﻿2 Dɔlɔ Sɛʋɛi.
22.
Zeluzalɛme nuiti ti yeeloni ná-doun zunu ɠaaɓelagi Aɠazia ʋa, ti sei ga masagi potogi zu, tɔɔzei Alaɓuiti ta-ɠɔɔɓɔgi niiti ti lɔɔni Zuda ɠɔɔlaaɠai zu, naati ti ná-doun zunu ɓakologiti pɛ paani. Ʋele ɠana Zuda masagi Yolame ná-doun zunui Aɠazia ná-masa fai lɔɔzeini la. 
Ná-konagi ɠɛni ga puufele maazu fele (22), siɛgi zu é zeini la ga masagi. Kona gila ka é kɛɛni masadai zu Zeluzalɛme. Dee laa ɠɛni ga Atali, Izilayɛle masagi Womeli ná-dounloin ta ɠɛni de. 
Dee é ɠɛni diizu faa ɲɔu ɠɛɛ vai ma, naa ná-tɛnɛ gooiti maaʋele ma. É ziɛ ʋele ɲɔuni ga Akaɓe ná-pɛlɛyeɠei ɠɛʋele, 
é Ɠɔoɠɔ GALAGI wanama vai ɠɛɛni, eɠɛʋelei nɔ pɛlɛyeɠei naa kɛɛni la, tɔɔzei kɛɛɠɛ zaa ʋoluma, naati ka ti ɠɛni ga ná-tɛnɛbo nuiti, ná-undaaʋiligi vaa zu. 
Naati ta-lɛnɛ gooiti maaʋele ma, ta Izilayɛle masagi Akaɓe ná-doun zunui Yolame ti liini ga kɔɔi Siili masagi Ɠazayɛle laalɔɠɔma, Lamɔte Galaade yooi zu. Siili nuiti ti masagi Yolame maawanani, 
naa ɠale ma Zizeleyɛle, ná-maawanaiti salezu nii Siili nuiti ti pɛɛni ba Lama, siɛgi zu ti lia la ga kɔɔi Siili masagi Ɠazayɛle laalɔɠɔma. Názu ɠa Aɠazia liini la pɛtɛsu, mazɔlɔɔ é ɠɛni zoolɛzu ga ʋe. 
GALA ge Aɠazia ná-daalimai naa zeɠeni, nii é liini bosu ga Yolame, é kɛ ga ná-undaaʋili saɓui, tɔɔzei é zeelini nɔ feya, ti ɠula ta Yolame, ti li Zewu laaɠomisu, Nimesi ná-doun zunui, nii Ɠɔoɠɔ GALAGI gulɔi ziɛni ma ga é Akaɓe ná-pɛlɛyeɠei zuwuɠaaleʋe. 
Zewu ɠɛni GALA ná-tukpɔi laalɛɛzu Akaɓe ná-pɛlɛyeɠei wu. É ɠulani Zuda lotuɠɔiti filiba, ta Aɠazia kɛɛɠɛlointi ti-lointi, ti ɠiliai ti-ɠɛɛ goi ná-botii ʋa, é ti ʋaa. 
Naa ʋoluma, é tɔɔzeini ga Aɠazia ɠaiziaa. Ti yeeʋɛɛni ma Samali taazuʋɛ, ʋɛ é lɔɔɠuni ná, ti lii la Zewu ʋɔ, naa paa. Kɛɛɠɛwola Zozafate ná-gaazu unfegi ma, ti maaɠuluni, tɔɔzei naa ɠilini Ɠɔoɠɔ GALAGI ʋa ga zii pɛ. Naa ɠɛai ma, nu nɔpɛ ge la mɔ ɠɛni Aɠazia ná-pɛlɛyeɠei wu, nii a zoo masadai ɠɛɛzu. 
Aɠazia dee Atali kaai ma ga ná-doun zunui zaa, é deveni ga é Zuda masagi mavofodaiti pɛ paa. 
Kɛlɛ Yolame ná-doun anzanui Yeɠoseba zooni é Aɠazia ná-doun zunui Zoase zeɠe dɔɔɠuzu masa dointi saama, niiti Atali ɠɛni ti ʋaazu, é li ga tiye ta anzanui nii é ɠɛni sosu, é ti lɛ nu ɲii ʋɛlɛi gila bu. Zalaɠa ɠula nui Yeɠoyada anzai Yeɠoseba ɠɛni ga masagi Yolame ná-doun anzanui ta, Aɠazia baazeelai ɠɛni de, tɔ ɠa é doungoi lɔɔɠuni Atali ʋa, naa ɠa é kɛɛni naa la paani. 
É kɛɛni dɔɔɠu ʋelei zu ga kona dɔzita anzanu felegɔi naati zea GALA sei ʋɛlɛi wu, naama ziɛgi zu Atali ɗa masadai ɠɛ zooi unda. 
