﻿2 Dɔlɔ Sɛʋɛi.
11.
Loɓoame zeelini nɔ feya Zeluzalɛme, é kɔɔɠɔ nu waaungila waaʋuulɔsaʋa (180.000) ɠaalɛɛni ba Zuda ta Ɓɛnzamɛn wolodamaiti saama, niiti ti zoogai gola, ga ti li, ti kɔɔi ʋɛɛ Izilayɛle nuiti ba, ti lɛkpɛma maazu ʋelei, nii a kɛ é zei naati unda ga maaɓaai. 
Kɛlɛ Ɠɔoɠɔ GALAGI ɓɔɛni GALA goo wo nui Semaya ʋɔ, é ɠɛ ma: 
«Ɓɔɛ Salomɔn ná-doun zunui Loɓoame ʋɔ, Zuda masagi, naa ʋɛɛ Zuda ta Ɓɛnzamɛn wolodamaiti su nuiti pɛ ba, è ɠɛ ti ma: 
‹Ɠɔoɠɔ GALAGI wooi ɠaa: À mina lɛ, wo ʋa vala wo-ɠɛɛlointi ba. Wo ɠilagilagi pɛ ge ɠale ma ná-pɛlɛi wu, mazɔlɔɔ nà ɠa niima vaiti seɠeai pɔ̀.› » Ti ɠoloni Ɠɔoɠɔ GALAGI wooi ʋɛ, ti ɠaleni ma. Ti la kɔ valani Zeloɓoame ʋa. 
Loɓoame zeini Zeluzalɛme, é botiiti kɛɛni Zuda laa wolaiti su, niiti siɠigiti ma, 
É siɠigi loni taa wolai niiti ma: Ɓɛteleyɛme, Etame, Tekoa 
Ɓɛte-Suul, Soko, Adulame, 
Gate, Malesa, Zife, 
Adolayime, Lakise, Azeka, 
Soleya, Ayalon, ta Eɓelɔn, zɛbɛsu laa wolaiti niiti ti Zuda ta Ɓɛnzamɛn. 
É ta ɓɔni naati ti-zɛbɛiti ba, é zou zɛʋɛ ɠundiɠiiti sei naati unda, naa ʋoluma mináti ka é ɠɛni ɠɔnɔgi, gulɔi ta dɔɔiti makɛsu ná. 
Taa wolai naati gilagilagiti pɛ su, kɔɔɠɔ zɛpɛgiti ti ɠɛni náti, naa ʋɛɛ kpɛɛinti ba. É zɛbɛ wola veeni taa wolai naati zea. É zeini Zuda ta Ɓɛnzamɛn unda. 
Zalaɠa ɠula nuiti ta Levi nuiti niiti ti vazaga ɠɛni de Izilayɛle yooi zu ná pɛ, naati ti latini ná-kakei ɠa, zooi zu ná pɛ. 
Levi nuiti ti ʋoluaveni ta-lii ɠɛɛzuʋɛti niiti ti ɠɛni ta-laaiti koba, ti ti-ɠɔligiti zɛ ná, ti li Zeluzalɛme ta Zuda yooi zu, tɔɔzei Zeloɓoame ta ná-doun zunuiti ti la ɠɛni vaazu bu ti ʋa ta-zalaɠa ɠula wotiiti kɛ Ɠɔoɠɔ GALAGI ʋɛ. 
Zeloɓoame tɔ ɓɔɠɔ ná-zalaɠa ɠula nuiti seini zalaɠa ɠula adaʋɛti faa ma, ʋɛti ti ɠɛni kɔɔɠɔ ganigiti kɔɔzu ná, niiti ti ga boli zinɛi ta nikɛ yiʋoi ʋaaɠulabai, niiti Zeloɓoame ti ɓɛtɛni. 
Levi nuiti kɔɠɔʋo ba, Izilayɛle wolodai ɠilagilagi pɛ su zɔiti é ɠɛ ti yiima ga ti ɠili Ɠɔoɠɔ GALAGI ʋa, Izilayɛle ná-GALAGI, naati ti ɠɛni ʋaazu Zeluzalɛme, ga ti zalaɠaiti kula Ɠɔoɠɔ GALAGI ʋɛ, ti-mɛmɛwolani ta-ƓALAGI. 
Tɔnɔ ma ɓɔbai ɠana ti kɛɛni, nii a kɛ Zuda masadai ɠɔɠɔ ɓikpi, ta ti zobo fe Loɓoame ʋɛ, Salomɔn ná-doun zunui. Ti kɛɛni naa zu ga kona saʋagɔ, tɔɔzei kona saʋagɔ laawu, ti ziɛni Davide ta Salomɔn ɠɔɠɔ ʋogi zu. 
Loɓoame Maɠalate zeɠeni ga anza, naa ɠɛni ga Yelimɔte ná-doun anzanui. Yelimɔte kɛɛɠɛ ɠɛni ga Davide. Maɠalate dee laaseigi ga Aɓiyayile, naa ɠɛni ga Eliyaɓe ná-doun anzanui, é ɠɛ ga Izayi ná-dounloin. 
Maɠalate doun zunuiti sɔlɔɔni Loɓoame ʋɛ: Yeyuse, Semalia ta Zaɠame. 
Suɠoozaai ma, é Aɓisalɔme ná-doun anzanui Maaka vuluni ɓalaa, ti dointi sɔlɔɔ ta naa: Aɓiya, Atayi, Ziza ta Selomite. 
Loɓoame Aɓisalɔme ná-doun anzanui Maaka nɛɛni ʋɛ, é leʋe anzai zɔiti ba é ti vuluni, ta niiti é la ɠɛni ti vuluni ga zɔiti kɛʋele. Anzai niiti é ti vuluni, naati ti ɠɛni ga nu puugɔ maazu lɔsaʋa (18), zɔiti é la ɠɛni ti vuluni, naati ti ɠɛ ga nu ʋuulɔzita (60), naati pɛ ti ɓɔsu, ti zunu loun ʋuufelegɔ maazu lɔsaʋa (28) ta anzanu loun ʋuulɔzita (60) zɔlɔɔ bɛ. 
Loɓoame doun mɔun tosuʋɛ veeni Maaka ná-doun zunui Aɓiya ʋɛ, é sei kɛɛɠɛlointi unda, tɔɔzei é ɠɛni pɔ ga é naa ɠɛ ga masagi ʋotogi zu. 
É kɛɛni ga keleɠele, é ná-doun zunui zɔiti gaaɠwɛ Zuda ta Ɓɛnzamɛn laa wolaiti pɛ su, niiti siɠigi ti ma, é ɠɔnɔgi ve ti ya ga pooʋama, é anza mɔinmɔin fulu ti ʋɛ. 
