﻿1 Dɔlɔ Sɛʋɛi.
27.
Izilayɛle ʋɛlɛyeɠe lotuɠɔiti daaseigiti pɛtɛ, niiti ti zeɠeni ga salaʋusu ɠundiɠiiti, nu waagilagilagiti ta nu ungilagilagiti unda, ta faaɠaaɠulaba nuiti niiti ti ɠɛni ɓɔsu masagi ʋa salaʋusu ɠɔɔɓɔgiti faa zu, niiti ti ɠɛni ʋaazu alu-o-alu, ti ɗa ta-wotii ɠɛ. Nu waaʋuufele maazu naanigɔ (24.000) ɠa é ɠɛni kɔɔɓɔgi ɠilagilagi pɛ su. 
Kɔɔɓɔ mɔungi nii alu mɔungi veeni zea, nu waaʋuufele maazu naanigɔ (24.000) ɠa é ɠɛni su. Zɔi é ɠɛni unda, naa ɠɛni ga Zaɓidiyɛle ná-doun zunui Yasoɓeyame. 
É ɠɛni ga Pelɛze mavofodai ta, tɔ ɠa alu mɔungi zu é ɠɛni kɔɔʋɛbɛi ma ɠundiɠiiti pɛ devezu. 
Kɔɔɓɔgi velesiɛi nii alugi velesiɛi ɠɛni zea, naati ɓalaa ti ɠɛni ga waaʋuufele maazu naanigɔ (24.000), Aɠoa nui Dodayi ɠa é ɠɛni naa unda, ná-seikobai ɠɛni ga Mikelɔte. 
Alugi zaʋasiɛi ma ɠɔɔɓɔgi ma lotuɠɔi ɠɛni ga zalaɠa ɠula ɠundiɠi wolai Yeɠoyada ná-doun zunui Ɓenaya, tiya ɓalaa ti ɠɛni ga nu waaʋuufele maazu naanigɔ (24.000). 
Ɓenaya naa ɠɛni kɔɔɠuluɓa ʋuusaʋagɔiti (30) unda, é ná-doun zunui Amizaɓade zeini ná-kɔɔɓɔgi naa unda. 
Kɔɔɠuluɓai naanisiɛi nii alugi naanisiɛi ɠɛni zea, naa ɠɛni ga Azayɛle, Zoaɓe kɛɛɠɛloin, ti yɛ liizu la, ná-doun zunui Zeɓadia ʋilɛ potogi zu, tiya ɓalaa ti ɠɛni ga nu waaʋuufele maazu naanigɔ (24.000). 
Alugi lɔɔlusiɛi nɔnɔi ɠɛni ga Yizala ná-pɛlɛyeɠei wu nui Samewute. Nu waaʋuufele maazu naanigɔ (24.000) ɠa é ɠɛni ná-kɔɔɓɔgi zu. 
Alugi lɔzitasiɛi nɔnɔi ɠɛni ga Ikese ná-doun zunui Ila, Tekoa nu ɠɛni de. Nu waaʋuufele maazu naanigɔ (24.000) ɠa é ɠɛni ná-kɔɔɓɔgi zu. 
Alugi lɔfelasiɛi nɔnɔi ɠɛni ga Efelayime mavofodai Ɠelɛse, Palon nu ɠɛni de. Nu waaʋuufele maazu naanigɔ (24.000) ɠa é ɠɛni ná-kɔɔɓɔgi zu. 
Alugi lɔsaʋasiɛi nɔnɔi ɠɛni ga Ɠusa nui Siɓekayi, Zela ná-pɛlɛyeɠei wu nu ɠɛni de. Nu waaʋuufele maazu naanigɔ (24.000) ɠa é ɠɛni ná-kɔɔɓɔgi zu. 
Alugi laaʋuusiɛi nɔnɔi ɠɛni ga Anatɔte nui Aɓiyezɛɛl, Ɓɛnzamɛn mavofodai ta ɠɛni de. Nu waaʋuufele maazu naanigɔ (24.000) ɠa é ɠɛni ná-kɔɔɓɔgi zu. 
Alugi ʋuusiɛi nɔnɔi ɠɛni ga Netofa nui Maɠalayi, Zela ná-pɛlɛyeɠei wu nu ɠɛni de. Nu waaʋuufele maazu naanigɔ (24.000) ɠa é ɠɛni ná-kɔɔɓɔgi zu. 
Alugi puugɔ maazu ɠilasiɛi (11) nɔnɔi ɠɛni ga Pilaton nui Ɓenaya, Efelayime mavofodai ta ɠɛni de. Nu waaʋuufele maazu naanigɔ (24.000) ɠa é ɠɛni ná-kɔɔɓɔgi zu. 
Alugi puugɔ maazu velesiɛi (12) nɔnɔi ɠɛni ga Netofa nui Ɠɛledayi, Woteniyɛle mavofodai ta ɠɛni de. Nu waaʋuufele maazu naanigɔ (24.000) ɠa é ɠɛni ná-kɔɔɓɔgi zu. 
Wɛlɛ totuɠɔi niiti ti-laaseigi ʋɛɛ, naati ka ti ɠɛni bolodaiti unda Izilayɛle yooi zu. Luɓɛn ná-bolodai: Zikili ná-doun zunui Eliyezɛɛl. Simiyɔn ná-bolodai: Maaka ná-doun zunui Sefatia. 
Levi ná-bolodai: Kemuwɛle ná-doun zunui Ɠasaɓiya, Aalɔn mavofodaiti tɔnɔi ɠɛni ga: Sadɔke. 
Zuda ná-bolodai: Eliyu, Davide kɛɛɠɛloin ta ɠɛni de. Isakaal ná-bolodai: Mikayɛle ná-doun zunui Womeli. 
Zaɓulɔn ná-bolodai: Aɓediyase ná-doun zunui Yisemaya. Nɛfɛtali ná-bolodai: Azaliyɛle ná-doun zunui Yelimɔte. 
Efelayime ná-bolodai: Azazia ná-doun zunui Wozé. Manasé ná-bolodai ɠilazuʋɛ: Pedaya ná-doun zunui Zowɛle. 
Manasé ná-bolodai ɠilazuʋɛ, é ɠɛni zeini Galaade: Zakali ná-doun zunui Yido. Ɓɛnzamɛn ná-bolodai: Aɓenɛɛl ná-doun zunui Yasiyɛle. 
Dan ná-bolodai: Yeloɠame ná-doun zunui Azalɛle. Niima nuiti ka ti ɠɛni ga Izilayɛle wolodaiti ma lotuɠɔiti. 
Davide la ɠɛni kɛɛni, ti ʋa zunu loungoiti daaseigiti sɛʋɛ, niiti ta-ɠonagi ɠɛni ga puufelegɔ (20), é yei bu, tɔɔzei Ɠɔoɠɔ GALAGI minazeɠeni ga toɠa Izilayɛle nuiti gaawɔɔlɔ, ti mɔin eɠɛ somideɠaiti ti geeɠɔlɔgi ɠa. 
Seluya ná-doun zunu Zoaɓe daasei sɛʋɛi lɔɔzeini, kɛlɛ é la ɠɛni gaaɓelani, tɔɔzei Ɠɔoɠɔ GALAGI yiiɠaawanani Izilayɛle ma naama laasei sɛʋɛi vaa zu. Naa ɠa é kɛɛni, naama laasei sɛʋɛi é ɠɛɛni, ma ɠaalugiti ti la ʋilɛni Davide ɠɛɛ vaiti ma zɛʋɛiti su. 
Adiyɛle ná-doun zunui Azamavɛte ɠa é ɠɛni masagi ná-naavolo makɛ vai unda. Niiti ti ti ɠaalɛɛni ba ɓalaɠaiti su, taa wolaiti ta taa goiti su, ta siɠi gaaɠoozagiti su, nui nii é ɠɛni naati unda, naa ɠɛni ga Woziase ná-doun zunui, Zonatan. 
Zɔi ma é ɠɛni kpalaga lii ɠɛ nuiti unda, naa ɠɛni ga Keluɓe ná-doun zunui Ezili. 
Zɔi é ɠɛni leezɛn ɓele wotiɠɛ nuiti unda, naa ɠɛni ga Simeyi, Lama nu ɠɛni de. Nii é ɠɛni dɔɔ makɛ vai unda kpeleiti su, naa ɠɛni ga Sefame nui Zaɓidi. 
Ziɛlaʋɛ ma nɛmɛi zu, zɔi é ɠɛni wolive ɓelei ta sikɔmɔɔl kpeleiti unda, naa ɠɛni ga Ɓaale-Ɠanan, Gedɛɛl nu ɠɛni de. Nui nii é ɠɛni gulɔiti makɛsu, naa ɠɛni ga Yoase. 
Togani ɓulugi niiti ta-laamii wosuʋɛ ɠɛni ga Salon nɛmɛi zu, nui nii é ɠɛni naati unda, naa ɠɛni ga Sitilayi, Salon nu ɠɛni de. Togani ɓulugi nii ma é ɠɛni pɛtugiti su, Adalayi ná-doun zunui Safate ɠa é ɠɛni naati unda. 
Zɔi é ɠɛni ɲɔmɛiti unda, naa ɠɛni ga Woɓile, Isemayɛle nu ɠɛni ga naa. Nii é ɠɛni soovale saaiti unda, naa ɠɛni ga Melonɔte nui Yedeya. 
Zɔi é ɠɛni baala kpulugiti ta boli ɓulugiti unda, naa ɠɛni ga Ɠagaal nui Yazize. Niima nuiti kpein ka ti ɠɛni Davide ɠɔligiti unda. 
Davide kɛkɛi Zonatan ɠɛni ga ná-tɛnɛbo nui, é ɠɛni ga faaɠwɛ nu wola, é ɠɛni ga sɛʋɛ ɠɛ nui. Tɔ ʋe, Ɠakamoni ná-doun zunui Yeɠiyɛle ʋe, tiya ɠa ti ɠɛni masagi ná-dointi kalasu. 
Ayitofɛle ɠɛni ga masagi ná-tɛnɛbo nui. Aaleke nui Ɠusayi ɠa é ɠɛni ga masagi ná-dɔɔɠuzu vaa makɛ nui. 
Ayitofɛle zeɠeai ma ná, Ɓenaya ná-doun zunui Yeɠoyada ʋilɛni potogi zu, ta Aɓiataal. Zoaɓe ɠa é ɠɛni ga kɔɔɠuluɓa wolai masagi ná-kɔɔʋɛbɛiti unda. 
