﻿1 Dɔlɔ Sɛʋɛi.
22.
Davide ɠɛni ma: «Ʋɛ ɠa Ɠɔoɠɔ GALAGI zei ʋɛlɛi losu ná, ʋɛ ɠa ná ɠɛɛzu ga Izilayɛle ná-gala zalaɠaiti kulazuʋɛ.» 
É devei veeni ga ti wɛɛinti pɛ gaalɛ ba, niiti ti ɠɛni zeini Izilayɛle yooi zu, é naati kakala laani ga ti kɔtui ɠula, ti saɠa GALA sei ʋɛlɛi lo fai zu. 
Davide kɔlu mɔinmɔin kɛʋele ɓɛtɛni ɓalaa kpogiti kpadɔ vai zu, ta kalagiti, é kɔlu ɓɔigi ma mɔinmɔin gaalɛɛni ba ɓalaa, nii nu la ɓena zoo gaalusu, 
naa ʋɛɛ sɛdele gulu mɔinmɔingi ʋa, nii Sidɔn nuiti ta Tiil nuiti ti ɠɛni feezu. 
É ɠisiɛni, é ɠɛ ma: «Dòun zunui Salomɔn ɠa ga zunu loungo, nii é la dɛ faa mɔinmɔin kwɛɛ. Ɠɔoɠɔ GALAGI zei ʋɛlɛi niima maanɛai ga é lo, kɛni tɔɠɔi ɠula zooi pɛ su, tɔɔzei bɔɔlɔ ʋelei ʋa, ta gola ʋa pelei ʋa. Naa ɠa é ba, nà kɛʋele ɓɛtɛi lɔɔzeizu bɛ.» Ʋele ɠana Davide pɛlɛ lo sɔɔlai ma mɔinmɔin gaalɛɛni la ba, é ʋa ʋɛ zaazu. 
Naa ʋoluma é ná-doin Salomɔn lolini, é devei ve naa ya ga naa GALA sei ʋɛlɛi lo Ɠɔoɠɔ GALAGI ʋɛ, Izilayɛle ná-GALAGI. 
É ɠɛni naa ma: «Dòun zunu, wɔin ɠɛa mà ga nà ɓɔɠɔi gè GALA sei ʋɛlɛi lo nà-GALAGI, Ɠɔoɠɔ GALAGI ʋɛ dɛbi vai ma. 
Kɛlɛ Ɠɔoɠɔ GALAGI ɓɔɛni pɔ̀, é ɠɛ mà: ‹È ɲamai wola ʋuuʋɛ, è kɔɔ wolaiti kɔɔʋɛ. Ɲama mɔinmɔingi nii è pua gàazu zooi ma naa maaʋele ma, ɗa laade è ʋa ɠɛ pɛlɛi losu bɛ̀ dɛ̀bi vai ma. 
Kɛlɛ doun zunu ɠa zɔlɔɔsu è ʋɛ, nii é ʋaazu ɠɛɛzu ga ziilɛi nu. Nà ziilɛigi ɠɛʋele ɓɛtɛ ti yɔɠɔzu ta sili nuiti pɛ, niiti ti maaɠoolii zu. Daaseigi ɠa ɠɛɛzu ga Salomɔn (nii poluʋɛ ga «ziilɛi nui»). Sii ma voloi pɛ su, nà ziilɛigi ta dooɠogi ve Izilayɛle ʋɛ. 
Tɔ ɠa é ʋaazu pɛlɛi losu bɛ̀, toɠa ɠɛ bɛ̀ ga dòun zunui, gè ɠɛ bɛ ga kɛɛɠɛ. Nà ná-masadai makɛ kpaan Izilayɛle unda, é la ɲiikpiga pɛ.› » 
Davide ɠɛni ma ʋolu: «Dòun zunu, Ɠɔoɠɔ GALAGI yɛ è ʋa, nii a kɛ è zoo è GALA sei ʋɛlɛi lo ɗa-ƓALAGI ʋɛ, nii é ga Ɠɔoɠɔ GALAGI, eɠɛʋelei tɔ ɓɔɠɔi é bogai la é ʋilɛ è ʋa. 
Ee, Ɠɔoɠɔ GALAGI soma kae siɛgi zu é è zeizu la Izilayɛle unda, é ɠimalai ta keleɠelegi ve è ʋɛ, nii a kɛ è ɠolo ná-tɔgi ʋɛ, tɛigi é ga ɗa-ƓALAGI. 
Ɗa ʋaazu liizu luɠɔ, ni ɗa ɠaaɓaana kele è ɠolo Ɠɔoɠɔ GALA ná-deveiti ta ná-tɔgiti bɛ, niiti é ti veeni Moize ya Izilayɛle ʋɛ. Yiilɔɔ, è zɛbɛzeɠe, mina lua, è zasu mina ɓali pa. 
Wɛlɛ, Ɠɔoɠɔ GALAGI zei ʋɛlɛi lo fai zu, gè ɠaaɓaaʋɛ kele gè kilo miliyɔn saʋagɔ (3.000.000) ɠaalɛ ba zanugi zu, naa ʋɛɛ kilo miliyɔn ʋuusaʋagɔ (30.000.000) ʋa walii zu, ta kɔlu ɓɔigi, naa ʋɛɛ kɔlu ɠitei ʋa, niiti nu la zooga ti ɠaalusu. Gè gului ta kɔtui ɓalaa kɛʋele ɓɛtɛʋɛ, ɗa ta ɓɔ niina naati ba ʋolu. 
Ɲɛɛliɠi ɠɛ nu mɔinmɔin ka è ɠoba, kɔtu zaɠa nuiti, gului ta kɔtui maaʋɔnɛ nuiti, ta kala nu wolaiti botii pɛ su. 
Zanugi, walii, kɔlu ɓɔigi, kɔlu ɠitei, naati ta è ya gaalu ge la ba. Tɔ ɠa é ba botii lɔɔzeina, Ɠɔoɠɔ GALAGI yɛ è ʋa kae!» 
Naa ʋoluma Davide boni Izilayɛle lotuɠɔiti pɛ ma ga ti yeeve ná-doun zunui Salomɔn ʋɛ. 
É ɠɛni ti ma: «Wa-ƓALAGI, Ɠɔoɠɔ GALAGI ɠa wo ʋa. É dooɠogi vea wo ya wa-you ɠwɛmaʋɛti pɛ, mazɔlɔɔ é zooi zu nuɓusɛ wɔlɔmaiti dɔa nà-zobogi wu. Pɛtɛ naati ta niina Ɠɔoɠɔ GALAGI ta ná-nuɓusɛiti ta-zobogi wu. 
Naa ɠa é ba, à ɠili Ɠɔoɠɔ GALAGI ʋa ga wo-yii pɛ ta wo-yɛnvui pɛ. À botii lɔɔzeina, wo Ɠɔoɠɔ GALAGI zeizu ɲadegai lo, nii a kɛ wo ʋa ga Ɠɔoɠɔ GALAGI ná-minazeɠe kesui ta ani niiti kpein ti veai Ɠɔoɠɔ GALAGI ʋɛ, wo ti la pɛlɛi naa wu, nii togai Ɠɔoɠɔ GALAGI ʋɛ.» 
