﻿1 Dɔlɔ Sɛʋɛi.
16.
Ti ʋaani ga GALA ná-minazeɠe kesui, ti da seɠe ɠotai wu, nii Davide toni bɛ. Ti gala zalaɠaiti ta ziilɛi zalaɠaiti kulani GALA bɛ. 
Davide ɓegai ma ga zalaɠai naati kula, é tuya looni nuɓusɛiti bɛ Ɠɔoɠɔ GALAGI laaseigi zu. 
É zɛba é daamianigi ɠaaɠwɛ Izilayɛle nuiti pɛ ba, zunuiti ta anzanuiti, ɛsɛ gilagilagi ɓulu ɠilagila sɔlɔɔni, ta sua mɔgai, é ʋɛɛ leezɛn vɔɔi ma ɓuun gilagila ba. 
É Levi nui tanigaa zeɠeni, naati ta-wotii ɠɛni ga ti yɛ Ɠɔoɠɔ GALAGI ná-minazeɠe kesui ɠoba, ti ɗa wooɠula Ɠɔoɠɔ GALAGI ma, Izilayɛle ná-GALAGI, ti ɗa guyeiti too bɛ, ti ɗa maamusɛ. 
Naama nuiti ti ɠɛni ga: Azafe naa ɠa é ɠɛni ga ta-ɠundiɠii, ná-seikobai ɠɛ ga Zakali, naa ʋolu geleiti ti ɠɛ ga Yeiyɛle, Semilamɔte, Yeɠiyɛle, Matitia, Eliyaɓe, Ɓenaya, Woɓɛde-Edɔme ta Yeiyɛle. Gɛingɛin ganiiti ti ɠɛni ti ya: papaiti ta kɔnigiti. Azafe ɠɛni kɔtɛgiti gɛinsu. 
Zalaɠa ɠula nu felegɔiti, Ɓenaya ta Yaɠaziyɛle, naati ti ɠɛni puʋugi vɛɛzu siɛgi pɛ su Ɠɔoɠɔ GALAGI ná-minazeɠe kesui ɠakalaʋɛ. 
Ma mɔun ge ɠɛni ga naa, ga Davide yeelo Azafe ta ná-pɛlɛyeɠei wu nuiti ba, ga ti ɗa maamusɛ wuyei loo Ɠɔoɠɔ GALAGI ʋɛ. 
À Ɠɔoɠɔ GALAGI maamusɛ, wo wooɠula, wo dɛɛ ga toɠa ga GALA, wo kɛɛ vaa wolaiti dɛɛ ziiti saama! 
À guyei loo tɔun bɛ, wo maamusɛ ga gɛingɛin ganigiti! À kɛɛwoti maayikiaiti kpein dɛɛ! 
À ɓɔɠɔ maamusɛ ga GALA daasei ɲadegai! Niiti ti Ɠɔoɠɔ GALAGI ɠaiziɛzu, naati ti ɠoozunɛ. 
À Ɠɔoɠɔ GALAGI ɠaiziɛ ta ná-zɛbɛi, wɔin ɠɛ wo ma ga wo ɠɛ gaazu yeenɔpɛ. 
À ɠizɛ kɛɛwoti maayikiaiti su, é ti ɠɛɛni, maaɓɛlɛ vaiti, ta ná-tukpɔɠaaleʋeiti, 
wɔiti wo ga ná-botiɠɛ nui Izilayɛle mavofodaiti, wɔi wo ga Zakɔɓe ná-dointi, wɔi é yiimazeɠeai ga woye! 
Ada-ƓALAGI ɠa ga Ɠɔoɠɔ GALAGI, toɠa deve eteai pɛ ma. 
À ɠizɛ ná-minazeɠegi zu yeenɔpɛ, wooi nii é fea yamani waagila (1.000) su nuɓusɛiti zea, 
minazeɠegi é boni Abalaame ʋɛ, ta ná-kona wooi ɠɛ de Izaake ʋɛ. 
É kɛ ga devei Zakɔɓe ʋɛ, é ɠɛ ga ɠɔoɠɔ minazeɠegi Izilayɛle ʋɛ. 
É ɠɛni ma: «Nà Kanaan yooi veezu è ʋɛ, toɠa ɠɛ ga wɔnɔi wo sɔlɔɔsu.» 
Wo lɔini gola, wo goa nɔ ɠɛni de, wo ga wɛɛinti wo seikɔɠɔmai zu ná, 
ti ɠɛni leʋeteʋesu, ziiti pɔ bɛti, ta masadaiti pɔ bɛti. 
Kɛlɛ GALA ge la ɠɛni ti yɛni na, nu nɔpɛ ge ʋa ti maanɔɠɔ, ti makɛ vai ɠa é masagiti doɠani la. 
É ɠɛni ti ma: «À mina naati sopele ɲɔu, niiti gè yiimazeɠeai ga tiye, à mina faa ɲɔu ɠɛ ga dàawoo laazeeli nuiti.» 
Eteai zu nuɓusɛiti kpein, à guyei loo Ɠɔoɠɔ GALAGI ʋɛ! Folo-o-folo, à ná-kizo fai ma woo niinɛ ʋagɔi laazeeli! 
À ná-lɛbiyai ɠula kɛlɛma ziiti saama, ta kɛɛwoti maayikiaiti nuɓusɛiti saama! 
Mazɔlɔɔ Ɠɔoɠɔ GALAGI wɔɔlɔʋɛ, tɔ ɠa maamusɛi kpein soloogai ma, maayikiʋɛ é leʋe gala kiligiti ba. 
Mazɔlɔɔ nuɓusɛiti ta-ɠalagiti pɛ ta ga zɛɛ ɠalagiti, kɛlɛ Ɠɔoɠɔ GALAGI ɠa é geeɠɔlɔgi ɓɛtɛni. 
Toɠa volozu ná-bɔɔlɔi ta ná-maayikii zu, zobogi ta koozunɛɛi ta seizu ɲadegai. 
Nuɓusɛiti kpein zooi ɠa, à Ɠɔoɠɔ GALAGI maamusɛ, wo ná-lɛbiyai ta ná-zɛbɛi ɠula kɛlɛma. 
À lɛbiyai ve Ɠɔoɠɔ GALAGI laasei golai ʋɛ! À ʋa ga vebɛaniiti, wo lo kakalaʋɛ! À ʋilɛ ɲiibiɠa, wo nɔkɔ Ɠɔoɠɔ GALAGI wu, ná-ɲadedai ma voloi zu. 
Eteai zu nuɓusɛiti kpein, à ɓali gaazu. Eteai ɠa loni kpaan, é la ɲiikpiga. 
Geeɠɔlɔgiti ti ɠoozunɛ, eteai ɠɛ koozunɛ wolai zu, Ti dɛɛ ga zii ɠiligiti pɛ ga Ɠɔoɠɔ GALAGI ɠa masadai ɠɛɛzu. 
Kpoloɗɛi zikɔ, ta bu aniiti kpein. Dɔɓɔi ɠoozunɛ, ta su aniiti kpein. 
Dɔɓɔzu wuluiti kpein ti wooɠula ga koozunɛɛi Ɠɔoɠɔ GALAGI ɠaazu. Mazɔlɔɔ toɠa ʋaazu é eteai lukpɔɠaaleʋe. 
À Ɠɔoɠɔ GALAGI maamusɛ, mazɔlɔɔ pagɛ, mazɔlɔɔ ná-wooɠɛɠiladai ɠa yɛsu ná ɠɔ! 
À ɠɛ ma: «Ee, GALAGI, gi Ɠizo Nui, gi ɠizo! Gi ɠaalɛ ba, è gi ɠula zii ɠiligiti saama, naa ɠa a kɛ gi è maamusɛ, ɗɛigi è ɲadegai, gá-ɠoozunɛɛi ɠɛ ga gi ɗa è lɛbi! 
Mamagi ɠa Ɠɔoɠɔ GALAGI ʋɛ, Izilayɛle ná-GALAGI, ɠɔoɠɔ ta ɠɔoɠɔ!» Nuɓusɛiti kpein ti ɠɛni ma: «Amina!» Ti Ɠɔoɠɔ GALAGI maamusɛni. 
Davide Azafe ta kɛɛɠɛlointi zɛni Ɠɔoɠɔ GALAGI ná-minazeɠe kesui ɠoba, ti ɗa ta-wotii ɠɛ miná yeenɔpɛ, eɠɛʋelei deveai la folo ɠilagilagi vaa ma. 
Siɠida makɛ nuiti é yeeloni ti ʋa, naati ti ɠɛni ga niiti: Yedutun ná-doun zunui Woɓɛde-Edɔme, naa ʋɛɛ Woza ʋa, ta ti-ɠɛɛlointi nu ʋuulɔzita maazu lɔsaʋa (68). 
É devei veeni zalaɠa ɠula nui Sadɔke ya ta zalaɠa ɠula nui zɔiti, ga ti ɗa ta-wotii ɠɛ Ɠɔoɠɔ GALAGI ná-seɠe ʋɛlɛ ɲadegai ɠakalaʋɛ, nii é zalaɠa ɠula adaʋɛ ma Gaɓaɠɔn, 
nii a kɛ ti ɗa gala zalaɠai ɠula folo ʋɛɛ kpɔkɔ ʋa Ɠɔoɠɔ GALAGI ʋɛ zalaɠa ɠulazuʋɛ maazu, eɠɛʋelei sɛʋɛai la Ɠɔoɠɔ GALAGI ná-tɔgi zu, nii é feeni Izilayɛle ya. 
Zɔiti ti ɠɛni ti ɠoba, naati ti ɠɛni ga niiti: Ɠeman ta Yedutun, naa ʋɛɛ zɔiti ba, niiti ziimazeɠegi woni ga tiye, ti yeelo ti ʋa ga ti ɗa Ɠɔoɠɔ GALAGI maamusɛ, mazɔlɔɔ ná-wooɠɛɠiladai ɠa yɛsu ná ɠɔ. 
Ɠeman ta Yedutun tɔnɔ ma wotii ɠɛni ga ti ɗa puʋugi vɛ, naa ʋɛɛ kɔtɛgi ɠɛin fai ʋa, ta gɛingɛin gani zɔiti niiti ti maanɛɛni ga ti ɗa ɠɛ guyei wu GALA dɛbi vai ma. Yedutun ná-doun zunuiti ta wotii ɠɛni ga ti ɗa wɛlɛ siɠidaʋɛti ma. 
Naa ʋoluma, nuɓusɛiti pɛ ti ɠaleni ma ta-ɠoizuʋɛti. Davide ɓalaa ge ɠaleni ma ná-koizu ga é tuya loo ná-pɛlɛyeɠei ʋɛ. 
