﻿1 Dɔlɔ Sɛʋɛi.
13.
Davide salaʋusu ɠundiɠiiti pɛ gaalɛɛni ba, niiti ti ɠɛni nu waagilagilagiti ta nu ungilagilagiti unda, naa ʋɛɛ seizumaanɛgi zɔiti ba. 
Naa ʋoluma, é ɓɔɛni Izilayɛle ʋɛbɛi pɛ pɔ, é ɠɛ ti ma: «Ni wa kaana ga faa ʋagɔ ʋe, ni toɠa ɓalaa ada-ƓALAGI, Ɠɔoɠɔ GALAGI ná-faazeikpasui zu, ade keelaiti teʋena ade-ɠɛɛlointi pɛ ma, niiti ti yɛgai ʋoluzu Izilayɛle you zɛʋɛi ɠilagilagiti pɛ su, naa ʋɛɛ zalaɠa ɠula nuiti ta Levi mavofodaiti ba ti ta-laaiti su ta ná ɠoba yooi zu, nii a kɛ ti pɛ ti ɠaalɛ ba ade zaama. 
Naa ʋoluma, ada ʋa niina ga ada-ƓALAGI ná-minazeɠe kesui ade ɠoba. Tɔɔzei siɛgi zu Sayile ɠɛa la masadai zu ade unda, ade la yiizoolɛni ga ade ʋa li kalama.» 
Bɛbɛi pɛ ge zolooni naama ɠigi ma, ti deveni ga ti naa ɠɛ. 
Davide Izilayɛle nuiti pɛ gaalɛɛni ba, é zo Ezipete ɠɔtuɗɛi ma, é zeeli Leɓo-Ɠamate, nii a kɛ ti GALA ná-minazeɠe kesui zeɠe Kiliyate-Yeyalime, ti ʋaa la Zeluzalɛme. 
Davide ta Izilayɛle nuiti pɛ ti liini Ɓaala, nii é Kiliyate-Yeyalime, Zuda yooi zu, ga ti ʋa ga GALA ná-minazeɠe kesui, nii Ɠɔoɠɔ GALAGI laaseigi maalolisu ma, nii é zeini seeluɓɛinti unda. 
Ti GALA ná-minazeɠe kesui ɠulani Aɓinadaɓe ná-pɛlɛi wu, ti da wotolo niinɛi zu. Uza ta Ayiyo ɠa ti ɠɛni ziɛzu wotoloi luɠɔ. 
Davide ta Izilayɛle nuiti pɛ ti ɠɛni ɠoozunɛɛzu GALA gaazu, ti ɗa guyeiti too ga zɛbɛi pɛ, ti ɗa gɛingɛin ganigiti gɛin: kɔnigiti, papaiti, tamadegiti, kɔtɛgiti, ta puʋugiti. 
Ti zeeliai ma Kidon ná-molo loɠazuʋɛ, nikɛiti ti ɓunɛni, ti ɠɛni ɠɛɛzu ti minazeɠe kesui loo. Uza yeemaaleni, é so. 
Ɠɔoɠɔ GALAGI yiiɠaawanani Uza ma, é doɠa, tɔɔzei é yeevɔɔɠuni minazeɠe kesui ʋa. Uza zaani miná, Ɠɔoɠɔ GALAGI ɠaazu. 
Davide yiiɠaawanani, mazɔlɔɔ Ɠɔoɠɔ GALAGI nii ɠɛɠala loɠai woni ga Uza. Ná laasei ge ʋɛɛni ga Pelɛze-Uza (nii poluʋɛ ga «é ɠulaʋɛ Uza ma»), naama laaseigi ɠa dɛ é ba zaaɠaza. 
Naama voloi Davide wola luani GALA ba, é ɗa ɓɔɠɔ ɠaazaɠa ga: «Nà zoo ɠale gè lɛ ga GALA ná-minazeɠe kesui pɔ̀ bɛ?» 
Davide la ɠɛni liini ga minazeɠe kesui pɔ bɛ, Davide ná-taa wolai zu. Ti liini la Gate nui Woɓɛde-Edɔme ná-pɛlɛi wu. 
GALA ná-minazeɠe kesui yɛni ná alu saʋagɔ laawu. Ɠɔoɠɔ GALAGI tuya looni Woɓɛde-Edɔme ʋɛ ta nɔnɔiti pɛ. 
