﻿1 Dɔlɔ Sɛʋɛi.
11.
Izilayɛle nuiti pɛ ti ʋaani Davide ʋɔ bɛ Eɓelɔn, ti ɠɛ ma: «Ada ga zii ɠila, ta ɲama ɠila. 
Kaite Sayile ná-masadai ma ziɛgi zu, ɗa ɠa è ɠɛni losu Izilayɛle ná-kɔɔiti tuɠɔ. Tama ɗa-ƓALAGI, Ɠɔoɠɔ GALAGI minazeɠeni è ʋɛ, é ɠɛ ma: ‹Ɗa ɠa è ɠɛɛzu ga nà-nuɓusɛi Izilayɛle maaɓɛɛ nui, è ɠɛ ga ná-totuɠɔi.› » 
Izilayɛle ɠɛwolaiti pɛ ti ʋaani masagi Davide ʋɔ bɛ Eɓelɔn. Miná ɠa ti minazeɠe kɛɛni ná yɔɠɔzu, Ɠɔoɠɔ GALAGI ɠaazu. Ti gulɔi ziɛni ma, kɛɛ vai zu ga Izilayɛle pɛ ma masagi, é zoloo naa ma, nii Ɠɔoɠɔ GALAGI boni, é ɠula Samiyɛle la. 
Davide ta Izilayɛle nuiti pɛ ti liini Zeluzalɛme laalɔɠɔma, ʋɛ ná laaseigi ga Yeɓuse, naa ɠa Yeɓuse nuiti ti ɠɛni zeini ná, zooi naa zu zei wo nuiti. 
Naati ti ɠɛni Davide ma: «È la lɛa taai nii zu pɛ!» Kɛlɛ Davide Siyɔn zoni, taai nii makɛgai ga siɠi gaaɠoozagiti, ti ná laasei pɛɛ ga: «Davide ná-taa wolai». 
Davide ɠɛni ná-nuiti ma: «Zɔi nɔpɛ a ɠɛ ga nu mɔungi, é vɔni Yeɓuse nuiti ma, nà kɛ ga kɔɔʋɛbɛi ma lotuɠɔi.» Seluya ná-doun zunui Zoaɓe ese ka é lɛɛni ti laalɔɠɔma, tama, é ɠɛ ga kɔɔʋɛbɛi ma lotuɠɔi. 
Davide zeini taazuʋɛ, naa ɠa é kɛa ti ná laaseigi ʋɛɛni la ga: «Davide ná-taa wolai». 
É ta ɓɔni taai zɛbɛi ʋa ga pɛlɛiti ta siɠigiti, niiti é ti loni pɛtugi maaɠoolii zu nii é daaveni, daa ga Milo. Naama ziɛgi zu, Zoaɓe ɗa taai mɔtai niinɛ. 
Davide zɛbɛi ɠɛni liizu ga wɔɔlɔa, tama Ɠɔoɠɔ GALAGI, Fai-Pɛ-Maliɠii ɠɛni ba. 
Davide ná-kɔɔɠuluɓaiti daaseigiti pɛtɛ, niiti ta Izilayɛle nuiti pɛ ti yeezeini bu ga zɛbɛi, yeeɠɛɠalai pɛ su é kɛɛni masadai zu, é zoloo naa ma nii Ɠɔoɠɔ GALAGI boni é ʋilɛ Izilayɛle ʋa. 
Wɛlɛ Davide ná-kɔɔɠuluɓa wolaiti daaseigiti ba: Ɠakamoni mavofodai Yasoɓeyame, é ɠɛni ga kɔɔɠuluɓaiti ta-lotuɠɔi. Tɔ ɠa é nu unsaʋagɔ (300) ʋaani ga ná-kpɛɛin, é ti pɛ paa ʋɔɔma kɔɔɠɔ laa ɠila su. 
Tɔun polumai ɠɛni ga Dodo ná-doun zunui Eleazaal, Aɠoa nui. É ɠɛni kɔɔɠuluɓa saʋagɔiti saama. 
Tɔ ɠa é Davide maazaani Pa-Damime, ʋɛ Filisiti nuiti ti ɠaalɛɛni ba ná kɔɔɠɔ vai ma. Kpalagi ta ɠɛni miná, sulaavegai kpe ga moloi nii daa ga wɔɔlezegi. Izilayɛle nuiti ti ʋelani Filisiti nuiti ba. 
Ti lopele ɓɛtɛni kpalagi zu, ti ná zo ʋolu, ti vɔni Filisiti nuiti ma. Ɠɔoɠɔ GALAGI fɔnifaama wola veeni Izilayɛle ya. 
Yeeta, kɔɔɠuluɓa ʋuusaʋagɔiti (30) saama, nu saʋagɔ yeini Davide ɠoba fasai ma Adulame ʋugi zu, siɛgi zu Filisiti ɠɔɔɓɔgi gila ge ɠɛni ɠaalɛɛzu la ba Lefayime ʋɛtugi zu. 
Davide ɠɛni názu ná-dɔɔɠu wosuʋɛ, siɛgi zu Filisiti ɠɔɔɓɔgi gila ge zeini la Ɓɛteleyɛme. 
Ani wɔin ta Davide zoni nɔ sa, é ɠɛ ma: «Ɓɛ ɠa a ʋa bɛ̀ ga Ɓɛteleyɛme taa loaʋɛ ma ziɛyeɠei zu ɗɛi ta pɔ̀, gè kpɔle?» 
Kɔɔɠuluɓa saʋagɔiti ti lɔɔni Filisiti ɠɔɔlaaɠai zu, ti ziɛi zaɠa ziɛyeɠei zu, é Ɓɛteleyɛme taa loaʋɛ. Ti ʋaani la, ti fe Davide ya, kɛlɛ é la ɠɛni kɛɛni, é ʋa kpɔle. É feeni Ɠɔoɠɔ GALAGI ʋɛ, é pu ya zooi ma. 
É ɠɛni ma: «Nà-GALAGI kìzo nii ɠɛɠala vai ɠɛɛ vai ma! Kulaʋɛ eɠɛ nà ɠɛ naama nuiti ma ɲamai ɓɔlezu, niiti ti ɠikulaai ti-yɛnvuiti su, ti li. Tɔɔzei ti ɠikulaʋɛ ti-yɛnvuiti su pɛ, ti ʋa ʋa ga ziɛi nii.» É ɠɛlɛni kpɔle vai ʋa. Lɔɠɔɠula faa wolai ɠana kɔɔɠuluɓa wola saʋagɔi naati ti kɛɛni. 
Zoaɓe kɛɛɠɛloin Aɓisayi ɠa é ɠɛni ga nu saʋagɔiti ta-ɠundiɠii. Tɔ ɠa é nu unsaʋagɔ (300) ʋaani ga ná-kpɛɛin. É lɔɠɔ zɔlɔɔni naazu nu saʋagɔiti saama. 
Tɔɠɔɠulani ti saʋagɔ zaama, é ɠɛ ga ta-ɠundiɠii, kɛlɛ é la ɠɛni zeelini nu saʋagɔ mɔungiti su. 
Ɓenaya, Yeɠoyada ná-doun zunui, é ɠɛni ga kɔɔɠuluɓa wolai ta ná-dounloun, nii é ɠɛni ga Kaɓeseyɛle nu, é lɔɠɔɠula faa wolaiti kɛɛni. Ɓenaya naa ɠa é Moaɓe ɠɔɔɠuluɓa wola felegɔ ʋaani. Tɔ ɠa ɓalaa, kɔɔlɛ vukɔi yɛni ʋuuzu foloi ta, é yeini ziɛyeɠei ɓomaʋɛ, é zalai ʋa. 
Tɔ ɠa mɔnɔ é Ezipete nui ta ʋaani, nii sɔligɔi ɠɛni ga mɛtɛlɛ felegɔ ta tukpɛ (2,5) kɛɠala, kpɛɛin é ɠɛni zea, é wɔɔlɔni ga seɠe vɛlɛ nui ná-gba gului ɠɛɠala. Tukpɔ nɔ ɠa é ɠɛni zoni Ɓenaya ya, é ʋili Ezipete nui naa ma, é naa ná-kpɛɛin ɠula zea, é paa la. 
Lɔɠɔɠula faa wolaiti kana Ɓenaya kɛɛni, Yeɠoyada ná-doun zunui, é lɔɠɔ wola zɔlɔɔni kɔɔɠuluɓa wola saʋagɔ ɠiligi niiti saama. 
É lɛbiya wola zɔlɔɔni nu ʋuusaʋagɔiti (30) pɛ ba, kɛlɛ é la ɠɛni zeelini nu saʋagɔ mɔungiti su. Davide seini tɔ ɓɔɠɔi makɛ zalaʋusuiti unda. 
Kɔɔɠuluɓai taɠiligaa laaseigiti kaa: Zoaɓe kɛɛɠɛloin Azayɛle, Ɓɛteleyɛme nui Dodo ná-doun zunui Ɛlɛɠanan, 
Ɠalɔɔl nui Samɔte, Palon nui Ɠelɛse, 
Tekoa nui Ikese ná-doun zunui Ila, Anatɔte nui Aɓiyezɛɛl, 
Ɠusa nui Siɓekayi, Aɠoa nui Ilayi, 
Netofa nui Maɠalayi, Netofa nui Ɓaana ná-doun zunui Ɠelɛde, 
Liɓayi ná-doun zunui Itayi, Giɓea nui Ɓɛnzamɛn yooi zu, Pilaton nui Ɓenaya, 
Naɠalé-Gaase nui Ɠulayi, Aalaɓa nui Aɓiyɛle, 
Ɓaɠalime nui Azamavɛte, Saaleɓon nui Eliaɓa, 
Gizon nui Ɓené-Ɠasɛme, Ɠalaal nui Sage ná-doun zunui Zonatan, 
Ɠalaal nui Sakaal ná-doun zunui Ayiyame, Uul ná-doun zunui Elifale, 
Mekela nui Ɠefɛɛl, Palon nui Ayiya, 
Kaalamɛle nui Ɠɛsɛlo, Ezeɓayi ná-doun zunui Naalayi, 
Natan kɛɛɠɛloin Zowɛle, Ɠageli ná-doun zunui Miɓaal, 
Amɔn nui Selɛke, Ɓeyelɔte nui Naalayi, nii é ɠɛni Seluya ná-doun zunui Zoaɓe ná-kɔɔɠɔ zɔɔlaiti seɠezu, 
Ila ta Galɛɓe, Yetɛɛl nu felegɔiti, 
Ɠɛte nui Ilii, Aalayi ná-doun zunui Zaɓade, 
Siza ná-doun zunui Adina, é ɠɛni ga Luɓɛn wolodamai zu nu, é ɠɛni ga Luɓɛn wolodamai zu nuiti ta-lotuɠɔi, é ɠɛni zeini ɓalaa salaʋusu ʋuusaʋagɔ (30) unda, 
Maaka ná-doun zunui Ɠanan, Miteni nui Zozafate, 
Asatelɔte nui Uziya, Alowɛɛl nui Wotame ná-doun zunuiti, Sama ta Yeiyɛle, 
Simili ná-doun zunui Yediayɛle, kɛɛɠɛloin ɓalaa Yoɠa, Tise nui, 
Maɠava nui Eliyɛle, Ɛlɛname ná-doun zunuiti Yeliɓayi ta Yosavia, Moaɓe nui Yitima, 
ta Metesoɓaya nuiti Eliyɛle, Woɓɛde, naa ʋɛɛ Yasiyɛle ʋa. 
