﻿1 Dɔlɔ Sɛʋɛi.
5.
Luɓɛn ɠa é ɠɛni ga Izilayɛle ná-doun zunu mɔungi, kɛlɛ tɛi é laani kɛɛɠɛ anzai gila koba, nii é la ɠɛni vuluni ga zɔiti kɛʋele, ná-doun mɔun tosuʋɛ ɠulani zea, é ve Izilayɛle ná-doun Zozɛfe ná-doun zunuiti zea. Naa ɠa é kɛɛni Luɓɛn laaseigi la mɔ ɠɛni zɛʋɛni doun mɔun tosuʋɛ. 
Zuda ɠɛɛni ga zɛbɛsu nu wola kɛɛɠɛlointi saama, mavofodaiti saama ɠa masa ge zɔlɔɔni ná, kɛlɛ doun mɔun tosuʋɛ veeni Zozɛfe ʋɛ. 
Izilayɛle ná-doun zunu mɔungi Luɓɛn ná-dointi daaseigiti kaa: Enɔke, Palu, Ɠɛsɛlon ta Kaalemi. 
Zowɛle nɔnɔ mavofodaiti kaa, é zo ɠɛɛɠɛiti ma, é li lointi pɔ: Semaya, Gɔge, Simeyi, 
Misé, Leaya, Ɓaale, 
Ɓeyela. Ɓeyela ɠɛni ga totuɠɔ wola Luɓɛnni mavofodaiti saama. Tɔ ɠa Asiili masagi Tigilate-Pilezɛɛl seɠeni, é lii la duɔlai zu. 
Ɓeela kɛɛɠɛlointi pɛtɛ, ti laaseigiti ti zɛʋɛai, eɠɛʋelei ta-wolodamaiti ti la, ta ta-ʋɛlɛyeɠeiti: Ma mɔungi ɠɛni ga Yeiyɛle, naa ʋoluma Zakali, 
ti-ɠaaɓelagi ɠɛni ga Zowɛle ná-dounloin Sema nɔnɔ ma lounloin Azaze ná-doun zunui Ɓela. Niima nuiti ti ɠɛni zeini Alowɛɛl ɠoʋii ma ta zooi nii diai é zei Neɓo gizei ʋa ta taai nii zu daa ga Ɓaale-Meyon. 
Ti ɠɛni zeini teʋebai laawu folo ɠulazu ʋelei, eyɛsu é zeeli ziɛ wolai Efelate ma, tɔɔzei ta-logani ɓulugiti suwɔɔlɔni Galaade yooi zu. 
Sayile ná-siɛgi zu, ti kɔɔi ʋɛɛni Ɠagaal nuiti ba, ti vɔni naati ma, ti naati ta-ʋɛlɛiti seɠe ga ti-ɲiizuʋɛti Galaade yooi zu folo ɠulazu ʋelei. 
Gade mavofodaiti ti ɠɛni zeini ti ɠoba lɛkpɛmaʋɛ nu ɠɔʋɛzu ʋelei Ɓasan nɛmɛi zu, eyɛsu ti zei Saleka ʋa. 
Naati saama, pɛlɛyeɠe wolai ɠɛni ga Zowɛle nɔnɔi, felesiɛi ɠɛ ga Safame nɔnɔi, naa ʋoluma Yayenayi ta Safate ta-ʋɛlɛyeɠeiti. 
Pɛlɛyeɠe lɔfela ɠili ge ɠɛni ti ɠoba, naama ʋɛlɛyeɠe ungiti kaa: Mikayɛle, Mesulame, Seɓa, Yolayi, Yayekan, Ziya, ta Eɓɛɛl. 
Naati pɛ ti ɠɛni ga Aɓiyayile ná-doun zunuiti, Aɓiyayile mɛmɛwolani daaseigiti kaa, é zo ɠɛɛɠɛiti ma, é li lointi pɔ: Ɠuli, Yaloa, Galaade, Mikayɛle, Yesisayi, Yado, ta Ɓuze. 
Guni ná-doin Aɓidiyɛle ná-doun zunui Ayi ɠa é ɠɛni ga ta-ʋɛlɛyeɠeiti pɛ ma lotuɠɔi. 
Ti ɠɛni zeini Galaade yooi zu, ta Ɓasan, naa ʋɛɛ ná maaɠoolii zu yooi pɛ ba, ta togani losuʋɛti kpein ti ɠɛni Salon, eyɛsu ti zeeli kwɛpelemaʋɛ. 
Niima nuiti pɛ daaseigi zɛʋɛni daasei sɛʋɛ zɛʋɛ wolai zu, siɛgi zu Yotame ɠɛni la ga Zuda masagi, Zeloɓoame ɠɛ ga Izilayɛle masagi. 
Luɓɛn ta Gade ti-mavofodaiti, naa ʋɛɛ Manasé ná-bolodai ɠilazuʋɛ ʋa, kɔɔɠuluɓa wolaiti ti ɠɛni naati zea, niiti ti-liegɔi ɠɛni ga nu waaʋuunaani maazu naanigɔ undɔfela puulɔzita (44.760), ti zoogai kɔɔɠɔ zɛpɛgi zosu, naa ʋɛɛ boɠa zɔkpɔi ʋa, ti zoogai ɓalaa mɛɛin ʋilisu, ti ɠɛʋele ɓɛtɛni ga ti li kɔɔɠɔzuʋɛ. 
Ti kɔɔi ʋɛɛni Ɠagaal nuiti ba, ti pɛɛ Yetuul ʋa, naa ʋɛɛ Nafise ta Nodaɓe ʋa. 
GALA ge ɓɔni ti ʋa, é zobogi ve ti ya, ti vɔni Ɠagaal nuiti ma ta niiti kpein ti kpɔni su, tɔɔzei siɛgi zu ti ɠɛni kɔɔi ɠɔɔzu la, ti wooɠulani GALA ma. GALA ge ti wooɠaaʋoteni, tɔɔzei ti laani da. 
Ti naati ta-loganiiti pɛ seɠeni: ɲɔmɛ waaʋuulɔɔlugɔ (50.000), baalagi ta bolii naati ti ɠɛni ga waaunfelegɔ waaʋuulɔɔlugɔ (250.000), soovalegi ɠɛni waafelegɔ (2.000). Ti nu waaungila (100.000) soni ɓalaa ga duɔiti. 
Ti zili nui ma mɔinmɔin ge zaani, tɔɔzei GALA ɓɔɠɔgoi ɠa kɔɔi naa ɠɛni zeezu. Ti zeini naati ta-yooi zu, eyɛsu ti lii ziɛgi zeeli duɔlai zu. 
Manasé ná-bolodai ɠilazuʋɛ zeini zooi naa zu, nii sogai Ɓasan ʋa, é zei Ɓaale-Ɠɛɛlɛmɔn ʋa, é zo Seniil ʋa, é zei Ɠɛɛlɛmɔn gizei ʋa. Ta-nuɓusɛiti gola ɠaawɔɔlɔni. 
Ta-ʋɛlɛyeɠe lotuɠɔiti daaseigiti kaa: Efɛɛl, Yiseyi, Eliyɛle, Azaliyɛle, Zelemi, Wodavia ta Yadiyɛle. Ta-ʋɛlɛyeɠe lotuɠɔi niiti pɛ ti ɠɛni ga kɔɔɠuluɓaiti, ti ɠɛ ɓalaa ga tɔɠɔɠulagiti. 
Kɛlɛ bolodamai niiti ti-mavofodai ti gaaɓela kɛɛni ga ti ɠɛ ga wooʋalada nuiti ti-mɛmɛwolani ta-ƓALAGI ʋɛ, ti ɠɛlɛ naa ʋa, ti ɗa zooi naa zu nuɓusɛiti ta-ɠalagi dɛbi, zii ɠiligi niiti GALA ge ti zuɠoloɠoloni ti ʋɛ. 
Naa ɠa é kɛɛni, GALA ge Asiili masagi niiti buzeɠeni ti laalɔɠɔma: Pule ta Tigilate-Pilezɛɛl, ga ti li ga bolodamai niiti ma nuɓusɛiti: Luɓɛn ta Gade, naa ʋɛɛ Manasé wolodamai ɠilazuʋɛ, ti ti ʋu taai niiti su: Ɠala, Ɠaɓɔɔl, ta Ɠala, naa ʋɛɛ Gozan ɗɛi maaɠoolii ʋa, zaaɠaza mináti ka ti zeini náti. 
Levi ná-doun zunuiti: Gɛɛlɛson, Keɠate, ta Melali. 
Keɠate ná-doun zunuiti: Amalame, Yiseɠaal, Eɓelɔn, ta Uziyɛle. 
Amalame ná-dointi: Aalɔn, Moize, ta Miliyame. Aalɔn ná-doun zunuiti: Nadaɓe, Aɓiyu, Eleazaal, ta Itamaal. 
Eleazaal ná-doun zunui ɠɛni ga Fineyase, naa mavofodaiti kaa, é zo ɠɛɛɠɛiti ma, é li lointi pɔ: Aɓisua, 
Ɓuki, Uzi, 
Zelayia, Melayɔte, 
Amalia, Ayituɓe, 
Sadɔke, Ayimaase, 
Azalia, Yoɠanan, 
Azalia, nii é zalaɠa ɠula wotii ɠɛɛni GALA sei ʋɛlɛi wu, nii Salomɔn toni Zeluzalɛme. 
Azalia Amalia zɔlɔɔni, Amalia Ayituɓe zɔlɔɔ, 
Ayituɓe Sadɔke zɔlɔɔ, Sadɔke Salume zɔlɔɔ, 
Salume Yilikiya zɔlɔɔ, Yilikiya Azalia zɔlɔɔ, 
Azalia Selaya zɔlɔɔ, Selaya Yewosadake zɔlɔɔ. 
Yewosadake liini duɔlai zu, siɛgi zu Ɠɔoɠɔ GALAGI Zuda ta Zeluzalɛme nuɓusɛiti teʋeni da duɔlai zu ga Neɓukadenɛzaal maaʋele. 
