﻿2 Masagiti.
15.
Izilayɛle masagi Zeloɓoame ná-kona ʋuufelegɔ maazu lɔfelasiɛi (27) ma masadai zu Izilayɛle unda, Amasia ná-doun zunui Azalia zeini Zuda unda ga masagi. 
Ná-konagi ɠɛni ga puugɔ maazu lɔzita (16), siɛgi zu é zeini la ga masagi. Kona ʋuulɔɔlugɔ maazu felegɔ (52) ɠa é kɛɛni masadai zu Zeluzalɛme. Dee laa ɠɛni ga Yekoliya, Zeluzalɛme nu ɠɛni de. 
É Ɠɔoɠɔ GALAGI yiima vai ɠɛɛni ga kɛɛɠɛ Amasia ɠɛʋele fai pɛ su. 
Kɛlɛ é la ɠɛni zalaɠa ɠula adaʋɛti koloɠoloni, nuɓusɛiti ti ɠɛni dɛ zalaɠaiti kulazu, ti ɗa ansansegiti gala náti. 
Ɠɔoɠɔ GALAGI gee zeeɓɛi ʋɛɛni masagi ʋa, é yɛni naama zeeɓɛi zu eyɛsu saa voloi zeeli. Ti maaɠelesa teʋeni pɛlɛi ta wu. Ná-doun zunui Yotame ɠa é ɠɛni masa pɛlɛi unda, é ɗa masadai ɠɛ zooi zu nuɓusɛiti unda. 
Azalia ná-kɛɛwotii mɔtaiti, ta nii kpein é kɛɛni, naati sɛʋɛʋɛ Zuda masagiti ta-ɠɛɛwoti zɛʋɛi zu. 
Azalia zaani. Ti maaɠuluni mɛmɛwolani ta-ɠabamaʋɛ, Davide ná-taa wolai zu. Ná-doun zunui Yotame ɠa é masadai ɠɛɛni potogi zu. 
Azalia ná-kona ʋuusaʋa maazu lɔsaʋasiɛi (38) ma masadai zu Zuda unda, Zeloɓoame ná-doun zunui Zakali zeini Izilayɛle unda ga masagi Samali. Alu dɔzita ɠa é kɛɛni masadai zu. 
É Ɠɔoɠɔ GALAGI wanama vai ɠɛɛni, eɠɛʋelei nɔ kɛɛɠɛiti kɛɛni la. É la ɠɛni zeɠeni naama ɠotoiti polu, niiti Neɓate ná-doun zunui Zeloɓoame Izilayɛle nuiti diini kɛɛ vai ma. 
Yaɓese ná-doun zunui Salume yaavai ɠilini ma, é paa nuɓusɛiti gaazu, naa ʋoluma é masadai ɠɛɛ potogi zu. 
Zakali ná-kɛɛwotii mɔtaiti sɛʋɛʋɛ Izilayɛle masagiti ta-ɠɛɛwoti zɛʋɛi zu. 
Ʋele ɠana Ɠɔoɠɔ GALAGI laawooi ʋilɛni la su, nii é boni Zewu ma, é ɠɛ ma: «È-lointi ta yɛ zeizu Izilayɛle masa kpɔkpɔgi ɠa eyɛsu è-mavofodai zeizu naanisiɛi.» Naa ma nɔ ɠa é ɠɛɛni. 
Woziase ná-kona ʋuusaʋagɔ maazu taaʋuugɔi (39) ma masadai zu Zuda unda, Yaɓese ná-doun zunui Salume zeini Izilayɛle unda ga masagi. Alu gila ka é kɛɛni masadai zu Samali. 
Gadi ná-doun zunui Menaɠɛme zeɠeni Tiilesa, é lɛ Samali, é Yaɓese ná-doun zunui Salume ʋaa, é masadai ɠɛɛni potogi zu. 
Salume ná-kɛɛwotii mɔtaiti, ta yaavai é gilini, naati sɛʋɛʋɛ Izilayɛle masagiti ta-ɠɛɛwoti zɛʋɛi zu. 
Názu ɠa Menaɠɛme kɔɔi valani la Tifisa taai ʋa, ta ná maaɠoolii zu laaiti kpein, é nuɓusɛiti pɛ paa, é zo Tiilesa é zeeli Tifisa, mazɔlɔɔ ti la ɠɛni taai naa ma ʋɛlɛlaʋɛti daalaoni tuɠɔ. Naa ʋoluma, koma anzanuiti pɛ ti ɠɛni ná, é ti-ɠogiti daaʋalini. 
Azalia ná-kona ʋuusaʋagɔ maazu taaʋuugɔi (39) ma masadai zu Zuda unda, Gadi ná-doun zunui Menaɠɛme zeini Izilayɛle unda ga masagi. Kona puugɔ ɠa é kɛɛni masadai zu Samali. 
É Ɠɔoɠɔ GALAGI wanama vai ɠɛɛni. Sii ma voloi pɛ su, é la ɠɛni zeɠeni naama ɠotoiti polu, niiti Neɓate ná-doun zunui Zeloɓoame Izilayɛle nuiti diini kɛɛ vai ma. 
Asiili masagi Pule ʋaani, é zooi zo. Menaɠɛme walii kilo waaʋuusaʋagɔ (30.000) veeni zea, ga naa ɓɔ ba é yɛ masa kpɔkpɔgi ɠa, ta ná-masa fai ɠɔɠɔ ɓikpi. 
Menaɠɛme naama walii zɔlɔɔni ga mului nii é kulani Izilayɛle naavolo nuiti zea, nu ɠilagilagi ɠɛni feezu ga wali ɠae ʋuulɔɔlugɔ (50), é ma waliiti kpein fe Asiili masagi ya. Naa vaani bu é ɠula zooi ʋa, é ɠale ma ná-taa zu. 
Menaɠɛme ná-kɛɛwotii mɔtaiti, ta nii kpein é kɛɛni, naati sɛʋɛʋɛ Izilayɛle masagiti ta-ɠɛɛwoti zɛʋɛi zu. 
Menaɠɛme zaani. Ná-doun zunui Pekayia ɠa é masadai ɠɛɛni potogi zu. 
Azalia ná-kona ʋuulɔɔlugɔi (50) ma masadai zu Zuda unda, Menaɠɛme ná-doun zunui Pekayia zeini Izilayɛle unda ga masagi Samali. Kona felegɔ ɠa é kɛɛni masadai zu. 
É Ɠɔoɠɔ GALAGI wanama vai ɠɛɛni, é la ɠɛni zeɠeni naama ɠotoiti polu, niiti Neɓate ná-doun zunui Zeloɓoame Izilayɛle nuiti diini kɛɛ vai ma. 
Ná-kɔɔɠuluɓai gila nii daa ɠɛni ga Peka, Lemalia ná-doun zunui, naa yaavai ɠilini ma, é paa Samali taazuʋɛ, masa pɛlɛi wu, é Pekayia ná-siɛpoluiti Aalagɔɓe ta Aliye ɓalaa paani. Salaʋusu ʋuulɔɔlugɔ (50) ɠɛni Peka ya Galaade nuiti saama. Kpegai ma ga ti ʋaa, é masadai ɠɛɛni naa ʋotogi zu. 
Pekayia ná-kɛɛwotii mɔtaiti, ta nii kpein é kɛɛni, naati sɛʋɛʋɛ Izilayɛle masagiti ta-ɠɛɛwoti zɛʋɛi zu. 
Azalia ná-kona ʋuulɔɔlu maazu felegɔi (52) ma masadai zu Zuda unda, Lemalia ná-doun zunui Peka zeini Izilayɛle unda ga masagi Samali. Kona ʋuufelegɔ (20) ɠa é kɛɛni masadai zu. 
É Ɠɔoɠɔ GALAGI wanama vai ɠɛɛni, é la ɠɛni zeɠeni naama ɠotoiti polu, niiti Neɓate ná-doun zunui Zeloɓoame Izilayɛle nuiti diini kɛɛ vai ma. 
Peka ná-siɛgi zu, Asiili masagi Tigilate-Pilezɛɛl ʋaani ga kɔɔi, é taa wolai niiti so: Iyon, Aɓɛle-Ɓɛte-Maaka, Yanoa, Kedɛse, Ɠasɔɔl, é Galaade ta Galilé yooiti pɛ soni ɓalaa naa ʋɛɛ Nɛfɛtali yooi ʋa, é li ga ma nuɓusɛiti duɔlai zu Asiili. 
Ela ná-doun zunui Wozé yaavai ɠilini Lemalia ná-doun zunui Peka ma, é paa, é masadai ɠɛɛ naa ʋotogi zu, Woziase ná-doun zunui Yotame ná-kona ʋuufelegɔi (20) ma Zuda unda masa fai zu. 
Peka ná-kɛɛwotii mɔtaiti, ta nii kpein é kɛɛni, naati sɛʋɛʋɛ Izilayɛle masagiti ta-ɠɛɛwoti zɛʋɛi zu. 
Lemalia ná-doun zunui Peka ná-kona felesiɛi ma masadai zu Izilayɛle unda, Woziase ná-doun zunui Yotame zeini Zuda unda ga masagi. 
Ná-konagi ɠɛni ga puufele maazu lɔɔlugɔ (25), siɛgi zu é zeini la ga masagi. Kona puugɔ maazu lɔzita (16) ɠa é kɛɛni masadai zu Zeluzalɛme. Dee laa ɠɛni ga Yelusa, Sadɔke ná-doun anzanui ɠɛni de. 
É Ɠɔoɠɔ GALAGI yiima vai ɠɛɛni ga kɛɛɠɛ Woziase ɠɛʋele fai pɛ su. 
Kɛlɛ zalaɠa ɠula adaʋɛti ti la ɠɛni ɲɛɛlɛni zooi ɠa, nuɓusɛiti ti ɠɛni dɛ zalaɠaiti kulazu, ta ti ɗa ansansegiti gala náti. Yotame ɠa é Ɠɔoɠɔ GALAGI zei ʋɛlɛi ma ziɠidaʋɛ ɓɛtɛni ʋɛ ná ɠɛni lɛkpɛma nu ɠɔʋɛzu ʋelei. 
Yotame ná-kɛɛwotii mɔtaiti, ta nii kpein é kɛɛni, naati sɛʋɛʋɛ Zuda masagiti ta-ɠɛɛwoti zɛʋɛi zu. 
Ná-masa fai ma ziɛgi zu Ɠɔoɠɔ GALAGI tɔɔzeini ga é ɗa Siili masagi Lesin leʋe Zuda laalɔɠɔma, ta Izilayɛle masagi Peka, Lemalia ná-doun zunui. 
Yotame zaani. Ti maaɠuluni mɛmɛwolani ta-ɠabamaʋɛ, mɛmɛwola Davide ná-taa wolai zu. Ná-doun zunui Aɠaze ɠa é masadai ɠɛɛni potogi zu. 
