﻿2 Masagiti.
14.
Yoaɠaze ná-doun zunui Zoase ná-kona velesiɛi ma masadai zu Izilayɛle unda, Zuda masagi Zoase ná-doun zunui Amasia zeini Zuda unda ga masagi. 
Ná-konagi ɠɛni ga puufelegɔ maazu lɔɔlugɔ (25) siɛgi zu é zeini la ga masagi. Kona ʋuufelegɔ maazu taaʋuugɔ (29) ɠa é kɛɛni masadai zu Zeluzalɛme. Dee laa ɠɛni ga Yoadan, Zeluzalɛme nu ɠɛni de. 
É Ɠɔoɠɔ GALAGI yiima vai ɠɛɛni, kɛlɛ é la ɠɛni zeelini mɛmɛwola Davide zu. É ziɛni nɔ ga kɛɛɠɛ Zoase ziɛ ʋelei. 
Zalaɠa ɠula adaʋɛti ti la ɠɛni ɲɛɛlɛni zooi ɠa, nuɓusɛiti ti ɠɛni zalaɠaiti kulazu, ti ɗa ansansegiti gala náti. 
Sei ʋele ɓɛtɛai ma nɔ feya masadai zu, é kɛɛɠɛ ná-botiɠɛ nu wolaiti pɛ paani, niiti ti kɛɛɠɛ ʋaani. 
Kɛlɛ é la ɠɛni naati ti-lointi paani, eɠɛʋelei sɛʋɛai la Moize ná-tɔ sɛʋɛi zu, ʋɛ Ɠɔoɠɔ GALAGI bogai ná ga: «Nu la doun kɛɛɠɛiti paa ti-lointi ta-ɠoto ɠɛai vaa zu, nu la dointi paa ti zɔlɔɔ nuiti ta-ɠoto ɠɛai vaa zu, kɛlɛ ɛsɛ gilagilagi ɠa za tɔ ɓɔɠɔi ná-kotoi vaa zu.» 
É Edɔme nu waapuugɔ (10.000) ʋaani Kpolo Ʋɛtugi zu, siɛgi ti kɛɛni kɔɔi ɠa, é Sela taai zoni, é daasei pɛɛ ga Yoketeyɛle, naama laaseigi ɠa é ná ʋa zaaɠaza. 
Naazu Amasia keelaiti teʋeni Izilayɛle masagi Zoase ma, Yoaɠaze ná-doun zunui, Zewu ná-dounloin, é ɠɛ naa ma: «Ʋa, de ɠomi, de kɔɔi ɠɔ.» 
Kɛlɛ Izilayɛle masagi Zoase gooɠaaʋoteni, é ɠɛ ma: «Yeeta Liɓan yooi zu, ɠain gulu goi ta ɠɛni sɛdele gului ma: ‹È-loun anzanui ve, é zei dòun zunui ʋɛ ga anza,› kɛlɛ Liɓan lɔɓɔ zuaiti ti leʋeni ga ɠain gului ʋɔ pelei, ti suɠolo ga ɠɔɠɔi. 
Gaama ʋe è vɔniga Edɔme nuiti ma, è ɠaazulɛa. Ɠoozunɛ naama lɛbiyai ma, è yɛ è-zeizuʋɛ. Leeni vaa zu ɗa ɓɔɠɔ lɔ fai ta zu nii gaaɓela ge la ʋani ɗa ɓɔɠɔi ma, naa ʋɛɛ Zuda masa zooi ʋa?» 
Kɛlɛ Amasia la ɠɛni woiloni goo ma. Názu ɠa Izilayɛle masagi Zoase lɛɛni la, ti kɔɔi ɠɔ ta Zuda masagi Amasia Zuda laai zu daa ga Ɓɛte-Semɛse. 
Zuda ɠɔɔʋɛbɛi looni bu Izilayɛle gelei ɠakala, ti ʋela naati ba, ɛsɛ ge li ná-taa zu. 
Izilayɛle masagi Zoase Zuda masagi Amasia zoni Ɓɛte-Semɛse. Amasia ɠɛni ga Zoase ná-doun zunui, é ɠɛ ga Aɠazia ná-dounloin. É liini Zeluzalɛme, é siɠigi ʋaaleʋe ga mɛtɛlɛ unfelegɔ (200) ɠɛɠala siɠidaʋɛti zɔɠɔzu, niiti ti laa ga Efelayime ta Zokogi. 
É zanugi ta waliiti pɛ seɠeni, naa ʋɛɛ sɔɔlaiti pɛ ba ti ɠɛni Ɠɔoɠɔ GALAGI zei ʋɛlɛi ma naavolo makɛsuʋɛ, ta masa pɛlɛi ma naavolo makɛsuʋɛ, é duɔiti soni ɓalaa, naa ʋoluma é ɠale ma Samali. 
Zoase ná-kɛɛwotii mɔtaiti, ná-tɔɠɔɠula faiti ta kɔɔi é kɔɔni Zuda masagi Amasia laalɔɠɔma, naati sɛʋɛʋɛ Izilayɛle masagiti ta-ɠɛɛwoti zɛʋɛi zu. 
Zoase zaani. Ti maaɠuluni Samali, Izilayɛle masagiti koba. Ná-doun zunui Zeloɓoame ɠa é masadai ɠɛɛni potogi zu. 
Zoase ná-doun zunui Amasia Zuda masagi kona puugɔ maazu lɔɔlugɔ (15) ɠɛɛni vulua, Izilayɛle masagi Zoase zaa ʋoluma, Yoaɠaze ná-doun zunui. 
Amasia ná-kɛɛwotii mɔtaiti sɛʋɛʋɛ Zuda masagiti ta-ɠɛɛwoti zɛʋɛi zu. 
Ti yaavai ɠilini ma Zeluzalɛme, é ʋela, é li Lakise, kɛlɛ sili nuiti ti numaa leʋeni polu Lakise ga ti paa miná. 
Ti ma ʋoomai laani wotoloi zu, sooiti ti ɗa mɛɛn, ti ʋaa la, ti maaɠulu mɛmɛwolani ta-ɠabamaʋɛ Zeluzalɛme, Davide ná-taa wolai zu. 
Zuda nuɓusɛiti pɛ ti ná-doun zunui Azalia zeɠeni, nii ná-konagi ɠɛni ga puugɔ maazu lɔzita (16), ti sei ga masagi kɛɛɠɛ Amasia ʋotogi zu. 
Tɔ ɠa kɛɛɠɛ zaai ma, é Elate taa wolai zoni ʋolu, é ná lo ʋolu, é dɔ Zuda masadai ná-zobogi wu. 
Zoase ná-doun zunui Amasia ná-kona puugɔ maazu lɔɔlugɔi (15) ma masadai zu Zuda unda, Izilayɛle masa pɔlɔi Zoase ná-doun zunui Zeloɓoame zeini Izilayɛle unda ga masagi Samali. Kona ʋuunaanigɔ maazu ɠila (41) ka é kɛɛni masadai zu. 
É Ɠɔoɠɔ GALAGI wanama vai ɠɛɛni, é la ɠɛni zeɠeni naama ɠotoi gila kpalaa polu, nii Neɓate ná-doun zunui Zeloɓoame Izilayɛle nuiti diini kɛɛ vai ma. 
É Izilayɛle you ɠwɛgi laani ʋolu daazu, é zo Leɓo-Ɠamate, é zeeli Kpoloɗɛ Wanai ma, eɠɛʋelei nɔ Ɠɔoɠɔ GALAGI boni la, é ɠula ná-botiɠɛ nui GALA goo wo nui Zonase la, Gate-Ɠefɛɛl nui, Amitayi ná-doun zunui. 
Mazɔlɔɔ Ɠɔoɠɔ GALAGI maanɔɠɔ wolai ɠaani nii Izilayɛle loai su, nu nɔpɛ ge la mɔ ɠɛni ná, doungo ʋɛɛ kpakolo ba, nii a zoo ɓɔsu ba. 
Tama Ɠɔoɠɔ GALAGI la ɠɛni boni ga toɠa Izilayɛle laaseigi ɲɛɛlɛzu, é kula geeɠɔlɔgi wu, naa ɠa é kɛɛni é Izilayɛle yooi ɠizoni ga Zoase ná-doun zunui Zeloɓoame maaʋele. 
Zeloɓoame ná-kɛɛwotii mɔtaiti, ta nii kpein é kɛɛni, ná-tɔɠɔɠula faiti, ta ná-kɔɔiti, ta ʋelei é Damase ta Ɠamate lɔɔni la Izilayɛle masadai ná-zobogi wu, niiti ti ɠɛni ga Zuda nɔnɔ, naati sɛʋɛʋɛ Izilayɛle masagiti ta-ɠɛɛwoti zɛʋɛi zu. 
Zeloɓoame zaani, ti maaɠuluni Izilayɛle masagiti ta-ɠabamaʋɛ. Ná-doun zunui Zakali ɠa é masadai ɠɛɛni potogi zu. 
