﻿1 Masagiti.
16.
Ɠɔoɠɔ GALAGI ɓɔɛni GALA goo wo nui Zewu ʋɔ, Ɠanani ná-doun zunui, ga é keela wooi nii laazeeli Ɓaasa ma: 
«Gè è zeɠeni fufiligi zu, gè è ɠɛ ga nà-nuɓusɛi Izilayɛle nuiti ta-lotuɠɔi, kɛlɛ è ʋilɛga Zeloɓoame ná-kɛʋelei ʋolu, è nà-nuɓusɛiti Izilayɛle nuiti dia kotoi ɠɛɛ vai ma, naa maaʋele ma, è nɔ̀un ziiɠaawana. 
Naa ɠa é ba, nà è ɓalesu ná, ɗa-o, ɗa-ʋɛlɛyeɠei-yo, nà wo zosu eɠɛʋelei gè Zeloɓoame ná-pɛlɛyeɠei zoni la, Neɓate ná-doun zunui. 
Ɓaasa ná-pɛlɛyeɠei wu, nui nɔpɛ é zaazu taazuʋɛ, gilɛiti ka ta ma ʋoomai mi, zɔi ma é zaazu dɔɓɔi zu, wɔniiti ka ta naama ʋoomai mi.» 
Ɓaasa ná-kɛɛwotii mɔtaiti, ta ná-tɔɠɔɠula faiti, naati sɛʋɛʋɛ Izilayɛle masagiti ta-ɠɛɛwoti zɛʋɛi zu. 
Ɓaasa zaani. Ti maaɠuluni Tiilesa. Ná-doun zunui Ela ɠa é masadai ɠɛɛni potogi zu. 
Ɠɔoɠɔ GALAGI ɓɔɛni Ɓaasa ta ná-pɛlɛyeɠei ʋɔ, é ɠula GALA goo wo nui Zewu la, Ɠanani ná-doun zunui, tɔɔzei faa felegɔ: mɔunpa, kotoi é kɛɛni, é Ɠɔoɠɔ GALAGI yiiɠaawana ga ná-kɛɛwotiiti, eɠɛʋelei Zeloɓoame ta ná-pɛlɛyeɠei ti kɛɛni la, naa ʋoluma Ɓaasa Zeloɓoame mavofodaiti paa vai. 
Aza ná-kona ʋuufelegɔ maazu lɔzitai (26) ma masadai zu Zuda unda, Ɓaasa ná-doun zunui Ela zeini Izilayɛle unda ga masagi Tiilesa. Kona felegɔ ɠa é kɛɛni masadai zu. 
Ná-kɔɔɠuluɓai Zimili, nii é ɠɛni kɔɔɠɔ wotoloi ɠilazuʋɛ kpein unda, naa yaavai ɠilini ma. Siɛgi zu Ela ɠɛni la Tiilesa, Aalasa ná-pɛlɛi wu, masa pɛlɛi ma ɠundiɠii, é ɗa dɔɔi ɓɔle eɠɛ nui dɔɔi sogai, 
Zimili lɛɛni, é paa, é masadai ɠɛɛ naa ʋotogi zu. Naa ɠɛɛni Zuda masagi Aza ná-kona ʋuufelegɔ maazu lɔfelai (27) ma masadai zu. 
É ɠɛɛni nɔ feya ga masagi, é Ɓaasa ná-pɛlɛyeɠei pɛ undaaʋili, é la zunu ɠila kpalaa zɛni vulua doungo zu, ɓaa kpakolo su ná-pɛlɛwu nuiti saama, ta nui niiti ti ɠɛni polu. 
Ʋele ɠana Zimili Ɓaasa ná-pɛlɛyeɠei pɛ undaaʋilini la, eɠɛʋelei Ɠɔoɠɔ GALAGI ɓɔɛni la tɔun daalɔɠɔma, é ɠula GALA goo wo nui Zewu la. 
Naa pɛ ge ɠɛɛni tɔɔzei Ɓaasa ta ná-doun zunui Ela ta-ɠotoiti ba ti ti ɠɛɛni, ta niiti ti Izilayɛle nuiti diini kɛɛ vai ma, ti Ɠɔoɠɔ GALAGI Izilayɛle ná-GALAGI yiiɠaawana ga ta-ɠɔɔɠɔ ganigiti. 
Ela ná-kɛɛwotii mɔtaiti, ta nii kpein é kɛɛni, naati sɛʋɛʋɛ Izilayɛle masagiti ta-ɠɛɛwoti zɛʋɛi zu. 
Aza ná-kona ʋuufelegɔ maazu lɔfelai (27) ma masadai zu Zuda unda, Zimili kɛɛni masadai zu ga dɔɔɠɔ ɠila Tiilesa, názu Izilayɛle ɠɔɔʋɛbɛi ɗa Filisiti nuiti ta-laa wolai Giɓeton maaɠaku. 
Kɔɔɠɔ nuiti ti mɛnigai ma ga Zimili masagi maaɓɔteʋea, é paa, naama volo na nɔ ti yɛni kɔɔlaaɠai zu, ti ta-ɠɔɔɠuluɓai Womeli ɠɛ ga Izilayɛle masagi. 
Womeli ta ná-kɔɔʋɛbɛi pɛ ti zeɠeni Giɓeton, ti li, ti Tiilesa zei kɛlɛ su. 
Zimili kaai ma ga taai zoga, é liini, é lɛ dɔɔɠu wosuʋɛ naa ɠɛni masa pɛlɛi wu, é abui ʋili masa pɛlɛi ʋa, é za abui zu. 
É zaani tɔɔzei kotoiti ba é ti ɠɛɛni, é Ɠɔoɠɔ GALAGI wanama vai ɠɛ, é ziɛ ʋele ɲɔu ga Zeloɓoame ɠɛʋele, nii é Izilayɛle nuiti diini kotoi ɠɛɛ vai ma. 
Zimili ná-kɛɛwotii mɔtaiti, ta yaavai é gilini, naati sɛʋɛʋɛ Izilayɛle masagiti ta-ɠɛɛwoti zɛʋɛi zu. 
Izilayɛle nuɓusɛiti ti ɠɛɛni su fele, gilazuʋɛ ʋilɛni Ginate ná-doun zunui Tiɓini ʋolu ga ti kɛ ga masagi, gilazuʋɛ ʋilɛ Womeli ʋolu. 
Niiti ti ɠɛni Womeli ʋolu, naati ti zobo sɔlɔɔni zɔiti ma ti ɠɛni Ginate ná-doun zunui Tiɓini ʋolu. Tiɓini zaani niina, Womeli zei masadai zu. 
Aza ná-kona ʋuusaʋagɔ maazu ɠilagi (31) ma masadai zu Zuda unda, Womeli zeini Izilayɛle unda ga masagi. Kona puugɔ maazu felegɔ (12) ɠa é kɛɛni masadai zu. Naama ɠona puugɔ maazu felegɔi (12) zu, é kɛɛni ga kona dɔzita Tiilesa. 
Naa ʋoluma é liini Semɛɛl ʋɔ bɛ, é Samali ɠizei ɠeya ma ga walii waadɔzita (6.000), é taa wolai lo gizei naa ma, é taai naa laaseigi ʋɛɛ ga Samali. Naama laaseigi ɠulani Seemeel laaseigi zu, nii é zooi ɠeyani ma. 
Womeli Ɠɔoɠɔ GALAGI wanama vai ɠɛɛni, siɛ ʋelei ɲɔi é leʋe masagiti pɛ ba, ti leʋeni tɔun tuɠɔ. 
É ziɛ ʋele ɲɔuni ga Neɓate ná-doun zunui Zeloɓoame ɠɛʋele, nii é Izilayɛle nuiti diini kotoi ɠɛɛ vai ma, ta ti Ɠɔoɠɔ GALAGI Izilayɛle ná-GALAGI yiiɠaawana ga kɔɔɠɔ gani kɔɔ vai ti ɠɛni kɛɛzu. 
Womeli ná-kɛɛwotii mɔtaiti, ta ná-tɔɠɔɠula faiti é ti lɛɛni, naati sɛʋɛʋɛ Izilayɛle masagiti ta-ɠɛɛwoti zɛʋɛi zu. 
Womeli zaani. Ti maaɠuluni Samali. Ná-doun zunui Akaɓe ɠa é masadai ɠɛɛni potogi zu. 
Aza ná-kona ʋuusaʋagɔ maazu lɔsaʋai (38) ma masadai zu Zuda unda, Womeli ná-doun zunui Akaɓe zeini Izilayɛle unda ga masagi Samali. Kona ʋuufelegɔ maazu felegɔ (22) ɠa é kɛɛni masadai zu. 
Womeli ná-doun zunui Akaɓe Ɠɔoɠɔ GALAGI wanama vai ɠɛɛni, é ɲɔu é leʋe masagiti pɛ ba, ti leʋegai tuɠɔ. 
É Neɓate ná-doun zunui Zeloɓoame ná-kotoiti pɛ kɛɛni, naa la ziilɛini, é li, é Sidɔn masagi Eteɓaale ná-doun anzanui Zezaɓɛle vulu, é li vɔlɔ é kɔɔɠɔ ganigi Ɓaale lɛbi, é nɔkɔ bu. 
É pɛlɛ loni kɔɔɠɔ ganigi Ɓaale ʋɛ Samali, é zalaɠa ɠulazuʋɛ ɓɛtɛ ná. 
É sale wului ɓadɔni. Naama ɠɛɛwotiiti kpein maaʋele ma, Akaɓe Ɠɔoɠɔ GALAGI, Izilayɛle ná-GALAGI yiiɠaawanani, é leʋe Izilayɛle masagiti kpein ba, ti leʋeni tɔun tuɠɔ. 
Akaɓe ná-siɛgi zu ɠa Ɓetɛle nui Yiyɛle Zeliko taai loni da ʋolu. Kɔtu mɔungi é daani, naa zu anii ɠɛni ga ná-doun zunu mɔungi Aɓilame, kpegai ma ga pɛlɛla ɓogiti pilɛ, naa zu anii ɠɛ ga ná-doun zunui loungo gelei Seguɓe. Naama vai pɛ ge ɠɛɛni é zoloo wooi naa ma, nii Ɠɔoɠɔ GALAGI boni, é ɠula Nun ná-doun zunui Zozuwe la. 
