﻿1 Masagiti.
14.
Naama ziɛgi zu, Zeloɓoame ná-doun zunui Aɓiya zeeɓɛni. 
Zeloɓoame ɠɛni anzai ma: «Ʋote, nii a kɛ nu nɔpɛ ge mina kwɛɛ ga ànzai ɠa ga ɗe, li Silo. Miná ɠa GALA goo wo nui Ayiya ná, tɔ ɠa é dɛɛni ga ze ga nà ɠɛɛzu ga masagi nuɓusɛi niiti unda. 
Ɗa ɓulu puugɔ zeɠezu, ta ɓuluiti, naa ʋɛɛ kɔin gulɔ woole ɠila ba, ɗa zeelina pɔ bɛ, toɠa naa wo è ma, nii é ɠɛɛzu ga doungoi.» 
Ʋele ɠana Zeloɓoame anzai kɛɛni la. É liini Silo, é lɛ GALA goo wo nui Ayiya naa ná-pɛlɛi wu. Ayiya la mɔ ɠɛni wozaɠaazu, gaazuʋɛ maaɓidini niina ga pɔlɔzaɠagi. 
Ɠɔoɠɔ GALAGI ɠɛni Ayiya ma: «Zeloɓoame anzai ɠana, é ʋaazu è ʋɔ bɛ ga é è ɠaazaɠa ná-doun zunui vaa zu, mazɔlɔɔ naa la ɠɛdɛni, ɗa gooɠaaʋote ɠani ta nii. Siɛgi zu é ʋaazu la, toɠa ɓɔɠɔ ɠulazu ga nu ɠili.» 
Siɛgi zu Ayiya kɔɠɔ lugi mɛnini la, kɛai ma kpofalagi maaɓudɛzu, é ɠɛni ma: «Lɛ, Zeloɓoame anzai, lee vaa zu è ɓɔɠɔ ɠulazu ga nu ɠili? Tèʋegɛ ga gè ziizoolɛ ɠeela woo wo è ma. 
Li, è ɠɛ Zeloɓoame ma: ‹Ɠɔoɠɔ GALAGI, Izilayɛle ná-GALAGI wooi ɠaa: Gè è zeɠeʋɛ nuɓusɛiti saama, gè è ɠɛ ga masagi ná-nuɓusɛiti Izilayɛle nuiti unda. 
Gè masadai ɠulaʋɛ Davide ná-pɛlɛyeɠei ya, gè fe è ya. Kɛlɛ è la kɛɛni ga nà-botiɠɛ nui Davide ɠɛʋele, nii é nà-deveiti soni, ta é ɠili nɔ̀un ba ga zii pɛ, ga é naa nɔ ɠɛ nii pagai gàazu. 
È-ziɛ ʋele ɲɔuɗa, é leʋe naati kpein ba ti leʋegai è luɠɔ, è lia, è gala kiligaa ɓɛtɛ ɓɔɠɔ ʋɛ, ta kɔɔɠɔ ganigiti, ga kɔlui puai, nii a kɛ è zìiɠaawana, é ʋoluave nɔ̀un ba. 
Naa ɠa é ba, nà maanɔɠɔi zeizu ɗa-ʋɛlɛyeɠei ma, gè zunuiti pɛ undaaʋili è-ʋaalobaiti saama, doungo ʋɛɛ kpakolo ba, gè ɗa-ʋɛlɛyeɠei ɓale ná tɛtɛ, eɠɛʋelei nu ɠa ɗa kaʋai ɓale da ga kpalegi. 
Ɗa-ʋɛlɛyeɠei wu nui nɔpɛ é zaazu taazuʋɛ, gilɛiti ka ta ma ʋoomai mi, zɔi ma é zaazu dɔɓɔi zu, wɔniiti ka ta naama ʋoomai mi. Naa ɠa Ɠɔoɠɔ GALAGI bogai.› 
«Ɗɛi ma è ga Zeloɓoame anzai, ɠale ma, è li ɗa-laazu, kɛlɛ ɗa lɛɛzu nɔ feya taazuʋɛ, doungoi za. 
Izilayɛle kpein ka ná-saa wɔlɔi wo. Tɔ ɠila kpe ka Zeloɓoame ná-pɛlɛyeɠei wu maaɠuluzu kabai zu, tɔɔzei tɔ ɠila kpe ka sɔ pagɔ ɠaai su, Izilayɛle ná-GALAGI, Ɠɔoɠɔ GALAGI ɠaazu, Zeloɓoame ná-pɛlɛyeɠei wu. 
Ɠɔoɠɔ GALAGI ɠa masa sei Izilayɛle unda naama voloi, nii a Zeloɓoame ná-pɛlɛyeɠei wu nuiti kpein undaaʋili. Naama voloi ɠa pele ma, é ɗa ʋa, é zeelia vɔlɔ. 
Ɠɔoɠɔ GALAGI ɠa Izilayɛle nuiti doɠa, tɛiti ti ɠɛai eɠɛ seeligi é ziɛlaʋɛ, toɠa ti lɔɔɠula zou ʋagɔi naazu é feeni ti-ɠɛɛni bɛ, é ti vaza ziɛ wolai Efelate ʋoluʋele yooi zu. Naa ɠa ɠɛɛzu ga tiye mazɔlɔɔ ti sale wuluiti kpadɔa, nii a kɛ ti Ɠɔoɠɔ GALAGI yiiɠaawana. 
Ɠɔoɠɔ GALAGI ɠa ʋaazu ɠɛlɛzu Izilayɛle ʋa, tɔɔzei kotoiti ba Zeloɓoame ti ɠɛai, ta niiti é nuɓusɛiti diai ti ɠɛɛ vai ma.» 
Zeloɓoame anzai wuzeɠeni, é ɠale ma Tiilesa. Kɛai ma kpofalagi maaɓudɛzu, é ʋa lɛ pɛlɛi wu, doungoi ɗa za. 
Ti maaɠuluni, Izilayɛle nuiti pɛ ti ná-saa wɔlɔi wo, eɠɛʋelei nɔ Ɠɔoɠɔ GALAGI boni la, é ɠula ná-botiɠɛ nui, GALA goo wo nui Ayiya la. 
Zeloɓoame ná-kɛɛwotii mɔtaiti, ʋelei é kɔɔi ɠɔɔni la, ta ʋelei é masadai ɠɛɛni la, naati sɛʋɛʋɛ Izilayɛle masagiti ta-ɠɛɛwoti zɛʋɛi zu. 
É kɛɛni masadai zu ga kona ʋuufelegɔ maazu felegɔ (22). Zeloɓoame zaani. Ná-doun zunui Nadaɓe ɠa é masadai ɠɛɛni potogi zu. 
Salomɔn ná-doun zunui Loɓoame masadai ɠɛɛni Zuda unda. Ná-konagi ɠɛni ga puunaani maazu ɠila (41), siɛgi zu é zeini la ga masagi. Kona puugɔ maazu lɔfela (17) ɠa é kɛɛni masadai zu Zeluzalɛme, taai nii Ɠɔoɠɔ GALAGI yiimazeɠeni la Izilayɛle wolodamaiti pɛ saama, ga tɔɠɔi ʋɛɛ ná ʋa. Loɓoame dee laa ɠɛni ga Naama, Amɔn nu ɠɛni de. 
Zuda wolodamai zu nuiti ti Ɠɔoɠɔ GALAGI wanama vai ɠɛɛni, ti ná-toloi wuzeɠe ga ta-ɠotoiti, é leʋe ti-ɠɛɛni tɔnɔi ʋa ti kɛɛni. 
Tiya ɓalaa ti zalaɠa ɠula adaʋɛti kpɛtɛni ɓɔɠɔ ʋɛ, ti sale ɠɔtuiti ta sale wuluiti to gizeiti kpein ungaʋɛti, ta gulu wunduiti bu. 
Koloɠolo nuiti ti ɠɛ ti ya ta-zalaɠa ɠulazuʋɛti, ti ɠɛni ʋokɔɠɔsu zii naati ta-ɠɔzɔba ɠɛɛwotiiti ma, niiti Ɠɔoɠɔ GALAGI ti ɓɛɛni Izilayɛle nuiti tuɠɔ. 
Loɓoame ná-konagi lɔɔlusiɛi ma masadai zu, Ezipete masagi Sisake lɛɛni Zeluzalɛme laalɔɠɔma. 
É Ɠɔoɠɔ GALAGI zei ʋɛlɛi wu naavolo makɛsuʋɛ anii pɛ seɠeni ta masa pɛlɛi wu geleiti, é anii pɛ seɠeni. É lati, é zanu kɔɔɠɔ zɛpɛgiti pɛ seɠe, niiti Salomɔn ti ɓɛtɛni. 
Masagi Loɓoame naati maavalibogi ɠɛɛni ga kɔlu ɓɔi kɔɔɠɔ zɛpɛgiti, é ti ve salaʋusui niiti ti ɠɛni masa pɛlɛi laaʋɛ makɛsu, naati ta-ɠundiɠiiti zea. 
Masagi li laa ɠilagila Ɠɔoɠɔ GALAGI zei ʋɛlɛi ma ɠoizuʋɛ, salaʋusuiti ti ɓena kɔɔɠɔ zɛpɛgiti seɠe, naa ʋoluma ti ɠale ma ga tiye, ti ti la ma ʋɛlɛi wu. 
Loɓoame ná-kɛɛwotii mɔtaiti, ta nii kpein é kɛɛni, naati sɛʋɛʋɛ Zuda masagiti ta-ɠɛɛwoti zɛʋɛi zu. 
Kɔɔi yɛni nɔ ɠɔ Loɓoameni zɔɠɔzu ta Zeloɓoame. 
Loɓoame zaani. Ti maaɠuluni mɛmɛwolani ta-ɠabamaʋɛ Davide ná-taa wolai zu. Loɓoame dee laa ɠɛni ga Naama, Amɔn nu ɠɛni de. Ná-doun zunui Aɓiyame ɠa é masadai ɠɛɛni potogi zu. 
