﻿1 Masagiti.
4.
Masagi Salomɔn ɠɛni Izilayɛle pɛ unda. 
Ná-nu wolaiti daaseigiti kaa: Zalaɠa ɠula nui Azalia, Sadɔke ná-doun zunui, 
Sisa ná-doun zunu felegɔiti, Eliyɔlɛfe ta Ayiya, naati ka ti ɠɛni ga ná-sɛʋɛ ɠɛ nuiti. Ayilude ná-doun zunui Zozafate ɠɛ ga laavaawogi. 
Yeɠoyada ná-doun zunui Ɓenaya ɠɛni ga kɔɔʋɛbɛi ma lotuɠɔi, Sadɔke ta Aɓiataal ti ɠɛ ga zalaɠa ɠula nuiti. 
Natan ná-doun zunui Azalia ɠa é ɠɛni ga zou zɛʋɛ ɠundiɠiiti ta-ɠundiɠii, Natan ná-doun zunui Zaɓude ɠɛni ga zalaɠa ɠula nui, é ɠɛ ga masagi bɔɔlai. 
Ayisaal ɠa é ɠɛni wɛlɛzu masa pɛlɛi ma, Aɓada ná-doun zunui Adonilame ɠa é ɠɛni ga duɔla wotii ma ɠundiɠii. 
Zou zɛʋɛ ɠundiɠi puugɔ maazu felegɔ (12) ɠa é ɠɛni Salomɔn ya Izilayɛle yooi ná pɛ su, tiya ɠa ti ɠɛni masagi ta ná-pɛlɛyeɠei ɠɔnɔ fai gaaɠulazu ba, ti ɠilagilagiti pɛ ti ɓena alu gilagila seɠe konagi zu. 
Ti-laaseigiti kaa: Ɠuul ná-doun zunui, nii é ɠɛni Efelayime ɠize yooi zu. 
Deekɛɛl ná-doun zunui ɠɛni Makase, ta Saalaɓime, ta Ɓɛte-Semɛse, ta Elon Ɓɛte-Ɠanan unda. 
Ɠesɛde ná-doun zunui ɠa é ɠɛni Aluɓɔte, tɔ ɠa Soko ta Ɠefɛɛl yooi ɠɛni zea. 
Aɓinadaɓe ná-doun zunui ɠa Dɔɔl yooi ɠɛni zea, Salomɔn ná-doun anzanui Tafate ɠa é ɠɛni ga anzai. 
Ayilude ná-doun zunui Ɓaana ɠa Taanake ta Megido ɠɛni zea, ta Ɓɛte-Seyan pɛ, nii é Saletan ɠobaʋɛ Zizeleyɛle wuʋɛ, é zo Ɓɛte-Seyan, é li Aɓɛle-Meɠola, é li Yokemeyame. 
Geɓɛɛl ná-doun zunui ɠɛni zeini Lamɔte Galaade yooi zu. Tɔ ɠa é ɠɛni Manasé ná-doun zunui Yayiil ná-taaiti unda ga kundiɠii, niiti ti ɠɛni Galaade, naa ʋɛɛ Aalagɔɓe ɠoʋii Ɓasan yooi zu ʋa, taa wola ʋuulɔzita (60) ɠɛni ná, siɠigi ti ma, ti laa ɗa ɠulu ga kɔlu ɓɔi sɔɠɔgi. 
Ido ná-doun zunui Ayinadaɓe ɠa é ɠɛni Maɠanayime. 
Ayimaase ɠɛni Nɛfɛtali. Naa ɓalaa Salomɔn ná-doun anzanui ta zeɠeni ga anza, daa ga Ɓasemate. 
Ɠusayi ná-doun zunui Ɓaana ɠa é ɠɛni Asɛɛl ta Ɓealɔte. 
Palua ná-doun zunui Zozafate ɠa é ɠɛni Isakaal. 
Ela ná-doun zunui Simeyi ɠɛ Ɓɛnzamɛn. 
Uli ná-doun zunui Geɓɛɛl ɠɛni Galaade yooi zu, Amool masagi Siɠon ná-zooi ɠɛni zea, ta Ɓasan masagi Wɔge ná-zooi. Zou zɛʋɛ ɠundiɠi ɠila nɔ ɠa é ɠɛni zooi ná zu. 
Zuda ta Izilayɛle ti mɔinni eɠɛ kpoloɗɛi ɠoba ɲaɠaegi. Ti ɠɛni daamii ta kpɔɔlei wosu, ti ɗa ɠoozunɛ. 
