﻿2 Samiyɛle.
22.
Davide niima wuyei looni Ɠɔoɠɔ GALAGI ʋɛ, siɛgi zu naa unmɔɔni da, é kula sili nuiti kpein zeezu, ma un ge la ma mɛɛ ga Sayile. 
É ɠɛni ma: «Ɠɔoɠɔ GALAGI ɠa ga nà-fasai, nà-siɠigi, ùnmɔɔ nui, 
nà-GALAGI, nà-fasai, ʋɛ gè lɔɔɠuzu ná, nà-kɔɔɠɔ zɛpɛgi, zobogi nii é kìzosu, nà-siɠi gaaɠoozagi, dɔ̀ɔɠuzuʋɛ, kìzo nui, nii é kìzosu toosu nuiti ma. 
Mamagi ɠa Ɠɔoɠɔ GALAGI ʋɛ! Siɛgi zu gè tolini da, gè vieni, gè ɠula sìli nuiti kpein zea. 
«Mazɔlɔɔ saai ma ɗɛ lakpatakpagiti ti màaɓɔleni, é ɗa màalua, eɠɛʋelei kɔtuɗɛi la, é faa zuɠoloɠologi ɠɛɛzu. 
Gɔvɛalaazu ɠaluiti ti veleveleni mà, saai ná-tumɔiti ti ɠɛ tùɠɔ, ti ɗa màalua. 
Nà-kidaaʋiligi zu, gè wooɠulani Ɠɔoɠɔ GALAGI ma, gè wooɠulani nà-GALAGI ma, é yɛni ná-masa pɛlɛi wu, é gòomɛni, nà-kpee wooi looni goizu. 
«Naazu, zooi ɓalini, é ɲiikpi, geeɠɔlɔgi ma wuulaagiti ti ɓalini, ti ɲiikpi ná-ziiɠaawanai maaʋele ma. 
Duului ɠa ɠulazu sokpayeɠeiti su, abui nii é galai wosu, naa ɗa ɠula daaʋɛ, ga tiɠilekai é ɗa ɠala. 
É geeɠɔlɔgi ziɛni su, é yei, tonaɓiin gaaɠiligai kɔɠɔi wu. 
É lɛɛni seeluɓɛin ɠɔma, é ɗa ɠoʋe, é ɠula kɛlɛma fiilɛi ɠoʋegiti kɔma. 
É ɓɔɠɔ maaveleveleni ga kpidii, é lɔɔɠu su, fiilɛ wolai ma ɓidii zu, tonaɓiin gaaɠiligai zu. 
Wozakalagi, nii é ɠɛni tuɠɔ, abulekaiti ti ɠɛni zosu ba. 
Ɠɔoɠɔ GALAGI ɠa zikɔzu geeɠɔlɔgi zu, GALA nii é Anii-Pɛ-Unda, naa wooi ɠa ɠulazu. 
É mɛɛinti pilini ga é sili nuiti suvaza, é mainmainti pilini, nii a kɛ ti ʋoluazo. 
Kpoloɗɛi ɓomaʋɛ ɠulani kɛlɛma, eteai ma wuulaagiti maa ɠɛ kala, ga Ɠɔoɠɔ GALAGI ná-kpaazaɠai maaʋele, ta sokpayeɠeiti su viilɛi! 
«É yeemaaleni, é yɛ geezuʋɛ, é nɔ̀un so, é mɛ̀ɛn, é kùla ziɛ wolaiti ga. 
É kùlani sìli nu wolai ya, niiti ti wɔ̀inzeɠezu, tama ti zuɓaai nɔ̀un ba. 
Ti wuzeɠeni dàalɔɠɔma nà-kidaaʋili foloi, kɛlɛ Ɠɔoɠɔ GALAGI ɠa é loni pòlu. 
É kùlani faaɓaagi zu, é kùlani, mazɔlɔɔ nɛ̀ɛʋɛ bɛ. 
«Ɠɔoɠɔ GALAGI vaani bu, é sò eɠɛʋelei nà-telebodai la, é kɛ bɛ̀, eɠɛʋelei zèeiti ɲade pelei la, 
mazɔlɔɔ gè Ɠɔoɠɔ GALAGI ná-peleiti sogɛ, gè la maaɠoozani nà-GALAGI ʋa, ga faa ɲɔu ɠɛɛ vaa maaʋele. 
Gàazu ɠa ná-tɔgiti ba yeenɔpɛ, gè la zeɠezu ná-deveiti ba. 
Gè ɠɛni ga ziimai ɠɛ nui, gè ɓɔɠɔ zoni ga gè mina faaɠaaza gola ɠɛ. 
Ɠɔoɠɔ GALAGI sàlani nà-telebo fai maaʋele ma, eɠɛʋelei nɔ̀un ɲadegai la tɔun gaazu. 
«Zɔi é è ʋɛ ga wooɠɛɠila nui, ɗa ɠɛ naa ʋɛ ga wooɠɛɠila GALAGI, zɔi peelalazu la ba, peelalazu la è ʋa naa letema. 
Zɔi ɲadegai, ɗa ɗa-ɲadedai lɛɛzu ga naa, niiti ti ga yaava nuiti, ɗa ɗa-ɠimalai lɛɛzu ga naati. 
Ɗa maanɔɠɔ nuiti kizosu, ɗa wɛlɛzu gaazulɛɛ nuiti ba, è ti maayei. 
Ɗa ɠa è ga nà-wozakalagi, ee, Ɠɔoɠɔ GALAGI! Ɠɔoɠɔ GALAGI ɠa nà-kpidii zu ɠɛ kala. 
Ni ɗa bà, nà ʋili salaʋusu ɓulugi zaama, ni nà-GALAGI ɠa bà, nà ʋili gè ɓudɛ siɠigi maazu. 
«GALA ná-peleiti daazeeliʋɛ, Ɠɔoɠɔ GALAGI laawooi ɠoleʋɛ. GALA ka ga kɔɔɠɔ zɛpɛgi naati kpein bɛ, niiti ti lɔɔɠuzu tɔun polu. 
Mazɔlɔɔ ɓɛ ɠa é ga GALA, ni Ɠɔoɠɔ GALAGI laade? Ɓɛ ɠa é ga fasai, ni gá-ƓALAGI laade? 
GALA ka é ga nà-siɠi gaaɠoozagi, nii zeeɠaaɓaai, é nà-pelei ɓɛtɛ ga pagɔ. 
Toɠa kɔ̀ɠɔiti kɛɛzu, eɠɛ dopai ɠɔɠɔiti, é tò ada ɠaaɠoozagiti. 
Tɔ ɠa é màalɛlɛzu ga kɔɔɠɔ vai, mɛɛin é ga kɔlu ɓɔigi kpili fai ɓaai, zèeiti ta mɛɛn ɠae ʋilisu ga naa. 
Unmɔɔgi è bosu ga ze, naa ɠa é ga nà-kɔɔɠɔ zɛpɛgi, ɗa-ɓɔbaiti ta sɛ̀bɛlɔɔzu. 
È-zaalai zu, nà ziɛzu valafala, kɔ̀ɠɔiti ti la liizu ga. 
«Nà ʋilɛsu sìli nuiti polu, gè ti zuɠoloɠolo, gè la ɠalega ma, ni gè la ti-ma zuwu ɠaaleʋeni. 
Gè ti-ma zuwu ɠaaleʋeni, gè ti ʋali ga, ti la mɔ wuzeɠea, ti loo kɔ̀ɠɔ wu. 
Ɗa sàamaɠilizu ga zɛbɛi kɔɔɠɔ vai ma, ɗa sìli nuiti toozu bu bɛ̀. 
Ɗa sìli nuiti kpɛɛzu tùɠɔ, nà wɔ̀inzeɠe nuiti koloɠolo. 
Ti kpɔba nu ɠaiziaa, ti la sɔlɔɔni, ni ta Ɠɔoɠɔ GALAGI lolina, naa la ti wooɠaaʋotesu! 
Nà ti ɠɛɛzu ga zooi ma vufiligi, gè ti wolowolo, gè ziɛ ti zu, eɠɛ pele zu ʋalaʋalagi. 
«È kùla nà-nuɓusɛiti ta-ɓaka fai laawu, è màkɛga ga zii ɠiligiti ta-ɠundiɠii. Nuɓusɛiti gè la ti ɠwɛɛ, naati ta botii ɠɛɛzu bɛ̀. 
Wɛɛinti ta ʋaazu, ti ɗa tɛ̀ su. Nà ti levena nɔ feya, ti ɠolo bɛ̀ gaamanɔ. 
Wɛɛinti ta iɲɔteʋei zu, ti zasu ɗa ɓali, ta ɠɛna ɠulaa ta-ziɠigi zu. 
«Ɠɔoɠɔ GALAGI ɠa vulua! Mamagi ɠa bɛ, tɔ ɠa é ga nà-fasai! Ɛsɛ pɛ ge nà-GALAGI maamusɛ, nà-kizo fasai. 
GALAGI é zobo feezu bɛ̀, gè nɔ̀nɔ ʋotokula, é ziiti kolozu bɛ̀, 
ɗa kùlazu sìli nuiti zea. Ɗa sèizu wɔ̀inzeɠe nuiti unda, è kùla nu ɲɔiti zea! 
Naa ɠa é ba, nà è maamusɛ zii ɠiligiti saama, ee, Ɠɔoɠɔ GALAGI! Nà guyei loo è-laaseigi lɛbi vaa ma. 
Ɠɔoɠɔ GALAGI unmɔɔ faa wolai ɠɛa ná-masagi ʋɛ. Toɠa wooɠɛɠiladai ɠɛɛzu naa ʋɛ, nii gulɔ ɲadegai ziaai ma, nii é ga Davide, ta mavofodai, eyɛsu ɠɔ!» 
