﻿2 Samiyɛle.
8.
Naa ʋoluma Davide vɔnini Filisiti nuiti ma, é ti ɠaazu unfe seɠe, é ta-ɠaaɓaai ɠula ti ya. 
É vɔnini ɓalaa Moaɓe nuiti ma. Niiti é ti zoni, é ti laani zooi ma, é ti ɠaaɠwɛ su ga seizu saʋagɔ ga galui. Nu zeizu saʋagɔi zaama, é seizu felegɔiti paani, é seizu ɠilagi yɛ vulua. Moaɓe nuiti ti ɠoloni Davide ʋɛ, ti ɗa mului zala ma. 
Naa ʋoluma Davide vɔnini Soɓa masagi Ɠadadezɛɛl ma, Leɠɔɓe ná-doun zunui, siɛgi zu é ɠɛni liizu la ga ná-masadai zeiɗa ʋolu ziɛ wolai Efelate maaʋɛ. 
Davide soo ɓizɛ zalaʋusu waagila undɔfela (1.700) zoni, ta siɛ kɔɠɔa zalaʋusu waaʋuufelegɔ (20.000). É wotolo ɓizɛ zoo ungila (100) makɛni. É mɔtaiti kɔɠɔʋolu ɲataiti teʋeni. 
Siili yooi zu nuiti ti ɠɛni Damase, naati ti ʋaani ɓɔsu Soɓa masagi Ɠadadezɛɛl ʋa. Davide nu waaʋuufelegɔ maazu felegɔ (22.000) ʋaani ti ʋa. 
Naa ʋoluma, Davide kundiɠiiti seini Damase yooi zu Siili nuiti saama. Siili nuiti ti ɠoloni Davide ʋɛ, ti ɗa mului zala ma. Ɠɔoɠɔ GALAGI ɠɛni fɔnifaamai veezu Davide ʋɛ, ʋɛ kpein é ɠɛni liizu ná ga kɔɔi. 
Davide zanu kɔɔɠɔ zɛpɛgiti seɠeni, niiti ti ɠɛni Ɠadadezɛɛl ná-salaʋusuiti zea, é li ga tiye Zeluzalɛme. 
Davide kɔlu ɓɔi mɔinmɔin seɠeni masagi Ɠadadezɛɛl ná-taa wolaiti su, Ɓeta ta Ɓelotayi. 
Siɛgi zu Ɠamate masagi Toyi mɛnini da ga Davide vɔnigɛ Ɠadadezɛɛl ná-kɔɔʋɛbɛiti pɛ ma, 
é ná-doun zunui Yolame leʋeni Davide ma ga é tuʋɔ, ta é mama fala vai zu Ɠadadezɛɛl ʋa, é vɔni ma, tɔɔzei Toyi ta Ɠadadezɛɛl ti ɠɛni kɔɔi ɠa nɔ ɠɔ. Yolame liizuʋɛ, é liini ga sɔɔlai ma zii pɛ, niiti ti ɠɛni ga walii, zanugi, ta kɔlu ɓɔigi. 
Masagi Davide ti veeni Ɠɔoɠɔ GALAGI ʋɛ, eɠɛʋelei é kɛɛni la niina ga walii ta zanugi, nii é kulani zɔɔma zii ɠiligiti zea, niiti é vɔnini ti ma: 
Edɔme nuiti, Moaɓe nuiti, Amɔn nuiti, Filisiti nuiti, ta Amalɛke nuiti, ta nii kpein é soni kɔɔi zu, é kula Soɓa masagi Ɠadadezɛɛl ya, Leɠɔɓe ná-doun zunui. 
Davide lɔɠɔi mɔta ɠulani, siɛgi zu é ɠaleni la ma, fɔnigai ma Edɔme nu waapuugɔ maazu lɔsaʋai (18.000) ma, Kpolo Ʋɛtugi zu. 
Naa ʋoluma, é kundiɠiiti seini Edɔme yooi ná pɛ su. Edɔme nuiti pɛ ti ɠoloni Davide ʋɛ. Ɠɔoɠɔ GALAGI ɠɛni fɔnifaamai veezu Davide ʋɛ, ʋɛ kpein é ɠɛni liizu ná ga kɔɔi. 
Davide masadai ɠɛɛni Izilayɛle pɛ unda, é ɠɛni tukpɔi ɠaaleʋezu ga sɔledai ná-nuɓusɛiti pɛ bɛ. 
Seluya ná-doun zunui Zoaɓe ɠa é ɠɛni ná-kɔɔʋɛbɛi unda, Ayilude ná-doun zunui Zozafate ɠɛ ga laavaawogi, 
Ayituɓe ná-doun zunui Sadɔke, ta Aɓiataal ná-doun zunui Ayimelɛke ti ɠɛ ga zalaɠa ɠula nuiti, Selaya ɠɛ ga sɛʋɛ ɠɛ nui. 
Yeɠoyada ná-doun zunui Ɓenaya ɠa é ɠɛni Kelɛte nuiti ta Pelɛte nuiti unda, niiti ti ɠɛni ga masa makɛ nuiti. Davide ná-doun zunuiti ti ɠɛni ga zalaɠa ɠula nuiti. 
