﻿2 Samiyɛle.
6.
Davide Izilayɛle ɠɔɔɠɔ nu ʋapagiti gaalɛɛni ba ʋolu, ti ɠɛ ga nu waaʋuusaʋagɔ (30.000). 
Naa ʋoluma, é ʋilɛni pelei ma ta naama ɠɔɔʋɛbɛiti pɛ, ti ɗa li Ɓaalé-Zuda ga ti ʋa ga GALA ná-minazeɠe kesui, nii Ɠɔoɠɔ GALAGI laaseigi maalolisu ma, Fai-Pɛ-Maliɠii, é zeini seeluɓɛinti unda. 
Ti minazeɠe kesui ɠulani Aɓinadaɓe ná-pɛlɛi wu gize unmaʋɛ, ti da wotolo niinɛi zu. Aɓinadaɓe ná-doun zunuiti Uza ta Ayiyo ɠa ti ɠɛni loni wotoloi luɠɔ. 
Ti minazeɠe kesui zeɠeni Aɓinadaɓe ná-pɛlɛi wu gize unmaʋɛ, ti ɗa lii la. Ayiyo ɠɛni ziɛzu wotoloi luɠɔ. 
Davide ta Izilayɛle nuiti pɛ ti ɠɛni ɠoozunɛɛzu Ɠɔoɠɔ GALAGI ɠaazu, ti ɗa gɛingɛin ganigi ma ziiti pɛ gɛin, niiti ti ɓɛtɛai ga sipɛlɛ gului, naa ʋɛɛ kɔnigiti ba, ta papaiti, tamadegiti, sɛkɛiti, ta kɔtɛgiti. 
Ti zeeliai ma Nakon ná-molo loɠazuʋɛ, nikɛiti ti ɓunɛni, ti ɠɛni ɠɛɛzu, ti GALA ná-minazeɠe kesui loo. Uza yeemaaleni, é so. 
Ɠɔoɠɔ GALAGI yiiɠaawanani Uza ma, é doɠa náʋɛ nɔ, tɔɔzei ná-faaɠaazagi ʋa. Uza zaani miná, GALA ná-minazeɠe kesui ɠobaʋɛ. 
Davide yiiɠaawanani, mazɔlɔɔ Ɠɔoɠɔ GALAGI nii ɠɛɠala loɠai woni ga Uza. Ná laasei ge ʋɛɛni ga Pelɛze-Uza (nii poluʋɛ ga «é ɠulaʋɛ Uza ma»), naama laaseigi ɠa dɛ é ba zaaɠaza. 
Naama voloi Davide wola luani Ɠɔoɠɔ GALAGI ʋa, é ɗa ɓɔɠɔ ɠaazaɠa ga: «Nà zoo ɠale gè lɛ ga Ɠɔoɠɔ GALAGI ná-minazeɠe kesui pɔ̀ bɛ?» 
Davide la ɠɛni vaani bu, é ʋa li ga Ɠɔoɠɔ GALAGI ná-minazeɠe kesui pɔ bɛ, Davide ná-taa wolai zu. Ti liini la Gate nui Woɓɛde-Edɔme ná-pɛlɛi wu. 
Ɠɔoɠɔ GALAGI ná-minazeɠe kesui yɛni ná alu saʋagɔ laawu. Ɠɔoɠɔ GALAGI tuya looni Gate nui Woɓɛde-Edɔme ʋɛ ta ná-pɛlɛyeɠei pɛ. 
É woni Davide ma ga Ɠɔoɠɔ GALAGI tuya looʋɛ Woɓɛde-Edɔme ná-pɛlɛyeɠei ʋɛ ta nɔnɔiti pɛ, GALA ná-minazeɠe kesui maaʋele ma. Názuʋɛ Davide liini, é GALA ná-minazeɠe kesui zeɠe Woɓɛde-Edɔme ná-pɛlɛi wu, é lii la Davide ná-taa wolai zu, koozunɛ wolai zaama. 
Ɠɔoɠɔ GALAGI ná-minazeɠe kesui zeɠe nuiti ti kɔɠɔ lo dɔzita ɠɛai ma, Davide nikɛ zinɛ wola ɠila kulani ga zalaɠai ta nikɛ yiʋo ɠila nii gulɔai. 
Davide ɠɛni kuai wosu ga zɛbɛi pɛ Ɠɔoɠɔ GALAGI ɠaazu, maaɠiliai nɔ ga geze zeɠei, kulaai ga zalaɠa ɠula nuiti ta-zeɠei. 
Ʋele ɠana Davide ta Izilayɛle nuiti pɛ ti liini la ga Ɠɔoɠɔ GALAGI ná-minazeɠe kesui Zeluzalɛme, ga koozunɛ wooiti ta puʋu fɛɛ wooiti. 
Tɛi Ɠɔoɠɔ GALAGI ná-minazeɠe kesui ɠɛni lɛɛzu Davide ná-taa wolai zu, Sayile ná-doun anzanui Mikale loni, é ɗa wɛlɛ fenɛtɛlɛ laaʋɛ. É masagi Davide ɠaani, é ɗa ʋili, é ɗa kuai wo Ɠɔoɠɔ GALAGI ɠaazu. É Davide ʋɛlɛʋɛlɛni yiimaʋɛ. 
Ti ʋaani ga Ɠɔoɠɔ GALAGI ná-minazeɠe kesui, ti da seɠe ɠotai wu, nii Davide toni bɛ. Davide gala zalaɠaiti ta ziilɛi zalaɠaiti kulani Ɠɔoɠɔ GALAGI ʋɛ. 
Davide ɓegai ma ga zalaɠai naati kula, é tuya looni nuɓusɛiti bɛ, Ɠɔoɠɔ GALAGI, Fai-Pɛ-Maliɠii laaseigi zu. 
É zɛba é daamianigi ɠaaɠwɛ Izilayɛle nuiti pɛ ba, zunuiti ta anzanuiti, ɛsɛ gilagilagi ɓulu ɠilagila sɔlɔɔni, ta sua mɔgai, é ʋɛɛ leezɛn vɔɔi ma ɓuun gilagila ba. Naa ʋoluma, ɛsɛ pɛ ge ɠaleni ma ná-pɛlɛi wu. 
Davide ɠaleni ma ná-pɛlɛi wu ga é tuya loo ná-pɛlɛ wu nuiti bɛ. Sayile ná-doun anzanui Mikale daaɠomini, é ɠɛ ma: «Ee! Gaamazu Izilayɛle masagi lɛbiya zɔlɔɔgɛ za, é ɠɔba ɲakai ɠulaʋɛ ná-botiɠɛ nuiti ta-wotiɠɛ anzanuiti gaazu, eɠɛ zunu ɲakai ta nɔ!» 
Davide Mikale wooɠaaʋoteni, é ɠɛ ma: «Ɠɔoɠɔ GALAGI ɠa gè nà-koozunɛɛi ɠulaai gaazu, nii é yiimazeɠeai ga ze, é è-ɠɛɛ yɛ ná, ta ná-pɛlɛyeɠei pɛ, é kɛ̀ ga ná-nuɓusɛiti Izilayɛle nuiti ta-lotuɠɔi. Nà koozunɛɛi ɠula dɛ ʋolu, dɛbi vai ma. 
Nà dɛ ɓɔɠɔ ʋɛlɛʋɛlɛsu ʋolu, é leʋe nii ʋa kɛai, gè ɓɔɠɔmaayei. Kɛlɛ naa pɛ ge ɠɛɛ ʋa, lɛbiyai ɠa ve bɛ̀, botiɠɛ anzanui naati zea, niiti è vaazu ti ma.» 
Sayile ná-doun anzanui Mikale la ɠɛni doun zɔlɔɔni, eyɛsu é za. 
