﻿2 Samiyɛle.
5.
Izilayɛle wolodamai zɔiti pɛ ti ʋaani Davide ʋɔ bɛ Eɓelɔn, ti ɠɛ ma: «Ada ga zii ɠila, ta ɲama ɠila. 
Kaite Sayile ná-masadai ma ziɛgi zu gi unda, ɗa ɠa è ɠɛni losu Izilayɛle ná-kɔɔiti tuɠɔ. Ɠɔoɠɔ GALAGI minazeɠeni è ʋɛ, é ɠɛ ma: ‹Ɗa ɠa è ɠɛɛzu ga nà-nuɓusɛi Izilayɛle maaɓɛɛ nui, è ɠɛ ga ná-totuɠɔi.› » 
Izilayɛle ɠɛwolaiti pɛ ti ʋaani masagi Davide ʋɔ bɛ Eɓelɔn. Miná ɠa ti minazeɠe kɛɛni ná yɔɠɔzu Ɠɔoɠɔ GALAGI ɠaazu. Ti gulɔi ziɛni ma, kɛɛ vai zu ga Izilayɛle pɛ ma masagi. 
Davide ná-konagi ɠɛni ga puusaʋagɔ (30), siɛgi zu é zeini la ga masagi. Kona ʋuunaanigɔ (40) ɠa é kɛɛni masadai zu. 
É kona dɔfela ta alu dɔzita ɠɛɛni Eɓelɔn, Zuda wolodamaiti unda, é kɛ ga kona ʋuusaʋagɔ maazu saʋagɔ (33) masadai zu Zeluzalɛme, Zuda ta Izilayɛle wolodamaiti pɛ unda. 
Masagi ta ná-kɔɔɠɔ nuiti ti liini Zeluzalɛme laalɔɠɔma, nii a kɛ ti kɔɔi ʋɛɛ Yeɓuse nuiti ba, niiti ti ɠɛni zeini naama yooi zu. Naati ti ɠɛni Davide ma: «È la lɛa taai nii zu pɛ! Mazɔlɔɔ anɛɛ gaazuɠole nuiti ta dɛkpu nuiti ta è laaʋili.» Naa ʋolu ɠɛni ga Davide la lɛa taazuʋɛ pɛ. 
Kɛlɛ Davide Siyɔn zoni, taai nii makɛgai ga siɠi gaaɠoozagiti, ti ná laasei pɛɛ ga: «Davide ná-taa wolai». 
Naama voloi, Davide ɠɛni ná-kɔɔɠɔ nuiti ma: «Zɔi é pɔ é ziɛ Yeɓuse nuiti bu, é leʋe nɔ ga ziɛ yei ʋelei, é zooi wu, toɠa zeeli ti ma, dɛkpu nui ta gaazuɠole nui niiti wɔinzeɠeʋɛ mà.» Miná ɠa faalaalii naa zeɠeni ná ga: «Gaazuɠole nui ta dɛkpu nui ti la lɛa pɛlɛi wu.» 
Davide zeini taazuʋɛ, é ná laasei pɛɛ ga: «Davide ná-taa wolai». É ta ɓɔni taai zɛbɛi ʋa ga pɛlɛiti ta siɠigiti, niiti é ti loni pɛtugi maaɠoolii zu nii é daaveni, daa ga Milo. 
Davide zɛbɛi ɠɛni liizu ga wɔɔlɔa, tama Ɠɔoɠɔ GALAGI, Fai-Pɛ-Maliɠii ɠɛni ba. 
Tiil masagi Yilame keelaiti teʋeni Davide ma, é sɛdele guluiti teʋe ma, ta pɛlɛ maalɛɛ nuiti, naa ʋɛɛ kɔtu zaɠa nuiti ba. Ti masa pɛlɛi loni Davide ʋɛ. 
Davide kwɛɛni naazu ga Ɠɔoɠɔ GALAGI tɔun toga ga Izilayɛle masagi, ta é ɠɛni ná-masadai ɠaawɔɔlɔzu, ná-nuɓusɛiti maaʋele ma, Izilayɛle nuiti. 
Davide zeɠeai ma Eɓelɔn, é li zeizu Zeluzalɛme, é anza ɠiligaa vuluni, ta é tanigaa zei, niiti ti la vuluni ga zɔiti kɛʋele. É doun zunuiti ta doun anzanuiti sɔlɔɔni naati ba. 
Davide ná-doun zunuiti daaseigiti kaa, niiti ti zɔlɔɔni Zeluzalɛme: Samua, Soɓaɓe, Natan, Salomɔn, 
Yiɓaal, Elisua, Nefɛge, Yafia, 
Elisama, Eliada, ta Elifelɛte. 
Siɛgi zu Filisiti nuiti ti mɛnini la ga ti gulɔi ziaa Davide ma ga é ɠɛ ga Izilayɛle masagi, ti lɛɛni gaiziɛ vai ma. Davide ma wooi mɛnini, é yei kɔɔlaaɠai zu. 
Filisiti nuiti ti ʋaani ga kɔɔi, ti ʋu Lefayime ʋɛtugi zu. 
Davide Ɠɔoɠɔ GALAGI ɠaazaɠani, é ɠɛ ma: «Nà zoo nɛi gè li Filisiti nuiti daalɔɠɔma? Ɗa ti lɔ nɛi zèezu ɓaa?» Ɠɔoɠɔ GALAGI gooɠaaʋoteni, é ɠɛ ma: «Li, tɔɔzei zeɠema nɔpɛ ge la ba, nà Filisiti nuiti dɔɔzu è yeezu.» 
Davide zeelini Ɓaale-Pelasime, é vɔni ti ma miná. Davide ɠɛni ma: «Ɠɔoɠɔ GALAGI zeɠe wɔɔʋɛ sìli nuiti ta-ɠɔɔɓɔgi ʋa tùɠɔ, eɠɛʋelei ziɛi a ɗa kaaɠai ɠolo la.» Naa ɠa é kɛɛni, ti ná laasei pɛɛni ga Ɓaale-Pelasime (nii poluʋɛ ga «Maliɠii nii é zeɠe wɔɔzu»). 
Filisiti nuiti ti ta-ɠɔɔɠɔ ganigiti tooni ya miná, Davide ta ná-kɔɔɠɔ nuiti ti naati seɠe. 
Filisiti nuiti ti ɠaleni ma ʋolu ga kɔɔi, ti ʋu Lefayime ʋɛtugi zu. 
Davide Ɠɔoɠɔ GALAGI ɠaazaɠani ʋolu. Naa gooɠaaʋoteni, é ɠɛ ma: «Mina ti laaɠomi. Ɠula ga ti ʋoluʋelei, ɗa zeelizu ti ma guluiti tetemaʋɛ. 
Siɛgi zu è nu ɠɔɠɔ lugi mɛnisu da guluiti unsuʋɛ, zuvilɛ, è ʋa, mazɔlɔɔ názu ɠa gè losu da è luɠɔ, nii a kɛ gè vɔni Filisiti nuiti ma.» 
Davide naa ɠɛɛni, nii Ɠɔoɠɔ GALAGI boni ma. É vɔnini Filisiti nuiti ma, é ɗa ti ɓɛ, é zo Geɓa, é zeeli Gezɛɛl. 
