﻿2 Samiyɛle.
2.
Naama vaiti poluma, Davide Ɠɔoɠɔ GALAGI ɠaazaɠani, ga ni toɠa zoo liizu, é zei Zuda laa wolai gila su. Ɠɔoɠɔ GALAGI gooɠaaʋoteni, é ɠɛ ma: «Ungo, ɗa zoo liizu.» Davide ɠɛ ma: «Taai ma ɓɛgele zu?» Ɠɔoɠɔ GALAGI ɠɛ ma: «Eɓelɔn.» 
Davide liini zeizu miná ta anza felegɔiti, Zizeleyɛle nui Ayinoame, ta Aɓigayile, poanzai nii Kaalamɛle nui Naɓale zɛni. 
É liini ɓalaa ga ná-kɔɔɠɔ nuiti pɛ, ta ta-ʋɛlɛyeɠeiti, ti li, ti zei Eɓelɔn maaɠoolii zu laaiti su. 
Zuda nuiti ti ʋaani miná, ti gulɔi ziɛ Davide ma ga é ɠɛ ga Zuda masagi. Davide mɛnini ga Yaɓese nui niiti ti Galaade, ti Sayile maaɠuluʋɛ. 
Davide keelaiti teʋeni ti ma, é ɠɛ ti ma: «Ɠɔoɠɔ GALAGI tuya loo wo ʋɛ, tɔɔzei wooɠɛɠiladai naa ʋa, nii wo kɛa wo-maliɠii Sayile ʋɛ, ga wo maaɠulua. 
Ɠɔoɠɔ GALAGI ɓɔɠɔi ɓalaa zoo é nuɓɔɠɔlai ta wooɠɛɠiladai ɠɛ wo ʋɛ. Nà wa-nuɓɔɠɔlai ɠɛɠala ɠɛ wo ʋɛ. 
À zɛbɛzeɠe, wo ɠɛ ga gaaɓaa nu wolaiti. Wo-maliɠii Sayile zaa, kɛlɛ à suɠwɛɛ ga Zuda nuiti ti gulɔi ziɛʋɛ mà, ga gè ɠɛ ga ta-masagi.» 
Naama ziɛgi zu, Sayile ná-kɔɔɠuluɓai, Nɛɛl ná-doun zunui Aɓenɛɛl liini ga Sayile ná-doun zunui Iseɓaale Maɠanayime taazuʋɛ. 
É liini, é dɛɛ ga naa ɠa é ga masagi Galaade, Asuul, Zizeleyɛle, Efelayime, ta Ɓɛnzamɛn yooiti unda, suɓuɠa zu Izilayɛle yooi kpein. 
Sayile ná-doun zunui Iseɓaale ná-konagi ɠɛni ga puunaanigɔ (40), siɛgi zu é zeini la ga Izilayɛle masagi. Kona felegɔ ɠa é kɛɛni masadai zu. Kɛlɛ Zuda wolodamaiti ti ɠilini Davide ʋa. 
Davide masadai ɠɛɛni Zuda wolodai unda kona dɔfela, alu dɔzita laawu Eɓelɔn. 
Nɛɛl ná-doun zunui Aɓenɛɛl ta Sayile ná-doun zunui Iseɓaale ná-kɔɔɠɔ nuiti ti zeɠeni Maɠanayime, ti ɗa li ga Gaɓaɠɔn ʋele. 
Seluya ná-doun zunui Zoaɓe ta Davide ná-kɔɔɠɔ nuiti ɓalaa ti ʋilɛni pelei ma, ti zeizu felegɔ pɛ ti ɠomi kpoigi ɠobaʋɛ nii é Gaɓaɠɔn, ti lopele ɓɛtɛ, zɔiti ti lo ziɛ ʋoluʋɛ, zɔiti ɓalaa ti lo ziɛ ʋoluʋɛ. 
Aɓenɛɛl ɠɛni Zoaɓe ma: «Nà pɔ ga ɗa-zunu loungoi tanigaa ta nɔ̀nɔi tanigaa ti kɔ ga gilagila.» Zoaɓe ɠɛni ma: «Zèe ɠa bu.» 
Kɔɔɠɔ nu puugɔ maazu felegɔ (12) ɠulani Ɓɛnzamɛn ma wolodamaiti saama, ta Sayile ná-doun zunui Iseɓaale letegi, salaʋusu puugɔ maazu felegɔ (12) ɠula Davide ná-kɔɔɠɔ nuiti saama. 
Kɔɔɠɔ nui ɠilagilagi zili nu zoni nɔungi ʋa, é boɠa zɔkpɔi lɔ kokakamaʋɛ, eyɛsu ti pɛ ti loo ʋɔɔma. Ti Gaɓaɠɔn ɠobaʋɛ miná laasei pɛɛni ga Boɠa Zɔkpɔ Ɓalagi. 
Kɔɔi wuzeɠeni ti yɔɠɔzu, é ɓɔi. Davide ná-nuiti ti ziɛni Aɓenɛɛl ta Izilayɛle nuiti bu naama voloi. 
Seluya ná-doun zunu saʋagɔ ɠɛni salaʋusuiti saama: Zoaɓe, Aɓisayi, ta Azayɛle. Azayɛle veɠani ɓɔɠɔ ma, é ɓizɛ, eɠɛ dopai é dɔɓɔi zu. 
É ʋilɛni Aɓenɛɛl ʋolu, é ɗa kpɛ. É ʋilɛni naa ʋolu, é la zeɠeni polu, é ʋa li ga yeezazu ʋele ɓaa ɠɔʋɛzu ʋele. 
Aɓenɛɛl ungi latini, é gaazaɠagi wo, é ɠɛ ma: «Azayɛle, ɗa ɠa è pòlu?» Azayɛle ɠɛ ma: «Ungo, nà ʋe.» 
Aɓenɛɛl ɠɛni ma: «Li ga yeezai, ɓaa ɠɔʋɛi, è ʋilɛ salaʋusu zunu loungoi nii gila polu, è ná-kɔɔɠɔ zɔɔlaiti kula zea.» Kɛlɛ Azayɛle la ɠɛni kɛɛni, é ʋa zeɠe polu. 
Aɓenɛɛl ɠɛni ma ʋolu: «Zeɠe pòlu, lee vaa zu è dìizu è ʋaa vai ma? Nà zoo ɠale gè wɛlɛ è-liɛ Zoaɓe ɠaazu?» 
Kɛlɛ Azayɛle la ɠɛni kɛɛni, é ʋa zeɠe polu. Aɓenɛɛl ná-kpɛɛin ma ungi lɔ Azayɛle ɠogi zu, é ɠula ga poluʋelei. É looni gaama, é za ná nɔ. Nu nɔpɛ a la zeelina ʋɛ Azayɛle zaai ná, kɛni a la lo. 
Zoaɓe ta Aɓisayi ti ʋilɛni nɔ Aɓenɛɛl ʋolu, foloi daazuʋɛ kpein ti ɗa zeeli Ama ɠizei ma, Giya letemaʋɛ, Gaɓaɠɔn teʋebai zu ʋelei. 
Ɓɛnzamɛn nuiti ti ɠaalɛɛni ba, ti ɓun ɓɔɠɔ ma Aɓenɛɛl ɠobaʋɛ, ti gize unmaʋɛ zo. 
Aɓenɛɛl ɗa wooɠula Zoaɓe ma, é ɠɛ ma: «Ade la looɠoga kɔɔi ɠɔɔzu ɓɔɠɔ laalɔɠɔma ga boɠa zɔkpɔi? È la gaaɠaazu ga niima vaiti gaaɓelagi ɠa ga faa ɲɔu? Lee ɠa è maaɓɔunsu, è ʋa bo ɗa-nuiti ma ga ti zeɠe ti-ɠɛɛlointi polu?» 
Zoaɓe gooɠaaʋoteni, é ɠɛ ma: «Gè ɠonaa Ɠɔoɠɔ GALAGI ma, nii é vulua, ni è la ɠɛni ɓɔɛni ɠana, nà-nuiti ti ɠɛa yɛsu wo ɓɛɛzu eyɛsu lina sobu.» 
Zoaɓe puʋugi vɛɛni, kɔɔʋɛbɛi pɛ ge loni, ti looɠo kɔɔi ʋa ta Izilayɛle nuiti kpɛɛ vai ʋa. 
Aɓenɛɛl ta ná-kɔɔɠɔ nuiti ti ziɛni naama ɓidii ɲɛgɛlɛin, Zuludɛn ma ʋɛtu nɛmɛi zu, ti zeeli Zuludɛn ma, ti kpudɛ, ti Ɓitelon maaleʋe, ti zeeli Maɠanayime. 
Zoaɓe zeɠeai ma Aɓenɛɛl ʋolu, é ná-kɔɔʋɛbɛiti pɛ gaalɛɛni ba. É ɠula Azayɛle ʋolu, nu puugɔ maazu taaʋuugɔ (19) ɠiligaa ɠa ti la ɠɛni ɓɔɛni toligi ma, Davide ná-nuiti saama. 
Kɛlɛ Davide ná-nuiti ti nu unsaʋagɔ nu ʋuulɔzita (360) ʋaani Ɓɛnzamɛn nuiti ta Aɓenɛɛl ná-nuiti saama. 
Ti liini ga Azayɛle ma ʋoomai, ti maaɠulu kɛɛɠɛ ná-kabai zu Ɓɛteleyɛme. Zoaɓe ta ná-kɔɔɠɔ nuiti ti ɲiini piin ziɛzu, ti zeeli Eɓelɔn geelaalaosuʋɛ. 
