﻿1 Samiyɛle.
22.
Davide zeɠeni miná, é li, é lɔɔɠu Adulame ʋugi zu. Kɛɛɠɛlointi ta ná-pɛlɛyeɠei wu nuiti pɛ ti mɛnigai ma, ti liini pɔ bɛ. 
Naa ʋoluma, maanɔɠɔ nuiti pɛ, ta niiti kuyei ɠɛni ti ma, ta niiti ti ɠoozu la ɠɛni nɛɛni, naati pɛ ti ɠaalɛɛni ba Davide ɠoba, é ɠɛ ga ta-ɠundiɠii. Ti ɠɛni ga nu unnaanigɔ (400) ɠɛɠala. 
Davide zeɠeni miná, é li Misepé, Moaɓe yooi zu. É ɠɛni Moaɓe masagi ma: «Nà è maanɛɛnɛzu, ga kɛ̀ɛni ta dèe ti ʋa, ti zei ʋɛ, eyɛsu gè ɗa sò pelei ɠa, Ɠɔoɠɔ GALAGI ʋɛ.» 
Davide liini ga kɛɛɠɛ ta dee, Moaɓe masagi ná-koizuʋɛ. Ti yɛni miná siɛgi naa pɛ su Davide kɛɛni dɔɔɠui zu. 
Yeeta, GALA goo wo nui Gade ɠɛni Davide ma: «Ɠula dɔɔɠui nii zu, ɠale ma, è li Zuda yooi zu.» Naazu Davide liini, é lɔ Ɠelɛte lɔɓɔi zu. 
Sayile ɠɛni Giɓea, é zeini gizei ma, tamalise wului ma niinigi wu, ná-kpɛɛin zoni zea, ná-botiɠɛ nuiti kakugai ma. É mɛnini ga ti Davide ta ná-nuiti kaaʋɛ. 
É ɠɛni ná-botiɠɛ nuiti ma: «Ɓɛnzamɛn nuiti, à woilo gòoi ma! Wa ɠisiɛzu ga Izayi ná-doun zunui nuu ɠa kpalagiti fe wo pɛ zea, ta leezɛn ɓeleiti? Wa ɠisiɛzu ga toɠa wo zei nu ungilagilagiti unda, ta nu waagilagilagiti unda ɓaa? 
Lee vaa zu mu, wo pɛ wo yaavai lɔɔzu mà? Mazɔlɔɔ wo tanɔpɛ ge la boni mà ga dòun zunui ti, ta Izayi ná-doun zunui, Davide, ti minazeɠeni yɔɠɔzu. Wo tanɔpɛ ge la yiizoolɛni ga é ʋa dɛɛ ga ze, ga dòun zunui ɠa nà-botiɠɛ nui laaʋilisu mà, nii a kɛ é bali lɛ tùɠɔ, eɠɛʋelei ade kaazu la za.» 
Edɔme nui Dowɛge, nii é ɠɛni Sayile ná-botiɠɛ nu wolaiti saama, naa Sayile wooɠaaʋoteni, é ɠɛ ma: «Gè Izayi ná-doun zunui ɠaaʋɛ, é ʋa Nɔɓe, Ayituɓe ná-doun zunui Ayimelɛke ʋɔ bɛ. 
Ayimelɛke Ɠɔoɠɔ GALAGI ɠaazaɠagɛ Davide ʋɛ, é daamianigiti fe zea, é Filisiti nui Goliate ná-boɠa zɔkpɔi ve zea.» 
Masagi nuiti teʋeni, ga ti ʋa ga Ayituɓe ná-doun zunui Ayimelɛke, nii é ɠɛni ga zalaɠa ɠula nui, ta ná-pɛlɛyeɠei wu nuiti pɛ, ti ga zalaɠa ɠula nuiti Nɔɓe. Ti pɛ ti ʋaani, ti ɓɔɠɔ lɛ ga masagi. 
Sayile ɠɛni ma: «Woilo ga pagɔ, Ayituɓe ná-doun zunui!» Naa gooɠaaʋoteni, é ɠɛ ma: «Gòi logɛ, màliɠii.» 
Sayile ɠɛ ma: «Lee vaa zu wa Izayi ná-doun zunui wo woyai lɔɔzu mà? Lee vaa zu è ɓului ta boɠa zɔkpɔi veai zea, è Ɠɔoɠɔ GALAGI ɠaazaɠa bɛ, nii a kɛ, é wuzeɠe dàalɔɠɔma, é bali lɛ tùɠɔ, eɠɛʋelei é kɛɛzu la za?» 
Ayimelɛke masagi wooɠaaʋoteni, é ɠɛ ma: «Ɗa-wotiɠɛ nuiti saama, ɓɛ ɠa é ga wooɠɛɠila nu, ga Davide ɠɛʋele? É ga è-nɛkoi, é ga è makɛ nui, naa pɛ poluma tɔ lɛi unfema wolai ʋa ɠɛ zea ɗa-ʋɛlɛi wu ɓaa? 
Ma mɔun ge la ga nuu ɓalaa, gè ʋa ɠɛ GALA gaazaɠasu bɛ. Kɛlɛ naa li poun! Gè la ɠisiɛni kaipa ga gè woya lɔ è ma. Tɔ ɠa é ba, mina niima ɠasɔi la ùnma, ɓaa nà-pɛlɛyeɠei wu nuɓusɛiti unma, mazɔlɔɔ gè la faa nɔpɛ kwɛɛ niima vai zu.» 
Masagi ɠɛni ma: «Ayimelɛke, ɗa zaazu, wa ɗa-ʋɛlɛyeɠei wu nuiti pɛ.» 
Naa ʋoluma masagi ɠɛni makɛ nuiti ma, ti ɠɛni kobaʋɛ: «À li, wo Ɠɔoɠɔ GALAGI ná-zalaɠa ɠula nuiti paa, mazɔlɔɔ tiya ɓalaa ti ɓɔgɛ Davide ʋa, ti ɠɛa kwɛɛni ga toɠa ʋelazu, ti la boni mà.» Kɛlɛ, masagi ná-botiɠɛ nuiti ti la ɠɛni kɛɛni, ti ʋa yeevɔɔɠu Ɠɔoɠɔ GALAGI ná-zalaɠa ɠula nuiti ba. 
Masagi ɠɛ ʋele ɠana Dowɛge ma: «Li, è zalaɠa ɠula nuiti paa.» Edɔme nui Dowɛge ɠa é latini, é zalaɠa ɠula nuiti paa. Naama voloi, zunu ʋuulɔsaʋa maazu lɔɔlugɔ (85) ɠa é paani, niiti zalaɠa ɠula zeɠei ɠɛni ti ɠɔba. 
É Nɔɓe nuiti paani mɔnɔ ga boɠa zɔkpɔi, zalaɠa ɠula nuiti ta-laazuʋɛ. É tɔɔzeini zunuiti ma, é li anzanuiti, ta doungoiti pɔ, naa ʋɛɛ ɲiimiɓɔlegiti ba, ta ɓalaa nikɛiti, ta soovalegiti, ta baalagiti, é ti pɛ paani. 
Kɛni Aɓiataal, nii é ɠɛni ga Ayimelɛke ná-doun zunui, é ga Ayituɓe ná-dounloin, naa ɠila kpe nɔ ɠa é zooni é ʋela, é li Davide ʋɔ bɛ. 
Aɓiataal boni Davide ma ga Sayile Ɠɔoɠɔ GALAGI ná-zalaɠa ɠula nuiti paaʋɛ. 
Davide ɠɛni Aɓiataal ma: «Gè gaaɠaani ga Edɔme nui Dowɛge ɠa li nɔ ti, é niima vaiti daazeeli Sayile ma, tɔɔzei é ɠɛni Nɔɓe naama voloi. Ɗa-ʋɛlɛyeɠei wu nuiti saa vai ma ungi ɠa é ga ze. 
Naa ɠa é ba, yɛ kòba, mina lua, mazɔlɔɔ zɔi é zɛ̀nvui ɠaiziɛzu, toɠa ɗa ɓalaa è-yɛnvui ɠaiziɛzu. Kɛlɛ ni ɗa kòba, nà è makɛ ga pagɔ.» 
