﻿Gaalu Sɛʋɛi.
33.
Peleiti pɛtɛ Izilayɛle nuiti ti leʋeni da, ti ɠulaai ma Ezipete yooi ʋa, ti zeiɗai kpasu, Moize ta Aalɔn ti loni ti luɠɔ. 
Moize ti-ʋuuzuʋɛti ta ti-ziɛzuʋɛti sɛʋɛni, eɠɛʋelei Ɠɔoɠɔ GALAGI ná-devei ɠɛni la. 
Alu mɔungi ma volo puugɔ maazu lɔɔlugɔi (15) ma, Pakegi ʋoluma zobui, ti liini, ti zeɠe Lamesɛse. Izilayɛle nuiti ti ɠulani ɓɔɠɔ yeema zooi ʋa, Ezipete nuiti kpein gaazu ɠɛni ti ʋa. 
Ezipete nuiti ti ɠɛni ti-loun zunu mɔungiti maaɠuluzu, niiti Ɠɔoɠɔ GALAGI ti ʋaani. Tukpɔi ɠana é daalɛɛni ta-ɠalagiti bu. 
Izilayɛle nuiti ti zeɠeni Lamesɛse, ti li, ti ʋu Sukɔte. 
Ti zeɠeni Sukɔte, ti li, ti ʋu Etame, nii é teʋebai ɠaaɓelazuʋɛ. 
Ti zeɠeni Etame, ti ɠaaɠale ma ga ʋogi Pi-Ɠaɠilɔte ʋele, Ɓaale-Sefon folo ɠulazu ʋelei, ti li, ti ʋu Migedɔle letemaʋɛ. 
Ti zeɠeni Pi-Ɠaɠilɔte, ti leʋe Seeli Kpoloɗɛi zaamaʋɛ, teʋebai ʋɔ pelei. Ti folo saʋagɔ ziɛ woni Etame teʋebai zu, ti li, ti ʋu Mala. 
Ti zeɠeni Mala, ti zeeli Elime, ʋɛ ziɛun puugɔ maazu felegɔ (12) ɠɛni ná, ta dɔɔ wulu ʋuulɔfela (70), miná ɠa ti ʋuuni ná. 
Ti zeɠeni Elime, ti li, ti ʋu Seeli Kpoloɗɛi ɠobaʋɛ. 
Ti zeɠeni Seeli Kpoloɗɛi ɠobaʋɛ, ti li, ti ʋu Sin teʋebai zu. 
Ti zeɠeni Sin teʋebai zu, ti li, ti ʋu Dofeka. 
Ti zeɠeni Dofeka, ti li, ti ʋu Aluse. 
Ti zeɠeni Aluse, ti li, ti ʋu Lefidime, ʋɛ nuɓusɛiti ti la ɠɛni ziɛ zɔlɔɔni ná ga ti ʋa ɓɔɔle. 
Ti zeɠeni Lefidime, ti li, ti ʋu Sinayi teʋebai zu. 
Ti zeɠeni Sinayi teʋebai zu, ti li, ti ʋu Kiɓelɔte-Ɠataava. 
Ti zeɠeni Kiɓelɔte-Ɠataava, ti li, ti ʋu Ɠaselɔte. 
Ti zeɠeni Ɠaselɔte, ti li, ti ʋu Litima. 
Ti zeɠeni Litima, ti li, ti ʋu Limon-Peelɛse. 
Ti zeɠeni Limon-Peelɛse, ti li, ti ʋu Liɓina. 
Ti zeɠeni Liɓina, ti li, ti ʋu Lisa. 
Ti zeɠeni Lisa, ti li, ti ʋu Keɠelata. 
Ti zeɠeni Keɠelata, ti li, ti ʋu Safɛɛl gizei ma. 
Ti zeɠeni Safɛɛl gizei ma, ti li, ti ʋu Ɠalada. 
Ti zeɠeni Ɠalada, ti li, ti ʋu Makelɔte. 
Ti zeɠeni Makelɔte, ti li, ti ʋu Taɠate. 
Ti zeɠeni Taɠate, ti li, ti ʋu Tala. 
Ti zeɠeni Tala, ti li, ti ʋu Mitaka. 
Ti zeɠeni Mitaka, ti li, ti ʋu Ɠasemona. 
Ti zeɠeni Ɠasemona, ti li, ti ʋu Moselɔte. 
Ti zeɠeni Moselɔte, ti li, ti ʋu Ɓené-Yaakan. 
Ti zeɠeni Ɓené-Yaakan, ti li, ti ʋu Ɠɔɔl-Gidegade. 
Ti zeɠeni Ɠɔɔl-Gidegade, ti li, ti ʋu Yoteɓata. 
Ti zeɠeni Yoteɓata, ti li, ti ʋu Aɓelɔna. 
Ti zeɠeni Aɓelɔna, ti li, ti ʋu Ɛsiyon-Geeɓɛɛl. 
Ti zeɠeni Ɛsiyon-Geeɓɛɛl, ti li, ti ʋu Sin teʋebai zu, tɔ ɠa é ga Kadɛse. 
Ti zeɠeni Kadɛse, ti li, ti ʋu Ɠɔɔl gizei ma, Edɔme yooi ɠwɛmaʋɛ. 
Eɠɛʋelei Ɠɔoɠɔ GALAGI ná-devei woni da, zalaɠa ɠula nui Aalɔn lɛɛni Ɠɔɔl gizei ma, é za, Izilayɛle nuiti kulaai ma Ezipete yooi ʋa ma ɠonagi ʋuunaanisiɛi (40) ma, alugi lɔɔlusiɛi ma volo mɔungi ma. 
Aalɔn ná-konagi ɠɛni ga kona ungila kona ʋuufele maazu saʋagɔ (123), siɛgi zu é zaani la Ɠɔɔl gizei ma. 
Názu ɠa Alade masagi, Kanaan yooi zu nui, nii é ɠɛni zeini zooi unda lɛkpɛmaʋɛ nu yeezazuʋɛ, naa mɛnini da ga Izilayɛle nuiti ta ʋaazu. 
Ti zeɠeni Ɠɔɔl gizei ma, ti li, ti ʋu Salamona. 
Ti zeɠeni Salamona, ti li, ti ʋu Punon. 
Ti zeɠeni Punon, ti li, ti ʋu Wɔɓɔte. 
Ti zeɠeni Wɔɓɔte, ti li, ti ʋu Ye-Aɓalime, Moaɓe kwɛpelemaʋɛ. 
Ti zeɠeni Ye-Aɓalime, ti li, ti ʋu Diɓon-Gade. 
Ti zeɠeni Diɓon-Gade, ti li, ti ʋu Alamon-Diɓelatayime. 
Ti zeɠeni Alamon-Diɓelatayime, ti li, ti ʋu Aɓalime gizeiti zɔɠɔzuʋɛ, Neɓo gizei ɠakalaʋɛ. 
Ti zeɠeni Aɓalime gizeiti ma, ti li, ti ʋu Moaɓe nɛmɛi zu, Zuludɛn ɠobaʋɛ, Zeliko letemaʋɛ. 
Ti ʋuuni Zuludɛn ɠobaʋɛ, é zo Ɓɛte-Yesimɔte, é li Aɓɛle-Sitime, Moaɓe nɛmɛiti su. 
Ɠɔoɠɔ GALAGI ɓɔɛni Moize ʋɔ, Moaɓe nɛmɛiti su Zuludɛn ɠobaʋɛ, Zeliko letemaʋɛ, 
é ɠɛ ma: «Ɓɔɛ Izilayɛle nuiti pɔ, è ɠɛ ti ma: Siɛgi zu wo Zuludɛn ɓudɛzu la, wo lɔ Kanaan yooi zu, 
wa zooi zu nuiti kpein kpɛ luɠɔ, wo ta-ɠɔɔɠɔ ganigiti kpein koloɠolo, ti ti ɓɛtɛai ga kɔtui, wo ta-vololibaiti kpein koloɠolo, ti ɓɛtɛai ga kɔlui gaawuungai, wo ta-zalaɠa ɠula adaʋɛti kpein koloɠolo. 
Wa zooi zeɠe ga wɔnɔ, wo zei ná, mazɔlɔɔ gè zooi vea wo ya, é ɠɛ ga wɔnɔ. 
Wa zooi ɠaaɠwɛ ʋa, wa kɛ ga kpakutoomai, eɠɛʋelei wa-wolodamaiti ti la. Niiti ti mɔinɗai, wa ta-yooi wɔɔlɔ, wo fe ti ya, niiti ti la mɔinni, wa ta-yooi ve ti ya, kɛlɛ gola mina wɔɔlɔ. Ɛsɛ ka naa zɔlɔɔ, nii a ve zea ga kpakutoomai, wa ti zeɠe ga wɔnɔ, eɠɛʋelei wo-ɠɛɛni ta-wolodamaiti ti la. 
Kɛlɛ ni wo la zooi zu nuiti kpɛɛni luɠɔ, ti zaama, niiti wa ti yɛ ná, ta ɠɛɛzu ga ɠaingi, ti ɗa ʋu wo-ɠaazuʋɛti, ta ani ɠaazoɓagiti ti ɗa wo-ɠo kakamaʋɛti kpota, ta ɠɛ ga wo zili nuiti zooi naa zu, ʋɛ wo ʋaazu zeizu ná. 
Názu ɠa nà wo zo da, eɠɛʋelei gè deveni la ga gè ti zo da.» 
