﻿Gaalu Sɛʋɛi.
25.
Izilayɛle nuiti ti zeini Sitime. Nuɓusɛiti ti tɔɔzeini ga ɓɔɠɔ lɔa koloɠologi zu, ta Moaɓe anzanu lointi. 
Naati ti ti lolini ga ti zalaɠai ɠula ta-ɠalagiti bɛ. Nuɓusɛiti ti vaani bu, ti zalaɠa laamii wo, ti nɔkɔ naati ta-ɠalagiti bu. 
Ti ʋɔɔpɛɛni naati ta-ɠalagi Ɓaale-Peyɔɔl lɛbi vai ʋa. Naama vai Ɠɔoɠɔ GALAGI yiiɠaawanani ti laalɔɠɔma. 
Ɠɔoɠɔ GALAGI ɠɛni Moize ma: «Nuɓusɛiti kpein gaalɛ ba, è ta-ɠundiɠiiti sɛlɛ guluiti ba, foloi ɠa, gàazu, naa ɠa a kɛ nà-ziiɠaawanai zeɠe Izilayɛle maala.» 
Moize ɠɛni Izilayɛle lukpɔɠaaleʋe nuiti ma: «Wo ɠilagilagi ná-nuiti paa, niiti ti ʋɔɔpɛai Ɓaale-Peyɔɔl lɛbi vai ʋa.» 
Zunu ɠila ge ɠɛni Izilayɛle nuiti saama, é ʋaani ga Madiyan anzanu ɠila kɛɛɠɛlointi saama, Moize ta Izilayɛle ʋɛbɛi kpein gaazu, naazu naati ti ɗa wɔlɔ, GALA daaɠomi seɠe ʋɛlɛi laaʋɛ. 
Zalaɠa ɠula nui Aalɔn ná-doun zunui Eleazaal ná-doun zunui Fineyase naama vai ɠaai ma, é wuzeɠeni bɛbɛi zaama, é kpɛɛin zeɠe, 
é ʋilɛ Izilayɛle zunui ʋolu ná-seɠe ɠotai wu, é ti felegɔ pɛ sɔ ʋɔɔma, kpɛɛin zunui volokula, é anzanui zo kobuʋɛ. Naazu maanɔɠɔ vai ɓeni Izilayɛle nuiti saama. 
Nu waaʋuufelegɔ maazu naanigɔ (24.000) ɠa é zaani maanɔɠɔi naa zu. 
Ɠɔoɠɔ GALAGI ɓɔɛni Moize ʋɔ, é ɠɛ ma: 
«Zalaɠa ɠula nui, Aalɔn ná-doun zunui Eleazaal ná-doun zunui Fineyase ɠa é nà-ziiɠaawanai zeɠea Izilayɛle nuiti maala, nà-ziizoolɛi ɠa é ma ti zaama, naa ɠa é kɛa, nɛ̀i gè ga GALAGI, nà pɔ ga ti nà ɠila nɔ dɛ̀bi, nà-ziiɠaawanai zu, gè la mɔ Izilayɛle nuiti ma zuwu ɠaaleʋeni. 
Naa ɠa é ba, ɗa ɠɛ ma: ‹Gè minazeɠegi ɠɛa tɔun bɛ, nii a ɠɛ ga ziilɛigi ma ungi. 
Toɠa ɠɛ ga tɔun nɔnɔ, ta mavofodaiti. Zalaɠa ɠula wotii ɠa ɠɛ ga tɔnɔ, yeeɠɛɠalai pɛ su, tɔɔzei é ná-ziizoolɛi ɠulaʋɛ kɛlɛma ná-GALAGI ʋɛ, é koto gba vai ɠɛɛʋɛ Izilayɛle nuiti ta-vaa zu.› » 
Izilayɛle zunui ti paani ta Madiyan anzanui ʋɔɔma, daaseigi ɠɛni ga Zimili, Salu ná-doun zunui. É ɠɛni ga Simiyɔn ná-pɛlɛyeɠe ɠundiɠii ta. 
Madiyan anzanui nii ti paani, daaseigi ɠɛni ga Koziɓi, kɛɛɠɛ laaseigi ɠɛni ga Suul, nii é ɠɛni ga bolodama mɔinmɔin ma ɠundiɠii, kulaai bolodai gila su Madiyan yooi zu. 
Ɠɔoɠɔ GALAGI ɓɔɛni Moize ʋɔ, é ɠɛ ma: 
«Vala Madiyan nuiti ba, è ti-ma zuwu ɠaaleʋe. 
Mazɔlɔɔ ti ɠɛni ga wo zili nuiti, ti laavegai ga keleɠele ɲɔi, Peyɔɔl ná-fai zu, ta Koziɓi, nii é ɠɛni ga Madiyan ɠundiɠii ta ná-doun anzanui, nii é zaani ga maanɔɠɔi, tɔɔzei Peyɔɔl ná-fai ʋa.» 
Maanɔɠɔ vai naa leʋega ʋoluma, 
