﻿Gaalu Sɛʋɛi.
20.
Konagi ma alu mɔungi, Izilayɛle nuɓusɛiti ti zeelini Sin teʋebai zu, ti ʋu Kadɛse. Miná ɠa Miliyame zaani ná, ti maaɠulu ná. 
Ziɛ la ɠɛni ná. Nuɓusɛiti ti ɠaalɛɛni ba Moize ta Aalɔn laalɔɠɔma. 
Ti kpɔɛi ʋɛɛni Moize ʋa, ti ɠɛ ma: «Ee, ni gá la ɠɛni zaani, siɛgi zu gi-ɠɛɛleaiti ti ɠɛni zaazu la, Ɠɔoɠɔ GALAGI ɠaazu! 
Leeni vaa zu wo ʋaai ga Ɠɔoɠɔ GALAGI ná-nuɓusɛiti niima leʋebai zu, gi za gá gá-loganiiti? 
Leeni vaa zu wo zeɠeai ga giye Ezipete yooi zu, wo ʋa ga giye niima adaʋɛ nimizai zu? Nu la zooga é ʋa ani nɔpɛ sin ʋɛ. Nu la kooleɠoole gulu ɠaazu ʋɛ, ɓaa kpelei, ɓaa gelenade gului. Ziɛ vɔlɔ ɠa é la ná, nu ʋa ɓɔɔle.» 
Moize ta Aalɔn ti maaɠoozani bɛbɛi ʋa, ti li GALA daaɠomi seɠe ʋɛlɛi laaʋɛ, náʋɛ ɠa ti looni ná, ti laaʋɛɛ zooi ma. Názu ɠa Ɠɔoɠɔ GALAGI ná-lɛbiyai ɠulani la ti ʋɛ kɛlɛma. 
Ɠɔoɠɔ GALAGI ɓɔɛni Moize ʋɔ, é ɠɛ ma: 
«Ɗa-lukpɔi zeɠe, wa è-liɛ Aalɔn, wo nuɓusɛiti gaalɛ ba. Wa ɓɔɛ fasa ɠɔtui ʋɔ ti ɠaazu, é ziɛi ve. Ɗa ziɛi ɠulazu fasa ɠɔtui naa ʋa, è fe nuɓusɛiti zea, ti ɓɔɔle ta ta-loganiiti.» 
Moize liini, é ná-tukpɔi zeɠe Ɠɔoɠɔ GALAGI ɠaazu, eɠɛʋelei naama levei veeni la zea. 
Moize ta Aalɔn ti bɛbɛi lolini fasa ɠɔtui ʋɔ bɛ, nii é lɛɛni ga tiye. Moize ɠɛni ti ma: «À woilo, wɔiti wo ga kololala nuiti! Wo laaʋɛ da ɓaa, ga gá zoo gi ziɛi ɠula fasa ɠɔtui tɛi ba wo ʋɛ?» 
Moize yeewuzeɠeni, é fasa ɠɔtui loɠa la ɠɛ fele ga ná-tukpɔi. Ziɛi ɠulani ga bɔɔlɔa. Nuɓusɛiti ta toganiiti ti zooni ti ɓɔɔle. 
Kɛlɛ Ɠɔoɠɔ GALAGI ɠɛni Moize ta Aalɔn ma: «Tɔɔzei wo la laani dà, wo ʋa nà-ɲadedai wɔɔlɔ Izilayɛle nuiti gaazu, naa maaʋele ma, wa la mɔ de, wa lo niima ʋɛbɛi luɠɔ, wo ʋa lii la naama yooi zu, nii gè feezu ti ʋɛ.» 
Meliɓa ɗɛiti kana, Meliɓa laaseigi ɠa é ga «sakpegi». Ná ɠa Izilayɛle nuiti ti kpɔɛi ʋɛɛni ná Ɠɔoɠɔ GALAGI ʋa. Ná ɠa mɔnɔ é ná-lɛbiyai ɠulani ná kɛlɛma ti ʋɛ. 
Moize keelaiti teʋeni, ti zeɠe Kadɛse, ti li Edɔme masagi ʋɔ bɛ. Ti ɠɛni ma: «È-ɠɛɛloin Izilayɛle ɠɛ, è kpɔlɔiti kpein kwɛɛ, nii gi sɔlɔɔgai. 
Kaite gi-mɛmɛwolani ti liini Ezipete yooi zu, gi zeini ná kona mɔinmɔin daawu. Kɛlɛ Ezipete nuiti ti gi zopele ɲɔuni, eɠɛʋelei ti gi-mɛmɛwolani sopele ɲɔuni la. 
Gi ɓainni Ɠɔoɠɔ GALAGI woizu, é gi woomɛni. É ná-geezuɠeelai leʋeni, é gi ɠula Ezipete yooi ʋa. Niizu gá Kadɛse, taai nii é ʋuuni ɗa-yooi ma ɠwɛpelemaʋɛ. 
Va bu, gi leʋe ɗa-yooi zu. Gi la ziɛzu kpalagaa zu, ɓaa kpelea, gi la wa-ɠɔlɔyeɠe ɗɛ ɓɔlezu. Gá ʋilɛsu nɔ pele wolai nɔ ma, gi la zeɠezu ba, gi ʋa li ga yeezazu ʋele, ɓaa ɠɔʋɛzu ʋele, eyɛsu gi ɗa-yooi maazuɓudɛ.» 
Edɔme masagi gooɠaaʋoteni, é ɠɛ ma: «Wo la leʋesu nà-zooi zu. Ni naa laade, nà kɔɔi ʋɛɛ wo ʋa.» 
Izilayɛle ɠeelaiti ti ɠɛni ma: «Gá ziɛzu nɔ ga pele wolai, ni gá ɗa-ɗɛi ta ɓɔlena, gá gá-loganiiti, gá sɔngɔi ve è ya. Gi la faa ɠili nɔpɛ maaɠaazaɠabosu è ma, kɛni nɔ è va bu, gi ziɛ ɠɔɠɔa, gi leʋe ɗa-yooi zu.» 
Masagi ti wooɠaaʋoteni, é ɠɛ ti ma: «Wo la leʋesu ʋɛ!» Edɔme nuiti ti Izilayɛle laaɠomini ga kɔɔɓɔgi, ti wola mɔin, ti wola yeeɠaaɓaai, 
ti pele ɓesa ti luɠɔ, ti ʋa leʋe ta-yooi zu, naa ɠa é kɛɛni Izilayɛle nuiti ti liini la ga pele ɠili. 
Izilayɛle nuɓusɛiti kpein ti zeɠeni Kadɛse, ti zeeli Ɠɔɔl gizei ma. 
Ɠɔoɠɔ GALAGI ɓɔɛni Moize ta Aalɔn ʋɔ, Ɠɔɔl gizei ma, Edɔme yooi ma ɠwɛpelemaʋɛ, é ɠɛ ti ma: 
«Aalɔn ɠana ʋa liizu mɛmɛwolani pɔ, ti zaai. É la lɔɔzu zooi naa zu, nii gè ʋaazu feezu Izilayɛle nuiti zea, mazɔlɔɔ wo woozotalai ɠɛɛni ga nà-deveiti, Meliɓa ɗɛi ná-faa zu. 
Aalɔn zeɠe ta ná-doun zunui Eleazaal, è lɛ ga tiye Ɠɔɔl gizei ma. 
Ɗa Aalɔn ná-zalaɠa ɠula zeɠeiti kula kɔba, è ti loo ná-doun zunui Eleazaal ɠɔba. Naazu Aalɔn ɠa li niina mɛmɛwolani pɔ, toɠa za miná.» 
Moize naa ɠɛɛni, nii Ɠɔoɠɔ GALAGI deveni la. Ti saʋagɔ, ti lɛɛni Ɠɔɔl gizei ma, nuɓusɛiti gaazu. 
Moize Aalɔn ná-seɠeiti kulani kɔba, é ti loo ná-doun zunui Eleazaal ɠɔba. Aalɔn zaani ná, gize unmaʋɛ. Moize ta Eleazaal ti yeini, ti zeɠe gize unmaʋɛ. 
Izilayɛle nuɓusɛiti kpein ti suɠwɛɛni ga Aalɔn zaa. Nuɓusɛiti kpein ti ná-wɔlɔi woni folo ʋuusaʋagɔ (30) laawu. 
