﻿Gaalu Sɛʋɛi.
14.
Izilayɛle nuɓusɛiti kpein ti kpeei looni, ti ɲii wɔlɔzu naama ɓidii. 
Ti unsuyelii loni Moize ta Aalɔn laalɔɠɔma. Nuɓusɛiti kpein ti ɠɛni ti ma: «Ni suɠila gi zaani Ezipete yooi zu, ɓaa teʋebai zu! 
Leeni vaa zu Ɠɔoɠɔ GALAGI pɔ ga é ʋa ga giye niima yooi zu, ti ʋa gi ʋaa ga kɔɔi, gi-anzaiti, ta gi-lointi, ti ʋa ɠɛ ga gi zili nuiti daamianigi? É la ɠɛa gi ʋɛ ga faa ʋagɔ ɓaa, ga gi ɠale ma Ezipete yooi zu?» 
Ti ɠilagilagiti ti ɠɛni ɠɛɛzu ɓɔɠɔ ma: «Ade yeelo kundiɠi ɠila ba, de ɠale ma Ezipete yooi zu!» 
Moize ta Aalɔn ti looni zooi ma, ti laaʋɛɛ Izilayɛle nuɓusɛiti kpein gaazu, ti ɠaalɛai ba. 
Zozuwe, Nun ná-doun zunui, ta Kalɛɓe, Yefuné ná-doun zunui, nu felegɔi naati, ti ɠɛni zɔiti ba, tɛiti ti liini zooi zuʋɛtɛsu, ti felegɔ ti ta-zeɠeiti balini ga kidaaʋiligi maaʋele ma, 
ti ɠɛ Izilayɛle nuɓusɛiti kpein ma: «Zooi nii gi suɓizaai, gi suʋɛtɛ, toɠa ga zou ʋagɔ wola. 
Ni Ɠɔoɠɔ GALAGI ɠa ade ʋɛ, toɠa ade lɔ zooi naa zu, é fe de ʋɛ, ʋɛ nɔnɔi ta kɔin gulɔi ʋooʋaai ná. 
Toɠa nɔ ga, à mina wuzeɠe Ɠɔoɠɔ GALAGI laalɔɠɔma. À mina lua zooi naa zu nuiti ba, mazɔlɔɔ ta ɠɛɛzu nɔ ga ade-ɠɔnɔ, niinigi é ɠɛa ti makɛsu, naa maaɠooza ti ʋa, tama Ɠɔoɠɔ GALAGI ɠa ade ʋa. Deɠɛmu, à mina lua ti ʋa pa!» 
Nuɓusɛiti kpein ti ɠɛni ɠɛɛzu, ti ti zɔɔ ga kɔtui, ti ti ʋaa, kɛlɛ gaamanɔ Ɠɔoɠɔ GALAGI ná-lɛbiyai ɠulani kɛlɛma Izilayɛle nuiti bɛ GALA daaɠomi seɠe ʋɛlɛi maazu. 
Ɠɔoɠɔ GALAGI ɠɛni Moize ma: «Niima nuɓusɛiti ta yɛsu bɛ̀lɛʋilisu eyɛsu siɛgi ɓɛgele zu? Ta yɛsu ɠɛlɛzu ga ti mina la dà, eyɛsu siɛgi ɓɛgele zu? Anɛɛ gè poo gola mɔinmɔin kɛa ti zaama. 
Nà ɗɔfɔ zeeɓɛi ʋɛɛzu ti ʋa, gè ti-ma zuwu ɠaaleʋe, naa ʋolu nà zii ɓɛtɛzu, é ɠula è zu, nii sɛbɛi a wɔɔlɔ, ta é mɔin Izilayɛle ʋa!» 
Moize Ɠɔoɠɔ GALAGI wooɠaaʋoteni, é ɠɛ ma: «Ezipete nuiti ti kwɛɛ ga ɗa ɠa è niima nuɓusɛiti kula ta-yooi ʋa ga è-zɛbɛi. 
Ti bogɛ niima you zu nuiti kpein ma. Ti mɛnigɛ ga ɗa, Ɠɔoɠɔ GALAGI, ɗa niima nuɓusɛiti saama, ɗa ɓɔɠɔ lɛɛzu kpezekele. Ti mɛnigɛ ga ɗa-lonaɓiingi ɠa zɛlɛni ti maazu, ɗa losu ti luɠɔ foloi tonaɓiingi zu, ta kpidii abuzogi zu. 
Ni ɗa niima nuɓusɛi kpein paana eɠɛ nu ɠila, zooiti ti è-ɠɛɛ vaiti ma woomɛniga, è ti ɠɛai, naati ta ʋaazu ɠɛɛzu ma: 
‹Ɠɔoɠɔ GALAGI la ɓena zobo sɔlɔɔ, é ʋa li ga nuɓusɛi tɛiti zooi naa zu, nii é ma ɠona woni ga é fe ti ya, naa ɠa é kɛai é ti ʋaa teʋebai zu.› 
Niizu Màliɠii, nà è maanɛɛnɛzu, ɗa-zobogi ɠula kɛlɛma ga zɛbɛi pɛ, eɠɛʋelei è boni la gi ma ga: 
‹Ɠɔoɠɔ GALAGI yii la ɗa ga ɠula fala, kpɛtɛʋɛ wooɠɛɠiladai zu, toɠa ɗa faaɠaaza golai zuvaayɛ ta tɔ koloɠologi. Kɛlɛ é la ɗa ga sɔba nui levea ga sɔbalala nu, toɠa doun kɛɛɠɛiti ta-vaa ɲɔi ʋotokula ti-lointi ma, eyɛsu yamani zaʋasiɛi ɓaa naanisiɛi.› 
Nà è maanɛɛnɛzu, niima nuɓusɛiti suvaayɛ ga ta-vaaɠaaza golai, ɗa-wooɠɛɠiladai maaʋele ma, eɠɛʋelei nɔ è niima nuɓusɛiti suvaayɛsu da, è zo ti ɠula voloi ma Ezipete yooi ʋa, é zeeli za ma.» 
Ɠɔoɠɔ GALAGI ɠɛni ma: «Gè ti maavaayɛga, eɠɛʋelei è falia la. 
Kɛlɛ eɠɛʋelei gè vulua la ga ɠite, nɛ̀i gè ga Ɠɔoɠɔ GALAGI, nà-lɛbiyai eteai pɛ daavegai, gè ɠonaa ga: 
Nui niiti ti nà-lɛbiyai ɠaani, ta poo golaiti gè ti ɠɛɛni Ezipete yooi zu, ta teʋebai zu, ti sùɠɔɠɔ daa ɠɛa puu, ti la ɠoloni bɛ̀, 
ti taɠila kpalaa ge la zooi naa ɠaa, nii gè ma minazeɠe boni, gè ɠona su ti-mɛmɛwolani bɛ. Tɛiti kpein ti bɛ̀lɛʋiligai, taɠila kpalaa ge la lɛa ná. 
Kɛlɛ nà-botiɠɛ nui Kalɛɓe, ɠi kili ka é ɠɛni naa ʋɛ, kɛɛʋɛ bɛ̀ ga wooɠɛɠila nu eyɛsu ɠɔ. Naa ɠa é ba, nà lɛ ga naa, ma yooi zu, ʋɛ é liini ná, mavofodaiti ta naa zɔlɔɔ. 
Tɛi Amalɛke nuiti ta Kanaan nuiti ti zeini nɛmɛi zu, lina sobu nɔ, wa nuiti gaaɠalesu ma teʋebai zu, wo li ga Seeli Kpoloɗɛi ʋɔ pelei.» 
Ɠɔoɠɔ GALAGI ɠɛni Moize ta Aalɔn ma: 
«Nà niima nuɓusɛ ɲɔiti zɛsu ná, ti ɗa unsuyelii lo dàalɔɠɔma, eyɛsu yeelɛ? Mazɔlɔɔ gè Izilayɛle nuiti ta-unsuyeliiti mɛnigɛ, ti tosu dàalɔɠɔma. 
Ɠɛ ti ma: ‹Eɠɛʋelei gè vulua la ga ɠite, nà wo zosu, eɠɛʋelei wo wooiti bogai la gòizu, Ɠɔoɠɔ GALAGI wooi ɠana. 
Wa za teʋebai tɛi su, wo-ma ʋoomaiti ti la ná. Wɔiti dɔin ti wo ɠaaluni, é zo kona ʋuufelegɔ (20) ma, é lɛ zeemaazu, mazɔlɔɔ wo unsuyelii logɛ dàalɔɠɔma, 
wo la mɔ lɔa zooi naa zu, nii gè ma minazeɠegi woni, gè ɠona ga wa zei ga, kɛni Kalɛɓe, Yefuné ná-doun zunui, ta Zozuwe, Nun ná-doun zunui. 
Kɛlɛ wo-lointi, wo ɠɛni ɠɛɛzu ma ta ɠɛ ga wo zili nuiti daamiani, nà liizu ga tiye ma yooi zu, ta zooi naa ɠwɛɛ, nii wo bɛlɛʋiligai. 
Kɛlɛ wɔun, wa zaazu teʋebai tɛi su. 
Wo-lointi ta ɠɛɛzu ga teʋeteʋe nuiti, kona ʋuunaanigɔ (40) laawu. Ta wa-wooʋaladai ma zalai zɔlɔɔ ɠana, nii wo kɛa ga ze, eyɛsu wo pɛ wo za teʋebai zu. 
Folo ʋuunaanigɔ (40) ɠa wo kɛɛni zooi zuʋɛtɛsuʋɛ, tama, wa wa-vaaɠaaza golai ma zalai zɔlɔɔ kona ʋuunaanigɔ (40) laawu, kona gila, folo ɠilagi ʋotogi zu. Wa kwɛɛ naazu ga wa ɠɛlɛna bà, wa ɓala.› 
Nà, Ɠɔoɠɔ GALAGI, nà ɠa kpɔ̀ɛai. Ungo, zekana gè ʋaazu niima nuɓusɛ ɲɔiti sosu da, ti ɠiliai ʋa, ti wuzeɠe dàalɔɠɔma. Ta ɲɛɛlɛzu teʋebai tɛi su, ti za ná.» 
Zunuiti Moize ti leʋeni ga ti zooi zuʋɛtɛ, ti ɠalegai ma ma, ti nuɓusɛiti unsuleʋeni, ti unsuyelii lo daalɔɠɔma, ga zooi zu vaiti suvala pelei. 
Ɠɔoɠɔ GALAGI zunui naati doɠani, ti za, tɔɔzei ti zooi ná-fai zuvalani. 
Zunuiti ti liini zooi zuʋɛtɛsu, ti pɛ ti zaani, kɛni Zozuwe, Nun ná-doun zunui, ta Kalɛɓe, Yefuné ná-doun zunui, naati nɔ ɠa ti yɛni vulua. 
Siɛgi zu Moize Ɠɔoɠɔ GALAGI laawooi woni da Izilayɛle nuiti ma, nuɓusɛiti gola ɠaalɛini. 
Poluma zobui, ti wuzeɠeni ga sobuzobui, ti lɛ gize yooi ʋɔ pelei, ti ɠɛ ma: «Gi koto ɠɛa, kɛlɛ gá ga lɛ, ʋɛ Ɠɔoɠɔ GALAGI ɓɔɛai, é ʋilɛ ná ʋa.» 
Moize ɠɛni ti ma: «Leeni vaa zu wo zeɠezu Ɠɔoɠɔ GALAGI wooi ʋolu? Wo la zobo sɔlɔɔga! 
À mina lɛ, mazɔlɔɔ Ɠɔoɠɔ GALAGI la wo zaama. Wo zili nuiti ti mina wo ʋaa fuun. 
Mazɔlɔɔ wa Amalɛke nuiti kaazu luɠɔ, ta Kanaan nuiti, wa ɓɔɠɔ ʋaa. Ʋelei wo ʋoluavegai da Ɠɔoɠɔ GALAGI ʋa, é la mɔ ɠɛa wo ʋa.» 
Ti daani mɛɛ, kɛni ti lɛɛni gize yooi ʋɔ pelei, kɛlɛ Ɠɔoɠɔ GALAGI ná-minazeɠe kesui la ɠɛni liini, ta Moize ɓalaa, ti ʋa ɠula ti-ʋuuzuʋɛ ʋa. 
Amalɛke nuiti ta Kanaan nuiti ti ɠɛni ʋuuni gize yooi zu, naati ti yeini, ti Izilayɛle nuiti sakpe, ti ti ɠoloɠolo, ti ʋilɛ ti ʋolu, eyɛsu ti li, ʋɛ ná laaseigi ga Ɠɔɔlema. 
