﻿Gaalu Sɛʋɛi.
12.
Moize Kuse anzanui ta zeɠeni ga anza. Miliyame ta Aalɔn ti ɠɛni vaazu ma. 
Ti ɠɛni ma: «Moize ɠila nɔ lɛi Ɠɔoɠɔ GALAGI ɓɔɛai pɔ! Kpɔɛʋɛ gá ɓalaagi gi ʋɔ!» Ɠɔoɠɔ GALAGI ti-wooi mɛnini. 
Tama Moize ɠɛni ga ɓɔɠɔmaayei nu gola, é leʋe nui pɛ ba eteai zu. 
Gaamago nɔ, Ɠɔoɠɔ GALAGI Moize lolini, naa ʋɛɛ Aalɔn ʋa, ta Miliyame, é ɠɛ ti ma: «À ɠomi, wo saʋagɔ, GALA daaɠomi seɠe ʋɛlɛi ʋɔ bɛ.» Ti liini ná. 
Ɠɔoɠɔ GALAGI yeini tonaɓiingi zu, é lo seɠe ʋɛlɛi laaʋɛ maazuʋɛ. É Aalɔn ta Miliyameni tolini. Ti felegɔ ti ʋaani. 
É ɠɛni ti ma: «À woilo, nii é bɛ̀, gè bo wo ma! Siɛgi zu GALA goo wo nu a ɠɛna la wo zaama, nà, Ɠɔoɠɔ GALAGI, nà ɗa ɓɔɠɔ lɛɛ la kulakɛlɛmai zu, gè ɓɔɛ pɔ segi zu. 
Kɛlɛ é la ɠana ga nà-botiɠɛ nui Moize, nii é ga lada nui nà-pɛlɛwu vai kpein su. 
Nà ɗa ɓɔɛ pɔ ga wooi koleai, faa zuɓidi laade, gè ɓɔɠɔ lɛɛ la, é kà. Lee vaa zu wo la luani, wo ɗa va nà-botiɠɛ nui Moize ma?» 
Ɠɔoɠɔ GALAGI yiiɠaawanani ti laalɔɠɔma, é li. 
Tonaɓiingi zeɠeni nɔ feya seɠe ʋɛlɛi maazuʋɛ, geei ʋɛɛ Miliyame ma mɛɛ, koleai eɠɛ kobe kolegi. Aalɔn wɛlɛni ba, é ka ga é ɠɛa ga gee nu. 
Aalɔn ɠɛni Moize ma: «Soma màliɠii, è mina gá-ɠotoi ma ɠasɔi la gi unma, gi kɛai ɠimalalai zu! 
Ee, de-ʋaazeelai mina ɠɛ eɠɛ doin saai, é ʋa zɔlɔɔ, nii kpusɛi ta luulaai, aisa é ʋa zɔlɔɔ.» 
Moize wooɠulani Ɠɔoɠɔ GALAGI ma, é ɠɛ ma: «Ee, GALA, nà è maanɛɛnɛzu, kɛdɛ!» 
Ɠɔoɠɔ GALAGI ɠɛni Moize ma: «Ni kɛɛɠɛ a la ɠɛni laaɗɛi ʋuuni gaazuʋɛ, é la ɓena yɛ ma unfegi zu, eyɛsu folo lɔfela? À kpɛ, é ɠula wo-ʋuuzuʋɛ ʋa, é kɛ su ga folo lɔfela, naa ʋoluma, wa yeezei bu niina, é ʋa wo zaama.» 
Miliyame ɠulani ti-ʋuuzuʋɛ ʋa, é kɛ ga folo lɔfela. Nuɓusɛiti ti yɛni ti-ʋuuzuʋɛ, eyɛsu é ʋa, é lɔ ti zaama mɔnɔ. 
Naa ʋoluma, ti zeɠeni Ɠaselɔte, ti li, ti ʋu Palan teʋebai zu. 
