﻿Levi Nuiti.
17.
Ɠɔoɠɔ GALAGI ɓɔɛni Moize ʋɔ, é ɠɛ ma: 
«Ɓɔɛ Aalɔn ʋɔ, ta ná-doun zunuiti, ta Izilayɛle nuiti kpein, è ɠɛ ti ma: Wɛlɛ, nii ɠa Ɠɔoɠɔ GALAGI deveai: 
«Ni Izilayɛle nui ta a nikɛi ɓaa baalagi, ɓaa bolii ɠɔdaaleʋena ga zalaɠai ti-ʋuuzuʋɛ, ɓaa ti-ʋuuzuʋɛ ʋoluʋɛ, 
é la liini la GALA daaɠomi seɠe ʋɛlɛi laaʋɛ, é ʋa kɛ ga vebɛanii Ɠɔoɠɔ GALAGI ʋɛ ná-seɠe ʋɛlɛ ɲadegai ɠakalaʋɛ, naama nui ɠa ɠɛ ga sɔba nu, tɔɔzei é ɲamai ʋua. Kpe ka leʋe ná-nuɓusɛiti ba, é ɠula ti zaama. 
Naa ɠa a kɛ, Izilayɛle nuiti ti mina mɔ ta-zalaɠa aniiti kula dɔɓɔiti su, kɛlɛ ti ɗa ʋa ga tiye zalaɠa ɠula nui ʋɔ, Ɠɔoɠɔ GALAGI ɠakala GALA daaɠomi seɠe ʋɛlɛi laaʋɛ, é ti ɠula ga zalaɠai Ɠɔoɠɔ GALAGI ʋɛ, ga ziilɛi zalaɠaiti. 
Zalaɠa ɠula nui ɠa ma ɲamai vaza Ɠɔoɠɔ GALAGI ná-zalaɠa ɠulazuʋɛ ma, GALA daaɠomi seɠe ʋɛlɛi laaʋɛ, é ma wulɔi ɠala, nii makugi a nɛɛ Ɠɔoɠɔ GALAGI ʋɛ. 
Ti la mɔ ta-zalaɠaiti kulaa zɛɛ ɠalagiti bɛ, niiti ti-ʋaaɠulabaiti ti ga boli zinɛiti, niiti ti ɠɛa ɓɔɠɔ ɠɔzɔzu ga tiye. Toɠa ɠɛ ga ɠɔoɠɔ tɔgi ti ʋɛ, ta ti-mavofodaiti kpein. 
«Ɗa ɠɛ ti ma mɔnɔ: Ni Izilayɛle nui ta, ɓaa seikɔɠɔma nui ta, é ti zaama, a gala zalaɠai ɠulana, ɓaa zalaɠai taɠili, 
é la liini la GALA daaɠomi seɠe ʋɛlɛi laaʋɛ, é ʋa kula ga zalaɠai Ɠɔoɠɔ GALAGI ʋɛ, naama nui ɓe ka leʋe ná-nuɓusɛiti ba. 
«Ni Izilayɛle nui ta, ɓaa seikɔɠɔma nui ta, é ti zaama, a ɲamai ma zii tanɔpɛ miina, nà ʋoluave naama nui ʋa, nii é ɲamai miizu, nà naama nui ɓeteʋe ɓalaa ná-nuɓusɛiti ba, é ɠula ti zaama. 
Mazɔlɔɔ ɲamai ɠa é ga kpɛtɛanii kpein zɛnvui. Gè feeʋɛ wo ya, ga wo koto gba vai ɠɛ la zalaɠa ɠulazuʋɛ, wo-yɛnvuiti faa zu, mazɔlɔɔ tɛi é ga zɛnvui ma ʋoogi, naa maaʋele ɠa ɲamai a kotoi gba la. 
Naa ɠa é ba, gè bogɛ Izilayɛle nuiti ma ga, nu nɔpɛ ge mina ɲamai mi wo zaama, anɛɛ seikɔɠɔma nui ʋe, é mina ɲamai mi. 
Ni Izilayɛle nui ta, ɓaa seikɔɠɔma nui ta, é ti zaama, a sua zona dɔɓɔ ziɛ su, ɓaa wɔnii, nii nu a mi, toɠa ma ɲamai ʋu zooi ma, é fufiligi ʋu gaazu. 
Mazɔlɔɔ kpɛtɛanii kpein, ni nɔ toɠa vulua, zɛnvui ɠa ma ɲamai zu. Naa ɠa é ba, gè bogɛ Izilayɛle nuiti ma ga, wo la kpusɛi tanɔpɛ ma ɲamai mia, mazɔlɔɔ kpɛtɛanii kpein zɛnvui ɠa ɲamai zu, nu nɔpɛ a ta miina, naa ɓe ka leʋe Izilayɛle nuɓusɛiti ba. 
«Nu nɔpɛ, é ɠɛni zou loun zu, ɓaa seikɔɠɔma nuiti su, a sua miina saai ɓɔɠɔ ʋɛ, ɓaa baliʋaliai ga, toɠa ná-seɠeiti gba, é maagba. Kɔzɔai ɠa yɛ de, eyɛsu kpɔkɔi. Naa ʋolu, toɠa ɲade. 
Ni é la ná-seɠeiti gbani, é ʋa maagba, ná-faaɠaaza golai ma ɠasɔi ɠa la unma.» 
