﻿Ɛgezɔde.
31.
Ɠɔoɠɔ GALAGI ɓɔɛni Moize ʋɔ, é ɠɛ ma: 
«Wɛlɛ, gè yiimazeɠeʋɛ ga Ɓɛsaleyɛle, nii é ga Uli ná-doun zunui, Ɠuul ná-dounloin, Zuda ná-bolodai zu. 
Gè daavegɛ ga GALA Zɛnvui, ta ɠimalai, ta keleɠelegi, ta soofaalai, botii ma zii kpein faa zu, 
é zoo faiti kazaʋisu, é zanugi ɓɛtɛ, ta walii, ta kɔlu ɓɔigi, 
é kɔtu zɔngɔ ɓaagiti saɠa, é ti ɲɛkpɛ ti-lɔɔzuʋɛti, é gului zaɠa, é botii ma zii kpein kɛ. 
Gè kpɔba nu ʋɛɛʋɛ ba, nii é ga Woɠoliyaɓe, Ayizamake ná-doun zunui, é ɠula Dan ná-bolodai zu. Gè keleɠelegi ʋuuʋɛ naati kpein ziimaʋɛ, niiti ti zoogai faa la, ga ti naa kpein kɛ, nii gè è leveai ma, 
é zo GALA daaɠomi seɠe ʋɛlɛi ma, é li zeele woo ɠesui ʋɔ, ta dakulugi, ta seɠe ʋɛlɛi ma zɔɔlaiti kpein, 
ta taɓalii ta ná-sɔɔlaiti, ta fitinai zei anii é ga zanu kitei, ta ná-sɔɔlaiti kpein, ta ansansegiti ma zalaɠa ɠulazuʋɛ, 
ta gala zalaɠaiti kulazuʋɛ ta ná-sɔɔlaiti kpein, ta maagba aniɲakai ta ná-seiga anii, 
ta botiɠɛ zeɠeiti, niiti ti ga zalaɠa ɠula nui Aalɔn ná-zalaɠa ɠula zeɠeiti, ta ná-doun zunuiti ta-zeɠeiti zalaɠa ɠulazuʋɛ ma woti vai ma, 
ta siɛma wulɔ ɲadegai, ta ada ɲadegai ma ansansegi. Ta naa kpein kɛ, eɠɛʋelei gè deveai la.» 
Ɠɔoɠɔ GALAGI ɓɔɛni Moize ʋɔ, é ɠɛ ma: 
«Ɓɔɛ Izilayɛle nuiti pɔ, è ɠɛ ti ma: ‹Wa nà-dooɠo foloiti maaɲɛ, mazɔlɔɔ naa ɠa a ɠɛ nɔ̀un nà, ta wa, ade yɔɠɔzu, wo-mavofodaiti kpein saama, é ɠɛ ga poogi, nii nu a kwɛɛ la ga nà ga Ɠɔoɠɔ GALAGI, nii é wo ɲadesu. 
Wa dooɠo foloi maaɲɛ, mazɔlɔɔ toɠa ɠɛ wo ʋɛ ga faa ɲadegai. Zɔi a kɔzɔna, ta naama nui ʋaa. Nu nɔpɛ a boti ɠɛɛna naama voloi ma, naa ɓe ka leʋe ná-nuɓusɛiti ba, é ɠula ti zaama. 
Folo lɔzita laawu, nu ɠa boti ɠɛ, kɛlɛ foloi lɔfelasiɛi ɠa ɠɛ ga dooɠo foloi, feai Ɠɔoɠɔ GALAGI ʋɛ. Zɔi nɔpɛ a boti ɠɛɛna dooɠo foloi, ta naama nui ʋaa. 
Izilayɛle nuiti ta dooɠo foloi maaɲɛ, tiya-o, ti-mavofodaiti-yo, é ɠɛ ga ɠɔoɠɔ minazeɠegi. 
Toɠa ɠɛ ga poogi, nà-o, Izilayɛle nuiti-yo, gi yɔɠɔzu, eyɛsu ɠɔ, mazɔlɔɔ folo lɔzita laawu, Ɠɔoɠɔ GALAGI geeɠɔlɔgi ta zooi ɓɛtɛni. Folo lɔfelasiɛi é ɓeni ná-botii ʋa, é looɠo.› » 
Siɛgi zu Ɠɔoɠɔ GALAGI ɓeni la ga ɓɔɛ Moize ʋɔ Sinayi gizei ma, é zeele woo ɠokolo felegɔiti feeni zea, kɔtu ɠokologiti, GALA ge sɛʋɛi ɠɛai ti ma ga tɔ ɓɔɠɔi zeeɓeɠai. 
