﻿Ɛgezɔde.
6.
Ɠɔoɠɔ GALAGI ɠɛni Moize ma: «Ɗa ʋaazu pɛtɛsu niizu, nii gè ʋaazu kɛɛzu ga Falaɠɔn. Nà-zeeɠaaɓaa wolai maaʋele ɠa é ʋaazu ɓesu la Izilayɛle nuiti ba, ti li, toɠa ti ɓɛɛzu, é ti ɠula ná-zooi ʋa.» 
GALA ge ɓɔɛni mɔnɔ Moize ʋɔ, é ɠɛ ma: «Nɔ̀un nà, nà ga Ɠɔoɠɔ GALAGI. 
Gè ɠulani kɛlɛma Abalaame ʋɛ, ta Izaake, ta Zakɔɓe, ga GALA Zɛbɛi-Pɛ-Maliɠii, kɛlɛ gè la ɠɛni ɓɔɠɔ lɛɛni ga tiye ga dàaseigi ɠa ga Ɠɔoɠɔ GALAGI. 
Gè minazeɠeni ti ʋɛ, ga nà Kanaan yooi veezu ti ʋɛ, zooi naa, nii ti su ga seikɔɠɔma nuiti. 
Nɔ̀un nà, gè Izilayɛle nuiti kpala gooi mɛnigɛ, niiti ti ga Ezipete nuiti ta-luɔiti. Gè ɠizɛgɛ nà-minazeɠegi zu. 
Naa ɠa é ba, ɠɛ Izilayɛle nuiti ma: ‹Nà ga Ɠɔoɠɔ GALAGI, nà wo viesu, gè wo ɠula boti ɓaagi laawu, niiti Ezipete nuiti ti daazu wo unma. Nà wo unmɔɔsu, wo ɠula duɔlai zu, nii wo su ti ya. Nà wo unmɔɔsu ga nà-zeeɠaaɓaai, naa ɠa ɠɛ ga tukpɔɠaaleʋe wolai ti laalɔɠɔma. 
Nà wo zeɠezu, wo ɠɛ ga nà-nuɓusɛiti, nà ɠɛ ga wa-ƓALAGI. Wa suɠwɛɛ naazu ga nà ɠa gè ga Ɠɔoɠɔ GALAGI, wa-ƓALAGI, nii é wo unmɔɔsu, é wo ɠula boti ɓaagiti daawu, niiti Ezipete nuiti ti daazu wo unma. 
Nà lɛɛzu ga woye zooi naa zu, nii gè ma ɠonai woni ga nà fe Abalaame ya, ta Izaake, ta Zakɔɓe. Nɔ̀un nà, nà feezu wo ya, é ɠɛ ga wɔnɔ. Nà Ɠɔoɠɔ GALAGI ʋe.› » 
Moize naama wooiti boni Izilayɛle nuiti ma, kɛlɛ naati ti la ɠɛni woiloni goo ma, mazɔlɔɔ ti ɠɛni iɲɔteʋe wolai zu, duɔla ɓaaɓaa golai maaʋele ma, nii ti ɠɛni su. 
Ɠɔoɠɔ GALAGI ɓɔɛni Moize ʋɔ, é ɠɛ ma: 
«Li, è ɓɔɛ Falaɠɔn ʋɔ, Ezipete masagi, é ɓe Izilayɛle nuiti ba, ti li, ti ɠula ná-zooi ʋa.» 
Moize Ɠɔoɠɔ GALAGI wooɠaaʋoteni, é ɠɛ ma: «Izilayɛle nuiti ti la woiloni gòoi ma. Falaɠɔn ɠa zoo ɠale woilosu gòo ma, nɛ̀i kpɔ̀ɛla ɓaai?» 
Ɠɔoɠɔ GALAGI ɓɔɛni Moize ta Aalɔn ʋɔ, é deveiti fe ti ya, é ʋilɛ Izilayɛle nuiti ba ta Ezipete masagi Falaɠɔn, Izilayɛle nuiti kula vai zu Ezipete yooi ʋa. 
Izilayɛle nuiti ta-ʋɛlɛyeɠeiti ma ɠundiɠiiti ti ɠɛni ga: Izilayɛle ná-doun zunu mɔungi é zɔlɔɔni, daa ga Luɓɛn. Naa ná-doun zunuiti ti ɠɛni ga: Enɔke, Palu, Ɠɛsɛlon, ta Kaalemi. Luɓɛn nɔnɔ ma ʋɛlɛyeɠeiti kana. 
Simiyɔn ná-doun zunuiti ti ɠɛni ga: Yemuwɛle, Yamin, Woɠade, Yakin, Soɠaal, ta Sayile, Kanaan anzanui ná-doun zunui. Simiyɔn ná-pɛlɛyeɠeiti kana. 
Levi ná-doun zunuiti daaseigiti kaa, eɠɛʋelei ti-mavofodaiti ti la: Gɛɛlɛson, Keɠate, ta Melali. Levi zii ma ɠonagiti ti ɠɛni ga kona ungila puusaʋagɔ maazu lɔfela (137). 
Gɛɛlɛson ná-doun zunuiti ti ɠɛni ga: Liɓini ta Simeyi, ta ta-ʋɛlɛyeɠeiti. 
Keɠate ná-doun zunuiti ti ɠɛni ga: Amalame, Yiseɠaal, Eɓelɔn, ta Uziyɛle. Keɠate zii ma ɠonagiti ti ɠɛni ga kona ungila puusaʋagɔ maazu saʋagɔ (133). 
Melali ná-doun zunuiti ti ɠɛni ga: Maali ta Musi. Naati ka ti ga Levi ná-pɛlɛyeɠeiti, eɠɛʋelei ti-mavofodaiti ti la. 
Amalame nazai Yokeɓɛde zeini ga anza, naa doun zunuiti sɔlɔɔni bɛ: Aalɔn ta Moize. Amalame zii ma voloi kpein ge ɠɛni ga kona ungila puusaʋagɔ maazu lɔfela (137). 
Yiseɠaal ná-doun zunuiti ti ɠɛni ga: Kolé, Nefɛge, ta Zikili. 
Uziyɛle ná-doun zunuiti ti ɠɛni ga: Misayɛle, Ɛlɛsafan, ta Sitili. 
Aalɔn Naason baazeelai Eliseɓa zeini ga anza, nii é ga Aminadaɓe ná-doun anzanui, naa doun zunuiti sɔlɔɔni bɛ: Nadaɓe, Aɓiyu, Eleazaal, ta Itamaal. 
Kolé ná-doun zunuiti ti ɠɛni ga: Asiil, Ɛlɛkana, ta Aɓiazafe. Kolé ná-doun zunuiti ta-ʋɛlɛyeɠeiti kana. 
Aalɔn ná-doun zunui Eleazaal, Putiyɛle ná-doun anzanui zeini ga anza, naa doun zunu zɔlɔɔni bɛ, é daasei pɛɛni ga Fineyase. Naati ka ti ga Levi lointi ta-ʋɛlɛyeɠeiti ma ɠundiɠiiti, eɠɛʋelei ta-ʋɛlɛyeɠeiti ti la. 
Aalɔn ta Moize naati ka Ɠɔoɠɔ GALAGI ɠɛni ti ma: «À li, wo Izilayɛle nuiti kula Ezipete yooi ʋa, wo ti zei kpasu ga pagɔ.» 
Moize ta Aalɔn ɠa ti liini, ti ɓɔɛ Ezipete masagi Falaɠɔn ʋɔ, ga ti Izilayɛle nuiti kula Ezipete yooi ʋa. 
Siɛgi zu Ɠɔoɠɔ GALAGI ɓɔɛni la Moize ʋɔ, Ezipete yooi zu, 
é ɠɛni ma: «Nà ga Ɠɔoɠɔ GALAGI. Li, è ɓɔɛ Ezipete masagi Falaɠɔn ʋɔ, naama vaiti kpein bo ma, nii gè bosu è ma.» 
Kɛlɛ Moize Ɠɔoɠɔ GALAGI wooɠaaʋoteni, é ɠɛ ma: «Nɔ̀un nà ɠa kpɔ̀ɛla ɓaai, Falaɠɔn ɠa woilo ɠale gòo ma?» 
