﻿Zenɛze.
21.
Ɠɔoɠɔ GALAGI Sala maawɔinɠaani, é naa laazeelini bɛ, nii é minazeɠeni la. 
Abalaame wɔlɔzaɠagai ma, anzai Sala kogi zeɠeni, é doun zunu zɔlɔɔ bɛ, naa ɠɛɛni é zoloo GALA ná-ku logai ma, nii é boni ma. 
Doun zunui nii Sala sɔlɔɔni bɛ, Abalaame daasei pɛɛni ga Izaake. 
Abalaame ná-doun zunui Izaake latini pɛlɛʋolu, sɔlɔɔ foloi lɔsaʋasiɛi ma, eɠɛʋelei GALA ge ma levei veeni la zea. 
Abalaame ná-konagi ɠɛni ga ungila (100), siɛgi zu ná-doun zunui Izaake zɔlɔɔni da. 
Sala ɠɛni ma: «GALA ge zobo fea ga gè ɲɛɛi wo ga koozunɛɛi, nu-o-nu nii a nii mɛnina, naa ɠa ɗa ɲɛɛ nɔ kpaain.» 
É ɠɛni ma: «Ɓɛ ɠa a la ɠɛ Abalaame ma, Sala ɠa ɲiimi ve dounɠa ya? Tama gè zunu loun zɔlɔɔga bɛ pɔlɔzaɠa siɛgi zu.» 
Doungoi wɔɔlɔni, Sala daaɠula ɲiimii ʋa. Abalaame fɛti wolai ɠulani naama voloi. 
Ezipete anzanui Agaal ná-doun zunui é sɔlɔɔni Abalaame ʋa, Sala naa ɠaani, é ɗa ɲɛɛi wo. 
Sala ɠɛni Abalaame ma: «Duɔ anzanui nii ɓɛ ta ná-doun zunui, mazɔlɔɔ niima luɔ anzanui ná-doun zunui, ta dòun zunui Izaake ti la ɓɔga poganii ma.» 
Niima wooi wanani Abalaame ma gola, ná-doun zunui maaʋele ma. 
Kɛlɛ GALA ge ɠɛni Abalaame ma: «Mina nii wana ɓɔɠɔ ma ɗa-luɔ anzanui ná-doun zunui vaa zu. Naa pɛ kɛ Sala ʋɛ, nii é bosu è ma. Mazɔlɔɔ Izaake ɠa è-mavofodai a ɠula su. 
Anɛɛ naa ʋe, nà ɗa-luɔ anzanui ná-doun zunui ɠɛ ga zii ta mɛmɛwola, mazɔlɔɔ tɔ ɓalaa ɠulaʋɛ è zu.» 
Poluma zobui, Abalaame wuzeɠeni ga sobuzobui, é ɓului zeɠe ta kɔlɔ woolei ziɛi su, é sɛlɛ Agaal ɓaki ba, é zunu loungoi ɓalaa ve zea, é vali ti ma. É liini, é leʋeteʋe Ɓeel-Seɓa teʋebai zu. 
Siɛgi zu kɔlɔ woolei zu ɗɛi ɓeni da, é zunu loungoi yɛni laani gulu goi ta wu, 
é li, é zei tɔ ɠila ɠoozama, ná tago maaɠoozaai nɔ fɔɛn, mazɔlɔɔ é ɠɛni ɠɛɛzu ma: «Gàazu la yɛsu doin ʋa, é ʋa ɗa za.» É zeini tɔ ɠila ɠoozama, é ɗa ɓalakpala, é ɗa wɔlɔ. 
GALA ge zunu loungoi wooi mɛnini, GALA ná-geezuɠeelai yɛni geezuʋɛ, é Agaal loli, é ɠɛ ma: «Agaal, leeni ɠa é è ya? Mina lua, mazɔlɔɔ ʋɛ è doungoi yɛgai ná, GALA ge goomɛnigɛ ná. 
Wuzeɠe, è zunu loungoi zeɠe, è gaanɛɛnɛ. Mazɔlɔɔ nà zii wola ɓɛtɛzu ba.» 
GALA ge gaazuzeɠeni ma, é kɔlɔyeɠei ɠa, é li, é kɔlɔ woolei laave ga ziɛi, é ta ve zunu loungoi ya, é ɓɔɔle. 
GALA ge ɠɛni zunu loungoi ʋa, é ɗa wɔɔlɔ. É zeini teʋebai zu, é ɠɛni ga mɛɛn ʋili nu ʋagɔi. 
É zeini Palan teʋebai zu. Dee anzanui ta ɠaiziɛni bɛ, é sei, naa ɠɛni ga Ezipete yooi zu nu. 
Naama ziɛgi nɔ zu, Aɓimelɛke ná-kɔɔɠuluɓai Pikɔle ʋilɛni polu, ti ʋa, ti Abalaame ɠa, é ɠɛ ma: «GALA ka naa pɛ suɓɛtɛzu, nii è kɛɛzu. 
Ɠona bɛ̀ niina ga GALA daaseigi, ga è la yàava, ɓaa dòinti, ɓaa màvofodaiti, kɛlɛ ɗa yɛ ɗa-wooɠɛɠiladai ɠilagi nɔ ʋolu nɔ̀un bɛ, ta niima yooi nii è lago zeizu su, eɠɛʋelei gè kɛa la è ʋɛ.» 
Abalaame ɠɛni ma: «Gè konai naa woga.» 
É ɓaazaɠani Aɓimelɛke ma kɔlɔyeɠei ná-fai zu, nii naa ná-botiɠɛ nuiti ti seɠeni ga zeeɠaaɓaai. 
Aɓimelɛke gooɠaaʋoteni, é ɠɛ ma: «Gè la kwɛɛ ɓɛ ɠa é naa ɠɛa. Ɗa ɓɔɠɔi è la ɠɛni naa woni mà, za ɠa gè mɛnisu da.» 
Abalaame baalagi tanigaa zeɠeni, ta boliiti, ta nikɛiti, é ti ve Aɓimelɛke ʋɛ, ti felegɔ pɛ ti minazeɠegi ɠɛɛni ɓɔɠɔ ʋɛ. 
Abalaame baala ziʋo zaa lɔfela makɛni yɛ ma ɓulugi zu. 
Aɓimelɛke ɠɛni Abalaame ma: «Leeni vaa zu è niima ʋaala ziʋo zaa lɔfelaiti makɛgai yɛ?» 
É gooɠaaʋoteni, é ɠɛ ma: «Yeezei baala ziʋo zaa lɔfelai niiti bu, gè feezu è ya, naa ɠa ɠɛ bɛ̀ ga zeele wooi ga nà ɠa gè niima ɠɔlɔyeɠei wɔa.» 
Naa ɠa é ba, ti naama adaʋɛ laaseigi ʋɛɛni la ga Ɓeel-Seɓa (nii poluʋɛ ga «minazeɠe kɔlɔyeɠei»), tɔɔzei miná ɠa ti felegɔ ti minazeɠeni ná ɓɔɠɔ ʋɛ. 
Ti minazeɠeni ɓɔɠɔ ʋɛ Ɓeel-Seɓa. Naa ʋoluma Aɓimelɛke wuzeɠeni ta ná-kɔɔɠuluɓai Pikɔle, ti ɠale ma Filisiti nuiti ta-yooi zu. 
Abalaame gului ta ziinni Ɓeel-Seɓa, nii ti ɠɛɛzu ma tamalise, náʋɛ ɠa é Ɠɔoɠɔ GALAGI valini ná, GALA nii é ná eyɛsu ɠɔ. 
É lɛbini zeini Filisiti nuiti ta-yooi zu. 
