﻿Zenɛze.
13.
Abalame zeɠeni Ezipete yooi zu, é lɛ ʋolu Kanaan yooi zu, lɛkpɛmaʋɛ nu yeezazuʋɛ, tɔun be-o, anzai ʋe-o, ta niiti kpein ti ɠɛni ga nɔnɔ. Lote ɠɛni ba. 
Abalame wola ɓɛtɛni, toganiiti su, ta walii, ta zanugi. 
É yɛni lɛɛzu ɓɛkpɛ, é zo lɛkpɛmaʋɛ nu yeezazuʋɛ yooi zu, eyɛsu é li Ɓetɛle, ʋɛ ná-seɠe ɠotai ɠɛni ná mɔunpa, Ɓetɛle ta Ayi ti yɔɠɔzuʋɛ, 
ʋɛ é zalaɠa ɠulazuʋɛ loni ná mɔunpa. Miná ɠa Abalame wooɠulani ná, Ɠɔoɠɔ GALAGI ma. 
Lote, nii é ɠɛni Abalame maazaasu, baalagiti ti ɠɛni zea ɓalaa, naa ʋɛɛ boliiti ba, ta nikɛiti, ta seɠe ɠotaiti, 
zooi la ɠɛni kula ɠɛa ti ʋa, ga ti ʋa zei ada ɠila, mazɔlɔɔ ti-yeaɠɔligiti ti wola mɔinni gola, ti la ɓena zoo ti ʋa zei ada ɠila. 
Naa ʋolu ɓalaa, Kanaan nuiti ta Felɛze nuiti ti ɠɛni zeini ma yooi zu naama ziɛgi zu. Kpɔɛi leʋeni Abalame ná-togani makɛ nuiti zɔɠɔzu ta Lote ná-togani makɛ nuiti. 
Abalame ɠɛni Lote ma: «Nà è maanɛɛnɛzu, maaɠaali mina ɠɛ de yɔɠɔzu da ɗe, ɓaa nà-togani makɛ nuiti ta ɗɔnɔiti zɔɠɔzu. Mazɔlɔɔ da ga kɛɛɠɛlointi. 
Zooi kpein ka è ɠakala. De ɠaaɠwɛɛna ma mu, ni ɗa liina ga nu ɠɔʋɛzu ʋelei, nà li ga nu yeezazu ʋelei, ni ɗa liina ga nu yeezazu ʋelei, nà li ga nu ɠɔʋɛzu ʋelei.» 
Lote ɠaazuwuzeɠeni, é wɛlɛ, é Zuludɛn nɛmɛ wolai ɠa, nii zɛɓɛa ɠɛni de ɲɛgɛlɛin. Ɠɔoɠɔ GALAGI ɠɛɛzu é ʋa Sɔdɔme ta Gomɔɔl ɠoloɠolo, ná ɠɛni eɠɛ Ɠɔoɠɔ GALAGI ná-kpelei, eyɛsu é zeeli Sowaal, kulaai ga Ezipete yooi ɠɛʋele. 
Lote yiimazeɠeni ga Zuludɛn ma nɛmɛ wolai kpein, é liini ga folo ɠulazu ʋelei. Ʋele ɠana ti felegɔ ti ɠaaɠwɛɛni ma la. 
Abalame zeini Kanaan yooi zu, Lote zei nɛmɛ zu laaiti su, é ná-seɠe ɠotaiti toni Sɔdɔme letema ʋelei. 
Sɔdɔme nuiti ti wola zuɲɔuni, ti ɠɛni ga kotoba nu wolaiti Ɠɔoɠɔ GALAGI laalɔɠɔma. 
Ɠɔoɠɔ GALAGI ɓɔɛni Abalame ʋɔ, Lote zeɠea ʋoluma polu, é ɠɛ ma: «Adaʋɛ è ná loni, ɠaazuwuzeɠe, è wɛlɛ, nu ɠɔʋɛzu ʋelei ta nu yeezazu ʋelei, folo ɠulazu ʋelei ta folo liizu ʋelei. 
Mazɔlɔɔ, zooi nii kpein è pɛtɛsu, nà ʋaazu feezu è ʋɛ, wa è-mavofodai, eyɛsu ɠɔ. 
Nà è-mavofodai ɠɛ eɠɛ zooi ma vufiligi, nii nu la zooga é ʋa gaalu, eɠɛ pelegi nu la zooga la é ʋa zooi ma vufiligi ɠaalu. 
Wuzeɠena ʋɛ, è zooi zuɓizɛ, è ziɛ sakpai ta kogi ma, mazɔlɔɔ nà ʋaazu feezu è ʋɛ.» 
Abalame ná-seɠe ɠotaiti seɠeni, é li, é zei Mamelé ná-sɛne guluiti bu, Eɓelɔn ɠobaʋɛ. É zalaɠa ɠulazuʋɛ loni ná Ɠɔoɠɔ GALAGI ʋɛ. 
