﻿Zenɛze.
12.
Ɠɔoɠɔ GALAGI ɠɛni Abalame ma: «Zeɠe ɗa-yooi zu, ɗa-wolodai zu, è ɠula è-ɠɛɛ ʋɛlɛi wu, li zooi naa zu, ʋɛ gè ná lɛɛzu ga ɗe. 
Nà ʋaazu zii wola ɠulazu è zu, nà tuya loo è ʋɛ, gè è-laaseigi wɔɔlɔ. Nà tuya loo zɔiti bɛ ga è maaʋele. 
Nà tuya loo naati bɛ, niiti ta tuya loo è ʋɛ, nà naati foovo, niiti ta è voovo, etea ʋɛlɛyeɠei kpein ka tuyai zɔlɔɔ è maaʋele ma.» 
Abalame liini, eɠɛʋelei Ɠɔoɠɔ GALAGI boni ma la, Lote ʋilɛni polu. Abalame ná-konagi ɠɛni ga puulɔfela maazu lɔɔlugɔ (75), siɛgi zu è ɠulani la Ɠalan taai ʋa. 
Abalame anzai Salayi zeɠeni ta Lote, nii é ɠɛni ga deɠe loin, é ʋɛɛ zeaɠɔligiti kpein ba, ta botiɠɛ nuiti, é ti zɔlɔɔni Ɠalan. Ti wuzeɠeni, ti li Kanaan yooi zu. Ti zeeliai ma Kanaan yooi zu, 
Abalame ná zuɓizɛni, eyɛsu é li adaʋɛ ná laaseigi ga Sikɛme, eyɛsu é zeeli Molé, sɛne gului ʋɔ bɛ. Kanaan nuiti ka ti ɠɛni naama yooi zu názu. 
Ɠɔoɠɔ GALAGI ɠulani kɛlɛma Abalame ʋɛ, é ɠɛ ma: «Nà zooi nii veezu è-mavofodai ya.» Abalame zalaɠa ɠulazuʋɛ ɓɛtɛni ná Ɠɔoɠɔ GALAGI ʋɛ, nii é ɠulani bɛ kɛlɛma. 
Naa ʋolu, é zeɠeni ná, é li ga gize yooi zu ʋelei, Ɓetɛle folo ɠulazu ʋelei. É ná-seɠe ɠotai loni Ɓetɛle folo liizu ʋelei ti yɔɠɔzuʋɛ ta Ayi, nii é folo ɠulazu ʋelei. É zalaɠa ɠulazuʋɛ ɓɛtɛni ná Ɠɔoɠɔ GALAGI ʋɛ, é wooɠula Ɠɔoɠɔ GALAGI ma. 
Abalame ɠɛni liizu ɓɛkpɛ ga lɛkpɛmaʋɛ nu yeezazu ʋelei. 
Pului looni zooi zu, Abalame yeini Ezipete ga é lago zei ná, mazɔlɔɔ pului wola wɔɔlɔni zooi zu. 
Siɛgi zu é ɠɛni ʋaazu maaɓuɠazu la Ezipete ʋa, é ɠɛni anzai Salayi ma: «Wɛlɛ, gè kwɛɛ ga ɗa ga anzanui nii pagai. 
Siɛgi zu Ezipete nuiti ti è ɠaazu la, ta ɠɛ ma: ‹Anzai ʋe!› Ta pàa, ti è yɛ vulua. 
Ɗa ɠɛ ti ma mu, ɗa ga bàazeelai, naa ɠa a kɛ ti sò ga pagɔ è maaʋele ma, zɛ̀nvui yɛ zèa è-zaalai zu.» 
Siɛgi zu Abalame zeelini la Ezipete yooi zu, Ezipete nuiti ti kaani ga anzai wola ʋagɛ. 
Falaɠɔn ná-nu wolaiti ti kaai ma, ti maamusɛni Falaɠɔn ɠaazu. Ti liini ga anzanui masagi ná-pɛlɛi wu. 
É Abalame zoni ga pagɔ anzanui maaʋele ma. Abalame togani goiti ta togani wolaiti sɔlɔɔni, naa ʋɛɛ soovalegiti ba, ta botiɠɛ zunuiti ta botiɠɛ anzanuiti, ta soovale saaiti ta ɲɔmɛiti. 
Kɛlɛ Ɠɔoɠɔ GALAGI maanɔɠɔ vaa wolaiti pɛɛni Falaɠɔn ta ná-pɛlɛyeɠei ʋa, Salayi maaʋele ma, nii é ga Abalame anzai. 
Falaɠɔn zɛba é Abalame loli, é ɠɛ ma: «Leeni ɠa è kɛai ga ze? Lee vaa zu è la boni mà ga è-anzai ʋe? 
Lee vaa zu è ɠɛai mà: ‹Bàazeelai ʋe›? Naa ɠa é kɛai gè seɠeai ga ànza. È-anzai ɠaa niina, seɠena, è li!» 
Falaɠɔn devei veeni ná-nuiti zea ga ti zɛ ná, é li, ta anzai, é ʋɛɛ naati kpein ba, ti ɠɛni ga nɔnɔ. 
