﻿Kitabo kya Habbaku̱u̱ki̱.
1.
Buni niibuwo butumuwa obu Mukama ahaaye mulangi̱ Habbaku̱u̱ki̱ mu kubonekeluwa. 
Ai̱ Mukama, buuye nku̱hi̱ki̱ya dhi̱ kukusaba kunkoonela? Bhaatu okubhengagha ku̱tegheeleli̱ya! Nkukutaaghilagha nʼelaka lyamaani̱ nti, “Butabanguko bwahingulaane!” Bhaatu tookwisagha kutujuna! 
Okulekagha mbona bintu bi̱bhi̱i̱hi̱ye ebi bantu bakwete kukola nangaaki? Tookwete kufubila bantu abakwete kukola bintu ebi bwaki? Nkuukalagha mboone ngoku bantu bakwete ku̱bhi̱i̱ya bintu kandi bali na butabanguko. Bakuukalagha mbatongana kandi mbalwana hantu hoona. 
Kilaghilo takikyali na maani̱ kandi taaliyo bwengani̱ja mu kooti̱. Bantu abakukolagha bintu bi̱bhi̱i̱hi̱ye bakwete kwobahi̱i̱li̱li̱ya bantu bahi̱ki̱li̱i̱ye, nahabweki taakyaliyo bwengani̱ja. 
Mukama aaghila ati, “Muukale mu̱loli̱ye mahanga agheeli̱ghi̱li̱i̱ye enu̱we, eki mukubona nkilehukana mu mahanga agha kikuswekani̱ya enu̱we. Nanga ndi nʼeki nkughenda kukola mu mahanga agha munaakaaye. Tamu̱ku̱hi̱ki̱li̱ja nankabha babaghambila ngoku kyabaayʼo. 
Olole, nkuha maani̱ Bakaladi̱ya, ehanga elisaakaaye kandi elili na baasilikale baamaani̱. Bakughendagha balu̱mba mahanga ghʼomu nsi yoona kandi bakwata bibugha ebitali byabo. 
Bakulekagha bantu bʼomu mahanga ghanji boobaha kandi batukumila. Bakukolagha ebi babbali̱ye kandi tabaku̱hu̱ti̱yagha bilaghilo bya mahanga ghanji. 
Nkai̱na syabo sisaai̱ye nguwe ku̱li̱gi̱ta bwangu kandi sisaakaaye kusaali̱ya myaga eghi njala ekwete. Abani̱i̱ni̱ye nkai̱na syabo baku̱lu̱ghagha hambali haseli̱ye mbali̱gi̱ta, nga kibebe kikuhalala kukwata eki kikuliya. 
Bakaladi̱ya aba bakukwatagha bantu na ki̱ku̱bha kandi basaakaaye. Muntu weena oghu akubabonagha mbaasa akuboobaagha. Bakukwatagha banyankomo bakaniiye kimui nga musene. 
Bakughayagha bakama kandi basekeelela balemi̱. Bakusekeelelagha bibugha ebili na bigho bi̱gu̱mi̱ye, nanga bakutuumagha etaka haa bigho ebi bani̱i̱ni̱lʼo kandi bakwata bibugha ebi. 
Mahe ghaabo ghakughendagha bwangu mu ki̱i̱kalo kinji nga mwegha ghukuhunga. Bakulami̱yagha maani̱ ghaabo ngʼoghu oti ni luhanga. Nahabweki musango ghubasi̱ngi̱ye.” 
Ai̱ Mukama Luhanga wanje, buuye taanuuwe wa bilo nʼebilo? Taanuuwe Mukama Luhanga wanje, oghu ahi̱ki̱li̱i̱ye? Ai̱ Mukama, tatu̱ku̱ku̱wa baa. Nuuwe kikuka kya buulukilo bwatu kandi nuuwe waataayʼo Bakaladi̱ya aba kutufubila. 
Ohi̱ki̱li̱i̱ye kwonini kandi tooku̱si̱i̱ma kintu kyona ki̱bhi̱i̱hi̱ye. Nahabweki, tooku̱gu̱mi̱si̱li̱ja bantu abakwete kukola bintu bi̱bhi̱i̱hi̱ye ebi. Buuye waaleki̱ye bantu aba kuukala banali boomi̱i̱li̱ nangaaki? Tawaabu̱ghi̱ye kantu koona bwaki? Bantu aba bakwete kwita bantu abasaai̱ye ebo kuba bahi̱ki̱li̱i̱ye. 
Waafooye bantu nga nsu̱i̱ syʼomu nanja kandi nga bihanguwa ebitali na mu̱lemi̱. 
Bakaladi̱ya aba bakukwatagha bantu ngoku bantu baku̱koleesi̱yagha ndobhaani̱ kukwata nsu̱i̱. Bakubaagha nga bantu abaku̱bi̱ye kati̱mba mu maasi kukwata nsu̱i̱ sikani̱ye esi babbali̱ye. Bakaakukwatagha bantu bakani̱ye, batandika kulimba badheedheeu̱we kandi basemeleeuwe. 
Bakuhongelagha kati̱mba kaabo bihonguwa nanga kakulekagha batunga ebi bakubbala. Kati̱mba aka kakubafoolagha baguudha kandi baliya byokuliya bisemeeye, nahabweki baku̱tu̱mi̱kagha bubbani̱ kulami̱ya kati̱mba kaabo aka. 
Buuye bakweyongela ku̱koleesi̱ya kati̱mba kaabo kukwata bantu kandi ku̱hwelekeeleli̱ya bantu bʼomu mahanga ghanji batali na kisa bilo nʼebilo? 
