﻿Nsi̱mo.
24.
Otalikwatiluwa etima bantu babhi kandi otalyekumbula kuukala nabo. 
Bakuukalagha mbeeli̱li̱kana haa mitima yabo ebikuleeta katabanguko kandi mbabu̱gha mu kanu̱wa kaabo ebikuleeta bijibu. 
Muntu mugheji akukwelagha ka yee kandi kwetegheeleli̱ya kuwe kuleka eguma. 
Kwetegheeleli̱ya kuwe kukulekagha aasu̱li̱ya mu bisiika biye, bintu bisemeeye kandi bya mughaso. 
Kuba mugheji kisaai̱ye kuba wamaani̱ kandi oghu eetegheleei̱ye asaai̱ye oghu ali na maani̱. 
Kuhanuuliluwa kusemeeye kukuleka olwane bulemo kandi bahi̱ baa magheji mbaakani̱ye hakubʼo bu̱si̱ngu̱li̱. 
Bighambo bya magheji bitimbiikaane kwonini mudhoma ku̱byetegheeleli̱ya kandi mu lukulato akuukalagha aholeei̱ye. 
Muntu oghu akuukalagha naategheka kukola bintu bi̱bhi̱i̱hi̱ye, bakumughilaghamu kaleeta bijibu. 
Mudhoma akuukalagha naategheka kukola kibhi kandi muntu wa mighayo, bantu tabakumubbalagha. 
Nu̱wooleki̱ye buceke mu bwile bwa bijibu, maani̱ ghaawe ngakee kwonini. 
Ocungule aba bakubbala kwita etali mu bwengani̱ja, otoobaha kughenda kubajuna lu̱ku̱. 
Okugubha kughila oti, “Ebi tambimani̱ye.” Buuye eye oghu akubonagha ebili haa mutima taakuboone? Eye oghu akulindagha bwomi̱i̱li̱ bwawe taakumani̱ye? Alikusasula kusighikila haa ebi okukolagha. 
Mwana wanje, oliye njoki, nanga sisemeeye kandi bwoki bwʼomu bighabo byasiyo bu̱nu̱li̱ye. 
Omanye dhee ngu kisemeeye kuba na magheji mu bwomi̱i̱li̱ bwawe, nuwaaghatu̱ngi̱ye, okuba kulungi mu maaso kandi kunihila kwawe taku̱ku̱kwi̱la busa. 
Weetantale kuba nga bantu babhi abakwebi̱sagha ku̱lu̱mba ka ya muntu mulungi kandi otalinyagha ka yee. 
Muntu ahi̱ki̱li̱i̱ye nankabha aghuwa milundi musanju̱, akuumukagha dhee, bhaatu kabhi kakaku̱hi̱kaghʼo bantu babhi kabahwelekeeleli̱ya. 
Otadheedhuwa kubona ngi̱ghu̱ yaawe naabona-bona kandi otasemeeleluwa kubona naaghuwa. 
Nuwaadheedheu̱we Mukama akumanya kandi asaaliluwe, akugubha kutamufubila. 
Oleke kutuntula haabwa bantu abakukolagha bintu bi̱bhi̱i̱hi̱ye, kedha kughilila etima bantu babhi. 
Muntu mubhi taakubaagha na kunihila kwa mu maaso, akubaagha nga taala eghi bali̱li̱mi̱ya. 
Mwana wanje, ohu̱ti̱yaghe Mukama na mu̱lemi̱ kandi otaakalagha na abakubajeemelagha. 
Bantu aba bakuhwelekeelela batamani̱ye kandi taaliyo oghu amani̱ye kifubilo eki Mukama kedha mu̱lemi̱ akubaha. 
Bantu bagheji aba bakatodha baabu̱gha bighambo bini. Ku̱twi̱la misango etali mu bwengani̱ja takili kilungi. 
Mu̱cu̱ wa misango oghu akughila muntu oghu ali na musango ati, “Tooli na musango,” akukiinuwa kandi bantu boona bakumwoha. 
Bacu̱ abakufubilagha abasobeei̱ye bakuba kulungi kandi bakutunga mu̱gi̱sa. 
Kukuukamu ebi̱hi̱ki̱ye, nkaakulolelʼo kaa bu̱u̱bhootu̱ bwamajima. 
Otakwela numba yaawe kandi kuba na ka ku̱hi̱ki̱ya oli na misili kandi omani̱ye ngu okugubha kuba na ntaahi̱ya. 
Otaliha buukai̱so haa muntu onji otali na kighendeleluwa kandi otali̱mu̱bu̱ghʼo bisubha. 
Otalighila oti, “Nkumutwalikani̱ya ngoku ankoli̱ye kandi nimusasule eki ankoli̱ye.” 
Nkasaalila mu kibanja kandi musili ghwa mi̱jaabbi̱i̱bbu̱ bya muntu mughala oghu ateetegheleei̱ye. 
Naasanga bilimu mahuwa kandi bi̱hu̱u̱ki̱ye. Lugho lwabiyo lwamabaale lwegengi̱ye. 
Obu naaboone eki, kyanjegheesi̱ya esomo ngu, 
taki̱hi̱ki̱ye kughila oti, “Oleke ndangaalʼo kati̱i̱, neekumbate kandi mpuumulʼo.” 
Bhaatu ngoku okweyongela kughwesaghila, niikuwo bunaku bu̱ku̱ku̱lu̱mba nga mu̱ji̱ndi̱ akwete kyakulwani̱i̱si̱ya. 
