﻿Jabbu̱li̱.
21.
Ewaa mukulu wa bilimbo. Jabbu̱li̱ ya Dhau̱dhi̱. Ai̱ Mukama, mukama adheedheeu̱we haabwa kumuha maani̱, adheedheeu̱we kwonini haabwa bu̱si̱ngu̱li̱ okumuhaagha. 
Waamuhaaye ebi abbali̱ye haa mutima ghuwe, waamuha byona ebi aakusabi̱ye. 
Waamuhaaye mi̱gi̱sa yamaani̱ kandi waamu̱lu̱wi̱ka haa mutuwe sipeewa ya bukama eghi ekoleeu̱we mu feeja esemeleeye kimui. 
Akakusaba bwomi̱i̱li̱ kandi waamuhaabuwo, waamuha bwomi̱i̱li̱ bwa bilo nʼebilo. 
Ki̱ti̱i̱ni̱sa kiye nkyamaani̱ haabwa bu̱kooneli̱ bwawe, waaleki̱ye bantu baamumanya kandi baamu̱hu̱ti̱ya kwonini. 
Waamuhaaye mi̱gi̱sa ya bilo nʼebilo kandi uwe kumuukala haai kwaleki̱ye aadheedhuwa, 
nanga mu̱lemi̱ akwesighagha Mukama wa Eghulu Munu. Akuukalagha agu̱mi̱ye haabwa kukunda kwamaani̱ kwa Mukama, taakutukumila bbaa. 
Mukama akukwata ngi̱ghu̱ siye syona kandi akukwata bu̱li̱ muntu weena oghu amwohi̱ye. 
Mukama okaakwisa, okubahwelekeeleli̱ya boona na mulilo ghwamaani̱. Okubamalʼo na ki̱i̱ni̱gha kyawe kandi mulilo ghu̱ku̱booki̱ya boona. 
Oku̱hwelekeeleli̱ya baana baabo boona munsi kandi na baasukulu baabo batwi̱ke. 
Nankabha bategheka kuhakani̱ya mukama waatu, ntegheka syabo si̱bhi̱i̱hi̱ye tasikukola bbaa. 
Akubabhasuulila bimala biye kandi beegaali̱ye bali̱gi̱te. 
Tukukusinda Mukama, haabwa maani̱ ghaawe. Tukulimba kandi tusinde bu̱toki̱ bwawe. 
