MAT 1:1 Yesus ami awil-fakal win namti kaldak bombe kemin, Yesus ali King Devit ami man loop ale; Devit ata Abraham ami man loop kelin kemin.
MAT 1:2 Abraham ali Aisak ami aalap ale; Aisak ali Jekop ami aalap ale; Jekop ali Juda so almi kiim anung maakup nikil imi aalap kesa.
MAT 1:3 Kemin, Juda ali Peres so, Sera so, awaang man imi aalap ale; Tama uli awaang man alep imi awak ko. Ale, Peres kaali, Hesron ami aalap kesa; Hesron ali Ram ami aalap.
MAT 1:4 Yak Ram kaali, Aminadap ami aalap kesa; Aminadap kaata, Nason ami aalap. Nason ali Salmon ami aalap.
MAT 1:5 Salmon kaali, Boas ami aalap ale; Rahap uta Boas almi awak aa, Boas ali Obet ami aalap, mep Rut kuuta Obet ami awak; kanolin kemin, Obet kaali, Jesi ami aalap kesa. Ale,
MAT 1:6 Jesi kaali, King Devit ami aalap kesa. Kemin, King Devit kaali, Solomon ami aalap kesale, Baseba uta Solomon ami awak namti kabuu. Yak kamasi kaali, Baseba kuuli, tunum kusnum Uria ami kalel; la ilom ale, kulaali, King Devit ata kuluulaya ami kalel kesu no.
MAT 1:7 Solomon ayo Rehoboam ami aalap kesa; Rehoboam kaali, Abiya ami aalap; Abiya kaali Asa ami aalap.
MAT 1:8 Asa kaali, Jehosafat ami aalap ale; Jehosafat ali Joram ami aalap. Joram ali Usia ami aalap ale,
MAT 1:9 Usia kaa Jotam ami aalap ale; Jotam kaa Ahas ami aalap ale; Ahas ali Hesekia ami aalap.
MAT 1:10 Hesekia kaa Manase ami aalap: Manase kaali, Amos ami aalap; Amos kaali, Josaya ami aalap.
MAT 1:11 Josaya kaali, Jekonia so almi ilem anung maakup nikil imi aalap kesip. Kemin, Jekonia asole, almi muuk maakup inin so, nikil kiili bom-biliwa, Israel tunum imi waasi Babilon kayaak tunum iyo, baa tal Israel-miin yemum o, kalalip baa tal daalip din-bomdipla, Babilon ita ita ke Israel-miin iyo kabaak baniwa, fuku tibii sok de-yim-tama bilin Babilon ilmi abip ma ma kaptam daa-daa-kemsip ko.
MAT 1:12 Kanola, Babilon kasel ili Israel-miin imi sok de-yimu imbilin ilmi abip tiiliwa, Jekonia ayo Sealtiel ayo duulaya, Sealtiel ayo Serubabel ami aalap kelale;
MAT 1:13 Serubabel kaali, Abiut ami aalap kelale; Abiut kaata, Eliakim ami aalap; Eliakim ali Aso ami aalap.
MAT 1:14 Aso kaali, Sadok ami aalap; Sadok kaata, Akim ami aalap; Akim kaali, Eliut ami aalap;
MAT 1:15 Eliut kaata, Eleasa ami aalap kesa; Eleasa kaali, Matan ami aalap; Matan kaali, Jekop akal alik awasekim ami aalap.
MAT 1:16 Jekop kaali, Josep ami aalap; Josep ami kalel Maria uta Yesus kaa duusu. Kemin, Yesus kaali, God ata uldaa-dabuula tiltam Kamokim kesa tunum Kraist o, akan-kaan-umbip kaata ko.
MAT 1:17 Abraham ami loop tap-tiisa kaali, man loop ayo tiila yak aba umbital Devit ami diim kuyaku dilit kalasuu kaalile, man loop tap-tiimin almi-kup tal aba tam mitkal kemin, ulultap, kanola Devit ami loop tap-tiise kaakal man loop tiila yak aba toop Babilon kasel imi tilsip kuyaku ditang kalasuu kaa man loop tap-tiimin ulmi-kup tal aba tam mitkal kaltoop ata ukosu. Kemin, Babilon kayaak ita taba Israel-miin imi waasi keyinsip. Kemin, iyo tal sok iluu imbi bilin Babilon ilmi abip ma ma kawu yim-tiibi keyiliwa, bom-biisip ulultap kemin, abip Babilon unsip kaali, kabaku man loop tiptin yakyak umbital God ami uldaa-dabuula tiltam Kamokim kesa tunum Kraist ami duusu diim kuyaku dilit kalsu kaali, man loop ukamin ulmi-kup tal aba tam mitkal uku no, kesu ko.
MAT 1:18 Kamosinim Yesus Kraist duusu namti kalano-som ko. Awak Maria kuuli, Josep ami weng-kup baaliwa bombu. La, atin kuluu kuyak tabep mola uso bomdip sin-yaamakin disa; bom-iliple, kulaa God ami Sinik Tambal ayo tal Maria umi iipyak tem unaya, ukol utamu yi, Kaa kumunbi kala kalale,
MAT 1:19 umi imak Josep kayi kala weng tik-daanbip ayo, ti tunum tambalim kemin, ayo mep weng kaluuta boko ku-fatap-daalila, alik iyo weng saniwale, Maria uyo suu duk-duulamu no, kala duluuma ilomdi bamyaal tap unang kuu kewon i!
MAT 1:20 kalala, kanolin aket kaata fuku-daka-bam ilale, Dukum ami ensel ma dabaala tal lom dulun weng bokola ko: Devit ami man loop Josep kapyo, kapni kalel o, kala weng baap-ta-silip Maria uyo man so kebu te! Katale, man mat tem kabak bombe kaali, God ami Sinik Tangbal alta tal umi iipyak tem unala kumun so kebu. Kemin, kabi suunin disa; kalel uyo kuluulan aa!
MAT 1:21 Bom bii man kaa duulokomu kaata, almi unang tunum alik imi kukup mafak uyo takan-tiiyila yak banula, yim-buulokoma. Kabi ami win kaa bokola-lomdap ata dong dokoyilala yim-buu-laamin tunum o, kala-lomdap Yesus o, akan o, kala kanum bokola ko.
MAT 1:22 Siin sawaayak kaptoowu Dukum ayo almi weng ku-fatap-dakamin tunum profet o, kala-laabip Aisaya ami weng ma bokolaya ata God ami Sukon Tem kabaku dolsa namti kulu tituun-kup tiltam tabasu.
MAT 1:23 Kemin, sawaayak kaali boko-lomda: Ti kaa utamin! Bii am ma daanula unang ma, tunum so ma sin-laamin disa, bom-ilomdula kawu, man kum-alomdu man tunum kemin, man duulokomu kaami win kaa Emanuel o, akokomip o, kalala kanum bokosa. Kemin, win kabak-ami miit kaali, God ayo nuso bombe no, kalsu ko.
MAT 1:24 Kemin, Josep ayo akan-bom ilala, Kamokim ami ensel ami lom dulun weng bokola kaata, weng san-somdala, dakela tam-tiin yak kalel uyo kuluula katale,
MAT 1:25 kalel uso ma sin-laamin dinim, bom-ilom man ayo duluula, Josep ayo man ami win ayo bokola-lom: Yesus o, ansa ko.
MAT 2:1 Herot ayo Provins Judiya kaptam-ami kamokim king ke-bom biisa diim kawu, Maria uyo Yesus ali Provins Judiya umi abip Betleam kawu duulula bom-ilale, wakalkan uta utamsip tunum malo ma atan talebu lo kasel imi kukuya yakyak umbital Jerusalam tal abale, bokolip ko:
MAT 2:2 Kipyo, kama man ma duulu tiltam Juda imi kamokim keba kaa doku bombe ni? Nuli atan tiltam tabebu kawu bom-ilupla, wakalkan ta ami duulu bombe kaayo, kukuyila yakyak tala-bulu, talabup o. Uyo utamdupya tal fet dola ami fiyaap ayo duumum o, kalalupla tulup o, yikiwa,
MAT 2:3 King Herot ayo kamokim king kusnum ami sang uyo weng san-ilomda kaata taba, Nami abiin ayo kuluulokoma nema yo? kala-lomda aket yaapkan fukun-balale, kuno Jerusalam kaptam kayaak alik yakal ti aket yaapkan fukun-bala kemip. Kemin,
MAT 2:4 Herot ayo taba tunum awem imi kamok kamok sole, Juda imi lo utamsip tunum iso, iyo alik afeta yim-tiile, dik-daaya: Kipni God ami uldaa-dabuula tiltam Kamokim ke-lokoma tunum kaami fen-tabasip kaali, doku duulokomu? yakale,
MAT 2:5 bokolip: I! Provins Judiya kaltam-ami abip katip ma Betleam kawu duulokomu kayi! Kemin, siin sawaayak kaptoowu God ami weng ku-fatap-dakamin tunum profet ma asiik taba ami sang kaa dola kutii boko-lomda:
MAT 2:6 Betleam kasel aa! ibi Judiya bokon kala bom-bilip kemin, ilom kaali, kipni tunum ma ata tiltam kamokim ke-lomda nami unang tunum Israel kii alik tiin molokoma. Kemin, kanolaya Betleam kayaak kipta win so ke-lomdip Judiya kayaak kusnum ita kabaak banip keyokomip kayi! kalalaya dolsa no, kala kanum bokolip ko.
MAT 2:7 Herot ayo weng san-somdaya, ayo utamsip tunum tilip iyo maak lo sawaanin weng kuyila, tal atamiple, dik-daayila ko: Kibi kamasi kaali, dok kanumin diim kawu wakalkan kuu tiltam tamalu utamdipla, ibi man ma duubu kalaliwa dikiwa tal-bilip bii kayoop kaa kanim kal ma duk-duulip bital tilip i? Yakale, isiik maan tela bokoliwa,
MAT 2:8 ayo bokola: Ibi Betleam uyo din ilomdip man kaali, talalu fen-tal-une-bamdip atamip namti, weng kulii-tal bokop-niwa, nakal din-ilomdi ami fiyaap uyo duu-bam ale, fet ayo dolon o, kal-bomda kasen-fakaya ko.
MAT 2:9 Kulaa, nikil iyo King ami weng uyo weng sandiwa, kulaa kambola ti kamasi atan tiltam talemin lo kawu bom-bilipla, wakalkan tiltam molu utam-silip usiik dusiin daa-lom una-bulule, ita mafiing tem kaltoowu utam-utam una-bilip bii wakalkan uyo yakaba bilin man ami am bombe umi dubim diim kutamu tolnula,
MAT 2:10 tilin daa wakalkan uyo utam ale, fiyaap duulip ko.
MAT 2:11 Kemin, nikil am tam uliwa yi, Man so, awak Maria so, awaat iyo bom-bilip kala kalale, tam itamiple, kamok kamok imi weng umkaayin kaa kanumin kemin, imi katuun duung ayo fakela daak tiin dabuuna man ami fiyaap dukum ayo disa akal ma ke-bam fiyaap duu-bam, fet-dakaan-bamdip ilmi men tem mafek mafek tangbal tangbal abu kulii-tilip kaayo, man ami kola kola ke-bam ale, tuum gol sole, as dan kuyak daalip kiin-taba tang tambal tabemin ma kaaso, yak ok tang tangbal tabemin so, uyo kuluu man ami kukaalip ko.
MAT 2:12 Kemin, God ali mep tunum kiimi lom dulun weng tildaak bokoya-lomda: Ibi asuk din Herot kaa atam-laamin disa yo, yakala, kulaali fan kulaa kela liip kusnum abalip ilmi abip unip ko.
MAT 2:13 Tambaniwa kulaa, God ami ensel ma tildaak Josep ami lom dulun weng bokola ko: Kapyo, Herot ayo tal man kulaa fen-tal-bomdi atam aalon o, kala-somda fen-tal-une-mokoma. Kemin, baan kawang-alap abil yak man awaat kiili, foko kulii waka-daalap umbilin Isip kawu bom-biliwa, bombii asuk nalta maso ma bokop-tolon o, akaya, fan kulaali,
MAT 2:14 Josep ayo kutamiip kuyaku abiltap tam tiin man awaat iyo foko kuliila,
MAT 2:15 umbilin Isip kawu bom-balaya bii, Herot ayo taana kawu, kulaata asuk foko kuliila tala ko. Siin sawaayak kawu, God ayo boko-lomda: Nami Man tunum ayo Isip bokon kawu bom-balaya bii, nalta naan-daaliya asuk talak kalalaya, God ayo almi profet ma ami bokolaya, ata unang tunum imi bokoyale, kuno Sukon Tem uyo dola kutii kesa. Kemin, Yesus so, awak Maria so, Josep alimal kiimi am bokon Isip kela tilsip kaami sang kaata, dolsa namti kulu duuk-kup dakat tiltam talsuu ko.
MAT 2:16 Kanola Josep alimal iyo din Isip kawu bom-biliwa, Herot ayo utama yi, Utamsip tunum iyo kasen-fokop-na-lomdip asuk weng uyo kulii-tal bokop-na-lomdip kawu, unin disa kebip o, kala-lomda, aket atul kelula, Herot ayo almi kamasi utamsip tunum imi dik-daa bokoya-lomda: Dok kanumin diim kawu, man kaa duulu wakalkan kuu tiltam tamalula utam-silip yoko? yakala, iyo bokola-silip umi aket kabak-ata-kup fuku-daa-lomda: Awu, man kulaa ti, kayoop kunolin kal dakan-tiila kulaali ti tiltam fasula kala kalale, almi tunum iyo yim-baala din abip Betleam kaptam asole, kaptam-ami abip mep mep so, uyo din aba tal une-bamdip, man tunum man unaak so man katip katip so, imulip wasital alep dakan-tii-bala ital alep dakan-tiilin disa bom-bilip iso, kebip iyo alik an-tal-unemip ko.
MAT 2:17 Abip Rama kaa Betleam kaptam-ami mepso kulu bombuu kemin, sawaayak kawu God almi profet Jeremaya ami weng ma bokolaya ata abip kaptam-ami sang boko-lomda: Rama kayaak kaptam-ali aket uluum dukum tabeyila-buluya, dukum-kup aman duluum-biliwa, alik weng sanip. Kemin, unang Resel umi man loop o, kala Israel-miin iyo ilmi man kalan kaa, ama-bilipla, ap-tunum kusal iyo dong dokoyup iyo asuk tiltam fiyaap duumik o, kalip. Katale, numi man kii disa kebip o, kalaliwa, abiltap-siik aman duluumin uyo disa ke-laamin disa; man kiimi tibi dooban uta ukdaa bomdiwa amabip o, kalsu. Kemin, Herot ami tunum fokola din man yan-tal-unemsip kaami sang kaata bokosa namti kulu fan tiltam tabasu ko.
MAT 2:19 Kemin, Josep alimal iyo Isip bokon kawu bom-bilipya, Herot ayo bombii taanaya kulaali, Dukum ami ensel ma tildaak Josep ami lom dulun weng bokola ko:
MAT 2:20 Kapyo, tunum kaami tam-taba man unaak kaa aalila, taanak o, kemsa tunum ayo taanba. Kemin, kulaa kela man awaat iyo foko kuliilap yak aba umbilin Israel bokon kawu unin o, akaya kulaali,
MAT 2:21 Josep ayo tam tiin-ilom man awaat iyo foko kuliila Israel bokon una. Lale,
MAT 2:22 Herot ami man Akelaus asiik tiltam aalap ami abiin uyo kuluu-lomda Provins Judiya kayaak imi kamokim king kela bomdala be no, kalip weng san-ilomda suun daa-lom Provins Judiya unon o, kalba uyo kela. Lale, God ayo asuk lom dulun weng tildaak Josep ami bokolala:
MAT 2:23 Alimal yak aba umbilin Provins Galili, Nasaret abip kawu ilipla yo. Sawaayak kawu profet ita God ami uldaa-dabuula tiltam Kamokim kesa tunum ami sang uyo bokoya-lomdip: Bombii kaali, ami win kaa Nasaret kayaak o, akokomip kayi! kalsip namti kulu fan tiltam talsuu ko.
MAT 3:1 Yesus aso, awak-aalap so, alimal ili kawu laabipla bombii, man ayo tal aba tam fasu tunum aalap dukum kelale, kulu oksam ukayin tunum Jon ayo tal Provins Judiya kaptam-ami tunum dinim bokon kawu bom-balala, unang tunum iyo tal-tal ke-bilipla, God ami weng uyo bakayim-bamda bokola:
MAT 3:2 God ami unang tunum imbii tam almi abip daa tiin molokoma kaali, mepso tulu, kemin (ibi God kaa numi ban-wakan-umbup uyo yam-kukulokoma kayu,) kipni ban ayo kulaa kela aket fanang uyo fal-sikiliwa yo, kal-bomda bakayila ko.
MAT 3:3 Siin sawaayak sawaayak kawu profet Aisaya ayo Jon ami sang kalaa Sukon Tem kabaku dolale bokola: Tunum ma, tunum dinim bokon kawu, naan-bamda bokola ko: Liip tambal ma talalmiwa, Kamokim ayo baan abiltap-kup talak o, kalala naanba kayi! kala Aisaya ata kanum boko dola kuyinsa. (Kemin, kabak-ami miit kaali, unang tunum kipni aket fanang ayo fal-siki talal-bam dota-silipla, Yesus ayo talak o, kala-lomdu kanum bokosu) no.
MAT 3:4 Jon ali (sawaayak profet o, kala God ami weng ku-fatap-daa bakayin tunum Elaija ami kukup kanumsa ultap kaata kuluu-lomda) ali ilim tambal kaa mikimsa disa; ami ilim mafak kaali, taloop kamel o kala-laabip umi kon kaata, bakelip mikilale, kang kau umi ipnaal uta ukduu ol tiil o kala dotu kutii, kuyang diila nek molule, ima waan tangbal uyo falala le, kupluum so, as tem umi mumu wok so, kiita-kup in-bom biisa.
MAT 3:5 Unang tunum yaapkan abip dukum Jerusalam ilin isole, Provins Judiya bokon alik kaptam-ami abip ma ma bom ilin iso, Ok Jodan balang diim ilin iso, iyo tal Jon ami weng kaata weng san-kaamum o, kalalipla,
MAT 3:6 tala-tala-ke Jon ami weng ayo weng san-kaa-bamdip, imi aket uyo fal-kela-lomdip le, God so, unang tunum so, imi tiin diim kawu ilmi ban kemin uyo ku-fatap-daka-bam ke-bilipla, Jon ayo taba imbii daak Ok Jodan kumun tem im-baak daa oksam wakaya ko.
MAT 3:7 Juda imi kamok kamok Falosi so, Sadusi yaapkan so, iyo tal Jon ata numi oksam ukayilak o, kalalip ami fanang tal-tal kebip. Lale, Jon ali utamala, Imi aket kaa fal-sikilin disa ke-lomdip tilip kala, kala-lomda, itam bokoyila ko: God ata taba-lomda kipni kukup mafak kaami kalan kaata, yam-mafak fuulokoma. Kemin, ibi kanta bokoyipla, ipkal aket fukun-daa-lomdipla, Din Jon atamup ami oksam ukuyokoma kaata, fan God ami aket atul kuyokoma uyo uktayokomu te! kalalip tale-bam ale, ibi inap imi tikiin kiin-bala, suun daa-lom ukadaa sak funbi unebip ililtap kelipla, nami fanang tale-bam kebip yoko? Katale, kaali, ibi uktayokomu disa yo.
MAT 3:8 Ti kukup tambal kaata ti kanu-bilipla, kabak-ali utamila, kipni aket fal-siki-lomdip ipni kukup mafak kaa, kulaabip kala kalon o.
MAT 3:9 Ibi nami weng kala bokoyokomi kaali, weng san iliwa, ibi Nuli ti Abraham ami man loop kemin uktayokomu no, kala-lom fiyaap duubip. Lale, God ata tuum kalawiili fal-sikila tiltam Abraham ami man loop ke-lomdipla, ipni abiin uyo kuluulamip kemin, ibi dotu utamdiwa!
MAT 3:10 Kemin, God ayo as miit tem kawu kaabaak ma kutii-lomda as ayo duulmon o keba. Kemin, as alik ibi dok kanolin kiita, as lap tambal ma abuulin disa kesip namti, duula-lom as kuyak daala kiin-taba unokomu no. Kemin ultap o, ipkal kukup tambal kaali, tabuulin dinim ke-lokomip kaali, God ata taba-lomda yam-kan tiilokoma no.
MAT 3:11 Kipni tunum talokoma no, kal-bom fenbip kaa, nita disa; kemin, kaali nasiik tilila, akal mulo kawu nami daang tem kawu talokoma. Kemin, ali kamokim dukum ke ata ata kela, nali kulaak banila, ata tam banin kala-somdiya fatom kep-nambu. Kemin, nali ti fan tunum kemin, nali taang-kalali yang ami miit tem kaa yang ilomdi ami yaan ilom kaa kulii-unomi dinim o. Ibi aket fal-sikilip kulaali, nali disa ok kulaata-kup kuluu-lomdi oksam ukayimbi. Nali disa ok kulaata-kup oksam ukayimbi. Katale, tunum kaa talokoma kaami almi Sinik Tambal ata dabaala taba-lomda kipni iipyak tem aket mafak fanang mafak dakabip uyo, as kuyak daala kiin abamnula, alik ibi tambal ke-lokomip ko.
MAT 3:12 Yak tunum imi yeng kuluu-lomdip wiit o kalalip kaali, bobi kutal tii-lomdip talal-bilip bii, umi ipnaal ayo takan-tii-lomdip wiit tiil ata-kup, kuu am tiile, ipnaal kaata-kup abul-daalip kiin-tabemin o. Kemin, ultap o; tunum kaa talokoma kaa tunum unang ami lak duusip iyo afeta yim-tii foko kutam almi abip tiiba-kup, ale yak tunum unang ami lak duulin disa ita, atin ti as kiinin-kup ilin ten-yaamin disa; ti kano kiinin-kup ilin kaami tem kabaaku abul-daala kiin-bam ilokomip o, kala bakayila ko.
MAT 3:13 Jon ayo kanu-bamda bom-balaya kulaali, Yesus ayo Provins Galili uyo kulaa kambola din Jodan dal din atamiya, Jon ayo oksam ukop-nak o, kalala din atamala,
MAT 3:14 Jon ayo bokoliya oksam woko-laamin kaayo kambolak o, kala-lomda bokolala: Yi, kabi God ali uldaa-tam-buula tiltam Kamokim kesap tunum ale, nita atin tunum kemin, nali oksam kaa ukop-tokomi disa; kapta taba-lom nami oksam okop-nan o. Kanimin o, kalalapla bokop-na-lomdap: Oksam ukop-nan o, kalbap i? akale,
MAT 3:15 Yesus asiik bokola: Nak-tunum kapyo, kabi nali oksam ukop-nokomap kaali, God ami weng kuka-daasa uyo tiltam tituun-kup ke-lokomu kalalila kemin, umi fanang kaata tili. Kemin, kapyo oksam ukop-nan o, kalala, Jon ayo fan, weng san-ilomda, Ayo, kala yak oksam ukola ko.
MAT 3:16 Jon ayo taba Yesus ami oksam ukola kem-salale, maak fak-daalin tap Yesus ayo ok tem kambola tiltam aba abiil tikiin uyo tem kalulu titam daalaya, God ami Sinik ayo awon Abim tap kela tildaak nami diim ayo abamna kala, kala-somdala,
MAT 3:17 alep iyo weng seliwa yi! abiil tikiin lo kawu, God ami weng ma tal bokolu kabak-ali boko-lomdu: Mep kaali ti nalmi Man aket-iip kemin, nami aket fanang uyo nali ami fiyaap-kup duubi no, kala bokoya weng sanip ko.
MAT 4:1 Jon ayo oksam ukola disa kelule, mulo kawu God ami Sinik ata Yesus ayo dibiila bilin unang tunum dinim bokon kawu dip-din daalaya, Tunum Mafak Setaan o kala-laabip ayo tal Yesus ami dap-kukulak o, kala dibii una. Kemin,
MAT 4:2 Yesus ayo ima kaa inam-nomi dinim o, kala kela bomdala, bii am sin-yaamin almi-kup 40 kiita disa kelala, Yesus ali ima tinap bom-balaya,
MAT 4:3 kulaali, Setaan ayo talaba-lomda bokola ko: Kabi fan God ami Man o, kalap namti, daak tuum kalawiili kuluu fal-sikilap ima bret kelula inamnap, titam-somdi, Awu, kabi fan God almi Man tituun kala tokon o, kala kanum bokolale,
MAT 4:4 Yesus ayo asiik maan tela ko: Daa, God ami Sukon Tem kabak-ali boko-lomdu: Ima bret kulaami inam-nokomap kulaali, tiil umi kup ifamin ale, kaali kapni aket fukunin kabak dong dokop-tokomu disa; kabi God ami weng uta alik weng san kutal-fukulokomap kaata, fan kapni aket fukunin uyo dong dokop-tokomu no, kalsu. Kemin, kaa kano-lomdila ima bret kaa, inam-nokomi dinim o, kala kanum bokola ko.
MAT 4:5 Kanum bokolale, Setaan ayo Yesus dap-tamala ti umbitam Abip Tangbal Dukum Jerusalam o kala-laabip daale, dibii tam lotu am awak dukum win sokan kaami liip kutal-fuku umbitam asal am desip umi dubim diim daale, bokola ko:
MAT 4:6 Kabi tifan God ami Man namti, mafek mafek ma kaata taba-lomdu telokomu dinim; kemin, asal kalawu uunfoko umbalaak tawaal diim abamnan aa! akale God ami Sukon Tem kabak boko-lomdu: God almi ensel imi bokoyilala, tal tiin-molipya, kabi telokomu disa yo, kala-somale, ma kaata boko-lom: Ensel ilta iip kawu, tim-tal fuku tam-fukulokomip. Kemin, tuum daang inang ayo ma ata taba-lomdu kapni yaan kaa, lop-tokomu disa yo, kala-som kesu. Kemin, kabi weng san-ilomdap uunfoko daak tawaal diim abamnawa, unang tunum kabaak bom-bilip iyo titamiwa yi, Awu, fan kabi God almi Man o, tokolip o, kala kanum bokolale,
MAT 4:7 kulaali, Yesus asiik bokola: Daa yo! God ami Sukon Tem weng ma uyo boko-lomdu: Dukum kaali, kapni God kemin, kaa dap-kuku-bam boko-lomdap: God kabi ti nami weng bokop-ti kaata-kup, weng sandap kanolawa, kayak kayak iyo utamiwa, U, God kabi, nami aket kaata duu-bomdawa, dong dakaap-nambap kala tiki no, kemin daa yo, kalsu te! kala kanum bokola ko.
MAT 4:8 Kanum bokolala, Setaan ayo Yesus dap-tamala umbitam amdu fiil diim tam kabale, yak tawaal alik kala bombe umi tunum miit kusnum kusnum kiiso, yak unang tunum imi mafek mafek talalusip iso, iyo kukola utamale,
MAT 4:9 bokola ko: Kabi nalmi tibi diim kulu katuun duung fekela daak tiin-ilomdap bokopna-lom: Kabi nalmi kamokim o, kalap namti, nayo tawaal kalawaaso, tunum miit kaaso, mafek mafek iso, alik iyo kup-tila kapta tiin molokomap o, akale,
MAT 4:10 Yesus asiik bokola ko: Setaan kapyo, kambop-nalalap tabanan o. God ami Sukon Tem kabak-ali boko-lomdu: God maakup ata-kup kapni tunum Dukum kemin, kabi katuun duung fakela-lomdap, ami win kaata-kup kufon-bam ale, ami weng kaata-kup weng san-kaaman o, kalsu. Kemin, nali katuun duung fekela daak kapni win kufop-tokomi disa te! aka ko.
MAT 4:11 Setaan ayo kanum bokola weng san-somdala kulu dap-kukumin uyo kambola tabanale, ensel iyo tal Yesus dong dokola tiin-mo-bomdip ima kulela talemip ko.
MAT 4:12 Yesus ami bilin saak disanang kawu laaba uyo, kulaa kelala umbital Provins Judiya kawu bom-balaya, Herot ami soldiya iyo Jon ayo dap-tal fuku dibii din kalabus am daalip bom-balaya, Yesus ayo Jon ami sang ayo weng san-somdala, Provins Judiya uyo kulaa kelala Provins Galili una.
MAT 4:13 Lale, din almi abip Nasaret kaa iloma dinim; kulaa yak aba din abip Kapeneam kawu ila. Abip Kapeneam kaptam-ali Ok Galili kumun ami mepso kulu bombuu kemin, abip kaptam-ali Sebulun so, Naptali so, imi man loop imi tawaal namti kawu bombuu ko.
MAT 4:14 Siin sawaayak Aisaya Yesus ami din Kapeneam kawu ilokoma kaami sang uyo God ami Sukon Tem dolsa namti kulu tituun-kup tiltam tuluya, Yesus ayo din kawu bom-biisa. Kabak-ali Aisaya ayo boko-lom:
MAT 4:15 Sebulun so, Naptali so, alep imi man loop imi bokon ayo yak Ok Jodan malii kulu tela kulii unu ti, kulii umbilin yol ok balang diim kulu dilit kalsu. Imi tawaal kaami win kaa Galili o, ke-bisip. Lale, unang tunum miit kusnum yaapkan ita tal kaptam bom-bilip ko.
MAT 4:16 Tawaal kaptam-ami kasel iyo kutamiip o, kala ban umi diim kawu bomdiwa, taan maaklo ke imi win ayo disa kelakin. Lale, falala-kalin dukum uyo tulu utamdiwa, iyo falala-kalin dukum umi diim kawu bisip o, kala Aisaya ata Yesus ami sang uyo dolsa ko.
MAT 4:17 Kulu Yesus ayo God ami weng uyo kufo-lomda unang tunum imi bakayim-bam bokola ko: God ami unang tunum imi im-taltam almi miit tem daa-lom tiin molokoma uyo mep dikiwa tulu kemin, ibi God kaa numi ban ken-yaabup kaa im-kuku-mokoma, kalaliwa ban ayo kambola aket fal-sikiliwa yo, kala bakayila ko.
MAT 4:18 Am ma daanale, Yesus ayo Galili kumun ami balang diim kaa liip un-bomdala tiyak daala yi, Aniing aabi kulii din tiilip saanin tunum alep ma ok fuku-bomdip aniing abuumin men dukum ayo binalip daak ok tem unu aniing fenipla itama ko. Ma kaami win kaali alep, Saimon o, akan-kaa-bam ale, Pita yo, akan-kaa-bam ken-laabip, akal almi niing Andru alep kiita itama ko.
MAT 4:19 Yesus ayo bokoya ko: Nak-tunum kusal kipyo, kipni okok kebip kulaali kela tilipla, naso nikil un-bom ok kusnum ma kuya-lom yim-baali aniing abun-unbip ultap ken-tal-une-bam, unang tunum iyo afet daa yim-bii tildang God ami miit tem kawu dakamin o! yakale,
MAT 4:20 fan, alep iyo weng sandip, ilmi aniing abuumin men uyo abiltap-kup kano kelalip, yak Yesus ami daang bakaalipla nikil unip ko.
MAT 4:21 Yesus ayo alep iyo imbii soop taba yang ulip, Sebedi ami man tunum man alep Jems sole, almi niing Jon so, alep iyo bom-bilip kala itama, kemin, alep yakal ti kuno aniing abuumin tunum. Alep imi aalap Sebedi aso, alimal maakup ilmi bot tem kabaaku bomdip alimal ilmi aniing abuumin men balat tababa ayo bikibip kala kalale, itama. Ale, Yesus ayo bokoya ko: Nak-tunum kusal kipyo, kipni okok kebip kulaa kela tiliwa, naso, nikil tal-une-bam nami ok kasiik ma kuyilila okokmin o, yakaya,
MAT 4:22 weng sandip abiltap-siik aalap ayo bot tem kulaaku kelalip tildak Yesus ami daang bakaaliwa tabanip ko.
MAT 4:23 Yesus ayo Galili bokon kaptam-ami abip ma ma kawu, tal-une-bamda yak aba tam lotu am tam une-bamda, God ami weng tambal uyo unang tunum bakayin-bamda bokola ko: God kanola ibi iltipni ban umi aket uluum ayo kuluu ban wakamin ayo kambolip namti, God ata kipni ban uyo keya-lomda imbii tam alami abip daa-lomda, tiin molokoma no, yakan-kaa-bam ale, unang tunum mafak-alin disa yakal ilmi kusnum e kala kuluu-kuluu unsip imi yam-talal-bam kem-tal-unema ko.
MAT 4:24 Kanu-balaya, unang so, tunum so, iyo ami kanuba kaami sang kaata weng kulii-una-tala-ke-bilip, dukum-nula unang tunum am bokon samaan kasel Siria kayaak yakal weng san ilmi abip ma ma kawu, kambolalip ilmi ap-tunum kusal angtiil mafak umkan-unsip iyo yim-tamalip Yesus fanang talemip. Kemin, unang tunum imi angtiil umu-laamin kaali, kalanolin angtiil umu-laamin kaata ko: angtiil mamin; tiling tem atul tabemin; sinik mafak ta yam-mafak-daasa; yak angtiil banbin-kup; tilik tilik yela daak tawaal aben-umbip aye, yaan sikil dibim tem dakan-unsip, kalanolin kiita kulii-tale-biliwa, Yesus ayo alik yam-talal-bala, tiltam yaap tem dakamip ko.
MAT 4:25 Ayo kanu-balaya, unang tunum yaapkan iyo Yesus ami fanang Provins Galili lo kawu tale-bala, Provins Dekapolis lo kawu tale-bala, abip dukum Jerusalam lo kawu tale-bala, Provins Judiya bokon abip ma kawu tale-bala, Ok Jodan malii kayaak abip ma ma kasel imi tale-bilip, kem-silom ang dinamsi kaliwa, Yesus aso unip ko.
MAT 5:1 Yesus ayo itam talaala yi, Unang tunum yaapkan iyo tal ang-delip kaa kalale, tam amdu tikiin tam aba daak tiin-ilomda almi miining tunum yaapkan iyo tal almi mepso kulu tiin kelipla,
MAT 5:2 Yesus ayo weng kukaayim-bamda bakayila ko.
MAT 5:3 Kamosinim diildiil ayo kanum bokoyila ko: Unang tunum iip maakup maakup iyo utamipla, Nuli titil-foko God ami kukup tangbal uyo kutal-fukulokomup disa yu, kalip. Lale, God alta im-taltam almi abip daalon o, keba. Kemin, almi titil kaata kuyilala ili God ami kukup tangbal kaata fuku-bomdiwa, tangbal-kup tiin-bom ale, fiyaap duu-bam ke-mokomip o.
MAT 5:4 Kuno unang tunum malo ma yakal utamiwa yi, Ap-tunum kusal iyo ban kemip kalbip-kup, imi aket tem uyo mafak ilula amamip. Katale, God akal dong dokoyila asuk tiltam aket bilili kalokomip, ale fiyaap duu-bam ke-mokomip.
MAT 5:5 Kemin, unang tunum malo ma nuta ti kanolin o, kal-bomdip ilmi tong uyo bakamin dinim dak-diiba bom-ilip namti, ili God ami tiin diim ayo win so ke-lokomip kalalaya, almi weng kutiisa uyo kipni kuyokomi no, kalsa kaayo, yakal kuyila fiyaap duu-mokomip ko.
MAT 5:6 Kuno unang tunum malo ma kukup tangbal kaata-kup nuu-bulupla, God ayo fiyaap duumak i! kemip namti, God akal dong dakaayin-bala, tituun-kup tabin unang tunum ke-bomdip fiyaap duu-mokomip ko.
MAT 5:7 Unang tunum malo ma ita ifan o, kal-bomdip ap-tunum kusal imi olen-dakaayin-bamdip kukup tambal tambal kamayip namti, God akal olen-in-bamda kukup tambal tambal kamayim-bala, fiyaap duu-bam ilokomip ko.
MAT 5:8 Kemin, unang tunum malo ma, imi aket kaa aket alep kemin daa; imi aket fukunin ayo ti maakup ke tituun-kup kelip namti, ili din God aso suunkup ilin abip kawu ilokomip. Kemin, kaami fiyaap ayo duu-mokomip o.
MAT 5:9 Dok kanolin unang tunum ita ma weng diki-bam ale, din-bom kemipla, ap-tunum kusal malo ma ita tal kanubip imi iipyak tem kabaaku tola-lom fakayin-bilip, kulaa kela mulo kawu weng talalu una-tala-ke-mokomip tunum kiita, God ayo boko-lomda: Aptum kusal imi fakel-ilin tunum kiili, nami Man o, kalala, fiyaap duu-mokomip o.
MAT 5:10 Aa ti kuno unang tunum malo ma iyo kukup tangbal-kup tabasu kaata-kup kutal-fukusip. La, umi kalan kaata tunum mafak iyo itam fanan-bam ale, yam-mafak-daka-bam ken-tabasip. Lale, kukup tangbal tabuulin tunum ili, God ayo im-taltam almi daam tem kawu daalon o, kalba kemin, tangbal-kup bom ale, fiyaap duu-bam ke-mokomip o.
MAT 5:11 Kipyo, kibi nalmi daang bakaalin tunum kemin, unang tunum kii kawanta nali nitam fananip namti, kuliita taba weng mafak dap-kaayim-bam ale, disa kukup mafak mafak uyo kukaayim-bam ale, disa kasen-fakayin weng ayo kukaayim-bam kipni win ayo dap-mafak-dakaayim-bam kem-laabip. Lale, ibi fiyaap-kup duu-mokomip.
MAT 5:12 Kemin, sawaayak God ami weng ku-fatap-dakamin tunum ili kipni ok kaa kanubip kaaltap kanu-bamdiwa, God ami ok ayo tabumsip. Lale, yak tunum kukup mafak tabuulin ita taba-lomdip kanolin kukup mafak ata profet imi kukaayinsip. Lale, ili ma daal-daal-kemin daa; talalu yikik titil-biki-bom ilsip. (Kemin, ibi kabak-ami aket uyo fanang daka-bamdiwa, daal tabemin daa; ti titil-foko tola bom ilin ko.) Ilom am ma daanokomu kaali, God alalta imbii tam abiil tikiin daale, kukup tangbal kaata-kup kukaayokoma. Kemin, ti fiyaap duumin sakbaalim dukum-kup duu-bamdiwa kayi! kala Yesus ayo almi miining daang bakaalin tunum imi kanum bakayila ko.
MAT 5:13 Yesus ayo faldak-tiimin weng alep ma boko-lomda: Yol ami titil o, kala abaal kaa disa kelu namti, kaa kalok nola talalulup asuk yol ami abaal ayo tabokoma ni? Kabak-ali atin disa te! Kanola unang uyo ima ket abuu fuulon o, kalu namti, utamula, yol kalawa mafakba nu, kalu kaa, yol kuluu balaalokomu disa; binalu tam daak abip abamnala unang tunum iyo ami tip diim kawu une-tale-ke-mokomip o. God ami unang tunum ibi yol abaal tabasu altap ke kukup tangbal kaata-kup kaptum kusal iyo kukuyin-bilipla, ima yol balaalip abaal taba-yaabu tap ke tiltam tambal-kup ke-lokomip ko. Ale, ibi kukup tangbal kaa kutal-fukulin disa ke-lokomip kaali, ibi God ami ok fukulin tunum ke-lokomip disa ibi yol mafaknuya binalip uneba tap ke-lokomip o.
MAT 5:14 Aa, kano ti, kanolin God ami unang tunum ibi yokon dawang alaltap keliwa, kukup tangbal ayo nuu-biliwa, kap-tunum kusal kayak kayak iyo ita-mokomip o. Ipni abip kaami amdu fiil tolsa alaltap o. Unang tunum unbip samaanlo kawu bom-bilip ili, ibi ita-mokomip.
MAT 5:15 Dok kanolin tunum ata ilaam iilfo kulaak baket tem kabaaku kuwaalokoma disa; ti iilfo kutam ulmi baan diim diilala, am ayo alik iilfo falala-kup kala bom-buluya, unang tunum kaptam bom-bilip iyo mafek mafek ayo tambal-kup utafii-mokomip ko.
MAT 5:16 Ibi yokon dawang yang uul tem kulaaso falala-kup kala-laabu ultap ke kukup tangbal kaata-kup kap-tunum kusal kusnum imi tiin diim ayo kukuyin-bilip utam-sinomdipla, imi aket fukunin uyo bam-daayilu kipni kaalap abiil kayaak God ami win ayo kufumin o, kala Yesus ayo kanolin weng do alep iyo almi kalaan tunum imi bokoyila ko.
MAT 5:17 Yesus ayo weng maso bokoya ko. Kipkal aket fukuniwa: Ali tal God ami Lo Moses ami dolsa so, God ami profet imi weng dolsip so, uta kukan-tiin talse no, nokolip i! Nali kabak-ata kukan-tiilon o, kalali talsii daa; nali tal imi weng kaata kutal-fukulila, tiknuk o, kalaliya talsii.
MAT 5:18 Nami weng bakayokomi uyo talalu weng san iliwa! Tawaal diim so, abiil tikiin so, kiimi ilokomip kaa, God ami Lo Moses dolsa umi anung anung ayo alik ti kano ilokomu. Kemin, alik ibi kaa ti suunkup kutal-fuku-bomdiwa ko. Bom ilom God ami boko-lomda: Kabak kanolokomi kayi! kalsa uyo nola alik dinim ke-lokomu kawu, God ami Lo kukal ti disa ke-lokomu ko.
MAT 5:19 Kabak-ali ti faneng kemin, dok nolin tunum ata God ami weng anung kaami sang kaa boko-lomda: God ami sang anung kuluuli win dinim o, kala-som aa, ap-tunum kusal imi kanolin kukup uyo kukuyim-bam ke-balaya, yakal ti weng kuyang saak tiimi namti, ami tam God ami abip ilokoma kaa, God ami tiin diim kaa win dinim ke ilokoma; ale, dok nolin tunum ata God ami weng uyo alik weng san-kaa-bamda ap-tunum kusal imi kanumin kukup uyo kukuyim-balaya, yakal kutal-fukulip namti, Ko! kaata fan tam God ami abip tiinokoma uyo, God ami tiin diim kaa, ti tambal-kup fatap diim kawu bom-balaya, God ali ami win ayo kufolokoma ko.
MAT 5:20 Nami weng kala weng selin! Lo utamsip tunum sole, Falosi so, ili God ami weng kulaa utam kaal kesip ili tunum imi tiin diim kulaa win so kesip. Lale, ili God ami Lo kaata-kup ti tabuulalip dinim; kambola kukup tangbal kutal-fukule, kukup mafak kutal-fuku-som ken-umbip kaa, God ali imi fiyaap dukum kaa ma duun-umba disa. Kibi God ami abip unum o, kalip kaali, God ami bokoya-lomda: Kaata kanumin o, yakan-kaaba kaata, talalu yikik-kutal-fukulokomip uta, fan imi God ami Lo kutal-fukusip uyo kabaak banuya, kipni God ami weng kutal-fukulokomip uta uta keluya, God imbii tam almi miit tem daalak o, kalala Yesus ayo weng tem almi okok-kemin imi bakayila ko.
MAT 5:21 Yesus ayo asuk bokoya ko: Sawaayak Moses ami awil-fakal imi bokoyinsa kaami sang kulaa bakayin-bilila, weng san kan-tabasip kabak boko-lomdu: Kabi kaptum kusal kaa aalap, taan-yaamin daa kalsu. Kemin, dok nolin tunum ata ap-tunum ma aala taana namti, dibii din weng talalmin tunum ami diim daaliwa, akal alta saanin uyo kolama no, kalsu.
MAT 5:22 Lale, nata weng kusnum ma bokolokomi kemin, weng san-iliwa! Dok nolin tunum ata ap-tunum ami aket atul kola namti, ali ap-tunum ayo dibii din kamokim ami diim daala kot ke-mokoma kemin, ibi kaa kanumin dinim o. Kano tunum kanta aptum ami weng mafak ma kola namti, almi kukup mafak kanuba uta dibii yang kot dukum diim daaluya, im-bak saanin tunum ata taba-lomda dabak molokoma no. Kemin, ibi kabak kanumin dinim kayi! Kuno tunum kaa kanta aptum ami bokola-lomda: Kabi ti fuut tabin tunum o, aka namti, God ata ali dabaala din as mafak suunkup ti kano kiinin-kup ilin abip unoma. Kemin, kibi kaa kanumin daa yo.
MAT 5:23 Kemin, kabi mafek mafek ma kulii-tal aba tam God ami lotu am un-ilomdi yaap ke yo kemin, uyo God ami kolon o, kalap namti, kabi aket kabak dotu fuku-daa-somdapla yo. Kapni kap-tunum ayo dok nolin kukup mafak ma ami konbi ni, kalap namti,
MAT 5:24 baan asuk kapni mafek mafek God ami kolon o, kalbap ayo kutiilawa, bina din kap-tunum ayo dap-talang daalap alep weng uyo dotule, aket maakup kelup kalbap-kup kawu, asuk tal-ilomdap kapni yaap ke yo, kalin kaami mafek mafek uyo God kaa kolan o, kala-somya ko.
MAT 5:25 Kanola kap-tunum ayo bokop-ta-lomda: Kukup mafak kep-nap kemin, tam-bii din weng talalmin tunum ami diim daalon o, kala namti, baan alep yang weng talalmin tunum ami diim unin disa; ilom kabi abiltap kap-tunum ami diim unap, alep weng ayo dotu aket maakup ke-lomdiwa, kelin o, kala-somla ko. Ale, kabi kamosinim kawu dotulin disa kelap namti, kap-tunum ayo timbi yang tam-baala yak weng talalmin tunum ami diim abamnapla, ata lekbi tam-baala yak bolis man imi sikil diim abamnap ita sok de-dap kalabus am daalokomip.
MAT 5:26 Kemin, kaptamu bom-balap bii kapni ban ke-salap uyo alik ti disa kelula kawu, tildaa tam-baalip tiltamba talokomap. Kemin, tituun weng bokop-ti: Kabi nami weng kaa dotu weng sandawa kayi! kala Yesus ayo almi aso maakup tal-unemin imi bakayila ko.
MAT 5:27 Kulaa Yesus ayo asuk weng kusnum ma bokola ko: Sawaayak Moses ami sang bokosa kaami sang ayo bakayim-bilip weng san kan-umbip kabak-ali boko-lomdu: Unang din tunum din kiili, sadikimin daa yo, kalsu.
MAT 5:28 Kalsu kemin, nata weng kusnum ma bokoyokomi kemin, weng san iliwa, Dok nolin tunum ata unang ma uyo utam-ilomda: Kwin! kuuta nami sidikimon o kala namti, ami aket kaa fukunba uyo unang tunum imi tiin kuwaka-yin-bam sadikimin kukup namti kaa bombuu.
MAT 5:29 Kemin, kapni tiin malii uta kukup mafak ayo kukup-tuya nuumon o, kem-tabap namti, kaltapni tiin malii tiingtup, uyo wal binalap unu. Tiin malii maakup kaa, kukup mafak kemin, kulaa kela bombi taan-ilomdap, tam God ami abip kawu suunkup ilokomap kaata, tambal. Lale, kabi tiin malii kaa ulduu kukan-tiili daa yo, kalalap, kukup mafak-kup nuubi saaknap kalale, God ami ensel ita taba-lom tam-baalip yang wing suunkup kiin-bam ilin abip unokomap kaali, tangbal disa.
MAT 5:30 Kanolin kemin, kapni sikil tiingtup uta bokop-ta-lomdu: Yang kukup mafak nuumon o, kali kalbap namti, sikil ayo wak binalap una. Sikil malii ukdin kelap kaa, kukup mafak kemin, kela bombii taandap tam God ami abip kawu suunkup ilokomap kaata, tambal dukum. Lale, kabi sikil malii ayo ukduu kukan-tiilokomi disa yo, kalalap, kukup mafak ata-kup ti kanumsi, saaknap kaa timbip-kup, God ami ensel ita tam-baalip yang wing tiil suunkup kiinin abip unokomap kaali, tambal disa yo, kala Yesus almi kalaan tunum imi kanum bakayila ko.
MAT 5:31 Yesus ayo asuk boko-lomda: Ipni kukuyin ita boko-lom: Ali kanta almi kalel uyo kambowi no, kala namti, kuyak fiitmin disa. Imak kapta sukon ma dola kalel umi kuwapla, kuliilu unokomu no, kalsip. Kemin,
MAT 5:32 nata weng kusnum akal ma kaata, bokolokomi kemin, weng selin! Dok nolin tunum ata ma kalel uli sadikimin dinim tangbal-kup bombuu. Lale, alta taba kalel kuluuli kewi te! kala, kewa uyo yang tunum kusnum ma dabuulu namti, God ami tiin diim ami kalel uso, tunum kusnum dabuulu aso, alep kiimi kanolip uyo sadiki-bamdiwa, unang umi diil imak ayo tiin kuwakan-bamdip dap-mafak-dakabip o, kalokomip ko. Yale, kaa mulo kawu, imak so, unang kuso, imi san-kup disa; diil imak ata taba-lomda im-baala yak sadikimin umi diim abamnip. Kemin, ban kemin, umi uluum ayo akmal asuumano kanolin kuluulip o, kala Yesus ayo almi kalaan tunum imi bakayila ko.
MAT 5:33 Yesus ali weng akal alik ma boko-lomda: Sawaayak Moses ata awil-fakal imi bokoyinsa kaami sang bakayin-bilipla, weng san kan-tabasip kabak-ali boko-lomdu: Kabi kaptum ami diim kawu weng ma kuka-daala-lomdap, kanolokomi kayi! kalalap God ami win awem kaata kufole, kapni weng uyo ku-titil-diilap namti, weng kaa lo-laamin daa yo, kalsu. Kemin ale,
MAT 5:34 weng san iliwa! Nata weng kusnum ma bokoyilila: Kabi weng kaa kuka-daalon kalap namti, weng kutal aba yak God ami win diim aye, mafek mafek umi win diim kaa tik-tii-bamdap kapni weng ayo ku-titil saanin disa yo. Tam abiil tikiin kaa God ami abip ale,
MAT 5:35 tawaal diim kaldaak-ali God alalta talalu-lom tiin mo kesa. Kemin, kanola Jerusalam kaali, King dukum God ami abip tawaal diim kala buu namti kabuu, kabi mafek mafek alik imi win diim kabak kufon-bamdap kapni weng kaa ku-titil saanin dinim.
MAT 5:36 Kemin, kabi taang-kala-somdap kaltapni dabom kon maakup maakup ayo fal-sikilap tiltam namaal ke-bala, duut ke-bala, kelama disa; God maakup ata-kup yaap kanolama; kabi kaltapni dabom kaa tii kufo-lomdap kaltapni weng kaa ku-titil saanin disa yo.
MAT 5:37 Kemin, kabi kalok nolin umi win uta ma boko-lomdi weng kutiilokomi uyo, titil-fokolu kewon kalap namti, kaa tunum mafakim Setaan ata bokop-taya, kasen-fakamin weng ayo baka-mokomap. Kemin, tituun weng kaata-kup baka-bamdap kaata kanolokomi kalap, ata-kup kanu-bam ale, Yi! kaa ke-lokomi no, kalap uyo atin kulaka-bam keman o, kala Yesus ayo almi kalaan tunum imi bakayila ko.
MAT 5:38 Yesus ayo weng ma bokola ko: Sawaayak Moses ami weng bokosa kaami sang uyo bakayin-bilip weng san-kan-tabasip kabak-ali boko-lomdu: Tunum ata taba-lomda kapni tiin uyo fela kutiip-ta namti, kapkal tiin umi maan kaa tii-lomdap ami tiin ayo fela kutelamap o, kala-som ale, te-bamda kapni kiil ayo malduu kutiip-ta namti, kapkal kaltapni kiil uyo maan kaa tii-lomdap ami kiil ayo malduu kutelamap o, kala kanum bokosu no.
MAT 5:39 Nata weng kusnum ma bokoyokomi. Kemin, weng san iliwa! Kanola tunum ami kukup mafak kup-ta kaa, kapkal ami kukup mafak kup-ta uyo kapsiik maan tiimin daa; le, ayo kukup mafak kup-ton o, kala namti, kabi daa yo, kemin daa; mep kanuba tunum ata taba kapni akalap malii tiingtuplo ayo tangafap ta bina daala namti, kabi falmek akalap malii ayo kolap bina-daa kelama no.
MAT 5:40 Kanola kap-tunum ami mafek mafek maan kup-ta, maan soyim kebap kaa, kapyo, telin disa ilawa, kap-tunum ayo tam-tama din weng talalmin tunum ami diim daaliya, kapni siyot ayo alta kuluu kup-nak i! kemaya, atamap namti, yak kapni siyot ayo konbap-kup, kuno diil katip saket ayo dilduu kola kemin ko.
MAT 5:41 Bolis ma mamdet kuyak daa, Kapta nami bung kuliilap din iip ma daap-na tal o, tokokoma kaa, aket atul tabemin daa; ti tambal o, kala kuliilap umbilin ami kulu no, kala bokop-ta uyo kukan-tii akaala yak aba umbilin samaan kababap-kup kawu, kutela talokomap o.
MAT 5:42 Kuno tunum ma kapni mafek mafek sang nen-daap-ta uyo kukaalin o. Tunum ali kapni mafek mafek ayo ma kup-napla, kulii umbili asuk kulip-ta talon o, kala kaa kabi daa yo, kemin daa kayi! kala Yesus ayo almi miining imi bakayila ko.
MAT 5:43 Yesus ayo asuk bokola: Ko! Siin diil weng uyo bakayin-bilip weng san-kan-tabasip. Kemin ale, Moses ami weng uta boko-lomdu: Ibi iltipni kayaak imi aket uta kukaayin o, kalsu. Ale, awil-fakal imi weng uta boko-lom: Ibi ti waasi iyo tit-kup itam ilin o, kalsu.
MAT 5:44 Lale, nata weng kusnum ma kaata bokoyokomi. Kemin, weng san iliwa! Kibi waasi imi aket kaata kukaayim-bamdiple, dok kanolin tunum kaata ma ibi kukup mafak kaa kukaayimba kalip namti, ibi beten kaa kamaan-biliwa, God akal dong dakaalak o.
MAT 5:45 Kemin, kaltipni Kaalap God abiil tikiin bombe ami atan ayo iilfo kulaala tildaak tunum tambal so, tunum mafak so, imi al uyo abale; om ayo kulaala tildaak tunum tituun so, tunum tituun dinim so, alep maakup imi diim kawu aben-umbu. Kemin, kanola ibi iltipni kayaak imi aket kuuyin tap ke waasi imi aket uyo kuyip namti, Kaalap God akal ibi talalu-yimula almi man ke-lokomip ko.
MAT 5:46 Kanola ibi tunum kusnum kayak kayak iyo kamboya-lomdip ipni aket ayo kaptum kusal imi aket ipni kuyimbip imi kup kuyip namti, kuuta dong dokop-tokomu disa. Kaa dok ata naa kalolip: Takis kaamin tunum mafak yakal kuno ap-tunum kusal kiita-kup imi kukaayila-yaabip kemin, kiimi kukup kaa kulaak banule, kapni kukup kaata uta uta ke-lokomu dinim te! Kapso, iso, ipni kukup kaa maakup kemin, kuuta dong dokoyokomu dinim o.
MAT 5:47 Ibi ti iltipni kayaak ita-kup weng fakayip namti, kaa dok kano-som tunum kusnum iyo kabaak banipla, kipta kipta ke-mokomip i? Daa, unang tunum Juda kasel ami lak duulin disa yakal ti, ilmi kayaak-kup weng fakaya-yaabip. Kemin ale, kipkal ti imi kukup kaa kanun-umbip kabak-ata kaa kanun-yaabip.
MAT 5:48 Kanolin kemin, iltipni Kaalap abiil kayaak ami kukup tangbal uta ti suun kanun-umba tap ke-bamdiwa, iltipni kayaak imi ti tambal tambal ma kamayim-bam ale, kipni waasi yakal kuno tambal tambal ma kamayim-bam ke-bamdiwa yo! kal-bomda Yesus ami weng uyo kanu-bam almi daang bakaalin man imi bakayila ko.
MAT 6:1 Yesus ayo weng ma bokola ko: Ibi kala nuu-bulupya, unang tunum kiita numi itam-somdiwa, numi win uta bakayin o, kalaliwa, iltipni kukup tambal tangbal ayo imi tiin diim kaa, kanumin disa ko. Utafii-bamdiwa kayi! Ibi kanu-mokomip kaali, kipni Kaalap abiil tikiin kayaak ayo taba-lomda kipni win kufuyim-bamda mafek mafek tambal kaa ma kuyokoma disa te!
MAT 6:2 Kabak-ami bokosu kaali, kipkal tunum iyo mafek mafek ma duluu-lom iipnip kalalip dong dokoyum o, kala kipni mafek mafek bung ayo kuluubip-kup, kukaayokomip kaali ti, nuyo kanu-bulup kayak kayak ita itam numi win ayo kufuyik i! kalin tunum ililtap kaa kanumin disa ko. Yak kukup alep tabuulin tunum ili kayak kayak ita itamik o, kal-bomdiwa tunum asiik dabaalip din-ilomda fong ket naan-balaya, unang tunum alik imi tiin diim mafek mafek dulubip imi bung kukaayila-yaabip. Kemin, lotu am aye, abip iip kawu kanun-umbip kaa fan bokoyokomi. Unang tunum imi tong bakan-umbip kaali, imi sisol namti kaa bombuu kemin, kaata-kup kuluulokomip ko.
MAT 6:3 Kipni tunum mafek mafek iipnip imi kukaayokomip kaali, kayak kayak imi tiin kuwaya-lomdip mafek mafek uyo baan tap maaklo masiim kukaayokomip kaata, fan kipni Kaalap God ayo atam-somdala, akal mafek mafek tambal ayo kipni kuyokoma no, kala Yesus ayo almi daang bakaalin tunum imi kanum bakayila ko.
MAT 6:5 Yesus ayo asuk bokoya ko: Kipni God ami beten kamalokomip kaali, kanu-buluwa, kayak kayak ita numi win kufuyik o, kalalip kanun-umbip ulultap kaa, kanumin disa yo. Kukup alep fukumin tunum ili kanu-buluwa, unang tunum iyo itamik o, kalaliwa, suunkup lotu am aa, abip iip kawu tola-bomdip God ami beten kamalin-kup laabip kabak tifan bokoyokomi, unang tunum ta kipni tong bakan-unbip uyo imi sisol namti kulu bombe kemin, kaata-kup kuluulokomip.
MAT 6:6 Lale, kipni God ami beten kamalum o, kalokomip kaali, iltipni am kaptam ban saal lii-lom ipni Kaalap God abiil kayaak bombe ayo maaklo beten kamalalip kayi! Kaalap ali kipni maaklo beten kamanbip ayo utam-ilomda mafek mafek sang dik-dakaanbip kaa kuyokoma ko.
MAT 6:7 Kipni God ami beten kamalokomip kaali, ibi Juda unang tunum disa imi babon-bamdip weng yamyam bakan-umbip ulultap uyo kanu-bam beten kemin disa. Kiimi aket fukunin kaali, weng yamyam baka-buluwa, salap men ita numi weng uyo weng sanokomip o, kala-lomdip uyo kanun-umbip.
MAT 6:8 Lale, Kaalap God ali ipni mafek mafek dulu-lom naan-daalin dinim bom-bilip uyo utamsa. Kemin, Juda unang tunum disa imi kukup kanubip ulultap kaa kanumin disa.
MAT 6:9 Kemin, ibi God ami beten kelum o, kalokomip kaa kala nuu-bamdip bakamalip ko: Numi Aatumen abiil tikin kayaak kapyo, kapni win kaali, sakbaalim dukum kemin, unang tunum alik nuli dong dakaayin-balawa, ata tambal-kup tabasa no, takan-kaa-bamduwa yo.
MAT 6:10 Kabi alik nuli imbii tam kaltapni miit tem daa tiin molap bomduwa yo. Kabi dong dakaayim-balap, alik nuli abiil tikiin kayaak imi kapni aket fukunbap kaata-kup talala-laabip tap kanu-bamduwa yo, kala-somla ko.
MAT 6:11 Kamala kulaali numi am kamala ima inin ayo kuyap in-buluwa yo.
MAT 6:12 Kabi numi ban uyo kamboya numi nak-tunum kusal imi numi ban kamayim-bilip, kamboyila-yaabup ulultap keyan o, kala-somla ko.
MAT 6:13 Kabi mafek mafek mafak tal numi diim aba yam-kukulon o, kalbu uyo dukum-kup dong dokoyawa, kuno kamboyap nuli yang ban ukduu-laamin disa yo. Setaan ata numi yam-mafak-daalon o, kalokoma uyo dong dokoyawa kamboyak o, kal-bomdiwa, God ayo kaa beten kaman-biliwa yo.
MAT 6:14 Kemin, kanola kibi unang tunum imi ban kamayimbip kuno kela-lom asuk fanang dakamin disa kemip namti, kipni Kaalap abiil tikiin kayaak akal ti kipni ban uyo kuno keya-lom asuk fanang dakamin disa keyokoma ko. Lale,
MAT 6:15 ili fan kibi ban wakayimbip ayo kuno kela-lom asuk fanang dakamin dinim ke-mokomip disa namti, kipni Kaalap akal kipni ban kebip ayo kuno kela-lom asuk fanang dakamin dinim keyokoma disa kayi! kala Yesus ayo almi daang bakaalin imi kanum bakayila ko.
MAT 6:16 Yesus ayo weng ma bokoya-lomda: Ibi God ami beten kemum o, kalalip ima falamip namti, ibi kukup alep fukumin tunum imi aket fukunin kaa, Nuli unang tunum imi ibakayim-bam tunum ami aket uluum kuluu-bomda tibi mafak diyaku bomda be alaltap keluwa, kayak kayak ili itamdiwa, numi beten kemin kaami win uyo bakayik o, kalalip tibi mafak duu-bomdip kanubip tap uyo, kanumin disa; imi aket fukunin uyo kayak kayak ita itamiwa yi, Beten ke-bam ima falabip o, yikin o, kal-bomdiwa, ok iluu-lom tibi kun ayo diingmin disa ke-bomdiwa, ima kaa falan-umbip. Kemin, nali ti tituun weng kaata bokoyokomi. Kayak kayak ita unang tunum ima fala tibi mafak diyaku-yaabip imi win kufoya-yaabip, imi sisol namti kulube kemin, kaata-kup kuluulokomip.
MAT 6:17 Kemin ale, kipkal ima ayo falamip namti, kipni ima fala-mokomip kaali, unang tunum ili disa; numi Atok God sawaan bom ilin ata-kup numi ima falabup uyo utamak o, kalaliwa kemin, daal tiin kaa talakamin daa; tibi kun ayo diing-bam ale, dabom kon ayo deng-bam ke-bamdiwa yo. Kaalap God ali sawaanin diim kawu laaba ata asiik ima falabip iyo itam-somdala, mafek mafek tangbal kuyokoma no, kala Yesus almi kalaan tunum imi kanum bakayila ko.
MAT 6:19 Asuk Yesus ayo boko-lomda: Ibi tawaal diim kaldaak-ami mafek mafek tambal tambal diilip tal am abe-mokoma kaali, keng tinom sole, ol fuku-som ke ku-mafak-daalokomu aa, yukut inin tunum ta tal am kaa balata-lom tiltam duk-duulokomip ko. Ibi tawaal diim kaldaak-ami mafek mafek tangbal tangbal kutookso kiiyo, kulii-tal kuyaku kuyaku ke sikip fik-tiimin dinim o.
MAT 6:20 Ibi God ami kukup tangbal tangbal ata-kup talalu yikik-kutal-fukulip namti, God akal kipni mafek mafek tangbal ayo abiil tikiin kawu afetu kutiiyila bom-buluya bii, tam atamiwale, kuyokoma. Kemin, abiil tikiin kaptam-ami mafek mafek kaali, tinom sole, ol fukusa so, ita ku-mafak daalokomip disa; aa, yukut inin tunum ayo tal balata kulii tam duk-duulokoma disa yo.
MAT 6:21 Kemin, ipni mafek mafek tangbal kaa, tawaal diim kaldaak bom buu namti, ibi tawaal kaami aket-kup fukun-bam ilokomip. Ale, ipni mafek mafek ayo abiil tikiin kawu bom ilu namti, aa ti abiil tikiin kaami aket-kup fukun-bam ilokomip o, kala Yesus ayo almi kalaan tunum imi kanum bakayila ko.
MAT 6:22 Yesus ayo faldak-tiimin weng ma boko-lomda: Ipni tiin kuuli angtiil umi yokon ultap kemin, tiin ayo tambal-kup ilu namti, kaata ibi mafek mafek mafak uyo kukaayak daka-bamdiwa, mafek mafek ayo tangbal-kup num-tal-une-mokomip.
MAT 6:23 Ale, kanola kipni tiin ayo atin mafak ilu namti, mafek mafek ayo utam, Awu, kuuta mafak e? kuuta tambal e? kal-bomdiwa tangbal-kup num-tal une-mokomip disa. God almi aket fukunin tambal kipni kuyokoma ayo kuuta yokon ultap ke kukuyim-buluya, utamiwa yi, Kanola tal-unebup kaa ti tangbal tal-unemup u, ke-mokomip. Kemin, mafek mafek uta taba-lomdu kanolin yokon kaa tenalu namti, kipni aket fukunin so, tal-unemin, tiin-yaamin so, uyo mafak ilokomu kayi! yakan-kaama ko.
MAT 6:24 Kulaata, Yesus ayo weng sawaa imi bokoya-lomda: Tunum maakup ma kaa taang-kala-somdala kamok alep imi ok ayo tabuu-mokoma disa. Kanola mep tunum kaali kanuma namti, ali ma ami atam fanan daa daang ukola-somdaya, ma ami aket ata kolokomale, ma kaami lak ata duuba-kup; ma ata kuno maas kela daang ukolokoma no. Kanolin kemin, ibi taang-kala God ami aket sole, moni kaamin kaami aket so, iyo alep alep kano imi aket uyo yan-bulu ilin disa yo, yaka ko.
MAT 6:25 Asuk Yesus ayo weng ma boko-lomda: Nali weng ma bokoyon o, kali kemin, weng san iliwa! Ibi taang-kala-somdiwa, God ami aket so, moni kaamin kaami aket so, iyo alep alep kano imi aket kaa yan-bulula ilokomup disa yo, kala-lomdiwa, kipni kaa unip umi aket dukum uyo fukun-bamdip boko-lom: Ima so, wok so, kii dok liip ma tilipla kuluu inum e? kal-bomdip ila faka-bam aket dukum uyo fukun-bam ale, iltipni angtiil lak ayo duu-lom bokolip: Kwin! ilim kaa doku ma tuluya kuluu mikilokomup i? kala ukol ila faka-bam aket yaapkan kaa fukun-bam kemin daa yo. God ata mafek mafek sakbaalim dukum o, kala kipni mam so, tiil so, kuyilaya bom-bilip. Kemin ale, kanola mafek mafek katip sakap inin so, ilim kaal mikimin so, kikal God alta kuyokoma. Kemin, kaami aket kaa suunkup aket yaapkan kaa fukunin disa yo.
MAT 6:26 Ibi awon imi asal asal kawu tal-unen-umbip kii itamin! Ili ima lang kaa imi dikimin disa; ale ili ima kaa dabuumin disa. Ima afetbi kulii-tal am kutiimin disa. Yale, kipni Kaalap abiil tikiin kayaak alalta ima uyo kukaayin-balaya, inan-yaabip. Lale, God ami aket fanang kaa, atin ti dukum uyo unang tunum kipni kuyimba-kup, awon ita imtal balang tem daa ke-somdaya, ipta ima uyo kukaayim-balaya ima ayo ti yaap inan-yaabip.
MAT 6:27 Kemin, ibi aket dukum fukun-bamdip iltipni angtiil lak dakaamin uta taba-lomdu dong dokoyilula, ipni ilin ayo kayoop aye, wasital aa, uyo maso til-daalip tooplo so keluya, tawaal diim kala bombii luk-daalokomip ema? Kwin, disa kawi! God ali boko-lomda: Kulaata taanan taka namti, kuyaku taanokomap ko.
MAT 6:28 Ibi kanimin o, kala-somdiwa ilim kiimi aket dukum kaa fukunbip yoko? Ibi saak yang aba saak saak kulaami mafek mafek tes kaa utamin! Kaa tunum nulultap keluya, ulmi ilim talal-bam faamin disa; uli ti disa kulu tiltam taba-lomdu umi tes tangbal ayo abun-umbu.
MAT 6:29 Siin sawaayak, tunum win tibin kamokim Solomon ami bom-biisa kaa, ali bung kayaakim ke-bomdala, ilim kutookso tangbal tangbal ata-kup kaata falatam tii-bam biisa. Lale, ami ilim sikil tuup baken-bilip miki-bam bom-biisa umi ilim dawang kulaali kulaak banula, as tes umi dawang tangbal ata ata kesu.
MAT 6:30 Kemin, tes kaali, tikiinal kawu bom ilin aye, tes tangbal uyo tes falaa ilana datnule, tunum ta tikiin kuyak-daalipla, ami tes kulaaso kiin abe-bam ke-laaba. Lale, kaa God alalta talalu kutii tiin molaya, tangbal-kup tes ayo fala-kan-umba. Kemin, nikil ibi aket alep kaa taka-bam God kaa nuli ilim kaal kaa ma kuyokoma ne? daa ye? kem-tabasip. Ipkal talalu utamin! God ami tiin diim kaali ibi tikiin tes ayo kabaak-banaya, kipta kipta kesip. Kemin, God akal kanola ibi talalu tiin molokoma ko.
MAT 6:31 Kanu-mokoma kemin, ibi aket yaapkan fukun-bamdip ami ima aye, ok aa, ilim kaal ayo, kaa doku tulu kuluu-somduwa, in-bom ale, miki-bam ke-bam ilokomup i? kemin, disa yo.
MAT 6:32 God ami lak duulin disa ili mafek mafek alik kanolin kaata fen-bomdiwa ken-umbip. Kemin, ipni Kaalap abiil tikiin kayaak ali kipso, iso, itamala ili mafek mafek alik kaali dal-kaabip kala kem-tabasa.
MAT 6:33 Lale, mafek mafek diil dukum kipni dal-kaa-mokomip namti kala bombe. Ibi God ami miit tem un-ilom almi tituun alik-daap kelupla, almi tituun-kup kukup ata-kup kutal-fukulum o, kala God ami aket ata ti kwin! disa akal ma kemin o. Kanumip namti, God akal dong dakaayim-bam ale, kipni mafek mafek duluu-bom-bilip kaakal kusnum ima aye, ilim kaal aye, uyo kukaayim-bam ke-mokoma ko.
MAT 6:34 Ultap kemin, kamala kaa ibi am sibi kaami mafek mafek fiitmin kaami aket kaa, aket yamyam ke-bam fukunin disa. Kemin, kulaa sindip kaami aket uyo fanang daka-biliwa kayi! Am kamala kalawaami mafek mafek fiitmin tiltam tulu umi aket namti kula kaa fukunbip kemin ti kulaata-kup taa! kal-bomdiwa yo, kala Yesus ayo weng tem kalaali almi kalaan tunum imi kanum bakayim-bisa ko.
MAT 7:1 Asuk Yesus ayo bokola: Kabi God ami abiin kaata, kuluu-lomdap ami okok keba uta nasiik kuluulila okok kemon i, kemin daa yo. Kabi kap-tunum kusal kii itafii-bamdap boko-lom: Ibi kukup mafak kebip te! kemin disa, kambolap namti, God akal win bakap-tam-bamda bokop-ta-lom: Kabi kukup mafak nuubap o, tokokoma disa.
MAT 7:2 Aa, kabi kaptum kusal kii ibi kanubip te! kal-bomdap win bakayap namti, aa ti God akal kapni kanubap kaakal, tam-kayaku-lom ale, kapni kaptum kusal imi dok kanolin kukup kaata, kukaayim-bam ilolap namti, God akal ti kanolin kukup kulaata ti, kapkal kukup-tokoma. Kemin, kaptum kusal kii weng mafak kaa kukaayin dinim kayi!
MAT 7:3 Kaptum kusal imi kukup mafak katip katip kuuli, sung ilol tal tiin uneba tap ale, kapni kukup mafak sakbaalim dukum kanubap kaata as daang tiin fuk-duup-ta-yaaba tap. La, kapni kap-tunum ami bokola-lomdap: Tiin sung tal aba yak unan i! ken-umbap. Katale, aket fukun-ilom as daang tiin faka-tanip-na kulaa laap bombu kemin, am ma daanula disa ke-lokomu. Kemin, aket uluum kep-nokomu disa yo, kem-laabap. Kemin, kabi kaltapni kap-tunum kusal imi kukup mafak katip katip kulaa utamsap. Katale, mep kaltapni kukup mafak awak sakbaalkan dukum kanubap kabak-ali kabi utabap e? disa?
MAT 7:4 Kanimin o, kalalapla kap-tunum kaa bokola-lomdap: Nak-tunum kapyo, dong dokop-ta-lomdi tiin sung ayo kukan-tiip-ton o, kalbap i? Daa! As daang ta tiin faka-tanip-ta tiin bokol ke-salap kalaali, kabi dok kano-somdawa dong dokolokomap i?
MAT 7:5 Kabi kukup alep fukumin tunum kapya! Kamosinim as daang uyo kaltapni tiin diim bombe kaali, kukan-tii-somdawa kawu, yak kap-tunum ami tiin sung uyo talalu utam-ilomdap kukan-telamap ko.
MAT 7:6 Kulaata weng kusnum ma bokop-ton o, kala-somdila ko. Kemin, kabi dok nolin unang tunum ita God ami weng kaa weng sanamup disa yo, kemip namti, kabi kiili God ami weng kaali, maso bakayin disa yo. Kemin, kapkal utaman! Man ma miyaan ami samsamala namti, miyaan ayo fal-siki-taba man kaayo, aalokoma. Ultap kemin, dok-nolin tunum ata God ami weng kaa unang tunum daal-dap-tiiyimba imi kukaayin-kup kema namti, kiili aket atul dap-tiiyule, tam taba dap-mafak-daalokomip. Kemin ale, kanumin siim o, kanola kap kayuum kiit ayo kulaalap daak tawaal diim abam-nokoma ayo kang iyo tal yaan biil tap-tap-kelip maaklo ke-lokoma. Kemin, kanolin o. Tunum unang iyo kanta God ami weng kaa, weng sanamup disa yo, kalbip kiili, suunkup kukaayokomap kaali, ili God ami win ayo ku-mafak-daalokomip o, kala Yesus ayo almi kalaan tunum imi kanum bakayila ko.
MAT 7:7 Kuno asuk Yesus ayo weng kusnum ma boko-lomda: Kabi dok kanolin mafek mafek ma dululap namti, suunkup God ami dik-dakaan-balapla, ayo kup-tokoma ko. Mafek mafek ma utamon kalalap fenbap namti, God ata dong dokop-tala uta-mokomap. Kuno kabi, tunum ami din ap-tunum ami am saal suunkup dok-dok-ke-balala, aptum ayo am saal baskaanba tap ke, ti suunkup God ayo dik-dakaalin-kup kemapla, kaata God akal, kapyo dong dokop-tokoma. Kemin, suunkup God ayo dik-dakaalin-kup ke-balawa yo.
MAT 7:8 Kawanta dik-dakamin ma dik-daalokoma namti, mafek mafek uyo kuluulokoma. Ale, kawanta mafek mafek ma uyo kuluulon o, kala din fenokoma namti, ata-mokoma. Aa, kawanta din saal dok-dok-ke-mokoma namti, saal uyo busolokoma no.
MAT 7:9 Awak-aalap kipyo, kapni man ayo ma dik-daap-ta-lomda: Ima ma kup-nap inamnon o, tokokoma kaa, yak tuum kaata kolokomap o? Disa ti! Ima kaata kolap inam-nokoma te!
MAT 7:10 Kemin ultap o. Asuk dik-daap-ta-lomda: Aniing ma kup-nalap inamnon o, kala kaali, kuno kela yak inap mafak kaata kolap inam-nokoma nema? Disa ti! Aniing kaata-kup kolap inam-nokoma.
MAT 7:11 Ti kapkal utaman! Kabi ban wakamin tunum kemin, mafek mafek mafak kaayo, kapni man imi ma kuyilalap. Kata, kapni man ayo mafek mafek tangbal ayo man kukaayin-bam ilolap. La, Kaalap abiil tikiin kayaak God akal fan ban kemin disa tambal-kup tabasa. Kemin, almi man ipkal dik-daalip kaali, akal mafek mafek mafak kaali ma kuyokoma disa. Tifan mafek mafek tambal kaata-kup kukaayim-bam iloma no.
MAT 7:12 Kuno ti kapni aket fukunin ayo, nami nak-tunum kusal ita kukup tambal kukaap-nam-biliwa, yaap tambal-kup ilon o, kemap namti, kamosinim kawu kapsiik kanolin kukup tangbal kaata, kukaayim-balawa yo, kala-somla kemin; weng kalawaali, asiin sawaayak Moses aso le, weng ku-fatap-dakamin tunum iso, imi weng God ami Sukon Tem dola kutii-silip kaami miit namti kalabu. Kemin, kaata kanu-balawa yo, kala Yesus ayo almi kalaan tunum imi bakayinsa ko.
MAT 7:13 Yesus ayo weng kusnum ma bokola: Suunkup as kiinin abip ami amitom liip kaali, sakbaalim dukum ale, liip kaa unsa kabang-ali fiitmin dinim o, kalaliwa, tunum unang deng yaapkan iyo liip kabang-ali tambal kawo! kalale, de kulii kabang balip unem-laabip. Katale, ili God kaa kambola biyang samaan kabang ban-ilomdiwa, maaklo ke-lokomip. Lale, God ami abip liip kaptam unemin amitom kaatale, atin liip katip kaptam bansa uyo ti fiitmin liip unsa kalaliwa, tunum unang yaapkan iyo kabang-ali fiitmin liip o, kalaliwa, kulaka-biliwa, unang tunum iip maakup maakup kiita-kup kabang liip unem-yaabip. Kemin, God ami suunkup ilin abip uyo kiita-kup ilokomip o, kala ko.
MAT 7:15 Yesus ayo bokola ko: Tunum malo ma tal baka-bamdip: Nuli God ami weng ku-fatap-dakamin tunum o, ken-umbip. Lale, ili fan kasen-fakan-umbip. La, saak miyaan apliip tal sipsip ipnaal ayo kuluu kulaak tikila namti, kabi kaali sipsip atul dinim faluum ata no, kalokomap. Lale, kaa tifan siip miyaan atulim namti kulube. Kemin, telokoma te! Tunum kasen-fakamin tunum ili iltap, ita taba-lom tam-mafak daalokomip kanolin o. Kemin, utafii-bamdiwa yi!
MAT 7:16 Nuli yang ulup as tiyup diim kaa titam-daalupla, yet lap abuubu kalalup duk-duulokomup ema? Aa, yang ulup, misiil sok diim damaang abuuba kalalup duk-duulokomup o? Disa, nuli as kaa ma tabamna atafiimup tal aba tam lap ayo abuulu utam talaalupya, Lap tangbal abuubu ne? lap mafak abuubu ne? kebup tap, kasen-fakamin tunum imi kukup ayo dotu utafii-mokomap. Ayo ilmi kukup mafak uta kukup-tuya imi aket fukunin ayo mafak kayi! tukuya uta-mokomap ko.
MAT 7:17 Kanum bokosu kemin, ti kapkal as lap abuumin umi kukup uyo utam tam! As lap tambal abuumin uyo ukol ulmi lap tambal kaata-kup abuulokomu. Ale, as lap mafak abuumin ukol kuno ti as lap mafak kaata-kup abuulokomu kalin o.
MAT 7:18 Kemin, as tambal uyo mulo kawu, asuk as lap mafak ayo abuulokomu disa; as mafak abuumin ukol mulo kaa asuk as lap tambal kaa abuulokomu dinim; ti tituun ulmi abuu-bulu abuu-bulu ke-mokomu no.
MAT 7:19 As uyo ma lap tambal abuumin disa kemu namti, as kayaakim ayo tam aba-lom as uyo an-duula kuyak daala, as kiin-abam-nokoma. Ultap kemin, ilom am ma daanokomu kaali, kasen-fakamin tunum kiili, God alalta fokola yang as kiinin abip unokomip.
MAT 7:20 Kemin kabi mep profet ilmi kukup mafak kabak-ata utamdawa, kiili kasen-fakamin tunum namti kulu-bom-bilip o, kalokomap kayi! kala Yesus ayo almi daang bakaalin tunum imi kanum bokoyila ko.
MAT 7:21 Kulaa, Yesus ayo titil tibin weng ma bokoyila ko: Tunum unang yaapkan yam iyo bakap-nam-bamdip: Kabi numi kamokim kemin, Nuli kapni ok kaata-kup kutal-fukup-tokomup o, kem-yaabip. Lale, disa; ilmi weng baka-bamdip: Nami Aatumen abiil tikiin kayaak ami weng uyo weng san-kaamin disa, kem-yaabip. Kemin, kiili imbii tam God almi abip daalokoma disale, atin ti disa. Dok nolin tunum kipta God ami weng uyo kutal-fukusip namti, kiita-kup im-tam God almi abip kaa daalokoma no.
MAT 7:22 Am mafiing diim tiltam tabamnula, unang tunum lii-bam afet-mokomi diim kaali, unang tunum yaapkan ili tal nami tiin diim mepso kuluba bokop-na-lomdip: Kamokim kapyo, Nuli kapni win diim God ami weng ayo kukaayinsup. Kapni win diim sinik mafak iyo fotabamnup yak bane-bam ale, kukup kusnum akal alik akal alik iyo kuyim-bam kem-yaabup te! Kulaa, kapkal utamsap kemin, nuli kapni tunum unang te! ke-mokomip. Katale,
MAT 7:23 nali bokoya-lomdi: Ibi God ami weng uyo kutal-fuku-tabuulalip dinim ke-lom kukup mafak kaata-kup kutal-fukusip. Kemin, ibi nami unang tunum disale, ibi nali ma itamsi disa. Kemin, kuno kep-na unin aa, yokokomi no, kala Yesus ayo almi daang bakaalin tunum imi kanum bokoya ko.
MAT 7:24 Yesus ayo asuk faldak-tiimin sang ma bokola ko: Dok nolin tunum ata nami weng kala bakabi kaayo, weng san-kaa-bamda nami kukup tangbal uyo kutal-fukula namti, ali kanolin weng kala bokolokomi umi kukup tabuulin tunum alaltap namti kulube. Am tangbal dinamin tunum ma ayo din am kun bobi kulii-tal tii kelale, afun tem ayo kala-bala umbilaak unu kela, am kun ayo kumola daak daak keba, kambola am ayo de kulaa kela, tam am un-ilomdip alimal sin-yaa-biliwa,
MAT 7:25 kulaata om so, ati so, tiltam taba-lom ok fakan tiltoop ilomda am ayo balata kulii-unokin. Yale, am ayo tangbal ma kela dese kemin, disa tiltoop dik-yak saanbi kewa ko.
MAT 7:26 Ale, dok nolin tunum ata nami weng kala bakabi kalaayo, disa tinang-kup umu-bomda nami kukup tangbal ayo kutal-fukulin dinim kema namti, kalanolin sang kala bokoyokomi umi kukup tabuulin tunum alaltap namti kulube. Tunum ayo aket tangbal ma fukunin disa ke-lomda daal-kup tibin tunum ma ayo taang-kala titil foko am tangbal kaa delokoma disa. Am kun tem ayo kala-somdala disa ti. Disa kulu kuyak tip kulu tii delaya,
MAT 7:27 kulaata om so, ati so, tiltam taba-lom ok namti fakan-tiltoop ilomdu am uyo wela daak abamnuya, ok ta balata kuliila unsa no, kala Yesus ayo weng do kala bokoya ko.
MAT 7:28 Yesus ami weng uyo bakayinsi alik dinim nu, kelale kulu, tunum unang yaapkan weng, weng san-kaabip iyo tiin alik tambanu aket fukun-bam,
MAT 7:29 ap-tunum kusal bokola una-tala-ke-bamdip bokolip ko: Kwin! kaami weng kukuyin kukup kaali ti akal almi kusnum ti! God ami aket fukunin uta utam kaal ke-somdaya, numi dotu kukuyimba. Lale, numi lo utamsip tunum kalawiita nuli kanola dotu kukuyilalip dinim o, kemip ko.
MAT 8:1 Kulaa, Yesus ayo amdu tikiin kulaa kela tildaak aba una-balala, unang tunum yaapkan iyo yak Yesus daang bakaalip aso, maakup unip ko.
MAT 8:2 Una-biliwa, kulaa tunum angtiil mafaksa ma aptum kusal ita fotabamnip yang saak kawu tiinsa ayo, Yesus ami fanang taldang ilomda tilik duung fakela daak tiin-ilomda bokola ko: Kamokim kapyo, kabi ti yaap kemin, dong dokop-non o, kalap namti, nami angtiil kulaa mafaksu kuluwa dotu-namulan o, akale,
MAT 8:3 kulaa, fan Yesus almi sikil ayo kulii yak tunum kaami angtiil diim kawu kuyak tii bokola-lomda: Ayo, nali dong dokop-ton o, kalaliya kemin, kulu talalu-tamuli yaap-namap, aka kem-salale, kulu tunum kaami angtiil mafak ayo kasentap-siik tambal-kup ke tunum kasaa kelaya,
MAT 8:4 Yesus ayo bokola ko: Kabi din ilomdap nami dotu-tamuli kaami sang uyo tunum kusnum imi bakayin disa taa! Kuno keya din lotu am dukum kaptam ban-ilomdap kapni angtiil ayo awem tunum pris ami diim kawu kukolap atam-somdala, U! fan kaali disa kep-tu no, kala bokop-tale kawu, Moses ami sawaayak weng kuka-daasa kaata-kup kutal-fuku-somdapla, kapni mafek mafek ma God ami kola-lomdap yaap ke yo, kalawa, unang tunum iyo titamiwa, U! fan kulu kabi yaapnap kala kala-somdiwa kawu, asuk tam-taldang daalin o, takak o, aka ko.
MAT 8:5 Kemin, kulaali Yesus yak aba din abip Kapeneam kaptam banala, Rom kasel imi waasi dinin tunum wan handret (100) imi kamokim kesa ayo atam ale, bokola ko:
MAT 8:6 Nak-tunum kapyo, dong dokop-nan. Nami ok fukulin tunum ayo olduuk fuk-dola-balaya yaan-yaan kulaaso, niil-alomda angtiil atul dukum-kup daka-bamdala am abiin kawu tiinba no, akale,
MAT 8:7 kulaa, Yesus asiik bokola: Ayo, nali kapso din ilomdi dap-talalulokomi taa! akala,
MAT 8:8 waasi dinin kamokim asiik bokola ko: Daa, nali tunum tambal disa; nali ti ban kemin tunum kemin, kamokim kabi timbi din nami am kaa unokomi disa; nakal nalmi dabom ami weng-kup weng san-kaamin tunum ale, nali waasi dinin tunum ilmi-kup deng 100 kalawiimi kamokim tiin molin kemin, nali tunum ma ami bokola-lomdi: Unan aa! akokomi, ayo unokoma le, tal aa! akokomi, ayo talokoma; aa, kuno nali okok kemin tunum ami bokola-lomdi: Yak kanolin ok kaata kanuman o, akokomi, ayo yak nuu-mokoma. Kanolin kemin ale, kabi yaap titil so yaap kemin, kuno kela weng kulaata-kup bokolapya kulu nami ok fukulin tunum ayo tambalnak o, aka ko.
MAT 8:10 Yesus ayo kanolin weng uyo weng sanba-kup, aket kong-mo fal-siki titoop daa unang tunum almi mepso kulu tiinaabip imi bokoyila ko: Nali tituun weng bokoyokomi kemin, weng san iliwa! Nali Israel-miin kipni iipyak tem kulu tal-unen-umbi uyo Juda kipni aket ayo fukun-bamdip: Nuli God ami man namti kala bom-bulup kayi! kem-yaabip. Lale, nali ma atamila, ali ma nitam, U, Yesus ali ti yaap kukup alik kanolokoma keba, kaa ma atamsi disa. Rom tunum kalaami aket fukunba uyo, utamaya, Yesus ali daa; weng kulaata-kup bokolaya nami okokmin tunum mafak bomda yang am bombe ayo yaap-nokoma no, kalalaya, ali tal bokop-na. Kemin, ami nami lak duula uyo sakbaalim dukum keluya, alik Juda kipta nami lak duup-na-laamin uyo daak banin ko.
MAT 8:11 Nali weng ma bokoyokomi kemin, weng san iliwa! Alik am bokon kala be kaami unang tunum balang balang yaapkan iyo tala-tala-ke ang-de-lom (Juda iip maakup maakup iso, imi bak-duu-lom kuyaku-diyaku-ke-lom) din God ami abip kawu God almi man alik-daap keliwa, numi awaalik Abraham so, almi man Aisak so, alim imi man loop Jekop aso, tiin-bomdiwa, ima ina faka-bam fiyaap duu-mokomip.
MAT 8:12 Yale, Juda yaapkan nuli God ami man namti kula bulup o, ken-umbip ili din God ami abip unokin la, ili din God ami abip kaa unokomip dinim; uktakan kuu-lomdip God ayo tam taba nuli daang ukuya-lomda im-baala tiltam saak kaltamu bom-bulup kalaliwa, Kwin kalaaso kawi! kalokomip. Kemin, kiili angtiil yol dap-tiiya bom-balaya, ilmi angtiil kalan uyo ama-mokomip kayi! yimba-kup,
MAT 8:13 fal-siki-taba waasi dinan tal-unemin imi kamokim ami bokola ko: Kabi utamapla, faneng ali yaap dap-talalulokoma no, nambap kalaliya, dap-talaluli kemin, dindapla am kawu utaman a! aka ko. Akan-kaa-bamda kama weng kulaata bakaala unan-salale, waasi dinin imi kamokim ami ok fukolin tunum ayo tambalna ko.
MAT 8:14 Ayo yaapnale, kulaa Yesus ayo yak aba din Pita ami am din ula, Pita ami imnon uyo angtiil mamin dukum kutiiwa-bala, mafak umu bomdu abiin tem kabaaku bombu kala kalale,
MAT 8:15 ami sikil ayo kuyak tii malewa kem-salale, umi angtiil mamin ayo disa kelula, tiltam tiindu Yesus nikil imi ima uyo talalu ku-mikil daayu ko.
MAT 8:16 Kanola wam-talalula bombii am atan ayo tilbanon e, ke-bulule, abip kasel iyo unang tunum yaapkan sinik mafak ta yam-mafak-daasa iyo dii dibii tal Yesus atamipla, Yesus ayo sinik mafak iyo weng bokoya fotabamna tabaniple, unang tunum mafak umkaan-unsip iyo alik talalu-yimula yaawa-yaa-bala kemip ko.
MAT 8:17 Siin sawaayak kawu, Yesus kaa tilin disa bom-balaya, profet Aisaya ata Yesus ami sang kaali, God ami Sukon Tem kabaku dola boko-lomda: Nuli mafak umu baluus-kup taba keluwa, ata taba-lomda talalu-yimuse no, kalala dola kutiisa. Kemin, Yesus ali kanolaya, fan Aisaya ami kanum bokosa uyo tituun tiltam tabasu no.
MAT 8:18 Yesus ayo itamala, Unang tunum yaapkan iyo falala-namulip kala kalale, almi ap-tunum kusal kalaan tunum imi bokoya-lom: Uniwa, nikil tam bot tem abalup umbiyak ok kumun umi malii kabak banum i! yakale, fan
MAT 8:19 unum o, kala taba kem-siliple, lo utamsa tunum ma tal Yesus ami bokola ko: God ami weng kukuyin tunum kapyo, kapni dok kanolin kawu tal-unemap kaa, nali ti kapso naso maakup tal-une-mokomup o, kala kanum bokolale,
MAT 8:20 Yesus asiik ami weng maan tela bokola ko: Sinokim ali tawaal tem kabaaku tem kalabi kuu-tiile, iim de sin-laabala le, awon yakal kuno ilmi iim tem kawu sin-yaa-bala, ken-umbip. Lale, Dukum Ami Man Nata, sin-yaamin am kaa disa; ti kapkal talalu aket kaa fanang daalawa, naso tal-unemon o, kalbap elile? disa? aka ko.
MAT 8:21 Kulaa, tunum kusnum ma Yesus ami daang tem talaba ata bokola: Kamasi kaa kuno kep-napla, asuk din-ilomdila, abip kawu nalmi atok ayo tiin mo-bom ilila, saaknala kawu, dibii din dawaalila, asuk kapni fanang talokomi kayi! akale,
MAT 8:22 Yesus asiik ami weng maan tela bokola: Daa yo. Kabi unemin daa yo, kela tildang nami daang bakaalin tunum ke-lomdawa yo. Tunum kanta nami daang bakep-tokomup disa yo, kalbip ilta-kup aptum kusal taanip iyo imbi din ima-laamik. (Ale kabile, din God ami weng kaata kulii-din unang tunum imi bakayim-balawa, iyo God ami lak duu-lomdiwa, tiltam God ami man ke-lomdip suunkup ilin unang tunum kelin o,) aka ko.
MAT 8:23 Yesus so, almi ap-tunum kusal iso, nikil iyo bot tem tam aba-lom tabanip ko.
MAT 8:24 Nikil iyo una-biliwa, wok kumun aalap dukum kemin, umbilip umbiyak wok daang iip iip kabaniwa, inim dukum ma abiltap tabamnala, ok uyo fola kulaala tiltam bot tem ayo talebu. Kata, Yesus ayo ti kano akan-bom-balala kemin,
MAT 8:25 ami aptum kusal iyo yak dap-kafang ale, bokolip ko: Kamokim a! Nuli mepso saak daalum o, kalup kemin, baan tam tiindap dong dokoyilap yaap kelum o! akiwa,
MAT 8:26 fan Yesus asiik bokoyila ko: Ipkal utamiwa, Awu, Kamokim ali nuso bombe kemin, nuli kaal dinim; abiin tangbal tiinbup kalolip disa. Ibi kanimin o, kalaliwa, wok ami atul kaata, suunbip yoko? yinba-kup, kulaali tam tiin tola inim so, wok so, iyo bokola ko: Mep inim so, wok so, kunuubip kulaa, ditang kalin! yaka-kem-salale, kulaata inim dukum so, wok so, ditang kala dinimnip ko.
MAT 8:27 Nikil alik iyo utamiwa yi, Inim so, wok so, iyo ami weng kaata-kup weng san-ilomdip dulumnip kala-somdipla kawu, imi fanang maaklo keyilule, bokola una-tala-ke-bam bokolip ko: Kwin! kalawaata dok kanolin tunum ata taba-bomda weng kulaata-kup bakam-salale, inim dukum so, wok so, kii ami weng-kup weng san-ilomdiwa disa kelip i? kemip ko.
MAT 8:28 Yesus inang iyo bot tem umbilip umbiyak ok balang malii Gadara kasel imi bokon kaptam baniple, Nikil iyo yak itamipla, kulaa tunum alep ma iyo tunum taanip imaasip imi kom tem kawu bom-laabipla, iyo tal Yesus ami diim abamnipya, itama kaali, siin sawaayak kaptoowu sinik mafak ita tunum alep imi yam-mafak-daasip. Kemin, alep ili ban boko-bilipla, unang tunum iyo imi atul kaata, itam suun-bilipla kemin, kom tem unemin kaami liip mepso ayo yang unemin disa ken-umbip. Kemin,
MAT 8:29 tunum alep iyo Yesus kaa atam-ilomdip atin atul fuut-bam disa akal ma ke-bam iyo bokolip ko: God Ami Man kapyo, Kabi tal-ilom kanimin ma numi nuuyon o, kalalapla, talbap i? God ami im-bak saan-bam lek ilin am kaa kama daan tiltam tabin disa bombuu kaldaku talap kaa, numi angtiil yol awak kaa kuyon o, kalalapla talap ema? Kwin! kaa kano-laamin disa yu! kala kanum bokolip ko.
MAT 8:30 Akiwa, nikil ilmi tola-bom-bilip, ami du kabang lo kawu, kang yam ma bomdip bak-fakaneng tababip kala itamiple,
MAT 8:31 kulaata, tunum alep sinik mafak imi iipyak tem tiinsip iyo Yesus ami bokola-lomdip: Nuli fotabamnon o, kalap namti, fotabamnap yak kang imi tiling tem un-ilom mep tunum alep kalawiiyo kamboyila unum o, akiwa, fan,
MAT 8:32 Yesus ayo bokola: Na, kamboyila unin a! yaka kem-salale kulu sinik mafak iyo abiltap tunum alep iyo kamboyila yang kang imi tiling tem uniwa, kulu kang namti alik aket fanang dinim keyila abiltap bina dilila diim dap-kuldaak-mo yak aba umbilaak ok Galili kumun tem din daa-lom wok ta yan dong dokola taanip ko.
MAT 8:33 Kanoliwa, kulaa kang tiin molin tunum yakal utamiwa yi, Kwin! kang namti kanola taan kuliila tabamnip kalale, bina yak aba din abip un-ilomdip abip kasel unang tunum imi kang kanolip kaami sang uyo bokoyila-som ale, mep tunum alep sinik mafak ita yam-mafak-daasip imi sang uyo bokoyila no, kelipla,
MAT 8:34 kawu unang tunum iyo kanolin sang ayo weng san-somdiwa abip kambolaliwa, yak aba din Yesus ami fanang din atamum i! kalalip din atam weng dukum-kup kola-lomdip: Kabi numi bokon kalawaali kulaa kelalap tabanan o, kala-lomdip fotabamnip ko.
MAT 9:1 Kanoyiwa, Yesus nikil iyo asuk tam bot tem abalip tildak ok kumun malii kaldaku bom-bilip ayo kulaa asuk yak malii abaliwa, kulaa kela asuk ilmi abip unip ko.
MAT 9:2 Din uniwa, tunum nikil ma aptum angtiil taan dikiksa ayo abiin diim una dalaa dibii tal Yesus ami fanang dap-tal daaliwa, Yesus akal itamala yi, Tunum nikil iyo atamipla, Yesus ali ti faneng nak-tunum kulaali, dap-talalulokoma kala, kal-bomdip kanubip kala, kalba-kup tunum angtiil alik dibim-ansa ami bokola-lomda: Nak-tunum aa, nali kapni ban uyo alik takan-tiip-ti disa kelu kemin, fiyaap duuman a! aka ko.
MAT 9:3 Kanum bakamala, lo utamsip tunum malo ma iyo weng sandiwa, aptum kusal imi bokola una-tala-ke-bamdip bokolip ko: Kwin! fan mep tawaal diim tunum kalawaali kasen-foko God ami okok kema kawo! kala-lomda God ami win ayo ku-mafak-dakaanba kawi! akan-kaamiwa,
MAT 9:4 Yesus ayo imi kanolin aket fukunbip iyo uteya-lomda bokoyila ko: Ibi kanimin o, kala kanolin aket mafak kaa fukunbip i?
MAT 9:5 Nali kalok nolin mafek mafek kanu-biliya, ibi abiltap nitam-ilomdip Kaa faneng bakaba nu nokokomip i? Nali bokoya-lomdi: Kapni ban kaali, takan-tiip-tili kayi! kalokomi kaa, ibi utamin disa ke-somdipla, ibakaba no, nokokomip. Kemin ale, aa bokoya-lomdi tam tola unan o, kalokomi kaata, utamdipla, Kuuli faneng bakaba nu, nokokomip ko.
MAT 9:6 Ipkal utamin! Nali God Ami Man kemin, nami titil dukum kaata kukuyim-bilila, ibi utamiwa, Ali ibakaba disa; ali tawaal diim kala tal bombe kaali, yaap unang tunum imi ban takan-tiiyokoma no nokokomip o, ke-bamdale, kulaa, tunum angtiil dibim ansa ami bokola ko: Kabi tolalap kaltapni abiin kabaaku tim-bilip tilip uyo, kuluu kutamalap kalapni am unan o, aka-laam-salale,
MAT 9:7 kulaa, fan tunum ayo tam tola almi am una ko.
MAT 9:8 Kanolaya kawu, uyo utam-somdiwa kemin, unang tunum kii utamdiwa atin aket kufoyilu suun-bam God ami win ayo kufon-bam ale, ami win uyo bokola una-tala-ke-bam ale, God alalta taba-lomda tunum kaa titil kolaya, yak kanolin kukup akal kusnum kaa kanola no, kal-bomdip awolmip ko.
MAT 9:9 Yesus ayo tunum angtiil dibimnin ayo dap-talalula unaya, am ayo kambola yakyak din takis kaamin am ofis din ula, takis kan-umba tunum Matyu nayo tiinbi kaa kala din nitam ale, bokop-na ko: Nak-tunum a! kabi nami daang bakaalin tunum kelawa, naso nikil um-bomduwa, nami okok kaasiik ma kup-tiya, keman o, kalale, fan nayo tola yak Yesus ami daang abila unsup ko.
MAT 9:10 Tabamnila, Yesus nikil iso, naso, nikil ofis ayo kamboli din nami am kawu ima im-buluwa, takis kaamin tunum yaapkan malo iso, aa kukup mafak kutal-fukulin unang tunum malo iso, tala-tala-kelip Yesus akal ami ap-tunum kusal iso, kuyaku nikil ang-de ima im-bom iluple,
MAT 9:11 Falosi malii ma ita utamiwa yi, Yesus ali kanumin tunum iso, ima imba kalaliwa, Yesus almi daang bakaalin tunum imi dik-daayip: Kipni kukuyilin tunum kaa kanimin o, kalala tal itamala takis kaamin tunum iso, kukup mafak fukulin tunum malo iso, nikil tiin-bomdip ima dakaap kaa inbip yoko? Kaami kaa kanuba kaali mafak o, kemipya,
MAT 9:12 Yesus ayo weng bakabip uyo weng san-somdala asiik bokoyila ko: Nayo faldak-tiimin weng ma bokoya-lomdi: Dokta ali tal tunum mafak-umulin dinim, ili yam-talalulokoma disa; ali tal tunum mafak-umulin ita-kup, yam-talalulokoma.
MAT 9:13 Kanolin kemin, nali taldila tunum unang iyo boko-lomdip: Nuli ban kemin dinim ale, nuli ti tituun-kup tabin unang tunum o, kebip kiita, nali tal kiimi dong dakaayin-bilila, imi aket kaata fal-kela-lomdip God ami lak kaata duulin o, kalalila talsi disa; unang tunum kanta boko-lomdip: Nuli ti ban kemin unang tunum o, kebip kiita, nali taldi dong dakaayin-bilila, imi aket uyo fal-siki-lomdip God ami lak kaata duulin o, kalalila, talsi no. Weng kala bakayimbi ayo, kipkal God ami Sukon Tem uyo fan tik-tii-bam mep weng kaa bakabi kaami miit uyo soko utamin a! Weng anung uyo boko-lomdu: Nami tiin diim uyo kipni taloop kulii-tal anu God ami kola, numi ban wakamin ayo molum o, kala kukaap-nin kulaali, katip so ale, ap-tunum kusal imi kukup tangbal kukaayin kaata, nami tiin diim uyo sakbaalim dukum kemin, ibi ti kanu-mokomip kaata, nali kipni fiyaap dukum ayo duu-mokomi no, kalsa no, Yesus ayo kanum bokoyila ko.
MAT 9:14 Oksam ukayin tunum Jon Baptis ami kalaan tunum iyo tal Yesus atam dik-daalip ko: Nuso, Falosi so, numi kukup ayo iip maakup maakup kaami beten kemum o, kalokomup kaali, Nuli inin kaa kela fala-bomduwa, beten ken-umbup. Yale, kapni kalaan tunum ilile, inin kaa falamin disa, beten ken-umbip kaata, kanimin o, kalaliwa ili inin kaa falamin disa ken-umbip yoko? kaliwa,
MAT 9:15 Yesus asiik imi weng maan tiiya ko. Almi saak-nokoma kaami sang kaata faldak unang tunum fokolokoma imi diim tii bokoya-lomda: Tunum ayo unang kuluulokoma ayo tunum iyo ima fuu-bam in-bom fiyaap duu-mokomip ko. Kanu-mokomip kaata, tunum kusnum ma ayo yaap o kala bokoya-lomda: Ibi fiyaap duu-bam inin daa, kemin, aket uluum tabe-bam inin kaa falamin o, yokokoma nema? Disa. Tunum maaklo ili utamipya, Nak-tunum ali nuso bombe kalalip fiyaap duu-bamdiwa, ima inokomip. Lale, bombii kaptoowu, waasi ita tal imi aptum ayo dap-tal fukulip kalokomip kaa, aptum kusal iyo aket uluum dap-tiiyilaya, inin ayo falaalokomip o, kala Yesus ayo faldak-tiimin weng bakayila ko.
MAT 9:16 Kanum bokoyilale, Yesus ayo (Juda kayaak imi itam ale, ilmi siin kukup kaata dukum-kup kutal-fukusip. Lale, nami kama kukup uyo kutal-fukulup disa yo, kalbip kalalaya,) asuk do eng alep ma bokoya-lom: Unang uli falewala kama alokso ilim fulduu kulii-tal diingnin disa buu, kaa ma ukduu kutal aba yak siin ilim balata-tababu umi diim tii bikilokomu no? Disa. Kanolokomu kaalile, diing-nokomu kaa alokso ilim uta taba-lomdu aluula kutiilokomu. Kemin, kulin diilu fongnu asuk mikilokomu ayo nakat-moluya, siin ilim disap uta abiltap biki taba-lom tem dukum ke-lokomu.
MAT 9:17 Aa, ti kalawaakal kanolin o. Tunum ayo meme ipnaal siin kawu dilduu kutiila fongbu umi tem kaptoowu kama alokso wain ok ayo iluula dongna kalale, sok ta kuluu tem ayo de katii kutama tal am tiila namti, ok ayo bombile, fasun-um-bom ale, meme ipnaal filit disa ayo fasu fasu um-bom abiltap-siik bikin-ilom ok ayo tiltamba talokoma. Aa, ipnaal ayo atin mafak-alomdu balata tabam-nokomu. Kemin, tunum alokso wain ok ayo iluulon o, kala namti, meme ipnaal kaa kama dilduu kutiila tootnin dinim, bombe ata-kup kuluu-lomdala, wain ok ayo iluu kulii-tal tiilokoma kaata, meme ipnaal so, wain so, alep kano yaap ilokoma no, kala Yesus ayo weng do alep kii bakaya ko. [Kemin, weng do kabak-ali boko-lomdu: Nali kama kukup kulii-tal kipni siin kukup umi anung til-daayon o, kalali talsi disa; nali kama kukup kaata-kup kulii tiliya kaata dotu kutal-fukulin o, kala kulii-talsi no, kalsa ko.]
MAT 9:18 Yesus ayo kanum baka-bam bakayin-salale, Juda imi kamokim ma Yesus ami fanang tal katuun duung fakela daak tiinda bokola ko: Nami man unang uyo ti kamala kulu taanula, utam kewa tili. Kemin, baan talap alep din ilom kapni sikil kaata, kuyak tiilapla, tam tiinuk o, kalaya
MAT 9:19 kulaali Yesus aye almi aptum kusal aye, iyo kamokim aso, unip ko.
MAT 9:20 Kuno unang ma bombuu kuuli, suunkup ulmi am unemin-kup kebii wasital talangkal dakan-tiisu. Kemin, uyo tal Yesus ami daang tem kulu tal bomale, aket fukunu ko: Nali yak Yesus ilim mikiba kulaata maaklo yak malelila nam-talalulala, tangbal kelon i! kala kanolin aket ayo fuku-daabu-kup, umi sikil ayo maaklo kuyak Yesus ami ilim matum diim kulaata-kup kutal-fuku kemula,
MAT 9:22 Yesus akal utamala, Ma tildak malep-na kala kalale, fal-siki titoop daa, utam bokowa ko: Nafalop kupyo, nali utamila, Kubi fan ali yaap nam-talalulokoma no, kalbap kalalila tam-talalulila, tambalnap kemin, fiyaap duulan a! waka-kem-salale, maak fak-daalin tap tambalnu ko.
MAT 9:23 Kanola Yesus yak aba tal kamokim ami am uyo tal ula, Tunum saakna kuwakamin umi olenin fongket dakaamin tunum iyo fongket ayo dakaa-bam ale, unang tunum alik yaapkan iyo tal dukum-kup ama-bam tulu tale-bamdip kebip kala tal itam ale,
MAT 9:24 bokoya ko: Kipyo, unang man kuuli taanbu disa; uli akan-umbu kemin, ibi amamin disa; kuno kewa tambanin a! Yakan-kaamale, unang tunum yaapkan ili kulaa kasen-fakaba no, kalalip aban kulil-telip ko.
MAT 9:25 Kulaa, Yesus ayo unang tunum yaapkan iyo yan-bak mola tambaniwa, Yesus ayo unang man ulmi sin-yaabu abiin tam-ilomda sikil um-tal fuku kem-salale, kulaa man unang uyo tam tiinula,
MAT 9:26 uyo kanowaya unang tunum iyo yak aba din abip ma ma un-ilomdip Yesus ami kanola kaami sang kaata, bakayila-tal-une-bilip dukumnu ko.
MAT 9:27 Yesus ayo mep am kaptam kuno kela una-balaya, kulaa tunum tiin fiim alep ma Yesus ami fanang yaan tem dikela tal bokolip ko: Kamokim kapyo, kabi King Devit Dukum alaltap kemin, kabi numi olen-daaya-lomdap kapni titil ata kuluu-lom dong dokoyan o, kemip ko.
MAT 9:28 Kemipla, Yesus ayo tam am banaya, tunum tiin fiim alep yakal ti Yesus ami daang tem tam uniwale, Yesus ayo alep imi dik-daaya: Alep ibi fanang daaliwa, titil ata yaap alep numi tiin kiiyo, dotuya dong dokoyama kalbip ema? yakala, Yesus ami weng bokoya uyo alep isiik bokolip: Ayo, kapta titil soyap kemin ale, dong dokoyokomap kala kalup te! kaliwa,
MAT 9:29 kulaa, Yesus ami sikil ayo kuyak tunum alep imi tiin diim tiiyale, bokola: Ibi utamipla, Ali ti almi titil ta dong dokoyokoma nikip kemin, kulu dong dokoyi no, yakaya,
MAT 9:30 tunum alep imi tiin ayo tambal-kup keyilula kulu, mafek mafek namti atamiwale, Yesus ayo dukum-kup bokoya-lomda: Talalu-yimuli kaami sang uyo kulii-din tunum malo imi bakayin disa kayi! yaka. Katale,
MAT 9:31 tunum alep iyo Yesus ami weng kanum bokoyila uyo weng sanamip dinim. Kuno kela din abip kusnum kusnum uyo tal-une-bamdip imi tiin dotuyila kaami sang uyo bakayila-tal-une-bilip dukumnu ko.
MAT 9:32 Tunum alep iyo Yesus kelalip uniwa, tunum kusnum ma asuk Yesus ami fanang dibii tilip kemin, tunum kaali sawaayak kawu sinik mafak ata dap-mafak-daalaya, weng abat kesa. Kemin,
MAT 9:33 Yesus ayo sinik mafak ayo fotabamna tabanala, tunum ayo kulu weng namti bakan-tabamna atamdipla, unang tunum iyo weng san-ilomdip tiin alik tam baneyulu bakamip ko: Kwin! kanolin kukup kaali kaa akal alik i! Israel-miin nuli kanolin kukup kaa siin kaa ma utamsup disa yo, kemip ko.
MAT 9:34 Kanumip. Lale, Falosi ita bokolip ko: Daa, kulaa sinik mafak imi kamokim Setaan ata titil kaluung kola-balaya, sinik mafak kii fotabamna wakadaa unen-umbip o, kalip ko.
MAT 9:35 Yesus ami abip ma ma tal-unen-umba kaali, yak aba din lotu am tam-ilomda unang tunum imi kukuyim-bam ale, God ami weng tangbal kaata, bakayim-bam bokola: Ibi aket fal-sikilokomip kaa, God ali kipni ban wakamin ayo takan-tiiya-lomda im-tama tam almi miit tem daale tiin molokoma no, kala bakayim-bamda unang tunum imi angtiil umulin akal alik akal alik kan-unsip imi talala yam-kaa-bam kem-tal-unema ko.
MAT 9:36 Yesus ayo unang tunum yaapkan kalawiili itama yi, Sipsip tiin saanin tunum kamboyip ilifin bomdip liip kelalip babon-babon-kem-tal-unebip ililtap ke-bam God ami tituun-kup tabin liip uyo utamin disa, kelipla, kawanta nuli dong dokoyokoma ni, kal-bomdipla aket yamyam takan-tabasip kalalaya, atin ti ol mokop dukum kukaayim-bamdala,
MAT 9:37 almi kalaan tunum imi faldak-tiimin weng ma bokoyila ko: Tunum unang yam iyo God ami weng uyo, weng san-kaamum o, kalip kiili, wiit yakaana-yaaba altap. La, wiit dakamin tunum kiili, mep iip maakup maakup alep ma kiita. (Mep wiit dakamin tunum kiili, God ami weng kulii-din unang tunum imi kukaayin ita kemin,)
MAT 9:38 ibi God ami beten kaman-bilipla, akal okok kemin tunum yaapkan ulela-lomda im-baala tal kipni diim abamnipla, kipso maakup din unang tunum imi God ami weng uyo bakayin o, kala faldak-tiimin sang uyo kanum bakayila ko.
MAT 10:1 Yesus ayo ap-tunum kusal talangkal imi naan-daayila tildang tiliwale, almi titil kuya-lom bokola: Kibi nami win diim kaata, sinik mafak iyo fotabe-bam ale, unang tunum alik angtiil mafak umulin akal kusnum kusnum fakan-unsip imi yam-talala tal-une-biliwa yo, kala kanum bokoya ko.
MAT 10:2 Almi kalaan tunum talangkal ulelsa imi win namti kalawiita ulelsa ko. Diildiil kulaali Saimon so, almi niing Andru so, ita ko. Yesus ali Saimon ami kanum bokola ko: Kapni win ma kaali Pita kayi! aka ko. Ale, alep ma imi win kiita, Sebedi ami man Jems so, almi niing Jon so, alep yakal;
MAT 10:3 Filip, Batolomyu yakal, Tomas, Matyu, nakal nali takis kaamin tunum kemin, sukon kalawaali dolbi ko. Alfius man awasekim Jems aso, Tadius so, yakal,
MAT 10:4 kuno Rom kasel imi itam fananin tunum awasekim Saimon akal, Yesus dap-fatap-daalokoma tunum abip Keriot kayaak Judas akal, ita-kup ulelna ko.
MAT 10:5 Yesus ayo almi aptum kusal iyo fokoli din nami ok kaata, okoknala unin o, kalalaya weng ayo bokoyale, Israel ili God ami kukup uyo kela-lomdip kiili, sipsip babon babon ke-bam maaklo kesip tap kesip. Kemin, ipta din yal-mokomip. Kemin, ibi din Sameria kasel imi abip kawu tal-unemin daa; aa, tunum kusnum imi abip aye, uyo tal-unemin daa; ibi ti yak aba din Israel imi abip kiita-kup tal-une-bamdiwa yo, kala-somla ko.
MAT 10:7 Ibi din abip kaptam kayaak ita-mokomip uyo bokoyilalip ko. God ami unang tunum im-tama tam almi abip unemin uyo mepso dikiwa tulu kayi! yimbip-kup;
MAT 10:8 mafak-alin umu umu umkan-unsip iyo yam-talal-bam ale, saaknip aye, iyo asuk imfu-bam aa, angtiil mafaksip imi yam-talal-bam, sinik mafak imi fotabamnip unang tunum iyo baa tukuya yak bane-bam kemin o. Sawaalak kaali, God ali ibi masiim kawu yam-talalula tiltam ami lak duubip. Kemin, ti ipkal kap-tunum kusal iyo disa masiim talal-yim-biliwa yo.
MAT 10:9 Unokomip kaa, moni so ma abu kulii-unemin daa;
MAT 10:10 aa, ima men, ilim alep, yaan ilom, katil kiiso, kii ma kulii-tal unokomip daa; bung foko diliilip unokomip kiili, ti iltipni ilim mikibip kuliita-kup kano mikibip ti tal-unemalip ko. Ibi ti kukup tambal kaata-kup kutal-fuku-bomdiwa, unang tunum imi kukaayim-bam dong dakaayokomip uyo yakal ti kanola kukup tambal kaata-kup kukaayokomip. Kemin, ibi bung mafek mafek uyo ma iip-nokomip dinim o.
MAT 10:11 Ibi din abip ma kabanokomip uyo fen-bam tunum ayo ma atamip ayo bokoya-lomda: Ti yaap ke tilip o, yaka atamip namti, ami am kawu aso bomdipla, unang tunum imi dong dakaayin-sile, kawu abip kaptam kulaa kela ti kanumin-kup yakyak kem-tal-une-mokomip.
MAT 10:12 Ipni din am unokomip ayo am kaptam kayaak iyo weng umuuya, Nak-tunum kusal kaa tambal-kup bom-bilip o? kalalip kanum bokoyin o.
MAT 10:13 Unang tunum iyo bokoya-lomdip: Ti yaap ke tilip kalalip im-tam ilmi am daalip namti, ilom keyila unum o, kalokomip uyo bokoya-lomdip: Dukum alalta-kup ibi alik tiin molaya tambal-kup bom-biliwa yi! yakale keyila unokomip. Ale, ti yaap ke tilip kalalip im-tam ilmi am daalin disa kelip kaa, ibi weng tambal-kup umuuyila unemin daa. Kuno kamboyila unemin o.
MAT 10:14 Am kaptam bom-bilip aa, abip kasel aa, iyo im-tam daa tiin mo-bom kipni weng ayo weng san-kaamin dinim kelip namti, Juda nulmi kukup ma kaata, kuluu-lomdipla, abip kaptam ayo kambola unolip ko. Nulmi kukup kaali, sung ilol tal aba yak kipni yaan diim tabuuba uyo diliit-mo kulaalip yak abip kasel imi diim kabamnula kawu, abip kaptam-ami unang tunum iyo utamiwa yi, Asuk ilom kaa maso tal abip kaltam nuli dong dokoyokomip disa yo, kalalip utamik o.
MAT 10:15 Kipyo, nami weng kala bokoyokomi uyo talalu weng san iliwa! Sawaalak kawu abip Sodom kayaak so, Gomora kasel so, ili kukup mafak kuuta ti nuumin-kup kem-unipla, God ayo yam-mafak fuula taansip. Kemin ale, bii am mafiing am daan tiltam abokomu kawu kanola God akal unang tunum iyo im-bak-saan-bamda Gomora kasel so, Sodom kasel so, ili angtiil yol ayo kuyokoma. Yale, am kamala kalawaali God ami weng kuluuli fatap diim kalawu bom buu kemin, ipkal yak aba din abip ma kaptam banokomip kaali, din uniwa, dok nolin ita ma God ami weng uyo kuyang saak tiiyip namti, God ami tam imi angtiil atul kuyokoma uta ti, uta uta ke-lomdu Sodom kasel so, Gomora so, imi nami weng tangbal weng san-kaamin disa ke-bam bom ilsip angtiil yol awak kuyokoma kuluuli, kulaak banokomu kayi! kala Yesus ayo weng sawaa uyo kal-bomda almi kalaan tunum imi kanum bakayila ko.
MAT 10:16 Yesus ami kukup mafak tal almi aptum kusal imi diim abokomu kaami sang kaata bokoyila ko: Ibi nami weng kala weng san iliwa! Ibi im-baali din abip ma abip ma kem yakyak unokomip uyo, miyaan mafak apliip imi tal sipsip yam-mafak-dakan-umbip tap ke abip tunum iyo taba-lom yam-mafak-daka-mokomip. Lale, kibi sipsip ililtap ke fuluum-kup taba-bomdipla ko. Inap kiimi liip tal-unemin uyo aket fukun-bamdipla, Misii tunum itam yelalip o, kalalip akolkup duluula tal-unen-umbip tap ke kipni tal-unemip tiin bom ilip ayo ti aket fanang tangbal kaata-kup fukun-bam kukup yaap-kup tabuu-biliwa yo, kala-somla kemin, dinan-tal-unemin disa; unang tunum ili kukup tangbal tangbal kaata-kup kukaayim-bam awon abim ami duluum-kup taba tiin-yaabip ililtap ke balili kala bomdiwa yo.
MAT 10:17 Ibi nami ok kala tabuu kulii-tabokomip kabaku kaami kalan kaata, nami waasi ita ipni yim-tal fuku sok de-yimbii din Juda imi kamok kamok ang dinabip imi diim daaliwale, kamok kamok ita im-bak-saanokomip aye, lotu am unokomip kaali, waasi ita ye-bam ke-mokomip utafii-bamdiwa kayi!
MAT 10:18 Ipkal nami ok tabuulokomip ayo, kaami kalan kaata, nami waasi ita ibi imbiilip umbilin Rom kasel imi kamok kamok imi diim tiiliwa ita lek-im-bam imbak-saanokomip kawu, kipkal kabaku utamiwa, God ami weng umi liip namti kabuu kala kalalipla, ipyo, Juda imi kamok kamok so, bokon kusnum imi kamok kamok so, imi diim kawu God ami weng namti bakayokomip o.
MAT 10:19 Ita ipni im-buu-im-bii din kamok kamok imi tibi diim daalokomip kaa, ipkal aket dukum kaa fukun-bam, Kwin! weng ma kaa binalip tildaak numi al abam-nokomu kaata, kanimin o, kalokomup yiki? Kaa dok kanolin weng kaata nokol kuluu weng an-anung-daa tiiyokomup i? kemin disa; ti bilili-kala bom-bilipla, God alalta, weng baka-mokomip uyo kukuyim-bala, tambal-kup baka-mokomip ko.
MAT 10:20 Iltipni aket fukunin kaata-kup weng kaa baka-mokomip disa; iltipni Kaalap God ami Sinik Tangbal ata kipso suunkup ilokoma akal, almi weng kaata kukuyim-balaya, bakayokomip o.
MAT 10:21 Tunum ili natam suun-bam ilmi nakal-fakal nami lak duulin iyo yam-fatap-daa im-baalip yak kamok kamok imi sikil diim abamnipla, ita anulip taan-laa-biliple, kuno awil-fakal taba ilmi man iyo fokolip yak waasi imi sikil abamnip anulip taan-laa-biliple, man ilta awak-aalap imi tit-moya waasi keyimbip-kup, im-baalip yak kamok kamok imi sikil diim abamnip anulip taan-yaa-bam ke-mokomip.
MAT 10:22 Kanolin kemin, God ami lak duulin disa bilip tunum alik iyo natam suun-umbip kemin ale, ili nami lak duu-bom okok kemin tunum maakup ita aket atul kukaayim-bam itam suunokomip. Lale, nami lak duu-ilin unang tunum ili kanta angtiil yol ayo utafii-bamdip yang banemin disa, suunkup yak nami lak duu-bilip diim kawu bom bii taanip namti, kiita fan God akal yim-tama tam almi abip daalaya, suunkup ilin unang tunum ke-lokomip ko.
MAT 10:23 Ipyo, din abip ma kawu bom talaaliwa, mafak bakayim-bamdip itafiimip namti, baan abip kanuyimbip kaptam kambolalip din abip kusnum kaptam banemin o. Nali tituun weng kaata bokoyokomi kemin, weng selin! Ibi nami weng kaata, kulii bomdip kulii yak aba din Israel-miin imi abip dukum dukum kawu tal-une-bam bakayila-tal-une-bilipla, kuno ti disa kelin disa bom ilule, Dukum ami Man Niyo, din abalila asuk talokomi no.
MAT 10:24 Sukul man ata ata kela almi kukolin tunum ayo dabaak tabiilokoma disa le, kuno okok kemin tunum akal taba-lom almi kamokim ayo akaala tam tip kaltoop banokoma disa.
MAT 10:25 Kemin, sukul man akal talaba tam almi kukolin tunum alaltap kela kaali, ti yaap ke-lokoma; kuno ok tabuulin tunum akal tal aba tam almi kamokim alaltap kela namti, kaali ti tambal. Kemin, waasi-miin ili kasen fokop-na-lomdip: Yi, ali sinik mafak imi kamokim Belsebul o, kala Setaan ata kayi! nambipla, kanola ili nami daang bakaalin tunum ipkal ibakayim-bamdip kipni win ayo atin ti ku-mafak-dakaayim-bam ke-mokomip o, kala Yesus ayo almi miining imi bakaya ko.
MAT 10:26 Asuk Yesus ayo bokola ko: Kanum bokosu no. Tunum unang nami lak duulin disa kiimi atul kaa suunin disa yo. Kamala kaa ibi nami kukup tangbal ata ti kanu-bam ale, nami weng tambal kaata-kup kuno ti bakayin-bam kebip. La, nami lak duulin disa ili utam, Awu, kuuli kukup tangbal e? weng tangbal e? kalalip utamsip dinim kemin, bom bii kaptoowu unang tunum yaapkan iyo utamiwa, Awu, kuuli ti weng tangbal ale, kukup tambal, kalaliwa kawu, talalu uta-mokomip. Kemin, ibi ti suun-bamdiwa nami ok uyo kuno kela-laamin daa; kuno ti yikik-kutal-fuku tala-biliwa ko.
MAT 10:27 Nami kama alokso weng kala bakayimbi kaali, ipta weng sandip kuyak aket tem daalipla, ilom kawu ibi weng kalawaali kutamalip bilin abip ma ma ayo dukum-kup bakayila-tal-une-bilipla, alik iyo weng san-kaamalip ko.
MAT 10:28 Tunum malo ma ita bokoya-lomdip: Ibi Yesus ami weng ayo kuluu bakayila uniwa yelokomup o, yaka-lomdipla ili kipni angtiil kulaa welip taanokomu. Lale, kipni sinik suunkup ilin kaali, aalip taan maaklo ke-lokomu disa. Kiimi atul kaa suunin disa; ti God maakup ami atul kaata-kup suunin o. Kaata-kup titil soyim kemin, ata taba-lom kipni tiil uyo wela taanule, ipni sinik ayo an-bina yang wing tiil suunkup kiinin-kup ilin abip kabanokomu. Kemin, God maakup ami atul kaata-kup suunin o.
MAT 10:29 Mep awon katip katip kuliili win dinim kemin, tunum ili moni kiin abin kulaata dabuu-lom awon katip katip alep iyo molokoma. Lale, awon katip tiyok maakup ma kaami dap-taldaak tawaal diim abam-nokoma kaa, God ali ata-mokoma. God ali daak abokomap disa yo, kala namti, awon katip sakap ayo tildaak abam-nokoma disa.
MAT 10:30 Kanolin kemin ale, God ali kipni aket ayo ti suunkup fukun-umba ali alik kipni dabom kon maakup maakup iyo tik-tii utamaya, Kanolin kal u, kala utam kuno mafek mafek alik tildak kipni diim aben-umbu uyo utam kesa. Kemin, ibi ti tangbal-kup tiin mo-bomda dong dakaaya tabase ko.
MAT 10:31 God kaami tiin diim kaa awon katip katip kiili, kulii kulaak baniwa, tunum kipta kipta kelin kemin, God ali kipni aket kaa fukun-bam ale, tambal-kup tiin mo-bom ken-umba. Kemin, ibi tawaal diim kayaak ita ipni anulum o, kebip imi atul kaa suunin dinim o, kala kanum bakayila ko.
MAT 10:32 Yesus ayo almi kalaan tunum imi bokoyila ko: Kipyo, dok nolin kapta din unang tunum imi tiin diim kaa boko-lomdap: Nali Yesus ami daang bakaalin tunum o, kemap namti, God ami lek-im-bam angtiil yol kukaayokoma kaami am daanokoma kabaku nakal Atok abiil tikiin kayaak ami tiin diim ayo bokola-lomdi: Ali nalmi kalaan tunum o, aka ke-lokomi no.
MAT 10:33 Kalok nolin tunum kapta boko-lomdap: Yi, nali Yesus ami daang bakaalin tunum disa yo, kalap namti, aa ti nakal nalmi Atok abiil kayaak ami tiin diim kaali bokola-lomdi: Ali nami daang bakaalin tunum disa yo, takali, kapni win kaa kuwaap-ta ke-lokomi kayi! kala Yesus ayo kanum bakayila ko.
MAT 10:34 Yesus ayo asuk bokola: Kipni aket fukunbip kaa, nali taldi unang tunum imi weng kukaayim-bili tiltam aket maakup kelin o, kalaliya talsii no, kalbip ema? Disa. Nali tal unang tunum bikilon o, kalali talsii. Nami weng uyo yeng man ta mafek mafek bikilu malii alep ke-laaba ulultap. Tunum unang ili nami weng uyo, weng sanokomip uyo, malo ma weng san-kaa-balale, malo ma weng san-kaamin disa ke daang ukuwa-bala ke-mokomip. Kemin, iyo biki-kutii miit alep ke-lomdiwa, waasi kela antap-daa una-tala-ke-mokomip o.
MAT 10:35 Nami weng kala kukuyinbi kaami kalan kaata, man tunum ma tiltam awil-fakal imi waasi kamayim-bilip, unang man ukol tam awak kasel imi waasi kamayim-bilip, kuno man imi unang tan yakal abimuwak kusal imi waasi kamayim-bilip ke-mokomip o.
MAT 10:36 Kabak-ami kanu-mokomip kaami miit kaa, unang tunum yak-saak-tildak-saak ita tal kanuyokomip disa; ti ilmi aptum kusal maak ilin ililta tiltam waasi kela una-tala-ke-mokomip.
MAT 10:37 Kemin, dok nolin tunum ata almi awak-aalap imi aket kaata-kup an-bulu kuya bomda nami aket uta le, katip ma kup-na namti, ali fan taang-kala-somda tal aba tam nami ok tabuulin man ke-lokoma disa. Aa, dok nolin tunum ata almi man unang aye, man tunum man aa, imi aket-kup an-buluya, imi aket-kup kuyale, nami aket kulaata katip sakap-kup kup-na kela namti, ali fan taang-kala-somdaya taltam nami ok fukulin man kep-nokoma disa yo.
MAT 10:38 Kuno kalok nolin tunum kapta nami man kelon o, kalap. Katale, nami as diim kawu angtiil yol kuluulokomi ultap kuno kuluulami uyo kuno kuluulami kalokin disa, kal-bom ale, nami daang bakaap-na bokop-ta-lomdi: Kaata kanuman o, takan-kaabi kaa tabuulin disa ke kanumap namti, kabi dok kano-lom nami tunum ke-lokomap disa ko.
MAT 10:39 Kabi kaltapni angtiil lak-kup duu-bomdap kaltapni aket fukunin kaata-kup kanum tal-unemon o, kemap namti, kabi naso suunkup ilokomup disa; ti kabi maaklo win dinim ke-lokomap. Ale, kapni aket fukun-bam kanubap uyo kulaalap tildang kanu-biliya waasi ita nelik o, kalolip kulaali, kuno nelalip o, kalalap tildang nami lak-kup duu-bom nami kukup ata dukum-kup tabuu kulii tabap namti, kabi naso suunkup ilokomup kayi! kala Yesus ayo almi aptum kusal imi kanum bokoyila ko.
MAT 10:40 Asuk Yesus ayo almi maakup ilin imi bokoyila ko: Tunum kaa kanta nami daang bakaap-nin tunum, kabi din atamawa, ti yaap ke talap, taka-lomda kapni weng uyo weng san-kaama namti, ali nami weng uyo, weng san-kaamin tunum ali namti kabe. Ale, tunum kanta God Nam-baala Talsii nami weng kaata, weng san-kaama namti, ali God ami weng so weng san-kaamin tunum namti kaa bombe ko.
MAT 10:41 Dok nolin tunum ata utamaya, Kabi God ami weng ku-fatap-dakamin tunum o, takalaya, kabi yaap ke talap o, taka-lom kapni weng uyo, weng san-kaama namti, God akal utam talaala, Awu, tunum kulaata dong dokop-ta kala-somdala kawu, akal kapni okok kem-laabap uyo maan tiip-ta-som ale, kap-tunum ami dong dakaap-tamba akal kuno tela ke-lokoma te! Ultap kemin, dok nolin tunum ata utamaya, Nak-tunum kaali ti tituun-kup tabin tunum kalalaya, ti yaap ke talap o, kal-bomda kukup tangbal-kup kukaala namti, God ali atama yi, Tambal-kup kukaaya kala kalalaya akal tituun-kup tabin tunum ayo maan tela-som aa, aptum ami kukup tangbal kukaanba akal ti kuno maan tela-som ke-lokoma no.
MAT 10:42 Nami tituun-kup tabin weng kala bokoyokomi kalaayo, talalu weng san bom iliwa! Dok kanolin tunum ata tunum kusnum ayo ma tala atamala, ali win dinim Yesus ami daang bakaalin tunum o, kalala bokola ko: Yak tunum kalawaali win dinim kemin, nali kaa dong dokolokomi dinim o, kalokoma dinim. Ayo boko-lomda, mep tunum kalawaali, Yesus ami man kemin, nali ami dong dokolokomi no, kalala dis ok uyo ilola inamna namti, God akal mep tunum kaami kukup kanuba uyo utam bokola-lomda: Kaptum dis ok ilolap kaami kukup kulaa katip. Yale, kaa ti yaap ma kanolap kemin, nali fiyaap duubi no, kal-bom ale, akal kukup tambal uyo maan telokoma kayi! kalala, Yesus ayo mep weng tem ayo almi miining imi kanum bakayinsi disa kelule, kamboyila im-baala almi okok kamala kem-unip ko.
MAT 11:1 Yesus ayo kanola almi kalaan tunum talangkal iyo kanumin sang uyo bakayim-bii disa kelule, kulaa abip uyo kulaa kela bilin abip kusnum abip kusnum imi mepso kaptam-ami tunum unang imi God ami weng kaata bakayim-bamda kukuyila ko.
MAT 11:2 Kanu-balaya, im-baak ok tem dakamin tunum Jon ali kalabus am kawu bom-balaya, almi kalaan tunum iyo fokola tal God ami uldaa-dabuula tiltam Kamokim kesa tunum Kraist ami atam iliwa, kalok nolin okok keba kalaliwa, tal Jon ayo bokoliwa, Jon ayo utam aket alep fukun ale, bokola: Kwin! Yesus kaata God ami ulduula tiltam Kamokim kesa tunum namti kulu be nelile? kusnum e? kemsile, kulaa almi kalaan tunum malo ma ulela foko yim-baala din ilom Yesus ami dik-daalip ko:
MAT 11:3 Oksam ukayin tunum Jon ali weng ma kuya-lomda, yim-baala tulup. Kemin, ali boko-lomda: Kabi tifaneng God ata uldaa-tam-buu-lomda, tam-baala tal-salap e, tunum kusnum ata ne? kalalup fenupla talak e? kala Jon ayo kanum boko-lom dik-daala no, kalba kemin, kaltapta bokoyilap utamum o,
MAT 11:4 kala dik-daaliwa, Yesus asiik bokoyila ko: Ibi din kanolin mafek mafek utamip so, weng sanip so, imi sang kaali, kulii-din Jon ayo bokolin aa! Tiin mafak ayo tiin baa atafii-balale, yawiit daam ayo tam tola tal-une-bilip, angtiil mafaksip iyo asuk tambal ke-biliple, talang abat iyo baa asuk weng san-kaa-bilip, tunum unang saakbip iyo asuk tam tiin laa-bilip, ale, tunum unang iiwaan iyo God ami weng tambal bakayinbi kaali, weng san-kaa-bilip, kebip kaali, ibi atamip kemin, ibi din-ilomdip Jon ami diim kawu ipni kanolin itamip so, weng sanip so, kaami sang kaali, bokolipla, ayo weng san-ilom kaal kela, nili kanta kala, naka ko kala ko.
MAT 11:6 Kemin, tunum ayo nami kanolin kala kanubi kaami aket fukun-bam ale, bokola: Yesus kaata-kup God ayo uldaa-dabuula talse no, keba ayo fiyaap duuma. Kemin, ibi dindipla, Jon ayo sang alik kaayo, bokola-lomdip: Jon kabi aket alep fukunbap kemin, ti aket ma uyo kelalap aket maakup ma ke-lom Yesus ami fiyaap kaata ti duu-bam bom-balawa yo! akin o, kala, Yesus ayo Jon ami kalaan tunum imi kanum bakayila ko.
MAT 11:7 Kanum bokoyilala, Jon ami daang bakaalin iyo Yesus kelalip kaami weng bokoyila uyo kulii Jon bakaala uniwa kulaali, Yesus akal unang tunum yaapkan bom-bilip imi Jon kaami sang kaata bokoya ko: Ibi siin kaa din tunum dinim bokon kawu bom-balala, Jon ami fanang unemsip kaa, kanimin ma atamum o, kalalip unemsip i? Kipni aket kaa fuku-daaliwa: Yi! Awu, daal tibin tunum ma inim ta taba fuun-balala, mokol falduu dibii une-taleba alaltap u, kalalip kaami din atamum o kalalip un-silip ema? Daa te! Jon ali daal tabin tunum disa; ali titil tibin tunum te!
MAT 11:8 Aa, ibi kanimin ma atamum o kalaliwa, un-silip i? Ibi fanang daatamin: Awu, tunum ma ilim tambal tambal ata-kup miki-balala, kaata din atamum o, kalalip un-silip ema? Disa te! Jon ali ilim tambal mikimin tunum kanolin disa; ilim tangbal mikimin tunum kiita, king ami am tambal kaptamu bomdiwa yaap-kup ilolip ale, Jon ali le saak unang tunum disanang kawu suunkup bom iloma kemin, ali disa.
MAT 11:9 Aa, ibi kanimin ma atamum o, kalaliwa unemsip i? Ibi din God ami weng ku-fatap-dakamin tunum ma atamum o, kalalip un-silip ema? Kaali fan, Jon ata weng ku-fatap-dakamin tunum kusnum alik kuliili kabaak baniwa, ata ata kelala yam-kan-tiise te!
MAT 11:10 Kemin kaali dok kata naa kalolip: God ami Sukon Tem kabak-ali Jon ami sang kaata, sawaalak kawu boko-lomdu: God ali almi Man kaami bokolaya: Tunum kulaata-kup ti nalmi kalaan tunum ke-lokoma te! Kemin kaali, nalta uldaa-dabuulila, ali dusiin daa din tawaal diim kalawaami unang tunum imi bokoya-lomda: Kibi iltipni aket tem kaa talalu bam-daka-bam kem-siliwa, kamokim ayo talak o, kem ale, kapta, mafiing kawu talokomap kayi! kala, God kaa almi Man ayo kanum bakaala no, kala God ami Sukon Tem kabak-ali kanum bokosu.
MAT 11:11 Kemin, weng kala bokoyokomi kaali, tifan, tituun weng kemin, weng selin! (Siin kaali, God ami profet kiili, God ami weng uyo kulii-tal bokola bokola kem-tabasip. La,) tawaal diim tunum alik kala tiltam tiltam kem-tabasip imi tunum maakup ata ma tiltam aba-lomda, Jon ata nami sang kulii-tal bakayimba alaltap so ma kanu-bamda kulii-tal bakayila-tabasa disa. La, unang tunum tiltam God ami miit tem talokomip kiilile, saak man mafak, man tambal yaapkan iyo tiltam God ami mafek mafek so, kukup so, uyo talalu utam-somdiwa kawu, Jon ata God ami kukup utamsa uyo kukan-tela-lomdip ita ita ke-lokomip ko.
MAT 11:12 Siin kawu, Jon ata God ami sang uyo unang tunum imi bakayinsa. Kemin, kuluu kulii yakyak kulii umbital kala diilu kaali, unang tunum yaapkan imi aket fukunin kaayo, God ami miit tem ayo titil-fak-daa tam unum o, kalaliwa diimaan-daasip.
MAT 11:13 Sawaayak kaali, Moses aso, malo God ami weng ku-fatap-dakamin kusnum kiiso, ili boko-lomdip: Am ma daanokomu kaali, God alalta unang tunum iyo foko im-taldang alami miit tem daa tiin molokoma no, kem yakyak tabasip. La, kamala kulaakal ti Jon akal weng yaan tem fanang maakup kaata-kup kanum bokose. Kemin,
MAT 11:14 weng ma sawaayak kawu bokosip kaali, Elaija ayo asuk talokoma no, kalsip. Lale, Elaija ami sang bakamsip kulaali faldak Jon ami diim tii bakamsip. Kemin, Jon ali kulu tiltam tabamnala imi weng ayo duuk-kup dakat ke-lom tiilasu.
MAT 11:15 Kemin, alik kipkal talang tem so kemin yaap-kup weng sanamip te! Sining kala duluum-alom dotu tinang umu weng san-iliwa.
MAT 11:16 Unang tunum kamala kula bom-bilip, kibi dok nolin tunum unang i? Ibi unang tunum dukum ke fasuu-silip. Lale, ibi ti man katip katip ililtap ke-bom-bilip te! Man katip katip ili abip daal iip kawu tiin-bomdiwa, man malii ma aptum kusal dukum-kup weng umuuya-lomdip bokolip ko:
MAT 11:17 Nuli was samanin tap kemum i, kalalip baal wii-bam ale, was daka-bam kebup. Katale, malii ma kiptale, nuso was wiimin disa; ale, nuyo tunum taana dawakamin tap kemum aa! kalalup amabup. Katale, kipta tal nuso amamin disa kebup ko. Kalok nolin kukup akal alik akal alik ma kabak-ami kukup kanu-mokomup kaali, ibi daa yo, kalalip kela kela kebip o, ken-umbip ko.
MAT 11:18 Ulultap o. (Ibi man katip katip fuut-kup tabin iltap ke-bamdiwa, Jon ami weng bakayimba kuluuli weng sanup disa yo, kal-bom ale, kuno nami weng uyo weng sanup disa yo, kal-bom kanu-bamdiwa, ibi disa kaami kalan kaata alep numi weng mafak kaata kukaayim-bam itafiin-umbip.) Kemin, Jon ami aket fukunin kaali, God alalta bokop-na-lomda: Yak kanolin inin-inin kaali inolap dinim o, nakase no, kalala, fala-biliya, God ali nami fiyaap kaata duumak i, kala-somdala, inin-inin akal kusnum kiiso, wain ok so, iyo suunkup falamin-kup ke-bam biisa. La, tal kaa kanu-balaya, ibi atam-ilomdiwa boko-lom: Fan, mep tunum kalawaali sinik mafak ta dap-mafak-daalaya, inin-inin kaa suunkup falan-umba no, kem-tabasip.
MAT 11:19 Kemin ale, Dukum Ami Man Nali taldila, ima so, wain ok so, kaa ma awem o, kalalila uyo ma kulaasii disa; ipni ima alik inan-umbip kulaa inan-yaabi. Lale, ipta bakap-nam-bamdip: Kipyo! mep abuuyap kaayo, soko talalu atamin i! (Juda numi kukup kaa ima mafek mafek fala-fala-ke-bam God ami beten kaata-kup kamalin. Lale, Yesus ali ti ma kanumin dinim.) Ali takis moni kaamin tunum so, kukup mafak tabuulin tunum kusnum malo iso, imi kayaak o, kem-yaabip. Kemin, dok nolin tunum ata God ami kukup tambal kaata-kup nuuma namti, kuuta kukoluya kayak kayak iyo atamiwa yi: Kaali God kaa talalu atamsa. Kemin, nuli yaap tal aba yak ami kukup tambal ma tabuulokomup o, kalokomip kayi! kala Yesus ayo kanum baka-bam bakayila ko.
MAT 11:20 Yesus ayo kukup akol almi kusnum ma kusnum ma yaapkan uyo abip malo abip ma ma imi kukuyila katale, unang tunum kuluwu bom-bilip ili imi aket fukunin ayo fal-siki-lomdip ban wakamin kaa kelalip disa, ke-biliwa, Yesus ayo im-bak-saan-bamda bokoya ko:
MAT 11:21 Iifan, Korasin kasel sole, Betsaida kasel so, kipyo ibi mokop soyal u! Nali kukup akal kusnum uyo kipni abip alep kaptamu kanumsi. Lale, ipni aket fanang uyo ma fal-siki-lom ban uyo ma kulaasip dinim. Nali yak aba din kanolin kukup akal akal alik uyo God ami lak duulin disa bilip imi abip Taya so, Saidon so, kaptamu kanumsi dinam, abip kasel ili utam-somdiwa, ili ban wakamin kaami aket uluum tabeyula ilmi aket uluum umi kukup kaata-kup kuluu-lomdip yek kutap ata kuluu ilmi angtiil diim ayo fokobip-kup, kuno ilim mafak ayo miki tiin bom ama-bam ale, ilmi ban uyo kuno kela-silip. Lale, nayo din kukuyin-biliya, uyo utamsip dinim o.
MAT 11:22 Mep nami weng kala bokoyokomi kalawuuli, kuyak aket tem daa-lom fukun-biliwa yo. Am mafiing diim tiltam tabokoma kaali, God ali Taya kasel so, Saidon kasel so, iyo im-bak-saan-bam angtiil yol ayo kuyokoma. Lale, ipni ban wakamin ayo kelin disa kelip kala kalalaya, God ayo kipni angtiil yol kukaayokoma uta ti atin awak sakbaalkan kukaayokoma ko.
MAT 11:23 Kapeneam kayaak kipyo, kibi boko-lomdip: Alik nuli din God ami abip kawu ilokomup o, kalbip. Lale, atin disa. Ibi nami weng ayo weng san-kaamin disa. Kemin, God ata fokola daak abip mafak unokomip. Kanola nali kanolin kukup akal alami kusnum kusnum num-tabasi ayo sawaayak abip mafak Sodom kasel kaptam-ami kukuyinsi dinam, Sodom kasel ili God ami ma atamsip dinam, ili aket kaa fal-siki-lom ban kemin ayo kamboliwa, God ata imi ban kamboya abip ayo tambal-kup bom-bulu, kulii yakyak kutal kala diilu. Lale, imi aket ayo fal-sikilin disa kala-lomdala yam-mafak-daalaya dinimsip.
MAT 11:24 Kemin, nami weng ma bokoyokomi kalawaali kuyak aket tem daa, fukun-biliwa yo, kala-somya kemin, am mafiing diim tiltam tabokoma kaa, God ali Sodom kasel imi im-bak-saan-bam angtiil yol kaa kuyokoma. Yale, Kapeneam kayaak kipni ban uta kulaalin disa kelip kala kalalaya kemin, God ata kipni angtiil atul dap-kaayokoma uta ti atin sakbaalim dukum kayi! kala Yesus ayo abip asuumano kalawiimi bakayila ko.
MAT 11:25 Yesus ayo abip kasel imi bakayinsi disa kelule, kulaa kela almi Aalap God ami bokola ko: Nami Aatumen kapyo, kabi Kamokim kemin ale, tawaal diim kalaaso, abiil kaaso tiin mosap. (Kemin, kapni kukup kaata taba unang tunum imi kukup kuluuli kabaak banula ata ata kesa. Kemin, yaap ke yo, kalbi.) Kemin, unang tunum iip maakup maakup ili aket fuku-daa utam: God ata kukuyim-balaya, Nuli utamsup disa. Kemin, nulmi aket fukunin kaata-kup kukuyim-buluya, nokol God ami mafek mafek uyo utamsup o, ken-umbip kalalawa kapni aket fukunin tambal uyo kuwaalapla, kiili ma utafiin-umbip disa. Kemin ale, unang tunum malo ma ili boko-lom: God kabi kukuyim-balap utamum o, ken-umbip o, kalalapla, kiita kukuyim-balawa utafiibip. (Kemin, ili nami weng kaa ti weng san-kaamin-kup kemum o, ken-umbip.) Kemin, kaali Atok kabi yaap ke yo, takan-kaabi ko.
MAT 11:26 Kapkal kanolin kukup uli kanumi no, kalalawa, kapni aket fukunin tambal uyo utamsup dinim o, kalin tunum imi kukaayim-bam kukuyim-balapla utafii-bam kaal kebip o, kala Yesus ayo God ami kanum bakaala ko.
MAT 11:27 Yesus ami beten kamaanba uyo disa kelule, umi anung ditat kaptoowu unang tunum yaapkan tem kawu bomdala bokola ko: Nami Atok ali mafek mafek iyo alik kulaap-na tildak nami sikil diim abasip. Kemin, nali almi Man tituun. Yale, unang tunum ili ma nitamiwa yi, Awu, ali fan God almi Man u, kalsip disa. Nalmi Aatumen maakup kaata-kup nitamsa. Kunolin kemin ale, unang tunum yakal nami Aatumen ali ma atam, Awu, ali kalok nolin tunum i? kala ma kalsip dinim; ti almi Man nata-kup atamsi. Kemin, nakal tunum unang ulela-lomdi nami Aatumen ami sang uta kukuyi namti, kiita Atok namti atam ke-lokomip ko.
MAT 11:28 Kipyo, Juda imi kamok kamok ilmi weng katip katip yaapkan uyo kulii-tal aba yak God ami lo diim kabak-ali anung til-dakaaya-tabasip. Kemin, dok nolin tunum ata mep weng katip katip uyo fiit-bam kutal-fukulup kalalip, aket uluum dap-tiiyu namti, baan ibi nami fanang tildang tiliwa, nita dong dokoyila kipni aket fukunbip uyo talalu kutiiyilila, tambal-kup bilili-kala bomdiwa yo, kala-somla ko.
MAT 11:29 Nali nalmi lo uyo kipni kuyili kutal-fukulokomip kaali, nalmi kukup kaata kukuyim-biliya, kipkal dik-daa kuluu kaal ke kutal-fukule, bilili-kup kalokomip ko. Nali balili-kup kala dik-diibin tunum kemin, ipkal kanola nalaltap ke-somdiwa, balili-kup kala bomdiwa yo.
MAT 11:30 Nami lo kaa fiitmin disa; fongso kemin, tildang nalmi miit tem kulawu bomdip nami lo kulaali, kutal-fuku-bom-biliwa yo, kal-bomda Yesus ayo almi kalaan tunum imi bakayila ko.
MAT 12:1 God ami iintang am ma daanule, Yesus ayo almi aptum kusal iso, wiit lang iip-iip kaptoop liip nikil de kulii-unip. Un-bomdiwa almi aptum kusal iyo ol-tinap keyilala, wiit san uyo dikela-lomdip inan inan una-biliwa,
MAT 12:2 Falosi malo iyo itam-ilomdip Yesus ami bokolip ko: Kapyo, kabi weng selan! Numi lo kuuli boko-lomdu: Ibi God ami iintang am daanbu kaali, ima dabuubi kulii-talemin daa yo, kalsu. Lale, yak kapni kaptum kusal kii kanimin o, kalaliwa wiit kaa daka-bamdip sikil ipyup-bamdip inan-talabip yoko? Kiili numi lo namti kulu ku-mafak-dakabip kala kaliwa,
MAT 12:3 Yesus asiik bokola: Ibi God ami Sukon Tem tik-tiin-umbip kaa dik-daa-kuluusip disa nema? Sawaayak Devit asole, almi ap-tunum kusel iso, nikil ima tinap keyilala bomdipla, Devit ali kabak-ayo kanimin nosa ni?
MAT 12:4 Lotu umi lo uyo boko-lomdu: Unang tunum ibi pris awem tunum imi bret fuu kulii-tal God ami kolum o, kala God ami am tiin-umbip kaali, inin dinim awem o. Kaali awem kemin, awem tunum ita-kup inin o, kalsu. Lale, Devit ali God ami am tam-ilomda awem tunum imi ima awem kaami sang uyo dik-daalale, tunum awem ayo olen-daala-lomda ima awem ayo kolaya, Devit ayo ma inaba-kup, malo kiita almi soldiya imi kuyila inasip. Lale, ibi boko-lomdip: Kaali kukup mafak ke-bisip o, ken-umbip disa. Kemin, kanimin o, kalaliwa nami nak-tunum kusal iyo ima tinap keyilala kanolip ibi bokoya-lomdip: Kaali kukup mafak kanubip o, yakan-kaabip i?
MAT 12:5 Ultap kemin, God ami Sukon Tem uyo boko-lomdu: Ibi God ami iintang am uyo okok kemin daa yo, kala-som ale, awem tunum imi bokoya-lomdu: God ami iintang am uyo ok kusnum kusnum akal alik kaa nuumin daa; iltipni awem tunum ke-bam umi okok kemin kaata-kup kanu-biliwa yo, kala kanum bokosu. Kemin ale, God ami iintang am daanula, awem tunum imi lotu ami okok ken-unbip kaa, ili iintang am o, kala ok kulaa-laamin umi lo duula-yaabip. Lale, ibi boko-lomdip: Kaali, kukup mafak nolip o, ken-umbip disa.
MAT 12:6 Kemin, ibi kulaa tambal o, kala-laabip. Lale, mep nami weng kala bokoyokomi kaluuta weng san iliwa! God Ami Tunum Nam-baala Talsii Nata lotu am diilim dukum uyo kulaak banula, nata nata kesi. Kemin, nami daang bakaalin tunum imi bokoyila iintang am umi lo uyo lo-lomdip nami okok ke-mokomip kakal ti, tangbal o.
MAT 12:7 God ali almi Sukon Tem kabak boko-lomda: Nami tiin diim uyo kipni taloop kulii-tal anu God ami kola, numi ban wakamin ayo molum o, kala kukaap-nin kulaali, katip so ale, ap-tunum kusal imi kukup tangbal kukaayin kaata, nami tiin diim uyo sakbaalim dukum kemin, ibi ti kanu-mokomip kaata, nali kipni fiyaap dukum ayo duu-mokomi no, kalsa. Kemin, ibi God ami weng umi miit kuluu atin ti talalu utamsip dinam, tunum kukup mafak fukusip disa, ti tangbal-kup bilip ita ibi lek yim-bak molalipla yo.
MAT 12:8 Dukum Ami Man Nali God almi iintang am umi tiin molin tunum ali kalabi kemin, nali ti yaap nami unang tunum imi bakayim-bamdi: God ami iintang am diim kulawu ibi kaa kanumin o, kalomi kaali, ili ti nolamip te! kala Yesus ayo Falosi imi kanum bokoyila ko.
MAT 12:9 Yesus ayo kanum bakayinsi keyila, nikil wiit lang kaptam kambolalip din Juda kasel imi lotu am unipla
MAT 12:10 tunum ma sikil malii dibimsa ma lotu am kutamu balaya, Falosi yakal kaptam tiinbip. Kemin, Yesus ayo talalu atafii-bam ilupla, numi lo kaali, lo-lomda God ami iintang am daanu kaami diim kawu, tunum kaayo, dap-talalula kala kalup namti, dabii din weng talalmin baan diim daa-lom dap-fatap-daalum o, kala-lom Yesus ami bokolip ko: Tunum ma God ami iintang am daanbu diim kawu, tunum mafak-alin ma dap-talalula namti, kaami kanola kaali, God ami lo lo-laamin kukup namti bom be nelile? Kapni aket fukunbap kaali i? Kemin ti kaltapta bokoya taman akipla,
MAT 12:11 Yesus asiik maan tiiya-lom bokoyila ko: Dok nolin tunum kapni sipsip tiin molap, bombe ayo ma God ami iintang am daanbu diim kulu kulii daak afun tem una kalokomap kaali, kuno kelap kulaaku sokoma nelile? kuno asuk dabuu dap-taltam daalokomap? Kwin! dabuu dap-taltam daalokomap kawi!
MAT 12:12 Katale, God ami tiin daaba kaali, sipsip kuliili, taloop kemin, ali kiimi aket kulaa katip katip ken-umba ale, unang tunum iltale, win so kemin, kiimi aket kaata ti suunkup fanang dakan-umba God ami aket fukunin kaa kipni kaptum kusal imi suunkup kukup tangbal kukaayimbip tap ke, nami iintang am daanbu uyo kaptum kusal kii kukup tangbal kukaayokomip kaali ti tangbal o, kem-yaaba kayi! kala Yesus ayo imi kanum bakayinsi kamboya,
MAT 12:13 fal-siki-taba talaala, tunum sikil malii dibimsa ami bokola ko: Kapni sikil kaa ifilan a! Aka-kem-salale, tunum ayo almi sikil ayo ifilale kulu, ami sikil uyo tangbal-alom sikil malii yaap ultap kelula,
MAT 12:14 kulaali, Falosi namti kulu tam tol ale, lotu am uyo kambolalip yak aba din am kusnum kawu tala-tala ang de-lomdip liip ayo ma fen daa atam-somdupla Yesus ayo aalupla taanak o! kala nikil weng takenip ko.
MAT 12:15 Falosi iyo weng taken-bam liip ma fen-daa Yesus ayo aalum o, kemiwa, Yesus asiik asiik ke utama yi, U kanup-nambip kala kalalaya, abip kutam kambolala una ko. Kanola unang tunum yaapkan iyo yaan tem din atamdiwa, imi unang tunum mafak-alin umkan-unsip iyo alik yam-talal-bamda titil tabin weng bokoya-lomda:
MAT 12:16 Nita taba-lomdi kipni mafak umusip imi talal-yimbi kaami sang uyo kulii dindip kaptum kusal imi diim kaa bakayin disa kayi! yaka ko.
MAT 12:17 Kaa dok kata naa kalolip: Sawaayak, God ami weng ku-fatap-dakamin tunum Aisaya ata God ami Sukon Tem uyo Yesus ami kanola kaami sang kaata, dolsa namti kula fan taltam talsu. Kemin, Aisaya ayo boko-lomda:
MAT 12:18 God ayo boko-lom: Kipyo, mep kaali nalta uldaa-dabuuli tiltam Kamokim kesa tunum tituun keba-kup nalmi ok tabuulin tunum ke kesa. Kemin, kaa nalmi aket dukum kaali, ami fiyaap kaata-kup duubi. Nali nalmi sinik ata dabaali daak ami diim aba bomdaya dong dakaan-balala, weng dotu kukaayin tunum kelaya, am bokon kala dik-daa kulaasu kalawaami unang tunum alik imi bokoya-lom: Kanolin kukup tambal kaata-kup nuu-bamdiwa yo, yakan-kaa-mokoma. Lale,
MAT 12:19 kaalile, weng diki-bam ilin titil weng bakamin aa, yak abip daal iip aye, kawu tola-bomdaya dukum-kup naan-bam ke-mokoma dinim o.
MAT 12:20 Mep kaali, unang tunum titil fokolin dinim bulus kebip iyo aket filit so, kukup tambal so, kiita kukaayokoma. Kemin, ali almi ok kaata dukum-kup kutal-fuku bombi le, tam kukup mafak uyo ku-mafak-daala dinimnula kukup tambal kaata-kup, uta uta ke-lokomu.
MAT 12:21 Kemin, tawaal alik kaa dik-daa kulaasu kalawaami tunum miit ma miit ma kaami unang tunum malo ma iyo almi lak kaata-kup duu-bom ale, fen-biliwa din unokoma no, kala, God kaa kanum bokosa kayi! kala Aisaya ayo kanum boko-lom dolsa ko.
MAT 12:22 Sinik mafak ata tunum ma dap-mafak-daalaya, ali tiin dakamin dinim ale, weng bakamin dinim kesala, kanosa tunum ayo Yesus ami fanang dibii tal daalipla, kulaa ata dap-talalula tiltam tiin baa weng boko kelaya,
MAT 12:23 kawu unang tunum alik iyo utamdip fanang alik tambaneyilula, aptum kusal iyo bokola una-tala-ke-bam bokolip: Kipni aket fukunin kaali, mep tunum kaa God ami uldaa-dabuusa tunum Devit ami man loop ata no, kebip ema? Aa, kipni aket fukunbip kaali yi? yikipla,
MAT 12:24 Falosi iyo weng san isiik bokolip: Sinik mafak imi kamokim Belsebul o, kala Setaan ayo Yesus ami diim kawu bomdala, dong dakaan-balala, kaami unang tunum sinik mafak ta yim-buusu ata fotabe-bala kemin, yak banebip o, iyo kemip.
MAT 12:25 Kulaa, Yesus ayo Falosi imi aket kaa fukunbip uyo uteyimba-kup, bokoyila ko: Kipyo, weng do kala bokoyokomi uyo talalu weng san bom ilipla! Abip maakup ma kaptam kasel iyo biki-kutii miit alep ke-lomdip ilmi dinin kulii-tabamnip namti, imi titil-foko yaap-kup ilolip uyo kuyaku imi titil kaali disa ke-lokomu. Aa kuno, unang tunum am maakup bom-bilip iyo suunkup weng aal faka-bamdip dinin-kup kemip namti, yakal ti kano maakup ilokomip disa; yakal ti kuno biki-kutii sakela una-tala-ke-lokomip.
MAT 12:26 Kemin, ultap, Setaan akal almi kayaak sinik mafak so alimal yakal kutii waasi kela una-tala-ke biki-kutii alimal kii titil-foko tangbal bom-bilip disa. Imi titil ayo disa keyon o, kalbu. Kemin, kibi nali bokop-na-lomdip: Belsebul kaa Yesus ami diim kawu bomdala dong dakaan-bala, unang tunum sinik mafak ta im-buu im-buu unsa kiili fotaba no, kalbip. Lale, Setaan ali almi sinik mafak iyo fotabamna yak banolip disa yo.
MAT 12:27 Nali sinik mafak kuliili fotaben-umbi kemin, kanola kipni daang bakaalin tunum kiikal ti sinik mafak iyo fotaben-umbip. Ibi boko-lomdip: Setaan ata Yesus ayo dong dokolaya, sinik mafak kii fotabeba kayi! kalbip. Katale, Falosi kibi boko-lomdip: God alalta numi ok tabuulin man imi dong dokoyilala, sinik mafak iyo fotabebip o, kalbip i? Kanimin o, kalaliwa weng alep kaa akal almi bokola bokola kebip yoko? Kipni kanubip uta taba-lomdu ipni kalaan tunum iyo kukuyila utamiwa yi, Nami sang bakap-nambip kaali, kasen-fakap-nambip o, kalbip ko. Setaan ata taba-lomda titil kaa kup-ninsa disa; God alalta titil kaayo kukaap-nam-balaya, sinik mafak kii fotabebi. Kemin, ibi babon-bam weng kala bakabip o.
MAT 12:28 God almi Sinik Tambal ata dong dokop-nam-balaya, nali sinik mafak kii fotaben-umbi kemin, siin God ami kipni bokoya-lomda: Nami tunum ulduuli tiltam Kamokim kesa ayo dabaali tal ipni diim kawu aba dong dakaayim-balaya, ibi tiltam nami miit tem talokomip kayi! kalaya fen-tabasip ayo nalta talbi kemin, kibi nami kukup kala kanubi uyo utamiwa yi, fan o, kalin.
MAT 12:29 Kemin, nami faldak-tiimin weng kala bokolokomi kalawuuli weng san iliwa! Dok nolin tunum ata kun soyap tunum ami am undala ami bung mafek mafek uyo duk-duulon i, kala namti, yukut inipyaap ayo kamasi kawu tunum titil soyap ayo sok de dap-tiile, kaal dinim ke kawu tam ilomda ami mafek mafek uyo duk-duulokoma no, kala Yesus ayo kanum bokola ko. (Kanum boko faldak-tiimin weng kaami miit kaalile, Yesus ami titil kaa Setaan ami titil uyo kabaak banu kensa. Unang tunum Setaan sikil baan diim bom-bilip iyo, Yesus ami sikil uyo tik-daa kukan-tela-lomda im-taldang almi miit tem dakan-umba. Kemin, kaami sang kaata faldak kulu tii-lomdaya, do weng kala bokoyila ko.)
MAT 12:30 Yesus ayo asuk boko-lomda: Tunum unang kanta nami okokmin uyo kamap-nin dinim aa, yang aptum kusal iyo dong dakaayin-bilip tildang nami miit tem talemin dinim kemip namti, kiili nami waasi tap ke unang tunum wakat tokola kep-na yang banebip ultap ke-bam kanun-umbip.
MAT 12:31 Kemin, ibi kabak-ali talalu utafii-bamdiwa yi! Tunum kaa kanta kukup mafak ke-bamda weng mafak baka-bam ken-um-bala ami aket fanang saanin uyo fal-siki-lom ami kukup mafak keba uyo kulaala namti, God ayo ami kukup mafak kaa kanum-yaaba uyo tak-daa-lom kukan-telokoma. Ale, tunum kanta God ami Sinik Tambal ami sang bokola-lomda: Belsebul sinik mafak imi kamokim ata Yesus ayo dong dakaanba no, kalokoma kaata, God ami Sinik Tambal ami win kaa ku-mafak-daawalak i, kala-somdaya, God ayo ami ban uyo tik-daawala yak banokomu dinim.
MAT 12:32 Kemin, dok nolin tunum ata Dukum Ami Man ami win uyo ku-mafak-daawali no, kalala, asuk ami aket fanang uyo fal-siki-lom nami kup-nokoma, kaata, fan God akal taba ami kanola uyo takan-telokoma no. Ale, dok nolin tunum ata God ami Sinik Tambal ami win kaa ku-mafak-daawala namti, kamala kulu ti kulii yak aba kaptoop unokomu kaalile, God ayo ami kanola uyo atin ti tik-daa-lom kukan-telokoma disa yo, kala Yesus ayo kanum bakayila ko.
MAT 12:33 Yesus ayo asuk Falosi imi bokoyila ko: Ibi as lap abuumin umi kukup uyo ti utamin! As lap tambal abuumin uli ukol ulmi yaap ma abuulokomu. Ale, as lap mafak abuumin ukol kuno ulmi lap mafak kaata-kup abuulokomu. Kemin, nokol utamuwa yi, Kanolin as lap abuulu kalup namti, utam, Awu, kaata as tambal ale, kaata as mafak o, kalokomup.
MAT 12:34 Ultap, kemin ale, Nuli tunum kii itamupla, dok nolin dok nolin kukup kiita kanun-yaabip kalup kulaa nokol utamupla, imi aket fukunin uyo kanolin kaata utamdula kemin, kaa kanun-umbip kalokomup. Tunum tambal ili aket fukunin tambal so ili ti kukup tambal-kup nuu-bam ale, weng tambal-kup baka-bam ken-umbip. Ale, tunum mafak itale, aket fukunin mafak-kup nuu-bam, weng mafak baka-bam, kukup mafak-kup kem-yaabip. Kemin, Falosi ibi ti aket mafak-kup fukun-umbip. Kemin, ibi taang-kala nami ok sang uyo tambal ma bokolokomip dinim o. Ibi inap mafak ta kiil daang tup tunum unang imi yam-mafak-dakan-umba ultap ke, iltipni weng mafak kaata baka-bamdiwa, unang tunum iyo yam-mafak-dakan-tabasip ko.
MAT 12:36 Tinang umu iliwa! Weng kalawaali bokoyon. Am mafiing diim kabaku God alta unang tunum kii alik maakup talalu itam liip-mokoma kaali, alalta unang tunum maakup maakup imi aket tambal fukunin dinim ke weng yaapkan bakamin-kup ken-tabasip kaami sang kaata, alik dik-daalaya, ili God ami tiin diim kawu, God ami weng maan ten-bam alik ifi-lom bakaalokomip.
MAT 12:37 Kanola God ali kipni weng, weng sanokoma uyo, malo ma ipni bokoya-lomda: Ibi ti kukup tambal nuumsip kayi! kala-lomda im-tama tam almi abip daalokoma. Ale, malo ma kipta bokoya-lomda: Yi, ibi kukup mafak num-tabasip te! yak-alomda im-baala yang abip mafak unip keyokoma no, kala Yesus ayo Falosi imi kanum bakayila ko.
MAT 12:38 Kulaata lo utamsip tunum malo iso, Falosi malo iso, iyo Yesus ami bokolip ko: Kukuyin tunum kapyo, numi aket kaali, kapta mirakel o, kala kukup akal kusnum ma kukuyilawa, utamuwa yi, Kabi ti fan God alalta tam-baala tal-salap tukum o, akipla,
MAT 12:39 Yesus asiik imi weng maan tiiyila ko: Ibi God ami weng kaa ma weng san-kaabip disa; ibi aket mafak fukunbip. Kemin, ibi bokop-na-lom: Kabi kukup akal almi kusnum kaata ma kukuyapla, Nuli utamuwa yi, Fan, God alta tam-baala tal-salap o, tukum kebip. Lale, kanolin kukup kaali ma kukuyokomi dinim. Kemin, nali sawaayak God ami profet Jona ami kukup kanosa kaata-kup kukuyokomi.
MAT 12:40 Jona ayo sawaayak kawu toop aniing sakbaalkan dukum umi mat tem kawu, bom bii am asuumano kelala, tiltamba talsa. Kemin, ultap o. Dukum Ami Man Nayo tawaal iipyak tem kabaaku bom bii am asuumalo keliya, am asuum diim kulu tam tiindi tiltamba talokomi ko.
MAT 12:41 Am mafiing daan tiltam tabokomu kaali, God ayo unang tunum alik imbii din weng talalmin baan diim daa im-bak-saanokoma uyo, Niniva kasel iyo tam tola Juda unang tunum kamala bom-bilip kipni sang kaata boko-lomdip: Nuli Jona ami weng tambal kaata weng san-somdupla, aket fal-siki-lom numi ban kemin ayo kambola-sulup. Lale, Jona ami weng tambal uyo kabaak banula, Yesus ami weng tambal uta uta kesu. Kemin, unang tunum kiili, Yesus ami weng kulaa weng san-silip. Lale, kiili boko-lomdip: Nuli aket fal-siki-lom numi ban wakamin kaa kulaalokomup dinim o, kalsip o, kala Niniva kasel ita ipni sang uyo God ami bokolokomip.
MAT 12:42 Kanolakin kemin, sawaayak kaali, Seba kasel imi tiin molin unang o, kala Kwin uli Solomon ami weng tambal uta ma weng sanon o, kala-lomdula ulmi abip uyo kambola talbu umbital Israel-miin numi bokon kalaba talsuu. Kemin, ilom am ma daanu am mafiing diim tiltam tabokomu kaa, God ata unang tunum alik imbii din weng talalmin baan diim tii-lom yim-bak saanokowa kawu, unang kuuta tola-lomdu Juda unang tinum kamala bom-bilip kipni sang ayo boko-lom: Solomon ami weng tambal ayo kulaak banula Yesus ami weng tambal ata ata kesa. Lale, unang tunum kiili, weng san-silip disa kayi! kala-lomdu God ami bokolokomu no, kala Yesus ayo kanum bakayila ko.
MAT 12:43 Yesus ayo asuk bokoya-lom bokola: Sinik mafak ayo tunum ma kaami diim kawu tiinsila, kulaa kela umbilin ok dinim bokon kawu yang tildang ke-bamdi baan diim ayo ma atam-somdila tiinon o, kalala, fen-tal-tal-ke-bamda baan diim kaa ma utamin dinim keli no, kalale,
MAT 12:44 kulaa bokola ko: Nami am kaa dinim kela kemin, asuk umbilin nalmi tunum kela talsii ami diim kawu ilokomi no, kalale, kulaa asuk umbilin ulala, Ami tunum ami iipyak tem uyo am kaptam-ami sung ayo mafek mafek alik diliit mo dotu fokola tambanip disa bom buu tap kebu kala kalale, kulaa
MAT 12:45 din sinik mafak fetkal kusnum ma kii itama. La, kiimi kukup mafak uyo nami kukup kulaa nam-baak tabii ita ita kesip kalale, asuk foko imtal tunum ami diim tii kelaya, alik maakup bomdiwa kamosinim kaami sinik mafak alafin tiinsa ayo kulaak banala, mafiing tem kawu, sinik fetkal ita tiltam tilip ita ita ke-lomdip kamala mep tunum ami aket mafak fukunin uyo atin mafak-alom uta uta ke-lomdu kamasi kaami aket fukunin mafak kanun-yaaba uyo kabaak banula kewu. Kanolin o. Kamala Juda kipni kukup mafak kebip kulaali, katip so kebip. Lale, bom bii kipni kukup mafak nuu-mokomip kaali, atin sakbaalim dukum nuu-mokomip o, kala Yesus ayo kanum bakayila ko.
MAT 12:46 Kal-bomda, Yesus ayo unang tunum imi bakayim-bam bom ilale, kulaa Yesus almi awak sole, nakal-fakal iso, aptil iyo tal abip kaptamu tolale, unang tunum bom-bilip imi bokoyip: Nuli Yesus aso, weng ma bokolum o, kalup yikiwa,
MAT 12:47 tunum ma kaptamu bombe ata Yesus ami bokola ko: Naktum kapyo, kapni kawak so, nakal-fakal nikil iso, aptil iyo tal kapso weng ma bokolum o, kalalip tal abip daal kawu tola bom-bilip o, kalala,
MAT 12:48 Yesus ayo unang tunum iyo kukuyim-biliya, tiltam nami unang tunum kelin o, kalala bokoyila ko: Kii kanta nami akamen so, nakal-fakal iso ni? kala-lomda
MAT 12:49 almi kalaan tunum imi sikil diil tuuyila unang tunum imi bokoyila-lom: Kalawiita itamin o! Kalawiita nalmi akamen sole, nakal-fakal tap namti kala bom-bilip.
MAT 12:50 Kemin, unang tunum kii kanta nami Aatumen abiil tikiin kayaak ami boko-lomda: Kaata kanumin o, keba, kaata-kup kutal-fukulip namti, kiita fan nami nakal-fakal so, akamen so, ililtap o, yaka ko.
MAT 13:1 Am daanba kulu Yesus ayo am kaptam kelala yak aba toop Ok Galili balang diim kawu tiin-bomda unang tunum imi bakayim-bam kukuyila ko.
MAT 13:2 Kukuyim-bam itama yi, Tunum unang deng-kup tala-tala-ke de-falala nam-bak molip kala kalale, bot ma ok daang diim kawu bombuu umi tem kabaaku tiinale, unang tunum ita ok balang akiim kawu tolnip kelipla, (kulaa ami weng kaata bakayim-bala alik iyo weng san-kaamip ko.)
MAT 13:3 Weng yaapkan uyo faldak-tii-bamda do eng kaata, baka-bom kukuyim-bam bokola ko: Kulaali, tunum ma ayo wiit o kala-laabip kaami san kaali, kulii-din langabip kawu sekela dabaalon o kalala, una kemin,
MAT 13:4 san kiili, kulii-din sekela tal-une-balale, san malo ma kiili, daak langabip kaami liip fatap diim abamnule, awon-miin ita tal inamnip.
MAT 13:5 Ale, langabip kaami tawaal anung ma kaali, tuum yaapkan kiita-kup kelula, tawaal uta katip sakap kemin, san malo ma kaali, daak kanolin tawaal kaami diim abamnu. Lale, tuum kaami tip diim kaali, tawaal katip kemin, abiltap-kup bikin-tabamnula,
MAT 13:6 timtim kaali, dukum-kup tawaal bikilin dinim kemin, atan mamin taba wiit san kaa, fuula kiin-ilomdu datnu.
MAT 13:7 Ale, san malo ma kaali, daak al mafak tem kaami iipyak tem abamnula, balaasaal mafak uta uta kelu, wiit iyo dutuluwa-lom mafaknip.
MAT 13:8 San malo ma ita, sakela daak tawaal tambal diim aba tambal-kup tiltam aba-lomdu abuu-lomdu tang yuun maakup diim kuyaku lap 100 abuu-bulule, tang malo uta 60 abuulu, malo ma ata 30 abuulu kelip.
MAT 13:9 Ipkal talang tem so kemin, mep weng kala bokoyi uyo talalu weng san-ilomdip atamin o! kala bakayila ko.
MAT 13:10 Yesus ayo weng bakayim-bala bii, disa kelule, almi daang bakaalin tunum iyo tal Yesus ami bokola-lomdip: Kamokim kapyo, kabi kanimin o, kalalawa unang tunum weng bakayimbap kaali, faldak kulu tii ke-bam suunkup faldak-tiimin weng-kup bakayila-yaabap yoko? kala dik-daaliwa,
MAT 13:11 Yesus asiik bokoya ko: Siin kaali, God ami unang tunum almi miit tem tiltam tilip tiin molokoma kaami sang ayo alik bakayinsa disa, anung-anung-kup. Kamala kalawaa God alta kipni aket tem uyo bam-daayilala kawu, ipkal utamiwa yi, Yesus ami faldak-tiimin weng kala bakayimba kaami miit tam God ami miit tem unup tiin molokoma kaami sang kaata nu, kalalip utabip. Lale, yak tunum kusnum itale kaa utafiin-umbip dinim o.
MAT 13:12 Kalok nolin tunum ata nami weng uyo, weng sanda kutal-fukula namti, ali God ata dong dakaan-balala, ayo utam kaal ken yakyak um-bomdala kawu tal aba tam atin uta-mokoma no. Tunum ali kanata nami weng uyo dotu weng san kuluulami disa yo, kala namti, kamasi kaptoop ami katip ma utamse kaata-kup bombiile, lokolu kulaalokoma.
MAT 13:13 Kemin, kanolin unang tunum kiili, nami okok kala talalbi kaali, ilmi tiin tituun kaata, utafiin-umbip. Lale, kii utamipla, U kabak faneng o, ken-umbip dinim; ale ilmi talang tem alep ayo nami weng kulaa weng san-kan-umbipla ili utamiwa, Weng umi miit namti kabuu nu, kem-yaabip disa, kalalila nakal do weng uyo, kanolin unang tunum kiimi bakayin-kup ken-umbi.
MAT 13:14 Siin sawaayak profet Aisaya ata God ami Sukon Tem kabaku kanolin unang tunum imi sang kaayo dola boko-lom: God ali boko-lomda: Unang tunum kipni aket fukunin kaa ibi talalu fukunin dinim kemin, ibi weng sanup daa yo, kala kipni talang tem ayo katii-som ale, tiin baa utamalup daa yo, kala kipni tiin ayo kabii kesip. Kemin, kunuubip uta ibi weng kaa ma weng sanup kalaliwa, weng san dik-daa kuluu-yaamin dinim; ale, dok nolin kaata ma utamup kalaliwa, talalu ma utafiimin dinim o. Lale, kipni aket fukunin uyo fal-sikibip dinam, ibi mafek mafek utafiibip kaami miit uyo kaal kelamip. Ale weng, weng san-kaabip kaami miit kuu talalu utam-som ke-lokomip. Kemin, kipni aket fukunin kaali tambal-kup keyilula, ibi nami fanang tiliwa, talalu-yimulokomi no, kala God kaa kanum bokoba kayi! kala Aisaya ami dolsa namti kuluwaami weng namti kaa tiltam tulu.
MAT 13:16 Kemin, nali tituun weng kaa bokoyokomi: Sawaayak sawaayak kaali, God ami weng ku-fatap-dakamin tunum profet o, ken-umbip iso, God ami unang tunum tituun-kup tabin yaapkan malo ma iso, ili nami okok kala ke-bilila, kipni utafiibip kaluuli atamum o, kalaliwa, kalaami sang baka-bisip. Lale, ibi utamiwa yi, Mep kulu tiltam tulu kalsip dinim. Ale, nimi weng kala bakayimbi kalawuuli kukal ti weng sanum o, kemsip. Lale, ili weng uyo weng san-kaa-bisip dinim o. Kemin, nami daang bakaalin tunum ibi, Yaap ke, God ayo aket fukunin tambal kuyase. Kemin, mafek mafek utafiibip kaa dotu utam-som mep weng, weng san-kaabip uyo dotu weng ma san-kaabip o, kala Yesus ayo alami daang bakaalin tunum imi kanum bokoyila ko.
MAT 13:18 Kemin kulaata, Yesus ayo almi daang bakaalin tunum imi bokoyila ko: Ti weng san iliwa! Nami weng do faldak wiit san kawu dikimin tunum ami diim tii bokoyili kaami miit kaata ku-fatap-daa bokoyokomi.
MAT 13:19 Kaali, tunum unang malo ma ili wiit san sekela daak liip fatap diim abebu tap. Kemin, ili tiltam God ami diim talemin kaami sang kulaa, fan weng san-kan-umbip. Lale, ili dotu ma utam-laamin disa ken-umbip. Kemin, tunum mafak Setaan ayo awon alaltap ke tal-ilomda God ami weng aket tem bombuu uyo, dik-daa kukan-tiiyilala, tunum unang ili weng kaa lukuuyokomu no.
MAT 13:20 Unang tunum malo ili wiit san sekela kulaala daak tawaal tuum yaapkan kaami diim abebu tap ke kiili, God ami weng uyo weng san-ilom ale, weng ayo abiltap fan o, kala fiyaap duu-mokomip. Lale,
MAT 13:21 weng uyo dukum-kup yikik kuyak ilmi aket tem daalin dinim kelip keliwa kemin, da luuknin tap ke mafek mafek mafak tal imi diim abam-nokomu aye, tunum kusnum ita God ami weng kaami kalan kaata, kiiyo bon diiyin-bamdip iyo abiltap kela yang banokomip ko.
MAT 13:22 Kuno unang tunum iip malo ma ili tunum wiit san sekela kulaala daak al mafak umi tem abeba ultap. Ili God ami weng ayo weng sanokomip. Lale, tawaal diim kalawaami mafek mafek iip-nokomip kaami aket dukum fuku-dakamin aye, moni kaa-bam fiyaap duumin kaata kemin, kanolin aket fukunin kaata dukum-nule, God ami weng kaami aket kuuta kulaak banu. Kemin, wiit umi tiil dinim, fuut-kup kebu ultap ke-lomdip God ami weng ayo titil-fak-daa dukum-kup kutal-fukulamip dinim ke-lokomip o.
MAT 13:23 Unang tunum malo ma ita wiit san sekela kulaala daak tawaal tambal diim abeba ultap kemin, ili God ami weng uyo weng san-ilom ale, talalu utam ke-lokomip kaa God ami weng ayo suunkup kutal-fuku kanu-mokomip. Kemin, malo ma iyo wiit kabak-ali 100 abuu-bulule, ultap kelale, malo ma ita 60 abuubu ultap ke-balale, iip malo uta 30 abuubu ultap ke-bala ke-lokomip o, kala Yesus ayo weng do kaami miit uyo kanum bakayila ko.
MAT 13:24 Yesus ayo unang tunum imi kukup mafak kutal-fuku ilin umi diim tii weng do ma faldak kulu tii unang tunum imi bokoya-lomda: God ami unang tunum im-taldang almi miit tem tii tiin molokoma kaali, ultap o. Langabip kayaak asiik wiit san tambal ayo kulii-din almi okok kamaalin imi kuyilala dabakabi unipla,
MAT 13:25 kutamiip kuyaku tunum unang iyo alik akan-uniple, imi waasi ayo maaklo ma tal-ilomda al mafak imi san iyo kulii-tal biil tangbal kawu wiit san dabakabi kulaa kela unip umi iipyak tem kulu dabakabi kulaa kela tabanala,
MAT 13:26 wiit san ayo tam taba-lomdu abuumon e, kem-sulule, kulaa ok tabuulin tunum iyo utamiwa yi, Wiit abuumon o, kebu umi iipyak tem kabaak-ali al mafak wiit alaltap ayo tiltam aben-umba kala, kala-lomdip
MAT 13:27 kulaa, din imi kamokim wiit lang kayaak ami bokolip ko: Kamokim a! kapni wiit san tambal kaata-kup kuyilap kulii-din biil dakamsup lale, mep al mafak kaa kalok nolin wiit san umi iipyak tem kabaaku tiltam tababu ni? akiwa,
MAT 13:28 ayo bokoyila ko: Numi waasi tunum ema? tal-ilomda al mafak san ma kulii-tal dabaala umba te! akale, kamokim ami okok kemin tunum iyo bokolip: Yak kanoba kulaali, nuyo din-ilomdup al mafak kii bitalamup ema? kala dik-daaliwa,
MAT 13:29 asiik bokola: E,e din ilom al mafak bita-bamdiwa wiit san tangbal kaaso dola kuyak tii-mokomip. Kemin, al mafak kaa bitamin daa.
MAT 13:30 Kuno kulaalip bom-bala bii wiit kaso, al mafak kaso, tiltam ilom abuu-lom yakaanula, wiit bomin am daan tiltam tabokomu kawu, ibi bokoyilila, kamosinim kaali, al mafak asiik dolbi de-kutii-kutii-ke-lomdip as kuyak-daalip kiin unale, mafiing kawu wiit kaata-kup bobi kulii-tal nalmi am kaltam tiimin o, kalokomi no, kala wiit lang kayaakim ayo almi ok tabuulin tunum imi kanum bokoyase no, kala Yesus ayo unang tunum imi kanum bakayila ko.
MAT 13:31 Yesus ayo do weng ma asuk bokola ko: Unang tunum God ami miit tem bom-bilip kiili, mastat san iltap kemin, mastat san kaali, atin ti fan katip tiyok. Lale, kanola tunum ayo ma dip-tama yang dulaya, ami talaba tam dukum ke-lokoma ayo as alaltap kelale, awon iyo tal aba tam ami tang diim kaptamu imi iim ayo dina-mokomip o, kala Yesus ayo kanum bokola ko. (Kemin, faldak-tiimin weng kuumi miit kabak-ali boko-lomdu: Mastat san kaaltap kanola God ami unang tunum iyo kamosinim kulaali iip maakup maakup ke-lokomip. Yale, mulo kawu taltam taltam kem yak aba butoop yaapkan ke-lokomip o, kalsu ko.)
MAT 13:33 Yesus ayo asuk do weng ma boko-lomda: Unang tunum God ami daam tem kawu bom-bilip kiili yiis o, kala-laabip bret fik-tiimin mafek mafek ulultap kemin, unang ma yiis katip sakap ma tak-daalu daak flawa dukum tem unu fal-siki-bulu bii maakup ma kela kala kalbu-kup, kela ilanin tap ke flawa kaali, fusuu-lomdu akal alik ma ke-lokomu ulultap o, kala-lom Yesus ayo kanum bokola ko. (Kemin, do weng kaali boko-lomdu: God ami lak duulin unang tunum iyo unang tunum ikal alik ma imi iipyak tem kawu bom-bilip namti, aptum kusal God ami lak duulin dinim bom-laabip kiili, ikal alik kebip-kup, kuno God ami lak uyo duu-lomdip, iyo yaapkan ke-lokomip o, kalsu ko.)
MAT 13:34 Kemin, faldak-tiimin weng kaali, kela-lomda, weng fatap kaata, kuluu-lomda unang tunum kiili, bakayila disa; ali ti faldak-tiimin weng kaata-kup imi bakayinsa ko.
MAT 13:35 Kaali kanola bakayin-balala, God ami profet ami weng sawaayak God ami Sukon Tem dolsa uyo fan tiltam tabasuu. Kemin, profet ami weng ayo boko-lomda: Sawaayak God ami tawaal so, abiil so, talalusa diim kuyaku kulii yakyak kulii umbital kala diilu kaali, dok kanolin tunum ata God ami kukup uyo ma utamsa disa. Kemin, kamala kalawaali God ami kukup ami sang uta faldak weng do diim tii bakayim-bamdi bam-dakaayim-biliya, weng san-kaa-mokomip o, kala God ami weng bakayin tunum ata Yesus ami sang uyo kanum boko-lomdala, siin sawaayak kaptoowu kanum bokosa ko.
MAT 13:36 Yesus ayo unang tunum yaapkan iyo ok kumun ami daang diim kamboyilala, yak aba tam am unala, ami daang bakaalin tunum iyo tal-ilomdip dik-daalip ko: Yak kapni wiit lang umi al mafak kaami sang faldak-tii weng do kaa bakayimbap kaami miit kaata nuyo bokoyilapla, kaal kelum o, akiwa,
MAT 13:37 kulaa Yesus ayo bokoya-lomda: Dukum Ami Man Nali tunum wiit san tangbal kuyila dabakamsip kaaltap ale,
MAT 13:38 mep tawaal kala dik-daa kulaasu kalawaami unang tunum kiili, nami lang abip ultap kemin, unang tunum tiltam God ami miit tem ba tilin ita, wiit san tambal kiiltap ale, tunum mafakim Setaan ami unang tunum ita al mafak iltap o.
MAT 13:39 Kemin, Setaan kaali, waasi tunum al mafak san biil tangbal kawu, dabakamsa alalta kemin, am mafiing diim tiltam tabam-nokoma uyo wiit yakaana bobi kulii-tal am tiimin umi am daan-yaabu tap ale, God ami ok tabuulin tunum ensel kiita, wiit bobi kulii-tal am tiimin tunum ililtap o.
MAT 13:40 Kemin, okokmin tunum ta al mafak iyo dolbi sikip fak-daa-fak-daa kebi kulii-din as kuyak daalip kiin-tabaneba tap ke am mafiing diim tiltam tabokomu uyo,
MAT 13:41 Dukum Ami Man Nalta taba nalmi ensel iyo fokoli tildaak ilomdip tunum mafak ta taba aptum kusal imi aket fukunin ku-mafak-daayip yang ban kemin tunum iso, le tunum unang kukup mafak tabuulin iso, kiilile ensel iyo itam-ilomdip unang tunum mafak kii yakal ilmi foko kulii-din
MAT 13:42 fokolip yak wing tiil mafak almi suunkup kiin-bam ilin kaami tem un-ilom kawu angtiil yol awak-kup dap-tiiyila-balaya, Kwin, kaluuso kanimin o, kalalupla kaldang liip talbup yoko? kal-bomdip dukum-kup fuut-bam ama-mokomip.
MAT 13:43 Kemin, God ami unang tunum itale, ilmi Aalap God ami abip kawu bomdipla talaba tam God alaltap ke ban wakamin dinim tituun-kup ke-lomdiwa, atan tik-daalin tap ke-lokomip. Ibi nami weng uyo weng sanip kaali, lukuuyulu kulaalalip kemin, ti dotu dukum-kup kutal-fukulin o kala, Yesus ayo almi daang bakaalin tunum imi kanolin weng tem ayo kanum bakayila ko.
MAT 13:44 Yesus ayo asuk weng do kusnum ma faldak-tii bokoyila ko: Siin sawaayak kawu tunum ma moni yaapkan ayo fakamsi ket tem kawu abumsile, kuliila ti kulii-din langabip kawu tawaal dikil-alom kuwala-laaba. La, bii taanala tuumon ket ayo ukol ti tawaal tem kabaaku maaklo tiinsula kulaa, am ma daanule, tunum kusnum ma din-ilomda tawaal fakan-tal-bomdala tuumon ket ayo utama ko. Mep tawaal kaali, ami tawaal disa. Lale, tuumon ket kaami fiyaap kaali, Kwin disa akal ma ke-bamda ami aket ayo fukuna ko: Ti yaap ke mep tuumon kala nalmi ma ke-lokomi no! kalale, asuk tawaal ayo kulii-tal aba yak moni ket ayo katii kambola din almi mafek mafek am kaptam bombuu uta alik fakabi kulii-din tiila molip kaami moni ayo kulii-din tawaal kaa mo-lomdala, aptum taansa ami tuumon yaapkan yam kuwaasa namti kulu alami alik-daap kensu no, kala Yesus ayo bokoyila ko. (Kemin, do weng kaami miit uyo boko-lomdu: Dok kanolin unang tunum kiita God ami miit tem unemin kaami aket ayo dukum-kup yeluya, ti yaap ke tam unokomip no, kemip namti, iyo kabak-ami fiyaap kaata-kup tabe-bamdip imi mafek mafek aket yesu uyo alik kela-lomdip tiltam God ami abip unokomip o, kala faldak-tiimin weng uyo kanum bokosu ko.)
MAT 13:45 Yesus ayo faldak kulu tiimin weng ma bokoya-lomda bokola ko: Siin kawu sisol bonang amiit ayo saanbi kulii-tal fik-tiibi kutiilaya, tal saan-bisip. Kemin, akal bonang ayo fen-tal-une-bam utamala, Ti tambal kaata-kup bombe kala-lomda saansa. Kemin, ilom am ma daanule, fen-tal aba yang ulayi, Tunum ma ata ti bonang tambal ma kutal-fukuba kala kalale, kaata molon o, kala, katale, uyo utama yi, Kaami tuumon saanin uyo dukum o, kalale, kambola almi tuumon bombu ami kuluu bonang kaami molakin kalin uyo iipnu kala kalale, kulaa kela din almi mafek mafek am tem kaptam bombuu uyo alik kulii-din tiila alik molipla, umi tuumon uta kuluu kulii-tal-ilomda bonang tambal ayo mose no, kala Yesus ayo kanum bokoyila ko. (Kemin, faldak-tiimin kaami weng miit uyo boko-lomdu: Kanola tunum unang kii kanta atin tiltam God ami miit tem uyo tam unon o, kalala, aket aalu namti, kamasi uyo ami mafek mafek aket-kup suun fukun-bam iloma uyo kela-somdaya tiltam God ami miit tem tildang talokoma no, kala do weng uyo kanum bokosu ko.)
MAT 13:47 Yesus ayo unang tunum God ami abip unokomip kaami sang kaata faldak kulu tii boko-lomda: Tunum malo ma kiili, aniing men abuumin sakbaalim dukum uyo binalip umbalaak ok tem un-ilomdu aniing yaapkan akal alik akal alik iyo afetbi kutiilule,
MAT 13:48 tunum iyo utamiwa yi, Aniing men uyo dongna kala kalale, kulaa men ayo sisii kulii umbiyak ok balang diim daa-lomdip daak ok dinin diim kawu tiin-bomdiwa, aniing iyo kutaltam tii-tii ke-bam tambal tambal kiita-kup foko ket tem abuu-bam ale, yak mafak kiita asuk fokolip daak ok kumun tem une-bulu kemip.
MAT 13:49 Kanolin kemin ale, am mafiing diim kaali, God ami ensel iyo tal-ilomdip unang tunum iyo bik-kutii-lomdip mafak ita yaap imi iipyak tem kaptamu ulelbi kutii kulii-tal yakal ilmi baan ma fak-daa-lom ale, mafak ita,
MAT 13:50 fokolip yak as mafak suunkup kiin-bam ilin umi tem un-ilomdip angtiil yol awak-kup tabeya-bulula, Kwin kaluso kanimin o, kala kaldang liip tale-yimbup yoko? kal-bomdip dukum-kup ama-mokomip o, kala Yesus ayo faldak-tiimin weng uyo bakayila ko.
MAT 13:51 Yesus ayo faldak-tiimin weng uyo bokoyila disa kelule, dik-daayila ko: Ibi nami faldak-tiimin weng bokoli kaami miit kabak talalu utam kaal kelip elile disa? yakala isiik bokolip: Ayo, utamup o, akiwa,
MAT 13:52 Yesus ayo bokoyila: Ibi utam kaal kelip namti, lo utamsip tunum tiltam nami man ke-lomdip God ami miit tem talbip ibi ti tambal-kup tiinip ko. Lo utamsip tunum ibi tunum imi siin kaami mafek mafek tangbal so, kama umi mafek mafek tambal so, kuyaku-diyaku kutiimin tunum ililtap o. Kemin, unang tunum iyo tal bokola-lomdip: Nuli dong dokoyan o, kalokomip uyo ali mafek mafek uyo tangbal-kup dong dokoyokoma. Kanolin tap kemin, siin kaa ibi God ami sawaayak ami weng uyo talalu utamsip. Kemin, kamala kalaali God ami kama weng umi kuluu bakayila-tabasi uyo, utam kaal ke kelip. Kemin, ibi weng alep kalawuuli kulii tulu tulu ke kuyak-mim-daalokomip kaali, kibi God ami weng kaa unang tunum kii tambal-kup bakayokomip o, kala Yesus ayo lo utamsip tunum imi bakayila ko.
MAT 13:53 Yesus ayo faldak-tiimin malo ma uyo bakayinbi dinim kelula, kulaa kela abip kaptam-ali kulaa kela
MAT 13:54 asuk tal almi abip diil Nasaret tala kemin, ayo tal-bomdala yak aba din lotu am kawu unang tunum iyo God ami weng uyo kukuyim-bala, tunum unang iyo weng san-ilomdip aket fanang alik tambanuya, iyo dik-daa una-tala-ke-bamdip bokolip: Kwin, weng kala kukuyimba kalawaata, dok liip utam dik-daa kuluu utamse ni? E, kawanta kukon-balaya, kanolin talalmin akal almi kusnum kaa kanuba ni?
MAT 13:55 Ali abip kaltam-ami as kom bakel-bamda mafek mafek talalmin tunum ami man ata ale, ami awak kuluuli Maria, nakal-fakal nikil kiitale, Jems, Josep, Saimon, Judas, kelin ale,
MAT 13:56 ami nakal-unang ita abip kalawu bom-bilip kemin, ali win tibin tunum disa. Kulaa disa abip tunum. Kemin, kulaami weng kulaa, weng sanokomup disa! kala-lomdip
MAT 13:57 daang ukolip, itam-ilomda Yesus ayo bokoya ko: God ami profet o, kala weng tem bakayilin tunum ayo din abip malo ma kaami tam unokoma kaata, abip kaptam kasel iyo boko-lomdip: Tunum kalawaayo, win tabin tunum o, kala ami weng baka-mokoma kaali ti, talalu weng san-kaamum o kalokomip. Lale, din almi abip tituun kaptamu unokoma kaata, almi abip kasel so, almi aptum kasel so, iyo ami weng kaali ma, weng sanokomup dinim o, yaka-lomda,
MAT 13:58 abip kasel iyo aket fanang daa-lom: Ali God ami titil kutal-fukusa disa yo, nakan-kaabip kala kalalaya, Yesus ayo mirakel o, kala talalmin akal kusnum akal kusnum yaapkan iyo almi abip kaptam-ali ma kanolama dinim; alep-kup kiita no.
MAT 14:1 Kemin, kulaata Yesus ami sang uyo, uu kalale kalaa Provins Galili kayaak imi tunum King Herot ayo weng san-ilomda
MAT 14:2 almi okok kemin tunum imi bokoyila ko: Daa. Kulaali oksam ukayin tunum Jon taanse alta tam tiin-ilomda kanolin titil kaali, kuluu-lomda, mirakel o kala kukup almi kusnum kusnum kaali kanuba no, yaka ko.
MAT 14:3 Kemin, Herot ami weng kaali, siin kawu ali Herot almi abokonim Filip ali taanin dinim bom-balaya, Herot ayo Filip ami kalel Herodias uyo tik-daa kuluula kala, kala-lomda kawu, Jon namti suunkup bakaan-bamda: Uyo kapkal utamsap kemin, unang kuumi kuluu-lomdap uso laabip kaali, God ayo boko-lom: Kukup kaa kanumin daa yo, kalsa namti kulu lobap te! akan-kaabi kela kela kemala, Herodias uyo Jon ami aket atul ayo kola-lomdu Herot ami oko-takaan-buluya, almi soldiya iyo bokoyilaya din-ilomdip Jon ayo sok de dibii din kalabus am daa-silip.
MAT 14:5 Kanola Herot ayo, Jon ayo aalon o, kala katale, ayo utama yi, Tunum unang ili utamipla, Jon kaali God ami profet weng kukaayin tunum o, kalbip kala kala-lomda utama, Awu, aalokomi namti, kiisiik balaap-nalalip o, kala itam suun-daa-lomdala aasa disa. Kuno kelaya, dibii din kalabus am kawu daasip ko.
MAT 14:6 Am ma daanule, Herot almi awak duusu umi aket fukunin am uyo daanule, kulaa Herot ayo unang tunum yaapkan iyo naan-daayila, tal Herot ami am kaptam kumup daa kulaa, ima in-bom fiyaap duu-bilipla, kulu Herodias umi man unang sii uyo tal kiimi tiin diim kuluwu was tambal ayo disa akal ma ke-bam saman-buluya, Herot ayo umi was samanbu uyo atam-ilomda fiyaap duu-bam ale, bokola ko:
MAT 14:7 Kaali ti tambal kemin, nali mafek mafek tambal ma kup-ton o, kebi kemin, kupkal bokop-na-lomdap dok nolin mafek mafek kaata ma kup-nan o, kalap uyo atin ti faneng kup-tokomi no, kala kanum bokowa le,
MAT 14:8 kulaata, unang man uyo din awak bokowa-lomdu: Akamen o. Nali din-ilomdi awakim ami diim kaa dok nolin mafek mafek uta ma kup-nan o, akokomi yoko? kalula, kulaa awak uyo bokolu: Dindap Herot ami bokola-lomdap: Nami aket fukunbi kaali, kabi din oksam ukayin tunum Jon kaami dabom kaata ukduu kuu falet diim tii kulii-tal kup-nan o, kalbi no, kala kanum bokolan o, kala awak uyo kanum bokowu ko.
MAT 14:9 Kanum bokowuya, uyo din Herot ayo bokolu weng san-somdala utama yi, Kabak-ali ti kukup mafak kala kala-lomdaya ayo ti aket uluum dukum-kup dap-teluya, daa yo, kalokin. Yale, ayo aket fukunaya, Tunum unang yaapkan bom-bilip kalawiita, nami weng kutiili uyo, weng sanip kala kala-lomdaya, kiimi tiin diim kaa ke-lokomi disa yo, kalalaya kulaata ayo kanoli no, kalaya kulaa almi soldiya
MAT 14:10 ma dabaala din kalabus am din-ilomda Jon ami dabom kaa ukduu-lom
MAT 14:11 kuyak falet diim tii-lom kulii-tal unang man umi kuwalala, uta kuluubu-kup, kulii din awak umi kuuwu ko.
MAT 14:12 Uyo kanowulula, Jon ami daang bakaalin tunum iyo Jon ami sang uyo weng sandiwa, tal Jon ami as kulii uyo dibii din dawaa-lomdip mulo kawu din Yesus, Jon sang uyo din bokolip ko.
MAT 14:13 Am bombe kawu, Yesus ayo Jon ami sang uyo weng san-somdala, aket uluum-kup dap-telule, almi daang bakaalip tal-unemin tunum kiita foko kulii-tal aba tam bot tem tiila nikil tam tiindip abip kaptam kambolalip Ok Galili kumun diim liip yakyak biyak malii aba din tunum dinim, disanang ma kaba unum o, kalalip unip ko. Unang tunum iyo weng saniwa yi, Yesus ali bot tem liip yak malii unon o, kalala unaba no, kalaliwa, ilmi abip ayo kela-lomdiwa, yakal tawaal liip Yesus fanang unip ko.
MAT 14:14 Yesus nikil iyo yak balang diim yak ilom, Yesus ayo talaala yi, Kwin! unang tunum yaapkan namti tala-tala-kebip kala, kala-lomda ti ayo talalu dukum-kup olen-daayila-lomda, unang tunum mafak umusip iyo yam-talal kaama ko.
MAT 14:15 Uyo kanu-bala bom bii mepso am tiin tala-bulule, ami daang bakaalin tunum iyo tal Yesus bokolip ko: Kamokim aa, am kala am tiin-som ale, unang tunum dinim bokon kemin ale, kalawaali ima dinim. Kemin, unang tunum kii yim-baalap din abip ma ma un-ilomdip kawu, ima ayo ma mo-lom inalipla siin o, kala kanum bokolipla,
MAT 14:16 Yesus ayo bokoyila: Nali yim-baali unokomip disa; ti kalawu bom-ilipla, Nikil kipni inin-inin ma kuyilipla yo! yakale,
MAT 14:17 nikil isiik bokolip: Nuli ima kaa tiknalup daa. Kemin, bret awakal ma le, aniing alep ma kalawiita-kup bom-bilip o, akiwa,
MAT 14:18 Yesus asiik bokola: Kulii-tal nami kup-niwa yo, yakale, fan,
MAT 14:19 kulii-tildang koliwa, Yesus ayo unang tunum imi bokoyila, daak tikiin kon diim kulu tiinaaliwa, bret awakal ale, aniing alep ma iyo foko-lomda titam abiil daa, God ami yaap ke yo, anba-kup, bret so, aniing so, iyo bakela kutii-lomda almi daang bakaalin tunum imi kukaaya-tal-unemsi kulaalipla,
MAT 14:20 alik iyo kuluu inbi-lom tiknipya kulaata, Yesus ami daang bakaalin tunum iyo yak ima tinan-bamdip kutiibip daam daam kiiyo, fakan-tal-unemsi basket almi-kup tal aba tam talangkal kiita, abuu-bilip dongniwale,
MAT 14:21 ti tunum deng ilmi-kup faiv tausin (5,000) ema le, ilmi man sole, unang tan iso, kuyaku-diyaku ke-lomdip ima kala inip ko.
MAT 14:22 Kemin, Yesus almi daang bakaalin tunum imi bokoya-lomda: Nak-tunum kusal kipyo, kipsiik tam bot tem tiindip kalaali kelalip umbiyak ok kumun malii kaba kemiwa, nata unang tunum kalawiiyo, yim-baali uniwa yo, yakala uniwa, akal bomda tunum unang iyo yim-baala unaaliwa kulaa,
MAT 14:23 akal alafin God ami beten kamaalon o, kalala, kulaa yak aba tam amdu tikiin kawu tam ilomda beten ke-bala bom bii am tiinu.
MAT 14:24 Am tiinule, bot uyo yakyak umbiyak ok kumun iip-iip kulu un-laam-siliple, kulu inim aalap dukum ma tiltam aba-lom fu-fu-balaya, ok ayo iin-balaya une-bulu tale-bulu ke-bamdu bot namti kuluu kulaalu umbu talbu ke-bulula bom bii
MAT 14:25 am daan daan tala-balale, kuluwu Yesus namti daang bakaalin imi fanang ok daang tip diim liip tol-tol tala-balala,
MAT 14:26 almi daang bakaalin tunum iyo Yesus ayo atamiwa yi, Ok daang kun diim liip talaba kala, atam-ilomdip imi fanang maaklo keyilu suun-bam ol-bamdip bokolip: Naka yi! Kaali sakbal i! kalalip suun-daa-laam-siliple,
MAT 14:27 kulaali, Yesus ayo abiltap-siik bokoyila ko: Nak-tunum kusal kipyo! Nalta kemin ale, ibi suunin daa yo; kela-somdiwa titil-fak-daalin a! yakala,
MAT 14:28 Pita ayo bokola ko: Kamokim kapyo, kabi kaltapta namti, nayo bokop-nawa ok daang diim kaami liip kapni balap ayo yak unon o, kalale,
MAT 14:29 Yesus asiik bokola: Ayo, tal a! akaya, Pita ayo bot tem tiinba uyo kelala, daak ok kumun diim liip Yesus ami be unaba; katale,
MAT 14:30 inim ati so, ok so, uta utam suun-daa kem-salale, kulaali abiltap-kup bakat mo ok kumun tem unon o, kalbi kala, kala-lomda Yesus ami naan-daala ko: Kamokim kapyo, dong dokop-napla, yaap kelon o, aka kem-salale,
MAT 14:31 kulu Yesus ayo taba maak fak-daalin tap ami sikil ayo dabaa yak Pita ayo dap-tal fuku-lomda bokola ko: Kabi kanimin o, kalalawa kapni aket fukunin uyo Yesus kaa titil-foko dong dokop-nokoma ne? dong dokop-nokoma disa ye? kalalawa suun-daalap i? Yak kanolin aket kaa fukunin daa; kabi utam, Awu, ali ti yaap dong dokop-nama no, naka-yaamin o, aka ko.
MAT 14:32 Akale, kulaa alep tam bot tem tiinipla, kulu inim ati namti kulu ditang-kala disa kelule,
MAT 14:33 daang bakaalin tunum iyo bot tem tiinaabip yakal atam-ilomdip Yesus ami win uyo kufon-bam ale, bokolip: Yi, kabi ti faneng God ami Man alik-daap o, akip ko.
MAT 14:34 Kemin, ok kumun iip-iip bilip ayo kulaa kelalip yak abip Genesaret umi mepso ok balang diim kawu yak unipla,
MAT 14:35 abip kasel iyo atamiwa yi, Kaa Yesus alta tala kala, kalbip-kup, weng binalip yak abip ma ma unule, tunum unang mafak umkan-unsip iyo Yesus ami be kulii-talemip kemin,
MAT 14:36 Yesus ami dukum-kup nen-bam bokolip ko: Kamokim kapyo, kuno kamboyawa yakal yak kapni ilim matum kulaata-kup malep-tiwa kulaali yaawa-yaamik o, kala bokoliwa, Yesus namti, Ayo! yakaya, unang tunum kawanta yak Yesus ami ilim matum diim malelip iyo yaawa-yaamip ko.
MAT 15:1 Kemin, Falosi so, lo utamsip tunum so, alep iyo Jerusalam lo tal Yesus ami dik-daala bokolip ko:
MAT 15:2 Kapyo, sawaayak numi awil-fakal ili boko-lomdip: Kabi ima inamnon o, kalap uyo, sikil kaa talalu diinga-somdapla kayi! kalsip. Awil-fakal ili suunkup ti ilmi man iyo kukuyin-kup kem-laabip. Kemin, nuli kanolin kukup uta kano tabuulup bombuu. Lale, kapni daang bakaalin tunum ili kanimin o, kalalip numi awil-fakal imi kukup kaa kenbip-kup, imi sikil uyo talalu diingmin dinim ke-bamdiwa, ima uyo inan-umbip yoko? akiwa,
MAT 15:3 Yesus asiik bokoya-lomda: Aa, ibi yi? Kanimin o, kalaliwa iltipni kawil-fakal imi weng sawaa kaata-kup weng san-kaa-bamale, God ami weng uta kuyang saak tela-laabip i?
MAT 15:4 Kemin, God ali boko-lomda: Kipni kaalap so, kawak so, iyo talalu tiin mo-lom ale, imi weng ayo weng san-kaa-bam dong dakaayim-bam ke-bamdiwa yo, kala-som ale, aa kawanita ami aalap so, awak so, kiimi weng mafak bakayila namti, ayo aalip taan-yaamin o, kala kanum bokosa.
MAT 15:5 Yale, ipkal iltipni weng kusnum ma boko-lomdip: Kanola tunum ayo moni bombe ayo God ami kolon o, kala-lom aalap so, awak so, imi bokoya-lomda: Nami moni kutal-fukubi kalawaali, God ami kolokomi no, kalbi kemin, asuk ulduu-lomdila akam ibi talalu tiin mo dong dakaayokomi dinim o, kala namti,
MAT 15:6 ami awak-aalap tiin molokoma disa kaa yaap ke-lokomu no, ken-umbip. Kemin, kabak-ali fan, iltipni sawaa weng kaata-kup kanum baka-bamdipla, God ami weng uyo kuyang saak tiilala tabasip te!
MAT 15:7 Ibi kasen-foko weng alep bakamin tunum yam kemin, sawaayak kaali, God ami profet Aisaya ali tifan kipni kukup kaami sang kaali, God ami Sukon Tem uyo dola kutii boko-lomda:
MAT 15:8 God kaa boko-lom: Kanolin unang tunum iyo disa nami tong kaata-kup bakan-unbip; kemin ale, nami aket kup-na-lomdip tildang nalmi miit tem uyo tololup o, kala-lomdipla, yang samaan bokon kawu laabip. Kemin,
MAT 15:9 ililta unang tunum kii ilmi weng sawaa kaata kukuyim-bamdip bokoya-lom: Kalawuuli God ami weng sawaa kemin, dotu kutal-fuku-bomdiwa kayi! kem-laabip. Yale, nali imi kasen-faka-bamdip tong bakan-yaabip kaa weng sanokomi dinim o, kalala, God kaa kanum bokosa kayi! kala Aisaya ata dolsa no, kala Yesus ayo kanum bokoyila ko.
MAT 15:10 Yesus ayo unang tunum imi naan-daayila tal atamiple, bokoya-lomda: Nali sikil ninak kaami sang kaata ma bokoyokomi dinim; mafek mafek umi taba kipni iipyak tem kaami fanang saanin uyo fan atin ti ku-mafak-dakaayin kaami sang kaata ma bokoyokomi. Kemin, weng san-ilomdip talalu utamin o, kala-somla ko.
MAT 15:11 God ami tiin diim kaa, tunum ali taba-lomda, sikil ninak tabemin kukup aye, saak yak mafek mafek awem o, kalsip aye, uta inamnala, daak mat tem un-ilomdu, uta taba atin dap-mafak-daalokomu dinim; aket mafak fukun-bam, weng mafak bakayokoma kuuta taba dap-mafak-daalokomu no, yaka ko.
MAT 15:12 Mulo kawu, Yesus almi daang bakaalin tunum iyo tal bokolip ko: Kamokim kapyo, kapni weng kaa bokoyilap uyo Falosi ili weng san-ilomdip aket mafak ke aket atul tabeyu kemin, kabi kabak utabap e disa? akiwale,
MAT 15:13 kulaa Yesus ayo do weng katip ma faldak-tii bokoyila ko: Unang tunum ili mafek mafek nami Atok abiil kayaak ami langabip ultap kemin, mep mafek mafek san iip maakup maakup iyo alalta ultiila tabamniple, mep al kaata alalta disa, iip kulu tabe-bulu, kesu. Kemin, ayo tam taba-lomda al ayo bita kulaala unokomu. Kemin ale, mep kamok kamok kiili ti al kiiltap kesip.
MAT 15:14 Kemin, kiimi weng kaa weng san-kaamin daa. Kanola kamok kamok kiili tiin fiim ililtap tam tunum tiin fiim ali ma taba-lomda aptum tiin fiim ma ami liip ayo kukola namti, kulaali ti alep maakup fukulin kulii afun tem unokomip o. [Ultap o. Falosi ili liip din God ami abip unemin uyo ma utamsip dinim. Ili dok kano-somdiwa, unang tunum kusnum iyo God ami liip kaa kukuyokomip disa yo,] yaka ko.
MAT 15:15 Pita ayo Yesus ami bokola ko: Kamokim, kapyo, mafek mafek awem o, kalip inin umi faldak-tiimin weng miit ayo ma bokoyan o, akale,
MAT 15:16 Yesus asiik bokola-lomda: Kamok kamok kiili, bam-daalin dinim kemin ale, kuno ti kipkal ti bam-daa kaal kelin dinim bom-bilip ema?
MAT 15:17 Ibi nami weng kaami miit kuu ma talalu utamin disa kelip kanolin kemin, nami weng kala bokoyokomi uyo talalu weng san-iliwa yi! Tunum ayo mafek mafek inam-nokoma ayo daak mat tem kabaku bombiile, imaan dabaalokoma kawu, tiil-ban-ilom disa ke-lokomu. Kemin, kuuta taba ami aket tem uyo ku-mafak-daalokomu disa. Kemin ale,
MAT 15:18 tunum ayo aket mafak suunkup fukunokoma namti, kawu weng mafak namti baka-mokoma. Kemin, almi aket mafak fukunokoma kuuta, taba-lomdu ayo tunum dap-mafak-daalokomu no.
MAT 15:19 Kanola, tunum ayo kukup mafak kaa nolin dinim ilomdaya, aket mafak usiik fanang daaba-kup, mulo kawu yang kukup mafak ayo nolokoma. Kemin, kukup mafak nolon o, kalokoma kaali, kala-nuumin kaata ko: Aket mafek fukunin; aptum aala taan-yaamin; aptum tiin kuwaala-lomda ami kalel uyo sadikimin; sadiki-bam aptum dap-mafak-dakamin; yukut inin; aptum ami ban kelin disa, bom ila kasen-foko din kiyap ami bakaalin; saak yak aptum ami daang tem weng bakayin uta kanu-mokoma.
MAT 15:20 Kemin, kanolin aket mafak uta taba-lomdu tunum ayo dap-mafak-dakan-umbu. Kemin, God ali kanumin tunum kaami fiyaap uyo duun-umba dinim o. Kanola, tunum ayo awil-fakal imi kukup uyo kutal-fuku-lomda kamasi uyo sikil diinga-lomda ima inin inam-nokoma disa kaali, kuuta taba God ami tiin diim uyo ma dap-mafak-daalokomu dinim o, kala-lomda Yesus ayo almi daang bakaalin tunum imi kanum bakayila ko.
MAT 15:21 Yesus nikil iyo Juda kasel imi tawaal ayo kelalip yak aba bilin kusnum imi tawaal ma unip ko. Kusnum kayak kayak kiimi abip dukum alep kaptam-ami win kaali, Taya so, Saidon so ko.
MAT 15:22 Kemin, tunum unang kawu ilin iyo Juda kayaak daa; kiili Kenan bokon kasel ita ko. Kaptam-ami unang ma tal Yesus ami naan-bam bokolu ko: Kamokim kapyo, kabi King Devit ami man loop kapta nami olen-daap-na-lomdap kapni titil kaata, kuluu-lom dong dokop-nan o. Nami man unang uyo sinik mafak ta taba-lomda um-mafak-daalaya, atin ti mafak-kup utamsu. Kemin, sinik mafak kulaa fotabamnap yak banaya, man uyo yaapnuk o, aku. Katale,
MAT 15:23 Yesus ali mep unang kuumi weng ayo ma mowin dinim kewale, almi aptum kusal ita tal Yesus ayo dukum-kup bokola-lomdip: Kamokim kapyo, unang kuuli numi daang tem kawu tal-bomdula, dukum-kup naan-talabu. Kemin, uyo fotabamnap banuk o! akiwa,
MAT 15:24 kulaali Yesus asiik imi weng an-anung daa bokola: God ali kusnum kayak kayak unang tunum yakal kanola kaa kanum talabu tap ke imi dong dakaayan o, kala-lomdala, nam-baala talsii disa; God ali utamala, Israel kayaak kiili, sipsip iyo babon tal-une-bam maaklo ke-silip ililtap u, kala-somdala kiita, dong dakaayan o, kala-somdaya, nam-baala talsii no, kala kanum bokolaya,
MAT 15:25 unang uyo weng san-ilomdu beten kemin kukup uta kuluu-lomdu katuun duung fakela daak tiin ale, bokolu: Kamokim kapyo, dong dokop-nan a! aku ko.
MAT 15:26 Kemin, (Juda kayaak ili fakaaniing unang tunum imi win uyo bokoya-lomdip: Miyaan o, yakan-kaa-bam ale, ilmi unang tunum kiitale, man o, yakan-kaa-bam ken-umbip.) Kemin, Yesus ayo faldak-tiimin weng ma boko-lomda: Man katip katip imi ima duk-duu kulii-din miyaan imi kuyokomip kaali, yaap tambal ma keyokomu dinim o. Kanolin o, kupni dong dokop-tokomi kaali, yaap kep-nokomu disa yo, wakale,
MAT 15:27 unang usiik ami weng bokola uyo bokolu: Kamokim kapyo, kaali ti faneng bokolap. Katale, miyaan imi aalap ayo ima in-balala, daam sekela daak tebol kaami minlo tem abam-nokoma kaali, miyaan iyo tebol kaami minlo tem kabaaku tiinaabip ita taba-lom inan-laabip. Kanolin tap kemin, kabi dong dokop-nokomap kaali, yaap kep-tokomu no, akule,
MAT 15:28 kulaa, Yesus asiik bokowa-lomda: Kupyo, tambal kemin ale, kubi nitamawa yi, Ali ti yaap dong dokop-nokoma nu! nakap kemin, kupni bokop-na-lomdap dong dokop-nan o, nakap uyo dong dokop-tokomi no, waka-lomda weng kaata-kup bakam-salale, abiltap-siik umi man unang uyo yaapnu ko.
MAT 15:29 Kulaa, Yesus nikil iyo Taya kasel so, Saidon kasel so, imi am bokon ayo kulaa kambola yak aba umbiling Ok Kumun Galili dal umi balang diim umi liip kawu kutal-fuku yak aba bitam amdu tikiin kawu tam tiin-bomdiwa,
MAT 15:30 unang tunum yaapkan iyo aptum kusal yawiit fuku tiinaasip so, sikil yaan mafak so, tiin fiim so, talang abat ke weng bakamin daa kesip kiiso, mafak-alin akal alik umkan-unsip iso, iyo dii dibii tal Yesus ami miit tem tii-bilipla, Yesus ata alik talalma ko.
MAT 15:31 Kanu-balaya, unang tunum yaapkan iyo atamiwa yi, Tunum yawiit iyo tola tal-une-bala, sikil yaan mafak iyo tangbal ke-bala, tiin fiim imi tiin iyo baa-lom mafek mafek atafii-balale, weng abat iyo weng baka-bala, kem-tiibip kala, kala-lomdip unang tunum iyo utam aket fanang alik tam baneyuluya, Israel kayaak numi God ami win ayo kufolum o, kala-lomdip fiyaap duumip ko.
MAT 15:32 Kanola, Yesus ayo utama yi, Unang tunum yaapkan iyo bom-bilip kala, kala-somdaya, almi daang bakaalin tunum iyo naan-daaya tal atamipla bokoya-lomda: Tunum unang kalawiili naso bombii am asuumano kelip kalaali, iyo ima kaa disa keyila, ima tinap keyimba kemin, nali olen-dakaayinbi. Lale, nali ima tinap kaa yim-baali abip unokomip namti, un-bomdiwa, ima tinap liip tiinokomip. Kemin, yak disa kanolin kaa, yim-baali unokomip dinim o, yakale,
MAT 15:33 daang bakaalin tunum isiik Yesus ami dik-daalip: Unang tunum kalawiili yaapkan deng saak kaa tunum dinim bokon kalaali, dok liip ima ayo kuluu-lomdup alik iyo ifalup ina tiik-nokomip? akiwa,
MAT 15:34 Yesus asiik nikil imi dik-daayila: Aa, ibi ima bret kaa kanim kal ma kulii-talbip i? yakale, Yesus ami weng bokolip: Nuli bret fetkal ale, kuno aniing katip katip malo ma kiita-kup o, akipla
MAT 15:35 kulaata, Yesus asiin unang tunum imi bokoyila, daak tawaal kulu tiinaaliple,
MAT 15:36 bret fetkal kiiso, aniing so, iyo foko-lomda God ami yaap ke yo, anba-kup, kulaa bret so, aniing so, iyo bakela kutii-lomda kuluu almi daang bakaalin tunum imi kuyilala, ita kulii-taba-lomdip unang tunum imi kabaanuyip
MAT 15:37 alik iyo imbi-lomdip tiikniple, kulaali daang bakaalin tunum ita taba ima yelbip anung anung ayo foko-lomdipla, basket almi-kup fetkal kiiyo, abuulipla dongnip ko.
MAT 15:38 Kanola tunum almi-kup fo tausin (4,000) ale, ilmi unang tan so, man so, iyo kuyaku-diyaku ke-lomdipla, ima kalawaali inamnip ko.
MAT 15:39 Kanoliwa, Yesus ayo unang tunum kiili, im-baala ilmi abip unaalipla, Yesus nikil iyo amdu tikiin ayo kulaa kela tildaak aba talaba tam bot tem tiindip umbilip, bilin abip Magadan umi tawaal mepso kabanip ko.
MAT 16:1 Falosi sole, Sadusi so, iyo tal Yesus ayo dap-kuku-bam dik-daa-lom: Kapyo, kabi mirakel o, kala kukup akal kusnum inang ma kukuyilawa, nuli utamupya yi, Kabi God alalta tam-baala tal-salap kala, takum o, akiwale,
MAT 16:2 Yesus asiik bokola: Tam atan uyo tem unula utamiwa yi, Am kel isak fokola kalokomip uyo ibi utam boko-lom: Atan tem un-ilomda am tiinu kel isak fulut fokola kemin, am sabi ayo am tangbalim daan bom ilokoma no, kal-bom ale,
MAT 16:3 kutim kaata am atam talaaliwa, Abiil ayo ok alala-lom malang tini tal-una kala atam ale kawu, ibi boko-lomdip: Am titak foko tal-unu. Lale, am ayo matikba kemin, wom talokomu no, kal-bom kem-yaabip o. Abiil kaptam-ami uta-mokomip kaa utamiwa yi, Am ayo kanolokomu kala kem-yaabip. Yale, ibi nami kukup kala kanubi uyo ma talalu utam-ilom, God alalta taba dong dakaan-balaya, kabak-ali kanuba nu ma nakan-kaabip dinim o.
MAT 16:4 Ibi God ami weng uyo ma weng san-kaabip dinim. Ibi ti aket mafak-kup fukun-bamdipla, bokop-na-lomdip: Mirakel o, kala, ukol ulmi kukup akal kusnum ata ma kukuyilawa, nuli utamupla yi, U, fan God alalta tam-baala tal-salap kala tukum o, kebip. Katale, uyo ma kanolin kukup ayo ma kanolokomi disa; ti maakup ma kaata-kup kukuyokomi kaali, Jona ami kano-lomda toop aniing dukum sakbaalkan umi mat tem kaptoowu bombii am asuumalo kelaya, asuk tiltam talsa ultap uta ma kukuyokomi kayi! yaka-lom Yesus ayo kanum bokoya kamboya tabana ko.
MAT 16:5 Yesus nikil iyo tam bot tem abalip yak aba umbiyak ok kumun malii yak abaliwa, Yesus ami daang bakaalin iyo aket fukuniwa yi, Numi bret ayo lukuuyulu kutii kela tulup kawi! kala-lomdip aket tambaneyilu, fanang daalip ko.
MAT 16:6 Yesus ayo faldak-tiimin sang ma faldak-tii bokoya-lomda: Nak-tunum kusal kipyo, ibi Falosi so, Sadusi so, imi yiis uyo talalu utafii-bam tal-une-bamdiwa yi! yaka ko.
MAT 16:7 Kanum bokoyilala, daang bakaalin tunum iyo weng sanbip-kup, bokola bokola ke-bam taken-una-tala-ke-bam bokolip: Kwin! bret ma kulii tilin daa, kelup kaata, yiis sang kaa bakaba nema yo? kemip.
MAT 16:8 Kemin, Yesus ayo almi daang bakaalin tunum imi weng kanum bakabip uyo utam-ilomda, ayo bokoyila ko: Ibi kanimin o, kalaliwa, bret kaa ma kulii-tilin dinim kelup o, kalaliwa, aket kabak ti suunkup fukunbip i? Ibi utam: Awu, ali ti yaap nuli tiin molokoma disa ema yo? kalaliwa aket yaapkan kaa fukunbip o?
MAT 16:9 Ti ipkal utam-tamin! Siin kaali, lukuuyase nema? Kibi nitam iliwa, bret awakal ma kuliita-kup foko tunum almi-kup faiv tausin (5,000) kalawiimi fakela kutii kabaanuyi im-bomdip yel-biliwa, ima anung anung ayo ket kanim kal abuu-silip? Kuno mulo kawu ibi nitam iliwa, bret fetkal ma kuluu-lomdi tunum ilmi-kup fo tausen (4,000) kalawiimi fakela kutiiyili im-bom kemsip umi ima anung daam daam ayo ket kaa kanim kal kaata abuu-silip? Kabak kanoli utam-silip kaali, kanimin o, kalalip nami titil kabak talalu utamin disa ke-silipla, ibi aket yaapkan fukunbip yoko?
MAT 16:11 Ipkal utamiwa yi, Kabak-ali faneng yiis so, flawa so, kuyak-mim-daa fuulipla, faskaamin umi mafek mafek kaami sang bakaba disa. Kaa Falosi so, Sadusi so, imi yiis uta taba ipni yam-mafak-dakamin kaami sang uta bakaba no, nikin o, kalaliya yo, kala Yesus ayo kanum bokola ko.
MAT 16:12 Kanum bokolala, Yesus alami daang bakaalin tunum iyo utamipla, Yesus ali bokoya-lomda: Bret faskaamin umi mafek mafek uta talalu utafii-bam tal-une-bamdiwa yo! keba disa. Ami weng bakaba kaali, Falosi so, Sadusi so, imi kukup mafak kukuyila-yaabip kuuta, talalu utafii-bam tal-une-bamdiwa yo! kal-bomda kaami sang uta bakaba nu, kalip ko.
MAT 16:13 Kulaata Yesus so, almi daang bakaalin tunum iso, yak aba umbilin abip ma Sisaria Filipai umi mepso kulu um-bom ale, Yesus atam almi daang bakaalin tunum imi dik-daayila ko: Unang tunum ili Dukum Ami Man Nami sang kaa boko-lomdip: Kaali kawanta no, nakan-kaabip i? yakale,
MAT 16:14 kulaa daang bakaalin tunum isiik Yesus ami weng an-anung-daa bokolip ko: Unang tunum malo ma ili boko-lom: Kaali oksam ukayin tunum, Jon Baptis ata no, ke-biliple, malo ma ita boko-lom: Yi, kaali God ami weng ku-fatap-dakamin tunum sawaayak biisa Elaija ata no, takan-kaa-bilip, malo ma ita bokop-ta-lomdip: Kaali God ami profet sawaayak bom-biisa Jeremaya ata no, takan-kaa-bilip, malo ma ita boko-lomdip: Ali God ami profet akal kusnum ema yo? takan-kaa-bala kebip te! akiwa,
MAT 16:15 Yesus ayo bokola: Aa, ibi yi? Ibi kaa kawanta no? nakan-kaabip i? yakale,
MAT 16:16 Saimon Pita ata Yesus ami weng uyo maan tela-lomda: Kabi fan ti God almi Man uldaa-tam-buusa Kraist namti kulu-balap ale, God ami dabaali din unokoma no, kal-bomda Israel-miin numi bokoyila fen-tabasup tunum namti kulu balap o, kala kanum bokolale,
MAT 16:17 kulaa, Yesus ayo Pita ami bokola-lomda: Jona ami man Saimon, kabi ti, kaa faneng bokolap kemin, tawaal diim kalawaami tunum ata ma tituun weng kala bokop-tin dinim; ti yaap ke nami Aatumen abiil tikiin kayaak alalta tituun-kup bokop-tala utamdawa kemin, kaa bokolap.
MAT 16:18 Kemin, kulaata weng ma bokop-ton o, kali kemin, nali talalu-tamulila, kabi maman tuum tap titil bikilawa kep-tokomi. Kemin, kulaata kapni win kusnum ma kaali Pita yo, tiki kaami miit kaali, tuum maman o, tiki. Kemin, nami okok ke-mokomap uyo, asuk nalmi titil uta kuluu-lomdawa, unang tunum yaapkan iyo foko kutal-dang nalmi miit tem tiilawa, nalmi unang tunum ke-lomdiwa, yakal maman tuum ulultap ke titil-kup fokoliwa kamboyokomi. Kemin, sinik mafak alik ita taba-lomdip im-baak moliwa, taan-ilom maaklo ke-lokomip disa. Kemin, ti suunkup ilokomip.
MAT 16:19 Nami titil kala kup-tokomi kalaali, kabi ti yaap unang tunum iyo bakayin-balawa, tiltam God ami miit tem kaa tiltam talokomip o. Kanola kabi utamapla, Dok nolin dok nolin kukup uyo mafak o, kalalap God ami tunum unang imi bokoya-lomdap: Kaali kanumin dinim o, kalokomap kaa, God abiil tikiin kayaak akal ti bokoya-lomda: Kaa kanumin daa yu, yokokoma. Kanolin tap kemin, kapkal utamapla, Kukup kaa tambal u, kalalap God ami unang tunum iyo bokoya-lom: Kaa kanumin o, kalokomap kaali, God abiil tikiin kayaak akal bokoya-lom: Kulaa kanumin o, yokokoma no, kala Yesus ayo Pita ami kanum bokolale,
MAT 16:20 kulaa, almi daang bakaalin tunum alik iyo bokoya-lomda: Kipyo, kibi tunum kusnum imi bokoya-lomdip: Yesus kaali God ami uldaa-dabuula tiltam Kamokim kesa tunum Kraist kayi, kalalip bakayila-tal-unemin disa yo, kala dil-moya ko.
MAT 16:21 Kemin, am daanba kulu, Yesus ayo weng kufo almi daang bakaalin tunum ku-fatap-daa bokoya-lomda: Ilom am ma daanuya kawu, niyo din abip win finin Jerusalam kaptam banila, Juda kayaak imi kamok kamok so, pris awem tunum imi kamok kamok isole, kuno lo utamsip tunum iso, ita taba-lomdip nayo kukup mafak angtiil yol kukaap-nam-bamdip nam-baalip yak Juda imi waasi imi sikil diim abamniya, nelip saakni namaalip bii am alep keliya, am asuum diim kawu God ayo nam-fola, asuk tam tiinokomi no, kal-bom bakaya yakyak kema ko.
MAT 16:22 Kulaa, Pita ayo alafin dibii yang kabangu dabak saan-bamda bokola ko: Kamokim kapyo, kabi kanolin aket kaa fukun-bamdapla bakamin dinim o. God ali kaa kewa tildak kapni diim kaa abam-nokomu dinim o kalale,
MAT 16:23 Yesus ayo fal-siki taba tiyak Pita kaa talalu atafii-bamda dabak-saan-bam bokola: Kabi nami God ami aket fukunba ultap uta fukunbap disa; waasi Setaan ami kukup altap kaata kukaap-nambap ale, tawaal diim kalawaami tunum imi aket fukunbip tap uta fanang dakabap kemin, kep-na-somdapla tabanan! Kabi tuum liip kawu kumo-bulula, tunum yang umi diim kawu yaan kuyak mo bang-baang-daa yang aba laabip tap ke umi tuum kanolin tap ke-bamdap kabi nami liip ukdaap-non o, kalalapla kanum bokolap. Kemin, kabi nami waasi tunum Setaan ami kukup tap uta kukup-nambap kemin, kulaalan o, anba-kup,
MAT 16:24 fal-siki titaldak daa almi daang bakaalin tunum imi bokoya-lomda: Dok nolin tunum kapta, naso din nami okok kemin kaata, okok kemon o, kalap namti, yak kaltapni aket fukunin kaata-kup kanumin kaali, kambola-lomdap nami aket kaata, dukum-kup kup-na-lomdap, nami as diim angtiil yol kuluulokomi ultap ke-lom taanami kulaali, kunola taanami no, kal-bomdapla, kanolin kukup kaata kuluu-bomdapla, tiltamdap nami okok kemin kaali, kutal-fuku kulii-taba balapla yo! kala-somla ko.
MAT 16:25 Kanolin kemin, tunum iyo kawanta ma almi angtiil kalan kaata, suunkup aket kuwa-bom, almi aket fukunin kaata-kup kanum tal-unemon o, kema namti, kaata taan-ilomda maaklo ke-lokoma; kemin ale, tunum ayo kawanta, kuno yang kunu-bili waasi iyo taba-lomdip nelamip kulaa, kuno nelamip o, kala-lomda tildang nami lak kaata-kup dukum-kup kutal-fuku kulii-taba namti, kanolin tunum kaata ti suunkup ilokoma ko.
MAT 16:26 Kano tunum ma am bokon kala dik-daa kulaasu kaami mafek mafek uta ti alik kaa-bam ale, suunkup ilin umi liip uyo ma dotulin dinim kema namti, almi bung mafek mafek yaapkan kaa kan-umba uta taba-lomdu dong dokolokomu nema? Disa te! Kuu dong dokolokomu disa kawi! Ali ti mafek mafek tambal-kup tabasu uyo ma God ami kolaya, God ayo bokola-lom: Yi, kabi suunkup ilokomap te! akokoma nema? Daa; suunkup ilin kaali, sisol ta kuluu mo kuluu-laamin umi mafek mafek disa te!
MAT 16:27 Kano am ma daanokomu kaali, Dukum Ami Man Nayo, nalami Aatumen God almi falala-kalin diim kawu, ensel iso, talokomup kawu, tal-ilomdi unang tunum alik maakup maakup imi dok nolin kukup kanum unsip uta tiiyokomi kayi!
MAT 16:28 Kemin, tituun weng kala bokoyokomi uyo, dotu weng san iliwa! Iip maakup maakup kula tola-bilip, ibi saaknin disa, bom ilom utamiwa yi, Dukum Ami Man Ayo titil tabin kuluu-lom Kamokim King kelaya, unang tunum tiin mola kala kalokomip kayi! kal-bomda Yesus ayo almi daang bakaalin tunum imi kanum bakayila ko.
MAT 17:1 Kemin, am bukupkal uyo disa kelale, kulaa Yesus ayo taba-lomda Pita so, Jems so, almi niing Jon aso, nikil asuumano, ita-kup foko imbiila yak aba umbitam amdu tikiin aalap batbat ma kawu tam unip ko.
MAT 17:2 Nikil tam abale, tunum asuumano kiili, Yesus kaa atamipla, Kwin! kaa akal almi kusnum ke-lomda ami tibi kun kaali ti, falala-kalin dukum atan kiinin tap ke-lomdu ami ilim uyo ibin namaal tap ke kelu kala kala-lomdip,
MAT 17:3 itamipla, tunum alep ma sawaayak kawu bom-biisip Moses sole, Elaija so, alep ili asuk abiil tikiin kela taldaak tilip Yesus so weng bakabip kala, kala-somdipla, iyo itamip ko.
MAT 17:4 Kanoliwa, Pita ayo itam-ilom Yesus ami bokola-lomda: Kamokim, kapyo, ti yaap ke kapso tal kalawu bom-bulup kemin, nuli am kiin-laap asuumano aye ma ema de-lomduwa, ma kaata kapni, ma Moses ami, tam ma kaata Elaija ami, ke deyiliya yo, kemale, kulaali
MAT 17:5 tam ibin uyo tildaak tilnong mo-imaalule, ibin tem kaptam liip weng ma boko-lomda: Kiwe! kulaali nalmi Man aket-iip kemin, nali ami fiyaap-kup duubi. Kemin, ami weng bakama uyo ti weng san-kaa-bamdiwa yo, kala-somla ko.
MAT 17:6 Kemin, aptum kusal iyo weng kaa weng sandiwa, suunin dukum ta akal ma ke-lomdip tilik duung fakela daak tibi ukdaalip tawaal lo un-ilom ale,
MAT 17:7 Yesus ayo tal bitaleya, yak bokoya-lom: Kipyo suunin daa kemin, tam tiinin a! yakala,
MAT 17:8 fan tam tiin tiyak daaliwa yi, Yesus kaata-kup bombe kala, kalalip atamip ko.
MAT 17:9 Atamipla kulaa, Yesus nikil iyo amdu tikiin ayo kulaa kela tal-bom ale, Yesus ayo almi daang bakaalin tunum nikil asuumano iyo weng kukuya-lomda bokoya-lom: Nak-tunum kusal kipyo, weng san iliwa! Ibi din tunum kusnum kayak kayak kiimi diim ayo kanolin kaa atamip, kaami sang uyo ma bakayin dinim o! Kano ti bom-bilipla bii, Dukum Ami Man Nayo taanila nam-bii din namaalip bii, tam tiindi tambani kala, kala-somdiwa kabaku yaap, unang tunum kayak kayak iyo bakayin o, kalala kanum bokoyila ko.
MAT 17:10 Kanum bokoyilaya, daang bakaalin tunum iyo weng kusnum ma Yesus ami dik-daalip ko: Lo utamsip ili kanimin o, kalalipla boko-lomdip: God ami profet weng ku-fatap-daa bakayin tunum Elaija sawaayak bombii taansa asiik talale, kulaali, God ami uldaa-dabuula tiltam Kamokim kesa tunum ata mafiing tem kawu talokoma no, ken-umbip i? akaliwa,
MAT 17:11 Yesus asiik imi weng maan tiiya bokola ko: Kabak-ali fan kemin, Elaija asiik dusiin daa tal-ilomda kanolin ok kaata kanu-mokoma ko. Tal unang tunum iyo dong dokoyilaya, aket dot kaamipla, God ami uldaa-dabuula Kamokim kesa tunum ayo mulo kawu talokoma. Kata,
MAT 17:12 weng ma uyo bokoyokomi: Elaija ali ti talse. Yale, tunum iyo utamiwa yi, U, kulaata kala-silip dinim; ilmi aket-kup fukun-ilomdipya, aalip taanse ko. Ulultap kanola unang tunum iyo taba-lomdip Dukum Ami Man Nakal ti kanola kukup mafak ayo kup-nokomip o, kala bokoyila kelale,
MAT 17:13 kulaali daang bakaalin tunum yakal utamiwa yi, Yesus ali fan Elaija ami sang uta bakaba disa; oksam ukayin tunum Jon ami sang kaata bakaba kala kalip ko.
MAT 17:14 Kemin, Yesus, Pita, Jems, Jon, nikil kanolin iyo tildaak amdu tawap tem tildaak uliwa, Kwin! unang tunum yaapkan tala-tala-ke-lomdip, Yesus ami liip fenbip kala, kalalip tal itamiple, tunum ma Yesus ami be tal tilik duung fakela daak tiin ale,
MAT 17:15 ayo bokola ko: Kamokim kapyo, nami man ayo olen-daala-lomdap dong dokolan o. Kaali nuukaal daam kesa kemin, dabuu dap banala wing tiil une-bam ale, wok tem une-bam ke-balala bii, angtiil yol daka-bamda utamsa kala kala-somdila,
MAT 17:16 kapni daang bakaalin tunum ita dap-talalulin o, kalaliya dap-tama tal daalila, ili dok kano dap-talalulalip dinim kebip o, kalale,
MAT 17:17 Yesus ayo almi daang bakaalin tunum iso, unang tunum bom-bilip kiiso, iyo bokoya-lomda: Kwin i! Ipni aket fukunin uyo atin fan tituun kelin disa kawi! Nali kipso bom bii kayoop yaapkan dakan-tiisi. Kata, ibi nitamiwa yi, Kaali God ami titil kaata kuluu-lomda sinik mafak iyo fotabeba yak banen-umbip kala, naka-laabip disa yo. Nali ipso bii, am kanim kal kelila, ibi natamiwa yi, Ali ti God ami titil kaali, nokol ti kuyama no, nokokomip i? Nali ipni aket mafak fukunbip kaali, daal tabep-nu no, kala-lomda fal-siki taba man ami aalap ayo bokola ko: Tunum man ayo dibii tilin a! yakale, kulaali,
MAT 17:18 man tunum ayo dibii tal daalipla, Yesus ayo dukum-kup sinik mafak ami bokola kem-salale, kulaata man ayo kela yak banaya, kulu man ayo abiltap tambalna ko.
MAT 17:19 Kanola kawu alami daang bakaalin tunum nikil iyo utamipla, Unang tunum iyo alik tabanaalip kala kalale, tal Yesus ami bokolip ko: Nuli kanimin o, kala titil fak-daa sinik mafak kaa fotabamnup yak banin dinim kela ni? akiwa,
MAT 17:20 Yesus ayo bokola: Ibi fan atamipla, Ayo ti God ami titil kaata, nuli kuyama kala, kalolip dinim kebip. Kemin, utamdula ibi taang-kala-lomdip fotabamnip yak banin disa keba. Nami weng kala bokoyokomi uyo talalu weng san bom-iliwa. Tunum ayo mastat san katip tiyok kaa diki-laaba alaltap kemin, kabi mafek mafek katip ami aket ayo ma fanang daa-lomdap, God ali ti yaap dong dokop-nala kanolokomi kala, kalokomap namti, ali dong dokop-tokoma. Kemin, bii mafek mafek dukum tiltam tabokomu uyo God ami dik-daalawa, ata dong dokop-taya, kanolokomap ko. Amdu kabi kaltapni baan diim kabaak tolsap uyo kela-somdawa, umbilap umbilin bokon kusnum kawu tolnan o, kalokomap uyo, fan kanolokoma. Dok nolin dok nolin kukup ayo God ami no, kalokomap kaa kabi titil-foko kanolokomap te!
MAT 17:21 [Kemin, sinik mafak imi fotabamnon o, kalap namti, kamasi kaali ima fala-lomdap God ami beten kamaalokomap kaata, sinik mafak iyo yak banemin ale, kaami kanumin disa ke-mokomap kaa, sinik mafak iyo yak banokomip dinim o, kala kanum bakayila ko.]
MAT 17:22 Kemin, Yesus ami daang bakaalin tunum nikil iyo alik din Provins Galili kaptamu din ang-delipla, Yesus ayo boko-lom: Kipyo, mepso kulu nami nak-tunum ma ayo aket fal-siki-lom Dukum Ami Man Nayo, nam-fatap-daa-lomda nam-baala yak waasi tunum imi sikil diim abamnila,
MAT 17:23 nelip saaknile, iyo nim-bii din namaalip bii am alep ke am asuum diim kawu, asuk tam tiin baalokomi no, kalaya almi daang bakaalin tunum iyo weng san-somdipya, atin ti aket uluum kemip ko.
MAT 17:24 Yesus aye, almi daang bakaalin tunum aa, iyo nikil din abip Kapeneam din itamiple, lotu am dukum kaami takis kaamin tunum iyo Pita ami dik-daalip ko: Kapni kukuyin tunum ali lotu am diildiil talalmin kaami takis ali ma saanin so ken-umba ne disa? akalipya,
MAT 17:25 Pita ayo weng maan tiiya: Ayo, ali saan-umba te! kala kela bom bii yak aba tam am un-ilom kaami sang uyo ma bokolama dinim kulaa bom ilale, Yesus ayo Pita ayo dik-daa bokola ko: Saimon aa, kaa kawanta takis ayo tawaal diim kalawaami kamokim king ami kukaan-bam saan-umbip i? Fan ti alami man kiita-kup saan-umbip e? malo kayak kayak ita-kup saan-umbip yoko? Aa, kapni aket fukunin kaali yi? akaya,
MAT 17:26 Pita asiik bokola: Yi, kayak kayak ita-kup saan-umbip o, akaya Yesus ayo bokola ko: Faneng bokolap. Kemin, lotu am diildiil uyo nalmi Aatumen ami am kemin, lo kuuli nami bokop-na-lomdu: Kanola man kabi takis uyo kuno saanan o, nansu dinim. Lale,
MAT 17:27 tunum kiili utamiwa yi, Kaa God ami man u, ninsip dinim. Kemin, nali takis molin dinim ke-lokomi kaa, ili boko-lom: Yi, ali kukup mafak keba no, nokokomip aye kemin, kapyo din wok kumun tem kawu aniing din tal-une-bamdap, kamasi diildiil ami aalokomap uyo kuluu-lomdap, umi bon-toko kaptoop ali utamawa yi, Tuumon dukum uyo buu kala, kalokomap uyo kulaata tikna kemin, kuliilap kulii-tal kapsole, naso, alep maakup numi takis moni ayo kulii-tal tunum kiimi kuya molan o, kala kanum bokola ko.
MAT 18:1 Kemin, kanola Pita so, Yesus so, alep iyo weng bakam-silipla, daang bakaalin tunum iyo tal Yesus ami bokola-lomdip: Kamokim kapyo, bom bii-lom tam God ami abip ilokomup kaali, kaa kanta ata ata kela aptum kusal nuli kabaak banup ata kamokim ke-lokoma ni? akiwa,
MAT 18:2 Yesus ayo man katip ma naan-daala tal atama dap-tal fuku dap ilimi miit tem kulu tii,
MAT 18:3 ayo almi daang bakaalin tunum imi bokoyila ko: Ibi man katip kuluwaa atamin! Weng uyo tifan bokoyokomi kemin, kipni kanolin aket mafak fukunbip ayo kuno kela fal-siki-lomdip man katip katip kalawiimi aket fukunin tangbal ultap kelin disa kelip namti, God ali ibi keyila ami abip kaa unokomip disa yo.
MAT 18:4 Kemin, man ili fiyaap duu-bam ilmi win kaa kufuumin dinim; imi aket ali ti tangbal-kup ma fukun-bam laabip. Kanolin kemin, dok nolin tunum ata almi aket-kup fukun-bam alami win kufuumin dinim, aket tangbal fukuna namti, kaata aptum kusal kii kabaak banip keyila, God ami abip tangbal uyo kamokim ke-lokoma.
MAT 18:5 Kemin, dok nolin tunum ata kalanolin man altap ayo ma atamaya, Yesus nami win diim uyo man kalanolin kaali, dong dokola namti, kaata nami dong dakaap-nin kukup namti kabe no, kal-bomda Yesus ayo kanum bakayila ko.
MAT 18:6 Yesus ayo asuk bokoya-lomda: Kusnum kayak kayak iyo utamiwa yi! Tunum ayo taba unang tunum God ami lak duu-yilin katip katip kebip imi yam-mafak-daalon o, kem-tabon o, kala ata-mokomip namti, kiili tam-ilom tuum dukum ata ma kuluu kuyak tunum kaami kum kun diim kabaku sok de kuu dabaalip daak yol ok kumun tem una namti, wok ta an-dong-dokola taanala, bi-lom God ayo yol katip uyo kolokoma. Ale, kanola kayak kayak iyo tunum kaa kanolin dinim ke kambolip, taba unang tunum God ami lak duu-yilin katip katip kebip iyo yam-mafak-daala kela yang kukup mafak uyo nuumip namti, God asiik taba atin ti kaami yam-mafak-daala kaami du kaa kolaya, tunum ayo atin ti angtiil yol awak dukum uyo dakan-unokoma.
MAT 18:7 Tawaal diim kasel unang tunum yaapkan ili ti tawaal diim kaldaak-ami mafek mafek aket kaata-kup yan-bulula, fukun-bam yang kukup mafak ayo num-yaabip. Kemin, God ali kaami kalan kaata im-bak-saan-bamda, imi kukup mafak kaata, du tiiya-laa-mokoma kalaliya, kemin, dukum-kup olen-yimbi no. Kukup mafak uyo suunkup tabanang tunum imi aket fukunin uyo ku-mafak-daayiluya, iyo yang kulaak tildang kulaak ke-bamdip ban ken-umbip. Lale, dok kanolin tunum ata kukup mafak uyo kanu-bamda almi aptum kusal oko-tokoya aye, kukuya kela, yakal yang kanolin kukup uyo kanumip namti, God akal taba-lom tunum kaa dabak saan-bam, kaami aptum kusal foko kulii yang banemin uyo tela-laa-mokoma. Kemin, ibi kabak talalu utafii-bamdiwa kayi!
MAT 18:8 Kabi kanola utamapla, Nalmi yaan aye sikil aa uta nam-bii yang daalu kukup mafak uyo kemon o, kalbi kala, kalap namti, kaltapni yaan sikil ayo ukelnap unip malii maakup ma ke-lomdawa, kukup mafak ayo kambola bombii taan-somdapya, tam God ami abip kawu suunkup ilokomap kaata, atin ti tangbal; kemin ale, kabi yaan sikil kii bo-kukan-tiilokomi dinim o, kalalap kukup mafak-kup nuubi taanap takalip, God ami ensel ita tam-baalip din suunkup as kiinin abip unokomap kaali, atin ti tambal disa yo.
MAT 18:9 Aa ti, kanola utamapla, Nalmi tiin kaali, kukup mafak ayo kukup-nam-bulula kanumon o, kalbi kalap namti, kaltapni tiin malii uyo ulduu kulaalap unu, tiin milii maakup ke-lomdap kukup mafak ayo kambola bombii taan-ilomdap tam God ami abip kawu suunkup bom ilokomap kaata ti tambal. Lale, kabi tiin malii uyo ulduu kukan-tiilokomi dinim o, kalalap kukup mafak kaata-kup nuumsi, bii saaknap kala kala-lomdip, God ami ensel ita tam-baalip din suunkup as kiin-bam ilin abip unokomap uyo, tambal disa yo, kala Yesus ayo kanum bokose. (Kemin, kaami weng kaa kanum bokose kabak-ami miit kaali boko-lomdu: Kabi utamapla, dok nolin dok nolin mafek mafek uta taba-lomdu sasii tam-bii yang kukup mafak tem tiinilon o, kem-tabu kalap namti, yak kanolin mafek mafek kulu daang ukuwa-lom kukup mafak uyo kuno kewa ti tangbal-kup bomdawa yo, kalsu ko.)
MAT 18:10 Kemin, Yesus ayo bokoya-lomda: Nak-tunum kasel kipyo, nami weng kala bokoyokomi uyo weng san iliwa! Kipni aket ayo fukun-ilom unang tunum God ami lak katip duulin bom-bilip win dinim o, kalokomip. Lale, ti ipkal utamin! Kiimi tiin molin tunum o, kala ensel ili nami Aatumen God ami miit tem kulu bomdipya, unang tunum God ami lak katip duubip imi sang uyo suunkup God ayo bakaala-yaabip. Kemin, ipni aket uyo fuku-daa, Kiili win dinim o, kemin daa; ibi talalu utafii-bamdiwa kayi!
MAT 18:11 [Dukum Ami Man Nali, tal unang tunum yang Setaan ami miit tem un-ilom maaklo kesip kiita, foko kulii tildang God ami miit tem tiilon o, kalalila talsii no.]
MAT 18:12 Nami faldak-tiimin weng kala bokoyokomi kaali, daa weng san iliwa! Tunum ma sipsip almi-kup wan handret (100) kalawiita tiin mo-laaba. La, maakup ma maaklo ke-lokoma kaali, ali dok kanolokoma? Sipsip tiin molin tunum ayo sipsip ilmi-kup nainti nain (99) ita-kup kamboyila amdu tikiin kawu bilipla, din sipsip maaklo keba ata fen-tal-une-mokoma ko.
MAT 18:13 Din fen-tal-une-bamda ata-mokoma uyo, sipsip tiin molin ayo fiyaapmin dukum duu-mokoma. Kemin, ami sipsip maakup kaami fiyaap ayo aptum kusal 99 maaklo kelin disa bom-bilip, kiimi fiyaap kanolin disa. Kwin! disa akal ma ke-bamda fiyaap duu-mokoma.
MAT 18:14 Ultap kemin, nami Aatumen abiil tikiin kayaak almi aket fukunin uyo unang tunum almi lak duu-yilin katip katip kebip iyo maaklo kemin o, kala, ken-umba disa! kala Yesus almi daang bakaalin tunum iyo kanum bakayila ko.
MAT 18:15 Yesus ayo asuk boko-lomda: God ami unang tunum kipyo, kanola God ami lak duulin ali ma taba kapni kukup mafak ayo kep-ta namti, kabi kayak kayak kii bakayin disa; ti alafin bombe kala, kala-somdapla kawu, din atamapya, ami kukup mafak kaa kanop-timba kaami sang uyo bokolapla, ayo kapni weng uyo weng sandala, almi kukup mafak kanuba uyo kulaala namti, kaata asuk alep maakup ibi kuyak dii una-tala-ke-lom ale, fiyaap duu-bamdip ilokomip.
MAT 18:16 Kemin, kapni weng uyo weng selin dinim kela namti, kaltapni kaptum ayo maakup aa, alep aa, ita ma im-tal tiilapla, alep kiita taba-lomdip alep kipni weng bokola una-tala-ke-mokomip kaali, weng sanokomip kaata, ti tambal o, kala God ami Sukon Tem uyo kanum bokosu. Kemin, alep imi weng so, kapni weng uso, uyo weng sanokoma kaata ilom am ma daanokomu uyo tunum ban keba ali maso kukup mafak uyo kanup-tokoma dinim o.
MAT 18:17 Lale, tunum ban keba ayo nikil asuumano kipni weng uyo weng selin dinim kela namti, din sios tunum unang iyo afet-daa-lomdip alik kaami sang uyo bokoyipla, weng uyo talaluliwa, tunum ban keba ayo alik kipni weng uyo weng selin dinim kela namti, kipni iipyak tem be ayo fotaba dabaalip tam banokoma kaata, ti tambal kayi! Ale, ibi kusnum tunum so, takis kaamin tunum mafak so, imi itam suun-bam yang itamip iso, tal-unemin dinim kem-yaabip tap keliwa, tunum ban keba ayo fotabip yang banemin o, kala ko.
MAT 18:18 Yesus ayo asuk bokola ko: Kulaa nali alik God ami lak duulin unang tunum tawaal diim kala bom-bilip ipni bokoyon o, kalaliya kemin, weng san iliwa! Alik ibi utamipla, dok nolin dok nolin kukup uyo mafak o, kalalup God ami unang tunum imi bokoya-lomdup: Kaali kanumin dinim o, kalokomup kaayo, God akal ti bokoya-lomda: Kaali kanumin daa yo, kalokoma. Aa ti kuno alik ipkal utamiwa, Kukup kaa tambal u, kalalip God ami unang tunum iyo bokoya-lom: Kaa kanumin o, kalokomip kaali, God abiil tikiin kayaak akal bokoya-lom: Kulaa kanumin o, yokokoma no.
MAT 18:19 Kemin, nali asuk weng kusnum ma bokoyokomi: God ami lak duulin tunum alep tap asuumano tap ibi aket maakup ke-lomdip nami Aatumen abiil tikiin bombe ami beten kamaan-bam dik-dakalokomip kaayo, ali weng san-ilomdaya ipni beten kebip kaa maan tiiya-lomda kanolokoma.
MAT 18:20 Kemin kaali ti, God ami lak duulin tunum alep tap, asuumano tap, Yesus nami win diim kawu afet-mokomip kaa, nali tal ipso ilokomi ko.
MAT 18:21 Kemin, Pita ayo tal Yesus ami dik-daala ko: Kamokim kapyo, nami nak-tunum ayo kukup mafak kukaap-nala, uyo ami kukup mafak kukaap-namba uyo kukan-tela-tela kemsi bii liip kanim kal ma fak-daalon o, nakan-kaabap i? Kuno kambola lukup-na yakyak kebi liip fetkal fak-daalokomi kabak kaata-kup ti yema? aka-lomda dik-daale,
MAT 18:22 kulaa Yesus asiik bokola: Daa, fetkal kaa ti disa. Kabi kaptum kaami kukup mafak kukaap-tamba kaali, tiimin daa. Kanola kaptum ayo kukup mafak yaapkan kaa kukaap-tin-kup keba. Yale, kabi suunkup kaa kela kela ke-mokomap kaali ti tambal o.
MAT 18:23 Kanolin kemin ale, God ami unang tunum tiin saanin kukup kaali, kamokim king ma ami kukup ultap kemin, kamokim ali aket fukun-ilom: Nalmi okok kemin tunum ta nami uluum kukaap-nip dolasii uyo, tik-tiili utam-somdipla umi maan uyo kup-nin o, aka-lomdaya,
MAT 18:24 alami dong dakaalin tunum ma ayo bokola ko: Kapta din tunum uluum kup-na-silip iyo im-tama tal o, akaya din maakup e kala dibii tal-tal kema. Kemin, tunum ma dap-tama tala kaami uluum ayo sakbaalim dukum kemin,
MAT 18:25 kaali moni dukum kaa ma kutal-fukulin dinim. Ali dok kano taang-kala-somdala, kaa molama disa yo, kalalaya, ami kamokim ayo soldiya imi bokoya-lomda: Kibi nami ok tabuulin tunum kalaaso, ami kalel man iso, imi bung alik kiiso, iyo kulii-din mafek mafek saanin baan diim tiilip molipla, umi sisol uyo kulii-tal tiilip, nata kuluu-lomdi alimal kiita, tunum kusnum ta foko kulii-din tiilaya, ami disa ok fokolin unang tunum ke-lokomip kaata, nami uluum namti kulu molokomip kayi! kema ko.
MAT 18:26 Ali kanolaya kawu, ami okok kemin tunum ayo weng sandaya, tilik duung fakela daak almi kamokim ami miit tem kulu dakela daak tiin-ilomda dukum-kup bokola ko: Kamokim kapyo, ata-bom ilawa molokomi kemin, olen-daap-na kep-napla, kapni uluum kaa alik molon o, akale,
MAT 18:27 kulaa ami kamokim ayo utamala kanum bokola kalale, kulaali olen-daala-lom ami uluum uyo maas kuno kelale, kulaa masiim kuno kambowala tabana ko.
MAT 18:28 Ok fukulin tunum ayo kamokim kambola tam abip tam ulale, Alami ap-tunum okok kemin tunum ma siin kawu, uluum katip ma nonsa ayo tal bombe kala kalale, almi aptum ayo yak del kalum kuyaku dap-tal fuku bokola ko: Baan kamala kulu ti kapsiik nami maan ayo baan tii kup-na-somdawa ya! akale,
MAT 18:29 aptum ayo tilik duung fakela daak tiin dukum-kup bokola ko: Daa kuno kep-nawa kaa molokomi kemin, olen-daap-nawa kawu, kapni maan katip kulaa molon o, akan-kaaba. Katale,
MAT 18:30 aptum ami weng uyo weng sanin disa ke-lomda yak aba din bolis bokoyilaya, kulaa bolisman ita tal dibii din kalabus am daa bokolip ko: Kabi ti kultamu bom-balap bii, kaptum ami maan ayo telokomap kawu, fan kabi tildaa tam-baalup tam-baa unokomap o, akiwale,
MAT 18:31 kulaa aptum kusal yakal utamiwa yi, Nak-tunum kaa dibiilip kalabus am daalip kala kalaliwa, iyo aket atul dip-tiiyu din ilmi kamokim ayo alik kaami sang uyo bokoliwa kulaali,
MAT 18:32 kamokim ayo weng san-somdala, soldiya ami bokola ko: Din nami okok kemin tunum mafak ayo dap-tama tal o, akale, din dabuu dap-tal daalaya kamokim ayo bokola ko: Kabi kukup mafak tunum kemin, kapni dik-daabap kaata nali olen-daap-ta-lomdila, kapni maan dukum ayo kuno kep-tambi no.
MAT 18:33 Kabi nami olen-daap-ti ulultap ke-lomdap kapsiik taba kap-tunum kaayo, olen-daalakin kaali, tambal. Yale, kabi kaali olen-daalin disa kebap. Kemin, kaata nakal kanola kabi olen-daap-tokomi disa yo, akale,
MAT 18:34 atin aket atul dap-telule, kulaali soldiya imi bokoyilaya, ita tunum mafak ayo de dibii din kalabus am daa bokolip ko: Kabi ti kultamu bom-balap bii kamokim king ami maan dukum uyo alik telokomap kuyaku tildaa tam-baalup tam banokomap kayi! kala kanum bokola-silip o, kala Yesus ayo faldak-tiimin weng uyo bokoyimba-kup kulaa,
MAT 18:35 asuk maso bokola ko: Kiwe, faldak-tiimin weng kaami miit uyo aket fukun-ilom utamin! Kaptum kusal kukup mafak kapni kukaap-tambip uyo kanubip kayi! kala, kapsiik kukup mafak ayo kukaayin daa; lukup-talala, kabi umi aket uyo maso ma fukunin daa. Kanola kaptum kusal imi maan uyo kukan-tiiyin disa ke-lokomap uyo, nami Aatumen abiil tikiin kayaak alalta kapni uluum kuu kukan-tiip-tokoma disa; angtiil yol kaata kup-tokoma kayi! kala Yesus ayo Pita ami kanum bakaan-bisa ko.
MAT 19:1 Yesus ami weng ayo bakayinbi alik dinimnu kulaaba-kup, Provins Galili kaptam kulaa kela Ok Jodan ayo yakan yak malii abala yak aba din Provins Judiya anung kaptam banale,
MAT 19:2 kulaa unang tunum yaapkan iyo dik-daa dabii tal Yesus ami daang tem lo kawu yak aba tal Yesus almi bombe kaltam banipla, Yesus ayo unang tunum mafak umulin ma tawaal kuluwu bom-bilip iyo yam-talal kaama ko.
MAT 19:3 Falosi malo ma iyo tal Yesus ami kasenolupla, Ayo weng mafak so ma bokola kala kala-lomdup dibii din weng talalmin baan diim daalum o, kala-lomdip, tal dap-kuku-bamdipla bokolip ko: Kapyo, Moses ami Lo numi kuyinsa kabak-ali tunum ayo unang kuluu kewa-yaamin sang uyo kanimin o kalsu ni? Kabak-ali boko-lomdu: Tunum ayo almi kalel uyo kewon o, kala uyo yak alik kalok nolin kalok nolin kukup ma nuu-mokomu kaami kalan uyo fotabam-nokoma kaata tambal o, kalsu nema? akiwale,
MAT 19:4 Yesus asiik imi weng ayo an-anung daa bokoyila ko: Ibi God ami Sukon Tem kaami sang kulaa tik-tiibi utamsip. Yale, kanimin o, kalaliwa nami dik-dakaap-ninbip i? Anung uyo boko-lomdu: Kamasi kawu, God ami mafek mafek alik talalu kutiiba-kup ayo imak so, ikis so, iyo talalu-yimula akam maakup ke-bom biisip.
MAT 19:5 Kanolin kemin, God ali boko-lomda: Akam maakup kesip diim kabaku tunum ayo unang kuluulokoma kawu, tunum ayo almi awak so, aalap so, iyo kamboyimba-kup, yak almi kalel umi diim kabaku fep-nala kawu, akam maakup angtiil maakup tap ke-lokomip o, kalsu.
MAT 19:6 Kemin, asuk maso alep ke-lokomip disa; atin akam ili ti maakup ke-lokomip. God ami tunum so, unang so, kulii-tala-tala kelaya, akam maakup kebip uyo, tunum ma ata taba akam imi angtiil maakup kebip uyo lolala kela yang-bana tildang-bana kemin disa yo, kala Yesus ayo kanum bokoyilale,
MAT 19:7 kulaa Falosi iyo Yesus ami dik-daalip ko: Kapni kanum bokolap uyo tituun namti, Moses ali kanimin o, kala-lomda God ami Sukon Tem uyo weng kusnum kaa dola kutii boko-lomda: Tunum kabi kalel kuu kewi no, kalap namti, kabak-ali fiitmin disa. Imakim kapta sukon ma dola kuu kalel umi kuwapla, kuluu-lomdu kep-ta unokomu kayi! kalsu no, akiwale,
MAT 19:8 Yesus ayo kiimi weng an-anung daa bokoya-lomda: God ata unang kuluula tunum dabuulu kemin umi lo kutiisa ayo ibi weng sanamup daa yo, kala kala-somdala Moses ayo, Ayo, kalala ibi iltipni unang tan iyo kamboyila-yaabip. Katale, kamasi God ami unang tunum talalu-yimusa kaali, God alalta tunum so, unang so, iyo kanolin kukup mafak kaata kanumin o, kalala, kuyinsa disa yo.
MAT 19:9 Kemin, nami weng ma kala bokoyokomi uyo talalu weng san iliwa! Kanola tunum ma ayo almi kalel uyo sadikimin dinim tambal-kup bombuu. Yale, alalta taba kewi no, kalala kewa-lomda, unang kusnum uta kuluula namti, God ami tiin diim kaami kanola kaali, fan sadiki-bamdala, alami kalel umi um-mafak-dakan-umba no, akokoma no, kala Yesus ayo Falosi imi kanum bakayila ko.
MAT 19:10 Kemin, almi daang bakaalin tunum iyo weng kaa weng san-ilomdip Yesus ami bokolip ko: Tunum ayo utamaya, Unang kuluu kulaakamin kaali, fiitmin o, kala namti, ayo unang dan-kaamin uyo kulaa-lomdala, kapkes ilokoma ayo, tambal o, akiwa,
MAT 19:11 kulaa Yesus asiik bokoyila ko: Tunum yaapkan iyo fan titil-foko kapkes ilokomip dinim; ili unang dan-kaa-mokomip. La, God ayo tunum malo iip maakup maakup ita-kup titil kuyilaya, ita-kup titil-biki-lom kapkes ilokomip o.
MAT 19:12 Tunum ili unang dan-kaamin disa ke kapkes-kup ilin kaami miit kaa yaapkan o. Tunum malo ma kamasi awak kasal iyo imulip imi angtiil kaa mafaksip kii kalok no taang-kala unang iyo im-buulokomip dinim. Ale, tunum malo ma waasi ita taba imi angtiil ku-mafak-daayinsip iyo kalok no unang kii dunulokomip dinim. Kuno tunum malo ma yakal angtiil kulaa tambal yale, God alalta titil kuyilaya kii kapkes bomdipla God ami weng ayo tambal-kup kulii-din aptum kusal iyo bakayum o, kalaliwa, unang kii dunulokomip dinim. Kemin, tunum ali ma God ami lak kaata dukum-kup duulon o, kalala, titil-foko kapkes-kup ila namti, God ali tunum kaami fiyaap ayo duu-mokoma kayi! kala kanum bokoyinsa ko.
MAT 19:13 Unang tunum iip maakup maakup iyo Yesus ata numi man katip katip sikil kuyak tii-lomda, God ami dik-daala dong dokoyila tambal-kup fasuulin o, kala-lomdip ilmi man iyo kulii-tal Yesus ami be tilip. Lale, Yesus ami daang bakaalin tunum iyo taba awil-fakal imi fotabamnup tabanik o, kemiwa,
MAT 19:14 kulaa Yesus ayo bokoyila ko: Ibi fotabemin daa yo. Kii fotabemin daa kemin, kamboyiwa, imi man iyo imbiilip nami bii tilin o. Tunum unang ili fanang daaliwa yi, God ali nuli dong dokoyokoma kala kalalipla, tiltam God ami miit tem talebip iyo, mep man katip katip ililtap kemin, ibi man katip katip kii fotaba dil-saanin disa; kamboyip nami fanang tilin o, kalalala,
MAT 19:15 man katip katip iyo sikil kuyak tii God ayo dik-daala ko: Aatumen, kabi mep man katip katip kalawiili dong dokoyan o, kalba-kup kulaa kamboyila una ko.
MAT 19:16 Am ma daanale, tunum kasaa ma tal Yesus ami dik-daala bokola ko: God ami weng kukuyin tunum kapyo, nali suunkup ilin tunum kelon o, kebi kemin, kaata dok kanolin kukup tambal kaata tabuuliya kawu, nali suunkup ilin tunum kelan o, nambap yoko? akaya,
MAT 19:17 Yesus asiik bokola ko: Kabi kanimin o, kalalap tal kukup tambal umi sang uyo nami dik-dakaap-ninbap? God maakup kaata-kup kukup tangbal uyo nuumin kemin, God ami Lo uyo Moses ata God ami Sukon Tem kawu dola kutiisa. Kemin, God ami weng kuuta tabuu-bomdawa kawu, kabi tiltam suunkup ilin tunum ke-lokomap o, akale,
MAT 19:18 kulaa tunum asiik dik-daa bokola ko: God ami dok nolin weng lo kuuta ti kutal-fukulin-kup ilan o, nambap? kalale, Yesus asiik bokola ko: Lo uyo boko-lomdu: Kabi tunum unang kii anulap taan-yaamin disa; kalapni kalel kuu, kewa unang kusnum so sadikimin daa; kabi yukut inin daa; kabi disa ibaka-balap, soldiya iyo kaptum kusal kii sok dinayin disa.
MAT 19:19 kabi kaltapni kawak-aalap imi weng uyo saak kuyang tiimin daa; ti imi weng kaata weng san-kaa-bam ale, kukup tambal kiita-kup kukuyilan o, kala-som ale, kuno kaltapni angtiil umi mok im-bom yaap-kup tiin saanbap tap ke kaptum kusal kayak kayak imi aket uyo kuyan o, kala kanum boko kesu uta te! akaya,
MAT 19:20 tunum kasaa ayo Yesus ami bokola ko: Nali God ami weng sawaa ayo alik kuno ti suunkup kutal-fukulin-kup bom-laabi. Katale, nali utamila, Kukup tangbal uyo ma iibi nema yo? kalbi. Kemin, kalok nolin kukup uta maso kutal-fukulan o, nambap yoko? akala,
MAT 19:21 Yesus asiik bokola-lom: Kukup tambal ayo ti alik tabuulon o, kalbap kala kalaliya, tabuulin disa bom-balap kaami sang namti kala bokop-tokomi. Kemin, kabi daa weng san ilawa! Kabi din-ilomdap kaltapni mafek mafek alik iyo kaptum kusal imi kuyilawa, ita moliwa umi moni kuluulokomap kaata, mep unang tunum mafek mafek dinimal imi kuyap namti, kaata din God ami abip kawu suunkup yaap ilokomap. Kemin, kano-lomdapla, kabi talawa, naso tal-une-bam, God ami okok kem-tal-unemum o, akale,
MAT 19:22 kulaa, tunum man kasaa ayo mafek mafek kayaakim kemin, Yesus ami weng bokola uyo weng san-somdala, ami aket ayo fanang-daala yi, Kwin, ti suunkup ilin tunum kelon o, kalbi. Yale, yak nami mafek mafek kiili, yaapkan kemin, kuno keyokomi disa yo, kala-lomda aket uluum dap-teluya, Yesus ayo kela una ko.
MAT 19:23 Tunum kasaa kanola unaya, Yesus ayo tunum kaami aket ayo fukun-bamdala, almi aptum kusal imi bokoyila ko: Nali tituun weng bokoyokomi. Yak mafek mafek soyal unang tunum kii, atin ti fiit-bamdip, (imi mafek mafek sikip fak-dakan-unsip iyo kulaalokomip kemin, malo ma kiita-kup God ami aket kola-lomdip,) tiltam God ami be kawu, tam unokomip.
MAT 19:24 Nali weng bokoli kaptoop maso tifili tooplo so unokomu. Kemin, olti dukum ma kamel uyo tam men sil ami tem kaa tam unon o kalokomu kaa, fiit-bi-somdula kawu tam unokomu. Ulultap kemin, yak tunum bung kayaak ali atin ti fiit-bi-somdala kawu, tam God ami miit tem kaa tam unokoma kayi! kala ayo kanum bokoya ko.
MAT 19:25 Kanum bokolala, daang bakaalin tunum iyo weng san-somdipya, Kwin! fanang aket alik tam baneyiluya iyo dik-daalip: Kapni kanum boko-lom: Bung kayaakim ayo fiit-bam tiltam God ami miit tem kaa tiltam talokoma no, kalap kaali, faneng namti, mafek mafek dinimal nuli dok kano-somdupya, tam God ami miit tem uyo tam unokomup i? Kaa fan taang-kala tam unolup daa, akiwa,
MAT 19:26 Yesus ayo ilmi tiin diim tiyak daa itam bokola ko: God maakup kaata-kup yaap mafek mafek alik iyo kanolama. Yale, tunum alik kuliili taang-kala-lomdip tiltam God ami abip ayo tiltam talokomip dinim; God alalta dong dokolokoma kaata, fan tiltam God ami daam tem ayo tiltam talokoma no, yakale,
MAT 19:27 Pita asiik bokola ko: Kapyo, weng selan! Kapni daang bakaalin tunum nikil nuli nulmi abip so, nulmi mafek mafek so, alik iyo kulaa kela-lomdup kapni okok kaata, ke-bam kapso tal-unebup kemin, kanubup kaali ilom God ami abip ayo din atamuwa, kabi kalok nolin kukup tangbal ata ma nuli kuyokomap i? akaya,
MAT 19:28 Yesus ayo almi daang bakaalin tunum imi bokoya-lomda: Nali tituun weng kaata bokoyokomi. Ilom am mafiing diim daanula kawu, God taba-lom asuk abiil so, tawaal so, imi kusnum dotulokoma kabaku, Dukum Ami Man Nata tiltam Kamokim diil ke-lomdila, alik kiili tiin molokomi. Kemin, kulu nami daang bakaalin tunum talangkal ibi nami titil kaata kuyilila, nami win diim Israel imi man loop imi miit talangkal kalawiili iltipta taba-lom miit maakup e kala tiin mola tiin mola ke-lokomip.
MAT 19:29 Kemin, dok nolin unang tunum ita nami lak uyo duu-lomdip imi am aye, nakal-fakal afalop kusal, awak aa, aalap, man, ima waan lang aye, iyo maas kuno keya-lomdip, nami ok kaata-kup kutal-fukulip namti, am mafiing diim daanokomu kabaku, God ayo kukup tangbal-kup kuyimba-kup, kanolin mafek mafek yel yak daa keya talsip uyo, ulmi-kup tiiyuk 100 kiita kuyila kelaya iyo suunkup ilokomip.
MAT 19:30 Kemin, unang tunum yaapkan kamala kaami win so ke-bom-bilip iyo, kaptoop kaptoop kaali, isiik win dinim keliple, win dinim ke-laabip isiik am ma daanokoma kaali, kiita win so ke-bom ilokomip o, kala Yesus ayo kanum bakayila ko.
MAT 20:1 Kulaa, Yesus ayo faldak-tiimin weng ma boko-lomda: God ami unang tunum tiin mo-bomda mafek mafek kukaayila-yaaba kaami kukup uyo sok lap lang kayaak ma taba okok kemin tunum imi kuyase kukup tap o. Langabip kayaak ami wain lang uyo dukum kemin, kutim atan tik-daalon e! kem-sulule, langabip kayaak ayo yak aba din yawolam aba tunum ma ulelnila, din nami okok kamap-nam-bamdip moni kaamin o, kalalaya,
MAT 20:2 yak aba din tunum malo ma itam ale, bokoyila ko: Kibi okok ke bi kalum o, kala-silip am maakup kemin kaami sisol kaata-kup tiiyuk kuya kuya ke-mokomi no, kala-lomda fokola din ami wain lang kawu tabuulip ko.
MAT 20:3 Kemin, am ma daanala ami kutim kawu, langabip kayaak ayo asuk tunum fen-talaba din yawolam ula, Kuno tunum malo ma iyo disa kulu bom-bilip kala kalba-kup,
MAT 20:4 bokoyila ko: Kipyo, ibi din nami wain lang kawu okok ke-bilip bii am tiinula, okok kebip ulmi sisol tiiyuk-kup kuyon o, yakale,
MAT 20:5 weng sandip yak aba din okok kemip ko. Din okok ke-bilip, bii atan uyo tal dibimnala, langabip kayaak ayo asuk tunum malo ma iyo fokola okok kem-uniple, bii luuka-somdala, atan ayo ansiki tal aba yak abamnala, tunum malo ma iyo kuno tam asuk im-baala okok kem unip ko.
MAT 20:6 Bom bii am tiinula, ok ayo disa kelon e! kem-sulule, ayo din yawolam din ulaya, Tunum malo ma iyo asuk kawu bom-bilip kala kalale, ayo bokoyila ko: Kipya! kibi kanimin o, kala am daanbu kaa disa kulu tiinaabip yoko? yakale,
MAT 20:7 isiik bokolip ko: Yi, nuli tunum ata ma ok ayo ma kuyin dinim kelaya, kemin disa am kulawu bom-bulup te! akiwa, bokoyila ko: Ok ayo ma kuyin dinim namti, kibi tal din nami wain lang kaata okok kemin a! yakala yak aba din okok kemip ko.
MAT 20:8 Kulaa atan uyo tem banon e! kem-sulule, wain lang kayaakim ayo okok kemin imi tiin molin ayo bokola ko: Ok fukulin tunum kii alik weng umbaayilap tala-tala-keliwa, imi sisol uyo kukaayilan o, kala-somla kemin, kamosinim kaali mep ma mulo tal okok kemip am tiinu isiik kuya-somdaple, kiimi daang tem kaata aptum kusal iip ma am taapnu tal okok kebip iyo kuyila kelapla kawu, kamasi diildiil kutim tal okok ke-bilip bii am tiina ita mafiing mafiing kulu ukuya kelan o, akaya,
MAT 20:9 kulaa tiin molin tunum ayo okok kemin tunum imi naan-daayila, tal atamiple, ayo sisol uyo akal almi ne, kala kola-kola kemsa disa. Kamasi kaali, okok kebi am maakup kebi am maakup kemin kaami sisol uyo tunum mafiing tal okok kebip isiik kuyimba-kup, taap tilip yakal iyo kuno ti ok fukubi am maakup kemin kaami sisol uyo kuyila kelala,
MAT 20:10 mafiing mafiing kaata, tunum kutim tal okok ke-bilip bii am tiina yakal tal sisol kaamum o, kalalip tal aba aket fukuniwa: Awu, nuli kutim kawu tal okok kem tala-bulup kulii yak aba umbital kala diilup kemin, nuli sisol dukum so kuluulokomup ema yo, kalip. Katale, tikip alik maakup ti tunum mafiing tilip imi sisol kuluulip tap okok kebi am maakup kemin kaami sisol kaata-kup kuluu-lomdipla,
MAT 20:11 utamiwa yi, Numi sisol kalawaali, nak-tunum kusal imi mep am tiina tal okok kem-silip am tiina imi sisol kuluulip ultap kuluulup kala kalaliwa, kamokim ami aket atul kukaan-bam balaan-bamdip bokolip ko:
MAT 20:12 Kamokim a! Ok tabuulin tunum kalawiili ok kaali ok ayo disa kelon o, kem-sulula, ayo talda ok katip ma kuya iyo nolip ale, nutale kutim kawu tal atan aalap dukum ami diim kalawu okok kem kulii umbital am tiinin diim kala diilup. Lale, kanimin o, kalalapla kabi sisol kaali imi sisol kuyilap kaaltap nokol kanoya kuyap yoko? Kabak-ali yaap keyin disa yo, akiwa,
MAT 20:13 wain lang kayaak asiik taba imi tunum maakup ma ami weng uyo tela-lomda bokola ko: Nak-tunum kapyo, duluuma weng san ilawa! Nali bokop-ta-lomdi: Okok kebi am taap maakup kemin kaami sisol kaata kup-tokomi no, kaliya, kabi okok ke-bili bii am maakup ke-lokomi kayi! nambap kemin, nali kapni kukup mafak kup-ta-somdila disa. Kemin, nulmi weng bokobup kaata-kup kutal-fukulila kemin, kaa kuyili ko.
MAT 20:14 Kaa nalmi aket fukunin uta tunum mulo tilip kaliili kukup tangbal ayo ma kuyon o, kalalila kapni sisol kup-ti ultap kuno yakal kanola kuyi no. Alik ibi okok kemsi bii am atan maakup kemin umi sisol kaata kuluulip, kemin ale, kaali ti yaap kelip te! Nali nalmi aket fukunin uta nalmi tuumon kaata kuluu-lomdi tunum iip maakup maakup imi mafek mafek iibip imi masiim dong dakaayimbi. Lale, kabi kanimin o, kalalawa aket mafak kuuta, kuyak tiip-tulala aket atul kuyak daa bom kanubap yoko? Kapni sisol uyo kuliilap tabanan a! kala-lomda wain lang kayaak ata okok kemin tunum imi kanum bakayinsa ko.
MAT 20:16 Faldak-tiimin sang kaami miit ayo dok nolin unang tunum ita mafiing talan-umbip kiita, bi-lom kawu dusiin daalokomip. Ale, dok nolin unang tunum ita isiik dusiin daa unip kiita, bi-lom kawu mafiing diim talokomip o, kala Yesus ayo kanum bokoyila ko.
MAT 20:17 Kulaa, Yesus so, daang bakaalin tunum iso, nikil iyo met abip dukum Jerusalam unum o, kalalip, un-bom ale, almi daang bakaalin tunum talangkal iyo tunum unang iipyak tem kabaku foko kulii yang kabang tiila nikil ilifin um-bomdip bokoya ko:
MAT 20:18 Kipyo, Jerusalam kaptam banum o, kalolup talabup kemin, yak aba din kawu bom ilupya, nak-tunum ma kaata, taba-lomda Dukum Ami Man Nayo, nam-bii din pris awem tunum imi kamok kamok iso, lo utamsip tunum iso, imi diim daayilala kawu, ililta weng taken-una-tala-ke-bamdip, Mep tunum kuluwaali, aalip taanak o, naka-lomdipla kawu,
MAT 20:19 nam-baalip yak Rom kayaak imi sikil diim abamniya, ita tam-ilomdip titul weng so, atafiimin weng mafak so, kiili bakap-nam-bamdiple, sok faklet ta kuluu lakatal kaap-nam-bam kebi-sinomdipla kawu, nam-bii din as diim kawu nam-tam diilip saaknila, nam-buu nam-bii din namaalip bombii am alep keliya, am asuumano diim kawu God alalta nam-folaya asuk tam tiin baalokomi no, kala Yesus ayo almi daang bakaalin tunum ilmi-kup kanum bakayila ko.
MAT 20:20 Sebedi ami kalel umi man iyo alep kemin, Jems so, Jon so, alep iyo imbii tal Yesus be tal-ilomdu katuun duung fakela daak tiin-ilom bokolu ko: Kamokim kapyo! Nali nami man kalawiili mafek mafek tangbal uta ma noyan o, kalbi akule,
MAT 20:21 Yesus ayo dik-daawa ko: Kubi nali kanimin kaata ma nop-nak o, nakan-kaabap yoko? wakale, awak usiik Yesus ami bokolu: Bom bii-lom kapni tiltam kamokim king ke-lomdap unang tunum alik imi tiin moyokomap kawu, kabi nami man tunum alep kalawiita ulelnawa, ma tal kapni tiing tuuplo tiina, ma tal awaanlo kaldangu tiina ke-lom ita dong dakaap-tam-bilipla, nikil kibi unang tunum kii tiin molin o, akule,
MAT 20:22 Yesus ayo fal-siki titalak daa tunum alap iyo itamale, almi angtiil yol kuluulokoma kaami sang uyo imi bokoyila ko: Alap kipyo! Kipni dik-dakabip kaami miit kaali, ibi talalu bam-daalin dinim; kemin, kukup mafak kayak kayak imi taba nami kup-nokomip kaali, kipkal saak nuso kuno kuluu kanolamup o, kalbip ema? yakale, boko-lomdip: Ayo, alap nuli ti kulaali kanolamup o, akipla,
MAT 20:23 Yesus ayo bokoya: Faneng kemin, ibi nami kukup mafak kaa kup-nokomip ulultap ke-lokomip. Yale, kaa nami ok tabuulin tunum ulela-lomdi kamokim ami abiin baan nami mepso bombuu uyo yim-tiilokomi dinim; kaali nami Atok God ami ok kemin alalta tunum iyo ulelsa. Kemin, im-tiilaya ita dong dakaap-nam-biliwa, unang tunum kii tiin molokomup o, kala ko.
MAT 20:24 Kanum bokoyilaya, Yesus ami daang bakaalin tunum nakalkal iyo weng sandiwa, daang bakaalin tunum alep kiimi aket atul kuyipya, aket atul dap-tiiyula,
MAT 20:25 Yesus ayo nikil iyo naan-daaya alik tal atamipla bokoya-lom: Kipyo! kipkal utamipla, Tawaal diim kalawu God ami aket kolin disa unang tunum imi kamok kamok iyo unang tunum kalaang weng kukaayim-bam ale, ilmi aket fukunin weng kaata-kup kukup mafak ayo kukaayim-bam ken-tabasip u, kalsip.
MAT 20:26 Lale, nami lak duulin ibi, kiimi kukup kaa kanun-umbip kaali, kipsiik dik-daa kuluu-lom kanumin dinim; kipni tunum ayo dok ata nita nak-tunum kusal imi tiin diim kaali, tiltam win tabin kelon o, kala namti, ali almi win kaali, kufumin dinim; balilii-kup kala-bom kaptum kusal imi minlo tem un-bom ilokoma kaata tangbal; kemin ale,
MAT 20:27 kipni tunum ayo kanta nita nita ke-lom tiltam naktum kusal imi kamokim kelila yo, kala namti, ali alik kipni unang tunum dong dakaayin tunum ke-lokoma kaata, tangbal o.
MAT 20:28 Dukum Ami Man Nali tal tawaal diim kalawu disa tal tiin bom-biliya, tunum kiita nami okok uyo kamap-nin o, kalali talsii disa; nali taldila kiita ti dukum-kup okok ke-bomdiya, unang tunum imi dong dakaayon o, kalalila talsii. Kaali, nali tal-ilomdi kuno kamboyi waasi ita nelip taanokomi kawu, unang tunum yaapkan imi iliim boyilile, kiiyo tiltam God ami man kela suunkup ilin o, kalalila talsii. Kemin, ibi nami unang tunum dong dakaayimbi ultap ke-bamdiwa yo, kala Yesus ayo kanum bakayila ko.
MAT 20:29 Yesus so, almi daang bakaalin tunum iso, iyo abip Jeriko uyo kela una-bilipla, unang tunum yaapkan iyo yak nikil imi daang baka kelip unip ko.
MAT 20:30 Una-bilipla, tunum tiin mafaknin alep ma liip balang diim kawu tiin bom-bilip iyo weng saniwa yi, Unang tunum iyo bakabip i! Yesus ayo tal-unaba no, kalbip kala kala-lomdip naan-tabamnip ko: Kamokim kapyo! Kabi kaltapni kawaalik King Devit ami man loop kemin, kabi numi olen-daaya-lom dong dokoyan o! kemiple,
MAT 20:31 tunum unang iyo taba alep imi balaayim-bam bokolip ko: Ibi duluumnin o, yakan-kaamip. Katale, tunum tiin mafaknin alep iyo ti iluut asuk dukum-kup naan-bamdip: King Devit ami man loop kamokim kapyo! kabi alep nuli olen-daaya-lom dong dokoyan o! kemip ko.
MAT 20:32 Kanumipla, Yesus ayo duluuma kawu tola-lomda naan-daayila: Ibi nali kanimin ma noyilak o, kala naap-nambip i? yakala,
MAT 20:33 alep isiik ami bokolip: Kamokim kapyo! Dong dokoyilawa, alep numi tiin kalawiiyo, baayilapla yak mafek mafek kiili, itafiimum o, kalalup naanbup o, akiwa,
MAT 20:34 Yesus ayo alep imi olen-daaya-lomda, yak imi tiin ayo sikil kuyak daa maleya kem-salale, mak fak-daalin tap alep imi tiin iyo tambal-kup keyilule kulaa, mafek mafek iyo itam Yesus aso unip ko.
MAT 21:1 Yesus daang bakaalin tunum nikil iyo tal abip dukum Jerusalam mepso tal Oliv Tikiin umi abip ma Betfage kaba talom ale, Yesus ayo almi daang bakaalin alep ma isiik fokoli uniwa yo, kala-lomda,
MAT 21:2 weng asiik duuya bokola: Ibi yak aba tam abip utafiibup kaptam tam ulip, Dongki man kasaa so, awak so, awaat iyo sok im-diilip bilip kala itam-ilom, abiltap ita-mokomip ko. Dongki awaat imi sok ayo, baa-lomdip awaat imbiilip nami bi tilip yo! Alep kanum umbaa-silipla tunum ma itama yi, Kanum talabip kalala itam dik-daaya namti, ipsiik bokola-lom: I, numi kamokim alalta kulii tilin o yakaya tulup. Kemin, kabi abiltap-siik dongki awaat kamboyilap imbi unum o, kala bokolalip kulii tilin o, kala kanum bokoya im-baala unip ko.
MAT 21:4 Kemin, sawaayak kawu God ami profet ma ayo God ami Sukon Tem kabaku dola kutii boko-lom: Ibi din abip dukum Saiyon o, kala Jerusalam kaptam ban-ilomdip abip kasel imi bokoya-lom: Di utamin a! kipni kamokim king ali kipni fanang talaba kemin ale, ali win soyap ami talemin tap ke-lomda talaba dinim. Ali dik-diiba bomdala dongki man kasaa ami daang kun diim tiinda talaba no, kalin o, kalsa. Namti kulaa ami weng bokosa uyo fan tiltam tabon e, kem-talabu ko.
MAT 21:6 Kulaa, Yesus ami daang bakaalin tunum alep iyo Yesus ami weng kaata-kup weng sandipya,
MAT 21:7 yak aba din dongki awak umi sok uyo baawa-lom, man awaat imbii tal Yesus koliwa, ilmi ilim saket ayo dilduu kutam dongki man kasaa ami daang kun diim kabaaku tabeliple, Yesus ayo tam dongki daang kun diim kabaaku tiinda una-balala,
MAT 21:8 unang tunum yaapkan imi aket fukunin uyo, king ami tala-bala fiyaap duumin kaami kukup ayo kanumin kemin, Yesus ayo kala liip talaba kemin, liip ayo tambal-kup ma dotuluwa tal-unak o, kala-lomdip ilimi ilim malo ayo dilela kulaak liip kawu taben-balale, malo ma ita liip mepso ami as tang kon bapliim so fakela kulii-talaba daak Yesus ami tal-unokoma taben-bala kebi kuteliwa, dongki ayo ilim so, as bapliim so, ami tip diim liip unak.
MAT 21:9 Kanum una-balala, unang tunum yaapkan iyo biki-kutii bon tem una-balale, unang tunum yaapkan malo ma ita daang tem lo kaptoowu kelip Yesus ata iipyak tem kawu una-bala ke-bamdiwa, fiyaap duumin dukum ke-bam ale, dukum-kup naan-bamdip: Nuli King Devit ami man loop kalaami win uyo kuluu kufolum o, kal-bom ale, Yesus kalawaali God Dukum ami win diim o, kalala talaba kemin, God ata kukup tangbal-kup kukaayim-balaya yo, kal-bomdip God ami win sakbaalim dukum ayo kuluu kufon-bamdup fiyaap duumum o, kemip ko.
MAT 21:10 Kanum una-biliwa, Yesus ayo yak aba din Jerusalam kaptam banale, abip kasel iyo alik atam-ilomdip alik maakup fanang alik tam baneyilula, fiyaap duu-bamdip yakal taba dik-daala una-tala-ke-bamdiwa bokolip ko: Kaa kawanta ni? kemipla,
MAT 21:11 unang tunum Yesus aso talabip ita aptum kusal imi bokoyip ko: Kaaye? kaali God ami profet o kala, God ami weng ku-fatap-dakamin tunum Yesus, ali Provins Galili umi abip Nasaret kaptam kayak tunum o, yikip ko.
MAT 21:12 Kemin, Yesus ayo yak aba din lotu am diilim din ula, Tunum iyo mafek mafek God ami kukaalin uyo kutal aba tam lotu am tiilip uyo kukaayim-biliple, saanbip kala kala-lom tam-ilomda, tunum alik mafek mafek kulii-talaba tam tiilip so, tunum kusnum tal saanbip so, iyo alik fotabamna sak funbi, tuumon kola una-tala-kemin tunum imi tebol ayo dak-siki ku kabaak moyale, awon abim God ami kukaalin umi kulii-tal tiilip saanin tunum imi abiin baan uyo dikela kulaaya yang aba kebi kutiiya-lom
MAT 21:13 bokoya ko: Sawaayak kawu God ayo Sukon Tem dolsip kabak boko-lomda: Nami am kaltam-ali beten kemin am o, kalokomip o, kalsa kaa, ibi God ami weng kulaa utamsip o kalsu. Yale, ibi ami weng kuuli, kuyang saak tela-lom God ami am uyo ku-mafak-dakanbip o. Am kaltam-ali ipni wan saan-bam kaptum kusal imi moni yukut inin am kelu kewinsip o, kala kanum bokoya ko.
MAT 21:14 Yesus ayo kano lotu am diilim kaptamu bom-balaya, unang tunum tiin mafak so, yawiit so, iyo Yesus ami bombe kawu din atam-yaa-bilip, yam-talal kaa-balala,
MAT 21:15 awem tunum pris o kebip imi kamok kamok so, lo utamsip tunum so, iyo Yesus ami kukup kusnum kanuba uyo utabip-kup, weng saniwa yi, Man katip katip iyo lotu am diilim kaltamu naan-bamdip bokolip ko: Kalawaali King Devit ami man loop. Kemin, ami win uta kufolum o, kalbip kala kala-lomdip tunum awem imi kamok kamok so, lo utamsip tunum so, ili Yesus ami aket atul kukaan-bam ale,
MAT 21:16 bokolip ko: Kapyo, kabi kanolin weng mafak bakabip uyo weng selap yoko? akipla Yesus ayo bokoya-lom: Kiimi weng ayo weng seli. Kemin, ili kukup mafak kebip disa. Ili God ami Sukon Tem bokosu kaata nuubip kaa boko-lomdu: God kapta man katip katip so, man unaak so, iyo kukuyilapla, kapni fiyaap duu-bam ale, kapni win uyo kufup-tan-bam ken-umbip o, kalsu. Kemin, ibi God ami weng kaa lukuuyinsu yoko? kala bokoyilala,
MAT 21:17 kamok kamok iyo lotu am diilim dukum kaptamu kamboyila tiltam daak abip abale, yak aba din abip Betani kaptamu akana ko.
MAT 21:18 Yesus aye, daang bakaalin tunum aa, nikil iyo Betani silip sintam kutim malang tem Betani ayo kela Jerusalam unum o, kalalip un-bom ale, Yesus ayo ol-tinap kelula,
MAT 21:19 utama yi, As fik al ma liip balang tem kawu tolsu kalale, yak aba yang fik lap ayo ma duk-duu ina-somdila yo, kala yang ulaya, Fik lap ayo ma abuulin dinim kon-kup be kalale, bokola ko: As kalawaali lap ayo ma asuk abuu-mokomu dinim o, kem-salale, kuyaku as fik miit ayo maak fak-daalin tap datnu ko.
MAT 21:20 Kanolaya, daang bakaalin tunum iyo utamdiwa aket alik tam baneyilula, bokolip ko: Nakayi! fik miit kaali, dok kano-lom abiltap-siik datnu ni? kemiwa,
MAT 21:21 Yesus ayo imi weng uyo bokoyila ko: Nami weng kalawuuli lukuuya-yaamin daa; ti kuyak iltipni aket tem daalalip kayi! God ami aket fukunap uyo aket alep fukunin daa. Talalu aket fukun daa; God ami kaata kanuman o, kalba, ayo yaap dong dokop-na kanu-mokomi kalokomap uyo kapkal yaap yak nami as kanoli ultap kaa kanolokomap. Kanola ti kalbi boko-lomdap: God, kabi yak amdu kulaa bildaa dabaalap yol ok kumun tem unak a! kalokomap uyo, fan kapni dik-daalap kaa God ali kanop-tokoma no.
MAT 21:22 Kapkal aket fukunawa, God ali ti dong dokop-na ami kukup kaa kanolokomi no! kalokomap namti, kabi beten ke dik-daalokomap kaata, ali fan kanop-tokoma no, yaka ko.
MAT 21:23 Yesus ayo yak aba tam Jerusalam aba-lom lotu am diilim kaami daam tem kawu tam-ilomda God ami weng kaata, unang tunum imi kukuyin-balaya, pris awem tunum imi kamok kamok sole, Juda kayaak imi kamok kamok iso, iyo tal Yesus ayo dik-daalip ko: Kapyo, kabi kawanami win diim kaata, kufo-bamdap yak kanolin kukup kala kanun-umbap i? Kabi kanta tam-baala tal-ilomdap kanolin kukup kala kanum-solap yoko? Nuyo bokoyawa, utamum o, akiwale,
MAT 21:24 Yesus asiik imi weng an-anung-daa bokoya-lomda: Na, nasiik weng ma kipni dik-daayokomi. Kemin, ibi nami weng kalu maan tiip-nip namti, aa nakal kipni weng uyo maan tiiyokomi.
MAT 21:25 Oksam ukayin tunum Jon Baptis ali kawanami win diim kaata, unang tunum iyo oksam ukayinsa ni? God ami win diim kanum-soma ne? tawaal diim kaldaak-ami tunum imi win diim kanumsa yoko? Nami weng kala dik-daayi kaata, maan tiip-niwa yo, kalale, ilmi-kup bokola una-tala-ke-bam bokolip: Kwin! nokol kaa kanimin o, kalokomup i? kemsile, Nuli boko-lom: God ami win diim kaata, kanumsa no, kalokomup namti, ali bokoya-lomda: Ibi utamiwa, God ami win diim kanumsa kalip namti, ibi kanimin o, kala, Jon ali fan God ami weng kaata tituun bakayimba, kemsip disa ema? kalokoma. Kemin, kela boko-lomdup:
MAT 21:26 Tawaal diim kalawaami tunum ami win diim kanumsa no, kalokomup kaata, unang tunum yaapkan kalawii aket fukuniwa yi, Kaa fan Jon ali God ami profet o, kala weng ku-fatap-daa bakayin tunum o, kalalip nuyo aket atul kuya yelalip o, kala nuli suunbup o, kala-lom
MAT 21:27 Yesus ami ibokola-lomdip: Kaa kanta Jon kaa bokolaya, ali taba-lom unang tunum kii oksam ukayinsa kalalup utabup dinim o, akiwale, Yesus asiik bokoya-lomda: Nakal ti kanolin kemin kawanami win diim kaata, kanolin kukup kaa kanun-umbi uyo bokoyokomi disa yo! yaka ko.
MAT 21:28 Yesus ayo kamok kamok imi bokoyila ko: Nami faldak-tiimin weng kala bokolokomi kalaali, talalu weng san-ilom ale, kawu kalok nolin aket fukunin uta ma tildang tulu kala-somdiwa kawu, kipkal bokop-nin o. Tunum ma ayo man tunum man alep kemin am ma daanule, man diil ami bokola ko: Nalmi man diil kapyo, kamala uyo din wain lang kaata dikiman o, kala bokolale,
MAT 21:29 man asiik aalap ami bokola: Nali keli no, kala biile, asuk aket fal-sikiba-kup; din wain lang dikima ko.
MAT 21:30 Kulaa, aalap ayo din man niing afung ayo atamda asuk ti fik ami bokola tap ke bokola ko. Bokolale, man asiik aalap ami weng bokola uyo bokola ko: Nata din dikimon o kala; katale, ali unoma disa, kelase no.
MAT 21:31 Kulaata nali weng ma dik-daayokomi kemin, weng san ilawa! Alap kiili niing ata ne? fik ata ne? ilmi aalap ami weng kaa weng san-silip yoko? yakala, kamok kamok isiik bokola-lomdip: Daa, fik ata aalap ami weng ayo weng selase no, akiwa, Yesus ayo bokoya ko: Nami weng kala bokoyokomi kalaali, dotu weng san iliwa! Tunum unang mafak ili fik ami kanose tap kanolokomip kaayo, takis kaamin tunum mafak iso, yak sadikimin unang so, ili ilmi aket kaata fal-siki-lomdip ita ita keliwa, kamok kamok ipta kulaak banipya, abiltap tiltam God ami miit tem talokomip. Kemin ale, aa ibi yi? Ibi tiltam God ami miit tem kaa tiltam talokomip e disa?
MAT 21:32 Kanolin kemin, siin kaali oksam ukayin tunum Jon Baptis ali tal ipni kukuyin-bam bokoya-lom: Ibi tiltam God ami miit tem talemin kaami liip kaa kano-somdiwa yo, kemsa. Lale, ibi ami weng kaa ma weng san-kaamsip dinim te! Takis kaamin tunum mafak kiiso, sadikimin unang so, ita Jon ami weng uyo weng san-somdiwa, imi aket ayo fal-siki-lomdip ilmi kukup mafak nuubip kulu kewa-lom tildang God ami lak kaata duulip kala, kalalip ibi itam-silip. Katale, ibi Jon ami weng uyo weng san kipni aket ayo fal-siki-lom ililtap kelin disa ke-lomdip, ipni kukup mafak nuubip uyo kela-lomdip, God ami lak kaata duulin dinim o, kala Yesus ayo kamok kamok imi kanum bakayila ko.
MAT 21:33 Yesus ayo asuk kamok kamok imi bokoyila ko: Nali weng kusnum ma bokoyokomi kemin, ibi talalu weng san iliwa! Tunum ma almi wain lang ma talalu kutii-lomda uti foko kela wain san ayo dikiba-kup; tuum tem kala-lomdipla, ok liip unemin dotu sok lap iyo fokolip daak uniple, yaan ta talela kutiibip-kup, ok bina-unemin uyo dotu kutii kela, lang kaptam tiin mo bom ilin tunum ami am ayo bitam asal kaptamu de kambolale, tunum wain lang tiin molokomip iyo ulela-lom bokoyila ko: Wain lap abuu tii-mokoma kaali, dakabi kutii kela tak-nuubi ok ayo laabi kutiiliwa, kaptum kusal ita tal molipla, kipta sisol ayo kuluu-lom anung ma iltipni kuluubip-kup; nakal anung kuluu kulaap-nip din unemak o, kala kamboya bilin samaan kawu una.
MAT 21:34 Kemin, wain lap abuumin umi am uyo daanula, tiin-saanin tunum iyo wain lap iyo dakamsi kutii kela yak ok ayo tuk-nuu-bam ok kaa laabi kutiilipla, aptum kusal iyo kuyip ita moliwa, kulaa wain lang kayaak ayo almi ok fukulin tunum iyo yim-baala tal wain lang tiin molin tunum imi bokoya-lom: Numi kamokim ami wain lap imi ok kaami sisol anung ata kuyilipla, nulmi kamokim ami kulela unum o, yikiwale,
MAT 21:35 kulaa wain lang tiin molin tunum iyo weng sandiwa, yak kamokim ami okok kemin tunum iyo yim-tal-fuku-lomdip, ma ata disa kiin waal biwakabi kelale, ma ata olso aalip taan-som, ma ata tuum ta binalip yak tunum ami dabom baken-bilip bom bii saakna keyip ko.
MAT 21:36 Kanolip kala kalalaya, kamokim ayo ok fukulin tunum iyo yaapkan iyo im-baala din wain lang tiin saanin tunum imi fanang din itamiwale, tiin molin iyo asuk kamasi okok kemin tunum imi tal itamip kanola yan-silip tap kuno yakal anulip taan kelip kala-somdala,
MAT 21:37 kamokim ayo weng sandala aket fukuna ko: Nali nalmi Man kalawaali dabaali din una namti, ali aalip taanokoma dinim. Ami win kaata kufon-bam ale, ami weng kaata-kup weng sanokomip o, kala kalale, mafiing diim kulaata, almi man ayo dabaala din wain lang tiin mo ilin imi bilip una.
MAT 21:38 Lale, din una wain lang tiin molin tunum iyo atam-ilomdip kulaa nikil iyo ilmi bokola una-tala-ke-lomdip bokolip: Kulawaali ti wain lang kayaak almi man kemin, bom bii-lom aalap ami taanokoma ayo, alalta aalap ami mafek mafek kaali, alik tiin mo-lom almi alik ke-lokoma kemin, aalupla taanala, wain lang kaltam ayo nulmi alik keyuk o, kala-lomdip,
MAT 21:39 yak man ayo dap-tal fuku-lom sisii dilili dibii tam uti yal foko tam daak saaklo kabaaku aalip taana kayi! kala Yesus ayo weng do ayo kanum bokoya ko.
MAT 21:40 Kemin, Yesus ayo dik-daaya-lomda: Kipyo, wain lang kayaak ami asuk talokoma kaa, ali wain lang tiin molin kii, kanimin ma noyokoma ni? Kipni aket fukunbip kaali kanimin o, kalbip? yaka-lomda Yesus ayo dik-daayilale,
MAT 21:41 kulaa kamok kamok iyo Yesus ami weng uyo maan telip ko: Kamokim ayo taba tunum mafak yam iyo yebi angtiil yol daka-bam saaknipla kawu, tiin saanin tunum kusnum iyo ulelnala ita tiltam ami wain lang kaa tiin mo-biliwa bii suunkup wain ayo abuulu kalale, wain lap wok ayo laabi aptum kusal imi kuyip ita molipla, kulaa wain lang kayaak ata imi sisol anung ayo suunkup tambal kukaalokomip o, kala kamok kamok iyo kanum bokolip ko.
MAT 21:42 Kemin, Yesus ayo bokoyila ko: Tiin molin tunum taba lang abip kayaak ami man ayo aalip taanba kiili, siin sawaayak tunum kusnum imi kukup kanu-bisip ililtap te! kala God ami Sukon Tem kaali, imi sang kaata kanum boko-lomdu: Ok fukulin tunum ili am kaa dina-bam tiyak daaliwa, Am kun ma kaali mafak kala, kala-lomdip kuluu kulaalip yak balang diim kabang abamna. Katale, kamokim ali am kun kaa atam-ilomda, Kwin! kaali ti tambal kemin am duwokop kelak o, kala-lomda am kun kaali, asuk dibii tildak dap-molaya ayo tangbal mokso ke tolnu ko. Kemin, kamokim ami kanola kulaa God alalta kemin, nuli utamuwa yi, Ami kanola kaa fan tangbal kela kayi! kala-sulup o, kalsu. Kemin, ibi kuyak tik-tii-bam utamsip. Yale, kanimin o, kalaliwa kaami miit uyo talalu utamsip disa yoko?
MAT 21:43 Kibi nami weng kala bokolokomi uyo talalu weng san iliwa. Siin kaali, God ali Juda kayaak kipni win kaa nami unang tunum o, kala-lomda, imbii tiltam nalmi miit tem daalon o, kemsa. Lale, kamala kalaali, God ali utamala, Ibi daang ukup-nip kalalaya, God asiik ibi daang ukuya-lomda, yak unang tunum kusnum kayak kayak ita ulelba-kup bokoyila ko: Ibi ti titil-fak-daa nami weng kuu weng san kutal-fukulip namti, nasiik ibi imbii tiltam nalmi miit tem daalokomi no, keba no.
MAT 21:44 [Aa, kuno ti am kun awak dukum ma bombuu. La, dok nolin tunum ata kutal daak am kun diim kaa daala namti, ayo dap-mafak-daalokoma le, am kun uyo dik-tam-daa tildaak tunum kaami angtiil diim abam-nokomu ayo, atin tunum dabuu dabaak molula, atin ti dap-mafak-daalokoma no, kala Yesus ayo almi sang kaata, faldak am kun umi diim kabak tii-lomda bakaya ko.]
MAT 21:45 Kanola pris o, kala awem tunum imi kamok kamok so, Falosi so, iyo Yesus ami faldak-tiimin weng alep kiili, weng san-somdipla utamiwa yi, Kuyak nulmi sang kaata bakayimba kala kalalipla,
MAT 21:46 sok delum o, kalip. Lale, utamipla, Unang tunum yaapkan ili aket fukun-bamdip, Yi, Yesus kaali God ami profet o, kalaliwa, fiyaap don-bilip kala kalalipya, kamok kamok iyo unang tunum imi atul uta itam-suun-daa-lom sok dedulin dinim kelip ko.
MAT 22:1 Yesus ayo asuk unang tunum imi weng ma faldak-tii bokola ko:
MAT 22:2 Ilom am ma daanula, God ayo almi unang tunum tiin molokoma kawu kamokim king kaami sang bokolon o, kalbi kalawaami kanumsa ultap kanu-mokoma no. Mep kamokim ami man ayo unang kuluulon o, kalale, ami aalap ayo: Ima kawol tapduu-bilipya, man ayo unang kuluulak o, kala-lomda, almi ok tabuulin tunum imi bokoya-lom: Unang tunum iyo naan-daayi kemin, ibi ima kaa fuu-lomdip, unang tunum iyo bokoyip tala-tala-kelipya, nuso tiin-bom ima kaa inum o, yakaya weng sanip ko.
MAT 22:3 Ima ayo fuu dotuliwa, kamokim ayo almi ok fukulin tunum imi bokoyila: Yak aba din tunum unang kamasi naan-daa-yimbip kiita bokoya-lom: Kulaata tiliwa ima inum o, kalip. Katale, unang tunum iyo tulum o, kalsip disa.
MAT 22:4 Kulaaliwa kemin, kamokim ayo asuk okok kemin tunum kusnum ma im-baala weng kulii din unang tunum iyo bokoya-lom: Nak-tunum kusal kipyo, numi kamokim ami weng kala bokoyokomup uyo weng selin! Ali boko-lomda: Nami ok fukulin tunum ita bulumaki aalap dukum dukum so, bulumaki man tambal yaapkan iso, anu duulbi kutii-lom tawobi kutal tiile, inin-inin alik iyo talalbi mikil-kup kutiilip. Kemin, kulaata tiliwa, nuso ima im-bomdup nami man ami unang kuluula ayo fiyaap duumum o, kalaya, weng ayo dibii tulup te! yikip. Katale,
MAT 22:5 tunum unang ili ti kuno kamokim ami weng kuuya uyo kuyang saak tela-lomdip kela akal almi okok e kala nuu-bala nuu-bala kemipla, tunum weng umuuyimba, ili ma ima lang uta diki-balale, ma ali din almi stuwa kawu okok ke-bala kemipla,
MAT 22:6 aptum kusal malo ita kamokim ami ok tabuulin tunum imi imtal fuku yebi anulip saaknip ko.
MAT 22:7 Kanoliwa, kamokim ayo weng sandala, ayo aket atul dukum-kup dap-telula, almi waasi dinin tunum imi im-baala din, tunum taba almi okok kamaalin tunum anubip iyo, waasi dinin isiik din aabi anubip-kup, imi abip ayo wing takayak daaya keliwale,
MAT 22:8 kulaa, almi ok fukulin tunum malii ma iyo naan-daaya tal atamip bokola: Nami ima ayo fuubi ku-mikil kebip. Yale, tunum unang ili kukup mafak kuluu-lomdip tilin disa kelip. Kemin, kiili nami ima kaa tal inam-nokomip dinim. Kemin,
MAT 22:9 ibi din abip ma ma kawu tal-une-bam unang tunum yaapkan iyo itam-ilomdip alik iyo foko kulii-tiliwa, ima ayo im-bom fiyaap duumum o, kala-lom im-baala unip.
MAT 22:10 Okok kemin tunum iyo din aba abip ma ma kawu, tal-une-bam tunum unang itamip, ayo ti mafak so, yaap so, alik kulii-tal kamokim ami am tii-tii-ke-bilip bii am alik muup-daalip ko.
MAT 22:11 Kanolipla, kamokim ayo tal, unang tunum im-taltam daalip tiinbip iyo, itafiin tal aba yang ulayi, Tunum ma ima ina-faka-bam fiyaap duumin ilim tangbal kolip uyo mikilama disa ke-lom, almi ilim mafak kaata-kup mikila tal tiinba kala kala-lomda,
MAT 22:12 kamokim ayo bokola-lomda: Naktum a! Kabi kanimin o, kala nami ilim tambal kup-ti kaa mikilin disa ke-lom tiltam talap yoko? akale, tunum kaayo, fatom-dap-telu ayo weng so ma bokolama dinim kelaya,
MAT 22:13 kamokim ayo almi okok kemin tunum imi bokoya-lomda: Kipyo, tal tunum kalawaali sikil-ang yaan-ang sok dela-lomdip, sisii dap-tama tam abip malang tikiba tem kaptam daaliwa, bomda, Kwin! kaluuso kanimin o, kala kalaba talbi yoko we? kal-bomda almi angtiil kalan amamak o, kala kamok bokoyilala kanola-silip o.
MAT 22:14 Ultap kemin, God ali unang tunum yaapkan deng saak imi bakayim-bamda: Kibi tiltam nami abip bii kalaba tiliwa yo, keba. Katale, tunum unang yaapkan ili ami weng kaa kuyang saak tii-bilipla, God ayo unang tunum iip maakup maakup ita-kup ulelnala kawu, tiltam God ami miit tem talen-tabasip o, kala Yesus ayo faldak-tiimin weng kaami miit ayo ku-fatap-daa bokoyila ko.
MAT 22:15 Kemin, Falosi iyo Yesus ami weng kaa weng san-ilomdip Yesus ayo sok dedulum o, kala-lomdip takas yang kabangu tiin, weng dil mo kasen-foko-lom weng ma dik-daalupya, weng mafak so ma bokola kala, kala-lomdup dap-tal fuku dibii din weng bakamin baan diim daalum o, kala-lomdip,
MAT 22:16 kulaali ilmi daang bakaalin tunum sole, King Herot ami ap-tunum kusal iso, iyo im-baalip din Yesus ami dik-daala bokolip ko: Kukuyin tunum kapyo, nuli titamsup, Kabi win tibin tunum so, win dinim tunum iso, ili kukup tangbal maakup uyo kukuyim-bamdaple, kabi tunum ma ami atul kaali ma suun-daa-laabap disa; kabi ti suunkup tituun-kup tabin weng kaata-kup bakayim-bam ale, God ami weng so, ami kukup kanumin o, kalba so, iyo kuluu-bomdawa, fan ti tituun weng kaata-kup unang tunum iyo kukuyim-bam kem-yaabap. Kemin,
MAT 22:17 nuli mafek mafek ma kaami sang kaata ma, dik-daap-tum o, kala-somdupla kemin (Rom kasel imi lo maakup ma uyo boko-lomdu: Ipni takis moni kaa numi King Sisa alami gavman ami kukaalin o, kalsu ale, Juda kayaak numi lo uta boko-lomdu: Ipni moni kaali, God ami kukaalin o, kala kanum boko-som kesu.) Kemin, numi takis moni kaa Sisa ami kukaalum e? God ami kukaalum e? Kapni aket fukunbap kaata bokoyilapla, nuyo utamum o, kala kanum bokolip.
MAT 22:18 Lale, Yesus ali imi aket mafak fukunbip uyo uteyila yi! Kanoluwa weng mafak ayo ma bokola kala akum o, kalbip kala kala-lomda bokoya ko: kasen-fakamin, ibi kanimin o, kalaliwa dap-kukulupla, ayo weng mafak ma bokolak i! nanbip yoko?
MAT 22:19 Takis mo-laamin moni ayo ma kulii-tiliwa, nita utam tamon o, yakaya, fan kulaa moni ayo koliwa,
MAT 22:20 utam ale, dik-daaya ko: Yak tuumon diim kabak-ali sinik so, win so kala bom-bilip kii, kawanmi sinik sole, win so, kiita bom-bilip i? yakale,
MAT 22:21 isiik Yesus weng maan telip. Kaye? Sisa ami sinik so, win so, kiita no, kaliwa, Yesus asiik bokola: Uyo kanolin kemin, tuumon kalawaali Rom kasel King Sisa ami tuumon kemin, Rom kasel imi gavman almi kukaan-bam ale, God ami mafek mafek kaata, kuno God ami kukaan-bam kemin o, yakale,
MAT 22:22 isiik weng san-ilomdip Yesus ami weng kaali, akal alik ma bokola no, kala-lomdip, imi aket fanang alik tambaneyu, Yesus ayo kambola tabanip ko.
MAT 22:23 Juda imi kamok kamok malo ma kiili, Sadusi yo, ken-umbip iyo boko-lomdip: Unang tunum taansip kiili, asuk tam tiinokomip disa yo, ken-umbip. Kemin, Sadusi malo ma iyo (din Yesus ami dik-dakamin kaa fiitmin dukum ma dik-daaluwa, ami miit kaali talalu daka-daa bokoyin disa kela namti, unang tunum iyo aban-delik i! kalalipla) tal Yesus ami bokolip:
MAT 22:24 Kukuyin tunum, kapyo! Nuli weng ma dik-daap-tum o, kalup. Kemin ale, sawaayak kawu, Moses ata God ami lo ayo numi kuyinsa umi anung kaa boko-lomdu: Tunum ali tunum man ma foko tiilin dinim ke ilomda saaka-lom kalel kutiila namti, niing alta asuk fik ami kaluun uta kuluula akam imi tunum man kuulokomip kaali ali boko-lomda: Kabi nami abaap ami man kayi! aka-lomda kamasi fik taanse ami bung mafek mafek uyo mep man kuula ami kukaalak o, kalsu. Kemin ale,
MAT 22:25 uyo weng san bom-ilawa, sawaayak kawu tunum ma nuso bom biisa ata, man tunum man fetkal foko tiilaya, nikil ti alik maakup tal aba tam fasuu tiile, kulaa fik diil asiik unang kuluula, ilom man so ma foko tiilama dinim ke, taanale, fik almi tamon ata taba fik kalel kaluun uyo kuluula. Katale,
MAT 22:26 akal ti kuno man so ma foko tiilama dinim, kela taanale, imi nakal kuno niing iip ma ata fakal imi kaluun uyo kuluula. Kata ti kanumin-kup kem-umbi-lom imi nakal kiiso nikil alik maakup maakup iyo man so ma foko tiilin dinim ke-lom,
MAT 22:27 alik kuliila tabiwa, atin mafiing mafiing kulaa unang ukol kuno taan kesu no.
MAT 22:28 Na! kapni aket fukunbap kaa bokoyan aa! Tunum nikil fetkal alik kiili, unang maakup kuuta-kup kuluu biile, taan-taan-kesip. Kemin, bom-bi-lom tunum taansip imi tam tiin kawang ke-lokomip kaali, unang kuuta kawanmi kalel ke-lokomu ni? kala, Sadusi iyo Yesus ami dik-daaliple,
MAT 22:29 Yesus asiik imi weng maan tiiya bokoya-lom: Ibi God ami Sukon Tem Weng kaali, talalu ma kaal kelin disa kesip kemin, God kaali, titil soyim o, kaa kalin dinim kesip. Kemin, ibi ti aket mafak-kup fukun-unbip o.
MAT 22:30 Weng san bom iliwa! Ilom am ma daanokomu kaali, unang tunum taansip kiili asuk tam tiin tam God ami abip suunkup ilokomip uyo, unang dan kaa-bala, tunum dan kaa-bala, ke-mokomip disa; kiili tiltam akal alik ke-lomdip abiil kayaak ensel ililtap ke-lokomip te!
MAT 22:31 Kemin, kipni weng kaa boko-lomdip: Tunum unang taansip iyo atin taan maaklo kesip kemin, God ali ma iyo im-fola tam tiinokomip disa yo, ken-umbip kaami sang kaata bokoyon o, kalaliya kemin, tunum taansip imi asuk tam tiin-yaa-mokomip kaami sang kaali, God alta bokoya, yak almi Sukon Tem kabak dola kutiiliwa ibi tik-tiin-umbip. La, ibi talalu ma utamsip disa. Ali boko-lomda:
MAT 22:32 Nali Abraham so, almi man Aisak so, almi man loop Jekop inang alimal imi God namti kalabi no, kala sawaayak tunum taansip imi sang kaa kanum bokosa. Kemin, unang tunum iyo taan-ilom maaklo kelip namti, God ayo imi tiin molama disa. La, unang tunum iyo taan-ilom maaklo kemin dinim. Kemin ti, tunum taandip din God ami diim kawu suunkup laabip isole, tunum tiin kawang bom-bilip iso, kiita tiin mosa. (God ami weng kaa Moses ami bokonsa kaami miit kaa dok ata naa kalolip: Abraham alimal ili sawaayak kawu saaksip. La, fan God ami tiin diim ayo ti bom-bilip kala kalalaya, alimal kii tiin mo-bomdaya, boko-lom: Nali alimal imi God namti kalabi no, kalsa) kayi kala Yesus ayo imi weng uyo maan tiiya ko.
MAT 22:33 Unang tunum yaapkan iyo Yesus ami weng kukuyim-bam bakayimba uyo weng sandiwa, fanang alik tambanula aket dukum fukunip ko.
MAT 22:34 Sadusi iyo Yesus ami kanum bokola uyo weng san-somdiwa, ami weng kaa maan telokomup dinim o, kalalip weng so ma bokolalip dinim. Duluuma tiinip kala, kalale, kulaa Falosi yakal tala-tala-ke weng dil mo kutii kulaa kela
MAT 22:35 nikil ilmi iipyak tem kulu lo utamsa tunum ma tiltam bokola: Nita iboko kasen-fakamin weng ma Yesus ami dik-daala utami ya, Ayo weng mafak aye ma bokola kala kalon o, kala-lomda,
MAT 22:36 Yesus ami dik-daala ko: Kukuyin tunum kapyo, God ami Sukon Tem Lo bombuu kabak-ali kalok nolin kaata ti diildiil dukum buu ni? akale,
MAT 22:37 Yesus asiik bokola: Kabi ti ami aket kaali, atuk atuk ke-laamin disa; kapni aket aa, fanang aa, tiin aa, kiili, alik kulaalap yak God Dukum ami diim abamnip, ami aket-kup kolan o, kalsu namti kaa bombuu.
MAT 22:38 God ami lo kuuli, win sokan dukum kemin, uta uta ke-lom lo malo kuliili, kulaak banip keyinsa no.
MAT 22:39 Aa, God ami lo ma ukol ti ultap uli boko-lomdu: Kabi kaltapni angtiil aket duu-lom, tiin saan-umbap tap ke, kaptum kusal so, kayak kayak so, imi aket kuyale, tiin saanin o, kalsu kemin,
MAT 22:40 lo alep kalawiita diildiil dukum o. God ami Lo alik Moses ata dolsa so, God ami weng ku-fatap-daa bakamin almi profet kuyila dolsip iso, kaami miit kaali, lo alep kiita kayi! yaka ko.
MAT 22:41 Yesus ayo utamaya, Falosi yaapkan iyo tal tiinaabip kala kalale, dik-daayila ko:
MAT 22:42 Ibi God ami uldaa-dabuula tiltam kamokim kesa tunum Kraist o, kalbip kaa kawanta ni? Ali kawanmi man loop tip-tiila kaptoop bansu umi tunum i? kalale, isiik bokolip ko: Kaali King Devit ami man loop o, akiwa,
MAT 22:43 Yesus asiik bokoya-lomda: Siin sawaayak, God ulduula tiltam kamokim kesa tunum ayo dabaala tal tawaal diim kalawaali tilin dinim ilala, God ami Sinik Tambal kaata, almi aket fukunin kaayo, King Devit ami kolaya, akal boko-lomda: God Dukum ata nami Kamokim ami bokola-lomda: Kapyo, tal aba yang nalmi sikil ting tuuplo kamokim ami tiin-yaamin baan diim kaldaaku tiin-balapla, bii-lom nata nata kelila kawu, kapni waasi iyo kabaak banip kamboyi kalalawa kawu, kii kapta tiin molokomap o, kala God ayo bokonsa no, kala Devit ata bokosa. Devit ali kanimin o, kalalaya, kaali nami Kamokim o, kalsa yoko?
MAT 22:45 Kiwe, God ami uldaa-dabuula tiltam kamokim kesa kaa kawanmi man i? Devit ami aket kaa fanang daalaya, Am ma daanokomu kaali, ilom kaptoowu nalmi man loop ata ma tiltam tabokoma kala, kalalala kaami aket kaata fanang daalaya, bokosa dinam kabak boko-lomda: Kaa nami Kamokim o, kaloma disa yo. Devit ali kalok nolin aket kaaso, fanang-daa boko-lomda: Kaa nami Kamokim o, kalsa ni? kala Yesus ayo Falosi imi dik-daaya ko.
MAT 22:46 Kanolin kemin, tunum ayo ma taang-kala-somdala, Yesus ami kanum bokola uyo nusiik maan telokomup dinim o, kala-lomdip weng so ma bokolin dinim kelip. Ti am kulu daanba kuyaku kamok kamok alik iyo Yesus ami weng kun tabin kaata suun-daa-lomdip maso ma dik-daalum o kalolip dinim kela unip ko.
MAT 23:1 Yesus ayo almi daang bakaalin tunum iso, unang tunum yaapkan iso, imi bokoya-lomda:
MAT 23:2 Lo utamsip tunum so, Falosi iso, ita God ami Lo Moses ata dola kutiisa uta kukuyila-yaabip
MAT 23:3 kiimi taba, ipni kukuyin-bam ale, weng bakayim-bam kem-laabip uyo ti tangbal-kup weng san-kaa-bam kutal-fuku-biliwa yo, kala-somla ko. Lale, ili God ami Lo ipni kukuyila-yaabip uyo, yakal weng san-kaa-bam kanun-umbip disa. Weng kuyang saak tiin-tabasip kemin, ibi imi kukup kanubip kaaltap kaa kuuta fukumin daa yo.
MAT 23:4 Kanola iyo mafek mafek uluum tabin kaali, kuluu kuyak tunum imi nakal kun diim kawu tiiya-lomdip imi dong dokoyum o, kala-aamin disa yo.
MAT 23:5 Kiilile, numi kukup uta kanu-bulupla, tunum unang ita itamdiwa numi win ayo kufuyik o, kalalipla, kanun-umbip o. Imi kukup kanun-umbip kaali, God ami Sukon Tem weng uyo boko-lomdu: Ibi God ami weng anung ma sukon diim kabaku dola kutii-lom ang-de-lom kuyak iltipni dabal kun diim so, biti kun diim so, kabaku kuyak daa bom tal-une-bamdip yo, kalsu. Lale, kamok kamok iyo ang aalap dukum dinabi kuyak ilmi dabal kun diim so, biti kun diim so, kawu dinabi kulii-tal-une-bam laabip aa, ti kuno ilmi ilim matum-matum ayo kiit kon yaapkan kuyak dakabi tal-unen-umbip o.
MAT 23:6 Kamok kamok kiimi din tunum kamokim ma aso ima inum o, kalokomip kaa, ili yak aba din ti abiin tangbal kamokim ami mepso kulu tiin-yaamum o, kal-bom ale, yak aba din lotu am unokomip kakal ti, kanola kamok kamok imi abiin baan tambal kawu tiinupla, unang tunum ita nuyo itafii-bamdipla, numi win ayo kufuyik o, kala kanu-bam kem-yaabip o.
MAT 23:7 Kanu-bam ale ma kaali, yak aba din ima saanin maket baan diim kaba unupla, unang tunum ita kamok kamok imi kanolin kukup kaata kuluu-lomdip weng umkaayim-bam, imi bakayim-bamdip: Kibi God ami Lo kukuyin tunum namti kaa bilip o, kemik o, kal-bomdiwa, kanu-bam ken-umbip o.
MAT 23:8 Nimi daang bakaalin ibi, kamok kamok imi kukup kanubip kaaltap kaa kutal-fukumin daa yo. Nami daang bakaalin tunum kipni kukuyin tunum kii yaapkan disa; ti maakup nata-kup kemin, ibi ma ata win tibin ke tam bana, ma ata win dinim ke kabaak bana kelin disa. Nikil tikip alik maakup kunolin altap altap ke-bomdip bom-bilip kemin, unang tunum iyo itam-ilom, U, kiili fan kukuyin tunum o, kal-bom kipni win kaa kufuyokomip daa yo, kala-somla ko.
MAT 23:9 Kanolin tap kemin, kipni God kaali yaapkan disa. Ipni Kaalap abiil tikiin kayaak God kulaa ti maakup kaata-kup kemin, tawaal diim kalawaali ipkal tunum ma ata kamokim o, kalalip, kaali numi atok o, kal-bom ami win kaa kufolin daa yo.
MAT 23:10 Ultap kemin, ti nata-kup, God ata uldaa-nam-buula tiltam kamokim kesi tunum kaali ti nalta-kup kemin, kabi kaptum kusal iyo bokop-ta-lomdip: Kamokim o, takan-kaa-bam kapni win uyo kufup-tin disa yo, kala-somla ko.
MAT 23:11 Kabak-ali ti atin kanumin dinim ko. Kipni iipyak tem kaptam-ali kanta ma kamokim namti, ali disa kipni masiim dong dakaayin tunum namti kaa bombe.
MAT 23:12 Dok nolin tunum ita ilmi win ayo kufu-bamdip: Nuli win tabin dukum o, kemip namti, kiilile bom bii-lom God ayo bokoya-lomda: Kanumin tunum ibi nami tiin diim kaali, ibi kabaak banipla ibi win dinim o, yokokoma. Ale, tunum kawanta ilmi win ayo kufumin dinim, ti aptum kusal imi disa kulu dong dakaayip namti, bii-lom kaptoop ali God ayo kanolin tunum kiimi win ayo kufoya bokoya-lomda: Nami tiin diim uyo ibi win dukum o, yokokoma no, kala Yesus ayo kanum bakayila ko.
MAT 23:13 Yesus ayo asuk lo utamsip tunum so, Falosi iso, imi bokoya-lomda: Lo utamsip tunum aa, Falosi ipyo, weng selin! Ibi ti kasen kasenmin kukup kaata-kup kutal-fukulin tunum kipyo! Unang tunum ili tiltam God ami miit tem tulum o, kal-bilipya ipta bokoya-lomdip: Daa, kamasi ibi kaa numi weng sawaa yaapkan kalawasiik kutal-fuku-somdiwa yo, yakan-kan-tabasip. Ipkal tam God ami miit tem ayo yang unemin disa bomdiwa, kemin ale, kipkal unang tunum God ami miit tem unum o, kalbip imi liip uyo bak-daaya-yaabip. Kemin, am ma daanokomu uyo kaami kalan kaata God ayo ibi angtiil yol awak uyo kukaayokoma kayi! Kemin, kabak ali talalu utafii-bamdiwa yo!
MAT 23:14 [Lo utamsip tunum so, Falosi so, ibi kasen-fakamin kukup kutal fukulin tunum yam kemin, ibi unang kaluun imi kasen-fakayin-bamdipla imi am sin-yaamin uyo bukuuyipla, iyo am dinim mafek mafek dinim ke-bam ken-umbip o. Kanolin kukup mafak mafak kulaa kanubip. Katale, ibi unang tunum imi tiin diim ayo kasen-foko God ami beten kaman-bulupla, unang tunum kiita, itam-ilomdip numi tong uta bakamin o, kalalip beten batbat ayo ken-laabip. Kata, ilom am am daanokomu kawu, kaami kalan kaata, God ayo ibi atin ti angtiil yol dukum kaa kukaayokoma te!]
MAT 23:15 Kemin, lo utamsip tunum so, Falosi so, ibi kasen-fakamin kukup kaata, kutal-fukulin tunum kemin, ibi boko-lomdip: Tunum unang kusnum kayak kayak ili aket fal-siki-lom Juda kasel numi kukup uta kutal-fuku tabuulin o, kalalipla, ibi tawaal liip e bot tem liip e unbilin abip kusnum kusnum kawu, weng kalawaali bakayila-tal-unen-umbip. Tunum ayo ma kipni weng kaata, weng san ami aket ayo fal-siki-lom ipni daang bakaalin tunum kela namti, kipta kukon-biliwa, akal ti kukup mafak ayo kanu-bala, bii kipni kukup mafak uyo kulaak banu, ami kukup mafak uta tam kaltoop ban-ilom dukum ke-lokomu no. Am ma daanokomu kaali, kabak-ami kalan kaata ipso, aso, alik ibi din abip mafak unipla, God ayo angtiil yol dukum uyo kukaayokoma ko.
MAT 23:16 Ibi tiin fiim ililtap. Ibi taang-kala liip din God ami abip unemin uyo tunum unang kii kukuya-yaabip disa. Kamok kamok ibi boko-lom: Kabi kaptum ami diim kawu weng kuku-daala-lomdi kanolokomi no, akokomap kaali, God ami lotu am diildiil win diim uta kufo-lomdap, kapni weng uyo ku-titil molap namti, kapni weng kuka-daalap kuumi lolokomap kulaali weng dinim o, kalokomip. Lale, kapni kaptum ami diim weng kuka-daalokomap kaali, gol kuluu kabas talalu kutii-lom God ami lotu am tiisip umi win diim tii kufo-lomdap kapni weng ayo ku-titil molap namti, kapni weng kutiilap umi lolokomap, kaali atin mafak o kalokomip. Kapkal kuu kutal fukulokomap o, kal-bom kukuyila-yaabip. Ilom kaali, ipni kanumin kukup mafak kaa kukuya-tabasip kaami kalan kaata, God alalta angtiil yol awak uyo kukaayokoma.
MAT 23:17 Lale, ibi kanolin umi weng miit dinim kaa kanimin o, kala bakabip? Lotu am diildiil kaa God ami am awem uta win sokan ale, am uta uta ke-lomdula, kabas aye, bung am kaptam bombe kiili, win katip kemin, iyo kulaak banin ko. Ibi tiin fiim tap ke babon bi tiinaasip utamdula kemin, kanolin weng kala bakan-umbip te!
MAT 23:18 Aa ti ma kaa, ibi boko-lom: Kabi kaptum ami diim kawu weng dap-tii kanolokomi no, kalokomap uyo fuumin baan diim mafek mafek fuubi God ami kukaalin umi win diim uta kufo-lomdap kapni weng ayo ku-titil molap namti, kapni weng kuka-daalap umi lolokomap kulaa weng dinim o, kalokomip. Lale, yak kapni kaptum ami diim kawu weng kuka-daalokomap kaata, mafek mafek olti tuum kom diim kabaaku as kiinba umi win diim ata kufo-lomdap kapni weng ku-titil molap namti, kapni weng kuka-daabap umi lolokomap kaa mafak o kalokomip. Kapkal kuu kutal-fukulokomap kayi! kal-bom kukuyila-yaabap. Kemin, ilom am ma daanokomu kaali, ipni kanumin kukup mafak kaa kukuyila-tabasip kuumi kalan kaata, God kaa angtiil yol dukum kukaayokoma.
MAT 23:19 Kata, ibi kanolin weng miit dinim weng kaa kanimin o, kalalip bakabip yoko? Fuumin baan kulaali, mafek mafek God ami kukaalin umi baan diim ale, win so kemin, akuum kabaak-ata uta uta ke-lomdula, mafek mafek olti tuum kom diim as kiinba umi win katip kemin, ita kulaak banu kewunsu. Ibi tiin bokol tap kesip. Kemin, utamdula mep kanolin weng kaa bakan-yaabip.
MAT 23:20 Lotu am diildiil umi fuumin baan diim so, mafek mafek olti fuumin baan diim bombuu so, iyo alep kano ti God ami no. Tunum ayo taba nalmi weng uyo ku-titil molon o, kala-lom fuumin baan diim umi win uta kufolokoma namti, kaali mafek mafek olti tuum kom diim as kiinba umi win kaaso, kufolala, ami weng uyo ku-titil molokomu no.
MAT 23:21 Ultap kemin, lotu am diildiil kaali, God ami am kemin, tunum ayo ma lotu am diildiil umi win uta kufola namti, God ali kaptam bombe kemin, ami win kaaso kufolokoma namti kabak buu no.
MAT 23:22 God kaali abiil tikiin kayaak kemin, tunum ali abiil tikiin umi win uta kufola namti, kaa God ami abiin tiinba kaami win kaaso, God almi win awem so, dafolokoma namti kaabuu.
MAT 23:23 Kemin, lo utamsip tunum so, Falosi so, ibi kasen-fakamin kukup kaata kutal-fukulin tunum kemin, ibi inin-inin atul katip katip aye, kuut aa, maang aa iyo bakela kutii kutii kebi sikip nakalkal ma keliple, baan maakup kulaata, God ami kukaala-yaabip. Ultap kemin, ibi God ami Lo kutal-fuku mafek mafek win dinim umi aket kiita-kup yan-bulula kanum-laabip. Katale, Lo umi mafek mafek win sokan dukum umi aket utale, lukuuyila kela-laabip. Kemin, ibi kaptum kusal kii alik maakup kukup tambal kaata-kup kukaayim-bam ale, aptum kusal iyo olen-daaya dong dakaayin-bam, kaptum kusal iyo ti tituun-weng-kup bakayim-bam kemin, ibi umi aket kaa lukuuyila kela-laabip. Kemin, God ali ipni fiyaap kaa duuba dinim kemin, ilom am ma daanula kawu, kaami kalan kaata, God ayo angtiil yol kukaayokoma. Kipni mafek mafek sikip fak-tiimsi sikip nakalkal kelule, sikip ma kaata God ami kukaala-laabip kulaa, tambal. Ya, yak kukup tangbal win so kaso kanu-mokomap kaata, yaap.
MAT 23:24 Kemin, ibi ti tiin fiim ililtap kemin, aptum ami liip ayo kukolokomip dinim o. Kanolin kemin, kamok kamok ibi tunum unang iyo kukup tangbal so ma kukuyila-yaabip disa; ibi weng sawaa katip katip uta kutal-fuku-lom ale, yak Lo dukum utale, kutal-fukumin dinim. Ibi tunum kalawaami sang bokoyokomi kaali, kalanolin o. Tunum ayo ok inamnon o, kala titoop daalaya, ami ok ket tem kaptoop ali wol balang ma tal aba toop saakba kala, kala-lomda kulaa kela ok ayo sing daala tiil-banu kela-somdala, kuno kamel kaa kang dukum kemin tal ok ket tem kabaaku daak ilom taanba ayo atamin disa ke-lomda, ok ku-mafak-daaba kulaaso maaklo inase no.
MAT 23:25 Kanola lo utamsip tunum so, Falosi so, ibi kukup alep fukumin tunum kemin, ibi kabas so, kap so, iyo disa tiltam saaklo kuliita-kup, diinga-laabip. Ya, am lo kabaak-ali diinga-laabip disa; kabaak-ali ninak so kela-laabip. Aa kuno ti, ibi mafek mafek kaa ti nulmi-kup kelum o, kal-bomdipla, aptum kusal imi mafek mafek uta yukut dakaayim-bam ale, saak-kup dik-dakaayim-bilip, aptum kusal imi mafek mafek uyo kukaayim-bam, kem-laabip. Ipni iipyak tem kabak-ali ninak ta taba yam-mafak-daasu. Kemin, am ma daanokomu uyo, kaami kalan kaata, God ayo angtiil yol uyo kukaayokoma.
MAT 23:26 Falosi ibi tunum tiin fiim ililtap kemin, ibi kap so, kabas so, imi tem kabaak asiik diingbip-kup, tiltam saaklo kaakal kuno ninak dinim tangbal-kup ke-lokomu no. Ultap kemin, ipni aket fukunin mafak uyo kela-lomdip aket fal-kel-nokomip kaata, kipni kukup kaakal ti tambal-kup ke-lokomu no.
MAT 23:27 Yak lo utamsip tunum so, Falosi iso, kibi kukup alep kiita-kup kutal-fukulin tunum kemin, ibi kom tem ultap o. Tip kultam-ata atin ti tambal-kup dotusip. La, iipyak tem kabaak-ali tunum imi tiil so, kun so, kiili foma-lomdu tang mafak kutam dakaba, kabaak-ali tunum unang kii talalu utam-laabip dinim o.
MAT 23:28 Kanolin ultap kemin, tunum unang ili kibi itamipya, Ibi tituun-kup tunum o, kala-laabip. Yale, ipni iipyak tem kabak-ali iltipni kukup alep fukumin so, kukup mafak kusnum so uta taba-lomdu yam-mafak-daasu. Kemin, bom bii kaali, kaami kalan kaata, God ayo angtiil yol kukaayokoma kayi! kala Yesus ayo lo utamsip tunum so, Falosi so, imi kanum bakayila ko.
MAT 23:29 Yesus ayo kamok kamok imi asuk bokoyila ko: Lo utamsip tunum so, Falosi iso, ibi kukup alep kiita kutal-fukulin tunum kemin, kipni kawil-fakal ita God ami weng ku-fatap-dakamin tunum profet iso, tituun-kup tabasip tunum kusnum iso, ili yan fakabi imbii din bal-kaamsip imi dabom diim ayo kipta tambal-nuk o, kala-lomdip, tuum ayo kulii-tal maltii-bam ale, ilakan-tal-une-bam as tes san ayo diki-yin-bam ke-bamdipla,
MAT 23:30 boko-lom: Nuli sawaayak ayo nuso, numi awil-fakal iso, maakup bom ilomduwa dinam, numi awal imi God ami weng ku-fatap-dakamin tunum profet anulip taansip tap nokol kanola dinam kano-sulup dinim o, kemip ko.
MAT 23:31 Kipni kanum bakabip kaali boko-lom: Nuli God ami profet anulip saaksip imi man loop ali kala-bulup o, kebip kaali, tifaneng ibi ililtap.
MAT 23:32 Kamosinim kaptoop ali kipni kawil-fakal ili kanolin kukup mafak kiita kutal-fukulipla, tiknuk o. Kemin, ilom kaami kalan kaata, God ayo angtiil yol ayo kukaayokoma.
MAT 23:33 Inap mafak ta taba tunum iyo ye-bam yam-mafak-dakan-umbip ililtap ipsole, iltipni kawil-fakal iso, ipta taba-bom tunum iyo yam-mafak-dakan-umbip. Kemin, ilom am ma daanokomu kaali, kaami kalan kaata God ayo fokola din as kiinin abip mafak suunkup kiin-bam ilin kawu kiin-bam ilokomip. Kipni aket ayo wakadaa din tangbal ilokomup aa, kemin daa. Tifan ti ibi din as kiinin abip une-mokomip te!
MAT 23:34 Nami weng kala bokoyokomi kalawaali weng san iliwa. Nami profet so, weng miit utamsip tunum so, mep kukuyin tunum iso, iyo im-baali din ipni bilip kawu unokomip. Lale, nami utabi uyo, kipta taba malo ma anulip taaniple, kuno malo ma ita anu im-bak as diim kawu im-dii-lom ye-bam ale, malo iyo imbii din lotu am kawu biwaka-bam ale, malo ma dabak tiiya yak aba din abip ma ma kawu, une-bam ke-mokomip o, kebi. Kemin,
MAT 23:35 kanu-mokomip kabaku God namti kawu angtiil yol uyo kuyokoma. Sawaayak kamasi kaptoowu kulii umbital kala diilu kaa kipni kawil-fakal ita taba-lomdip tituun-kup tabin tunum kii, yem-tabasip. Kamosinim diildiil kaali, Ken asiik almi niing tangbal Ebel ayo aala taanala, kuyaku iluu-lomdu, God ami okok kemin tunum iyo kuyaku yan yakyak kulii umbital kulaa diila iltipni kawil-fakal ita Berekia ami man Sekaraya ayo din God ami am diildiil kaldak ale, mafek mafek fuu-bilip kiin tabemin baan diim kabak umi iip iip kabaaku tolnaya aaliwa, taansa. Kemin, God alalta kipni kawil-fakal imi ban wakamin kaaso, mep iltipni ban wakamin so, kaami kalan kaata kuyak-kuyak ke-lomdala, God ayo angtiil yol kaa ibi kuyokoma ko.
MAT 23:36 Nali tituun weng asuk bokoyokomi. God alalta alik kipni kawil-fakal imi ban wakamin kaami kalan kaata, tunum kamala kulu bom-bilip kipni kuyokoma no, kala, Yesus ayo lo utamsip tunum so, Falosi iso, imi kanum bakayila ko.
MAT 23:37 Yesus ayo Jerusalam kasel imi aket fanang daa-lomda aket uluum kelula, unang tunum imi bokoya-lomda: Jerusalam kasel kipyo, God ami profet iyo ye-bilip taan-yaa-bam ale, God almi daang bakaalin tunum yim-baala tal-tal ken-umbip iyo tuum-ta-kup binalip yak aba ye-bilip taan-laa-bala kem-tabasip. Lale, nali awon awak umi man foko-lom ulmi bal kun tem tii katii-yimbu tap o. Am yaapkan daa n tiltam taba tal-unum kemu kaali, nali alik ibi imbii tildang daa nalmi sikil ta uti foko yam am daalon o, kala-laabi. Lale, kep-na-laabip kemin, kanun-umbi dinim o.
MAT 23:38 Kipyo, kanola daang ukup-nip kemin, God asiik ipni daang ukuyale, waasi iyo kuno kamboya taldip kipni abip so, lotu am diildiil so, iyo yam-mafak-daaliwa, unang tunum alik iyo ilmi abip ayo kambolalip wakadaa sak funbi una-tala-ke-lokomip. Kemin, maso kaptam ilokomip dinim o.
MAT 23:39 Nali ti fan tituun weng kaata bokoyokomi kaali, ibi maso ma nitamin daa; bom-bilip bii iltipta boko-lomdip: Numi kamokim kalawaali God kapni win diim tala kemin, kabi kukup tambal kaata-kup kukaan-balapla yo, ke-mokomip kawu nita-mokomip kayi! kala Yesus ayo kanum bakayila ko.
MAT 24:1 Yesus ayo lotu am diildiil ayo kela unon o, kemale, kulaa almi daang bakaalin iyo tal bokolip ko: Kamokim kapyo, tiyak am tambal kala atam taman o, akiwa,
MAT 24:2 Yesus asiik bokoya-lomda: Kamala kulaata, tiyak daa tuum kuyak tip-tip ke-lom am tangbal desip kaa utafiibip. Yale, nami weng kala bokoyokomi kaali, talalu weng selin! Bom bii-lom kaali, waasi tunum ita tal am kalawaali alik balata kutii-lom tuum kuyak tip tip-bam miltiin-unsip uyo dekela dabuulip daak abamnu bii disa ke, disa akal almi kulu bala bala ke-lokomu no, yaka ko.
MAT 24:3 Yesus so, almi daang bakaalin tunum iso, ilakis yak aba tam Oliv Tikiin kawu Yesus ayo tiinale, almi daang bakaalin tunum iyo tala-tala-ke-lom dik-daalip: Kamokim kapyo, dok kanumin diim kawu waasi iyo tal lotu am diildiil ayo balat-nokomip i? Kalok nolin kukup kaasiik tiltam tuluya utam, Awu, kulaali kapni asuk talapla, tawaal disa ke-lokomu namti kulu mep tulu kala uta-mokomup yoko? akiwale,
MAT 24:4 Yesus asiik nikil imi bokoyila ko: Talalu utafii-bamdiwa yi! Kasen-fakayin tunum kiimi weng kaa, weng san-kaamin daa yo.
MAT 24:5 Tunum yaapkan iyo tal-ilomdip, nami win uta kuluu-lom boko-lomdip: Nali God ami uldaa-nam-buula tiltam kamokim kesi tunum Kraist o, tal kala una-una-ke-bilipla, unang tunum yaapkan iyo imi weng kaali tifan o, kala weng san yang banokomip. Kata, ibi imi weng kaali, Fan o, kala weng san-kaamin daa yo.
MAT 24:6 Ibi weng seliwa! Tunum miit ma iyo kaa din daalip, tunum miit ma iso waasi din-biliple, am waasi umi ukduu dinan-tal-une-bala kemip uyo dukum-nokomip kawu, ibi am mafiing daan tiltam tulu no, kalalip aket kufoyu kaa suunin daa; kanolin kukup kusiik tiltam tabokomu. Yale, uyo kanum tala-buluya, kuyaku abiltap am mafiing diim ayo daan tiltam tabokomu disa kayi!
MAT 24:7 Am bokon ma kaptam kasel iyo bokon kusnum ma kasel iso din-biliwale, kuno king kusnum ma ami tunum tiin moba ita taba-lomdip yak king kusnum ma ami tunum tiin mosa iso, din-biliple, kuno am bokon yaapkan kawu ima tinap, ol fut am daan tiltam aba-tala-bulule, bim ayo taltam taba-taba balala ke-mokoma. Lale,
MAT 24:8 angtiil yol kaa kaa-mokomip kaata-kup, kuluu-laa-mokomip disa; uyo tal-unula, asuk mafiing kaptoowu angtiil yol yaapkan yaapkan tiltam aba talun-talun kebii, disa kelula, kawu am mafiing am uyo tiltam talokomu ko.
MAT 24:9 Ibi nami lak duu-bomdip nami ok kaata fuku-bom-bilip kemin, kaami kalan kaata abip ma ma kiimi tunum yaapkan ita ibi aket atul kukaayim-bam ale, iyo itam suun-bamdip yim-tal fukule, sok de-yimbii din kamok kamok imi diim daayiwa kamok kamok ilmi tunum ita anulip taan-yaa-mokomip o.
MAT 24:10 Kanum tiltam tabam-nokomu kuyaku, nami lak duulin tunum yaapkan iyo nami daang bakaalin iyo kep-na-lomdip, daang ukup-na ilmi kayaak nami lak suunkup duu-bom-bilip imi waasi keyila itam fanan-bam yim-baalip din waasi imi sikil diim abe-mokomip.
MAT 24:11 Bom bii-lom kaali, ibakamin tunum yaapkan iyo tal boko-lom: Yi, nuli God ami profet o, yakan-kaabip. Kemin, tunum unang yaapkan iyo imi kasen-fakamin weng kaata weng san ale yang aba une-mokomip.
MAT 24:12 Kemin, kanolin kukup kanu-mokomip kabaku, tunum unang yaapkan imi kukup mafak uyo sakbaalim dukum ke-bilipla, Kristen unang tunum yaapkan iyo imi aptum kusal aket kukaayin uta da katip katip kem toop dinim-nokomu.
MAT 24:13 Lale, nami lak duulin unang tunum ili, kanta angtiil yol uyo daka-bamdip kulaa yang banemin dinim; suunkup nami lak kaata, dukum-kup titil-biki-bom bilip taaniwa kawu, kiita God alalta yim-tama tam almi suunkup ilin abip kawu daalala, suunkup ilokomip.
MAT 24:14 Kemin, nami unang tunum ibi yak aba din tawaal kala bombu kaami abip ma ma uyo tal-une-bamdip unang tunum alik imi bakayim-bamdip: Yesus ali taan-ilomda kipni iliim boyase. Kemin, ipni aket kaa fal-siki Yesus ami lak duuliwa, God akal im-tama tam almi abip tangbal daalokoma no, kala bakayila-tal-unemin o. Kanolip disa ke-lokomu kabaku am mafiing diim namti, tiltam talokomu no, kala Yesus ayo almi daang bakaalin imi bakayila ko.
MAT 24:15 Matyu nata, unang tunum nami sukon dol-yimbi umi tik-tiibip kipyo! Yesus ami weng bokose umi dol-nokomi kaluu dotu utamin! Yesus ayo alami daang bakaalin iyo asuk bokoyila-lomda: Siin sawaayak ayo profet tunum Daniel ata God ami Sukon Tem uyo dola kutiisa kabak-ali boko-lomdu: Bii-lom kaptoop ali Jerusalam imi waasi ita taba-lomdip mafek mafek atin mafakan dukum ma kuuta kutam God ami lotu am diilim kaptam tiilipla, uta tiltam ilomdu God ami am diilim ayo ku-mafak-daalu mafak-nokomu no, kalsa. Kemin ale, ibi utamiwa, Mafek mafek mafak uyo kutam God ami am diilim tiiliwa tiltam tolnu kala kalokomip uyo,
MAT 24:16 ibi Provins Judiya kawu bom-bilip kiili, abip ayo kela wakadaa bitam amdu tikiin tikiin kawu, sawaan-laa-malip ko.
MAT 24:17 Kuno am abal akiim kawu bilip namti, asuk tam aba bung ayo ma fokolupla yo, kala tam unemin disa; kulaa kuno maas kela abiltap-siik wakadaa din sawaan-laa-malip kayi!
MAT 24:18 Aa, iltipni langabip kawu bom-bilip namti, asuk din abip aba ilim ma foko kuluuluwa yo, kalalip asuk abip unemin daa; langabip kuluwu ti kela abiltap din sawaan-laa-malip o.
MAT 24:19 Kanumin kukup tiltam tabokomu uyo, unang kumun sole, manuuk so, imi ukadaa unokomip uyo fiit-bamdip tal-une-bam ale, angtiil yol awak uyo kaa-bam ke-mokomip. Kemin, kwin! kiiso kawe! kebi no.
MAT 24:20 Wom ati taba-lom am mafak daana aye, God ami iintang am daanu naa, uyo kanolin mafek mafek mafak ayo tiltam tulu namti, ibi taang-kala abiltap unolip dinim. Kemin, ibi God ami bokola-lomdip: Kapyo, am mafak am daan tiltam tulu kemin, mafek mafek mafak uyo kewap tiltam talemin daa yo, aka-lomdip beten kaman-biliwa yo, kala-somya ko.
MAT 24:21 Siin sawaayak kawu, God ata kamosinim tawaal talalusa kuyaku, kulii yakyak bital kula diilu kaali, atin kukup mafak dukum kala tiltam tabokomu ulultap kaa ma tiltam tabasu dinim. Kemin, kanumsi tal-unuya, maso mafiing ayo ma alaltap kanolin kukup mafak dukum kaayo, maso asuk tiltam tabokomu disa.
MAT 24:22 Kata, God ali almi unang tunum kii ulelnala almi lak duulin imi olen-daayila, boko-lomda: Angtiil yol dakamin am daan tiltam talokomu ayo am mafak kanolin daan talokomu kaali, abiltap-kup tal aba toop banuk o, kalala bokosa. Kemin ale, kanolin weng ayo bokolin disa kesa dinam, almi tunum unang iyo alik kuliila taba disa kelalip. Lale, weng kuuta kutiisa kemin.
MAT 24:23 Am kanumin am daanokomu kuyaku, tunum ali ma kipni bokoya-lomda: God ata ulduula Kamokim kesa tunum Kraist ali kulabe kemin, atamin a! kalba aye, yang kabe kemin atamin o, kalba kaa, ibi fan o, kala-laamin daa yo.
MAT 24:24 Nami weng kala bokoyi kaa dok ata naa kalolip: Kasen-fakayin tunum iyo taba-lom God ami tunum unang ulelna almi lak duusip kipni kasen-fokoya-lomdup, kipni aket fukunin ayo ku-mafak-daayupla, yang banin o, kalaliwa, kipni fanang tale-mokomip. Ma kaata, tal bokoya-lomda: Nali God ami uldaa-nam-buula tiltam Kamokim kesi tunum Kraist o, kalale, kuno ma ata tal bokoya-lom: Nali God ami profet weng ku-fatap-dakamin tunum o, ke-bam mirakel o kala kukup akal almi kusnum kaa kukuyokomip. Lale, God ata ipni ulelsa kemin, ibi yim-buulokomip disa.
MAT 24:25 Kemin, nami aket fukunin kaali, mep kanolin kukup tiltam talokomu uyo ibi kanolin kasen-fakamin tunum kiimi weng kuu weng sanamip o, kalalila, tiltam tabin dinim, bombuu umi sang kaa bokoyi nami weng kaluuli dotu weng san utafii-bamdiwa ko.
MAT 24:26 Kuno ti, tunum malo ma tal bokoya-lomdip: God ami ulduula tiltam Kamokim kesa tunum Kraist ali umbilin unang tunum dinim bokon kawu bombe kemin, din ilom atamum o, kalip namti, fan o kala, din unemin daa. Aa kuno ti tunum malo ma bokoya-lom: God ami ulduula tiltam Kamokim kesa tunum Kraist ali yak am kaptamu aptum kusal so bombe no, kalip namti, ibi imi weng kaa weng san-kaamin dinim.
MAT 24:27 Kamokim Sakbaalim Dukum Ami Man Nami asuk talokomi kaali, baabaa falala-kup kala abiil so, tawaal so, alik falala-kup kala-yaaba alaltap keli tildang fatap-nila, tawaal diim kayaak unang tunum alik iyo nita-mokomip o.
MAT 24:28 Kibi utamipla, Awon mafek mafek fom iniwal yaapkan iyo tam abiil kawu tal-unebip kala kalip namti, kabak ipkal utamiwa yi, Awu, awon ili kaldaak daaliwa, ilimi inin-inin ma ayo taana atamdiwa kala tala-tala-ke-lokomip o. Ultap kemin, nami mafek mafek sang kaa kanum bokoyi umi tiltam tulu namti, utamiwa yi, Nimi talokomi uyo kulu mep dikiwa tulu kalokomip o, kala Yesus ayo almi daang bakaalin imi kanum bakayila ko.
MAT 24:29 Yesus ayo almi daang bakaalin imi bokoyila ko: Yak kanolin kukup mafak mafak uyo tiltam aba tal-unemsi disa keluya, kuyaku tam atan uyo simit-kup daa-lom malang tinilule, kuno kayoop ami dawang akal disa ke-som, wakalkan ukol ti kano abiil tikiin kawu bom-bilip kiiyo, kambola dikela tildaak abe-biliple, tam abiil kun diim mafek mafek titil-kup tabasip yikil kuno alik ilmi liip ayo kelalip sak funbi liip kusnum liip tal-une-bala, tal-une-bala, ke-mokomip ko.
MAT 24:30 Kanum tala-buluya, tawaal diim kalawaami tunum miit ma ma nami lak kaa duulin disa kesip iyo titam abiil tikiin daaliwa, Dukum Ami Man Nayo ibin tem kabaku tilila, nami titil uyo kuluu-somdila, atan alaltap ke tiin buluusi-kup sikin-bulula, talaba kala, kala-lomdip suunin aalap dukum ke-bamdipla ama-mokomip.
MAT 24:31 Kanolila, fong ket weng aalap dukum ayo naan-tabamnule, nalmi ensel iyo yim-baali unbilin am bokon alik kaa dik-daa kulaasu kaami balang tem atalingkal God ami unang tunum ulelna almi aket-kup konsip iyo afetu-lom yim-bii talokomip kayi! kala Yesus ayo almi daang bakaalin imi kanum bakayila ko.
MAT 24:32 Yesus ayo asuk weng ma faldak-tii boko-lomda: As kaami kukup kaa fanang daalin! Ipkal as fik umi kukup kuu utamipla, umi kon duul ayo bam-daa kalaangnu namti, kuuli umi lap abuumin ayo mepso dikiwa tulu kala kalokomip o.
MAT 24:33 Kanolin kemin ale, nami kanolin kukup tiltam tabokomu umi bakayila-tabasi uyo fan kulu tiltam tulu kala kalokomip kuyaku utamipla, Kaa nami talokomi kaami am namti kulu mepso tulu kala, kalokomip o.
MAT 24:34 Nami weng kala bokoyokomi kaali, ibi weng san iliwa. Tunum unang malo ma tiin kawang bom-bilip kiili, taanin disa kano bom ilipla, nami weng bokoya-lomdi: Ilom kaali, mafek mafek mafak alik iyo tiltam abokomu no, kalbi kaali, atin ti tiltam talokomu.
MAT 24:35 Am ma daanokomu kuyaku, abiil so, tawaal so, kulii maaklo disa ke-lokomip. Yale, nami weng kuluuta ti disa ke-lokomu dinim; kano ti suunkup ilokomu no, kala Yesus ayo faldak-tiimin sang ayo kanum bokoyila ko.
MAT 24:36 Yesus ayo almi daang bakaalin imi bokoya-lomda: Ali dok kanumin diim kawu talokoma no, nakan-kaabip i? Tawaal diim kaldaak-ami tunum ali ma atamsa disa; aa, abiil tikiin kasel ensel ili babon; aa, God ami Man nakal kano ma kaal kesi disa; ti nalmi Aatumen God maakup ata-kup atamsa.
MAT 24:37 Sakbaalim Dukum Ami Man Nali tilin disa kama bom ilila kaali, unang tunum kukup kaa kanu-mokomip kaalile, sawaayak Noa ami sip dina-balaya, unang tunum imi kukup mafak kanu-bisip ultap o.
MAT 24:38 Siin sawaayak Noa ami bom-balaya ok foko tiltam tibin dinim ilsa kaa, unang tunum ili (God ami lak uyo duulin dinim ke-bomdiwa,) ima so, ok so, in-bomdip ale, tunum iyo unang dan kaa-balale, unang yakal tunum dan kaa-bala ke-bilipla, bom bi Noa ayo sip dukum ayo dinan-umbi-lomda dinimnu kewa-lomda, kulaa almi kalel so, almi tunum man asuumano le, imi unang tan so, alimal kalawiita-kup tam sip tem tam uniwale
MAT 24:39 unang tunum kusnum kii utamiwa yi, Ok foko tiltam abokoma no, kalin dinim babonipya kulaali, ok ayo fakan tiltam aba-lomda unang tunum iyo alik yan dong doko-lom alik anula taansip o. Ultap kemin, unang tunum ili God ami lak kaa duulin disa bom iliwa, bii Dukum Ami Man Nayo talokomi.
MAT 24:40 Nami talokomi kuyaku, tunum alep ma ima lang dikimiwale, ensel ayo tal ma ata dabuuba-kup, ma ata kambola unokoma.
MAT 24:41 Kano ti nami talokomi ayo unang alep ma ima dotmipya, ensel ayo tal ma uta umbuuba-kup, ma uta kuno kewa unokoma.
MAT 24:42 Kemin, ibi utamdiwa: Awu, kipni Kamokim ali dok kanumin diim kawu talokoma kala nambip disa. Kemin, kipkal suunkup liip fen-bam biliwa yo.
MAT 24:43 Nami weng do katip ma kala bokoyokomi uyo, talalu weng san aket fukun-iliwa. Tunum am kayaakim ali utama yi, Kutamiip kaali, dok kanumin diim kawu yukut inin tunum ayo talokoma kala kalba dinam, ali kawang-bomda kutii ilaya, yukut inin tunum ayo kalok no-somdala, tal am kaa balata kutii-lomdaya, tam ami bung kaayo, duk-duu kuliila unoma disa.
MAT 24:44 Ultap kemin o. Ipkal utamiwa yi! Dukum Sakbaalim Ami Man Nali dok kanolin diim kawu ma talokoma no, nakan-kaabip disa. Maaklo tem o. Kano ti suunkup fen-bamdiwa kayi! kal-bomda, Yesus ali alami daang bakaalin imi kanum bakaya ko.
MAT 24:45 Yesus ali almi daang bakaalin imi faldak-tiimin sang ma bokoyila ko: Nali tunum ok dukum-kup ti kanu-bamda aket tangbal fukun-bam kemin tunum, ami sang kaata bokoyon o, kala-somla kemin, kanolin ok tabuumin tunum almi kamokim alta ulduu-lomda bokola ko: Kabi mep nalmi okok kemin tunum kalawiili, dotu yaap-kup tiin molapla, tambal-kup kanu-biliwa, nami mafek mafek ayo dotu yaap-kup bom-bulula, bii ima dan kaayin ulmi am daanokomu kabaku, ima uyo okok kemin tunum imi dan kaayan o, aka bokolala kela unokoma.
MAT 24:46 Kulaa ok fukulin tunum ayo kamokim ami weng kaata-kup, weng san kutal-fuku-bomdala, ami ok ayo ti kano kutal-fukulin-kup bom ale, okok kema namti, bii kamokim ayo asuk tal ulala yi, Yaap-kup okok kem-tabasa kala kalala, tal fiyaap duulokoma.
MAT 24:47 Kemin, kamokim ayo tal bokola-lomda: Nali utamila kulawu bomdi titamin disa bom-bilila, ok tangbal nun-umbap kemin, kuluwaata ok awak dukum kaata kapni kup-tila, kapta nami bung mafek mafek iyo alik tiin molokomap o, akokoma.
MAT 24:48 Yale, tam okok kemin tunum mafak ma fanang daaliya yi! Nami kamokim ayo mafek mafek ma taba-lom dabaak molu kemin, abiltap talokoma disa yo kala, kala-lomda,
MAT 24:49 ap-tunum kusal ok maak fukulin tunum iyo ye-bamda, ok mafak im-bom babon-babon kemin tunum iso, tiin-bomda ima aa, ok mafak aa, iso inan-tal une-bamda,
MAT 24:50 kamokim kaa dok kanumin diim kawu talokoma ni, ke-bamda fenin disa; kemama daa; ti kuno ila namti, bom-balaya, bii tam am ma daanale, kamokim ayo tal ulaya, Kwin! Kukup mafak nuum-tabasa kala atamale kulu, ami kukup mafak nun-tabasa namti, maan tii-lomda
MAT 24:51 dukum-kup biwaka-bam angtiil yol kukaalokoma kaali, tunum weng weng kuyang saak tii-bamda kukup alep tabuumin tunum ami angtiil yol kukaayin ultap ke, akal kanola angtiil yol ayo kukaan-balaya, ok mafak tabuulin tunum ayo fuut-bamda bokola ko: Kwin! kalawuso kawi! kal-bomda dukum-kup iin-bam ama-mokoma kayi! kala Yesus ayo almi daang bakaalin imi kanum bokoyila ko.
MAT 25:1 Kulaali, Yesus ayo asuk faldak-tiimin weng ma boko-lomda: Am ma daanokomu kaali, nami tiliya, God ata unang tunum alik imi tiin molokoma kaami sang kaata faldak kaami diim tii-lom bokoyon o, kalalila kemin, ipyo weng selin! Tunum ma unang kuluulon o, kalala, unang umi awak-aalap iyo yaap o, kaliwa uyo sintam dabuulu umbuula kemin umi am uyo daan tiltam abale, kuluwu unang umi dong dakaawin unang sii nakalkal kiili, ilmi ilaam iyo kutamalipla, afalop umi aalap ami am ayo kambola tiltam saaklo abal akiim kawu, tiin-bom tunum talda unang kuluulokoma ami liip-kup fenip ko.
MAT 25:2 Unang awakal ma kiita, aket fukunin tambal kemin, imi mafek mafek ayo dotuliple, kuno unang awakal ma kiita aket tambal so ma fukunin dinim. Kemin, imi mafek mafek ayo dotuulin disa ke-lomdip
MAT 25:3 ilimi ilaam ayo iilfo kuliilip unip. Katale, ilaam umi ok so ma iluu kulii-unolip daa le,
MAT 25:4 afalop kusal aket tambal fukunin ita, ilmi ilaam ayo ok ling abuu kulii-som ale, kalasin ayo ket kusnum kawu abuu kulii, kelipla, nikil unip.
MAT 25:5 Kano-lomdip unang nikil iyo tiin-bom-biliwa bii, ayo tilin dinim kela kala kalbip-kup, tiin yak dap-tiiyu akan-unipla,
MAT 25:6 nikil akan-bilip bom bii, am iipyak fokolale kulu, tunum ma naan-tabale bokola ko: Tunum unang kuluulon o, kalba ayo kulaata tala kemin, baan kamala kulawu tal dibiilip am unin a! kal-bomda, naan-daaya,
MAT 25:7 unang nakalkal iyo weng sandiwa dikela tam tiin ilaam ayo dotulip,
MAT 25:8 unang aket tambal fukunin dinim yakal utamipla, Numi ilaam kii kiin-tabokin ok kalawaali mepso dinimnum o, kalbip kawi! kalbip-kup, afalop kusal aket tambal fukunin imi bokoyip ko: Numi ilaam ayo ok disa kela tenum o, kalip kemin, ipni ilaam ok kaata, ma ling abuuyiwa, numi ilaam ayo ling-abuulup kiin-tabuya nikil unum o, yikiwa,
MAT 25:9 unang aket tambal fukunin isiik taba aket tambal fukunin dinim unang imi kanum bokoyip ko: Daa. Numi ilaam ok ayo katip sakap kemin, ipni anung ling-abuuyila ke-lokomup kaali, numi ilaam alik iyo abiltap tenokomip. Kemin, kipkal din stuwa un-ilom ilaam wok ma mo-somdipla kawu, ling-abuu kuliilip tilin a! yikiwa,
MAT 25:10 kulaali, aket tangbal fukunin dinim unang iyo yak aba din stuwa ilaam ok fen uniwa, kulu tunum unang kuluulon o, kalba ayo tal mepso kuluba tala kala-lomdip unang nikil awakal dotu ku-mikil kebip iyo, yak aba din unip; tunum ayo tala ke dak-duule dabuu dap-tam am daalip bom alik iyo ima ina faka-bam bom-iliwa, okok kemin tunum ita taba yak am saal ayo kuyak mo liilip ko.
MAT 25:11 Da ilanin tap keliwa, unang awakal ma iyo tal naan-bamdip bokolip ko: Nulmi nak-tunum kapyo, mep okok kemin tunum kuliili, bokoyilap saal basuuyiwa, nikil nuso tam unuwa yo, akipla,
MAT 25:12 tunum kama unang kuluula asiik unang nikil awakal imi weng uyo maan tiiya: Disa! Ibi nami kayaak disa. Nali ok tabuulin tunum kii bokoyili saal kaa busuu-yokomip dinim te! kala-lom unang aket tangbal fukunin dinim imi kanum bakayinsa no, kala Yesus ayo kanum bakayila ko.
MAT 25:13 Asuk Yesus almi daang bakaalin imi bokoya-lomda: Faldak-tiimin weng kaami miit ayo talalu aket fuku daalin o! Ibi utamipla, Nali dok kanolin diim kawu talokoma ni, ma kalbip disa; kemin, ibi ti suunkup talalu fen-bamdiwa kayi! yaka, kanum bokoyila ko.
MAT 25:14 Kemin, Yesus ayo faldak-tiimin weng akal kusnum ma bokoya: Ilom am ma daanula, talokomi kabaku God ami taba tunum ma kaami dabak-saanin tap ke, unang tunum iyo im-bak-saanokoma no. Tunum kaa umbila umbilin abip samaan ma kawu bombii talokomi no, kalala almi okokmin tunum iyo weng umuuyila, tal atamiple, almi moni aye, bung mafek mafek alik iyo kulaayila yak imi sikil diim abamnipla
MAT 25:15 ali utamala, Ma ayo aket tambal fukunin, malo ma ita daa; aket tangbal fukunin tap so, kala-lomda, moni sakbalim dukum kaata kulaayila yak aket tangbal fukunin ami sikil diim aba-som ale, yak moni katip so kulaata, kulaayila yak aptum kusal imi sikil diim abamniple, ma ata K5,000 kolale, ma ata K2,000 kola-som, kuno ma ata K1,000 kola kelala, kalawiita kuluu-somdipla, wan siki-bamdip moni kaap-nam-biliwa yo, kala kambola una.
MAT 25:16 Kanoyila, kamokim ayo keya unale, kulaa ok fukulin tunum K5,000 kuluula ayo wan siki-bala bom bii moni yaapkan kela K10,000 kelale,
MAT 25:17 kuno okok kemin tunum ma ami K2,000 kuluuba, akal moni ayo kuluu bisnis ke-balaya, bii moni ayo sakbaalim dukum ke-lom K4,000 ke no, kelu. Katale,
MAT 25:18 okok kemin tunum mafiing ma K1,000 kuluuba ayo, kutal-fukule, wan sikimama dinim, kuno kela-lomda, kulii yang tawaal tem kala-lomda almi kamokim ami moni ayo kuwaala ko.
MAT 25:19 Bom biile, kulaa ok tabuulin imi kamokim ayo asuk umbital abip tal aba-lomda ami moni kanolin ayo dok kanu-bamdiwa bisnis ken-umbip yokon o, kala-lomda almi ok fokolin tunum asuumano iyo naan-daayila tal-ilomdip,
MAT 25:20 kamasi okok kemin tunum K5,000 kuluuse asiik tal-ilomda asuk K5,000 kusnum kuluuba kaami kulii-som, kuno K5,000 kola unse ami kulii ke tal kola bokola ko: Kamokim, kapyo, kalaa ataman! Nali kapni K5,000 kup-na un-salap ayo, kuluu bisnis ke-bamdila K5,000 kusnum ma kalawaayo kuluu-som kelila, kuyang mim-daa daalila K10,000 keba no, kala kola ko.
MAT 25:21 Kola utam-ilomda kamokim asiik bokola: Ti yaap ke kabi ok kaa kup-ta unsii kaali kela-salap disa; kabi ti talalu titil-foko yikik-tabuusap. Kemin, mafek mafek katip ayo kup-ta uni tambal-kup tiin-mo-salap. Kemin, nali kulaata mafek mafek sakbaalim dukum kaata ma kulaap-ti yak kapni sikil diim abamnula, kutal-fuku-lom tiin molokomap o. Kemin, tiltam talapya, nikil maakup fiyaap duumum a! aka kanum bokola ko.
MAT 25:22 Kuno ok fukulin tunum K2,000 kuluuse ayo tal kamokim ami bokola-lomda: Yi! kamokim kapyo, kalaa ataman! Nali kapni K2,000 kup-na un-salap uyo kuluu-lom bisnis ke-bamdila, kuno asuk K2,000 akal alik ma kuluu kelila, kuyang mim-daa daalila K4,000 keba no, kala kola.
MAT 25:23 Kemin, kamokim ayo utam boko-lom: Ti yaap ke, kabi ok kaa kup-ta unsii kalawa kela-salap disa; kabi ti kano titil-foko yaap-kup tiin mo-salap. Kemin, mafek mafek katip sakap namti kaa kup-ti tambal-kup tiin mo-salap. Kemin, nali kulaata mafek mafek dukum ata, kulaap-ti yak kapni sikil diim abamnula tabuu-lomdap, tiin molokomap. Kemin, tiltam talawa, nikil maakup fiyaap duumum o, aka kela ko.
MAT 25:24 Kanoliwa, mafiing mafiing kulaata ok fukulin tunum K1,000 kuluuse ayo tal bokola-lomda: Yi! kamokim kapyo, nali titamsii, kabi tiin ma baalin tunum balap titamsii. Kemin, kabi tunum kusnum ulela fokolap din kaltapni langabip ayo okok tala-laabip. Yale, ima aye, inin-inin fakan-umbip iyo kaltapni-kup ke-bam ale, aa kabi tunum kusnum iyo fokolap din kapni mafek mafek iyo kaptum kusal imi kuyip san-umbip. Lale, kabi kaltapni moni-kup ayo faka-bam ke-balap titamsii kalaliya kemin,
MAT 25:25 nali kapni atul kaata suun-daa-som ale, bisnis kemin umi kukup kaali, babon kemin ma utamin disa. Kanolin kemin, nali kapni moni kalawaali kulii-din-ilomdi tawaal foko-lom kuwaap-tila, tambal-kup laabu kemin ale, kula kaltapni moni kalayo, kuluulan o, kala-lomda kolala,
MAT 25:26 kulaa, kamokim ayo ok tabuulin tunum ami bokola-lomda: Kabi ok fukulin tunum mafak ale, daal-kup tabasap tunum kemin, kabi bokop-na-lomdap: Kabi tunum kusnum ulela fokolap din kaltapni langabip ayo okok tala-laabip. Yale, ima aye, inin-inin fakan-umbip iyo kaltapni-kup ke-bam ale, kabi tunum kusnum iyo fokolap din kapni mafek mafek iyo kaptum kusal imi kuyip saan-umbip. Lale, kabi kaltapni-kup moni-kup ayo faka-bam ken-umbap o, nakap.
MAT 25:27 Kemin, kabi kanolin aket uyo fuku-daali no, kalap kaali, kabi kanimin o, kala-somdawa, nami moni kaali, kulii-din beng tiilawa, nami moni kaa dukumnin disa kesu yoko? Dinam, ti kano-salap dinam, yaap nali asuk taldi moni dukum ayo kuluuliya kaa! Kaa kambolawa nali taldi nami moni anung uyo kuluulin dinim ke-lomdila, asuk ti nalmi K1,000 kup-ta-unsii ita-kup tal im-buuli no, aka-lom ale,
MAT 25:28 kulaa, almi dong dakaalin tunum iyo bokoya-lomda: Kipyo, yak ami sikil diim kawu moni kutal-fukuba kulaa kuluu-lomdip, yak tunum K10,000 kuluuba ami kola kelin a! yaka ko.
MAT 25:29 Nami kanum bokoli kabak-ami miit kaali, tunum ayo kanta ok tambal fuku-bamale, kamokim ami weng ayo weng san-kaa-bam ke-mokoma kaata, ami kamokim ayo ok maso ma kolaya, okok kemin dukum ayo kuluu nuu-mokoma. Aa, moni yaapkan ayo kaa-bam ke-mokomu no. Kanolin tunum ata okok mafak ke-bam ale, almi kamokim ami weng ayo kuyang saak ten-bam ke-mokoma kaali, almi kamokim ata tam-ilom ami ok ayo kukan-telaya, ami okok kemin sisol kaa maso ma kaa-mokoma disa yo.
MAT 25:30 Kalo, ok tabuulin tunum ibi mep okok kemin dinim daal-kup tibin kulaa, dabuu dabaalip tam kutamiip tem ilin abip kaptam ban-ilomda, boko-lom: Kwin, kalaaso kanimin o, kalaliya kaldang liip tale-yimbi yoko? Kal-bom dukum-kup amamak o, kala, kamokim ayo okok kemin tunum imi tiin molin imi kanum bokoyase no, kala Yesus ayo kanum bokola ko.
MAT 25:31 Yesus ayo bokoya-lomda: Bii-lom kawu, Dukum Ami Man Nali taba-lom God ami ensel iyo alik foko-kutal-tiiliya, nami win ayo kufup-nam-bilip, nakal kamokim king ke-lomdila, titil dukum ayo kuluu-lomdi, unang tunum alik iyo tiin molokomi. Kemin,
MAT 25:32 ensel ita taba-lomdip, tawaal diim kalawaami tunum miit ma miit ma iyo alik foko kulii-tal nami diim tiiliwa, nalta afetuli sikip alep ke-lokomip o. Nali sipsip tiin molin tunum imi kanubip tap kang baan alep kalawaali sipsip tituun ili yakal baan ma fak-daa, meme ili yakal baan ma fak-daa ke-bamda afetba tap ke-bamdiya,
MAT 25:33 sipsip ita foko kutal aba yang nalmi sikil tiingtuplo kaldangu fik-tiibi-kup ale, yak meme ita kutal aba yang sikil awaanlo kaldang fak-daa ke-lokomi no.
MAT 25:34 Kanoyi iliwale, Kamokim king nayo, unang tunum tal nami tiingtuplo kaldang tolbip imi bokoya-lomdi kanum bokoyokomi ko: Nalmi Aatumen God tawaal dotusa kawu, God ali abip tambal ayo unang tunum tuluun-kup tabasip imi no, kala-lomda talalu kutiiyinsa. Kemin, God ali ipni fiyaap-kup duuba. Kemin, ibi tiltam suunkup bom-biliwa yo, kala-lomdi, kanum bokoyokomi.
MAT 25:35 Nami Atok ami kipni fiyaap duuba kaami miit kaali, dok kata naa kalolip: Siin kawu nali ima tinap kep-nula ilsi kawu, ipta ima ayo kutal daap-nip inasii. Aa, nali ok del tabep-nu bom-bili, kipta ok iluu kutal-daap-nip inasii. Nali fatal tunum tiliya, ipta bokop-na-lom: Ti yaap ke talap o, naka-lom nam-tam am daa-silip.
MAT 25:36 Kuno, nali ilim dinim kelila, kipta ilim kup-nip mikisii; nali dubana-bamdi mafak bom-biliya, kipta dong dakaap-nin-silip. Aa, nali sok de-namulip ilila, kawu ipta tal dong dakaap-nin weng uyo bakap-nam-biliwa, nami aket ayo yaap ma kep-na kesuu no, kala-lomdala, kaata God ayo ipni fiyaap duumin dukum ayo duu-yinba no, kalile,
MAT 25:37 kulaa, tituun-kup tabin tunum unang isiik nami weng bakayimbi uyo ti bokolip: Kamokim a! Nuyo utamuwa yi, Kukup tangbal kaali ma kabi kukaap-tupla, kabi itam-salap i? Nuli doku ma titamuwa yi, Kabi ima tinap tabep-tambu kala kalalupla, ima kaa ma kup-tup ina-salap i? Aa, nuli doku titamupla, kabi ok del tabep-tambu kalalupla, ok kaa iluu kup-tup ina-salap?
MAT 25:38 Kabi kalok nolin diim kawu fatal tunum o, kala talawa bokop-ta-lomdup: Ti yaap ke talap o, kala tim tiltam am daa-sulup i? Aa, nuli kaloku titamup kabi ilim dinim balap takalup, ilim kaa kup-tup miki-salap?
MAT 25:39 Nuli kalok nolin diim kawu titamup dubana-bam mafak tiinbap taka-lomdup, dong dokop-ta-sulup? Kuno nuli doku titamup kabi sok de-tamulip bom-balap takalup, tal dong dakaap-tin weng tangbal kaata bakap-tam-bulupya, kapni aket uyo yaap ma kep-ta kesuu yoko? akiwale,
MAT 25:40 kulaa Kamokim nasiik imi weng ayo maan tiiyila bokoya-lom: Nali ti atin fan tituun weng kaata kipni bokoyon o, kali kemin, weng san bom-ilipla! Kipni tawaal diim bom-ilsip kaa, ibi kanolin kukup tangbal kalawaata unang tunum win dinim tiltam nami lak duulin kiimi kukaayinsip. Yale, ipni kaa imi kanuyinsip kaalile, nami kukaap-nansip o, kalokomi ko.
MAT 25:41 Kanubi kulaa keyimbi-kup, fal-siki taba ti awaanlo kawu tiyang daa, unang tunum mafak imi bokoya-lom: Yi! ibi sawaayak kawu, God ayo abip ma ti suunkup as kiinin kaaso talalu-kutii bokoya-lomda: Setaan aso, ensel mafak almi ok tabolin tunum kesip iso, iyo foko im-baali din wing tiil kano suunkup kiin-bam ilin kawu ilokomip o, kalsa. Kemin ale, kaali iltipni kukup mafak kaata kanu-biliwa, God kaa daang ukuyinsa. Kemin, kep-na din suunkup as kiinin abip unin a!
MAT 25:42 God ali taba-lom kipni daang ukuyinsa kabak-ami miit kaali, dok kabak-ata naa. Nali ima tinap bom ilila, ibi ima ma kup-nip inamnin disa kesii. Aa, nali ok del kep-nu ilsii ayo ibi ok ma iluu kup-nip inamnin disa kesii.
MAT 25:43 Nali fatal tilin tunum kesi uyo ibi bokop-na-lom: Yi! ti yaap ke talap o, naka-lom nayo nam-tam am daalin dinim ke-silip. Aa, ilim dinim bom ilsi kaali, ibi ilim ayo ma kup-nip mikisii dinim. Nali angtiil dubana-bam mafak ilsi kawu, ibi dong dokop-nin disa ke-silip. Kuno nali sok de-namulip bom ilsi kawu, ibi taldip weng tangbal kaa bakap-nam-bilip, nami aket ayo ma tangbal kep-namu dinim kesuu no, kalalaya kemin, God ali kabak-ata ibi daang ukuyase no, yikiya,
MAT 25:44 kulaa, unang tunum mafak isiik bokolip: Kamokim kapyo, nuli kabi ma talap maas kep-ta-sulup disa te! Kaa kaloku nuli titamupla, Awu, kabi ima tanap tabep-tambu? aa, ok del dap-tiip-tamba? aa, fatal tilin tunum kelap? aye, yak ilim dinim aye, angtiil dubana-bamdap mafak ilsap. Aa, sok de-tamulip bom-balap kala-lomdup, nuli dong dokop-tin dinim, kuno kambop-ta-sulup yoko? kala kanum bokoliwale,
MAT 25:45 Kamokim nasiik imi weng an-anung-daa bokoya-lomdi: Nali tituun weng kaata-kup bokoyokomi. Kemin, weng san iliwa! Ibi unang tunum iwaan win dinim tiltam nami lak duulin iyo daang ukuya-lomdip dong dakaayin dinim kemsip. La, ipni kanu-bamdip imi kanuyinsip kaali, nami daang ukup-na bom ale, dong akaap-nin dinim kemsip. Kemin, uyo kaa bom buu te! yokokomi.
MAT 25:46 Kabak-ami kalan kaata, unang tunum iyo kawanita aptum kusal kii dong dakaayin dinim kemip namti, kiili fokoli din abip mafak kawu bomdip angtiil yol dukum ayo suunkup daka-mokomip. Ale, tituun-kup tabin unang tunum ita foko kulii tam God ami abip kaa tiilila, iyo ti suunkup bom-ilokomip o, kala Yesus almi daang bakaalin imi bakayila ko.
MAT 26:1 Yesus almi daang bakaalin imi weng bakayinba uyo alik disa kelule, kulaa bokoya ko:
MAT 26:2 Nak-tunum kusal kipyo, utamipla yi, Am alep ma disa keluya, kuyaku Juda kayaak numi ima Pasova uyo inokomup kala kalbip. Kemin, kuluwu Dukum Ami Man Nayo, nam-baalip yak waasi imi sikil diim abamnila, nam-bak as diim daa nelip taanokomi kayi! kala kanum bokoyila ko.
MAT 26:3 Kemin, kulaa pris o, kala awem tunum imi kamok kamok isole, Juda kayaak imi kamok kamok iso, iyo din awem tunum imi dabom Kayafas ami am dukum kaptamu tala-tala-ke-lomdiwa,
MAT 26:4 weng taken-una-tala-ke bile bokolip: Dok kano-somdupla kawu, Yesus ayo maaklo dap-tal fuku aalup taanak i? kala-lomdip
MAT 26:5 bokolip: Nulta unang tunum tala-tala-ke-bamdip ima inokomip Pasova yo kebip kaami tem kabaku aalokomup kaali, unang tunum yaapkan iyo ban boko-lomdip iyo taba nuyo mafak o, yakan-kaa-bamdip yemalip. Kemin, ilom ima ayo alik inamnip dinimnal una-tala-kelip kala, kala-somdupla kawu, aalum o, kala weng kutiilip ko.
MAT 26:6 Yesus nikil iyo Oliv Tikiin kaptam-ali kambolalip yak aba umbital abip ma Betani kaptam ba tilip ko. Kamasi kawu Yesus ayo Betani tunum ma abang daam Saimon ami dap-talaluse. Kemin, kaata tal Yesus nikil imi bokoya-lomda: Tiliwa, nami am kawu tiin-ilomdup ima inamnum o, kalaya, kulaa fan din ami am kaptamu tiin-bom ima iniwale,
MAT 26:7 unang ma taba tal tang tangbal fuunin ok ayo kulii-tal Yesus ami dabom diim kawu sing daawalu ok kaali, tuum alabasta ket dotulin kabaaku abuusip. Kemin, unang uyo moni dukum uyo kuluu-lomdu mo kutal tiibu. Kemin, kaata kanoluya,
MAT 26:8 Yesus ami daang bakaalin tunum iyo utamiwa, Unang kuuli, kanubu kala kala-somdipla, aket atul tabeyu kulaa ilmi dik-daalip ko: Uli kanimin o, kalalula, tang tangbal fuunin ok kalawaali tinan-daalu disa kela ni?
MAT 26:9 Tang tangbal fuunin ok kalawaali kela-lomdu, kulii-din aptum kusal imi kuyilu ita molipya, atin ti moni dukum ayo kuluu-lom, kulii-din mafek mafek dinim ilin unang tunum imi kuyikinla yo, kalip ko.
MAT 26:10 Kanumipla, Yesus ayo utama yi, Kanolin weng bakabip kala kalba-kup, kulaali almi daang bakaalin tunum imi bokoyila: Ibi kanimin o, kalaliwa, weng mafak kaa unang bakawipla, uyo aket dukum fukunbu yoko? Kaali kukup tangbal nami kanop-nu kemin, kulaalin a!
MAT 26:11 Unang tunum mafek mafek dinim iyo ipso suunkup ilokomip kemin, ibi yaap dong dakaayilalip. Lale, nali kipso suunkup kalawu ilokomi disa.
MAT 26:12 Unang uli utamu yi! Yesus ayo mepso aalip saaknaya, dibii din tuum tem kawu dawaalokomip kala kalaluya, Juda kayaak numi as kuli dotu kulii-din kuwakamin kukup kuuta kuluu-somdula, nayo saaknin disa iliya, tang tangbal-kup tabin ok ayo nami dabom diim kawu sing daap-nu.
MAT 26:13 Kemin, kaali ti fan tituun-kup bokoyokomi. Ilom kaptoop ali unang tunum kiimi am bokon alik kula dik-daa kulaasu iyo tal-une-bam nami weng tangbal kukaaya-tal-une-mokomip ayo, unang kuumi kukup tangbal kala kup-nu kaami sang kaa bakayila-tal-une-bamdiwa, umi win ayo suunkup kufuwokomip kayi! kala Yesus ayo kanum bakayila ko.
MAT 26:14 Yesus ami kalaan tunum talangkal la, maakup ma ali abip Keriot kasel Judas ata din pris awem tunum imi kamok kamok imi itam ale,
MAT 26:15 ayo dik-daaya-lomda: Kipyo, nali Yesus ayo dabaali yak kipni sikil diim abamna namti, moni kaa kanim kal ma kup-nokomip i? yakaya, ami weng bokoyila ayo weng san-ilom, tuumon dukum almi-kup 30 kiita koliwale,
MAT 26:16 Judas ayo tuumon dukum ayo kuluuba-kup, Kwin! kaa dok no-somdila, dap-fatap-daalon o, kal-bomda liip fen-tal-unema ko.
MAT 26:17 Kemin, bret fuulip faskaamin dinim inin umi am o, kala am maakup diim kawu iintang am uyo daanula, Yesus almi daang bakaalin tunum iyo tal Yesus dik-daala-lomdip: Kabi nuli kaloku ima Pasova ayo dotuliwa yo, kalbap yoko? akiwa,
MAT 26:18 Yesus asiik bokola: Siin kawu Jerusalam kayaak tunum ma kipni kukuyasii. Kemin, kamala kuluwu din Jerusalam kaba tunum kulaa atamip namti ayo bokola-lomdip: Kapyo, numi kukuyin tunum ami weng bokoyila kulii-tulup kaali, bokop-ta-lom: Nami nak-tunum kapyo, nami taan-laamin am ayo mepso tulu kemin, nami daang bakaalin tunum iso, nikil nuli tal kapni am kaptamu ima Pasova ayo in-bomdup fiyaap duu-bamduwa yo, kala Yesus ayo kanum bokop-tala, tulup o, aki no, kala Yesus ayo kanum bokoyilala, daang bakaalin tunum iyo im-baala din-ilomdip,
MAT 26:19 ami weng-kup weng san-ilom ima uyo dotulip ko.
MAT 26:20 Bom bii, am tiinu atan ayo yak tem unaya, Yesus so, almi daang bakaalin tunum talangkal iso, iyo tal am kaptam tiin-bom ima ayo in-bom ale,
MAT 26:21 Yesus ayo daang bakaalin tunum imi bokoyila ko: Nami weng kalawaali ti tifaneng bokoyokomi: Nikil iltipni tunum maakup ma ata nak-tunum ayo taba-lomda, nam-fatap-daalaya nelokomip o, yakale,
MAT 26:22 kulaa, daang bakaalin tunum iyo Yesus ami weng bokola uyo weng san fanang alik tam baneyula aket yaapkan fukun-bam ale, aket uluum dukum ke-lomdip ma asiik dik-daala dik-daala kem-una-tala ke-bam ale, bokolip: Kamokim kapyo, nata nelile, ni disa yi? kal-bom dik-daala dik-daala ke-bam aket yaapkan fukunipla,
MAT 26:23 Yesus asiik bokola: Nak-tunum ma naso sikil kutaldaak falet diim kabaaku daa inamnup namti, kulaata nam-fatap-daalaya nelokomip.
MAT 26:24 Sawaayak kawu God ami Sukon Tem nami kanola taanokomi kaami sang bokosu kaali, fan kamala kulu kaami sang ayo tiltam tuluya, Dukum Ami Man Nami nelip taanokomi. La, tunum nami nam-fatap-daalokoma ali atin ti angtiil yol awak dukum kuluulokoma. Kemin, awak kuu mep man kaa kuulin dinim nosu dinam, ali angtiil yol awak dukum uyo kuluulama dinim kaali tambal o, kalaya,
MAT 26:25 ami dap-fatap-daalon o, kalba tunum Judas ayo Yesus ami bokola-lomda: Kukuyin tunum kapyo, kabi nami sang bakap-nambap yoko? akala, Yesus asiik ami weng uyo maan tela bokola-lomda: Fan taa! Ti kaa bokolap kalapta te! aka ko.
MAT 26:26 Nikil ima in-bom ale, kulaa Yesus ayo bret maakup ma kuluuba-kup, God ami yaap ke yo, aka yak lo kutii daang bakaalin tunum ima kabaanuya-lom bokoya ko: Kalawaali nami tiil kemin, kuluu inamnin o, yakale, kuluu inamnip ko.
MAT 26:27 Inamniwa, ata wain ok ma iluu kutal-fuku, God ami yaap ke yo, aka almi daang bakaalin tunum imi kukaayim-bam ale, bokoya ko: Nikil alik kuluwa kuluu-lomdipla inamnin a!
MAT 26:28 Kalawaali nami kiim kemin, nami nelipla nami kiim ayo sing daa-lomdu God ami kama weng umi de-kutiiluya, ibi nami kiim kaa atam, Wu faneng, God ali unang tunum yaapkan numi ban wakamin kaali, takan-tiiyase no, kalokomip.
MAT 26:29 Kemin, nali weng kusnum ma bokoyokomi. Asuk nali wain wok kala maso ma inam-nokomi daa, kela bom-bili bii din nami Atok God ami abip kawu ipso bomduwa, alik maakup wain ok alokso kaata inokomup kayi! yaka ko.
MAT 26:30 Nikil ima inamnip disa kelale, kulaa alik iyo God ami Sukon Tem baal maakup ma uluubip-kup, abip kela yak aba tam Oliv Tikiin unip ko.
MAT 26:31 Yesus nikil iyo liip un-bom ale, Yesus ayo bokola: Am kamala kutamiip kulaayo, alik ibi kep-nalalip ukadaa unokomip. Kemin, God ami Sukon Tem sawaayak dolsip kaami sang kaali, boko-lomdu: God nalta, waasi iyo kamboyila ita taba-lomdip sipsip tiin molin tunum ami aalipla, sipsip alik iyo ukadaa une-bala tale-bala ke-lokomip kayi! kalsu namti fan kulu ipta kunolokomip.
MAT 26:32 La, nili kanola taani, namaalip ilana asuk tam tiiniya, Provins Galili unokomi kawu, ibi din kawu nitamin o, yakale,
MAT 26:33 Pita ayo weng sanba-kup, Yesus ami bokola ko: Kamokim, kapyo! Kapni daang bakaalin tunum malo ma ita kapni kanop-tip kaata, kambop-ta wakadaa unokomip. La, nali kuno kep-ta wakadaa unokomi disa.
MAT 26:34 Kulaa, Yesus asiik Pita ami bokola ko: Naktum kapyo! Nami weng kala bokop-tokomi uyo aket fukunapya! Kamala kutamiip kuyaku, awon kakaruk aalap ayo naan-tabin dinim kama ilaya, kabi nami sang ayo bokop-na-lomdap: Yi! Kaali ma atamsi dinim o, nakan-kaamsi, liip asuumano fak-daalokomap o, akale,
MAT 26:35 Pita asiik weng dukum-kup bokola-lomda: Atin ti disa yo! Kapso naso yelum o, kalip kaa, nali boko-lomdi: Yi! Kaali ma atamsi dinim o, tokokomi disa yo, kalale, kuno Yesus alami daang bakaalin iyo nikil alik ti Pita ami weng bakaba weng yaan tem kulaata iso, maakup kanum bokolip ko.
MAT 26:36 Yesus so, almi daang bakaalin iso, iyo yak aba din langabip Getsemani abale, Yesus ayo bokoya ko: Nali mep yang kalawu beten kemi kemin, nikil ibi kulawu tiin-bom iliwa yo, kala,
MAT 26:37 kamboyila Yesus ayo Pita, Sabedi ami man tunum man alap Jems so, Jon so, nikil ita-kup foko-yim-bii yang abale, Kwin! Yesus ami aket tem uyo ti uluum dukum ke-lomda aket mafak kelu, nikil imi bokoyila ko:
MAT 26:38 Kipyo, nali utamila, Kulaata ti nelip taanokomi kala, kalalila, nami aket tem ayo atin ti uluum dukum kep-nu kemin, nali yang kawu God ami beten kamaali. Kemin, ipkal kuldaaku fen-bam ale, talalu kutii-bomdiwa yo, yaka-lom
MAT 26:39 kamboya alakis mep yang kulubale, katuun duung fakela daak tiin dabuuna God ami beten kamaan-bam bokola ko: Atok kapyo, kukup mafak uta tildang nam-mafak-daalon o, kem-talabu kaa, kabi dil molap kuno keluk o, kalap kulaali, kabi yaap titil-foko-lom kanop-nalalap. Yale, nami aket fukunin ayo, kabi nami aket fukun-bam kaata kanop-nan o, kalbi kuu daa: kemin, ti kaltapni fanang daa, kanolon o, kalbap kaata-kup kanolan o, kal-bomda kanuma ko.
MAT 26:40 Yesus ayo beten kemsi kenba-kup, tildang ulaya, Tunum nikil asuumano iyo akan-fak-liibip kala kalale, yam-kafala-lomda bokoya ko: Nikil ibi akanbip yoko? Kibi titil-fak-daa kawang bom kutii ilanin tap kelalip daa; abiltap-siik akanbip o?
MAT 26:41 Setaan ayo ipni oko-takayim-bilila, yang ban ukduulip kala yokon o, kal-bomda ibi yam-kukuba kemin, kipni aket fukunin ayo ti kukup tambal-kup nuumum o, kalbip. Lale, ipni titil ayo katip; yang kukup mafak kaa nuu-mokomip. Kemin, asuk akan-unemin disa kelalip kawong-bomdip God ami beten kamaan-bilip, dong dakaayim-bala yo, kala-somla ko.
MAT 26:42 Kanum boko kulaa kamboyila, asuk yang olang diim yang abale, God ami beten kamaan-bam bokola: Atok kapyo, kuluu kalapni san, kabi kuno waasi iyo kamboyili ita taba-lom angtiil yol ayo kolik o, nakap kulaali, nali daa yo, kalokomi disa. Nali kapni weng bokolap uyo, ayo kalokomi no, kala beten kemsi, kulaa kelale,
MAT 26:43 asuk tildang ulala yi, Aptum kusal asuumano iyo asuk ti kuno tiin yak dap-tiiyu akan diisa kulaabip kala itam kamboyila
MAT 26:44 tildang kamasi kanola beten kebi, una tap, ti kuno God ami asuk kunolin beten kulaata-kup kema ko.
MAT 26:45 Kanumsi kulaa kela asuk tildang ula, Akanbip kala tal yam-kafala bokoya ko: Ibi asuk akan-bom fan-kaabip o? Ipni akan-unemin kulaali ti kutoop kulu diilip disa kelu kemin, tam tiin ibi atam-tamin! Kulaata nak-tunum maakup ma ata taba-lomda Dukum Ami Man Nayo nam-fatap-daa nam-baala yak tunum mafak imi sikil diim abam-nokomi namti kaa tiltam tabu kemin,
MAT 26:46 tiltam tolnip unum a! Nak-tunum nami nam-fatap-daalala, nelokomip ayo din atamdi yo, kalala talaba kemin, tilip una-tala dak-duulum o, kala Yesus ayo almi daang bakaalin tunum iyo kanum bakaya ko.
MAT 26:47 Kulu Yesus ayo weng bakam-salale, almi daang bakaalin tunum talangkal, la talang kaata tala kemin, ali Judas ata. Kamasi kaa, pris awem tunum imi kamok kamok so, Juda kayaak imi kamok kamok iso, ita taba-lom tunum yaapkan iyo im-baalip wan kong so, ulin so, kuliiliple, Yesus ami dap-fatap-daalokoma tunum Judas aso tal-bom ale, Judas ayo bokoya-lomda: Kipyo! Kano ata-bom iliwa, nita din tunum kaali, kuluwaata kayi! kala dap-tal miki-lom fiil buluk tokoli namti, kulu be kemin, ipyo dap-tal fukulin o, yakale, baa kutama tala-bilip,
MAT 26:49 Judas asiik Yesus almi dik-yak-dela abiltap umbital weng umonba-kup: Kukuyin tunum kaa balap o? kala yak dap-tal miki-bam fiil buluk tokola-laam-salale,
MAT 26:50 Yesus ayo bokola ko: Nak-tunum, kabi kanimin ma nolon o, kala talap uyo bii-bii kemin daa yo, abiltap nolan o, akan-kaamale, kulu tunum iyo tal Yesus namti dukum-kup dap-tal-fukulip.
MAT 26:51 Yesus ami daang bakaalin tunum ma ata bainat almi iim tem kawu bombe kaata, kuluu-lomda, pris awem tunum imi dabom ami ok tabola bom ilin tunum ami talang kaal malii tik-daa kulaawala tildaak abale,
MAT 26:52 kulaali, Yesus ayo almi daang bakaalin tunum ami bokola: Dok kanolin tunum kaata taba-lomda, bainat ta kuluu aptum kusnum iyo yelip taanip namti, imi kayaak isiik bainat ta ti yelip taanokomip kemin, dinin daa. Baan kapni bainat kaa asuk kulaak almi iim tem unak o, aka ko.
MAT 26:53 Nali nalmi Aatumen God ami dik-daali ayo abiltap almi ensel yaapkan yam iyo bokoyila, tal nayo dong dokop-nipla tangbal unon o, kali kaali, yaap kanolami. Kabi kabak utabap disa ema?
MAT 26:54 Ya, nali Atok ami dik-daalila ayo kanolokoma disa. Siin sawaayak kaptoowu God alalta almi Sukon Tem kabaku kutii boko-lomda: Nami Man kaali, waasi ita taba-lom aalipla saaknak o, kalala alta kanum bokosa. Kemin, nalmi Aatumen God ami bokola-lomdi: Atok kabi dong dokop-nawa tangbal unon o, kalokomi kabak-ali ami weng kutiisa kaa, lo kutii-lom kutoop saak telokomi namti, ami weng kutiisa uyo tiltam tituun ke-lokomu dinim o. Nali kabak dik-daalokomi disa kayi! kala Yesus ayo daang bakaalin tunum imi kanum bokoyila ko.
MAT 26:55 Kaata Yesus ayo tunum tal dap-tal-fululip imi bokoyila ko: Ibi, nali din lotu am diilim kaptamu tiin-bomdila unang tunum imi suunkup kukuya-laabi kawu, tal nam-tal fukulakin kaa, kanimin o, kalalip kulaasip. La, ibi kamala kalawuuta, aptum kusal ye-bam, mafek mafek yukut dakaayin tunum ami dap-tal fuku dedu-laabip tap ke-lom kanaat bal, asukum bal, bainat aye kiita til akiip-na-lom de-namulum o, kala tiltam tilip yoko?
MAT 26:56 Mep kipni kukup kaa kano tiltam tilip kaali, yaap ma ke tiltam tilip disa. Lale, ipni kaa kanolip uyo, God ami profet weng ku-fatap-dakamin tunum kiimi weng, God ami Sukon Tem dolsip uyo kula fan tiknu ko, kala Yesus ayo tunum baa taldip sok dedulip imi kanum bokoyila ko. Kemin kulaa, Yesus alami daang bakaalin tunum iyo weng san-ilomdip, Yesus ayo kelalip abiltap wakadaa una-tala-kelip ko.
MAT 26:57 Kayafas kaali, tunum awem imi kamokim diildiil pris kemin, lo utamsip tunum iso, Juda kayaak imi kamok kamok iso, iyo tal kaami am kawu tiin-bom iliwa, tunum Yesus dap-tal fuku-lomdip iyo ililta dibiilip tal kamokim Kayafas ami be kawu daalipya,
MAT 26:58 Yesus ayo dafuku dibiilip una-biliple, Pita ayo Yesus ami mafiing tem da samaan so kaltoowu akola tap-tal tap-tal yak aba din hetpris Kayafas ami am kaami daam tem una. Lale, tam am unoma disa. Kalo abip daal uti daam tem kabaaku bom ilomdila kamok kamok iyo Yesus kaa dok nonbip i, kalon o, kala-lomda tiltam daak siip lo kawu soldiya iso, nikil tiinip ko.
MAT 26:59 Kemin, pris o, kala awem tunum imi kamok kamok so, alik imi kamok kamok iso, iyo Yesus aalum o, kala-lomdip, tunum kawanta Yesus ata-bilip, kukup mafak so ma nola atabip kala, kala-somdupya, kiita fokoluwa weng talalmin umi baan diim kawu, ibokoliwa yo, kala-lom iyo fen-bam iliwale,
MAT 26:60 kulaa, tunum yaapkan iyo kamok kamok imi bilip kawu, tal-ilom Yesus ami sang ayo kasen-fakalip. Katale, kamok kamok iyo ma utamiwa yi, Awu, kabak-ata, mafek mafek ban dukum keba kemin, kaami kalan kaata talola aalokomup daa yo, kemipya, kulaa tunum alep ma ita tal boko-lomdip: Kipyo,
MAT 26:61 tunum kalawaali boko-lomda: Nali ti, God ami lotu am diildiil uyo balata kutiili bii am alep keluya, am asuumano diim kula asuk delami no, kalaya nulmi talang tem alep alep iyo weng san iluwa, kanum bokose no, kala kanum bokoliple,
MAT 26:62 kulaa, awem tunum imi kamokim diildiil Kayafas ayo tam tola Yesus ami dik-daala ko: Mep tunum alep kalawiimi kaa, bakap-tambip uyo kanimin o, kala weng an-anung-daa bokoyin disa, kebap i? Kii kanimin o, timbip i? aka. Kata,
MAT 26:63 Yesus ayo kano duluuma ilale, Kayafas ayo asuk bokola-lomda bokola: Kapyo, nali weng ma dik-daap-ton o. Kabi disa kawu bakap-nin disa suunkup ilin tunum God ami win awem kaata-kup dafo-lomdap tituun-kup maan tiip-napya utamon o, kala-somla kemin, kabi God ami uldaa tam-buula tiltam Kamokim kesap tunum Kraist o kebip kaa, kapta ema? akala
MAT 26:64 Yesus asiik bokola: Tifaneng kaa bokolap; alik ibi weng san iliwa, nami weng kala bokolon o. Bom ilom kaptoop ali natamipla, Dukum ami Man, Nali abiil tikiin kawu ilin titil-kup tabasa God ami sikil tiingtup diim o, kala Kamokim ami baan diim kawu tiinbi kala nikip ilom ale, kaata utamiwa yi, Abiil tikiin umi ibin umi tip diim kabaaku tiindala tala kalalip nita-mokomip o, kala kala-lom Yesus ayo kamok kamok imi kanum bokoyila ko.
MAT 26:65 Kanum bokoyilaya, Kayafas tunum awem diildiil ayo weng san-ilomda Juda kayaak imi aket uluum tabemin umi kukup uyo kanumin kemin, almi ilim mikiba uyo balata kutii-lomda, tunum alik tiinbip imi bokoya-lomda: Kipya! kaami weng mafak bokola kalawaali, God ami win ku-mafak-daala, ipkal weng selip. Kemin, almi sang bokola kaa, nuli tunum ma fen-bam atamupla, kaata Yesus ami sang uyo maso ma bokoyokoma disa!
MAT 26:66 Kemin, kipni aket fukunin kaali, tunum kalawa kalok nolum o, kalbip i? yakale, isiik bokola-lomdip: Kulaaye? Atin ti kukup mafak ke-lom God ami weng mafak bokola kemin, kuno kambolap aalip saaknak o, aka-lomdip
MAT 26:67 kulu mok tak-binalip yak Yesus ami tiin matum diim abe-bam ale, sikil tangafap ta biwaka-balale, malo ma sikil amim tup biwaka-bala, ke-bam
MAT 26:68 atafiimin weng bakan-bamdip: Kabi boko-lomdap: Nali God ata nami uldaa-nam-buula tiltam Kamokim kesi tunum namti kalabii no, kala-laabap kaali, kabi alik utamsap. Kemin, kabi nitaman! Awu, kaa kanta tal neba no, kalbap namti, bokoyapla, weng selum o, kala atafiimin weng bakaalip ko.
MAT 26:69 Kanon-bilipla, Pita ayo abip uti daam tem kawu bom ilale, awem tunum imi kamokim diildiil Kayafas ami ok fukulin unang ma uyo tal Pita ami bokola-lomdu: Kapso ti Provins Galili kayaak Yesus aso tal-unen-umbip o, akuya,
MAT 26:70 tunum yaapkan imi tiin diim kawu, Pita ayo yawaal daa-lom bokola: I, daa! nali kupni weng bakabap kabak-ali dotu ma kaal kelin dinim bii no, wunba-kup,
MAT 26:71 kamboya yang abip uti daam tem umi amitom mepso kawu tola ilale, kuno ok tabuulin unang kusnum ma uyo tal Pita ayo atam kenbu-kup, uyo mep tunum malo ma tolbip imi bokoyu ko: Tunum kalawaali abip Nasaret tunum Yesus ami daang bakaalin tunum namti kulube, aka kemula,
MAT 26:72 Pita ayo asuk atin ti yawaal daa-lomda: I, ti disa te! Ti tifaneng nali tunum kaali ma talalu atamsi disa yo, kala kanum bokowa ko.
MAT 26:73 Kulaa, kuno ilanin tap ke tunum kulu tolbip iyo din Pita ayo bokolip ko: Kabi nuli weng seluwa yi, Kabi Provins Galili kayaak imi weng tap bakabap kala tukup kemin, fan ti kapso Provins Galili kayaak kemin, kabi fan Yesus ami daang bakaalin tunum o, tambup te! aka kemiwa,
MAT 26:74 Pita asiik weng dukum-kup bokoya-lomda: Ee, nali atin ti tunum kaa ma atamsi disa! Nali kasen-fakamin weng ma bokoyi namti, God ata taba-lom angtiil yol kup-nak o, yakan-kaam-salale, kulu awon kakaruk aalap namti naan-tabamnale,
MAT 26:75 kulaa Pita namti weng sandaya, asuk aket fanang daala yi, Awu, Yesus ami kamasi bokop-na-lomda: Awon kakaruk aalap ayo naan-tabin dinim kama bom ilala, Pita kabi nami sang ayo bokop-na-lom: Ni kaa ma atamsi disa yo, nakan-kaabi liip asuumano fak-daalokomap o, namba kaali, faneng kaa kanoli kala aket fuku-daale, tunum kulu aso, nikil tolbip iyo kamboya tam daak uti daam tem kabaaku aba-lom dukum-kup iin-bam amama ko.
MAT 27:1 Kemin, am daan-ilom kutim kuluwu awem tunum alik imi kamok kamok sole, Juda imi kamok kamok iso, iyo weng talalulipla, kulaa Yesus ayo kuno kelup aalip taanak o, kala-lomdip ilmi soldiya iyo bokoyilipla,
MAT 27:2 ita Yesus ayo sok de dibii din dabaalip yak Rom kasel imi kiyap Pailat ami sikil diim abamna ko.
MAT 27:3 Kanolipla, Yesus ami dap-fatap-daase tunum Judas ayo dulul eng ma weng sana yi, Yesus kaa aalum o, kalip kala, kala-lomdala, ami aket tem ayo mafak-kup kelule, aket fasuubiile, aket fanang daa mep tuumon pris awem tunum sole, Juda imi kamok kamok iso, imi konbip uyo asuk kulii-din ilmi daayon o,
MAT 27:4 kalala, kulii-din bokoyala ko: Tunum kaa kukup mafak so ma nolin dinim keba. Yale, kaa nalta dabaali yak ami waasi kipni sikil diim ababa kemin, kamala kuyaku, aaliwa taanokoma. Kemin, kaali ti nalta kukup mafak kenbi no, kalala, kamok kamok isiik bokolip ko: Kapni kanobap uyo kaa numi san daa; kaltapni san te! akiwa,
MAT 27:5 Judas ayo imi weng ayo weng sandaya, tuumon ayo sekela kulaala daak lotu am diildiil umi abiin kabamna, kambola abiltap tam daak abip abala bina din binang an-kutiilu ko.
MAT 27:6 Pris tunum awem imi kamok kamok iyo utamipla, Tuumon ayo sekela fokola daak abiin kabamna kala, kala-lom, daak tuumon kiiyo kumup-daa-lom nikil bokolip ko: Nuli tuumon kulawiili kuluu-lomdupla, tunum aalip saak-nokoma ami kun mobup. Kemin, kaali moni mafak kela ko. Sawaayak Moses ami Lo uyo boko-lomdu: Ibi tunum aamin umi kun moni ayo kuluu God ami kola-lom lotu ami diildiil kaa tiimin daa yo, kalsu kemin, moni kalaali kuluu kalok nolokomup i? kala
MAT 27:7 weng taken-bam tawaal ma molum o, kala-lomdip tuumon ayo kulii-din tawaal kayaak kola ami tawaal uyo moliple, tawaal kayaak ata tawaal fakel-bam ok ket talala-yaaba kemin, kamosinim kaali tawaal kaptam-ami win kaali boko-lomdip: Ok ket talalmin imi tawaal o, kem-laabip. La, ilom pris tunum awem iyo mo-lomdip tunum kusnum kayak kayak imi taanip kulii-din kaptamu imakamsip. Kemin, kaptam-ata kom tem kelula, umi win ayo tuk-duu-lom: Tunum an-silip ami kun kaata, kuluu-lom tawaal mo-silip o, kemsip kemin, yak aba tal kamala kakal ti kuno bakabip o.
MAT 27:9 Sawaayak kawu, God ami profet Jeremaya ata kaami sang uyo boko-lomda: Siin kaali, Israel malo ma ita weng talalu kutii boko-lomdip: Numi tuumon dukum ulmi-kup 30 kiita kuluu-lom tunum kaami kun ayo molokomup o, kala-lomdip molip sulula kulaa, ilom asuk tuumon kola mo-silip kaa kuluu-lomdip, ok ket talalmin tunum ami tawaal kun mobip. Kemin, siin kawu kanolin daa. Bom iliwa, God Dukum ata bokop-na-lomda: Kapta bokoyilapya iyo kanolin o, nakala, kii nasiik bokoyilila kanobip o, kala Jeremaya ata kanum bokosa kemin, Jeremaya ami boko-lomda: Siin mobip o, kalsa kaami miit uyo bom ilom molokomip kayi! kalsu. Kemin, kamala kulu fan fatapnu.
MAT 27:11 Juda-miin imi kamok kamok iyo Yesus dap-tama tal Rom kayaak imi kiyap Pailat ami diim daaliwa, Pailat ayo Yesus ami dik-daala ko: Kabi Juda-miin imi kamokim king namti kulu-balap ema? akale, Yesus ayo Pailat ami weng ayo maan tela bokola: Nali kaa ma bokolin disa; la, kabak kaltapta kanum bokolap o, akaya,
MAT 27:12 kulaa, Juda-miin so, awem tunum pris so, imi kamok kamok iso, iyo kasen-foko-lom: Yi, tunum kalawaali ti fan kanola kukup mafak keba te! kalbip uyo, maan tiiyama disa. Kano tiin-kup itam keya duluuma tolna.
MAT 27:13 Kemin, Pailat ayo Yesus ami bokola-lomda: Kabi kapni win ku-mafak-dakaap-tambip kaa weng sebap e? disa? Kabi kanimin o, kalalawa imi weng kaa maan tiiyikin disa kelap, kulaa duluumbap yoko? akale,
MAT 27:14 Pailat akal utamaya, Yesus kaali, kamok kamok imi weng ayo maan tiiyin disa kela kala, kala-lomda, aket fanang alik tambanelu aket dukum fukuna ko.
MAT 27:15 Juda-miin imi kukup ayo kanumin kemin, utamipya, Wasital tiltam tulu ayo Juda-miin imi iintang am o, kala Pasova umi ima tini-bam ina fakamin am daan tiltam tulu kala, kalalip tala-tala-kelipla, Rom kasel imi kiyap ayo bokoya-lomda: Tunum sok deduusup ayo iltipta boko-lom: Kanuminok kulaata til daa dabaalin o, kaliple bokoyi: Ata din til daali no, yakaya, ilta kulaata ko, kalum kala-silip; almi soldiya iyo din til daa-lom win tolola kelip un-un ken-umbip.
MAT 27:16 Kemin, sawaayak kawu tunum ma ami win kaali, Barabas ali kukup mafak mafak kaata nuu-balaya, win fikyak dela-yaabipla, dap-tal fuku sok de dibii tal kalabus am kaa daalip tiinsa. Kemin,
MAT 27:17 kulaali Pailat ayo utama yi, Yesus ali kukup mafak kaata ma kanolaya, kamok kamok iyo dabaalip tildak nami sikil diim ababa daa, kalba-kup ale, kuno unang tunum iyo Yesus ami weng ayo baka-balaya, weng san-ilomdip ami win ayo kufon-bamdip fiyaap duu-biliwa kemin, kaata kamok kamok kiita, almi kanuba kaata, tolola-lomdiwa kemin, dabaalip tildak nami al abamna kala utama ko. Unang tunum yaapkan iyo talaaliple, Pailat ami aket fukunin ayo, Tunum unang imi aket fukunbip kaata, Yesus ata uldaa dabuulipya, nakal soldiya imi bokoyi, taldaa dabaalip unokoma nema yo? kala-lomda, unang tunum imi bokoyila ko: Kaata yak Barabas kalawaata, tildaa dabaalip unak elile? Yak God ami uldaa-dabuula tiltam Kamokim kesa tunum Kraist ayo, akan-kaan-umbip Yesus kalawaata, tildaa dabaalip unak e? Kaa dok kata tildaa dabaalum o, kalbip? yaka ko.
MAT 27:19 Pailat ayo weng talalmin am kaptamu tiin-bom Yesus ami sang baka-bilip weng san-kaa-bam ilale, kalel uyo sukon ma dola kulaawalu tam utamala, kulaa bokola-lomdu: Kapyo, nali kamala kutamiip kulu lom duu-lom Yesus kaa atamdila suunin-kup kebi. Kemin, weng sanilap bokop-ton. Kaali kukup mafak so ma noba disa; ali ti tunum tangbalim kemin, kabi num-som kukup mafak so ma kolalawi! kala-lomdu dola kulaawalu tiltam tulu utama ko.
MAT 27:20 Awem tunum imi kamok kamok sole, Juda-miin imi kamok kamok iso, iyo Pailat ami weng dik-daala uyo, weng san-ilomdip tunum alik kulu tolbip iyo moyin-bam bokolip: Ibi Pailat ami dik-daaliwa, almi soldiya imi bokoyilaya, ita din ilom Barabas sok baa tildaa dabaalip unak. Tabanala, Yesus ata aalin o, kalipla,
MAT 27:21 kiyap Pailat ayo asuk maso ma dik-daaya-lomda: Kipni aket fukunbip kaali, tunum alep kii dok nolin tunum ata sok baa dabaalup unak o, kalbip namti, kaata tildaa dabaalup unak eli? yakala, asuk isiik boko-lom: Barabas ata tildaa dabaalip unak o, kalbup o, akiple,
MAT 27:22 kulaa Pailat ayo dik-daaya: Yak kunolip kulaali, God ami ulduula tiltam Kamokim kesa tunum Kraist o, kem-yaabip Yesus ali kalok nolan o, nambip i? kalale, alik dukum-kup naan-bam bokolip ko: Dabak as diim daa-lom aalin o, kal-bom kanumip ko.
MAT 27:23 Kanumipla, Pailat ayo bokoyila ko: Aa, kabak kanimin o, kalalipla kanubip i? Kaali kalok nolin ban ma ukduuba no kalalip kaami kalan o, kala-lom aalokomup i? yaka. Katale, iyo alik weng san-ilomdip dukum-kup fuut-bam boko-lomdip: Dabak as diim daa-lom aaliwa, taanak o, kemip ko.
MAT 27:24 Kulaa, Pailat ayo utama yi, Nami weng bakayimbi uyo weng sep-nin disa kelip kutoop saak tiip-nanbip kala, kala-lomda, nali imi weng kaakal kutoop kot tiiya ke-lokomi kaali, dinan kulii-tabokomip o, kala-lomda almi okok kemin tunum ma bokola-lomda: Ok ma iluu kulip-na tal o, kala bokola ayo din ok iluu kutal-daalaya, Pailat ayo alik imi tiin diim kulu almi sikil diing-bam ale, bokoyila ko: Nami sikil kala diingni kaami miit kaali boko-lomdi: Tunum kalawaali aalin a! kalbi disa; ami taanokoma kaali, nami san disa, kaa iltipni san o, yakala,
MAT 27:25 alik tal tolbip iyo bokolip: Ayo, nuli utamuwa, Ami saak-nokoma kaa, nulmi mafek mafek o, kalup. Kemin, kaa kukup mafak kelup namti, God alalta nusole, numi man loop kaptoop iso, numi angtiil yol uyo kuno kuyama no, kemip ko.
MAT 27:26 Kanu-biliwa kemin, Pailat ayo almi soldiya iyo bokoya din Barabas ata sok tildaa dabaalip unale, Yesus kaata, sok faklet ta kuluu langatal kaansi kambolale, soldiya imi bokoya ko: Ibi dabak as diim daa aaliwa, taanak o, kala kabak-ali Juda-miin imi aket fukun-bamdip: Pailat kapyo, kabak-ata kanolan o, kebip uyo Pailat ata kanoya ko.
MAT 27:27 Kemin, kiyap Pailat ami soldiya iyo Yesus ami dibii tam kiyap ami am dukum anung kaptoop ali almi sin-laamin am kemin, dap-tam daa-lomdip, soldiya alik iyo tala-tala-ke falala dap iip kabaak daa-lom
MAT 27:28 kasen-foko king imi ilim batbat mikin-umbip tap kela makelum o, kala-lomdip, almi ilim ayo dilduu kukan-tela-lomdip, ilimi ilim fiingim ma kuluu dildaak tinela-lomdip,
MAT 27:29 sok lingliing soyim kaata, ukduu-lom king imi nafalum tap ke faa-lom kutam dabom diim dildaak tinenbip-kup, tam malal ma kuluu kasen-foko kaa king imi asukum kasaa altap o, kala almi sikil tiingtup diim kuyaku amela kabi kamokim o, kala king imi kukup uta kanola-lomdip, katuun duung fakela daak tiin, tituleng bakan-bamdip: Juda kayaak imi kamokim king balap yoko? akan-kaa-bam ale,
MAT 27:30 mok tak-saala tal-une-bamdip le, malal ta kuyak dabom ayo dakaan-bam ke-lom
MAT 27:31 iyo itafiimin weng bakanbip ayo disa kelula, iyo ilim fiingim kulaak tinelip ayo dalduu kukan-tela-lomdip asuk almi ilim kaata, kuluu makela dabii tam saaklo abalup dibii din as diim kawu dabak as diim daa aalum o, kala-lom dibii unip ko.
MAT 27:32 Waasi dinin tunum iyo abip dukum Jerusalam uyo kamboya Yesus ayo dap-tamalip un-bomdiwa utamipla, Saimon ali Provins Sairini kayaak ayo liip kulu tal taba kaa kalale, disa kawu ami aba mola-lom fotabipla, Yesus ami as tiim aalap dukum dabak daa aalokomip uyo, kolip Saimon asiik kuliila yakyak tam
MAT 27:33 Golgota muk kun o, kala kaami miit kaali, Tunum Dabom Kun tap o, kem-yaabip kawu din abale,
MAT 27:34 kulaali, wain ok sole, marasin atul tabasu kaaso, kiiyo kulii-tal Yesus ami kuyak delup ina-lomda ami yol angtiil ayo katip so, ma keluk o, kala kolip. Lale, Yesus ayo: Da mep katip ma lutmo atam, daa yo, kala kambola ko.
MAT 27:35 Kulaali, Yesus ayo dabak as diim daabip-kup, kawu tuum katip katip saatu kiita foko-lomdip kulaalup tam aba daak aba ke-bam, kanta ata ata ke Yesus ami ilim ayo kuluula kala kalalup utamum o, kala-lomdip Yesus ami ilim namti abaanulip disa kelaya,
MAT 27:36 tiin-bomdip Yesus ami atafii-bam bom iliwa,
MAT 27:37 Pailat ami okok kemin tunum ma ata as kom ma kuluu-lomda, dok ami kalan kaata Yesus kaa aalip, kala-lomda kaami sang uyo kabaku dola-lomda kanum boko-lom dolna ko: Tunum kalawaali, Yesus kaa Juda kayaak imi king o, kala-lom as kom diim kabaku dola kuyak tam Yesus ami dabom mepso as matum diim kabaku kutiilale
MAT 27:38 kulaa, waasi dinin soldiya iyo, Yesus dabak as diim daa sil bikibip-kup, kuno asuk tunum yem-tal-une-bamdip, imi bung mafek mafek yukut dakaayin tunum alep yakal, yim-bital yim-bak as diim daa-lomdip, ma ata dap Yesus ami tiingtup lo dip-tam diibip-kup, ma ata dibii-tal aba yang awaanlo kawu dip-tam dii keya-lomdip yim-tam diilip ko.
MAT 27:39 Tunum mepso kulu tal-unebip iyo aban-den-bamdip Yesus, ami atafiimin weng uyo bakaan-bamdip:
MAT 27:40 Kapya! kabi kaltapni bon tem weng baka-bamdap: Nali lotu am diilim ayo balata kutiili bombii am alep keluya, am asuum diim uyo, asuk delokomi no, kala kaltapni tong bakamsap kemin, kabi fan God almi man alik-daap namti, kano-lom, kaltapni angtiil lak uta duulawa, as diim tam diibip ayo kela tildaak tawaal abamnan a! ke-bam atafiimin weng bakaaliwale, kuno
MAT 27:41 pris awem tunum imi kamok kamok so, lo utamsip tunum imi kamok kamok so, aa, Juda imi kamok iso, yakal ti tong fakaan-bamdip atafiimin weng bakaan-bam bokolip ko:
MAT 27:42 Kaa unang tunum kayak kayak imi angtiil lak uta duu imi dong dakaayin-bala, yaawa-yaabip. Lale, ali kalok kano-lomda almi angtiil lak kaata duu-lom yaap-nama dinim keba ni? Kulaa, fan Israel-miin numi kamokim king dinam, fan as diim ayo kelala tildaak tawaal diim abamnala nokol atamupla, U, fan kaali God almi man tituun uu, kalupla yo.
MAT 27:43 Kemin, akal boko-lomda: Nali God ami Man o, kem-yaaba ami aket fukunin uyo: God alalta, nayo dong dokop-na-lomda nam-buulaya, yaap ilokomi no, keba. Kemin, atam iluwa kano dong dokola namti, fan bakaba no kalum o, kala-somla ko. God ayo ti faneng dong dokola yaap-nokoma kaata utam, Awu, kaali fan God almi man alik-daap kalum o, kala atafiimin weng bakalip ko.
MAT 27:44 Kanum bakaan-biliwa kawu, kuno tam tunum yan-tal-une-bamdip imi mafek mafek yukut dakaayin tunum nikil im-diibip alep yakal ti atafiimin weng uyo Yesus ami bakaan-bam kemip ko.
MAT 27:45 Kanolip bom bii atan tal dibimnule, kulu am namti malang tini-lom am bokon alik kulu dik-daa kulaasu uyo malang tini-lom tilnong molu bom bii, am atan tal dayak abamna 3 kilok o, kala-laabip kelala,
MAT 27:46 malang tinilin ayo disa kelon e, kem-sulule, kuyaku Yesus namti Hibru ilmi weng dukum-kup bakan-taba toop aba boko-lom: Eli, Eli, lama sabaktani yo, kala kabak-ami miit kaa boko-lomdu: Nami God kapyo, nami God kapyo, kanimin o, kala kuno kep-nanbap yoko? kal-bomda Hibru ilmi weng kaata kuluu bakamale,
MAT 27:47 tunum mep kulu tolbip imi tunum malo ma iyo weng san-ilom bokolip ko: Sawaayak God ami profet weng ku-fatap-daa bakayin tunum bom biisa Elaija ami naala-taba ko, kala-lomdip,
MAT 27:48 tunum maakup ma ata abiltap bina yang mafek mafek tiiyup kon altap kaata, kuluu kulaak wain ok atul tabin kabaak mo-lom, as daang tiila kulii-tal koli inamnak o, kala kulii-tal aba tam kukaalale,
MAT 27:49 tunum malii ma ita bokolip: Ka! kuno bom ilawa, atam ilup Elaija ata talda dong dokola tildaak aba ne? kalum o, kala iliwa,
MAT 27:50 Yesus ayo boko-lomda, Kwin kaluso kawi! kala-lomda dukum-kup asuk Aalap ami naan-daanba-kup kulu saakna ko.
MAT 27:51 Saaknaya, lotu am diildiil kaptamu ilim aalap ma ku diiliwa tildaak God ami abiin awem uyo akiisu. La, Yesus ayo taan-laam-salale, kulu ilim aalap dukum ayo bitam mutum diim kulu, tela tikip-kup biki tala ti kulii bitaldaa matum daa-lom, malii na malii na ke-lomda kulaalaya, God ami abiin awem dukum kaptam ayo fatapna ko. Kulaa, bim aalap ma kutaltam daa am bokon kulaaso, kuu kukula saan-bam filifili-bamdu tuum dukum dukum iyo iip kuyak duula une-bulu, tale-bulu, kem tiltam abuya,
MAT 27:52 God ami unang tunum saaknip imbii din tuum tem bal-kaan-unsip imi kom tem imi amitom tuum kuyak katii katii kesip uyo, ulta-kup busuu kutii kuno kelula, unang tunum saaksip iyo tam tiin bom-iliple, am alep disa kela am asuum diim kawu,
MAT 27:53 Yesus akal ti kuno tam tiin baalale, yakal kuno tuum tem kaptamu tiltam abalip yak aba din God ami abip Jerusalam kaptam banaaliwa, unang tunum yaapkan kulu tiinaabip iyo itafiimip ko.
MAT 27:54 Kanu-buluya, soldiya iso, soldiya 100 tiin molin tunum kamokim o, kalin so, iyo Yesus ami tiin mobip yakal utamiwa yi, Yesus ayo taan-laam-salale, bim tale-bulu, saak kukup kusnum akal alik akal alik iyo tabe-bulu kemip kala, kala-somdipla, alik iyo suunin sakbaalim dukum ke kun dinim keyula bokolip ko: U faneng, kalaali God almi man tituun o, kalip ko.
MAT 27:55 Siin kawu, Yesus ali Provins Galili ayo kambola unala, unang yaapkan yakal kuno kelalip iso, din imi ima fuuyim-bam ale, dong dakaayin-bulup yo, kala iso, yakyak tal Jerusalam tal-silip. Kemin, unang iip maakup maakup iyo abip Makdala kayaak unang Maria ukol aa; Jems, Josep alap imi awak Maria ukol, Sebedi man alep imi awak, nikil kanolin kiita-kup. Unang yaapkan iyo yak aba yang samaan so kawu tola ata-bom-sulupla, waasi tunum kiita taba-lom Yesus kaa kalok kanolip kala kalum o, kalalip nikil din atafiimip ko.
MAT 27:57 Awasekim Josep kalawaali, Provins Judiya kaptam-ami abip Arimatea kayaak ali win tibin dukum ale, ali Yesus almi lak duulin tunum kemin, bii am tiinale yak aba din kiyap ami am abale,
MAT 27:58 Rom kayaak imi kiyap Pailat ami atam dik-daa-lomda tal, dik-daaliya, Ayo, yaap o, kalap namti, Yesus ami as kuli kaali, ayo yo, kalapla kulii-din kuwaalon o, kalalila tili no aka dik-daalaya, Pailat ayo, kulaa yaap o, kala-lomda almi waasi dinin tunum iyo weng umuuya tal atamipla, bokoyila din Yesus ami as kuli ayo til-daalip tildaak abamnala, dabaalip yak Josep ami sikil diim abamna ko.
MAT 27:59 Kamasi kawu Josep almi ok fukulin tunum imi bokoyilala, ita taba-lom Josep ayo ilomda saaknala, dawaalokomup almi no, kala kama tuum tem ma kalolipla bombe kemin, Josep ayo Yesus ami as kuli ayo dibii din ilomda alokso ilim namaal tambal ma kuluu de falala-lomda dibii din almi tuum tem kalola-silip kaptamu dawa-lom tuum tem kaami saal ayo tuum dukum ma taa-bi-lom talalusip. Kemin, kuuta buplun-baplun kutama tildang amitom ti saal kuyak katela unaya,
MAT 27:61 Makdala kayaak unang Maria usole, awasekan Maria ma uso, alep iyo tiin-bom tiyak daa ilipya, tuum ayo kanola liiba kala kal-bom atafiimip ko.
MAT 27:62 Yesus ayo taanale, dibii din dawaa kela tal bii silip sintam iintang am daanule, pris o, kala awem tunum imi kamok kamok so, Falosi iso, iyo yak aba din Pailat ayo atam bokolip ko:
MAT 27:63 Kamokim a! Yesus ibakamin tunum ayo saaknin disa ilomdala kawu boko-lomda: Bii nelip saak-nokomi kaali, bom bii am asuumano keliya, asuk tam tiinokomi no, kalase. Kemin, ami weng kaa bokose kabak-ali ti aket dukum fukunbup. Kemin,
MAT 27:64 numi aket fukunbup kaali, almi daang bakaalin tunum ita din tuum tem un-ilomdip, ami as kuli ayo maaklo yukut kuluu kulii-din tuum tem kusnum kawu buluubip-kup, tunum unang iyo bokoya-lomdip: Yi! atin tifan taanba. Yale, God alalta asuk dafola tam tiinba te! kalokomip ema yo? kemin, kano-lom ilom ale, almi daang bakaalin tunum iyo kasen-fokoya-lomdip Yesus kaali, tam tiin baaba no, yakan-kaa-mokomip kaata dukum-alom uta uta ke-lom ale, siin kamosinim Yesus almi kasen-foko bokoya-lomda: Nali God alta uldaa-nam-buula tiltam Kamokim kesi tunum nali kalabii no, kem-tal-unemsa uyo, kulaak banule, ke-wokomip kala, kala-somdupla kabak-ami aket dukum fukunbup o. Ami daang bakaalin tunum ita din ami as kuli ayo kuluu kuliilip unokomip. Kemin, baan kapni soldiya iyo ma fokolap din tuum tem dawaabip ayo kamala so, sabi so, uyo kutii-bam iliwa yo, kala Pailat ayo bokoliwa,
MAT 27:65 Pailat ayo almi waasi dinin tunum iyo ulelna yak kamok kamok imi sikil diim abamniple bokoya ko: Kibi mep soldiya kala foko kulii-unabip iyo im-tama din ababip-kup iltipta yak tuum tem saal ayo dukum-kup nek kala liilipla waasi dinin tunum kii kutiilalip ko.
MAT 27:66 Awem tunum imi kamok kamok iyo Pailat kambola as dan ma kulii-din-ilomdip, tuum tem saal balang diim ayo taploop daa kela, kaa ti nek kalu kayi, kala-lom waasi dinin tunum iyo yam kom tem ami amitom tiile, bokoyip ko: Ti kuldaaku kutiilin o, yaka kano keya tabanip ko.
MAT 28:1 God ami iintang am daanbu uyo disa kelule, Sande kutim mepso atan tiltam tabon e, kem-sulule, Makdala kayaak unang Maria sole, awasekan Maria so, alep yakal yak aba din tuum tem Yesus dawaabip uyo utamum o, kalalip unip ko.
MAT 28:2 Alep yak aba din tuum tem mepso kulu banipya, Kwin! bim aalap dukum ma tabamnala, tawaal ayo kukula-saan-balaya, God ami ensel ma abiil tikiin kawu tildaak-ilomda kom tem ami tuum kom ta kuyak mo saal liibip ayo baplun kulaala yak banu, kela tam tuum dibim diim kabaaku tiin bom ilala,
MAT 28:3 unang alep iyo tal uliwa, Kwin! ami tiin matum ayo mafek mafek namaal lamlaam sokan dukum ultap an-tii-lom tiin buluusi so, keba kala atam ale, kuno ami ilim kakal ti abiil matak ultap kaata mikiba kala atamip. Kata,
MAT 28:4 soldiya yakal ensel kaa kanola kala atam-ilomdip suunin dukum ke-lom wulwaal-kup tap-tap um-bom ale, tiin buluusi anu-fokola daak tawaal aba-lom atin tunum anu-kutiilap saaka-yaabip tap kelip ko.
MAT 28:5 Kanolipla kemin, ensel ayo unang alep imi bokoyila ko: Kiwe, kibi nami nitam suunin daa. Nali utamila, ibi Yesus dabak as diim daa aalip saakba ami fanang fen-talabip kala kalbi. Yale,
MAT 28:6 ali kalawu bombe disa; ali tam tiinda tuum tem kaltam kelala tam bana. Ali siin kaa ipni bokoyase kaayo, Asuk tam tiinokomi no, kalase uyo kibi lukuuyimbu no? Ti ipkal tal-ilomdiwa, ami dibii tal dawaabip abiin-kup kela uyo utamiwa yi, U, ali faneng tuum tem kaltam-ali kelala tambana kaa kalin a!
MAT 28:7 Tal utamip kemin, baan bina din-ilomdip ami daang bakaalin tunum iyo bokoya-lomdip: Kaali ti faneng Yesus ali fan taanba. La, ali asuk tam tiinda tuum tem ayo kambolala tambana. Kemin, ali asiik dusiin daa Provins Galili unaya, kipyo din atamin o, kala-lom din kanum bokoyin. Weng tifan bokoyi ko, kala ensel ayo bokoyalale,
MAT 28:8 kulaali, unang alep iyo weng sanip kaata da suunin so, ke-bam ale, fiyaap duu-bamdip kom tem kaali, kambola abiltap-siik daak aba din Jerusalam dindip daang bakaalin tunum iyo mafek mafek tambal ami sang kaata bakaya unip ko.
MAT 28:9 Unang alep iyo abiltap-siik binan bom ale, iyo Yesus namti liip kawu atamipla ayo bokola: Kasalep kaa silip o? yakale, alep ili king weng umuuyila-yaamin kukup kaata kano-lom tal almi diim kulu katuun duung fakela daak tiin ami yaan ayo kutal-fukulip itam ale,
MAT 28:10 Yesus ayo bokoya: Kibi suunin daa yo. Baan alep bina din nami naktum kusal kii bokoyiwa, Nikil ibi din Provins Galili kawu, Yesus nayo nitamin o, kala kanum bokoyin o, kala Yesus ayo alep imi kanum bokoya unip ko.
MAT 28:11 Unang alep iyo tuum tem kambola unan-siliple, kuno waasi dinin tunum yakal tuum tem ayo kela bina din Jerusalam aba pris o, kala awem tunum imi kamok kamok imi kanolin mafek mafek kanum tiltam tulu utamip umi sang alik uyo bokoyipla,
MAT 28:12 iyo weng san-ilomdip weng kulaalip din Juda-miin imi kamok kamok imi diim unula, kulaa iyo tala-tala-ke-lomdip weng ayo dotu kutii kela tam moni dukum ayo ukduu-lom soldiya imi kuya dil moyimbip-kup, bokoyip ko:
MAT 28:13 Kipyo, weng kalawaali kulii-din unang tunum imi bokoya-lom: Yi, kutamiip kawu alik nuyo akan faklii iluwa, Yesus almi daang bakaalin tunum ita tal-ilom ami as kuli ayo yukut kuluu kuliilip umbip kayi! yakan-kan tal-une-bilipla, fan o, kalik o.
MAT 28:14 Kanola Rom kayaak imi kiyap Pailat ali weng sanda kipni aket atul uyo kuya namti, nuta taba-lom weng tangbal tangbal ata dukum-kup bakalupla, utama yi, Awu, fan kaa ipta ban kebip disa kala kala-somdaya, kukup mafak so ma kuyin disa ke kamboyokoma. Kemin, aket dukum fukunin daa yo, kala kamok kamok iyo soldiya imi kanum bokoyip ko.
MAT 28:15 Waasi dinin tunum iyo moni ayo kuluu-somdiwa, awem tunum imi kamok kamok weng kuyip uta kulii-din kanumin sang kaata-kup bakayim-biliwa, Juda kasel unang tunum iyo weng san-somdiwa, weng kulu bokolip kuluuta kuno ti kutal-fuku bakan yakyak kulii umbital kamala kula diilu ko. Weng kaali, tifaneng ko. Kem-tabasip o.
MAT 28:16 Kamosinim kawu Yesus ayo almi daang bakaalin tunum imi bokoya-lomda: Din Provins Galili kanolin amdu tikiin kawu nitamin o, yinsa. Kemin, fan almi daang bakaalin tunum kumkal iyo yakaba tam amdu tikiin ayo tam uliwa yi,
MAT 28:17 Yesus ayo bombe kala kalip. Lale, daang bakaalin tunum malo ma iyo aket fuku-daa: Naka kalawaali Yesus taanda asuk tam tiinse ata ne disa ye? kemip. Katale, asuk king imi weng umkaayin kaata, kuluu-lom katuun duung fakela daak tiinipya,
MAT 28:18 Yesus ayo tal imi mepso kuluba talabale bokoya: Naktum kusal a! God alta uldaa-nam-buu-lom almi titil kaata alik kup-nala, tawaal diim so, abiil tikiin so, umi mafek mafek alik uyo tiin molon o, kem-tabi. Kemin,
MAT 28:19 ibi nami okok kemin tunum kelin o, kalalila ibi ulelni. Kemin, ibi din am bokon kala dik-daa kulaasu kaami tunum miit kusnum kusnum iyo alik nami weng kaata kulii umbilin bakayila-tal-une-biliwa, iyo tiltamdip nami daang baka-bam ale, nami lak uyo dukum-kup dakan-unip kala-somdipla, ibi Atok God so, almi man naso, almi Sinik Tambal aso, alimal maakup numi win diim kaata baka-bam oksam kaa wakayim-bam ale,
MAT 28:20 nami weng kukuyila-tabasi uyo alik talalu kukuyim-biliwa, kulaa yakal weng sandiwa, dotu yikik-kutal-fukulin o, kala kanum bakaya. Kemin, ibi nami weng kala bokoyokomi kaluuli soko weng san iliwa, nali maas kamboyokomi disa; Nali ti ipso suunkup bom-bili bii, am mafiing diim tulule, am bokon kula dik-daa kulaasa kalawaami dinim-nokomu kutoop kuyaku dilit kalokomi no, kala Yesus ayo almi daang bakaalin tunum imi kanum bakayinsa ko.
MAR 1:1 Kalawaali ti God ami tunum Man Yesus Kraist ami weng tangbal so, kukup tangbal so, ami kanum tal-unemsa kaami sang kaata bokoyokomi kemin, weng san iliwa!
MAR 1:2 Kemin, Profet Aisaya ayo sawaayak kawu, God ami Sukon Tem Weng ma dola kutiisa kaali, boko-lomda: God ali almi Man ami bokola-lomda: Nakal tawaal diim tunum ayo uldaa-dabuulila, ata nami kalaan tunum kelala, asiik dabaali din unang tunum imi bokoya-lomda: Kamokim ali talokoma kemin, ibi kiltipni aket tem kaali, dot-kaamipla yo, kal-bomda,
MAR 1:3 unang tunum dinim disanang bokon kawu ayo naan-bam boko-lomda: Liip tangbal inang ma dot-kaamipla kawu, Kamokim ayo abiltap talak o, kala bokoyak, ilimi aket dot-kaamin diim kawu ti bakam-salale, kapta mulo mafiing tem unokomap o, kala God ayo almi Man ami kanum bokolase no, kala Aisaya ata dola kutiila laabula, kaa faneng tiltam talsu. Kemin, kaami sang kaata weng san iliwa!
MAR 1:4 Kaali, oksam wakayin tunum Jon Baptis ami sang kaata kemin, ali din disanang bokon kawu bom unang tunum iyo bakayin-bamda: Kipni ban kemin kaali, kela-lomdip aket fal-siki tildang oksam wokolipla, God ayo kipni ban kemin uyo takan-tiiya disa keluk o, ke-balale,
MAR 1:5 Provins Judiya ami abip ma ma imi kayaak alik iso, ale abip diildiil Jerusalam kayaak alik iso, ili Jon ami weng kaali weng san-kaamum o kalalipla, iyo tala-tala-ke Jon ami weng ayo weng san-kaa-bamdip, ilmi aket uyo fal-kela-lomdip le, God so, unang tunum malo iso, imi tiin diim kawu, ilmi ban kemin uyo ku-fatap-daka-bam ke-bilipla, Jon ayo taba imbii daak Ok Jodan kumun tem im-baak daa oksam wakaya.
MAR 1:6 Kemin, Jon ayo (sawaayak kawu God ami profet o, kala weng tem bakayin tunum ma ali Elaija ami kukup kanu-bisa kaata kuluu-lomda) ali ilim tangbal ma mikimin dinim kemin, ami ilim mafak kaa taloop kamel o, kala-laabip umi kon kaata, bakelip mikilale, kang kau umi ipnaal uta ukduu ol tiil o kala ilet dotu kutii kakam kun kawu, kuyang diila nek molule, ima waan tangbal uyo falala le, kupluum so, as tem umi mumu wok so, kaata-kup in-bom biisa.
MAR 1:7 Kemin, Jon ayo unang tunum iyo bokoya-lomda: Kipni tunum ma talokoma no, kal-bom fenbip kaali, nita disa; kemin, kaali nasiik tilila, akal mulo kawu nami daang tem kawu talokoma. Kemin, ali ti kamok imi diilim ke-lom, ata ata ke nali kabaak bani kep-ninsa no kalalila, fatom kep-nala kemin, nali faneng ti tunum kemin, nali dok no-lom titil-foko yang ami miit tem kaali, din-ilomdi ami yaan-alom sok kaa baawalami disa.
MAR 1:8 Kemin, nali wok uta kuluu-lomdila, kipni oksam uyo wakayinbi. Kata, tunum ma talokoma ami wok-sam wakayokoma kaali ti fan wok daa; almi Sinik Tangbal dabaala tal kipni iipyak tem aket mafak fukunin kaata dotu yim-tiilala, kibi atin ti tangbal-nokomip o, kal-bom Jon ayo kanum bakayinsa ko.
MAR 1:9 Kemin, Jon ayo kanum-salale, kulaa Yesus ayo Provins Galili kaami abip Nasaret kap-din liip ayo tal atamala, Jodan kumun tem kawu, Jon ata Yesus ami oksam ayo ukolale kulaa
MAR 1:10 wok tem ayo sak butmo kela tiltam aba abiltap titam daala yi, Abiil tikiin uyo tem kaluulu kala kem-salale, God ami Sinik ayo awon abim altap ke-lomda taldaak Yesus ami diim ayo aba kala, kala-laam-salale,
MAR 1:11 kulaa, abiil iip-iip kawu weng ma bokola ko: Kabi nalmi Man nami aket-iip kemin, nali kapni fiyaap-kup duup-ta-laabi kayi! kala ko.
MAR 1:12 Da kem-salale, God ami Sinik ayo maak fak-daalin tap tal aba-lom Yesus ayo maaklo dabaala unbilin disanang bokon kabale,
MAR 1:13 saak kawu bombii am sin-laamin almi-kup 40 kelala, Setaan ayo tal-ilom Yesus ami dap-kukulila, Yesus ayo kukup mafak ma kela kala, akon o kala-lomda dap-kukum-tal-unema. Kemin, Yesus ayo siip wolti atul-kup tabasip iso bom-balala, ensel iyo taldip Yesus ayo dong dokola tiin molip o.
MAR 1:14 Kulaa, oksam wakayin tunum Jon ayo (taba King Herot ami kukup mafak sang uyo bakaan-balala, Herot ayo taba unuk tabuulin iyo fokola tal Jon ayo) sok delip bom-balale, Yesus ata tal Provins Galili kawu tal-ilomda God ami weng tangbal kaami sang ayo unang tunum iyo bokoya-lomda:
MAR 1:15 God ami taba unang tunum imi yim-taldang almi miit tem daa tiin molokoma kaali, mep tulu kemin, ibi utamipla, God ayo numi ban ke-laabup uyo yam-kuku-mokoma no kalbip kemin, kipni ban kemin uyo kela aket fal-siki-lomdip God ami weng tangbal uyo faneng o kala, ami lak kaata duu-bomdipla yo, kala bakayila ko.
MAR 1:16 Kemin, am ma daanale, kula Yesus ayo Galili Ok Kumun kaami balang diim kawu, liip un-bomda Saimon so, almi niing Andru aso, alep imi itama, Kiili aniing abuubi kulii-din tii-bom saanin tunum kemin, imi aniing abuumin men kaali, kulaalip daak wok tem abamnula aniing fenbip kaa, kalale,
MAR 1:17 kulaa, Yesus ayo din alep imi bokoya-lomda: Nak-tunum kusal kipyo, kipni okok kebip kulaali kela tilipla, naso nikil un-bom ok kusnum ma kuya-lom yim-baali din aniing abun-unbip ultap ken-tal-une-bam, unang tunum iyo afet daa yim-bii tildang God ami miit tem kawu dakamin o, yakale,
MAR 1:18 kulaa fan, alep iyo weng sandip, ilmi aniing abuumin men uyo abiltap-kup bisat mo kelalip, yak Yesus ami daang bakaalipla nikil unip.
MAR 1:19 Kemin, Yesus ayo alep iyo yim-bii yang mep kuluba talaala yi, Tunum alep ma iyo ilmi bot tem kaptamu ilmi aniing abuumin kaami men balata tabasu uyo bikibip kala, kalale, ayo itama. Kemin, alep kiili, Sebedi ami miining Jems sole, almi niing Jon so, ita kemin
MAR 1:20 abiltap-siik alep iyo bokoya-lomda: Nak-tunum kusal kipyo, kipni okok kebip uyo kela-lomdip tilipla, nikil un-bom nami ok asiik ma kuyilila kawu, okok kemin o, yakale, kulaali alep iyo weng sandip aalap Sebedi so, Sebedi almi ok tabolin tunum iso, ita bot tem kaptamu keyilalip, alap iyo din Yesus ami daang bakaalip unip ko.
MAR 1:21 Kemin, Yesus nikil iyo din Kapeneam abip kawu iliwa, God ami iintang am kawu, Yesus ayo din Juda kasel imi lotu am tam ilomda unang tunum imi kukuyin-balala,
MAR 1:22 iyo fanan-bam boko-lomdip: Kaami weng kukuyin kukup kaali, faneng atin ti akal kusnum kemin, God ami aket fukunin kaata dik-daa-kuluu-lomdala kemin, ali titil-kup taba-bom nuli kukuyinba. Lale, numi lo utamsip tunum yakal ti kano-lom titil-kup taba-bom nuyo kukuyamip dinim o, kemip.
MAR 1:23 Kemin, lotu am kaptam ayo tunum ma sinik mafak ta dap-mafak-daasa ayo aso kaptamu bombe kemin, kulaa sinik mafak ayo tunum kaami diim kawu bombe ayo naan-bamda
MAR 1:24 boko-lom: Wo, Nasaret kayaak Yesus, kapyo! Kabi nuli kanimin ma noyon o, kalalapla talap i? Kabi kano tal nuli yam-mafak-daali win dinim kelin o, kalalapla talap o? Nali titamila yi, Kabi God ami tunum uldaa-tam-buu-lom tam-baala tal-salap namti kaltapta kala tiinbi no, kala kanum bokolale,
MAR 1:25 kulaa, Yesus asiik sinik mafak ayo diil saan-bam bokola-lomda: Kabi dulumnapla yo! tunum kaa kewalalap yak banan o, aka-laam-salale,
MAR 1:26 kulaa sinik mafak ayo kela-lomda tunum kaayo ilela dabaala unba-talba-ke-bam dukum-kup fuutmale, kulaa kela yak banale,
MAR 1:27 kulaa, unang tunum alik iyo fanan-bamdip aptum kusal kusnum iyo dak-daa una-tala-ke-bam boko-lomdip: Kala dok nolin ma taltam taba ni? Kaali kukup akal alik ma kulii-tal numi kukuyila kemin, kulaa fan tunum la, ami titil uyo tiiksa kemin, sinik mafak iyo titil tabin weng ayo bokoya-lomda: Yak banin o, kalala, ami weng kaata-kup weng san-kaabip kayi! kal-bom kemip.
MAR 1:28 Kemin, Yesus ami kanola kaami sang kaali, abiltap yak Provins Galili kaami abip ma ma alik iyo yak aba tildak aba ke-lom atin dukumnu ko.
MAR 1:29 Kemin, kulaa Yesus so, Jems so, Jon sole, okok kemin tunum kusnum kusnum iso, nikil iyo lotu am uyo kela-lomdip kulaa daak aba din Saimon so, Andru so, alep imi am uyo tam uliple,
MAR 1:30 Saimon ami imnon uyo angtiil mamin dap-tiiwa mafak-alin kuluu-bomdu sin-laamin baan diim kabaaku akanbu kala, kala-lomdiple, Yesus ayo abiltap bokolipla,
MAR 1:31 Yesus ayo tal unang kuumi sikil ayo kutal-fuku umfola tam tiinule, kuyaku umi angtiil mamin uyo disa kewala-laam-salale, asuk uta taba-lomdu imi ima waan uyo talalu kutiiyu ko.
MAR 1:32 Kulaa, bom-bilip atan uyo daak tem unon e, kem-sulule, (God ami iintang am uyo disa kelu kala, kala-somdipla), abip kasel iyo unang tunum mafak-alin so, unang tunum sinik mafak ita taba yam-mafak-dakan-unsip so, alik iyo fakabi kulii Yesus ami fanang talemip.
MAR 1:33 Kemin, abip kasel unang tunum yaapkan iyo Yesus ami bombe kaptam-ami amitom ayo muup-daalip.
MAR 1:34 Kemin, Yesus ayo taba-lomda unang tunum yaapkan iyo kanolin mafak-alin umkan-unsip iyo yam-talal-yim-bamda sinik mafak iyo fotabe-bala yak bane-bamdip kemipla, Yesus ayo atamala yi, Sinik mafak iyo nitamipla, Kaali God ami uldaa-dabuula tiltam Kamokim kesa tunum namti kapta kala, nikip o, kala-lomda ayo bokoya-lomda: Ibi nami sang kaali, bakamin daa yo, yakale, sinik mafak iyo weng fakel-yila ko.
MAR 1:35 Am ayo daan-daan kem-talan-sulule, kulaa Yesus ayo tam tiinda din tunum dinim bokon kawu, God ami naan-bamda ke-balale,
MAR 1:36 Saimon so, almi aptum kusal iso, nikil iyo tam tiin talaaliwa yi, Kwin! Yesus ayo keya unba kala, kalalipla, yakal iyo Yesus ami yaan tem din
MAR 1:37 uliwa yi, Tiinba kala, kalbip-kup, iyo Yesus ami bokola-lomdip: Kapyo! Unang tunum yaapkan iyo dong dakaayilan o, kalaliwa iyo tal-ilomdip kapni fenbip te! akiwale,
MAR 1:38 kulaa Yesus asiik bokoya-lomda: Nali abip malo ma alik imi weng kukaayilon o, kalalila talbi kemin, unang tunum kaa tal nami fenbip kiili, weng kulaa kukaayila-somi. Kemin, keyilaluwa, din abip kusnum kusnum isiik nami weng ayo kukaayin-bilila, nikil unum o, yaka.
MAR 1:39 Kemin, Provins Galili bokon alik kawu ayo yakyak ke-bamda ilmi lotu am kaptamu weng ayo bakayin-bamda, sinik mafak unang tunum imi diim kawu bom-bilip iyo fotabe-bamda kem-tal-unemsa ko.
MAR 1:40 Kemin, tunum angtiil mafaksa ma aptum kusal ita taba fotabamnip yang saak kawu laaba ayo Yesus ami fanang tal-ilomda kamokim king ami weng umola-laabip tap kaami kukup kaata-kup kanola fanang daa-lomda tal tilik duung fakela daak tiin Yesus ayo dukum-kup bokola-lomda: Kabi ti yaap kemin, dong dokop-non o, kalap namti, nami angtiil kula mafaksu kuluwa dotu-namulan o, aka.
MAR 1:41 Kemin, Yesus ayo tunum kaami dukum-kup olen-daala-lomda almi sikil ayo kulii yak tunum kaami angtiil diim kawu kuyak tii bokola-lomda: Aa, nali dong dokop-ton o, kalalila kemin, kulu talalu-tamuli yaap-namap, aka kem-salale,
MAR 1:42 tunum kaami angtiil mafak uyo maak fak-daalin tap disa kewalule, kulaa tunum ayo tambalim kelale,
MAR 1:43 kulaa Yesus ayo weng uyo dukum-kup bokola-lomda: Kabi din unang tunum imi diim kawu, nami dotu-tamuli kaami sang uyo bakayin daa kayi! Kuno, keyila unap ti din pris o, kala-laabip tunum awem ami diim kawu, angtiil uyo kukolap titamala, Kabi atin ti tangbalnap o, takalala, Kabi Moses ami sawaayak kawu weng dap-tiisa kaata, kutal-fuku-lomdap mafek mafek ma God ayo kola-lom, Yaap ke yo, kalapla kawu, unang tunum iyo titamiwa yi, Faneng kaa tangbalnap u, kala-lomdip asuk tam tildang daalin o, tikin o, kanum bokola-lomda dabaala una.
MAR 1:45 Lale, tunum kaali un-bomdale, Yesus ata angtiil mafak kaami dap-taleluba kaami sang uyo dap-fatap-daka-bamda, weng uyo kulaala unu-tulu-ke-balala, Yesus ayo utamala yi, Unang tunum yaapkan iyo talemip kala, kala-lomda, ayo abip malo ma imi tam itamama dinim; kela tunum dinim bokon kawu din bombe. Katale, abip kusnum kusnum alik imi unang tunum iyo Yesus ami fanang kabang-tale-bala, kaldang-tale-bala, kaptoop-tale-bala, kamet-tale-bala kemip ko.
MAR 2:1 Yesus ayo kawu bomda sin-sin-bala, kulaa asuk kela yakaba din Kapeneam abip din abala, am kawu bom-balala, abip kasel iyo weng saniwa yi, Yesus ayo tal am kawu bombe kala kalbip-kup, kulaali,
MAR 2:2 unang tunum yaapkan iyo tal aba-lomdip am uyo abiin tem dinim kelipla, tunum maakup ayo ma dok no-lomda amitom liip ayo ma tiltam taloma dinim kelale, Yesus ayo God ami weng uyo bakayilale,
MAR 2:3 kulaa, tunum atalingkal ma iyo aptum ma ali angtiil dibimsa kemin, dap-tamalip tii Yesus ami fanang unum o, kala as de kuliilip tilip.
MAR 2:4 La, talaalipla yi, Kwin! unang tunum ita taba-lom abiin uyo alik bukubip kala, dok no-lomdup nuyo dibii-din Yesus ami miit tem mepso kawu unomup dinim o, kala-lomdipla, yakaba dibii tam am kon al kawu tamdiple, am kon uyo fakela kutii-lomdip tunum ayo almi bet diim kabaaku akan-unba. Kemin, almi abiin tiinba kulaaso, akolkup sok ta dap-dii-lomdip dabaalip unbalaak Yesus almi miit tem abamnale,
MAR 2:5 kulaa Yesus akal itamala yi, Tunum nikil iyo atamipla, Yesus ali ti faneng nak-tunum kulaali, dap-talalulokoma kala, kal-bomdip kanubip kala, kalba-kup tunum angtiil alik dibim-ansa ami bokola-lomda: Nak-tunum kapyo! nali kapni ban kemin kaali, alik takan-tiip-tilila, disa kelu no, aka ko.
MAR 2:6 Lo utamsip tunum malo ma iyo kaptamu tiinbip kemin, ilmi aket kaata-kup fukun-ilomdip:
MAR 2:7 Kanimin o, kalala tunum kaali, weng kaayo kanum baka-bam God ami win ayo ku-mafak-dakaanba ni? Tawaal diim tunum ayo ma taba-lomda unang tunum imi ban wakamin uyo ma takan-tiiyama dinim kemin, God maakup ata-kup ti unang tunum imi ban kemin kaali, takan-tiiya disa kelamu no, ke-bam fanang dakamip.
MAR 2:8 Kemin, Yesus ayo almi aket fukunin kaata utamala yi, Kanolin tunum iyo kanolin aket kaata fukunbip kala, kala-lomdala, ayo bokoya-lomda: Kanimin o, kala kibi kanumin aket kaa fukunbip i?
MAR 2:9 Nali dok nolin mafek mafek kiita ma kanolila kawu, kibi abiltang nitamipla, Ali fan bakaba kala, nokokomip i? Nali tunum kalawaami bokola-lomdi: Kapni ban kemin kaali, takan-tiip-ti no, kalokomi kaa, ibi bokop-na-lomdip: Nuli kaa nulmi tiin daa atamin dinim kelup kemin, kabi ibakabap o, kalokomip. Kemin ale, nali tunum angtiil alik dibim-ansa kaami bokola-lomdi: Tam tiindap kapni abiin dotup-ta-lomdip timbi tilip kaa, kuliilap unan o, akila, tam tol-nokoma kaata, ibi atamipla, Kaa ti fan bakaba kemin, ali ti ban kemin kaakal ti takan-tiiyama kala, nokokomip.
MAR 2:10 Kemin, kipkal utamin! Nali Dukum ami Man kemin, nami titil dukum kaali, kuyilila, kipyo utamdipla, Kaayo ibakaba disa kemin, tawaal diim bombe ali ti unang tunum imi ban wakamin iyo takan-tiiyama no, nokokomip o, ke-bamdale, kulaali,
MAR 2:11 tunum angtiil alik dibim-ansa ami bokola-lomda: Kapyo! Kabi tolalap kaltapni abiin dalaa tim-bilip tilip uyo, kuluu kutamalap kalapni am unan o, aka-laam-salale,
MAR 2:12 kulaali alik kulu tiinabip imi tiin diim kuluwu tunum kulaayo abiltap tam tolba-kup, almi bet uyo kulii tam banala, unang tunum iyo atam-ilomdip aket kufoyilu suun-bam ke-bamdip God ami tong kaata baka-bam fiyaap-kup duu-bam boko-lomdip: Nuli kanolin kukup kaayo, sawaayak kaali ma atamsup dinim o, kemip ko.
MAR 2:13 Kemin, Yesus ayo asuk tam abip ababa-kup din ok kumun ami balang diim kawu din unala, kulaa unang tunum yaapkan iyo asuk tal ami bombe kawu, tal atamiple, ayo kukuyinsi keyinba-kup kawu
MAR 2:14 ayo yakyak un-bomda Alfius ami man Livai ata atamala, Kaali takis moni fakamin tunum kemin, ali almi am katipkan ofis o, kala-laabip kaptamu tiinba kala, kalale, kulaa Yesus ayo bokola-lomda: Nak-tunum a! kabi nami daang bakaalin tunum kelawa, naso nikil um-bomduwa, nami okok kaasiik ma kup-tiya, okok keman o, akale, kulaali tam tolba-kup yak Yesus ami daang bakaala unip.
MAR 2:15 Kemin, Yesus nikil iso, Livai aso, iyo ofis uyo kelalip din Livai ami am kawu ima im-bilipla, takis moni fakamin tunum yaapkan sole, kukup mafak kutal-fukulin unang tunum kusnum iso yaapkan iyo suunkup Yesus ami daang bakaalipla tal-banemip kiili, Yesus so, almi okok kemin tunum iso, tiin-bom ima im-biliwa kawu,
MAR 2:16 lo utamsip tunum malo ma ili Falosi kemin, kiili Yesus ayo atamipla yi, Yesus ayo moni fakamin tunum sole, kukup mafak fukulin unang tunum kusnum iso, ima inbip kala, kalbip-kup, kulaa Yesus almi okok kemin tunum imi dik-daaya-lomdip: Kaa kanimin o, kalala ayo tal itamala takis kaamin tunum iso, kukup mafak fukulin tunum malo iso, nikil tiin-bomdip ima dakaap kaa inbip yoko? Kaami kaa kanuba kaali mafak o, kemipya,
MAR 2:17 Yesus ayo weng sanba-kup, kulaali Falosi tunum imi faldak-tiimin weng ma kaata-kup bokoya-lomda: Dokta ali tal tunum mafak-umulin dinim, ili yam-talalulokoma disa; ali ti tal tunum mafak-umulin ita-kup, yam-talalulokoma no. Ultap kemin, unang tunum iyo boko-lomdip: Nuli ban kemin dinim; nuli ti tituun-kup tabin unang tunum o, kebip kiita, nali tal kiimi dong dakaayin-bilila, imi aket kaata fal-kela-lomdip God ami lak kaata duulin o, kalalila talsi disa; unang tunum kanta boko-lomdip: Nuli ti ban kemin unang tunum o, kebip kiita, nali tal dong dakaayin-bilila, imi aket uyo fal-siki-lomdip God ami lak kaata duulin o, kalalila, talsi no, ke-bam bakaya ko.
MAR 2:18 Kemin, am ma daanale, oksam wakayin tunum Jon Baptis ami okok kemin tunum so, Falosi tunum iso, iyo inin-inin kaali, fala-bomdip beten ke-bilipla, unang tunum ma iyo tal Yesus ami dik-daala-lomdip: Jon Baptis ami okok kemin tunum so, Falosi imi okok kemin tunum iso imi kukup kaali, liip ma kaami beten kemum o, kalokomip kaali, kiimi inin-inin kaa falaa-bomdipla, dukum-kup beten ken-unbip. Lale, kapni okok kemin tunum itale, inin-inin kaali ma falaalamip dinim; beten kulaa ken-unbip. La, kanimin o kalalipla iyo inin-inin kaa falamin disa ke-laabip yoko? akipla,
MAR 2:19 Yesus ayo bom-bilip imi weng kaali, maan tiiya-lom almi taanokoma kaami sang uyo faldak-tiiya boko-lomda: Tunum kaa unang ma kuluulokoma ayo tunum iyo ima fuu-bam in-bom fiyaap duu-mokomip. Kanu-mokomip kaata, tunum kusnum ata yaap ma kela bokoya-lomda: Ibi fiyaap duu-bam inin daa, kemin, aket uluum tabe-bam inin kaa falamin o, yokokoma ema? Disa yo! Tunum kayaak iyo atamipla, nuso bombe kala, kalbip-kup fiyaap-kup duu-bamdip ima waan uyo inokomip.
MAR 2:20 Lale, ilom kaptoop ayo waasi iyo tal-ilomdip aptum ayo dap-tal-fuku dibii unip kala, kalbip-kup kawu, aptum kusal iyo aket uluum tabeyilula, ima waan kaali, falaalokomip o, kala Yesus ayo weng faldak-tiimin weng uyo kanum bakayila ko.
MAR 2:21 Kemin, Yesus ayo (Juda kasel iyo itamala yi, Ilmi siin kukup kaata dukum-kup kutal-fukusip. La, nami alokso kukup kaali, kutal-fukulamup disa yo, kebip kala, kalalala), asuk ayo faldak-tiimin weng alep ma bokoya-lomda: Unang uyo yaap kewula alokso ilim daam ayo kulii-tal diingnin dinim bombu kaali, ma ukduu kulii yak siin ilim balata tabu kaami diim tii bikilokomu no? Disa te! Kanolokomu kulaali, diing-nokomu kawu, alokso ilim kaata siin ilim umi aluula, kutiilule, kulaa ilim kulin baan diim diilu koknu asuk mikilokomu kaali, aluula kutii-lom nakat mobu. Kemin, siin ilim kaata abiltap balata taba-lom tem dukum uyo kalulokomu.
MAR 2:22 Aa ti, kanumin ultap kemin, tunum ayo meme ipnaal daa siin kawu dilduu kutiila koksu kaami tem kawu alokso kaami wain ok o kala sok lap wok uyo iluula dongnu kala, kalale sok ta kuluu-lom wok bon ayo de kutiiba-kup, kulii-tal am kawu kutiila namti, ilomdula ok kaali, fusun-un-bomdula, meme ipnaal totnin kaa abiltap nakat mo-lom bikin-ilomdu ok uyo sing-tam-daa tiil bun-ilom disa ke-lokomu le, ipnaal kaali, mafak-alomdula falela tabokomu. Kemin, tunum ayo kama wain ok uyo iluulon o, kala namti, meme ipnaal alokso dulduu kutiila totnin dinim bombu kaata-kup kuluu-lomda, wain ok kaa iluu kulii-tal am tiilokoma kaata, tangbal-kup ilokomu no, kala Yesus ayo weng faldak-tiimin weng alep uyo bakayila ko. (Kemin, weng faldak-tiimin alep kaali bokoya-lomdu: Nali alokso kaami kukup uyo kulii-tal kipni siin kukup kaami anung til-daayon o, kalalila talsi disa; nali ti alokso kaami kukup kaata kulii-tilila kuuta, talalu kutal-fukulin o, kalalila kulii-talsi no, kalsu ko.)
MAR 2:23 Kulaa, God ami iintang am o, kala lotu kemin am ma daanule, Yesus so, almi okok kemin tunum iso, iyo wiit lang kaami iip-iip kaptoop liip nikil kii yakyak unip. Kemin, almi okok kemin tunum iyo un-bomdip ima tinap keyulala, wiit lap ayo dikela-lomdip inan inan una-biliwa,
MAR 2:24 Falosi malo ma iyo Yesus ami bokola-lomdip: Kapyo! Weng san ilawa. Numi lo kaali bokoya-lomdu: Ibi God ami iintang am kaali, ima fakabi kulii-talemin dinim o, kalsu. Lale, kanimin o kalaliwa kapni okok kemin tunum ili wiit kaali, ukel-bamdip inbip yoko? Kuliili numi lo uyo ku-mafak-dakabip o, akan-kaamiple,
MAR 2:25 Yesus asiik bokoya-lomda: Ibi God ami Sukon Tem weng tik-tiin-umbip kaali ma dotu kaal kelin dinim kesip ema? Sawaayak Devit asole, almi ap-tunum iso, nikil iyo ima tinap keyilala bomdipla, Devit ali kabak kanimin ma nosa ni?
MAR 2:26 Lotu kaami lo kaali boko-lomdu: Unang tunum ibi pris o kala tunum awem imi bret fuu kulii-din God ami kolum o, kala-lomdip kulii tam God ami am kaptamu kutam tiin-unbip kaali, inin dinim. Kaa awem kemin ti, tunum awem ita-kup inin o, kalsu. Lale, Abayata ami tiltam tunum awem imi kamokim diilim o kala, hetpris ke-bom balala, kulaali Devit ayo God ami am kaptamu din-ilomda tunum awem ami ima awem kaami sang kaata, dik-daalala tunum awem ayo olen-daala-lomda ima awem ayo kolala, Devit ayo anung fuk-duu inaba-kup anung ma kaata kuluu-lom almi waasi dinin tunum imi kuyalala inasip. Kemin, nikil kuliili lo kaa lo kutiisip. Kata, ibi boko-lomdip: Kaali kukup mafak kanosip o, ken-umbip dinim kayi! Kemin, kanimin o kalaliwa nami okok kemin tunum iyo ima tinap-tabeyu kanu-bilipla, ibi bokoya-lomdip: Kaali kukup mafak kanubip o, yakan-kaabip i?
MAR 2:27 Sawaayak kawu God ami unang tunum dotu-yim-tiisa kaali ti almi iintang am kaami aket kaata-kup fukun-bomdala, talalu-yim-tiisa dinim kemin, God ami aket fukunin kaali, iintang am kaata taba unang tunum imi dong dakaayuk o, kalalala, almi iintang am kaali, dotu kutiiyinsa.
MAR 2:28 Kemin, Dukum Ami Man Nayo, mafek mafek alik kaami tiin molin ale, God ami iintang am kiimi tiin molin tunum namti kala bombi. Kemin, nali ti yaap unang tunum iyo bakayim-bamdi: God ami iintang am diim kulawu ibi kaa kanumin o, kalomi kaali, ili ti nolamip te! Yesus ayo Falosi imi kanum bakaya ko.
MAR 3:1 Kulaa, Yesus ayo asuk din Juda kasel imi lotu am ma tam una kaali, tunum ma sikil malii famsa ayo kawu bombe.
MAR 3:2 Kemin, Falosi tunum ili kaptam bom-bilip iyo aket fukun-bamdip: Yesus ayo talalu atafii-bam ilupla, numi lo kaali, lo-lomda God ami iintang am daanu kaami diim kawu tunum kaayo, dap-talalula kala kalup namti, dibii-din weng talalmin baan diim kawu daa-lom dap-fatap daalum o, kemip.
MAR 3:3 Kemin, Yesus ayo tunum sikil malii famsa ami bokola-lomda: Kabi tam tola tal iip dikis kaldaak tolnan o, aka-lom
MAR 3:4 Yesus ayo Falosi imi dik-daaya-lomda: Numi lo kaali boko-lom: Kabi God ami iintang am daanu kaali, unang tunum iyo dong dakaayan o, kalsu ne, yam-mafak-dakaman o, kalsu ne? Aa, boko-lomdu: Kabi unang tunum mafak-alin imi yam-talal-balapla, yaawa-laamin o, kalsu nelile, kuno kamboyawa taan-laamin o, kalsu yoko? ke-bam bakayin-balale, iyo weng dulumnip.
MAR 3:5 Kemin, Yesus ayo kawu tola-bom unang tunum alik iyo itafiin-tal-une-bam talaala yi, Kuliili God ami weng kaali, weng san-namup dinim o, kalbip kala, kalale, kulaa Yesus ami aket uyo ti mafak-ala-lom aket atul dap-tela kelula, Yesus ayo tunum sikil malii famsa kaami bokola-lomda: Kapni sikil kaa ifilan a! aka-kem-salale, tunum ayo almi sikil ayo ifilale, tangbal ma kelule,
MAR 3:6 kulaa, Falosi iyo abiltap din King Herot ami tunum iso, nikil weng taken-bamdip, Yesus kaali dok no-lomdupla, ayo aalup taanak o, kal-bom takenip ko.
MAR 3:7 Lale, Yesus so, almi okok kemin tunum iso, nikil iyo keyilalip yakaba toop Galili Ok Kumun unipla, kulaa Provins Galili kaptam-ami unang tunum yaapkan iyo Yesus ami daang bakaalipla, kulaa Provins Judiya kasel so,
MAR 3:8 Jerusalam kasel so, Provins Idumea kasel so, yak Jodan wok malii kasel so, abip Taya so, abip Saidon kayaak so imi mepso kulu ilin unang tunum yaapkan iyo Yesus ami kukup alik kaa kanuba kaami sang kaata weng sandip dak-daa kulii ami fanang tilip ale,
MAR 3:9 kulaa, tal atamipla, unang tunum yaapkan iyo yam-talal-bala unang tunum mafak-alin fuku-laabip iyo sikil kulii yak melelupla, nuyo yam-talalulak o, kala-lomdipla, tala-tala-ke-lomdip tal buku kulaalipla, Yesus ayo itama yi, Unang tunum mafak-alin kuluusip ita taba nim-bak molokomip kala, kalalala, kulaa almi okok kemin tunum imi bokoya-lomda: Kipyo! Din bot ma fen fen kulii-tal mepso kulu ma kutal tiilipla yo, kala ko.
MAR 3:11 Kemin, sinik mafak mafak-miin iyo Yesus ami atamip kaali, kamok kamok imi weng umkaayin kaami kukup kaata-kup kuluu-lomdipla, ilmi tilik duung uyo fakela daak tiin-ilom Yesus ami miit tem kuluwu dabuuna-lom wol-bamdip bokola-lom: Kabi ti God ami Man o, akipla kulaali,
MAR 3:12 Yesus ayo dukum-kup bokoya-lomda: Kipyo! Kaali God ami Man o, kal-bomdip nam-fatap-dakamin disa yo, kalba-kup, kulaa sinik mafak mafak-miin iyo fotabe-balala yak banemip ko.
MAR 3:13 Kemin, Yesus ayo yak aba tam amdu tikiin ma tam una, kaali tunum talangkal ma ita, ulela-lomdala, kiita naan-daaya unipla bokoya-lomda: Kibi nami kalaan tunum kelip kemin, ibi naso ilup kaa, kipta ulelnila, God ami weng tambal kaata unang tunum iyo bakayin-bamdiple,
MAR 3:15 titil kuyilila kaata, kuluu sinik mafak taba unang tunum imi yam-mafak-dakan-unsip iyo fotabe-bam kemin o, kala-lomda ulelna.
MAR 3:16 Tunum talangkal kiimi win kiili, kala bom-bilip: Saimon ami win kusnum kaali Yesus ata Pita yo, anba akal,
MAR 3:17 ale, Sebedi ami miining Jems so, almi niing Jon so, alap imi win kusnum kaali, Yesus ata bokoya-lom: Boaneges o kala taman fakabu ultap o, yika alap yakal,
MAR 3:18 ale, Andru akal, Filip akal, Batolomyu akal, Matyu akal, Tomas akal, ale, asekim Jems kaali, Alfius ami man kemin akal, Tadius akal, asekim Saimon ali Rom kayaak imi itam fananin tunum akal,
MAR 3:19 ale Yesus almi dap-fatap-daala aalokomip tunum Keriot kayaak Judas akal kela, nikil kiita ulelna ko.
MAR 3:20 Kemin, Yesus nikil iyo tam am unipla, unang tunum yaapkan iyo tal falala yim-tiiliwa, nikil iyo dok no-somdiwa ima kaali, inam-namip dinim keliwale
MAR 3:21 kulaa, Yesus almi ap-tunum kusal iyo, kaami sang uyo weng san boko-lomdip: Ali abat-alom tiinsa kemin, kulaa din Yesus ayo ulduu dibii tulum o, kala-lomdipla tilip.
MAR 3:22 Kemin, lotu kaal ke-laamin tunum abip diil Jerusalam kaa liip tal-bom-bilip iyo boko-lomdip: Sinik mafak imi kamokim Belsebul o, kala Setaan ayo Yesus ami diim kawu bomdala, ata dong dakaan-balala, kaami unang tunum sinik mafak ta yim-buusu ata fotabe-bala kemin, yak banebip o, iyo kemip.
MAR 3:23 Kemin, Yesus ayo unang tunum tal ami liip bolip iyo weng umuuya tal almi mepso tiliple, weng faldak kulu tii taldak kulu tii ke-bam bokoya-lomda: Setaan ayo dok kano-somda sinik mafak kusnum almi okok kemin iyo fotabam-nala yak banoma dinim.
MAR 3:24 Abip maakup kaali, biki-kutii miit alep ke-lomdip ilmi waasi dinip namti, kiimi titil-foko tangbal-kup laabip kaali, kulaata imi titil namti disa ke-lokomu.
MAR 3:25 Kanolin kemin, unang tunum am maakup laabip iyo suunkup weng aal diki-bam waasi dinin-kup kemip namti, ili tangbal-kup ma ilokomip dinim; kemin, yakal ti biki-kutii waasi kela una-tala-ke-bam kanu-mokomip.
MAR 3:26 Kanolin alaltap, Setaan so, almi sinik mafak iso, alimal yakal waasi kewala una-tala-ke biki-kutii, miit alep ke-lomdip dinip namti, alimal kuliili, titil-fak-daa-lomdip tangbal-kup ma laabip dinim; ale, kulaa imi titil kaali, disa keyilon o, kebu.
MAR 3:27 Dok nolin tunum ata taba kun soyim tunum ami am undala ami bung mafek mafek uyo duk-duulon i, kala namti, yukut inipyaap ayo kamasi kawu tunum titil soyim ayo sok de-dap-tiile, kaal dinim ke kawu tam ilomda ami mafek mafek uyo duk-duulokoma no, kala Yesus ayo kanum bokola.
MAR 3:28 Kemin, nali weng kalawaali, tituun weng kaata bakayinbi kemin, weng san iliwa! Tunum kaa kanta kukup mafak ke-bamda, weng mafak baka-bam ken-um-bala ami aket fanang dakamin uyo fal-siki-lom ami kukup mafak keba uyo kulaala namti, God ayo ami kukup mafak kaa kanum-yaaba uyo tak-daa-lom kukan-telokoma. Kemin ale,
MAR 3:29 tunum kanta God ami Sinik Tambal ami sang bokola-lomda: Belsebul sinik mafak imi kamokim ata Yesus ayo dong dakaanba no, kalokoma kaata, God ami Sinik Tambal ami win kaa ku-mafak-daawala kala-somdaya, God ayo ami ban uyo tik-daawala yak banokomu dinim. Suunkup ilokomu.
MAR 3:30 Kemin, kaali dok ami miit kaata daa kemin, kiili boko-lomdip: Kaali sinik mafak ayo ami diim kawu bombe no, kalip kaami sang kaata, Yesus asiik weng maan tiiya-lom kanum bakaya ko.
MAR 3:31 Kulaa, Yesus ami awak so, nakal-fakal nikil iso, iyo tal-ilomdip abip kaptamu tola-lom weng kulaalip am kaptam unula, iyo boko-lom: Numi fanang talan o, kemipla,
MAR 3:32 unang tunum yaapkan iyo tiin-bom bii Yesus ayo falala dabak mobip kemin, bokola-lomdip: Nak-tunum kapyo! Kapni kawak so, nakal iso, aptil iyo taldip kapni weng ma bokop-tum o, kalalip tal abip kaptamu tolbip o, akiple,
MAR 3:33 kulaa Yesus asiik unang tunum imi dik-daaya-lomda bokola: Kii kanta nami akamen so, nami nakal-fakal so ni? yinba-kup,
MAR 3:34 tiinbip iyo itafiin-tal-une-bam ayo bokoya-lomda: Kalawiita nami akamen so, nami nakal so kemin,
MAR 3:35 unang tunum iyo kawanata God ami boko-lomda: Kaata kanumin o! keba kaata-kup kutal-fukulip namti, ita nami niik-kusal, nami nakal-kusal ale, nami akamen aptil iltap namti kaa bom-bilip ko, yaka ko.
MAR 4:1 Kemin, Yesus ali yang aba toop Ok Galili balang diim kawu unang tunum iyo kukuyin-bomda utama yi, Unang tunum yaapkan iyo tala-tala-ke-lomdip falala nam-bak molip kala, kalba-kup, kulaa bot ma ok daang diim kawu bombu kuumi tem kaptamu tiinba-kup, unang tunum yaapkan itale, tildak ok daang diim kawu tolnipla,
MAR 4:2 weng yaapkan kaali, faldak-kulu-tii taldak-kulu-tii-ke-bam kukuyin-bam bokoya-lomda:
MAR 4:3 Ibi weng san iliwa! Kulaa tunum ma ayo wiit o kala-laabip kaami san kaali, kulii din langabip kawu sekelmon o kalala, una kemin,
MAR 4:4 san kaali, kulii-din sekela tal-une-balale, san malo ma kiili, daak langabip kaami liip fatap diim kulu abamniple, awon-miin ita tal inamnip.
MAR 4:5 Ale, langabip kaami tawaal anung kaali, tuum yaapkan kiita-kup kelula, tawaal kaata katip sakap kemin, san malo ma kiili, daak kanolin tawaal kaami diim abamnip. Lale, tuum kaami tip diim kaali, tawaal katip kemin, abiltap-kup bikin-tabamnipla,
MAR 4:6 timtim kaali, dukum-kup daak tawaal bikilin dinim kemin, atan mamin ta wiit san kii, fuula kiin-ilom datnip.
MAR 4:7 Ale, san malo ma kiili, daak al mafak tem kiimi iipyak tem abamnipla, balaasaal mafak uta uta kelu, wiit iyo dutuluwa-lom mafaknip kemin, ili dok no-somdipla tangbal-kup abuumamip dinim kelip.
MAR 4:8 Ale, san malo ma ita, sakela daak tawaal tambal diim aba tambal-kup tiltam aba-lomdip abuu-bilip kaami asal maakup asal maakup kaami diim kaali, 30 abuu-biliple, malo ma ita 60 abuu-biliple, malo ma ita 100 abuu-bilip kelip.
MAR 4:9 Kemin, ibi abat disa; ipkal talang tem tangbal kemin, mep weng kala bokoyili uyo, talalu weng san-ilomdip, atamin a! kala Yesus ayo kanum bakayila ko.
MAR 4:10 Kulaa ilana, Yesus alakis kelala, almi daang bakaalin tunum talangkal sole, tunum malo ma Yesus aso maakup tiinbip iso, iyo taba-lomdip weng miit weng malo ma kaami sang kaata ami dik-daalipla,
MAR 4:11 Yesus asiik bokoya-lomda: Siin kaali, God ayo unang tunum iyo tam almi miit tem unipla, ayo tiin molokoma kaami sang kaali, alik ma bakayinsa dinim; anung katip kaata-kup kemin, kamala kulaayo, God akal kipni aket tem kaali, bam-daayilala, kipkal utamipla yi, Yesus ami faldak-tiimin weng kaa bakayinba kaami miit kaali, God ami miit tem unupla, tiin molokoma kaami sang o kala atabip. Katale, unang tunum God ami lak ma duulin dinim kesip iyo nali taba-lom faldak-tiimin weng kaata-kup bakaya-laabi.
MAR 4:12 Kata, unang tunum kanta God ami lak ma duulin dinim kesip iyo ti nami okok kemin kaami dot-kaabi kaali, ilmi tiin kaata talaa utam-laabip. Lale, ilmi aket tem kaali ma bam-daa-yinsu dinim; ale ilmi talang tem alep kiili, nami weng kaa weng san-laabip. La, ili utamipla, Weng kaami miit kaali, kalabu no, kalalipla kiiyo, aket fal-sikilipla, God ayo imi ban kemin takan-tiiyalala, disa kelamu dinim kelip kala, kala-somdila, kulaa faldak-tiimin weng kaata-kup, kanolin unang tunum kiimi bakayin-kup ken-unbi no, kema ko.
MAR 4:13 Kemin, Yesus ayo asuk bokoya-lomda: Kibi nami faldak wiit san kaami diim tii bokoyili kaami miit kaali, atamin dinim kelip o? Kemin, atamin disa kelip kulaa, ibi dok no-somdip faldak-tiimin weng kusnum alik kiimi miit kaali, ata-mokomip i? Kemin, dotu weng san iliwa, bokoyon.
MAR 4:14 Wiit san dikimin tunum kaali, God ami weng bakayin tunum ata kemin,
MAR 4:15 tunum malo ma iyo wiit san sekela fokolip daak liip fatap diim aba-laabu kanolin ultap kemin, iyo tildang God ami miit tem talemin kaami sang kaali, weng sanokomip. Lale, ili ma dotu utamin dinim kem-laabip. Kemin, Setaan ayo awon altap ke-lom abiltap tal-ilomda God ami weng imi aket tem kabak bombu kaali, yak kuluu-yilala, unang tunum iyo weng kaa lukuuyilokomu.
MAR 4:16 Ale, unang tunum malo ma iyo tunum ami wiit san sekela fokola daak tuum yaapkan tem kiimi diim aba-laabip kaaltap kemin, kiili God ami weng kaali, weng sandip, weng kaa abiltap, Faneng o, kal-bom fiyaap duu-mokomip. Lale,
MAR 4:17 weng kaali dotu kuyak ilmi aket tem daalin dinim kesipla; da luuknin tap ke mafek mafek mafak uyo tal kiimi diim abam-nokomu aye, tunum kusnum ita taba God ami weng kaami kalan kaata, kiiyo bon diiyin-bamdip abiltap kela yang banokomip.
MAR 4:18 Kulaa, unang tunum malo ma iyo tunum ami wiit san sekelna daak balaasaal mafak kiimi iipyak tem abebip ultap kemin, kanolin kiiyo, God ami weng kaali, weng sanokomip.
MAR 4:19 Lale, tawaal diim kaami mafek mafek kiimi uluum kiita aket dukum-kup fukun-ilom aye, moni faka-bam fiyaap duumin aye, mafek mafek kulaali nalmi alik kuluulon o, kala aket-kup dakat ke-laamin kaata sakbaalim dukum kelula, God ami weng kaami aket kaata kabaak banu ke-lokomu. Kemin, wiit kaami tiil dinim ol-kup ke-laabu ulultap ke-lomdipla, God ami weng kaali, dukum-kup titil-fak-daa fukulokomip disa.
MAR 4:20 Kemin ale, unang tunum iip maakup maakup ita tunum ami wiit san sekela kulaala daak tawaal tambal diim abebu ulultap kemin, iyo God ami weng uyo weng sandip, Faneng o, kala suunkup kutal-fuku kanu-mokomip kaali, malo ma iyo wiit kabak-ami 30 abuu-laabu ultap kelale, malo ma iyo 60 abuu-laabu ultap kelale, malo ma ita 100 abuu-laabu ulultap ke-bala ke-lokomip o, kala Yesus ayo faldak-tiimin weng kaami miit kaali, kanum bakaya ko.
MAR 4:21 Kemin, Yesus ayo bokoya-lomda: Nuli ilaam kaali, iilfo kulii daak baket tem kabaaku kuwaalokomup dinim; ale iilfo kulii daak bet tawap tem kabaaku kuwaalokomup dinim; (kemin, iilfo kulii tiltam ulmi baan diim kawu tiilupla, am uyo falala-kala-bulula, unang tunum am kaptam bom-bilip iyo mafek mafek kiili, tangbal-kup ita-mokomip).
MAR 4:22 Kemin, bombii am mafiing am daanokomu kulaa, nami mafek mafek sang so, weng miit so, iyo maaklo kuwaa-bomdi faldak-tiimin weng kaata-kup bakaya-tabasi kaali, God akal kulii tam ku-fatap-daalala, unang tunum alik iyo ata-mokomip.
MAR 4:23 Kemin, kibi ti abat disa; kibi ti talang tem tangbal kemin, weng kaa bokoyili kaali, talalu weng sandip, dotu kuluulin o, kal-bomda bakaya ko.
MAR 4:24 Kemin, Yesus ayo weng ma kaali bokoya-lomda: Weng kaali, kipni bokoyokomi kaa, talalu weng san iliwa! Kapni kaptum kusal iyo dok nolin kukup ma kukuya-laabap namti, God akal ti kanolin kukup kaata-kup kukup-ta-somdale, aa anung kaali maso ma ifiiya ke-lokoma. Kemin, kaptum kusal iyo kukup mafak kaali, kukaayin dinim.
MAR 4:25 Kemin ale, tunum kanta ma nami weng kaali, weng san bam-daalokoma namti, kaali God ata dong dakaan-balala, kaal ke yakyak kem-unokoma. Kemin ale, tunum kanta nami weng kaali, weng sanin daa ke-lomda, Nali utamsi no, kala namti, kaami weng katip ma kaa utamsa kaali, abiltap lokolokomu no, kala Yesus ayo kanum bakaya ko.
MAR 4:26 Kemin, Yesus ayo asuk bokoya-lomda: Unang tunum kanta tiltam God ami miit tem tilip tiin molokoma kaali, tunum mafek mafek san ultiila taba-laabu ultap kemin,
MAR 4:27 ayo ultii kela din bom kutamiip kaata, akan-une-bam ale, am daanokoma kaata, okok ken-tal-une-bam ke-balala, mafek mafek san kiili ukol bikin-taba dukum-alaabu. Lale, ayo utamala, Mafek mafek san kaali, dok no-lom bikin-tabokomu ma? kala-laaba dinim kemin, (ultap kanolin ibi utamipla, Unang tunum iyo dok no-somdip tiltam kusnum ke-lomdipla, God ami miit tem kaali tam unokomip o, kemikin dinim).
MAR 4:28 Kemin, mafek mafek san kaali, tawaal tem kabaaku ultiilip bombii, bikin-taba-lomdula, tiltam abuu-laabu kemin, kamosinim kaali, kon asiik tiltam bam-daa-lomdu kulaali tes falaa-lomdula kawu, tiil-nokomu.
MAR 4:29 Kemin, utamapla, Yakaanu kaali, ulmi dakamin am uyo kulu tiltam tulu kala, kalokoma kaali, abiltap din dakabi kulii-talokoma no, kal-bomda Yesus ayo kanum bakaya ko.
MAR 4:30 Kemin, Yesus ayo asuk boko-lomda: Nali unang tunum tildang God ami miit tem tilipla, tiin molokoma kaali, faldak dok ami diim tii-lomdi kaami miit kaali, dong dokoyilila ibi ata-mokomip ma?
MAR 4:31 Kaali, unang tunum God ami miit tem bom-bilip iyo mastat kaami san ililtap kemin, tawaal kala dik-daa kulaasu kaami mafek mafek kiimi san malo ma kaali, katip sakap. Lale, mastat san dikilokomap kaata, fan atin ti lap katip sakap.
MAR 4:32 Lale, tunum ma ata kulii-din dikila, kaami taba-lom tiltam sakbaalim dukum ke-lokoma kaali, umi tang uyo sakbaalim dukum ke-lomdu tiltam as ulultap kelula, awon iyo tiltam as kaami tang akiip tem kaptamu imi iim kaali dina-mokomip o, kala Yesus ayo kanum bokoya ko. (Kemin, faldak-tiimin weng kaami miit kaali, boko-lom: Mastat kaami san ultap kanolin kaali, God ami unang tunum iyo kamala kulaayo, alep-kup kebip. Lale, am ma daanokomu kaali, ti tiltam tiltam ke-lom yaapkan ke-lokomip o, kalsu ko.)
MAR 4:33 Kemin, Yesus ayo utamala yi, Dok nolin kaami faldak-tiimin weng kaata, unang tunum iyo ti uta-mokomip o, kala-lomdala, kaata-kup yaapkan iyo bakayin-bam, God almi kukup kaami sang uyo faldak kawu tii-lomdala, bakaya-laaba.
MAR 4:34 Kemin, faldak-tiimin weng kaali, kela-lomda, tituun weng kaata kuluu-lomda unang tunum kiili, bakaya-laaba disa; almi okok kemin tunum kiita-kup Yesus aso bom-bilipla, faldak-tiimin weng alik kiimi miit kaali, tituun-kup ku-fatap-daa bokoya-laaba ko.
MAR 4:35 Kemin, am kula daanokoma kulaata, atan uyo talaba daayak tem unule, almi daang bakaalin tunum iyo bokoya-lomda: Tilipla, nikil kulawa kela bot tem liip yak ok kumun dukum kaami malii kaptam unum o, yakale,
MAR 4:36 kulaa fan nikil iyo unang tunum yaapkan kawu bom-bilip iyo keyilalip, ilmi bot tem tiinip kemin, tam tiinbip-kup, dibiilip uniple, unang tunum malo ma iyo bot kusnum ma kaptamu iso unip.
MAR 4:37 Kulaa, umba-biliple, inim sakbaalim dukum ma tiltam tulula, ok uyo fola kulaala tiltam bot tem ayo tale-bamdule, kulaa, bot uyo ok ta taba-lom tiltam dongnon o, kalbu.
MAR 4:38 Lale, Yesus ayo bot tem umi ol duuk tem kaptoowu bomda ami dabom kaayo, kulii yak dabom-fap diim daa-lomda akan-unba. Kemin, almi okok kemin tunum iyo met dafo-lom bokola-lomdip: Numi kukuyin tunum kapyo! Mepso wok ta yelu taanum o, kalbup kalaali, kabi numi aket kaali, fukunbap elile daa? kemiple,
MAR 4:39 Yesus ayo fan, tiin baaba-kup, tam inim kaayo dil mo-lomda bokola dinimnale, kulaa ok ami bokola-lomda: Kulaata, bilili-kalalap dulumnan o! akalala, atin duluma-lomda dinimnu kelule,
MAR 4:40 almi okok kemin tunum imi bokoya-lomda: Ibi kanimin o, kala-lomdip ok kaami atul kaali, suunbip i? Kibi nitamipla, Kamokim kaa nuso bombe kaali, suunin disa yo, kebip e disa? kemale,
MAR 4:41 nikil iyo kwin! suunbi boko una-tala-ke-bamdip, Kalawaali dok nolin tunum ata taba-lomdala, weng kaata-kup bakam-salale, inim so, ok so kiili, ami weng kaata-kup weng san-ilomdiwa disa kelip i? kemip ko.
MAR 5:1 Kemin, Yesus so, almi daang bakaalin tunum iso, iyo bot tem liip umbiyak ok kumun sakbaalim dukum kaami malii Gerasa kasel imi bokon yakdiple,
MAR 5:2 Yesus ayo bot tem kaali, kela daak tawaal abamnale, tunum ma sinik mafak ata dap-mafak-daasa ayo tal Yesus ami atama kemin, tunum kaali kom tem liip tiltam abala tala.
MAR 5:3 Kemin, ali suunkup kom tem kawu laaba kemin, tunum iyo dok ata ma titil-foko-lomda dap-tal-fukulama dinim.
MAR 5:4 Kemin, aptum kusal iyo kela-sulupla, ayo yemama no, kala-lomdipla, suunkup ami yaan so, ami sikil so, kiili sen ta kuluu-lom dinabii kutelipla, sen kaayo, ukela-ukela-ken-umba kemin, tunum dok ata ma taang-kala titil-foko-lomda, tunum kaayo, dap-tal-fukulama dinim ken-umbip.
MAR 5:5 Kemin, suunkup kutamiip so, taap so, kawu amdu tikiin so, taansip imi kom tem kawu, tal-une-bam dukum-kup ol-bam naan-tal-une-bam le, almi angtiil kaali, tuum bal ta ukelbi kutela tal-unen-umba.
MAR 5:6 Tunum kaali tal am mepso ma tilin dinim, samaan kawu, Yesus ayo atam-ilomda kamok kamok imi weng umkaayin kaami kukup kaali, kanumin kemin, abiltap din Yesus almi miit tem kawu daak tilik duung fakela dabuuna-lom ti kabaak daalale,
MAR 5:7 Yesus ayo sinik mafak ami bokola-lomda: Sinik mafak kapyo! Tunum kaali, kambola yak banan o! akale, tunum ayo dukum-kup wol-bamdale, boko-lom: Yesus kabi Atin Win Tabin God ami Man alik-daap kemin, kabi tal-ilom dok nop-non o kalalapla talap i? Nali God ami tiin diim kawu weng kaali bakap-tinbi kemin, kabi nali angtiil yol awak kaa ma kup-na-laamin daa yo; kambop-nan o, akale, kulaa
MAR 5:9 Yesus asiik tunum kaayo, dik-daala-lomda: Kapni win kaali kanim tinepyap yoko? akale, kula tunum kulaayo atamala yi, Sinik mafak yaapkan iyo nami iipyak tem kabaku bom-bilip kala kalba-kup, ayo boko-lomda: Nuli 6,000 bom-bulup kemin, nami win kaali Yaapkan o, aka-lomda,
MAR 5:10 Yesus ayo dukum-kup ami bokola-lomda: Kapyo! Sinik nuli fotabamnap yak bokon kusnum kawu unemin disa yo, akale,
MAR 5:11 kang atin ti yaapkan kiili, tam yak amdu tikiin kawu bomdip bak-fakabip
MAR 5:12 kemin, sinik mafak kiili, Yesus ami dukum-kup dik-daala-lomdip: Kabi nuli fotabam-napla, tunum kalawaayo kambola yak kang imi tiling tem unum o, kalipla,
MAR 5:13 Yesus ali, Ayo, kalala, kulaa sinik mafak namti tunum kaali kambolalip tiltam ababip-kup yak kang imi tiling tem uniple, kulaa kang yakal babonbi kulaa-lomdip diimal dap-kuldaak mo umbalaak Galili Kumun tem kabaak un-ilomdip kang ilmi-kup 2,000 kiiyo, ok taba yan dong dokola alik taanip.
MAR 5:14 Kemin, kang tiin molin tunum yakal kabak utamiwa yi, Kang iyo kano-lomdip taanip kala, kala-somdipla, iyo uka-daalip bina bilin abip unang tunum imi bakaya-tal-une-bilipla, unang tunum iyo dindupla kanolu uyo atamum o, kalalipla, yak aba tal
MAR 5:15 Yesus ami diim tal ulipla yi, Tunum siin kawu, sinik mafak yaapkan ita dap-mafak-daalip laaba ami aket fukunin kaali, daa tangbal ma kewalula, ilim miki tiin-bombe kala, kalbip-kup kulaa, Yesus ami atul ayo suunip.
MAR 5:16 Kemin, unang tunum Yesus ami kukup kanola atamip kaata, aptum kusal iyo tunum sinik mafak ta taba-lomdip dap-mafak-daalip laaba. La, Yesus ata dap-talalulala, ami sang ayo bakaan-bamdiple, kulaa kang kanolip imi sang uyo bakayin-bam kemipla kemin,
MAR 5:17 kulaa abip kasel iyo Yesus ayo dukum-kup bokola-lomdip: Gerasa kasel numi am bokon kalawaali, kela-lomdap unan o, akan-kaamip ko.
MAR 5:18 Kula kanum bokoliple, kulaa Yesus ayo asuk tam bot tem tiinba-kup unum o, ke-balale, tunum siin kawu sinik mafak ta dap-mafak-daalip laaba kaali, Yesus ami dukum-kup bokola-lomda: Kep-napla, nali kapso unum o, akale, kulaa
MAR 5:19 Yesus asiik bokola-lomda: I daa; kabi kaltapni abip kaali, asuk dindapla, Dukum ami kapni olen-daap-ta-lomda, mafek mafek sakbaalim dukum kanop-ta kaami sang kaali, kaptum kusal unang tunum iyo bakaya yakyak ken unan o, akale, kulaa
MAR 5:20 tunum kaayo, ababa-kup dap-talalulala, tangbal keba kaami sang uyo bakaya-tal-une-balale, unang tunum alik iyo awal-bamdip weng kulii-una-tala-kelip ko.
MAR 5:21 Kemin, Yesus nikil iyo bot tem yak wok kumun malii yak unip unang tunum yaapkan iyo tala-tala-kelipla, ali ok balang diim kawu bomda, kukuya-salale,
MAR 5:22 kulaa Juda kasel imi lotu tiin molin tunum ma tala kaami win kaali, Jarius kemin, ali tal Yesus ayo ataba-kup, kamokim imi weng umkaayilin kaami kukup kaali, kanumin kemin tilik duung fakela daak Yesus ami miit tem aba dabuuna-lomda
MAR 5:23 dukum-kup nen-bam bokola-lomda: Nami unang man sii kulii mepso taanon o, kem-sulula, kewa tili kemin, talap alep dindupla, kapni sikil kaata kuyak tii-lom um-talalulapla, asuk tiltam tiin-ilom tangbal keluk o, kalale,
MAR 5:24 Yesus aso nikil unip. Yesus nikil iyo unba-bilipla, unang tunum yaapkan ita Yesus ayo falala dap iipyak tem kabaak daa unabip. Kemin,
MAR 5:25 kiimi iipyak tem kaali, unang ma bombu kuuli, suunkup ulmi am unemin-kup kebii, wasital talangkal dakan-tiisu kaali ti,
MAR 5:26 dokta ita nam-talalulamip o, kala-lomdula, suunkup dokta yaapkan imi fanang kaali, din itamu talalmup o, kala angtiil yol dukum kaali, kukaa-ulin-kup ke-bilipla, umi sisol kaali, kukaayin-bam saan-bulula, bombii, umi moni kaali, disa kesa. Lale, umi mafak-alin kaali, ma daaklo so, kewalamu dinim kemin, atin mafak-kup laabula,
MAR 5:27 kulaa, Yesus ami sang kaali, weng san-ilomdu tal unang tunum imi iipyak tem kawu tal-ilom, Yesus ami daang tem kawu tola umi aket fukunin kaali, Nayo yak Yesus ami ilim-kaal kaata-kup bamaaltap yak malelila, nam-talalulala tangbal ke-lokomi ni, kala-lomdu, umi sikil kaali maaklo kulii yak Yesus ami ilim balang kaata-kup malelule,
MAR 5:29 kulaa maak fak-daalin tap umi mafak-alin uyo dinim kelula, kulaa utamula yi, Nalmi am unemin-kup ken-unbi kaali, disa kep-nulu kala, kem-sulule,
MAR 5:30 Yesus akal atamala yi, Nami titil kaali maaklo dong dokowa no kala-lomda, abiltap fal-siki talaka-bam unang tunum almi daang tem bom-bilip imi bokoya-lomda: Kalaali kawanta nimi ilim kaali, melep-nala ni? yakale,
MAR 5:31 almi daang bakaalin tunum iyo bokola-lomdip: Kapkal utaman! Unang tunum yaapkan iyo tola-lomdip tam-bak iipyak tem daa falala namulip kala kala-lom utabap kemin, kanimin o kala boko-lomdap: Kanta malep-nala no, kalbap i? akipla,
MAR 5:32 Yesus ayo talakan-tal-une-bam kawanta kaali kanop-nala ni? kalon o, kala-lomda, talakamale,
MAR 5:33 unang ukol utamula yi, Nam-talalula kala, kala-lomdu suun-daa walwaal-kup tap-tap-ke-bamdu, kulaa kamokim imi weng umkaayin kukup kaali, kanumin kemin, tal Yesus almi miit tem kawu tilik duung fakela daak tiin dabuuna-lomdu, ulmi mafak-alin sang so ulumi kanolu kaami sang so kiili, faneng fatap-kup bakayule, kulaa
MAR 5:34 Yesus asiik weng ayo akolkup bokowa-lomda: Nafalop kupyo! Nali utamila, Kubi, fanang daalapla, Kulaali fan nam-talalulokoma no, kalbap kala, taka-lomdila kemin, talalu-tamuli kemin, kupni aket tem kaali balili-kup kalapla, din tangbal-kup bom-balapla yo, kalala kewa una.
MAR 5:35 Kemin, unang kuuli, unokin dinim bom ilula, Yesus ayo weng kukaaya-salala, kulaa lotu tiin molin tunum Jairus ami am okok kemin tunum ma iyo tal Jairus ami bokola-lomdip: Kapni man unang kuuli, taanu kemin, kabi God ami weng kukuyin tunum kaayo, disa iip kawu dibii-talemin daa yo, kemipla,
MAR 5:36 Yesus ayo weng kaali, weng sanba-kup lotu tiin molin tunum ami bokola-lomda: Kabi suunin disa kela, Ali ti yaap kanolokoma no! nakalapla yo.
MAR 5:37 Kulaa, unang tunum imi bokoya-lomda: Nami uni kaali, alik kibi tal aba din unemin daa yo, kalba-kup, Pita so, Jems so, Jems almi niing Jon aso, imi weng umuuyilala, ita-kup aso nikil unip.
MAR 5:38 Kemin, Yesus ayo kela din lotu tiin molin tunum ami am kawu din aba, Jairus ami aptum kusal iyo babon-bam atul fak-daa-bamdip, dukum-kup amabip kala, kalale,
MAR 5:39 tam am aba-lom bokoyila ko: Kipya! Kanimin o, kalalip dukum-kup aman dulum weng kalaabip i? Man unang kuluuli, taanbu disa; uli akan-umbu kemin, kibi dukum-kup amamin daa yo, yakan-kaama le
MAR 5:40 unang tunum iyo boko-lomdip: Ali ibakaba no, kalbip-kup aban-kulil-teliple, Yesus ayo unang tunum iyo alik fotabamna abip unaalipla, Yesus ayo man ulmi awak-aalap so, almi okok kemin tunum asuumano iso, ita-kup foko-yim-bii tam abiin ma unang man umi bombu uyo, tam ababa-kup kulaa,
MAR 5:41 man unang umi sikil kaali kutal-fukuba-kup bokowa-lomda: Talita kumi yo, kala bokowala kaami miit kaali, man unang sii kupyo tam tiinan o, ukale,
MAR 5:42 uyo kasentap tam tiin-ilomdu tal-banen-tabu. Man kuumi wasital kaali, talangkal-kup dak-duulin kemin, kulaa awak-aalap iyo atam-ilomdip aket akal ma kemiple,
MAR 5:43 Yesus ayo weng kaali, dukum-kup imi bokoya-lomda: Kipni man umi umfoli tam tiinu kaami sang kaali, unang tunum kusnum imi diim kawu, kaa bakamin daa yo, kala-lomda bokoyale, inin-inin inang ma man kuluuli kuwip inamnuk o, kal-bomda bakaya ko.
MAR 6:1 Kemin, Yesus so, almi daang bakaalin tunum iso, nikil iyo abip kaa kela-lomdip din Yesus almi abip Nasaret kawu din unip.
MAR 6:2 Kemin, ayo tal bom ilale, God ami iintang am kaayo daanule, tam lotu am kaptamu God ami weng kaali, kufo-lomda unang tunum iyo bakayin-bam kukuyin-balala, unang tunum yaapkan iyo weng san: Kwin! kalaso kanum bakama kawi! kala-lomdip bokolip ko. Faneng, tunum kaami weng tangbal kaa kukuyinba kaata, doku ma kuluuse ni? Dok no-lom Yesus ayo aket fukunin tangbal kaali, dok no-lomda dik-daa-kuluuse ni? Kanta ma kukon-balala kanolin mirakel o kala kukup ulmi kusnum kusnum kaali kanuba ni?
MAR 6:3 Kemin, siin kaayo tunum kaali, abip kaltam-ami as kom bakela kutii-bam mafek mafek talalmin tunum ke-bamda bom ilsa kemin, kaali Maria umi man ale, kaali Jems so, Josis so, Judas so, Saimon aso, nikil imi fik kemin ale, alami nakal-unang yakal ti kuno abip kalawu bom-bilip, (kemin kaali, win finin tunum disa, kaali ti disa abip tunum kemin, kaami weng kaali weng sanalup dinim) o, kala-lomdipla daang ukolipla itaba-kup
MAR 6:4 Yesus akal bokoya-lomda: God ami profet o, kala weng tem bakayilin tunum ayo din abip malo ma kaami tam unokoma kaata, abip kaptam-ami kasel iyo boko-lomdip: Tunum kalawaayo, win finin o, kala ami weng baka-mokoma kaali ti, talalu weng san-kaa-mokomip. Lale, din almi abip tituun kaptamu unokoma kaata, almi abip kasel aye, almi aptum kusal aye, aa yak almi kiim anung aye, iyo ami weng kaali ma, weng sanokomip dinim o, yakale,
MAR 6:5 abip kasel iyo aket fuku-daa-lomdip, Kaali God ami titil kaa ma kutal-fukusa dinim o, kebip kemin, aket tam banelule fanang-daaba-kup, Yesus ayo kukup almi kusnum ma almi abip kaptamu kano-laaba disa. La, unang tunum mafak-alin malo ma ita-kup sikil kulii yak daa-lom yam-talalula, tangbal kelip ko. Kemin, Yesus ayo Nasaret kela una kaami abip ma abip ma imi kukuya yakyak kem-tal-unema.
MAR 6:7 Yesus ayo okok kemin tunum talangkal iyo yim-baali alep e kala una-una-kelin o, kala-lomda naan-daaya tal mepso tiliple, almi titil kaali, kuya-lomda bokoya-lom: Kibi nami win diim kaata sinik mafak mafak kiili fotabam-nipla, yak banemik o, kalba-kup kulaa
MAR 6:8 kipni yak abip ma ma kaami kanun-tal-une-mokomip kaali, (abip unang tunum iyo taba ibi dong dakaayokomip kemin,) kibi ima aye, men dukum aye, aa tuumon anang aye, kaali ma kulii-unemin daa; malal kaata-kup kulii-tal-une-mokomip.
MAR 6:9 Kemin, yaan-ilom kulaa, kuno diltoop tine unolip. Lale, siyot kaal kaali alep daa; maakup kaata-kup kulaak tinila kulaak tinila ke-lomdipla, unokomip.
MAR 6:10 Kemin, ibi din abip ma din unip kaali, am maakup kaptamu bomdip abip unang tunum iyo kukuyinbi keyinbip-kup aa, yak abip ma ma ken-tal-unemalip.
MAR 6:11 Kanolin kemin, am kaptam bom-bilip aa, abip kasel aa, iyo im-tam daa tiin mo-bom kipni weng ayo weng san-kaamin dinim kelip namti, Juda nulmi kukup ma kaata, kuluu-lomdipla, abip kaptam ayo kambola unolip o. Nulmi kukup kaali, sung ilol tal aba yak kipni yaan diim tabuuba uyo diliit-mo kulaalip yak abip kasel imi lo kabamnula kawu, abip kaptam-ami unang tunum iyo utamiwa yi, Asuk ilom kaa maso tal nuli dong dokoyokomip dinim o, kalin o, kala Yesus ayo kanum bokoya ko.
MAR 6:12 Okok kemin tunum nikil iyo yakyak din unang tunum iyo bakayin-bamdip: Ibi aket fal-siki-lom kiltipni kukup mafak kaa kanubip kaata, kela-lomdipla yo! ke-bamdiple,
MAR 6:13 nikil iyo sinik mafak yaapkan iyo fotabe-bilip yak bane-biliple, kulaa angtiil diim ilikmin kaami marasin kaali, kuluu-lom unang tunum mafak-alin imi angtiil diim kaa ilik daaya-lomdip beten keya yam-talalulip taltam tangbal ke-bam kemip ko.
MAR 6:14 Kemin, Yesus ami win kaali, tiltam dukum-nule, King Herot akal kuno weng san kela kemin, malo ma iyo boko-lomdip: Yesus ali oksam ukaayin tunum Jon Baptis taanse ata kemin, kulu God ata dafola asuk tam tiin-ilomdala, kanolin titil kaali, kuluu-lomda mirakel o kala kukup almi kusnum kusnum kaali kanuba no, kemiple,
MAR 6:15 malo ma iyo boko-lomdip: Daa ya! Kaali sawaalak God ami profet o kala weng sawaa bakayin tunum Elaija biisa ata kulu tiltam talda kulu kanuba no, kemiple, malo ma ita boko-lomdip: Daa ya! Kaali Elaija disa, kaali ti God ami weng sawaa bakayin tunum kusnum kemin, sawaayak kaami weng sawaa bakayin-bisip iltap o, ke-bam, weng aal diki-bam una-tala-ke-bilipla,
MAR 6:16 Herot ayo weng sanba-kup bokola: Siin kaali, nami waasi dinin tunum ayo dabaali din-ilomda Jon ami dabom kaali, buk-dola-lom anse. Lale, kaata God ayo asuk dafolala, faneng tam tiinba no, kala ko.
MAR 6:17 Kanola Herot ami kanose kaali ti, siin kaa Herot almi abokonim Filip ayo taanin dinim bom ilala, Herot ayo Filip ami kalel Herodias uyo tak-daa kuluulala, kaata ti suunkup Jon ayo bakaan-bamda: Kapkal utamsap kemin, kap-kabelim ami kalel kuumi tak-daa kuluu-lomdap uso laabip kaali, God ayo boko-lomda: Kukup kaa kanumin daa yo! kalsa namti kulu lo kutiibap o, kala bakaalin-kup ke-balala, Herodias kuuli ti, Jon ayo aket atul-kup kola-lomdu Herot ayo waka-takaan-bulula, almi unuk tabuulin tunum iyo bokoyilala, iyo dindip Jon ayo sok de dibii-din kalabus am kawu daa-silip.
MAR 6:19 Herodias uyo aket atul dap-tiiwale, Jon ayo dok nola-lomdi aali taanak o, kemin-kup kemu. Lale, Herot ayo Jon ayo atamala yi, Ali tunum tangbalim, ban kemin dinim kala, kala-lomdala, Jon ayo atam suun-bamda tangbal-kup tiin mo-bom balala kemin, Herodias ukol dok no-somdula taang-kala-lomdu, aalu taanama dinim. Kemin, Herot ayo Jon ami weng tangbal kaa weng saan-kaa-bamda aket yaapkan fukuni kala, kala-lom kelakin. Kata, ali ti suunkup Jon ami weng kaata-kup weng san-kaamon o, kema ko.
MAR 6:21 Herodias ukol Jon ayo dok no-lomdi aali taanak o, kem-laabu kemin, Herot ami awak duusu kaami aket fukunin am kaali, daanula, Herot ayo almi dong dakaalin tunum so, almi waasi dinim tunum imi tiin molin so, Provins Galili kasel imi kamok kamok iso, iyo naan-daayilala, tal Herot am kaptamu ima waan in-bom fiyaap duu-bilipla,
MAR 6:22 Herodias umi man unang uyo tiltam am taldu danis tangbal ayo ke-bulula, Herot so, tunum ima inbip iso, iyo utam-ilomdip unang man kuumi fiyaap kaali duu-un-bamdip king ayo unang man sii kuumi bokowa-lom: Kaali tangbal kemin, nali mafek mafek tangbal ma kup-ton o kebi kemin, kultupta bokop-na-lomdap, dok nolin kaami mafek mafek kaata ma kup-nan o nakap kala, kalalila, kulaata-kup kup-tokomi.
MAR 6:23 Kemin, nami weng kaali ti, faneng bokop-ti kemin, dok nolin mafek mafek katip aye, dukum aye, ale, mafek mafek sisol dukum kuluu-lom saanin aye, inang kaata kanola kubi kaami sang dik-daalap kaali, ti maaklo kup-tokomi no, ukale,
MAR 6:24 kulaa, unang man uyo abiltap tam-ilomdu awak uyo dik-daawulu: Akamen o. Nali awakim ami diim kaali, kanamin mafek mafek kaata ma kup-nan o, akokomi ni? ukule, kulaa awak uyo bokowa-lomdu: Tam ilom Herot ayo bokola-lomdap: Nami aket fukunin kaali, kapni waasi dinin tunum ayo ma dabaalap dindala, oksam wakayin tunum Jon Baptis kaami dabom uyo ukduu kulii-tal kup-nan o, kalbi no, kala kanum bokolapla yo, kala awak uyo kanum bokowulule,
MAR 6:25 kulaa man uyo abiltap tiltam am taldu king ami bokola-lomdu: Nami aket fukunin kaali, ti kamala kulawu kapni waasi dinin tunum ayo ma dabaalap dindala oksam wakayin tunum Jon Baptis kaami dabom ayo ukduu-lom ku kabas diim tii kulii-tal kup-nak o, kalbi no, akule,
MAR 6:26 kulaa king ayo weng san-ilomda, utama yi, Kaali atin ti kukup mafak kala, kalba-kup kulaa ami aket tem kaali ti mafakalule, Disa yo, kalokin. Katale, fanang daalala, Unang tunum yaapkan bom-bilip kalawiiyo, nami weng kutiili kaali, weng sanip kala, kalba-kup, Ayo, unba-kup,
MAR 6:27 king ayo almi waasi dinin tunum ayo bokola-lomda: Din Jon ami dabom kaali, ukduu kulii-talan o, akala din kalabus am un-ilomda Jon ami dabom kaali, ukduu-lomda kuu kabas diim tii
MAR 6:28 kulii-tal-ilomda unang man sii umi kuwa, uta kuluu-lomdu kulii-din awak umi kuuwu ko.
MAR 6:29 Kemin, Jon ami daang bakaalin tunum iyo kaami sang kaali, weng sanbip-kup, iyo tal Jon ami as kuli kaali, kulii-din buluusip ko.
MAR 6:30 Kulaa, Yesus almi kalaan tunum yim-baala alep e kala un-un-kesip iyo asuk tala-tala-ke-lom Yesus ayo bokola-lomdip: Kamokim kapyo! Weng alik kulu kuyap kulii-un-sulup kaali, yaan tem kanola talal-bamdup, yak kapni weng tangbal kaali, kukuyin-bam kem-solupla kala, tulup o, akip.
MAR 6:31 Kemin, unang tunum yaapkan iyo tal aba unbip-unbip-ke-bilipla, bii-lom Yesus so almi kalaan tunum iso, nikil iyo kalawaali dok no-lomdup ima kaali, inam-nolup dinim kelup kala, kalba-kup Yesus ayo bokoya-lomda: Na! Unip nikil nulukis din tunum dinim disanang bokon kawu kun fan-kaamin katip ma funulin tap kelupla yo, yakale,
MAR 6:32 kulaa nikil ilakis tam bot tem tiinbip-kup, abip kaali kela ok kumun kaami daang kun diim liip yakyak din tunum dinim, disanang bokon ma unum o, kala-lomdipla, unip ko.
MAR 6:33 Kemin, ok kumun balang diim kaami abip ma ma kawu, kasel yaapkan iyo itamdip, Yesus nikil namti kulu bot tem liip tal-unbabip o, kala, itabip-kup, isiik abiltap tawaal liip dak-daa dibii-din tunum dinim disanang bokon kaali din bom iliwa,
MAR 6:34 Yesus nikil iyo yak balang tem yak ilom, Yesus ayo talaala yi, Kwin, unang tunum yaapkan tala-tala-kebip kala, kala-lomda ti talalu dukum-kup olen-daayila-lomda: Kiili, sipsip imi tiin molin tunum iyo keyilala, ilikis bomdip, liip kaali, kela babon tal-unebip iltap ke-bam God ami tituun-kup liip kaali, atamin dinim ke-lomdip, kanta ma nuli dong dokoyokoma ni? kal-bom aket yaapkan fukun-unbip kala, kala-lomda, weng yaapkan kaali, bakayin-bamda kukuya ko.
MAR 6:35 Kulaa, kukuyin-bala atan kaa tem unon e kem-sulule, Yesus almi okok kemin tunum iyo tal bokola-lomdip: Bokon kalawaali, unang tunum dinim ale, atin am tiin daa kela kemin,
MAR 6:36 unang tunum kalawiiyo, fokolap din abip ma aye, bokon mep aye, iyo din un-ilomdipla kawu, ilmi inin-inin ma mo-lomdip inalipla siin o, kemiple,
MAR 6:37 Yesus asiik bokoya-lomda: Nikil kipni inin-inin kiita ma kuyilipla yo, yakala kulaa, nikil isiik bokola-lomdip: Nuli moni almi-kup tu handret (200) inang ma kuliilip din bret kaali, mo-lom kulii-tal kuyupla, ina-lomdip siin o kalbap elile, kanimin o, kebap i? akiple, kulaa,
MAR 6:38 asiik bokoya-lomda: Ibi bret kaali, kanim kal ma bombe namti din atamin o, yakale, ding bokobip-kup tal bokola-lomdip: Bret katip katip kiita, awakal ale, aniing kiita alep-kup bom-bilip o, akipla, ataba-kup
MAR 6:39 unang tunum imi bokoya-lomda: Alik daak balaasaal kon tangbal diim kawu afetu kutii tiina tiina kelipla yo, yakale,
MAR 6:40 alik daak tiinip kaali, ma 100 kabaak tiinaala, ma kabaak-ata 50 tiinaaliple,
MAR 6:41 bret awakal ale, aniing alep ma iyo foko-lomda titam abiil daa, God ami yaap ke yo, anba-kup, bret so, aniing so, iyo bakela kutii-lomda almi daang bakaalin tunum imi kukaaya-tal-unemsi kulaalipla,
MAR 6:42 alik iyo kuluu inbi-lom tiiknip kemin,
MAR 6:43 daang bakaalin tunum iyo bret so, aniing so, tanan-tanan-kebip kaali, afeta-tal-une-bi-lomdip basket almi-kup talangkal abuubi kutiilip kemin,
MAR 6:44 tunum deng ilmi-kup faiv tausin (5,000) iyo bret so, aniing so, kiiyo, inip ko.
MAR 6:45 Kemin, Yesus almi daang bakaalin tunum iyo bokoya-lomda: Nak-tunum kusal kipyo! Kipsiik tam bot tem kaali, tam tiin ok daang kun liip yak malii ababip-kup, abip Betsaida unipla kawu, nita unang tunum kalawiiyo, yim-baali unipla yo, yakala nikil unaalipla,
MAR 6:46 akal unang tunum iyo bokoyilala, unaaliple, akal yak aba tam amdu tikiin ma tam-ilomda God ayo beten kamaala ko.
MAR 6:47 Kulaa, beten kaman-bala am malang tinilule, bot kaali umbiyak ok kumun iip-iip unula, kulaa akal alafin tildak tawaal diim kawu bomda,
MAR 6:48 tilii biyak daalala, Inim ta nikil iyo bot kuuso, yim-baala yak aba tildak aba ke-bilipla, titil-kup taba-lom as kom kuluu ok kaali dabela yakyak unabip kala, kem-salale, am daan daan talba salale, kuluwu daang bakaalin tunum imi fanang ok daang tip diim liip tol-tol-ke-lom akaaya-tal-unon o kalba. Lale,
MAR 6:49 nikil iyo alik atamipla yi, Ali bot dinim ok daang kun diim liip kawu talaba kala, atam-ilomdip iyo suun-daa-lom, Kaali sakbal i! kal-bom atin suunin dukum ke-bam olmiple, Yesus ayo abiltap-siik bokoyila ko: Naktum kusal kipyo! Nalta kemin, ibi suunin daa yo; kela-somdiwa titil-fak-daalin a! yaka-lomda,
MAR 6:51 din ilmi bot tem tiinipla, kulu inim ati namti kulu ditang-kala disa kelu. Kemin, nikil imi aket fukunin kaali, dok no-lom abiltap bam-daa-lomdip Yesus kaali, dok nolin titil kaata ma kuluu-bomda kanuba no, ma kalolip dinim. Kemin, kamosinim kaali, nikil iyo atamipla yi, Yesus ayo bret katip kaali, unang tunum yaapkan iyo dan-kaayin-balala, inbi-lom tiikbip kala, kalbip-kup Yesus ayo dok nolin tunum i! kala-lom bam-daalin dinim kebip-kup, kamosinim kawu, nikil iyo atamipla, Yesus kaali, ok daang kun liip talaba kala, kalbip. Lale, kaali dok nolin tunum i? kalin dinim ke-lomdipla, atin suunip ko.
MAR 6:53 Kemin, ok kumun iip-iip kaali, kela yak abip Genesaret umi mepso ok balang tem kawu yak ababip-kup, bot kaali kulii yak ok balang diim kawu tii-lomdipla sok ta buku kuk-diibip-kup,
MAR 6:54 kela din itamiple, abip kayaak iyo abiltap din atamipla, Kaa Yesus alta tala kala, kalalipla
MAR 6:55 iyo abiltap yang abip mepso kaali, tal-une-bamdip unang tunum mafak-alin kuluusip iyo biin de yim-bital ulipla, Yesus ayo yak abip ma abip ma bombe no, kalipla, ita yim-tal Yesus ami be kawu daalip.
MAR 6:56 Kemin, Yesus ami tal-uneba kaali, abip dukum so, abip katip so, yak maket abip aye kaaso din-une-bam, kem-tal-une-balala, unang tunum iyo aptum kusal mafak-alin kuluusip iyo kulii tiltam abip daal kawu yim-tiilipla, Yesus ami dukum-kup nen-bam bokolip ko: Kamokim kapyo! Kabi kuno kamboyawa yakal yak kapni ilim matum kulaata-kup malep-tiwa yaawa-yaamik o, kala bokoliwa, Yesus namti, Ayo! yakaya, unang tunum kawanta yak Yesus ami ilim matum diim malelip iyo yaawa-yaamip ko.
MAR 7:1 Falosi so, Jerusalam kaptam-ami lo utamsip tunum malo ma iso, iyo tal Yesus almi diim kawu tala-tala-ke-lomdip,
MAR 7:2 Yesus almi daang bakaalin tunum malo ma iyo itamipla yi, Awil-fakal imi sikil fiit-bam diingmin kaami kukup kaata kela-lomdip, ilmi sikil kaali disa mep kulu diingnup o, kala kela ima inbip kala, kalbip-kup, daang-tem weng uyo bakayip.
MAR 7:3 Kemin, daang tem weng bakayinbip kaali ti, Falosi la ili Juda kayaak kaa bom-bilip sole, Juda kayaak alik iso, iyo ilmi awil-fakal imi kukup kaata kutal-fukusip. Kemin, (kiimi aket fukunin kaali, awil-fakal imi kukup kaa lolup namti, kaata taba nuli yam-mafak-daalokomu kala, kalbip-kup) kamosinim kaali sikil diingmin dinim kelip kaali, ima kaa ina-laabip disa;
MAR 7:4 ale din maket kemin baan diim din aba tilip inang kaali, iyo sikil diingnin disa kelip namti, ima kaali ma, ina-laabip disa. Kemin, sawaayak awil-fakal imi kukup kusnum kusnum yaapkan kiita kuluu-lomdip saak yak kaap aye, sosben aye, dis aye, bet inang kaali, diing-bamdip kukup kusnum kusnum kiili, kanu-bamdip kanumin-kup kemip.
MAR 7:5 Kemin, Falosi so, lo utamsip tunum iso, iyo Yesus ami dik-daala-lomdip: Kapyo! Sawaayak kaali numi awil-fakal iyo boko-lomdip: Ima inamnon o, kalap uyo sikil kaali, kanola talalu diing daa-lomdapla yo, kalsip. Kemin, awil-fakal ili suunkup ilmi man iyo kukuyin-kup ken-laabip. Kemin, nuli kanolin kukup kaali ti, kutal-fuku-bom-bulup. Lale, kapni okok kemin tunum ili kanamin o, kala numi awil-fakal imi kukup kaali, kutal-fukulamup dinim o, kal-bomdip imi sikil kaali, talalu diingnin dinim ke-lomdip ima uyo inbip i? akipla,
MAR 7:6 Yesus asiik bokoya-lomda: Kibi disa weng alep bakamin tunum kemin, sawaayak kaali, God ami profet Aisaya ali tifan kipni kukup kaami sang kaali, God ami Sukon Tem uyo dola kutii boko-lomda: God ayo boko-lom: Kanolin unang tunum iyo disa nami tong kaata-kup bakaan-unbip; kemin ale, nami aket fukun-ilomdip tildang nalmi miit tem uyo tololup o, kala-lomdipla, yang samaan bokon kawu laabip. Kemin,
MAR 7:7 ililta unang tunum kii, ilmi weng sawaa kaata-kup kukuyim-bamdip bokoya-lom: Kalawuuli God ami weng sawaa kemin, dotu kutal-fuku-bomdiwa kayi! kem-laabip. Yale, nali imi kasen-faka-bamdip nami tong kaata bakan-yaabip kaa weng sanokomi dinim o, kala God ayo kanum bokosa kayi! kala Aisaya ata weng kaa dola kutiisa.
MAR 7:8 Kemin, ibi God ami weng kutiisa kaali, kela-lomdipla, sawaayak tunum saaka tam bansip imi kukup kaata ti, kano kutal-fukusip te!
MAR 7:9 Kipni titil-kup taba kawil-fakal imi weng kutiiyinsip kaata-kup kutal-fukulum o, kala-lomdip God ami weng kutiisa kaali, daang-ukonsip kaali ti tangbal disa; kaali ti mafak kemin, kaami sang kaata bokoyon o, kalbi kemin, weng san-iliwa!
MAR 7:10 Sawaayak kaali, Moses ayo God ami Lo uyo unang tunum imi kuya bokoya-lomda: Kipni kawak-aalap, iyo talalu tiin mo-somale, imi weng ayo weng san-kaa-bam dong dakaayim-bam, ke-bamdiwa yo, kala-som ale, aa kawanita ami awak-aalap, kiimi weng mafak bakayila namti, aalip taan-yaamin o, kala kanum bokosa.
MAR 7:11 Kata, ipkal iltipni weng kusnum ma boko-lomdip: Kanola tunum ami moni bombe ayo, God ami kolon o, kalalala awak-aalap iyo bokoya-lomda: Nami moni kutal-fukubi kalawaali, God ami kolokomi no, kebi kemin, kaami win kaali, Koban o, kala-laabip. Kemin, kaali asuk ulduu-lomdila, akam ibi talalu tiin mo dong dakaayokomi dinim o, kala namti,
MAR 7:12 almi awak-aalap imi dong dokoyin dinim kela kaali, yaap ke-lokomu no, kala-laabip.
MAR 7:13 Kanumin kemin, kaali ibi iltipni kawil-fakal imi kukup kaata, kuluu-lomdipla unang tunum iyo kukuya-laabip. Kemin, kaata ibi God ami weng uyo kuyang saak tiilala tabasip te! Kemin, kanolin kukup yaapkan kiita, ibi kanun-umbip o, kalba-kup, Yesus ayo kanum bakaya ko.
MAR 7:14 Yesus ayo asuk unang tunum imi naan-daaya tal atamipla bokoya-lomda: Alik ipyo! Nali weng ma bokoyon o, kalbi kemin, dotu weng san-ilom kaal kelin!
MAR 7:15 God ami tiin diim kawu, tunum ayo ma sikil ninak soyim aye, mafek mafek, Awem o, kala-laabip aye, uyo inamna daak almi mat tem unokomu kaata taba-lom dap-mafak-daalokomu disa; kata, tunum ayo aket mafak fukun-bamda, kukup mafak ke-mokoma kaata ti dap-mafak-daalokomu.
MAR 7:16 [Kemin, ibi abat daa; ibi weng kaa sanilip kemin, weng kala bokoyili kaali, talalu weng sandipla, atam kaal kelin o, kala Yesus ayo kanum bakayila ko.]
MAR 7:17 Yesus ayo unang tunum iyo kamboya tam am unale, alami daang bakaalin tunum iyo dik-daala-lomdip: Weng faldak-tiimin weng kaa bokobap kaami miit kaali, dotu ifiiyalawa nuyo utamum o, akipla,
MAR 7:18 Yesus asiik bokoya-lomda: Kamok kamok kiili, miit kaali bam-daalin dinim kemin ale, kano ti kipkal ti bam-daa kaal kelin dinim bom-bilip ema? Ibi utamsip dinim kemin, weng san-iliwa bokoyon o, kala-somla ko. Kulaa, tunum ma ayo mafek mafek tiltam saaklo kawu bombu kaami inam-nokoma kaali, tituun-kup daak mat tem kawu ilana-lomdu din imaan dabaalokoma kawu, tiil bun-ilom disa ke-lokomu. Kemin, kaata taba-lom kaami aket kaali, dap-mafak-daalokomu dinim o, kala kanum bokoya ko. Yesus ami weng kanum bokola kaami iipyak tem kabak-ali ti, mafek mafek alik inin o, kalsa kaa, awem dinim o, kala ko.
MAR 7:20 Kanolin kemin, Yesus ayo bokoya-lomda: Kukup mafak uyo tunum ami aket tem kabaku bombu kaami tiltam saaklo tulu ayo kanu-mokoma kaata, fan tunum ayo dap-mafak-daalokomu.
MAR 7:21 Tunum ayo kukup mafak kaali, kanolin dinim ke-lom aket mafak kasiik fanang daa-lom mulo kawu yangda kukup mafak uyo kanolokoma. Kemin, kukup mafak kanolon o, kalokoma kaali, aket mafak fukunin aye, sadiki-bam aptum dap-mafak-dakamin aye, yukut-inin aye, aptum aala taan-laamin aye, aptum ami tiin kuwaala-lomda ami kalel uyo sadikimin aye,
MAR 7:22 aptum ami mafek mafek tiin nenin aye, kukup mafak mafak nuumin aye, iiweng bakamin aye, fatom dinim ke-bam ban kemin aye, saak yak aptum ami daang tem weng bakayin aye, weng mafak bakayin aye, almi win kufumin aye, maaklo babon-bam fuut-kup kuyak daa ilin aye, kiita kanu-mokoma.
MAR 7:23 Kemin, kukup mafak alik kiimi miit kaali, tunum imi aket tem kabaku ilomdula, tiltam saaklo tulula ban kelala namti, kaata fan tunum ayo dap-mafak-daalokomu no, kala, Yesus ayo kanum bakayila ko.
MAR 7:24 Kemin, Yesus nikil iyo Juda kasel imi bokon kaali, kela din abip kusnum kayak kayak imi bokon kawu unip. Kemin, imi abip dabom alep kiimi win kiili, Taiya so, Saidon so, kemin Yesus ami fanang-dakamin kaali, Tunum iyo ma nitamin dinim kelipla, maaklo din kun funulon o, kala-lomdala, din am ma kaptamu ilanin tap kela. Katale, dok no-lomda ayo sawaanama dinim;
MAR 7:25 unang ma uyo weng sanula, Yesus ayo tala no, kalbip kala, kalbu-kup, unang kuuli man unang ma la, sinik mafak ta taba-lom uyo um-mafak-daasa. Kemin, unang kuuli, Juda kayaak disa; uli Fonisia kayaak unang. Lale, uli Yesus ami fanang tal-ilomdu, kamok kamok imi weng umkaayin kukup kaali, kanumin kemin uli tal Yesus ami miit tem kawu tal-ilom tilik duung fakela tiin-ilomdu dabom falat kalomu dinim ke-lom dukum-kup boko-lomdu: Nami man unang uyo sinik mafak ta taba-lom um-mafak-daasa. Kemin, kaata fotabamnap yak banala, man uyo tangbal keluk o, aku.
MAR 7:27 Kemin, (Juda kasel iyo unang tunum kusnum kayak kayak imi win kaali, bokoya-lomdip: Ibi miyaan yam o, yakan-kaa-bamdiple, ilmi unang tunum itale, Fan tunum imi man o, kal-bom ken-umbip. Kemin, Yesus ayo aket fuku-daala yi, Unang umi aket fukunin kaali, um-kukulila, Yesus kulaali ti kunolama no, kalbu ne, kulaa kanolama dinim o, kalbu ne kala, utamon o, kala-lomdala) faldak-tiimin weng ma bokowa-lomda: Man katip katip imi ima duk-duu kulii-din miyaan imi kuyokomip kaali, tambal keyokomu dinim; kemin, kamosinim kaali, man katip katip isiik ifamin (kemin, kupni dong dokop-tokomi kaali, tambal kep-nokomu dinim) o, wakale,
MAR 7:28 unang usiik boko-lomdu: Kamokim kapni weng kaali, faneng bakabap. Kata, man imi ima in-bilipla, daam sekela daak tebol kaami minlo tem abam-nokomu kaali, miyaan yam tebol minlo tem kabaak tiinaabip ita taba-lom inan-laabip, kanolin tap kemin, kabi dong dokop-nokomap kaali, yaap kep-tokomu no, akule,
MAR 7:29 Yesus asiik bokowa-lomda: Weng kaali, tangbal ma bokolap kemin, sinik mafak ayo fotabamni, kupni man uyo kambowa yak bana. Kemin, nafalop kupyo! Kambola kultupni am unan o, wakale,
MAR 7:30 daak aba din ulmi am ulula yi, Sinik mafak ali man uyo kambowa yak banale, uyo tangbal-kup akan-umbu kala, kalbu-kup, utamu ko.
MAR 7:31 Kemin, Yesus ayo asuk abip Taiya kaa kela din abip Saidon aba daak aba yang Distrik Dekapolis kaami liip din aba akaala daak aba tal Galili wok dal abale,
MAR 7:32 tunum ma ali talang tem abat ale, weng bakamin kaali, mafak-kensu ayo almi aptum kusal iyo dibii-tal ababip-kup, Yesus ami dukum-kup bokola-lomdip: Tunum kalawaayo, kapta atabap-kup dap-talalulan o, akiple,
MAR 7:33 Yesus ayo unang tunum iyo kamboya dap-tama yang saak lo kabangu alep ilakis-kup ke-lom, Yesus ayo sikil diil kiiyo kulii yak tunum ami talang tem alep kiili, dibiila toop un-un-kelale, mok tak-daa kulaala daak sikil duung diim abamnule, kulii yak tunum kaami falang diim tenba-kup,
MAR 7:34 God ayo beten kaman-bamda ti abiil tikiin daa ilanin tap keba-kup olen-an-bam tibitap-tibitap-ke-bam bokola-lomda: Efata yo, kala kaami miit kaali, Talang tem kipyo! Tangbalnin o, yaka-laam-salale,
MAR 7:35 tunum kaami talang tem sole, bon tem so, kiili tangbal kewalip weng kaa tangbal-kup baka-bamdale, aptum kusal imi weng kaali, weng san-kaa-bam kema.
MAR 7:36 Kemin, Yesus ayo unang tunum malo ma bom-bilip iyo kanola atamip imi bokoya-lomda: Kibi yang kaptum kusal iyo nami kaa kanoli atamip kaami sang kaali, bakayin dinim o, kala, titil tabin weng kaayo, bokoya. Katale, ili ti yang aptum kusal iyo suunkup bakaya yakyak kem-tal-unemip.
MAR 7:37 Kemin, unang tunum kaa bom-bilip ili atin fanang alik tam baneyulula, una-tala-tala-ke-bam boko-lomdip: Tunum kalawaata, mafek mafek kaa kanuba kaali, alik tangbal-kup ke-bamda, talang tem abat iyo yam-talalulala, weng san-kaa-bam ale, weng bakamin dinim iyo yam-talalulala, weng tangbal baka-bam ken-umbip o, kemip ko.
MAR 8:1 Kanumsa kaata kemin, unang tunum yaapkan iyo Yesus ami weng kaali, asuk weng sanum o, kala-lomdip iyo tala-tala-kemiple, imi ima kaali, disa yo kalba-kup Yesus almi daang bakaalin tunum imi naan-daaya tal atamipla ayo bokoya-lomda:
MAR 8:2 Unang tunum kalawiili naso bombii am asuumano kelip kalaali, imi ima kaa disa keyila, iyo ima tinap ke-yimba kemin, nali olen-dakayinbi no.
MAR 8:3 Lale, malo ma kala bom-bilip kiili, samaan bokon kawu talbip kemin, kanola nali ima tinap yim-baali abip unokomip namti, un-bomdiwa, ima tinap liip tiinokomip o, kalale,
MAR 8:4 daang bakaalin tunum isiik Yesus ami dik-daalip: Unang tunum kalawiili yaapkan kemin, tunum dinim bokon kala, dok liip ima ayo kuluu-lomdup alik ifalup ina tiik-nokomip yoko? akiwa,
MAR 8:5 asiik nikil imi dik-daaya-lomda: Kipni ima bret kanim kal ma kulii-talbip i? yakale, iyo bokolip. Nuli bret fetkal-kup o, akipla,
MAR 8:6 Yesus asiik unang tunum iyo bokoyila, daak tawaal kulu tiinaaliple, bret fetkal kiiyo, foko-lomda, God ami yaap ke yo, anba-kup, bret iyo bakela kutii-lomda kuluu almi daang bakaalin tunum imi kuyilala, ita kulii-taba-lomdip unang tunum iyo kukaaya-tal-une-biliple,
MAR 8:7 nikil iyo aniing katip katip malo ma iyo bom-bilip kano Yesus ayo kuluu God ayo yaap ke yo kala, almi daang bakaalin tunum iyo bokoya-lomda: Aniing kaaso kuya-kuya-kelin o! yakala kabaan-yila tal-unemip.
MAR 8:8 Kemin, unang tunum iyo imbi-lomdip tiikniple, kulaali daang bakaalin tunum iyo ima in-bomdipla yelbip anung anung kiiyo foko-lomdip basket almi-kup fetkal kiiyo, abuulip dongnip.
MAR 8:9 Kemin, unang tunum iyo bret so, aniing so, inamnip kiili, fo tausin (4,000) kanolin ita inamnip dinim kelule, kulaali Yesus ayo taba yim-baala unipla,
MAR 8:10 almi daang bakaalin tunum so nikil iyo tiltam bot tem tiiniple, yak Distrik Dalmanuta kaami malii kabak unip ko.
MAR 8:11 Kemin, Falosi malo ma iyo tal Yesus ami dap-kuku-bam bokola-lomdip: Kapyo, kabi mirakel o, kala kukup almi kusnum kaata ma kukuyilawa, nuli atamupla yi, Fan, kabi God alta tam-baala tal-salap kala, takum o, akipla
MAR 8:12 ali aket uluum kela baplelula bokoya-lomda: Ibi bokop-na-lomdip mirakel o, kala akal almi kukup kusnum ma kanolapla atamum o, kala dik-dakap-nin daa yo! Kemin, nali ibi weng kaa faneng bokoyokomi kemin, kanolin fanang dakabip tunum ibi nali mirakel o, kala kukup almi kusnum fenbip kaali ma kanoli ata-mokomip disa yo, kalba-kup
MAR 8:13 Yesus ayo asiik unang tunum iyo kulu keyila almi daang bakaalin tunum iso, nikil iyo tam bot tem tiinbip-kup, yak wok kumun malii kawu unip ko.
MAR 8:14 Kemin, Yesus ami daang bakaalin tunum nikil iyo bret kaa lukuuya kutiibip-kup bret maakup kaata-kup bot tem kaptamu kulii-tilip kemin,
MAR 8:15 Yesus ayo weng fatap kaata, faldak-tii-lom weng ma bokoya-lomda: Naktum kusal kipyo! Kibi Falosi so, Herot so, imi yiis kaali, dotu utafii-bam dap-kayak dap-kayak-ke-bam bomdipla yo! yakale
MAR 8:16 nikil ili Yesus ami faldak-tiimin weng bokola kaami miit kaali, kaal kelin dinim ke-lom-dipla kemin, nikil ikal teken-bam boko-lomdip: Kwin, bret malo kaa dinim kemin, yiis kaami sang kaata bakaba neli ye? ke-bam bakamiple, kulaa
MAR 8:17 Yesus ayo almi daang bakaalin tunum imi weng kanum bakabip uyo utam bokoya-lomda: Ibi kanimin o, kala-lomdipla ibi boko-lom: Nuli bret dinim kemin, kanum bakaba no, kebip ema? Kipni fanang saanin kaali, duk-duu kuwayilu ibi utamipla, Yiis kaami sang kaata disa kemin, mafek mafek kusnum kaami sang kaata bakaba no, kala utam kaal kelin dinim kelip o?
MAR 8:18 Kibi tiin so, talang tem so, kemin lale, atafii-bam ale, weng san-kaa-bam bam-daalin dinim kelip o? Siin kaali, bret awakal fakela-lom kuyili kipkal kuluu tunum ilmi-kup faiv tausin (5,000) kiimi kuyilip ina-lom tiika yela kutiilipla asuk basket abumsip kaali, kanim kal ma abuu-silip i? Kibi lukuuyase no? yakale, isiik bokola-lomdip: Basket kiili talangkal abuu-sulup o, akipla,
MAR 8:20 nikil iyo asuk ma dik-daaya-lomda: Asuk kamosinim kaami bret fetkal fekela kuyili iltipta kuluu-lomdip unang tunum ilmi-kup fo tausin (4,000) kiimi kuyilip in-bom tanan-tanan-kemsip kaali, ibi basket kaa kanim kal ma abuu-silip i? yakale, iyo boko-lomdip: Basket fetkal abuu-sulup o, akipla
MAR 8:21 Yesus asiik bokoya-lomda: Kibi kamali kaa, dotu utamin disa bilip o?
MAR 8:22 Kemin, Yesus nikil iyo yak aba din abip Betsaida kawu, din unipla, abip kasel iyo tiin bikilin tunum ayo dibii-tal Yesus ami bokola-lomdip: Tunum kalaayo, kapta atamdap dong dokolawa, ami tiin ayo tangbal kelak o, akiple,
MAR 8:23 Yesus ayo tunum tiin bikensu ali abip kaali, kambola dap-tal-fuku dibii yang tikiin tem kabang un-ilomda, mok tik-daala, yak ami tiin diim aba sikil ta yak dap-tal-fuku ayo dik-daala-lomdip: Kapyo! Ti kaldak mafek mafek inang ma atamap elile disa ye? akale
MAR 8:24 tiin baaba-kup bokola ko: Nali mafek mafek ma talalu atamin dinim kebi lale, tunum malo ma iyo itafiibi. Lale, kuliili as ema yo? yakan-kaa-bilila, tal-unebip. Katale, tunum namti kulu tal-unebip kala, kalbi no.
MAR 8:25 Yesus almi sikil alep kiita asuk ti kano kulii yak tunum ami tiin diim telala, kulaata tiin dak-daa dotu atam talaalale, Nami tiin kaali, asuk tangbal kep-nulu no, kalba-kup, kulaali mafek mafek alik kiili, tangbal ma itam-kem-salale,
MAR 8:26 Yesus ayo tunum kaayo, Dabaali asuk almi am unak o! kala bokola-lomda: Kabi yang abip kaali, Nali tangbal keli no, kala, unang tunum alik iyo kukuyilap titam-laamin daa yo! akale, am una ko.
MAR 8:27 Kemin, Yesus sole, almi daang bakaalin tunum iso, iyo din Sisaria Filipai abip kaami mepso kaami abip malo ma kaali, yakyak ken-un-bomda almi daang bakaalin tunum imi dik-daaya-lomda: Unang tunum kiili, boko-lom: Kaali kawanta no nakan-kaabip i? kalala imi dik-daayale,
MAR 8:28 isiik bokola-lomdip: Unang tunum ma iyo boko-lomdip: Kaali, oksam ukayin tunum Jon Baptis ata no, ke-biliple, malo ma ita boko-lomdip: Kaali God ami weng ku-fatap-dakamin tunum profet o, kala sawaayak kawu biisa Elaija ata no, takan-kaa-biliple, malo ma ita bokop-ta-lomdip: Kaali, siin sawaalak God ami weng ku-fatap-dakamin tunum ma sawaayak kawu biisa ata no, takan-kaa-bam ke-bam bilip o, akiple
MAR 8:29 nikil ilmi dik-daaya-lomda: Aa, ibi yi? Ibi kaa kawanta no nakan-kaabip i? yakale, Pita ata Yesus ami weng uyo, maan tela-lomda: Kabi fan ti God almi man uldaa-tam-buusa Kraist namti kulu-balap ale, God ami dabaali din unokoma no, kal-bomda Israel-miin numi bokoyila fen-tabasup tunum namti kulu balap o, kala kanum bokolale,
MAR 8:30 nikil imi dukum-kup bokoya-lomda: Ibi tunum maakup ayo ma bokola-lom: Yesus kaali, God ami uldaa-dabuula tiltam Kamokim kesa tunum namti kulu bombe no, kala bakayila-tal-unemin disa kayi! kala kanum bakayila ko.
MAR 8:31 Kemin, weng kaali, kufo kukuyin-bamda boko-lom: Am ma daanokoma kaali, Dukum Ami Man Nayo, kukup mafak mafak yaapkan angtiil yol kukaap-nin-bilip bombii um-tal daalile, Juda kasel imi kamok kamok so, awem tunum o, kala pris imi kamok kamok so, lo utamsip tunum iso, ita daang ukup-na-lom nitam suun-bamdipla, iyo nam-baalip yak nulmi waasi Rom kayaak imi sikil diim abamnila, ita nelip saaka bombii am alep kelila, am asuum diim kawu asuk tam tiinokomi no, kala-lomda
MAR 8:32 ayo weng fatap bokolale, Pita ayo Yesus alakis dibii yang kabangu aba-lom almi taanokoma kaami sang bokoyila kaami kalan kaata, dip-yak saan-bam bakaan-balala,
MAR 8:33 Yesus akal fal-siki ti kaltam daa almi daang bakaalin tunum iyo itafii-bamda, Pita ayo dip-yak saan-bam bokola ko: Kabi nami God ami aket fukunba ultap uta fukunbap disa; waasi Setaan ami kukup altap kaata, kukaap-nambap ale, tawaal diim kalawaami tunum imi aket fukunbip tap uta fanang dakabap kemin, kep-na unan o! aka ko.
MAR 8:34 Kemin, almi daang bakaalin tunum so, unang tunum tal kulu tekel falabip iso, iyo weng umuuya tal atamipla bokoya-lomda: Dok nolin tunum kapta, naso din nami okok kemin kaata, okok kemon o, kalap namti, yak kaltapni aket fukunin kaata-kup kanumin kaali, kambola-lomdap nami aket kaata, dukum-kup kup-na-lomdap, nami as tiim kawu angtiil yol kuluulokomi ultap ke-lom taanami kulaali, kunola taanami no, kal-bomdapla, kanolin kukup kaata kuluu-bomdapla, tiltamdap nami okok kemin kaali, kutal-fuku kulii-taba balapla yo! kala-somla ko.
MAR 8:35 Kanolin kemin, tunum iyo kawanta ma almi angtiil lak kaata suunkup aket uyo kuwa-bom, almi aket fukunin kaata-kup kanum tal-unemon o, kema namti, kaata taan-ilomda maaklo ke-lokoma; kemin ale, tunum ayo kawanta, kuno yang kunu-bili waasi iyo taba-lomdip nelamip, kuno nelamip o, kala-lomda tildang nami lak kaata-kup duu-bom, nami weng tangbal kaata, dukum-kup kutal-fuku kulii-taba namti, kanolin tunum kaata ti suunkup ilokoma.
MAR 8:36 Ale, tunum ayo ma tawaal kala dik-daa kulaasu kaami mafek mafek kiita, alik faka-bamdale, suunkup bom ilin kaami liip kaali ma kemin dinim kema namti, almi mafek mafek yaapkan kuluu fakaba kaata, taba-lomdip dong dokolokomip ema? Disa! Kaali taba dong dokolokomu dinim te!
MAR 8:37 Iyo mafek mafek tangbal-kup tabasu inang ma God ami kolala, God ayo bokola-lomda: Kabi suunkup ilokomap o, akokoma nema? Disa! Suunkup ilin kaali, sisol ta kuluu mo-laamin kaami mafek mafek disa!
MAR 8:38 Unang tunum yaapkan iyo kukup mafak kaata, kutal-fuku-bamdipla, God ayo daang ukola kela yang banen-umbip kemin, kanta unang tunum imi diim kawu fatom-duk-duu-bom, nami win kaali, bakayin dinim kema namti, am ma daanokoma kaali, Dukum Ami Man Nayo nalmi Aatumen God ami falala-kalin so, ensel atin tangbal tangbal iso, nikil numi talokomup kaali, nasiik tunum kaami win kaali, kufolokomi disa; ali ti disa kayi! aka-lomdi ali dap-kan-tiilokomi no.
MAR 9:1 Kemin, weng kalawaali tituun-kup tabin weng bokoyokomi kemin, kibi weng san-iliwa! Malo ma ibi taanin dinim bom ilom utamipla yi, Ali tiltam king ke-lomda unang tunum iyo tiin mola kala, kalokomip kayi! kal-bomda Yesus ayo kanum bakayila ko.
MAR 9:2 Kemin, am bukupkal uyo talaba toop banule, Yesus ayo taba-lomda Pita so, Jems so, Jon aso, nikil asuumano, ita-kup foko imbiila yak aba tam amdu tikiin aalap batbat ma kawu, nikil ilifin bomdiple, kulaali tunum asuumano kuliiyo, Yesus ayo atamipla yi, Kwin! kaa akal almi kusnum ke-lomda
MAR 9:3 ami ilim kaali, atin ti ibin namaal tap, tiin buluusi so, kelala atamip. Kemin, tawaal diim unang kalawiiyo, dok no-lom ilim ma diing daa-lomdip ilim kaa namaalim tiin buluusi so kelamu dinim.
MAR 9:4 Kemin, nikil iyo atamipla, tunum alep ma sawaayak bom-biisip kiili, Elaija so, Moses aso iyo asuk abiil tikiin kela tildaak tilip Yesus aso, weng bakabip kala, itabip-kup,
MAR 9:5 Pita nikil iyo suunin dukum ke-bamdipla kemin, Pita ata fanang daa-lomda, Kaata kanimin weng ma bokolokomi ni? ke-bamda kulaata Yesus ami bokola-lomda: Numi kukuyin kapyo! Yaap ke kapso tal kalawu bom-bulup kemin, nikil nuli kiin-laap am asuumano aye ma ema de-lomduwa, ma kaata kapni, ma kaata Moses ami ale, ma kaata Elaija ami ke-lom de-yum o, kal-bom kemale,
MAR 9:7 tam ibin uyo tildaak tilnong mo-imaalule, ibin tem kaptam weng ma boko-lomda: Kipyo! Kaali ti nami aket-iip Man kemin, ibi ami weng bakama uyo ti weng san-kaa-bamdipla yo! kalale,
MAR 9:8 iyo suunbii abiltap-kup tiyak daalipla yi, Tunum alep iyo maaklo kelipla Yesus ata-kup bom ila atamip ko.
MAR 9:9 Atamipla, Yesus nikil iyo amdu tikiin ayo, kela tal-bom ale, Yesus ayo almi daang bakaalin tunum nikil asuumano iyo weng kaali, dukum-kup bokoya-lomda: Nak-tunum kusal kipyo! weng san iliwa! Ibi din tunum kusnum kayak kayak kiimi diim ayo, kanolin atamip kaami sang uyo ma bakayin dinim kayi! Kano ti bom-bilipla bii, Dukum Ami Man Nayo, taanila, nam-bii din namaalip bii, tam tiindi tambani kala, kala-somdiwa kabaku yaap, unang tunum kayak kayak iyo bakayin o, kala kanum bokoyale,
MAR 9:10 nikil iyo kanola atamip kaami sang kaali, bokolamip dinim; ti yawaal daa-lomdip Yesus ami weng, Saakni namaalip sindi asuk tam tiinokomi no, kala kaami miit kaata fen-bam atamum o, kal-bomdipla fenip ko.
MAR 9:11 Kemin, nikil asuumano iyo weng kusnum ma Yesus ami dik-daala-lomdip: Lo utamsip tunum ili kanimin o, kala boko-lomdip: God ami profet o, kala weng ku-fatap-daa bakayin tunum Elaija sawaayak kawu bombii taansa asiik talale, God ami uldaa-dabuula tiltam Kamokim kesa tunum ata mafiing tem kawu talokoma no, ken-umbip i? akiple,
MAR 9:12 Yesus asiik bokoya-lomda: Kiimi weng ma boko-lomdip: God ami uldaa-dabuula tiltam Kamokim kesa tunum ayo tilin dinim bom ilala, Elaija asiik tal unang tunum iyo dong dokoyilala, imi aket tem kaali, dotmipla, talokoma no, ken-umbip. Kaali tifan bakan-umbip kemin, ibi weng san iliwa! Kaami miit kaali, dotu bokoyon. Elaija ayo ti talse. Katale, tunum ilmi aket kaata-kup fukun-bamdiwa, aalip taanse. Kemin, sawaayak God ami Sukon Tem dola kutiisip kaali, kulu tifan tiltam talsu. Kata, God ami uldaa-nam-buula tiltam Kamokim kesi nami sang kaali, sawaayak kawu, weng ma kaa dola kutii-lom, Ita kukup mafak mafak kiili Dukum Ami Man ayo, kolip angtiil yol awak dukum ale, mok baan kamaalokomip o kala, dola kutiisip. Kemin, kanimin o, kala ibi kaami aket kaali, fukunbip dinim i? kala Yesus ayo Jon Baptis ami sang kaata kanum bakaya ko.
MAR 9:14 Kemin, Yesus nikil iyo yakyak taldaak daang bakaalin tunum malii ma keyila umbip imi diim taldaak abom e; unang tunum yaapkan iyo nikil imi diim kaptamu tala-tala-keliple, lo utamsip tunum malo ma ita daang bakaalin tunum malii ma iso, weng aal dikibip kala, kala tildaak itamiple,
MAR 9:15 unang tunum kuliiyo, talaalipla, kwin! Yesus ayo kala tala kala, kala-lom fanan-bi-lomdip abiltap din weng fakaliple,
MAR 9:16 asiik almi daang bakaalin tunum iyo dik-daaya-lomda: Ibi kanim kalan ma iso weng aal dikibip i? yakale
MAR 9:17 unang tunum kulu tiinaabip imi tunum ma asiik boko-lomda: God ami weng kukuyin kapyo! Nami man tunum ayo sinik mafak ta del bak-daansa. Kemin, asuk dok nolin diim kawu, sinik mafak kaali tal nami man kaami tal faalna kaali, dap-tal-fuku dabaala daak tawaal aba-lom mok daban-kup baktam-baktam-bamda, kiil eng-kup dilit-dalat-bamda, ami angtiil kaali kaluung alik dip-yak tela-lomda kanun-umba kala, kalalila dibii-tal uliyi, Kabi disa kelap kala, kalalila, kapni daang bakaalin tunum imi bokoya-lomdi: Kipta, sinik mafak kulaa fotabamnip yak banak o, yakan-kaabi. Katale, faneng titil-foko fotabamnip yak banoma dinim kelip o, kala ko.
MAR 9:19 Kemin, Yesus asiik almi daang bakaalin tunum so, unang tunum kulu tiinaabip iso, imi bokoya-lomda: Kwin i! Ipni aket fukunin uyo atin fan tituun kelin disa kawi! Nali kipso bom bii kayoop yaapkan dak-duusi. Kata, ibi nitamiwa yi, Kaali God ami titil kaata kuluu-lomda sinik mafak iyo fotabamna yak banen-umbip kala, naka-laabip disa. Nali ipso bii, am kanim kal kelila natamiwa yi, Ali ti God ami titil kaali, nokol ti kuyama no, nokokomip i? Nali kipni aket mafak fukunbip kaali, daal kep-namba kemin, man tunum ayo dibii-tilin o, yakale,
MAR 9:20 iyo dibii-tal atamipla, sinik mafak ayo Yesus ayo atam-ilomda abiltap man ayo dap-kula mo dabaala unba talba kemsi, dabaala daak tawaal diim aba fal-siki-du-siki-ke-bamda mok daban-kup baktam-baktam ma ko.
MAR 9:21 Kemin, Yesus ayo man kaami aalap ayo dik-daala-lomda: Man kalawaali kanu bi-lomda kayoop kaali, kanim kal ma duk-duusa ni? akale
MAR 9:22 asiik bokola-lomda: Sawaayak man katip kabaku kanum talan-umba kemin, suunkup sinik mafak kaali, taba man kaayo dap-mafak-daalon o, ke-bamdala an-kulaala yak wing tiil une-bam ale, wok kumun tem une-bam ken-umba. Kemin, kanola kapyo! Ti dong dokolamap namti, nuyo olen-daaya-lom dong dokoyan o, kala, ayo kanum bokolale,
MAR 9:23 Yesus asiik bokoya-lomda: Kapyo, kapni bokop-na-lom: Kabi tifan dong dokolamap o? nakap kaali yi? Dok nolin tunum ata ma fanang daala yi, God ayo ti kulaali, kunolama no, kema namti, yak mafek mafek alik dik-daala kulaali, God ayo ti kunolama no yakale,
MAR 9:24 man kaami aalap ayo wol-bamda boko-lom: Nili God ayo kalawaali kunolama no, kalbi. Lale, da katip ma fanang-dakabi kemin, dong dokop-napla, sakbaalkan keluk o, kalale
MAR 9:25 Yesus ayo talaala yi, Unang tunum iyo tunum kaami fuutba kaali, weng sanbip-kup abiltap tala-tala-kemip itaba-kup, sinik mafak ayo fuut kaan-bamda bokola ko: Sinik mafak taba-lomdap kabi man kalawaayo del kola kutenbap-kup ale, sikil ta talang tem akensap kemin, nali titil tabin weng ma bokop-ton o, kali kemin, weng san ilawa! Man kaayo, kambola yak banan o, kala-somla kemin, asuk maso ma talaba yak ami tiling tem kaali, unemin dinim o, aka-laam-salale,
MAR 9:26 sinik mafak ayo fuut-bamda, man ayo dukum-kup dabaala unba-talba-ke-bamda kambola tiltam banale, man ayo tiin tip-daa kelale, unang tunum yaapkan iyo boko-lomdip: Daak man kulaa, taana te! ke-bam bakamiple,
MAR 9:27 Yesus ayo daak sikil kabaku dap-tal-fuku kufola tam tiina ko.
MAR 9:28 Kemin, ilanin tap ke, Yesus so, almi daang bakaalin tunum iso, ilifin tam am tiin-ilomdip, Yesus ayo dik-daalip: Kanimin o, kala nuli titil-fak-daa sinik mafak kaa fotabamnup yak banin dinim kela ni? kala, kanum bokolipla,
MAR 9:29 Yesus asiik bokoya-lomda: Yak mafek mafek kusnum kaali, kanola-lomdip God ami beten kamalin dinim kelip kaali, kanolin sinik kaa dok kano-lom fotabamnip yak banokoma dinim o, kala kanum bakaya ko.
MAR 9:30 Kemin, Yesus nikil iyo bokon kaa kambonbip-kup, daak aba unbiyang Provins Galili kaami liip kawu yang ababip-kup, Yesus ayo unang tunum iyo weng sandip nitamum o, kala, tala-tala-kemin dinim ke-lom nikil nulufin bomdupla, nalmi daang bakaalin tunum iyo kukuyon o, kala-lomda daa kasen-kasen tal-une-bomda almi daang bakaalin tunum iyo kukuyin-bam bokoya-lomda: Kipyo, mepso kelu kemin, nak-tunum ma ayo aket fal-siki-lomda Dukum Ami Man Nayo, nam-fatap-daa-lomda nam-baala yak waasi imi sikil diim abamnila, ita nelip taanila, nim-bii din namaalip bom bii, am alep ke-lomdi, am asuum diim kawu, asuk tam tiinokomi no, kal-bom kukuyin-bam bakaya. Kata,
MAR 9:32 nikil iyo ami weng bakayinba kabak-ali talalu bam-daa utamin dinim ke-lom suun-bamdipla, kaami miit kaali ma dik-daalin dinim kelip ko.
MAR 9:33 Kemin, Yesus nikil iyo dak-daa kulii-daak aba toop Kapeneam din aba-lomdip, tam am kawu tiin-bom, nikil imi dik-daaya-lomda: Kibi liip tilip kaali, kanimin sang kaata bokola-sala bokola-sala-ken-tilip itami ni? kal-bom dik-dakaya. Lale,
MAR 9:34 yikil fanang daalipla, Numi liip tulup kaali, nikil nokol kawanta ma numi kamokim ke-lokoma ni? kala-sala kala-sala-ke-bam weng aal dikin-talabup kala, kalbip-kup, nikil iyo fatom-dap-tiiyulala weng dulumnip.
MAR 9:35 Kemin, Yesus ayo daak tiinba-kup, daang bakaalin tunum talangkal iyo weng umuuyila tal atamipla bokoya-lomda: Kanola tunum iyo, nita God ami tiin diim kaali, kamokim kelon o kala namti, kaali almi aket fukunin kaa kambola-somdala, unang tunum alik imi dong dakaayin tunum keba-kup ale, ami bon tem tii kaltam daa ilin tunum ke-lomdala yo, kalba-kup
MAR 9:36 man katip ma dabii tildang nikil imi iipyak tem kabaaku dap-tal miki-lom nikil imi bokoya-lomda:
MAR 9:37 Dok nolin tunum ata man kala-waaltap ayo ma atam-ilomda, Yesus ami win diim kawu, man kalanolin man kaali win sono, kala-lomda dong dokola namti, kaali nami dong dakaap-nin kukup namti kulubu. Ale, God akal nam-baala talsii kemin, kanta nami dong dokop-na namti, kaali nami dong dakaap-nin kukup kaata-kup disa; kemin, kaali tifan, God ami dong dakaalin kukup namti kaa bombu no, kala, Yesus ayo kanum bakaya ko.
MAR 9:38 Kemin, Jon ata Yesus ami bokola-lomda: Numi kukuyin tunum kapyo! Nikil nuli tunum ma atamupla, Ali kapni win kaata, kufo-lomda sinik mafak iyo fotabamna yak bane-bilip kawu, nuli atamupla, Ali kapni daang bakaalin tunum kelin dinim bomda kanolin kaali, kanuba kala, kala-lom nuyo bokola-lomdup: Kapni disa kawu Yesus ami win kufon-bam kanubap kaali kambolan o, kala dil molup o, akiple,
MAR 9:39 Yesus asiik bokoya-lomda: Kanola tunum ayo ma nami win kaata kufo-lom mafek mafek akal alik kusnum ma dotula namti, ali ilomda dok no-lomda weng mafak kaa kup-nokoma dinim; kemin, kibi kaa kulaalan o, akan-kaamin disa yo.
MAR 9:40 Kemin, dok kanolin tunum ata, nulmi waasi kamayin dinim kela namti, numi nak-tunum kela kemin, kibi kaa kulaalan o akan-kaamin disa yo.
MAR 9:41 Ale, dok nolin tunum ata ma itam-ilomda, Awu, ibi Kraist ami tunum o, kala-lomda dong dokoyon o, kala, wok kaali iluya inamnip namti, God akal tunum kaami kukup kaa kanola kaali, utam boko-lomda: Kaptum wok ilolap kaami kukup kaali, katip sakap lale, kaali tangbal ma kanowalap kemin, nali fiyaap duubi no kala-lomda, akal kukup tangbal kaali, fan maan telokoma no kala, Yesus ayo kanum bakaya ko.
MAR 9:42 Kemin, Yesus ayo asuk bokoya-lomda: Kusnum kayak kayak iyo utamiwa yi! Tunum ayo unang tunum God ami lak duu-yilin katip katip kebip imi yam-mafak-daalon o, kem-tabon o, kala ata-mokomip namti, tuum dukum ata ma kuluu kuyak tunum kaami kum kun diim kabaku sok de-lom dabaalip daak yol ok kumun tem una namti, wok ta an-dong-dokola taanala, bi-lom God ayo yol katip ma uyo kolokoma. Ale, kanola kayak kayak iyo tunum kaa kanolin dinim ke kambolip, unang tunum God ami lak duu-yilin katip katip kebip iyo yam-mafak-daa kela yang kukup mafak uyo nuumip namti, God asiik atin ti kaami yam-mafak-daala kaami maan uyo kolaya, tunum ayo atin angtiil yol awak dukum uyo daka-mokoma.
MAR 9:43 Ale, fanang daalawa yi, Nalmi sikil ta nim-bii yang daalu, kukup mafak kaali kemon o, kalbi kala, kalap namti, kaltapni sikil malii kaali, ukduu kulaalap una. Sikil malii maakup ma ke-lom, kukup mafak uyo kambola bombii taandapla tam God ami abip kawu suunkup ilokomap kaata, atin ti tangbal; kemin ale, kabi sikil malii kaayo, ukduu-lom kukan-tiilami dinim o, kala kukup mafak kaata-kup kanubi taanaple, God ami ensel iyo tam-baalip din wing suunkup kiinin abip unokomap kaali, tangbal disa; [kemin
MAR 9:44 abip kaali wing kaa ten-laamin dinim; ale angtiil diim amnom-miin kiili, disa ke-laamin dinim kemin kanolin abip kaata].
MAR 9:45 Ale, kanola fanang daalawa yi, Nalmi yaan uyo nam-bii din daalula, kukup mafak kaali, kemon o, kalbi kalap namti, kaltapni yaan malii kaali, buk-duu kulaalap unula, yaan malii ma maakup ke-lom kukup mafak uyo kambola bombii taan-ilomdap tam God ami abip kawu suunkup ilokomap kaata, atin ti tangbal; kemin ale, kabi yaan malii kaayo, buk-duu kukan-tiilami dinim o, kala kukup mafak kaata-kup kunubi taanaple, God ami ensel iyo tam-baalip din wing kiinin abip unokomap kaali, tangbal disa; [kemin
MAR 9:46 abip kaali, wing kaa ten-laamin dinim; ale, angtiil diim amnom-miin kiili, disa ke-laamin dinim kemin kanolin abip kaata].
MAR 9:47 Kanolin ultap kemin, kanola fanang daalapla yi, Nalmi tiin kaali, kukup mafak uyo kukup-nam-bulula, kanumon o, kalbi kalap namti, kaltapni tiin malii kaali, ulduu kulaalap unula kewa-lomdap, tiin malii ma maakup ke-lomdap kukup mafak uyo kambola bombii taan-ilomdap tam God ami abip kawu suunkup bom ilokomap kaata ti tangbal; kemin ale, kabi tiin malii kaali, ulduu kukan-tiilami dinim o, kala kukup mafak kaata-kup kanubi taanaple, God ami ensel iyo tam-baalip din abip mafak unokomap kaali, tangbal disa; kemin,
MAR 9:48 abip kaali, wing kaa ten-laamin dinim; ale angtiil diim amnom-miin kiili, disa ke-laamin dinim kemin, kanolin abip kaata.
MAR 9:49 Kemin, ibi nami weng kaa kukaayinbi kaali, weng san iliwa! Titil weng o, kala kibi suunbip. Lale, faneng weng kaali, tituun kemin, alik kawanta nami lak duulip namti, God ami aket fukunin kaali, Tangbal-kup kukuyin-bilila, nalmi weng kaata-kup weng san-kaa-bamdip, tiltam titil-fak-daalin o, kala-lomda awak-aalap imi man babon-bilip ye-bam aye, ke-bilip kukuyinbip ultap ken-umba ko.
MAR 9:50 Yol kaali abaal-kup tabin kemin, balaalapla, ima iyo abaal tabokomu. Lale, kanola yol uyo abaal tabin dinim kelu kaali, kabi dok kano-lomdap dotulapla, kaami abaal kaali tabokomu ni? Kaali atin dinim o. Ibi yol ultap kemin, kanola ibi weng aal diki-bam, nikil nuli kawanta nulmi kamokim ke-lokoma yoko? kala-sala kala-sala-ke-bam weng aal dikimip namti, kaata taba kipni kaptum kusal dong dakaayin kukup tangbal kaali, dik-daa kulaalu daak aba disa ke-lokomu. Kemin, kanola weng aal dikimin dinim ke-lom, kiltipni kaptum kusal iyo aket balili-kalin kukup kaata-kup kukaayin-bamdipla yo, kalba-kup, Yesus ata almi daang bakaalin tunum iyo bakaya ko.
MAR 10:1 Kemin, Yesus ali bokon kaali, kambola wok Jodan kawu yakan yak malii ababa-kup, daak aba din Provins Judiya kaami anung kawu din abale, unang tunum yaapkan iyo asuk Yesus ami fanang tala-tala-kemiple, almi kanola unang tunum suunkup kukuyin-bam laaba ultap kaata kano kukuyin-balala ilip.
MAR 10:2 Kemin, Falosi malo ma iyo tal Yesus ami kasenolupla, weng mafak so ma bokola kala kala-lomdup dibii-din weng talalmin baan diim daalum o, kala-lomdip iyo tal dap-kuku-bamdipla dik-daalip ko: Kapyo, Moses ami lo numi kuyinsa kaali kanimin o, kalsu ni? Uyo boko-lomdu: Tunum iyo almi kalel uyo kambowon o, kala kaali, fotabokoma kaa tambal o, kalsu nema? akiple,
MAR 10:3 Yesus asiik bokoya-lomda: Moses ali dok kanolin lo kaata kipni kuyinsa ni? yakale,
MAR 10:4 isiik bokolip ko: Moses ayo tunum kaali, kambolala akal kalel kambo-wa-laamin kaami sukon kaali, dola-lomda ami kalel uyo kuwa-lom kawu fotabemin o, akipla
MAR 10:5 Yesus ayo bokoya-lomda: God ata tunum dabuulu unang kuluula kemin, kaami lo kutiisa kaali, kipni kawil-fakal so, kipso, ibi weng sanup dinim o, kalbip kala, kala-lomdala kemin, Moses ayo kanola kipni lo kaali dola kutiiyinsa.
MAR 10:6 Lale, kamosinim God ami mafek mafek alik talalu kutiisa kawu, imak so, ikis so, talalu-yim-tiila akam maakup ke-bom biisip.
MAR 10:7 Kanolin kemin, God ami Sukon Tem uyo kaami sang kaa boko-lomdu: Akam maakup kesip kabaku tunum ayo unang kuluulokoma kawu, tunum ayo almi awak-aalap iyo kamboyimba-kup, akal almi kalel umi diim kabaku fep-nala kawu, akam maakup ke-lokomip o kalale,
MAR 10:8 akam iyo angtiil maakup tap ke-lokomip o, kalsu. Kemin, asuk maso ma alep ke-lokomip disa; atin akam ili ti maakup ke-lokomip.
MAR 10:9 Kemin, God ami tunum so, unang so, kulii-tala-tala-kelaya, akam maakup kebip uyo, tunum ayo ma akam imi angtiil maakup kebip uyo, lolala, kela yang-bana tildang-bana kemin disa yo, kala Yesus ayo kanum bakaya ko.
MAR 10:10 Kemin, Yesus nikil iyo asuk tam am aba-lomdip almi daang bakaalin tunum iyo weng kaami sang kaali, dik-daaliple,
MAR 10:11 Yesus asiik bokoya-lom: Kanola tunum ayo ma almi kalel uyo kewa yang unang kusnum ma kuluula namti, God ami tiin diim kawu, kaami kanola kaali, sadiki-bamda almi kalel uyo ti daang ukuwa-bom ku-mafak-dakaba kala kalokomale,
MAR 10:12 unang ukol kanola ulmi imak ayo kela yang tunum kusnum ma dabuulu namti, God ami tiin diim kawu, kuumi kanolu kaali, sadiki-bamdula, ulmi imak ayo ti dap-mafak-dakabu kala kalokoma no, kala, Yesus almi daang bakaalin tunum iyo kanum bakaya ko.
MAR 10:13 Kemin, awil-fakal unang tunum malo ma iyo Yesus ata taba-lom sikil kulii yak numi man imi angtiil diim kawu tiiya dong dokoyala, tangbal-kup fusuulin o, kala-lomdipla, kulii-tilip. Lale, Yesus ami daang bakaalin tunum iyo awil-fakal iyo fotabamnup tabanik o, kala katiiyiple,
MAR 10:14 Yesus ayo talaalala, Iyo kanubip kala kalba-kup, aket atul kelule, daang bakaalin tunum imi bokoya-lomda: Unang tunum ili fanang daaliwa yi, God ali, nuli dong dokoyokoma kala kalalip tiltam God ami miit tem talebip iyo, man katip katip kala bilip ililtap kemin, ibi man kiili fotabemin dinim; kamboyip nami fanang tilin o.
MAR 10:15 Nami weng kala bokoyili kaami miit kaali, tifan bokoyokomi kemin, weng san iliwa! Man iyo katip katip bom-bilip kiita, awil-fakal iyo mafek mafek ma kuyum o, kalokomip kaali, man kiili maaklo yak awil-fakal imi sikil diim kaali, kuluulokomip dinim; kanolin ultap, unang tunum kawanta God ami miit tem kawu unum o, kalip kaali, kamboyiwa, God akal dong dokoyalala, God ami miit tem kawu tildang talokomip; kemin ale, unang tunum kawanta ilmi aket kaata-kup fukun-bam kukup mafak nuumum o, kalip kaali, ilmi san kemin, atin ti God ami miit tem kaali, tildang talokomip dinim o kala-lomda,
MAR 10:16 yak man katip katip iyo yim-tal miki-lomda, sikil umkaayin-bam bokoya-lom: God ayo kibi ti kukup tangbal-kup kukaayilak o, kala bokoya yakyak kema ko.
MAR 10:17 Kemin, Yesus nikil iyo daak aba yang liip kulu uniple, tunum ma abiltap tal Yesus ami miit tem kawu tal-ilom, kamok kamok imi weng umkaayin kaali, kanumin kemin, tilik duung fakela daak tiin-ilom dik-daala-lomda: God ami weng kukuyin tunum tambal kapyo, kabi nali weng ma kemin, dik-daap-tila, kapyo bokop-napla, nali ti utamon. Nali dok kano-somdila, tiltam suunkup ilin tunum ke-lokomi ni? kala dik-daalale,
MAR 10:18 Yesus asiik bokoya-lomda: Kabi kanamin o, kala bokop-na-lomdap: Kabi tunum tangbal o, nakap i? Tunum tangbal ayo ma bombe dinim; ti God maakup ata-kup tambal-kup tabin kemin, kabi kanimin o, kalalap: Kabi tunum tambal o, nakap yoko?
MAR 10:19 Kapkal kabak utamsap kemin, lo uyo boko-lomdu: Kabi tunum unang kii, anulap taan-yaamin disa; kalapni kalel kuu, kewa unang kusnum so, sidikimin disa; kabi yukut inin dinim; kabi disa ibaka-balap, soldiya iyo kaptum kusal kii sok dinayin disa; kabi ibaka-bam kaptum ami mafek mafek kaali, fakamin dinim; kabi kaltapni kawil-fakal imi weng uyo kuyang saak tiimin daa; ti imi weng kaata, weng san-kaa-bam ale, kukup tangbal kaata-kup kukaayin-bam keman o, kala lo uyo kanum bokosu no, kala kanum bokoyale,
MAR 10:20 tunum kasiik bokola-lomda: Kwin, nali sawaalak man katip sakap kaptoowu, yakyak kulii umbital tunum aalap dukum keli kaali, God ami weng kaa kutiiyinsa alik kiili, weng san kan-tabasi no, akale,
MAR 10:21 Yesus ayo tunum ami atam-ilom atin ti aket kola bokola-lomda: Kulaali kanun-umbap. Lale, kabi kukup maakup ma kaata-kup kanun-umbap disa; kemin, kabi dindap kaltapni mafek mafek kiili, kaptum kusal imi kuyilapla, ita moliwale, kaami moni kaali, kuluu-lom kulii-din unang tunum iiwaan imi kuyokomap kaata, din God ami abip kawu suunkup tangbal ilokomap. Kemin, kano-lomdapla, kabi talawa, naso tal-une-bam, God ami okok kem-tal-unemum o, akale,
MAR 10:22 tunum kaali, mafek mafek soyim kemin, Yesus ami weng bokoya kaali, weng san-ilomdala, aket fuku daalala yi, Atin suunkup ilin tunum kelon o, kalbi. Lale, nami mafek mafek kiili, yaapkan kemin, kuno keyokomi disa yo, kala-lomda aket uluum dap-teluya, Yesus ayo kambola una.
MAR 10:23 Kemin, Yesus ayo fal-siki-lomda almi daang bakaalin tunum imi bokoya-lomda: Kwin! yak mafek mafek soyal unang tunum kii, ti fiit-bamdip, (imi mafek mafek sikip fak-dakan-unsip iyo kulaalokomip kemin, malo ma kiita-kup God ami aket kola-lomdip,) tiltam God ami miit tem tam unokomip o yakale,
MAR 10:24 daang bakaalin tunum iyo Yesus ami weng kaali, weng san-ilom fanang alik uneyu kala, kalba-kup, Yesus ayo weng kaali, asuk bokoya-lomda: Man kipyo, unang tunum iyo tiltam God ami miit tem tiltam tulum o, kalbip kaali, fiitmin kayi!
MAR 10:25 Ale, olti dukum ma kamel uyo tam men sil ami tem kaa tam unon o kalu kaa, fiit-bi-somdula tam unokomu. Ultap kemin, yak tunum bung kayaak ali atin ti fiit-bi-somdala kawu, tam God ami miit tem tam unokoma kayi! kala bokoyilale,
MAR 10:26 nikil iyo atin fanang alik uneyule, Yesus ami bokola-lomdip: Kapni kanum boko-lom: Bung kayaakim ayo fiit-bi-somdala, tiltam God ami miit tem kaa tiltam talokoma no, kalap kaali, faneng namti, mafek mafek dinimal nuli dok kano-somdupla, tam God ami miit tem uyo tam unokomup i? Kaa fan taang-kala tam unolup daa yo, akiwale,
MAR 10:27 Yesus ayo ilmi tiin diim kulu tiin dik-yak diiya-lom bokoya ko: God ata ti mafek mafek alik kiili, kanolama. Lale, tunum alafin kela kaali, taang-kala-somdala tiltam God ami miit tem kaayo, tiltam talokoma dinim; kemin, God ata taba-lomda dong dokolokoma kawu, ayo tiltam God ami miit tem tiltam talokoma no yakale,
MAR 10:28 Pita asiik boko-lomda: Kapyo, weng san-ilawa! Kapni daang bakaalin tunum, nikil nuli nulmi abip so, nulmi mafek mafek so, kiili alik kela-lomdupla, kapni okok kemin kaata, ke-bam kapso tal-unebup o, kala kanum bokolale,
MAR 10:29 Yesus ayo bokola-lomda: Weng kalawaali tifan bokoyokomi kemin, dok nolin unang tunum kiita nami lak kaali duu-lomdip, nami weng tangbal kaali, kulii-din unang tunum iyo bakayon o kala-lomdip, imi am aye, fik aye, nakal aye, almi unang aye, awak-aalap aye, man aye, ima lang aye, kaali, kambola-lomdip tal nami okok kemin kaata, kutal-fukulip namti,
MAR 10:30 kamala tawaal diim kalawu bom-bilip kawu, nami okok kebip kaami kalan kaata, tunum kusnum ita fuut-kaayin-bam aye, ye-bam aye, ke-mokomip. Lale, kibi am kusnum aye, fakal-nakal aye, unang aye, awil-fakal aye, man aye, ima lang aye, almi-kup wan handret (100) kiita-kup kuluulokomip. Kemin, am ma daanala, tam abiil tikiin ilokomip kaali, kawu suunkup bom ilokomip.
MAR 10:31 Kemin, unang tunum yaapkan kamala kaami win soyal bom-bilip iyo kaptoop kaptoop kawu, isiik win dinim keliple, win dinim ke-laabip isiik am ma daanokoma kaali, win so ke-bom ilokomip o, kala Yesus ayo kanum bakaya ko.
MAR 10:32 Kemin, Yesus so, almi daang bakaalin tunum iso, nikil iyo din abip diil Jerusalam met unum o, kala un-bomdip, Yesus asiik dusiin daa umbabale, almi daang bakaalin tunum ita daang tem un-bomdip bokolip: Kwin! kaa din itamupla nuyo yelokomip kawe! kal-bomdip ilmi aket tem-kup fanang daa umba-biliple, tunum kusnum nikil imi daang tem tababip iyo suunip. Kemin, Yesus almi tunum talangkal ita-kup ulduu kulii yang kabangu almi am ma daanokomu kaali, tunum ita taba-lomdip kanuyokomip kaami sang kaata asuk bokoya-lomda:
MAR 10:33 Kipyo, Jerusalam kamet banum o, kala talabup kemin, din kawu bom-bulupla, nak-tunum ma taba-lomda, Dukum Ami Man Nayo, nim-bii din tunum awem o, kala-laabip pris imi kamok kamok so, lo utamsip tunum iso, imi diim daalale, yikal weng taken-bamdipla, tunum kaayo aalip taanak o, naka-lomdipla, nam-baalip yak Rom kasel imi sikil diim abamnila,
MAR 10:34 ita taba-lomdip, atafiimin weng mafak bakaap-nan-bamdip, mok kaali, nami angtiil diim kawu, tik-tiip-nam-bam, sok faklet ta kuluu ne-bilip bii taani, namaalip bombii am alep ke-lomdi, am asuumano diim kawu asuk tam tiinokomi no, kala Yesus ayo kanum bakaya ko.
MAR 10:35 Kemin, Sebedi ami man alap Jems so, Jon so, iyo tal Yesus ayo bokola-lomdip: Numi kukuyin kapyo, alep numi aket fukunin kaali, mafek mafek sang ma kaa bokop-tokomup kalawaali kalanolan o, kebup o, akiple,
MAR 10:36 asiik alap imi bokoya-lomda: Alap ibi nali kanamin kaata ma kanolan o, nakan-kaabip i? kala, kanum bokoyale,
MAR 10:37 alap isiik bokola-lomdip: Ilom kabi tiltam king ke-lokomap kawu, alap nuta keyapla, ma ata tal kaltapni tingtuplo kabangu tiina, ale ma ata tal kaltapni awaanlo kaldangu tiina ke-bam kabi dong dakaap-tin-bam ke-bulupla, nikil nuta unang tunum iyo tiin molum o, akiple,
MAR 10:38 Yesus asiik almi angtiil yol kuluulokoma kaami sang kaali, alep imi bokoya-lomda: Alap kipni dik-dakabip kaami miit kaali, ibi talalu bam-daalin dinim kebip kemin, kukup mafak ma kayak kayak ita taba nami kup-nokomip kaali, kipkal saak nuso kuno kuluu kanolamup o, kalbip ema? Ale, nami angtiil yol awak kuluu-lomdi taanokomi kaali, kipkal ti kaali kuluu um-tal daa-lomdip saak-namip o? kala kanum bokoyale,
MAR 10:39 alap isiik bokola-lomdip: Aa, alap nuli ti kanolamup o akiple, Yesus asiik bokoya-lomda: Fan kemin, kibi nami kukup mafak kaa kup-nip um-tal daa-lomdi taanokomi ultap kanolokomip.
MAR 10:40 Lale, kaa nami ok tabukla tunum ulela-lomdi kamokim ami abiin baan nami mepso bombuu uyo yim-tiilokomi dinim; kemin, kaali God almi mafek mafek kemin, akal tunum kii ulelsa. Kemin, ita yim-tam tiilala, ita taba dong dakaap-nim-bilipla, unang tunum iyo tiin molokomup o, kala kanum bokoya.
MAR 10:41 Kemin, Yesus ami okok kemin tunum nakalkal iyo Jems so, Jon so, alap imi weng kaa bokolip kaami sang kaata weng san-ilomdip, nikil iyo alap imi aket atul kuyipla, aket atul dap-tiiyule,
MAR 10:42 Yesus ayo nikil iyo naan-daaya alik tal atamipla ayo bokoya-lomda: Kipyo, kipkal atamsip kemin, tawaal diim kaami God ami lak duulin dinim unang tunum imi kamok kamok ita, unang tunum iyo kalaang weng kaali, kukaayin-bam ale, ilmi aket fukunin weng kaata-kup, kukup mafak ayo kukaayim-bam ken-tabasip u, kalsip.
MAR 10:43 Lale, nami lak duulin ipyo, kiimi kukup kaa kanun-umbip kaali, kipsiik dik-daa kuluu-lom kanumin dinim; kipni tunum iyo dok ata nita nak-tunum kusal imi tiin diim kaali, tiltam win tabin kelon o, kala namti, ali almi win kaali, kufumin dinim; balili-kup kala-lom kaptum kusal imi minlo tem un-bom ilokoma kaata, tangbal; kemin ale,
MAR 10:44 kipni tunum ayo kanta nata nata ke tiltam naktum kusal imi kamokim kelila yo, kala namti, ali alik kipni dong dakaayin tunum ke-lokoma kaata, tangbal o.
MAR 10:45 Kemin, Dukum Ami Man Nali, tawaal diim kalawaali disa kawu tal tiin-bom-bilila, tunum ita nami okok kamaap-nin o, kalalila talsii disa; nali taldila dukum-kup okok-bam unang tunum iyo dong dakaayon o, kalalila talsii. Kaali, nali tal-ilomdila kuno, keyilila waasi ita nelip taanokomi kawu, unang tunum yaapkan imi iliim kaali, boyilile, kiiyo tiltam God ami man kelip suunkup ilin o, kalalila talsii. Kemin, kibi nami unang tunum dong dakaayinbi ultap ke-bamdipla yo, kala Yesus ayo kanum bakaya ko.
MAR 10:46 Kemin, Yesus nikil iyo dak-daa dabii-din abip Jeriko din ababip-kup, Yesus sole, almi daang bakaalin tunum so, unang tunum yaapkan iso, iyo Jeriko kaali, kambola unum o, kemiple, Timeas ami man Batimeus ayo tiin bikensu kemin, mafek mafek uyo naan-bam ken-umba ayo liip balang diim kabaaku tiinba.
MAR 10:47 Kemin, weng ma weng sanala yi, Abip Nasaret kayaak Yesus ata talaba no kalbip kala, kalba-kup, naan-bamda boko-lom: King Devit ami man loop Yesus kapyo, kabi nali olen-daap-na-lom dong dokop-nan o! ke-bam naan-balala,
MAR 10:48 tunum yaapkan iyo, Dulumnan o, kal-bom fuut-kaanbip. Lale, ali ti kano dukum-kup ti naan-bam bokola: King Devit ami man loop kamokim kapyo, kabi olen-daap-na-lom dong dokop-nan o, ke-bamda naanin-kup ke-balale,
MAR 10:49 Yesus ayo kawu duluuma tola-lomda, kayak kayak imi bokoya ko: Bokolipla talak o! yakale, tiin bikilin ayo naan-daala bokola-lomdip: Balili-kalbap-kup tola talan o, akiple,
MAR 10:50 ilim sakbaalim dukum ma kuluu mikiba uyo dulduu kukulu tii abiltap-kup tola-lomda, Yesus ami fanang din atamale,
MAR 10:51 Yesus ayo dik-daala-lomda: Kabi kanamin ma nop-nak o, kal-bomdap naap-nanbap i? kala kanum bokolale, tunum tiin bikensu asiik bokola-lomda: God ami weng kukuyin tunum kapyo, nami tiin ayo baap-nalapla, mafek mafek kiili, itafiimon o, kal-bomdi naap-timbi no, akale,
MAR 10:52 Yesus asiik boko-lomda: Nali utamila, Kabi, fan nam-talalulama no! nakap kala, kalalila kemin, tam-talaluli asuk tangbalnap kemin tiin baa mafek mafek iyo talalu itaman o, aka-laam-salale, abiltap-siik ami tiin uyo tangbal ma kewalule, Yesus ami daang tem yakaba, nikil liip-kup unip ko.
MAR 11:1 Kemin, Yesus nikil iyo tal abip diil Jerusalam kaami mepso tal Oliv Tikiin kaami abip alep ma Betfage so, Betani so, kiimi mepso kawu tal-ilomdip, Yesus ayo almi daang bakaalin tunum alep ma isiik yim-baali unipla yo, yaka-lom,
MAR 11:2 alep imi bokoya-lomda: Alep kibi yakaba din abip atafiibup kaali, tam-ilomdip dongki man kasaa ma sok kuk-diilip bombe kalip namti kaalile, siin kaa tunum so dap-tama tal-unemakin dinim; disa kama man bombe kemin, alep yak sok baa dibiilip tal nami bi kala talokomip. Kemin ale,
MAR 11:3 kanumipla, tunum ayo ma alep kipni dik-daaya-lomda: Kanimin o kala-lomdip kaa kanubip i? yaka namti, kipkal bokola-lomdip: Yi, numi Kamokim ayo ok so kemin, din kulii-tilin o, yakala tulup kayi! kalale, nuli kiin dibii-din daalupla, Kamokim ayo asuk abiltap yim-baala din dibii-talokomup o, kala bokonbip-kup dibii-tilin o kala kanum bokoyilale, kulaa,
MAR 11:4 alep iyo din uliwa, Dongki man kasaa ayo liip balang diim amitom kawu bukulip bombe kala, kalbip-kup din sok baa kemiple,
MAR 11:5 tunum kawu tolbip iyo alep imi dak-daaya-lomdip: Alep kibi kanamin o, kala-lomdipla, dongki kasaa kaali sok baabip i? kala kanum bokoyiple,
MAR 11:6 alep yikal Yesus almi weng bokoya tilip kaata kanola bokoyipla, alep kamboyiple,
MAR 11:7 alep iyo dongki man kasaa kaayo, dibii-tal Yesus ami kutal-daaliple, ilmi ilim batbat ta, kutam dongki ami daang kun diim kabaaku tabeliwa, Yesus ayo tam tiinale,
MAR 11:8 unang tunum yaapkan imi fanang dakamin kaali, king ami tala-bala fiyaap duumin kukup kaali, kanumin kemin, Yesus ami liip kawu talaba kaali, nuli liip kalawaali atin tangbal-kup dot kaamupla tal-banak o, kala-lomdipla, ilmi ilim batbat malo ma kiili, dalela-lomdip kulaak liip kawu tii-balale, malo ma itale, yang aba langabip as tang kiiyo, as kon bapliim so, fakabi kulii-tildaak Yesus ami liip tal-unokoma kaayo, tabii-bala kem-yakyak-ke-bilipla, dongki kaali, ilim so, as bapliim so, kiimi tip diim kaptoop liip unak.
MAR 11:9 Kanum una-balala, unang tunum yaapkan iyo biki-kutii dusiin daalale, unang tunum yaapkan malo ma ita daang tem lo kaptoowu kelip Yesus ata iipyak tem kawu una-bala-ke-bamdiwa, fiyaap duumin dukum ke-bam ale, dukum-kup naan-bamdip: God ami win kaali, Kufolum o, kal-bomdip: Yesus kalawaali God Dukum ami win diim talaba no; God ata kukup tangbal kaata-kup ami kukaan-balala yo, kal-bomdip,
MAR 11:10 kalawaali numi awaalik King Devit ami unang tunum tiin mo-bisa altap ke-lokoma kemin, God ata kukup tangbal kaata-kup kukaan-balala yo, kala-lomdip, God ami win sakbaalim dukum kaali, kutam asal tela kufon-bam fiyaap duumum o, kemip.
MAR 11:11 Kemin, Yesus nikil iyo din Jerusalam aba, Yesus ayo tam lotu am diilim kaami mafek mafek alik kiiyo, itafiin-tal-une-bala, atan tem unon o, kem-sulule, kelala almi daang bakaalin tunum talangkal iso, nikil maakup asuk Betani abip unip ko.
MAR 11:12 Kemin, Yesus nikil iyo din Betani abip sinbip-kup, kambola yakyak un-bomdipla, Yesus ayo ol-tinap kelula,
MAR 11:13 tiyang daalala yi, Fik miit ma yang samaan so kawu tola-lomdu as kon yaapkan bombe kala kalba-kup, daak aba yang fik uyo ma duk-duu inalila yo kala-lomda, yang ulala, Fik kaami abuumin am kaali, kama kemin fik kalawaali kon-kup bombe no, kala-lom,
MAR 11:14 as kuumi bokowa-lomda: As kupyo, as lap ma abuulapla, tunum iyo ma kupni lap uyo maso ma duk-duu inam-nokomip dinim o, kal-bom bakamale, almi daang bakaalin tunum iyo weng sanip ko.
MAR 11:15 Kemin, Yesus nikil iyo yakyak umbital Jerusalam tal-ilomdip, Yesus ayo tal aba tam lotu am diilim tam aba-lom, tunum iyo mafek mafek God ami kukaalin uyo kutal aba tam lotu am tiilip uyo kukaayim-biliple, saanbip kala-lom tam-ilomda, tunum alik mafek mafek kulii-talaba tam tiilip so, tunum kusnum tal saanbip iso, iyo alik fotabamna sak funbi, tuumon kola-una-tala-kemin tunum imi tebol ayo dak-siki-lom kabaak mole, awon abim God ami kukaalin umi kulii-tal tiilip saanin tunum imi abiin baan uyo dikela kulaaya yang aba kebi kutiiya-lom
MAR 11:16 bokoya-lomda: Kibi mafek mafek kiili, foko-dibii-tal God ami lotu am diildiil kaami daam tem amitom liip kaali, talaba yang malii kaami amitom uyo yang aba tam banemin dinim o, kala-lomda iyo fakel-yila.
MAR 11:17 Kemin, Yesus ayo unang tunum lotu am diilim kaptamu bom-bilip imi kukuyin-bam bokoya-lomda: Sawaayak kawu God ami weng Sukon Tem ma dola kutiisip kaali, boko-lomdu: Nami am kaltam-ali tunum miit alik imi beten kamaap-nin kaami am o, ke-mokomip o, kalsu. Kemin, kibi God ami weng kaali kaal kesip. Lale, ibi ami weng kuuli, kuyang saak tela-lom God ami am uyo ku-mafak-dakan-tabasip o. Am kaltam-ali ipni wan saan-bam kaptum kusal imi moni yukut inin am kelu kewinsip o, kala kanum bokoya.
MAR 11:18 Kemin, awem tunum o, kal-bom Pris o, yaka-laabip imi kamok kamok so, lo utamsip tunum iso, iyo Yesus ami weng kaa kanum bokola kaami sang uyo weng san-ilomdip, (fanang daaliwa yi, Unang tunum alik iyo ami weng bakayin-bam kukuyinba kaali, weng san-ilom fanan-taba fiyaap duubip kala kala-lomdip, Yesus ayo tili-dela-bomdip), kala nolu kaali, dok no-lom aalup taanak i? kem-una-tala-kemip.
MAR 11:19 Kemin, bombii am tiinule, Yesus nikil iyo Jerusalam kaayo, kela unip o.
MAR 11:20 Sinbip-kup kutim kawu, Yesus nikil iyo asuk tal ulipla yi, As fik namti kon so, timtim so, kiili alik datbip kala kalbip-kup,
MAR 11:21 Pita ata kaami aket kaa fanang daa-lomda bokola-lomda: Numi kukuyin kapyo, as fik miit kuumi katii-wunbi kambowa-unbap kaali, yak kaa datbu kaataman! akale,
MAR 11:22 Yesus asiik nikil imi bokoya-lomda: Kibi utamipla, God ayo dik-daalupla, kaali ti weng san kanolama no, kal-bom dik-dakaan-bam bom-bilipla yo, kala-somla kemin,
MAR 11:23 nami weng kalawuuli lukuuya-yaamin disa; ti kuyak aket tem daalalip kayi! Kanola dok nolin tunum ata God ami bokola-lomda: God kapyo, yak amdu kaali, baldaa dabaalap yak yol wok kumun tem unak o, kala-lomda ami aket tem kaali, aket alep fukunin dinim kela atamala yi, Nami kaa dik-daali kaali, tifaneng tabokoma no kala namti, kaami dik-daala kaa, God ayo taba-lomda kanolokoma.
MAR 11:24 Kemin, asuk kaami sang kaali, maso ma bokoyon o kali kemin, kabi dok nolin kukup kaami aket fuku-daka-bamdap, Nali God ayo dik-daalila ayo ti kanop-nama no kala kala-lomdap God ayo beten kamalap namti, kapni kaa dik-dakabap kaali ti, faneng kanop-tokoma.
MAR 11:25 Kemin, kanola kabi tiltam tola-lomdap, God ami beten kamaan-bamdaple, kaptum taba-lom kapni ban kep-tinba kaami aket kaali, fanang daalap namti, kaami ban kep-tinba kaali, kambolap dinim keluk o, kala-somla kemin, kanolap namti, kapni Kaalap abiil tikiin kayaak ayo kapni ban kemin sang dik-daala-lom: Lukuup-ta kep-nan o, kalokomap kaali, kanola kambop-ta dinim ke-lokomu. Lale,
MAR 11:26 [faneng kabi kaami ban kep-timba kaali, lukuup-ta kelin dinim kelap namti, kapni Kaalap abiil tikiin kayaak akal kanola kapni ban kemin kaali, lokola kep-tokoma dinim] o, kal-bom Yesus ayo Pita ami kanum bakaala ko.
MAR 11:27 Kemin, Yesus nikil iyo asuk umbital Jerusalam tal aba-lomdip Yesus ayo tam lotu am diilim kaami daam tem kaptamu tal-banemale, tunum awem o, kala-laabip pris imi kamok kamok sole, lo utamsip tunum so, Juda kayaak imi kamok kamok iso, iyo tal
MAR 11:28 dik-daala-lomdip: Kapyo! Kabi kawanami win diim kaata, kufo-bamdap yak kanolin kukup kala kanun-umbap i? Kabi kawanta tam-baala tal-ilomdap, kanolin kukup kaali, kanum-solap yoko? akiple,
MAR 11:29 Yesus asiik bokoya-lomda: Na, nasiik kipni weng ma dik-daayokomi kemin kibi nami weng kaali, maan tiip-nip namti, kaa nakal kanola kipni weng kaali, maan tiiyokomi.
MAR 11:30 Oksam wakayin tunum Jon Baptis ayo kanami win diim kawu unang tunum iyo oksam wakayinsa ni? God ami win diim kawu kanum-soma ne? tawaal diim kaldaak-ami tunum imi win diim kawu kanumsa ni? Nami weng kala dik-daayili kaata, maan tiip-nipla yo kala, dik-daayale,
MAR 11:31 kamok kamok iyo weng aal diki-bam bokola una-tala-ke-bamdip bokolip: Nuli kanamin o, kalokomup i? Nuyo boko-lomdup: God ami win diim kawu kanumsa no kalokomup kaali, ali nuli bokoya-lomda: Kibi fanang daalipla, God ami win diim kawu kanumsa no, kalip namti, kanamin o, kala kibi Jon kaali, faneng God ami weng kaata bakayinsa no kemsip dinim o, yokokoma; kemin ale,
MAR 11:32 nuyo bokola-lomdupla: Tawaal diim kaami tunum ami win diim kawu kanumsa no, kalokomup elile? daa ye? Kaa kanolokomup daa yo, kalip. Kanum bakabip kaami miit kaali, dok kata naa kalolip: Kamok kamok ili unang tunum yaapkan imi itamipla, Jon kaali ti faneng God ami profet o, kala weng ku-fatap-daa bakayin tunum o, kala-lom bakabip o, kalipla, nuli boko-lomdup: Kaali God ami profet daa yo, kalup namti, unang tunum ili aket atul numi kuya-lomdip yelamip o, kala-lom suun-daa-lomdipla
MAR 11:33 kemin, Yesus ami weng kaali, ibokola-lomdip: Kaa kanta Jon kaa bokolaya, ali taba-lom unang tunum kii oksam ukayinsa no kalalup utabup dinim o, akiwale, Yesus asiik bokoya-lomda: Nakal ti kanolin kawanmi win diim kawu, kanolin kukup kaa kanun-umbi uyo bokoyokomi disa yo, kala Yesus ayo kamok kamok imi kanum bakaya ko.
MAR 12:1 Kemin, Yesus ayo weng faldak-tiimin weng iip maakup maakup ayo bakayin-bam ale, tunum ma wain langabip ma talalu kutii-lomda, tam uti foko kela wain san ayo dikiba-kup; tuum tem kala-lomdipla, ok liip unemin dotu sok lap iyo fokolip daak unule, yaan ta talela kutiilipla, ok bana-unemin ok bon uyo dotu kutii kela, langabip kaptam tiin mo-bom ilin tunum ami am ayo bitam asal kaptamu de kamolale, tunum wain lang tiin molokomip iyo, ulela bokoyila ko: Wain lap abu tii-mokoma kaali, dakabi kutii kela tak-nuubi ok ayo laabi kutiiliwa, kaptum kusal ita tal molipla, kipta sisol ayo kuluu-lom anung ma iltipni kuluubip-kup, nakal anung ma kuluu kulaap-nip din unemak o, kala kamboya bilin samaan kawu una.
MAR 12:2 Kawu bom-balala, wain lap abuumin umi am uyo daan tiltam tabamnula kawu, tiin-saanin tunum iyo wain lap dakamsi kutii kutii kela ok ayo tuk-nuu-bam ok laabi kutiilipla, aptum kusal imi kuyip ita tal moliwa, wain lang kayaak ayo almi okok kemin tunum ayo ma dabaala tal wain lang tiin molin imi bokoya-lomda: Nimi kamokim ami wain lap kaami ok kaami sisol anung ata kup-nipla, nulmi kamokim kulela unon o, yinba.
MAR 12:3 Lale, ili biwaka-bi-lomdip, disa kulu dabaalip alami kamokim ami be una.
MAR 12:4 Kemin, asuk tal atama yi, Kamokim ayo asuk okok kemin tunum kusnum ma ami weng ayo bokola-lom dabaala din wain lang tiin molin tunum imi diim unale, ami kamokim ami weng kola kulii-tilba kaayo, bokoya. Katale, iyo dabom bakela-lomdip, kukup mafak kaayo, kukaan-bi-lom dabaalip unale,
MAR 12:5 kamokim ayo asuk ma dabaala din itamale, atin aalip saakna. Kemin, kanu-bam tunum yaapkan kiili, fokola din itamum e, malo ma ye-bilip tale-bam ale, malo ma kiita, yelip atin saaka-laa-bilip kelip.
MAR 12:6 Kemin, kamokim almi man aket-iip maakup alafin kelale, kamokim ayo aket fukunbi talaala yi, Awu, nali nalmi man aket-kup kola-laabi kulaata, dabaali din una namti, ami weng kaali, kuyang saak telalip disa yo, kala kala-lomdaya almi man mafiing diim kawu, dabaala din wain lang tiin molin tunum imi fanang una.
MAR 12:7 Lale, tiin molin tunum kiiyo, atamiwale, ili weng boko una-tala-ke-bam bokolip: Kulaali ti wain langabip kayaakim almi man kemin, bom bii-lom almi aalap ami taanokoma kawu, alalta aalap ami mafek mafek alik kiili tiin mo-lom almi alik ke-lokoma kemin, baan aalupla taanala, wain langabip kaltam ayo nulmi alik keyuk o, kala-lomdip,
MAR 12:8 yak man ayo dap-tal fuku-lom aalipla taanale, tunum man kaayo, sisii dilili dibii tam uti yal foko dabaalip tamdaak saaklo kawu abamna no, kala-lom Yesus ayo faldak-tiimin weng kaayo, kanum bakaya ko.
MAR 12:9 Kemin, Yesus ayo weng ma dik-daaya-lomda: Kipyo, wain langabip kayaak ami asuk talokoma kaa, ali wain langabip tiin molin kasel kii, kanimin ma noyokoma ni? Ali taldaya, tiin molin tunum kiili, atin ti anula taaniple, asuk tunum kusnum ma ulela-lomda, wain langabip kaayo, kuyak kiimi sikil diim tiiyala, ita taltam wain langabip kaayo, tiin molokomip o, kala bakayin-bam
MAR 12:10 asuk bokoya-lomda: Tiin molin tunum ita taba-lomdip wain langabip kayak ami man aalip taanba kiili, sawaayak kaptoop ami tunum kusnum imi kukup kanu-bisip iltap te! kala God ami Sukon Tem kaali, kanum boko-lomdu: Ok fukulin tunum ili am kaa dina-bam tiyak daaliwa, Am kun ma kaali, mafak o, kala-lomdip faldang mo binalip yak balang diim kabang abamna. Katale, kamokim ali am kun kaa atam-ilomda: Kwin! kaali ti tambal kemin am dubim ami duwokop kelak o, kala-lomda am kun kaali, asuk dibii tildak dap-molaya ayo tangbal mokso ke tolnu. Kemin, kamokim ami kanola kulaa God alalta kemin, nuli utamuwa yi, Ami kanola kaa fan tangbal kela kayi! kala-sulup o, kalsu. Kemin, ipkal kuuli, tik-tii-bam atam-laabip. Katale, kibi kanimin o kalalipla kuumi miit kaayo, dotu atamin disa kesip i? kala Yesus ayo kamok kamok imi kanum bakayale, kulaa
MAR 12:12 yakal utamiwa yi, Ee, Yesus ayo nulmi sang kulaata, faldak numi diim tii bakayinba kala, kala-lomdip, Kulaa yak dafukulum o, kalip. Katale, unang tunum Yesus ami weng, weng san-kaabip imi itam-suun-daa-lomdipla kemin, ayo sok dedulin disa, kela unip ko.
MAR 12:13 Kemin, Falosi tunum iip maakup maakup so, Herot ami tunum iip maakup maakup iso, kiili fokolip din Yesus ami fanang din-ilomdip, kasen-foko-lom weng ma dik-daalipla, Ayo weng mafak aye ma bokola kala, kalalipla, tal bokoyipla, nuyo din dafuku dibii-din weng bakamin baan diim daalum o, kala-lomdip yim-baalip unip.
MAR 12:14 Kemin, Falosi nikil kiiyo, tal Yesus ami bokola-lomdip: Kukuyin tunum kapyo! Nuli titamsup kemin, kabi win soyal tunum iso, win dinim tunum iso kiili, kukup tambal kaali, maakup kukaayim-bom ale, kabi tunum ma ami atul kaali, ma suun-daalamap disa le; kabi suunkup tituun-kup tabin weng kaata-kup bakayim-bam ale, God ami weng kaata-kup kanumin o, kalba kaata kuluu-lomdapla, fan, tituun-kup tabin weng kaata-kup unang tunum kiiyo, kukuyim-bam ken-umbap. Lale, mafek mafek ma kaami sang kaata dik-daap-tum o kalup. Kemin, (Rom kasel imi lo ma kaa boko-lomdu: Ipni takis moni kaali, nulmi King Sisa almi gavman ami kukaalin o, kalsu. Kemin ale, Juda kasel numi lo kaata boko-lomdu: Ipni moni kaali, God ami kulaalin o, kalsu. Kemin,) numi moni kaali, Sisa ami kukaalum e? God ami kukaalum e?
MAR 12:15 Sisa ami kukaalokomup elile, kela God ami kukaalum e? kemin, kapni aket fukunbap kaata, bokoyapla kawu, nuli utamum o, akiple, Yesus ayo imi aket mafak fukunbip kaali, akal kaal kela yi, Ali weng mafak ma bokoya kala kalum o kala-lomdip kanubip kala, ayo bokoya ko: Kibi kanimin o kala nali kasen-faka-bam nam-kukubip i? Tuumon maakup ma kulii-tilipla, nali atamon o, yakale,
MAR 12:16 fan, tuumon maakup ma kulii-din daalipla kawu, imi dik-daaya-lomda: Yak tuumon diim kabak-ali sinik so, win so, kala bom-bilip kii, kawanmi sinik sole, win so, kiita bom-bilip i? yakale, iyo bokolip: Sisa ami sinik so, win so, kiita no, akipla,
MAR 12:17 Yesus asiik bokoya-lomda: Uyo kanolin kemin, tuumon kalawaali Rom kasel imi King Sisa ami tuumon kemin, Rom kasel imi gavman almi kukaan-bam ale, God ami mafek mafek kiita, kuno God ami kukaan-bam kemin o, yakale, isiik weng san-ilomdip Yesus ami weng kaali, akal alik ma bokola no, kala-lomdip, aket fanang alik tabaneyu ko.
MAR 12:18 Juda kasel imi kamok kamok malo ma kiili, Sadusi yo, ken-umbip iyo boko-lomdip: Unang tunum taansip kiili, asuk tam tiinokomip disa yo, ken-umbip. Kemin, Sadusi malo ma iyo (din Yesus ami dik-dakamin kaa fiitmin dukum ma dik-daaluwa, ami miit kaali, talalu daka-daa bokoyin disa kela namti, unang tunum iyo aban-delik i! kalalip) tal Yesus ami bokola-lomdip:
MAR 12:19 Kukuyin tunum kapyo! Nuli weng ma dik-daalum o, kalup. Kemin ale, sawaayak kawu, Moses ata God ami Lo ayo numi kuyinsa umi anung uyo boko-lomdu: Tunum ali tunum man ma foko tiilin dinim ke ilomda saaka-lom kalel kutiila namti, niing alta asuk fik ami kaluun uta kuluula akam imi tunum man kuulokomip kaali, ali boko-lomda: Kabi nami abaap ami man kayi! aka-lomda, kamasi fik taanse ami bung mafek mafek uyo man kuula ami kukaalak o, kalsu.
MAR 12:20 Kemin, weng san-bom ilapya! Siin kaali, tunum ma ami man tunum nikil kiili fetkal kemin, nikil alik taltam fusuulipla, fik diil asiik unang ma kuluu bii, man ma kuulin disa ke, taanale,
MAR 12:21 almi tamon asiik asuk fik ami kalel kaluun kuuyo, kuluula. Kata, akal man ma kuulin disa ke-lom taanale, niing iip akal asuk ti kuluuta kuluula,
MAR 12:22 nikil alik kanumin-kup ke-bi-lomdip man aye ma kuulin disa ke-lomdip taanipla, atin mafiing mafiing kulaata unang ukol kano taan kesu no.
MAR 12:23 Kemin, tunum nikil fetkal alik kiili, unang maakup kuuta-kup kuluu biile, taan-taan-kesip. Kemin, bom-bi-lom tunum taansip imi tam tiin kawang ke-lokomip kaali, unang kuuta, kawanmi kalel ke-lokomu ni? Kemin, kapni aket fukunbap kaata, bokoyap, weng selum o, akiwale,
MAR 12:24 Yesus asiik imi weng maan tiiya bokoya-lomda: Ibi God ami Sukon Tem Weng kaali, talalu ma kaal kelin disa kesip kemin, God kaali, titil soyim o, kalin dinim kesip. Kemin, ibi ti aket mafak-kup fukun-unbip o.
MAR 12:25 Weng san bom iliwa! Ilom am ma daanokomu kaali, unang tunum taansip imi asuk tam tiin tam God ami abip suunkup ilokomip uyo, unang dan kaa-bala, tunum dan kaa-bala, ke-mokomip disa; kiili, tiltam akal alik ke-lomdip abiil tikiin kayaak ensel iltap ke-lokomip te!
MAR 12:26 Kemin, ipni weng kaa boko-lomdip: Unang tunum taansip kiiyo, taan-ilom atin maaklo kesip o, kala-laabip. Yale, bii God ata asuk yim-folala tam tiin baalokomip o, kala-laabip kaami sang kaayo, bokoyan o, akipla, Moses ami buk tem weng kaayo, boko-lomdu: Moses ayo as katip ma tolsa kaami diim kabaku wing kaali, kiin-tabamnala ayo atamala, God ayo Moses ami weng bokola-lomda: Nali Abraham so, almi man Aisak so, ilmi man loop Jekop so, alimal ilmi God namti kala bombi no, ansa no, kalsu. Kemin, ibi Sukon Tem Weng kuuli, tik-tiin-unbip lale, talalu ma kaal kesip disa.
MAR 12:27 Kemin, tunum taan-ilom din God aso suunkup laabip isole, tunum tiin kawong bom-bilip iso, ita tiin mosa. (Kemin, altap, God ami weng Moses ami bokonsa kaami miit kuuli dok kata naa kalolip: Kemin, Abraham alimal kiili, sawaayak kawu taansip. Lale, God ami tiin diim kaali, ili bom-bilip o, kalalala, Nali alimal imi God ti kalabi no, kala bokonsa.) Kemin, ibi boko-lomdip: Unang tunum taansip kiili, atin disa kesip. Kemin, asuk iyo taltam tiinokomip disa yo, kala-laabip kaali, fan daa yo, kala, Yesus ayo Sadusi imi kanum bakaya ko.
MAR 12:28 Kemin, lo utam-laamin tunum ma tal tola weng san-balaya, weng takenbip e kala, utamala yi, Yesus ayo kiimi weng kaali, maan tela weng tambal kaata-kup bakaba no kalalaya, akal Yesus ami dik-daala-lomda: God ami weng bokoyinsa kaayo, dok kanolin kaata diildiil i? akale, Yesus asiik bokola-lom:
MAR 12:29 God ami weng diildiil kaali ti Moses ami bokola-lomda: Israel unang tunum ibi talalu weng san iliwa! Dukum kaali, numi God kemin, maakup kulaata-kup numi Kamokim kayu!
MAR 12:30 Kabi ti ami aket kaali, atuk-atuk-ke-laamin daa yo. Kapni aket aa, fanang aa, tiin aa, titil aa, kiili, alik kulaalap yak God Dukum ami diim abamnip ami aket-kup kolan o, kalsa kaata, diildiil o.
MAR 12:31 Aa, weng fatap ma kaa boko-lomda: Kabi kaltapni angtiil aket duu-lom tiin mo-laabap tap ke, kaptum kusal so, kayak kayak so, imi aket kuyale, tiin saanin o, kalsa. Kemin, weng kalu kusnum ma uta taba-lomdu weng alep kiili, yim-baak molokomu disa yo, kalale,
MAR 12:32 lo utamsa tunum asiik Yesus ami bokola-lomda: Kukuyin tunum kapyo! Kaali faneng te. God alaltap kaayo, ma bombe disa; kemin, maakup ata-kup numi kamokim kemin, kaali faneng tituun weng kaata bakayinbap.
MAR 12:33 Kemin, kanola tunum ayo anung-anung-kemin daa ke-bam, almi aket aa, fanang aa, tiin aa, titil aa, kiiyo alik kulaala yak God ami diim abamnipla, atin dukum ami aket-kup kola-bomdala, almi angtiil kaami aket uyo tambal-kup tiin mo-laaba; kanolin kaata kaptum kusal kayak kayak imi aket kuya-laabap namti, tunum kaami kanuba kukup kaata, atin ti ata ata ke-lom, taloop aye, ima aa kiili fuulip kiin-bala God ami kukaalin kaali, kabaak banokomu no, kalale,
MAR 12:34 Yesus ayo atamaya, Tunum kaali, aket tambal fukun-ilomda kanum bakaba kala, ayo bokola-lomda: Kabi mepso taltam God ami miit tem talapla, God akal kabi tiin molon o, kalba no, akale, kamok kamok ili suun-daa-lomdip ili maso ma bakamamip dinim kela unip ko.
MAR 12:35 Kemin, Yesus ali lotu am diilim kaptamu bomdala, unang tunum kiiyo, weng bakayim-bam kukuyim-bamdala, weng ma kaayo, bokoya-lomda: Kanimin o kala lo utamsip tunum ili boko-lomdip: God ami uldaa-dabuusa tunum Kraist o kebip kaali, King Devit ami man loop ayo taltam tabasa kaptoop ami tunum o, kala-laabip i?
MAR 12:36 Kemin, sawaayak kaali, God ami Sinik Tambal kaata, almi aket fukunin kaayo, King Devit ami kolala, akal boko-lomda: God Dukum ata nami Kamokim ayo bokola-lomda: Kapyo! Tal aba yang nalmi ting tuuplo kamokim ami tiin-yaamin baan kabaaku tiin-balapla, bii-lom nata nata kelila kawu, kapni waasi iyo dimiili kabaak banip kamboyi kala kalalawa kawu, kii kapta tiin molokomap o, kala God ayo kanum bokonsa no, kala Devit ayo kanum bokosa.
MAR 12:37 Kemin, God ami uldaa-dabuula tiltam Kamokim kesa kaa, kawanami man i? Kanola Devit ayo fuku-daala yi, Am ma daanokomu kaa, ilom kaptoowu nalmi man loop ata ma tiltam tabokoma kala kalala kaami aket kaata-kup fanang daa-lom bokosa dinam, kabak boko-lom: Kaa nami Kamokim o, kaloma disa yo. Devit ali kalok nolin aket kaaso, fanang-daa ke boko-lomda: Kaa nami Kamokim o, kalsa ni? kala Yesus ayo kanum bokoya ko. Kemin, unang tunum yaapkan tal tiinip iyo fiyaap duu-bamdip Yesus ami weng uyo weng san-kaamip.
MAR 12:38 Kemin, Yesus ayo kukuyin-bam ale, weng ma bokola ko: Ibi mep lo utamsip tunum iyo talalu itafii-bamdiwa yo! Imi aket fukubip kaalile, ti ilim batbat kaata-kup miki-bi-lomdipla abip kawu tal-une-buluwa, unang tunum iyo numi itafiimik o! kala-lomdip tal-une-bam ale, iyo din maket saanin baan diim unokomip kaali, unang tunum iyo tal bakayin-bamdip: Kamokim, kaa balap o? Kukuyin tunum kaa balap o? yakan-kaamin o, kalaliwa, unang tunum imi tiin diim kawu tal-une-bam ale,
MAR 12:39 iyo din lotu am aye, ima inin am aye kawu, din unokomip kaa, ti abiin tambal-kup kuluu tiinupla, tunum unang iyo itafii-bamdip numi win ayo kufuyik o, kal-bom kanun-umbip.
MAR 12:40 Lale, lo utamsip tunum iyo unang kaluun imi kasen-fokoya-lomdip imi sin-laamin am ayo bak-daayiple, iyo am dinim, mafek mafek dinim ke-bam kanun-umbip o. Kanolin kukup mafak kaata kanubip. Lale, ili unang tunum imi tiin diim kawu, God ami beten kamaalup kawo kala, bakan kaptoop kaptoop-ke-bulupla, unang tunum iyo itam-somdipla, numi tong kaata-kup bakayik o, kal-bomdipla, beten batbat-kup ken-umbip o. Kanola, ibi imi talalu itafii-bamdiwa kayi! Kukup mafak awak sakbaalim dukum kaali ken-umbip kemin, God ali angtiil yol awak sakbaalim dukum kaata, kuyokoma te! kala, Yesus ayo lo utamsip tunum imi sang kaata, unang tunum imi kanum bakaya ko.
MAR 12:41 Yesus ali lotu am diilim kaptamu God ami moni kulii-tal abuumin kaami ket mepso kulu tiin-bomda, unang tunum imi kukup kaata, itafiimala, moni ayo kulii-tal ket abuumipla, mafek mafek soyal ili ti moni yaapkan-kup kulii-tal ket abuu-bilipla,
MAR 12:42 unang kaluun atin mafek mafek dinim ma ukol tal tuumon kiin-abin katip katip alep kiita-kup yim-bital ket abuulu utama.
MAR 12:43 Kemin, Yesus ami daang bakaalin tunum imi weng umuuya tal atamipla ayo bokoya-lomda: Ibi unang kaluun kuu utamip o? Unang tunum malo ili bung yaapkan so la, tuumon anung katip kuliita kulii-tal God ami kukaanbip; kemin ale, mafek mafek dinim unang kaluun umi tuumon katip ma ima saan-bam inokin kuliita alik dilii-tal God ami alik kolu kemin, atin ti weng tifan eng ma bokoyokomi kemin, ibi weng san bom iliwa! God ami tiin diim kaa, unang kaluun mafek mafek dinim umi kukup kanolu kaali ti, uta uta ke-lomdu unang tunum imi kukup ayo kabaak bana no, kala Yesus almi daang bakaalin tunum iyo kanum bokoya ko.
MAR 13:1 Yesus ayo lotu am diilim ayo kela tiltam abip daal abale, almi daang bakaalin tunum ma tal bokola-lomda: Numi kukuyin kapyo! Lotu am kaltam-ali ti, atin am tambalkan ale, ili tuum tangbal tangbal kiita dikela kulii-tal maltiin-tal-une-bi-lom tuum am kaptam tangbal-kup desip. Kemin, ti utam-taman! akalale,
MAR 13:2 Yesus asiik bokola-lomda: Am sakbaalkan kulaa utafiibap kaami sang kaata bokop-ton o, kali kemin, weng san ilap! Bii-lom kawu, waasi iyo tal am uyo alik olso balata-lomdip, tuum kuyak tip-tip-bam maltiin-unsip iyo dekela dabuulip daak abamnu bii disa ke, disa akal almi kulu bala-bala-ke-lokomu no, ansa.
MAR 13:3 Yesus ayo tam Oliv Tikiin kawu tiin-bomda tiin kulaala yak malii lotu am diildiil uyo utafiimale, Pita, Jems, Jon, Andru kanolin nikil ita-kup aso tam tiinip kemin, tildang dik-daala-lomdip:
MAR 13:4 Kamokim kapyo! Kalok kanolin diim kawu, waasi iyo tal-ilomdip lotu am diildiil kaptam balat-nokomip i? elile, Dok kanolin kukup kabak asiik tiltam tabu utam talaaluwa yi, Awu, kukup mafak namti kulu tiltam tabon o, kalu kalokomup yoko? akiwale,
MAR 13:5 Yesus asiik nikil imi bokoya-lomda: Talalu utafii-bamdiwa! Kasen-fakayin tunum kiimi weng kaa, weng san-kaamin daa kayi!
MAR 13:6 Tunum yaapkan iyo tal nami win ayo kufu-bamdip boko-lom: Nali God ata uldaa-nam-buula tiltam Kamokim kesi tunum o, ke-bala ke-bala-ke-biliwa, unang tunum yaapkan iyo imi weng kaa, Fan o, kala weng san yang banokomip. Kemin, imi weng bakan-talabip ayo, weng san-kaamin disa yo.
MAR 13:7 Kano, ibi weng saniwa! Tunum miit ma iyo baa kulii-din daalip, tunum miit ma iso, waasi din-biliple, am waasi ayo ukduu dinan-tal-une-bala-kemip uyo dukum-nokomip kawu, ibi kaa am mafiing diim daan tiltam tulu no, kalalip aket kufoyu suunin daa. Kanolin kukup kaasiik tiltam tabokomu. La, kanum tala-bulula, kanumin diim kawu am mafiing uyo abiltap-siik tiltam tabokomu disa kayi!
MAR 13:8 Am bokon ma kaptam kasel iyo bokon kusnum ma kasel iso din-biliwale, kuno king kusnum ma ami tunum tiin moba ita taba-lomdip, yak king kusnum ma ami tunum tiin mosa iso, din-biliple, aa, am bokon yaapkan kawu bim ayo tiltam tabe-bala, ol futam ayo tiltam tabe-bala ke-mokomu. Kemin, angtiil yol kaa kaa-mokomip kaata-kup, kuluu-laa-mokomip disa; uyo tal-unula, asuk mafiing kaptoowu angtiil yol yaapkan yaapkan iyo tiltam aba talun-talun kebii, disa kelula, kawu am mafiing am uyo tiltam talokomu ko.
MAR 13:9 Kanolin kemin, kipni kukup ayo yaap-kup tiin mo-bomdiwa kayi! Ibi nami wok kala tabu-unokomip kaami kalan uyo, nami waasi ita taba-lom yim-tal-fuku de-yim-tama din Juda kasel imi kamok kamok yaapkan imi diim kawu tiiliwa, ita lii-bam yim-bak-saan-bam ale, ibi lotu am unipla waasi iyo tal ye-bam, kuno nami wok fukulokomip kabak-ami kalan kaata, nami waasi ita tal yim-tama din tawaal diim imi kiyap so, kamok kamok iso, imi diim daalipla, ita lii-bam yim-bak saanokomip kabaku utamiwa yi, God almi weng kaami kalan namti kabuu no, kaliwa imi diim kawu nami sang namti bakayokomip o.
MAR 13:10 Am mafiing diim kaali, tilin disa kama ilaya, nami lak duulin ili God ami weng tangbal ayo kulii-din tunum miit kusnum alik imi diim kawu bakayila-tal-unemik o.
MAR 13:11 Kemin, ita taba-lom ibi yim-bii din weng bakamin baan diim daalokomip kaali, ibi aket yaapkan kii fukun-bamdip: Kwin! kaaso weng binalip tildak numi diim abe-mokoma kaata, kanimin weng ma bokoyokomup i? kemin daa; fanang daa-bomdipla ipni weng baka-mokomip disa; kipni weng baka-mokomip kaali, God ami Sinik Tambal alta kipni aket tem bombe ata kukuyim-balala, weng yaap-kup baka-mokomip o.
MAR 13:12 Tunum nitam suun-bam ilmi nakal nami lak duulin iyo yim-buu yim-baalip yak kamok kamok imi sikil diim abamnipla, ita taba-lom anulip saaka-laa-biliple; awil-fakal yakal kuno man iyo yim-baalip yak waasi imi sikil diim abamnip iyo anulip taan-laa-biliple; kuno man yakal ilmi awol imi waasi keya-lomdip fokolip yak kamok kamok imi sikil diim abamnipla, iyo yelip saaka-laa-bilip ke-mokomip.
MAR 13:13 Kemin, ibi nami lak kaata-kup, duu-bom nami okok kaata ken-umbip o, kala-lomdipla, unang tunum yaapkan ita taba-lom ibi aket atul kukaayin-bam, itafii-mokomip. Lale, nami lak duulin unang tunum ili, kanta angtiil yol uyo daka-bamdip kulaa yang banemin dinim; suunkup nami lak kaata, dukum-kup titil-faka-bam bombii taaniwa kawu, kiita God alalta yim-tama tam almi suunkup ilin abip kawu daalala suunkup ilokomip o, kal-bomda Yesus ayo almi daang bakaalin tunum atalingkal imi kanum bakayin-bisa.
MAR 13:14 Unang tunum nami sukon dol-yinbi umi tik-tiibip kipyo! Yesus ami weng bokosa kaata, dol-nokomi kulawaayo talalu utamalip ko! Kemin, Yesus ali asuk almi daang bakaalin tunum imi bokoya-lomda: Ilom am ma daanokomu kaa, ipkal utamipla, Jerusalam kaptamu waasi ita taba-lom mafek mafek atin mafakan dukum ma kulii-talaba tam ulmi baan ayo kela kutam God ami lotu am awem kaptam tiiliwa, uta taba-lomdu atin God ami am ayo ku-mafak-daalu mafaknula kalokomip kaami diim kawu, ibi Provins Judiya kalawu bom-bilip namti, abip kalawaali, kelalip wakadaa bitam amdu tikiin-tikiin kawu, sawaan-laa-malip ko!
MAR 13:15 Ale, ibi abal akiim kawu bilip namti, asuk tam am un-ilomdip bung ma foko-kuliiluwa yo kala tam unemin daa; kuno kela abiltap-siik ukadaa din sawaan-laa-malip kayi!
MAR 13:16 Aa, kuno ibi iltipni langabip kawu bilip namti, asuk din abip aba ilim ma foko-kuliiluwa yo, kalalip abip unemin daa; langabip kuluwu kela abiltap-siik din sawaan-laa-malip ko.
MAR 13:17 Kabak-ami tiltam talokomu kaali, unang kumun sole, unang manuuk so, kiimi ukadaa unokomip uyo fiit-bamdip tal-une-bam ale, angtiil yol awak uyo kaa-bam ke-mokomip kemin, kwin! kiiso kawe! kebi no.
MAR 13:18 Wom ati taba-lom am mafak daana uyo, kanolin mafek mafek mafak kiiyo, tiltam tilip namti, ibi taang-kala abiltap ukadaa unolip disa; kemin, ibi God ami bokola-lomdip: Kapyo, am mafak am daan tiltam tulu kemin, kabi mafek mafek mafak kiiyo, kewap tiltam talemin disa yo, aka-lomdip beten kaman-biliwa yo, kala-somla ko.
MAR 13:19 Kemin, siin sawaayak diildiil diim kawu, God ami tawaal talalusa kawu kulii yakyak kutal kamala kala diilu kaali, kanolin atin kukup mafak dukum kaa kanum tiltam talokomu ultap kaa ma tiltam tabasu dinim. Kemin, kanumsi tal-unuya, maso mafiing ayo ma alaltap kanolin kukup mafak dukum kaayo, maso asuk tiltam tabokomu disa.
MAR 13:20 Kata, God ali almi unang tunum kii, ulelnala almi lak duulin imi olen-daayila, boko-lomda: angtiil yol dakamin am daan tiltam talokomu ayo am mafak kanolin daan talokomu kaali, abiltap-kup tal aba toop unuk o, kalala bokosa. Kemin ale, kanolin weng ayo bokolin disa kesa dinam, almi tunum unang iyo alik kuliila taba disa kelalip. Lale, weng kuuta kutii bokosa ko.
MAR 13:21 Am kanumin am daanokomu kuyaku, tunum ali ma tal bokoya-lomda: God ami ulduulala, Kamokim kesa tunum Kraist ali kulube kemin, kaa atamin o kalba aye, yang kabe kemin, tal atamin o! kalba kaa, ibi, Fan o kalin daa yo.
MAR 13:22 Nami weng kala bokoli kaali, dok kata naa kalolip: kasen-fakayin tunum iyo God ayo ulelnala almi lak duusip kipni kasen-fokoya-lomdup, kipni aket fukunin ayo ku-mafak-daayupla, yang banin o, kala-lomdip kipni fanang tale-mokomip. Ma kaata tal bokoya-lomda: Nali God ami uldaa-nam-buula Kamokim kesi tunum Kraist o, kalale, kuno ma ata tal boko-lom: Nali God ami profet weng ku-fatap-dakamin tunum o, ke-bam mirakel o, kala kukup akal almi kusnum kaa kukuyokomip. Lale, God ata ipni ulelsa kemin, ibi yim-buulokomip disa.
MAR 13:23 Kemin, nasiik mafek mafek mafak mafak ma kaa tiltam tabokomu kaa tiltam tabin dinim, bom buu ti kaptoowu kama iluya, kalawu umi sang kaa bokoyi nami weng kaluuli dotu weng san utafii-bamdiwa yo, kala-lomda Yesus almi daang bakaalin tunum imi kanum bakayila ko.
MAR 13:24 Yesus ayo asuk almi daang bakaalin tunum imi bokoya-lomda: Yak kanolin kukup mafak mafak ayo tiltam aba tal-unemsi disa keluya, kuyaku tam atan uyo simit-kup kala-lom malang tinilule, kuno kayoop akal ami falala-kalin disa ke-som ale,
MAR 13:25 wakalkan yakal ti kano abiil tikiin kawu bom-bilip kiiyo, kambola dikela tildaak abe-biliple, tam abiil kun diim mafek mafek titil-kup tabasip yikil kuno ilmi liip ayo kelalip sak funbi liip kusnum liip tal-une-bala tal-une-bala ke-mokomip o.
MAR 13:26 Kemin, uyo kanumsi tal-banen-sulule kawu, unang tunum alik iyo titam daa, nitamipla, tam Dukum Ami Man Nayo, ibin tem kabaku tilila, nami titil uyo kuluu-lomdila, atan alaltap ke tiin buluusi-kup sikin-bulula, talaba no kalalip nita-mokomip.
MAR 13:27 Kemin, nalmi ensel iyo yim-baali unbilin am bokon alik kala dik-daa kulaasu kaami balang tem atalingkal God ami unang tunum ulelna almi aket-kup konsip iyo afetu-lom yim-bii talokomip o, kema ko.
MAR 13:28 Yesus ayo asuk weng ma faldak-tii bokoya-lomda: As ami aket kaa fanang daalin! Ipkal as fik umi kukup kuu utamipla, umi duul ayo bam-daala kalaangnu namti, kuuli umi lap abuumin ayo mepso dikiwa tulu kala kalokomip.
MAR 13:29 Kanolin kemin ale, nami kanolin kukup tiltam tabokomu umi bakayila-tabasi uyo fan kulu tiltam tulu kala, kalokomip kuyaku utamipla, Kaa nami talokomi kaami am namti kulu mepso tulu kala, kalokomip o.
MAR 13:30 Kipyo! Nami weng kala bokoyokomi kaali, weng san iliwa! Tunum unang malo ma tiin kawang bom-bilip kiili, taanin disa kano bom ilipla, nami weng bokoya-lomdi: Ilom kaali, mafek mafek mafak alik iyo tiltam abokomip o, kalbi kaali, tiltam talokomip.
MAR 13:31 Kemin, am ma daanokoma kuyaku, abiil so, tawaal so, kulii maaklo disa ke-lokomip. Yale, nami weng kuuta ti disa ke-lokomu dinim; kano ti suunkup ilokomu no, kala Yesus ayo faldak-tiimin sang ayo kanum bokoyila ko.
MAR 13:32 Yesus ayo almi daang bakaalin tunum imi bokoya-lomda: Ali dok kanumin diim kawu talokoma no, nakan-kaabip i? Tawaal diim kaldaak-ami tunum ali ma utamsa disa; aa, abiil tikiin kasel ensel ili babon; aa God ami Man nakal kano ma kaal kesi disa; ti nalmi Aatumen God maakup ata-kup utamsa.
MAR 13:33 Ibi utamiwa, Ali kalok kanumin diim kawu talokoma no, kalbip disa kemin, ibi ti suunkup liip fen-bam bom-biliwa kayi!
MAR 13:34 Nami din abali asuk talokomi kaali, tunum bilin abip samaan uneba tap, tunum ayo umbilin abip samaan ma kawu ilanali asuk talokomi no, kalala, almi okok kemin tunum iyo naan-daaya tal atamiple, almi moni aye, mafek mafek kiiyo, alik kulaaya yak imi sikil diim abiple, akal almi wok e kala kola kola keba-kup, amitom tiin molin tunum ami bokola-lomda: Kabi dotu fen-bam balawa, biili talon o, kalala una.
MAR 13:35 Kemin, kipta utamiwa yi, Awu kalok nuumin diim kawu am kayaakim ayo talokoma no kalbip disa; maaklo kemin, atan tem bana taloma ne? bii kutamiip-nala taloma ne? ali maaklo abiltap tal ula yi, Akanbip kala kalokoma kaali mafak. Ultap kemin, ibi kaal ke kalok nuumin diim kawu, nali talokomi ma? nambip disa; ipkal talalu bomdip liip fenipla talomi no.
MAR 13:37 Nami weng kala daang bakaalin tunum kipni bokoyi kaata, unang tunum alik kipni bokoyin o, kali kemin, alik ibi talalu fen-bam bom-biliwa yo! kala Yesus almi daang bakaalin tunum imi kanum bakayila ko.
MAR 14:1 Kemin, sabi bii sintam Pasova tiltam tulu, toloop so, bret fusuu-laamin disa so, inokomup kayi! kalale, kulaa tunum awem o kala pris imi kamok kamok so, lo utamsip tunum iso, iyo Yesus ami disa iip kulu kasen-fokola-lom dap-tal-fuku, sok dedu-lom aalup saaknak o, kala-lom bokolip:
MAR 14:2 Nuyo yak unang tunum tala-tala-ke-bam ima inokomip kaami diim Pasova yo kebip kawu aalokomup kaali, unang tunum yaapkan iyo, Kaa ban kelip o, kala-lomdip, Numi mafak o, yakan-kaa-bam yemalip kemin, kelup ilom ima ayo alik inamnip dinimnala una-tala-kelip kala, kala-somdupla kawu, aalum o, kala weng dap-tiilip ko.
MAR 14:3 Yesus nikil iyo Oliv Tikiin ayo kela din abip Betani kawu bomdiwa, din tunum ma angtiil mafaknala, alta dap-talalula yawase Saimon ami am kawu ima im-bom bom ilala, unang ma tang tambal-kup tabin ok ket ma kulii-tulu kaami ket kaali, tuum alabasta ta tem kalu dotusip. Kemin, tang tangbal-kup tabin ok naat o ken-umbip ayo kaptoowu be kemin, kaali ti sisol dukum ta saan-umbip. Kemin, unang uyo ket kaayo, lo-lomdu tang tambal-kup tabin ok ayo kulii yak Yesus ami dabom diim kawu sing daalula,
MAR 14:4 tunum malo ma aso tiin-bilip imi aket tem ayo aket atul keyilula, nikil ilmi-kup weng boko una-tala-ke-bam bokolip: Kwin! unang kalawuuli tang tambal-kup tabin ok kalawaaso tinan-daalu kawi!
MAR 14:5 Kaa kano kela-lomdu, tang tambal-kup tabin ket ayo kulii-din aptum kusal imi kuyilu ita mo-lomdip moni almi-kup 300 ayo akaala tam lo anang ma kuluu-lom, kulii-din mafek mafek dinim ilin unang tunum imi masiim kuyilakin o! kela-lomdu disa kawu tinan daalu disa kela no, kal-bomdip mafak o, wakan-kaamip.
MAR 14:6 Lale, Yesus ayo tunum imi bokoya-lomda: Ibi kanimin o kalaliwa, weng mafak kaa unang kuu kukaa-un-bilipla, uyo aket dukum fukunbu yoko? Kewin o! Uli kukup tangbal nami kanop-nu kemin, kulaalin a!
MAR 14:7 Unang tunum mafek mafek dinimal kiili, kipso suunkup laabip ale, ipkal kano dong dokoyum o, kalip, kuno ipkal yaap kukup tambal kaa kuyilalip. Lale, nali kipso suunkup kala ilokomi disa;
MAR 14:8 unang uyo utamula yi, Dok kanolin ata yaap nola nami no kalu uyo kaa kanolu, kaa utamula, Yesus ayo mepso aalip saaknaya, dibii-din tuum tem kawu, kuwaalokomip kala, kalalula, Juda kayaak numi as kuli dotu dibii-din kuwakamin kukup kuuta, kuluu-lomdula, nayo saaknin disa iliya, tang tambal-kup tabin ok ayo nami dabom diim sing daap-nu.
MAR 14:9 Kemin, kaali ti fan tituun weng bokoyokomi. Ilom kaptoop ali unang tunum kiimi am bokon alik kula dik-daa kulaasu iyo tal-une-bam nami weng tangbal kukaaya-tal-une-mokomip ayo, unang kuumi kukup tangbal kala kup-nu kaami sang kaa bakayila-tal-une-bamdiwa, umi win ayo suunkup kufuwokomip kayi! kala Yesus ayo kanum bakayila ko.
MAR 14:10 Yesus ami daang bakaalin tunum kiili, talangkal, la ma kaali abip Keriot kasel Judas kemin, ata din-ilomda tunum awem imi kamok kamok imi bilip kawu, Yesus ayo dap-fatap-daalon o kala, din awem tunum imi kamok kamok imi bokoyilala
MAR 14:11 iyo weng sandiwa, imi aket tem kaayo, atin tangbal ma keyilula, moni ayo tik-tii-lomdip weng kutii, Sin ilom kanolap kala kalalupla kawu, kup-tokomup o, akiwa, ayo bomda kalok kano-lomdi dap-fatap-daalon o, kala-lomda akola liip fen-tal-unema ko.
MAR 14:12 Kulaa, bret fusuu-laamin disa ami inin am maakup diim kawu Juda kayaak iyo sipsip man kasaa iyo aabi kutii Pasova kaayo, inan-laabip kemin, kulaa almi daang bakaalin tunum iyo Yesus ami dik-daala-lomdip: Kapyo! nuli din kaloku ima Pasova kaa kawu ma dotuliwa yo kalbap yoko? akiwa,
MAR 14:13 Yesus ayo almi daang bakaalin tunum alep ma yim-baali din unin o, kala-lom imi bokoya ko: Din Jerusalam abip dukum unokomip ayo okok kemin tunum ma tal kipni ita-mokoma kemin, atamipla, Ali unang imi liip ke-lom ok ket aalap dukum ma tawaal ta fak-duu talalusip kaptoowu ok iluu kutam dabom diim tii kulii-talaba kala kalalipla, yak ami daang abamnipla,
MAR 14:14 ayo am kaptam banan-salale, alep ipkal tunum kaami kamokim am kayaak ami bokola-lomdip: Yi, numi kukuyin tunum ayo weng ma kup-ta kulii-tulup kemin, ali bokop-ta-lomda: Kapni am kaltamu am anung ma kiiin ukuyilawa, nami daang bakaalin tunum iso, naso, kaltamu bomdup nokol Pasova kaa inamnum o, kalaya tulup o, kala kanum bokola tulup te! kala bokolipla,
MAR 14:15 kulaa, am kayaakim ayo kipni weng uyo weng sanba-kup, yim-tama tam am tip kaptam daa am anung dukum ma kukuyila utamipla, ima fuumin kaami mafek mafek alik kiita ti kaptamu bom-bilip kala, kalalipla, kaptamu inin-inin ayo talal-bam nuumiwa yo, kala alep yim-baala unip.
MAR 14:16 Daang bakaalin tunum alep iyo din abip dukum Jerusalam din uliwa, Yesus ami weng bokoya tulup ayo, tifan tituun-kup kelu kala, kalale, tal Pasova inin ayo talal-bam fuumip ko.
MAR 14:17 Bom bii, am tiindu atan yak tem unaya, Yesus almi daang bakaalin tunum talangkal iyo tal
MAR 14:18 am ukuyimba kaptamu tiin-bom nikil iyo ima ina faka-bam ale, Yesus ayo almi daang bakaalin tunum imi bokoya-lomda: Nami weng kalawaali ti tifaneng bokoyokomi: Nikil iltipni tunum maakup ma ata naso inbup kulaata, taba-lomda nam-fatap-daalala, nelokomip te! yakala,
MAR 14:19 daang bakaalin tunum iyo Yesus ami weng bokola uyo weng san fanang alik tam baneyula aket yaapkan fukun-bam ale, aket uluum dukum ke-lomdip ma asiik dik-daala dik-daala ken-una-tala-ke-bam ale, bokolip: Kamokim kapyo! Nata nelile, ni disa yi? kal-bom dik-daala dik-daala ke-bam aket yaapkan fukunipla,
MAR 14:20 Yesus asiik bokoya-lomda: Ibi talangkal la, ipni tunum ma naso sikil kulaak falet tem kabaaku daa inamnup namti, kulaata, nam-fatap-daalaya, nelokomip o.
MAR 14:21 Sawaayak kawu, God ami Sukon Tem kabaku nami kanola taanokomi kaami sang bokosu uyo, fan kamala kulu kaami sang ayo tiltam tuluya, Dukum Ami Man Nami nelip taanokomi. La, tunum nami nam-fatap-daalokoma ali atin ti angtiil yol awak dukum kuluulokoma. Kemin, awak kuuli mep tunum kaa kuulin dinim nosu dinam, ali angtiil atul awak dukum uyo kuluulama dinim, kaali tambal o, kema ko.
MAR 14:22 Yesus nikil iyo ima in-bomdip Yesus ayo bret ma kuluuba-kup God ami yaap ke yo, aka-lom lo kutii almi daang bakaalin tunum imi kuya-lomda bokoya: Kalawaali nami tiil kemin, kuluu inamnin o, yakale, kuluu
MAR 14:23 inamniwa kawu, ali wain wok ayo iluu kutal-fuku, God ami yaap ke yo, akale, almi daang bakaalin tunum imi kukaayila, inam-niple,
MAR 14:24 ayo bokoya-lomda: Kalawaali, nami kiim kemin, nami nelipla, nami kiim ayo sing-daa-lomdu God ami kama weng umi de-kutiiluya, ibi kiim kaa atam, Awu faneng, God ali unang tunum yaapkan numi ban wakamin kiili, takan-tiiyase kala, kalokomip o.
MAR 14:25 Nali tifan bokoyomi: Nali kamala kaali, asuk wain ok kalawaali, maso ma inam-nokomi disa; kela bom-biili bii din God ami abip kawu, wain ok alokso kaata ma inokomi no, yaka-lomdala kanum bokoya ko.
MAR 14:26 Nikil ima kaa inamnip disa kelale, kulaa iyo God ami baal maakup ma uluubip-kup, Oliv Tikiin unip ko.
MAR 14:27 Yesus nikil iyo liip kawu un-bomdiwa, Yesus ayo bokoya ko: Ilana alik ibi kep-nalalip ukadaa unokomip. Kemin, God ami Sukon Tem sawaayak dolsip kaami sang kaali, boko-lomdu: God nalta, waasi iyo kamboyi ita taba-lomdip sipsip tiin molin tunum ami aalipla, sipsip alik iyo ukadaa une-bala tale-bala-ke-lokomip kayi! kalsu kemin, fan kulu ipta kanolokomip.
MAR 14:28 La, nata kanola taani, namaalip ilana asuk tam tiiniya, Provins Galili unokomi kawu, ibi din kawu nitamin o, kemala,
MAR 14:29 Pita ayo weng sanba-kup Yesus ami bokola-lomda: Kamokim kapyo! Kapni daang bakaalin tunum malo ita kambop-ta wakadaa unokomip. La, nali kuno kep-ta wakadaa unokomi disa yo, akala,
MAR 14:30 Yesus asiik Pita ami bokola-lomda: Naktum kapyo! Nami weng kala bokop-tokomi uyo aket fukun-salapya! Kamala kutamiip kuyaku, awon kakaruk aalap ayo naanbi du alep fak-daalin disa, ilala, kabi nami sang ayo bokop-na-lomdap: Yi! Kaali ma atamsi dinim o, nakan-kaamsi liip asuumano fak-daalokomap o, akala,
MAR 14:31 Pita asiik weng dukum-kup bokola-lomda: Atin disa yo! Kapso naso maakup yelum o, kalip kaa, nali boko-lomdi, Yi! Kaali ma atamsi dinim o, tokokomi daa yo, akale, kuno Yesus alami daang bakaalin iyo tikip alik ti Pita ami weng bakaba weng yaan tem kulaata iso, maakup kanum bokolip ko.
MAR 14:32 Kulaa, Yesus so, almi daang bakaalin tunum iso, iyo yak aba din langabip Getsemani abale, Yesus ayo bokoya ko: Nali God beten kamali kemin, nikil ibi kulawu tiin-bom iliwa yo, yaka-lomda,
MAR 14:33 keyila Pita, Jems, Jon nikil asuumalo ita-kup foko-yim-bii yang aba Yesus ami aket tem uyo atin mafakalule, aket uluum dukum-kup kelu,
MAR 14:34 nikil imi bokoya-lomda: Kipyo! nali utamila, Kulaata nelip saak-nokomi no, kalalila, nami aket tem ayo atin ti uluum dukum kep-nu kemin, yang kawu God ami beten kemi kemin, kaa ipkal kuldaaku fen-bam ale, talalu kutii-bom iliwa yo! yaka-lomda,
MAR 14:35 keyila akal sop-taba yang lo kabale, tilik duung fal-kela daak tiin dabuunale, kulaa God ami beten kaman-bamdala: Aatumen kapyo! kabi ayo kalap namti, kamala mafek mafek mafak tildak nami diim abokomu uyo kuluu kulaap-nap yak banuk o.
MAR 14:36 Atok kapyo! Kabi ti alik yaap-kup nolalap kemin, kabi kukup mafak tildang nam-mafak-daalon o, kebu uyo dil molawa kep-nuk o, kalbi. Lale, nami fanang daka-bamdi Aatumen kabi kabak-ata dil moyawa kep-nuk o kebi kaali, kabi kuluu kanumin disa; kaltapni aket fukunbap kaata-kup kuluu kanumon o kalolap kaali, ti yaap o, kal-bomda beten kema ko.
MAR 14:37 Yesus ayo kanola beten kemsile, kulaa kela tildang ulala, Tunum nikil asuumalo iyo akanbip kala, kalale, yam-kafala-lom Pita ami bokola-lomda: Saimon, kabi akan-umbap o? Kabi titil-fak-daa kutii bom ilanin tap kelalap daa; abiltap-siik akanbap o?
MAR 14:38 Setaan ata ipni oko-takayim-bilila, yang ban ukduulip kala yokon o, kal-bomda ibi yam-kukuba kemin, kipni aket fukunin ayo ti kukup tambal-kup nuumum o kalbip. Lale, ipni titil ayo katip; yang kukup mafak nuu-mokomip. Kemin, asuk akan-unemin daa; kelalip kawong-bomdip God ami beten kamaan-bilip, ayo dong dakaayim-bala yo, kala-somla ko.
MAR 14:39 Kanum boko keyila Yesus ayo asuk yang olang diim aba almi kamosinim beten kemsi kulaa tala tap kulaata, asuk beten kemsi kulaa kela,
MAR 14:40 asuk tildang ulala yi: Aptum kusal asuumano iyo asuk ti kuno tiin yak keyu akan diisbip kala-lomda yam-kafalnala, fatom keya weng babon daalip ko.
MAR 14:41 Kanum boko keyila Yesus ayo asuk yang-ilom beten kemsi liip duum asuumalo diim asuk tal ulala, Daang bakaalin iyo yam-kafala-lom bokoya: Ibi asuk akan-bomdip fan-kaabip o? Ipni akan-unemin kulaa ti kutoop kulu diilip disa kelu kemin, tam tiin atam-tamin! Kulaata nak-tunum maakup ma ata taba-lomda Dukum Ami Man, Nayo nam-fatap-daa nam-baala yak tunum mafak imi sikil diim abam-nokomi namti kaa tiltam tulu.
MAR 14:42 Kemin, kibi tiltam tolnip unum a! Nak-tunum nami nam-fatap-daalala, nelokomip ayo din atamdi yo, kalala talaba kemin, tilip una-tala duk-duulum o, kala Yesus almi daang bakaalin tunum iyo kanum bakaya ko.
MAR 14:43 Yesus ayo weng bakaya-salale, almi daang bakaalin tunum kiili talangkal, la talang kaata tala kemin, ali Judas ata. Ali kamosinim kaali, awem tunum o, kala pris imi kamok kamok so, lo utamsip tunum so, Juda kasel imi kamok kamok iso, ita tunum yaapkan iyo yim-baalip din iyo bainat so, wan kong aye, saak yak asukum so, kiiyo fokola-fokola-kelipla, Yesus ami dap-fatap-daalokoma tunum Judas aso tal-bom ale, Judas ayo bokoya-lomda: Kipyo! kano ata-bom iliwa, nita din tunum kaali, kuluwaata kayi! kala dap-tal miki-lom fiil buluk tokoli namti, kulu bombe kemin, ipta dap-tal-fuku dibii-unolip kayi! yakaya, iyo baa kutal daa-lomdipla,
MAR 14:45 Judas asiik Yesus ami tiin dik-yak-dela-lom abiltap tal weng umola bokola-lomda: Nalmi kukup-nin tunum kaa bom-balap o? aka dap-tal miki fiil buluk tokola-laam-salale,
MAR 14:46 kulu tunum iyo tal Yesus namti dukum-kup dap-tal-fukulip ko.
MAR 14:47 Kanolipla, tunum maakup ma Yesus aso bom-bilip ata taba-lomda, bainat almi iim tem kawu bombe kaata, kuluu-lomda, pris awem tunum imi dabom ami ok tabola bom ilin tunum ma ami talangkal kaal malii kaata tik-daa kulaawala tiil abale,
MAR 14:48 kulaa Yesus ayo tunum tal dap-tal-fukulip imi bokoya-lomda: Ibi nali din lotu am diilim kaptamu tiin-bomdi unang tunum imi suunkup kukuya-laabi kawu, kano tal nam-tal-fuku sok de-namulakin kaa, kanimin o kalaliwa kaa, kulaasip. La, ibi kamala kalawuuta, aptum kusal ye-bam, mafek mafek yukut dakayin tunum ami dap-tal-fuku dedu-laabip tap ke-lomdip kanaat bal, asukum bal, bainat aye kiita, kulii tiltam akiip-na-lom de-namulum o, kala tiltam tilip i? Kaali ti, sawaayak kawu God ami Sukon Tem nami sang dolsip namti kulu tiltam tulu kemin, kulaa yaap o, yakala,
MAR 14:50 kulu Yesus almi daang bakaalin tunum iyo weng sandiple, Yesus ayo alik kelalip abiltap wakadaa una-tala-kelip o.
MAR 14:51 Kulaa, tunum man kasaa ma ata yak Yesus dibii-unip imi daang bakaala unabip kemin, ali ilim namaal kaata miki unala, waasi ita taba-lomdip, sok deduulum o, kala yak dap-tal-fukuliple,
MAR 14:52 almi ilim ayo dilduu ku kulu tii kela ilim dinim angtiil fatap ukadaa tabana ko.
MAR 14:53 Awem tunum o kala pris imi kamok kamok alik isole, Juda kayaak imi kamok kamok aye, lo utamsip iyo tal awem tunum imi kamokim diilim hetpris ami am kaptamu tala-tala-keliple, kulaa tunum Yesus de dibii-tilip iyo dap-tama tal hetpris ami be daalip.
MAR 14:54 Kanum tala-biliwa, Pita ayo Yesus ami daang-tem samaan so kaptoowu akola dip-tal-dip-tal yakaba din hetpris Kayafas ami am kaami daam tem tam una. Lale, tam am unoma dinim; tiltam daak uti tem kaptamu, bomdaya, soldiya iso tiin-bomdip diil fuumip.
MAR 14:55 Kemin, pris o, kala awem tunum imi kamok kamok sole, alik imi kamok kamok so, iyo Yesus aalum o, kala-lomdip, tunum kawanta Yesus ata-bilip, kukup mafak so ma nola atabip kala, kala-somdupla, kiita fokoluwa weng talalmin umi baan diim kawu, bokoliwa yo, kala-lom imi fenip. La, ma atamalip disa keliwa,
MAR 14:56 kemin kawu, tunum yaapkan iyo Yesus ami sang ayo kasen-faka-bamdip: Ye, ali kanoba kanoba kayi kalbip. Lale, kamok kamok iyo utamipla, Imi weng ayo akal almi baka-bala baka-bala-kebip kala kalalipla,
MAR 14:57 tunum iip maakup maakup ma ita tiltam tola bomdiwa, ibakamin weng kaa bakaan-bamdiwa bokolip ko:
MAR 14:58 Ayo, fan nokol weng san-buluwa ayo boko-lomda: Ilom am ma daanula kawu, nalalta lotu am diilim awem kaayo, tunum ilta desip kaa, balatni bi am alep kelule, am asuum kulaa asuk kusnum ma delokomi. Yale, nali tunum dinan-umbip tap ke-lokomi disa yo, kalase no, kalbip.
MAR 14:59 Lale, weng kaa bakabip kakal ti, akal almi baka-bala baka-bala kebip kala, kalalip itamip ko.
MAR 14:60 Awem tunum imi kamok kamok o kala hetpris ayo tiltam imi iipyak tem kulu tola Yesus ami dik-daala-lomda: Mep tunum kaa, bakap-tambip uyo kanimin o, kala weng an-anung-daa bokoyin disa, kebap yoko? Kii kanimin o, timbip aka.
MAR 14:61 Kata, Yesus ayo kano duluuma ilale, hetpris ayo asuk dik-daala-lomda: Unang tunum alik ili God ami win kufola-laabip kemin, kabi God ami uldaa-tam-buula tiltam Kamokim kesap tunum Kraist o kebip kaa, kapta ema? akaya,
MAR 14:62 Yesus asiik bokola-lomda: Kanum bakabap kaa, nita kemin, bom ilom kaptoop ali nitamipla, Dukum ami Man Nali abiil tikiin kawu, ilin titil-kup tabasa God ami sikil tiingtup diim o, kala kamokim ami baan diim kawu, tiinbi kala, nikip ilom ale, kaata utamiwa yi, Abiil tikiin umi ibin umi tip diim kabaaku tiindala tala, kalalip nita-mokomip o, kala Yesus ayo imi kanum bokoyila ko.
MAR 14:63 Kanum bokoyilala kawu, Kayafas tunum awem diildiil ayo weng sandala, Juda kayaak imi aket uluum tabemin umi kukup uyo kanumin kemin, almi ilim mikiba kaayo, balata kutii kela tunum alik tiinbip imi bokoyila ko: Kipyo! Almi sang bokola kaa, nuli tunum ma fen-bam atamupla, kaata Yesus ami sang ayo maso ma numi bokoyokoma disa!
MAR 14:64 Kemin, ami weng mafak bokola kalawaali, God ami win ku-mafak-daalala, ibi weng sanip kemin, kipni aket fukunbip kaa, mep tunum kalawaali, kalok nolum o, kalbip i? yakale, alik iyo bokoyip ko: Ali ti atin kukup mafak kela kemin, dabaalup yak Rom kasel imi sikil diim abamnala aalip taanak o, kalip.
MAR 14:65 Tunum iip maakup maakup bom-bilip iyo kulu mok tik-ten-bamdip ilim ta kuluule, Yesus ami tiin matum ayo katela-lomdip, tangafap ta biiwaka-bam, titul saan-bam atafiimin weng uyo bakaan-bam: Kabi boko-lom: God ata nam-baala talsi kemin, nali mafek mafek kulaa alik utamsi no, ken-laabap kemin, kapkal nitamdap, Awu kaa ata neba kalap namti, nami win ayo bokolawa, titamon o, kala biiwakabi, yakbana-yakbana-kemsi keliwa kawu, bolis isiik Yesus namti biiwakamip ko.
MAR 14:66 Pita ayo abip uti daam tem kawu bom ilale, awem tunum imi kamokim dabom ami wok fukulin unang ma taldu,
MAR 14:67 Pita ayo diil fuuba kala atam tal bokola-lomdu: Kapso ti, Nasaret kayaak Yesus aso tal-unen-laabap o, akuya,
MAR 14:68 Pita ayo yawaal daa-lom bokowa-lomda: Daa yo! Nali kupni weng bakabap kabak-ali dotu ma utamin disa yo, waka-lomda kulaali yang am daang kaami amitom mepso diim kulu tola bom ilale,
MAR 14:69 okok kemin unang kuuyo, Pita kaa atamdula asuk tunum ma kawu tolbip imi bokoya-lomdu: Kipyo! mep tunum kalawaali, Yesus ami tunum ma namti kalabe no, yakan-kaamule,
MAR 14:70 Pita ayo asuk atin ti yawaal daa-lomda: I, ti disa te! yakale, ilanin tap tunum malo ma iyo Pita aso tola bom-bilip iyo Pita ami bokola-lomdip: Kabi nuli weng seluwa yi, Kabi Provins Galili kayaak imi weng tap bakabap kala tukup kemin, fan ti kapso Provins Galili kayaak kemin, kabi fan Yesus ami daang bakaalin tunum o, tambup te! aka kemiwa,
MAR 14:71 Pita asiik weng dukum-kup bokola-lomda: Ee, kipni tunum kaami sang bakabip kaa, nali ma atamsi disa; nali kasen-fakamin weng ma bokoyi namti, God ata taba-lomda nayo angtiil yol kup-nak o, yakan-kaam-salale,
MAR 14:72 kulu awon kakaruk aalap ayo naan-tabamnale, Pita namti, weng san-ilomda, asuk aket fanang daala yi, Awu, Yesus ami kamasi bokop-na-lomda: Awon kakaruk aalap ayo naanbi liip alep fak-daalin disa, kama bom ilala, Pita kabi nami sang ayo bokop-na-lomdap: Ni kaa ma atamsi disa yo, naka naka kemsi liip asuumano fak-daalokomap o, nakase namba kaa, fan kulu kanoli no, kala kabak-ami aket kaata, fuku-daa-lomda dukum-kup amama ko.
MAR 15:1 Am daan-ilom am takas tiil-banala, kutim kawu, awem tunum pris o, kala-laabip imi kamok kamok aye, Juda kayaak imi kamok kamok aye, lo utamsip imi kamok so, kamok kamok kusnum iso, iyo weng talalu-lomdip ilmi bolis imi bokoyip ita Yesus ayo sok de dibii-din dabaalip yak Rom kasel imi kiyap Pailat ami sikil diim abamnala,
MAR 15:2 Yesus ayo Pailat ami tiin diim kawu tolnaya, Pailat ayo dik-daala-lomda: Kabi Juda-miin imi kamokim king namti kulu bom-balap ema? akaya, Yesus asiik bokola ko: Nali kaa ma bokolin disa la, kabak kaltapta bokolap o, aka ko.
MAR 15:3 Kulaa, awem tunum imi kamok kamok iyo mafek mafek yaapkan ami sang ayo kasen-fokola-lomdip, tunum kalawaali faneng kanola ban keba keba kayi! kal-biliwa,
MAR 15:4 Pailat ayo asuk Yesus ami dik-daala-lomda: Kabi mafek mafek sang yaapkan iyo kulii yak kapni win diim tii-bom bakabip kaali, weng sanap o? Kabi kanimin o kala imi weng kalawaali, maan tiiyin disa ke-lomdapla dulumbap i? aka.
MAR 15:5 Kata, Yesus kaali, kamok kamok imi weng uyo maan tiiyin disa kela kala, kala-lomda Pailat ayo fanang disa kelula, ayo aket yaapkan fukuna ko.
MAR 15:6 Juda imi Pasova kaami diim kawu, kukup ma kaali, kanumin kemin, utamiwa yi, Wasital uyo tiltam tulu kaali, Juda kasel imi iintang am o kala Pasova inin am ayo daanu kaa kalale, kulaa iyo tala-tala-keliwale, Rom kasel imi kiyap ayo bokoya ko: Tunum sok deduusup ayo iltipta boko-lom: Kanuminok kulaata tildaa dabaalin o, kalip kala, kalaliya bokoyi: Ata din tildaali no, yakaya, ilta kulaata ko, kalum o, kala-silip; almi soldiya iyo din til-daa-lom win tolola kelip un-un-ken-umbip.
MAR 15:7 Kemin, sawaayak kawu tunum malo ma gavman so, waasi din-bomdiwa tunum iyo ye-bilip saaka-laa-biliwa kawu, gavman ayo taba-lom sok laabi yim-tii kutal kalabus am daalip tiinsip. Kemin, kaptam bilip imi tunum ma ami win kaali Barabas.
MAR 15:8 Kemin, tunum tal ang-delip iyo tildang Pailat ami bokola-lomdip: Pasova ima inan-talan-umbup kaami kukup kanuyila-laabup alaltap keyan o, akiwa,
MAR 15:9 Pailat ayo utamaya yi, Yesus ali kukup mafak kaata ma kanolaya, kamok kamok iyo dabaalip tildak nami sikil diim ababa daa kala-som ale, kuno unang tunum iyo Yesus ami weng ayo baka-balaya, weng san-ilomdip ami win ayo kufon-bamdip fiyaap duu-biliwa kemin, kaata kamok kamok kiita, almi kanuba kaata, tolola-lomdiwa kemin, dabaalip tildak nami diim abamna kala, kala-lomda, Pailat asiik unang tunum imi dik-daaya-lomda: Ipni aket fukunin kaa, nali nalmi soldiya imi bokoyilila, Juda kasel kipni kamokim king ata tildaa dabaalin o, kebip ema yo? yaka.
MAR 15:11 Kata, awem tunum imi kamok kamok iyo taba-lom tunum tal debip imi wiis moyiwa, iso, Pailat ami weng kaayo, maan tela-lomdip: Kapni soldiya imi bokoyawa, Barabas ata-kup sok baalin o, akiwa,
MAR 15:12 asuk Pailat ayo bokoya-lomda: Yak kanum bokolip kulaali, Juda kasel kipni king kamokim o, ken-umbip kalawaayo, kalok noyan o, nambip i? yakale,
MAR 15:13 isiik naan-bamdip boko-lom: Dabak as diim daa-lom aaliwa, taanak o, kemipla,
MAR 15:14 Pailat ayo bokoya-lomda: Aa, kabak kanimin o, kalalip kanubip yoko? Kaali, kalok nolin ban ma ukduuba no, kalalip kaami kalan o, kalalup aalokomup yoko? yakan-kaaba. Lale, weng san-ilom ili dukum-kup fuut-bam boko-lomdip: Dabak as diim daa-lom aaliwa, taanak o, kemip ko.
MAR 15:15 Pailat ayo kanoliya, tunum tal debip imi aket ayo yaap ma keyuk o, kala-lomda imi weng kaata weng san-ilomda almi soldiya imi bokoyilaya ita din Barabas ata sok tildaa dabaalip unang tunum imi iipyak tem kawu unale, Yesus kaata, sok faklet kuluu-lom lakatal kaan-bam biwakabi, keliwa kawu, soldiya imi bokoya-lomda: Dabak as diim daa aaliwa, taanak o, yaka-lomda dabaaya yak soldiya imi diim abamna ko.
MAR 15:16 Kemin, kiyap Pailat ami soldiya iyo Yesus ami dibii-tam kiyap am dukum anung kaptoop ali almi siin-laamin am kemin, dap-tam kaptam daa-lom soldiya malo ma iyo naan-daayilipla, iyo alik tala-tala-ke-lomdip,
MAR 15:17 kasen-foko king imi ilim miki-laabip tap kelum o, kala-lomdip ilmi ilim isak fulut ma kaata, kuluu kulaak tinela-lomdip sok langliing so kaata, ukduu-lom king imi nafalum tap ke faa-lom, kutam ami dabom diim dildaak tinela-lomdip,
MAR 15:18 iyo atafiimin weng ma ami bokola-lomdip: Juda kayaak imi kamokim king kabi balap yoko? an-bomdip,
MAR 15:19 malal ta kuyak dabom dakan-bam ale, mok tak-saala tal-une-bamdip, king imi weng umkaayin kukup kaata kuluu katuun duung fakela daak almi diim kulu tiin-ilom weng tangbal kaayo bakaalip. Lale, kulaa fan disa; kasen-foko atafiimin weng kaata, bakaan-bilipla,
MAR 15:20 kanon-bamdip atafiimin weng bakaanbip uyo disa kelale, kulu iyo ilim isak fulut dildak tinelip ayo dilduu kukan-tela-lomdip asuk almi ilim kaata, kuluu makela dibii tam saaklo abalup, dibii-din dabak as diim daa aalum o, kala-lom dibii-unip ko.
MAR 15:21 Soldiya iyo Jerusalam kaptam kelaliwa, Yesus ayo dibii un-bomdip iyo atam talaaliwa yi, Aleksanda so, Rufus so alap imi aalap Saimon kaa, Provins Sairini kayaak ayo saaklo kawu, talaba kala, kala-lomdip maaklo aso dabaalip tal kabak bana Yesus aalokomip kaami as tiim ayo kuyak telip kuliila aso yakyak
MAR 15:22 bilin Golgota Mukun o, kala kaami miit kaali, Tunum Dabaal Kun Mukun o, ken-laabip kaba unip.
MAR 15:23 Soldiya iyo wain wok sole, marasin atul tabasu meya yo kebip kaaso, kuyak mim-daa-lomdip fal-siki-lom Yesus ami kolup, inamnaya kawu, dabak as diim daa sil bikilup ami angtiil yol ayo katip so kelak o, kala kolip. Lale, Yesus ayo inam-noma daa, kelala,
MAR 15:24 kulaa Yesus ayo dabak as diim daa-lomdipla kawu, iyo Yesus ami ilim kaali, ku kuluu ti kutii-bomdip tuum katip katip saatu iyo kulaalup tam aba daak aba ke-bam, kanta ata ata kela namti, Yesus ami ilim ayo kuluulala, atamum o, kala-lomdip, Yesus ami ilim namti dalela-lomdip kabanulip ko.
MAR 15:25 Yesus ami dabak tam as diim daa, sil bikilip kaali, atan tal dibimnin disa kama ilula, dabak tam as diim daalip.
MAR 15:26 Kemin, Pailat ami okok kemin tunum ma as kom ma kuluu-lomda kalok ami kalan kaata ma aalip kala-lomda sang ayo ami diim kabaku dola-lomda kanum bokola ko: Tunum kalawaali Juda kasel imi kamokim king o kala as kom diim kabaku dola-lomda kuyak tam Yesus as dabom diim tip kabaku kutam diila ko.
MAR 15:27 Soldiya iyo taba-lom Yesus dabak as diim daabip-kup, kuno tunum alep ma yem-tal-une-bamdip, imi bung mafek mafek yukut dakaayin tunum alep yakal, yim-bital yim-bak as diim daa-lomdip, ma ata dap Yesus ami tiingtuplo kawu dip-tam diibip-kup, ma ata dibii-tal aba yang awaanlo kawu dip-tam dii keya-lomdip yim-tiilip.
MAR 15:28 [Kanolip kaali, siin sawaayak kaptoowu God ami Sukon Tem uyo boko-lomdu: Ili kukup mafak ayo soldiya ita taba-lom fuut-tabin imi kukaayila-laabip tap ke, mep tunum kakal kanola kolip o, kalsu. Kemin, kulu tiltam fatapnu.]
MAR 15:29 Tunum mep kulu tal-unebip iyo aban-den-bam Yesus ami atafiimin weng uyo bakaan-bamdip: Kapyo! kaltapni bon tem weng boko-lomdap: Nali lotu am diilim dukum ayo balata kutiili bombii am alep keluya, am asuum diim kawu, asuk delokomi no, kalalap, kaltapni tong bakamsap kemin,
MAR 15:30 baan kaltapni angtiil lak kaata duu-lomdap tam-bak as diim daabip ayo, kulaa kelalap tildaak abamnan o! akan-kaa-bamdip atafiimin weng bakaan-bilipla,
MAR 15:31 awem tunum o kala-laabip pris imi kamok kamok so, lo utamsip iso, yakal ti kuno Yesus ami atafiimin weng bakaan-bamdip, nikil iyo bokola una-tala-ke-bam bokolip: Kaali unang tunum kayaak kayaak imi angtiil lak kaata, duu imi dong dakaayim-bala yaawa-laabip. Lale, ali kalok kano-lomda almi angtiil lak kaata ma duu-lom yaap-nama dinim keba ni?
MAR 15:32 Aa, ti tifan God ami uldaa-dabuula tiltam Kamokim ke-lomda, Israel numi kamokim king kesa namti, alta as diim ayo kulaa kela tildaak abamnala, nokol atam-somdupla, Awu, fan kaali ti God almi man u! kalum o, kala atafiimin weng bakaalipla, tunum alep Yesus aso nikil maakup yam-bak as diim daabip yakal kuno atafiimin weng uyo bakaayim-bam kemip ko.
MAR 15:33 Atan tal dibimnule, kutamiip dukum tiltam-ilomdu, am bokon alik kala dik-daa kulaasu uyo tilnong molu bombii, atan ayo an-fal-kela tal aba dayak 3 kilok kela kawu, kutamiipba namti asuk disa kelula,
MAR 15:34 malang tinilin ayo disa kelon e, kem-sulule, kuyaku Yesus namti Hibru ilmi weng dukum-kup baka-bam boko-lom: Eli, Eli, lama sabaktani yo, kala kabak-ami miit kaa boko-lomdu: Nami God kapyo, nami God kapyo, kanimin o, kala kuno kep-nanbap yoko? kal-bomda Hibru ilmi weng kaata kuluu bakamale,
MAR 15:35 tunum mep kulu tolbip imi tunum malo ma iyo weng san-ilom bokolip ko: Aa, ayo sawaayak kawu God ami weng ku-fatap-dakamin tunum profet biisa Elaija ami naala-taba no, kala-lomdip
MAR 15:36 tunum ma abiltap yang mafek mafek as abum altap kaata, kuluu kulaak wain ok atul tabin kabaak mo-lomda, as daang ta tiila kulii-tal koli inamnak o kala, kulii-tal aba tam kukaalale, aptum ayo bokola-lomda: Kelap titam daa atam iluwa, Elaija ata tal tildaa dabaala tildak tala ne? disa ye? kalum o, akale,
MAR 15:37 kulaa, Yesus ayo asuk Aalap ami dukum-kup naan-daala-lomda, kulu mam dakat kala saakna ko.
MAR 15:38 Kanolala, mep lotu am awem diilim kaptamu ilim aalap dukum ma ku-dii-lom God ami abiin awem ayo katiisu. Kemin, Yesus ayo saaka kem-salale, kulu ilim aalap dukum ayo bitam mutum diim kulu, tela tikip-kup biki tala ti kulii bital-daak daa-lom, malii na malii na ke-lomda kulaalaya, God ami abiin awem namti ku-fatap-daalala,
MAR 15:39 100 soldiya imi kamokim ayo, Yesus almi mepso kulu tolba kemin, almi tiin matum kaayo, atama yi, Yesus ali kanola taana kala kalale, bokola ko: U faneng, ali ti God almi Man o, kala ko.
MAR 15:40 Kemin, unang yaapkan yakal kuno Golgota Tikiin kawu tiinaabip kemin, iyo takas yang samaan so kabangu tola atam ilupla, soldiya iyo Yesus kaa kalok nolip kala yukum o, kala-lomdip nikil iyo yang bom atafiimip ko. Unang nikil kaa tolbip kiili, Makdala kayaak unang Maria ukol, Jems so, Josep so, alap imi awak Maria ukol, Salomi ukol, imi afalop kusal yakal nikil kanolin kiita tolbip. Kemin,
MAR 15:41 siin kawu, Yesus ami Provins Galili kaptamu bomda tal-unem-soma kaali, unang asuumano kalawiili, Yesus anang tal-une-bamdip imi ima fuuyim-bam ale, imi tik-daayip tal-une-bam kemsip. Kemin isole, imi afalop kusal unang yaapkan iso, nikil iyo maakup Yesus aso tal Jerusalam tal-silip kiili, tal tola-bomdip, Yesus ayo atafiimip ko.
MAR 15:42 Tunum ma Josep awasekim kaali, abip Arimatea kayaak ali kamokim tangbalim o akan-kan-umbip. Kemin, ali God ami unang tunum tiin molokoma kaami am daan tiltam tabokomu kaami liip-kup fen-tabasa. Kemin, ali utamaya, Sabi kaa, God ami iintang am daanula, kanu-mokomip ami mafek mafek ayo dot-bilip bii am tiinu kala, kala-lomda suun-daalama disa kuno din Pailat ami dik-daala ko: Kapyo, yaap o, kalap namti, Yesus ami as kuli kaali, kup-napla, kulii-unon o, kalalila tili no, aka dik-daalaya,
MAR 15:44 Pailat ayo fanang alik tam banelu fanang dakamsile, Kwin, kaata fan taana ne? daa ye? kemsi 100 soldiya imi kamokim ami weng naan-daalala tildang tala, Pailat ayo dik-daala-lomda: Fan, Yesus kaa abiltap saakna ema? akala,
MAR 15:45 Ayo, faneng ali sawaayak kawu taanba te! akale, 100 soldiya imi kamokim ami weng kaata-kup, weng san-ilomda Josep ami bokola-lomda: Yaap kemin, din-ilomdap kuluu-kulii-din bululan o, akaya una ko.
MAR 15:46 Makdala kayaak unang Maria uso, aa awasekim Josep awak Maria uso, alep iyo talalu atafiimupla, ayo dibii-din doku bulula kala kalum o, kala-lomdip talalu atafii-bam iliwa, Josep ayo din ilim namaal ma molaya, aptum ma aso alep din-ilomdip Yesus kaayo, taldaa dabuu-lomdip ilim ta falala-lomdip dibii-din kom tem tunum ilta tuum tem kaayo, kaluusip kaptamu dawaa-lom tuum tem kaami saal ayo tuum dukum ma taa-bi-lom talalu-silip. Kemin, kuuta baplun baplun kulii daang tem ayo akii kela uniwa kawu, unang alep kiili, kanubip kaayo, alik atamip ko.
MAR 16:1 Kulaa God ami iintang am ayo disa kelule, Makdala kayaak unang Maria ukol, Jems ami awak Maria ukol, kano Salomi ukol, nikil iyo tang tangbal-kup tabin ok ayo saanbi kuliilip tii kulii umbital Yesus ami angtiil ilik daalupla yo, kala nikil saanbi.
MAR 16:2 Kutiilip se sintam Sande am maakup kaami kutim malang tem atan uyo kama tik-daa kulaalu tal asal asal kem-sulule, nikil iyo Yesus tuum tem dap-tiibip ayo din atamum o, kalalip tal-bom ale,
MAR 16:3 nikil ilmi baka-bamdip bokolip: Tuum dukum ma baplun baplun kulii yang saal lela-silip kaali, dukum kemin, kaa kanta dik-daa kulaayila yak banula, tam atam unokomup i? kem-tal bom tiyang daalipla, amitom saal kaa busuuba kala, kala-lomdip,
MAR 16:5 nikil iyo yak aba tam tuum tem tam ulip, Tunum kasaa ma ilim namaal-kup tabasa ma dildaak tini-lomda, tal aba yak tingtuplo kaldangu tiinba kala, atam suuniple,
MAR 16:6 ayo nikil imi bokoya-lomda: Nikil kipyo! kibi nami nitam suunin daa; Nasaret kayaak dabak as diim daa aalip saakba ami fanang fen-talabip. Yale, ali kalawu bombe disa; ali tam tiinda, tuum tem kaltam kelala, tam bana te! Yesus kulaa dibii-tal kultamu buluu-silip. La, tii kala abiin-kup kela umba kemin, atamdiwa,
MAR 16:7 nikil kipta din Pita so, Yesus almi aptum kusal malo iso, imi bokoya-lomdip: Yesus ali siin kawu bokoya-lomda: Nasiik wak-toloya unila, din Provins Galili kawu nita-mokomip o, yakase. Kemin, kaa fan, asiik wak-toloya umbaba. Kemin, din atamin o! kala kanum bokoyin o! kala ko.
MAR 16:8 Kemin, nikil iyo atam suun-daa wulwaal-kup tap-tap-sile, kulaa tuum tem kaayo, kela tiltam saaklo aba, uka-daalip unip. Lale, iyo suun-daabip kemin, tunum so ma bokoyilalip dinim kelip ko.
MAR 16:9 [Yesus ayo Sande kutim malang tem tam tiindala, diildiil din Makdala kayaak unang Maria umi diim din fatapna atamule, siin kawu, sinik mafak fetkal ita unang kuumi diim kawu bom ililipla, Yesus ata fotabamna unaasip kuuta.
MAR 16:10 Kemin, unang kuu Yesus atam-ilomdu, uyo din tunum nikil Yesus aso ilsip imi bilip kawu din ulu, nikil ili aket uluum keya-bulu bomdip amabip kala, din itam-ilomdu
MAR 16:11 bokoyu: Kipyo! Yesus kaali, asuk tam tiin kawong kela ilaya, atamdi tili no, yuku. Katale, ili unang umi weng kaali, ma weng sanalip disa kewip ko.
MAR 16:12 Mulo kawu kuno, tunum alep ma abip dukum Jerusalam ayo kulaa kela nulmi abip unum o, kala unba-bilipla, Yesus ayo tiltam tunum kusnum alaltap ke din alep imi itamala, alep iyo atam-ilomdip,
MAR 16:13 asuk ilmi abip ayo kelalip tal Jerusalam tal-ilom Yesus atam tilip kaami sang kaata, tal aptum kusal bokoyip. Iyo aa ti kuno, aptum kusal imi weng kaa weng seyilin disa kelip ko.
MAR 16:14 Kuno, Yesus ami daang bakaalin tunum kumkal iyo biile, ima inan-silipla, Yesus ayo imi diim kawu fatapna atamipla, ayo itama yi, Nikil imi aket ayo fanang daa, Yesus ayo tam tiin kawang ke-lokoma kebip disa le, aa unang tunum tal bokoya-lomdip, Yi, ali tam tiina atam tulup o, kalbip kaa ili fan o, kalolip disa ke-lom, kaa weng sanokomup disa yo, kal-bom kebip kala, kala-lomda, kaami kalan kabak-ata nikil iyo katii-yimbi keyale,
MAR 16:15 kulaa, Yesus ayo nikil imi bokoya-lomda: Ibi nami weng tambal ayo kulii-din am bokon alik kala dik-daa kulaasu kaami unang tunum imi bakayila-tal-une-bilipla,
MAR 16:16 kanola unang tunum kawanta tal aba nami lak duulipla, oksam okoyip namti, God ayo taba-lom kiili, dong dokoyala, ilmi ban kemin kukup ayo, kela-lom tambal-kup ilokomip. Kemin ale, kanta nami lak kaayo, duulin disa kelip namti, God ata taba-lomda unang tunum iyo dukum-kup yim-bak saan-bi-lomda angtiil yol kaa kuyokoma.
MAR 16:17 Nami aket kup-nin kiili, God ata dong dakaayin-balala, mirakel o, kala kukup akal almi kusnum kusnum iyo nuu-mokomip. Kemin, kanu-mokomip kaali, ti nami win kaata-kup kufo-lomdipla, sinik mafak kii fotabamnip yak bane-biliple, kuno weng kusnum ma utamsip disa kaayo baka-bamdip,
MAR 16:18 kanola inap mafak atul-kup tabasa ayo dabuu dap-tal-fukulip aye, wok ina saaka-laamin ami inamnip aye, kiili yela saaka-laamin daa; kuno, sikil kuyak unang tunum mafak-alin imi dabom diim tiiyipla, unang tunum iyo yawaa-laa-bam ke-mokomip o, kala Yesus ayo almi daang bakaalin tunum imi kanum bakayila ko.
MAR 16:19 Kamokim Yesus ayo weng bakayimbi disa kelu kamboya kem-salale kulu, God ayo Yesus dabuu dibii tam abiil tikiin daalaya, God ami sikil tiingtuplo kawu kamokim ami baan diim kabaaku tiina.
MAR 16:20 Kemin, kanolaya kawu, almi daang bakaalin tunum namti kawu, yak abip ma ma alik kiiyo, bakayila-tal-une-bilipla, Kamokim Yesus ami Sinik Tambal ata taba-lom iyo dong dakaayim-balaya, almi siin weng bokoyase kaali ti kanu-bamdip unang tunum iyo nikil imi mirakel kanubip ayo utamipla yi, Kiimi weng kaali, ti faneng kala, kemsip ko.]
LUK 1:1 Nak-tunum kamokim Tiofilus kaa tiinsap o? Nali Luk nata sukon kalawaali dola kup-ton o kalalila ko. Kapkal utamsap, siin sawaalak kaali, tunum yaapkan ili God ayo taba-lomda mafek mafek yaapkan kiili numi iipyak tem kaptam-ami kanumsa kaami sang kaali, weng san kaa-bam ale, dik-dakaya-tal-une-bam ifii-bam dolsip.
LUK 1:2 Tunum ilmi tiin alep alep Yesus kaa atafiimsip iyo ata-bom-iliple, Yesus ayo, kamasi kaptoowu kanum yakyak kulii umbital kula diila kala, kalbip-kup; kulaali yikal Yesus ami weng kuu nuli bakayin-bilipla, weng san-kan-tabasup. Kemin ale, tunum kawanta sukon kaa tunum dola-silip ili Yesus ilmi tiin alep alep atam-silip, ilimi bon tem weng kaata, weng san-ilomdipla dola-dola-kemsip.
LUK 1:3 Kulaa, nakal kamosinim kaptoowu sukon kala dola-silip umi diim ayo tik-tii-bamdila utafii-bam ale, unang tunum imi bon tem kawu kuluu laa-bam kanu-bomdila, weng anung anung kiili, kuluu kuyak-kuyak-ke-lomdi tambal-kup afetusii. Kemin ale, Tiofilus kapni dola kup-tila,
LUK 1:4 utam-somdapla, weng dola-lom kup-ta-silip kabak-ami miit kaali, bam-daa utam-ilomdap atin ti kaal kelan o kala-somla ko.
LUK 1:5 Herot kaali, Provins Judiya kaptam-ami kamokim o kala king ke bom-balaya, tunum awem ma bombe ami win kaali Sekaraya. Ali awem tunum Abiya ami man loop kaptoop ata kemin, ami kalel umi win kaali, Elisabet uli awem tunum Aron ami manum kaptoop ami man loop.
LUK 1:6 Kemin, God ami tiin diim kaali ti akam kiimi kukup kaa ti tambal-kup kutal-fuku kulii-taba-lom ale, God Dukum ami weng kuka-daasa kaali, alik tambal-kup tabuu kutama taba kesipla,
LUK 1:7 kulaa, Elisabet uyo man dinim kelu akam laabipla, biile kulaa unang sawalnule, imak akal kuno sawalna kelipla,
LUK 1:8 kulaa, Sekaraya kaami tunum miit imi okok kemin am kaali daanule, kulaali tunum iyo Jerusalam tam lotu am awak diilim kawu okok ke-biliple, Sekaraya akal God ami am awem kaptamu tam bomda awem tunum ke ilin imi ok kaali, okok kema.
LUK 1:9 Kemin, awem tunum imi uldaa-dabuu-laamin kaami kukup kaata kuluu-lomdip Sekaraya ayo uldaa-dabuuliwa, tam God ami atin ti am awak awem kaptamu tam-ilomda, as ma kaami dan kaata kuluu-lom, as kaa kuyak daala kiin-balala, as lak so, tang tambal so, kiita God ayo ataba-kup, tang tabe-balala, fiyaap duu-mokoma no kala as kuyak daala kiina ko.
LUK 1:10 As dan kaami as ayo kuyak daala kiin-bulu bom-ilale, unang tunum yaapkan iyo ilmi kukup kaata kuluu-lomdipla, tam lotu am diilim ami mepso kulu bomdip beten kemip ko.
LUK 1:11 Beten kemiple, God ami ensel ma kasentap-kup tal as dan ami as kuyak dakamin umi baan diim kabaak-ami balang diim, tingtuplo kulu tolnale,
LUK 1:12 kulaali Sekaraya ayo atam-ilomda, kwin! fanan taal-bi-lomda atam suunale,
LUK 1:13 ensel ayo Sekaraya ami bokola: Sekaraya kapyo, kabi suunin disa yo! Kapni beten kebap kulaali, God ayo weng sanba kemin, kapni kalel Elisabet uyo man tunum man ma kuulokomu. Kemin, ami win kaali, Jon o akan.
LUK 1:14 Kuulokomu kaali, akam ipni aket tem kabak-ali atin ti akal tambal ma keyilule, fiyaap duu-bam ale, unang tunum yaapkan yakal ti kanola ami fiyaap duu-mokomip o.
LUK 1:15 Dukum ami tiin diim ayo, ali win tabin keba-kup, God ami ok awak dukum uyo kutal-fuku ke-lokoma no. Ali wain ok mafak atul-kup tibin so kaali, ayo inokoma disa yo; kuulokomu kawu, God ami Sinik Tambal ayo tal ami aket tem kabaku donga-lom suunkup ilokoma ko.
LUK 1:16 Jon ata, Israel-miin imi bakayin-balaya, yaapkan imi aket fukunin uyo fal-siki-lomdip, Tunum Dukum God ami lak uyo duulokomip.
LUK 1:17 Kemin, God ami Sinik Tambal ata Jon ayo dong dakaan-balala ami kukup sole, titil so, ayo God ami weng ku-fatap-daa bakayin tunum Elaija ami kukup sole, titil so, ultap kelaya, asiik Kamokim ami bon tem tunum ke taldala, awil-fakal imi kukup mafak mafak ilmi man imi kukaayilin uyo takan-tiiyilale, awil-fakal imi aket uyo, man imi kuyipla, alimal iyo abiin tambal-kup tiinokomip o. God ami weng kuyang saak tiimin tunum imi dong dakaayin-balala, imi aket fukunin mafak so, kukup mafak so, uyo kulaale kukup tambal so, aket fukunin tambal so, kaata-kup kutal-fukulipla, ayo tunum so, unang so, iyo Kamokim ami sang kaata bakayin-balale, kiimi aket fukunin uyo dong dakaayin-balala, yakal ilmi aket uyo fal-siki talalulip kala, kala-somdala Kamokim ayo talokoma kayi! kala ensel ayo kanum bokola ko.
LUK 1:18 Kanum bokolale, Sekaraya asiik ensel ami bokola ko: Nali dok kano-somdila, weng kaluuli utam, Awu, faneng u kalokomi ni? Nakal tunum sawolnile, nami kalel wokol kano sawalnu kesup kaali yoko? akale,
LUK 1:19 ensel asiik ami weng uyo maan-tela bokola: Nali God ami okok kemin tunum diildiil Gebriel nata, God alta nam-baala tal-ilomdi, God ami kalaan weng tambal uyo bokop-ton o kalali tili te!
LUK 1:20 Kemin, kabi weng kala weng selan aa! Kabi kamala kaali, nami weng uyo weng selin disa kelap kala, kala-somdala God ali kapni del tem weng uyo dal mop-ta kemin, weng kaa baka-mokomap disa ke-bom bii nami weng bokop-ti uyo, tiltam ilom tituun kem-sulule, kapni kalel uyo man kuulula kuyaku, kapni del tem uyo, asuk weng kaa baka-mokomap o, aka ko.
LUK 1:21 Kemin, ensel ayo bakaan-bala, bom ilale, unang tunum iyo Sekaraya ami fen-bam ale, aket fukun-bam bokolip: Kwin! Sekaraya kaa, kanimin ma tiltam tulula, ma nuu-bamda am awem kaptamu tiinba ni? kal-bomdip aket yaapkan fukun-bamdip kanumip.
LUK 1:22 Sekaraya ayo kulu tiltam abip talale, unang tunum iyo atamipla, weng bakamin dinim kela tiltam abip tala kala, kalbip-kup atam ale, Kaali God ami am awem kaptamu mafek mafek akal kusnum ma atama nema yo? kalalip kanumipla, Sekaraya akal utama yi, Nami del tem ayo God ata dal-mop-na kala, kalalaya, sikil ata-kup unang tunum imi kukuyin-bamda kanolin kanolin o kema ko.
LUK 1:23 Kemin, Sekaraya ayo lotu am diilim umi okok kebi disa kelule, kulaa ayo Jerusalam kaptam ayo kelala almi abip unala
LUK 1:24 kemin, kulaa din bombii luuka le, kulu ami kalel Elisabet namti unang sawal diim kulu man kumni! kala, kalbu-kup, kulaa am kaptamu bom-bulu bii, kayoop awakal kiita duk-duulu. Kemin,
LUK 1:25 Elisabet uyo boko-lomdu: God dukum alta olen daap-na-lomda nami man dinim bom-laabi kaami fatom uyo kukan-tiip-namba kemin, kamala kuluwaata unang tunum imi tiin tem uyo fatom dinim kep-nu no.
LUK 1:26 Kemin, Elisabet uyo man kum ke-bom bii kayoop bukupkal kiita dakan-tii kem-sulule kawu, God ami ensel Gebriel ayo dabaala tal Provins Galili kaptam-ami abip ma bombu kaali, Nasaret kawu tal-ilomda,
LUK 1:27 unang sii ma bombuu umi win kuuli, Maria kemin, Josep ami weng bak-daalip bom-ilule, ali King Devit ami manum kaptoop ami loop kemin,
LUK 1:28 ensel ayo tal bokowa-lomda: Nafalop kaa laabap o? Tunum Dukum ali mafek mafek sakbaalim dukum ma kup-ton o kalalaya, uldaa-tam-buuba. Kemin, kupni diim kulu tiinba no, wakale,
LUK 1:29 Maria uyo weng kaa weng sandula, aket dukum-kup fukun-bulula, kulaa yak kanolin weng kaata, kanimin sang ma bokop-na ni? kemule,
LUK 1:30 ensel ayo bokowa: Maria kupyo, suunin disa yo; God ali ti kupni fiyaap uyo duu-bamdala uldaa-tam-buuba kemin ale,
LUK 1:31 kubi man kum ke-lomdap tunum man ma kuulokomap ami win kaali Yesus o, akolap ko.
LUK 1:32 Kemin, ali bom bii-lom kaata kamokim kelaya, ami win kulaa fan Sakbaalim Dukum God almi Man o kala God ayo kanum bokolokoma. Kemin, siin sawaayak kaa Man kaami awaalik Devit ali kamokim king ke-bomda bom ilsa altap kelaya, God Dukum ayo Man kalawaasiik uldaa-dabuula tiltam kamokim ke-lokoma. Kemin,
LUK 1:33 kaata taba-lomda Jekop ami man loop Juda kayaak kaptoop unip kipni suunkup suunkup tiin molokoma. Kemin, ami tiin molokoma kaptoop ali disa ke-lokomu disa te! Kanolin-kup ilokomu no, kala kanum bokowa ko.
LUK 1:34 Kala kanum bokowale, Maria usiik ensel ami bokola-lomdu: Kaa fan bokop-nap lale, nali sii bombii kaa dok kano-lomdila, man kaa kuulokomi ni? akule,
LUK 1:35 ensel asiik bokowa-lomda: Kuwe, God almi Sinik Tambal alta tal kupni iipyak tem unale, God Dukum alta dukum-kup tam-titil-diilokoma no! Kemin, man kuulokomap kaali, fan atin ti ban kemin dinim ale, Man kaali God almi Man o akan-kaa-mokomip te!
LUK 1:36 God ali titil tibin kemin, yak mafek mafek alik kiili, kanolama. Kemin, kupni kokneng Elisabet uyo, sawalsu. Katale, kuno ti man kum kebu. Kemin, uli man tunum ma kuulokomu. Kemin, siin kaa, uli man dinim kesuu no, ken-umbip. Yale, man kumun-alomdu bom bii kayoop bukupkal duk-duubu no, wakale,
LUK 1:38 Maria usiik bokolu: Nali Dukum almi bon tem ti kultam daalin unang kemin, mafek mafek sang kulu bakap-nimbap kulaa, kuno kunop-nama no, akule, kulaali ensel ayo kambowa tabana ko.
LUK 1:39 Kewa unale, kulaali Maria abiltap bung ayo webi kuliilu tam aba yakyak bilin Provins Judiya bokon kaami amdu tem kawu abip ma bombe kaptam banu kemin,
LUK 1:40 yakyak din Sekaraya ami am tam ilomdu, Elisabet umi weng fokowa-laam-sulule,
LUK 1:41 kulaa Elisabet umi man unaak mat tem kawu bombe namti uunfoko tam aba daak aba keba kala, kalale kulu, God ami Sinik Tambal ata Elisabet umi dongnu kewala
LUK 1:42 dukum-kup Maria umi bokowa-lomdu: Dukum ami dong dakaap-tin kup-timba kaa, unang alik imi dong dakaayila-laaba ultap disa; kupni dong dokop-tamba kaali, sakbaalim dukum ale, man kupni mat tem kabaku bombe kaa Dukum ami dong dakaalin ayo kola keba ko.
LUK 1:43 Kwin i! nali win dinim kaa, kupta Kamokim ami awak ke-lokomap kawi! Kanimin o kalalap nami fanang kala talbap?
LUK 1:44 Kupni weng umuup-nap weng seli kaata, nami man mat tem kuldaku bombe ayo weng sandala, fiyaap duu-bamda uunfoko tam aba daak aba kema atami.
LUK 1:45 Kulaa tambal kemin, Maria kupni Dukum ami ensel weng kutiip-timba kaa fan tituun u kalap kemin, kulu Dukum ami weng kuka-daaba uyo kup-ta, atam-ilomdap atin ti fiyaap duulokomap o, kala Elisabet uyo Maria umi kanum bokowu ko.
LUK 1:46 Maria uyo Elisabet umi weng kaata, weng san-ilom baal wii-bamdu bokolu: Nami aket tem kaldaak-ali fiyaap dukum kep-nu kemin, Dukum almi-kup dap-fiil tii-bomdi bakamon o kalalila kemin,
LUK 1:47 God ali nalmi iliim bomin tunum kemin, nami aket tem kaldak-ali fiyaapmin dukum kep-nimba kaali,
LUK 1:48 dok kata naa kalolip: Nali win dinim unang katale, God alta nami aket tem uyo atam-ilomda uldaa-nam-buuse. Kemin, kaptoop kaptoop unip kaali, unang tunum alik iso, Man iso, ili nitamiwa yi, God ata mafek mafek tangbal ma kup-na kala, kala-lomdip, atin ti uli fiyaap duumin unang i! kalokomip o. God alalta titil miit kayaakim kemin, ami titil kaata taba-lomda dong dokaap-nin sakbaalim dukum uyo kup-nimba. Kemin, utamila, God ami win uyo atin ti ban kemin dinim; atin tambalim dukum bombuu kala, kala-somdila ami tong kaata kano bakamon o, kalbi ko.
LUK 1:50 Dok kanolin kiita God ami suun-bamdip ami win uyo kufola-lom ami weng uyo kutal-fukulip namti, God ali kiili olenin-kup kamayin-bamdale, imi man loop tap-tiila unip kaptoop ayo olen-dakaayin ayo ti kanolin-kup kanun-una.
LUK 1:51 Kemin, God ami titil dukum kaata kuluu-lomda unang tunum God ami weng, weng san-kaamin dinim; kuyang saak tiimin iyo fotabam-nala abiltap ukadaa unaa-silip.
LUK 1:52 Kemin, God ayo taba-lom tawaal diim kaldaak-ami tunum win tibin iyo yam-baak tabiile aa, tawaal diim kaldaak-ami win dinim tunum ita yim-buu yim-fosa no.
LUK 1:53 God ali taba tunum mafek mafek dulu iipnip kiimi men tem uyo dongnu keyinba-kup ale, tunum win soyal kelip iyo mafek mafek kayaak kiimi men tem kaata disa; kamboyim-bam kem-tabasa.
LUK 1:54 Kemin, siin sawaayak kawu, God ali numi awil-fakal imi bokoya-lomda: Nali ti dong dakaayokomi no, kalba-kup ale, asuk Abraham asole, ami man loop iso, imi bokoya-lomda: Nali alik ibi suunkup kaptoop kaptoop unip uyo dong dakaayokomi kayi! kalalaya ami weng kutiisa uyo lokonsu dinim; kano aket fukun-bamdala, almi miining Israel nuyo, olen-daaya-lomda, suunkup dong dakaayila-tabasa no, kala-lom Maria uyo baal wiimu ko.
LUK 1:56 Kanola Maria uyo Elisabet uso, awaat kawu bomdula bombii kayoop asuumano iyo dakan-tiiluya asuk ulmi abip unsu ko.
LUK 1:57 Bombii luuka le, kulaa Elisabet uyo man ayo fuk-duulale, ilana man tunum kuulula,
LUK 1:58 kulaali Elisabet ulmi abip kasel so, aptum kusal so, yakal weng saniwa, Dukum alta olenin sakbaalim dukum uyo akam imi kuya-lomda, man tunum man kala kuuya kala, kala-lomdip uso maakup fiyaap dukum uyo duumipla kemin,
LUK 1:59 man unaak kaa kuulula, bombii am oklungkal kelale, awil-fakal iyo tal man unaak ami ipnaal kaayo, bo-wakan-tela-somla yo, kalalipla, nikil iyo tal-ilomdip nulmi kukup kanun-umbip kaata-kup kuluuluwa, almi aalap win Sekaraya kaata bokolum o, kemiple,
LUK 1:60 awak uyo boko-lomdu: Daa yo! Man almi win kaa Jon o kala akolup te! kala kanum bokoyula,
LUK 1:61 kulaali awil-fakal iyo bokolip: Kanum bokolap. Katale, akam kipni lo kaa kanolin win kaali, ma bom-bilip disa yo, kalbip-kup,
LUK 1:62 iyo utamiwa yi, Aalap kaa weng bakamama disa kala, kalalipla, ilmi sikil kaata-kup kukaan-bamdip Sekaraya ami dik-daalip: Kapyo, kapni man unaak ami win kaa, kantanep yaap o akokomup i? akiple,
LUK 1:63 Sekaraya asiik sikil iksi-bam kukuya-lomda: Dolmin kaami mafek mafek ma kup-nip dolnon o, yaka, kolipla, Man ami win ayo Jon o kala dolnale, awil-fakal iyo fananbile, aket fukunip ko.
LUK 1:64 Kulu maak-fak-daalin tap Sekaraya ami bon tem ayo baa-som ale, ami falang ayo bam-daala kelula, kulaali God ami win kaali, kufu-bamda fiyaap duumin dukum uyo don-bam kema.
LUK 1:65 Kemin, almi abip kasel iso, awil-fakal iso, iyo fanan-bam weng iin una-tala-ke yak abip ma ma kelula, Provins Judiya kaami amdu tem kasel iyo alik weng san-ilomdip utamipla, Man ayo fusun tam-tam una-balale, God ami titil kaali, aso bombe kala, kalaliwa, aket dukum kaali, fukun-bam bokolip: Ilomda man kaami tiltam fasuulokoma kaali, dok kanolin tunum tap ma ke-lokoma yaki? kemip ko.
LUK 1:67 God almi Sinik Tambal ata Jon ami aalap Sekaraya ayo tal dongna kela tiin mo bom-balaya, Sekaraya akal God ami weng kaali, bakayin-bamda ila ko.
LUK 1:68 Kalo, Israel-miin nulmi God Dukum ami win kufon-bam, kanumin sok aa, kaa akal talda almi unang tunum nuyo dong dokoyimba-kup ale, sok kaali, til-daa-yimba kelaya, ti yaap-kup tiinsup ko.
LUK 1:69 God alalta sawaalak almi okok kemin man Devit ami man loop ma ata uldaa-dabuulala, kaata dabaali unokoma no, kalsa. Kemin, kaa almi titil dukum kaata, kano-lomda tildaa yim-baalala, nuli kaal dinim ke-lokomup o.
LUK 1:70 Sawaalak kawu, God ayo tunum malo ma iyo ulelnala, almi tiipmin weng o kala profet tituun-kup tabin iyo weng ku-fatap-dakamin tunum kalawiita, almi weng kaali, kutiiya unang tunum imi bokoya-lomdip:
LUK 1:71 Kipyo, God ali numi yam-kasenu-lomda: I, kipni waasi so, tunum kanta ipni tit-kup bom ilin iso, ita taba ibi yam-mafak-dakamum o, ke-mokomip. Kata, nalta kanolin tunum, imi sikil diim bom-bilip, ibi yam-kan-tii im-buu im-taldang daali, nalami unang tunum alik-daap ke-lokomip te! kala God ayo yam-kasenusa no, kala God ami weng tem bakayin tunum iyo unang tunum imi bakayinsip ko.
LUK 1:72 God ayo numi awil-fakal imi bokoya-lomda: Kipni olen-daayila-somdila, nalmi weng, atin ti tambal-kup tibin kuka-daayili, kaami aket kaata kutal-fukulokomi no, kalsa.
LUK 1:73 Ultap kemin, God ali numi awaalik Abraham sole, almi man loop nuso, numi dukum-kup weng kutii bokoya-lomda:
LUK 1:74 Ibi nami lak uyo duule, suunin disa kemin o, kalalila, nalta kipni waasi imi sikil diim bom-bilip, ibi yim-bu-lomdila im-taldang nalmi miit tem kulu daalokomi. Kemin,
LUK 1:75 tawaal diim kala-bomdip suunkup ilip kaa, Nali ibi atin ti tambal-kup bom ale, nami tiin diim kuluwu tituun-kup tibin kukup kaata-kup kutal-fuku kulii-una-biliwa yo, kalalila, ulela im-taldang daalokomi no, kala God ayo Abraham so, almi man loop nuso, numi bakayinsa no, kala Sekaraya ayo kanum bokoya-lomda,
LUK 1:76 almi man unaak Jon ayo bokola ko: Man unak kapyo, bom-bi-lom kaali, Abiil Tikiin God ayo bokop-ta-lomda: Kabi ti nalmi weng bon tem weng bakamin tunum o, kalokomi. Kemin ale, kapta kapsiik dusiin daa un-bomdap Kamokim almi liip uyo, talalu ku-mikil dakala una-balapla, talokoma no.
LUK 1:77 Kapta, tunum unang iyo afet daa im-tii bokoya-lomdap: God akal kipni uluum uyo takan-tiiya-lomda, talalu-yimulokoma no, kal-bom bakayilapla, kaal ke-lokomip.
LUK 1:78 Kemin, God ami aket aa, fanang uyo, alik numi kuyale, aa olen-daayila ke-somdala utama yi, Numi aket fukunin kaali, malang tinilule, nuli saaka-yaamin kaami atul kaata, suun-bam ken-umbup kala, kalalaya alta tunum ma tam abiil tikiin kawu aso maakup ilin kaata, uldaa-dabuula talokoma. Kemin, kaami talokoma kaali, kutim atan tiltam taba-lomdu tak-daalu una-talaba kebu ultap ke numi aket fukunin kaali, bam-daa imuba-kup; malang tinibu uyo iilfoya, alta balili-kup kala dik-diiba bom ilin kaami kukup tambal kaata-kup kukuyin-balala kanu-mokomup o, kal-bomda Sekaraya ayo tiipmin weng tap kela bakayin-bamda baal uyo wiima ko.
LUK 1:80 Kemin, man ayo bom-bii-lom fasun-um-bom ale, almi angtiil so, sinik so, iyo titil kuluu-lom, kulaali bilin unang tunum dinim bokon kawu bom-bala, bom bii almi okok kemin am uyo daan tiltam tulu kala, kalale, kulaata tal fatawa-lomda Israel-miin iyo kukuyin-bisa ko.
LUK 2:1 Kemin, Jon ami kuusu diim kuyaku, King Ogastas ayo lo ma kutii, almi kiyap imi bokoya ko: Ibi din-ilomdip unang tunum alik nata tiin mosi imi win kaali, dolmin o! yakala,
LUK 2:2 kulaali kamosinim win dol-yila-silip kabak-ata kemin ale, Kwirinius ali Provins Siria kaptam-ami kiyap ke-bom balaya, imi win uyo dol-bisip.
LUK 2:3 Kemin, unang tunum alik iyo, Din bokolupla, numi win uyo dol-yilak o, kalalipla, kelalip ilmi atin abip unemip.
LUK 2:4 Kemin, Josep ali King Devit ami man loop kemin ale, Provins Galili abip ma kaali, Nasaret kawu laaba kaa kambolala, yak aba bital almi abip miit o kala ami awaalik Devit ami abip kaba tala kemin, abip kaa tala kaptam-ali Betleam o ken-umbip kaa, Provins Judiya kaptamu bombuu.
LUK 2:5 Kemin, Josep sole, Maria weng bak-daalip bombu la, uli man kum kemin uso, alep iyo, Din bokolupla numi win ayo dol-yilak o kalale, alep unip.
LUK 2:6 akam iyo yak aba bilin Betleam kaptam bom iliwa, Maria uyo kulaata man namti fuk-duula kala kalu. Lale,
LUK 2:7 unang tunum fatal kalo talemin imi tal sin una-tala-kemin am uyo utamiwa yi, Unang tunum yaapkan iyo tal-ilom, am uyo alik muup-daabip kala, kalalip, akam iyo bulumaki imi am kutamu ilomdip, Maria uyo Man tunum Man diil ayo kuulule, kulaa ilim falala dibii daak bulumaki imi ima inin kabas tem kabaaku dabaak tiilu ko.
LUK 2:8 Kutamiip kuyaku, abip umi saaklo mepso tikiinal kulu sipsip tiin molin tunum iyo kulu bomdipla, ilmi sipsip tiin bom iliple,
LUK 2:9 God Dukum ami ensel ma kasentap talala, Dukum ami yokon dukum ma imi diim kawu falala-kup kalula utam-ilomdip, walwaal-kup tap-tap-ke-bam suunipla,
LUK 2:10 ensel ayo tal bokoya-lomda: Kipyo, fanan-bam suunalip kemin, nali God ami kalaan weng tambal kaata, kuliili talabi kemin, uta kanoyula unang tunum alik iyo fiyaap duu-mokomip o.
LUK 2:11 Kanola am daanbu kulu din Devit ami abip kawu unang ma Man kuulu kemin, Man kaali kipni Talalu-yimu-laamin tunum ale, God ami uldaa-dabuusa tunum Kraist kaali, Kamokim o.
LUK 2:12 Kamala-kup kulu ibi din-ilomdip, Man kaa fen yak aba din ata-mokomip kaali, awak uyo ilim ta falala-lomdu dabaak bulumaki imi ima inin kabas tem kabaak tiilu bombe kala, kalalip atamip namti, Awu, Man namti kulube no! kalokomip o, kal-bomda,
LUK 2:13 bakam-salale, maak fak-daalin tap abiil tikiin kayaak ensel atin yaapkan iyo tal atamipla nikil iyo, God ami win uyo kufu-bamdip bokolip ko:
LUK 2:14 Kaali tunum unang ili tam abiil tikiin kayaak God ami tong kaata-kup baka-mokomip. Kemin, God ayo dok kanolin unang tunum ma tawaal diim kalawu bom-bilip imi aket falit ayo kuyon o, kalokoma kaali, kuyilala, kiimi aket tem kaali, bilili-kup keyulula, ilokomip o, kemip ko.
LUK 2:15 Ensel iyo kanum bokoyilalip kamboyila asuk abiil tikiin uniple, sipsip tiin saanin tunum iyo bokola una-tala-kemsile, bokolip: Kalo, uniwa nikil dindup Betleam kawu, mafek mafek akal alik ma tiltam tabula, Dukum ata numi kukuyila kaayo, nikil din-ilom atamum aa! kalale,
LUK 2:16 kulaali nikil abiltap fen yakyak aba bilin ulip, Awak Maria sole, Josep so, akam iyo bomdipla, bulumaki imi ima inin kabas tem kabaaku Man ayo akanba kala kalalipla,
LUK 2:17 kulaa nikil iyo ensel tal Man kaami sang bokoya unba kaa tal unang tunum imi bakayila-tal-une-bilipla,
LUK 2:18 alik iyo weng san-ilomdip kanumip kaa, sipsip tiin molin tunum tal bokoyip kaata aket yaapkan fuku-dakamip. Katale,
LUK 2:19 Maria uli weng alik kiili, kuyak aket tem daa, aket fukun-bam ilu ko.
LUK 2:20 Sipsip tiin molin tunum iyo asuk kela yakyak un-bomdip, God ami win kaata-kup dap-fiil tii-bamdiwa, ilmi utabip so, weng sanbip so, kaami aket uyo fukuniwa yi, Ensel imi weng bokoyinbip kabak-ali ti fan tituun weng tiltam tababu kala kalalipla, God ami mafek mafek akal alik ma kukuyila itamip kaami fiyaap kaata duumip ko.
LUK 2:21 Am oklungkal kelala, Man unaak imi ipnaal bomin kaami am kaali, daan tiltam tulule, kulu Man ami win ayo Yesus o aka, awil-fakal iyo bokolip kemin, win kaali, siin kawu, awak man kum kelin disa bom ilula, ensel ami tildaak win kaa bokowase kaata-kup bokolip ko.
LUK 2:22 Awil-fakal yakal atamipla, Kayoop maakup kelu awak umi iintang am disa kelu man im-taltam dakamin diim o, kala Moses ami Lo kutiisa uyo daanu no kalalipla, man ayo dip-tamalip bilin Jerusalam kaptamu Dukum ami kolum o kalalip iyo dibiilip unip. Kemin,
LUK 2:23 Dukum ami weng kuka-daala Moses ata Sukon Tem dola kutiisa uyo boko-lomdu: Tunum man diil kuulip kiili, Dukum ami kukaalin o, kala-som ale,
LUK 2:24 kanolin am uyo daanon o kalule, awon abim alep tap aye, awon abim atin aket iip kama awon alep imtal-fuku imbii tal Dukum ami kukaalin o! kalsu. Kemin ti, kanum unip.
LUK 2:25 Kalsu kemin, kulaata abip Jerusalam kayaak ma ami win kaali, Simeon ali tunum tambal-kup tabasa le, ali God ami lak-kup duu-bomda God ami kukup-kup fuku-bom ilin tunum kemin, ali bom-laaba, God ayo Israel imi uluum uyo kukan-tiiya kala, kalon o kal-bomda fen-laaba, God ami Sinik Tambal ayo aso bomda laaba kemin,
LUK 2:26 bokola-lomda: Faneng, kabi saaknin disa ilomdapla Dukum ami weng kutiisa kaa, nami uldaa-dabuusi tunum ayo dabaayi din unokoma no, kalsa ayo talala, atamdapla taanokomap o, ansa.
LUK 2:27 Kemin, Simeon ayo God ami Sinik ata dap-titil-diilala, din lotu am awak diilim kaptamu bom-balala, Yesus ami awil-fakal iyo Man kaa dibiilip tam lotu am kawu lo kuka-daasa uyo kutal-fuku-somdupla, Man ayo Dukum ami kolum o, kala,
LUK 2:28 dibii tam daaliple, Simeon ayo Man kaa dabuu dap-mikile, God ayo yaap ke yo, anba-kup bokola ko:
LUK 2:29 Kulaali, Dukum almi weng kutiisap namti kula tiltam tulu utami no. Kemin, nali ti kaltapni bon tem-kup daa-yilin nayo, fiyaap duuli kemin, kulaata kam-bop-nap taanon o kala-somla ko.
LUK 2:30 Numi iliim boyokoma tunum kalawaali, fatapna nalmi tiin tituun atami kemin,
LUK 2:31 kuluwaata unang tunum alik iyo atamin o kalalala, uldaa-dabuu dabaala talba te!
LUK 2:32 Kalawaali yokon dawang alaltap o. Israel-miin imi aket fukunin kaata-kup daa; unang tunum kusnum imi aket fukunin kakal ti iilfo ifiyimulala, kapni tituun-kup tabin weng kaali, uta-mokomip ale, ali kaltapni tunum unang Israel-miin iso, imi yim-tama taldang kapni miit tem tiilala ilokomip kayi! kala Simeon ayo kanum bakama ko.
LUK 2:33 Simeon ayo Yesus ami sang kaali, God ami kanum bakaan-balala, awak-aalap iyo aket yaapkan fukuniple,
LUK 2:34 kulaali Simeon ayo God ami dik daala-lom bokola ko: Alimal kiili tambal-kup dong dakaayin-balawa yo, kala-som ale aa, Yesus ami awak Maria umi bokowa ko: Kupyo, weng selan, God ali Man kalawaali uldaa-dabuulaya tiltam fatapnala kawu Israel unang tunum yaapkan iyo ami weng kuluuli, weng san-kaamin dinim ke-bamdip God ami liip uyo kela yang bane-bam, ali ilmi uluum tem diin-yaa-bam ale, Israel unang tunum kusnum yaapkan ita ami weng kuuli, weng san kaa-bam ke-bilipla, alta talalu-yimu-lomdaya, yim-bitam almi abip unokoma. Kemin, God alta dabaala tal-ilomda kukuyilala, utamiwa yi, Ali kanolin tunum o, kalokomip. Katale, unang tunum yaapkan ili baka-bamdip: Daa yo! kanolin tunum kaa tambal disa yo, kalokomip. Kemin,
LUK 2:35 kaali kayak kayak kii utamiwa yi, Kamosinim kaali, ilmi aket kaa kuwaa-bisip la kamala kawu ku-fatap-daayu no, kalokomip. Kemin, ilom am ma daanula, kupni Man kaami kukup kaa kanolokomip kaali, yeng man tela yol tabebu alaltap ke, kupni aket tem uyo bikip-tu, uluum awak dukum kaali, tam-bak molokomu no, kala Simeon ayo Maria umi kanum bokowa ko.
LUK 2:36 God ami weng tem bakamin unang Ana umi aalap Fanuel ayo Asa ami miit kayaak tunum kemin, Ana uyo unang sii bom-ilom tunum din ke bom bii wasital fetkal dakan tiile,
LUK 2:37 kulaa imakim ayo saaknale, kuno ulufin ilom wasital 77 ma duk-duu kaaso kaaso kuyaku-diyaku-ke, wasital almi-kup 84 kiita disa keliple, kulu sawalsu. Kanolu kata, Ana uli ti suunkup lotu am awem kaptamu, taap so, kutamiip so, uyo ti kawu kup bomdula God ami lak kaa ti yikik-duu-bam ale, beten uyo kanumin-kup kemu. Kemin, am malo ma imi diim uyo ima inin disa kela, ima fala lotu am diilim kaptamu beten kaata-kup ke-bam ilu ko.
LUK 2:38 Kemin, Simeon ayo Yesus ami sang kaali, awak-aalap imi bakayin-balaya, Ana ukol tal lotu am tal ulula, Man ayo bombe kala, kalbu-kup, kulaali atamu yi, Kulaata nu! kalale, God ami yaap ke yo, aku. Kemin, Jerusalam kasel alep tap maakup tap ili God ami fen-bilipla, alta taldala numi waasi imi sok kaali, baayila, nokol nulta-kup kelum o, kal-bomdipla, God ami fen-tabasip. Kemin, Ana uyo alik imi bokoyulu ko: Kipyo, Man kalawaali kipni fen-tabasip kuluwaata te! yuku ko.
LUK 2:39 Kemin, Josep so, kalel Maria so, alimal iyo Dukum ami weng kutiisa kaali, kayoop maakup kelu awak umi iintang am dinim kelula, Man imbii tiltam am talemin umi kukup kaali, alik nolip disa kelule, alimal iyo Jerusalam uyo kambola asuk nulmi abip unum o, kalalip, Provins Galili umi abip Nasaret kawu unip.
LUK 2:40 Man ayo fasuu-lom titil kutoop tinilale, aket fukunin tambal ayo kuluu kaal kemin dukum kelaya, God ayo tiin mo aket balili-kalin ayo kola ko.
LUK 2:41 Wasital maakup maakup ami diim kaali, Yesus so, ami awak-aalap so, alimal yakal God ami iintang am o kala, Pasova ima inin am uyo daanon o kem-sulule, kulaali Jerusalam kawu din imbi tal-tal-ken-umbip. Kemin,
LUK 2:42 kulaa Yesus ami wasital ayo talaba tam talangkal kelale, Pasova kaami am kaali daanule, kulaa asuk imi Pasova ami kukup uyo fukulum o, kalalip alimal iyo Jerusalam unip. Kemin,
LUK 2:43 kulaa Pasova ami am ayo disa kelula, asuk alimal unum o, kalip. Katale, man Yesus ayo Jerusalam kaptamu ilala, maak lo kela unip kaali, ma kaal kebip disa;
LUK 2:44 ili kaa aptum kusal so talaba no, kalalip, bom bii am tiinule, kulu ami kayaak so, almi aptum kusal imi diim kaali, fen-tal-unebi;
LUK 2:45 man Yesus ayo atamin disa kelup kala, kalaliwa, kulaali asuk alep iyo fen yakyak Jerusalam unip ko.
LUK 2:46 Kemin, kanola akam fen-tal-unebi bii am alep kele, am asuum diim kulu fen din uliwa, Kwin! man Yesus ayo tal lotu am awak dukum kaltamu bomda God ami Lo kukuyin tunum imi iipyak tem kabaaku bomdala, imi weng kaata, weng san-kaa-bam ale, ayo dik-dakaayin-bam ke-balaya,
LUK 2:47 tunum alik aso bomdip, Yesus ami weng, weng san-kaabip iyo utamiwa yi, Ami aket fukunin sole, kukuyin tunum imi weng ayo akal weng an-anung daka-bam keba so, kaa disa akal kusnum u! kalaliwa, kwin! iyo atam-ilomdipla fanan taalbile, awak-aalap iyo fen-tal atam-ilomdip
LUK 2:48 yakal fanan taalbile, awak uyo bokolu ko: Nami man kabi dok kanolon o, kalalawa, kawak-aalap nuli kamboya-lomdapla, taldap kalawu tiinbap i? Kawak-aalap nuli fen-tal-une-bi-lom titamin disa kelup kala, kalalupla, aket mafak keyulula, aket uluum kuluu bomdupla, fen-talabup te! akule,
LUK 2:49 kulaa Yesus asiik awak-aalap imi bokoya-lomda: Kanimin o kalalipla nami fen-tal-unebip i? Nali utamiya, Nali Atok God ami lotu am diilim kaltamu bom ilon o, kalbi kaali, ibi ma kaal kebip ema? kala-lomda kanum
LUK 2:50 bokoya. Katale, awak-aalap ili ami weng kaa talalu bam-daalin disa kelip.
LUK 2:51 Kemin, Yesus ayo asuk awak-aalap so alimal yakyak abip Nasaret unip. Kemin, din bomdala, awak-aalap imi weng uyo, weng san-kaa-bam, bilili-kup kala bom-balale, awak ukol dok kanolin dok kanolin tal ami diim abebu kaali, aket fukun-bamdu, kuyak ulmi aket tem daka-bam ilu.
LUK 2:52 Yesus ali fasuu-lomda, ami aket fukunin kaali, bam-daa-lomda tambal kelule, kulaali unang tunum sole, God so, iyo, ami fiyaap kaata-kup duumip ko.
LUK 3:1 Taiberius ali Rom kayaak imi king kebi bom bii wasital tiin milii foko (15) kelale, Pontius Pailat ata Provins Judiya kaptam-ami tiin mola kesip. Kemin, kulaali Herot akal Provins Galili kaami tiin molale, kuno Herot ami fik Filip ata, Provins Ituria so, Provins Trakonitis so, kiimi tiin mo kelale, Lisenias akal Provins Abilene kaami tiin mola aa,
LUK 3:2 Anas so, almi imnon Kayafas so, amdim ita, Juda kayaak imi awem tunum imi kamok kamok kelip ke-bomdiwa tiin mo ilsip. Kemin, kulaa Sekaraya ami man Jon ayo tunum dinim bokon kawu bom-balaya, God ayo Jon kaa uldaa-dabuu bokola-lomda: Kabi nami weng kaali, kutama din unang tunum imi bakayan o, kala kanum bokolale,
LUK 3:3 Jon ayo yak aba din abip abip alik iyo Ok Jodan balang mepso kawu bom-bilip kiita, ayo God ami weng uyo bakayim-bam bokoya-lomda: Kipni ban kemin kaali, kela-lomdip aket fal-siki-lom tildang oksam wokolipla, God ayo kipni ban kemin uyo takan-tiiya disa keluk o, kal-bomda bakayila ko.
LUK 3:4 Kemin, kanu-bisa kaali, siin sawaayak kawu, God ami weng ku-fatap-daa bakayin tunum profet Aisaya ayo Sukon Tem uyo dola boko-lomda: Tunum ma ayo tunum dinim bokon kawu bomda weng dukum-kup bakayin-bamda: Dukum ami liip kaa ku-mikil daa dot-bam kem-silipla, ilanalala talak o.
LUK 3:5 Biil alik tiinaasip kiili, tawaal ta kuluu abuula tiltam tulu kewale, muuk so, amdu so, alik kiili, balela-lom ifi duule aa, liip dikil-dakal-kesip kiiso, talalula tituun-kup keliple, tuum tem liip mafaksip kiiso, talalula tambalna kelik o.
LUK 3:6 Unang tunum alik iyo God ami tunum uldaa-dabuula tal numi iliim bo-yimulokoma tunum ayo, tala atamin o kalba-kup ale, tunum kaali, weng dukum-kup bakayinba kayi! kala Aisaya ayo kanum bokosa ko.
LUK 3:7 Kemin, unang tunum yaapkan ili tal atamuple, ata oksam ukoyak o kala tal atamiple, Jon ayo bokoya ko: God ata kipni kukup mafak kaami kalan kaata, yam-mafak fuulokoma. Kemin, ibi kanta bokoyipla, ipkal aket fukun-daa-lomdipla, Din Jon atamupla, oksam ukuyokoma kaata, fan God ami aket atul kuyokoma uyo uktayokomu te! kalalip tale-bam ale, ibi inap imi tikiin kiin-bala, suun daa-lom ukadaa sak funbi unebip ulultap kelipla, nami fanang tale-bam kebip yoko? Katale, kaali, ibi uktayokomu disa yo.
LUK 3:8 Kukup tambal kaata ti kanu-bilipla, kabak-ali utamila, Kipni aket fal-siki-lomdip ipni kukup mafak kaa, kulaabip kala kalon o. Ibi nami weng kala bokoyokomi kaali, weng san iliwa: ibi, Nuli ti Abraham ami man loop kemin uktayokomu no, kala fiyaap duubip. Lale, God ata tuum kalawiili fal-sikila tiltam Abraham ami man loop ke-lomdipla, ipni abiin uyo kuluulamip kemin, ibi dotu utamdiwa!
LUK 3:9 Kemin, God ayo as miit tem kawu kaabaak ma kutii-lomda as ayo duulmon o keba. Kemin, as alik kiili dok kanolin kiita, as lap tambal ma abuulin disa kesu namti, ayo duula-lom as kuyak daala kiin-abam-nokomu. Kemin ultap o, ipkal kukup tambal kaali, kutal-fukulin dinim ke-lokomip kaali, God ata taba-lomda yam-kan-tiii-lom fokola yak kiin-abokomip o, kala Jon ayo unang tunum imi kanu-bam bakayilale,
LUK 3:10 kulaali isiik dik-daalip: Katale, nuli kalok kanu-mokomup i? akipla,
LUK 3:11 Jon ayo bokola: Dok kanolin kapta siyot alep namti, ma kaata dilduu tunum ma disa kulu bombe ami kolan aa! Ale, dok kanolin kapta ima so namti, baan-im-bamdawa yo, kala kanum bakayila ko.
LUK 3:12 Kemin, takis kaamin tunum iyo, Tal atamupla, Jon ata oksam ukuyak o, kalalip, tal Jon ami dik-daalip ko: Kukuyin tunum kapyo, Nuli kanimin kaata no-somduwa i? akiwale,
LUK 3:13 asiik bokoyila: Ibi moni yaapkan kaa kaamin daale; gavman imi weng kuka-daa-lomdip: Moni kanolin kal o kalbip kiita-kup, kuluu-yaamin o! yakale,
LUK 3:14 aa soldiya yakal asuk Jon ami dik-daala-lom bokolip: Aa nuli yi? Kalok nuu-mokomup i? akiple, Jon asiik bokoya-lomda: Ibi tunum unang ili suunin weng kaali, bokoya-lomdip: Yelokomup o. Nuli yim-tama din weng talalmin tunum imi diim daa disa ibakamin weng kaata bokolupla de-yimulokomip o, kaliple, kipni atul kaata, itam suun-bamdiwa, imi moni kaali, kukaayila-yaabip. Kemin, kanumin ayo kela-somdiwa, iltipni okok kemin kaami kun kaata-kup kuluu-lomdip fiyaap duubip-kup, ale maso ma kaamin dinim o, yaka ko.
LUK 3:15 Kulaa, unang tunum iyo Jon ami kukup kanola kaata, utam-ilomdip aket dakat kalalipla, Jon ami aket yaapkan fukun-bam ale, Kaali Kraist kaa God ami tunum, uldaa-dabuula Kamokim kesa, dabaala talokoma no, kalsa ata nema yo? kemip ko.
LUK 3:16 Kanumiple, Jon ayo alik imi bokoya ko: Kipni tunum talokoma no kal-bom fenbip kaa, nita disa; ata kamokim diildiil kemin, ata ata kelaya, nali kabaak banin kemin, fatom kep-nala, nali ami yaan-alom sok kaali, baalami disa. Nali disa ok kulaata-kup oksam ukayimbi. Katale, tunum kaa talokoma kaami almi Sinik Tambal ata dabaala taba-lomda kipni iipyak tem aket mafak fanang mafak-dakabip uyo, as kuyak daala kiin-abamnula, alik ibi tambal ke-lokomip o.
LUK 3:17 Tunum imi yeng kuluu-lomdip wiit kiita bobi kutal tii-lomdip dot-bilip bii, umi ipnaal ayo takan-tii-lomdip wiit tiil ata-kup, kuu am tiile, ipnaal kaata-kup abul-daalip kiin-tabemin o. Kemin, ultap o; tunum kaa talokoma kaa tunum unang ami lak duusip iyo afeta yim-tii foko kutam almi abip tiiba-kup, ale yak tunum unang ami lak duulin disa ita, atin ti as kiinin-kup ke-bam ten-yaamin disa; ti kano kiinin-kup ke-bam ilin kaami tem kabaaku abul-daala kiin-bam ilokomip o.
LUK 3:18 Jon ayo kanum bakayinba kuyaku, God ami weng tambal uyo bakayim-bamda, unang tunum imi aket uyo kufuyim-balaya, imi aket aa fanang aa kiiyo fal-sikilin o, kala bakayila ko.
LUK 3:19 Herot kaali, Provins Galili bokon kaptam-ami king kamokim dukum kemin, almi fik ayo taanin disa bom-salale, ayo fik kalel Herodias uyo tak-daa kuluuba-kup, kukup mafak mafak yaapkan malo iyo kuyaku kanu-bam ke-balala kemin, Jon ayo Herot ami kukup mafak uyo kanuma kala, kala-somdala, ku-fatap-daawalala kawu, Herot ayo aket atul dap-telula kulaali,
LUK 3:20 asuk kukup mafak yaapkan iyo kanu-bam ale, almi okok kemin tunum imi bokoyilala, tal-ilomdip Jon ayo sok de dibii-din kalabus am daalip bom-biisa no.
LUK 3:21 Jon ali kama sok de duulin disa, bom ilipla, unang tunum yaapkan iyo alik tal Jon ami diim tiliple, Jon ata oksam ukayin-bamda bom-balala, Yesus akal mafiing kawu tal Jon ami bokola-lomda: Oksam ukop-nan o! akale, Jon ayo fan Yesus ayo oksam ukolala, Yesus ayo beten kem-salale kulu, abiil tikiin namti saal busuulule,
LUK 3:22 God ami Sinik Tambal ayo awon abim tilin tap ke, tal Yesus ami diim aba kem-salale, kulaa abiil iip-iip kawu weng ma bokola ko: Kabi ti nalmi Man ale, nali suunkup kapni mok-kup inap-tin-bam, kapni fiyaap-kup duup-ta-laabi kayi! kala ko.
LUK 3:23 Yesus ayo bombii wasital 30 kiita duk-duulale kulu, almi okok kemin kaali, ilu-lomda okok kemsa. Kemin, unang tunum alik iyo Yesus kaa Josep almi man o, ken-umbip. Lale, kaa God almi man tituun kemin, Josep ali Heli ami man,
LUK 3:24 Heli ayo Matat ami man, aa Matat kaa Livai ami man, Livai ayo Melki ami man, Melki ayo Janai ami man, Janai ayo kaa awasekim Josep ami man,
LUK 3:25 Josep ayo Matatias ami man, Matatias ayo Amos ami man, Amos ayo Naham ami man, Naham ayo Esli ami man, Esli ayo Nagai ami man,
LUK 3:26 Nagai ayo Mat ami man, Mat ayo awasekim Matatias ami man, Matatias ayo Semen ami man, Semen ayo Josek ami man, Josek ayo Joda ami man,
LUK 3:27 Joda ayo Joanan ami man, Joanan ayo Resa ami man, Resa ayo Serubabel ami man, Serubabel ayo Sealtiel ami man, Sealtiel ayo Neri ami man,
LUK 3:28 Neri kaa awasekim Melki ami man, Melki kaa Adi ami man, Adi kaa Kosam ami man, Kosam kaa Elmadam ami man, Elmadam kaa El ami man,
LUK 3:29 El kaa Josua ami man, Josua kaa Eliesa ami man, Eliesa kaa Jorim ami man, Jorim kaa awasekim Matat ami man, Matat kaa awasekim Livai ami man,
LUK 3:30 Livai kaa awasekim Simeon ami man, Simeon kaa awasekim Juda ami man, Juda kaa awasekim Josep ami man, Josep kaa Jonam ami man, Jonam kaa Eliakim ami man,
LUK 3:31 Eliakim kaa Melea ami man, Melea kaa Mena ami man, Mena kaa Matata ami man, Matata kaa Natan ami man, Natan kaa Devit ami man.
LUK 3:32 Devit kaa Jesi ami man, Jesi kaa Obet ami man, Obet kaa Boas ami man, Boas kaa Salmon ami man, Salmon kaa Nason ami man,
LUK 3:33 Nason kaa Aminadap ami man, Aminadap kaa Atmin ami man, Atmin kaa Ani ami man, Ani kaa Hesron ami man, Hesron kaa Peres ami man, Peres kaa awasekim Juda ami man,
LUK 3:34 Juda kaa Jekop ami man, Jekop kaa Aisak ami man, Aisak kaa Abraham ami man, Abraham kaa Tera ami man, Tera kaa Naho ami man,
LUK 3:35 Naho kaa Seruk ami man, Seruk kaa Reu ami man, Reu kaa Pelek ami man, Pelek kaa Ebe ami man, Ebe kaa Sela ami man,
LUK 3:36 Sela kaa Kainan ami man, Kainan kaa Apaksat ami man, Apaksat kaa Siem ami man, Siem kaa Noa ami man, Noa kaa Lamek ami man,
LUK 3:37 Lamek kaa Metusela ami man, Metusela kaa Enok ami man, Enok kaa Jaret ami man, Jaret kaa Mahalalel ami man, Mahalalel kaa awasekim Kainan ami man,
LUK 3:38 Kainan kaa Enos ami man, Enos kaa Set ami man, Set kaa Adam ami man, Adam kulaatale, God ami man. Tunum miit namti kano-lom tunum miit ukusa ko.
LUK 4:1 God ami Sinik Tambal ayo Yesus ami diim kawu dongna kelala, Yesus ayo Ok Jodan Dal kela una-balaya, Sinik ayo dibii bidin tunum dinim bokon kabanala
LUK 4:2 Yesus ayo tunum dinim bokon kawu bom-balaya, Tunum Mafak Setaan o kala-laabip ayo tal Yesus ami dap-kukuliya, yak kukup mafak kaali ma kanola kala kalon i, kala-lomda, dap-kukubi yakyak kema ko. Am sin-laamin almi-kup 40 iyo yak baniple, Yesus ayo ima uyo ma inam-noma disa kelale, am kunolin tal unula ima tinap uyo tabelule,
LUK 4:3 Setaan ayo Yesus ami bokola-lomda: Kabi ti God almi Man tituun namti, kabi daak tuum kulaali kuluu fal-sikilapla, bret keluya, inamnap titamila, Awu, kabi fan God almi Man tituun kala tokon o, kala kanum bokolale,
LUK 4:4 Yesus asiik maan tela ko: Daa. God ami Sukon Tem weng kabak-ali boko-lomdu: Ima kulaami inam-nokomap kulaali, tiil umi kup ifamin ale, kaali kapni aket fukunin kabak dong dokop-tokomu disa yo, kala-lomdula kanum bokosu kemin, kaa kano-lomdila ima bret kaa inam-nokomi dinim o, kala kanum bokola ko.
LUK 4:5 Kanolale, kulaa Setaan ayo Yesus ami dap-tamala tii umbitam iip ma kawu daale, kulaali abiltap-siik tawaal diim kaami tunum miit ma tunum miit ma iyo alik kukolale bokola ko:
LUK 4:6 God ali bokop-na-lomda: Am bokon alik kala dik-daa kulaasu sole, tunum miit akal alik ma akal alik ma bom-bilip iso, kii kapni no, nansa. Kemin, nata-kup kii tiin mobi kemin, nalta tunum ayo ma kuluwaata no, kali namti, kaata ulduu-lomdi kup-tila, kapta tiin molan aa! akokomi. Kemin, kanola nali tunum miit ma ma kii yim-baali yak kaltapni sikil diim abamnipla, kapta taba, kiili tiin molalap.
LUK 4:7 Kemin, kabi nalmi tiin diim kulawu bokop-na-lomdap: Kabi nami kamokim o, kalap namti, tunum miit ma tunum miit ma iyo alik kup-tile, kii ti kaltapni no, aka kanum bokolale,
LUK 4:8 kulaali Yesus asiik bokola ko: Daa te! God ami Sukon Tem uyo boko-lomdu: God maakup ata-kup kapni tunum Dukum kemin, kabi tilik duung fakela-lomdap, ami win kaata-kup kufon-bam ale, ami weng kaata-kup weng san-kaaman o kalsu te! aka ko.
LUK 4:9 Aka kanum bokolale, kulaali Setaan ayo Yesus dap-tamala tii umbitam Jerusalam kawu daale, dibii tam lotu am awak dukum win sokan kaami liip kutal-fuku umbitam asal am desip umi dibim diim kawu daale, bokola ko: Kabi tifan God ami Man namti, mafek mafek ma kaata taba-lomdu telokomu dinim; kemin, asal kalawu uunfoko umbalaak tawaal diim abamnan aa! akale,
LUK 4:10 God ami Sukon Tem uyo boko-lomdu: God ali almi ensel imi bokoyilala, iyo tal tiin-molipya kabi telokomu disa yo, kala-somale, ma kaata boko-lomdu:
LUK 4:11 Ensel ita tal tam-tal-fukulokomip. Kemin, tuum daang inang ayo ma ata taba-lomdu kapni yaan kaa, lop-tokomu disa yo, kala-lom kanum bokosu. Kanolin kemin, kabi weng san-ilomdap uunfoko daak abamnawa, unang tunum iyo titamiwa yi, Awu, fan kabi God almi Man o, tokolip o, kala kanum bokolale,
LUK 4:12 kulaali Yesus asiik bokola: Daa yo! God ami Sukon Tem kabak-ali boko-lomdu: Dukum kaali, kapni God kemin, kaa dap-kuku-bam boko-lomdap: God kabi ti nami weng bokop-ti kaata-kup, weng sandap kanolawa, kayak kayak iyo utamiwa yi, U, God kabi, nami aket kaata duu-bomdawa, dong dakaap-nambap kala tiki no, kemin daa yo, kalsu te! kala kanum bokola ko.
LUK 4:13 Kulaa, kanumsi Setaan ayo Yesus ami dap-kukumin kaali, dap-kuku-balala, dinim kelale, Yesus ayo titil-fak-daala kala, kala-lomda, kela liip kusnum ma fena ko.
LUK 4:14 Yesus ayo asuk almi bokon Provins Galili unale, God ami Sinik ata aso bomdala, dong dakaan-balala, Yesus ayo titil-foko okok ke-balaya, kayak kayak iyo Yesus ami tong kaata, kulii yak Provins Galili bokon kaami abip ma ma kawu, bakayila-tal-une-bilip, dukum-nule,
LUK 4:15 kanola Yesus ayo God ami weng kaayo, kulii yak Provins Galili kaami lotu am, am-ma am-ma uyo kukuyin-balaya, alik ami weng uyo weng san-kaa-bam ale, ami win ayo kufu-bam kemip ko.
LUK 4:16 Yesus ami abip diilim kaali, Nasaret kaptamu kemin, kawu almi awil-fakal iso bomdaya, fasuuse. Kemin, yakyak din almi abip unale, God ami iintang am daanule, alami kukup kanun-umba kaata-kup, fukula lotu am unen-umba. Kulaa, lotu tiin molin tunum ayo Yesus bokolale, tam tola-lomda, unang tunum imi tiin diim kawu God ami Sukon Tem uyo tik-tiimon o, kala ko.
LUK 4:17 God ami Sukon anung ma uyo God ami weng tem bakayin tunum Aisaya ata dolsa kuuli, lotu tiin molin tunum ayo Yesus ami kolala, sukon uyo baa-lomda, anung ma uyo utaba-kup, tik-tii-bam bakan-tabamna:
LUK 4:18 God ami Sukon Tem weng uyo boko-lomdu: God Dukum alta uldaa-nam-buulala, ami okok kemin uyo, kutama taba-bilila yo, kalalaya, nam-baala talsii. Kemin, Dukum almi Sinik ayo dabaala tal nami diim aba-lomda dong dakaap-nam-balaya, okok kaa kebi te! Kemin, God ami bokop-na-lomda: Kanolin ok kalaata kanuman o, kalase namti kalabuu. Nalta God ami weng tambal uyo mokop soyal kiimi bakayon o kala-somdila ko. Nalta unang tunum sok de-yimusip imi bokoya-lomdi: Sok til-daa-yim-baalip uluum dinim tabanin o, yokon o kala-somdila kemin, nalta tunum unang tiin fiim ken-unsip kiimi bokoyi, Tiin baalin o, kalon o. Nalta waasi dinin tunum ita ita kesip kiimi yam-kan-tiile, tunum kabaak bansip kiita, til-daa-yim-baali uluum dinim kelik o.
LUK 4:19 Nalta unang tunum imi bokoya-lomdi: Kulaata God Dukum ami am uyo daan tulu kemin, almi tunum unang iyo yam-talal-kaa-mokoma no, yokon o, kala God ami Sukon Tem kabak-ami weng kaldak kanum bokosu no, kala Yesus ayo tik-tii-bamda bakayila ko.
LUK 4:20 Kemin, Yesus ayo sukon kabak-ali tik-tiila disa kelule, asuk sukon uyo falala de-lomda, lotu tiin molin tunum ami kola tiinba-kup, unang tunum imi kukuyon o, kalalaya, ilmi tiin diim kulu tiinale, unang tunum alik lotu am kutam bom-bilip iyo, Yesus ami tiin dik-yak-dela atafiimiple, ami weng bakayokoma kaata ti weng san-kaamum o, kalip ko.
LUK 4:21 Kulaa, ayo alik imi bokoya-lomda: Kamala kulaa God ami weng kaa tik-tii-bili weng senip kaa, weng kalawaali, God ali nalmi sang kaata bokolaya, God ami weng tem bakayin tunum Aisaya ata dolsa. Kemin, uli kulaa tiltam tabamnu no kalale,
LUK 4:22 kulaa, iyo weng sanipla, weng tambal kuu tiltam tabebu kala, kalale, iyo aket fanang alik tam baneyule, ami win kaali, kufon-bam bokolip: Kipyo, kaali kawanami man daa; ali Josep ami man. Yale, kaa kanolin weng tambal kuu dok kanolin liip kabangu tildang tulu kuluu-somda, bakayinba ni? kem una-tala-kemiple,
LUK 4:23 kulaa, Yesus asiik bokoyila ko: Ibi weng saniwa, Yesus ali unang tunum mafak umkan-unsip ili toop abip Kapeneam kaptamu talalu-yimuba no nikip o kalbip. Kemin ale, kamala-kup kulawu ipkal sawaayak awil-fakal imi faldak-tiimin weng ma boko-lomdip: Dokta kapyo, yak kaltapni mafak-alin kaa, talalulan o! kalalip baka-bisip kaa, asuk bokop-niple, Kapni toop Kapeneam okok kemin tambal kanobap kaali, asuk kaltapni abip Nasaret kaltamu kanolan o, nokokomip kala, kalbi te!
LUK 4:24 Lale, nali weng tituun weng kaata-kup bokoyokomi kaali, God ami weng tem bakayin tunum ili almi abip kasel imi bakayokoma kaa, yakal boko-lomdip: Ee, kabi disa; ti nultap te! kalbip-kup ale, iyo weng sanokomip disa yo.
LUK 4:25 Weng tituun weng uyo ma so bokoyokomi kemin, weng san bom ilipla, siin sawaayak kawu, God ami weng ku-fatap-dakamin tunum Elaija ami bom ilsa kaami diim kawu, wom manim dinim bom bii wasital asuumano le, kayoop bukupkal kiita disa kelipla, abip ma ma kaptam iyo ol fut am uyo tiltam tabamnula, unang kaluun yaapkan iyo am bokon Israel umi abip kaptam ilip. Lale,
LUK 4:26 Elaija kaa Israel tunum la, God ayo Elaija ayo ma dabaala talda Israel unang kaluun yaapkan imi dong dokoyinsa disa; dabaala tal bokon kusnum ma Saidon umi abip Sarefat kaptam-ami unang maakup uta-kup dong dokowunsa ko.
LUK 4:27 Kuno ilom kawu, God ami weng ku-fatap-daa bakayin tunum ma ali Elaisa ami bom ilsa diim kulu, tunum angtiil dibim mafak-umulin yaapkan iyo am bokon Israel umi abip kaptamu ilip. Katale, Elaisa ali tunum kiili ma dong dakaayin-bisa disa te! Am bokon kusnum Siria kayaak tunum Naman ata-kup dong dokonsa no, kala Yesus ayo kanum bokoyila ko.
LUK 4:28 Tunum alik lotu am kutam tiinbip iyo Yesus ami weng kaata weng san-ilomdip utamipla, Yesus ayo kanola numi sang kaata bakayimba kayi! Kala kala-lomdip iyo aket atul tabeyulule, an-tokonbi kela,
LUK 4:29 tam tola yak dap-tal-fuku sisii dilili dibii tam daak abip aba-lomdip abip kela sisii dilili dibii-unip. Kemin, ilmi abip kaali, amdu umi tawoop tem kawu ilin kemin, dilili dibii tam amdu ami dabom diim aba-lom, dabuu dabaalup koot unak o kemip. Katale,
LUK 4:30 Yesus ayo ilmi bak-biik tem kulu-bala tabana ko.
LUK 4:31 Yesus ayo abip Nasaret kaali, kelala, daak Provins Galili kaptam-ami abip ma kaa Kapeneam kaptam unale, God ami iintang am uyo daanuya, Yesus ayo lotu am tam-ilomda, God ami weng uyo unang tunum imi bakayin-bam kukuyin-balala,
LUK 4:32 iyo utamiwa yi, Yesus ami kukuyin kukup kaali, atin tifan ukol kusnum ma kala, kala-lomdipla, God ami aket fukunin kaata, dik-daa-kuluu-lomdala kemin, ali titil-kup taba-bom nuli kukuyinba no, kala-lomdipla, awal-bam una-tala-kemip ko.
LUK 4:33 Kemin, lotu am kaptam-ali tunum ma bombe kaali, sinik mafak ata dap-tal-fukusa kemin, dukum-kup naan-bamda
LUK 4:34 boko-lom: Wo, Nasaret kayaak Yesus, kapyo! Kabi nuli kanimin ma noyon o, kalalapla talap i? Nali titamila yi, Kabi God ami tunum uldaa-tam-buu-lom tam-baala tal-salap namti kaltapta kala tiinbi no, kala kanum bokola ko.
LUK 4:35 Kanumale, Yesus asiik sinik mafak ayo katen-bam bokola-lomda: Kabi duluma-lomdapla, tunum kaa kewalalap yak banan o, aka-laam-salale, kulaa sinik mafak ayo taba-lomda, tunum kaali, dabaala daak tunum tiinbip imi iipyak tem kabaaku abamna kata, dap-mafak-daalama dinim; kambola yak banala,
LUK 4:36 kanola atam-ilomdip, unang tunum alik iyo fanang alik tam banu fanan-bamdip weng bokola una-tala-ke-bam ale, bokolip: Kwin! kaa dok kanolin weng ma bokola ni? Tunum kala titil-kup tibin dukum kemin, sinik mafak imi dukum-kup bokoya-lomda: Yak banin o! yakala, yak banip te! kalip.
LUK 4:37 Kemin, Yesus ami kanola kaami sang kaali, yak Provins Galili kaami abip alik ma ma iyo yak aba tildak aba ke-lom atin dukumnu ko.
LUK 4:38 Yesus ayo tam tolale, lotu am uyo kambola Saimon ami am unale, Saimon ami imnon uyo angtiil mamin dukum ke-umba kala, kalbip-kup, kulaali Saimon alimal iyo dik-daala-lomdip: Kapta dong dokowan o! akipla,
LUK 4:39 Yesus ayo unang ulmi mepso kuluba-lomda dukum-kup angtiil mamin umfukuba ami bokolalala, angtiil mamin ayo disa kelale, maak fak-daalin tap uyo tam tiinbu-kup, kulaa yak ima ayo kuluu fuu kutii atin tambal ma ke-lomdu imi kuyu inip ko.
LUK 4:40 Am tiin tiin tala-bulule, God ami iintang am uyo disa kelule, unang tunum imi aptum kusal kanolin kanolin mafak-alin umusip iyo, kulii-tal Yesus ami fanang tiliwa, Yesus ayo sikil kutam tunum unang alik mafak-alin kuluusip imi diim tii-lomda talalu-yimula, tambal-kup kemip.
LUK 4:41 Kemin, sinik mafak ita taba-lomdip unang tunum yaapkan de-yimusip. La, Yesus ayo sinik mafak iyo fotabam-nala, tiltamba tal-ilomdip bokolip ko: Kabi ti God ami Man kapta nu, kala-lomdip ola una-tala-kemiple, Yesus ayo itama yi, Sinik mafak yakal nitamiwa kaali, God ami uldaa-dabuusa tunum Kraist ata no, nikip kaa kala-somdaya, weng dukum-kup bokoya-lomda: Maso ma bakamin dinim o! kala kanum bokoya ko.
LUK 4:42 Kanubi silip sintam kutim malang tem Yesus ayo abip Kapeneam uyo kelalala, (God ami beten kamaalon o kalala,) bilin unang tunum dinim bokon kawu unale, unang tunum iyo fen yak aba din atam-ilomdip, ayo dal molum o kemipla,
LUK 4:43 Yesus ayo bokoya-lomda: Aatumen God ali boko-lomda: Kabi nami weng kaata, kutamalap din abip ma abip ma iyo bakayim-balawa, tildang nami miit tem talemin o kalala nam-baala talsii. Kemin, ami kalaan eng tambal kaata, kulii-din abip ma ma kawu bakaya-tal-une-mokomi no, kala-lomdaya,
LUK 4:44 keyilala din Juda bokon kaami abip ma ma kaami lotu am kawu God ami weng uyo bakayila-tal-unema ko.
LUK 5:1 Am ma daanule, Yesus ayo Ok Kumun Genesaret ami balang diim kawu bom-balaya, unang tunum ili God ami weng kaata weng san-kaamum o, kalalip tal falala-dabak-moliple,
LUK 5:2 Yesus ayo utamala yi, Aniing abuumin tunum iyo bot alep sisii kutal-dang ok balang diim tiilip kela, yang aniing men uyo diingbip kala itamale,
LUK 5:3 bot kiili alep kemin, ma kuuli Saimon ami bot la, Yesus ayo Saimon ami bot tem tam tiin-ilom bokola-lomda: Bot uyo dibiiwap yakyak ok balang diim mepso unuk o, akale, kulaa Saimon ayo fan bot uyo dibiiwa yakyak wok balang mepso abule, ayo God weng kaata, unang tunum imi kukuyila ko.
LUK 5:4 Yesus ami weng ayo bakayimbi dinimnule kulaali, Saimon ami bokola ko: Kapso, kap-tunum kusal iso, ibi bot kalawuuli dibiiwa kulaalip yak ok kumun iipyak tem unula, kipni aniing abuumin men kaayo, binalip daak ok tem unula aniing iyo ma abuulin o! yakale,
LUK 5:5 fan Saimon ayo bokola: Kamokim kapyo, kutamiip dukum kaayo nikil nuli aniing fenbi sulup. Lale, atin ti aniing katip so ma fokobup disa; kemin, kuno kelamup. Lale, yak kapni weng bokolap kunolin kemin, aniing abuumin men ayo binalup daak ok tem unokomu no, akale, kulaa
LUK 5:6 kulu nikil imi aniing abuumin men uyo binalip daak ok tem una bombii yak sisii kulaalip tiltam talak o, kaliwa yi, Uluum kaata, disa akal ma kelu kala kaliple, aniing kalaata disa yaapkan kelula, kaami uluum kaata, taba-lomdu aniing men ayo balata tabon o kalula kemin,
LUK 5:7 aptum kusal bot tem ma bom-bilip imi weng umuuyip tal dong dokoyipla yo, kala-lomdip, nikil imi sikil so tal tukuya kelipla, dong dakaayip nikil alik ke-lomdip, aniing abuumin men uyo kulii tiltam daa, aniing iyo bot tem kutiilip; bot alep iyo dongnipla, aniing imi uluum ta tabamnuya, bot alep kiiyo, kulii ok kumun tem unum o, kalipla,
LUK 5:8 Saimon Pita akal utamala yi, Kaa kanolu kala, kala-somdala, tilik duung fakela daak Yesus almi miit tem kulaak abale bokola: Kamokim kapyo, nali ban kemin tunum; nami aket kaa fukunin daa; kemin kuno kambop-nan o, aka ko.
LUK 5:9 Kanola Saimon nikil iyo tam bot ma umi tem tiiniple, kuno Saimon ami ap-tunum kusal malo ma yak bot ma kaami tem unip ke-lomdip, aptum kusal malo kiili, Sebedi ami man alap Jems so, Jon so, kanolin alik iyo aniing sikip aalap dukum kaali, atam-ilomdip walwaal dakamsile, kulaa Yesus ayo Saimon ami bokola ko: Suun-daa-laamin daa; siin sawaayak am kala daan talan-umbu kaali, aniing fakan-umbip. Kemin ale, am kala daana kaali, tunum kiita, faka-bam im-taldang nalmi miit tem tii-mokomap o, akaya,
LUK 5:11 nikil iyo bot sisii kuyak ok balang diim kuyak tii kela imi tawaal diim kaami mafek mafek aket fukunin uyo kela-somdipla, Yesus ami weng, weng san-somdipla, aso maakup unip ko.
LUK 5:12 Kulaa ilom am ma daanule, Yesus ayo abip ma kaptamu bomdala utama yi, Angtiil mafak-ansu tunum ma bombe kala, kala atama. Kemin, tunum kaa tal Yesus atam ale, tilik duung fakela daak almi mepso kulu tiinba-kup, ayo dukum-kup Yesus ami dik-daala-lom bokola: Kamokim kapyo, kabi ti yaap kemin, dong dokop-non o, kalap namti, nami angtiil kula mafaksu kuluwa dotu-namulan o, aka kanum bokolale,
LUK 5:13 Yesus almi sikil ayo kulii yak tunum kaami angtiil diim kawu kuyak tii bokola-lomda: Ayo, niyo dong dokop-ton o, kalaliya kemin, kulu talalu-tamuli yaap-nokomap o, aka kem-salale, tunum ami angtiil mafak uyo maak fak-daalin tap disa kelule, tunum ayo tambal kela,
LUK 5:14 Yesus ayo dukum-kup bokola-lomda: Kabi din tunum imi diim kaali, nami dotu-tamuli kaami sang uyo bakayin daa kayi! Kabi din-ilomdap awem tunum pris ami diim kawu kapni angtiil uyo kukolap, ayo titamala, U fan kapni angtiil uyo tambal kebap o! tamba-kup, kulaali Moses ami weng kutiisa kaata, kutal-fuku-lomdap mafek mafek ma God ami kolale, yaap ke yo, kalapla, unang tunum alik iyo titamiwa yi, Faneng kaa tambalnap o! kala-lomdip asuk tam tildang daalin o, tikin o, aka.
LUK 5:15 Katale, unang tunum iyo Yesus ami kanonba kaami sang kaali, weng san-ilomdip, weng kulii-una-tala-kelipla, tunum unang yaapkan iyo weng san-ilomdip, nokol din Yesus ami weng kaata, weng sanum o, ke-bamale, nulmi tunum unang mafak-alin kuluusip, iyo yim-tama din daalupla ata talalu-yimulak o, kal-bomdip talen-umbip. Katale,
LUK 5:16 am yaapkan kiili, Yesus ayo keya din tunum dinim bokon kawu din-bomda almi Aalap God ami beten kamala-umba no.
LUK 5:17 Falosi so, lo utamsip tunum iso, iyo tal Yesus ami weng uyo weng selum o, kalalip tal Provins Galili so, Provins Judiya so, kaptam-ami abip ma ma iso, abip win finin Jerusalam so, kaali kulaa kela tal Yesus ami fanang tala-tala-keliwa, kulaali am ma daanule, Yesus ayo am kaptamu bomda unang tunum imi God ami weng ayo bakayin-balaya, Falosi sole, lo utamsip tunum malo ma iso, iyo tam tiindip weng sanip, God ami titil kaa Yesus ami diim kawu bom-buluya, unang tunum mafak-umusip iyo yam-talal kaa-balaya,
LUK 5:18 tunum malo ma ita tunum angtiil taan dikiksa ayo dabaalip abiin tem una dibii-tal abip ababip-kup, kulaa dibii tam am Yesus ami bombe almi miit tem mepso kuluu daalupla dap-talalulak o, kalalip kanumip.
LUK 5:19 Kata, iyo utamiwa yi, Kwin! am kaptam-ali muup-daabip kala, kalbip-kup iyo liip fen-tal-tal-kemip, liip dinim kelu kalbip-kup, kulaa nikil dibii tam am konal tii kela yak am kon ayo tak-duu kuyak-tii kelale, kulaali tunum angtiil dibim-alom taanin tap kesa ayo biin tem kabaaku kanola bom ilale, sok buku-lom akola dabaalip yakyak umbilaak unang tunum tiinaabip imi iipyak tem aba bilaak tii, Yesus almi be miit tem kulaak abale,
LUK 5:20 kulaa Yesus ayo itamala yi, Tunum nikil iyo atamipla, Yesus ali ti faneng nak-tunum kulaali, dap-talalulokoma kala, kal-bomdip kanubip kala, kalba-kup tunum angtiil alik dibim-ansa ami bokola-lomda: Nak-tunum kapyo, ban kemin kaali, alik takan-tiip-ti no, aka ko.
LUK 5:21 Kemin, kulaa lo utamsip tunum so, Falosi tunum iso, iyo aket fukun-bam kanumip ko: Kwin! tawaal diim tunum kii dok kano-somdipla tunum unang imi ban wakamin kaa takan-telama disa yo! Ti God maakup ata-kup te! Tunum kalawaali dok kanolin tunum ma kalaata taba-lomda God kaa weng mafak bakaan-bamda kanum bakaba ni? ke-bam kanum bakamiple,
LUK 5:22 Yesus asiik imi aket kanolin aket fukunbip uyo uteyinba-kup, bokoya ko: Ibi kanimin o kalalipla, kanolin aket kaa fukunbip i?
LUK 5:23 Nali kalok nolin mafek mafek kanu-biliya, ibi abiltap nitam-ilomdip Kaa faneng bakaba nu nokokomip i? Nali bokoya-lomdi: Kapni ban kaali, takan-tiip-tili kayi! kalokomi kaa, ibi utamin disa ke-somdipla kaali, ibakaba no, nokokomip. Kemin ale, aa bokoya-lomdi: Tam tola unan o, akokomi kaata, utamdipla, Kuuli faneng bakaba nu, nokokomip.
LUK 5:24 Ipkal utamin o. Nali Dukum Ami Man kemin, nali nalmi titil dukum uyo kukuyili ipyo utam-somdipla, Kaali ibakan-umba disa; kemin, tawaal diim kalawu bombe kaali, ali ti unang tunum imi ban kemin uyo takan-tiiyokoma no nokokomip o, ke-bam ale, tunum angtiil dikiiknin ami bokola-lomda: Kabi tolalap kaltapni abiin dalaa tim-bilip tilip uyo, kuluu kutamalap kalapni am unan o! aka-laam-salale,
LUK 5:25 kulaa, tunum ayo maak fak-daalin tap unang tunum tal tiinaabip imi tiin tem kulu tam tola daak almi akan-unen-umba abiin uyo kuluu kutamala tam abip abala almi am din-ilomda, God ami win kaata-kup kufu-bamda fiyaap duuma ko.
LUK 5:26 Kanolala atamdiwa kawu, unang tunum alik iyo fanang alik tam baneyulala bokolip ko: Siin sawaayak kaa, kanolin kukup kaa ma atamsup disa yo! Kamala kulu kalanolin kukup kalawaata, Yesus ata kukuyila utamup o, kal-bomdip God ami win kaata-kup kufuumip ko.
LUK 5:27 Yesus ayo tunum angtiil dibim-alom taanin tap kesa ayo dap-talalula, yak aba din takis kaamin tunum imi am o kala, din takis kaamin tunum Livai ayo tiin bombe kala, kalale kulaa bokola ko: Nak-tunum a! kabi nami daang bakaalin tunum kelawa, naso nikil um-bomduwa, nami ok kaasiik ma kup-tiya, okok keman o! akale,
LUK 5:28 Yesus ayo Livai ami kanum bokola kem-salale, fan ayo tam tola bung alik kiiyo, keyimba-kup, yak Yesus ami daang bakaalala, alep unip ko.
LUK 5:29 Bombiile, Livai ayo Yesus ami fiyaap dukum-kup don-bamda ima fuu-bam, inum o! kalale, almi ok tabolin tunum imi bokoyilala, din ima fuu-bamdip, talal-bilipla, aptum kusal sole, takis kaamin tunum malo yaapkan iso, iyo tal Livai ami am tiliwa, tiin-aa-bomdip fiyaap duu-bam ima ina fakamipla,
LUK 5:30 kulaa Falosi kamok kamok so, kuno lo utamsip tunum ili yakal Falosi tunum kemin kiiso, iyo tal-ilomdip, Yesus ami daang bakaalin tunum imi itafii-bam ale, bokolip ko: Ibi kanimin o, kalaliwa, tal tunum mafak takis kaamin tunum isole, kukup mafak kutal-fukumin tunum iso, iyo tiin-bomdip ima so, ok so, kaa inaneng tababip i? kal-bomdip kanum bakamiple,
LUK 5:31 Yesus asiik bokoya-lomda: Weng ma faldak-tii bokoyokomi kemin, weng sanin! Dokta ali tal tunum mafak-umulin dinim, ili yam-talalulokoma disa; ali tal tunum mafak-umulin ita-kup, yam-talalulokoma no.
LUK 5:32 Kanolin kemin, nali taldila tunum iyo boko-lomdip: Nuli tituun-kup tabasup tunum kemin, aket fal-sikilokomup dinim o, kebip kiimi yam-talalulon o, kalalila, talsii disa; nali taldi tunum iyo boko-lomdip: Nuli ban kemin tunum kemin, aket fal-sikilum o, kalbip kiimi yam-talalulon o kalalila, talsi te! kala kanum bokoya ko.
LUK 5:33 Tunum iip maakup maakup ma iyo tal Yesus ami bokola-lomdip: Kapyo, Jon Baptis ami kalaan tunum ili beten kemum o, kalip namti, ima fala-bom, beten ke-biliple, kuno Falosi yakal ilmi daang bakaalin tunum yakal ti kanolin kukup ultap uta kanu-bilip ken-umbip te! Lale, kapni daang bakaalin tunum itale, kanolin kukup uta kutal-fuku kanumin dinim ke-bamdiwa, ima inin-kup ken-umbip kaali, dok kano-lomdipla kanun-umbip i? akipla,
LUK 5:34 Yesus ayo almi sang kaata, faldak-tii-lomda bokoya ko: Tunum ma ayo unang kuluulale, tunum ami kayaak iyo ima fuu-bam imbile, alik maakup fiyaap dukum duu-mokomip. Kemin, fan yaap keyilu ili aptum kusal kii kasen-fokoya-lomdip: Ibi ima kala inin disa yo, yokokomip ema? Daa te; tunum ami kayaak kiili, ima kaa falaalokomip disa; tikip alik maakup inam-nokomip te!
LUK 5:35 Lale, bombii kaptoowu, waasi ita tal imi aptum ayo dap-tal-fuku dibiilip kalokomip kaa, aptum kusal iyo aket uluum keyula inin ayo falaalokomip o, kala Yesus ayo faldak-tiimin weng kanum bakayin-bam ale,
LUK 5:36 Yesus ayo Juda kii (itamala, Kii ilmi siin kukup kaata ti dukum-kup yikik-fukusip. Kemin, ami kama kukup uyo, kutal-fukulalup dinim o, kalbip kala, kalalaya,) faldak-tiimin weng alep ma boko-lomda: Yaap keyilula, unang uli ulmi saket alokso kaa anung ayo ma falduu dibii yak saket disapnin ami diim tii bikiilokomu nema? Daa te! Ulmi saket alokso kaata-kup, falduu kanolokomu kaali, mafak-nokomu. Kemin ale, saket daam alokso ma falduu kuyak saket disapnin ami diim tii bikiilokomu namti, saket daam alokso sole, saket disapnin kaaso, alep kii fanang maakup ke-lokomip disa yo.
LUK 5:37 Ultap kanolin kemin ale, tunum ayo meme ipnaal siin kawu dilduu kutiilala, fongbu umi tem kaptoowu kama alokso wain ok ayo iluula dongnale, sok ta kuluu tem ayo de-lom kulii-tal am tiila namti, ok ayo bomsile, fasun-um-bom ale, meme ipnaal filit disa ayo fasu-fasu um-bom abiltap-siik bikin-ilom ok ayo bisel-unokomu. Aa, ipnaal ayo atin mafak-alomdu balata tabam-nokomu.
LUK 5:38 Kemin, tunum ayo kama ami wain ok kaa iluulon o kala namti, meme ipnaal alokso dilduu kutiila bombuu kaata-kup, wain ok ayo iluu kulii-tal tiilokoma kaata, ti tambal-kup ilokomu no.
LUK 5:39 Tunum kaa kanta sawaalak kaami wain ok inamna kaa, yak wain ok kusnum kaa inam-nokoma dinim o kaali, dok kata bokola naa kalolip: siin kaami wain ok inamni umi abaal kaali, tambal dukum ale, alokso wain ok kaata, abaal dinim o, kalokoma no, kala Yesus ayo faldak-tiimin weng kaata bakayila ko.
LUK 6:1 God ami iintang am ma daanule, Yesus ayo almi daang bakaalin tunum iso, nikil wiit lang iip-iip kaptoop liip un-bomdipla, almi daang bakaalin tunum iyo un-bomdiwa, ima tinap keyule, wiit lap kiiyo, dikela fuku-lomdip lap kiita ulel-bam inan yakyak una-biliwa,
LUK 6:2 kulaa Falosi malo ma ita itam-ilomdip bokoyip ko: Kiwe! Numi lo kaa boko-lomdu: Ibi God ami iintang am kaa okok kemin dinim o, kalsu te! Yale, ibi kanimin o kalaliwa, wiit lap kaa dikel-bam inan talabip i? Kibi numi lo kaa, ku-mafak-dakan-tababip te!
LUK 6:3 Kemipla, Yesus asiik bokoya-lomda: Ibi God ami Sukon Tem uyo tik-tiin-umbip kaa ma kaal kesip disa ema? Sawaayak Devit aso, almi ap-tunum iso, nikil iyo ima tinap keyilala bomdipla, Devit ali kabak kanimin nosa ni?
LUK 6:4 Lotu umi lo uyo boko-lomdu: Unang tunum ibi bret fuu kulii-tal awem tunum pris imi kuyiwa, God ami kolum o, kala God ami am kufun-umbip kaali, inin dinim, awem kemin awem tunum ita-kup inin o. kalsu. Yale, Devit ali God ami am kaptam-ali din-ilomda, awem tunum imi ima awem sang uyo dik-daayilale, awem tunum ita ima awem duung ima tap kaali, kolale, Devit ayo lo-lomda anung ma inale, anung ma kaata, kuluu kuu almi ap-tunum imi kuyilala inasip o. Katale, ibi boko-lomdip: Kaali kukup mafak kesip o, ken-umbip disa. Kemin, ibi kanimin ma nolum o kalaliwa, nami daang bakaalin tunum kalawiili, ima tinap keyu kanu-bilipla, ibi bokoya-lomdip: Kuu ti kukup mafak kanubip o, kebip i?
LUK 6:5 Dukum Ami Man Nali, God almi iintang am umi tiin molin tunum ali kalabi kemin, nali ti yaap nami unang tunum imi bakayim-bamdi: God ami iintang am kulawu, Ibi kaa kanumin o kalomi kaali, ili ti kanolamip te! kala Yesus ayo Falosi imi kanum bakayila ko.
LUK 6:6 Kulaa asuk God ami iintang am ma daanule, Yesus ayo lotu am kaptamu God ami weng ayo unang tunum imi bakayin-bamda tunum ma atamala, ami sikil tingtup ayo famsa kala, kalala atamale,
LUK 6:7 lo utamsip kasel so, Falosi iso, am kaptam tiinaabip iyo aket fukun-bamdip kanumip ko: Yesus ayo talalu atafii-bam ilupla, numi lo kali, lo-lomda God ami iintang am daanu kaami diim kawu tunum kaayo, dap-talalulala atamup namti, dabii-din weng talalmin baan diim daa-lom dap-fatap-daalum o! kemip.
LUK 6:8 Katale, Yesus ali imi aket kanolin aket fukunbip uyo utam-ilomda tunum sikil famsa ami kanum bokola-lomda: Kabi tam tola tal iip dikis kaldaaku tolnan o! aka-laam-salale, tunum ayo tola tal iip kulu tolnale,
LUK 6:9 Yesus ayo tunum unang imi bokoya-lomda: Ibi numi lo kaami sang ma dik-daalokomi namti kalabuu no. Lo kuuli boko-lomdu: Kabi God ami iintang am daanu kaa, unang tunum imi dong dakaayan o, kalsu ne? yam-mafak-dakaman o, kalsu ne? Aa, boko-lomdu: Kabi unang tunum mafak-alin imi yam-talal-balapla, yaawa-laamin o, kalsu nelile, kuno kamboyawa, taan-laamin o, kalsu yoko? kala kanum boko-lomda,
LUK 6:10 Yesus ayo fal-siki tunum alik iyo talalu itafiin tal-unemsile, tunum yawiit ami bokola-lomda kanum bokola ko: Kapni sikil kaa ifilan a! aka-kem-salale, tunum ayo almi sikil ayo ifilale kulu, ami sikil uyo tangbal mokso-kup kelu.
LUK 6:11 Kata, lo utamsip so, Falosi iso, iyo alik aket atul dukum tabeyule, Yesus kaa dok kanolokomup i? kal-bomdip weng takenip ko.
LUK 6:12 Kemin, kulu Yesus keya yak aba tam amdu tikiin kawu beten ke-bam God ami naan-bala bom bii,
LUK 6:13 am daanule, kulaa almi daang bakaalin tunum iyo naan-daayala tilipla, tunum talangkal kuliita-kup ulelale, bokoya-lomda: Kibi nalmi kalaan tunum kelip te! kala kanum bokoya ko.
LUK 6:14 Kalaan tunum kelip o, kalase namti kalawiita ko. Ma ali Saimon sole, ami niing Andru so, ita kemin, Yesus ali Saimon ami bokola-lomda: Kapni win kusnum ma kaali, Pita yo, kala kanum bokolale; kuno ali Jems so, Jon so, alap yakal, aa Filip so, Batolomyu so alep yakal,
LUK 6:15 Matyu so, Tomas so, Alfius ami man awasekim Jems, awasekim Saimon kaali, tunum ma iyo baka-bamdip: Rom kasel numi tiin mosip ili waasi din-bom la fotabamnup tabanik o, ken-umba tunum,
LUK 6:16 awasekim Jems ma kaami man Judas ayo ulduu-som, Yesus ami bombii dap-fatap-daalokoma tunum Keriot kayaak Judas akal, kanolin kiita ulela yim-tiila ko.
LUK 6:17 Yesus ayo kanola amdu tikiin kaptamu tunum nikil talangkal iso amdu kulaa kela yakyak tildaak biil bokon tiliple, almi daang bakaalin tunum yaapkan iyo tala-tala-kelipla, (kulaa Yesus ayo tam tolba-kup, weng uyo bakaya) ko. Bakayin-balaya, unang tunum yaapkan tal debip iyo Provins Judiya kaptam-ami abip ma ma kasel iso, abip diildiil win finin Jerusalam kasel so, aa, yol ok balang diim abip alep Taya so, Saidon so kiimi
LUK 6:18 aket fukunin kaali, din Yesus ami weng kaata weng san-kaa-buluwa kawu, numi mafak-alin kaali, yam-talal-kaa-bam kemak o! kalalip tala-tala-kelipla, kuno sinik mafak im-buulin iso, tal atamiwa iso, iyo talalu-yimulala, tambal keliple,
LUK 6:19 tunum unang iyo utamiwa yi, Nak-tunum kusal iyo maleliwa, Yesus ami titil ayo yak imi diim aba-lom iyo talalu-yimulu tambal-namip kala, kalalipla alik iyo dok kano-lom Yesus ayo malelum o, kem una-tala-kemip ko.
LUK 6:20 Yesus ayo fal-siki ti almi daang bakaalin tunum itafii-bam ale, bokoya ko: Mafek mafek iiwa-yaamin unang tunum kipyaa! Kibi God ami miit tem bom-bilip kemin, alalta tiin molaya, ibi talalu tambal-kup tiin-bom ale, kano ti fiyaap duumin-kup bom-biliwa yo.
LUK 6:21 Ol-tinap ilin unang tunum kipyaa! Ibi kamala kalawaali ima tinap tiinip. Katale, God alalta ima kaa kukaayim-balala inbi-lomdip, ti inamnup kala, kalbip-kup, fiyaap duumalip ko! Aket uluum-kup tabeya-bulula ilin ipkal, ibi kamala kalaali amabip. Katale, God akal tambal-kup talalu-yokoma kawu, aban dii-bamdiple, fiyaap dukum duu-bam kemalip ko!
LUK 6:22 Dukum Ami Man Nalmi kalaan tunum kipkal, ibi nami daang bakaalin kemin, nami waasi kii kipni itam suun-bamdip yam kayak daka-bam talalu itafiimin-kup ke-bam, kipni win kaa mafak bakayim-bam kem-laabip. Katale, kanolin kukup mafak kuu kanuyokomip kaata, fan ibi aket fukuniwa, God ali mafek mafek tambal kaata-kup abiil tikiin kawu bomda talal-yimba nu kalale, fiyaap awak dukum kaata-kup duu-bam, was daka-bam kemin o, kala-somla ko. Kemin, kanolin kukup mafak kutal-fukulin tunum kiimi awil-fakal kiili, kanolin kukup ultap kaata, God ami weng tem bakayin tunum ili kanuyin-biliwa, titil-fak-daka-bam ilsip. (Kemin ale, kipkal aket fukun-ilomdip titil-fak-daa-somdiwa yo, kala-somla ko.)
LUK 6:24 Bung kiimi aket-kup yelu ilin, kipkal! Ibi mafek mafek tambal ayo kuluulipla, kipni aket tem kuyak tambal ke-yimbu. Katale, kipni kanolin fiyaap duubip ayo kabak-ata-kup utabip. Kemin, fiyaap duumin kusnum ayo ma kuluulokomip disa; ibi ti angtiil yol dukum kaata-kup kuluulokomip.
LUK 6:25 Aa, kuno kamala kulu unang tunum ima imbi-lomdip, tiknup o, kala fiyaap sakbaalim dukum duubip kipyo, ilom am ma daanokomu kaali, ibi ima tinap dukum uyo uta-mokomip kayi! Tunum unang aban dii-bamdip fiyaap duumin dukum kebip kipyo! Ilom am ma daanokomu kaa, ibi aket uluum tabe-bam ama-bam ke-bamdiwa, yol dukum uyo kuluulokomip te!
LUK 6:26 Kibi unang tunum tal numi win uyo kufuyik o kala kaami aket-kup yelu ilin kipyo, God alta kipni uluum kuya-lomda, angtiil yol kukaayin-balaya, angtiil yol dukum ayo kuluulokomip. Ultap kemin, siin sawaayak kaa, ku-fatap-daka-bam ibakamin tunum malo ili numi win kaata kufuyik o kala-lomdip ilmi weng-kup God ami weng disa kemin, bakayin-biliwa, kipni kawil-fakal ili imi tong kaata bakamsip o, kala Yesus ayo kanum bakaya ko.
LUK 6:27 Yesus ayo asuk bokola ko: Kibi nami weng bokoyi kaa, weng sanokomup disa yo kalbip disa; ibi weng sanip kemin, kamala nami weng bakayokomi kaa, talalu weng san bom-ilipla! Kanola kipni waasi kii mok inayin-bam ale, unang tunum kawanta ipni itam-suunbip iyo, tambal-kup ma kamayin-bam kemalip kayi!
LUK 6:28 Kemin, kanola kipkal ti, God ami bakaan-bilipla, ata taba-lom kipni yokoop ukayin tunum iyo dong dakaayin-bam ale, kawanta kasen-faka-bam tituleng kaa kipni bakayin-bilip, ilmi aket ayo talal-yim-bam kemak o, kala-somla ko.
LUK 6:29 Dok kanolin tunum ata, kapni akalap malii kaali, tang afap dabaa-lom tela namti, ati kuno malii so fal-siki kolapla telak o. Kemin, ultap o. Kanola dok kanolin tunum kaata, kapni ilim saket ayo dildaa kuluula namti, kuno kenbap-kup, yak kapni siyot ayo dil dolan o.
LUK 6:30 Dok kanolin tunum ata tal kapni mafek mafek sang ma dik-daala namti, kuno kolan aa! Aa, dok kanolin ata kapni mafek mafek kulii-unse namti, ayo dukum-kup bokola-lomdap: Asuk kup-nan aa! kemin daa yo.
LUK 6:31 Kuno ti kapni aket fukunin ayo, nami nak-tunum kusal ita kukup tambal kukaap-nam-biliwa, yaap tambal-kup ilon o, kemap namti, kamosinim kawu kapsiik kanolin kukup tangbal kaata kukaayim-balawa yo, kala-somla ko.
LUK 6:32 Kanola kabi tunum kusnum kayak kayak iyo kamboya-lomdap kapni aket ayo kaptum kusal imi aket kapni kup-tambip kaata-kup imi kuyap namti, kuuta dong dokop-tokomu disa. Kaa dok ata naa kalolip: God ami lak duulin disa kikal imi aket kaa ilmi aptum kusal kiita-kup imi kukaayila-yaabip kemin, kiimi kukup kaa kulaak banule, kapni kukup kaata uta uta ke-lokomu dinim te! Kapso, iso, ipni kukup kaa maakup kemin, kuuta dong dokoyokomu dinim o.
LUK 6:33 Kanola kabi kayak kayak iyo kamboya kaltapni unang tunum imi kukup tambal kamap-tambip kiita-kup, tambal-kup kuyap namti, kuuta dong dokop-tokomu disa; le God ami lak duulin disa tunum unang yakal ti kanun-umbip o!
LUK 6:34 Kanola kabi mafek mafek ma kuluu kaptum kusal kiita-kup imi kuyale, aket fukunap yi, Salaya asiik maan tiip-nak o, kalap namti, kukup kanolap kulaa yaap lale, kuuta dong dokop-tokomu disa; God ami lak duulin disa yakal ti, kanola mafek mafek ayo ma kuluu aptum kusal imi kuyinbip-kup ale, ayo aket fanang daa, Ayo salaya asiik maan tiip-nokomip o, kem-tabasip kiiso imi dokoyokomu disa. Kemin, kiimi kukup kuu kabaak banula, kapni kukup kuuta uta uta ke-lokomu dinim.
LUK 6:35 Kemin, God ali unang tunum iyo God ami lak duulin disa isole, aa tunum unang iyo mafek mafek kuluubip-kup yaap ke yo kalin dinim so, kiili ti mok inayin-bamda aket bilili-kalin kaata ti kukaayila-tabasa. Kemin, God ami lak duulin disa imi kukup kaata kabaak banu nami kukup kaata uta uta kemon o, kalap namti, waasi iyo mok inayimbap-kup ale, kukup tambal-kup kamayim-bamdaple, mafek mafek kaptum kusal kuyale, boko-lomdap: Nak-tunum kusal kipsiik kuluulip, salala, kipsiik maan-tiip-nin o, kemin disa; keman o, kala-somla ko. Kanumin-kup ke-mokomap kaata, dong dokop-tulula, fan God akal maan dukum tiip-ta-lomda kukup tambal-kup kup-tale, kulaali kabi Sakbaalim Dukum God ami man ke-bom ilokomap o.
LUK 6:36 Kapso, unang tunum alik iso, iyo ban kemin unang tunum kemin God ayo ipni yam kot baan diim tii-lomda yam-mafak-daka-mokoma. Lale, kapni Kaalap God ali mok inap-tim-bam aket bilili-kalin kukaap-tam-bam kem-tabasa. Kemin ale, ultap o. Asuk kapkal unang tunum iyo mok inayin-bam, aket bilili-kalin kukaayin-bam keman o, kala Yesus ayo kanum bakayila ko.
LUK 6:37 Yesus ayo asuk boko-lomda: Kabi God ami abiin ayo kuluu-lomdap ami okok keba kaali nasiik kuluu-lom, okok kemon o, kemin disa; kabi kap-tunum kusal aye, malo ma kaa bom-bilip kii yam kot baan diim daa-lom bokoya-lomdap: Ibi kukup mafak nuubip o, kemin daa. Kanumin kukup kaali kelap namti, God akal mafak kamap-tam-bam bokop-ta-lomda: Yi, kabi kukup mafak kebap o, tokokoma dinim te! Aa kanola kapkal utamapla, Kap-tum kusal aye, malo ma kaa bom-bilip, iyo ban kelip o, kalokomap kaa boko-lomdap: God alta umi du kaali, tiiyale, angtiil yol kaali, kuyak aa! kemin disa yo. Uyo kuno kelap namti, God akal du tii-lomda angtiil yol ayo kup-tokoma disa. Kemin, kanola kaptum ami ban ayo takan-telap dinimnuk o, kanolap namti, God akal ti kapni uluum ayo takan-tiip-ta, atin ti dinim-nokomu.
LUK 6:38 Kabi kaltapni mafek mafek ayo kaptum kusal aye, malo ma kaa bom-bilip, kii masiim kukaayokomap kaata, God akal mafek mafek uyo kuno masiim kukaap-tokoma. Kemin, God ami mafek mafek tambal kukaayin kaali, men ima waan abuumin ultap kemin, akal dukum-kup abuu-lomda, dibiila daak nek kalule, asuk maso ma kulii yak abuulala, donga-lom sekela tabu kala, kala-lomda kukaayokoma. Kemin, God ami mafek mafek kukaayokoma kaali, God akal kaptum kusal aye, malo ma kaa bom-bilip, imi mafek mafek kukaaya-laabap akal kano ulmi maan-kup tiip-ta-lomda kukaap-tokoma. Kemin, God ayo kukup tambal kup-ton o, keba kemin, aa ultap kapkal kukup tangbal uyo kaptum kusal aye, malo ma kaa bom-bilip, imi kukaayim-balawa yo, kala Yesus ayo kanum bokoya ko.
LUK 6:39 Kulaa faldak-tiimin weng ma bokoyila ko: Tunum tiin fiim ma ata aptum tiin fiim ma ami liip kaa kukola unokoma nema? Disa kawi! Kanu-mokoma namti, alep maakup kulii afun tem unokomip.
LUK 6:40 Kemin, man katip katip kiili, sukul kukuyin mafek mafek kaali, talalu ma atabip disa; kemin, ilmi tiin molin o, kala kukuyin tunum kiita, talalu utamsip kemin, ita kukuyin-biliwa, man katip katip iyo utam dik-daa kuluu-yaabip. Kemin, bom bii man katip katip yakal utamiwa yi, Nokol dik-daa kuluulup kala, kalbip-kup, yakal ilmi kukuyin tunum iltap ke-lokomip.
LUK 6:41 Kap-tunum kusal imi kukup mafak katip katip kuuli, sung ilol tal aba yak tiin tem uneba tap ale, kapni kukup mafak sakbaalim dukum kanuubap kaata, as daang ta tiin fuk-duup-ta-yaaba tap. La, kabi kap-tunum ami bokola-lomdap: Naktum kapyo, tiin sung tal aba yak unan o! Ken-umbap. Katale, aket fukun-ilom as daang tiin faka-tanip-na kulaa laap bombu kemin, am ma daanula disa ke-lokomu no. Kemin, aket uluum kep-nokomu disa yo, kem-laabap. Kemin, kabi kaltapni kap-tunum kusal imi kukup mafak katip katip kulaa utamsap. Katale, kaltapni kukup mafak awak sakbaalkan dukum kanuubap kabak-ali kabi utabap e? disa?
LUK 6:42 Kanimin o, kalalapla kap-tunum kaa bokola-lomdap: Nak-tunum kapyo, dong dokop-ta-lomdi tiin sung ayo kukan-tiip-ton o, kalbap i? Daa! As daang ta tiin faka-tanip-ta tiin bokol ke-salap kalaali, dok kano-somdawa dong dokolokomap i? Kabi kukup alep fukumin tunum kapya! Kamosinim as daang uyo kaltapni tiin diim bombe kaali, kukan-tii-somdawa kawu, yak kap-tunum ami tiin sung uyo talalu utam-ilomdap kukan-telamap ko.
LUK 6:43 Yesus ami weng faldak-tiimin weng ma bakaya-lomda: As tambal kaali, as lap mafak ma abuulokomu disa; ale as mafak ayo ma as lap tambal abuulokomu disa.
LUK 6:44 Kemin, nokol utamupla, Kanolin as lap uyo abuubu no, kalup namti, utam, Awu, kanolin as kaali ti tambalim aa, yak kanolin as kaata mafak o, kalokomup. Uyo kanolin kemin, nuli as tiyup miit tem yang-ilomdup as fik lap uyo ma duk-duu inam-nokomup disa; ti tiyup lap ulmi-kup abuu-laamin o. Ultap kemin, nuli yang sok masiil ami diim kawu dalap ayo abuuba no, kalalup duk-duulokomup disa.
LUK 6:45 Ultap kemin, nuli tunum kunolin iyo kukup kanun-umbip kalup kulaa nokol utam, Ami aket fukunin kaa kanu-bam kanun-umbip o, kalokomup. Kemin, tunum tambal ili aket tambal fukun-bam ale kukup tambal kaata-kup ke-bam ale, weng tambal uyo baka-bam ken-umbip ale, tunum mafak itale, aket fukunin mafak-kup ke-bamdip, weng mafak baka-bam kukup mafak nuu-bam ken-umbip o, kala, Yesus ayo kanum bakayila ko.
LUK 6:46 Yesus ayo bokola: Ibi nami win kaa suunkup bakap-nam-bamdip Kamokim o, nakan-kaamin-kup laabip. Lale, kibi kanimin o kala, nami weng kaa weng san-kaamin dinim i?
LUK 6:47 Tunum nami fanang tildang nami weng uyo weng san-kaa-bam ale, nami weng kala bakabi kaayo, weng san-kaa-bamda nami kukup tangbal uyo kutal-fukula namti, ali kanolin weng kala bokolokomi kaami kukup fukulin tunum alaltap namti kulube.
LUK 6:48 Kanola tunum ayo am tambal dinamin tunum alaltap kemin, din am kun iyo bobi kulii-tal tii kelale, yak am kun tem iyo tuuptuup-kup dikila-dikila-ke-lomda, am ayo dela, alimal am un-ilomdip sin-yaa-bam bom-iliple, ok ayo fakan tiltoop-ilomda, am ayo balata kulii-unon e, kalbu. La, am kaa tambal-kup talalu dese. Kemin, am uyo, talalu yikik tawaal kaali, fuku tolasu.
LUK 6:49 Ale, dok nolin tunum ata nami weng kala bakabi kalaayo, disa tinang-kup umu-bomda, nami kukup tangbal ayo kutal-fukulin dinim kema namti, kalanolin sang kala bokoyokomi umi kukup fukulin tunum alaltap namti kulube. Tunum ayo am kun kaa tawaal tem uyo talalu kala-lomdala disa; kemin disa laap loklok delaya, ok ayo fakan tiltoop-ilomdu am kaali, abiltap-siik bal daala daak abamnule, kulaali ok ta taba balala kulii-unsuu no, kala Yesus ayo faldak-tiimin weng uyo kanum bakayila ko.
LUK 7:1 Yesus ami weng alik kaali, unang tunum imi bakayila disa kelule, kulaa kela daak abip Kapeneam una.
LUK 7:2 Kemin, Rom kaptam-ami waasi dinin tunum wan handret (100) imi kamokim kawu ilin ayo ok tabuulin tunum yaapkan kemin, almi okok kemin tunum maakup ma ami aket dukum konsa ayo mafak-alin dukum kuluu-lomda, ti taanon e kalale,
LUK 7:3 ami kamokim ayo weng sanaya, Unang tunum iyo Yesus ami sang kaali, bakabip kala, ayo weng san-ilomda, Juda kayaak tunum kamok kamok malo ma imi bokoya-lomda: Ibi din-ilomdip, Yesus atam bokolipla: Tal-ilomdap waasi dinin tunum imi kamokim ami ok fokolin tunum ayo dap-talalulan o, akin o! kala-lomda, iyo yim-baala din-ilomdip,
LUK 7:4 Yesus ami diim aba-lom dukum-kup Yesus ami bokola-lomdip: Waasi dinim tunum kamokim ali Juda kayaak numi aket kaata kukaayin-bamda alami moni kaata, kuluu-lomda, lotu am ayo numi deyase. Kemin, ali tunum tangbal-kup tabasa. Kemin, kabi din kaa dong dokolan o, akiwale,
LUK 7:6 Yesus ayo tunum mep kulu bom-bilip iso yakyak din abale, Yesus ayo tal am mepso abale, waasi dinim tunum imi kamokim ami kayaak iyo yim-baala din Yesus ami bokola-lomdip: Kamokim kapyo, waasi dinim tunum kamokim ali boko-lomda: Daa! Nali tunum tambal disa; nali ti ban kemin tunum kemin, kamokim kabi timbi din nami am kaa unokomi disale,
LUK 7:7 aa, tunum tambal keluya, kapni fanang uyo din unokomi dinim. Kemin, kabi kulu tola-lomdap, weng kaata-kup bokolawa, nami ok tabuulin kaltamu bombe ayo asuk yaap-nak o, aka-lomda
LUK 7:8 bokola ko: Nakal nalmi dabom ami weng-kup weng san-kaamin tunum ale, nali waasi dinin tunum ilmi-kup 100 kalawiimi kamokim tiin molin kemin, nali tunum ma ami bokola-lomdi: Unan aa! akokomi, ayo unokoma le, Tal o! akokomi, ayo talokoma; aa, kuno nali okok kemin tunum ami bokola-lomdi: Yak kanolin ok kaata kanuman o, akokomi, ayo yak nuu-mokoma. Kanolin kemin ale, kabi yaap titil so yaap kemin, kuno kela weng kulaata-kup bokolapya kulu nami ok fukulin tunum ayo tambalnak o, kala waasi dinin tunum ayo kanum bakaba kaali, ili Yesus ami kanum bokolip ko.
LUK 7:9 Kemin, Yesus ayo kanolin weng uyo weng sanba-kup, aket kong-mo fal-siki titoop daa unang tunum almi daang tem kulu talebip imi bokoya-lomda: Nali weng ma bokoyokomi kaali, weng san iliwa! Nali Israel-miin kipni iipyak tem kulu tal-unen-umbi uyo Juda kipni aket ayo fukun-bamdip: Nuli God ami man namti kala bom-bulup kayi! kem-yaabip. Lale, nali ma atamila, ali ma nitam, U, Yesus ali ti yaap kukup alik kanolokoma no, keba, kaa ma atamsi disa; Rom tunum kalaami aket fukunba uyo, utamaya, Yesus ali daa; weng kulaata-kup bokolaya, nami okokmin tunum mafak bomda yang am bombe ayo yaap-nokoma no, kalba kemin, ami nami lak dakaamin uyo sakbaalim dukum keluya, alik Juda kipta nami lak dakaamin uyo daak banin ko.
LUK 7:10 Mep waasi dinim tunum kamokim yim-baala tilip tunum iyo asuk din kamokim ami am din-ilomdip, kamokim ami ok fokolin tunum ami mafak-alin ayo yaaba kala, kalip ko.
LUK 7:11 Yesus ayo kanumsi bom-ilom, ayo abip ma Nain kaptam banon o, kalala, alami daang bakaalin tunum iso, aa unang tunum yaapkan iso, maakup yakyak unip. Kemin,
LUK 7:12 Yesus nikil iyo yak aba unbilin abip kaptam-ami uti daam tem umi saal mepso din unipla, Nain kayaak yakal tunum ma saakba. Kemin, dibii-din dawaalum o, kala dibiilip tilipla, din itamiple, tunum saakba ami awak uyo unang kaluun mafak kemin, ulmi man tunum man yaan maak kemin, awak ukol biin tem una as de dibii-talabip imi daang tem kawu tala-bulule, kuno unang tunum yaapkan yakal umi daang tem kamet tala-bilip kemip.
LUK 7:13 Kemin, Kamokim Yesus ayo unang kuu utam-ilomda, dukum-kup olen-daawa-lomda, bokowa ko: Awak kupyo, amamin daa yo! wakale,
LUK 7:14 kulaa, yang tunum biin kaami mepso kawu un-ilomda akola sikil kuyak tunum man saakba ami biin diim kawu malelale, mep tunum as de dip-tama talabip yakal kulu tolniwa, kulaa Yesus ayo tunum taanba ami bokola-lomda: Man tunum man kapyo, kabi tam tiinan aa! aka, kem-salale,
LUK 7:15 kulaa, tunum man taanba ayo tiltam tiin-ilomda, weng bakan-tabale, Yesus ayo awak umi bokowa-lomda: Awak kupyo, kupni man kala tam tiina kalaatam! waka-lom, awak ulmi kuuwa ko.
LUK 7:16 Kanolaya, unang tunum alik iyo Yesus ami kanola kaali, atam-ilomdip alik iyo suunin dukum kaa ke-bamdipla, God ami win uyo kufon-biliple, kuno malo ma ita bokolip: God ami weng tem bakayin win tabin tunum o, kebip profet ayo tal nulmi iipyak tem kulawu tolna atamum i, kemiple, kuno malo ma ita boko-lomdip: God ata tal alami tunum unang talalu-yimulon o, kalalaya alta tala no, ke-bilip kemip ko.
LUK 7:17 Unang tunum alik iyo Yesus kanola kaami sang kaata-kup baka-bala baka-bala ke-biliwa, weng yakyak din Provins Judiya kaptam-ami abip ma ma sole, aa yak aba umbilin kusnum kusnum imi abip ma uyo weng yakyak din unu weng san-san-kelip ko.
LUK 7:18 Oksam ukayin tunum Jon ayo sok de-dap am daalip bom-balaya, Jon almi kalaan tunum iyo tal Yesus ami kanun-tabasa kaami sang kaata, Jon ayo bokolipla, Jon ayo almi kalaan tunum alep ma ulduu-yim-baalala
LUK 7:19 tal Yesus bokolip ko: Oksam ukayin tunum Jon ali weng ma kuya-lomda, yim-baala tulup. Kemin, ali boko-lomda: Kabi tifaneng God ata uldaa-tam-buu-lomda, tam-baala tal-salap e, tunum kusnum ata ne? kalalup fenupla talak e? kala Jon ayo kanum boko dik-daala no, kala tal kanum bokolipla,
LUK 7:21 ayo alep imi tiin diim kulu, Yesus ayo angtiil mamin kaabip tunum unang iyo yam-talal-bam ale, angtiil mafak-alin kan-tabasip unang tunum imi yam-talal-bam ale, sinik mafak kan-unsip iyo takan-tiiyim-bam, tiin mafak ken-unsip iyo yam-talal-bam ke-balala,
LUK 7:22 Jon ami kalaan tunum alep iyo atafiimiple, Yesus ayo bokoya-lomda: Alep ibi din kanolin mafek mafek atamip so, weng sanip so, kiimi sang kaali, kulii-din Jon ayo bokolin o! Tiin mafak ayo tiin baa mafek mafek itafii-balale, yawiit daam ayo tam tola tal-une-bilip, angtiil mafaksip iyo asuk tambal ke-biliple, talang abat iyo asuk weng san-kaa-bilip, tunum unang saakbip iyo asuk tam tiin laa-bilip, ale, tunum unang iiwaan iyo God ami weng tambal bakayinbi kaali, weng san-kaa-bilip, kebip kaali, ibi atamip kemin, alep ibi din-ilomdip Jon ami diim kawu ipni kanolin atamip so, weng sanip so, kaami sang kaali, bokolipla, ayo weng san-ilom kaal kela, nili kanta kala, nakak o kala.
LUK 7:23 Kemin, tunum ayo nami kanolin kala kanubi kaami aket fukun-bam ale, bokola: Yesus kaata-kup God ayo uldaa-dabuula talse no, keba ayo fiyaap duuma. Kemin, alep ibi dindipla, Jon ayo sang alik kaayo, bokola-lomdip: Jon kabi aket alep fukunbap kemin, ti aket ma uyo kelalap aket maakup ke Yesus ami fiyaap kaata ti duu-bam bom-balawa yo! akin o, kala, Yesus ayo alep imi kanum bakayila ko.
LUK 7:24 Jon ami kalaan tunum iyo tabaniple, kulaali Yesus ayo tunum unang yaapkan tiinbip imi Jon ami sang kaata, bakayim-bamda bokoyila: Ibi siin kaa din tunum dinim bokon kawu bom-balala, Jon ami fanang unemsip kaa, kanimin ma atamum o, kalalip unemsip i? Kipni aket kaa fuku-daaliwa yi, Awu, daal tibin tunum ma inim ta taba fuun-balala, mokol falduu dibii-une-taleba alaltap o, kalalip kaami din atamum o kalalip un-silip ema? Daa te; Jon ali daal tabin tunum disa; ali titil tibin tunum te!
LUK 7:25 Aa, ibi kanimin ma atamum o kalaliwa, un-silip i? Ibi fanang daatamin: Awu, tunum ma ilim tambal tambal ata-kup miki-balala, kaata din atamum o, kalalip un-silip ema? Disa kawi! Jon ali kaaltap disa; ali tunum dinim bokon kawu ilin tunum kemin ale, tunum ilim tambal tambal mikimin ili king ami am kawu bomdipla tambal-kup laabip.
LUK 7:26 Kemin, ibi kanimin ma atamum o, kalaliwa unemsip i? Ibi din God ami weng ku-fatap-dakamin tunum ma atamum o, kalalip un-silip ema? Kaali fan, Jon ata weng ku-fatap-dakamin tunum kusnum alik kuliili kabaak baniwa, ata ata kelala akayinsa te!
LUK 7:27 Kemin kaali dok kata naa kalolip: God ami Sukon Tem kabak-ali Jon ami sang kaata, sawaalak kawu boko-lomdu: God ali almi man kaami bokolaya: Tunum kulaata-kup ti nalmi kalaan tunum ke-lokoma te! Kemin kaali, nalta uldaa-dabuulila, ali dusiin daa din tawaal diim kalawaami unang tunum imi bokoya-lomda: Kibi iltipni aket tem kaa talalu bam-daka-bam kemiwa, kamokim ayo talak o, kem ale, kapta, mafiing kawu talokomap kayi! kala, God kaa almi Man ayo kanum bakaala no, kala God ami Sukon Tem kabak-ali kanum bokosu.
LUK 7:28 Kemin, weng kala bokoyokomi kaali, weng selin! (Siin kaali, God ami profet kiili God ami weng uyo kulii-tal bokola bokola kem-tabasip. La,) tawaal diim tunum alik kala tiltam tiltam kem-tabasip imi tunum maakup ata ma tiltam aba-lomda, Jon ata nami sang kulii-tal bakayimba alaltap so ma kanu-bamda kulii-tal bakayila-tabasa disa. La, unang tunum tiltam God ami miit tem talokomip kiilile, saak man mafak, man tambal yaapkan iyo tiltam God ami mafek mafek so, kukup so, iyo talalu utam-somdiwa kawu, Jon ata God ami kukup utamsa uyo kukan-tela-lomdip ita ita ke-lokomip o
LUK 7:29 Siin sawaalak kaali, unang tunum alik ili Jon ami weng kaa weng san-silip. Kemin, unang tunum win dinim so, takis kaamin tunum iso, imi aket fukunin kaa, ti tambal keyu bokolip: God ami weng kaa ti faneng kayi! kalale, yak aba tal Jon ami diim tale-biliwa, ayo oksam ukayinsa. Yale,
LUK 7:30 yak Falosi so, lo utamsip tunum iso, iyo aket fukunin tambal dinim kemin, Jon ami miit tem un-ilom Jon ami kamboliwa, ali oksam ukuyinsa disa; kemin, iyo God ami mafek mafek ma ipni dong dokoyon o, kala-lomda kutiiyinsa kaali, umkayak dakan-umbip o.
LUK 7:31 Yesus ayo asuk bokoya-lomda: Aa, unang tunum kamala kula bom-bilip kibi dok kanolin unang tunum i? Kibi unang tunum dukum ke fasuu-silip. Lale, ibi ti man katip katip ililtap ke bom-bilip te!
LUK 7:32 Man katip katip iyo abip daal iip kawu tiin-bomdipla, malo ma bak-duu aptum kusal iyo weng naan-daayilale, bokolip: Nuli was samanin tap kemum i, kalalip baal wii-bam ale, was daka-bam kebup. Katale, malo ma kiptale, nuso was wiimin disa; ale, nuyo tunum taana dawakamin tap kemum o! kalalup amabup. Katale, kipta tal nuso amamin disa kebup o. Kalok nolin akal alik akal alik kabak-ami kukup kanu-mokomup kaali, ibi daa yo, kalalip kela kela kebip o, ken-umbip. Kemin,
LUK 7:33 ultap o. (Ibi man katip katip fuut-kup tabin iltap ke-bamdiwa, Jon ami weng kuluuli weng sanup disa yo, kal-bom ale, kuno nami weng uyo weng sanup disa yo, kal-bom kanu-bamdiwa, ibi disa kaami kalan kaata alep numi weng mafak kaata kukaayim-bam itafiin-umbip.) Kemin, Jon ami aket fukunin kaali, God alalta bokop-na-lomda: Yak kanolin inin-inin kaali inolap dinim o, nakase no, kalala, fala-biliya, God ali nami fiyaap ata duumak i, kala-lomdala, inin-inin kusnum kiiso, wain ok so, iyo suunkup falamin-kup ke-bam biisa. La, tal kaa kanu-balaya, ibi atam-ilomdiwa boko-lom: Fan, mep tunum kalawaali sinik mafak ta dap-mafak-daalaya, inin-inin kaa suunkup falan-umba no, kem-tabasip.
LUK 7:34 Kemin ale, Dukum Ami Man Nali taldila, ima so, wain ok so, kiili awem o, kalalila uyo ma kulaasii disa; ipni ima alik inan-umbip kulaa inan-yaabi. Lale, ipta bakap-nam-bamdip: Kipyo! mep abuuyap ayo soko talalu atamin i! (Juda numi kukup kaa ima mafek mafek fala-fala-ke-bam God ami beten kaata-kup kamaalin. Lale, Yesus ali ti ma kanumin dinim.) Ali takis moni kaamin tunum so, kukup mafak fukulin tunum kusnum malo ma iso, imi kayaak o, kem-yaabip.
LUK 7:35 God ami kaal kemin kaali, atin tambal kaayu, kawanta ma ami kaal kemin kukup uyo kutal-fukulokoma namti, ali utama ya, Awu, kaali ti faneng o, kalokoma no, kal-bomda Yesus ayo kanum baka-bamda bakayila ko.
LUK 7:36 Falosi tunum ma ayo Yesus ami bokola-lomda: Kabi tal nami am kawu naso alep ima inum o akale, Yesus ayo din Falosi ami am kawu tiin bomdip ima in-bom iliple,
LUK 7:37 sadikimin unang ma abip kaptamu bombuu kemin, weng selula, Yesus ayo tal Falosi tunum ami am kaptamu bomda ima inba no, kalip itabu-kup, kulaa uyo yak tuum ket talalusip ket tem tang tambal-kup tabin wok ayo kuluu
LUK 7:38 kulii-tal Yesus almi miit tem mepso kulu uyo tilik duung fakela daak tiin-ilomdu akolkup ama-bulula, umi tiinok ayo foko daak Yesus ami yaan diim abe-balala, uyo yak ulmi dabom kon batbat kiita daak Yesus ami yaan diim tiin ok kaayo, diliit molule, kulaali king imi win kufuyin kukup kaata-kup kuluu-lomdu, Yesus ami yaan ayo fiil-buluk takaan-bamdu: Yaap ke; nalmi kamokim e, kal-bomdu kanu-bam ale, kulu wok ket tang tambal-kup tibin wok namti sang daalula, daak Yesus ami yaan diim namti abamnu ko.
LUK 7:39 Falosi tunum ata Yesus ami bokola-lomda: Talawa ima inum o aka ata, unang umi kukup kanubu kaali utaba-kup, akal aket fukuna yi, Yak kanolin unang kuuli, sadikimin unang kemin, fan tunum kalawaali, God almi weng tem bakayin tunum kelama kaali, akal utam: Awu, kaa dok kanolin unang kuuta, tal malep-nalamu disa yo, kalba. Katale, ali utamin disa keba kemin, atin ti ali weng tem bakayin tunum disa kala, kala ko.
LUK 7:40 Yesus ayo utam talaala yi, Falosi ami aket fukunin ayo kanu-bam fukunba kala, kalba-kup, bokola-lomda: Saimon kabi nali weng ma bokop-tokomi no, kalale, Saimon asiik bokola: Ayo, kukuyin tunum kuno bokop-nan o! akale,
LUK 7:41 Yesus asiik faldak-tiimin weng ma bokola-lomda: Tunum moni kayaak ma ata tunum alep ma imi, Moni kii asuk maan-tiip-nin o kala, ma ata 100 kina le, ma ata 10 kina keyilale,
LUK 7:42 tunum alep iyo maan ayo tiilalip disa, kelip. Katale, tunum moni kayaak kaa mep tunum alep imi maan ayo kuno kamboya ko. Kamboyilale, tunum alep kiili, ma ata moni kayaak ami aket-kup kola kaali, ata ata kelaya, ma ata kabaak bana yoko? kala kanum bokoyilala,
LUK 7:43 kulaa Saimon asiik bokola: Nami aket fukunbi kaali, tunum kaami uluum dukum 100 kina iyo molin disa kaata no. Moni kayaak kaata, kaami uluum uyo kuno kambola kemin, tunum ayo moni kayaak ami aket-kup kola no, kalbi no, akala, Yesus ayo ami bokola: Kulaa, kapni aket fukunin kaali, tituun-kup kep-tu no, aka-lomda
LUK 7:44 fal-siki tiyak daa, unang uyo sikil diil tuwale, Saimon ami bokola-lomda: Kabi unang kalawuuli kulu utamap ema? Nali tiltam kapni am tiltam talbi. Yale, kabi numi kukup kaa kutal-fuku kaltapni okok kemin tunum ayo dabaalap taldala, ok ayo ma kuluu-lomda nami yaan ayo ma diing daap-nin dinim; kata unang kulawuuta, ulmi tiin wok ta taba nami yaan kalaali diing-nambu-kup, ulmi dabom kon batbat kiita yak nami yaan diim tiin ok ayo dilit mop-na kelu.
LUK 7:45 Tal am kaltam ba talbi kaa, kabi kanola fatal tunum tala ayo weng umkaan-bam ale, tiin matum fiil-buluk takaalin kukup kaa ma kanop-nin disa kelap. Kemin ale, mep unang kuluwuuta, nami yaan ayo fiil-buluk takaala yakyak kutal kala diilu.
LUK 7:46 Kemin, kabi nulmi kukup kaa ma kutal-fuku-lomdap yak tang tambal-kup tabin wok ayo kuluu nami dabom ayo diliit mop-nin disa kelapla, mep unang kalawuuta, tang tambal-kup tabasa ok ata kulii-taldu, nami yaan kaa diliit mop-nu te!
LUK 7:47 Kanolu kemin, ti weng san-ilapla, bokop-ton: Unang kuuli utamula, Nali kukup mafak kaa kanun-umbi no kalalula, Yesus kaata nami uluum sakbaalim dukum kaali, takan-tiip-nama no, kalalula, uyo nami aket dukum kaa kup-na-lomdula, yak kanolin kukup kaali, kanop-nu no. Lale, kanola tunum ali ma aket fukuna yi, Nali uluum katip sakap kaal fong so kebi no, kala namti, ayo takan-telokomi. Yale, yak kanolin tunum kaa nami aket katip kaata-kup, kup-nokoma no, kal-bomda Yesus ayo Saimon almi sang kaata, bokola.
LUK 7:48 Kemin, Yesus ayo unang umi bokowa-lomda: Nali tifan tituun weng bokop-tokomi: Kupni ban kaali, takan-tiip-ti no, ukale,
LUK 7:49 kulaa yak tildak tiinbip tunum iyo, weng san bakan-una-tala-ke-bam atafiimin weng uyo boko-lomdip: Dok kanolin tunum kaata, ban wakamin ayo takan-tiip-ti no, keba ni? Kem-una-tala-kemipla,
LUK 7:50 Yesus ayo unang umi kanum bokowa-lomda: Kubi nami lak duubap kemin, God ata talalu-tamulala, kubi tambal-kup bomdawa yo, waka ko.
LUK 8:1 Ilom ale, Yesus ayo din abip dukum dukum so, abip katip katip so, kawu tal-une-bamda God ami weng tambal uyo bakayila-tal-une-bam ale bokola: Kiwe, kipni yang kabangu tiinaasip kaa kulaa-somdipla, tildang God ami miit tem tilin o! yakan-kaa-bam bakayin-balaya, almi kalaan tunum talangkal isole,
LUK 8:2 unang malo ma iso, nikil iyo Yesus aso, abip ma ma kaba unip. Kemin, unang kaa-bilip kiilile, siin kaali malo ma ili mafak-alin ta yim-tal-fukulin ale, malo ma kiita, sinik mafak kan-unsip. La, Yesus ata talalu-yimulala, yaawa-silip nikil kiita, ili ilmi moni ta kulii-din-ilomdip, ima kaa saanbi kulii-tal fuu-bamdipla, Yesus aso, almi kalaan tunum iso, imi kukaayin-bilipla, nikil iyo inan yaksip. Kemin, unang ma uyo abip Makdala kayaak unang Maria kuuli, Yesus ata sinik mafak ilmi-kup fetkal iyo kukan-tiiwase. Ale, ma kuumi win kaali, Joana kemin, umi imak kaami win kaa Kusa ayo King Herot ami am awak dukum kaptam-ami soldiya imi tiin molin tunum kesa. Ale, afalop ma umi win kaali, Susana kanolin kemin, unang yaapkan ma iso, Yesus ami daang bakaalip ko.
LUK 8:4 Tunum unang yaapkan ilmi abip ma ma kiiyo kela tal Yesus ami fanang tala-tala-ke-bilipla, Yesus ayo utama yi, Tunum unang iyo yaapkan kelip kala, kalba-kup, kulaa weng faldak-tiimin weng ma bakayila ko.
LUK 8:5 Kulaa, tunum ma ayo wiit o kala-laabip kaami san kaali, kulii-din langabip kawu sekelmon o kalala, una kemin, san kiiyo sekelale, san malo ma iyo sekela daak langabip kaptam-ami liip kulu-bamniple, awon ita tal inamnip, kuno unang tunum iyo tal-une-bamdip wiit san iyo kulaak saan tal-une-bilip tambal kelakin disa ke-lom atin ti mafaknip.
LUK 8:6 Kuno san malo ma kiili, sekelna daak tawaal tuum tip diim aba bikin-tibip. Katale, tuum diim kaali ok dinim kemin, taba-lom tam iip kuluba datnip.
LUK 8:7 San malo ma kiita sekelna daak al mafak imi iipyak tem un-ilom tabamniple, abiltap-siik al mafak ita ita ke-lomdip, kuyak molip mafakniple,
LUK 8:8 malo ma kiita daak tawaal tambal diim aba tambal-kup taba-lom iyo abuu-bi-lomdip, 100 kup abuula abuula kelu no, imba-kup, bokola: Ibi abat disa; ipkal talang tem tambal kemin, mep weng kala bokoyi uyo talalu weng san-ilomdip atamin a! kala Yesus ayo kanum bakayila ko.
LUK 8:9 Yesus almi daang bakaalin tunum iyo ami weng uyo weng sandiwa, iyo dik-daalip ko: Kamokim kapyo, nuli kapni weng kaa ma talalu kaal kelin disa kelup kemin, kabi kabak-ami miit kaayo, ifii-lom bokoyan o! akipla,
LUK 8:10 Yesus ayo bokoya ko: God alalta kipni aket tem ayo ifiiya kaal-kebip kemin, kipkal utam ale, Awu, Yesus ami faldak-tiimin weng bakayin-bamda faldak kulu tii fal taldak kulu tii ke-balala, nokol kaami miit kaa talalu bam-daa, Awu, kanolin kanolin kabak-ami miit kaata nu! kalale, uyo tiltam God ami miit tem talemin kaata no, kala utabip. Katale, tunum malo malo kiita, nami ok kala talalbi kaa, ilmi tiin alep alep utafiin-umbip. Katale, imi aket tem uyo ma talalu kaal-kesip disa; le, ilmi talang tem alep kii, nami faldak-tiimin eng kaali, weng san-kaan-umbip. Yale, faldak-tiimin weng miit kaa ma talalu weng san-kaan-umbip disa yo. Ti disa weng san-kaamin kaata-kup, kanun-umbip. Kemin, kaali dok kanolin kabak-ata disa, nalta faldak-tiimin weng ayo mep kanolin tunum kiimi bakayila-yaabi no, yaka ko.
LUK 8:11 Yesus ayo weng faldak-tii bokoyila kaami miit kaali, ku-fatap-daa bokoyila ko: Kaami miit namti kala bombuu: Wiit san kaali, God ami weng kuluuta te!
LUK 8:12 San malo ma kiili, sekela daak liip kulu abamniple, awon iyo tal inamnip o, kali kaali, kalanolin tap o. Tunum malo ma ili God ami weng uyo weng saniwale, Setaan ali awon kiimi kukup alaltap ke tal-ilomda God ami weng yak aket tem un-ilomdu bombuu kaali, takan-tiiyilala iyo weng kaa lukuuyilula, dok kano-som God ami lak ayo duuliwa, talalu-yimulamu disa yo.
LUK 8:13 San malo ma kiita, sekela daak tuum tip diim aba-lom bikin-taba datnu no, kali kaali, kalanolin o. Tunum malo ma iyo God ami weng ayo weng sanbip-kup, kutal-fuku fiyaap duu-mokomip. Katale, san ultiilap bikin-tabokomu. Yale, timtim disa kebu ultap kemin, kanola God ami weng kaali, kutal-fukulokomip. Katale, talalu fuku ku aket tem daalokomip disa; kemin, God ami lak ayo du kutal-fuku bom-iliple, Setaan ayo tal yam-kuku-mokoma kawu, kela yang banokomip o.
LUK 8:14 Ale, yak san malo ma sekela daak al mafak imi iipyak tem unipla, al mafak ita kuyak molip, mafak-nokomip kaali, kanola tunum iip maakup maakup ma ili God ami weng ayo weng sanokomip. Yale, tawaal diim kaldaak-ami mafek mafek yaapkan imi aket kaata, aket yaapkan fukun-bam ale, moni aket fukun-bamale, mafek mafek iipnip kaami aket kaata-kup suunkup fukun-bam ale, disa fiyaap duumin kaami aket fukun-bam kemin kaata uta uta kelule, God ami weng kaami aket utale, kulaak bunu, God ami ok kaali, okok-mokomip dinim o.
LUK 8:15 Kemin ale, san malo ma kiita sekela daak tawaal tambal diim aba tambal-kup taba abuulip. Kemin, kaali ultap o. Tunum malo ma iyo God ami weng kaali, weng sanbip-kup, lukuuyokomu disa; ti kano dukum-kup kuyak aket tem daalokomip kaa, God ami okok kemin kaali, suunkup titil-foko kutal-fuku-bom nuu-mokomip. Kemin, kanolin kaali, wiit lap yaapkan abuulokomu kaa, 100 kup abuu-laamin alaltap o, kalala kanum bakayila ko.
LUK 8:16 Yesus ayo asuk faldak-tiimin weng akal kusnum ma kaata, bokoya-lomda: Nuyo ilaam ayo iilfo kuyak baket tem aye, iilfo kulaak bet umi minlo tem anang kawu tiilokomup disa; ti kutam asal ulumi baan diim kawu tiiluwa, am kaptam ayo iilfo falala-kup kala bom-balaya, unang tunum iyo tiltam-ilomdipla, ata-mokomip o.
LUK 8:17 Bom bi-lom am mafiing daan tiltam talokomu kawu mafek mafek alik sawaanasip iyo, God alalta yam-taltam fatap diim daalala, ibi kuu ita-mokomip o. Ultap kemin ale, bi-lom am mafiing diim daanokomu kawu, weng sawaansu kaali, God alta weng ku-fatap-daalala kawu, ibi weng sanokomip te!
LUK 8:18 Kanolin weng kaa, bokoyili kaayo, ibi God ami weng alik kaali, talalu weng san bom iliwa yo, kala-somla ko. Tunum kanta ma nami weng kaali, weng san kaal-ke-lokoma namti, kaali God ata dong dakaan-balala, kaal ke yakyak kem-unokoma. Kemin ale, tunum kanta nami weng kaali, weng sanin disa ke-lomda kaata, Nali utamsi no, kala namti, kaami weng katip ma kaa utamsa kaali, abiltap-siik lokolokomu no, kala Yesus ayo kanum bakaya ko.
LUK 8:19 Kulaa, Yesus ami awak so, nakal so, aptil iyo Yesus ami fanang tal uliwa, Unang tunum yaapkan ita taba-lom Yesus ayo falala dabak-mobip kala, kalaliwa, aket fukunbi: Kwin! kaata dok liip yang-ilomdupla, Yesus ami mepso kaa yang unokomup i? kemip ko.
LUK 8:20 Kanumipla, tunum ma Yesus ami mepso bom-bilip ayo, Yesus ami bokola-lomda: Kapni nakal-aptil iyo tam daak abip kabaaku tal tola-bomdip titamum o, kebip te! akale,
LUK 8:21 asiik ami bokola-lomda: Unang tunum kanta God ami weng kaata, weng san-ilom kutal-fukulip namti, fan kiita nami akamen ale, nakal-fakal namti kiita ililtap o, kala kanum bokola ko.
LUK 8:22 Kulaali am ma daanule, Yesus so, almi daang bakaalin tunum iso, nikil iyo tam bot tem tiiniwa, Yesus ayo bokoya-lomda: Tilipla, nikil kulawa kela bot tem liip yak ok kumun dukum kaami malii kaptam unum o yakala, fan nikil iyo tam bot tem abalip unip.
LUK 8:23 Nikil iyo un-bomdiwa, Yesus ayo akan-unale, nikil iyo yakyak umbiyak ok daang iip-iip kawu unipla, inim aalap dukum ma amdu lo kawu taldaak ok daang diim aba-lomda, ok ayo langdu kulaala tiltam bot tem un-ilomdu, nikil anu-lon o, kemule,
LUK 8:24 kulaali iyo Yesus ayo dap-kafangale, bokolip: Numi Kamokim kapyo, nikil nuli mepso ti taanum o kalup kemin, baan tam tiinan o! Kala-lomdip dap-kafang-niple, kulaali tam tiin tola inim so, wok lang binala tiltam tele bokobu so, ayo bokola ko: Mep inim so, wok so, kunuubip kulaa, ditang kalin o! yaka-kem-salale, inim dulul so, wok so, iyo ditang kala dinimnip.
LUK 8:25 Duluma kem-siliple, kulaali Yesus ayo almi daang bakaalin tunum imi kanum bokoyila ko: Kibi nitamiwa yi, Kamokim ali nuso bombe kaali nuyo yaap o nimbip disa ema? Kanimin o kalalipla, inim so, ok so, kiimi atul uyo suunbip i? kalala kanum bokoyilale, kulu nikil iyo Yesus ami atam suun-daa-lom aket alik tam baneyilula, aket yaapkan fukun una-tala-ke-bam ale, bokolip ko: Tunum kalawaami weng boko-lomda, inim so, ok so, dukum-kup bokoyala, yakal ami weng-kup weng san-ilomdip, balit-kala-lom dulumnip kemin, tunum kalawaata dok kanolin tunum i? ke-bamdip nikil kanum bakamip ko.
LUK 8:26 Kulu Yesus nikil iyo Provins Galili ayo kambola bot tem liip nikil yakyak biyak ok kumun ami malii Gerasa kayaak imi bokon ayo yak aba-somdiwa,
LUK 8:27 kulaa, Yesus ayo bot tem kaptam kela daak ok balang diim tola kemale, abip kaptam kayaak tunum ma sinik mafak ta dap-mafak-daasip ayo Yesus ami fanang talale, siin sawaalak kaptoop ali tunum kaali, ilim mikimin disa; ale ali am sin-yaamin disa; kemin, kanola ayo din kom tem kawu, sin tal-unen-umba.
LUK 8:28 Kemin, siin kaali, sinik mafak ta taba-lomda mep tunum kaa dap-mafak-daa-sala, aptum kusal iyo misii kuno kelupla yemama no, kala-lomdipla, sen ta kuluu tunum ayo sikil ang yaan ang iyo sok dela-lom, dap-tiilup o, kala tiin mo iliwa; kwin! sikil-ang yaan-ang de dubip ayo ukela dabaala una-tala-kelule, sinik mafak ta tunum kaa faldang mo dabaala bilin tunum dinim bokon aba aba ke-bamda, suunkup ti kanun-umba. Kemin, tunum ayo Yesus ami atam-ilomda, tal Yesus ami miit tem tal kabaaku mat asiik kulii daak tawaal diim aba dukum-kup ola-tabamnale, tunum ayo Yesus asiik sinik mafak ami bokola-lomda: Kabi tunum kaali, kela unan o, akale, sinik mafak ta atin dukum-kup naan-bamda bokola ko: Yesus kabi Atin Win Tabin God ami Man alik-daap kemin, kabi tal-ilomdap dok nop-non o, kalalapla, talbap i? Kabi nami olen-daap-na-lomdap, nami angtiil yol dukum kaa kukaap-nin disa; kambop-nan o, aka ko.
LUK 8:30 Kulaa, Yesus ayo dik-daala-lomda: Kapni win kaali, bokop-na taman, akale mep tunum kaa utama yi, Sinik mafak yaapkan kii nami iipyak tem kaldaaku tiinaasip kala, kalba-kup, bokola ko: Nami win kaali, Yaapkan Yaapkan o, kala kanum bokolala,
LUK 8:31 sinik mafak iyo Yesus ami dukum-kup naan-bamdip bokolip ko: Kabi nuli fotabam-napla, umbilup umbilaak tawaal tem abip mafak kabaak-ali unemin disa kayi! akip ko.
LUK 8:32 Akiwale, kang atin ti yaapkan kiili, yak amdu tikiin ami mepso kawu bomdip bak-fakabip. Kemin, sinik mafak iyo Yesus ami dukum-kup nen-bam bokola-lomdip: Kabi nuli, kuno kamboyap yak kang kuliimi tiling tem unum aa! akiple, Yesus ayo bokola: Ayo, yakale,
LUK 8:33 kulaa, sinik mafak iyo tunum kulaa kela-lomdip, iyo abiltap-siik tunum ayo kambola-lom, yang kang imi tiling tem uniwa, kulu kang-miin namti fanang mak-maak-uuyila abiltap bina dilila diim dap-kuldaak-mo yak aba umbilaak ok Galili Kumun tem un-ilomdip yan dong dokola taanip ko
LUK 8:34 Kemin, kang tiin molin tunum yakal kii itamiwa yi, Kang iyo kano-lomdip taanip kala, kala-somdipla, ukatamalip bina bilin abip unang tunum imi bakayin-bam ale, yang ima lang bom-bilip imi yang bakaya-tal-une-bilipla,
LUK 8:35 unang tunum iyo din-ilom kanola kaa din atamum i! kala-lomdip iyo tal ulipla, Sinik mafak ayo tunum kulaa kela yak-banipla, kulaali ayo ilim mikile, ami aket ayo akal tambal ma keluya, tildang Yesus ami miit tem kulu tiinba kala, kalaliwa iyo suunip ko.
LUK 8:36 Unang tunum iyo Yesus ami kukup kanola atamip kaata, aptum kusal iyo bakayim-bam ale, tunum kaami sinik mafak ta dap-mafak-daasipla, Yesus ata dap-talalulala tambalna no, kalalip bakan-una-tala-ke-bilipla,
LUK 8:37 Gerasa kasel unang tunum iyo atin ti suun-daa-lom Yesus ami bokola-lomdip: Kabi nuli keya unan o! akipla, fan Yesus ayo imi weng kaata-kup, weng sandala, asuk tam bot tem tiin-ilomda, unum o kalale,
LUK 8:38 tunum sinik mafak kano kelip ayo, tal Yesus ami dukum-kup dik-daala-lomda: Nali kapso unum o, akale, Yesus ayo bokola: E, daa. Kabi asuk din kaltapni abip aba-lomdap, God ami mafek mafek sakbaalim dukum ma kanop-tamba kaali, ku-fatap-daka-bamdap unang tunum alik iyo bakayan aa! aka-lomda, mep tunum ayo dabaala din almi abip kasel imi bokoya-lomda: Yesus ata mafek mafek dukum ma talalu-namuba no, yakan-kan-tal-unema ko.
LUK 8:40 Kanolaya, unang tunum iyo Yesus ami fen-bom-bilipla, ayo asuk tal Ok Galili Kumun yak malii kawu talala, unang tunum iyo fiyaap duu-bam ale, weng umkaansip o.
LUK 8:41 Abip kaptam kayaak tunum ma ami win kaali, Jairus. Kemin ale, ami abip kaptam-ami lotu am kaptam-ami tiin molin tunum kemin, ali tal Yesus almi mepso kulu tilik duung fakela daak tiinba-kup, dukum-kup Yesus ami dik-daala-lomda: Nali atin unang man maakup ulufin kemin, umi wasital kaali, talangkal duk-duule kulu, uyo mafak umu-lomdu atin ti kulaata mepso taanon e kalbu kemin, talawa alep din nalmi am kawu bombuu kemin, din dong dokowan o, akala, fan Yesus ayo Jairus so alep unip. Kemin, Yesus ayo umbabalala, unang tunum yaapkan iyo Yesus kaa falala dap iip kabaak-daaliwa, un-bomdipla,
LUK 8:43 mep kiimi iipyak tem kabak daa-lom unabip kaa unang ma bombuu kuuli, suunkup ulmi am unemin-kup kem-laabu; uli dokta yaapkan iyo saan-bulula, dong dakawa-laabip. Lale, kanola tunum ma kaata taba-lomda umi mafak-alin ayo um-talaluma disa ke-bilipla, bombii wasital ulmi-kup talangkal dakan-tiisula kulaali,
LUK 8:44 unang tunum yaapkan iyo yam kayak kayak kem tal aba biyak Yesus mepso almi daang tem kulu tola aket fukunu yi, Ti Yesus maakup ata-kup nali dong dokop-nokoma kala, kalale, kulaa sikil kuyak Yesus almi ilim matum diim ayo malelule, kulaali maak fak-daalin tap umi mafak-alin uyo dinim kelula, kulaata utamula yi, Nalmi am unemin-kup ken-unbi kaali, disa kep-nulu kala, kemu ko.
LUK 8:45 Kemule, Yesus ayo bokola ko: Kaa kawanta tal malep-na ni? kemale, alik tal falala duubip iyo bokolip: Nali disa disa kemiple, Pita ayo bokola-lomda: Kamokim aa, unang tunum yaapkan iyo tal-ilomdip, iipyak tem daa tam-bak-mobip kaa kanimin o, kalalapla, kaa kanum bokolap yoko? aka kemale,
LUK 8:46 kulaa Yesus ayo bokola: Alik ili disa; kemin ale, nali utamila, Nalmi titil kuuta malo ma imi dong dokoyu no, kali kemin, nakal utamila, Atin maakup ma ta kanoliya dong dokop-nak i! kalalaya, tildak malep-nala, nami titil ta dong dokolu kala kali no, kala kanum bakamala,
LUK 8:47 unang ukol utamula, Maaklo kasentap sawaanami disa, Yesus ali ti fatap nitama kala kala-somdula, kulaali suun-daa walwaal-kup taptap tildang Yesus almi miit tem kuluwu tilik duung fakela tildaak tiinbu-kup, unang tunum imi tiin diim kulu bokolu ko: Nali nalmi am-kup unem-laabi kemin, nalmi sikil kulaata yak malep-tilila, kapni titil kulaata abiltap-siik, nayo talalu-namulala yaapni no, kemula,
LUK 8:48 Yesus ayo bokowa-lomda: Nafalop kupyo, kubi aket fukunawa, Kulaata nam-talulokoma no, kala-lomdapla, kanolap tam-talaluli kemin, ti kupni aket tem kaa balili-kala-lom tambal-kup dindap tiin bom-balapla yo, waka ko.
LUK 8:49 Yesus ayo ti unang kuumi weng ayo baka-um-bam ilale, kulaa Jairus ami am kaptam-ami ok fukulin tunum ma tal Jairus ami bokola-lomda: Kapyo, kapni man unang kuluuli, taanu utamdi tili kemin, kabi God ami weng kukuyin tunum kaali, disa iip kawu dibii-talemin dinim o, akale,
LUK 8:50 Yesus ayo weng san-ilomda, Jairus ami bokola: Kabi suunin disa kela, Ali ti yaap kanolokoma no! nakapla, kapni man uyo asuk tam tiip-tuk o aka.
LUK 8:51 Kemin, Yesus ayo din kamokim ami am mepso din abale, unang tunum aso tilip iyo bokoya ko: Ibi naso tam am kaptam-ali tam unemin daa yo, yakale, Pita so, Jon so, Jems nikil isole, man umi awak-aalap iso, ita-kup Yesus ayo yim-baala tam kamokim ami am kaptam unipla,
LUK 8:52 unang tunum ita abip kaldaak bomdip dukum-kup amamipla, Yesus ayo bokoya ko: Kiwe, amamin disa yo; man kuuli taanbu disa; uli akan-unbu te! kemale,
LUK 8:53 alik iyo utamipla, Unang man kuuli, atin taanu utabip kemin, ali kasen-fakayinba no, kal-bomdip aban kulil-teliwa,
LUK 8:54 Yesus ayo kamboya tam am abale, man unang umi sikil kaali, fukuba-kup bokowa ko: Man unang kubi tam tiinan aa! uka kem-salale,
LUK 8:55 man umi sinik ayo asuk tal tiip-nula, kulaa unang man uyo abiltap tam tiinule, Yesus ayo unang man umi awak-aalap imi bokoya-lomda: Inin-inin ma man unang kuluuli kuuwip inamnuk o, yakale
LUK 8:56 man unang umi awak-aalap imi fanang uyo alik tam baneyilula, fiyaap duumip. Katale, Yesus ayo dukum-kup bokoya ko: Alep ibi din unang maakup tunum maakup kiili, bakayin dinim o, yaka ko.
LUK 9:1 Yesus ayo daang bakaalin tunum talangkal iyo weng umuuya alik tal mepso kulu tiliple, almi titil ayo kuyale, bokoya-lomda: Nami win diim kaata-kup sinik mafak alik iyo fotabe-bam ale, tunum unang mafak umusip akal-alik akal-alik kuluusip kiili, takan-tiiyim-bam kem-tal-unemin o, yaka-lomda,
LUK 9:2 asuk bokoya ko: Ibi din unang tunum iyo bokoya-lomdip: Ibi God ami lak kaali, dukum-kup duu-lomdipla tiltam God ami miit tem tilin o, yakan-kan tal-une-bam ale, aa, unang tunum mafak umusip iyo yam-talal kaa-bam kem yakyak tal-unemin o.
LUK 9:3 Kemin, unokomip kaali, bung ayo ma kulii-unemin disa; malal aye, ima men moni aa, iyo ma kulii-unemin disa. Ti disa; tunum tiil-kup unin o. Ti ilim maakup ata-kup mikile, unin o. Unang tunum kii dong dokoyipla, kuno isiik dong dokoyum o, kala-lomdip kaa isiik kipni mafek mafek kiili, kuyokomip kayi!
LUK 9:4 Ibi um-bi-lom umbilin abip ma din unipla, kaali ti am maakup ma kaptamu kup tiin-bom unang tunum iyo dong dakaayinbile, keya unemalip kayi!
LUK 9:5 Katale, abip kasel iyo im-tam daa ibi tiin molin dinim kelip namti, Juda numi kukup ma kaata, kuluu-lomdipla, abip kaptam ayo kambola unolip ko. Nulmi kukup kaali, sung ilol tal aba yak kipni yaan diim tabuuba uyo diliit-mo kulaalip yak abip kasel imi lo kabamnala kawu, abip kaptam-ami unang tunum iyo utamiwa yi, Asuk ilom kaa maso ma tal abip kaltam nuli dong dokoyokomip dinim o, kalin o, kala Yesus ayo kanum bokoya ko.
LUK 9:6 Kala-lomda, Yesus ayo daang bakaalin tunum talangkal iyo yim-baala din abip ma ma kawu, God ami weng tambal uyo kulii-bom bakayila-tal-une-bam ale, unang tunum mafak-alin umkaan-unsip iyo yam-talal kaa-bam kem-tal-unemsip o.
LUK 9:7 Kemin, unang tunum iyo Yesus ami sang kaayo, bakan-una-tala-ke-bam ale, malo ma ita bokolip: Kaali oksam ukayin tunum Jon ata asuk tam tiin kawang keba no, ke-biliple, kuno malo ma ita bokolip: Daa; kaali tunum sawaayak bom-biisa Elaija ata kulu tiltam talba no, ke-balale, unang tunum malo ma ita boko-lomdip: Kulaaye, kaa sawaalak profet God ami weng ku-fatap-daa bakayin tunum ma taansa kemin, ata nema, asuk tam tiinba no? ke-bala kemiple, kulaali Herot ali Provins Galili kaptam-ami kamokim king kesa. Kemin, unang tunum iyo Yesus ami sang ayo baka-bilipla kawu, Herot ami aptum kusal iyo weng san-ilom, tal bokolipla, Herot akal aket dukum ayo fukunsile bokola ko:
LUK 9:9 Sawaalak kaali, nami okok kemin tunum iyo yim-baali din-ilomdip, Jon ami dabom kaa ti bak-duu aasip. Kemin, ali dok kanolin kaami sang kaata, weng seli ni? kal-bomda baan Yesus kaa atamon o! kema ko.
LUK 9:10 Kulaa, Yesus ami kalaan tunum iyo asuk tal-ilomdip Yesus ayo bokolip: Kapyo, mafek mafek ok alik kiili, nolup tulup o, akipla, Yesus almi kalaan tunum ita-kup yim-biila, unang tunum iyo kamboya, umbilin abip ma Betsaida unip.
LUK 9:11 Unang tunum iyo weng seliwa yi, Yesus ayo abip Betsaida una no, kalalip kulaali, unang tunum iyo dak-daa kulii yak aba din atamipla, Yesus ayo weng umkaayin-bam, fiyaap duu-bamda bokola: Ibi atin ti God ami lak uyo duuliwa kawu, tiltam God almi miit tem tilin o, yakan-kaa-bam ale, unang tunum mafak-alin kuluusip yaapkan iyo yam-talal kaa-bam kema ko.
LUK 9:12 Kemin, kanu-bam bom bii am tiinule, Yesus ami daang bakaalin tunum talangkal iyo tal Yesus ami bokola-lomdip: Kapyo, bokon kala bom-bulup kalawaali, unang tunum dinim bokon kalawu bom-bulup kemin, kabi unang tunum kalawiili yim-baalap din abip ma din abip ma kawu, din ima waan ma fen-daa ina-lomdipla, kawu siik o! akan-kaamiple,
LUK 9:13 kulaa Yesus asiik bokola: Nikil kipkal inin-inin ma kuyilipla yo! yakale, tunum ilmi-kup faiv tausin (5,000) ema iyo bom-bilip. Kemin, Yesus ami daang bakaalin tunum iyo Yesus ami bokolip ko: Nuli ima yaapkan dinim; la bret awakal ale, kuno aniing alep ma kiita-kup bom-bilip kemin, kuliili tiknamip disa; kanolin kemin, ti kabi yim-baalap din kayak kayak kii dik-daayupla, ima ayo maso ma kuyip mo kuliilup taldupla, unang tunum alik kula tiinaabip iyo ifalup ina-lom solip eliye disa ye? akiwale, Yesus ami daang bakaalin tunum imi bokoyila-lomda: Unang tunum iyo bokoyilipla: Afetbi 50 e kala tiina tiina ke-lomdip tiinin o, yikiwa yo, yakale,
LUK 9:15 Yesus ami daang bakaalin tunum iyo unang tunum imi bokoya-lomdip: Kanola tiinin o, yikiwa, alik iyo kanola tiinip.
LUK 9:16 Yesus ayo bret awakal ale, aniing alep ma iyo foko-lomda titam abiil daa, God ami yaap ke yo, anba-kup, bret so, aniing so, iyo bakela kutii-lomda almi daang bakaalin imi kuyala ita unang tunum imi banuyipla,
LUK 9:17 alik iyo kuluu inbi-lom tiknipla kawu, Yesus almi daang bakaalin tunum iyo yak ima tinan-bamdip, kutiibip daam daam kiiyo, fakan-tal-unemsi basket almi-kup tal aba tam talangkal kiita, abuu-bilip dongnip ko.
LUK 9:18 Kemin, am ma daanule, Yesus ayo alafin bomda beten ke-balala, almi daang bakaalin tunum iyo bital tiliwa, ayo dik-daaya-lomda: Unang tunum kiili boko-lom: Kaali kawanta ni? nakan-kaabip, kalala, imi dik-daayale,
LUK 9:19 daang bakaalin tunum isiik Yesus ami weng maan tela-lom bokolip ko: Aa, unang tunum malo ma iyo boko-lom: Kaali, oksam ukayin tunum, Jon Baptis ata no, ke-biliple, malo ma ita boko-lomdip: Yi, kaali God ami weng ku-fatap-dakamin tunum sawaayak biisa Elaija ata no, takan-kaa-biliple, malo ma ita bokop-ta-lomdip: Kaali siin sawaalak God ami weng ku-fatap-dakamin tunum ma saaksa. La, asuk tam tiinba no, tambip o, kem-una-tala-kemiple,
LUK 9:20 Yesus ayo bokola: Aa, ibi yi? Ibi nali kawanta no, nakan-kaabip i? yaka kemale, Pita ata Yesus ami weng uyo maan tela bokola-lomda: Kabi fan ti God Almi Man uldaa-tam-buusa Kraist namti kulu-balap ale, God ami dabaali din unokoma no, kal-bomda Israel-miin numi bokoyila fen-tabasup tunum namti kulu balap o, kala kanum bokola ko.
LUK 9:21 Pita ayo kanum bokolale, Yesus ayo titil tibin weng uyo almi daang bakaalin tunum imi dil mole bokoya-lomda: Nami weng kala bokoyokomi kaali, din-ilomdip yen-tal-une-bamdip: Yi, Yesus kaali, God almi Man uldaa-dabuusa tunum o, kalalip kaata ke-bamdip bakayila-tal-unemin disa yo!
LUK 9:22 Ilom am ma daanokoma kawu, Dukum Ami Man Nali, kukup mafak yaapkan angtiil yol kukaap-nokomip. Ale, Juda imi kamok kamok so, awem tunum o kala pris imi kamok kamok so, lo utamsip tunum iso, ili daang ukup-na nitam suun-bamdipla, iyo nam-baalip yak nulmi waasi Rom kayaak imi sikil diim abamnila, ita nelip saaka bombii am alep keliya, tam am asuum diim kulu God ayo nam-fola asuk tam tiinokomi no, yimba-kup,
LUK 9:23 asuk unang tunum alik iyo bokoya-lomda: Dok nolin tunum kapta, naso din nami okok kemin kaata, okok kemon o, kalap namti, am maakup maakup yak kaltapni aket fukunin kaata-kup kanumin kaali, kambola-lomdap nami aket kaata, dukum-kup kup-na-lomdap, nami as diim angtiil yol kuluulokomi ultap ke-lom taanami kulaali, kunola taanami no, kal-bomdap, kanolin kukup kaata kuluu-lom, tiltamdap nami okok kemin kaali, kutal-fuku kulii-taba balapla yo! kala-somla ko.
LUK 9:24 Kanolin kemin, tunum iyo kawanta ma almi angtiil lak kaata, suunkup aket kuwa-bom, almi aket fukunin kaata-kup kanum tal-unemon o, kema namti, kaata taan-ilomda maaklo ke-lokoma; kemin ale, tunum ayo kawanta, kuno yang kunu-bili waasi iyo taba-lomdip nelamip kulaa, kuno nelamip o, kala-lomda tildang nami lak kaata-kup dukum-kup kutal-fuku kulii-taba namti, kanolin tunum kaata ti suunkup ilokoma.
LUK 9:25 Kuno tunum ma tawaal kala dik-daa kulaasu kalawaami mafek mafek alik kiita ti kaa-bam ilomda saaknala, ami sinik ayo maaklo kela namti, almi mafek mafek kiita taba-lomdip dong dokolokomip ema? Disa te! Kabak dok kano-lomdip dong dokolokomip disa.
LUK 9:26 Tunum kanta ma nami win ayo kufup-nin dinim ke-bamale, kayak kayak kiimi itam suun-daa nami weng ayo bakayin disa kema namti, am ma daanokoma kaali, Dukum Ami Man Nayo, nalmi falala-kalin so, Aatumen God ami falala-kalin so, ensel atin tambal-kup tabasip imi falala-kalin kiiso, kiimi diim kawu talokomi kaa, nasiik tunum kaami win ayo kufolokomi disa ale disa. Ali ti disa kayi! aka-lomdi ali dap-kan-tiilokomi.
LUK 9:27 Kemin, mep tituun weng kala bokoyokomi uyo, dotu weng san iliwa! Iip maakup maakup kula tola-bilip, ibi saaknin disa, bom ilom utamiwa yi, Ali tiltam king ke-lomda unang tunum iyo tiin mola kala kalokomi kayi! kal-bomda Yesus ayo kanum bakayila ko.
LUK 9:28 Yesus ayo kanum bakayinbi disa kelule, kulaa keya bom-bala bii am oklungkal kelale, kulu Yesus ayo God ami beten kamaalon o kalale, kulaa Pita so, Jon so, Jems so, ita-kup nikil foko im-tama umbitam amdu tikiin ma tam un-ilomdipla,
LUK 9:29 Yesus ayo beten ke-balale, daang bakaalin tunum iyo atamiwa yi, Ami tiin matum ayo akal alik kelala, ami ilim ayo namaal alik ke-lomdu tiin angkaal so kelu kala, kalip.
LUK 9:30 Kulaa, maak fak-daalin tap, tunum alep ma iyo God ami falala-kalin so tiltam Yesus almi diim kulu tolniple, Yesus so weng bakamipla, ma ata sawaalak God ami weng ku-fatap-daa bakayinbi saaksa Moses sole, ma ata Elaija so, alep ita Yesus ami kanum yakyak kulii-din Jerusalam kawu taanala, God ami, Kaa kanuman o, akase kaali, disa kelu ke-lokoma kaami sang kaata, bakalip.
LUK 9:32 Pita nikil iyo tiin yak keyu atin akan-unip. Lale, asuk kulaa kela tiin baa talaalipla, Yesus ayo atin ti falala-kup kala-lom tolnale, tunum alep ma tal tola kelipla itamiple,
LUK 9:33 Pita akal utamala: Moses so, Elaija so, kii mepso Yesus kaa kela unum o kalbip kaa kalale, yak kanolip kabak-ami miit kaa talalu utamin disa ke-lom ali atin babon daa-lomda Yesus ami bokola-lomda: Kamokim kapyo, ti yaap ke kapso tal bom-bulup kemin, nuli am kiin-laap asuumano aye ma ema de-lomduwa, ma kaata kaltapni, ma kaata Moses ami, ma kaata Elaija ami, kela deluwa yo, kema ko.
LUK 9:34 Kemin, Pita ayo kanum bakayim-balale, tam ibin uyo tildaak tilnong mo-imaalule, kulaali Yesus ami daang bakaalin tunum asuumano iyo suuniple,
LUK 9:35 ibin tem kaptamu weng ma boko-lomda: Kaali ti Nalmi Man uldaa-dabuusi namti kulube, kemin ale, ibi ami weng bakama uyo ti weng san-kaa-bamdiwa yo, kala-somla ko.
LUK 9:36 Kemin, kulaata weng kulu bakaba ayo disa ke kem-sulule, ibin ta tal tunum alep iyo im-tama unula, Pita nikil iyo talaalipla, Yesus alafin kela kala, kaliwale, Yesus ami tawaal diim bom ilsa kaa, Yesus ami daang bakaalin tunum ili ilmi amdu tikiin kawu mafek mafek kanum tulula utabip kaami sang kaayo, unang tunum kii ma bokoyilalip dinim ke-lom yawaal daalip.
LUK 9:37 Kulaa, Yesus aso, almi daang bakaalin tunum asuumano iso, nikil iyo amdu tikiin kawu silip sintam kutim malang tem amdu ayo kulaa kela tildaak ulipla, Unang tunum yaapkan iyo Yesus ami liip tal-bomdip, liip fen-talabip kala, kalalip itamiple,
LUK 9:38 tunum ma unang tunum yaapkan imi tem kulaaku ma naan-bamda bokola-lomda: Kukuyin tunum kapyo, nami man tunum kuluwaayo, ali atin ti yaan maak alafin kemin, sinik mafak ta taba-lomda dukum-kup yikik dap-tal-fuku-balala, man ayo abiltap-siik naak-fakan-taba atamuple, mook daban-kup baktam-baktam-bamda sinik mafak ta dap-mafak-daalu saaka bombii tam tiin-tiin-kem-yaaba. Kemin, sinik mafak kaalile, abiltap-siik kela yak banen-umba disa. Kemin, kabi atam-ilomdapla, dukum-kup dong dokolan o.
LUK 9:40 Kemin, nali kapni daang bakaalin tunum imi dik-dakaayin-bam bakayin-bamdi: Kipta sinik mafak kulaa fotabamnip yak banak o, yakan-kaabi. Katale, faneng, titil-foko fotabamnip yak banoma dinim kelip o kala-lomda Yesus ami kanum bakaan-balala,
LUK 9:41 Yesus ayo alami daang bakaalin tunum sole, unang tunum bom-bilip iyo bokoya-lomda: Kwin! Ipni aket fukunin kaali, fan atin tituun disa kawi! Nali kipso bom bii, kayoop yaapkan dak-duusi. Kata, ibi nitamiwa yi, Kaali God ami titil kaata kuluu-lomda sinik mafak iyo fotabeba yak banen-umbip kala, naka-laabip disa yo. Nali ipso bii, am kanim kal kelila, ibi natamiwa yi, Ali ti God ami titil kaali, nokol ti kuyama no, nokokomip i? Nali ipni aket mafak fukunbip kaali, daal tabep-nu no, kala-lomda fal-siki taba man ami aalap ayo bokola-lomda: Yak kapni man kaayo dibii-tal taman! aka ko.
LUK 9:42 Akale, man tunum ayo almi aalap so alim tal Yesus almi mepso kulu tola bom-biliwa, sinik mafak ayo taba-lomda tunum man ayo dukum-kup an-binala daak tawaal diim abamnala, dukum-kup dabuu dap-kula-saan bii kambolale, kulu Yesus ayo sinik mafak ami mafakso no akan-kaa-bam bokola ko: Sinik mafak kabi yak banan aa! aka kem-salale, man ayo kela yak banala, Yesus ayo yak tunum ayo talalu-lomda asuk almi aalap ami kola.
LUK 9:43 Kemin, kanolala unang tunum iyo utamiwa yi, God ami titil dukum kaata Yesus ami kolala, kaa kanola kala, kalalipla, aket yaapkan fukun-una-tala kemip ko. Unang tunum ili Yesus ami titil kabak kanola kaami aket uyo aket dukum fukun-bilipla, Yesus ayo almi daang bakaalin tunum imi bokoya-lomda:
LUK 9:44 Ibi nami weng kalawuuli, talalu weng san-ilomdip lukuuya-yaamin disa. Ti mepso kulu nami nak-tunum ma ayo aket fal-siki-lom Dukum Ami Man Nayo, nam-fatap-daa-lomda nam-baala yak waasi imi sikil diim abokomi no, kala kanum bokoyila.
LUK 9:45 Katale, ami daang bakaalin tunum ili, ami weng kaa bakayinba kabak-ali talalu bam-daa utamin disa kelip, kabak-alile, God ali weng kabak-ami miit ayo kuwaalaya kemin, talalu utamin disa keliwa, mafek mafek tiltam tabokomu kaami atul kaata, utam suun-daa-lomdipla, Yesus kaa dik-daalin dinim kelip ko.
LUK 9:46 Kamboliwa, Yesus ami daang bakaalin tunum nikil iyo weng aal diki-bamdip boko una-tala-ke-bam ale, bokoya-lomda: Kaa kawanta nulmi iipyak tem kaltam bombe ata, tiltam kamokim ke-lokoma ni? kal-bomdip kanum una-tala-kemiple,
LUK 9:47 Yesus akal utama yi, Iyo yak kanolin aket kaali, fukunbip kala, kalba-kup, man katip ma ami naan-daala tal Yesus almi bombe kawu tal tolnale, Yesus ayo almi daang bakaalin tunum iyo bokoya-lomda: Nami tiin diim kaali, man katip kalanolin kalawaali sakbaalim dukum kala kalbi. Kemin ale, kawanta ma man katip kalawaltap kalaali, nami win diim kaata dong dokola namti, kaa nimi dong dakaap-nin ali kaa bombe te! Ale, God ali nam-baala talsii kaa, kawanta nami dong dakaap-na namti, kaali God ami dong dakaalin tunum namti kaa bombe no. Kemin, kawanta fanang daalaya, Nali ami minlo tem unsi tunum u, kala namti, kaata fan God ami tiin diim kawu, atin ti dukum ke-lokoma no, yaka ko.
LUK 9:49 Kala kanum bokoyilale, Jon ayo Yesus ami bokola-lomda: Nikil nuli tunum ma atamupla, Ali kapni win kaata, kufo-lomda sinik mafak iyo fotabamna yak bane-bilip kawu, nuli atamupla, Ali kapni daang bakaalin tunum kelin dinim bomda kanolin kaali, kanuba kala, kala-lom bokola-lomdup: Kapni disa kawu Yesus ami win kufon-bam kanubap kaali kambolan o, kala dil molup o, akiple,
LUK 9:50 Yesus asiik Jon so, almi aptum kusal iso, iyo bokoya-lomda: Dok kanolin tunum kaata, kipni waasi keyin disa kela namti, kulaali iltipni kayaak alaltap kemin, ibi kaa kulaalan o akan-kaamin disa yo, kala kanum bakayila ko.
LUK 9:51 God ami Yesus dibii tam abiil tikiin unokoma kaami am kaali, mepso tulula kemin, Yesus ayo fuku-daala yi, Kulaata atin ti Jerusalam unon o, kalale, almi daang bakaalin tunum iso nikil
LUK 9:52 alimal um-bom ale, Yesus ayo daang bakaalin tunum malo ma isiik yim-baala dusiin daalip, nikil yakyak bilin Provins Sameria kaami abip ma kaptamu boko-lomdip: Yesus ayo talaba kemin, am sokoma ayo ma dotola kem-sulupla, talak o, kalip. Katale,
LUK 9:53 Sameria kayaak kiili, utamipla, Yesus ayo tal sindala, Juda numi waasi kiimi abip dukum Jerusalam unon o kala, talaba kala kalaliwa, Kulaali, kala talemin disa yo, kala weng binalip din ileliwa, Yesus ayo kuno kelale,
LUK 9:54 ami daang bakaalin tunum Jon so, Jems so, nikil iyo weng sandiwa, Yesus ami tal bokola-lomdip: Kamokim kapyo, nuli God ami naan-daaluwa, wing mol lapnin ma fokola tildaak aba-lomdip abip kasel kutamali fuula kiin-abamnik o, kalbup te! Kemin, kapni aket fukunin kaata, bokoyilapla utamum o, akiwa,
LUK 9:55 Yesus ayo fal-siki alep iyo weng dukum-kup bokoya-lomda: Kwin! kukup mafak kaa kanumin disa kawi! yakale
LUK 9:56 abip kaali, kelalip din abip kusnum kaptam banip ko.
LUK 9:57 Kemin, Jerusalam unum o, kalalip nikil una-bilipla, tunum ma tal Yesus ami bokola-lomda: Kabi dok kanolin kawu tal-unemap kaa, nali ti kapso naso maakup tal-une-mokomup o, akale,
LUK 9:58 Yesus asiik bokola-lomda: Sinokim ali tawaal tem kabaaku tem kalabi kuu-tiile, iim de sin-laabala le, awon yakal kuno ilmi iim tem kawu sin-yaa-bala, ken-umbip. Lale, Dukum Ami Man Natale, sin-yaamin am kaa disa; ti kapkal talalu aket fuku-daalan aa! Kabi ti kanola naso tal-unemon o, kebap ema? akala
LUK 9:59 Yesus ayo tunum ma ami bokola-lomda: Kabi nami fanang tal-ilomdap nami daang bakaalin tunum kelan o! akale, tunum ayo bokola: Kamokim kapyo, kamasi kaa kuno kep-napla, asuk din-ilomdila, abip kawu nalmi atok ayo tiin mo-bom ilila, saaknala kawu, dibii-din dawaalila, asuk kapni fanang talokomi kayi! akale,
LUK 9:60 Yesus asiik ami weng maan tela bokola-lomda: Daa yo! Kabi unokomap disa; kulaa kela tildang nami daang bakaalin tunum kelan aa! Tunum kanta nami daang abam-nokomup disa yo, kalbip ilta-kup aptum kusal taanip iyo imbi din ima-laamik. Katale, kabi din unang tunum bokoya-lomdapla, God ami lak duulip tiltam God ami miit tem tiltam-ilomdip suunkup ilin unang tunum kelin o, kala bakayila-tal-uneman aa! kala mep tunum ami kanum bakaalale,
LUK 9:61 tunum ma ayo Yesus ami tal bokola-lomda: Nak-tunum kapyo, nali kapni daang bakaalin tunum kelon o, kalbi. Katale, kamasi kaali, nayo kambop-napla, din abip aba ilomdi nalmi awil-fakal iyo itam weng fokoya kawu, tal-ilomdi kapni daang bakaalin tunum kelon o, akale,
LUK 9:62 Yesus asiik bokola-lomda: Tunum ayo ima lang kaa talalu tiin molin disa ke-lokoma kaali, ami man kiili, talalu tiin mo ifa-mokoma dinim; kemin, ultap o. Tunum ali nimi lak ata-kup duuli no, kalala, ayo atuk-atuk-kema namti, God ami weng ayo unang tunum kiili, talalu kukaayokoma disa yo, kala kanum bakayila ko.
LUK 10:1 Kemin, kaali disa kelule, Kamokim Yesus ami aket fukunin ayo bom bii-somdila, kaata kawu abip ma ma tal-unemon o kala-lomda ayo tunum ilmi-kup 72 kiita ulela-lomda, alep e kala yim-baala abip e kala un-un-kelin disa bom iliple,
LUK 10:2 Yesus ayo weng ma faldak-tii bokoya-lomda: Unang tunum yaapkan kiili, Yesus ami lak duulin disa lale, iyo God ami weng uyo weng san-kaamum o kebip kemin, kiili wiit yakaana-laabu kanolin tap. Lale, wiit dakamin tunum iyo alep-kup kemin, (mep wiit dakamin tunum kuliili, tunum ita God ami weng kulii yang unang tunum imi bakayin ita kemin), ibi God ami beten kamaan-bilipla, alta okok kemin tunum yaapkan iyo ulelale, yim-baala din iltipni diim aba-lomdipla, kipso maakup din unang tunum God ami weng ayo bakayin o!
LUK 10:3 Kibi yim-baalila unin o. Kanola ibi unokomip kaa, tunum ili saak miyaan apliip imi sipsip man an-fakan-umbip tap ke, tal yam-mafak-daka-mokomip. Kemin ale, ibi kuu talalu utafii-bamdiwa kayi!
LUK 10:4 Kipni unokomip kaali, tuumon kii kulii-unemin disa; aa, ima men ayo abuu kulii-unemin disa; yak yaan-alom kusnum aso ma kulii-unemin disa; aa, liip kawu un-bom talaalip unang tunum iyo liip kawu tala-tala duk-duulip kaa, tiin-bom weng bakayin disa; weng-kup umuuya ti abiltap din abip aba nami sang kaata, bakayila-une-bala, tale-bala kelin aa!
LUK 10:5 Kanola suunkup am une-mokomip kaali, kamasi kaa am kasel iyo weng fokoya bokoya-lomdip: God alta am kaptam kasel ibi tiin mo-balala, kipni fanang dakamin ayo ti balili-kup kala, bom-biliwa yo, kala-somla kemin,
LUK 10:6 am kaptam bombe kaa balili-kalin tunum namti alta bokoya-lomda: Ibi tan ke tilip o, yokokoma kemin, God alalta kukup tambal ma kuyokoma. Katale, ali balili-kalin disa kela namti, tiin so, aket so, kiita-kup, Awu, kaa tilip u, kalale, ali weng umuuyokoma disa. Kemin, God ali kukup tambal kaa, ami kolokoma dinim.
LUK 10:7 Kemin, ibi abip kaptamu bomdip unang tunum kukuyin-bam ilip kaa, kibi din am kusnum kusnum kaa sin-laamin disa; ti kamasi din am kuluulip kaptamu-kup bomdipla, ima aye, ok aa, saak yak dok kanolin inin-inin kuyip uyo ti saak inin-kup kemalip ko. Kemin ale, ima kukaayin-bilip inokomip kaalile, kipni okok kamayin-biliple, kaami tiim kaata, ima kukaayin-bilip inokomip o.
LUK 10:8 Abip unum o, kalalip din itamipla, Ipyo, tan ke tilip o, kalalip iyo yim-bii din dok nolin ima ma ayo kuyip namti, kulaa ti inin-kup o.
LUK 10:9 Kibi abip kasel unang tunum mafak umkaan-unsip imi yam-talal-bam imi bokoya-lomdip: God ali kipni bokoya-lomda: Kibi tiltam nalmi miit tem tiliwa, tiin molokomi no, kalba kaali, mepso dikipnu no, yakan-kaamiwa kawu, kaal kelik o.
LUK 10:10 Din abip ma ayo din itamipla, Abip kaptam ayo tiin aa, fanang aa kiita-kup itamipla, iyo weng umuuyin disa kelip namti, yang abip iip kulu tolale, iltipni kukup kaata-kup, kanola sung ilol tal ipni yaan diim tabuubip kiiyo, diliit mo fokolip yak abip kayaak imi diim uniple, ibi bokoya-lomdip:
LUK 10:11 Kipyo, weng san bom ilipla, ti yaap ke tilip o, yokolip disa kelip. Kemin, kiltipni abip ami sung diliit mo binalup din unu kaali, iltipni diim kawu bom-bulu yi; Nuli kamboya unabup kemin, weng katip ma bokoya-somdupla unum o, kalup. Kemin, talalu weng san bom iliwa! Nuli God ami weng kaali, Tiltam nalmi miit tem tiliwa, tiin molokomi no, kalba kaayo, mepso dikipnu kaali, iltipni kuliiya tulup. Katale, ibi weng sanin disa kelip. Kemin, kuno iltipni san o, yakalip, abip kasel kaptam iyo kanum bokoyilalip kamboya unolip kayi!
LUK 10:12 Kemin, nali abip kasel kaptam-ami sang kaata ma bokoyokomi kemin, sawaalak abip ma bom-biisu umi win kaali Sodom ale, abip kaptam-ami unang tunum imi kukup kaali ti, atin mafak ke-bilipla, God alta taba-lomda abip kaptam ayo ku-mafak-daale, kuno unang tunum iyo yam-mafak-daasa. Kemin ale, God ami am mafiing diim tiltam tabula, Sodom kayaak imi angtiil yol kukaayokoma kulaali, katip so ale, abip kaptam-ami dok kanolin tunum ita God ami weng, weng sanup disa yo, kalalip babon tal-unebip kiimi angtiil yol kukaayokoma kaatale, atin ti sakbaalkan dukum kuluulokomip o, yakale, Yesus ayo tunum ilmi-kup 72 imi weng bakaya ko.
LUK 10:13 Kulaa, Yesus ayo abip alep kaptam-ami unang tunum weng uyo bakayin-bam ale bokola: Korasin kasel so, Betsaida kasel so, kipyo. Kibi iifan mokop soyal o! Nali kukup ukol ulmi kusnum kusnum kiili ti kipni abip alep kaptamu kanumsi. Lale, kipni aket fukunin ayo ma fal-siki-lom ban wakamin kaali ma, kensip disa te! Nali kanolin kukup ukol ulmi kusnum akal alik akal alik miit ma miit ma imi abip Taya so, Saidon so, kaptamu ma kanumsi dinam, abip kasel God ami atamin disa ita atam-somdipla, imi ban wakamin kuuta, aket uluum keyulala ilmi aket uluum kaami kukup kuuta kuluu-lomdipla, yek ayo tuk-duu-lomdip, ilimi angtiil diim ayo kabii-bam ale, ilim kaal mafak balal-tibin kaata, miki-lomdip dinam kaa, aman duluum bi-lomdip ilmi ban wakamin kii kambola-silip.
LUK 10:14 Kemin, kanola am mafiing diim tiltam tabokomu kaali, kanola God ami angtiil yol dukum kukaayokoma kaa, God ami Taya kasel sole, Saidon kasel so, imi angtiil yol kukaayokoma kuluuli, katip so kemin. Kata, fan kiptale, angtiil yol sakbaalim dukum so, namti kipta kuluulokomip te!
LUK 10:15 Aa, Kapeneam kasel kipkal, kibi boko-lomdip: Alik nuli ti din God ami abip kawu ilokomup o, kalbip. Katale, kaa fan disa; kibi nami weng kaa, weng san-kaamin disa kesip. Kemin, ibi fokoli daak abip mafak unokomip o, kala Yesus ayo abip asuumano kaptam-ami unang tunum imi kanum bakayila ko.
LUK 10:16 Kemin, Yesus ayo almi daang bakaalin tunum ilmi bokoya-lomda: Dok kanolin tunum kiita, nami daang bakaalin tunum kapni weng ayo weng san-kaama namti, ayo nami weng, kakal weng san-kaap-nin tunum ali kulu bombe. Kemin, kanta kapni weng kaa weng sanami disa yo! kala namti, kaata fan nami weng kaa, weng sanami dinim o, kalba namti kulu bombe no. Ale, tunum kaa dok kata God nam-baala talsi, nami weng kaa weng sanami disa yo, kalba namti, kulaali God ami weng kaa weng san-kaamin dinim namti kulu bombe no, kal-bomda almi daang bakaalin tunum imi kanum bakayila ko.
LUK 10:17 Daang bakaalin tunum 72 imi okok kem yakyak bilip bii disa kelula, asuk tal Yesus atam-ilomdip, fiyaap duumin dukum kaali, duu-bam Yesus ayo bokola-lomdip: Kamokim, kapyo, sinik mafak kiili, kapni win ata-kup baka-bulupla kawu, ili numi weng kaata, weng san-ilomdip tunum iyo baa tukuya unem-solip o, akiwa,
LUK 10:18 Yesus asiik bokoya-lomda: Kanu-biliwa kawu, nakal utami yi, Setaan ami titil kaali kabaak ban-ilomda ayo baabaa dabaalin tap ke-lomda kasentap abiil tikiin kawu kutal daak tawaal diim daaba kala, kalasii.
LUK 10:19 Kemin, ibi weng selin! Nali nami titil kaa kipni kuyasii. Kemin, liip un-bomdipla, inap sole, malepkan so, imi diim kawu yaan ta im-baak molokomip. Lale, kaa yelokomip disa. Kipni titil kaali, nami waasi Tunum Mafakim ami titil kuluuli kabaak banula, kipni titil kaata, uta uta ke-lokomu. Kemin, yak mafek mafek mafak ita ma taba-lomdip, yam-mafak-daalokomip dinim, atin disa.
LUK 10:20 Kemin, sinik mafak ili kipni weng kaa, weng san kutal-fukulin kala, kalale, ibi fiyaap duubip. Lale, kuluuli katipkan ale, mafek mafek sakbaalim dukum namti kala bombuu: ibi tal God ami miit tem tiliwale, God alalta kipni win kiili, alami Sukon Tem kabaku dola kuyak daayase. Kemin, kabak-ami fiyaap kaata duumalip te!
LUK 10:21 Kemin, kulaali God ami Sinik Tambal Yesus ami aket tem ilin ayo Yesus ami aket uluum takan telale, Yesus ayo atin fiyaap duumin dukum uyo duu-bamda, almi aalap ami bokola-lomda: Atok kapyo, kabi tawaal diim kaldaak aso, abiil tikiin so, kiili tiin mosap. Kemin, (kapni kukup kaata taba-lom unang tunum imi kukup uyo kabaak banu kewa uta uta kesu. Kemin, yaap ke yo, kebi.) unang tunum maakup maakup iyo aket fuku-daa-lomdip: God ata kukuyin-balala, nuli utamsup disa. Kemin, nulumi aket fukunin kaata, kukuyin-bulula, nokol God ami mafek mafek uyo utamsup o, ken-umbip kala, kalalapla, kabi kapni aket fukunin tambal uyo kelalapla, kiiyo ma utamsip disa. Kemin ale, unang tunum maakup maakup iyo boko-lomdip: God kabi kukuyin-balapla, utamum o, ken-umbip kala, kalalapla, kiita kukuyin-balapla, utabip. Kemin, (kiiyo nimi weng uyo weng san-kaamin-kup, kemum o ken-umbip kemin,) kaayo, Aatumen kabi yaap ke yo, kebi. Kemin, kapkal, kanumin kukup uyo, kaata kanumin o, kalalapla, kapni aket fukunin tambal uyo utamsup disa yo kebip tunum imi kukaayim-bam ale, kukuyin-balapla, kaal ken-umbip o, kala Yesus ayo God ami kanum bakaan-bam bakaala ko.
LUK 10:22 Beten keba uyo kulaa kela-somdala, Yesus ayo tunum unang yaapkan imi diim kawu bokoya-lomda: Nami Atok God ali mafek mafek alik iyo kulaap-na tildak nami sikil diim abasip. Kemin, nali almi man alik-daap lale, unang tunum ili ma natam, Awu, kaali fan God almi man tituun o, kalsip dinim; ti Atok God maakup ata-kup ti nali natama. Ultap kemin, dok kanolin tunum ata ma nami Atok ali ma atam, Awu, kanolin tunum u! ma kalsip disa ti; almi Man nata-kup atamsi. Kemin, unang tunum nalta ulela-lomdi, nalmi Atok ami sang uyo kukuyi namti, kiita-kup fan Atok ayo atam ke-lokomip o, kal-bomda bakayila ko.
LUK 10:23 Kanumsile, kulaa fal-siki almi daang bakaalin tunum ilmi-kup bokoya-lomda: Mafek mafek kipni tiin diim namti kulu tiltam tabamnula, utafiin-umbip. Kemin, kipta ti tambal ma God alalta ti mafek mafek kalawiili kukuyimba kemin, fiyaap duulin o, kala-somla ko.
LUK 10:24 Weng ma bokoyokomi kemin, kipyo weng selin! Siin sawaalak kaa nili tilin dinim bom-bilila kawu, God ami weng ku-fatap-daa bakayin tunum yaapkan iso, king o kala kamok kamok yaapkan iso, ili nami ok kala kanubi kaali, ipni utafiin-umbip kaa, utamum o, kemsip. Lale, kuu utamipla, Tiltam tulu no, kalsip dinim. Ale, nami weng kala kipni bakayinbi kalawuuli kuno ti yakal weng san-kaamum o, kemsip. Lale, ili ma weng san-kaamsip disa kayi! kal-bomda ayo almi daang bakaalin tunum imi kanum bakayila ko.
LUK 10:25 Lo utamsa tunum ma ayo tola-lom, Yesus kaa dap-kukulila, weng mafak ma yak-boko-tildak-boko kela kala kalon i! kalale, bokola ko: Kukuyin tunum u. Nali dok kano-somdila suunkup tunum ke ilokomi ni? akale,
LUK 10:26 Yesus asiik bokola-lomda: God ami weng Sukon Tem sawaalak kawu dolsip kaali, kapkal tik-tiin-umbap kemin ale, kabak kanimin o kalsu ni? akala,
LUK 10:27 lo utamsa tunum ayo bokola: God ami Sukon Tem uyo boko-lomdu: Kabi ti atuk-atuk kemin daa; kapni aket, fanang, tiin, titil, kiili, alik kulaalap yak God Dukum ami diim abu atin ami mok-kup inan-bamdawa yo, kala-somla ko. Kuno kaltapni mok inbap tap ke-somdapla, kaptum ami mok-kup inan-bamdawa yo kala kanum bokosu no, akale,
LUK 10:28 kulaa Yesus asiik bokola-lomda: Kulaa ti fan bokolap. Kemin, kaata kanumap namti, kuuta ti suunkup ilokomap. Kemin, kanu-bamdapla yo, akale
LUK 10:29 lo utamsa tunum ayo, kanum bokolila, unang tunum kayak kayak iyo nitam, Kaali ti tunum tambalim o, nikin o kalala, ayo Yesus ami asuk bokola-lomda: Kaptum ami mok inaalan o, kalsu kaata, kawanami mok inaalin kaata ni? akale,
LUK 10:30 Yesus ayo mep tunum kaami weng kaali, maan tela boko-lom kayak kayak imi mok inaayin sang kaata faldak-tiimin weng ma bokola ko: Am ma daanule, Juda tunum ma Jerusalam kela yakyak bilin abip Jeriko unon o kala una-balaya, tunum liip kutii yan kutii keya imi mafek mafek dakaayin tunum iyo, tal dap-tal-fuku an-ku liip kaa daa kela yak ami ilim bung men kiiyo, alik duk-duu kulii-un-bomdip andap liip kutiilip unip saaknin tap kela bom-balala,
LUK 10:31 lotu am tunum awem pris o kebip ayo ma liip kulu kutal-fuku um-bom atam talaalaya, Tunum ma kanoba kala, atama. Katale, kela yang balang liip abala kela unale,
LUK 10:32 kuno Livai tunum lotu am kaptam-ami dong dakaayin tunum ma tal ula, Tunum kaa ti kano bombe kala, kata, kuno ti akal liip balang biki-lom akaala una kelipla,
LUK 10:33 Juda imi waasi tunum Sameria ma liip kaami diim tal ulaya, Kwin, fan kalawaali imi waasi Juda tunum ma an-ku liip kala, tii unip taanin ke tiinba kala, kalale, kulaali ayo olen-daalale,
LUK 10:34 kulaa yang mepso kulu dap-tal miki yak marasin abang abamin ok ayo kuluu an-kutii-unbip kaami abang tem ayo abonba-kup, yak abang dinamin ayo kuluu dela ke, tunum ayo dabuu dafo dap-tam yak almi dongki ami daang kun diim tii-lom dap-tamala tii bital fatal imi tal siin-unemin am kawu daa talalu tiin mola se.
LUK 10:35 Sintam tuumon silva alep ma kuluu-lom am kaptam-ami tiin molin tunum ami kola-lom bokola-lomda: Tunum an-kutiibip kalawaali, kapta tambal-kup tiin molap bom-balala, bii asuk tal-ilomdi, kapni mafek mafek iktu-balap ayo yaap-nokoma kaami maan kaayo, tiip-ton o, kala tabanse no, kala Yesus ayo lo utamsa tunum ami bokola-lomda:
LUK 10:36 Kapni aket fukunbap kaa, tunum asuumano kii kanta tunum aabip ami aket kolase? akale,
LUK 10:37 kulaa lo utamsa tunum ayo bokola: Yi, tunum olen-daala-lom, dong dokolase ata no, akale, Yesus ayo bokola: Kemin ale, ti kapkal din-ilomdap kaltapni waasi imi aket kaata, kuya-lomdap kanumin kukup kuuta-kup ti kanu-balawa yo! aka ko.
LUK 10:38 Yesus so, almi daang bakaalin tunum iso, nikil iyo asuk yak aba bilin abip akal alik ma din itamipla, kulaa unang ma umi win kaali, Mata uta ti yaap ke tilip o, kalalu im-tam am daalule,
LUK 10:39 Mata ulmi neng Maria uyo tal Yesus almi miit tem kulu tiin-bomdu ami weng kaayo, weng san-kaa-bam tiin ilula,
LUK 10:40 kulaa Mata uyo fiit-bamdu, ima ayo dot-bam ale, uyo aket uluum dukum ma kewale, tal Yesus ami bokola-lomdu: Kamokim kapyo! Nami neng kalawuuli kambop-na-bulula, nalakis fiit-bamdi ima fuubi kaa, nitamin disa nobap ema? Baan uyo bokowapla tal dong dokop-nuk aa! akan-kaa-bam bakaalula,
LUK 10:41 Kamokim asiik bokowa-lomda: Mata, kubi ti mafek mafek yaapkan kiimi aket kaata ti tan-bulula, aket uluum kep-timbu. Katale,
LUK 10:42 kubi kukup maakup ma umi aket kaata-kup lukup-tula kuuli, iibap. La, Maria uli utamu yi, Kukup lukup-tu kulaabap kaa, nami weng uyo weng san-kaamin kaata nu, kalalula, kabak-ata nami weng kaa, weng san kuyak aket tem dakabu. Kemin, umi kanolin kukup kaa takan-tii-wokomup dinim o, kalala, Yesus ayo kanum bokowa ko.
LUK 11:1 Am ma daanale, Yesus ayo tunum dinim bokon kawu bomda God ami beten kamaan-balala, almi daang bakaalin tunum kiili, aso maakup bom-bilip kemin, ami beten keba ayo disa kelule, kulaa daang bakaalin tunum maakup ma tal Yesus ayo dik-daala-lomda: Kamokim kapyo, beten kemin kukup kaali, nuli dok kano-lomdupla, beten ke-mokomup i? Sawaalak kaali, oksam ukayin tunum Jon ami daang bakaalin tunum ata-kup kukuyin-bam bokoya-lomda, God ami beten kamaalin kukup tambal namti kalabuu no, kal-bomda kukuyinsa ultap ke, kapkal God ami beten kamaalin kaami kukup kaali, kukuyan o, kala bokolale,
LUK 11:2 Yesus ayo bokoya-lomda: God ami beten kamaalin kaali, kalanola bakaalalip ko: Numi Aatumen God kapyo, Nuli kapni win kaa, atin ti tambal kemin kaata, nuli kufop-tum o, kalup kemin, Kabi alik nuli yim-tama tam kapni miit tem daa-lom tiin molokomap kaali, talak o, kala-somla ko.
LUK 11:3 Am kala daan-bulula ilup kaa, nuli ima kaa kukaayin-balawa, tiika-bomdup, inan una-buluwa yo.
LUK 11:4 Kayak kayak ita, numi kukup kanuyilip kaa, kukan-tiiyila-yaabup kemin, kanola ti kapkal numi ban wakamin kukal kukan-tiiyin-balawa yo, kala-somla ko. Mafek mafek mafak kaa tiltam numi yam-kukulon o kalbu namti, dukum-kup dong dakaayim-balapla, ban kemin kaa uktayuluk o, kalalip, beten kamaalin kaami kukup kaali, kutal-fuku-bomdiwa yo, yaka ko.
LUK 11:5 Kemin, Yesus ayo asuk beten kamaalin kaami sang kaali, faldak-tiimin weng kusnum ma boko-lomda: Am malang tini-lom am iip yaknule, tunum ma yak aba din almi aptum am din-ilomda almi aptum ayo dik-daala-lom bokola-lomda: Nak-tunum kapyo, am kamala kutamiip kulawu nalmi naktum ma tal nalmi am kawu sindila unon o, kalala tala. Katale, nali ima dinim o, kalalila tili. Kemin, tam tiin-ilomdap kapta dong dokop-na bret asuumano ma kup-napla, kulii-din daali ayo ina sinda unala, kawu ilom nasiik maan kaa tiip-ton o, akale,
LUK 11:7 Tunum am kaptam akanba ayo bokola-lomda: Saal kaltam talalu lii-lom alimal akanbup. Kemin, tam tiin-laa-bamdi, man imi tiin yak dakel-yilami kemin, nali tam tiin ima kaa ma kup-tokomi disa; kabi duluum-alomdap baan ti kep-na unan o, akase. Lale,
LUK 11:8 nali kabak-ami sang kaali bokoyon o, kalalila kemin, weng san iliwa! Am kayaakim ali utama yi, Tunum abip tola-bomda bakaba kaa nalmi nak-tunum u, kalalaya, kaata fan tam tiin-somdala, ima ayo kolokoma disa. Ti atamala, tunum abip kaptam tola-bomda naanba, ali suun-daa-yaamin disa; ti naanin-kup kema kala, kala-somdala kawu, akal tam-tiin tam ap-tunum ami weng alik kanu bokoba kaali, maan tela ima kaa kolaya, kuliila unokoma.
LUK 11:9 Kanolin kemin, nami weng bokoya-lomdi kaata, ibi kanumin o, yokokomi kabak-ata kanu-malip kayi! Kibi dok kanolin mafek mafek kaata ma iibup o, kalip namti, suunkup God ami dik-dakaan-bilipla, ayo kukaayilama ko! Kanola suunkup fen-tal-une-bilipla, God akal dong dokoyilaya utamalip te! Aa, ti saal dok-dok kemin ultap ke, ti suunkup God kaa ti dik-dakaan-bilipla, dong dakaayin-balaya yo, kala-somla ko.
LUK 11:10 Kanola ili mafek mafek sang ayo ma God ami dik-daalip namti, akal tunum alik dik-dakaanbip imi kuyokoma le, kuno tunum imi mafek mafek fen-tal-unebip namti, kanola God alta dong dokoyila fen-bam uta-mokomip. Aa, tunum saal dok-dok ke-mokomip kakal ti, saal busuu-yinba-kup, im-taldang almi miit tem ayo daalokoma no!
LUK 11:11 Awil-fakal kipyo. Kibi nami weng kalawu weng sanalip ko. Kanola kapni man ayo dik-daap-ta-lomda: Aatumen kabi aniing ma inamnon o, kebi kemin, kup-nokomap e disa ye? kala dik-daala kaali, inap kaata kolokomap ema? Disa te! Ti aniing kaata-kup kolokomap.
LUK 11:12 Aa, ti asuk dik-daap-ta-lomda: Awon win ma inamnon o kebi kemin, kup-nokomap e disa ye? kala dik-daala kaali, kaa keng mafak malepkan kuuta, kuluu kolokomap ema? Disa te! Ti awon win kuuta-kup, kolokoma no.
LUK 11:13 Kibi ti ban-kemin tunum-kup bom-bilip. Lale, kibi mafek mafek tambal kii, kaltipni man kii kukaayila-yaabip tap kanola, iltipni Kaalap abiil tikiin kayaak God akal ti tunum kemin, alta mafek mafek tambal iyo almi man kipni kukaaya-laaba; ami kukaayin kukup kaa ti, uta uta kesu. Kemin, kipkal ami dik-daalokomip kaa, akal almi Sinik Tambal ayo dibii-tildaak dong dokoyokoma kayi! kala Yesus ayo kanum bakayila ko.
LUK 11:14 Tunum ma sinik mafak ta dap-mafak-daalaya, weng abat kesa. La, Yesus ata sinik mafak ayo fotabamna yak banala kulu, tunum ayo tambal ke-lom asuk weng bakan-tabale, unang tunum iyo atam-ilomdip, fanang alik tam baneyilu. Katale,
LUK 11:15 malo ma ili boko-lomdip: Yesus ami diim kawu, sinik mafak imi kamokim Belsebul o kala, Setaan ata bomda tiin mo-bom dong dakaan-balala, ali unang tunum sinik mafak im-buusip imi fotaba yak banebip o, ke-balale, malo ma imi aket fukunin kaata, Yesus ami dik-daaluwa, kukup akal alik ma nolaya kawu atamuwa yi, Kaa kukup mafak ema! kanuba kaa kalum i, kala-lomdip bokolip ko: Kabi kukup ukol alik ma numi kukuyap nokol utamuwa yi, God ata dong dokop-talala, yak kanolin kukup kaa kanubap kala, tukum o, kala bakamip.
LUK 11:17 Lale, Yesus ali kanubip kiimi aket fukunin kaali, utam-ilom bokoya-lomda: Kiwe! Mep faldak-tiimin weng kala bokoyokomi kaali, talalu weng selin! Abip maakup ma kaptam-ali biki-kutii dinan-kulii-tabip namti, imi titil foko-laabip namti, kulaata mafak-nokomu no. Kanumin ultap kemin, kanola unang tunum am maakup kaptam bom-bilip ili, weng aal-kup diki-bam suunkup dinin-kup, ilip namti, kaa maakup ilokomip disa; biki-lom una-tala-ke-lokomip. Kemin, ultap o.
LUK 11:18 Kibi bokop-na-lomdip: Setaan ayo titil so ma kup-tala, almi kayaak sinik mafak imi fotabam-napla, yak banen-umbip o, ninbip kaali, tifan dinam Setaan so, almi kayaak sinik mafak iso, alimal yakal biki-kutii miit alep ke dinan tabolip kaa, alimal kii titil-fokolamip disa; (Lale, Setaan ali kanu-mama disa kawi! Ibi kulaali, babonin weng bakabip te!)
LUK 11:19 Nali sinik mafak iyo fotabi yak banen-yaabip kanolin kemin, ultap Juda daang bakaalin tunum yakal sinik mafak iyo fotabamnip yak banebip o. Ibi bokop-na-lomdip: Setaan ata Yesus kaali, dong dokolala, sinik mafak fotabe-balala, yak banen-umbip o, nakan-kaan-umbip. Yale, kipni okok kemin tunum iyo sinik mafak fotabam-niwa yak banen-umbip kiili utamipla, Tunum kaa ma Setaan ami titil kaata kuluu-lomda sinik mafak kii ma yak banoma disa yo, kalalip utam-silip. Kemin, ili kabak-ata utamiwa yi, Kibi nami sang bakap-nambip kaali, ibakap-nambip o, kala-lomdip Juda okokmin tunum ita kanum bokoyokomip ko.
LUK 11:20 God alalta nali titil kup-nalala, mep sinik mafak kii fotabamni yak banen-umbip kaali, tifan namti, ibi utamiwa yi, Awu, faneng God ayo unang tunum imi yim-bi-din nalmi miit tem tii-lomdi tiin molokomi no kalsa kaali, kuluwu tiltam tabu no kala, kalik o kala, Yesus ayo kanum bakama ko.
LUK 11:21 Kemin, Yesus ayo almi titil dukum kaata, uta uta ke Setaan ami titil kaa wela kabaak bansu. Kemin, kaami sang kaali, weng ma faldak-tii bokoya-lomda: Tunum ma titil soyim ayo tam almi bung kiiyo, talalbi kutam almi am tii kambola, waasi dinin mafek mafek iyo foko miki-lomda, almi am bung ayo tiin mo bom-balala, almi bung uyo ti tambal-kup tiin-bilipla,
LUK 11:22 kulaali tunum ma ayo disa akal titil ta akal ma kesa ata tal atamala, aso alep din-bi-lomdip ata ata ke-lomda, aptum am kayaak ami waasi dinin ami mafek mafek kii mikilom faksa-lomda, Tal nelamu disa yo, keba so, aptum ami mafek mafek dotu kutam am tiiba so, kiiyo alik dik-duu-lom almi waasi tunum ami kolokoma kaali, tunum am kayaak ami titil kaali kulu dinim-nokomu.
LUK 11:23 Kulaa, dok kanolin unang tunum ita nami ok ayo ma nuumin disa, aa yang aptum kusal iyo dong dakaayin-bilip tildang nami miit tem talemin disa, kemip namti, kiili nami waasi unang tunum ililtap ke unang tunum imi oko-takayim-bilipla yang banen-umbip ililtap ke-lom kanun-umbip o, kala Yesus ayo kanum bokoya ko.
LUK 11:24 Yesus ayo asuk weng faldak-tiimin weng kusnum ma bokoya-lomda: Sinik mafak ma tunum ma ami diim kawu laaba. Kemin, sinik mafak ayo tunum kela din ok dinim-kup bokon kawu yang aba tildang aba ke-bam baan diim uyo ma utam-somdila ilon o, kalala, fen-tal-tal kema yi, Baan diim ayo ma atamin disa keli kala, kalba-kup, ayo bokola: Yi! nami am baan kaa, fen-bili disa keba kemin, asuk umbilin nalmi tunum kela talsii ami diim kawu bomdila ilon o, kalale,
LUK 11:25 kulaali asuk umbilin ulala, Ami tunum ami iipyak tem kaa am kaptam-ami sung ilol aye, saak yak bung mafek mafek kiiyo atin diliit mo-lom tambal ma kela-lomda, tunum disa am-kup bombuu tap keba kalale,
LUK 11:26 kulaali din sinik mafak ilmi-kup fetkal kiita, itam-ilom, iso kulii-tal tunum ami diim tiilala, alik maakup bomdipla, kamasi sinik mafak maakup kaami ilsa kulaali, kulaak banin, ale mulo kaami sinik mafak fetkal kaa tiltam tilip kiita, ita ita ke-lomdip kulu tunum kulaami aket fukunin mafak kaali, atin mafak-alom, uta uta kelula, kamasi aket fukunin mafak utale, kabaak banu kewansu no, kala Yesus ayo faldak-tiimin weng kaa kanum bokoyila ko.
LUK 11:27 Yesus ayo weng ma unang tunum yaapkan imi tem kawu bokoyilale, kulaa unang ma usiik Yesus ami dukum-kup bokola-lomdu: Kapyo, tambal kemin kapni kawak uyo tamu-lomdu muuk ayo kukaap-tam-bamdu tiin molu bom bii fasuu-lom tunum dukum ke-salap. Kemin, God ata kawak umi kukup tambal-kup kuka-um-balala, fiyaap duu-buluya yo, aku.
LUK 11:28 Lale, Yesus ayo bokowa-lomda: Fan bakabap. Katale, unang tunum ili kawanta ma God ami weng kaa weng san-kaa-bamdip, God ami kukup tambal kaata kutal-fuku kulii-tabe-bam kem una namti, kaata fan God ayo kukup tambal kaa, maso ma ti kukaayin-kup kem-unokoma no, kalala, Yesus ayo unang umi weng kanum bokolula maan tiiwa ko.
LUK 11:29 Unang tunum yaapkan iyo din Yesus ayo ata-buluwa, kukup akal alik uyo ma nolaya, nuyo atamum o, kalalip tal falala duuliple, bokola: Ibi aket fukunin mafak kaali fukun-ilom ibi bokop-na-lomdip: Mirakel o, kala kukup akal kusnum kaata ma, kukuyapla kawu, atamuwa yi, Kabi fan God alta tam-baala tal-salap kala kalum o, kala-lomdip dukum-kup dik-dakamin-kup kebip. Lale, nili kanolin kukup kaali ma kanumila, kaami fiyaap kaali ma, duu-mokomip disa. Kemin, sang maakup ma kaata-kup kukuyokomi kaali, Jona ami toop aniing dukum kaami mat tem tiin ilsa kaami sang kaata-kup kukuyokomi.
LUK 11:30 Siin sawaalak kawu, God ami weng tem bakayin tunum Jona ayo almi abip kaa kela umbilin tunum miit kusnum ma imi abip win finin dukum Niniva yo, kala-laabip kawu, Niniva kayaak iyo bokoya-lomda: Kibi kukup mafak kulu kanun-umbip kuluu kulaalin o, kal-bomda bokoya bokoya ke-bisa ultap, Dukum Ami Man Nali tal kamala kulaami unang tunum bom-bilip kiita bokoya-lomdi: Kibi kukup mafak kula kanun-yaabip kuluu kewin o, kalalila bakayon o, kala talsi no.
LUK 11:31 Sawaalak kaa, Seba bokon kaptam-ami unang tunum imi tiin molin unang kamokan Kwin uyo Solomon ami weng tambal kaata ma weng selon o, kalalula, ulmi abip kaali kela-lomdu, yakyak umbital Israel-miin imi bokon kawu talsu. Kanola am mafiing diim daanokomu kaali, God ata unang tunum alik iyo yim-tama din weng talalmin baan diim daale, yim-bak-saanokoma kaa unang kuluuta tam tola-lomdu, kamala kulaami unang tunum bom-bilip kipni sang ayo bokolule, Solomon ami weng tambal kaata, kabaak banule, Yesus ami weng tambal kaata, uta uta kesuu. Lale, unang tunum kalawiili, ma weng san-silip dinim o, kalalula, God ami diim kawu, kanum bokolokomu.
LUK 11:32 Kanumin ultap kemin, am mafiing diim daanokomu kaali, God ata unang tunum alik yim-tama din weng talalmin baan diim kawu daale, yim-bak-saanokoma kaa, Niniva kayaak iyo tam tola-lomdip, kamala kalawaami unang tunum bom-bilip kipni sang kaata boko-lomdip: Nuli Jona ami weng tambal kaata, weng sandupla, aket fal-siki-lom, nulmi ban wakamin kuluu kewasup. Kemin, Jona ami weng tambal kuluu kulaak banula, Yesus ami weng tambal kaata, uta uta kesuu. Unang tunum kalawiili, Yesus ami weng tambal kuuta, weng san-silip. Lale, nuli aket fal-siki-lom nulmi ban kemin, kaa kulaalokomup disa yo, kala-silip o, kala, Niniva kasel ili kipni sang kaata, God ami kanum bokolokomip o, kala, Yesus ayo kanum bakayila ko.
LUK 11:33 Yesus ayo asuk faldak-tiimin weng ma bokoya ko: Ibi ilaam kaa iilfo-lomdip kulii-daak kabuk tem tiile, baket kuuta kuluu-lomdip ilaam kuumi kulaak tinilokomip ema? Daa; iilfo kuyak alami baan diim kawu tiiliwa, unang tunum talokomip iyo tal kaali ata-mokomip te!
LUK 11:34 Kemin, kipni tiin kiili, amitom ultap. Kemin, amitom saal ayo busuulip namti, falala-kalin ayo am ba talokoma. Kanolin tap kemin, kipni tiin kaa baalip namti, falala-kalin ayo tal kipni tiin ayo tulu ata-mokomip. Kemin ale, kipni tiin kaa mafak ilu namti, atin ti malang tinilin diim kawu ilomdip mafek mafek kii ma ita-mokomip dinim o.
LUK 11:35 Kemin, ibi kaa talalu utafii-bamdipla! Ibi tiin mafak ililtap ke babon-bamdip, kipni aket fukunin ayo malang tinilin tap ke ilin disa yo; tiin tambal-kup baa-bomdip mafek mafek itam-laabip tap ke, ti tambal-kup bomdiwa kayi!
LUK 11:36 Ibi God ami falala-kalin kaa kuno kewip, talaba daak kipni aket tem ayo un iilfolokomu kawu, kipni aket tem malang tini-yinsu uyo alik falala-kup kala-lom ibi falala-kup kala-lom, ilaam iilfolin tap ke, ibi tambal-kup ilokomip o, kala Yesus ayo kanum bakayila ko.
LUK 11:37 Yesus ayo kanum bakamsi bokoyila disa kelule, kulaa Falosi ayo ma tal Yesus ami bokola-lomda: Kapyo, talapla, naso alep din nami am kawu ima inum o, akale, fan Yesus ayo aso alep din Falosi ami am kawu tiinip. Kemin,
LUK 11:38 Falosi ayo Yesus kaa atama yi, Yesus kaa Juda numi kukup kaata kuluu-lomda sikil kaa diing-nama dinim ke-lom kambola ima imba kala, atam-ilomda aket dukum fukuna ko.
LUK 11:39 Kanolale, Kamokim ayo ami kanola kaali, atam ale bokola-lomda: Lotu kaami lo fukumin kaali, Falosi ibi wok ket inin kaap so, falet so, ili disa tiltam saak lo angtiil diim kulaata-kup diinga-laabip. Katale, yak iipyak tem kabak-alile, diinga-laabip dinim. Kemin, kanolin tap o. Kipni aket fukunin ayo ti God ami tiin diim kawu tiinum tambal o, kala-lomdip suunkup wok-sam kaa waka-bam ken-umbip. Lale, yak kipni aket fukunin mafak dukum so, unang tunum imi moni kaami aket-kup tiin nen-bam kuluu-yaamin kaaso, iyo ma keya-laamin disa ken-umbip.
LUK 11:40 Kipni aket fanang kaali ti, babonbip kemin, ibi ti talalu utamin! God ami mafek mafek talalu kutiisa kaa, saak lo kaata-kup talalusa nema? Disa; ali tildak ipnaal diim so, iipyak tem kabak aso, maakup talalu kutiisa te! Kemin, ibi ipnaal diim so, iipyak tem kabak aso, kiili tiin saan-bamdiwa yo, kala-somla ko.
LUK 11:41 Ibi aket fukunin ayo ti fal-siki-lom unang tunum mafek mafek iibip iyo olen-daayinbip-kup, kipni inin-inin kaali, falet diim bombuu aye, yak ket tem kabaaku wok so, bombuu aye, kiiyo kuyokomip kaali, ibi God almi tiin diim ayo atin tambal-kup ke-lokomip te!
LUK 11:42 Falosi kipyo, kibi weng senin! Kibi maang aa, kuut aa, yak mafek mafek inin-inin katip katip atul-kup tabasip kii, duula kutii sikip nakalkal keliple, sikip maakup ma kabaak-ata tii God ami kukaala-yaabip tap, ibi kukup katip katip kiimi aket kaata yan-buluya, kanu-bam ale, yak kukup sengkan dukum kaami aket kaata lukuuya-laaba. Kemin, kaali ti ibi God ami aket yelula, dukum-kup ma kolin dinim ke-bamale, iltipni kaptum kusal iyo alik maakup ti kukup tambal kaata-kup kukaayin dinim; kemin, God ali ipni fiyaap kaa duun-umba disa. Am ma daanokomu kaali, kaami kalan kaata, God ayo angtiil yol kaali kukaayokoma. Kemin, ibi kukup dukum kaami aket-kup yelula, kanu-mokomip kaata, God ayo fiyaap dukum duulokoma. Kemin, yak kukup katip katip ita-kup kanumin disa; ti kukup dukum kaso kanu-bam kemin o, kala-somla ko.
LUK 11:43 Falosi kipyo! Kibi din lotu am unokomip kaa, Nuli tunum kamok te! kala, din abiin tambal kawu tiinupla, unang tunum alik iyo itamik i! kalalip tiin-laabip. Aa, din ima waan saanin baan diim unokomip kaakal, kipni aket fukunin kaali ti, Nili fatap diim kawu tola-bilila, unang tunum alik iyo tal bakap-nam-bamdip: Kamokim kaa balap o? Kukuyin tunum kaa salap o? nakan-kaamik i, kalalapla, kabi kanun-umbap. Katale, ilom am ma daanokomu kaali, God ali kanun-umbip kaami kalan kaata, kibi angtiil yol kaa kuyokoma no.
LUK 11:44 Kayak kayak kiimi titafiibip kaali, angtiil diim kaata, Kabi tunum tambal o, tinbip. Katale, kapni iipyak tem kabak-ami aket mafak so, fanang mafak so, fukunbap kaali, tunum taana dibii-din dawaalip tawaal tem kabaaku foma-sing-daka-balala, unang tunum iyo atamin disa ke-bomdip disa tiip diim kulu tal-unebip. Ultap kemin ale, ilom am ma daanokomu kaali, God ayo kaami kalan kaata, kabi angtiil yol ayo kup-tokoma no, kala Yesus ayo Falosi imi itafiimin weng kaata kanum bakayinsa ko.
LUK 11:45 Kemin, kanum bokoyilale, kulaa lo utamsa tunum ma tiltam Yesus ami bokola-lomda: Kukuyin tunum o! kabi kanolin weng bokolap kaa, nuli kaa itafiimin weng bakabap kala, kalbup o, akale,
LUK 11:46 Yesus ayo bokola-lomda: Ayo, faneng, bakabap te! Lo utamsip tunum kibi unang tunum iyo bokoya-lomdip: God ami weng kuka-daasa kaata ti fukulin o! kala, kaata-kup bakan-umbip disa; kaltipni saak weng sawaa kusnum kusnum iyo kulii tam God ami weng kutiisa umi tiip diim kaa daka-bamdipla, unang tunum iyo bokoya-lomdip: kutal-fukulin o! yakan-kan-umbip. Kemin, unang tunum ili kaa utamiwa yi, Lo yaapkan iyo kutal-fuku-bam nuyo fiitbup o, kalaliwa, aket uluum kaa tabeyila-yaabu. Lale, ibi olen-daayila dong dakaayin-bilipla, iyo lo fukumin disa ken-umbip. Kemin, am ma daanokomu kaa, God ali kabak-ami kalan kaata, lo utamsip tunum kipkal, ti kanola angtiil yol kaa kuyokoma kayi!
LUK 11:47 Kipni kawil-fakal ili, God ami weng ku-fatap-daa bakayin tunum kiiyo, yan-fakabi imbii din kuwakamsip. Kemin, ibi kasen-foko God ami weng tem bakayinsip imi aket kaata, fukunbup o, kalalipla, imi dibim diim kaayo, tambal-nuk o, kalalipla, tuum uyo kuluu ilaka-bamdip, aa as tes san kiiyo, diki-bam ken-umbip. Katale, kipni aket tem ayo, Tambal-kup ke, kawil-fakal ita taba kiiyo anu-silip o, ken-umbip. Kemin, kibi iltipni kawil-fakal ililtap kayi! Kiili anulip imaa-silip ale, kipta imi dibim diim uyo tiin mosip. Kemin, am ma daanokomu kaali, God ata kaami kalan kaata, ibi angtiil yol kaa, kuyokoma.
LUK 11:49 Kemin, God ali yak aba kunolin mafek mafek bombuu kuluu utamsa. Kemin, ali kipni kukup kaami sang ayo boko-lomda: Nali nalmi weng ku-fatap-daa bakayin tunum so, aa daang bakaalin tunum iso, ili yim-baali din unang tunum imi diim abokomip. Yale, tunum ita tam taba malo ma anu kuwaka-bam ale, kuno malo ma kiita, disa angtiil yol-kup kukaayin-bam, ke-mokomip o, kalala, God ayo kanum bokosa no.
LUK 11:50 Siin sawaalak God ami tawaal so, abiil so, talalusa kawu, kipni kawil-fakal iyo God ami weng ku-fatap-daa bakayin tunum iyo yan-fakan yakyak kulii umbital kula diilu kemin, tunum unang kama kula bom-bilip yakal ti kanola, nami daang bakaalin tunum ye-bamale, kuwaka-bam ke-mokomip. Kemin, kabak-ami kalan kaata, kawil-fakal iyo kaami maan kaata kuluusip. La, God akal kipni kawil-fakal imi ban so, iltipni ban kiiso, kuyaku-diyaku ke-lomda, ban kuumi maan kaata, God ayo angtiil yol kaa kipni kuyokoma.
LUK 11:51 Kamasi kaptoop-ali Kein asiik taba-lom niing Abel aala taanala, kulaali God ami ok tabuulin tunum iyo kayak kayak ita yan-talan-umbipla, yan yakyak kutama tal awem tunum ma Sekaraya namti am awem kaldak ale, mafek mafek fuulip kiin-aba-laamin baan diim kabaaku an-ku kabaak tiilipla saaksa. Lale, kabak-ata asuk bokoyokomi kemin, weng san bom-ilipla! Kipni kawil-fakal kanola ban ke-biliwa, kanola kaami ban kuluuta tal man loop kipni diim abamnula, God ali kabak-ata angtiil yol kaa, kuyokoma ko.
LUK 11:52 Lo utamsip tunum kipyo! Kibi utamiwa yi, God ami Sukon Tem kaali, God ami aket fukunin weng kaata, kukuyin-bulu utafiibup kala, kalbip. Yale, ti kipkal God ami aket fukunin kukup kaa, kanu-malup dinim o, kal-bom ale, yak kaptum kusal imi God ami aket fukunin kukup kaata, kanumum o, kal-biliwa, kipta yim-tal yim-tal ke-bam ken-umbip. Kemin, ilom kawu, God ayo kaami kalan kaata ibi angtiil yol dukum uyo kuyokoma no, kala Yesus ayo lo utamsip tunum imi kanum bakayila ko.
LUK 11:53 Kanum bokoyinba-kup, Yesus ayo am kula kela tam daak abip unale, alik maakup yak ami daang aba un-bomdipla, lo utamsip tunum so, Falosi iso, iyo Yesus ami aket atul dukum kaayo kola-lomdip, Yesus ami bon tem ayo talalu tiin dik-yak-dela dik-dakaalin-kup ke-bulupla, ayo weng mafak ma bokola kala kalale, kulu ti dibii-din weng talalmin baan diim kawu daalum o, akan-kaa-bamdip atafiimin weng so, kasen-fakaalin weng so, dik-dakamin weng so, kiili ti yaapkan Yesus ami bakaalip ko.
LUK 12:1 Unang tunum yaapkan iyo tala-tala-ke-lom ang de-lomdip Yesus ami weng kaata ma, weng san-kaamum o kalalip, muup-daa-lomdip aptum kusal imi yaan kaami yim-baak saanin so, kemipla, Yesus ayo almi daang bakaalin tunum imi akolkup bokoya-lomda: Misii ibi Falosi ililtap kelamip kemin, ibi Falosi imi yiis bret faskaamin kaami kutap kaa utafii-bamdiwa kayi! Falosi imi kukup alep fukulin kiimi sang ata bakayinbi. Kemin,
LUK 12:2 dok kanolin unang tunum imi kukup mafak maaklo kuwaalokomip kaata ilom am ma daanula, God akal alta imi kukup mafak uyo ku-fatap-daayokoma.
LUK 12:3 Kanolin kemin ale, kutamiip kawu kaptum kusal imi kukup mafak kaami sang kaa kuwaa-lom boko-lomdip: Kanolokomup o, kalalap bokolap namti, am daanin diim kawu, unang tunum alik iyo, alep imi maaklo weng bokobip kaali, weng san-ilomdip, weng yen una-tala-ke-bamale, taken-una-tala-ke-mokomip aa, yak dok nolin ami weng mafak sang akolkup kaltapni am kaptamu bokolap namti, unang tunum ili alik abip iip kawu kapni sang bokobap kaami sang uyo naan-bam ke-mokomip o, kala Yesus ayo kanum bakayila ko.
LUK 12:4 Yesus ayo asuk bokoya-lomda: Nak-tunum kusal kipyo, nami weng ma bokoyokomi ayo weng san iliwa! Tawaal diim tunum kaami tela taanokomap kaa, kapni angtiil kaata-kup wela taanokomu. Katale, am ma daanokomu kaali, kapni sinik ayo kaaso dap-mafak-daap-ta-lom aala disa. Kemin, tawaal diim tunum kiimi atul kaa itam suunin daa yo.
LUK 12:5 Kemin, dok nolin ami ma atam suun-daalokomap kaami sang uyo bokop-tokomi. God ali titil soyim kemin, ata taba-lomda tela namti, ali ti tam-baala yang suunkup as kiin-bam ilin abip unokomap ami atul kaata-kup atam suunamap.
LUK 12:6 Lale, ipkal weng sanin! Tunum iyo tuumon kiin abin alep kuliita, yim-buu-lomdip awon katip katip awakal kii molokomip. Lale, God ali awon kanolin katip sakap kiimi aket ayo ma lokolu ke-lokoma dinim.
LUK 12:7 Kemin, God ami tiin diim kulaali, awon katip katip kuliimi aket kula, kabaak baniwa, ipta ipta kesip. Kemin, God ali kipni aket kaa ma lokolokomu dinim; ali kipni dabom kon maakup maakup kiili ti diing baka-bam ale, kipni aket ayo suunkup fanang daka-bam, tiin mo dong dakaayin-bam kem-tabasa. Kemin, tawaal diim tunum kiimi atul kaali, itam suunin daa yo, yakan-kaa-bamda kanum bakaya ko.
LUK 12:8 Ayo daang bakaalin tunum imi bokoya-lomda: Nali kipni weng ma bokoyokomi kemin, dok kanolin kapta din unang tunum imi tiin diim kawu boko-lomdap: Nali Dukum Ami Man kaami daang bakaalin tunum tituun keli no, kalap namti, God ata lek yim-bamda angtiil yol uyo kukaayin-bamda kanuyokoma kaami am daanokomu kabaku, nali abiil tikiin kasel imi tiin diim kawu bokop-ta-lomdi: Kaali nalmi daang bakaalin tunum te! tokokomi. Kemin ale,
LUK 12:9 kabi unang tunum kawanta unang tunum imi tiin diim kawu boko-lomdap: Nali Dukum Ami Man kaami daang bakaalin tunum kelami dinim o, kala namti, God ami lek yim-bam angtiil yol kukaayokoma kaami am daanokomu kawu, nakal abiil tikiin kasel imi tiin diim kawu bokop-ta-lomdi: Kaali nami daang bakaalin tunum disa yo, tokokomi.
LUK 12:10 Kemin, nali Dukum Ami Man yale, tunum unang kanta nami weng mafak uyo kukaap-nambile, asuk aket fal-sikila namti, God akal ami ban kemin kaali, kukan-telokoma. Kemin ale, dok nolin unang tunum ita God ami Sinik Tambal ami weng mafak kaayo bakalip namti, God ali imi ban kemin kaali, atin ti kukan-tiiyokoma disa.
LUK 12:11 Kanola tunum iyo itamiwa yi, Ibi nami daang bakaalin tunum kala, kalbip-kup, iyo yim-tama tam lotu am daalipla, Juda imi kamok kamok iyo im-bak-saanbile, yim-tama din kiyap imi diim kawu daalipla, ita yim-bak-saanokomip. Kemin, kanuyokomip kaali, ibi aket yaapkan fukun-bamdip: Kwin! weng kutal numi diim diiyokomip kaali, kanimin o, kalokomup i? Kemin, dok kanumin weng kaata, maan tiiyokomup ma? kala-laamin daa yo. Kela bilili-kup-kala bom ilipla, God ami Sinik Tambal ata taba ibi kukup tambal kaali, kukuyalala, weng tambal kaata-kup bakayokomip o, kala Yesus almi daang bakaalin tunum imi kanum bakayila ko.
LUK 12:13 Unang tunum yaapkan iyo Yesus aso tola-bom iliple, kulaa, tunum ma ayo unang tunum yaapkan imi iipyak tem kulu bokola-lomda: Kukuyin tunum kapyo. Kabi nami abaap ayo bokolapla, numi atok saakba ami tawaal so, am bung mafek mafek iso, iyo biki-lomdap nakal anung ma kup-nala yo! akale,
LUK 12:14 Yesus ayo tunum kaami bokola-lomda: Nak-tunum kapyo, God ali nam-baala tal-ilomdi, kipni tawaal so, mafek mafek am bung iso, kiimi weng kiita, talal-bamdap kabaan-yilan o, kalalaya, nam-baala talsi disa yo; nali ti ok kusnum okok kemin tunum o, kalba-kup,
LUK 12:15 kulaa fal-siki taba unang tunum imi bokoya ko: Ibi nami weng bakabi kalawuuli, talalu weng senin! Tunum mafek mafek soyal ili ilmi mafek mafek kiita, dong dokolipla, tambal-kup ilokoma disa le, kaptoop kaptoop kakal, ali suunkup ilokoma disa. Kemin, ibi kaptum kusal imi tawaal so, mafek mafek am bung iso, imi mok kaa inin disa yo, kala ko.
LUK 12:16 Yesus ayo weng ma faldak-tii bokoya-lomda: Mafek mafek soyap tunum ma ami langabip ayo wiit san yaapkan tabamnip itaba-kup, kulaali tunum ayo tiin-bomda aket fukuna ko:
LUK 12:17 Kwin! nami wiit dakela kutal am tiimin am kaali, dukum disa kemin, umi baan diim kutiimin ayo muup-nula dok kanolokomi ni?
LUK 12:18 Nami wiit am kaali, balata kutii-lom, am dukum-kup ma de-lomdila, wiit so, mafek mafek so, kiili diili tam abamnuk o, kala!
LUK 12:19 Ayo dinamsi bom bii disa kelule, kulaa tiin-bom aket fukun-bamdi: Ti yaap ke, nali mafek mafek yaapkan so ke tiikni no. Kemin, kulaata bom bii wasital yaapkan ma duk-duu-somdila, kaata kun fan kaa-bamdile, inin-inin yaapkan uyo im-bomdi, ok mafak dukum-kup in-bomdila, fiyaap duumon o, kalokomi no, kalala, kanolin aket kaali, fukuna.
LUK 12:20 Lale, God ali bokola-lomda: Kabi babon bi-lom tiinsap kapyo! Am kamala kutamiip kulu saaka-lomdap yak kapni mafek mafek talalbi kutiin-tabasap kuluuli, ke-wokomap. Kemin kabi, Bung kiili, nalmi alik o kala-laabap kaali, kawanta kuluulokoma ni? kala, God ayo mep tunum kaami kanum bakaanba.
LUK 12:21 Kemin, ipkal utamin! Kanola ibi tunum kaaltap ke iltipni aket-kup fukun-bamdip mafek mafek afet-mokomip kaa, ibi God ami tiin diim kaa tifan win dinim o, ke-lokomip o kala, Yesus ayo kanum bakayila ko.
LUK 12:22 Kulaa, Yesus ayo almi daang bakaalin tunum imi bokoya-lomda: Kibi kamala kulu nami weng bokoyili kaa, weng selip o? Kanum bokoli kaami anung kaali, bokoyokomi. Ipni kula unip kaami aket awak dukum ayo fanang daka-bamdip boko-lom: Kwin! ima kaa doku ma tulula, inam-nokomup i? kal-bomdip aket yaapkan kaa fukun-bam ale, iltipni angtiil lak uyo duu-lom boko-lomdip: Kwin! ilim kaa doku ma tulula, mikilokomup i? kal-bomdip aket yaapkan fukunin disa yo.
LUK 12:23 God ata mafek mafek sakbaalim dukum kaa iltipni mam so, titil so kiita, kuyilaya kulu bom-bilip, aa mep mafek mafek katip katip o, kala inin-inin aye, ilim mikimin aye, kiiyo kanola God alta kuyokoma. Kemin, kabak-ami aket kaali, yaapkan fukunin disa yo.
LUK 12:24 Ti ipkal awon kii itam-tamin! Kiili ima waan lang kaa imi dikimin disa; lale, ili ima kaa dabuubi kulii-din am kawu tii-bam inin disa; God alalta imi ima ayo kukaayin-balala inan-umbip. Katale, God ami aket dukum kaali, unang tunum kipni kuyale, awon imi aket kuya-laaba kaata kabaak banala, unang tunum iptale, ima ayo kukaayim-balaya, ima iyo inan-laabip.
LUK 12:25 Ibi kanolin aket yaapkan kaa fukun-bam, iltipni angtiil lak kuuta, dong dokoyilula, ibi tiika-yilin ayo kayoop so, wasital so, kiiyo til daalup toop lo so keluya, tawaal diim kalawu bom bii ilanin tap ke-lokomip ema? Daa te! God ali boko-lomda: Kuyaku taanan aa! kalsa kuyaku ti taanokomap te!
LUK 12:26 Kemin, kayoop til-dakamin aa, yak wasital til-dakamin kaa, katip sakap lale, ibi taang-kala kanolamip disa. Kemin, ibi kanimin o, kalalipla, mafek mafek awak dukum kaami aket kaata, aket yaapkan fukun-umbip yoko?
LUK 12:27 Ti ipkal as tes uyo utamin! Kaali tunum nulultap kelula, ulmi ilim uyo talal-bam bikimin disa; uli ti disa kulu tabemin kaali, God alta tiin molaya, uyo bomdula umi tes tambal kaa, abun-umbu. Kemin, siin sawaalak tunum win soyap Solomon ami bom-biisa kaa, ali mafek mafek soyim tunum ale, ilim tambal tambal kiita-kup miki-bisa. Yale, unang tunum ilmi sikil ta, ilim tambal kii baken-bilip miki-bisa le, imi dawang kuluuli, kulaak banin so kelula, God ami as tes kaa talalusa utale, kaami dawang kaali ti uta uta kesu.
LUK 12:28 Kemin, sinaan so, mokol so, imi tes tambal iyo bom-bilip kemin, bom ilanin tap ke data kemiple, kulaa tunum ita tikiin kuyak daalip tes kiiyo, kasentap kiin aba-yaabip. Katale, tes kaali, God alalta talalu kutiilala, tambal-kup falala-kala-laabip. Kemin, nikil ibi aket alep kiili fukun-bam, God kaa nuli ilim kaa ma kuyokoma ne, disa ye? kem-laabip kaa, ipkal talalu utamin. God ami aket dukum kaa, kipni kuyale, as tes kiimi aket kuya-laaba kaali, kabaak unin kemin, alalta kipni ilim kaa kukaayokoma.
LUK 12:29 Kemin ti, ipkal kanolin aket kuuta, fukun-bamdiwa, inin-inin kaami aket kaata-kup yan-bulula, aket yaapkan kaa fukunin daa yo.
LUK 12:30 Kaa dok kata naa kalolip: Tawaal diim kaldaak-ami unang tunum ili God ami samaan kawu bomdipla, tildang ami weng kaayo ma, weng san-kaamin disa; ili ti suunkup ilim so, inin so, kiimi aket kaata-kup yan-bulula, aket yaapkan iyo fukun-umbip. Lale, kipni Kaalap God akal kaali, utamala, Ibi suunkup inin-inin umi liip kaa fenbip kala, kala-somdala, inin-inin iyo suunkup kukaayokoma te!
LUK 12:31 Kemin, tawaal diim kalawaami mafek mafek aket kaali, dukum-kup yelula ilin disa; ti God almi ok kaami aket kaata-kup yelu okok ke-mokomip kaata, fan God akal ilim so, inin-inin so, kiiyo kukaayokoma no, kala Yesus ayo kanum bakayila ko.
LUK 12:32 Kulaa, asuk Yesus ayo almi daang bakaalin tunum imi bokoya-lomda: Nikil kipyo. Kibi sipsip alep-kup ililtap kemin, God ali aket fuku-daa utama yi, Ibi imbii tal nalmi abip kala daaliya, ilin o, keba kemin, kibi tawaal diim kalawaami mafek mafek aket kii aket yaapkan fukunin dinim ale, suunin daa.
LUK 12:33 Kemin, nuli mafek mafek yaapkan kiili bom-bilip o kalip namti, mafek mafek kiili, saan-bamdipla, tuumon ayo kuluu-lom, unang tunum iyo itamiwa yi, Awu, kuliita duluubip kala, kalalip, kuliimi kukaayin-biliple, kuuta imi dong dakaayuk o. Tawaal diim kalawaami men sole, ilim so, kuliili, disap-nokomip aa, tuumon ukol kuno abiltap-kup disa ke-lokomu; yak keng katip katip ita mafek mafek uyo inam-nipla, balat tabokoma; kuno tunum yakal mafek mafek yukut daka-bilip ken-umbip kemin, mafek mafek kuliili, dinim-nokomu. Kemin, mafek mafek kalawu kuliili, tildak kuyaku-diyaku-ke-bam afetmin disa; God ami ok tambal kaata-kup kanu-bilip bom bii, God alalta maan tiiya-lom yim-tama din almi suunkup ilin abip kawu daalaya, tambal-kup ilin o, kala-somla ko.
LUK 12:34 Kanola tunum ma tawaal diim kalaami mafek mafek kiimi aket-kup an-bulula ila namti, ali kanolin mafek mafek kaali, kulii-tildak kuyak mim-daa sikip fak-dakan-unokoma. Kemin ale, kanola tunum ma ali almi mafek mafek aket fukunin ayo kuno maas kewa God ami aket kaata-kup an-bulu ila namti, fan tunum kaata, God ami lak dakamin kaami kukup kaa, kutal-fuku-bom ilokoma no, kala, Yesus ayo kanum bakayila ko.
LUK 12:35 Yesus ami bokoya-lomda: Ibi weng senin. Ibi dotu-lomdip nami liip ayo fen-bam bom-ilipla, bom biilila kawu tolon o. Kemin, nata faldak-tiimin weng ma ok tabuulin tunum ma kaami sang kaata bokoyokomi kemin, kipni kukup kaali, ok fukulin tunum kiimi kukup ilaltap ke-biliwa yo, kala-somla ko. Kemin, am ma daanule, kaami kamokim ayo utamala, Nak-tunum kaali, unang sii ma kuluulala, akam imi aptum kusal iyo tala-tala-ke-bam ima ina fakaneng tababip kala, kalale, kulaali itamala, Aso fiyaap duumum o, kalalala tabana. Kemin, almi ok tabuulin tunum kiili, ilmi kamokim kaa dok kanolin diim kawu asuk talokoma no, kalbip disa; ti maaklo kulu bung mafek mafek ayo dotu kutii kela fen-bam iliwa, kutamiipnu kala, kala-lomdip, yokon uyo iilfo-lom kawang-kup tiin-bom ilmi kamokim ayo fen-bilipla, bom biila ayo tal saal dok-dok diina kalale, kulaali abiltap tam-tiin din saal ayo busolip.
LUK 12:37 Kemin, almi okok kemin tunum iyo kawang bom iliwa, tal itamale, kulaa, Ti yaap ke tal itami no, kalale, imi fiyaap kaali, duu-bam kukup tambal uyo kukuyinba-kup ale, kamokim ali, ima ifamin imi kukup kaata, kuluu-lomda bokola: Daak tiinipla, nalta ima ifalila inin o, kala kanum bokoyale,
LUK 12:38 ok fukulin tunum yakal utamiwa yi, Awu, am kutamiip muma diinula, toloma ne, am daan daan tala-balala kawu toloma ne? kalbip disa. Yale, ti disa maaklo kulu suunkup fenin-kup ke-bilipla, ayo tal-ilomda kukup tambal kaayo kukaayila ko.
LUK 12:39 Weng ma bokolokomi kaa, weng senin! Am kayaakim ayo utamala, Awu, atan sinik uyo tal dok ba tulula, yukut-inipyaap tunum ayo tolokoma no kalase dinam ali tiin baa fen-bamda ilala, yukut-inipyaap ayo am taloma dinim.
LUK 12:40 Kanolin kemin, Dukum Ami Man Nami tolokomi kaa ibi utam, Awu, kunolin diim kulu tolokoma no, kalbip disa; kemin ipkal ti maaklo kulu suunkup fen-bam bom-ilipla, nayo tolomi kayi! kala-lomda Yesus ayo almi daang bakaalin tunum imi kanum bokoyinsa ko.
LUK 12:41 Yesus ayo weng faldak-tiimin weng kaali, bokoyila disa kelule, kulaa Pita asiik Yesus ami bokola-lomda: Kamokim kapyo. Yak faldak-tiimin sang ma bokolap kaali, nuta-kup bokoyap e, unang tunum alik iso bokoyap e? akale,
LUK 12:42 Kamokim asiik bokola-lomda: Kanum bokolap kemin, ibi talalu weng san-ilipla! Nali tunum titil-fak-daa-bomda, aket tambal-kup fukun-bamda ilin tunum ami sang kaata ma bokoyon o, kali kemin, kamokim ma ayo umbilin samaan kawu bom biilila, tolokomi kayi, kalalaya, almi okok kamaalin tunum ma ulduu-dap-tii-lom, bokola ko: Kabi nami ok tabuulin tunum kalawiili, tambal-kup itafii-bamdapla tiin mo-balap, iyo ok tambal-kup fuku-bamdipla, nami mafek mafek iyo tambal-kup bom-bilipla, ima kabaanu-ya-laamin kaami diim daanokoma kabaku, kapta nami okok kemin tunum imi kukaayan o, kala, bokola-lomda kela unokoma.
LUK 12:43 Kela tabanala, okok kemin tunum ayo kamokim ami weng uyo weng san-ilomda, ali ami ok tambal ayo kutal-fukulin-kup ke-bomda, okok kemin-kup ila namti, kamokim ayo asuk tal ulala, Ali tambal-kup okok keba kala, kalokoma kawu, ami fiyaap kaali, dolokoma.
LUK 12:44 Kemin, kamokim ayo tal bokola-lomda: Nali kalawu bomdi, kabi titafiimin disa; bom bilila, kabi ok tambal ayo tabuusap kala, tal tiki kemin, ok dukum ma uyo kup-ta unila, kapta nami mafek mafek kiili, alik tiin molokomap o, akokoma.
LUK 12:45 Lale, kanola okok kemin tunum ayo aket fuku-daa: Nami kamokim kaa mafek mafek kusnum ma kuuta taba-lomdu, ami tolokin uyo dap-diila kemin, abiltap-siik toloma dinim o, kala-lomda, ali aptum kusal okok kemin unang tunum iyo ye-bamda, ima ayo faka-bam im-bomda saak ok mafak in-bomda, babon tal-une-bamda, kema;
LUK 12:46 kwin! kamokim kanumin diim kawu ma tolokoma ni, kala fenin disa ke-bam ila namti, bom-balala bii, am ma daanule, kamokim ayo tal ula yi, Kukup mafak kem-tabasa nu, kala atam ale, kulu ami kukup mafak namti maan tela-lomda angtiil yol awak dukum ayo kukaalokoma kaali, weng kuyang saak tiimin tunum kiimi angtiil yol dukum-kup kukaayin tap kela kukaalokoma no.
LUK 12:47 Kanu-bam okok kemin tunum ali kawanta utamala, Kamokim ayo yak kanolin ok kabak-ata kanuman o, kalba. Katale, ok kabak-ami aket kaali, fukun-bamda, kufuku okok kemama disa; ami weng uyo kuyang saak tiila namti, ami kamokim ayo tal-ilomda angtiil yol awak dukum uyo, kolokoma.
LUK 12:48 Kemin ale, okok kemin tunum kaa kanta utamala yi, Kamokim ali, Kalanolin ok kaata kanuman o, akin disa kela unala; ti maaklo kulu kukup mafak-kup kema namti, ami kamokim ayo angtiil yol katip kaali, kolokoma. God ali aket fukunin tambal kaata, tunum ma kaami kola ayo utamsa namti, God alalta kabi tambal-kup okok keman o! akokoma. Kanola, tunum ma ata God ali suunkup aket tambal uyo, kukaalin-kup ila namti, God ali, Kabi atin ti ok tambal kaata-kup, suunkup okok kemin-kup keman o, akokoma no, kala Yesus ayo kanum bakayin-bisa ko.
LUK 12:49 Yesus ayo almi daang bakaalin tunum imi bokoya-lomda: Nami taldaak tawaal diim talsii kaali, unang tunum imi aket fukunin mafak so, kukup mafak so, imi kalan kaata, wing ta kuyak daalila kiin-aba-lomdu disa keluk o kala talsii. Kemin, nalmi aket fukunbi kaali, as kuyak dakamin kaali kamala kawu no kebi.
LUK 12:50 Yale, kanolin kukup uyo tiltam tilin disa bom-bulula, nasiik angtiil yol awak dukum kaali, kuluulokomi. Kemin, nali utamila, Kaami am uyo daan tiltam tolokomu kala, kala-lomdila, kabak-ami aket dukum kaata, fukun-bamdi aket uluum tabep-na-bulula, bom biile, nami kanolin angtiil yol uyo dinim-nokomu no.
LUK 12:51 Kipni aket fukunbip kaa, Ali tal-ilomda unang tunum imi weng kaata, bokoyi tilipla alik aket maakup kelin o, kalalala talse no, kalbip ema? Disa te! Nami weng, weng sep-nokomip kaali, iip maakup maakup ita weng sanokomip. Lale, malo ma kiitale, Weng sanokomup disa yo, kalalipla daang ukolokomip. Kemin ale, toko-lom tunum miit alep ke-lomdip, weng aal dikin-una-tala-ke-bam, waasi kela una-tala ke-mokomip.
LUK 12:52 Kanola am maakup kutamu unang tunum awakal ilip namti, biki-lom alep ma yakal kelip kuno, asuumano yakal kelip ke-lomdipla, nami weng kalan kabak-ata kanum taba, alep iyo tunum asuumano iso, weng aal diki-biliple,
LUK 12:53 awil-fakal yakal, tunum ma iso, waasi kela una-tala-ke-biliple, awil-fakal unang yakal unang man iso, kuno waasi kela una-tala-ke-biliple, abimuwak kusal yakal miining imi unang tan iso, waasi kela una-tala-ke-bilip ke-mokomip o, kala Yesus ayo kanum bakaya ko.
LUK 12:54 Kulaa, asuk Yesus ayo unang tunum imi kanum bokoya-lomda: Ibi utamiwa yi, Ibin uyo duutkan kelu kala, kalale, ipyo boko-lomdip: Yi, om tolokoma no, kalalip abip talen-umbip,
LUK 12:55 aa, ibi utamiwa yi, Atan tem un-laabu kawu utamipla, Inim ayo fufu tala kala, kalokomip kaali, am yaak am tiltam tabokomu no, kaliwale, tiltam taben-umbu.
LUK 12:56 Kukup alep kutal-fuku-bam utamsip tunum kibi, tawaal diim so, abiil kaaso, kiita, itam ale, Awu, am kanolin am kaata daanokomu no, kem-laabip. Lale, ibi babonin tunum kiimi kukup kaata kuluu-lomdipla kemin, dok nolin mafek mafek kamala kawu tiltam taben-umba kaami miit kabak utabup disa yo, kalbip kayi! kala, Yesus ayo kanum bokoyila ko.
LUK 12:57 Yesus ayo weng kusnum ma bokoya-lomda: Ibi kanimin ma nolum o, kalaliwa, ipkal aket fuku-daa, Awu, kabak-ata kanu-mokomup kaata ti mokso keyokomu no, ken-umbip elile disa ye?
LUK 12:58 Uyo kanolin kemin, kanola tunum ali ma bokop-ta-lomda: Kukup mafak kamap-nambap kemin, timbi din kamokim ami diim kawu daalila, ata tam-bak-saanbi, kulaali angtiil yol kaali, kup-tak o taka namti, kabak kapkal utamapla, Ulmi am tituun namti kuyaku tiltam tabokomu kala, kalokomap kaa, kapkal ale, akal alep din weng uyo talalulip disa kelule, alep aket maakup kelip kulaalalip. Ale, weng uyo talalulip disa kelin disa kelip namti, ata kabi timbi din kamokim ami diim kawu daalaya, ata lekbi tam-bak mole, tam-baala yak bolis boi imi sikil diim kawu abamnaple, ita tam-baalip tam kalabus am unokomap.
LUK 12:59 Kanop-tip bom biile, kapni ban kanun-umbap uyo kot baan diim kawu alik molap disa kelule kaata, taldaa tam-baalip tiltam ba tolokomap. Kemin, ibi nami faldak-tiimin weng kaali, talalu weng san iliwa yo, kala Yesus ayo unang tunum imi kanum bokoya ko.
LUK 13:1 Kanumin am daanbu kuyaku, unang tunum bom-bilip iyo tal Yesus ami diim abale bokolip: Unang tunum malo ma Provins Galili kayaak ili God ami yaap ke yo, akum o, kalalipla, olti iyo kutal tiiliple, awem tunum ita yak olti kiiyo, anu-lom fuu-bilipla, kiyap Pailat ami soldiya iyo yim-baala tal Galili kasel imi anulipla, imi kiim kaami kuyaku le, olti imi kiim kaayo kuyaku, ke-lom sing-tam daasip o, kala bokoliple,
LUK 13:2 asiik bokoya-lomda: Kipyo, kipni aket fukunbip kaa, Galili kasel ili malo ma ban kemin, kaa ti sakbaalkan dukum o, kala, kalalip anulip taanipla, malo ma kiita, imi ban kemin kaata katip u, kalaliwa, kuno kamboyip yaap ke-silip o, kalbip ema?
LUK 13:3 Disa, ilmi ban kemin kaami kalan kaata taansip disa. Lale, ibi nami weng kala bokoyokomi kabak-ali ipyo talalu weng san iliwa! Ibi iltipni ban kemin kaa kela aket fal-sikilin disa ke-lokomip kaali, ibi alik Galili kasel ililtap ke-lom alik saak-nokomip te!
LUK 13:4 Kanolin kemin, siin kaali, tunum ilmi-kup tal aba tam daak nakal malii foko (18) kiita, abip dukum Jerusalam kaami tang tem abip ma Siloam kaptamu tola bom-iliple, kulaali am batbat ma kaata bal du kulii taldaak aba-lomdu yim-baak mo anulu saaksip. Kemin, kipni aket fukunbip kaali, Jerusalam kasel ili imi ban kemin kaa, dukum kemin, kaa anulu taansip o. Ale, malo ma ita imi ban kemin kaatale, katipso kemin, anulin disa kelu yaawa-silip o, kebip ema?
LUK 13:5 Kaa disa! Ilmi ban kemin kaami kalan kaata taansip disa. Lale, ibi nami weng kala bokoyokomi kabak-ali ipyo talalu weng san iliwa! Kipni ban kemin kaa kela aket fal-sikilin disa ke-lokomip kaali, alik ibi mep tunum kiimi kanosip ililtap ke taanokomip te! kal-bomda ayo kanum bakayila ko.
LUK 13:6 Kulaa, Yesus ayo faldak-tiimin weng ma boko-lomda: As fik ma kaali tunum imi wain lang iip-iip kabaaku tolsu. La, tunum wain lang kayaak ayo din as fik kuu utamala, Fik kuuli, abuubu kala kalon o, kalale, ayo tal ula yi, As lap so ma abuulamu disa kelula utama
LUK 13:7 le, ami langabip okok kemin tunum imi bokoya-lomda: Kipyo, as lap abuumin am kulaa mep tulu kemin, tal utam utam kemsi wasital asuumano duk-duuli. Katale, as fik kalawuuli lap so ma abuulamu dinim, kesu kemin, as kuluu welan aa! Mep as kuuta, taba-lomdu tawaal kaami matak ayo alik in-bulula, disa ke-lokoma kaa, mafak kemin, baan as kuluu welan o, akale,
LUK 13:8 kulaa langabip kaptam-ami okok kemin tunum ayo langabip kayaak ami weng ayo maan tela ko: Kamokim o. As kalawaami miit tem ayo tawaal an-fal-siki-lomdi as kaami ima inin kaali, dotulila
LUK 13:9 as kuu lap abuuluk o. Ilom wasital maakup anang ma duk-duu utam talaalupla, Abuulin disa; ti kanolin-kup ilu namti, bokop-napla kawu, welon o, kalase no, kala ayo kanum bokoyila ko.
LUK 13:10 God ami iintang am ma daanale, Yesus ayo yak aba din lotu am kawu, unang tunum imi God ami weng bakayilale,
LUK 13:11 kulaa, unang ma tiinbu kuuli, sinik mafak ta taba-lom mafak-alin kuwa tiinsu. La, bom bii-lom wasital almi-kup tal aba daak nakal malii foko (18) duk-duusu. Ale, unang kuumi ol kun kaali, silik tal u kesu. Kemin, uyo talalu tolnamu disa, kesula,
LUK 13:12 Yesus ayo unang kuuli, utaba-kup, kulaa uyo naan-daawa tal atamule, bokowa-lomda: Unang kupyo, nali kupni mafak-alin kulaali
LUK 13:13 kukan-tiip-ti te! umba-kup, almi sikil ayo kuyak tam unang umi angtiil diim tii kem-salale, kulu maak fak-daalin tap, tituun-kup tam tola-lom, God ami fiyaap ayo don-bamdu win kufolu ko.
LUK 13:14 Uyo kanu-bulula kawu, lotu am kaptam-ami kamokim ayo utama yi, Yesus ali God ami iintang am daanbu kawu, unang kuu um-talalula tam tolnu kala, kalale, tunum kaami aket atul ayo Yesus ami kola-lomda, unang tunum imi bokoya ko: Am bukupkal ke-laamin kiimi diim kaata-kup okok kemin; ale, God ami iintang am daanu no, kala, kaa okok kemin am daanbu disa; ibi tal Yesus atamupla, Yam-talalulak o, kalip namti, okok kemin am ma daanula kawu, ipyo tal atamip yam-talal kaamak aa! Ale, yak God ami iintang am daanba kaali, tal atamip yam-talal kaamin disa te! kala, ban boko-lom kanum bokoya.
LUK 13:15 Kala kanum bokolale, Yesus asiik weng bokola-lomda: Kukup alep fukulin tunum kipyo! God ami iintang am daanbu diim kaa alik ibi iltipni bulumaki so, dongki iso, iyo din sok baa yim-bi din ok ayo kuyip inan-umbip kaali yi!
LUK 13:16 Mep unang kulawuuli, Abraham almi man loop ukol ti nulultap kemin, unang kalawuuli, Setaan ata um-mafak-daalala, umi ol kun kaali, silik tal uuwala bom bi-lom wasital almi-kup tal aba tam daak nakal malii foko (18) duk-duusula te! Kanola, God ami iintang am kalawaata yaap kep-nula, Setaan ami sok ta de-umtiisa kaa, nata taba-lom tildaa umbaa-lomdila, um-talaluli dalaal kelu no, kala ko.
LUK 13:17 Yesus ayo kanum bokoyila kem-salale, kulaa ami waasi kensip iyo fatom-duk-duu-lomdip weng so ma bokolin disa kelipla, unang tunum iyo Yesus ami kukup tambal talala tal-uneba kaali, atam-ilomdip ami fiyaap ayo dukum-kup duumip ko.
LUK 13:18 Ayo asuk bokola-lomda: Unang tunum kiimi tal aba tam God ami miit tem uniwa, tiin mo-laaba kiili, dok kanolin ililtap i? Kemin, nalta bokoya-lomdi: Kiili kalanolin unang tunum o, kalomi.
LUK 13:19 Unang tunum God ami miit tem bilip iyo mastat kaami san ililtap kemin, (mastat san kaali, fan lap atin ti katip sakap lale,) tunum ma ata kulii yang dikiilala, yaap taba-lom, atin ti as dukum alaltap kelale, awon iyo talaba tam ami tang diim kawu, iim kiiyo dinan-umbip o, kala Yesus ayo kanum bokola ko. (Kemin, faldak-tiimin weng kaami miit kaali, bokoya-lomdu: Mastat ami san ililtap, ti God ami unang tunum iyo kamala kaali, iip maakup maakup ita-kup talebip. Lale, ilom am ma daanokoma kawu, tala-tala-ken-umbi-lom atin ti yaapkan ke-lokomip o, kalsu ko.)
LUK 13:20 Yesus ayo asuk weng kusnum ma boko-lomda: Tunum unang iyo tal aba tam God ami miit tem tiliwale, tiin moba kiili, dok kanolin iltap ma?
LUK 13:21 Nakal bokoya-lomdi: Unang tunum kiili, kalanolin o, yokokomi. Kemin, unang tunum tal God ami miit tem kawu bom-bilip kiili yiis o kala, bret dotmin mafek mafek ulultap kemin, unang ma yiis katip ma tuk-duu-lom kulaalu daak flawa dukum kaami tem unala, fal-siki-bulu bii, maakup kelula kuno kela ilanin tap kelule, flawa uyo fasuu-lom akal alik ma ke-lokomu alaltap o, kala Yesus ayo kanum bokola ko. (Kemin, faldak-tiimin weng kaami miit kaali, bokoya-lomdu: God ami lak duulin unang tunum iyo unang tunum kusnum imi iipyak tem kawu bom-bilip namti, aptum kusal God ami lak duulin dinim bom-bilip iyo yakal ilimi kusnum ke-lomdip, yakal ti kano God ami lak uyo duu-lom, atin ti yaapkan ke-lokomip o, kalsu ko.)
LUK 13:22 Yesus so, almi daang bakaalin tunum iso, iyo Jerusalam unum o, kalalip yakyak un-bomdipla, Yesus ayo God ami weng kaali, yak abip tildak abip imi bakaya yakyakda, uniwale,
LUK 13:23 kulaa, tunum ma ayo tal Yesus ami dik-daala-lomda: Kamokim kapyo, God ayo tunum iip maakup maakup ma ita-kup yim-buu-lom yim-tama tam God ami abip daalokoma nema? akale, Yesus ayo alik imi bokoya-lomda:
LUK 13:24 God ami abip unemin kaami amitom kaali, atin ti katip sakap kemin, unang tunum yaapkan iyo tam unum o, kalbip. Katale, ili fan taang-kala-lomdip tam unolip disa te! Ti ipkal titil-fak-daa God ami weng tambal kuuyo, kutal-fuku-lomdipla, God ami abip kaa tam unin aa!
LUK 13:25 Bom ilom am ma daanokomu kawu, abip tiin molin kayaak alta tam tola yang amitom saal liilokoma kawu, tunum unang tildang kulu tolbip. Ibi din amitom kulu tolale, dok-dok ke-bam naan-bamdip kanum baka-mokomip o: Kamokim, kamokim, kapyo saal busuuyan o, saal busuuyan o, ke-bam akan-kaa-bam naalokomip. Lale, abip kaptam-ami amitom tiin molin tunum asiik bokoyokoma: Daa. Ibi dok kayaak i? Nali ibi ma itamsi dinim kemin, ibi kaloku ma laabipla tilip i? kalala dik-daayokoma no,
LUK 13:26 kala, kanum bokoyilale, kulaa kipkal bokolokomip ko: Aa, kabi tal numi abip kawu talawa titafii-bam ale, nuso ima im-bom, ok im-bom, God ami weng tambal ayo bakayin-bam ke-bamdapla kawu, nuli itamsap kaali yi? akiwale,
LUK 13:27 kulaa, asiik asuk bokoya-lomda: Nali ibi ma itamsi dinim kemin, ibi kaloku ma laabipla tilip i? Nali kibi itamila, Ban kemin unang tunum ibi nami unang tunum o, kalsi disa; baan kep-na tabanin aa! yokokoma no.
LUK 13:28 Ibi itamipla, Juda nulmi awil-fakal Abraham, Aisak, Jekop alimal yakal aa, God ami weng ku-fatap-daa bakayin tunum kanolin iso, alik ili God ami abip kaltamu bom-bilip; kemin ale, nuta fotabam-nala tam daak saak lo kaptamu bom-bulup kala, kalokomip. Kemin, ibi angtiil yol dukum tabemin kaali, tabeya bom-bulula; Kwin! kuuso kawi! kal-bomdip iltipni angtiil kaami kalan kaata ama-mokomip kayi!
LUK 13:29 Kanola abiil kulii umbilin dilit kalsu so, tawaal kulii umbilin dilit kalsu so, kiimi tunum unang yaapkan kipni itam-laabip dinim kiiyo, tala-tala-ke-lom God ami abip kawu bomdipla, ima ina fakaneng taba-bilipla, ibi itafii-mokomip.
LUK 13:30 Am kamala kalawaami diim kawu tunum unang yaapkan ili win dinim bom-laabip iyo am mafiing diim kawu isiik win soyal keliwale, kamala kala unang tunum yaapkan win soyal ke-bom-laabip ita, am mafiing diim kaali, isiik win dinim ke-lokomip o, kala Yesus ayo kanum bakayila ko.
LUK 13:31 Am kanumin diim kuyaku, Falosi malo ma iyo tal Yesus ami bokola-lomdip: Yesus kapyo! Provins Galili kaptam-ami tiin molin tunum Herot ali boko-lomda: Nalmi soldiya iyo yim-baali din telip taanan o, kalba. Kemin, baan abiltap Galili kaltam-ali kulaa kelalap tabanan o, akiple,
LUK 13:32 Yesus asiik bokoya-lomda: Herot ali saak miyaan alaltap kemin, ipta asuk din-ilomdip kanum bokolin o: Yesus ami weng bokop-tamba kalawuuli, talalu weng selan o, kala-somla ko. Ali, bokop-ta-lomda: Nali kapni atul uyo titam suun-daa ukadaa unokomi dinim; kamala so, sabi so, uyo unang tunum sinik mafak yim-fukusa imi sinik mafak fotabe-bam ale, yak unang tunum sik mafak umkan-unsip imi yam-talal-bam ken-um-bomdi, am sabi ye, sankaali ye, anang kawu, nami ok ayo dinimna kulaalokomi no, kalba kayi! kalalip din Herot kaa kanum bokolin o, kala-somla ko.
LUK 13:33 Yale, God ami weng ku-fatap-daa bakayin tunum ili suunkup abip dukum Jerusalam kaptamu-kup yan-umbip kemin, kaa yaap kep-nula, Jerusalam kaptamu God ami weng ku-fatap-daa bakayin tunum nayo, nelokomip. Nali Herot ami bokon tiin moba kalawaali, keya din Jerusalam kawu itamila, neliwa taanokomi kemin, kalawu okok ke-lom kamala so, sabi so, sankaali so, kiiyo okok daalila kawu, yakyak Jerusalam unokomi no, kalaya bakayila ko.
LUK 13:34 Kanola Jerusalam kasel imi aket kaata fukun-ilomda ayo aket uluum dap-telule, almi aket-kup fuku-daale bokola: Jerusalam kasel kipyo! Ibi God ami weng ku-fatap-daa bakayin tunum iyo ye-bilipla saaka-yaa-bam ale, God ami daang bakaalin tunum yim-baala tal-silip iyo, tuum ta kup ye-bilip taan-yaa-bam ken-umbip. Katale, awon awak umi man kiili, kuu ulmi bal kun tem tii katii-yaabu tap kemin, am yaapkan daan tal-unem-tabasa kaa, nali ti alik maakup ibi im-taldang daa, nalmi sikil ta uti fokolin tap ke yam am daalon o, kemin-kup, kanum-tabasi. Yale, kibi kep-nip kaali, kanun-umbi disa yo.
LUK 13:35 Kipyaa! Kipkal daang ukup-nip kemin, God akal ibi daang ukuya-lomda, waasi iyo kamboya tal-ilomdip kipni abip so, lotu am awak dukum so, kiili, yam-mafak-daayokomip. Kemin, nali tituun weng kaata bokoyokomi: Ibi maso ma nitamin disa bom bi-lom iltipta boko-lom: Numi Kamokim kalawaali, God kaltapni win diim kawu tala kemin, kabi kukup tambal kaata-kup kukaayan o, naka-lomdip nita-fii-mokomip kayi! kala Yesus ayo kanum bokoya ko.
LUK 14:1 God ami iintang am ma daanule, Yesus ayo din Falosi imi kamokim ma ami am kawu tiin-bom ima im-balaya, tunum alik am kaptam tiinbip iyo Yesus ami kukup kaata ma atafiimum o, kalalip kanumipla
LUK 14:2 kulaa, tunum ma sikil yaan fasonsu ayo Yesus almi mepso kulu tiinba kemin,
LUK 14:3 Yesus ayo atamale, lo utamsip tunum so, Falosi iso, imi aket fukunbip kaata ma utam-ilom iyo dik-daaya-lomda: Kipyo, nulmi lo kabak-ali boko-lomdu: God ami iintang am daana kaali, ibi tunum mafak-alin umuba kaa yaap dap-talalmin o, kalsu ne disa ye? yakale,
LUK 14:4 iyo kaal kesip lale, isiik weng so ma maan telin disa keliwa, Yesus ayo yak tunum mafak-alin umusa ayo dap-tal-fuku dap-talalu-lom dabaala almi am unala,
LUK 14:5 Yesus ayo kamok kamok imi bokoya-lomda: Kibi God ami iintang am daanbu kaa kanola ibi iltipni man aa, bulumaki aa, ma kulii ok kumun tem una namti, kabi abiltap kaltapni man aye, bulumaki aa, kaa dabuu dap-taltam daalokomap e, kuno ke-lokomap e? kala dik-daayilale,
LUK 14:6 Falosi iyo ma taang-kala ami weng ma maan telalip disa, kuno kulaa kelip ko.
LUK 14:7 Yesus ayo utamala, Tunum kii tala-tala-kebam ima kaa inum o, kalalip tal aba tiltam am tale-bamdip kanu-buluwa, unang tunum kiita nuyo itamik o, kalalip tal ti abiin baan tambal kiita-kup, fen-tal aba yang tiin-yaamip itaba-kup, kulaa tunum kaptam bom-bilip imi faldak-tiimin weng ma bokoya-lomda:
LUK 14:8 Dok kanolin tunum kaata ma unang kuluulon o, kalba-kup, kapni weng umuup-ta talawale, yak ima in-bom ale, fiyaap duumum o, kalala, din aba tam am unap namti, kabi abiin baan tambal kaa tiin-laamin disa; kabi ti iiwaan win dinim tunum kemin, tunum win soyim ma tolokoma ali unang kuluulon o kalba ayo ami naan-daala-lomda kabi tal abiin baan tambal kaldaaku tiinan o, anba-kup,
LUK 14:9 dibii-tal kapni bokop-ta-lomda: Kabi yak abiin tambalim kabaak yak tunum win soyap ami kolan aa! tokokoma kaali, kabi umbiyang imi daang tem kulu tiinale, kwin! fatom-duk-duulokomap.
LUK 14:10 Kanola kuno tunum ma weng umuup-ta-lomda: Talawa, ima inum o, taka namti, kuno din-ilomdap met wolung tem aa, balang tem aa, kulu ma tiin-yaamin taa! Kanu-mokomap kaata, mep tunum weng umuup-ta ayo tal bokop-ta-lomda: Nak-tunum kapyo, tal ti abiin baan tambal kaldaaku tiinan o, takale, kabaku alik kaptam tiinbip iyo titamiwa yi, Awu, kabi win tabin kelap kala, kala-lomdip kapni win ayo kufup-tokomip o.
LUK 14:11 Kanolin altap kemin, dok kanolin tunum kaata almi win kaali, kufuuma namti, God ali dabaala kulaak banokoma le, dok kanolin tunum kaata almi win ayo kufuumin disa kema namti, God ata mep tunum kaami win kaa kufolala, win soyap ke-lokoma kayi! kala, Yesus ayo kanum bakaya ko.
LUK 14:12 Kemin, Yesus ayo kanum bokoyinba-kup, fal-siki taba mep tunum kaa weng umola tal atama ima im-bokobip ami bokola: Kabi ima tang dap-kaalon o, kalap namti, kaltapni aket fukunin kaa, Nak-tunum kusal iyo naan-daayi tal nami ima ayo inabip-kup kawu, isiik nami ima ayo tiip-nik o, kalalapla, kaltapni kaptum kusal so, kaltapni abip kasel bung kayaakal iso, kiita weng umuuyila-yaamin disa. Kanolap namti, kunolin tunum kuliita-kup kapni ima fuuyap inamnip ita-kup tiip-tokomip.
LUK 14:13 Kabak-ali kanumin daa. Kapni ima tikiyap namti tunum iiwaan so, tunum yawiit aa, tunum yaan ukum aa, tunum tiin mafak kanolin kuliita naan-daayap tal ima kaa inin o.
LUK 14:14 Kanoyap inam-nokomip. Lale, saak yak kanolin kiili, fan kapni ima kabak tiip-talalip disa te! Bom ilom tituun-kup tunum taansip imi tam tiinokomip kabaku, God ata kapni kukup tambal mep tawaal diim kalawaami kanumsap kaali, tiip-tale, kabi kulu fiyaap dukum-kup duu-mokomap o, kala, Yesus ayo kanum bokola ko.
LUK 14:15 Kulaa, tunum ma Yesus aso ima im-bokobip ilmi iipyak tem kulu tunum ma Yesus ami weng ayo weng san-ilomda ayo bokola: Kamokim o. Bom bii-lom kaptoowu tunum ayo God ami abip din unale, God ami ima tini-bala inam-nokoma kaali, tunum kaa fiyaap duu-mokoma no, akale
LUK 14:16 kulaa, Yesus asiik weng ma faldak-tii bokola: Tunum ma ima tinimon o kalale, unang tunum yaapkan imi bokoya-lomda: Am kunolin diim kulu talemin i! yaka ko.
LUK 14:17 Yakalala bombe la, kulaata utama yi, Ima inin am ayo daanu kala, kalale, kulu almi okok kemin tunum ma dabaala din tunum kamosinim kawu diing kutiiyase imi bokoya-lomda: Kipyo, kulaata inin am uyo daana kemin, tilin i! kala. Katale,
LUK 14:18 tunum alik imi aket tem kaali, Ima falalup kayi! kala, faldak-tii kasen-fakan-bamdipla, tunum ma ayo kanum bokola-lomda: Nali ima lang ma mobi kemin, din atamdila kawu, talokomi disa kayi! Kemin, din bokolan i, akale
LUK 14:19 kulaa, tunum ma akal bokola: Yi, bulumaki nakalkal ma mobi kemin, din tik-tii itam-somdila yo, kalbi kemin, nali talokomi disa. Kemin, din-ilomdap bokolan o, akale,
LUK 14:20 tunum ma ayo bokola: Yi, nali unang ma kama-kup kuluubi kemin, nali talokomi disa kayi! kala kanum boko-boko-kelip ko.
LUK 14:21 Tunum yaapkan iyo kanum boko-boko-kelip kala, itaba-kup, asuk ok tabuumin tunum ayo tal almi tiin molin kamokim ayo tal tunum kanum boko-boko-kelip itam tala kiimi sang kaayo, bokolale, kamokim ayo tunum kanum boko-lom kolip kiimi aket atul kuuyale, kulaa asuk almi ok tabuulin tunum ayo bokola-lomda: Na, baan abiiltap bilin abip kaptam-ami liip dukum sole, liip katip katip so, kawu tal-une-bamdapla, iiwaan, win dinim, tunum yawiit, tunum yaan ukum, tiin mafak, iyo afetbi kuliilap imtal daalawa, ita ima kawol aye, kang kawol aye, tawobi kutiibi kaldaak-ata inik o, kala ko.
LUK 14:22 Ok fukulin tunum ayo kamokim ami weng ayo weng san-ilomda din kanoba-kup, abiltap asuk tal almi kamokim ayo bokola-lomda: Kamokim o, nali kapni weng uyo weng sandila, kanoli. Katale, am kaltam-ali abiin anung ma disa kulu bombuu no, akala, kamokim almi ok fokolin tunum ayo bokola:
LUK 14:23 Tunum unang ita taba-lomdip nami am kaltamu tiltam tale-bilip tiiknak o, kalbi. Kemin, kabi din aba langabip liip kawu kutal-fuku din langabip ma ma kawu tal-une-bamdap, unang tunum iyo ku muwa tal-unebi kuno saak-kup sisii imtal nami am kaltamu tiilawa ima so, kang awon iso, inik o, akale,
LUK 14:24 fal-siki taba ti almi am tunum unang tiin bom-bilip imi bokoya-lomda: Nali nikil alimal kipni weng ma bokoyon o, kalalila kemin, kamasi unang tunum imi bokoya-lomdi: Tiliwa, nami am kaltamu naso ima inum o, yikila, kela-silip kiili, nami ima kaa inam-nokomip disa. Ale, unang tunum tal nami am kaltam talbip kiptale, nami ima kaali, inam-nokomip kayi! kalan o, kala, Yesus ayo unang tunum ilom am ma daanokomu kawu, din God ami abip ima ina-faka-mokomip kiimi sang kaata faldak-tiimin weng kamun bakayila ko.
LUK 14:25 Am ma daanale, unang tunum yaapkan iyo Yesus aso um-bomdipla, Yesus ayo fal-siki taba tiyak unang tunum iyo itam bokoya-lomda:
LUK 14:26 Kabi tildang nami okok kemin kaa kutal-fukulon o, kalap namti, kabi talalu aket fukudapla yo, kala-somla. Kemin, kabi nami lak duu-yaamin kaata sakbaalim dukum kelule, yak kaltapni kawak-aalap imi lak duu-yaamin, kalel umi lak dakaamin, man lak aye, ilem anung maakup imi lak dakaamin, kaltapni angtiil lak dakaamin kulu kulaak banula, nami lak duu-yaamin kaata, dukum keluk o, aka. Kemin, kabi kuliili keyilalap tildang nami miit tem tal-ilomdap, nami ok kaata-kup fukulap namti, kabi nami daang bakaalin tunum kelan o, kala-somla ko.
LUK 14:27 Kemin, dok nolin kapta nimi daang bakaalin tunum kelon o, kalokomap kaali, tunum ayo dabak as diim daaliwa ayo angtiil yol kuluu-lomda taanokoma ulultap ke, Kuno kuluulami no, kalin dinim so, nami daang bakalap nali boko-lomdi: Kaata kanuman o, kalbi kaayo, kutal-fukulin dinim kaaso, kiiyo kanumap namti, kabi kalok no-lomdap nami daang bakaalin tunum kelamap dinim o. (Lale, kabi kabak alik kanumap namti, kaata fan nalmi daang bakaalin tunum ke-lokomap ko.)
LUK 14:28 Kabi nami ok kuu kutal-fukulon o, kalap namti, kamasi kaali, kabak-ami fiitmin kaami aket uyo talalu fuku-daa-somdapla kawu, tildang nami ok uyo tabuulon o kala-somla kemin, mep faldak-tiimin weng kala bokoyokomi kalawuuta, kipni aket fukunin kabak ayo bam-daayokomu. Kemin, ibi talalu weng san-iliwa, dok kanolin tunum ata ma am sakbaalim dukum ma delon o, kala namti, kamosinim kaali, tiin-bomda tuumon ayo ding boko utamala, Am kaami kun kulaali, tiknu ne, disa ye? kalokoma.
LUK 14:29 Ale, ayo moni ding bokolin disa kela namti, am kun kiita-kup molile, tuumon uyo disa kelamu no, kalala kulaalokoma kaa, unang tunum alik iyo atam-ilomdip aban den-bam ale, atafiimin weng bakaan-bam ke-bam ale,
LUK 14:30 bokolip: Tiyak tunum kaa daa atamin! Ali am dukum ma delokomi no, kala-lomda dinan-umba. Yale, tuumon kaa disa kenbu kemin, tunum kaa am kaa dela dinimnu kulaalokoma disa te! akokomip o.
LUK 14:31 Kanolin tap kemin, kamokim ma ayo weng selaya boko-lomdip: Waasi dinin ilmi kamokim sole, twenti tausin (20,000) ita tal numi kamokim aso dinan-tabum o, kalalip talabip kayi! kalokomip namti, ami aket fukunin uyo tambal ma talalulin disa yo, kalale, tunum ten tausin (10,000) kiita-kup baa kulin daalip aso dinan-tabokomip ema? Disa. Kamasi akal kaptoowu tiin-bom aket fukun-bamda almi tunum iso, iyo ding boko, Awu, ti waasi dinin imi kamokim aso, almi dinin tunum iso, dinan-tabokomup kulaa ti, nuta nuta ke-lokomup o, kalale, kulaa dotu afet daa kutiilokoma no.
LUK 14:32 Aa, kanola utamala yi, Nuli tiiknamup disa yo, kalokoma kaa, waasi tunum kiili, samaan kawu talabip o, kalokoma kaa, almi kalaan yim-baala unemin tunum iyo yim-baala din waasi imi kamokim ayo bokolip ko: Kapyo, numi kamokim ata yim-baala tal bokop-ta-lomdup: Dinan-kulii-tabokomup disa; kemin ale, disa weng kaata-kup, talalu-lomdup kelum o, kalokomip o.
LUK 14:33 Kanolin tap kemin, kabi tildang nami ok fukulon o, kalap kaa, kamasi kawu talalu aket fuku-daa-somdapla kawu, kapni mafek mafek so, kaptum kusal iso, iyo alik keya-somdapla kawu, tildang nami miit tem tilin disa kelap namti, kabi nami daang bakaalin tunum ke-lokomap disa yo, kala ayo kanum bokoyila ko.
LUK 14:34 Yesus ayo faldak-tiimin sang ma boko-lomda kanum bokola ko: Yol kaali ti mafek mafek tambal abaal-kup tabasa. Lale, kanola kaami titil kaa disa kelu namti, dok kano dotuluwa, asuk yol kaa titil kaa kuluulokoma ni? Kabak-ali atin disa te!
LUK 14:35 Yak yol abaal dinim kesu uyo binalu daak tawaal tambal diim abam-nokomu namti, yol ta taba-lomdu tawaal kaa dong dokolokomu disa; ku-mafak-daalu, titon san tabokoma disa kemin, kulaala saak banokomu no, kala-som ale, kuno bokola kipkal talang tem sole, nami weng kala bakayinbi uyo talalu weng selin o! kala kanum bakayila ko.
LUK 15:1 Tunum takis kaamin sole, tunum kukup mafak kutal-fukulin iso, iyo tal Yesus ami mepso kulu tal-ilomdip, ami weng kaata weng san-kaamipla,
LUK 15:2 Falosi so, lo utamsip iso, iyo Yesus ami aket atul kola-lom, kala weng baka-bamdip bokolip ko: Mep tunum kalawaali tunum kukup mafak kutal-fukusip kiimi aptum ke-bomdala, iso ima inan-umba no, kalbip kala, kala-lomdala,
LUK 15:3 faldak-tiimin weng ma bokoya-lomda: Kanola iltipni tunum ma sipsip ilmi-kup 100 kiita tiin mola laabip. La, kulaa maakup ma maaklo kela namti, sipsip aalap kayaak ayo ding bokola yi, 99 kiita-kup bom-bilip kala, kalba-kup, malo ma kiili kawu tikiinal kulu kano keyale, aptum maakup ma disa keba ami fen-tal-unebi ata-mokoma no.
LUK 15:5 Kanola atam-ilomdala, dabuu dap-tam almi nakal kun diim tii kawu kuliiya-lomda, fiyaap duun-duun dibii-tala. Kemin,
LUK 15:6 dibii-tal almi abip tal-ilomda, almi aptum kusal iyo naan-daayila, tala-tala-kelipla, kulaali bokoya-lomda: Kipyo, nami sipsip ma maaklo kelaya, fen-tal-unebi atam dabuu dabii-tali kemin, kipso naso ami fiyaap duumum o, kalokoma.
LUK 15:7 Kanolin tap, kanola nakal ibi bokoyon o, kalalila kemin, ban kemin tunum ma ami ban ayo kela-lomda aket fal-siki-lom God ami lak duula namti, abiil tikiin kasel ensel ili atin ti ami fiyaap awak dukum uyo duulokomip. Ale, mep tunum ilmi-kup 99 kiita le boko-lomdip: Nuli ban kemin dinim; tambal-kup bom-bulup kemin, dok kano-lomdup aket fal-sikilokomup i? kalip namti, ensel iyo kanubip kiimi fiyaap dukum uyo duuyokomip dinim; kemin ale, fiyaap katip sakap ma duuyokomip o, kala ko.
LUK 15:8 Yesus ayo faldak-tiimin weng ma bokoya-lomda: Unang ma uyo sisol dukum tuumon nakalkal kiita, kutal-fukulu ilom ale, maakup ma maaklo kusolu namti, uli yokon iilfo kufo-lomdu abiin sung ilol kaali, diliit-saanbi asuk ata-mokomu no.
LUK 15:9 Atabu-kup, ulmi kayaak iyo weng umuuya tala-tala-keliple, kulaali uyo bokolu: Yi! nami tuumon ma maaklo kelula, fen-bi-lomdi utabi kemin, kipso naso fiyaap duumum o, yakan-kaa-mokomu.
LUK 15:10 Kemin, nali ipni bokoyon o, kalalila kaayu, kanola ban kemin tunum ma almi ban ayo kulaa kela-lomda aket fal-siki-lom God ami lak duula namti, God ami ensel iyo atin ti tunum kanola kaami fiyaap sakbaalim dukum uyo duu-mokomip o, kema ko.
LUK 15:11 Yesus ayo asuk weng ma faldak-tii bokoya-lomda: Tunum ma ayo laaba,
LUK 15:12 ami man kiili alep kemin, niing ata aalap ami bokola-lomda: Atok kapyo, bom biilap kapni taanapla, kapni bung mafek mafek baanokomip kawu, nami malii kup-nokomip kaali ti kama kulawu nasiik kup-nawa yo, akale, kulaa fan almi bung mafek mafek iyo alap imi tokoya ko.
LUK 15:13 Kanolaya, niing ayo bom ilanali yo kaloma dinim; kulu ti almi bung kanolin mafek mafek iyo dibii kulii yak aba bilin abip samaan ma kabana. Kemin, din abip kaptamu bomdala, da kukup mafek mafek iyo kutal-fuku-bomdala, ami kanolin mafek mafek dap-tama talsa kiili, alik tinan-daala disa kelip,
LUK 15:14 kulaali bokon kaptam ayo ima disa ke, ol fuut am dukum ma kutaltam daalule, kulaa mafek mafek iyo dulule um-tal daala.
LUK 15:15 Kanolu utam ale, din abip kaptam kayaak tunum ma atama aso bomdipla, tunum ayo dabaala din ami bokon kawu kang imi ima waan ifamin ok kaata, tiin mo-bomda,
LUK 15:16 as ma kaami lap kaata, kang imi ifa-balala, iyo im-bilipla, akal kuno kuuta ma inatamon o, keba. Lale, ami ima ayo ma kolin dinim kela.
LUK 15:17 Kanu-bam ilom ale, kawu ami aket kaali, bam-daalula boko-lomda: Nami atok ami okok kemin tunum iyo ima yaapkan-kup inan-laabip. Katale, nami tal kala-laabi kaatale, ima tinap-kup bomdila, taanon o, kalbi. Kemin,
LUK 15:18 kulaa kela nalmi atok ami fanang unokomi. La, nali bokola-lomdi: Atok kapyo, nali God ami tiin diim kaayo, ban ke-bam ale, kapni tiin diim ayo ban ke-bam ken-umbila tili. Kemin
LUK 15:19 ale, kamali kabi maso ma bokop-na-lomdap: Nalmi man o, nokokomap kaali, yaap kep-nokomu disa kemin, kuno kep-na-lomdap kapni okok kemin tunum kelon o, akokomi kayi! kal-bomda kanolin aket uyo fanang dakama ko.
LUK 15:20 Kulaa, almi aalap aket kaali, tabamnule, nalmi atok be kawu unon o, kalala tabamna. Kemin, almi aalap fanang umbabala, umbilin abip mep-mep un-kem-salale, aalap ayo atam ami aket tem kaali, olenin dukum kemsile, kulaali baan abiltap bina toop dip-tal miki weng fokola kem-salale,
LUK 15:21 kulaa, man ayo bokola-lomda: Atok kapyo, nali God ami tiin diim so, kapni tiin diim so, kaali, ban ken-umbila tili. Kemin, kalawaali maso ma kabi bokop-na-lomdap: Nalmi man o, nokokomap kaa, yaak kep-tu bokop-nokomap disa yo kemale,
LUK 15:22 aalap ayo almi okok kemin tunum imi bokoya-lomda: Baan abiltap bina din-ilomdip, atin ti ilim tambal ayo ma kulii-tal makenbip-kup, ale, sikil iling ayo ma kuluu kulii-tal sikil duung tem ayo diltoop daala-som aa, yaan ilom ayo ma kuluu kulii-tal diltoop tinela kenbip-kup, kulaa
LUK 15:23 din-ilomdip bulumaki man tambalim tiil abuulin ayo ma an-kulii-tilipla, fuu-bam in-bomdup fiyaap duu-bam kemum o.
LUK 15:24 Kabak-ami miit kaa dok ata naa kalolip: mep nami man kalawaali maaklo ke-lom, saaknin tap kesa. La, kamala asuk tam-tiin ke tiin kawang kela tala atamup. Kemin, ami fiyaap duu-bam inum o, kalale, fan iyo fiyaap duu-bamdip ilip.
LUK 15:25 Katale, fik ali lang dikin-umba kemin, lang dikibi bital am daang mepso kuluba weng sena yi, Abip namti was eng sole, baal eng so, namti akal ma kebu kaa kala, weng sanba-kup kulaa,
LUK 15:26 okok kemin tunum ma ami naan-daala tal bokola-lomda: Kiili, kanimin fiyaap ma duu-bam kanubip i? akale, asiik bokola:
LUK 15:27 Yi! kapni niing ayo asuk ti tambal-kup tal itamala, kaalap ayo asuk dabuulala kemin, bulumaki man tambal tiil abuulin ma an-kulii-tal kufuu-bam in-bom kanubip o, akale, fik ayo weng san-ilomda
LUK 15:28 aket atul dukum kelu, Nili tam am unomi dinim o, kalala, kano abip daal kabaaku bom ilale, aalap ayo tiltam daak-ilomda man ayo naan-bam bokola-lomda: Tiltam talawa yo, kal-bom molale,
LUK 15:29 man asiik aalap ami bokola-lomda: Daa yo! Atok kapyo! Nali wasital yaapkan dakan-tii yakyak kem-tabasi kaali, kapni ok-kup tabup-tansi kaa, kapni weng bakaap-na-laabap kaa, ma kuyang saak tiip-tinsi disa. Lale, kabi meme man tambalim kaa ma aap-napla, nalmi kayaak iso tiin-bom fiyaap duu-bamdup inasup dinim. Lale,
LUK 15:30 mep kapni man ayo kapni kanolin mafek mafek kuliila din sadikimin kaata, kanum tal-une-bam ale, mafek mafek iyo sekela kulaala unu-tulu-ke-balala, talale, kaata kapyo, bulumaki man tambal tiil abuulin kaata aalap o? ke-bam aalap bakaalale,
LUK 15:31 aalap asiik bokola-lomda: Man aa, kabi suunkup alim maakup laabup kemin ale, nami mafek mafek kulaa ti alik kaltapni te!
LUK 15:32 Kanola niing ayo maaklo ke-lom saaknin tap kesa. La, kamala kulu tam tiin-ilom tiin kawang kela talala, atamup kemin, kaata fiyaap duumum o, akan-kaamsa no, kala Yesus ayo kanum bakaya ko.
LUK 16:1 Yesus ayo faldak-tiimin weng ma alami daang bakaalin tunum imi bokoya-lomda: Tunum bung kayaakim ata okok kemin tunum ma ulduulila, ata taba-lom bung mafek mafek so, ok fuku-yilin tunum iso, iyo tiin molak o, kalalala, ayo ulduula. Lale, tunum kusnum iyo tal mafek mafek soyap ami bokola-lomdip: Yi, kapni bung tiin molin tunum kaali, kapni mafek mafek kii ma talalu tambal-kup ma tiin moba disa kemin, almi kayaak iyo tale-bilipla, masiim kuluu kukaayinba kayi! akipla
LUK 16:2 kulaa, bung tiin molin tunum ayo weng umola tal atamale bokola: Kabi kukup mafak so nema, ke-balapla, unang tunum iyo weng bakan-una-tala-kemip weng sani kaa, kabi kabak kanimin ma nuu-balawa yi? Kanubap kaa kalalila, kabi kamala kulu tam-kan-tiilila kemin, kabi asuk maso ma nami mafek mafek iyo ma tiin mop-nokomap disa. Baan ti unin disa ilomdawa, ti kamala kulawu sukon ma kuluu nami mafek mafek kanobap kaami win kaa, dolbi kutiile kuliip-na talap tii atam, Awu, dok nolin bung kiita tambal bom-bilip aa, dok nolin kiita disa kebip kaa kalon o! aka ko.
LUK 16:3 Kala kanum bokola, bung tiin molin tunum ayo aket fukunbi bokola: Yi, nami kamokim ayo nam-kan tiilon o, kala kabak-ata dok nolokomi ma? Nali titil so foko-lomdila, tawaal dikilmin kaami ok kaa ma ke-mokomi disa le, aa fatom kemin, nak-tunum kusal imi ima sang kaa nen-daayokomi disa.
LUK 16:4 Ayo! Kulu nali aket fukunin tambal ma utami kayi! Nali nak-tunum kusal iyo kamokim ami maan anung ayo kuluu kuya kuya keli salala kawu, nami ok ayo dinimnu kewa-somdila disa kawu ilokomi. Nak-tunum kusal isiik fiyaap duu-bamdip nam-tama din imi am daa-lom iyo nami tiin molin o, kalale,
LUK 16:5 kulaa, kamokim ami bung tiin molin tunum ayo tunum alik ita kamokim ami maan kuluu-silip iyo naan-daaya-lom bokoya-lomda: Ibi kamokim ami maan kensip ayo maakup e kala asiik tal mo una-una-kemin o, yaka bom-balala, dusiin daalin tunum asiik tal atamale bokola: Kabi kanim kal kaata kamokim kaa maan telokomap i? akale, kulaa asiik bokola:
LUK 16:6 Yi, nali as lap oliv ok ket ulmi-kup 100 kiita maan telokomi no, akale, bung tiin molin tunum ayo bokola: Kabi yak maan kunolin alik kiili, kamokim ami alik tela-laamin disa; baan tal tiin-ilomdap kaltapni sukon (tiket) falduup-tasi kaata, kuluu-lomdapla, dolmin fal-siki-lomdap oliv ok ket 50 kiita-kup, kaltapni win ayo dola ke-lomdap oliv ok ket 50 kiita-kup telan o! akala,
LUK 16:7 fan, maan kaa anung-kup tela-lomda unale, kuno tunum ma asiik tal tiin molin tunum ayo bokola-lomda: Aa, kabi yi? Kanim kal kaata kamokim kaa maan telokomap i? akale, ayo bokola: Nali wiit bek almi-kup 100 kiita maan telokomi no, akale, bung tiin molin tunum ayo bokola: Maan kaa alik kamokim ami tela-laamin disa; baan tal tiin-ilomdapla, kaltapni sukon falduup-tasi kaata, kuluu dolmin kaa fal-siki-lomdap bek ulmi-kup 80 kuliita-kup, kaltapni win ayo dola ke-lomdap 80 bek kiita-kup telan o, akale, fan maan anung kiita-kup tela-lomda una ko.
LUK 16:8 Mafek mafek tiin molin tunum mafak ayo almi kamokim ami kanumin mafek mafek iyo kanubi tinan daa kutela. Lale, mulo kawu almi kamokim ayo utama yi, Mafek mafek tiin moyilin tunum ami fiyaap dolin disa la, mafek mafek tiin molin tunum almi angtiil lak duu-bom tambal tiin-yaamin kaami aket kaata-kup fukun-bamdala, kanolin kukup kaa kanonba kala, kala-lomdala, almi mafek mafek tiin molin tunum mafak ami win ayo kufola no. Kemin, kamokim ami tunum mafak kaami win kufolin kaa dok kabak-ata daa kalolip: Tawaal diim kalawaami unang tunum ilmi okok kemin kaami aket fukunin kaata, kuluu-lomdipla mamdet kuyak daa-bom okok ke-bamdip, unang tunum God ami falala-kalin diim bom-bilip ita, kulaak baniwa keyinsip te!
LUK 16:9 Weng ma bokoyokomi kemin weng san bom ilipla! Kibi tawaal diim kalawaami ilip kaa, bung aye, yak tuumon aye kii, kuluu-lom unang tunum kii tambal-kup dong dakaayin-bam ale, naan-daayip tal iltipni am tilipla, tiin saan-bam kamayin-biliwa, ili ti iltipni kaptum kusal tituun alik-daap kelin o. Kemin, bombii ibi yaap-kup tawaal diim kalaami tuumon aa, mafek mafek tambal aye, kulaa disa keliwa kawu, God ami suunkup ilin abip unokomip kaata, God akal bokoya-lomda: Yi, ibi ti nalmi naktum kusal o, yokokoma no.
LUK 16:10 Kemin, kamokim ayo almi ok ayo kulaala yak almi okok kemin tunum ami sikil diim unula, ali ti tambal-kup okok kema namti, almi kamokim ayo utamaya, Ti tambal-kup kanum taba kala, kala-lomdala, ayo fiyaap duu-mokoma kaata, ok dukum kaata-kup kolaya, okok ke-mokoma no. Ale, almi kamokim ayo, Ok katip kaata, koli mafak nuuba kala, kalalala, ok dukum kaata, koliya, ti kanu-mama no, kalalala kemin, kolokoma disa.
LUK 16:11 Kanolin tap kemin ale, kipni mafek mafek tawaal diim kala bom-bilip kiili, kuluu-lomdip tambal-kup tiin molin disa kelip namti, God ami okok kemin dukum uyo binala yak ipni sikil diim abam-nokomu nema? Daa.
LUK 16:12 Ibi tunum kusnum imi mafek mafek kaa talalu tiin molokomip disa kaali, God ami mafek mafek kulaala yak iltipni sikil diim abamnula, iltipni ke-lokomu nema? Disa.
LUK 16:13 Tunum kawanta kamok alep kiili, ma ami ok fuku-som, ale, ma ami ok fuku-som kemon o, kala namti, ali taang-kala-lomdala kamok alep imi ok kaa fuku-mokoma disa; kanola tunum ayo God ami okok kemon o, kala-lom, ok tabuu-bam moni kaama namti, God ali daang ukolale, moni kaami aket kaata ti dukum kukaayokoma. Kemin ale, tunum kaa kanta God ami aket-kup kola-lomda, God ami wok kaata talalu yikik fukula namti, moni kaamin kaami aket kaa, ma fanang daalokoma disa; ibi titil-foko-lom taang-kala God so, moni so, alep kiimi aket kii aalu ilokoma disa yo, kalala, ayo kanum bakayila ko.
LUK 16:14 Falosi ili ti moni aket-kup yesula, Yesus ami kanolin sang bakayinba kaali, weng san-ilomdip isiik atafiimin weng uyo bakaliple,
LUK 16:15 Yesus ayo itam bokoya-lomda: Ibi unang tunum imi tiin diim kaata, kukup tambal kaata kutal-fuku-bom-buluwa, unang tunum iyo numi win kaa kufuyik o! kem-tabasip. Lale, God akal itama yi, Kipni aket aa, fanang aa, iyo tambal e mafak e ken-umba. Kemin, tunum unang ili kipni kunolin kukup kulaami win kulaa bakan-tabasa. Lale, God almi tiin diim kawu kanun-umbip kaali, ti kukup mafak kutal-fukusip kaa, tang tabin mafak dukum o.
LUK 16:16 Sawaalak kawu, Moses ata God ami Lo kuka-daasa kaali, dola kutiilale, God ami weng ku-fatap-daa bakayin tunum yakal God ami weng uyo dola-lom keliwa, uyo bokoya-lomdu: God ami weng alik kaali, yikik kuyak aket tem daa-lom kutal-fukulin o, kalaya, yakal kutal-fuku-bomdip man loop dip-tiilip tam tam tabasula, oksam ukaayin tunum Jon namti tildaak talsa. Yale, kamala kulaata Jon so, nami daang bakaalin tunum iso, yakal ale, nakal nuta-kup unang tunum imi weng tambal kaali, bakayin-bamdup: Kipni aket uyo fal-sikilipla, God akal kipni iliim kaali, boya-lomda yim-tama tildang almi miit tem tiilak o, kala nikil nuli bakayin-bulupla, tunum unang yaapkan iyo tildang God ami miit tem tulum o, kala-lomdip nikneka talabip.
LUK 16:17 Kemin, God ata unang tunum imi iliim boyokomi no, kalba kaali, am ma daanon o kalbu. Lale, God ami Lo uyo dinim kelin disa bombuu kemin, am mafiing diim daanokomu kawu, tawaal so, abiil so, kiili disa ke-lokomip. Katale, fan God ami Lo alik kuutale dinim-nokomu disa; ti kano suunkup ilokomu no, kala bakayinsa no.
LUK 16:18 Yesus ayo asuk bokoya-lomda: Kanola tunum ma ayo almi kalel uyo kewa-lomda, yak unang kusnum ma kuuta kuluula namti, God ami tiin diim kaa kaami kanolokoma kaali, sadikin-tal-unemin tunum o, kalokoma. Kemin, kano ti tunum ma akal aptum ami kalel kewa-lom fotabasa kuuta kuluula namti, God ami tiin diim kawu ami kanolokoma kaali, sadikin-tal-unemin tunum o, kalokoma no, kala Yesus ayo kanum bakayila ko.
LUK 16:19 Yesus ayo faldak-tiimin weng ma bokola-lomda: Sawaalak kawu tunum bung kayaakim ma ti tambal-kup tiin bom ale, okok kemin disa; ti disa kulu tiin-bomdala, suunkup ilim tambal tambal akal alik akal alik kiita-kup miki-bam ale, ima tambal tambal kiita-kup in-bom ken-umba.
LUK 16:20 Kemin ale, kulaa tunum iiwaan ma ami win kaali, Lasarus ali aptum kusal iyo dap-tal bung kayaakim ami amitom daalip unip bom bii, un-un-ken-um-bala, suunkup akan-uni kawo! kala, medaak aba bom bii un-un-ken-umba. Kemin, ayo fen-bam utamala yi, Bung kayaakim ami ima in-bomda ima bam aa, ima anung binalip saak unebip kiita talaala, Bom-bilip kala, kalba-kup, kulaa ayo ima tinap kenbu kemin, kiiyo kuluu ina-ina-ke-balale, ami angtiil kaali ti abang ta disa akal ma kensa. Kemin, miyaan yaapkan ita tal ami abang iyo falang atalip ko.
LUK 16:22 Bom ilomda ayo taanale, ensel iyo tal tunum iiwaan ami sinik ayo dabuu dap-tamalip din abiil tikiin daalip, Abraham aso bom biliwa, bom ilom kuno bung kayaakim akal taana dawaaliple,
LUK 16:23 ali din as kiinin abip kawu bomdala, angtiil yol awak uyo kuluu-lomda titam daala yi, Abraham namti bitam samaan kawu bombe kala, kalale, Lasarus ali Abraham aso bombe kala, atama ko.
LUK 16:24 Tiin kawang-bomda bung soyap ke-bomda biisa ayo naan-taba-lomda boko-lom: Nalmi awaalik Abraham kapyo! Nali as dawang tem diin-bomdila, nami angtiil ayo kiin tal faal-faal-balala, angtiil yol dukum ayo kamap-na talababa kemin, olen-daap-na-lomdap, kabi Lasarus kulaa dabaalap tal-ilomda sikil diil diim ok katip ma kulii-tal-ilomda, kuyak nami falang kiin-bokoba kulaa abop-na diis-nak o, ke-bamda naan daalale,
LUK 16:25 Abraham ayo bokola-lomda: Nalmi man kabi ti aket fuku-daatam. Siin kaa, kabi tiin kawang bom ilsap kaali, kabi mafek mafek tambal tambal kiita-kup kaa-balaple, Lasarus alile, saak mafek mafek mafak kiita-kup fakan-umba. Kemin, Lasarus ali abip tambal kuluu bomda fiyaap dukum duuba. Kemin ale, kuno kapta angtiil yol awak uyo kuluubap te!
LUK 16:26 Ti kukup akal alik ma namti kala bombuu kaa daataman, God ali ok bukung dukum ma kala bikisa. Kemin, kuno yakal yak malii kuluunip nokol tildak malii kuluunup kesup kalaali, tunum tildak malii kaldak bom-bilip kaliilile, yak malii unum o, kalokomip. Lale, ili dok kano taang-kala-lomdip yak malii unolip disa; kuno yak malii tunum kabaak bom-bilip yakal tildak malii tulum o! kalokomip. Katale, yakal dok kano-somdip kanim diip tildak malii baa tololip daa! aka ko.
LUK 16:27 Kanolin kemin o, akale, siin bung kayaak ke-bom biisa asiik bokola-lomda: Nalmi awaalik kapyo, nali weng ma dik-daap-tokomi. Nalmi nakal awakal ili nalmi atok ami am kaptamu bom-bilip kemin, yakal kanola tal angtiil yol awak dukum kuluu-laamin abip kalaba tololip kemin, kapyo, dik-daap-talila, Lasarus kulaata dabaalap daak-ilom bokoya-lomda: Yi, kipni tiing ami bomda kukup mafak mafak kem unan-soma ulultap kaa, Ibi kanumin disa yo, kalala, kanum bokoyak o, akale,
LUK 16:29 Abraham asiik bokola-lomda: Aa, Moses sole, God ami weng ku-fatap-daa bakayin tunum iso, ita God ami weng ku-fatap-daa-laamin kaali, God ami Sukon Tem kabaku dolsip. Kemin, kuyak ata kapni nakal iyo ti yaap weng sanamip te! akala,
LUK 16:30 fan bung soyim ke-bom biisa ayo bokola: Daa yo. Ti awaalik Abraham kabi ti kano weng san ilawa, nami nakal kiili, God ami Sukon Tem weng uyo weng sanamip dinim. Lale, ti tunum taansa kaata, kom tem kawu tam tiin-ilomda din God ami Sukon Tem weng uyo bokoyokoma kaata, fan imi aket ayo fal-siki-lom yak kukup mafak nuumin kaali, kulaalokomip o, akale
LUK 16:31 kulaa, Abraham asiik bokola: Kuno kapni nakal ili Moses so, God ami profet imi weng so, iyo weng san-kaamin disa ken-umbip namti, kanola tunum siin kawu saaksa ata kom tem kawu tam tiinda din bokoyokoma kaali, kanolin tunum ami weng kaa, weng sanokomip dinim o, kala kayi! kala Yesus ayo faldak-tiimin weng kaali, kanum bakayila ko.
LUK 17:1 Yesus ayo almi daang bakaalin tunum imi bokoya-lomda: Kukup mafak uyo tiltam aba-lomdu unang tunum imi aket fukunin kaa ku-mafak-daayulula, yang bun-alomdip ban kem-tal-une-mokomip. Yale, tunum kaa dok kanolin tunum kaata, kukup mafak ke-balala, aptum kusal iyo atamiwa yi, Awu, ali kanuba no kalbip-kup, kulaa yakal ban ke-bam God ami lak duu-yilin uyo kulaa kela yang banip namti, God akal mep tunum ayo angtiil yol kaa kolokoma. Kemin, ibi kuu talalu utafii-bamdiwa kayi!
LUK 17:2 Kanola kayak kayak ili utamiwa yi, Tunum kaa kanolon o, kalba kala, kalokomip uyo ili taba-lom tuum dukum ma kuluu-lomdip kuyak tunum kaami kalum kun diim kabaku sok de-lom dabaalip daak yol ok kumun tem una namti, mep tunum kaa saaknala, bi-lom kawu God ayo angtiil yol katip ma kaata-kup ami kolokoma. Kemin ale, tunum ali taba unang tunum God ami lak dakaamin katip katip kebip imi yam-mafak-daala ban ke-lomdip yang banip namti, kulaa God akal taba-lomda kabak-ami du tiim o, kala tunum ayo angtiil yol awak dukum kaa kolokoma.
LUK 17:3 Kemin, kabak-ali iltipni kukup kabak-ata talalu utafii-bamdiwa kayi! Kapni kap-tunum ayo kapni mafek mafek ma ban kep-ta kaa kabi boko-lomdap: Kabi maso ma kanumin disa yo! akawa, ami aket uyo fal-sikila namti, kabi ami ban kep-timba kaa, kuno kambolalap.
LUK 17:4 Kanola am maakup ma daana kuyaku kapni ban kamap-tin-bi-lomda asuk ti suunkup tal bakap-tam-bamda: Kapyo, nami kukup kaa kanup-tambi kaa ti mafak o, kali kemin, kuno kulaali no, kem-una namti, kapkal ami kukup mafak kanup-tamba kaa, lukup-ta kela-laamalap kayi! kala Yesus ayo kanum bakayila ko.
LUK 17:5 Yesus ami kalaan tunum iyo bokolip: Kamokim kapyo, kapta dong dokoyilawa, numi God ami lak dakaamin ayo dukum-nuk o, kala kanum bokoliple,
LUK 17:6 Kamokim ayo bokoya-lomda: Kanola, kipni God ami lak duu-laamin kaali, mastat almi san alaltap katip sakap ke-lomdip God ami dik-daalip namti, akal dong dokoyilala, as ma bokola-lomdip: As kabi timtim so dola kutamalap daak yol ok kumun tem aba-lom tolnan o! kalokomip kulaa, fan God ali kipni weng kulaata-kup weng seya-lomda as ayo bokolale, timtim soyim dola-lomda din yol ok kumun tem kawu tolna uta-mokomip o, kala Yesus ayo faldak-tiimin weng kanum bokoyila ko.
LUK 17:7 Yesus ayo bokoya-lomda: Tunum win soyim ami disa iip okok kamaalin tunum kaali, din langabip din-ilomda fiitbi ok fakabi talale, yak kang imi tiin mo-bala bom bii am tiinu tala kaa, tunum win soyim kaa boko-lomda: Baan abiltap siin din kaltapni ima kaasiik fuu inalapla yo! akokoma nema?
LUK 17:8 Disa! Kuyak kanum bokolokoma disa. Kemin, ayo bokola-lomda: Kamasi kaali, nami ima kasiik talalup-na-lom ifop-nap im-bilile, mulo kaata kaltapni ima ayo talalu-lom fuu inamnan o, akokoma.
LUK 17:9 Disa iip okok kamaalin tunum ali ti almi tiin molin tunum ami weng kaata-kup weng san din ami wok-kup, fukubi tala. Lale, ali almi tiin molin ayo, Ami yaap ke yo, kala, atin kukup tambal uyo kolokoma disa. Kemin, almi okok keba kaami sisol kaata-kup kolokoma.
LUK 17:10 Ultap kemin, ibi God ami okok kamaalin tunum kemin, God alta bokoya-lomda: Ibi kala nolin ok kala, kuyi kaata-kup nuu-biliwa yo! yakala, kanu-bilip bii dinimnu namti, iltipni win kaa kufo-bam boko-lomdip: Numi ok tambal kanun-tabasup kabak-ata talalu utam-ilomdap numi win uyo kufoyin-bam yaap ke yo yakan-kaaman o, kemin disa; ti boko-lomdip: Nuli fan ti disa iip okok kamaalin tunum kemin, numi suunkup ok tabuumin kaata-kup ti kanun-umbup o, kemin o! kala kanum bakayila ko.
LUK 17:11 Yesus so, almi daang bakaalin tunum iso, nikil iyo Jerusalam kaptam banum o, kalalip din liip ma din kaba-lomdip, Provins Sameria ku kabak daa, mep Provins Galili kuu kaldang daa, ke iip-iip kuyak liip
LUK 17:12 nikil wan din abip ma kamolipla, kulaa tunum nakalkal ma dikik-fukusip iyo tal Yesus atamum o kalalip tal-ilom, mafak-umusip ilmi kukup kanun-umbip kaata-kup no-lomdip daa samaanlo kabangu tolale,
LUK 17:13 weng kaata-kup fak tildang daa naan-bam bokolip: Kamokim kapyo, numi olen-daaya-lomdap numi angtiil mafak kalanosup kulaa dong dokoya dotu-yimulan o!
LUK 17:14 akan kaamiwa, Yesus akal fan imi angtiil mafak uyo uteyila-lomda ayo bokoya-lomda: Ibi din-ilom awem tunum imi diim kawu ipni angtiil uyo kukuyilipla, iyo utam-ilom boko-lomdip: Ipni angtiil uyo tambalnu no, kalipla kawu, unang tunum iyo weng san-ilomdip fiyaap duumin o, yaka. Kemin, kanum bokoyilala, Yesus ami weng kaata-kup weng san-ilomdip liip kulu unan-siliple, imi angtiil kaa, yaap tambal-kup ma keyulule,
LUK 17:15 kulaa nikil unabip iyo tunum maakup ma akal ata utamala yi, Nami angtiil uyo tambal kep-nu kala, kalala asuk tal-bomda dukum-kup God ami win ayo kufola tal-bom
LUK 17:16 lamo daak Yesus almi miit tem kuluba-lomda, tilik duung fakela daak tiin-ilom, Yesus ami, Yaap ke yo, aka ko. Tunum kaali, Sameria kasel kiili, Juda imi waasi kemin.
LUK 17:17 Yesus ayo almi daang bakaalin tunum kuliiso, maakup imi bokoya-lomda: Tunum maakup kalawaata-kup tala. Katale, tunum nakalkal yam-talaluli katale, tunum bitikal kiili yi?
LUK 17:18 Tunum bitikal kiili kanimin o, kalalip tal God ami win kaali, kufolin disa kulaalip tabanipla, Juda numi waasi Sameria kayaak maakup kalawaata-kup talda God ami win kaa kufon-bam yaap ke yo, keba ni? kala-lom
LUK 17:19 Sameria tunum ami bokola-lomda: Kabi nami weng kaata weng sandap utamawa yi, Fan ali yaap kanolama no kalbap kala, kala-lomdila kulu kapni aket tem kabak aso talalu-tamuli kemin, tam tola-lomdapla tambal-kup din bom-balawa yo, kala kanum bokola ko.
LUK 17:20 Falosi malo ma iyo tal Yesus ami dik-daala-lom bokola-lomdip: Dok kanumin diim kawu God ami tunum ulduula Kamokim kesa ayo dabaala tal-ilomda, Rom ita numi tiin mosip kaa, tal-ilom tildaa yim-baa-lom tiin molokoma yoko? akiwale, asiik bokola: God ami tunum ulduula Kamokim kesa tunum kaami tal tiin molokoma kaali, fatap kulu tiin tiyak daa atam-laamin kaami mafek mafek disa te!
LUK 17:21 Ali tal abip maakup ma kaptamu bomdala ibi tiin molokoma disa ale, ami tiin molokoma kaali akal alik. Kiwe! Ali tal-ilomda kipni aket tem kabaku bomdala, ibi tiin saanokoma no, kala-lom, Falosi imi bokoyimba-kup kulaa,
LUK 17:22 ayo fal-siki taba alami daang bakaalin tunum iyo bokoya-lomda: Am ma daan tiltam talokomu kaali, tiin-yaamin am mafak ma tiltam tabokomu kemin, ipkal talalu utamiwa yi, Dok kanumin diim kabaku Dukum Ami Man Nayo, asuk talokoma kaa kalum o, kalokomip. Lale, ibi ti disa maaklo kawu fenokomip.
LUK 17:23 Mep tunum unang malo ma ita ipni bokoya-lomdip: Yak tunum kula bombe kulaata God ami ulduu-dabaala talse no, kaliwale, tunum unang malo ma ita boko-lomdip: Daa. Kakaa disa. Kalawaata God ami dabaala talse tunum namti kala bombe no, ke-bamdip; kasen-faka-mokomip kemin, ibi imi weng kaa weng sandip din itamum o, kemin disa yo.
LUK 17:24 Dukum Ami Man Nami asuk talokomi kaa kanolala kawu talokomi disa. Baabaa maak ma dabaa falala-kup kalala, am bokon alik abiil so, maakup wii-falala-kup kala-laaba tap kelila, fatap-kup kuyaku talokomi. Kemin, kuyaku unang tunum alik iyo nita-mokomip.
LUK 17:25 Yale, din abiil tikiin unin disa bom ilila, unang tunum kamala kula bom-bilip kalawiili, daang ukup-na-lomdip kukup mafak kaata, kukaap-nam-bilipla, angtiil yol awak uyo kuluu-lomdila unokomi ko.
LUK 17:26 Nami unokomi kaali, asuk tilin disa bom-ilila, unang tunum kiili, sawaalak Noa ami sip awak sakbaalkan dina-balala, unang tunum imi kanolin kukup kanumsip ultap kanu-bam kanu-mokomip. Kemin,
LUK 17:27 Noa ami sip dina-bisa kaa, unang tunum alik ili (God ami lak uyo dukum-kup duu-bomdiwa disa; ti tawaal diim kalawaami mafek mafek kiimi aket kaata ti dukum-kup duu ilsip. Ili yaap bom-bulup o kal-bomdiwa) kasen-foko ima in-bom ale, unang aa tunum aa iyo dan-kaa-bamdip ok ke-bamdip kanu-biliwa, bombii sip uyo alik ditang-kala dinimnule, Noa alimal iyo tam sip tem uniwa, abiltap maak fak-daalin tap, ok ayo alala tiltam-ilomdu, unang tunum iyo alik im-baak-molu mam bapliiya-lomdu alik kuliila tabasip. Kemin, kanumin siim o kanola nakal abiltap-siik talokomi kayi!
LUK 17:28 Kanolin kemin, nami unokomi kaali, asuk talin disa kalo bom ilila, unang tunum imi siin sawaalak Abraham ami niing ami man Lot kaami bom-balala unang tunum kiimi kukup kanu-bisip tap ke-lomdip kanu-mokomip. Kemin, Lot ami bom-balala, abip Sodom kasel unang tunum alik imi God ami lak kaa duulin disa; ti tawaal diim kalawaami mafek mafek aket dukum-kup yesu. Kemin, Nuli yaap bom-bulup o, kal-bomdiwa; disa kulu ima im-bom, mafek mafek san-bam ale, am lang diki-bam, ke-bam biliwa biile,
LUK 17:29 Lot alimal iyo abip Sodom ayo kambolalip tabanipla kulu, abiil kaptamu maak fak-daalin tap as kiinba sole, tuum mangsip so, iyo om manin tap ke-lomdip, tildaak tunum unang iyo alik fuulipla taansip.
LUK 17:30 Dukum Ami Man Nami asuk tiliya kawu, alik nata-mokomip kaali, kanola unang tunum kii God ami lak kaa talalu dukum-kup duu-laabip disa; ti tawaal diim kaldaak-ami mafek mafek aket kiita dukum-kup duu-bom ilipla, nali talokomi te!
LUK 17:31 Kemin, nami am daanokoma kaali, tunum ma almi abal akiim tiinba ayo asuk tam am aba-lom almi bung kaptam bom-bilip kiiyo duk-duu kulii-tiltam banemin disa; almi bung alik kiili ti maas kutii keya unokoma. Kanolin kemin, kanola tunum ma ayo almi langabip kawu bomda lang dikiba kaali, asuk din am kaa un-ilom bung duk-duu kulii-unemin daa, kela wakadaa unak o.
LUK 17:32 Kemin, siin sawaalak kawu, Lot ami kalel uyo abip kaptam-ami mafek mafek kela tulu kabak-ami aket kaata, disa akal ma kewalala asuk fal-siki taba ti daang tem daalamu daa, as mamin kaata uyo umfuulala, taansu kabak-ami aket kaata talalu fukun-bamdiwa yo, kala-somla ko.
LUK 17:33 Dok kanolin tunum kaata ti almi angtiil-kup mok im-bomda ila namti, ali taan-ilomdala, maaklo ke-lokoma le, aa tunum kanta ma almi angtiil lak kuuli, duulin disa maas kewa-lomda nami aket-kup kup-na bomda, nami ok kaata-kup kulii-taba namti, kaata suunkup ilokoma no.
LUK 17:34 Kemin, nali weng ma bokoyokomi kaali, nali kutamiip tili namti, abiin maakup ma kabaaku tunum alep iyo akan bom-iliwale, ensel iyo tal-ilomdip ma ata dabuu dabii-un-bomdiple, ma ata kuno kela unokomip.
LUK 17:35 Kanolin tap nakal am daanin diim tili namti, unang alep ma ima fuumum o kalalip kama num-siliple, ensel iyo tal-ilomdip ma uta kuluu kulii-un-bomdiple, ma uta kuno kewa unokomip o.
LUK 17:36 [Kanola nimi talokomi kaali, tunum alep ma ima lang diki-bam ilipla, ensel iyo tal-ilomdip, ma kaata dabuu dap-tama un-bomdip, ale ma kaata kuno kela unokomip o,] kal-bomda Yesus ayo almi daang bakaalin tunum imi kanum bakayila ko.
LUK 17:37 Kanum bokolale, daang bakaalin tunum iyo dik-daalip: Kamokim, kapyo! Doku kanu-mokomu ni? akiple, Yesus asiik bokoya-lomda: Kabi utamawa yi, Awon filfil yaapkan iyo sak fun una-talabip o, kala itamap namti, kaptam-ali tunum ayo taanba ami as kuli kaata bom-balaya kemin, kanubip o kalokomap. Kemin, kanolin tap ti ipkal utamiwa yi, Mep nami mafek mafek sang kaali, kaa tiltam tabu kala, kalokomip o, kulaata utamiwa yi, Nami talokin uyo mep dikipnu no, kalokomip kayi! kala, ayo bakayila ko.
LUK 18:1 Ayo almi daang bakaalin tunum imi bokoyilala, daal tabe-bam God ami beten kemin uyo kuno kela-som kemin disa; suunkup ti kanu-biliwa, God ayo imi beten weng kaali, akal maan tiiyilama no, kala-lomda ayo faldak-tiimin weng ma bakayila ko.
LUK 18:2 Abip ma kaptamu tunum kot weng san-kaamin tunum ma bombe. Kemin, ali God ami atul ayo suunin disa ke-bamda, ami weng uyo weng san-kaamin disa ke-bam ale, ali aptum kusal imi aket kaa ma kuyima disa ke-bam laaba.
LUK 18:3 Kuno abip kaptam-ali unang kaluun ma tiinsu. La, uli ti suunkup tal weng talalmin tunum ami fanang-kup tale-bamdu dik-dakaala-lomdu: Nami waasi ayo nam-mafak-daalon o, keba kaa dong dokop-na-lom, tunum kaa lekbi dabak-molawa kep-nak o, kal-bomdu bakaalu ko.
LUK 18:4 Akan-kaa-bulula, kamosinim kaali, weng talalmin tunum ayo dong dokop-nin dinim ken-umba. Kata, bom-ilomda, kaata aket fuku-daa-lomda: Yi! Nali God ami atul kaa ma suunin disa bom ale, aa mep unang kaluun kuumi angtiil lak kaa ma duu kemin disa kanubi. Katale,
LUK 18:5 unang kaluun kaa tal dik-dakamin-kup kem-tabasu kaa, nali daal dap-tiip-nansa kemin, nakal kabak talalu-walila, kambop-nu ilon i, kala Yesus ayo faldak-tiimin weng kaa kanum
LUK 18:6 bokoyilale kulu, Yesus ayo weng faldak-tii-lom bokoyila kaami miit ayo ku-fatap-daa bokoyila ko: Kibi weng talalmin tunum mafak kaami weng uyo weng sanip taa!
LUK 18:7 Ali saak tunum mafak la, ali unang kaluun umi weng ayo weng sewa te! Ale, God ali ti atin tambal-kup tabasa. Kemin, alta almi unang tunum ulelsa, imi weng tambal kaata-kup weng san-kaa-bam laaba kemin, bokoyokomi kemin, weng san iliwa. Tunum unang ili kutamiip so, taap so, beten kemin-kup laabip kaali, God ali keya-laamin disa; ali abiltap tambal-kup dong dakaayin-bam laaba. Kemin ale, Dukum Ami Man Nayo, nami din abiil tikiin din abali asuk tal tawaal diim kalaba talokomi kaali, nali utamila, God ami unang tunum yaapkan ili God ami lak duu-bomdip kutamiip so, taap so, beten ke-bam bom-laabip o, yokokomi ne disa ye? Daa. Malo ma ita yang banokomip. Kemin, nikil kibi nami bii asuk talokomi kaami aket kaali ti, fuku-daa God ami lak ayo talalu yikik-kutal-fuku naan-biliwa yo, kal-bomda bakaya ko.
LUK 18:9 Tunum malo ma ilmi aket-kup fukun-bamdip, Nuli ti tituun-kup tibin tunum ale, nak-tunum kusal malo ma ilile, tituun-kup tabin tunum disa yo, kebip kala, kalba-kup, Yesus ayo faldak-tiimin sang ma kanubip imi bokoyila ko.
LUK 18:10 Tunum alep ma iyo God ami beten kamaalum o kalale, alep iyo din lotu am diilim kaptamu din abale, kulaa ma kaali takis fakamin tunum ale, ma kaata Falosi tunum, alep iyo din uniple,
LUK 18:11 kulaa, Falosi ali tola bom almi fanang-kup fanang daka-bamda beten kema ko: God kapyo, nali nak-tunum kusal kusnum ban wakamin ililtap disa yo, kalalila kemin, yaap ke yo kalbi. Ili aptum kusal imi bung mafek mafek uyo disa kawu dakayin-bam ale, kasen-fakayin-bam, saak yak sadikin-tal-une-bam ken-umbip. Ale, nali kabak-ali ma kanun-umbi dinim. Nali mep yak takis kaamin tunum alaltap kelila ban ke-laabi disa. Kemin, nali yaap ke yo, kebi.
LUK 18:12 Nami kukup tambal kanun-umbi kaami sang kaali, weng san ilawa, suunkup Sarere e kala dukduu-dukduu-ken-umbup kabak-ami iipyak tem kabak-ali nali kapni aket kaa dukum-kup fuku-daka-bamdi, ima inin disa fala bombii am alep keke-ke-bamdi, yak nami sisol kan-umbi kaali, sikip nakalkal fak-tii-lomdi sikip maakup ma kabaak-ata kulii-tal lotu am dukum kaltamu kapni kukaap-tam-bam ken-unbi no, kala kanu-bam beten kema.
LUK 18:13 Ale, mep tunum takis kaamin tunum ali toop daang tem kutoowu tola bomda, almi kukup mafak ken-umba kaami fatom uta tabela bom-bulula titam abiil tikiin daalama disa; kulaa kela dabuna-lomda bokola ko: God kapyo, nali ban wakamin tunum kemin, nali olen-daap-na-lom dong dokop-nan o, kal-bomda beten kema ko.
LUK 18:14 Nali kipni weng ma bokoyokomi kaali, God ata taba-lomda takis kaamin tunum ami ban wakamin ayo takan-telala, tituun-kup tabin tunum kelap o, akale, kulaa almi am banale, Falosi ata God ali kuno kambola akal disa almi am una kelipla, kemin, tunum almi win kufolokoma kaali, God ali dap-kayak daalokoma. Kemin, tunum kaa kanta aptum kusal imi minlo tem un-ilomda almi win kaa, kufumin disa kema namti, God ata ami win kaayo, kufolokoma no, kala ko.
LUK 18:15 Yak mafak umusip kiita-kup foko-kulii Yesus ami fanang talsip disa; man katip katip iyo imbiilip tal Yesus be taldip awak-aalap imi aket kaali, Yesus ata sikil kuyak man katip katip imi dabom diim kawu tiiya-lomda, dong dokoyilala, tambal-kup ilomdip fasuulin o, kalalipla kemin, man katip katip iyo yim-tamalip tilip. Katale, Yesus ami daang bakaalin tunum ili, man katip katip kiili, foko-kuliilip talemin daa yo, kala fotabam-niwa,
LUK 18:16 Yesus ali daang bakaalin tunum imi bokoya-lomda: Man iyo kuno yim-biilip nami fanang tilin aa! yimba-kup, bokoya-lomda: Tunum unang ili fanang daaliwa yi, God ali nuli dong dokoyokoma no, kalalip, tiltam God ami miit tem talebip iyo, mep man katip katip kalawiltap kemin, ibi man katip katip kii fotaba dil-saanin disa; keyilipla nami fanang tilin o, yaka-lomda,
LUK 18:17 Nali ti tituun-kup tabin weng kaata bokoyokomi kemin, weng san bom ilipla! Man kiili, man katip katip bom-bilip kiita, awil-fakal iyo mafek mafek ma kuyum o kalokomip kaali, man kiili maaklo yak awil-fakal imi sikil diim kaali, kuluulokomip dinim; kanolin kemin, unang tunum kawanta God ami miit tem kaali, tam unum o, kalip kaali, kamboyiwa, God akal dong dokoyalala, God ami miit tem kaali, tiltam talokomip; kemin ale, unang tunum kawanta ilmi aket kaata-kup fukun-bam kukup mafak nuumum o, kalip kaali, ilmi san kemin, atin ti God ami miit tem kaali, tiltam talokomip dinim o, kala-lomda kanum bokoyinsa ko.
LUK 18:18 Kulaa, Juda imi kamokim ma tal Yesus ami dik-daala-lomda: Kukuyin tunum tambal kapyo, nami dik-dakamin ma dik-daap-tokomi kaa, maan-tiip-napla utamon o. Kemin, nali dok kano-somdila, tiltam suunkup ilin tunum ke-lokomi ni? akale,
LUK 18:19 Yesus ayo bokola-lomda: Kabi kanimin o kala bokop-na-lomdap: Kabi tunum tambal o nakap i? Tunum tambal ayo ma bombe dinim; ti God maakup ata-kup tambal-kup tabin. Kemin, kabi kanimin o kalalap: Kabi tunum tambal o, nakap yoko?
LUK 18:20 Kabi God ami weng kuka-daasa kulaali utamsap uyo boko-lomdu: Kaltapni kalel kuu, kewa unang kusnum so sadikimin disa; aa, kabi tunum unang kii anulap taan-yaamin disa; kabi yukut kaa inin daa; kabi disa kawu ibaka-balap, soldiya iyo kaptum kusal kii sok dinayin disa; kabi kaltapni kawil-fakal imi weng uyo kuyang saak tiimin daa; ti imi weng kaata-kup, weng san-kaa-bam ale, kukup tangbal kaata-kup kukaayin-bam keman o, kalsa no kala, kanum bokolale,
LUK 18:21 kulaa, kamokim asiik bokola-lomda: Kwin, nali sawaalak man katip sakap kaptoowu yakyak kulii umbital tunum aalap dukum kulaa diili kaali, God ami weng kaa kutiiyinsa kiili, alik weng san-kan-tabasi no, akale,
LUK 18:22 Yesus ayo tunum kamokim ami weng kaa, weng san ale, bokola-lomda: Kulaali fan kanun-umbap yale, kabi ti kukup maakup ma kuuta-kup kanun-umbap disa; kemin, kabi dindap kaltapni mafek mafek kiili, kaptum kusal imi kuyilapla, ita moliwale, kaami moni kaata, kuluu-lom kulii-din unang tunum iiwaan imi kuyokomap kaata, fan din God ami abip kawu suunkup tambal ilokomap. Kemin, kano-lomdapla, kabi talawa, naso tal-une-bam, God ami okok kem-tal-unemum o, akale,
LUK 18:23 kulaa, tunum man kasaa ayo mafek mafek kayaakim kemin, Yesus ami weng kanum bokola ayo weng san-ilomda, ami aket kaa fanang daala yi, Kwin! ti suunkup tunum kelon o, kalbi. Katale, yak nami mafek mafek kiili, yaapkan kemin, kuno ke-lokomi disa yo, kala-lomda aket uluum kensa.
LUK 18:24 Yesus ayo atama yi, Tunum mafek mafek soyap kaali, aket uluum dap-telu kala, kalale, almi daang bakaalin tunum imi bokoya-lomda: Yak mafek mafek soyal unang tunum kii, ti fiit-bamdip, (imi mafek mafek sikip fak-dakan-unsip iyo kulaalokomip kemin, malo ma kiita-kup God ami aket kola-lomdip,) tiltam God ami miit tem tam unokomip.
LUK 18:25 Kemin, kabak utamsip. Olti dukum kamel uyo tam men sil ami tem kaa tam unon o kalu kaa, fiit-bi-somdula tam unokomu. Ulultap kemin, yak tunum bung kayaakim ali atin ti fiit-bi-somdala kawu, tam God ami miit tem ayo tam unokoma kayi! kala bokoyilale,
LUK 18:26 tunum unang Yesus ami weng bakaanba uyo weng san-ilomdip Yesus ami dik-daala-lomdip: Kapni kanum boko-lom: Bung kayaakim ayo fiit-bamdala tiltam God ami miit tem kaa tiltam talokoma no, kalap kaali, faneng namti, mafek mafek dinimal nuli dok kano-somdupya kawu, tam God ami miit tem uyo tam unokomup i? Kaa fan taang-kala tam unolup daa yo, akiwale,
LUK 18:27 Yesus ayo bokoya-lomda: Tunum kaa taang-kala-somdala, tam God ami miit tem kaa tam unokoma disa; God ata dong dokolokoma kaata, fan tam God ami miit tem uyo tam unokoma no, yakale,
LUK 18:28 Pita ayo bokola-lomda: Kapyo, weng san ilawa! Kapni daang bakaalin tunum nikil nuli nulmi abip so, nulmi mafek mafek alik so, kii keya-lomdupla, kapni ok kaata, fuku-bom kapso tal-unebup o, akale,
LUK 18:29 Yesus almi daang bakaalin tunum nikil ilmi bokoya-lomda: Kulaa fan yale, nami bokoyokomi kalawaali fan kayi! Kawanita aket fukun-ilomdip: Nuli God ami weng uyo kulii yang unang tunum imi bakayin-bulupla, tam God ami miit tem unin o, kalale, imi am so, almi man aptil so, nakal-fakal so, awak-aalap aye, iyo abip kawu keya-lomdipla din God ami ok fukulip namti,
LUK 18:30 kamala tawaal diim kala bom-bilip kawu, God akal maan dukum kaali, tiiya-lom tiin mola tambal-kup bilipla, ilom kawu saak-nokomip kaali, din atamiwa God aso suunkup ilin o, yakan-kaama ko.
LUK 18:31 Yesus ayo almi daang bakaalin tunum talangkal iyo kumup-daa yim-tama yang abale, bokola: Ipyo weng selin! Siin kawu Dukum Ami Man Nami sang uyo, God ami profet weng tem bakayin tunum imi bokoyilala, ita God ami Sukon Tem kabaku dolsip. Kemin, kamala kulu met Jerusalam unokomup kaali, weng kaa alik tiltam aba-lom lap abuulokomu.
LUK 18:32 Kemin, din Jerusalam kasel itamupla, Juda imi kamok kamok kiita, taba-lomdip nam-baalip yak Rom kayaak imi sikil diim abamnile, nitafiimin weng mafak uyo bakap-nam-bamdiple, angtiil diim mok tik-tiip-nam-bam,
LUK 18:33 sok faklet ta kuluu ne-bi-lom nelip taanokomi. Lale, am asuumano diim kaata, asuk tam tiinokomi no, yaka.
LUK 18:34 Lale, almi daang bakaalin tunum iyo Yesus ami bakaba kaami miit uyo talalu kaal kelin disa kelipla, kulaa Yesus almi daang bakaalin tunum ili ami weng bakaba kabak-ami aket kaali, talalu ma fukunin daa ke-lomdip weng kaami miit uyo bam-daalin disa kelip ko.
LUK 18:35 Yesus so, almi daang bakaalin tunum iso, iyo yakyak din abip Jeriko mep kulu unan-siliple, kulaa tunum tiin mafak ma liip balang diim kawu tiin-bomda unang tunum tal-unebip imi moni kaata dik-dakaayin-bamda neyila-laaba.
LUK 18:36 Kemin, akal weng selaya yi, Unang tunum yaapkan iyo tal-unebip kala, kalba-kup dik-daala ko: Kaa kanimin ma nuubip i? yakale,
LUK 18:37 tunum unang isiik bokolip: Abip Nasaret kayaak Yesus ata talaba no, akiwale,
LUK 18:38 tunum tiin bikilin ayo Yesus ami naan-bam bokola-lomda: King Devit ami man loop Yesus kapyo, kabi nali olen-daap-na-lom dong dokop-nan o! kemale,
LUK 18:39 unang tunum dusiin daa unbabip iyo balaan-bamdip bokola-lomdip: Dulumnan o! akan-kaabip. Katale, tunum tiin bikilin ayo dukum-kup ti naanin-kup ke-bamda bokola: King Devit ami man loop kapyo, nali olen-daap-na-lom dong dokop-nan o! kal-bom naanin-kup kemale,
LUK 18:40 Yesus ayo duluuma kawu tola-lomda, kusnum imi bokoya-lomda: Kiwe, tunum tiin mafak ayo dibiilip nami fanang tilin o, yakale, kulaa fan, tunum tiin mafak ayo dibii-tal Yesus ami miit tem daalipla, Yesus ayo tunum tiin mafak ami dik-daala-lomda:
LUK 18:41 Kabi kanimin ma nop-nalak o, kala naap-nanbap i? akale, tiin bikilin tunum ayo bokola: Kamokim kapyo, nami tiin ayo baap-napla mafek mafek kiili, itafiimon o, kalbi no, akale,
LUK 18:42 Yesus ayo bokola-lomda: Nali utamiya, Kabi fan nam-talalulamap o, nakap kala, kalalila kemin, kulaa tam-talaluli asuk tambalnap kemin, tiin baa mafek mafek uyo talalu ataman o! aka-laam-salale,
LUK 18:43 kulaa, maak fak-daalin tap ami tiin ayo tambal-kup kewalule kulaa, mafek mafek iyo itam Yesus aso tal-une-bamda, God ami yaap ke yo, kema. Kemin, kanu-balala, unang tunum yakal atamiwa yi, Tunum tiin bikilin ayo Yesus dap-talalula kala, kalalip God ami win uyo kufon-bam fiyaap duumip ko.
LUK 19:1 Yesus almi daang bakaalin tunum nikil iyo din abip Jeriko kaayo, din aba akaala unum o, kalalip Jeriko tam itamiple,
LUK 19:2 kulaa tunum ma bombe ami win kaali Sakius; ali takis kaamin tunum imi kamokim ale, ali bung kayaakim kemin, ali Jeriko kaptamu laaba;
LUK 19:3 ali, Yesus kaa atamdila dok kanolin tunum ata kala, kalon o, kema. Katale, unang tunum yaapkan isiik tal aba toop liip bak-daalip kemin, Sakius ayo tunum mepkan kemin, Yesus kaa atamin disa kelala,
LUK 19:4 akal utama yi, Awu, Yesus namti kula liip tal-unokoma kala, kalale, Yesus ayo talalu atamon o, kalba-kup, asiik unang tunum yaapkan tem kuyaku kuleka bina din as fik al ma kaptamu duu tam tiin tital daak liip daa tiin bom ilale,
LUK 19:5 kulu Yesus ayo yak aba tal asal tiinba kaami miit tem kulu tola titam daa Sakius ayo atam ale bokola-lomda: Sakius aa, kamala kulaali ti nali din kapni am kawu ilokomi. Kemin, baan abiltap asal uyo kela tildaak tawaal talawa yo, akale,
LUK 19:6 fan Sakius ayo asal uyo kela abiltap-siik tildaak tawaal aba-lom, Yesus ami weng fokola-lomda, fiyaap sakbaalim dukum duuma ko.
LUK 19:7 Kanola tunum unang iyo alik atamipla, Yesus ali kukup mafak fukumin tunum ami am una no, kala-lomdip, Yesus ami daang tem weng bakaan-bamdip boko-lom: Kaali din ban kemin tunum ami am kaptamu sokoma no, kemip.
LUK 19:8 Sakius ayo yak Yesus so, almi miining so, iyo foko kulii tam almi am kawu yim-tam daa ilanale, kulaa Sakius ayo tam tola Yesus ayo bokola-lomda: Nak-tunum kapyo, weng san ilawa, nami bung iyo fak-tiibi sikip alep fak-tii-lomdi yak ma kabaak-ata tunum iiwaan mafek mafek dinimal imi kabaanuyokomi. Ale, ma kabaak-ata unang tunum ibakayin-bamdi, imi moni dakayila-yaabi uyo asuk kukaayokomi kaali, tuumon maakup e kala yukut duk-duuyasii ni kalbi-kup, tam tuumon atalingkal e kala kuyaku-som kola kola ke-lokomi no, kalale,
LUK 19:9 Yesus asiik bokola-lomda: Kabi Abraham ami man loop lale, kabi siin kaali, God ami liip kela yang atin ti maaklo kesap. Lale, ti kamala kulu God ayo kapso, kapni man-aptil iso, kipni iliim uyo boyila yaap kelip o.
LUK 19:10 Dukum Ami Man Nali tal unang tunum kukup mafak ke-bam God ami daang ukola-lomdip maaklo kesip kiita, fen-bamdi yim-taldang daa dong dokoyilile, imi iliim kaata boyon o, kalalila, abiil tikiin kaa kela talsii no, kala Sakius ami kanum bakaala ko.
LUK 19:11 Yesus ali tal Jerusalam mepso tala no, kalbip-kup, unang tunum iyo aket fuku-daaliwa yi, Kamala kaali, God ata taba-lomda Rom kayaak imi diim uyo tak-daa yim-buu-lomda, Numi tiin molokoma nema yo? kemipla, unang tunum ili Yesus ami weng uyo, weng san ilipla, Yesus ayo talalu-kukuyilila, numi kanolin aket fukunbup kaali, faneng disa yo, kalin o, kala-lomda, faldak-tiimin weng ma bokola,
LUK 19:12 kulaa, kamokim ma ayo aket fuku-daala yi, Naan-daap-nambip kemin, umbili bilin am bokon samaan ma kaptam banila, mep bokon kaptam kasel ita taba-lomdip uldaa-nam-buuliwa, Kabi numi tiin molin tunum kayi! kalalipla Kabi king kelan o, kaliwa, asuk tolokomi no, kema.
LUK 19:13 Tunum kaali unon o, kal-bom ale, kulu almi okok kemin tunum nakalkal iyo naan-daaya tildang atamiple, kulaa tunum maakup almi moni nakalkal e kala kola-kola keba-kup bokoya-lomda: Nami umbili umbilin am bokon samaan kawu ilokomi uyo, mep moni kaa dunuuyi kaa kuluu-lom wan saan-tal-une-bamdip, moni ayo maso ma kuluu kuyak tiip-tiip ke-biliwa, biili asuk nalmi talokomi kabaku moni kaayo, asuk kulii-tal kup-nin o, yaka ko.
LUK 19:14 Kamokim ayo kanum bokoya, tabanala almi abip tunum atam suun-umbip iyo tunum ma kalaan yim-baalip ami daang tem din-ilomdip tunum unang samaan kawu bilip imi bokoya-lomdip: Nuli mep tunum kalawaali king ke-lokoma disa yo, kalbup te! kalip ko.
LUK 19:15 Kemin, kanum bokolip. Lale, mep tunum kalawa ulduulip tiltam king ke-bom biile, asuk yak aba tal almi abip aba-lomda baan abiltap almi ok tabuulin tunum ma bokola-lomda: Na! baan abil din tunum nakalkal kiimi tuumon kuyila unsii iyo weng umuuyilap tilip dik-daaya-lomdi: Nami tuumon kuyila tabansii kaa, kanim kal ma kuluu-silip kala, yokon o kalbi. Kemin, ipyo din bokoyap tilin o, akale,
LUK 19:16 kulaa fan tunum ma asiik tal king ami bokola-lomda: Kamokim kapyo, nili kapni tuumon nakalkal kup-na un-salap kiili, wan saan-tal-une-bamdi dukum-nipla, kutiip-tasii asuk nakalkal ma kuluu kuyak tiptiip-ta kebi no, akala,
LUK 19:17 king ayo bokola-lomda: Kabi ti ok tabuulin tunum tambalim kesap. Kemin, nami mafek mafek katip ma kup-ta unsii namti, atin yaap-kup tiin-mo-salap. Kemin, kaali abip nakalkal kiita, kup-tila tiin-molokomap o, kala kanum bokolale,
LUK 19:18 tunum ma akal tal bokola-lomda: Kamokim aa, nali kapni tuumon nakalkal kup-na un-salap kiili, wan saan-tal-une-bili tiltam sakbaalim dukum kelipla, kulaa kewa bomdila, mep moni kiiyo, awakal ma kuluu kuyak tiptiip-ta kebi no, akale,
LUK 19:19 king ayo bokola-lomda: Kaa tambal kebap kemin, kulaata kabi abip awakal ma kiita kup-tila, tiin-molokomap o, aka ko.
LUK 19:20 Kuno ti tunum ma akal tal-ilom bokola: Kamokim aa, kabi titamila, Kabi tunum siliil-kup tabin kala, kalalila kemin, kapni okokmin tunum kiili, fiit-bamdip kaami win moni kaali, kaap-tam-biliwa kawu, miing-kup tal tiin-bomdawa kaa-bam ale, kaltapni okok kemin tunum imi langabip kaami mafek mafek dikilip tiltam tiilbu kaa, kabi mikil diim-kup tal tiin-bomdawa faka-bam ken-umbap kemin, nali kapni atul kaata, titam suun-daa-som ale, aa bisnis kemin kaami liip kaa ma talalu utamsi disa kala, kala-lomdila kemin, kapni moni iyo ti tambal-kup kambola kuwaap-ti tiinsip te! Ti kala daatam akale,
LUK 19:22 king ayo ok tabuulin tunum ami bokola-lomda: Kabi ti ok tabuulin tunum mafak dukum kesap. Kemin, ti kaltapni weng bokop-nap utami kaami kalan kaata, sok de-tamulokomi te! Kabi bokop-na-lomdap, Kabi tunum siliil-kup tabin balap titamsi kemin, kapni ok tabuulin tunum imi ok tabuu-bamdip moni kan-umbip kaa, kabi miing-kup tal bomdapla kaa-bam ale, kapni okok kemin tunum imi langabip kaptam-ami mafek mafek dikilip tiltam tiilbu kaali, mikil-kup tal tiin-bomdap faka-bam im-bom ken-umbap o, kalap. Kemin,
LUK 19:23 kaa kanimin o, kalalawa, nami moni kaa kuliilap din beng kawu tiilawa, tal-ilomdi win moni kaa maso ma kuluulami dinim i? Kemin, kaa kanimin o, kalalapla, kuwaalawa disa iip kawu bom-laabu ni? kala kanum bokolale,
LUK 19:24 kulaa almi dong dakaalin tunum bom-bilip iyo bokoya-lomda: Kibi yakdiwa, ami sikil diim kawu moni kutal-fukuba kulaa kuluu-lomdiwa, tunum moni nakalkal kuluuba kaami kolin o! yakala,
LUK 19:25 iyo bokolip: Kamokim kapyo, kabak kanum bakamin daa; tunum kalawaali, moni nakalkal kuluuba kaali yoko? akiwa,
LUK 19:26 king asiik imi weng maan tiiya bokoya-lomda: Weng ma bokoyokomi kemin, ipyo weng san bom iliwa! Tunum kaa kawanta ok tambal-kup fuku-bomda almi kamokim ami weng kaata-kup weng san-kaa-bamda ila namti, ami kamokim ayo ok uyo maso ma kolala, ok dukum kaata okok kemama. Ale, kawanta ok uyo mafak ke-bamda ami kamokim ami weng ayo kuyang saak ten-bamda kema namti, kaami kamokim ayo almi mafek mafek katip bombe uyo kuluu-lomda okokmin sisol uyo maso ma kolokoma disa yo! ke-bamdala, weng
LUK 19:27 ma kaata boko-lomda: Siin kawu tunum malo ma imi bokola-lomdip: Nuli mep tunum kaali, numi king ke-lokoma disa yo, kalbup o, naka-silip. Kemin, kii yim-bital nalmi tiin diim kulu anulip taanik o, kalsa no, kala Yesus ayo kanum bakayila ko.
LUK 19:28 Yesus ami weng uyo disa kelula kawu, ayo dusiin daalale, daang bakaalin tunum ita mafiingnip ke yakyak din Jerusalam din unipla,
LUK 19:29 abip alep kemin, ma kaa Betfage so, Betani so, kiili umbitam Oliv Tikiin kaptamu kemin, Yesus nikil iyo mepso kulubale, Yesus almi daang bakaalin tunum alep ma ipsiik unipla yo, yaka-lom,
LUK 19:30 bokoya-lomda: Alep ibi yak aba tam abip utafiibup kaptam ulip, Dongki man kasaa ma sok buk-duulip bombe kala kalip namti kaalile, siin kaa tunum so dap-tama tal-unemakin dinim; disa kama man bombe kemin, alep yak sok baa dibiilip nami bi kala tilipla yo. Kemin ale, kanumipla
LUK 19:31 tunum ayo ma alep dik-daaya-lomdip: Kaa kanimin o kala-lomdip kaa kanubip i? yaka namti, kipkal bokola-lomdip: Yi, numi Kamokim ayo ok so kemin, din kulii-tilin o, yakala tulup kayi! kala bokolalip kulii-tiliwa yo, kala yim-baala unip ko.
LUK 19:32 Alep iyo tal abip kawu tal uliwa, Fan Yesus almi weng bokoyila kaata-kup tifan dongki man kasaa ayo sok buk-dulip bombe kaa kalale,
LUK 19:33 alep iyo sok baamiple, dongki tiin molin tunum ayo tal dik-daaya bokoya-lomda: Ibi kaa, kanim nolum o, kalaliwa, tal dongki ami sok kaa baabip i? yakale
LUK 19:34 alep isiik bokola-lomdip: Yi, numi Kamokim kaali bokoya-lomda: Alep din kuliilip tiliwa yo, yakala alep tulup o, kala kanum bokolipla dongki kayaak ayo boko-lom, Kuno kulii-unin o, yakale,
LUK 19:35 alep iyo dongki man kasaa ayo dibii-tal Yesus ami kutal daaliple, almi daang bakaalin tunum ita ilmi ilim batbat ta kutam dongki ami daang kun diim kabaaku tabeliwa, Yesus ami dong dokolipla, Yesus ayo tam dongki ami daang kun diim tiinala, alimal
LUK 19:36 una-bilipla, unang tunum imi aket fukunin kaali, Yesus ami liip talaba kaayo, liip tambal-kup ma dotuluwa tal-unak o, kala-lomdip, ilimi ilim malo ma kiita dalela kulaak liip kawu kutii-kutii-ke-bilipla, dongki ayo Yesus ami dibii yak ilim kutii bokobip kaptoop bala una ko.
LUK 19:37 Yesus Oliv Tikiin ayo kulaa kela, tildaak Jerusalam mepso talan-salale, Yesus ami lak duulin tunum unang yaapkan iyo tal dap-falala duu-lomdip iso una-bilip, unang tunum alik iyo kukup akal alik akal alik Yesus ata kanu-balaya, itafiimsip kaami aket kaata, fanang daa-lomdip alik iyo ti God ami win kaata, kufu-bam, naan una-tala-ke-bamdip fiyaap sakbaalim dukum-kup duu-bam
LUK 19:38 bokola-lomdip: Numi kamokim king kalawaali, God Dukum ami win diim o, kalala talaba kemin, God ata kukup tangbal-kup kukayim-balala yo! Kemin, ayo numi dong dokoya yaap kelupla, tam abiil tikiin kaptamu abiin tambal-kup tiinokomup. Kemin, God ami win dukum-kup ayo kufon-bamdup fiyaap duumum o, ke-bam kanu-bilipla,
LUK 19:39 Falosi malo ma unang tunum yaapkan imi tem kulu bom-bilip kemin, tiltam Yesus ami bokola-lomdip: Kap kukuyin tunum kapyo, mep tunum unang kapni daang bakep-tambip kalawiili, baan bokoyawa, Dulumnin o! kala kanum bakaaliple,
LUK 19:40 Yesus asiik imi bokoya: Nali dulumnin o! yokokomi disa; nali kipni weng ma bokoyokomi kemin, weng san iliwa. Mep tunum unang kalawiili, dulumnin o! yokokomi namti, daak tuum kuliita, tunum ililtap keliwa kawu, nami win kaa kufumalip o, yaka ko.
LUK 19:41 Yesus ayo tal abip dukum Jerusalam mepso kuluba-lom atam-ilomda, kulaali abip kasel kaptam imi olen-in-bamda ama-bam bokola:
LUK 19:42 Ibi, Nuli ti tambal-kup balili-kala bomduwa yi, kalbip. Lale, am kala daansuu kaali, kipni aket fukunin kaa atin ti mafak-yinsu. Kemin, ibi kanolin kukup uyo ma utabip disale, bilili-kalin kukup uyo kaa utabip disa yo. Ibi utamipla, Kamala kuluwu God ali numi yam-talalulon o kalba, nuli kalalip utabip dinam, fan ibi yam-talalulama. Yale, ibi tiin bokol tap kelip, kipni aket uyo fal-sikilin disa kelip kaa, uktaalip kemin, kabak-ata am ma daanula kawu, kipni waasi iyo tal-ilomdip, kipni abip uyo falala kuyak moliple, kibi ok fanang, ima fanang, dok kanolin kaami fanang kaali ma tiltam talokomip disa; keliple, waasi ita baan dalaa kutam abip uti dong diim daa kela unfoko tam daak abip aba-lom, ibi yan-fakan tal-une-bam ale, abip kaami mafek mafek iyo ku-mafak fuuyin-bamdip, kipni tuum am dinan-unsip so, tuum uti fokosip so, iyo dekela binalip tildaak tawaal diim kaba-lomdu, tuum iyo sekela yang kuluba tildang kuluba ke-mokomu no, kala Jerusalam kasel imi aket kaata, fukun-bamda kiimi kalan kaata amama ko.
LUK 19:45 Yesus almi daang bakaalin tunum iso yim-tamala tam Jerusalam daa keyila tam lotu am diilim tam ulala, Kwin, tunum iyo taba-lomdip sipsip so, bulumaki so, kiili kulii-tal God ami koliwa, tunum unang imi ban kelip kukan-tiiyila-yaamin kaami inin-inin uyo kutal tii-bomdip lotu am diilim kaptamu saanbip kala, kalale, Yesus ayo tunum mafek mafek saaneng kalaabip iyo alik yan-buk-duu yim-baala tam baniwa,
LUK 19:46 kang awon saan-bamdip kiimi sisol kaa-bokobip imi weng ma bokoya-lomda: God ami Sukon Tem kabak-ali boko-lomdu: Nami am kaltam-ali beten kemin kaata-kup kanumin o, kalsu. Lale, ibi ami weng kaa kuyak saak tii-lom, God ami am kaltam ku-mafak-dakan-tabasip. Kemin, am kaltam-ali ipni wan saan-bam kaptum kusal imi moni yukut inin am kelu kewinsip o, kala Yesus ayo kanum bakayila ko.
LUK 19:47 Yesus ayo suunkup unang tunum imi God ami weng uyo am diilim kaptamu kukuyin-kup ke-balala, kulaa tunum awem imi kamok kamok iso, lo utamsip iso, Jerusalam kaptam-ami kamok kamok iso, iyo Yesus aalup taanak o, kalalip kaami liip kaata fen-tal-unemip. Katale,
LUK 19:48 tunum unang alik ili Yesus ami weng kaata-kup weng san-kaamum o, kalalipla suunkup tal falala-dabak-mo yakyak ke-bam weng san-kaamin-kup ke-biliwa kemin, kamok kamok iyo dok liip kawu ma yang-ilomdip dap-tal-fukulalip dinim kemip ko.
LUK 20:1 Am ma daanala, Yesus ayo lotu am diilim kawu unang tunum imi kukuyin-bamda God ami weng tambal uyo bakayin-balala, pris awem tunum imi kamok kamok iso, lo utamsip tunum iso, Juda kayaak imi kamok kamok iso, iyo tal dik-daala-lomdip:
LUK 20:2 Kapyo, kabi kawanami win diim kaata, tal kanolin kukup kala kanun-umbap i? Kawanta tam-baala tal-ilomdap, kanolin kukup kala kanum-solap yoko? Nuyo bokoyawa utamum o, akiwale,
LUK 20:3 Yesus asiik bokoya-lomda: Na, nakal weng ma ipni dik-daayokomi kemin, kipkal maan tiip-nin aa!
LUK 20:4 Oksam ukayin tunum Jon Baptis ali kawanami win diim kaata, unang tunum kii oksam ukayinsa ni? God ami win diim kawu kanum-soma elile, tawaal diim kaldaak-ami tunum imi win diim kawu kanumsa ni? Nami weng kala dik-daayi kaata, maan tiip-niwa yo, kala dik-daayale,
LUK 20:5 ilimi-kup bokola una-tala-ke-bamdip bokolip: Kwin! nokol kaa kanimin o, kalokomup i? Nuyo boko-lomdup: God ami win diim kaata, kanumsa no, kalokomup kaali, ali bokoya-lomda: Ibi utamiwa, God ami win diim kanumsa no, kalip namti, ibi kanimin o, kala, Jon ali fan God ami weng kaata tituun bakayimba, kemsip disa ema? kalokoma kemin,
LUK 20:6 unang tunum yaapkan kalawiili utamiwa yi, Jon ali God ami weng ku-fatap-daa bakayin tunum u, kebip kemin, nokol boko-lomdup: Tawaal diim tunum ma kaami win diim kaata kanum-soma no, kalokomup namti, unang tunum kalawiili aket atul keyula, tuum ta kuluu nuyo yelamip o, kala-lomdipla kemin,
LUK 20:7 Yesus ami ibokola-lomdip: Kaa kanta Jon kaa bokolaya, ali taba-lom unang tunum kii oksam ukayinsa kalalup utabup dinim o, akiwale,
LUK 20:8 Yesus asiik bokoya-lomda: Nakal ti kanolin kemin, kawanami win diim kaata, kanolin kukup kii kanun-umbi no, yokokomi disa yo! yaka ko.
LUK 20:9 Kulaa, Yesus ayo weng faldak-tiimin weng ma kaali, sawaayak God almi weng ku-fatap-daa bakayin tunum imi yim-baala talemsip imi diim tii unang tunum iyo bakayila ko. Tunum ma ayo wain lang ma dikibii diki-lomda, wain lang ayo kulaala yak tunum kusnum malo imi sikil diim abamnula bokoya-lomda: Wain lap abuu tii-mokoma kaali, dakabi kutii kela tak-nuubi ok ayo laabi kutiiliwa, kaptum kusal kiita tal molipla, kipta sisol ayo kuluu-lom anung ma iltipni kuluubip-kup; nakal anung ma kuluu kulaap-nip din unemak o, kala keya bilin samaan kawu una ko.
LUK 20:10 Kawu bom-balala, wain lap abuumin umi am uyo daan tiltam tabamnula kawu, tiin-saanin tunum iyo wain lap dakabi kutii-lomdip ok ayo tuk-nuu-bam ok laabi kutiilipla, aptum kusal imi kuyip ita tal moliwa, kulaa wain lang kayaakim ata alami okok kemin tunum ayo ma dabaala tal wain lang tiin molin imi bokoya-lomda: Nimi kamokim ami wain lap kaami ok kaami sisol anung kaata ma kup-nipla, nulmi kamokim ami kulela unon o, yaka. Lale, iyo biwaka-bi-lomdip, disa kulu dabaalip almi kamokim be una.
LUK 20:11 Kamokim ayo asuk ok tabuulin tunum akal kusnum ma dabaala din wain lang tiin molin tunum imi diim tal-ilom kamokim ami weng uyo tal bokola. Lale, akal ti kuno dabaak-mo biwaka-bamdiple, kukup mafak kaayo, kukaan-bi-lom, disa kulu dabaalip unale,
LUK 20:12 ati kuno kamokim ayo asuk liip asuumalo diim okok kemin tunum kusnum ma dabaala din wain lang tiin molin tunum imi diim unon e! biwakabi aalip kiim tabamnale, dap-tal-fuku dabuu-dabaalip saak lo uti yam tem abala una ko.
LUK 20:13 Kanumsile, wain lang kayaakim ayo aket fukunsi, Kwin! kaata kanimin ma nolokomi ni? kemsi. E, e aket fukunin ma tildang tulu utami. Ti nalmi aket-iip man kulaata dabaali imi fanang din unokoma te! kalale, aket fukuna yi, Nami Man aket-iip kalawaali aalokomip disa; ti ami weng kaata-kup weng sanokomip ema? kala, dabaala din wain lang tiin molin tunum imi fanang din una.
LUK 20:14 Lale, wain lang tiin molin tunum iyo atamiwa yi, Fan kamokim almi man ali kulu tala kala kala-lomdip, maaklo abiltap ilmi-kup bokola una-tala-ke-lomdip bokolip ko: Kuluwaali ti wain lang kayaakim almi man kemin, bom bii-lom almi aalap ami taanokoma ayo, alalta aalap ami mafek mafek kiili, alik tiin mo-lom almi alik ke-lokoma kemin, baan aalup taanala, wain lang kaltam ayo nulmi alik keyuk o, kala-lomdipla,
LUK 20:15 kulaali yak dap-tal-fuku, sisii dilili dibii tam uti daam tem uyo akaala dabaak saaklo daa-lom aalip taana no, kala-lomda kanum bokoyila ko. Kemin, Yesus ayo dik-daaya-lomda: Kipyo, wain lang kayaakim ami asuk talokoma kaa, ali wain lang tiin molin kasel kii, kanimin ma noyokoma ni?
LUK 20:16 Akal tal-ilomda wain lang tiin molin tunum iyo anula taaniple, asuk tunum kusnum ma iyo ulela-lomda, wain lang uyo kuyak kiimi sikil diim tiiyala, ita tiltam wain lang kaayo, tiin molokomip o, kala Yesus ayo faldak-tiimin weng uyo kanum bakayila ko. Unang tunum iyo weng faldak-tiimin weng kaata, weng san-ilomdip iyo (utamiwa yi, Wain lang kayaakim kulaali, God ami sang kaata bakayinba nu, kalbip-kup, yak wain lang tiin molin tunum o kala, kuliili Juda nulmi kamok kamok kuliimi sang kulaata bokola no, kala-lomdip) bokolip. Daa te. God ali numi kamok kamok kiili, kanola anulokoma disa, akiwale,
LUK 20:17 Yesus ayo talalu tiin dik-yak-diiya bokoya-lomda: Dok kabak-ami miit kaata, God ami Sukon Tem weng uyo boko-lomdu: Ok fukulin tunum ili am kaa dina-bam tiyak daaliwa, am kun ma kaali mafak o, kala-lomdip faldang mo binalip yak balang diim kabang abamna. Katale, Kamokim ali am kun kaa atam-ilomda, Kwin! kaali ti tambal kemin am dubim ami duwokop kelak o, kala-lomda am kun kaali, asuk dibii tildak dap-molaya ayo tangbal mokso ke tolnu ko. kalsu nema?
LUK 20:18 Aa, kuno ti am kun awak dukum ma bombuu. La, dok nolin tunum ata kutal daak am kun diim kaa daala namti, ayo dap-mafak-daalokoma le, am kun uyo dik-tam-daa tildaak tunum kaami angtiil diim abam-nokomu ayo, atin tunum dabuu dabaak molula, atin ti dap-mafak-daalokoma no, kala Yesus ayo almi sang kaata, faldak am kun umi diim kabak tii-lomda bakaya ko.
LUK 20:19 Lo utamsip tunum isole, awem tunum imi kamok kamok iso, ili utamipla, Ee, Yesus ayo nulmi sang kulaata, faldak kulu tii numi bakayinba kala, kala-lomdip, Kulaata yak da-fukulum o, kalip. Katale, unang tunum Yesus ami weng uyo weng san-kaabip imi itam-suun-daa-lomdip kuno kambolip ko.
LUK 20:20 Kulaa, lo utamsip tunum isole, awem tunum imi kamok kamok iso, iyo boko-lomdip: Kano ata bom iluwa, Yesus ayo kukup mafak ma nola kala, kalbup-kup, kuyaku dap-tal-fuku dabaalup yak Rom kasel imi gavman ami sikil diim abamnala, ata dabak saan-bi-lomda, dabaala yak almi soldiya imi kuyilala, Yesus kaa aalip taanak o! kala-lomdip, Yesus ayo talalu tiin dik-yak-dela atafii-bamdipla kemin, ili tunum kusnum ma moni kuya-lom bokoya-lomdip: Kipta din Yesus ayo atam kasen-fokola-lomdip, Nuli kabi tunum tambalim o, kal-bom tamsong-bamdup mok-kup inap-tanbup o, akan-kaa-bamdip ata-bom iliwa, Yesus ayo weng mafak aye ma bokola ne kala tal bokoyipla yo, kala iyo yim-baalip unip ko.
LUK 20:21 Yim-baalip tal Yesus ayo bokola-lomdip: Kukuyin tunum kapyo, numi titafiin-umbup kaali, kapni weng bakayin-bam kukuyila-yaabap kaa, ti tituun-kup. Aa, kabi ti yak win tibin kiita ti nami dong dakaap-nin o, kal-bomdap imi tong kaa ma bakan-umbap disa; kabi ti unang tunum alik win so, win dinim iso, ili alik tikip maakup God ami weng so, kukup so, kii ti tambal-kup kukaayila-tabasap kayi! kalbup te!
LUK 20:22 Mafek mafek sang uyo ma dik-daap-tum o kalalupla tulup kemin, (Rom kasel imi lo kaali, boko-lomdu: Ibi ipni takis moni uyo, numi king Sisa ami gavman ami kukaayin o, kalbu-kup ale, Juda kasel numi lo kuuta, boko-lomdu: Ibi ipni moni kuuli, God ami kukaalin o, kalsu.) Kemin, numi takis moni uyo Sisa ami kukaalum elile, God ami kukaalum e? akiwale
LUK 20:23 Yesus ayo imi aket tem kaa uteyila yi, Kii kanola wak-talalupla, ayo weng kuyak kutaldak ke-bamda weng mafak aye ma bokola kala, kalum i, kala-lomdip bokop-nip u, kala-lomda asiik bokoya-lomda:
LUK 20:24 Na! tuumon ma kulii-tal kukup-nipla! yakale, kulaa tuumon ma kuluu kukoliple, bokoya-lomda: Yak tuumon diim kabak-ali sinik so, win so, kala bombe kaa, kawanami sinik sole, win so, kaata bom-bilip i? yakala, iyo bokolip: Kaye? Sisa ami sinik so, win so, kiita no, akipla,
LUK 20:25 Yesus ayo bokoya-lomda: Uyo kanolin kemin, tuumon kalawaali Rom kasel King Sisa ami tuumon kemin, Rom kasel imi gavman almi kukaan-bam ale, God ami mafek mafek kiita, kuno God ami kukaan-bam kemin o, yaka.
LUK 20:26 Kemin, ili Yesus ami weng asiik maan tiiya-lom bokoyila kaali, weng sandiwa, fanang alik tam baneyilula, unang tunum kalawiimi tiin diim kaa nuli wak-talalokomup. Lale, kaa nuta nuta kelalup disa yo, kalaliwa, weng kaa kulaa kela, dulumnip ko.
LUK 20:27 Juda imi kamok kamok malo ma kiili, Sadusi yo, ken-umbip iyo boko-lomdip: Unang tunum taansip kiili, asuk tam tiinokomip disa yo, ken-umbip. Kemin, Sadusi malo ma iyo (din Yesus ami dik-dakamin fiitmin dukum ma dik-daaluwa, ami miit kaali, talalu daka-daa bokoyin disa kela namti, unang tunum iyo aban-delik i! kalalip) tal Yesus ami bokola-lomdip:
LUK 20:28 Kukuyin tunum kapyo! Nuli weng ma dik-daalum o, kalup. Kemin ale, sawaalak kawu, Moses ata God ami lo ayo numi kuyinsa kaami anung uyo boko-lomdu: Tunum ali tunum man ma foko tiilin dinim ke ilomda saak-alom kalel kutiila namti, niing alta asuk fik ami kaluun uta kuluulala akam imi tunum man kuulokomip kaali ali bokola-lomda: Kabi nami abaap ami man kayi! aka-lomda kamasi fik taanse ami bung mafek mafek uyo mep man kuula ami kukaalak o, kala kanum bokosu te!
LUK 20:29 Weng san ilawa, sawaalak kawu tunum ma ayo, man tunum man ilmi-kup fetkal foko kutiilale, ti nikil alik maakup fasuu tiiliwa, kulaa fik diilim asiik unang ma kuluu bom-ilom man so ma kuulama disa; ilomda taanale,
LUK 20:30 kulaa, almi tamon ata fik kalel kaluun uyo kuluula bom ilip. Katale, akal ti kuno man dinim-ilomda ayo saaknale,
LUK 20:31 niing iip ma akal ti kanolale, kano nakal yakal fakal imi kaluun uyo kuluu kuluu ke-bi-lomdip, iyo man ma kuulamip disa ke-lomdip taan-taan-keliple,
LUK 20:32 atin mafiing mafiing kulaata unang ukol ti kuno taan kesu no.
LUK 20:33 Na! kapni aket fukunbap kaa bokoyan o! Tunum nikil fetkal alik kiili, unang maakup kuuta-kup kuluu biile, taan-taan-kesip. Kemin, bom-bi-lom tunum taansip imi tam tiin kawang ke-lokomip kaali, unang kuuta kawanmi kalel ke-lokomu ni? kala, Sadusi iyo Yesus ami dik-daaliple,
LUK 20:34 kulaali Yesus asiik bokoya-lomda: Kamala tawaal diim kula bom-bilip kaata, tunum ata unang dan kaa-bala, unang yakal tunum dan kaa-bala ke-bam akmal ken-umbip. Yale,
LUK 20:35 am mafiing am daanokomu kabaku, God ali unang tunum malo ma kiita-kup bokoya-lomda: Saaksip ibi yaap-kup asuk tam tiindiwa, tam nami abip kawu suunkup ilokomip kayi! kalokoma. Kemin, kiimi tam tiindipla, tam ilokomip kaali, tunum kiili asuk unang dan kaa-mokomip disa le, aa unang kiikal asuk tunum kii dan kaa-mokomip disa.
LUK 20:36 Kemin, kiili asuk maso taanokomip disa; ti fan God almi man alik-daap ke-lomdip abiil kayaak ensel ililtap ke suunkup ilokomip te!
LUK 20:37 Kemin ale, ipni (weng boko-lomdip: Unang tunum taansip iyo, taan-ilomdip maaklo kesip kemin, God ali asuk yim-fola tam tiinokomip disa yo, ken-umbip) kaami sang kaata bokoyon o, kalalila, nami weng kaata-kup disa; Moses ami weng kaaso, kukuyula utamupla, Unang tunum taansip iyo asuk tam tiinokomip o, kalokomup. Kemin, as katip sakap ma Moses ami mepso kawu tolsa. La, ayo wing kiin-taba-lom kiin-abamnin disa kesa ami sang kaata, baka-bam ale, bokola: Nali Abraham so, almi man Aisak so, almi man loop Jekop alimal imi God namti kalabi no, kalsa. Sawaayak mep tunum alimal kaa taansip imi sang kanum bokosa.
LUK 20:38 Kemin, unang tunum iyo taan-ilom maaklo kelip namti, God ayo imi tiin molama disa. La, unang tunum iyo taan-ilom maaklo kemin dinim. Kemin ti, tunum taandip din God ami diim kawu suunkup laabip isole, tunum tiin kawang bom-bilip iso, ita tiin mosa. Kemin, ultap God ami weng Moses ami bokonsa kaami miit uyo dok kabak-ata naa kalolip: Abraham alimal ili sawaayak kawu taansip. Lale, God ami tiin diim kaali ti bom-bilip kemin, alimal iyo tiin mo-bomdala, ayo boko-lomda: Nali alimal imi God namti kalabi no, kalsa no, kala, Yesus ayo Sadusi imi kanum bakayila ko.
LUK 20:39 Kanum bokoyilala, lo utamsip tunum iyo Yesus ami weng Sadusi kanum bokoyila kaata, weng san-ilomdip, malo ma bokola-lomdip: Kukuyin tunum kapyo, kabi Sadusi imi weng kuu tambal-kup bokoyilap o, kalalipla kemin,
LUK 20:40 kanola ili utamiwa yi, Yesus kaali ti talalu dik-daa kuluusa tunum o, kalalipla, ami atam suun-daa maso ma dik-daalin dinim kelip ko.
LUK 20:41 Yesus ayo kamok kamok imi dik-daaya-lomda: Lo utamsip tunum iyo boko-lomdip: God ami Man uldaa-dabuusa tunum Kraist o kebip kaali, Devit ami man loop o, ken-umbip. Kemin, kanimin o kalalipla, kaa kanum bakan-umbip i?
LUK 20:42 God ami Sukon Tem weng anung ma Buk Saam kabaku Devit akal boko-lomda: God Dukum ali nami Kamokim ami bokola-lomda: Kapyo, tal aba yang nalmi ting tuuplo kamokim ami tiin-yaamin baan kaldaaku tiin-balapla, bii-lom nata nata kelila kawu,
LUK 20:43 kapni waasi itale, kabaak banipla, kapta tiin molokomap o, kala God ata kanum bokoyinsa kayi! kala, Devit ayo bokosa no.
LUK 20:44 Kiwe, God ami uldaa-dabuula Kamokim kesa kaa kawanmi man i? Devit ami aket kaa fanang daalaya, Am ma daanokomu kaali, ilom kaptoowu nalmi man loop ata ma tiltam tabokoma kala kalalala kaami aket kaata fanang daalaya, kanum bokosa dinam kabak boko-lomda: Kaa nami Kamokim o, kaloma disa yo. Devit ali kalok nolin aket kaata, fanang-daa ke boko-lomda: Kaa nami Kamokim o, kalsa ni? kala Yesus ayo Falosi imi dik-daaya ko.
LUK 20:45 Tunum unang alik iyo kawu bomdip Yesus ami weng kaata weng san-kaa-bam iliwa kulaa, fal-siki taba aso almi daang bakaalin tunum imi bokoyila ko:
LUK 20:46 Kiwo, kibi mep lo utamsip tunum kii talalu itafii-bamdiwa kayi! Imi aket fukunbip kaalile, ti ilim batbat kaata-kup miki-bi-lomdupla abip kawu tal-une-bulupla, unang tunum iyo numi itafiimik o! kala-lomdipla tal-une-bam ale, iyo din maket saanin baan diim kawu unokomip kaa, unang tunum iyo tal bakayin-bamdip: Kamokim kaa balap o? Kukuyin tunum kaa balap o? yakan-kaamin o, kalaliwa, unang tunum imi tiin diim kawu tal-une-bam ale, iyo din lotu am aye, ima inin am aye kawu, din unokomip kaa, ti abiin tambal-kup kuluu tiinupla, tunum unang iyo itafii-bamdip numi win ayo kufuyik o, kal-bomdiwa, tinaa-bom ken-umbip.
LUK 20:47 Lale, lo utamsip tunum iyo unang kaluun kiili kasen-fakayim-bamdipla, imi sin-yaamin am kiiyo kuluuyipla, ili am dinim, mafek mafek dinim, ke-bam ken-umbip. Kemin, mep kanolin kukup mafak kaa kanubip. Kemin, ili unang tunum imi tiin diim kawu God ami beten kamaalup kawo kala, bakan kaptoop kaptoop ke-bulupla, unang tunum iyo itam-lomdipla, numi tong kaata-kup bakayik o, kal-bomdipla, beten batbat-kup ken-umbip o. Kanola ibi imi talalu itafii-bamdiwa kayi! Kukup mafak sakbaalim dukum ken-umbip kemin, God ali angtiil yol sakbaalim dukum kaata, kuyokoma te! kala, Yesus ayo lo utamsip tunum imi sang kaata, daang bakaalin tunum imi kanum bakayila ko.
LUK 21:1 Yesus ayo lotu am diilim kaptamu bomda unang tunum tuumon kulii-tal God ami kukaalum o, kala kulii-tilip kiiyo, ita-bom ilale, mafek mafek soyal iyo maakup e kala, kulii-tal ket abuu una-una-kemiple,
LUK 21:2 ayo tiyak daala yi, Unang kaluun atin mafek mafek dinim ma ukol tal tuumon kiin-abin katip katip alep ma iyo kulii-tal ket abuulu kala, utam ale,
LUK 21:3 aso daang bakaalin tunum imi bokoya-lomda: Ibi unang kaluun kuuli utamip elile disa ye? Unang tunum kusnum kiili, mafek mafek soyal kemin, ili tuumon yaapkan lale, anung katip kiita-kup kulii-tal God ami kukaanbip ale, unang kaluun kuluutale, mafek mafek dinim umi tuumon katip ma ima saan-bam inokin kuliita, alik dilii-tal God ami alik kulu kolu. Kemin, atin ti weng tifan ma bokoyokomi kemin, ibi weng san bom iliwa! God ami tiin diim kaali, unang kaluun bung dinim umi kukup kaata, uta uta kelule, tunum unang kusnum imi kukup kaata, kulaak banu no, kala, Yesus ayo kanum bokoyila ko.
LUK 21:5 Kemin, Yesus ami daang bakaalin tunum malo ma God ami lotu am diilim desip kaami sang kaata bokolip: Iyo tuum tambal tambal sole, kiit kon o, kala, am kaptamu kutiilip tambal kemin kiita, kuluu God ami am uyo talalu desip. Kemin, atin tiin so malii-malii diinsu kayi! kemiple,
LUK 21:6 Yesus ayo bokoya-lomda: Am ma daanokomu kawu, waasi iyo tal mafek mafek tambal tambal kii itafiibip kuliiyo, alik ku-mafak fuulipla, disa kelule, am uyo alik ti olso balata-lomdip, tuum kuyak tip-tip-bam miltiin-unsip kiiyo dekela fokolip daak aba-lomdipla, almi kulu bala-bala-ke-lokomip o, kala Yesus ayo kanum bokoyila ko.
LUK 21:7 Yesus almi daang bakaalin tunum iyo dik-daala-lomdip: Kukuyin tunum kapyo, dok kanumin diim kawu waasi kii tal-ilomdip kabak kanum tal-une-mokomip i? Dok kanolin kukup kabak asiik tiltam tabu utam talaaluwa yi, Awu, kukup mafak namti kulu tiltam tabon o, kalu kalokomup yoko? akiwale,
LUK 21:8 Yesus ayo maan tiiya bokoya-lomda: Kabak talalu utafii-bamdiwa yi! Kasen-fakayin tunum kiimi weng kaa, weng san-kaamin daa. Tunum yaapkan iyo tal baka-bamdip: Yi, nuli God ami man ami win diim tulup o, yakan-kaa-bam ale, iyo tal boko-na-boko-na-ke-bamdip: Nali God ata uldaa-nam-buulala kamokim kesi tunum o, kala ke-biliple, tunum iip maakup maakup ita boko-lomdip: Am mafiing diim uyo tiltam tabu kemin, God ami ulduula kamokim kesa tunum ayo talon o kalba no kal-bom ke-mokomip. Katale, ibi imi weng kaali, Fan o, kala weng san-kaamin disa kayi!
LUK 21:9 Kulaa, ipkal weng seliwa! Tunum miit ma iyo baa kulin daalip miit kusnum ma iso waasi din-biliple, abip kayaak ilmi yakal kano waasi kela una-tala-kem tiltam tabamnu namti, kaami atul kaali, ibi suunin disa; kamasi kaali, yak kanolin kukup yaapkan kiisiik tiltam tabokomip. Yale, kabak asiik kanum tal-unule, am mafiing diim kaali, abiltap-siik tiltam talokomu disa yo.
LUK 21:10 Am bokon ma kaptam kasel iyo bokon kusnum ma kasel iso din-biliwale, kuno king kusnum ma ami tunum tiin moba ita taba-lomdip yak king kusnum ma ami tunum tiin mosa iso, dinan-tal-une-mokomip.
LUK 21:11 Kanu-biliple, am bokon yaapkan kala bombe kaali, bim aalap dukum ma kutaltam daa-lomda, tawaal kalawaali, kukula saan-bala fili-fili-ke-balale, ol fut am sole, angtiil mafak umkaamin am so, iyo daan tiltam tabe-biliple, mafek mafek ukol alik ma utamsip disa uyo, abiil tikiin kaptamu dikela tildaak tulula, unang tunum ili kanolin kukup tiltam tabokomu kaali, atin ti suunin dukum kaali, tiltam tabeyokomu kayi!
LUK 21:12 Yale, kabak-ali tiltam tabin disa bom ilula, kayak kayak ita taba-lomdip, ibi Yesus ami win diim kawu laabup o, ken-umbip kaami kalan kaata, ipni yim-tal-fuku kukup mafak kaayo, kukaayin-bamdip yim-baalip yak Juda kamok kamok imi sikil diim abamnipla, ita yam lotu am kaptam tii-lomdip, yim-bak saanbile, yim-baalip tam kalabus am unokomip. Ale, ma kaali yim-tama din tunum kusnum imi kamok kamok aye king so, kiyap so, imi diim kawu daaliwa, ita yim-buu weng yim-bak-saanokomip kabaku utamiwa yi, God almi weng kaami kalan namti kabuu no, kaliwa imi diim kawu nami sang namti bakayokomip o.
LUK 21:13 Kabak-ami kanum tiltam tabokomu kabak-ali ipkal utamipla, Awu, liip namti kaa tiltam tabu no, kala-lomdip unang tunum iyo nami sang so, weng so, kiita bakayokomip.
LUK 21:14 Ibi yim-tamalip din weng talalmin tunum imi diim kawu daalum o kalbip kaa, aket yaapkan kii fukun-bamdip: Kwin, kaso kawi! Dok kanolin weng kaata ma nokol maan tiiyokomup i? kemin disa; bilili-kup kala bomdiwa kayi!
LUK 21:15 Kanolin am daanokomu kaali, nalta aket fukunin tambal ayo kuya-lom ale, weng tambal baka-mokomip kaali, nalta kukuyilila, kipni weng kuuta uta uta ke-lom waasi imi weng kuluuli, dibiiwip tiil banokomu.
LUK 21:16 Iltipni kawak-aalap so, nakal-fakal so, kawal so, kaptum kasal so, kiita, God ami lak kaa, duulin disa kemin, ibi yam-fatap-daa yim-baalip din kamok kamok imi sikil diim abamnipla, kamok kamok ilmi soldiya imi bokoyilip, malo ma ibi anulip taanokomip.
LUK 21:17 Kemin, ibi nami lak kaata-kup, duu-bom nami okok kebip o, kala-lomdipla, unang tunum yaapkan ita taba-lom ibi aket atul kukaayin-bam, itafii-mokomip. Yale,
LUK 21:18 nami lak uyo dukum-kup duu-bom bii taanipla kawu, God akal ibi tambal-kup tiin mo-laaba kemin, taandip maaklo ke-lokomip disa te! Ali yim-tama tam alami abip tambal kawu daalala, suunkup ilokomip o, kala Yesus ayo kanolin weng kaayo, kanum bakayila ko.
LUK 21:20 Yesus ayo weng ma imi bokoya-lomda: Ilom am ma daanokomu kaali, ipkal utamiwa yi, Waasi dinin tunum iyo tal abip dukum Jerusalam kaptam ayo falalnip kala, kalokomip kulu utamiwa yi, Abip namti ku-mafak-daalip abiltap disa ke-lokomu no, kalolip ko.
LUK 21:21 Kulu waasi tunum iyo kuno keya wakadaa unin o. Kemin, ibi Provins Judiya kawu bom-bilip namti, iltipni abip uyo kulaa kela ukadaa umbitam amdu tikiin kabale, sawaan-yaamin; ibi mep abip dukum Jerusalam kaptamu bom-bilip namti, baan abiltap uka-daalip din sawaanin; aa, iltipni langabip kawu bom-bilip namti, asuk abip unemin daa; abiltap kela yang sawaanamip kayi!
LUK 21:22 Sawaalak kaali, God ami weng Sukon Tem kabaku dola-lomdip: God ami Jerusalam kasel imi uluum iyo maan tiiya angtiil yol kukaayokoma kaami sang kaali bokosip. Kemin, waasi imi talokomip kabaku mep weng kala bokosip kaali, fan tiltam duuk-kup dakat kalokomu no.
LUK 21:23 Kabak-ami tiltam talokomu kawu, God ayo kuno tong-foko kamboyilaya, Judiya kayaak imi angtiil yol kaali, kuya-lomda kukup mafak uyo mep kanolin kiimi kuyokoma te! Kanola unang man kumun sole, manuuk so, imi ukadaa unokomip uyo fiit-bamdip tal-une-bam ale, angtiil yol dukum uyo kaa-bam ke-mokomip kemin, kwin! kiiso kawe! yakan-kaabi no.
LUK 21:24 Waasi tunum ita taba-lomdip Judiya kasel malo ma ili wan kong tup ye-bilip iyo taan-yaa-bilip; kuno malo ma kiitale, yim-tal-fuku sok de-yimu-lom yim-bii yak aba bilin bokon kusnum kawu kutii-bam ale, yak waasi yakal ilmi bokon ayo kulaa kela, tal abip Jerusalam kaptam ayo tiin mo-bomdip ti ku-mafak-dakamin-kup ke-bilip bombii, God ayo Jerusalam kaa kelalip ilmi bokon unokomip kaami diim kaali, tiltam tulula, unokomip kayi! kala Yesus ayo kanum bakayila ko.
LUK 21:25 Yesus ayo asuk weng akal alik ma bokoya-lomda: Am mafiing diim tiltam tabokomu kaa, atan, kayoop, wakalkan so, kiili, yakal ilmi kusnum ma ke-lokomip. Kemin, tawaal diim kalawaali yol ok daang kun fonfon tal-bom dukum-alomdu an-kulaala tildak ok balang abe-bamdu, weng dukum uun-una-tala-ken-umbu no. Unang tunum miit ma miit ma alik iyo kabak-ami kanum tulu kaa, uta-mokomip o! Atin suunin awak dukum kaali, kuluu-lom aket uluum dukum tabeyokomu no.
LUK 21:26 Abiil tikiin kaptam-ami wakalkan kiili, ilmi liip ayo kela-lomdip almi liip kusnum kusnum kawu tal-une-bala tal-une-bala ke-mokomip. Kanu-biliwa, unang tunum iyo itamiwa, Kaa kanum tabip uu! kala-lomdipla, abiin kaa talalu ma tiinokomip disa; ti suunin dukum kaata-kup ti kanu-bam ale, bokolip ko: Kwin! Tawaal diim kalawaata dok kanolin kukup mafak kalawuuli tal numi diim abon o, kalbu ni? ke-mokomip.
LUK 21:27 Kemin, kanolin kii kanumsi tal banipla, kulaata Dukum Ami Man Nayo ibin tem kabaku tilila, nami titil uyo kuluu-lomdila, atan alaltap ke tiin buluusi-kup sikin-bulula, kawu alik iyo nita-mokomip.
LUK 21:28 Kemin, ibi utamipla, Yak kanolin kukup uyo tiltam tabu kala, kalaliwa, kulu utamiwa yi, Nali abiltap tal kipni iliim bokoyokomi kala, kalalipla, kipni aket uluum tabebip uyo, kulu ditang-kala, kipni aket uyo titil-fak-daa tola-lomdip, nami liip uyo titam-daa fenipla talon o, kala, Yesus ayo fiyaap duumin weng uyo kanum kukaayin-bam bakayila ko.
LUK 21:29 Yesus ayo sang ma faldak-tii bokoya-lomda: Ibi as fik kuuli atamiwa, Kaami abuu-laamin kukup ayo dok kanu-bamdu abuubu ni, ken-umbip. Kemin, kanola ipkal mep as fik uyo utamipla, malap bam-daala namti, abuulon o, kalalu malap bam-daaba no, kalokomip. Aa, ipkal kanolin kabak-ami aket kaa fukun-bamdiwa kayi!
LUK 21:31 Kanolin tap kemin, utamiwa yi, Nimi kukup kanum talokomu kaami sang bakan-tabasi kaali, kulu tiltam tulu kala, kalokomip kaali, ibi utamiwa yi, God ami nam-baala tal unang tunum imi tiin molokomi kaami am uyo mepso tulu kala, kalokomip.
LUK 21:32 Nami weng kala bokoyokomi kaali, ibi weng san iliwa. Tunum unang malo ma tiin kawang bom-bilip kiili, taanin disa kuno bom ilipla, nami weng bokoya-lomdi: Ilom kaali, mafek mafek mafak alik iyo tiltam abokomu no, kalbi kaali, tiltam talokomu.
LUK 21:33 Am ma daanokomu kuyaku, abiil so, tawaal so, kiili maaklo ke disa ke-lokomip. Yale, nami weng kuuta ti disa ke-lokomu dinim; kano ti suunkup ilokomu no, kala Yesus ayo faldak-tiimin sang ayo kanum bakayila ko.
LUK 21:34 Kulaa, bokoya-lomda: Nalmi kayaak kibi talalu utafii-bamdiwa yi! Unang tunum yaapkan iyo ima waan yam tabamnu no, kalalip suunkup inin-kup ke-bam ale, ok mafak ayo im-bom tikiiyila babon tal-une-bam saak yak tawaal diim kalawaami mafek mafek kiimi aket uluum kaata, tabe-bam ke-mokomu. Kemin, kibi mep kanolin mafek mafek kabak-ami aket kaata ti yan-laamin daa yo! God ami am mafiing am kaali, ali abil diila faksalin tap kebu kemin, unang tunum alik tawaal diim kala bom-bilip iyo babon-iliple, abiltap ninolin tap dik-yak daalale, kwin! kaluuso kawe! kalolip kemin talalu kabak utafii-bamdiwa kayi!
LUK 21:36 Kibi ti suunkup nami talokomi uyo utafii-bam fen-bamdipla, God ami beten kamaan-bam dik-dakaan-biliwa, God akal titil kaayo, kukaayin-balaya, yak kukup mafak tal kipni angtiil diim abokomu kaa, kipni aket fukunin kaa ku-mafak-daayokomu disa te! Ti suunkup titil-foko bom-biliwa, bii am mafiing diim kaa suunin disa; Dukum Ami Man, Nalmi talokomi diim kulu tol-nokomip o, kalala, Yesus ayo kanum bakayila ko.
LUK 21:37 Yesus ami Jerusalam kaptamu bomdala, taap kaata lotu am diilim kawu tola-bomda, God ami weng kaata, unang tunum imi kukuyin-bam ale, kutamiip kaatale, tam Oliv Tikiin kawu beten ke-bam sin-sin ke-balale,
LUK 21:38 unang tunum yaapkan iyo din atamup, lotu am diilim kawu, Yesus ami weng uyo bakayin-balala, weng san-kaamum o, kalalipla kutim malang tem iyo suunkup talemip ko.
LUK 22:1 Bret fuulip fasuulin disa kela inin kaami win kaali, boko-lomdip Pasova yo, ken-umbip kaami am uyo mep talan-sulule,
LUK 22:2 tunum awem imi kamok kamok so, lo utamsip so, iyo taken-bamdipla, Kalok kanola-lomduwa, Yesus kaa aalum i? kemip. Yale, unang tunum yaapkan kiita, Jerusalam kaptamu tala-tala-ke-lom, ang dinan tala-bilipla kemin, numi balaayin-bamdip yemilip o! kalalip, iyo suun-daa-lomdip maaklo kuwakamin liip kaata fen-bam ilip ko.
LUK 22:3 Abip Keriot kayaak Judas ali Yesus ami daang bakaalin tunum talangkal iso nikil maakup okok kemin tunum la, Setaan ayo tal yak Judas ami aket tem un-ilomda ku-mafak-daalala utamala,
LUK 22:4 kamok kamok iyo kanolum o, kebip kala, kalba-kup, kulaa din itama, awem tunum kamok kamok iso, lotu am diilim kaptam-ami soldiya imi kamok kamok so, kiimi kalaan din bokoya ko: Nali Yesus kulaa dabaayi yak kipni sikil diim abam-nokoma kaptoop-ami liip kaata fenbi no, yakale,
LUK 22:5 kwin! iyo weng sandiwa, imi aket tem kaayo, atin tangbal ma keyilula, iyo bokola-lomdip: Sisol kabak-ami weng kaata, boko-lomdupla dotu kutiip-tup salala kup-tum o, akiwale, fan
LUK 22:6 Judas ayo imi weng bokolip ayo, weng san-ilomda, Ayo, yaka-lomda, bokola: Yi, siin atamila, unang tunum yaapkan iyo tiin kuwaalip kala, kala-lomdila kawu, Yesus ayo maaklo dabaayilila, yak kamok kamok kipni sikil diim abak o! yakalala, din liip fen-tal-unema ko.
LUK 22:7 Kulaa, bret fuu-bilip faskaamin disa ke-bala, inin kaami iintang am uyo daan tiltam tulule, Juda kasel imi kukup uyo ti kanumin kemin, Pasova am daan-laaba kaali, sipsip man iyo aa-bam fuu-bam inin kemin,
LUK 22:8 asuk kaami am uyo daanule, Yesus ayo Pita so, Jon so, alep imi bokoya-lomda: Alep kipta dindip Pasova inokomup kaami mafek mafek iyo talalu kutii kemipla, nuyo din unupla alimal tiin-bom inum o, yakale,
LUK 22:9 ili bokola-lomdip: Din ilom am kaa doku-bomdup inin kaa talal-bam dotmupla, din unokomip i? akiwa
LUK 22:10 ayo bokoya-lomda: Nayo kabak-ami weng ma bokoyokomi kemin, weng san bom iliwa! Alep ibi din Jerusalam aba kem-siliple, okok kemin tunum ma tal ita-mokoma kemin, ami atamipla, ali unang imi ok lan-umbip tap ke ok ket dukum ma tawaal ta talalusip kaptoowu ok iluu kutam dabom diim tii kulii-talaba ami daang tem kawu, yak ami daang bakaalip, din am unokoma kaali, ti kipso aso tam am abale,
LUK 22:11 am kayaak ali kutamu bombe kemin bokola-lomdip: Yi, numi kukuyin tunum ayo weng ma kup-ta nuli kulii-tulup kemin, ali bokop-ta-lomda: Kapni am kultamu am anung ma kiin ukuyilawa, nami daang bakaalin tunum iso naso kaptamu bomdup nokol Pasova uyo inamnum o, kalaya tulup o, kala kanum bokola tulup te! kala bokolipla,
LUK 22:12 kulaa, am kayaak ayo kipni weng uyo weng sanba-kup, yim-bitam am tip kaptoowu am anung dukum ma kabang-ata kukuyila utam talaalipla, ima fuumin kaami mafek mafek alik ti kaptamu bom-bilip kala, kalalipla, kaptamu inin-inin iyo talal-bam iliwa yo, yaka-lomda
LUK 22:13 alep yim-baala din uliwa, Yesus ami weng bokoya tulup ayo, tifan tituun-kup kelu kala, kalale, Pasova kaami inin-inin iyo kaptamu talal-bam fuumip ko.
LUK 22:14 Bom bii atan uyo yak tem unula, Yesus ayo almi daang bakaalin tunum iso, iyo tal Jerusalam am ukduu kuyinbip kaptamu tiin-bomdipla, ima im-bom ale,
LUK 22:15 kulu almi daang bakaalin tunum iyo bokoya-lomda: Nami aket dukum fukunbi kaali, angtiil yol ayo kuluu-lomdi saaknin disa, ilomdila kawu, kipso Pasova ima kaa ina-lomdila yo! kalbi no.
LUK 22:16 Nami weng kala bokoyokomi kaa, ibi weng san iliwa. Kamala kulaata nali mafiing mafiing kipso tiin-bom Pasova ayo inbi kaa, tawaal diim kalawaali maso ma inam-nomi disa; kuno kela bom-bili bii, am ma daanula kawu, Atok God ata alik tiin molokoma kaali, Pasova kaami miit ayo ku-fatap-daalokoma kabaku, asuk Pasova uyo maso ma inam-nokomi no, kala-lom kanum bokoyinsa ko.
LUK 22:17 Yesus ayo wain ok ayo kaap tem iluu kutii kela God, Ami yaap ke yo anba-kup, kulaa almi daang bakaalin tunum imi kuya bokoya-lomda: Wain ok kalawaali, kuluu-lom ma asiik inamna inamna kelin o, yaka kanoya inam-niple,
LUK 22:18 bokoya: Weng selin! Nali kamala kaali, wain ok kalawaali maso ma inam-nokomi disa; kuno kela bom biili dok kanumin diim kabaku God ami unang tunum alik iyo tiin molokoma kawu, asuk tiltam tulu kala, kalaliya kawu, inam-nokomi kayi! yakale,
LUK 22:19 kulaa, bret uyo kuluuba-kup, God ami yaap ke yo, anba-kup, lo kutii almi daang bakaalin tunum imi kuya-lom, bokoya-lomda: Bret kalawaali nalmi tiil ultap [kemin, kipni iliim kabak-ata boyon o, kalalila, nalmi tiil kala kuyokomi kaa mep ima bret kuyokomi kaluuli kuluu inamnin aa! Ilom am ma daanula kawu, asuk inokomip kaali, asuk nalmi tiil kuumi aket kaata, fanang daka-bamdiwa inin o, kala-somla ko.
LUK 22:20 Kanola Pasova ima ayo inamnip disa kelule, Yesus ayo wain wok ma iluu kuyinba-kup bokoya-lomda: Wain ok kalawaali nalmi kiim alaltap kemin, nami nelip taanila, nami kiim sing-tam-daa tildaak abam-nokomu kaali, ipkal utamiwa yi, Ipni iliim uta boyon o, kalalila, nalmi kiim ayo kamboli sing-tam-daalu kala kalaliwa, yak God ami weng alokso kaa kutiisa uyo, fan tiltam duuk-kup dakat kalu nu, kalokomip kayi! yaka ko.]
LUK 22:21 Kanumin sang uyo kanum bokoyinba-kup, weng akal alik ma ayo bokola: Nak-tunum kusal, kibi weng selin. Tunum ma nam-fatap-daa nam-baala yak nami waasi kep-ninsip imi sikil diim abam-nokomi ali naso tiin-bom ima imbup. Kemin,
LUK 22:22 siin sawaayak kawu, God ami aket fukunin ayo, Nami Man kaali, dabaali daak unokoma ayo, kanola taanokoma kayi! kalsa. Yale, dok nolin tunum ma ata Dukum Ami Man nam-fatap-daalokoma kaata ti, almi uluum tem diinokoma kayi! kala, Yesus ayo kanum bokoyilala,
LUK 22:23 almi daang bakaalin tunum iyo weng sandiwa, nikil iyo aket uluum tabeyule, dik-daala una-tala ke-bam ale, bokolip: Nikil numi iipyak tem kultam bombe kaa, dok kanolin tunum kaata dap-fatap daalokoma ni? Ken-una-tala-kemip ko.
LUK 22:24 Yesus ami daang bakaalin tunum iyo weng aal dikin-una-tala-ke-bam boko-lomdip: Nulmi tunum kaa, kanata ma tiltam numi dabom ke-lokoma ni? kemipla
LUK 22:25 Yesus ayo bokoya-lomda: Tawaal diim kalawaami God ami lak duu-laamin disa tunum kiimi kamok kamok ili tunum unang titil-kup tabin kukup kaata, fuku-bomdiwa tiin saan-tabasip. Kemin, imi aket fukunin kaali, unang tunum kiita, numi tong kaata-kup bakayin o, kal-bomdiwa, disa iip bakayin-bamdip: Nuli unang tunum kipni dong dakaayin tunum o, kem-laabip. Lale,
LUK 22:26 ibi imi kukup kanun-umbip kaa kipkal utabip-kup kanumin disa; kemin, dok kanolin kapta talaba tam kaptum kusal imi dabom kelap namti, kabi ti, Nalta-kup o, kalalawa, kaptum kusal kii titil eng kaa bakayin disa; ti ilmi niing alaltap kelawa, kaptum kusal imi ok tabuulin tunum tap tambal-kup tiin molokomap kaata, fan mokso ke-lokomu; le kabi talaba tam kaptum kusal imi kamokim kelap kaa disa kawu tiin-yaamin disa; kaptum kusal imi ok tabuulin tunum kelawa, dong dakaayin-balawa yo! yaka.
LUK 22:27 Kemin, tunum win tibin asole, almi okok kemin tunum iso, imi kukup kaali, kipkal utamsip, tiin-bomda naan-balala, ima kutal dakan-bala inba kaata, tunum win tibin elile, yak ima ifa kulii-tala ata tunum win tibin e? Kulaaye? tiin-bomda ima inba kaata, tunum win tibin. Yale, nali kipso laabi kaali, nali ma kanun-umbi dinim; kemin, okok kemin tunum tap ke-lomdila, nali kipni dong dakaayila-yaabi.
LUK 22:28 Kukup mafak tiltam nami diim aben-umbu kaa, ibi nili kep-nansip disa; ibi ti suunkup nami diim kaldaku fewa-laabip te!
LUK 22:29 Kulaa, Atok ami kanop-ninsa ultap ke-somdila, nakal ti ibi kanoyokomi. God alta uldaa-nam-buu-lomda, almi titil ayo kup-ninsa. Kemin, ami win diim kawu unang tunum iyo tiin molokomi. Kemin ultap o. Am ma daanala kawu, ipyo yim-buu-lomdi yim-bii din nami abip kawu, ipso naso maakup tiin-bom ima inbi-lomdup, titil kuyila, nami win diim kawu, Israel imi tunum miit talangkal iyo ipkal taba-lom miit maakup e kala, tiin mola tiin mola ke-lomdip yim-bak-saanokomip o, kala Yesus almi daang bakaalin tunum imi kanum bakayila ko.
LUK 22:31 Yesus ayo Pita ami bokola-lomda: Nak-tunum Saimon aa, kabi weng san ilawa! Setaan ali alik ibi yam-kuku-bamdala, Awu, kibi God ami man e nalmi man e yokon o kalala, God ami dik-daalaya, God ali, Ayo, kala kemin, tunum ma wiit lap kiiyo foko tam-aba-tildaak-aba ke-bilipla, bulung iyo, takela yak ban-ilomdip, tiil kaata-kup daak kabas diim abebip ilaltap ke, Setaan akal yim-baala tam aba daak aba ke-bam yam-kukulala, ibi kulii daak abokomip kayi!
LUK 22:32 Lale, nalile God ami beten kamaan-bam ale bokola-lom: Atok kapyo, Setaan ata Saimon ami dap-kululala kanolokoma kemin, kabi dong dokolapla, ami kukup mafak uyo taba-lomdu ami lak dakaamin kaa ku-mafak-daalamu disa yo, kal-bomdi beten kebi. Kemin, ilomdapla kawu, kabi asuk aket fal-siki-lomdap, aket kup-nokomap kabaku, kapni aket fukunin uyo bam-daap-tokomu kawu, kaptum kusal iyo dong dakaayin-balapya, imi aket fukunin uyo baayilula, titil-fokolik o, kala Yesus ayo Pita ami kanum bakaala ko.
LUK 22:33 Pita asiik bokola-lomda: Kamokim aa! Nali ti kapso maakup kuno yim-tama din kalabus am daalalip. Katale, kapni diim kawu ti fep-nami le, kuno kapso alep maakup yelalip. Katale, kuno nakal ti yak kapni diim kawu fep-nami no! kemale,
LUK 22:34 Yesus ayo Pita ami bokola-lomda: Pita kawe, kabi talalu weng san ilawa! Nali bokop-ton: Kutim malang tem kawu, awon kakaruk ayo naan-tabin disa ilala, kabi, Ni kaa ma atamsi disa yo, nakan-kaabi du asuumano fak-daalokomap te! aka ko.
LUK 22:35 Kulaa, Yesus alami daang bakaalin tunum imi dik-daaya-lomda, Siin kaali, bokoya-lomdi: Ibi moni so, ima men so, yaan-alom kiiso, kulii bomdip, nami ok kaa okok kem-tal-unemin disa yo kala, dil mo-lom, yim-baali tal-unemsip kaa, mafek mafek so ma iiwa-silip ema? kala, dik-daayilale, Yi, disa. Mafek mafek so ma iiwa-sulup disa yo, akiwale,
LUK 22:36 Yesus ayo bokoya-lomda: Kamala kula tiinbup kaali, ukol ulmi kusnum. Moni, ima men, kulaa bom-bilip namti, kuno kulii ale, bainat ayo disa yo, kalip namti, iltipni ilim saket kulaata dulduu kulin tiilipla, tunum kusnum ita tam mo-lom kabak-ami moni kaata kuluu-lomdip, bainat ayo mo kulii bomdiwa tal-unemalip kayi!
LUK 22:37 Kemin, kibi nami weng kulaa, weng san iliwa! God ami Sukon Tem kabak-ali boko-lomdu: Kiili kukup mafak kaali, fuut tabin imi kukaayila-yaabip ultap ke, tunum kaami konsip kayi! kalsu kulaa nalmi sang kulaata bokosu te! God ami Sukon Tem alik nami sang bokosu uyo ti mepso dik-tam-daa tiltam tolon e, kalbu kemin ale, kanolin kukup mafak uyo mepso kukaap-nokomip o, kala kanum bokoyale,
LUK 22:38 almi daang bakaalin tunum iyo weng san-ilom bokolip: Kamokim aa, ti kala daatama bainat alep kala bom bilip kalaayo, akiple, Yesus ayo utama yi, Daang bakaalin tunum iyo kukup mafak tildak nami angtiil diim tildak abokomu uyo talalu utamin disa ke-bom bakabip o, kala, kala-lom, bokoya-lomda: Ti, bokoli kemin ti te.
LUK 22:39 Yesus ayo amdu Oliv Tikiin kawu ti suunkup God ami naan-bam beten kamaalin-kup ken-umba kemin, kaami kutamiip kulu almi kukup kanun-umba kaata-kup kuluu-lomda, daang bakaalin tunum iyo foko kuliila Jerusalam ayo kambo kela, Oliv Tikiin kawu
LUK 22:40 alimal din abale bokoya-lomda: Kukup mafak uyo tal yam-kukulon o, kalalula abiltap tal kipni diim abam-nokomu kemin, ibi God kaa beten kamaan-bam, dik-dakaan-biliwa, ata dong dakaayin-balala, ban kemin kukup uyo tal ipni diim abemin kaa, uktayuk o, yimba-kup,
LUK 22:41 alami daang bakaalin tunum iyo kulu bom ilipla, keya mep yang kulu tilik duung fakela daak tiin God ayo beten kamaan-bam bokola:
LUK 22:42 Atok God kapyo, mep kukup mafak tiltam nami diim talon o, kalbu kuluuyo, kaltapni san kemin, dil molan o, kalap namti, dil molawa kawu, nayo angtiil yol kaa kuluulin disa kelon o. Nali mep kanolin kukup uyo tal nami angtiil diim kaa abemin disa yo, kalbi. Lale, nami fanang daka-bamdi Aatumen kabi kabak-ata dil moyawa, kep-nuk o, kebi kaali, kabi kuluu kanumin disa; kaltapni aket fukunbap kaata-kup kuluu kanumon o, kalolap kaali ti yaap o, kal-bomda beten
LUK 22:43 kem-salale, [kulaa, ensel ma tildaak-ilomda dong dokola-lom, dap-titil diilale,
LUK 22:44 Yesus ayo kwin! angtiil mamin dukum kaata disa akal ma ok fon tap kelule, aket uluum dukum uyo kuluu-lomda asuk God beten kamaan-bam, almi aket uluum kuluula, kaami sang kaata, bakaan-bam kem-salale, ami mamin ayo kiim tap ke-lom dung-dung-ke-balala,]
LUK 22:45 beten kemsi kelale, din ulala, Kwin! almi daang bakaalin tunum namti aket uluum-kup keya-lomdu, daal-kup tabeyu akan-fak-liibip kala kalale,
LUK 22:46 kulaa, yam-kafalna tam tiinip bokoya-lomda: Ipyaa! Ibi akan-unemin disa te! Mafek mafek mafak tal yam-kula molokomu kemin, baan tam tiin God kaa naan-bamdiwa yo, kala Yesus ayo kanum bakayila ko.
LUK 22:47 Yesus ayo kanumin sang bakayin-salale, kulu tunum yaapkan iyo tilip. Judas ali Yesus almi kalaan tunum kelala, nikil talangkal ke-bom tal-banen-umbip ata, kulaa Yesus ami bombe bokon kaayo, liip kukulala tal-ilomdip, kula Judas ayo tal Yesus ayo dap-kiil-mon o, kalala, bital mepso kulu talale,
LUK 22:48 Yesus ayo bokola-lomda: Nak-tunum Judas kapyo, kabi tal-ilomdap Dukum Ami Man Nayo, nam-kiila tal-bomdawa, nam-fatap-daa dabaali yak waasi imi sikil diim abamnak o, kalalawa, tal nam-kiil-mon o, kebap ema? kala, kanum bokola ko.
LUK 22:49 Yesus ami daang bakaalin tunum aso bom-bilip ili tunum kii, itamip yi, Yesus ayo dap-tal-fukulum o, kalbip kala, kala-lom Yesus ami bokola-lomdip: Kamokim kapyo, nokol nulmi bainat ta ma kuluu-lomdup yemalup yoko? akiwale,
LUK 22:50 awem tunum imi dabom ami ok tabuulin tunum ma bombe kemin, daang bakaalin tunum ma ata almi bainat ayo kuluu-lomda, mep tunum kaami talang-kaal tiing tup kaayo, tuk-duu kulaala daak abamnale,
LUK 22:51 Yesus ayo atam-ilomda, daang bakaalin tunum imi yim-bak-saan-bam ale, bokoya-lomda: Kaa kanumin disa yo, yaka-lomda, tunum kaami talang-kaal kaayo, kutal-fukula, asuk tambal ma ke-lom mokso kelu ko.
LUK 22:52 Kemin, awem tunum imi kamok kamok aye, lotu am diilim kaptam-ami soldiya imi kamok kamok, aa saak yak kamok kamok malo ma kii bom-bilip kiita, tal-ilomdip Yesus ayo dap-tal-fukulum o, kalalip tal tolniwale, Yesus ayo bokoya-lomda: Kipni aket fukunbip kaa nali, Banengim tunum atulim o, kalaliwa, nami atul kaata, ipyo suun-daa-lomdip wan so, bainat so, as sukum so, kiita, daka-bi-lom kulii-tal nam-tal-fukulum o, kalalip baa tal akip-nip o?
LUK 22:53 Am yaapkan daan-laabu kaa, nali lotu am diilim kaptam tiin-bomdi unang tunum ili kaa suunkup kukuyin-bilila, kaa nitam nitam ken-umbip. La, ibi tal kaptamu nam-tal-fuku sok dep-nin disa nosip. Kata, kamala kulu God ayo kutamiip kaami miit tiin saanin tunum Setaan ayo kambolala, almi aket fukunin ayo kipni kuya-lom, dong dokoyilala, Kanumum o! kalalipla, Awu, numi liip uyo bombuu nu, kala-lomdipla, baa tal nam-tal-fukulum o, kalalipla, tilip o kala, Yesus ayo kamok kamok imi kanum bokoyila ko.
LUK 22:54 Yesus ayo kanum bakayinsi kamboyilale, soldiya iyo yak dap-tal-fuku dap-tamalip dibii yak aba din abip tam-ilom awem tunum imi dabom ami am kaptam uniwale, Pita ayo samaan so kaptoowu tip-tal tip-tal yak aba tam
LUK 22:55 awem tunum imi dabom ami uti daam tem ula, Okok kemin tunum iyo abip daal iip kabaaku as kuyak daalip kiin-balala, tunum malo ma tal tiin-bomdip wing tiil ayo falala kuyak mobip kaa kalba-kup, akal yang itama iso tiin-bom diil fuumipla,
LUK 22:56 ok tabuulin unang ma ukol atam talaalu yi, Ayo tal as dawang falala kalba kabaaku tiinba kala, kala-lomdu tiyak daa talalu atam ale kulaa, tunum kulu tiinbip imi bokoya-lomdu: Kipyo, mep tunum kula tal tiinba kuluwaali, Yesus ami daang bakaalin tunum te! yukule,
LUK 22:57 Pita ayo yawaal daa-lom bokowa-lomda: Kupyo, nali tunum kaa ma atamsi disa yo! wakale,
LUK 22:58 bom ilanale, tunum ma ayo Pita ami atam ale bokola: Kabi ti mep tunum kaami daang bakaalin tunum te! akale, Pita asiik asuk bokola-lomda: Kapyo, nali ti atin disa te! aka-lomda
LUK 22:59 tiin bom ilale, tunum kusnum ma asiik tal bokola-lomda: Nali mep tunum kalawaami weng bakaba kaali, weng seliya, Provins Galili kayaak o, kali kemin, kaali Provins Galili kayaak Yesus ami daang bakaalin tunum o! kala, ti kanum bokola bokola kemale,
LUK 22:60 Pita asiik bokola-lomda: Kapyo, kapni weng bakabap kaali, nali weng san-ilomdila, kabak dok kanolin sang kaata ma bakabap o, kalbi disa te! kalale, kulu maak fak-daalin tap, awon kakaruk aalap ayo naan-taba ko.
LUK 22:61 Kamokim Yesus ayo kuyaku fal-siki tiyak-daa Pita ayo talalu atafiimale, ayo asuk aket fanang daala yi, Awu, Yesus ami kamasi bokop-na-lomda: Awon kakaruk aalap ayo naan-tabin dinim kama bom ilala, Pita kabi nami sang ayo bokop-na-lom: Ni kaa ma atamsi disa yo, naka-naka kemsi liip asuumano fak-daalokomap o, namba kaali, fan kaa kanoli kala aket fuku-daa-lom
LUK 22:62 utama yi, Kwin! Fan, Yesus ami win kaali, kuwaala-lomdi, Kaa ma atamsi disa yo, kali kaali, atin ti kukup mafak kaata kuluu-lomdila, kanum bokoli kawi! kalalala, keya tam daak uti am kaba-lomda dukum-kup iin-bam amama ko.
LUK 22:63 Soldiya Yesus ami tiin mobip iyo Yesus ami atafiimin weng bakaan-bam biwakamiple,
LUK 22:64 kanolin kukup kaata kanu-bamdip, Yesus ami tiin matum ayo ilim ta kuluu de-lomdip, aa-bamale, atafiimin weng uyo, boko-lom: Kabi kamboyap unang tunum ili bokop-ta-lomdip: Kabi God ami weng ku-fatap-daa bakayin tunum o, ken-umbip. Yale, kabi talalu utamsap namti kulu balap ema? Kapyo, tunum ma tal tela kaata bokoya-lomdap, kaali ata tal nelan i? yakawa, atamum o, akan-kaa-bamdip
LUK 22:65 saak weng mafak disa akal almi weng mafak mafak kiita bakaan-bam kemip ko.
LUK 22:66 Kulaa, am daanale kawu, Juda imi kamok kamok iso, awem tunum imi kamok kamok lo utamsip tunum iso, iyo weng bakamum o, kala, tala-tala-ke-lomdip tal ilmi weng bakamin am kaptamu tal tiin-ilomdip, soldiya iyo Yesus ayo dibii-din imi diim daaliple,
LUK 22:67 kamok kamok iyo Yesus ami bokola-lomdip: Kalo, kabi bakayan o! Kabi God ami ulduusa tunum Kraist ema? akipla, Yesus asiik bokoya-lomda: Nali bokoya-lomdi: Nali God ami ulduula-nam-buusa tunum Kraist o, kalokomi kaali, ibi kabak tifan bakaba no, kalokomip dinim.
LUK 22:68 Kanolin ultap kemin, nakal weng ma dik-daayokomi uyo, ibi maan tiip-nokomip disa. Yale,
LUK 22:69 nali weng kulawuuta-kup bokoyon o, kalalila, kamala kulawu kulii yak aba kaptoop unokomu kaali, Dukum Ami Man Nali, Kamokim ami tiin-laamin baan diim ayo kuluu-lomdila, titil-kup tabasa God ami sikil tingtup diim kabaku tiinokomi no, kala kanum bokoyale,
LUK 22:70 alik iyo bokola-lomdip: Yak kanum bokolap kaa: Nali God ami Man o, kala bokolap ema? akiwale, Yesus asiik maan tiiyila-lomda: Ipni kabak-ami bokop-nip kabak-ali ti fan te! yakale,
LUK 22:71 ilmi weng-kup boko-una-tala-ke-bam bokolip: Nuli almi weng bokola kuu, nulmi talang tem alep alep weng sanup yi, Ali fan ban kemin tunum o, akup kemin, nuli tunum ma fen-bam atamupla, ata Yesus ami sang kaali maso ma bokoyokoma dinim o, kala ilmi weng-kup bakamip ko.
LUK 23:1 Kamok kamok alik iyo Yesus ayo dap-tamalip yak aba bilin Rom kasel imi kiyap Pailat ami diim daale,
LUK 23:2 faldak-faltalak ke-bamdip, disa weng mafak mafak uyo baka-bam boko-lomdip: Tunum kalawaali, numi weng sanbup kaa Juda, numi unang tunum imi kasen-foko neyin-bamda boko-lom: Ibi moni takis ayo kuluu Rom kayaak imi King Sisa Juda kipni tiin molin kaa kukaalin disa; nata God ami uldaa-nam-buusa Kraist kemin, nali kipni king o, kalala atam-ilomdupla kaata, dibiilup kapni fanang tulup o, akiwa,
LUK 23:3 Pailat ayo weng san-ilomda, Yesus ami dik-daala-lom: Kabi Juda-miin imi kamokim king namti kulu-balap ema? akale, Yesus asiik bokola-lomda: Nali kaa ma bokolin disa; la, kabak kaltapta bokolap o, aka.
LUK 23:4 Kemin, Pailat ayo awem tunum imi kamok kamok aye, yak tunum kusnum yaapkan imi bokoya-lomda: Kipyo, nali tunum kala atamila, ali kukup mafak so ma nolaya, dibii-tilip dinim; (kemin, nali nalmi soldiya iyo ma bokoyilila, angtiil yol kaa ma kolokomip disa) te! yaka. Katale,
LUK 23:5 (kiimi aket fukunbip kaali, Pailat ami uko-tokolupla, kukup mafak ma Yesus ami kolak o, kala-lomdip) asuk dukum-kup naan-bam bokolip ko: Kaali Provins Judiya abip ma ma kayaak imi tunum alik imi wiis-saayin-bam bakaya-tal-une-bamda Rom kayaak iso waasi dinum o, kebip o. Kamosinim kanolin kukup kaali, Provins Galili bokon kaptam asiik kanum tabasa. Kemin ale, kamala kaata tal numi Provins Judiya kalawu kanum tal-uneba no, kala kanum bakalip ko.
LUK 23:6 Pailat ayo weng kaayo, weng san-ilomda, dik-daa-lomda: Awu, tunum kalaali Provins Galili kayaak ema taa?
LUK 23:7 Ayo, tunum kaali Galili kayaak ta! akipla kemin, sawaayak Rom kaptam-ami king Sisa ata Herot uldaa-dabuu bokola-lomda: Nalmi win diim kaata, kabi Provins Galili kaptam-ami unang tunum iyo tiin molokomap o kalaya, tiin mosa. Kemin, Pailat ali utama yi, Kama kuluwaata Herot ali Provins Galili kulaa kela, kiin tal Jerusalam kalawu bombe no! kalba-kup, kulaa Yesus ayo dibii-tal ami diim kawu dabak molum o, kalalip dibii tilip, Uyo, kaa nami ok disa, Herot almi ok alik o, kala-lomda almi waasi dinin tunum soldiya iyo weng umbaaya tal Yesus ayo dibiilip din Herot ami diim daalip ko.
LUK 23:8 Siin kawu Herot ayo Yesus ami sang baka-bilipla, weng san-kaa-bamdala, Naka Yesus kaa ma atamon i, ken-umba. Kemin, ami aket fukuna kaali, kukup ukol alik kaata ma kanu-balala atamon o, kem-tabasa. Kemin, Yesus ayo dap-tal-fuku dibii-din alami diim daalip atam-ilomda, ami aket uyo disa akal ma ke-bam fiyaap duumale
LUK 23:9 kulaa, Herot ayo ti weng yaapkan kaata, Yesus ami dik-daa kala. Katale, Yesus ayo weng anung so ma telama disa, kelaya,
LUK 23:10 awem tunum imi kamok kamok sole, lo utamsip tunum iso, yakal ti Herot ami be un-ilom taklii yang mepso kuluba-lomdip, Yesus ami sang kaata ti mokop faldak-faltalak kamaan-bam disa weng mafak mafak kaayo, bakaan-bilipla,
LUK 23:11 Yesus ami weng dinim ke-bom-balaya, Herot asole, almi Provins Galili imi soldiya iso, iyo atafiimin weng bakaan-bam, kukup mafak kukaan-bam ale, king ami ilim tambal mikin-umba tap ke, mikelale, nong saan-am-bam fan ti king ami weng umkaalin ultap kamaansi kelale, kulaa almi soldiya iyo bokoyilala, Yesus ayo dap-tamalip asuk Pailat ami be kawu unip.
LUK 23:12 Siin kaali, Herot so, Pailat so, alep ili waasi kela una-tala-kesip. La, alep kamala kulaata aptum kela una-tala-keliwa ilip ko.
LUK 23:13 Pailat ayo awem tunum imi kamok kamok sole, Juda imi kamok kamok sole, tunum kusnum so, iyo naan-daaya tala-tala-ke ang-delipla bokola:
LUK 23:14 Ibi tunum kalawaali dibii-tal nami diim daa bokop-na-lomdip: Tunum kalawaali, Juda imi wiis-saayin-balala, Rom kayaak iso, dinalupla yo, kalbip o, kalip. Lale, kaami sang kaali, iltipni tiin diim kulu ali dik-dakaanbi. Katale, nali atamila, Ali kukup mafak so ma noba disa yo, kalalala,
LUK 23:15 Herot akal Yesus ami dik-dakaan-bam atamala, Ali ban ma keba disa yo, kala-lomdala, asuk dabaala nami fanang tala. Kemin, nali utamila, Kipni aket fukunbip kaa soldiya imi bokoyilila, Yesus kaa aalip saaknak o, kali. Lale, Yesus ali ban ma keba kelala, kata nali bokoyila aalip taanokoma disa.
LUK 23:16 Nali soldiya imi bokoyilila, sok faklet ta langatal kaanbi kamboliwa, ami sok kaa tildaa dabaali tabanak o, kalokomi no, kema ko.
LUK 23:17 [Mep Pasova inin kaami diim ayo wasital maakup e kala duk-duu-lom kawu ina-ina ken-yaabip. Kemin, inip kaali, Pailat ali Jerusalam kaptam-ami kiyap imi kukup kaata, kuluu-lomda kanolila, Juda-miin iyo nami kanoli kaami fiyaap uyo ma duumik o, kala-lomda soldiya imi bokoya-lomda: Juda-miin sok laabi im-tiisip imi maakup ma kulaata dildaa dabaalip tabanak o, yaka-yaka-ken-umba. (Kemin, kulaali Pailat ami aket fukunba kaali, soldiya iyo bokoyila, Yesus ata sok tildaa dabaalip unak i! keba)]. Lale,
LUK 23:18 Juda iyo alik maakup dukum-kup naan-bamdip bokola-lom: Bokoyapla, tunum kulaa aalip taana le, Barabas atale, sok tildaa dabaalip unak o, kal-bomdip mamdet kuyak daa-bom kanum bakaalip ko.
LUK 23:19 Tunum Barabas kaali, sawaalak kawu Rom kasel so din-bomdupla, Juda numi bokon ayo kela-lomdip ilmi abip unin o, kalala, Barabas ata tunum malo ma nen-bam titil tibin weng kaata, bakayim-balala, iyo Barabas so, ke-lomdip, Rom kasel tal abip dukum Jerusalam kaptam tiinsip iso, dinan-taba-lomdip nikil ita tunum malo ma iyo anulip saakniwa, Rom kayaak ita ita ke-lom Barabas ayo dap-tal-fuku-lomdip, sok de dibii-din kalabus am daalip laaba. La,
LUK 23:20 Pailat ayo soldiya imi bokoya-lomda: Yesus ayo sok tildaa dabaalip unak o, kalala, asuk tunum yaapkan imi bokoya. Katale,
LUK 23:21 ili ti weng sanamip disa ke-lom, asuk dukum-kup fuuta una-tala-ke-bam, Tunum kaa ti dibii-din as diim kawu aalip taanak o! Kaa dibii din dabak as diim daa aalip taanak o, kal-bomdip weng dukum-kup bakaalip.
LUK 23:22 Kemin, liip alep fak-daa kamboyinba-kup, ma kaami diim kaata Pailat ayo bokoya-lomda: Kaa dok kanolin ban kabak-ata keba kala-lomdupla, kabak-ami kalan o, kalaluwa aalokomup i? Nali atamila, Ali kukup mafak aye ma keba dinim o, kali kemin, nali kaa bokoyila aalip saak-nokoma disa. Kulaa kela bokoyilila, disa sok faklet ta kuluu langatal kaanbi kela-lomdip, dabaalip tabanak o, kalokomi no, kala ko.
LUK 23:23 Juda-miin ili Pailat ami weng kaa weng sanokomup disa yo, kala-lomdip imi aket fukunin ayo Pailat kaa, Numi weng kaata-kup weng seya kutal-fukuyak o, kala-lom dukum-kup ti suunkup naanin-kup ke-bam ale, Kaa kanumin disa yo! Ti bokoyap dibii-din as diim daa aalip taanak o, kal-bom dukum-kup naan-bam ale, kulu Pailat ami fanang saanin ayo ku-mafak-daaliple,
LUK 23:24 Pailat ayo Juda imi kamok kamok imi kabak-ata kanolan o, kalbip namti, kanoya-lom,
LUK 23:25 almi soldiya imi bokoya-lomda: Ibi din kalabus am tunum ma gavman so din-bomdip tunum anula taanipla, ayo sok de dap-tal daasip ata sok tildaalip tabanala, Yesus ata dibii-din as diim daa aalin aa! yaka ko.
LUK 23:26 Rom kaptam-ami soldiya iyo Yesus dap-tamalip abip Jerusalam kaptam kambolalip um-bom ale, tunum Provins Sairini kayaak ma Saimon o, akan-kan-umbip ayo tal liip kawu itamale, Saimon ali saaklo kawu tal Jerusalam unon o, kala talala, soldiya iyo yak dap-tal-fuku fal-siki dap-tii-lomdip Yesus ami as tiim uyo kuluu kuyak nakal tela bokolip: As tiim kala kuu nakal tiilap, yak Yesus daang abap unip unum o, akiwale, kulaa fan as tiim kuluu kuu nakal tiilala unip ko.
LUK 23:27 Una-bilipla, tunum unang yaapkan itale, Yesus ami mafiing tem kaptoowu tal-bomdiwa, unang malo ma ita ti aket uluum ke-lom mafak keyu dukum-kup amamiple,
LUK 23:28 Yesus ayo weng san-ilomda, fal-siki-lom imi bokoya-lomda: Jerusalam kasel unang tunum aa! nami kalan kaa amamin disa yo; ti iltipni angtiil kalan so, man kalan so, kiita amamin o!
LUK 23:29 Kibi weng selin! Ilom am ma daanula kawu, waasi ita tal-ilom kipni angtiil yol uyo kukaayokomip kawu, awal unang kipyo, iltipni man angtiil yol daka-mokomip kaami kalan kaata, ama-bam boko-lomdip: Unang man dinim so, unang kama man kuulin disa bombuu so, aa unang man amaat kama muuk kuuwin disa bombuu so, ita tambal-kup aket uluum so ma kuluulin disa kelip o, yokokomip kemin,
LUK 23:30 kaami am kaa daanokomu kaali, unang tunum iyo amdu fiil dukum ami bokola-lomdip: Yi, ti balduu kulii tildaak yim-baak mo-lom yelawa baan saaknum o, ke-mokomip.
LUK 23:31 Kemin, as wiis kaami kuyak daalip kiin-tabemin kulaa mamin katip sakap ke-lokoma ale, as dat kaami kuyak daalokomap kaata, abiltap kiin-taba-lom mamin dukum ke-lokoma. Kanolin kemin, nali as wiis alaltap ke, nali kukup mafak kaa ma kanolin disa kesi. Lale, kiita angtiil yol ayo kup-nokomip, kemin ale, mep Jerusalam kasel kipta ti as dat alaltap ke, ti kukup mafak yaapkan uyo kanum tabasip. Kemin, waasi iyo tal kipni angtiil yol sakbaalim dukum uyo kuyokomip o, kala, Yesus ayo kanum bakayila ko.
LUK 23:32 Kemin, soldiya iyo fuut tabin tunum alep ma iso, yim-tama tal tituun-kup tunum Yesus aso, dabaku ke imbii yak as diim daa anulum o, kalaliwa, iyo yim-biilip tal-ilomdipla,
LUK 23:33 mukun ma tola bombe kaptam-ali Mukun Dabaal Kun Tap o, kalbip kaptamu tam-ilomdip soldiya iyo Yesus ayo kulaata dabak as diim daa sil biki-lomdip dabuu dafole, kuno tunum fuut tabin tunum alep ma yakal yim-bital yim-bak as diim daa-lomdip, ma ata dap Yesus ami tiing tuplo kawu dip-tam diibip-kup, ale ma kaata awaanlo kawu dip-tam dii keya-lomdip yim-tiilipla
LUK 23:34 Yesus ayo bomda Aalap God ayo beten kamaan-bam bokola-lomda: Atok kapyo, mep kalawiili babon-bam maaklo kanup-nambip kemin, kaami kalan kabak-ata, angtiil yol kaa kuuyila-yaamin disa; imi uluum kulaa kukan-tiiyan o, kala kanum bakayila ko. Kulaa, soldiya iyo Yesus ami ilim kaali, kuluu kutii-bomdipla tuum katip saatu iyo kulaalup tam aba daak aba ke-bam, kanta ata ata ke, Yesus ami ilim ayo kuluula kala, kalalup utamum o, kala-lomdip Yesus ami ilim namti kabaanulip disa kelaya,
LUK 23:35 unang tunum iyo tola-bom Yesus atafii-bam iliwa, kulaa Juda imi kamok kamok ita atafiimin weng bakaan-bamdip bokolip: Ali ti unang tunum kusnum imi angtiil lak kaata dong dakaayin-balala yaawa-laabip. Kemin ale, ali fan ti God almi ulduusa tunum Kraist namti, baan akal almi angtiil lak uyo duu-lomda as diim yol daka bokoba uyo kulaa kela tildaak abamna atamum o, ke-bamdip atafiimin weng uyo bakaalip ko.
LUK 23:36 Soldiya iyo kamok kamok imi weng uyo weng san-ilom kulaa isiik Yesus ami titul weng bakaan-bamdip, tal Yesus almi mepso kuluba tal-ilom ale, wain wok kok tabasa kaata, kuu delup inamnak i! kala, kola-lom,
LUK 23:37 asuk bokola-lomdip: Kabi fan ti, Juda imi king namti, kapkal kaltapni angtiil lak uyo duu-lomdap yaap-nan o, akan-kaa-bam bakaalipla,
LUK 23:38 Pailat ami okok kemin tunum iyo, as kom ma kuluu-lom kaami diim kabaku dolale bokola: Tunum kalawaali, Juda kasel imi kamokim king o, kala dolnale, as kom ayo kuyak tam Yesus ami tip diim diibip as dabom diim kabaku kuu diiliple,
LUK 23:39 kulaa fuut tabin tunum alep Yesus aso im-diibip iyo, ma ata Yesus ami atafiimin weng bakaan-bam bokola-lomda: Kabi tituun eng boko-lomdap: Nali tifan weng God almi ulduula Kamokim kesi no, kalap namti, ti kapkal kaltapni angtiil lak kaata, duu-som ale, alep numi lak ayo duu-lomdap God ami dik-daalawa, alta dong dokoyilaya, nikil alik ti kano yaap-num o! kemale,
LUK 23:40 ma ata aptum ami titil-tibin weng bokola-lomda: Kawe, Yesus ayo aalip saaknon o kalba kemin, ti kapkal telip taanon o, kalbap kaa, kanimin o kalalawa kanum bakabap? Kabi God ami atul kaa suun-daalin disa bom-balap ema?
LUK 23:41 Kwin! alep nuli kukup mafak tabuulin-kup tabin kesup kemin, kaata yaap-kup angtiil yol uyo kuluu taanum e kalup ale, yak tunum kalawaalile, ali kukup mafak so ma nosa disa yo, kala aptum ma ami kanum bokolale,
LUK 23:42 kulaa fal-siki-lom Yesus ami bokola-lomda: Yesus, kapyo, kapni king ke-lom unang tunum imi tiin molokomap kaali, nami aket uyo fukun-ilomdap dong dokop-nan o, akale,
LUK 23:43 Yesus asiik bokola-lomda: Nami tifan tituun eng kaata-kup bokop-tokomi kemin, weng selan! Kamala kulaali, Baladais o, kala abiil tikiin kaali, kapso naso alep ilokomup o, kala Yesus ayo kanum bokola ko.
LUK 23:44 Atan uyo tal dibimnule, tawaal kaali alik malang tinilu bom ilala, lotu am diilim kaptam-ami ilim sakbaalim dukum ma kuu diilip God ami abiin anung awem katiilip laabu uyo, dabom kaptamu tikip-kup biki kutal daak daalale, God ami abiin awem uyo ku-fatap-daalale, atan sinik ayo tal 3 kilok asuum diim talale kawu, am asuk daanala,
LUK 23:46 kulu Yesus ayo dukum-kup aalap naan-bam bokola-lomda: Atok kapyo, nami sinik kalawaali, kuyak Atok kaltapni sikil diim tiili no, kala-lomda Yesus ayo saakna ko.
LUK 23:47 Saaknale, soldiya 100 imi tiin molin tunum akal atama yi, Yesus ali kanola taana kala, kalale, God ami win ayo kufon-bam ale bokola: Yak tunum kalawaali atin ti tutuun-kup tabin tunum o, kala ko.
LUK 23:48 Kemin, Jerusalam kayaak unang tunum yaapkan imi aket fukunbip kaali, din-ilom Yesus aalokomip uyo, ata-bom-sulupla yo, kalalip tala-tala-kemsi afet daa tiinbip. Kemin, kukup kanolin akal alik kaa tiltam taba taba kelu kaali, utamipla, kaa imi aket tem uyo mafak keyilu iyo amabi kulaa kela, ilmi am e kala una-una-keliwale,
LUK 23:49 Yesus almi kayaak so, unang so, Provins Galili kawu Yesus aso yak-mum o, kalalip aso maakup talbip ita-kup, takas yang samaan so kabangu tola bomdip atafiimupla, waasi iyo dok kanolip e kalum o, kalaliwa atafiimip ko.
LUK 23:50 Tunum ma ami win kaali Josep o, akan-kan-umbip ali, Provins Judiya kaptam-ami abip ma Arimatea kayaak kemin, ali ti tunum tambalim; ali God ami unang tunum imi tiin molokoma kaami am daan tiltam tabokomu kaami liip-kup fen-tabasa. Kemin, ali Juda-miin imi Kaunsol imi tunum kesa. Lale, Kaunsol alik iyo weng takenbi boko-lomdip: Yi, Yesus ayo dabaalup yak Rom kayaak imi diim abamnala, aalup taanak o, kalalip weng taken-bilipla, Josep ata boko-lom: Daa yo, kalba. Kemin,
LUK 23:52 Josep ayo din Pailat ami dik-daala-lomda: Ayo, kalap e kalalila kawu, nata Yesus ami as kuli kaa, kuluu kulii-unon o, kalalila tili no, aka dik-daalale, Pailat ayo, Yaap o, aka.
LUK 23:53 Kemin, siin kaali, Josep nikil ilta tunum saaknip ima-laamin kaami tem kayi! kala-lomdip tuum tem ma kaluulip laaba. Kata, tunum ayo ma taanala, kulii-tal buluusip disa; kemin, Josep so, aptum ma aso, alep iyo Yesus ami as kuli kaayo, kuluu kutil-daak tii-lomdip ilim namaal tambal ma kaata kuluu de-falala-lomdip dibiilip yak aba din almi tuum tem kaluu-silip kaptamu dawaa-lomdip
LUK 23:54 alep iyo atamiwa yi, Kamala kaa God ami iintang am daan-laamin kaami mafek mafek kii talalulum o kalbip kaami am uyo mepso disa kelale, God ami iintang am uyo mepso daanon o kalu kemin, kuyaku abiltap as kuli kaayo, kulii-din buluu-somla yo; kanola yak God ami iintang am daan tiltam taba kaa, tunum taana ami as kuli kaa kulii-din bal-kaamin disa yo, kala-lomdip abiltap Yesus ami as kuli kaayo kulii-din buluulip ko.
LUK 23:55 Kanola buluulum o, kalalip tabanipla, Provins Galili kayaak unang Yesus aso maakup tal-silip ita, yak Josep ami daang abamnip un-bom talaalipla, Kom tem namti kuyak bombu kemiple, Josep nikil iyo Juda imi tunum taana kaa kanumin kemin, mafek mafek tang tambal-kup tabin ayo ma kuluu-lom angtiil ilik dawaalin disa ke-lom, abiltap mam sanam dawaalip kemin, unang iyo atamdipla,
LUK 23:56 aket fukunin kaali, wel so, fauda so, tang tambal-kup tabin ok kiita, kulii-tal Yesus ami angtiil diim kawu ilik daalalup yaap ilak o, kalalipla asuk yak aba din abip dukum un-ilom talalu kutiilip. Katale, Moses ami Lo kutiisa kuusiik kutal-fuku-bom ilupla, God ami iintang am uyo disa kelula yo, kalalip ilip ko.
LUK 24:1 God ami iintang am uyo disa kelule, silip sintam Sande am maakup ami kutim malang tem kawu, unang nikil iyo din kom tem unum o, kalale, nikil mafek mafek tang tambal-kup tabin wok ket ayo talalu kutiibip iyo kulii fuut din abomi!
LUK 24:2 Amitom saal kaami tuum kom ta saal kuyak mobip kaali, baplun yang banula, amitom uyo kuno busuulin bombuu kala, kala-lomdipla,
LUK 24:3 nikil iyo tam tuum tem tam unip. Katale, Yesus ami as kuli kaali, atamin disa ke-lomdipla,
LUK 24:4 kwin! aket yaapkan fukun-bam, iyo talaalipla, Abiltap-siik, tunum alep ma ilim atin ti namaal mikilin ili atan tiin buluusi tabin tap ma mep kulu tolbip kaa kalale, unang iyo itam-ilomdip,
LUK 24:5 suun-daa dabuniple, tunum alep iyo bokoya-lomdip: Ibi kanimin o kalalipla, tunum tiin kawang keba ayo kom tem kaltam fenbip i?
LUK 24:6 Yesus ali kalawu bombe disa; ali tam tiinba kemin, kibi talalu aket fuku-daalin! Siin kaa, kipso nikil Provins Galili kawu bom-ilom bokoyase kaa, kanum boko-lomda:
LUK 24:7 Dukum Ami Man Nali tunum ita nam-baalip yak kukup mafak fukulin tunum imi sikil diim abamnila, iyo nam-tamalip din as diim kawu nam-tam dii nelip taanokomi. Katale, am alep keliya am asuum diim kaata, asuk tam tiin baalokomi no, kalase no, kala tunum alep iyo kanum bokoyiliple,
LUK 24:8 kulaali unang nikil iyo aket fukun daaliwa yi, Fan, Yesus ami weng kanum bokose namti kabuu nu! kala kalip.
LUK 24:9 Kemin, nikil tuum tem ayo kambolale, nikil iyo bina tal Jerusalam aba-lomdip, kalaan tunum kumkal iso, imi aptum kusal iso, imi diim un-ilomdip, mafek mafek alik itamdip tilip kaami sang so, mep weng, weng san tilip kaami sang so, bokoyiliple,
LUK 24:10 mep unang kiili, abip Makdala kayaak Maria ukol, Joana ukol, Jems awak Maria ukol, kuno unang malo ma iso, kanolin nikil ita unbip. Weng kaayo, kulii-tal kalaan tunum kumkal kaa bokoyilip. Lale,
LUK 24:11 kalaan tunum nikil ili boko-lomdip: Daa yo! Unang kiili, babonin weng kaata bakabip o, kala-lomdip, imi weng kaa, Fan o, kalin disa kelip ko.
LUK 24:12 [Kemin ale, Pita ata tam tola bina yakyak din tuum tem amitom kulu dik-dii daak kuluba titam daa, Ilim falala-lom dibii-din dawaabip kaata-kup bombe kala, kala-lomda atam, Kwin i! kala, ayo suun-daa-lom kela tal am bomda kanola atamda tala kaami aket kaata ti, fukunin-kup kema ko.]
LUK 24:13 Am atan kulu tik-daaba kulaami am tiinin diim kuyaku, Yesus ami aptum alep ma Jerusalam kelalip yak aba din abip Emeas unum o, kalalip, unan-silipla, Jerusalam liip kela Emeas kaami liip batbat kaali 11 kilomita kemin,
LUK 24:14 alep iyo un-bomdip, mafek mafek alik kii kanobip kiimi sang kaata
LUK 24:15 bokola-sala bokola-sala alep ken-unipla kawu, Yesus ayo tal imi daang abamnala, aso nikil maakup una-biliwa,
LUK 24:16 mafek mafek ma kamboyala, alep ili atam, Awu, kaali Yesus ata no! kalolip disa.
LUK 24:17 Ken-una-biliple, Yesus ayo dik-daayila-lomda: Alep ibi kanim sang kaata, bakan-talabip i? yakale, alep iyo aket uluum-kup keyulule, amamin fanang dik-yaku-lom bokolip.
LUK 24:18 Kemin, tunum ma ami win kaali, Kliopas ata Yesus ami weng kaali, dik-daala-lomda: Abip kusnum malo malo kaami unang tunum yaapkan ita tal Jerusalam katam katam ke-bam bom-bilip. Lale, tunum maakup ma kapta-kup tal Jerusalam kaami mafek mafek kaa tiltam kanobip kii itabap disa ema? kala Yesus ami dik-daalale,
LUK 24:19 Yesus asiik alep imi dik-daaya-lomda: Kipni mep mafek mafek kii tiltam talbip o, kebip kabak-ali dok kanolin kabak-ata ni? yakale, isiik bokola-lomdip: Mep mafek mafek kaa tiltam tababip kaa, mafek mafek tiltam Nasaret kayaak Yesus ami diim ababu kaami sang kaata bakan-talabup te! Ali God ami weng tem bakayin tunum kemin, God so, unang tunum iso, ili atamiwa yi, Ali titil-foko-bomda ok tambal-kup okok ke-bam ale, weng tambal kaata-kup bakayin-bam kemin tunum o, ken-umbip. Kemin,
LUK 24:20 numi awem tunum imi kamok kamok sole, unang tunum imi kamok iso, ita dabaalip yak Rom kasel imi kiyap ami sikil diim abamnala, kiyap ata dabak-saanbi boko-lomda: Aaliwa taanak o, kalala, dibii-din as diim kawu dap-tam dii aalip saakba.
LUK 24:21 Yale, siin kawu numi aket uyo fuku-daaluwa yi, Awu, kulaata taba-lomda Israel unang tunum numi waasi iyo yim-baak tabii ata ata ke-lomda abiin tambal kaa numi kuyokoma no, kalsup. La, ma kaata ami mafek mafek tiltam tababu kaali, am alep kelu kemin, kamala kulaata am asuum diim kemin,
LUK 24:22 fanang alik tam banbup kaa kutim malang tem kawu, numi unang malo ma ita din tuum tem ulipla, Yesus dawaa-silip ayo din okolipla
LUK 24:23 Yesus ami as kuli uyo ilokin disa kala kalaliwa, asuk kela tal bokoya-lomdip, Nuli ensel ma itamupla iyo boko-lom: Ali tiin kawang keba no, kalip o, yikiwale,
LUK 24:24 numi tunum malo ma isiik bina din tuum tem uliwa yi, Unang imi weng bokolip kaali, ti faneng o, kalip. Katale, Yesus ali ma atamakin dinim o, kalbip-kup, alep ita kanum baka-bamdip Yesus ami kanum bakaalip ko.
LUK 24:25 Kemin, Yesus asiik alep imi bokoya-lomda: Alep ibi babon-bam abiltap kaal kelin disa nobip ema? Sawaalak kaali, God ami weng tem bakayin tunum ili, Kraist ami sang kaa unang tunum imi bakayila-tal-une-bisip. Yale, alep ibi utamiwa, Alik kiili faneng boko-silip o, kala-silip disa. La, kanum bakan-talabip i?
LUK 24:26 Sawaalak kaa, God ali boko-lomda: Nami ulduusii tunum Kraist ali angtiil yol kaali kuluu-lom taan-ilomdala, asuk tam tiin abiil tikiin tiltam-ilom tunum kamokim dukum ke-lomda, akal almi kusnum ma ke-lokoma no, kalsa. Yale, ibi God ami weng kuuli, talalu utamsip disa ema? kala Yesus ayo alep imi dik-daaya.
LUK 24:27 Kemin, sawaayak Moses ami weng so, God ami weng bakayin tunum imi weng so, weng ma kuuta God ami Sukon Tem kabak bombuu so, kaami tem kabak-ali Yesus almi sang bokosu kaami miit kaata, alep imi talalu ifi daka-daa bokoyila ko.
LUK 24:28 Kanola, tunum alep imi abip kaptam banum o, kala talabip uyo tal mep abale, alep ili Yesus kaa atamiwa yi, Ti yakyak unon o, kalba kala kalaliwa,
LUK 24:29 alep iyo bokola-lomdip: Daa yo. Atan uyo tem unon e kalu kemin, Kuno kela talawa, alep nuso din sindupla yo, akiwale, fan nikil tam am abale
LUK 24:30 kulaa, nikil tam am tiin-ilomdip, Ima inalupla yo, kalale, Yesus ayo bret ma kutiilip kaata kuluu-lomda, God ami yaap ke yo, aka, lo-lomda tunum alep imi kuyilale,
LUK 24:31 alep imi tiin iyo baaya atamiwa yi, Kulaa Yesus alta nu! kala atam kem-siliple, kulu maaklo disa kela ko.
LUK 24:32 Kanola atam-ilomdipla, alep iyo bokola bokola ken-tabale, bokolip: Awu! alep nuli liip tala-bulupla, ayo God ami Sukon Tem kabak-ami weng miit kaali, talalu daka-daa bokoyilala, alep numi aket uyo kufoyilala, fiyaap-duun-duun tulup o, kalaliwa,
LUK 24:33 alep iyo baan abiltap-siik asuk tal Jerusalam tal uliwa, Kalaan tunum kumkal isole, kuno aptum kusal malo ma iso, tal kaptam-kaptam-bam nikil iyo bom-bilip kala kalale, itamipla,
LUK 24:34 iyo bokolip: Yi, ti faneng te! Kamokim ali tiin kawang keba kemin Saimon ali ataba no, kemiple
LUK 24:35 kulaa, alep yakal Yesus din liip kawu, itama un-bomdip weng bakan-bakan daa unip kaami sang so, aa bret lo kutiiya atamip kaami atamdip, Awu, kulaa ti Yesus alta nuu, kalbip kaami sang so, kiita bokoya kelip ko.
LUK 24:36 Nikil bom weng uyo baka-bam bom-iliple, Yesus ayo ilmi bom-bilip iipyak tem kulaaku tiltam tola bokoya-lomda: Nikil kibi aket kulaa, akola balili-kup kala bomdiwa yo, kala bokoyilale,
LUK 24:37 Kwin! nikil ili kulaa sakbal ema yo, kala-lomdip fanang maaklo keyulu suun-daaliwa,
LUK 24:38 Yesus ayo bokoya-lomda: Kibi kanimin o kalaliwa suun-bamdip, Kaali fan Yesus e, sakbal e, nambip i?
LUK 24:39 Nikil kibi tital nami sikil so, yaan so, kali itam-tamin. Nali nalta te! Sikil kutaldak daa nam-tal-fuku-tamin! Sakbal ili tiil sole, kun so, kii disa yo, yaka-lomda,
LUK 24:40 ami sikil so, yaan so, iyo kukuyilale,
LUK 24:41 nikil iyo atin ti fiyaap duu-bi-lom disa akal ma ke-lomdip aket yaapkan fukunip. Kata, nikil imi aket kaa fan e disa ye? kemiple Yesus ayo bokoya-lomda: Ibi mep kaa ima so ma kutiilip ilomu ni? yakale
LUK 24:42 kulaa, yak aniing anung ma kufuu kutiibip kemin,
LUK 24:43 ayo kuluu-lom kolip, inan-taba atamip ko.
LUK 24:44 Yesus ayo bokoya-lomda: Siin kaali, nali kipso bomdup nali kipni bokoya-lomdi: Sawaalak Moses ami Lo so, God ami weng ku-fatap-dakamin tunum imi weng so, God ami Sukon Tem baal wiimin so, kii nami sang kaata bokosip. Kemin ale, siin sawaayak kawu nami sang dolsip kaa alik kanola tiltam talokomu no, kalaliwa, taanin disa, bom ilomdila bokoyasii no, yakala,
LUK 24:45 tunum nikil imi aket tem kaa bam-daayila utamiwa yi, God ami weng dolsip namti fan kabuu no, kala, kaliwale,
LUK 24:46 Yesus ayo bokoya-lomda: God ami Sukon Tem kabak-ali boko-lomdu: God ami ulduusa tunum Kraist ali angtiil yol kuluu-lom taanala, dawaalip bombii am asuumano ami diim kawu, asuk kom tem kawu tam tiinokoma.
LUK 24:47 Kemin, ami tunum ili God ami ulduusa tunum Kraist o, akan-kaabip ami win diim kaata, God ami weng kaluuli, kuliilip din bakan-tal-une-bilipla, tunum miit ma ma alik iyo weng san-ilom ale, imi aket mafak aa fanang mafak aa kiita, fal-siki-lom God ami kolipla, God ata imi ban wakamin uyo kukan-tiiyokoma. Kemin, kamasi kaali, Jerusalam kaptamu ilu-somdipla kawu unokomip o, kala kanum bokosu.
LUK 24:48 Kemin, nikil kipkal iltipni talang tem alep alep kiiyo, weng san-ilom ale, iltipni tiin alep alep kiiyo, itam-som kebip kemin, kabak-ami sang kaata, bakan-una-tala-ke-bam ale, taken-bamdiwa, bakayila-tal-unemin o, yaka-lomda bokola:
LUK 24:49 Ipkal weng sanin! Siin kawu Atok ami boko-lomda: Nami Sinik Tambal ayo kipni kuuyokomi no, kalsa kaali, kulu nalta kuya-lomdi ipni dabaayi talokoma. Lale, nikil kibi abip diilim kultamu-kup bom ilipla, abiil tikiin kayaak God ami Sinik ayo tal kipni diim aba-lomdala, ami titil kaata, kipni kuyilak o, kal-bomda kanum bakayila ko.
LUK 24:50 Kulaa, Yesus ayo nikil imi foko kuliila ti unbilin abip Betani din aba-lomda, kulu ami sikil ayo kufo-lomda, God ami beten kamaan-bam ale, boko-lom: Atok kapyo, kalawiili dong dokoyilawa, tambal-kup bom-biliwa yo, ken-um-bom ale,
LUK 24:51 kulu kamboya taba kem-salale, God ayo Yesus dabuu dibii abiil tikiin una ko.
LUK 24:52 Kemin, nikil ili Yesus ami win ayo kufonbi kulaa kela, asuk din Jerusalam kawu bomdip fiyaap sakbaalim dukum-kup duu-bamale,
LUK 24:53 suunkup tam lotu am diilim kaptamu God ami win ayo kufon-bam ale, ti tanke yo, kal-bomdip kanumin-kup kemsip ko.
JOH 1:1 Siin sawaayak kaali, God ali tawaal kaa talalulin dinim bom-balaya, God ami Weng o, kala Kraist ayo bom-biisa. Kemin, God ami Weng kulaali, alta God aso laabip kemin, Alim maakup tiin-bom biisip o.
JOH 1:2 Atin kaptoop-ami miit tem kaali, Alim maakup loko-bom biisip.
JOH 1:3 Kemin, God maakup alafin kanolin mafek mafek alik kii talalusa dinim. Alami Weng o kala, Kraist aso, Alim maakup ke-lomdipya, abiil so, tawaal so, mafek mafek alik kiili talalusip o.
JOH 1:4 God ami Weng alalta tiin kawang miit kayaak ale, alalta falala-kalin miit kayaak kemin, ami dawang kaali, tawaal diim kasel imi aket tem uyo iilfoyila-lom bam-daayimulula utamiwa yi, Ali kanolin God kala, kala-silip.
JOH 1:5 Kemin, yokon dawang kalawaali, kutamiip tem kasel imi iilfoyinsu. Kemin, kutamiip kukup ayo dok kano-lomda, yokon dawang kaa tenulama dinim.
JOH 1:6 God ami kalaan tunum ma dabaala talsa ami win kaali Jon.
JOH 1:7 Kemin, ali tal-ilomda, yokon dawang o kala Kraist ami sang kaali, unang so, tunum so, imi bakayin-balaya, iyo weng san-ilomdipya, aket fal-siki-lom, ami lak duulin o, kala talse no.
JOH 1:8 Jon ali yokon miit kayaak disa; ali disa tal yokon miit kayaak ami sang kaata-kup tal bakayinsa.
JOH 1:9 Fan, mep yokon dawang kaali, Kraist alta-kup. Kemin, kaami iilfuumin kaa, unang tunum alik imi aket tem uyo iilfoya-lomda bam-daayimuluya, utafiin-umbip kemin, ali unang tunum imi tiin diim kulu talon o, kem-salale, [Jon asiik dusiin daa-lom talse ko.]
JOH 1:10 God ami weng kaali Kraist alalta, tawaal kalawaali talalu kutiilaya, bom bii tildaak tal-ilomda tawaal diim kawu bom ilsa. Yale, tawaal diim kasel iyo atam, Awu, kaali God ami man uldaa dabuusa tunum o, kalolip dinim.
JOH 1:11 Ali tal alami miit talse. Yale, alami miit tem unang tunum iyo atamiwa yi, Kaali Kraist kala, kala-silip dinim.
JOH 1:12 Yale, almi tunum iip maakup maakup iyo ami kelum o, kala-lomdip, ami weng uyo weng san aket fal-siki ayo lak duuliwa, alta-kup dong dokoyilale, im-taldang daala, iyo tiltam God almi man alik-daap ke-silip.
JOH 1:13 Kemin, kiimi tiltam God ami man kela-silip kaami liip namti kala bombe. Awil-fakal imi God ami lak duu ilsip kaata, imi dong dokoyinsu disa; ale, aalap so, awak so, akam maakup sin-yaa-bamdip man fakan-umbip ulultap disa le; tunum almi aket fukunin kaaso kaa disa; kemin, kaa God almi aket fukunin kaata-kup tunum iyo ulduu im-taldang daala, tiltam almi man ke-silip o.
JOH 1:14 God ami Weng o, kala Kraist ayo tildaak fatawa tawaal diim tunum ke-lomda numi iipyak tem kawu bom-balaya, nuli atamuwa yi, Ali disa misiim kulu unang tunum imi dong dakaayin tunum ale, ali fan tituun-kup tabin tunum kala, kala-lomduwa, kaali yokon dawang alaltap ke-bomda, kukup tambal-kup kutal-fukusa kala, kala-lomdup, atamuwa yi, Ali Aalap God ami man tunum man yaan maak kemin, ali Aalap ami kukup tambal kaata-kup kukuyin-bam kanun-umba kala, kala-sulup o.
JOH 1:15 Jon ali unang tunum imi naayin-bamda bakayin-balaya: Tunum kalawaami sang kaali, nili siin kawu bokoya-lomdi: Nasiik tilile, tunum ma mulo kawu tiltam unang tunum imi diim fatap-nokoma kaali, sawaayak kaa nili nimulin daa ilsip uyo, mep kaali bom-bisa kemin, ali win tibin ale, ali Kamokim. Yale, nili alaltap disa yo. Nili ti disa kulu ilin tunum ale, ali disa yo, yakase.
JOH 1:16 Kraist ali aket balili-kup kala ilin tunum kemin, ali funu dakamin dinim; ale, ali numi la daal kep-na no kemin dinim. Kemin, ali suunkup disa misiim kulu numi dong dokoyila yam-titil saayin-bam ken-umba.
JOH 1:17 [Kabak ami miit kaali], sawaayak kawu, God ayo Moses ami Lo kiiyo, kolaya, ata kulii-din unang so, tunum so, imi kukuyila bom-biisip. Kemin, am kulu daansuu kulaata, God ayo itama yi, Ili talalu kutal-fukulin dinim kelip kala, kala-lomdaya, Yesus Kraist ayo dabaala tal disa misiim kawu dong dokoya-lomda, yam-titil-diila, alami kukup tambal so, aket filit kalin tituun-kup tabasa kukup kaa, nuli kukuyila kuuta kuluu-sulup o.
JOH 1:18 Atin ti tunum ili God kaa ma atamsip dinim kemin, God ami man tunum man ali God kemin, yaan maak ayo Atok ami mepso kawu laaba, ata-kup atam-ilomda kukuyila atamuwa yi, God kaa kanolin kala, kala-sulup te!
JOH 1:19 Jon ami sang uyo kanum bakayinsa kaali, Judiya kasel imi kamok kamok iyo tunum awem o kala pris iso, imi dong dakaayin tunum miit ma Livai tunum so, iyo Jerusalam kawu yim-baalip tal Jon ami dik-daalip ko: Kabi kawanta ni? akipya,
JOH 1:20 Jon ayo yawaal-daa-yinsa dinim ke-lomdala ayo talalu tituun weng bokoyila ko: God ami uldaa-dabuula tiltam Kamokim kesa tunum Kraist o kebip kaa, nali disa yo! yakale,
JOH 1:21 isiik asuk ami dik-daala-lomdip: Kemin, kabi Elaija ema? akiple, asiik bokola: Ee, nita daa yo! yakale, isiik asuk dik-daalip: Kabi profet God ami weng tem bakayin tunum talokoma no kala fen-umbup kulaali, kapta nema? akiwa, Daa yo! Nili disa! yakale, isiik asuk dik-daalip ko:
JOH 1:22 Kanum bokolap kulaali bokoya-lomdap: Nili kanumin tunum o yakawa, nokol weng kulii-din kamok kamok yim-baalip talbup imi weng uyo nokol kulii-din moyulum o, kala-somya kemin, kabi nili kanolin tunum o, yakawa yo, akipla,
JOH 1:23 Jon ayo bokola ko: Sawaayak profet Aisaya ayo boko-lomda: Tunum ma unang tunum dinim bokon kawu naan-bam bakayin-bamda: Ipyo, iltipni aket tem kaa talalu-lomdip, ku-mikil-daa kem-siliwa, Tunum Dukum ayo talak o, keba no, kala Aisaya ayo dola kanum bokosa kemin, kalaan tunum kulaali nita no, yaka-lomda Jon ayo kanum bokoyila ko.
JOH 1:24 Kemin, yim-baalip talbip kiili, Falosi ita yim-baalip talbip kemin,
JOH 1:25 asuk nikil ilta Jon ami dik-daalip ko: Kabi boko-lomdap: God ami uldaa-dabuula tiltam Kamokim Tunum Kraist o kebip, ali nili disa; ale, Elaija ayo asuk talokoma no, kala fen-umbup ali nali disa; aa profet talokoma no kala fen-umbup kaali, nali disa yo, yakap. Kemin, kabi kanimin o, kala unang so, tunum so, kalawiili oksam ukayinbap yoko? akiwa,
JOH 1:26 Jon asiik weng an-anung-daa bokoya ko: Nali fan oksam kulaata-kup ukayinbi. Lale, ipni iipyak tem kulu tunum ma bombe kaali, ibi atamsip disa yo.
JOH 1:27 Kamasi kawu bokoya-lomdi: Nasiik tal-ilom, tunum ma nimi mafiing tem tal-ilomda, unang tunum imi diim tiltam fatap-nokoma no, kalasii ayo kulaata kemin, kaali sakbaalim dukum o. Nili tituun-kup tunum keluya, ami yaan ilom sok kaali, yaap kep-nuya ami yaan ilom sok kaa baalami dinim o, kala ko.
JOH 1:28 Abip Betani kaali, yak wok Jodan malii kawu kemin, Jon ayo kawu unang so, tunum so, imi oksam uyo ukayin-bamda, weng uyo kanum bakayinsa no.
JOH 1:29 Sintam, Jon ayo Yesus atama yi, Nami fanang talaba kala, kala-lomda, tunum so, unang so, imi bokoya-lomda: [Numi kukup kaali, sipsip man ita ye-buluwa, imi kiim ata sing-tam daa-lomdu, numi ban wakamin uyo takan-tii-yila-yaamin o, ulultap kemin,] tiyang daatamin! Yang tunum kaa, God ami sipsip man alaltap kemin, kulaata alik tawaal diim kasel numi ban kemin umi takan-tiiya-lomda, iliim boyokoma tunum namti yang kulu tala ko.
JOH 1:30 Nali kaami sang kaata, bakayin-bamdi nasiik tiliya, tunum ma nimi mafiing tem kawu tiltam unang tunum imi diim tiltam fatap-nokoma; ali sawaayak kaa, nali namulin dinim bom ilsip kaali, kaa bom-balaya kemin, ali win soyap ale, ali Kamokim. Yale, nili alaltap disa; nili iip kulu tunum o, kalbi kemin,
JOH 1:31 siin kawu nakal atam, Awu, kaata no! kalsi dinim. Yale, Israel kasel ibi kukuyiliya, kaa atamin o, kala-lomdiya, tal oksam kaa ukayin-bam bombi no, kala ko.
JOH 1:32 Jon ayo unang tunum imi bokoya-lomda: Nali God ami Sinik Tambal ayo titam daa atamila, Abiil tikiin kaayo, kambola awon abim tam-daa tildaak tilin tap ke-lomda, tal tunum kaami angtiil diim aba tiina kala kalbi no.
JOH 1:33 Siin kawu nakal talalu atam, Awu, kaata kala, kala ma atamsi dinim. Yale, God ayo nim-baala tal-bomdi unang so, tunum so, imi oksam ukayila-yaabi kemin, alalta bokop-na-lomda: Kap-tunum ma atamawa, God ami Sinik ayo tildaak tunum kaami diim tiina kala ata-mokomap namti, kaata nimi Sinik Tambal kaali, aso ilokomip. Kemin, akal tunum unang yakal Sinik Tambal ayo kuyilaya, aso bom dong dakaayokoma no, kalase. Kemin,
JOH 1:34 nili kama kulu atam, Ata kala kali kemin, ipni bokoya-lomdi: Kaali fan God almi Man alik-daap o, kebi no, kala Jon ayo kanum bokoyila ko.
JOH 1:35 Sintam Jon ayo asuk alami kalaan tunum alep iso tola-bom atamiwa yi,
JOH 1:36 Yesus ayo yak kulu tal-unaba kala, kala-lomda bokola ko: Tiyak kaa atamin! yak kulaali God ami Sipsip Man alaltap o, yaka ko.
JOH 1:37 Jon ami kalaan tunum alep iyo Jon ami weng kaali, weng san-ilomdip, alep iyo yak Yesus ami daang abamnipla,
JOH 1:38 Yesus ayo fal-siki itama yi, Ili nimi daang abamnipla kala, kala-lomda: Ibi kanimin ma fen-talabip i? yakale, bokolip ko: Rabai yaa! Kabi doku bom-balap yoko? akipla, ilimi weng: Rabai yo kalip kaali, nulmi weng boko-lomdup: Tisa yo, ken-umbup.
JOH 1:39 Kemin, kanum bokoliwale, ayo bokoya ko: Alep ibi taldiwa, am kala atamin o, yakala, tunum alep iyo iso yak aba din ulip, Am namti bombe kala kalip kemin, atan sinik ayo taltoop ataling diim unule, am tiinaya aso ilip ko.
JOH 1:40 Tunum alep iyo Jon ami weng ayo weng san Yesus ami daang abamnip kemin, maakup ma kaata Andru kaa Saimon Pita almi niing o.
JOH 1:41 Andru ayo bina din fik Saimon atam bokola ko: Abaap kapyo, nuli Mesaya ayo atamup te! anba. Kemin, Hibru ilmi weng Mesaya o, kala kaa Grik ilimi weng kaali boko-lomdip: Kraist kaa God ata tunum kaa uldaa-dabuu-lom tiltam Kamokim kesa tunum o, ken-umbip o.
JOH 1:42 Andru ayo kanum bokola-lomda, Saimon ayo dap-tamala, Yesus fanang din atamala, Yesus ayo atam-ilom bokola ko: Kapni win kaa bakap-tam-bamdip: Jon ami man Saimon o, ken-umbip. Yale, bii-lom kaa, kapni win ma kaali Siifas o, ke-mokomip o, anba. Kemin, Hibru ilmi weng Siifas o, ansa kaali, Grik ilmi weng kaa Pita yo, ken-umbip. Kemin, kabak-ami win miit kabak-ali tuum o.
JOH 1:43 Sintam, Yesus ayo din Provins Galili bokon unon o, kala kemin, Yesus ayo din Filip atam ale ayo bokola-lomda: Talapla, nami daang abamnap unum o, akale,
JOH 1:44 Filip ali Betsaida kayaak kemin ale Andru so, Pita so, alep yakal imi abip dukum ili kaptam kayaak.
JOH 1:45 Kulaa, Filip ayo din Nataniel ayo ataba-kup bokola ko: Nak-tunum kapyo, sawaayak kawu awaalik Moses ayo tunum kalawaami sang kaali, sukon tem kabaku dolsa. Aa, profet yakal ami sang uyo bokosip. Kemin, God ami tunum dabaala tildaak talokoma ami sang bokosip namti kala atamup o. Kaali Nasaret kayaak Josep ami man Yesus o, akale,
JOH 1:46 Nataniel asiik bokola ko: Nasaret kayaak tunum maakup ayo win tambal so ma ke-lokoma dinim o, akale, Filip asiik boko-lomda: Kanolin kemin ale, ti kapkal tal atam taman o! aka unip ko.
JOH 1:47 Yesus ayo atama yi, Nataniel ali nimi fanang talaba kala, kala-lomda ami sang ayo bokola ko: Tunum kulu talaba kulaayo, kaa atin ti fan Israel kayaak tituun kemin, ali ibakamin so ma bakan-umba disa yo, akale,
JOH 1:48 Nataniel ayo dik-daala-lomda: Kabi dok kano-lomdap nili nitabap i? akale, Yesus ayo bokola ko: Filip ali weng umuup-tin dinim ilala, kabi as fik miit tem kawu tiin-bom ilapla titabi no, akale,
JOH 1:49 Nataniel ayo boko-lomda: Kukuyin tunum kapyo! Kabi God alami Man ale, Israel kasel imi kamokim dukum king o, akale,
JOH 1:50 Yesus asiik bokola: Nili bokop-ta-lomdi: Kabi as fik miit tem kawu tiin bom-ilawa titabi no, tikiya kawu weng sanawa yi, Fan kala, kala-lomdapya, nimi lak kaa duulap ema? Bom-bi-lom kaptoowu kukup sakbaalim dukum ma uta-mokomap kuuli, uta uta ke-lomdu kamala kaluuta le mepkan ke-lokomu no,
JOH 1:51 kalba-kup kulaata, Tituun weng kaayo, ipni bakayinbi kemin, ibi utamiwa yi, Abiil tikiin kaami saal kaali, busuuluya, God ami ensel iyo Dukum ami Man, Nimi liip kaltamu tam-aba daak-aba kebip kala yokokomip o, kala-lomda Yesus ayo kanum bokoyila ko.
JOH 2:1 Am alep ma disa kelale, Provins Galili bokon kaptam-ami iipyak tem abip ma Kena kawu, tunum ma unang kuluulokomi no, kala kemin, alami kayak iyo tala-tala-ke iyo fiyaap duumum o, kemipla, Yesus ami awak uyo tulula,
JOH 2:2 Yesus so, ami daang bakaalin tunum iso, iyo kiita bokoyip, iso tal keliwa,
JOH 2:3 kulaata in-bomdipya, wain ok ayo inamnip disa kelaya, awak uyo Yesus ami bokola-lomdu: Kapyo, kalawiimi wain ok ayo dinim kela no, akuya,
JOH 2:4 Yesus ayo bokowa: Akamen kupyo, nimi ok kutal-fuku-bom biliya, unang tunum nita-mokomip kaami am kaali, kama tiltam tabin disa bombuu kemin, kubi bokop-na-lomdap: Kapyo kanuman o, nakan-kaamin daa yo! ukale,
JOH 2:5 kulaa Yesus ami awak uyo am kaptam-ami ok fukulin tunum imi bokoya-lomdu: Kipta, kaata kanolin o! yaka namti, kaata nuumin o! yuku ko.
JOH 2:6 Kulaa, Judiya kasel kiimi kukup kaali, ima inamnum o, kalbip-kup, kamasi kaali, imi sikil, aa falet, kaap, iyo diinga-yaabip. Kemin, dingmin kaami wok ket sakbaalim dukum bukupkal kiili, tuum ket lale, maakup maakup imi duung wok ling abuu-laamin kaali, 100 lita bom-bilip kemin,
JOH 2:7 Yesus ayo ok fukulin tunum imi bokoya-lomda: Ipyo, wok ma ilii-tal-ilomdipla, wok ket tem kabaaku ling abuulip dongna yo, yakaya, wok ayo ling abuu-bilip, tiltam dongnaya, bokoyila ko:
JOH 2:8 Kulaa wok ma iluu-lomdip kulii-din tunum ima im-bokobip imi tiin molin ami kolin o! yakala, fan wok ayo iluu-kulii-din ami daalip ale
JOH 2:9 kulaa wok kuluu fal-siki-lomdu wain ok kelale, ima tiin moba tunum ayo falang ata talaala yi, Wain wok ayo dok liip ma kulii-tilip i? kaloma dinim kelale, ok fukulin tunum wain ok ilii tilip itale, utamiwa yi, Kawu ilii tulup kala kalip. Kemin, tiin molin tunum ayo tunum unang kama kulu kuluula ami naan-daala talale, ami bokola ko:
JOH 2:10 Wain wok kalawaali, tambal-kup tabasa kawi! Tunum alik imi kukup kaa, wain wok tambal-kup tabasa usiik kola, alik inamniwa, disa kelaya kawu, mulo kawu wain wok mafak kaata kuyokoma. Kata, kapta wain wok atin ti tambal-kup tabasa kaata kutiilap bom-balala, kamala kuluwu kuluu-lomdapla kuyap o, kala ko.
JOH 2:11 Yesus ami diildiil tunum ma atamsip dinim kukup kaami kanosa kaali, Galili bokon abip Kena kawu kano-lomdaya kawu, ami titil sakbaalim dukum kaali, imi kukuyilaya, ami daang bakaalin tunum iyo atam-sinomdipya, ami lak ayo duulipla kemin,
JOH 2:12 Yesus so, awak uso, almi nakal-fakal so, almi daang bakaalin tunum iso, iyo daak aba toop Kapeneam abip kawu sin-sin bi am sin-yaamin malo ma yak bana ko.
JOH 2:13 Judiya kasel imi Pasova iintang am o kala ima waan tini-bam inin uyo mepso kem tala-bulu, Yesus ayo yak aba tam Jerusalam din-ilomda,
JOH 2:14 tam lotu am diildiil abip kulu tam ulala yi, Tunum iyo bulumaki kulii-tal saan-bala, sipsip kulii-tal saan-bala, awon abim tap kiiyo, kulii-tal saan-bala ke-bilipla, malo ma ita anu-lom God ami kukaan-bilipla, tunum malo ma ita tebol diim kawu tiin-bomdip tuumon kaali, dala una-tala-kebip kala, kala-lomda itam-ilomda
JOH 2:15 ayo sok ma kuluu dotuu-lomda, sok faklet ta yem-tal-une-bamda, bulumaki so, sipsip so, tunum alik iyo tiltam tiin-bom saan-bokobip kuliiso, am diilim kutamu fokola tam daak saaklo uniwale, tuumon sisol kola una-tala-kemin tunum imi tuumon ket uyo, sing-daa kulaayila unule, imi tebol ayo duk-duu fal-siki-lom kaldaak mo keyila.
JOH 2:16 Yesus ayo awon abim saanbip tunum imi bokoya-lomda: Ibi kaltam-ali kambola-somdiwa, kulii tam banin o! Ipni mafek mafek kulii-tal Atok ami am kaltamu saanbip uyo kambolin o, yakan-kaamale,
JOH 2:17 almi daang bakaalin tunum iyo Yesus ami kanola kaami aket kaali, fuku-daa utamiwa yi, God ami Sukon Tem weng uyo boko-lomdu: Nali dukum-kup God kapni am kaami lak-kup duubi kaa, nimi aket tem uyo as kiinba ultap o, kalsu no, yaka.
JOH 2:18 Kemin, Judiya kasel imi kamok kamok isiik weng ma dik-daalip ko: Kabi dok nolin kukup akal alik kaata ma nolap atamupla, God ayo kaata nolan o, takaya, kabi mafek mafek kalawa fokolap tam banu kala, tukum o? akipya,
JOH 2:19 Yesus asiik bokoya-lomda: Lotu am diilim kalawaali dap-mafak-daaliwa disa ke-lokomu kaali, nili dinabi bom bii am asuumano-kup ma ke-lom asuk delokomi no, yakale,
JOH 2:20 isiik bokolip: Tunum kalawiili lotu am diilim kultam dina-bilip bom bii-lomdip wasital 46 iyo yak banipya desip. Kemin ale, kabi dina-balap bom bii am atan asuumano-kup ayo disa kela delamap ema yo? kala kanum bokolip.
JOH 2:21 Kemin, Yesus ami lotu am diilim kaami sang bokose kaalile, atin almi angtiil kaami sang kaata bokoyase.
JOH 2:22 Kemin, bom bii ami taana God ata taba-lom dafose diim kawu, almi daang bakaalin tunum iyo aket fukun daaliwa yi, Awu, ayo kanum bokoyase kala, kala-lomdip kulaata utamiwa yi, God ami sukon tem weng so, Yesus ami weng so, kiiyo atin ti fan kala, kala-silip ko.
JOH 2:23 Kemin, Yesus ayo abip Jerusalam kaptamu bom-balaya, unang tunum iyo Pasova iintang am kaami diim ima waan tinibip kaami diim kulu unang tunum yaapkan iyo atamiwa yi, Ami kukup ma atamsip dinim mirakel o kala, kukup akal alik kaata nuu-balala, atam-ilomdip iyo ami lak kaali, duulip. Yale,
JOH 2:24 Yesus ayo alik imi aket tituun dinim ami konbip kaali, talalu itaba kemin, utama yi, Atin ti kiili nami lak duulin disa yo kala ko. Kamboyilaya ita bokola-lomdip: Kala no-somla yo, akolip dinim. Kemin, Yesus ayo unang tunum imi dik-daayilaya, unang tunum imi kanun-umbip kiimi sang kaayo, ma bokonbip disa; Yesus akal utamaya, Kiimi aket tem uyo kanolin kala kalase ko.
JOH 3:1 Kemin, tunum ma ayo bombe ami win kaali, Nikodimas o ken-umbip kemin, kaa Falosi imi tunum ale, Judiya kasel imi kamok kamok imi maakup ma kesa.
JOH 3:2 Kemin, tunum ayo kutamiip kawu tal Yesus ami bokola-lomda: Kukuyin tunum kapyo, God ali tunum imi diim kawu bombe disa dinam, kapni kukup kusnum akal alik kaa kanubap alaltap uyo ma kanu-mamap disa yo. Kaa nokol titamsup kemin, God ayo tam-baala tal kukuyin tunum kesap o, akale,
JOH 3:3 Yesus asiik bokola-lomda: Weng kaali, tifan tituun-kup bokop-tokomi no. Kanola tunum ayo kama tunum kelin disa kela namti, kaa God ami miit tem uyo tiltam talokoma dinim o, akale,
JOH 3:4 kulaa Nikodimas asiik bokola ko: Nali tunum sawol kesa ayo asuk yak awak umi mat tem uniya, asuk namulokomu disa; kemin, ali dok kano-lomda asuk kama tunum kelama yoko? akale,
JOH 3:5 Yesus asiik bokola ko: Weng kalawaali, fan tituun-kup bokop-tokomi no. Kanola tunum ali wok so, God ami Sinik aso, taba-lom dap-talalula, tiltam kama man kelin disa kela namti, kaa God ami miit tem kaali, tiltam talokoma dinim.
JOH 3:6 Kemin, tunum ayo man duula namti, man kaali tawaal diim tunum-kup ke-lokoma. Kemin, God ami Sinik ata taba-lomda, tunum ayo talalu duulaya, kama tunum kela namti, tunum kaa God ami man ke-lokoma no.
JOH 3:7 Nili bokop-ta-lomdi: Kabi kama man kelan o, tiki kaa, kabi suun-daa-lomdap aket yaapkan kaa fukunin daa yo!
JOH 3:8 Kemin, inim kaali, alami aket fukunin kaata-kup fuun-taba kalip unokomi no, kalba-kup, fuun yak aba yak bokon ma bokon ma kem-tal-une-balaya, biil eng ata-kup weng san-yaabup. Yale, nuli atam dok kabaaku tiltam aba dok liip una kala-laabup dinim kemin, ultap o. God ami Sinik ayo taba-lomda tunum ayo dap-talalulokoma kaa, ali kama tunum keba kala, kalokomap. Yale, dok kanola atam-ilomdawa, Sinik kaa dok kano-lomdaya, kaa kanonba no, kalolap disa yo, kala kanum bokola ko.
JOH 3:9 Kulaa, Nikodimas asiik bokola-lomda: Ayo, kanolin kaali fan dok kano-somdala, tiltam talokoma yoko? akale,
JOH 3:10 Yesus asiik bokola-lomda: Kabi Israel imi kukuyin tunum yale, kabi kabak ma talalu utamsap disa ema?
JOH 3:11 Kemin, weng kalawaali, tituun-kup bokop-tokomi. Kemin, nalmi mafek mafek utamsi kaami sang kaata baka-bamdila, mafek mafek nalmi tiin kaata, baa utamsi kaami sang uta, baka-bam ken-umbi. Yale, ibi, nami weng bakan-unbi kuuli, weng sanamup dinim o, kalsip.
JOH 3:12 Kemin, nili tawaal diim kalawaami mafek mafek kaami sang kaali, bakayinbi. Yale, ibi, Kaa fan o, kalsip dinim; kemin, nili abiil tikiin umi mafek mafek kaami sang kaata baka-mokomi namti, kaa dok kano-lomdip fan o, kalokomip?
JOH 3:13 Tunum ayo ma tawaal diim kalawaali kela tam God ami abip kaayo, ma tam aba tildaak tilin dinim; kemin ale, Dukum Ami Man Nata-kup tam God ami abip abiil tikiin kawu laabi. La, tildaak talsii.
JOH 3:14 Kemin, sawaayak awil-fakal imi disanang bokon kawu bom-biisip kaali, inap taba-lom ye-bilip, taan-laa-biliwa, Moses ayo inap sinik ma talalu-lomda, kuyak as diim daa kuluu kufola unang tunum [iyo bokoya-lomda: Ipyo, tiyak tam daa inap kaa ata-mokomip kaali, taanokomip dinim o, yakale,] mepso taanum o kalbip iyo tiyak tam inap daa atamipla, God ayo dong dokoya tambal ke-bisip. Kemin, ultap o; kanola Dukum ami Man, nakal nam-buu nam-fo-lom neliwa kawu,
JOH 3:15 kulaa alik nimi lak duubip iyo, God ata taba-lom dong dokoyilaya, yaap ke-lomdip suunkup ilokomip o, kala-lomda, Yesus ayo kanum bakama ko.
JOH 3:16 Kemin, God ami man ali yaan maak ata-kup yale, God ayo tawaal diim unang tunum numi aket dukum kaata kuya-lomdala, kawanita nimi man kaami lak ayo duulip namti, kii maaklo ke-lokomip disa. Kii talalu-yimuliya, suunkup ilokomip o, kala-lomda, ami man yaan maak kaali, numi dabaayila talse no.
JOH 3:17 God ayo, Nimi man ali dabaali daak tawaal diim kaami unang so, tunum so, imi bokoya-lomda: Iltipni kukup mafak kaami kalan kaata, yim-bak-saanak o, kala-somdala, dabaala tildaak talse daa; kemin, kaa dong dokoyila tiin tap daalin tap kelin o, kala-lomda dabaala tildaak talse.
JOH 3:18 Kemin ale, tunum ayo God ami man kaami lak duula namti, God ayo bokola-lomda: Kaltapni ban kemin kaami kalan kaata, tam-bak-molila utam kuluulokomap o, kalokoma disa. Aa, tunum ayo ami lak kaali, duulin dinim kela namti, God ali alami weng boko kutiisa kaami sang kaali, bokola-lomda: Kabi nimi man yaan maakup ami lak kaali, duulin dinim kesap. Kemin, kaltapni kukup mafak kaami kalan kaata, tam-bak-molila maan uyo kuluulokomap o, kalokoma.
JOH 3:19 Kemin, weng talalmin kaami miit ayo ti, God ayo alami man dabaala tildaak yokon tap ke iilfolaya, unang tunum imi kukup kaali, falala-kup kalasuu. Yale, unang tunum kiili, kukup mafak ta yelula, atin mafak-alomdip, kutamiip tem kabangba un-ilomdipla, God ami falala-kalin diim uyo kambonsip.
JOH 3:20 Kemin, alik kukup mafak kutal-fukulin tunum kiili, falala-kalin diim kaali, utam suun-daa-lomdipla, Misii nulumi kukup kaata, tildang fatap diim talomu no, ke-bamdiwa kemin, falala-kalin diim kaa tildang talen-umbip disa te!
JOH 3:21 Ale, God ami kukup tambal kutal-fukulin tunum ita, kayak kayak tunum iyo nuli talalu itamiwa yi, Nuli God ami titil diim kawu, bomdup kanumin kanumin kukup nun-unbup kala kalin o, kala-lomdipla, falala-kalin diim kaali, tildang talen-umbip o.
JOH 3:22 Kemin bilipya, Yesus so, ami daang bakaalin tunum so, nikil iyo yak aba din Judiya bokon din aba-lomdip kawu bomdiwa, unang so, tunum so, imi wok-sam ukayip.
JOH 3:23 Kemin, kulaata King Herot ami soldiya iyo Jon ami sok de dibii-din kalabus am daalin disa kama bom-iliwa, Jon akal abip Ainon kawu tunum so, unang so, imi wok-sam ukayila kemin, abip Ainon kaali, abip Selim mepso kawu bombe kemin, abip alep kaami mepso kawu wok kumun yaapkan iyo bom-bilip kemin, kawu bom-balaya, tunum unang iyo tale-bilip, wok-sam ayo ukayin-bisa ko.
JOH 3:25 Jon ami daang bakaalin tunum isole, Judiya kasel imi kamokim ma kaaso, iyo angtiil diim kawu wok-sam ukamin kaami kukup ami sang kaata, taken-bamdip, weng aal dikimipla, weng kaa dukum-nula tal-ilom,
JOH 3:26 Jon ami bokola-lomdip: Kukuyin tunum kapyo, sawaayak kawu, tunum ma yak wok Jodan malii kawu kapso bomdipla, kaami sang bakayinsap, kakal tunum so, unang so, alik iyo nuli keyila-lomdip din Yesus atamip ata wok-sam ukayinba no, kala bokolipla,
JOH 3:27 asiik bokoya-lomda: Abiil Tikiin Kayaak ami ok konsa kaa dinim dinam, kanu-mama disa. Lale, Abiil Tikiin Kayaak ayo tunum kaami ok konsa kaa, kanu-mokoma le,
JOH 3:28 Nili siin kawu bokoya-lomdi: Nali God ami uldaa-dabuusa tunum o, kala-lom kaa Kraist kaata daa; kemin, nali Kraist ami bon tem tal-bomdi ami liip ku-mikil-dakaalin tunum nita no, yikila ipkal weng san-silip.
JOH 3:29 Judiya kasel numi kukup kaa kanumin kemin, tunum ayo unang uyo ma mepso kuluulokomi no kala namti, unang kuuli tunum ami kalel alik-daap ke-lokomu no. Ami aptum ayo dong dokola-lomda unang uyo kola-lom ami fiyaap duu-bam weng bokolokoma uyo fen-bamda ilala, tunum ayo unang kuluu-lom fiyaap duu-bamda, Tambal o, kala kawu, aptum ayo weng sanba-kup, atin ti fiyaap dukum duu-mokoma. Kanolin tap kemin, nali ami aptum ke-lomdi, nami fiyaap duumin kakal ti dukum-alomdu tiknu.
JOH 3:30 Kemin, ami win ayo tiltam dukum-nule, nimi win kaata, daak minlo tem kawu unokomu, kaa tambal keluk o, kala-lomda Jon ayo Yesus kaami sang kaali, kanum bokoyila ko.
JOH 3:31 Abiil tikiin kawu tildaak talse kaa, alik ili kabaak baniwa ata ata kesa. Kemin, nuli tawaal diim tunum kemin ale, tawaal diim kalaami mafek mafek kaata-kup utamsup kemin, kaami sang kaata-kup bakan-unbup. Abiil tikiin kawu talse kaali ti, ata ata kesa.
JOH 3:32 Kemin, ali ami atamsa so, weng sansa so, kiimi sang kaali, bakayila-yaaba. Yale, tunum unang iyo ma weng sanamip dinim ke-silip. Yale,
JOH 3:33 kawanita ami weng ayo weng san kutal-fukulip namti, kaa ili boko-lomdip: Kaa faneng kemin, God ayo tituun-kup tabin weng bakaan-umba kala, kala-silip.
JOH 3:34 Kemin, God ami Man dabaala talse kula, God ayo alami Sinik ayo atin ti alik ami kolaya, God ami tituun-kup tabin weng ayo bakayila-tal-unemsa.
JOH 3:35 Aalap God ayo Man kaami aket diildiil ami kola-lomda, kanumin kanumin mafek mafek alik iyo kulaala yak ami sikil diim abasu.
JOH 3:36 Tunum ayo God ami man kaami lak duula namti, kaali suunkup tunum kelale, kawanta daa yo, kala ami weng ayo weng sanokomi daa yo, kala namti, kulaa ali suunkup tunum ke-lokoma disa. Kemin, God ami aket atul dukum kaali, ami diim kawu laabu no.
JOH 4:1 Kemin, kunumin diim kulu, Falosi iyo weng sandipla, Unang tunum yaapkan iyo Yesus ami fanang tal-ilomdip, nuli kapni ok fukulin tunum kelum o, kalipla kemin, Yesus ami wok-sam ukayinba kaali, ata ata ke-bam ale, Jon ami ok utale, daak lo so kebu no, kebip kala, kalip. Lale,
JOH 4:2 Yesus ali disa, almi daang bakaalin tunum nikil ita, unang tunum imi wok-sam kaali, ukayinsip.
JOH 4:3 Kemin, Yesus ali utamaya, Falosi ili weng kaa weng sanbip kala, kala-lomda, Provins Judiya kaa kambola asuk Provins Galili unon o, kala-lomda,
JOH 4:4 liip kaa Sameria unemin liip kawu kutal-fuku Galili Bokon unon o, kala ko.
JOH 4:5 Kulaa, Yesus ayo tal Provins Sameria kawu liip tal abip Saika kaba tala kemin, abip Saika kaali, awaalik Jekop ami sawaayak kawu ami man Josep ami tawaal ukonsa ami mepso kawu kemin, Yesus ayo kawu liip tala-bala, ayo daal dap-telule, Jekop ami afun tem kalasa kawu tal-ilomda, ok afun tem kalasa kaami tuum balang diim kabaaku tiin-bomda kun fan kaa-bamda ilale, atan tal dubimnu.
JOH 4:7 Kemin, Yesus ami daang bakaalin tunum iyo din abip kawu ima saan-unipya kemin, Sameria kayaak unang ma tal wok iluu kulii-unon o, kala tulu. Kemin, Yesus ayo dik-daa-wa-lomda bokowa ko: Kupyo, wok ma ilup-nap inamnon o, wakale,
JOH 4:9 Judiya kasel imi kukup kaali, Sameria kasel so maakup unu-tulu-ke-bamdip wok dakaap ima dakaap kaa inin dinim kemin, uli bokola-lomdu: Daa. Kabi Judiya tunum ale, nali Sameria kayaak unang kemin, kaa kanimin o kala wok uyo ilup-ti inam-nokomap i? akule,
JOH 4:10 Yesus asiik bokowa ko: Kubi God ami mafek mafek misiim kup-ton o kalba kaali, nitamawa, kubi nali kawanta wok sang kaa dik-daap-ta-lom: Ilup-nap inamnon o, tambi kalap namti, nimi dik-daap-napla, suunkup ilin ok kaata kup-tokomi no, wakale,
JOH 4:11 unang usiik bokola-lomdu: Nak-tunum kapyo, kabi wok laamin ket uyo ma bombe disa; le, wok afun tem kaa samaan dukum kaldaaku no. Kaali kabi doku suunkup ilin wok kaa, iluulokomap i?
JOH 4:12 Wok afun tem kaldaak-ali numi awaalik Jekop ata numi kaloyala, ami miining so, bulumaki so, imi loop ita inbi kela kulaalip tildak numi diim abamnuya, wok tambal kalawaali inan-yaabup. Yale, kapni aket kaa, Kaali disa kemin, nita nita kesi kemin, suunkup ilin wok kaata kup-tokomi no, nambap ema yo? akule,
JOH 4:13 Yesus asiik umi weng kaali, maan tiiwa-lomda bokowa ko: Kemin, kawanta tal wok kalawaa ma inokomip namti, ili asuk wok del dip-tiiyokomu te!
JOH 4:14 Lale, dok kanolin tunum ayo nami suunkup wok ilin ayo koli inam-nokoma kaali, asuk wok del uyo tabelokomu dinim; nimi suunkup wok kolokomi kaa, tuum tem wok alaltap tunum kaami aket tem kabaku foko-tabe-balala, in-bomda suunkup ilokoma no wakale,
JOH 4:15 unang usiik bokolu ko: Nak-tunum, kabi kanolin suunkup ilin wok kaa ma kup-nap ina-somdiya kawu, nimi wok del ayo dinim kelaya, nali suunkup tal wok laabi kulii-unen-umbi uyo kambolon o, akula,
JOH 4:16 Yesus asiik bokowa: Kubi din kultupni timak ayo naan-daalap tala, dabii-talawa yo! ukala,
JOH 4:17 usiik ami weng maan tela bokola-lomdu: Daa. Nali imak disa te! akule, Yesus ayo bokowa: Kupni weng bakabap kaa faneng, kubi timak dinim. Kata,
JOH 4:18 siin kawu kubi tunum awakal diinusap. La, kula dabuu bom-balap kaali, kupni timak daa; kemin, kaa fan bokolap te! wakala,
JOH 4:19 unang usiik bokolu ko: Nak-tunum kapyo, kulaata kabi titami yi, Kabi profet o, kala God ami weng ku-fatap-daa bakamin tunum o tiki no.
JOH 4:20 Sameria kasel numi awil-fakal imi kukup kaali, mep tam amdu tikiin kaali, God ami aman dakaalin ami baan diim la, Judiya kasel ipta baka-bamdip: Jerusalam kaptam-ata alik numi God ami win kufolin baan diim o, ken-umbip. Kemin, kaami baan diim tambalim o, kebap o, akule kulaa
JOH 4:21 Yesus asiik bokowa-lomda: Nafalop kupyo, Sameria kasel ipni God ami kufolin baan kaami miit uyo, ibi ma talalu utamsip dinim. Kemin, Judiya kasel nuta utamuwa yi, Atok God ata alik numi iliim boyokoma tunum ayo dabaala Judiya kasel nulmi diim talokoma no, kala, kala-lomdupla, nuta-kup God ami win kafolin kaami miit kaa utamsup. Yale, nami weng kaali, tituun-kup weng bokop-tokomi kemin, talalu weng selan! Am ma daanokomu kawu, ibi mep tam am du tikiin kaa maso tam God ami win kufolokomip disa; ale, din Jerusalam ukol kanola Atok ayo ami win kufokolomip disa.
JOH 4:23 Lale, am ma daanokomu, uli kaa tiltam tulu kemin, kanola unang tunum ili Atok ayo fan almi win kufolokomip kiili, ami win kufola-laamin kaami baan diim aket kaa fuku-daaliwa daa. Imi aket fukunin so, fanang saanin so, kaali alik atin ti Atok ami koliwa, ami Sinik ata taba-lom iyo dong dakaayin-balala, lotu kamaalokomip. Kemin, Atok ayo, kanolin unang tunum kiita, lotu kamap-nin o, kala-lomda kanolin imi fenba no.
JOH 4:24 God ami Sinik numi kuya-laaba kaami miit kayaak kemin, kawanita God ami lotu kamaalum o, kalip namti, aket fukunin so, fanang saanin so, kii atin ti God ami koliwa, ami Sinik ata taba-lom dong dakaayin-balala, lotu kamaalin o, wakale,
JOH 4:25 unang usiik bokolu: Nali utamiya, God ami tunum uldaa-dabuusa Kraist ami talokoma kawu, alta mafek mafek sang kaali, alik bakayin-bamda kukuyokoma no, akule
JOH 4:26 Kulaa, Yesus ayo bokowa-lomda kanum bokowalala: Ayo, nita kala kupso bomdup weng bakap-tambi kulaa, nalta te! uka ko.
JOH 4:27 Ke-bamda baka-un-salale, alami daang bakaalin tunum iyo tal ulipla yi, Ayo unang kuso weng bakabip kala kalale, iyo aket kufoyula aket fukunip. Lale, tunum ayo ma unang umi dik-daa-wa-lomda: Unang kubi kanim fanang kaata tal tiinbap i? ukoma dinim ale, Yesus ami dik-daala-lomdip: Kabi kanimin o kala unang uso weng baka-bokobip yoko? akolip dinim kelip.
JOH 4:28 Kemin, kulaata unang uyo wok ket kutii kela bina din abip kasel unang tunum imi bokoya-lomdu:
JOH 4:29 Ipyo, tal aba din atamin o! Tunum ma nili natamsa dinim. Yale, nami mafek mafek alik kanun-umbi kiimi sang alik kaa ku-fatap-daap-nala nali tili kemin, kaa God ami tunum uldaa-dabuusa Kraist ata nema yo? yukule,
JOH 4:30 tunum unang iyo abip kelalipla, Yesus ami fanang tilip ko.
JOH 4:31 Kanun tala-biliwa, daang bakaalin tunum iyo Yesus ami bokolip ko: Kukuyin tunum kapyo, ima ma ina titil-fokolawa yo, akip. Lale,
JOH 4:32 asiik bokoya-lomda: Ibi nami ima umi inan-umbi kaali, ibi ma utamsip disa yo, yakala,
JOH 4:33 daang bakaalin tunum nikil yakal dik-daala una-tala-ke-bamdipla: Tunum kusnum ma ata ima uyo ma kulii-tal daala inamna kemin kanuba nema? kemipya,
JOH 4:34 Yesus ayo bokoyila ko: Ibi ima inam-nokomip kaali, fiyaap duu-mokomip. Kemin, nakal ti kanola, God nam-baala talsii alami aket fukunba kaata-kup, kutal-fuku-som ale ami ok kup-nase uyo disa kelu kulaalon o, kal-bomdiya, nali fiyaap duubi.
JOH 4:35 Kipni kawil-fakal iyo boko-lomdip: Kayoop atalingkal ayo ma disa kelale, wiit lap ayo yakaanala daka-mokomup o, ken-umbip. Yale, nami weng faldak-tiimin kaali, bokoyokomi kemin, weng selin! Tiyak wiit lap lang yaapkan daaliwa yi! Wiit lap kaali, kamala kulu yakaanba kemin, dakamin o, kalile, kanta lap daka-mokoma ayo dakamin sisol uyo kuluulaya, God ata mafek mafek dakamin unang tunum iyo suunkup ilin umi kukup uyo imi kuyilala kawu, san dabakamin iso, lap dakamin iso, iyo aket maakup ke-lom fiyaap duumik o, kala-somla ko.
JOH 4:37 Kemin, awil-fakal imi sang ma kaa boko-lomdu: Tunum ma ata dikimin tunum ale, tunum ma ata fakamin tunum ken-umbip kaali, fan tituun weng kemin ulultap o.
JOH 4:38 Nili ibi yim-baali din unang tunum iyo im-taldang God ami miit tem daa keya talbip. Kata, ibi siin kaa God ami sang uyo bakayin-bamdipla, ma kukuyila-silip dinim. Kemin, tunum kusnum ita fiit daa-lomdip kukuya-silip. Kemin, ipta disa masiim-kup din-ilomdip yim-tama taltam daalip talbip o, kala Yesus ayo kanum bokoya ko.
JOH 4:39 Sameria kasel unang tunum yaapkan abip kaptam kasel iyo, unang umi weng bokoya-lomdu: Ali nami mafek mafek alik kii kanun-yaabi kaami sang kaali, ku-fatap-daap-nan o, kalu kaata, weng san-ilomdipla, Yesus ami lak kaa duu-lom
JOH 4:40 tal ami dik-daa kalin-kup ke-bam bokola-lomdip: Kalawu nuso biilapla, unan o, kaliwa, fan kawu bom bii am alep kela ko.
JOH 4:41 Am alep kese kulu unang tunum yaapkan iyo duung-kup tale-bamdipla, ami weng uyo weng san-ilomdiwa, ami lak uyo duubip-kup,
JOH 4:42 unang uyo bokowa-lomdip: Kupni weng bokoyinbap kaata-kup weng san-ilomdupla, ami lak kaa duubup dinim; nokol ti nulmi tiin alep alep, atamale, nulmi talang tem alep alep kiita, ami weng kaali, weng san ke-lomduwa, fan eng uu! kala-lomdupya, atamupya, Atin ti tawaal diim kayaak numi iliim uyo boyokoma namti, ata kala, kala-somdupla kemin, ami lak uyo duulup o, kalip ko.
JOH 4:43 Siin kawu, Yesus ayo alami sang uyo bokoya-lomda: Profet o, kala God ami weng ku-fatap-dakamin tunum ayo, alami bokon kawu bomdala, win dinim kelaya, unang tunum iyo ami weng ayo weng sanokomip dinim. Ale, bokon kusnum kawu bomdaya, win so kelaya, ami weng uyo weng sanokomip o, kalsa. Kemin, kulaata Yesus ayo itama yi, Sameria kasel unang tunum kalawiili, Nami weng kaa weng san-kaabip kala, kala-somdaya, kawu bom bii am alep kela, Provins Sameria ayo kulaa kela yakyak din Provins Galili una.
JOH 4:45 Kemin, siin kaali, Galili kasel yaapkan iyo din Jerusalam din-ilomdip Pasova kaami iintang am umi ima waan tini-bam inin uyo tini-biliwa, Yesus ami ok akal alik akal alik yaapkan kiili, nuu-balaya, itam talbip. Kemin, Yesus ayo din Galili kasel itamala, ami fiyaap ayo duubip ko.
JOH 4:46 Yesus ayo asuk yak aba din Galili Bokon abip Kena din una kemin, siin kawu abip kaptamu ok ayo fal-sikila wain ok kela ina-silip, abip kaptam ata no. King ami ok dong dakaalin tunum ami man tunum ayo abip Kapeneam kaptamu mafak-alin umulaya,
JOH 4:47 aalap ayo weng ma weng selaya, Yesus ayo Judiya bokon uyo kela tal Galili talba no, kebip kala kala-lomdaya, ayo din Yesus ami dik-daala ko: Nak-tunum kapyo, daak Kapeneam kawu nimi man ayo mepso taanon e kalba. Kemin, kabi tildaak dong dokolapla, tambal kelak o, akale,
JOH 4:48 Yesus asiik bokola: Alik ibi nitamipya, Nimi kukup tambal akal alik ma kanolokomi disa namti, ibi atin ti ami lak kaa duulokomup dinim o, kalokomip o, yakale,
JOH 4:49 kamokim ami dong dakaalin tunum ayo bokola ko: Nak-tunum kapyo, atin ti nami man aket maakup ayo taanama kemin, abiltap naso tildaak dong dokolan o! akaya,
JOH 4:50 Yesus ayo bokola ko: Kapni man kaa taanokoma disa kemin, ti kabi asuk unan aa! akale, fan tunum ayo Yesus ami weng uyo, faneng bokop-na no, kalalaya una ko.
JOH 4:51 Tunum ayo liip kulu kama unan-salale, ami ok fokolin tunum iyo tal liip kawu tala-tala dak-duu bokolip: Kapni man aket maakup ayo tambal keba no, akipla,
JOH 4:52 ayo dik-daaya-lomda: Dok kanumin diim kawu man kaa tambal keba ni? Yakale, isiik bokolip: Sinla am atan tal fal-sikiba (1 kilok) kawu ami angtiil mamin uyo disa kebu no, akipla,
JOH 4:53 aalap ayo utama yi, Awu, sinla am atan tal fal sikim-sala, Yesus ami bokop-na-lomda: Kapni man ayo tambal kela no, namba kulu kala, kalale, yak aba din am aba-lom, Yesus ami kukup kanoba kaata, bokoyilala kawu, aso ami kalel man iso, alimal ili Yesus ami lak duulip ko.
JOH 4:54 Yesus ami Provins Judiya kela din Provins Galili kawu ilsa kaa, kukup akal alik alep ma kanose kemin, kamasi ma kaali, kano-somdaya, ale mulo kaatale kala kano-lomdaya, man tunum ayo dap-talalu kese no.
JOH 5:1 Ilom, Judiya kayaak imi iintang am daanokomu diim kulu, Yesus ayo Jerusalam una ko.
JOH 5:2 Jerusalam abip kaami tuum uti sakbaalim dukum fokosip. La, uti kaptam-ami amitom dukum kaami win kabak-ali Sipsip Imi Amitom o, ken-umbip kemin, amitom mepso kabaaku wok kumun ma tiinsu. Kemin, Hibru kasel imi weng kaali, boko-lomdip: Betesda Kumun o, ken-umbip. Kemin, wok balang diim kulu tawaal am ma de-lom abiin baan awakal ma dalaasip.
JOH 5:3 Kemin, tunum unang yaapkan mafak-alin umu-umu-kesip iyo tal am kaptamu tal akan-balale, tiin-bom-bala ke-bamdiwa, fenbip. Kemin, mafak-alin kuluusip kiili, tiin bikiilin, yawiitsip, dikiksip, kiita [kemin, imi fen-umbip kaali, am ma daanule, God ami ensel ayo tal aba daak wok kumun tem un-ilom kukala mola wok kumun ayo lin-balaya kawu, tunum ayo dok kanolin mafak-alin umkan-umba ayo ma asiik asiik ke abiltap unfoko daak wok tem una namti, asiik yaawa-yaaba kemin, imi mafak-alin kaa akal alami mafak-alin kusnum kusnum yaapkan yam kemin, ok kabaak-ali bom ilupla, ok ayo liin-tabala kawu daak unum o, kal-bom fen-umbip] ko.
JOH 5:5 Kemin, tunum ma tawaal am desip kaptamu bombe ayo, akal ti mafak-alin mafak dukum ma kuluu-bomda bii, wasital 38 kiita dakan tiisa. La,
JOH 5:6 Yesus ayo tunum kaa atam talaala yi, Akan-bom tiinba kala kalale atama yi, Ami mafak-alin kaa, sawaayak kawu kuluusa kala, kalale, bokola-lomda: Kapyo, kabi tambal kelon o, kalbap ema? akale,
JOH 5:7 tunum mafak-alin asiik bokola: Nak-tunum kapyo, wok kabaak-ami liinokoma kawu, nali nami nak-tunum ali ma tal nam-bii daak wok tem kaa, daalama daa; nakal daak unon o kala unon e; tunum kusnum isiik isiik ke-lomdip akaap-na daak unen-umbip o, akale,
JOH 5:8 Yesus ayo bokola-lomda: Kapyo, tam tola-lomdapla, kaltapni abiin uyo kuliilap unan o, aka
JOH 5:9 kem-salale, ayo iboko maak fak-daalin tap tambal kela, almi abiin uyo kuluu kuliila tabana. Kemin, am kula daanbu kaali, God ami iintang am daanbu kemin,
JOH 5:10 Juda imi kamok kamok iyo tunum tambal ke tala ayo atam bokolip: Kabi kamala kalawaali God ami iintang am daanbu kemin, Juda numi kukup kaa, abiin kaali kulii-tal unemin daa yo, akip. Lale,
JOH 5:11 ayo bokola: Tunum nam-talalula ata bokop-na-lomda: Kaltapni abiin uyo kuliilap unan o, nakaya, kulii-tili no, yakale,
JOH 5:12 iyo dik-daalip ko: Kaa kawanta bokop-ta-lomda: Kapni abiin kaa kuliilap unan o, takan i? Ali ma kanum bokop-tama disa yo! akipla,
JOH 5:13 tunum ayo imi bokoya-lom: Tunum unang yaapkan iyo une-bala-tale-bala-kebip kemin, tunum kaali, imi kanubip imi bak-biik tem kawu unaya kemin atam: Awu, Kaata kala, kalin disa keli no, yaka ko.
JOH 5:14 Ilomdala, Yesus ayo asuk lotu am diildiil dukum kawu tunum kaa atam bokola ko: Kamala kaa kabi nali tambal kebi kalalap fiyaap duubap. Yale, kabi utaman! kabi asuk ban maso ma ke-lokomap namti, mafek mafek mafak sakbaalim dukum kaali, ma kuluulokomap. Kemin, ban maso ke-laamin dinim o, aka ko.
JOH 5:15 Tunum kulaa, Yesus ayo atam kela din Juda imi kamok kamok imi bokoyila ko: Nimi nam-talaluba tunum kulaali, Yesus alta te! kala ko.
JOH 5:16 Juda imi kamok kamok iyo utamiwa yi, Yesus kaa tunum kaa God ami iintang am daanbu diim kawu talaluba kala, kala-lomdip, iyo Yesus ami waasi kela-lom dap-mafak-daalum o, kemip.
JOH 5:17 Kata, Yesus ayo utam talaala yi, Ili nimi nitafiimin weng kaali, bakap-nam-bamdip nam-mafak-daalum o, kalip kala, kala-lomda, imi weng kaali, maan tiiya bokoya-lomda: Atok kaali, disa am kaaso, almi iintang am kuuso, kuyaku-diyaku-ke suunkup okok ke-bam laaba Kemin, nakal kanola suunkup okok ke-bamdi laabi no, yakaya,
JOH 5:18 Juda imi kamok kamok iyo weng san-ilomdip, kulu aket atul dukum keyilula, Yesus namti aalum o, kebip kabak-ami miit kaali, imi God ami iintang am kaami kukup kuka-daasip kaami aket kaa fukunipya, Yesus ali numi kukup ma kaali, ku-mafak-daaba kaa kalbip-kup, ale weng seniwa, boko-lomda: God ali nami Atok alik-daap o, kala, kala-somdipya, kaami kalan kaata, iyo taba-lomdip aket atul tabeyula, weng kaa bokola kaami aket kaali, fuku-daa-lomdiple, ali boko-lomda: Nali God aso maakup o, kala ami kuyaku ke kanumip o.
JOH 5:19 Kemin, Yesus ayo imi aket fukunbip kaali, utam bokoya ko: Nami weng kaa tituun-kup tabin weng bokoyokomi kemin, talalu weng san iliwa! God ami Man nali, nalmi aket fukunin kaata-kup kanu-mokomi daa. Nali utam-ilomdiya, Atok ami kanuba kaata-kup, nakal kanu-mokomi no.
JOH 5:20 Atok ali Man nami aket kup-namba-kup, kanumin kanumin mafek mafek alik iyo kanun-umba kaa, Man nami kukup-nale, mafek mafek dukum ma kukup-nokoma kiili, sakbaalim dukum ke-lomdip ita ita ke-lokomip. Kemin, kanu-mokomi kaa, ibi utam-ilom awal-bam ibi aket yaapkan fukun-bamdip, God ata-kup o, kala ami tong kaali, baka-mokomip o.
JOH 5:21 Kano, Atok ayo, Dok kanolin unang tunum taanip yim-folala, tam tiin asuk tiin kawong ken-umbip kaali, almi san kemin, ultap o, ami Man nakal kanola unang tunum iyo uldaa yim-buu-lomdi talalu-yimuliya, suunkup ilin unang tunum ken-umbip o.
JOH 5:22 Atok ami aket fukunin kaa, Unang so, tunum so, alik iyo nami Man kaa atam-ilomdiwa, Aalap nami win kufup-nala-yaabip tap, Man ami win akal ti kanola kufon-bam kemin o, kala-somdaya, ami tunum yam-kuku-lom weng yim-bak-saanin ok uyo alik kulaala tildak Man nami diim abasuu. Kanolin kemin, Atok ali tunum ayo ma dap-kuku-bam weng kaa ma im-bak-saan-umba dinim; kemin, Man nata-kup, yam-kuku-bam weng im-bak-molokomi no. Dok kanolin kaata, Man ami win kaali ma kufop-nokoma disa namti, Atok nam-baala talsii ami win kakal ti, kunola kufolokoma dinim o.
JOH 5:24 Weng kala bokoyokomi kaali, tituun-kup tabin weng kemin, weng san bom iliwa! Kawanta nami weng kaa, weng san God ayo nami nim-baala talsii ami lak ayo duulip namti, ita fan suunkup ilin unang tunum kebip. Kemin, nali yam-kuku-bam imi kukup mafak ken-umbip kaali, maan tiiyokomi disa. Kemin, dong dokoyila yim-bi tiltam suunkup ilin unang tunum kebip kemin, taan-yaamin abip uyo akaala suunkup ilin unang tunum ke-lokomip.
JOH 5:25 Kaa ti faneng kemin, unang tunum alik bom-bilip iyo, taan-ilomdip dinim kelakin tap. Yale, am kula daanon o kalbu kaa imi am daanbu kemin, kawanita God ami Man nami weng kaali, weng san-ilomdip nami lak duulip namti, ita suunkup ilin unang tunum ke-lokomip.
JOH 5:26 Atok ali tiin kawong miit kayaak kemin, titil kup-nalaya, nakal Atok alaltap ke-lomdiya, tiin kawong miit kayaakim kesi.
JOH 5:27 Nili fan, Dukum ami Man kemin, ami titil tabin kaali, nimi kup-nale, tunum yam-kuku-lom weng yim-bak-saanin kaami okok kemin uyo nimi kup-na kesa no.
JOH 5:28 Ibi weng kala bokoyokomi kaali, aket yaapkan fukunin daa; kaami am daanokomu kaali, alik taansip iyo nami weng ayo weng san-ilomdipya,
JOH 5:29 kom tem uyo kambola tiltam talokomip. Kemin, kawanta kukup tambal kutal-fukusip ita, tifan tiin kawang ke-lom suunkup ilokomip. Ale, kawanta kukup mafak kutal-fukusip ita, tifaneng yam-kuku-bamdi imi kukup mafak nun-umbip uyo maan tiiya-lomdi, weng yim-bak-mo ke-lokomi no, kala-lomda Yesus ayo kanum bakama ko.
JOH 5:30 Kemin, Yesus ayo weng maakup ma boko-lomda: Maakup nalafin kaa dok kano-somdiya, kaa kanu-mami dinim. Lale, nalami aket fukunin kaali disa; Atok nam-baala talsii ami aket fukunin kaata-kup, nali dakela un-bomdila, tunum so, unang so, kalawii tituun-kup yam-kuku-bam ale, tituun-kup yim-bak-mo, ken-umbi no.
JOH 5:31 Kanola, nalta-kup nalmi sang bokoyokomi kaali, alik ibi weng san-ilomdip, Ami weng kaata fan disa yo, kalokomip. Katale,
JOH 5:32 ma bombe ata nami sang ayo bakaba kemin, nali utamiya, Nami sang bakaba kaa, fan tituun weng o kala, kali no.
JOH 5:33 Siin kaali, ibi nami sang uyo kulaalip din Jon ami diim abamnuya, ayo bokoya-lomda: Weng kalawuuli faneng kemin, God ami tunum ulduuse tunum ata no, yakase.
JOH 5:34 Kemin, nali Jon aye, tunum kusnum nami win kufup-nambip kaami aket kaa, sakbaalim dukum fukunbi disa; nami aket sakbaalim dukum kaali ti, ibi nami lak kaata-kup dukum-kup duulip dong dokoyi, suunkup ilin unang tunum kelin o, kala-lomdiya, Jon ali nami sang bokose kaami sang kaata bokoyi.
JOH 5:35 Kemin, Jon kaali, yokon dawong alaltap kemin, ipni aket tem uyo iilfoyilaya, ami weng ayo ipni aket fukunin kaali, talal-bamda ilaya, fiyaap duu-bam ilanin tap ke-silip o.
JOH 5:36 Katale, ok akal alik akal alik kaa kanubi kalawaata taba-lom, Jon ayo nami sang bakayinsa kaa, kabaak banuya ata ata keba kemin, nami okok kemin akal alik akal alik kala kanubi kaali, sawaayak kawu Atok ayo kukup-na tiin mo ok tambal tambal kala kanubi kaa, unang tunum alik iyo nitamipla, Atok alalta, ulduu-lom nam-baala talsii no, nikik o, kala-somla ko.
JOH 5:37 Atok ayo nam-baala talsii, alalta nami sang kaali, liip kusnum kusnum uyo kulaala tal-tal-ke-bulu weng san kan-umbip. Yale, fan alami bon tem weng kaata-kup weng sanamip dinim. Ale, ami tiin matum ayo ma atamin dinim kesip.
JOH 5:38 Kemin, Atok ata nam-baala talsii. Yale, ibi nami lak ayo duulin disa kesip kaata, ami weng tambal uyo kuyak ipni aket tem daalamip dinim kesip o.
JOH 5:39 Ibi God ami Sukon Tem weng kabak tik-tiibip kaali, ipni aket kaali, kuuta dong dokoyulu suunkup ilin unang tunum kelum o, kala-lomdipla, tik-tiibip kabak-ali faneng, nami sang kaali, kanum bokosu. Katale,
JOH 5:40 ibi tildang nami lak duu-lom suunkup ilin unang tunum kelum o, kebip daa yo.
JOH 5:41 Tunum kiiyo, nami win kufup-nam-bam, ale kufup-tup disa yo, kebip kaali, nali aket ma fukun-umbi dinim;
JOH 5:42 ipni aket tem kaa utamiya, Ibi God ami aket uyo ma konsip dinim. Kemin,
JOH 5:43 nali Atok ami win diim talsii. Yale, ibi nami weng kaa weng sanokomup daa yo, kalip. Kemin, kano tunum kusnum ayo ma alami win diim talokoma kaata-kup, ami weng ayo weng sanokomip o.
JOH 5:44 Ipni aket kaali ti, nak-tunum kusal kiita-kup numi win kufuyin o, ken-umbip. Yale, ibi God maakup ata numi win uyo ma kufuyak o, kal-bomdipla, God ami weng ayo weng san kan-umbip disa; kemin, dok kano-lomdipla, taang-kala-lom nami lak kaali, duulamip dinim; ale, God ami lak kaa ma duulamip disa yo, ken-umbip.
JOH 5:45 Kemin, Ibi nami aket fukun-bamdiple, kaa numi ban kemin uyo Atok God ami diim ayo ku-fatap-daayokoma no, nokolip i! Kipni ban kemin kaami ku-fatap-dakayin ayo ti Moses ata-kup kemin, ibi aket fukun-bamdipla: Nuli Moses ami Lo kuluuli kutal-fuku dikiwa unokomup kulaali, uta dong dokoyulu yaap ke-lokomup o, kalbip. Yale, Moses ata ipni ban kemin uyo ku-fatap-daayokoma no.
JOH 5:46 Sawaayak Moses ami sukon tem dola kutiisa kaa, nami sang kaata dolsa. Kemin, ibi Moses ami weng kaali, weng san kutal-fuku dikiwa unsip dinam, nimi weng kuukal ti kano weng san kutal-fuku dikiwa unolip disa.
JOH 5:47 Kemin, ibi Moses ami weng dolsa kaali, kutal-fukusup o, kala-lom ibakan-umbip kemin, ibi dok kano-lomdip nami weng kakal ti kutal-fuku unokomip disa yo, ke-bam, Yesus ayo kanum bokoyila ko.
JOH 6:1 Yesus ayo Jerusalam kambola din Provins Galili kawu bom biile, Galili Wok Kumun sakbaalim dukum kaayo, lo yak malii una. Kemin, wok kumun kaami win ma kaali, Taiberius Wok Kumun o, ken-umbip.
JOH 6:2 Kemin, tunum unang yaapkan iyo Yesus ayo atam-ilomdip ami kukup akal alik akal alik iyo kanu-bamda, unang so, tunum so, imi mafak-alin kaa, talalu-yinba kala, kala-lomdip ami yaan tem unip ko.
JOH 6:3 Kulaa, Juda kasel imi ima Pasova inin iintang am uyo mepso tuluya kemin, Yesus ayo almi daang bakaalin tunum iso tam am du tikiin ma kawu tiin-ilomdipla,
JOH 6:5 tiin daka-bam talaala yi, Unang tunum yaapkan iyo nami fanang talabip kala, kalale, Yesus ayo Filip ami bokola-lomda: Nuli ima kaa doku ma mo-lomdupya, kulii-tal unang tunum yaapkan kii alik ifalup alik tik-nokomip yoko? kala-lomda
JOH 6:6 dap-kukumin weng ayo Filip ami bokola. Yale, Yesus ali utama yi, Mafek mafek kalawaali kanolokomi no, akale,
JOH 6:7 Filip asiik Yesus ami bokola ko: Nuli moni almi-kup tu handret (200) inang kaata, kuluu ima uyo ma molamup. Yale, kaa fan tik-nokomip dinim. Kemin, unang so, tunum so, alik ili ima katip kalawa ina-lomdip tik-nokomip disa yo, akale,
JOH 6:8 Yesus ami daang bakaalin tunum ma Saimon Pita ami niing Andru ayo bokola-lomda:
JOH 6:9 Man tunum man ma kaata, ima bret katip katip awakal ma aniing katip katip alep ma kiita kulii-tilba. Yale, kanolin kii unang tunum yaapkan kalawiili, tik-nokomip dinim o, aka ko.
JOH 6:10 Kemin, Yesus ayo balaasaal kon tem tambal ma bombe kala atam daang bakaalin tunum imi bokoya-lomda: Tunum unang bokoyiwa, balaasaal kon diim kawu tiiniwa yo, yakala bokoyip tiiniple, tunum ilimi-kup kaali, 5,000 iyo alik daak tiinip ko.
JOH 6:11 Yesus ayo ima bret ayo kuluu God ami, Yaap ke yo, anba-kup, unang tunum tiinbip imi kabaanuyila alik iyo iniwale, kano aniing yakal kuluu-lomda God ami, Yaap ke yo, anba-kup, imi kabaanuyila alik iyo ina-lom
JOH 6:12 tikniple, Yesus ayo alami daang bakaalin tunum imi bokoya-lomda: Ibi yak ima anung daam daam kutiibip kaa, tinanin daa; kela, afet daalin o, yakale,
JOH 6:13 ima bret katip katip awakal inamnip imi daam daam kiiyo, kumup-daa-lomdip basket talangkal abuulip dongnale,
JOH 6:14 unang tunum iyo Yesus ami kukup akal alik ma nolala, utam-ilomdip bokolip: Faneng kawi! kaa profet God ami bon tem weng bakayin tunum talokoma no, kala fen-umbip ata te! kemipla kulaali,
JOH 6:15 Yesus ayo utamaya, Unang so, tunum so, iyo baka-bamdip boko-lom: Dap-tal fuku-lomdup alik nuyo bokola-lomdup: Kaata numi kamokim king kelan o, aka-lomdupya, ata numi tiin mola ilum aa! kebip kala, kalba-kup, kamboyila alafin asuk am du tikiin una ko.
JOH 6:16 Kulaa am tiinule, Yesus ami daang bakaalin tunum iyo daak wok Galili Kumun dukum ami balang diim kawu iyo tam bot tem un-ilomdip,
JOH 6:17 asuk abip Kapeneam unum o, kala-lomdip, as kom alep ma wok ayo ilelip kayak kayak una-bala bot uyo una-bulu nikil yakyak bilin iip unip kutamiip-nule, Yesus ayo tal itamin disa; kama ilale,
JOH 6:18 kwin! inim sakbaalim ma kutal daa-lomda wok daang ayo an-kulaala tam aba daak aba kema. Kemin,
JOH 6:19 daang bakaalin tunum kii, kilomita awakal e, bukupkal e, samaan dukum kawu un-bomdip utamiwa yi, Yesus ali bot tem kaptam tiinba disa, la wok daang diim liip kulu yakyak bital bot mepso kulu tala-bala atam-ilomdip suunin dukum kemip. Lale,
JOH 6:20 Yesus ayo bokoya-lomda: Nalta kemin, suunin daa yo, yakale,
JOH 6:21 atam-ilomdip fiyaap duule, dip-taltam bot tem daalum o, kala dip-taltam daa kem-siliple, abiltap-siik utamiwa yi, Umbiyak kulunum o, kalbip uyo, talaalip, Fan bital wok balang diim tulup kala, kalip ko.
JOH 6:22 Unang tunum iyo liip dinim kemin, wok kumun malii kabaku silip sintam utamipya, Sinla kaa bot kuu maakup kemin, Yesus ali disa, daang bakaalin tunum ita-kup tam bot tem tiindip umbip o, kalaliwa, Yesus ayo fenipla,
JOH 6:23 kulaa bot yaapkan ukol alik ukol alik iyo abip Taiberius lo kabaku tal wok balang diim so kulu tiilipla, bokon kaali, Yesus ami Aalap God ami yaap ke yo, aka-lomda unang so, tunum so, imi ima kuya inabip kawu
JOH 6:24 kemin, unang tunum iyo utamiwa yi, Yesus so, almi daang bakaalin tunum iso, namti bom-bilip disa kala yaka-lomdip, iyo tam bot tem tiin-ilomdip Yesus ami fen Kapeneam unip ko.
JOH 6:25 Unang tunum iyo yak wok kumun malii yak ulipla yi, Kawu bombe kala kalale, atam dik-daalip ko: Kukuyin tunum kapyo, kabi dok kanumin diim kawu talbap yoko? aka, kanum bokoliwa,
JOH 6:26 Yesus asiik bokoya-lomda: Nali fan tituun-kup weng kaali, bokoyokomi. Ibi nami kukup talalmin akal alik akal alik tambal nobi kaami miit kaata, talalu utamum o, kalaliwa disa; ibi sinla ima ifali ina-lomdip, ibi ina-lom tikbip kaata, maso ma inamnum o, kalaliwa, nami fen talbip o?
JOH 6:27 Kipyo, ibi ima-inin suunkup ilin dinim kaami aket kaata-kup yan-laamin daa; kemin ipyo, suunkup ilin ima inamnip dong dokoya yam-titil-diiluya, suunkup suunkup ilokomip kaata-kup fen-bamdiwa, kaami aket kaata-kup, yeluya bomdiwa yo! kala-somla kemin, Atok God ayo uldaa nam-buu-lomda kanolin ima kukaayin ok uyo kulaap-na tildak Dukum Ami Man nami diim abasu. Kemin, ibi kanolin ima kaa dik-daalip namti, nita kuyokomi no, yakale,
JOH 6:28 isiik dik-daalip: Dok kanolin ok kaata kutal-fuku-bom-buluwa kawu, God ayo fiyaap duuyokoma ni? akipla,
JOH 6:29 Yesus asiik bokoya-lomda: God ami okok kemin kulaali, ibi God ami tunum ulduu-lom nam-baala talsii nami lak kaata-kup duulin o, kala-somya ko kala kanum bokoyale,
JOH 6:30 isiik ami weng kaali, bokola-lomdip: Kabi talalmin kukup tambal uyo ma kanu-balapla, utam-somdupya kawu, kapni weng kaali faneng kala, tukum o. Kemin, kabi kanimin kaata ma nuuyokomap yoko?
JOH 6:31 Numi awil-fakal iyo sawaayak kawu disanang bokon kawu tiin-bomdipla, ima mana kaa im-bisip kemin, God ami sukon tem weng kabak-ali boko-lomdu: Kalawaali abiil tikiin kaami ima kulaayila, tale-balaya in-bisip o, kalsu. Kemin, kapkal maakup kanola kukaayin-balawa yo, akipla,
JOH 6:32 Yesus asiik almi faldak-tiimin weng ma bokoyila ko: Ipyo, nali tituun-kup weng ma bokoyokomi kemin, weng san bom ilipla! Moses ali abiil tikiin kawu ima mana kaa kipni kawil-fakal imi kukaayinsa disa; Atok ata kukaayinsa. Kemin, kamala kala ali fan abiil tikiin suunkup ilin ima kaa, ipni kukaaya-yaaba. Kemin,
JOH 6:33 fan suunkup ilin ima bret kaa God ata kolase, kaali ti, God ata abiil tikiin kulaala tildaak ilomdu tawaal diim kasel unang tunum imi talalu-yimulu tiltam suunkup ilin unang tunum ke-lokomip o, yakale,
JOH 6:34 iyo boko-lomdip: Nak-tunum kapyo, kanolin ima bret kaata, suunkup kukaayin-balapya inum o, kalbup o, akiwa,
JOH 6:35 Yesus asiik bokola ko: Suunkup ilin ima bret yo, yiki kaali, nalta te! Tunum ayo ma nami fanang tildang nami miit tem tal-ilom, nami lak kaali, dukum-kup ma duula namti, kaami aket tem kaali, ima tinap tabelokomu dinim; wok tinap tabelokomu disa; tambal-kup ilokoma.
JOH 6:36 Kata, nami weng ma ipni bokoyasii uyo asuk bokoyokomi kemin, ibi nami tiin matum kaali, atam-silip. Yale, ibi nami lak kaa ma duu-silip dinim.
JOH 6:37 Unang tunum alik iyo Atok ata kup-nokoma kiili, nami fanang talokomip ale, kawanta tildang nami lak duulip namti, nali atin ti ma fotabam-nokomi disa; nali dabuulokomi no.
JOH 6:38 Nali abiil tikiin kaa kela tildaak-ilomdi, nalmi aket fukunin kaata-kup kutal-fuku unon o kala talsii disa; nali Atok nam-baala talsii ami aket fukunin kaata-kup kutal-fuku-bomdila, talsii no.
JOH 6:39 Atok ata nam-baala talsii ami aket kaali ti, tunum ulel-talasii kiili, maakup anang ma kelapya, maaklo kelama no, nakan-kaaba. Kemin, am mafiing diim kaa, iyo yim-folap tiltam tiinokomip o, nakan-kaaba.
JOH 6:40 Kemin, nami Atok ami aket kaali ti, unang tunum alik iyo nami man ayo talalu atam-ilomdip, God ami man namti kala bombe no, kala-somdipla, ami lak kaali, dukum-kup duulokomip kiita, suunkup ilin unang tunum keliwa yo, kala kanum bokolala, bom bii-lom am mafiing daanokomu kawu, atin ti nalalta imi yim-folila, tam tiinokomip.
JOH 6:41 Kemin, Yesus ayo boko-lomda: Abiil tikiin kawu suunkup ilin ima bret uyo talsuu no, yiki kaali nalta no, kala kanum bokoyilale, Juda kasel imi kamok kamok iyo weng san-ilomdip: Ibakaba no, kala-lomdipla, imi aket ayo ti aket atul dukum keyila,
JOH 6:42 weng yaapkan baka-bamdipya bokolip: Tunum kalawaali, Josep ami man Yesus kemin, ami awak-aalap ili itamsup kemin, kaali tawaal diim tunum nulultap. Kemin, ali kanimin o, kala-lomdala, nuli ibokoya-lomda: Nali abiil tikiin kawu talsii no, kalba ni? kemipla,
JOH 6:43 Yesus asiik bokoyila ko: Kipyo, disa kaa aket atul kep-na-lomdip, weng yaapkan baka-bam ale, weng yen-bam takena-una-tala-kemin daa yo!
JOH 6:44 Tunum maakup ma ayo dok kano-somdaya, almi aket fukunin kaali, tildang nami diim kaa taloma disa; kemin ale, Atok nam-baala talsii alalta, tunum iyo ulela im-taldang daap-naya, ilom am mafiing daanokomu kulu asuk yim-foliya, tam tiinokomip.
JOH 6:45 Kemin, sawaayak kawu, profet ita God ami Sukon Tem weng dolsip kabak-ali boko-lomdu: God ayo taba-lomda tunum so, unang so, alik iyo alami kukup kaali, kukuyokoma no, kalsu. Kemin, tunum unang alik ili God ami weng kaali, weng san-ilomdip utamip kiili, nami fanang tildang talen-umbip o.
JOH 6:46 Tunum ayo ma Atok ami tiin tituun dik-yak dela atamsa dinim; kemin, ti maakup nata-kup God so bom ale, atamsi no.
JOH 6:47 Ibi weng kalawuuli tituun weng bokoyokomi kemin, unang tunum iyo ma nami lak kaali, duulip namti, kiita fan ili suunkup ilin unang tunum kebip o.
JOH 6:48 Nali nalta suunkup ilin kaami ima bret kemin o.
JOH 6:49 Sawaayak kawu, kipni kawil-fakal iyo ima tambal mana kaali, disanang bokon kawu bomdip in-bisip. Yale, iyo bombii tiltam tunum sawal kele, taansip.
JOH 6:50 Lale, suunkup ilin ima bret abiil tikiin kawu talsuu kaa, akal alik o. Kanola tunum iyo inamnip namti, taanokomip dinim;
JOH 6:51 nalalta abiil tikiin kaami suunkup ilin ima bret kemin, abiil tikiin kaali, kelali tildaak talsii. Kemin, tunum ayo kawanta suunkup ilin ima bret kaali, kuluu inamna namti, ali suunkup suunkup ilokoma no. Suunkup ilin ima bret kaa kolokomi kaali ti, nami angtiil uyo lo-tabokomu kaata, kuyokomi kaali, tawaal diim kasel ipni iliim boyiliya, suunkup ilin unang tunum ke-lokomip o, kala kanum bokoyila.
JOH 6:52 Kemin, Juda kayaak kamok kamok iyo weng san-ilomdip, nikil iyo aket atul-kup ke una-tala-ke-bam, weng aal dikin-una-tala-ke-bamdip bokolip ko: Tunum kalawaali dok kano-somdaya, almi tiil kaa numi kuyila inam-nokomup i? kemipla,
JOH 6:53 Yesus asiik bokoya-lomda: Nali tifaneng bakayimbi kemin, ibi Dukum Ami Man nami tiil so, kiim so, iyo inam-nokomip disa namti, tiin kawang suunkup ilin kaami kukup uyo ipni iipyak tem kawu ilokomu disa. Kemin,
JOH 6:54 tunum unang kii kanta nami tiil so, kiim so, iyo inan-umbip namti, tiin kawang suunkup ilin kaami kukup uyo ilmi iipyak tem kawu be. Kemin, am mafiing diim kabaku nita yim-foliya tam tiinokomip.
JOH 6:55 Nami tiil uyo atin ti ima; ale, nami kiim uyo atin ti wok inin o.
JOH 6:56 Kemin, tunum ayo kawanta nami tiil so, kiim so, iyo inan-umba ayo, nimi diim kawu bombe aa, nakal ami diim kawu bombii no.
JOH 6:57 Atok ali nami nam-baala talsii, ali tiin kawong miit kayaak kemin, ata ami titil kaali, kup-nala suunkup bom tiinsi ultap kemin, nali tiin kawong miit kayaakim kemin, tunum ayo nam-buu-lomda ina namti, kaali nami titil ayo kolila, ali suunkup suunkup ilokoma no.
JOH 6:58 Nali nalalta, fan suunkup ilin kaami ima bret kemin, abiil tikiin kaali, kela tildaak talsii. Kemin, ima kaa kipni kawil-fakal disanang kawu bomdip im-bomdip taansip kanolin daa; tunum ayo kanola suunkup ilin ima bret kalawaali ina namti, suunkup suunkup ilokoma no, yakale,
JOH 6:59 Yesus ayo Kapeneam lotu am kaptamu weng kaa, kanum bakayin-bam kukuya ko.
JOH 6:60 Yesus ami daang bakaalin tunum yaapkan iyo weng kaa weng sanbip-kup, bokolip ko: Weng kaa bakaba kaali, uluum tabin weng kemin, kawanta weng kaa weng san kaal-ke-lokoma yoko?
JOH 6:61 Kanum bokolip katale, tunum ma ayo Yesus ami bokolama dinim. La, ali itama yi, Aket atul weng kanum boko aket fukunbip kala, kalale, itam-ilomda asiik bokoya ko: Kanolin weng bokoli kaa, kipni aket tem kabak ku-mafak-daaya nema?
JOH 6:62 Yak kanolip kulaali, ti ipkal nitamiwa yi, Dukum Ami Man Nali asuk tam nalami suunkup ilin kaami abip bombii kela talsii kaali, una kalip namti, ibi kanimin o, kalokomip i? Kaakal, kipni aket tem kabak ku-mafak-daayokomu nema?
JOH 6:63 Ibi tawaal diim kaldaak-ami mafek mafek kiimi aket kiita tiltam yan-ilomdip, ibi dong dokoyilipya, ibi suunkup ilin unang tunum ke-lokomip disa. Kemin, God ami Sinik ata unang tunum imi aket tem kaali, bam-dakaayin-balaya, aket fal-siki-lomdip, suunkup ilin unang tunum ke-lokomip o. Kemin, weng kala bokoyili kabak-ali Sinik Tambal alalta bam-daayilaya kawu, ibi God ami suunkup ilin unang tunum kelin o, kalbi. Yale,
JOH 6:64 iip maakup maakup ibi nami lak kaa duubip disa yo, yakaya kemin, Yesus ayo sawaayak kaptoowu yakyak kutal kamala kalawu diila kaata, utama yi, Kii kawanta nami lak kaali, duulokomip disa yo, kala, kala-lomda tunum ayo kawanta nam-baala yak waasi imi sikil diim abam-nokoma kala utamsa kemin, kaa kanum bokola ko.
JOH 6:65 Ayo kanum bokoyale: Kaa sawaayak kawu utamsi kemin, ibi bokoyili: Kanola Atok ayo tunum imi titil kuyokoma dinim kaali, dok kano-somdaya, tildang nami miit tem tal-ilomda nami lak kaa duulokoma disa yo, kalbi no, kala ko.
JOH 6:66 Yesus ami daang bakaalin tunum talangkal iso, malo yaapkan ma iso, nikil iyo bomdip, daang bakaalin tunum yaapkan iyo ami weng uyo kanum bokola weng san-ilomdip, weng kaa uluum dukum o, kala-lomdip iyo aso tal-unemin kaa, kelalip tabanip.
JOH 6:67 Kemin, Yesus ayo almi daang bakaalin tunum talangkal imi bokoya-lomda: Ipkal iso unum o, kalbip ema? yakale,
JOH 6:68 Saimon Pita ayo Yesus ami bokola: Kamokim kapyo, kanum bokolap. Yale, nuli kambop-ta kawanmi fanang unokomup? Tunum maakup kapta-kup suunkup tiin kawong miit kaami sang kaa, kukuya-laabap. Kemin,
JOH 6:69 kabi numi aket bam-daayilawa, utamuwa yi, Kabi God almi tunum tambal ale, atin ti ban dinim tam-buu-lom tam-baala taldaak tal-salap, maakup kapta-kup kala, kalbup o, akale,
JOH 6:70 Yesus asiik bokoya-lomda: Nalta tunum talangkal ibi ulelasi kemin, ipni iipyak tem tunum maakup ma ami aket tem ayo sinik mafak tal aba yak ami tiling tem unokoma. Kemin, ali Tunum Mafakim ami man keba no yakale,
JOH 6:71 Yesus ali weng kalawaali Judas ayo Keriot abip kayaak, Saimon ami man ami sang kaata bokola ko. Judas kaali, Yesus alami daang bakaalin tunum yale, asuk fal-siki-lomda, Yesus ayo baayala, yak waasi imi sikil diim abamna aalokomip, ata no.
JOH 7:1 Bombiile, Yesus ayo utama yi, Juda kayaak imi kamok kamok iyo nelum o, kalbip kala, kalale, Yesus ayo Provins Judiya kaa tal-unemami daa yo, kala-lomda, Provins Galili kawu tal-unema ko.
JOH 7:2 Juda imi Sel Am Disa Kiin Sin-yaamin ami iintang am kaali, mepso tuluya kemin,
JOH 7:3 Yesus ami nakal-fakal iyo tal bokola-lomdip: Tunum ma ayo kayak kayak kiita nitamik o, kala namti, ami okok kemin kaa maaklo yawaal-daa nolokoma disa; ali ti fatap diim kulu nuu-mokoma. Kanolin kemin, kapkal kanolin okok kemin kaali, kanumon o, kalap namti, kapkal tal fatap diim tal-ilomdap, unang tunum yaapkan imi tiin diim kawu kanu-balawa yo. Provins Galili kalawaali, kela din Provins Judiya din-ilomdap, kapni kukup akal alik ma kanu-balawa, kapni daang bakaalin tunum Judiya kawu ilin iyo titamik o, akipla,
JOH 7:5 ami nakal-fakal kiili, kaa God ami Man o, kalsip dinim kemin, weng kaa kanum bokolip ko.
JOH 7:6 Yesus ayo asuk nakal-fakal imi bokoya-lomda: Nami am kaa kama daan tiltam tilin dinim bombu; lale, ibi suunkup am daan-laan-umba kaali, numi am daanbu no, ken-unbip.
JOH 7:7 Kemin, tawaal diim kaldaak-ami unang tunum kiili, ipni itam finan-daa-lomdip disale, nali imi kukup mafak kaa ken-umbip kaami sang kaata, bakayin-biliya kaata, ili nitam finan-umbip.
JOH 7:8 Kamala kaali, ipkal iintang am daanbu kemin, din Jerusalam kawu lotu kemin o! yiki. Lale, nami am kaa daanin disa; kama bombe kemin, kamala kalaali nili din iintang am kaa, din unokomi dinim,
JOH 7:9 yaka-lomda Provins Galili kawu ila ko.
JOH 7:10 Yesus ami nakal-fakal iyo unipla, akal ilanale, yak aba din am iintang am daanuya, ayo, Unon o, kala. Katale, ali fatap diim kawu unsa dinim; ayo sawaan tem liip una.
JOH 7:11 Iintang am daanba diim kulu, Judiya kasel imi kamok kamok iyo Yesus kaa atamin disa bomdiwa, unang tunum imi dik-daaya-lomdip bokolip: Kaa doku bombe ni? kemipla,
JOH 7:12 kawu unang tunum iyo maaklo akolkup weng boko una-tala-kemipya kawu, malo ma bokolip ko: Kaali tunum tambal o, kemiple, malo ma ita bokolip: Ee, kaali unang tunum imi ibakayin tunum o, kemip.
JOH 7:13 Katale, ili Juda kasel imi kamok kamok imi atul kaata, itam finan-daa-lomdipla kemin, tunum iyo ma Yesus ami win kaali, ma ku-fatap-daa bakamalip dinim kelip.
JOH 7:14 Kemin, iintang am daanbu kaali, am anung ma disa kelale, am anung ma bombe kawu, Yesus ayo tam lotu am diilim kaali, tam-ilomda unang tunum imi weng uyo kukuyin-bamda bakayilala,
JOH 7:15 Judiya kasel imi kamok kamok iyo ami weng bakaba kaali, weng san-ilomdip aket dukum fukun-bam boko-lomdip: Yak kanolin tunum kala numi skul ma kama-unsa dinim; lale, kaa doku utam-laamin dukum kaa, dik-daa kuluusa kemin, kanum bokola yoko? akipla,
JOH 7:16 Yesus asiik bokoya-lomda: Kukuyimbi kalawaali, nalmi aket fukunin kaata-kup ibi kukuyinbi disa; God, nam-baala talsii, ami weng kaata-kup bakayinbi no.
JOH 7:17 Tunum ayo ma God ami aket fukunin kaata-kup, kutal-fukulon o, kala namti, kanolokoma kaa, ali nami weng bakabi kaali, utama yi, Kaa God ata bokolaya tal bakaba ne? alalta disa alami aket fukunin weng tal bakaba ne? kala, kaal ke-lokoma.
JOH 7:18 Tunum ma ayo alami aket fukunin weng-kup bakaba namti, ayo Kanu-biliya, unang tunum iyo nitam-ilomdipya, nami win kaa, kufup-nin o, kalba kayi! Aa, tunum ma God ata nam-baala talsii ami win kaata-kup kufolon o, kalba namti, ali ibakamin weng kaa, bakamin dinim; weng tituun-kup bakamin tunum o.
JOH 7:19 Kemin, sawaayak kaali, Moses ayo Lo umi weng ma kukaa-daasa. Yale, alik ibi lo kuuli ma kutal-fukusip dinim; kemin, ibi kanimin o, kala-somdipya, nali nelum o, kalbip i? yakale,
JOH 7:20 unang tunum isiik bokola-lomdip: Kabi sinik mafak ata nema kapso bombe kemin, bakap-tamba nema yo? Ili kawanta telum o, kalbip yoko? akipla,
JOH 7:21 Yesus asiik imi weng kanum bokolip kaali, bokoyila ko: Nali lotu kemin tambal akal alik ma nosii kawu ipni aket kaali, ku-foyilu fanang mafak keyasuu.
JOH 7:22 Moses ayo Lo ma kuuyilale, kukuyila-lom: kemin iintang am daansuu diim kawu okok kemin tambal akal alik maakup ma nosii kawu ipni aket kaali, Man tunum ayo kuule, bii am fetkal kelale, angtiil ipnaal kaa, bola-yaamin kemin, ibi kaali utamsip. La, man kaa am oklungkal kela namti, kaali God ami iintang am daana kala kalip, kaakal ami ipnaal kaali, bola-yaabip o. Kaa Moses alta-kup kanolin kukup kaa iluusa disa; awil-fakal ita siin kawu nuu-bisip. Yale, Moses ami kukoliwa, ayo ipni kukuyinsa.
JOH 7:23 Kemin, ipni Moses ami weng kutiisa kaali, lo-laamin dinim, kibi kutal-fukulin o, kal-bomdipla, God ami iintang am kaa, ibi man ipnaal bo-kukan-tiiyin-bamdip, Kaali tambal o, ken-umbip. Kemin, nakal ipni kanun-umbip tap, nakal iintang am ma daanuya, tunum ayo dap-talalulila tambal keba kemin, ibi kanimin o, kalaliwa, nami aket atul-kup kukaap-nambip yoko?
JOH 7:24 Ibi disa kawu bomdip tiin kaata-kup natafiimin daa; talalu nitafii-bamdip, tambal-kup nuuba ne? mafak nuuba ne? kemin o, kala ko.
JOH 7:25 Ami weng kaali, bokola disa kelule, kulaa Jerusalam unang tunum malo ma iyo bokolip ko: Tunum kalawaa kamok kamok iyo aalum o, kebip namti kalabe nema yo?
JOH 7:26 Kaa atamin! Ayo tal unang tunum yaapkan tem kalawu ilmi tiin diim weng bakaba kawu, kamok kamok iyo weng kaa ma bokolamip disa kelipla, kamok kamok iyo maaklo atam, Kaali God ami uldaa-dabuusa tunum o, kala ali Kraist ata no, kala-lomdip aket fuku-daka-bam kenbip ema?
JOH 7:27 Daa. Nuli atamupla, Ali kaloku ma kela talba kaali, kaal-kebup. Yale, Kraist ami talokoma kaali, utamduwa, Awu, kaali kaloku talba no, kalokomup disa yo, kalip ko.
JOH 7:28 Yesus ayo lotu am diilim kaptamu kukuyin-bamda, ayo weng dukum-kup bokoya-lomda: Ibi nali nitam-ilom nami doku talsi kaali, ibi fuku-daa-lomdip kaal-kesup o, kalbip. Katale, ibi talalu nali natamsip disa yo. Nalami aket fukunin kaata, talsi disa; God ayo fan bombe kemin, alalta nam-baala talsii. Katale, ibi kaa talalu atamsip disa yo.
JOH 7:29 Nata-kup atamsii le, Alim maakup bom-ilomdupla, kawu nam-baala talsii kemin, nata atamsi no, kala ko.
JOH 7:30 Kanum bokolaya, ayo dap-tal-fukulum o, kalip. Lale, ami taanokoma kaami am kaali, daan tiltam tabin disa kemin, God ata del molaya, iyo dap-tal fukulamip dinim kelip.
JOH 7:31 Katale, unang tunum yaapkan iyo Yesus ami lak duulip kii boko-lomdip: Kraist kaa, God ami uldaa-dabuusa ami talokoma ami kukup yaapkan akal alik nuu-mokoma kawu, tunum kalaami kukup akal alik kaa kanum tabasa kaali, kabaak banokomu disa; kemin, Kraist kaa, God ami uldaa-dabuusa tunum namti kula bombe no, kalip ko.
JOH 7:32 Tunum unang yaapkan iyo Yesus ami sang kaali, weng san-ilomdipla, kala weng bakamipla, Falosi iyo weng selipya, iyo kanum bakabip, kala, kala-somdipya, Falosi so, awem tunum imi kamok kamok so, iyo lotu am bolis yim-baalip din Yesus ami dap-tal-fuku-lomdup sok dedulum o, kala uniwale
JOH 7:33 kulaa, Yesus ayo almi taanokoma kaami sang kaa, unang tunum imi bokoya-lomda: Nali ipso bombii ke-lokomi disa. Nali asuk keyilali, asuk God nam-baala talsii ami fanang unokomi. Kemin ale,
JOH 7:34 nami din ilokomi kaa, ibi ma taang-kala-lomdip tal aba tam nami ilokomi kaa, din unokomip disa yo. Ibi nami fenokomip. Lale, ibi nita-mokomip dinim o, yaka ko.
JOH 7:35 Kanum bokoyilaya kemin, kamok kamok iyo weng bokola una-tala-ke-bam taken-bam bokolip: Ali dok banaya, nuli atamin disa ke-lokomup i? Ayo nuli keyilala, umbilin Juda imi sawaayak din abip Grik kasel imi abip ma laabip kawu iso bomdala, Grik imi weng bakayin-bam kukuyokoma nema?
JOH 7:36 Ali boko-lomda: Nali din kawu ilokomi kaali, ibi taang-kala tal aba din unokomip disa yo, yakale, weng ma kaata boko-lomda: Ibi nami fen-tal-une-mokomip. Yale, kibi nita-mokomip dinim o, kala kanum boko kela kemin, weng kabak-ami miit kaa kanimin o, kala ni? kemip.
JOH 7:37 Juda imi Sel Am Disa Kiin ami iintang am kaami am mafiing diim daana kaali, am dukum daanule, Yesus ayo kulu tal aba tam unang tunum imi tiin diim kawu tola-lomda, weng titil-foko bokoya-lomda: Kipyo, dok kanolin tunum ata ma wok tinap kelula, nami fanang tala namti, ali wok kaata ma koliya, ayo inamnak o.
JOH 7:38 God ami Sukon Tem weng kabak boko-lomdu: Kawanta nami lak duulokoma namti, ali nami suunkup ilin wok kaa dalawa-laamin dinim kaali, ma koliya ami aket tem kaali, suunkup donga-lom basel-balaya, ayo kayak kayak iyo dong dakaayokoma no, kala kanum bokosu no, yakale,
JOH 7:39 Yesus ayo God ami Sinik ami faldak-tiimin weng ma bokola kaali, unang tunum iyo kawanta God ami lak duulokomip namti, God ayo taba-lom almi Sinik kuyokoma ami sang kaata bokola. Kemin, am kula daanbu kaa, Yesus ali tawaal diim kala kela Aalap God ami fanang unin dinim ilala, God ali alami Sinik ayo dabaala tildaak tilin dinim ilaya, Yesus ami weng kaa: God ayo almi Sinik ayo kuyokoma no, kala-lomda kanum bokosa ko.
JOH 7:40 Unang tunum yaapkan iyo kanolin weng kaali, weng san-ilomdip, malii ma iyo bokolip: Atin ti faneng te! tunum kalaali profet imi God ami weng bakayin tunum talokoma no, ken-umbip namti ata te! kemiple,
JOH 7:41 unang tunum malo ma ita boko-lomdip: I fan, ali God ami tunum uldaa-dabuusa tunum Kraist o kaliwale; aa, malo ma kiita boko-lomdip: Kraist ali Galili kayaak disa kemin, kaali Kraist disa yo.
JOH 7:42 God ami Sukon Tem weng kabak-ali boko-lomdu: Kraist kaali, Devit ami man loop o, kalale, Devit ami abip diildiil Betleam kawu duulokomu no kala, kanum bokosu kemin, Yesus ata daa.
JOH 7:43 Kemin, unang tunum iyo Yesus ami kalan o, kala biki-lom yak-una-tildak-una-ke weng aal dikimipla,
JOH 7:44 tunum malo ma kiita, Yesus dap-tal fukulum o, kalip. Katale, tunum ma ata taba-lomda Yesus ayo yak dap-tal-fukulin dinim, kelip ko.
JOH 7:45 Lotu am bolis iyo Yesus kambola asuk din Falosi so, tunum awem imi kamok kamok iso, imi fanang din itamipla, iyo dik-daayilip: Ibi kanimin o kala ayo dap-tal-fuku dibii-tilin disa kelip yoko? yikipya,
JOH 7:46 lotu am bolis isiik bokolip ko: Sawaayak kaa tunum alaltap ma bomdala, kanolin weng tambal kaa ma baka-bisa dinim o, kalalupla kemin, kela tulup o, yikipla,
JOH 7:47 Falosi iyo bokolip: Kulaa ipni kasen-kasen-yin-bamda bakayilaya, Ibi fan o, kala kambola tilip ema?
JOH 7:48 Falosi nusole, kamok kamok iso, nuli katip so ma ami lak duusup disa yo.
JOH 7:49 Ale, unang tunum Yesus ami lak duulin kiili, Moses ami Lo utamsip dinim kemin, iyo God ayo itama yi, Kii win dinim ke maaklo ke-lokomip o, yinsa no, kemip.
JOH 7:50 Kanumipya, tunum kamokim ma iso tiinbip ayo, Nikodimas ayo siin kawu din Yesus atama weng bakamsip ata, ap-tunum kusal imi bokoyila ko:
JOH 7:51 Numi Lo kaa boko-lomdu: Ibi tunum ayo disa kawu dabuu dap weng bakamin baan diim kaa dakamin daa yo kalsu! Kemin, kamasi ami weng kaali, kuluu-somdipya, kaata ami weng sole, kukup so, kiita talalu utam-somdipla kawu, kaata dap weng bakamin baan diim uyo daalin aa! kalsu no, yakale,
JOH 7:52 iyo atafiimin weng kanum bokolip: Kabi Galili kayaak ililtap win dinim tunum ke-lomdap, kanum bokolap o? Kabi God ami weng kabak talalu tik-tii-lomdap utam, Awu fan, Galili tunum ayo ma tiltam profet ke-lokoma no, kalsu daa yo, kala-lom atamdawa yo, akipya,
JOH 7:53 [unang tunum alik iyo sekela alami am e kala une-bala-tale-bala-kelipla,
JOH 8:1 Yesus akal Jerusalam kaali, kambola yak aba tam amdu Oliv Tikiin una ko.
JOH 8:2 Sintam kutim malang tem kawu, asuk tal aba lotu am diildiil tam unale, unang tunum yaapkan iyo taltam falala-dabak-moliple, Yesus ayo daak tiin-bomda weng bakayin-bam kukuyin-balaya,
JOH 8:3 lo kukuyin tunum so, Falosi iso, iyo unang ma sadiki-bulula utamsip. Kemin, iyo umbii-tal ami diim daalip tolnula,
JOH 8:4 Yesus ami bokolip ko: Kukuyin tunum kapyo, unang kalawuuli imak kela bomdu sadiki-buluya kemin, umbii-tulup o.
JOH 8:5 Numi kukup kaali, Moses ami Lo kaa bokoya-lomdu: Ibi kanolin unang kuu tuum ta bina daa welipya, taanuk o, kalsu. Kemin, kabi kanimin o, kalokomap i? akipya,
JOH 8:6 imi aket tem kaalile, weng kaa dik-daaluwa, weng tambal ma bokoyin disa kela kala, kalalupya kawu, dip-tama din kot baan diim daa-lom kawu dap-fatap-daalum o, kala-somdipya kemin, kanum bokolip. Katale, Yesus ayo dabuna bomda sikil diil ta daak tawaal kabaaku dolmale,
JOH 8:7 iyo tola-lomdip weng kaali ti, dik-dakaalin-kup ke-bilipya, Yesus ayo tam tola bokoyila ko: Dok kanolin tunum kapta ma ban kemin dinim ke-laabap namti, kapsiik tuum ma kuluu binalapla yo! yakale,
JOH 8:8 asuk daak tiin dabuna sikil kulaak tawaal kabaaku dolmale,
JOH 8:9 iyo kanolin weng uyo weng san-ilomdip, tunum alik maakup maakup iyo tam daak saak lo aba tunum kamok kamok isiik dusiin daa une-bilipla, tunum malo ita mafiing kawu unip ko. Alik unipya, Yesus so, unang kabuu uso, ita-kup keyila unipya,
JOH 8:10 unang ulufin Yesus ami miit tem tolnule, Yesus ayo dabom kufo tiyak daa utam unang uyo bokowa ko: Kupyo, ali tunum maakup ma ayo taba-lomda tam-bak-molon o kalokin dinim ema?
JOH 8:11 wakale, Ayo, ili ma kalokin dinim ta! akule, Yesus ayo bokowa ko: Nakal kanola tam-bak-molon o, kalokomi disa kemin, kupyo, unan aa! Katale, din unokomap kaali, maso ma ban ke-laamin disa yo, kala kanum bokowa ko.]
JOH 8:12 Yesus ayo Falosi imi bokoyila ko: Tawaal diim kasel unang tunum imi yokon dawong kaali, nalta kemin, kawanta ma nami daang bakaalon o, kala namti, ali nami dawong kaata, ami aket tem uyo falala-kup keluya, ali kutamiip tem kawu ilokoma disa. Kemin, ali falala-kalin diim tunum ke-lom suunkup ilokoma no, kalale,
JOH 8:13 Falosi isiik bokola-lomdip: Kabi kaltapni sang-kup bakabap kaali, ti yaap kep-tuya, bakan-umbap disa. Kapni weng kaa, tituun weng disa yo, akipla,
JOH 8:14 Yesus asiik bokoya-lomda: Nali utamiya, Kawu liip talsi aa, kawu liip unokomi kala, kalbi kemin, nalmi sang-kup bakabi kaa, atin ti faneng te! Kemin, ibi nitamiwa yi, Ali dok liip talse nambip disa le, nami unokomi kaali, ibi utabip disa yo.
JOH 8:15 Ibi tawaal diim kasel imi tunum yam-kukumin kaami kukup kaata, aptum kusal imi itafii-bamdipla, yam-kukun-umbip. La, nali ipni tunum kii yam-kuku-bam itafiimin umi kukup uyo, nali kanun-umbi disa.
JOH 8:16 Yale, kanola nali yam-kukumi namti, kaa nata-kup disa; Atok nam-baala talsii alalta-kup tiin mo-balaya, Alim ke-lom yam-kuku-mokomup. Kemin, nami yam-kukumin kaali, tifan tituun-kup yam-kuku-mokomi.
JOH 8:17 Kemin, ipni Lo yo, kala weng kutii-lom dola kutiisip kaali, boko-lomdu: Kanola tunum alep iyo weng maakup ma bokola-bokola-ke-lokomip kaali, weng talalmin tunum akal weng sandaya, kaami aket kaali, Atin ti fan o, kalak o, kalsu.
JOH 8:18 Kemin, nali nalmi sang kaata-kup suunkup bakayinbile, Atok nam-baala talsi alalta kanola nami sang kaata-kup bakayin-bam be no, yakale,
JOH 8:19 iyo dik-daala-lomdip: Kapni kaalap kaa doku bombe ni? akiwa, Yesus asiik bokoya-lomda: Ibi nali natamsip disa kemin, nami Atok akal atamsip disa yo. Ibi nali nitamsip dinam, ibi nami Atok akal atam kesip o, yaka ko.
JOH 8:20 Yesus ami weng bakayinsa kaali, lotu am diildiil dukum kaami anung moni kutiimin am kaptamu weng bakayinsa. Kemin, iyo tiyak dip-tal-fukulum o, kala-silip. Lale, Aalap God ayo utama yi, Nami Man ami am kutensi kaali, kama daanin disa, bombuu kala, kala-lomda del mola kambolip ko.
JOH 8:21 Am ma daanule, Yesus ayo asuk bokoya-lomda: Am ma daanokomu kaali, nili kano keya unokomi. Kemin, ibi fen-tal-une-bam nita-mokomip disa; ale, ibi iltipni ban kemin kaami uluum kuuta yim-baak-molu, taanokomip o. Ale, ibi nami abip unokomi kaa, ibi tal aba din talokomip disa yo, yakale,
JOH 8:22 Juda imi kamok kamok iyo taken-una-tala-ke-bam bokolip: Kalawaali kanimin o, kala boko-lomda: Nami abip unokomi kaa, ibi tal aba din unokomip dinim o, kala ni? Ali binang aalokoma kemin, bakaba ne? kemiwa,
JOH 8:23 Yesus ayo bokoya-lomda: Ibi tawaal diim tunum ale, nali tawaal diim kalaami tunum daa. Ibi tawaal diim kalaami tunum, ale nata, asal kaptam-ami tunum.
JOH 8:24 Kemin, ibi bokoya-lomdi: Ibi iltipni kukup mafak kaami uluum kaata keyula, kaaso taanokomip o, yiki. Ibi kaa, Niyo kano Suunkup Ilin Kaa Nalta kemin o, kala, nokolip disa kelip kulaali, ibi kukup mafak so kemin, taanokomip o, yakale,
JOH 8:25 isiik bokola-lomdip: Kabi kawanta yoko? akiple, Yesus ayo bokoyila: Siin kaptoowu nalami sang kaa bakayila-laabi, ayo nalalta no.
JOH 8:26 Ipni kukup mafak kanun-umbip kaami sang kaali, yaapkan bakayin-bamdile, ipni kukup kiili, yam-kuku-bam weng yim-bak-saanami. Katale, kamala kalawaali kanolokomi dinim kemin, tunum nam-baala talsi ayo fan, tituun-kup tibin tunum o. Ami weng kaali, nali alik weng san-ilomdiya, nata tawaal diim kasel imi bakayinbi no, yaka ko.
JOH 8:27 Ili utam, Awu, kaa alami Aalap God ami sang bakaba kala, kalolip dinim keliwa,
JOH 8:28 Yesus ayo bokoyila-lomda: Am ma daanokomu kaali, ibi Dukum Ami Man Nayo, nam-tam-folokomip kawu nitamiwa yi, Niyo kano Suunkup Ilin Kaa Nalta kemin o! kalokomip, kulaata utamiwa yi, Okok kemin kaa kanun-umbi kaa, nalafin kanun-umbi disa; le, nalmi aket fukunin daa yo; Aalap ata weng kaa bakaan-balaya, bakayinba kala nokokomip o.
JOH 8:29 Atok ata ulduu-nam-baala talsii ayo kaata kanuman o, namba kaata, nali suunkup kanu-biliya, nami fiyaap kaali, duun-unba. Kemin, ali kep-nimba disa; ali naso suunkup bom-balaya, kanubi no, kalaya,
JOH 8:30 tunum yaapkan iyo Yesus ami weng kaa kanum bokola kaali, weng san-ilomdip ami lak kaa duubip ko.
JOH 8:31 Yesus ayo Judiya kasel ami lak duusip imi bokoya-lomda: Ibi nami lak kaa duu nami daang bakaalin tunum kep-nip kemin, ibi nami weng kaali, suunkup kutal-fukulin-kup ilip namti, atin ibi nami daang bakaalin tunum alik-daap ke-lokomip o.
JOH 8:32 Ibi nami tituun weng kaali, kaal ke-lomdip, Atin ti tifaneng o, kalokomip kaata, nali tal-daa-yim-baaliya, ibi tambal-kup ilokomip o, yakale, kulaa isiik bokola-lomdip:
JOH 8:33 Numi awaalik Abraham ami man loop kemin, tunum ayo ma nuli sok de-yimulaya, ami okok kemin kaa ma fukusup disa te! Kabi boko-lomdap: Tal-daa-yim-baalila tambal-kup ilokomip o, kebap kaa kanimin o yakap yoko? akipya,
JOH 8:34 Yesus asiik bokoya-lomda: Nali tituun weng bakayinbi no. Ibi ban kemin kukup kaa, suunkup kutal-fukusip namti, ibi iltipni kukup mafak kaata, taba-lom im-baak-mo sok de-yimusu no.
JOH 8:35 Tunum disa sok dedulip okok kemin tunum ayo tunum man alimal imi iipyak tem kawu suunkup abiin tambal ma tiinokoma disa; kuno keya unale, tunum man ata-kup suunkup alimal imi iipyak tem kawu abiin tambal-kup tiinokoma.
JOH 8:36 Kemin faneng, God ami man nita, til-daa-yimbaali namti, atin ti ibi tambal-kup ilokomip.
JOH 8:37 Kemin, nali ibi itamiya, Ibi iltipni kawaalik Abraham ami man loop o, kalbip. Yale, ibi nami weng bakabi kaali, ma kuyak aket tem daabip disa kemin, ibi nelum o, kalbip.
JOH 8:38 Nali ipni weng kaa kukuyinbi kaali, Atok so Alim maakup bomdupla kaali utamsi kemin, bakayinbi no. Kata, ipni kukup kaata kanu-biliwa, ipni kaalap ata kukuyin-balaya, kanun-unbip o, yaka ko.
JOH 8:39 Isiik bokolip: Numi atok kaali, Abraham ata-kup o, kalipla, Yesus asiik bokoya-lomda: Daa yo! ibi fan Abraham ami man loop dinam, ibi ami kukup tambal kanumsa kaata-kup, kutal-fukulalip. Yale,
JOH 8:40 ibi fen-tal-une-bam nelum o, kebip kemin, ok alik kaa ken-umbi kaali ti, God ami tituun weng kaata kuluu-lomdiya, bakaya-tabasi no. Ipni kukup kaa kanubip kaali, Abraham ali kaa kanu-bisa dinim te!
JOH 8:41 Ibi iltipni kaalap ami kukup kaata, kuluu-lomdiwa kanun-umbip o, yakale, isiik bokola-lomdip: Daa yo! nuli liip man disa yo! Numi atok kulaali ti, God maakup kaata-kup o, kalbup kemin, nuli fan ti alami man alik-daap te! akipla,
JOH 8:42 Yesus asiik asuk bokoyila ko: God ayo fan iltipni kaalap dinam, ibi nali natamiwa, nili fan Atok aso Alim maakup tiinsupla nam-baala talsi kala, kala-somdipla, nami aket kaali, kup-namip. Lale, ibi nami aket kup-namip disa yo. Nali nalmi aket fukunin kaata-kup talsi dinim; God ata nam-baala talsii te!
JOH 8:43 Kemin, kanimin ma nolum o, kala-lomdiwa, nami weng kaa talalu weng san-silip disa yi? Nami weng kaa, weng sanamup dinim o, kala-lomdip talang tem akiibip ko.
JOH 8:44 Kipni kaalap kaali, Tunum Mafakim ata kemin, ibi ami man te! Ibi ami aket fukunin kaata-kup kutal-fukulum o, ken-umbip. Siin kaptoop ali ti unang tunum iyo yan-umba. Ali tifan kaami kukup kaali, ma kutal-fukusa dinim kemin, ali ti suunkup ti tifan kaami aket-kup fukun-umba dinim. Kemin, kaa ti ibakamin miit kayaak ale, ibakamin tunum imi aalap o. Ami ibakamin kaa, almi suunkup kaata ti, kutal-fukun-umba.
JOH 8:45 Kemin, nali fan tituun weng kala bakaya-unbi kaali, ibi nami weng kaa weng sanamup daa yo, kalalipla kep-na-laabip.
JOH 8:46 Kemin, kawanta ma nili nitamiwa, Kaa kukup mafak keba no, nikip kaali, nam-fatap-daalin dinim yoko? Kemin, nali weng kaa tituun weng-kup bakabi kaa, ibi kanimin o, kalalipla weng sanakin disa kebip i?
JOH 8:47 Atok God almi man alik-daap kiita, God ami weng kaali, weng san kutal-fuku-unokomip. Ale, ibile God ami man daa; kemin, ami weng kaali, Kaa weng sanum o kalup daa yo, ken-umbip o, kala kanum bokoyila ko.
JOH 8:48 Judiya kasel imi kamok kamok iyo Yesus ami bokola-lomdip: Kapni Moses ami Lo kup-tinsa kaali, kutal-fukusap disa; kabi Sameria tunum kemin, kutal-fukusap disa. Kabi sinik mafak ta tiin molaya, kanum bakabap o, kala-lomdup kaa faneng ema yo? akiple,
JOH 8:49 Yesus asiik bokola: Ee, nali sinik mafak disa; kemin ale, nali Atok almi win kaata-kup kufon-bilile, ipta nami win kaata dimilup kabaak banak o, ken-umbip o.
JOH 8:50 Nami aket fukunbi kaali, unang tunum ili nami win kaata kufup-nin o, kalbi daa; Atok ata nami Man ami win kaata kufolin o, kalba. Kemin, Atok ata, nami win kufup-nin disa kebip imi yam-kuku-lomda yam-bak-saanbi molokoma no.
JOH 8:51 Nali fan tituun-kup weng kaa bokoyokomi kemin, kawanta nami weng kukonbi kaa, weng san kutal-fuku-kulii-tabokoma kaali, taan-ilomda atin maaklo disa ke-lokoma disa yo, kala ko.
JOH 8:52 Juda kamok kamok isiik bokolip ko: Kamala kulu titam kukulupla, kabi sinik mafak ata kabi tiin molala bom-balap o, tukup te! Abraham akal taanale, profet yakal taanip kesip kemin ale, kapta boko-lomdap: Kawanta nami weng kukonbi kaali, weng san kutal-fuku-kutama-unokoma ayo atin taan-ilomda maak lo disa ke-lokoma dinim o, kalap ema?
JOH 8:53 Numi awaalik Abraham ali taansa. Ale, kapni aket fukunin kaata, Abraham ayo kabaak banale, nita nita kesi no, kebap ema? Kanola profet yakal ti taansip. Kabi aket fuku-daa-lom: nita nita kesi no, kebap yale, atin ti kabi kabak banap te! akipla
JOH 8:54 Yesus asiik bokola ko: Nali kano nalmi win kufumami kaali, unang tunum iyo nami weng kaa, weng sanamip dinim o. Nami win kufup-nin kaa nalta daa; Atok ata-kup kemin, alalta ibi boko-lomdip: Numi God o, ken-umbip ata-kup. Yale,
JOH 8:55 ibi kaa talalu atamsip disa kemin, nata-kup atamsi. Ale, nata boko-lomdi: Kaa atamsi disa yo, kalomi kulaali, nali iltiptap ke disa ibakamin tunum kelami. Yale, nali kaali talalu atamdiya kemin, ami weng so, kukup so, kiita kutal-fukusi.
JOH 8:56 Kemin, ipni kawaalik Abraham ayo sawaayak sawaayak kaptoowu, ali talokoma no, kala-lomdaya, fen-umba. La, ibi nitama yi, Talse kala, kala-lomdaya, fiyaap sakbaalim dukum uyo duumsa no, kala.
JOH 8:57 Kemin, Judiya kasel imi kamok kamok isiik bokolip ko: Kwin! Abraham ali sawaayak kawu taansa kawi! Kabi tunum dukum kelin dinim, disa bom-balapla, kaata Abraham atamsi no, kalbap yoko? akiwale,
JOH 8:58 Yesus asiik bokoya-lomda: Nali fan bakayinbi te! Nali sawaayak kaptoop, Abraham ali duulin dinim bom-buluya kawu, bom-biisi no,
JOH 8:59 yakale kulaali, iyo daak tuum ta kuluu-lomdip aalum o, kemipla, Yesus alta almi kawaalaya, atamin dinim keliwa, lotu am diilim uyo kambola tam bana ko.
JOH 9:1 Kemin, Yesus ayo liip kawu un-bom talaala yi, Tunum ma awak mat tem kabaku tiin bakiilin ma duusu ayo atamale,
JOH 9:2 almi daang bakaalin tunum iyo dik-daalip ko: Kukuyin tunum kapyo, yak kaa dok kanolin kaata ma ban kelala, ami tiin kaali, bakensuu ni? alalta ne? almi awak-aalap ita ne? akipla,
JOH 9:3 Yesus ayo bokola: Daa! kuyak ami ban kemin diim kabak tinimin daa; awak-aalap imi ban kemin diim kabak daa. Ami tiin mafaksa kabak ap-tunum kusal iyo atamiwa yi, God ami titil sakbaalim dukum ayo ami diim kawu okok daaluya kawu ata-mokomip o, kala kali ko.
JOH 9:4 Kutamiip-nokoma kaali, tunum dok kanolin ata ma okok ke-mokoma disa; kuluwaa atan tal unebu tap kawu, nuli suunkup God ata nam-baala talsii ami okok kemin-kup kaa ke-bamdup bom-buluwa, atan ayo tem ba una kala, kalum aa!
JOH 9:5 Nali tawaal diim kalawu bombi kaali, unang tunum alik imi yokon dawong kesi no, kala ko.
JOH 9:6 Kanum bokoba-kup, Yesus ayo mok tak-daala daak tawaal abamnale, mok so, tawaal so, kiili an-fal-siki-lomda, tawaal kuluu kuyak tunum ami tiin diim kabaku kabela-lomda, bokola ko:
JOH 9:7 Din-ilomdap, wok kumun Siloam kawu kapni tiin matum kaa ding-nan o! akala kemin, wok kumun kabaak-ami win miit kaali, boko-lomdip: Dabaala Unemin o, ken-umbip kemin, tunum tiin bakiilin ayo din ami tiin matum kaali, diinga tiyak daa mafek mafek kaali, itam-ilom, asuk talale,
JOH 9:8 ami kayaak sole, unang tunum ami nen-bala atafiin-umbip iso, iyo dik-daalip: Kalawaali tunum tiin-bomda nen-umba ata nema? kalipla,
JOH 9:9 malo iyo bokolip: Ayo, kulaata taa! kaliwale, malo ma ita boko-lomdip: Ee, Kaa, ka daa. Kemin, kaali alaltap ma ata no, kemipla, tunum alalta bokola: Ayo, nalalta te! yakale,
JOH 9:10 iyo dik-daalalip ko: Kabi dok kano-lomdapla, kaa talakabap i? akipla,
JOH 9:11 ayo bokola: Kaaye? Tunum ami win kaali Yesus o, ken-umbip kulaata, tawaal fuk-duu-lomda nami tiin matum tal-daap-na-lom bokop-na-lomda: Din wok kumun Siloam kabaaku tiin matum uyo diing-nan o! nakaya, din ilomdi tiin matum ayo diinga kem-silile, kwin! abiltap-siik mafek mafek namti utami kala, kala-somdiya tali no, yakale,
JOH 9:12 Tunum kaa doku ma bombe ni? kemipla, Mo te! yaka ko.
JOH 9:13 Kemin, unang tunum iyo tunum tiin bakiilin Yesus ata dap-talalula, ayo dabuu dibii Falosi imi fanang unip.
JOH 9:14 Yesus ami tawaal kuluu-lomda tunum tiin bikiilin ami dap-talaluba kaali, iintang am o, kala lotu am daanbu kawu dap-talaluba kemin,
JOH 9:15 Falosi yakal tunum ami dik-daalip ko: Kaa dok kanop-talala, kabi mafek mafek kaa atafiibap i? akipla, ayo bokoyila ko: Ali tawaal ta fak-duu kuyak nami tiin tiip-nale, nalalta tiin matum kaali, dinga-lomdi atami no, yakale,
JOH 9:16 Falosi malo ma iyo bokolip ko: Tunum kanola kaali, iintang am lotu kemin kaami lo kaali, ma kutal-fukusa disa kemin, kaali God ami ap-tunum disa yo, kala-lomdip kanumiple, kulaali malo ita bokolip: Kukup mafak kemin tunum kaa dok kano-lomdaya, kanolin kukup akal alik akal alik kaali, kanu-bam talal-mama yoko? ke-bala ke-bamdip, weng aal diki-bamdipla,
JOH 9:17 iyo asuk tunum ayo dik-daalip ko: Kabi boko-lomdapla: Ali nami tiin baap-na tambal keli no, kalap kemin ale, kapni aket fukunbap kaali, ali kalok nolin tunum i? akipla ayo bokoya-lomda: Ali profet o, kala God ami weng ku-fatap-dakamin tunum o, kalbi no, yaka.
JOH 9:18 Katale, Judiya kasel imi kamok kamok iyo utamiwa yi, Tunum ayo mafek mafek uyo itafiiba kaali, faneng sawaayak tunum kalawaali tiin bikiisa. La, asuk tambal kela kala, kalolip dinim ke-lomdip, ilana awak-aalap iyo naan-daayip tal itamiple,
JOH 9:19 iyo dik-daayip ko: Kalawaali, akam ipni man ema? Ibi boko-lomdip: Awak duusu diim kawu tiin bakensa no, ken-umbip ema? Aa, dok kano-somdala kamali kaata mafek mafek kaa atafiiba ni? yikipla,
JOH 9:20 awak-aalap iyo bokolip ko: Alep nuli utamuwa yi, Kaali nulmi man o, kaliple, kulaali awak uyo tiin bikiilin duusu.
JOH 9:21 Yale, nuli utamuwa yi, Dok kano-somdaya, ayo kamala kulu mafek mafek kaali, atama, aa ali kawanta taba-lomda, ami tiin mafak uyo nola tiin baala kaali, nuli atamin disa kelup kemin, ipkal ayo talalu dik-daalin aa! Akal tunum yayim dukum kemin, ipkal dik-daaliwa kawu, alta bokoyokoma no, yikip ko.
JOH 9:22 Ami awak-aalap iyo Juda imi kamok kamok imi atul itam-suun-daa-lomdip kanum bokolip ko. Juda kayaak kamok kamok iyo siin kawu weng taken-bamdipla alik, Ayo, kala-lomdip tunum ayo ma boko-lom: Yesus ali Kraist o, God ami uldaa-dabuusa tunum o, kala namti, ali tiltam lotu am uyo tiltam tala namti, ayo fotabamnup tam banokoma. Kemin, ali asuk tiltam talemin daa yo, kalbip. Kemin,
JOH 9:23 ami awak-aalap iyo weng san suun-daa-lom bokolip: Akal tunum yayim dukum kemin, ipkal dik-daaliwa yo! yikip ko.
JOH 9:24 Falosi iyo tunum ami awak tiin bikiilin duusu ayo dum alep fak-daa naan-daalip tal itamale, iyo bokolip ko: Nuli utamuwa yi, Tunum kapni tiin baap-tanba kaali, kukup mafak kemin tunum o, kalsup. Kemin, God ami win kaata-kup kufolan o! Yesus kaami win ayo kufolin disa yo! akiwale,
JOH 9:25 ali bokoya-lomda: Nali ma atabi dinim kemin, ali ban kemin tunum e? ban kemin tunum disa ye? kebi dinim. Yale, kukup maakup ma atin ti utami kaalile, siin kaa nami tiin kii bikiilin. La, kama kulaata, mafek mafek uyo atabi no, kali no, yakale, iyo asuk dik-daalip:
JOH 9:26 Ali kanimin ma nop-ta ni? Ali dok kano-lomdaya, kapni tiin mafak kaa talalu-tamuba yoko? akipla, ayo bokola:
JOH 9:27 Kamasi kaa ipni bokoyili kaali, ibi weng sanin disa nolip o? Ibi kanimin o, kalaliwa, asuk weng kaa weng sanum o, kalip yoko? Kemin, ipkal, ami daang bakaalin tunum kelum o, kalaliwa ema? yakale,
JOH 9:28 iyo talalu atafiimsi weng mafak ayo bakaan-bamdip: Daa yo! Kapta kanolin tunum ami daang bakaalin tunum kebap! ale, nulile Moses ami daang bakaalin tunum o!
JOH 9:29 Nuli utamupya, God ayo Moses ami weng kola unang tunum imi bakayinsa kalbup. Yale, kanolin tunum ali, God ata taba-lomda weng kaali, kolin disa; ata bakayinba kaali, nuli kaa atamsup dinim; kemin, atam-somdupya kaata, Awu, kaa liip talse kala kalbup dinim o, akiwale,
JOH 9:30 asiik bokola ko: Ipni kanolin weng bakabip kaali, atin ti kusnum kawi! Ali nami tiin mafak talalup-namba. Yale, ibi utam-ilomdip ali kanolin liip kawu talse kalbip disa yo? kala-lomda imi bokoya-lom:
JOH 9:31 Nuli utamsup, God ali ban kemin tunum imi dik-daalokomip kaa, weng seyokoma disa. Kemin, unang tunum kawanta, Kaali numi God o, kalokomip kiita, God ayo imi aket-kup fukun-bamda, ami suunkup naala-yaabip namti, imi dok kanumin sang ma dik-daalokomip namti, God ayo weng seyokoma no.
JOH 9:32 Sawaayak tawaal kala tiltam aba kulii bital kala diilu kaa, tunum ayo ma weng sanaya, yak tunum almi awak umi mat tem kabaku tunum tiin bikiilin ayo talalu duuba no, kaliwa ma weng sansa dinim o.
JOH 9:33 Kemin, God ayo tunum Yesus ayo dabaala tilin dinim kelama kaali, akal dok kano taang-kala-somdaya kanolin kukup kaali, ma nolama dinim o, yakale, tunum tiin bikiilin Yesus dap-talaluba ayo bokolale,
JOH 9:34 Falosi iyo bokolip ko: Kabi ban kemin tunum dukum kapta numi kukuyon o, kalalawa yo? kala-lomdip lotu am kaptamu bombe; la, fotabamnip tiltamba tala ko.
JOH 9:35 Yesus ayo weng sanaya, Tunum tiin mafak-dap-talalubi ami fotabamnip tiilba tala ami sang kaata, weng yen-una-tala-kebip kala, kala-somdaya, Yesus ayo tal aba yang ulaya, Tunum ayo bombe kala kala-lomda, atam dik-daala: Kabi Dukum Ami Man kaami lak kaa duubap ema? akale
JOH 9:36 tunum ayo bokola: Nak-tunum kapyo, bokop-na-lomdap: Ata no, nakapla, nakal ami lak ayo duulon o, akale,
JOH 9:37 Yesus ayo bokola: Kabi atabap kulaata, kapso weng bakabup kulaali, nalta no, akale,
JOH 9:38 tunum ayo bokola ko: Kamokim kaltapni lak-kup duuli no, kala-lomda tilik duung fakela daak tiin-ilomda, Yesus ami win uyo kufola ko.
JOH 9:39 Yesus ayo faldak-tiimin weng ma bokola ko: Nali tawaal diim kalawaami tal-bomdiya, unang tunum imi kukup kaali, talalu itafiimon o, kalaliya tildaak talsii. Kemin, unang tunum malo ma imi tiin bikiilin ililtap kesip. Yale, nuli God ami kukup kaata utamum o, kebip ita, nali taldiya, imi tiin kaali baayiliya, iyo talalu tiin talakan-tal-une-bamdip, ale unang tunum malo ma, Nuli God ami kukup utamsup o, ken-umbip itale, weng sanokomup disa yo, kal-bomdip iyo babon-babon-ken-umbip kemin, imi aket tem kaali, tunum tiin bakensu alaltap o, yakala,
JOH 9:40 Falosi malo ma iyo mepso kulu bom-bilip ita, Yesus ami weng kaali, weng san-ilom dik-daalip ko: Kabi numi sang so bokoya-lomdap: Ipso tiin mafak o, yakap ema? akipya, Yesus ayo bokoyila:
JOH 9:41 Kipni boko-lomdip: Nuli tiin mafak o kalbip dinam, kaami miit kaali, ibi kukup mafak dinim kesip. Yale, ipni boko-lomdip: Nuli tiin baalin o, kebip kaami miit kaalile, ipni ban wakamin kaali, disa kelin dinim kano bombuu no, kala ko.
JOH 10:1 Ti faneng nali bokoyokomi kemin, weng san bom-iliwa! Tunum ayo sipsip imi wuti fokolin kaami amitom desip kaali, kambola kusnum liip kawu wuti dong diim kawu foko daak unebip kiili, tiin alep baa-bomdipla, yukut inin tunum ita le,
JOH 10:2 tunum ayo wuti kaami amitom liip tam uneba kaata, sipsip imi tiin molin tunum alalta kemin,
JOH 10:3 ayo tal atamale, wuti kaami amitom tiin molin tunum ayo tam wuti kaami amitom busolale, ayo yak almi sipsip imi win kaali, naan-daayila weng sanbip-kup, tal atamipla, foko kuliila tam abip una. Kemin,
JOH 10:4 almi sipsip iyo kulii yak aba tam saaklo abale, kulaali asiik dusiin daa foko-kulii un-bomda naayila, yakyak una-balale, ili tiin molin tunum ami weng kaa, kaal kesip kemin, daang bakaalipla, tal unen-umbip.
JOH 10:5 Ale, tunum kusnum ayo ma naan-daayokoma kaali, ami weng kaa, weng sandip tal ami daang kaa, bakaalip tal-une-mokomip disa; ali atam suun-daa-lomdip, ukadaa unokomip o, kala-lomda,
JOH 10:6 Yesus ayo weng do faldak-tii-bam kanum bokoyila. Yale, ili faldak-tiimin weng kaami miit uyo talalu utamin dinim kelip ko.
JOH 10:7 Kemin, Yesus ayo asuk Juda imi bokoyila ko: Nali ipni tituun-kup weng kaali, bokoyokomi kemin, weng selin! Nali sipsip imi wuti kaami amitom kemin,
JOH 10:8 kamasi tunum alik diildiil isiik taltam tale-biliwa, bom bii nasiik kala taltam talsii kaali, ili tiin alep baa-bom yukut inin ke-bamdipla kemin, sipsip iyo, imi weng kaa weng seyokomup daa yo, kemsip.
JOH 10:9 Nali wuti kaami amitom kemin, kawanta tal wuti kaami amitom liip tilip kiili, nakal kiili dong dokoya-lomdi asuk yim-buulokomi no. Ili tambal-kup tam wuti kaami amitom kaali, tiltam balaasaal kon kaali, inan tam aba tiltam aba ke-mokomip.
JOH 10:10 Kemin, yukut inin tunum ili disa kawu talen-umbip disa; din-ilomdup yukut daka-bam ale, ye-bamdup yam-mafak-daka-bam kemum o, kalalipla, talen-umbip. Lale, nakal kanola tal itamiya, Nimi fanang talokomip namti, ili suunkup ilin kaami kukup alik uyo kuyon o, kala talsii no.
JOH 10:11 Nalalta sipsip imi tiin molin tunum tambal kemin, tiin molin tunum tambal ali sipsip imi aket kaata kuya-lomda, imi suunkup tiin mo-bomda, almi angtiil lak kaali, duulikin disa ke-lomda taanokoma.
JOH 10:12 Kemin, kanolaya sipsip tiin molin tunum aye, sipsip imi kayaak ili disa yale, okok ke-lom moni kaamin tunum ata tiin moba namti, ali talaala yi, Saak miyaan apliip dukum ayo tala ata-mokoma kaa, sipsip imi aket kaa kuyin disa ke-lom, ayo maas kuno keya ukadaa unale, saak miyaan dukum ayo talaba ti sipsip iyo an-kuyangu an-kutalangu ke-bamda, aa-bam in-bom ale, fuut mafak kaata-kup kukaayin-bala kemin, sikela una-tala-ke-mokomip.
JOH 10:13 Kemin, tunum kanolin kaali, sisol kaami okok kemin kaata-kup ke-bamdaya, sipsip imi aket iyo kukaayin disa kemin, maas keyilala, ukadaa unokoma no.
JOH 10:14 Nali sipsip tiin molin tunum tambal kemin, Atok ayo nitamale, nakal atami kesup. Kemin, ultap o. Nakal nalmi sipsip itamile, yakal natamip kesup kemin, nayo sipsip imi dong dokoya-lomdi, nalmi angtiil lak kaali ma, duulin dinim ke-lomdiya taanokomi.
JOH 10:16 Kemin, nami sipsip kusnum ma wuti tem kaltamu bom-bilip disa kiili, nili kiiso, foko kutaltam wuti tem tiiliya, nami weng kaali, talalu weng sanin o, kalaliya, sipsip iyo daam tem maakup ke-lomdipla, imi tiin molokoma kaali, maakup nalta-kup iyo tiin molokomi no.
JOH 10:17 Atok ali aket dukum-kup kup-ninsa kaami miit namti kaa bombuu no. Kemin, nali nalmi angtiil lak kaali, kulaa-lom, taan-ilomdi asuk tam tiinokomi.
JOH 10:18 Tunum ma ata almi aket fukunin-kup nelala, taanokomi disa; nalami aket fukunbi kaata-kup taanokomi. Nalalta-kup nalmi angtiil ayo kenbi-kup, taanokomi kemin, nakal titil-foko-lomdi asuk tam-tiin unomi. Kanolokomi kaali, Atok alalta bokop-nase no, kalale, Yesus ayo kanum bokoyila ko.
JOH 10:19 Juda kayaak imi kamok kamok iyo kanolin weng kaali, weng san-ilom tunum biki-lomdip, yak-una-tildak-una-ke-lomdip weng aal diki-bamdip,
JOH 10:20 tunum yaapkan iyo bokolip: Kaaye? sinik mafak ta takela-balala, babon-bamdaya, bakaba. Kemin, ibi kanimin o kala ami weng kaa weng san-kaabip i? kemipla,
JOH 10:21 tunum malo ma iyo bokolip: Katale, sinik mafak ayo taba-lomda dafukulama kaa, kanola weng tambal kaa bakamama disa; sinik mafak ayo dok kano-somdaya, tunum tiin bikiilin ayo baalama ni! kemip ko.
JOH 10:22 Jerusalam kaptamu diil tabemin am kaa daan tiltam tulule, kulu numi awil-fakal lotu am diilim desip kaami aket fuku-bam ilin kaami am kaa daanu no, kala-lomdip ima dukum inin am daana, inip kawu, lotu ken-umbip kaami wuti daam tem anung ma kaptoop ali boko-lomdip: King Solomon ami Abal Akiim o, ken-umbip kemin, Yesus ayo tam un-kem-salale,
JOH 10:24 Juda imi kamok kamok iyo tal mepso kuluba-lomdip, falala-dabak-mole, iyo bokolip: Kapyo, nuli ti suunkup aket yaapkan-kup fukun-bam laabup kemin, dok kanumin diim kawu nuyo bokoyilapla, nuli balili-kup kalokomup yoko? Kabi fan God ami uldaa-tam-buusa no, kal-bomdip Kraist o, ken-umbip kapta namti, kamala kulu tituun weng kaali, bokoyilan o, akipya,
JOH 10:25 Yesus asiik bokoyila ko: Nali weng kaa bokoyasii. Yale, ibi nami weng kaa weng san, Awu, kaa tifan bakaba disa yo, naka-silip o. Atok ami win diim okokmin kusnum tambal tambal nuubi kiita, nili nam-fatap-daabip. Yale,
JOH 10:26 kibi nami sipsip ke-lom nami lak duulin dinim kemin, ibi nitamiwa, Kaali God ami Man o, nakan-kaabip dinim.
JOH 10:27 Nami sipsip ili nami weng kaa utamsip ale, nakal iyo talalu itamsi kemin, ili tal nami daang ababip
JOH 10:28 kemin, nili dong dokoyiliya, suunkup ilin unang tunum ke-lom, bom-bilip kemin, taanokomip kaali, maaklo ke-lokomip disa. Ale, tunum ma ayo ma tal-ilomda, nami sikil diim kawu baa yim-buulokoma dinim o.
JOH 10:29 Nalmi Atok alalta, iyo ulela kup-nalase, kemin ale, ami win kaali, sakbaalim dukum kemin, tunum kamok kamok kusnum ma iyo kabaak banip kemin, tunum ayo Atok ami sikil diim kaa ma taang-kala-lomda, baa yim-buulokoma disa.
JOH 10:30 Atok Alim nuli ti maakup o, kalala Yesus ali imi kanum bokoya ko.
JOH 10:31 Juda imi kamok kamok iyo asuk tuum ta kuluu-lom aalup taanak o, kemipla,
JOH 10:32 Yesus ayo bokoyila ko: Atok ami talalmin kukup akal alik akal alik yaapkan kiili, kukup-nalala, niyo talal-biliya, ibi utabip. Yale, ibi okok kemin kala nuubi kaali, mafak ma nuu-biliya, kaami kalan o, kala-somdipya tuum ta nelum o, kalbip ema yo? yakale,
JOH 10:33 isiik ami weng kaali bokolip ko: Nuli kapni kukup tambal kanubap kuumi aket kaata fuku-daaluwa disa. God ami atafiimin weng bakabap kaami kalan kaata, nuli tuum ta telupla taanan o, kalbup te. Kabi iip kulu tiltam abin tunum. Yale, numi fanang saanin kaali, utamuwa yi, Kabi boko-lomdap: Nalta God o, kebap kala kalaluwa yo, akiwa,
JOH 10:34 Yesus ayo bokoyila: Ibi kanimin o kala kanum bakabip yoko? Ti ipni God ami Sukon Tem weng tik-tiin-umbip kabak-ali boko-lomdu: God nali bokoya-lomdi: Ibi God nalaltap kelip o, kalsi no kalsu. Kemin,
JOH 10:35 God ata almi weng uyo kuya-lomda bokoya-lom: Ibi God nalaltap o, yinsa. Kemin, (God ami weng uyo lo-laamin dinim, kano ilomu) kulaali,
JOH 10:36 nali Atok alalta, ulduu-lom: Kabi nami alik-daap o kala, nam-baala tal tawaal diim kala talsii. Kemin, nali boko-lomdi: Nali God ami Man o, kalbi kaa, ibi kanimin o, kala boko-lom: Kabi God ami atafiimin weng kaa bakaanbap o, nakan-kaabip i?
JOH 10:37 Nali Atok ami okok kemin tambal kup-ninsa kaali, nuu-mokomi disa namti, ibi nami weng kaakal kano fan bakaba no, kalokomip disa.
JOH 10:38 Kata, nili Atok ami kukup tambal tambal kup-nase kiiyo kanun-umbi kemin, ibi nami weng kaa fan bakaba no, kalin o, kala-somla ko. Lale, ibi nami weng uyo fan bakaba no, kalin disa kelip namti, nami okokmin kemin tambal akal alik kala kanubi kaali, utamipla, Fan tambal-kup kanuba nu, kalin o, kala-somla kemin, ibi talalu utamiwa yi, Nimi Atok ali naso bombe le aa, nakal aso bombii kemin, Alim nuli maakup laabup kala, kalin o, yaka ko.
JOH 10:39 Asuk Juda imi kamok kamok iyo Yesus ayo dap-tal-fuku sok dedulum o, kemip. Katale, ali tambal-kup akaaya tabana ko.
JOH 10:40 Yesus ayo asuk yak aba din Wok Jodan ayo yakan yak malii aba-lomda, din siin kawu Jon ami unang tunum imi wok-sam ukayinsa kaami olang diim kawu bomda,
JOH 10:41 tunum unang yaapkan iyo din atam-ilom bokola una-tala-ke-bamdip bokolip ko: Kwin! Jon ali kukup tambal akal alik ayo ma kanumsa dinim. Yale, Jon ami tunum kaami sang bokose kaa, tifaneng kawi! kemipla,
JOH 10:42 unang tunum yaapkan ma kawu bom-bilip iyo ami lak duulip ko.
JOH 11:1 Tunum ma mafak-alin umuba ami win kaa Lasarus la, ali Betani kayaak kemin, ami unang alep ma bom-bilip kiili, Maria so, Mata so, iyo abip Betani kaa nikil maakup kaa kayaak kemin,
JOH 11:2 Maria uyo Yesus ami yaan diim ok tang tabin tambal kaata, kuluu kabela-lomdu, ulmi dabom kon ta diliit molokomu kaa uta kemin, unang alep kiimi tunum ayo mafak-alin kuluuba kemin.
JOH 11:3 Kula, unang alep iyo weng kulaalip din Yesus ami bokola-lomdip: Kamokim, kapyo, kapni kaptum aket kola-laabap tunum Lasarus ayo, mafak-alin kuluuba no, akipla,
JOH 11:4 Yesus ayo weng san-ilomda, fuku-daala kaali, taan-yaamin kaami mafak-alin daa; kaa unang tunum iyo utamiwa yi, God ami titil kaata-kup o, kala-lomda God ami win kaali, kufon-bam ale, God ami Man, nimi win kufup-nam-bam kemin, kaami mafak-alin kaata kuluuba no, kala ko.
JOH 11:5 Yesus ayo Mata so, neng Maria so, Lasarus inang nikil imi aket kaali, kuyinsa.
JOH 11:6 Kemin, Yesus ayo weng sanaya, Lasarus ayo mafak-alin umula tiinba no, akipla weng san-ilomdala, mokop kawu bombii am alep kelaya,
JOH 11:7 kulu almi daang bakaalin tunum iyo bokoyila ko: Kalo! unip; nikil Provins Judiya bokon unum o, yakale,
JOH 11:8 kulaa daang bakaalin tunum isiik bokolip: Kukuyin tunum kapyo, asuk Provins Judiya unokomup o? Judiya kasel imi kamok kamok iyo tuum ta telum o, kalbip. Katale, asuk unokomap o? akiple,
JOH 11:9 Yesus ayo weng do weng ma faldak-tii bokola ko: Taap kaali, okok kemin am daan-yaamin ale, nami okok kemin kaali, malang tinilin dinim, kano taap bombe ko. Tunum ali ma taap diim una namti, kaali falala kalba kemin, kaa kulaak daalokoma dinim, tambal-kup unokoma ale,
JOH 11:10 tunum ali ma kutamiip una namti, yokon dawong dinim una kemin, un-bomda kulaak daalokoma no, kala ko.
JOH 11:11 Yesus ayo kanum bokoyinba-kup, weng ma bokola ko: Numi naktum Lasarus ayo akan-umba kemin, kulaali din dafoliya, tam tiinokoma naa! kalale,
JOH 11:12 ami daang bakaalin tunum iyo bokolip: Ali kanola akan-umba kulaali, tambal ke-lokoma no, kalip. Lale,
JOH 11:13 Yesus ami weng kaa bokola kaami miit kaali, Lasarus ayo taanba no, kalale, ami daang bakaalin tunum imi aket fukunin kaata le, Lasarus ali akan-bom kun fan kaaba no, kalip ko.
JOH 11:14 Kulaa Yesus ayo, nikil imi talalu weng ku-fatap-daa bokoyila-lomda: Lasarus ayo taanba te!
JOH 11:15 Kemin, nali ipni aket kaata fukundiya, nimi mafek mafek kanolokomi kaali, utam-ilomdipla, Kaali God ami Man o nikin o, kalalila, Lasarus ayo kelila taanba kemin, nali Lasarus so ilin dinim bom-ili taanba. La, kaami fiyaap kaali, duubi. Kemin kalo! unum aa! kala ko.
JOH 11:16 Kulaa, Tomas ami win ma kaa Didimas kemin, ayo ap-tunum kusal imi bokoyila ko: Na! unip maakup aso una-bulupya, kuno nuyo yelip taanum aa! kala ko.
JOH 11:17 Kulaa Yesus ayo tal Betani abip kawu weng sana yi, Lasarus ayo taanala dibii-din tuum tem kaptamu dawaalip bombii am atalingkal kela no, kalipla weng sana ko.
JOH 11:18 Jerusalam kaali kela yakyak din abip Betani unemin kaa kilomita atalingkal kaa samaan daa kemin,
JOH 11:19 unang tunum yaapkan iyo kawu tal Mata so, Maria uso, alap imi tunum taanba ami kom am tal bal-faka-bamdip bom-bilip kemin,
JOH 11:20 Mata uyo weng sanu yi, Yesus ayo talaba no, kalip uyo weng sandu Yesus ami liip fen din atamule, neng Maria uta am kawu ilu,
JOH 11:21 Mata uyo Yesus ami bokolu ko: Kamokim kapyo, dinam kabi kalawu bom-balap dinam, nimi tunum ayo taanama dinim. Yale,
JOH 11:22 nali utamiya, Kabi dok nolin mafek mafek sang ma God ami dik-daalokomap kaali, kup-tokoma no, kebi no, akule,
JOH 11:23 Yesus asiik bokowa ko: Kupni tunum kulaali tam tiinokoma te! ukaya,
JOH 11:24 Mata usiik bokola-lomdu: Nali utami yi, Ali am mafiing diim kawu asuk tam tiinokoma no, kalbi no, kalule
JOH 11:25 Yesus ayo bokowa-lomda: Taan-ilom tam tiin-yaamin kaami miit kulaa ti nata-kup. Kemin, tunum ayo ma nami lak duula namti, ali taanokoma. Yale, ali asuk tam tiin kawong ke-lokoma.
JOH 11:26 Tunum ayo ma tiin kawong ilomda nami lak duula kaali, ali taanokoma disa. Kubi kaa, Fan o, kalbap o? ukale,
JOH 11:27 Mata usiik Yesus ami bokolu ko: Ayo, nali titamiya, Kamokim, kabi God ami uldaa-tam-buusa tunum Kraist o kebip ale, kabi God ami Man namti kapta nu! taka-lomdila kemin, sawaayak kaa, God ayo tunum dabaala tawaal diim kalaba talokoma no, kalsip kaali, kapta no, tansi no, kalu ko.
JOH 11:28 Mata uyo kanum bokonbu-kup, kulaa bina din neng Maria uyo umtama yang lo un-ilomdu kalaweng bokowa-lom: Kukuyin tunum kaali, tal-bomda kupni fenba no, ukule kulaali,
JOH 11:29 Maria uyo Yesus ami sang uyo, weng san-ilomdu tola bina din Yesus ami fanang unu ko.
JOH 11:30 Yesus ayo tal abip talokin dinim, kano tal liip kawu bom-balala, Mata uyo din atam tulu kawu bom-ilaya kemin,
JOH 11:31 Juda unang tunum iyo kom am tem kawu, Mata so, Maria uso, bom-bilip iyo itamipla, Maria uyo tola abiltap-kup tambanu kala, kalalip imi aket fukunip kaali, Uli din tunum ami kom tem kawu amamon o, kala unu nema yo? kalalipla, iso yak umi daang bakaalipla unip ko.
JOH 11:32 Maria uyo din Yesus ami bombe ayo din atamule, Yesus almi mepso kulu tilik duung fekela daak tiin bokolu: Kamokim kapyo, kulawu bom-balap dinam, nami tunum ayo taanba dinim o, aku.
JOH 11:33 Akula, Yesus ayo utama yi, Maria so, unang tunum Maria uso tilip iyo aman duluum weng-kup taba tilip kala, kala-lomda, aket tem kaali, atin ti mafak kelula, aket uluum dukum dap-telule,
JOH 11:34 ayo dik-daaya-lomda: Ibi dibii-din doku dawaabip yoko? yakale, alap iyo bokolip: Kamokim kapyo, taldap ataman aa! akiwale
JOH 11:35 kula, Yesus ayo ama-balala
JOH 11:36 unang tunum malo iyo bokolip ko: Ayo, ami aket konsa kemin, tiyak kala amaba kala, daatamin o! kemiple,
JOH 11:37 malo ita bokolip: Ali tunum tiin bikiilin iyo tiin baayase. Lale, kanimin o kala-lomda, tunum kalawaali dong dokolin dinim kelaya, taanba ni? kemip ko.
JOH 11:38 Kemin, asuk Yesus ayo aket tem uluum dukum-kup kelule, ayo yak aba din kom tem una. Kom tem kaptam-ali tuum tem kaptamu dawaa-silip kemin, buluu-lomdip tuum kom ta kulii-tal aba yak amitom kaa saal lii-silip.
JOH 11:39 Kemin, Yesus ayo bokoya-lomda: Yak tuum kom ayo kuluu kukan-daalin o, yakale, tunum taanba ami unang Mata uyo Yesus ami bokola-lomdu: Kamokim kapyo, ali buluulup bom bii am atalingkal kela kemin, fom tang kuyak daaba no, akule,
JOH 11:40 Yesus asiik bokowa ko: Kamasi nimi weng bokop-tambi kaali yi? Bokop-ta-lomdi, nami lak kaali, duulap namti, God ami titil kaa uta-mokomap o, kaliya tulup kemin, nami lak kaata duulapla yo, ukale,
JOH 11:41 tunum iyo weng san-ilomdip, yak tuum kom, kom tem uyo dak-duu kuyak tiiliwale, Yesus ayo titam abiil tikiin kawu daa-lomda boko-lom: Atok kapyo, yaap ke, nami beten kaali, weng sep-nap o.
JOH 11:42 Nali utamiya, Nami beten kaa, weng san-kaa-bamdap, nimi beten kaali, maan tiip-na-laabap o, kalsi. Yale, nimi beten kep-tili kaa ti, unang tunum kalawiili weng san-ilom utamiwa yi, Kaltapta nam-baalap talsi no, kalik o, kalaliya bokop-ti no, kala kanum boko beten kela ko.
JOH 11:43 Ali weng kaa kanum bokoba-kup, dukum-kup naan-daa-lomda: Lasarus, kapyo! tam tiin tiltamba talan o, akan-kaam-salale,
JOH 11:44 tunum taanba ayo kulaata tiltam talala, ilim sok kuluu-lomdip ami dabom ang, yaan ang, sikil ang, sok de-falala dip-tii-silip kemin, Yesus ayo bokoya-lomda: Yak sok baa dip-tiilip tiltam abamnak o, yaka ko.
JOH 11:45 Kemin, kulu Juda kasel unang tunum iyo Maria utamum o kala tilip kiili, tal Yesus ami kanola tunum ayo taana dafola kaami utamip kaa, unang tunum yaapkan iyo Yesus ami lak duulip. Kemin,
JOH 11:46 daa alep tap maakup tap ita din Yesus ami kanola kaami sang kaali, kutama din Falosi imi bokoyilip.
JOH 11:47 Kemin, awem tunum imi kamok kamok sole, Falosi iso, iyo Kaunsol imi lafet daa im-tii-lomdip bokoyip ko: Ipyo, kalaali dok kanolokomup i? Tunum kaali, kukup akal alik akal alik kaali, kufun-tal-uneba kemin,
JOH 11:48 kanola nuyo kano ke-lokomup kaali, unang tunum alik iyo ami lak duulip namti, Rom imi aami imi aket kaa, waasi uyo ma dinum o, kalalipla tunum afetbip ema yo? kala-lomdipla, tal numi lotu am diildiil ku-mafak-daale, numi unang tunum iyo yam-mafak-daa ke-lokomip kemin, ami win kaayo, dinim kelaya yo, kemip ko.
JOH 11:49 Wasital kuluwaami diim kulu, tunum Kayafas ayo uldaa-dabuulip awem tunum imi kamok kamok imi kamokim dabom ke-bomda bombe kemin, ayo bokoya-lomda: Ibi babon-bamdipya talalu utamsip dinim o.
JOH 11:50 Ti ibi talalu aket fuku-daalin. Nuli mafek mafek kaali ma, nolokomup disa kulaali, Rom kasel imi aami iyo tal unang tunum alik nuyo yelipla taanokomup. Kemin, kanolokomup kaata tambal kemin, tunum kaata, dabuulupla, ata ap-tunum kusal numi abiin kaali, kuluu-lomda ata-kup, taanaya nuta yaap kelum o, yaka ko.
JOH 11:51 Ayo kanolin weng kaa, almi weng disa; kemin, wasital kuluwaami diim kulu tunum awem imi kamok kamok imi kamokim kese. Kemin, God ata taba-lomda weng kaal kemin kolaya, bokoya-lomda: Yesus ayo Judiya kasel numi abiin kuluu-lomda, ata-kup taanaya, nuli yaap ke-lokomup o, kalase.
JOH 11:52 Katale, Yesus ali Juda imi ban wakamin tem-kup din taanse dinim; kemin, ali unang tunum alik sekela una-tala-ke-silip ili, God ami man kelipla, alik afeta kumup daali miit maakup kelin o, kala-lomda kiimi ban kemin tem kaata din taanse ko.
JOH 11:53 Kemin, am kula daana kulaami diim kulu weng kaali, talalu bakam-sile, aalup taanak o, kemipya,
JOH 11:54 Yesus ayo itam-ilomdaya, Juda imi tiin diim kaali, kamboyila almi daang bakaalin tunum iyo yim-tamala bilin abip Efraim kawu nikil ilip. Kemin, am bokon disanang ma abip kaami mepso kawu bombe no.
JOH 11:55 Juda imi Pasova iintang am o kala ima dukum tinimin inin am kaali, mepso daan talan-sulule, abip ma abip ma kasel kiimi unang tunum iyo din Jerusalam din-ilomdupya, wok-sam oka-lomdupla, nuli God ami tiin diim kawu tituun-kup tabin bom buluwa yo, kala-somdipla tala-tala-ke-lom
JOH 11:56 Yesus ami talokin ayo, fen-bamdipla, iyo lotu am dukum diildiil abip kulu una-tala-ke-bam ale, bokola-una-tala-ke-bamdiple, ipni aket fukunip kaa, Yesus ayo numi ima tinimin am daanbu kaa, talokoma dinim ema yo? kebip o, kem-una-tala-kemip.
JOH 11:57 Tunum awem kamok kamok so, Falosi iso, iyo weng kuka-daa bokolip ko: Tunum ayo atamipya, doku ma bombe no, kalip namti, kaali tal bokoyiliwa, din-ilomdup dap-tal-fuku sok de-dibii-tulum o, kala-lomdip iyo boko-una-tala-kemip ko.
JOH 12:1 Pasova iintang am o, kala ima ina fakamin am kaali, daanin disa am bukupkal ma bom-sulule, Yesus ayo din Betani abip abala una; kemin, abip kaa siin kawu tunum Lasarus ayo taanaya, Yesus ata dafose ami abip.
JOH 12:2 Abip kaptam kasel iyo Yesus ami fiyaap don-bamdip, ima folipla, Mata uta dong dokoyulu, ima uyo kulii-tal kola-kola-kelipya, abip kasel unang tunum sole, Lasarus so, Yesus aso, iyo tiin-bomdipya, in-biliple kulaali,
JOH 12:3 Maria uyo tang tabin wok tambal ket kaami uluum kaali, hap kilo uyo kuluu-lomdu, Yesus ami yaan diim kawu sing-daala-lomdu, ulmi dabom kon batbat ta yak diliit saanule, tang tambal ayo taba-lom am kaptam aso bukula. Kemin, tang tambal tabin wok ami win kaali boko-lomdip: Naat o, ken-umbip kaami sisol kaali, sakbaalim dukum kaata kuluu saan-umbip.
JOH 12:4 Yesus ami daang bakaalin tunum Keriot kayaak Judas ata taba-lomda Yesus dap-fatap-daalokoma ata bokola:
JOH 12:5 Tang tambal-kup tabin wok Yesus ami diim tinan daalu kaami sisol ayo sakbaalim dukum kemin, okok kebi wasital maakup ke sisol kaabip tap ami sisol kaa kanolin kemin, unang kuuli kanimin o, kala kulii-din maket diim kawu kutiiluya, molip tuumon 300 ayo kuluu-lomdu kulii-din unang tunum mafek mafek dinimal imi kuuyin disa nolu no? kala ko.
JOH 12:6 Judas ayo yukut inin tunum kemin, ali nikil imi tuumon men tiin mo-bomda kulii-tal-une-bamdaya, tuumon kaali, maaklo yukut malii ma fakan-umba kemin, ami weng kaali ti, unang tunum iiwaan imi aket kaa fukunin dinim kemin, almi aket-kup fukun-bamdaya kemin, kanum bokola ko.
JOH 12:7 Kanum bokolale, Yesus ayo bokola: Unang kuuli, kuno kewan aa! Kewapya, tang tibin wok tambal kutal-fukubu kaa, tiin mo-bomduya, nami taani namaalokomip kaali, talalu-namulu yo.
JOH 12:8 Unang tunum mafek mafek dinim iyo kipso suunkup laabip. Lale, nali kipso suunkup kalawu ilokomi disa yo, kala kanum bokola ko.
JOH 12:9 Juda unang tunum yaapkan iyo weng saniwa yi, Yesus ayo abip Betani kawu bombe no, kalalip iyo kabanip ko. Iyo din Yesus ata-kup atamum o, kalaliwa daa; siin kawu Lasarus ayo taanaya, Yesus ata dafolaya, tam tiinse kemin, aso atamum o, kalalipla unip.
JOH 12:10 Juda kasel unang tunum yaapkan iyo utamipla, Yesus ayo Lasarus ami dafose no, kala-somdipya, tunum awem imi kamok kamok imi lak kaa, kela Yesus ami lak kaata-kup duulip kemin, awem tunum imi kamok kamok iyo utamiwa yi, Iyo kanubip kala, kalalipya, Lasarus aso aalup taanik o, kala weng tituun-kup bokolip.
JOH 12:12 Unang tunum yaapkan iyo Pasova iintang am ima inin uyo kufolum o, kala-lomdip tal Jerusalam kawu sintam weng sanipya, Yesus ayo Jerusalam talokoma no, kala-lomdip,
JOH 12:13 fiyaap dolin kaami kukup kaali, iyo kutal-fuku as kokonas o kebip kaami kon usaanum kon tang bapliim tap kaa fakelbi kutama Yesus ami liip fen-un-bom, naan-um-bomdip: God ami win kufolum o. Yesus ayo God Dukum ami win diim talaba kemin, God ata kukup tangbal kaata-kup kukaan-bala yo! Ayo Israel kasel numi kamokim king kela kemin, ami fiyaap don-bam win kufolum o, kemip ko.
JOH 12:14 Sawaayak God ami Sukon Tem weng kabak-ali boko-lomdu: Abip Saiyon o, kala Jerusalam kasel kipyo, di utamin a! Kipni kamokim king ali kipni fanang talaba kemin, suunin disa yo. Ali dongki man kasaa ami daang kun diim kabaaku tiindaya talaba no, kalsu. Kemin, Yesus ali dongki man kasaa ma kuluu-lomda, kaami daang kun diim kabaaku tiin-ilomda talaya,
JOH 12:16 am kaa daanaya, kukup kaa kanu-bisip kaami miit kaali, ami daang bakaalin tunum iyo bam-daa talalu ma utamin dinim ke-silip. Yale, ilom Yesus ayo asuk tam tiin-ilomda abiil tikiin unaya kawu, daang bakaalin tunum iyo asuk fuku-daa utamiwa yi, God ami Sukon Tem weng namti kanum bokosa kala, kala-somdip imi kukup kanola-silip kaami miit namti kawu utam-silip.
JOH 12:17 Kemin, siin kawu unang tunum iyo Yesus aso din kom tem ilomdipla atam-silip, Yesus ayo Lasarus ami naan-daala-lom ayo dafola tam tiina kala, kalbip iyo, unang tunum kayak kayak imi bakayin-bilip,
JOH 12:18 weng san-ilomdip utamiwa yi, Yesus ami kukup kaa akal almi kusnum kaata, kanoba kala kala-somdipya, alik iyo din kawu atamum o, kalalip unipla,
JOH 12:19 Falosi yakal utamipla, Alik iyo tabanip kala, kala-lomdip kulaali, boko-una-tala-ke-bam ale, bokolip: Ibi ti kaa daatamin! Numi okok kemin nolum o, kalbup uyo, kabaak banu kemin, tawaal diim kalaami unang tunum iyo alik ami daang bakaalip te! kemip ko.
JOH 12:20 Juda unang tunum iyo Jerusalam tal God ami win kufolum o, kalalip tal bom-bilip kemin, Grik kayaak maakup maakup iso nikil maakup tal God ami win kufon-bam ale, ima im-bom ke-bilipya,
JOH 12:21 Grik kayaak iyo tal Provins Galili kaami abip ma Betsaida kayaak Filip ami dik-daala-lom bokolip ko: Kapyo, nikil nuli Yesus atamum o, kala tulup o, akipya,
JOH 12:22 kulaa Filip ayo din Andru bokolale, alep maakup yak aba din Yesus ayo bokolipya,
JOH 12:23 Yesus ayo bokoya-lomda: Dukum Ami Man Nami am namti kulaata mep dikiwa tulu kemin, God alalta nam-fo nam-tama tam asal kaltoop banokoma ko.
JOH 12:24 Nami weng faldak-tiimin weng ma kaali, fan eng tituun-kup bokoyokomi kemin, weng san bom-ilipla! Tunum ayo wiit san dikilokoma disa; tambal-kup ilokoma namti, wiit kaa ma abuulokoma disa. Kata, tunum ayo wiit san ayo dikilokoma ata, fan san ayo fal-siki-lomda taanin tap ke-lokoma. Katale, bikin-taba-lomda, lap yaapkan abuulokoma.
JOH 12:25 Ultap o. Tunum ali ma almi angtiil lak-kup fukun-bamdaya, nali tambal-kup tiin yakyak umbutoop tunum sawol ke-lokomi no kala namti, ali almi angtiil-kup tiin molokoma. Yale, tunum kaali, maaklo ke-lokoma. Yale, tunum kawanta tawaal diim kalawu bomda, alami angtiil kaami aket kaali, kela-lomda, nami aket kaata-kup kup-na namti, kaa tam abiil tikiin kawu suunkup suunkup ilokoma.
JOH 12:26 Ultap o. Tunum ayo kawanta nami okok kemin kaali, tabuulon o, kala namti, kaa nami daang bakaa-lom, dok kanolin bokon kawu ilokomi kaali, naso bomdaya, Atok ali, kaami win kaali, kufolokoma no, yaka ko.
JOH 12:27 Kulaa Yesus ayo boko-lomda: Nimi aket tem kaali, uluum dukum-kup kep-nu kemin, Atok ayo kanimin o, kalokomi yoko? Nami weng kuluwaa, Atok kapyo, kabi angtiil yol dukum sole, kukup mafak so, iyo mepso tilip kemin, takan-tiip-nan o, kalokomi nema? Daa! Nali utamiya, Atok alalta angtiil yol kaali, kuluulan o, kalsa kala, kala-somdiya, tawaal diim kala talsi no, kala-lom,
JOH 12:28 almi Aalap ami bokola-lomda: Atok kapyo, kamboyap kanop-nipla kawu, unang tunum alik iyo nitam-ilomdipla, kapni win kaali, kufup-tik o, kem-salale, abiil tikiin lo kawu weng ma boko-lomda: Sawaayak kaali, nayo kabi tam-baali daak aba-lomdap, nami okok kemin kaata, kanup-nam-balawa, unang tunum iyo nami win kaali, kufop-nambip kemin, bombii nili bokop-tiliya, kanu-mokomap ukol fanang maakup asuk nami win kaali, kufop-nokomip o kala kanum bokola.
JOH 12:29 Tunum unang alik Yesus ami mepso tolbip kuliiyo, weng kulaa weng san-ilomdip, malo ma iyo bokolip ko: Kaa taman fokola nema yo? kaliple, malo ma ita bokolip: Ee, ensel ami weng ema bokola no? kalalip kemip ko.
JOH 12:30 Yesus ayo imi weng kaa maan tiiya bokoyila ko: Weng kaa bokola weng sanip kaa, nami lak kaata disa; ipni lak kaata no, kala bokola. Kemin,
JOH 12:31 God ayo tawaal diim kaldaak-ami tunum unang imi kukup mafak yam-kukuba-kup, weng yim-bak-saanbi yim-bak-molokoma kemin, kulaata God ayo tawaal diim kalaami tiin molin Tunum Mafak Setaan ayo an-bak-mola yang banokoma.
JOH 12:32 Kemin, tawaal diim kalawu bombi. Yale, nam-fo-lom nelokomip kaami diim kulu, unang tunum alik iyo alula tildang nami miit tem talokomip o, kala ko.
JOH 12:33 Yesus ami aket kaali, Nimi weng kaa kanum bokoliya kawu, nitamiwa yi, Ami angtiil yol kanolin kaa kuluu-lomda, taanokoma kala nikin o, kala-lomda kanum bokola ko.
JOH 12:34 Unang tunum isiik ami weng kaa maan-tela bokolip ko: Numi God ami Sukon Tem kabak weng sanupla uyo boko-lomdu: God ami uldaa-dabuusa tunum o, kalbip Kraist ali suunkup ilokoma no, kalsu. Yale, kabi kanimin o, kala boko-lomdap, Dukum Ami Man ali dap-tam fo-lomdip aalip taanokoma no, kalap yoko? Dukum Ami Man kaa kawanta ni? akipla,
JOH 12:35 Yesus asiik bokoya-lomda: Yokon falala-kalin kaali, ipso iilfo ilanin tap ke-lokomu kemin, mepso kaa malang tinilokoma. Kemin, tunum ayo kutamiip tem unaba ayo liip kaa, talalu utam-utam unokoma disa. Kemin, falala-kalin kula iilfoba kuluwu, ibi liip kaa talalu utamdip unin o, kala-somla ko.
JOH 12:36 Nata-kup ipni falala-kalin ulultap kemin, nili ipso bombii kulaata, nami falala-kalin kaata, ibi iilfoyila bom-bilip. Kemin, ibi nami lak kaata duulip namti, nami man kelipya, nami falala-kalin kaata, ipni liip kaali, suunkup iilfoyila ilokoma no, kala kanum bokoyila ko. Yesus ayo kanum bokoyila disa kelala, ali almi kawaala-lomda unaya, atamin dinim kelip ko.
JOH 12:37 Yesus ayo unang tunum imi tiin diim kawu, mafek mafek kusnum akal alik akal alik kiili, kanu-balaya, atam-silip. Yale, God ami uldaa-dabuusa tunum ali ata kala, kala-lom ami lak kaali, duusip dinim.
JOH 12:38 Ili kanobip kemin, sawaayak kawu, profet Aisaya ami bokola ata Sukon Tem dolsa kaali, atin ti faneng tituun-kup tiltam taba-lom, boko-lomda: Dukum, kapyo. Kawanta numi weng kaa weng sandiwa, Awu faneng u, ma kala-silip i? Atin kaali ti dinim o. Dukum, kapni titil okok kemin akal alik akal alik kiili, kutal-fuku-bom kukuyinbap kaa, kii kawanta ma utam-silip i? Atin ti disa yo, kalsa.
JOH 12:39 Ultap kemin, Aisaya ayo, God ata bokolala, dolsa kaali, boko-lom: God nayo ti noyilila, iyo tiin kabiile, imi aket tem kaali, weng ayo weng san kuyak aket tem daalalup disa yo, kalsip. Kemin, ili utamin dinim kebip-kup ale, imi ban kemin kukup kaali, kulaalalip dinim. Misii fal-siki tildang God nami fanang tildang tilip, talalu-yimuli tambal kelamip dinim o, kalsa ulultap kemin, tunum unang ili Yesus ami lak uyo duulamip dinim; kensip.
JOH 12:41 Sawaayak kawu, God ayo Aisaya ami kanum bokolaya, Yesus ami titil kaali, utam-ilomda ami sang kaali kanum bokosa no.
JOH 12:42 Unang tunum yaapkan iyo Yesus ami lak kaali, duulalip disa kelip. Kata, Juda kamok kamok yaapkan imi iipyak tem kawu kamok kamok yaapkan iyo Yesus kaa God almi uldaa-dabuusa tunum namti ata no, kala-silip. Yale, ili yawaal-daa-lomdipya kemin, imi aket fukunin kaa kala-somdipla ko: Ku-fatap-daa bakamupla, Falosi iyo lotu am kaptamu nuyo fotabam-nipya, tiltam saaklo talolup o, kala-somdipya kemin, itam-finan-daa yawaal-daalip.
JOH 12:43 Kaa dok ami miit kata naa kalolip: Imi aket kaali, tunum ita-kup numi win kufuyin-bamdip, fiyaap duumin kaata ti, diildiil dukum keluya, God ata taba-lomda numi win kufuyikin kaata, kabaak bansu no, kala-somdipla ko.
JOH 12:44 Yesus ayo weng dukum-kup bokoya-lomda: Tunum ayo kawanta nami lak kaa ma duula namti, kaali nami lak kaata-kup duula disa; kaa Atok nam-baala talsii ami lak so du kela no.
JOH 12:45 Kemin, tunum ali ma nali talalu nitama namti, ali Atok nam-baala talsii aso, atama.
JOH 12:46 Nali tal tawaal diim kalawaami unang tunum imi yokon dawang ultap kaata nali iilfoyinsi kemin, kawanta nami lak kaali, duulip namti, ili kutamiip tem kaa ilokomip dinim o. Nami dawang kaali, imi aket tem so, dabom tem so, kiili, iilfoyokomu no.
JOH 12:47 Kanolin kemin, tunum iyo ma nami weng kaali, weng sanbip. Yale, kaa weng san kutal-fuku kutama tabolup dinim o, kalokomip namti, nali kii yim-bak-saanokomi disa! Nami tawaal diim kala talsii kaa, nali unang tunum imi yam-bak-saan o, kala talsii daa; nali taldi unang tunum iyo yim-bu im-taldang daalon o, kala talsi.
JOH 12:48 Kemin, tunum iyo kawanta nali daang ukup-na-lomdip nami weng kaa kuyang saak tiip-nip namti, am mafiing diim daanokomu kawu, nimi weng bokoyasii kuuta, yim-bak-saanokomu te!
JOH 12:49 Nami weng bakayinbi kaa, nalmi aket fukunin kaata-kup bakayinbi disa; Atok nam-baala talsii alalta bokop-na-lomda: Kanum bokolan o, nakan-kaa-balaya, almi weng yaan tem kaata-kup bakan-umbi.
JOH 12:50 Nali utamsi, Tunum ayo kawanta Atok ami titil tabin weng kaa, weng san kutal-fuku ami lak kaali, duula namti, kaali suunkup ilin tunum ke-lokoma. Kemin, nimi weng bakabi kaa, Atok ata kanum bokolan o, ke-balaya bakabi no, kala, kanum bakayila ko.
JOH 13:1 Kemin, Pasova yo kala iintang am ima ina tinimin am kaali, kama daan tiltam tabin disa bom-suluya, Yesus ayo utamaya, Nali tawaal diim kalawaali kelali Atok fanang unokomi kaali, mepso tulu kala, kala ko. Tawaal diim kalawaami unang tunum malo ma iyo Yesus ami unang tunum kelipla, Yesus ayo kiimi aket kaata, kuyimba-kup, kiimi aket kaata suunkup ayo aalula, kukaayin-bam kem-tabasa ko.
JOH 13:2 Am tiinale, Yesus so, alami daang bakaalin tunum iso, ima inip kemin, siin kawu Setaan ata taba-lomda almi aket fukunin kaali, Saimon, kaa Keriot kayaak tunum, ami man Judas ami kolaya, ayo aket fukun-bamda Yesus ayo dap-fatap daalon o, kem-tal-uneba. Kemin,
JOH 13:3 Yesus ali utama yi, Atok ayo kanumin mafek mafek alik iyo kulaap-na tildak nimi sikil diim abasu no, kalale, kanola God alalta nam-baala tal tiinsi kemin, kulaata asuk God ami fanang unon o, kali kala, kala-lomdaya
JOH 13:4 kemin kulaata, ima ayo kambola tam tola okok kemin tunum imi kukup kaata kuluu-lomdiya yo, kala-lomda, ami saket uyo dilduu kutii, taakol ma kuluu-lomda, almi mikim kun diim falala-lom miki,
JOH 13:5 wok ma sing-daala daak falet dukum tem unuya, kuluu almi daang bakaalin tunum imi yaan diim tawaal so, sung so, bom-bilip iyo diing daaya-lomda, taakol kuluu diliit mo keyila, yakyak tal
JOH 13:6 Saimon Pita ami diim talale, ayo bokola ko: Kamokim kapyo, nami yaan kaa diing-nokomap ema? akale,
JOH 13:7 Yesus asiik bokola: Kamala kala nami kanubi kaa, kabi talalu utabap dinim. Katale, mulo kawu talalu bam-daa uta-mokomap o, akale,
JOH 13:8 Pita ayo bokola: Disa yo! Kabi atin ti nami yaan kaa diing daap-nokomap dinim o! akala, Yesus ayo bokola: Kabi kep-nalap nali diing daap-tin disa keli namti, kabi naso aket maakup kelin disa le, mafek mafek ma kup-ton o kali kaali, kuluulokomap disa yo, akale,
JOH 13:9 Saimon Pita ayo bokola: Aa, yak kunum bokolap kulaali, kuno yak nami yaan kaata-kup daa; kemin, nami sikil so, dabom so, alik iyo diing daap-nan o! akale,
JOH 13:10 Yesus ayo bokola: Dok kanolin tunum kapta oksam ukolap namti, kabi atin ti tambal-kup ke-lokomap. Kemin, tawaalak tem talokomap kaali, asuk angtiil alik ukolokomap disa yo. Disa! yaan kaata-kup diing-nokomap o, kala ko. Kemin, alik ibi yaap kata, maakup ma kaata-kup, tambal disa yo, kala ko.
JOH 13:11 Yesus ayo siin kawu utama yi, Tunum ayo kulaata nam-fatap-daalokoma kala, kalsa kemin, kulaata Yesus ayo boko-lomda: Alik ibi tambal; yale, atin maakup ma ata-kup tambal disa yo, kala kanum bokola ko.
JOH 13:12 Yesus ayo imi yaan diing daayila dinim kelale, almi saket kaa kuluu dildaak tinile, asuk tiinba-kup dik-daayila: Ibi nami kukup kaa, ipni diim kawu kanoyili kaali, talalu utamip o?
JOH 13:13 Ibi bokop-na-lomdip: Kukuyin tunum; kamokim o, nakan-kaan-umbip kaali tifan, nalalta kemin, kaa tambal-kup kanum bakan-umbip.
JOH 13:14 Nali ipni kamokim ale, kukuyin tunum kesi. Kemin, kamala kulu nali ipni yaan diing daayili kaa, kanola ipkal iltipni kap-tunum kusal imi yaan kaali, diing dakayin o, kala-somya ko.
JOH 13:15 Nali tituun-kup weng kaali, bokoyokomi. Kemin, okok kemin tunum ayo dok kano-lom win tibin ke-lom ata ata kelaya, ami kamokim ayo dabaala kabaak banoma disa; le, daang bakaalin tunum ayo dok kano-lom ata ata kelaya, tunum dabaala talse ayo dibiila kabaak banoma dinim. Kemin, Nami kukup ipni kanoyili ultap kaa ipkal kanumin o, kala-somdila, nami kukup kaa, ipni kukuyili uyo, malo ma iyo utamik o, kala-somla ko.
JOH 13:17 Nimi kukup kanoli kaami sang bokoyili kaali, utam-ilomdip kaal-kebup o kalokomip kawu, ibi kanumip namti, ibi fiyaap duu-mokomip o.
JOH 13:18 Nalta ibi talalu itam-somdila ulelsi kemin, nimi weng bokoli ultap: Ali tambal daa yo, kali kaali, alik ipni sang bokoyi disa; kemin, ipni tunum maakup ma ami sang kaata-kup bokoli. Kukup kanolin kaali tiltam tabamnula, God ami sukon tem kabak-ami sang uyo tifan tabamnuk o, kalsu kaa boko-lomdu: Tunum naso maakup ima in-bom yaabup kulaata, taba-lom asuk ayo kela-lomda nami waasi kep-nokoma no, kalsu.
JOH 13:19 Nimi aket fukunbi ayo, kanolin sang tiltam talokomu kaa, ibi utamipla, Fan, alalta Suunkup Ilin Tunum o, nikin o, kala-lomduya, kaa tiltam tabin disa; bom-suluya kawu, kaami sang kaali, kanum bokoyili ko.
JOH 13:20 Nali tituun-kup weng kala bokoyokomi. Dok kanolin tunum ata nimi tunum dabaali talokoma kaali, yaap ke talap o, aka-lomda ami weng kaali, weng sana namti, kaali nami weng kaa, weng san-kaamin tunum namti kulube; aa, kanta God nam-baala talsi nami weng kaayo, weng san kaama namti, kaali God ami weng kaakal weng san-kaamin tunum namti kabe no, kala Yesus ayo kanum bokola ko.
JOH 13:21 Yesus ayo kaa kanum bokoba-kup, aket dukum kaa fukun-bamda kaa faldak-tiimin weng disa, fatap weng ma bokola: Nami weng kalawaali ti tifaneng bokoyokomi: Nak-tunum ma ayo ipni diim kawu be ata nam-fatap-daalala, nelokomip te! yakale,
JOH 13:22 daang bakaalin tunum yakal aket yaapkan fukun-bamdipla, Kwin! kaakup kawanami sang ma bakaba ni? kal-bomdip tiyak ap-tunum daa atama atama kemiple,
JOH 13:23 daang bakaalin tunum maakup ma, atin ti Yesus ata aket dukum ami kola-laaba, ata lamo yak Yesus almi langlang tem mepso kawu tiinba. Kemin,
JOH 13:24 Saimon Pita, ayo ami du fafat o kala, bokola-lomda: Ti, kapta dik-daalalawa, kawanami sang bakaba kaa kalan o! akale,
JOH 13:25 ayo tikli yang Yesus ami mepso aba dik-daala-lomda: Kamokim kapyo, kaa dok kata ni? akala,
JOH 13:26 Yesus ayo bokola: Ale kaye? Nili bret ayo ma bak-duu kulaak titon sup tem daa-lomdi, tunum ayo koliya, tildak kutal-fukula kawu atam, Awu, ata taa! kalin o, kalale, yak bret anung ma kuluu-lomda, kulaak titon sup tem kabaak mo-lomda, Keriot kayaak tunum Saimon ami man Judas ami kolala, yak kutal-fuku-kem-salale,
JOH 13:27 Setaan ata taba-lomda, Judas ami aket fukunin kaali, ku-mafak-daalaya, Yesus ayo ami bokola ko: Dok nolon o, kalap kaali, abiltap kelan o! aka ko.
JOH 13:28 Alik tiin bomdip, ima ina faka-bokobip, iyo Yesus ami weng bokola kaali, weng sanip. Katale, tunum ayo ma Yesus ali kaa kanimin o kala kaa bakaba ni? akoma disa.
JOH 13:29 Kemin, Judas ayo nikil imi tuumon men kaa ata tiin molin kemin, daang bakaalin tunum imi aket kaali, Yesus ayo bokola-lomda: Kabi din ima ina faka-mokomup kaami mafek mafek iyo ma mo kulii-tal o, aka una nema yo? kaliple, malo ma ita boko-lom: Kabi dindap mafek mafek mo-lomdap mafek mafek dinimal imi kuya tal o, kala una nema yo? kalip ko.
JOH 13:30 Judas ayo bret kutal kufukuba-kup, keya-lomda kutamiip una ko.
JOH 13:31 Judas ayo kanola keya unale, Yesus ayo bokoyila-lomda: Dukum Ami Man Nayo, kamala kulaata nayo win so ke-lokomi no, kalbi. Kemin, unang tunum iyo nitam-ilomdipya, God ami tong kaali, baka-mokomip.
JOH 13:32 Nami kanolokomi kaali, nitam-ilomdip God ami tong dukum kaali, baka-mokomip namti, God alalta nam-tama tam tip kaltoop daalokoma. Le, abiltap-siik kanop-nokoma ko.
JOH 13:33 Man-miin ipyo, kamala kulu nali ipso kalawu ilanin tap ke ni kamboyila unila, ibi nami fenokomip. Yale, nami weng siin kawu Judiya kasel imi kamok kamok imi bokoyilasii kaali, kulaata ipkal weng fanang maakup kuluuta bokoyokomi. Kemin, nimi kabanokomi kaali, ibi tal aba din unokomip daa yo.
JOH 13:34 Kamala kulaata, nimi alokso kukup kaali, lo kemin kuyokomi kaali ma namti kala bombuu. Ibi kap-tunum kusal imi aket uyo kuya-una-tala-kemin aa, nimi kipni aket kuyinsi ultap ipkal kanola kap-tunum kusal iyo aket kuya-una-tala-kemin o.
JOH 13:35 Ibi kap-tunum kusal imi aket kaali, kuya una-tala-kemip namti, unang tunum kayak kayak iyo itamiwa yi, Kiili Yesus ami daang bakaalin tunum o, yokokomip o, kala Yesus ayo kanum bokoyila ko.
JOH 13:36 Saimon Pita ayo bokola-lomda: Kamokim, kabi dok banap i? akale, Yesus asiik bokola: Nimi unokomi kaali, kamala kaa kabi taang-kala-lom nimi daang bakaa-lomdap unolap disa. Lale, ilanin tap kawu kabi nimi daang uyo bakaalokomap o, akale,
JOH 13:37 Pita ayo bokola: Kamokim Dukum kapyo, nali kanimin o kalaliya kamala kulawu-kup kapni daang kaali, bakaalokomi dinim i? Kanola nelip aye, nelin dinim kelip. Kata, kapso alep maakup ti ilokomup o, kala kanum bokolale,
JOH 13:38 Yesus asiik bokola ko: Kabi kanola nelip aye, nelin dinim kelip. Kata, kabi alep maakup ti ilolup o, kalbap ema? Daa yu! Naktum kapyo! Nami weng kala bokop-tokomi uyo aket fukun-salapla! Kamala kutamiip kuyaku, awon kakaruk aalap ayo naan-tabin dinim kama ilaya, kabi nami sang ayo bokop-na-lomdap: Yi! Kaali ma atamsi dinim o, nakan-kaamsi, liip asuumano fak-daalokomap o, aka ko.
JOH 14:1 Yesus ayo almi daang bakaalin tunum iyo bokoya-lomda: Ibi aket mafak mafak fukunin daa kabak-ami miit kaali, God almi weng kaa boko-lomda: Kaata kanolokomi no, kalsa kaali, faneng ti kanolokoma no, kalbip-kup, ale kanola nami weng bokoya-lomdi: Kaata kanolokomi no, kalasii kaali ti, kakal ti faneng kanolokoma no, nakan-kaa-bam kutal-fukulin-kup ke-bamdip, ibi aket mafak mafak fukunin daa yo, kala-somla ko.
JOH 14:2 Nimi Atok ami am kaali, abiin yaapkan bom-bilip kemin, nali din-ilomdiya, ipni am abiin kiili dot-mokomi. Kaali kanolin disa dinam, nali kanum bokoyilami disa.
JOH 14:3 Kanola nali din abiin talalu-yokomi kaali, nali asuk tal ipni imbii-din daali, kipso naso maakup ilokomu.
JOH 14:4 Kemin, kipkal nami liip unokomi kaali, utamsip o, yakale,
JOH 14:5 Tomas ata bokola-lomda: Kamokim kabi dok unokomap i? Nuli ma utamsup disa kemin, liip kaata dok kanola ata-mokomup yoko? akale,
JOH 14:6 Yesus ayo bokola-lomda: Nalalta God be unemin liip kaali, kalabi le, nalalta weng tituun-kup bakamin kaami miit kayaak ali kalabi le, nalalta tiin kawong kaami miit kayaak namti kalabi. Dok kanolin tunum kaata, liip kusnum liip kawu talaba din Atok ami diim kaa unokoma disa; kemin, maakup nata-kup o.
JOH 14:7 Siin kawu ibi nitamsip dinam, kaa Atok akal atam kelamip. Katale, ibi nali natamsip dinim; kemin, Atok akal atamsip dinim o. Kamala kulaata nitamip kemin, kulu Atok akal atam ke-lomdip, kulu iltipni tiin ayo baa atabip te! yakale,
JOH 14:8 Filip asiik bokola-lomda: Kamokim kapyo, Kaalap ayo nuli kukuyilawa, atam-ilomdup, Awu, tifan kalum o, kala kanum bokolale,
JOH 14:9 Yesus asiik bokola: Filip kapyo! Nali sawaayak kipso yaabi kaali, kabi nali nitamin disa, bom-laabap o? Kawanta nali nataba namti, ali Atok akal atam keba. Kemin, kabi kanimin o, kala bokop-na-lomdap: Kabi Kaalap ayo numi kukuyan o, kalbap i?
JOH 14:10 Nali Atok ami diim tiinile, Atok akal nami diim tiina kesup. Kemin, kabi kaa faneng o bakaba no, kalokin dinim yoko? Nami weng ipni bakayila-yaabi kaali, nalmi aket fukunin weng kaata-kup, bakaya-laabi disa; Atok nami diim kawu bombe kaami weng kaata, bakaya-laabi. Kemin, ata dong dakaap-nam-balaya, ami okok kemin tambal tambal kiili, kanum-yaabi.
JOH 14:11 Kipkal nami weng uyo utam, Nali Atok ami diim tiinile kulaa, Atok akal nimi diim kawu tiina kesup o, kebi kaata, utam fan kala, kalin o, kala-somya kemin; kanola ipkal kanum bokolamup disa yo, kalip namti, ipkal nami okok ke-bamdi talalmin akal alik akal alik kanun-umbi kiita, itamdipla, Fan o, kala kalolip ko.
JOH 14:12 Nali ipni tituun-kup weng ma bokoyokomi kemin, weng san-bom-iliwa! Nali Atok be unokomi kawu, tunum ali ma nami lak duula namti, Atok alalta dong dokolaya, ali nami okok ke-bamdi talalmin akal alik akal alik kanun-umbi kiili, akal kanu-bamdaya, ok sakbaalim dukum kaa kanu-mokoma no. Kanu-balaya, nimi okok ken-umbi kiili, kabaak banip akaap-nokoma.
JOH 14:13 Nali, ami Man kemin, kanu-biliya, unang tunum iyo nali nitam-ilomdipla, Atok ami tong kaali, bakaalokomip o, kalbi. Kemin, ipni dok kanumin mafek mafek ma nolum o, kala nimi win diim kawu, Atok ami naan-daalokomip namti, alik kiili ti noyokomi le,
JOH 14:14 mafek mafek ma kuluulum o, kala nami win diim kawu dik-daap-nip namti, nakal kaa noyokomi no.
JOH 14:15 Ibi kanola nimi aket-kup kup-nip namti, nami weng kutiiya-lomdi kukaaya-tabasi kaali, kutal-fukulokomip. Ale,
JOH 14:16 nakal Atok ayo bokoliya, asuk Ami Dong Dakaayin Tunum kusnum ma kaata, dabaala tal ipni yam-titil-diilaya, kaata kipso suunkup suunkup ilokomip ale,
JOH 14:17 ali tituun-kup weng bakamin Sinik kemin, tawaal diim kalaami unang tunum ili ilmi tiin ta kaa atamsip disa; la, imi diim kaali, talon o, kalba. Yale, fan titil-foko: Ayo, kalolip dinim; kemin, ali ipni diim kulu bombe kemin, bii-lom kaa, ipni tiling tem kawu suunkup ipso ilokoma kaali, kipkal atabip kulaata taa!
JOH 14:18 Nali maas kamboyiliya, ibi man bon iltap ke ilokomip dinim. Kemin, biiliya, asuk kipni fanang talokomi.
JOH 14:19 Ilanin tap ke-lom kawu, tawaal diim kasel iyo maso ma nita-mokomip dinim. Yale, iptale asuk nita-mokomip o. Nali tam tiin ilokomi kemin, kipso maakup tam tiin ilokomip o.
JOH 14:20 Taandi asuk tam tiinokomi kawu, ibi nitamiwa, Nali Atok ami diim kawu tiinile, ipta nami diim kawu tiinip. Ale, nata ipni diim kawu tiini kesup kala, kalokomip o.
JOH 14:21 Kemin, kawanta nimi weng kutiiya-lomdi kukuya-tabasi kaa, utamda talalu kutal-fuku ilokoma kaata, ali ti nami aket-kup kup-ninsa. Kemin, tunum ayo ti nami aket-kup kup-nokoma kaa, nami Atok akal ami aket kaa kolale, naso maakup ami aket kaali, kolile; niyo ami kukolila, ayo nitam ke-lokoma no, kala Yesus ayo kanum bakayila ko.
JOH 14:22 Kanum bakayilale, Keriot kayaak Judas kaa daa; awasekim Judas ma ata boko-lomda: Kamokim kabi kalok kano-lomdapla, numi-kup kukuyim-balap tita-mokomup. Yale, kulaa tawaal diim kasel unang tunum imi tiin diim kaatale, kukuyim-balap tita-mokomip dinim o? akale,
JOH 14:23 Yesus asiik ami bokola-lomda: Kanola tunum ali nami aket-kup kup-na namti, kaata nami weng uyo kutal-fukulaya, nami Atok ata tunum kaami aket uyo kolale kawu, Alim nuyo tal tunum kaami diim tuluwa, aso suunkup ilokomup.
JOH 14:24 Ale, dok kanolin tunum kaata, nimi aket uyo ma kup-nin disa kela namti, ali nimi weng uyo talalu-kutal-fukulokoma dinim; ipni weng kala weng san-kaabip kaali, fan nalmi weng daa; kaali Atok nam-baala talsii ami weng kaata-kup bakayinbi no.
JOH 14:25 Nali ipso kalawu bomdiya, weng kala ipni bakayila-yaabi. Katale,
JOH 14:26 nali kamboyila unila, Atok ayo nami win diim kawu, alami Sinik Tambal ata dong dokoyila yam-titil-saanin ayo dabaala tal-ilomda, alta-kup ipni mafek mafek alik kaa kukuyin-bam ale, ipni aket fukunin kaali kufuyin-balaya, nami weng alik bakayila-yaabi kaami aket kaa, asuk fuku-daalokomip o.
JOH 14:27 Nikil kibi kamboyila unokomi kemin, tambal-kup balili-kala bomdiwa yo, kala-somya kemin, ibi tawaal diim kalawaami unang tunum imi diim kawu nuyo balili-kalum o, kala aket yaapkan fukun-bam suun-umbip iltap daa; ibi yam-titil-diiliya, nami aket tem kaa balili-kala ke-bomdi bii ultap kebip kemin, ibi aket mafak fukun-bamdip suunin daa yo.
JOH 14:28 Nimi weng kaa ipni bokoya-lomdi: Ibi keyila, din bom-biiliya, asuk talokomi no, yikila weng sanip kemin, Atok ayo sakbaalim dukum kemin, ata ata ke nali akaap-ninsa; kanola siin kawu ibi nami aket kaali, kup-ninsip dinam, nalmi Atok be unila, alalta ibi yam-titil-diilaya, umi fiyaap kawu uyo duulamipla yo, kala ko.
JOH 14:29 Kemin, ilana keyila unokomi kawu, ipkal utamiwa yi, Kaali fan, bokoya unse kala, kalin o, kalaliya, kamboyila unin dinim ilomdiya kemin, kamano kulu bokoyili no.
JOH 14:30 Tawaal diim kalawaami tiin molin o, kala kamokim Setaan ayo tal nam-bak-molon o, kala mep talaba kemin, nali ipso weng yaapkan baka-mokomi disa; le, Setaan ali titil-foko-lomda nali tiin molama dinim.
JOH 14:31 Kata, nali tawaal diim unang tunum ilta natamdip, Awu, kaali Aalap almi aket-kup konsa kala, nikin o, kala-somdiya kemin, Atok almi weng ti bokop-ninsa kaata-kup, kanun-umbi no. Na! tolnipla, nikil unum aa! kala Yesus ayo kanum bokoyila ko.
JOH 15:1 Yesus ayo bokoya-lomda: Nali ti faneng sok wain altap ale, Atok ata wain langabip kayaak altap. Ale iptale, nami tang altap o.
JOH 15:2 Nami tang alik iyo lap abuumin disa kelip kiili, Atok ata bo-kukan-tii-bam ale, tang lap abuumin kiitale, tang bakel-bala, mepkan ke-lomdip asuk namnom kiita, tilil taba-lomdip tambal-kup abuumik o, kala-lomda, talal-bam dota-yaaba. Kemin,
JOH 15:3 ultap kemin, nimi weng ipni kuyili kuluubip kaali, yak ipni aket tem kabaku dotuuyulala, tambal-kup bom-bilip o.
JOH 15:4 Kipkal nami diim kawu tiiniple, nakal kipni diim kawu tiini kelum o, kala-somya kemin, kanola as alami tang ayo ulumi tiil diim kabaku tabuulin disa ke-lokomu kaali, dok kano-somduya abuulokomu dinim. Ultap kemin, ibi nimi diim kawu yak fewa ilokomip dinim kaali, ipkal kanola titil-foko-lomdip, lap abuumin kukup tambal kaali, kutal-fukulokomip disa yo.
JOH 15:5 Nata sok wain ale, ipta sok wain ami tang iltap. Kemin, kanola ibi nami diim kawu tiiniple, nakal ipni diim kawu tiini kelup namti, ibi lap yaapkan kiili, abun-umbip. Ale, ibi nami diim kaali, fep-nokomip disa yo kala kep-nokomip kaali, ibi dok kano taang-kala kukup tambal kaali, ma kanolokomip dinim; ale
JOH 15:6 kanola tunum ayo nami diim, Yak fep-nokomi disa yo, kala namti, Atok ata taba-lomda, ayo as tang kii bakelna tildaak miit tem abe-bala foko kulii yang tiilip data-laan-umbip ultap kamaya-laaba kemin, sok wain tang ayo afetbi kutii-lom, as kuyak daalip kiin-tabanen-umbip o.
JOH 15:7 Kemin, ipkal kanola nimi diim kawu tildak fewa-lomdip nimi weng kaali, kutal-fukulip namti, kipni dok kanolin mafek mafek kiimi aket fukun-bamdip, Atok ami dik-daalokomip kaali, ipni weng kaa, weng san-ilomda kanoyokoma.
JOH 15:8 Ibi lap yaapkan so kemin, kukup tambal tambal kaali, kutal-fukulip namti, unang tunum kipni itamiwa yi, Awu, kiili Yesus ami daang bakaalin tunum kelipla kaa kanubip kala, kala-lomdipla kawu, nami Atok ami tong kaali, baka-mokomip.
JOH 15:9 Kemin, Atok ali nami aket-kup kup-ninsa ultap, nakal ti kanola ipni aket-kup kuyinsi. Kemin, ibi nimi langlang tem kulu bomdiwa yo, kala-somya kemin,
JOH 15:10 nali nalmi Atok ami weng kutii-lom kup-ninsa kaali, kutal-fukusi. Kemin, Atok ali nami aket-kup kup-nale, nali almi langlang tem kuluwu-kup bom-laabi kemin, ultap o. Ipkal kanola nami weng kutiiya-lom kukuya-tabasi kaali, kutal-fukulip namti, aa nakal ti ipni aket-kup kuya-lomdi, ibi nami langlang tem kulu ilokomip.
JOH 15:11 Kemin, nami fiyaap duumin kaami miit kaali, kipni diim kawu-kup bom-buluya, atin ti fiyaap-kup duu-biliwa yo, kala-lomdi weng kalawaali ipni kuyili no.
JOH 15:12 Nami weng ma kutiiyinbi kaali, kalabuu: Nali kipni aket suunkup kukaayila-yaabi ultap ke, iltipni kap-tunum kusal imi aket kaa ti kola-una-tala-ke-bamdiwa yo, kala-somya ko.
JOH 15:13 Tunum ayo ma aptum kusal imi lak kaata-kup duu-bam dong dakaayin-bamda alami angtiil lak uyo ma duulin disa ke-lomda taana namti, ap-tunum kusal imi aket kukaayin kaami kukup kusnum ma kaata, taba-lomdu akaala unokomu disa; ale
JOH 15:14 nali weng titil tibin kaa ipni bokoyiliya, kanu-mokomip namti, ibi nalmi nak-tunum kusal o.
JOH 15:15 Ok fukumin tunum ayo ma alami kamokim ami kanumin okok kaa kanuba kiili, utam, Awu kaa kanuba kaami miit uyo kaa bombuu kala, kalokoma dinim; kemin, nali maso ma bokoya-lomdi: Ibi nalmi ok fukulin tunum o, yokokomi disa. La, nalmi Atok ami bon tem weng alik weng san-kan-umbi kaata-kup bokoyinbi kala, kala-somdila kemin, ibi nalmi nak-tunum kusal kala, kalbi no.
JOH 15:16 Nali kipta uldaa nam-buu-lomdip: Ali numi tiin molin o, kalsip dinim. La, nata ibi ulela yim-buu-lomdi yim-bak okok kemin kaami diim daaliya, kukup tambal nuumin kaali, ibi lap abuumin-kup ke-bomdiwa yo, kalaliya, uldaa-yim-buusi. Kemin, kanoyasii kaali, ibi nami win diim Atok ayo mafek mafek sang ma dik-daalokomip kaali, kuyokoma.
JOH 15:17 Kemin, nali weng kaa ipni kutiiyi kemin, Ibi kap-tunum kusal imi aket kaali, kola-una-tala-ke-bamdiwa yo! kala Yesus ayo kanum bakayila ko.
JOH 15:18 Yesus ayo bokoyila ko: Kanola tawaal diim kasel iyo ipni mafak kamayin-bamdip ban bokoyip namti, kipkal aket uluum dukum kaali, kuluu-laamin daa yo. Kemin, ipkal utamiwa yi, Awu, kiili kamasi kawu ayo ban bokonsip namti, kaa nokol kanuyila tabip kala, kalolip o.
JOH 15:19 Ibi tawaal diim tunum iltap maakup kelamip kaali, nikil tambal-kup laabip. Yale, nata uldaa-yim-buuliya, ibi tawaal diim kasel imi kukup uyo kambola tiltam nami tunum kebip kemin, tawaal diim kasel kaliita ipni ban bokoya-laabip o.
JOH 15:20 Ibi fanang daalin! siin kawu bokoyi kaali, ok fukumin tunum ili ita ita ke ilmi kamokim ayo dibiilip kabaak banokoma dinim o, kaliya, weng sanip kemin, kawanta nimi waasi kep-na-lom kukup mafak kaata kukaap-ninsip namti, ipkal kanola ipni waasi keya kukup mafak kaa kukaayokomip. Kemin aa, kawanita nami weng kukuyinsi kaali, weng san-kaamsip namti, ita ipni weng kaakal kano, weng san-kaa-mokomip.
JOH 15:21 Tawaal diim kasel iyo Atok alta nam-baala talsii ali atamsip disa; le ipta nami daang bakaalin tunum kep-nambip kemin, nimi win diim kaata no, kala-somdipla, ili ipni kukup mafak mafak yaapkan iyo kukaayokomip o.
JOH 15:22 Nali tal unang tunum imi ban kemin kaata ma ku-fatap-daayin disa dinam, ili dok kano-lomdip numi kukup mafak kanun-umbup kaami uluum namti kalabuu kala, kalbip dinim; kata, kamano nali bokoyi kemin, ili boko-lomdipya: Numi kukup kaa tambal o, kalokomip dinim.
JOH 15:23 Kii kawanta ban bokop-nip namti, ili nami Atok aso maakup ban bokolip.
JOH 15:24 Sawaayak kaa, tunum kusnum ali ma nimi okok kemin kusnum akal alik kala talalbi kaali ma kanumsa disa. Kemin, ili natamiwa, Ami okok kemin uyo kanuba nu, naka-silip disa dinam, kaali utam, Numi kukup kaali, atin ti uluum dinim kala, kalolip. Yale, kamala kulu utam-ilomdipla kemin, Atok Alim numi ban bokoyip.
JOH 15:25 Ili God ami sukon tem kabak-ami tik-tiin-umbip kaali, tiltam aba-lomdu atin ti tifan eng o kaluk o kala, boko-lomdu: Disa kawu aket atul kukaap-ninsip o, kalsu no.
JOH 15:26 Ipni dong dokoyon o, kala God ami Sinik ata tituun-kup weng bakamin miit kayaak ali Atok ami diim kawu laaba kemin, ata dabaayili Atok ami kela tal ipni diim abamnaya, nimi sang alik kaali, bakaya-tal-une-mokoma no.
JOH 15:27 Diildiil nimi okok kemin kaali, kufolin disa bom-biliya, ibi naso laabup kemin, ipkal kanola nimi sang kaali, alik bakaya-tal-une-biliwa yo, kala Yesus ayo kanum bakayila ko.
JOH 16:1 Yesus ayo bokoya-lom kanum bokoyila ko: Nami weng bokoyili kaa, yak tildak iyo ipni kukup mafak kukaayokomip kaali, ibi nami lak duulip kaa ukadaa yang banolip o, kala-somdila kanum bokoyili no.
JOH 16:2 Ibi lotu am kaptamu yim-tal-fuku imbii tiltam saaklo tii bokoya-lomdip: Ibi asuk ma tiltam nuso ilin daa yo, yokokomip. Kemin, kanu-mokomip kaami am kaali, daan tiltam tabuya, tunum iyo taba-lomdip ipni yelip taan-yaa-mokomip kemin, imi aket kaali, God ami kukup tambal kanon-bulupla, fiyaap duuba no, kalokomip.
JOH 16:3 Lale, kanubip kiili, Atok kaa talalu atamsip dinim kiita kemin, ili ipni kukup mafak kanubip kaali, kukaayokomip.
JOH 16:4 Kata, nali kama kulawu ipni kaal ke-laamin sang kaali, bokoyili iluya, ili taltam ipni yam-mafak-dakamin am kaali, daan tiltam tulula kawu, ibi utamiwa yi, Awu, fan ami weng bokoyase kaali, tiltam lap abuulu kala, kala-lom bilili-kala titil-fak-daa-bomdiwa yo, kala Yesus ayo kanum bakayila ko. Yesus ayo bokoyila: Siin kawu naso nikil tiinsup kaali, maakup bomdup ipni dong dakaayin-bili, nikil laabup kaali, sang kanolin uyo ma bokoyinsi dinim. La,
JOH 16:5 kamala kulu nali keyila Atok nam-baala talsii ami fanang unokomi kemin, weng kulaa bokoyili. Yale, ibi fanang kaa ma bam-daa-lom ku-fatap-daa dik-daap-na-lomdip: Kabi dok banap i? nanbip dinim o.
JOH 16:6 Kamala kulu, kanolin sang uyo, bokoyi ipyo kaal kelip kemin, ipni aket tem kaatale, aket uluum ke-yimbu te!
JOH 16:7 Katale, nimi weng kalaali, ti faneng tituun weng bokoyokomi kemin, nami unokomi kaata, ipni dong dokoyokoma le, nimi unokomi disa kaali, ipni dong dakaayin o, kala God ami Sinik kaali, tal ipni diim abokoma dinim. Nami unokomi kaata tambal kemin, tamdiya, God ami Sinik Tambal ayo dabaayili taldaak kipni iipyak tem kabaku bomdaya,
JOH 16:8 alta tawaal diim kasel tunum unang iyo kukuyin-bam ale: Ibi ban wakamin tunum unang o, yakale, God ata atin ti tituun-kup tabin kukup tambal tambal kemin kaami miit kayaakim kalba-kup, God ali tunum kukup mafak kutal-fukulin imi liiwu itam-ilomda, yim-tam kot baan diim daalokoma no, kala kukuyin-bala, kawu utamiwa yi, Awu, fan nuli ban kemin tunum unang kala, ke-mokomip.
JOH 16:9 Kemin, ayo kukuyokoma kaami miit kaali, kala bombe no. God ami Sinik alta tawaal diim kasel kukuya-lomda, Ibi Yesus ami lak duulalup daa yo, kalbip kaali, iltipni kukup mafak kaata no, kalba-kup ale,
JOH 16:10 Yesus ali ibi kamboyila, Aalap fanang unse kemin, mulo kaa maso ma ata-mokomip disa yo. Ali tituun-kup tolsa le, God ami Man ali tituun-kup tabasa no, kala kukuyokoma.
JOH 16:11 God ali tawaal diim kalawaami kamokim Setaan ayo fotaba-lomda, dap-kot baan diim daasa kaali, imi kukuyokoma no.
JOH 16:12 Kemin, weng yaapkan bombe kaa, bakayon o, kalbi. Katale, weng kaa sakbaalim dukum kemin, ale ipni aket tem ayo uluum tabeyu, ibi talalu titil-foko utam kutal-fukulokomip disa. Kemin, kamala kaali, nali weng yaapkan maso ma, bokoyokomi disa yo.
JOH 16:13 Kemin, God ami Sinik talokoma alta, ibi atin fan tituun weng kaali, ata talalu ifiiyala dong dakaayin-bam talalu kukuyin-balaya, bam-daa utam ale, dik-daa kuluulokomip o. God ami Sinik ami weng bakayokoma kaa, almi aket fukunin daa; kaa God almi weng kaata-kup weng san ale, bakayokoma; ale, mafek mafek tiltam talokomu kaali, ku-fatap-dakayokoma no.
JOH 16:14 God ami Sinik kaali, nimi weng bakabi kaata-kup, kuluu-lomdaya, ibi bakayin-bam, ale kukuyin-bam, nimi win kaata kufup-nokoma no.
JOH 16:15 Atok ami aket fukunin so, titil so, mafek mafek alik kiili, nami diim kawu bom-bilip kemin, nita God ami Sinik ami bokoliya, ata mafek mafek nami diim kawu bom-bilip kiita, kuluu ku-fatap-daalala, ita-mokomip o, kala Yesus ayo kanum bakayila ko.
JOH 16:16 Yesus ami boko-lomda: Ilanin tap ke-lokomip kaali, ibi nali ma nita-mokomip disa yo. Ilanin tap ke-somdipla kawu, asuk nita-mokomip o, yakale,
JOH 16:17 daang bakaalin tunum malo ma iyo weng boko-una-tala-ke-bamdip, weng kabak-ami miit uyo kanimin o, kalba ni? aa, ami weng boko-lom: Ilanin tap ke-lokomu kaali, ibi nali nita-mokomip dinim; ale, ilanin tap ke-somdipla kawu, nali asuk nita-mokomip o, kalba-kup, weng anung ma kaata boko-lomda: Atok fanang unokomi no, kalba kaami weng miit kaa kanimin o, kala ni?
JOH 16:18 Ilanin tap ke-lokomip o, yaka kaami miit kaata, kanimin o kala yoko? Nuli kabak-ami miit kaa utabup dinim o, kem una-tala-kemiple,
JOH 16:19 Yesus ayo itama yi, Weng kabak dik-daalum o, kalbip kala itam ale, asiik bokoya-lomda: Ibi weng bokoyili kabak-ami miit kaata taken-bam ifin una-tala-kebip ema? Nami weng bokoyili kaali, ti fan ilana luuk daalin tap ke-lokomu kawu, ibi nali nita-mokomip dinim ale, ilanin tap keliwa kawu, asuk nita-mokomip o, yiki ko.
JOH 16:20 Ipyo, tituun-kup weng bokoyokomi kemin, ibi ni keyila unokomi kemin, nikil ipni aket tem kaali, uluum-kup tabeyulula ama-bamdip, am iwal in-bom ilokomip. Yale, kap-tunum kusal tawaal diim kasel ita fiyaap duu-mokomip; ale, iptale aket uluum-kup tabeyulula ilokomip. Yale, ipni aket uluum kaata, fal-siki-lom tambal-kup keyulula, ibi fiyaap duu-mokomip.
JOH 16:21 Kemin, unang uyo man kuulon o, kalokomu kaa utamu yi, Nimi man kuu-laamin am uyo, kulaata mepso tulu kala, kala-somdula, aket uluum dukum tebe-wokoma. Yale, bii ilanin tap, man ayo kuubu-kup, asuk man kuu-laamin kaami yol kaa kuluu aket uluum kanolin uyo maso ma fuku-daalokomu dinim. Man ayo kuubu-kup, kaata fiyaap duu-mokomu.
JOH 16:22 Kemin, ibi kamala kaali, unang man kum umi aket uluum kuluu-laabu ultap kaali kuluulokomip kemin, ilanin tap keluya, asuk tal ibi itamiya, ipni aket tem kaa fiyaap sakbaalim dukum duu-mokomip kaali, kaa kawanta dil moyokoma disa yo.
JOH 16:23 Bii-lom asuk nita-mokomip kaata, ibi nali maso dik-daap-nokomip dinim. Weng bokoyokomi kaali, ti fan tituun weng bakayinbi no. Ibi Atok ami mafek mafek sang dik-daalum o, kalip kaali, nimi win diim kaata dik-daaliwa, kuyokoma.
JOH 16:24 Ibi siin kawu, nimi win diim kaali, Atok ami mafek mafek sang kaa, dik-dakaala-yaabip disa. Yale, kamala kulaata, kulaa nitabip kemin, nimi win diim Atok ayo suunkup dik-dakaan-biliwa, ayo kukaayin-balaya, ipni aket tem uyo atin ti fiyaap-kup duu-biliwa yo, kala Yesus ayo kanum bakayila ko.
JOH 16:25 Yesus ali boko-lomda: Nali ipni faldak-tiimin weng kaata-kup bakayin-biliya, tiinsip. Katale, am ma daanokomu kaami diim kaata, faldak-tiimin weng kaa maso ma bokoyokomi dinim. Atok ami sang kaali, fatap kaata-kup bakayokomi no.
JOH 16:26 Am kanumin diim kulu daanokomu kulaata, nami win diim Atok ayo tituun-kup dik-daaliwa ayo dong dakaayokoma. Ibi nami aket kaali, kup-na-lomdip utamiwa yi, Fan Atok alta dabaala talse no, kalbip kemin, Atok alta ipni aket kaali, kuyinba. Kemin, kipni beten ayo maan tiiyila dong dokoyon o, kalba kemin, ipni aket kaali, ata numi weng uyo kuluu Atok ami kukaalama no, nokolip; daa, ipkal te!
JOH 16:28 Sawaayak kaali, nali Atok so bom-biisup ya, kela tal tawaal diim talsii. Kemin, ilom am ma daanuya, tawaal diim kalawaali kuno kela, asuk Atok fanang unokomi no, yaka ko.
JOH 16:29 Kanum bokoyilale, kulaata daang bakaalin tunum iyo bokola-lomdip: A! kulu faldak-tiimin weng kemin kapyo, kambola weng kaa fatap bokoyapla utamup o.
JOH 16:30 Kaata utamuwa yi, Kabi mafek mafek miit alik kii utamsap kemin, tunum ili dik-daalin dinim bom-iliwa kawu, kabi imi aket fukunbip kaali, kapsiik itam-ilomdap maan tiiyila-yaabap kala, kalbup-kup kawu, nuli titamuwa yi, Kabi Kaalap so laabap; la talsap kala, taka-som kelup o, kaliple,
JOH 16:31 Yesus asiik bokoya-lomda: Atin ti mafiing diim kulawu bam-daa utamip o?
JOH 16:32 Talalu ibi weng sanin! Kaami am kaa tiltam talokomu no, yakasii namti kula tiltam tulu kemin, nikil ibi sak funbi sekela-una-tala-ke, kep-na unokomip. La, kaa nalafin ilokomi disa; Atok ayo naso Alim maakup bom-bala ilin ata-kup Alim maakup ilokomup o.
JOH 16:33 Uyo kaata kanum bokoyiliya, ipkal weng san-ilomdiwa, balili-kala titil-fak-daa-bomdiwa yo, kala-somdila kemin, ibi tawaal diim kalawu ilip kaali, angtiil yol so, aket uluum dukum so, kiili, tiltam tale-bulu ilip. Yale, ti aket fuku-daa-lom nitamiwa yi, Ata ata ke-lomda, tawaal diim kalaami titil kaali, dibiili kabaak bana no, kala kemin, balili-kala titil-fak-daa-bomdiwa yo, kala-somla kemin, kanum bokoyila ko.
JOH 17:1 Yesus ayo kanumin weng uyo bokoyila, disa kelule, ti abiil tikiin daa le, bokola ko: Atok kapyo, nami taanokomi kaali, mepso kulu tiltam talon o, kalu kemin, kabi bokop-na-lomdap: Tunum alik imi dabom o ninsap kemin, nakal unang tunum iyo ulel-nambap imi iliim uyo boyiliya, tiltam suunkup ilin unang tunum ke-lokomip. Kanolin kemin, kabi nam-tama tam asal kaltoop daalap iyo nitamiwa yi, Atok kaltapta uldaa-nam-buusap kala, kala-somdipla, nakal kapni win kaali, kufop-tiiya kaata, utam-ilomdipla, kapni win kaali, kufup-tokomip.
JOH 17:3 Kemin, kabi suunkup tambal bom ilin kaami miit kaa, unang tunum iyo, kabi titamiwa yi, Kapta-kup fan ti God maakup kala, kalale, nali nitamiwa yi, Yesus Kraist nali kaltapta nam-baalap talsii no, kalip namti, ili suunkup ilin unang tunum ke-lokomip o.
JOH 17:4 Nali tawaal diim kala yaabi kaali, kapni okok kemin kaata kanuman o, kala nam-baalap talsii namti kulaata dinimnu kulaaliya, tunum unang iyo Atok kapni titil kaali, utamdiwa kawu, kapni tong kaa bakabip o.
JOH 17:5 Kemin, Atok kapyo! Kabi sawaayak tawaal talalulin disa biisap kaali, Alim maakup bomduwa nimi win kaali, win fiinin ke-bom biisi. Kemin, kamala kuluwaakal, nali kapni tiin diim kawu win fiinin ke-bom ilsi kaa asuk kup-nalapla yo, kala Yesus ayo kanu-bam beten kemsa no.
JOH 17:6 Ayo beten ke-bam kanum bokola ko: Kapni tawaal diim tunum iyo ulelnapla nami daang bakaalin tunum ke-silip kiili, kaltapni kemin, iyo ulela-lomdap kup-napla, nali kapni sang kaata bakayin-bili kapni weng kaali, weng san kutal-fuku-lom
JOH 17:7 utam talaalip, Mafek mafek alik kanu-bam bakan-unbi kiili, kaltapta kup-nap kanum-umbi kala, kalip; ale,
JOH 17:8 nali kaltapni weng kup-na-salap kaata-kup bakayin-biliya, iyo weng san-ilomdip utam talaalip, Awu, faneng Alim maakup ilin la, nam-baalap talsii no, kalbip o.
JOH 17:9 Nali kiimi beten keyokomi kemin, tawaal diim kasel unang tunum alik imi beten keyokomi disa. Kemin, kaltapni ulel-ninsap kiita-kup, dong dokoya beten keyon o, kalbi. Kiili, kaltapni tunum alik-daap o, kala-somdila, imi beten keyokomi.
JOH 17:10 Nami unang tunum alik kiili, kapnile, kapni unang tunum alik kiita, nimi no. Alim numi unang tunum kiili, nami kukup tambal kaata kanu-bilipya, kayak kayak iyo itamdiwa, nami win kaata kufumip ko.
JOH 17:11 Nali maso tawaal diim kala ilokomi dinim o. Kapni fanang tam unokomi kawu, daang bakaalin tunum kalawiita, tawaal diim kalawu ilokomip kemin, Atok atin ti tambal-kup tabasap kapta, kaltapni titil kup-ninsap altap kaata, kuluu-lom dong dokoya-lom dal molapya, yakal Alim nultap ke aket maakup fanang maakup kelin o, kala-somya ko.
JOH 17:12 Nikil maakup bom-bulup kaali, kaltapni titil kup-ninsap alaltap kaata kuluu-lomdila, tiin mo-bomdi dal molila, maakup aye ma an-maaklo kelakin dinim kesip. Yale, maakup ma kaata-kup kelaya, maaklo kelon o, kalba. Kemin, God kapni Sukon Tem weng ma boko-lomdap: Kaata kanolokomi no, kalsap namti tifan tiltam tababu.
JOH 17:13 Kemin, kulaata nali kapni fanang din unokomi kemin, tawaal diim kula bii kulaata, weng kala bokoyiliya, nimi aket tem uyo balili-kala-bomdi fiyaap dun-umbi tap ke-bamdipla, yakal imi aket tem uyo balili-kala fiyaap kaata-kup duu-bamdiwa yo, kala-somya ko.
JOH 17:14 Nali tunum kalawiili kapni weng kaali, kukuyili utam ale, weng san kutal-fukusip o. Nali tawaal diim tunum daa; nali asal tunum kemin, yakal kano asal unang tunum kelip kemin, tawaal diim kasel iyo aket atul-kup kukaayin-bam imi tilip-kup kamayimbip o.
JOH 17:15 Nali kiili, tawaal diim kaldaak yim-bu-yim-bi unan o, kalbi dinim; lale, tunum mafak Setaan ata yam-mafak-daalama kemin, nali kapni dik-daap-tiliya, Kapta taba-lom dong dokoya-lom dal moyilapla, tambal-kup bomdiwa yo, kala-somya ko.
JOH 17:16 Nali tawaal diim kalaami tunum daale; aa, yakal ti tawaal diim kalaami tunum daa.
JOH 17:17 Kemin, kapni weng kaali, atin ti faneng kemin, kapni weng ayo kuyak imi aket tem dabom tem daayapla, iyo tiltam kapni tunum ke-lom atin ti tituun-kup tibin kelin o! kala-somya ko.
JOH 17:18 Sawaayak kawu, nimi nam-baalap talsii kaali, tawaal diim unang tunum imi iipyak tem kawu talsii. Kemin, ultap o, daang bakaalin tunum kalawiili, nalta yim-baali tawaal diim kalaami unang tunum imi iipyak tem kawu unokomip.
JOH 17:19 Kemin, nali kiimi lak o kala titil-fak-daa taandila imi iliim boyon o kalbi kemin, iliim boyilila yakal titil-fak-daa-lomdip kapni man tituun-kup tibin unang tunum kelin o, kalalila taanokomi no, kala Yesus ayo kanum bokola ko.
JOH 17:20 Kemin, Yesus ayo beten ke-bamda bokola ko: Nali daang bakaalin tunum kalawiita-kup beten keyon o, kalbi disa. Nali beten keyokomi kaali, tunum unang nami weng kulii yang bakayin-bilip weng sandip, tiltam nami lak dakaa-mokomip kiiso, beten keyon o, kalbi no.
JOH 17:21 Alim nuli ti Alim maakup ke-bomdup aket maakup, fanang maakup, kesup la kep-ta talsii ultap o. Tunum unang nami lak duubip yakal ti, kanola Alim nulultap ke aket maakup ke-bilipla, tawaal diim kalaami unang tunum yakal imi kukup tambal kaa utamiwa yi, Fan eng, Atok kaltapta nam-baalap talsii no, kalin o.
JOH 17:22 Kapni titil kup-ninsap kaata, nakal iyo kuya keliya, nikil maakup ilokomip kaali, kapso naso Alim maakup aket maakup ke-bom laabup ultap keliwa yo, kala-somya ko.
JOH 17:23 Kemin, suunkup kabi nami diim kawu tiinaple, aa nakal kapni diim kawu tiini ke laabup ultap, yakal kanola aket maakup kelipla, tawaal diim unang tunum iyo utamiwa yi, Kaltapta nam-baalap talsii kala, kalale, kabi nami aket kup-nansap ultap ayo kanoya-lomdap, unang tunum nami lak duubip imi aket kaali, kuyila kebap kala, tikin o kala-somya ko.
JOH 17:24 Atok kapyo, nami aket kaali ti, unang tunum ulel-ninsap iyo, nami din ilokomi kaali, ti iso din kawu ilik o, kalbi kemin, kanola sawaayak tawaal uyo talalu kutiilin disa biisap kaali, nami aket kaa dukum-kup kup-na-som ale, kapni titil ayo kup-ninsap. Kemin, nami aket fukunbi kaali, ili nimi titil dukum kuluusi so, dawang iilfosi so, iyo utamin o, kalbi no.
JOH 17:25 Atok tituun-kup tabasap kapyo, tawaal diim kasel unang tunum iyo titamsip daa; ti nata-kup kabi titamsi kemin, nimi tunum kalawiita-kup titamipla, kapta nam-baalap talsii kala kalbip o.
JOH 17:26 Nata-kup kabi tam-fatap-daaliya, kabi titabip kemin, nali maso ma tam-fatap-daa kukuyin-bili talalu titamin o, kala-somya kemin, kabi nami aket kup-nambap ultap, kuno yakal ap-tunum kusal ilimi aket uyo kuyum o, kal-bomdipla yo, kala-somya kemin, nali iso maakup tik-daayili ilokomup o, kal-bomda Yesus ayo beten kamayin-bisa ko.
JOH 18:1 Yesus ayo beten kela disa kelale, almi daang bakaalin tunum so nikil yak aba daak Wok Kidron ayo yakan ale, iyo yak aba tam langabip unip.
JOH 18:2 Kemin, langabip kaptam-ali, Yesus nikil iyo suunkup din kawu unen-umbip kemin, Judas ata Yesus ami dap-fatap-daalon o, kalba akal, langabip kaptam-ali atamsa.
JOH 18:3 Kemin, Judas ayo yak aba din tunum awem o kala, pris imi kamok kamok sole, Falosi iso, imi dik-daayilale, iyo ilmi unuk tabuulin tunum malo ma iyo ulelale, Rom imi aami malo ma ulela-som ke, kuyaku-lomdipla, Judas alalta liip kukula iyo tal langabip mepso tilip. Kemin, iyo ilaam so, yokon so, daang bal so, sinam bal so, iyo kuliilip tilip ko.
JOH 18:4 Kemin, Yesus ali utama ya, Mafek mafek alik kanup-nokomip kiili, kaa bom-bilip kala kala-lomda, ayo yang imi mepso kuluba dik-daaya-lomda: Ibi kawanami fen-talabip i? yakale, iyo bokolip ko:
JOH 18:5 Nuli Yesus, Nasaret kayaak, ami fen talabup o, akipla, Yesus ayo bokola: Kaa nalalta taa! yaka-kem-salale, suun-daa-lom iyo wakadaa yang lo aba lamo daak-abip ko. Judas ayo dap-fatap-daalon o, kalba ayo waasi dinim tunum iso, tal tolniwa kemin,
JOH 18:7 Yesus ayo asuk dik-daayila-lomda: Ibi kawanami fen-talabip yoko? yakale, iyo boko-lomdip: Nuli Yesus, Nasaret kayaak, ami fen-talabup o, akipla,
JOH 18:8 Yesus ayo bokola: Nali asuk kamasi kaa bokoyili kaali yoko? Kula nalta te! Ibi nimi fen-talabip namti, tunum kaliili, keyip unin o! yaka,
JOH 18:9 kanum bokola kaali, siin kawu beten ke-bam boko-lomda: Atok kapyo, nali kaltapni tunum ulel-nala-salap maakup ma ayo kambolila maaklo ke-lokoma dinim o, kulu tifan tiltam tuluk o kala bakayinsa.
JOH 18:10 Saimon Pita ayo bainat kuluu-lomda, kuyak awem tunum hetpris o, kalbip ami ok fukulin tunum Malkus ami talang kaal tingtup ayo tuk-duu kutal-daak tela ko.
JOH 18:11 Kanolaya, Yesus ayo Pita ami bokola-lomda: Kabi yak bainat kaayo, asuk kulaak alami men abuulan! Kuno keyilapla kanop-nin o. Atok ali kuno angtiil yol dukum uyo kuluulan o, ninsa kemin, kuluulokomi no, aka ko.
JOH 18:12 Rom imi aami so, imi kamokim aso, Judiya kasel kamok kamok imi unuk tabuulin iso, iyo Yesus dap-tal-fuku sok delip ko. Wasital kulaami diim kulu, tunum awem Kayafas ayo ulduulipya, awem tunum diilim ke bombe kemin, aami iyo Yesus dap-tama din Kayafas ami yimnon Anas am kaptam daalip.
JOH 18:14 Kayafas akal sawaayak kaali, Juda imi kamok kamok imi bokoya-lomda: Kaali ti tambal dukum o. Tunum kalawaata dabuulupla, ata ap-tunum kusal numi abiin uyo kuluu-lomda, ata-kup taanala, Rom imi waasi tunum iyo tal dinokomip disa kemin, unang tunum alik iyo tambal-kup kelik o kala, kala ko.
JOH 18:15 Saimon Pita aso, daang bakaalin tunum ma aso, alep iyo Yesus ami daang bakaalipla tilip kemin, tunum awem hetpris ayo, Yesus ami daang bakaalin tunum ma kaali, atamsa kemin, ali Yesus aso tam hetpris ami am uti daam tem unale,
JOH 18:16 Pita atale, tam seplo amitom diim kulu tola ilan-salala, Yesus ami daang bakaalin tunum ma kaata, tunum awem hetpris ayo atamsa kemin, ali tildang ilomda, amitom tiin molin unang umi bokowale, Pita ayo bokolu: Tiltam tal o, akule, fan tam una;
JOH 18:17 atabu-kup bokolu ko: Kabi tunum kaami daang bakaalin tunum ema yo? akule, Pita ayo bokowa ko: Daa. Nali disa te! wakale,
JOH 18:18 ayo diil tabelule, wokok kemin tunum so, soldiya iso, nikil iyo as kuyak daalip kiin-tabamnale, iyo tal wing tiil uyo falala kuyak mo-bomdip diil fuumipya, Pita aso tala nikil maakup diil fuumip ko.
JOH 18:19 Tunum awem imi kamokim hetpris o kebip ata Yesus ami dik-daala-lomda: Daang bakaalin tunum imi sang uyo bokop-na-som ale, kapni kukaayila-yaabap kaami sang kaali, bokop-nan o, akale,
JOH 18:20 Yesus asiik boko-lom: Nali ti fatap diim kulu unang tunum imi weng uyo kukaayila-yaabi le, aa Juda imi tala-tala-kemin baan diim o, kala abip ma ma imi lotu am awem sole, lotu am diildiil so, iyo weng kaali, kukuyila-yaabi kemin, nami weng kaa maaklo ma yawaal-daa bakan-umbi dinim o.
JOH 18:21 Kanimin o, kala kabi nimi dik-daap-nap yoko? Nali unang tunum kiili tituun-kup weng kaata-kup bakayin-biliya, weng sansip. Kemin, kabi unang tunum imi dik-daayawa, ita nami weng bakayila-yaabi kaali, bakap-tik o.
JOH 18:22 Yesus ayo kanumin weng uyo bokola kem-salale, soldiya ma mep kulu tolba ata taba-lomda, Yesus ami bina daa-lomda bokola: Kabi kamokim dukum kaa kanumin weng kaa bakaalin dinim o! akale,
JOH 18:23 Yesus ayo bokola: Nali weng mafak ma bokoli namti, kaata no kala, bokop-nan o. Lale, nali kanola weng tambal kaata, bakaanbi namti, kabi kanimin o, kala nelap yoko? aka ko.
JOH 18:24 Kemin, Anas ayo boko-lomda: Dap-tamalip tunum awem diildiil Kayafas ami fanang unin o! yakale, soldiya iyo Yesus ayo ti kano sok de-dibii-unip ko.
JOH 18:25 Saimon Pita ayo tal tola-bomda diil fuumale, tunum kulu wing tiil tiin-bomdip diil fuubip iyo, dik-daalip ko: Kabi mep tunum kaami okok kemin tunum ema yo? akiple, ayo bokola: Ii daa! Nali disa te! aka ko.
JOH 18:26 Awem tunum diildiil ami okok kemin tunum ayo Pita ata taba-lomda talang kaal tak-daa kutenba ami miit maakup kemin, ata tal bokola: Kabi yak langabip kawu Yesus aso bom-ilapla, nali titamin tap kebi nema yo? kala kanum bokolale,
JOH 18:27 Pita ayo asuk bokola: Daa yo! Nali atin ti disa yo! ke-bamda weng sana yi, Awon kakaruk aalap namti naan-taba kala, kalale, weng sana ko.
JOH 18:28 Atin ti kutim malang tem kulu Juda kamok kamok iyo Kayafas ami am dukum uyo kambola-lomdip Yesus ayo dap-tamalip din kiyap Pailat ami weng talalmin am kaptam daa-lom, iyo aket fukun-bam bokolip: Ee, kiyap kaali, God ami lak kaa duusa disa kemin, misii nuli tam ami am unokomup kaali, God ami tiin diim kawu nuli yaap ke-lokomup disa kemin, din Pasova umi ima fuu-bam inokomip kaa, falalamup o, kala, kala-lomdip, kela tam saaklo kawu bom ilipla,
JOH 18:29 kiyap Pailat ayo tiltam bokoyila ko: Ibi tunum kalawaali, dok kanolin kukup mafak uyo ma noyilala, atam dibii-tilip yoko? yakale,
JOH 18:30 isiik bokolip ko: Kanola tunum ayo kukup mafak ma nuu-mama dinim kela kaali, dibip-ta talolup dinim o, akipla,
JOH 18:31 kulaali kiyap Pailat ayo bokola: Kipkal dap-tama din-ilomdip iltipni lo uyo weng kutiisip diim daa-lom, kawu kot baan diim daalin o! yakale, isiik bokolip ko: Rom kasel ibi nuli bokoya-lomdip: Juda kasel ibi tunum ma dap-kot baan diim kawu dabak daa-lom, aalip taan-yaamin disa yo, ken-umbip kemin, dibii-tulup o, akip ko.
JOH 18:32 Siin kawu, Yesus ayo boko-lomda: Ilom am ma daanokomu kaali, nali kanola taanokomi no, kalsa kemin, am kula daana kulu ami weng uyo fan kulu tabu ko.
JOH 18:33 Kemin, asuk Pailat ayo tam am un-ilomda, soldiya iyo bokoyilala, Yesus ayo dibii tam uniple, ayo Yesus ami dik-daala-lomda: Kabi Juda kasel imi kamokim king ema? akale,
JOH 18:34 Yesus asiik bokola ko: Kaali ti kaltapta aket fuku-daa-lom, nali dik-daap-nap elile? kaa tunum ita ma bokop-tipla, kaa kanum bokolap i? akale,
JOH 18:35 Pailat asiik bokola: Ee, nali Juda kayaak daa. Kaltapni tunum so, tunum kamok kamok iso, ilta tam-baalip taldak nimi sikil diim abamnap kemin, kabi kaa kanimin ma noyapla yi? akale,
JOH 18:36 Yesus asiik bokola-lomda: Nali tawaal diim kaldaak-ami kamokim king daa; nali tawaal diim kaldaak-ami king dinam, nami okok kemin tunum iyo dinan-taba-lom nali dil molipla, tunum ali ma taba-lomda nam-baala taldak Juda kasel kamok kamok imi sikil diim uyo abomi dinim. Katale, nali tawaal diim kaldaak-ami king daa yo, akale,
JOH 18:37 Pailat ayo dik-daala ko: Kemin, kabi king elile disa yi? akale, Yesus asiik bokola: Kaltapta boko-lomdap: Nali king o kalap. Yale, nali akumen nam-uluya, tawaal diim kala talsii kaali, ti tituun weng kaata-kup bakayon o, kala talsii kemin, unang tunum tituun weng fenbip iyo, nimi weng, weng san-ilom utamipla, Ami weng kaa ti faneng kala kebip o kala, bokolale,
JOH 18:38 Pailat asiik boko-lomda: Atin ti weng tifan weng kaa, kanimin kaata ni? aka ko. Kiyap Pailat ayo kanum bokoba-kup, asuk Juda imi kamok kamok imi bokoyila ko: Nali tunum kala atamila, ali kukup mafak so ma nolaya, dibii-tilip dinim.
JOH 18:39 Lale, iltipni kukup kaali, kanumin kemin, Pasova iintang am o, kala ima inin am daanu kaali, ibi tal nami dik-daap-nipya, nali tunum sok de-yimusip kiiyo, maakup ma tildaa dabaa-laabi kemin, ipni aket fukunbip kaa, nali nalmi soldiya imi bokoyilila, Juda kasel kipni kamokim king kaata, tildaa dabaalin o, kalbip ema? yakale,
JOH 18:40 tunum alik iyo dukum-kup naan-bamdip: Daa yo! Daa yo! Kabi Barabas ata-kup tildaa dabaayilap talak o, kal-bomdip, ami win kaata dukum-kup naanip. La, Barabas ayo tunum ye-bam ale, yukut in-bom kemin tunum o.
JOH 19:1 Kanolipya kulaali, Pailat ayo dabaala yak aba din soldiya imi diim abamnale, ita sok faklet ta kuluu-lomdip langatal kaan bi kela-lomdip,
JOH 19:2 yak sok langliing soyim ma kuluu malang ukolin tap ke-lomdip, kulii yak Yesus ami dabom diim dildaak tinela, yak ilim isak fulut kaali, makela iyo
JOH 19:3 tildang bokola-lomdip: Juda kayaak imi kamokim king balap yoko? akan-kaa-bamdipla, atafiimin weng bakaan-bam ale, kolbaang tuup aa-bamdip kemip ko.
JOH 19:4 Pailat ayo asuk tam abip tola tunum imi bokoya-lomda: Kipyo, nali ami ban wakamin uyo ma utamin dinim keli kemin, tamdi dabuu dap-taltam abip daayilila, ipkal atamdiwa yo, yakale,
JOH 19:5 Yesus ayo dibii taltam saaklo daalipla talaaliwa, Yesus ami dabom diim kaali, sok langliing soyim ta kuluu-lom, malang ukolin tap ke-lom dildaak tinelale, kulaa ilim isak fulut ma dildaak tinelip so, kanolin tiltam tolnale, Pailat ayo tunum bom-bilip imi bokoyila ko: Ti tunum kala, daatamin o, yakale kulaali,
JOH 19:6 tunum awem imi kamok kamok so, lotu am bolis iso, iyo atam-ilom, naan-bam kanum bakamip ko: Ayo dibii-din as diim kawu dabak daa aalin o! Ayo dibii-din as diim kawu dabak daa aalin o! kala kanumipla, kiyap Pailat ayo bokoya-lomda: Nali ami kukup mafak kaali ma utamin dinim keli kemin, nikil iltipta-kup dabuu-lomdipya, dibii-din as diim kawu dabak daa aaliwa taanak o, yaka ko.
JOH 19:7 Juda kasel imi kamok kamok isiik ami weng bokoyila kaali bokola-lomdip, kanum bokolip ko: Tunum kalawaali boko-lom: Nali God ami Man o, ken-yaaba kemin, numi lo ma kaali boko-lomdu: Kanolin tunum kaali, aalip taan-yaamin o, kalsu kemin, aalin o, kalip ko.
JOH 19:8 Kiyap Pailat ayo kanolin weng kaa weng san ale, ami aket tem kaali, suunin dukum uyo atin ti dukum kelala,
JOH 19:9 asuk tam am tam-ilomda, Yesus ami dik-daala ko: Kabi doku ilin tunum i? akale, Yesus ayo weng so ma bokolin dinim kelaya,
JOH 19:10 Pailat ayo bokola-lomda: Kabi kanimin o, kala nimi weng dik-daap-tili kaa, kapsiik ma bokop-nin disa nolap i? Nali titil soyim kemin, nita taldaa tam-baali unolap; ale soldiya iyo bokoyilila, timbi din as diim kawu tam-bak tam diilipla taanamap. Kemin, kabi kaa utabap dinim yoko? kala kanum bokolaya,
JOH 19:11 Yesus asiik kiyap ami weng uyo maan tela-lom bokola: God ali titil kup-tama dinim kela kaa, kabi dok kano-som, taang-kala-lomdap nali dibiilap tiil-banomi disa. Kemin, kanola kapni ban kemin kaali dukum la, tunum ma ata nam-baala tildak kapni sikil diim ababi ami ban kaata, atin ti dukum o, aka ko.
JOH 19:12 Pailat ayo weng san-ilomda, liip ma fen-bam keli unak o, kala-lomda fenba. Lale, Juda ita ti naanin-kup ke-bamdipla: Tunum kanta ma boko-lomda: Nali king o, kalokoma kaali, Rom kasel ipni king Sisa ami waasi ke-lokoma. Kemin, kabi kaa kanola dabaalap unokoma namti, kabi Sisa ami ap-tunum disa; kabi ami waasi ke-lokomap o, akip ko.
JOH 19:13 Kiyap Pailat ali kanum bokolip weng san ale, ayo tiltam Yesus ayo dap-tama tam saak lo weng talalmin baan diim daalip, daak tiina ko. Weng talalmin kabaak-ami win uyo boko-lomdip: Tuum Kom Abiin o, ken-umbip ale, Hibru imi weng kaatale boko-lomdip Gabata yo, ken-umbip.
JOH 19:14 Am kula daana kulu, Juda iyo am sabi kaali, iintang am Pasova ima inin kaami mafek mafek uyo talal-bulup sala yo, kala talal-bilipla, atan tal dabimnule, kiyap Pailat ayo Juda imi bokoya ko: Ti ipni king kala, daatamin! yaka-laam-salale,
JOH 19:15 isiik dukum-kup naan-una-tala-ke-bamdip bokolip: Dabaalip yak banak o! Dabaalip yak banak o! Dap-tama din as diim daa aalin o, kemipla, Pailat asiik bokoyila ko: Ibi ipni king kaali ti, soldiya imi bokoyilapla, dibii-din as diim kawu dap-tam-diilipla taanak o! nanbip o? yakale, tunum awem imi kamok kamok isiik bokolip: Nuli king dukum kaali, Rom kayaak ipni king Sisa maakup ata-kup, malo ma dinim o, akipla,
JOH 19:16 kulaali Pailat ayo aket fukun-ilomda kanoyiliya, imi aket uyo tambal-kup keyuk o, kala-lomda soldiya imi bokoyila ko: Ipyo, taldipla, Yesus ayo dibii-din dabak as diim daalin o, kala-lomda, dabaaya yak imi sikil diim abamna ko. Soldiya iyo tal Yesus ayo dap-tamalip unip uyo,
JOH 19:17 Yesus alta almi as tiim uyo kuu nakal tii kuliila din bokon win ma boko-lomdip: Dabal Kun Mukun o, ken-umbip tiila kemin, Hibru imi weng kaatale, mukun kaptam-ami win kaali, boko-lomdip: Golgota yo, ken-umbip.
JOH 19:18 Soldiya iyo tunum alep ma kuluu Yesus aso, yim-bak as diim daalipla, Yesus ayo tunum alep iyo ma kabang ma kaldang ke Yesus ata iip kabaaku dap-tam diilip ko.
JOH 19:19 Pailat ayo weng ma boko-lomda: Yesus Nasaret kayaak kaali, Juda kayaak imi kamokim king o, kala kanum bokolaya, alami ok fukulin tunum iyo dolnip kabak-ali Juda kayaak imi weng so, Grik imi weng so, Rom kasel imi weng so, ke weng asuumalo kal kanola dola-lomdip sukon uyo dola kuyak tam Yesus kaami as diim kumobip kaami dabom diim kabaku kuyak tam diilipla kemin, amdu katip kaalile, abip dukum win so umi mepso kawu kemin, tunum yaapkan iyo tal tiyak tam-daa tik-tii-bam atafiimiple,
JOH 19:21 tunum awem imi kamok kamok iyo din Pailat ayo bokolip ko: Kabi kanimin o kala Juda imi king o, kalapya dolbip yoko? Daa! baan bokoyap talulin aa! Alta baka-bamda: Nali Juda kasel imi king o, ken-umba no, kala dola kutiilin aa! akiple,
JOH 19:22 Pailat asiik bokola: Daa! weng dola kutiibip kulaali ti, ti dolbip o, yaka ko.
JOH 19:23 Soldiya iyo tal Yesus ayo dabak as diim daka-bam ale kulu, ami ilim delela-lomdip sikip atalingkal kutii-lomdip tunum atalingkal iyo sikip maakup maakup kebip-kup siyot kaatale, batbat ma bakiisip disa; kaali butoop ilim altap bakiisip kemin,
JOH 19:24 nikil iyo boko-una-tala-ke-bam bokolip ko: Nikil kaa balat-nokomup disa kemin, tuumon ma kulaalup tam aba daak aba ke-bam kawanta ata ata kela kala kala-lom ata kuluulak o, kalip kaali, atin ti tifan tiltam tuluk o kala, sawaayak kawu God ami Sukon Tem kabak uyo boko-lomdu: Iyo nimi ilim ayo dalela kabaanu-lomdiple, nimi siyot batbat ayo kuluu tuumon ta kulaalip tam aba daak aba ke-bam kawanta ata ata kela kalale, ata kuluulak o, kalsu uyo, fan tiltam tulu ko.
JOH 19:25 Yesus ami awak so, ami awak umi neng uso, Klopas ami kalel Maria so, Makdala kayaak unang Maria uso, nikil atalingkal iyo tal Yesus as diim mepso kulu tola iliple,
JOH 19:26 Yesus ayo titaldaak daala yi, Awak so, siin almi daang bakaalin tunum aket dukum kukaala-yaaba aso, tolnip kala, kalba-kup, awak uyo bokowa ko: Akumen kupyo, mep tunum kulaata kupni man kelak o, kala kanum bokowa-lomda,
JOH 19:27 almi daang bakaalin tunum ayo bokola: Kapyo, mep kuuli kapni kawak kep-tu no, akala kulaali, fan daang bakaalin tunum ayo awak Maria uyo umtama din alami am daa-lomda tiin mola awaat bom-ilsip ko.
JOH 19:28 Kanubi disa kelule, Yesus ayo utama yi, Nimi mafek mafek kanu-mokomi no, kala talsii namti kulu disa kelu kala, kala-lomda ayo utama yi, God ami weng anung ma bokosu kaali, fan kulu tiltam tabamnu kala, kala-lomda bokola ko: Wok del kep-na no, kalale,
JOH 19:29 wok kon lafup soyim ayo fokolip daak wok kok tabasa tem unule, abum tap kaata kuluu as tang diim kabaku fak-daa-lomdip kuyak tam Yesus kuk-delip inale, bokola ko:
JOH 19:30 Kulu disa kelu no, kalale, dabom uyo ukdaala tal langlang tem unale, Yesus ayo almi sinik kambolala, unala, taana ko.
JOH 19:31 Kemin, am kula daanba kulu Juda kamok kamok iyo utamipla, Am sabi kaali, atin God ami iintang am dukum uyo daanokomu kala, kala-lomdip bokolip ko: Tunum imi as kuli kiili, keyupla, as diim kawu ilokomip kaa, mafak kemin o, kala-lomdip, din Pailat ayo bokolip ko: Kabi soldiya iyo bokoyilawa, dindip tunum imi tal kun tal kun kiiyo, fakela-imtiiliwa, iyo taanipya kawu, yim-bi-din buluulin o! akipla,
JOH 19:32 kulaali, soldiya iyo asuk din-ilomdip kamosinim dap-diibip ami tal kun ayo fakelale, kuno ma ami tal kun ayo fakela-daptii ke-lomdipla,
JOH 19:33 Yesus ata tildang ulipya, Taanba kala, kalalipla, ami tal kun kaata-kup fakelmin disa, kelip.
JOH 19:34 Kata, soldiya ma ata kanaat kuluu-lomda Yesus ami malan kun tem bakela kem-salale, kasentap-siik kiim so, wok so, iyo sing-tam daalip ko.
JOH 19:35 Kemin, tunum ma kaa atamse kaali, unang tunum kipkal utamipla, Yesus ali ti fan taanse no, kalin o, kala-lomdaya bokoyase. Kemin, ipni weng kuyase kaa, ti fan tituun weng kaali, utama yi, nimi weng kaa tituun weng bokoyasii kala kalase no.
JOH 19:36 Kanolin kaa tiltam tabamnala God ami Sukon Tem weng kaali tifan tiltam tuluk o kala, boko-lomdu: Tunum kaami kun kaa ma fakela aalokomip dinim o, kalbu-kup,
JOH 19:37 God ami Sukon Tem weng anung ma uyo boko-lomdu: Tunum kanaat ta saal-ambip kaali, unang tunum iyo atafii-mokomip o, kalsu. Kemin fan, kaa tiltam tabamnu.
JOH 19:38 Uyo kanubi dinim kelule, awasekim Josep ayo abip Arimatea kayaak kemin, ali Yesus ami lak duusa. Yale, ali Juda imi kamok kamok imi itam-suun-daaya maaklo Yesus ami lak duusa. Kemin, ali utamaya, Kaali alik kanubi dinim kelu kala, kala-somdaya kulaali, ayo din kiyap Pailat ami dik-daala ko: Yesus ami as kuli kaali, yaap kulii-unomi yoko? kala tili no akaya, Pailat ayo bokola: Ayo, yaap kuno din kuluu kulii-unolap taa! akale, Josep ayo tam Yesus ami as kuli kaayo, kuluu kulii-una ko.
JOH 19:39 Nikodimas kutamiip tal Yesus atamsa aso, tal Josep ami dong dokola. Kemin, ali as meya so, alo kaaso, imi dan ket maakup ma abuusip kaali, tang tambal-kup tabin kemin, kulii-talale, wok ket kaptoop ami uluum kaali, 30 kilo. Kemin,
JOH 19:40 tunum alep iyo Juda kasel imi tunum kuwakamin kukup kaata, kano-lomdipla, Yesus ami as kuli uyo ilim dukum ma kuluu falala duu-lomdip, tang tabin wok ayo angtiil kabelale, ilim ayo falala dibii-din dawaalum o, kalip ko.
JOH 19:41 Yesus aabip mepso kulu, as san lang ma dikisip kaptamu tuum tem ma bombe kemin, alokso-kup kulu kalu-silip. Lale, tunum ayo ma taanaya, dip-tal kaptamu ma dawaalin disa bilip. Kemin,
JOH 19:42 kulaata alep iyo fanang daa-lomdip, God ami iintang am mepso tulu kemin, dibii-din samaan kawu dawaalokomup dinim; kemin, mep tuum tem kultamu, alep iyo Yesus ayo dip-tiilum o kala, alep dibii yang dawaalip ko.
JOH 20:1 God ami iintang am uyo dinimnale, kulaa Sande am maakup ma kaami diim kutim malang tem kulu, Makdala unang Maria inang nikil iyo, atin kutim malang so bom-salaya, nikil yak aba din tuum tem din ulip, Amitom tuum kom kuluu saal liibip kaali, busuba kala, kalale kulaali,
JOH 20:2 Maria uyo abiltap bina tal-ilomdu Saimon Pita so, Yesus alami aket dukum kukaala-yaaba daang bakaalin tunum aso, alep imi bokoyu ko: Kipyo, numi Kamokim ami tuum tem kaptam-ali kuluu kuliinbip kaali, nuli din atam-somdupla, ayo dibii-din doku dawaa-silip i? kalolup dinim o, yukule,
JOH 20:3 Pita so, daang bakaalin tunum ma aso, alep iyo abiltap bina din tuum tem unip. Kata,
JOH 20:4 daang bakaalin tunum ma asiik Pita kuu liip daa asiik din kom tem amitom kulu
JOH 20:5 dik-dii daak-aba tinet daalale, ilim kaal kaata-kup bombe kala atama. Yale, tam unoma dinim kano bom-ilale,
JOH 20:6 Pita ata mafiing tem kalawu unaba kemin, ata bina tam tuum tem ulala, Ilim falala-lom dibii-din dawaabip kaata-kup bombe kala, atam ale,
JOH 20:7 Yesus ami dabom diim ilim falala duubip uyo, dilduu kulaalip yang kusnum kababa kala atama ko.
JOH 20:8 Kanum-salale, daang bakaalin tunum ma asiik tala aso, tam tuum tem ayo tam ulale, Fan, tam tiinda tambanba kala, kala ko.
JOH 20:9 God ami Sukon Tem weng kaali, boko-lomdu: God ami uldaa-dabuusa tunum ayo taanokoma. Yale, asuk tam tiin kawang kelak o, kalsu kaami sang kaa, alep iyo talalu aket kaa fanang daa utamsip dinim kemin o.
JOH 20:10 Kemin, alep iyo atam kela abip unip ko.
JOH 20:11 Maria uyo tam tuum tem saaklo kawu tola-bomdu, amabu kemin, dik-dii daak aba titam daaluya,
JOH 20:12 ensel alep ma ilim namaal mikilin iyo tal Yesus ami abiin yukul kabaaku tiinbip kala, itam talaalu yi, Ma ata toop ami ol duuk lo tiina, ma ata dabom lo kawu tiina ke tiinbip kala, itam kem-sulule,
JOH 20:13 ensel alep iyo bokowip ko: Kupyo, kanim kalan amabap i? ukipla, uyo bokolu: Ipyo, nimi Kamokim dabuu dabii-unbip kaa, dibii-din doku daabip yoko? kal-bomdiya amabi no, ke-bam ale,
JOH 20:14 asuk dak-siki talaalu yi, Yesus namti tolba kala atamu. Yale, uli atamdu, Awu, kulaali Yesus alta kala, kalsu dinim o.
JOH 20:15 Kemin, ayo bokowa-lomda: Kubi kanim kalan ma amabap i? Aa, kubi kawanami fen-talabap yoko? ukale, umi aket fukunu kaali, as san lang kaltam-ami tiin molin tunum ata no, kala-lomdu bokolu ko: Kabi Yesus ami as kuli uyo kulii-din kaloku kutiibap namti, kukup-napla kuluu kulii-unon o,
JOH 20:16 akule, Yesus ayo bokowa ko: Maria, kupyo! ukala, uyo fal-siki Hibru weng boko-lomdu: Raboni, kapyo, aku kaali, uyo boko-lomdula: God ami weng kukuyin tunum, kabi! akuya,
JOH 20:17 Yesus ayo bokowa: Nali Atok ami fanang abiil tikiin kaali, tam unin dinim bombii kemin, kubi tildak nam-tal-fukumin daa yo! Kemin, kubi din nami tunum nikil kiiyo, bokoya-lomdap, Yesus ayo bokop-na-lomda: Nali tam abiil tikiin kayaak ami fanang unokomi kemin, kaa nalmi Atok ale, ipni Kaalap ale, kaa nami God ale, kipni God o, kala Yesus ayo kanum bokop-na atam tili no, kala din nimi tunum nikil imi kanum bokoyan o, ukale, unu.
JOH 20:18 Makdala kayaak unang Maria uyo din-ilomdu, daang bakaalin tunum nikil imi bokoyu ko: Nali Kamokim ayo atamdiya tili no, kala bokoyule, Yesus ami weng bokowa kaayo, usiik din-ilom alik bokoyu ko.
JOH 20:19 Daang bakaalin tunum nikil iyo Juda kamok kamok imi itam-suun-daa-lomdip am maakup kaami kutamiip kulu, nikil am maakup ma kutamu ang-de-lomdip, nikil am saal ayo talalu lii-lom bom-ilipya, Yesus ayo ilmi bom-bilip iipyak tem kulu tiltam tolale, bokola: Nikil kibi aket kulaa, akola balili-kup kala bomdiwa yo, yaka-lomda,
JOH 20:20 alami sikil so, malan kun tem abang so, iyo kukuyila utam, Awu, fan kaali Kamokim alalta kala, kalalip atin ti fiyaap duumip ko.
JOH 20:21 Kanolipya, Yesus ayo asuk bokoyila: Nikil ibi aket balili-kala bomdipla, kanola Atok ami nam-baala talsii kemin, nakal ibi yim-baali unokomip o, kala-lomda,
JOH 20:22 nikil mam-kuyale, bokoya: Nikil ibi God ami Sinik Tambal ayo kuluulin o, kala kanum bokoyale,
JOH 20:23 ibi itamiwa yi, Dok nolin unang tunum iyo imi aket uyo fal-siki-lomdip ilmi kukup mafak uyo, kenbip kala, kalale, bokoya-lomdip: God ayo ipni ban kemin uyo takan-tiiyimba no, kalip namti, iyo utamiwa yi, Faneng, God ali numi kukup mafak uyo atin ti fan takan-tiiyimba kala, kalokomip. Lale, kawanita itamipla, imi aket uyo fal-sikilin dinim ke-lomdip ilmi kukup mafak kaa, kenbip disa kiili, bokoya-lomdip: God ali ipni ban kemin kaali, takan-tiiyin dinim be no, kalip namti, ili utamipya, Faneng, God kaali, numi kukup mafak uyo takan-tiiyin dinim bombe kala kalokomip o, kala, kanum bokoyila ko.
JOH 20:24 Kemin, Yesus ami tal daang bakaalin tunum itamse kaali, daang bakaalin tunum ma Tomas ami win ma kaali, Didimas, ali unaya, tunum nakalkal ma kiita-kup bom-iliwa, Yesus ayo tal imi iipyak tem kulu tolna atamipla, una bom-silipya,
JOH 20:25 kawu Tomas ayo tal itamale, aptum kusal iyo bokolip ko: Nuli Kamokim ayo atamup o, akipya, Tomas ayo boko-lomda: Nali ami sikil kaami sil tem uyo atam-som ale, nimi sikil diil uyo kuyak sil tem daa-sinom, nimi sikil kaayo, kuyak malan kun tem kanaat bina-silip tem daa, kanolokomi disa kaali, fan o, kalokomi disa yo, kala kanum bokoya ko.
JOH 20:26 Kulaali, bom-ilipla, am bukupkal ma disa kelala kulu, Yesus ami daang bakaalin tunum iyo asuk am kaptamu nikil ang-delipla, kaata Tomas aso nikil bom am saal uyo talalu lii-lom bom-ilipya, Yesus ayo asuk tal imi iipyak tem kulu tolale, bokoya ko: Ibi aket balili-kala bomdiwa yo, yaka-lomdala,
JOH 20:27 kulaa Yesus ayo Tomas ami bokola-lomda: Na! kawu kapni sikil diil ayo kutal nimi sikil kaami sil tem kaali, daa atam-sinom ale, kapni sikil kaali kutaldak nimi malan kun tem kaami kanaat binabip, kanaat tem uyo daa-lom ke utamdapla, Kalawaali disa kalolap ale, Awu faneng alalta nu! kala-lomdap nakan o! akale,
JOH 20:28 kulu Tomas ayo Yesus ami bokola-lomda: Kabi ti nimi Kamokim ale, kabi nami God o, akale,
JOH 20:29 Yesus asiik Tomas ami bokola-lomda: Kabi nitam-ilomdap, Awu, ti faneng, alalta nu, kala nimi lak uyo duulap ema? Tunum kanta nitamin disa ke-lomdip, nami lak duulip namti, fiyaap duulik o, kala ko.
JOH 20:30 Yesus ami tal tawaal diim kala bom ilsa kaali, mirakel o kala kukup akal alik kusnum kusnum yaapkan kiiyo, kanu-bam, unang tunum imi dong dakaayin-bamda ilsa kaali, Yesus almi daang bakaalin tunum ilmi tiin diim kulu kanumsa. Kemin, alik kiili sukon tem kaldak dol-nokomi disa kemin, anung-kup ma,
JOH 20:31 dolniya ibi utamipya, God ayo Yesus kaa tunum imi dong dakaap o, kala dabaala talse Kraist o, kala-som ale, ali God ami Man alik-daap o, kala dolni kemin, ibi Yesus ami lak uyo duulipla, ami win diim o, kala suunkup ilin unang tunum kelin o, kala dolni ko.
JOH 21:1 Bom-ilom am ma daanale, asuk Yesus ayo yak aba din wok Taiberius kumun kawu, almi daang bakaalin tunum nikil imi diim kawu din fatapnala, atamsip kemin, kanumsip kaami sang namti kala bombe.
JOH 21:2 Tunum nikil imi win kiili, Saimon Pita, Tomas ami win ma kaa Didimas, Galili kayaak abip Kena kasel Nataniel akal, Sebedi ami man tunum alep yakal, kuno daang bakaalin tunum alep ma iso, ita nikil tiinbip kemin,
JOH 21:3 Saimon Pita ayo bokola: Nakal aniing abun uni no, kalale, iyo bokolip: Nuso nikil unum o, kaliple, nikil yak aba tam bot tem tam tiin aniing fen-tal-unemin-kup kebi, kutamiip dukum kanolin kaali, aniing so ma abuulamip dinim kelip ko.
JOH 21:4 Kanum tal-unemip am daanale, Yesus ayo tal yak wok balang malii kawu tolna. Katale, daang bakaalin tunum iyo kaa atam, Ayo Yesus ata no, kalolip dinim keliwa, Yesus ayo bokoya ko:
JOH 21:5 Man-miin kipyo, aniing so ma kuluulip yoko? yaka weng umuuyale, isiik bokolip: I, dinim o! akipla,
JOH 21:6 Yesus ayo bokoya ko: Ipni aniing men kaali, kulaalip tal tingtup lo kabaak banuya kawu, aniing kiili ma kuluulin o! yakaya, fan aniing men uyo binalip wok tem unula, aniing yaapkan iyo tal daak un-ilom donga uluum dukum kelaya, dok kano-lom kutaltam bot tem tiilamip dinim kelip o.
JOH 21:7 Yesus ami aket dukum konsa tunum ayo, Pita ami bokola ko: Yak kulaali Kamokim ata te! aka-laam-salale, kulaali Pita ayo weng sanba-kup ami saket kaali, dilduu kutii-lom okok keba kemin kulaa kuluu mikiba-kup, unfoko daak wok tem un-kem-salale,
JOH 21:8 aptum kusal ita, kaa samaan kawu bom-bilip dinim kemin, 90 mita kiita-kup o, kala-lomdipla, aniing men uyo bot kuso sisii dilili kutaldak balang tii kela,
JOH 21:9 iyo met ulipya, As kuyak daala kiinba kala, atam talaalip, Aniing so, ima bret so kutii-bom, aniing kaata, as tiil kabaaku kiinba kala, atamiple,
JOH 21:10 kulaali Yesus ayo bokoyila: Mep nikil iltipni aniing abuulip kiita ma kulii-tiliwa yo, yakale,
JOH 21:11 Pita ata yak bot tem un-ilomda, aniing men kaayo, sisii kutama tildak wok balang tala kemin, aniing men kabaak-ali aniing yaapkan-kup tal aba daak unaabip. Kemin, aniing kabaak-ili 153. Aniing kiili, deng yaapkan yale, aniing men kaali, balata tabokin dinim kelu ko.
JOH 21:12 Yesus ayo bokoyila ko: Tal ima inin o! yakaya, tal-ilomdip atamiwa yi, Ali Kamokim o, kalbip. Lale, ili suun-daa dik-daala-lomdip: Kabi kawanta ni? akolip dinim kelip.
JOH 21:13 Yesus ayo bret ayo kuluu-lomda fakela kuyinba-kup, ale aniing kaakal duula kuuya kela inamnipya,
JOH 21:14 ami kom tem tam tiinda ilsa uyo daang bakaalin tunum ilmi diim-kup tiltam fatawa fatawa kebi liip alep fak-daase kemin, kulaata asuum diim namti kulu tal itam kela ko.
JOH 21:15 Aniing so, ima so, iyo inabip-kup, Yesus ayo Saimon Pita ami bokola-lomda: Asekim Jon ami man Saimon, kapyo. Kabi mep kaptum kusal imi aket kup-nimbip kaali, kabaak banu, kapta nimi aket kaata dukum-kup kup-nambap ema? akale, Pita ayo bokola: Ee! Kamokim kabi utam, Nali aket dukum kup-tambi kala nambap o, akale, Yesus ayo bokola: Kabi nimi sipsip man iyo ima ifap-nam-balawa yo! aka ko.
JOH 21:16 Ayo asuk bokola-lomda: Jon ami man, Saimon kapyo, kabi nimi aket dukum-kup kup-nambap eli yi? akale, Pita asiik bokola: Ayo, Kamokim kabi utam-ilomdap, Nali aket kup-tambi kala, kalbap o, kalale, Yesus ayo bokola: Kabi nimi sipsip kiili, tiin mop-na bom-balapla yo! aka ko.
JOH 21:17 Kulaa asuk liip asuumano kaali, dik-daala ko: Jon ami man, Saimon kapyo, nami aket kup-nambap elile disa ye? akale, Pita ayo utamala, Liip asuumalo dik-daap-na-lomda, Kabi nimi aket kaa kup-nambap ema? Kala, kala-somdaya, aket uluum tabelule, ali Yesus ami bokola-lomda: Kamokim kapyo, mafek mafek alik kaa utamsap. Kemin ale, kulaa nimi aket kaa kup-tambi kala no, nambap o, akale, Yesus asiik bokola: Kabi nami sipsip iyo ima ifap-nam-balawa yo!
JOH 21:18 Kaali tituun weng bokop-tokomi kemin, kabi sawaayak man kasaa ilsap kaali, kabi ti kaltapni aket fukunin kaata-kup bomdapla, mafek mafek talal-bam ale, yak abip abip uyo tal-une-bisap. Lale, bom bii-lom sawal-nokomap kaali, kaltapni aket fukunin kaata-kup, kuluulokomap disa. Kemin, sikil kufolapya, tunum kusnum ita taba-lom sok de-tamu-lomdip: Bokon kabang-ali unokomi dinim o, kalsap. Yale, kabang liip timbi-din daalokomip o, aka ko.
JOH 21:19 Yesus ayo weng faldak-tiimin weng kaa bokosa kaali, tunum ita kanolin kukup uyo kuluu-lomdip Pita aalip taanaya, unang tunum iyo Pita ami kukup tangbal kaali, utam-ilom, God ami win kufon-bamdip, ami tong baka-mokomip kaami sang kaata bokosa no. Kemin, Yesus ayo boko-lomda: Kabi nami daang bakaa-lom tal o! ansa ko.
JOH 21:20 Pita ayo fal-siki atam talaala yi, Yesus ami aket kola-laaba tunum ayo numi daang tem kulu talaba kala kalale, tunum ali siin kawu ima im-bomdip ayo lamo yak Yesus almi langlang tem kawu bokola: Yesus Kamokim kapyo, kawanta tam-fatap-daalala, tam-bak waasi imi sikil diim uyo abam-nokomap yoko? ansa ata.
JOH 21:21 Kemin, Pita ayo daang bakaalin tunum kaali, atam ale, Yesus ami bokola ko: Kamokim kapyo, mep tunum kalaali yi? akale,
JOH 21:22 Yesus ayo Pita ami bokola: Kulaa ye? nami aket kalaali tunum ayo, keli bomdala, bom bii asuk talokomi kaali, kano bom-sala talomi. Yale, kaa kaltapni san ema? Kabi daang bakaalin-kup tala-balawa yo! akale,
JOH 21:23 kulu Yesus ami weng Pita ami kanum bokola kaali, yen yakaba din aptum kusal imi diim unule, Yesus ami lak duulin iyo bokolip ko: Daang bakaalin tunum kalawaali ma taanokoma disa yo, kalsip. Katale, Yesus ali weng ma boko-lomda: Kaa taanokoma disa yo, kalsa disa kemin, boko-lomda: Kaa nami aket kaali, tunum ayo kamboli bom-balaya, bombii talokomi uyo kano bom-salaya, talomi. Yale, kaa kaltapni san o? ansa ko.
JOH 21:24 Kemin, siin kaali, daang bakaalin tunum alalta mafek mafek alik Yesus ami kanumsa kaami sang kaata dolase no. Kamala kuluwu kaami sang kaata, unang tunum iyo bakayimba kemin, nuli utamuwa yi, Ami weng uyo ti fan ti tituun-kup tabin weng o, kalbup kemin,
JOH 21:25 Yesus ayo mafek mafek yaapkan kiili, kanu-bisa. Yale, tunum iyo ma mafek mafek alik kanu-bisa kaami sang kaali, dolmalip dinam, atin ti numi tawaal kalawaali buk yaapkan dolnip kiita, bukulamip o.
ACT 1:1 Tiofilus kapyo, sawaalak kawu, Luk nayo, sukon ma dolasii kaali, kamasi Yesus ami mafek mafek nuu-bam ale, kukuyim-bam kebi kulaayo,
ACT 1:2 God ata dabii tam abiil tikiin unse kaami sang kaata dola kuyasii. Kemin, dibii tam unin disa ilomdala, God ami Sinik Tambal ata Yesus dong dokolaya, weng uyo almi kalaan tunum ulelase imi kuyila bokoyilala kawu, God ayo dibii tam unse. Kemin, kamala kulu kabak-ami sang ayo sukon ma dola kup-ton o, kali.
ACT 1:3 Kemin, Yesus ayo aalip saak-alomda, asuk tam tiindala, almi kalaan tunum ilmi diim kawu fatap-nala, atamiwa yi, Tifaneng tiin kawang keba kala, kalalipla, atama atama kemsip o. Ilmi diim fatap-nala atafii-biliwa, God ami unang tunum yim-bii tiltam almi miit tem tii tiin molokoma kaami sang ayo bakayim-bala bii, am ilmi-kup 40 kiita tal-unipla,
ACT 1:4 Yesus ayo din almi kalaan tunum itama iso ima im-bom ale, titil weng uyo bokoya-lomda: Kibi Jerusalam kaa kambola yang tildang kemalip, ti kulu bom-iliwa, kipni bokoya-lomdi Aatumen almi Sinik Tambal ayo dabaala talokoma no, yakasii ayo, fen-bam iliwa yo, kalaya kaa!
ACT 1:5 Jon kulaali, unang tunum imi oksam-kup ukayinsa, ale nali am malo ma yak banala, God ayo, almi Sinik Tambal ata dabaala tal, kipni iipyak tem ayo dotuu-yilala, yaap ke-lokomip o, yakase ko.
ACT 1:6 Kemin, Yesus ami kalaan tunum iyo tala-tala-ke Yesus ami dik-daalip ko: Kamokim kapyo, waasi ita taba-lomdip, numi tawaal kalawaa kuluusip. Kemin, kapta tal Israel numi tawaal ayo kuluu-lomdap, Israel kayaak numi king kelapya, nokol nulmi kamosinim kanumsup tap ke-lom, nulta tiin molamup eli yoko? kemipla,
ACT 1:7 Yesus asiik bokoya-lomda: Aatumen almi aket fukun-unba kaata, akal utamala, Kalok nolin diim kawu kaa kanolokomi kalsa. Kemin, ibi kaali dok kata kanu-mokoma uyo utabip disa. Kaa kipni mafek mafek daa.
ACT 1:8 Kipni mafek mafek kaali, ilom God ami Sinik Tambal ata iltipni diim abamna ilokomip kawu, titil-foko-lomdipla, kawu din abip Jerusalam une-bala, Provins alik Judiya une-bala, bilin Sameria une-bala, yak aba umbilin am bokon alik kala dik-daa kulaasu ayo une-bala une-bala, ke-lomdipla, nita-bom-bilip nami kanumin kanumin kukup kanun-umbi kaami sang ayo bakayila-tal-une-mokomip o, kala bakayila ko.
ACT 1:9 Kemin, kabak-ami sang uyo bakayim-bala bom atafiimiple, God ayo dabuu dafola atamip, dibii tam bun-kem-salale, ibin ta tilnong akiilula, atamin disa kelipla,
ACT 1:10 ami unaba uyo, titam dakamin-kup kemipya, mep kulu tunum alep ma ilim namaal dildaak tikilin tal mep kulu tola-lomdip
ACT 1:11 bokoyip ko: Galili tunum kipyo, kibi kanimin o, kala suunkup bomdip titam abiil tikiin-kup daabip yoko? Yesus kaa kamboyila, God ata dibii tam abiil tikiin una ayo bombii atamip tam una, altap asuk tildaak talokoma. Kemin, kulaa kela unin o, yikip ko.
ACT 1:12 Amdu tikiin kaa bom-bilip kaali, Oliv Tikiin kala-laabip. Kemin, kaa Jerusalam mepso kawu bombe kaami liip kaali ti, God ami iintang am daana Juda iyo ilmi liip mep unemin kaata-kup. Kano tunum alep iyo kamboyila unipya, Yesus ami kalaan tunum iyo amdu Oliv Tikiin ayo kulaa kela,
ACT 1:13 tal Jerusalam abalipla, tam ilmi abiin ma kaptoowu sin-yaabip kemin tam unip ko. Imi win kiili: Pita, Jon, Jems, Andru, Filip, Tomas, Batolomyu, Matyu, Alfius ami man Jems, Rom kayaak imi itam-suunin tunum Saimon, awasekim Jems ami man Judas kanolin kiita, tam uniple, iso, unang malo iso,
ACT 1:14 Yesus awak Maria uso, Yesus almi nakal kiiso, alik imi aket fukunin ayo maakup ke-bomdipla, titil-fak-daa-bomdiwa, God ami naalin kup kemip ko.
ACT 1:15 Bii am asuumalo anang ma keliwa, kawu tala-tala-kelip uyo, 120 kanolin ema ita kemin, Pita ata iipyak tem tam tola bokola ko:
ACT 1:16 Nak-tunum kusal kipyo, weng san iliwa! Siin sawaayak uyo, God ami Sinik Tangbal ata King Devit ami bokola-lomda: Bom ilom kaptoowu tunum ma tiltam taba kaata, kanolokoma no, kalaya, Devit ata kuyak Sukon Tem daa dolsa. Kemin, kamala kawu, Keriot kayaak Judas ata, taba-lom tunum kiiyo, liip kukuyila, dap-tal-fuku sok de-du-silip. Kemin, Devit ami weng ayo tifan weng tituun dik-tam-daa tiltam talsuu.
ACT 1:17 Kemin, kaali Yesus alalta ulduu dip-taldak kumkal numi iipyak tem daale, ok kalawaayo, numi dunuuyila, akal kola, kese no kalase.
ACT 1:18 Judas ami fuut tabebi kulaase kaami sisol kola-silip uyo, kuluu-lomda, tawaal anung ma mose no. Ami taanse kaali, olban asiik kulii tildaak tawaal aba-lomda, mat bikin-ilom, ami ol mat tem alik kabak bikinsuu.
ACT 1:19 Kemin, Jerusalam kayaak alik iyo weng sandiwa, tawaal anung kaami win kaali, Akeldama yo kala kiim bokon o, kala-lomdip, ilmi weng ayo kanum bakan-umbip ko.
ACT 1:20 Kanum bokoyilale, Pita ayo Judas ami sang ayo maso ma bokoyila-lomda: Devit ayo baal ma Juda kayaak imi baal buk kabaku dola bokoya-lomda: Tunum ayo ma ami am kaptam ilin daa; uyo, kulaalip fakela tabuk o, kalba-kup, tunum kusnum ata ma tiltam ami baan kuluu-lom, okok kemak o, kala, Judas ami sang kaali, siin kaptoowu kanum bokosa ko.
ACT 1:21 Kamokim Yesus ali nuso bomdup tal-unemsup kaali, kamasi Jon ayo unang tunum oksam ukayinsa ayo, tunum malo ma nuso suunkup bomdupla, yakyak kutal kala diilupla, Yesus ayo kamboyilala, asuk God ayo Yesus dap-tama tam unse. Kemin, kulaata tunum ma ulduuluwa, tiltam-ilomda Judas ami abiin kuluulala, nuso okok ke-bamdup Kamokim Yesus tam tiinse kaami sang kaata, unang tunum imi bakayum o, kal-bomda, Pita ayo kanum bakayila ko.
ACT 1:23 Kemin, kanolokomip tunum alep imi win ayo iluu-lomdip, ma ami win kaali, asuumano Josep Basabas Jastus, akal ma kaa Matias, alep ita ulelnip ko.
ACT 1:24 Ulela-lomdip, God ami naan-bam boko-lomdip: Kamokim kapyo, Judas ali yang ban-ilomda taanala, kapyo dabaalap abip mafak unse. Kemin, kabi tunum alik imi aket tem uyo utamsap. Kemin, kabi tunum ma siin kawu ulduu-lomdap, kaali Judas ami abiin kuluu-lomda, nami kalaan tunum kelaya, okok ke-mokoma no, kala uldaa-dabuusap namti, kulu kukuyilap utamupya, tunum alep kalawiiyo, Awu ma kalawaata, kalalup atamum o, kala-lomdip,
ACT 1:26 tuum katip katip foko-lom binalip tam aba tildaak aba ke-bam utamiwa yi, Matias kaata kala, kala-lomdip, yak Matias ayo dap-yak Yesus ami kalaan tunum imi iipyak tem daalip, talangkal kesip ko.
ACT 2:1 Am ma daanale, Juda ilmi Pentikos o kala ima inin am daan ilale, Yesus ami lak duulin iyo alik tala-tala-ke am ma kaptamu ditam daa-bom iliwa,
ACT 2:2 inim dukum ami biileng tap ma abiil kaptamu abiltap uun tala-bulu am kaptam tinaabip iyo alik weng san-ilom utamiwa yi,
ACT 2:3 Wing dawong alaltap ayo imi diim iilfola-iilfola kem-talaba, alik imi diim abamnu kala kalip ko.
ACT 2:4 Kulaali, God ami Sinik tal imi diim aba-lom titil kuyilala, abip ma ma imi weng akal alik akal alik imi ma utamsip dinim namti, kawu kuluu-lomdip bakamip kemin, kaali God ami Sinik ata dong dokoyilaya bakamip o.
ACT 2:5 Kemin, Juda kayaak malo ma God ami kukup tambal tabuulin tunum iyo am bokon alik dik-daa kulaasu kaami tunum miit ma ma iyo kambola tal Jerusalam kaptam tala-tala-ke-bom bomdip, akal almi weng del e kala baka-bala baka-bala ken-umbip kemin,
ACT 2:6 biileng uun-bala, imi unang tunum yaapkan iyo weng san-ilomdip, abiltap tal-ilomdip weng seliwa yi, Bayi! kalawiili numi weng kalaata bakabip kawi! kala-lomdip fanang alik tambanu,
ACT 2:7 aket yaapkan fukun-ilom bokolip ko: Mep alik kaa bakabip kiili, utamsip tunum disa; kiili ti Galili tunum ita-kup.
ACT 2:8 Mep kii numi weng kaata baka-bilip, weng san san kelup. Lale, ili kalok kano-lomdiwa, baka-bala baka-bala kebip i?
ACT 2:9 Patia kayaak ke-bala, Midia kayaak, Elam kayaak, Mesopotemia kayaak, Judiya kayaak, Kapadosia kayaak, Pontus kayaak, Esia kayaak,
ACT 2:10 Frigia kayaak, Pamfilia kayak, Isip kayaak, Sairini umi mepso Libia kayaak ke-bulu, Krit kayaak, Arebia kayaak aa, Juda kayaak imi Rom kaptamu ilin imi kiin tal-silip aye, Rom kasel Juda imi kukup utam kutal-fukusip aye, iyo tale-bala tale-bala ke-bom iluwa, mep kalawiili God ami kukup akal kusnum kusnum kanum tabasa kaami sang bakayin-bilipla, numi weng kaa alik bakabip kala weng san-kaa-bala kaa-bala-kebup o, kala-lomdip,
ACT 2:12 awol-bam aket yaapkan fukun-bam bokola una-tala-ke-bam ale, bokolip: Kanubip kabak-ami miit kaa kalok nolin i? kemiple,
ACT 2:13 tunum malo ma ita itafiimin weng Yesus ami lak duulin imi bokoya-lomdip: Ok mafak abaal-kup tabasa kaata yaapkan imbi-lomdiwa, tikiiyilala kemin, kanolin weng kaa bakabip o, yakan-kaamip ko.
ACT 2:14 Kemin, Pita ayo aptum kusal Yesus ami kalaan tunum kumkal iso, tola-lomda weng dukum-kup unang tunum imi bokoya-lomda: Nak-tunum kusal Juda kayaak so, tunum miit kusnum iso, Jerusalam kaltam bom-bilip kipyo! Kabak-ami miit ayo bokoyokomi kemin daa weng san-iliwa!
ACT 2:15 Nikil kiili ok mafak inbi-lomdiwa, aket fanang dinim keyu kanubip o, kalbip o? Disa! Kuluwaali kutim atan tiltam iip tulu ma kabe kemin, ok mafak kaa ina-bup disa.
ACT 2:16 La, God ami profet Joel ata sawaayak God ami weng Sukon Tem dolsa namti kulu tiltam tulu utamip uyo kanum boko-lom:
ACT 2:17 God ali boko-lomda: Bom bii-lom tawaal kalawaami mepso disa ke-lokomu diim kaali, nami Sinik dabaali daak unang tunum alik imi diim aba dong dokoyila, kipni unang man so, tunum man so, iyo nami weng kuluu unang tunum imi kukaayokomip. Kemin, nali lom dulun weng tap visin o kebip uyo iip maakup maakup ayo kipni man tunum ket kasaa kasaa imi kukuyim-bam ale, lom dulun weng iip maakup maakup uyo kipni tunum sawol sawol imi bakayim-bam ke-mokomi.
ACT 2:18 Kemin, kanumin am daanokomu kaali, nali ti kanola nami Sinik ayo dabaali daak nalmi ok fukulin unang tunum imi diim abamnala, nami weng ayo kuluu unang tunum imi kukaayim-biliple,
ACT 2:19 nayo mirakel o kala kukup disa akal almi kusnum kaayo, abiil kaptamu kukuyimbi-kup, kuno mafek mafek akal almi kusnum daak tawaal diim kawu kukuya ke-lokomi no. Kiim so, as kiinba, as lak dukum so, ayo tiltam abule,
ACT 2:20 atan uyo atin malang tini timit kalule, kayoop ayo fiingim ke, kano biile, Dukum Nami Am Dukum ayo daanu utamip yi, God kaali titil tabasa kala kalokomip o.
ACT 2:21 Kawanita Dukum niyo, naan-daap-nip namti, iyo dong dokoyiliya, ban kemin kaami maan uyo kuluulokomip disa le, yaap-kup ilokomip o, kala God ayo kanum bakama atamsi kayi kala, Joel ayo kanum bokosa. Kemin, kulu fan tiltam tuluya, ibi utamip o, kala-lomda Pita ayo kanum bakayim-bisa ko.
ACT 2:22 Kalale, Pita ayo weng ma bokoya-lomda: Nak-tum kusal Israel tunum kipyo! Nimi weng kaayo, weng san-iliwa! Kulaa ipkal utamsip kemin, Nasaret kayaak Yesus ali ipni iipyak tem kawu balaya, God ata dong dakaan-balala, kukup dukum aye, kukup almi kusnum mirakel kaa talala-yaaba. Kemin ale, God ami kanu-bisa uyo kipni kukuyila utamipla, God alalta dabaala talse kala kalalip, utam-silip kulaata kemin ale,
ACT 2:23 sawaalak God ami fanang ayo tedaa kutii-lomda; Kuuta yaap kemin, kewi tiltam talokomu no kalsa. Kemin, God ayo Yesus dabaala yak kipni sikil diim aba-lom ibi keyila, Yesus dibii-din tunum God ami lak duulin disa imi diim daaliwa, dabak as diim daa-lom, aalip taanala, dawaa-silip. Lale,
ACT 2:24 ali sakbal am kawu suunkup tiinsa disa; ali God ata kuluu-lom dafolala, tam tiin kawong kese.
ACT 2:25 Kemin, sawaalak kawu, King Devit ayo, Yesus ayo suunkup ilokoma ami sang kaa boko-lomda: Nali Kamokim kaa nami mepso kuluwu suunkup laaba kalali atami. Kemin, ali nami sikil tingtup diim kulu bomdala, dong dakaap-nam-bala titil-foko bomdila, suunin disa yaap-kup ilokomi.
ACT 2:26 Kemin, nami aket tem uyo tambal ma kep-nula, fiyaap duu-bamdi, bii kaali, nali utamiya, Nali taanokomi. Lale, asuk tam tiinokomi kala kalalila, aket balili-kup kalbi kemin,
ACT 2:27 kaa dok ata naa kalolip: Kapni tuup tem man nali, kep-namap disa. Nami saak-nokomi kaali, nami sinik uyo kuno kep-nawa, sakbal am kawu ilokoma disa; aa nami tiil uyo fom-nokomu disa.
ACT 2:28 Kabi tiin kawang kaami liip uyo kukup-nambap. Kemin, kabi naso ilup ayo fiyaap duu-mokomi kalaliya, balili-kup kalbi no, kalala, Devit ayo kanum bokosa no, kala Pita ayo kanum bakama ko.
ACT 2:29 Kala kanum bokoyimba-kup, Pita ayo weng ma bokoya-lom bokola ko: Nak-tunum kusal kipyo, numi awaalik Devit ami sang kaata talalu dotu daka-daa ifiiyon o, kalalila kemin, sawaalak kaali, ali atin taanala dawaasip. Ami tuum tem dap-tiisip ayo bombe. Am kamala kulaa mep yang kuluwu bombe, (kalalupya, utamup yi, Devit kaa almi sang kaata bokosa disa; tunum kusnum ami sang kaata bokosa kala kalbup).
ACT 2:30 Devit ali God ami profet o kala weng ku-fatap-dakamin tunum kemin, utama yi, God ali bokop-na-lomda: Nimi weng ayo ti faneng bokop-tokomi: Bii-lom kaa, nali kapni man loop kaptoop ata ma uldaa-dabuulila, kamokim kaltap tap kelaya, Israel iyo tiin molokoma no, kalsa no, kala-lomda,
ACT 2:31 bom-bii-lom kaali, God ayo kanumin kanumin uyo kanu-mokoma kala kala-lomda, God ami Uldaa-dabuula Tiltam Kamokim Kesa Tunum Kraist ami tiltam tiin kawang ke-lokoma kabaak-ami sang ayo boko-lomda: God ali ami sinik ayo kuno maas kamboliya, sakbal am kawu ilokoma disa; aa ami angtiil ayo fom-nokomu disa yo. kalsa.
ACT 2:32 Kemin, Yesus kaali, God alalta dafolala, tam tiinse. Kemin, alik mep kula bom-bilip kiiso atam-sulup.
ACT 2:33 Kemin, ami aalap alta dafola tam tiina dibii tam God ami sikil tingtup diim mepso kulu daa-lomda, kamala uyo, sawaayak God almi man Yesus ami bokola-lomda: Nami Sinik Tambal ayo kapni unang tunum imi kuyokomi no, kalsa uta, kano-lomda dabaala tildaak numi diim aba dong dakaayimba. Kemin, numi weng kusnum kusnum numi utamsup dinim ami baka-bala baka-bala ke-bulup itafii-bam ale, weng san-kaabip aye, kaa God ami Sinik Tambal ok kaata ko.
ACT 2:34 Devit ali tiin kawang tam abiil tikiin unsa disa; Yesus ata ko. Devit akal Yesus ami sang ayo boko-lomda: God Dukum ayo nami Kamokim ami bokola-lomda: Kabi nami sikil tingtup lo tiin-balapya, bombii
ACT 2:35 kaali, kapni waasi kiiyo yim-tal kapni miit tem daalila, kapta kamok kelapya, kapni weng-kup weng san-kaa-bam kapni minlo tem kulu ilokomip o, kalba kayi! kala Devit ata kanum bokosa no.
ACT 2:36 Israel kasel ibi talalu utamin! Yesus ayo iltipta dabaalip yak waasi imi sikil diim aba dabak as diim daa-lom an-silip. Yale, God ata dong dokola-lom: Kabi kamokim ale, nami tunum ulduuli tiltam kamokim kesap o, kalase no, kala Pita ayo kanum bakayila ko.
ACT 2:37 Kemin, unang tunum iyo weng sandiwa, aket uluum keyilula, Pita so, aptum kusal Yesus ami lak duulin malo iso, imi bokoya-lomdip: Nak-tum kusal kipyo, nuli kalok nolokomup i? yikiwa,
ACT 2:38 Pita asiik bokoya-lomda: Ibi aket fal-sikibip-kup, Yesus Kraist ami naan-daala oksam wokoya-wokoya keyiliwale, God ayo kipni ban kemin kukan-tiiyale, alta maakup maakup kipni almi Sinik Tambal ayo kuya-kuya kelak o.
ACT 2:39 Sawaalak kawu, God ayo boko-lomda: Nami Sinik Tambal ayo, alik imi kuyokomi no, kalsa. Kanola kipsole, kipni man aye, alik samaan kawu laabip iso, ipni kuyokomi no, kalba. Kemin, kawanta numi Dukum God ayo naan-daayila tildang almi miit tem tilip namti, alik imi kuyokoma no, kala Pita ayo kanum bakayila ko.
ACT 2:40 Kemin, Pita ayo weng yaapkan bakayim-bamda bokoya-lom: Kiwo, ibi utafii-bamdip unang tunum alik ipni kukup mafak ayo kela-lomdip, angtiil yol kuluulokomip kaa, yaap kelin o, yakala,
ACT 2:41 kawanata Pita ami weng ayo weng san-ilomdip, ayo, kalip namti, iyo oksam okoyip ko. Am kulu daanba kulu tunum unang almi-kup 3,000 kiita, Yesus ami lak duu-lomdip, tiltam Yesus ami lak duusip imi iipyak tem tilsip ko.
ACT 2:42 Kemin, Yesus ami lak titil-fak-daa-bomdiwa, Yesus ami kalaan tunum imi weng ayo weng san, niik, kabel maakup ke-bam, ima maakup im-bom ale, God ami naan-bam kemsip o.
ACT 2:43 God alta Yesus ami kalaan tunum imi dong dokoyilaya, kukup akal almi kusnum mirakel yaapkan talal-biliwa, unang tunum alik iyo fanang alik tam baneyulu, aket yaapkan fukun-bisip o.
ACT 2:44 Alik Yesus ami lak duulin unang tunum iyo niik, kabel maakup ke mafek mafek alik dong-dokola-dong-dokola-ke-bam ken-umbip.
ACT 2:45 Imi tawaal aye, mafek mafek ma ayo tunum kusnum imi keyip mo-lom sisol ayo kuluu-lomdip, bung dinimal imi kukaayila-tal-unemsip.
ACT 2:46 Iyo aket maakup keliwa, am alik daan-laamsa kaa, din lotu am diildiil kawu tala-tala-ke lotu ke-bam ale, tal ilmi am kawu tala-tala-ke ima maakup in-bom aket tambal ke-bam, nikil alimal ima im-bom fiyaap duu-bam ale,
ACT 2:47 God ami fiyaap don-bam ke-biliwa, unang tunum kusnum alik iyo mep kanubip imi fiyaap duu-yinsip o. Suunkup am maakup ma daan-daan kemsa kaali, unang tunum ili Yesus ami aket koliwa, alalta dong dokoyila, ili ban kemin kelip kala, kala-lomda, dotula tiltam unang tunum kamasi isiik tiltam Yesus ami daang bakasip imi tem unip tiltam yaapkan ke-silip ko.
ACT 3:1 Am ma daanule, bombii am tiina, unang tunum iyo God ami lotu am diildiil din God ami beten kamaalum o, kemipla, Pita, Jon alep iyo yak aba din lotu am diilim unum o, kalalip unip. Kemin,
ACT 3:2 tunum ma awak uta duuluya, kun dabima tiinsa. Kemin, suunkup aptum kusal ita as fak-daa dibii-din daalip, lotu am diilim ami amitom mepso tildaak tawaal diim kabaaku tiilipla, amitom kaami win kaali Amitom Tambal o, kem-yaabip. Kemin, unang tunum ili tal aba kaptam unemum o, kalalip tale-bilip, tunum yawiit biin de dap-tal tiibip ayo neyim-bamda, Ibi moni aye, ima aa, ma kukaap-nin o! kal-bomda neya-laaba,
ACT 3:3 Pita so, Jon so, alep iyo din atamiple, yawiit ayo itam ale, Awu alep ili tal lotu am diilim kultam unum o, kala talabip kala nen-daayilale,
ACT 3:4 Pita, Jon alep iyo tunum yawiit ami tiin dik-yak-dela atam Pita ata bokola ko: Kap titaldak-daa itam taman! akala,
ACT 3:5 tunum yawiit ami aket kaali, fuku-daalala yi, Awu, alep mafek mafek ma kup-nokomip ema yo? kala talalu alep itafiimale,
ACT 3:6 Pita ata bokola: Nali tuumon gol aa, yak tuumon silva aye, kaa disa; kemin, nami diim bombe kaata-kup kup-tokomi. Nasaret kayaak Yesus Kraist ami win diim kaata-kup, kabi tam tola tal-uneman aa! aka kem-salale,
ACT 3:7 ami sikil tingtup kaata, dap-tal-fuku dafolala, ami yaan so, yaan mukuk so, ayo tambal kelule,
ACT 3:8 titil-foko abiltap tola tal-unem-tabaya, alep iso tam lotu am diilim tam un-ilom, ayo um-bomdala unfoko tam aba tildaak aba ke-bamda, God ami win ayo kufu-balaya,
ACT 3:9 unang tunum yakal atamiwa yi, Tunum yawiit namti tola tal-une-bamda God ami win kufonba kala kala-lomdip,
ACT 3:10 kaali tunum Amitom Tambal ami balang diim tiin-bomda nen-umba tunum ata kala, kala-lomdip, aket-kup fanang daa, Bayi, kwin! ami yaan kaa yaapna! kala-lomdip awalmip ko.
ACT 3:11 (Lotu am diilim kaptam-ami uti kaali, tuum uti desip kemin, kaami uti dong diim kawu am batbat dinan kulii umbiyang daasip. Kaa am batbat kaami win kaa King Solomon ami Am Abal Akiim o, kem-laabip. Kemin,) tunum kaayo, Pita so, Jon alep imi sikil diim tabuu-balaya, Solomon ami Am Abal Akiim kaptamu tal-une-bilipla, unang tunum alik iyo fanang dakat tam banu abil tala-tala-keliwa,
ACT 3:12 Pita ayo itam talaala yi, Tala-tala-kebip kala kalale, bokoya ko: Nak-tunum kusal Israel-miin kipyo, ibi kanimin o, kalalipla kabak-ami aket-kup fukun-bamdiwa, numi talalu itafiibip i? Kipni aket kaa ti, Alep kii fan titil tibin tunum aa, kii tunum tangbal kemin ilta taba-lomdip tunum kaa dotuulip tal-uneba kalbip yoko?
ACT 3:13 Disa! Numi awaalik kusal Abraham so, almi man Aisak so, imi man loop Jekop so, numi awil-fakal alik imi God ali, almi ok fukulin man Yesus ami fiyaap kaata duu-balala, kanuba kaami win uta, kufon-balaya dukumnu no. Siin kawu ipta Yesus ayo dibii-din kiyap Pailat ami diim daalipla, Pailat ata tunum tambal kalawaali sok til-daalon o, kalaya,
ACT 3:14 ipta boko-lomdip: Daa yo. Kaayo, God ami ban kamalin dinim kaali, tifan disale, tunum kaa tangbal disa yo, kala-lomdip, Pailat ami oko-tokolipla, tunum yan-umba Barabas ata sok til-daalale,
ACT 3:15 ibi weng dukum-kup bokolipla, tiin kawang miit kayaak ata aalip saaknaya, God ayo dafolala, tam tiina alep nuyo atam-sulup.
ACT 3:16 Mep tunum kaa atafiibip ayo, kipkal atamsip te! Yesus ali alep nuli itamala, Imi aket fukunin kaali, fan Yesus kaali ti yaap mep tunum kalawaali dafolokoma no, kalbip kalalaya, Yesus ali tunum kalawaali, titil kola tolna. Yesus akal alep numi aket fukunin ayo dong dokoyale, tunum kalawaami kukup tangbal kola-som kelaya, ami yaan ayo tangbal keluya, ali kipni tiin diim ayo kula tiltam tolnala atafiibip ko.
ACT 3:17 Kamala kaali, nulmi naktum kusal iso, numi kamok kamok iso, ibi itami yi, Ibi Yesus kaa God uldaa-dabuula tiltam kamokim kesa tunum ata kalalip atamin disa ke-lom, babon daa-lom bokoyip aalip taanse no, kalbi.
ACT 3:18 Kaali ti, sawaalak God ayo weng kalaan weng bokolaya, alik ami profet tunum isiik weng san boko-lomdip: God ayo boko-lomda: Nami Uldaa-dabuuli Tiltam Kamokim Kesa Tunum ayo angtiil yol kuluu-somdala, taanokoma no, kalsa no, kala bakayila-yaabip. La, God ayo Yesus dabaala tal bom-balaya, ipta aalip ami weng ayo tiltam tituun kesu ko.
ACT 3:19 Kanola-silip kemin, kipni aket ayo fal-siki-lomdip, God ami miit tem uniwa, ata taba-lom kipni kukup mafak takan-tiiyilaya,
ACT 3:20 Dukum ata kipso suunkup bom-balaya, kipni aket tem ayo bilili-kup keyu titil-fak-daalin o. Sawaalak kawu, God ami bokola-lomda: Kabi nalta ulduuli tiltam kamokim kesap tunum o, kalsa kaali, Yesus ata kemin, God ayo asuk Yesus ayo dabaala numi fanang asuk talak kalip namti, kipni aket ayo fal-siki-lomdiwa yo.
ACT 3:21 Lale, Yesus ali abiil tikiin bom-balala, bombii God ayo mafek mafek alik dotula, tiltam akal tangbal ma keluya kawu, Yesus ayo talokoma. Sawaayak kaa, God ali umi sang ayo bokolaya, almi weng ku-fatap-dakamin tunum tangbal profet isiik bokosip o.
ACT 3:22 Siin kawu, Moses ali Yesus ami sang kaa boko-lomda: Kamokim God alta uldaa-nam-buu-lomda nam-baala taldi ami weng bakayimbi tap ke-lomda, ipni tunum ma ulduuyila tiltam profet kelala, God ami weng ayo alik kipni bakayokoma. Kemin, alik ibi ami bokoya-lomda: Kanumin o, yakan-kaa-mokoma ayo weng san kutal-fukulin o, kala-somla ko.
ACT 3:23 Unang tunum ili, God ami profet weng ku-fatap-daa bakayin tunum ami weng, weng san-kaamin dinim ke-mokomip kiita, ilmi unang tunum imi iipyak tem kulu, kanolin unang tunum iyo anula dinim-nokomip o, kalsa.
ACT 3:24 Moses ayo kanum bokola laabu. La, kuno Samuel akal baka-bala-ke-bisipla, God ami profet weng ku-fatap-dakamin tunum malo ma yakal kuno bakayim-bilip kemsip. Kemin, God ami profet alik iyo kamala kalawaami mafek mafek ayo tiltam tiltam kem-tabasu kaami sang kaata sawaayak bakayinsip ko.
ACT 3:25 Siin sawaalak kawu, God ata Abraham ami bokola-lomda: Nali kapni man loop kaptoop-ata dong dokoyiliya, ita am bokon alik kala dik-daa kulaasu kaami unang tunum talal-im-bilip fiyaap duu-mokomip o, kalsa. Kemin, ibi God ami profet weng tem bakayinsip imi man loop iltap kemin, God ami weng kutiisa kaa, kipni kawal imi kuuya, aa ipkal kuuyila kesa.
ACT 3:26 Kemin, God ali almi okok kamaalin man ata ulduula, numi fanang tildaak talse; ali Juda kayaak alik isiik dong dokoya fal-siki-yimulila, imi ban kemin ayo kelin o, kalalaya, dabaala numi fanang kasiik talse no, kala Pita ayo bakayila ko.
ACT 4:1 Pita so, Jon so, alep iyo unang tunum imi weng kukaayim-bam ilipla, pris awem tunum isole, lotu am diilim kaptam-ami soldiya imi kamokim iso, aa Sadusi iso, iyo tal itamipla,
ACT 4:2 Yesus ami kalaan tunum alep iyo unang tunum imi bakayin-bamdip, Yesus ami tam tiinse sang kaata bakayim-bam ale, bii-lom ayo unang tunum saaksip yakal kuno tam tiinokomip o, yakan-kaabip kala, kala-lomdip, aket atul keyilala, soldiya imi bokoyilipla,
ACT 4:3 iyo alep kiimi yak im-tal-fuku talaalip, Am tiinbu kala kalalip sok de-yimu-lomdip siin sabi kawu no, kalip ko.
ACT 4:4 La, unang tunum yaapkan iyo alep imi weng uyo weng san-ilomdip, Yesus ami lak duulip. Kemin, tunum deng yaapkan tiltam tiltam ken yak aba butoop dukum kesuu umi deng, ding bakamin almi-kup 5,000 kalawiita tiltam tilip ko.
ACT 4:5 Kulaa silip sintam Juda imi dabom dabom isole, imi kamok kamok iso, lo utamsip tunum iso, iyo Jerusalam kaptamu tala-tala-ke-lom,
ACT 4:6 Hetpris tunum awem Anas so, Kayafas aa, awasekim Jon, Aleksanda, Anas ami kayaak alik iso, kiiyo tala-tala-kelipla,
ACT 4:7 soldiya iyo tal Yesus ami kalaan tunum alep iyo foko im-bii-din kamok kamok imi tiin diim tii tolniple, dik-daayip ko: Alep ibi kanta bokoya dong dokayilaya, titil-foko-lomdip kaa kanum solip yoko? yikiwale,
ACT 4:8 kulaa God ami Sinik Tambal ata Pita ami aket tem un dong dokolala bokoya-lom: Juda kayaak imi dabom dabom iso, imi kamok kamok iso, kipyo,
ACT 4:9 kipni kula alep numi dik-daaya-lomdip: Kipni tunum yawiit kaa talalubip yoko? kalolip ayo, ipkal utam kalok kano-lom tunum kaa yaaba ni kalip namti,
ACT 4:10 kaami miit ayo kipso aa, Israel iso, kipni bokoyupla utam kaal kelin aa! Nasaret kayaak Yesus Kraist ata taba-lom mep tunum kala talalulaya, kipni tiin diim kaa tolba kaayo, iltipta Yesus ayo dabak as diim daa aalip saakna dawaaliple, kulaali God ayo dafola tam tiin kawong kese, kulaata te!
ACT 4:11 God ami Sukon Tem weng ami sang ayo boko-lomdu: Ibi am dinamin tunum iltap ke-lom, as kalaang-kup tabasa ma ayo mafak o, kala kela-silip. Lale, kamala kaatale, as kalaang kaa amdu wokop keba kayi! kalsu. Kemin, amdu wokop kulaali Yesus alalta no!
ACT 4:12 Yesus maakup ata-kup taba-lomda numi ban kemin ayo kukan-tii kamboyilala, angtiil yol kaa ma kuluulokomup dinim; yaap-kup ke-lokomup. God ali tunum kusnum ata ma tawaal diim kaldaaku bomdala nuyo dong dokoya yaap-nokomup umi sang kaa, nuli ma bokoyinsa disa yo, kala Pita ayo kamok kamok imi kanum bokoyilaya,
ACT 4:13 kamok kamok yakal utamipla, Pita so, Jon so, alep kii suunin kela-lom bakayimbip kala, kala-lomdip itamiwa yi, Alep kii skul ma kesip disa; disa ilin tunum kala, kala-lomdip fanang daa aket yaapkan fukun-bamdip utamipla, Kii Yesus so bom ilin kala kalip ko.
ACT 4:14 Kanola tunum yaaba ayo ti alep imi mepso kulu tolnaya, kamok kamok iyo atamipya, Dok kano bokoya-lom: Ibi kasen-fakabip o, yokolip disa.
ACT 4:15 Iyo alep bokoya fotabip tam abip unip weng taken-una-tala-ke-bam,
ACT 4:16 Tunum alep kalawiita, kalok noyokomup yoko? Alep fan, atin kukup akal almi kusnum ma dotuuliwa, Jerusalam kayaak alik iyo weng san-ilomdip, fanan-daabip kemin, nuli boko-lom: Tunum alep kalawiita, tunum kaa dap-talalubip disa yo, kalokomup kula bokoyokomup disa.
ACT 4:17 Lale, weng kalawa dukum-nula, unang tunum iyo baka-bam kulii-una-tala-ke-mokomip. Kemin, fananin weng bokoya-lomdup: Alep ibi Yesus ami win kaa kufu-bam maso ma unang tunum imi bakayin daa yo, yukum o, kala-lomdip,
ACT 4:18 kulaa alep naan-daayip tam itamip bokoya-lomdip: Alep kibi Yesus ami win kaa kufu-bam, maso ma unang tunum imi bakayin-bam kukuyin dinim kayi! yikiple,
ACT 4:19 Pita so, Jon so, alep isiik bokolip ko: Ibi kalbip. La, alep nuli God ami weng kaa kuyang saak tiila, kipni weng kaata weng selokomup kaali, God ami tiin diim ayo mafak e tambal? Ti ipkal utam aket fuku-daalin!
ACT 4:20 Ya, alep nuli dok kano-lom, Yesus ami kukup nulmi tiin alep alep atam-sulup so, ami weng kaami weng san-sulup so, kaa kuwaalokomup disa yo, yikip ko.
ACT 4:21 Yikipla, kamok kamok iyo sok de-yikin lale, utamiwa yi, Unang tunum alik ili sinla God ata tunum dap-talaluba ami fiyaap kaata, duubip kala, kala-lomdip, kabak-ami atul kaata suun-daalipla, asuk iyo alep imi suunin weng so, titil tabin weng so, bokoya-lomdip keyip unipla,
ACT 4:22 God ata kukup akal almi kusnum tunum dap-talaluba kaayo, tunum ami wasital kaali, 40 akaala unsa ko.
ACT 4:23 Keyipla, Pita so, Jon so, alep iyo yak aba din alep ilmi aptum kusal din itamipla, tunum awem pris imi kamok kamok isole, Juda kasel imi kamok kamok iso, imi weng ayo bakayim-bilip,
ACT 4:24 kulaali, nikil iyo weng sanbip-kup, aket maakup ke God ami beten kamaan-bam boko-lom: Dukum kapyo, kapta titil miit kayaak; kapta abiil so, tawaal so, yol ok so, mafek mafek alik kaa bom-bilip so, kiiyo, talalulap laabip.
ACT 4:25 Siin sawaalak kaali, kapni Sinik Tambal ata kapni okok kemin man numi awaalik Devit ami bokolaya, akal kanolin suunin weng kala bakayim-bilip kaami sang kaa boko-lomda: Kanimin o, kala kayak kayak kii, aket atul keyu taken-bam, God ami Ulduula Tiltam Kamokim Kesa Tunum ami dap-mafak-daalum o, kala din-ilom uktakan kuu tilsip i?
ACT 4:26 Tawaal kala dik-daa kulaasu kalaami kamok kamok king o, kalin iyo talalu kutii tala-tala-ke-lom, God so, almi Ulduula Tiltam Kamokim Kesa Tunum aso, waasi dinan-tabokomip o, kemsip kayi! kala, awaalik Devit ayo kanum bokosa ko.
ACT 4:27 Faneng kemin, siin kaali, Herot so, Pontius Pailat so, unang tunum miit kusnum iso, Israel numi kamok kamok iso, iyo tal aba tam Jerusalam kaptamu tala-tala-ke-lom, kapni ok fukup-tin tunum tambal Yesus kapta no, ansap ayo, aalum o, kemsip. Kemin ale,
ACT 4:28 sawaayak kaptoowu, Dukum kaltapni fanang kaata-kup fuku-daa-lomdap kamboyiliya, kaa kanu-mokomip o, kalsap. Kemin, kaa tala-tala-ke alik kiili kano-silip.
ACT 4:29 Dukum kapta, mep kiimi suunin weng numi bakayimbip kaali, utam ok fukulin tunum numi dong dokoyap, suunin kaa kela-lomdup, titil-biki-lom kapni weng ayo bakayum o.
ACT 4:30 Kabi nuyo dong dakaayim-balapla, kapni ok tabuulin man tangbal Yesus ami win kaata fanang daka-bamdup, unang tunum mafak umulin iyo yam-talalulup yaawa-laa-bam ale, kukup disa akal alik akal alik mirakel dotulup unang tunum iyo itam awal-bam, kapni daang ayo baka kelin o, kala beten kemip ko.
ACT 4:31 Tala-tala-ke-bam beten ke-bokobip am kaptam ayo liin-bam fili-fili-ke-bulula, God ami Sinik Tambal ami titil namti kawu tal imi diim abamnala, alik iyo waasi imi atul kaata suunbip ayo kela-lomdip, din God ami weng ayo dukum-kup bakayila-tal-unemip ko.
ACT 4:32 Yesus ami lak duulin unang tunum alik imi aket fukunin ayo maakup ke tunum ma ayo boko-lomda: Mafek mafek kaa nalmi alik o kaloma dinim; ti mafek mafek alik iyo dong-dokola-dong-dokola-ken-umbip.
ACT 4:33 Kemin ale, Yesus ami kalaan tunum iyo titil kuluu-lomdip, Kamokim Yesus ami taanda tam tiina atam-silip ami sang Jerusalam abip kutama ata-kup bakaya-tal-unemip. Kemin, God ali alik kiimi aket balili-kalin kuya dong dakaayim-balala, kukup tambal kaata-kup kutal-fuku-silip.
ACT 4:34 Bokon kayaakal aye, am bung soyal iso, iyo baayip mo-lom, ami sisol ayo kulii-tal kalaan tunum imi kuya, Ipkal kutal-fukulin o, yikiple, kalaan tunum iyo kaa, kuluu-lom, mafek mafek iipnip tunum imi kukaayila-tal-unemsip o. Tunum malo ma iip-namip dinim kemsip.
ACT 4:36 Kemin, tunum ma kaami win kaali, awasekim Josep. Kemin, kalaan tunum ili win ma tokola-lomdip Banabas o, kala aptum kusal imi dong dakaayin tunum o, akipla, ali Livai imi man loop ale, ali bokon Saiprus kayaak
ACT 4:37 kemin ale, ali tawaal ma ukduu-lom tunum kusnum imi keyila molip, moni ayo kulii-tal kalaan tunum kuya-lomda, Kala ipkal fukulin o! yinsa ko.
ACT 5:1 Kuno tunum ma ami win kaali, Ananayas ale, kalel umi win kuuta, Safaira kemin, akal kuno almi bokon ma ukduu-lomda, tunum kusnum imi kuya molip.
ACT 5:2 Lale, imak ayo kalel dik-daawaya, uyo boko-lomdu: Kulaa tambal o, kalaluya, ayo tawaal molip kaami sisol anung ayo almi am kawu kutiiba-kup, anung kaata-kup, kuliila ti tal Yesus ami kalaan tunum imi kuya kasen-fokoya-lomda: Tuumon kalawaali, akam numi bokon mobup ami sisol alik kuluubup namti kalabe kemin ale, iltipta kuluu-lom kutal-fuku-bomdiwa yo, yakala,
ACT 5:3 Pita ayo Ananayas ami bokola ko: Kabi, kanamin o, kala Setaan ami kambolap, ata kapni aket tem ayo ku-mafak-daap-tala, bokon kaami sisol anung kaa ku kaltapni am kawu kuwaalapla, God ami Sinik Tambal kaa kasen-fokolap yoko?
ACT 5:4 Tunum kusnum ata molin disa kaali, bokon uyo kaltapni bokon kemin, tunum kusnum molip kaata, kaltapni moni kemin, kapkal tiin mo-bomdawa ya! Kanolin kemin, kabi kanimin o, kala kaltapni aket ayo fanang dakabi tal kasen-fokoyap yoko? Kabi tunum nuta-kup kasen-fokoyap disa; God ami kasen-fokola kelap o, akala,
ACT 5:5 Ananayas ayo weng san-ilomda, lamo daak tawaal aba taanaya, weng ayo yen-una-tala-ke-bam unang tunum iyo weng san-ilomdip fananip.
ACT 5:6 Kemin, tunum kasaa tiinbip iyo yak ilim ta kuluu falala duu-lom dibii-din dawaalum o, kala-lomdip dibiilip unip ko.
ACT 5:7 Ilanin tap talaalipla, Kalel ukol tal am ba tulule, kawanta umi imak ami sang ma ayo boko-umba daa.
ACT 5:8 Kemin, Pita ayo bokowa-lomda: Kupyo, akam ibi bokon ami sisol ayo kanolin kuliita-kup kuluubip o? kala bokop-nan o! wakala, usiik kasen-foko-lomdu bokolu ko: Ayo, kunolin kal kuliita-kup taa! akuya,
ACT 5:9 Pita ayo bokowa-lomda: Kanimin o, kalalip akam ibi boko-lom: Kanolum o, kala-lomdip, tal Dukum ami Sinik kaa dap-kukulum o, anbip i? Weng selan! Unang kupni timak kula taana dibii-din bulu tilip iyo, tal amitom tilip kii, itam-taman! Kuliita kupkal kanolap tam-bii unokomip ko, waka, kem-salale,
ACT 5:10 maak fak-daalin tap lamo daak Pita almi miit tem kuluba saaknuya, tunum kasaa nikil iyo, tal ulipla, Kalel uyo taanu kala, kala-lom kulii-din imak almi bululip balang tem mepso kulu kuwaalip.
ACT 5:11 Kemin, God ami unang tunum alik isole, unang tunum malo ma iso, iyo weng san-ilomdipla, ili God ami atul kaata suunip ko.
ACT 5:12 Yesus ami kalaan tunum iyo disa kukup akal almi kusnum kusnum mirakel ayo yaapkan unang tunum imi tiin diim kawu talal-biliwa, Yesus ami daang bakaalin unang tunum iyo suunkup Solomon ami Am Abal Akiim kaptamu tala-tala-ke-bam laabip. Kemin,
ACT 5:13 Kamokim ami lak duulin disa tunum unang kii, Yesus lak duulin imi fiyaap-kup duubip. Lale, God ami atul kaa suun-bam tal itamip nikil kuyak mim-daa bom ilsip disa. Lale,
ACT 5:14 unang tunum malo yaapkan iyo Kamokim ami lak duu tiltam ami miit tem tilipla kaata, yaapkan ke-silip.
ACT 5:15 Kanolin kemin, unang tunum aptum kusal mafak-alin iyo kulii-tal abip kawu imbii daak abiin kon diim tii, yam biin diim tii keliwa, imi aket fukunip ayo Pita ami talokoma kaa, tal mafak ilin imi sikil kuyak tii beten keya yaap-nokomip ema yo, kala, tala-balaya, atan kulaala tal Pita ami diim abamna ata, sinik talaba yak mafak-alin imi angtiil aba-lom yaap-nik o, kalalip imbii-tal tiinip.
ACT 5:16 Kuno unang tunum Jerusalam abip mepso mepso kayaak iyo aptum kusal mafak-alin iso, sinik mafak yam-mafak-dakan-unsip iso, iyo kulii-tala-tala-kelip, Yesus ami kalaan tunum ita talalu-yimulip, yaawa-yaawasip.
ACT 5:17 Hetpris o kala awem tunum imi dabom aso, aptum kusal Sadusi iso, ita taba-lom kalaan tunum imi ok tambal nuubip kaami kalan kaata, tal-kaayin-bamdip,
ACT 5:18 ilmi bolis man imi bokoyipla, ita din ilom, im-tal-fuku sok de-yimbii tal gavman ami kalabus am tiilip.
ACT 5:19 Am kutamiip-nule, Dukum ami ensel ma ayo tal kalabus am saal ayo busuuya kalaan tunum nikil iyo im-taltam abip daal tiile,
ACT 5:20 bokoya-lomda: Ibi din lotu am diilim kawu tola-lomdip, Kamok ami daang bakaalin alik imi tiin-yaamin tal-unemin kaami kama kukup ami sang ayo, unang tunum alik imi sang kaa bakayin o, yakale,
ACT 5:21 kalaan tunum iyo weng sandiwa, kutim malang tem din lotu am diilim tamdip unang tunum imi kukuyip ko. Hetpris awem tunum imi dabom asole, aptum kusal iso, iyo tal Israel imi kamok kamok iyo naan-daayip, Kaunsol alik tal kaltam kaltam kelipla, lotu am kaami tiin molin bolis man malo ma imi bokoya-lomdip: Din kalabus am un-ilomdip, tunum kii imbii-tilin o, yikiwa, unip.
ACT 5:22 La, din ulipya, Yesus ami kalaan tunum iyo kalabus am kaptam ilin dinim kala kelalip tal kamok kamok imi bokoyip ko:
ACT 5:23 Yi! din ulup, Am saal kaa, ti yaap-kup nek kala liibip ti! tunum iyo amitom ayo kutiibip, kalalup saal ayo busuulup. Yale, nuyo tunum ma itamalup disa kelupla tulup o, yikipla,
ACT 5:24 pris awem tunum imi kamok kamok iso, lotu am diilim kaami tiin molin bolis man imi kamok aso, iyo imi weng kaata weng san-ilomdip aket dukum fukun-bile, kulaali kwin! kaa kalok kanolokomup i?
ACT 5:25 kemipla tunum maakup ma ata tal bokoya-lomda: Kiwe! kipni tunum foko-kulin kalabus am tiibip kiili, lotu am diilim kaptamu bomdiwa, unang tunum imi kukuyim-bam bilip te! yakaya,
ACT 5:26 lotu am diilim kaami tiin molin bolis man imi kamok aso, almi bolis man iso, iyo din-ilomdip, suunin so ke-bam ale, nuli tunum kiimi kukup mafak kuyup namti, unang tunum iyo tuum kuluu-lom bina-daa yemalip o, kala-lomdip, yemin disa, akolkup nikil iyo imbii-tal-ilom
ACT 5:27 kamok kamok imi diim tiilip tolniwale, awem tunum
ACT 5:28 imi dabom ayo bokoya-lomda: Nuli ti dukum-kup kipni bokoya-lomdup: Ibi Yesus ami win kaa maso ma kufu-bam, unang tunum kii kukuyin disa yo yaka-sulup. Yale, ibi numi weng ayo kuyang saak tiiya-lomdip, Yesus ami sang ayo Jerusalam kasel alik imi bakayimbip te! Kemin, ibi numi sang ayo bokoya-lomdip: Ita Yesus ayo dabaalip yak waasi imi sikil diim abamna aalip taanse no, kebip. Bakayim-bulup weng ayo yak kamok kamok imi diim abuk o, kalalipla bakayimbip yoko? yakale,
ACT 5:29 kulaa, Pita nikil isiik bokolip ko: Kanola tunum ma ayo bokoya-lomda: Kaata kanolin o, kalaya, utamuwa yi, Tunum kaami weng kaa God ami weng tap disa kalup namti, ami weng kaa kela-lomdup, God ami boko-lomda: Kaata kanumin o, kalase kaata-kup tabuulokomup.
ACT 5:30 Iltipta bokoyipla: Waasi ita taba-lom, Yesus dabak as diim daa aalip saaknala dawaalip balala, numi awil-fakal imi God ata dafolala, tam tiin ilaya,
ACT 5:31 God ayo dabuu dibii tam almi sikil tingtup diim mepso daalaya, Yesus ayo kamokim dukum kela, Israel-miin imi dong dokoyila, aket fal-sikilip imi ban kemin, uyo kukan-tiiya disa keluk o, kala dap-tiise. Kemin, ali numi Kamokim ale, numi dong dokoya kukup mafak ayo kambola yaap ke-lokomup namti kaata ko.
ACT 5:32 Nuli kanolin kukup uyo utam-sulup. Kemin, nuli kaami sang kaata unang tunum imi bakayila-yaabup kemin, God ami Sinik Tambal alalta ti kanolin sang ayo bakayim-balala nun-yaabup. God ali almi Sinik Tambal ayo dabaala tal almi weng, weng san-kaamin unang tunum numi diim aba, nuso bombe kayi! kala Pita nikil iyo kanum bakayip ko.
ACT 5:33 Kamok kamok iyo Pita nikil imi weng ayo weng san-ilom aket atul dukum keyulula tunum nikil iyo anulup taanik o, kemip.
ACT 5:34 La, tunum kamokim ma imi aptum kusal ilmi iipyak tem kulu tola bokoyon o, kala ami win kaa Gamaliel. Ali Falosi kele, lo kukuyin tunum kemin, unang tunum alik ili ami fiyaap-kup duu-yaabip. Kemin, ayo bolis man imi bokoya-lomda: Mep tunum nikil kalawiili foko-im-tam abip daalip bom iliwa! yakala, fan foko kulii tam baniwa kulaali,
ACT 5:35 aptum kusal kamok kamok malii imi bokoya ko: Naktum kusal Israel kipyo, dotu utafii-bamdiwa yi! Tunum kii dok kanoyokomup kalaliwa yi!
ACT 5:36 Sawaalak kawu, tunum ma ali Teudas ata tiltam boko-lomda: Nita kamokim dukum keliya yo, kala-lomda, tunum almi-kup 400, kiita ami daang baka-bamdipla, Rom kasel imi gavman iyo anulum o, kalsip. Lale, gavman iyo aalip taanala, ami daang bakaalin alik iyo sak fun daa una-tala-ke-lom, imi ok ayo kulaalipla, saak daa-lom maaklo disa kesu.
ACT 5:37 Bombiile, gavman ayo unang tunum alik imi win dol-insip kawu, Galili kayaak awasekim Judas ata, tunum ma oko-tokoya, ami daang bakaalip Rom kasel anulum o, kalsip. Yale, aa ti kuno gavman ayo aaliwa taanaya, ami daang bakaalin iyo sak fun daa una-tala-kesip.
ACT 5:38 Weng ma bokoyokomi kemin, talalu weng san-iliwa! Kamala kalawaali ipyo Yesus ami kalaan tunum nikil kii dil moya-laamin daa; kuno kamboyiwa, kanumin o. Fan, tunum alami weng aye, ok aa, ayo kufola namti, disa kelamu.
ACT 5:39 La, God alalta kufola namti, ibi taang-kala-lom iyo del molokomip disa. Del molum o kalip namti, kanolin liip kawu kibi God aso, dinokomip ema yo, kala Gamaliel ayo kanum bokoyilaya, kamok kamok iyo Gamaliel ami weng kaata-kup weng sandipla,
ACT 5:40 Yesus kalaan tunum nikil iyo weng umbaayip, tal itamipla, bolis man imi bokoyip, ita yebi im-tii keyipla, kamok kamok iyo bokoya-lomdip: Ibi Yesus ami win kaa maso ma kufu-bam bakayin disa yo,
ACT 5:41 kala-lomdip, tildaa im-baalip am ayo kelalip tam abip abalipla, nikil ili ti fatom dinim, bom aket fuku-daaliwa yi, Tanke God akal itamaya, ili ti yaap Yesus ami win kufu-bam, kamok kamok imi bokoyokomip kala, kala-lomda dong dokoya kanolup o, kalalip, fiyaap duu-bam ale, imi numi kukup mafak kuya-lom win ku-mafak-daayip kulaa katip o, kal-bom kemsip.
ACT 5:42 Am daan-yaamin suunkup tiltam tabemsa ayo, kalaan tunum ili lotu am awak diilim so, unang tunum imi am so, yak aba tal-une-bamdip, unang tunum imi kukuyim-bam bokoya-lom: God ami Ulduula Tiltam Kamokim Kesa Tunum ali Yesus ata te! kala, kalaan eng uyo weng tambal bakayin kaa, kulaasip dinim o.
ACT 6:1 Am kulu daanse kulu, Juda kayaak Yesus ami lak duulin yaapkan ke-lomdiwa, Juda Grik weng bakamin iyo Juda ilmi Hibru weng bakamin iyo balaayim-bamdip; Am kala daan tiltam taben-umba kaali, ibi unang tunum ima aye, mafek mafek iipnip aye, iyo dan kayila-yaabip. Yale, Numi unang kaluun-miin kiitale, kamboya-laabip o, kemipla,
ACT 6:2 Yesus ami kalaan tunum nikil talangkal iyo alik Yesus ami lak duulin unang tunum imi naan-daayip tala-tala-kelip bokolip: Nuli God ami weng bakayila-yaabup ayo, kulaa yak moni aye, ima aye, kukaayimbup kaa tambal disa.
ACT 6:3 Kemin, nak-tunum kusal kipkal tunum ma kawanta ti fan win tangbal bakaan-bilip ilin aye, God ami Sinik ata dong dakaan-balala, ok yaap nuumin kukup tangbal utamsa kalip namti, kiita fetkal ma ulelniwa, nuta tunum fetkal imi bokoyupla, yak kanumin ok ayo kutal-fukulin o!
ACT 6:4 Nuli kanolin ok ayo kulaa-lomdup, titil-fak-daa God ami beten kamaan-bam ale, God ami weng kaata-kup unang tunum imi bakayim-bam ke-mokomup o, kaliwa,
ACT 6:5 unang tunum alik iyo weng kalawaali, Yaap o, kala-lomdip, kulaa Stiven ayo God ami lak dukum duula, God ami Sinik Tambal ami diim bombe ayo ulduu-sinom, kuno Filip, Prokorus, Nikano, Timon, Pamenas nikil iyo ulelbip-kup; abip Antiok kayaak Nikolas almi kukup kaa kela Juda imi tem din unsa ayo ulduu ke-lomdipla,
ACT 6:6 im-bii-din kalaan tunum imi kukuyimbip-kup; ok kaayo kuyum o, kalalipla, sikil kuyak dabom tii God ami beten keyinsip o.
ACT 6:7 Kemin, God ami weng ayo dukum-nula, Jerusalam kayaak yaapkan iyo Yesus ami lak duu-lom almi unang tunum ke-balale, kuno pris awem tunum o, kalin yaapkan yakal ti tiltam Kamokim ami lak dakaa-bala kemsip o.
ACT 6:8 God ayo Stiven ami aket balili-kalin kolale, ayo dong dakaan-balaya, titil-fak-daa-lomda kukup akal kusnum mirakel akal alik akal alik kiiyo, unang tunum imi tiin diim kawu talal-balaya, atam-ilomdip awalmip ko.
ACT 6:9 Juda kayaak yaapkan ma iyo sawaayak kawu bilin abip Sairini kawu bala, abip Aleksandria kawu bala, Silisia bokon aye, Esia bokon kawu sok de-yimulip disa wok, okok-ke-bisip kiimi tiin molin tunum ita sok tildaa im-baalip tal Jerusalam kaptamu bom-laabip. Kemin, imi lotu kemin am ayo sok tildaa im-baalip talemin imi lotu am o, ken-umbip kawu, iyo weng kufo Stiven so weng aal dikimip.
ACT 6:10 La, God ami Sinik akal Stiven dong dakaan-balala, talalu utamsa. Kemin, weng tangbal kaata-kup bakayim-balaya kemin, kalok kano ita ita kelalip disa yo.
ACT 6:11 Kanola tiin kuwaala-lomdip, din tunum malo ma imi oko-tokoyiwa: Unang tunum imi kasen-fokoya-lom, Stiven ali Moses so, God so, itafii-bam weng mafak bokoya weng sanbup o, kem-tal-unip. Kemin,
ACT 6:12 Stiven so, weng al dikimsip tunum ita unang tunum sole, imi kamok kamok lo utamsip imi wiis moyiwa, iyo tal Stiven ayo dap-tal-fuku dibii-tal kamok kamok Kaunsol alik imi bilip kawu daalip tolnala
ACT 6:13 tunum kusnum malo ma iyo foko-kutal-tii keliwa, ita kasen-fokola-lomdip: Tunum kalawaali ti suunkup baka-bamda: Mep kipni lotu am diilim kaasole, sawaalak God ami Lo Moses kola dolsa so, kiili mafak o, kal-bom ale, aa boko-lom:
ACT 6:14 Nasaret kayaak Yesus ali lotu am diilim kaayo, balata kutiile, kuno Moses ami kanumin o, kala numi kuyinsa kukup ayo kukan-tiilaya, kama kukup kaata, kup-nokoma no, kalaya, weng sanbup te! kemip ko.
ACT 6:15 Kalipla, kamok kamok Kaunsol alik am kaptam tiinabip iyo Stiven atam talaaliwa yi, Ami tiin matum kaali, ensel tiin matum tap ke, falala kala kala-lomda tambal-kup tolba kala, atamip ko.
ACT 7:1 Hetpris awem tunum imi dabom ayo Stiven ami bokola-lomda: Mep tunum kalawiimi weng kaali, fan bakap-timbip ema? akaya,
ACT 7:2 Stiven asiik bakan-taba ko: Aatumen so, abaap kusal so, kipyo, nami weng ma bokoyon o, kali kemin, weng san iliwa! Sawaalak numi awaalik Abraham ayo din abip Haran din unin disa, Mesopotemia bokon kawu balaya, abiil kayaak God ayo tal Abraham atam fatawa,
ACT 7:3 boko-lomda: Abraham kapyo, kapni bokon so, abip kayaak iso, iyo keyilalap bilin bokon ma kukup-ti kabanan o, akala, kulaa,
ACT 7:4 Kaldia kasel imi bokon Mesopotemia kawu, ayo kelala din abip Haran kawu bala bii, ami aalap ayo saaknaya, God ata dabaala tal nulmi bokon bom-bulup kulawu tal biisa.
ACT 7:5 La, God ayo Abraham almi tawaal alik ma kolin disa; bokon daam katip aye ma kolin dinim. Yale, Abraham ami bokola-lomda: Bii-lom kaali, bokon kalawaali, kapni man loop alimal kipni atin kuyokomi no, ansa. La, Abraham ali man dinim.
ACT 7:6 God ayo bokola-lomda: Bokon kama kuluulin dinim iliwa kawu bii-lom kaali, kapni man loop kiili, tawaal kusnum kawu bom-bilipla, tawaal kasel ita bokoya-lomdip: Ibi fatal man o, kala im-bak-mo sok de-yimuliwa, disa iip kawu okok ke-bam ale, kukup mafak mafak kukaayim-bilip, bom bii-lom wasital almi-kup 400 kiita duk-duulokomip.
ACT 7:7 Bii-lom tawaal kasel iyo taba-lom kipni yim-baak tibii-yokomip uyo, nakal kiiyo anuli atul duk-duulipla kawu, kapni man loop iyo bokon kaa kelalip tal bokon kalawu bomdiwa, fiyaap duup-nam-bam beten kamap-nokomip.
ACT 7:8 Kemin, kabi kaltapni man tunum unaak so, miining imi tunum man unaak so, imi ipnaal ayo boya-boya-kelip bii, fasuulip utamipla, God numi bokoya-lomda: Kapni bokop-ti kaa kanu-mokomi no, kalsa kala kalin o, kala-lom God ayo kanum bokolala, Abraham ayo man tunum Aisak duula bii am oklungkal kelale, man ami ipnaal ayo bo-kukan-tela bom bii, Aisak ayo Jekop duu-lom, ami ipnaal ukduu-kukan-tela, biila Jekop ali numi tunum miit talangkal fokolala, bom bii imi ipnaal ayo kukan-tiiyinsa no, kala Stiven ata kamok kamok imi bakaya ko.
ACT 7:9 Kalale, Stiven ayo weng ma kamok kamok imi bokoya-lomda: Jekop ami man iyo ilmi niing Josep ayo tit-atam-ilomdip, tunum kusnum imi kuyip mo-lom dibii bilin Isip bokon daalipya, mafek mafek mafak ma tal ami diim abamnu. Yale, God ayo taba-lom Josep ayo tiin mo-balala, yaap-kup bomdaya, tal Isip kaptam-ami King Fero ami tiin diim tolnaya, King Fero ayo Josep ami dik-daala: Kabi nami lom ma duubi kabak-ami miit kabak bokop-nalalap o? kala dik-daalale, God ami aket fukunin tambal ayo Josep ami kolaya, Josep ali king ami weng ayo yaap-kup maan telala, king kaa fiyaap duu-lomda ami ulduulala kamokim ke-lom, Isip kasel iyo tiin mole, king ami am kaptam-ami am bung ayo tiin mosa ko.
ACT 7:11 Isip so, Kenan so, bokon alep kaa ol fuut am daanala, atin ti awak um-tal-daa-lomdip, numi awal kii kalok kano-lom, ima kaa kaloku kuluu inam-nolip dinim keliwa,
ACT 7:12 kulaa Jekop ayo weng sela yi, Isip kaptam-ata ima so kutiilip bombe kayi! kalale, kulaa almi man iyo yim-baala din Isip un-ilomdip, ima mo kulii-tilip im-bom ilomdipla,
ACT 7:13 kulaa asuk yim-baala din Isip itamipla Josep ayo almi sang kaa ku-fatap-daa bokoya-lomda: Nali iltipni niing Josep nalta te! Nali saaksi disa, kala bombii kaayo! yakaya kawu, Fero namti weng san utama yi, Josep ami nakal-fakal namti kaa-bilip, kalale,
ACT 7:14 Josep ayo weng binala din almi aalap Jekop be unaya, almi man so, ami man imi man bung so, alik ilmi-kup 75 iyo naan daaya-lom: Atok, alimal ibi nami bii kala tilin o, yakaya, Jekop alimal iyo din Isip unsip. Din kawu ilomdipla, aalap ayo saakna, ilom kuno ami miining yakal taan keliwa,
ACT 7:16 imbii-din abip Sekem abip tii-lom ilmi awaalik ami tuum tem moyinsa kaptamu bululipla, tal-unsip. Kemin, tuum tem kaptam-ali siin kawu Abraham alta sisol kuluu Sekem kayaak Hamo ami man loop imi kuya mosa no, kala Stiven ayo kamok kamok imi kanum bakayin-bisa ko.
ACT 7:17 Kuno ti Stiven ayo weng ma kamok kamok imi bokoya ko: Jekop ami man loop iyo kulila tibipla, Israel-miin iyo Isip kawu bom-bilip bii man fokolip tunum miit oko dukumna una-bala butoop unipla, kulaata God ami weng kutiimin weng uyo sawaayak Abraham ami bokola-lomda: Ilom am ma daanokomu kaali, Kenan bokon kalawaali kapni man loop imi kuyokomi no, kalsa ayo mepso tulu. Kemin,
ACT 7:18 kulaata tunum kusnum ma tiltam Isip kaptam-ami king kela. Lale, king kaali, Josep ami ok tangbal nuu-bisa uyo utamsa disa.
ACT 7:19 Kemin, ali numi awal imi kasen-fokoya-lom, atin ti yam-mafak-daka-bamda: Man tunum fakan-unip iyo kuyang saak kawu tii-bilip taan-yaamik o, kala kaak foko-lom atul tiin baala kanu-bisip o.
ACT 7:20 Kanu-balaya kemin, Moses ami awak uyo Moses duuluya, God atamaya, Man kaa atin tangbalim ale, man kasaa kalalaya, ami fiyaap kaa duuba. Kemin, awak aalap ili, ilmi am kaptamu tiin-molip bii kayoop asuumalo duk duulala,
ACT 7:21 dibii yang ok balang diim dap-tiiliwa, King Fero ami man unang uta tal atam dibii-din ulmi am daa-lom ulmi man duulin tap ke-lomdu, tiin mo ifamu ko.
ACT 7:22 Moses ayo skul ke-bamda, Isip kayak imi kukup aye, aket fukunin aye, ayo kaal keba-kup; weng tangbal baka-bam ale, ami kukup tangbal uyo titil-biki kelala, nuu-bisa kayi! kala Stiven ayo kanum bokoyinsa ko.
ACT 7:23 Stiven ayo weng ma uyo bokoya ko: Moses ali biilaya, ami wasital kaali, 40 kaata disa kelaya, fanang daa-lomda: Ni king ami am kaltam kelali, din nalmi kayaak Israel iyo itamon o, kala din bomdala,
ACT 7:24 itama yi, Isip tunum ma taba-lomda, Israel tunum ma dabaak-mo aa-bokoba kala kalale, Israel tunum ami lo una alep ke-lom, Moses asiik taba kaata, Isip kayaak an-kutiila taanala,
ACT 7:25 Moses ami aket fukunin ayo, Nalmi kayaak iyo nitamiwa yi, God ata Moses ali dabaala din Israel sok tal-daa-yim-baala unin kalalaya, Moses kaa dabaala taldaya, Isip tunum kaa aala, nokolip o, kala. Yale, ili talalu utamin disa.
ACT 7:26 Silip sintam kuno Israel tunum alep ilmi dinan-kulii-tabum e, Moses ayo tal itam fuk-duuya, Alep kulaa kela ku mim-daa yaap-kup ilin o, kala tal bokoya-lom: Nak-tunum kusal aa, alep ibi asuk Israel maakup kemin, kanimin o, kala alep iltipni dinan-tal-ababip? yaka.
ACT 7:27 Yale, tunum aptum aaba ata taba-lom Moses ami ilela yang banaya, bokola: Kabi kawanta bokop-ta-lom: Kabi Israel numi tiin-molin ke-lom, kot kaa weng san-kaamin tunum o, tamba ni?
ACT 7:28 Kanolin kemin, kabi sinla Isip tunum ma aalap taanba tap kep-non o, kalawa yo?
ACT 7:29 aka-lomda, Moses namti weng san suun-daa uka-daala, bilin Midian kayaak imi bokon kawu bom-ilom unang kuluu, man tunum alep fokosa no! kala Stiven ayo kanum bakayin-bisa ko.
ACT 7:30 Kanum bokoyilale, kuno Stiven ayo weng ma bokoya-lomda: Moses ayo kawu bombii wasital 40, kiita duk-duulaya, kulaa ayo tunum dinim bokon kawu bomda, tal amdu Sainai Tikiin mepso kawu bital kaba talale, as katip ma tolba kabaku as kiin-balala, ensel ayo ma tal as dawang tem kabaku tolba, kala
ACT 7:31 Moses ayo as atam-ilomda aket dukum fukun-bile, yang as kiinba mepso kawu aba atamon o, kala yang unaya, Dukum almi bon tem weng bokola-lomda:
ACT 7:32 Nali kapni kawil-fakal imi God Abraham sole, almi man Aisak ami man Jekop alimal kanolin imi God, kaa nata kayi! akaya, Moses ayo weng san binbin-kup keng-keng-taba suun-daa dabunala, Dukum ayo bokola-lomda:
ACT 7:33 Kabi nami mepso kala tolbap kalawaali awem tem kelu. Kemin, baan yak kaltapni yaan ilom kaa dalela kutiilawa yo!
ACT 7:34 Niyo itami yi, Nami unang tunum Israel kayaak iyo Isip kasel ita taba-lom kukup mafak kaa nuuya-umbip uyo, itam-som aa, ye-bilip aman-laabip ayo weng san kebi kemin, tildaakdila dong dokoyilila, yaap kelin kalali tili. Kemin, tam tolnawa, tam-baali asuk Isip un-ilomdap nami unang tunum iyo foko-kulii-tal o, kalbi kayi! kala Dukum ata kanum bokonsa kayi! kala Stiven ayo kanum bokoya ko.
ACT 7:35 Kuno Stiven ayo weng ma bokoya-lom: Siin kaali, Israel ili Moses ami aket atul kola-lom boko-lomdip: Kanta bokop-ta-lomda, Kabi Israel numi tiin mo-bom, kot weng san-kaayin tunum o, tamba ni? aka-lom daang ukoliwa, laaba. Yale, God ami ensel ma dabaala tal as katip kiinba ami iipyak tem kabaku bomdala, Moses ami bokola-lomda: Kabi asuk bilin Isip unan o, akaya, Moses ayo Isip dinda Israel kasel imi sok tildaa yim-baala ukadaa unemin tunum ale, kamokim ke, kesa.
ACT 7:36 Isip bokon ayo kelala, liip kukuyila yim-tama unbilin Ilem Ok Kumun mepso kawu ilanalala, yakyak bilin tunum dinim disanang bokon kawu bom-balaya, bii wasital almi-kup 40, kiita dakan-tiisa. Kemin, imi Isip kawu kanu-bisip so, Ilem Ok Kumun kawu kan-unsip so, disanang bokon kawu, kanun-bisip so, kaa Moses ali suunkup kukup akal almi kusnum kusnum o, kala mirakel iyo kukuyin-bisa.
ACT 7:37 Moses akal Yesus ami sang ayo Israel imi bokoya-lomda: God uldaa-nam-buu-lomda nam-baala tal weng tem kaa bakayimbi kemin, bii kaptoop ali ti kano altap tunum ma ayo ulduulala, tiltam profet kelaya, God ami weng ayo, kipni bakayokoma no, yinsa.
ACT 7:38 Kemin, numi awil-fakal ili tunum dinim disanang bokon kawu, ang-de iliwa, Moses aso bomdiwa, tam amdu Sainai Tikiin unaya, God ayo ami ensel ami bokolaya, ata God ami suunkup ilin weng kaa Moses ayo bakaan-balaya, weng sandala, alta kulii tildaak ilomda, Israel unang tunum imi bakayinsa.
ACT 7:39 La, numi awil-fakal kiili, Moses ami weng kaali, weng sanamup disa yo, kala-lomdip, maas kuno kela-bom, Isip biisip kaami aket ayo fanang daa-lomdip, Nuyo asuk Isip unum o, ken-umbip kemin,
ACT 7:40 Moses ali amdu tikiin kawu bom-balala, ami fik Aron ami bokola-lomdip: Moses kaa numi im-tamala Isip kela talse kaa, nuli ma atamin disa kebup kaa ali dok banba? Yak kanoba kulaa, mafek mafek imi sinik ma dotuu ilawa, ita numi God keyiwa, nuyo aman dakayim-bulup, ita numi liip kukuyin o, kemip.
ACT 7:41 Kemin, iyo kang, bulumaki man ami sinik ma talalu-lom, olti kulii-tal anu-lomdip, sinik ilmi sikil tup talalubip ami kolale, aman dakaayin-bam, fiyaap duumip kala yakalaya,
ACT 7:42 God ayo daang ukuya-lom kamboyilaya, atan aye, kayoop, biningok imi beten kamayip. Kemin, siin kaa God ami profet Amos ayo sukon ma dola-lom kabak-ami sang ayo boko-lomda: God ali boko-lomda: Israel-miin kipyo, kibi sawaayak tunum dinim bokon kawu bombii wasital almi-kup 40 duk duu-lom talsip kaa, taloop iyo anu-lomdip, kukaap-ninsip dinim.
ACT 7:43 Kipni sinik ma dotusip kaa, Molok ami sel am kulii-tal-une-bam beten kamaan-bam ale, sinik ma talalusip Refan akal kano kulii-tal-une-bam, biningok kup-ta tiin-mosap o, kala aman dakan-bam aye kemsip. Lale, ibi nali aman dakaap-nin disa; kipni sinik alep dotu-silip ita aman dakaayim-bisip o. Kanu-bisip o, kalaliya, keyili waasi ita taba-lom ibi im-bii-din abip Babilon imi daang tem tiiliwa, din kawu ilokomip kayi! kala, God ayo kanum bokoyinsa no! kala God ami profet Amos ata dolsa kayi! kala, Stiven ata kamok kamok imi kanum bakayila ko.
ACT 7:44 Kemin, Stiven ayo weng ma kamok kamok imi bokoya-lomda: Ibi lotu am diilim kaami sang ayo dik-daalip kemin, ipyo, weng san iliwa! Numi awil-fakal iyo tunum dinim bokon biisip kawu, God ata Moses ami bokola-lomda: Nami lotu am kukup-tila, utamap ultap ma ibi delin o, yakala, sel am kaa desip. Am kaptam alik tala-tala-kelipya, God ata weng bakayin am kuuta ko.
ACT 7:45 Biilipla, Josua ayo liip kalfal kelaya, numi awil-fakal imi man loop iyo yakyak bilin Kenan bokon din uniwa, God ayo taba Kenan kayaak fotabamna sak fun unaalipla, imi tawaal ayo kuluu-lomdip, isiik lotu sel am ayo kulii-din ilmi mepso kuluwu delip tiin-bulula bom bii, Devit ayo tiltam king kelaya,
ACT 7:46 kukup tangbal nuu-balaya, God ayo Devit ami fiyaap don-bisa. Kemin, Devit ayo boko-lom: Nami awaalik Jekop ami God kapyo, Kabi kambop-nawa, kapni lotu am ma dep-tilila kawu ilan o, kalala, God ayo bokola-lomda:
ACT 7:47 Daa yo kala kambolaya, Devit ami man Solomon asiik lotu am uyo densa.
ACT 7:48 Ya, Atin Win Tibin God ali tunum imi sikil tup delip kaptam-ali laaba disa yo, kala God ami profet o, kala weng ku-fatap-daa bakayin tunum ma ayo boko-lomda:
ACT 7:49 Dukum ali boko-lomda: Nali abiil so, tawaal so, alep kii kano bomdila, kamokim ke tiin mo laabi kemin, ibi am kaa kalok kanolin am uta ma dep-nokomip i? Nali dok kaptamu kun funulokomi ni?
ACT 7:50 Disa; nalmi sikil tup kaa mafek mafek kala dotusii. Kemin, ibi nami am uyo ma dep-nin o, kalbi disa, kala God ayo kanum bokosa no, kalala, profet ata dolsa.
ACT 7:51 Kamok kamok kipyo, ibi God ami weng kaali, weng sanup daa yo kala-silip. Kemin, kipni aket tem so, talang tem so, kiili, God ami kolup disa yo, kala-silip. Kemin, suunkup God ami Sinik Tangbal kaa kipni aket tem kabak bomda kukuyon o, kala-balaya, ibi daa yo kemin-kup kem-tabasip. Kemin kaali ti iltipni kawil-fakal ililtap te!
ACT 7:52 Siin sawaayak kipni kawil-fakal iyo taba-lom, God ami profet alik weng ku-fatap-daa bakayin tunum biisip ili kukup mafak mafak kaa kukaayinsip. Kemin, maakup so ma kensip disa. Kanta awil-fakal iyo bokoya-lomdip: Yi! bom-bii-lom kaali, Tunum Tituun-kup Tabasa ayo talokoma kayi! ke-bisip ili anulip saaksip. La, kulaata Tituun-kup Tabin Tunum Yesus ayo tal bom-balaya, ibi ti kuno dap-fatap-daa dabaalip yak waasi imi sikil diim abamnala, aalip taanse.
ACT 7:53 Sawaalak kawu, ensel ita God ami Lo uyo numi awil-fakal imi bokoyipla, bakaya tam-tam kulii bital numi diim kula diilu utamsup. Yale, ibi fukulin disa kesip o, kala Stiven ayo kamok kamok imi kanum bakaya ko.
ACT 7:54 Kamok kamok iyo Stiven ami weng ayo weng san-ilomdip aket atul tabeyu kiil eng-kup dalet kalip.
ACT 7:55 Yale, God ami Sinik Tangbal ata Stiven ami dong dokolaya, titam abiil daalale, God ayo as dawang tap ke-balaya, talaalala, Yesus namti God almi sikil tingtup diim namti tolba kala atamale,
ACT 7:56 bokola ko: Ipkal titam abiil namti kaa tem kalulu kaayo, Dukum ami Man ayo God ami sikil tingtup diim kawu tolba kaali, atami no, kalale, kulaali
ACT 7:57 kwin! dukum-kup tuum bikinin tap ke-lomdip, talang tem akii-lom abiltap tola yak dap-tal-fuku-lomdip,
ACT 7:58 dabuu dabaalip tam daak saaklo abal akiim kawu abamnala, tuum ta kuluu binalip yak Stiven ami diim abem ale, tunum Stiven ami sang kasen-fokonbip iyo ilmi ilim saket dalela-lomdip, ku man tunum man kasaa ma ami win kaali, Sol o, akan kan-umbip ami diim katiilip tiin-mo ilala kawu, yak tuum namti binalip yak Stiven diim abamale,
ACT 7:59 Stiven ayo aalum o, ke-bamdipla, tuum iyo bina-biliwa kawu, God ami beten kaman-bamda: Kamokim Yesus kapyo: Nami sinik kalawaali kuluulan o, kala-lomda,
ACT 7:60 katuun duung fakela daak tiin-ilomda, ayo dukum-kup naan-bam: Kamokim kapyo, kabi imi kukup mafak kanubip kaa, aket fuku-daa maan tiiya-yaamin disa yo, akan-kan toop taana ko.
ACT 8:1 God ami daang bakaalin tunum ita, Stiven ami dibii-din dawaalip, tal-bomdip disa akal ma ke-bam amamip ko. Am kulu daana kulu, Juda malo ma ili kukup mafak uyo kutaltam-daa Yesus ami unang tunum Jerusalam kaptam bom-bilip iyo kukaayim-biliwa, um-tal-daa-lomdip Yesus ami kalaan tunum kiita-kup keyila-lomdip, alik sak fun bilin Provins Judiya bokon so, Provins Sameria bokon ami abip ma ma kawu une-bala-une-bala kemip.
ACT 8:3 Sol ayo kukup mafak kaata-kup kukaayin-biliya, Yesus ami unang tunum iyo ti alik dinimnik o, kala-lomda, yak aba din am am iyo fen-tal-une-bamda itama yi, Unang tunum kawanta Yesus ami lak duulin kala kalale, kulaali sisii dilili imbii tiltam aba foko kulii-din kalabus am tiimin-kup kem-tal-banemsa ko.
ACT 8:4 Kemin, Yesus ami unang tunum iyo sak fun bilin abip ma ma kawu bomdiwa, God ami sang kaata, unang tunum imi bakayila-tal-unemip.
ACT 8:5 Kemin, Filip ali umbi-daak abip dukum Sameria kaptamu bomdaya, God ata Ulduula Tiltam Kamokim Kesa Tunum, Kraist ami sang ayo unang tunum imi bakayin-balala,
ACT 8:6 unang tunum alik iyo utamipya, Ali God ami weng tangbal ayo bakayin-bam ale, kukup akal almi kusnum mirakel o, kalbip kaami talal-bam kema kala, kala-lomdip, ami weng ayo talalu weng san-kaamip.
ACT 8:7 Sinik mafak yaapkan ita taba-lom, unang tunum imi aket tem kabak tiinsip iyo dukum-kup ol-bam kamboya tiltamba, tale-bam ale, iwiitsip aye, yaan dikik fukusip aye, yaapkan iyo yaawa-bomdiwa kemin,
ACT 8:8 Sameria kayaak iyo fiyaap dukum duumip ko.
ACT 8:9 Siin kawu, tunum ma laaba kaali, Saimon kemin, ali usong tunum ke-bam boko-lomda: Nali kamokim o, kal-bomda, kasen-faka-bam kukup akal almi kusnum kaata kanu-balaya, Sameria kasel iyo atam-ilom awal-bamdip,
ACT 8:10 unang tunum win dinim so, win soyal so, alik iyo boko-lomdip: Utamsip tunum iyo boko-lomdip: God ma ami win kaali, titil miit kayaakim o, kem-yaabip kemin u! Saimon ayo atamupla yi, Titil dukum ayo kuluuya kanuba kalup kemin, ata-kup titil miit kayaak god o, kala-lomdip, ami weng ayo talalu weng san-kaamip.
ACT 8:11 Kemin, sawaalak usong tunum ami kukup uyo kutal-fuku nuu-bala atafii-bamdip aket fanang alik tam baneyulula, ami weng ayo dotu weng san-kaa-bam ken-umbip.
ACT 8:12 La, Filip ayo God almi unang tunum imbii tam almi mepso tii tiin-molokoma kaami sang kaata, bakayin-bam ale, Yesus Kraist ami win kufon-bam ke-balaya, unang so, tunum so, iyo alik maakup weng tangbal uli ti fan o, kala-lomdip, Yesus ami lak ayo duu-lomdip, oksam okoyiwa,
ACT 8:13 Saimon akal ti kuno Yesus ami lak duu kelaya, oksam okolip. Kemin, Saimon ali suunkup Filip ami daang bakaala yak-bamdiwa utama yi, Filip ali kwin! kukup akal almi kusnum kusnum mirakel kaata, talalba kala kala-lomda, fanang maaklo kelu.
ACT 8:14 Kemin, Yesus ami aptum kusal Jerusalam bilip iyo weng seliwa yi, Sameria kasel iyo God ami weng uyo weng sanbip kala, kala-lomdip, Pita so, Jon so, alep iyo im-baalip din Sameria un-ilom,
ACT 8:15 itamiwa yi, Sameria ili Kamokim Yesus ami win kufo-lomdip, oksam okoyinbip. Lale, God ami Sinik Tangbal ayo tildaak kiimi diim abin disa be kala, kala-lomdip, sikil kuyak imi dabom diim tiiya-lom, God ami bokola-lomdip: Kamokim kapyo, Kapni Sinik Tangbal kaa kalawiimi diim abamnak o, kaliwa, kulaali God ami Sinik ayo tal kiimi diim abamna ko.
ACT 8:18 Saimon ayo utama yi, Yesus ami kalaan tunum alep kii, sikil kuyak unang tunum imi dabom diim tiiliple, God almi Sinik ayo dabaala tal imi diim abamna kala kalalaya, moni kulii-tal alep imi kuya-lom
ACT 8:19 bokoya ko: Alep ibi kanolin titil kalawaali ma kup-nipla, God ami Sinik Tambal ayo kanta nami sikil kuyak dabom diim tiilokomi kaayo, imi diim abak o, yakale,
ACT 8:20 Pita asiik bokola-lomda: God alami titil masiim kukaayila-yaaba kaa, kabi moni kuya-lomdi, molon o, kalbap o? Disa, kalok kano molokomap disa. Kanolokomap kaa, God ata kapso, kaltapni moni so, im-baala as kiinin abip unolip i!
ACT 8:21 God ali titamala, Kapni aket tem kaa tangbal disa yo, takan-kaaba kemin, numi God ami okok kebup kalawaali, kabi fukulamap disa.
ACT 8:22 Nali kabi titamila, Titil kaami mok-kup im-bomdaple, ban kemin uyo aket kuwa kutal-fuku kesap kala, takan-kaabi kemin, kapni ban kebap ayo kulaa-lomdap aket fal-siki Dukum ami beten kela naan-daala-lom: Kamokim kapyo: Nami kalanolin aket kala fanang daka-bam bii ayo kukan-tiip-napla, disa keluk o, akawa, Dukum ata kapni ban kemin kaa kukan-tiip-tak o, akala, kulaali
ACT 8:24 Saimon asiik Pita so, Jon so, alep imi bokoya-lomda: Alep ipta, Dukum ami beten keliwa, dong dokop-nala, kapni angtiil yol sang bokop-nap ayo ma tildak nami angtiil diim abomu dinim keluk o, kema ko.
ACT 8:25 Alep kii Yesus ami sang so, Kamokim Dukum ami weng so, bakayinsi keyilaliwa, asuk alep Jerusalam unum o, kalalip alep yak aba din Provins Sameria bokon abip yaapkan iyo God ami weng tangbal bakayila yakyak umbilin Jerusalam unsip o.
ACT 8:26 Kemin, Filip ayo abip dukum Sameria kawu, bom-balaya, Dukum ami ensel ayo ma tal bokola-lomda: Kabi atan unebu lo liip kaa kela, tal awaan lo liip kawu kutal-fuku din abalap yak Jerusalam lo kaptamu liip ma ke kulii-tal abip Gasa diisip kawu, wan yak molawa unan o, akale, Gasa liip kaali, tunum unang dinim disanang liip ko.
ACT 8:27 Filip ayo mikil kelala, tam taban-bomda wan yak liip mo toop ulala, Tunum alep ma iyo itamale, tunum ma kaali, moni tiin molin tunum ale, ali tunum dukum kemin, ali Itiopia bokon imi unang kamokan o, kala Kwiin Kandasi umi okok ke-bam ale, umi moni ayo tiin mo ilin tunum kemin, ali tal Jerusalam kawu lotu ke-balaya,
ACT 8:28 ayo asuk tal almi abip unon o, kalaya, asole taloop hos tiin molin tunum alep iyo kalis hos ta sisii-kulii-tal-unemin kabaaku tiindip unabip kemin, moni tiin molin tunum ayo kabaaku tiin-bomda, God ami profet Aisaya ata da sawaayak kawu, Sukon Tem weng dolsa uyo tik-tiin-una-balaya, Filip ayo atamdaya,
ACT 8:29 God ami Sinik Tangbal ata Filip ami bokola-lomda: Kabi toop kalis tal-unaba mepso kulu ilawa yo, akala, fan
ACT 8:30 Filip ayo abiltap toop ulale, Ali profet Aisaya ami sawaayak sang dolsa namti tik-tiin una-bala weng san-ilom ayo ami dik-daala ko: Nak-tunum kapyo: Kapni weng tik-tiibap kaami miit kabak kaal ke utabap ema? akaya,
ACT 8:31 asiik bokola-lomda: Nali tituun-kup ifiip-nakin tunum kaa disa; kemin, dok kanoliya utamami ni? Kanolin kemin, baan tiltam talawa, alep tiindupla, akala, tam unala, nikil asuumano kalis diim tiindip unip ko.
ACT 8:32 Dolsa kaami weng tik-tiin unaba kabak-ali boko-lom: Ali kukup mafak kukaan-biliple, sipsip ayo aalum o, kala kulii-una-bilip, duluma-yaaba tap aye, sipsip man ami kalim bataan-bilip sining kala-yaaba tap kanola ali dulumase.
ACT 8:33 Kiita kukup mafak ami konbip-kup; kasen-foko dap-kuku boko-lomdip: Ali aalip taanak o, aka keliwa, aalip taanse. Kemin, tawaal diim kalawu bombe disa. Lale, ami kayaak tiltam tiltam ke-mokomip kii, ti as kon tem tap ke diing bokolamap dinim o, kala, Aisaya ata dolsa ko.
ACT 8:34 Kulaa, moni tiin molin tunum ayo Filip ami bokola-lomda: God ami profet weng tem bakamin tunum ayo kanum boko-lomdala: Kawanmi sang bokosa ni? Alami sang bokosa elile, tunum kusnum ami sang bokosa ne? Bokop-napla weng selon o, akaya,
ACT 8:35 Filip asiik kaami weng dolsa ayo ifelale, Yesus ami sang kaayo bakaala una.
ACT 8:36 Kemin, hos ayo kalis dilili im-tamulu un-bom ok ma tal-unsa ami mepso kabale, moni tiin molin tunum ayo Filip ami bokola: Nak-tunum kapyo, kabi tiyang daa, ok kaa atam-taman! Nali oksam okolon o, kali kemin, kabi nitamap kaali, mafek mafek ayo ma nami diim kawu bombe no, nakan-kaabap ema yo? akala,
ACT 8:37 [Filip asiik bokola-lomda: Kabi Yesus ami lak kaata ti dukum-kup duuli ko, kalawa yo, kalaya, tunum asiik bokola-lom: Ayo, nali utamiya, Yesus Kraist ali God ami Man o, kali kemin, oksam okop-nan aa! aka-lomdala],
ACT 8:38 alami hos tiin molin tunum ami bokolaya, hos ami sok ayo kuluu kutal mola duluma, hos ayo kulu tolnaya, Filip so, moni tiin saanin tunum so, alep iyo soop daak tawaal abalipla, yak aba daak ok daang diim tola, Filip ata ami oksam okolale,
ACT 8:39 alep tildak balang aba kemipya, Dukum ami Sinik ayo taba-lom, Filip ayo abiltap-siik dibii-unaya, moni tiin molin tunum ali maso ma atamama disa kelaya, kulaali kelala, tam alami liip unaba ti un-bomdale, fiyaap duun-duun yakyak una.
ACT 8:40 Filip ayo, talaalaya, Bital abip Asdot kalaba tili kala, kalalaya, yak abip ma ma ke-bamda, Yesus ami weng tangbal uyo bakayila yakyak tal abip Sisaria talse.
ACT 9:1 Sol ali ti suunkup Kamokim Yesus ami daang bakaalin unang tunum imi yam-mafak-daa-lom anuliya taanin o, kal-bomda, aket atul weng aye, suunin weng ayo bakayim-bam tal-une-bam be kaayu, ayo din abip Damaskus kasel kiita, maso kanuyon, o kalala, din awem tunum imi kamok dabom hetpris ami be din,
ACT 9:2 dik-daalale, ayo din Damaskus kaptam-ami Juda tunum imi lotu tiin molin tunum imi sukon dola kuya bokoya-lomda: Kipyo, kanola unang aa, tunum aa, kii Yesus kukup kaata, kutal-fuku-bomdip kawu laabip namti, Sol ayo itamda, sok de-im-bii-tal Jerusalam kalaba tolon o, kala uyo, kuno im-bii-talak o, kala hetpris ayo sukon kaa dola-lomda, Sol kola.
ACT 9:3 Kemin, Sol ayo din abip Damaskus mepso din unale, falala-kalin dukum ma abiil tikiin kaptamu maak fak-daalin tap tadaak ami diim aba-lomdu, alik falala-kup kalala,
ACT 9:4 atam lamo daak tawaal abamnale, kulaa weng ma bokola-lomda: Sol kapyo, kabi kanimin o, kalalap kukup mafak uyo kukaap-na-laabap o, kalale, weng san
ACT 9:5 asiik bokola-lomda: Kamokim kabi kanta ni? akala, asiik bokola: Nali Yesus nata kemin, nami unang tunum imi kukup mafak-kup kamayanbap te!
ACT 9:6 Kabi tam tiindawa, toop abip dukum un-ilomdap bom-balapya, tunum ma tal bokop-ta-lomda, kanumin kanumin ayo kanuman aa! tokokoma no, aka ko.
ACT 9:7 Tunum Sol aso unabip iyo weng bakaanba kaayo, talalu weng sanamip disa; tunum so ma atamalip disa kelipla, duluma tola bom iliple,
ACT 9:8 Sol ali tawaal ayo kela tiltam tola tiin baala. Lale, tiin malang tinelu. Kemin, kulaali nikil iyo sikil ta dap-tal-fuku-dibii un-bomdiwa, liip kukola yakyak dibii yang toop abip Damaskus daalipla,
ACT 9:9 tiin malang kutelala, ima aye, ok aa, fala-bom beten ke bii am asuumano kela ko.
ACT 9:10 Yesus ami daang bakaalin tunum ma Damaskus kaptamu ilin kemin, ami win kaali, Ananayas. Kamokim ayo lom dulun eng tap visin o kebip kawu Ananayas ayo bokola-lomda: Ananayas kapyo! akaya, Kamokim ni kalabi kaayo! akale,
ACT 9:11 Kamokim asiik bokola ko: Yang liip ma ami win kaali, Tituun-Kup Liip o, kala-yaabip kemin, liip kaa kawu daak aba yang asekim Judas ami am ayo yang ilomdap bokola-lom: Nali Tasus kayaak, ami win kaa Sol ami fen-talabi no! akolap ko. Ali lom tap du utama yi, Tunum ma ami win kaa Ananayas ata sikil kuyak dabom tiip-naya, nami tiin uyo tangbal kep-nokomu no, kalalaya, God ami beten kamaan-bamda be no, kala Kamokim ayo bokolaya,
ACT 9:13 Ananayas asiik bokola-lomda: Kamokim kapyo, unang tunum yaapkan iyo bokolip ko: Tunum kalawaali, Yesus ami unang tunum Jerusalam bilip imi kukup mafak mafak uyo kukaayim-bala, yol dukum kuluu-laabip kemin,
ACT 9:14 unang tunum alik Yesus ami win kufo beten kamaalin unang tunum imi sok de-yimulon o, kalalaya, awem tunum pris imi kamok kamok imi bokoyila: Ayo! kalipya, sukon kaa dola koliwa, kalaba talba kemipla, weng sebup o, akaya,
ACT 9:15 Kamokim asiik bokola ko: Kabi unan o! Kaali nami okok kemin tunum keba kemin, nalta ulduuli din-ilomda unang tunum kayaak kayaak iso, imi kamok king malo iso, Israel-miin iso, imi fanang din-ilomda, nami sang kaata bakayak o, kalaliya, ulduuli.
ACT 9:16 Kemin, nalta kukola-lomdi: Kabi nami okok ke-bamdaple, nami win ayo kufu-bam ke-mokomap kaami kalan kaali, angtiil aa, kukup mafak kukaap-tokomip aye, kaa uta-mokomap o, kalali ami kukolokomi no, kala ko.
ACT 9:17 Kulaali, Ananayas ayo yak aba din am tam ilomda sikil kuyak Sol dabom diim tii bokola: Nak-tunum Sol aa! Kapni liip kawu tal-bomdap, Kamokim Yesus atabap ata bokop-na-lomda: Kabi din Sol ami sikil kuyak telapla, ami tiin ayo tambal kelale, God nami Sinik Tambal ata ami diim aba-lom, dap-titil dii kelon o, kala nam-baala tili no, kalaya,
ACT 9:18 kulaa, Sol ami tiin diim mafek mafek aniing ilim ultap uta kaliila tildaak abula, ami tiin ayo abiltap tambal kelu asuk mafek mafek atam-ilom, tamdaak unala, oksam okolipla,
ACT 9:19 kulaa, ima ina titil-fokola ko. Sol ayo Yesus ami daang bakaalin iso, Damaskus kawu bomdip bii luuk daalin tap kelaya,
ACT 9:20 abiltap yak Juda kayaak imi lotu am kiiyo tam une-bam, Yesus sang bakayim-bamda: Yesus ali God almi Man o, yakaan-kaa-bamda bakayila-tal-unema. Kemin,
ACT 9:21 alik ili ami weng uyo weng san-ilomdip, ili aket kaa maaklo keyulula, bokolip: Kaali Yesus ami win kufo beten kamaalin unang tunum Jerusalam kawu bilip, yam-mafak-dakamsa tunum ata nema te? Kamala kalawakal asuk sok de-yimbii-din awem tunum pris imi kamok kamok imi bilip unon o, kalalaya talba no, kalip ko.
ACT 9:22 Kemin, Sol ali Juda-miin Damaskus kawu ilin imi titil-foko tituun-kup ifiiya-lomda, God ami Ulduula Tiltam Kamokim Kesa Tunum ayo Yesus ata kayi! kala bakayin-kup ke-bala, weng san-ilom aket dinim keyulula, weng babon daalip ko.
ACT 9:23 Sol ayo kanu-bamda, kawu bombii am yaapkan kelaya, Juda iyo maaklo tala-tala-ke weng taken-taba aalum i! kala-lomdip,
ACT 9:24 din abip kaptam-ami uti tem yang ilom amitom e kala kutiila-kutiila-ke-bomdip, taap so, kutamiip so, kutiimip. Lale, tunum ma tal Sol ami bokolaya, kutamiip kawu, almi aptum kusal ita dabaalip daak basket tem una, basket ayo sok buku-buku-ke-lomdip, sok lo kutal-fuku dibii tam abip ami tuum uti fokosip uti dong diim liip akolkup dabaalip daak tawaal abala unse ko.
ACT 9:26 Sol ayo din Juda-miin imi win fiinin Jerusalam abip din-ilomda, Yesus ami daang bakaalin unang tunum imi iipyak tem aba-lomda, iso ilanali yo, kalba. Lale, ili ami kamasi kukup kanumsa kaa utamsip kemin, ali Yesus ami lak duulin daa yo, kala-lomdip, ami atam suun-daalip. Lale,
ACT 9:27 Banabas ata Sol ami dong dakaan-bamda, dibii-din Yesus kalaan tunum imi bilip kawu daa bokoya-lomda: Ibi Sol kalawaali, Damaskus liip kawu kutal-fuku un-bomdala, Kamokim Yesus atamaya, ayo weng bokola, Damaskus dinda, suunin ayo kulaa kela-lom, Yesus ami weng kufu-bamda unang tunum imi bakayinsa no, kala kanum bokoyilaya,
ACT 9:28 kemin, Sol ayo iso bomdip, Jerusalam kawu tal-une-bam, suunin kulaa kela-lomda, Kamokim ami win kaata-kup kufu-bamda, unang tunum imi bakaya ko.
ACT 9:29 Bakayim-bam balaya, asole Juda kayaak Grik imi weng bakamin iso, iyo weng aal diki-bamdip boko-lom: Aalupla taanak o, kala liip fenipla,
ACT 9:30 Yesus ami daang bakaalin iyo weng sandiwa, dibii-din abip Sisaria kaptamu daalip, yak sip tem abala almi abip tituun Tasus una ko.
ACT 9:31 Kemin, kanola Provins Judiya sole, Provins Galili, Provins Sameria kiimi Yesus ami lak duulin unang tunum alik iyo angtiil yol disa; abiin tangbal-kup tiindiwa, titil-fokolip. Kemin, ili utamipla, Yesus kaali, numi dabom o, kalalipla, Kamokim ami minlo tem undiwa, God ami Sinik Tangbal ata dong dokoyilaya, Yesus ami unang tunum kiiyo, yaapkan kesip ko.
ACT 9:32 Pita ayo yak abip ma ma kawu tal-une-bamda, daak Yesus ami aptum kusal abip Lida kawu ilin imi fanang daak ulaya,
ACT 9:33 Tunum ma be kemin, ami win kaa Ainias; ami sikil yaan iyo dikik-ansip ayo ti alami am kawu bom bii wasital oklungkal kiita dakan-tiisa kala kalalaya,
ACT 9:34 Pita ayo bokola-lomda: Ainias kapyo, kamala kuluwu Kraist ata tam-talalula kemin, tam tola kaltapni abiin kon ayo aluula dotulan o, aka kem-salale, maak fak-daalin tap tam tolna. Kulaa,
ACT 9:35 Lida kasel so, tawaal Saron kasel iso, alik iyo atamdip aket fal-siki-lom Kamokim Yesus ami lak dolip ko.
ACT 9:36 Kemin, Yesus ami daang bakaalin unang ma abip Jopa kawu ilin kemin, umi win kuu Tabita yo, ke-bam Dokas o, wakan-kaa-bam ken-umbipya, unang uli suunkup kukup tangbal-kup nuu-bamdu, unang tunum mafek mafek iipnip imi kukaayin-bam ken-yaabu.
ACT 9:37 Kemin, Pita ayo Lida abip kawu bom-balala, unang uyo mafak umu-lom taanule, kulaali ilmi kukup kuluu-lom, oksam okowa umbii tam abiin dukum ma tip kaptoowu um-tii-lom ilip.
ACT 9:38 Lida abip kaptam-ali abip Jopa umi mepso kulu be kemin, Yesus ami daang bakaalin Jopa kasel iyo weng seliwa yi, Pita ayo Lida mepso kawu bombe no, kalip kala, kalalipla, tunum alep ma yim-baalip din-ilomdip weng kulii-din Pita ami bokolip ko: Numi unang ma saaknu kemin, nak-tunum kapyo, baan talapla yo! akiwa, kulaali
ACT 9:39 Pita ali imi weng kaata-kup weng sanda, alep iso nikil din unipla, tal Pita ayo dibii tam am abiin tip diim kawu dip-tam daaliwa, unang kaluun kaluun alik iyo tal mepso kulu tal tola ama-bamdip, Tabita umi tiin kawang bomduya, ilim akal alik akal alik biki bi kuyimbu kaali, kuluu-lom Pita ami kukolip.
ACT 9:40 Lale, Pita ayo unang kaluun alik iyo bokoyala tam banipla, katuun duung fakela daak tiin-ilom God ami beten kamaan-bam fal-siki tiyak daa unang saakbu uyo utam bokowa ko: Tabita kupyo, tam tiinan o, waka kem-salale, unang taanbu uyo tiin baa Pita atam tam abiin tiinuya,
ACT 9:41 Pita ayo sikil kuuwa uyo kutal-fuku-lom tam tiinuya, unang kaluun-miin iso, Yesus daang bakaalin malo iso, iyo naan-daaya, tiltam tilip, unang uyo kukuyila utamip yi, Uyo tam tiin baalu kala kaliwale,
ACT 9:42 Jopa kasel alik iyo weng san-ilomdip aket fal-siki-lom, Kamok ami lak duulipla
ACT 9:43 kemin, Pita ali Jopa kawu bomda am yaapkan kelala, kang bulumaki ipnaal kaata, talalmin tunum ami win kaa Saimon aso alep bom-ilsip ko.
ACT 10:1 Tunum ma abip Sisaria kawu be ami win kaa Konilius; ali waasi dinin tunum ilmi-kup 100 imi tiin molin kemin, waasi dinin tunum ili Itali kaptam-ami waasi dinin o, yakan kan-laabip imi anung o.
ACT 10:2 Ali lotu kemin tunum kemin, aso almi man aptil iso, alimal ili ti God ami fiyaap-kup duun-yaabip, ali tunum isom ale, ali Juda unang tunum imi mafek mafek iipnip iyo kukaayim-bamda, suunkup God ami beten kamaan-bam, kem-yaaba kemin,
ACT 10:3 kulaa am ma daanuya, atan tal aba daayak aba ke-balale, kulu Konilius ayo almi lom tap ma visin o kebip uyo duu-lomda, fatap-kup atama yi, God ami ensel ma tal am ba tala kala atamale, ensel ayo tal bokola ko:
ACT 10:4 Konilius kapyo! Wo! kalale, atam suunin so ke-bamda bokola: Kamokim o! kanimin yoko? kala dik-daala bokola-lomda: God ali titam-ilomda, ali beten kamap-nam-bamdap aa, yak unang tunum mafek mafek duluubip iyo kukaayim-bamdap ken-umbap kala takaliya, kapni fiyaap duup-tim-bamdi, kukup tangbal ma kup-ton o, keba no.
ACT 10:5 Abip Jopa kaptam-ami tunum ma be ami win kaali alep kemin, ma kaa Pita ale, win ma kaata Saimon. Kanolin kemin, ma kaali kang bulumaki ipnaal talalmin tunum aso alep bom-bilip ami win kaa awasekim Saimon kemin, ami am kaali biyang yol ok balang diim kawu desip. Kemin, ti kamala kulu tunum ma yim-baalap bilin Pita atamip tilin! aka ko.
ACT 10:7 Ensel ayo unale, Konilius ayo almi ok fukulin tunum alep ma, kuno tam waasi dinin tunum ma, nikil naan-daaya. Kemin, waasi dinin tunum akal God ami aket kola-bom, God ami beten kamaala-yaaba, ali Konilius aso bomda dong dakaalin tunum o.
ACT 10:8 Nikil kanolin ita, tal atamipya, Konilius ayo ensel almi weng alik bokola kaata, imi bokoya-lomda, yim-baala din abip Jopa unip ko.
ACT 10:9 Kulaa, nikil iyo yakyak umbilin iip silip sintam kutim yak aba bital abip mep mep tala-biliwa, atan tal dibimnu, Pita ayo tam am konal diim kabaaku beten ke-bam, bom ilala,
ACT 10:10 ol-tinap kelula, ima ma inali yo, keba. Lale, ima kaa kiinin disa be kemin, kama fuubip kala, ilaya Pita ayo lom tap visin o kebip ma fatap-kup talaalaya,
ACT 10:11 Abiil tem kalulule, mafek mafek ma ilim kaal dukum altap umi balang kaali, fukula-fukula ke kulii bital-daak tawaal tiiluya, talaalaya,
ACT 10:12 Kwin! kabaak-ali: nuuk, kang, atiim, inap, awon, kanumin mafek mafek iyo Juda kii inin disa awem o, ken-umbip kiita, ilim men kabaaku bukuba kala atamale,
ACT 10:13 tam weng ma bokola kaali, tal Pita ami bokola-lomda: Pita kapyo, kabi yak taloop kunolin yaapkan kulii yebi fuu-lomdap inan aa! akaya,
ACT 10:14 Pita asiik bokola-lomda: Kamokim kapyo, Juda numi lo kaa boko-lomdu: Kii awem kayi! kalsu kemin, nali siin kaa nali kanolin kii ma inasi disa. Kemin, kikil ti ma anu fuu inam-nokomi disa yo! akaya,
ACT 10:15 weng ayo asuk bokola: Mafek mafek alik kii God ata boko-lomda: Yaap o, kalba kaa, kabi awem o, kemin disa yo,
ACT 10:16 aka-aka-kemsi, weng du asuumalo fak-daalaya, maak fak-daalin tap ilim dukum kaayo, kulii tam abiil tikiin una ko.
ACT 10:17 Pita ayo kanolin lom dulun tap kaa atamdaya, aket yaapkan fukun-bamdala, Kwin! lom tap duuli kaami miit kaata, dok kanolin sang ma yoko? ke-bamda ilaya, tunum nikil Konilius yim-baala tilip iyo, tal-ilom tunum iyo tal bokolip: Saimon ami am kaa kaloku be ni? kaliwa, bokoyiwa, tal aba daak amitom mepso kulu tolnipla,
ACT 10:18 weng umbaaya dik-daayip: Tunum ma ami win kaa alep kemin, ma kaa Saimon ma kaata Pita kemin, kalawu bombe nema? kaliwa,
ACT 10:19 Pita namti ami lom tap duula kaata, umi aket fanang daka-bam bom-ilale, God ami Sinik ata bokola-lomda: Kapyo, weng san-ilawa, tunum asuumalo ma tal kapni fenbip iyo itaman!
ACT 10:20 Kii, nalta yim-baali tilip kemin, kabi kela tam tiin daak itam-ilomdap, unon e, kelon e, kemin daa; nikil unolip ko.
ACT 10:21 Kulaa, Pita ayo daak tunum nikil imi bokoya-lomda: Kipni tunum kaami fen-talabip kula nata te! Ibi kanim fanang tilip? yakala boko-lomdip:
ACT 10:22 Konilius ali waasi dinin tunum almi-kup 100 imi tiin molin tunum kemin, ali tifan tunum tangbal ale, God ami fiyaap dolin tunum. Juda alik ili ami win ayo kufola-yaabip kemin, sinla God ami ensel ma ayo tal bokola-lomda: Weng kulaalap din Pita be unula, tal kaltapni am kalaba tal ilom ami weng ayo ma bokop-tala, weng selan! taka Konilius ata, yim-baala tulup o, akiwa kulaa
ACT 10:23 Pita ayo bokola: Tiltam tiliwa, nikil sindupla, yakala, tam unip nikil silip sintam Pita bung dotula aso nikil maakup unip kemin, Yesus daang bakaalin tunum Jopa kaa kayaak aso nikil unip ko.
ACT 10:24 Nikil iyo yakyak bilin iip silip sintam una-bilip, Konilius akal utama, Awu, kulaata mepso talabip kala kalale, almi aptum kusal so, am maak ilin iso, imi bokoya ko: Ibi tal am tiliwa, fenuwa yo, yakala, tala-tala-ke-lom fenip ale,
ACT 10:25 Pita ayo tal Sisaria abip iip kulu talale, kulaali Konilius ayo din Pita almi miit tem kulubale, kamokim ami weng umkaalin tap ke, tilik dung fakela daak Pita almi miit tem kuluba dabuna ti kaldaak daa Pita ami fiyaap dola. Lale,
ACT 10:26 Pita ayo Konilius ayo dafoba-kup bokola: Nali tawaal diim tunum te! Nak-tunum kabi ti kaldaak-daa dabuna-yaamin daa; tolnan! akaya,
ACT 10:27 kemin alep iyo weng bakamsi kela tam am ula, Unang tunum yaapkan ma tal tiinaabip kala tam itamale, kulaa
ACT 10:28 Pita ayo bokoya ko: Kipkal Juda numi kukup ayo utamsip. Kemin, nuli yakal ilmi tunum miit kusnum iso ilin aye, din atamup alep tiin ilana kela talemin aa, kaali ti awem. Lale, God ali kukup-na boko-lomda: Kabi yakal ilmi tunum miit kusnum imi sang ayo bokop-nap: Kaa awem kemin, yaap kep-nuya tunum kaami miit tem kaa yang unokomi disa yo, kalolap. Lale, Yaap o, tiki no kala God ayo nami kanum bokop-na-lomda kukup-nimba. Kemin,
ACT 10:29 kapni naan-daap-nambap kaata, unon e kelon e, kebi tilbi disa; nali weng ma dik-daap-ton o, kali kanimin o, kala, naan-daap-nambap i? akala,
ACT 10:30 Konilius asiik bokola-lomda: Bii am asuumano keli kabak-ali kano atan tal aba yak banale, nayo am kaltamu bomdila, God beten kamaan-bam bom talaalile, Tunum ilim dawang soyim mikilin ma tal nalmi tiin diim kulu tolna, atamila,
ACT 10:31 ayo bokop-na-lomda: Nak-tunum kapyo, God ali kapni beten ken-umbap uyo, weng san-kaa-bam ale, Juda unang tunum mafek mafek duluulip iyo, masiim kukaayila-yaabap kaata, titamdala, kukup tangbal ma kup-ton o, keba kemin,
ACT 10:32 Jopa kawu tunum ma bombe ami win kaa awasekim Saimon kemin, ali kang bulumaki ipnaal talalmin tunum ma aso alep bom-bilip kemin, ami am kaali biyang yol ok balang diim kawu buu kemin, kapni tunum ma fokolap dindip Pita bokoliwa, Konilius kapni balap kala talak o, kalale,
ACT 10:33 kulaa abiltap-kup tunum nikil iyo yim-baali kapni fanang din unipla, kabi nami weng kaayo, weng sandap talap kemin, yaap ke talap. Kamala kalawaali, alik nuli tal God ami tiin diim tiinaalup kemin: Kapta Dukum ami weng bokop-ta-lom: Din imi bokoyan o, tamba ayo bokolapya weng selum o, kala Konilius ata Pita ami kanum bokola ko.
ACT 10:34 Kulaa, Pita ayo weng namti ilu bokoya-lomda: Kipyo, utamiya, ti faneng, God ayo aket fukun-ilomda, yak tunum miit ma ma ili ti disa tildak miit maakup kiita-kup, ayo kala-laaba disa.
ACT 10:35 Unang tunum miit yaapkan yaapkan kiita, God ami lak kaa duu-bomdip, kukup tangbal umi tabu-bam kemip namti, God ali kanolin kiimi fiyaap kaa duu-mokoma no, kalbi.
ACT 10:36 Kipkal utamsip taa! God ali Israel numi bokoya-lomda: Yesus Kraist ali unang tunum alik imi Kamokim maakup kemin, unang tunum kawanta Kamokim kaami lak ayo duula namti, Kamok ata taba-lomda dap-talalulala, ami aket tem ayo bilili-kup kala-lom, yaap-kup ilokoma no, kala-lomda God ali weng tangbal kaata kulaala talsu.
ACT 10:37 Jon Baptis ayo oksam ukamin sang ayo unang tunum bokoyala, Yesus ami kukup kanum talan-soma uyo, kaa ipkal utamsip. Kemin, ali din Provins Galili bokon aye, yak aba din Provins Judiya aye, abip ma ma kawu almi kukup ayo kukuya-tal-unemsa ko.
ACT 10:38 God ali, almi Sinik Tambal ayo Nasaret kayaak Yesus ami kolale, dong dokola kelaya kawu, dabaala tildaak taldaya, God aso bomdaya, abip ma ma kawu tal-une-bamdala, unang tunum yam-talal-kaa-bam ale, Setaan ata alik yam-mafak-dakan-unsa imi yam-talal-bam kem-tal-unemsa.
ACT 10:39 Yesus ali Provins Judiya aba-somdala, din abip dukum Jerusalam kaptam aso, abip malo malo iso, tal-une-bamda, kanumin kanumin kukup alik iyo talala tal-une-balaya, almi aptum kusal nulmi tiin alep alep kaa atam-sulup kemin, kabak-ami sang kaata unang tunum imi bakayila-tabasup o. Kanola waasi ita dabak as diim daa an-silip.
ACT 10:40 La, am alep kela, am asuum diim kawu God ayo dafolala, tam tiinaya, atam-sulup. Kemin,
ACT 10:41 unang tunum alik kii ma atam-silip disa; kemin, nuta-kup God ata ulelnala atam-sulup. Kemin, nuli atamuwa yi, God ali numi bokoya-lomda: Ipni atamip kaami sang kaata, unang tunum imi bakayin o! yakaya kaa kipni bakayimbi, faneng tiin kawang kelaya, aso nuso ok so, ima so, maakup inan-solup.
ACT 10:42 Kemin, numi bokoya-lomda: Kibi nami weng kaata, kulii-tal-une-bam unang tunum imi dotu bokoya-lom God ali boko-lomda: Bii-lom kaali, Yesus kulaata tiin kawang bilip so, taansip iso, iyo talalu lii-bam yam-kuku-mokoma no, kalase kayi! yakan-kaa-bam bakayila-tal-unemin o, kalsa.
ACT 10:43 God ami weng ku-fatap-dakamin tunum profet alik ili, kaami sang ayo bokoya-lomdip: Kanita God ami Uldaa-dabuula Tiltam Kamokim Kesa Tunum ami lak duulip namti, God ali ami win diim o, kala-lomda, imi ban kemin ayo kukan-tii kamboyokoma kayi! kemsip o, kala Pita ayo kanum bakayinsa.
ACT 10:44 Kanola Pita ayo weng kaa bakayim-bam ilaya, God ami Sinik Tambal ayo tal-ilomda, God ami weng kaa weng san-kaabip alik imi diim abaya,
ACT 10:45 Juda Yesus ami daang bakaalin malo ma Pita so, nikil talbip yakal utamipya, Kaa Juda nuta-kup daa; unang tunum miit kusnum iso, yakal kano God ayo almi Sinik Tangbal ayo kuuyilala, abip ma ma imi weng akal alik akal alik ma utamsip disa ayo baka-bamdiwa, God ami kukup tangbal kuuya, ami fiyaap duu-bamdip, tong bakan-tabip kala, itam-ilomdip aket dinim keyula,
ACT 10:47 Pita ayo aptum kusal imi bokoyila ko: Kipyo, God ami Sinik kaa siin sawaalak tildaak numi diim abase tap, kanola unang tunum kalawiimi diim kaakal ti tal abamna kalip. Kemin, kawanta ma oksam ukamin kaa ma daa yo, kalomip dinim o, kalale,
ACT 10:48 nikil alimal imi bokoya-lomda: Ibi Yesus Kraist ami win kufoliwa, oksam ukuyin o! yakala oksam okole, bokolip: Kabi kalawu nuso sin-sin-ke-bam ilanaluwa kawu, unan! akiwa, kanosa ko.
ACT 11:1 Bom bii Yesus ami kalaan tunum iso, Yesus daang bakaalin Provins Judiya bilip iso, nikil iyo weng saniwa yi, Juda nuta-kup daa, unang tunum kusnum yak tildak yakal ti kano God ami weng ayo weng san-kaa-bam kebip kala, kalalipya weng sanip.
ACT 11:2 Kemin, Pita ata met Jerusalam imi itamaya, Juda Yesus ami lak duulin ma Juda imi kukup suunkup fukusip ita, Pita ami dabak molum o, kala bokolip ko:
ACT 11:3 Kabi kanimin o, kala din tunum ipnaal ukan tiilin disa imi am kaptamu unawa, iso nikil bomdip ima inan-solip yoko? Kaali ti awem la yo! akipya,
ACT 11:4 Pita asiik miit kawu kufo-lom, mafek mafek alik tiltam tabasu kaami sang kaayo, dotu daka-daa bokoya-lomda:
ACT 11:5 Kipyo, nali siin kaa Jopa kawu bomdiya, God ami naan-biliya, nami aket tem kaali, akal kusnum ma kep-nula, lom tap o, kala fatap atamiya, mafek mafek ma ilim dukum tap umi balang fukula-fukula-ke-lom abiil kaptamu akola kulii yakyak tildaak nalmi diim tulu kalile,
ACT 11:6 talalu atam talaaliya, Tawaal nuuk sole, asal nuuk dukum so, atiim so, inap so, awon kiiso, kiita ilim diim kabaaku tiinaabip kala atam kemile,
ACT 11:7 kulaa God ami weng ma tal bokop-na-lomda: Pita kapyo, kabi yak daak toloop kanolin kiili, aa-bam fuu-bam inan aa! nakale,
ACT 11:8 nasiik bokola-lomdi: Kamokim kapyo, Juda numi lo kaa boko-lomdu: Awem o, kalsu. Kaa siin uyo nami bon tem kaa ma inasi disa kemin ale, kikal nali anu fuu inam-nokomi disa yo! akile,
ACT 11:9 weng ma bokola kaali, asuk tal bokop-na-lom: Mafek mafek alik kii God ata awem dinim o, kalba kaa, kabi awem o, kemin daa yo, nakaya, kulaa,
ACT 11:10 kanum bakamsi du asuumalo fak-daalaya, ilim dukum kaayo, taloop kiiso, alik foko kulii tam abiil tikiin unaya,
ACT 11:11 kanola kabak-ayo tunum asuumano ma iyo tal nami am kaba tilipla, Sisaria kayaak Konilius ata tunum nikil ma yim-baala nami fanang tiliwa,
ACT 11:12 God ami Sinik ata bokop-na-lomda: Kabi unon e kelon e, kemalap i! ti nikil maakup unolip ko, nakala, iso naso, Yesus daang bakaalin Jopa tunum bukupkal iso, nikil yakyak bilin Konilius am din atamuwa,
ACT 11:13 asiik numi bokoya-lomda: Ensel ma ayo tal nami am kaltamu tal bokop-na-lomda: Abip Jopa kaa kayaak ma bombe ami win kaa alep kemin win ma kaali, Pita ale, ma kaata Saimon, kanolin kemin tunum ma fokolap din Pita atamip tiliwa,
ACT 11:14 weng ma bokoya weng selawa, God ata kapso, alimal alik am maakup ilin iso, alimal kipni aket tem talalu-yimulala, tiltam atin ti almi unang tunum tambal kelin o, kala ensel ayo bokop-na no, kala Konilius ayo kanum bokop-na ko.
ACT 11:15 Kulaa, nasiik weng ma bakaliya, God ami Sinik siin kawu tal numi diim abase tap ke kanola yakal tal alimal imi diim abamna kala, kalalila kulaali,
ACT 11:16 kamasi God ami man Yesus ami weng bokoya-lomda: Jon kulaali oksam kaata-kup ukayinsa ale, nali God ami Sinik Tangbal ata dabaali taldaya, ata kipni iipyak tem uyo dotu-yimula, alik yaap-nokomip o, kalase kaami aket kaa fuku-daali. Kemin,
ACT 11:17 utamiya, Siin kaa nuli Kamokim Yesus Kraist ami lak duu-sulup kawu, God ali almi Sinik dabaala tal numi diim abamna bombii kama kulawu ami Sinik ata dabaala tal nikil imi diim abamna kala kalaliya, kaa dok kano-somdila, God kaa daa yo, akila yaap kep-namu daa kalaliya, Pita ayo kanum bakaya ko.
ACT 11:18 Kanola, Yesus ami aptum kusal iyo weng sandiwa, imi fatom dinim weng Pita ami bakaanbip ayo kulaalipla, God ami fiyaap duu-bam bokolip ko: Yak kunolin kulaa God ayo taba-lom unang tunum miit kusnum iyo kano bokoya-lomda: Kipni aket ayo fal-siki-lom tiltam suunkup ilin unang tunum kelin o! yakan-kaaba kayi! kala-silip ko.
ACT 11:19 Stiven aalip taanse kabaku, Juda iip maakup maakup ma iyo kukup mafak kutaltam daa-lomdip, Yesus ami aket kolin unang tunum imi kukaayim-bilipla, sak funbi umbilin Fonisia bokon une-bala, Saiprus bokon une-bala, kutal abip Antiok kulu dela, kawu bomdiwa, Yesus ami weng tambal ayo ilmi aptum kusal Juda ita-kup bakayinsip.
ACT 11:20 La, ilmi tunum ma kii Saiprus kayaak so, Sairini kayaak iso, kemin iip maakup maakup iyo tal abip Antiok tal-ilomdip, kano unang tunum kayak kayak imi bakayip. Kemin, Dukum ata dong dokoyilaya, iyo titil-fak-daa tiltam-ilomdip, Kamokim Yesus ami sang kaayo, bakayim-bilipya, unang tunum yaapkan iyo ilimi kukup mafak kaayo, kela-lomdipla, Kamokim Yesus ami aket kola-silip.
ACT 11:22 Kemin, Yesus ami lak duulin unang tunum abip dukum Jerusalam bom-bilip iyo kano-silip umi sang ayo weng sandiwa, Banabas ayo dabaalip Antiok din ilomda itamaya,
ACT 11:23 God ali abip kasel imi disa misiim kulu tangbal ma kamayim-balaya, ilimi fiyaap kaayo, duubip kala, kala-lomdala, fiyaap-kup duu-bamda, dukum-kup bokoya-lomda: Ibi Kamokim Yesus ami weng ayo kela-yaamin disa, titil-biki kutal-fuku-bomdiwa yo, yakan-kaama.
ACT 11:24 Kemin, Banabas ali ti tunum tangbal; ali Yesus ami lak kaa dukum-kup duusa kemin, God ami Sinik Tambal ata ayo dong dakaan-balaya, weng baka-bala unang tunum yaapkan iyo Kamokim ami lak duu-lom tildang ami miit tem tilip kesip.
ACT 11:25 Kemin, Banabas ayo din Tasus kawu, Sol fen din atamala,
ACT 11:26 dap-tama tal Antiok tala, alep iyo Yesus aket konsip unang tunum yaapkan imi bakayim-bam bom bii, wasital maakup duk-duuliple, kamosinim kaa Antiok kasel unang tunum isiik weng kufo: Yesus almi daang bakaalin unang tunum Kristen o, kala-silip ko.
ACT 11:27 Am kulu daanse kuyaku, God ami profet weng ku-fatap-dakamin tunum ma iyo Jerusalam kaptamu yak aba tiltoop Antiok tilip. Kemin,
ACT 11:28 ilmi tunum ma ami win kaa Agabus ali God ami Sinik ata bokolaya, asiik tam tola unang tunum imi bokoya ko: Bom-bii-lom kaali, am bokon kala dik-daa kulaasu kaa ol fut am daanokomu kayi! yaka ko. (Ti faneng kemin, bii-lom Klodius ali tiltam king kelaya, ima dinim ol fut am kaayo daansu ko.)
ACT 11:29 Kanum bokoyilaya, Yesus ami aket kolin iyo taken-taba bokolip: Kanolokomup kaata, tangbal te! Nikil nokol Kristen Provins Judiya kayaak imi dong dokoyupla, ma ami tuumon ayo kulii-tala-tala-ke afet-daa-lom kulaayilup din unuya yo, kalale, kulaa
ACT 11:30 fan Banabas so, Sol so, alep imi tuumon kuyipla, kuluu-lomdip kulii-din Yesus ami aket kolin unang tunum Provins Judiya kawu bilip imi kamok kamok kuyinsip ko.
ACT 12:1 Am kula daanse kulu, King Herot ayo ti kukup mafak kutaltam daa-lom Kristen tunum unang malo ma imi kukaayila tal-bomda,
ACT 12:2 soldiya yim-baala din-ilomdip Jon fik, Jems ayo dibii-tal ilomdip bainat tup aaliwa kulaa,
ACT 12:3 Herot ayo utamaya, Juda iyo Jems aabip kaami fiyaap ayo duubip kala, kala-somdaya, kulaali ti bret yiis so nolip faskaamin disa kaami iintang am daanaya kuyaku, asuk soldiya maso ma fokola dindip Pita ayo sok de-dibii-tal ilomdip,
ACT 12:4 kalabus am daaliwa, soldiya almi-kup tal aba daayang, talang malii foko, kiita atalingkal atalingkal ke-bam kutamiip so, taap so, Pita kutii-bilipya, Herot ayo fanang daa: Nali kano ili Pasova ami taloop so, ima bret so, fuu-bam imbip ami disa ke-lokomu diim kawu, nayo waasi dinin tunum imi yim-baali din Pita dibii-tal Juda ilmi tiin diim daaliwa, weng dotuliwa, soldiya imi bokoyila, aalip taanokoma no, kala ko.
ACT 12:5 Pita ali kalabus am kaptamu balaya, kutiibip. La, Kristen unang tunum iyo titil-fak-daa-bomdip God ami beten kamaan-bam: Kapyo, Pita kaa dong dokolan o, akip ko.
ACT 12:6 Pasova ima ayo in-bilip bii dinimnula kulu, Herot ayo aket fuku-daala yi, Sibi Pita dibii-tiliwa, weng dotulupla, aalip taanak o, kala-lomda, bom ilaya, kutamiip kawu Pita ayo kalabus am bombe kemin, soldiya alep iyo sen sok alep ta kulii-tal anung ayo kulii yak Pita ami bukup kun diim buku, anung ma kaata soldiya ami bukup kun diim buku, ke-lomdip soldiya alep ma tal malii kaldangna, ma tal malii kabangna, ke Pita ata dap iip kabaak daalip akana keliple, soldiya malo ita amitom kutiilip bom-balaya, kulaa,
ACT 12:7 abiltap maak fak-daalin tap yokon ma iilfo kulaala tal am kutam tii alik falala-kup kaluya, Dukum ami ensel ma ayo tal-ilomda, sikil kuyak Pita ami malan kun diim kuyaku malela kem-salale, tam tiina bokola: Nak-tunum kapyo, ban abiltap tam tolnan! aka kem-salale, bukup kun diim sen ayo alep alep dilela daak abamnip tam tolnaya,
ACT 12:8 ensel ayo bokola: Yak ol tiil ayo kuluu kuyang debap-kup, yaan-alom diltoop tini kelan o! akala kanolale, bokola: Kapni ilim dukum ayo dildaak tini kelawa, tal nami daang abamnawa yo, kalale,
ACT 12:9 fan yak kanoba-kup, ensel ami daang bakaala alep tambanip. Lale, Pita ayo dotu utamaya, Ensel ami weng bakap-namba so, mafak mafak talal-namba so, kaa fan o, kaloma daa. Kulaa lom ema dakaan-unabi no, kalala,
ACT 12:10 alep iyo tam abalipla, tildang soldiya taktok ma mepso kulu kutiibip iyo akaya yam-kan ti kulaa yang asuk kano taktok ma kutiibip iyo akaya, tam daak uti daam tem aba yang uniwa, uti dukum amitom kaami ain saal uyo ulta-kup busuulula, tam abip dukum tam abalip yang liip dukum kaayo, yang abale, maak fak-daalin tap ensel ayo Pita ami kambola tabana ko.
ACT 12:11 Kela tabana, Pita ami aket ayo talalu fanang daa: Bayi! nali talalu utamiya, Fan Herot ata sok de-namulaya, Juda iyo aket fanang fukun-bamdip, Herot ayo talalu atafii-bam dabak-mo-somdaya, soldiya imi bokoyilaya, aalokomip ema yo, nakan-kaabip. Lale, Dukum ali, almi ensel dabaala taldaya, nam-taltam abip daalaya, yaap keli ko.
ACT 12:12 Kanolin aket ayo fanang daa-somdaya, yak aba din Jon-Mak ami awak Maria umi am tal ulala, Unang tunum yaapkan iyo tal ang-de am kaptamu bomdip Pita ami sang kaata, God ami beten kebip. Kemin,
ACT 12:13 Pita ayo din saal dok-dok-kem-tabale, okok kemin unang ma Roda uta yak aba tiltoop saal busuulon o, kalale,
ACT 12:14 weng seluya, Pita almi weng bokola kala, kalaluya, umi aket ayo yaap ma kewala, saal ayo basolamu daa, kela abiltap bina met bokoya-lomdu: Kipyo, Pita ayo tal amitom tola be no, yikule,
ACT 12:15 isiik bokowip: Daa, kubi babon-bamdap kasen-fakabap ema yo, wukiwale, Daa, ti faneng o, kala-lomdu, Ali ti fan Pita alta tal tolna no, kalule, iyo bokolip: Daa, kulaa Pita ami ensel ema yaa! kemip.
ACT 12:16 La, Pita ayo ti saal dok-dok-kemin-kup keba kala, kala-lomdip, met saal busu atam faneng o, kalalip fanang dakat keyu ko.
ACT 12:17 Pita ayo tam sikil kufola nikil iyo dulumnip, Dukum almi ensel ata dabaala tal kalabus am tildaa dibii tiltam daala tala ami sang ayo bokoya-lomda: Kipyo, Yesus ami niing Jems so, Yesus ami daang bakaalin tunum kusnum iso, nikil kiiyo sang kaayo bokoyin o, yakala, tam daak saaklo abala abip ma unon o, kalala maaklo tabana ko.
ACT 12:18 Kula am daanala, soldiya iyo Pita ami abiin ukdaa-lomdip, Kwin! Pita kalawaali dok liip tam banba ni? kala-lom suun-daa aket yaapkan fukunipya,
ACT 12:19 Herot ayo soldiya ma yim-baala din Pita fenip. Yale, atam-laamin daa keliwa, Herot soldiya kutiilip daana imi tiin molin imi bokoyila, ata dik-dakaan tal-unebi kelala, soldiya kusnum ma ita bokoya-lomda: Tal kalawiili yim-bii-din anulipla taanik o, yakaya, fan anulip saaknip ko. Kanoliwa kulu, Herot ayo Provins Judiya ayo kulaa kela daak abip Sisaria kawu bom ilsa no.
ACT 12:20 Kemin, yak Taya kasel so, Saidon kasel so, iyo King Herot ami tawaal tiin mosa kawu, ima saanbi kulii-talen-umbip. Kemin, am ma daanaya, Herot ayo imi aket atul kuya atam-ilomdip, aket fukun-daa kanola, Kaa numi bokoya-lom: Ibi tal numi ima kaa saanin daa yo, yokokoma nema yo, kala-lomdip tala-tala-ke tal king ami am tiin molin tunum Blastas ami kukup tangbal kola-lom, bokolip ko: Nak-tunum kapyo, dong dakaayim-balawa, king aso, waasi kela-una-tala-kebup ayo, kulaalum o, akip.
ACT 12:21 Kemin, Herot ami am kutiiba ayo daanule, unang tunum iyo tala-tala-keliple, Herot ayo king imi ilim tangbal kaata miki-lomda, king imi tiin-yaamin baan diim tiin-ilom weng dukum tuuptuup bakayim-bamda bokolaya,
ACT 12:22 unang tunum iyo kasen-foko dukum-kup naan-bam bokolip: Weng bakayimba kaali, tunum daa; kaa god ma ata no! kemip.
ACT 12:23 La, Nali God daa yo, kalaya kelamip aa, duluma keyilaya, kulaa ti God o, kala-lomdip bakan-bilipla, maak fak-daalin tap Dukum ami ensel ata mafak-alin kolaya, diit ta taba-lom aalip saaksa.
ACT 12:24 Lale, Kamokim Yesus ami weng ayo bakayila-tal-une-bilip dukumnala, abip yaapkan iyo weng san-kaamsip.
ACT 12:25 Kemin, Banabas sole, Sol so, alep imi moni kulii-tal kukaayin umi wok ayo disa kelu kalaliwa, abip dukum Jerusalam kulaa kela Jon-Mak aso, dibiilipla, nikil Antiok unip ko.
ACT 13:1 Kristen unang tunum imi abip Antiok bom-bilip imi iipyak tem kawu, God ami profet weng bakayin tunum so, kukuyin tunum iso, iyo bilip kemin, Banabas, ali tunum duutim Saimon, abip Sairini kayaak Lusius, Manain kaa Herot almi aptum, Sol kanolin kiita.
ACT 13:2 Kula, Yesus ami lak duulin unang tunum ili ima fala-bomdip Kamokim ami naan-bam iliwa, God ami Sinik ata bokoya-lomda: Nalta Banabas sole, Sol so, alep imi bokoya-lomdi: Alep ibi din ok kalawa okok kemin o, kali kemin, nikil kibi dil saanin daa; alep kii yim-baalip unin i! yakaya,
ACT 13:3 kulaa asuk ima fala-bomdip, God ami beten kamaan-bam kemsile kulu, sikil kuyak alep imi dabom diim tii beten ke yim-baalip, alep unip ko.
ACT 13:4 God ami Sinik ayo Banabas sole, Sol so, alep iyo yim-baala daak abip Selusia aba-lom iyo yak sip tem abalip Provins Saiprus unip. (Kemin, Provins Saiprus kaali, yol ok kumun ami daang kun diim iip kawu ilin) o.
ACT 13:5 Kemin, alep ili din Provins Saiprus ami abip win fiinin Salamis kawu din aba-lom, Juda imi lotu am tam-ilomdip God ami weng ayo bakayila tal-unemip. Jon-Mak ali alep iso bomdaya dong dakaaya ko.
ACT 13:6 Provins Saiprus abip alik iyo bakayila tam-tam kulii umbilin abip Pafos dii-somdiwa, tunum ma atamip kaali, tunum kaa usong falela-bom ibaka-bamda: Nali God ami weng ku-fatap-dakamin tunum profet o, ke-bam ale, ali Juda kayaak kesa kemin, ami win kaa Ba-Yesus ata; Grik kayaak ita ami win kusnum ma bokola-laabip kaali, Elimas o, akan-kan-umbip. Kemin, ali Provins Saiprus kaptam-ami kiyap dukum ami aptum kemin, kiyap Sekias Polus ali ti kaal kelin tunum kemin, ali God ami weng ayo talalu weng selon o, kala-lomda, Banabas sole, Sol so, alep imi naan-daaya tilip. Lale, Elimas ami aket fukuna kaali, Kiyap kaayo, Yesus ami lak kaa duulama no kala-lomda, abiltap tal tunum alep iyo dil mo-lomda: Ibi Yesus ami sang kaa ma kiyap kaa bokolalip o, kal-bom kanumala,
ACT 13:9 Sol, ami win ma kaali Pol o, kal-bom iyo bakaala-yaabip kemin, God ami Sinik Tambal ata Pol ami dukum-kup dong dokolaya kemin, Pol ayo dabak dela taba usong tunum ayo talalu atam bokola-lomda:
ACT 13:10 Kapyo, kasen-fakamin weng ayo kapni diim kawu bombule, kabi Setaan ami man ke-lomdap, kukup tangbal alik kaami kalan kaata tit-keya ita-bomdawa, unang tunum kii, fotabe-bamdap dil-saan-tabasap. Kemin, tunum ali God ami weng ma utamon o, kala namti, kabi suunkup kasen-fakayim-bamdap dil-saan-umbap te! Ti! kapkal kaa utaman!
ACT 13:11 God ali telon o, kalba kemin, kapni tiin kiili bikiip-tuya, atan utamin disa ke bii ilana ke-lokomap te! aka-kem-salale kulu, maak fak-daalin tap God ayo ibin tap kuuta, kulaala tildaak aba-lomdu tiin ayo malang tinelula, kulaa liip fen-tal-une-bamda, tunum ma atam bokoliya, nam-tal-fuku liip ayo kukup-na yakyak da unon o, kalalaya, fen-tal-unema.
ACT 13:12 Kemin, kiyap ayo mafek mafek tiltam tulu kaayo utamdaya, Kamokim Yesus ami sang uyo Pol sole, Banabas so, alep imi bakayimbip uyo, weng san-ilom awal-bamda, Yesus ami lak duula ko.
ACT 13:13 Kemin, Pol so, aptum kusal iso, iyo nikil abip Pafos ayo kulaa kelalip sip tem abalip Provins Pamfilia abip ma Pega kawu unip. Lale, Jon-Maak ayo keyila, asuk Jerusalam unaya,
ACT 13:14 kulaa alep iyo Pega kelalip, yak aba bilin Provins Pisidia abip ma Antiok kawu din bomdiwa, God ami iintang am daana kuyaku, alep yak aba tam Juda imi lotu am tam undiwa tiiniwa,
ACT 13:15 lotu am kaptam-ami tiin molin tunum iyo sawaayak Moses so, God ami profet iso, imi weng dolsip anung ma tik-tii-bamdip iyo weng kulaayip din Pol sole, Banabas so, alep imi bokoya-lomdip: Nak-tunum kipyo, ibi weng ma mep unang tunum kalawiimi kukuyila dong dokoyum o, kalip namti, yaap bokoyilalip o, yikiple,
ACT 13:16 Pol asiik tam tola sikil kufola dulumnip ayo bokola: Israel tunum so, tunum miit kusnum God ami naalin tunum iso, nikil kipyo,
ACT 13:17 weng san iliwa! Israel numi God ali sawaalak kaa, numi awal imi dil molaya, fatal ita din Isip biilipla, ayo dong dakaayin-balala, ami tunum miit ayo yaapkan kelipla, God almi titil ta im-tamala Isip kela
ACT 13:18 umbilin saak tunum dinim disanang kawu bomdiwa, kukup mafak tabu-bom ban kem yak aba umbutoop wasital almi-kup 40 kiita dakan-tiisip. Yale, God ali ti kano keyinsa disa;
ACT 13:19 dong dokoyilaya, ili Kenan bokon ami tunum miit fetkal iyo yam-mafak-daalip dinimniwa, tunum ayo taana ami bung foko kabaanu-laabip tap kelaya, imi tawaal ayo kuluulaya, numi awal imi kuyila kawu
ACT 13:20 bom-bii-lomdip, wasital almi-kup 450 kiita dakan-tiisip. Kuyale kulaali, tunum ma ulduula tiltam kamokim ke Israel imi tiin mola bii saaknale, kusnum ulduu kem yak aba butoop alami profet Samuel ami diim abalaya, uldaa-dabuulaya tiin mo-biisa.
ACT 13:21 Kemin, am kula daanba kulu, Israel iyo Samuel ami bokola-lomdip: Kabi kamokim king kaata ma ulduulapla, numi tiin molak o, kalipla, kulaa God ayo Benjamin ami man loop kaptoop-ata ma kaa Kis ami man Sol ata ulduulaya, king ke-lom tiin mola bii wasital almi-kup 40 duk-duulaya,
ACT 13:22 God ayo dap-kan tii-lomda Devit asiik ulduulala, imi king kelaya, Devit ami sang ayo bokop-na-lomda: Nali Jesi ami man Devit kaa atamiya, Ali nami weng kaata alik weng sanda kaa, kanolokoma kala kalaliya, nami aket tem ayo kanolin tunum kaami fiyaap don-bam ilomi no, kala-lom
ACT 13:23 bokola-lomda: Bii-lom kaa Devit ami man loop kaptoop ata ma ulduuliya, Israel kipni dong dakaayila kukup mafak uyo kukan-tiiya yaap-kup ilokomip o, kalsa. Kemin, kama kulawu God ayo almi sawaayak weng kutii bokosa kaayo kanolaya, Yesus kaa, Israel imi kuya-lom dabaala talse no.
ACT 13:24 Yesus ali almi ok kaa iluulin daa ilala, Jon ayo Israel unang tunum alik imi bokoya-lomda: Kipni ban kemin kaa kelalipla, aket fal-siki-lom oksam wokolin o! ke-bamda bakaya,
ACT 13:25 Jon ami ok kaali, mepso disa kelon o, ke-bulule, bokola ko: Kipni tunum ma talokoma no, kala fenbip kaali, nali disa; nasiik tiliya kawu, akal mafiing nami daang tem kawu talokoma kemin, ali ti Tunum Dukum ale, ali ti titil soyim kalaliya, fatom kep-nambu kemin, nali fan tunum kaami miit tem ayo yang-diya ami yaan-alom sok kaa baalami disa yo, kal-bomda, Jon ayo kanum bakayinsa no.
ACT 13:26 Nak-tunum kusal kipyo, Abraham ami miining so, tunum kusnum God ami beten kamaala-yaabip iso, nikil kipyo, God ali weng ma nulmi-kup kulaayila talsu kemin, weng kaluu numi dong dokoyu ban kemin uyo kukan-tiiya yaap-nokomup kaami sang kaata kemin,
ACT 13:27 Jerusalam kasel so, kamok kamok iso, iyo atamipla, Yesus ali nulmi dong dokoya numi ban kemin kaa, kamboya yaap-nokomup, Tunum namti ata kaa tala! kalsip disa. Alik God ami iintang am daan-yaamu kaa, sawaalak God ami tunum profet weng dolsip ayo suunkup tik-tii-bilipla, weng san-kan-umbip. Lale, kaami miit ayo dotu ma utamsip disa. Kemin, bakayim-bamdip: Yesus ali aalip saaknak o! kaliwa, sawaalak sang kaa dolsip uyo fan tiltam tabasuu.
ACT 13:28 Kemin, ili kalok kano atam, Awu ami ban kemin ayo ma bombe kala kalaliwa yaap keyu aalip saak-nokoma kalsip disa. Lale, Pailat ami bokola-lomdip: Kapni soldiya imi bokoyapla, Yesus ayo aalip taanak o, akiwa,
ACT 13:29 kulaa alik kanumin kanumin sawaayak God ami tunum profet ita Yesus ami sang dolsip ayo fan tituun-kup tiltam tuluya, iyo kanolip taana kawu, kaata tunum kusnum iyo tal dabak as diim daabip ayo kuluu-kulii-din tuum tem dawaalip.
ACT 13:30 La, God ayo dafolaya tam tiindala,
ACT 13:31 siin Provins Galili kasel iso, met Jerusalam un-silip imi fanang tal itama atafiibi am yaapkan ke-silip. Kemin, kamala kalawaakal atam-silip ili, ami sang ayo Israel unang tunum imi bakayila-tabasip.
ACT 13:32 Nuli weng tangbal ayo kulii-tal kipni bakayinbup. Siin sawaayak kawu, God ayo numi awaalik Abraham alimal imi bokoya-lomda: Kipni man loop iyo kanoyokomi no, kalsa ko.
ACT 13:33 Fan, God ali almi weng kutiisa kaata-kup kutal-fuku-lomda, Yesus kaa dafola tam tiinse. Kemin, ami diim kabaku God ayo ilmi miining nulta, dong dokoyilala kemin, ayo baal buk alep diim dolsip kabak-ali boko-lomdu: God ayo boko-lomda: Kabi nalmi man kemin, kamala unang tunum imi kukuyila, iyo titam-ilomdip, Ami man o, kalip o kala God kaa kalsa kayi! kala-lomdip dolsip.
ACT 13:34 God ata dafolaya, tam tiindaya, maso saaka fom-nokoma disa yo, kala God ayo kanum bokolale, Nali sawaalak Devit ami bokola-lomdi: Kapso, kapni miining alimal iso, ibi ulela-lomdi, kukup tambal kaata-kup kukaayokomi kalsi kaali, atin fan kukaayokomi no, kalba-kup.
ACT 13:35 Kuno baal kusnum ma kaami weng kaata Devit ata God ami bokola-lomda: Kabi kaltapni uldaa-dabuusap tunum ayo kambolap taanaya, sing daalokoma disa yo, kalsa.
ACT 13:36 La, weng kalawaali Devit ali almi sang bokosa disa. Devit ali God ami weng kaata weng san-kaa-bamdaya, unang tunum am kaa daan-bala biisip imi dong dakaayimbi keya-somdala saaknale, dibii-din alami awal imi kom tem kaptamu dawaaliwa, sing-daasa kemin ale,
ACT 13:37 tunum ayo God ata dafolala, tam tiin baase Yesus kaa sing daase disa.
ACT 13:38 Kemin, weng kufo-lom bakayimbup ti nak-tunum kusal kipkal utamin! Moses ami Lo uta taba-lomdu, kipni ban kemin uyo kukan-tiiyula, ibi God ami tiin diim kaa tituun-kup kelip o, yokokomu disa; Yesus ata, unang tunum imi ban ayo kukan-tiiya-yaamin kemin, kanola kanita ami lak duulip namti, Yesus ayo kiimi ban ayo kukan-tiiyala, ili God ami tiin diim kaa tituun-kup tabin kelip o, yokokoma.
ACT 13:40 Kemin, sawaayak kaali, God ami weng ku-fatap-dakamin tunum profet iyo boko-lomdip: Tunum itafiimin weng bakamin kipyo, kipni bom bilip kulu, nayo kukup akal alik ma dotulokomi kemin, tunum ayo ma taba-lom kanolin sang ayo kipni bokoya namti, Ibi kaa kasen-fakaba kayi! yokokomip. Lale, kaali taba-lomdu ibi yam-mafak-daalu saak-nokomip. Kipkal utam aket dotu fukun-bamdiwa yo, kalsip. Kemin, kuuta taba-lom kipni diim aba-lomdu yam-mafak-daalamu kemin, kabak utafii-bamdiwa kayi! kala Pol ayo kanum bakayila ko.
ACT 13:42 Pol sole, Banabas so, alep iyo lotu am kela tam abip unum o, kala tabamniple, tunum iyo alep imi bokoya-lomdip: Yak ma ami diim God ami iintang am daanokomu kaali, alep ibi asuk tal weng kalawaa maso ma bakayin o, kalbip-kup;
ACT 13:43 kulaa lotu am ayo kela tam saaklo aba une-bala, tale-bala, ke-bamdip Juda so, tunum miit kusnum Juda imi kukup tabuusip iso, yaapkan iyo yak alep imi daang bakaalip um-bom ale, bokolip: God kaa kipni disa misiim kulu kukup tangbal tangbal kamayin-bam dong dakaayim-bam kem-tabasa. Kemin, unang tunum kipkal ti almi diim kulu fewa biliwa kayi! kala alep kiiyo kanum bakayip o.
ACT 13:44 Ilom ale, kuno God ami iintang am ma daanula, abip dukum kaptam-ami unang tunum yaapkan iyo God Dukum ami weng kaali, Pol sole, Banabas so, alep numi bakayokoma kaata, weng sanum o, kalalip mepso alik lotu am tala-tala-kelip. Lale,
ACT 13:45 Juda ili itamiwa yi, Unang tunum yaapkan iyo tala-tala-kelip kala kala-lomdip tit-itafii-bam mafak kamayin-bamdip unang tunum imi bokoyip ko: Pol ami weng kulaa fan bakaba disa yo, kal-bomdip itafiimin weng bakayim-bam kemipla,
ACT 13:46 Pol sole, Banabas so, alep kiili suunin disa bokoya-lomdip: Nuli ti yaap keyu yaap ma God ami weng kamosinim kaali, Juda kipsiik bokoyup. La, kipni aket fukunin kaa, Alep imi weng boko-lom ibi suunkup ilin unang tunum kelin o, kalbip kaami kutal-fukulokomup kaali, yaap keyokomu disa yo, kala-lomdip alep numi weng kaa bakayimbup kaa, daang ukuwip. Kemin, kunolip kulaa, alep nuyo keyilalup, tunum miit kusnum kala-yaabip imi God ami weng bakayokomup o.
ACT 13:47 Kemin, kabak-ali kalok ata naa kalolip: Dukum ayo numi bokoyila-lomda: Ibi nalta ulelni yokon tap iilfo-biliwa, kayak kayak tunum iyo falala-kalin tem kawu bomdiwa, nami weng ayo talalu uta-mokomip kemin, ibi am bokon kala dik-daa kulaasu kiimi unang tunum imi bakayila-tal-une-bilip; kawanita weng selip namti, dong dokoyipla, ban kemin uyo kela yaap-kup ilokomip o, kalba kayi! kalalip kanum bakayip ko.
ACT 13:48 Unang tunum miit kusnum weng kaa weng sandiwa, fiyaap duu-bamdip, Kamokim Yesus ami sang bakabip kaami tong bakamip. Kemin, unang tunum kanita God ata ulduu-lomda, Kiili suunkup ilin unang tunum ke-lokomip o, kalsa kiili, Yesus ami aket kolip unang tunum kiita.
ACT 13:49 Kemin, Yesus ami daang bakaalin unang tunum ita taba-lom Kamokim ami sang ayo baka-bilip, yak abip, tildak abip, kemu ko.
ACT 13:50 Lale, kayak kayak unang win soyal maakup maakup ili God ami naala-laabip. Kemin, Juda ili kanolin unang iso aa, abip ami kamok kamok iso, wiis-saayim-bilipla, kukup mafak ayo Pol sole, Banabas alep imi kukaayim-bamdip fotabam-nipla, Antiok kela unum o, kala-lomdipya,
ACT 13:51 Juda imi kukup kaayo kanumin, ilmi yaan akiim sung ilol ayo kalila kulaalip kalo abip lo unuya, kulaa abip kasel kaptam-ami unang tunum yakal utamiwa yi, Nuli ti unang tunum kusnum ili god ami lak duulin disa ililtap kala kemiple, alep iyo kamboya yak abip Aikoniam unip.
ACT 13:52 Lale, Antiok kayaak Yesus aket kolin iyo fiyaap duu-bilipla, God ami Sinik ata imi diim bomda dong dakaayila ko.
ACT 14:1 Kuno ti Pol sole, Banabas so, alep iyo din abip Antiok kaba tam Juda imi lotu am tam aba-lomdip, Yesus ami sang ayo bakayim-bilipla, Juda kasel so, Grik kasel iso, unang tunum yaapkan yakal ti, Yesus ami lak duulip.
ACT 14:2 Lale, Juda malo ma Yesus daang bakaalin disa bilip iyo, Kristen imi balaayim-bamdip tunum miit kusnum imi woko-takayim-bamdip, imi aket fukunin ayo ku-mafak-daayip, yakal ti Kristen iyo tit-kamayim-bam kemip. Lale,
ACT 14:3 alep iyo suun-daalamip disa; ti Kamokim Yesus ami sang ayo ti kuno unang tunum bakayin-bam ale, Kamokim Yesus ata alep imi dong dakaayin-balala, kukup ma mirakel kaata talal-bilipya, unang tunum yakal kaa utamipla yi, Alep ili God ami kukup tangbal kaali, disa misiim kulu kuyila dong dakaayila-yaaba ami sang kaali, ti faneng kala kalaliwa, alep iyo Aikoniam kawu bom bii kayoop alep e asuumano e duk-duulip.
ACT 14:4 Yale, abip kaptam-ami unang tunum iyo lo-lomdip, tunum malii ma Juda imi le, malii ma ita, Yesus ami kalaan tunum alep imi ke-som kelip ko.
ACT 14:5 Bombii tunum miit kusnum so, Juda iso, imi kamok kamok iso, ili boko-lomdip: Kukup mafak kuyum o, kala-lomdip tuum ta yelupla, alep iyo saaknin o, kemipla,
ACT 14:6 alep iyo weng sandiwa, ukadaa din distrik Likonia kaptam-ami abip sakbaalim dukum dukum Listra abip aba, Debi aba, kem tam taba abip mep mep kaba yakyak un-bomdiwa,
ACT 14:7 Yesus ami weng tangbal kaata, unang tunum imi bakayila tam tam unip ko.
ACT 14:8 Pol so, Banabas so, alep iyo din abip Listra kawu tunum yaan mafak ma atamip, tunum kaa awak ol mat tem kabaku yaan mafak duuluya, yawiita-lomda tal-unemin disa; tiinsa. Kemin,
ACT 14:9 tunum kaa Pol ami weng bakayimba ayo, dotu weng san bom-ilaya, Pol akal tiin dik-daa atam talaala yi, Tunum kaa fanang daalaya: God alta talalu-namulama no, kalba kalale, kulaa
ACT 14:10 Pol ayo tiin dik-yak dela atam ale, dukum-kup bokola-lomda: Kabi tam tola yaan iyo biing mo ifi tolnan o, aka-laam-salale, fan abiltap tiltam tola tal-unema ko.
ACT 14:11 Kanolaya, unang tunum yakal atamipla, Pol ali tunum dotula kala, kala-lomdip, Likonia kasel ilmi weng-kup naan-bam boko-lomdip: Kwin! god kaali yaapkan kemin, god alep kalawiili tunum nultap keliwa, tildaakdip numi tunum yaan mafak kalawaali dafolip o, kala-lomdip,
ACT 14:12 kulaa Banabas ata god diildiil Sus o, aka-kaa-bam ale, Pol ayo atamipya, Ali weng kufo bakayin tunum kala kala-lomdip god ma kaata Hemes o, aka kelipla,
ACT 14:13 kemin, god Sus ami lotu am kaali, tam abip kaami uti daam tem ayo akaala daak saaklo kabaaku bombe kemin, Sus ami awem tunum pris ayo as tes ayo sok tinimsi-lomda, kang kau imak imi kalum diim kulaak tiniiya-lomda, kau iyo kulii-tal abip daam ami amitom ami mepso talaya, kulaa awem tunum so, unang tunum iso, iyo kau kalawii anu-lomdup god alep imi naan-daaya-lomdup kuyum o, kemip.
ACT 14:14 Lale, Yesus ami kalaan tunum Banabas sole, Pol so, alep iyo weng sandiwa, aket mafak keyuluya, imi aket uluum kuluu-yaamin ayo kanumin kemin, ilmi ilim kaata balata kutii-lomdip, abiltap din unang tunum imi iipyak tem kabang-ban-bomdipla, naan-bamdip:
ACT 14:15 Nak-tunum kusal aa! ibi kanimin o, kalaliwa kaa kanubip yoko? Alep nuli god disa; tunum fatap asuk ti maakup kunolin iltiptap ta! Nuli talduwa, weng tangbal kulaata ma bokoyum o, kala talbup. Kemin, weng kalawuuli, kipni laap kiin umi mafek mafek tunum sikil tup dotmin ami fiyaap duubip kulaa kela-somdiwa, aket fal-siki-lom God suunkup ilin tunum ami fiyaap kaata, duumin o! God ata abiil so, tawaal so, yol ok so, mafek mafek alik kala-bilip kiiso, dotu kutiisa kemin,
ACT 14:16 sawaayak kaali, tunum miit malo ma keyilaya, ilmi kukup ayo kuno tabuusip.
ACT 14:17 La, kuno maas keyinsa disa. God ali: Kii nitamiwa, God kaata mafek mafek tangbal kaa kukaaya-laaba kala kalalaya, kukup tangbal ipni kukaayila uyo, abiil kaptamu om ayo kulaala tildaak kipni inin-inin lang kaayo, tiin saan-balaya, yaap-kup taba tiila-yaa-bam ale, ima kukaayin-bala inbi mafaknu kulaa, kipni aket tem ayo disa akal ma keyulu fiyaap duu-bam ken-umbip o, kala kanum bakayip ko.
ACT 14:18 Ti mepso unang tunum iyo kau anu-lomdip kuyum o, kemipla, alep isiik isiik ke weng iliya-lom weng fuk-duuyip kensip o.
ACT 14:19 Yale, Juda kasel malo ma Provins Pisidia bokon kaptam-ami abip Antiok so, Aikoniam so, abip alep kawu ilin ita tal abip Listra tal-ilom Listra kasel imi wiis-moya aket kufoyipla, kulaali yakal tuum kuluu binalip yak abe-bi-lom Pol an-kulaalip daak tawaal aba atam talaalip, Fan taana no, kala-lomdip, Pol ayo sisii dilili dibii tam daak saaklo daalip.
ACT 14:20 La, Yesus ami daang bakaalin tunum iyo din Pol an-kutiilip ayo atam iip e tolna tolna ke falala dap iip kabaak daa-bilipla, asuk tam tiindaya, abip kaptamu se, sintam kutim Banabas alep abip Debi unip ko.
ACT 14:21 Pol sole, Banabas so, alep iyo Debi kawu, God ami weng tangbal bakayim-bamdip, dong dakaayin-biliwa, unang tunum yaapkan iyo Yesus ami lak dakaa-bilip, biile alep asuk din abip Listra aye, Aikoniam aye kawu tam tam Provins Pisidia bokon unip. Kemin,
ACT 14:22 tal-une-bamdip, alep iyo Yesus ami daang bakaalin unang tunum iyo yam-titil-mo bokoya: Alik nuli tam God ami abip ayo tam unum o, kalbup. Yale, tawaal diim kalawu bom-bulupla, mafek mafek mafak yaapkan iyo tildak numi diim abe-buluya, bii angtiil yol uyo um-tal-daa-lomdupla, tam unokomup kemin, numi Yesus ami lak duu-sulup kaali, dukum-kup kano yikik-kutal-fuku-buluwa yo, kal-bomdip alep iyo bakayila-tal-unemip.
ACT 14:23 Kano alep iyo alik abip ma ma kiiyo, yak aba din Kristen unang tunum imi tunum ma im-buu-lom bokoya-lomdip: Kalawiita kipni tiin molin o, kalale kulaa ima fala-bomdipla, God ami beten kamaan-bam boko-lomdip: Kamokim kapyo, kalawiili kaltapni lak duu-silip. Kemin, kapta tiin molawa, tambal-kup bomdiwa yo, kala-lomdip ulela-ulela kem-tal-unemip.
ACT 14:24 Kemin, Pol sole, Banabas so, alep iyo din Provins Pisidia aye, yak aba din Provins Pamfilia din kawu bomdiwa,
ACT 14:25 bokon kaptam-ami abip ma Pega kawu, God ami weng uyo unang tunum imi bakayinsi kelalipla, yak aba daak abip ma Atalia daak abalip,
ACT 14:26 sip kuluulip asuk Provins Siria bokon Antiok tilip ko. Antiok kaa kamasi Yesus ami daang bakaalin unang tunum imi ima fala-bomdiwa, God ami beten kamaan-bam boko-lomdip: Kabi kukup tangbal kuya yaap ma kamayim-bamdap alep imi dong dokoyawa, ok num-tal-unemin o, kala-silip. Kemin, kulu alep imi ok ayo disa kelu kulaa kela asuk tilip.
ACT 14:27 Kemin, tal abip Antiok abale, kulaa alep iyo Kristen unang tunum afetu kutii alik kanumin kanumin God ata dong dokoyin-bala, kanum talan-umbip kaami sang ayo bakayila umbutoop daa, bokoyale, kuno God ata taba-lomda, tunum miit kusnum imi kukuyila, Yesus ami lak dakaabip kaami sang bakayim-bam kemip.
ACT 14:28 Kemin, alep ili Yesus ami lak duulin unang tunum iso bombii am yaapkan kesip o.
ACT 15:1 Judiya kayaak iyo Provins Judiya kaa kela tal abip Antiok tal-ilom Kristen tunum imi bakayim-bam bokoya-lomdip: Nikil kipyo, ibi Moses ami kukup kaata, kuluu-lomdip kawil-fakal iyo bokoyipla, Ita kipni angtiil ipnaal ayo bo-kukan-tiiyin disa kesip namti, dok kano-lom God kaa, ibi im-taldang almi miit tem kaa tiilokoma disa yo, ke-bilipla,
ACT 15:2 Pol sole, Banabas so, alep imi katii-yin-bamdip weng aal dikimipya, Yesus ami aket kolin unang tunum iyo Pol sole, Banabas so, Antiok tunum malo ma iso, iyo ulela im-tii-lom bokoya-lomdip: Jerusalam uniwa, Yesus kalaan tunum so, Kristen kiimi kamok kamok malo isole, kipso, angtiil ipnaal bo-kukan-tiimin kaami weng ayo dotuulin o, yikip.
ACT 15:3 Kemin, Kristen unang tunum iyo nikil yim-baalip yak aba din Provins Fonisia aye, Provins Sameria aye, kem yak aba tam Jerusalam unum o, kalalip nikil iyo un-bomdipla, Kristen ma iyo itamip namti, bokoya-lomdip: Unang tunum miit kusnum malo ma ili aket fal-siki-lom Yesus ami lak ayo dakaan-talan-umbip o, kalipla, Kristen iyo weng sandiwa fiyaap duumip ko.
ACT 15:4 Kulaa, nikil iyo tal Jerusalam tilipla, Kristen unang tunum so, kalaan tunum so, Kristen kiimi kamok kamok iso, ili yaap-kup weng umuuyale, weng foko, iyo Pol sole, Banabas so, imi mafek mafek yaapkan God ata dong dokoyila, kanumsip kaami sang kaayo bakayip.
ACT 15:5 Lale, Falosi ma Yesus daang bakasip iyo tola bokolip: Alep kipni bakayila-tal-unemip ayo, weng anung ayo ma dik-daa-keliwa, tunum miit kusnum imi bokoya-lomdip: Kipni kawal kiiyo bokoyipla, ita kipni angtiil ipnaal ayo ukan tiiyale, Moses ami Lo ayo kutal-fuku kelipla, God ata taba-lomda kipni ban kemin ayo keyak o, kala bakayila-tal-unemin o, yakan-kaamip ko.
ACT 15:6 Kemin, Yesus kalaan tunum iso, Kristen imi kamok kamok kusnum iso, iyo weng kala talalmum o, kalalip tala-tala-ke,
ACT 15:7 weng yaapkan ayo taken bii kulaaliwa, Pita asiik tam tola bokoya-lomda: Nak-tum kusal kipyo, kipkal utamsip taa, Siin kaali, God ayo iltipni iipyak tem kulu nali ulduu-lomda: Kapta nami weng tangbal ayo kulii-din unang tunum miit kusnum imi bakayila-tal-une-balapla, iyo weng sandiwa, nami lak kaayo, dakaamik o, kalase. Kemin,
ACT 15:8 God ali unang tunum alik imi aket tem kaayo, atamsa. Kemin, almi aket fukunin kaata: Kusnum unang tunum kayak kayak nami lak dakaabip kaali ti, tangbal kemin, nali Juda iyo kukuyiliya utamik o, kalalaya sawaayak kawu alami Sinik Tambal kuyinsa alaltap kanolin kusnum kayak kayak imi kuyase.
ACT 15:9 God ali nokol nulmi weng kusnum ma kuyimba-kup, yakal ilmi weng kusnum ma kuya kesa disa. Kemin, kaa weng maakup kaata-kup kuya-lomda itama yi, Kiili, nami lak kaata-kup duulip, kala, kalalaya, imi ban kemin kamboyase te!
ACT 15:10 Kemin, Juda numi lotu kemin umi lo kutal-fuku-yaamin kaali, fiitmin o. Sawaayak numi awil-fakal iso, nuso, nuli dok kano-lomdup taang-kala kutal-fukulalup disa; ipkal kamala kulu lo weng ayo Yesus ami lak duulin unang tunum imi kuya-lomdip kutal-fukulin o, yikiwa ili fiitbi mafak-nokomip. Kemin ale, kanimin o, kala kipkal God ami alokso weng kaa boko-lomda: Kulaalin o, kalase ayo kelalipla boko-lom: Ee, ibi kaa kanumin o! kalbip o? Disa.
ACT 15:11 Nuli utamupla yi, Kamokim Yesus ali numi olen-daaya-lom taandaya, numi ban kemin kukan-tiiyilaya, yaap-kup ke-sulup. Kala-sulup kemin, aa kiikal ti yaap ke-lokomip o, kala Pita ayo kanum bakama ko.
ACT 15:12 Kanum bakayala, alik iyo duluma iliple, Banabas sole, Pol so, alep imi weng bakayip kaali, alep imi weng kaali, din tunum miit kusnum imi fanang din unipla, God ata dong dokoyila, mirakel akal almi kusnum ayo talalsip kaami sang kaata bakayim-bilip, weng san-kaamip.
ACT 15:13 Kemin, alep iyo bakayimbi keliwa, Yesus ami niing Jems asiik bokoyila ko: Nak-tunum kusal kipyo, nami weng kala, weng san iliwa,
ACT 15:14 Saimon Pita ami weng kipni bokoya: Kaa God ali kamasi unang tunum miit kusnum imi olen-daaya-lomda, iip maakup maakup ulelnala, alami tunum unang alik-daap ke-silip kaami sang kabak-ata bokoya. Kemin,
ACT 15:15 Sawaalak kawu God ami tunum profet imi weng bokosip kaali ti, Saimon ami weng tap kemin, imi sukon kabak-ali dola-lomdip:
ACT 15:16 Dukum ali boko-lom: Sawaalak kaa King Devit ami man loop ma asiik unang tunum kiiyo, tiin-mola tiin-mola ke-bisip. Lale, kamala kulaata am balala tabasu tap kele, disa kelu kewip. Kemin, biiliya, asuk taldiya kawu am dinamin tap ke, Devit ami man loop ata ma ulduulila, ata unang tunum kii tiin molokoma.
ACT 15:17 Kemin kano-lomdi, Juda kasel kiita-kup disa; tunum kusnum kusnum aye, tunum miit kusnum ma nami no, kala ulelsi ita, Dukum nami fen-bam nitamin o, kalaliya kanolokomi kayi! kala-lomda,
ACT 15:18 Dukum ayo kanum bokosa. Kemin, sawaayak kaa ali kabak-ami sang kaata numi awil-fakal imi bakayim-bisa no, kala-lomdipla profet iyo dolsip o.
ACT 15:19 Nami aket fukunin kaali, nuli tunum miit kusnum imi aket fal-siki-lom God ami lak duu-silip kii, weng tem so ma kukuyim-bulup, utamiwa yi, Yi! kulaa fiitmin o, kala tabuulamup disa yo, kalokomip kemin, kaa kukuyin disa yo kala-somla.
ACT 15:20 Kemin, nusiik sukon kala dola unang tunum kusnum imi kuya-lom: Tunum ili taba-lom ima uyo awem men kukaayin-bamdip wiis-saanbip, kaami ima kaa ibi inin daale aa, sadikimin daa, taloop kalum o fukulip saakna aye, kiim aa, kaa inin disa yo, kalalupla dola kuyum o, kalbi. Kemin,
ACT 15:21 sawaayak Juda malo ma iyo din abip kusnum dukum kawu, tiina-tiina-ke-bomdipla, God ami iintang am daan-yaaba kaa suunkup din lotu am tam unipla, Moses ami sukon ayo tik-tiilip iyo weng san-kaa-bam ale, Moses ami weng ayo bakayim-bam kukuyim-bilip, weng san-kaa-bam utamsip. (Kemin, weng kala bokoyokomup kaa, utam kaal-ke kutal-fukulokomup kaali ti, yaap ke-lokomup) kalin o, kalalaya, Jems ata kanum bakayila ko.
ACT 15:22 Yesus ami kalaan tunum so, Kristen imi kamok kamok kusnum iso, Kristen unang tunum alik ita, aket fukun-daa bokolip ko: Yaap kelu kemin, numi tunum alep ma iyo ulela yim-baalup din unipla, Pol sole, Banabas so, nikil ita Antiok unin o, kala ilmi tunum alep imi win-kup kufoyila-yaabip ita kemin, Judas ami win kusnum ma kaali, Basabas sole, Sailas so, alep ita ulela-lomdip, sukon ma dola kuya yim-baalip unip.
ACT 15:23 Sukon kabak-ami weng kaa kalanum boko-lom dolbip: Nak-tum kusal kaa tiinsip o? Yesus almi kalaan tunum so, kamok kamok malo ma iso, Kristen nuta sukon kaa, unang tunum miit kusnum abip Antiok kasel aye, Provins Siria kasel aa, Provins Silisia kasel Kristen ke-silip kipni dola kuyum o, kalup kemin,
ACT 15:24 nuli weng selupla, Numi tunum ma din-ilomdip weng bakayim-bilip, ibi aket yaapkan fukun-bam babonbip kala, kalbup. Lale, kaliili nuta yim-baalup din umbip disa te!
ACT 15:25 Aket maakup nulta boko-lomdup: Nulmi aket Banabas sole, Pol so, alep kiili ti waasi ita anulakin. Lale, ili yaawa-somdipla, numi Kamokim Yesus Kraist ami weng kaa bakaya-solip kaa, yaap o kalbip kemin, tunum ma ulela-yim-baalup alep iso nikil ipni fanang unin o! kalbup.
ACT 15:27 Judas sole, Sailas so, alep iyo din-ilomdip sukon tem weng kala dolbup uyo, asuk imi bon tem weng so, kipni bokoyila kelin o, kalalupla, yim-baalup talbip kayi!
ACT 15:28 Kemin, God ami Sinik Tambal aso, nuso, nikil nokol aket fuku-daa weng yaapkan kuyup namti, fiit-mokomip. Kemin, yaap keyula weng maakup kaata-kup bokoya-lomdup: Tunum ili taba-lom ima uyo awem men kukaayin-bamdip wiis-saanbip kaami ima aye, toloop kalum o fokolip saakna aye, kaa inin daa yo; aa sadikimin daa, kalbup kaami sang kaata-kup bokoyum o, kalbup. Kemin, kanolin kanolin kukup kiita kelip namti, tambal o. Nak-tunum kusal ibi tambal-kup bomdiwa yo, kalalipla, sukon weng kabak kanum bokolip ko.
ACT 15:30 Kristen iyo nikil yim-baalip din Antiok aba Kristen unang tunum iyo afetu im-tii-lomdip sukon ayo kuyipla
ACT 15:31 tik-tii-lomdip, sukon kabak-ami yam-titil-saanin weng kaami fiyaap kaata duulipla,
ACT 15:32 Judas sole, Sailas so, alep ili God ami profet kemin alep yakal weng yaapkan Kristen imi bakayim-bilip, iyo Yesus ami lak dakaamin kaayo, titil-fokolipla,
ACT 15:33 alep iyo Antiok kawu bombii ilaniliwa, Kristen iyo asuk yim-baalip unin o, kala bokoya-lomdip, Jerusalam kaptam Kristen ita alep yim-baalip talbip. Kemin, alep ipta numi weng kalawaali, kulii-din weng umuuyin o, kalipla,
ACT 15:34 [Sailas ata boko-lomda: Ee, nali unokomi disa; nali kalawu ili no kalaya, Judas ata-kup unak o.]
ACT 15:35 Pol sole, Banabas so, alep iyo Antiok kaptamu bom-bilip, alep isole, Kristen kusnum yaapkan iso, nikil bomdiwa, Kamokim Yesus ami weng kaata unang tunum imi bakayim-bam kukuyip ko.
ACT 15:36 Alep ilomdiwa, Pol ata Banabas ami bokola: Kapyo, alep asuk din abip ma ma kaami kamasi Kamokim Yesus ami weng bakayila-tal-unebi tal-sulup kaayo, dindup Kristen iyo itam yaap bilip e, mafak bilip e, kalum o, akala,
ACT 15:37 Banabas ali Jon-Mak so, nikil unum o, kala. Lale,
ACT 15:38 Pol ayo aket fukunbi boko-lomda: Daa; tunum kaa yak Provins Pamfilia kawu kano kelala, alep nulufin okok kem-tal-unemsup kemin, ali ku kala daaluwa, unum o, akala,
ACT 15:39 alep iyo weng aal dikimsi, akal almi liip kusnum aba-una-una-kelipla, Banabas ayo Jon-Mak dap-tamala yak sip tem aba yak bokon Saiprus unipya,
ACT 15:40 Pol akal Sailas alep unum o, kaliwa, Kristen iyo bokolip: Kamokim kaata, masiim kawu dong dokoya tangbal-kup unokomip o, yakan kaa-bilip, alep
ACT 15:41 din Provins Siria aba, Provins Silisia aba ken um-bom Kristen unang tunum iyo weng bakayim-bamdip, yam-titil-saan yakyak ken-unip ko.
ACT 16:1 Kulaa Pol sole, Sailas so, alep iyo yakyak din abip Debi abalip, yak aba din abip Listra unip. Kemin, abip Listra kaptam-ali tunum ma Yesus ami lak duulin ma be kaami win kaa Timoti; ali Juda unang ma Kristen kesu umi man. Lale, aalap kaali Grik tunum.
ACT 16:2 Kemin, abip Listra so, Aikoniam so, kaptam-ami Kristen ili boko-lomdip: Timoti ali ti tunum tambal-kup tabasa no, akan kan-yaabip. Kemin,
ACT 16:3 Pol ami aket fukunin kaa, Timoti ali ti nuso nikil unum o, kalala, ayo ulduula. Lale, Pol ali aket fukuna yi, Juda alik abip ma ma bom-bilip iyo atamipla, Timoti ami aalap kaa Grik kasel kala, kala-lomdip iyo bokola-lom: Kabi tunum miit kusnum o, kalokomip ema yo? kala-lomda Juda kukup imi kuluu-lomda ami ipnaal ayo bo-kukan-tela-lomda dabuu dabiila una ko.
ACT 16:4 Nikil kiiyo, liip un-bomdiwa, abip ma kawu yakyak ken-un-bomdipla, iyo bokoya-lom: Siin kaa Yesus ami kalaan tunum so, Kristen kamok kamok kusnum iso, abip Jerusalam din bom-bilip iyo, taken-bam bokolip: Tunum miit kusnum kayak kayak Kristen kesip iyo kaata kanu-biliwa yo, kala-silip kayi! kala nikil iyo kanumin weng kaa Kristen imi bakayila-tal-une-bilipya,
ACT 16:5 abip ma ma imi Kristen unang tunum yakal tiltam titil-fak-daa God ami lak ayo dakaabip. Kemin, am daan-daan-ken-umba ayo, unang tunum kusnum iyo tiltam-tiltam-ke-lomdip imi tam unipya, dukumsip o.
ACT 16:6 God ami Sinik Tambal ata taba-lomda, nikil iyo bokoya-lomda: Ibi din Provins Esia kawu din-ilomdip nami weng kaa bakayin daa yo! yakaya, atamdip bilin Provins Galesia ami anung Frigia kawu.
ACT 16:7 Provins Misia ami mepso aba-lomdip, nikil iyo yang Provins Bitinia kaba unum o, kalip. Lale, Yesus ami Sinik Tambal ata nikil kiiyo dal mola.
ACT 16:8 Kula kela Nisia unemin liip kawu kutal-fuku din abalip yak aba daak abip Troas unip.
ACT 16:9 Nikil akan-ilom, kutamiip kawu Pol ayo lom tap visin o kebip ma duulaya, Provins Masedonia tunum ma tola Pol ami atin ti dukum-kup naan-daala-lomda: Kabi sip tem tildak Provins Masedonia tildak ilomdap, numi dong dakaayan o, keba kala atamdala,
ACT 16:10 lom tap ayo duulaya, nikil iso, Luk nata buk kalawaali dol bokobi naso, utamupla, God ayo numi naan-daaya-lomda: Yak ilomdip nami weng tambal kaata, Provins Masedonia unang tunum imi bakayin o, kalba kalalupya, kula abiltap nuyo bung talalu le, kulaa tal sip ma kuluu-lom, Provins Masedonia unum o, kala-lom dotulup ko.
ACT 16:11 Nikil nuli abip Troas ayo kulaa kela, sip tem liip tituun-kup wakat biyak ok ding Samotres kawu yak sulup, sintam kela yak abip Neapolis yak abaluwa,
ACT 16:12 kawu sip tem ayo kelalupla, yak aba met abip Filipai unup. Kemin, Filipai kaali, Provins Masedonia kaami abip diildiil kemin, sawaalak kaali, Rom ita tal abip kaa fak-tii-lom laabip kemin, kawu sin-sin-kelupla,
ACT 16:13 God ami iintang am daanba kuyaku fanang daaluwa yi, Juda imi God ami naalin baan diim kaali, okdal kawu nema? kalale, tam abip kaptam-ami uti am tem saak lo aba din okdal tiin-bomdupla, unang-miin iyo tala-tala-kebip kala din imi bakayin-bulupya, kulaali,
ACT 16:14 unang ma uyo numi weng kaata, weng san-kaabu umi win kuuli Lidia; uli abip Tayataira kayaak unang umi wok kaa ilim ifum kaata kutal-tii-buluya, saan-umbip. Kemin, uli Grik unang la, suunkup God ami beten kamala-laabu. Kemin, Dukum ata dong dokowaya, Pol ami weng kaayo talalu weng sandula,
ACT 16:15 usole, ulmi am maakup ilin iso, iyo oksam okoyipla, Lidia uyo numi bokoya-lomdu: Nikil ibi nami kukup kaayo atamipya, U fan Kamokim Yesus ami lak kaali ti duubu kala nikip namti, ibi tal nami am kaltamu bomdiwa yo, yukuya, yaap ke yo, waka tam kaptamu bom-ilsup ko.
ACT 16:16 Am ma daanale, nuyo God ami naalin baan diim unum o, kalalup una-bulupla, disa kulu sok de-yimulip tunum ma imi okok kamayin unang sii ma utamup ale, unang kuuli, sinik mafak kuluusu. Kemin, sinik mafak ta dong daka-wun-balaya, kanumin kanumin mafek mafek tiltam tabokomip kiimi sang kaali, bakaya-laabu. Kemin, unang tunum iyo tale-bilipla, ku-fatap-daa bakayin-buluya, iyo sisol kaa unang sii umi tiin molin imi kukaayin-bilipya, moni soyal kesip. Kemin,
ACT 16:17 unang kuuli, Pol nikil numi daang tem kamet tal-bom naan-bam bokolu: Tunum nikil kalawiili, Atin Fan God Win Tabin ami okok kem talbip tunum o. Kipni dok nolin dok nolin nolip, God ata dong dokoyilala, ban kaayo kela yaap ilokomip kaami sang kaata, kipni bakayila talbip o, kem-tal-bomdula,
ACT 16:18 unang kuuli ti suunkup kanumin-kup ke-buluya, bii am yaapkan disa kelaya, Pol ayo daal dap-telu fal-siki taba sinik mafak ami bokola ko: Yesus Kraist ami titil-kup tabasa ami win diim bakap-tambi. Kemin, kabi unang kulu kewa unan aa! aka kem-salale, kulu maak fak-daalin tap sinik mafak ayo, kewa yak bana ko.
ACT 16:19 Kewa yak banaya, unang kuumi tiin molin tunum iyo utamiwa yi, Bayi! numi sisol fakan-umbup kaami miit kaa disa kelu kala, kala-lomdip, kulaali Pol so, Sailas alep iyo im-tal-fuku sisii dilili im-bii-din abip iip kaptam-ami kamok kamok imi tiin diim tiilum o, kala im-bii-tal
ACT 16:20 Rom kasel imi yim-bak-saanin tunum imi diim tiiliwa bokoya-lomdip: Kipyo, mep tunum alep kalawiili, Juda kayaak kemin, alep kaliita tal-ilomdip, numi abip unang tunum iyo yam-mafak-dakabip. Kemin,
ACT 16:21 alep kii, Juda imi kukup uta kukuyimbip. Lale, Rom kasel nuli kaali, weng san-ilom kutal-fukulokomup kaa, tambal disa yo, kaliwale,
ACT 16:22 abip unang tunum yakal alep kiimi weng mafak bakayim-bilipla, yim-bak-saanin tunum iyo soldiya imi bokoyiliwa, alep imi ilim ayo balata kukan-tiiya-lomdip, faklet kuluu-lom, langatal kayim-bilip kiim tabamnala, alep iyo ye-bii
ACT 16:23 yim-tii keya-lomdip, kulaali yim-tama tal kalabus am daa, iliya yim-baalip am kaptam unip, kalabus tiin molin tunum ami bokola-lomdip: Talalu tiin molan o, akiwale,
ACT 16:24 weng san-ilomda yim-tama tam am ma kaptam daala tiiniple, alep imi yaan kiiyo, fokola tal aba daak as ma tem kalasip kaptoop unipya, sok de-yimula no.
ACT 16:25 Am iipyak fokola, Pol sole, Sailas alep iyo God naan-bam ale, baal wii-bam ke-biliwa, kalabus-miin iyo weng san-kaa-bam, bom iliwa,
ACT 16:26 maak fak-daalin tap bim aalap ma tiltam taba-lomda, kalabus am kaayo, ti mepso wan binala daak abokin-kup kem-sulula, abiltap-kup kalabus am saal alik iyo ilta-kup busuuliple, kalabus de-yimubip alik imi sen sok kaayo, dalela daak aba keluya,
ACT 16:27 kalabus tiin molin tunum akal tam tiin yang ulaya, Kalabus am saal iyo alik busuulip kala kalale kwin! kalabus-miin kaptam-ali alik ukadaa unip ema yo? kala-lomda, kulaa akal almi kamok kamok imi atul itam suun-daa-lomda, bainat kaayo, kuluu bina-daa nalmi nelak o, kemaya,
ACT 16:28 Pol ayo dukum-kup naan-daala-lomda: Kapyo, alik nuli kala-bulup kemin, nelak o, kebap kaa kelan aa! akaya,
ACT 16:29 kalabus tiin molin tunum ayo naan-tabaya, tunum ma akal abiltap yokon iilfo kulii-tal atamale, abiltap kalabus am tam ilomda, walwaal-kup tap-tap-ke-bamda, Pol sole, Sailas so, alep imi miit tem kulu katuun duung fakela daak tiin-ilomda,
ACT 16:30 alep iyo foko kutaltam seplo tii bokoya ko: Nak-tunum kusal kipyo, nali kalok noliya kawu, God kaayo dong dokop-naya, ban kemin ayo kela-lomdi yaap-nokomi ni? yakale,
ACT 16:31 alep isiik bokola-lomdip: Kabi Kamokim Yesus ami lak kaata duulawa, God ata kapni ban kemin kaayo, kukan-tiip-ta-lomda kambop-tala, tambal ke-lokomap. Kemin, kapso, kaltapni am maakup ilin iso, iyo yaap ke-lokomip o, kala kanum bokonbip-kup;
ACT 16:32 iyo Kamokim Yesus ami sang ayo tunum kaasole, almi am maakup ilin alik iso, imi bakayip.
ACT 16:33 Kutamiip kuyaku, kalabus tiin molin tunum ayo alep iyo foko kutam am tii alep imi faklet daam abang kiiyo, diinga yim-tii keyilala, kulaa isiik ami kalel aye, man aa, alimal alik iyo abiltap-siik oksam wokoyiple,
ACT 16:34 kulaa alep im-bitam almi am daa, ima fuuyip iniwale, mep tunum kaaso, almi am maakup ilin iso, iyo ti tanke God ami lak kaa duulup o, kal-bom fiyaap duumip ko.
ACT 16:35 Bom-ilip am daana, Rom kayaak imi yim-bak-saanin tunum iyo, soldiya ma fokolip tal kalabus tiin molin tunum ami bokolip: Kabi tunum alep kii tildaa yim-baalap unin o, akiwa,
ACT 16:36 ayo imi weng kaa, Pol ami bokola-lomda: Yim-bak-saanin tunum iyo weng kulaalip tal-ilomda, alep kii tildaa yim-baalip unin o, kalip. Kemin, alep tiltam abip abalip kipyo, aket tambal-kup keyulu unin o, yakaya,
ACT 16:37 Pol asiik soldiya imi bokoya-lomda: Alep nuli Juda. Lale, numi win kaa Rom kawu dolsip, Alep ili Rom kayaak o, yaka-laabip. Lale, Rom kasel ili yim-bak-saan-bi-somdipla kawu, numi ban kemin ayo ma utam-somdiwa, kawu sok de-yimubip dinim. Kemin, soldiya iyo bokoyipla, kasen-foko alep nuli unang tunum imi tiin diim kawu, faklet ta langatal kayim-bi-lomdip, im-tal kalabus am daabip. Kemin, am kamala daanba kulu, yawaaluya-lomdip, maaklo fokolup unin o, kalbip a? Disa, ilta taldiwa, alep nuli im-bii tiltam abip daaliwa ya! yakaya,
ACT 16:38 soldiya iyo Pol ami weng kaayo, din yim-bak-saanin tunum imi bokoyilipla weng saniwa yi, Bayi! tunum alep kiili, Rom kasel kesip kala, kalalipla, suun-daa-lom,
ACT 16:39 din alep imi bokoya-lomdip: Ifan o. Nuli itam, Awu alep kibi Rom kayaak kesip kalbup disa kalalupla, soldiya imi bokoyulupla: Alep ipyo faklet langatal kaya-solip o! yaka-lomdip im-taltam abip daa-lom, bokoya-lomdip: Abip kaltam kelalip alep ipyo, unin o! yikiwa,
ACT 16:40 alep iyo kalabus am kelalip yak aba din Lidia umi am din aba Kristen so tiin-bomdip, imi yam-titil-saanin weng ayo bakayinsi keyilalip unip ko.
ACT 17:1 Kemin, alep iyo din Amfipolis abip aba Apolonia abip aba kem yakyak tal Tesalonaika abip unip kaali, abip kaptam-ali Juda imi lotu am ma kawu bombe kemin,
ACT 17:2 Pol almi kukup ti kanun tal-unen-umba tap kela, lotu am tam ilomda, God ami Sukon Tem weng kabak-ata talalu bakayim-bam bii, God ami iintang am almi-kup asuumalo kiita, dakan-tii-lomda,
ACT 17:3 ayo talalu ifi daka-daa bakayim-bam bokoya-lomda: Sawaalak kaa God ali alami Ulduula Tiltam Kamokim Kesa Tunum ami sang kaata bokoya-lomda: Kukup mafak kaata kukaan-bilip, bii um-tal-daalaya kawu, ayo aalipla, taan-somdala, tam tiinokoma no, kalsa. Kemin, fan ti tiltam talsuu. Kemin, nali Yesus ami sang bokoyi kaa, God ami Ulduula Tiltam Kamokim Kesa Tunum namti kaa be kayi! yakan-kaama le,
ACT 17:4 Juda imi malii ili, Yesus ami lak ayo duu-lomdip, Pol sole, Sailas alep imi tem unipla, Grik kayaak iyo God ami beten kamaala-yaabip imi unang tunum yaapkan yakal ti Yesus ami daang ayo bakaaliple, kuno unang win soyal kii katip sakap disa, yaapkan iyo Yesus ami lak kaayo, duulip.
ACT 17:5 Lale, Juda iyo tit-itam-ilomdip, din tunum fuut taba-bom disa iip kulu tiinbip kiili, tunum imi bilip din-ilomdip, unang tunum yaapkan iyo afetule, abip tunum imi wiis-saayim-bilipla, din Jeson ami saal ayo dekela kulaalip una, kulaa kela Pol alep iyo fen-tal-une-bam, itam-ilom kulii-tal yim-baalup tam daak unang tunum imi sikil diim abin o, kala-lomdip, fen-tal-unemip.
ACT 17:6 Lale, alep itamin disa keliwa, Jeson so, Kristen malo ma iso, iyo sisii dilili im-bii-tal abip kamok kamok imi bilip kawu tii-lom, naan-daaya-lomdip: Kipyo, Pol inang iyo abip ma ma tal-une-bamdip, unang tunum imi aket fukunin aye, imi kukup aye, kaa yam-mafak-dakan-tal-unen-umbip.
ACT 17:7 Kemin, kamala kaata tal Jeson ami am kawu tiliwa, tambal-kup tiin mola sin-sin-kebip te! Sisa kaali, Rom kayaak imi king kamok dabom kemin, Kristen alik ili Sisa ami weng kaata, kuyang saak tela boko-lomdip: Sisa kaali, fan king disa; king kusnum ma bombe, almi win kaa Yesus o, kalbip kayi! kaliwa,
ACT 17:8 tunum unang iso, abip kaptam-ami kamok kamok iso, iyo weng san-ilomdip, aket yaapkan fukun-bamdip,
ACT 17:9 kamok kamok iyo, Jeson so, aptum kusal iso, imi yim-bak-saanbi bokoya-lomdip: Ibi moni kuluu-lom numi kuyipla, til-daayup tal-unemipla, kot ayo taltam tuluya, asuk tal kot kemin o, kalipla, kamboyip tam banip.
ACT 17:10 Kristen ili aket fuku-daaliwa yi, Abip kasel ili Pol sole, Sailas so, alep iyo anulup taanik o, kalbip kala, kala-lom, suun-daa-lomdip kutamiip-nala kulu, abiltap yim-baalip abip Beria unip. Kawu din kabalipla, Juda imi lotu am tam aba,
ACT 17:11 Juda kayaak abip Tesalonaika kawu ilin kiili, alep imi weng kaa weng sansip disale aa, Juda kayaak abip Beria kawu ilin ita, tunum aket fukunin tambal-kup ke-bom ita ita ke-bamdip, alep imi weng kaa weng san-kaa-bam ale, fiyaap duu-bam, alep imi weng kaali, utam faneng ema kalum o, kala ilip ilip ayo suunkup God ami Sukon Tem weng kabak-ayo tik-tii-bamdip,
ACT 17:12 Juda yaapkan iyo Yesus ami lak duuliwale, Grik kasel tunum win soyal iso, unang win soyal iso, yaapkan ili Yesus ami lak kaayo, duulip ko.
ACT 17:13 Juda kayaak yang abip Tesalonaika ilin iyo weng saniwa yi, Pol ali din abip Beria kawu bomda God ami weng kaa bakayimba no, kalbip kayi! Kala-lomdip, iyo fotabum o, kalalip, tal Beria kasel imi weng dukum-kup bakayim-bam ale, wiis-saayim-bam ke-bilipla,
ACT 17:14 Kristen iyo utamiwa yi, Tunum kalawiimi aket tem kiili, aket atul kuyak daabip kala, kalalipla, baan tap Pol ayo dabaalup umbilaak yol ok dal abamnale, Sailas so, Timoti alep ita kano ti Beria kawu kamboyila,
ACT 17:15 tunum malo ma iyo liip kukola yakyak Pol dibii bilin abip Atens daalipla, kulaa asuk nikil iyo nulmi abip unum o, kaliwa, Pol ayo bokoya-lomda: Ipta dindiwa Sailas sole, Timoti so, bokoyipla, Alep iyo abiltap nami bii kalaba tilin o, yakale, kelalip ilimi bokon unip.
ACT 17:16 Pol ayo Atens kawu bomda Sailas sole, Timoti so, alep imi fen-bamda talaala yi, Abip kaptam-ali ibakamin god ami sinik yaapkan kiita, dotbi kutiisip kala, unang tunum ili tal imi naayila-yaabip kala, kala itamdala, ami aket tem kaali, mafakalula,
ACT 17:17 Juda imi lotu am ayo tam ilomda Juda so, tunum miit kusnum God ami win kufola-laabip iso, imi talalu bakayim-bam ale, suunkup din abip iip kawu tola-bomda, kawanta kawu bombe ayo God ami weng ayo fatap kawu, bakayim-bam yakyak tal-unema.
ACT 17:18 Grik kasel utamsip tunum imi miit win ma kaali, Epikurian ke-bam ale, miit win ma kaata Stoik o, ke-bam ken-umbip. Kemin, kanolin utamsip tunum kiimi malo ma kabak-ali un-bomdiwa, Pol ayo atamip. Kemin, malii ma aptum kusal dik-daaya-lomdip: Tunum weng aye, bon tem aa, kaa bakayimba kaali, kanim sang bakayimba yoko? kemiple, malo ma isiik weng saniwa yi, Pol ali Yesus ami sang so, taan-ilom tam tiin-yaamin kaami sang so, kaata bakaba kalaliwa boko-lomdip: Kaali abip ma imi sinik kusnum kusnum god o, ken-umbip imi sang kaata, bakaba nema yo, kala-lomdip,
ACT 17:19 iyo Pol dibii-din kamok kamok imi weng bakamin baan diim Areopagus daa bokola-lomdip: Kapyo! Nuli kapni kama weng ma unang tunum bakayim-bam kukuyimbap kaami weng kaata ma bokoyapla, utamum o, kalbup. Kemin ale,
ACT 17:20 nuli kapni weng ayo weng sanuwa yi, Weng akal alik akal alik kiita, bakabap kala timbup kemin, weng kabak-ami miit kabak-ata utamum o, kalbup o, akiwa,
ACT 17:21 (kiimi weng kabak-ami miit kabak-ali abip Atens kasel so, fatal tilin tunum tal bilip iso, ili alik kukup kusnum kaa ma kutal-fukusip disa. Ili ti kama alokso weng kaata kutal-fuku-som aa, kama weng kaata ma weng san-kaa-bam kemin-kup laabip ko.)
ACT 17:22 Pol ayo kamok kamok imi iipyak tem kabaaku tola-lomda, bokoya ko: Atens kayaak kipyo, nali itamiya, kibi titil-kup taba-bomdip tawaal diim kalawaami mafek mafek sinik dotu kutiisip kiita, aman dakaya-laabip o, kalbip. Kemin,
ACT 17:23 siin kawu, nali um-bomdila, mafek mafek aman dakaala-yaabip iyo utafiin yakyak tal-une-bam ale, mafek mafek kulii-tal as kuyak daalip kiin-taba sinik imi kukaayin baan diim ma atamiya, weng ma dolsip kaali, boko-lomdu: Baan diim kalawaali, God ayo ma atamsup disa ami sinik dotonsup o, kalsu kalali utamdiya, tili kemin, ibi kulaa atamin disa kesip. Yale, ayo aman dakaala-yaabip. Kemin ale, kaami sang kaata, bokoyon o, kali.
ACT 17:24 God ata taba-lom, am bokon kala dik-daa kulaasu mafek mafek alik kala bom-bilip kiili, ata talalusa. Kemin, ali abiil tikiin kaptam-ami Kamokim ke aa, tawaal diim kalawaami Kamokim ke kesa. Kemin, ali am tunum ilta sikil ta desip kaptamu tiin-bom yaaba disa.
ACT 17:25 Ali mafek mafek ma iipnala, tunum nulmi sikil ta talalmin mafek mafek kaata, kukaala-yaabup disa; alta taba-lomda, unang tunum alik nuli yam-talalu-lomda mam kuya-lomda, mafek mafek alik kaa kukaaya-yaaba.
ACT 17:26 Kemin, kamasi ali tunum maakup ma dotulaya, tunum miit iyo wokosip. God ali tawaal kala dik-daa kulaasu kaayo, siksi-lom, tawaal daam e kala ukuya ukuya kelala, unang imi man fakan-unip so, alik numi taan-laamup so, kaami am o, kala kaayo, alta kutiisa. Kemin,
ACT 17:27 God ami aket fukunin kaa, Ili nami fen-bamdip nitamin o, kal-bom ale, fen-bamdip, kanum yakyak ke-bamdip, nami fanang kaa talokomip ema yo? kal-bom kanu-bamdala, numi am ayo kuka-daa-yinsa. Kemin, God ali nuli keya samaan kawu bombe disa; ali ti alik numi mepso kulu bombe.
ACT 17:28 Siin kawu, tunum ma ayo boko-lomda: God ali unang imi dong dokoyila, man kii faka-bilipla, God alta taba-lom, man nuyo dong dokoyila fasuu-lomdup, kala bomdup yak kanumin mafek mafek alik kiiyo, nun-yaabup o, kalsa. Kemin ale, iltipni weng dolmin tunum ma yakal ti boko-lomdip: Nuli faneng ami man kemin, ata tiin mosa no, kalsip.
ACT 17:29 Kemin, nuli God ami man kemin, atamupla, Tunum ma almi aket kaata-kup fanang daka-bamda, gol aye, silva aa, tuum tangbal aa, ma kuluu-lomda, mafek mafek ma almi sikil ta talalusa kalup namti, fanang daalupla, God ali mafek mafek kanolin altap kala-yaabup kaali, kelum o, kala-somla ko.
ACT 17:30 Kemin, siin kaa, tunum kiili, God kaa talalu atamin disa keliwa, kanumin kukup mafak yaapkan kii kutal-fukulip kala, kalalaya, God ali tiin itam kulaasa. Yale, ali tawaal alik kala dik-daa kulaasu kaami unang tunum talalu yim-bak-saan-bamda, afet-mokoma ami am daanokomu kaali, kutiisa. Kemin, kama kuluwaami abip ma ma alik ami unang tunum imi bokoya-lomda: Kipni kukup mafak ayo kela aket fal-sikilin o, keba. Kemin, God ali tunum ma ulduu-lom bokola-lomda: Kapta taba-lom nami baan diim kaayo, kuluu-lomdap, talal-yim-bamale, itafii-bam dot-mokomap o, kalale, aa alik iyo itam faneng tituun o, kalin kalalaya, ami aalip taanse kaali, God alalta dafolaya, tam tiinse kayi! kala Pol ayo kanum bakaya ko.
ACT 17:32 Kamok kamok iyo tunum ami taanda tam tiinse kabak-ami sang kaata weng sandipla, malo ma iyo atafiimin weng bakaan-balale, malo ma iyo bokola-lomdip: Bii kaptoop-ali kapni kanolin sang bakabap kaayo, asuk weng sanokomup kayi! kal-bom kemip.
ACT 17:33 Kemin, Pol ayo Areopagus kula kamboyilala,
ACT 17:34 tunum malo ma iyo yak Pol ami tem un-ilomdipla, Yesus ami lak duulip kiili kalawiita no. Areopagus kamok kamok imi tunum Dionisias akal, kuno unang ma Damaris ukol, kuno unang tunum kusnum malo ma iso, iyo Yesus ami lak duulip ko.
ACT 18:1 Biilaya, Pol ayo abip Atens kaayo, kulaa kela, bilin abip Korin kawu bom-balala,
ACT 18:2 Juda tunum ma Akwila ayo din atama kemin, ami abip dukum kaali, umbiyak Provins Pontus kawu bombe. Siin kaa asole, almi kalel Prisila so, akam iyo abip dukum Rom kaptamu bom-biliwa, Rom kasel imi King Klodius ayo Juda kayaak imi bokoya-lomda: Alik Juda ibi Rom numi bokon kaltam kela tabanin o, yakala, akam iyo Provins Itali kelaliwa, alokso-kup kulu tal Korin bilip kemin, Pol ayo tal akam imi itamon o, kalala din ula yi,
ACT 18:3 Akam kiimi ok ayo nalami ok kala nuubi alaltap kala, kalalaya, akam iso kawu bomdipla, okok ke-bam, iyo sel biki-bam kutii-bilipla iyo saan-bisip.
ACT 18:4 Suunkup God ami iintang am ayo daan-yaa-bulu, Pol ayo yak aba tam Juda imi lotu am une-bamda, Juda sole, Grik so, imi God ami sang kaata, dukum-kup bakayim-biliya, iyo Yesus ami lak ayo duulin o, kal-bomda kukuyim-bam bakayila ko.
ACT 18:5 Sailas, Timoti so, alep imi Provins Masedonia kambola tal aba kem-siliple, kulu Pol namti suunkup am daan-laaba kaali, God ami weng kaata-kup bakayim-bam Juda imi bokoya-lomda: God ami Uldaa-dabuula Tiltam Kamokim Kesa Tunum kulaa, Yesus kaata no kal-bomda, suunkup kanum bakayim-balaya,
ACT 18:6 kulaa Juda isiik bokola-lomdip: Kapni weng bakabap kaali, ibakabap o, aka-lomdip, weng mafak bokola keliwa, Pol ayo itam-ilomda, Juda imi kukup kuluu-lomda, almi ilim diim sung tabuubip kiiyo, kukula-mola kaliila tiil banip kelale, bokoya ko: Bom-bii-lom kaali, ibi sung ilol kaliila tiil baneba tap ke, angtiil yol dukum kuluu maaklo ke, disa ke-lokomip kaali, kaa nami san disa; kiltipni san te! Kamala ayo keyilali, tunum miit kusnum imi weng bakaya-unokomi no, yaka-lomda,
ACT 18:7 lotu am ayo kulaa keyila tabana. Tunum miit kusnum God ami naalin tunum ami win kaali, Tatias Jastus ami am kaa Juda imi lotu am ami balang diim kawu desip. Kemin, Pol ayo din ami am kaptamu bomdala, unang tunum imi bakayilala kawu,
ACT 18:8 Juda kayaak imi lotu am tiin molin Krispus aso, almi am maakup ilin iso, iyo Kamokim Yesus ami lak duulipla, Korin kasel deng yaapkan iyo Pol ami weng kaata, weng san-ilomdip, Yesus ami lak duuliwa, oksam wokoyip ko.
ACT 18:9 Ilom am ma daanala ami kutamiip kawu, Yesus ayo lom dulun weng tap ma tal Pol ami bokola-lomda: Nali kapso bombii kemin, tunum ayo ma taba-lomda tam-mafak-daalokoma disa. Kemin, kabi suun-daa-lomdap, kelon kalolap o. Nami weng ayo bakayilalap ko. Tunum unang abip dukum kalawu bom-bilip iyo yaapkan nami lak duulokomip kayi! akale,
ACT 18:11 kulaa, Pol ayo kawu bomdaya, God ami weng kaali, unang tunum bakayim-bala bii wasital maakup ale, kayoop bukupkal ita duk-duula ko.
ACT 18:12 Rom kayaak tunum ma Galio ata, Provins Akaya kaptam-ami kiyap diildiil ke-lomda, balaya, Juda iyo afetu-lomdip, Pol ayo weng mafak bakaan-bamdip, dap-tal-fuku dabii-tal kot kemin am kaptam daa-lom,
ACT 18:13 kiyap ami bokolip ko: Kapyo! Mep tunum kalawaali, unang tunum woko-tokoyala, lo kulaa-lom, imi God ami lotu kamaalin ayo yakal ilmi kusnum lotu ken-umbip o, akiwa,
ACT 18:14 Pol akal bokolakin. Yale, kiyap Galio ali Juda imi bokoya-lomda: Juda kayaak ipyo, tunum kalawaali kukup mafak nuuba aye, fuut tabeba aa keluya, kabak-ami kalan kaata dibii-tiliwa, nayo kipni weng ayo weng sandi dong dokoyami.
ACT 18:15 Lale, ibi tal ami weng bakaba aa, Yesus ami win kufu-bam bakaba, aye iltipni lo kaami sang kaata-kup bokop-nip kemin, nali kanolin kaami sang kaa baka-bamdi kot ke-mokomi disa; kemin ale, ipkal talalmin aa! yaka-lomda,
ACT 18:16 fotabamna, kot kemin am ayo kela tam banipla,
ACT 18:17 Grik iyo taba-lomdip, Juda imi lotu am tiin molin tunum Sostenes ayo dap-tal-fuku-lomdip, kot kemin amitom kulaaku biiwakan-tal-unemip. Katale, Galio ayo kuno tiin itama ko.
ACT 18:18 Wasital maakup anung ma disa kelala kawu, Pol ayo Korin kawu bombii am yaapkan kelaya, kulaa Kristen iyo weng umuuyila-lom, keya din abip Senkria kawu ilom dabom kon ayo bita-lomda, kukuyimbila, atamipla yi, Ali ti fan God ami bokola-lomda: Kala nolokomi no, kalsa kaa, fan kanolaya disa keluya, dabom kon kaa bitaba kalip kala itam kamboyila, Provins Siria unon o, kalala, tam sip tem abala, Prisila uso, Akwila aso, akam iso maakup tam aba
ACT 18:19 yak aba tam abip Efesis yak undiwa, Pol ayo tam Juda imi lotu am un-ilomda, Yesus ami sang kaali, talalu bakayilaya iyo boko-lomdip: Kabi ti kalawu ilanin tap kelalap ko, akipla, Daa yo, yaka bokoya-lomda: Kanola God ali asuk maso din itaman o, nokokoma namti, kaata asuk talokomi no, yaka, weng umuuya Prisila so, Akwila akam iyo keyila, tam sip tem abala Efesis kelala una ko.
ACT 18:22 Pol ayo Sisaria din abala sip ayo kelala, yak aba met Jerusalam met ilomda Yesus ami lak duulin unang tunum iyo weng umuuya yak aba tildaak Antiok tildaak aba,
ACT 18:23 ilanin tap kelala kawu, umbilin Provins Galesia ami anung Frigia abip ma ma kem-tal-une-bamda, Yesus lak duulin unang tunum imi weng bakayila-tal-une-balaya, yakal tiltam titil-fokosip ko.
ACT 18:24 Juda kayaak tunum ma tal Efesis kawu laaba ami win kaali Apolos. Ami abip diildiil kaali, Isip kaptam-ami abip sakbaalim kaa, Aleksandria. Ali ti weng tambal-kup bakamin tunum ale, God ami Sukon Tem weng kaa dotu ifii-bam bakayin tunum kemin,
ACT 18:25 siin kaa Kamokim ami Liip kaami kukup ayo kukonsip. Lale, Jon Baptis ami wok-sam wukayinsa kaami sang sole, Jon ata Yesus ami sang bakayinsa kaami sang so, kiita-kup kaal kesa. Kemin kaata, ayo titil-biki unang tunum imi bakayin-bam, Yesus ami sang ayo tituun-kup bakayila-yaaba.
ACT 18:26 Kemin, Apolos ayo Juda imi lotu am tam-ilomda, God ami weng ayo kufo bakayim-bam, alik imi tiin diim ayo fatom dinim bakayim-balaya, Prisila uso Akwila aso, akam iyo ami weng kaata weng sandiwa, dibii-din ilmi am daa, Yesus ami sang ayo maso ma bakaan-bamdip, God ami weng ayo talalu bakalip ko.
ACT 18:27 Biile, kulaa Apolos ayo yak Provins Akaya kabak banon o, kalaya, Efesis Kristen unang tunum iyo yaap-kup unan o, akiwale, Akaya kasel Kristen imi sukon dola kuya bokoya-lomdip: Kipyo, mep tunum kalawaali, kipni am unon o kalala, talokoma kaali, weng fokola dotu tiin mo-bom biliwa yo, kala dola kolip, kulii yak aba din Provins Akaya din ilomda, unang tunum God ata kukup tambal tambal masiim kawu kuyila, Yesus ami lak duu-silip iyo talalu dong dakaayila.
ACT 18:28 Kemin, kaali alik imi tiin diim ayo titil-fak-daa Juda imi kukuyim-bam, bokoya-lomda: Kipni weng bakabip kaali, ibakabip o, kala bakayim-bam ale, God ami Sukon Tem weng kabak-ayo bakayim-bam bokoya-lomda: God ami Ulduula Tiltam Kamokim Kesa Tunum kaali Yesus alta no, yakan-kaa-bam kema ko.
ACT 19:1 Kemin, Apolos ayo Korin bom-balaya, Pol ayo met Provins Esia bokon amdu tem-tem kawu tal-une-bam, kulaa kela toop abip Efesis un-ilomda,
ACT 19:2 Yesus ami daang bakaalin ma itam bokoya-lom: Kibi kamasi Yesus ami lak duu-silip kulu, God ata Sinik Tambal kaayo, kuyase nema? yakala, isiik boko-lom: Daa, weng ayo ma numi bokoya-lomdip: Sinik Tambal ma bombe kayi! yikipla, weng sanin disa ke-sulup te! akipla,
ACT 19:3 asiik bokoya-lomda: Kanolin kemin ale, ili kalok nolin weng kaata, bakayim-bamdipla, kibi wok-sam kaa wokoya-silip i? yakala, isiik bokolip: Ili Jon ami weng kaata, nuyo kukuya-lomdipla, iyo wok-sam kaa wokoya-silip o, akiwa,
ACT 19:4 asiik bokoya-lomda: Jon ali Israel o, kala Juda unang tunum kanta almi ban ayo kambola imi aket kaa fal-sikilip namti, kiita wok-sam ukayim-bam ale, bokoya-lom: Kipni tunum ma talokoma kayi! kal-bom fenbip ayo, nami daang tem lo talokoma. Kemin, ami lak duulin o, kal-bomda bakayinsa no. Kemin, tunum talse kulaa, Yesus ata te! yakan-kaama.
ACT 19:5 Kemin, Efesis kasel, Yesus ami lak duulin ili, weng kaa weng sandiwa, Yesus ami win ayo kufoliwa wok-sam wokoyipla,
ACT 19:6 Pol ayo sikil kuyak imi dabom diim tii, God ami bokolale, God ami Sinik Tambal kaata, tildaak imi diim abamnala, weng kusnum kusnum ma utamsip disa ayo baka-bam ale, God ami weng ayo baka-bam kemip ko.
ACT 19:7 Tunum kanumip kiili, talangkal kiita.
ACT 19:8 Kulaa, Pol ayo Juda imi lotu am tam ilom suunin dinim ke-lomda, weng dukum-kup unang tunum imi bakayim-bamdaya, God ayo Yesus ami ulduula tiltam kamokim kela unang tunum tiin moyilin sang kaata kukuyim-bam ale, Weng bakayimbi kaa tituun-kup tabin weng o, kal-bom bakayimbi bii kayoop asuumano kebila
ACT 19:9 malo ma kii ti fuut kuyak daa-bom ale, Yesus ami lak kaa duulokomup disa yo, kal-bom, lotu am kaptamu tola-lomdip, balaayin-bam boko-lom: Liip Alokso kulaa mafak o, yakan-kaamip itamda, Pol ayo kamboya Yesus daang bakaalin iyo foko kuliila din Tiranus ami kukuyin am kawu bom, suunkup kukuyin-kup ke-bala bii,
ACT 19:10 wasital alep duk-duulala, Kamokim Yesus ami sang ayo yak Provins Esia bokon abip abip kawu tal-une-buluya, Juda so, Grik so, alik Esia kawu ilin kiiyo, weng san-kaamip. Lale, malii ma weng san-kaa-bala le, kuno malii ma weng san-kaamin disa ke-bala kemip ko.
ACT 19:11 God ayo Pol ami dong dakaan-balaya, mirakel o, kala talalmin akal alik akal alik kiiyo talal-balaya,
ACT 19:12 unang tunum iyo tal Pol ami mamin talamin ilim aye, okok ke-bam mikimin ilim ayo, kiita kulii-din unang tunum mafak umulin imi angtiil diim kutiiyiwa, mafak-alin ayo disa ke-laa-bulule, sinik mafak aye iyo keya yak bane-bam, kemip ko.
ACT 19:13 Juda kayaak malo ma ili abip malo malo kawu tal-une-bam unang tunum sinik mafak yam-mafak-daasa iyo dotu-yimulip yaawa-laa-balale, unang tunum malo ma sinik ta yam-mafak-daasa namti, Kamokim Yesus ami win kufo sinik mafak bokola-lomdip, Pol ayo, Yesus ami sang bakaba kemin, nokol kanola Yesus ami win diim kawu bakayimbup kemin, yak banin aa! ke-laabip ale,
ACT 19:14 Juda imi awem tunum pris imi kamokim ma ami win kaa Seva ami man tunum fetkal yakal kaa kanubip. Yale, nikil kii Yesus ami lak duusip disa.
ACT 19:15 Kemin, sinik mafak ayo bokoya-lomda: Tunum titil miit kayaak kaa Yesus kulaa atamsi aa, titil-kup tabasa tunum Pol ami sang kulaa weng sansi. Lale, tunum titil disa ibi kawanta ni? yakale,
ACT 19:16 tunum sinik mafak so, ayo taba kaata, nikil im-baak-mo yebi ata ata kelaya, nikil imi angtiil ayo duul duul kutiiyale, imi ilim inang kaali, balat kutiiya kelala, am kaa kela, angtiil fatap sak funbi ukadaa unip.
ACT 19:17 Kemin, biiliwa, Juda alik so, Grik iso, Efesis kawu ilin iyo weng san suun-daaliwa, Kamokim Yesus ami win diim titil-fokolin o, kala dukum-kup win kufon-bam ale, fiyaap duu-bamdiwa
ACT 19:18 kemin, unang tunum yaapkan Yesus lak duu-silip iyo, tal-ilom siin kukup tabuusip kaayo, ku-fatap-daka-bam ale, fatap-kup bakamip.
ACT 19:19 Kemin, yokoop inin yaapkan ili ilmi yokoop uka-bam yemin ami sang sukon diim kabak dolsip iyo kutal-tiilipla, unang tunum atafii-bilip, as abul-daalip kiin abamnala, sukon kaami sisol ayo diing bokolip kaali, moni almi-kup 50,000 kalip o.
ACT 19:20 Titil-fak-daa-lom kanu-bilipla, Kamokim Yesus ami weng ayo dukum ma una-buluya, unang tunum yaapkan ili Yesus ami lak duu-silip o.
ACT 19:21 Kanola kabak-ali kanubi tal-unula, God ami Sinik alta Pol ami fanang saanin kukon-balaya, ayo boko-lomda: Nali Provins Masedonia aba, Provins Akaya aba, Jerusalam aba, kem yakyak unokomi kemin, God ali bokop-na-lomda: Kabi Rom unan o, naka kemin, Jerusalam kawu biiliya, Rom unokomi kayi! yakale,
ACT 19:22 Pol almi dong dakaalin tunum Timoti sole, Erastus so, alep iyo yim-baala din Provins Masedonia uniple, Pol akal Provins Esia kalawu bom-bii-somdila yo, kala-lomda kawu ila ko.
ACT 19:23 Kula, am kulu daansuu kuyaku, tunum miit kusnum iyo Kamokim Yesus ami Liip kaa, Nuli weng sanokomup disa yo, kala-lomdip, ban bakamipla,
ACT 19:24 tunum ma ami win kaali, Demitrius ali silva kuluu-lomda almi god unang Atemis umi lotu am kaptam-ami sinik dot-bam ale, kuno sinik dotmin tunum malo imi tiin mo-som ke-balaya, unang tunum kii kabak-ata tal aman kaalum o, kala-lomdip, tal saan-bilipla, dotmin tunum ili sisol kaa-bamdip, win soyal kemsip.
ACT 19:25 Demitrius ali sinik dotmin tunum isole, mafek mafek altap ti talalmin tunum iso, iyo afetu kutii-lomda bokoya-lom: Nikil kipyo, kipkal utamsip. Kemin, numi okok kebup kaami sisol tangbal namti kulu kaabup kemin,
ACT 19:26 kipkal weng kulaa utamsip. Pol ali Efesis kasel so, Provins Esia kasel kusnum iso, yaapkan iyo dukum-kup bokoya-lomda: Sinik kaa Demitrius inang ita ilmi sikil ta talala-laabip kaa, fan god daa yo kala waka-takayin-balala, kulaakabip.
ACT 19:27 Kemin, kanumaya numi ok tangbal kaami win ku-mafaknu ke-wokomip ema yo? Esia kasel alik iso, am bokon alik kaami abip ma ma kayaak iso, ili god unang dukum Atemis naawa-yaabip. Kemin, Pol ayo kanum bakamala, kabak-ami lotu am kasaa kaami aket uyo kewa ke-lokomip ema yo? Kanumaya, Atemis uyo atin win disa kelu kewa, umi tong kaa ma baka-mokomip disa yo, kala-lomda Demitrius ata kanum bakayila ko.
ACT 19:28 Tunum tiinaabip iyo, Demitrius ami weng kaa weng san-ilomdiwa, aket atul dap-tiiyilu naan-bamdiwa: Efesis kayaak numi Atemis kuuli, sakbaalim dukum o, kemin-kup ke-bilipla, dukum-nula,
ACT 19:29 abip kasel alik iyo utamin disa bomdiwa, yakal kanola kasen-foko dukum-kup naan-bamdip, disa mafak kemipla, Masedonia tunum Gayus so, Aristakus so, alep ita Pol aso, nikil tal-unebip kemin, alik iyo alep kiimi im-tal-fuku-lom abiltap-kup sisii dilili im-tam daak abip iip kawu tiilipla,
ACT 19:30 Pol ayo unang tunum tala-tala-kelip imi iipyak tem kawu tola-lomdi weng kukaayon o, kalala, Yesus ami daang bakaalin iyo fakelnip kambolaya,
ACT 19:31 Provins Esia kaami kamok kamok malo ma ili Pol ami kayaak kemin, yakal kuno weng binalip tal Pol ami bokola-lomdip: Kabi din abip iip tala-tala-kebip kaa yang unemin disa yo, akipla,
ACT 19:32 kemin, tala-tala-kelip iyo babonbi tala-tala-keliwa, deng yaapkan saak yakal atul fak-dakabip kaami miit uyo, dotu talalu kaal-ke utamin disa; malo ma yakal weng kusnum ma naan-bilip aa, kuno malo ma yakal weng kusnum naan-bala, kemipla,
ACT 19:33 Juda kayaak iyo tunum ma Aleksanda ata, ulduu bokola-lomdip: Kabi tola boko-lomdap: Juda numi san daa yo, kalawa ya! aka-lomdip, ilela dabaalip yak unang tunum yaapkan imi tiin diim unala, unang tunum iip maakup maakup iyo aket fukun-daalip ko: Tunum kalawaali kamok o, kalalipla, weng ayo ma bokoyapla yo, akiple, tola-lomda sikil kufo dil moyila talalu ifi daka-daa, bakayim-bili weng san-kaamin o kala. Lale,
ACT 19:34 alik iyo atamipla, Tunum kaali, Juda tunum kala kalaliwa, alik maakup naan-bamdip: Efesis kasel numi god unang Atemis uli ti dukum o, kal-bomdip naanin-kup ke-bilip, bii atan sinik alep kiiyo, yak bana ko.
ACT 19:35 Kano iyo naan-bilipla, Efesis kaptam-ami tiin molin tunum o, kala kuskus ayo unang tunum imi weng fakel-yilin-kup ke-bala, bii naan-bokobip ayo, kulaa dulumnipla, bokoyila ko: Efesis kasel nikil kipyo, Alik am bokon kala dik-daa kulaasu ami unang tunum ili utamsip te! Efesis kayaak nuli Atemis umi lotu am so, tuum awem abiil tikiin kawu tildaak abasu so, umi tiin molin o, kalsip. Kemin,
ACT 19:36 tunum ali weng kaa ma fan daa yo! kalokoma disa. Nak-tunum kusal kipyo, bilili kala dulumnin o! Ipni aket kaa talalu fuku-daalin disa keliwa, abiltap-siik mafek mafek mafak kaa, ma kanumin disa yo.
ACT 19:37 Kanola tunum alep kiili, numi lotu am kaami mafek mafek kaa ma duk-duubip disa; aa, numi god unang umi weng mafak mafak so, ma kuwin disa kebip. Lale, kibi disa iip kawu alep kii im-tama tiilip kaayo?
ACT 19:38 Demitrius so, almi aptum kusal mafek mafek talalmin tunum iso, ili kot kemin am ayo utamsip aa, weng talalmin tunum kii itamsip. Kanolin kemin, tunum ma kaami kanuba ayo aket atul tabelu namti, nikil iyo dibii-din weng bakamin baan diim tii kawu, ami ban keba sang ayo bokoyipla dabak-molin o, kala-somla ko.
ACT 19:39 Ibi kabak-ami sang kaata maso ma bakamum o, kalip namti, abip kasel kipni weng bakamin am daanokomu kabaku bakamin!
ACT 19:40 Am kala daanba kaa, gavman kii nuli itam boko-lomdip: Ili tala-tala-ke-lomdip, weng aal diki-bam ale, din-bom kemip o, kalokomip ema? kemin, kanola nuli dok kano-lomdupla umi miit kaa ma bokoyokomup disa yo. Miit dinim o, kala-lom,
ACT 19:41 kuskus ayo kanum bokoya-lomdala, tala-tala-ke tal abip iip tiinbip iyo, fotaba tabanip ko.
ACT 20:1 Efesis kasel imi aket atul eng bakabip ayo bii disa kelale, Pol ayo weng binala din itamula, Yesus daang bakaalin iyo tala-tala-kelip yam-titil-saanin weng bakayimbile, weng foko keyila, din Provins Masedonia abalaya,
ACT 20:2 kaptam-ami abip ma ma kaayo tal-une-bamda, Kristen imi dong dakaayim-bam, yam-titil-saanbile, kamboya bilin Provins Akaya kawu bom bii
ACT 20:3 kayoop asuumalo duk-duulaya, kulaata kela sip tem abala, tituun-kup wan din Provins Siria unon o, ke-bam ilala, Juda iyo maaklo kala boko aalum o, kalbip kaali, weng sandala, aket fukun-daa: Sip tem ayo kelali tawaal liip asuk Masedonia din abalile, Provins Siria unon o, kala ko.
ACT 20:4 Tunum fetkal ma Pol aso, nikil unip. Kemin, fetkal kiili, Beria tunum Pirus ami man Sopata akal, Tesalonaika kayaak Aristakus so, Sekundus so, alep yakal, Debi tunum Gayus akal, Timoti akal, Provins Esia kayaak Tikikus so, Trofimus so, alep yakal kanolin kiita, Provins Akaya ayo kelalip Provins Masedonia abalip, yakyak din Filipai aba Luk ayo bombe no, nikipla,
ACT 20:5 nikil fetkal kiiyo Pol, Luk alep nuyo keyilalip, isiik sip tem abalip din abip Troas kawu numi feniwa,
ACT 20:6 nuyo Filipai kawu, Pasova bret yiis dinim inin ayo, inbi kulaa kelalupla, Filipai ayo kela sip tem aba un bii, am awakal keluwa, wan din Troas molupla kawu, nikil iyo din itamupla, kawu bii am fetkal kelup ko.
ACT 20:7 Sarere kutamiip kawu, nuyo iso kominion inamnum o, kala tala-tala-keluple, Pol ayo, Sabi unokomi kayi! kalala, weng ayo ti bakayin-kup ke-bala bii, am iipyak fokolala, am kaptam bom-bulup kaali, am batbat dukum
ACT 20:8 kemin, kawu tala-tala-ke tam abiin ma asuum diim kaptamu tiinbup. Kemin, ilaam yaapkan kaayo, iilfun-tal-unebi kelipla, kiin-bulu bulupla,
ACT 20:9 man tunum ma kaami win kaali, Yutikus ali, soloop tem diim kabaaku tiinba kemin, Pol ayo weng ti kano bakamin-kup ke-balaya, ayo lamun um-bom ale, atin akan disa-lom, kulaa kalo daka-daka kulii umbilaak tawaal diim daalaya, daak dafolum o, kala dabuu dafo talaaliple, Saakna kala kalip o.
ACT 20:10 Kanumipla, Pol ayo daak aba dap-tal miki bokoya ko: Amamin daa yo kala tam tiina kalaayo, ti kala daatamin! yakala,
ACT 20:11 asuk tam tiin-ilom kominion ina-lomdipla, kutamiip aalap dukum kulaayo, kuno bakayin-kup ke-bala bombii am daanula keya, tabana.
ACT 20:12 Kemin, alami ap-tunum kusal ili atamipla, Tiin kawang bombe kala kalalipla, fiyaap duu kulii am unip ko.
ACT 20:13 Pol ayo aptum kusal numi bokoya-lomda: Nali sip tem ayo kelalila, tawaal liip din abip Asos unokomi no, kebi. Kemin, ipta sip tem abalip yakyak abip Asos din nitamipla, nikil unum o, kalaya kela unup.
ACT 20:14 Pol akal yak aba din abip Asos kawu bom ilala, nuli tal atamupla, sip tem yak aba din abip ma Mitilini abalupla,
ACT 20:15 yak aba din iip kawu sulup, sintam yak aba din abip Kios ami mepso kawu sindupla, yak aba din abip Samos aba kawu asuk sindupla, yak aba din abip Miletus unuple,
ACT 20:16 kulaa, Pol ayo aket fuku-daa-lomda: Sip ku abiltap nam-biilu unuk. Kula Pentikos o, kala ima inin am awem daanin disa, kama ilala, din Jerusalam unomi kalalila, Provins Esia kawu bii ilana kalomi disa, din Efesis akaala baan unon o, kala ko.
ACT 20:17 Nikil nuyo Miletus din itamupla, Pol ayo weng kulaala tulu, Yesus lak duulin tunum unang Efesis bilip imi kamok kamok imi bokoya-lomda: Ibi tiliwa, weng ayo ma bokolupla yo! yakaya,
ACT 20:18 tal atamipla bokoya-lomda: Kipkal nami kukup kaa atamsip. Kemin, siin nayo tal Provins Esia kalawu kipso suunkup biiliya kamboya unsii. Kaali,
ACT 20:19 Juda iyo kuwakamin weng baka-bamdip: Dap-mafak-daalum e, aalum e, kebi, iyo dum yaapkan fak-daalip weng mafak so, kukup mafak so, kaata kukaap-nam-bilipla, fiit-bam ilsi. Lale, nali Kamokim Yesus ami bon tem tunum kemin, nali nalmi tong kaa bakamin dinim ke-bam nalmi angtiil lak duu-yaamin dinim, ke-bamdi nak-tunum kusal Juda kayaak ita Kamokim Yesus ami daang ukonbip kaami kalan kabak-ata, aket mafak kep-nula, ama-bamdi suunkup Kamokim Yesus ami weng ata dukum-kup bakaya-somi. Kemin,
ACT 20:20 nali kipni atul kaata suun-daa-lom duluma kalasi disa; dok kanumin dong dakaayin weng ma bombuu kaa kipni bakayin-bam ale, kipni tala-tala-kelip kawu kukuyin-bamdi aa, kipni am am tal-une-bam kukuyimbi
ACT 20:21 Juda so, Grik iso, kipni dukum-kup bokoya-lomdi: Ibi ban kemin ayo kela-somdipla, aket fal-siki God ami kola-lom, numi Kamokim Yesus ami lak duulin o, yakaliya, bakayin-bam kemsi.
ACT 20:22 Kemin, ipkal utamin, Kamala kaali, God ami Sinik ata nam-buu nam-biila Jerusalam uni. Kemin, dok kanolin dok kanolin ma Jerusalam kawu iliya, tildak nami diim abomu kaa, nali utabi disa.
ACT 20:23 Kemin, nili maakup ma kaata-kup utamsi. Abip yaapkan tal-une-biliya, God ami Sinik Tambal alta nam-fatap-daa bokop-na-lomda: Kabi tunum kii, kukup mafak kukaap-tam-bamdip, sok de-tam kaa-bam ke-mokomip o kala-lom bakap-nam-balaya, tal-une-bam bii. Yale,
ACT 20:24 Kamokim Yesus ayo ok kup-na kaami sang ayo bokop-na-lomda: Kabi nami weng tambal kaa unang tunum iyo bokoya-lom: God ali unang tunum imi aket ayo kukaayim-bamda, kukup tangbal ayo kukaayim-bam, ken-yaaba kayi! yakan o, kalase kalaliya, nami aket fukunin ayo nami angtiil kaa, suun-daabi disa; nelalip kata, ilmi san kemin kuno nelalip. Yale, nali God ata ok kup-nase kaa, talala yakyak kutoop daa, atin ditang-kalu kulaali yo, kalbi.
ACT 20:25 Kipkal utamin! Siin kaali, iltipni iipyak tem kawu bomdila, God ami miit tem bom-bilip, imi tiin mo laaba umi sang kaata, bakayila-tal-unem-somi. Lale, kamala kalaali, nali utamila, ibi maso ma nita-mokomip disa yo, kalaliya,
ACT 20:26 kulaata, atin weng mafiing mafiing ma bokoyokomi. Kemin, nali kipni atul kaa suun-bamdi dulumsi disa; God ami weng kaata ibi kala-nuumin o, kalsa ayo bakaya toop bokoyasii. Bii-lom, ibi God ami weng kaa kuyang saak telip namti, ayo taba-lom ibi anula angtiil yol kuyala awak uta-mokomip. Lale, kaa nita disa yo.
ACT 20:28 God ami Sinik Tambal ata taba-lomda ibi ulela bokoya-lomda: Ibi Kristen kii tunum sipsip tiin molip laabip iltap ke, tiin molip ilin o, kalase. Kemin, ili Yesus ami lak duulin unang tunum kaa, saakna, almi kiim kaata sing-tam-daalaya, imi iliim boyase. Kemin, tiin molin kibi alik imi kukup so, iltipni kukup so, kii dotu tiin mo utafii-bamdiwa, God ami weng ayo, bakayim-bam kukuyim-biliwa kayi!
ACT 20:29 Nami utabi kaa, bom bii keyila unila, apliip atul-kup tabasip tunum mafak iyo taba-lom, tal Kristen kipni tem un-ilomdip, sipsip ibi yam-mafak-daalokomip kaa kalbi.
ACT 20:30 Kemin, kaltipni iipyak tem kulu tunum malo ma kiita taba-lomdip, Kristen iyo foko kutal-dang-daalupya, numi daang bakaaliwa yo, kala-lomdip, kasen-fakamin weng bakayim-bilip, kulaa yang banokomip. Kemin ale,
ACT 20:31 kipkal utafii-bamdiwa kayi! Nali tiin ok tale-bulu ama-bamdiya, alik maakup maakup ipyo, kukuyin-bam weng bakayin-kup ke-bam, kutamiip so, taap so, kanu bii, wasital asuumano duk-duusii kaami aket kaa, aket fukun-bamdiwa kayi!
ACT 20:32 Kanola, God ami beten kamaan-bam boko-lomdi: Dukum kapyo, Efesis Kristen kii tiin molawa; iyo kapni weng kaata weng san-kaa-bam bilipla, kukup tambal kukaayim-bamdap tiin molan o, kalbi kemin, God ami weng tambal kaata ibi yam-titil-diilokomu. Kemin, ali ti yaap ibi yang unang tunum talalu-yimula tambalsip imi iipyak tem tiilaya, ibi suunkup yaap ilokomip.
ACT 20:33 Kemin, ibi nitamipla, Tunum kalawaali moni aye, ilim aye, ma tiin nen-bamdi dakayila tal-unemi nitam-silip ema?
ACT 20:34 Kipkal nitamsip kemin, nali am kon sel biki-bam okokmin tunum o, ninsip; nami sikil alep alep kaliita ok kaa kutal-fuku-bomdila, nakal keli aa, tunum naso bulup numi mafek mafek iipnu ayo saansi kemin,
ACT 20:35 alik nami mafek mafek talalu-lomdi okok ken-umbi kaayo, kukuyim-bam, bokoya-lomdi: Kipso, naso, titil-fak-daa-lomdup okok ke-bam, unang tunum mafak-alin kuluulip aye, mafek mafek iipnip aa, iyo dong dakaayum o, kalaliya, kukuyi utam-silip. Kemin, Kamokim Yesus alta boko-lomda: Kanola tunum ma mafek mafek ma aptum ami masiim kola namti, tunum kuluula ayo, fiyaap duulokoma, aa yak tunum kolokoma ata, atin fiyaap duumin dukum ke-mokoma kayi! kalase. Kemin, kipso, naso, kaami weng bokosa kaami aket kaata fanang daka-bamduwa yo, kala-lomda, Pol kaa kanum bakayinsa.
ACT 20:36 Pol ayo weng bokoyila disa kelale, nikil alik maakup katuun duung fakela daak tiin-ilom God ami beten kamaalaya,
ACT 20:37 ama-bamdip, yak dap-tal miki weng fokola-lomdip,
ACT 20:38 iyo ami bokoya-lomda: Kibi maso nita-mokomip disa yo, yaka kaami kalan kaata dukum-kup olen-bamdip, aket tem mafak-ilu dibii tam sip tem daalip ko.
ACT 21:1 Pol nikil nokol kuno aket tem uluum dukum uyo kuluu-lomdup, Efesis kasel Kristen iyo kamboya yak sip tem unupla, tituun-kup bakyak abip Kos tal kabalupla kawu, sulup sintam din abip ma Rodes aba yak aba din abip Patara aba,
ACT 21:2 sip kuu kewa daak aba, sip kusnum ma din utam, kuuli umbiyak Provins Fonisia unon o, kalbu kaa kalale, kaptam-ami tem unum o, kalalup kaptam ami tem abalup yak aba bilin
ACT 21:3 yol ok daang kun diim kaptam-ami tawaal ma Saiprus din kabalupla, ukdaa ku awaanlo kabang daaluwa, akaala Provins Siria din kaba-lomdup, sip uyo imbii-din abip Taya kaba-lom, bung ayo alik kawu kukan-tiilum o, kalbip kaa kalale, nuyo sip tem kela daak aba yang
ACT 21:4 Yesus ami lak duulin unang tunum imi fen yang itamuple, iso kawu bom-ilupla, God ami Sinik ata mafek mafek Pol ami diim kawu tiltam tabokomu kaali, imi aket tem ku-fatap-daayala, Pol ami dil molum o kala bokola-lomdip: Kabi Jerusalam kaa din unemin daa yo, akipla kemin, bii am fetkal kelale, Kristen tunum unang man so, alik iyo numi imbiilip tam daak abip dukum umi saak lo tam aba yak aba toop yol ok balang abale, kulaali iso, nuso, katuun dung fakela daak ok dinin diim aba God ami beten kamaan-bam,
ACT 21:6 yakal weng umuuyip, nokol weng umuuyup kelupya, asuk tam sip tem aba kem-suluple, iyo keyila ilmi am unaalip ko.
ACT 21:7 Kula nuyo abip Taya kulaa kela, sip tem yak aba din abip Tolemes aba Kristen iyo weng umuuya iso kawu, sulup sintam
ACT 21:8 Tolemes kulaa kela, din abip Sisaria abalupla, sip kela daak abale, din Filip ami am din kawu atamup, nikil bom ale, ali God ami weng tambal bakayin tunum ale, Jerusalam kawu ulduulip dong dakaayin tunum kesip fetkal la, fet kaa ata kemin,
ACT 21:9 kaami man unang atalingkal kiili, sii. La, yakal God ami profet o, kala weng ku-fatap-dakamin unang ke-silip.
ACT 21:10 Kemin, nuli kawu am sin-sin-kelupya, God ami profet tunum ma Provins Judiya kametu kela tiltoop tala, ami win kaali Agabus.
ACT 21:11 Ayo numi fanang tal-ilomda, Pol ami ol tiil kaata, kuluu-lomda, almi sikil yaan ayo de-lomda bokola ko: God ami Sinik Tambal ayo bokop-na-lomda: Pol kapni Jerusalam unokomap kaali, Juda ita taba-lom nalmi sikil so, yaan so, deli alaltap kep-ta-lomdip, tam-baalip yak Rom kayaak imi sikil diim abam-nokomap o, kala Sinik ayo kanum bokop-na no, kala, Agabus ayo kanum bokolaya,
ACT 21:12 nuli weng kabak weng sanduwa nusole, kaa ilin iso, nuli Pol ami dukum-kup bokola-lom: Kabi Jerusalam kamet-ali unemin daa, akupla,
ACT 21:13 Pol kaa numi weng kaa maan tii bokoya-lomda: Kanimin o, kalaliwa, ibi ama-bamdip nami unon o, kalbi kaa, nam-tal-kaabip i? Nali Jerusalam met itami, ili kaali: Yesus ami win kufun-yaaba kala, naka-lomdip sok de-namulum o, kalip aye, nelip taanami no, kalbi kulaa yaap o, yakaya,
ACT 21:14 kemin, nuli atamupla yi, Waka-tokoluwa, aket fal-sikilama disa kela kalalupla, kela bokola-lomdup: Kamokim Yesus ami aket fukunba namti, kuno tiltam tuluk o, akup ko.
ACT 21:15 Sin-sin-keluwa, mafek mafek iyo dotu kutii, Jerusalam kamet banum o, kemuwale,
ACT 21:16 abip Sisaria kaptam-ami Yesus daang bakaalin tunum malo ma numi im-tamalip met Jerusalam Nason ami am daalip, aso bulup. Kemin, ali Provins Saiprus kayaak; ali sawaalak kaptoowu Yesus ami daang bakasa.
ACT 21:17 Kemin, Jerusalam Kristen yakal talaalipla, Pol inang iyo tilip kala kalalipla, fiyaap duu-lom weng umuuyip.
ACT 21:18 Sindupya, Pol nikil nuyo din Yesus ami niing Jems ayo atamum o, kala din ulup, Jems ami am kaa Kristen imi kamok kamok alik iyo aso bom-bilip kala, kalale,
ACT 21:19 Pol ayo imi weng umuuya, kula God ami weng kulii-din tunum miit kusnum imi bakayim-bala, God ata dok kanolin mafek mafek kukuyila-yaaba kaami sang kaata bakayila ko.
ACT 21:20 Kamok kamok iyo Pol ami weng ayo weng san-ilomdip, God ami fiyaap duu-bam, God ami tong kaata baka-bam, Pol ami bokola-lom: Nak-tum kapyo, kabi itamapla, Juda kayaak ili deng yaapkan yaapkan ili Yesus ami lak duu-silip kala kalap kemin, alik ili Moses ami Lo uta kutal-fukulum o, kala fiyaap duubip. Kemin,
ACT 21:21 iip maakup maakup ili, kapni sang kaata, aptum kusal iyo kasen-fokop-ta-lomdip, Pol kaali, Juda kasel miit kusnum kiimi abip bom-bilip, imi kukuyim-bamda: Ibi Moses ami Lo kulaa-lomdip, kipni man imi ipnaal ayo bo-kukan-tiiya-yaamin daa; aa, Juda numi siin kukup kaata tabuu-yaamin daa yo, kal-bomda bakaba no, takan-kaabip.
ACT 21:22 Kemin, kii weng seliwa yi! Pol namti kulu tala taka-lomdip, aket atul uyo kup-tokomip kemin, kapso, nuso, nuli kalok kanolokomup i?
ACT 21:23 Kanolu namti, kabi numi bokop-tokomup kaata kanolan. Numi tunum atalingkal iyo weng kutii-lom God ami bokola-lomdip: Atin ti fan, kaali ti kanolokomup o, kalbip. Kemin,
ACT 21:24 kapyo, im-buulawa, iso, kapso, God ami am diildiil tam-ilomdip Moses ami weng boko-lom: Kabi God ami tiin diim kawu wok-sam woko tambalim kelan o, kalsa kaata, kutal-fuku-lomdip bii, tuumon ayo kuluu imi sipsip inang ma moyilapla, pris awem tunum imi kuyip, kuyak fuu God ami kolipla, kukup kaa disa kelu kala, kalaliwa, ilmi dabom kon ayo bitalipla, unang tunum alik iyo titamipla, Kapkal Moses ami Lo kaa, kufukusap kala, kala-lomdip kapni sang bokolip weng sanbip kulu kasen-fokobip o, kalokomip.
ACT 21:25 Kemin ale, tunum miit kusnum Yesus ami lak duu-silip kii, nuli sukon dola kuya-lom, numi aket fukunin sang kaata bokoya-lomdup: Ibi Juda imi kukup kaa alik tabuu-laamin daa; alep-kup kiili, tunum ili taba-lom ima uyo awem men kukaayin-bam wiis saanbip kaami ima kaa, ibi inin daale, aa taloop mam baplelip saakna aye, kiim aa, kaa inin disa, aa sadikimin daa yo, kalalup dola-lom, kulaayup din unsuu no kala-lomdip, iyo Pol ami kanum bakaalip o.
ACT 21:26 Kanolipla, Pol ayo tunum atalingkal iyo nikil silip, sintam God ami tiin diim kawu wok-sam waka-bam tambal kelipla, tam lotu am diildiil tam-ilom, Pol ayo pris awem tunum ami bokola-lomda: Am fetkal kii tal-unipya, tunum atalingkal kalawiimi weng kutii God ami bokonbip ami iintang am bom-bilip kaayo, dinim-nokomu. Kemin, kaata asuk taldupla, kalawiimi sipsip aye, ma God ami kola kola kelum o, kala-lomdip, kulii-tal tiip-tipya, anulokomap kayi! aka ko.
ACT 21:27 Tunum atalingkal imi iintang am fetkal ayo disa kelon e kem-suluya, Juda kayaak kusnum Provins Esia kawu talbip iyo utamipla, Pol ali am diilim kaptamu bombe kala kalaliwa, aptum kusal iyo wiis-moyipla, kula dap-tal-fuku-lom
ACT 21:28 iyo naan-bamdip: Israel tunum kipyo, Nulmi dong dokoyin a! Tunum kalawaali ti abip abip alik kawu tal-une-bamda, tunum miit kusnum imi bakayim-bamda: Ibi Juda kayaak itafiimin weng bakayim-bam ale, Moses ami Lo uyo weng kuyang saak ten-bamdipla, lotu am diildiil uyo utafii-bam kemin o, kem-tal-unen-umba aa, numi Lo kaayo boko-lomdu: Tunum miit kusnum kii tam lotu am diilim kaltamba talemin disa yo, kalsu. Yale, kalawaali Grik kayaak kaa ma imbii tam lotu am diildiil kaltam bana kulaalile, lotu am kultam ku-mafak-daaya kayi! kalip kemin,
ACT 21:29 (ami kanum bakaan-bam naalip kabak-ami miit kaa, siin kawu ili atamipla, Efesis tunum ma Grik kayaak Trofimus ali Pol aso abip iip-iip kawu tal-unebip kala, kala-lomdip, Pol dibii tam lotu am diildiil tam una ko, kala-lomdip, kanum baka-bam naanip. Lale, ali lotu am diilim kaptam din unin disa ko.)
ACT 21:30 Kemin, kulaata Jerusalam kasel iyo aket atul eng foko abiltap tala-tala-ke, tal Pol lotu am un-ilom, dap-tal-fuku sisii dilili dibii tiltam abip daa-lom, maak fak-daalin tap pris awem tunum kaa kaltam yemin disa yo kala-lomda, lotu am saal ayo kuyak-mo liila ko.
ACT 21:31 Juda kayaak iyo tam-ilom Pol aalum o, kem-tabum e, soldiya ma weng binalip din Rom kayaak imi soldiya kamokim ami bokola-lomdip: Yi, Jerusalam kayaak alik kaltam ili ban boko-lomdip waasi dinum o, kalbip kayi! kalipla,
ACT 21:32 ayo weng san-ilomdaya, soldiya iyo abiltap afetu kutii kela soldiya imi tiin molin tunum ayo ulduu kuyaku ke foko kulii-din unipla, Juda yakal itam talaalip yi, Kamokim so, waasi dinin tunum iso, iyo tilip kala kalalipla, Pol biwakabip kaayo, kelipla,
ACT 21:33 kamokim ayo tal Pol ami bokola-lomda: Kabi sok de-tamulokomi no, kala-lomda, soldiya iyo bokoya ko: Sen sok alep ma kuluu-lomdip, deliwa yo, yakale, kula Juda imi dik-daayila ko: Kala kanta ni? Kaa kanimin ma noba? yakaya,
ACT 21:34 Juda iyo akal almi mafek mafek sang e kala naan-bala naan-bala ke-bam tuluk-tuluk-ke-bilipla, kamokim ali kalok kano-lom Pol ami kanoba kaami sang kaa talalula ma weng selin dinim ke, soldiya ma imi bokoya-lomda: Ibi dibii tam numi am dukum kaptam unin o, kalaya, dibii tam un-ilomdip,
ACT 21:35 tuum ta baan dalaasip kutal-fuku kaltamba unum o, kalip. Katale, Juda iyo aket atul dukum keyulu, Pol ayo ti dap-tal-fuku aalum o, kalbip kala, kala-lom, soldiya iyo Pol dabuu dafo-lomdip dibilip unip.
ACT 21:36 Juda tunum iyo daang tem kawu un-bom naan-um-bom aalip saaknak o, kemin-kup yakyak unip ko.
ACT 21:37 Waasi dinin tunum ayo dibii tam almi am dukum daalum o, kem-siliple, Pol ayo Grik imi weng ata bakan-taba-lomda, soldiya imi kamokim ami bokola ko: Nali weng ma bokop-tami eliyi? akala, asiik fanang alik tam banu bokola: Kwin! kabi Grik kayaak imi weng dik-daa kuluusap ema?
ACT 21:38 Sawaayak kawu, tunum ma taba-lomda, gavman so, waasi din-bomda tunum almi-kup fo tausin (4,000) ita afetu kutii-lomda, bainat uyo fukula-fukula-kelipla, umbilin tunum dinim bokon kawu unsip. Kemin, tunum mafak kaali, Isip bokon kaa kayaak. Yale, kabi yak Grik weng bakabap, kemin kabi tunum kanolin disa yo akaya,
ACT 21:39 Pol asiik bokola ko: Ee, nali Juda kayaak nami abip tituun kaa Tasus te! Kemin, Provins Silisia kawu bombe. Nami abip kaa abip sakbaalim dukum win so kawi! Nak-tum kapyo, kuno kep-nap weng ayo Juda kalawiimi bokoyon o, akaya,
ACT 21:40 ayo, akala, Pol ayo baan akiim kuluwu tola sikil kufo-kem-salale, dulumnip Juda ilmi Hibru weng kaata-kup bokoya-lomda:
ACT 22:1 Nami niik kasal kabel kasal kipyo! Nasiik nalmi kukup tambal kutal-fukubi kaami sang kaata ma bokoyokomi. Kemin, weng san bom iliwa yo, yakale, kulaa
ACT 22:2 ili weng seliwa yu! Ali Hibru nulmi weng kaata bakan-tabamna kala kala-lomdip, atin ti dulumniple, bokola:
ACT 22:3 Nali Juda kayaak kemin; nami akamen uyo Provins Silisia bokon abip ma Tasus kawu nam-uluya, ilom nali tal abip dukum Jerusalam kaltamu fasuu-lom, skul ken-um-bomdila, Gamaliel ata nulmi awal imi lo kaa talalu kukup-nam-balaya kemin kawu, kano-somdila, ipni God ami aket dukum konsip tap nakal kanola-lom, God ami aket dukum ayo konsi.
ACT 22:4 Nali kukup mafak kaa, unang tunum iyo Liip Alokso din unebip imi kukaayim-bamdi, yam-mafak-daka-bamdila, Iyo anuli taanik o, kemsi. Kemin, tunum unang iyo sok de-yimbi din kalabus am tii-bam kemsi.
ACT 22:5 Awem tunum imi kamok diildiil o, kala, pris so, kamok kamok alik kiiso, ili nitamipla, Ali ti fan tituun eng bakaba kala, kalalipla ili natabip kemin, yakal bokolalip te! Kii aptum kusal Juda Damaskus kawu ilin imi sukon dola kuya bokoya-lomdip: Kipyo, yaap kemin Pol kaa din una kaali, Kristen Damaskus kawu ilin imi imtal fuku sok de-yimu imbii-tal Jerusalam daalaya, kot kamayinsi-lom yemum o. Aa, anulup saaknik e kala-lomdip, dola kup-nip kulaa abip Damaskus uni no, kal-bomda Juda imi kanum bakayila ko.
ACT 22:6 Pol ayo kanum bokoyimba-kup bokola ko: Nali yakyak din Damaskus mep mep kuluba unila, atan tal dibimnule, maak fak-daalin tap abiil tikiin kaptamu falala-kalin ma iilfo kulaala tal nami diim aba-lomda, alik falala-kup kalaya,
ACT 22:7 nayo lamo daak tawaal diim aba-lomdi, weng ma ayo weng seliya bokop-na-lomda: Sol kapyo, kabi kanimin o, kal-bomdawa, kukup mafak kaa nami kukaap-nambap yoko? nakale,
ACT 22:8 nasiik bokoli: Kamokim, kabi kawanta ni? aki, bokop-na-lomda: Nali Nasaret kayaak Yesus nata; nami unang tunum imi kukup mafak kukaaya-laabap o, nakala,
ACT 22:9 tunum naso bilip kiili, falala-kalin kula atamip. Lale, weng bakaba kaata, talalu weng selin disa ke-silip.
ACT 22:10 Kemin, ayo bokola-lomdi: Kamokim kapyo, nali kalok nolokomi ni? aki. Kamokim asiik bokop-na-lomda: Tam tola-somdapya, yang Damaskus kawu balawa, tunum ma tal bokop-ta-lomda: God bokop-na-lom: Sol ali kanumin kanumin kaata kanumak o, kala bokop-na tili kemin, kaata kanuman o, tokokoma kayi! kalaya, kulaali
ACT 22:11 falala-kalin dukum ma falala-kup kaluya, tam tola mafek mafek ma atamami disa keliya, tunum naso unabup ita sikil kuldaku, nam-tal-fukulip Damaskus toop un-sulup o.
ACT 22:12 Kanola, God ami daang bakaalin tunum kano ma ami win kaali Ananayas ali Moses ami Lo dotu kutal-fukusa kemin, Juda alik Damaskus kawu ilin iyo boko-lomdip: Ali tunum tambal o, akan-kan-umbip
ACT 22:13 ata tal nalmi mepso kulu tolale, bokop-na ko: Nak-tunum Sol kapyo, kapni tiin kulii tambal kep-tik o! kala bakap-nan-salale, kulu nami tiin iyo tambal kep-nipla, Ananayas ayo atamila,
ACT 22:14 ayo bokop-na ko: Nulmi awal-fakal imi God ata bokop-na-lomda: Pol ata ulduuliya, nami aket fukunin ayo atam-som, Tituun-kup Tabasa Tunum ata atam aa, ami bon tem weng ayo weng san kelak o, kalalila, ulduuli kayi! kala bokop-na. Kemin,
ACT 22:15 kabi God ami weng ayo unang tunum alik imi bakayim-bam ale, kaltapni tiin alep alep atabap so, weng sanbap so, imi sang kiita bakayim-bam ke-mokomap.
ACT 22:16 Kabi fen bii-somdi yo, kalolap i, tam aba yang oksam ukubap-kup; Kamokim ami dik-daalawa, kapni ban kaayo, kukan-tiip-ta kelak o, kala-lomda, Ananayas ayo kanum bokop-na-som, kelala, Pol ayo kanum bokoyila ko.
ACT 22:17 Kemin, Pol ayo bokola-lomda: Biiliya, asuk tal Jerusalam bomdila, tam lotu am diilim un-ilomdi God ami beten kamaan-bam lom dakaabap tap ke-bamdi,
ACT 22:18 Kamokim ayo atami, bokop-na-lomda: Jerusalam kasel ili kapni weng bakayimbap kaa, weng sanokomip dinim kemin, baan kamboya Jerusalam kaltam kulaalap unan o! nakale,
ACT 22:19 kulaa nasiik Kamokim ami bokoli: Kamokim kapyo, Jerusalam yakal utamsip o. Nali lotu am alik tam une-bamdi, kanita kapni lak duulin iyo sok de-yimu imbii-tal kalabus am tii-bam ale, ye-bam kesi.
ACT 22:20 Aa, siin kaa Stiven ali kapni sang ayo unang tunum imi bakaya-tal-uneba kala kala-lomdi, ita ami aalip taansa kaali, nalta, ayo, yaka-lomdi, nali mep kulu tola-bomdi tunum kii ilmi ilim delela-lomdip aabip uyo, nata tiin moyasii kaata! Iyo nami kanosi kulaa, ili utamsip. Kanolin kemin ale, ili nami weng kaa weng sanokomip elile disa ye kala, Kamokim ayo kanum bokolila,
ACT 22:21 Kamokim asiik bokop-na ko: Nali tam-baali umbilap bilin tunum miit kusnum imi diim abokomap. Kemin, kuluwa kulaalap tabanan aa! akaya, ayo kala Pol ayo kanum bakaya ko.
ACT 22:22 Juda kayaak iyo kano duluma weng san-bilipla, Pol ayo weng bakan-una-bala, bom-bilip bakan-yak-aba butoop almi tunum miit kayak kayak imi weng bakayila-yaaba kaami sang kaata, bokoya kem-salale kulu, dukum-kup naan-taba-lomdip: Kwin! kanolin tunum kaa kambolap tawaal diim kalawaa, ilin disa; kemin an-kuwaalin aa! Kambolip tiin kawong ilin daa; aalip taanak o, kemipya,
ACT 22:23 atul weng fak-daka-bam ale, ilimi aket atul tabeyu kanumin kukup kaata, no-lom ilmi ilim kaltam falep ayo dilduu kulaalip une-bulu-tale-bulu-ke-bam ale, iiwin tuk-duu-lom binalip asal une-bulu kemipla,
ACT 22:24 waasi dinin tunum imi kamok ata bokoyilaya, soldiya iyo Pol dibii tam ilmi am dukum dap-tam-daaliwa, kulaa kamokim ayo bokoya-lomda: Juda fuut-bam naan-bam aalip taanak o, kebip kaami miit kabak-ata bokop-nalap, weng selon o, kali kemin, ipta faklet kuluu aa-bam dik-dakaan-bilip, weng miit kaa bokoyilaya, weng sanum o, kala. Lale,
ACT 22:25 waasi dinin tunum iyo sok de-dap-tii-lomdip, kang ipnaal sok ta kuluu langatal aalum o, kalbip. Lale, Pol ayo soldiya imi tiin molin tunum ma mep kulu tolba ami bokola ko: Kapyo, nali Rom kayaak kesi te! Rom ipni lo kaa boko-lomdu: Rom kayaak kesa kaa, weng dabak saanin dinim ilom faklet kulu biiwakamin kaa tambal o, kalsu ka? akaya,
ACT 22:26 tiin molin ayo weng sandaya, din kamokim ami bokola ko: Kapya, mep tunum kalawaali Rom tunum kesa te! Kabi kalok nolon o anbap i? akaya kulaa,
ACT 22:27 kamokim ayo tal Pol ami bokola-lomda: Kabi fan Rom kayaak ema? bokop-nap kaal kelila yo akale, asiik, Ayo, kalale,
ACT 22:28 kamokim asiik bokola: Nali sisol dukum ta kuluu-lom, Rom imi kuya-lomdi tiltam nali Rom kayaak kesi te! akaya, Pol asiik boko-lom: Nalile, atok ali Rom kayaak kemin, nakal Rom kayaak ke-bisi no, akala,
ACT 22:29 abiltap soldiya ita sok faklet tup aa-bam dik-daa-dik-daa-keluwa, ami ban keba sang bokoyak o, kebip iyo, kela kayak baniwa, kamokim ayo aket fukun-daa: Naka kaa Rom tunum kemin, nalta Rom kasel numi lo kaa lo-lomdi, soldiya bokoyiliya, sen sok kaa kuluu dedulip kala, kala-lomda, Pol ami atul kaali, suun-daala ko.
ACT 22:30 Se, sintam waasi dinin kamokim ayo talalu atam-ilom, Juda kayaak kii kanim kalan Pol kaa aamum o, kem-solip kalon o, kala, ayo waasi dinin imi bokoyalaya, sen sok kuluu dedubip ayo, til-daalipla, weng dukum-kup ku awem tunum pris imi kamok kamok so, Kaunsol iso, imi kuya tala-tala-kelip kulaa ayo Pol dibii tildaak imi bilip daala tolna ko.
ACT 23:1 Pol ayo tiin tituun dik yak Juda imi kamok kamok imi diim diiya-lom talalu itafii-bamda bokoya ko: Nak-tunum kusal kiwe, God ali nami kanolin mafek mafek alik kanum tam tam kutal kala diili kulaa utaba. Ami weng kaa kuyang saak tenbi disa; ali utamaya, nali fatom dinim bomdila, nami aket tem ayo balili-kup kep-na buluya bii no, kalale, kulaa
ACT 23:2 tunum awem imi kamokim diilim hetpris Ananayas ayo tunum Pol ami mepso kulu tolbip imi bokoya-lomda: Ibi mep kaami fiil kaa kalutnin o, yakaya iyo kanolipla,
ACT 23:3 Pol asiik bokola-lomda: Kabi ti kukup alep tabuulin tunum ale kabi ti am kuluwu tiin-bomdawa, lo-kup fuku-bomdap, nam-bak-saan-bam bakabap. La, kapkal lo uyo kuyang saak ten-bamdawa, bokoyap nelip. Kemin, kapkal God ata taba-lom telokoma te! akaya,
ACT 23:4 tunum Pol mepso tolbip iyo bokola-lomdip: Kabi God ami awem tunum imi dabom kaa, weng mafak kaa bakaalin daa yo akipla,
ACT 23:5 kulaa Pol asiik bokoyila ko: Nak-tunum kusal kipyo, atam, Awu kaa tunum awem imi kamok dabom kalali, atamsi disa; God ami Sukon Tem kaldak boko-lomdu: Israel kipni kamok kaa, weng mafak kaa bakaalin disa yo, kalsu kemin ale, weng kala kuyak saak tiiyon o, kalbi disa yo, yaka ko.
ACT 23:6 Pol ayo kanum bokoya-lomda, itama yi, Kamok kamok malii ma kii Sadusi malii ma kii Falosi kaa kalale, kamok kamok imi weng dukum-kup bokoya-lomda: Nak-tunum kusal aa! Nami awaalik kasal kiili, Falosi kemin, nali Falosi imi loop te! Utamila, Tunum taansip ili tam tiinokomip kala kalaliya, fenbi kemin, kabak-ami sang kulaata bakayila-tal-une-biliya, kuyak ami kalan kulaata, taba-lomdip, kipyo kot kamap-nambip o, yaka ko.
ACT 23:7 Kanum bokolaya, kamok kamok iip kulu biki-kutii-lomdip Falosi so, Sadusi iso, kiiyo weng aal dikibip kemin,
ACT 23:8 kabak-ami miit kaali, Sadusi iyo boko-lomdip: Tunum saaksip kii, tam tiinokomip disa le, aa ensel kii disa aa, tunum kii sinik dinim o, ken-yaabip ale, Falosi ita baka-bamdip: Disa; alik ili kano bom-bilip o, ken-yaabip.
ACT 23:9 Kemin, ili tuluk-tulukmin-kup ke-bam disa akal ma kemiple, lo utamsip tunum ma Falosi kesip ita tola dukum-kup boko-lomdip: Nuli tunum kala atabup kalaali, ami ban kemin kaa ma bom buu kalbup disa. Sinik e ensel e ta taba-lomda, Damaskus unemin liip kawu bokolase nema yo? kalipla,
ACT 23:10 ti weng aal dukum-kup kemipya, soldiya imi kamokim ayo itama yi, Yak-una tildak-una ke-bamdip, weng aal dikibip iyo taba-lom, Pol ayo biing-mo dibii-una-tala-ke-bam: Aalolip o, kala-lomda, suun-daa soldiya imi bokoya tildaak kamok kamok imi iipyak tem tildaak aba-lomdip kasen tap-kup Pol ayo dap-tamalip tam ilmi am dukum kaptam unip.
ACT 23:11 Kemin, kutamiip kawu, Kamokim Yesus ayo tal Pol almi mepso kulu tola bokola-lomda: Pol kapyo, suunin daa; atin ti titil-biki-bomdap, nami sang kaa Jerusalam kala bomdap bakayimbap tap ke, nami sang ayo abip dukum Rom kawu bakayim-bam ke-mokomap o, aka ko.
ACT 23:12 Am daana kutim kawu, Juda malo ma iyo maaklo tala-tala-ke taken-bamdip, God ami tiin diim weng kutii bokolip: Ima ok fala ilomdup, Pol aalup saaknaya kawu, asuk ok so, ima so, inamnum; aa aalin disa ke-lom inam-nokomup namti, God ata taba-lom yela saak-namup o, ke-bam bakamip.
ACT 23:13 Tunum ilmi-kup 40 le, kuno anung ma ita kanum boko-lomdip,
ACT 23:14 kulaali, din awem tunum pris imi kamok kamok iso, Juda imi kamok kamok iyo bokoya-lomdip: Alik nuli God ami tiin diim kawu weng kutii boko-lomdup: Pol kaa aalin disa ke, ima inamnup namti, God ayo numi yelala, taanokomup o, kalup. Kemin,
ACT 23:15 kipso, Kaunsol kamok kamok ipso, ipta weng binalip din Rom kasel imi soldiya imi kamokim ayo kasen-fokola-lomdip: Pol ayo dap-taldaak daalawa, ami kukup aye, weng aa, kaami sang kaata, maso ma bokoyilaya, dotu utamum o, kalipla, nuli liip kawu kutii ilupla, Pol ayo tal kamok kamok ipni diim talokoma disa. Nuta liip kawu kutii ilup, ayo tiltoop tala, aalokomup o, kemip ko.
ACT 23:16 Kulaa, Pol almi unang umi man ata weng sanala boko-lomdip: Juda iyo asuk kutii-lomdup Pol ayo aalum o, kalbip kala kala-lomda almi unang man ata tiltam soldiya imi am dukum ayo tiltam Pol ami bokolaya,
ACT 23:17 Pol asiik soldiya tiin molin tunum naan-daala tal atamale, bokola-lomda: Kabi mep man tunum man kalaali, kapni kamokim ami weng ma bokolon o, kalba kemin, tal dibii-din daalawa bokolak o, kalaya,
ACT 23:18 kulaa fan, soldiya imi tiin molin ayo dibii-din kamokim be daa bokola ko: Pol sok de-dubip ta, weng umbaap-na yang atami bokop-na-lomda: Mep man tunum man kalawa kapni kamokim ami weng ma bokolon o, kalba kemin, dibii-din daalawa bokolak o, kalaya, dibii-tili no, akale,
ACT 23:19 kulu kamokim ayo yak man dap-tal-fuku dibii-yang sawaan tem kabangu akola bokola ko: Kabi kanim sang ma bokop-non o, kalalawa talap? Kala dik-daalale,
ACT 23:20 ayo bokola ko: Juda imi kamok kamok iyo weng taken-bam boko-lomdip: Sabi kawu, soldiya imi kamokim ami din-ilom kasen-fokola-lomdup, Pol ami kukup so, weng so, kaami sang kaata ayo maso ma bokoyilaya, dotu utamum o, kala kanum bokoluwa, dibii-tildaak kamok kamok imi bilip tildaak talak o, kebip. Lale,
ACT 23:21 kabi imi waka-taka-mokomip weng kaa, weng san-ilomdap, Pol kaa dibii-unemin disa kayi! Tunum kaa kanubip kiili, 40 le, kuno anung ma kanolin kiita, liip kutii-lomdup aalum o, kalaliwa, ili God ami tiin diim kawu boko-lomdip: Nuli aalin disa ke-lomdup ima ina, ok ina kelup namti, God ayo taba-lomda yela taanokomup o! kala-lomdip weng dotu-lom tii, kapni weng kaata-kup tal: Ayo! yakawa yo, kala-lom, fenbip o, kala man ayo kamokim ami kanum bokolaya
ACT 23:22 kemin, soldiya tunum imi kamokim ayo man tunum man ami bokola: Kapni weng kaa bokop-nap kaami sang ayo tunum ali ma bokola-laamin disa kayi! kala-lomda dabaala tambana ko.
ACT 23:23 Kemin, kulaa, kamokim ayo soldiya imi tiin molin tunum alep ma naan-daaya, tal atamiple bokola: Alep kipta din soldiya iyo bokoyip dotuliwa, kutamiip-kulii unokomip ayo ti, tawaal liip yalmin tunum almi-kup 200 ale, hos daang kun diim yalmin tunum almi-kup 70, kuno tam tawaal liip tal une-bam, bainat tup dinin ita 200 kela, kiita afet-daa-lom, mafek mafek talalmipla, am kutamiip-nula, atan sinik talaba tam biti diim tulu kala kalale, kulaa ayo kuliilip abip Sisaria unin o.
ACT 23:24 Kuno Pol akal hos ma kola kelip tam ami daang kun diim kabaaku tiinala, yaap-kup dibiilip provins kamokim diilim Feliks bombe unin o, yakale,
ACT 23:25 sukon ayo dola kuya-lom bokoyila ko:
ACT 23:26 Provins kamok diilim tambal Feliks kaa balap o? Nali Klodius Lisias nata sukon kala dola kup-ti.
ACT 23:27 Mep tunum Pol kalawaali, Juda ita taba-lom dap-tal-fuku aalup taanak o, ke-bilipla, nayo atami yi, Kaali Rom kayaak tunum kesa kala kalaliya, soldiya iyo fokoli abiltap din-ilomdip imi sikil un-ilom dabuu dap-tal daasii. Kemin,
ACT 23:28 nali atamila, Juda kasel iyo kanim kalan aamum o kem-solip kaa, kalon o, kalaliya, ayo imi bilip dibii-daak daayili. Kemin,
ACT 23:29 nali utami yi, Ilmi lo kabak-ami mafek mafek kalan uta mafak bakaan-bam kanonbip. Yale, ami ban ma buu keluya aalap taanak o! Aa sok dedulan kalolapla, kaa tambal disa kala bom-ilila,
ACT 23:30 tunum ma kaata, tal bokop-na-lomda: Juda kayaak iyo yawalmin weng baka-bam boko-lomdip: Aalup saaknak o! kalbip kayi! kalaya, abiltap nayo dabaap-ti tala kemin, aalum o, kebip kiimi bokoya-lomdi: Ibi kanim kalan kanonbup kala, kala-lomdip, din provins kamok diilim Feliks ami bokolin o, kali kayi! kala-lomda, sukon kaayo dola kuya ko.
ACT 23:31 Kemin, soldiya iyo kamokim ami weng ayo weng sandipla, kutamiip kawu, Pol ayo dap-tamalip umbitoop abip Antipatris toop ba kem-silip, am daanale,
ACT 23:32 soldiya malo tawaal liip yalmin iyo aptum kusal iyo keyila asuk ilmi abip unipla, malo ma hos daang kun diim yalmin ita, Pol ayo dibii-din
ACT 23:33 abip Sisaria din aba, sukon ayo provins kamok diilim ami konbip-kup, Pol ayo dibii-din aba dabaalip yak kiyap ami sikil diim aba kelip.
ACT 23:34 Provins kamok diilim ayo sukon tik-tiiba-kup, Pol ami dik-daala ko: Kabi dok kanolin Provins kayaak i? akale, Pol ayo bokola-lomda: Nali Provins Silisia tunum o, akale
ACT 23:35 weng san bokola ko: Provins Silisia kayaak imi tiin molin kulaa nalta kemin ale, tunum telum o, kem-solip iyo tilipla, kapni weng ayo weng sandila, tam-bak-molon o, kalale, soldiya ma imi bokoya-lomda: Kibi yak Pol ayo dibii tam gavman numi am dukum sawaalak Herot ata desa, kaptam daa-lomdip tiin molin o, yaka ko.
ACT 24:1 Bombii, am awakal kelipla, awem tunum imi kamok diilim o, kala hetpris Ananayas so, Juda imi kamok kamok iip maakup maakup iso, ili Rom kasel imi lo utamsa tunum kemin Tetulus ayo, dibii-din daalupla, weng kolip alta kot diim kawu weng bakayak o, kala-lomdip, Jerusalam kela dibii-tiltoop Sisaria abalipla, tal provins kamokim diilim ami tiin diim kawu tola-lom bokolip ko: Nuli Pol ami kot kelum o, kala tulup kalipla,
ACT 24:2 weng binalip din atamuya, Soldiya iyo Pol ayo dap-tal daalipla, Tetulus ayo kasen-fakan-bam mokop waka-takamin weng ayo Feliks ayo bokola-lomda: Provins kamok diilim tambal, Feliks kapyo, kabi nuli tambal-kup tiin mo bom-balapla, abiin yaap-kup tiinsup. Ale, kabi numi aket balili-kalin kuyila bomdawa, numi abip ma kayaak iyo dong dakaayim-bamdaple, kukup kanumin kanumin ayo kukuyim-balap, nuli kuluu-lom talal-bamdup tangbal-kup tiinsup.
ACT 24:3 Kemin, kanubap uyo utam-ilomdupla, numi aket tem ayo tambal ma kamayinba no takalupla, fiyaap duu-bamdup, yaap ke yo, takan-kaabup o.
ACT 24:4 Nali tam-baak tibii-lomdi, weng batbat kaa ma baka-mokomi disa; nali nak-tunum kusal kaliimi weng mepkan ma bokop-ton o, kala-somdila kemin, kabi nami aket balili-kalin kaa, kup-na weng san ilawa!
ACT 24:5 Juda kayaak nuli ata-bulupla, Pol ali ti fuut tabin kala, kalalup atamsup. Kemin, kabak kalok ata naa kalolip: Ali ti tawaal kala dik-daa kulaasu alik ayo yak aba tal-une-bamda, Juda alik imi bakayila-tal-une-balaya, iyo bak-tam daa yak-una, tildak-una, ke-bomdipla, weng aal diki-bam ken-yaabip. Kemin, ali Juda tunum nuyo keyila yang ban-ilomda, Nasaret kayaak imi lak duusip imi kamokim kesa. Kemin,
ACT 24:6 lotu am diildiil uyo ku-mafak-daalon o, kemaya, nuyo yang dap-tal-fuku-sulup. [Kanolaya, dibii-din weng bakamin diim daa-lom, nulmi lo kaami kukup kaata kolum o! kemupla,
ACT 24:7 soldiya imi kamokim Lisias ata, tal titil kuyak daa-lom, tal numi sikil baaya-lomda, Pol ayo ulduu dibii-din almi am daa,
ACT 24:8 bokoya-lomda: Kanta kot kelum o, kalip namti, tal kapni tiin diim tola-lomdip, kot kelin o, kalba no.] Kemin, mafek mafek kaami kalan alik numi dap-kot baan diim daabup uyo, kapkal tunum ayo maso ma dik-daalapla, alta bokop-tala kaal-kelan o, kala-lomda, Tetulus ayo kanum bakamale,
ACT 24:9 Juda kasel iso nikil kelipla, mafak bakaan-bam bokolip: Tetulus ami weng kaali, ti faneng bakaba no, kemip ko.
ACT 24:10 Kula, provins kamok diilim ayo Pol asiik bokolak o, kala sikil diil tolale, Pol asiik bokola ko: Kapyo, nali titamsi. Kabi Juda kasel nuyo yim-bak-saanbi wasital yaapkan kii dakan-tiilap titamsi. Kemin, nami kukup kanu-bam ilsi kaami miit ayo dotu ifiiyokomi kaa, kapni diim kawu bokop-ton o, kalaliya, nami aket tem ayo atin yaap ma kep-nu.
ACT 24:11 Kapkal dik-daayawa bokop-tip utamalap te! Nali lotu am diildiil kaptamu God ami lotu kemon o, kalalila, met Jerusalam bombii am talangkal kebi. Lale,
ACT 24:12 nali lotu am diilim kawu aye, lotu am katip katip aye, Jerusalam abip iip kawu biliya, Juda kayaak kiiyo, nitamip yi, Ali tunum ma kaso alep weng aal fakabip aa, ali unang tunum iyo afetba naka-silip daa te!
ACT 24:13 Ili nam-bak-saanbip. Lale, kalok kano-somdipla, dotu kukup-tip kabi utamap yi, Weng kaa tifaneng bakabip kala kalolap disa.
ACT 24:14 La, nami sang ma bokop-nip kaali, tifan kemin, nali mep kalawiimi boko-lomdip: Tunum anung ma nuyo kamboya yang ban-silip o, ken-yaabip imi tunum namti kalabii kemin, nali Liip Alokso kaami kukup kaata daang baka-bamdila, Juda nulmi awal imi God ami lotu uta kamaala-yaabi. Kemin, Moses ami Lo dolsa so, God ami profet iso, iyo alik ti tifaneng o, kalbi-kup;
ACT 24:15 aa, Falosi kalawiimi utamsip ultap aa ti nakal kaa utamiya, God ata taba-lom ban kemin disa tunum so, ban kemin tunum so, alik iyo im-fola tam tiinokomup kaali, ti faneng o, kal-bomdi bakayim-bam kebi. Kemin,
ACT 24:16 nali suunkup titil-fak-daa-bomdila, God ami weng aye, tunum imi weng aa, ayo ma kuyang saak tiisi disa; kemin utamduya, nali fatom dinim bomdila, nami aket tem ayo bilili-kup kep-na-buluya, tiinsi ko.
ACT 24:17 Kemin, nali Jerusalam kaptam kulaa kela din tawaal ma kabalila, tal-une-bili bii, wasital malo ma dakan-tilila, nayo asuk tal Jerusalam moni kuluu-lom Kristen kanita mafek mafek iibip imi kuya-lomdi, sipsip aye, ayo mo-lomdi God ami kola kelon o, kalalila,
ACT 24:18 God ami tiin diim wok-sam woko, tambal ma kelila, kulii tam lotu am diilim kaptam biliya, nitamip. Lale, unang tunum yaapkan ili ma nami bii tala-tala-ke naanin disa kelipla,
ACT 24:19 Juda kayaak Provins Esia kawu talbip ita taba-lom, kasen-foko nam-tal-fuku-silip. Kemin, Esia tunum kiili, mafek mafek kalan ma mafak bakap-num o, nambip dinam, ilta tal-ilomdip, kaltapni tiin diim kulawu tola-lomdip bakap-nam-bilip utabap. Lale,
ACT 24:20 Esia tunum iyo tilin disa kebip kemin, mep kamok kamok kalawiita, nami din Kaunsol kamok kamok imi iipyak tem kawu tola bom weng bakami iyo nitam-silip, ililta dok kanolin ban ma keba kala, kala utam-silip namti, kaami sang kaata bokop-tipla, utaman aa!
ACT 24:21 Kemin, weng maakup ma bokop-tum o, kalbip ema? Kemin, siin imi iipyak tem kawu tola-lom dukum-kup bokoya-lomdi: Nali utamila, Tunum saaksip iyo tam tiinokomip kaali, ti tifaneng kala kalaliya, kabak-ami sang kaata, baka-yila-tal-une-biliya, am kula daanba kulu, ibi kulaami kalan kulaata, nam-bak saanbip o, kalasii kayi! kal-bomda Pol ayo kanum bakayila ko.
ACT 24:22 Kulaa Feliks ayo Liip Alokso kaami kukup kaa talalu utamsa. Kemin, weng ayo fakela dil mo kamboya bokoya-lomda: Ibi tola-bom ilipla, soldiya imi kamokim Lisias ayo tiltoop talaya, ami diim kawu kipni weng kala bakabip uyo, dotuli dinimnuk o, kalale,
ACT 24:23 soldiya imi tiin molin ayo bokola-lomda: Kabi Pol ayo dap kalabus am daalap, ilaya atin sok dedulalap i! bom-bala almi kayaak tal atamum o, kalip ayo, mafek mafek iipna aye, ima aa, kulela talemip kaa, dil-saanin disa yo, aka ko.
ACT 24:24 Feliks ayo sin-yaa-bam bombe la, almi kalel Drusila uso, akam tilip kemin, Drusila uyo Juda kayaak unang; Feliks ayo weng kola soldiya ayo Pol dibii-tal daaliple, Yesus ami lak duu-yaamin kaami sang kaata bakala-una-bala weng san-kaama ko.
ACT 24:25 Pol ayo ban kemin dinim kukup tambal tabuumin sang so, aket tambal fukun-bam, kukup mafak aket kaa, kela-laamin kaami sang so, God ayo alik imi talalu itafii-bam, yam-bak-saanokoma kaami sang so, kiita talalu ifi-daka-daa bakayilale, Feliks ayo suun-daa boko-lomda: Kulaata tam-baali unabap kemin, din bom ilawa, bom-ilomdila, nami ok ayo disa kelu kala, kala-somdila kawu, soldiya iyo weng kuyiliya, maso ma tam-tal-daaliwa, kapyo kaami sang kaata maso ma bakap-nan o, aka ko.
ACT 24:26 Feliks ami aket fukuna kaali, Pol ayo moni ma maaklo kup-naya, til-daalila unak o, kal-bom fen-bamdala, suunkup soldiya imi bokoya dap-tal-daalip ayo God ami weng bokola bokola kema. Lale,
ACT 24:27 bombii, wasital alep kiiyo disa kelipla, Posias Festus ata Feliks ami abiin ayo kuluula, kelaya kabaku, Feliks ayo kanoliya, Juda iyo nami fiyaap duu-bam, nami tong kaata kulaalip Rom unuk o, kala-lomda, Pol ayo kalabus am kaptamu kambola bom-balaya, Feliks ayo abip Sisaria kela atin una ko.
ACT 25:1 Provins kamok diilim Festus ali din Provins Judiya din aba-lomdi, nami ok ayo kufolon o, kalaya, tal Sisaria kawu biile, am asuumano kelaya, kulaa kela met Jerusalam unale,
ACT 25:2 awem tunum pris imi kamok kamok iso, Juda imi kamok kamok kiiso, iyo tal Pol ami sang ayo Festus ami bokola-lomdip: Kano-lomda ban kesa no, kemip. Kemin, kiimi aket fununin kaa, Nuli liip kawu kutii-lom, Pol ayo aalum o, kala-lomdip, Festus ami weng uyo dukum-kup bokola-lomdip: Numi kamokim o! Kabi numi dong dokoya-lomdap tunum kaali, dabaalap tilnet Jerusalam talaya, kot kamaalum o, akipla,
ACT 25:4 Festus asiik imi weng ayo maan tiiya-lomda: Pol kaa Sisaria kalawu sok deduulip tiinsa kemin, nali nakal mepso asuk toop Sisaria unokomi. Kemin,
ACT 25:5 kipni kamok kamok kii, yim-baalip naso nikil maakup toop Sisaria itamupla, Tunum kaa ban ke tal-unen-umba namti, iyo kaami sang ayo bakap-nin o, yaka ko.
ACT 25:6 Festus ayo Jerusalam kawu bii, am woklungkal e nakalkal e kelaya, kulaa kela toop Sisaria kawu, se, sintam tam kot kemin am tiinala, soldiya imi weng kuya-lomda: Pol ayo dibii-tilin o, kala bokoyilaya,
ACT 25:7 Pol ayo tal atamaya, Juda kayaak Jerusalam kambola tiltoop talbip iyo, iip tolna tolna ke-bamdip, kukup mafak yaapkan kaami kalan kaata an-dalaalip. Lale, imi weng miit ayo dotu bokolipla, Festus ayo weng sana yi, Ti fan tituun weng bakabip kalin disa kela ko.
ACT 25:8 Kulaa, Pol asiik imi an-dalaalip kaayo, asiik maan tii-lom bokoya ko: Nali Juda nulmi lo aye, nulmi lotu am diilim aa, Rom kasel ipni King Sisa ami lo kaa be, kaa ma kuyang saak tiiwa-lomdi, ban wakan-umbi disa, kalala, Festus akal utamaya, Faneng bakaba kala kala-lomda le,
ACT 25:9 Festus ami aket fukuna kaali, mafek mafek ma kanolila, Juda kasel iyo nami fiyaap duup-nin o, kala-lom Pol ami bokola-lomda: Kabi Jerusalam unon o, kala kanubap ema? unon o, kalap kulaali, kuno met Jerusalam un-ilomdap, kapni weng ayo bakap-nim-balap, talalu weng san-kaa-bamdi, titam kuku-lomdi lek tiilon o, akaya,
ACT 25:10 Pol asiik bokola: Daa! Am kaltam tolbi kaali, Rom imi weng talalmin am ale, nam-kuku-bam weng san-kaabap kapkal Rom imi provins kamok diilim kemin, kulaa tolbi kulaakal ti yaap kemin, kapkal nali dotu nitamawa, Juda kayaak imi mafek mafek ma nayo ban keyasi disa nakap.
ACT 25:11 Nali ban kemin tunum keliya, mafek mafek ma ban kelila nitam-ilomdap umi kalan kaata, yaap keyu aalip taanak o, nakap kulaali, kuno kep-nan kalokomi dinim. Kemin, soldiya bokoyawa, nelalip taa. La, kaa bakap-nambip kaali, kasen-foko weng kutaldak nami diim tikibip namti, Rom kasel kipni lo uyo boko-lomdu: Tunum dok kanolin kapta kanolin tunum ayo dabaalip almi waasi imi sikil diim abemin disa yo! kalsu te! Kemin, kuno kep-nap bom ilila, bii nam-baalap kapni abip dukum Rom din-ilomdi, King Sisa alta nam-bak-molak o, kalbi, kala-lom, Pol ayo kanum bakama ko.
ACT 25:12 Festus asiik almi dong dakaalin tunum so, takenbile, Pol ami bokola-lomda: Kaltapta boko-lomdap: Sisa alalta nam-bak-molak o, kalap kemin, nali tam-baali ami bombe unokomap o, aka ko.
ACT 25:13 Festus ayo abip Sisaria kawu bii ilanalala, King Agripa so, Benaisi so, nikim iyo din Festus ami weng umolum o, kala-lomdip, tal Sisaria aba-lomdip,
ACT 25:14 kawu sin-sin-kemalipla, kulaali Festus ayo Pol ami sang uyo king kaami bokola ko: Siin kaami provins kamok diilim Feliks ayo tunum ma kalabus am kaptamu kela tabanaya bombe kemin, kaali Pol ata kemin,
ACT 25:15 nali met Jerusalam kawu bom ilsi kaali, awem tunum pris imi kamok kamok iso, Juda imi kamok kamok iso, iyo tal ami sang kaata ku-fatap-daa bokop-na-lomdip: Kapta soldiya imi bokoyapla, aalin o! ayo aalip saaknak o, kalipla,
ACT 25:16 nasiik bokoya-lomdi: Rom kasel imi im-bak saanin tunum numi kukup kaali, tunum kaa kasen-foko: Ayo kala kuyup numi soldiya ita aalip saak-nokoma disa. Kemin, kamosinim kaa, nuli tunum dabak-saanbip ayo, kelup tal an-dalaabip imi tiin diim kulu tola-bomda, almi kukup kanoba ami sang kaata talalu bokoyilaya, weng seluwa yi, Ami kukup kaali, atin ti mafak kala, kalalupla, malo dabak-mo dabaalup, yak numi soldiya imi sikil diim abamna aalokomip o, kali ko.
ACT 25:17 Kemin, ili kala tal itamupla, fiyaap duu-bombii, luuknin disa; kula sintam kot am tam tiinile, weng kuyip soldiya ita Pol ayo dibii-tilipla,
ACT 25:18 nami utabi, Ayo ami ban kemin ayo dukum tap o, kalbi. Yale, dabak-saanbip ili tola kanolin kabak-ami ban kemin kaami kalan ma an-dalaka-bam bokonbip disa. Kemin,
ACT 25:19 ilimi lotu kemin umi kukup kaami kalan so, tunum ma Yesus kaami saakase kabak-ami kalan so, kiita Pol so, weng aal dikibip, Pol ali boko-lomda: Ali bombe no, ken-umba. Kemin,
ACT 25:20 nami aket yaapkan ayo fukun-bili, dok kano-somdila, mafek mafek kanolin sang kaa talalu uta-mokomi disa kala kalalila, ayo dik-daala bokola-lomdi: Kabi Jerusalam unon o kalbap elile? Daa ye? Unon o, kalap kulaali, kuno met Jerusalam kawu kapni weng ayo bakap-nam-balawa, talalu weng san-kaa-bam, titam kuku-lom tam-bak-molon o, kalile,
ACT 25:21 Pol ayo bokop-na-lomda: Kabi kep-nap kalabus am kaptamu bom-ilomdi kawu nam-baalap, Rom din-ilomdi, King Sisa alalta, lekbi nam-bak-molak o, kalaya, kulaa soldiya iyo bokoya-lomdi: Na! dibii-yang kalabus am daalip bom ilala, dabaali Sisa ami be kawu din unaya, alalta dabak-molak o, kalbi no kala-lomda Festus ayo bakalala, kulaa
ACT 25:22 Agripa asiik Festus ayo bokola-lomda: Nasiik ami weng ayo, weng selon o, kala-lomda, ayo bokola ko: Sabi kawu ami weng kaa, weng selokomap kayi! aka ko.
ACT 25:23 Silip sintam Agripa so, Benaisi so, nikim iyo ilim tambal sole, kiit kon so, kaayo mikibi tal tiinipla, ilmi tunum ita kukup tambal tambal ayo king ami kukaalipla, nikim iso, soldiya imi kamok kamok iso, abip kaptam-ami tunum kamok kamok kiiso, iyo weng talalmin am tam uniwa, Festus ayo soldiya iyo bokoya Pol ayo dap-tal-daaliwa,
ACT 25:24 Festus ayo bokola ko: King Agripa kapso, alik kipso, kipyo tunum atafiibip kalawaali, Juda kasel alik Jerusalam kawu ilin kiiso, kalawu ilin iso, iyo naan-bam bokop-na-lomdip: Kelap, ilin daa; aalan o, nakan-kaabip. Yale,
ACT 25:25 nali utami yi, Ami ban kemin kaa ma bombe keluya, aalip yaap keyokomu disa kala, kali kemin, alalta bokop-na-lom: Kapyo kuno kep-nap, bom ilila ilom kawu nam-baalap, Rom undila, King Sisa alalta nam-bak-molak o, kala kanum bokola utamdila, tam-baali unokomap kalbi. Lale,
ACT 25:26 nali tunum kalawaami kukup mafek kaa ma dotu utabi keluya, kaami sang ayo nami kamokim Sisa ami dola kolokomi daa. Kemin, kanola nali weng kuyi tunum kalawa dibii King Agripa kapso, alik kipso, kipni diim tiilip, nuyo dik-dakaan-bulupya, bokoyilaya, weng sandupla, nayo weng ma dola kolon o, kalalila, weng kuyili dap-tal-daalip.
ACT 25:27 Kemin, kabak kalok ata naa kalolip: Nayo utami yi, Tunum sok de-dubii kaayo, dabaali yak numi kamokim ami diim unemin, almi ban kemin kaami sang ayo dolnin disa ke-lom tunum-kup dabaali unemin kaa, mafak o, kalalaya, Festus ayo kanum bakama ko.
ACT 26:1 Kemin, King Agripa ayo Pol ami bokola-lomda: Tambal, kapni kukup ami sang ayo bakap-nan aa! akaya, kula Pol ayo sikil kufo-bakayila ko.
ACT 26:2 King Agripa kapyo, nali yaap ke kamala ayo kaltapni tiin diim kulu tola-lomdi, Juda kasel alik iyo kala bakap-nam-bamdip: Kano-lomdap ban ukduu-salap o, kem-tabasip kaami sang kaayo, bokop-tokomi. Kemin,
ACT 26:3 kabak-ami miit kaali, Juda numi kukup so, numi weng aal dikin-umbup so, kulaa alik dotu utamsap. Kemin, nami weng kala baka-mokomi kaa daal daap-tiip-tamu dinim. Kemin, nak-tunum, kabi dotu weng san-bom-balawa yi!
ACT 26:4 Juda alik yakal nitamsip, Sawaayak kaa nali man katip bomdila, Juda kasel iso, Jerusalam kawu bomdila, bom bii fasuulile, nami kukup ayo atafiimsip.
ACT 26:5 Juda imi God ami win kufumin kaami miit yaapkan. La, Juda numi malii Falosi iyo titil-fak-daa-lomdip, ilmi God ami lak duu-yaamin kukup ayo dukum-kup fukuu-lomdip ita ita keliwa, miit malo ma iyo kabaak banen-umbip. Nali Falosi ke-bom biliya, nitafiin-umbip. Kemin, yakal bokolalip: Ayo, yakal bokop-talalip taa!
ACT 26:6 Kemin, sawaalak kaali, God ali nulumi awal imi bokoya-lomda: Bom-bii-lom kaa kaata kanu-mokomi no, kala weng kutiisa, namti kamala kulu nayo utamila, ali fan kanolokoma kala kalalila, fen-tabasi. Kemin, kaami kalan kaata, iyo taba-lom nam-tal-daalip kala tola-bilila, kapyo, dotu nitafii-bamdap, nam-bak-molokomap. Lale,
ACT 26:7 Juda kasel nulmi tunum miit almi-kup talangkal yakal ti kanola kutamiip so, taap so, iyo suunkup God ami naan-bamdip: God ali fan kanolokoma kala kalalipla, fen-unbip. Kemin, nakal ti kanola kabak-ata kanu-biliya, Juda iyo taba-bom nam-bak-saan-umbip te! King kapkal, ti kabak utam-taman!
ACT 26:8 Juda ibi kanimin o, kalalipla, aket ayo talalu fanang daaliwa yi, God ayo awil-fakal imi weng kuka-daa-lomda, taansip iyo im-fola tam tiinokomip kaa, ti faneng uu! kem-yaabip disa?
ACT 26:9 Aa ti kano siin kaa nami aket fukunin ayo, Kukup mafak yaapkan uyo nuu-bam, Kristen unang tunum imi kukaayim-biliya, kiimi Nasaret kayaak Yesus ami lak duu-yaamin ayo, kulaalip ami win ayo disa keluk o, kem-tal-unemsi.
ACT 26:10 Kemin, nali Jerusalam kawu kanu-bam biliya, awem tunum o, kala pris imi kamok kamok ita ulduu ok ayo kup-nip, nali unuk tabuulin tunum imi bokoyilila, iyo din Yesus ami aket kolin unang tunum yaapkan iyo sok de-yimbii-tal kalabus am daka-bilila, kamok kamok iyo boko-lomdip: Anulip taanin o, kalum e! Nakal ti boko-lomdi: Kuno anulip saaknik o, yakan-kaamsi. Kemin,
ACT 26:11 nali suunkup lotu am maakup maakup iyo din tal-une-bamdi, iyo kanuyin-biliya, boko-lomdip: Yesus kaa, God ata dabaala tilin disa; kulaa alta disa kulu talse. Kemin, kelin o! kala-lomdi, nayo imi aket atul-kup kukaayim-bamdi, kukup mafak ayo kukaayila-tal-une-biliya, iyo sak funbi bilin abip dukum samaan samaan unip ayo dikiya-tal-une-bisi no, kala Pol ayo King Agripa ami kanum bakala ko.
ACT 26:12 Pol ayo King Agripa ami bokola-lomda: Ni kanum tal-une-biliya, awem tunum pris imi kamok kamok ita ulduubip-kup ok kalawayo kup-nale, sukon ayo dola kup-na nam-baalip din Damaskus uni ko.
ACT 26:13 King kapyo, nali Damaskus unemin liip kawu kutal-fuku una-biliya, atan tal dibimnule, kulu falala-kalin dukum ma abiil tikiin kaptamu falala-kalin dukum ma kulaala tal nasole, tunum-miin alik kaa naso talabup iso, numi diim aba alik falala-kup kalula, utam falala-kalin kaa atan tap kanolin disa; atin ti akal ma.
ACT 26:14 Kemin, alik nuyo lamo daak tawaal diim aba-lomdupla, niyo weng ma weng seliya, Hibru imi weng kaata-kup bokop-na-lomda: Sol kapyo, kabi kanimin o, kala nami kukup mafak-kup kamap-na umbap yoko? Kemin, kau ayo almi yaan ta bina daa-lom tiin molin tunum ami wan bal diim daa-lomda almi yaan bakela angtiil yol kuluu-laaba tap, kabi kau ami kanumin tap ke-balapya, nami weng kuyang saak tiip-nambap kaali, fiitbap kayi! nakaya,
ACT 26:15 nasiik bokola-lomdi: Kamokim, kabi kawanta ni? akile, Kamokim ayo bokop-na-lomda: Nali Yesus nata kemin, nami unang tunum kiimi kukup mafak kukaaya-tal-unen-umbap. Yale,
ACT 26:16 kabi tam tiin yaan ayo dotu tolnan aa! Nali bokop-ta-lomdi: Kapta numi bon tem tunum ke-bomdawa, kulaa natamap kaami sang so, bom biili kukup-ti nita-mokomap kaami sang so, kiita unang tunum imi bakayan o, kalalila tal kukup-ti nitamap. Kemin,
ACT 26:17 nali tam-baali Juda kasel so, unang tunum miit kusnum iso, imi fanang unokomap. Ili taba-lom: Telum o, kalokomip. Lale, nalta kabi dong dokop-tim-bilila, yaap-kup weng kulii-tal-une-mokomap.
ACT 26:18 Tam-baali din-ilomdap, kukuyim-bam bakayim-balapla, kii talalu utamdipya, kutamiip tem bom-bilip, Setaan ata tiin mosa iyo kela tildang falala-kalin diim tilipla, unang tunum nami lak duulin iyo God ata tiin mo bomdaya, imi ban kemin ayo kukan-tiiya-lomda, iyo imbii unang tunum imi aket talalu-yim-bala, tambalsip imi iipyak tem tiilaya, nikil ilin o, kalaliya, tam-baali unokomap o, kala-lomda Kamokim ayo bokop-nase no, kala Pol ayo King Agripa ami kanum bakaala ko.
ACT 26:19 Pol ayo King Agripa ami bokola-lomda: King Agripa kapyo, nali abiil kaptamu weng ma bokop-na weng sansii kaa, kulaa kelasii disa.
ACT 26:20 Nali Damaskus aba, Jerusalam aba, kem yakyak din Provins Judiya kaptam-ami abip ma ma aba tunum miit kusnum imi abip kaayo, din yak-bam bokoya-lomdi: Ibi kaltipni ban kemin ayo kambola kipni aket ayo fal-siki-lom God ami kola-lomdip, kukup tambal tangbal kaata kutal-fukulipla, kayak kayak iyo itamiwa yi, Fan aket fal-sikibip kala kalin o, yakan-kaa-bam ken-umbi. Kemin,
ACT 26:21 kanum-umbi kabak-ami kalan kaata, Juda iyo lotu am diilim kaptamu nam-tal-fuku-lomdip, nelip taanakin. Yale,
ACT 26:22 God ata dong dakaap-na tabasa kemin, kala bombii. Kula tola-lomdi, tituun eng ayo kufoli; win soyal so, win dinim so, alik maakup iyo God ami kanu-bala, utamsi kaami sang bakayi. Kemin, nali weng uyo weng kusnum ma bakayimbi disa; ti sawaayak God ami profet weng ku-fatap-dakamin tunum so, Moses so, ili boko-lomdip: God kaa kanolokoma kayi! kalsip kaata, asuk nakal ti kaata, bakayimbi. Kemin ale,
ACT 26:23 ili boko-lomdip: Bii-lom kaali, God ami Ulduula Tiltam Kamokim Kesa Tunum ayo angtiil yol ayo kuluu, taan-ilomdala, asiik tam tiinokoma le, unang tunum yakal ti kano tam tiinokomip. Kemin, ata taba God ami unang tunum talalu-yimulala, yaap ke-lokomip kaami sang uyo Juda kasel so, miit kusnum iso, imi bakayin-balaya, falala-kalin diim talokomip o, kalsip kayi! kala Pol ayo King Agripa ami kanum bakaala ko.
ACT 26:24 Pol ami weng ayo kanum bakamale, Festus ayo Pol ami dukum-kup bokola-lomda: Pol kabi babon daasap kawi! kapni skul dukum kaata, kebi dik-daa kuluu-lom utamsap kuuta taba-lomdu, kapni aket fukunin ayo ku-mafak-daap-ta-buluya, kabi babon-bamdap bakabap te! akaya,
ACT 26:25 Pol asiik bokola: Provins kamok diilim Festus kapyo, nali babon-bamdila, bakabi disa; nami aket kaa yaap-kup fukun-bamdi weng tambal-kup tituun bakabi.
ACT 26:26 Mafek mafek Yesus ami diim abasuu kaali, maaklo tiltam abasuu disa; fatap-kup tiltam tabasuu kemin, talalu utamiya, mep King Agripa ali mafek mafek alik kaa talalu utamsa kala, kalaliya, suunin disa keliya, King ami diim kawu ami sang ayo bakayimbi no, kalale,
ACT 26:27 Pol ayo tiyak daa king ami atam bokola-lomda: King Agripa kabi, sawaayak God ami profet weng ku-fatap-dakamin tunum imi weng bokosip kaali, ti faneng bokosip o, kebap ema? Nakal titamsi kemin, kabi faneng bokosip o, kalbap o, kala-lomda, Pol ayo kanum bokola.
ACT 26:28 Kemin, Agripa ayo Pol ami aban-den-bam bokola-lomda: Kamala kulu kapni aket fukunbap kaa, weng bakan-siliya, ayo abiltap tiltam Kristen kelak o, nakalapla, bakabap o? akaya,
ACT 26:29 Pol asiik bokola-lomda: Abiltap kamala tiltam Kristen ke-lokomap so, aa ilom tiltam Kristen ke-lokomap kakal, liip alep kulaakal awem dinim yaap o; nakal beten ke-bam, God beten kamaan-biliya, kapkal aa, nami weng alik kaa weng san-kaabip iso, ibi tiltam naltap keliwa, Yesus ami lak duulin o, kalaliya, God ami beten kamaanbi. Yale, ita taba-lom numi sen sok ta dep-nanbip tap kelin o, kalbi disa, yaka ko.
ACT 26:30 Kanum bokolaya kulu, King so, provins kamok diilim so, Benaisi uso, aa tunum unang iso, tiinaabip iso, iyo tam tola
ACT 26:31 bokolip: Tunum kalawaali ban ma ukduuba keluya, yaap kuno aalokomip disa le aa, sok de-duulokomip dinim o, kala bakan-una-tala kemipla,
ACT 26:32 Agripa ayo Festus ami bokola-lomda: Tunum kalawa siin kawu bokop-ta-lomda: Kabi kep-nap bom-ilila ilom kawu nam-baalap bilin iltipni abip diil Rom unila, King Sisa alalta nam-bak-molak o, kalsa disa dinam, yaap taldaa dabaalup. Lale, kanum bokose kemin o, kala ko.
ACT 27:1 Provins kamok diilim Festus ayo aket fukunbi: Pol so, tunum kusnum ma sok de-yimusip iso, iyo fokola sip tem abalip yakyak bilin Provins Itali abalip Rom unin o, kala-lomda, almi soldiya imi bokoyila, sok de-yimusip iyo alik fokola yak Julias ami sikil diim abip bokola-lomdip: Mep tunum kii kapta tiin mo imbiilap unan o, akipla, Julias ayo Rom kasel imi King Sisa ami soldiya kemin Sisa ami weng kulii-una-tala-kemin tunum imi kamokim ata ko.
ACT 27:2 Kemin, sip ma abip Adramitium ayo kelalu, tal Sisaria kawu ilanalu yak Provins Esia kaptam-ami abip abip kawu yakyak unon o, kalbu kala kalale, sok de-yimusip kiiso aa, Luk naso, Provins Masedonia abip Tesalonaika kayaak Aristakus aso, nuyo yak sip tem unupla,
ACT 27:3 yakyak bilin iip kawu sindupla, din abip Saidon abalupla, Julias ayo Pol ami kukup ma tambal kamaan-bam bokola ko: Yaap kemin, kabi sip tem ayo kelalap din kaltapni kaptum kusal itamapla, tangbal-kup tiin molip saan o, akaya,
ACT 27:4 din itamda talaya, Saidon ayo kelalupla, inim taba-lomda sip umi liip ayo bak-daalaya, abiltap im-tama unomu disa ke-buluya, kula nuyo yang malii dulul taleba liip ayo kela yang Saiprus lo ami balang diim kabang liip abalupla din
ACT 27:5 Provins Silisia ayo akaala wan din yol ok dukum ami daang kun diim aba yak aba din Provins Pamfilia ayo akaala din unuple, Provins Lisia umi abip Maira kawu abaluple,
ACT 27:6 sip tem ayo kela soldiya imi tiin molin ayo sip kusnum ma kuluulaya, sip ayo abip Aleksandria akaala tal Maira kawu ilana-somdula, Provins Itali unon o, kalbu kaa kalale, nuyo yak kaptam unup. Maira ayo kela unup ko.
ACT 27:7 Inim ayo asuk taba-lom sip umi liip uyo bak-daala, sip kuu akolkup una-buluya, kwin! ti fiita yakyak un-bom, sin yakyak wan tal abip Nidas mepso molup. Lale, inim taba sip unokin liip ayo bak-dalala, unokin dinim keluwa; kulaa fal-siki tal balang tem kabang liip yak aba yak ok daang iip abalu yol ok kumun kaami diim kaptam-ami tawaal dukum Krit umi tawaal anung Salmone ayo akaalale, Krit kaptam-ami balang tem kabang liip fiita yakyak tal sip baan diim tangbal ma wan tal kawu kamolu; kemin kaali abip dukum ma Lasea bokon ami mepso kawu bombe.
ACT 27:9 Kemin, nuyo fiyaap-kup yakyak ken-umbi-lom am yaapkan kelupla, Juda kasel imi ima falamin am ayo daan tal bana, Pol ayo utama yi, Kulaata inim so, ok so, namti dukumna kala kalale, kulu ma nuyo ok unokomup ema yo? kalalaya, imi weng bokoya:
ACT 27:10 Tunum kipyo! nali utamila, Sip baan tambal kalawa kelalup yakyak unabup namti, sip so, bung so, iyo mafak-nokomip aye, ukat-mo ok tem unolup e, kal-bom ale, ati nokol yelamu ne? anulu saak-namup e? kal-bom kebi. Kemin, kaa kela unemin disa yo, kala. Lale,
ACT 27:11 soldiya imi tiin molin ayo Pol ami weng ayo kuyang saak tela-lomda, sip muk fukulin tunum so, sip kayak iso, alep imi weng uta weng sanala,
ACT 27:12 tunum yaapkan iyo aket fuku-daaliwa yi, Inim dukum so, ati so, tiltam aba tal-unbu-unbu-ke-buluya unokomup kaali, ti sip umi baan diim kaa yaap keluya, ilokomup disa; kemin kela umbiyang abip Finiks kaayo, Provins Krit kawu sip umi baan ma kaa atin tambal kemin, sip ayo kawu ilokomu kaali ti yaap. Sip kuu kawu ilokomu kaa, tambal-kup bom-buluya, inim dukum so, ati so, kaa taba-lom ku-mafak-daalokomu disa kala, kala-lomdip bokolip inim dukum ayo katip so kela namti, nuyo sip baan diim ayo kela din Finiks bom-buluwa, inim dukum so, ati so, uyo kanubi dulumnala yo, kala kanum bokolip ko.
ACT 27:13 Inim katip fuunba kulaa yaap sip uyo wan din Finiks molokomu no kalalip sip umi kulaak mo kutal-fukulu tola-laamin mafek mafek kufolip tiltam tulule, sip uyo im-tamalu yak Provins Krit ami ok balang diim mepso yak aba kemula, tawaal muk ta inim dukum ayo katiilu. Katale,
ACT 27:14 ilanin tap keluple, kulu inim atin ti aalap dukum namti tawaal diim kulu tal-ilomda,
ACT 27:15 sip uyo kuluu kulaala umbu-talbu-ke-bulula, babon bii kulaaluya, sip uyo fal-sikilipya, ku inim taleba ami daang ukuwa, sip uyo inim ta kulii-una. Kemin,
ACT 27:16 din abaluwa, yol ok daang diim tawaal katip ma Kauda ami balang tem kabang liip yang kaba um-bomduwa, bot katip ma sip dukum kuumi diim kabaaku sok bukubip uyo fiit-bam sisiibi kulaalup tiltam sip tiiluple,
ACT 27:17 iyo fanang daaliwa yi, Sip kalawaali dakela-tabokomu nema yo? kala-lomdip, sok kuluu-lom sip umi balang malii ayo sok delip nek kalale, kulaa aket fukun-daa: Tawaal Afrika kabak-ami ok dinin diim kaa mafak kemin, sip ayo yak diin-ilomdu yelamu no, kala suun-daa-lomdip sip umi ilim dukum o, kala sel ayo dul-duu-lomdip, kewip inim ta sip uyo akolkup kulii una-buluya unup ko.
ACT 27:18 Kula sindupla, inim so, ok daang so, uta taba-lom sip uyo dukum-kup kulaalu unbu-talbu-ke-buluya, kulu iyo bung kaayo fokolip ok une-balala, kelalipla,
ACT 27:19 am asuumano diim kulaata, sip umi sok aye, sel aa, kuk diimin ami as aye, ayo ilmi sikil ta fokolip ok unu kewiwa, sip uyo fongnu le,
ACT 27:20 ati aalap dukum ayo suunkup fufu-balaya, ibin ta tilnong mo kelala, nuyo dok kano atan so, wakalkan so, imi liip tal-unebip kii talalu atamin disa ke-lom, babon tal-unebi am yaapkan kelupla, kulaali numi yaap unokin o, kalbup namti kuyaku ditang kalule kulaalup ko.
ACT 27:21 Ima kaa ma inolip disa, kem-talan-umbipla, Pol ayo ilmi iipyak tem kulu tola bokola: Nikil kibi siin nami weng bokoyi kep-na-lomdip, Provins Krit kelalip tal-silip disa dinam, mafek mafek kaa ma kulaalip ok umba dinim ale, ma buusa keba disa; yale, nikil iltipta nami weng kuyang saak tiip-nipna talbip namti, kulu tiltam tabu utabip.
ACT 27:22 Kanun um-bom kipni tunum kaa ma aalu taanokoma disa; ti sip uta-kup dekela-tabokomu. Kemin, kabak-ata bokoyiliya, aket tem ayo dakat daak abiin tiyuk o, kala bokoyi.
ACT 27:23 Nali God ami tunum kaayu, beten kamaala-yaabi kemin, kamala kutamiip kulu ami ensel ata tal nalmi diim kulu tola
ACT 27:24 bokop-na-lomda: Pol kabi suunin disa. Yaap din Sisa ami tiin diim kawu tolnawa, tam-bak-molokoma. Kemin, God ali kapni win diim o, kala-lomda, tunum alik kapso, unabip iyo kukup tambal kuya dong dokoyila yaap-nokomip kaa utam taman o, kala bokop-namba. Kemin,
ACT 27:25 nali utamila, God ali nami bokop-namba kaa, ti fan kanolokoma kala kalbi. Kemin, nikil kibi suunin daa; balili-kup kalin o.
ACT 27:26 La, sip kuuli, imbii yak ok daang diim tawaal ma kaa daaluya balang tem kawu diinokomu kayi! kala kanum bakayila ko.
ACT 27:27 Kemin, inim dukum fuun-bala bii, am almi-kup sin-yaabi am matumkal (14) kelaya, ami kutamiip kulu inim ta sip uyo kulii-una-bala, nuyo yol ok Adria kumun kawu liip una-bulup, kutamiip iipyak fokolaya kulu, sip umi okok kemin tunum namti utamiwa yi, Tildak tawaal mepso tildak unup ema yo? kala-lomdip,
ACT 27:28 ok kumun kulaalip daak unu siksimin sok ayo tuum buku kulaalip daak ok tem unuya, kuluu utam talaalip, kabaak-ami liip kaali 40 mita kela kalale, yanglo so kaata, asuk sok binalip daak una iyo kuluu atam talaalip, kabaak-ami liip kaata, 30 mita kelu kalalipla,
ACT 27:29 tildak dalsiim tulup kulaa sip yang tuum tem inang diin-ilom yelama no kala-lomdip, suun-daa-lom toop sip umi olduuk tem kawu toop aba-lomdip, sip kutal-fukulu tola-yaamin umi mafek mafek angka atalingkal iyo fokolip daak ok tem un kutal-fukulu tolnula iyo aman duluum-bamdip: Am kabi baan daanawa, ok balang atamdup yaap-num o, kemip. Kemin,
ACT 27:30 sip okok kemin iyo sip kela yak banum o, kala-lom, kasen-foko-lomdip, Nuli yang sip umi dabom tem ilom sip kutal-fukulu tola-laamin mafek mafek kusnum ma fokolup daak ok tem unokoma no kala-lom, bot katipkan uyo sok buku kulaalip daak ok daang diim abamnula,
ACT 27:31 Pol ayo soldiya so, imi tiin molin iso, imi bokoya-lomda: Sip umi okok kemin tunum kalawiili sip kalumi fukulokomip disa namti, kaa dok kano ibi yaap-nokomip disa yo! yakale,
ACT 27:32 soldiya iyo bot sok bak-duulip bot uyo kewip disa kulu unu ko.
ACT 27:33 Kemin, am kel foko kem-salale, Pol ayo dukum-kup nikil alik imi bokoya-lomda: Ibi aket yaapkan fukun-bamdip: Kwin! kaa ti yela saak-nulup e yaap-nulup e? kal-bomdiwa, ima kaa inam-nolip disa kem-tal-bi-lomdip am matumkal (14) kelip. Lale,
ACT 27:34 ibi saak-nokomip disa le, aa katip so ma mafak-nokomip disa; kemin ibi ima inin aa! Ima inam-nokomip ayo yam-titil-diilula, titil-fokolokomip o, yaka-lomda,
ACT 27:35 almi ima bret ma kuluuba-kup; alik imi tiin diim kulu God ami yaap ke yo, aka-lomda, lo kutii inaya,
ACT 27:36 atamdipla, nikil imi aket tem ayo tambal ma keyulula, yakal ima inip. Kemin,
ACT 27:37 sip kaptam-ami tunum tabasup kaali, 276 nuta tabasup.
ACT 27:38 Kemin, nikil iyo imbi, inaliwa, sip uyo fong-alom, imbii yak ok balang daaluk o, kalalipla, ilmi ima wiit ayo fokolip ok unu ko.
ACT 27:39 Am daan atan tik-daalu, sip okok kemin iyo tawaal kulaa atamip. Lale, siin kaa ma atamsip daa, tiin kulaalip yak ok balang abamnu, utam talaliwa yi, (Yol ok ayo faka-bamda tuum muuk alinsa ayo dap kabak-kabak daa kela, iip ding ma an-kulii kamet bansa kemin kaa) ok dinin diim tambal ma be nema yo? kala sip uyo kuyak met ok dinin diim kaa daalum o, kala-lomdip,
ACT 27:40 sip umi kutal-fuku-yaamin angka ami sok ayo bukulip disa ok tem kawu bom-bulule, sip umi duuk sok desip ayo baa-lom kutal-fuku-som, sel katip ma kutam di kelip yak unup. Lale, inim ayo taba-lom imbii yak balang tem daalon o, kala unan-suluya,
ACT 27:41 sip uyo yak ok balang diim mepso kulu diin-ilom tolnule, sip umi dabom tem ayo nakat-kala-lomdu diinuya, ok ala una-tala-ke-bamda, sip kuuyo ok ta fakliik-faklaak-bamda dakela kela ko.
ACT 27:42 Kanoluya, soldiya imi aket ayo fukun-ilomdip: Tunum sok de-yimusup kii ma daak ok daang aba ok falan yak aba ukadaa unokomip ema? kala alik anulup taanik o, kalip. Katale,
ACT 27:43 soldiya imi tiin molin ayo Pol ami dong dokola-lomdi dil molila, kiimi kanolin aket fukunbip, ibi kaayo kulaalin o, kala-lomda fotaba bokoya-lomda: Ibi kanta ok falamin tunum ibi ma bom-bilip namti, kipsiik unfoko daak ok daang abalip falan yak balang uniple,
ACT 27:44 malo ok falamin disa, ipta as tiim aye, sip dakela tabu umi daam kaata ma kuluu-lomdip, kutal-fuku-bilip, ok ta as so, tunum so, imbii yak balang daa daa kelak o, yakaya, kula kano-lomdup, yak ok balang diim aba-lom nuyo alik aapnup ko.
ACT 28:1 Yaap kelupla, kulaali weng sanup yi, Tildak ok daang diim umi tawaal ok balang diim abup kaali, boko-lomdip Malta yo, ken-umbip kaa kabamnup. Kemin,
ACT 28:2 tawaal kaptam-ami unang tunum iyo ti numi kukup tambal kukuyin-bilipla, wom-man-bomda diil so ke-balala, kemin, wing kulii-tal as kuyak daa-lom, im-tal-daalip diil fuu-bam ilupla,
ACT 28:3 Pol ayo yak as kusnum ma foko kulii-tal kuyak wing tiil tiilaya, kabaaku inap mafak ma as kulii-tal kuyak daala ami tem kabaaku inap kaaso kulii-tal tiilala, kiin-bam wing mamin kelala, bal daang mo tildak Pol sikil bekelaya,
ACT 28:4 bokon kaptam-ami unang tunum iyo atamipla, Inap ta Pol ami sikil bakelala, kulaak diila kala, kala-lomdip bokolip ko: U faneng tunum kalawaali tunum yemin tunum namti kulabe nema? Kemin, yol ok kumun tem kawu taanakin. Lale, inap ta aala kemin, kaata ti yaap ma saak-nokoma no, kem-una-tala-kemip.
ACT 28:5 Lale, Pol ayo inap kaami faldang mo dabaala dayak as kiinba tem unala, aala, kaa mafak-alin ma kuluulama disa kelale,
ACT 28:6 unang tunum iyo Pol atam ilupya, abang kaayo fasuula ne? abiltap lamo daak aba saakna ne? kalum o, kala atafii-bam bii kebip. Lale, mafek mafek mafak ma ami angtiil diim abomu dinim kelu kala, kalalipla, aket fal-siki asuk bokolip ko: Kwin! tunum kalawaa numi sinik aman dakaala-yaabup namti kula bombe nema yo? kemip ko.
ACT 28:7 Ok daang diim ami tawaal kaptam kayaak tunum kamokim ami win kaa Publius kemin, nuli tal ami bokon mepso kulu tulupla, ata imbii tam almi am daa-lomda tambal tambal ma kamayim-bamda, tiin mola bii am asuumano keluwa,
ACT 28:8 Publius ami aalap ayo angtiil aalu mafak bombe, ami mafak-alin kaali, angtiil mamin kutelale, ol ilem duu-bam ke-balaya, Pol tal atam God beten kamaan-bam, sikil kuyak tii nola yaapnala,
ACT 28:9 ok daang iip bokon kaptam kasel kiimi unang tunum mafak-alin umu-bilip yakal weng saniwa, dap-talalula yaapna no, kalip kayi! kala-lomdip tal atamiple, yam-talal-kaa-bala,
ACT 28:10 asuk ita taba-lom mafek mafek yaapkan iyo numi masiim kukaayim-bilip, biile asuk keya sip tem abalup unum o, kalupla, numi mafek mafek disa kebu kaalile, isiik ilmi mafek mafek ayo kutal aba tam sip tem tiiya tiiya keyip ko.
ACT 28:11 Siin kawu sip ma Isip bokon abip Aleksandria kawu kela tal ok daang kun diim bokon tawaal Malta kawu buluya, inim so, ati dukum so, tiltam ba un-un-ke-buluya, sip dabom bumet bal ami diim kaa as taa-lomdip: Rom kasel imi god diil Sus ami man tunum awaang alep imi sinik kaata dotusip kemin, sinik alep imi aman dakayila-yaabip. Kemin, nuli kawu bii kayoop asuumano duk-duulupla, sip kayaak inim katip kela kemin unum o, kalipla, fan yak sip tem unupla,
ACT 28:12 kela yakyak bilin Sirakyus din aba kawu bii am asuumano ke,
ACT 28:13 kulaa kela yak aba met Regium kawu sulup, sintam inim ayo daang tem lo kawu tulula, yak aba din iip kawu sindupya, din abip Puteoli abale,
ACT 28:14 sip uyo kela yak Kristen itamupya iyo boko-lomdip: Ibi kulawu nuso biilipla unin o, kaliwa kawu, iso sin-yaabi am fetkal kelupla, keyila yaan diim liip yakyak tam Rom unup.
ACT 28:15 Kemin, nuyo kanola una-bulupla, Rom kaptam-ami Kristen unang tunum ili weng saniwa yi, Pol nikil iyo talabip kayi! kalipla din liip imbakan unuwa tilin o, kalalip, abip kela fen-tal-bom, malo ma tal abip ma tilip. Kemin, abip kaptam-ami win kaa: Tunum fatal imi tal kaptam sin-unemin am asuumano imi abip o, ken-umbip. Kemin kawu, bom fen-balale, kuno malo ma ita keya tal Apias imi ima saanin baan diim kawu tal itamip, Pol ayo itamda, God kabi yaap ke yo, kala-lom, ami aket tem ayo tambal ma keluya,
ACT 28:16 nikil nuyo tal Rom tulupla, Rom gavman ayo yaap o, kalaya, abip kayaak ma almi am kaa Pol ami kela kaptamu bomdaya, tal-unemama no, kala-lomdip, soldiya ayo tal Pol tiin mola kema ko.
ACT 28:17 Rom kaptamu bii, am asuumano kelaya, Pol ayo Juda imi tal Rom kaptam bilip imi kamok kamok imi weng umuuya tala-tala-kelipla bokoya ko: Nak-tunum kusal Juda kipyo, nali kukup mafak ma nami nak-tunum kusal Juda kasel kii ma kukaayila-yaabi disa; lale numi awal imi kukup ayo ma kutoop saak tiin-umbi disa. La, nali Jerusalam kawu ilila, nam-tal-fuku-lomdip, nam-baalip yak Rom kayaak imi sikil diim abamnila,
ACT 28:18 Rom kayaak imi provins kamok diilim ata kot kamap-nam-bam nitamiwa yi, Ami ban kelakin kaa ma bom buu tabuk aalokomup dinim o, naka-lomdip, taldaa dabaalip unak! naka-silip.
ACT 28:19 La, Juda imi kamok kamok ita taba-lom kiyap imi bokoya-lomdip: Daa yo. Kaa tildaa dabaa-laamin daa yo! yaka-lomdip, iluut kuyak daalipla, nayo utami yi, Kiyap kaa nam-baala Juda imi kamok kamok imi sikil diim abi nam-mafak-daalokomip kala, kalaliya, nayo kiyap ami bokola-lomdi: Kapyo kambop-nap ilila, ilom kawu nam-baalap ipni abip dukum Rom kawu uniya, Sisa alta lek bi nam-bak-molak o, kaliya, kula nam-baala talbi. Kemin, kaami miit kaali, nami nak-tunum kusal Juda imi ma im-bak-saanon o, kalalila disa, ilta fiit kuyak daka-mipla, kiyap ami bokolasii.
ACT 28:20 Sawaalak kaali, God ali Israel imi bokoya-lomda: Nami tunum ulduuli tiltam kamokim kesa ayo dabaali tal kipni dong dokoyala tambal ke-lokomip o, kalsa. Kemin, nali God ami Tunum Ulduula Tiltam Kamokim Kesa ami sang kaata, bakayila-tal-unen-umbi. Kemin, kabak-ami kalan kaata sen sok ta kuluu dep-nipla, nami diim kala tiinsa. Kemin, kaami sang kaata bokoyon o, kala-lom kaata, weng kulaali din unula, ipyo tilip kaa bakayimbi no, kala-lomda Pol ayo kanum bakayila ko.
ACT 28:21 Isiik bokolip ko: Kamok kamok Provins Judiya kawu bilip kii, kapni sang ayo sukon ma dola kulaalip tal numi diim tilin daa; le aa naktum kusal Juda talebip ili, tal kapni sang kaa ma bokoyilalip disa; aa weng mafak aye, ma bokop-talalip disa.
ACT 28:22 Kata, nokol utamsup kemin, abip ma ma imi tunum malo ita, Liip Alokso kaami weng mafak bakayila-laabip kemin, kapni bon tem weng kaata bokoyapla, nuli kapni aket fukunin kaata utamum o, kebup o.
ACT 28:23 Kemin, Juda kasel iyo Pol bokola-lomdip: Sindupla kawu tal kapni weng kaa weng sanokomup kayi! akalip asuk din sindipla, kutim malo ma ita-kup disa; tunum yaapkan tal almi am bombe tilipla, Pol ayo God ami weng kaa diki-dakat-bamda bakayim-bala bii, atan tem banuya, ami weng unang tunum yak God ami mepso unip tiin saanin kaami sang uyo bakayim-bam, ayo kanum bakayi God ami man Yesus ami lak duulin o, kala-lomda, Moses ami Lo so, God ami profet imi sang iso, kiita kulii-tal aba yak Yesus ami sang kaami iipyak tem kawu bombu kaali, kukuya-lomda bakayim-bam kema. Kemin,
ACT 28:24 malo ili Pol ami weng ayo weng sandiwa, ti faneng bakaba no, ke-balale, malo ma itale, kulaa fan bakaba disa yo, ke-bala ke-bamdip,
ACT 28:25 yakal almi aket fukunin e kala, baka-bala-baka-bala-ke-bi-lomdip kela unum o, kemip. Kabak-ami miit kaali, unin disa iliwa, Pol ayo weng ma boko-lomda: God ami Sinik Tambal ata numi awal imi weng bokoyinsa kaali, imi man loop ipni sang so, bokoyinsa. Kemin, God ami Sinik kaa profet Aisaya ami bokolaya, ata numi awal imi bokoya-lomda:
ACT 28:26 Kipyo, God ali bokop-na-lomda: Aisaya kabi dindap unang tunum imi bokoya-lomdap: Kipni talang tem kaa, nami weng kaa weng san-kaa-mokomip. Lale, ibi utam weng kabak-ami miit uyo kaa buu nu! kalokomip disa; aa, kibi nami ok nuubi kulaa iltipni tiin alep alep kaa, itafii-mokomip. Lale, kipni aket ayo ma bam-daayokomu disa kayi! yaka-lomdapla yo kalsa ko.
ACT 28:27 Kabak dok kata naa kalolip: Unang tunum imi aket fukunin kaa talalu fanang daalin dinim kemin, ili weng sanokomup disa yo kala, imi talang tem kaa katii aa, tiin-baa utamup disa yo kala, imi tiin kaa kabii kesip. Lale, kiimi aket fukunin kaa fal-sikilokomip kaa, ili mafek mafek utafiibip kaami miit kaa, uta-mokomiple, weng uyo weng san-kaabip kaami miit uyo, dotu utam ke-lokomip; kiimi aket fukunin kaa yaap ma keyuluya, iyo nami bii kalawu tiliwa, talalu-yimulokomi no kala, God ayo bokop-namba kayi! kala Aisaya ata kanum bokosa.
ACT 28:28 Kemin, weng kala baka-mokomi kaa weng san iliwa! Ati, kipkal kanolipla, kawu God ayo almi weng ayo, miit kusnum imi fanang kulaala talsu kaa, yakal weng sanipla, God ali dong dokoyila imi ban kemin ayo kela yaap ke-lokomip o, kala-lomda,
ACT 28:29 [Pol ayo bakayim-balaya, Juda iyo weng aal-kup dikin-dikin-unaalip ko.]
ACT 28:30 Kemin, Pol ayo am kawu bomda am kayaak ayo ami sisol kola-kola-ke-bam bii, wasital alep duk-duuse diim kabaku, tunum unang kanta din atamum o, kalip namti, weng umkaayim-bam ale, yaap ke tilip o, yakan-kaa-bam,
ACT 28:31 suunin disa, titil-biki-bom unang tunum din God ami mepso unip tiin saanin kaami sang kaata, unang tunum imi bakayim-bamda, aa Kamokim Yesus Kraist ami sang-kup baka-bam kukuyin-bam kemsa. Kemin, Rom kayaak ili ma taba-lomdip dil molip kensa disa. Kemin, Luk nami weng kula ti.
ROM 1:1 Nak-tunum kusal kaa tiinsip o? Nali Yesus Kraist ami ok fukulin tunum Pol nata kemin, God alalta kalaan tunum kelan o kala, nayo uldaa-nam-buu-lomdala, Kapta God ami weng tambal kaa kukaayan o, nakase. Kemin, sukon kala nak-tunum kusal kipni dola kuyon o, kalaliya nuubi.
ROM 1:2 Kanola sawaayak kawu, God alalta weng kutii boko-lomda: Nali unang tunum iyo nami weng tangbal kalawuuta kuyokomi no, kala-lomda almi profet weng ku-fatap-dakamin tunum imi bokoyila, God ami weng kutiisa kaali, dolnipla God ami Sukon Tem weng awem kaldaku tiinsu.
ROM 1:3 God ami weng tangbal kaali, almi Man ami sang bokosa kaata ko. Numi Kamokim Yesus Kraist ami awak uta duuluya, tiltam tunum fatap kesa kaa, King Devit ami man loop kele,
ROM 1:4 aa God ami Man titil-kup tabasa ami kukup tangbal kaata, kutal-fuku-bom ilom ayo taanale, God ata almi titil dukum ta dafolala, tam tiina, nuyo utamup yi, Kaali ti God almi Man o, kala-sulup.
ROM 1:5 Kemin, God ayo numi disa misiim kawu dong dakaayin-bamda le, almi aket fukunin kaata, Pol kaa Yesus Kraist ami ok kaata, okok-balala, tunum miit kusnum alik imi bakayin-balaya, Kraist ami lak ayo duule, ami weng uyo weng san kelin o, kalalaya, God ali Kraist almi sikil diim kawu almi kalaan tunum nami ok tambal kala kup-nase.
ROM 1:6 Kemin, God ali abip ma ma imi tal Rom kaptam bom-bilip kipni aket kaakal ti fuku-daaya-lomdala, ipso yim-tiilala, Yesus Kraist ami unang tunum kesip o.
ROM 1:7 Abip dukum Rom kaptam bom-bilip ibi God ata taba-lom kipni aket kuya-lomda ibi yim-tiilala, tiltam almi unang tunum kesip. Kemin, sukon kalaali alik ipni dola kuyon o, kalalila kayi! Kemin, nali nulmi Atok God aso, Kamokim Yesus aso, alim iyo dik-dakaayin-bilila, ita disa masiim kawu, dong dakaayin-bilipla, kipni aket tem ayo bilili-kup kala bomdiwa yo!
ROM 1:8 Nami kamasi kaami sang asiik bakayokomi namti kala bombe: Kipni Kraist ami lak dukum-kup dakaamin sang kaata, boko-kulii-una-tala-kem-laabip. Kemin, nali alik kipni aket kaata, fukun-bamdi Yesus Kraist ami win diim kawu nami God ami, Yaap ke yo, akan-kan-yaabi.
ROM 1:9 Nali God ami ok kaa titil-fak-daa-bomdila, suunkup weng ayo almi Man ami sang tangbal kaa kukaayin-kup ke-bilila, God kaa nali nitamsa kemin, nali ibokoyokomi disa; kipni win kaa ti suunkup kufuyin-bamdi beten kamayila-laabi.
ROM 1:10 Kemin, nali God ami dik-daala-lomdi, Aatumen kapyo, nayo siin kawu itamin disa nosi kemin, kamala kawu, Ayo, kalap namti, nami liip kaa ma kep-napla, tam aba din itamon o, kal-bomdila nali suunkup beten kem-tabasi.
ROM 1:11 Kaa dokata naa kalolip: Nami aket fukunbi kaali ti baan din itamon o, kal-bom ale, weng bakayim-bam dong dakaayim-bilila, God ami Sinik ata taba-lom kipni mafek mafek tangbal ma kiita misiim kuya titil-fokolin o, kal-bom kebi.
ROM 1:12 Kemin, kaa nami aket fukunin kaami miit namti kaa bombuu: Kipni Dukum ami lak dakaamin kaata, taba-lomdu nami dong dokop-nule, kuno nami lak kaata taba kipni dong dokoyu ke-mokomup kaata kipso, naso, numi aket tem ayo yam-titil-diilokomu no, kalbi ko.
ROM 1:13 Nami nak-tunum kusal kipyo, Kipkal talalu utamin! Suunkup baka-bamdi: Din kibi ita-mokomi no, kem-laabi kaali, yak kusnum kayak kayak ili dong dakaayim-bili imi Kraist ami lak duu-laamin kaayo, dukumsu no, kalalila kemin, kaata kano kipkal dong dakaayon o, ken-umbi. Lale, mafek mafek kusnum ma kaata, tildang nami liip kaa, katii-katii-kem-tabasu no.
ROM 1:14 Nali God ata bokop-na-lomda: Kabi abip kayaak skul ke utamsip so, saak kasel skul kemin disa so, aa tunum itamsip so, tunum itamsip disa kiiso, alik dong dakaayan o, kala God ata bokop-nase.
ROM 1:15 Aa, nami aket fukunin kaa, atin ti Rom kaptam bom-bilip kipkal God ami weng tangbal kaa, kukaayim-bam kemon o, kalbi.
ROM 1:16 Nali God ami weng tangbal kaami su kaali dakabi disa; atin ti nali fiyaap duubi. Kemin, kaa kalok-ata naa kalolip: God ami weng tangbal kaami titil ma namti kala bombuu; alta ti taba-lomda unang tunum alik ami aket kolip kiili, yim-taldang daalama le, Juda kayak isiik Kraist ami lak duuliple, tunum miit kusnum ita mulo kawu ami lak duulipla, God ayo tunum miit alep imi im-bii-tildang almi miit tem tiise.
ROM 1:17 God ami weng tangbal kaali, numi kukuya-lomda, Ibi kamasi kaa Kraist ami lak duu yakyak toop taanokomip kuyaku dilit kalokomip kaata, kipni ban kemin kaami uluum kaa disa keyuluya, tituun-kup tabin unang tunum iltap ke-lokomip namti kaa bombu no, kalsa ko. Kanolin kemin, God ami Sukon Tem uyo boko-lomdu: Tunum kaa kanta God ami lak duula namti, God ali kaami bokola-lomda: Kapni ban kemin kaami uluum kaa disa kep-tu kemin, bokop-ta-lomdi: Kabi tituun-kup tabin tunum kelap o, kalila, kabi suunkup ilin tunum ke-lokomap o, kalsu ko.
ROM 1:18 God abiil tikiin kayaak ami aket atul tabemin kukup kukuyila utamsup kaali, kala bombe: Tunum iyo God ami kukup uyo daang ukuwa-lom ilmi kukup mafak kiita-kup nuu-bam ale, tifan tituun weng kaata kulaak tiibi kema namti, God ali taba-lom imi kukup kaami maan ayo kulaayila yak kanobip imi diim abamnula, iyo angtiil abamnula yol awak kaa kuluu-laabip.
ROM 1:19 Kemin, kaami miit namti kalabe: God ali almi kukup kaa atama yi, Anung kaa unang tunum kii ti uta-mokomip kala, kala-lomda kukuya tiltam fatapnu utam-silip.
ROM 1:20 Kemin, sawaayak sawaayak kawu, God ami mafek mafek alik talalusa kulu yakyak kutal kula diilu kaa, unang tunum ili ami mafek mafek talalusa kiili, itafiin-tabasip. God ali Sinik lale, ami mafek mafek talalusa kaata taba-lomdu kukuyula utamip yi, God ami kukup kaa kanolin kala, kalalip utamalip, aa ami titil dukum suunkup ilin ayo utamip yi, Ali atin ti God u! kala atam-som, kanum-tabasip. Kemin, dok kano tunum kaa boko-lomda: Nali utamila, God kaa ma bom ila atamin disa keliya, ban kebi no, kalokoma disa ko.
ROM 1:21 God kulaa atamsip la, kulaa fan God daa yo, kala-lomdip ami win kaa kufon-bam yaap ke yo, ke-bam kanun-umbip disa; imi aket fukunin kaa, mafak-alom babon daa, malang tini-yinsu.
ROM 1:22 Kemin, ilmi fuut kaata-kup, tabe-bam boko-lomdip: Nuli ti utamsup o, ken-umbip. Lale, ili atin ti babon daa tiinaasip.
ROM 1:23 God ali ti tunum sakbaalim ale, suunkup ilin God kemin, ale tunum nuli taan-laamin tunum lale, ili God ami daang ukola maso ma naalalip disa ke-lom kela ilmi sikil ta yak tunum sinik, awon nuuk imi sinik, inap sinik kanolin miin kiita, talalbi-kutii-lom aman dakayila-yaabip o.
ROM 1:24 Kanu-biliwa, God kaa kamboyilaya, ilmi aket mafak fukunin kaata, yim-tama yang atin kukup mafak tem kawu tiniluya, ilmi angtiil ayo ku-mafak-dakan-umbip kemin,
ROM 1:25 kanolin tunum kiili, fan God ami tituun weng kaa kela-lomdip Setaan ami kasen-fakamin weng kaata fukule, miit kayaak ayo kela-lomdip saak yak mafek mafek God ami dotusa kaami ban kaata, dakan-bamdip wiis saan-bam ken-umbip. Lale, nuli God almi win kaata, suunkup kufun una-buluwa yo, kala-somla ko. Kemin, yaap taa!
ROM 1:26 Kanu-biliwa, God ali kuno tiin ita-balaya, fatom tibin kukup kaami aket-kup yan-balaya, unang yakal tunum iso, sin-laa-bam atafiimin kukup ayo kela-lomdip afalop kusal unang kusnum iso sin-laa-bam ke-biliple,
ROM 1:27 kuno tunum yakal imi aket ayo atin mafak keyu unang iso, sin-yaa-bamdip utam-laamin kukup kaa, kela-lomdip aptum kusal kusnum iso, sin-laa-bamdip ili aptum kusal kusnum iso, fatom tabin kukup ata kanu-bilipla, ilmi kukup mafak kanubip kaata, yaap keyu kaami uluum kuuta taba-lomdu ilmi aket tem so, angtiil so, kiiyo ku-mafak-dakayila-laabu te!
ROM 1:28 Kemin, God ayo utama yi, Imi aket fukunin kabak-ali, God kaa ka disa yo, kala ban bokolip itamdala, kamboyala ilmi fanang saanin mafak kaata-kup kutal-fuku-bomdiwa yak kaa kanumin daa yo, kalsa kaami kukup kaata kanun-yaabip.
ROM 1:29 Kemin, atin kukup mafak yaapkan kiita ilimi aket tem dongnula nuu-bam ale, ban ke-bam aptum kusal imi mafek mafek kiita tal-kaayin-bamale, aptum kusal iyo aket mafak kukaayin-bam aa, tunum mafek mafek soyal imi bung kiita tal-kaayin-bam ale, tunum yelip taan-laa-biliple, weng aal diki-bam, aa aptum kusal imi ibakayim-bilip fan o, ke-bam ale, aptum kusal iyo yam-mafak-daka-bam ale, weng uyo de-kulii-una-tala-ke-bam ale,
ROM 1:30 aptum kusal imi bolop-yim-bam win mafak kaata bakayim-bam ale, God ami atam suun-bamdip; weng titil tibin weng mafak mafak-kup baka-bamdiple kukup mafak kiita-kup nuu-bamdip; iyo dak-fanan-tal-une-bamdip aa, Nuta-kup o, kala ilmi tong kaata-kup baka-bam ale, dok kanolin kukup mafak kaata ma no-lom ban kelum o, kala kabak-ami liip fen-tal-une-bam ale, awak-aalap so, imi weng kaa, kuyang saak tii-bam ale,
ROM 1:31 babon-tal-une-bam ale, disa weng ibaka-bam ale, ilmi kiim maakup imi aket kaa kuya-laamin dinim ke-bam ale, aptum kusal kayak kayak imi ifan o, kala olen-kaayin dinim ken-tabasip.
ROM 1:32 Kanu-bilipla, God ami tituun-kup tabin weng ma bokoya kuka-daasa kaali, boko-lomda: Tunum kanolin kukup fukulin kiili ti yaap ke ma fokoli yang taan-laamin abip un-ilom atin maaklo win dinim ke-lokomip o. kalsa. Kemin, tunum kaa-bilip kiili ti, lo kulaa utamsip. Lale, kela-lom kukup mafak ata ti kutal-fukusip kemin, kaa kanun-umbip kaata-kup daa; ti aptum kusal kayak kayak yakal ti kano kukup mafak kutal-fukubip ili tangbal kanubip o, kal-bom ken-umbip o.
ROM 2:1 Kanum bokosa la, alik ibi kaptum kusal yim-bak-saanin tunum kemin ale, maakup maakup kipni bokoyokomi. Kabi kalok kano kaltapni ban kemin ayo kuwaalokomap disa kemin, ti weng selan. Kabak-ali dok kata disa kabi kukup mafak kaa kaptum kusal imi kanun-umbip tap ke ti kapkal kanun-yaabap. Kemin, kabi yak kaptum kusal kii yim-bak-saan-umbap kaali, kaptum kusal imi sang kaata-kup bakayila-yaabap disa; kemin, kapkal ti kanun-umbap kemin, kaltapni weng kaata tam-bak-saanbu te!
ROM 2:2 Nokol utamsup: God ali kanolin kukup fukulin kiili, kaami maan ayo ukaayim-bala angtiil yol awak kaayo, um-tal-dakan-umbip. Kemin, God ami kot kamayim-bam yim-bak-saanokoma kaali ti, atin tituun-kup.
ROM 2:3 Kemin, kabi kaptum kusal iyo bakayim-bamdap: Kaa kukup mafak nun-umbip o kal-bom bakayim-bap. Kata, aa kanolin kukup kulaa ti kapkal ban ke-laabap kemin, kabi kanimin o, kalbap? Kabi God ami kot ayo kalok kano-lomdap kela wakadaa tambal-kup unokomap i?
ROM 2:4 Kabi kanimin o kala kanolin aket kaa fukunbap? God ali tambal tambal ma kamap-tam-bam ale, abiltap kapni ban kemin kaami maan ayo nuup-tin disa; ali ipyo suunkup balili-kala bomda fen-tabasa. Kemin, God ami kukup tangbal kaali, kapni aket fukunbap ayo miit dinim kemin, saak-kup o, kalbap ema? God ami aket fukunin kaali, kapni aket kaa fal-siki-lom kapni ban kemin ayo kelan o, kala-lomda talal-tamba kaa utamsap disa ema?
ROM 2:5 Kabi aket fal-sikilami disa yo, kalalap kaltapni aket ayo titil-foko tuum tap kelap namti, kaata fan ilom kabak-ami maan uyo sisol mafak kup-tokoma kaata, afetbap. Kemin, sokomu kaa, God ami aket atul tabemin kukup kaami am daanula, tituun-kup kot kamayokoma kawu, kapni ban wakamin kaami maan namti kawu kuluulokomap ko.
ROM 2:6 God ami tunum imi kukup kanum-laabip kaami maan tiiyokoma kaali, atin ti tiiknula kawu kukaayokoma.
ROM 2:7 Kemin, tunum malo ma iyo imi aket fukunin kaali, Kukup tangbal ata-kup titil-biki bom-bulupla, God ayo numi yim-tama tam almi falala-kalin abip kawu daa-lomda, ayo numi win tangbal kaata bokoyimba-kup ale, ayo talalu-yimulala, nokol taan-laamin uyo uktaayuk o, kalalipla kaami liip kaata fen-yaabip. Kemin, kaata God ali tunum imi talalu-yimulaya, God aso suunkup ilokomip.
ROM 2:8 Kuno tunum malo ma ita nulmi aket fukunin kaata-kup o, kal-bom tabuu-bomdiple, kukup tituun-kup tabin kukup ayo daang ukuwa kewa kukup mafak mafak kiita-kup tabun-umbip. Kemin, God ayo kanolin tunum ili aket atul dukum kuya-lomda, atin kukup mafak ayo kuya ke-lokoma.
ROM 2:9 Kanta kukup mafak alik kiiyo, tabuulip namti, God ali aket uluum so, angtiil yol so, kiita imi diim abamnu keyokoma ale, kanta kukup tangbal kaata-kup kutal-fukulip namti, God ayo win tangbal so, almi falala-kalin kaaso kuyala, dak-diiba-bom bilili-kup kalokomip. Kemin, God ali Juda kasel ita-kup kuyokoma. Lale, kuno tunum miit kusnum iso kuya ke-lokoma.
ROM 2:11 Kabak-ami miit kaali, God ali kiita tunum win tabin o, kala, kiita tunum win dinim o, kal-bomda yam-kukulokoma disa; ti tikip alik maakup kuyaku-diyaku-ke-lomda tunum imi kukup kanun-yaabip kaata, yim-bak-saan-umba ko.
ROM 2:12 God ami yam-kukumin kaa kanumin kemin, tunum miit ma Moses ami Lo kuu utamsip disa kemin, ban kemip kaali, iyo lo kaa utamin disa ke-bamdiwa, iyo maaklo ban ken-umbip. Lale, God alalta yam-kukulokoma kaa, atin maaklo ke win dinim ke-lokomip. Lale, Juda kasel ili Moses ami Lo kaali, iyo utamsip kemin, ban kelip namti, God ali lo kaata kuluu-lomda yam-kukulokoma kaa yakal ti kano maaklo ke win dinim ke-lokomip.
ROM 2:13 Kaami miit kaa, unang tunum iyo God ami Lo kulaa disa kulu weng san-kaamin-kup kemip namti, God ali imi bokoya-lomda: Kipni ban kemin kaami uluum kaali, disa keyulula tituun-kup tabin unang tunum kelip kayi! yokokoma disa; tunum kanta God ami lo kaata-kup fukulip namti, fan ita-kup God ayo kanolin weng kaa bokoyokoma.
ROM 2:14 Moses ali God ami Lo kaali, kayak kayak ili ma kuyinsa disa; la, kulii daa iip maakup maakup ita ilmi aket fukunin kaata-kup, lo kaami kukup kaata kutal-fukusip. Kemin, God ami Lo kaa tunum kanolin imi diim kawu-kup buu daa; la, God almi aket fukunin tangbal kaata, kukaayim-balaya, utamipla yi, God ami aket fukunba kaali, Kanolin o kalba kala, kala-lomdip kutal-fukusip.
ROM 2:15 Kiimi kukup kutal-fukusip kuuta taba-lomdu, nuyo kukuyula kawu utamuwa yi, Kukup kuumi aket fukunin kaa, ilmi aket tem kabaku buu; kaa God alalta ku-fatap-tiiyala kanubip kala, kalbup. Kemin, aa ti kuno kukayak kukayak kemin, kuuta taba-lomdu asuk kukuyula, utamuwa yi, Faneng u, kalbup. Kemin, kipni kukup ma kaali, iltipni aket fukunin kaata boko-lomdu: Kaa mafak kebip kemin, fatom-duk-duulin o, kalbu-kup ale, imi kukup ma kaa ilmi aket fukunin kaayo boko-lomdu: Kukup kaa kanubip kaa yaap nuubip kemin, fiyaap duulin o! kal-bom ken-yaabu no.
ROM 2:16 Kemin, kaa ilom am ma daanokomu kawu, God ayo yam-kuku-mokoma kaami ok kaali, Yesus Kraist ami kolaya, alta unang tunum alik imi aket fukunin kaaso, kukup kaaso, kiili yawaal-daasip kemin, yam-kuku-mokoma. Kemin, God ami weng tangbal kukaayila-yaabi kaali, kanolin sang kaaso bakayila-yaabi o.
ROM 2:17 Juda kayaak kabi baka-bamdapla: Nali Juda o, kal-bomale, Nali Moses ami Lo ayo kutal-fuku-lom tangbal-kup laabi kemin, nali God ami tunum kemin, nami win uyo kufuubi no, kalale;
ROM 2:18 kabi God ami aket fukunin ayo utamsap kemin, kabi Lo uyo kukup-tam-bilip dik-daa-kuluu utamsap kemin, kabi atin kukup tangbal kaa yaap ke-lokomu no, kalale,
ROM 2:19 kapni aket fukunin ayo boko-lomdap: Nali Lo utamsi kaata utafiimin kaami miit namti kaa utam ale, fan tituun-kup tabin weng kaami miit ayo utam kesi. Kemin, nali yaap tunum tiin fiim ami liip ayo kukolami le, nata tunum kutamiip kawu ilin ami yokon namti kalabi le, nata tunum dik-daa-kuluusip dinim imi weng tem kukaayin namti kalabii, aa nali man katip katip imi kukuyin namti kala bombii no, ken-umbap ko.
ROM 2:21 Aa, kabi kaptum kusal kiita kukuyila-yaabap. Lale, kanimin o kala kaltapni weng kukuyila-yaabap ayo kaltapni kaa kutal-fukulin disa kesap yoko? Kabi yak tildak imi bokoya-lomdap: Yukut kaa inin disa yo, yakan-kan-umbap. Lale, kapkal yukut kaa inan-umbap ema te?
ROM 2:22 Kabi kayak kayak imi bakayim-bamdap: Tunum din, unang din kiiso, tunum ket unang sii kii sadikimin disa yo, ken-laabap. Katale, kapkal kanun-umbap ema kayi? Kabi weng ayo dukum-kup kukaayim-bamdap, awem men kaa, daang ukuwa kelin o, ken-yaabap. Lale, kapkal tam am awak kaptamu ami duung ima aye, ayo kapkal yukut dakan-umbap ema? Kabi ti kanumap namti, kaalile God ami daang ukola-laamin liip namti kaa bombuu te!
ROM 2:23 Juda kayaak kabi kaltapni win kufo boko-lomdap: Nali God ami tunum kemin, God ami Lo kuluu utamsi no, kalbap. Lale, kabi Lo duul-bamdap God ami win kaa ku-mafak-dakaala-laabap taa!
ROM 2:24 Kemin, God ami Sukon Tem kabak kapni kanun-yaabap kaami sang ayo boko-lomdu: Juda iltipni fuut kaata tabe-biliwa, tunum God ami lak duulin disa kayak kayak iyo itamdiwa, God ami win ayo ku-mafak-dakaala-laabip o, kalsu.
ROM 2:25 Kulaa, awak uyo tamulule, kawil-fakal ita taba-lom kapni ipnaal bo-kukan-tiip-tiple, ali God ami tunum kelan o, kalsip. Kemin, kabi God ami Lo kaata kutal-fuku kulii-tabap namti, siin umi ipnaal bo-kukan-tiip-ta-silip kaata, taba dong dokop-tokomu. Lo ayo lolap namti, angtiil ipnaal kaa ukduu-kukan-tiip-ta-silip kaata, dong dokop-tokomu disale, kabi yak tunum miit ma ipnaal bo-kukan-tiiyin dinim iltap ke-lokomap.
ROM 2:26 Ale, dok kanolin tunum ata ami ipnaal ayo bolin dinim yale, ayo Lo kaami kukup alik kiiyo, kutal-fukula namti, God ali tunum kaa atamala, Ali fan nalmi Lo kaami liip kaa dakela-unen-umba kemin, fan ipnaal bo-kukan-tensip tunum alaltap kala, kalokoma.
ROM 2:27 Fan taa! Juda kayaak kapni ipnaal ayo bo-kukan-tiip-ta-silip ale, aa God ami Lo Moses ata dolsa ayo kapni diim kawu buu. La, kapkal Lo kaa duula-laabap. Kanola, tunum ipnaal bo-kukan-telin daa ali Lo kaa fan kutal-fuku kulii-taba namti, ami lo kutal-fukuba kaata taba-lomdu kapni tam-bak-saan-bam bokop-ta-lomdu: Kabi Lo kaa dotu fukubap dinim o, tokokomu.
ROM 2:28 Fan, God ami tunum ayo dok kanolin tunum ata ni? Kabi boko-lomdap: God ami tunum kii, Juda kayaak ita kemin, kanta awak-aalap iyo Juda kayaak ke-lom duulip awil-fakal ita taba-lom kapni ipnaal kaa bo-kukan-tiip-ta-silip namti, kaata kayi, kalokomap. La, kaaka disa.
ROM 2:29 God ami tunum ke-laamin kaali, kanumin kemin, God ami lak ayo duulaya, God ami Sinik ata tal aba yak ami aket tem un-ilom dap-talaluba. Kemin, God kaa awak-aalap imi kukup so, ipnaal bo-kukan-tela-yaamin kaami kukup so, kiili ding boko-laaba disa; Sinik ami yak aket tem kabaku bombe kaata-kup, ding boko-laaba; kemin, tunum ayo God ami lak duula namti, ali tunum imi tiin diim kaa win so ke-lokoma disa; ali ti God ami tiin diim kaata, win so ke-lokoma no.
ROM 3:1 Kanolin kemin, Juda nuli kalok kano-lom nuta nuta ke-lom tunum miit ma kii yim-baak tibiilamup i? Dok kanolin mafek mafek tangbal kaata ipnaal bo-kukan-tiiya-laamin kaami liip kaa tiltam talen-umbu ni?
ROM 3:2 Kaye? Kabak-ali ti mafek mafek tangbal tangbal kiita bom-bilip ko. Kamasi mafek mafek tambal kiili, God ami weng ayo kulaala yak Juda numi sikil diim abamnula, tiin mo-bomdup, nuyo kayak kayak iyo bakayim-bam ken-umbup
ROM 3:3 kaa tifan kemin, Juda malo ma kiili God ami weng kaa kutal-fukulin disa kesip kemin, God ayo kukup tangbal kaa kukaayim-bisa disa; kaa kanimin o, kalokomup i? Ti ilmi God ami weng kambolipla, akal keyase kaata taba-lomda, kukuyala utamuwa yi, God almi weng Abraham ami bokola-lomda: Kapni man loop kiili, kukup tambal kukaayokomi kayi! kalsa uyo keyinsa no, kalokomup ema?
ROM 3:4 Daa! Unang tunum alik ili ibakan-umbip la, God ali ti suunkup weng tituun-kup tabin kaata, baka-bam ale, ami kanolokomi no, kalsa kaata, aket fukun-bom ke-bam laaba. Kemin, ultap God ami Sukon Tem ayo boko-lomda: Unang tunum alik iyo utamiwa yi, Kapni weng kaa atin ti faneng o, kalale, waasi iyo timbi-din daalip kot ke-mokomap kaali, titamiwa yi, Kabi atin tituun-kup tabin tunum kala, tokokomip o, kalsu.
ROM 3:5 La, nuli ban ke-bulupla kawu, God ata aket atul kuyila-lom yim-bak-saan-bam maan tiiyala, unang tunum iyo God ami atam-lomdip boko-lom: Ali tituun-kup tabin tunum o, kala-laabip. Kemin, nuli tawaal diim tunum ilimi aket fukunin kaata kuluu-lomdup boko-lom: Numi ban kaami kalan kaata, unang tunum iyo God ami win kufola-laabip kemin, kanimin o kala ali aket atul kaa numi kuyila-lomda, numi maan mafak uyo kuya-laaba yoko? Ali ti tituun-kup tabin disa yo, kalomup ema?
ROM 3:6 Daa. God ali tituun-kup tabin disa dinam, kalok no-lomda tawaal kala dik-daa kulaasu kaami unang tunum alik numi kukup ayo yam-kukulama disa ko.
ROM 3:7 Nami kukup mafak kanu-bilila kaata, God ata maan tiip-nase kaali, kuuta taba-lom kukuyula, kayak kayak ili fatap-kup atamipla, God ami maan tiiya-yaamin kukup uyo tituun-kup tabin kesu kala, kala-lomdipla God ami win ayo kufolipla tiltam atin ti dukumnu namti, kanimin o kala God kaa nami kanolila, ita almi win tangbal kufonbip kiimi kukup uyo talalu utamin disa ke-lomda bokop-na-lom: Kabi ban wakamin tunum kebap kemin, maan kaa tiip-tokomi no naka yoko? Maan tiip-nokoma kaali, God ali tituun-kup tabin disa yo kalomi nema?
ROM 3:8 Kanum bokolup kemin, tunum ma iyo boko-lomdip: Na kuno, nokol kukup mafak ma so ma ke-bulupla, kayak kayak iyo numi kukup mafak ayo atam-som ale, God ata numi ban kemin, kaami tiiyim-bamda kukaayimba kaali, utam ke-bamdiwa, God ami tong bakamik o, kalbip. Kemin, imi weng ayo yaap keyokomu no? Disa. La, tunum malo ma iyo weng mafak kanolin kaata kukaap-nam-bam boko-lom: Pol ayo tunum imi weng kanolin kaali bakan-unba no, kala-laabip. Kemin, am ma daanokomu kawu, tunum kanolin kiita ibakamin weng kaata numi kukuyimbip kaami kalan kaali, God ata maan tituun-kup tabin kaata, tiiyokoma. Kemin, yaap keyokomu te!
ROM 3:9 Kanum bokolup kaa kanimin o kalbap? Juda kasel nuta nuta ke nak-tunum kusal kii kabaak banip keyinsup o kalbap ema? Disa! Nali kaa boko-lomdi: Ban kemin kuuta taba-lomdu Juda nuso, tunum miit kusnum iso, alik nuyo yim-bak-mosu no, kali te!
ROM 3:10 Kemin, God ami Sukon Tem kaami sang kaa boko-lomda: Tunum God ami tiin diim kaali ma atin tituun-kup tabasa kaa, ma bombe disa; le
ROM 3:11 aa, God ami kukup tangbal kaa ma talalu utamsa tunum ali ma bombe disa; aa Nali God ami diim kawu ilon o, kalba tunum, ali ma bombe disa yo. Kemin,
ROM 3:12 alik ili God kaa kela yang ban-ilom ale, alik ili ti tunum mafak ke-lomdipla kemin, maakup aye ma ata taba-lomda kukup tambal so ma kutal-fukun-umba disa; atin ti disa yo.
ROM 3:13 Kemin, imi weng mafak kaali, kom tem fom tang tabeba tap ke baka-balale, weng yaapkan iyo disa kawu bakan-una-tala-keliwa, unang tunum iyo weng san-ilomdip taan-laamin kaami liip uyo dikela-unen-umbip; ale inap mafak tunum aamin altap ke, aptum kusal imi win ku-mafak-dakaayin ami win yaapkan iyo bakayim-bamdiple,
ROM 3:14 suunkup wiis-saanin weng so, weng mafak atul-kup tabin so, kiiyo, aptum kusal imi weng bakayim-bamdiple,
ROM 3:15 abiltap-kup aket atul tabeyu aptum kusal iyo yelip taan-laa-bam ale,
ROM 3:16 suunkup mafek mafek yaapkan kiiyo, ku-mafak-dakaayin-bam ale, uluum tabin yaapkan iyo tunum ami kukaan-bam ale,
ROM 3:17 ili aptum kusal kusnum iso aket maakup ke balili-kalin kaami miit uyo kaal-ke utam-laamin dinim ke-bamale,
ROM 3:18 God ami aket kaa fukun-bam kukaan-bamdip suunin disa yo, kala God ami Sukon Tem ayo kanum bokosa no.
ROM 3:19 Nokol utamsup kemin, Moses ami Lo kaami weng alik bokosu kaali, tunum lo utamsip imi bakaya-laabu kemin, kaa kalok kata naa kalolip: God ami aket kaali, Lo kaata kutiiyilila, tunum ali dok kano yawaal-daa boko-lom: Nali tituun-kup tabin tunum o kaloma disa ke-bam, tawaal kala dik-daa kulaasu kaami unang-tunum alik ili ilmi ban kemin kaami uluum tem diinin o, kala-lomda, God ayo Lo kaali, Moses ami konsa.
ROM 3:20 Kemin, kaami miit kaali, Lo kaata kukuyula, utamupla, Nulmi ban kemin namti kabuu no, kala-yaabup kaata-kup o. Tunum ali ma Moses ami Lo kukup ayo kutal-fukula namti, God ali ami kanuba ayo atam-ilomda bokola-lom: Nami tiin diim ayo kapni ban kemin kaami uluum ayo disa kep-tula tituun-kup tabin tunum kelap o, akokoma disa yo.
ROM 3:21 La, am kala daanse kulu, God almi tiin diim kawu tiltam tituun-kup tabin tunum kemin liip kaali, nuli kukuyasuu. Kemin kaali, Lo fuku-laamin kaami liip kaptoowu tunum ayo God ami tiin diim kawu tiltam tituun-kup tabin tunum ke-lokoma disa. Kemin ale, liip ma ami tem kawu tiltam tituun-kup tabin tunum ke-lokoma namti kala bombe: Moses ami Lo dolsa kaaso, God ami Profet imi weng dolsip kiiso, kiiyo kabak-ata liip ma kaami sang kaata bokosip.
ROM 3:22 Kemin, God ami tiin diim ayo tiltam tituun-kup tabin tunum kemin kaami liip namti kalabu: Unang tunum nuli akal almi alik akal almi alik disa; nuli ti ban ke-lom ale, God ami numi tong bakamakin ayo uktansup. Kemin, nokol ti kanola unang tunum alik ili kanta Yesus Kraist ami lak ayo duulip namti, ita God ayo bokoya-lomda: Ibi tituun-kup tabin unang tunum o, kala yaka-yaaba no.
ROM 3:24 Yesus ata taba-lomda numi iliim ayo boyase kala, kala-lomda God ali almi aket fukunin kaata-kup numi bokoya-lomda: Kipni ban kemin maan kaali disa keyulula, nami tiin diim tituun-kup tabin unang tunum kelip o, ken-yaaba. Kemin, God ali molipla kawu, kukup tangbal ayo kukaayon o, kem-yaaba disa; ali ti masiim kukaaya-laaba no.
ROM 3:25 Sawaayak kawu, God ayo Yesus uldaa-dabuu-lomda, Dabaali daak as diim saaknala kawu, ami kiim sing-tam daalokomu kaata, unang tunum almi lak duulokomip imi ban ayo moyokoma no, kala-lomda dabaala talse. Kemin, God ami kukup tambal tituun-kup tabin kaa kukuyase kaalile, sawaayak God ayo unang tunum ban kemip iyo kukup mafak kaa asiik abiltap maan tiiyin-bisa disa; la kamala kala daanu kaali, God ali unang tunum imi ban kemin ayo afet-yin-bam ale, unang tunum alik Yesus ami lak duulip iyo God alta boko-lom: Kipni ban kemin ami maan kaa disa keyula, ibi tituun-kup tibin unang tunum kelip o, kal-bom ke-balaya, nokol utamupya, God ami kukup tangbal kanola kukaayimba kaayo, tituun-kup tabasu kukup o, kal-bomdupla, utafiin-umbup o.
ROM 3:27 Kanuya-laaba kemin, nulmi win kufumin kaami liip kaa doku bombu ni? Atin disa ko. Kaami liip kulaali bak-daasu te! Kalok nolin ma ata taba-lomda liip kaa bak-daasa? Nulmi Lo fukusup kaata, taba-lom liip kaa bak-daasu nema? Disa. Nulmi Yesus ami lak duulup God alalta taba-lomda talalu-yimu-laamin kaata, kaami liip kaa bak-daalula, nuli kalok no-lom nulmi win kaa kufumalup dinim.
ROM 3:28 Kemin, weng kala bakabup kaami miit kaata bokolokomi kemin, tunum ali Lo kaata-kup kutal-fukula namti, God ayo bokola-lomda: Kapni ban kemin uluum ayo disa kep-tuya, tituun-kup tibin tunum kelap o, akokoma disa; tunum ali Yesus ami lak kaata duula namti, Kaata fan, ali tituun-kup tabin tunum o, akokoma no.
ROM 3:29 Aa, God kaali, Juda kasel kiita-kup imi God ema? Disa! Ali ti tunum miit kusnum kayak kayak iso, maakup imi God o.
ROM 3:30 God kulaa ti maakup. Kemin, ali alik kuyaku-diyaku imi God maakup. Kemin, tunum ipnaal bo-kukan-telin tunum akal tiltam Yesus ami lak duula namti, kaali God ali bokola-lomda: Kapni ban kemin kaami uluum uyo disa kep-tu tituun-kup tabin tunum kelap o, akokoma. Le, kuno tunum ipnaal bo-kukan-telin dinim akal tiltam Yesus ami lak duula namti, aa ti kano, Kapkal tituun-kup tabin tunum kelap o, aka ke-lokoma.
ROM 3:31 Kemin, numi Yesus ami lak duulupla, Ili tituun-kup tabin tunum o, yakase kaata, taba-lom Lo uyo kulaak molamu nema? Daa! Lo kuuta kukuyula utamuwa yi, Kaa kukup tangbal e, kaa ban kemin kukup e, kala-lomdu, Yesus ami lak ayo dakaabup kemin, kabak-ata utamuwa, Lo kaa ti tangbal kala, kebup o.
ROM 4:1 Juda numi awaalik Abraham ami sang ayo kanimin o kalokomup i? God ali kalok kanolin kukup kaata, kolala Abraham ali atamsa ni?
ROM 4:2 Kaaye? Abraham ali ti kukup tangbal so, okok kemin tambal so, kiita-kup, kutal-fuku-balala, kaata God ayo bokola-lomda: Kabi tituun-kup tabin tunum o, ansa dinam, Abraham ayo nalmi titil-kup o, kalala almi win-kup kufu-bisa. La, God ami tiin diim kaali, ali titil dinim kemin ale, almi win kaata kasen-foko kufuuba no, ansa.
ROM 4:3 Kemin, God ami Sukon Tem kabak kanimin o, kalsu? Uyo boko-lomdu: Abraham ami aket fukunin kaa, God ami weng kutiip-na kaali ti, fan kanolokoma ko, kalaya, God ayo aket fuku-daa-lomda: Abraham ami kanum bokola kaata, ali tituun-kup tabin tunum kela kayi! ansa no, kalsu.
ROM 4:4 Nokol utamsup, Tunum okok-bamda sisol ayo kuluulokoma kaa, boko-lomdup: Masiim kuluula no, kalokomup disa; kaa almi okok keba kaami kun kaata kuluula no, kalokomup.
ROM 4:5 Kemin, ultap kano tunum ali aket ma fuku-daa-lom, God ali nami kukup tangbal kaa, titil-fak-daa-lom kutal-fukuli kaata, ayo atam-ilom bokop-na-lomda: Kabi tituun-kup tabin tunum kelap o, kalokoma dinim. Kemin ale, tunum kaa God ami lak duulin dinim la, boko-lomda: U, fan God ali nami ban kemin ayo yaap kep-na-lomda bokop-na ko: Kapni ban kemin kaami uluum uyo disa kep-tula, tituun-kup tabin tunum kelap o, nokokoma kala, kala namti, God ali tunum kaami kanum bokola kaata utamdaya, Kabi tituun-kup tabin tunum kelap o, akokoma.
ROM 4:6 Kemin, God ayo tunum ami kukup kaa diing bakan-umba disa; almi Man ami lak duu-laamin kaata, utamdala bokola-lomda: Kapni ban kemin kaami uluum ayo disa kep-tulala, tituun-kup tabin tunum kelap o, kalala, fiyaap duun-umba. Kemin, sawaayak Devit akal ti kano kaami sang kaa boko-lomda:
ROM 4:7 Unang tunum alik kiiyo kanta God ayo imi kukup mafak uyo dilit moya-lomda imi ban kemin kaayo, toloya namti, unang tunum kaa kanoya iyo fiyaap duu-mokomip.
ROM 4:8 Kemin, kano Dukum ayo tunum ma ami ban kemin kaami aket ayo lokolu kela kela kema namti, tunum kaa fiyaap duu-mokoma kayi! kalsa.
ROM 4:9 Kuno tunum ma awil-fakal ita ami ipnaal kaa bo-kukan-tela boko-lomdip: Nuli God ami man o kemin tunum ita-kup God kaa imi ban kemin kiiyo takan-tiiya kaami fiyaap kaa, duu-mokomip ema? Disa! Tunum ipnaal boyin disa bilip yakal ti kanola kanumin fiyaap kaa duu-bilip ke-mokomip. Kemin, Abraham ami aket kaali asuk fanang daalum. Numi weng kala bokolup namti kalabu. Kemin, boko-lomdup: Abraham ali God ami weng kutiip-nala kaali, ti fan kanolokoma no, kalala, God ayo bokola-lomda: Kapni ban kemin kaami uluum kaali, disa kep-tu kemin, bokop-ta-lomdi: Kabi tituun-kup tabin tunum kelap o, kalomi kayi! ansa no, kalup.
ROM 4:10 Kemin, Abraham ali dok kanu-balala, God ayo atam bokola-lomda: Kabi tituun-kup tabin tunum o ansa ni? Ami ipnaal kaa, bo-kukan-telip bom ila ye, bo-kukan-telin disa kelip bom ila yi? Disa. Ami ipnaal kaa bo-kukan-telin disa kelip bom ilala, God ayo bokola-lomda: Kabi tituun-kup tabin tunum kelap te! ansa.
ROM 4:11 Abraham ami ipnaal ayo bo-kukan-telin disa kelip ilomdaya, God ami weng kutiip-na ayo fan kanolokoma kala, kala-lomda, God ayo boko-lom: Kabi tituun-kup tabin tunum o, ansa. Kemin, Abraham ami ipnaal kaa, bo-kukan-tensip ami dal kaali, woko-lomdu Abraham ami kukolula, atama yi, God ali nami nam-buuse kaami miit kaali, nami aket fukunin kaa, Fan God kaa kanolokoma no, kalasii namti kulube no, kala-lom, atamsa. Tunum kanta ipnaal bo-kukan-telin disa lale, God ami lak duulip, God ayo bokoya-lom: Ibi tituun-kup tabin tunum o, kala namti, kiimi Abraham ami kamasi God ami lak duusa tap kelipla kaata, Abraham ami man loop ililtap ke-lokomip.
ROM 4:12 Kemin, Abraham ali tunum malo malo imi ipnaal bo-kukan-tiiyip iyo boko-lomdip: Nuli God ami man o, kalin tunum imi awaalik kesip. Kemin, kaami miit kaa imi ipnaal bo-kukan-tiimin ata-kup daa; sawaayak Abraham ami ipnaal bo-kukan-tiilin disa kelip ilom God ami lak duu-bisa tap ken-umbip. Kanolin kemin, ili Abraham ami man loop ililtap ko.
ROM 4:13 Sawaayak kawu, God ayo Abraham so, almi man loop dap-tiila unokoma kaptoop aso imi bokoya-lomda: Ibi unang tunum miit ma ma kulii kulaak baniwa, ipta ipta ke-lom tiin molokomip o, kalsa. La, Abraham ali Moses ami Lo kaata kutal-fukulaya, God ali ansa disa; Abraham ayo utamaya, Kaa fan God ayo kanolokoma no, kemaya, God ayo boko-lom: Kabi tituun-kup tabin tunum kelap te! akaya, God ali asuk weng ma kutii-lomda Abraham ayo bokola-lom: Tituun-kup kanolokomi no, ansa.
ROM 4:14 Kemin, God ali almi weng kanolokomi no, kala weng kutiisa kaami mafek mafek iyo tunum Lo fukulin imi-kup kukaaya-laaba dinam, kaa God ayo almi weng kutiise kaa kewala, titil dinim, disa kulu tiinule, kuno ti tunum iyo God ami lak dakaamin kaami liip kaali, God ayo kewala, kakal ti kuno titil dinim kelakin. Lale, kabak kano-laaba disa.
ROM 4:15 Kemin, God ali Lo kutiilala, kuuta taba-lomdu numi ban wakamin kaami maan tiimin uyo kutaltam dakan-umbu. Kemin, Lo uyo disa dinam, nuli kalok kano boko-lom: Yak tunum kalawaali Lo lola no, ken-umbup disa la te!
ROM 4:16 God ami aket fukunin kaa, Abraham almi man loop alik iyo talal-yim-bili tituun-kup tiltam nami weng kutii-lom imi kuyokomi kayi! kalsi kaa disa kulu masiim kuluuliwa yo! kal-bomdala, God ali utamala yi, Unang tunum ili nami Lo kutiisi kaa kutal-fukulin dinim, ke-lokomip kaami maan kaali, kuyokomi no, kalsa. Yale, kukup tangbal kaata ma kukaayon o, kala utamala, Abraham ali nami lak duusa kawu, weng tangbal kaa kutii-lom Abraham ami bokonsa. Kemin, weng tambal kala kutiiyinsa kaa, tunum Juda kasel kiita-kup daa; tunum miit kusnum taltam God ami lak duu Abraham ami kanosa tap kelip iso, imi weng kutiiyinsa. Kemin, tunum almi man loop imi kukup tangbal kukuyin-bala iyo utafiibip tap kano ti Abraham ali tunum God ami lak duu-yaamin kukup uyo numi alik kukuyinsa.
ROM 4:17 Kemin, God ami Sukon Tem kabak-ami sang uyo boko-lomdu: Nalta bokop-ta-lomdi: Kabi man loop dap-tiila, umbutoop tunum miit wokolokomu imi awaalik o, kalalila, uldaa-tam-buuli no, ansa. Kemin, weng kala God ata kutiisa kemin, atin ti titil-fak-daalokomu no. Kemin, God ata-kup tunum saaknip kiiyo, yim-fola tam tiinalip ale, mafek mafek utamupya, dok kano tiltam tabomu dinim o, kalbup kaali, naan-daawa tiltam tabe-bam ken-umbu kemin, Abraham ali God almi weng tituun-kup tabin ti kanolokoma no, kalsa ko.
ROM 4:18 Kanola Abraham ali God ami kaata kanolokomi no, kalba kaami liip kaa kanolokoma kaali, utamin disa; la, ti almi aket kaa fuku-daalala, God kaa, ali fan kanolokomi no, kalsa kaa ti, ali liip kawu tiltam tulu utamsa kaa tunum tap kelaya, kaata God ayo dong dokolala, tiltam tunum miit win so imi awaalik kesa. Kemin, God ami sawaayak Abraham ami bokola-lomda: Kapni tunum miit ayo tiltam kanolokomu no, kalsa namti kaa tiltam dukumsu.
ROM 4:19 Kemin, Abraham ali utama yi, Nami wasital kiili, 100 keliya, tunum sawol kebi kemin, kalok nolila, man kaa duulokomi disa yo, kalale, kuno Sara ukol man dinim bombii unang sawolsu no kalsa. La, ami aket fukunin kaali, Titil-fak-daa-lomda utamala, God ali fan ti kanolokoma nu! kalsa.
ROM 4:20 Kemin, God ali boko-lomda: Mafek mafek ilomdu kanolokomu no, kalsa kaali, Abraham ali kaa aket alep fukunala, Kaa kanolokoma disa ema yo kalsa disa; ali ti faneng kanolokoma no, kalala, tiltam titil-faka-bam God ami win kaata ti kufolin-kup ke-bam, fiyaap duu-bamda utama yi, Siin kawu, God ayo boko-lomda:
ROM 4:21 Man ma kup-tokomi kayi! ansa kaali, God ali atin fan kanolama no, kalsa.
ROM 4:22 Kanum bokola, God ayo atamaya, Abraham ami God ali fan kanolama no, kala bokola-lomda: Kabi tituun-kup tabin tunum o, ansa.
ROM 4:23 Kemin, God ami Sukon Tem kabak boko-lomdu: God ayo boko-lom: Kaali tituun-kup tabin tunum o, ansa kaa, Moses ali Abraham ami aket kaata-kup fuku-daa-lomda dolsa disa;
ROM 4:24 ali numi aket kaaso fuku-daa-lomdala kemin, dolsa. Kemin, God ayo numi Kamokim Yesus ali asuk dafola tam tiinse kemin, nuli God ami lak kaa dakaabup. Kemin, God ali almi lak dakaabup kaata, atam-somdala, Ibi tituun-kup tabin unang tunum o, yokokoma.
ROM 4:25 Kemin, God ami aket fukunin kaali, Kukuyiliya, iyo utamipla yi, God ami Man taanda numi ban kemin kaami mose kaami liip kawu, God kaa nuli talalu-yimuba no, kalin o, kalalaya, ayo dabaala tildaak as diim taanaya, God ata, Dafoli tiltam tiin-ilomda ayo imi dotu-yimulaya, imi ban kemin kaami maan ayo disa keyulula tituun-kup tabin unang tunum kelin o, kala-lomdala Yesus ayo kom tem kawu dafola tiltam tiinsa ko.
ROM 5:1 Kemin, nuli utamupla, God ali ti yaap kanolama kala kalalupla, nuyo almi lak duulupla, ayo numi Kamokim Yesus Kraist ata taba-lomda numi iliim kaa bolaya, God ayo numi bokoya-lomda: Kipni ban kemin kaami uluum kaali, disa kelaya, tituun-kup tabin unang tunum kelip kayi! yakala kemin, nuli God aso aket bilili-kala-lom aket maakup ke-sulup.
ROM 5:2 Yesus ami lak duu-sulup kabak-ata alta yim-biila din God ami mepso kawu daalaya, nuli God alta disa misiim kawu dong dakaayin-balaya, laabup kemin, utamuwa yi, God ayo yim-bii tam almi abip daalala, aso yaap-kup tiinokomup kala, kalalupla ami fiyaap kaata-kup, duu-bamdup ami fenbup o.
ROM 5:3 Nuyo kabak-ami fiyaap kaata-kup duumin daa; angtiil yol tildak numi diim abokomu kaakal ti kano kaami fiyaap kaaso duu-bamduwa yo, kala-somla ko. Nuli kanola uluum tabin tiltam numi diim tulu uyo titil-foko-lom ku nakal tii bom kutal-fukulup namti, kaata taba-lomda, titil-fak-daa yim-bak-molaya tiltam titil-fokolokomup o.
ROM 5:4 Nuli tiltam titil-fokolup namti, God ali kaa tambal o kalokoma; God ami Tambal o kalokoma kaata, taba-lom nuli dong dokoyalaya, God ali ulela yim-biila din almi abip unokoma kaami fiyaap kaata, duu-bam fenbup.
ROM 5:5 Kemin ale, utamupya, Nuli ulela yim-biila din almi abip unokoma no, kalup namti, fan atin ti alalta ulela yim-bii-yim-tam-daalaya kawu, nuli fiyaap duu-mokomup. Kemin, kaa kalok kata naa kalolip: God ali almi Sinik Tambal kaata kuyila, Sinik alalta kukuyim-balaya, numi aket fukunin ayo atamupya, God kaa numi aket-kup kuyimba no, kebup o.
ROM 5:6 Kemin, ami numi aket kukaayin kaali, kanolin kemin, siin kaa nuli titil-fokolin disa ilupla, God ayo, Kulaata yaapso kelu nami Man ayo taanokoma kala, kala-somdaya, Kraist ayo kukup mafak kutal-fukusup numi lak kaata, duu-lomda taanaya, nuli yim-tama tildang God ami miit tem daase.
ROM 5:7 Kemin ale, kano tunum ma ami aptum ayo atama yi, Mafek mafek mafak ma uta tunum tangbal kaa aalon o, kem-tabu namti, du maakup ma kulaata-kup din dong dokola-lom ami abiin kaayo, kuluu-lomdila taanon o kaloma tap ema? Lale,
ROM 5:8 Kraist ami taanse kaali, mep tunum ami taanon o kaloma tap disa; ali akal almi kusnum; nuli unang tunum tambal disa; nuli ban kemin unang tunum ke-bom laabup. La, Kraist ata taba-lomda numi iliim kaa bolon o, kala-lomda atin aket fukunin dinim ke-lomda, taanse kemin, kanolin kukup kaa God ata kukuyase kabak-ata utamupla, Numi aket kaata aaluya kemin, kaa kanose no, kebup ko.
ROM 5:9 Kemin, ayo taanaya, ami kiim kaata sing-tam-daa-lom nuli diinga-yimuluya kawu, God ayo bokoya-lomda: Ipni ban kemin kaami uluum ayo disa keyalaya, tituun-kup tabin unang tunum kelip kayi! kalase. Kemin, kamala ayo atin ti utamupya yi, Fan kaa kanose altap ke atin ti dong dakaayin-kup ke-bala God ami aket atul tabemin kaa nuli ma kuluulokomup disa kala, kalbup.
ROM 5:10 Kemin, siin kaa nuli God ami waasi kela bom ilupla kawu, God ami Man ayo tal taanse. Ami tal taanse ami win diim kawu God ata taba-lomda: Waasi kemin kukup ayo kukan-tiiyala, God aso, nuso maakup aket ayo kola-una-tala-ke-sulup. Kemin, nuli atin ti talalu utamupla, Fan God ami Man kaa fan tam tiindala, unang tunum imi dong dakaayila-laaba. Kemin, ilom kaali, numi ban ke-bulupla, God ayo aket atul kelula, kaami kalan kuyikin uyo God ami Man ata tam taba dil molaya, atin ti yaap-kup ilokomup o, kalbup.
ROM 5:11 Kemin, kaata-kup daa; numi Kamokim Yesus Kraist ata numi kanoyilaya, God ayo nuso aket maakup ke-sulup. Kemin, kamala kaa, God ami kaa kanose kaami fiyaap kaata, duubup o.
ROM 5:12 Tunum maakup ma Adam ata taba-lomda ban kemin liip kaayo, kutal-dang-daalaya kawu, ban kemin kukup uyo tiltam aba-lomdu tawaal diim kalawaayo dukum-nula kawu, taan-laamin uyo kutaltam-daaluya, unang tunum alik ban ke-bilipla, kaami uluum kaata yim-buulaya, suunkup taan-laabip ko.
ROM 5:13 God ami lo kaa kuyin disa bom ilala kawu, ban kemin usiik tawaal diim kala bom-biisu. La, unang tunum iyo utamipya yi, Numi kanubup kaali, ban kemin namti kabuu no, kemsip disa; God ali imi ban kemin kaami maan ayo abiltap-siik kukaayim-bisa disa.
ROM 5:14 La, saaka-laamin kuuli, Adam ami diim kawu ilu kulii yakyak kutal Moses ami diim daaluya, unang tunum alik biisip iyo yim-buuluya taan-laa-bisip. Tunum malo ma God ami weng kutiilala, Adam ata losa tap kanosip disa; ti disa kulu babon-bamdipla, lo duul-bam ilsip. Lale, saaka-laamin kaata, taba-lom yakal ti yim-buu kesu ko. Sawaayak kawu, God ayo Yesus ami sang kaayo, boko-lomda: Bii-lom kaali tunum kamokim ma dabaali din unokoma no, ansa. Kemin, God almi sikil ta tunum Adam kaa dotusa ami aket ayo fuku-daa utam-som ale, tunum kamokim God ata dabaala tildaak tawaal diim talsa kaami aket ayo kaakal ti fuku-daa utam-som kelupla yo.
ROM 5:15 Adam ami ban kesa so, God ami numi disa misiim kulu olen-daaya-lomda talalu-yimusa so, kaa fanang maakup disa; akal almi fanang alik kemin, tunum maakup ma ami ban kesa kaami laban kaata, taba-lomda unang tunum yaapkan kii yam-tal-fukulaya, saaka yakyak talan-umbip te! Lale, God ali numi disa misiim kulu olen-daaya-lomda, tunum maakup Yesus Kraist ami tem kawu, kukup tangbal kaata, unang tunum yaapkan numi kuyinsa. God ali numi disa misiim kulu olen-daaya-lomda kukup tangbal kaa kuyase kaata, uta uta ke-lomdu, Adam ami taan-laamin kutaltam numi diim daayase kuuli, kabaak banu kewasuu.
ROM 5:16 God ami disa misiim kulu olen-daaya-lomda ali kukup tangbal kuyase so, Adam ami ban kemsa so, kiili, akal alik akal alik kemin Adam ami ban kesa kaali, God ayo dabak-saan-bam bokola-lomda: Tunum kalawaa ban kela kemin, ami man loop tiltam talemip iyo alik ban ke-bamdip maaklo ke atin win dinim ke-lokomip kayi! kalsa. Lale, am kala daansu kaali, unang tunum yaapkan iyo ban ke-biliwa, God ayo bokoya-lomda: Ibi win dinim ke maaklo ke-lokomip o, kalase. La, ayo asuk disa misiim kulu olen-daaya-lomda, Kibi tituun-kup tabin unang tunum o, kala kutiiyinsa. Kemin, God ami kaa olen-daaya-lom bokoyase kaali, almi kukup tangbal kuyase namti kaa bombu.
ROM 5:17 Tunum maakup Adam ata taba-lom God ami weng kuyang saak tela-lom, ban kelala, ami liip kawu tiltam taan-laamin kaata, unang tunum iyo yam-mafak-dakan-tabasu. Kaa kanum tabasu uyo ti sakbaalim dukum; kemin ale, kuno tunum maakup Yesus Kraist ami kanosa ami liip kaata, kukup tangbal kaali, disa misiim kulu tiltam taben-umbu kabak-ali atin ti dukumsu. Kemin, alik kii kanta ma Kraist ami lak duulipla, God ayo bokoya-lomda: Kipni ban kemin kaami uluum uyo disa keyuluya, tituun-kup tabin unang tunum kelip o, kala namti, kiita God ami titil ayo kuluu-lomdip suunkup ilokomip. Kemin, God ami kanolin weng ayo masiim imi kuyokoma ko.
ROM 5:18 Weng kuu kanum bokosu kemin, uyo talalu utamum. Tunum maakup Adam ata tiltam taba-lomda, God ami weng kutiisa uyo losa. Kemin, kaami laban kaata, unang tunum alik nuli ti yam-mafak-daasu. Kemin, God ali boko-lomda: Iltipni ban kebip kaata, maaklo ke win dinim ke-lokomip o, kalsu. La, tunum ma Yesus ami as diim taanse kawu, ami tituun-kup tabin kukup namti kala bombu. Kemin, God ali kaami aket kaata fanang daa-lomda boko-lom: Kipni ban kemin kaami uluum kuuli disa keyu no, kalalaya, nuyo uktakan kuu-lomdup suunkup ilin unang tunum ke-sulup.
ROM 5:19 Kemin, tunum maakup Adam ata God ami weng ayo saak kuyang tela-lomda ban kelala, kaami laban kaata taba-lomda, unang tunum yaapkan iyo yam-mafak-daasa; la, tunum kusnum ma kaali, Yesus Kraist ata Aalap ami weng kaayo, weng san-ilomda kanola kemin, unang tunum yaapkan iyo God ata bokoya-lomda: Ibi tituun-kup tabin unang tunum kelip o, kal-bomda bakaya-tabasa ko.
ROM 5:20 Kanola, God ayo ban kemin kaayo fatap-nuk o, kala-lomda Lo kaayo kuyilaya, unang tunum ili Lo kaali, duul-bamdip atin ti ban kemin dukum ayo kemsip. Lale, God ali utam-ilomda atin ti dukum-kup olen-daayase kaata, taba-lomdu kiimi ban kemin uyo kabaak banu uta uta kesu.
ROM 5:21 Kemin, siin kaali ban kemin kaami kukup kaata taba-lomdu taan-laamin uyo kutal-dang-daaluya, kaami diim kawu unang tunum iyo dukum-kup yim-tal-fukulu tabasip. Kemin, kamala kalawaata, God ayo disa misiim kulu ami olen-dakaayin dukum kaata, taba-lomda nuli talalu-yimulaya, God ali bokoya-lomda: Kipni ban kemin kaami uluum ayo disa keyilula, tituun-kup tabin unang tunum kelip o, yakase. Kemin, kaa dok ami kalan kabak ata naa kalolip: God ayo numi Kamokim Yesus Kraist ami taanse ami win diim o, kala-lomda nuyo talalu-yimulaya taan-laamin liip uyo kano kela-lomdup kala, tiltam suunkup ilin unang tunum ke-sulup o.
ROM 6:1 Kanum bokosu kemin, kanimin o, kalokomup i? Boko-lomdup God ami disa masiim kulu olen-dakaayin kaali, uta uta kesu. Kanolin kemin, nuli ban kemin-kup kaa, ke-buluwa, atin ti God ata nuli olen-daayak o, kala-lomdup ban kemin-kup ke-mokomup ema?
ROM 6:2 Daa te! Nuli tunum taanda almi ban kemin kuuli kewa uneba tap ke ban kemin kaami mok inin uyo kulaa-sulup. Kemin, kanimin o, kala, kamala kalawaali nuli ban kemin ayo ti kutal-fukulin-kup kebup i?
ROM 6:3 Kemin, oksam oko-sulup kabak-ali, Yesus Kraist ami win diim oksam woko-sulup. Kemin ale, kabaku God ami tiin diim ayo nuso, Kraist aso, ke maakup saaka-laabup tap ke-lomdup oksam oko-sulup. Kemin, ibi kabak-ali utamsip disa ema?
ROM 6:4 Kanola numi oksam oko-sulup kabak-ali Yesus Kraist ami saakna dawaa-silip tap ke-sulup. La, God ali nuso, Yesus Kraist aso, yim-baak tawaal tem tiilip bom-bilip tap keyase. Aalap almi titil awak dukum kaata kuluu-lomdala Kraist ayo dafose. Ultap kemin, nokol kanola ata talalu-yimulaya, tiltam kama unang tunum kemalup ko.
ROM 6:5 Kraist ali ma kanola ban kemsa disa kemin, nokol ti yak ami diim kawu fewa-lomdup tunum saaka almi ban kemin kewa uneba tap ke-sulup. Kemin, kanola nokol ti ilom am ma daanokomu kaali, yak ami diim kawu fewa-lomdup asuk kanola tam tiinsa tap ke-lokomup.
ROM 6:6 Kaa nokol utamsup kemin, Kraist ami as diim kawu, aalip taanse tap ke numi siin kukup kaali, God ata wela taanuya, ban kemin numi diim kawu bombuu kaami titil ayo disa kelu kewase. Kemin, tunum saakna kaali, ali kalok kano-lomda ban kemin ayo maso ma asuk ban ke-mokoma disa; nuli ban kemin kaami ok ayo maso ma kutal-fuku-laamin daa; kuno kelum o, kala-somla ko.
ROM 6:8 Nuyo utamuwa yi, Kraist ami taanse ultap ke-sulup o, kalup namti, nokol ti kanola kawu dotu utamupla, Nuli yaawa-lomdup Kraist aso ilokomup o, kalokomup.
ROM 6:9 Kemin, nokol utamsup, Kraist ali asuk tam tiinse kemin, taan-laamin uyo maso ma titil-foko dabaak molokomu disa le, ali asuk maso ma taanokoma disa.
ROM 6:10 Kraist ali du maakup ma taanaya, tiiksu. Kemin, saakase diim kabaku ban kemin kaami titil ayo fokola unu kewa tiltam tiin yaawa-lomda tam banse. Kemin, kamala kalawaami Yesus ami tal-uneba so, tiin bombe so, kii, God ami ok ayo tabuu-bom kanu-balaya, God ali Yesus ami fiyaap ayo donba.
ROM 6:11 Kemin, ultap kaayo, bokoyokomi kaali, ipkal aket fukunin! Ibi tunum saaka-lom almi ban kemin kuuli kewa uneba tap kesip. Kemin, ban kemin kaami titil kaa taang-kala-lom asuk maso ma yim-baak-molamu dinim; kibi yak Yesus Kraist ami diim kawu fewa-lomdip yaawa okok ke-bulupla, God ali numi fiyaap ayo duumak o, kala-lomdip God ami ok kaa okok kebip o.
ROM 6:12 Kemin, kanola ban kemin uta taba-lomdu kipni angtiil saaknin uyo bokoya-lomdu: Kaa kanumin o, yuku namti, ibi kaa kanumin daa; le, aa ban kemin uta taba-lomdu ibi yim-tama yang daalu, aket fukunin mafak kuuta taba-lomdu, Kaata kanumin o, kalu uta-kup diki-un-bamdip, yang umi tem diinokomip. Kemin, utafii-bamdiiwa kayi!
ROM 6:13 Ibi tunum saakna dawaalip asuk tiltam tiinba laaba altap kesip. Kemin, kipni yaan sikil ayo kuyang daa, kukup mafak ami diim daa, ban wakamin daa; kipni angtiil so, aket fukunin so, alik kiiyo kuyak God ami diim kawu, tiiliwa, sikil yaan iyo tituun-kup tabin kukup tambal kaata-kup, nuu-biliwa yo.
ROM 6:14 Kemin, ibi Moses ami Lo umi diim kawu bom-bilip disa; ibi God ami disa masiim kulu olen-ilin diim kawu bom-bilip kemin, ban kemin uyo kewipla uta, taba-lomdu de-yimu-laamin daa yo.
ROM 6:15 Kemin, kanola namti, kaa nuli dok kanolokomup ma? Nuli lo umi min lo tem kawu unemin kaa kulaa-lomdup God ami disa masiim kulu olenin ami diim kawu tiinup kala kalalupla kawu, yaap ban kemamup eliye? Atin ti disa!
ROM 6:16 Ibi kaa atamsip disa ema? Nuli kanola yak tunum kamokim ma ami sikil diim abamnupla tiin moba, ami weng kaata-kup kutal-fuku kulii-tabup namti, nuli tunum kaami sok de-yimulala, tunum ma kaami disa iip okok kamaalin unang tunum ke-lokomup. Kanolin kemin, utamin! Ibi ban kemin kaami weng ayo kutal-fuku kulii-tabip namti, ban kemin kuuta taba-lomdu sok de-yimulin tap keluya, ban kemin kaami uluum uyo kuluu-lom saak-nokomip. Kanolin kemin, ibi God ami weng kutal-fukulip namti, ipkal tituun-kup tabin kukup kaata-kup kutal-fuku kulii-abokomip.
ROM 6:17 Kemin, ibi sawaayak kaalile, sok de-yimulin tap kelula, ami ok kaata-kup disa ok fuku-bom biisip. Yale, kamala kalawaata, God almi weng tituun-kup tabin uyo kulaalip yak kipni diim abamnu, atin kutal-fuku-silip. Kemin, kipso, naso God ami yaap ke yo, akan-kaa-bamduwa yo, kala-somla ko.
ROM 6:18 Kibi kukup mafak kaami okok kemin unang tunum kesip. Yale, ban kemin uta taba-lomdu ibi sok ta de-yimulin tap kesu kaali, God ata til-daa-yim-baa-lomda yim-biyak tituun-kup tabin kukup kaami diim daalala, kibi tituun-kup tabin kukup kaami sok ta de-yimulin unang tunum ke-silip.
ROM 6:19 Kemin, kipni aket fukunbip kaa, titil-fak-daalin dinim bombuu no, kalalila kemin, tunum nulmi kukup kaami sang kaata bakayimbi. Kemin, siin kaa kipni sikil yaan kulaalip yak ban kemin diim abamnu, sadiki-bam kukup mafak mafak ayo nuu-bam ken-umbip. Lale, kamala kalawaata kipni sikil yaan ayo kulaalip yak kukup tangbal ami diim abamnu kaata-kup kutal-fuku kulii-taba-bomdiwa kawu, God ami man alik-daap kelin o.
ROM 6:20 Sawaayak kaali, ban kemin uta taba-lomdu sok ta de-yimulin tap kelula kawu, ibi kukup mafak kaata kutal-fuku-bom ilsip kabak-ata, kipni aket ayo fukun-bamdiwa, Nuli kukup tangbal kaali ma tabuulum o, kemsip disa;
ROM 6:21 lale, kamala kalawaali kipni siin kaami kukup umi fatom kaata tabeyimbu kemin, ibi umi tem kabangu dok nolin dok nolin mafek mafek tambal kaa ma kuluu-silip i? Daa. Kaa disa. Kukup kaali, atin saaka-laamin kaami kukup kutaltam dakamin kukup namti kabuu.
ROM 6:22 Kemin ale, kipni ban kemin ta taba sok ta de-yimulin tap kesu kaa God ata tildaa yim-baalala, ibi almi ok tabuulin tunum unang kelipla, God ata dong dokoyilala, ibi God almi man alik-daap keliwale, kukup kaali atin suunkup ilin kaami kukup kutaltam dakamin kukup namti kabuu.
ROM 6:23 Kemin, ban kuuta taba-lomdu ulmi ok tabuulin unang tunum kiimi ok fukulin ami sisol kukaayila-laabu. Kemin, sisol kabak-ali atin saaka-laamin kaata; yale, God ami kukup tangbal numi misiim kukaayila-laaba kaali, nuli yak Yesus Kraist ami diim fep-nupla, alta tiltam numi Kamokim ke-lomda talalu-yimuse. Kemin, ilom kaali, im-taldang almi miit tem daalala, aso suunkup ilokomup o.
ROM 7:1 Nak-tunum kusal kipyo! Kibi lo umi kukup kulaa utamsip kemin, weng kala ipni bakayokomi kalawaali abiltap-siik uta-mokomip. Kemin, tunum tiin kawang ilokoma kaata-kup lo ayo taba-lom sok ta delin tap kelu weng san kutal-fukulokoma. Lale, taanokoma kaalile, disa yo.
ROM 7:2 Kemin, faldak-tiimin weng ma bokoyokomi kemin, dotu weng san iliwa. Tunum din uli imak kaa taanin disa bombe namti, kaali lo uta taba-lomdu akam ili sok ta de-yim-tiilin tap kelula, akam iyo bom-bilip. Kemin ale, imak ali fan saakna namti, lo ta akam sok ta de-yimulin tap kesu namti unang kuuli maso ma sok ta de-umtiilin tap ke-lokomu disa.
ROM 7:3 Lale, faneng, imak ali saaknin disa bom ilala kawu, yak tunum kusnum ma kuluulu namti, kaata fan kayak kayak iyo bokowa-lomdip: Unang kuu tunum din la, imak kaa kano kelu no, kalokomip; aa imak ayo saakna namti, kaata lo uyo taba-lomdu unang kuu maso ma sok dewin tap ke delokomu disa; kulaa uyo kula kela yak tunum kusnum dabuulon o, kalu namti, uyo imak kaa kelu no kalokomip disa. Kemin, ultap kaayu, taanokomup kaali, lo uyo asuk maso ma sok ta de-yimokomu disa yo.
ROM 7:4 Ultap kemin ale, nami nak-tunum kusal kipyo! Kibi tiltam Kraist almi angtiil o, kala almi unang tunum ke-silip kemin utamduya, Ibi Kraist ami taanse tap ke-silip. Kemin, Moses ami Lo kuluuli, asuk maso ma sok ta de-yimulin tap ke-lokomu disa; ibi unang kaluun umi tunum kusnum ma dabuu-laabu tap ke-silip. Kemin, kipni alokso timak ma kaali, tunum dawaalip asuk tam tiinse alta kemin, ami win diim kabaku nuli God ami no kalalupla, kukup tambal kaa kanubup.
ROM 7:5 Kemin, siin kaami aket fukunin kukup mafak umi diim bulup kaali, lo uta bokoya-lomdu: Kukup mafak kaa kanumin disa kayi! yinsu. Lale, nulmi aket mafak fukunin uta taba-lom, numi aket uyo kufuyin-bulula, kanum tabasup. Kemin, kanolin kaa numi aket tem kabaku ilomdula, suunkup taan-laamin kukup uta kutaltam dakan-umba.
ROM 7:6 Lale, nuyo Kraist taanse tap ke-lomdup mafek mafek kaa taba-lom numi yim-tal-fukusu uyo kewa-sulup. Kemin, lo uyo taba-lomdu nuli maso ma yim-tal-fukulokomu disa; kamala kalawaali numi God ami kukup kanubup kaali, kaami liip kaali ti kanumin kemin, God ami siin Lo Moses ami kolala, dolsa kaali, bokoyilu, kanumsup kaa daa; kamala kala God ami Sinik ata dong dakaayin-balala, kukup kusnum kuluu-lomdup kanubup kaata te!
ROM 7:7 Kanum-laabup kemin, nuli kanimin o, kalokomup? Nuli boko-lomdup: God ami Lo kuluuli ban kemin kaami miit namti kaa buu no, kalokomup ema? Disa. Lo uta taba-lomdu ban kemin kaa nami kukup-nin disa nosu dinam, niyo ban kemin miit uyo utamsi disa. Kemin, umi miit uyo kalabu no. Lo uyo boko-lomdu: Kabi kaptum ami mafek mafek uyo tiin nenin disa yo, kala-lomdu Lo uyo kanum bokosu disa dinam, nali mafek mafek nenin kukup uyo kaali ma utamsi disa.
ROM 7:8 Lale, ban kemin uyo utamu yi, Liip ma bombuu kala, kala-lomdula Lo kaami sang bokop-na-lomdu, nami aket tem kaali, nenin kukup akal alik akal alik kanolin kiita kutal aba yak tiip-ninsuu no. Kemin ale, Lo disa dinam, nuyo utamuwa yi, Kukup kalawaali ban kemin o, kala-sulup disa yo.
ROM 7:9 Sawaayak kaa, nali God ami Lo kutiisa kaayo ma utamin disa bomdiya, kukup iip ma ma uyo kanu-bisi. Lale, mulo kalawu God ami Lo uyo utamila, Kulaata ban kemin uyo tiltam fatap-nula,
ROM 7:10 utami yi, Nami ban kebi kalawaali ti taan-laamin liip namti kaa kebi no, kalasii. Kemin, kamasi kaali, God ali tiin kawang ilan o, naka-lomda almi Lo uyo, kup-nase. Yale, Lo kuuta taba-lomdu dong dokop-nu tiin kawang ilomi disa; Lo kuu nami saaka-laamin liip kebi kaata kukup-ninsuu no.
ROM 7:11 Kaa dok kata naa kalolip: Ban kemin kuu utamu yi, Liip ma buu kala, kalaluya, Lo umi sang uyo kasen-fokop-nula, Fan o, kalila, ban kemin ulta taba-lom Lo kuuta kuluu-lomdu nelu saakasii.
ROM 7:12 Lale, God ami Lo kuuli, ban kemin kaami miit namti kaa bombuu disa; kaali ti atin tangbalim ale, weng alik kiili, God ami Lo tem kabaku bombuu kabak-ali ti tituun-kup ke-lom tangbal-kup faltama unsuu no.
ROM 7:13 Kanum bokolup. Lale, kalok kano-lom lo tangbal uyo taba-lom nelu saak-nami ni? Disa te! Ban kemin kuuta taba-lomdu nelu saakasii. Kemin, ban kemin uyo tiltam fatap-nula, nuyo utamuwa yi, Ban kemin kuu atin mafek mafek mafak dukum o, kala-sulup. Kemin, ban kemin uta tam taba lo tambal uyo kuluu-lom okok ke-bamdula, taan-laamin kuu taltamdula, nami diim kawu bombuu kemin, kaa kanosuu kaali, lo taba-lomdu ban kemin kaami kukup uyo kukup-nu utami yi, Ban kemin kaali, atin ti faneng mafak dukum o, kalasii no.
ROM 7:14 Nokol utamsup. Lo kabak-ali God ami Sinik Tambal ata taba-lom kukuyale, God ami aket fukunin uta, Kanolin o, kalba namti kaa buu no, kala kukuyila-laaba. Lale, nali aket mafak fukunin kaayo, bom-buluya kemin, God ayo kaata kanuman o, keba ayo kuno kelila kemin, ban kemin uta taba-lomdu nali sok ta de-namulin tap kelula, umi ok kaata-kup tabuu-bom ilsi.
ROM 7:15 Kanolin kukup kaa kanun-umbi kaami miit kaali, utamsi disa; kabak kanun-laabi kaalile, dok kanolin kaami kukup kaata ma kanu-mokomi ma kalbi kaa fan, ma kanun-umbi disa; kaa utamila, Kaali kukup mafak o, kalali utamsii kaata, suunkup kanumin-kup laabi.
ROM 7:16 Kanola nali kukup kalawuuli mafak kemin, kanu-mokomi disa yo, kem-laabi. Lale, asuk kanubi. Kemin, kanumi disa yo, kem-laabi kabak alile boko-lomdi, Lo kuuli tangbal kemin o.
ROM 7:17 Kanola nami kanun-umbi kaali, tunum nalta kanun-umbi disa; ban kemin kaata, nami iipyak tem bombuu uta taba-lomdu kanun-tabasu.
ROM 7:18 Kemin, nakal utamsi kaali, nami siin kukup fukunin aket umi tem kaa mafek mafek tangbal so ma bombuu disa; kukup tambal kulaa kuno kanu-mami no, kalbi. Lale, dok kano-somdi kanu-mami disa.
ROM 7:19 Aa, kuno kukup tangbal kulaali kanu-mami no, kalbi ayo fan kaa ma kanun-umbi disa; kemin ale, kukup mafak kaa fan kanu-mokomi disa yo, kala-laabi kaata, fan kanun-unbi.
ROM 7:20 Kemin, kukup mafak kaa kanu-mokomi disa kalbi kaayo, asuk nakal kaa kanubi kaali, nata kanun-umbi daa; ban kemin nami iipyak tem kawu bombuu kaata, kaa kanun-umba no.
ROM 7:21 Nali utamila, Kalanolin kukup kalawuuli nami diim kawu bombuu kemin, nali kukup tangbal uyo kutal-fukulami no, kalbi. Lale, kukup mafak kuuta taba-lomdu nami liip kaayo, kutii-bom laabu no, ken-umbi.
ROM 7:22 Kemin, kuno nalmi aket fukunin kaami iipyak tem kulaa God ami Lo umi aket uyo nesu.
ROM 7:23 Lale, nali kawu utamila, Kukup ma nami iipyak tem kabaku bombuu no, kala-laabi kuuta, taba-lomdu God ami kukup nami aket fukunin kaami tem bombuu uso alep din-bomdipla, uta nim-biyak ban kemin umi titil diim nami iipyak tem kawu sok de-namulin tap kesu.
ROM 7:24 Kemin, kwin, kaso kawi! Nami siin aket fukunin uta taba-lomdu suunkup tii nam-mafak-daka-bulula, atin mafaksi kaata, kawanta ma taba-lomda kaa nam-buulokoma ni?
ROM 7:25 God ata kemin, ali taba-lomda numi Kamokim Yesus Kraist ami bokolaya, ata nam-buulokoma no, kalalila kemin, nali God ami yaap ke yo, kebi. Kemin, nami kanu-bam bii namti kaa bombe kemin, nakal nalmi aket fukunin uta utamila, Nali God ami Lo diim kawu bii no, kalbi. Lale, nami siin aket fukunin almi kukup uta taba-lomdu ban kemin umi titil diim kawu bombi no.
ROM 8:1 Kanolin kemin, nuli Yesus Kraist ami diim kawu fewa-sulup kemin, kamala kalawaali, God almi yim-bak-saanin weng kabak-ali ma kaa bokoya-lomda: Ibi ban kemin kaami sisol ayo ma kuluulokomip o, kalba disa.
ROM 8:2 Kemin, umi miit namti kala bombe: Nuli kanola Yesus Kraist ami kelupla kawu, God ami Sinik Tambal kaata taba-lom talalu-yimulala nuyo suunkup ilin unang tunum ken-umbup. Ban kemin so, taan-laamin so, ita taba-lom nuli sok ta de-yim-tiilin tap kelip biisup. Lale, nali de-nam-tiilip biisi ayo God ami Sinik Tambal ami titil ata tildaa nam-baala nali yaap-kup bombii.
ROM 8:3 Kemin, kaami liip namti kala bombe. Numi ban kemin uta taba-lom liip kawu, tiinsu. Kemin, Lo kuu kalok no-lomdu nuli dong dokoyulula, Lo uyo tabuulalup disa. Lale, Lo kuu fan taang-kala-somdula kanolamu dinim kelu kala, kalalala, God alta taba-lomda kuno, almi Man ata dabaala tildaak tawaal diim aba-lomda ami angtiil kaali, ban kemin unang tunum numi angtiil altap kese. Kemin, God ayo numi ban kemin ayo kukan-tiiyon o, kalalala, numi ban kemin umi maan ayo almi Man Yesus Kraist ami kolala, ata numi molaya, nuli yaawa-sulup.
ROM 8:4 Kemin, Kraist ali, Kanoliya, nami Lo kaami kukup tituun-kup ayo imi diim abamnu, ti atin kutal-fukulin o, kala-lomdala kanose. Kemin, kamala kalawaali, siin kaami kukup mafak kaa maso ma kutal-fuku-lom nuubup disa; God ami Sinik Tambal ami kukup kaata-kup kutal-fuku-lom nun-umbup o.
ROM 8:5 Kemin, tunum ayo kanta almi siin kukup mafak umi aket-kup an-bulu ila namti, ali almi aket fukunin kaata-kup kutal-fuku-bom kukup mafak kaali nuu-mokoma no; ale, tunum kanta kukup ma God ami Sinik ata kukolala, ami aket-kup an-bulu ila namti, kaata God ami Sinik ami aket fukunin tangbal kaa kanuman o, keba kaata, kutal-fukulokoma.
ROM 8:6 Kanola, tunum ami aket fukunin ayo almi siin kukup mafak ami aket-kup kola namti, tunum kaa almi taan-laamin liip kaa keba; kemin ale, kuno tunum ayo kanta ma God ami Sinik ami aket-kup kola namti, kaata ami aket ayo bilili-kala bomda almi tiin kawang ilin liip kaayo, keba; kemin ale,
ROM 8:7 kanola tunum ali kanta almi siin kukup mafak aket-kup kola-bom ila namti, tunum kaali, God ami Lo uyo kutal-fukulon o, kalba disa le aa, dok kano fukulama disa ke-lokoma. Kemin, ali God ami waasi kela ilokoma.
ROM 8:8 Kemin, tunum kanta almi siin kukup mafak kutal-fukulin-kup kema namti, tunum kaa God ami aket fukunba kaami kukup ayo fan, taang-kala fukulama dinim.
ROM 8:9 Lale, fan kanola God ami Sinik Tambal ayo ipni diim kawu ila namti, kibi iltipni siin kukup mafak umi diim kawu bilip disa; ibi Sinik Tambal ami kukup kaami diim kawu bom-bilip o. Kanta Kraist ami Sinik Tambal kaa ami diim kawu ilin disa namti, ali Kraist ami tunum disa.
ROM 8:10 Kanola iltipni ban kemin uta taba-lomdu ipni angtiil uyo welu saak-nokomu. Lale, Kraist ali kipni iipyak tem kawu bombe namti, kaata God ami tiin diim ayo fan, tituun-kup tabin unang tunum ke-lomdip kipni sinik ayo yaawa-lomda tambal-kup bombe no.
ROM 8:11 Yesus Kraist ali taanala, God ata taba-lomda asuk dafola tam tiinse. Kemin, kipni iipyak tem kaali, God ami Sinik Tambal ayo ila namti, ilom am ma daanula, God ami am mafiing daanokoma kawu, God alalta tam-taba kipni angtiil taansip iyo asuk yim-fola tam tiin-ilom tiin kawang ilokomip o. Kanolin ok kalawaali ami Sinik Tambal ipni iipyak tem kawu bombe ami kolala, kaa kanu-mokoma no.
ROM 8:12 Kalu kemin, numi nak-tunum kusal kipyo! God kaa nuli bokoya-lomda: Iltipni siin kaami aket fukunin mafak kuu kutal-fuku-laamin disa yo. God ami Sinik ami weng bakayimba kaata-kup kutal-fuku-bomdiwa yo, ken-laaba.
ROM 8:13 Kemin, kanola ibi siin kaami aket fukunin mafak kaata, kutal-fukulip namti, iltipni saak-nokomip kaami diim kawu, iltipni win ayo atin ti disa maaklo ke-lokomu. Kemin, ibi kanola Sinik Tambal ami dik-daaliwa, alta taba-lomda kukup mafak ipni diim kawu bombuu kaayo, wela taanula, ibi daang ukuwa-lom kelip namti, asuk tiin kawang ke ilokomip o.
ROM 8:14 Kemin, tunum ayo God ami Sinik ami weng kaa weng san-kaamin kiili, God ami man kensip namti kaa bilip.
ROM 8:15 Kemin, ipni God ami Sinik dabuu-silip ibi taba-lom disa de-yimu-lom ipni suunin kaa kukaayila-laaba disa; Sinik ayo dabuuliwa ata, ulelnala tiltam God ami man kela-laabip o. Sinik ami titil diim kawu, God ayo naan-bamdup: Atok o, Atok o, akan-kaa-bam naalin-kup kem-laabup.
ROM 8:16 Kemin, numi aket tem ayo utamuwa yi, Nuli God ami man o, kebup kemin, kano God ami Sinik alta kukuyim-balaya, utamuwa yi, U faneng nuli God ami man kala kebup.
ROM 8:17 Kemin ale, nuli God ami man ke-sulup kemin, kaata kuno am ma daanokoma kaali, Atok ami mafek mafek dotuu kutiiyinsa kaayo, almi sikil diim kuluulokomup kaali, Kraist aso nikil maakup kuyaku-diyaku-ke-lomduwa kuluulokomup. Lale, kamala kala bom-bulup ayo utamum: Nuli Kraist ami siin angtiil yol kuluuse tap ke angtiil yol kaamup namti, kabaku am ma daanokomu kawu, abiil tikiin God ami tiin diim kaali, Kraist alaltap ke nuli win soyal kele, God ami mafek mafek tangbal iyo kuluu kelakin o.
ROM 8:18 Nami aket fukunbi kaali, ilom am ma daanula, abiil tikiin kawu tambal-kup ilokomup kaata, kukup tangbal ayo God ata numi kuyokoma kaali ti, mafek mafek dukum kemin, nuyo tangbal-kup kawu, tiinokomup kemin, kamala kaali dok kanolin angtiil yol kaabup uyo, atin ti katip sakap ke-lokomu no, kalbi.
ROM 8:19 Kemin, yak am bokon kala dik-daa kulaasu kaami mafek mafek alik kiiso, ale unang tunum iso, kiili, God ami talalusa kiita boko-lomdip: God ata kukuyila utamuwa yi, God ami man kii kalok nolin unang tunum i? kalum o, kalaliwa titam-daka-bamdip talaka-bam fenbip.
ROM 8:20 Kemin, God ami mafek mafek so, bung so, unang tunum so, talalusa kiili, bomdiwa imi ok ayo tangbal-kup ma nun-umbip disa; atin ti kii mafaksip o. Ilmi aket fukunin kabak-ata disa; God alalta sok de-yim-tiilala, tiltam abasa.
ROM 8:21 Kemin, nuyo fen-buluwa, tituun-kup tabin God ayo nuli tildaa yim-baalala mafak-nokomup disa; ali talalu-yimula almi man imi dalaal-kup bilip tap nokol ti kuluu-lomdup atin tangbal-kup ilum o, kala-lomdip fen-tabasip.
ROM 8:22 Kemin, nokol kabak utamsup, God ami mafek mafek alik kiiso, unang tunum iso, kii talalusa imi angtiil yol kan-tabasip kaali ti unang umi man kuulon o, kala-lomdu angtiil yol dakabu tap yakal ti kanola fiit-bamdip amamin-kup ke kulii yakaba tal kala diilip. Kemin ale,
ROM 8:23 kaali mafek mafek alik am bokon kala tiinsip iso, God ami lak duulin disa unang tunum iso, kiita-kup, aket tem kawu fiit-bam aman duluum-laabip disa; God ami Sinik kamasi kuyala kuluu-sulup nuso, ti kano angtiil yol kaa-bam yol awak uyo utafii-bam kanu-bamduwa, fen-tabasup. Kemin, nuli tiltam God ami man ke-sulup kawu, God alalta taba-lom kanolin kukup tangbal kaa kukaayokomi no, kalsa kaali, kano-lomdala, faneng numi angtiil ayo asuk fal-sikiyila akal kusnum ke-lokomu no, kalalupla, talalu titil-foko-bom fenbup.
ROM 8:24 Kemin, God ali numi iliim kaa boyase kabak-ata nuli utamupla, Fan God kaa numi kaa asuk talalu-yila, numi angtiil uyo akal alik ke-lokoma kala kalalupla, fen-laabup. Lale, kaa mafek mafek ma utamum o, kala fen-bulup tiltam tulu utamup kaa asuk maso ma fenokomup disa; kanola tunum ayo mafek mafek ayo utama namti, kaa kanimin kaata maso ma atamon o, kalalaya fenokoma ni?
ROM 8:25 La, God ali kukup numi kuyokoma kaali, kuluulin disa bom-bulup kemin, kaali ti fan kuyokoma no, kalalupla, numi aket fukunin ayo kukup kaa kuyokoma kaami aket uyo yan-buluya, niyo bilili-kup-kala-bomdup fenbup o.
ROM 8:26 Kanolin kemin, God ami Sinik kaata numi utam-laamin disa aye, beten katip katip kemin aye, numi dong dakaayin, aa kaali kanumin kemin, kaali utamupla yi, Kalok nolin beten kaata naalokomup aa, numi beten weng ayo dik-daalakin la, dok kano-lom weng bak-tam fatap-daa dik-daalalup disa; nulmi aket tem kuyaku fanang daka-mokomup kaa, Sinik ata taba-lom numi uluum kuluu-lomda dong dakaayim-bam beten kamayila-laaba kaali, del weng so ma bokolama dinim.
ROM 8:27 Kemin, Atok ali tunum numi aket tem kaayo, talalu ateyale, aa almi Sinik ami aket fukunin ayo dotu atela kesa. Kemin, kaami miit kaali, almi Sinik kaayo, God ami aket fukunin almi atamsa kaami sang ata-kup God ayo dik-dakaan-bamdaya, God ami unang tunum numi dong dakaayila-laaba no.
ROM 8:28 Kulaa nokol kaal-kesup taa! God almi aket fukunin kaata, Unang tunum malo ma iyo naan-daayila tildang God almi miit tem tal-ilomdip imi aket kaa God ami kola-silip. Kemin, kalok nolin mafek mafek kaa, kiimi diim uyo tiltam tulu namti, God alalta iyo dong dakaayin-balala, yaap-kup laabip.
ROM 8:29 Kemin, God ami unang tunum naan-daayila tildang ami miit tem talemin namti kaabu no: God ali unang tunum alik iyo ti atin talalu itamsa. Kemin, utamala, Kanta nalmi unang tunum alik-daap ke-lokomip o, kala-lomda kiita ulelnila, yaapkan iyo nalmi Man tituun Kraist alaltap keliple, nalmi Man tituun ata imi fik diil keya kelak o, kala-lom ulelsa.
ROM 8:30 Unang tunum kanola kamasi ulelsa iyo naan-daayila tildang almi miit tem tilip kala, kala-lomdala, bokoya-lom: Kipni ban kemin ami maan ayo disa keyilula, tituun-kup tabin unang tunum kelip kayi! kala-lomda almi titil anung kaa kuyilala, kuluusip o.
ROM 8:31 Kemin, God ali kabak-ali kanose. Kemin, nokol kanimin o, kalokomup i? God ami titil kaali, atin ti sakbaalim dukum kemin, numi diim kawu bomda dong dakaayila-laaba. Kemin, kawanta ma taba-lomda, numi waasi ke-lomdip yim-baala kabaak banupla, ata ata ke-lokoma ni? Kuyak atin ti disa te!
ROM 8:32 God ami aket fukunin kaa katip katip ke-bamdala, almi Man ayo dabaala tilse disa; ali aket dinim dabaala tal saak-alomda numi iliim ayo alik boyase. Kemin, almi Man ayo numi kuyase tap ke, atin ti mafek mafek alik ayo aket dinim numi kuyokoma te!
ROM 8:33 Tunum God almi unang tunum ulelase nuli, God ali bokoya-lomda: Ibi tituun-kup tabin unang tunum o, ken-umba. Kemin, kanta taba-lomda numi yim-bak-molokoma yoko? Kaa atin ti disa te!
ROM 8:34 Ale, kanta boko-lom: Tunum iyo ban kemin kaami maan uta kuluulin aa, yokokoma yoko? Kaakal atin ti disa! Yesus Kraist ali saaka le, asuk tam tiin-ilomda din Aalap God ami sikil tingtup lo kawu tiin-bomdala, numi beten kamayim-bamda dong dakaayin-bam bombe.
ROM 8:35 Kemin, dok kanolin ata taba-lomda, Kraist ayo dal molula, numi olen-daaya-laaba ayo kamboyokoma ni? Kano uluum tiltam numi diim abemin aye, angtiil yol tiltam talemin, aa tunum ata kukup mafak kukaayin aa, yak ol fuut am tiltam talemin aye; numi mafek mafek iiwa-laamin aa, mafek mafek mafak ta yelu saaka-laamin aye, yak kanolin mafek mafek mafak kiita taba-lomdip Kraist ami dal saan-bilipla, numi olen-dakaayin kaali, kamboyama nema? Disa! Kaata taang-kala-lomdala dil molalama disa.
ROM 8:36 Yak kanumin mafek mafek iyo tal numi diim ayo aben-umbip. Kanolin kemin ale, God ami Sukon Tem uyo boko-lomdu: Nuli God kapni unang tunum kep-tambup kuyaku kayak kayak iyo anulup saaknik o, kala am daan tal-una, atan tal-una, kemu ayo ti dabak tiiyin-kup ke-bam ale, itamiwa, Nuli sipsip imi anulipla taaniwa ina-laabip iltap keyum o, kal-bom kuno ti anulup taan-laamin ata-kup o, ken-umbip o, kala, kanum bokosu.
ROM 8:37 Kemin, kukup kanolin uyo tiltam taben-umbu. Yale, Kraist ali numi aket kaata-kup an-buluya, nuyo dong dakaayin-balaya kawu, tiltam nuta nuta kem yakyak talsup o.
ROM 8:38 Kulaa faneng, nami utabi kaali, mafek mafek uta ma taba-lomdu Kraist ami ma dil moluya, numi olen-ila-laaba kaa kulaalama disa; kemin, taan-laamin aye tiin kawang ilin aye, ensel aye, sinik mafak titil-kup tabasip aye, kamala kalawaami mafek mafek ma bombe, aa, mafek mafek ma kaptoop talokomu aye, saak yak titil akal almi miit ma ma aye,
ROM 8:39 abiil kaptam-ami mafek mafek aye, tawaal tem kabaak-ami mafek mafek aye, yak mafek mafek saak yak kulu buu, tildak kulu buu, kulaaso alik kuliita ma taba-lomdip taang-kala, God kaa dil molipla, numi olen-dakaayin-bam laaba kaali, kulaalama disa; ti kano olen-yim-bam laaba kaa numi Kamokim Yesus Kraist ami win diim kuluu-sulup kemin, mafek mafek kiita ma taba-lomdip dil molipla, kulaalama disa.
ROM 9:1 Nili Kraist ami tunum kemin, ibakamin weng kaa bakan-umbi daa; ti faneng tituun-kup tabin weng kaata-kup bakan-umbi kaali, God ami Sinik Tambal ata nami aket fukunin ayo dong dokop-na utami ya, Weng kalawaali ti faneng tituun-kup bokolokomi no kalbi. Kemin, weng san iliwa.
ROM 9:2 Nali ti suunkup nalmi nak-tunum kusal Israel imi aket uluum awak kaata-kup kuluu-bomdila, utam yakyak talan-umbi.
ROM 9:3 Kemin, nalmi aket fukunin dukum kaali ti, God ata taba-lomda nami tunum miit maakup iyo im-taldang almi miit tem tiilak o, kebi no. Kemin, nali utami yi, Liip so kelu dinam, Kraist ami dik-daaliya, nata nam-kan-tiilala yak ban-ilomdi nami win ata disa kelule, ita im-taldang-daala nami abiin kuluu-lom tam abiil tikiin unin o, kalomi. Lale, kaa liip namti kabe disa kemin, kwin, kiiso kawi kala-laabi no!
ROM 9:4 Kemin, God ali Israel kasel imi yim-buu bokoya-lomda: Ibi nami unang tunum ale, nalmi man o, kalale, God ayo titil so, dawang so, ayo kukuyila utamiwa yi, Awu, God ali nuso bombe kala, kalsip. Kemin, God ami weng kutiisa so, ami Lo so, tifan lotu kemin kukup kaaso aa, God ami kanolokomi kayi! kala kuka-daasa so, kii imi kuyilala, ilimi diim kulu bombuu.
ROM 9:5 Kemin, sawaayak kawu, tunum miit kaptoop ami man loop namti kaa-bilip ilmi diim kaptoowu God ami uldaa-dabuula tiltam kamokim ke-lom Kraist ayo tiltam tunum kese. Kemin, Kraist ali mafek mafek alik kiimi dabom kesa. Kemin, ali tifan ti God kemin, ami tong kaata-kup suunkup nuyo bakamum o, kala-somla kemin, fan ko.
ROM 9:6 La, nuli utamuwa, God ali Israel kayaak iyo alik ulelnala, tiltam almi unang tunum kensip disa yo, kalup namti, nuli ibokoya-lomdup: God ayo Abraham ami bokola-lomda: Kapni man loop kaptoop-ali yaapkan yaapkan ke-lokomip o, kala, weng kutiisa. Lale, alik ulelnin disa kemin, ali kasen-foko kelase no, kalolup ema? Kaali disa yo.
ROM 9:7 Abraham ami man loop kiili, alik God ami man disa; iip maakup maakup kiita-kup kemin, sawaayak kawu God ayo Abraham ami bokola-lomda: Kapni man kaa disa; kemin, kapni man Aisak ami loop kaptoop ata-kup kapni win ayo bokoyilila, kaltapni tunum miit ke-lokomip o, ansa.
ROM 9:8 Kemin, weng kalawaami iipyak tem namti kala bombe: God ami diim kaali, Abraham ami man fokosa kiili ti alik nalmi man o, kalsa disa; nami weng kuka-daali ilom fan tiltam abamnaya, man duubip kaata-kup nalmi man kayi! kala-lomda God ayo kanum bokosa.
ROM 9:9 God ali Abraham ami weng kuka-daa bokola-lomda: Nali kapni kalel Sara uyo tangbal-kup dong dakaa-um-bili ilu kemin, yak wasital ma ami diim kawu asuk tilila, man tunum ma duulokomu kayi! kalaya, bombii weng ayo fan tiltam abamnaya, Sera uyo Aisak ayo duusu.
ROM 9:10 Kaa kaata-kup daa; ma namti kala bombe: Rebeka umi man tunum man awaang imi aalap kulaa maakup kemin, ali numi awaalik Aisak.
ROM 9:11 Kemin, God ayo tunum ulamin kaami kukup aket fukun-ilomda, Tunum ami kukup tangbal kanuba kaata, atam-ilom ulduu dabuulokomi disa; ti nalmi aket kaata-kup, Awu kulaata naan-daala-lom ulduuliya, unang tunum iyo nami kukup uyo utamin o, kala-somdala kemin, man awaang alep iyo awak uyo imulula tiltam kukup mafak aye, kukup tangbal aye, ayo ma nuumin disa bom iliwa,
ROM 9:12 kamasi kawu, God ayo almi aket fukunin kaata-kup dap-mafiing daa talokoma niing kaata ulduu-lomda, awak Rebeka umi bokowa-lomda: Dap-mafiing daa talokoma niing kaata, asiik bon tem talokoma alaltap ke atam fik kaa tiin molokoma no, wansa ko.
ROM 9:13 Bom bii-lom man awaang alep imi imulu fasuu-lomdip iyo bii-lom saaksip imi sang kaali, God ayo boko-lomda: Nali niing Jekop ami aket kaata konsi ale, fik Iso ami aket kaa ma konsi disa yo, kalala, God ami Sukon Tem uyo dolsip o.
ROM 9:14 Kanum bokosa kemin, kaa kanimin o, kalokomup i? Nuli boko-lom: God kaami unang tunum ulamin kaali ti yaap ma ulan-umba disa yo, kalokomup ema? Daa te!
ROM 9:15 God ali Moses ami bokola-lomda: Kanola nali ban kemin unang tunum kii ma olen-daayon o, kali namti, nali olen-daaya-lom kukup tambal kaata-kup kuyokomi aa, unang tunum mokopso kebip iyo ma olen-daayon o, kali namti, olen-daaya dong dokoyokomi no, kalsa.
ROM 9:16 Kemin, God ami unang tunum ulamin kaami kukup kaa kanumin kemin, unang tunum ili boko-lomdip: Kapni unang tunum kelum o, kalbup kemin, kabi numi uldaa-yim-buulan o, kebip aye, kukup tambal kaata dukum-kup fukulupla, God ayo numi fiyaap-kup duu-bam uldaa-yim-buulak o, kebip aye, kii disa; God almi aket fukunin kaata-kup unang tunum iyo ulela-lomda, olen-daaya-laaba.
ROM 9:17 Kemin, God ami Sukon Tem kabak-ali boko-lomdu: God ayo Isip kayaak imi king ami bokola-lomda: Nali kapso din-bomdup nami titil kaata, unang tunum alik imi kukuyilila, am bokon kala dik-daa kulaasu iyo utam-ilomdip nami win kaata, kufup-nin o, kala-lomdila, kabi uldaa-tam-buuliya king kelawa, kanolin kukup kalawaata kup-tiya alik iyo utabip o, kalsu.
ROM 9:18 Kanolin kemin, nokol kaa ti utamum, God ali tunum ma olen-daalalon o, kala kaa, tunum kaami ban kemin ayo telakin. La, kela-lom olen-daala-lomda kukup tangbal ata-kup kukaalokoma le, kuno tunum ma ami aket kufoliya, fuut-tabemak o, kala, kaa God ali sawaayak Isip kasel imi king ami aket kufolaya, ayo fuut-tabemsa tap ke kano kufolaya, ayo fuut-tabe-mokoma no, kalsa.
ROM 9:19 Kemin, kabi bokop-na-lom: Kanta ti God kaa dil molala, ami fanang saanin kanuba ayo asuk kelama disa; God ata tunum ami aket kufolaya fuut-taben-umba. Kemin, God ata tunum ami bokola-lomda: Ee, yak kanubap kaali, ban kebap o, ken-umba kaa faleluya kanum-laaba disa yo, kebap ema? Kaa disa yo!
ROM 9:20 Kabi tifan tunum kemin ale, dok kano-lomdawa God ami titil tabin weng kaa bokolalap i? Faldak-tiimin weng ma kalawa utamum. Tawaal fuk-duu ima fuumin ket talalmin kaali, tunum almi sikiltup talalmin kemin, ket kaali, asuk tunum dotuba almi bokola-lomda: Kabi kanimin o, kala nali kalanola nam-talalubap yoko? akokoma nema?
ROM 9:21 Tunum tawaal fuk-duu-lom ima fuumin ket talalmin ayo tawaal ma fuk-duu-lomda talalulokoma kaali, ma kaptoop-ata ima tini-bam inin ket, suunkup fukumin disale; ket malo kiita ma kaptoop-ata almi ima suunkup fuu-bam inin ket. Yale, ami kanolin kukup kaa kanolokoma kaa tituun-kup tabin disa yo, kebap ema?
ROM 9:22 God akal ti kanose. Kemin, ami aket kaali, Nami aket atul ayo kutaltam-daaliya, unang tunum alik iyo nami titil kaata, atamik o, kalalala, unang tunum nami aket atul tabemin ayo yak imi diim abamnu keyokomi yakal yam-mafak-daa kelon o, kalase. Yale, aket atul ayo abiltap-siik kuyin disa bomda fen-tabasa.
ROM 9:23 Kemin, ami aket kaali, Unang tunum iyo God nami abip atin ti falala-kup kalsu so, umi kiit kon so, kiita kukuyila utamin o, kala-lomda God almi kukup tambal kaata, unang tunum iip maakup maakup imi kuyokoma. Kemin, nuyo olen-daaya-lomda weng umuuya dotuya kesa.
ROM 9:24 Kemin, naan-daayase kaa unang tunum kiili, Kristen nuta kemin Juda kayaak nuta-kup daa; yak tunum miit kusnum iso naan-daayase.
ROM 9:25 Kemin, Hosea ami sukon ma dolsa kabak akal ti God ayo bokoya-lomda: Unang tunum kiili, nami unang tunum disa; lale, am ma daanuya kawu, nalmi unang tunum ke-lokomip o, yokokomi. Ale, nali kiimi aket kuyinsi disa; kata ilom kawu imi aket ma kuyokomi no, kalokoma kayi! kala-lom God kaa kanum bokosa.
ROM 9:26 Aa, Hosea ayo weng ma boko-lomda: God kaa kipni im-taldang-daa bokoya-lomda: Ibi nami tunum unang disa yo, kalsa ulmi baan diim kabaaku, kayak kayak iyo bokoya-lomdip: Kii suunkup ilin God ami man o, kalokomip kayi! kalsa.
ROM 9:27 Aisaya akal, Israel kayaak imi sang ma bokoya-lomda: Dukum ayo am bokon alik kalawaali, unang tunum alik kiili yam-kuku-bamda im-bak-saanokoma kabaku abiltap ilmi kukup mafak nun-umbip kaami sisol ayo tituun-kup tiiyokoma. Kemin, Israel imi man loop dip-tiilokomip kaptoop-ali ti yol ok balang diim kaami ok dinin alaltap ke-lokomip. La, God ali atin iip maakup maakup kiita-kup, dotu-yimulala iyo yaap-nokomip o, kalsa.
ROM 9:29 Aisaya ayo kaami sang almi kaal-kemin weng ma bokoya-lomda: Kanola God kaa titil-kup tabasa ayo numi tunum malo ma keyokoma iyo disa dinam, nuli Sodom so, Gomora so, ili God ata anula disa kesip tap kelakin. Yale, malo ma iip maakup maakup nuyo keyila ilokomup o, kalsa ko.
ROM 9:30 Kanum bokosip kemin ale, kaali kanimin o kalokomup? Numi weng bokolokomup namti kala bombe. Yak unang tunum miit ma ma ili kukup tangbal kaata tabuuluwa, God ayo bokoya-lomda: Ibi tituun-kup tabin unang tunum o, yakak o, kala-lomdip dukum-kup kutal-fuku-biisip disa; ili God nami lak kaata duulip o, kalale, ayo bokoya ko: Kipni ban kemin kaami uluum ayo disa keyilula, tituun-kup tabin unang tunum kelip o, kalase.
ROM 9:31 Kemin ale, Israel kasel ili ti lo kaata kutal-fukulupla, God ata bokoya-lomda: Ibi ti tituun-kup tabin unang tunum kayi! yakak o, kal-bomdiwa lo kuuta-kup fuku-bom biisip. Lale, atin talalu soko kutal-fukulin disa biisip.
ROM 9:32 Kemin, ili kanimin o, kalaliwa, lo kaa kutal-fukulin disa biisip i? Kabak-ali numi Yesus lak dakaamin kaami liip kaata kayi! kalaliwa disa; kemin, numi kukup tambal kaali, dukum-kup fuku-laamin kaami liip kabangu God kaa bokoya-lomda: Ibi tituun-kup tabin unang tunum o, yakak o, kalalipla iyo titil-fak-daa bom ilsip. Kemin, imi kanu-bam ilsip kaali, imi liip tal-une-bamdip yaan dabom kuyak tuum diim mo bangbaang daa daak aba-lom aket atul taben-umbip tap ke, Yesus ami lak kaa duulup disa yo, ke-bisip.
ROM 9:33 Kemin, God ami Sukon Tem kabak-ali Yesus ami sang faldak-tiimin weng ma ayo boko-lomda: Weng selin! Abip Saiyon o, kala Jerusalam kawu, tuum ma tunum yaan dabom kuyak mo daak aba-lom aket atul tabemin o, kala tuum maman ma tunum yam-mafak-dakamin uyo kutiili. Lale, tuum o kala faldak tunum kalaami diim tiili kalawaali, dok kanolin unang tunum iyo ma ami lak duuliwa kawu, ali imi daang ukuyilala, fatom duk-duulokomip disa yo, kala kalsa no.
ROM 10:1 Nak-tunum kusal kipyo, nami aket ma fukunbi kaali, atin ti nalmi kayaak Israel ili God ayo asuk yim-buulama no, kala-lomdi suunkup God ami kanolin sang kaata naalin-kup ke-bam laabi.
ROM 10:2 Kemin, nali talalu Israel kii itamsi kemin, imi sang ayo weng kaa ku-fatap-daayokomi. Ili titil-fak-daa God ami daang bakaalum o, kebip. Lale, ili babon-bamdipla, ilmi aket fukunin kusnum kaata, kuluu-lomdip kaata God ami daang bakaalup kayi kalbip o.
ROM 10:3 Kanola ti God ayo unang tunum imi bokoya-lomda: Kipni kukup mafak kaami uluum ayo disa keyilula, tituun-kup tabin unang tunum kelip o kalin kaami kukup kaa utamup disa yo, kala-lomdip kaa nulmi kukup kaata ti, tituun-kup o kala-lomdip kaata-kup kutal-fuku-bom biisip. Kemin, ili Yesus ami lak duulip God ata bokoya-lomda: Ibi tituun-kup tabin unang tunum kelin o, kalin kaami kukup kaa kuluulamup disa yo, ke-biisip.
ROM 10:4 Nokol kaa kaal-kelum. Moses ami Lo uyo Kraist ata nolaya tiikasu. Kemin, unang tunum alik Kraist ami lak duulin iyo God ayo bokoya-lomda: Ibi tituun-kup tabin unang tunum kelip o, ken-umba no.
ROM 10:5 Moses ayo sukon uyo dola-lomdale, unang tunum imi lo fukulip God ata bokoya-lomda: Ibi tituun-kup tabin unang tunum o yakan-kaamin kaami sang ayo boko-lomda: Unang tunum kii kanta Lo kutiisi kaa talalu kutal-fukulip namti, kiita tiin kawang sinik kaa kuluulokomip o, kalsa.
ROM 10:6 Kemin ale, God ami Sukon Tem uyo tunum God ami lak duula no, kalale, bokola-lom: Kabi tituun-kup tabin tunum kelap kayi kalin kaami sang kaata boko-lomdu: Kaltapni aket tem-kup boko-lomdap: Nali tam abiil tikiin abali asuk tolon o, kemin daa yo, kalsu. Weng kabak-ami miit kaali, tunum kaa dok kano-somdaya tam Kraist ayo dap-taldaak daa-lom ami weng uyo weng san-kaa-mokoma disa yo, kalsu.
ROM 10:7 Kemin, aa ti kuno Sukon Tem ma kuuli boko-lomdu: Kabi boko-lomdap: Nali daak sakbal am abali asuk tolon o, kemin daa yo, kala weng kaami miit kaali, tunum ali kalok kano-lomdaya din sakbal imi abip kaa din-ilomda Kraist ayo dap-taltam-daalaya, ami weng kaa weng san-kaa-mokoma disa yo kalsu.
ROM 10:8 Lale, God ami Sukon Tem kabak-ali kanimin o, kalsu? Kaali boko-lomdu: God ami weng ayo kapni diim kawu bombuule, kapni bon tem kawu bombuule, kapni aket tem kawu bombuu no, kalsu. Kemin, God ami weng kaali, numi Kraist ami lak duu-yaamin kaami sang kaata, unang tunum imi bakayila-laabup namti kaa bombuu.
ROM 10:9 Kanola kabi weng ku-fatap-daa, boko-lom: Yesus kaali nami God ale, nami Kamokim ke kesa no, kalale, kapni aket tem ayo talalu utamawa, Fan God ayo Yesus kaa kom tem kawu dafose no kala, kanum bokolap namti, kaata fan God ayo tam-taldang-daalokoma no.
ROM 10:10 Nuli aket fuku-daalupla yi, Ali tifaneng o, ke-bulupla, God ayo bokoya-lomda: Kipni ban kemin kaami maan ayo disa keyulula, tituun-kup tabin unang tunum kelip o, kal-bom ale, numi Yesus ami lak dakaamin kaami sang kaata, nulmi bon tem kawu baka-bulupla, God ayo nuli im-taldang tii-bam kem-laaba.
ROM 10:11 God ami Sukon Tem ma kabak akal Kraist ami sang ayo boko-lomdu: Dok kanolin unang tunum iyo ma ami lak duuliwa kawu, ali imi daang ukuyilala, fatom duk-duulokomip disa yo, kalsu.
ROM 10:12 Kemin, Juda so, tunum miit ma ma iso, ili God ata kukup maakup kaata-kup kukaayila-laaba. Kemin, ata alik numi Kamokim akal ti maakup kemin, kanta ami naan-bam beten kamaala-laabip namti, ali olenin dukum-kup kamayin-bamda dong dakaayim-bam kem-laaba.
ROM 10:13 Kaami sang kaa God ami Sukon Tem kabaku boko-lomdu: Kawanita Dukum ayo naan-bam beten kamaalip namti, ili im-taldang almi miit tem daalokoma no, kalsu ko.
ROM 10:14 Lale, God almi weng kukaayin tunum ma yim-baala tilin disa kelip namti, ili kalok kano-lom God ami weng ayo Juda unang tunum imi kukaayokomip daa; tunum maakup ma tal God ami weng uyo kukaayin daa ke-lokoma kaa, kalok no-som God ami weng kaa weng sanokomip disa; aa, ami weng uyo weng selin disa kelip namti, kaa dok kano utamipla, Fan, Yesus ali God o kalin disa kelip kaa! Kemin kaata ili utamipla, Fan Yesus kaa God o, kalin disa ke dok kano-lom naan-daalokomip disa; la, God ali fan almi weng kukaayin tunum iyo fokola tal-ilomdip God ami weng kukaayin-bilipla, Juda kayaak iyo weng san-kaamsip. Sukon Tem kaami sang ayo boko-lomdu: Tunum iyo weng tangbal kulii-tal bokola namti, atin kukup tangbal namti kabe no, kalsu ko.
ROM 10:16 Kata, Israel ili ti alik maakup God ami weng tambal ayo kulii-tabasip disa; kabak-ami sang kaali, Aisaya ayo boko-lomda: Dukum kapyo. Kanta numi weng kaa, ti faneng o, kalbip? Kiili, yaapkan disa yo, kalsa.
ROM 10:17 Nuli utamuwa yi, God ami okok kemin tunum ita taba-lom God ami weng numi bakayinbip ayo Kraist ami sang o, kalalup weng san-kaa-bulupla, weng kaata numi aket tem kufuyim-bulula, Kraist ami lak kaali, dakan-umbup o, kala utamup.
ROM 10:18 Weng ma dik-daalokomi. God ami weng tambal kaa ma Israel kasel iyo weng san-kan-umbip disa yoko? Ayo, weng san-kaan-umbip. Ultap kemin, God ami Sukon Tem uyo boko-lomdu: God ami weng ayo yak abip ma ma kiiyo, alik yakyak una-bulu am bokon kala dik-daa kulaasu kaami unang tunum iyo weng san-kan-umbip o, kala kanum bokosu.
ROM 10:19 Lale, asuk weng kaa maso ma dik-daalokomi. Israel kayaak ili weng kala talalu weng sansip disa ema? Ayo, ili dotu weng sansip. Kamala kalawaali kayak kayak yakal ti utam kebip kamasi kaali, Moses ami Sukon Tem usiik God ayo Israel kasel imi bokoya-lomda: Ibi boko-lomdip, Nuli tunum miit tangbal o, kalbip. Lale, nali ibi yim-buulokomi disa; unang tunum iip maakup maakup ita ma yim-buulila, kipni aket ayo mafak ilula, kukup tangbal ma imi kukaayokomi kaali, ibi nen-bamdip tunum miit utamsip disa ita ma yim-buulokomi kaa, ibi aket atul kamayokomip o, kalsa.
ROM 10:20 Aisaya ali Israel imi atul kaata, itam-suun-daasa disa kemin, tunum miit kusnum imi sang kaata-kup kufola-lom God ami weng uyo boko-lomda: Tunum miit kusnum iyo nitamum o, kalalip fenbip disa. Yale, ili nita-mokomip ale, aa ili aptum kusal imi nami sang kaa ma dik-daalin dinim. La, nali imi diim kawu fatap-nila iyo nita-mokomip o, kalsa.
ROM 10:21 La, Israel kasel imi sang ma kaali God ayo boko-lomda: Nali unang tunum iyo weng kuyang saak tii-bamdip titil-kup tabasip iyo, Tal nami nak-tunum kusal kep-niwa yo, kalalila naayin-bili, atan tal-una, kayoop tal-una-kem-tabasu. Lale, iyo kulaasip o, kalsa no.
ROM 11:1 Kalsa kemin, dik-dakamin ma dik-daalokomi. God ayo almi unang tunum kiili, fotabasa nema? Kuyak atin disa. Kanola nakal Israel kayaak, nali Abraham ami loop ale, Benjamin ami tunum miit. Lale, nali God kaa fotabasa disa.
ROM 11:2 Kemin, God almi unang tunum sawaayak kawu ulelsa kiili, fotabasa disa; nokol Elaija ami sang God ami Sukon Tem kabaku bombe kabak-ata aket fukunum: Elaija ayo God ami naan-bamda Israel imi kukup mafak kanubip kaami kalan kaata, aket mafak kela bulula, bokola-lomda:
ROM 11:3 Dukum kapyo. Ili kapni profet o, kala weng tem bakayin tunum iyo anu-lomdip, numi mafek mafek kapni fuu-bam kukaap-tin baan diim kaayo, duula kulaalip unale, maakup nata-kup bom-biliya, aalup taanak o, kala nami fen-tal-unebip o, ansa.
ROM 11:4 La, God ali ami weng tensa kaa kanimin o, ansa ni? Kaali boko-lom: Kaa kapta-kup disa; nali tunum almi-kup 7,000 kiita dil moliya, nalmi alik-daap ke-lom bom-bilip. Kemin, ili tunum miit kusnum imi god kaami win kaali Baal o, ken-umbip kaami aman dakaala-laabip disa yo, ansa.
ROM 11:5 Ultap kemin, am kala daanba kaakal ti Israel unang tunum iip maakup maakup kiita-kup God almi disa misiim kulu olenin kaata taba-lomda ulelase.
ROM 11:6 Kemin, ili kukup tangbal kaata kutal-fukusip o, kalalala, uldaa-yim-buusa disa; ti alta disa imi misiim kulu olen-yilin kaata, taba-lomda iyo ulelsa. Kemin, God kaa ili kukup tangbal kutal-fukusip o, kalalala kiili ulelsa dinam, God ali dok kano boko-lomda: Nayo disa masiim kulu dong dakayinbi no, kaa kaloma disa.
ROM 11:7 Kanum bokolu kemin, kanimin o kalokomup i? Israel kayaak imi aket kaali kanubup kaata, God ayo bokoya-lomda: Ibi ti tituun-kup tabin unang tunum kayi, kalin kaami liip kaata kuluulalup o, kala fiita-laabip. Lale, fiit-bamdip kuluu-laamin disa, nosip. Kemin, God ali unang tunum iip maakup maakup malo ma ita-kup ulelnala, iyo mafek mafek ayo kuluuliple, malo yaapkan itale, keyila fuut-tabemin-kup kaata, ke-biisip.
ROM 11:8 Kemin, God ami Sukon Tem ayo imi sang kaa boko-lomdu: God ali kiimi aket tem ayo sok ta de-yimula babon-daale, tiin uyo kuwayila, atafiimin dinim; aa, talang tem akal kuno God ami weng ayo weng san utam-laamin daa, ke-bam iyo kanum yakaba kutal kamala kulaami diim kulaa diilip o, kalsu no.
ROM 11:9 Aa ti, Devit akal almi waasi Israel tunum malo ma imi sang ayo God ami beten kamaan-bam bokola-lomda: Ima dukum fuu-bam im-bom fiyaap dukum duun-laabip. Lale, kabi imi fiyaap duumin ayo fal-sikiyapla, abil aye, saamin afun aye, ok tem aye, imi tem diinin tap kelip o, imi kukup mafak ami sisol ayo tiiya-lomdap le,
ROM 11:10 imi aket fukunin ayo ku-mafak-daayap tunum tiin bokol iltap kelipla, uluum awak uyo kulaayapla, yak imi diim abamnu, kuno keyawa suunkup kulii bom-biliwa yo, kalsa ko.
ROM 11:11 Kaa kanum bokosa kemin, nali dik-dakamin ma dik-daalokomi. Israel kaa daak abasip kiiyo atin mafaksip ema? Disa! God ali itama yi, Israel kii boko-lom: Yesus kaa numi Kamokim disa yo, kala-lomdip daak abamnip kala, kala-lom kamboya-lomda unang tunum miit kusnum kiita, yim-buu im-taldang almi miit tem tiin-umbaya, God ami aket fukunin kaa, Israel kasel iyo nami kukup tangbal kala kanubi kaa, kulii kayak kayak imi kukaayimbi kabak-ata utamiwa yi, Miit kusnum ita numi abiin ayo kuluubip o, kalalip iyo tiin nen-bamdipla, yakal ti kuno nami fanang tilin o, kala-lomda tunum miit kusnum iyo foko-kutaldang almi mepso tiin-umba.
ROM 11:12 Kemin, Israel kayaak ili daak abamnip kala, kala-lomda kawu, God ayo keya-lomda tawaal diim kalawaami unang tunum yaapkan ita dong dakaayim-bam ale, God ali itama ya, Israel iyo Yesus kaa numi Kamokim daa yo, kebip kala, kalalala, kaata kamboya-lomda, yak miit kusnum ita atin yaap ma kamayim-balaya kemin, Israel kayaak God ata ulelsa iyo asuk alik tildang God ami miit tem talokomip kawu, alalta taba-lom tunum miit maakup maakup iyo atin ti kukup tangbal dukum kaata kukaayokoma.
ROM 11:13 La, kamala kaali unang tunum miit kusnum kusnum kipni weng ma bakayon o, kali kemin, God ata taba nali uldaa-nam-buu-lomda: Kabi nami kalaan tunum ke-lomdap yak tunum miit kusnum ili nami weng tangbal ayo kulii yang bakayan o, kala uldaa-nam-buu-lomdaya, nam-baala talbi no. Nali ok kalawaali tifan God almi ok o, kal-bomdila kaami fiyaap kaata duu-bamdi okok kaa ken-umbi.
ROM 11:14 Nalmi aket kaali, ok kalawaata okok ke-bamdi, wak-tala-yin-bamdi nalmi tunum miit Israel imi aket fukunin kaa, kufuyim-bilila, iip maakup maakup iyo tal tunum miit kusnum imi itamipla, God aso yaap-kup bom-bilip o, kala-lomdip kaami kalan kaata, tiin-nen-bam God ami fanang unum o, kaliwa iyo dong dakaayim-bilila, God ata yim-bii taldang daalak o kebi.
ROM 11:15 Kemin, God ayo Israel-miin imi fotaba-lomdaya, keya kulii bilin am bokon kulaa dik-daa kulaasu ami unang tunum iyo bokoyila tituun-kup kuyak mim-daa tiltam God aso aptum kela-una-tala-ke-silip. Kemin, ilom kaali, Israel iyo asuk God ami fanang tildang tilip yim-buulokoma kaali, mafek mafek dukum kemin, tunum saaknaya dawaalip asuk tiltam tiin kawang keba tap ke-lokomu.
ROM 11:16 Kemin, bret anung ma imiin fak-duu God ami kolipla yaap o kala-lom kuluula namti, kuno ti tiil akal kolip namti, kuluu ke-lokoma. Kuno as timtim ma kalawaali God almi namti, aa ti, kuno ti tang so alik God almi no. Ultap kanolin kemin, sawaayak Juda kayaak imi awil-fakal talangkal imi dabom ili God ami tunum alik-daap ke-bam ilsip. Kanolin kemin, bombii kaali, awil-fakal imi man loop yakal ti God almi tunum alik-daap ke-lokomip o.
ROM 11:17 Kemin, tunum as oliv kaa dikisa ayo ami tang iip maakup maakup ayo fulula-lomda din saak lo as oliv tang ata fakela kulii-tal aba yak tunum ta dikisa tang kaa wakelna ami diim kabaku tiilala kawu, fewa-lomdala dal woko-lom asuk namnom ayo taba-lom tambal-kup taben-umba. Kemin, Israel kasel ili as oliv tunum ta dikisa tap ale, tunum miit kusnum kiptale, saak as oliv tang alaltap kemin, God ali Israel unang tunum iyo anung kukan-tiin-umba. La, kamala kalawaata, God ayo ibi im-taldang-daa-lom anung til-daalaya, ibi ami diim kawu fewa-lom titil ayo kuluu yaap-kup bilip o.
ROM 11:18 Kemin, ibi as tang tikyak-tiise kemin, as tang miit kayaak kiili ipta yim-baak tibii ipta ipta kemin daa; kanola weng mafak ma kuyum o kalip namti, kaptoop talalu fanang daaliwa kawu, utamiwa, Nuta timtim ayo kutal-fukuluwa buu daa; timtim uta taba-lom nuyo yim-tal-fukulu bulup kala, weng tangbal kaata-kup imi kukaayin o, kala-somla ko.
ROM 11:19 La, ibi boko-lom: God ami aket kaa nuta yim-bital yak ilmi yukul diim yim-bak-tiilala, tang dikis iip kabiiliwa yak fewa-yimuli ilin o, kala-lomda tang iip kaali, fuk-duu-lomda kanose no, kebip ema?
ROM 11:20 Kulaa fan bakabip. La, kiili Yesus ami lak duulin disa kesip kiita tik-daa yam-kan-tiisa. Ale, ibile, Yesus ami lak duulip kaami win diim kaata, ibi yim-bital aba yak anung til-daa-lom fewa-yimulala, tiinsip. La, ipkal talalu utafii-bamdiwa yi. Dak-fanan-bam dalaalmin daa. Kemin, suun-bamdiwa kayi!
ROM 11:21 Siin sawaayak kawu, God ali as oliv tang iip ma kaata fak-duu kukan-tiilaya tiinsu tap kanola yakal ti kulii daak abokomip namti, God ayo taba kukan-tiiyokoma.
ROM 11:22 Kemin, ibi God ami olenin so, titil weng kuya yim-bak-saanin so, iyo talalu utamin. Tunum ayo kanta God ami weng kaa kulaala namti, God ayo titil weng kaata, kola dabak saanbi angtiil yol ayo kolokoma. Lale, tunum miit kusnum ibi God ata nuli olen-daayase kemin, ami lak duulip namti, kaata ayo olen-daayokoma, ale, kelip namti, kaata fan ipkal tik-duu yim-bak saak tiilokoma.
ROM 11:23 La, yak tang malii yo kalin Israel kayaak ita asuk imi aket kaa fal-siki-lom Yesus ami kolip namti, God ayo taba-lomda asuk yim-bak as diim kabaku tii-lom fewa-yimulokoma kemin, God ali ti yaap yim-bak-daalama.
ROM 11:24 Kemin, ipkal utamin! Siin kaa, ibi saak lo as oliv ami tang la, God ata yang-ilomda saak lo as oliv ami tang tik-duu im-bii tildang-ilomda yim-bak as oliv tunum ta dikisa ami diim kabaku anung til-daaya-lomda fewa-yimuse. Kemin, kaa iltipni baan tituun diim kabaku fepsip disa; God ali fiit-bamda kanolokoma disa kemin, ali ti as oliv tunum ata dikisa ami tang tuk-duuse ayo asuk kulii-tal aba yak as oliv diim kabaku fewa-yimulama kemin, ali ti kaa kanolokoma ko.
ROM 11:25 Nami nak-tunum kusal kipyo! Babonin daa; weng sawaansu kulawuuta bokoyokomi. Kemin, talalu utamdiwa yo, kalbi. Iltipni aket-kup fuku-daa boko-lom: Nuli kaal-kesup kalolip o, kalalila, weng sawaansu kaami miit uyo ifiiya bokoyokomi kaa kala bombuu. Israel malo ma ili God ami weng kaa weng sanalup daa yo, kala-lom kulaa kela fuut-kup tabe-bilipla, tunum miit ma ita tiltam imi iipyak tem kawu iyo tiltam tiltam kem-una-biliwa, God ami weng kuka-daa-lom kanolin kal ipta tiltam talokomip o, kalsa uyo taltam tiik-nokomu kawu, Israel imi dak-fananin ayo kutoop kuyaku diilokomip.
ROM 11:26 Kanolin kukup kaa kutal-fukulokomip kaata, God ayo asuk kiiyo, alik fokolokoma. Kemin, God ami Sukon Tem uyo boko-lomdu: Iliim boyin tunum kaali, Abip Saiyon kaptamu tiltam taba-lomdala, ayo din Jekop ami man loop imi diim abalala, ili nami weng kuyang saak tiimin kukup ayo tak-duu kukan-tiiyilila,
ROM 11:27 kulaali, nami weng kutii-lom kuka-daalile, Jekop ami man loop imi weng kutii-lom kuka-daalip ke-lom kuyak mim-daalokomup. Kemin, nami weng kutii-lom kuka-daalokomi kaali, kalanolin o; nali imi kukup mafak ayo alik kukan-tiiyokomi no, kalsu ko.
ROM 11:28 Israel iyo God ami weng tambal kaa weng sanokomup daa yo, ken-umbip utamduya kemin, ili tiltam God ami waasi kela-silip. Kabak-ata taba-lomdu tunum miit kusnum imi dong dakaaya-laabu. Lale, God ali siin sawaayak kaptoowu ulela-lomda imi aket dukum kuyinsa kemin, ilmi awil-fakal kuliila-saaka-tabasip imi aket kaata no, kala-lomda aket kaa imi kuyinsa.
ROM 11:29 Kemin, God ayo tunum ma ayo olen-daala-lom uldaa-dabuu-lomda kukup tangbal ayo kola-lomda, ilom asuk kukup kanolin kaa kukan-tela-laaba disa yo.
ROM 11:30 Siin kaali, unang tunum miit kusnum ibi God ami weng ayo kuyang saak tensip. La, kamala kalaali God ayo ipni olen-daayimba kemin, ipni olen-daayimba kaami miit kabak-ali Israel iyo God almi weng kuyang saak telalip kala, kala-lomda ayo ipta im-taldang-daalaya imi abiin kaa kuluubip.
ROM 11:31 Kanolin kemin, Israel yakal kano ti weng kuyang saak tiibip. Lale, kipni God ami olen-dakaayin-balala ami kuluubip kaali ti, mepso yakal kanola kuluulokomip.
ROM 11:32 Kemin, God ami aket fukunin ayo ilom Israel kayaak iso, kusnum kayak kayak iso, imi unang tunum alik iyo utamiwa yi, Nuli ban kemin kaa ke-lokomup kaata, olen-daayilon o, kala-lom keyilala, ami weng ayo kuyang saak tii-biliwa kaata taba-lom sok ta de-yimulin tap kesu.
ROM 11:33 Kwin, tifan! God ami olenin so, aket fukunin tambal so, kaal-kemin aye, iyo ti atin sakbaalim dukum kemin ale, kiili katip daa. Kemin, tunum nuta dok kano-lomdupla, ami aket fukun-bam nuuba kabak-ami miit ayo alik nuli utamalup disa; le kano nuli ami kukup ayo talalu alik utamalup dinim.
ROM 11:34 Kemin, God ami Sukon Tem kabak-ali boko-lomdu: Kawanta God Dukum ami aket fukunin kaa atamsa ni? Aa, kanta taba-lomda ami aket fukunin kukup kaa, konsa ni?
ROM 11:35 Kanta bokola-lomda: God kabi mafek mafek iibap kemin, nami mafek mafek kiita ma kup-tilala, ilom kawu, nami maan kaa tiip-nan o akokoma nema yo? kala-lomda Sukon Tem uyo kanum bokosu.
ROM 11:36 La, tunum ayo kanolama disa yo! Kaali dinim o! Kaa dok kata naa kalolip: Ali mafek mafek alik kaami miit kayaak ale, mafek mafek alik kiimi aalap. Kemin, mafek mafek alik kaali ti, maakup almi alik kemin, nuli ami win ayo suunkup kufuumin-kup ke-bamdupla yo kala-somla kemin, fan ko.
ROM 12:1 Nalmi nak-tunum kusal kipyo, nali God ami olenin dukum kaata, fukun-bamdiya kemin, ipni titil tibin weng ma bokoyiliya kawu, kipni aket fukunin so, angtiil alik kiiso, kiili God ami kolin o; tunum ayo taloop an-ilom wolso alik God ami kukaanbip ultap ke kolin o; kanola kipni angtiil kaa tiin kawang bom iluya kawu, God ami koliwale, ibi God almi wolso alik-daap kelin o, kala-somla kemin, God ami kukup kaali, Kaata kanumin o kalba kaata-kup kanum-bamdiwa yi! Kemin, kanu-mokomip kaata, fan kipni God ami lotu kemin kaami kukup namti kaa bombu.
ROM 12:2 Kanola tawaal diim kalaami unang tunum kii God ami lak duulin disa ita waka-takayip namti, ibi mep kanubip kiimi kukup mafak kaali, kutal-fuku-yaamin daa. Kemin, ipni aket fukunin dukum uyo kulaalip yak God ami diim abamnuya kawu, God alalta kibi fal-siki-yim-tiilaya, aket fukunin akal alik uyo kuluuliwale, kipni kukup uyo talalu kutiiyilaya, tiltam ukol alik keluya, kaata atin utamiwa yi, God ali ipni tal-unemin, tiin-yaamin uyo kala-nuumin o keba kaali, kalabu nu kalin o keba kemin, ibi utamiwa yi, Dok kanumin kukup kaata tambal aye, dok kanolin kukup kaata nuli kutal-fuku-bom bulupla, God ali fiyaap duu-mokoma aye, dok kanolin kukup kaata ban kemin disa aye; kiita atin ti tambal-kup kanu-mokomup kala, kala-lomdip utam-somdipla yo! kala-somla ko.
ROM 12:3 God alta nali disa misiim kawu uldaa-nam-buulala, nali almi tunum kesi. Kemin, kanola weng kalawuuli alik maakup maakup kipni bokoyokomi. Kemin, kapni kukup kaami aket so, kapni utam-yaamin kaami aket so, kiiyo kapkal utamawa yi, Kuuli kanoli no kalbap o? Kapni aket fukunin kaali, Nata nak-tunum kusal kiili, yam-kan-tii nata nata ke-lomdila, tam akaayi no, kemin daa kayi! Ti kabi aket tambal-kup fuku-daa utamapla, Awu, God ali nitama yi, Kaali nami Man ami lak kaayo, duula kala, kala-somdaya, kanolin utam-yaamin so, titil so, okok kemin uyo kup-namba no kala-somdapya, aket fukunin tambal kaata-kup fukun-bamdawa yo, kala-somya ko.
ROM 12:4 Kemin, kaa nokol utamsup, Numi angtiil kulaali maakup yale, kaami iip yak tem kabak-ali daam yaapkan kemin, alik kiimi ok kaa maakup disa; akal alami okok ke-bala ke-bala ken-umbip.
ROM 12:5 Kemin, kanola ti unang tunum nokol ti yaapkan yaapkan la, Kraist ami diim kawu yak fep-nup namti, nuli angtiil maakup tap ke-lom, alik maakup maakup nusole, numi nak-tunum kusal iso, maakup kuyak mim-daa angtiil maakup ke-sulup o.
ROM 12:6 Kanola God ali alami aket fukunin kaata-kup kuluu-lomda disa misiim kulu utam-yaamin aa, titil aa, ok aa, okok kemin kusnum kusnum alik iyo maakup maakup numi kuyase. Kemin, kaata kutal-fuku kulii-tabum o, kala-somla kemin, kanola tunum ayo ma God alta ulduulala, God ami weng kukaayin tunum kela namti, kaali ti alalta God ami tituun-kup tabin weng kuluu-sulup kaata-kup kuluu-lomda ap-tunum kusal iyo kukaayinba.
ROM 12:7 Kemin, tunum ayo kawanta ma ap-tunum kusal imi dong dakaayin tunum kela namti, akal alami okok kemin, akal ti titil-fak-daa-lomda ap-tunum kusal iyo dong dakaaya-tal-une-bala le, dok kanolin tunum ata God ami weng kukuyin tunum kela namti, aa ti akal yikik-kutal-fuku ap-tunum kusal iyo kukuyin-balale,
ROM 12:8 aa ti tunum ayo kanta ap-tunum kusal imi yam-titil-saanin tunum kela namti, aa ti akal aptum kusal imi yam-titil-saan-bamda bakayim-balale, kuno dok kanolin tunum ata ap-tunum kusal imi mafek mafek kukaayin tunum kela namti, ali aptum kusal kiili, mafek mafek kukaayin-bamale, tunum ali kawanta Kristen unang-tunum imi dabom ke-lom tiin mola namti, ali ti kuno tambal-kup tiin mo-bom-balale, aa tunum ali dok ata ap-tunum kusal imi olen-daaya-lom dong dakaayila namti, kakal ti kanola fiyaap-kup duu-bamdaya ap-tunum kusal iyo dong dakaayin-bam ke-biliwa yo! kala-somya ko.
ROM 12:9 Ipni kaptum kusal imi aket kuyum o kalip kaa, katip katip ke-bam imi aket kaali, kukaayin disa kayi! Kap-tunum kusal imi aket kaali ti alik dukum-kup kuyale, kukup mafak mafak uyo atin daang ukuwa-somdipla, ibi atin ti kukup tambal diim kawu fewale,
ROM 12:10 Kraist ami lak duu-silip kaata-kup, ibi kaptum kela una-tala-ke-silip. Kemin, ti kanola kipni kaptum kusal imi aket uyo talalu kuyinbip-kup, maakup maakup ibi kaptum kusal kayak kayak imi win uyo kamboya-laamin disa; ti kufuyin-kup ke-bam ale,
ROM 12:11 daal tabemin daa; kemin, aket tambal-kup fukun-bamdip, titil-foko-lom Dukum ami lak ayo dakaan-bam ale, God ami Sinik ata kamboliwa, ata taba-lomda dong dokoyilaya, God ami fiyaap uyo duu-bamale, Dukum ami ok uyo dukum-kup kutal-fuku-bomale,
ROM 12:12 utamipya, Dukum ali faneng, numi dong dokoyokoma nu, kal-bom fiyaap duu-bam fen-bamdiple, utam talaalip, Uluum tabin uyo tiltam kipni itamu namti, kaa suunin daa; titil-fak-daa-lomdip beten kaata-kup tiinbu daanbu uyo ti kanu-bam ale,
ROM 12:13 God ami unang tunum iip maakup maakup ili bung mafek mafek uyo uktiip-nip kaali, dong dakaayin-bam ale, aa abip kusnum tunum ayo tal kipni diim tilip kaali ti tambal-kup tiin saan-bam ke-biliwa yi!
ROM 12:14 Kemin, tunum kiili taba-lomdip ibi yam-mafak-dakamip namti, ibi God ami aman-dakaan-bamdip mep kiimi yam-mafak-daalan o kemin disa; kiili ti tambal-kup dong dokoyan o kal-bomdipla, beten kaata-kup kamaayokomip.
ROM 12:15 Kemin, tunum iyo fiyaap duumip namti, aa ti kipso, iso, fiyaap duu-mokomip; ale, ili amamip namti, aa ti kipso, iso, nikil maakup ama-bamale,
ROM 12:16 ibi ti iltipni lak-kup duu tiin-saanbip ulultap ke-bam, kaptum kusal imi aket uyo kuyinbip-kup, nuli win tabin tunum kasaa kasaa kemin, nuli kanolin ok mafak kaa kanu-mokomup dinim o, kemin disa; kipni aket uyo balili-kup-kala bomdipla, ok mafak kuyip kaata saak kuno okok ke-bamdiwa yo!
ROM 12:17 Kemin, kanola tunum ayo kipni kukup mafak uyo kukaayip namti, kipsiik taba-lomdip kanuyinbip imi kukup mafak kaa kukaayin disa; kukup tambal kaata-kup ti titil-foko yikik-kutal-fuku-bom-bilipya kawu, kayak kayak iyo itam ipni fiyaap ayo duu-mokomip.
ROM 12:18 Ale, ibi dinan-tal-unemin kaami aket kaata-kup fukun-bam ilin disa; kemin, ipkal utamipya, Balili-kup-kalin kaami liip kaptoop-ali kaa bombuu nu kalip namti, kibi unang tunum alik iso aket maakup ke-bamdiwa yo kala-somla ko.
ROM 12:19 Kemin, nalmi nak-tunum kusal kipyo! Kibi kaptum kusal kiili, iltipni mafek mafek uyo ban keyip kaali, ipkal maan-tiimin disa; kuno keyipla, God alta taba-lomda mep imi aket atul uyo kuya-lomda, imi ban wakamin kaami maan uyo tiiyokoma. Kemin, ibi kuno kamboyiwa, ata imi maan uyo tiiyak o. Kabak-ali ipkal utamsip, God ami Sukon Tem kabak-ali boko-lomdu: Kamokim Dukum ali boko-lomda: Ban wakamin kaami maan tiimin kaali, nalmi mafek mafek kemin, nalta taba-lomdi maan uyo tiiya tiiya ke-mokomi no, kalsa no kala kanum bokosu ko.
ROM 12:20 Ipkal kaa kanumin daa kemin, Sukon Tem uyo boko-lomdu: Kabi utamapla, Kapni waasi tunum ma ima tinap kelu atamap namti, kabi inin-inin uyo konbap-kup, ami del tem uyo wok del kenbu kala, atamap namti, ok uyo iluu kukaan-bam ke-mokomap kaata, fan alami kukup mafak kanun-laaba kaami fatom uyo kuluulokoma no kala, Sukon Tem uyo kanum bokosu.
ROM 12:21 Kemin, kayak kayak ita taba-lomdip kipni kukup mafak kukaayinbip kuuta taba-lomdu, kipni aket fukunin uyo kufoyulu, Nakal maan tiiliya yo kemin disa; kemin, ibi ti kukup tambal kaata-kup kutal-fukulipla uta taba-lomdu kayak kayak imi kukup mafak uyo kabaak banuya, kamboyin o kala-somla ko.
ROM 13:1 Kanola God alalta gavman kiili ulela im-tiisa kemin, kiili ilta iip kulu tiltam tabasip disa; gavman alik imi ok kaali, God almi sikil diim kawu tiltam taba-yaabip. Kemin, tunum alik kiili gavman ami weng kaata-kup weng san-kaa-bamdiwa yi!
ROM 13:2 Kemin, tunum kaa kanta gavman ami weng uyo kuyang saak tiiba namti, kaali God ami weng namti kulu kuyang saak tiiba kemin, kaami maan uyo kuluulokoma ko.
ROM 13:3 Kemin, gavman kiili bomdiwa iyo kukuyin-bilipla kawu, kukup tambal kaata-kup kutal-fukulin kiita, suunik o kala-somdipya disa; kukuyin-bilipya, kukup mafak-kup kutal-fukulin kiita, suun-bamdipla, kukup mafak kaata kambolin o kal-bomdipya, kukuyin-bam, sok dina-yin-bam ken-umbip. Kemin, kabi gavman kaami atul kulaa suunin disa kelon o kalbap namti, kuno ti kukup tambal kaata-kup kutal-fukulapla kawu, gavman ita kano kapni win uyo kufup-tam-biliwa yo!
ROM 13:4 Kanola kiili God ami okok kamalin tunum kemin, dong dakaap-tam-bulupya, tambal-kup ilan o takan-kaabip. Katale, kabi kano ban kemin-kup kemap namti, gavman kii sok de-tamulokomip. Ale, asukum kuluu te-mokomip, aa tan-kutiilip taanokomap. Kemin, kabi suun-bamdawa ko. Gavman kiili, God ami ok tabuulin tunum kemin, tunum ayo kukup mafak-kup kema kaali, kanolin isiik maan tiiya-laamin kaami ok fukulin tunum iyo kaa bom-bilip te!
ROM 13:5 Gavman kiili, kanum-yaabip kemin, nuli imi min lo tem un-ilomdupya yo, kala-somya. Kemin, gavman ami weng kutal-fuku-yaamin kaami miit kaali, God ata numi kukup mafak kaami maan tiimin ami atul kaata-kup, suun-daaluwa disa; nuli aket fukun-ilom atamuwa yi, Kiimi weng kaali, atin tituun-kup tabin u, kala-somdupya, kutal-fuku kulii-una-bulupya yo!
ROM 13:6 Kemin, Ata no, kala-somdapya kemin, gavman ami takis moni uyo kukaan-bam kem-tabasap. Kemin, kaa dok kata disa: gavman kiili, God ami okok kemin tunum kemin ale, ok kalawaali titil-fak-daa bomdipya kemin, kutal-fuku kulii-talan-umbip te!
ROM 13:7 Kemin, kanola gavman ayo taba-lomda, Kanuman aa! kalip namti, imi weng kaata-kup weng san-kaa-bom ale, dok kanumin dok kanumin liip takis uyo kuyan o kalip namti, kukaayin-bam ke-mokomap. Ale, gavman imi minlo tem un-ilom ilokomap aa, kapni kamokim ami win uyo kufon-bamdaple, ami tong kaata bakaan-balap, ami fiyaap uyo duu-bam ke-bamdawa yi!
ROM 13:8 Kanola ibi tunum kaami mafek mafek uyo kuluu-lomdip maan kukaalin kaali, abiltap-siik koliwa kawu, atin ti alik disa keluk o. Lale, God ali numi weng kaa dukum-kup bokoya-lomda, Ibi kaptum kusal kiimi aket-kup kukaayin o, kalase kaali, maan tiiyin tap kemin, kuyokomip kaali, atin ti alik disa ke-laamin disa; kuno kuli yakyak ken-unuk o. Kemin, ipkal kaata suunkup kanu-biliwa yo. Kaa dok kata disa: dok kanolin tunum kaata aptum kusal imi aket-kup kuyinba namti, kaata atin tituun-kup tabin lo kaata kutal-fukulin tunum namti kaa bombe ko.
ROM 13:9 Kulaali, nokol utamsup taa, Lo uyo boko-lomdu: Kabi unang din tunum din iyo sadikimin daa. Aa, kabi tunum kaali, aalap taan-yaamin disa. Kabi yukut kaa inin disa. Kabi kap-tunum kusal ilmi mafek mafek kaami kalan kaa tal-kaayin dinim o kalsu. Kemin ale, lo kalawuso, lo kusnum malo yaapkan bom-bilip kiiso, alik kiimi miit diildiil kulaali, maakup; kemin ale, diildiil uyo boko-lomdu: Kabi ti kaltapni angtiil lak kaata duu-bom tiin saanbap ulultap kelawa, kap-tunum kusal kayak kayak imi aket kaata-kup kukaayin-bamdawa yo! kala kanum bokosu.
ROM 13:10 Kemin, tunum ayo aptum kusal kayak kayak kusnum kiimi aket-kup kukaayila kaali, kukup mafak kuuli ma kanu-mokoma disa; ali atin ti lo kutal-fukulin tunum namti kulu bombe.
ROM 13:11 Kemin, kipkal am kula daanu kulaali utabip o, kalaliya, bokoya-lomdi: Kanolin kukup kaali, kanolin kayi kalbi kemin, kulaata kipni akan-unsip uyo kulaa-somdip, tam tiin baalin aa! Ti ipkal utamin! Siin kaali, nuli kama tiltam Kristen unang tunum ke-sulup kaa, God ami yim-tama tam almi abip daalama. La, uyo samaan kaptoowu bom-iluya kemin, kemin ale, kamala kulaali tal mepso talsu.
ROM 13:12 Kemin, kutamiip uyo mepso disa kelule, am mafiing uyo mepso daanon o kalbu kemin, kukup mafak kutal-fuku kutamiip tem kabangu bom-bulup kaa, alik kambowa tildang falala-kalin diim tal-bomdupla, numi waasi dinin kaami ilim kuuli, miki-somdupya yo!
ROM 13:13 Nulumi tal-unemin, tiin-yaamin kaali, ti tunum ami kaa fatap diim kulu tal-uneba ulultap kanu-bamdupya, nuli fuut-taben tal-une-bam ok mafak in-bomdup babon-babon kemin disa; aa sadikimin uyo kanu-bam ale, yak kukup mafak mafak fatom tabasu uyo kanumin disa; aa nuli aket atul-kup tabe-bam ale, tunum kusnum imi mafek mafek uyo disa kawu mok in-bom tiin-nenin disa;
ROM 13:14 ibi Kamokim Yesus Kraist ami lak uyo duulip kulaali, ali tal kipni diim ila kaali, ipni waasi dinan-tal-unemin kaami ilim mikimin ulultap kemin, ibi yak iltipni aket fukunin umi taba-lomdu, yak kanumin kanumin kukup mafak kaata kanumin o, kalbu kaali, yang kanum tal-unemin disa kayi!
ROM 14:1 Kemin, tunum ma Kristen kesa. Yale, ali aket fukun-bamda kanuma ko. Nali Kraist almi lak duusii kulu Moses ami Lo yaapkan uyo kutal-fukuliya, God ayo nami fiyaap kaata, duumak o kema namti, ayo dibii tiltam iltipni iipyak tem kulu daalipya, nikil alimal maakup ke ilokomip. Katale, kibi tunum ami aket fukunin weng bakaba uyo nikil weng sanokomip kaa, aso weng aal dikimin disa kayi!
ROM 14:2 Kanola unang tunum Kristen malii iyo ma boko-lomdip: Nuli yak inin-inin akal alik akal alik iyo kuno yaap alik inokomup o kala in-balale, kuno Kristen malo ma ita boko-lomdip: God ami tiin diim kaa kang tiil inin kaali, yaap keyulala inokomup disa yo, kala kelup o, kalalip fala-bala ken-umbip.
ROM 14:3 Kemin, tunum mafek mafek saak-kup inipyaap ata taba-lomda aptum mafek mafek kang tiil falamin tunum kaali, aket mafak uyo ma kukaalin daa; le aptum kusal kang tiil falamin yakal aket fuku-daa utama yi, Naktum ami saak-kup inan-laaba kaali, kaa ban kemin o aka-sala, kemin dinim o. Kemin, kanola kaptum saak-kup inin tunum kaa kapni ok fukup-tin tunum disa; kaa God ami okok kamaalin tunum kemin, alalta ulduuse.
ROM 14:4 Kemin, kabi tunum saak-kup inan-umba ami balaanbap. Lale, kabi dok kanolin tunum kapta taba-lomdap tunum kusnum ami okok kemin tunum ami weng mafak kaali, kukaala-yaabap i? Kapni kaptum ami bokola-lomdap: Kapni okok kebap kaa mafak kebap o kala ma kapta tambal kebap o kala, kaptum ami kanum bakaalin kaa, kapni san disa; alami kamokim almi san kemin, ami kamokim kulaali Yesus ata-kup te! Alalta taba dap-titil-diila, ali Yesus ami lak kaa dukum-kup dakaa-balaya, kabak-ami win diim kabaku dabuulokoma no.
ROM 14:5 Kemin, tunum ali ma taba ami aket uyo fuku-daa-lomda, Am kula daanba kulaali, God ami tiin diim kaali, am dukum ma daanbu kemin, uta uta ke-lomdu am daan-yaamin malo kiili, dimiilu kabaak banipla, ke-yimbu no, kalale, tunum kusnum ma ami aket fukunin kaata fuku-daa-lomda, Ee, daa. Yak am daan-yaamin alik kaa ma tambana daak-bana kelin disa; ti alik ti maakup ultap o kalokoma kaali, tunum maakup maakup iyo utamipya, Kaali kanolokomi kaata tambal o, kal-bomdaya kanu-bala yo kala-somla ko.
ROM 14:6 Kanola, tunum ayo aket fuku-daa-lomda, Am kula daanba kuluwaali, am daan-laamin kusnum iyo ma akayinsa no, kala namti, mep tunum kaali, iintang duk-duulaya am kulu-kup tiin-bomda Kamokim Dukum ami fiyaap kaata duu-bam laaba ale; tunum ayo yak mafek mafek alik saak-kup ina namti, tunum kaa aket fuku-daa-lomda, Kamokim ali nami fiyaap duumak o kalala, in-bomda, God kabi ti yaap ke yo ke-balale; kuno yak tunum ma mafek mafek malo ma falamin tunum akal ti aket tedaa, Kamokim ayo nami fiyaap uyo duumak o kalalaya, kang tiil fala-lomda ima so, titon so, kiita-kup in-bomdaya, God ami yaap ke, kapta kukaap-nam-balawa inbi no, ke-bala ken-laabip ko.
ROM 14:7 Kemin, nuli nulmi iipyak tem kulaami tunum ma alami aket fukunin kaata-kup yak mafek mafek uli ma kanu-mokoma disa; le almi aket fukunin kaata-kup ma nalta taanokomi no, kalalaya, taanokoma disa; nuli Kamokim almi kemin, kula tiin kawong bom-bulup kaali, Kamokim almi aket fukunin kaata-kup kanum yak aba toop taanokomup kulu dilit kalum o.
ROM 14:9 Kemin, Kraist alalta ti kanola taanse. Lale, asuk tiltam tiin kawong ke-lomda tunum taansip so, tiin kawong bilip iso, imi kamokim kelon o, kala tam tiinse ko.
ROM 14:10 Kanolin kemin, kabi kanimin o kalalawa, kabi kaltapni kaptum Kristen kaa weng mafak ma bokola-lomdap: Yi, kaa ban kebap uu akan-kaabap i? Ale, kapkal kanimin o kalalawa, kaltapni kaptum Kristen kaa atafiibap i? Ti kipkal utamin! Alik nuli am ma daanokomu kaali, din God ami tiin diim kawu tolnuple, kulaa God alta boko-lomda: Kaali ti kukup tambal e mafak e kalokoma no kala-somdupya, kanolin weng uyo aptum ayo bokola una-tala-kemin daa yo.
ROM 14:11 Ultap kemin, God ami Sukon Tem kabak-ali boko-lomdu: Dukum ayo boko-lomda: Atin faneng nali taan-laamin dinim; suunkup ilin tunum kemin, ilom am ma daanokomu kaa, unang tunum alik ili tilik duung fakela daak dabuna-lom, nami beten kamap-nam-bamdiple, alik ibi boko-lomdip: God kaali tifan ti God o, ke-mokomip o kalba no kala Sukon Tem uyo kanum bokosu no.
ROM 14:12 Kalsu kemin, ti nokol utamum! Alik maakup maakup nuli alik numi kanumin mafek mafek kiimi kukup kanum-tabasup kaami miit kaali, am ma daanokomu uyo God ami diim kawu kaa baka-mokomup te!
ROM 14:13 Alik numi yam-kuku-bamda yim-bak-saanokoma tunum kaali, God maakup ata-kup kemin, nokol nulmi naktum kusal imi kukup kanubip kaali, aket mafak kukaayin disa; nokol aket fukun-ilom: Nuli dok kanolin kaata no-lomdup nak-tunum kusal iyo kukuyup utam-ilomdip iyo yang ban wakamin daa yo yakan-kaa-bamdupla yo.
ROM 14:14 Kanola, Kamokim Yesus alta kukup-na kuuli, atin utamsi kemin, inin-inin uyo ma God ali numi bokoya-lomda: Ee, yak kuuli awem ko. Ma yakan-kaan-umba disa. Lale, kanola Kristen tunum ali ma almi aket fukunin kaata-kup, Yi, kuuli awem o, kalba-kup asuk kutal-fukula namti, yaap kelula kaa tambal kanu-mokoma disa.
ROM 14:15 Kemin, kaami miit namti kala bombuu kemin, kabi inin-inin ma awem o kalsip uyo ma inamnap namti, kapni kaptum ayo utamaya, kapni inamnap kaata taba-lomdu kapni kaptum kaami Yesus lak dakaamin uyo ku-mafak-daalu namti, ti kapkal kuuta utamawa yi, Nalmi nak-tunum ayo aket kolin dinim kela-lomdi, dap-mafak-daali no, kalokomap. Kemin, Kraist ayo taan-ilomda mep nak-tunum kaami iliim uyo bolon o kala-lomda taanse te! Kemin, kabi mep mafek mafek awem o kalsip kaali, in-bomdapya, kaltapni kaptum kaa dap-mafak-dakamin disa yo.
ROM 14:16 Kemin, kipni aket fukunin uyo, Numi kukup kanubup kaali tambal o kebip. Lale, kayak kayak iyo taba-lom kaa weng mafak uyo kukaayilalip kemin, kaa talalu utafii-bamdiwa yi!
ROM 14:17 Kemin, alik nuli aket fukun-bam boko-lomdup: Kwin, kaa inokomup e fala-mokomup e kebup, kabak-ali diildiil o kalolup. Lale, disa kabak diildiil daa; God ami Sinik Tambal ata taba-lomda tituun-kup tabin kemin, kukup aa balili-ke-bam ilin kukup fiyaap duumin kukup uyo numi kukaayin-balaya, kanum-unbup kuuta, atin mafek mafek diildiil namti kaa bombuu.
ROM 14:18 Kemin ale, tunum ili Kraist almi okok kemin tunum ke-lomda kaa kutal-fukula namti, God ali kabak-ami kukup kaali tambal o kalale, kusnum kayak kayak yakal, Yi kaali ti tunum tambalim o kala kalokomip ko.
ROM 14:19 Kanolu namti, nuli yak aket maakup kemin so yak naktum kusal imi dong dakaayin-bulupla iyo tal aba tam titil-foko God ami lak dakaamin so, uyo alik titil-foko yikik-kutal-fuku-bomla yo.
ROM 14:20 Kemin, kapni inin-inin kanolin inbap kaami liip diim kaali, kabi kap-tunum kusal imi God ami lak dakaamin kaa ku-mafak-dakayin disa; yak alik inin-inin alik kiili tambal. Lale, kanola kabi mafek mafek awem o kalbip uyo ma inamnapla, kayak kayak iyo titam-ilomdip imi aket tem uyo mafak ilu namti, kapni kukup mafak namti kulu buu te!
ROM 14:21 Kemin, kabi kanumin kaali kang tiil awem o kalsip uyo in-bomdap aa, ok mafak uyo in-bom ale, yak kukup kusnum kusnum uyo kanu-balapya, kaptum kusal iyo kabak utamdip yang ban wakan-tal-uneba no kalip namti, kawu kanumin kukup kulaalokomap kaata yaap kep-tokomu no.
ROM 14:22 Kemin, kapkal mafek mafek uyo utamapla, Kuu mafak e tambal e kalin kaa, God so kapso iltipni san kemin, kanola tunum ayo utama yi, Mafek mafek kaali tambal o, kala-lom kawu, kanu-bamdapya, kaata alami aket fukunin uyo tituun-kup utamduya kemin, Kaa ban kebi disa yo kala namti, kaata ali fiyaap duu-mokoma no.
ROM 14:23 Kemin ale, tunum ayo inin-inin kaa aket alep fukun-bamda ina namti, God ayo taba ami kukup uyo talalu utam-ilomda, Kuuli tambalkan o, kalin disa yo kelaya, unaba kabak-ami kalan uyo lekbi dabak-molokoma. Kemin ale, tunum ali mafek mafek alik kiili tambal o kalin disa ke-lomda, maaklo kanuma namti, kaa ban wakamin namti kaa bombuu ko.
ROM 15:1 Kemin, numi God ami lak dakaamin uyo titil-fak-daa-lom ilupya, dok kanolin tunum ata God ami lak dakaamin ayo dukum-kup titil-fokolin disa kela, aket alep fukun-bamda, Nalmi kukup kanubi uyo God ami tiin diim kaali tambal kanubi ne mafak kanubi ne kema namti, nuli aket atul dinim balili-kup-kala bomdupla, mep ayo dong dakaalum o. Kanola nulmi aket fukunin kaata-kup kaa kanumin disa;
ROM 15:2 alik maakup maakup nuli nak-tunum kusal Kristen unang tunum iyo dong dakaayin-buluwa kawu, utam-somdipya kaami fiyaap ayo duu-bamdip tiltam kukup tambal kaata-kup kuluubip-kup imi Kraist ami lak dakaamin uyo titil-fokoyuk o.
ROM 15:3 Kabak-ali le, dok kata disa yo. Kraist maakup almi aket fukunin kaata kutal-fukulin disa kemin, God ami weng kolase kaata-kup kutal-fuku bom-balaya kemin, angtiil yol awak uyo tal ami diim kawu abasuu. Kemin ale, kanola ti God ami Sukon Tem weng kabak-ali God almi uldaa-dabuusa tunum ata taba-lom God ayo boko-lomda: Kanola tunum ali weng mafak uyo kukaap-tip namti, mep imi weng mafak uyo tal nami diim abebu no, kalase.
ROM 15:4 Kemin, sawaayak weng kala God ami Sukon Tem kabak dolsip uta taba-lomdu alik numi kukuyuk o kalaliwa dolsip. Kemin ale, weng kuuli numi aket tem uyo yam-titil-diilu tiltam titil-fak-daa balili-kup kala-bomdupya, God ami kanu-mokoma kaata, fen-buluwa yo kala-somya ko.
ROM 15:5 Kemin, God ali balili-kalin kukup sole, titil-foko tola-ilin kaami kukup so, kaami miit kayaakim kemin, nakal beten ke-biliya, alta taba-lomda ibi dong dokoyilaya, Yesus Kraist ami kukup kaata-kup kutal-fuku-lomdip kaata ti aket maakup kaata-kup kelin o ken-laabi.
ROM 15:6 Kemin, God ali Kamokim Yesus Kraist ami aalap kemin ale, alik kipkal weng maakup kaata-kup baka-bamdip God ami tong kaata-kup baka-bamdiwa yo, kala-somla ko.
ROM 15:7 Nali kanum bakabi kemin, ipkal Kraist ata yim-tama tildang daase ultap ke, kipkal kanola iltipni kaptum kusal iyo yim-tama tildang daa aket maakup ke, una-tala-keliwa, kayak kayak yakal utam-somdipya kawu, yakal God ami win dukum uyo kutaltam daa baka-mokomip te!
ROM 15:8 Ti kipkal! Nami weng bokoyokomi uyo weng san bom-iliwa. Kraist ali Juda kayaak imi ok fukulin tunum ke-lom, ayo dong dokoya-lomda kanu-bam, God ami tituun-kup tabin weng kaata, dap-titil-diilaya, kanola kaata taba-lomda sawaayak God ata kiimi awil-fakal imi weng kuka-daayila-lomda, Kanokolomi no kalsa namti duukup-dakat tiikasuu.
ROM 15:9 Kemin, Kraist ami aket fukunin kaali, tunum kusnum kayak kayak ili God ami olen-daayilin kuuta iyo utam-somdipya, ami tong ayo bakamin o, kalba kemin, God ami Sukon Tem uyo awaalik Devit ata boko-lomda, kanum bokosa no. Nali kapni win uyo tunum kusnum kayak kayak imi diim kawu kufu-bam ale, kapni win uyo baal atuk kelu wii-mokomi no kala-som ale,
ROM 15:10 aa Sukon Tem ma kabak boko-lomdu: Yak tunum miit kusnum ibi God ami tunum miit iso fiyaap duu-bamdiwa yo, kala-som ale,
ROM 15:11 aa ti kuno Sukon Tem ma wokol boko-lomdu: Yak tunum miit kusnum kayak kayak alik ibi Dukum ami win uyo kufon-biliple, unang tunum alik yakal ami win kaata-kup kufon-bam ke-biliwa yo, kalale,
ROM 15:12 Aisaya akal boko-lomda: Sin-ilom am ma daanokomu kaali, Jesi ami man manum kaptoop ata ma tiltam tabokoma. Kemin, tunum kaali, tunum miit kusnum imi king keyilaya, ami lak-kup duu-lomdip, liip fen-bulupya, tambal-kup talalu-yimulak o kala-lomdip fen-bam ilokomip o, kala kanum bokosa ko.
ROM 15:13 Kemin, ibi God ata yam-titil-dii bom-balaya, fen-bulup atin-kup yim-buulokoma no, kal-bomdipla, fen-umbip. Kemin, nakal beten ke-biliya, alta ibi dong dakaayin-balala, almi lak duu-yilin kaami liip diim kabangu ibi fiyaap duumin dukum so, balili-kala ilin kaami aket dukum so, iyo kuluu-lomdipya, tal aba tam God ami Sinik Tambal ami titil kaata kuluubip-kup, ipni God ami am tambal am ma daanokomu kaami fenbip kuuli, titil-foko tam-tam una-bulu yo kala-somla ko.
ROM 15:14 Nalmi nak-tunum kusal kipyo! Nami utabi kaali, ibi suunkup kukup tambal-kup kanu-bam laabip kemin, kipni aket fukunin kaali, ukol ulmi kusnum akal alik akal alik kemin, ipkal taba-lomdip kap-tunum kusal iyo aket fukunin tambal-kup kola-una-tala-kemalip ko.
ROM 15:15 Kanolin lale, kipyo! Sukon tem kabak-ali titil weng tap so ma dola kuyila. Lale, kaa ipni suun-daa-somdiya kulaabi dinim; kabak-ali kanola dola kuyila kipni aket uyo asuk fuku-daalin o kalaliya kemin, kanolin weng kaa dola kuyi kabak dok kabak ata naa kalolip: Kemin, God alta ok tambal kalaata kukaap-nam-balaya,
ROM 15:16 Yesus Kraist ami okok kemin tunum kelila, bokop-na-lomda: Kabi tunum miit kusnum imi iip kaldaaku bomdapya, dong dakaayan o nakaya, tiltam God ami tunum awem bom ilsip ililtap keliya, God ami weng tambal uyo kukaayila-yaabi. Kemin, nami aket fukunin uta bakayin-biliya, tunum miit kusnum iyo tildang tiliwa, God ami Sinik Tambal ata boko-lomda: Kalawiili God almi alik-daap o kalaya, taloop inin-inin iyo kutama din God ami kukaanbip ulultap ke yim-tama din-ilomda God ami kolip, Tambal kelip o kala-lomda ayo yim-buu yim-buulak o kal-bomdi kanun-tabasi ko.
ROM 15:17 Kanum-unbi kemin, Yesus Kraist ami diim kawu fewa-bomdiya, okok kebi kemin, God ami okok kamaanbi kabak-ami fiyaap kaata duun-umbi.
ROM 15:18 Aa, nali mafek mafek kusnum kaami sang so ma bokolokomi disa; nali ti Kraist ami ok kala kulaap-na tildak nami sikil diim abamnu, kanum tabasi kaami sang maakup ma kaata-kup bokoyokomi kemin, ti weng san iliwa. Kraist ami aket fukunba kaali, Pol ami dong dakaan-bilila, kanu-balaya tunum miit ma ma iyo utam-somdipya, tiltam God ami weng tambal uyo weng san-kaa-bam kutal-fuku kutama tabin o kala-somdaya, nayo dong dakaap-nam-balaya, tiltam God almi weng kaata, unang tunum imi bakayin-bam ale, ami kukup tambal uyo kukuyin-bam kebi. Kemin, God ami Sinik Tambal ata titil-fak-daa-lomda nali nam-baak-mo ke-balaya kemin, okmit ukol alik ukol alik mirakel o kebip uyo kanu-bam kem-tabasi. Kemin, nali Kraist ami weng tambal uyo alik Jerusalam kawu diildiil kufo-somdiya, bakaya yakyak umbutoop Provins Ilirikum kulu dilit kalasii.
ROM 15:20 Kemin, nami kanum tal-unem-tabasi kaali, din abip ma ma kawu tal-une-bamdi, Kraist ami win ayo weng selin disa bom-bilip iyo ma bom-bilip e disa e kalaliya, kiita nayo Kraist ami weng tambal kaata ma kukaayon o kal-bomdiya, nayo yakyak kem-tabasi te! Nali naktum ami ok kufo-lom fiit-bam talal-bamda anung kulaaba kuuta, nata tal yak ami ok anung kambonba kaata, kuluu-lomdiya dinimnu kelakin disa ken-umbi.
ROM 15:21 Nali ti kanu-biliya, God ami Sukon Tem uyo boko-lomdu: Tunum kiili ami sang uyo weng sanin disa bom-bilip iyo ilmi tiin alep alep uyo baa ata-mokomip ale, tunum ili ami sang ayo ma weng sanin disa bom-bilip iyo talalu uta-mokomip o, kalasuu kabak-ata tiltam tuluk o kalaliya, kanum-laabi no.
ROM 15:22 Kemin, ok kalawuuta suunkup tildang nami unon o, kalbi uyo tiltam liip bak-daa-bak-daa-ke-buluya kemin, dok kano-lomdiya, nali din ipni itamami disa; ken-umbi.
ROM 15:23 Lale, kamala kulaata, kalawaami ok uyo usiik dinimnu kewi kala, kala-somdiya yo kalbi kemin, sawaayak kulu din itamon o kem-tabasi kaali, wasital yaapkan iyo tal-un-tal-un-kem-tabasu no kalaliya, kulaata din itamon e kali.
ROM 15:24 Ilom am ma daanuya niyo tam tam bilin am bokon Spen unokomi diim kawu dindi ipsiik itam-somdiya kawu unon o kalbi. Kemin, din itamiya, Kipso nikil alimal bom bii fuluka-somdiya, nami aket uyo tambal kep-nu kalaliya, kulaali ipkal Spen bokon unemin kaami liip uyo kukup-nipla, unon o kalbi.
ROM 15:25 Kalbi katale, kamala mafek mafek uyo kutama din Jerusalam kaptam-ami God ami unang tunum bom-bilip imi weng kuya dong dokoya unokomi.
ROM 15:26 Kemin, mafek mafek kuuta din kuyokomi kabak-ami miit kaali, Provins Masedonia kasel sole, Provins Akaya kasel so, iyo weng kutii-lom, Kaali tambal kemin, bung mafek mafek uyo ma afetu kutii-lomdup Jerusalam kasel God ami unang tunum bung mafek mafek iiwa-bilip imi kulaayup unuk o kalaliwa kemin ko.
ROM 15:27 Imi aket uyo ti fiyaap-kup duu-bamdipya kemin, kanun-umbip. Lale, kiimi olenin kabak-ami miit kaali kala bombuu ko: Kiili Juda kayaak abip Jerusalam kaptamu bom-bilip imi maan ma kuyip kutal-fukubip kemin, maan kabak-ali dok kata disa; kemin, kamasi Juda kasel Kristen kesip isiik God ami weng uyo kulii-din kayak kayak imi bakayum o kala, din-ilomdip miit alep imi God ami lak dakaamin uyo dong dakaayinsip. Kanolin kemin ale, tunum miit alep kiisiik taba-lom Juda kasel iyo dong dokoya-lomdip, mafek mafek uyo kuyum o kalalipla yo.
ROM 15:28 Kemin, nali iso bung tambal tambal afetbip uyo kutama din Jerusalam kasel imi kuya-somdiya kawu, ok kalawuuli dinimnu no, kalaliya, liip kutal-fuku yak aba din Spen bokon unemin kaami liip kabak-ali din ipsiik itamdile unokomi.
ROM 15:29 Kemin, nami utabi kaa, kipni fanang din itamiya, Kipso, naso, dong dokola una-tala-kemum o kalaliya kemin, Kraist ami titil dukum so, fiyaap dukum so, kiita numi diim abokomu no.
ROM 15:30 Nak-tunum kusal kipyo! Nami fanang dakabi kaali, ibi Kamokim Yesus Kraist sole, God ami Sinik so, ita taba-lom, numi aket kufoyilipla, nuyo aket kola-una-tala-ken-laabup iso, imi aket kaa ibi kuluu-lomdip, naso titil-foko God ayo naan-bulupla yi!
ROM 15:31 Ibi nali God ami beten kamaan-bilipla, alta nali tiin molaya, din Provins Judiya unokomi uyo God ami weng kuyang saak tensip tunum iip maakup maakup ma nam-mafak-daalum o kebip imi fakelnaya, kambop-nip tambal-kup bom-bilile, ipkal God ami dik-dakaan-bilipla, akal almi unang tunum abip Jerusalam kaptam bom-bilip iyo dong dakaayin-balaya, nami ok kala ilimi dong dakaayinbi kabak-ami fiyaap uyo duu-bam yaap ke yo kal-bom
ROM 15:32 kanu-bilipla, God almi aket fukunin kaata, Ayo, kala kulaali nali fiyaap-kup duu-bamdiya, din kipni diim uyo din uniya, kipso maakup bomdup kun-fan-kaamin katip uyo ma fanu-somdiya, kaata nami aket tem uyo tambal kep-nuk o, kalaliya ko.
ROM 15:33 Kemin, God ata aket balili-kala-lom dak-diiba bom tiin-yaamin kaami miit kayakim kemin, ali alik kipni diim kawu bom-bala bomdiwa yo kala-somla kemin, fan ko.
ROM 16:1 Kemin, nulmi unang Fibi kuuli, Rom kaptamu din tiinsuu uli, abip Senkria kaptam-ami God ami unang tunum imi dong dakaayin unang kemin, ibi uyo tambal tambal-kup kama-un-bamdipya yi!
ROM 16:2 Nami aket kaali, ipkal Dukum ami aket kaata fukun-bam ale, Fibi uyo um-taldang Kristen imi iipyak tem kawu daalip ilokomu kaata fan, God ami unang tunum numi kukup namti kaa bombuu kemin, unang kuuli, unang tunum yaapkan yaapkan iyo dong dakaayin-bam ale aa, nakal dong dakaap-nam-bam kem-tabasu. Kemin, kaali kanola ok yaapkan uyo fiit-bamdula, mafek mafek maakup ma kaata aket uluum kuluu-lomdu ilu namti, ipkal kanola uyo dong dakaa-um-bam ke-biliwa yi!
ROM 16:3 Kemin, nami weng kaa umuuyi kaali, kutama dindip Prisila uso, Akwila aso, akam imi kuyin i. Akam kiili, Yesus Kraist ami ok kaali naso nikil maakup okok-ken-unbup.
ROM 16:4 Kemin, akam kiili okok-kem-tal-unemupya, kuno waasi ita taba-lomdip nuli anulip taanamup. Kata, kuno yelip taanamup o kal-bomdipya, iyo dong dakaap-nam-bilipla kemin, nali yaap ke yo kalasii. Kaa nata-kup, Tan ke yo kalasii disa; Kristen tunum miit kusnum alik ma ma yakal akam kiimi yaap ke yo ken-unbip.
ROM 16:5 Kanola ipkal nami weng umuuyi kaa, Kristen unang-tunum iyo tal akam imi am kaptamu tala-tala-kebip imi so, kuuyin o kalaliya ko. Aa, ipkal atin ti nalmi nak-tunum Epainetus kaami weng umoli uyo kutama din bokolin i! Ali Provins Esia bokon kaa ti kamasi diildiil uyo kasiik tiltam Kraist ami lak kaa duusa.
ROM 16:6 Aa, nami weng ma kuuyi kaa ibi kutama din ipni titil-kup fak-daa-bomdu dong dakaayin unang Maria umi ku-umbip-kup weng ma kaatale,
ROM 16:7 kutama din Andronikus so, Junias so, alep imi kuya kelin i! Alep iyo naso nikil maakup Juda kasel kemin, God ami kalaan tunum iyo alep imi win tambal kaata-kup bakayin-bam laabip. Kemin, naso nikil maakup sok de-yimulip bom ilsup kii, isiik tiltam Kraist ami lak kaa duuliple, nata mulo kawu Kraist ami lak kaa duusi.
ROM 16:8 Kemin, nalmi nak-tunum Ampliatus ali Kamokim ami lak duulin tunum kemin, nami ami weng umoli uyo koliple,
ROM 16:9 Ebanus aso, nuso, Kraist ami okok kemin tunum kemin, ami weng umoli uyo kola-som, aa atin ti fan nalmi nak-tunum Stakis ami weng umola keli kemin,
ROM 16:10 konbip-kup ma kaali kukup mafak uyo taba Apeles ami diim abebu. Lale, ali titil-fak-daa fan Kraist almi kukup fukulin tunum kemin, ami weng umoli uyo kola-som; aa Aristobulus alimal imi weng umuuya keli uyo kuya kelin o!
ROM 16:11 Ale ma kaata, Herodion ali naso alep maakup nuli Juda kayaak kemin, ami weng umoli kaali kolale, Kristen unang tunum Nasisus ami am kaptamu maakup ilin imi weng umoli uyo kola kelin i!
ROM 16:12 Kemin, nami weng umkaayin ma uyo kutama din titil-foko yikik-kutal-fuku-bomdip Kamokim ami okok kemin unang Trifina uso, Trifosa uso, imi kuyale, kuno nami weng umkaayin ma kaata kutama din Kamokim almi ok yikik-kup kutal-fuku-bomda okok kem-laaba ali atin fan ti nalmi naktum alik-daap Pesis ami kola-som ale,
ROM 16:13 kuno weng umkaayin ma uyo kulii-din Kamokim almi suunkup ok kutal-fuku-bom daang bakaalin tunum Rufus ayo kolale, aa ti kuno almi awak ulmi man tiin mobu ultap ke, nami tiin molin-kup laabu umi ku-umbip-kup
ROM 16:14 ale, weng ma kulii-unokomip kaata kulii-din Asinkritus so, Flegon so, Hemes so, Patrobas so, Hemas so, imi kayaak bom-bilip iso imi kuyale,
ROM 16:15 kuno nami weng umkaayin ma uyo kulii-din Filologus aso, Julia uso, Nereus ami neng Olimpas ukol aa, God ami unang tunum nikil alik bom-bilip iso, imi weng kuyin o kala-somla ko.
ROM 16:16 Kemin, ibi tala-tala-kemip namti, God ami unang tunum alik numi kukup uyo kuluu-lomdip, ipni kap-tunum kusal iyo ti tambal-kup weng umola-na-tala-kemin o. Unang tunum alik Kraist ami lak duulin yakal yak abip ma ma bom-bilip ili ibi weng umuuya kelip ko.
ROM 16:17 Kanola nalmi nak-tunum kusal kipyo! Kanola tunum iip malo ma ita taba-lom ale, kipni God ami weng kaa weng sanbip uyo kuyang saak tii-bam ale aa, weng aal dikimin uyo kutam-daaliple, Kristen tunum unang ilmi iipyak tem kawu, din-bilipla, tam tabip kaata yim-tama yang liip kusnum uyo dakan-tal-une-bam kem-tabasip. Kemin, nayo weng kala dukum-kup bokoyiliya, utam kii daang ukuya talalu itafii-bamdiwa yi! kalaliya bakayinbi.
ROM 16:18 Kanolin tunum kiili, nulmi Kamokim Yesus Kraist ami ok uyo ma fuku-bom kanun-tabasip disa; kiili ti ilmi aket fukunin kaata-kup kutal-fuku-bom ale, unang tunum kukup mafak kaa nuli kutal-fukulamup disa yo, kalbip imi disa kasen-foko ibokoya-lomdip imi tong baka-bamdiple, weng abaal-kup bakayin-bom ke-bilipla, Fan o, ken-umbip.
ROM 16:19 Kemin ibi le, God ami weng kaata-kup kutal-fuku kulii-bom-bilipla, yak kanolin sang kaali, unang tunum alik weng san-kan-umbip. Atamdila, nali kipni fiyaap uyo duubi. Yale, nalmi aket fukunin kaali, atin ibi ti kukup tambal uyo utam-som ale, kukup mafak kaami aket uyo fukun-bam kemin daa yo kebi.
ROM 16:20 Kemin, God ali balili-kalin kaami aket fukunin kaami miit kayaak kemin, Setaan ayo dabuu dabaak molila, kipni minlo tem kaptoop unak o keba. Kemin ale, nulmi Kamokim Yesus ami disa masiim kulu kukup tambal tambal ma ipyo dong dakaayin kaata kipni diim kawu bom-bulu yo kala-somla ko.
ROM 16:21 Kemin, naso alep maakup okok kemin tunum Timoti ata weng uyo umuuya binoya din unu kemin, Lusius so, Jeson so, Sosipata so, kanolin kiili naso nikil maakup Juda kasel kemin, yakal ti kanola weng uyo umuuya binalip din umbu no.
ROM 16:22 Kemin, nali Tetius nata Pol ami bon tem weng kuluu-lomdi mep sukon kala dolni kemin, Kamokim ami win diim kaata nali nak-tunum kusal kipni weng kala umuuya-lomdi kulaayi din unu ko.
ROM 16:23 Kanola Gayus ata ipni weng uyo umuuyila kemin, kaata taba-lomda nali almi am kawu tambal-kup ayo tiin moba. Kemin, ali Kristen unang tunum ili tiin saan-bam kem-laaba. Kemin, abip dukum kaltam-ami gavman imi moni tiin molin tunum Erastus so, alep nulmi nak-tunum Kwatus so, alep ita ipni weng umuuyip o.
ROM 16:24 [Kemin, numi Kamokim Yesus Kraist ata alik kipni disa misiim kulu kukup tambal tambal ma kamayin-balaya, tambal-kup tiin bom-biliwa yo kala-somla kemin, fan ko.]
ROM 16:25 God maakup ata-kup taba-lomda ibi almi lak dakaamin uyo dong dokoya tiltam titil-fokolamu. Kemin, nata Yesus Kraist ami weng bakayi kaa, God ayo taba-lomda numi dong dakaayinba kaami sang kaali nali suunkup sang kaa bakayila-tabasi. Kemin ale, mep weng kalawuuli God almi weng sawaayak kaptoowu sawaan yakyak kutal kula diilu kaata. Yale,
ROM 16:26 kamala kulu God ayo taba ku-fatap-daalaya, ami weng ku-fatap-daa bakayin tunum kiita, almi weng kaayo dolnipla kawu, tiltam fatapsu. Kemin, God ali suunkup ilin kemin, ali Kaa kanoliya tunum miit kusnum iyo tiltam nalmi lak-kup duu-lomdip nami kukup kaata-kup kutal-fukulin o kalalaya, alta bokoyilaya, nuli almi weng uyo kulii-din tunum unang miit ma miit ma alik imi kukaayin-bulupla, kaal-ken yakyak tabasip.
ROM 16:27 Kemin, God maakup kaata-kup mafek mafek alik utamsa. Kemin, nuli Yesus Kraist ami win diim kawu God ami tong kaata-kup bakaan-bamdup ami win kaata kufon-bulupla yo, kala-somla kemin, fan ko.
1CO 1:1 Naktum kusal kaa tiinsip o? Nali God ami uldaa-nam-buula tiltam kamokim kesa tunum ale, Yesus Kraist ami kalaan tunum Pol nata no. God alalta nali kalaan tunum o, kala nam-buulaya nasole, nulmi kayaak Sostenes aso,
1CO 1:2 alep nuta sukon kalawa God almi unang tunum abip dukum Korin kaptam bom-bilip kipni dola kuyum o, kalalupla kemin, God alalta ibi naan-daayila yak Yesus almi diim kulu fewa almi unang tunum alik-daap keliple, God ayo abip malo malo kaami unang tunum iyo weng umuuyila, yakal tiltam almi unang tunum ke kelipya, nulmi Kamokim Yesus ami win diim kawu beten kem-yaabip. Kemin, ali imi Kamokim ale, nulmi Kamokim ke kesa.
1CO 1:3 Nali nulmi Aatumen God aso, aa Kamokim Yesus Kraist aso, alim imi beten kamayin-bilila, alim ita taba-lom ibi kukup tambal tambal ma kamayin-biliwa, ipni aket tem uyo dak-diiba-bom bilili-kala bomdiwa yo.
1CO 1:4 Nami God ata taba Yesus Kraist ami bokolaya, ata taba kukup tambal tambal uyo kipni kukaayila kala, kalaliya, nali suunkup ti kipni aket-kup fukun-bamdila God ami yaap ke yo, akan-kan-tabasi ko.
1CO 1:5 Nikil numi Kraist ami weng kaa bakayinsup kaata, kipni aket tem kabak-ayo titil-fak-daa-bulula, God ali ibi itama yi, Yak Yesus Kraist ami diim ayo fewa-silip kala kalalaya, ali ipni dong dakaayin-kup ke-balaya, Kraist ami weng kuu talalu utamdiwa kemin, weng kaluuli unang tunum kii tambal-kup kukaayila-yaabip.
1CO 1:7 Kemin, God alalta taba-lom yak aket fukunin tambal tambal alik kiili, kukaayimba kemin, ibi kaa maakup so ma iipnin disa ke-bamdip nulmi Kamokim Yesus Kraist ami tala ata-mokomup kaata, fenbip kala kalaliya, God ami yaap ke yo, akan-kan-unbi.
1CO 1:8 Kanola God alalta ibi naan-daayila taldang almi Man Yesus Kraist nulmi Kamokim aso, aket maakup ke-silip kemin, God ali almi weng kutii dong dakaayokomi no, kalsa kaali, tifan kanu-mokoma. Kanolin kemin, kaali Yesus Kraist alta ibi dong dakaayin-balaya, tiltam titil-fak-daa yakyak kutoop, nulmi Kamokim Yesus Kraist ami talokoma kawu, umbutoop kulu dilit kalokomip kaata, ibi ban dinim, uluum dinim, ke-lokomip o.
1CO 1:10 Lale, naktum kusal kipyo, nali Yesus Kraist Kamokim ami win diim kawu ipni titil weng kaa kuuyon o, kali ko. Kipyo, diil duul kemin dinim o. Alik ibi atin ang maakup ma de-kutii-bom ale, weng maakup kaata-kup baka-bam ale, aket fukunin uyo maakup kaata-kup ke-bam, Yi, yak kaata ma kanolum o, kalip namti, fanang maakup kaata-kup ke nuu-bamdip bomdiwa yo.
1CO 1:11 Nalmi nak-tunum kusal aa, kabak-ami miit kaali, unang tunum nulmi kayaak Kloe ulmi am maakup ilin ililta kipni sang uyo bokop-na-lomdip: Kristen ilta lo kutii waasi kela una-tala-kebip o, nikiwa, weng sanbi. Kemin ale,
1CO 1:12 nali kaali asuk maso ma bokoyokomi. Alik maakup maakup ibi akal alami weng kusnum e kala baka-bala baka-bala-kem-tabasip o. Malo ma bokolip ko: Nali Pol ami tunum o, ke-bala; kuno malo ma ita boko-lom: Nali Apolos ami tunum o, kala-sala, aa, malo ma ita boko-lom: Yi, nata Pita ami tunum o, ke-bala; iip ma ita boko-lom: Nuli Kraist ami tunum o, ke-bala, ken-tabasip.
1CO 1:13 Kiwe! Yesus ali almi tiil kaata lo-kutii duula-duula-kutiilaya, kipni kamok kamok kii tiltam yaapkan ke-silip o? elile, Pol nata as diim kawu taan-ilomdila ibi dong dokoyasii ne? elile, ibi Pol nami win diim kawu oksam kaa uko-lomdip tiltam nalmi daang bakaalin unang tunum ke-silip e? Kaa disa te!
1CO 1:14 Kipni iipyak tem kaptam-ali Krispus so, Gayus so, alep kuliita-kup oksam ukoyasii. Kemin ale, alik tunum malo ibi taang-kala boko-lomdip: Pol ata almi win diim nuli oksam ukoyila tiltam almi daang bakaalin ke-sulup, kalokomip dinim kalalila kaata, nali God ami yaap ke yo, akan-kaabi.
1CO 1:16 Awu, ma kaali, Stefanas aso, almi am maakup ilin unang tunum iso, imi oksam ukuyila kesii. Kemin, nali maso ma ukuyasii ne disa ye? Nali babonbi.
1CO 1:17 Kraist ali tunum unang kiita oksam ukayan o, kalala nam-baala talsii disa. Almi weng tambal kaata, unang tunum imi bakayila-tal-uneman o, kala-lomda nali nam-baala talsii. Kemin ale, Yesus Kraist ami as diim taanse uyo unang tunum imi tiin diim uyo saak daa-lom win dinim kelamu no, kala-somdila, nami weng uyo utamsip tunum imi aptum kusal ita uka tokolum o, kalalip tawaal diim unang tunum imi weng sawaa kaami liip uyo bakayila-yaabip ultap nali kanun-umbi disa; nali ti tituun-kup tabin weng kaata-kup bakayila-tabasi ko.
1CO 1:18 Nimi tituun weng kaata-kup bakayila-yaabi kaami miit kaali, unang tunum taandiwa maaklo ke-laamin kaami liip kebip imi aket fukunin uyo boko-lomdip: Yak kipni Yesus Kraist ami as diim taanse no, ken-umbip uyo babon-bamdiwa bakan-umbip o, kem-tabasip. Lale, nuli boko-lomdup: Yesus Kraist ali as diim kawu taan-ilomdala numi iliim uyo boya unse no, kalsu kuuli, fan titil so kala kalalup kuu tifaneng o, kalup kalalaya, God ali nuli talal-bam dot-yimba.
1CO 1:19 Kemin, unang tunum iyo taandiwa maaklo ke-laamin kaami liip kawu, bom-bilip kalawiimi sang kaali, God almi Sukon Tem uyo boko-lomdu: Niyo tunum aket tambal fukunin kiimi aket fukunin tangbal kaali, dap-mafak-daayilila, babon-daa iliwale, kaal-kesip tunum imi aket fukunin kaali, maas keyokomi no, kalsu.
1CO 1:20 Kanolokomip kemin, nokol utamum. Malo ma ili tawaal diim kalawaami kukup utamsip tunum ke-balale, kuno malo ma ita kasen-foko-lomdip: Nuli weng sawaa alik kabak-ali atin talalu utamsup o, kalin tunum ke-bala, aa malo ma iyo weng kaali, Nata-kup bokoli yo, kalin tunum ke-bala; kemin yale, kanumin tunum kuliili tawaal diim kuluwaami tunum. Kemin, dok kano-somdipla God ami titil tabin kaami sang kaali, dotu baka-mokomip disa. Yale, Yesus ami as diim taanse kaami diim kabaku God ayo nuli kukuyila utam talaalup tawaal diim kalawaami utamsip tunum imi weng bakan-yaabip uyo babonin imi weng bakamin ultap uu, kala-yaabup.
1CO 1:21 Kemin kaali ti, God ali utamsa, tawaal diim tunum kalawiimi liip uyo kuwayilala, kiili taang-kala ilmi mafek mafek alik utam-yaamin kaami tem un-ilomdip God kaa ata-mokomip dinim. La, God ami aket fukunba kaali, Unang tunum iyo talalu-yimulon o, kala-somdala nuli dong dakaayin-balaya, God ami weng tambal kaata, nuta bakayin-buluple, unang tunum kusnum ita boko-lom: Weng kalawaali babon-bamdip bakabip o, kal-biliwale, nuta unang tunum imi weng tangbal kaata bakayin-bulup kuno maakup maakup ita Kraist ami lak kaa duulip kala-somdala, God ayo taba kiimi yam-talalu-yaaba.
1CO 1:22 Juda kasel ili ti titil kuyak-daa mirakel o, kala mafek mafek akal alik akal alik talalmin kiita ti utam-somduwa yi; ti faneng uu, kalum o, kalbip. Lale, Grik ita titil dabak daa-bom kaata kaal-kelum o, ke-bala kem-tabasip. Yale,
1CO 1:23 nuli unang tunum Kraist ami as diim taansa ami sang kaata bakayila-tabasup ko. Bakayin-bulup iyo weng san-ilom Juda iyo boko-lomdip: Weng kalawuuli maso ma weng sanokomup disa yo, kalbip. Lale, tunum miit ma ma ita boko-lom: Ibi babon-bamdip weng kaa bakabip o, ke-bilip ken-umbip. Katale,
1CO 1:24 fan, nuta Kraist ami taanse kaami sang uyo unang tunum imi tituun-kup bakayila-tabasup. Kemin, God ami Juda kayaak so, tunum miit kusnum iso, imi naan-daaya nuyo weng san-sulup. Unang tunum nokol utamsup kaa God almi titil sole, utam-laamin so, alik Kraist ami kolase.
1CO 1:25 Kemin, iip maakup maakup ili God ami weng kaa weng san ale, bokolip: Ibi babon-bamdip weng kala bakabip te! kalbip. Lale, God ami kukup kaali, tunum imi utam-yaamin tambal kaali, ata ata ke tam kaltoop baneba. Lale, malo ma ita God ami weng kaali, weng san-ilomdip bokolip: Kraist ami taanse kaami sang bakabip kuluuli titil dinim o, kalbip. Kata, God ami kukup kaa kanun-umba kaata, taba tunum imi titil kaali, kabaak banu kewa-yaa-bam ken-umba no.
1CO 1:26 Nak-tunum kusal kipyo, sawaayak kawu God ami kipni naan-daayila tiltam tiilin disa bom-bilip kaami aket kaali, Kristen ipyo, aket fukun-bamdiwa yi. Siin uyo unang tunum malo ita ipni itam bokoya-lomdip: Ibi unang tunum yaapkan ma utamsip disa le, ibi yaapkan ma titil-fak-daa kaptum kusal iyo tiin saanin dinim ale, ibi yaapkan ma win soyal ke-laabip disa yo, yakan-kaa-biliwa kawu, God ayo ipyo naan-daayila tiltam Kristen ke-silip o.
1CO 1:27 Tawaal diim unang tunum ili kipni sang kaali boko-lomdip: Babonin unang tunum o, ken-umbip. Lale, God ali ibi ulelnila, utamsip tunum imi baka-bamdip: Nuta-kup utamsup o, ken-umbip iyo itam fatom-duk-duulin o, kalala, kuno keyilala ipta ulelnala; tawaal diim unang tunum iyo kipni sang uyo boko-lomdip: Kuliili win dinim o, kem-tabasip. Katale, God ali ibi ulelnila tunum unang win soyal imi ti nuta-kup win tabin o, kala-laabip iyo ipni itamdip fatom-duk-duulin o, kalala, ili kuno keyilala win dinim kipni ulelba-kup ale,
1CO 1:28 tawaal diim tunum ili kipni sang kaali bokoya-lomdip: Kuliili win dinim unang tunum o, kala, disa kulu ilin unang tunum o, yakan-kan-umbip. Yale, God ali ibi ulelnila win soyal imi win kaata kabaak banuk o, kala-lomda win dinim kibi ulela kesa.
1CO 1:29 Tiltam win soyal ke-laabip. Kemin, kaata God ami tibi diim tunum ili ma taang-kala-somdipla ilmi win kaa ma kufolamip dinim.
1CO 1:30 Kemin, God ata yim-tiilaya, ibi Yesus Kraist ami diim kawu yak fewa-silip. Kemin, God ata taba Kraist ayo ulduulaya, alalta aket fukunin tambal kaata nuli kukaayila-tabasa. Kemin, unang tunum tiltam God ami tiin diim tituun-kup tabin kemin kaami liip kaali, Kraist maakup ata-kup liip namti kulube kemin, ami win diim kawu God ayo yim-buu yim-talang-daalaya, nuli God ami man alik kebup-kup, God ayo nuli ban ta sok de-yimulin tap kesu kaali, tildaa yim-baala kaal dinim tambal-kup laabup.
1CO 1:31 Kemin, God ami aket fukunin kaali, nuli ti God almi Sukon Tem kabak-ali boko-lomdu: Dok kanolin tunum kaata ma nalmi win kaali kufumon o, kala namti, kaa kanumin disa. Lale, Kamokim ami kanun-umba kaata-kup win kufon-bamda yo, kalsu kaami kukup kaata kutal-fukulin o, kala God kaa kanum bakan-umba no.
1CO 2:1 Kemin, nalmi nak-tunum kusal kipyo, Nakal kanola kamasi din God almi weng kuyin disa bombe kaami sang kipni diim kawu bakayinsi kaali, nali weng kusnum kusnum kiita ma bakayin-bamdi ibi oko-takayinsi disale, utam-laamin dukum kaami sang kaata ma bakayin-bam kemsi disa yo.
1CO 2:2 Kabak dok kata disa: Nali din unin disa ilomdila, nami aket fukunin ma fanang daa dotusii kaali, ilomdi kawu din kipni iipyak tem ilokomi kaa, yak mafek mafek kusnum kaami aket kaa ma fukunokomi daa; ti Yesus Kraist ami aket kaata-kup fanang daka-bam ale, almi as diim taanse kaami aket kaata-kup fukun-bamdi kulii-din bakayokomi no, kalaliya, kabak dotu-kutii kulii-yak aba din kipni iip yak tem unsii.
1CO 2:3 Kemin, siin kaali, nali kipso bomdi God ami weng kaa bakayinsi kabak-ali, nali titil dinim ke-bomdila, ok kalawuumi atul kaata suun-bamdila wulwaal-tap-tap-kemin dukum uyo kanumsi. Kemin,
1CO 2:4 mep weng kala bakayin-bam aye, God ami weng tangbal kukuyin-bam ke-bam bom ilsi kaa, nali natamsip. Tunum imi weng kaata ma kuluu ibi bakayin-bilila, aket kaali fal-siki-lom nalmi aket fukunbi ultap kelin o, kalali bakayin-bam ilsi disa. Nami weng bakayinsi kaata, weng san-ilom utamiwa yi, God ami Sinik Tambal ami titil kaali, sakbaalim dukum u, kalalip kawu utam-silip. Kemin,
1CO 2:5 kanu-biliya, kipni Kraist ami lak dakaamin kaali, utamsip tunum imi weng tambal kaata weng san-ilomdip Kraist ami lak kaali duusip disa. Kemin, God ami titil kaata, kibi utam-somdipla, Kraist ami lak kaali duu-silip o.
1CO 2:6 Ya, unang tunum God ami titil diim talaba tam titil-foko-silip kiita, nali aket fukunin tangbal kaami weng kaata kukaayila-yaabi. Yale, aket fukunin tangbal kaali, tawaal diim kasel imi aket fukunin disale, kaa sinik mafak ta tawaal diim kaldaak-ami tiin mobip kiimi titil kuuli, daak daak unabu.
1CO 2:7 Lale, aket fukunin tambal kaami weng kaa kukaayila-tabasi kaali, God ami aket fukunin tambal yang sawaanu kewunsa kaami sang kaata, ku-fatap-dakaayinsi. Kemin, God ali tawaal kalawaali talalulin disa; ilomdaya kawu, numi talalu-yimula abiil tikiin tambal-kup ilokomup kaami aket usiik diildiil kaptoowu fukun-ilom talalu-kutii unang tunum iyo kuwayinsa ale,
1CO 2:8 tawaal diim kaldaak-ami tiin molin unang tunum iyo ma taba-lomdip weng kalawuuta miit kaali ma utamsip disa. Kanuba kaali, ma utamsip dinam, abiil tikiin kaami Kamokim kaa dabak as diim daa aasip disa yo.
1CO 2:9 Lale, nali God ami Sukon Tem kaami mafek mafek sang bokosu kaami sang kaata, bakayinbi namti kala bombuu kemin kala daatamin. Uyo boko-lomdu: Mafek mafek tiin talaa utamin disa bombuu so, tinang umu weng sanin disa bombuu; aa, talaba yak unang tunum imi aket tem unin disa bombuu so, kiita-kup God ayo tunum unang nami aket kukaap-nin imi kuyon o, kalalaya dotu kutiiyase no, kalsu. Kemin,
1CO 2:10 weng kala yang sawaansu. Lale, God alalta almi Sinik Tambal ami bokolaya ata taba-lomda weng kalawuuli kukuyilala utam-sulup. Kemin, God ami Sinik Tambal ata mafek mafek alik kaali, utafii-bam ale, God ami aket fukunin, ilom am ma daanokomu kaali, kanu-mokomi no, kala alami aket kaata-kup fukun daa kakal ti utafii-bam ken-umba.
1CO 2:11 Kemin, dok kanolin tunum ata ma ap-tunum kusnum ami aket tem kaali, utelama ni? Kaa ti disa. Tunum ali almi sinik almi aket tem bombe ata-kup utamala kanolin aket kaata fukunba nu, kalokoma. Ultap o, tunum maakup ma ayo taba-lomda God ami aket fukunba kaali utelokoma disa. God almi Sinik ata-kup God ami aket fukunba kaali utensa.
1CO 2:12 Kemin, nuli sinik mafak tawaal diim unang tunum imi tiin molin ata kulu-sulup disa. Nuli ti God almi Sinik dabaala talse ata-kup kuluu-sulup. Kemin, kanola nokol utamupla, Mafek mafek alik masiim kii God ata kuyase namti kulu-bilip nu, kalalup uta-mokomup.
1CO 2:13 Kemin, nuli kaami sang kaa ku-fatap-dakaayin-bamdup bakayila-tabasup. Yale, utamsip tunum imi diim kawu weng kaluuli kuluu-sulup dinim. God ami Sinik alalta numi kukuyila weng san-somdupla, nusiik ami weng kaata tunum God ami Sinik imi diim kawu bombe imi talalu ifiiyim-bam bakayila-tabasup.
1CO 2:14 Katale, tunum kaali God ami Sinik ali ami weng kaali, babon-bamdip weng bakabip tap o, kalala weng sanokomi disa yo, kem-yaaba. Kemin, weng kala God almi Sinik ata-kup dong dokolaya nuli weng kuumi miit kaali, utam kaal-ken-umbup. Kemin, tunum kanola God ami Sinik ayo ami diim kawu bombe disa, ali dok kano-somdala weng kaami miit kaali, uta-mokoma disa.
1CO 2:15 Kemin, kanola nikil nuli Kraist ami aket fukunin kaali, Utamsup tunum kemin ale, tunum God ami Sinik ami diim kawu bombe ata yak mafek mafek alik kiili, talalu utafii-bam afeta-tabasa. Kemin ale, fan, tawaal diim tunum ali kanta ma taang-kala-somda tunum God ami Sinik ami diim kawu bombe ayo atafii-bamda ali dok nolin tunum i, kem-yaaba disa. Ultap kemin, God ami Sukon Tem kaali, boko-lomdu: Dok kanolin tunum ata ma taba-lomda Kamokim ami aket fukunin kaali ma utensa dinim. Ale, dok nolin tunum ata ma taang-kala-somdala, Kamokim kaa kukolama disa yo, kalsu ko.
1CO 3:1 Nak-tunum kusal aa. Kamasi nami weng ma kipni bakayinsi kaali, nami God ami Sinik ami weng, weng san-kaamin unang tunum imi kukuyila-yaabi ulultap disa; nali siin kaami kukup mafak kaata aket-kup yan-bulu ilin unang tunum imi bakayila-yaabi ultap ke-bamdi ibi bakayinsi. Kemin ale, kaami miit kaa, am kulaa daansuu kaali, ibi man unaak ililtap bomdipla, Yesus Kraist ami kukup kaali, titil-fak-daa kutal-fukulin disa bom-bilip kala, kalaliya,
1CO 3:2 nali inin-inin titil-fokolin kiita ma kukaayinsi disa; ibi muuk kaata-kup kukaayinsi kemin, sawaayak kaali, ibi inin-inin kalaang-kup tabasu kaa kalok no titil-foko inam-nolip disa. Kemsip kemin, kamala kuluwakal ti ibi tiltam titil-fokolin disa kama bom-bilip o.
1CO 3:3 Kabak-ami miit kaayo, ibi siin kaami kukup mafak kaata kutal-fuku-bomdip aptum kusal aket mafak kukuyin kukup aye, weng aal dikimin aye, kaa kipni diim kawu bombuu. Kemin, kanolin kukup kaa kanubip kaali, siin kaami kukup namti kabuule, tawaal diim kalawaami kukup namti kaa bombuu.
1CO 3:4 Kipni tunum malo ma iyo boko-lomdip: Nuli Pol ami tunum o, ke-bala, aa, malo ma ita boko-lom: Nuli Apolos ami tunum o, ke-bala kem-tabasip. Kemin, kanolin kukup kaali, tawaal diim kasel tunum imi kukup kaata-kup kanubip o.
1CO 3:5 Kemin, ipyo aket kabak talalu fanang daalin! Kipni aket fukunbip kaa, Apolos kaa kawanta ni? kal-bom ale, Pol ni kanta no? kal-bomdipla, malo iyo bak-daa kulii yak ma ami tem una, malo ma iyo bak-daa kulii tildak nami tem kaldak ba tala kebip i? Alep nuli dakat tam banin tunum disa. Alep nuli God ami okok kemin tunum nuta kemin, Kamokim ata alep numi ok kaa kuya-kuya-kelaya, ok kalawaali fuku-bomla ipni dong dakaayin-bulupla, Yesus ami lak kaa duu-silip.
1CO 3:6 Nata titon san iyo ultii-bilile, Apolos ata titon san iyo datnamip o, kala-lomda ok ilii tal ok aban-tal-une-bala ke-bulupla, God alalta titon san iyo tiin mo-balala tiltam tabe-bam kem-yaabu.
1CO 3:7 Kanum tabasup kemin, tunum ali titon san ultiimin kabak-ali win dinim; ale, tunum ok ilii tal ok abamin akal ali win dinim o. Fan, God ami titon san kaami tiin mo-balala, tiltam tabemin maakup kabak ata-kup win so kemin,
1CO 3:8 tunum ayo titon san diki-bala, kuno tunum ma ata ok ilii tal ling-abun-tal-une-bala, kaali akal kusnum akal kusnum disa. God ali alep ilmi okok kem-laabip kabak-ata-kup tii-lom ale, sisol uyo kuya kuya ke-lokoma.
1CO 3:9 Kemin, alep nuli ti alep maakup God ami ok tabuulin tunum ale, ipta God ami langabip tap kelip. Kemin, ibi malo bak-daa kulii yak ma ami tem una, tildak nami tem tala kemin disa yo. Kemin, kipta God ami am dela bombuu ultap.
1CO 3:10 God ata aket fukunin so, weng so, titil aye, kiita kup-nalala, nali tiltam tunum am dinamin kaami kukup kuuta, talalu utamsa tunum alaltap ke-bomdi, nali God ami am kun kaata kumolile, God ami ok tabuulin tunum kusnum ita am kaami bom aa, kuk, abiin kaata talalba kemin, dok kanolin kapta am kun kumosii kaami diim kabaaku am kaali delon o, kala namti, maakup maakup kapkal talalu utafii-bamdap tambal-kup am kaa dina-balawa yo, kala-somla ko.
1CO 3:11 Kemin, ipkal kulaa kaal-ke utamsip taa! Am kun duwokop ayo tiltam tolase. Kemin, kulaali Yesus Kraist alta kemin, tunum kusnum ata ma taba-lomda am kun kusnum ma kuu tiltam tol-nokoma disa.
1CO 3:12 Kemin, God ami weng kaa kukuyinsi kulaalile, am kun kumolin tap kesii. Kemin, Kristen tunum ili kaptam-ami diim kawu am dina-mokomip kaali, kanola ma ata fan God ami weng o, kala mafek mafek kiin-aba-yaamin disa ultap kaata, kuluu am tambal kaali delale; Kristen tunum ma ata tunum ilmi weng o, kala mafek mafek abiltap kiin-tabemin altap kaata kuluu am mafak kaali, dela kelip namti,
1CO 3:13 ilom am ma daanula, God ami unang tunum yim-bak-saan-bam lek ilokoma kaami am kaali, tiltam tulula kawu, unang tunum alik imi okok ken-umbip kaali, tiltam fatap-nula uta-mokomip. Kemin, God ami yim-bak-saanokoma kabak-ali as kiinba ultap ke-lokomu. Kemin, as kiinba ultap ke-lokomu kaata, taba-lomdu tunum maakup maakup iyo yam-kuku-bulula, God ayo imi ok fukusip kaali utam, Awu, tambal fukusip e? mafak fukusip e? kal-bomda kanu-mokoma no.
1CO 3:14 Kemin, kanola okok kemin tunum iyo ma am kun kumosii diim kaptamu am kaali delaya, ami am kuuli kiin-taba unin disa kelu namti, kaata God almi ok fukulin tunum kela kaali, mafek mafek tambal maan tenba-kup kolokoma.
1CO 3:15 Kemin ale, kano ok tabuulin tunum ayo ma ami am kaali, olso kiin-abelu namti, kaata tunum kaami taba God ami okok kemin ayo as kiin-taba disa kewalula, kaami sinik kaali, as kiin-abelokomu dinim; ali tunum wing tiil lo kabaku dabuu dap-taldak daalip akaala-yaaba alaltap kelaya tambal-kup ilokoma no.
1CO 3:16 Kristen unang tunum alik kuyaku-diyaku-ke-bom-bilip, ibi ti God ami am awem ultap kemin, God ami Sinik ali kaltipni iipyak tem kuyaku bombe kalalip, ibi kaa utamsip disa ema?
1CO 3:17 God ami am o, kalbu kaali, Kristen kipni sang namti kaa bakayimbu. Kemin, ibi ti almi alik-daap te! Kemin, kanola tunum ayo God ami am awem o, kala Kristen unang tunum kipni niik kabel o, kemin kukup kaali, ku-mafak-daayila namti, God akal taba mep tunum kaa dap-mafak-daalokoma no.
1CO 3:18 Kipni aket fukunin kaali, talalu bam-daayu, bomdiwa yi! Iltipni iipyak tem kaptam-ali tunum ma tawaal diim kalawaami kukup kaata kutal-fuku-lom yak kalanolin aket kaata fukun-ilomda nali utamsi no, kema namti, ami kanolin aket kaa fukun-bom kanum taba kaali, kelak o! Kanola ali kuno kambola namti, tawaal diim kayaak unang tunum ili: Kaali utamsa dinim tunum o, ke-mokomip. Lale, mulo kawu asuk God ayo dong dakaan-balala, tiltam utam-laamin tunum ke-lokoma.
1CO 3:19 Kemin, kabak-ami miit kaali, tawaal diim kaldaak-ami unang tunum ili boko-lom: Nuta ti dik-daa kuluulin unang tunum o, ken-umbip. Yale, God ali boko-lomda: Ibi babonin unang tunum o, kem-laaba. Kemin, God ami Sukon Tem kaami sang kaali, boko-lomdu: God ali tunum ilmi kukup mafak, kasen-fakamin kutal-fuku-bom ilin kiili, tunum imi abil diilip abiltap yim-fola fakan-umbip tap ke-bamdiwa, abiltap im-taldang-daa-lomda ilmi kukup mafak nun-umbip kaami kalan yim-bak-saan-umba no, kalbu-kup;
1CO 3:20 kuno ma kaata boko-lomdu: Kamokim ali utamala yi, Utamsip tunum imi aket fukunin kulaali, saak daa-lom atin ti mafaksa no, kalsa kayi! kala kanum bokosu no.
1CO 3:21 Kemin, ibi malii ma bak-daa kulii yak iltipni kamok kamok akal almi kusnum kusnum imi win iyo kufole kufu-bamdip mafek mafek ma kaali, kuyik o, kala iyo bokolip: Yi, nuli kanumin ok ami tunum o, kala-sala kala-sala-kemin disa; umi miit kaa mafek mafek alik so, kamok kamok iso, ita taba kipni dong dakaayin namti kaa bombe kemin,
1CO 3:22 Pol nasole, Apolos so, Pita so, nikil nuli unang tunum imi kamok kamok iltap ke ipni dong dokoyum o, kala bom-bulup; tawaal diim kalawaami mafek mafek tangbal uyo ipni dong dokoyum o, kala bom-bilip; kaali ibi taan-laamin kaami liip kawu bom-ilipya, God ata ipni uldaa-yim-buu-lomda yim-tiltam alami abip kawu tiilaya, aso maakup suunkup suunkup ilokomip; am kala daanu kaami mafek mafek tangbal so, sin ilom kaami mafek mafek tiltam tabokomu kaaso, kiita taba-lom ibi dong dakaayokomip;
1CO 3:23 kibi Kraist ami diim fewa-silip ale, Kraist ata God ami diim kawu fewase. Kemin, mafek mafek alik kalawiita ipni dong dokoyum o, kala bom-laabip o.
1CO 4:1 Kibi kanola nikil numi aket kaali, fanang daa-lomdip: Yi, Pol, Apolos, Pita, nikil kiili Yesus Kraist almi okok kemin tunum keliwa, God alalta iyo ulelnaya, God ami weng yang sawaansu kaami tiin saanin tunum ke-silip u! kalalip numi aket ayo fukun-bamdiwa yo.
1CO 4:2 Kemin, tiin molin ami okok kemin tunum ami lo kabak-ali boko-lomdu: Tiin molin tunum ali almi ok kaali, tambal-kup tiin mo bom-balala yo, kalsu.
1CO 4:3 Kemin, kipkal, dok nolin tunum ata nami okok kemin kabak-ali dok kanolin kaata ma tabuuba ma? kala namti, nali kabak kanimin o, kalokomi disa. Aa, nakal ti kanola nalmi kukup kaali, utafii-bam dok nolin kukup kaata kanum-yaabi ni? kalomi disa yo.
1CO 4:4 Kemin, nali Kraist ami ok kutal-fukubi kabak-ali nalmi ban wakamin so ma utabi disa. Yale, nali boko-lom: Ni ti tituun-kup tabin tunum kalokomi dinim. Kaa natafii-bamda, Tunum tangbal e? tunum mafak e? ke-mokoma kaali, Kamokim Yesus almi ok kemin o.
1CO 4:5 Kemin, kanumin am kaa kama daan tiltam tilin disa bombuu kaali, kibi unang tunum imi kukup kaali, utafiiyim-bamdip, ili dok nolin kaami kukup kaata kutal-fukubip i! kemin dinim o. Ibi Kamokim ami liip-kup fen iliwa, alta taldala mafek mafek alik yang kutamiip tem sawaansu kaali, kutaltam falala-kalin diim tiiba-kup, kawu unang tunum alik imi aket fukunin kaali, kutaltam daala fatapnu keyokoma kawu, God ayo alik maakup maakup numi okok kem-laabup kaami sang ayo, tambal nun-yaabip e? mafak num-tabasip e? kala bakayokoma o.
1CO 4:6 Nak-tunum kusal kiwe! Nami aket fukunbi kaali, kipni dong dokoyon o, kalalila, mafek mafek sang kala bakayinbi kaali, faldak Apolos alep nulmi diim tii-lomdila bakayinbi. Kemin, ibi alep numi kukup kanubup kaami aket kaata fukun-bamdip God ami Sukon Tem ulmi bokosu kuuli, kuyang saak tiimin disa; ti kaami kukup kaata-kup kutal-fuku-bomdiwa ko. Ibi kutaang-kup tabe-bam ale, kaptum ami win kaata kufon-bam ale, yak malo ma ami win utale, ti tabelin dinim o.
1CO 4:7 Kabi aket fuku-daa ifiiya boko-lomdap: Atin kukuyin ma ata ata ke-lom tam bana, kukuyin ma ata kabaak bana no, kalokomap namti, kanta ifiiya-laamin kaami kukup uyo kup-tase? God ata no. Ale, kapni mafek mafek alik kala kan-tabasap kaali, God alami sikil diim kawu tildang tale-bulula fakan-umbap ema? Kemin, God ata kapni mafek mafek kuluusap uyo kup-tinsa. Lale, kabi God ayo ifiiya-laamin kaami kukup uyo nami kup-ninsa kaami aket uyo fukunin disa ke-lomdap boko-lom: Nita kukuyin tunum ami ifela-lomdi ulelbi kemin, nami win uyo kufuubi no, kala-laabap kaata kanimin o, kalalapla kanum bokobap yoko?
1CO 4:8 Aa, kulaa ibi bokola-lomdip: Nuli God ami weng kulaa tiika-lom dik-daa-kuluu utam ale, God ami mafek mafek kaali, tiika-som ke-lom nuta taba Pol nikil kibi yim-baak tabii tiltam kamokim king ililtap ke-sulup o, kebip ema? Disa. Ibi king ililtap ke-silip disa. La, nami aket fukunbi kaali, kanola ibi fan God ami tiin diim ayo king ke-silip dinam, nokol ti talaba tam kipso king kelum o, kemsup.
1CO 4:9 Iltipni aket fukunbip kaali: Nuli ti king alaltap kebup o, kalbip. Lale, nami aket fukunbi kaali, God ami kalaan tunum nuli ulela-yim-tiilaya atin tunum win dinim ke-lom minlo tem unsip ililtap kesup. Kemin, nuli tunum weng talal-bi-lomdip aalup taanokoma kayi! kaliwa fen-bamda bombe alaltap ke bom-bulup kemin, waasi iyo taba tunum alik iso, abiil tikiin ensel iso, imi tiin diim kawu itam abandii-yim-bamdip: Yelup taanik o, kebip.
1CO 4:10 Kemin, nuli Yesus Kraist ami win kaata kufolum o, kalaluwa, ami ok kaata tabuubup. Katale, ipta numi sang kaali boko-lom: Yi, kiili babonin tunum kemin, nuta Kraist ami kukup kuluu ti talalu utamsup tunum ale, kuliili titil-fokosip disa. Kemin ti nuta titil-fak-daasup ale, ili win dinim; nuta win so no, kem-yaabip. Katale,
1CO 4:11 nuli sawaayak kaptowu kulii yak aba bital kala diilup kaali ti ima tinap-kup bom ale, del tem ayo atin datale, ilim ayo dal-kaa-bam ale, unang tunum kayak kayak ita numi sikil tangafap-tup ye-bam kamayim-bilipla, abiin tambal so ma tiinalup disa ke-bam ale,
1CO 4:12 nulta ti fiit-bam tuumon ayo nulta-kup kuluu ima kaa saan-bam im-bom ke-bulupla, unang tunum kayak kayak ita numi weng mafak mafak kaali, kukaayin-bam kebip. Kata, nuli ti, weng maan tiiya weng tambal kaata-kup kukaayim-bam ale, kukup mafak mafak kanuyip uyo kuno tiin-kup ita-bulup kanuyim-bam ale,
1CO 4:13 saak yak kusnum ita numi atin weng mafak kukaayip kala kalbup-kup: kulaa nuta filit weng kaali, bakayin-buluple, ita numi itam suun-bamdip mook baan kamayim-bam bilipla tabasup kulii yakaba bital kula diilup o.
1CO 4:14 Nali sukon kalawaali kipni fatom weng kaa kukuyim-bamdila dola kuyon o, kalaliya disa. Ibi nalmi man tap kemin, nali olen-im-bamdila, kipni aket fukunin uta ifiiyili utamin o, kalalila, dola kukaayimbi no.
1CO 4:15 Kamala kalawaali, ipni tiin molin tunum kii yaapkan ema? Kiita taba Yesus Kraist ami kukup kaali, kukaayin-bamdip, kipni tiin mosip. Lale, kabak-ali kipni kawil-fakal yaapkan kii disa; kipni kamasi tiltam Kraist ami lak duu-silip kaali, tunum maakup nata-kup kipni kaalap ke-bomdila, Yesus ami weng tangbal kaali, kukaayim-bilila, ibi yak Kraist ami diim kabaku fewa-silip. Kemin, kukuyinsi kaali, nali utamila, Nali tiltam ipni aalap ke-bomdila kukuyinsi kala, kalalila,
1CO 4:16 nali kipni weng kaali, dukum-kup bakayim-bilila, kipkal nalmi kukup kaa kutal-fuku-laabi kaata utamdipla, kutal-fuku-bomdip yo, kalaliya bakayimbi.
1CO 4:17 Kemin, kaata kanolila Timoti kaa dabaali kipni fanang din unak o, kalbi. Kemin, ali fan ti nalmi man altap ami aket-kup kola-laabi. Kemin, ali Kamokim Yesus ami ok kaali, ti tangbal-kup tiin mo ilin. Kemin, ata dabaali din ilomdala, Yesus Kraist ami kukup nami kutal-fuku-bomdi abip ma ma kaptam imi kukuyim-bam ken-umbi kaami sang kaata bakayim-balala, asuk kipni aket kaali, kufuyokoma no.
1CO 4:18 Malo ma ipni aket fukunin kaata, Pol ali numi fanang kawu talokoma disa yaa, kal-bomdip iltipni kulu ti dak-fanan tal-une-bam kutaang-tabebip. Lale,
1CO 4:19 kanola Kamokim ayo unan aa! naka, namti, ipni fanang abil din unomi kaa dindi tunum kutaang-kup tibin imi weng kaata ma weng san utamon i! kalali din unokomi disa. Din itamila, God ami titil kaali, ma imi diim kawu ma buu ne? disa ye? kala utamon o, kalali kaata din unokomi.
1CO 4:20 Kemin, kanta God ami titil so bombe namti, kaata God ami tunum unang ale, ali boko-lomda: Nata God almi lak duubi no, kalba. Lale, God ami titil kaali, kaami diim kawu ilin disa kela namti, kulaali kasen-fakamin tunum ale, ali God ami unang tunum disa.
1CO 4:21 Kemin, kipni aket fukunbip kaali, dok nolin kukup kaata ma utamum o, kalbip? Kipni aket fukunbip kaali, Pol ayo as sukum iluu kulii bomdala numi talalyila talak elile? ali olen-daayila bilili kalin kukup kaata kuluu-lomda numi fanang kaa talak o, kalbip i? weng filit weng kaata-kup kukaayilak o, kalip namti, kipni kukup kanubip kaali, kipkal talaluliple, kawu din filit weng kaata-kup kukaayon o, kala-somla ko.
1CO 5:1 Kemin, weng seliya, atin kukup mafak disa ulmi kusnum uta unang din tunum din imi kukup ku-mafak-dakamin kuuli, kipni diim kawu bombuu no, kalalipla kaali, weng yen-bam ke-bilipla weng sanbi. Kemin, aa tunum God ami lak duulin dinim yakal ti kanolin kukup mafak kaami fiyaap kaa ma duun-umbip disa yo. Kaali tunum ma aalap ayo taanala miin alalta, aalap ami kalel kuuli kuluuse. Kemin, kanolin kukup kaami sang kaata ko.
1CO 5:2 Kemin, ibi kukup mafak kaami fiyaap kaata duubip o? Kibi kanolin aket kuluu kewa-somdipla, mep tunum kaa taba-bom kanolin kukup kutal-fukuba kaami fatom kaata kuluu-lomdipla, kipso nikil maakup kuyaku bom lotu kemin disa. Kemin, kiili fota-bamnip tabanak o, kala-somla ko.
1CO 5:3 Nali umbital samaan kalawu bombii. Yale, nami aket fukunin kaali, kulaali din kipni diim abasu. Kemin, kaalile tifan kipso maakup bom-bulup tap kebi no. Nali tunum kanolin kukup kaa kanuba kaata, fanang daa-lomdila, Kamokim Yesus ami win diim talalubi. Kemin, ipni bokoyon o, kali kaali, ibi tala-tala-ke-bamdip kaami kukup kaali, talal-bamdiwa yo! Nami aket fukunin so, nulmi Kamokim Yesus ami titil so, kiita kipso bom-biliwa yo.
1CO 5:5 Ibi mep tunum kaa, Kristen kipni iipyak tem kawu bombe kemin, kulaa fotaba dabaalip tam banala, Setaan ata taba-lom angtiil yol kolala, utamdaya asuk tildang God ami miit tem tala, ilom am ma daanula asuk Kamokim ami talokoma kabaku God alta taba-lom mep tunum kaami sinik ayo asuk dap-taldang almi abip daalak aa!
1CO 5:6 Tunum mafak ayo ipni iipyak tem kawu bombe kemin, kanimin o, kala kaltipni win kaa kufumum o, kala-laabip yoko? Kabak-ali yiis bret faskaamin ultap disa katip tik-daalip daak bret ami tem unokoma kaali, bret ayo dukum fasuulokoma. Kemin, kanolin o. Kabi kanolin aket fukunap namti, unang tunum kusnum ili utam ale, yakal kukup mafak kaami fiyaap kaali duu-mokomip. Kemin, ibi kabak-ali utamsip disa ema?
1CO 5:7 Ipkal Pasova kaami am daanula, Juda imi kanun-umbip ultap kanu-malip ko. Kaali, ili ti tam bret so, sipsip ami diim ukduulip so, kiita talalbi kutii inan-umbip. Kemin ale, ma kaata imi siin kaami yiis am kaptamu bombuu kaali, fokolip unu kulaa-lom kama bret kaata yiis disa nuu-bam inan-umbip tap ke, tiltam kama unang tunum ke-silip. Kemin, imi bret yiis tik-tiimin dinim, disa nun-umbip ultap, kipkal kanola kukup mafak kaali, kulaalip kot unu kewa tiltam tituun-kup tabin tunum unang kelin o. Ale, ma kaata sipsip man ata an-ilom God ami kola kuyak fuulip kiin-tabamnula, God ata imi kukup mafak kaali, takan-tiiyila-yaaba ultap o. Yesus Kraist ali Kristen unang tunum numi sipsip man ililtap kelala, kanola aaliwa numi iliim kaali boyase.
1CO 5:8 Numi Pasova kaami fiyaap duumin kaa yak kamasi kaami yiis mafak kaa kutaldak tiimin disa, kaa ban kemin so, aa atin kukup mafak so, kiimi sang kiita ko. Kemin, kaali kela-lomdup bret yiis dinim ata kuluu-lom numi Pasova inin am daanu kaali in-bom ale, fiyaap dumalup o. Bret yiis disa yo, kalbu kabak-ali aket fukunin tambal so, kuno tituun eng bakamin so, kiimi sang kiita ko.
1CO 5:9 Nami sukon ma kipni dola kuyasii kabaku nali boko-lom: Kibi yak kaptum kusal tunum unang din unang tunum din kabak-ami kukup ku-mafak-daa-laabip tunum kiili, ipso ti nikil alimal ilin disa yo, kalasii.
1CO 5:10 Kemin, kabak-ali nali boko-lomdi: Kibi tawaal diim kalawaami unang tunum din tunum unang imi kukup ku-mafak-dakamin aye, saak yak kap-tunum kusal ilmi mafek mafek kiita kalan tal-kaayim-bam dakaayin aa, yak awem men imi wiis-saayin aye, kanolin unang tunum iyo baan kamboyila unin o, kalasii dinim. Kanolin unang tunum kiili, am bokon kala bombuu kaali muupsip. Kemin, kaa dok kano-somdupla, tawaal kalawaaso, mep kanubip iso, kii kamboya unolup dinim.
1CO 5:11 Mep weng kaa dola kuyasii kaami miit namti kalabuu. Kemin, kanola tunum ma ayo tam-ilomda kusnum imi bakayim-bamda, Nali tiltam Kristen kebi te! kal-bomda laaba, ata yak taba tunum din unang din kukup kaali, ku-mafak-dakan-tal-une-mokoma aye, yak aptum kusal imi mafek mafek kaali, dakaayokoma ale, saak yak men awem wiis saayim-bam wak talayin aye, saak weng mafak bakamin, ok mafak imbi-lomda tekela lukup-lukup tal-unemin aye, ninaa-ninaa-ke-bamda aptum kusal imi mafek mafek kaali, dakaayim-bamda kema namti, Kristen ibi yang ami atamip aso, tal-unemin disa le, aso maakup inan-tal-unemin disa yo.
1CO 5:12 Kabak kanum bokosii kaali, tunum tiltam God ami lak duulin disa bom-bilip imi itam lii-bam, kaa kalok nuu-bamdipla kanubip i! kalin kaa nami ok ema? Disa. Kaali God alalta taba-lomda imi kukup kaali yam-kukula, Yi, kaa mafak e? tangbal nuubip e? ke-mokoma. La, Kristen unang tunum ipni iipyak tem kaptam-ami yim-kukumin kaali, atin ti iltipni ok alik kemin ale, kabak ti God ami Sukon Tem kaali boko-lomdu: Ibi tunum mafak kipni iipyak tem kawu bom-bilip iyo fota-bamnip tabanik o, kala kanum bokosu.
1CO 6:1 Kemin, iltipni tunum ma kanola aptum Kristen kusnum ma aso alep weng aal dikimip aye, kaa ali fatom dinim la, Kristen unang tunum kii kamboyilala, aptum kaa dibii-din God ami lak duusip dinim imi diim daalaya, ita dabak-saan-umbip yoko?
1CO 6:2 Am ma daanokomu kawu, ilom God ami unang tunum nuli taba alik tawaal diim unang tunum imi kukup iyo yim-kuku-bam utafiiyokomup kaa, ibi utamsip disa ema? Kulaa, faneng ipta tawaal diim kasel unang tunum alik kalawiimi kukup kiili utafiiyokomip. Kata, yak weng aal dikimin kaami miit kaata-kup ibi taang-kala talalulamip disa yoko?
1CO 6:3 Kemin, nuli abiil tikiin kayaak ensel imi kukup kaali, yam-kuku-bam utafiiyim-bam kemakin, kaakal kaa ibi utamsip disa yo? Aa, kulaa faneng, imi kukup kulaali yim-kuku-bam utafiiyokomup. Kemin, nuli tawaal diim kalawaami uluum tabin kaali, dotu utafii-bam nokol weng kaluuli dotu-somdupla yo!
1CO 6:4 Kanu-mokomup kemin, kanola tawaal diim kalaami mafek mafek sang ayo ma bombuu namti, kaa ibi kanimin o, kala yam-kukumin kaami weng kalawaali, tunum God ami lak duulin disa imi kukaayin-bilipla, ita yam-kukun-umbip yoko?
1CO 6:5 Tunum Kristen kesip alep ma iyo weng aal dikimip namti, kipni iipyak tem kaptam-ali tunum ma taang-kala weng san dotu-yimulama dinimna ema? La, kuno kela aptum kusal iyo yim-tama din tunum Yesus ami lak duulin disa kiimi diim tiiliwa lekbi yim-bak-saan-unbip i? Kanolin kukup kaa kanun-umbip kaa atin fatom te! Kibi kunun-umbip kulaa, kela-somdiwa iltipni tunum ma uldaa-dabuulipla, ata kipni weng aal dikimip uyo talal-bala yo!
1CO 6:7 Kibi kaptum kusal kiili, imbii-din daalip lek yim-bam kot kamayila-yaabip. Katale, kanolin kukup kaali, ibi Kristen nulmi kukup uyo kulaa kela-somdiwa kaa kanun-tabasip. Kemin, kiwe, kaptum kusal Kristen ita taba kukup mafak kaa kipni kukaayim-bam ale, kasen-fakayim-bam, kipni mafek mafek kaata dakaayim-bam kanu-mokomip kaa, ibi kulii-din weng talalmin tunum imi fanang une-mokomip kaali, yaap keyokoma disa. Kemin ti kuno kamboyip ita kipni yam-mafak-dakan-tal-une-mokomip kaata, fan yaap keyokomu.
1CO 6:8 Lale, kipkal unang tunum kusnum imi kukup mafak uyo kukaayim-bam ale, kasen-fakayim-bam imi bung uyo dakaayim-bam, kem-laabip. Kemin, kaa God ami lak duulin disa kiita-kup daa. Iltipni kaptum kusal Kristen kusnum kiiso, ili kaltipta taba-lomdip kukup mafak uyo kukaaya-tabasip o.
1CO 6:9 Tunum kukup mafak kutal-fukulin ili God ami abip kaa din unokomip disa yo, kalsu kaali, ibi utamsip disa ema? Kipni aket fukunbip kulaali, Ya suunin weng bakabu kuluuli, kasen-fakabu! Kemin, nuli ti tambal-kup tam unokomup aa! Kemin disa kayi! Ti utamin! Tunum sadikimin, awem men kutii-bom wiis-saalin, unang din tunum din kiimi kukup ku-mafak-dakamin, tunum alep ilmi aptum kalel tap kela imak tap kela ke alep maakup sin-yaamin aye,
1CO 6:10 tunum yukut inin, aptum kusal imi mafek mafek itam mok inayale, yukut dakaayin, ok mafak imbi-lom tikiiya babonin, aptum kusal weng mafak bakayin, saak aptum kusal ilmi mafek mafek kaami kalan tuluuyila ye-bam bung dakaayim-bam kemin, kanumin tunum kiili tam God ami abip kaa tam unokomip dinim; atin ti disa te!
1CO 6:11 Sawaayak kaali, maakup maakup ipkal kanolin unang tunum iltap bom-bisip. Yale, ibi God ami lak kaata duuliwa, Kamokim Yesus aso, God ami Sinik kaaso, alep ita taba-lom kipni ban kaali, diing daayip tiltam tambal-kup ke God almi man alik-daap keliwa, God ali boko-lomda: Kipni ban kaami uluum kaali, disa kelula, kulaata tiltam tituun-kup tabin unang tunum kelip kayi! yinsa ko.
1CO 6:12 Kemin kulaali, kapni weng kulaa tifaneng boko-lomdap: Yak kunolin mafek mafek alik buu, kulaa kanolokomi no, kalbi kaali, weng dinim kulaa ti kunolokomi, kulaali kalbap. Katale, yak kanolin bung mafek mafek kaa alik kanola ma taba-lom dong dokop-tamu dinim. Nakal ti boko-lomdi: Yak mafek mafek kunolin alik bombuu kiili kanolon aa, kalbi, kulaa weng dinim kanolon o, kalokin. Yale, nali bung ayo maakup so ma kambolila kaata taba nili sok de-namulin tap ke-lokomu disa yo.
1CO 6:13 Tunum ma ayo alami weng ku-titil-molon o, kala tal-ilomda bokola ko: God ayo inin kulaa daak mat tem unemin so, mat tem kabaak-ata inin-inin inamnap saak unemin kaami baan diim kaaso, alep imi talalusa no, kala-laaba. Kaami miit bakaba kaali, dok kata naa kalolip: Kanolin weng uyo alami aket fukunin um-titil-saan-bamda, dok kanumin dok kanumin kukup sidikimin aye, nuumon o, kala namti, ayo ti kanolama no.
1CO 6:14 God almi titil kaata, Kamokim ayo kom tem lo dafolaya tam tiinsa. Kemin, nokol ti kanola yim-fola tiltam tiin angtiil kusnum akal alik dik-yak ulokomup.
1CO 6:15 Kemin, ibi yak iltipni sikil yaan aa, angtiil kaa, Yesus Kraist ami tiil anung uu, kalalip utam kaal-kesip e disa? Nali Yesus almi tiil anung. Dok kano-somdila nali yak ilomdi sadikimin unang umi angtiil diim aba-lomdi sadikimin unang umi angtiil anung ke-lokomi ni? Daa te! Sadikimin kuu ti atin kukup mafak dukum kemin, kaa kanu-mokomi disa yo.
1CO 6:16 Ti kabak ipkal utamin! God ayo boko-lomda: Akam ili tiltam angtiil maakup tap ke-lokomip kayi! kalsa. Kemin ale, tunum ali ma yak sadikimin unang uyo yang tuk-duu kuliila una namti, uso aso kuyaku-diyaku-ke iyo tiltam angtiil maakup ke-lokomip.
1CO 6:17 Kanolin kemin ale, tunum ayo yak Yesus Kamokim ami diim fep-nokoma kaata, aso aket maakup ke-lomdipla ilokomip o.
1CO 6:18 Kemin, ipkal, sadikimin kukup kaali, kulaa kela-bomdiwa yo. Tunum ili yak ban malo ma wakan-umbip kulaali, yak ilmi iipyak tem kabaku kanun-umbip disa. Kulaa, tiltam saak lo kulu kanum-laabip. Lale, tunum ayo sadikima namti, kuuta fan, taba-lomdu ami iipyak tem kaali, alik atin dap-mafak-daalokomu.
1CO 6:19 Kaltipni iipyak tem kabak-ali God ami Sinik Tambal ami am awem o, kalsa kabak-ali ibi utamsip disa ema? God ali almi Sinik ayo ibi kuuyila kaltipni iipyak tem kabaku bombe. Yak iltipni angtiil kaa fan, iltipni disa; God ali sisol dukum o, kala Yesus ami kiim kaata, kuluu asuk ibi molaya kipni angtiil kaali, God almi alik kesu. Kemin, ipni sikil yaan kulaaso, angtiil kulaaso, alik kukup tambal kaata-kup nuu-biliwa, kayak kayak iyo God ami tong kaata-kup baka-biliwa yo!
1CO 7:1 Kamala kulu nakal kipni sukon tem dola kulaap-nip talbu kabak-ami weng ma bokop-nambip kaata, nakal weng maan kaa tiiyon o, kalalila kemin, kanola tunum ma ayo unang uyo ma kuluulin disa bombe namti, kaa mafak disa.
1CO 7:2 Lale, sadikimin liip kaali, yaapkan buu kemin, tunum alik maakup maakup iyo akal almi kalel so kela-kela-ke-balale, kuno unang alik maakup maakup yakal ti ilmi imak so kela-kela-ke kanola ilokomip kaata, tambal o.
1CO 7:3 Kemin, kalel umi angtiil kaali, ulta tiin mobu disa; imakim ata tiin molale, kuno imakim ami angtiil kakal alta tiin moba disa. Kemin, kalel uta tiin molu kelip akam bom-bilip. Kemin, imakim ami angtiil kaali, kalel umi kemin, dil saanin disale, kanola kalel umi angtiil ukol imakim ata tiin mola kebip. Kemin, uli dil saan-bulu kemin disa.
1CO 7:5 Kemin, kapta kuluulaple, uta tam-buulu kebip. Kemin, ma ata taba almi angtiil kaali, daa yo, kalala dil saanin disa yo. Kulaa, akam iyo aket maakup kebip-kup, beten kaata ke-bam ilana-somdupla yo, kalip kulaali tambal. Lale, mulo kawu akam kibi angtiil uyo kulii-tala-tala-ke-lokomip kaata tambal o. Kanola kulii-tala-tala-kelin disa kelip namti, Setaan ayo tal yam-kukulale, kulii daak abokomip o.
1CO 7:6 Unang kuluula, tunum dabuulu kemin, kaami sang kala bakabi kaali, nali boko-lomdi: Kuyak kuno kunumin o, kalbi dinim. Kaa iltipta dik-daap-nipla kemin, nali kaali ti tambal o, kalbi.
1CO 7:7 Nami aket fukunbi kaayo, unang tunum alik iyo nalaltap keliwa, kapkes bom ilin o kalbi. Lale, God ata unang tunum alik maakup maakup imi titil kukaayim-balaya kapkes balale, kano unang din tunum din ke-bala ken-umbip.
1CO 7:8 Kulaa, unang tunum kapkes so, unang kaluun so, kipni bokoyokomi ko: Kipkal nami kala kanola kapkes bom-laabi tap kelip disa; kapkes kulu ilum o, kalip kulaali tangbal. Yale,
1CO 7:9 unang tunum kapkes so, kaluun so, ili ti unang kuluula, tunum dabuulu kemin, kaami kukup akal kusnum ma keyu yang ban waka-mokomup o, kalip namti, baan kuno kela yak unang kuluula, tunum dabuulu, ke-mokomip kaata tambal.
1CO 7:10 Kemin, lo kalawaali tunum din, unang din, imi kuyon o, kalalila kemin, kabak-ali nalmi lo disa; kaali Kamokim Yesus ami lo kuka-daasa kabak-ali boko-lomdu: Unang uli ulmi imakim kaa kewala-yaamin disa.
1CO 7:11 Kanola unang uyo ulmi imakim kaa kambolu namti, yak tunum kusnum kaa asuk kuluu-laamin disa. Ale, unang uyo disa kaa ilokomi dinim o, kalu kulaali, asuk yang ulmi suun imak dabuu bii kensu ami atamule, aket maakup ke asuk akam tambal-kup ilokomip kaata tambal o. Imakim akal almi kalel kuu fotabemin disa yo, kala Kamokim ami lo kaali kanum bokosu.
1CO 7:12 Kemin, kalawaakal ti unang din, tunum din, imi sang kemin ale, kaali Kamokim Yesus ami weng disa; kulaa nalmi weng kemin ale, ipni bokoyon o, kalila ko. Kanola tunum akam ma laabip. La, imakim ali tiltam Kraist ami lak duula namti, unang uyo bokolu: Nami imak ali Kristen keba. Lale, nali kela yang banokomi disa yo, kalu namti, imak kaa kalel kuuli fotabamna yang banemin disa.
1CO 7:13 Kuno ti unang akam ma bom ilom, kulaa kalel uyo tiltam Kraist ami lak duulokomu ayo tunum kaa bokola ko: Nami kalel uyo Kristen kebu. Katale, kuu kewa yang banomi dinim o, kala namti, kalel uyo taba imakim ayo kela unemin dinim o.
1CO 7:14 Kabak-ami miit kaali, tunum ali, Kraist ami lak duulin dinim ayo ti almi kalel Kraist ami lak duusu kuumi aket-kup kuwa-bomda umi diim-kup bom ila namti, God almi unang tunum Kristen imi aket-kup kuyila bom laaba ultap ke God akal tunum kaa tiin molokoma no. Kanola unang uyo Kraist ami lak duulin dinim bombuu, ukol ulmi imakim Kraist ami lak duulin ami aket kola bomdu ami diim kawu suunkup ilu namti, God almi unang tunum Kristen imi aket-kup kuyila-laaba tap ke, God akal mep unang kuu tiin molokoma no. God ali kanola aket kukaayin dinim ken-umba dinam, Kristen kipni man iyo Yesus Kraist ami lak duulin disa, imi man ililtap kesip. Lale, God akal utamaya, Awak-aalap ibi Kraist ami lak kaa duulip kala, kala-somdala, kipni man kiili tiin mo-balaya bom-bilip o.
1CO 7:15 La, God ali kipni naan-daayilila, Tiltam aket bilili-kup kala abiin tambal-kup tiin-bom ilin o, kalala ibi weng umuuyase. Kemin, kuno tunum akam ma bom laabipla, imak ayo Kraist ami lak duulokoma kaali, kalel uyo Kraist ami lak duulin disa utamula, Nami imak ali tiltam Kristen keba kalalu atamduya kuno kelon o, kalu namti, kulaa weng dinim kemin, unang uyo kuno imakim ayo kelamu. Kemin, imakim Kraist ami lak duulin ayo kalel kuuli, dil saanin disa kuno kambowa kela yang banemin o. Aa, ti kuno unang akam ma bom ilom, kalel uta tiltam Kraist ami lak duulule, kulaa imakim Kraist ami daang bakaalin dinim be, ayo utama yi, Nami kalel kuuli, tiltam Kristen kebu kala, utamdala kuno kewa unon o, kala namti, kulaa weng dinim. Kemin, kalel kuu asuk imak kaa dil saanin disa. Kuno kambolu namti, kewa yang banemin kaata-kup o.
1CO 7:16 Kalel, kubi ti kultupni timak ayo dong dakaan-balap tiltam Kristen ke-lokoma ne? tiltam Kristen ke-lokoma disa yi? Kemin, kubi kabak utabap disa. Kuno ti imakim kapkal kapni kalel uyo dong daka-um-balap tiltam Kristen ke-lokomu ne? tiltam Kristen ke-lokomu disa ye? Kabak-ali kabi utabap dinim, babonbap. Kipni tiltam Kristen kelup o, kalokomip kaali, ibi iltipni unang tan aye, imak miineng aa, Yesus ami lak duulin disa, kii keyila yang banemin disa yo.
1CO 7:17 Kamokim ami unang tunum maakup maakup imi tiin-laamin kaali, kuya-kuya-kelale, tiin-laamin kanolin kaami diim kawu bom-balaya, God ayo naan-daala tildang talse kaali, kaata-kup kutal-fuku-bom-balala yo, kalalila, alik abip ma ma ilmi Kristen unang tunum iyo lo sang kalawuuta suunkup bakayila-tabasi.
1CO 7:18 Kemin kanola, Juda tunum ma ami ipnaal ukduu-kukan-telip bom-balaya, God ayo weng umola tildang talse namti, ami angtiil dal kaa talalulila disa ke-lokomu no, kemin daa yo, kala-somla ko. Aa ti, kuno tunum miit ma dok nolin tunum ata ami ipnaal ukduu-kukan-telin disa kelip bom ilala, God ayo weng umola tildang talse namti, ali bokoyilala ita taba-lomdip kaami ipnaal kaa bo-kukan-telokomip disa yo, kala-somla ko.
1CO 7:19 Kaami miit kabak-ali, tunum ipnaal bomin kukup kaa dok kanolokomu disa; kuno ipnaal bo-kukan-tiilin dinim kata, kaa dok kanolamu dinim. Lale, fan, God ami Lo kutal-fuku-bom-ilin kaata fan mafek mafek win so namti kala bombuu ko.
1CO 7:20 Tunum ok ma, God ata kolase kaami diim kulu bom-salaya, God ata naan-daala tildang talse namti, okokmin kaa kanuba kaami diim kawu-kup bala yo, kala-somla ko.
1CO 7:21 Kanola disa masiim sok de-tamulip tunum ma kaami disa okok ke-balap, God ayo weng umbaap-ta tildang tal-salap namti, kapni sok de-tamulip disa masiim ok fuku-balap kaami aket uluum kaa tabemin disa. Lale, kabi utamapla, Nali sisol kuluu nalmi kamokim ami kola moliya, sok tildaa nam-baala ami ok tabonsi uyo, kulaa kela tam banokomi kaami liip kaa bombuu kalap namti, kaata mo-somdawa kaal dinim kambola tam banokomap o.
1CO 7:22 Mep tunum kaa sok dedulip tunum ma kaami okok kamaan-balala, God ata naan-daala tildang Yesus ami mepso talse, ali kamala-kup kulu Kamokim almi keba. Kemin, ali sok dedulip tunum ma kaami okok keba. Lale, Kamokim Yesus ami tiin diim uyo tunum kaali ban kaata taba-lomdu asuk sok deduulin tap ke-lokomu dinim o. Ale, dok nolin tunum kaata ma sok deduulin dinim disa kulu bom-salaya, God ata naan-daala tildang Yesus ami miit tem talse namti, ali sok dedulip okok kemin dinim bombe. Lale, kulaata Yesus Kraist almi sok deduulin tunum alaltap kelaya, ayo yak mafek mafek alik kiili, Yesus almi boko-lomda: Kalaata kanolan o, akan-kaaba kaata-kup nun-umba.
1CO 7:23 God ata taba-lomda ibi Kraist ami kiim ta kuluu mose. Kemin, saak yak mafek mafek kanumin kukup mafak kaami tiltam sok de-yimulin tap kelon o, kalu kaa, ibi maso yak kutal-fuku-laamin dinim o.
1CO 7:24 Nak-tunum kusal kipyo, tunum ami tiin-laamin ayo kutal-fuku-bom-balaya, God ayo naan-daala tildang talse namti, ali ti God ami diim kawu fewa-bomda kanolin tiin-laamin kaami diim kawu suunkup bom-balaya yo.
1CO 7:25 Ibi unang sii tunum ket imi sang kaata dik-daap-na-lomdip, sukon kala dola kup-nambip. Kemin, Kamokim Yesus ali kanolin kaami sang kaali, ma bokosa dinim, kalalila, nalmi aket fukunbi kaata kuluu bokoyon o, kali kemin, Kamokim Dukum ata olen-daap-na-lomdala, talalu-nam-tiilaya tiltam bomdi iyo weng bakayim-biliya, Kristen unang tunum ili nami weng bakabi kaami fiyaap uyo duu-bam iyo kutal-fukusip. Kemin, ibi weng san iliwa.
1CO 7:26 Am kula daansuu kaali, aket uluum tiltam tiltam kem-tabu kemin, nali utamila ibi fiit-mokomip kalaliya, nalmi aket fukunbi kaa, alik ibi kamala kalawaali kanola bom-bilip kaali, kapkes ilin aye, unang din ke-bom ilin aye, ultap kanolin-kup ilokomip kaata tambal o, kalbi kaali,
1CO 7:27 kanola kabi kalel so namti, aket yaapkan fukun-bam, Kwin kaa dok kano-somdila kewa unon i, kemin daa! Aa, kanola kabi kalel dinim kapkes namti, baan unang ma kuluulon i, kala aket yaapkan kaa fukunin disa.
1CO 7:28 Lale, kabi unang kuluulokomap namti, kaa ban wakamin disa. Aa, unang sii ukol tunum dabuulokomu kukal uli kaa ban wakamin disa. Lale, tunum unang ili unang din tunum din kelip namti, mep tawaal diim kalawaali aket uluum kaata kuluu-laa-mokomip. Kata, nami aket fukunbi kaali, kanolin aket uluum kaata tal kipni diim abe-mokomu dinim o, kalbi.
1CO 7:29 Nak-tunum kusal kipyo, weng ma bokoyokomi. Kemin, weng san iliwa. Tawaal diim kalawaami kukup kala kanola bombuu kaali, bom ilana disa ke-lokomu kaali, mep dikiwa-talabu kemin, daa mep ilana luk daalin tap ke-lokomup kabak-ami tunum unang din aye, tunum ami kayaak taanan e, kalala, amaba aa, tunum bisnis kemin tunum aye, tunum tawaal diim kalawaami ok tabuulin tunum aye, kanolin kukup kutal-fuku ili mep tawaal diim kalawaami kukup tambal kaami aket kaata yan-bulu ilin dinim o. Kaami aket kulaa filit so ke-bamdiwa, God ami mafek mafek kaami aket kaata yan-buluya, bomdiwa yo, kala-somla ko.
1CO 7:32 Nami fanang dakabi kaali, mafek mafek aket uluum yaapkan kiita taba-lomdip kipni aket fukunin kaali, ku-mafak-dakaayim-bilipla, aket yaapkan kaa fukunin dinim o, kebi. Kemin, tunum ket ayo ti Kamokim Yesus ami kukup kaami aket kaata-kup kutal-fuku-bomda, Kaata kanu-biliya, Kamokim ata nami fiyaap kaali, duumak o, kalala kaali kanu-mokoma.
1CO 7:33 Lale, tunum unang din ayo tawaal diim kalawaami mafek mafek kaami aket fukun-bamda, Kaata kanu-bilila, kalel uyo nami fiyaap kaata duup-nuk o, kalalaya kabak-ali kanu-bamdala
1CO 7:34 yak God ami ok kaata nuumon e, ale yak nalmi kalel umi mafek mafek kaata kanuman o, nambu kaata nuumon e, kal-bomdala, aket alep fukun-tabasa. Kemin, unang fasel aye, unang sii bombuu aye, uli Kamokim Yesus ami kukup kaami aket-kup fukun-bamdu, Nali God almi alik-daap ke-lomdila yang kalok nolin kalok nolin kukup kanumi kulaali, nali almi kanuman o, kalba kaata kanu-bamdila yo, ke-mokomi. Kemin ale, unang, tunum din uta tawaal diim kalawaami mafek mafek kaami aket kaata-kup fukun-bamdula kanu-biliya, imak ata nami fiyaap kaa duumak i, kala-lomduya kaata kanu-mokomu no.
1CO 7:35 Kemin, weng kalawaali ipni unang kuluula tunum dabuulu kemin, kaata kelin o, kalali bakayimbi disa; nali bokoyilila, ibi kuuta dong dokoyiluya kanu-bam tambal-kup ilin o, kala bakayimbi. Kemin, kanola nayo ti ibi tituun-kup bomdiwa yo. Aket alep fukunin daa; Kamokim Yesus ami ok kaa ti dukum-kup kutal-fuku-bomdiwa yo, kalaliya weng kalawaali bakayimbi.
1CO 7:36 Kemin, unang sii ma tunum ket ami no, kalalip weng tik-daaliple, ayo daa yo, kala kewase. Katale, ali utamala, Awu, nami unang ma weng ma kaa baap-niwa umi bokowa-lomdi: Tam-buulokomi disa yo, kalasii kabak-ali tambal disa, kalala, aket dukum fukun-bam ale, unang umi aket kaata disa akal ma an-bulula, disa akal ma ke-bamdala, utama yi, Unang kuluulokomi kaali ti yaap kep-nokomu no, kala namti, almi aket fukunin kanolokoma kuyak ali ban wakamin disa. Kuno umbuula dabuulu akam kemin o.
1CO 7:37 Lale, tunum ayo mafek mafek kusnum ma kaata tildak ami aket tem un-ilomdu unang din kemin, uyo kuno kulaa-lomdapla disa kulu ilan o, kalula, disa almi aket fukunin kaata titil-kup fak-daa-bomda bokola: Nali unang din keli disa yu! kalala ami aket tem ayo kukup mafak kemin kaami aket kuu kuno kewa fanang tambal kaata-kup fukun-bam ale, yak almi aket uyo boko-lom: Unang sii alami no, kalalip baap-na-silip kuuli, kuluulokomi disa yo, kala kanum boko kela namti, kulaa weng dinim tambal o.
1CO 7:38 Kemin, unang sii alami no, kalalip weng baala-silip uyo kuluula namti, kulaa kukup tambal ale, kuluulin dinim kela namti, aa kaaso ti kukup tambal dukum.
1CO 7:39 Kemin, unang uli imak taanin disa bombe kaata, kalel uyo ami diim kawu yak fewa bom-ilom imak ayo taanale, kaluun kewa uyo yang tunum kusnum ma dabuulon o, kalu namti, kulaa weng dinim, yang kunolamu. Lale, tunum ali tifan ti Kristen kesa tunum kaata dabuulokomu uyo tambal. Lale,
1CO 7:40 nami aket fukunbi ayo, kanola unang uli disa ilokomu namti, atin ti fiyaap-kup duu-bam ilokomu no, kalbi. Kemin, tunum kusnum ili nami weng kala bakabi tap ma kanu-bam bakan-umbip dinim. Lale, nalmi aket fukunbi kaali, God ami Sinik ata taba-lomda nakal kanola kukup-nam-balaya, weng kala bakayinbi ema yo? kebi ko.
1CO 8:1 Kulaali, kipni sukon tem dola kup-na-lomdip tunum kiimi taloop kuluu-lomdup awem men imi kukaayup kayi, kal-bomdip fuu-bam inin kaami sang dik-daap-na-silip kaami sang kaata nakal maan tiiyon o, kali. Kemin, kibi boko-lom: Salap men kaami titil dinim kaali, alik nuli ti utamsup te! kalbip. Kulaa faneng. Lale, nuli utamsup te! kalin kulaata taba-lomdu nulta-kup o, kalalip fuut-tabemin kaami kukup uyo kutaltam dakan-tabasip. Lale, nuli naktum kusal imi aket kola una-tala-kemin kukup kaami kuluulokomup kuuta taba-lomdu Kristen nuli dong dokoyilu tiltam atin titil-fak-daalokomup.
1CO 8:2 Tunum ma ayo nali mafek mafek kiili alik utamsi no, kala namti, tunum ami utam-laamin kaali, tiltam tiiknin disa buu. Kemin ale,
1CO 8:3 fan kanuba tunum ali God ami aket-kup kola namti, kaata fan God ali utama yi, Kaali nalmi man u! kalokoma.
1CO 8:4 Kemin, taloop kuluu-lomdup awem men ami kolum o, kala fuu-bam inin kaami sang kaata bokoyokomi ko. Kemin, kulaa nokol utamsup kemin, salap men kaa fan mafek mafek tituun disa; ibakamin kemin, sinik God alaltap kiili ma bom-bilip disa, ti God ali maakup ata-kup bombe no.
1CO 8:5 Kulaa, tawaal diim kalawaami unang tunum ili mafek mafek yaapkan kiili, god o, kal-bom ale, kuno unang tunum yaapkan kiikal kamok kamok o, kal-bala ken-umbip. Lale, yak mafek mafek abiil tikiin so, abiil kaptamu bom-bilip iso, aa yak mafek mafek tawaal diim kala bom-bilip aye, unang tunum ita imi bakayin-bamdip: God o, yakan kan-umbip kii, fan numi God daa.
1CO 8:6 Numi God kulaa ti maakup kemin, kaali Aatumen God ata, ali mafek mafek alik kiimi miit kayaakim kemin, nuli tifan almi man alik-daap o. Kano ti numi Kamokim maakup ata-kup ti fan bombe kemin, ali Yesus Kraist ata no. Kulaata taba-lomda mafek mafek alik kalawi talalu kutiilaya, Kristen nuli tiltam almi titil diim kawu mokso bom-bulup te!
1CO 8:7 Lale, Kristen maakup maakup ili utamiwa yi, Awu, awem men kuuli fan, ibakamin umi mafek mafek o, kalalip talalu utamsip disa. Siin sawaayak kaptoowu ili awem men umi diim kaptoowu-kup talan-umbip. Kemin, unang tunum Kristen kanolin imi aket fukunin kaa taloop kuluu salap men imi kukaayin kaali, atin ti fan mafek mafek tituun o, kalalipla inan-yaabip kemin, imi aket fukunin kaali taloop kalawaali awem men umi kemin, Kristen nami imbi kalawaali kukup mafak ema yo? kal-bom ina-faka-biliwa uta taba-lomdu imi aket tem kabak-ali ku-mafak-dakaayila-tabasu.
1CO 8:8 Lale, nuli yak inin-inin kiili, inamnin disa kelup namti, kaali God ami tiin diim kawu, mafak ke-lokomup disa. Kuno inamnup namti, God ami tiin diim kawu, mafak-nokomup disa. Inin-inin kaata ma taba-lomdu nuli yim-bii din God ami mepso kaa daalokomu dinim o.
1CO 8:9 Kemin, yak iltipni kukup mafak kaa kanubip kuuta taba-lomdu tunum unang God ami lak duu titil-fak-daalin disa, bom-bilip imi yam-mafak-daalula yang ban ke-mokomip. Kemin, kipkal kabak talalu utafii-bamdiwa kayi!
1CO 8:10 Awem men kaami taloop kaata kup-tip inamnon o, kalap kulaa, weng dinim kemin, kulaali inin-kup o, kalbap tunum kabi yakaba yang awem men kaami am kaa tam-ilomdap men awem wiis molin disa. Tiin-bom yak kang daam ayo kuluu awem men kukaanbip kaami inokomap kaali ti kanola tunum titil-fak-daalin disa; ke aket fukun-bam taloop kaali faneng salap men ami kemin Kristen nami inokomi kaali kukup mafak ema yo? kalba tunum ayo din titamala, Awu, kapkal inbap kala kalale, ami aket fukunin namti, kufolula akal taloop kuluu men awem kukaanbip kaali, inokoma no.
1CO 8:11 Kaali kapni aket fukunbap kaali, kulaa weng dinim kuno ini no, kalbap uta taba-lomdu tunum titil-fokolin disa bombe ayo dap-mafak-daalokomu. La, kap-tunum ali Kraist ata ami iliim kaali, bolon o, kalala taandala asuk dabuu dap-talang almi langlang tem daase. Kemin,
1CO 8:12 kipni kap-tunum kusal maakup maakup imi aket fukunin kaali, talalu titil-foko-lom kuu kayak kuu kayak kemin disa bilip kemin, ibi kanolin kukup kaali kanu-bam ale, ami God ami lak duu-laamin ku-mafak-daawala-lokomip kaa, kipni Kraist ami ban kamalokomip namti kabuu no.
1CO 8:13 Kalsu kemin, kanola nali taloop kuluu-lomdip ibakamin salap ami kolip kaa in-bilila, nami nak-tunum ayo nitamale, kaata taba-lomdu ami aket fukunin kaali, ku-mafak-daalu yang ban wakama kala kali namti, taloop kaali maso ma inam-nokomi dinim.
1CO 9:1 Tunum malo ma imi min lo tem kawu tiin-bom-biliya, ita nami tiin saanin dinim. Ale, tunum malo ma ili boko-lomdip: Pol ayo Yesus Kraist ami kalaan tunum disa yo, kal-bom ale, Ali numi Kamokim Yesus ali almi tiin alep alep kaali atamsa disa yo, kal-bom kanubip. Katale, nami sang bakabip kaali, kasen-fakabip. Nali Kamokim Yesus ami ok kaata-kup okok ke-bilila, ibi kabak-ata utafii-bamdipla tiltam Kristen kem-tabasip.
1CO 9:2 Tunum kiimi aket fukunin ayo boko-lom: Pol kaali Yesus ami kalaan tunum disa yo, nakan-kaabip. Yale, kuyak ali nali maan tiimin disa. Kemin, kipkal utamsip taa! Nali Yesus Kraist ami kalaan tunum kemin, kayak kayak ili kipni kama kukup kanubip kaali, utam-ilomdip Pol ali tifan Kamokim Yesus ami kalaan tunum ke-bomda kukuyin-bala kaa kanubip o, kem-tabasip.
1CO 9:3 Kemin, tunum malo ma iyo baloop-nam-bilipla, imi weng kanup-nambip kaami maan tiiyila-yaabi namti kala bombe.
1CO 9:4 Yesus aptum kusal kalaan tunum nuli God almi ok kaata-kup fuku-bulupla, God ami unang tunum ita taba-lom inin-inin ayo numi kukaayilip namti, kaata yaap keyokomu. Ale,
1CO 9:5 Kraist ami kalaan tunum kusnum iso, Yesus Kamokim ami nakal iso, Pita kabe aso, nikil kanolin kiili, Kristen unang kesip ita-kup dunu-silip. Kemin, God ami okok kem-tal-unemip kaali, akal almi kalel e, kala kusiin daala kusiin daala kem-tal-une-bamdip okok kem-tal-une-bilipla, Kristen unang tunum iyo moni aye, mafek mafek aa, iyo kuluu dong dakaayila-yaabip ale, nali yi? Nakal ti kanu-mokomi kaata yaap keyokomu.
1CO 9:6 Aa nasole, Banabas so, alep nuli God ami ok sole, tawaal diim moni wok kulaaso, kano alep alep okok ken-tabasup. Ibi numi bokoya-lomdip: Alep kipni God ami okokbip kaali, nuli dong dakaayin-bam moni kaa kukaayokomup disa. Kemin, moni kaali, alep iltipni san. Kemin, alep ipni moni ok tabuumin kaali, kulaa kela-yaamin disa. Alep ti kano ok tabuu-bomdiwa yo, kalbip. La, ibi Kraist ami kalaan tunum kusnum yakal ti kanolin weng kaa kuno kulakamin disa ema? Daa. Nokol ti kanola moni ok kaali, kambola God ami ok kaata-kup okok ke-buluple, kipta numi moni aye kaayo kuluu numi dong dakaayokomip kaata ti tambal.
1CO 9:7 Kemin, dok nolin tunum kaata ma waasi dinin kaami ok kaata ma tabuula namti, almi inin kaa alalta fen-tal-une-mokoma disa. Almi tiin molin tunum alalta inin-inin ayo tiin mo kukaalokoma. Aa, dok kanolin tunum kaata ima lang dikima namti, ti alalta-kup din dabuu bi kulii-tal inokoma. Aa, tunum kaa kanta bulumaki tiin molin tunum kela namti, bulumaki muuk ok anung kaali alalta ilii tal inam-nokoma. Kanolin kemin ale, ibi moni anang ayo alep nuli dong dakaayim-bilipla, nuta taba God ami weng kaata kipni kukuyokomup kaata tambal dukum o.
1CO 9:8 Tunum kipni kukup kaami sang kaata-kup bakayimbi disa; lo ukol kanum bokosu. Kemin,
1CO 9:9 Moses ali Lo kabak-ami sang maakup ma kaata kanum boko dola-lomda: Bulumaki ayo kapni okok kamap-tam-bamda wiit ami tip diim kawu ti tibin tal une-bala, wiit tiil kaali, ulela daak tawaal abamnip afetbap kaali, bulumaki ami bon tem kaa sok dinalin disa kaali, kambolawa, akal wiit anung ayo inan-tal-une-bamdala, ti antibin tal-unemin o, kalsu. Kemin, God kaa bulumaki imi aket kaata-kup fukun-bamdala bokosa dinim.
1CO 9:10 Yesus almi kalaan tunum numi aket so fukun-bamda ima tinap ilokomip kaa mafak o, kala-lomdaya kabak kanum bokosa. God ami aket fukunba kaali, tunum iyo malii bak-daa kuluu wiit lang diki-balale, malii ma wiit yakaana ayo daka-bala yo. Kemin, tunum iyo aket fukuniwa yi, Daka-mokomup kaa, nokol anung kaali faka-mokomup kala, kal-bomdiwa, okok ke-mokomip kaali, tambal kala-somdala God ali numi aket kaata fukun-bamdala, Lo kaa Moses ami bokolale ata dolsa.
1CO 9:11 Kemin, Banabas alep nuta God ami weng tambal kaali, kulii-din kipni iipyak tem daalupla, tiltam dukumasu. Kemin, kipni inin-inin aa, ilim aye, moni ayo kuluu numi dong dakaayokomip kaa, kukup tangbal disa yo, kebip ema?
1CO 9:12 Kipni aket fukunbip kaayo, kaa tambal o, kala kanolin mafek mafek kaali, tunum kusnum imi kukaayokomup kalbip. Yale, ibi numi aket kaali, fukun-bom nokol mafek mafek kaali, kukaayim-bam kemalip disa yoko? Faneng, nokol kanolin mafek mafek kulaa kuluulalup o. Kemin inin-inin aye, ilim, moni, kulaa nokol yaap kuluulamup. Lale, nulmi aket fukunbup kaali, moni aye, kuluulokomup kaata taba Yesus Kraist ami weng tambal kaami liip kaa bak-daalamu no, kala suun-bamduwa, ma kuluulin disa kela mafek mafek kaali iip-nulup o, kalalupla fiit-bam moni ok kaata okok-kem-tabasup. Kemin,
1CO 9:13 tunum Jerusalam lotu am diildiil dukum kaptam-ami okok kem-laabip, ili kaptam-ami ima anung ayo faka-bam ale, awem tunum pris o, kebip iyo, taloop kulii-tal tii, kuyak fuulip kiin-bala, God ami kukaanbip kaami daam kaali, ililta taloop kaami anung uyo, ilimi uka-bam kem-yaabip kaa, ibi utamsip disa ema?
1CO 9:14 Ultap kanolin kemin ale, Kamokim Yesus ali lo kalawuuli kutii-lomda, tunum ali God ami weng tambal kaata kukaayin-bala, weng san-kaamip namti, mep tunum kaa weng, weng san-kaabip isiik ima waan aye, kiili kulii-tal dong dakaayin o, kalalala kutiisa.
1CO 9:15 Lale, nali mafek mafek kaa ma kuluulin dinim. Kemin, kamala kuluwaata mafek mafek ma kuluulon o, kalalila weng kalawaali dolni disa. Atin ti yak kipni moni aye, ayo ma kuluulokomi dinim. Nami God ami ok disa kulu okokbi kaami fiyaap kaata duubi. Kemin, nami aket fukunbi kaali, tunum ma ata taltam moni aye, ma kup-na-lomda, nami fiyaap duubi kaami miit ayo dik-daa kukan-tiip-nokoma disa, kaali mafak o, kalbi.
1CO 9:16 Kemin, nakal utamila, God alta bokop-na kalaliya ami weng tambal kaata bakayila-tabasi. Nali dok kanola boko-lomdi: Nalmi aket fukunin kaata kuluu-lomdiya kanubi ni, kalokomi disa. Nali weng tangbal kala kukaayin disa ke-mokomi kaali ti, atin um-tal-daalokomi no.
1CO 9:17 Kano ok kalawaali ti, nalmi aket fukunin kaata-kup num-tabasi dinam, kuuta nali sisol kan-tabasi. Yale, nalmi aket fukunin kaa disa. God ami ok kalawuuta kanuman a! kalala kup-namba kaata-kup kaa kanum-umbi.
1CO 9:18 Kemin, nali kabak-ami sisol kaa dok kanolin sisol tap ma kuluulokomi ni? Nami sisol kaali, God ami weng tambal kipni kukaayila-tabasi kabak-ami sisol o, kala moni kaa-mami. Lale, kabak ma kan-umbi disa. God ami weng tambal kaata, kuluu-lomdi disa kukaayimbi kaami fiyaap duubi kaata nami sisol kaamin tap namti kuluubu kemin, kaata-kup ti yo, kalbi no.
1CO 9:19 Nali tunum ma ami sikil diim kawu bom bii disale, kuno tunum ma ata taba-lom sok de-namulala ami okok kamanbi dinim. Lale, nami aket fukunbi kaali, unang tunum yaapkan imi okok-kamayin tunum alaltap kelila, God ami weng kaata bakayin-biliya, weng san-ilomdiwa tildang God almi miit tem tilin o, kala kalaliya, nalmi aket fukunin kaata kanumin miin kiimi okok-kamayin tunum alaltap kelila kaata talan-umbi.
1CO 9:20 Kemin, nami taba unang tunum miit ma miit ma imi God ami weng bakayila-laabi kaali, kanumin kemin, din Juda iso bomdila imi kukup tangbal kaata utam kaal-ke kutal-fuku-bomdila, imi bakayim-bili nami weng kaali, weng san-somdipya, tildang God almi miit tem tilin o, kalali Juda imi kukup tangbal kaata, kutal-fukun-bomdi God ami weng kaali bakayila-tabasi. Nali Juda imi lo diim kawu bom bi disa. La, nali Juda imi lo yikik-kutal-fukusip, kiiso bomdila imi kukup tambal kuuta kutal-fuku-bomdila, imi bakayin-bilila iyo weng sandipla tildang God ami miit tem tilin o, kalalila imi kukup tambal kaata kutal-fuku-som ale, God ami weng kaa bakaayila-tabasi.
1CO 9:21 Aa, ti nalmi kayaak Juda kiika daa; tunum unang miit yakal alik iso bomdila, God ami weng kaali bakayim-biliya, iyo weng san-ilomdip tildang God ami miit tem tilin o, kala kaata kalali Juda imi lo ayo kambola miit kusnum kayak kayak imi kukup tambal kaata kutal-fuku God ami weng kaata bakayila-tabasi. Yale, nali fan, God ami Lo kuu kulaa kewansi daa. Kaali, nali Yesus Kraist ami weng kutiisa kaata kutal-fukuliya kaa kanum tabasi.
1CO 9:22 Ale, nali unang tunum God ami lak katip katip kebip iso, bomdila bakayim-bilila, weng san-somdipla, tildang God ami miit tem tilin o, kala-lomdi imi kukup tambal kaata tabuu-bomdi God ami weng kaali, bakaayila-tabasi. Kemin, kaa nali tunum miit ma miit ma alik imi God ami weng kaata bakayin-biliya, nami weng kaali talalu weng san-somdiwa, malo ma tildang God ami miit tem tilin o, kalali iso bomdila, imi kukup tambal tambal kiita kutal-fuku-bomdi liip yaapkan uyo um-kuku-bamdi God ami weng kaa bakaayila-tabasi te!
1CO 9:23 Kemin, nali God ami weng tambal kaata kufu-biliya tiltam dukum-nuk o, kalaliya, kukup alik kaami sang kulaa bokoyili, kulaa ti kunum tabasi kemin, ilom am ma daanokomu kaali nasole, tunum iip maakup maakup iso, nuli God ami mafek mafek tambal tambal kiita ma kuyila kuluulum o, kalalila kanum tabasi no.
1CO 9:24 Tunum iyo abiltap bina dilila um-bomdip iyo akaala-sala akaala-sala-ke-bam alik une-mokomip. Lale, maakup ma ata-kup bina dinda mafek mafek kaali, kuluulokoma. Kemin, ibi kabak-ali utamsip dinim ema? Kipkal ti kanola God ami mafek mafek kuyokoma kaa, kipkal abil un-bomdip akaala akaala kem-unebip tap ke-bam God ami ok kaali, titil-fak-daa okok-bamdiwa kayi!
1CO 9:25 Tunum alik imi abiltap bina dilila-unemin kaali, kamasi kaali ti nata nata kelon i! kal-bomdip imi angtiil diim yol tabebu aye, daal dap-tiiyimbu aye, kaa alik ti saak kuno kela-bomdiwa abiltap unemin ayo suunkup kano ti kukumin-kup kanum-yaabipla, kuliili tawaal diim kuldaak-ami mafek mafek mafak-alaamin kulaa nuta nuta ke-lomdupla fakamum o, kal-bomdip kanun-umbip. Lale, nuli mafek mafek mafaka-yaamin disa. Ti suunkup kano ilokomu kaata kuluulum o, kalalupla God ami ok kaa okok-kem-tabasup.
1CO 9:26 Kemin, God ami ok kala tabuusi kaali, nakal ti tunum imi abiltap bina-unebip iltap kem-tabasi. Yale, bina-um-bomdi tiin kulaali yak aba tildak aba ken-um-bomdi abiltap unen-umbi disa. Aa, nali tunum alep waasi din-bomdip sikil amim aliim dinbup kawo, kalbip tap kem-tabasi. Yale, uktala kaa-bam sikil amim ayo yak bina daa tildak bina daa ken-umbi disa.
1CO 9:27 Kemin, misii nali God ami weng tambal kaali, tunum kusnum imi-kup kukaayinsile, ilom nalmi daak abokomi kaali mafak o, kalaliya kanun-umbi. Kemin, ti nalmi aket fukunbi kaali ti, yaan sikil uyo atin nalmi aket fukun-bamdi kaata kanolak o, kalbi kaata-kup kemuk o, kal-bomdila nalmi titil kaata-kup kanum tabasi no.
1CO 10:1 Nalmi kayaak kipyo. Nami aket fukunbi kaa, weng kala bokoyokomi kalawuuli talalu utamin o! Siin sawaayak kawu Israel numi awil-fakal Moses aso unsip kiili, ibin usiik usiik un-bomduya, liip uyo kukuyila una-bulula, alik iyo tambal-kup Fingim Yol Kumun o kebip uyo lo yak malii abalip unsip. Kemin,
1CO 10:2 alik ili Moses ami daang bakaaliwa yak bansip. Oksam wakamin o, kala baptis kemin kaami sang kaata faldak ibin so, yol ok so, imi diim tii bakabi. Kemin,
1CO 10:3 una-bilipla, God ata inin-inin iyo kukaayin-bala, alik iyo in-bom ale,
1CO 10:4 ok ayo kuyila-laa-bam in-bom ke-bisip. Kemin, tuum tem ok kaa disa kawu in-bisip disa; Yesus Kraist alta ok kaa kukaayin-balaya, God ami tuum tem ok kaata im-bisip. Kemin, kaa aso un-bomdipla, ok ayo kukaayin-bala im-bisip.
1CO 10:5 Lale, God ali unang tunum yaapkan kiimi kukup uyo utama yi, Kaa mafak kaa kala yam-mafak-daka-balaya, unang tunum yaapkan kanolin iyo am bokon disanang bokon kawu saaka-laa-bisip.
1CO 10:6 Kemin, mafek mafek alik kiiyo tiltam tabasip kiita taba-lom nuyo bokoya-lomdip kipkal mafek mafek mafak uyo utam aket kufoyula Israel imi kanu-bisip tap kaa kemin daa yo.
1CO 10:7 Israel malo ma iyo, ibakamin salap kaa wiis-saan-bisip uyo, God ami Sukon Tem kaali, imi sang uyo boko-lomdu: Kuno unang tunum iyo tiin-bom ima so, ok mafak kaaso, iyo in-bom ale, was wii-bam, sadiki-bam ke-bisip kayi! kala kanum bokosu. Kemin, ibi kanu-bisip kaa kanumin disa yo. Kemin,
1CO 10:8 kanubip kala kalalaya, unang tunum yaapkan ilami-kup 23,000 kiita God ayo am maakup daana kulu anula saaksip. Kemin, nokol kanola kiimi sadikimsip ultap kaa kanumin dinim.
1CO 10:9 Kemin ale, Yesus ali numi kanumin kaata ma noyokoma disa yo, kala dap-kuku-bam suunkup ban waka-bulup siin Israel malo ma ita taba God ami dap-kukumum e, akal taba kata, inap kulaala taba anulip taan-ilom maaklo kesip tap kaa kanumin disa.
1CO 10:10 Aa, malo ma iyo God ami weng uluum weng kaata-kup bakaan-bam iliwa, Ensel Tunum Yela Taan-yaamin ami dabaala tildaak anula taan maaklo ke-bisip. Kemin, ibi kukup ultap kaa kanumin dinim o.
1CO 10:11 Kemin, mafek mafek alik iyo tiltam imi diim abe-yinsip kiimi sang iyo, God ami Sukon Tem kabaku bomduya, tawaal kalawaali mepso disa kelon e, kalbu kemin, kalawaami unang tunum bom-bulup, numi suunin weng kala kukaayinbu.
1CO 10:12 Kemin, tunum akal utamala, Nali titil-foko-bomdi bii no, kala namti, kulaa daak abokoma. Kemin, kabak talalu utafii-bamdaya kayi!
1CO 10:13 Kemin, kukup mafak kaa tal kipni diim aba yam-kukum-tabasu kuu ukol ulmi kusnum disa; kukup mafak kaa, suunkup tal tunum unang alik kii yam-kuku-bulula iyo utafiin-umbip. Lale, God ayo almi weng kutii-lomda dong dakaayokomi no, kalsa kaata kutal-fuku-bomdala, ali kukup mafak taba yam-kukumin kuu ma kambowa uta uta ke-lomdu kipni titil uyo kabaak ban-ilom keyokomu dinim. Kukup mafak tal kipni diim aba yam-kukulokomu kaa, God ata taba kipni liip uyo kukuyin-bamda dong dakaayokoma. Kemin, kanolin kabak-ami liip kaali, ibi dong dokoyilaya, kipkal tiltam titil-foko tola-lomdip yam-kukubu umi iliiwip kabaak banu ke-wokomip ko.
1CO 10:14 Kanum bokosu kemin, nalmi nak-tunum kusal kipyo. Ibi ibakamin salap so, mafek mafek akal kusnum iso, imi aman dakaayin kukup uyo kulaa kela daang ukuyin o, kala-somla ko.
1CO 10:15 Ibi utamsip tunum kala, kalaliya nali weng kala bakayinbi. Kemin, nami weng kala bakayinbi uyo kuluu-somdiwa ifin-un-bom utamiwa yi, Awu, kuu tambal e? mafak e? kal-bomdiwa yo.
1CO 10:16 Kominion inokomip kabak-ali nuyo kuyaku-diyaku-ke God aso aket maakup kelupla, wain ok ayo iluule, God ami yaap ke yo, anbup-kup kawu, Yesus Kraist ami kiim sing-tam-daasuu kaami aket kaata fanang daka-bam in-bom ale, bret ata fak-duu-lom Yesus ami tiil lo-tabasuu kaami aket kaata fanang daka-bamdupla in-bom kem-laabup. Kemin,
1CO 10:17 nuli unang tunum yaapkan yale, bret atale maakup. Alik nuli bret maakup kulaata-kup inan-umbup. Kemin, alik nuli aso miit maakup fuku tiil abin tap ke maakup kuyak mim-daasup o.
1CO 10:18 Kemin, ti kipkal Israel imi kukup kanun-tabasip uyo fanang daalamip o. Tunum pris o, kebip iyo mafek mafek kulii-din kuyak fuulip kiina God ami kola-laabip umi anung iyo inan-umbip kaalile, God aso aket maakup ke-bamdiwa kanun-umbip.
1CO 10:19 Nami weng kabak-ali, kanim sang kaata bakayimbi ni? Korin kayaak God ami lak duulin dinim imi mafek mafek ibakamin salap ami kukaalin so, ibakamin salap kaaso, kii fan mafek mafek tituun kemin disa yo, kalbi.
1CO 10:20 Nami weng bakabi kabak-ali God ami lak duulin disa bilip imi mafek mafek kii kukaayila-yaabip kaali, sinik tambal god alaltap ami kukaanbup o, kalbip. Yale, kaa sinik mafak imi kukaayila-yaabip. Kemin, kibi ibakamin salap mafak iso aket maakup ke-lom kuyaku-diyaku-kemin daa yo, kalalila bakabi.
1CO 10:21 Kemin, kanola yak kukup alep fukumin tunum ibi yak Kamokim Yesus ami aket uyo fukun-bam bret so, wain ok so, iyo inan kuyak iip daa kenbip-kup, asuk yak sinik mafak ami aket uyo fukun-bam kabak-ami ok, ima, kang, iyo in-bom kemip namti, God kaa ibi dong dokoyokoma disa te! Kemin, ibi kaa kanumin disa.
1CO 10:22 Nuli sinik mafak ami mafek mafek inokomup namti, God dukum ali aket mafak kaa kukuyokoma. Kemin, nulmi titil kaa, fan taang-kala-somdup ami titil ayo ilelup kabaakba ke-lokomup disa. Ata taba-lomda kanu-mokomup kaami duu tiim ayo yol awak sakbaalim dukum uyo kuyila uta-mokomup o.
1CO 10:23 Aa, kipni weng ma boko-lomdip: Yak mafek mafek alik kulu bom-bilip kuliili kanolum o, kalup kulaa weng dinim. Kemin, ti kanumin kaata-kup o, ken-umbip kaali, tangbal. Lale, mafek mafek alik uyo ma taba-lomdu nuli dong dakaayila-yaabu disa. Aa, kipni boko-lomdip: Yak mafek mafek alik bom-bilip iyo kanolum aa, kalup uyo kulaali weng dinim; kemin ale, kanumin kaata-kup o, kem-yaabip kulaali tambal. La, mafek mafek alik iyo taba-lomdip yam-titil-diilip atin tiltam titil-fak-daa-laabip disa.
1CO 10:24 Kemin, kabi kaltapni angtiil lak kaata-kup dakaamin daa; kaptum kusal unang tunum kusnum imi angtiil lak kaaso duu-bom keman o, kala-somla ko.
1CO 10:25 Taloop saanin baan diim ayo din aba taloop kii molokomap kulaali, alik maaklo inin kemin, kaa aket yaapkan fanang daka-bam taloop kalawaali awem men ami kola-lomdipla kulii-tilip e? daa ye? kala taloop kayaak kii dik-dakaayin-bam un-bomdap saanin disa.
1CO 10:26 Kabak-ami miit kaali, God ami Sukon Tem uyo boko-lomdu: Tawaal kalawa sole, mafek mafek alik tawaal kalaami diim kawu bom-bilip iso, kiili ti God Dukum almi alik o, kalsu. Kaa awem dinim kemin, kaa dik-dakamin disa yo.
1CO 10:27 Tunum ma God ami lak duulin disa bombe ata naan-daap-ta-lomda: Talapya ima inum o, takala unon o, kalap uyo, kulaa tambal kuno din atamap mafek mafek alik kaa kup-tokomip uyo inam-nolap. Lale, kabak-ami aket uyo aket yaapkan fukun-bam, Kwin, taloop kalawaali salap ami kolaliwa iyo kulii-tilip e? daa ye? kal-bomdawa dik-daka-bamdap inin dinim o.
1CO 10:28 Yale, tunum ayo ma utamala, Kristen ili taloop kaa men awem kukaayinbup kaali, inan-umbip disa te! kalala ayo bokop-ta-lomda: Yi, taloop kalawaali ibakamin salap ami kola-somdila kuliili tili te! taka namti, tunum kaa kanum bokop-ta ami aket kaa fukunawa yi! Inam-nokomi namti, ami aket fukunin uyo ku-mafak-daalokomi kala, kala-lom kulakamin o.
1CO 10:29 Nali kapni sang kaata bakabi disa yo. Nali ti tunum kusnum ami sang kaata bakabi. Kemin, ami God ami lak dakaamin kuu tiltam titil-fokolin disa bombuu kala kalalawa, taloop uyo kela-yaamin o. Kulaa, tunum ma nayo bokop-na-lomda: Faneng kemin, nali kang kulaa inam-nomi. La, fanang daabi-kup kawu inamnila, kanimin o, kala tunum kusnum ita taba-lom nami aket fukunin talalu kutii-lomdi imbi kaa nitam weng mafak kaa kukaap-nokoma ni?
1CO 10:30 Kanola, nali God ami yaap ke yo, akali inam-nokomi kaali, tunum kusnum ata nami yaap ke yi, kalali inbi uyo, weng mafak uyo kukaap-nin dinim o, kala-somla ko.
1CO 10:31 Kanolin kemin, ibi ima in-bom, ok in-bom, saak yak mafek mafek akal kusnum kusnum alik nuumip uyo mafek mafek alik kiili, God ami win kaata-kup kufu-bamdiwa kanu-mokomip.
1CO 10:32 Kemin, Kristen unang tunum ibi utamiwa yi, Kipni yak kalok nolin kalok nolin kukup kaata ma kanumip uyo, kaptum kusal kayak kayak iso, Juda sole, miit kusnum tunum aa, God ami unang tunum iso, iyo utam-ilomdip God ami mepso uyo kulaa kela yang banokomip kala kalip kaali, ibi kanumin kukup kaa kanumin disa.
1CO 10:33 Kemin, nakal ti kanola mafek mafek alik kii kanun-umbi uyo utami yi, Ilmi tiin alep alep kiita utam, Awu, kuuli kukup tambal o, kalokomip kala kalaliya, kaami kukup kaata ti kanum-yaabi. Nali nalmi angtiil lak kaata duu-laabi disa; unang tunum yaapkan imi dong dakaayin-bilila, God ata im-taldang almi miit tem tiilak o, kal-bomdila, dong dakaayila-tabasi.
1CO 11:1 Kemin, nali Yesus Kraist ami keli kayi! kala-lomdi kawu, nami tal-unemin, tiin-yaamin, kanun-umbi nalaltap ke-bomdiwa, kipni tal-unemin tiin bom-ilin uyo kipkal kanu-bamdiwa yo!
1CO 11:2 Ibi suunkup nami kukup so, weng so, iyo kabak-ami aket fukun-bamdiwa, weng kala kuluu kipni kukuyinsi kaa, alik kutal-fukulin-kup kebip kala kalaliya kemin, nali boko-lom: Kipni kaa kanum tabasip uyo atin tambal-kup kanum-yaabip o, kalbi. Lale,
1CO 11:3 weng kala bokoyokomi kalawu, weng san talalu utamin o! Tunum alik imi dabom kaali Yesus Kraist atale, kalel umi dabom kaata imak ata, Yesus ami dabom kaali God ata.
1CO 11:4 Kemin, nulmi kukup uyo tunum unang kii dok nolin ita utamiwa yi, Nuli Kamokim ami minlo tem kulu bom-bulup kala kalip kaali, ilim kaal kaa kuluu ilmi dabom uyo akii-lomdip tal-unemin kemin, tunum ayo alami dabom uyo ilim kuluu katii-lomda beten ke-mokoma, aa God ami weng kuluu-lom unang tunum imi kukaayokoma kaa, tunum kaami kanoba kabak-ami iipyak tem kabak-ali boko-lomdu: Yesus kaaka daa. Tawaal diim tunum ma ata fan nami dabom o, kalokomale,
1CO 11:5 kuno unang ma ulmi dabom kaa, ilim kuluu katiilin dinim kelu, beten ke-mokomu, aa God ami weng uyo kuluu unang tunum imi kukaayokomu kaa, unang kuumi aket fukunu kaali, unang numi kukup kaa kuno kela-somdila, yak tunum imi kukup kaata kuluuli yo, kalalula kanu-mokomu. Kemin, umi dabom kaa imak kabe. Imak ayo kalel umi ma, kaa kanolu ni, kalokoma kaali, ali kabak-ami fatom kaa duk-duulokoma kabak-ali, unang mafak sadikin-tal-unebu no, kala-lomdip kusnum ita taba umi dabom kon ayo alik bata-lom mepkan batowip umi fatom kuluu-yaabu tap ke-lomdu kuluulokomu.
1CO 11:6 Aa, unang uyo ulmi dabom kaayo, ilim kaal kuluu akiilin disa kelu beten kemu namti, mepkan bita-lomdula yo, kala-somla kemin, ukol boko-lomdu: Mepkan bitamin kaali fatom o. Aa, alik bitamin kakal ti fatom u, kalu namti, ilim kaal kuluu katiilokomu kaa tambal ke-lokomu.
1CO 11:7 God ali tunum ami dabom kemin, tunum kaa ilim kaal kaa kuluu dabom kaa katiila lotu kaa ke-mokoma disa. Kemin, kaami miit kaali, God alalta taba-lom tunum kaa dap-talalulaya, ata tiltam God alaltap kelale, Kraist ata nami dabom o, kala-lom kukuyalala kawu unang tunum iyo atam-ilomdip God ami win uyo kufolum o, kalokomip. Lale, unang uyo imak ata nami dabom o, kala kukuyulala kawu unang tunum iyo utam-ilomdip, imakim ami win uyo kufolum o, kalokomip. Kemin, unang uyo ilim kaal kaa kuluu ulmi dabom kaa katiimin o.
1CO 11:8 Miit kaa dok kata naa kalolip: God ali unang umi malan kun kaata tak-duu-lomda tunum kaa dap-talalusa disa; God ali tunum ami malan kun kaata tak-duu-lomda unang kuu wam-talalusa.
1CO 11:9 Kemin ale, ma kaata God ali unang umi aket uta fukun-somdala, tunum kaa dap-talalu-uliya unang uyo dong dakaawak o, kalalaya dap-talalusa disa; God ali tunum ami aket kaata fukun-somdaya kemin, unang uyo talalu-umuliya, tunum ami dong dakaaluk o, kala-somdala um-talalusa.
1CO 11:10 Kanosa kemin, unang uli ilim kaal kaa dabom katii lotu ke-mokomu kaa, ensel ili utamipla yi, Unang kuuli imakim ami minlo tem kuyangu bombuu kala kalokomip uyo, kaata tambal o.
1CO 11:11 Lale, Yesus Kamokim ami kukup kaa, tunum ili nulmi titil kaata-kup te! kalalip unang kii kamboya ilifin bom ilin disale, kuno unang yikal nulmi titil kaata-kup o, kalalip tunum kii kamboyip ilifin bom-bilip dinim. Kemin, unang tunum imi titil kulaa ti maakup kuyaku-diyaku bom-bilip kemin ale,
1CO 11:12 siin sawaayak kawu, God ayo diil unang um-talalusa kaa, tunum ami malan kun kaata, tak-duu-lomda um-talalulala tiltam unang kesu. Kemin, kanola kamala kalawaali, God ali unang imi dong dakaayin-balala, ita man tunum iyo faka-bilip, awak kusal imi tiling tem liip kawu tildaak aben-yaabip kemin, God ata alik kanolin kaami miit kayaakim kesa.
1CO 11:13 Kemin, Kristen kipkal kukup kalanolin kalawuumi sang kaa bokoyokomi kaldak-ata utafii-bamdiwa yo. Kaali, unang uyo ilim kaal kuluu dabom akiilin disa, ap-tunum kusal imi tiin diim kawu God ami beten kamaalokomu kaata tangbal e? mafek e? kal-bomdiwa yo.
1CO 11:14 Kipkal, unang tunum nulmi aket fukunin uyo utamsip taa! Nuli boko-lomdup: Kanola tunum ali dabom kon batbat ke-lokoma kaali, yaap ke-lokomu dinim. Kemin,
1CO 11:15 yak unang kuuta, dabom kon batbat kelu namti, kulaali ulmi kiit kon tambal o, ken-umbup. Kemin, kaa God alalta dabom kon batbat kaali, umi dabom kaami katiimin o, kalalaya kukaayila-yaaba.
1CO 11:16 Kemin ale kanola, dok nolin tunum ata kabak-ami sang kaata nuso weng aal dikimum o, kala kaali, akal talalu utam-somdaya kayi! Nuli dabom kon katii lotu kemin kaami kukup kusnum kaa disa. Aa, God ami unang tunum abip ma ma bom-bilip yakal ti, kanolin kukup akal alik kaa disa. Kemin kalanolin kukup kaata ti kutal-fuku-bomdiwa yo.
1CO 11:17 Kalawaali kipni weng sawaa kusnum ma kuyokomi. Lale, kipni kukup kanun-umbip kaami sang kaata baka-bamdila, win kaa ma kufoyokomi disa kabak-ami miit kaali, kipni tala-tala-ke-bamdip lotu ken-umbip kabak-ali kukup tambal so ma tiltam tabemin dinim. Ti kukup mafak kaata-kup kutaltam dakan-tabasip kaami sang kaata kemin,
1CO 11:18 kamosinim nami kabak-ami sang bokolokomi kaayo, kipni lotu kemum o, kalalipla kipni tala-tala-kemip kaali, anung ma ukdaa kulii yang tunum miit kusnum imi kelup te, kala-sala kala-sala-ke-bamdiwa, lotu kaa kem-yaabip kayi! kaliwa nali weng sandila, Awu, fan ema kayi! kalbi no.
1CO 11:19 Kipni kanola biki-kutii yang-una tildang-una-ke-silip kaali mafak. Lale, kaami mafek mafek tambal ma bombuu. La, ibi lo-lomdip, kabangu utam talaaliwa yi, Kii kanta fan God almi unang tunum tituun u, kalalipla utafiin-unbip o.
1CO 11:20 Kipni tala-tala-ke-lom God ami win uyo kufolum o, kala ima maakup inan-yaabip kaali, ibi Kamokim Yesus almi miining iso, nikil ima mafiing inasip ultap kaa ma kanun-umbip disa.
1CO 11:21 Iltipni inin-inin kutal-tii alik maakup kuyaku-diyaku-ke maakup inum o, kala kulii-talen-umbip uyo, kutal-tii aptum kusal imi fen-umbip disa. Maakup maakup kipni kulii-tilip ayo abiltap-kup kipsiik baan kasentap ima so, wain ok so, iyo dukum-kup bisil tabu imbile, lukup-lukup-ke-biliwale, fiyaap mafiing tilip ita tal ol tinap-kup daka-bilip o, ken-umbip, kaa tambal disa yo.
1CO 11:22 Ibi am so bombe kemin, kanimin o, kalalipla iltipni am kaptamu ok so, ima so iyo dukum-kup ina-laamin dinim kebip-kup, tala-tala-ke-lom God ami win kufolum o, kala talen-umbip i? Kaptum kusal God ami unang tunum kii kanimin ban ma keyiwa, ibi taba-bom mook baan kamayinbip i? Ibi kaptum kusal mafek mafek inin disa imi tiin diim kaali, mafek mafek dukum in-biliwa, iyo fatom keyila-yaabu ne? Nali kaa kanim weng kaata kuyokomi yoko? Nata bokoya-lomdi: Yi, ibi kukup tambal kanubip o, kalaliya, kipni win uyo kufoyami no? Disa te! Nali kipni win kaa kufoyokomi daa.
1CO 11:23 Nami weng kala kuyokomi kaalile, Kamokim Yesus alami bon tem weng kawu kup-nala, kamasi kawu bokoyasii. Am kaa malang tini-bom ilula, Judas ata Yesus Kamokim ami dibii-din daalaya, yak waasi imi sikil diim abase kaami kutamiip kuyaku Yesus Kamokim ayo bret ma kuluule,
1CO 11:24 Aalap God ami yaap ke yo, akale, fakela-kutii bokoya: Kalawaali nami tiil kemin, ibi dong dokoyuk o, kalalila kuyon o, kalbi kemin, kipkal kanu-bam in-bomdiwa, nami aket uyo fukun-biliwa yo, kalalala bret ayo kuya inamniwale,
1CO 11:25 kulaa inin alik iyo inamnip disa kelale, kuno Yesus ayo kap ma kuluu-lom wain ok kabaak mo iluu kutii bokola ko: Wain ok kalawaali nalmi kiim sing-tam-daa-lom alokso weng kaami ku-titil-saan-bamdu de kutiilokomu kaata kemin, ipkal suunkup kanu-bam laa-bam in-bomdiwa, nami aket-kup fukun-biliwa yo, kala-lomda kap tem wain ok abuula uyo kuyila-ina-silip.
1CO 11:26 Kanola kipkal suunkup bret so, wain ok so, kiimi inin kaali, im-biliwa kawu, unang tunum malo ma iyo utamiwa yi, Kamokim ayo unang tunum iso, God aso, asuk nikil maakup kelik o, kala taansa no, kalokomip. Kamokim ami taanse kabak-ami fanang kaata daka-bam ti kanumin-kup kulii yakaba butoop asuk almi talokoma diim kulu kutoop kulu diilin o.
1CO 11:27 Kamokim Yesus ayo kanum bokosa: Dok kanolin tunum unang ata aket uyo talalu fuku-daalin disa ke-lomdala kominion o, kala Yesus Kamokim ami inin kaami win kaa ku-mafak-daa, Kamokim ami bret ayo disa kulu in-bom ale, Kamokim ami wain ok ayo disa kulu in-bom kema namti, mep tunum kulaali Kamokim ami tiil so, kiim so, kiimi win kiita, kaali yam-mafak-daka-mokoma. Kemin, kaami kanu-mokoma kaali, alami ban wakamin namti kulu bombuu.
1CO 11:28 Kemin, unang tunum iyo ilmi aket tem kabak talalu fanang daa utamiwa yi, Atin nuli ban kemin kaa disa tambal-kup bom-bulup kala kalaliwa kaata, yak bret so, wain ok so, kii kuluu-laamin o.
1CO 11:29 Tunum akal kanola talalu aket fuku-daalaya, Yi, kaali Kamokim ami tiil sole, kiim so, kalin disa kela, bret so, wain ok so, kiili disa muma inamna namti, kabak inamna kaa almi ban kemin namti kuluu buu.
1CO 11:30 Kominion o, kala Kamokim ami inin ayo disa kulu in-bomdiwa, kipni unang tunum yaapkan iyo titil dinim ke mafak-alin um-kaa-balale, malo ma taan tem daka-bala kem-tabasip.
1CO 11:31 Katale, nokol nulmi aket tem uyo talalu utafii-bam kuu-kayak kuu-kayak-ke-bam God kapyo, numi ban uyo kukan-tiiyawa yo, kalalupla, tambal-kup inan-umbup dinam, mafek mafek mafak uyo kutaldak nulmi angtiil diim kaa dakamalup disa. Yale,
1CO 11:32 Kamokim Dukum ali numi kukup uyo yam-kuku-bamda aket uluum so, angtiil yol so, iyo kukaayimba. Kemin, Dukum ami aket fukunin kaali, ilom am ma daanule, nami lak duulin dinim kesip iyo lekbi yim-bak molile, maaklo keliwa kawu, nami lak duulin unang tunum iyo kukup mafak kanubip iso, maaklo disa kelalip o, kalalaya, Kamokim alalta taba awak-aalap ilmi man mafak bakayim-bamdip ye-bam kukuyimbip tap ke, almi man kensup nuli yam-kuku-bam ale, aket uluum so, angtiil yol so, iyo kukaayimba no.
1CO 11:33 Kanolin kemin, nalmi nak-tunum kusal kipyo, kaldak kanum bokolu kemin, God ali utama yi, Ibi kukup mafak kebip kala, itam-somdaya yim-bak-saanokoma. Kemin, talalu utafii-bamdiwa kayi! Kabak-ali inum o, kalalip tala-tala-kemip ibi abiltap bisil-kup tabu inin daa. Kaptum kusal imi fen-silip alik iyo tal ang-delip kalbip-kup kawu, alik maakup inin o. Kanola iltipni tunum ma ima tinap dip-telu baan abil inamnon o, kala namti, alami am kawu inam-nokoma kulaali yaap o. Mafek mafek akal alik ma kaami sang kaata bokoyon o, kalbi. Lale, sin kawu din iltipni diim undila kawu dotulokomi no.
1CO 12:1 Nak-tunum kusal aa, nami aket fukunbi kaa, ibi God ami Sinik ami titil akal kusnum kusnum kaami aket kaa kuyak-tiki kutalak-tiki-ke-bam babonalip o, kalbi kemin, weng san iliwa.
1CO 12:2 Kipkal utamsip. Kemin, siin kaa ibi Kristen kelin disa ilsip kawu, kaptum kusal iyo imbang daa-lomdip, salap mafak ami aman dakan-bilip, awem men isiik imi weng kaa ma tiiyilalip disa yo, ke-bisip.
1CO 12:3 Kemin, ibi God maakup ami win uyo kufolum o, kalin kaami kukup uyo talalu utamin dinim bom-bilip kemin, weng ma uyo bokoyon. Kano tunum ma bokola: God ami Sinik ata weng kala bokop-namba no, kala namti, kabi kabak dotu itafii-bamdawa fan bakaba ne? Kasen-fakaba ne? kalalap utamdapla uyo nuumin o. God ami Sinik ayo tunum ami diim kawu bomdala, weng kukaayin dinim kema namti, tunum kaa boko-lom: God ata Yesus ami dap-mafak-daalala, ali win dinim maaklo kelak o, kalokoma le, tunum God ami Sinik Tambal ata ami diim kawu bombe, ata-kup boko-lomda: Yesus kaa God ke, alta Kamokim ke kesa no, kalokoma.
1CO 12:4 God ami Sinik kaa unang tunum numi titil akal almi kusnum kaa kuya-kuya-kelaya, ok ayo akal alami tabuu-bala tabuu-bala-kem-yaabup. Lale, God ami Sinik kulaa ti maakup kulaata-kup bombe.
1CO 12:5 Nuli yak Kamokim ami ok akal alik akal alik kulaa num-laabup. Lale, numi Kamokim kulaa ti maakup kulaata-kup bombe.
1CO 12:6 Numi okok kemin kaami kukup ayo akal almi kusnum kusnum kulaa bombuu. Lale, God maakup ata-kup taba-lom alik numi titil ayo kukaayin-balaya, ipyo taltam ilom ok kulaa alik fukusup.
1CO 12:7 Kemin, God ami Sinik ami fanang-daala kaali, Unang tunum Kristen maakup maakup ami titil kukaayin-biliya, aptum kusal iyo alik dong dakaayin o, kala-somdaya, almi titil kaa alik maakup maakup nuyo kukaayila-yaaba kawu utamuwa yi, Tifan eng, God ami Sinik Tambal ayo numi iipyak tem kabaku tiin-bom okok-ken-umba no, kalokomup.
1CO 12:8 God ami Sinik ata tunum iyo ulelale, ma kaata titil kola ata God ami aket fukunin uyo aptum kusal imi kukaayim-balale, unang tunum iyo God almi aket fukunin kaata kuluu-lom tangbal-kup tiin-buluwa, God ata numi fiyaap duumak o, kala kanun-umbip; ale, ma kaata titil kola God ami kukup kaami sang uyo baka-bala unang tunum iyo talalu utam-laa-biliple;
1CO 12:9 ma kaata God ami Sinik ata dong dokola atin ti talalu utamala, God ali nami beten kamaanbi uyo fan, maan tiip-nokoma no, ke-balale; ma ata God ami Sinik maakup almi titil kaata kuluu-lom unang tunum angtiil mafak-alin kuluusip imi yam-talalulip taltam yaawa-laa-biliple;
1CO 12:10 ma ata, tiltam God ami Sinik ami titil kaata kuluu-lom kukup akal kusnum nuu-bala akal kusnum nuu-bala ke-biliple; kuno ma ata, tiltam titil kaata kuluu-lom God ami weng sawaansu uyo unang tunum imi ku-fatap-daka-bam bakayim-bala; ma kaata utamala kaali ti sinik tambal e? sinik mafak e? ke-bala; ma kaata abip ma imi weng del ma utamsip dinim uyo baka-balale; ma ata weng kusnum kusnum ayo weng sanda fal-sikila aptum kusal iyo bakayim-bala no, ken-umbip.
1CO 12:11 Sinik kulaa ti, maakup ma kulaata taba-lomdala mafek mafek yaapkan iyo kukuyim-balaya kemin, kanun-umbip kaa ti, almi fanang saanin kaata kanolin titil akal kusnum kusnum kaali, unang tunum ma ami no, kala kola-kola-kem-tabasa no.
1CO 12:12 Kulaali, nali God ami Sinik ata taba-bomda ami titil akal kusnum kusnum kukaayila-yaaba kaami sang kaata faldak tunum nulmi angtiil diim kala tii bokolon o. Tunum numi angtiil kulaali maakup lale, daam kaa yaapkan yam. Yale, kaami kuyak mim-daalin kulaa ti angtiil maakup kelin. Yesus Kraist ami lak duulin unang tunum nokol ti kanolin bom-bulup.
1CO 12:13 Kemin, nokol Sinik Tambal maakup ata noyila nokol ti tiltam almi angtiil maakup tap kelupla, oksam uyo ukuyinsip o. Kemin ale, Juda so, tunum miit kusnum iso aa, disa iip ok im-bak-diilip okok kemin iso, sok de-yimulin disa kulu ilmi ilin unang tunum iso, alik tikiip maakup nuli kano-sulup. Kemin, God alalta Sinik Tambal maakup kulaata alik numi kuyinsa.
1CO 12:14 Nokol utamsup. Angtiil kaali daam maakup kulaata-kup daa; kaami daam kaali yaapkan o.
1CO 12:15 Kemin, yaan ata boko-lomda: Nali sikil la, nita angtiil ami daam daa yo, kala namti, yaan ami weng kanum bokola kaa tifan disa; kaa angtiil daam ma namti kaa bombe.
1CO 12:16 Kuno talang tem malii akal boko-lom: Yi, nali tiin la, nali angtiil kaami daam daa, kalu namti, talang tem malii kaa kanum bokola kaa tifan disa; kaa angtiil daam ma namti kaa bombe.
1CO 12:17 Kanola, angtiil uyo talang tem dinim ke-lom, alik ti maakup tiin ata-kup kelu namti, kaa dok kano-som weng kaa weng sanokoma ni? Aa, yak angtiil ayo matum tem disa ke-lom, alik ti talang tem ata-kup kelu namti, kaa dok kano-som mafek mafek tang kaa ninin tamu uta-mokoma yoko?
1CO 12:18 Lale, kaa angtiil umi kukup kaa, kaa bombuu disa. God almi aket fukunin kaata, Kanolon o, kalalaya, angtiil alik umi daam katip katip iyo kuyak dii-dii-kelaya angtiil maakup dotusa.
1CO 12:19 Kanola, angtiil umi daam-daam iyo dukum maakup kuluuta-kup kelu namti, fan ulmi daam tituun kaa doku bombuu ni?
1CO 12:20 Lale, kabak kanosa disa. Angtiil kaluumi daam-daam kiili, yaapkan yale, angtiil kaa ti maakup kaata-kup kemin, kanola Kristen nuli God ami Sinik ami titil ukol ulmi kusnum kusnum ayo kuluula-kuluula-ke-sulup. Lale, nuli tiltam alik maakup ke-sulup.
1CO 12:21 Tiin uli titil-foko-lom sikil umi bokowa-lomdu: Kubi disa ya! nali ti tambal-kup ilokomi. Kemin, kuno kep-na tabanan o, kalule, kulaa dabom ukol yaan umi bokowa-lomdu: Kubi disa kulaali nakal ti tambal-kup ilomi. Kemin, kuno kep-na tabanan a, ke-bulu ke-mokomip disa.
1CO 12:22 Kemin ale, nulmi angtiil daam kalawuumi ma aket kaa fukun-bam boko-lomdup: Kuluuli titil dinim o, kem-laabup. Lale, daam uyo disa namti, numi angtiil kalawaali tambal-kup ilokomu dinim. Ale,
1CO 12:23 numi angtiil kuumi anung ma kaami aket uyo fanang daka-bam boko-lomdup: Kaali tangbal atafiimin disa! kem-laabup. Kemin, nuli daam kaa tambal-kup tiin molup kaa kutookso ilomule; numi angtiil kaluumi anung ma umi aket uta fuku-daa boko-lomdup: Utafiimin disa. Kaa fatom i! kem-laabup. Kemin kaata, nuyo ilim kuluu tambal-kup miki-bam akin-umbup. Yale,
1CO 12:24 numi angtiil kuumi anung ayo tambal-kup tabasu uyo dotu tiin molup kutookso kesu dinim; God alalta taba-lom tiil alik umi anung uyo kuyak mim-daa-lomda dotu kutiisa. Kemin, numi angtiil anung maakup maakup iyo win dinim ke tal minlo tem unsip kala kalalaya, alalta yim-buu yim-taltam daala win tibin kelip keyinsa.
1CO 12:25 Kemin, God ami aket fukunin kaali, Angtiil uyo diil duul ke akal yak-una tildak-una-kemin disa yo, kala-somla ko. Kemin, kanoliya daam-daam alik iyo ap-tunum kusal yakal tambal-kup tiin-mola tiin-mola-kelin o, kalala, ayo talalu yim-taltam tii win tibin kelip kamboyinsa.
1CO 12:26 Kemin, kanola angtiil daam ayo ma angtiil yol ma kuluulu namti, angtiil alik uyo yol alik kuluulokomu. Kanola angtiil daam ma tiltam win tabin kelu namti, alik maakup fiyaap duu-bam kanu-mokomip o.
1CO 12:27 Kanolin kemin, alik ibi ti Yesus Kraist ami angtiil kemin, maakup maakup ibi ami tiil anung te!
1CO 12:28 Kemin, God ami Kristen unang tunum ulan-umba kaali, tam diildiil kaali, Kraist ami kalaan tunum ale; ma kaata God ami profet o, kala weng ku-fatap-daa bakayin tunum; kuno ma kaata kukuyin tunum ke-sala; aa, imi daang tem mirakel o, kala, kukup akal alik ma talalmin tunum ke-sala; kuno ma kiita unang tunum mafak-alin imi talalu-yimulip tiltam yaawa-laamin tunum yakal; kuno tunum unang malo ma dong dakaayin tunum unang ke-sala; kano ma wok tiin saanin tunum ke-bala; aa tunum abip ma ma imi weng del babon uyo utam weng bakamin tunum ke-bala. Kanolin kemin, God ami unang tunum kii ulelnala kalanolin ok uyo kanum-yaabip o.
1CO 12:29 Kemin ti, kipkal Kristen unang tunum kala bom-bilip iyo itam-tamin! Kiili ti, alik maakup Kraist ami kalaan tunum e? God ami profet weng ku-fatap-dakamin tunum e? kukuyin tunum e? mirakel o, kala talalmin tunum e?
1CO 12:30 Tunum unang mafak umulip talalu-yimula tiltam yaawa-laamin tunum e? tunum abip ma ma imi weng ma utamsa disa kaami weng bakamin tunum e? weng fal-siki-lom bakamin tunum o, kalbip o? Disa te! Kiili yakal ilmi titil kusnum e? kala kuluula-kuluula-kemin, lale
1CO 12:31 ibi titil tambal dukum kaata atin ti kuluulum o, kal-bomdiwa kaami aket kaata-kup yan-bulula bomdiwa yo. Kemin, kamala kalawaali kukup tambal-kup tabasu kuuta ma kukuyon o, kali ko
1CO 13:1 Nali yak tunum miit ma ma imi weng so, ensel imi weng iso, iyo kuluu-lom unang tunum imi bakayami. La, nali imi aket uyo kukaayilin dinim keli, weng kalawaali bakayili namti, weng baka-mokomi kaali, belo ami tilneng-tilneng-kebip aye, was tin dotulin dinim kelip, was weng mafak naanba alaltap ke-bom, disa weng ata-kup bakayokomi.
1CO 13:2 Aa, nayo kanola God ami profet imi weng bakayilin tunum imi weng bakayimbip tap keli, alik God ami aket yang sawaansu uyo utam kaal-kebi-kup: yak aket fukunin akal alik akal alik iyo alik utabi-kup; nali God ami lak dakaamin dukum kelila, God ata titil awak uyo kup-nalala kuluu-lomdi yak amdu ami bokola-lomdi: Ulmi tolsu baan diim uyo kulaa kelalap yang bokon kusnum ma unan o, kalokomi. Lale, nali tunum unang ili talalu aket kukaayilin dinim keli namti, nali fan win dinim ke-lokomi te!
1CO 13:3 Kuno nali nalmi bung alik ayo dakabi tunum iwaan ami kutelokomi naa; yak kano nayo Kristen numi waasi iyo kuno kamboyili nam-baalip yak wing tiil un-ilomdi kiin-aba-lom taanokomi; la, nali unang tunum kiimi aket uyo ti kukaayilin disa ke-lom kaa kanoli namti, kukup tangbal kaa dok kano-som dong dokop-nala, God ayo maan tangbal so ma kup-nokoma disa yo.
1CO 13:4 Tunum almi ap-tunum kusal imi aket kukaayilin tunum ali, kusnum ita taba kukup mafak kolokomip kaa, asiik abiltap-siik maan tiiyokoma disa le; ali ap-tunum kusal imi dong dakaayin tunum ale; tunum imi bung mafek mafek ayo neyokoma dinim; ali almi tong kaata baka-bamda ti nata-kup o, kal-bomda;
1CO 13:5 kutaang-kup tabe-bamda, almi mafek mafek kaami aket-kup fukun-bamda ke-mokoma disa; ali abiltap-kup aket atul dap-tela-laamin aye, yak tunum kusnum ita ami ban kelip uyo kano kutal-fuku-bomda fanang dakamin-kup ke-mokoma disa.
1CO 13:6 Ali kukup mafak uyo unang tunum imi iipyak tem kawu kaami fiyaap kaali duu-mokoma disa. Fan, God ami kukup kaami fiyaap kaata-kup duu-bamdale,
1CO 13:7 ap-tunum ata ban kela kulaali kuno kewala suunkup aptum ban kaman-bamda, weng sana yi, Kusnum ita nami nak-tunum ayo dap-mafak-dakabip o, kalala aket fukunala nak-tunum kaali kukup mafak kemin disa. Kemin kayak kayak ita kasen-fokola-lomdip, weng uyo kuyak ami diim kawu tiibip ema tap? kal-bomda suunkup fiyaap duu-bam God ami dong dokolokoma kabak-ata-kup fen-bam ale, ti suunkup kukup mafak tiltam tabemu uyo titil-fak-daa tola kulaa yak banemin tunum namti kaa be no.
1CO 13:8 Numi nak-tunum kusal aket kukaayilin kukup kaali, atin disa ke-lokomu dinim. Lale, ilom am ma daanula, God ami weng ku-fatap-daa bakamin kukup kulaali, disa kelule; abip ma ma imi weng ma utamsip daa kaami weng bakamin kukup uyo dinim kelule; saak yak aket fukunin kusnum kusnum iyo alik utam-laamin kukup uyo disa ke, ke-lokomu.
1CO 13:9 Kemin, kamala kaali nuli God ami kukup uyo daam-daam kulaata-kup utam kaal-ke-som ale, God ami weng kukal ti kano anung anung-kup bakayin-bam kem-tabasup.
1CO 13:10 Lale, Yesus Kraist ali mafek mafek alik iyo utam-som ale, kukup tangbal kaata-kup fuku-som kesa. Kemin, bii am ma daanula talokoma kabaku numi God ami kukup anung anung utam kaal-kemin so, God ami weng anung anung bakayin so, kulaa iyo alik disa kelula, God ami kukup so, weng so, alik iyo talalu uta-mokomup ko.
1CO 13:11 Kamosinim nami man bom-ilsi kabak-ata man katip katip imi weng kaata-kup baka-bamdi man katip katip imi kaal-kemin kukup kaata atafii-bam, nami aket fukunin uyo man katip katip imi aket fukunin ultap ke-bam ke-bisi. La, kuluwaata tiltam fasuu-lomdi, man imi kukup uyo kulaasii.
1CO 13:12 Tunum dukum ayo man imi kanumin kanumin kukup nun-umbip iyo kulaasi no, kala-laabip tap kemin, am ma daanula kawu, mafek mafek anung anung tiika-laamin dinim kawu nuta atafiin-umbup uyo kulaalokomup. Kaami miit uyo bokoyokomi ko: Kamala Kristen unang tunum nuli God ami kukup uyo talalu utafiibup disa; ok tit diim ninak tiin-bulu kaami tiyak-daa mafek mafek dotu atin atamin disa ke-laabup tap kebup. Lale, ilom am ma daanala kawu, fan God ami fanang uyo talalu ata-mokomup. Kamala kaali, God ami kukup uyo utamsup. Lale, ilom kawu ami numi talalu itamsa ulultap ke kanola nokol ami kukup uyo dotu tiin dik-yak-dii ata-mokomup.
1CO 13:13 Kanolin kemin, kamala kalawaali nuli utamuwa yi, Suunkup suunkup God ami lak duu-laamin kaami kukup so, God ami liip fenin kaami kukup so, alep iyo nak-tunum kusal imi aket kukaayilin kaami kukup kaa-bilip. Asuumano kalawiita suunkup kano ti ilokomip. Lale, kukup asuumano kiimi diildiil maakup ma kaali ti, nulmi nak-tunum kusal imi aket kukaayilin kaata ko.
1CO 14:1 Ibi ti kano titil-daka-bamdipla kusnum imi aket kaata ti suunkup kukaayin-biliwa kayi! Ibi God ami Sinik Tambal ami titil kusnum kusnum kukaayila-yaaba kaami aket uyo kufoyuk o, kala-somla ko. Katale, Sinik Tambal ami titil kipni kuyila talalu kuluulokomip kaa, God ami weng tem uyo ku-fatap-daa bakamin kaami aket kaata dukum-kup keyilula yak fuku-bom-biliwa yo!
1CO 14:2 Kaami miit kaali, dok nolin tunum ata taba abip ma ma imi weng ma utam kaal-kesa disa kaami weng kaata bakama namti, ali weng kaali, tunum numi bakayokoma disa; kaali ti, God almi-kup bakaalokoma. God ami Sinik Tambal alta titil kolaya, God ami aket fukunin yang sawaansu kaami sang uyo baka-mokoma. Lale, kayak kayak ili ami weng bakaba kaa, ma utamsip disa babon. La,
1CO 14:3 tunum God ami weng tem baka-mokoma ami weng uta taba-lomdu unang tunum imi God ami lak duu-yilin iyo, yam-titil-diilula, God ami kukup uyo kukuyilula unang tunum iyo kanolum o, kaliple, uluum tabin diim kawu titil so kukaayokomu.
1CO 14:4 Tunum ma ata abip kusnum ma imi weng ali utamsa disa, ali naknak weng bakayokoma kaayo, ami weng uyo almi aket tem-kup dap-titil-diilokomu. Lale, tunum ma ami God ami weng bakayokoma, ami weng kuuta taba-lomdu ap-tunum kusal Kristen unang tunum kiimi yam-titil-diilokomu o.
1CO 14:5 Nalmi aket fukunbi kaali, alik ibi abip ma ma imi weng kaa kipni ma utamsip disa, babon uyo kuno bakamin o, kalbi. Lale, nami aket fukunin dukum kaali ti, ibi God ami weng uyo bakayin o, kalbi. Kemin, tunum abip kusnum imi weng ali utamsa dinim, uyo bakama namti, tunum kusnum ata ami weng kaa bakaba uyo fal-siki bokoyilale, Kristen unang tunum iyo weng san-sinomdipla, titil-fak-daalin o. Lale, weng kaa fal-sikilin disa ke-lokoma kaali, mep tunum kaa abip kusnum imi weng kaa babon-bam bakaba ayo tal minlo tem unala, God ami weng tem bakayin tunum ata talaba tam tip kaltoop banokoma no.
1CO 14:6 Nak-tunum kusal, kipyo. Ibi nami weng kala bokoyokomi kalawuuli dotu utamin! Kanola, nali tal kipni diim ababi-kup abip ma ma imi weng kaa kibi utamsip disa, kaami weng uyo bakayokomi disa. Kaata dong dokoyokomu dinim. Nali God ami weng uyo bokop-na ku-fatap-dakaayin aye, God ami mafek mafek tituun-kup uyo kukaayin-bilila, uta-mokomip aye, kiita ipni dong dokoyokomu ko.
1CO 14:7 Kemin ale, nuli mafek mafek sinik dinim o kala, fong ket aa, buung bengkan aa, imi aket kaata fanang daalum; kiimi biileng ayo naan-bam tam-bana tildaak-bana-ke-bam, tambal-kup naanin disa kemip namti, kaa dok kano kaami weng kabak naanbu kabak-ali dotu weng sanalup dinim; ale
1CO 14:8 bikul kaakal tambal-kup naan-tabin disa ke-lokomu namti, waasi dinin tunum ili kalok no, utam-somdipla, Awu, kaali waasi tabu kala kalalipla iyo fak-saalokomip disa.
1CO 14:9 Ultap kemin, kipkal lotu ke-bam abip ma ma imi weng utam-ilom ma kaal-kesip daa, kaami weng baka-mokomip kaa, yak tunum akal weng kusnum kusnum utamin disa bom-bilip, ili dok kano-lomdip kipni weng bakabip miit uyo dotu utamalip disa yo. Kipni weng bakabip kaali, disa yak as diim, tuum diim, dok saanbu tap ke-mokomu.
1CO 14:10 Kabak-ali faneng kemin, tawaal diim kalawaali yakal ilmi weng del e kala baka-bala baka-bala-kemin, uyo yaapkan bom-bilip kemin, alik ili ap-tunum kusal imi bakayin-bilipla, weng kaami iipyak tem uyo utam kaal-kem-tabasip. Lale,
1CO 14:11 nali tunum ami weng bakaba kaami iipyak tem uyo utamin disa keli namti, ali aket fukun-ilomda: Yi, ali tunum miit kusnum o, nokokoma le, nakal, ali tunum miit kusnum o, aka ke-mokomi.
1CO 14:12 Kipkal kanola tunum ayo weng del kusnum ma utamsip disa kaayo, bokoyokoma namti, ibi ami dong dakaalin so, ali ipni dong dakaayin so, iyo ke-mokomip disa. Kemin, ibi ami weng uyo kaal kebip ale, ali ipni weng uyo ma kaal-keba kawu, iltipni diim kawu dong dakaayokomu. Ipni aket fukunin dukum kaali, ti God ami Sinik ami titil ata kuluulum o, kalbip ema? Kanubip namti, iltipni dok nolin dok nolin titil kuluu-lomdip kap-tunum kusal Kristen unang tunum imi yam-titil-saanin kuuta, titil-foko kuluu-bomdiwa kayi!
1CO 14:13 Kala kanum bokolu kemin, tunum ayo abip ma ma imi weng kaata-kup bakaba namti, ali taba God ami weng umolala ata kaal-ke-laamin ayo kolaya, weng uyo ifiiyilala, ap-tunum kusal iyo talalu utam kaal-kemin o.
1CO 14:14 Ti kipkal aket fukunin! Kabi abip kusnum imi weng kapni utamsap disa, kaami weng baka-bamdap God ami beten kamaalokomap kaa, kaltapni sinik ukol God ami beten ke-mokomu. Lale, kapni aket tem uyo kapni weng bakabap kuuli, ma utam-ilomdala weng kaami iipyak tem kuu dok nolin i! kalala aket fukunokoma.
1CO 14:15 Kanum bokolu kemin, kabak-ali kabi kalok nolokomap? Kaltapni sinik kabak beten ke-mokomap kaali, kaltapni aket fukunin ukol ti utamu yi, Beten weng kaali, kanolin kaami sang kaata bakaba nu, kalalu utam kaal-ke-lokomu, kaata tambal. Kemin kanolin o, kaltapni sinik kabak-ami God ami baal wii-mokomap kaa, kaltapni aket fukunin ukol ti utamula kanolin kaami baal miit ata wiiba kalalu utam kaal-ke-lokomu kabak ata mokso. Lale,
1CO 14:16 lotu ke-mokomip uyo, nak-tunum kaayo, kanolin beten kemin kukup tambal uyo kambola-lomdap abip ma ma imi weng utamsap disa, kaami weng kuluu-lom babon-bam baka-bamdap God ami yaap ke yo, akan-kaamap namti, tunum ayo kapni weng del kusnum utamsap disa bakabap kakal uta-mokoma disa kemin, kapni mepso kulu tiinba ayo kapni beten weng uyo talalu utam boko-lomda: U faneng, kalokoma disa.
1CO 14:17 Kemin ale, kano tunum kapni beten kaa ke-bam yaap ke yo, kalbap kulaa tambal ema? Lale, uta taba-lomdu kap-tunum ami aket tem uyo dap-titil-molokomu disa yo.
1CO 14:18 Nami suunkup abip ma ma imi weng ma utamsi disa, umi bakan-umbi uta taba kipni abip malo malo imi weng utamsip disa umi bakayila-yaabip uyo, kabaak banula uta uta kesu kemin kaali, God ali yaap ke yo, akan-kaabi. Lale,
1CO 14:19 Kristen unang tunum tala-tala-ke-mokomip kaa, nali kalanolin weng kaata-kup bakayin-bilila, utamin o, kalalila, abip ma ma imi weng uyo ma utamsi disa, kaami weng uta weng batbat kaata bakayin-bilila babonalip kemin, uyo kulaa-somdila, nulmi weng kuuta-kup kuluu-lomdi mep weng duung katip kulaata-kup imi bakayin-bamdi kukuyokomi kaata, weng kabak-ami iipyak tem uyo abiltap-kup uta-mokomip o.
1CO 14:20 Nak-tunum kusal kipyo. Man unaak imi aket fukunin kaali, kukup mafak ayo ma nuumum o, kala-laabip disa. Kemin, kipkal man unaak ililtap kebip kanolin aket fukunokomip kaata tambal. Lale, kipni abip ma ma imi weng kaa ma utamsip disa, weng bakamin kaami aket fukunin kaali, ibi man katip katip imi aket fukunin ultap uyo kemin daa. Unang tunum dukum dukum imi aket fukunin tap kaata kanu-bamdiwa yo.
1CO 14:21 Tunum imi God ami Sukon Tem weng dolsip uyo boko-lomdu: Kamokim Dukum ayo boko-lomda: Am ma daanula kawu, asuk nakal weng kuliili, unbilin unang tunum yakal ilmi weng kusnum bokoyinsu imi bokoyilila, ita weng uyo kulii-tal kaltamu kufolokomip. Lale, nami weng uyo talalu weng sanokomip dinim o, kala, Kamokim Dukum ayo kanum bokosa kayi kalsu ko.
1CO 14:22 Kalsu kemin, numi kanola abip ma ma imi weng kaa nuli utamsup disa kaami weng bakamin kaami kukup kaa, God ata titil kaa numi kuuyilala, nuta abip malo malo imi weng kaa numi utamsup dinim uyo baka-bulupla, weng kuuta taba God ami lak duulin ili daa kemin, God ami lak duulin dinim bom-bilip, unang tunum ita-kup kukuyila-yaabu. Kemin ale, God ami weng uyo kuluu unang tunum kukaayin kaami kukup kaata, God ayo titil kaa numi kuuyilala, nuta God ami weng uyo kuluu kukaayin-bulup, weng kuuta taba God ami lak duulin disa kii daa; unang tunum God ami lak duu-lom bom-bilip ita-kup, kukuyila-yaabu.
1CO 14:23 Kabi abip ma ma imi weng baka-mokomap kaali, uta taba-lomdu unang tunum kiili, dong dokoyokomu disa. Kristen unang tunum alik ibi tala-tala-ke alik maakup abip ma ma imi weng kaali, kibi ma utam kaal-kesip disa kaami baka-mokomip kaali, tunum ili kanolin kukup kuuli utamsip disa; aye, tunum God ami lak duulin dinim imi tiltam talokomip kaa kiili boko-lomdip: Daa! Kalawiili babon-bamdipla kanubip ema yo? kalokomip. Kemin,
1CO 14:24 ibi alik maakup iltipni weng kaata kuluu-bomdipla, God ami weng kulii-tal kola-una-tala-ke-mokomip kaali, tunum God ami lak duulin disa; aye, yak tunum ipni kukup kaa kanubip uyo utamsa dinim kaaso, tiltam tala namti, kipni weng bakabip uyo tunum kaami aket tem uyo wan binalin tap kelula utama yi, Kwin i! Nami kukup mafak nun-umbi namti kala nam-fatap-daalip kawi! kalalala uta-mokoma. Kemin,
1CO 14:25 weng alik yak aket tem sawaansu namti kulaata tiltam fatapnu kala, kala-somdala kawu, kamok kamok imi weng umkaayin tap ke-lomdaya, katuun duung fakela daak dabuuna-lomda, God ami win uyo kufon-bamda boko-lom: God ali fan kipni diim kawu bombe no, ke-mokoma no.
1CO 14:26 Nak-tunum kusal kipyo. Nami weng kala bakayimbi kaami miit namti kala bombuu kemin, atam iliwa. Ibi lotu kem tala-tala-ke-mokomip kabak-ali Kristen unang tunum ita yam-titil-diilum o, kalaliwa, alik kanu-biliwa yo, kala-somla ko. Alik ibi ok so ko. Ma ata baal wiimin. Ma ata God ami Sukon Tem weng baka-bamda kukuyin tunum; ma kaata God ami weng bokolale, asiik unang tunum imi bakayin tunum ke-sala; ma ata abip ma ma imi weng ma utamsip disa kaami weng bakayin tunum ke-sala; ma ata ap-tunum imi weng kusnum baka-bala ata fal-siki kukaayin tunum ke-sala kemin o. Kanumin kaali Kristen unang tunum imi dong dakaayin-bam kanumin o.
1CO 14:27 Kemin, ali kanta abip malo ma imi weng kaali, utamsa dinim kaami bakamon o, kala namti, tunum asuumano e? alep e? kiita-kup mep weng kala baka-mokomip kaali ti yaap o. Alik iyo weng kulii-tal kabak-kabak-kemin disa. Ma asiik boko una-una-kemin lale, tunum ma ata weng kaa fal-siki kuu bakayokoma kaali, ti tangbal o.
1CO 14:28 Yale, lotu ke-mokomip kaali, tunum weng fal-kelmin ayo disa namti, tunum abip ma ma imi weng bakamin tunum kaami weng uyo unang tunum imi bakayilin disa; duluma tiin-bomda God almi-kup bakaan-balala yo.
1CO 14:29 God ami weng kuluu unang tunum kukaayin tunum maakup e? alep e asuumano e? kiita-kup God ami weng uyo bakayin-biliwale, ap-tunum kusal iyo fanang daaliwa yi, God ami weng kaami sang bakabip uyo ifiiyin-bamdip atin ti God ami weng e? disa ye? kala-somdip kanu-bamdipla yo.
1CO 14:30 Katale, lotu ke-bam ale, tunum ma lotu am kaptam tiinba ayo God ata taba tunum kaami aket tem uyo weng ma kolale, asiik tiltam tola weng ma uyo kukaayon o, kala namti, kamasi diil tunum kaa tola-bomda weng kukaayinba ayo duluma bom ilale, ap-tunum asiik tola weng uyo bakayin o.
1CO 14:31 Kanola, kaami kukup kaata, ipta God ayo weng so ma kukuyokoma kawu, alik maakup maakup ibi God ami weng uyo kuluu-lom unang tunum imi bakayin-bilipla, alik yakal utam titil-fak-daalik o.
1CO 14:32 God alami aket fukunin kaali, Ibi alik maakup maakup numi fanang dakabup kaata lotu kaa kemum o, kala-laamin disa. Lale, kipni aket fukunin uyo kulii-tala-tala-ke aket maakup ke-somdiwa, lotu uyo tambal-kup kemin o. Kemin, God ami weng kuluu-lom unang tunum baka-bam kukuyin tunum ayo, kano unang tunum imi weng ilu-lom bakayokomi aye, unang tunum imi weng bakabi disa ke-laamin aye, imi kukup uyo dotu tiin saan-bamdila kayi! kala-lomda aket fukun-bamdala yo.
1CO 14:33 Kemin, Juda imi lo kaali boko-lomdu: Unang ili talaba tam God ami unang tunum kii tiin saanin disa. Kiili tal minlo tem uniwa yo, kalsu. Kemin, Kristen unang tunum ibi tala-tala-ke lotu kemip kaali, unang kibi weng yaapkan kaa baka-bamdip tuluk-tulukmin disa; duluma bom-biliwa yo! God ami unang tunum alik abip ma ma bom-bilip ili kanumin kukup kaata-kup kanun-umbip.
1CO 14:35 Kemin, unang uyo lotu tiin molin ami weng bakaba kaami miit kaata utamon o, kalu namti, uyo din am kawu ulmi imak ata dik-daaluya, ata talalu ifi bakawala utamamu. Lale, fan Kristen unang tunum imi lotu kemip namti, unang umi weng baka-mokomu kaali tambal disa yo.
1CO 14:36 Kemin ale, ibi kanimin o, kalaliwa, kukup kalawaali kuyang saak tiibip i? Nuta diil unang tunum kemin, God ami weng uyo unang tunum kusnum ma imi bakayinsup o, kalbip o? Ale, nuta-kup, unang tunum kusnum ili disa, God ami weng uyo kutal-daasup o, kal-bomdip kala-laabip yoko?
1CO 14:37 Kemin, tunum ma ayo aket fuku daa-lomda: Nali God ami weng kuluu unang tunum imi kukaayin tunum te! kala, aa nami titil kalaali God ami Sinik ata kup-nala kutal-fukubi no, kala namti, kaali akal utama yi, Nami weng kala kipni dola kuyi kalawuuli, Kamokim Yesus ami titil-tibin weng uyo bakaya-laaba kaata no, kalala utamak o.
1CO 14:38 Ale, tunum ayo ma boko-lomda: Pol ami weng kaali, Kamokim Yesus ami lo kaata bakaba disa yo, kala namti, kaa nokol utamupya, Ali God ami weng kuluu unang tunum imi kukuyilin tunum disa yo, kala kalokomup o.
1CO 14:39 Kemin, nalmi nak-tunum kusal kipyo. Kibi God ami weng uyo kuluu-lom unang tunum imi kukaayilin kaami aket kaata-kup dakat kalula dukum-kup fuku-bomdiwa yo. Yale, ibi taba iltipni unang tunum imi bokoya-lomdip: Ibi abip ma ma imi weng ibi ma utamsip disa umi bakamin kaa awem kemin, kabak bakamin disa yo, kala fakelmin dinim o.
1CO 14:40 Kemin, alik kipni kukup kiili tambal-kup nuu-bamdiwa, ipni lotu kemin kukup uyo ti tambal-kup ma kutal-fuku kulii-una-biliwa yo!
1CO 15:1 Nalmi kayaak kipyo. Nali kipni aket fukunin ayo asuk kufoyilila, God ami weng tambal kamasi kuyasii kabak-ami aket kaata asuk fuku-daalin o, kala-somdila kemin, ibi God ami weng tambal kuluu-silip uyo, U, ti faneng o, kalale, titil-foko kutal-fuku kulii-tabasip. Kemin,
1CO 15:2 ibi God ami weng tambal kuu maas kewa-yaamin disa; ti yikik-kutal-fukulip namti, kaata God ayo dong dakaayin-balala bii, yim-bii tam almi abip kaa daalokoma no. Tifan, ibi siin kaa, God ami lak kaa duulin disa ke-silip kiili, God ali yim-bii-tam almi abip tambal kaa daalokoma disa yo.
1CO 15:3 Kemin, nami kamosinim weng kuluusi kaali, ti sakbaalim dukum kemin, kaa kipni kuyasii, kaa sawaayak kawu, God ami Sukon Tem weng umi bokosu kaa Kraist ami taan-ilomda numi ban kemin kukan-tiiyase kaami sang kaata boko-lomdule,
1CO 15:4 ami taanaya, dibii-din tuum tem kuwaalip bii, am asuumano diim kawu asuk tam tiinse kaami sang kaata bokosu te!
1CO 15:5 Kemin, Kraist ami tam tiinse kaali, tal Pita ami diim kaasiik tala atamdala kawu, tal almi kalaan tunum talangkal ulelsa isiik itam-somdala kawu,
1CO 15:6 almi daang bakaalin tunum ilmi-kup deng 500 ale, kuno bakli ma kalawiimi diim tal itamaya, alik maakup atamiple, kulaata yakaba din almi niing Jems ayo atam-som kelaya kawu, alik Kraist almi daang bakaalin iyo alik atam-silip. Kamala kuluwaali almi daang bakaalin 500 kaliyo, yaapkan ma bom-balale, malo ma iyo saaka-bala kem-tabasip o.
1CO 15:8 Uyo itam yakyak kem-tal-unebi disa kelule, kulaa kela mafiing diim yakaba umbital nalmi diim talala atamsii. Yesus ali tal nami ulduulse kaali, ali tal almi kalaan tunum malo ma imi ulelsa iltap kesip disa. Unang umi aket fukunin uyo man kuulokomi uyo yak kayoop alep e asuumano e diim kawu kuulokomi no, kalbu. Lale, kasentap man kuulula, weng dukum ma boko-laabip tap ke-lomdila tiltam God ami kalaan tunum kelila, nata atin mafiing mafiing atamsii.
1CO 15:9 Kemin, Kraist ami kalaan tunum imi win uta taba-lomdu nami win uyo kabaak banu kep-na imi win kuuta uta uta kesu. Kemin, nali God ami unang tunum kii yam-mafak-dakan-tal-unebi kulaasi kemin, unang tunum ili bokop-na-lomdip: Pol ali Yesus ami kalaan tunum o, nakan-kaa-mokomip kaali, yaap kep-nokomu disa. Lale,
1CO 15:10 nami kalanola bom bii kaali, God ali olen-daap-na-lom dong dokop-nalala, tiltam almi kalaan tunum kesii. Kemin, God ami olen-daap-nalala tiltam almi kalaan tunum kesii kaali, lap abusuu kemin, nami God ami weng kuluu unang tunum imi dukum-kup kukaayin uta tam lo so kelule, Kraist ami kalaan tunum kusnum imi dukum-kup okok kemin uta tildaak lo so kelu. Kesu yale, ok kalawaali nalta kanum tabasi disa, kaali God ami titil kaata kup-nam-bamda alalta kaa kanuman o, nakan-kaa-balala, kanum tabasi.
1CO 15:11 Lale, nami God ami weng kamosinim kaa kipni bakayila-tabasi kaali, kaa akal kusnum ale, Kraist ami kalaan tunum kusnum imi weng kipni bakayila-yaabip kuuta, ukol ulmi kusnum disa; alik numi weng kala bakayila-tabasup kalaali ti alik weng maakup. Weng sakbaalkan dukum kaa ibi weng saniwa yi, Awu, faneng kalaliwa, talalu kutal-fuku-silip o.
1CO 15:12 Numi weng suunkup kipni bakayila-yaabup kaali, Yesus ami taanala kuwaalip God ata asuk dafola tam tiinse no, kal-bomdupla, ipyo bakayila-yaabup kaami weng namti kala buu. Yale, malo ma ibi kanimin o, kala boko-lomdip: Unang tunum nuli taan-ilom dok kanola asuk tam tiinokomup disa yo, kalbip o?
1CO 15:13 Aa kulaa kunubip. Lale, utamapla unang tunum taansip ili fan tam tiinokomip dinim ke-lokomip o, kalup namti, kabak-ata nuyo boko-lomdup: God ali taba Kraist kaa dafosa disa yo, kalokomup o.
1CO 15:14 Kulaali, God ata Yesus kaa dafolin disa kesa dinam, mep numi weng kala bakayila-yaabup kuluuli, miit dinim ale, ipni Kraist ami lak dakaamin kuluukal ti kuno miit dinim.
1CO 15:15 Aa ti yak kipni weng kaa boko-lomdip: God ata unang tunum taansip kii yim-folokoma disa yo, kalbip uyo fan dinam, nuli unang tunum ili God ami sang kulaa kasen-fakayin-bam boko-lomdup: God ata Kraist ayo dafolaya, tam tiinse no, kem-tabasupla yo.
1CO 15:16 Weng kala bokoli uyo asuk bokolokomi. Kemin, dotu weng san-iliwa. Nuli utamupla, God ayo unang tunum taansip imi yim-folin disa ke-lokoma no, kalup namti, nuli boko-lom God ali Kraist kaa dafolin disa kese no, kalokomup.
1CO 15:17 Aa ti, God ali Kraist dafolin disa kesa dinam, kipni Yesus ami lak duu ilin uta taba-lom ibi dong dokoyokomu dinim; iltipni uluum uta taba-lomduya de-yimulu bom-bilip o.
1CO 15:18 Aa ti ultap o, unang tunum Kraist ami lak duulin taansip yakal ti atin maaklo win dinim ke-silipla yo.
1CO 15:19 Kemin, nuli Kraist ami lak kaata duu-bom ayo fen-tabasup. Lale, kanola Kraist ami numi talalu yim-tii dong dakaayin-balala, yakaba butoop taanokomup kuyaku ditang-kala disa kelu namti, kayak kayak ili yaap ilmi ap-tunum kusal olen-ilin uyo kukan-tiiya nuyo dukum-kup olen-daayila boko-lomdip: Kristen imi aket fukunin kaali, Kraist ata dong dakaayin-balala, bom bii saak-nokomup iyo yim-fo-lomda yim-bitam God ami abip daa-lomda mafek mafek tangbal ma numi kuyokoma disa yo, kalbip. Kanimin o, kalalipla, Yesus ami liip kuuta dikiwa-unen-umbip yoko? Liip kaami miit kaa dinim kemin, kwin olen-daayokomup o! kalokomip. Lale, kabak-ali ti atin faneng tam tiinokomup o.
1CO 15:20 Kulaa faneng, Yesus ayo taanaya, God ayo asuk dafose kemin, utamupla, God ayo unang tunum taansip yakal ti yim-folokoma kala kebup kemin,
1CO 15:21 kabak-ami miit kaali, Adam ata taan-yaamin uyo kutaltam daalale, kulaa Yesus ata unang tunum imi taan-ilom asuk tam tiin-yaamin uyo kutaltam ku-fatap-tiila kesip. Kemin,
1CO 15:22 kaalile, alik nuli Adam ami man loop kemin utamduya, taan-laabup. Lale, Kraist almi unang tunum nuli, alik God alta yim-folala, tam suunkup abip kawu ilokomup. Lale,
1CO 15:23 God almi kuyaku tabuk o, kalase uyo tiltam tulu no, kalalaya, unang tunum alik maakup maakup nuli yim-fola tam suunkup abip kuluula-kuluula-ke-lokomup kaa, God ali Yesus asiik dafola tam tiinse. Kemin, Kraist ami talokoma kaali, God ata taba-lomda Kraist ami unang tunum alik nuyo yim-fola tam tiin ke-lokomup o.
1CO 15:24 Kulaa tam tiinuple, am mafiing diim namti tiltam tabamnule, Kraist ayo taba God ami waasi kamaala-laabip kiili, sinik mafak titil-kup tabasip so, tawaal diim imi kamok kamok isole, ilmi titil so, iyo namti kuluu alik yam-mafak-daala dinimnip kulaa keyilale, almi mafek mafek so, unang tunum so, imi tiin saanin ayo, asuk kulaala yak Aalap God ami sikil diim abam-nokomu. Lale,
1CO 15:25 kabak kanolin disa bom-ilomda, asuk Kraist alalta tal aba tam Kamokim King kela una-balala kawu, God ayo yakaba butoop waasi alik iyo yim-baak-saan-balala, disa ke-lokomip kabaku ditang-kalu kulaa-somdala, iyo fokola taldaak Yesus ami minlo tem uniwa,
1CO 15:26 kawu alik waasi iyo disa kelip kala kalba-kup kawu, taan-laamin miit uyo wela dinim ke-lokomu o.
1CO 15:27 Kemin, God ami Sukon Tem weng uyo boko-lomdu: God alalta taba mafek mafek alik so, unang tunum so, kiili fokola talaba daak King ami yaan min lo tem tiila kayi! kalsu. Kemin, alik numi utamsup kaa, God ali mafek mafek alik kiiso, unang tunum iso, iyo fokola talaba daak Kraist ami yaan min lo tem tiilaya, alalta tiin molokoma. Lale, fan God ata talaba daak Kraist ami yaan min lo tem kaa unokoma disa.
1CO 15:28 Lale, ilom am ma daanula God ayo mafek mafek alik kiiso, unang tunum so, iyo fokola taldaak Yesus ami minlo tem unipla, tiin molokoma kaali, God ami Man Yesus Kraist asiik talaba daak Aalap God ami minlo tem unaya, God alalta talaba tam dabom keba-kup, alik maakup tiin molokoma.
1CO 15:29 Kemin, unang tunum malo ma ili ap-tunum kusal taansip imi aket kaata-kup fukun-bamdipla, imi abiin kuluu dong dokolum o, kala, oksam ukayin kulaali ukan-umbip. Lale, ili utamiwa yi, Taansip imi tam tiinokomip kaami sang bakabup kulaa fan disa yo, kalip namti, oksam uta ukoluwa kawu dok nolin ma tiltam tuluk o, kalaliwa, oksam kaa ukan-umbip yoko?
1CO 15:30 Nokol ti God ami ok kaata-kup okok ke-bulupla, suunkup unang tunum iyo taba nuli yam-mafak-dakan-tal-unemum o, kem-laabip. Yale, kabak-ali utamupla, Taanokomup uyo asuk tam tiinokomup disa kala kala-sulup dinam, nuli nulmi angtiil lak ayo kambola ok kalawaali nun-umbup disa. Lale, ti tifaneng tam tiinokomup kala-somduwa kemin, ok kalawaali kanun-tabasup o.
1CO 15:31 Suunkup waasi iyo nelum o, ke-bilipla kemin, nami taan-laamin kaali maaklo kawu tiltam tulu taanami kaa, tifan o. Ale, nili waasi imi iipyak tem kawu bilila kemin, ibi din Kamokim Kraist ami diim kabaku fewa-silip. Kemin, kipni win uyo kufoya-laabi kaakal ti tifan o.
1CO 15:32 Kamosinim nami tal Efesis kasel imi abip kaltamu bomdi tunum aket atul tabin iso, nikil weng aal diki-bam bom ilsup kaa, nali tunum saaknip imaasip imi ilom asuk tam tiinokomip o, kemin kaami aket uyo kela-lomdi weng aal dikimin kaata-kup diki-bam ilsi dinam, kanimin mafek mafek ma uyo kuluulami yoko? Atin disa. Kemin, unang tunum yaapkan ili tunum imi saaknip imaasip iyo ilom asuk tam tiiniwa, God ata taba yim-bak-saanokoma kaami aket uyo fukunakin disa kela boko-lomdip: Sabi inang kawu alik nuyo taanokomup kemin, am kala daan-bala bom-bulup kaali, saak yak ima kawal tap duu-bam in-bom, aa ok mafak in-bom, fiyaap duu-bam kemum o, kala kanum yakaba toop iip kulu daa kulaa kela taan-laamin o, ken-umbip kemin, nuli asuk tam tiinokomup disa yo, kalup namti, nuli ti kanolin tap kelakin. Lale, nuli ti atin faneng tam tiin baalokomup te!
1CO 15:33 Kemin, utamsa tunum ma bokola-lomda: Nuli tunum kukup mafak fukulin iso, tal-unemup namti, numi kukup tambal uyo kela-lomdup yak ililtap kelalup o, kalsa. Kemin, kabak ti fan bokosa. Kemin, ibi kap-tunum kusal iyo kamboyip kasen-fakayim-bilipla, kipni aket tem uyo kufoyilu imi kukup mafak kanubip kaa, kipkal kanumin dinim o.
1CO 15:34 Kipni babon-tal-unebip kulaa kela-somdipla, aket tem uyo talalu kutiile, kukup mafak kebip uyo kela-som nami weng bokoyokomi kalawuuta weng sandiwa, kipni iipyak tem kabaak bom-bilip imi maakup maakup ibi God kaali talalu atamsip disa kala kalalila, weng kalaali kufoyilila, kipni kukup mafak kaa kanubip kaami fatom uyo kuluu una-tala-kelin o, kalalila, kemin weng kala, kufoli no.
1CO 15:35 Tunum ma, kapyo, dik-daa-lomdap kanum bokolap ko: Tunum unang taansip kiili, God kaa kalok kano-lomda yim-fola tam tiinokomip i? Tam tiin-ilomdipla, dok kanolin angtiil ata ma kuluuliwa ilokomip yoko? kalokomap. Katale,
1CO 15:36 kapni aket kabak dotu fukunin disa bomdapla kabak dik-daalap ema? Kabi wiit san aye, inin-inin san iyo ma ultiilawa bikin-tabamnip le, kulaa kamasi san ultii-salap ayo fom-nokomu. Lale, inin-inin san uyo bikin-tabin disa kelu namti, kulaa tabamnin disa ke-lokomu. Ale, inin-inin san kaami ultiilap tabam-nokomu kaali, yuun so, kon so, kii dikilawa, tiltam aba dukuma-laaba disa. Kemin, umi san katip sakap kulaata-kup ultiilawa taba-laaba.
1CO 15:38 Kanola, inin-inin san tabam-nokoma kaali, God ayo taba yuun so, kon so, san umi kolon o, kalba kaata-kup kolokoma. Kemin, mafek mafek san bikin-taba yuun so, kon so, akal almi kusnum kola-kola-ke-balaya, tiltam taben-umbu no.
1CO 15:39 Mafek mafek alik imi ipnaal kaali, fanang maakup daa. Unang tunum ili yakal ilmi ipnaal alik, aa yak nuuk ili yakal ilmi ipnaal alik, awon yakal ilmi ipnaal alik, wok tem ilin aniing ili yakal ilmi ipnaal alik, kanolin o.
1CO 15:40 Kuno ti, abiil kaami mafek mafek so, tawaal diim kalawaami mafek mafek iso, iyo bom-bilip. Yale, abiil kaami mafek mafek umi angtiil dawang ali okol almi kusnum ale, tawaal diim kalaami mafek mafek kaami angtiil dawang uli ukol ulmi kusnum.
1CO 15:41 Kuno ti, atan kaami dawang uli ukol ulmi kusnum ale, kayoop ami dawang kaa akal almi kusnum kuno biningok imi dawang kaata disa akal almi akal alik akal alik iilfola-iilfola-kem-tabasip.
1CO 15:42 Bom-ilom unang tunum taansip imi asuk tam tiin-yaa-mokomip kaami kukup uyo kanumin kemin, as kuli kulii-din kuwaalokomup uyo fom-nokomu. Lale, unang tunum taanup yimaalip ilom nuyo tam tiinokomup kawu, numi angtiil kusnum kuluulokomup kaa fom-nokomu dinim o.
1CO 15:43 Taanupla imaalokomip uyo, numi as kuli kulaali titil dinim ke-lomdu mafaknula imaalokomip. Lale, asuk God ata numi yim-fo-lomda angtiil akal kusnum kuyilala tam tiinokomup kaami angtiil kaatale, titil soyim ke tambalim dukum kuyokoma. Kemin,
1CO 15:44 numi angtiil kalawuumi ma saaknu kulii-din kuwaalokomip kulaali, tawaal diim kala-bom-bulup kaami angtiil yale, numi God ami yim-fola tam tiinupla kawu tiil kusnum kuyokoma kaali, abiil tikiin ilokomup kaami angtiil kaata ko. Kemin, kabak-ali ti tifan o. Tawaal diim kala bom-bulup kaata, nuli angtiil so bom-bulup ale, as kuli kalawuumi kewa tam abiil tikiin kawu ilokomup kaali, numi angtiil uyo kusnum kaata kuluu ilokin te!
1CO 15:45 Aa, ti kuno God ami Sukon Tem uyo boko-lomdu: Siin sawaayak uyo, God ali kamosinim kaptoop ami diil tunum Adam ayo mam so, tiil so, iyo konsa no, kalsu. Lale, mulo kawu tunum Adam kusnum o, kala Kraist ata tiin kawang sinik kaata numi kukaayila-yaaba no.
1CO 15:46 God ali tiin kawang sinik kaasiik kukaayila-laaba disa; mam kaasiik kuyimba-kup, mulo kawu tiin kawang sinik ayo kukaayila-laaba.
1CO 15:47 Kemin, God ali tawaal kaata fuk-duu-lomda diildiil tunum Adam ayo dap-talalusa. Ali tawaal diim kalawaami tunum. Lale, mafiing diim kaptoowu tunum kusnum Adam o, kala Kraist ata abiil tikiin kaami tunum o.
1CO 15:48 Tawaal diim kasel alik unang so, tunum so, nuli tawaal diim kayaak Adam alaltap ke-bom-bulupla, kuno tunum unang abiil tikiin unokomup nuta abiil tikiin kayaak Kraist alaltap ke-sala kelupla ilokomup.
1CO 15:49 Kamala kalawaali, tawaal diim kayaak Adam alaltap ke-bom-bulup. Kemin, ilom am ma daanokomu kaata, abiil tikiin kayaak Kraist alaltap ke ilokomup o.
1CO 15:50 Nak-tunum kusal kipyo. Nami weng kala dotu kuyokomi. Kemin, weng san-bom-siliwa. Unang tunum nuli fan tunum fatap kaa dok kano-som angtiil so kulii tam God ami abip kaa unolup disa. Le, aa numi as kuli kala bombuu kuuli, suunkup bom ilokomu dinim.
1CO 15:51 Lale, nali weng sawaansu ma kipni bokoyon o, kali. Kemin, ibi weng san-iliwa. Alik nuli taanokomup disa; malii ma nuli kano bom-iluwa, bikul uyo am mafiing mafiing diim kawu, God ami fongket naan-taba kem-salale, kulu God alalta nuyo alik fal-siki-yimula maak fak-daalin tap tiltam nokol kusnum ma ke-lokomup. Kemin, bikul naan-tabokomu kuluwu, tunum unang saaksup nuyo tam tiin-ilomdupla asuk maso ma taanokomup dinim; ti suunkup ilokomup kaali, God ata taba alik nuli fal-siki-yim-tiilala tiltam akal alik ke-lokomup.
1CO 15:53 Kemin, numi tiil kala diisa-lomdu foma-laabu kuuli, fal-siki-lom asuk tiltam ukol alik ke tambalkan ke-lomdu suunkup kano ilokomu.
1CO 15:54 Uyo tiltam tulule, numi tiil ipnaal kun kem-unsu uyo fal-sikila, tiltam suunkup ilin kaami mafek mafek ke-lokomu, kabaku God ami Sukon Tem weng uyo boko-lomdu: God ali taba saaka-yaamin kaami liip uyo ukdaala atin disa ke dinimnula ata ata kela no, kalsu kulaata, God ayo ulultap ke kanolokoma.
1CO 15:55 Kemin, Moses ami Lo uta taba-lomdu numi ban kemin uyo ku-futap-tiilula kawu, utamuwa yi, Numi ban kemin kaami maan ayo awak sakbaalkan dukum u, kala kalbup. Kemin, numi ban kemin kaami kalan kuuta taba-lomdu titil-kup fak-daa-lomdu angtiil yol uyo numi kukaayila-tabasu. Lale, God ami Sukon Tem ma kabak-ata kaami sang uyo boko-lomdu: Saaka-yaamin kuuta taba uta uta ke-lomdu nuyo yim-baak-molu atin yam-mafak-daalokomu daa yo, kalsu.
1CO 15:57 Nuli ban kemin kaami diim kawu bom-bulupla, Yesus ayo yim-buu-lom tiin kawang liip ilin kawu daalon o, kala talaba taansa. Kemin, ban aye, taan-laamin aye, uyo maso ma ita numi tiin molokomu disa. Kemin, kaa God ali ti yaap ke yo, akum o, kala-somla ko.
1CO 15:58 Kanum bokolu kemin, ti nalmi nak-tunum kusal kipyo. Kulaa kipkal utamsip taa! Kipni Kamokim Yesus ami ok dukum fuku-bom-bilip kaali, tuk-duu kulii daak abokomu disa yo. Ibi walwaal-tap-tap-kup kemin daa; ti titil-foko tola-bomdiwa, suunkup iltipni Kamokim Yesus ami ok uyo titil-foko tabuu-bom-biliwa yo!
1CO 16:1 Ibi moni uyo afetbii kutii-lom Yesus ami lak duulin unang tunum Provins Judiya bom-bilip kawu imi kulaayup unuk o, kala-silip. Kemin, kabak-ami sang kaata ma bokoyon o, kalbi. Siin kaa nali Provins Galesia kaptam-ami abip ma ma imi Kristen unang tunum imi bokoya-lomdi: Tuumon afetmin kaali, kalanola afet-biliwa yo, kalasii. Kemin ti ipkal kanu-biliwa kayi! kemin,
1CO 16:2 Sande alik uyo, tikip alik maakup, ipni moni kaamip kaami aket uyo dotu fanang daabip-kup, anung ma kaata kulii-din iltipni am kawu kutii tambal-kup kuwaalip bom ilule, nami din unokomi kawu, moni ayo fiit-bamdip afet-mokomip dinim. Ipni kulu afetu kutiisip kulaata-kup, abiltap-siik iltipni tunum ulelbip imi kuyiple, ita Judiya kasel imi kuliiya unokomip.
1CO 16:3 Kemin, sin-ilom din unokomi kawu, sukon malo ma dola kipni tunum ulela-silip imi kuyokomi kaayo, God ami unang tunum Jerusalam bom-bilip iyo tik-tii-lomdip kaal-ke-lokomip. Kemin, kipni tunum ulela-silip iyo yim-baali din kipni moni afetu kutiibip uyo kuliiliwa umbiling Jerusalam kaptam unokomip. Kemin,
1CO 16:4 nalmi aket kaata fukun-daalila, kuno naso no, kali namti, naso nikil maakup unokomup o.
1CO 16:5 Nali dindi ipni itamon o, kalbi. Lale, kamasi kaali Provins Masedonia din aba-somdila kawu, tal tal ma somdila mulo kawu din ita-mokomi. Kemin,
1CO 16:6 din unila, kipso bom bii ilanin tap ke-somdupla yo, kalbi. Lale, nali utam, Awu, am aye, kayoop aa, ayo kanolin kal dakan-tiili talokomi kaali, nali utabi disa; kipso bomdi bii yol ok ami fakaba uyo dinimnu ne? kala-somdila kawu, abip ma unon o, kali namti, kawu ipkal dok nolin mafek mafek ma dong dokop-na nam-bii din bot tem kawu, daaliwa unomi.
1CO 16:7 Kemin kulaali, nali kiin din itamdi talon o, kalbi disa. Kamokim Yesus ayo bokop-na-lomda: Kuno din-bom bii ilanin tap kelawa yo, kala namti, din unila kipso, nikil alimal maakup ilanin tap ke-lokomup. Lale,
1CO 16:8 God ata bokop-na-lomda: Kaltam-ami Kristen unang tunum imi dong dakaayan o, kala-lomdaya, ok awak dukum kala kup-namba no, kalbi. La, numi waasi yaapkan iyo bom-bilip. Lale, saak kuno ti ok uyo maso ma kem-silila kawu no, kalbi. Kemin, nami aket fukunbi kaali, abip Efesis kalawu bom ilila Pentikos o, kala ima duung fakamin am uyo tal-unu kala, kalalila kawu din unon o, kalbi o.
1CO 16:10 Timoti kakal ti, kuno nami Kamokim Yesus ami okok ken-umbi ultap kanu-bamda unang tunum iyo dong dakaayila-yaaba. Kemin, atam-iliwa, ayo yakyak din kipni diim tala namti, ipyo dap-tam am daa dotu tiin moliwa, nikil alimal maakup ilokomip kaa, ti tambal o.
1CO 16:11 Tunum ali ma taba aket fuku-daa Timoti ali kama man kemin, ali ti taang-kalalala, nuli dong dakaayokoma dinim o, kal-bom aket mafak kaa kukaalin disa yo. Bom-ilana kalaya kawu, ipyo dong dokola dibii umbital liip daalipla, ayo fiyaap duun yakyak talak o. Nali Timoti akal ale, ami kayaak kiiso, tal-unebip nikil kiita tilipla itamon o, kala-lomdi imi liip fenbi.
1CO 16:12 Aa, kuno nulmi kayaak ma Apolos ami sang akal ti ibi bokoyila kelon o, kalbi no. Suunkup weng uyo dukum-kup ami bakan-bamdila: Kabi kap-tunum kusal ma foko-kuliilawa, bilin Korin kasel kiimi itaman o, akan-kaa-bamdi bom bii. Lale, ali kama kalawu din unokomi disa yo, keba. Kemin, aptum kusal isiik uniwa, ata sinda kawu utamala, liip so kelu ne, kalalala kawu din unokoma o.
1CO 16:13 Kemin ibi dotu utafii-bamdip Yesus ami lak dakaamin uyo ti titil-foko kutal-fuku-bomdip suunin daa; titil-foko tola-bomdiwa yo.
1CO 16:14 Kipni dok kanolin ma nuumip uyo, ipni aket kaa God ami kukaan-bam ale, unang tunum imi kukaayim-bam ke-bamdiwa kanumin o, kala-somla ko.
1CO 16:15 Nak-tunum kusal kipkal kaa utamsip taa! Stefanas aso, almi kalel man iso, alimal isiik Provins Akaya kasel kusnum imi yam-kan-tii-lomdiwa, tiltam Kristen ke-silip. Kemin, ilmi aket fukunin kaata alimal ili God ami unang tunum iyo dong dakaayin-kup ken-tabasip.
1CO 16:16 Kemin, nali weng kaa dukum-kup ipni bokoyilila, ibi talaba daak Stefanas so, almi okokba ililtap iso, alik ami dong dakaan-bam dukum-kup kalanolin ok kala nuumin so, imi minlo tem uniwa yo.
1CO 16:17 Stefanas so, Fotunatus so, Akaikus aso, ili nami fanang tilipla, nali fiyaap duu-bamdi bii kemin, kaami miit kabak-ali kamala kalaali alik ibi taang-kala talokomip disa. Kemin, tunum nikil asuumano kiita kipni abiin uyo kuluulip.
1CO 16:18 Kipni weng kaata kulii-tal natabip kaata nami aket tem uyo fiyaap duubi. Ipkal ti kano fiyaap duu-bilip kebup. Kemin, kanolin tunum kiimi fiyaap kaata duu-bamdiwa yo, kalbi.
1CO 16:19 Provins Esia kaptam-ami abip maakup maakup imi Kristen unang tunum ili kipni weng umuuyip. Kemin, Akwila so, Prisila uso, akam yakal ale, kuno unang tunum tala-tala-ke-bamdip akam imi am kaptamu lotu wan-umbip iso, nikil alimal ita Kamokim Yesus ami win diim kipni weng uyo dukum-kup umuuyip ko.
1CO 16:20 Kristen unang tunum alik kaltam bom-bilip ita ipni weng umuuyila kelip ko. Kemin, ibi God ami unang tunum nulmi kukup kaata kuluu-lomdiwa, kap-tunum Kristen iyo weng fokola una-tala-ke-biliwa yo.
1CO 16:21 Nami sukon dolmin tunum kalawaami dolmin o, kala bairo kaata, kuluu-lomdila, nalmi sikil ta sukon kalaali kipni dola kuyon o, kalalila kemin, POL NITA IPNI WENG UMUUYILI KO.
1CO 16:22 Unang tunum kanta Kamokim Yesus ami aket kaa, koli daa yo, kala namti, kulaa ali maaklo ke win dinim kelak o. Kemin, numi Kamokim Yesus kapyo, Kabi tal o, kala-somla ko.
1CO 16:23 Kamokim Yesus kaa ibi disa misiim kawu tambal tambal ma kamayim-bamda tiin mola, tambal-kup bom-biliwa yi!
1CO 16:24 Utamila, ibi Yesus Kraist ami diim kawu yak fewa-silip kala, kalalila, nali kipni aket kaata-kup kukaayimbi kemin, kaali tifan ko.
2CO 1:1 Nak-tunum kusal kaa laabip o? Nali Pol nata God almi fanang saanin kaata, nali uldaa-nam-buulaya, Yesus Kraist almi kalaan tunum kesi. Kemin, nata sukon kala God ami unang tunum abip Korin kaptam bom-bilip ipsole, alik Provins abip Akaya kaptam bom-bilip iso, kipni dola kulaayili din unokomu kabak-ali nikil alimal nulmi nak-tunum Timoti aso, weng umuuyila kela kayi!
2CO 1:2 Nuli Aatumen God so, Kamokim Yesus Kraist aso, alim imi dik-dakaayin-bulup ita disa misiim kawu ibi tambal tambal ma kamayin-bilip, kipni aket tem ayo balili-kup kala bomdiwa yo, kebup o.
2CO 1:3 Nulmi Kamokim Yesus Kraist ami aalap God kaali, nuso maakup numi Atok kemin, ali numi olenin aket kaata kukaayila-yaaba kemin, numi aket uluum kuluulup ayo suunkup ata kipni dong dakaayilala, nuyo ami aket bilili-kalin diim kawu laabup kemin, nikil alimal nokol ti ami win kaata-kup kufon-bam yaap ke yo, akan-kaa-mokomup kaata ti tambal ma ke-lokoma no.
2CO 1:4 Kanola Sailas so, Timoti so, nikil numi angtiil yol sole, aket uluum so, kaa-bam kem-tabasup ayo, God ata numi dong dakaayin-balala, aket bilili-kup-kalin aket kaa kuluu-laabup. Kemin, Aatumen ami aket bilili-kalin ayo kuya-lomda kukuyilala utamsup. Kemin, ultap ti nokol nak-tunum kusal imi aket uluum aye, angtiil yol ayo kuluulip kaali, nuyo dong dakaayilupla, iyo aket bilili-kalin diim kawu tiin-bom laabip o.
2CO 1:5 Kamala kaa nikil nuli Kraist ami siin angtiil yol kuluuse ultap nokol ti kanu-bam kan-tabasup. Kemin, nokol ti kanola God ali nuli itama yi, Yak Kraist ami diim ayo fep-nip kala kalalaya kemin, nuli Kraist kaami dong dakaansa tap ke dukum-kup ipyo dong dakaayin-balala, balili-kup-kala yakyak talabup.
2CO 1:6 Kemin, nikil numi aket uluum aye, angtiil yol kaa kan-talan-umbup kaami miit kaali, God ami aket fukunin kaa, Angtiil yol aa, aket uluum aye, Pol nikil imi diim abamnula, nita dong dakaayin-biliya, isiik balili-kala titil kuluu-lom nikil iyo yaap-kup Korin kasel imi dong dakaayin-biliwa, imi aket uluum aa, angtiil yol kaabip uyo kuno kaata utam kulaa-bomdiwa, bilili-kala biliwa, bii im-taldang nalmi abip kawu daalon o, kala-lomda, God ali nikil numi dong dakaayin-balaya, balili-kala talan-umbup kabak-ata nikil nokol utamdupla, Ibi dong dakaayin-buluwa ibi bilili-kala-lom talan-laabip. Kemin, nikil nulmi kanolin aket uluum aye, saak yak angtiil yol aa, kuluu kuno utam titil-fak-dakabup tap ipkal ti kanola aket uluum angtiil yol tildak kipni diim aben-umbu kaa, ipkal kanola ti dukum-kup ti til-fak-daa-tabasip.
2CO 1:7 Kibi kaa daak abokomip kala, kalalupla, nikil nuli suunbup disa; nuli utamupla, God ata ibi dong dakaayin-balala titil-foko ilokomip kalaluwa, aket uluum aye, angtiil yol aa, kaata tal numi diim abe-bulula, God ata dong dakaayin-balala, balili-kala-laabup ultap kaata, tiltam kipni diim abamnula, God ata dong dakaayin-balala, bilili-kala-yaa-bom ke-mokomip o, kebup.
2CO 1:8 Nulmi nak-tunum kusal kipyo! Nuli weng ma kuuta bokoyup, ibi utamin o! kalaluwa kemin, nikil nuli mep alokso-kup Provins Esia kawu bom-iluwa, mafek mafek mafak dukum o, kala angtiil yol dukum ma tiltam nikil numi angtiil diim abasuu kaali ti, atin mafek mafek saak-baalim dukum ma unang tunum ita numi kukup mafak ukol alik ukol alik kiita kukaayinsip kaali ti, angtiil yol awak kaata kukaayin-bilip bom bii numi titil ayo disa kelule, atin umtal-daa taanakin tap kesup.
2CO 1:9 Kaata tiltam numi diim abamnuya, nulmi aket fukunin ayo God ali kanolin mafek mafek mafak kaami tem kabaku din-ilom kipni taanokomip uyo mepso tulu kayi! kalalaya, mafek mafek mafak kaa kuno kewa tiltam talebu ema? kala-sulup. Katale, kabak-ali disa. God ami aket fukunin kaali, Kanolin mafek mafek mafak kuuta, kewi tildak Pol nikil imi diim abokomu kaata, dong dokoyiluya iyo utamiwa yi, Awu, nulmi titil kulaa fan daa kala kalalip utamip, God ata-kup titil miit kayaakim ale, ata-kup suunkup dong dakaayin-balala titil-fak-daa laabup o, kalin o, kala-lomda mafek mafek mafak uyo kuno kewala, tildak numi diim abemsu. Kemin, God ami titil kaali ti, tunum taanip imi yim-fola tam tiin-yaamin tunum o.
2CO 1:10 Nikil nuli kanola angtiil yol dukum kaami tem kaptamu diinakin tap la, God ata nikil nuli dong dokoyila yaawa-lom kawu utamuwa yi, Ata-kup numi suunkup dong dakaayin tunum kala, kala-sulup. Kemin, ilom am ma daanokomu kaali, mafek mafek akal kusnum ma tiltam numi diim abam-nokomu, kalalupya, utam God maakup ata ti, suunkup numi dong dakaayila kala, kalalupla, numi aket uyo kuyak ami diim kawu fewa-sulup.
2CO 1:11 Kemin, ipkal numi dong dokoya beten kamayim-biliwa yo! Kemin, unang tunum yaapkan kiimi beten kamayokomip kaali, God ali maan tiiyale, nuli dong dokoyilaya, nuyo tambal-kup ke-lokomup kaata, unang tunum yaapkan kusnum iso, kipso, maakup kuyaku-diyaku-ke Aatumen God ami bokola-lomdip: Ti yaap ke, disa masiim kawu dong dokoyilapla, yaap ke-silip o, kala-lomdip ami win ayo kufolokomip o.
2CO 1:12 Mafek mafek kaa nun-umbup kaami win kufola-laabup namti kala bombu: Nikil nuli dulul eng ma weng sanbup kaali, Korin kasel malo ma boko-lomdip: Pol nikil kiili, numi kasen-fakayinbip o, kalipla weng sanbup. Yale, nikil numi tinang umu utabup kaali, kaa fan tituun weng disa yo, kalbup; nuli atin ti aket tem kaa utamuwa yi, God almi tiin diim kawu, nuli kukup mafak kaa ma kipni kukaayila-yaabup disa; nuli ti kukup tambal kaata-kup kukaayila-tabasup o, kalalupya, numi aket kuu balili-kup ke-yimbu. Kemin, God ali suunkup numi disa misiim kulu dong dakaayin-bam, titil kukaayim-bam kem-yaaba. Kemin, tawaal diim kalawaali utamsip tunum imi aket fukunin uyo kewa-lomdup, God almi aket fukunin tituun-kup tabasu kaata-kup, kuluu-lom unang tunum alik imi tituun-kup tabin weng kaata-kup bakayin-bam, kukup tambal kaata-kup kukaayin-bam ale, kipkal kuno kanolin kukup kaata suunkup kukaayin-bam kem-tabasup. Kemin, kaami okok kemin umi win kuuta, kufola-laabup o.
2CO 1:13 Nikil numi kanola kipni sukon dola kuya-kuya-kem-laabup kaa, nuli kasen-foko dola kuyilupya, kipni aket uyo kufoyuk o, kala-somdupya disa; nuli sukon kalawaata dola kulaayilup din unuya, tik-tii-bamdip talalu utamin o, kala dola kulaayup din unen-umbu te! Kemin, weng anung ma kalawuuli weng sanbip ale, anung ma kuu talalu weng sanbip disa. Lale, numi aket fukunin kaali, Ipkal weng uyo alik talalu utamdiwa, Kuuli ti, faneng, tituun-kup weng o, kala kalaliwa, Kamokim Yesus ami asuk talokoma kawu, kipni kukuyin tunum nuta, kipni fiyaap duu-bamdup win kufuyin-buluple, kuno unang tunum kipkal kukuyinsup tunum numi kuno fiyaap duu-yin-bam win uyo kufuyin-bilip kemakin o.
2CO 1:15 Nali siin kawu utamila, Nami din unokomi kaa, ibi nami fiyaap duup-nam-bam yaap ke talap o, kalalip am kaa kup-nokomip o, kalaliya, nali din ibi itafii-bamdi kipni dong dakaayin-bam kebi, dum alep ema? fak-daalon o, kala nami aket ayo kanola fukunbi no.
2CO 1:16 Kamasi kaa boko-lomdi: Provins Masedonia unokomi kaa, kamasi diildiil din God ami unang tunum Korin kayaak kipsiik itamdiya kawu, kamboya niyo tam tam bilin Provins Masedonia unokomi no. Din abaliya, asuk Masedonia kelali talokomi kaali, asuk tal itamdi talokomi. Kemin, kipta inin-inin aye, dok nolin dok nolin kiita ma dong dokop-nale, ipyo nam-tama din sip tem daaliwa, yakyak Provins Judiya unokomi no, kalasii.
2CO 1:17 Yale, mulo kawu weng mafak ma tulu weng san aket fuku-daa nami weng kulii-din Korin kasel bakayokomi kaa, weng sanokomip disa ema yo? kalaliya, kamala kaa Korin unokomi disa yo, kalaliya din unin disa kebi. Kemin, kamala kawu weng kulii-tal bokop-na-lom Korin kasel malo ma ili boko-lomdip: Pol ali fan boko, iboko kemin tunum o, nambip-kup, ali tawaal diim tunum God ami lak duusip dinim tunum ililtap ke, almi mafek mafek kaami aket kaata-kup fukun-bamdala, weng uyo disa bon tem weng kaata-kup boko-lomda: Din unokomi kayi! kal-bom ale, Ee asuk ma boko-lom: Din unokomi disa yo! kal-bom keba kayi! kaliwa weng sanbi. Lale, imi weng kaa fan daa.
2CO 1:18 God ali fan tituun-kup tabin weng bakamin kaami miit kayaakim kemin, ali ibakamin disa. Nakal ti kanolin kemin, bon tem weng ata-kup boko-lomdi: Kaa kanolokomi no, kal-bom ale, nalmi aket fukunin kaata, Yi, kaa daa yo! kal-bomdi nali bakan-umbi disa.
2CO 1:19 Sailas, Timoti, naso nikil nuli siin kaa God ami Man Yesus Kraist ami sang kaayo bakayinsup. Kemin, ami kukup kaali ti, fan Aalap God almi kukup tap tituun weng-kup bakamin kemin, ami bon tem weng ma boko-lomda: U, kanolokomi no, kal-bom almi aket fukunin ma, Daa yo, kal-bom ken-umba disa; ali kanolokomi kayi! kala kalalala, weng kutiila kaa iip-nokomu disa; kaa ti kano-laaba.
2CO 1:20 Siin sawaayak kaptoowu God ami weng kuka-daasa kaali boko-lomda: Kukup tambal kuuli, Nata kanolokomi no, kalaya tiinsula, Yesus ami talsa kawu, God ami bokola-lomda: Kanolan o, kalsa kaa, Yesus ali alik kanolaya, God ami weng kuka-daasa uyo as lap abuulin tap kesu. Kanola Yesus ami kukup kanun-soma kaata nokol utam, God ali ami weng boko kuka-daa kanolokomi kayi! kalsa kaali, suunkup kanu-bam nuli dong dakaayin-bam laaba kala kala-lom bokolup, Yi! faneng, kal-bomdupla God ami win uyo kufola-yaabup.
2CO 1:21 God ata-kup kipso, nuso, nikil alimal nuli ulelnala, nuli Kraist ami suunkup ilin unang tunum ke-sulup. Kemin, God ali dong dokoyala nikil alimal titil-foko tolnupla,
2CO 1:22 God ata alik numi kukuyilala talalu utamupya, God ali ti nuli ulelnala nuli fan almi unang tunum alik-daap ke-sulup. God almi Sinik Tambal kaali imiin tap kaa numi kuyilala numi aket tem kawu bombe no, kala-somdupya, utamuwa yi, God ami mafek mafek kusnum ma atin ti kuyokomi no, kalase uyo fan ti kuyokoma no, kebup o.
2CO 1:23 God ata-kup nami aket fukunin uyo talalu utep-na-som, aa nami din unokomi disa yo, kalali din itamin disa kebi kabak-ami miit kaali, utam-som keba kemin, nami din unin disa kebi kabak-ali dindi yim-bak-saan-biliya, ipyo fatom dakamalip o, kalaliya am kula daanba ayo nali Korin kaa din unin disa; kula bii ilanin tap kebi no.
2CO 1:24 Nikil nuli kipni tiin mo-bom bokoya-lomdup: Kanolin aket kaa fuku-daa utamiwa yi, Awu faneng kala, kal-bom kemin o, ke-bam bakayin tunum disa; aa, tildak kanolin o, kanolin o, kemin tunum disa; nuli utamuwa yi, Ibi God ami weng kaa yikik-kutal-fuku-bom-bilip kala kalalupya, nuyo kipso nikil alimal maakup kuyaku-diyaku-ke-lomdup, God ami ok uyo tabuu-bulupya, ibi fiyaap duu-bam-biliwa yo.
2CO 2:1 Nali siin kawu din kipni kukup mafak kunumsip kaami kalan kaata, yim-bak-saan-bilila, ipyo aket uluum kuluu-silip. Kemin, kaata nali atin ti aket fukun-daali yi, Asuk din itamdila, kipni kukup mafak kanubip kaami kalan kaa yim-bak-saan-bilila, ipyo aket uluum kuluulamip o, kalaliya kemin, nali asuk din unokomi disa yo, kalalila nali kela bom bi. Kemin,
2CO 2:2 kipni fiyaap kaata-kup duumon o, kalbi. Yale, kanola nami din ita-mokomi kaa, ibi aket uluum tabeyule, dok kano-lomdip fiyaap duuman o nokokomip disa yo, kala-somdila kemin, kipni fanang kaa din ita-mokomi disa yo, kalalila kemin, bom bi.
2CO 2:3 Kemin, siin kawu nali sukon ma dola kuya-lomdi titil weng kaa ti tituun-kup bokoyilila utabip. Kemin, nali kipni fanang kaa din unin disa bom ilila, kipni aket uyo fal-siki-lom kukup mafak ayo kambola keliwa kawu, kukup tambal kaata-kup nuu-biliwa, nami din unokomi kaa, kipni kukup mafak uyo utam-somdila, aket uluum kep-namu no. Nali din kipni kukup tambal kaata-kup, utamdiya fiyaap duumon o, kebi ko. Nali din ulila, Ipni aket mafak nami kukaap-nin uyo lukuuyu kulaabip u, kala kalaliya kaata nali fiyaap duu-mokomi. Kemin ale, nami utabi kaali, alik kipkal kaa fiyaap duu-mokomip o, kalbi.
2CO 2:4 Kemin, nali siin kawu sukon ma dola kipni kuyasii kaali, nami aket tem uluum dukum-kup kep-nan-bulula ama-bamdila, sukon kaa dola kuyasii. Kemin, nali sukon kuyila: Kipyo! aket uluum tabeyak i! kalalila dola kuyasii disa. Kemin ale, kuyiliya utamiwa yi, Ali numi aket kaa dukum-kup kuya-laaba no, kalin o, kala kalalila, sukon kaa dola kuyasii ko.
2CO 2:5 Kemin, tunum ma ami ban kese kaa, nali aket uluum kep-nase. Yale, kaa nata-kup disa; unang tunum iip maakup maakup yakal ti kipni aket uluum kuyila kese. Kemin, kunuba kaata, alik numi aket uluum kuyase. Kata, nami aket fukunbi kaali, ibi suunkup ami ban kemin kaami maan ayo kukaan-bilip umtal-daalama no.
2CO 2:6 Yaapkan kibi ami ban wakamin kaami kalan kaata, du tela-tela-kem-tabasip; kanumin ayo ti kutoop kulu dii kulaalamip o.
2CO 2:7 Kemin, kamala kuyaku ibi ami ban kese kaami maan kukaan-bilipla, ayo aket fal-sikise kemin, kulu lukuuyilu asuk ayo dibii-tildang iltipni iipyak tem daa ayo dong dakaalin weng kaata kukaan-bilipla, ami God ami lak duu-yaamin kaayo, titil fokolak. Ale, ibi kanola ami kukup tambal ayo ma kukaalin disa kemip namti, ali asuk atin ti aket uluum dukum ma kuluu-lomdala, ami God ami lak duu ilin kaayo, kulaa kela yang banokoma no.
2CO 2:8 Nalmi nak-tunum kusal, kipyo! Nali bokoyilile, kamala kaa ti kukup tambal kaata tunum kaa kukon-bam ale, Nuli kapni aket dukum kaata kup-tambup te! akiwa, atamak o, kala-somya ko.
2CO 2:9 Nali kamasi kawu ibi yam-kuku itamila yi, Nami weng uyo alik ti kutal-fukulip kala yokon o, kala kala-lomdi sukon tem kabak-ata bokoya-lomdi: Ibi mep tunum kaami ban kaali, maan telin o, kala-lomdi kanum bokoyasii.
2CO 2:10 Kemin, (nali itamiya, Ibi nami weng kuu weng san kutal-fukubip kala, kalalila,) kamala kawu asuk weng ma kuyon o, kali. Kemin, ibi ami kukup mafak kaa lukuuya kelin aa! Nakal kano ami kukup mafak uyo lukup-na kemin, ami ban uyo nami diim kalawu ban keba disa; iltipni diim kawu ban keba. Kemin, nali ami ban keba uyo lukup-ninba kaami miit kaa kabaak banula, kipta ami ban keba uyo lukuuyimba kaami miit kuuta uta uta kebu. Katale, nami aket fukunin kaa, nikil alimal iyo nuli mafek mafek uyo dotulupla disa kelule, ibi tambal-kup bomdiwa yo, kala-lomdila, Kraist ami tiin diim kawu, nali tunum ami ban keba uyo lukup-ninba.
2CO 2:11 Kanola talalulokomup kaata, Setaan ayo liip ifelup tiltam God ami unang tunum numi aket fukunin kaayo, ku-mafak-daayila kukup mafak kaa ma nolokomup dinim. Kaa dok kata naa kalolip: Alik nokol utamupla, Setaan ayo tal numi aket tem uyo ku-mafak-daayon i, kal-bomda kaami liip uyo ti suunkup fen-tal-une-bamda tiltam talon o, keba ko.
2CO 2:12 Nali siin kawu, Kraist ami sang kaata-kup, bakayila yakyak bilin abip ma Troas aba utamila, God Dukum ata unang tunum imi aket fukunin ayo dotuyila iyo balili-kala bom ami weng ayo weng san-kaamum o, kebip o, kali. Katale,
2CO 2:13 utamiya, Nalmi naktum Taitus kaa tilin disa kala kalaliya, nayo aket uluum tabep-nula, nayo kawu ilokin disa; kulaa kela uni. Siin kaali, nali Troas kaa unin disa, ilom Taitus ami bokola-lomdi: Kapta nami abiin kaa kuluu-lomdap tal aba din Korin unokomap kaali, din ulawa, Korin kasel imi aket fukunin uyo tambal-kup keyinbu ne? mafak keyinbu ne? kala kalalap weng ayo kutama tal Troas kalawu nitam-ilomdap nayo bokop-nan o, kala, Taitus ami kanum bokola-lomdi dabaali umba. Yale, ali tilin disa yo, kalaliya, asuk Troas kala ilokomi disa kala kalaliya, Troas kasel iyo weng umuuyila keya kulaa, Taitus ami fen yakyak bital Provins Masedonia tili ko.
2CO 2:14 Kemin, kulaa tal Taitus ayo atamile, kipni sang ayo bokop-nala, Nayo, God ami yaap ke yo, aki ko. Nami God ami yaap ke yo, akan-kaabi kaami miit kabak-ali, God ali almi Man Yesus ayo uldaa-dabuula ali tiltam Kamokim Dukum ke-lomda ata numi waasi keyon o, kala tal-ilomda ata ata kelaya, nuli kabaak ban-ilom almi kalabus tunum tap kelupla, ata dusiin-daa unba-balala, nuta yak ami daang tem abupla, alik iyo numi itafiin-umbip. Kanolin kemin, God ali nikil nuyo ulelna tal-une-bam Kraist ami sang kaata nuyo bakayin-bulupya, tunum imi mafek mafek kaami tang tumu-lomdip tang tambal o, kala-laabip ultap kemin, am bokon kala dik-daa kulaasu kaami unang tunum deng-kup fikip-fikip tiinaasip iyo weng sandiwa weng uyo kaal-ke utam kebip.
2CO 2:15 Kanola nikil nuli Yesus ami sang kaata, unang tunum imi bakayila-tal-une-buluwa, dukuma-tala-bulula, God ali fiyaap duuba. Numi kanubup kaali, mafek mafek dulul ta tang kulii-uneba tap keluya, unang tunum malo ma tang mafak taba-bom-bala atam suunbip alaltap ke, God ami weng uyo atam suun-daa yang taan-yaamin liip une-balale, malo ma ita tang tambal taba bom-bala, fiyaap duubip ililtap ke, God ami weng kaa fiyaap duu-bam weng san suunkup ilin liip kaata, tabuu une-bala-kem-tabasip. Kemin, kaa kanta kanolin ok awak dukum kaa tabuulama disa. Aa, alami titil uyo taang kaloma dinim; God maakup ata-kup titil kaa kuyilaya kanu-mokomup.
2CO 2:17 Kemin, nikil nuli tifan Kraist ami okok kamaalin tunum kemin ale, tunum kusnum yaapkan imi aket fukunin kaali, weng kala bakayin-bulup unang tunum ita moni kukaayin-bilipla, ita tiltam bung kayaakal kelum o, kal-bomdip, God ami weng uyo kukuyup kawo! kala kasen-fakayimbip. Katale, nikil nuli ililtap disa; God akal nuli ulela-lomda yim-baala din-ilomdup, ami sang kaata-kup ipni bakayinbup, ale kuno Kraist ami ok tabolin tunum ke-sulup. Kemin, nuli ami weng kaa bakayin-bam moni kaamum o, kala-somdupla disa; nuli ami aket dukum-kup kola bomdup, ami tiin diim kawu tituun weng kaata-kup bakayin-bulupya, ayo fiyaap duumak o, kalalupla nuyo kaali bakayinbup o.
2CO 3:1 Kabi boko-lomdap: Pol nikil iyo kala-bomdip ilmi win kii kufun-tal-unebip o, kebap ema? Disa. Kaa nulmi win kaa kufubup disa; ibi nuli itamiwa nuli kanta no, kalbip. Kemin, nuli asuk sang kanolin kaali, maso ma bokoyokomup dinim. Unang tunum numi kukup ma kaami sang kaata, kipni bokoyon o, kali kemin, dotu weng san iliwa! Kanola tunum naknak ma kapni atamsap dinim tunum ma ayo tal kipni abip kalaba talon o, kala namti, ami aptum ma abip kasel iyo talalu atamsip kiita, sukon ma dola boko-lom: Kalawaali ti tunum tambal-kup tabasa. Kemin, kaami weng kaata-kup weng san-kaa-bamdip ami win ayo kufolik o, kalaya, tunum babon soyim ami kolala, ata sukon ayo kuliila din abip kasel imi kuyilaya ti yaap ke talap o, kalalip am aye anang ma dotu-lom kolokomip. Yale, nikil nuli sukon kanolin kala kulii-tal kuya-yaabup disa. Aa, kipkal sukon kanolin uyo ma kuyip kulii-din abip ma daayila-yaabup disa yo.
2CO 3:2 Kipkal numi sukon tap. Kemin, kaa dok kata naa kalolip: Abip ma ma yaapkan iyo weng saniwa, Pol nikil ili Korin kasel imi kukuyin-bilip, kukup tambal kaata, kutal-fukubip o, kala utamipla, Pol nikil ili fan Yesus almi kalaan tunum u! kebip. Kemin, kaata nikil numi abip ma ma tal-unemup uyo, alik ili ti yaap ke tilip o, kalalip, fiyaap duu numi weng kaayo, talalu weng san-kan-umbip. Kanubip kala, kalalupla, sukon tem uyo boko-lomdu: Pol nikil kiili, tunum tambal o, kalbu kaata ma kulii-din abip ma ma imi kuyokomup disa.
2CO 3:3 Ibi Kraist ami sukon dolsa tap, nikil nuta kulii-tal unang tunum kuya-sulup. Sawaayak kawu, God ata kamasi diildiil weng ma kutii tuum diim kabaku dola konsa. Kaa Moses ata kulii-tal unang tunum imi kuyinsa. Yale, ibi tuum diim fuut aye, ing aa, alaltap disa; God tiin kawang miit kayaakim almi Sinik Tambal ata dabaala tal aba yak kipni aket tem unse. Sinik kaata, fut tiimin alaltap ke dolase. Kemin, kaali God ayo ami Sinik ata kuyak kipni aket tem tiiyila, fal-siki yim-tiilaya kukup tambal kaata kutal-fukuliwa, kayak kayak iyo itamipla yi, Kraist ata fal-siki-yimuba kala kalbip o.
2CO 3:4 Kemin, nikil nuli utamuwa yi, Kraist alta taba-lom ibi fal-kela-yimula tiltam kama unang tunum ke-silip kala, kalalupla, nuyo utamuwa yi, Kaali tifan, God alta taba-lom nuli ulelna ami ok kaa ti tambal-kup tabuu kulii-tabin o, kalase kala, kala-sulup.
2CO 3:5 Lale, fan kalaan tunum nuta-kup taang-kala, God ami ok kaa talalu tabuulalup dinim. Aa, nulmi win kaa kufumin daa; God almi titil kaata kukaayin-balaya, almi ok kala talalu tambal-kup kutal-fuku talabup o.
2CO 3:6 Nuli God almi kalaan tunum kemin, God alalta numi dong dokoya-lom ami titil kaata kuya-lomda yim-baala tal-sulup. Kemin, nuli ami kama weng kuka-daasa kaata, unang tunum imi kukaayin o, kala-lomda yim-baala tal-sulup. Kemin, siin sawaayak kawu, God ami weng kutiiyinsa uyo, Moses ami kola, akal kulii-tal Israel unang tunum imi kuyinsa. Lale, ili talalu kutal-fukulin disa ke, taan-ilom maaklo kesip. Katale, God ami alokso weng akal almi kusnum ma asuk kutiiyase kaata, kulii-tal kuya-sulup kaali, boko-lomda: God ami Sinik dabaala tal unang tunum imi diim abamnaya, ata dong dakaayin-balaya, kama unang tunum ke-lom, God ayo kaata kanolin o, keba kaata-kup, kutal-fuku-bomdipla suunkup ilokomip o, kala God ami alokso weng uyo kanum bokosa no.
2CO 3:7 Kemin, God ali siin ami weng ayo kuka-daa, tuum kom diim kabaku dola Moses ami kolala, God ami dawang uyo yak Moses ami tibi kun diim abamnula talsa. God ali amdu tikiin kawu kelalaya, Moses ayo tunum unang imi bilip tildaak itamon o, kalala tala-bala ami tiin matum diim dawang ayo timit-timit tala-bulu tildaak tala. Katale, Moses ami tiin matum diim dawang ayo ti kano bom-balaya, tala Israel iyo talalu tiin soko dela-lom atamsip disa. Kemin, God ami kamosinim weng kutiisa kaa, dok kano-somdu tunum unang imi saaka-lom maaklo kemin kaami liip kaa bak-daa katiiyamu disa. Lale, God ayo weng kutiilaya kawu, unang tunum kii dawang kulaa atamsip.
2CO 3:8 Katale, God ami Sinik Tambal ami kama alokso weng kutiiyase kaami kulii-tal kufose kaami dawang kaata ata ata ke-lomda unang tunum imi aket tem uyo iilfoyale, siin kaami dawang kaata kabaak bana kesa. Kaami dawang ayo daak daak un-bomda disa ke-lokoma disa; ali ti kano amiitsa.
2CO 3:9 Kamosinim weng kutiisa uyo boko-lomdu: Tunum unang kii kanta weng kala, weng selin disa ban-wakamin-kup kebip kemin, nali yim-bak-saan-bilila, kiili taan-ilom maaklo ke-lokomip kayi! kala, kanum bokosu kulaali tambal. Lale, kamala kulu God ami kama alokso weng kutiiyase namti kalabuu: God ali tunum unang imi ban uyo kukan-tiiya-lomda imi aket ayo fal-siki-yimulala tiltam almi kama unang tunum alik-daap kamaanbip o. Alokso weng kutiiyase kaata ti atin tambalkan o. Kaata, ata ata kelaya, diil weng kuluuli taldaak minlo tem unsuu.
2CO 3:10 Uli kanosuu kemin, kamala kaata God ami weng ma kutiiyase kaata atin ti ata ata kelaya, siin umi weng kuluu atin ti kabaak ban-ilom win dinim kesu.
2CO 3:11 Siin kaami weng kaali, kiin taap weng kemin, daa ilanin tap keluya, God ami kama weng kutiiyase kaata, atin ti ata ata ke-lomda, kamasi diildiil weng umi abiin yukul kuluu-lomda tiltam amiit weng kesa.
2CO 3:12 Kemin, nikil nuli fan utamuwa yi, God ami alokso weng kutiiyase kaali, suun amiit weng uu, kalaluwa kuwakan-umbup disa; God ami alokso weng uyo unang tunum kii fatap-kup bakayila-tabasup.
2CO 3:13 God ami dawang Moses ami tiin matum diim abamnu namti kulaata timit-timit tala-buluya, ayo ilim ma kuluu-lomda almi tiin matum kaayo, katiisa kaa, Moses ami aket fukunin kaali, Israel ili God ami dawang namti kulaata timit kalin so kem-talabu no, kala utam-sinomdip, Awu! kaba um-bomdu disa kelu no, kalolip o, kala-lomda tiin matum kaayo katiisa. Yale, nuli Moses ami kanosa tap ke nikil nuli God ami weng o, kala dawang tambal kalawaali kuwakan-umbup disa.
2CO 3:14 Kemin, sawaayak kaa Israel ili aket fukunin tambal disa. Kemin, ili dok kano talalu God ami weng kuu utam weng san-ilom kaal-kelamip disa, ke-bilipla, kulaa Moses ayo taana kela tiinsipla, kamala kuluwaakal ti kanubip. Israel ili tala-tala-ke God ami siin diildiil weng kutiiyinsa kaali, tik-tiibip yakal kuno ti aket fukunin tambal disa; imi aket fukunin ayo babon-bam ilim ta tiin matum akiibip tap ke-lomdip, bom bii iip maakup maakup ma ita yak Kraist ami diim fep-nipla kulu, ilim kaal o kala babon-bam ilin uyo kukan-tiiyilaya, kaata suunkup God ami weng uyo talalu weng san-kaa-bamdip iyo kuyak aket tem dakan-umbip.
2CO 3:15 Kemin, asuk maso ma bokolokomi. Moses ali kamasi God ami weng yak Sukon Tem daa dolsa uyo yakyak kulii umbital kulaa diilu, Juda imi suunkup tik-tii-bam dotu kaal-kelamip dinim kaali, ilim kaal fal-daalip tildaak ilmi tiin matum akiibu tap ken-umbip kemin, ili kalok kano-lom dotu utamalip dinim kebip.
2CO 3:16 Katale, kanola kanta imi aket fanang uyo fal-siki-lom Kamokim ami kolokomip kawu, Kamokim ata imi babon-bam ilin ilim kaal tap akiisip ayo tik-duu kukan-tiiyala kawu, God ami weng uyo talalu weng san kutal-fukulokomip.
2CO 3:17 Kemin, nami weng kala boko-lomdi: Kamokim o, kebi kaalile, Yesus ami Sinik Tambal ami sang kulaata kemin, Kamokim Yesus ami Sinik numi diim kawu ilokoma kaa, dok kanolin kaata taba-lomda nuli yim-buu yim-baak-molokoma ni? Moses ami Lo so, mafek mafek kusnum iso, ita ma tiltam-ilomdip nuli sok de-yimulokomip disa; Yesus ami Sinik ata numi siin kukup kaami sok ayo baayala, dalaal kebup.
2CO 3:18 Kemin, kamala kalaali mafek mafek ma kaata taba-lomda Kristen numi tiin matum kaa akiilin disa; nuli ok sinik altap ke numi Kamokim Yesus ami yokon dawang ayo kuluu-lomdup, nak-tunum kusal kayak kayak imi kukuyilup, yakal nuli itamipla yi, Yesus ami kukup uyo kiimi diim kawu bombuu kala, kala-som ale, Yesus ami Sinik kaata, taba iyo fal-siki yim-tiilala, tiltam Yesus altap ke tal bomdiwa, ami kukup tambal kaayo, maso ma nuumum o kala-lomdip kulii yakyak talabip o, kal-bom kanubip o.
2CO 4:1 Nikil nuli utamupla, Nuli God ami waasi unang tunum la, God ata aket balili-kalin uyo kuya-lomda, nuli ulela yim-tii dong dokoyila bom-balaya, ami aket balili-kalin diim kawu, okok kebup o, kalbup. Kemin, mafek mafek mafak tiltam numi diim abebu kaali, nuli titil-foko talabup.
2CO 4:2 Yale, tunum malo ma iyo boko-lomdip: Pol nikil ili unang tunum kiimi ibakayinbip o! kalbip. Lale, nikil nuli kukup mafak kuwaasu kaata ma kanu-bamdup, God ami ok uyo tabun-umbup disa; nuli ibakayin-bam kipni aket kufuyinbup disa; nuli God ami weng kaa fal-siki ku-kaltam ku-kaldaak-ke-bam ku-mafak-dakabup disa. Kaa disa te! Nuli ti God ami tituun-kup tabin weng kaata-kup, kufo bakayin-bam ale, God ami tiin diim so, unang tunum imi tiin diim iso, kiili ti tituun-kup tabasu kukup kaata-kup, kutal-fuku-buluwa, iyo itamipla yi, Nuli God ami bokoya-lomda: Kaata kanumin o, kalba kaata-kup, kanubip o, yimbip.
2CO 4:3 Kanola nikil nuli God ami weng tambal kaa bakan-talabup kalawaali, kuwaasu weng so ma bakabup disa; unang tunum iyo din liip ma kawu bomdip ili maaklo kelum o, kalbip kiita-kup weng sanamip disa kelip o.
2CO 4:4 Kanolin unang tunum kiili, tawaal diim kalaami sinik mafak mafak imi kamokim Setaan ata taba-lomda, unang tunum imi aket fukunin kaami liip uyo bak-daaya-lom, iyo yim-tama yang kutamiip tem kabang daalaya, atin ti babon-daasip. Kemin, ili dok kano-somdipla utamiwa yi, God ami weng uyo, faneng u! kalalip utamalip dinim. Kanola God ami weng tambal uyo tal imi talang tem une-bam aa, Yesus ami dawang uyo tal imi diim abe-bam kebu. Katale, ili kaa utamalip disa, kelipya, imi aket tem kaali, iilfolamu disa kelu no. Kraist maakup ata-kup Aalap God alaltap kemin, alalta God ami lak duulin unang tunum numi God ami kukup tambal uyo kukuyinba-kup, God ali kanolin kemin, nokol utafiibup.
2CO 4:5 God ami weng kala kufun-talabup kaa, nulmi win kaata, kufu-bamdup nulmi sang kaata baka-bulupla, nulmi win kaata kufuyin o, kebup disa; numi weng kala bakabup kaali: Yesus Kraist kaa nulmi Kamokim o, akan-kaa-bam ale, ami sang kaata-kup bakan-talabup. Kemin, Yesus ali numi yim-baala tal kipni dong dakaayum o, kalalup talabup, nuli kuno saak kipni okok-kamayin tunum kesup taa!
2CO 4:6 God ami dawang falala-kalin kalawaali siin sawaayak kawu, God ali kamosinim am bokon kala dik-daa kulaasu kawu talalu kutiisa. La, kuuli kutamiip tem kawu ilu kala, kala-lom bokola: Tawaal, kubi falala-kalan o, kalaya, maak fak-daalin tap tawaal diim uyo falala-kup kalsu no. Ultap kemin, God ata nolaya, ami dawang kaakal numi aket tem kaldak iilfoyilala, aket bam-daayu, Kraist ami kukup uyo utamuwa yi, Aalap God akal ti kanolin kala, kalbup.
2CO 4:7 Kemin, nikil numi God ami weng tambal uyo kulii-talabup kaa, nuli akim ket tap ke-lom nuli titil dinim kemin, God ami titil diim kawu God almi weng atin tambal-kup tabasu kaata bakan-talabup. God ami aket fukunin kaa, Nami weng tambal kaluuta, tawaal diim tunum iip maakup maakup kiimi kuyilila, isiik kulii-din unang tunum imi bakayila-tal-une-bilipla, alik kii utamiwa yi, Nikil ili titil disa. Lale, God maakup ata-kup titil sinoyim kemin, alalta nuli dong dakaayin-balaya, okok kebip kala, yikin o, kalalaya kawu, nikil numi kuyila kulii-bomdup bakayila-tal-unebup o.
2CO 4:8 Mafek mafek mafak yaapkan iyo tiltam kalaan tunum numi diim abebip. Kata, nuli yelu daak ababup dinim; aa, mafek mafek kuu uta uta kebu disa yo. Kemin, nuli utamupla yi, Kanolin aket uluum kaami miit kuu, utabup disa. La, kala kanubu umi uluum kaa nuli boko-lomdup: God ami miit tem kawu bom-bulup kaa, kulaa-lom kuno imi weng bakayinbup uyo kulaa kela, yang banum i! kalbup disa.
2CO 4:9 Waasi ita numi kukup mafak kaa kukaayinbip. Yale, numi God ali numi Aatumen kemin, ali nuli kamboyila yak waasi imi sikil diim abebup disa; kuno ye-bam kukup mafak kukaayin-bilip bii umtal-daa ti taanakin. Lale, God ata numi titil kuyila tam tiin yaawa-laa-bamdupla, God ami weng kaata-kup weng san-kaa-bam kanum yakyak talabup.
2CO 4:10 Kano siin kawu waasi ita taba-lomdip Yesus aalip taanse. Kemin, kanola ti suunkup waasi iyo taba nikil nokol yelum o, kem-tabasip. Ya, God ayo dong dakaayin-balala, nuli kaal dinim tambal-kup bom-buluwa, ibi utamiwa yi, Yesus ali taan-ilomda tam tiinda tal nikil imi iipyak tem kaldaku bombe kala kebip.
2CO 4:11 Taanin disa bom-bulup kawu, nuli Yesus ami sang kaata, unang tunum imi bakayila-yaabup kaami kalan kaata, suunkup waasi ita yelum o, kal-biliwa, unang tunum yakal itam-talaalip, Nikil nuyo anulip taanip kalokin. Lale, Yesus taanda tam tiinse suunkup ilin tunum ata nikil numi iipyak tem kawu bomdala, dong dakaayinba no, kebip.
2CO 4:12 Yesus ami weng kaami kalan kaata, waasi ita suunkup nikil kii yelip saaknik o, ken-umbip. Kata, nuli kipni lak kaata duu-lomdupya, ibi ti kano suunkup ilin o, kalaluwa, Yesus ami sang uyo bakayimbup o.
2CO 4:13 Siin sawaayak kawu, tunum ma ata God ami Sukon Tem uyo dola boko-lomda: Nali utami yi, God ami weng kaali, ti faneng tituun weng kala, kalaliya, nak-tunum kusal imi bakayinbi no, kalsa. Kemin ale, ultap nokol kaali utam, God ami weng kuuli, fan tituun weng o, kalaluwa, nuli angtiil yol uyo kuno utam kulaa-bomduwa, nak-tunum kusal kii bakaya-tal-unebup kaami miit uyo kaa dok kata naa kalolip:
2CO 4:14 nokol utamupla, God ata Kamokim Yesus ami dafola tam tiin-ilomda, nuso bombe kala, kala-lomdup kawu utamuwa yi, Ilom am ma daanula, nikil alimal numi taanokomup uyo alta yim-folala nuyo tam tiinup yim-tama tam Yesus almi diim kawu tiilaya, aso nikil alimal maakup ilokomup kala, kalalupya kemin, angtiil yol uyo kuno tiin uta-bomdupla, nak-tunum kusal imi bakayinbup.
2CO 4:15 Kemin, nulmi angtiil lak uyo duulakin disa; maas kewa bom kipni dong dakaaya-bulupla kemin, nikil numi aket fukunin kaa, Unang tunum kusnum yaapkan iyo God ami disa misiim kawu iyo dong dakaayin kukup kaata, kuluu-lomdiwa yaapnin o. Kanolokoma kaata, yakal boko-lomdip: Yaap ke yo, kemin kaata, kanumin-kup ken tam-tam-ke-bamdiple, God ami win ayo kufolokomip o, kalbup.
2CO 4:16 Fan, God ata nuli yim-fola asuk tam tiinokomup kala, kalaluwa kemin, nikil nuli aket fuku-daaluwa, kaa fan angtiil yol kaa kuluu umtal-daa-laabup. Yale, God ami lak duu-sulup uyo kulaa-som aa, ami weng bakayinbup uyo kewa kelum o, kalbup disa; nuli ti suunkup unang sawol tunum sawol iltap ke-bomduwa, numi angtiil kun tem uyo titil dinim daklis-kup kalsip. Yale, God ali numi aket tem kaayo, talalu kutiiya, numi sinik ayo dong dakaayin-balaya, nuyo suunkup titil-foko-tabasup.
2CO 4:17 Kemin, numi kanolin aket uluum kaabup uyo daa ilanin tap ke abiltap disa ke-lokomu. Kemin, kanolin aket uluum katip sakap kulu abiil tikiin kaa numi aket uluum kala fakabup kaata, fal-siki-yimu-lom numi fiyaap duumin tiltam talokomu kaali ti awak sakbaalkan ale, suunkup kano fiyaap duu-bam God aso maakup ilokomup. Kemin, numi aket uluum kaa kabaak banula, atin ti fiyaap duumin kaata ti, uta uta keluya, kaa siksiilamup disa.
2CO 4:18 Kanolin kemin, tawaal diim kalawiimi mafek mafek tiin ta itafiibup kaata, ilanin tap kelula, disa ke-lokomu ale, abiil tikiin kaami mafek mafek atamin disa bom-bulup kaata ti, kano suunkup ilokomu no, kal-bomduwa, nikil nuli tawaal diim kaami aket uluum kuu ma dukum-kup fanang dakabup disa; ilom am ma daanula, abiil tikiin kawu fiyaap duumin abiin kaa, tiinokomup kaami aket kaata yan-buluya bom-bulup ko.
2CO 5:1 Nokol kanolin uyo utamsup, numi tiil kala bombuu kaali, tawaal diim kuluwaami kiin-laap am delap bombuu ultap kaami tem kaptamu bom-bulup. Numi taandup as kuli ke-wokomup uyo, God ata numi sinik ayo tiil kusnum ma kuyokoma. Tiil kusnum kaali, tunum ilta sikil ta am desip ultap disa! God almi sikil ta abiil tikiin kawu am desa ultap kemin, tiil kusnum kuuli, suunkup ilin kaami angtiil kaata, kuyokoma no, kalaluwa kemin, nuli God ami lak duu-sulup uyo, kulaa-som aa, ami weng bakayin uyo kulaa kelum o, kalbup disa.
2CO 5:2 Kamala kala bom-bulup kaali, numi angtiil kaali, kiin-laap am ultap kutamu bomdupla kemin, aket uluum-kup keya-bulula, bom-bulup kemin, numi aket fukunin dukum kaali, numi am kaa abiil tikiin kawu buu kaali, nulmi angtiil kusnum kaa God ata kuyilaya suunkup ilum o, kebup.
2CO 5:3 Nuli saaknupla kawu, God ayo angtiil kusnum ma numi kuyokoma. Kemin, nuli sinik kaata-kup ilokomup disa.
2CO 5:4 Kulaa faneng, nuli kiin-laap am kutamu bomdupla, aket uluum tabe-bamdup aket yaapkan-kup fanang dakamsi kela-kela-kem-laabup kaa, nuli taandupla, siin kaami angtiil kala bombe kuuta kewum o, kalaluwa disa; numi aket fukunin kaali, God ata angtiil kusnum ma kuyila nulmi kamasi angtiil kalawuuta, tiltam ukol kusnum ma keluya nuli suunkup ilum o, kalbup.
2CO 5:5 God alalta ti, suunkup ilin o, kala-lomda numi aket tem kaldak-ali talalu-yim-tii-lomda, almi Sinik Tambal kaata kuyase. Kemin, God ami aket fukunin kaali, Mep nalmi Sinik Tambal kaasiik imiin kuyilila sulule, mulo kaptamu mafek mafek anung dukum o, kala, angtiil kusnum kaasole, suunkup ilin kaaso, kiita alik atin ti kuyokomi kayi! kala-lomda, almi Sinik Tambal kaasiik kuyase no, kalaliwa, Faneng nulmi atin ti alik kuyokoma o, kebup o.
2CO 5:6 Numi kanubup kuuta, taba-lomdu nikil numi aket tem kaayo, suunkup dong dakaayin-buluya, suunin disa fiyaap-kup duun-yaabup. Kemin, kamala kulu nuli Kamokim Yesus ayo tiin dik-yak dii atamdupya, aso yaap tal-unebup disa; lale, ami lak duu-laamin kaali kulaa ke-lokomup disa la, utamupla, U, fan Kamokim ami asuk talokoma kaami liip kaata, fen-bam tambal-kup tal-unebup. Kemin, nokol utamupla yi, Kamala kala angtiil taanin disa bom-bulup kemin, din Kamokim Yesus kaa atamupla, aso maakup bom-bulup disa yo, kala kebup.
2CO 5:8 Kanubup katale, numi aket tem kaldak-ali suunkup suunin disa; fiyaap kaata duumin-kup laabup. Numi aket fukunin dukum kaali ti, numi as kuli uyo kutii kewa din atamupla, Kamokim Yesus aso ti nulmi abip alik-daap kawu ilum o, kalbup.
2CO 5:9 Lale, nulmi abip tituun kawu laabup aye, kulawu laabup aye, kaata ti, saak numi aket fukunin kaali, Kamokim Yesus ali bokoya-lomda: Yak kanolin kukup kaata kanumin o, kalba kaata-kup, kutal-fukuluwa kawu, ali fiyaap duumak o, kebup.
2CO 5:10 Kemin, kaami miit kaali, alik nuli din Kraist ami weng yim-bak-saanokoma kaami baan diim kawu fatap-nokomu. Kemin, tawaal diim kala bom-bulup kaali, kukup tambal kutal-fukulup aye, ban kemup kaa, Kraist ali tikip alik maakup maakup nuli itam-liiwula, numi kukup kaa dok kanolin kukup kaata, kanubup kala, kalale, kulaali ti kuno ti ulmi tiim kaata-kup tela-tela-ke-mokoma no.
2CO 5:11 Kanolin kemin, nikil nuli Kamokim Yesus ami yim-bak-saanokoma kaami atul kaata suun daalupya kemin, nuta unang tunum imi Yesus ami lak duulin o, kalalupya, suunkup nuli bakaya-tal-unen-tabasup. God ami tiin diim kaali, nuli atin ti fatap diim kawu bom-bilip o, keba tap nami aket fukunin kaa kipkal kanola itamiwa yi, Nikil kiili, fatap diim kuluwu bom-bilip u, yikik o, kal-bom kebi.
2CO 5:12 Mep numi weng bakayinbup kaa, nikil nulmi win kaata kufu-buluwa, ibi itam, Awu, kiili tunum tambal o, yikin o, kalaluwa disa; numi aket fukunin kaa, ipta-kup nulmi win kaata kufuyin o kalbup kemin, tunum malo ma iyo ilmi aket fukunin mafak bombu kaata, kuluu-lomdip ilmi tong kaata-kup baka-bam, Nuli Juda tituun ale, nuli God ami lotu ayo suunkup kamaalin o, kal-bom ale, nikil numi okok kebup kaata, itafii-bam daang tem weng bakayin-bam kebip kala, kalaluwa, kibi kiimi diim uyo numi fiyaap kaa duu-yin-bam, imi daang tem weng bakayinbip kaa, ipkal weng kaa maan tiiyin o, kal-bomduwa, numi ok sang kalawaali dolbup.
2CO 5:13 Malo ma ili boko-lomdip: Pol nikil kiili, babonin tunum ke-lomdip, kanubip o, kalbip. Yale, kaa nikil nokol ale, God akal, Nulmi san o, kalaluwa, ami ok kala okok-kem-tabasup. Kemin ale, ili boko-lomdip: Pol nikil iyo babonin dinim kanubip o, kalbip kaali, nuli ti tambal-kup bomdupya, titil-fak-daa-bomduwa, ibi dong dokoyum o, kalaluwa, ok kalawaali kanubup.
2CO 5:14 Kemin kabak-ali, nuli utamupya yi, Kraist ali numi mok inaya-lom aket kuyase kala, kalaluwa, ami ok kaata tabuusup. Kemin, nuli atabup kaali, tunum maakup Yesus Kraist ata-kup taba-lomda alik numi abiin kaata, kuluulaya taanse no, kala atamdupla, Ami taanse kabak-ali alik nuso ami diim kabaku taanin tap ke-sulup o, kalbup.
2CO 5:15 Ami aket fukunin kaali, Kabak-ata kanolila, unang tunum alik tawaal diim kala bom ilokomip iyo, ilmi aket kaa fukun-tal-unemin disa, kulaaliwa, nali imi dong dokoyon o, kalalila taani God ata nali nam-fola asuk tam tiinokomi. Kemin, nami aket kaata-kup fuku-dakan-tal-une-biliwa yo, kalalaya kemin, alik numi abiin kaata kuluu-lomda taanse.
2CO 5:16 Kanose no, kalaluwa, unang tunum nulumi kayaak imi kukup uyo itafii-bam ili dok kanola tiin bom-bilip kem-tabasup. Lale, kamala kalawaali maso ma kanubup disa yo. Ale, siin kaali, unang tunum nulmi kukup kaali utam-som, Kraist ami kukup kaayo utam keluwa kawu, ali dok kanolin tunum i? kala-sulup. Yale, kamala kala maso ma kanubup disa.
2CO 5:17 Kanola unang tunum ili ma Kraist ami diim kawu fewa bom-bilip namti, God ata kii talalu-yim-tiilala, tiltam atin ti kama unang tunum ke-lom, imi siin kaami aket fukunin ayo alik dinimnuya, alokso aket fukunin kaata-kup tiltam tabokomu.
2CO 5:18 Kamosinim kaa nuli God ami waasi kamaan-bam ilsup. Lale, God ali mafek mafek alik kiimi miit kayaakim kemin, almi aket fukunin kaata-kup, Kraist ayo dabaala taldaya, numi iliim boyalala, waasi ayo kambola-lomdup tiltam God aso, aket maakup keluple, God ayo almi waasi imi dong dokoya tiltam God aso, aket maakup kemin, kaami ok uyo numi kuyilaya, nuta ok kala tabuusup.
2CO 5:19 Kemin, numi unang tunum imi weng kukaayila-yaabup kaa, God ali Kraist ami diim kawu bomdala, tawaal diim kalaami unang tunum iyo talalu-yimula tiltam iso, aket maakup kelum o, kala-lomdala, kiili ban wakamin-kup kebip o, kalalaya, kuno maas keyinsa disa; nikil nuta ulelnala, almi waasi imi weng kukaayin-bulupla, tiltam God aso, aket maakup kemin, ami ok kaata-kup okok ken-umbup.
2CO 5:20 Kanolin kemin, nikil nuli uldaa-yim-buulala tiltam Kraist ami weng kulii-tal-unemin tunum ke-lomdupla, unang tunum imi bakayila-tabasup kaa, God alalta numi bon tem kaata ipni naan-daaya-lomda numi dong dokoyilala, ami weng kaali, unang tunum alik imi kukaayim-bam ale, Kraist almi weng kaata-kup, unang tunum alik imi bokoya-lomda: Atin ti nulmi naktum kusal kipyo! Ibi God aso waasi kela una-tala-kemin kukup uyo kela-lomdip, tiltam God aso aket maakup kelin o, kala nuyo bakayin-bam ken-umbup.
2CO 5:21 Kraist ali ban kemin dinim; la, God alalta numi ban wakamin alik uyo kulaala yak Kraist ami diim abamnula, ali fan ban kemin tunum alaltap kelaya taanse. Kemin, God ami aket fukuna kaali, Ili ban kemin unang tunum; la, kanoliya ili Kraist ami diim kawu fewa-lomdip, tiltam nalmi tiin diim kulu tituun-kup tabin unang tunum kelin o, kala-lomdala, God alalta kabak kanosa.
2CO 6:1 Yesus ami kalaan tunum nikil nuli God aso bomdup okok kebup kemin, nuta ipni weng ma dukum-kup bokoyum o, kalup kemin, weng san iliwa! God ayo boko-lomda: Unang tunum imi disa masiim kawu dong dakaayin-bam kapni iliim bomin am uyo daan tiltam tulu kala, kalaliya kawu, kapni weng uyo weng san-somdila dong dokop-tasii no, kalase. Kemin, siin kaa God ali kanum bokosa. Kemin, am kamala kula daana kalawaali, God ali kipni weng uyo weng san-ilomda, kipni iliim boyin am kaayo, daan tiltam tulu kemin, dik-daaliwa, akal ipni dong dokoyak o. Kanolin kemin, kibi God ata disa masiim kawu ipni dong dokoyase kaa, ibi maas kela-laamin daa; kuno kelipla tal ipni diim abamnak o!
2CO 6:3 Utamuwa yi, Misii unang tunum iyo nikil nuyo itam bokoya-lomdip: Pol anang imi kukup so, weng so kiili, atin ti maakup disa yo, kal-bomdip weng itafiimin weng bakayililp o, kala ili numi kukup kaa kanu-bam God ami okok kebup kaami kalan kaata, God ami daang ukolalip o, kalalupla, nuli ti kukup tangbal so, weng so, kiili maakup ma nun-umbup.
2CO 6:4 Ti kukup tambal kaata-kup kukuyin-buluwa, ibi nikil nuli itamiwa yi, Ili tifan God almi ok tabolin tunum kesip. Kemin, numi kanun-umbup kaali, yak mafek mafek mafak tal numi diim abamnu aye, aket uluum kuluulup aa, saak yam-mafak-daalu aye, kaali ti aket atul ke-yimbu disa; ti titil-fak-daa-lom, God ami weng uyo kukaayila-yaabup.
2CO 6:5 Numi waasi ita tal sok faklet aye, asukum aye, ta ye-bam ale, sok ta de-yam-bamdip, fuut-kaayin-bam, atul-fak-daka-bam ke-biliwa, nuli atin iluut ti titil-fak-daa fiit-bam okok ke-bamdupya, nuli tambal-kup ma akan-unemin dinim; ima tinap-kup atin umtal-dakamsup. Lale,
2CO 6:6 nuli ti kukup tambal kaata-kup tabuu-bom ale, aket fukunin tambal namti kalabuu kala, kutal-fuku-som aa, abiltap-siik aket atul tabemin dinim ke-bam aa, unang tunum imi kukup tambal ma kamayin-bamdup kem-yaabup kaali, nuli God ami Sinik Tambal ami titil kaata kuluu-lomdup, tunum kusnum imi aket ayo ti dukum-kup kukaayin-bam kemsup.
2CO 6:7 Kemin, nikil nuli kanu-bamdupya, God almi tituun-kup tabin weng kaata-kup kukaayin-bam ale, God ami titil diim kawu ok kaa ke-bam, nuli atin tituun-kup tabin kaami kukup kaata, waasi dinin kaami mafek mafek kiita, sikil awaanlo fuku tingtuplo fuku kelin tap, ke-lomdupla, tunum ita taba-lom numi yam-mafak-daalum o, kebip kiiyo, kabaak banipla keyila-yaabup.
2CO 6:8 Kemin, tunum malo ma kiita, numi win uyo ku-mafak-dakaayin-biliwale, kuno malo ma kiita, numi win kaa kufuyin-bilip, malo ma kiita weng mafak kukaayim-bilip, malo ma kiita yang tunum kusnum imi bokoya-lomdip: Pol nikil kiili ti, kukup tambal-kup kebip o, kal-bom kanu-bilipya, malo ma kiita imi aket fukunin kaata, Nikil kuliili kasen-fakayin-bam ibakayin tunum kayi! yakan-kan-umbip. Lale, nuli ti tituun weng kaata-kup bakayila-tabasup.
2CO 6:9 Kemin, tunum malo ma kiita boko-lom: Nikil ili win dinim o, kebip. Yale, yang abip ma ma kiimi unang tunum yaapkan ita nuli itamsip. Kemin ale, nuli ti saak-nakin tap keluwa, God ata dong dokoyilala, taanin disa bom-bulup; malo ma imi aket fukunin kaata, nikil imi ban kaami kalan kaata, God ayo taba-lom angtiil yol kukaayinba no, kem-laabip. La, mafek mafek mafak uyo ma tildak numi angtiil diim aba yelu taanin disa bom-bulup.
2CO 6:10 Kanola nikil nuli aket uluum uyo kuluu-yaabup. Yale, nuli kuluu utam-kewa-bomdup, suunkup God ami fiyaap-kup duu-bamdup; tunum iwaan kebup. Katale, nuyo God ami mafek mafek tambal tambal kiili, unang tunum yaapkan imi kukaayin-bamduple; nuli tawaal diim kalawiimi mafek mafek iyo disa kebip. Katale, nuli God ami mafek mafek yaapkan kiili, fuku-bam kem-tabasup o.
2CO 6:11 Atin nulmi nak-tunum kusal Korin kasel kipyo! Nuli kipni aket-kup yesu. Kemin, aket fukunin nulmi aket tem kaldaku bombuu kaa, ibi kuwaayilalup disa kemin, ipni alik kaa bokoyup.
2CO 6:12 Kemin, nuli kipni aket kaa lukuuyinsa disa; kipni aket ayo ti suunkup fukun-umbup. Yale, kipta numi aket uyo kuyilalup disa yo, kala-lomdip titil-kup tabasip.
2CO 6:13 Kalaali aalap ata man imi weng tem bakayinba tap keliya, weng kala bokoyon o, kali kemin, weng san iliwa! Numi kukup kala, kipni kanuyila-yaabup tap, kipsiik numi aket uyo alik kuyinbip-kup maan tiiyin o, kala-somla ko.
2CO 6:14 Yak tunum unang God ami lak duulin disa bom-bilip kiili, yakal alik tunum miit kusnum tap kemin, kibi iso tal-une-bam imi kukup nuubip kaa ipyo, dong dokoyip nuumin disa kemin, tituun-kup tabin kukup so, kukup mafak so, alep kiili, aptum kela una-tala-kemin disa. Kuno am daan-laamin so, kutamiip so, alep kii alep maakup aptum kela una-tala-ke kuyaku-diyaku-ke-lomdip alep tambal maakup ilokomip disa;
2CO 6:15 Kraist ali Setaan aso alep aket maakup kesip disa kemin, ili kanimin o, kalaliwa, tunum God ami lak duulin so, aa tunum God ami lak duulin disa iso, alep imi aket fukunin kaa maakup kaata-kup fukunokomip i? Disa te!
2CO 6:16 Nuli dok kano-lomdupla awem men uyo kulii-din God ami am awem kawu tiilupla, God aso aket maakup kelamup i? Disa. Kipkal utamsip taa! Kristen numi iipyak tem kaldak-ali tiin kawang miit kayaakim God almi am tituun alik kemin, kaami sang kaali, siin kawu God kaa boko-lomda: Nali iso bomdila imi iipyak tem kabaku tiin-bomdila, nata imi God keyilile, ita nami unang tunum kep-nip ke-lokomip o, kalsa.
2CO 6:17 Kanolin kemin, Dukum ayo weng maso ma boko-lomda kanum bokosa: Kibi nami lak duulin disa bom-bilip kii, ipso tal-unemin disa; kii yakal kamboyila takas yang ipkal iltipni baan ma kawu bomdiwa kayi! Ibi kukup mafak kaami aket kaa fukunin disa kemip namti, kaata nali yim-buu-lomdile,
2CO 6:18 kawu nata kipni kaalap keyilile, kipta nalmi tunum man kep-na-som ale, nalmi unang man kep-na ke-lokomip o, kala-lomda Tunum Dukum Titil Miit Kayaakim ata kanum bokosa ko.
2CO 7:1 Tifan nalmi nak-tunum kusal kipyo! God ami weng kala kuka-daa-lom boko-lomda: Nali kipso bomdila, kipni kaalap keyilile, kipta nami man kep-nip ke-lokomup o, kalsa kaali, nulmi diim kulu bombe kemin, nuli kukup mafak kaata, taba-lomdu numi angtiil so, aket tem so, kii yam-mafak-dakamin uyo, alik kulaalup unu, kewa atin tambal-kup bom ale, God ami atul kaata-kup suun-bam, kukup tambal kaata, suunkup kutal-fuku-bomduwa yo, kala-somla ko.
2CO 7:2 Kanola tunum malo ma ita bakayin-bamdip: Yi, Pol nikil iyo bomdip unang tunum imi kukup mafak kukaayila-tal-une-bam ale, imi Yesus ami lak duu-laamin uyo ku-mafak-dakaayila tal-une-bam, kasen-fakayin-bam, imi bung mafek mafek kaa, dakaayila-tal-une-bam kanun-umbip o, kalbip. Yale, nikil nuli kaa ma kanoya-sulup disa. Kemin, kibi kanubip imi weng kaa, weng san-kaamin disa; ibi ti numi aket-kup kuyila bomdiwa yo.
2CO 7:3 Nali weng kala bolop-yim-bamdi fatom kukaayon o, kalalila, bakabi dinim; kamosinim nami weng kala bokoya-lomdi: Nuli kipni aket-kup yesu no, kali kaali, ti faneng kemin, taan-laamin aa, tambal tiin kawong ilin aa, uta ma taba-lomdu nuta kipni aket kukaayinbup uyo loluya, kulaa lukuuyokomu disa.
2CO 7:4 Taitus ata weng kulii-tal bokop-na weng saniya, Ibi fan tiltam God ami kukup kaata-kup kutal-fukubip o, kalalila, kipni fiyaap kaata duubi. Kemin, kukup mafak alik iyo suunkup tal numi diim aben-umbu. Lale, kaata taba aket uluum awak uyo ma kup-ninsu disa; nali ti fiyaap aalap dukum-kup duubi no.
2CO 7:5 Siin kawu, nuli din Provins Masedonia bokon kawu un-sulup kaptam-ali, Nuli ma tiin-ilom fanang daalup yo, kalokin. Lale, uyo ma kanumsup disa. Disa ukol ulmi kukup mafak ukol ulmi akal alik akal alik uta tal numi diim abe-bulula, nuli tunum kusnum iso weng aal dikimin uyo bom-bulule, aket dukum-kup fukun-bam
2CO 7:6 kemsup. Lale, God ali tunum aket uluum kuluuba ayo dap-talalulala tiltam balili-kala-yaamin God kemin, ali Taitus ayo dabaala tal numi diim abamnala kulu, God ayo numi aket uluum ke-yimbu namti, yam-talalulala aket balili-kala-sulup.
2CO 7:7 Kemin, Taitus ayo tal nulmi diim abase kaata-kup, God ali talaba numi aket tem uyo yam-talalulala kawu, balili-kala-sulup disa; ipta Taitus ami aket fukunin ayo talalu kuteliwa, ayo aket balili-kalba-kup ata weng kalawuuli, kulii-talaya, kawu God ata numi aket tem uyo dotu kutiiyila numi aket kaa, balili-kala, ke-sulup. Taitus ata numi bokoya-lom: Korin kasel ili, Kwin, kaaso mafak kebup kawi! kala-lomdip imi aket fukunin uyo, Asuk Pol kaa atam-ilomdup, ami aket dukum-kup ma kolupla, aso nikil aket fanang maakup ke ilum o! kalbip kayi! nakaya kemin, nali fiyaap duumin kaali, atin ti akal ma kebi ko!
2CO 7:8 Nali utamiya, Nami kamasi sukon ma dola-lomdi titil tabin weng so, weng tem so, kiili kipni kuyilasii kaata, kipni aket tem uluum uyo kuyinbu kala, kalalila kemin, nakal ti aket uluum kaa kuluusii. Ya, kamala kala utamiya, Sukon kuuta taba-lomdu kibi aket uluum kuyasuu. Lale, bom bii ilinin tap kelin dinim o, kalbi kemin, nali sukon kaa kuyasii kaa, aket uluum ma kebi disa.
2CO 7:9 Nali kamala kalawaali fiyaap duubi. Yale, nali kipni aket uluum kuluu-silip kaami fiyaap kaa duubi disa. Siin kaali, nami weng kaata taba-lomdu ibi yam-mafak-daasuu daa; God ayo kipni aket uluum kaa kuyilala, ibi aket uluum ke-lomdip aket fal-siki-silip kaami fiyaap kaata duubi.
2CO 7:10 Kemin, unang tunum God ami aket fanang daa ban kebip kaami aket uluum dap-tiiyu kuuta, taba-lomdu unang tunum numi aket fal-sikiyu, God ami lak duulupla, alta numi fiyaap duu-bam talal-ila tabasa. Kemin, numi aket kaa, Nuli kanolup kaali, kwin, kaaso mafak kebup kawi! kala ifan o ye! kalokin dinim ke-lokomup. Ya, tawaal diim kaldaak-ami tunum imi kukup mafak kutal-fuku-bom aket uluum kaamin kaami kukup kaata tabamnula, unang tunum imi aket uyo fal-sikilin dinim ke-lomdip saaka-lom tiin kawong suunkup ilin dinim ke-lokomip kaali, kwin, kaaso mafak kebup kawi! kala ifan o ye! kalokomip.
2CO 7:11 Kemin, kipkal mafek mafek yak kipni diim abasuu kabak talalu utam-tamin! Kipni God ami aket fuku-bam ban kemin kaami aket uluum kaa kuyalala, kaata taba-lomdu kibi dong dakaayin-bulula, kukup tambal tambal kaata-kup kanum-solip kaali ti, aket uluum kuu tildak numi angtiil diim abu kala, kalalipla, ibi baan abiltap Pol ami bokoluwa, utama yi, Nuli ma ban kemin disa kelip yakak o, kalaliwa, kipni weng kaa nami alik daka-daa bokop-na-som ale, tunum ban kese ami weng mafak bakaan-bamdip, God ami atul suun-bam ke-bamdiwa, Pol ali numi fiyaap kaata duumak i! kalaliwa, mafek mafek mafak kalawuuli baan talalulup tambal-nuk o, kal-bomdipya, ibi tunum ban kese ayo titil-foko-lom lekbi dabak-mosip. Kemin, alik kipni kukup kaa kanu-bam talalsip kaa ti kukup tambal dukum kemin, nali itamila, Ibi dotu-lomdip ban dinim kelip kala, kalbi no.
2CO 7:12 Kulaa faneng, nali siin kawu kipni sukon ma dola kuyasii. Ya, nali tunum kaa ban kese aso, ami aptum kusal imi ban keyase iso, alep kiimi aket kaata fukun-somdila dolasii disa. Nami aket fukunbi kaali, dola kuyila ibi talalu utamiwa yi, God ayo Korin kasel iyo numi kukup uyo utamiwa yi, Pol ami aket-kup fukun-bomdip kanumsip o, keba kala, kalin o, kalalila, kabak-ata sukon ma kaali dola kuyasii no.
2CO 7:13 Kipni kukup kaa kanumsip kaata, taba-lomdu numi aket uluum uyo dak-daayu daak aba-lom balili-kup kalasuu ko. Kanola numi aket tem kaa balili-kala-yaamin kaata-kup kemsup disa. Utamupla yi, Alik ipta taba-lom Taitus ami aket uyo dong dakaan-bilipla, ami aket kaa balili-kala, fiyaap duula tala kala kalaluwa, nokol ti fiyaap dukum-kup duu-bam kebup.
2CO 7:14 Siin kaa, nali kipni tong ayo Taitus ami diim kawu bakamsi Taitus ami din unse kaa, ibi itamala yi, Korin kasel kalawiimi kukup kaali, faneng Pol ami weng bokop-nase tap kaata, kutal-fukusip kala kalala, ayo tal bokop-naya kaata, nali fatom ma kuluulin disa kebi. Kemin, nali suunkup weng tifan kaata-kup bakaya-laabi kemin, kanola ipni tong kaa Taitus ami bokolasi kaakal ti tifaneng tiltam tabasu.
2CO 7:15 Taitus ayo din kipni itamala, kipni aket fukunin uyo, Yi! ali tal yim-bak-saan-bamda katiiyon o, kala talaba ema yo? kala-lomdip ibi ami atam suun-daa-lom, wulwaal tap-tap-ke-bam am kaa koliwa, bomda weng uyo alik kipni bakayin-balaya, weng kaa weng san-kaam-solip. Kemin, Taitus ali tal kipni kanonsip kaami aket kabak-ata fukun-bamdala, kipni olen-yilin aket kaali, tiltam dukuma talabu.
2CO 7:16 Kemin, kamala kuluwaa nali utamila, Weng kula dolni kalawuuli ibi dotu yikik-kutal-fukulokomip kala, kala-somdila, nali kipni fiyaap duubi no.
2CO 8:1 Nak-tunum kusal kipyo! Nikil nuli Provins Masedonia kaptam-ami abip ma ma kiimi Kristen unang tunum God ata disa misiim kawu imi dong dakaayin-balala, mafek mafek kanum-tabasip kaami sang kaata, Korin kasel kipni bokoyum o, kalup kemin, dotu weng san ilipla!
2CO 8:2 Mafek mafek mafak yaapkan iyo tiltam Masedonia kayaak imi diim abe-bam yam-kukubip. Katale, ipyo utamiwa yi, Awu! ti God ata-kup kala, kalaliwa, atin ti God ami fiyaap-kup duu-bam iyo utamiwa yi, Kristen unang tunum Provins Judiya kaptam bom-bilip ili atin mafek mafek uyo iibip kala, kala-lomdip moni uyo afetu kutii-lom dong dokoyum o, kemsip kiimi mafek mafek kulaa katip lale, yaapkan iyo masiim kuluu imi kuya-silip.
2CO 8:3 Kaali ti nalmi tiin alep alep itamsii kemin, fan tituun-kup bokolokomi. Kemin, tuumon ayo ilmi aket fukunin kaata-kup kuka-daabip-kup mafek mafek uyo ti kuyokomup kala, kala-lom, kuyale, asuk mulo kawu maso ma kuyak tiip-tiiya ke-bamdiwa, yaapkan-kup kukaaya-solip. Kemin,
2CO 8:4 titil-fak-daa-lom weng dukum-kup bakaan-bamdip: Pol nikil ipta, Ayo, kalipla kawu, nuli Kristen unang tunum kusnum iso, kuyaku-diyaku-ke kuyak mim-daa moni ayo afetu-lom Judiya kayaak Kristen unang tunum bung dinim atin ti duluusip imi atin ti dong dakaayum o, kemsip.
2CO 8:5 Siin kawu, nikil nuli aket fuku-daa, Masedonia kayaak iyo moni kaa ma kuyokomip ema yo? kala-sulup. Lale, kaa moni kaata-kup kuya-silip disa; mafek mafek aalap dukum ma kaali, isiik Kamokim ami min lo tem kawu un-ilomdip almi alik-daap ke, God ami aket fukunin kaata-kup fuku-bamdip kawu, numi aket uyo kuyila-som ke-lomdiwa, moni ayo kuya-silip o.
2CO 8:6 Utamupla yi, Masedonia kayaak iyo moni kukaayimbip kala, kalaluwa, Korin kasel kipni aket kaa asuk fukunbup. Kemin, sawaayak Taitus ayo moni afetmin ok uyo din-ilomda, kipni diim kawu kufo afetbi kulaa kela talse kala, kalaluwa kawu, nuli dukum-kup bokola-lomdup: Kabi asuk din moni afetmin ok kaata dinimnu kewa-somdawa yo, anbup.
2CO 8:7 Kipni mafek mafek alik kii kanum-yaabip kaali ti kukup tambal namti kaa kanubip. God ami lak ayo talalu dukum-kup duule, iltipni God ami lak duubip kaami sang uyo titil-fak-daa kufu-bam ale, Kraist ami weng uyo kaal-ke utam ke-silip. Kanolin kaata kemin, God ami ok uyo atin tambal-kup ke-bamdiwa, numi aket uyo kuya kesip. Kemin, kanola ti moni afetmin kaami okok kemin tambal kakal ti kano tambal-kup kanu-bam ke-biliwa yo.
2CO 8:8 Nali kaa kipni weng dukum-kup bokoyila: Ibi kuno kanumin o, yakan-kaabi disa; faldak-tiimin weng bakayinbi kaali, nami aket fukunin uyo, Masedonia kasel imi mamdet kuyak daa-bomdip Judiya kasel imi mafek mafek dinimal iyo dong dakaayila-yaabip kaami sang kaata bokoyilila, Masedonia kayaak imi kukup tambal kanun-umbip ultap ke-bam, kipsiik unang tunum kusnum imi aket ma kukaayip kala, kalaliya, kabak-ata atamiya, kipni kukup kaa kaptum kusal olen-imbip kaali ti, fan kala kalon o, kalaliya, Masedonia kasel imi kukup kaami sang kaata bakayimbi.
2CO 8:9 Kemin, ipkal numi Kamokim Yesus Kraist ami olen-dakaayin kukup uyo utamsip. Ali abiil tikiin kaptam-ami mafek mafek kayaakim. Lale, ami kipni disa misiim kawu dong dokoyase kaata, ali tiltam bung dinim tunum bafinal ililtap ke-lomda ayo dong dokoyilase. Kanola, tunum bafinim kelila, nali ipni God ami mafek mafek yaapkan kiita imi kuyon o, kala-lomdala kabak kanose. Kemin, ipsiik kanola-lomdip Judiya kasel mafek mafek iibip kiimi dong dakaayilalip ko.
2CO 8:10 Kulaa nami aket fukunin namti, kipni bokoyokomi. Ibi yak wasital ma tal unse kaami diim kaali, tunum miit akal kusnum daa; iltipta moni ma afetmum o, kala-lom kipsiik iluu-lom moni ayo afetu-lom kulaalip bombuu. Siin kaa, ibi titil-fak-daa-lom moni uyo baan afetu kutiilum o, kemsip. Kemin, kanolin mafek mafek uyo, Kulaata nuli ti tiiknu kala kalip kawu, kamala kulu asuk titil-fak-daa afetulip disa kelu kela-lom, Judiya kasel imi kuyokomip kaali, tambal o.
2CO 8:12 Kemin, tunum ma ali ti mafek mafek kukaayin kukup kaata-kup kanumon o, kema namti, God ali tunum kaami kukup kanuba kaali tambal o, akokoma. Kemin ale, tunum ali mafek mafek katip kutal-fukuba kaa, God ali bokola-lomda: Dukum-kup ma kup-nan o, ken-umba disa; tunum ali mafek mafek katip ma kutal-fukuba namti, God ayo bokola-lomda: Katip maso ma kup-nan aa! akan-kaa-bam, kuno dukum kutal-fukuba namti, kaata dukum tap so ma kup-nan o, kal-bom kem-yaaba disa yo.
2CO 8:13 Kemin, nali bokoya-lomdi: Ibi moni dukum kaali, Judiya kasel imi kuyiwa, ita tambal-kup biliwale, kipta mafek mafek kaa duluulin o, kalbi disa. Nami aket fukunin kaali, Judiya kasel yakal ilmi alik ale, Korin kasel ipkal iltipni alik kemin disa; ti alik kuyak mim-daa maakup ke-bomdiwa yo, kalbi. Kemin,
2CO 8:14 am kamala kula daanba kaali, kipni mafek mafek yaapkan kiiyo kuluu-lom, tunum mafek mafek duluubip kiili, kipyo dong dokoyipla, iyo tiltam asuk iltip tap ke mafek mafek soyal ke-lokomip o. Ilom kuno, kipsiik mafek mafek duluulip namti, aa, kulaa isiik kipyo, ilmi bung yaapkan kiiyo, kuluu-lom dong dokoyilip ipkal asuk ililtap mafek mafek soyal ke-lokomip.
2CO 8:15 Ultap kemin, God ami Sukon Tem kabak-ali Israel imi bilin disanang bokon kawu bom-biliwa, God ata inin-inin akal alik kiita, kukaayin-bala faka-bam insip kaami sang uyo boko-lomdu: Inin-inin yaapkan foko kutiila ayo yaap in-balale, kuno katip foko kutiila akal iwa-yaamin dinim; kano yaap-kup im-bom kemsip o, kalsu. Kemin, iyo yaap in-bisip tap, ipkal kanola masiim kola una-tala-kemip namti, ipkal yaap ilokomip o.
2CO 8:16 Taitus ali God ata dong dokolala, ayo tiltam nulmi aket fukunin tap kela kala, kala-somdila, nali God ami yaap ke yo, anbi. Taitus ami aket fukunin akal ti ibi dong dakaayon o, kal-bom keba.
2CO 8:17 Kemin, nuli utamuwa yi, Taitus ali ok kalumi aket kaa ti aket dukum an-bom-bulula, alami aket fukunin kaa asuk din dong dakaayon o, kalba kala, kalalupla kemin, ayo dik-daaluple, kulaa, Ayo, nali din dong dakaayokomi no, kalba. Kemin,
2CO 8:18 nuyo nak-tunum ma dabaalup Taitus aso, alep tilbip. Kemin, mep tunum kaali, abip ma ma alik imi Kristen unang tunum imi tiin diim kawu, God ami weng uyo tambal-kup kukaayin-balala, iyo atam ami fiyaap-kup duu-bam laabip. Kemin,
2CO 8:19 kaata-kup disa; ma kaali, abip ma ma imi Kristen unang tunum yakal uldaa-dabuuliwa, Pol nikil iso un-bomdiwa dong dakaayila unak o, kalaliwa, ulduulipya, bomda numi dong dakaayimba kemin, numi ok kalawaali, Kristen unang tunum imi moni afetbip kaata, foko-kulii-din Provins Judiya kasel Kristen unang tunum iyo dong dokoyuple, alik iyo numi kanu-bam naktum kusal imi dong dakaayin kukup uyo utamdipla kawu, Kamokim Yesus ami fiyaap ayo duu-mokomip o.
2CO 8:20 Kanola nikil numi aket fukunbup kaa, numi kukup kala, kanu-bamdup moni dukum kala tiin mo-bom kulii-tal-unebup uyo weng mafak ma kuyila aa, ili moni kaa yukut inan-tal-unebip o, yokolip o, kalalupla kemin, mep nak-tunum kaali, aso nikil yak-bamdupla, moni kala kan-tabasup.
2CO 8:21 Numi aket kaali, nuli Dukum ami tiin diim kaata-kup tituun-kup tabin kukup kaa kanubup disa; unang tunum imi tiin diim kawu kaaso ti kukup tambal-kup nuu-bam kemum o, kalbup.
2CO 8:22 Nuli nak-tunum ma ayo dabaalup Taitus alep iso tilip. Kemin, tunum kalawaali suunkup ok yaapkan ayo kukaan-bam dap-kukuluwa yi, Ali ti titil foko-bomda ok kaa, kem-taba kala, akan-kan-unbup. Kemin, kamala kaali utamala, Ibi kukup tambal kaata-kup ke-mokomip o, kalalaya kemin, titil-fak-daa din ibi dong dakaayon o, kalba.
2CO 8:23 Nuta mep tunum nikil kiili yim-baalup tilip kemin, Taitus kaali, naso alep maakup bomdup okok ke-bam, kipni dong dakaayin tunum namti kaa bombe; kuno nulmi naktum alep ma kiita, abip malo kaami Kristen unang tunum imi bon tem tunum ale, Kristen kayak kayak kiili, alep imi okok-ken-umbip kabak-ata atafii-bamdiwa, Kraist ami tong ayo bakan-umbip.
2CO 8:24 Kanolin kemin, nikil kiimi din unip kaali, ibi mep tunum nikil kii dong dokoyila tiin molip, moni ayo afetu kutii kuyip, iyo kuliilip din Judiya kasel imi kuyiple kawu, yang abip ma ma kaami Kristen unang tunum yakal kipni Judiya kayaak imi olen-daaya-silip kaayo atamiwa yi, Awu, Pol nikil ili Korin kasel imi kukup kaami tong kaata, bakan-unbip kabak-ali ti faneng u, kala kalin o.
2CO 9:1 Ibi moni God ami unang tunum Provins Judiya kaptam ilin imi dong dakaayin kaami sang kaa ipkal utamsip. Kemin, kaami sang kaa batbat ma dola kuyokomi dinim.
2CO 9:2 Kaa dok kata naa kalolip: nakal utamiya, Kipni aket tem uyo moni ma kuluu Judiya kasel mafek mafek dinim imi dong dakaayum o, kalbip kala, kalalila kemin, Masedonia kayaak imi diim kawu, kipni win ayo suunkup kufuyin-bamdila bokoya-lomdi: Yak wasital ma tal unse kawu, Korin kayaak so, Provins Akaya kasel kusnum iso, ili aket fukuniwa, Awu! ilom am ma daanokoma kulaali, nuli Judiya kayaak Kristen kii dong dokoyokomup o, kalalip ilmi aket-kup fukun yakyak kutal kala diilip kala, kalaliya kemin, Masedonia kasel yaapkan iyo kipni kaa dong dakaayum o, kalbip kaami sang uyo weng sandiwa, Nokol kaa, titil-fak-daa kanumum o, kal-biliwa uyo kuyila-silip.
2CO 9:3 Lale, nami aket fukunbi kaa, mep numi weng kala bakayin-bam kipni tong-kup bakabup uyo uktayimu. Kemin, nali nak-tunum kusal kii yim-baali din-ilom dong dakaayin-bilip, ibi nami weng Masedonia kasel imi bokoyasii ultap kaa talal-bam iliwa yi, kalaliya kemin, naktum kusal iyo yim-baali kipni fanang tilip.
2CO 9:4 Nuli fan utamupla, Ibi moni kaa Judiya Kristen imi kuyokomup o, kalalip iltipni aket-kup fukun-bam kutal kala diilip kala, kalbup. Katale, nami aket fukunbi kaali, kanola Masedonia kasel iyo ma tildak nami tem tiliwa, nikil din itamupla, Ibi talalulin disa kelip namti, Masedonia kasel iyo Pol nikil iyo ibakayimbip o, yokokomip kemin, nokol fatom-duk-duuluple, kuno ipkal fatom-duk-duulip kelamup o, kalalila kemin,
2CO 9:5 nami aket fukunbi ayo naktum kusal imi bokoyilila, isiik din bokoyipla, kipni weng kutii-lom, Moni kaayo, afetu-lom Judiya kasel Kristen imi kulaayup unokomu kayi! kala-silip kaali, talaluliwa nata mulo kawu din utam alik afetu kutiibip kala, kalon o, kalbi. Kemin, moni kala nata weng dukum-kup bokoyila kanumin aa! yokokomi disa; kaa iltipni aket fukunin kaata, moni kalawaa misiim kuyum o, kalbip. Kemin, ibi kaami fiyaap kaayo, duu-bam kanola kuyin o, kalbi.
2CO 9:6 Kemin, ipkal kaa talalu utamin! Tunum ali ima lang katip ma dikila namti, katip kaata-kup dabuu ma kulii-tal inam-nokoma. Aa, tunum ayo ima lang dukum dikila namti, ali dukum-kup dabuubi kutal tii inokoma. Kanola ultap kibi mafek mafek yaapkan iyo kaptum kusal imi kuyip namti, God akal ti mafek mafek yaapkan kiiyo kuyokoma.
2CO 9:7 Kanola tunum ami aket fukunin kaali, Kolokomi namti, iip-nami. Kemin, kolokomi disa yo, kalbi. Lale, Pol nikil ili dukum-kup bokoya-lomdip: Kuyin aa! kemip kala, kalalila, kuyimbi no kala, aket uluum kela namti, God ali kanolin kukup kaami fiyaap kaa duu-mokoma disa. God ali tunum kaami fiyaap duu-bamdip kukaayin kaami fiyaap kaata-kup, fiyaap sakbaalim dukum duu-mokoma.
2CO 9:8 God ali yaap-kup mafek mafek tambal alik kiili ipni kuyilala tiik-nokomip kaali, tifan kuyama. Kemin, ibi suunkup tawaal diim kala ilip kaayo, mafek mafek iyo yaapkan kukaayinba no, kala-lomdipla, kaptum kusal imi kuyokomip kaayo, ipta utamiwa yi, Ti tiiknu kala, kalbip-kup, iltipni uyo tiika ke-mokomip.
2CO 9:9 God ami Sukon Tem kaami sang uyo boko-lomdu: Tunum tambal ali aket yaapkan fukunin dinim ke-bamda, ami mafek mafek yaapkan kiiyo, kuluu tunum mafek mafek iipnip imi kukaayokoma. Kemin, kaami mafek mafek aptum kusal imi kukaayin kaami kukup uyo ti kano suunkup ilokomu kayi! kala kanum bokosu.
2CO 9:10 Tunum iyo inin-inin san uyo diki-bilipla, God ata tiin mo-bala bii dukum-niple, inin-inin dukum ayo yaapkan abuu-bilipla, inan-umbip. Kemin, kanola Korin kasel ipkal, Kristen unang tunum kusnum imi masiim dong dakaayokomip kaali, God ata kipni kukup tambal kanubip kaayo, tiin mo-bala dukum-alomdu, Kristen unang tunum yaapkan imi dong dakaayokomu.
2CO 9:11 Kemin ale, God ata mafek mafek suunkup kukaayin-balala, mafek mafek soyal keliwa kulu, ipkal tiika-lomdiwa, Kristen kusnum imi mafek mafek yaapkan uyo kukaayokomip. Kemin, kipni moni kuyip kulii-unokomup kaali, kulii-din Judiya kasel Kristen imi kuyuple kawu, kabak-ami fiyaap kaata duu-bam ale, God ami yaap ke yo, akan-kaa-bam ke-mokomip o.
2CO 9:12 Kemin, kipni moni kaa kuyip Provins Judiya kasel imi kuliiya, unokomup kaata, taba-lom God ami unang tunum mafek mafek uktiibip kii, dong dakaayin-bulula kawu, yakal ti bung kayaakal ke tiik-nokomip. Yale, kabak ata-kup disa; Judiya kayaak yaapkan so, unang tunum kusnum yaapkan iso, yakal ti ipni kukup kanoyokomip kaami fiyaap duu-bam God ami, Ti yaap ke yo, akan-kaamin-kup ke-bam ilokomip.
2CO 9:13 Ipyo, Judiya kasel Kristen imi dong dakaayin-bilipya, ipni kukup tambal kaa kanubip kaayo, tiltam fatap-nula Judiya Kristen ili utamiwa yi, Kibi boko-lomdip: Yesus ami lak duu-sulup o, kalbip uyo fan kutal-fukule, God ami weng uyo fan kutal-fuku kelip kala, kala-som ale, ili utamipla, Moni yaapkan ayo kuya-som ale, unang tunum kusnum yaapkan imi kukaayin-bam kem-tabasip kala, kalalipla kawu, yakal God ami win uyo kufolokomip.
2CO 9:14 Kemin, yakal utamipla, God ami disa misiim kulu olen-dakaayin sakbaalim dukum kaa Korin kasel kipni kukaayinba kala, kalokomip kaata, yakal aket yelule, God ayo beten kamaan-bilipla, ata kibi titil kukaayokoma.
2CO 9:15 Kemin, God ayo alami man Yesus kaa disa misiim kulu numi kuyase kaali, atin ti sakbaalim dukum kemin, nuli fan taang-kala-lomdupla, kabak-ami sang uyo alik ku-fatap-daa-lom bokolamup disa. Kabak-ali ti God ami yaap ke yo, akan-kaa-bamdup laabup o.
2CO 10:1 Kipni tunum malo ma weng binalip tildak nami diim tii-bom boko-lomdip: Ali nuso ila kaata, suun-bamdala, filit weng kaata-kup kukaayokoma ale, nuyo kamboyinba-kup, takas yang samaanlo una kulaali, numi titil tabin weng kaata-kup kulaayila talen-umbu no, kem-yaabip. Yale, kaptum Pol nali Kraist ami kukup kaa atamila, Alami aket fukunin uyo akola dak-diiba bomdala, unang tunum kii akola dik-diiba bom-ilin kukup tambal kaata-kup kukaayila-yaaba no, kalalila, aa ti nakal filit kalin weng kaata-kup kukaayilila, kaal kelik o, kalbi. Lale,
2CO 10:2 dok kanolin tunum ipta ma boko-lom: Yi, Pol nikil imi aket fukunin kaa, God ami lak duulin disa kiimi aket fukunbip ultap ke-bamdiwa, kanum tal-unen-umbip o, kebip kii, nayo imi itam-suunbi disa; nali titil tabin weng kaata suunin disa imi kuyokomi. Ti nalmi nak-tunum kusal kiwe! Ibi iltipta ibakamin tunum kii, ilipta titil tabin weng kuyiwa, kukup mafak uyo kulaaliwa, nayo din-ilomdi kipni diim kawu titil tabin weng bakayikin uyo keyon o, kalbi no.
2CO 10:3 Kanolin kemin, nuli tifan tawaal diim kula bom-bulup. Yale, nuli Setaan aso, ban waka-bam, waasi dinan-tal-unemin tap kebup kabak-ali ti tawaal diim tunum imi waasi dinin ultap kebup disa;
2CO 10:4 waasi dinin kaami mafek mafek alik kala kutal-fukubup kiili, tawaal diim kalawaami mafek mafek kii disa le, aa, yak nulmi titil kaata kuluu-lom waasi kaa dinbup disa; God ami titil dukum kaata kuluu-bomduwa, waasi kalawa dinbup kemin, nuli God ami titil kaata kuluu-lomduwa, Kristen numi titil-kup ke-lomdup Setaan ami titil kaali, kabaak bana ke-lokomup.
2CO 10:5 Kemin, nuli God ami titil tabin kaata kuluu-lomdup, kanolin tunum imi kasen-fakamin weng kaayo, kulaak tibiiya-lomduple, ili ti, Nuta-kup utamsup o, kala, aptum kusal God ami lak duulum o, kalbip imi liip kuwaya-laamin weng uyo kulaak tibiiya keya-laabup. Kemin, numi aket fukunbup kaa, tunum unang imi kukuyin-bulupla, kiimi aket fukunin uyo fal-siki-lom, aket tambal fukunin kaata-kup, kuluu-lomdip, Kraist ami weng uyo kutal-fukulin o, kalaluwa kemin, kabak-ata bakayin-bam kukuyila-tabasup.
2CO 10:6 Kemin, nuli dotu kutii-lom ipni-kup fenbup te! Ibi nami weng bokoya-lomdi: Titil tabin weng uyo kasen-fakamin tunum imi kuyiwa yo, kali kaali, talalu weng san-ilom fukulipla, tunum ma ata nami weng uyo weng sanami daa yo, kala namti, ali kuumi maan uyo aket uluum dukum kolokomup kayi!
2CO 10:7 Kipni tiin ata-kup binalip yak unang tunum imi angtiil kaata-kup itafiibip uyo, kulaa kela-somdiwa, tituun-kup tiyak daa imi tal-unemin tiin-bom ilin kaata, itafii-bamdiwa yo. Kabi aket fuku-daalapla, Nali fan tiltam Kraist ami daang bakaalin tunum ke-lomdila, Pol ayo dap-kan-tii nita akaansi no kalbap ema? nakan-kaabap. Katale, fan Pol nali Kraist ami kalaan tunum kesi. Kemin, kabi asuk talalu aket fuku-daalawa, Nali tiltam dok kanolin tunum kesii ni, kal-bomdawa yo, kala-somla ko!
2CO 10:8 Kamokim Yesus alalta uldaa-nam-buulaya, Kapta nami ok kalawaali okokman o! nakala kanubi. Kemin, kabak bokop-na-lomda: Kabi unang tunum nami lak duulin kiita, ku-mafak-daayilan o, nakaya disa; kabi unang tunum nami lak duulin kiita, dong dakaayin-balawa, titil-fak-daalik o, kala-lomda, uldaa-nam-buulaya kanubi. Kemin, kabi bokop-na-lomdap: Pol kaltapni ok kaa kanum tal-unebap kaami tong-kup bakabap kaa yaap kep-tin disa yo, nakan-kaabap ema? Fan, nami God ami ok kala kup-naya, kanubi kaami sang uyo bakabi. Yale, bakabi kaami fatom kaa ma kuluulin disa, bom bii.
2CO 10:9 Kemin, nami aket fukunbi kaali, ibi boko-lomdip: Pol ali kasen-foko-lom suunin weng kaata kukaayin-bamda, sukon kulaayila talen-tabasu no, kemin disa yo.
2CO 10:10 Aa, iltipni tunum malo ma nami sang kaata boko-lom: Ami sukon dola-yaaba kabak-ami tem kabak-ali uluum tabin weng so, titil tabin eng kaaso, bakayin-bamdala dola-laaba. Katale, siin kamasi alami talse kuyaku atamuwa yi, Ali titil tabin dinim tunum kemin, titil dinim ke-lomda, weng dukum so ma bokoyama dinim o, kalale, ami weng uyo man katip katip imi sam-dinan-tal-une-bamdip weng bakabip ultap o, kala, atam kuku ke-sulup. Kemin, God ata uldaa-dabuusa disa yo, ken-umbip.
2CO 10:11 Tunum kiimi weng kaa bakan-umbip yakal ti dotu aket fukunin! Nali samaan kawu bomdila, kipni sukon-kup dola kukaayimbi. Lale, am ma daanokomu kaali, nayo din unila, kipso maakup ilokomup kawu, titil tabin weng so, weng tem so, kiita bakayin-bamdi, mafek mafek sang kala sukon tem dola kukaayinbi kiiyo, ti alik kanu-mokomi no.
2CO 10:12 Nalmi nak-tunum kusal kipyo! Kipni tunum malo ma imi aket fukunbip kaali ti, Nuta-kup o, ken-tabasip kaali, nokol imi kukup kaa kanun-tabasip tap ke-mokomup dinim. Kiimi ti, Nuta-kup o, kem-tabasip kabak-ali miit dinim. Kemin, ilmi aket fukunin kaata-kup kuluu-bomdip, Yi, nuli Kraist almi kalaan tunum o, kal-bomdiwa, kanumin kukup uyo kanun-tabasip. Lale, nikil nuli God alta ulelnala, almi ok kala fokola-bulup o, kalalupla, fatom dinim ami ok tabola-bulup kaami sang kaata-kup bakan-tal-unebup.
2CO 10:13 Kanolin katale, nuli mafek mafek yaapkan kiimi tong kiiyo ma baka-mokomup disa; God almi ok kala kuyase kaami sang kaata-kup bakamakin kemin, God ali numi bokoya-lomda: Nami weng kaata kuyilila, kulii yang abip ma ma iyo bakayim-bamdip okok kem-tal-unemin o, kalala wok uyo kuyase. Kemin, Korin kasel ibi kabak-ami diim kawu bom-bilip.
2CO 10:14 Kemin, nuyo din abalupla, God ami boko-lomda: Okok kem yakyak toop kulu dilit kalu kewin o, kalsa kaali, ma kukan-tii akaala toop lo so unsup disa; kamasi diildiil kaptoop-ali God kaa nusiik yim-baala din-ilomdup, God ami weng tambal kaayo, kipni bakayinsup.
2CO 10:15 Kemin, God alalta almi ok uyo kabaanuyilaya, sekela taba yak abip ma kawu okok-bala, tildak abip ma kawu okok ke-bala kem-talabup. Kemin, nikil nuli God ami ok numi kuyase kaa, ma kukan-tii akaala tam nak-tunum kusal tunum kusnum imi ok tangbal fuku-bomdip God ami weng bakayinbip kaami tem kaptam un-ilomdup nulmi tong kaata, baka-bam kasen-foko-lom: Yi! ok tangbal kalawuuli nulta talala-tabasup o, kalbup disa. Fan numi aket fukunbup kaa, ibi utamipla, God ali ti yaap mafek mafek alik kii kanolama no, kala-somdipya kawu, numi dong dakaayin-biliwa, kipni diim okok kebup uyo dukum-nuk o, kebup.
2CO 10:16 Kemin, nuli kipni diim kulu bomdup okok kebup kaayo, disa kelu kala, kalaluwa kawu, God ami weng tambal uyo kutamalup bilin kipni akaaya din bokon kusnum ma bombe kaptam-ata bakayokomup. Kemin ale, nuli tunum kusnum ami ok tambal tabuu ilan-soma kaami tem un-ilomdup, ok tangbal kaayo, nuta talala-tabasup o, kalalup nulmi tong kaa bakan-unokomup disa yo.
2CO 10:17 God ami Sukon Tem kabak-ali boko-lomdu: Dok kanolin tunum kaata fiyaap duumon o, kala namti, ali Kamokim ami fiyaap kaata-kup duu-bam ami tong kaata ti bakaan-bamdala yo, kalsu. Kemin ale,
2CO 10:18 nokol utamsup taa, dok kanolin tunum ata almi tong kaata bakamin-kup kema namti, God ami tiin diim kaayo, tunum kaali win dinim ke-lokoma. Kuno kalok nolin tunum kaata, God ata tunum kaami win kaayo kufola namti, kaata fan win soyim ke-lokoma no.
2CO 11:1 Kemin, ibi kep-niwa, tunum babon-bamda weng yak-boko tildak-boko-keba alaltap kemon o, kali kemin, kambop-niwa nalmi sang kaata ma bokoyon o, kali.
2CO 11:2 God ali tunum imi aket-kup fukun-bamdaya, Ulelnila tiltam nalmi alik kelik o, kal-bomdaya, dil saan-umba. Aa, ti nakal kipni aket-kup nan-buluya kemin, awil-fakal imi unang sii noya-laabip kukup kaata kuluu-lomdiya, ibi ti tunum maakup kulaata-kup kuluulin o, kalaliya baaya-lomdi ipyo! dil saan-umbi. Kibi unang sii weng bak-daayip tituun-kup iliple, tam imbii-din tunum am dakabip ultap ke bom-iliwale, ilom kawu ibi foko-kulii-din Kraist ami kolon o, kalalila kemin, ami weng bak-daayasii.
2CO 11:3 Katale, nalmi aket fukunbi kaali, Setaan o, kala inap diiyap ali ti kasen-kasenmin kukup uyo utamsa. Kemin, sawaayak kawu, ata taba-lomda, numi awak Ef umi kasenu-wunsa. Kanumin siim kemin, kanolin kasen-fakamin tunum ayo talaba kipni aket fukunin uyo ku-mafak-daayila, kipni tangbal-kup bom Kraist ami aket fukunbip kaayo kulaalamip o, kalaliya kemin, kabak-ata nali suun-daabi.
2CO 11:4 Nami suun-daabi kaami miit kabak-ali, tunum malo ma ita Yesus ami sang akal alik uyo din kipni diim kawu bakayin-bilipla, ibi talalu aket fukunalip disa, kelip abiltap boko-lom: Kabak-ali ti tangbal o, kebip kemin, Yesus ami sang bakayinbip kaa, Yesus sang bakayinbup kabak-ali disa; kipni imi weng, weng san-kaa-bamdip sinik kaa kaabip kaali, siin God ami Sinik Tambal kuluu-silip kii disa; sinik kusnum kaata kuluu-lomdiple, weng kaa, weng san-kaa-bam, Yi, ti tambal o, kalbip kiili, kamasi God ami weng tambal weng san-silip kabak-ali disa. Kemin, dok nolin tunum ita tal kipni diim aba mep kanolin weng kaa kukaayilip namti, da tiin kaata-kup ita-biliwa, kanun-umbip o, kala-lomdiya, kaami atul kaata suunbi no.
2CO 11:5 Kemin da weng san iliwa! Nami aket fukunbi kaali, nali kipni tunum iyo boko-lom: Nuli Yesus almi kalaan tunum imi kamok kamok o, kem-laabip kiimi min lo tem kawu tiinsi disa yo, kalbi.
2CO 11:6 Kuno malo ma iyo boko-lomdip: Yi, Pol kaami God ami weng kukaayilin kaali, weng uluum kaata-kup, bakayila-yaaba no, ken-umbip. Lale, nami aket fukunin kaa, mepkan kebi disa; fan, God ami weng so, kukup so, kuliili, atin ti talalu utamsi. Kemin, alik kaami sang kaata, kipni talalu bakayin-bam kukuyin-bilila, utamsip.
2CO 11:7 God ami weng tambal kamosinim bakayinsi kaali, sisol kaa ma kaamsi disa; kaa kanumsi kaali, nalmi win uyo kuwaa-bomdila, kipni win kaata-kup kufuyinsi. Kemin, ipkal kanolin kukup tambal kaa kanumsi kaali, kukup mafak ke-bam ban kemsa no, kalbip ema?
2CO 11:8 Abip ma ma Kristen unang tunum ili moni kuluu-lom dong dakaap-nam-bilipya, God ami weng tambal kaa, ipni kukaayinsi. Kanumin kukup kaali, imi okok-kamayin-bilila disa; ili moni kulaa masiim kukaap-nam-bilipla kaata, kuluu-lomdila yukut fakamin tap ke-lomdi, kipni dong dakaayin kaali, disa kulu dong dakaayinsi.
2CO 11:9 Kamasi kaa, nali kipso bomdi, mafek mafek iwa-yaamsi kaa, nali taba-lomdi, tunum maakup ma ami mafek mafek uluum kaa ma kola-lomdi: Kapta nami inin-inin uyo tiin molan o, kemsi disa; tunum Kristen Masedonia kawu tal Korin taldipla, ita mafek mafek iibi uyo atin ti tiiknu kep-niwa, nami kamosinim boko-lom: Ibi nali inin-inin uyo kukaap-nim-bam tiin mo-biliwa yo, kemsi disa. Kanumsi kaata, asuk kanumin-kup ke-mokomi.
2CO 11:10 Kemin, fan Kraist ami tituun weng uyo nami diim kalawu bombuu kemin, nakal ti kanola tituun weng kaata-kup bokoyon o, kalila kemin, nami aket fukunbi uyo nalmi sisol kaamin dinim. Disa. God ami weng bakayila-yaabi kaali ti, tambal o, kalaliya, din kipni Provins Akaya kaptam-ami din aba tal-une-mokomi kaali, abip ma kaptam-ami Kristen tunum unang ita ma keyilila, sisol ayo ma kukaap-nokomip disa. Nili boko-lom: Kanu-bamdi okok ken-umbi no. Ken-umbi kaayo, kulaa ke-lokomi disa yo.
2CO 11:11 Nali kanimin o, kalalila weng kalawaali bakayinbi ni? Nali kipni aket kaa kuyin disa kesi kemin, weng kalawaali bakabi no? Disa te! God ali utamsa. Kemin, nali kipni aket-kup nesu te!
2CO 11:12 Lale, kipni tunum iyo boko-lomdip: Nuli Yesus ami kalaan tunum kesup kayi! ken-umbip kiili, ilmi win kaata-kup kufu-bamdip, kipni bokoya-lom: Pol nikil imi kukup kanun-umbip ultap kaata kanubup o, kal-bomdiwa, kanu-bilipla kemin, nali itamila, Kiili okok ke-bam sisol kan-umbip kala kala-lomdi, nali imi kanolin aket fukunbip kaami liip uyo fuup katii-lomdi nam-daayon i, kalaliya, nami sisol kaamin dinim. Disa, God ami ok tabonsi kaali, kulaa ke-lokomi disa; kuno ti kanumin-kup ili.
2CO 11:13 Tunum ili boko-lomdip: Nuta Kraist ami kalaan tunum ale, ami okok kemin tunum o, kal-bom, disa kasen-faka-bam ilmi kukup kaata fal-siki ku-kaltam ku-kaldaak-ke-biliwa, kayak kayak kiita itamiwa yi, Kiili fan Kraist alami kalaan tunum ema yo? kem-laabip. Lale, kiili fan disa kuuli, kasen-fakamin tunum namti kuluu bilip te!
2CO 11:14 Kemin kaa ita-kup daa; Setaan aso, akal ti alami kukup uyo fal-siki ku-kaltam ku-kaldaak-ke-balala, tiltam ensel tambal ami yokon tap ke-laaba ultap uyo kanu-bam, kem-tabasa. Kemin, ibi yak kanola ibakamin tunum kiimi kukup kanubip kaali, atam-ilomdip aket kufoya-yaamin disa yo.
2CO 11:15 Kalsu kemin, kanola Setaan ami ok tabuumin tunum yakal ti ilmi kukup uyo kanola fal-siki ku-kaltam ku-kaldaak-ke-lomdipla, God ami okok kemin tunum imi kukup tambal ultap kanubip kaayo, nokol utam aket dakat kala-yaamin disa. Ilom am ma daanokomu kaali, kiimi kukup mafak kanun-tabasip kaami tiim kaali, maan tiiyuk-kup kuluulokomip o.
2CO 11:16 Kamosinim kaa bokoyili kemin ale, asuk kamala kaakal bokoyokomi. Tunum ma bokop-na-lomda: Ali babonin tunum o, nakan-kaamin disa. La, kuno yak babonin tunum o, kala kanum bokolip kulaali, kuno saak kep-niwa, nakal nalmi win ayo mep katip ma kufo kelila,
2CO 11:17 unang tunum yaapkan iyo tawaal diim kaldaak-ami kukup kaata, kutal-fuku-bomdiwa, ilmi win uyo kufun-umbip o, kala-somdila nakal kuno ti ilmi kukup kaata kutal-fuku-lomdi, nalmi win kaayo kufolon o, kali. Lale, nali Dukum ami, Yak kuuta kanuman o, namba kaata-kup kutal-fuku-lomdi nalmi win kaa kufubi dinim; disa, nali tunum babonba alaltap ke-lomdi titil-fak-daa-bomdila, nalmi win kaa kufubi te!
2CO 11:19 Kemin, ibile, Nuli aket fukunin tambal bombuu no, kalbip. Yale, ibi talalu aket fukunin disa ke-lomdiwa, babonin tunum kiita, kamboyiwa ita tal babonin weng kaata, bakayin-bilip weng san-kan-umbip. Kemin ale, nami weng tambal kaatale, ibi weng san-kan-umbip disa.
2CO 11:20 Kemin, kanola tunum ayo suunkup im-bak-diila okok kemin-kup kemin aye, kipni mafek mafek kiiyo, alik disa kelu keyokoma; aye, ibi kasen-foko imbii yang tem tinila angtiil yol kuluulokomip; ibi win dinim o; nata-kup win so no, kemin aye, ali sikil binala yak ipni tiin matum diim abe-bamda kanuma namti, ibi kuno tiin-kup ata-biliwa, kanuyilama. Ibi kuno kep-niwa, nalami win uyo kuno kufumon aa!
2CO 11:21 Ili kukup kaa, ipni kanoya-silip kaali, tituun-kup tabin dinim kemin, nali ti titil-foko-lomdi, ipni kanoyin disa kesi kaami fiyaap kaata duumsi. Kemin, nali kanosi dinam, fatom duk-duulami no. Tunum kii, ilmi dok kanolin kukup kanubip kaami sang uyo suunin disa, kufolip namti, aa nakal ti, nalmi dok kanolin kukup kanubi kaami sang uyo suunin dinim kano kufo-lomdila, tunum babonin weng bakaba alaltap ke-bomdi weng kaa bokolokomi.
2CO 11:22 Nuta kup o, kem-tabasip ita-kup ti Hibru tunum ema? Daa, nakal ti Hibru tunum. Ale, kiita-kup Israel tunum o? Daa, kulaa nakal ti Israel tunum. Kaa ita-kup Abraham ami man loop o? Daa, nakal ti Abraham ami man loop o.
2CO 11:23 Kulaata, nayo tunum babonin kaami weng bakaba alaltap kelon o, kali kemin, tunum kasen-fakan-tal-une-bamda, Yi, nuli Kraist ami kalaan tunum o, ken-umbip kiita-kup Kraist ami okok kemin tunum ema? Daa te! Nali Kraist ami okok kemin kiili, kabaak baniwa, keyila nata nata kesi kawi! Kabak-ali nata nata ke titil-fak-daa-lom okok kemin kulaali, nata yam-kan-tiisi. Kano-lomdi Kraist ami sang kaata, unang tunum imi bakayimbup kaami kalan kaata, waasi ita taba ibakamin tunum malo ma iyo kukup mafak uyo kukaayin-bam ale, nata suunkup sok de-nam-kaa-bam ale, ne-bam aye, ke-bilipla, ti mepso taanakin-kup kem yakyak tabasi.
2CO 11:24 Kemin, Kraist ami sang unang tunum imi bakayila-tal-unebi kaami kalan kaata, Juda kayaak imi soldiya ita sok faklet ta nemin almi deng maakup ale bakli talangkal (39) kanup-nam bi-lom liip awakal fak-daa kep-niple, kulaali ilom
2CO 11:25 Rom kasel imi soldiya ita as sukum ta kuluu ne-bi-lom liip asuumano fak-daaliwale, kuno ilom am ma daanula kaata, waasi iyo tal nelum o, kala, tuum tuup nebi kep-nip, ti mepso taanakin tap ke-bam kemsi. Suunkup sip tem yol ok daang kun diim liip tal-unemin-kup kemsi no. Una-bulup sip uyo mafaknu kala, kalale, unfoko daayak ok daang diim aba ok falan yak balang tem aba aba kemsi liip alep fak-daabi kuwale, ma kaata, yol ok daang kun diim kawu ok falan-una-bilila, bii am maakup keli yak balang tem ababi-kup kem-tal-unebi.
2CO 11:26 Kemin ti suunkup liip samaan uyo tal-une-bamdi ok ta nan-kulii unokin tap ke-bam ale; tunum mafak iyo liip liip kawu kutii-bamdip tunum yebi kutii kamboya yak mafek mafek dakayin imi sikil diim kawu maaklo kelakin tap ke-bamdile; kuno nalmi kayaak Juda ilta taba nam-mafak-daalum o, kala, kanup-nam-bam ale; kuno tunum miit kusnum yakal ti tal nam-mafak-daalum o, ke-bam; kuno abip dukum aye, disanang bokon aye, yol ok daang kun diim kawu umtal-daalakin tap ke-bam ale; kasen-foko: Nuta Kristen kayi! kalbip imi sikil diim kawu maaklo kelakin tap ke-bamdi kanum yakyak tabasi.
2CO 11:27 Nali kanu-bamdila, fiit-bamdi kutamiip ayo ti okok ke-bamdila; akan-unemin disa, ke-bamdiya; ima tinap so, ok tinap so, kiiyo awak utam-som ale; suunkup ima fala okok kemin-kup ke-bam ale; diil dukum-kup kep-na-bulu umtal-daka-bamale; ilim kaal kaayo, iiwa kem yakyak tabasi.
2CO 11:28 Lale, kaa kanolin kiita-kup kanumsi disa; suunkup nayo unang tunum Kristen alik imi aket kaata fukun-bamdila kemin, iyo tiin mo bom-bilila, kabak-ami aket uluum awak dukum kaata, dap-tiip-nuya, uluum kaabii yakyak tabasi.
2CO 11:29 Kemin, tunum ayo Kristen liip kaa titil dinim kela kala, kalokomi kaali, kabak-ami aket dukum uyo kuluu-yaa-bam ale, utamila, Tunum ayo tal tunum ma nolaya, ban kela kala, kalokomi kaa, kaami aket uluum uyo kaa-bam kem yakyak tabasi no.
2CO 11:30 Kemin, nali liip kusnum kaa disa yo, kalaliya, nalmi win kufolon o, kalbi uyo kanolokomi. Kemin, kabak-ali dok nolin mafek mafek tal nami diim kawu kabamnula, ibi utamipla, Pol ali titil dinim o, kalokomip kaami mafek mafek sang kaata-kup boko-lomdi kufolokomi.
2CO 11:31 God kaa Kamokim Yesus ami God, aa almi aalap, nuli ami win kaata suunkup kufon-bam laabup. Kemin, ali natamsa, Mep nalmi titil dinim o yinbi kaami sang kaata kipni bokoyon o, kali kaali, tifan eng bokoyokomi. Kemin, weng san bom-iliwa!
2CO 11:32 Nali sawaayak kaali, din abip Damaskus kawu bom-biliya, King Aretas ami kiyap ma Damaskus abip dukum kaayo, tiin mo-biisa. Kemin, ata abip kaptam-ami uti fokosip amitom uyo kutii bom ilila, Pol ayo talala kawu, dap-tal-fuku-lom sok de-dulon o, kala-lomda, tunum iyo ulelnala din amitom kawu kutiilip. Katale,
2CO 11:33 nalmi nak-tunum kusal Kristen malo ita tal nam-tamalip umbitam wuti dukum kaami dabom diim am desip kaptamu nam-tam-daa-lomdip nam-baalip yak basket tem dukum kabaak banile, basket uyo sok buku-lomdip am kaptam-ami soloop tem kaluusip kaptamu akola nam-baalip umbital daak saaklo uti yam tem abale, kulaali kiyap ami tunum fokola met amitom kutiibip imi tiin kuwaayila uka daali tabansi ko.
2CO 12:1 Tunum nulmi win kufuumin kaata taba-lomdu, Kipso, naso, numi dong dokoyokomu disa. Yale, utamila, Kipta nami kukup utam-laamin kaami liip kusnum uyo dinim o, kala-somdila, mafek mafek tildak nami diim aben-tabasu kaami sang kabak-ata ma bokoyon o, kali. Kemin, nalmi lom tap visin o kebip kaami tem kawu Kamokim Yesus ami mafek mafek ma kukup-na-som ale, maaklo weng bokop-na keba kaami sang kabak asiik bokolokomi.
2CO 12:2 Siin kaali, nali Yesus ami tunum kela bomdila, God alta nam-tamala umbitam almi abip daala, bom ilana kela asuk nam-bii-tal daala bom bii wasital mitkal dakan tiisi kemin, lom tap kaami liip kaali, sinik kaata ata-kup kulip-na unse ne? angtiil kaso nam-tama tam unse ne? Kanolin kemin, nali ma kaal-kebi disa; God maakup ata-kup kabak utaba.
2CO 12:3 Kemin, nayo utam talaaliya, God ata nam-tamala tam Baladais abiil tikiin unse kalali utabi. Lale, kwin, kaakup lom tap kaami liip kaa sinik kaata-kup kulip-na unse ne? angtiil kaso nam-biila unse ne? Kemin, nali ma kaal-kebi disa, babon; God ata-kup kabak-ali utaba. Nami lom tap visin o kebip tam abiil tikiin abali talsii kabak-ali weng ma weng sansii. Lale, kanolin weng kaa weng awem kemin, kaami sang kaali, tunum ali ma kufolama dinim.
2CO 12:5 Nali nalmi lom tap visin o kebip kaami liip din aba talsii kaami sang namti kula bakabi. Lale, mafek mafek kusnum alik tildak nalmi diim aben-tabasu kaami sang kaata, baka-bamdila nalmi tong kaa baka-mokomi disa. Lale, kalok nolin kaata taba nami nam-fatap-daalula ibi utam, Awu, Pol ali titil dinim kulu tiin dukuusa nu, nakalip nitam-silip kaami sang kaata-kup bokoyokomi.
2CO 12:6 Kulaali, nalmi tong kanola bokoli namti, tunum babon-bamda weng yak-boko tildak-boko-keba tap kanolokomi disa; weng ayo ti tituun eng-kup bokolokomi. Yale, yak nalmi tong kaa baka-bamdi lom tap duusii kaami sang uyo maso ma bokolokomi disa. Kabak-ami miit kaali, dok kata naa kalolip: Nalmi aket fukunbi kaayo, ibi nami lom tap visin o kebip duusii kaami sang uyo weng san-ilomdip, Yi, Pol ali atin ti tunum tambal-kup tabasa no, nakan-kaamin disa yo, kalbi. Kemin, nami aket fukunbi kaa, ibi nami kukup kanubi kaata utam-som ale, mep weng kala bakayinbi uyo kaal-ke-som keliwa kawu, atam-ilomdipla, Ali kalok nolin tunum i! nikin o, kala-somla ko.
2CO 12:7 Nali lom tap visin o kebip yaapkan dakaamsi kiili, mafek mafek sakbaalim dukum o, kalsi kaami kalan kaata, God ami aket fukunin kaali bokop-na-lomda: Kaltapni win kaali, suunkup bakamin disa; nata-kup o, kemin disa yo, kala-lomdala kemin, Setaan ayo kuno kambolaya, ata taba mafak-alin ma kup-nala, angtiil yol sakbaalim dukum kep-nu kaali ti, sil tal aba yak yaan tem unala, yol tabeba tap kep-nula, yol awak kuluu umtal-daasii.
2CO 12:8 Kemin, angtiil yol kaa kukan-tiip-nan o, kala-lomdi Kamokim Yesus ami beten kamaanbi du asuumano fak-daalile,
2CO 12:9 kulaa asiik bokop-na-lomda: Nami titil kaali, tunum unang titil-fokolin disa bom-bilip imi dong dakaayin kemin, nami titil kukaap-ta-yaabi kaali, tiiknama no, kala-lomdila, kapni angtiil yol kukan-tiip-tokomi dinim o, kalala Kamokim ayo kanum bokop-nase. Kemin, nali titil dinim kayi! kali, kaali aket uluum uyo maso ma kuluulokomi disa. Kabak-ami fiyaap kaata ti atin fiyaap duu-biliya, Kraist almi titil dabuu-lomda nali tiin molak o, kalaliya, nali boko-lomdi: Nali titil dinim o, ken-umbi.
2CO 12:10 Utamiya, Kulaata nalmi titil uyo disa kelu kala kalale, kawu Kraist almi titil ayo atin ti kup-nokoma. Kraist ami ok tabuu-lom titil dinim bom-bilila, tunum ita kukup mafak kukaap-nam-bamdipla, yak mafek mafek mafak kaata, tal nami diim abe-bulule, tunum iyo suunkup nam-mafak-daka-bam ke-mokomip kaa, kaali ti tambal. Kraist ali almi titil kaata kup-nokoma no, kala-lomdiya, kabak-ami fiyaap-kup duu-mokomi no.
2CO 12:11 Nalmi tong kala bakabi kaali, tunum babon-bamda, weng bakaba alaltap kebi. Katale, kipkal saak weng mafak kaata-kup bakap-nam-biliwa kemin, nakal nalmi tong-kup bakabi kemin, ibi nami win kaami tong kaata bakan-umbip dinam, kabak yaap ma keyilamu. Yale, ibi kaa ma kanubip disa. Kulaali, saak nakal win dinim lale, kipni tunum imi boko-lom: Nuli Yesus ami kalaan tunum ilmi kamok kamok o, kem-yaabip ili ita ita ke-lom nali nam-kan-tiisip disa yo.
2CO 12:12 Nami aket tem ayo aket atul dinim, daal dinim; titil-foko-bomdila, kipni iipyak tem kaayo, fiit-bamdila, Kraist ami kalaan tunum imi okok kemin yaapkan kiiyo, kulii-din kipni diim kawu kanu-biliya, utamiwa yi, Pol ali fan eng, Yesus almi kalaan tunum o, kala naka-silip. Ali iltipni diim kulu yak talalmin kusnum akal alik akal alik iyo iltipni diim kulu tiltam abe-bulula, ibi fanang alik tam baneyu utamiwa yi, God ami ok so, ami titil so, namti kaa bombuu kala kemsip.
2CO 12:13 Nami kukup abip ma imi Kristen unang tunum imi kanuyinsi ultap ke-bomdila ibi kanuyinsi. Kemin, nami kukup kala abip ma ma imi kanuyinsi kaayo, iip-nula ma kamboyasii dinim. Disa. Yale, kiltipni diim kawu kukup maakup ma kaata-kup kuyinsi disa. Nata taba-lomdi kipni moni kaa ma kuluusi disa. Kemin, kibi bokop-na-lomdip: Kabi numi moni kaa ma kuluulin disa ke-salap o, kalbip kaali, kukup mafak o, kebip ema? kalip kaali, ibi nami kukup mafak, Numi kuyase no! kalbip kaayo, kuno kambop-nin o, kala-somla ko.
2CO 12:14 Nali kipni fanang din itam tal-tal-kebi liip alep fak-daasii. La, kamala kuluwaata asuk din unon o, kalbi. Kemin, nali dindi kipni mafek mafek kaata fakayon o, kala-somdila disa. Ibi talalu weng san iliwa! Nali kipni mafek mafek kaa ma atin ti fokolokomi disa; nali kipta foko kutal-dang God ami miit tem tiiliya, God almi man kelin o, kalali kanubi. Ti ipkal utamin! Man ili taba-lom titil foko-lom as kutal tii ok kutal tii ke-bam awak-aalap iyo tiin molokomip disa; fan awak so, aalap so, ita as kutal ok-kutal tii ke-bamdip ita man kii tiin molip tal aba tam faskaan-umbip. Ibi nalmi man ililtap kemin, nami ima-waan kaali ipta saap-nin disa yo, kalbi. Kanolin kemin,
2CO 12:15 nali kipni dong dokoyon o, kala-somdila, angtiil yol tiltam nami diim abe-mokomu kaayo, kuno tiin uta-bomdiya, nami mafek mafek aye, titil aa, ilin aye, ok aa, kiiyo tabuu-bomdila, dong dakaayokomi. Kemin, nali kipni aket-kup atin nan-bulula, bom bii kemin, kaami maan kaali, kipta nami aket uyo katip sakap kup-tum o, kalaliwa yo?
2CO 12:16 Lale, tunum malo ma iyo nami sang kaayo bokop-na-lomdip: Kulaa faneng, Pol ali numi moni kaa fatap-kup fakayila-yaaba disa. Lale, ali nenin tunum kemin, ibakamin kukup kaata, kuluu-lom ibi kaa, Kanolin o, Kanolin o, yakan-kaa-bamda disa iip kawu yim-bak-dii-balala, moni kaa afeta-solup o, kem-tabasip.
2CO 12:17 Katale, nali dok kano-somdila kipni moni dakayinsi ni? Siin kawu, tunum malo ma yim-baali kipni fanang din un-silip kabak-ali tunum maakup ma kasen-foko dabaali din-ilomda ipni moni kaa dakayinsa ema?
2CO 12:18 Nali Taitus ata ipni fanang dabaali din unak o, kala-lomdi ami tikdaap ma tik-daalala, Taitus so, alep tal-silip kaali, Taitus ata ipni dong dokoyila moni kaa afetu-lom [Judiya kasel imi kulaayup unuk o, kala-lomdip afetsip]. Yale, ali moni kaa ma yukut inam-noma disa; Taitus alep numi aket kulaa ti maakup fukun-bam ke-bamdup kukup uyo maakup kaata-kup kutal-fuku-bom laabup o.
2CO 12:19 Sukon kala dolbi uyo dola kulaayi din unu atam tik-tiilokomip, kaali, ipni aket fukunin kaali, Pol ami weng dola kulaala din Korin kasel imi diim abamnula, tik-tii-lom utamiwa yi, Pol ali kukup mafak so ma kanumin disa yo, nikin o, kalbip. Lale, kabak-ali disa; nali Kraist ami tunum ke-lom bom bii kemin, God alami tiin diim kawu weng ayo alik bakayin-biliya, nalmi kayaak kipni God ami lak duu-laamin kaata, taltam titil-fak-daalin o! kalali sukon kala dol-yimbi.
2CO 12:20 Nami suunin tap ke-bamdi aket fukunbi kaa, nali kipni bilip kawu din unokomi kaayo din ulila, Kipni aket uyo fal-siki-lom kukup mafak uyo kulaabip e, disa ye kalali itamon o kalbi. Yale, din itam talaali, Ibi aket fal-siki-lom kukup mafak uyo kulaalin disa kesip kala kalalila aket uluum kuluulokomi ema yo? kalali suun-daabi. Kemin, ipni aket kaa Pol ami talokoma kawu, aket bilili-kalin tunum ayo tala atamum o, kalbip. Lale, nalmi suunbi kaali, din kipni kukup mafak kanubip kaayo atam-ilomdila titil tabin weng kuya-som, aa, aket uluum kuya ke-biliya, ibi kanolin yim-bak-saanin tunum nayo nitam-ilomdip kipni aket fanang kaayo, mafak ilokomu ema yo? kal-bomdi kaami suun-bam kebi. Kemin, kukup mafak disa ulmi kusnum kusnum kiiyo, weng aal dikimin aye; kaptum kusal imi aket mafak kukaayin aket atul tabemin; saak yak mafek mafek nasiik kuluuli yo kemin; weng mafak bakamin; aa, daang tem weng bakayin; dak-fanan-bam ti nulta kup o, kemin; aa yak Kristen imi kukup uyo kela kuyak-tini kutalak-tini-kemin ayo bombuu kala, kalaliya, kaami atul uyo suunbi.
2CO 12:21 Kemin, kipni unang tunum yaapkan ili siin ayo kukup mafak nuu-bam, sadiki-bamdip, imi aket tem ayo akal ma keyula din kukup mafak kem-solip. Kemin, nami aket kaa nali asuk din itam unang tunum yaapkan iyo aket fal-siki-lom kukup mafak uyo daang ukuwa kulaalin disa, bom-bilip kala kalile, nami God ata kipni tiin diim kawu aket uluum uyo ma kup-nale, kaami kalan kuuta amamami no, kalalila, kabak-ami atul kaata suunbi no.
2CO 13:1 Nali din itam tal-tal-kemsii liip alep fak-daasii. Kemin, am kamala kaakal asuk din itamon o, kebi. Kemin, din unokomi kaali, nali God ami Sukon Tem weng boko-lomdu: Kabi tunum ami ban ke-lom tal kapni diim weng talal-mokoma kaayo utamawa yi, Tunum maakup alafin kaa daa, talaalap tunum alep e asuumano e tap ita boko-lomdip, Yi, tifan, ban keba te! kalalip weng fanang maakup bokolip o, kalap namti, kaata weng san-ilomdawa weng uyo talal-mokomap o, kalsu kuuta, kutal-fuku-lomdi tal dabak-molokomi kemin, kabak-ali talalu utafii-bamdiwa yo.
2CO 13:2 Unang tunum siin kawu ban kesip so, aa unang tunum kusnum iso, kipni weng ma bokoyon o, kalaliya kemin, kamasi din aba tili bombe. La, asuk mulo kawu din unila, kipso maakup bomdup weng kalawuumi sang kaata bokoyasii. La, asuk kamala samaanlo kalawu bomdila kaami sang kaata, maso ma bokoyokomi. Kemin, weng san iliwa! Nali asuk din ulila, Unang tunum kiili, maso ma ban kebip kala, kalokomi kaali, ma keyokomi disa. Ti alik kipni ban kebip kaami maan uyo kuyi yol awak kuluulokomip.
2CO 13:3 Kibi bokop-na-lomdip: Kukuyawa utamup, Kraist ata kapni bon tem kawu, tiin mo bom-balaya, almi titil tibin weng kaata bakabap o, tukum o, kebip ema? Ilom am ma daanu tal-ilomdi, ipni ban wakan-umbip kaami maan uyo tiiyilila, utamiwa, U, faneng, Kraist ami weng kaa Pol ami kukaan-balaya, ata fiit-kup tabin weng kaata, kuluu-lomda bakayinba no, nokokomip. Kraist ayo akolkup tam-ilom kipni ban kemin kaami maan uyo duu tiiyokoma disa; atin ti angtiil yol awak dukum kaata dukum-kup kuyilale, ibi awak uta-mokomip.
2CO 13:4 Kamasi Yesus ami tildaak talse kaa, ali fan tunum titil dinim nultap ke-bom ilale, dap yak as diim daa aalip taanse. Lale, God ami titil kaata, asuk dafola tam tiin-ilomda bombe kemin, Yesus ami aptum kusal nuli titil dinim la, kipni kukup mafak mafak kanubip kaata talalu-yimuluwa yo, kalalup din unokomup. Kemin, disa kaa din unokomup disa; nuli Yesus ami diim kawu fewa suunkup ilin tunum unang ke God ami titil kaata kuluulup kala, kalale, kulaali yak aba din kipni kukup kaata talaluyum o, kalalup din unupla ibi utamiwa, Pol nikil kiili, God ami titil kaata kuluu-lomdiwa, numi kun tibin weng kaata kukaayimbip kala kalokomip ko.
2CO 13:5 Ti ipkal utamin! Dok kanolin kapta Yesus Kraist ami lak duubap namti, kaata fan Kraist ali kapni aket tem kabaku bombe. Ale, Kraist ayo kapni aket tem ilin disa namti, kapni Kraist ami lak duu ilin kaa tiiknin disa bom-balap kemin, iltipni aket tem uyo talalu utafii-bamdip, Fan nuli God ami lak kulaa duu-sulup e? duu-sulup disa ye? kala fanang tet-bamdiwa kayi!
2CO 13:6 Ilom am ma daanokoma kawu, nami utafiibi kaa, ibi nuli itamiwa, Imi baka-bamdip: Nuli Kraist almi kalaan tunum o, kem-laabip kaali, faneng bakan-umbip kala kalokomip o, kalbi.
2CO 13:7 Nuli utamupya, Ibi ban wakamalip o, kalaluwa, God ami beten kamaan-bamduwa, Kapta dong dokoyilawa, kukup tambal-kup kemik o, kal-bom kanun-tabasup. Numi beten kaayo, ibi kukup tambal kaata-kup nuu-biliwa, kayak kayak iyo itam boko-lomdip: Pol nikil ili Korin kasel imi tambal-kup kukuyinbip kemin, nikil kiili fan Kraist ami kalaan tunum o, kalbup o, kal-bomdip numi tong kaayo, bakamik o, kal-bom beten kesup disa; numi beten kaa, ipta iltipni aket fukunin kaali, tiltam kukup tambal kaata-kup nuu-biliwa, kayak kayak iyo Pol nikil kiiyo, Kraist ami kalaan tunum imi titil kaata, kuluu-lomdip din Korin kasel imi titil tabin weng uyo bakayin disa kelip kemin, ili tifan Kraist ami kalaan tunum disa yo, yokokomip. Yale, kulaa yaap faleyamu no.
2CO 13:8 Ipkal utamalip ko. Nikil numi ok kalawaali God ata kuyase kaata, God ami weng tituun-kup tabin kukup uyo kanubup uyo lo-tabu ke-wokomup disa; kaata dong dakaayin-bulula, God ami kukup tambal uyo talalu yikik-fuku-bomduwa kanu-mokomup.
2CO 13:9 Nuli kanola Kraist ami titil kaata, kuluu-lom kipni kukup mafak uyo talalulin disa kelupla, ipkal iltipni kukup kaa talalu-mokomip namti, nuli fiyaap duu-mokomup kala, kala-lomdupla, suunkup God ami beten kamaan-bulupla, ibi tiltam Kristen tituun-kup kelin o, kal-bomdupya, beten kamayila-yaabup.
2CO 13:10 Kamala kalaali, nali samaan kalawu bomdila weng kala dola kukaayinbi kabak-ami miit kaayo, Kraist alta okok kemin kaami titil kala kup-nase kaali, kuluu-somdila ipni yam-mafak-fuulokomi disa; kaa kuluu-lomdi kipni God ami lak dakaamin kaata dong dokoyiliya, tiltam titil-fak-daalin o, kalbi. Am ma daanula, din uniya, kipso nikil alimal maakup tiin-bom ilokomup kaali, titil kala kuluu-lom dukum-kup mafak bakayimbi kala kalaliya kemin, ti kalawu bomdila sukon-kup dola kuyilila, ipni kukup mafak uyo kamala kalawu dotuliwa, mafiing kawu din unon o, kalaliya, sukon kala dola kuyi ko.
2CO 13:11 Nalmi kayaak kipyo! Nami weng kaali, disa kelu kewa-somdiya kulaata weng umuuyon o, kalaliya kemin, ibi dong dokola una-tala-ke-bamdip kipni God ami lak duu-yilin kaayo, dukum-kup yikik-kutal-fuku-bom ale, nami weng bokoyi kaata, tambal-kup weng san-bom ale, kipni aket fukunin uyo atin ti maakup kaata-kup fukun-bam ale, aket maakup keliwa, God ali olen-dakaayin God ale, aket bilili-kalin God kemin, ata kipso bom-biliwa yo, kala-somla ko.
2CO 13:12 Kemin, God almi unang tunum numi kukup kaayo, tikip alik maakup, Ibi naktum o, kala weng fokola una-tala-ke-bamdipla yo.
2CO 13:13 Alik God ami unang tunum kaltamu bom-bilip ita kipni weng umuuyilip kayi!
2CO 13:14 Kemin, Kamokim Yesus Kraist ata ibi disa misiim kaami kukup tambal kaata-kup kamayin-bam ale, God ata kipni aket ayo kuyale, God ami Sinik Tambal ata taba-lomda alik kipni aket tem kaayo, yak fewa kelaya, tambal-kup bom-biliwa yo!
GAL 1:1 Nali God ami kalaan tunum Pol nata sukon kala dola kuyokomi kemin ale, nali tunum ma ata taba-lomda, nam-baala talsi dinim. Aa, God ami kalaan tunum ita okok kemin uyo ma kup-nan-sip disa. Kemin, kano Yesus Kraist so, almi Aalap Yesus almi dafola tam tiinse God aso, alim ililta ok kalawaali kup-na-silip.
GAL 1:2 Kemin, Kristen unang tunum naso bom-bilip nikil alimal nuta, Provins Galesia kaami abip ma ma bom-bilip kipni weng ma umuyum o, kalup.
GAL 1:3 Kemin, numi Aalap God so, Kamokim Yesus Kraist aso, Alim ita ipni kukup tambal uyo kukaayin-bamdip iyo dong dakaayin-biliwa, ibi ti balili-kup kala bomdiwa yo!
GAL 1:4 Kraist ali nulmi Atok God almi aket fukunin kaluuta-kup kanuman o kalba kaata-kup kutal-fuku-lomdala, tal tawaal diim kalawaami kukup mafak kala bom-bilip kiita nuli tik-daa yam-kan-tiilon o kalalaya, almi angtiil kaami lak uyo ma duuse disa; ayo maas kewa-lomdaya, numi ban wakamin uyo moyase;
GAL 1:5 kemin ale, nuli suunkup God ami tong kaata-kup bakan-tal-une-bamdupla yo. Kaali ti kemin fan ko.
GAL 1:6 God ali Kraist ata kipni disa kawu olen daayase kaami liip kabaku God alalta ibi naan-daayila kemin, ibi ami daang bakaala talabip. Lale, nali kabak-ali utami yi, Ibi Yesus kaa abiltap kambola-lomdip, yak weng tambal o kala weng kusnum kaata-kup, kutal-fukula, kutal-fukula-ke-lom nuumum o kemip kala, kalaliya uyo, Ibii! nakayi, kwin kaasok kawi kalbi!
GAL 1:7 Kemin, weng kusnum tambal ma kaa bombuu disa. Lale, kanola tunum iip maakup maakup ili kipni aket fukunin uyo ku-mafak-dakaayin-bamdipla, Kraist ami weng tambal kuuta, bakamup kawo! kala kasen-foko ilta Kraist ami weng tambal uyo fal-siki-dusiki-kemum o kal-bomdipla uyo kanu-bam ken-umbip. Yale,
GAL 1:8 God ami weng tambal kuluuli maakup; kemin ale, kanola nokol abiil tikiin kaami ensel, aa yak tunum ayo dok kata ami aket fukunin kaali, God ami weng tambal tituun-kup tabin kipni kukuyi no keba kaa, God ali utamaya, Ami weng kukaayinba kabak-ali fan nulmi kamasi God ami weng tituun-kup tabin weng kipni kukaayinsup ultap kaata kukaayin dinim kela namti, God alta taba-lomda mep tunum mafak kanuba ayo dabaala din abip mafak kawu maaklo ke win dinim ke-lokoma.
GAL 1:9 Kanola, nokol weng kuluu-lom siin bokoya-sulup, kaata asuk kamala uyo bokoyokomi kemin, kanola tunum ali weng tambal o kala, kukaayin-balaya, God ali utamaya, Kipni siin kamasi weng tambal kuluu-silip ultap disa yo kala namti, ifan, mep tunum kaaso fan God ata dabuu dabaala yang abip mafak unokoma kawi!
GAL 1:10 Kemin, ti kamala weng kula bakabi uyo baka-bilila, tunum ita nami weng kalawaali, tambalkan te kalin o ken-umbi ema? Disa te! Kaali kanu-bilila, God ata nami nitamaya, Nami kukup uyo tambalkan o nakak o, kalaliya te! Uta kanu-bilila, tunum kiita nami fiyaap kaata duumik i ken-umbi ema? Disa! Kaali kanu-bamdiya, kanum tabasi dinam, kaa nali Kraist ami ok fukolin tunum kesi disa.
GAL 1:11 Kemin, nalmi nak-tunum kusal, kipyo. Weng kalawuuli tituun-kup tabin weng bokoyokomi kemin, mep weng tambal kamasi kaa kukaaya-somi kabak-ali kanola, tunum ma ayo taba-lomda, weng kuluu kufolaya, tiltam tabasu dinim; ale
GAL 1:12 aa, nali tunum imi diim kawu ma kuluusi dinim; tunum ma ata weng kalawuuli ma kukup-nase disa; Yesus Kraist alta-kup mep weng kalawuuli kukup-nase.
GAL 1:13 Nami weng uyo tifaneng tituun-kup tibin kemin sang kala kukuya-lom bokoyokomi uyo talalu weng selin o kala-somla ko. Nali siin sawaayak kaali, nali Juda kayaak nulmi lotu kemin kaata yikik-kutal-fuku-bomdiya, kanu-bamdi ilsi. Kemin, ibi kaata weng san-silip; kemin ale, nali God ami unang tunum Kristen o kalin imi itam suun-bamdila, alik maak fak-daa sung ilol diliit molin tap keliya, alik dinimnik o kal-bomdiya, iyo yan-fakan-tal-unemsi.
GAL 1:14 Kemin, nali siin kaali, alik nalmi awil-fakal imi kukup kaata kuyak tabep mo-bomdi, Juda kayak kaptam-ali maakup nata-kup nalmi naktum kusal iyo yim-baak tibi-lomdi, nata Juda nulmi kukup kaata talalu kutal-fuku kanu-bam biisi.
GAL 1:15 Katale, sawaayak kawu, akamen uli namulin disa bom ilsu diim kaptoowu, God ali uldaa-nam-buusa. Kemin, almi aket fukunin kaata-kup naan-daap-na, tildang atamiya, almi okok kemin uyo kup-nalaya, kutal-fuku kulii-tabasii no. God ami aket fukunin kaali: Kanoliya,
GAL 1:16 Pol ata nami weng tambal uyo kutama din tunum miit ma miit ma imi bakayak o kala-lomdaya, almi Man alta kukup-naya, nayo atamsii. Yale, God almi Man kukup-nase kulu nali tunum ayo ma dik-daalasii dinim; ale,
GAL 1:17 aa nali abiltap-siik din Jerusalam tunum isiik tiltam God ami kalaan tunum kesip imi fanang din itamila, mafek mafek utamsii kaami miit kaata ma kukup-nin o kalalila imi fanang din itamsii disa; nali kambola din am bokon Arebia kawu bom-bilila, kulaali asuk kambolalila abip Damaskus unsii ko.
GAL 1:18 Nali tiltam Kristen ke-bomdi bii wasital asuumano dakan tiilila, nayo din Jerusalam din unile, Pita so, alep weng bakamum o kalaliya din atamiya, alep kawu sin-yaabi bombii am talaba yang tiin malii foko kesii. Katale,
GAL 1:19 God ami kalaan tunum ti Kamokim Yesus ami niing Jems kaata-kup ilaya atamsii. Malo kiili ma itamsii disa.
GAL 1:20 Kemin, weng kala dola kuyi kaali, God ami tiin diim uyo disa ibokoli daa; atin tifan tituun weng kaata-kup ipni dola kuyi ko.
GAL 1:21 Kemin, ilana-somdiya kawu, asuk Siria bokon kawu bii yak aba din Silisia bokon kawu tiinbi yakyak kem-tal-unemsi. Yale,
GAL 1:22 Kristen unang tunum Provins Judiya kaptam-ali nami tiin-matum uyo ma atamin disa bomdiwa, disa
GAL 1:23 weng kaata-kup weng saniwa yi, Sawaayak kaali, tunum kaata numi Yesus ami lak dakaamin uyo ku-mafak-daayilila dinimnuk o ke-bamdaya, numi yem-tal-unemsa. Yale, kamala kalawaata, Yesus ami weng tambal uyo kukaayila tal-une-balaya, unang tunum iyo tal Yesus ami lak uyo dakaabip o ke-bilipla, iyo weng san-kaabip.
GAL 1:24 Kemin, ili weng saniwa yi, God ali Pol ami diim kawu kanuba no kemip, weng sandiwa, God ami tong uyo bakan-tal-unemsip ko.
GAL 2:1 Nali bom biiliya, wasital matumkal uyo duk-duuliya, Banabas aso, alep asuk din Jerusalam unum o kala-lomdupya, nayo Taitus aso dabuu keliya nikil asuumano unup. Jerusalam kayaak diildiil tunum Kristen kesip ita weng umuuyip unsup disa.
GAL 2:2 Kemin, God alta bokop-nala unsi kemin, nami aket fukunin kaali, ok kala kanubi kaaso, aa sawaayak kaami kanum-tabasi uso, uyo maaklo kelamu no kalaliya kaata, din Kristen unang tunum imi kamok kamok ilmi am kawu nikil tiin-bomdupla, weng tambal kaluuli, unang tunum miit kusnum imi bakayila-tal-unen-umbi weng kalawuuli, fanang maakup kaata-kup kamok kamok imi talalu kukuyinsi.
GAL 2:3 Kemin, Taitus ali naso, tal-une-bam ilsup kaali, ali Grik tunum katale, kamok kamok ili weng uyo ma kuka-daa-lomdip, Kipyo! nulmi kukup kaata ma kutal-fuku-lom mep tunum kaami ipnaal uyo bo-kukan-telin aa! kala-silip disa.
GAL 2:4 Katale, Kristen o kala atuk atuk kemin tunum malo ma kiili, Yesus Kraist ata numi kukup kuyase kaata utamum o kala-lomdip, tiltam nuso maakup tiin bomduwa kemin, kanola, Sawaayak kaa nuli Moses ami Lo uta taba-lomdu sok de-yimulin tap kesu. La, Kraist ata sok ayo tildaa yim-baalaya nuli tiin tip-daalin tap ke-sulup. Yale, tunum malo ma tiltam tilip bom-bilip kiita, bokoya-lomdip: Moses ami Lo kuuta, asuk kutal-fukulin o! kal-bomdip kanum bakabip. Katale, Banabas alep nuli, asuk yak sok de-yumulin tap kemin kaami kukup kulaali, kutal-fukulokomup disa yo, kala-sulup te!
GAL 2:5 Kemin, God ali Yesus ata numi iliim boyin tap kaami sang kaa ma fal-siki-lom kuu kaltam kaldaak ken-umba disa; God ami tituun-kup tabin weng tambal kuuli, kipni diim kawu ti suunkup bombulu yo! yaka-lomduwa, nuli tunum kiimi sikil diim abamnupla, ita tiin mosip disale; imi weng kaata weng sandupya, yak Taitus ami ipnaal kaa ma ukan telin dinim ke-sulup.
GAL 2:6 Kanola, tunum iip maakup maakup ili Kristen unang tunum imi kamok kamok o kalsip. Lale, kiili kalok nolin kaata win so no, kalaliwa kiimi aket uyo ma fukun-umbi disa; le, aa God ali tunum kiimi win umi aket kaata fuku-dakan-umba disa; tunum win soyal bom-bilip kiili, nami weng uyo maso ma ifiip-nan-sip disa.
GAL 2:7 Atin ti disa kemin, ili utamiwa yi, Siin kaali God ali Pita ami dabaala din Juda kayaak imi weng tambal kukaayila-unse ultap ke, ti kanola God akal nali nam-baala umbi unang tunum miit ma miit ma kawu God alami weng tambal kaata kukaayila-unse no naka-silip.
GAL 2:8 Kemin, God ayo Pita ami titil kolaya kalaan tunum ke, ok fuku-ilin kaami ok kaata kutal-fuku-somdaya, Juda imi iip yak tem kaptam banse. Kemin, nakal ti kanose ultap keliya, nakal God alta taba-lomda titil uyo kup-nala, kalaan tunum imi ok uyo kutama bomdiya, yak aba unang tunum miit kusnum kusnum imi iip yak tem uyo tal-une-bamdiya okok-ken-tabasi.
GAL 2:9 Kemin, Jems so, Pita so, alep kiili, kamok kamok o yakan-kan-unbip. Kemin, kiili utamiwa yi, God alalta ok dukum kalawaali, misiim kuyase no kala-lomdipla, Banabas so, naso, alep nuli kiim maakup iltap ke, weng fokoyipla, nikil aket maakup kebup-kup kulaa iyo boko-lomdip: Alep kipta, unang tunum miit kusnum kusnum imi iipyak tem kaptamu okok kem-tal-une-biliple, nikil ma nuta Juda kayaak imi iip yak tem kaptamu tal-une-bamdup okok ke-bulup ke-bam kanu-mokomup o kaliwa, kulaali fan, weng uyo talaluluwa
GAL 2:10 kamok kamok iyo weng maakup kaata-kup boko-silip. Kemin, Ibi mafek mafek dinim tunum imi aket kaata fukun-bamdip dong dakaayin-bamdiwa yi! kala-silip. Kemin, nali kaami aket uyo nan-buluya, ok kalawuuli titil-foko-bomdiya kulii yak abip ma ma kem-tal-unen-umbi.
GAL 2:11 Kanola, nikil nuli Jerusalam kaptam kulaa kela bital abip Antiok kawu unupya kawu, bombii Pita ali tal nuso bomdup kawu utami ya, Ali tal kukup mafak kem-taba kala kalaliya, almi tiin diim kulu dabaak-mo lekbi kensii.
GAL 2:12 Kemin, mep kabak-ami miit kaali, Jems ali Kristen imi Moses ami Lo ti dukum-kup kano yikik-kutal-fukulin tunum malo ma iyo yim-baala tal-silip kiili tilin disa ilipla, Pita ali yak unang tunum miit kusnum imi tem una ima uyo inan-umbip. Katale, tunum ili kulaata tal atamipya, kulu Pita ali imi atul kaata itam-suun-daa almi kukup tambal tunum miit kusnum iso, ima inan-umba uyo kulu ditang kala kambola-lomda, maso itamaya, iso ima uyo ma inam-noma dinim kelale,
GAL 2:13 Juda kayaak Kristen kesip yakal Pita ami kukup mafak kaata dikiwa-taba-lomdip uyo kelip kala, kala-lomdaya, Banabas ali suun-daa kambolon o kaloma disa. Lale, kiimi kukup kaa kanubip kaata taba-lomdu, Banabas ayo sisii dabang daaluya, akal ti kanola suun-daa kelaya,
GAL 2:14 nali itami yi, Kii God ami weng tambal kaami liip kaa tituun-kup kutal-fukubip dinim o, kalaliya, nali alik imi tiin diim kulu Pita ami talalu bokola-lomdi: Juda kayaak nuli tunum miit ma iso ok dakaap, ima dakaap, kaa inin dinim. Yale, Juda kabi kaltapni kukup uyo kela-lomdap, yak tunum miit ma Kristen kelin iltap ke-lomdap iso, ima inan-tala-balap kaali, tambal. Lale, kamala kalawaata, kanimin o kalalawa, tunum miit kusnum ma Kristen kelin ili kanola kukup kalawaali kukuyilawa: Ibi Juda numi kukup kaata kutal-fuku-lomdip, kaptum kusal Juda kayaak ita-kup iso, kanola ima uyo inin o, kala-lomdap kaa titil-fak-daa kanubap i? aka-lom Pita ami kanum bakaanbi kelase ko.
GAL 2:15 Faneng te! Tunum miit kusnum ili, Moses ami Lo uyo ma kutal-fukusip disa. Kemin, Juda ita bokoya-lomdip: Mep kiili ban kemin tunum o ken-umbip. Katale, Juda kayaak Kristen kesup nuli tunum miit kusnum imi man loop disa; numi awil-fakal kiili, Juda imi man loop kiita fokoliwa, nuli kala bom-bulup. Lale,
GAL 2:16 kaali nokol utamsup, God ali Moses ami Lo kutal-fukulin tunum ami aket kaata fukun-bamda, Kaali tituun-kup tibin tunum o, ken-umba disa. Tunum ali Yesus Kraist ami lak duula namti, ata-kup God ali: Kaa fan tituun-kup tabin tunum o, yakan-kan-umba. Kemin, nuli yak Lo uyo iluut kutal-fuku-laamin kaami liip uyo kambola Yesus Kraist ami lak kaata duusup utamduya kemin, God ali numi Kraist ami lak dakaamin kaami toloop kabak-ami diim kaata nuli, Tituun-kup tabin unang tunum o kem-yaaba. Kemin, dok kanolin tunum ata Lo kaata iluut kuyak daa bomda kutal-fuku-balaya, God ali bokola-lomda: Tunum kaali, tituun-kup tabin tunum o ken-umba disa ko.
GAL 2:17 Kemin, Juda malo nuli, God ali numi bokoya-lomda: Ibi tituun-kup tabin unang tunum o yakak i! kalalupla, Moses ami Lo titil-kup fak-daa kutal-fuku-ilin kaami liip uyo kambola-lom, Kraist ami lak dakaamin kaami liip kaata kuluu-sulup. Kemin, Juda ili boko-lomdip: Moses ami Lo titil-foko kutal-fuku-ilin kaami kela-yaamin kaali ti mafak; kemin ale, Kraist ata kukuyilaya, ibi kaa kano-silip utamduya kemin, kaata kukuyila tal aba tam tunum miit kusnum iltap ke-lom ban kemin tunum ke-silip o ken-umbip. Lale, ili dik-daa kuluusip dinim; Kraist ali kukup mafak kaami miit kayaak disa le, aa numi lotu kemin kaami lo kambola-sulup kaali ban kemin disa.
GAL 2:18 Nali kanola Moses ami Lo uyo dukum-kup kutal-fuku bom-biili kulaasii uyo asuk kuluu-lomdi kutal-fukuli namti, Lo kuuta, bokop-na-lomdu: Kabi Lo duulmin tunum o, nakokin.
GAL 2:19 Kemin, nali kanola Lo kutal-fuku-biisi kuuta, taba-lomdu bokop-na-lom: Kabi kaltapni ban kemin kaami tem diin-ilom telu taanokomap o, kemuya, Kraist ata nami abiin uyo kuluu-lomdaya, as diim uyo taan-ilomda, Lo kaami weng bokop-nasuu uyo wela taansuu. Kemin, kamala kalawaali Lo kuu nali maso ma nam-tal-fukubu dinim; nali ti God alami-kup kanuman o kalba kaata-kup kutal-fukubi.
GAL 2:20 Kemin, kamala kala tiin kawong bombii kaali, nalmi titil kaata kuluu-lomdi tiin kawong bombii disa; Kraist ata nami iip yak tem kaldaku bom-balaya, nali tiin kawong bomdila kemin, kamala kala tawaal diim alik kalawaami tal-banen-umbi kaami tal-unebi uyo almi lak kaata-kup duu-bamdiya, tal-unebi kemin, nali kawu utamiya, God ami Man ali, nami lak ata duu-lomdaya, almi angtiil lak uyo duulin dinim maas kulaase no kalbi.
GAL 2:21 Kemin, kanola Lo kuuta taba-lomdu dong dakaayin-buluya, nuli kukup tambal kaata kutal-fukusup dinam, kaa Kraist ali atin disa kulu taanse. Katale, ami taanse kabak-ali miit so kemin, God ami disa kulu olen-daap-nase uyo binali unen-umbu disa. Kabak-ali atin disa te!
GAL 3:1 Galesia kayaak tunum babonin kipyo. Nuli Yesus Kraist ayo kukuyupla ibi atam-silip, ali as diim kawu dabak tam diilipla taanse diim kaali, iltipni tiin alep alep iyo atam-laamin tap ke-silip. Lale, kamala kaata kawanta nong-fokoyala baboneng tabasip i?
GAL 3:2 Nali weng maakup ma kaata-kup ibi dik-daayokomi. God ali kanimin o kalalaya, ali almi Sinik Tambal kaa kipni kuyase ni? Kaa Moses ami Lo kaata talalu tambal-kup kutal-fukulip kala, kala-lomdaya, God ali kuyase ne? God ami weng tambal kaata weng san-kaa-bamdip, Awu, kuuta tituun-kup tabin o kalip kala, kala-lomdaya, almi Sinik Tambal kaa kuyase?
GAL 3:3 Kamasi, kaa ibi God ami Sinik Tambal ami titil diim kawu kipni Yesus ami lak duu-yaamin kaa kufo-silip; kemin ale, kamala kalawaatale kambola-lomdiwa, iltipni titil kaata Kraist ami lak duu-yaamin kaa kutal-fuku kulii-tabum o kebip i? Kanimin o kalaliwa baboneng duku-bilip yoko?
GAL 3:4 Siin sawaayak kawu, uluum tabin yaapkan uyo tal kipni diim abem-somu uta taba-lomdu kipni aket fukunin kabak-ali kufoyasuu nema? Katale, nami aket fukunbi kaali, uta taba-lom kipni aket fukunin uyo kufoyuluya, dukum-kup fanang dakan-tabasip o, kebi.
GAL 3:5 Kanimin o kala-somdaya, God ami Sinik Tambal ayo kipni kuyimba-kup, ilipni diim kawu ok awak dukum win sokan kaa kanu-bam kemsa ni? Almi aket fukunin kaali, Moses ami Lo talalu kutal-fukusip kabak-ata no kala-somda ye? Kabak disa. God almi weng tambal, weng san-ilomdip, kaa ti atin faneng o, kebip uta te!
GAL 3:6 Kemin, numi awaalik Abraham ami kanon-bisa uyo talalu utamum. God ami Sukon Tem kabaku boko-lomdu: Abraham ali aket fukuna yi, God ami weng kuka-daap-namba kuuli faneng, kanolokoma no, kalale, God ali utamaya, Ami aket fukunin uyo kanum bokola kala, kala-lomdaya, boko-lomda: Ali tituun-kup tabin tunum kayi! kala-lomda, God ami Sukon Tem kabak-ali kanum bokosu.
GAL 3:7 Kemin, ti ipkal utamin! Tunum unang iyo dok kata utamipya, God ami weng tambal uyo fan tituun o kalip namti, kiita-kup atin fan Abraham alami man loop iltap.
GAL 3:8 Kemin, sawaayak kaa, God ami Sukon Tem kabaku weng kaal-ke boko-lomdu: Unang tunum miit kusnum ili tiltam nami lak uyo duulipla kawu, kabaku nayo bokoya-lomdi: Kiiso maakup tituun-kup tabin unang tunum o yokokomi no kalase. Ultap kemin, God ami Sukon Tem kabak-ali boko-lomdu: God ami weng tambal kaa Abraham ami bokola-lomda: Ilom am ma daanokomu kabak-ali kapni miining imi diim kaata fan kukup tambal tambal uyo unang tunum miit ma ma alik iyo kuyokomi no, kalase kayi! kala Sukon Tem uyo kanum bokosuu.
GAL 3:9 Ultap kemin ale, tunum God ami lak duula kaakal, God ali kukup tambal tambal kolokoma kaali, Abraham ami kanu-balaya kanon-bisa altap akal kanu-mokoma ko.
GAL 3:10 Katale, tunum yaapkan iyo, Nuli Moses ami Lo kaata talalu iluut dabak-daa kutal-fuku-bom buluwa kaata, God ayo bokoya-lomda: Ili ti tituun-kup tabin unang tunum o, yakak o kal-bomdiwa kutal-fukulip namti, God ayo wiis-moyilala, unang tunum kiili, maaklo ke win dinim ke-lokomip. God ami Sukon Tem uyo boko-lomdu: Kanola unang tunum alik ili Lo weng kaami sukon tem kabak bombuu uyo, Lo maakup ma so ma kewin disa alik ti kutal-fuku kanu-mokomip namti, God ayo wiis-moyila kiili, atin maaklo ke win dinim ke-lokomip disa yo, kalsu.
GAL 3:11 Kemin, God ami Sukon Tem uyo boko-lomdu: Dok kanolin tunum kaata, God ami lak kaa duula namti, kaata-kup God ali bokola-lomda: Kabi tituun-kup tabin tunum kayi! akaya, tunum kaali tiin kawong ilokoma no, kalasuu. Kemin, nokol kabak utamuwa yi, Tunum unang iyo ma taang-kala Moses ami Lo kaata talalu yikik-kutal-fukulamip dinim utamduya kemin, God ali boko-lomda: Ili tituun-kup tabin unang tunum o kalokoma disa yo, kebup.
GAL 3:12 Kemin, God ami Sukon Tem kabaku boko-lomdu: Dok nolin tunum ata ti Lo kaata-kup alik ti kano kutal-fukulin-kup ila namti, mep tunum kaali kabang-ami liip kawu tiin kawong ilokoma te! kalsuu. Kemin, kaa utamupla, Moses ami Lo kutal-fukumin uyo God ami lak duu-yaamin kaami mafek mafek disa yo, kebup ko.
GAL 3:13 Sukon Tem uyo asuk boko-lomdu: Aa, tunum ali kawanta kukup mafak nuu-balaya, aalip taanaya dabak tam as diim dap-diilip namti, ali utamupya, U, fan God ali mep tunum kaami win uyo mafak bokolala kemin, aalip o kalolup. Ale, Moses ami Lo uyo numi win kaali, mafak bokoya-lomdu: Ban ken-umbip ibi, atin God ata kipni win mafak bokoyokoma te! kala kanum bokosu. Kemin, God ali Kraist ami win mafak bokolala, uyo kuluu-lomda as diim taanse kaali, numi abiin kaata kuluu-lom taanse. Le, numi win mafak bokoyinsu uyo kuluu-lomda, asuk molaya, yaawa-sulup.
GAL 3:14 Kanola Kraist ami aket fukunin kaali: Kanoliya tunum miit ma miit ma iyo nami diim kawu fep-nipla, God ami Abraham ami weng kuka-daalaya kutal-fukuse ultap ke-lomdaya, yak tunum miit ma iyo yim-tama tam alami miit tem daa-lomda kukup tambal-kup kukaayak o, kala-som ale, uyo kanoliya, Atok ayo utama yi, Kiili nami lak duulip u! kala-lomdaya, almi Sinik kaa kuyokomi no kalase ayo numi kuyak o! kalalaya, Yesus kaa mose ko.
GAL 3:15 Nalmi nak-tunum kusal kipyo. Kalawaali, tunum nulmi sang kaata ma bokoyokomi kayi! Tunum alep ma imi weng uyo kuka-daa yak sukon tem unu dol-nokomip uyo, yak tunum kusnum ma ata tildang-ilomda, alep imi weng kutiibip uyo kuyang saak tiilama dinim. Ale, asuk maso til daala tooplo so unomu disa yo. Kemin, ultap o. God alami weng kuka-daa kaata: Kanolokomi te, kalase kaayo ali lolokoma disa.
GAL 3:16 Kanola, God ali boko-lomda: Mafek mafek tambal ma uyo am ma daanuya kabaku tiltam talokomu kayi! kalase. Kemin, God ami weng kuka-daasa uyo, God ali Abraham aso, aa Abraham alami man aso, alim imi kuyinsa kaa, God ami weng bakaan-bisa kaali, man loop yaapkan kesip imi sang kaata bokonsa disa; atin man loop maakup ma ami win kaata-kup bokonsa. Kemin, Abraham ami man loop sang kulaali, Kraist alami sang kulaata bokosa te!
GAL 3:17 Kemin, nami weng kuluumi miit kaali, kamasi kaa God ali Abraham ami diim kawu weng uyo boko kuka-daala-yaabuya, bombii wasital ulmi-kup 430, kiita dinimnipla kawu Lo namti tiltam dukup dakat kalasu. Katale, Lo kuuli, dok kano-lomdula, sawaayak God ami weng kutiisa uyo kulaak tabiilamu dinim ale, titil-foko taang-kala-lomduya, God ami weng kukulu-daasa kaa, kukan-tiilamu dinim.
GAL 3:18 Kanola, Lo kaata kutal-fuku-lomdup, God ami mafek mafek: Kaali kipni no, kalsa uyo kan-umbup dinam, utamuwa yi, Liip kaali God ami weng kuka-daa-lomda kaa kanolokomi kayi! kalsa kaami liip kawu disa. Kaa Lo kaami liip o, ken-umbup. Lale, God ali: Nalmi weng kuka-daasi kaata no, kalalaya, mafek mafek tambal kaali, Abraham ami konsa ko.
GAL 3:19 Sawaayak sawaayak kaptoowu, God ayo Abraham ami diim kawu weng kuka-daa-lomda, Am ma daanokomu uyo kanolokomi no kalsa. Kemin, ali kanimin o, kala-lomdaya mulo kawu Moses ami diim kawu Lo kaa kuka-daansa ni? Kaaye? God ali, ban kemin kaami miit kaata tiltam fatap-nuk o! kala-lomdaya, Lo uyo kuka-daase. Kemin, God ami aket fukunin kaali, Lo kalawuuta bom-buluya, yak aba umbutoop Abraham ami man loop sawaayak sawaayak, nalmi weng kuka-daansi tunum Kraist ami dusiin-daa talokoma kuyaku dilit kaluk o, kala-lomdaya, weng kaa kutiisa te! Kanola God ali Lo kuuli, ensel imi kuyilaya kemin, Moses ata God so, unang tunum so, imi iipyak tem kabaaku tolnaya, ensel ita Moses ami koliple, ata fukuba-kup asiik unang tunum imi kuyase.
GAL 3:20 Katale, tunum maakup ma ata taba-lomda, God ali dap-kabak daa-som Abraham ami dap-kaldak daa-som kelaya, dong dokoyilaya, weng uyo ma boko kutiisip dinim; atin disa te! God maakup alta-kup taba-lomda, Abraham ami weng uyo boko kuka-daala-lomda, Kaata kanolokomi no ansa, kaata fan uta uta ke-lomduya, Moses ami Lo kuuli, kabaak bansuu.
GAL 3:21 Kanum bokolu kemin ale, Lo kuuta taba-lomdu God ami weng boko-lom: kanolokomi no, kalsu kuuta tit-utam-ilomdu losu nema? Disa te! God ami, Kuuta kanolokomi no, kalsa uta taba-lomdu tiin kawong ilin kuuta kukaayila-yaabu. Lale, Lo umi kanum-unbu kaa ukol ulmi kusnum. Ale, kanola Lo uli tunum imi yam-titil-diiluya iyo tiltam Lo uyo kutal-fukun-umbip dinam, Lo uta fan tunum kii yam-talalulula tiltam God ami tiin diim kaata tituun-kup tabin unang tunum kemalip. Yale, kanolin Lo kuuli ma bombuu dinim.
GAL 3:22 Kemin, God ami Sukon Tem kabak-ali boko-lomdu: Ban kemin uta taba-lomdu unang tunum iyo alik sok de-yumulin tap kesu no, kalsu. Kemin, God ami aket fukunin uyo, Ban kemin kuuta kuno kewiya uta taba-lomdu, kiili sok de-yumulin tap keluya, imi aket awak dukum uyo fukun-ilomdiwa kawu, nami man Yesus Kraist ami lak uyo duu-lomdiwa yo! Sawaayak kawu nami lak duulin unang tunum imi weng uyo kuya-lomdi, Kanolokomi no, kalasii uyo kuluulin o, kala-ilomdaya, ban kemin uyo kuno kambowaya uta taba-lomdu sok de-yim-tiilin tap kesu ko.
GAL 3:23 Kemin, Yesus ali talala unang tunum ili ami lak kaa duulin disa bom-biliwa, Moses ami Lo uta taba-lomdula, nuli sok de-yumulin tap keluya, tiinaasupya, kulaata Yesus ami lak duu-yaamin kaami liip kuuta tiltam fatapsu.
GAL 3:24 God ami aket fukuna kaali, Ilom am ma daanokomu kabaku ali utama yi, Kiili nalmi man Kraist ami lak ayo duulip o kala-lomdaya kawu, ayo bokoya-lomda: Kipni ban kemin kaami maan uyo disa keyulula, tituun-kup tabin unang tunum kelip o, yokon i kalalaya, Lo uyo kutiilaya, nulmi Aalap keya-bomdu tiin mo yakyak kulii yak aba bital kula diilu kaali, Kraist ami talse kuyaku dilit kalasuu.
GAL 3:25 Kemin, kamala kulu Yesus ami lak dakaamin kukup uyo tiltam talsuu. Kemin, Lo uta numi Aalap tap keya tiin molu kaami diim kabaku maso ma bom-bulup dinim o.
GAL 3:26 Dok kanolin ipta, Yesus Kraist ami diim kawu fewa-silip namti, ipta fan atin ti God ami man ke-bom bom-bilip o.
GAL 3:27 Aa, ibi kawanta ma Kraist ami lak duu-lomdip oksam woko-silip namti, kipta fan Kraist ami aket fukunin so, ami kukup so, kiili kuluu-silip.
GAL 3:28 Kemin, God ali tunum unang iyo itafii-bamda, Awu, yak kalawaata Juda kayaak ale, ma kalawaata tunum miit kusnum o! kal-bomdaya itafii-bam ayo lii-bamda, Awu, kalawaali sok dedulip okok kemin tunum ale, ma ata akal almi aket-kup fukunin tunum kala ke-bamdale, kuno kalawaali tunum, aa kalawuuta unang o ke-bamda liiwa-yaaba disa; alik ibi Kraist ami diim kawu yak fewa-silip kemin, ibi akal alik akal alik disa; ibi ti fanang maakup.
GAL 3:29 Kraist ami unang tunum ibi Abraham ami God ami lak duusa ultap ke-silip utamduya kemin, ibi Abraham ami man loop iltap ke-lomdipla, sawaayak God ami boko-lomda: Mafek mafek kalawuuli Abraham ami no, ansa kaali kipkal kuluulokomip o.
GAL 4:1 Kemin, kabak-ami sang uyo maso ma bokolon o kalaliya kemin, tunum ayo am ma daanokomu uyo almi man alta tal aba tam Aalap ami taanda alik kanumin mafek mafek kii kutiilokoma uyo kuluulokoma. Kemin, bung kayaakim ali man kaa bombe. Lale, kama man bombe kaptoop-ali almi mafek mafek kaa akal tiin molokoma dinim; ali disa wok fuku-lom iiwaan ami man altap kelala, okos aa, aalniing aa, ita man ayo tiin mole, ami bung mafek mafek kiiyo tiin mo ke-bom bilipla, man ali weng kuyang saak tiimin dinim, Ti weng, weng san-kaamin man ke-bamdaya, ti tiin molin ami weng kaata-kup weng san yakaba butoop Aalap almi, Kulaata mafek mafek kutiilokomi uyo kolan o, ansa kuyaku dilit kalokomu.
GAL 4:3 Ultap kemin, nokol kanola aket tambal ma fukunulup disa. Man katip katip ililtap ke tawaal diim kalawaami kukup mafak imi minlo tem kuyangu bom-buluwa ita sok de-yumulin tap ke-biliwa tiinsup. Lale,
GAL 4:4 God ali tunum unang Moses ami Lo umi minlo tem bom-bulup numi iliim kaata, Boliya nalami man ke-lomdip nami mafek mafek iyo kuluulin o kalalaya utama yi, Almi, kaa kanolokomi, kalase uyo tiltam tulu kala, kala-lomdaya, alami man ayo dabaala tildaak talaya, awak uyo duuluya, tiltam aba Moses ami Lo uta kutal-fuku-somdaya bom ilsa ko.
GAL 4:6 Kemin, kamala kaali, Ibi God nalmi man ke-bom bilip o, kala-somdaya, God ali almi man Yesus ami Sinik ata dabaala tal nulmi aket tem un-ilom dong dokoyilaya kawu, nuli God ayo, Atok o, atok o, akan-kaa-bomduwa naan-umbup.
GAL 4:7 Kanola kibi maso ma Moses ami Lo weng kaata-kup bon takas tiyak tam umi bon tem daalin tunum bom-bilip disa; kibi God ata yim-talalulaya, God alami man ke-silip utamduya kemin, God ami mafek mafek, Nalmi man kep-nokomip kiimi no kalalaya, talalu kuyase, uyo kipta kasentap tal aba tam kuluulokomip ko.
GAL 4:8 Ibi sawaayak kaali, God kaa atamin disa bom-biliwa, sinik mafak ita taba-lomdip sok de-yimuliwa, imi minlo tem kawu bomdip imi ok uyo kutal-fukuya-bomdipla, Kiita numi god o ke-bamdip ilsip. Lale, sinik mafak kiili, fan God daa. Le fan, kii god alaltap disa.
GAL 4:9 Katale, kamala kulu ibi God atam-silip. Kata, ibi talalu atam-silip disa; God alalta ibi itam-ilomda uldaa-yim-buulaya atam-silip. Kemin, ibi kanimin o kalalipla asuk alula yang tawaal diim kalaami sinik mafak mafak imi minlo tem uyo kabak banum o kala-silip i? Kuliili titil dinim ale, ili ok tambal ayo ma nun-umbip disa; kemin, kanimin o kalaliwa din itamupla, ita sok de-yumulin tap keliwa imi okok ilum o kalaliwa yo?
GAL 4:10 Ibi kaata, Kanu-bulupla God ali numi itam-ilomda, numi fiyaap kaata suunkup duu-bamda yim-buulak o kal-bomdiwa kemin, kanola am awak dukum ma daanbu so, kayoop tiltam tabamna fiyaap duumin so, unang tunum alik tala-tala-ke-bam lotu kemin am daanbu so, alokso wasital tiltam tababu kaami kukup kaaso, kiiyo kanu-bam fiyaap duun-unbip. Lale, kuu God ami liip kaa, kaa bombe disa. Ita ipni yim-buulokomu disa.
GAL 4:11 Nali kipni aket dukum kaata yaapkan fukun-bamdiya, nali siin kawu kipni fiit-kup dabak-daa-bomdiya, dong dakaayinsi uyo atin daak ababu ema yo kebi.
GAL 4:12 Kibi tunum miit kusnum kemin, ibi Moses ami Lo diim kawu tiin-bomdiwa, sok de-yumulin tap kesu disa. Kemin, sawaayak kaali, Juda nulmi kukup kaata kambola-lomdiya, iltiptap kelile, Moses ami Lo uta taba-lomdu sok de-namulin disa keluya, bom biisi. Katale, kamala kulaata kanimin o kalaliwa, ipta Juda imi kukup uyo kuluulum o, kalbip i? Ibi kanumin disa yo. Atin nalmi nak-tunum kusal kipyo. Kabak-ami sang kaata ibi dukum-kup bokoyon o, kala-lomdiya kemin, ibi Juda imi Lo kaami aket uyo lukuuyu kulaa-lomdip, tiltam naltap keliwa yo kala-somya ko. Kamasi kaali, ipkal utam-silip. Kemin, nali ibi abiltap keya unokin lale, nali mafak-alin kaata umuli kala, kala-lomdiya kemin iltipni abip bom-bilip kulu kipso maakup suunkup bomdila, God ami weng tambal kaami sang kaali, kamosinim kawu kufo-lomdiya, kukaayinsi. Kemin, ibi kukup mafak so ma kup-na-silip disa.
GAL 4:14 Faneng, mafak-alin uta taba-lomdu nam-mafak-daaluya, ipyo, aket uluum kuyula, kwin! kaaso kep-nokomip kawi! kalasii. Lale, ibi nali daang ukup-na-silip dinim; ale daal tabeyu kep-na-silip daa yo, kala-lomdiya ibi God ami ensel e, Yesus Kraist ami dabuulin tap ke-lomdip nami weng uyo weng san-kaamsip.
GAL 4:15 Kemin, ibi God ami weng kuuta, fiyaap duu-bam atin ibi mafek mafek tambal tambal iyo dong dakaap-nam-bamdip kukaap-ninsip o. Nami utamsii kaali, kanola ibi nami tiin mafak uyo utamdipla, Kaa olen-daala-lomdupla kemin, numi tiin tambal kaata luk-duu-lomdup kolup dong dokoluk o, kala-silip dinam, uyo kano-silip. Katale, kipni fiyaap duumin kaa kanumsip kaali, ibi kamala kaa kanubip disa. Kabak-ali kuu doku daa-silip i?
GAL 4:16 Nali weng kaa faneng tituun-kup tabin bokoyasii. Kemin, kipni aket fukunbip kaali, nali kipni waasi ema?
GAL 4:17 Kemin, Juda tunum iyo kasen-foko God ami weng tambal kukaayup kayi! kemin tunum ili atin kipni neyinbip. Katale, ili kipni lak uyo ma duu-bamdiwa disa; ili ti ilmi lak kaata-kup duu-bamdiwa kipni neyinbip. Kemin, aket fukunin kaali, Nuyo Galesia kasel imi nen-daayupla kawu, ili Pol ayo kelalip tildak numi tem tiliwa, nikil alimal maakup ke tambal-kup bomduwa yi! kal-bomdipla, Juda tunum ili ipni neyinbip.
GAL 4:18 Kanola nuli, kayak kayak iyo kukup tambal kaata-kup kutal-fukulin o kalalupla, neyokomup kulaali tambal. Kanola naso nikil alimal ilokomup e, aa nali ilokomi disa ye, uyo kanolin kukup kaa tambal kemin, kibi suunkup mokso ma ke-bom kanu-mokomip.
GAL 4:19 Nalmi man kipyo. Nami aket uluum kaali, unang man kuulon o kal-bomdu yol dukum utam-laabu ulultap kebi kemin, kibi siin kaa tiltam Yesus Kraist ami lak uyo duuliwa yo, kal-bomdiya, aket uluum uyo tabep-nuya, ipyo fen-unbi. Kamala kulu tiltam tin Kraist alaltap keliwa yo kalaliya, aket uluum tabep-na-buluya bombii,
GAL 4:20 nali ipni kukup kaata aket yaapkan fukunbi kemin, kamala kaali kipso, naso, nikil alimal maakup bomdupya weng uyo bakayon o kalbi. Lale, nali olen-yinbi kemin, uyo bokon samaan o kalaliya kalawu bomdi, disa weng kaata-kup dola kuyi no.
GAL 4:21 Unang tunum kipyo! Maakup maakup kibi Moses ami Lo umi minlo tem kawu-kup bom iluwa, uta yim-bitam abip tangbal daaluk o kalbip. Lale, nali kibi dik-daayokomi. Ibi Moses ami weng dolsa kaali, talalu utamsip e disa?
GAL 4:22 God ami Sukon Tem kabaku boko-lomdu: Abraham ayo man tunum alep kemin, ma kaali Abraham almi disa kulu ok fukulin unang Heka kuuta Ismael ayo kuulule, ma kuutale, dalaal unang Sara kuuta Aisak ayo kuulu kesu no kalsu. Yale, disa kulu ok fukulin unang umi man kuusu kaata, alami aket fukunin kaata-kup akam maakup bomdiwa awak uyo kumun so ke-lomduya kuusu. Ale, dalaal unang umi man kuusu ata God almi weng mikil diim, Akam, ibi man ma kuulokomip o, kala boko kuka-daalaya akam maakup ilomdip awak uyo man kumun ke-lomduya kuusu ko.
GAL 4:24 Sang kabak-ali faldak-tiimin sang kemin, unang alep kiili, God ami weng alep ma kuka-daasa ultap kemin, ma kaali, Moses ami Sainai Tikiin kawu, tam atama Lo kaa konsa kabak-ali disa kulu ok fukulin unang Heka ultap kemin, tunum unang ili, Lo kuuta yikik-kutal-fukulum o kalaliwa, iluut kuyak daa fiit-bilipya, Lo uta sok de-yim-tiilin tap keluya, fiita-yaabip. Kemin, kiili Heka umi man disa kulu ok fuku ilin tap ke-bamdiwa kanu-bisip.
GAL 4:25 Kemin ale, Sainai amdu fiil kaptam-ali am bokon Arebia bokon amdu kemin, tam kaptamu Moses ayo Lo kaa kuluusa; kemin ale, Heka kuuli Lo ultap kanolin. Ale, Jerusalam kaptam-ali Juda imi abip diildiil kemin, Jerusalam kasel kiili, lotu kemin umi lo uta ti kano dukum-kup kutal-fukulum o kalalip kanu-bilipya, lo uta taba-lomdu sok de-yim-tiilin tap keluya, kanun-umbip. Kemin, Heka uli Jerusalam kasel iltap; kemin ale,
GAL 4:26 Jerusalam ma yo kalin kaa, God ami Jerusalam kasel ili disa kulu ok fukumin dinim bom-bilip o kalin, uli unang Sara uta kemin, uta God ami abip tambal Jerusalam ultap. Kemin, uli God alami weng ma Abraham ami diim kawu kuka-daa-lomda, Kaata kanolokomi no, kalsa ulultap ale, kaali, unang tunum God ami weng kuka-daaya kanolokomi no, kalase kuu utamupla, Fan uu kalokin, uyo numi awak.
GAL 4:27 Kemin, God almi Sukon Tem kabaku kanum bokosu kaali, Juda imi Jerusalam umi sang kuuso, God ami Jerusalam umi sang so, kiita faldak unang alep kiimi diim kawu tii boko-lomdu: Unang kubi man fakamin disa, fuunkis unang kesap. Yale, kubi fiyaap-kup duu-bam tiin bomdawa yo, kala-somya kemin, Kubi man faka-bamdawa, yol utam-yaamin uyo ma kuluusap disa. Yale, kupni aket uyo tambal-kup ma kep-tula fiyaap duumin-kup tiin-bomdapla naan-bamdawa ilan o! Disa kulu ilin kupta, man yaapkan unang ke-lomdap, unang tunum din umi man fakamin uyo kup-ta akaawa, kupni man kiita ita ita ke-lomdip tunum unang yaapkan ke-lokomip o, kalsu ko.
GAL 4:28 Kemin, naktum kusal! Kibi Sara umi man Aisak alaltap kemin, ibi God ami weng ma kipni kuka-daaya-lomda, Kanolokomi no kalsa uyo, U fan u! kala-silip kabak-ata utamduya kemin, ibi God almi man kela-silip.
GAL 4:29 Lale, man kaa, awak-aalap ilimi fanang saanin man duu-silip, Ismael ata taba-lomda man God ami Sinik ata awak-aalap dong dokoyilala, Aisak kaa kuu-silip ali, waasi kela bom ilsa. La, mep kamala kulu tunum unang Moses ami Lo tabuulin ita tam aba tunum unang God ami weng kuka-daaya, Uta kanolokomi no kalsa, uyo ti faneng u! kebip kiita, waasi ken-umbip.
GAL 4:30 Katale, God ami Sukon Tem kabaku kanimin o kalsu ni? Kabak boko-lomdu: Sok de-yumulin unang umi man kulaali unang sok de-yumulin disa umi man aso alep maakup kelip aalap ami bung kaa kuluu-yaamin disa; sok de-yumulin unang umi man sole, awak so, awaat iyo fotabam-nala, atin yak banin o kalsu.
GAL 4:31 Kanum bokosu kemin, nak-tunum kusal ibi! Nuli unang tunum God ami weng kuka-daaya, Uyo kanolokomi kayi! kalsa kabak-ali utamupya, U, kabak-ali faneng u! kala-sulup, nuli unang sok de-yumulin unang umi man alaltap disa; nuli unang sok de-yumulin disa unang umi man alaltap; kemin ale nuli sok de-yim-tiilip ilin disa; disa kulu ilin imi kukup kaata-kup kutal-fuku laabup.
GAL 5:1 Kraist ali aket fukunin kaa, Nuli sok de-yumulin disa ilin ililtap ke tambal-kup bomdiwa yo kala-lomdaya, numi Moses ami Lo uta taba-lomdu sok de-yimulin tap kesu uyo til-daayase. Kemin, ibi Juda ita sok de-yumulin tap keliwa, Moses ami Lo uta asuk maso ma kutal-fuku-laamin dinim. Kemin, titil-foko tola-bomdiwa ko.
GAL 5:2 Nali Pol nata weng kala bakayinbi kemin, weng selin. Kanola tunum kibi God kaa, Nuli tituun-kup tabin tunum o yakak o kalaliwa, Juda ili kamboyiwa ita taba, kipni ipnaal uyo bo-kukan-tiiyip namti, Kraist ami as diim taanse kabak ibi dong dokoyokomu disa. Atin ti disa te!
GAL 5:3 Kuno kamboyulupla, iyo numi ipnaal uyo ukan-tiiyik o kebip tunum kiwe. Nali weng kalawuuli asuk ti fatap-kup bokoyokomi kemin, dok kanolin kapta ma kanolin Moses ami kukup maakup kuuta-kup kutal-fukulap namti, kabi Moses ami Lo alik umi minlo tem unapla, sok de-tamulin tap ke-lokomu no kala-somla ko.
GAL 5:4 Tunum malo ma kipni aket fukunin uyo boko-lomdip: Nuli God kaa bokoya-lomda: Ibi tituun-kup tabin tunum o yakak o kala-lomdip Moses ami Lo uta fukulum o kala-silip. Kata, kanolin kukup kuu ibi Kraist kaa kambola-lomdipya, God ayo kipni dong dokoyikin kaami liip uyo kulaalum o kalbip.
GAL 5:5 Katale, numi aket kaa ma kanubup disa; God ami Sinik ata yam-titil-diilaya, nuli utamuwa yi, God ayo, Ibi tituun-kup tabin unang tunum o, yokokoma kala kalsup. Kemin, uyo utamupla, God ami weng kuu atin fan u kalaluwa, weng kabak-ata fen-bulupya, tiltam dukup-dakat kaluk o kalaluwa, kabak-ali fenbup.
GAL 5:6 Kanola tunum ayo Yesus Kraist ami diim kabak fep-na namti, ipnaal bo-kukan-tiimin uta taba-lomdu dong dokoyokomu dinim. Ale, aa ipnaal bomin disa kuukal kuno dong dokoyokomu disa. Ale, kanola tunum ali Yesus Kraist ami lak kaata duu-lomda, ap-tunum kusal imi kukup tambal aket falit kaata kukaaya namti, kanolin kukup kaata taba-lom atin tituun dukum o.
GAL 5:7 Siin sawaayak, kipni Kraist ami lak dakaamin kaali, tiltam titil-fokosu. Yale, kamala kalawaata weng selila, ibi God ami tituun-kup tabin weng uyo maso ma kutal-fukubip dinim o kaliwa kaata, weng san-ilomdiya, kanta bokoyilaya ibi kano-silip yoko?
GAL 5:8 Kemin, God ali kibi naan-daaya, alami fanang uyo tildang talen-umbip. Kemin, God ata ibi tiklak-yim-bamda kambop-na unemin kaa tangbal o, ken-umba disa.
GAL 5:9 Kaa kipkal utamsip kemin, kanola mafek mafek atul tabin katip ma kaata dabaalap yak inin umi iipyak tem kabaak banokoma ayo, ami atul ata taba-lomda inin-inin iip yak tem ayo bukulokoma. Ultap kemin, tunum ta, disa ibakamin weng ma bakayinbip kiili, iip maakup maakup ita-kup lale, ti kuliita taba-lomdip unang tunum yaapkan kii yam-mafak-daalokomip kayi!
GAL 5:10 Kemin, naso nikil alimal maakup kuu mim-daa Kamokim ami lak uyo duu-sulup. Kemin, nali kaa utami yi, Ibi faneng nami aket fukunin kuuta-kup kutal-fukulokomip kaata, kibi ibakamin tunum kiimi fanang saanin kaa kusnum akal alik kutal-fukulokomip disa yo kebi. Kemin, tunum kaa kawanta taba-lomdip kipni aket fanang saanin ku-mafak-daayip namti, kaa God alalta mep tunum kiimi ban kemin kaami maan uyo tiiyokoma ko.
GAL 5:11 Kata, tunum malo ma ili boko-lomdip: Pol ata taba-lomda tunum alik iyo bakayin-bamda: Yi, kipni ipnaal uyo bo-kukan-tiiyiwa, God ali boko-lomda, Ibi tituun-kup tabin tunum te! yakak i! kala-lomdaya, bakayin-kup tabasa kawi! ken-umbip. Kemin ale, naktum kusal, kibi nali kanola weng kaa bakayila-yaabi dinam, Juda kiili, kukup mafak uyo kukaap-nalalip disa. La, nali kanumin weng kuu kanum boko-lomdi bakayinbi dinam, Yesus ami as diim taanse umi sang kuuli, ma taba-lomdu Juda imi aket atul uyo kuyuluya, aket atul tabebip uyo disa kelamu. Lale, kaa disa te.
GAL 5:12 Kemin, mep tunum kaa taba-lomdip kipni aket fukunin kaa ku-mafak-dakayin-bam bom-bilip kiili, kanolip namti, kiili atuk-atuk-kemin disa. Kemin, kiimi ipnaal katip sakap kaata bo-kukan-tiiyip yol kuluu-laamin lale, nami aket kaali atin ti iltipni angtiil alik ayo bo-falala kuyak moyiwa yol dukum kuluulik o kebi.
GAL 5:13 Nak-tum kusal kipyo. Kabak faneng kemin, God ali ibi naayin-balaya, tal aba tam Moses ami Lo kaata fuku-bom ilupya, God ata ibi tituun-kup tabin unang tunum o kalin kaami liip uyo, kela talaba yak sok de-yumulin dinim iltap ke-silip. Katale, ibi iltipni aket kaata fukun-bamdip: Yi, nuli nokol nulmi fanang dakamin kaata-kup fukun-bamdupla, yak mafek mafek nuumin tunum ke-sulup. Kemin, nuli siin kaami kukup uyo kanolum o, kalup kulaali, kanolalup o, kemin daa. Ibi ti kaltipni kap-tunum kusal kiimi aket kaata kuyinbip-kup, alami weng-kup weng san-kaa-bamdip dong dokola una-tala-ke-bamdiwa yo, kala-somya ko.
GAL 5:14 Lo alik kabak-ami iipyak tem uyo maakup kemin, uyo boko-lomdu: Kabi kaltapni angtiil lak kaata duu-bomdap tiin saan-umbap ultap kelap, yak kaptum kusal imi lak uyo duu kelan o kalasu.
GAL 5:15 Kalsu katale, ibi ti dinin kaata-kup kanum yakyak kutama tal-bomdiwa yak fik o kalba, niing o kalba, uyo dap-kayaku una-tala-kemip namti, ipni aket maakup ke una-tala-kemin uyo dinim kelule, alik kuyaku-diyaku-ke mafak-nokomip kemin. Ibi kuu talalu utafii-bamdiwa yo! kala-somya ko.
GAL 5:16 Nami weng namti kalanolin ko. Kibi God ami Sinik ata kambolip ata tildak ibi tiin molak i! Kemin, kibi kanu-mokomip kaali, siin ami kukup uyo maso ma kutal-fukulokomip disa; God ami Sinik ami kukup kukuyinba kaata-kup kutal-fukulokomip.
GAL 5:17 Kemin, nulmi siin kaami aket fukunin ali akal almi boko-lomda: Yak kaata kanuman o, tildak kaata kanuman o ke-balale, aa God ami Sinik ali akal almi ma boko-lomda: E, e, yak kaata kanuman o, tildak kalaata kanuman o ke-bala, ken-umbip. Kemin, alep kiita taba-lom waasi kela una-tala-ke-biliwa kemin, kabi yak kukup tambal kaata-kup kutal-fukulon o kebap kaa, taang-kala yak fukulamap dinim ken-umbap.
GAL 5:18 Lale, God ami Sinik asiik unala, ami daang tem unip namti, kibi Moses ami Lo kuumi minlo tem kawu bom-bilip disa.
GAL 5:19 Kipkal siin umi kukup kanumin kulaa utamsip taa! Yak sadikimin kukup, unang umi utam aket dakat yak abu nenin, yak kukup mafak mafak fatom-tabasu kukup,
GAL 5:20 awem men umi wiis-saan-bam naalin, yokoop wakamin, waasi kela una-tala-kemin, dinin kukup, itam-suunin kukup, nenin kukup aye, nuta nuta keluwa yo kalin aye, weng aal-dikimin, tunum miit bakela una-tala-kemin
GAL 5:21 aptum kusal imi neya una-tala-kemin kukup, ban ima fuubi kutii im-bom aket mafak fukunin ok mafak inbi-lom babon bi-lom, sadikimin kukup akal liip kusnum kusnum nuumin kukup, kanumin kukup kiita taba-lomdip yam-mafak-dakan-unbip o, kala kiimi sang kiili siin kawu bokoyasii. Lale, asuk kamala uyo yam-titil-saanin weng kaa bokoyokomi. Kemin, unang tunum alik ili ti kanolin kukup kaata-kup ti kutal-fukulin-kup ilip namti, ili God ami abip tambal kaali, tam unipla, alta tambal-kup ili tiin mola ilokomip disa.
GAL 5:22 Lale, God ami Sinik Tambal ami kukup ali kalanolin kaata kanumin o kala kutaltam dakan-umba ali kala bombuu ko. Kaptum kusal iyo olen-dakaayin, fiyaap duumin kukup, aket tem balili-kup kala ilin, akola fanang dik-daa bom weng dinim ilin kukup, aptum kusal dong dakaayin-bam kukup tambal tambal kamayin aye, kukup tambal uyo kewa-laamin daa ti suunkup kutal-fukulin-kup ilin,
GAL 5:23 akol akol kemin kukup, siin kukup kaami aket uyo dibiilip daak abokomu kaami kukup, kulaali ti lo maakup so ma boko-lomdu: Kalawaali kanumin dinim o kalsu disa.
GAL 5:24 Kemin, alik Kraist ami lak duulin tunum unang kamasi kaami kukup kaami aket tem bombuu kabak aso, yak kukup mafak kaami aket-kup yesu uyo welip taanu kewa-silip.
GAL 5:25 Kemin, God ami Sinik alta atin tiin kawang ilin numi kuyase kemin, nokol kanola God ami Sinik ami weng kaata kutal-fukuluwa, alalta numi tal-unemin, tiin-yaamin uyo dal mo-balaya yo, kala-somya ko.
GAL 5:26 Nuli kanola nulmi win uyo disa kaa kufumin disa. Ale, nuta nak-tunum kusal imi aket fukunin uyo ku-mafak-daayulupla, iyo aket atul kaa tabemin dinim; yak imi mafek mafek uyo mook in-bomdup nenin disa ko.
GAL 6:1 Nak-tunum kusal kipyo. Kanola ipkal utamipla, Tunum ma yang ban keba kala, kalip namti, tunum kamasi God ami Sinik ami weng kutal-fuku daang bakaalin tunum ipta, yang-ilomdip akolkup nu-bam ale, aket bilili-kalin kaata-kup kukaan-bam dong dakaala unan-silip ami aket fanang uyo asuk tambal-kup keluk o. Misii Setaan ayo ipkal tal yam-kukulaya, mep tunum kaami ban ukuba ultap kelamip i! Ibi boko-lom: Yi! nuli titil-fak-daasup kawi kemin disa; kabak talalu utafii-bamdiwa yi!
GAL 6:2 Kemin, kaptum kusal ili aket uluum uyo kuluulip namti, ibi yang dong dakaayin-bamdiwa yo. Dong dakaayokomip kaata, fan Kraist ami lo namti kaa kuluu-lomdip kanubip.
GAL 6:3 Kemin, tunum ma ami aket fukunin uyo fukuna yi, Yi! nali kasaa win tibin tunum kawi! kema namti, ali win tabin dinim kemin ami aket tem uyo fanang mak-maak ola-buluya baka-mokoma.
GAL 6:4 Kanun-unbip kemin, unang tunum maakup maakup iyo ilmi kukup uta utamiwa yi, Kaata mafak e, tambal e, yakan-kaa-bamdiwa kayi! Kanola utamipla, Imi kukup uyo tambal u! kalip kulaali, kanubip umi kukup uyo fiyaap duulalip. Ale, yak imi kukup kuyaku-som, aptum ami kukup kuyaku-som, kelip liiwu kela-laamin disa.
GAL 6:5 Unang tunum maakup maakup ili God ami tiin diim kawu tolniwa, God alta taba-lom imi kukup uyo liip-mokoma. Kemin, tunum kabi yak kap-tunum kusal kusnum imi kukup uyo liiwalin dinim yo.
GAL 6:6 Kulaali, tunum ayo God ami weng uyo unang tunum imi kukuyila uyo, inin-inin aye, tuumon aa uyo lo-lomdip, anung kaata ilmi kukuyin tunum kaami kukaalalip ko.
GAL 6:7 Ibi weng kalu talalu weng selin. Kanola tunum ayo yang inin-inin san kulii-yang dikila ilom tiltam tabokoma kaa, mafek mafek san kusnum ke-lokomu disa; asuk ti ulta tiltam abuulule duk-duulokoma. Kemin, ultap o. Tunum ayo dok kano-lomdaya, alami kukup uyo kuwaa-lomda God kaa kasen-fokolokoma disa; God ali taba tunum almi kukup mafak kanun-tabasa kaami maan uyo telokoma.
GAL 6:8 Kanola, tunum ma ayo siin kaami kukup kaata ti kano kutal-fukulin-kup ila namti, alami siin kaami kukup kaa kanumin-kup keba kaata, taba-lomda tiltam dap-mafak-daalale, atin maaklo ke-lokoma. Kemin, kanola tunum ali God ami Sinik Tambal ami weng kaata-kup kutal-fuku ila namti, kaata Sinik Tambal ata ami suunkup ilin kaami liip kaali talalu kolaya suunkup ilokoma.
GAL 6:9 Fan, ilom am ma daanokomu kabaku, God ali numi kukup kaami maan kaali, tiiyokoma. Kemin, nokol kukup tambal fuku ilin uyo daal-daal-kemin disa; nuli am lang uyo daal-daal-kemin disa kemup namti, ilom ima waan tiil-nokoma uyo inin-inin tambal-kup faka-mokomup.
GAL 6:10 Kanolin kemin, uyo utamupla, kabak-ata liip so no kalup namti, unang tunum alik kukup tambal kaata-kup kukaayin-bam ale, tunum unang iyo tal Kamokim Yesus ami lak duulin ita dukum-kup titil-foko kukaayin-bam ke-bamduwa yo.
GAL 6:11 Kamala kulu, nami weng uyo disa kelu kewon e kali kemin, nali nak-tunum ami weng kala bakaan-bilila dolba ami dolmin mep bairo uyo kuluu-lomdi nakal nalmi weng mafiing kaata dol-yinbi. Kemin, ipkal dolmin dukum dol-yinbi uyo utamiwa, kaa nalta dola kuyili kala kalin o kalaliya dol-yinbi.
GAL 6:12 Tunum malo ma kipni ipnaal kaa bo-kukan-tiiyiwa yo, kalalip iluut kuyak dakabip. Kemin, kaa kanimin o kalaliwa kanubip i? Kiili, ap-tunum kusal Juda kusnum imi tiin diim kaali, ili kukuyin tunum tambal o, kalin o kal-bom ale, imi aket kaa fukun kanola, Nuli unang tunum imi kukuyin-bulupla Moses ami Lo uyo daang ukuwa Yesus ami as diim taanse ami lak kaata-kup duulip namti, Juda ili kaami kalan kaata aket atul tabeyule, numi yemalip i! kalale, kulaali Moses ami Lo yo kala mep ipnaal wakan-tiimin kukup kaata yikik-kutal-fuku-bom kukuyila-yaabip; kemin ale,
GAL 6:13 kukuyin tunum kiili, kanum bakan-unbip. Katale, kanola tunum imi ipnaal wakan-tii-lomdip, Nuli ti, atin Juda tituun kelup te! ken-unbip kiili, fan Moses ami Lo kaa atin talalu tambal-kup kutal-fukusip disa. Lale, kukuyin tunum imi aket fukunin kaali, Titil-foko bakayin-bulupla, numi weng kaata weng san-ilomdiwa, ipnaal uyo bo-kukan-tiiyiwa kawu, kayak kayak iyo numi win dukum-kup bakamin o, kalalipya, iyo iluut kuyak daa bomdip kipni kanum bakayila-laabip.
GAL 6:14 Kata, nali mafek mafek kusnum ma kiimi win kaali ma kufolokomi disa; nali ti Yesus Kraist ami win kaata-kup kufu-bamdi, ami as diim taanse kabak-ami fiyaap kaata-kup tabebi kemin, nami fiyaap duun-umbi kabak-ami miit kaali, Yesus ali as diim kawu taan-ilomda numi dong dokoyase no kala-lomdiya kaata, tawaal diim kaami mafek mafek ita nami tiin molokomip disa; atin ti ili taanin tap kesip. Kemin, nili mafek mafek kanolin ma iyo nuubi disa. Ili nami kambop-na-lomdip taanin tap kesip kaa asuk ili nam-bital nam-mafak-daka-mokomip disa yo.
GAL 6:15 Kemin, ipnaal bo-kukan-tiimin kukup kaali, mafek mafek sakbaalim dukum disale, ipnaal bo-kukan-tiimin kukup kambola-laamin kuukal ti, mafek mafek sakbaalim dukum disa. God ami ulela-yim-buulala tiltam kama unang tunum kem-laabup kaami fiyaap kaata-kup duumin o.
GAL 6:16 Kemin, dok kanolin kipta kanolin aket kaata-kup kutal-fukulip namti, nali beten kamayin-bilila, God ali ibi ulduulala atin ti Israel tituun-kup tabin ke-silip namti kaa-bilip, ipni olen-daaya-lomda dong dakaayin-balaya, tiltam balili-kalin aket uyo kuluulin o kal-bomdiya beten kamayinbi ko.
GAL 6:17 Kemin, weng mafiing namti kalabuu. Yesus ami kalan kaata, tunum iyo taba nayo nemin-kup ke-biliwa, nami angtiil diim uyo dal yam-kup bukusu. Kemin, nali atin ti Yesus ami okok kemin tunum kemin, tunum iyo ma nami weng kukaayinbi uyo, asuk kuyang saak tiilamip o kalaliya kemin,
GAL 6:18 nak-tunum kusal kipyo. Nali Kamokim Yesus ami beten keliya, kipni diim kawu bomdaya, kibi kukup tambal disa masiim-kup kukaayin-balaya, bom-biliwa yi! Fan ko. Kemin, Pol nita sukon kala dolni no.
EPH 1:1 Nak-tunum kusal kaa tiinsip o? Nali God ami kalaan tunum Pol nita God alami aket fukunin kaata uldaa-nam-buulaya, nali tiltam Kraist almi kalaan tunum kesi. Nata sukon kalawaali God almi unang tunum abip Efesis kaptamu bomdip Kamokim Yesus Kraist almi lak kaata-kup duu-lomdip, yang banemin dinim ilin, ipni dola kuyon o, kali.
EPH 1:2 Kemin, nayo dik-daaliya, numi Aatumen God sole, Kamokim Yesus Kraist so, alim ita taba-lomdip, yaap ma kamayin-bilipla, kipni aket tem ayo bilili-kala-bomdiwa yo, kala-somya ko.
EPH 1:3 God ali numi Kamokim Yesus Kraist ami God ale, almi aalap kemin, God ali Kraist ami sikil diim kawu mafek mafek tambal alik iyo kuyila, numi aket fukunin uyo dong dakaaya-laaba no, kalaluwa kemin, God ami win ayo kufon-bam ami tong-kup bakamum o, kala-somya ko.
EPH 1:4 God ali tawaal kalawaa talalu kutiilin dinim ilomdaya kawu, nuli uldaa-yim-buu-lomda, kiili Kraist ami lak duu-lomdiwa, nami tiin diim kawu atin tituun-kup tabin bomdiwa, ban kemin dinim ilin o, kala-lomdaya, nuli uldaa-yim-buusa.
EPH 1:5 Siin sawaayak kawu, God ayo numi aket uyo kuya-lomdala ami aket uyo, Yesus Kraist ayo dabaali din taanaya, iyo ami lak kaata duuliwa, nayo yim-bii tiltam nalmi man keyon o, kalsa kaali, God almi san kemin, kaa kanoyon o, kalsa.
EPH 1:6 God ayo almi Man ami aket kaata-kup aasu. Yale, numi olen-daaya-lomda, almi man ayo kambola-lomda dabaala tal nuli yam-talaluse. Kemin, atin ti God ami kanosa kaata, nuli God ami win kaata kufon-bam, ami tong kaata-kup baka-bamduwa yo, kala-somla ko.
EPH 1:7 God ali numi disa misiim kawu olen-daaya-lom dong dakaayilin kaali ti, sakbaalim dukum kuya-lomda, Yesus Kraist ami taanaya ami kiim sing-tam-daasu kuuta, God ayo numi ban kemin uyo takan-tiiyila-lomda, numi iliim uyo boyale, tiltam kanumin mafek mafek kii kaal-ke-lom utam bam-dakamin uyo kuya kesa. Kemin, kaa ami olen-kaayin kaali, atin ti sakbaalim dukum kulaala tildak numi diim abasu te!
EPH 1:9 Sawaayak kawu, God ali, Nimi Man Kraist ayo dong dokop-nala, kaa kanolokomi no, kala, aket fukun-ilomda kutal-fukula suluya, almi san kemin ami aket fukunin yang sawaansu uyo numi diim kawu ku-fatap-daayila utam-sulup.
EPH 1:10 God ami aket fukunin kaa, Mafek mafek alik iyo tiin mo-lom una-biliya, nimi Man ami kolokomi no, kalsi uyo, tiltam tulu kala, kala-lomdiya, kulaata abiil tikiin kaami mafek mafek so, tawaal diim kaami mafek mafek iso, alik iyo kuyak nimi Man ami diim kawu tiilila alta kamokim ke-lomda tiin molokoma no, kalsa namti kulu ku-fatap-daasa ko.
EPH 1:11 Kulaa, sawaayak sawaayak kawu, God almi aket fukunin kaata, nuli uldaa-yim-buusa. Kemin, kulu Kraist ami diim kawu fep-nupla kawu, God ayo taba-lomda talalu-yimulaya, alami unang tunum ke-sulup. Atin ti fan kemin, God ayo dok kanolin aket fukun-ilomda: Awu, kaata kanolokomi kala, kalokoma uyo ti kanola talalu kutiila tiltam yaap ke-lomdu unen-umbu.
EPH 1:12 Kamasi kawu, Juda kayaak nusiik God ami weng kuka-daa-lomda: Nami uldaa-dabuuli Kamokim kesa tunum Kraist ayo dabaayi din unokoma no, kalsa ami fen-tabasup. Kemin, God win tabin ami tong kaata-kup bakamum o, kala-somya ko.
EPH 1:13 Kemin, Efesis kasel ibi Juda kayaak daa; ibi ipkal tunum miit kusnum kemin, ipkal ti kanola God ami tituun-kup tabin weng tambal kaali, weng san-silip. Kemin, God ami iliim boyokoma kaami sang kaali, bokoyup ibi weng sandipla, Kraist ami lak kaata duulip ami diim kawu tiltam tabasip. God ayo almi Sinik Tambal ayo unang tunum imi kuuyokomi no, kala weng kuka-daasaya alami Sinik ata ibi kuuyilaya, angtiil maak tiimin tap kese.
EPH 1:14 Mafek mafek imiin kap-tunum ami kolap sin-ilom kawu, alik kola-laabap tap, God ami Sinik numi kuuyase kaa, imiin kemin, Sinik ayo kukuyilaya kawu, utamuwa yi, God ami weng kuka-daa-lomda kanolokomi no, kalsa uyo, atin-kup kuluulokomup o, kalsup. Kemin, kaali utamuwa yi, Awu, nuli kawanita God ami unang tunum kebup namti, God ayo numi sok til-daayalala, nuli uluum dinim ke-lokomup kala, kala-lomdup, kulaa fan utamsup. Kemin, God win tabin tunum ami tong kaata-kup bakamum o, kala-somya ko.
EPH 1:15 Nali weng sani yi, Ibi Kamokim Yesus ami lak kaata-kup ti duule, God ami unang tunum imi aket kaata-kup duusip o, kalipla weng sandiya, God ami alik kanum tabasa kaata nali ibi keyila-yaabi dinim; ipni aket-kup nan-bulula, suunkup God ami yaap ke yo, kem-yaabi kemin, kanola nali ti suunkup ipni aket kaata-kup fukun-bamdiya, beten-kup ken-tabasi.
EPH 1:17 Kemin, numi Kamokim Yesus Kraist ami God, numi Atok atin ti falala-kalin dukum kemin, nali ami aman dakaan-biliya, aket fukunin tambal kaata-kup ibi kukaayin-bam ale, ami weng miit uyo ipni diim kawu ku-fatap-dakaayin-bam ke-balala, God ayo kulu bombe kala, kalalipla kawu, talalu atin ti atamin o, kal-bomdiya, aman dakaaya-yaabi.
EPH 1:18 Nimi beten kaali, God ayo ipni aket fukunin uyo dotu kutiiyala kawu, atin ti talalu atamiwa yi, God ata numi naan-daayila, tiltam ami lak duuluple ayo boko-lomda: Kanolokomi kaali, fen-bam bom-biliwa yo, kalsa kabak-ami miit namti kala bombuu kala, kalbip-kup; ale, ibi utamiwa yi, God ami weng kutii boko-lom: Nimi unang tunum ibi dong dakaayin-biliya, naso tambal-kup ilokomup o, kalsa kaali, atin mafek mafek tambal o! kalale,
EPH 1:19 ibi utamipla, Ami titil dukum kuluu-lom God ami lak duusup numi dong dakaayila-tabasa kaata, kano ilila atamin o, kalaliya, ipni beten kaali kamayila-laabi. Kanolin titil dukum kaa God ata kuluu-lomda, alta tal yak numi iipyak tem kawu okok ken-umba.
EPH 1:20 Kemin, kanolin ultap ami titil kuluu-lomda siin kawu Kraist ami taana dafo-lom dibii tam abiil tikiin daalala, God alami sikil tiingtup diim kawu tiinsa namti kaa bombe.
EPH 1:21 Kemin, sinik mafak mafak so, kano sinik tambal tambal iso, ili Kraist ata taba-lom alik yim-baak-mo tabanse; aa tunum kamok kamok win soyal iyo yim-baak tibi ata tam kaptoop ban-ilom bombe. Kemin, am kula daan tulu so, sin-sin-ke-lokomu so, ami win kaali, suunkup tam kaltoowu ilokomu.
EPH 1:22 Kemin, God ali abiil tikiin so, tawaal so, unang tunum so, mafek mafek alik iso, kiili kulaala yak Kraist almi diim kawu abamnip keya-lomda, God ayo Kraist ami ulduulala, ata Kristen numi dabom ke-bomdaya tiin mosa.
EPH 1:23 Kristen unang tunum nuli Kraist ami angtiil ultap kemin, Kraist ali abip so, sep so, abiil tikiin so, iyo alik buku-tiin-bomdaya, alik tiin mo-som ken-tabasa kemin, ultap o. Ali Kristen unang tunum numi iipyak tem kawu bomdaya, dukum-kup dong dokoya tiin mo kesa no.
EPH 2:1 Kemin, siin sawaayak kaali, ibi God ami weng kaa kuyang saak tela yak ban kemin akal alik akal alik ita kulii tiltam tiltam ke-bilipla, ita taba-lomdip ipni sinik uyo welip taanuya, liip mafak diim kawu bom ilsip.
EPH 2:2 Siin kaa ibi kukup mafak kaali, tawaal diim kalawaami unang tunum imi kanun-umbip ultap kemsip. Ipkal maakup ti kanum-solip kemin, ibi kaalile, sinik mafak imi kamokim ami weng kaata-kup weng san-kaa-bamdipla, kanum-solip. Kemin, kamala kalawaali sinik mafak ayo yang unang tunum kawanita God ami weng kuyang saak tiimin imi bukuyila-balaya, kanun-laabip.
EPH 2:3 Kaa tunum miit maakup ipta-kup daa; Juda-miin nokol kanola maakup siin kaali kanumin tunum imi kukup mafak kanumsip ultap ke nokol ti kanum-solup. Kipso, nuso, alik nulmi san kemin, nulmi aket fukunin kaata-kup kanum-solupla, kaata nulmi aket tem tiling tem kaata kanu-buluya, yang kanum-solup. Kemin, siin sawaayak kaali, God ali ban kemin kaami kalan kaata, aket atul kelula, angtiil yol uyo kuluulokomip o, kalsa. Kemin, nokol kanola bom-ilomdupla, tunum kusnum imi angtiil yol kuluulokomip ultap ke nokol kanola kuluulamup o.
EPH 2:4 Kabak ti faneng kemin, nulmi ban kemin uta taba-lomdu nulmi sinik uyo welula taansu. Yale, God ayo numi aket-kup kuya ifan o, kala tangbal tangbal ma kamayin tunum kemin, numi aket-kup aasu kemin kaali, utama yi, Nami Man ayo faneng, asuk dafoli tam tiinse no, kala-lomdaya, numi sinik ukol ti kano kufola tiltam tiin baayase. Atin ti fan God ayo ifan o, kala almi aket bilili-kalin kaata kuya-lomda, ipni iliim uyo boyalala, asuk tildang tal-silip te!
EPH 2:6 Kemin, God ami aket fukunin kaali, Am ma daanokomu kawu nami man Yesus Kraist ami lak duulin iyo im-taltam abiil tikiin daaliya, nami Man Yesus aso, iso, mafek mafek iyo tiin molin o, kalalaya, nuli tiltam Kristen ke-sulup kaali, numi sinik ayo kufolaya tam tiin kawong kelula, aso tambal-kup tiinsup.
EPH 2:7 God ami aket fukunin kaali, Kanoliya unang tunum imi man fakan kaptoop kaptoop ken-unip uyo utamiwa yi, God ali numi aket kaata atin kuya-lomda, Yesus Kraist ayo dabaala tal-ilomda akal ti kuno numi aket uyo atin ti sakbaalim dukum kuya kese. Kemin, nuli dok kano-lomdupla, talalu utamalup dinim o, kala utamin o, kala-lomdaya, numi sinik iyo yam-folala, tiltam tiin kawong ke-silip.
EPH 2:8 Kemin, God ali ipni olen-daaya-lom aket bilili-kalin kaata kuya-lomda, alami man ayo kuuyilaya, ibi Yesus ami lak uyo duulip kala, kala-lomdaya, ipni iliim uyo boyase. Ibi mafek mafek tambal kiita ma nuu-biliwa, God ayo kaami maan o, kala-lomdaya, ipni iliim uyo boyase dinim; akal almi aket fukunin kaata-kup ipni iliim uyo disa masiim kawu boyase.
EPH 2:9 Kemin, God alta kaata-kup kaa kanoyase. Kemin ale, nuli dok kano-lomdupla nulmi win uyo kufolup tam tiip kaptoop unomu dinim te!
EPH 2:10 Kemin, kala tiinsup kaali, nuli Yesus Kraist ami diim kawu yak fep-nupla, God alta nuyo yam-talalulaya, alokso unang tunum ke-sulup. Kemin, God ami aket fukunin kaali, Nami kukup tambal dotusi kaali, kutal-fukulin o, kalalala, yam-talalulala, tiltam alokso unang tunum ke-sulup ko.
EPH 2:11 Juda tunum imi tunum man imi ipnaal ukelmin kukup kaali, kutal-fuku-bomdiwa boko-lomdip: Nuli God ami tunum miit diildiil namti kala bom-bulup o, ken-umbip. Yale, Ibi tunum miit kusnum ita yimusip. Kemin, ibi Juda tunum daa; Juda kasel ita ipni bokoya-lomdip: Ibi ipnaal bomin kukup uyo ibi kutal-fukulin disa; le, kibi God ami tunum miit imi loop daa yo, ken-umbip. Yale, kii God ami kukup ami sang kaali ma bakamin disa, ken-umbip. Kemin, tunum imi kukup kaami sang kaata-kup bakan-umbip kemin, ipni kanola tiin-bom biisip kaami aket kaata fuku-daalin o.
EPH 2:12 Ipni kanola bom ilsip kaa, ibi Yesus Kraist ami diim kawu ma yak fewa bomdip ilsip dinim; kibi God ami tunum miit diilim imi atuk kiika daa. Ibi tunum miit kusnum utamduya kemin, Juda kasel imi bokoya-lomdip: Ibi bokon kusnum imi man o, kemsip. Sawaayak kawu, God ayo weng kuka-daa bokoyilala, Juda kasel iyo tal mepso kulu tilip nikil alimal maakup bom ilsip. Yale, ibi iso ma bom ilsip daa; kipni tawaal diim kala bom ilsip kaali, God ami diim uyo ma fewa ilsip dinim; ale ibi aket kaa ma fukun-ilom suunkup tambal ma tiin-bom ilokomup o, kemsip disa; ibi kasen-foko maaklo babon-bam biisip.
EPH 2:13 Kemin, ibi siin kaali, God ami tiin diim uyo samaan kawu tiinsip. La, kamala kulaata Yesus Kraist ayo ibi itama yi, Nimi as diim taani kiim sing-tam-daasuu kaata no, kala-lomdaya, nimi diim kawu tildaak fep-nip kala, kalalaya, kibi im-taldang daalaya, kulaata God ami mepso kulu bom-bilip o.
EPH 2:14 Kraist alta taba-lomda Juda nuyo yim-bakule, tunum miit kusnum kusnum ipyo yim-baku ke-lom kuyak mim-daalaya, tunum miit maakup ke-lom abiin tambal-kup tiin-bom bulup. Sawaayak kaali, tunum miit alep numi atam suun-daa una-tala-kemsup kaali, uti fokolin ultap ke iip kabaaku foko-lomdu ukdaa kulaalu una-tala-kesup. Ya, Kraist ata as diim kawu, taan-ilomda uti daam fokosup uyo balaata kutiila dinim keluya, kawu tala-tala-ke-lom tambal-kup bom-bulup.
EPH 2:15 Kemin, Juda kayaak imi lo uyo boko-lomdu: Yak ma kaata kanumin daale, yak ma uta ti kanumin o, kalsu kaata dukum-kup kutal-fuku kutama tabasip. Kemin, Kraist ami aket fukunin kaa, Nali lo umi titil uyo dak-daa kulaali daak taanu kamboliya, unang tunum sok de-yimulin tap kesu uyo disa keluya, tunum miit alep kiili tildang nimi diim fep-nipla, nata talalu-yimulila, tiltam tunum miit akal alik ke miit maakup ke-lomdipla, abiin tambal-kup tiinin o, kala-lomda ayo taanaya kawu lo umi titil uyo dak-daala daak taanu kelase.
EPH 2:16 Kraist ami as diim taanse kulu tunum miit alep imi atam suun-daa una-tala-kemin namti, kulaata disa kelu kamboyila-lomda, yim-bital kumup-daa talalu-yimulaya, tunum miit maakup ke-lomdip God almi mepso kulu tildang tal-ilomdip kuyak dii una-tala-ke-silip.
EPH 2:17 Kraist ami tal unang tunum God ami weng tambal bakayinsa kaali, asuk tiltamdup kuyak dii una-tala-kemin kaami sang kaata bakayinsa. Kemin, kaa tunum miit kusnum God ami samaan kawu bom-bilip ipso, Juda kayaak God ami mepso ilin nuso, alik numi sang kaata bakayinsa. Kemin,
EPH 2:18 Kraist ami taanse kulu tunum miit alep nuli God ami Sinik maakup kaata-kup taba-lomda dong dakaayin-balaya, titil-foko Aatumen God ami beten kaali kamaan-bam laabup o.
EPH 2:19 Kemin, tunum miit ma ibi Kraist ami lak uyo duu-silip. Kemin, ibi maso asuk bokon kusnum imi man aye, tunum kusnum aye, ke ilokomip disa yo. Ibi God ami unang tunum atuk namti kaa bilip ale, God almi abip kulu ilin ke-silip.
EPH 2:20 Kipso, nuso, nuli God ami am delin tap ke-sulup. Kemin, ali taba-lomda almi kalaan tunum so, weng ku-fatap-daa bakayin tunum iso, nuli yim-tii-lom am kun kumolin tap kelale, Yesus Kraist ata am malii kuyak tinilin tap kelaya kaata ipta le, am bom so, am kuk so, iltap ke-silip.
EPH 2:21 Kemin, Kraist ata taba-lomda am kun alik iyo foko-lom delaya, tulu-tulu-ke taltam am tambal ke-lomdula, tam am sakbaalim ke Dukum God almi alik keluya, ami win kufumin am ultap keluya kela-yaaba.
EPH 2:22 Kemin, ibi Yesus Kraist ami diim kawu fewa-silip. Kemin, Kraist ata taba-lomda ibi yim-bii yak ap-tunum kusal Kristen kusnum alik imi tem kawu, yim-bak ulaya, Alik ibi taltam God ami am alaltap keliwa, Sinik akal ipni iipyak tem kabaku bombe ko.
EPH 3:1 God ali kaata kanola-lomdaya, tunum miit kusnum kusnum ipni dong dokoyon o, kala-lomdaya, kanose. Kemin, Pol nali ipni lak o, kala God ami beten kamaala-yaabi. Nali Yesus Kraist ami okok kemin kaayo, kutal-fokola bom ale, tunum miit kusnum kayak kayak ipni dong dakaayin-bam ke-biliya kemin, kaami kalan kaata nami sok dep-ninsip.
EPH 3:2 Ibi nami sang uyo weng sanipla, God ata Pol ami okok kemin tambal kaali, kolaya kanu-balala, ami okok kemin kuuta taba-lomdu Efesis kasel ibi dong dakaayila-yaaba le,
EPH 3:3 God ayo sawaayak, almi aket tem-kup fanang-daa kaata kanu-mokomi no, kalalala, kutal-fukusa kaa, Pol ami diim kawu ku-fatap-daalaya utamse no, kalbip o, kemipla, weng san-silip ema? Kemin, kaami sang katip uyo tildaak iip kuyaku dolasii.
EPH 3:4 Kemin, tik-tiilokomip kabaku ibi nimi kaami utamsi uyo ipkal kano tituun-kup utam ale, Kraist ami taba-lomda God ami sawaayak aket fukunin yang sawaansu uyo kanu-bamdala, ku-fatap-daase uyo utamin o, ke-lokomip.
EPH 3:5 Tunum iyo sawaayak kawu, God ami aket fukunin yang sawaansu uyo ma utamsip dinim. Yale, kulaata ami Sinik ayo dabaala talda God alami tunum win tabin o, kala-lom alami kalaan tunum nuso, weng ku-fatap-daa bakayin tunum iso, numi diim kawu, Sinik ata God ami aket fukunin sawaansu uyo ku-fatap-tiiyalala, kaa fatap-kup utamsup.
EPH 3:6 God ami aket fukunin sawaansu kaali kala bombe: God ayo ti fanang-daka-bamdaya, Tunum miit kusnum iyo nimi weng tambal uyo weng sandip, yak nami man Yesus Kraist ami diim kabak fep-nokomip kaata, nali tambal-kup iyo talalu-yimuliya, Juda imi tal aba tam Kraist ami lak duulipla, talal-yimbi ultap keliya; tunum miit alep ili angtiil maakup keliwa, nimi mafek mafek sang boko-lom: Kanolokomi no, kala kuka-daasi uyo kuluulokomip o, kala-lomda, God ayo kanola fanang daa kutal-fukusa no.
EPH 3:7 God ayo saak o, kalin tunum kemin, alta uldaa-nam-buulaya, alami okok kemin uyo kutal-fukusi kaali, unang tunum iyo almi weng tambal kalawaali kukaaya-laabi kaa, alta titil uyo kup-naya kemin, kanun-umbi.
EPH 3:8 Kemin, nak-tunum kusal God ami unang tunum imi tiin diim kaali, nali atin win dinim, ke atin kabaak bansi. Yale, God almi ok tambal kaata kup-nala, tunum miit kusnum iyo God ami weng tambal kaata bakayin-bamdile, bokoya-lomdi: Kraist ali atin kipni lak kaata no, kala-lomdaya, mafek mafek dukum ma kaa kanose ni! kal-bomdiya, kanun-umbi.
EPH 3:9 Kemin, God ami aket fukunin yang sawaansu kaayo nata kuluu-lomdiya, unang tunum alik imi talalu kukuyin-biliya kawu, iyo utamipla, God ayo kaa dok kano-lomdaya, kaa kanoyokoma kala, kalalipla, iyo utafiin-umbip. Siin sawaayak kawu, God ayo abiil so, tawaal so, kala dik-daa kulaasu kaami mafek mafek kiiyo talalusa tunum kemin, ayo aket fukun-bamda: Am ma daanokomu kawu, abiil tikiin kaami sinik tambal tambal iso, ensel titil-kup tabasip iso, iyo utamiwa yi, God ata Kristen unang tunum iyo talalu-yimulala, iyo dok kanolin bom-bilip kala, kala-lomdipla, iyo utamipya yi, Atin ti God alta aket tambal-kup fukunin tunum o, kalalip, utamin o! kala-lomdala, God ayo sawaayak kaptoowu, alami aket-kup fukun-ilomda: Kaayo kanu-mokomi no, kalsa uyo kutal-fukusa. La, ku-fatap-daase.
EPH 3:11 Siin sawaayak kawu, God ami aket uyo fukun-ilomda: Bii-lom kawu, nimi aket fukunin nalmi aket tem kabaku suunkup bombuu uyo bakayin-biliya, talalu utam-ilomdip dik-daa kuluulokomip o, kalsa. Kemin, fan, kaa numi Kamokim Yesus Kraist ayo dabaala talda, alalta God ami aket fukunin tambal namti kulu ku-fatap-daala tiltam fatawasuu.
EPH 3:12 Nuli yak Kraist almi diim kawu fewa-lomdup numi aket uyo fal-siki-lom kuyak alami diim daa-sulup. Kemin, kaa talalu utamupla yi, Nuli liip so kemin, God ami dik-daalupla, numi weng kaa weng seyokoma no, kala-lomdupla, suunin dinim, God ayo beten kamaalin-kup laabup.
EPH 3:13 Kanolin kemin, aket uluum fakamin daa. Waasi iyo taba-lomdip nali kipni dong dakaaya-tabasi kaami kalan o, kala-lomdip, angtiil yol awak dukum uyo kukaap-ninbip. Lale, nimi angtiil yol kala kaabi kaami aket uyo ibi fukun-bam aket uluum fakamin daa; ti nimi kala dong dakaayin-bili, ipni titil-fak-dakabip kaami aket kaata-kup fukun-bamdip, fiyaap duu-bamdiwa yo, kala-somla ko.
EPH 3:14 God ayo liip ma talalusa. Kemin, tunum miit kusnum ipso, Juda kayaak nuso, maakup kuyaku-diyaku-ke-lomdup miit maakup ke-sulup. Kemin, tal-unemi kaali, dok kanolin aket ma fuku-daali namti, kawu tam tilik-duung fakela daak tiin-ilomdi, Aatumen God ayo beten kamaala-laabi.
EPH 3:15 Abiil tikiin kasel alik iso, tawaal diim kasel alik nuso, nuli akal almi tunum miit kusnum e, kela kela ke-sulup. Yale, Aatumen God ayo alik numi miit kayaak kemin, ali kaa bombe. Kemin,
EPH 3:16 utami yi, Titil dukum uyo Aatumen God ami diim kawu bombuu kala, kalaliya, nayo dik-daaliya, ami Sinik ata dik-dakaan-bam bokoyila, alta taba-lomda titil kuyale, kipni aket fukunin uyo dong dokoyilala, titil-foko-bomdiwa yo, kala dik-dakaan-bamdile,
EPH 3:17 kipni aket kuyak Yesus Kraist ami diim kawu daaliwa, alta suunkup iltipni aket tem kawu bom-bala yo, kal-bomdi dik-dakaan-bam, ken-umbi. Kemin, ipni kukup tambal kaa kanun-umbip kaami miit kaalile, as timtim kaata dong dokolula, as kaami titil-foko tola-yaaba alaltap ke, nali God ayo dik-daaliya, alta dong dokoya ibi God ami mok ineya-laamin so, unang tunum imi mok ineya-laamin so, kiita yan-bilipya, titil-foko tola-bom kukup tambal kaata kutal-fukuliwa yo, kalalila naala-yaabi.
EPH 3:18 Kraist ali atin numi aket-kup aasu. Kemin, nuli dok kano-lomdupla, kaami miit uyo talalu utamalup dinim kesup. Yale, God ayo dik-daaliya, alta dong dokoya ipso, God ami unang tunum alik iso, ibi taang-kala utam kaal-keliwa yi, Awu, Kraist ali ipni aket tem sakbaalim dukum kukaaya kaptoop kaptoop unan-umba kala, kalaliwa, God ayo ipni aket tem uyo muup-nu keyilale, ipkal ti God alaltap ke ifilip tooplo so keluk o, kal-bomdi dik-dakaala-yaabi ko.
EPH 3:20 God ali alami titil uta kuluu-lomdaya, titil-foko numi iipyak tem kabaku ok dukum uyo kanum kulii tooplo so unoma. Aa, numi beten weng uyo, God kabi kaata kanolan o, akan-kaa-bamale, nulmi aket fukunin kaata, God ali yaap titil-foko kaali kanolama nema? kala-lom numi nuu-mokomup uyo kabaak bunuya, ami kanu-mokoma kaata atin ti uta uta ke ifin tooplo so unokomu kayi!
EPH 3:21 Kemin, Yesus Kraist alami diim kawu fewa almi tunum miit alik-daap ke-sulup nuli God ami win uyo kufon-bam ami tong kaata-kup baka-bam ke-bamdup, nuso, numi man loop kaptoop iso, nuyo kanumin-kup ken-una-bulupya yo, kala-somya kemin, kulaata taa!
EPH 4:1 Nali God Dukum ami ok kutal-fukulin tunum kemin, utamduya, kaami kalan kaata sok de-namulipla, tiinsi. Kemin, God ayo ipkal kanola bokoyila tiltam almi man ke-silip. Kemin, ipni tiin-yaamin, tal-unemip aye, kiiyo talaba tam God ami kukup tambal, Uta kanumin o, kalsa uyo tiknu kewin o, kalaliya, weng kala dukum-kup bakayinbi.
EPH 4:2 Ibi kaptum kusal kayak kayak imi minlo tem un-ilom, win dinim ke-bomdip, aket filit kaata-kup kukaayin-bamdipla yo! Kaptum kusal iyo ma God ami kukup kanumin o, kalsa uyo alik maakup ilaalin dinim namti, kii itafiimin daa, ami aket kaata kukaan-bamdip, aket tambal-kup balili-kal-bomdip dong dakaayin-bilip, tilip nikil maakup ke-lom ilaaluwa yo, kala-somla ko.
EPH 4:3 God ami Sinik Awem ata taba-lomda dong dokoya sok de-yimulin tap kelaya, aptum kela una-tala-ke-bam aket maakup ke-silip. Kemin, kaata ti dukum-kup kutal-fuku-bomdiwa yo, kala-somla ko.
EPH 4:4 Numi kuyaku-diyaku-ke-sulup kaali ti angtiil maakup tap ale, God ami Sinik kipni diim kawu be ali ti maakup kulaata-kup kemin, God ami kipni bokoyila tiltam almi man ke-silip kuyaku, weng ma bokoya bokoya ke: Ibi yim-bii-tal nalami abip daaliya, ipso, naso, kalawu ilokomup o, kalaya, ibi fen-tabasip kaa weng kusnum disa; ti weng maakup kulaata-kup.
EPH 4:5 Aa, kuno yakal ilmi kamok alik kamok alik daa; kipni Kamokim kulaa ti maakup kulaata-kup; ale, kipni Kraist ami lak du una-tala-kesip kulaali atin maakup ale, ami win finin diim kawu, oksam kaali ukan-tabasip uyo maakup.
EPH 4:6 Numi God ali ti maakup kemin, alik numi Aatumen. Ali alik nuli tiin mo-bom ale, alik numi tiin diim kawu, okok ke-bam ale, alik numi iipyak tem kawu bom kem-tabasa ko.
EPH 4:7 Kanolale, Yesus Kraist ayo kukup tambal tambal uyo maakup maakup nuli kuyin-balaya, ami titil diim kawu, kanun-umbup. Kemin, kaa alami aket fukunin kaata mafek mafek masiim miit akal alik akal alik iyo kuya kuya kesa.
EPH 4:8 Ultap kemin, God ami Sukon Tem kabak-ali Kraist ami sang kaali boko-lomdu: Siin sawaayak kawu, tiltam aba-lom tam unse kaali, ali waasi sok de-yimulin yaapkan yaapkan iyo kulii-tam-ilomda unang tunum iyo mafek mafek masiim imi kuyinsa no, kalsu.
EPH 4:9 Kemin, weng kaa boko-lomdu: Tiltam aba-lom tam unse no, kalsu kabak dokata daa kalolip: Kamasi uyo tal daak tawaal diim abalala, tam unse.
EPH 4:10 Mep tunum kaa alalta kamasi tildaak talse kaali, alalta asuk tam unse. Kemin, ayo atin ti tam abiil tikiin tam-ilomda abip so, saak so, abiil tikiin so, kiili alik tiin mo buku-bomdi yo, kala-lomdaya, tam banse.
EPH 4:11 Kemin, Kraist ami mafek mafek masiim kukaaya-yaaba namti, kala bombe. Tunum malo ma nami kalaan tunum o, kala iyo ulela-som, malo ma ita God ami weng tem ku-fatap-daa bakayin tunum o, kala ulelale, malo ma ita, ulela God ami weng tambal kaata kulii-din abip ma ma uyo bakayila-tal-unemin tunum o, kala ulelale, kuno malo ma ita ulela Kristen imi tiin mo-bom dong dakaayin-bamdip, God ami weng kukuyin tunum o, kala ulelsa.
EPH 4:12 Kanola Kraist ami mafek mafek kukaaya-tabasa kiiyo, kaa God ami unang tunum nuli dong dakaayim-bam kukuyin-bilila, yakal tal aba yak nami ok uyo yaap-kup kutal-fukulokomip kala, kalale, iyo kanolipla, nimi unang tunum o, kalin kabaku nami tiil uyo tiltam dukum-nokomu no, kala, kala-lomdala ayo kukaayila-tabasa.
EPH 4:13 Kemin, kanum-kup umbutoop alik numi tiltam aket maakup kelupya, numi God ami man ami lak duu-yaamin aye, atam-laamin aye, uyo maakup ke-lokomu. Kemin, kanum una-bulupya, numi God ami lak dakaamin kaali, dukum-alom man tunum ami fasuu-lomda dukum ke-laaba alaltap kelupla, Kraist alaltap ke-lokomup o.
EPH 4:14 Kanumup namti, nuli suunkup man katip katip ililtap ke ilokomup dinim; ale, nenin tunum kiimi ibakamin weng kaata bakayin-bilipla, nuli man imi kukup kanumin tap kaa fan o, kala kela yang banebip dinim o. Imi kasen-fakamin weng bakamin kaa, yol ok daang kun kaami fonfon taba-lomda ala una-tala-kebu tap aye, inim ta as kon duk-duu kulaala tam-tam unebu ulultap o; kemin, nuli ibakamin weng kaa weng san-kaamin daa.
EPH 4:15 Kata, God ami tituun-kup tabin weng kaata-kup weng san-kaa-bam kutal-fuku-bomduple, unang tunum kayak kayak imi aket-kup yan-buluya, bomduwa yo. Nuli tiltam fan unang tunum dukum kebup-kup, numi dabom Kraist ami diim kabaku fewa-bomdupla yo, kala-somya ko.
EPH 4:16 Kemin, numi dabom alalta tiin mo-balaya, nulmi sikil, yaan, tiin, uyo alami mafek mafek, Kanolin kiita kanumin i! kalalaya, maakup maakup numi bakayimba kaali, tambal-kup kanu-buluwa kemin, tunum ami malmel ayo tulu-tulu-ke tiil ayo alik de-kutiilaya, atin tiil maakup kesu ultap kemin, tiil kaami anung uyo nuli dong dokola una-tala-ke-bamdupla, nikil alik maakup ken-umbup ultap kemin, kanola aket kola-una-tala-ken-umbup kawu, tiil uli tiltam titil-foko dukum-alaabup o.
EPH 4:17 Nali weng tem ma Dukum ami win diim kawu weng dukum-kup ma bokoyon o, kali. Kemin, ibi Aatumen God ami lak duulin dinim unang tunum imi kukup kanubip kaa, ibi maso ma kanumin disa. Kiimi aket fukunin kaa, tambal disa; disa ibakamin aket kaata-kup fukun-umbip.
EPH 4:18 Ili utamsip dinim kemin, imi utam-yaamin uyo miit dinim ale, ili babon-tal-unebi tiinsip. Kemin, ili tiltam God ami suunkup ilin unang tunum kelin dinim ale, disa iip aket kaata-kup fukun-umbip.
EPH 4:19 Ale, ili fatom so ma dakan-umbip dinim; ili ti kukup mafak mafak kaami aket kaata-kup yan-bulula, aket kutoop tini-bomdipla, daal dinim, suunkup kanumin-kup ken-tabasip.
EPH 4:20 Imi kanolin kukup mafak kaali, Kraist ami kukup kipni kukuya-sulup uyo kaa bombuu disa.
EPH 4:21 Kraist ami sang uyo bokoyup ibi weng sandiwa, tiltam ami unang tunum kebip-kup; Yesus ami tituun weng tambal kaata kukuyin-bulup, weng san-silip kaa, atin ti faneng.
EPH 4:22 Nuli ipni kukuyinsup kaali, sawaayak uyo, ipni dok kanolin dok kanolin kukup ma mok im-bom ilsip kaa, ibi kukup tambal o, kala din kukup mafak kaata kanu-bamdipla, iltipni angtiil uyo ku-mafak-dakan-tal-unemsip. Lale, ipni kanolin siin kaami aket fukunin kaa kulaalip yang kot unu kelin o, yaka-lom kanum bokoyinsup.
EPH 4:23 Kemin, kipni sinik so, aket fukunin so, kiiyo kulaalip yak God ami diim abamnipla, akal talalu-yimulala, tiltam alokso kelipla yi;
EPH 4:24 alokso aket fukunin kaata kuluulin o, kala-somla kemin, alokso aket fukunin kaa God alta nimi aket fukunin ultap kaata kuluulin o, kala kuyala ibi aket fuku-daa kanu-bilipla, kayak kayak iyo itamiwa yi, Ili tituun-kup tabasip ale, ili atin tambal-kup tabasip kala kalokomip te!
EPH 4:25 Kanolin kemin, alik ibi ibakamin kukup kaali, kela-lomdip yak kanumin mafek mafek kiimi sang kaa kaptum kusal iyo tituun-kup tabin weng kaata-kup kaptum kusal Kristen kesip kusnum iyo bakayin-bamdipla yo! Alik nuli angtiil maakup kaami atuk atuk ke-bomduwa bulup kemin, tituun-kup tabin weng kaata-kup bakayin-bamduwa yi!
EPH 4:26 Ibi kanola ti, aket atul-kup kamayu namti, kaa ban ke-mokomip. Kemin, kaa dotu utafii-bamdiwa yi! Aket atul-kup dap-tiip-tu bom-balap bii, atan uyo yak tem banemin daa; baan abiltap takan-tiilan o, kala-somla ko.
EPH 4:27 Suunkup aket atul kaali, falala tam-tiilula, suunkup kutal-fukulin-kup ilap namti, kapni aket tem uyo sinik mafak imi kamokim Setaan ami saal namti, kulu busuulokomap.
EPH 4:28 Yukut inin tunum ali asuk maso ma tal yukut inin disa; am kamala kalawaali okok tambal ke-bamdala, alami titil diim kawu ima moni iyo kaa-bamdaya, utamaya, Ap-tunum ayo mafek mafek kiiyo iiba no, kala namti, ayo dong dakaan-bamda ilokoma.
EPH 4:29 Kemin, ibi weng mafak uyo bakamin daa; ibi weng tambal tambal kaata-kup baka-bamdipla, unang tunum titil dinim iyo yam-titil-saan-bam ale, unang tunum weng, weng san-kaabip iyo dong dokoya keliwa, iyo kawu ilu-lom God ami fiyaap uyo duu-mokomip.
EPH 4:30 Ibi kap-tunum kusal imi weng mafak uyo bakayin-bamdip, God ami Sinik Tambal ami aket uluum uyo kukaalin daa yo. Ami Sinik Tambal kaa ipni diim kawu bombe kemin, Sinik ayo God ata saal fakyak tiiyase ulultap kemin, ibi kaa utamiwa yi, Kaa faneng nuli God ami unang tunum namti kala bulup u, kalalupla, am ma daanokomu kawu God ali sok tal-daa-yim-baalaya, nuli uluum dinim ke-lokomup kala kalin o, kalokomip.
EPH 4:31 Kemin, ipni fanang mafak daka-bamdip aket mafak fukunin so, aket atul tabemin so, fuut-tabe-bamdip aket atul tabemin so, titil eng bakamin so, weng yenin so, aptum kusal itam suunin so, alik kanolin kukup mafak kiiyo alik kulaalip kot unu keya-lomdipla;
EPH 4:32 kaptum kusal iyo akola aket bilili-kalin kukup kaata tambal-kup dong dokola una-tala-ke-bamdipla yo! Kemin, God ata taba-lomda Kraist ami win diim kipni ban kemin uyo takan-tiiyase ulultap ke kaptum kusal taba-lom ipni mafek mafek kiili, ban kelipla kaa, ipkal kuno kambola takan-tiiya una-tala-ke-biliwa yo!
EPH 5:1 Ibi God alami man kemin, ali kipni aket kaata-kup kuyinsa. Kemin, ami kukup kanun-umba ultap ke, ipkal kanu-bamdiwa biliwa yo!
EPH 5:2 Kraist ali numi aket kaata kuya-lomda dong dokoyon o, kala-lomda, tunum kiimi God ami mafek mafek kolum o, kala fuulipla, tang tambal-kup tabe-balala kuluu-lomda tambal o, ken-umba ulultap kelaya, ami tiil kaali, God ami kolaya, waasi ita aalip taanda akal almi sinik ayo God ami kolala ke saaknaya, God alta dabuu-lomda yaap o, akase kemin, ulultap o, ipkal kanola kaptum kusal imi aket kuya-lomdip dong dakaayin-bamdipla yo!
EPH 5:3 Kemin ale, ibi God almi unang tunum kemin, ipni sadiki-bam miyaan ililtap ke-mokomip, aa yak mafek mafek soyal kelupla yo! kemin aye, kaami kanu-mokomip kaali, yaap keyilula kanu-mokomip dinim; ale ma kaata ibi dok kanolin kukup uyo ma kaata tambal o, kala-lomdip kanu-bilipya, kap-tunum kusal iyo itam-ilomdiwa, Kaali sadikimin kukup ulultap o, kalip namti, kipni kanu-mokomip kaa yaap keyokomu dinim o. Ibi kanu-bilipla, kap-tunum kusal kii kanumin aket kaa fukunin disa.
EPH 5:4 Kemin, ipni fatom tabin weng ayo baka-mokomip aye, ibakamin weng baka-mokomip aye, dakmin-bamdip weng mafak mafak baka-mokomip aye, inang kaa atin tifan tambal dinim o. Kipni God ami yaap ke yo, akan-kaa-mokomip kaata faneng tambal keyilula kanu-mokomip.
EPH 5:5 Kemin, ipkal utamin: Kawanata sadiki-bamda miyaan ililtap kema, aa nata mafek mafek soyap keli yo, kema namti, kaali God ayo kambolaya, yak Kraist ami diim uyo kawu fewa-lomda God ami uti daam tem uyo tam unokoma dinim. Kemin, tunum ali mafek mafek soyap keliya yo, kema namti, kanolin aket fukunin uyo tiltam-ilomdu God ami aket fukunba uyo takan-teluya, God ami aket uyo atin ti lokoluya ke-lokoma.
EPH 5:6 Kemin, unang tunum iyo God ami weng uyo kuyang saak tela-bomdipla, ban kemin sang kaa bakabi kaata-kup ban kemip namti, kaami kalan kaata, tifan God ayo aket atul keluya, angtiil yol uyo kuyokoma. Kemin, ibi tunum ibakamin imi weng kaata weng san iliwa le, ita yim-tama yang kukup mafak kaami tem uyo tini-mokomip dinim; ale,
EPH 5:7 kanolin tunum iyo yang mepso itamip iso, kipso, maakup tal-unemin daa kayi!
EPH 5:8 Siin sawaayak kaali, kipni aket tem kaa malang-kup tini-bom-buluya, kukup mafak mafak kiita-kup kanu-bisip. Kemin, am kula daansuu kulaata ibi tal Kamokim Yesus ami unang tunum ke-lomdipla, kipni aket tem kaali, falala-kalasu. Kemin, falala-kalin kaata, unang tunum iyo dong dokoyulule, kukup tambal tituun-kup tabasu kaata-kup kutal-fukumin o. Kemin, kibi tunum falala-kalin diim kawu bom-bilip imi kukup kanubip ultap ke-bamdiwa yo!
EPH 5:10 Ibi talalu fen-bamdipla utamiwa yi, Dukum ami weng bokoya-lomda: Kaata kukup tambal o, keba uyo kaa buu no, kala kal-bomdipla, kuuta-kup kutal-fuku-bom kanu-biliwa yo!
EPH 5:11 Imi kanumin mafek mafek kanun-laabip kaa, malang tinalin kaami kukup mafak kemin kukup kaali, dok kanola ap-tunum kusal iyo dong dokoyamu disa. Kemin, kanola imi kukup maaklo kasentap kanun-umbip kaali, atin ti kukup mafak kemin, kanola kaami sang uyo fatap-kup bokolokomap kaali, fatom tabep-tokomu. Ibi iso maakup tal-unemin daa. Atin ti kukup tambal kaata-kup kuuta fuku-bomdipla, kipni kukup tambal kaali, falala-kup kala-lomdu, mep kiimi malang tinalin kukup uyo ku-fatap-daayuluya, kayak kayak iyo utamipla yi, Kaa kukup mafak kala kalin o!
EPH 5:13 Kemin, God almi falala-kalin uyo iilfolaya, kukup mafak malang tinilin uyo tiltam fatap-nula unang tunum iyo utamiwa yi, Kukup kaali kanolin u! kala iyo uta-mokomip.
EPH 5:14 Kemin, God almi falala-kalin uyo iilfolaya, kukup uyo tiltam fatapnu namti, uso asuk falala-kalin ultap ke-lokomu. Kristen nuli kaami sang kaata baka-bam faldak tiimin weng uyo boko-lomdup: Kapyo, baan abiltap kapni akan-ilom taanbap uyo kela tiltam tiinapla, Kraist ata tumbu-tambang alami falala-kalin diim kawu daalokoma no, ken-umbup.
EPH 5:15 Kipyo, ipni falala-kalin diim bom-bilip kaami aket uyo fukun-bamdipla, iltipni tal-unemin, tiin ilin aye, uyo talalu utafii-bamdiple, aa ipni kukup kaali tunum utamsip dinim imi kukup kanun-umbip ulultap uyo kanumin daa. Ti tunum utamsip imi kukup kanun-umbip ultap kaata-kup kanumin o!
EPH 5:16 Kemin, kamala kulaali, unang tunum yaapkan iyo kukup mafak uyo kutal-fukulip tiltam tulu kemin, kanola ibi utamiwa yi, Dok kanumin diim kulu numi nak-tunum kusal imi kukup tambal kuyikin so kaami am uyo daanu kala kalip namti, kambolip disa; tal yang banemin daa; kemin ti kanumin kaata-kup o.
EPH 5:17 Kemin, kanola babonin kukup kaali, kutal-fukumin disa; um-kuku utamipla, Dukum God ami kipni bokoya-lomda: Kaata kanumin o, yakan-kaaba uyo kala bombuu no, kala utamdipla kaali kanumin o!
EPH 5:18 Kibi ok mafak kaali, dukum-kup im-bom babon-bamdip, iltipni tiin-laamin kaa ku-mafak-dakamin daa yo. Ibi God ami Sinik ayo kambolip alta-kup taba-lomda, kipni aket tem uyo dukum-kup dongnala, tambal-kup bomdiwa yo, kala-somla ko.
EPH 5:19 Kemin, ap-tunum kusal Kristen iso, weng bakamip kaali, Baibel tem kaami baal so, Yesus ami fiyaap don-bam baal wiimin so, aa God ami Sinik ata alokso baal kuyase kaami baal wiimin so, kiita wii-bamdiwale, Dukum ami baal uyo fanang tem so, bon tem so, kuten-bamdiwa yo!
EPH 5:20 Kemin, kipyo, nuli Kamokim Yesus Kraist ami unang tunum kesup o, kal-bomdupla, suunkup mafek mafek alik kiimi sang kaa Aatumen God ami bakaan-bamdup: Yaap ke yo, ke-bam, kanu-bam bom-biliwa yo!
EPH 5:21 Kipyo, aket fukun-ilomdipla, Kraist kaali numi Kamokim u! kala-lomdipla, ami weng uyo weng san-kaan-umbip. Kemin, ibi kap-tunum kusal Kristen kesip imi weng kuukal ti kano weng san-kaa-bamdipla, imi minlo tem kulu bomdipla yo!
EPH 5:22 Kemin, unang, tunum din ipyo, ibi Kamokim Kraist ata kelip ipni tiin molaya, alami weng kaata-kup weng san-kaan-umbip ulultap ke, iltipni timimel imi weng kaata-kup weng san-kaa-biliwa yo, kala-somya ko.
EPH 5:23 Kanola Kraist kaali, nalmi tiil o, kala almi unang tunum numi iliim kaata boya-lomdala, numi dabom kesa ulultap kemin, kanola tunum din kibi timimel kii ipni dabom
EPH 5:24 kemin, Kristen unang tunum numi Kraist ami kambolup ata numi tiin mola alami weng-kup weng san-kaan-umbup ulultap ke, atin ti timimel imi weng kaata-kup weng san-kaa-bamdipla yo!
EPH 5:25 Ale, unang din ipkal, ibi Kraist ami unang tunum kemin, ali numi aket kaata-kup kuya-lomda, alami angtiil lak uyo duulakin dinim ke, numi iliim kaata boyase ultap, yikal ti kalel kusal imi lak kaata-kup duu, tambal-kup tiin mo bomdipla yi!
EPH 5:26 Almi angtiil moyase kaami miit kaali, kala bombuu: Kraist ami aket fukunin kaali, Nami lak duulokomip kaa, unang tunum ili weng tambal uyo kuya-lomdi diinga-yimuli tiltam tambal ke-lomdipla, foko-kulii tildang nalami miit tem tii itami yi, Kalawiili tunum ket unang sii ililtap ke, alik ti mafak dinim; atin tambal-kup kala, kala-lomdila, kuliili fokoli yak God ami sikil baan diim abamnipla, alami man alik-daap kelin o, kala-lomdaya, Kraist ayo alami angtiil kaata, numi moyase.
EPH 5:28 Kanose kemin ale, tunum ipyo, iltipni angtiil kaami lak uyo duu-lom tangbal-kup tiin saanbip ulultap, talalu ipni kalel kusal imi lak-kup kuya-lomdip, tambal-kup tiin molin o, kala-somla kemin, imak aso, alami kalel uso, akam ili maakup kemin, tunum ayo almi kalel umi lak o, kal-bom tangbal-kup tiin mola namti, kaami kanu-mokoma kabaku almi angtiil uso tiin molokoma.
EPH 5:29 Kemin, tunum ayo ma alami angtiil uyo ma utam suun-daa-yaaba dinim o. Almi angtiil kaami lak uyo duu-bamda, almi angtiil uyo inin-inin kukaa un-bamda tambal-kup tiin mo ilokoma ulultap kemin, Kristen unang tunum nuli Kraist ami angtiil kemin, nuyo tambal-kup tiin-saan-umba.
EPH 5:31 Kanolin kemin, God ami Sukon Tem weng uyo boko-lomdu: Tunum ayo awak-aalap iyo kamboyila yak alami kalel umi diim kawu fep-nokoma kaali, alep iyo angtiil maakup ke-lokomip o, kala Sukon Tem uyo kanum bokosu.
EPH 5:32 Kanolin weng kabak-ami miit kaa yaapkan. Yale, nami aket fukunin uyo kaami miit ma kaali, Kraist so, unang tunum so, imi sang kaata kanum bokosu no, kalasi.
EPH 5:33 Lale, maakup maakup alik ipni sang ukol fanang maakup kanum bokosu. Kemin, tunum ipyo, iltipni angtiil kaami lak kaata duu-bam tangbal-kup tiin saanbip ulultap ke-bam, iltipni kalel kusal imi lak-kup duu tambal-kup tiin saan-bamdipla, aa unang tan yakal imimel imi win uyo kufuu-bam ke-bamdipla yo!
EPH 6:1 Aa man kipyo, ipkal Kristen kemin kawak-aalap imi weng kaata-kup weng san-kaa-bam ilokomip namti, kawu tambal-kup keyula kutal-fukulokomip.
EPH 6:2 Kemin, God ami Sukon Tem weng uyo boko-lomdu: Kawak-aalap kiili, numi dabom o, kala-lomdipla, imi weng kaata-kup weng san-kaa-bamdipla yo, kalsu. Kemin, weng kaa God ami kamasi diildiil kawu lo uyo kuka-daa-lomda, alami weng uyo kuka-daasa, Uta kanolokomi no, kala kutii kesa. Kemin,
EPH 6:3 weng kabak-ali boko-lomdu: Weng san-kaamap namti, tambal-kup bomdaple, tawaal diim kala bombi ke-lokomap o, kalsu ko.
EPH 6:4 Ale, awil-fakal kipyo, man iyo suunkup titil tabin weng kaa bakayin-biliwa, man iyo aket atul tabemin daa. Ti tambal-kup tiin mo-bomdipla yo. Kamokim ami weng kaata-kup kukuyin-bam ale, kukup mafak kebip uyo yim-bak-saan-bam ke-biliwa yo!
EPH 6:5 Disa iip kawu sok de-yimulip ok fukulin tunum kipyo, ibi iltipni tawaal diim kalawaami okok kebip kaami aket kaali ti maakup kaata-kup fanang daka-bamdip, imi weng kaata-kup weng san-kaa-bamdiple, aa yak okok kemin kaami aket uyo maakup kaata-kup fukun-bam ale, imi weng kaata-kup weng san-kaa-bamdipla yo! Kraist ami weng, weng san-kaa-bam kanun-umbip ulultap ke-bamdiple,
EPH 6:6 iltipni kamok imi tiin diim kaata-kup okok ke-bulupla, iyo fiyaap duumik o, kalin daa. Kraist ayo numi disa iip kawu sok de-yimuse kemin, nuli ami okok kamaalin tunum o, kalaliwa, kiimi tiin kuwaayinbip kaaso, suunkup ok ayo dukum-kup kutal-fuku-bomdipla, God almi boko-lomda: Kaata kanumin o, yimba kaata-kup aket tem kabaku atin ti kutal-fuku kanu-biliwa yo!
EPH 6:7 Kemin, kipni disa iip kawu sok de-yimulip okok kebip uyo ti ipni tiin atafiimin aa, fanang dakamin aa, kiimi aket uyo kulaalip yak kabak banu kutal-fuku kanu-biliwa yo, kala-somla kemin, ibi, nuli tunum imi okok-kamayinbup kaata yoko! kala mafak mafaknin daa kemin, ipni Kamokim Yesus Kraist ami okok kemin tambal kaata dukum-kup kutal-fukulokomip ultap ke-lomdipla, ok uyo tambal-kup fukulin o.
EPH 6:8 Ipkal utamsip. Kemin, fanang daalin! Tunum ayo kanta ma okok kemin tambal ma kema namti, God Dukum ayo taba-lomda okok kebip kaami maan uyo kuyokoma no. Tunum sok deyin sole, tunum sok de-yimulin dinim iso, iyo maan tambal kaa ti fanang maakup kola kola kuyokoma ko.
EPH 6:9 Disa iip kawu sok de-yimulip bom okok-ken-umbip imi awil-fakal o, kala tiin molin tunum kipyo, kipkal ti kanola ok fukulin tunum iyo kala nuuyim-bamdiwa yi! Ibi mep kulu ipso bom-bilip kiili, titil tabin weng uyo bakayin-bilipla, suunin kaami kukup kaali, kela-lomdipla, kukup tambal kaata-kup kukaayin-biliwa yo! Ti ipkal utamin, abiil tikiin bombe kaata ipni tiin molin ale, ipni ok tabuulin tunum imi tiin molin kemin ata taba-lomda, unang tunum win finin so, win dinim iso, alik maakup yam-kuku-bamda yim-bak-saanokoma no.
EPH 6:10 Nimi weng mafiing mafiing namti kula bokoli disa ke-lokomu. Kemin, ibi Kamokim Yesus Kraist ami diim kawu yak fewa-bilipla, ami titil dukum kaata kuluu-lom ipni dong dakaayin-balala, ipni aket tem kulaaso, kukup uso, iyo titil-foko-bomdiwa yo!
EPH 6:11 Kemin, numi waasi dinin kaa tunum fatap iso, dinan-umbup disa. Kemin, sinik mafak kaptamu bom-bilip so, sinik mafak tawaal diim kaldaak-ami malang tinalin kukup kaami miit kasel iso, sinik mafak alik atin ti titil-kup tabasip iso, imi kamok iso, dinan-umbup; kemin, ibi waasi dinin kaami mafek mafek God ata numi kukuyila-yaaba kiili, alik kuluu-lom tii-bomdipla, taang-kala titil-foko tol-nokomip kaata fan sinik mafak imi kamokim ayo kasenu ibokoya yim-tama yang tem kabaak tini-mokoma. Kemin, uyo talalu utafii-bamdip kulaalip yak bane-buluya bomdipla yo!
EPH 6:13 Kemin, kanola kabi God ami waasi dinin kaami mafek mafek alik iyo miki-lomdapla, kukup mafak tiltam tolokomu uyo titil-fak-daa tola-lom daang ukuwap une-buluya, titil-kup foko tola-bomdapla yo!
EPH 6:14 Kemin, kapni tola-lomdap kutiilokomap namti, kala buu kaatam! Weng tifan bakamin kaami kukup uyo waasi dinan-tal-unemin kaami ol tiil uyo kuyang di miki-laamin ultap kemin kuyang di mikilan o, kala-somla kemin; liip tangbal dikiwa unemin uyo waasi dinin kaami naam ultap kemin, waasi dinin kaami ilim uyo dildaak tiniman o!
EPH 6:15 God ami weng tambal uyo boko-lomdu: Unang tunum tala-tala-ke nalmi miit tem tilipla tiinum o, kala kanum bokosa kaali, unang tunum imi bakaya-tal-unemon o, kalap uyo, waasi dinin kaami yaan-alom uyo kutoop tinimin ultap kemin kutoop tiniman o!
EPH 6:16 Ma kaata, kabi waasi dinin kaami as kom daam katip ma kutoop ilmi fet kun tem tini-lomdip ilmi angtiil bak-daa-bomdip dinbip ulultap ke-lomdip, suunkup kapni aket uyo kuyak God ami diim daalapya, Tunum Mafakim Setaan ami fit oltem kaptoowu as milip kuyak daa-lomda ami wan binala as kon so, sok nang nong so, bola taleba uyo talokomu dinim; kemin wing kaali, daak aba tenokomu no.
EPH 6:17 Waasi dinin kaami nafalum kalaang-tabasu kaata kulaak tinilokomap kuuta, dabom uyo tambal-kup ilokomu; kemin ulultap o, utamapya, God ayo nami iliim uyo bop-na-lomda, nali tambal-kup bom bii no, kal-bomdapla yo! Kemin kabi waasi dinan-tal-unemin yeng o, kala bainat o, kebip ayo kutal-fuku waasi imi aket tem bakelilin ulultap ke-lomdap le, God ami Sinik weng taba-lom kup-timba uyo kuluu-lom unang tunum iyo bakayin-balapla, kuuta taba-lomdu imi fanang-dakamin uyo tam unokomu. Kemin, kanumin mafek mafek kiita kanu-bamdapya, faksaalin-kup bom-balawa yo!
EPH 6:18 Kanu-bamdipla, beten kemin o. Kipni God ami beten kamaalokomip kaali, Sinik ami win diim kawu dok kanolin dok kanolin kukup ke-mokomip iyo suunkup beten kamaan-bamdiple, kela-laamin daa. Ti tiin alep alep uyo baa-bomdipla, daal dinim, dak-lom dinim, tiin yak dinim, ke-bom kano aman dakaan-bamdip beten kamaan-bilipla, akal taba-lomda almi unang tunum alik iyo dong dakaayin-bam ale,
EPH 6:19 aa naso dong dakaap-nam-bam ke-balaya, alami weng uyo kuluu-lom unang tunum imi kuyokomi kaali, God akal dong dokop-nala, itam suunin dinim, titil-foko Yesus Kraist ami sang uyo bakayin-biliya, God ami weng tambal yang sawaansu uyo talalu utamin o!
EPH 6:20 Nali God ami bon tem tunum o, kala weng tambal kuuta kulaala tulu weng san kulii yang unang tunum imi kukaayin tunum yale, kabak-ami kalan kaata nili sok dep-nipla, bom bii kemin, nali alami weng tambal kukaayin kaami okok kemin kaata, ipta God ami aman-biliwa, akal niyo dong dakaap-nin-balala, nayo suunin uyo kulaa-lomdila, titil-foko tola bakayin-bamdi yo!
EPH 6:21 Kemin, Tikikus kaali, nulmi kiim maakup tap ke, Kamokim Yesus Kraist ami ok dukum-kup yikik-kutal-fukuulin tunum; Tikikus ayo dabaali din una kemin, alalta nami okok kem-tabasi sole, bom bii so, kiimi sang alik iyo bokoyilaya, kipyo, weng san utamiwa yi, Pol nikil alik kii dok kanola bom-bilip i! kala, kala-lomdipla, fiyaap duu-mokomip ko.
EPH 6:23 Aatumen God so, Kamokim Yesus Kraist aso, alim ita taba-lomdip ibi dong dokoyiliwa, atin ti nalami naktum kusal Kristen maakup ibi numi kayaak o, kala una-tala-ke-bamdiple, kap-tunum kusal imi aket-kup yelu kola-una-tala-ke-bamdip, iltipni aket uyo dukum-kup kuyak alim imi diim uyo fewa kelin o!
EPH 6:24 Kemin, kipso le, dok kanolin unang tunum alik ita suunkup numi Kamokim Yesus Kraist ami aket kaata-kup yeluya tiinsip iso, ibi God ata taba-lomda ipni aket tem uyo disa masiim kawu yaap ma kamayin-balala, tambal-kup bom-biliwa yi!
PHI 1:1 Nak-tunum kusal kaa tiinsip o? Pol naso, Timoti aso, alep nuli Yesus Kraist ami wok fukulin tunum kemin, Pol nali sukon kala dola kulaa-yilila din Filipai unang tunum Yesus Kraist ami man alik-daap kesip kipso, kipni tiin molin wasman o, kalbip aa, Kristen unang tunum imi dong dakaayin tunum iso, nikil alimal ipni fanang din unu.
PHI 1:2 Nili dik-dakaan-bilila, numi Aatumen God aso, Dukum Yesus Kraist aso, alim ita disa misiim kawu tambal tambal ma kamayiwa, ipyo aket balili-kup kala bom-bilip o.
PHI 1:3 Nali ti suunkup suunkup ipni aket-kup fukun-bamdiya kemin, nali nalmi God ami yaap ke yo, akan-kaan-unbi kemin,
PHI 1:4 suunkup nali alik ipni beten kamayila-yaabi kaa, nimi aket tem uyo ti akal ma kep-na-lomda fiyaap duu-buluya, nayo beten kamayin-bam laabi.
PHI 1:5 Ipni beten kamayila-laabi kaa dok kata naa kalolip: Nak-tunum kusal ibi kanola kamasi kaa dong dokop-nipla, nikil alimal maakup ke God ami weng tambal kaali kukaaya yakyak aba bital kala diilu kaa nali fiyaap duubi.
PHI 1:6 God ali ipni aket tem kabaku bomda, wok tambal tambal uyo iluu-lomda kanoyase. Kemin, nayo utamiya, Atin ti faneng kala, kalbi kemin, God akal kanun una-balala, yakyak butoop Yesus Kraist ami talokoma kuyaku dilit kalu kulaalokoma.
PHI 1:7 Kemin, ibi nalmi aket kemin nami kanolin alik kipni aket-kup fukun-bamdi laabi uyo tambal-kup kep-nula fukun-umbi no. Siin ami tal-unemsi kaa, God ami weng tambal kaata unang so, tunum so, imi talalu kukuyin-bamdi, ifiyi ilila kemin, nam-tal kalabus am daabip. Kemin, sawaayak so, kamala so, kaali God ami wok kala kup-nase kaa, ibi dong dokop-nip, nikil alimal maakup kanum talabup. Kemin, nali ti kipni aket-kup fukun-yaabi.
PHI 1:8 Kemin, nali alik kipni aket-kup kuyinsi kabak-ami miit kaali, Yesus Kraist ali kipni yam-fiil-tii-bam laaba kaami aket kaata-kup fukun-laaba; kemin ale, nakal ti ultap ipni yam-fiil-tii-bamdi ipni aket-kup nan-bulula, God akal nali nitama yi, Atin ti faneng bakaba no, nakan-kaaba te!
PHI 1:9 Nali kipni suunkup beten kamaya-laabi uyo ti kala buu: beten kamayin-biliya, kipni kaptum kusal imi aket kukaayin uyo dukum-nuk o, kala-lom kanu-bilipla, God ayo alami aket fukunin katip ma kuuya kuuya ke-lomda dong dokoyilala, kaal-ke-lomdip
PHI 1:10 talalu atam, Dok nolin uta atin kukup tangbal kala, kalale, kanolin kukup kaata-kup kutal-fuku-lomdipla, kukup mafak dinim, ban kemin dinim, atin ti tangbal-kup kutal-fuku-bamdiwa yo, kala-somla kemin; kayak kayak iyo ipni itam bokoya-lomdip: Ibi kukup mafak kutal-fukulin unang tunum o, yokokomip dinim kaami diim kawu bom-ilipla, Kraist ayo talak o, kal-bomdila beten kem-tabasi.
PHI 1:11 Kemin, beten ke-bilila, Yesus Kraist alta dong dakaayin-balala, kipni kukup alik kanu-mokomip kaali, atin ti tangbal ke tiknula, kap-tunum kusal iyo utamdipla kawu, God ami win uyo kufon-bamdip boko-lom: God ata-kup o, kal-bomdiwa yo, kala beten ken-tabasi ko.
PHI 1:12 Naktum kusal ipyo, nili ibi kaluuli utamin o, kalbi. Kemin, nimi mep mafek mafek uluum uyo Rom kawu kuluubi kuuta taba-lomdu God ami weng tambal kuu kuluu kuyak mobu disa; atin ti ifiili toop lo so keluya,
PHI 1:13 tunum alik King Sisa ami tiin mo-bom bukuuyilin isole, kusnum kayak kayak alik iso, ili nitamipla yi, Nali kalabus am kala bombi kaali, Yesus ami okok kemin kaami kalan kaata dedulip bombe kala nambip.
PHI 1:14 Kemin, nak-tunum kusal, Kamokim Yesus ami lak duulin yaapkan iyo nitamiwa yi, Ali kalabus am kaptamu bombe kaali, God ayo ami dong dokolaya, ayo suunin disa bombe kala, naka-lomdipya, yakal titil uyo kuluule, iyo suunin dinim ke, titil-foko-lom, God ami weng uyo ap-tunum kusal imi bakayinbip ko.
PHI 1:15 Faneng, imi Kraist ami sang aptum kusal imi bakayinbip kaali, malo ma nalmi ok kalan kaata talup-na-lomdip, dimelup kabaak banaya nuta nuta kelum i! kala Yesus ami sang uyo bakayin-bilip le, malo ma ita aket tambal kaata-kup fukun-bamdipla Yesus ami sang uyo bakayinbip.
PHI 1:16 Kemin, tunum kalawii nitamiwa yi, God alta ok kaa kolaya, God almi weng tambal uyo unang tunum iyo talalu kukuyin-bamda bakaya-tabasa nu, kala-lomdipya, ami aket-kup kolale, dong dokolum o, naka-lomdip aket tambal kaata-kup fukun-bamdipla kemin, Kraist ami sang uyo bakayinbip. Lale,
PHI 1:17 malo ma itale, aket tambal uyo nami kukaap-nan-bamdiwa disa. Nuta nuta ke-lomdup kalabus am kaptam bombe kaa uluum uyo maso ma kolum i! naka-lomdip Kraist ami sang uyo bakayinbip.
PHI 1:18 Ili kuno aket tambal fukun-bala, aket mafak fukun-bala, ke-bam bakayinbip. Kata, saak kunoluya taa! Nali kuumi aket dukum uyo ma fukunbi dinim; alik imi Kraist ami sang unang tunum imi bakayinbip kaata sakbaalim dukum o! kalaliya kaami fiyaap kaata duubi ko.
PHI 1:19 Nali utamiya, Suunkup ibi nami beten kamap-nan-bam ale, Yesus Kraist ami Sinik Tambal ata dong dakaap-namba no, kemiya kemin, kanumin mafek mafek mafak kii tiltam talbip kiita dong dokop-nipla tambal-kup ilokomi no, kalaliya fiyaap-kup duu-bamdi ilokomi.
PHI 1:20 Kemin, nami kot uyo disa keluya kawu, neliwa taanami ne? kep-nip ilokomi ne? kalbi. Yale, nami aket dukum ma fukunbi uyo ti: Nali kamala so, suunkup kaptoop ami unokomi kuso, kaali fatom dinim, suunin disa ke ti titil-kup foko-bomdiya okok ke-biliya, nimi mafek mafek alik kanu-mokomi uyo unang tunum ita utam-ilomdip, Kraist ami win uyo kufolin o, kalbi.
PHI 1:21 Nelip taanin dinim noli namti, Kraist almi man alik-daap ke bomdila kalawu ilokomi kaali tambal; aa nelip taani namti, saak kuno din Kraist aso ilokin kaata ti atin tambal o, kalbi.
PHI 1:22 Ale kuno ti tiin kawong ili namti, unang tunum yaapkan imi Yesus ami sang uyo bakayokomi. Yale, nali utam-ilom kuuta ma tambal o, kala ma kaal kebi dinim. Yale,
PHI 1:23 nami aket uyo alep fukun-bam biing-mo kulii-unu-tulu-kebu. Kemin, nami aket uyo tawaal diim kala, kela din Kraist atamila aso ilokomup kaata fan atin ti tambal o, kalbi. Yale,
PHI 1:24 fan, nali utamiya, Nalta bomdiya ipni dong dakaayokomi kaata ti, atin tambal o, kalbi no. Kemin, nali utamiya, Nali dong dakaayin-bilila, kipni Kraist ami lak duu-laamin uyo dukumnu titil-fak-daa-lomdip fiyaap duu-mokomip kala, kalbi.
PHI 1:26 Kemin, asuk nayo din kipni itafii-bamdi dong dakaayon o, kala din ita-mokomi kaa, ibi nimi fiyaap-kup duu-bamdip le, Yesus Kraist ami win kufu-bam ke-mokomip ko.
PHI 1:27 Kula ipni aket fanang-dakamin diildiil kaali ti, dok kanumin dok kanumin kanum tal-unemin uyo Yesus Kraist ami sang tambal bokosa kaata-kup dikiwa unin o. Kemin, nali sok til-daa-nam-baaliwa kawu din itamami ne? din unomi disa ye? Katale, nami weng selon o, kalbi kaali ti, ibi titil-fak-daa-bomdipla, nikil maakup kuyaku-diyaku-ke aket maakup ke-bamdip dok-lom dinim; daal dinim; ti dong dokola una-tala-ke-bam Kraist ami weng tambal kaata-kup unang tunum imi kukuyin-bam bakayim-bilipya, ami lak uyo duulokomip.
PHI 1:28 Kibi tunum aket atul tabe-bamdip aket uluum kukaayinbip kiimi atul kaa suunin-daa kaata, nali weng selon o, kalbi kayi! Aa ibi suunin dinim ke-mokomip kaata kukuyiluya, ili utamiwa yi, Nuli uktaala maaklo ke-lokomup. Ale, Kristen ita God ayo dong dokoyilaya, tambal ke-lokomip kala, kalokomip.
PHI 1:29 God alalta ipni uldaa-yim-bulaya, tunum Kraist ami lak duusip. Yale, kibi disa kulu ilokomip dinim; ami lak duusip kaami kalan kaata, kayak kayak ita taba-lomdip ipni angtiil yol so, aket uluum so, kiita kukaayin-biliwa um-tal-daka-mokomip.
PHI 1:30 Siin kawu Filipai kawu nitafiimsip imi atul kaali, suunin dinim ke-bom ok sakbaalim dukum ku-titil-fak-daa-lom fuku-bili nitamsip. Ale, kamala kaakal kano weng san ilipla, nali Rom kawu ok dukum fuku-bom titil-fokobi kala, kalbip kaayo, nak-tunum kusal ipkal kanolin kaa suunin dinim ke-bom-biliwa yi, kala-somla kemin, Yesus ami kalan o, kala kanumin kukup mafak uyo ipni nuuyokomu kaali, suunin dinim o, kala-somla ko.
PHI 2:1 Ibi aket maakup ke-bamdip suunin dinim ke-mokomip kaali, Kraist ayo ibi yam-titil-saan-balala, suunin dinim bom-bilipya, kemin ale, ali numi aket-kup kukuyila utamuwa yi, Ali numi mok uyo inayimba kaali, aket balili-kala kaami diim ilup o, kalbip; kemin ale, Kraist almi Sinik so, kipni sinik iso, iyo fanang maakup kebip, kemin ale, ibi aket baayala, aket balili-kup kala, kukup tangbal kaata-kup kola una-tala-ken-umbip.
PHI 2:2 Kanolin kemin, nak-tunum kusal kipyo, Nami nenbi kaami sang kala bokolokomi kuuta, kipni aket fukunin uyo aket maakup ke-bamdiple, ipni aket kola una-tala-kemin kaata maakup ke-bomdiple, fanang maakup aket maakup ke-lom ke-mokomip kaata, nali atin fiyaap duumin dukum kuyokomi.
PHI 2:3 Mafek mafek alik kanu-mokomip kiita fan ibi, Nulta-kup o, kala iltipni lak-kup dakaa-bamdip le, kanu-bulupya, nulmi tong kaata-kup bakayin o, kal-bomdip kanumin daa; kemin ibi kaptum kusal imi minlo tem kulaak ban-ilomdip, Nak-tunum kusal ipta-kup o, ke-biliwa kayi!
PHI 2:4 Ibi, nulmi mafek mafek kanubup kaata-kup tiin saanum o, kalin daa. Lale, kaptum kusal imi mafek mafek kanubip kaakal fuku-daka-bam tiin-saanin o. Ibi kanumip namti, fiyaap duumin dukum duu-mokomi no.
PHI 2:5 Yesus Kraist ami aket fukun-bam ilsa uyo, ipkal kalanolin aket kaata-kup kutal-fukulin o. Kemin, alami aket fukun-bisa namti kala bombe ko.
PHI 2:6 Ali atin ti fan, God ke-bom bom-biisa. Yale, ali kanolin aket kaata-kup kutal-fuku-bom-biisa kaa asuk God alaltap ke-bomdiya yo, kemsa disa.
PHI 2:7 Yale, ali kanolin kukup uyo maas kewa-lomda, tildaak tawaal diim kasel numi angtiil kaata kuluula le, unang tunum iyo atamiwa yi, Ali atin ti fan tunum kala-lom atamiwa, Ayo mafek mafek dinim tunum alaltap ke, disa kulu dong dakaayin tunum ke-bamdala,
PHI 2:8 God ami minlo tem kulaak banaya, Aalap ami weng kaata-kup, weng san-kaa-bam dakela-un-bomda taanse. Kemin, tunum fuut-tabin tunum an-laamin altap ke-lom as diim kawu angtiil yol awak dukum uyo kukaan-bilip, bi-lom taanse.
PHI 2:9 Kanolin kemin, Aalap God ayo Man ami atama yi, Kaa yaap keluya kaa kanola kala kala-lomdaya, ayo dafola tam tiina dibii tam asal kaltoop bana kelale, kulaa kamokim diildiil ke win soyap ke-lom siinenok kesa.
PHI 2:10 Kanolin kemin, abiil tikiin kasel so, tawaal diim kasel so, unang tunum tawaal minlo tem kabaak bom-bilip iso, alik iyo Yesus ami fiyaap kaata don-bamdip alik iyo ami tiin diim kawu tilik duung fakela daak tiin-bom boko-lomdip:
PHI 2:11 Yesus Kraist kaali numi kamokim diildiil o, kal-bomdipla kemin, Aatumen God ami tong kaata-kup baka-mokomip o, kala-somla ko.
PHI 2:12 God ali suunkup kipni iipyak tem kulu bom okok ken-unba. Kemin, ami aket uyo, Kiimi aket kufuyim-biliya, kanu-mokomup kala ke-biliwa, nakal dong dakaayin-biliya, tikbip-kup titil-foko-lom nimi minlo tem un-ilomdip nami aket fukun-bam: Kanolin o, kalbi kaata-kup dikiwa un-bom kanu-bamdiwa yo, ken-umba. Kemin, kipyo, nuli disa kemin, Aatumen God ata-kup o, ke-bam ok dukum-kup fuku-bom kulii yakaba toop daalipla, kipni kukup alik iyo, Yesus ata kipni iliim bose uyo, tiiyuk o, kala-somya kemin ale, nalmi nak-tunum kusal kipyo, siin kawu ipso bom-bilila, suunkup God ami weng, weng san-ilom dikiwa-un-silip. Kemin, kamala kaakal ti ultap kamboya talbi, kuuso ti God ami weng uyo suunkup kutal-fuku ditela un-bomdiwa yo.
PHI 2:14 Kipni mafek mafek alik nuumip kii, weng mafak kaata-kup taken-bam weng aal-dikimin kiiyo, kambola-lomdipya nuumin i!
PHI 2:15 Kanu-mokomip kaata, ipni tawaal diim ban kemin abip kalaami ilip, uyo ibi ninak dinim atin tambal-kup ke-bom God ami tituun-kup tabin man kelin o. Kipyo, kaptum kusal imi iipyak tem kawu bomdip kanubip uyo, ti abiil tikiin umi yokon dawong ultap ke iilfo-bomdipla,
PHI 2:16 God ami weng kaata kap-tunum kusal imi kukuyin-bam bakayin-bilipla, iyo weng saniwa yi, Kuuli ti faneng uu, kala kawu kuluu-lomdipya, suunkup ilin unang tunum kelin o. Kemin, ibi kanu-mokomip kaata, fan, Kraist ami tolokoma kawu, nali kipni ok kanum-unbip uyo nali utamiya, Nami dong dakaayin-bilila, ok uyo kulaasip dinim te! Kano kutal-fuku-bilipla bombi dukumna kala, kalaliya nakal kipni fiyaap uyo duu-mokomi no.
PHI 2:17 Kipni God ami lak duusip uyo atin alik kola-silip kaali, tunum inin-inin anu-lomdip fuu-lom alik olso God ami kukaalin ultap kelip. Le, tunum ami wain ok ket kuyak olti ami diim sing-daala kawu, God ami kukaalin kaali, nami nelipla taanokomi kaata, kanolin fanang dakamin ultap ke-lomdu ipni diim kawu un-bom God ami kukaalokomu. Kemin, niyo aket uluum kep-nokomu daa; nali fiyaap dukum duu-bamdiya kemin, nimi kanubi uyo kipni kukaayinbi. Kemin,
PHI 2:18 kipkal ti kanola fiyaap-kup duu-bamdip kipni fiyaap duumin kaata, nimi kukaap-nin o, kalbi.
PHI 2:19 Yesus Dukum alami san kemin, Timoti ayo dabaali din unak o, kala namti, mepso kawu dabaali din kipni itafiin-tal-unebi asuk tal kipni sang uyo kulii-talaya, nakal weng seliya nam-titil-diilaya, kipni aket dukum fukunbi uyo kela aket tambal-kup kep-nuk i! kalbi.
PHI 2:20 Kemin, tunum kusnum kayak kayak alik ili, imi mafek mafek aket kiita-kup yan-bom-buluya kemin, ili Yesus Kraist ami ok uyo ma fanang dakamin disa kesip. Timoti ata-kup, ami aket fukunin kaali, nami aket fukunin ultap alep maakup ke-bomdupla, Filipai kasel kipni aket kaata-kup an-buluya, kipni dong dakaayon o, kalba
PHI 2:22 kemin, Timoti ata, nali dong dokop-na bom-balaya, alep maakup God ami weng tambal kaata bakayila-tabasup kaa, man ayo aalap dong dokolaya alim okok kemin tap ke, ali tunum tambalim kemin, ami kukup uyo utamsip.
PHI 2:23 Kemin, nami aket fukunin uyo nili utami yi, Gavman iyo dok kanop-nokomip i! kala-lomdiya kawu Timoti ayo abiltap dabaali din unak o, kalbi kemin,
PHI 2:24 nalmi utabi, kaa Dukum almi san kemin, liip uyo talalup-nala kawu, nakal din tolokomi no, kalbi.
PHI 2:25 Nami aket fukunbi uyo tambal kemin, nulmi tunum Epafroditus ayo dabaali din unak o, kalbi kemin, kaakal ti ok fuku-bomda God ami weng tambal uyo talalu kukuyin-bam dong dakaap-nam-balaya, alep yaan maakup ke talabup. Kemin, kaali iltipni tunum dabaap-nip tal niyo dong dakaap-na-laaba.
PHI 2:26 Ali atin ti, ipni fanang-daaya-lomdale, ayo weng sana yi, Mafak-alin umuba no, kaliwa, ibi weng san-ilom aket uluum kuluubip o, kalalaya, aket uluum kela-buluya, atin baan tap din itamon o, keba.
PHI 2:27 Fan. Siin ayo mafak-alin dukum umu-lomda taanakin tap kelaya, God ayo ami olenin aket kaata-kup disa; naso alep maakup aket balili-kalin kuuyila-lom dong dokolaya tambal-kup keba; ale taanba dinam, nami aket uluum kuluusi uyo atin ti sakbaalim dukum kelula ifiili toop lo unu te!
PHI 2:28 Kanolaya kemin, nami aket fukunin dukum uyo ti asuk ayo dabaali din unaya, kipkal ami tiin matum uyo utela fiyaap duu-biliple, ipni aket uluum kaami kalan kuluusip uyo aket uluum kep-na-laabu kaali, ukol ti disa kep-na-bulu yo, keluk o, kalbi.
PHI 2:29 Din una dabuulokomip uyo Dukum ami win diim o, kala fiyaap duu-bam, nulmi tunum kabi yaap ke talap o! kala kanum bokolin i! Ali almi angtiil lak uyo duusa dinim; ali nami okok kebi kaami aket-kup fukun-daa utamaya, Ibi ma dong dokolamip disa yo, kala-lomdaya nakal tiknu kulaalon o, kalalaya, dong dakaap-nam-bamda, mepso Yesus Kraist ami ok awak dukum kaami tem kabaku taanikin tap ke yawaala-lomda yaap kesa. Kemin, ibi ami win so, tunum alaltap bom-bilip imi win kiiso, iyo kufon-bam fiyaap duumin o, kala-somya ko.
PHI 3:1 Nalmi nak-tunum kusal kipyo, Ibi Kamokim Yesus ami fiyaap kaata-kup duu-biliwa yi! Nami weng kusnum ma bokoyon o, kalbi namti kala bu kemin, nami weng kamasi kawu bokoyasii kaa, nali fatom dinim ale, daal dinim keliya asuk kipni aket kufoyiliya, ibi dong dokoyulula ibi kaal-ke-lom bom iliwa yi, kalalila ipni dola kuyokomi.
PHI 3:2 Kiwo! Tunum kukup mafak fukulin kiili ti, saamin atul ililtap bom-bilip kemin, ibi kii talalu itafii-bamdiwa yi! Kiimi aket fukun-umbip kaali, kipni ipnaal uyo ukan-tiiyupla, God ata kipni itamaya, Nami tunum kelip o, kalak i! kem-yaabip. Yale,
PHI 3:3 God ami Sinik ata numi dong dokoyilaya, God ami beten kamaan-bamduple, Yesus Kraist ami fiyaap ayo don-bam ale, ami tong kaata-kup bakaan-bam ale, ami win kufon-bam kem-tabasup. Kemin, nulta-kup God ami lak kaa duu-sulup te; ili disa. Ili ipnaal ukan-tiimin so, kukup ma so ultap uyo aket kuyak ami diim kawu daa-silip.
PHI 3:4 La, iyo aket kuyak ami diim kawu daa-silip kaali, naso kanolin fanang daa-lom kaami lak uyo duulami no. Kano tunum ma ayo fanang daka-bam kukup uyo atin ti dong dokop-nokomu no, kala numa kaali, kaami miit uyo katip sakap. La, nakal aket kanolin altap uyo ifiili toop lo kelu tiltam nita nita ke-laamin kemin, kaami miit dukum namti kala buu no:
PHI 3:5 Nakal kanola akumen uyo namulu, bombii am oklungkal kelile, nakal kano awol iyo nami ipnaal uyo bo-kuyak tiip-na-silip. Kemin, nimi akumatum kiili, Benjamin ami mafel imi tunum miit Israel imi loop kaptoowu talsip. Kemin, nali tunum miit kusnum imi loop daa. Nali ti Hibru tituun o. Nali Moses ami Lo utamsi kaali, nali Falosi imi kukup kaali nali talalu utam-ilomdi, Lo uyo dukum-kup kutal-fuku-som kesi tunum namti kalabi.
PHI 3:6 Nali ti, fiit-kup taba-lomdi Kristen unang tunum imi yan-tal-une-biliya, angtiil yol uyo utam-silip. Kemin, nami Lo titil-kup taba-bom kutal-fuku dikiwa-unemin uyo tunum kiili utam talaalipla, Ali kuyak-tini kutaldak-tini-keba disa yu; kaa tituun-kup tabin tunum uu, naka-silip ko.
PHI 3:7 Kemin, siin kaali, kanolin kukup uyo kutal-fuku-bom-bilila, dong dokop-nala God ayo nitam boko-lomda: Kabi tunum tituun-kup tabin tunum o, kala, kala-lom kulaali ti yo, kal-bomdi kalasii. Yale, kuu utamiya, Kuuli tikbu disa yo, kala-lomdiya Kraist ata nami iliim bop-nase uta tikbu no, kalbi. Kemin,
PHI 3:8 nami aket fukunin uyo Juda kasel imi kukup kaata-kup dong dokop-nokomu daa; mafek mafek alik kiita kabaak bansip o, kalbi-kup, ale utamiya, Nami Kamokim Yesus Kraist ata talalu atamsii kaa, atin ti fan ata-kup diildiil dukum o, kebi no. Nali Kraist ata-kup, diildiil kep-nalala, alami aket-kup nelule, alami alik-daap tunum kelon o, kala ami lak kaata duubi kemin mafek mafek alik iyo fom iltap o, kalaliya kemin, bisat kewasii. Nami aket fukunbi uyo, Lo uta kutal-fuku diken-bili tituun-kup tabin kelon i! kalbi disa. Nimi aket diildiil uli ti, Kraist ami lak uta dukum-kup duulokomi kaata God ayo boko-lomda: Ali tituun-kup tabin tunum o, nokokoma kaata, fan ti tambal o, kalbi.
PHI 3:10 Nami aket fukunin uli ti, Kraist ami aket fukunin kanu-bam ilsa kuu nakal talalu utam kanumon o, kalbi le; ami taanda tam tiinse kaami titil kaata nakal kup-nak o, kebi; aa nakal ti alaltap ke-bamdila, angtiil yol uyo kuluubi-kup taanon o, kalbi no.
PHI 3:11 Nali kanolokomi kaata, nakal kano tam tiinokomi kala, kalaliya kaami aket uyo nesu ko.
PHI 3:12 Nami aket uyo Kraist ami kukup kaata, kuluu-lomdi tiksi no, kalbi dinim. Kata, Yesus Kraist ata nami aket fuku-daase kaali ti, ali fan-kaamin baan diim uyo kuluulak o, naka-lomda uldaa-nam-buulala alami alik-daap kesi. Ultap kemin, nakal ti, fan-kaamin baan diim uyo kuluu-lomdi, nalami alik-daap keluk o, kalaliya, biing mo-lomdi yikik-fuku-bomdi fiita-unabi.
PHI 3:13 Nak-tunum kusal ipyo, fan-kaamin baan diim uyo kuluubi dinim o, kalbi kemin, nami aket maakup ma kuluubi uyo, daang tem kaptam-ami siin kukup kaami aket uyo kewa-lomdiya, dusiin-daa unabi kaami mafek mafek kuluulokomi kaami aket kaata neluya, nasiik nasiik talabi.
PHI 3:14 Bi-lom kaptoowu God ayo Yesus Kraist ami win diim o, kala naan daap-na tam unokomi kaali, kapsiik e? naasiik e? kelip ata ata ke maan kukaayin ultap ke, nali maak fak-daalin tap bina bilin fan kaamin baan diim abamni le, maan kup-nak o, kalaliya, tituun-kup tola-bomdi abiltap unabi ko.
PHI 3:15 Nokol ti God almi man alik-daap ke-lom sawaa fukulin unang tunum kesup. Kemin, God ami weng uyo weng san-ilom dikiwa-unemin uyo kaal-kesup. Kemin, ibi aket akal alik ma fukun-umbip namti, God alalta kipni aket fukunin uyo ifi ku tituun daayilaya utamalip te!
PHI 3:16 Kanola, God ami kukup kaa, kaal-ke-bam kutal-fukusup uyo, kamala kulu dukum-kup kutal-fuku kutama una-buluwa yo, kala-somla ko.
PHI 3:17 Nami nak-tunum kusal kipyo, alik ibi nami kukup tambal kanun-umbi kaata-kup kutal-fuku-bom dikiwa-uniple, kaptum kusal iyo, nulmi kukup tambal kaata kukuyupla, iyo kutal-fukubip uyo utafii-bamdip kutal-fuku-ke-bamdiwa yo.
PHI 3:18 Weng kala bokoyokomi kaali, suunkup bakayila-yaabi kuluuta asuk bokoyokomi kemin, nali tiin ok tabe-bulula ama-bamdiya bokoyon o, kali. Kemin, unang tunum yaapkan nuyo imi kukup uyo utamuwa yi, Kraist ami as diim taanse ami sang uyo ma weng sanup disa yo, ke-bam kanun-umbip kala, yinsup.
PHI 3:19 Ti, ilmi angtiil mok kaata-kup in-bomdipla, kaami lak duun-unbip kaata ti ilmi ibakamin god alaltap keya bom-balaya kemin, fatom dinim kukup so, fuut tabemin kukup so, kiita kutal-fukule, tawaal diim kaldaak-ami mafek mafek aket kaata-kup yan-buluya kemin, kanu-bam ken-umbip; kanun-umbip kiili, Setaan ami wing dawong tem un-ilomdip maaklo ke-lokomip.
PHI 3:20 Kata, nuta abiil tikiin kaami unang tunum kebup. Kemin, aket kufoyala fen-bulupya, numi dong dokoya yim-buuse tunum Kamokim Yesus Kraist alta abiil tikiin kawu tal-ilomdaya,
PHI 3:21 numi angtiil mafak buluus-kup tabasu taan-ilom fom-nokomu kalawuuli, fal-sikilaya, almi angtiil tap kelu le, falala-kalin ayo kuyokoma. Ali titil soyim kemin, kaa kanoluk o, kalokoma uyo alik kanolaya tiknula kulaalokoma kemin, numi angtiil ukol ti kanola fal-sikilala ukol kanolokomu no.
PHI 4:1 Kanolin kemin, nalmi nak-tunum kusal kipyo, nami weng kaa bokoyi uyo weng san dikiwa-um-bomdipla, Dukum ami kukup kutal-fuku-silip uyo titil-foko-bomdiwa yi! Nali ipni aket-kup fukun-bomdiya abiltang-kup din itamon o, kal-bomdiya, ipni diim kawu okok ke-bilila, ibi God ata nami kup-nala, nami maan tangbal ulultap kebip. Kemin ale, nali kipni mafek mafek kanum tal-unebip kaami fiyaap uyo akal ma duu-bam tiinbi no.
PHI 4:2 Yuwodia so, Sintike so, unang alep kipkal weng selin! Alep ibi Kamokim Dukum ami lak duu-silip. Kemin, ibi weng aal kaa dikimin daa! Kemin alep ibi aket maakup ke tambal-kup bomdiwa kayi!
PHI 4:3 Aa kapyo, ti nalmi nak-tunum kemin, nali bokop-ton o. Kabi siin kaa, kapso alep maakup okok ke-bam ilsup. Kemin, kapkal ti kanola mep unang alep kiili, dong dokoyilawa, alep iyo aket maakup fanang dakamin maakup ke-bomdipla yo, kala-somla ko. Alep kiili, kamasi dong dakaap-nin-bilip ok sakbaalim dukum kaa fuku-bam God ami weng tambal ayo kukaayinsip. Kemin, Klemen aso, ap-tunum kusal iso, nikil maakup okok kemsip kiili, God ali unang tunum suunkup ilokomip imi win uyo almi sukon tem kabak-ali dolsa ko.
PHI 4:4 Kibi Kamokim Dukum ami fiyaap kaata suunkup duu-bamdipya yo! Nali asuk maso ma bokoya-lomdi: Fiyaap kaali, duumin o, yiki ko.
PHI 4:5 Am kulanun tulu kulaata, Dukum ayo mepso kawu talokoma kayi kemin, unang tunum alik imi olen-daaya-lom aket bilili-kalin kuya ke-biliwa, iyo utamiwa yi.
PHI 4:6 Ibi aket uluum kaa yaapkan fukunin disa; ipni mafek mafek sang alik iyo God ami koliwa yo. Alik, kipni beten ke-mokomip kaali ti ipni mafek mafek iipnip iyo dik-dakaan-bam ale, God ami yaap ke yo, ke-bamdiwa yi, kala-somya ko.
PHI 4:7 Kunu-mokomip kaata, God ami aket balili-kalin uyo kipni kuyalala, balili-kalbip uyo sakbaalim dukum kaata, tunum nuli dok kano-lom bam-daa-lomdup utamalup dinim; kemin, ibi Yesus Kraist ami diim kawu fewa-bomdiwa, God ata kipni aket tem so, tiling tem so, kiiyo tiin moyila aket uluum dinim, aket dukum fukunin dinim, tambal-kup balili-kala bom ilokomip o.
PHI 4:8 Kemin, nalami nak-tunum kusal kipyo, weng mafiing anung ma bokoyokomi namti kala buu kayi! Ibi kiltipni aket fukunin uyo tambal-kup tiin mo-bomdipla, takas kayak kayak ke-bam ale, kukup tambal kaami aket kaata-kup fukun-bamdip le, kanola ibi kanumin kanumin kukup alik kiili itamiwa yi! Dok nolin ibakamin kukup dinim so, dok nolin tituun-kup tabasu so, dok nolin ninak dinim so, ke-bom kiimi fiyaap kiita duun-umbip kala; ale dok nolin win tambal-kup tabasu so, dok nolin atin ti tambal-kup tabasu so, kiimi sang kiita tong bakan-umbip kala, kalip namti, kanumin kanumin kukup alik kiimi aket kaata-kup fukun-bamdipya yo, kala-somla ko.
PHI 4:9 Ibi kukup kala, kukuyila uyo kuluule, weng koli kaata weng san-ilom ale, nami kukup kala nuubi iyo itam-som kano-silip kaata kuluu kuyak aket tem daa kanu-biliwa, God ami aket balili-kalin kuuta, kukaayila-yaaba alta dal mola bomdiwa yo, kala-somla ko.
PHI 4:10 Kamokim Yesus ayo kup-nale, nali utami yi, Ibi nami aket uyo kufop-nipya, nali Tunum Dukum ami win diim yaap ke yo, kalbi kabak-ali miit so kala, kalaliya, nali fiyaap kaa duubi kemin, kaami miit uyo utamiya, Ibi kamasi kaali, nami aket fukun-bamdip dong dokolum aa, kemsip. Yale, liip dinim kala, kalalipya, liip dal kaa-bamdipla fen-bam kensipla kala, kala-lomdiya, ibi dong dokop-nip o, kalaliya, fiyaap duubi kayi!
PHI 4:11 Ali boko-lomda: Nali mafek mafek duluubi no, kalba. Kemin, ami dong dokolum o, kala, kala-lomdip aket fukunokomip uyo kipta kanop-nin o, kalbi dinim. Yale, mafek mafek katip ma kuluuta-kup bombuu namti, saak kanolin diim kawu laabi taa kala balili-kup kala-lom bom ilin uyo kaal-kesi. Kemin,
PHI 4:12 mafek mafek soyap kemin kaami kukup uyo utamsile aa, mafek mafek iiwa-laamin kaami kukup uyo utam um-kukubi kaal-kesi. Kemin, kalok nolin kukup ma tiltam tabam-nokomu kaata, nalile suunkup kawu utam fiyaap duumin kukup uyo um-kukubi-kup kaal-tiklin-kesi. Kemin, nali ima inamni fikin-tabamnu no, kali kaali, fiyaap duu-mokomi; ale ima-tinap tabep-na-bulula ti maso ma inamnon o, kalokomi ukol ti kanola fiyaap duu-mokomi.
PHI 4:13 Kraist ata titil kup-na-lom dong dokop-nam-balaya kemin, ami titil diim kawu mafek mafek alik tangbal iyo kanu-mami no.
PHI 4:14 Kanu-mami katale, nak-tunum kusal ibi nami aket uluum fukunbi kuuli, dong dokop-na-lom kuluubip kemin, kaa tambal o.
PHI 4:15 Filipai kasel ibi talalu utamsip, kamasi kaami din ipni Provins Masedonia kaptamu bomdi God ami weng tambal kukuyinbi; kula ipyo keya yak abip katip katip ma tal-unemsi kawu, ibi nami dong dakaap-nam-biliple, nita kipni dong dakaayim-bilila, Kristen malo ma nami dong dakaap-nansip disa; ti ipta-kup dong dokop-na tuumon uyo kukaap-nansip. Kemin,
PHI 4:16 nali din abip Tesalonaika kaptamu biliya, Filipai kasel ibi ma dong dokop-nokomip disa ema yo, kalasi disa. La, dum alep ibi dong dokop-na-silip.
PHI 4:17 Kanolin sang bokoyili kaata, Pol ami tuumon masiim ma kolum o, nambip kabak-ata aket fukunbi disa; nami aket fukunbi uyo, naktum kusal kipni kukup tambal kanubip kaata, ifiili tooplo so ke dukum-nuya, mulo kaptamu ibi win tambal uyo kuluulin o, kebi.
PHI 4:18 Kemin, mafek mafek alik kup-na-silip iyo donga-lomdu sikelbu. Kemin, nimi mafek mafek tikbu kaali, ipni tuumon, Epafroditus ami kolipla, ata kulii-tal kup-na kuluubi. Kaa God ami mafek mafek kolum o, kala kufuulip tang tambal fuun-balala kaa tang tambal o, ken-umba ultap o.
PHI 4:19 Ali nimi God ale, ipni God, ata mafek mafek tambal tambal alik kiimi miit kayaak kemin, ali Yesus Kraist ami win diim o, kalalaya, ipni mafek mafek alik iipnip uyo kuuya tik-nokomip.
PHI 4:20 Ali nulmi Aatumen ale numi God kemin, ami fiyaap kaata, duu-bam, ami win uyo kufon-bam, suunkup ami fiyaap kaata duu-bamduwa yo, kala-somya kemin, fan ko.
PHI 4:21 Nali, God ami unang tunum Yesus Kraist ami diim fewa-silip, ipni weng umuuyon o, kali kemin, nami Kristen tunum nikil maakup bom-bulup yakal, ipni weng uyo umuuyip le kuno,
PHI 4:22 God ami unang tunum alik kala bom-bilip yakal ipni weng umuuya kelip aa, King Sisa ami am dukum okok kemin maakup maakup yakal kano dukum-kup kipni weng umuuyup o, kala kanum bokolip ko.
PHI 4:23 Yesus Kraist numi Kamokim, ali tangbal tangbal ma kamayim-bam disa misiim kawu ipni kuuya tiin mola bom-biliwa yo, kala-somya ko.
COL 1:1 Nak-tunum kusal kaa yaabip o? Nali Pol nata kemin, God almi aket fukunin kaata-kup nali uldaa-nam-buulaya, Yesus Kraist ami kalaan tunum kensi. Nata sukon kala God almi unang tunum abip Kolosi kaptamu bom-bilip kipni kulaayilila, din unokomu, kabak-ali nami tunum Timoti ali kipni weng umuuya kela kemin, kipni Kraist ami lak duusip uyo kulaasip disa; ibi titil-fokosip kemin, nayo beten kamaan-biliya, Aatumen God ata tal disa ipni masiim kawu dong dakaayin-balala, ipni aket tem uyo balili-kup kala bomdiwa yo, kala-somla ko.
COL 1:3 Kipyo, God ami tituun-kup tabin weng tambal uyo kamasi din unu weng san-silip kaa, ipkal utamipla: God alta mafek mafek tambal iyo afetu kutiiyilaya, abiil tikiin kawu bomdu numi liip fenbu no, kala-lom kaa ipkal Yesus Kraist ami lak uyo duule, God almi unang tunum alik imi aket uyo kukaayin-bam kem-tabasip. Kemin, Timoti alep nuli weng sanupla, Ibi kanubip o kala, alep numi beten kamayila-yaabup kaali, alep nuli suunkup Kamokim Yesus Kraist ami Aalap God ami win kaata-kup kufon-bamdup, kipni aket uyo fukun-bam, Yaap ke yo, kal-bom beten kamayin-bam yaabup.
COL 1:6 Kemin, am bokon alik kala dik-daa kulaasu kaali, God ami weng tambal ayo tiltam dukum-nula unang tunum iyo utamiwa yi: Kukup tambal ti kabuu no, kala-lomdipla, kutal-fuku kutama tabasip. Kemin ale, kanola ipkal kamasi God ami weng tambal din unu weng san-silip kabak-ali, ipkal dotu kutal-fuku kulii-tabasip. Epafras ata, God ami weng tambal ipni disa misiim kawu kukuyilaya utamiwa yi: U faneng kala, kala-lomdipla, God ami kukup tambal numi kukaayila-yaaba namti kabuu nu, kala-silip. Kemin, alep nokol Epafras ami aket dukum koluwale, ali ti daal dinim, titil-foko Kraist ami okok-kamaalin tunum kelala, alep nuso, nikil maakup okok ken-umbup. Ali numi abiin kaata kuluu bomdaya, ibi dong dakaayin-bamda kukuyinba. Kemin,
COL 1:8 Epafras ali alep numi bokoya-lomda: God ami unang tunum imi aket kola una-tala-kemin, kaami kukup kaali ti, God ami Sinik alta Kolosi kayaak unang tunum iyo dong dokoyilaya kanubip o, kalase ko.
COL 1:9 Kemin, kanum talabu kala, kalalup alep nuyo kamasi kipni sang kaata, weng san-sulup kawu, suunkup ipni aket-kup fukun-bam, beten kem-tabasup. Kemin, numi beten kaali, God ami dik-dakaan-bulupya, ayo almi aket fukunin kaata: Kalaata kanumin o, keba uyo kukuyale, ipkal talalu utam God ami Sinik akal ti dong dokoyilaya, atin ti aket fukunin tambal uyo kuluule, atin ti utam-laamin unang tunum ke kelin o!
COL 1:10 kal-bom, kaa dik-daalupya, Dukum alalta dong dokoyilaya, ibi ti almi unang tunum alik-daap ke-lomdip, almi aket fukunin kaata, Kalaata kanumin o, kalba kaata ti, suunkup kanu-bilipya kemin, Dukum ayo kanubip kaami fiyaap uyo duumak o, ke-bam ale, dik-daalupya, alalta ipyo dong dokoyilaya, ibi kukup tambal tambal kaata-kup nu-bam, God ami kukup kanum-unba uyo utafiin yakyak un-bom dotu utam-ilomdip God ali kanolin o, kalin o, yakan-kaabup. Kemin,
COL 1:11 nokol dik-dakaan-bulupya, God ami titil dukum uyo kuya-som yam-titil-dii kelaya, ibi titil-fak-daa-lomdip dok kanolin mafek mafek uluum tabin tiltam ipni diim kawu talokomu uyo kewa-yaamin disa; kipkal titil-fak-daa-bom balili-kup kala fiyaap kaali duu-bamdiple,
COL 1:12 Aatumen God ami yaap ke yo, akan-kaa-bilipla yo, kal-bomdupya, nuli beten kem-tabasup. Aatumen ata dong dokoyilaya, ibi tiika-silip kemin, am ma daanokoma kaali, kipso, Yesus ami lak duulin unang tunum almi falala-kalin diim kawu bom-bulup nuso, nuli mafek mafek tambal ma God ayo boko-lomda: Ipni no, kala-lom talalu kutiiyinsa uyo kuluulokomup ko.
COL 1:13 Nuli kutamiip tunum mafak ata yim-buu-yim-bang kutamiip tem daalaya, yang un-ilomdupla ami minlo tem unup ata tiin mosa. La, Aatumen God ata nuli uldaa-yim-buu-lomdala yim-bii yak almi aket dukum kola-laaba Man Yesus ami miit tem daalaya, ata tiin molaya tambal-kup ke-sulup. Kemin,
COL 1:14 Aalap ayo Man ami kanolase uyo utamdaya: Numi ban kemin uyo kukan-tiiya-lom iliim boya-lomda sok til-daa-yim-buulin tap kelaya, nuli tambal-kup ma ke-sulup.
COL 1:15 God ali sinik kemin, nuli ti atamup disa; aa, Kraist akal ti kuno Aalap God alaltap kemin, ali tildaak tawaal diim talse kaata, fatap-nala kawu, unang tunum iyo atam-ilom: Aalap God kaa man Yesus altap o, kala-silip. Kemin, mafek mafek iyo talalulin disa biisa kaali Yesus kaa bom biisa. Kemin, Aalap God ayo Man ami diim kawu, mafek mafek alik kala bom-bilip iyo talal-bisa. Man ali mafek mafek alik Aalap talal-bisa kiimi dabom kesa. Kemin, mafek mafek alik talal-bisa kiili, abiil tikiin umi mafek mafek alik kiiso, tawaal diim kaldaak-ami mafek mafek so, aa mafek mafek fatap bom-bilip iso, kuwaala bom-bilip kiiso aa, ensel alik titil-kup tabasip iso, iyo talalu-yimusa. Kemin, kaali God ayo mafek mafek alik kiili, kulaala tildak man ami diim abamnipya, Kapta dabom ke-lomdap kii tiin mo-bom balawa yo, aka kanum bokonsa.
COL 1:17 Kemin, God ami mafek mafek alik kii talalulin dinim bom-bisa kaali, Kraist ali ti kano bom-balaya, mafek mafek kiiyo talalulaya kawu, Kraist ata mafek mafek iyo ku ilmi baan diim kawu katiiba-kup, tiin mosa.
COL 1:18 Kemin, Kraist alta Kristen unang tunum numi miit kayaak ke alta numi dabom kelale, Kristen unang tunum nuta ami tiil tap kesup. Kemin, kaali God ali: Nalmi Man diil o, kala-lomda ali mafek mafek alik kiimi dabom kelak o, kala-lomda ayo asuk dafolaya, tam tiin kawang kesa.
COL 1:19 God almi aket fukunin kaata-kup: Nami Man kaali, Aalap naltap ke-lomda nami kukup so, titil so, iyo alik kuluulak o, kala-lomdala, Aalap ayo Man ami konsa.
COL 1:20 Kemin, God ami aket fukunin kaayo, Nami Man ata mafek mafek alik kiiso, unang tunum alik iso, iyo kulii-tildang nalmi miit tem tiip-nak o, kala-lom, titil kaa kola-lomda, Man ayo dabaala tildaak as diim kawu taan-ilomda mafek mafek alik so, abiil tikiin kasel so, tawaal diim kaldaak-ami unang tunum iso, alik iyo afetu im-taldang almi Aalap almi miit tem tiilaya, imi God ami waasi kensip iyo kambola-silip ko.
COL 1:21 Siin sawaayak kaali, ibi God ami samaan kawu bomdip ami waasi kela bomdipla kawu, aket fukunin mafak uyo kutal-fuku-som, kukup mafak uyo kutal-fuku ken-unbip. La,
COL 1:22 kamala kulaata, God ata almi Man dabaala tildaak tunum fatap ke-lomda as diim taanse. Kemin, utamduya, God ayo afeta-yimulaya, nikil alimal ibi alami kayaak ke-silip. God ali ipni aket-kup fukun-bamdaya kemin, iyo nami weng tambal kaa weng san-ilomdip kutal-fuku-bom nami kanolokomi no, kalsi kaami fenbip uyo kambola-yaamin disa; kaali ti, faneng o, kala-lom dukum-kup talalu utam-ilomdip kutal-fuku titil-foko kutama un-bomdip ban kemin dinim, atin ti tituun-kup tabin unang tunum kelipla, nami Man ayo yim-tama tiltam nalmi tiin diim tiilak o, kala-lomdaya, God ami Man ayo dabaala tildaak talse. Kemin, am bokon alik kala dik-daa kulaasu kaami unang tunum kiiyo, God ami weng tambal uyo unang tunum iyo taken-bam kulii-una-bilipya, nali ti God ami okok kemin tunum ke-lomdiya, ami weng tambal kaata, bakayila-yaabi no.
COL 1:24 Kraist ami tunum unang ibi almi angtiil tap kesip. Kemin, kamala kaali, kipni dong dakaayinbi kaami kalan kaata, angtiil yol kaa dakabi. Yale, kaami fiyaap uyo duubi. Kraist ayo siin kawu bokop-na-lomda: Kapni taba-lom nami unang tunum imi dong dakaayokomap uyo angtiil yol kuluu-laa-mokomap o, nakase uyo, fan kala kanun-umbi. Yale, uyo disa kelin dinim kama bombuu. Kamala kalawaali ti dong dakaayin-bam, angtiil yol dakamin-kup ken-umbi.
COL 1:25 God alalta uldaa-nam-buulaya, nali tiltam Kraist ami unang tunum imi ok fukulin tunum ke-bomdiya ibi dong dakaayila-tabasi. Kemin, God almi weng kaata alik iyo kukaayin-biliya, ibi talalu utam-laabip.
COL 1:26 Sawaayak kawu, weng kalawuuli tunum miit alik imi tiin diim kaa, God ayo kulii yang kuwaa-yinsa. Kata, kamala kulu taltam alami tunum unang imi tiin diim kawu ku-fatap-daayala utam-silip.
COL 1:27 Kanola God ami aket fukunin kaa, Nami unang tunum imi kukuyilila utamipla yi, Weng yang sawaansu uyo atin ti tambal kala, kala-lomdipla, unang tunum miit ma ma iyo alik dong dokoyimu no, kalin o, kalsa. Kemin, weng yang sawaansu uyo boko-lomdu: Kraist ali kipni tiling tem kabaku bombe no, kalsu. Kemin, kipkal fen-bilipya, tal yim-tama tam alami falala-kalin abip abiil tikiin kawu daalaya, aso maakup ilokomip ko.
COL 1:28 Numi aket fukunin kaali, Unang tunum iyo tal aba tam Kraist ami unang tunum ke-silip imi dong dakaayin-bulupla, alik tiltam Kraist ami aket kola-laamin kaali, dukum-alom tiiknu keliwa kawu, yim-tama tiltam God ami tiin diim kawu daaluwa yo, kalalupla, unang tunum alik iyo Kraist ami sang uyo kukaayin-bamdupla, yak kaal-ke-laamin yakal ilmi miit ma ma iyo kukuyin-bam ale, bokoya-lomdup: Ibi yak ma kuuta kanumin ale, yak ma kuuta kanumin disa kayi! yakan-kaa-bam ken-unbup. Kemin,
COL 1:29 nami aket kaali ti kiimi dong dakaayon o, kal-bomdiya, ok ayo kano ti fiit-bamdi dong dakaayin-kup kem-tabasi. Kemin, nami kala fiita-tabasi kaali, Kraist alta titil dukum ayo kup-naya kemin, kanum-tabasi ko.
COL 2:1 Ipkal utamin, Nali ti ipso, abip Laodisia kayaak so, alik nami fanang atamin disa bilip iso, ipni dukum-kup fiit-bamdiya, dong dakaayila-tabasi.
COL 2:2 Nali kanola fiit-bamdi dong dakaayin-biliya, kipni aket tem kaali, titil-foko-lomdip aket kola-una-tala-kebip-kup, nikil maakup ke-lomdip aket fukunin tambal uyo kuluulipla kawu, kipni Kraist ami lak dakaamin uyo dong dokoyulula, atin titil-foko-lom God ami weng kulii yang kuwaasa kaami miit uyo atin ti utamin o, kal-bomdiya, dong dakaayila-tabasi. Weng kulii yang kuwaasa kaa, Kraist ami sang kaata, kemin,
COL 2:3 Kraist ata-kup utam-laamin so, aket fukunin tambal so, alik imi miit kayaak o.
COL 2:4 Nami weng kala bokoyi kaayo, tunum iyo ma ibi ibakayin-bam kasenuyipla fan o, kalolip o, kalaliya bokoyi no.
COL 2:5 Nali kipso bom-bulup disa; nami aket fukunin kaata-kup kipso bom ilin tap kesi no, kalaliya kemin, nami fiyaap duubi kaali, itamiya: Alik nikil maakup ibi ma ami titil e kala kulii-tala-tala-ke-lom titil-fak-daalipya, Kraist ami lak kaali, dukum-kup dakaabip o, kalaliya, nami fiyaap kaata duubi ko.
COL 2:6 Siin kawu Yesus Kraist ami lak duu-lomdip: Kulaata numi Kamokim o, kala-silip. Kemin, kamala kalaakal, ibi yak Kraist ami diim kawu fep-nipla aso, maakup almi kukup tambal kaata-kup kutal-fukulin o, yiki.
COL 2:7 Kibi mafek mafek san diki-bilipla, timtim kiiyo yak aba umbalaak tawaal unipya, tambal-kup tabebu tap ke-lokomip ale, am delip am kun ta ku-titil-molu titil-foko tola-yaabu tap aye, ke-lomdip Kraist ami tituun-kup tabin weng Epafras ata ipni kukuyinsa uyo, weng san-kaa-bilipla, ipni Kraist ami lak uyo dukum-nula titil-foko-bomdiwa yo. Kanola ibi suunkup God ami yaap ke yo, akan-kaa-biliwa yo.
COL 2:8 Tunum maakup maakup ili disa kasen-foko kukuyin-bam bakayin-bilipla, kipni aket fukunin uyo, Fan, kiili tituun-kup tabin weng tambal kaata bakabip o, kalokomip. Yale, kanolin tunum kiili, Kraist ami weng bakamsa kaata baka-bamdiwa disa; awil-fakal imi kukup sang kaata-kup baka-bam ale, tawaal diim kalawaami kukup mafak mafak kiimi sang kaata-kup kasen-foko ibaka-bam ken-unbip. Kemin, kiili mokop yang kasenuyipla, ibi weng san-kaamip namti, yang abil tem unin tap ke-lokomip. Kemin, ibi imi weng kaa, weng san-kaamin disa; dotu utafii-bamdiwa kayi!
COL 2:9 Kemin, Kraist ami sawaayak tildaak tawaal diim aba-lom tunum ke-bomda ilsa kaali, fan ali ti God kemin.
COL 2:10 Kamala kaali, ipta Kraist ami anung til-daa-lomdip ami unang tunum alik-daap ke-lom suunkup ilin ke-silip. Kemin, sinik alik titil-kup tabasip imi dabom kaa Kraist ata no.
COL 2:11 Kemin, Juda imi kukup kaa kanumin kemin, awak uyo man tunum ayo kuulu kala, kalale, kulaali awal iyo man ami ipnaal kaayo, bo-kukan-tela le, man ayo tiltam Juda nulmi tituun kela no, ken-unbip. Kemin ale, ibi tiltam Kraist ami tunum keliwa, iyo tal ipnaal bo-kukan-tiiyin disa; Kraist ata kipni ban kemin kaami aket kipni aket tem kabak bom-bulu kanun-unbip kaata, bo-kukan-tiiyilaya, taltam alami unang tunum tituun ke-silip.
COL 2:12 Kanola kipni daak ok tem unip oksam kaa ukuya-silip kaali, ipni sawaayak ban ke-bisip kaami kukup kaata, kambolipla God ata kipni ban kemin ayo kukan-tiiya disa kesuu tap, kukal kanola Kraist ami taana dawaa-silip ulultap o. Kanola kipni oksam ukuyip tiltam tal-silip kaa, God ayo ipni talalu-yimulala ibi suunkup ilin unang tunum ke-silip tap, kakal ti God ami Kraist dafola tam tiinse ulultap kemin, ibi God ami Kraist dafola tam tiinse ami titil uyo ti yo, kala-lomdiwa God ami lak kaata duuliwa kawu, God akal talalu-yimulaya, ibi suunkup ilin unang tunum ke-silip.
COL 2:13 Siin sawaayak kaali, Kraist ayo kipni ban kemin kaami aket kipni aket tem kabak bom-bulu kanun-umbip kaata, bo-kukan-tiiyin dinim kela bom-bilip kemin, ibi ban ken-tal-une-bam bom-biisip. Kemin, kanumsip kaali, God ami tiin diim kaali, ibi unang tunum taansip ililtap ke-bom ilsip. La, kamala kaata, God ata kipni ban kemin uyo alik kukan-tiiya-lomda, Kraist ami dafola tam tiinse ulultap ke-lomda ibi talalu-yimulaya, ibi suunkup ilin unang tunum ke-silip.
COL 2:14 Kemin, God ami Lo Moses ami konsa kuuli boko-lomdu: Yak kaa kanumin disa yo, kalsu kaali, nuli duul-bamdupla, kaami uluum kaata fakan-talan-solup. Yale, Yesus Kraist ami dabak as diim daalip taanse kaata, God ata numi uluum kaami win kuyak sukon tem dolsa uyo tulula atin dinimnu, kewase.
COL 2:15 Kemin, Kraist ami as diim taanse kaali, God ata mafek mafek alik titil-kup tabasip imi titil uyo kukan-tii yim-baak tibi ata ata ke kukan-tiiyilaya, unang tunum iyo atam kaal-kesip o.
COL 2:16 Ibi tunum ma ata kamboliwa, ata taba-lomda ipni inin-inin kaami sang aye, God ami ima tinimin am daanokoma kaami sang aa, kayoop kama tiltam tabamna iintang duk-duu-yaamin am kaami sang aa, God ami iintang am daan-laamin kaami sang uyo weng ma kutii-lom yim-bak-saanokoma disa; atin ti disa.
COL 2:17 Kemin, kanolin iintang am dakan-umbip aye, inin-inin aye, kaali tiil kaami sinik talaba tap kaata atam-laabup, kemin ale, tiil kaami atin tituun tiltam talsuu kaali Kraist ata no.
COL 2:18 Kemin, tunum ma ayo tal kanola almi lom tambal ma duuli. Kemin, nata-kup utamsii no, kal-bomda, ayo kipni bokoya-lom: Kipyo, kaptum kusal numi minlo tem unin aa! yakan-kaa-bam ale, bokola: Ibi God ami beten kamaala-yaabip ulultap ke kanola ensel ami beten kamaalin o, ke-bamda kanuma namti, kanuba tunum ayo kambolip ata taba-lomda, ibi yim-baak tibii-yaamin dinim o.
COL 2:19 Kanolin tunum kaali, fan titil-foko-lomdala Kraist ami weng uyo kutal-fukulin disa ke-lom, ami aket fukunin kaali, tawaal diim kasel ilmi aket fukunin kaata-kup kuluu-lomdaya, Nata-kup o, ken-unba. Yale, kanun tal-uneba kaami miit kabak-ali liip disa yo! Kraist ali Kristen numi dabom ale, nuta ami tiil tap kemin, dabom ata taba-lomda tiil alik kaami inin-inin uyo kukaalin-kup ke-balaya, kun so, malmel so, kiili tiika-lomdip angtiil uyo tambal-kup unu-tulu-ke-bomdiwa, God almi titil diim kawu tiltam ilu, dukum-alaabip o.
COL 2:20 Kamasi ipni yak Kraist ami diim kawu fewa-silip kaali, tunum ami taan-ilomda tawaal diim kalawaami mafek mafek kutii kela uneba ultap ke-lomdip ibi kayak kayak imi tawaal diim kalawaami bung aket fukunin kukup kaali, kela-lomdip Kraist ami lak-kup duu-silip. Kemin, kamala kalaata ibi kanimin o, kalaliwa, tawaal diim tunum imi kukup kela-silip kaa, asuk kuluu-lom bomdiwa kanubip i? Kiili weng kutii-lom boko-lomdip: Kuu ina-laamin daa! Aa, falang ata-laamin daa! Ibi kaa malela-laamin daa! kala-silip kaa, ibi kanimin o, kala kanumin weng kaa dikiwa-unabip yoko? Daa! kanolin weng kuu dikiwa-unemin disa yo.
COL 2:22 Tunum ilta-kup kanolin weng kaa kutii-lomdiwa, nuli kukuyila-laabip. Kemin, kanumin weng kutiisip kaali, nuyo kuluu-lom fukumupla kawu, atin ti disa ke-laabu. Kemin, kanolin weng kuu dikiwa-unemin disa yo.
COL 2:23 Faneng, kanolin weng kutiisip kaata, taba-lomdu nuyo wiis-moyulula lotu ke-bamdup uyo bokoya-lomdu: Ibi kap-tunum kusal imi minlo tem unin o, yakan-kaa-bam ale, uta taba-lomdu nulmi angtiil yol uyo kukaayin-bam ken-unbu. Kemin, nulmi tiin diim kaata, mep kanolin weng kutiisip uyo, weng sawaa tangbal o, kalbup. Yale, weng uyo fan taang-kala-lomdu aket mafak fukun-bam, kukup mafak nuu-bam kemin, uyo dibiilu tiil banomu disa yo.
COL 3:1 God ata Kraist ami dafola tam tiinse alaltap ke-lomda nuso yim-fola tam tiin suunkup ilin unang tunum ke-sulup. Kemin, ibi abiil tikiin kaami mafek mafek kiimi aket kaata-kup yan-bulula bomdiwa yo! Tam abiil tikiin kaali, Kraist ali Kamokim diildiil kelaya, God ami sikil tingtup diim kabaaku bombe.
COL 3:2 Kemin, kibi Kraist ami diim kawu yak fewa-lom alokso tunum unang keliwa, God ata ipyo tiin molaya, ibi tambal-kup bom-bilip kemin, ibi tunum ami taan-ilomda tawaal diim kalawaami mafek mafek kela uneba alaltap ke-silip te! Kemin, tawaal diim kalaami mafek mafek ami aket uyo asuk yelu yak unemin disa te! abiil tikiin kaami mafek mafek aket kaata-kup yan-buluya, bomdiwa yo, kala-somya ko.
COL 3:4 Kemin, kipni alokso unang tunum ke-silip kaami miit kaali, Kraist ata kemin, ilom am ma daanuya, ami tiltam fatap-nokoma kawu kipso, kanola God ami titil falala-kalin diim kawu aso, ipso, tiltam fatap-nokomip ko.
COL 3:5 Tawaal diim kukup mafak mafak kipni diim bombuu uyo atin kulaalip daak abip yelip taanip keyin o, kali kemin, kukup kanolin kiili ti: sadikimin aa; unang iso, kukup mafak mafak kemin aye; sadikimin kaami aket-kup yelu ilin aye; kukup mafak kaata kanumon o, kalin aye; nali mafek mafek soyap keli yo, kalin aye; kanolin fanang saanin kiili yelip taanipla keyin o. Kemin, ipni aket fukun-bamdip, Nuyo mafek mafek soyal kelupla yo kala-lom kiimi aket-kup yelula, dukum-nule, tunum men awem umi aket-kup yelula, wiis-saanin kaami kukup nun-umbip ultap keyu namti, kaali mafak o.
COL 3:6 Kemin, tunum ayo God ami weng uyo weng san-laamin disa ke-bam kanolin kukup kiita fukuma namti, God ayo atin ti aket atul dukum kaayo, kola-lomda bombii maan tela-lom angtiil yol kolokoma.
COL 3:7 Kemin, siin kaali ibi kanolin kukup kiita kanu-bilipla, kanumin kukup kuuta, taba-lomdu ibi yim-baak tibi yakyak kemsu.
COL 3:8 Lale, kamala kulaali aket atul tabemin aa, itam finanin aye, fuut-bam aket atul tabemin aye, tunum tit-kup ata-bom ilin aye, ibaka-bam dap-fatom-kaamin aye, alik kiiyo, welip taanu keyin o, kala-somya ko.
COL 3:9 Kipni aket mafak fukun-bamdip kukup mafak kutal-fuku-bom ilsip kuuyo, welip taansu. Kemin, ibakamin weng kaali, asuk bokola una-tala-kemin disa.
COL 3:10 God ata talalu-yimulaya, ibi tiltam alokso tunum unang ke-silip. Kemin, God ayo nami fanang uyo atin ti kaal-ke-bamdip iyo bam-daalik o kala, alalta taba-lomda kipni aket tem uyo suunkup talal-yim-balaya, ibi alaltap ken-talan-unbip.
COL 3:11 Kemin, kabak-ami iipyak tem kawu ilip kemin, aket kanolin kii fukunin disa. Nuli Juda ale, nuli tunum nokol miit kusnum, aa nuli kanta tunum man imi ipnaal bo-kukan-tiimin kukup fukumin aye, nuli kanta kanolin kukup tabuulin dinim aye; nuli fatal tunum aye; nuli saak kasel unang tunum kemin, mafek mafek ma iyo itamsup dinim aye; nuli sok de-yimulip tunum ma ami disa wok fukulin tunum, aye; nuli nulumi dalaal kulu-bom yakmin aye, kanolin alik kiili win dinim o; mafek mafek atin ti win soyim dukum kaali, Kraist ata kemin, ali unang tunum alik ami lak duu-silip imi iipyak tem kabaku bombe. Kemin, kaata aket fuku-daalin o.
COL 3:12 God ali ibi ulelnaya, almi unang tunum ke-lom tituun-kup tibin keliple, almi aket uyo kipni aket-kup aasu. Kemin, ipkal ti kanola unang tunum alik iyo olen-yim-bamdiwa, tambal tambal ma kamayin-bamdiple, kipyo kaptum kusal imi minlo tem un-ilomdip, kaptum kusal iyo aket balili-kalin kaata kuyinbip-kup, balili-kup kala bomdiwa yo.
COL 3:13 Kapta kaptum ami bokola-lomdap: Nalmi nak-tunum kaltapta ban kep-nambap o, kala-lom dabak-molon o, kalap namti, ami kanolin aket kukaanbap uyo kukan-tela-lomdap ami ban kep-timba uyo lukup-tala kelan o. God Kamokim ali kipni ban kemin uyo kanola kukan-tiiya-lomda lukolase. Kemin, kipkal ti kanola kaptum kusal imi ban keyip uyo kukan-tela-lom lukuuya una-tala-kemalip o.
COL 3:14 Ibi kanumin umi kukup kuu kanumum o, kalip namti, kipni kukup uyo maso ma kulii-tildak kuyak mim-daa ke-lokomip kaata, fan kaptum kusal kii aket kola-una-tala-ke-bamdiwa kemin, nikil alimal atin ti kuyak mim-daalin o, kala-somla ko.
COL 3:15 Kibi Kraist ami dik-daalipla ata dong dokoyilaya, bilili-kup kala-bom ilin aket kaata, kuluu-lomdip fanang-dakamin tambal kaata-kup kutal-fuku-bomdipla yo, kala-somla kemin, kaa dok kata naa kalolip: God ami aket kaali, Unang tunum imi weng kuyiliya angtiil maakup ultap ke-lom balili-kala-laamin kaami aket kaata-kup kuluulin o, kalalaya ipni weng kaa kuyase. Kemin, ibi God ami yaap ke yo, akan-kaa-bamdiwa kayi!
COL 3:16 Kraist ami weng kuyak aket tem daka-bam dukum-kup kaal-ke-lom kaptum kusal iyo God ami sang uyo kukuya una-tala-ke-bamdip, utafii-bamdiwa yo kalin weng uyo bakayin-bamdip le, kipni aket kabak-ali God kaa yaap ke yo, akan-kaa-bamdip, Baibel umi baal so, Yesus ami fiyaap don-bam baal wiimin so, God ami Sinik ata baal kuyase kaami baal kiita-kup, wii-bamdiwa ilolip kayi!
COL 3:17 Dok kanumin weng bakamin so, kukup kaaso, iyo alik kanumip namti, Kamokim Yesus ami win kaata kuluu-lom alik kanu-biliwa, kalok nolin kukup Kraist ami ipni kanuyimba kaali, Aatumen God ami yaap ke yo, akan-kaa-bam kanu-malip ko.
COL 3:18 Unang, tunum din kipyo, timak kusal kiita kipni dabom keyinbip kemin, imi weng bokolip kaata-kup, weng san-kaa-bamdiwa yo. Ibi Kristen kesip kemin, kipni kanolin kukup kaa kanu-mokomip kaali, ti tambal ma keyilula kanu-mokomip.
COL 3:19 Tunum, unang din kiwe! Kipkal iltipni unang tan kii titil weng kaa, bakayin-bamdipla, imi aket tem kaa ku-mafak-dakayilalip kemin, atin ti tambal-kup iltipni unang tan imi aket-kup yan-buluya, tambal-kup iyo tiin mo-bomdiwa yo.
COL 3:20 Man kipyo, kibi Kristen kesip kemin, kawak-aalap imi weng, Kanumin o, kebip kiili, alik ti weng san-kaa-bam ti kanu-bamdiwa yo. Kemin, God ali kanumin kukup kaata, fiyaap duu-mokoma no.
COL 3:21 Awal kipyo! Kipni man kiili, titil weng kaa suunkup bakayip namti, imi aket tem uyo aket atul keyulula, aket uluum kaami diim kawu ilokomip. Kemin, kibi man kii kanuyin dinim o.
COL 3:22 Disa sok de-yimulip bomdip okok kemin unang tunum kipyo, ipni tawaal diim tunum kala tiin molin imi mafek mafek sang alik bakayinbip kaali, tambal-kup weng san-kaa-bamdipla yo. Kibi imi weng kaata, weng san-kaa-mokomip kaali, tiin molin tunum imi tiin diim kaata-kup okok ke-bulupla, ili numi fiyaap kaata duumik o, kalin disa; ili ilin disa kelip kata, kakal ti tambal-kup okok ke-bilipla yo. Ibi ti Kamokim Kraist ami aket kaata-kup fukun-bamdipla, kipni aket fanang uyo tambal-kup ma kulaalip yak ok kaami diim kawu abuu-bomdiwa yo.
COL 3:23 Kemin, ibi kalok nolin ok nuumip ayo ilom am ma daanula, tam abiil tikiin tam unipla kawu, Kamokim Yesus Kraist ami ok tambal kaata, fukulokomip ultap ke, tawaal diim kalaakal iltipni tiin molin tunum imi ok ayo titil-foko okok ke-bilipla yo, kala-somla ko.
COL 3:24 Ibi Kamokim Kraist ami ok tabolin tunum ke-silip kemin, am ma daanuya kawu ok dinim-nokomu diim kabaku, Kamokim alta kipni sisol kamasi talalu kutiiyinsa kaali, atin kuyokoma kemin, ibi kanolin wok kiili nun-umbip.
COL 3:25 Ale, tunum iyo ti ban kemin-kup ilip namti, God ata kaami maan uyo tiiyokoma. Kanu-mokoma kaalile, kaa tunum imi tiin matum aye, angtiil aa, kaata itafii-bamdaya disa; ali aket tem so, kukup so, kiita-kup tituun-kup dik-yak-dii itamdaya kawu, maan kaa tiiyokoma te!
COL 4:1 Tiin molin tunum ipyo! ipkal ti disa sok de-yimulipla, bomdip kipni okok kamayin tunum unang kiiyo ti yaap-kup kukup tangbal kaata-kup kukaayin-bilipya kayi! Ti kipkal utamin, Kamokim abiil tikiin kawu bombe akal ibi dotu tiin mola bom-bilip kemin, ipkal ti kanu-bamdiwa, iltipni wok fukuya ilin tunum unang kiiyo, tambal-kup ma tiin molip bomdiwa yo.
COL 4:2 Ibi God ami beten kamaalin kaali, suunkup titil-foko-bomdiwale, aket uyo talalu fukun-bam, beten kamaan-bam ale, God ami yaap ke yo, akan-kaa-bamdiwa kayi!
COL 4:3 Siin sawaayak kawu, Kraist ami sang bakayinsi kaami kalan kabak-ata sok de-nam-tal kalabus am kala daaliwa tiinsi. Kemin, ibi God ayo beten kamaan-bilipla, nuyo dong dokoya-lomda, numi liip ayo kukuyilala, Kraist ami sang sawaansu uyo ku-fatap-daka-bam unang tunum imi bakayum o.
COL 4:4 Kemin, God ami wok kaali, nami kup-nase. Kemin, ibi God ami beten kamaan-bilipla, ata nami dong dokop-nala, weng sawaansu kaami sang uyo tituun-kup ku-fatap-dakaayim-biliya, mep kiimi aket tem uyo bam-daayuk o.
COL 4:5 Kemin, ibi unang tunum Kraist ami lak duulin disa bom-bilip imi tiin diim kaali, ibi atamiwa, liip uyo ma bombuu no, kalip namti, disa kaa tiin aa ilin daa; kemin, dok kanolin kaata ma kanolum o, kalip kaali, tambal-kup fanang-daka-bamdip atin kukup tambal tambal kiita-kup nu-bamdiwa yo.
COL 4:6 Kemin, kipni weng bakayip uyo ti weng abaal-kup tabeya-buluya, tambal-kup bakayin-bilipla, iyo ipni dik-daalipla, ibi utamiwa yi, Awu, liip namti kabuu kala, kalalipla kawu, alik kiimi dik-daayilip uyo maan uyo tiiya-tiiya-ke-mokomip kaata yaap o.
COL 4:7 Fan, Tikikus ali ti nulmi kiim maakup tap ke-bom, ali daal dinim ke-bomda, ali Kamokim Yesus ami wok tabuulin tunum kesa. Kemin, ali nuso Kamokim ami wok tabuulin tunum kemin, kaata dabaali dindaya nami tiin-laamin so, tal-banemin so, kiimi sang kaata alik kipni diim kawu ma bakayokoma.
COL 4:8 Kemin, nami fanang dakabi kaali, ibi utamiwa yi, Pol nikil ili kalok nola bom-bilip i kalin o, kalaliya, mep Tikikus ayo dabaali din-ilom kipni diim kawu bokoyila-lomda yam-titil-diilaya, fiyaap duulokomip.
COL 4:9 Kemin, Onesimus kakal ti nulmi kiim maakup tap ke, ami okok-ken-umba kaali, daal dinim ale, ali ti iltipni tunum kemin, ali Tikikus so, alep yim-baali dindipla, kalaami mafek mafek ma tiltam taben-umbu kaami sang kaata, bokoyokomip ko.
COL 4:10 Aristakus ali naso, sok de-yimulipla, alep maakup kalabus am kawu bom-bulup akal kipni weng uyo umuuyale, aa Banabas ami alak Jon-Mak akal, weng ayo umuuya kelip kemin, Jon-Mak ali din una namti, ami sang kaali, siin kawu kuyinbi akal ti dap-tama din iltipni am kawu daa tiin molip ilom keya unak o.
COL 4:11 Kemin, Josua Jastus akal kuno weng uyo umuuyila kelip o. Juda kayaak Kristen kesip kiili, tunum asuumano kalawiita-kup, kun biki-bomdip dong dakaap-nam-bilipla, nikil nuli God ami weng uyo kukuyin-bulupya, iyo God ami miit tem uyo tildang talen-umbip o.
COL 4:12 Kemin, Epafras akal kuno weng uyo umuuya kela kemin, akal ti, iltipni tunum. Akal Yesus Kraist ami ok fukulin tunum ibi suunkup dong dakaayin-bam ale, God ayo dukum-kup beten-kamaalin-kup ke-bamdaya, Aatumen God kabi mep unang tunum kiili dong dakaayilapla, kiimi kapni lak duu-yaamin uyo dukum-alomdu man tiltam fusuu-yaabip tap ke, titil-foko-lomdip imi aket tem aye, uyo titil-foko-lomdipla, God kapta, Kaata kanumin o, kalbap uyo utam kuluu-lomdiwa yo, kal-bomda beten kamayila-tabasa ko.
COL 4:13 Nali ali atamsi. Ami sang ayo ma bokoyokomi kemin, weng san iliwa! Ali fiitmin dukum ke-bamdaya, kipso, abip Laodisia kasel so, aa abip Hiyerapolis kasel so, ibi alik dong dakaayila-tabasa.
COL 4:14 Kemin, Dokta Luk ali nulmi aket-iip maakup kemin, aso, Demas so, alep yakal kuno ipni weng umuuya kelip ko.
COL 4:15 Kemin, ibi nami weng umuuyila keli kaali, nalmi nak-tunum Laodisia kasel imi kuya-som ale, unang Nimfa uso, aa Kristen unang tunum umi am kaptamu tala-tala-ke-bam lotu ke-bamdip ilin iso, imi weng umuuya kelin o.
COL 4:16 Kipni tiin molin tunum ayo sukon kala dola kulaayi tulu kaali, tik-tiila weng sanbip-kup, kulaalip din Laodisia kasel unang tunum Kristen kesip imi diim kawu abamnula, imi tiin molin tunum akal tik-tiila weng sanbip-kup, sukon akal kusnum kaali, Laodisia kasel imi kuyinbi uyo tik-tii-lom yakal kulaalip talokomu kaayo, ipkal tik-tii kelalip ko.
COL 4:17 Kemin, ibi Akipus ami bokola-lomdip: Kabi Kamokim Yesus ami okok kemin tunum kemin, wok kaa kup-tase kaa, ti talalu kutal-fuku ilomdap dinimnu, kewan o, akolip ko.
COL 4:18 Nami sukon dolmin tunum ami dolmin o, kala bairo uyo nakal kuluu-lomdiya, nakal nalmi sikil ta sukon kalawaali kipni dola kuyon o, kalaliya kemin, NALI POL NALTA KIPNI WENG UMUUYI KO. Nali sok de-namulipla kalabus am kaltamu bom bii. Kemin, ibi nami aket kaa lukuuyama ni! God ata disa masiim kawu ipyo yaap ma kamayim-bamda tambal-kup, tiin mola tambal-kup bom-biliwa yi! Fan ko.
1TH 1:1 Nak-tunum kusal kaa laabip o. Pol nakal, Sailas, Timoti, nikil nuta sukon kala God ami unang tunum Tesalonaika abip kaptam bom-bilip kipni kulaayup din unokomu. Nuyo utamuwa yi, Numi Aatumen God aso, Kamokim Yesus Kraist aso, imi lak kaata dukum-kup duu-silip kala kala-somdupla, nuli naan-bam dik-daka-bulupla, God alalta taba-lomda ibi disa masiim kawu tambal ma kamayim-balaya, kipni aket tem uyo bilili-kup keya buluya bomdiwa yo, kalbup ko.
1TH 1:2 Numi beten kem-yaabup kaami yaap ke yo, kalin kaa God ami kukaala-yaabup kabak-ali, ipni suunkup God ami aket kukaala-yaabip kaata no, kal-bom ale, dik-dakaan-bulupla, suunkup ibi dong dakaayak o, kal-bom kem-tabasup.
1TH 1:3 Ibi utamiwa, Numi Kamokim Yesus Kraist ami weng kuka-daaya-lomda kabak kanolokomi te! kalase, uyo lolokoma dinim. Nuyo dong dokoyokoma no, kalaliwa, ipkal Kraist ami weng uyo weng san kutal-fuku-som ale, ami aket uyo kola-som, ami ok uyo dukum-kup titil-foko kutal-fuku ke fenupla talak o, kal-bomdip, kanu-bilipla kaata, kipni aket fukunin kaali ti titil-fak-daa tola-bom iliwa yo, kala-lom numi yaap ke yo, kalin uyo Aatumen God ami kukaala-yaabup.
1TH 1:4 Nak-tunum kusal kipyo. Nokol utamuwa yi, God ali kipni aket uyo kuya-lomda ibi nalmi no, kala-lom uldaa-yimbuuse kala kalalupla, numi yaap ke yo, kalin uyo God ami kukaala-yaabup.
1TH 1:5 Numi God ami weng kukaayinsup kaa, tunum nulmi bon tem weng kaata-kup kukaayinsup disa. God ami Sinik Tambal ata titil kuya-lomda dong dakaayin-balala kemin, God ami tituun weng uta kukaayin-bulupya, alalta dong dakaayin-bala, ibi God ami weng uyo dukum-kup bam-daa utamiwa yi, Tifaneng u, kemsip; nikil numi kipso bom-bulup uyo kipkal utamiwa, Pol nikil imi kukup kanubip kaali, numi dong dokoyum o, kala kanubip o, ke-bam kemsip ko.
1TH 1:6 Nak-tunum kusal kipni God ami weng uyo weng san-silip kaa, ibi nikil numi kukup tambal tabuusup kaata utam kaal-ke-lom kutal-fuku ilan-solip sole, Kamokim Yesus ami kukup tambal kaaso tabuu-silip. Kemin, kayak kayak malo ma ita taba-lom ipni kukup mafak uyo kukaayin-biliwa, angtiil yol dukum uyo suunkup kuluu-laabip. Lale, God ami Sinik Tambal ata dong dakaayin-balala kemin, ibi aket uluum so ma kuluusip disa; suunkup fiyaap duun-tabasip.
1TH 1:7 Kemin, Kraist ami lak duulin unang tunum iltipni Provins Masedonia kayaak so, Provins Akaya kayaak iso, ili kipni Yesus ami lak duu fiyaap duumsip kaami fiyaap kaali, weng san-somdipla, Nokol kipni kukup kanumsip uyo ma nokol tabuulum o, kebip. Kemin,
1TH 1:8 kipni Kamokim Yesus ami sang bakayinsip uyo, weng kaa alik yak Provins Masedonia abip abip kaa bom-bilip, Provins Akaya kaptam-ami abip abip kaa bom-bilip, iyo weng san-silip. Lale, kaa kaptam ita-kup disa, unang tunum am bokon samaan kasel yakal weng saniwa, Ibi fan God ami weng kutiisa uyo lolokoma dinim kala-lomdiwa, ami weng uyo weng san-kan-tabasip te! Nikil nuli utamupla, Alik kii kipni Yesus ami lak duu-laamin sang uyo weng san-ilom bakabip kala kalalupla kemin, nuli kipni sang kaata unang tunum kusnum iyo maso bokoyokomup disa.
1TH 1:9 Kayak kayak ili suunkup baka-bamdiwa: Pol nikil imi kamosinim Tesalonaika kasel Kristen kipni fanang din un-silip uyo, ibi imi weng kaa weng san kutal-fukule, awem men iyo daang ukuwa kipni aket fukunin ayo fal-siki-lom fan, God suunkup ilin ami lak kaata duuliwa,
1TH 1:10 fenupla, abiil tikiin kaptamu God ami Man ayo talak o, kalbip kayi! kala unang tunum alik iyo bakabip. God ami Man Yesus kulaata taa! kemin, taanala God alalta dafolala tam tiinse. Tunum unang imi ban kemin kaata no, kala-lomdala, God ayo aket atul tabela-laabu. Ilom am ma daanuya, angtiil yol kuyikin. Lale, Yesus ata taba-lom almi unang tunum numi iliim kaata bose. Kemin, God ami angtiil yol kuyokoma kaali, nuli uktayokomu ko.
1TH 2:1 Nak-tunum kusal kipyo! Ibi Yesus Kraist ata ipni iliim uyo boyase. Kemin, nikil numi din unupla, kipso bom God ami okok kemsup ayo numi ok kaali, disa maaklo kesuu disa kaali, lap abuusuu uyo, kipni tal aba tam Kristen unang tunum ke-silip kaata no.
1TH 2:2 Ipkal utam-silip, din Tesalonaika unin disa bom-iluwa, abip Filipai kaptam-ami kamok kamok ita taba kukup mafak numi kukaayin-bam ale, weng mafak ayo kukaayin-bam ke-biliwa, din Tesalonaika un-sulup kaali, waasi ita taba-lom Kraist ami sang bakayimbip uyo loyupla kulaalin i! ke-biliwa, God alalta titil kuyilala, suunin dinim ke, unang tunum alik imi tiin diim kawu, God ami weng tangbal kaa ipni kukaayinsup.
1TH 2:3 Kemin, kipkal numi kukup so, aket fukunin so, iyo itam-tamin! Numi weng kukaayinsup kaali, God ami weng kela-lomdup weng kusnum kaata bakayin-bulupla kemin, ibi kulaa kela yang ban-silip disa. Aa, aket fukunin mafak aye, ma kuluu-lomdupla, bakayinsup disa. Aa, yak oko-takayim-bulup kukup mafak kuuta tambal kayi! yakan-kaa-bam kemsup disa.
1TH 2:4 God akal utamala, Kii ti yaap ma keyu unang tunum kii God nami weng tangbal Kraist ami sang kaata tituun-kup bakayokomip kala, kalalaya, God alta nuli im-baala yakyak ke-bamdupya, God almi weng kuyila-lomda kabak-ata bakayin o, yakan-kaaba kaata bakayila-tal-unemsup. Nuli bakayila-tal-une-bulupla, tunum unang ita numi fiyaap duuyin o, kalaluwa daa; God ata numi aket fukunin uyo talalu utamsa. Kemin, bakayila-tal-une-bulupla, akal numi fiyaap uyo duumak o, kalalupla kaa kanum tal-unemsup.
1TH 2:5 Nuli kipni diim uyo, weng tambal kaata-kup bakayim-buluwa, kipni aket uyo nikil ili tunum tangbal o, kalalip mafek mafek ma kuyin o, kalalupla, kipni tong bakamsup disa; kipkal kuu talalu utamsip. God alalta numi aket fukunin kabak-ali utama yi, Pol nikil ili maaklo moni so, mafek mafek so, uyo kaa-bamdiwa, tunum unang kiili God ami weng kaa bakayinsip disa yo, kalin uyo utam kesa.
1TH 2:6 Kanola nuli dok kanolin kukup kaata ma kanu-buluwa, kipsole, unang tunum kusnum iso, kipta numi win uyo kufuyin o, kalaluwa disa.
1TH 2:7 Nuli Kraist ami kalaan tunum kemin, nuli kipni yaap dik-daayup numi mafek mafek kamayikin. Lale, kamasi kipso bom ilsup kaali ma kanumsup disa. Nuli unang umi man unaak akolkup aka fulu tiin saanbu tap ke-bamduwa, ibi akola talalu tambal-kup kukuyin-bam tiin mo-bom ilsup.
1TH 2:8 Nuli ti dukum-kup kipni aket dukum kuyinsup utamdula kemin, God ami weng uyo kukaayin-bulupla, kabak-ami kalan kaata, waasi ita tal yelipla, taanakin kemsup. Katale, nuli ti titil-foko God ami weng tambal Kraist ami sang tangbal kaata bakayinsup.
1TH 2:9 Nak-tunum kusal kipyo! Siin kipso bomdup numi mafek mafek nuumsup kaami kukup kaali, ibi utafiim-solip, numi God ami weng tambal bakayinsup kaa, nuli taba kipni ima kaata-kup inayin-bulupla, ipni ima so, bung so, tuumon aye kiita iip-namip o, kalalupla, God ami weng bakamin kaata-kup daa; nulmi moni ok so, okok ke-bamdup fiit-bam kutamiip so, taap so, ti okok kemin-kup ke-bam moni kaa-bamdup nulmi ima ayo saan-bam im-bulupla, utamiwa yi, Awu, ili ti dukum-kup numi aket dukum kuyinsip o, kemsip.
1TH 2:10 Nikil nuli kukup mafak so ma kukaayin dinim. ti kukup tangbal tituun-kup tabasu kaata-kup kukuyinsup. Kaa Kristen kipso, God aso, ipkal kaa talalu utafiimsip.
1TH 2:11 Nikil numi kukup kaali, tunum almi man ami kukup tangbal kukonba tap, aa nokol ti maakup maakup ibi kukup tambal kaata kukuyin-bulupla, ipkal utam-silip.
1TH 2:12 Kanolin ultap kemin, nuli kipni yam-titil-saanin weng kaata bakayin-bam dong dakaayin-bulupla, talaba tam titil-fak-daalin o, kalaluwa kemin, ipni bokoya-lomdup: God alalta ibi uldaayimbuu im-taldang almi miit tem daale, tambal-kup tiin mola bom-bilip. Kemin, ilom kaali ibi tam God ami falala-kalin abip kawu im-tam daalala, suunkup ilokomip. Kemin, kukup tambal ata-kup kutal-fuku-bom-biliwa, God ata kipni fiyaap uyo duuyak o, kal-bomduwa, weng uyo suunkup bakayinsup ko.
1TH 2:13 Numi God ami weng kulii-din bakayinsup uyo, weng san utamiwa yi, Kaali tunum numi bon tem daa; kaa God almi weng kala kalaliwa, utam, Fan uu, kala-lom kulaali, God ami lak uyo duuliwa, God ami weng kuuta taba-lom ibi dong dokoyuluya, God ami lak duulin unang tunum ibi tal aba titil-fak-daa tituun-kup tunum unang ke-silip kala kalalupla, God ami yaap ke yo, kalin uyo kukaala-yaabup ko.
1TH 2:14 Nak-tunum kusal aa! Juda ili, Yesus Kraist ami lak duulin disa ita taba-lomdip God ami unang tunum o, kala Yesus Kraist ami lak duulin Provins Judiya kaptam bom-bilip imi kukup mafak uyo kukaayin-bilip utam-laabip tap, ti kano Tesalonaika kasel God ami lak duulin disa yakal ti taba-lomdip Kristen unang tunum ipni kukup mafak kukaayin-bilip um-tal-dakan-umbip.
1TH 2:15 Siin sawaayak Juda kasel God ami lak duulin disa kiita, taba-lom God ami profet weng ku-fatap-dakamin tunum imi anulip taan-laa-bilip kuno Juda kayaak ilta numi Kamokim Yesus ayo an-ke-silip. Kemin ale, asuk Juda kayaak iyo nikil numi kukup mafak uyo kukaayin-bam fotabasip kaali, kipsole, Kristen unang tunum alik abip kusnum kayaak iso, iyo kipni waasi keyinsip. Kemin, God ali taba kiimi aket atul dukum kuyinsa.
1TH 2:16 Juda-miin kiimi aket fukunin kaa, Pol nikil iyo Kraist ami sang uyo tunum unang miit kusnum imi bakayin-bilip, imi aket fukunin uyo fal-siki-lom tal God ami unang tunum numi iipyak tem talokomip. Kemin, Pol nikil imi liip uyo ukdaayupla yo, kalbip. Lale, ili taang-kala-lom numi liip uyo katii-yilalip dinim; kusnum kayak kayak imi bakayin-bulupla kemin, Kraist ami lak uyo duuliwa, imbii-tildang almi miit tem dakan-tabasa. Juda ili suunkup kaata kanu-bilipla, umi tem kabangu imi ban kemin uyo dukum ma tiltam tiltam tabasu. Lale, kamala kalawaata, God ami aket atul aalap dukum namti tal kiimi diim abamnula, yol awak uyo dakabip o.
1TH 2:17 Nak-tunum kusal kipyo! God ami waasi ita nuli fotabam-nipla, ilanin tap ke ibi kamboyila tal-sulup. Kaptoowu kulii yakyak kutal kala diilup kaali, ibi awil-fakal imi man kamboya tal samaan tilin tap ke-sulup. Kemin, nuli aket uluum tabeyimbu. Kaali faneng kemin, nuli samaan kawu bom-bala bom-bala kebup. Lale, nuli kipni aket kaa ti suunkup fukun-bam ale, olen dakaayin-bam ke-bamdupya, fiit-bam dok kano-somdupla din itamum o, kem-tabasup. Katale, kaa dok kano din unolup dinim.
1TH 2:18 Nikil nuli fan kipni fanang asuk din unum o, kala ti din unokomup o, kala suunkup liip fen-tal-unebup. Lale, Setaan ata numi liip uyo katii-yin-balaya kemin, nikil nuyo din unemin dinim ken-umbup.
1TH 2:19 Numi suun ti din itamum o, kem-tabasup kaami miit kaali, siin sawaayak nuli Tesalonaika ipni iipyak tem kawu okok ke-bam fiit-bulupla, Yesus ami lak duuliwa yo, kala-lom fen-bulupla, tifan ibi Yesus ami lak duu-silip kemin, nuli fiyaap dukum duubup. Ale, tunum ma ayo ata ata ke-lomdala, mafek mafek tangbal ma kuluulokoma ultap kaali, iltipta kemin, ibi numi mafek mafek tangbal kemin ale, Yesus ami talokoma kawu ipso, nuso, nikil alik nuyo almi tiin diim kawu tol-nokomup kuyaku, Pol nikil nuyo ipni win uyo kufoyokomup.
1TH 2:20 Atin ti faneng, ipni kukup tangbal nuubip kaata, God ata numi win uyo kufoyale, nuli ipni fiyaap duubup o.
1TH 3:1 Nikil numi aket fukunin kaali, misii disa kalawu bomdup kipni aket yaapkan fukunbup uyo, mafak kemin, naso, Sailas so, alep nuta abip Atens kalawu tiin-bomdup
1TH 3:2 Timoti ata dabaalup kipni fanang din unak o, kalalupla kaa dabaalup talse. Timoti ali nuso maakup God ami ok fukulin tunum, ali God ami weng Yesus Kraist ami sang kaata, kulii-din unang tunum imi bakayila-tal-unen-umba. Kayak kayak ita taba-lomdip kukup mafak kipni kukaayinbip uta taba-lom ipni aket fukunin uyo ku-mafak-daayilu yang banolip o, kalalupla, Timoti kaa dabaalup din-ilomda, ibi dukum-kup dong dakaayin-bala, ipkal titil-foko God ami lak kaa dukum-kup duulin o, kalalupla kemin, ali dabaalup din unse. Kamosinim nikil numi kipso bom ilsup kaali, bokoya-lomdup: Tunum unang God ami lak duulin dinim ita Kristen tunum unang numi kukup mafak kukaayokomip o, kala-sulup uyo, tifaneng bokoya-sulup namti fan kulu tiltam talsuu. Kemin, ibi aket kuyak-tini kutal-tini-kemin daa. Ipkal utamipla, God ami aket fukunin kaali, kukup mafak tiltam tulu uyo, kulaali yak Kristen imi diim abamnuk o, kalalaya kanolin kukup mafak uyo kewa tal numi diim abe-buluya, angtiil yol uyo utafiibup kala kalaliwa, utamin o.
1TH 3:5 Nali weng saniya, Kayak kayak ita ipni kukup mafak uyo kukaayinbip kala kalalila, aket yaapkan fukun-bamdi, kipni God ami lak duu-yaamin uyo kulaalamip o, kala-somdila, nali Timoti kaa dabaali din-ilom ibi itama yi, Titil-foko tolbip kala kalalaya, weng uyo kulii-tal bokop-nala utamon o, kalalila dabaali din unse. Kemin, nami aket fukunbi kaali, ti Setaan ata numi ok dukum fiit-bam dong dakaayinsup uyo, alik ku-mafak-daa ibi ukatokoya, God ami lak duu-yaamin uyo kulaa kela yang ban-silip ema yo? kalaliya, aket dukum ayo fukun-tabasi.
1TH 3:6 Lale, Timoti ami kipni kamboyila talba kaa, weng tangbal kulii-tal numi bokoya-lomda: Tesalonaika kasel ili God ami lak uyo dukum-kup yikik-kutal-fuku-bam, imi aptum kusal imi aket uyo kukaayin-bam, suunkup numi aket fukun-bam fiyaap duu-bam ken-umbip. Nikil nuli kiimi aket fukun-bam kii din itamum i, ken-umbup tap yakal ti Pol nikil kii tiliwa itamum o, ken-umbip o, kala Timoti ata tal nuyo bokoyimba no. Kamala numi kipni aket dukum fukun-umbup uyo, kulaa kela fiyaap ata-kup duubup.
1TH 3:7 Mafek mafek mafak tiltam tale-bulu, nokol kuno aket uluum tabe-bam angtiil yol daka-bam ken-umbup. Lale, nak-tunum kusal kipni sang Timoti kulii-tal numi bokoyila weng sanbup uta taba-lomdu aket uluum kaali, kukan-tiiyilula, aket tangbal ke-lom, fiyaap aalap duu-bamdup bom-bulup kemin, kaa dok kanolin kaata disa, nuli weng seluwa, ibi Kamokim Yesus ami lak ayo dukum-kup duu-lom utamipla, Kamokim ali nuso bomda, yam-titil-diila titil-foko tola-bom, ami kukup tambal kaata suunkup kutal-fuku-bom ilokomup o, kalbip kala bokoyila weng san-somdupla, asuk numi aket tem uyo tambal ma keyilula, bilili kala fiyaap-kup duu-bom tangbal-kup bom-bulup.
1TH 3:9 Nikil nuli ti dukum-kup kipni fiyaap kaata-kup duubup. Yale, numi yaap ke yo, kalin kaali, God ami kola-laabup namti uyo ti tiknamu disa.
1TH 3:10 Nikil nuli ipni olen-yim-bamdupla, ti taap so, kutamiip so, suunkup God ami naan-bam dik-dakaan-bulup, liip keyila din unup tibi unu-tulu-kelupla, God ami weng uyo maso ibi kukaayin-bulupla, kulaali kipkal talalu kaal-ke utamiwa yi, God ali dong dakaayim-bala, numi Kraist ami lak duu-laamin uyo tambal-kup titil-fak-daalu yaap-kup ilokomup kala kalin o.
1TH 3:11 Nikil nuli beten ke-bamdup numi Aatumen God so, nulmi Kamokim Yesus so, alim ilta mafek mafek liip tiinbu uyo kukan-tii-lom yim-din-daaliwa, nuyo kipni fanang din unum o, kal-bomdup dik-daka-bam ale,
1TH 3:12 Kamokim ami naan-bam dik-dakaan-bulupla, ibi iltipni kap-tunum kusal Kristen iyo aket kukaayim-bam ale, tunum unang kusnum kayak kayak God ami lak duulin disa kiikal, kuno aket kukaayin-bam, ipni kap-tunum kusal aket kukaayin kukup uyo ti dukum-kup titil-fak-daalula, tal aba tam nikil numi dukum-kup kipni aket kukaayila-yaabup tap ke-lomdip, iltipni kap-tunum kusal so, kayak kayak iso, imi aket kukaayin o, kala dik-daka-bam kem-tabasup.
1TH 3:13 Kipni kanu-mokomip uyo, Kamokim Yesus ayo dong dokoyilaya, kipni Yesus ami lak dakaamin uyo titil-fak-daalula, kaptoop kaptoop kawu numi Kamokim Yesus aso, almi unang tunum tituun-kup alik iso, iyo talokomip uyo, tal kipni imbii tam nulmi Aatumen God ami tiin diim tiiliwa, ibi ti almi unang tunum tituun-kup tabin kelipla, Setaan ali taang-kala-lomda yim-bak-saanin weng uyo maso ma bokoyama disa yo, kalalupla, kaami sang kaata God kaa naala-yaabup ko.
1TH 4:1 Nak-tunum kusal aa! Kamala kalaali, weng akal alik ma dola kuyum o, kalaluwa ko. Kaali, sawaayak kawu nikil nuyo ipni kukuyim-bam bokoya-lom: Ipni kanolin kukup tangbal kaata, kanu-mokomip kaali, God ali fiyaap duu-mokoma no, kala bakayin-bulup, ipkal kaal-tiklin-ke-lom, kutal-fuku kulii-tabasip. Kemin, kamala kaa, nuli Kamokim Yesus ami win diim kawu dukum-kup bokoyupla, kipkal kanolin kukup tangbal uyo kutal-fukusip kaata, dukum-kup yikik-kutal-fuku bom-biliwa dukum-nuk o, kala-somla ko.
1TH 4:2 Kabak-ali Kamokim Yesus almi weng kaata, kulaalup yak kipni diim abasuu. Kemin, ipkal utamiwa yi, U kuuta nu, kala kala-silip.
1TH 4:3 God ami aket fanang dakamin kaali, ibi God ami lak uyo atin talalu duu-lom, almi tituun-kup tabin unang tunum ke-lom ale, sadikimin kukup ayo ti kulaalin o.
1TH 4:4 Kemin, tunum ibi utamin! Tunum, unang din kuluula, unang, tunum din kuluulu kemin kukup uta ti atin tambal dukum. Kabi God ami lak duulin disa tunum ami unang utam-ilomda aket yak abu disa akal ma kelu tuk-duu kulii-unon o, keba tap kaa, kanumin daa; ti bilili-kup kala bomdap unang kuluulap tambal-kup dotu tiin molap biliwa yo.
1TH 4:6 Kemin, numi weng kala bakayin-bulup weng sanip kuuli, kuyak saak tiimin daa, kemip namti, iltipni kap-tunum kusal imi aket fukunin so, tiin-bom ilin so, kaa ku-mafak-daayokomip disa. Siin kaa, nuli kanolin sang uyo weng dukum-kup bokoya-sulupla, kamala kalaakal ti weng dukum-kup asuk bakayin-bulupla, tunum unang kawanta weng kaluuli, kuyang saak tiilipla, kap-tunum kusal imi kukup mafak uyo ma kuyip namti, Kamokim ayo angtiil yol uyo kuyokoma.
1TH 4:7 God ali uldaa-yimbuuli tiltam Kristen kebip-kup, yang sadikimin kukup kaami aket kaata yeluk o, kalalaya disa. Ali ti ulelnila tiltam Kristen kebip-kup, kulaali nami aket kaata-kup yelule, aket kup-nin o, kalalala nimi kukup tambal kaluuta kutal-fukulin o, kala-lom nuli ulelase. Kemin, unang tunum kanta weng kalawuuli, kuyang saak tiilip namti, kii tunum nuta-kup daang ukuyokomip disa; kulaa kunoliwale, God kaa almi Sinik Tambal kipni kukaayila-laaba kaayo, akal daang ukoyokoma ko.
1TH 4:9 God akal taba-lom nulmi nak-tunum kusal ibi kukuyase. Kemin, ibi kap-tunum kusal God ami lak duulin unang tunum imi aket kukaayin kukup kaata, utam kaal-ke-lomdiwa, kanolin kukup tambal uyo God ami unang tunum kipni abip kasel kaptam bom-bilip imi kukaayin-bam ale, unang tunum alik Provins Masedonia kaptam bom-bilip imi kukaayim-bam kem-tabasip. Kemin, ibi kanolin kukup uyo utam kutal-fukusip. Kemin ale, nuli sukon dola kutii kaami sang uyo maso ma bokoya-lomdup: Ibi kaptum kusal Kristen imi aket uyo kola-una-tala-kemin o, kalokomup disa; nuli ti weng maakup ma kuuta dukum-kup bokoyupla, kap-tunum kusal imi aket kola-una-tala kemin kaami kukup kaa kanubip uyo, atin ti tangbal-kup kulii-taba-biliwa yo.
1TH 4:11 Kemin, nikil numi kipso bomdup kaata kanolin o, yakan-kaamsup kaaltap ke kap-tunum kusal iso weng aal dikimin disa; kap-tunum kusal kii tiin mo-bom kanolin kanolin yakan-kaamin daa; ibi disa kulu bom-bilipla, kap-tunum kusal ita ima fakaa-yim-bilip inin daa; kipkal sikil so kemin yang okok-bamdipla, ima uyo kulii-tildang im-bilipla, kayak kayak iyo God ami lak duulin dinim kebip ipni kukup tambal uta utam-somdiwa, boko-lom: God ami lak duulin unang tunum kiili, tituun-kup tabasip o, yakan-kaamalip ko.
1TH 4:13 Nulmi nak-tunum kusal kipyo. God ami lak duulin disa bom-bilip iyo utamiwa, God ata unang tunum saaksip iyo asuk yim-fola tam tiinokomip o, kalalipla, kaami am daan tiltam talokomu kaa ma fenbip disa. Kemin, numi aket fukunin kaali, ibi ililtap ma ke-lomdip unang tunum taanip imi kalan kaa amamin disa. Kemin, Kristen unang tunum taanip kiili, atin taan-ilom win dinim maaklo kelin disa, bom-bilip. Kemin, kabak-ali talalu utamin o, kalalupla imi sang kaata bokoyokomup.
1TH 4:14 Kemin, God ami unang tunum nuli utamupla, Yesus ali taanda asuk tam tiinse kalbup kemin, nokol utamuwa, God ata Yesus ami lak duulin unang tunum taansip iyo im-fola asuk tam tiin-ilom Yesus aso tiltam fatap-nokomip o, kalalupla kemin, aket uluum tabemin ayo kulaa kela fiyaap duu-bamduwa kayi! kala-somla ko.
1TH 4:15 Kamala kulu, nikil nuli Kamokim Yesus ami mafek mafek akal kusnum ma kukuyase kaata, kipni bokoyum o. Am ma daanula, Kamokim Yesus ami asuk talokoma kawu, Kristen tunum unang saaknin disa ke-lom, tiin kawang bom-bulup nuli, siin kawu saaksip imi yam-kan tii-lom nusiik dusiin-daa unokomup disa; siin kawu taansip isiik, Kamokim ami fanang unokomip te!
1TH 4:16 Kabak-ami kanum tiltam tabokomu namti kalabe ko. Yesus ali dukum-kup bokoya-lomda: Kanolum o, kala kem-salale, ensel kamokim ayo naan-balala kabaku, God ami fong ket dukum uyo naan-bulule kulu Kamokim Yesus namti abiil tikiin ayo kela tildaak iip-iip kawu talala, Kraist ami lak duulin unang tunum taansip isiik tam tiinipla
1TH 4:17 kawu tiin kawang-bulup nuta, God ayo afeta kutii yim-tam tii-lomda tunum unang taansipla tam tiinip iso, kuyak mim-daa, tam abiil tikin kaptam-ami ibin tem kaptamu tala-tala-ke-lomdup Kamokim ami atamuwa, ata im-bitam abiil tikiin daalale, aso suunkup ilokomup o.
1TH 4:18 Kanolin kemin, am ma daanokomu kaali, unang tunum taansip iyo asuk tam tiinokomip. Kemin, numi aket fukunin kaali, kaami sang kaata bokoyupya, ilom kipni tunum unang taanipla, kaptum kusal ita aket uluum tabe-bam amamip namti, ipkal numi weng bakayimbup kaluuta bakayim-bilipla, aket uluum kaa kambola bilili kala bomdipla yo, kalalupya bakayimbup ko.
1TH 5:1 Nak-tunum kusal aa! Kipkal Kamokim Yesus ami talokoma kaami sang uyo talalu utamsip. Kemin, Kamokim ami talokoma kaami am daanokoma kaa dok kanolin tunum kapta ma utam-ilomdap, Awu kulaata talokoma kayi! kalomap disa. Tunum yukut inin ami kutamiip maaklo taleba tap kela, Kamokim ayo maaklo talokoma. Kemin, nuli sukon tem kaldaku dola kuya-lomdup: Kanolin diim kawu Kamokim ayo talokoma no, kalalup bokoyokomup disa.
1TH 5:3 God ami lak duulin disa unang tunum imi bokoya una-tala-ke-bam: Nuli tangbal-kup tiin-bom waasi dinim, aket uluum dinim, bom-bulup o, ke-mokomip kuyaku unang umi tangbal-kup bom-ilom ale, Nakayi! man fuk-duula ni! kalalu man duu-laabu tap ke, maaklo kawu tal imi diim abam-nokoma kaa, unang tunum kii kanta ma God ami tiin diim uyo ukadaa yang sawaanokoma disa.
1TH 5:4 Lale, nak-tunum kusal kibi kutamiip tem kawu bomdip God ami lak duulin dinim unang tunum ililtap daa; ibi tildang falala-kalin diim kawu bomdip mafek mafek kaa utafiibip. Kemin, Kamokim ami talokoma ami am daanokoma kaali, ibi tunum yukut inin kutamiip talala, unang tunum atamdip fanan-taba-laa-bip ultap ke fananokomip disa.
1TH 5:5 Kemin, weng kalawaali bokoyi kaa dokata naa kalolip: Kipso, nuso, nuli God ami unang tunum kemin, ali keyila kutamiip tem kawu tiin fiim tap ke bom-bulup disa; kamala kalaali, im-taldang falala-kalin diim daalala, tiin so tap ke mafek mafek kaa atafiibup.
1TH 5:6 Kemin, nuli kutamiip tem kawu bomdup God ami lak duulin disa kiiltap ke akan unemin disa; nuli ti suunkup titil-biki-lom aket tangbal-kup fukun-bam ale, kukup mafak kanumin kaami aket tildang tulu kaa, talalu aket fuku-daa kela-yaa-bamduwa kayi!
1TH 5:7 Kutamiip kawu, unang tunum kiili akan-une-bam ale, kutamiip kawu tunum unang kii ok mafak in-biliwa, dabom tem ayo babon-bam weng mafak mafak ayo baka-bam kukup mafak nuu-bam kem-laabip.
1TH 5:8 Lale, God ali almi unang tunum nuyo im-taldang falala-kalin diim daala tiin so ke-lom mafek mafek kaa atafiibup. Kemin, nuli aket tambal kaata-kup kanu-bam ale, kukup mafak nuumin umi aket tildang tulu uyo, nokol dotu aket fuku-daa uyo kela-yaa-bamduwa, nuli soldiya waasi dinan-tal-unemin tunum imi wan binalip tal aket bikiyimu no, kalala naam dildaak tini yang waasi dinba tap, kelupla utamuwa, Kamokim Yesus Kraist ami weng kaa kuka-daa-lomda: Kuyaku ali ti kanolokomi kayi! kalsa kaali ti faneng, kanolokoma kala kalaluwa, ami aket kaata kukaan-bam ale, nuli waasi dinin tunum ami nafalum kalaang-kup tibin dildaak tini-lomda ami dabom ayo akelu yang waasi dinan-tal-uneba tap kelupla, utam, Awu, Kraist numi im-bii tam abiil tikiin unokoma no, kalbip ami liip kaata, fen-bam kemuwa, numi Kraist ami lak dakaamin uyo tambal-kup bomduwa ko.
1TH 5:9 Weng kala bokoyi kaa dok kata naa kalolip: God ali numi sang uyo boko-lomda: Kiili angtiil yol sakbaalim dukum kukaayim-bili utamin o, kalsa disa. Kula Kamokim Yesus Kraist ata yam-talalulaya, tal aba tam nalmi man kep-nin o, kalalaya, God ayo im-taldang daasa.
1TH 5:10 Kemin, Yesus ami taansa kaa, tawaal diim unang tunum imi iliim kaata boliya, naso maakup suunkup ti kano ilum o, kalala taansa. Kemin, nuli taan-yaa-bala, tiin kawang-bala ke-buluwa kawu, Kraist ami talokoma kaalile, nuli akal almi kawu bom-bala bom-bala ke-lokomup disa. Nuli ti alik maakup kuyak mim-daa-lom Kraist aso suunkup ilokomup.
1TH 5:11 Kemin, ibi siin kanum tabasip uyo kamala kalawu kanu-bamdiwa, kap-tunum kusal iyo suunkup kanolin weng tambal kaata, kukaayin-bam ale, dong dokola una-tala-ke-bilipla, tiltam titil-fokolin o.
1TH 5:12 Nak-tunum kusal kiwe! Nikil nuli weng ma ipni dukum-kup bokoyum o, kalalupla kemin, weng san bom-iliwa, Kristen ipni kamok kamok kiili, God alalta ulelnala, tiltam kipni iipyak tem kaptamu okok ke-bamdip, kipni God ami lak duu-yaamin kukup tambal uyo kukuyin-bamdipla, Kipkal fuku-bomdipla yo, yikipla kemin, ibi kabak-ami aket tambal-kup fanang daka-bam, tangbal-kup kukaayin-bam ke-biliwa ko.
1TH 5:13 Kemin ale, kamok kamok ili ti talalu kipni dong dakaaya-yaabip. Kemin, ipkal aket tambal dukum kaata-kup fukun-bam, win kufuyim-bam ale, aket dukum-kup kukaayin-bam ke-bamdiwa yo, kala-somale, nikil ibi balili-kup kala-lomdip kap-tunum kusal iso, aket maakup ke-bomdiwa yo, kala-somla ko.
1TH 5:14 Nak-tunum kusal kipyo! Nikil nuli dukum-kup weng kala Kristen kipni kuyup kutal-fukulin o, kalaluwa, Kristen unang tunum daal-kup dap-tii-yaa-bala, yang okok uyo ma nuumin disa kemin, imi weng dukum-kup bakayin-bilipya, yakal titil-foko tal aba yang okok kaa ke-bamdipla yo. Yak unang tunum kusnum kayak kayak imi aket atul kanubip iyo kipta yang dong dakaayim-bilip titil-fakdaa suunin disa ke-bam ale; tunum unang kaa kawanta ami God ami lak dakaamin ayo titil-fokolin disa bilip namti, ipta yang dong dakaayin-bilipla, iyo tiltam titil-fokolalip ko. Ibi abiltap aket atul tabu kap-tunum kusal kii kukaayin daa; ti bilili kalin aket kaata-kup kola una-tala-ke-bam ale,
1TH 5:15 kap-tunum kusal ita kukup mafak kipni kukaayinbip kaa, ibi ti ban boko una-tala-kemin daa. Ti kukup tangbal kaata-kup Kristen so, unang tunum Kristen kelin disa bilip iso, imi kukaayin-bam ke-biliwa ko.
1TH 5:16 Kemin ale, God ami man Yesus Kraist ami lak duulin unang tunum kipni kanumin o, keba namti kalabuu. Ibi suunkup Kamokim Yesus ami fiyaap-kup duu-bam ale, dok nolin dok nolin mafek mafek ma num-tal-unebip kaaso, God ami suunkup naala-tal-une-bam, dok kanolin kukup tal kipni diim abamnu namti, ibi God ami yaap ke yo, akan-kaa-bam ke-biliwa ko.
1TH 5:19 Ibi God ami Sinik Tambal ami tal kipni iipyak tem kabaku okok kemon o, keba ayo daa yo, aka-lom saal lela-yaamin daa.
1TH 5:20 Dok kanolin tunum ata boko-lom: God almi Sinik Tangbal ata weng kalawa kup-namba te! kalala bakayila namti, ibi weng kaa daa yo, kalalip kambola-yaamin disa ko.
1TH 5:21 Utamiwa yi, Kwin! kaata God ami kukup elile? Setaan ami kukup e? kal-bomdipla, kanola um-kuku-bam, kukup kalaali tambal dukum o, kalip namti, kukup uyo kutal-fuku-yaamin ale,
1TH 5:22 utamipla, Kukup kaa mafak o, kalip namti, alik ti kuno kulaa kela-yaa-bam kemin ko.
1TH 5:23 Nikil nuli naan-bam dik-dakaan-bulupya, bilili-kalin miit kayaakim God alalta ibi yam-talalu-yimulaya, taltam yaap-kup alaltap kele, kulaali kipni sinik so, aket so, tiil so, kiiyo mafaka-yaamin disa, tangbal ma keyula, kulaali, nulmi Kamokim Yesus Kraist ami asuk talda kipni kukup kiita, tal itafiin talokoma kawu, tal kukup mafak so ma utamin disa kelon o kala talak o.
1TH 5:24 Ipni yim-buu-im-taldang almi mepso tiisa, God ali ami weng kuka-daa-lom: Kanolokomi kayi! kalba kaa, lolokoma disa. Kemin, alalta taba-lom kipni kukup mafak uyo kukan-tiiyokoma te!
1TH 5:25 Nak-tunum kusal aa! Numi God ami naan-bam dik-dakaan-bamdup: Kiiyo, dong dokoyan o, akan-kaa-bamdup, nuli ipni sang kaata God ami bakayanbup ultap kipkal God ayo naan-bilipla, nuyo dong dakaayim-balaya yo, kala-somla ko.
1TH 5:26 Ibi iltipni kap-tunum kusal God ami lak duulin tunum unang imi kukuyup utamiwa, Awu kiili numi aket kukaayila-yaabip kalin o, kal-bomdiwa, tambal-kup weng umuuyila una-tala-kemalip ko.
1TH 5:27 Pol nali Kamokim Yesus ami win diim kawu, weng dukum-kup ipni bokoya-lomdi: Kamok kamok ipyo, sukon kala iltipni-kup tik-tiimin daa; alik God ami lak duulin unang tunum Tesalonaika kasel imi diim kawu tik-tii-bilip, weng san-kaamin o.
1TH 5:28 Kemin, numi Kamokim Yesus Kraist alalta ibi disa masiim kawu tangbal ma kamayim-bam tiin mola, yaap-kup bomdiwa yo.
2TH 1:1 Nak-tunum kusal kaa tiinsip o. Pol, Sailas, Timoti kanolin nikil nuta sukon kalawaali, God ami unang tunum abip Tesalonaika kaptam bom-bilip kipni kulaayup din unuk o, kalaluwa kemin, nuli utamupla, Ibi Aatumen God aso, Kamokim Yesus Kraist aso, alim imi lak kaata dukum-kup duusip o, kala kalalupla kemin,
2TH 1:2 nuli Atok God aso, Kamokim Yesus Kraist aso, alim imi dik-dakaayim-bulup, ita taba-bomdip ipni disa misiim kulu tambal tambal ma kamayim-bilip, kipni aket fukunin uyo bilili-kup keya-bulu yo, kem-tabasup ko.
2TH 1:3 Nak-tunum kusal aa! Nuli weng sanuwa, Kipni God ami lak duu-yaamin sakbaalim dukum kelule, kipni kap-tunum kusal Aatumen God ami lak duulin imi aket dukum kukaayin uyo tiltam dukuma-tala-bulu kebip kala kalalupla, nuli God ami yaap ke yo, kalin uyo yaap ma keyula kukaayila-tabasup.
2TH 1:4 Kabak-ali kanum tabasip kaa kalalupla, God ami unang tunum kusnum tala-tala-ke afetulipla, kaali nuli ti kipni win uyo kufuyin-bam ale, kipni sang uyo imi bakayim-bamdup: Tesalonaika kasel Kristen unang tunum bom-bilip ili God ami lak duulin disa, tunum ita kukup mafak kukaayim-bilip, bom bii angtiil yol kaa utamsip. Lale, kiimi God ami lak duu-laamin kaali, kulaa-yaamin disa; dukum-kup yikik-kutal-fuku kulii-tabasip o, kala bakayila-tabasup ko.
2TH 1:5 God ami waasi tunum ita kipni kukup mafak uta kukaayila-tabasip. Lale, kipni God ami lak dakaamin kaali, dukum-kup yikik-kutal-fuku kulii-tabasip uta taba-lomdu alik nuli kukuyim-bulula, talalu utabup-kup, utamuwa yi, God ali unang tunum alik imi kukup kaa atin tambal-kup itam-ilomda, Awu, kuuta tambal ale, kaluuta mafak kalba-kup kawu, afetu yim-tii-lom ayo bokoya-lomda: Kipni kaa kanum tabasip kaami fiyaap uyo duubi. Kemin, kipta nali ulelsi kemin, yim-tama tam nalami abip kawu daa-lom, suunkup tiin molokomi no, yokokoma no, kala kalbup.
2TH 1:6 God ali ti kukup tambal kaata-kup kutal-fukulin kemin, unang tunum kanta ma ipni kukup mafak uyo kukaayim-bilip angtiil yol dakamip namti, kiili ti God akal ti angtiil yol uyo kuyila uta-mokomip. God ami tiin diim kaa, nasiik angtiil yol kuyokomi kaali ti tambal o, kem-yaaba.
2TH 1:7 Kemin, am ma daanokomu kaa, ibi God alalta kipni angtiil yol uyo kukan-tiiya-lom tambal-kup ilin kaata kuyimba-kup, kuno nokol kanoyila ke-lokoma kaali, God alalta Kamokim Yesus ayo abiil tikiin lo kaptamu dabaala talda kipni angtiil yol uyo kukan-tiiyokoma. Ultap Kamokim Yesus ami talokoma kaali, ensel titil-kup tabasip iyo ku as dawang tem kabaku tiilaya aso, tildaak ilomdip,
2TH 1:8 unang tunum iyo God ami ma atamsip disa so, God ami daang bakaalin unang tunum la iyo numi Kamokim Yesus ami sang tambal umi kuyang saak tiimin iso, kiili angtiil yol kuyokoma.
2TH 1:9 Kanolin unang tunum fuut-kup tabasip kiimi kanun-umbip kabak-ami molokoma kaali, kano-somla ko: Kamokim ami talokoma kabaku angtiil yol kuyokoma kaa disa ke-laamin dinim; ti suunkup ilokomu le, ami tiin diim uyo fotaba im-baala yang ban-ilomdip almi titil tibin awak sakbaalkan dong dakaayin uyo maso ma uta-mokomip disale, atin disa.
2TH 1:10 Ale, weng ma kaata Kamokim Yesus ami talokoma kaali, unang tunum alik Yesus ami lak duulin ili kulaata Yesus ata imi iliim bose umi aket uta aket tam baneyiluya kawu, Yesus ami win ata kufu-bam kemokomip. Kemin, Tesalonaika kasel kipkal utamipla, God ami weng tangbal bakayinsup kabak-ali faneng kala-silip kemin, ipkal God ami unang tunum iso, kipso, ibi numi Kamokim Yesus ami win kaata kufon-bam ke-mokomip ko.
2TH 1:11 Numi aket kaali, unang tunum alik iyo numi Kamokim Yesus ami win kaata kufumin o, kal-bomdupla kemin, nuli suunkup Aatumen God ata ipni ulelsa tunum ami naan-bulupla, God alalta ipni aket tangbal fuku-daaya-lomda talalu-yimula tikalipla, tal aba tam almi ok kaata tambal-kup kutal-fuku-bilip, alami kaluung ata kukaayim-bam ke-balala, kipni aket fukunin so, titil so, angtiil so, iyo God ami kolokomip kaali, dong dokoyila ibi tambal-kup tal aba tam unang tunum tangbal kelum o, kebip uyo tal aba tam tangbal ke-lom, Kamokim Yesus ami kukup tangbal kaata kutal-fukulum o, kala-laabip uyo fukulokomip.
2TH 1:12 Kemin, kipni kanumin kukup kaami kutal-fukulokomip uyo, unang tunum kayak kayak ili kipni kukup tangbal kaata utafii-bamdipla kawu, numi Kamokim Yesus almi win uyo kufon-bam ke-mokomip. Ale, ata kipni win uyo kufu-bam kemak o, kala-lomdup naala-laabup, kaa dok kata naa kalolip: Numi God ami lotu kamaala-laabup aso, numi Kamokim Yesus Kraist aso, alim ita tangbal tangbal ma kamaya-tabasip kemin.
2TH 2:1 Nak-tunum kusal aa! Nuli Kamokim Yesus Kraist ami tal-ilomda almi unang tunum kensup numi, afetu kutiilala aso, nuso ilokomup, kabak-ata bokoyum o, kala-somla kemin, talalu weng san-iliwa!
2TH 2:2 Dulul eng ma boko-lomdip: Kamokim ayo talba no, kebip uyo, ibi kaa fan eng o, kala weng sanip namti, kipni aket fukunin tambal kaa maaklo keyimu. Kuyak ali fan o, kalalip weng san-kaamin disa. Weng kabak-ali sinik mafak ata ma taba-lom tunum ma bokolaya kanubip e? Tunum ma almi aket fukunin weng bokola ne? elile? tunum ma boko-lomda: Pol nikil ita umi sang uyo sukon tem dola kuya-silip o, yikiwa ye? Kabak nali ma kaal-kebi dinim. Lale, kaami sang uyo disa dulul eng bakabip. Kemin, imi weng kabak-ali weng san kaamin disa ko.
2TH 2:3 Kanolin weng kaa, dok nolin tunum unang ita ipni bakayip namti, kabak fan o, kemin disa. Kamokim Yesus ami asuk tilin disa bom-balala, kamosinim uyo unang tunum yaapkan ili God kaa daang ukola fuut kuyak dakan-tal-une-bamdip, Setaan ami daang bakaalin tunum o, kala God ami weng kuyang saak tiimin miit kayaak kaata, God ata dap-fatap-daala tiltam kanuma no, kalala kulaali, mafiing diim kaptoowu Kamokim Yesus ayo talokoma. Kemin, God ami weng kuyang saak tiimin miit kayaakim ali, God ata dabaala din as kiinin abip kawu yol awak kuluu-lomda um-tal-daalokoma.
2TH 2:4 Kemin, Kamokim Yesus ayo tilin disa bom ilala, God ami weng kuyang saak tiimin tunum miit kayaakim ali God ami tit atam-ilomda, unang tunum imi men awem mafek mafek wiis saan-bam aye, alik imi itafiimin weng bakayim-bamda, almi win kaata-kup kufu-bam unang tunum bakayim-bam: Nata god alik kuliili yam-kan tiisi no, kal-bomda atin kukup mafak dukum kaata, kuluu-lomda tal aba tam Jerusalam God ami lotu am diildiil dukum kaptamu tam-ilomda God ami abiin awem kabaaku tiin-bomda: Nata ti God ko, ke-mokoma kayi!
2TH 2:5 Nali siin kawu ipso abip Tesalonaika kaptamu bom-ilomdi, kanolin kukup tiltam tabokomu kaami sang uyo alik bokoyasii. Yale, ibi lukuuyasuu ne? daa ye?
2TH 2:6 God ami weng kuyang saak tiimin miit kayaakim ayo tildang fatap diim aba kanolin kukup alik uyo kanumon o, kalba. Lale, am kulaa daanse kawu, tunum ma tam-taba ami liip uyo bak-daaba kemin, ibi liip bak-daaba tunum ali kaa kanta ni, kala utamsip. Lale, God almi kabaku kanolokomi no, kalsa uyo tiltam tulu kaa kalale, kulu God alalta almi weng kuyang saak tiimin miit kayaak ayo dap-taldang fatap diim daala fatap-nokoma.
2TH 2:7 Am kala daansuu ayo, Setaan ali maaklo titil-fak-daa unang tunum yaapkan imi kasen-kasen-yim-bam ibakayim-bili: God ami lo uyo kuno daang ukuwin o, kalalaya almi okok keba. Lale, God ata Setaan ami kukup kanuba uyo ku-fatap-daalin disa, bom-bala bii, tunum ayo God ami weng kuyang saak tiimin miit kayaakim ami liip katin-tabasa ayo, God ata dibii-unokoma kawu, God ami weng kuyang saak tiimin miit tabuusa ayo dap-fatap-daala, fan tildang fatap-nokoma.
2TH 2:8 Kemin, God ami tunum liip bak-dakamin-kup kem-yaaba ami kuluulokoma kuyaku ti maak fak-daalin tap, God ami weng kuyang saak tiimin miit kayaak ayo tildang fatap diim abamnale, unang tunum alik iyo ata-mokomip. Lale, Kamokim Yesus ami talokoma kawu, almi weng awak titil-kup tabasu so, almi dawang atan kiinba ultap aso, ita taba-lomdip mep tunum kulaayo, aalip dinim-nokoma no.
2TH 2:9 Am ma daanuya, Kamokim Yesus ayo tilin dinim bom-ilala, Setaan ayo almi titil awak dukum ayo almi daang bakaalin tunum God ami weng kuyang saak tiimin miit kayaak ami kolala, tal-ilomda kasen-fakamin kukup akal alik akal alik yaapkan iyo kukuyim-balaya, unang tunum yaapkan iyo utam aket alik tam baneyokomu.
2TH 2:10 Kabak-ali kanu-bam kasen-fakayim-balaya, ami weng uyo, tifan o, kalale, yang liip mafak diim aba-lom din abip mafak une-mokomip. Kanolin kayu, God ali ti unang tunum kii talalu-yimu-lom im-taldang-daalon o, kala-laaba. La, ili God ami tituun weng uyo weng san kuyak aket tem daalamup daa yo, kala daang ukolokomip uyo, yang abip mafak unokomip kayi!
2TH 2:11 Unang tunum ili God ami tituun weng ma weng sanin disa ke-lokomip kaa, God ali titul moyila-lomda mokop keyilala, God ami weng kuyang saak tiimin miit kayak kaami ibakamin weng kaa fan o, kalalip weng san, kukup mafak nuu-mokomip. Kemin,
2TH 2:12 dok kanolin unang tunum alik iyo God ami tituun weng uyo weng selin disa ke-lom, ilmi kukup mafak umi aket-kup yan-buluya, kulii-tabokomip kaa, God ali yim-bak-saanin weng uyo bokoya-lomda: Ibi kukup mafak kutal-fukusip. Kemin, kabak-ami kalan kaata angtiil yol uyo kuyokomi no, kala-lom kanum bokoyokoma.
2TH 2:13 Nulmi nak-tunum kusal kipyo. Nikil nuli utamupla, God ali kipni aket kuyinsa kala kalalupya, suunkup God ami yaap ke yo, akum o, kebup kabak-ami miit kaali, sawaayak kaptoowu God ayo ibi nalmi no, kalala ulelnaya, mulo kawu ibi God ami tituun-kup tabin weng uta weng sandiwa, fan u, kalalipla, God ami Sinik ata talalu-yimulala, ibi God ami unang tunum tituun-kup tabin kela-silip. Kemin, kaal dinim bom-bilip kalalupla, nuli God ami yaap ke yo, akum o, kebup.
2TH 2:14 Nuli Yesus Kraist ami weng tangbal uta bakayin-bulup, weng san-kaabip kala-somdala, God ali numi weng bakayimbup kaami tem kaptoowu naan daayase. Ibi im-taldang nalmi miit tem daa-lomdi, nalmi man Kamokim Yesus Kraist so, ipso, win kufumin kaali, ipni kuyon o, kalalaya, ibi naan-daayase. Kemin, kabak-ata no, kalalupla, nuli yaap ke yo, kalin uyo God ami kolum aa! kalbup ko.
2TH 2:15 Nulmi nak-tunum kusal kipyo, ibi God almi unang tunum ke-silip taa! God ami weng tangbal anung ma uyo, bon tem weng bakayim-bam ale, anung ma kaata, sukon tem dola-lom kuyila-sulup. Kemin, ibi suunkup titil-foko-bom ale, tangbal-kup aket fukun-bam, God ami tituun-kup tabin weng kuuli ti suunkup kano kutal-fuku-ke-bomdiwa ko.
2TH 2:16 Nikil nuli utamuwa, Numi Kamokim Yesus Kraist ali alik numi aket kuyimba-kup, kukup tangbal tangbal kuyila kesa kala kalaluple, kaali utamuwa, Alalta kaluung kuya dong dokoya titil-foko tola-lomdup, God ayo mafek mafek tangbal dotu kutiiyinsa uyo fenin-kup kemuwa, kuyokoma no, kalaluwa, nikil nuli Kamokim Yesus Kraist aso, Aatumen God so, alim imi dik-dakayim-bulupla,
2TH 2:17 alim ilta ipni titil tabin kuyila-lom dong dokoyipla, dok nolin dok nolin kukup tiltam kipni diim abamna namti, ipkal suunkup kukup tambal kaata ti kutal-fuku-bom ale, weng tangbal kaata-kup baka-bam ke-biliwa yo.
2TH 3:1 Nak-tunum kusal ipyo. Weng ma kuuta bokoyum o, kalaluwa kemin, ibi suunkup numi win kaa God ami naan-bam dik-dakaan-biliwa, numi dong dakaayim-balala, Kamokim Yesus ami sang kaata, unang tunum yaapkan imi bakayin-bulupla, weng tambal uyo kasentap yak aba din abip ma ma ke-bulula, unang tunum yaapkan iyo kipni God ami weng, weng san-ilom fiyaap duu-bam kutal-fuku-silip tap kelik o.
2TH 3:2 Unang tunum malo ili Kamokim Yesus ami weng tangbal uyo weng san-kaamin dinim ke-bamdip, numi ok kala nuubup uyo mafak o, kalbip. Mep tunum mafak fuut tabin kiili, numi ok kalaali ku-mafak-daayokomip. Kemin, ipkal God ami naan-bam dik-dakaan-biliwa, God ata numi uti foko yam am daalak o, kala-somya ko.
2TH 3:3 Unang tunum malo ma iyo Kamokim Yesus ami weng tangbal kaa fan disa yo, kebip. Lale, kipso, nuso nuli utamupya, Kamokim ami weng kaa ti faneng o, kala-lomdup utamuwa, Yesus kaa ibi maas keyokoma disa. Ali ti, dong dokoyila, kipni aket fukunin uyo yam-titil-dii uti de yam am daa ke-lokoma kaa, Setaan ayo kipni aket fukunin kaa ku-mafak-daayokoma disa yo, kalbup.
2TH 3:4 Nikil nuli kipni aket dukum fukun-buluwa, Kamokim Yesus ata kukuyila utamupla, Ibi dong dakaayin-balala, kamasi bokoya-sulup uyo suunkup kutal-fuku kulii-tibip kala kal-bomduwa, nikil nuli aket bilili-kup kala-lomduwa, bom-bulup o.
2TH 3:5 Nikil nuli Kamokim ami naan-buluwa, alalta ibi dong dakaayin-bala, ibi utam-ilom bam-daaliwa yi, Awu, God ali numi dukum-kup olen-yila-laaba kala kalbip-kup, Kraist ayo suunkup nuli dong dakaayin-balala, numi aket fukunin uyo titil-fokobu kaa kalin o. Kukup mafak mafak tiltam tabokomu uyo ipkal Kraist ami titil-fokosa tap ke, kipkal titil-fokolokomip ko.
2TH 3:6 Nak-tunum kusal kiwe! Kamokim Yesus Kraist ami win diim titil weng kalaata bokoyokomup. Kemin, utamin! Kipni iipyak tem kaptam-ali Kristen unang tunum malo ma ili numi weng uyo ipni bokoya-sulup kaa, weng san-kaamin dinim ke-bamdip okok kemin disa. Daal-kup tabe-bam kebip kemin, kanolin unang tunum kiili kuno kamboyip disa kulu ilin o.
2TH 3:7 Uyo ipkal utamsip taa! Nuli kipso bomdup daal tabemin disa ti okokmin-kup kemsup tap kano ti, kipkal titil-foko okok ke-bamdiwa yo!
2TH 3:8 Kipni ima aye, mafek mafek aye, numi kukaayin-biliwa, disa masiim numi kukaayinsip disa; ti saanin-kup ke-bamduwa fakamsup. Kemin, kaa utamuwa yi, Ibi numi lak duu-bam ale, kipni inin-inin so, tuumon so, uyo iip-namu no, kalalupla kemin, am daanin diim so, kutamiip so, ti tuumon okok kemin-kup ke-bamdupla, kanolin kaayo saansup.
2TH 3:9 Kemin, numi din ilom God ami weng bakayum o, kalalup din unupya, kipni ima kukaayinsip kaali, God ami weng kukaayinsup umi saanakin. Lale, nuli tuumon okok-bam kuluu-laabup umi kukup tangbal uta kukuyilupya, ipta kutal-fukulin o, kalalupla ti okok kemin-kup kemsup.
2TH 3:10 Siin kawu, kipso bomdup bakayin-bam unang tunum kawanta daal-kup dap-tela-bulu, okok kemami daa yo, kema namti, ali ima kaa kukaan-bilip inin dinim kayi! kala-sulup kaami aket uta fukun-bam tabuu bom-biliwa yo.
2TH 3:11 Kanimin o, kalalupla, kaami sang kaa disa kulu sukon tem kabak-ali dola kutiibup disa; kaali unang tunum ma iyo tal bokoya-lomdip: Tesalonaika kaptam-ali Kristen unang tunum malo ma ili ti okok kemin disa; disa kulu bomdip unang tunum malo kayak kayak imi bakayin-bam: Kanola okok kemin o! kal-bom kem-tabasip o, kala-lom bokoyip weng sanbup. Kemin,
2TH 3:12 unang tunum kanolin kukup kutal-fukulin, ibi Kamokim Yesus Kraist ami win diim weng tem so, titil weng so, ayo kuyup: Ibi weng sandiwa dik-diiba bom kukup tangbal kaata-kup kutal-fuku-bom, iltipni inin-inin kaami ok uyo okok ke-bamdip kulii-tildang in-bomdiwa yo.
2TH 3:13 Nulmi nak-tunum kusal alik kipyo. Ibi kukup tambal kutal-fukumin kabak-ali daal tabeyu kela-laamin daa; kaali ti kano suunkup fuku-biliwa yo.
2TH 3:14 Kipni iipyak tem kaptam unang tunum okok kemin dinim ili kanta nikil numi sukon tem weng kabak-ali ma weng selin disa kelip namti, kii dotu itafii-bamdiwa, yang imi mepso unemin daa; yakal utamiwa, Keyimbip kala, kalalip fatom keyu yak kanumin kukup kaali, kuno kela-lom kukup tambal kaata-kup kutal-fukulik o.
2TH 3:15 Kaali ti kano ibi waasi keyila kukup mafak kaa kukuyilin disa. Kiili kaltipni kayaak kemin, ibi utafii-bamdiwa yi yakan-kaamin weng uyo bakayin-bilip, yakal kano kukup tangbal kaata-kup kutal-fukulik o.
2TH 3:16 Nuli beten ke-bulupla, dok nolin dok nolin kaami kukup uyo tiltam kipni diim kawu abamnu namti, aket balili-kalin miit kayaak Kamokim Yesus alalta ali kipso, bomdala bilili-kalin aket uyo suunkup kukaayin-balaya, tangbal-kup bomdiwa yo.
2TH 3:17 Nami sukon dolmin tunum ami bairo kaali, kuluu-lomdi nalmi sikil diim sukon kalawaali dola kuyon o, kala-somdila kemin, Pol nata ipni weng kala umuuyi ko. Nalmi win kaali, kala nuu-bamdi dola-yaabi kemin, utamipla, Fan, Pol almi dolmin namti kaa be kala kalolip ko.
2TH 3:18 Numi Kamokim Yesus Kraist alalta ibi kukup tangbal-kup ma kamayim-bam tangbal-kup tiin mola alik yaap-kup bom-biliwa yi!
1TI 1:1 Timoti kaa tiinsap o. Nali Yesus Kraist ami kalaan tunum Pol nata kemin, numi iliim boyase God aso le, numi fen-bam bulup, Yesus Kraist so, alim ilta nimi ulduu-lomdipla ok kalawaali kup-na-silip o. Kapyo, God ami weng kaa kup-tilila, talalu weng sandap yak Kraist ami lak ayo duu-salap kaata ti atin nami man alaltap ke-salap kemin, sukon kalawuuli dola kup-ton o kala-somdila dol-tambi no. Nami aket uli ti Aatumen God so, numi Kamokim Yesus Kraist so, alim ili olen-daap-tam-bamdip tambal tambal ma kamap-tin-bilipla, dik-diiba balili-kup kala suunin disa bomdapla yo timbi ko.
1TI 1:3 Kemin, siin kawu Masedonia bokon unon o kal-bomdiya bokop-tasii kuluuta asuk nali bokop-tokomi kemin, abip Efesis kawu-kup bomdapya, dok kanolin tunum kaata ibakamin weng kaata unang tunum imi kukuyokoma aye,
1TI 1:4 sawaayak sang uyo disa weng-kup bakan-kaptoop kaptoop kemin aye, yak ilmi awil-fakal imi win kaata-kup bakan kulii-kaptoop bane-bam kemip namti, bokoyawa, Ku kulaalin o. Kanumin weng kaata taba-lom unang tunum imi dong dokoyuluya, God ami lak dakaamin uyo titil-fak-daalokomu dinim; kuuta taba-lomdu unang tunum imi aket uyo ku-mafak-daayiluya, weng aal fakaa-mokomip.
1TI 1:5 Yale, nami weng kala bokop-ta-lomdi, bokoyapla, Kambolin o kala, bokoli. Kaata weng san-kutal-fukulip namti, kukup tambal kaata-kup kanumum o kala aket maakup kaata-kup fukun-bamdiple, siin umi ban wakamin uyo God ata taba-lomda takan-tiiyase, kaami aket kaata maso ma fukun-bamdipla, Nuli kukup mafak so no, kemalip. Kemin, dik-diiba bomdipla, atin Yesus Kraist ami lak kaata-kup duulin o kanolokomip kaata, aptum kusal imi lak dakaamin kaami kukup namti tiltam dukum-nokomu.
1TI 1:6 Kemin, unang tunum malo ma iyo kanolin kukup uyo kela-bomdipla, disa weng kaata-kup taken-una-tala-ke-bamdipya,
1TI 1:7 ili God ami lo kukuyin tunum kelum o, ke-bamdipla iyo bokolip ko: Numi weng kuuli tifan o ken-umbip. Yale, imi weng kanum bakabip so, mafek mafek sang bakan-bilip so, kaami miit uyo talal utam-somdipla disa; ili ti amon-bamdipla babonin weng kaata-kup bakan-unbip o.
1TI 1:8 Nokol utamsup, Dok nolin tunum ata God ami Lo uyo tituun-kup kutal-fukula namti, uta taba-lomdu nuyo dong dokoyokomu. Kemin,
1TI 1:9 nokol ma ukol utam ke-somduwa, God ami Lo kuka-daasa uyo tunum ban kemin dinim imi disa. Kemin, kaali ban kemin tunum alik imi lek-yim-bam kukuyin uyo kaa buu. Kemin, Lo kuuli ulta tunum fuut tabe-bamda Lo duul-bam ilin tunum iso, God ayo daang ukola bomdip iyo ban kemin kukup kutal-fukulin kiiso, ili aket fukun God kaaka disa yo, nalmi titil diim kaata-kup bii no kemin tunum, awak-aalap anulip taan-yaamin tunum, ap-tunum kusal anulip taan-yaamin tunum, sadikimin unang tunum, ap-tunum unang tap kelaya sadikimin tunum, tunum ma ayo taba-lomda, tunum kusnum ma ami man yukut tuk-duu kulii-unemin tunum, ibakamin tunum, tunum ayo ibakamin weng kuuta, Atin ti faneng o, kemin tunum, God ami tituun-kup tabin weng uyo kambola, yak kukup kusnum kusnum kiita kutal-fukulin tunum, alik imi yim-bak-saan-bamda, kukuyokoma namti kaa bombu ko.
1TI 1:11 Kanolin kemin, fan tituun weng kuuli, God ami weng tambal kaami anung kaata kemin, God ami aket uyo, Pol ami koliya, ata kuluu-lomda unang tunum imi kukaayak o, kala-somdala kemin, kulaap-na tildak nimi diim abasu. Kemin, God ali ti atin tambal-kup tabin ale, fiyaap duumin kaami miit uyo kaabe kemin, akal taba-lomda, almi weng tambal kuuli, kup-nase no.
1TI 1:12 Siin kawu, nali numi Kamokim Yesus Kraist ami win uyo ku-mafak-dakaan-bamdi, balaan-bam, Kristen imi waasi keya tit-ita-bomdi, kukup mafak mafak uyo kukaayin-bam kemsi. Kata, Kraist ata titil uyo kup-na-lomda utama yi, Pol ali ti nimi wok kalawaali nuu-mokoma no, kala-somdaya, nam-buulaya okok kaa ken-unbi. Kemin, nali yaap ke yo, kalbi. Kemin, kanumsi kuuli, liip tambal kaa utamin disa keliya, ami lak uyo duulin dinim bomdila kemin, uyo kanu-bamdila utama yi, Ali kanun tal-uneba kala, kala-somdaya olen-daap-na-lom,
1TI 1:14 atin ti kukup tambal kaata-kup disa masiim kup-na dong dokaap-nam-balaya, Kamokim Yesus Kraist almi lak uyo duu-lomdila nak-tunum kusal kayak kayak iyo aket uyo kukaaya-tabasi no.
1TI 1:15 Kristen numi weng baka-bamdup, Yesus Kraist ayo tildaak tawaal diim tal-ilomda ban kemin unang tunum numi iliim kaata boyilon o, kala-somdala, Tildaak talse no, ken-unbup kaali ti atin faneng. Kemin, unang tunum imi weng san kuyak aket tem daa fuku ilin kaami sang namti kala buu. Kemin, alik nuli ban kemin yale, nali utamila, Nak-tunum kusal imi ban kemin kaata katip ale, nimi ban kemin kaa dukum o kalbi. Yale,
1TI 1:16 Yesus Kraist ata nimi kanu-bam ilsi kaata, olen-daap-na-lom abiltap aket atul kup-ninsa disa; akola balili kala bomda fen-balaya, ami lak uyo duuliya, ayo talalu-namuse kabak-ami miit kaa dok kata naa kalolip: Kemin, Kraist ami aket uyo, Fen-biliya, atin ban wakamin tunum mafak Pol asiik tiltam nimi lak kaata duulaya, kusnum kayak kayak ita nimi kukup kaata utamdipla, yakal kanola nimi lak kaata, duulip talalu-yimuliya, suunkup ilin tunum unang kelin o, kala-somdaya, fen un-bomda, kanose.
1TI 1:17 Kemin, kaali ti suunkup king ke-bom ilin-kup bomdale, ali taan-yaamin dinim ale, tunum ayo dok kano-som atamalip dinim; maakup kaata-kup atin fan God namti kulu bombe. Kemin, unang tunum iyo suunkup ami win dukum kaata-kup, kufu-bamdipla yo, kala-somya kemin, fan ko.
1TI 1:18 Timoti kapyo, kabi nalmi man alaltap kemin, siin kawu Kristen tunum yaap-yaap nuli weng sawaa malo ma iyo kup-ta-sulup kemin, kamala kaata wok sang uyo asuk ulultap kaata bokop-ta-lomdi, Kaa kanuman o kala bakap-timbi. Kemin, numi weng uyo kuyak aket tem daalapla, kaami titil diim kawu kabi waasi din-bomdap titil-foko-bom dinbip ulultap kaata kelapya, kapni Kraist ami wok fukusap uyo yikik-kutal-fuku-bomdawa yo!
1TI 1:19 Kapni Kraist ami lak dakaamin uyo dukum-kup kutal-fuku-som ale, tituun-kup tabin kukup uyo tolkup tabasu yaap o, kala utamsap kaata-kup dukum-kup kutal-fuku ke-bomdawa yo! Kanola tunum malo ma ili utamipla, kukup kuuli tituun-kup tabasu kala utamsip. Yale, kuu daang ukuwa kambolalipla, sip dukum umi din yol ok kumun tem tuum dukum umi diim dibin foko dekela tabebu ulultap ke imi Kraist ami lak dakaamin uyo mafaknu kulaasip.
1TI 1:20 Ti tunum alep kaa kanosip kaa daatamin! Haimenias sole, Aleksanda so, alep iyo kaa fanang maakup kanolipya, yim-baali yak Setaan ami sikil diim abamniwa, angtiil yol uyo kuyalaya maso ma Aatumen God ami win kaa ku-mafak-dakaalin daa yo kalaliya, yim-baali yak ababip o.
1TI 2:1 Kemin, nali mafek mafek awak dukum ma kaami sang kaata bokop-talokomi. Kemin, weng san ilapya! Kristen unang tunum, kipyo, God ami naan-bamale, unang tunum alik iyo beten ke-bam, imi aket uyo, God ami yaap ke yo, akan-kaa-bamdiple, gavman alik iso, king, kamok kamok iso, imi beten kamayin-bilipya, God ayo dong dakaayin-balaya, ipyo tambal-kup tiin molipla, alik nuli uluum dinim, waasi dinim, tambal-kup tiin bomdupla, God ata-kup o kal-bomdup ami kukup tambal kaata-kup kutal-fuku kulii-una-bulupya yo!
1TI 2:3 Numi uldaa-yim-buusa tunum God ami tiin diim akal kanolin beten kaata atin ti tambal o kalala, beten umi fiyaap kaata dun-umba, kaa dok kata naa kalolip: Kemin,
1TI 2:4 God ali, unang tunum alik iyo foko kulii-tildang, Nalmi miit tem tiiliya, utamiwa yi, God ami kanuba namti kaa buu nu nikin o, ken-umba.
1TI 2:5 God maakup ata-kup tiina, kuno tunum maakup ma iip kabaaku tola God bik-abang daa, unang tunum bik-kaldang daa ke-bomda dong dakaayin-balala nuyo tal atamdup kela una-tala-kemin tunum kaa Yesus kulaata taa!
1TI 2:6 Siin kaali, God ami bokola-lomda: Kuno nayo, unang tunum alik imi iliim boyon o kala-somdaya, almi angtiil ayo maas kewase. Kemin, God ali numi kukuyalaya, utamupla yi, U faneng, God ali unang tunum alik nuli yim-bii-tildang almi miit tem daalon o, ken-umba nu, kalalupla utamsup.
1TI 2:7 Kemin, nali God alta, Umi sang uyo unang tunum imi bakayak o, kalalaya, uldaa-nam-buulaya, nili tiltam almi weng bakayin tunum kebi-kup ale, almi kalaan tunum ke kelile, akal bokop-na-lomda, Kapyo, tunum miit kusnum kayak kayak imi fanang din ilomdap, nimi tituun-kup tabin weng uyo kulii-din kukuyin-balawa, taltam Kraist ami lak uyo dakaamin o, nakase. Kemin, nali disa ibakamin weng bakabi disa; atin ti tituun-kup tabin weng kaata-kup bakabi te!
1TI 2:8 Nimi aket fukunbi namti kalabu: kapta bokoyapla, unang tunum iyo dok kanolin bokon kawu lotu kemum o kalip namti, tunum iyo tola beten ke-mokomip kiili ban kemin disa; aket atul tabemin disa; weng aal dikimin disa; atin ti talalu atafii-bam nuu-bamdipya, God ami aman dakaan-biliwa yo.
1TI 2:9 Nimi aket fukunbi namti kala buu: unang dak-finan-bamdipla, atin tifan ti lamlaam-kup tabemum o kala-lomdip, dabom kon ang-dina-bam ale, kiit kon tambal-kup tii-bam siyaat ting, iling aye, ilim kaal tiin buluusi so, ilim sisol dukum kiita saan-bi-lom falatam tiibi, dalaalmin daa; akolkup dik-diiba bomdipla, saak yak ilim kaal ma kanolin tap ma ilmi atamip namti, kuliita-kup ipyo tii-bam falatam miki-bilipla yo!
1TI 2:10 Kemin, unang ili God ami man kelum o kalip namti, kukup tambal tambal kaata-kup ke-mokomip kaata, fan imi kiit kon tii-lom lamlaam-kup tabemin kaami liip namti kaa be.
1TI 2:11 Unang uyo ti bilili-kup kala dik-diiba bomdu duluma weng uyo weng san-kaa-bamle kaami miit uyo utamum o kal-bomdipya yo.
1TI 2:12 Nali unang ma kewiya, uta taba-lom tiltam tunum ami kukolin unang ke-lokomu dinim ale, tunum ami dabom ke-lokomu disa; duluma bom, weng kaata-kup weng san-kaa-bamdipya yo
1TI 2:13 Kemin, kabak dokata naa kalolip: Siin kawu, God ayo Adam asiik dap-talalu duuba-kup ale, mafiing kaata Ef umi talalu kesa. Kemin,
1TI 2:14 Adam ali tunum mafak Setaan ami ibakamin weng kaata weng san-ilomda nosa disa; unang uta ibakamin weng uyo weng san-ilomdula, ban kesu!
1TI 2:15 Kata, unang iyo man faka-mokomip kaali, kano God ami lak kaali ti suunkup dakaa-bamdiple, olenin kaami kukup uyo kutal-fuku-lomdip atin ti tambal tambal ma ke-bam ale, aptum kusal iyo aket kukaayip namti, God ayo kukup tambal kaa kukaayokoma no.
1TI 3:1 Kemin, kalaali tituun-kup tabin weng o. Tunum ma ayo Kristen unang tunum imi tiin molin tunum kelon o, kala namti, kaali tambal.
1TI 3:2 Kabi tunum ma uldaa dabuulap tal Kristen imi tiin molin tunum kelak o kalap namti, kalanolin kukup kutal-fukusa tunum kaata ma ulduulan o kala-somya ko. Ali atin kukup mafak nuu-bamda ban wakamin dinim; tambal-kup balaya, kayak kayak iyo ami ban keba namti kaa buu nu kala atam dabak-saanin dinim; aa unang yimdal dan-kaamin disa; aa ami tal-unemin, tiin-yaamin uyo talalu-sokoso bom ilin ale, aket fukunin tambal kaata-kup fukun-bamda, aket bilili-kalin kaata-kup kutii-bom fanang dik-daalin tunum, ap-tunum kusal kusnum tilip iyo yim-tama tam am daa tambal-kup kamayin-bamda, ap-tunum kusal kayak kayak iyo kukup tambal-kup kukuyin-bam,
1TI 3:3 ok mafak uyo in-bomda tekela babonin weng ami bakamin dinim; abiltap aket atul dap-tela yemin disa; fulum-kup taba-bomda, falit weng kaata-kup bakayin-bamda, ami weng aal fakamin disa; sisol, bonang aye, tuumon aket aalu aket dakat yak abemin dinim tunum;
1TI 3:4 aa ami kalel, man iyo atin tambal-kup tiin mo-bomda kukuyin-balala man iyo aalap ami aket tambal kola-lomdip ami weng kaata-kup weng san-kaa-bam ken-umbip. Kemin, tunum kanolin kaata ma uldaa dabuulan i!
1TI 3:5 Kanola tunum ayo alami kalel aptil kii dotu tiin saanin kaami kukup uyo utamda disa, kaa ulduulap dok kano taang-kala tal aba tam God ami unang tunum imi tiin molokoma dinim.
1TI 3:6 Kemin, tunum kama kulu tal God ami man keba kaali, taltam God ami unang tunum imi wasman tiin molin tunum kela namti, ali, Nata-kup o, kal-bomda kutaang-tabe-mokoma ema? Kemin, kanuma namti, God ayo sawaayak Setaan ami fotaba-lom kanolaya, angtiil yol konsa ulultap ke, tunum kaakal angtiil yol uyo kolokoma. Kemin, kama-kup kulu Kristen keba kaa ulduu-yaamin daa yo!
1TI 3:7 Tunum ayo kawanita God ami lak duulin disa, kiimi tiin diim uyo win mafak-kup bakaalin tunum namti, ali uldaa dabuulawa le, God ami unang tunum imi tiin molin ke-lokoma uyo, mafak bakaan-bilip fatom dak-duu ilale, Setaan ayo taba-lomda abiltap tal dap-tama yang banokoma. Kemin, tunum kaa dok kata win tambal-kup bakaalin namti, ata uldaa dabuulan o kala-somya ko.
1TI 3:8 Ultap o. Ibi tunum ma ulelnipla, iyo wasman imi dong dakaayin tunum kelin o kalip namti, kalanolin kukup fukulin tunum kiita ma uldaa-yim-buulin o. Kemin, kiili win tambal-kup bakayin tunum ale, ili weng alep bakamin disa le, ili ok mafak umi aket-kup yelu suunkup inin disa, ili tuumon imi mok uyo in-bom suunkup fakamin daa ke-bamdipla,
1TI 3:9 ili ti suunkup God ami tituun-kup tabin weng tambal kaata-kup dukum-kup kutal-fuku, ami win-kup dap-fiil-tii-bam ilin tunum ita ma uldaa-yim-buulin o, kala-somya kemin,
1TI 3:10 kamasi kaa, ibi imi ok uyo yam-kukulipla, imi ok kaa atin tituun-kup kelip kala, kala-somdipla, kiita keyipla, wasman imi ok uyo dong dakaayin o, kala-somya ko.
1TI 3:11 Aa ti, imi unang tan yakal win tambal-kup bakayin unang ke-bamdip, daang tem weng kaa bakamin disa ke-bam ale, imi tal-unemin, tiin-yaamin uyo tambal-kup utafii-bam, tituun-kup tabin tabasu kaami kukup uyo kela kemin disa, suunkup kutal-fuku-bom ilin unang kiimi imimel kiita ma ulelnin o.
1TI 3:12 Aa ti fanang maakup pasta imi dong dakaayin tunum yakal unang yimdal dan-kaamin dinim ale, ilmi kalel aptil iyo atin tambal-kup, tiin mo ilolip tunum ita ma uldaa-yim-buulin i!
1TI 3:13 Kemin, pasta imi dong dakaayin tunum iyo dokata ok tambal uyo kemip namti, kii win tambal-kup bakayin ale, ili Yesus Kraist ami lak uyo titil-fak-daa duu-bomdip suunin disa kaami sang uyo baka-mokomip ko.
1TI 3:14 Nali fan kapni fanang kaata, abiltap din titamon o kalbi. Yale, kaali weng kulawusiik dola kup-tili utamdapya,
1TI 3:15 nali abiltap din unin disa keli namti, kapsole, God ami miining alik iso, ibi utamiwa, Dok kanolin kukup ma kutal-fukulokomup kaata tambal keyokomu ni kalokomip kaa, God ami man kesip ili atin tiin kawong ilin God ami unang tunum ita kemin, Kristen unang tunum ili God ami tituun-kup tabin weng uyo aptum kusal imi bakayin-bilipya, dukum-alaabu no.
1TI 3:16 God ami kukup kaami miit kaali atin ti sakbaalim dukum kemin, tunum ili sawaayak kaali ma utamsip disa. Yale, kamala kulu kaami miit namti kalabu. Kemin, utaman, kaami miit kaali Yesus Kraist kulaata kemin, Kristen nuli boko-lomdup, Ali tiltam fan tunum keba-kup tiltam fatap-naya, God ami Sinik ata kukuyila utamuwa yi, Tunum kalawaali fan tituun-kup tabin tunum tabasa ni, kalalupya, ensel iyo atamipla, Ami sang uyo yak abip ma abip ma keluya, tawaal diim kasel unang tunum iyo ami lak uyo du kelipya, God ayo taba-lomdala dap-tama tam abiil tikiin unse no, kala bakan-umbup o.
1TI 4:1 God ami Sinik ayo weng ku-fatap-daa kanum bokosa: Bi-lom kawu sinik mafak iyo iiweng bakan-unbip ita taba-lomdip, iiweng bakamin tunum iip maakup maakup iyo kukuyipla, yakal unang tunum iyo kukuyip, Kristen malo iyo imi weng kaata weng sandipla, ilmi God ami weng kaa fan u kalin uyo, kela yang bane-mokomip o. Tunum ibakayin kiimi ibakamin weng uta taba-lomdu ilmi aket fukunin uyo ku-mafak-daayuluya, dok kano-somdipla ban kemin uli kaa buu no, kalolip dinim ke-mokomip. Kemin,
1TI 4:3 tunum kuliita taba-lomdip, unang dan kaamin, tunum dan kaamin kiimi kukup uyo, Awem o kal-bomdiple, ima inin-inin malo iyo, Awem o, yakan-kaa-bam ke-mokomip o, kala-lomda God ami Sinik ata kanum bokosa. Kemin, kanolin tunum ili kanu-mokomip. Katale, siin God ami lak duu-lomdip nimi tituun-kup tabin weng uyo utamip namti, kiita nami mafek mafek dotusi uta im-bomdipya, nami yaap ke yo, nakan-kaa-bamdiwa yo, kala talalu kutii, numi kuyinsa.
1TI 4:4 Kemin, kaa dok kata naa kalolip: Mafek mafek alik God ami talalusa kaali, tambal dukum kemin kela-yaamin daa; God ami yaap ke yo akan-kaa-bamdup faka-buluwa yo.
1TI 4:5 God ami weng so, numi beten kebup so, ita taba-lomdip, numi mafek mafek kuluu-yaa-mokomup kiili, tituun kelipla kela-laabup. Kemin, tambal-kup faka-mokomup ko.
1TI 4:6 Kabi nimi weng tem kup-ti uyo kutama yang kaptum kusal Kristen kesip imi kukaayokomap kaata, fan kabi Yesus Kraist alami ok tabuulin tunum tambal ke-lomdap, weng tambal kukup-tip, fan o kala weng san-salap uta, taba dong dokop-tula titil-fokolokomap.
1TI 4:7 Yale, utamapla, Kii God ami sang uyo kambola yak sawaayak sang uta disa baka-bam weng mafak mafak aye, disa iip sang kaata bakamip itamap namti, kanolin weng kulu daang ukuwa-lomdap God ami kukup kaata-kup talalu kutal-fuku titil-foko-bomdapya yo.
1TI 4:8 Kaa dok kata naa kalolip: Tunum iyo baal uyo tambal-kup baktiimum o kalip namti, imi yaan so, sikil so, iyo um-kukumin-kup ke-mokomip kaali, ilmi angtiil uyo dong dokoyin tap so ke-lokomu. Yale, God ami kukup umi um-kukumin-kup ke-bam kaal-tiklin-ke-lokomup kaa, uta taba-lomdu numi sinik ayo dukum-kup dong dakaayokomu. Ale, kamala kaami kanola bom-bulup kaali, dong dakaayin-bulu ilom am ma daanokomu kabak-ami suunkup ilokomup kaali, dong dakaayin-bam ke-mokomu.
1TI 4:9 Kemin, weng kalawuuli fan kemin, kaa tunum unang alik iyo weng san-ilomdip kaa aket alep fukunin daa; fan o kalolip ko.
1TI 4:10 God ali unang tunum alik imi iliim bomin God kemin, kawanita fan God ami lak duulip namti, akal taba-lom imi iliim uyo boyokoma no. God ali tiin kawong bom ilin kemin, kaa utamupla, Fan ti bii-lom nuli yim-bii-din almi abip daalaya, aso ilokomup kala kalalupla, fiyaap duu-bam fen-umbup. Kemin, kaata-kup God ami kukup uyo dukum-kup okok ke-bam fiita-tabasup o.
1TI 4:11 Kabi nimi weng kup-ti ku, unang tunum imi kukaayin-bam kukuyin-balapya, utafii-bomdiwa yo, kala-somya. Kemin,
1TI 4:12 kabi kama man yale, iyo, Kabi disa tunum o kalolip i! Kabi tambal-kup bakayin-bamdap, kukup tambal kaata-kup kutal-fuku-bom ale, Kraist ami lak-kup duu-bomdapla, ban kemin dinim tituun-kup kukup tabasu kaami kukup kaata-kup nuu-bamdap, kutal-fuku ke kukuyin-balapla, God ami lak duulin iyo kapni kukup tambal kaata atamdipya, Nokol kanolin kukup kanu-mokomup kaali, tambal keyokomu no kalalipya, yakal maakup kanu-bamdipla yo kala-somya ko.
1TI 4:13 Kemin, am kulu daana kaa, nimi din talokomi kaami liip fen-bam ilokomap kaa, unang tunum ili God ami sukon tem kabak-ata tik-tii-balap, weng san kaa-biliple, nokol ti kanola kanumum o kala bakayin-balapla yo. Atin ti talalu kukuyin-bam kem-salawa yi. Kemin,
1TI 4:14 siin kawu, Kristen tunum yaap-yaap so, God ami weng ku-fatap dakamin iso, nikil nuta sikil kuyak kapni angtiil diim kawu tii-lom beten kep-ta-sulup kawu, God ami okok kemin kaami titil tambal kup-tase kaa, disa maaklo kelu, kela-laamin daa yo.
1TI 4:15 Kabi okok kaami lak kaa dukum-kup tabuu-lomdap, kutal-fukulin-kup balapla, Kristen malo kayak kayak iyo kapni ok kaa, atin tambal tambal ke-mokomap kala, tokokomip.
1TI 4:16 Kemin, kabi yak kaltapni mafek mafek nuu-mokomap kaali, tambal-kup tiin mo-bomdaple, aa yak unang tunum imi kukuyokomap kaa, ti tambal-kup tiin mo ke-bomdapla, suunkup ok kaa dukum-kup yikik-kutal-fuku-bomdawa yo. Kemin, kabi kanu-mokomap kaata, taba-lomda kapni dong dokop-tale, kapni weng, weng san-kaabip iyo dong dokoya keluya, God ayo kukup tambal uyo kuyokoma no.
1TI 5:1 Kabi tunum sawol kii, titil weng kaa bakayin daa; aket filit kaata-kup kukaayin-bamdapla, kaltapni kaalap ami weng akola bakaanbap ulultap ke-bamdapla yo. Man tunum ma kasaa kasaa yakal ti kaltapni nakal-fakal imi weng tem akola bakayinbap ulultap ke-bamdaple,
1TI 5:2 unang sawol iyo tambal-kup kaltapni kawak sawol umi weng tambal baka-bamdap um-talalbap tap ke-bamdaple, unang man sii iyo weng tambal kaata-kup bakayin-bamdapla, kaltapni nakal-unang imi weng tambal kaata-kup bakayinbap ulultap ke-balapya yo, kala-somya ko.
1TI 5:3 Kanola unang ma imakim taanaya, kaluun um-tiilaya, uli ma tiin mo-laabip disa, atin ti ulufin ilu namti, uyo tambal-kup talal-um-bamdawa yi!
1TI 5:4 Aa, unang kaluun umi man aye, man loop iyo ma bom-bilip namti, man kii utamiwa yi, Kamasi kaa nokol maan so nu kala-somdipla, awak so, aalap so, iyo yakal talalu tiin molik o; kanola man isiik tiin molokomip kaata man iyo awak-aalap imi tiin moya bom-bisip uyo yakal tiilik o. Kaa dok ata naa kalolip: God ali kanumin kaami kukup kaata, fiyaap dun-umba.
1TI 5:5 Kemin, unang kaluun umi tiin mo-laabip dinim, ukol ulufin ilu namti, umi aket uyo kulaalu yak God ami diim unu namti, umi aket fukunin kaa, God ata dong dokop-nokoma no kala-somdula, suunkup kutamiip so, taap so uyo, God ami beten kamaalokomu.
1TI 5:6 Yale, unang kaluun ma ulmi aket fukunin kaata-kup ulmi angtiil lak kaata-kup duu-bomdu yak kanumin kanumin kukup mafak kiita, kutal-fuku tal-unemu namti, kuumi sinik ayo taansa kemin, disa kawu bomduya, kanum tal-une-mokomu. Kemin,
1TI 5:7 kabi Kristen unang tunum iyo wiis-saayin-balapla, man iyo awak-kusal kaluun kaluun iyo tiin molokomip kaata, fan man imi diim uyo weng ma ilokomu disa yo. Kemin,
1TI 5:8 tunum ali almi aptum kusal iyo tiin molin dinim kela namti, kaali tunum mafak ale, tunum ali almi awak-aalap, fik, niing, iyo tiin molin dinim kela namti, kaami God ami lak duusa kaali, disa ke-lomda atin tunum mafakim ke-lomda ami kukup mafak uyo, tunum kaa God ami lak duulin disa; haiden o kalbip imi kukup mafak kanun-umbip uyo kabaak banula ata ata kesa no.
1TI 5:9 Kristen tunum unang iyo unang kaluun iyo dong dakaayum o kalalipla, tiin-saan-umbip. Kemin, unang kaluun ma boko-lomdu: Naso, win kuyak daap-nan o, kalu namti, kabi utamapla, Unang kuuli wasital 60 kaa kukan-tii tal aba kaltam bansu aa, talaalapla, Uli tunum maakup ma ata-kup dabuu-lomdu,
1TI 5:10 ok tambal tambal-kup fuku-bamdu win so kesu kala, kala-somdapla, kabi kanolin unang kiita, imi win kaata dola-lomdap ibi tiin molin o kala kanum bokop-ti. Kemin, ok tambal tambal fukun-tabasu kaali, kamasi kaptoowu ulmi man iyo tambal-kup tiin mo-som, fital tilip iyo tiin saan-bam, Kristen iyo tambal ma kamayin-bamdu, tunum unang aket uluum kulu bomdip bilip iyo dong dakaayin-bamdu, ok kusnum tambal akal alik akal alik iyo kanu-bam ilin, unang kiita imi win kaata-kup kuyak daayan o.
1TI 5:11 Kata, kabi yak unang kasaa la umi imak kaa taanala kaluun kesu kemin, umi win kaa dolmin daa yo. Kaa dok kata naa kalolap: Umi aket uyo dakat yak asuk tunum kusnum ma kuluulon o, kalu namti, uli Kraist ami ok kutal-fukubu kaa, daang ukuwale, kulaa
1TI 5:12 aptum kusal ita bokowa-lomdip: Sawaayak kupni weng kuka-daa-lomdap kanolokomi no, kalsap kaa, kambolap kaali, mafak o kalokomip.
1TI 5:13 Kemin, kukup ma kalaakal kanu-bam ke-mokomu kaa, daal tabemin kaami kukup kaata, kulii yak ma imi am am kawu tal-une-bamdu ma imi yam kaata-kup fen yakyak ke-bam daal tabin unang ke-lokomip disa ma ma imi weng bakan-tilip kaata, itam-ilomdu weng de kulii-unemin, ma imi weng yukut kulii-din weng falala kuyak-tini-kutal-tini-ke-bam ale, weng mafak disa ukol ulmi miit ma ma kaata kuka-daa, baka-bam ke-mokomu.
1TI 5:14 Kapkal utamsap, Unang kasaa la umi imak kaa taanala kaluun kesu kemin, unang malo ma kanolin kiili, Kraist ami liip uyo kulaa-lomdip, Setaan ami aket-kup kola ami daang bakasip. Kemin, nimi aket fukunin kaa, unang kasaa ili asuk tunum kusnum dan kaa-bam man faka-bamdip, ilmi am kaptam-ali tiin mo ke-mokomip kaata, tambal kanu-mokomip. Kemin, kanu-bilipla, waasi iyo taba-lom imi kukup mafak uyo ma nuubip kala utam-ilomdip, weng mafak kaa ma Kristen nuyo kukaayokomip disa yo.
1TI 5:16 Kristen unang ilmi kiim maakup uyo kaluun kelu namti, afalop uta tambal-kup tiin mo-bom bulu yo, kala-somla ko. Kanola wasman imi dong dakaayin tunum iyo unang kaluun iyo tiin mo-bom ale, ilmi wok uyo kutal-fuku kemip namti, kii wok alep takamin kaa fiit-mokomip. Kemin, unang kanta imi imak miineng taanipla ili ma dong dakaayin dinim kesip kiita-kup, tiin molin o kala-somla ko.
1TI 5:17 Kristen kamok kamok diil tunum ok tambal-kup tabuulip iyo, sisol kaa tambal-kup kukaayokomip. Yale, Kristen kamok kamok diil tunum iyo dok kata titil fak-daa-bomdip God ami weng uyo kukaayin-bam kukuya-yaabip kiita, atin ti sisol dukum so kaata kukaayin o!
1TI 5:18 Ultap kemin, Kristen kamok kamok diil tunum imi ok tabuu-bilip imi sisol kukaayin kaali, God ami Sukon Tem kabaku kanolin sang kaa boko-lomdu: Bulumaki ali fiit-bam kapni ok kamap-tam-bamda, wiit umi tip diim kawu antibin tal-une-balala, wiit lap uyo ulela daak tawaal diim abamnale, afet-bamdap kanubap kaa, bulumaki ami bon tem kaa sok dela-yaamin daa; kambolapla, akal almi sisol kaamin tap ke, wiit malo ma iyo in-bomdaya, ti tibimin o, kalbu-kup ale, Ok fukulin tunum ayo sisol tambal kaamin o kalsu ko.
1TI 5:19 Kemin, tunum maakup ma ata-kup boko-lomda: Kristen kamok kamok diil tunum ali ma ban keba no, kaa kabi ami weng uyo weng sanamap disa; fan tunum alep aye, asuumano aa, imi weng bokolip kaata fan weng san-somdapya
1TI 5:20 utamawa yi, Ali fan ban keba kala kalalapla, dibii-din Kristen kamok kamok diil tunum imi tiin diim daa, dabak-saanokomap kawu, aptum kusal yakal atamdipla, fanang-daa suunokomip o.
1TI 5:21 God so, Yesus Kraist so, God ami ensel iso, imi tiin diim kaa tituun weng kaata dukum-kup bakap-tambi. Kemin, weng san bom ilawa yi. Kabi kanola fasel ami kukup umi miit uyo utamin disa kelap namti, abiltap kaltapni aket tem fuku-daa, Faneng, kanuba no, kemin daa le, kanuba disa yo kemin daa; iyo talalu itafin-um-bom yam-kuku-bam talaka-bamdapya yo. Kanola kabi kayak kayak kusnum iyo atul weng bakayin-bamdap, kaltapni kayaak ita filit weng kaata bakayim-bam kemin daa; weng sawaa kaa maakup kaata-kup kukaayan o kala-somla ko.
1TI 5:22 Tunum uldaa dabuulap God ami okok keba kaa, kukup mafak nuu-bamda ban keba namti, ami uluum tabin uta taba-lomdu tam-tal-fukulokomu. Kemin, kabi tunum kaa maaklo man sinam abiltap uldaa dabuulap tiltam God ami unang tunum imi tunum kamokim kemin daa; kapkal kaltapni kukup kanumin uyo talalu atafii-bam, tambal-kup bom-balawa yo.
1TI 5:23 Kemin, kabi disa ok inin kaa kelalawa, wain ok katip ma kaaso in-balapla, kapni mat tem mafak-alin kuluusap uyo, dong dokop-tula, daak lo so kelu yo kala-somya ko.
1TI 5:24 Tunum ma ami ban kemin tiltam fatap-nula, abiltap utamupla, Kaa ban keba kala ken-umbup. Katale, tunum ma ami ban kemin kaata yang kuwaala biile, ku-fatap-daalipla, utam-yaabup o.
1TI 5:25 Ultap kemin, kukup tambal uyo fatap-kup kulu tiinsu le, kukup tambal ma ukol kuno tiltam fatawa-laabu disa; yale, kikal ti suunkup sawaan-bom ilokomip disa yo.
1TI 6:1 Kemin, unang tunum alik disa laap sok de-yimulip bomdip, okok kemin iyo aket fukun-bamdipla, Numi tiin molin tunum kaata-kup tunum tambal kemin, nuli ami weng kaa kutal-fukule uyo kanu-mokomup o, kal-bomdipla yi! Kanu-mokomip kaata tiin molin tunum ayo itama yi, Okok kemin imi kukup kaa atin ti tambal u, kala-somdaya, God ami win ayo ku-mafak-daka-mokoma disa le, Kristen imi win uyo kaa mafak o ke-mokoma dinim o.
1TI 6:2 Disa laap sok de-yimulip ok tabuulin imi tiin molin ili Kristen kesip namti, ok fukulin ayo aket fuku-daala yi, Ali nalmi kayaak kemin weng dinim ke-lom ami ok uyo daal-daal-ke-bamdila yiis kemin daa, ami aket fukunin kaa, Ali Kristen kemin, nali ami aket konbi kaata, ami ok uyo tambal-kup kamaan-biliya, akal okok kamaanbi kabak-ali mafek mafek tambal uyo kaa-bala kemum o, kala aket fanang daalokoma kaata, fan ok tambal-kup fuku-mokoma no. Kemin, kabi suunkup unang tunum iyo kukuyin-bamdap, kukup kalanolin kiita kala-nuumin o kal-bom kukuyin-kup kukuyin-kup ke-balawa yi!
1TI 6:3 Numi Kamokim Yesus Kraist ata taba-lomda, nuli God ami kukup kaami sang uyo talalu kukuyinsa, tunum kaa dok kanolin kaata ma taba-lomda, Kraist ami tituun-kup weng so, God ami kukup kutal-fukumin sang so, iyo kela yak weng kusnum kaata kuluu-lomda unang tunum imi kukuya namti, kaali
1TI 6:4 nokol utamupla, Tunum kaa, Nata talalu utamsi no, kal-bomda kutaang-kup taba bomda dak-fananba kata, ali ma talalu utamsa disa yo, kalokomup. Kemin, aket mafak kaali, kanolin tunum ami diim kawu bomdula, disa iweng kaata, Nata-kup bokoliya yo, kal-bomda, weng miit kaami kalan uyo weng aal diki-bam ke-bam ilin kemin, ali kanolin kukup kaata-kup aket aasu. Kemin, kanu-bamda bomdaya, kemin kanolin weng kaata kukuyin-bala, kayak kayak iyo weng sandipla, kukup mafak kanun-umbip namti kabakbu. Kanola aptum kusal ilmi mafek mafek kalan tuluya, weng aal diki-bam, disa kawu ilmi mafek mafek kalan nen-una-tala-ke-bamdip, dinan-kulii-tabe-bam ale, ap-tunum kusal imi weng mafak kukaayin-bamdiple, utamiwa yi, Nak-tunum kusal imi aket mafak uyo suunkup numi kukaayinbip kala kala-laabip, ale
1TI 6:5 suunkup weng aal-kup diki-bilip, somu-somu-ke-bam laabip kemin, kanolin tunum kiimi aket kaa atin ti mafak-insu. Kemin, God ami tituun weng uyo talalu utamin dinim keliwa kemin, imi aket fukunin uyo, God ami kukup kutal-fukumin uyo mafek mafek soyal kemin kaami liip uli kabuu nema yo, ken-umbip ko.
1TI 6:6 Fan, tunum ali kanita bilili kala dik-diiba bomda, aptum kusal imi mafek mafek mok uyo inin dinim ke-bamda, God ami kukup kaata kutal-fukulin-kup ilin namti, God ata taba-lomda ali atin tambal-kup kaman-bam laaba.
1TI 6:7 Nokol utamsup kemin, awak kasel ili numi yimu-laabip kaa awak kusal imi mat tem kaptamu mafek mafek so ma kuliilup, talen-umbup disa; bom bii tawaal diim kalaami ke-lokomup, kaa mafek mafek katip so ma kutama unokomup disa.
1TI 6:8 Kanolin kemin, nuli inin so, ilim kaal so, iyo ma bom-bilip namti, nuli mafek mafek katip kulaata tii yo, kal-bomdupya yo.
1TI 6:9 Tunum kanta ma bung yaapkan kaamin kaami aket-kup aalu namti, kaali dok kanolin dap-kukumin ma tiltam dap-kamolu kulii afun tem unin aye tap kelale, kukup mafak kaata taba-lomdu ami aket tem uyo ku-mafak-daalula babon-bam suunkup bung aket an-buluya, atin mafak-nokoma.
1TI 6:10 Kaa dok kata naa kalolip: Tunum ali tuumon kaamin aket kaata aalule, ali yak kukup mafak mafak alik kiimi miit namti kabuu kemin, tunum maakup maakup ili tuumon aket yelula, aket dakat yak abemin kuuta taba-lomduya, yim-tama yang tem diiluya, ilmi God ami lak dakaamin uyo kambola-lomdip ililta ilmi angtiil yol uyo kuluu kutaldak daa-lomdipya, aket uluum dukum uyo kan-tabasip o.
1TI 6:11 Kata, kabi God ami man ale, kabi kanumin kukup uyo kewa-kewa-ke-bamdap tambal tambal ma ke-bamdap, atin ti God ami kukup tangbal kaata-kup kutal-fuku-bom, kapni aket uyo kulaalap yak God ami diim abu kela-bomdap, kap-tunum kusal kayak kayak iyo, tambal o yakan-kaa-bamdaple, mafek mafek mafak tal kapni angtiil diim abamnu uyo titil-fak-daa-lom welap une-buluya, tunum kusnum kayak kayak imi aket filit kaata-kup kukaayin-bamdaple, kanu-balawa yo.
1TI 6:12 Kemin, tunum ayo Kraist ami lak duu-bomda ilokoma kaalile, tunum abiltap binan-bom kapta kapta kelap o kala, mafek mafek kukaanbip ultap kemin ale, kapkal ti tambal-kup abil unabap kaa, ti titil-foko-bomdapya yi! Sawaayak uyo God ali, Dap-tiiliya suunkup ilin tunum kelak o kala-lomdala, tim-tiilaya, kabi unang tunum yaapkan imi tiin diim kaa kapni Kraist ami lak duusap kaami sang uyo ku-fatap-daalap utam-silip kemin, kapni suunkup ilin tunum kesap kaa, ti dukum-kup titil-foko bom-balawa yi.
1TI 6:13 Kemin, God ali alik titfitmin mafek mafek kiimi mam-kukaayin God ale, Yesus Kraist ali kiyap Pontius Pailat ami diim kawu tituun-kup weng tambal-kup bokonsa tunum kemin, God so, Yesus Kraist so, alim imi tiin diim kawu weng dukum-kup uyo bokop-tokomi kayi!
1TI 6:14 Kabi dok kanumin kaata ma nuu-balapla, weng mafak uyo kulii-tal aba yak God ami weng kabak tinimin daa yo; tambal-kup tiin mo-bomdawa yi. Kabi tiin molokomap kaali, tunum unang ili boko-lomdip: Weng kuuli mafak o, kalokomip disa. Kemin, kano ti tiin molin-kup una-balapya, yak aba butoop numi Kamokim Yesus Kraist ami tal fatap-nokoma kulu kutoop kulu daalan o, kala-somla ko.
1TI 6:15 God ali utamaya, Yesus Kraist dabaali daak fatap-nokoma no kalsa kaa, tiltam tulu no, kalokoma, kabak-ata fan dabaala tildaak fatap-nokoma. Kemin, God ata-kup fiyaap duumin kaami miit kayaak ale, maakup ata-kup titil sakbaalim dukum uyo ami diim kawu bombuu. Kemin, ata king alik imi Kamokim diildiil ale, ata kamok kamok alik imi dabom ko.
1TI 6:16 Maakup ata-kup taan-yaamin disa ale, ami falala-kalin iilfoba kaa, atin tiin buluusi so kemin, dok kano-somdupla nuli yang ami mepso kaa yang ilomdup atamalup dinim; aa, tunum ma ata taba-lomda atamsa disa le, kuno tunum maakup ma ata taba-lomda atamama dinim o. Unang tunum nuli ami win kaata-kup kufon-bamdupla, ayo suunkup nuli tiin molin-kup bom-bala yo kala-somla ko.
1TI 6:17 Kemin, tawaal diim kalawaami mafek mafek uyo abiltap-siik mafak-nokomu kemin, tunum bung kayaakal kiili fuut-tabemalip. Kemin, bokoyilawa, imi mafek mafek yaapkan kaami lak dakaamin kaa kambola-lomdipla, atin ti God ami lak kaata duulin i! God ali alalta numi mafek mafek tambal yaapkan iyo kukaayin-bala fiyaap duumin-kup laabup o.
1TI 6:18 Kabi mafek mafek soyal iyo bokoyapla: Suunkup kukup tambal tambal kaata kutal-fuku bomdiple, ap-tunum kusal iyo atin kukup tambal kaata-kup kukaayin-bamdip, suunkup imi mafek mafek uyo aket dinim ke tunum kusnum iyo isom ke-bamdip masiim kukaayim-bam ke-bamdipla ko.
1TI 6:19 Umi kanumin kaali, iltipni bung men tap ke kuyak tam abiil tikiin tiiliwa, ilom dong dokoyokomu ultap, Kuuta tangbal kemin, am talaap kun kemin, uyo am kaami miit titil sokan kaata dong dakaalin ulultap kemin, mafek mafek soyal iyo mafek mafek masiim kukaayim-bam ke-mokomip kaata, fan dong dokoyilula, ili suunkup ilin unang tunum God ami abip bombe kawu ilokomip ko.
1TI 6:20 Timoti kapyo, God ami ok kup-tase kaa talalu tiin mo-bomdawa yi! Kanola tunum iip maakup maakup iyo boko-lomdip: Nuta-kup tituun weng uyo utamsup o, ken-umbip. Yale, kiili ibakamin weng kaa baka-bamdiple, tawaal diim kalaami disa eng kaata kasen-foko, Kaa God ami weng o, ke-bamdip kanun-umbip kemin ale, tunum malo iyo boko-lomdip: Nuli utamsup o kal-bomdip kanum-unbip. Yale, God ami fan tituun eng ayo uktansip kemin, kabi imi kanumin weng kuu daang ukuwa-somdapla yo kala-somla ko. Kemin, God ayo nak-tunum kusal ibi disa masiim kawu tambal tambal ma kamayin-bam tiin mola biliwa yi!
2TI 1:1 Timoti kaa laabap o? Nali Yesus Kraist ami kalaan tunum Pol nita kemin, sawaayak kaali, God ali weng kuka-daa-lomda dok kata nami man Yesus Kraist ami diim kawu fep-na namti, ali ti suunkup ilokoma no, kalsa. Kemin, alami aket fukunin kaata, nali uldaa-nam-buu-lomda, Kabi nalmi weng kutiisi kaata, unang tunum imi bakayan o, nakala, kalaan tunum kesi ko.
2TI 1:2 Timoti kapyo, kabi atin ti nalmi man altap ke-lomdila mok inap-ta-laabi kala, kalalila, sukon kala dola kup-ton o, kalalila kemin, nali Atok God aso, numi Kamokim Yesus Kraist so, alim imi dik-dakaayim-biliya, ita kapni disa masiim kawu tambal tambal ma kamaap-tam-bamdip, aket filit uyo kukaap-tam-biliwa, kapni aket uyo balili-kup kala bom-balawa yi!
2TI 1:3 Nami awil-fakal yakal kuno, God ami kukup kaata-kup kutama un-bom ilsip. Kemin, aa ti nakal kanola kutal-fuku kutama tabasi kemin, nalmi aket tem uyo utami yi, Kanolin kukup kutal-fuku kutama talabi kaali ti, mokso kebi kalale, aa kuno nami beten kebi uyo ti, kutamiip so, taap so, suunkup ti kapni aket-kup fukun-bamdiya, God ayo yaap ke yo, akan-kaabi.
2TI 1:4 Kemin, nali kambop-ta talon o, kem-silile, kapni ama-bam tiin ok tildaak abemu titamdiya, kep-talasii kaami aket kaata, fukun-bamdile, baan ti din titam-somdiya, fiyaap dukum-kup duumon o, kal-bom kebi.
2TI 1:5 Kemin, nali kapni Yesus ami lak duu-yaamin kaami aket uyo fanang-daa utamila, Kabi ibakamin disa. Fan, ti Yesus ami lak uyo dakaabap o, kebi kemin, kapni kawowak Lois usiik kanola Yesus ami lak duulule, kulaa kaltapni kawak Yunis ukol kuno ami lak duu ke-silip. Kemin, nali talalu utamila, Kapkal kanola ami lak uyo duu ke-salap kala tiinbi no.
2TI 1:6 Kalaliya kemin, nali kapni aket fukunin uyo kufop-ton o, kalbi kemin, siin kaali, nali sikil kuyak tiip-ta-lom God ami dik-daaliya, ami okok kemin so, titil so, kiita kup-tase. Kemin, numi suunin kukup kaa, God ami Sinik ata kuyinsa disa; ata tiin molaya, titil-foko God ami ok uyo okok ke-bam ale, numi aket uyo dukum-kup naktum kusal imi kukaayim-bamduple, mafek mafek mafak kaata yam-fukulon o kalu uyo, daa yo, ken-umbup. Kemin, kamala kalawaali kufo-lomdap, God ami kup-tase uyo, tunum as fuun-daala as kiin-taba dawang tabeba tap kelawa, dukum-kup kutal-fuku-balawa dukum-nuk o, kala-somla ko.
2TI 1:8 Kup-tase kemin, naktum kapyo, unang tunum imi fatom kaata kep-tula, numi Kamokim Yesus ami sang bakamin kaami ok uyo kelalap o, kalaliya kemin, kaptum nali, God ami ok kaata okok ke-bilila, kaata sok de-namu-silip kemin, kanola kabi nami kanosi kaami fatom uyo tabep-tamu disa kayi! Mafek mafek mafak tal numi diim abe-bulu, um-tal-dakabup kaali, God ami titil kaata kuluu-lomdap kapso, naso, nikil iyo titil-foko kutal-fuku-bomduwa, God ami weng tambal kaata unang tunum imi kukuyum o.
2TI 1:9 God ata nuli yim-taldang alami miit tem daa, bokoya-lomda: Kibi nalmi unang tunum tituun-kup tabin kelin o, kalsa. Kemin, God ali utamala, Numi kukup kaata tambal ma kebup kala kala-lomda, nuli yim-taldang alami miit tem daasa disa. Almi aket fukunin kaata, olen-daaya-lomda, nuli yim-taldang daase. Kanola, sawaayak kaali, God ali tawaal dotuulin disa ilomdaya, fanang daa-lomda: Nalmi man Yesus Kraist ami diim kabangu disa misiim kawu tambal tambal ma imi kamayokomi no, kalsa. Kemin,
2TI 1:10 am kula daansu kulu, numi iliim boyin tunum Yesus Kraist ata tal fatap-nala kawu, atamdupla, God ami tambal tambal kamayin namti kalabuu kala kala-sulup ko. Yesus Kraist ata, taan-yaamin kaami titil uyo disa kelu kewa, boko-lomda: Kipni taanokomip kaa, taandiwa maaklo ke win dinim ke-lokomip disa yo, kalba-kup, almi weng tambal uyo boko-lomda: Ibi nami lak duulip namti, suunkup ilin unang tunum ke-lokomip o, kala-somda ku-fatap-daalaya, atam-sulup.
2TI 1:11 God alta uldaa-nam-buu-lomda: Kabi nami weng tambal kulii yang unang tunum imi kukuyin tunum o, kalala nali ami kalaan tunum ke-som aa, asuk kukuyin tunum ke, kesi.
2TI 1:12 Nali kaami kalan kaata uluum kuluu-bomdiya, bom bii. Lale, nali kaami fatom kaa dakabi disa; kaa dok ata naa kalolip: Kemin, tunum kaami lak duusii kaali atamsi, kanola nali utamiya, Atin ti ami weng tambal kulaala tildak nami sikil diim abasu kaa, alta taba-lomda kuluu-lom talalu tiin mo-bom-balala, ami weng tambal uyo suunkup kutama yak aba umbutoop almi am mafiing am daanu tolokoma kulu, diilokomu no, kalbi ko.
2TI 1:13 Nali God ami weng uyo tituun-kup bakap-tam-biliya, weng san-salap. Kemin, kapni weng san-salap kaata ti unang tunum imi kukuyin-bamdap bom-balawa yo! Sawaayak kaa, nuli Yesus Kraist ami diim fewa-lomdup ami lak ayo duule, numi aket ayo Yesus Kraist ami kola-som aa, naktum kusal imi kuya-som ke-sulup. Kemin, kaali dukum-kup yikik-kutal-fuku-bom-balawa yi!
2TI 1:14 God ami Sinik Tambal ayo numi iipyak tem kabaku bombe kemin, ata dong dokop-ta faksa-bomdapla, God ami weng kulaala yak kapni sikil diim abasu uyo, dotu tiin mo-bomdawa yo! kapkal fal-siki yak-boko-tildak-boko-kemin disa; ti tambal-kup tiltam aba una-balapla yo!
2TI 1:15 Kapkal utamsap taa! Provins Esia kasel Fiselas so, Hemosenis so, ap-tunum kusal iso, nikil ili alik kii daang ukup-nip tiinsi.
2TI 1:16 Lale, mep Onesiforus ata, nami kalabus am kaltam bombi uyo fatom dinim, tal nitama, alep bomdup dong dakaap-nam-balala, nami fanang dakamin uyo ti tambal-kup bom ilsi. Kemin, nali Kamokim Dukum ami dik-dakaan-biliya, akal olen-daa Onesiforus so, am maakup ilin iso, iyo tambal tambal-kup kamayan o, kala beten kamayimbi no.
2TI 1:17 Ali tal abip Rom kalawu bom ilala bi weng sana yi, Pol ayo bombe kala kalale, fiit-bam fen-tal-une-bi-lomda nitamse.
2TI 1:18 Kaami dong dakaap-ninsa ma kaali, abip Efesis kawu, ali liip yaapkan dong dakaap-ninsa uyo, kapkal kaal-ke-salap. Kanola beten ke-bamdiya, Kamokim Dukum ami dik-dakaan-biliya, Kamokim Yesus ami unang tunum yam-kukumin ami diim daan tiltam abokomu kawu, Onesiforus ayo olen-daalak o, kebi ko.
2TI 2:1 Kemin, nalmi man kapyo, kabi Yesus Kraist ami diim kawu yak fep-nawa, tambal tambal kamap-tam-bam dong dakaap-ta-yaaba. Kemin, kabi titil-foko-bomdawa yi!
2TI 2:2 Unang tunum yaapkan tem kawu imi kukuyin-bilila, weng uyo weng san-kaamsap uyo kuluu-somdawa, tunum weng, weng san-kaamin tunum kusnum kusnum imi bakayin-balawa, yakal tambal-kup utam ale, tiin mo-bomdiwa kawu, yakal kuluu-lomdipla, unang tunum kusnum iyo kukuyin o, kala-somla ko.
2TI 2:3 Tunum titil-kup tabasa waasi dinim tunum ali, angtiil yol tiltam tulu kaali ti, titil-foko tola-bomdaya, dinan-unokoma. Kemin, ultap o. Yesus Kraist ami okok kebup kaami diim kabang aket uluum uyo, tiltam talebu kaali, kapso, naso, titil foko-bomdupla, ami okok kemin uyo, kutal-fuku kulii-una-buluwa yi!
2TI 2:4 Kemin, aa tunum ali waasi dinin tunum kela namti, ali yak okok kemin kusnum kusnum iyo ma tabuulokoma disa; ali ti ami aket uyo boko-lom: Nali okok kemin tambal ke-biliya, nami dabom ayo nitam-somdala, nami fiyaap uyo duumak o, kalalala, kanolin aket maakup kaata-kup fukun-bamda okok kemin uyo tabuulokoma.
2TI 2:5 Kemin, tunum ayo abiltap unemin kaami weng uyo talalu weng san utam-somdala, ali ti tituun-kup abiltap unokoma kemin, tunum ali weng kaa weng selin dinim ke-lomdaya, ali yang kuluuba tildang kuluuba kem yakyak tal sok bukubip diim kaba talokoma kaali, ali sisol kaa, ma kuluulokoma disa.
2TI 2:6 Kemin, kanola tunum ma waan lang ma fiit-bamda, dikibi diki kutii kela tiin mo-bom-bala, bii tiilna namti, waan lang kayaakim asiik waan uyo foko kulii-tal fuu inam-nokoma.
2TI 2:7 Kabi nami weng kaa bokoli kaami aket uyo fukun-bam bom-balawa, Kamokim alta kapni aket uyo dong dakaap-tam-balala kabi kaal-ke-lom, ami weng miit alik namti kabuu kala kalolap ko.
2TI 2:8 Nami God ami weng tambal bakayin-bam laabi uyo boko-lomdi: Yesus Kraist ayo taan-ilomda, asuk tam tiinse le, aa kaali Devit ami man loop o, ken-tabasi. Kemin, kapkal ami aket uyo suunkup fukun-balawa yo!
2TI 2:9 Kemin, God ami weng tambal bakayinbi kaata, tunum iyo atam aket fuku-daa, Kaa tunum mafak dukum o, kala-lomdipla, kukup mafak kaata-kup kukaap-nam-bamdip, sok de-nimbii tal kalabus am daka-bam ken-tabasip. Kata, tunum ili taba-lom, taang-kala-lomdipla, God ami weng uyo liip ukdaalalip disa yo, kalbi.
2TI 2:10 Kanubip kata, nimi aket fukunin kaali, God ami unang tunum ulela yim-tii-lomda, mep kiili nalmi no, kalase, kiimi dong dakaayin-biliya, iyo Yesus Kraist ami lak uyo duulipla, akal talalu-yimulala, naso, abiil tikiin kawu, suunkup ilum o, kalaliya, nami aket tem uyo ti titil-fak-daa-lomdi, uluum tabin alik kaa, tiltam talebu uyo kulaak tii-bomdila, tiinsi.
2TI 2:11 Kemin, kanola Yesus Kraist ami sang kala bokop-tokomi kaali, atin ti fan kemin, weng san bom ilawa yi! Nuyo ami taanse ultap kanola nokol taansupla, Yesus ami tam tiin kawang ke bombe tap, aa ti nokol kanolokomup te!
2TI 2:12 Nuli uluum tabin uyo numi diim tiltam tabebu uyo sak fuunin daa, titil-fak-daa bom, God ami okok kemin uyo kutal-fuku kutama tabup namti, nokol kamok kamok ke-lomdup aso, ilokomup. Lale, nuli ami daang ukola ilup namti, akal ti kanola numi daang uyo ukuya ilokoma.
2TI 2:13 Kemin, nokol boko-lomdup: Nuli ami daang bakaalum a! kalup. Katale, asuk kambolup namti, kuuli mafak. Katale, akal almi weng kaa boko-lomda: Nakal nalmi unang tunum iyo dong dakaayokomi no, kala kaa, ami weng kaa kulaalama disa; uyo titil-fak-daa kanu-mokoma ko.
2TI 2:14 Kabi weng kaa bokop-tili uyo kuluu-lomdap, Kristen unang tunum imi aket uyo kufo-yilapla, aket fukun-bamdiwa yi! God ami tiin diim kaali, kabi titil weng kaata bokoya-lomdap, Ibi yak kanumin weng kanumin weng kaami kalan kaata, weng aal dikimin daa yo, kala bakayan o, kala-somla ko. Weng aal dikimin kaata, taba-lomdu tunum iyo ma yam-titil-diilokomu disa. Weng dikimin uta taba-lomdu, tunum kanolin weng aal fakaabip imi weng sanip kaali, yam-mafak-daalokomu.
2TI 2:15 Kemin ti, kapkal taang-kala God ami okok kemin tunum almi alik ke-lomdap, God ami tiin diim uyo fatom dinim, God ami tituun weng kaata, unang tunum imi tituun-kup bakayin-balawa kawu, God ayo bokop-ta-lomda: Yi, kapni okok kebap uyo, atin ti tambal o, takak o.
2TI 2:16 Kemin, tunum malo ma ili, fan God ami weng ayo ma bakan-umbip disa; kemin, tunum ilmi disa aket fukunin weng kaata-kup, bakan-yaabip. Yale, kanolin weng kuuta taba-lomdu, unang tunum iyo akol yimbi yang-yang-ke-lom sisii yim-tama liip kusnum kabang ban-ilomdip, God ami daang ukolalip. Kemin, kaa kambola kambola, ke-bam bomdawa yo!
2TI 2:17 Kemin, kiimi weng mafak kaali, abang suunkan uta taba-lomdu, tiil ukel-bam ku-mafak-dakayinbu ulultap kemin, Kristen unang tunum yakal kanola yam-mafak-daalokomu. Kemin, Haimenias so, Failitas so, alep ili weng aal dikimin kiimi tunum kemin,
2TI 2:18 ili God ami liip tituun ayo uktala-lom bokolip: God alta, nikil alimal numi yim-fola tam tiin-yaamin kaali ti siin tildang tal-sulup. Kemin, ilom am ma daanuya kawu, dok kano-lom asuk nuli yim-fola tam tiinokomup disa yo, kala-lomdipla, unang tunum malo ma kiimi Yesus Kraist ami lak dakaamin iyo ku-mafak-dakabip.
2TI 2:19 Lale, God ami weng kaali, tunum ami am kun kumola ding-ding diina-lomdu, am uyo kutal-fuku-yaabu ulultap kemin, kanola God ami weng ayo kalok no-lomda fom-nama disa; ale, God ayo kelama disa kemin, God ami weng ayo boko-lomda: Kamokim ali almi unang tunum kiili, talalu itamsa no, kalale, ma kabak-ata boko-lomdu, Unang tunum alik kii dok kata boko-lomdip: Yesus kaa numi Kamokim o, kemip namti, kiili kukup mafak kuuli, daang ukuwa kewin o, kala am kun diim kabaku weng dolsa kabak-ali kanum bokosu no.
2TI 2:20 Kemin, am awak dukum kaptam-ali ima inin kaami ket o, kala-lom sosben aa, diis aye, iyo bom-bilip kemin, malo ma kaata gol ale, malo ma kaata silva ale, malo ma kiita kuno as, aa malo ma kiita tawaal mokol kaata kuluu-lomdip dotu-silip kemin, ket malo ma kabaak-ata ima tinimin ami fuu-bam inin ket ale, ket malo ma kaata ti suunkup fuu-bam inin ket kemin ultap
2TI 2:21 kanola tunum ili weng aal dikimin aa, ibakamin weng kukuyin aye, kanolin kukup mafak kuuli, kulaala kot banu kewa, atin ti tambal-kup ila namti, ali atin ti ima tini fuu-bam inin ami ket ultap ke-lomda, atin ti tituun-kup taba-bomdaya, ali ti almi Kamokim ayo dong dakaan-bam ale, Kamokim ami okok kemin tambal tambal alik iyo kutal-fuku-bomda kanu-bamda, ilokoma no.
2TI 2:22 Kemin, tunum man kasaa kasaa malo ma imi aket fukunin kukup mafak kutal-fukulin kaa, kapni diim kawu tiltam tulu namti, kaa daang ukuwa-lomdawa kayi! Kabi yak kanumin kukup uyo daang ukuwa-lomdap, kabi ti tituun-kup tabasu kaami kukup kaayo, kutal-fuku-som ale, God ami lak ayo dukum-kup kutal-fuku-bomdaple, kap-tunum kusal imi aket uyo kukaayin-balapla, tunum kiiyo, aket tambal-kup kuluu-lomdip Kamokim Dukum ami beten kamaalin tunum iso, tambal-kup bilili-kup kala tiin-bomdawa yo!
2TI 2:23 Kabi unang tunum ili itamawa yi, Babonin weng bakabip aye, weng al diki-bamdip waasi dinum o kebip kala itamap namti, kabi kiiso weng bakamon o, kalin disa yo.
2TI 2:24 Kabi Kamokim Yesus ami ok fukulin tunum kemin, kabi weng aal dikimin disa. Kemin ale, unang tunum alik imi kukup tambal kaata-kup kukaayin-bamdaple, kukuyin kukup ayo tambal-kup kutal-fuku-bom ale, aket atul weng aa, kalaang weng anang kaa bakamin dinim, atin ti balili-kup kala bomdapla, weng kaa akola bakayin-bam keman o, kala-somla kemin,
2TI 2:25 kanola, tunum malo ma iyo tal kapni weng uyo kuyang saak tiip-tip namti, kabi kii akolkup yim-taldang-daa, God ami tituun weng kaata kukuyin-balawa, God ata imi dong dokoyilala, kiimi aket kaa fal-sikilip tambal-kup keyula, God ami tituun weng kaayo fan uu, kalokomip ema yo? kala-somdawa kawu, kukuyan o! kala-somla kemin,
2TI 2:26 siin kaali, Setaan ayo abil-dii-bamda nami okokmin kaata-kup nuumik o kala yim-fuku-laaba. La, kanola kiili, God ami weng uyo, weng san utamiwa yi, Faneng uu! kalip namti, kiili Setaan ami abil uyo kambolokomip ema?
2TI 3:1 Kemin, kapkal dotu fanang daa ataman! Am mafiing diim daanokomu kaali, kukup mafak yaapkan uyo tiltam tiltam ke-mokomu. Kemin, unang tunum
2TI 3:2 iyo ilmi aket fukunin kaata-kup fukun-bamdiwa kemin, iyo tuumon kaami aket yeluya, fukun-bam ale, tam ilmi tong kaata-kup baka-bamdip boko-lom, Nuta-kup te! ke-bamdiple, fuut-kup taba tal-une-bam ale, imi weng mafak baka-bamdip, aa awak-aalap imi weng bakabip uyo kuyang saak tii-bam ale, yaap ke yo, kemin dinim ke-bam ale, God ami kukup uyo ma kutal-fukulin disa ke-bam ale,
2TI 3:3 ilmi kiim maakup iyo, aket uyo ma kukaayin disa ke-bam, dinan-tal-unemin uyo kambola-yaamin dinim ke-bam ale, daang tem weng uyo baka-bam, fuut-tabin kukup kaata-kup kanu-bam ale, kayak kayak iyo ti aket atul kamayin so, kukup mafak so, kaami aket kaata-kup kukaayin-bamdiple; aa kukup tambal kaami tiliip kama-un-bamdipla,
2TI 3:4 aptum kusal iyo yim-baalip yak waasi imi sikil diim abamnip ye-bam ale, dok kanumin dok kanumin kaata ma molum o, kalip kaa, aket tambal kaata ma fukunduwa yo, kala-yaamin dinim uyo abiltap nuu-bam ale, ilmi titil kaata-kup baka-bamdiple, Ti nuta-kup o, kal-bom ale, disa iip kulu ilmi angtiil mok-kup inan-tal-une-bamdip, God ami aket kaa, kola-yaamin dinim ke-bamdip,
2TI 3:5 disa kawu God ami kukup uyo kutal-fukulup o, kalip. Katale, God ami tituun-kup tabin weng uyo ma kutal-fukulin dinim ke-lomdip, God ami titil uyo ma kuluulamup disa yo kala-lomdip kanu-mokomip. Kemin, kabi kanolin tunum kiimi mepso ilin kaa suun-bamdawa yi!
2TI 3:6 Kamala kanolin tunum imi iipyak tem kawu malo ma iyo tiltam bom-bilip kemin, ili ibaka-bamdip, aket tangbal fukunin disa unang imi waka-tokoyin-bam wiis-moyiwa, yim-tama tam am daa-lomdip, kukuyin-biliwa kiimi disa weng kukuyinbip kaata weng san-ilomdip fan o, ken-umbip. Kemin, unang kiimi ban ke-bisip ami aket dukum uyo fukun-bamdiple, imi ban kemin kaami aket kaata imi kukuyin-buluya, ban waka-bamdip yang kutaldang-kutaldang-ke-bam ale,
2TI 3:7 suunkup ti kanola weng akal alik akal alik uyo utamum o, kalbip. Katale, taang-kala, weng kuuli faneng tituun uu, kala God ami tituun weng uyo utam kaal-ke kuluulalip disa ken-umbip.
2TI 3:8 Sawaayak kawu, Janes asole, Jambres aso, alep ili Moses ami weng kulaa disa ibakaba no, akan-kaa-bisip. Ultap kemin, tunum kiili, God ami tituun weng uyo tiliip kewa utafii-bam, imi aket fukunin uyo mafak keya-lomdu, God ami weng uyo fan tituun o, kalin dinim kelip kaa kalale, kulaali, God akal, Kiili nami unang tunum disa yo, yaka-lomda kamboyila-yaaba. Yale,
2TI 3:9 Sawaayak, Janes so, Jambres so, alep iyo kanu-bilipla, aptum kusal iyo itamiwa yi, Kii babonin kukup kaata-kup kutal-fukubip kemin, imi win uyo kufoyokomup disa yo, kala kalsip kemin, ultap o, tunum kiimi kukup so, win so, uyo sakbaalim dukum ke-lokomu disa.
2TI 3:10 Kata, atin ti kabi nimi kukup alik uyo utamsap. Kemin, nimi weng uyo unang tunum imi bakayila-yaabi uyo, weng san-kaa-bam ale, nimi kukup kala kanubi uyo utafii-bamdap, nami kukup alik kaa kanubi kaami miit uyo talalu utam ale, nami titil-foko-bomdi God ami lak dakaan-unbi uyo utafii-bamdap, aa nami aket atul weng dinim, balili-kup kala-bomdi dong dakaayin-kup ken-unbi kaata, atafii-bamdawa, unang tunum imi aket kuyinbi uyo, utam ale, God ami okok kemin uyo kambola-laamin disa; nimi kanola titil-foko-bomdi tabasi uyo utafii-bamdaple,
2TI 3:11 kayak kayak imi kukup mafak kukaap-ninsip uyo utam-som ale, nami din Antiok aba Aikoniam kawu, falala din Listra aba kem-tal-unemsi kaali ti, angtiil yol dukum kukaap-ninsip uyo utafii-bam kem-solap. Kemin, kanolin uluum yaapkan iyo kukaap-nin-biliwa, kuso kulii bomdi ilan-somi. Katale, Kamokim Dukum akal tambal-kup dong dakaap-nin-bamda, dil saan-bam, tiin saan-balala kemin, tambal-kup yakyak kem-talan-unbi.
2TI 3:12 Nata-kup disa; unang tunum alik iyo kawanita imi aket fukunin kaali, Yesus Kraist ami diim kawu fewa ilum o, kalip kulu God ami kukup tambal kaami bon-kup diiwa laabip namti, tunum ita taba-lomdip yam-mafak-daka-bilip, abiin mafak-kup tiinokomip. Kemin,
2TI 3:13 tunum mafak iso, ibakamin tunum iso, kuliita taba-lomdip unang tunum imi kasen-fakayin-biliple, kuno Setaan akal ti kasen-fakayin-bam, ke-balala, kiimi kukup mafak kulaata kanu-bilip kanum toop toop dukum-nokomu no.
2TI 3:14 Katale, kabi kukup-tin-bulupla, Fan u, kalalap kuluu-salap uyo ti dukum-kup yikik-kutal-fuku-bomdap kulii-una-balawa yi! Kabi kukup-tupla, nuli itamsap taa!
2TI 3:15 Aa, ma kalaaso atam-salap ko. Kabi sawaayak kawu man katip sakap ilomdapya, God ami tituun-kup weng dolsip uyo, utam yakyak tabasap kemin, sukon tem kanolin weng kaata tik-tii-balawa, kaata ti aket fukunin tambal kaami liip uyo kukup-tula, utam kaal-ke-lomdap, Yesus Kraist ami lak duulawa kawu, God ayo tal-ilom talalu-tamulokoma kayi!
2TI 3:16 Kemin, God ami Sinik alalta taba-lomda, God ami Sukon Tem weng alik uyo, ku-fatap-daka-balala, dolsip. Kemin, God ami Sukon Tem weng kaami okok kemin tangbal kaali, taba-lom God ami tituun weng uyo numi kukuyin-bamdule, numi ban uyo ku-fatap-daka-bam bokoya-lomdu: Kanumin daa yo, ke-bam ale, numi tal-unemin, tiin-yaamin uyo yam-talal-bamdu, tituun-kup tabin kukup uyo numi kukuyin-bam kem-yaabu.
2TI 3:17 Kemin ale, kuuta taba-lomdu, God ami unang tunum nuli dong dakaayin-buluya, titil-fak-daa atin ti talalu tika-lom faksa-lomdup, okok kemin tambal tambal alik iyo nuumum o, ken-unbup ko.
2TI 4:1 God aso, Yesus so, alim imi tiin diim kaa, nali titil tabin weng uyo ma, bokop-tokomi kemin, weng san ilawa! Yesus Kraist ali, unang tunum tiin kawang bom-bilip so, taansip so, imi yam-kuku-bamda yim-bak-saanokoma. Kemin, Yesus Kraist ayo tal-ilomda, unang tunum alik imi tiin diim kawu, tiltam kamokim diilim ke le, suunkup ilokoma.
2TI 4:2 Kemin, kabi God ami weng uyo kuluu-lomdap, unang tunum iyo bakayan i! Kapkal utaman, Unang tunum kiili, kanolin weng kaa ma, weng sanum o, kalbip e weng sanamup disa yo, kalbip. Katale, kabi ti titil-fak-daa-bomdap, weng kaa, bakayin-kup ke-bamdaple, God ami titil-tibin weng uyo kuluu-lomdap unang tunum imi fanang saanin uyo, wan binalap yak abin tap keyawa, imi fanang saanin uyo fal-sikiliple, kapta unang tunum imi aket uyo kufuyin-balapla, iyo God ami kukup uyo kulii-una-bilipla, kabi ti suunkup titil-tibin weng kaa kela atin ti balili-kup kala, akolkup kukuyin-bam kanumin-kup ke-balawa kayi!
2TI 4:3 Kemin, kabi weng selan! Ilom am ma daanokomu kabaku, unang tunum imi aket fukunin kaayo, tituun-kup tabasu weng kaali, kuluulamup disa yo, kalokomip. Kemin, kiilile, imi aket fukunin kaali ti, Nuta-kup o, ke-bam ale, kukuyin tunum yaapkan iyo foko-kutal tii-lom bokolip ko: Tiyak kanolin weng kaa, weng san-kaabup kaata ti, nuso mok inbup kemin, ti maso bakayin o, ke-bilipla, kukuyin tunum ita taba-lomdip bakayokomip kaata kuyaku,
2TI 4:4 God ami fan tituun weng uyo welip daak abule, daang ukuwa-lomdip, disa ibakamin sang kaata-kup weng san-kaa-mokomip.
2TI 4:5 Yale, kapkal kuu ti talalu aket fukun-bamdawa, suunkup aket bam-daka-bam ke-bam ale, kaami uluum ayo kano kulii-bomdap, God ami weng tambal kaata-kup unang tunum iyo kukuyin-bam ale, kapyo, ti imi dong dakaayin-bam, okok kemin uyo, dukum-kup yikik-kutal-fuku kulii-taban o, kala-somla ko.
2TI 4:6 Kapyo, nali kamboya unemin kaami am uyo mepso tulu kemin, tunum ita taba-lomdip nelipla, God ami fanang unon o, kali ko.
2TI 4:7 Nali tunum, abiltang bina din-ilomdi, weng kuka-daabip kaami diim abamnon o, kalba ultap ke, God ami weng tambal kaata, dukum-kup kukaayila yakyak kulii bital weng kuka-daap-ninsa diim tili, aa nami God ami lak dakaamin uyo ti kutal-fuku-tabasi.
2TI 4:8 Kanola, tunum ma ata ata ke, bina din una sisol uyo kola-laabip ultap kemin, kamala kulaakal God akal, sisol uyo, afetu kutii-lomda, nami liip-kup fenba; kemin ale, sisol kaali ti, tituun-kup tabasu kukup kaata, kutal-fuku kulii-taba-laaba kaali, unang tunum imi sisol kukaayin kaata ko. Kemin, Kamokim Dukum ami am mafiing diim kawu, unang tunum iyo ti tituun-kup yam-kuku-mokoma kawu, nali liiwa namuba-kup kawu, tam sisol kaa kup-nokoma. Kemin ale, kaa ata-kup sisol kaa, kuluulokoma naa kalolip i. Kemin, alik unang tunum God ami aket kola-bomdip, Kamokim ami tiltam fatapna atamum o, kem-yaabip, iso sisol kala kuluulokomip ko.
2TI 4:9 Nak-tunum kusal iyo umbabip kemin, baan kapkal fanang daka-bamdap abiltap-kup talawa yi!
2TI 4:10 Kabi nami weng kaa weng selan! Demas ayo maas kep-nase kemin, ami aket fukunin dukum kaali ti, kulaala yak tawaal diim kalaami mafek mafek kaami aket kaata-kup aalula kemin, kambop-nalala, Tesalonaika unse. Ale, Kresens ata Provins Galesia una, aa Taitus akal kuno Provins Dalmesia una ke-silip. Kemin ale,
2TI 4:11 Luk ata-kup, naso bombe. Kemin, kabi Jon-Mak ayo bokolapla, kapso alep maakup tilin i! Nali, kaata, dong dokop-nala, alep tambal-kup okok ke-mokomup.
2TI 4:12 Nali Tikikus ali, dabaali Efesis din unse.
2TI 4:13 Kemin, kabi tolon o, kalap namti, nami ilim saket batbat diil katiimin kaayo, abip Troas kayaak Kapus ami am kaptamu kutii kela talsii kaayo, kulip-na-som ale, mep buk kabuu uyo kulip-na kelap tala ni! Kabi lukup-tula kela talolap i! Talalu aket fukun-bamdawa, olti meme umi ipnaal ta dul-duu-lomdip, buk kaa talalusip uso, kuliilap tal o, kala-somya ko.
2TI 4:14 Kemin, ain faka-bamda mafek mafek talalmin tunum Aleksanda ata taba-lomda, nam-mafak-dakamsa. Kemin, ilom am ma daanokomu uyo, kanolin kukup fuku kutama tabeba kaali, bii Kamokim Yesus akal maan tiilokoma te!
2TI 4:15 Kanola Aleksanda kulaata taba-lomda, numi weng uyo ku-tibiya-yaaba tunum kemin, tunum kaata taba-lomda, kapni okok kemin tambal uyo ku-mafak-daap-tama kemin, kapkal kaa talalu atafii-bamdawa kayi!
2TI 4:16 Nali kamosinim kot ke-bam ale, waasi imi weng uyo nakal tiiyasii kaali, tunum ili ma tik-daap-nipla, naso tola dong dokop-nala, alep ke-lomdup, kiimi weng uyo ma maan tiiya-sulup disa; tunum alik kiili ti, kambop-na alik tabanip kala kalale, kulaali ti maakup nalakis ke, imi weng uyo nakal maan tiiya kesi. Nali God ami beten kamaan-biliya, naktum kusal alik imi kep-na un-silip kaami aket kaa, fukunin disa.
2TI 4:17 Kep-na tabanip. Katale, Dukum ali mep kulu naso bomda, nami tiin mo-lom buku-balaya, ami titil uyo kukaap-nin-balaya, nali titil-foko-bomdiya, ami weng tambal alik uyo ti kukuyin-biliya, tunum miit kusnum alik ili Juda disa; iyo yang kulu tiin-bala-tiin-bala-ke-bam bom-bilip iyo weng san-silip. Kemin, nali waasi imi iipyak tem kawu ilsi kaa, God ayo kambop-ninsa disa; ali uldaa-nam-buula yaap kesi.
2TI 4:18 Kanola, alik kanolin kukup mafak kiita nam-mafak-daalum o, ke-biliwa, Dukum ayo dil-saan-bamda, nim-tama talbi bital kala tili kaali ti, alalta nim-bii-tildang almi lang-lang-tem daalala, abiil tikiin kawu bomdila, alta nili tiin molokoma. Kemin, nokol ami tong kaata, suunkup bakamin-kup ilum o, kala-somla kemin, ti faneng ko.
2TI 4:19 Kapyo, nami weng umuuyokomi kalawuuli utamdapla, Prisila so, Akwila so, aa Onesiforus so, almi man aptil iso, imi kuyawa yakal utamin i!
2TI 4:20 Erastus ali abip Korin kawu kambola tilila, bombe ale, Trofimus ali, mafak umuulaya, abip Maletus kawu kambola tilila, bombe.
2TI 4:21 Kemin, kabi kawu ilanali yo, kalolap i! ati so, inim dukum so, kaami am daanokoma kaali, kiita kapni liip uyo bak-daalamip kemin, baan abiltap tal o, kala-somya ko. Yubulus so, Pudens so, Linus so, Klodia so, alik numi nak-tunum Kristen unang tunum iso, ita kapni weng uyo umuup-tip ko.
2TI 4:22 Kamokim Yesus ayo kapni diim kawu bomda, kapni sinik ayo tiin mop-ta, tambal-kup bom-balawa yo! kala-som kemin, God ata, kukup tambal tambal disa misiim kawu kukaayin-balaya, tambal-kup bom-biliwa yi! Pol, nita sukon kala dola kup-ti no.
TIT 1:1 Taitus kaa balap o? Nali Pol God ami okok ke-bamdi ami tunum kesi. Kemin, Yesus Kraist ayo weng bokop-nalala almi kalaan tunum ke-lom nasiik unang tunum imi bakayin tunum ke-lom nimi ok uli ti God ami unang tunum dil mo-lom nalmi no, kala ulelase, imi dong dakaayin-bili, tal aba tam almi lak kaata, duu-lomdip almi tituun weng uyo asuk talalu utamdip ale, God ami kukup tambal kutal-fukule, ami okok kemin kaata kutal-fukusi no.
TIT 1:2 Kemin, God ali sawaayak kawu, mafek mafek alik kiiyo dotulin dinim kawu, weng boko kutii-lom: Nami unang tunum dil mosi; ili suunkup ilin unang tunum ke-lokomip o, kala kanum bokosa kaata, atin fen-bam yikik-kutal fukun-umbup. Kemin, God ali ibakamin God disale,
TIT 1:3 ali utamala kawu kanu-mokomi kalasii kaali, tiltam tulu kala, kalalala kawu, ami weng uyo unang tunum imi atin ku-fatap-daayala, kula God numi dong dokoya asuk yim-buu-laamin God maakup kaata bokop-na-lom: Kapyo nimi weng kaata din unang tunum imi bakayan o, nakase.
TIT 1:4 Taitus kabi, fan ti nalami man alaltap, kapso, naso, maakup God ami lak duusup. Kemin, Aatumen God so, numi dong dokoya-lom yim-buu-laamin tunum Yesus Kraist so, alim kiita-kup isom-kup taba-lomdipla, kapni aket tem tiling tem uyo balili-kalin uyo suunkup iluk o.
TIT 1:5 Kabi am bokon Krit kawu, kep-ta tal-bomdi, mafek mafek alik talalulin disa kela tili kaata, talal-bamdapya, kamasi nimi weng kup-tasii ulultap kaata, din abip ma ma imi tunum iip maakup maakup iyo ulelnap tiltam Kristen unang tunum imi tiin molin tunum ke ke kelin o, kalaliya kep-ta talsi.
TIT 1:6 Aa, tunum ulel-nokomap kiiili ti win tambal-kup bakayin; kalel yamdal diimin dinim maakup kuuta-kup kuluusa; imi man kiili, tiltam God ami lak uyo duulipla, kusnum kayak kayak iyo boko-lomdip: Man kii fuut tabin, aa weng kuyang saak tiimin yaapkan o, kala bakayin dinim; kiimi awol kiita ulelnan o! kala-somla ko.
TIT 1:7 Kemin, Kristen unang tunum imi tiin molin kiili, God ami dong dakaalin tunum kemin, kii win mafak so bakayin aye, ilmi aket fukunin kaata-kup kanun-umbip aye; suunkup aket atul tabemin: aa suunkup ok mafak inin; weng aal dikimin diim kawu aptum kusal yemin; nata mafek mafek soyap keli yo, kala-laabip tunum kiiyo, aket kong mop-tu abiltap ulelmin daa;
TIT 1:8 tunum kawanta tal imi am tala namti, ili dotu tiin mo-laamin aye, atin kukup tambal kaata-kup kutal-fukulon o, kalin; aa aket fanang tambal-kup fukunin, aa tituun-kup kukup nuumin tunum, God ami kukup kaata-kup kutal fukumin, yak ban ukduulon o, kalba kaali, aket uyo talalu aket fuku-daa kela-yaamin tunum aye,
TIT 1:9 God ami tituun weng kukuyinsup uyo, dukum-kup yikik-kutal-fuku-lom kesa kiita-kup ulelnapla, kaata taba-somdala God ami tituun weng uyo unang tunum imi kukuyim-balala tunum kusnum ma ami bokola ko: Kapni weng kaa tituun bakabap dinim o, aka, kanum bokola namti, tunum ulduulap ata taba boko-lomda: Ee, nami weng bakabi kaa faneng kemin, kaami miit uyo talalu kukup-talokomi no, akala ke-mokoma. Kemin ti, tunum Kristen unang tunum imi tiin molin kanolin tunum kiita-kup ulelnan i!
TIT 1:10 Yak tunum kutaang-tibin iyo yaapkan kemin, ili babonin weng baka-bam ale, ibaka-bam ken-umbip. Yale, Juda kayaak imi kukup kutal-fukulin tunum ita kanum tal-bomdipya, ita ti miit yaapkan iyo kufosip. Kemin, tiin molin tunum iyo Yesus ami lak dakamin imi kukuyilipla, utamiwa yi, Nuli ibakamin imi weng uyo kulaa-lomdup God almi tituun-kup tabin weng kaata, bakamum o, kala imi bakayin kaami miit o.
TIT 1:11 Kemin, kiili kukuyikin dinim kaata la, iyo kano kukuyim-bamdipla kabaku tuumon kaami aket kaata-kup yelu fukun-bamdipla kaa kukuyin-bam tuumon dakayum o, kala tunum alimal iip maakup maakup God ami lak dakamin kaali, ku-mafak-dakayin-bam ken-umbip. Kemin, kabi imi weng bakabip kaali, weng titil tabin kaata-kup bakayim-balapla, duluuma bomdipla yo, kala-somla ko.
TIT 1:12 Siin sawaayak kawu, Krit kayaak utamsa tunum ma boko-lomda kanum bokosa no. Krit kasel kiili, suunkup ibakamin-kup ke-bam ale, siip wolti mafak atul tibin ililtap ale, daal-kup dip tiiya-balaya bomdipla, suunkup abuumin-kup ken-umbip ililtap o, kala-lomda ilmi ap-tunum ma ata kanum bokosa.
TIT 1:13 Ami weng kuuli ti fan eng kemin, Kristen unang tunum dotu titil-fak-daalin dinim bom-bilip, fanang dakabi ultap uyo, Juda kasel imi awil-fakal imi disa weng bakan-umbip sole, tawaal diim tunum iyo God ami daang ukonsip. Kemin, ilimi weng awem kutiimin so, kaata kufukulin-kup kem-tabasip. Kemin, kipyo, kaali kulaa-somdipla, God ami lak kaata tambal-kup duulin o, kalalapla dukum-kup bakayin-bomdapla yo.
TIT 1:15 Unang tunum iyo aket mafak fukunin dinim kaami liip uyo daken-bamdipla kemin, mafek mafek awem inin aye, mafek mafek awem nuumin aye, iyo ti kanu-bam bom iliwa, God ata boko-lom: Kibi unang tunum mafak o, yakan-kaa-mokoma disa. Unang tunum imi aket mafak fukunin kaami liip uyo daken-bamdipla, Yesus Kraist ami lak uyo duu-laamin dinim o, kebip ita, mafek mafek awem inin aye, mafek mafek awem nuumin aye kiita, kanu-bamdipla kemin, God ayo numi aket tangbal kuyan o, kala kal-bomdip kanu-biliwa, God ayo boko-lom: Kibi unang tunum mafak o, yokokoma. Ale, unang tunum kanolin iyo kukup tangbal so, mafak so, kaami aket kaa talalu fanang dakamin dinim ke-lom kukup mafak uyo nuu-bamdip fatom dinim tap ke-bam kem-laabip o.
TIT 1:16 Kem-laabip iyo boko-lomdip: Nuta-kup God ali atamsup o, ken-umbip. Yale, ilmi kukup kanolin nun-umbip kaa, nuli utamuwa yi, Ili God kaali talalu atamsip dinim u, kalolup. Kiili weng san-kaamin disa le, kukup tambal kaali, ma talal-malip dinim kemip kemin, God ayo itam-ilom, Nuli mafak kelupla kawu, mok-kup tikas-takas kamaya-laaba no!
TIT 2:1 Kristen unang tunum iyo kano-laabip kaali, kabi God ami tituun-kup tabin weng siin kawu weng sansap kaata-kup kanola kukuyan o, kala-somla ko.
TIT 2:2 Tunum sawol kiili, ok mafak kaa suunkup imbile tikiya babonin daa; dik-diiba bomdip ale, yang ban wakamum o, kalbip uyo talalu aket fuku-daa kela-lomdipla, God ami lak duu-yaamin so, mok ina-yaamin so, mafek mafek uluum tibin diim kawu atin dukum-kup tola-laamin so, kaata dukum-kup kutal-fuku taba-bom kemin o, kal-bomdapla kukuyan o!
TIT 2:3 Aa, unang sawol yakal ti, God ami aket konsip kemin, yakal dik-diiba bomdipla, daang tem weng bakayin disa; ok mafak suunkup inin kaami aket fukunin kaata, suunkup tiin moyu ilin dinim; uli ti kukup tambal kaata, unang tunum imi tambal-kup kukuyin o, kal-bomdapya kukuyan o!
TIT 2:4 Kanola kukuyin-biliwa, imi imak miineng sole, man so, imi mok kaata inayim-bamdiple
TIT 2:5 dik-diiba bomdipla, yang ban kelum o, kalbip uyo talalu aket fuku-daa kela-lomdipla, sadikimin disa; ili imak miineng kusal iyo tambal-kup tiin mo-bom ale; aptum kusal iyo dong dakaayin bomdipla, imak miineng imi weng uyo tambal-kup weng san-kaa-bamdip kanu-biliwa, kayak kayak iyo itam boko-lomdip: God ami weng kuu fan tituun daa; kibi disa iip bakan-umbip o, kalokomip disa yo.
TIT 2:6 Kanolin ultap kemin, tunum man kasaa kasaa yakal kanola dik-diiba bomdip ale, ban kelum o, kalbip kaa, aket kaa talalu aket fukun-ilomdip kela-laamik o, kala yam-titil-saan-bamdap dukum-kup bakayan o.
TIT 2:7 Kemin, kapkal ti, kanumin mafek mafek alik kiili ti tambal-kup nuu-balapya, tunum kasaa kasaa yakal ti kanu-mokomip. Unang tunum imi kukuyim-bamdapla, atin ti tituun weng kaata ti soko-sono kutal fuku-bomdap basat kewa-laamin daa ke-balapla, unang tunum iyo titamdip, Ali God ami weng tituun kaami lak kaata, dukum duusa no, kalokomip.
TIT 2:8 Kukuyim-bamdap tituun weng tambal kaata-kup bakayin-bam ke-balawa, tunum kapni waasi kep-takin iyo numi itam boko-lomdip: Kaa dok kano-lomdup itafii-bam mafak bakayokomup dinim o, kala-lom fatom tabeyokomu no.
TIT 2:9 Kemin, disa iip sok de-yimulipla, ilmi tiin molin tunum ami weng kaata-kup weng san-kaa-bam ale, ilimi ok kaa kanubip uyo tambal-kup talal-bam okok-bilipla, ilmi tiin molin iyo fiyaap duuyokomip. Kemin, ili ilmi tiin molin imi weng kaa kuyang saak tiimin dinim.
TIT 2:10 Aa, imi bung aye, inin-inin aye, kiili yukut dakamin daa; ili ti ilmi mafek mafek tiin molin tap ke-biliwa, tiin molin tunum iyo utamiwa yi, Ili atin ti numi mafek mafek iyo yukut kulii-unokomip disa yo, kalokomip. Kemin, kayak kayak ili utamiwa yi, Imi asuk yim-buu-laamin God ami tituun weng kukuya utamsip umi fiyaap kaata-kup duumum o, kala kalalipla, kukup tangbal kaata-kup kanu-biliwa yo.
TIT 2:11 Mep kukup tangbal kaami liip uyo kukuyin-bam kanumin o, kala bakayan o, kalbi kaami miit namti kala bom be ko. God ali, unang tunum alik iyo yim-bii-tildang nalami miit tem daalon o, kalalala kemin, isom-kup taba aket balili-kalin kaata, unang tunum alik imi kukaaya-laaba.
TIT 2:12 Kemin, ali numi kukuya-lom: Ipyo, unang tunum nami lak duulin dinim imi kukup sole, tawaal diim kaami aket-kup fukunin sole, ban kelum o, kalip so, uyo ibi aket talalu fuku-daa kela-lomdipla, ti kukup tambal kaata-kup talal-bomdipla, God nimi kukup tangbal kanun-umbi ultap kaata nuu-bamdipla yo, kalalala nuyo kukuyase. Kemin, kamala kaakal kanumum o, kala-somla ko.
TIT 2:13 Kemin, tawaal diim kalawu ilup kaali, nuyo kanu-bom fen-bulupla bi-lom, Yesus Kraist ami talokoma uyo kamokim tambal ke-lom talala atamdup atin ti tiin buluusi keyala kawu, fiyaap duu-mokomup. Kaali ti numi God Dukum ale, asuk yim-buu-laamin tunum kemin,
TIT 2:14 siin sawaayak kaali, ban wakamin uyo taba-lomdu alik nuli sok de-yimulin tap keyinsu. La kulaa, Yesus ami aket fukunin uyo takan-tiiyon o, kala-lomda, unang sole, tunum so, imi ban wakamin kaata, alik diinga yimu-lomdiya, tiltam nalmi unang tunum alik-daap kep-nipla, kukup tambal kaata-kup aket kufu-yim-bulula, kuuta-kup kutal-fukulin o, kala-lomda, alik numi ban wakamin tem kabaku diin-ilomda taansa.
TIT 2:15 Kapkal unang sole, tunum so, imi mafek mafek kanolin sang uyo bakayin-balapya yo! Kabi God ami titil kuluu-lom win tibin tunum kesap. Kanolin kemin, kanola tunum ili kapni weng uyo kuyang saak tiip-ta-lom kutoop kot tiilip namti, weng uyo dukum-kup bakayin-bamdap: Kaa kanumin daa yo, yakan-kaa-bamdapya, kalawaata kanumin o, kal-bom bakayin-bamdawa yo.
TIT 3:1 Kapyo, ti asuk maso bokoyan i! Ibi gavman so, kiyap so, imi weng uyo weng san-kaa-bamdip le, ok tangbal alik kiiyo tangbal-kup dot kaa-bamdiple,
TIT 3:2 unang tunum alik kii, weng itafiimin weng uyo bakayin daa yo; weng aal diki-bam waasi kela antap-daa una-tala-kemin daa; ti befal-befal-ke-bamdiple; suunkup balili kala, dik-diiba bom kaptum kusal alik iyo tambal tambal ma kamayin o, kal-bomdapla bakayin-bam keman o!
TIT 3:3 Kemin, kanola nokol siin kaali aket tangbal fukunin dinim ke-bom ilup le, weng kutoop kot tii-bamduple, disa bakabip kaali fan o, kal-bomduple, suunkup nuyo aket fuku-daa kanumin kanumin kaali, ban kemum o, kala, dikiinin-kup ke-bam kanumin uyo dong dokoya titil-fak-daa kelamup dinim ke bomduple, naktum kusel iyo waasi keya-bomdupla, imi mafek mafek kaami tiin uyo nen-bulupla, am taap talbunu kayoop tangbal talbana ke-bilipla, tunum kayak kayak iyo numi itam fanan-bam daang wukaayin-biliple, kanola nokol nak-tunum kusal iyo itam fanan-bam daang wukuya una-tala-ken-umbup o.
TIT 3:4 Ken-umbup lale, numi iliim bomin tunum God ayo unang tunum alik numi aket uyo kukaayin-bamdale, kukup tangbal uyo kukaayin-bam ken-umba kemin, kaami kukuya utam dak-daa kuluu-sulup kaata,
TIT 3:5 alta numi iliim uyo bose kaali, numi kukup tangbal uta utamdala disa yo. God ayo unang tunum ilmi maan tiiyon o, kaloma. Lale, alta alik numi olen daaya-lomdala kemin, numi iliim uyo boyase. Kemin, kaali ti, God ayo nuli diinga-yimulila tiltam kama unang tunum kelik o, kala almi Sinik Tangbal ayo dabaala tildaak dong dokoyinsa.
TIT 3:6 Kemin, God alami Sinik Tangbal ayo dabaala yak nulumi iliim bomin tunum Yesus Kraist ami diim abala, Yesus ata taba-lomda Sinik Tambal ayo dabaala tildaak ilomda alami titil dukum ta dukum-kup numi dong dokoya-laaba.
TIT 3:7 God ami aket fukunin uyo, Nalami Sinik Tangbal ayo dabaali din unang tunum imi talalu-yimulala, nami tiin diim kawu, ibi tituun-kup tabin bom-bilip o, kala-lom alami Sinik Tangbal ayo numi kuyase. Kemin, numi God aso suunkup ilokomup o, kala fen-umbup uyo God akal kano kuyila unang tunum iyo naso maakup suunkup ilum o, kalalala isom ke-bomda numi iliim uyo boyala suunkup ilin unang tunum ke-sulup.
TIT 3:8 Kemin, weng kaa bokoyili kaali, faneng bokoyili kemin, nili ti kaami sang kaali kabi weng kaa dukum-kup bokoya-lomdap: Unang tunum God ami aket kolin, ipyo, talal-bamdip, kukup tangbal-kup kutal-fuku kulii-taba bilipla yo yakan o, kalbi. Kemin, kanolin weng fatap kaata bakayokomap uyo tangbal kayi! unang tunum iyo dong dokoyokomu.
TIT 3:9 Kata, Juda tunum iyo ilimi awil-fakal imi win kufun-umbip kaami miit uyo talalu utam-laamin dinim, waasi kela una-tala-kemin sole, Moses ami Lo kaaso ban kela-lom dap-kayaku una-tala-kemin kiimi kalan weng aal dikibip kemin, kanolin uta taba-lomdu mep kanubip imi dong dokoyulala kukup tambal uyo kutal-fukulokomip disa. Kemin, kibi yang umi mepso kaa une-bam nuumin disa kayi!
TIT 3:10 Kemin, kanola kapyo, utamapla, Tunum ayo ma God ami tituun-kup tibin weng uyo kukuyikin dinim ke-bam, yim-bak-molala, Kristen unang tunum iyo weng aal diki-bamdip bakela-una-tala-kelum o, kalbip kala, kalap namti, weng fatap uyo kola yak kebii, liip alep anang ma fak-daalapla, weng ku-saak tiip-ta namti, kuno kewa-laamin ko.
TIT 3:11 Kapkal utamsap, Kanolin tunum weng kuyang saak tiip-ta ami aket tem uyo God ami tituun-kup tabin weng uyo daang ukuwase kala kalsap. Kemin, ban wakamin-kup ke-balaya, ami kukup mafak uyo atin ti dap-mafak-daalula ali kaal-keba. Lale, ali dotu-laamin dinim keba no.
TIT 3:12 Kemin, nali aket fukun-ilomdi abip Nikabolis kawu din ilokomi no, kal-bom aket fukunbi. Kemin, wom so, ati so, imi am daana kala, kalokomi kaali, nali kawu bom biili kayoop maakup duk-duulokomi. Kemin, asuk nili Atemis ata ne? Tikikus ata ne? dabaap-tili din kapni abiin kuluula namti, kawu kapkal nimi fanang kaali kawu abiltang tal o, kali ko.
TIT 3:13 Kabi mep Senas lo utamsa tunum asole, Apolos so, alep imi liip unokomip uyo talalu-yimulapya, alep imi mafek mafek uyo ma uktiiwa-yaamin dinim tambal-kup unin o, kala-somya ko.
TIT 3:14 Kemin, numi Kristen unang tunum iyo disa iip kawu bom ilin dinim; ili unang tunum imi dong dakaayin o. Kemin, titil-fak-daa ok tangbal-kup okok-bamdipla, kap-tunum kusal mafek mafek uktiip-nip kiiyo, kipta taba-lomdip imi dong dakaayokomip kaata, God ami kukup tambal uyo talalu utam dik-daa kuluulin o.
TIT 3:15 Unang tunum alik naso bom-bilip ita weng umuup-tip kemin, kabi Kristen numi aket kuya-laamin iyo nak-tunum kusal imi bokoya-lomdap: Pol sole, aso ilin iso, ili ipni weng umuuyinbip o, yakan i! God ali isom-kup taba-bomda, alik ibi aket balili-kalin disa misiim kaata, kuya tambal-kup bom-biliwa yi!
PHM 1:1 Nulmi aket-iip Filemon kaa laabap o? Yesus Kraist ami sang bakaya-tabasi kaami kalan kaata, sok de nam-tiilip laabi kaa, nali Pol nata kemin, nulmi nak-tunum Timoti aso alep nuli sukon kala, dola kup-tum o kalup. Nami weng umuuyi kaali, kuluu-lomdap Kristen unang so, tunum so, tal kapni am kaptamu lotu ken-umbip iyo weng umuuyinbap-kup, ale Apia so, Akipus so, nikim iyo weng umuuya kelan i! Filemon kapso, naso, alep nuli Kraist ami ok maakup tabuulin kemin, Apias kuuli, nulultap Kristen ke-lomdu uli nulmi unang kesu kemin, Akipus kaakal ti nulultap ke, Setaan aso waasi dinan-un-bomdaya, Kraist ami okok ke-bamdaya, angtiil yol kuluu-lom kaal-kelin tunum kesa.
PHM 1:3 Kemin, numi Aatumen God aso, Kamokim Yesus Kraist aso, alim ita disa masiim ipni kukup tambal kaata-kup kukaayin-bilip, ipni aket tem kaali, balili-kup kala, bom-biliwa kayi!
PHM 1:4 Nalmi nak-tunum Filemon kapyo, nali kapni God ami unang tunum imi aket kukaayin so, Kamokim Yesus ami lak daka-bam ale, aket kukaalin so, kaami sang kaata, weng san-kaa-bamdiya, nami beten kemin kaali, nali suunkup kapni aket fukun-bam ale, dong dakaap-tam-bamdi, God ami yaap ke yo kemin uyo, kukaan-bam ke-bamdi tiinsi.
PHM 1:6 Kapso, nuso, nikil nuli utamupla, Kraist ata kanola numi dong dakaayinba kaami sang kaata, bokola una-tala, nikil nuyo ken-umbup. Kemin, beten ke-bilila, God alalta taba-lomda, nuli aket fukunin tambal kaata-kup kukaayin-balaya, utamuwa yi, Kraist ami kukup tambal kaa, numi kukaayila-laaba kaali, utam-ilom kaabu kala, kalaluwa, ti talalu maso ma utamduwa yo, ken-umbi no.
PHM 1:7 Nak-tunum kapyo, kabi God ami unang tunum kaa bilip iyo aket kuya-lomdap yam-titil-molawa, ili balili-kala bom fiyaap duubip kemin, kaata taba-lomdu, nami aket dukum-kup fukun-umbi uyo takan-tiip-na-lomdu nam-titil-diilula, fiyaap dukum-kup duubi.
PHM 1:8 Nak-tunum aa. Kap-tunum nali, Yesus Kraist ata uldaa-nam-buulala almi kalaan tunum ke-lom ami weng kulii-yang kukaayila tal-unemin tunum kesi, Pol nata kemin, nali ti kanola Yesus Kraist ami titil diim kawu dukum-kup bokop-ta-lomdi: Kulu kunolan o! tokomi. Yale, kaa utamila, Nak-tunum kabi alep maakup Kraist ami lak duulupla, aket kola-una-tala-kesup kala, kala-somdiya kemin, disa akol eng kaata-kup, mafek mafek sang ma dik-daap-tokomi. Kemin, kamala kaali, Yesus ami weng kalan kaata, sok de-namulip tiinbi. Kemin,
PHM 1:10 nali kalabus am kalawu bom iliya, kapni disa ok fukulin tunum Onesimus ayo talaya, nita God ami weng uyo kukaan-biliya, ali kuyaku Kraist ami lak kaayo duu-lomda, ali ti nalmi man alaltap keba. Kemin, Onesimus ami lak kaata no kalaliya, nak-tunum kabi bokop-tiya, bom ilap ayo din una namti, Kabi yaap ke talap o, aka-lomdap, asuk dabuu-lom tiin molan o! kala-somya ko.
PHM 1:11 Kemin, siin kaali, Onesimus ali kapni ban kep-ta ukatamala talse. Kemin, kaayo utam-somdapla, fanang daa kambola-salap. Lale, kabi kamala-kup kulu tunum kulaa dabuulap namti, ali nami ok dong dakaap-na-yaaba ulultap ke-lomda, kapni ok uyo asuk dong dakaap-tama ko.
PHM 1:12 Kemin, Kraist ami kalan kaata, sok de-namuliwa, bom bii kaa nak-tunum kabi tal dong dakaap-nakin. Katale, kapni liip dinim o kalaliya kemin, nami aket iip Onesimus ayo kamboli kapni baan diim uyo kuluu-bomda dong dakaap-nak o, kalbi. Yale, nali tam kayak tii-lomdi ayo asuk dabaalap tal dong dakaap-nak o! kala-lomdi weng titil tibin weng uyo bokop-tokomi disa. Kemin, kaltapni aket fukunin kaata, Ayo, kalokomap kaata, fan kanolokomi kemin, kamala kaali, asuk kaltapni dabaap-ti din unokoma kayi!
PHM 1:15 Kemin, God ayo Onesimus ami kela kapni kambop-talala unse kaa dok kata naa kalolap: God ami aket kaali, Onesimus ayo asuk din aba talala kawu, Filemon aso atin ti suun ilak o kalalaya ema kemin kep-ta unse ema tap. Kemin,
PHM 1:16 siin kaali, ali kapni disa okok kemin tunum ke-bomda ilsa. Yale, kamala kaata le, disa iip ok fukulin tunum kaata-kup keba disa; kanola kapso alep maakup Kraist ami lak duulin tunum kelaya, atin ti kaltapni kap-tunum alik keba te! Nali ami aket-kup konbi kemin, nak-tunum kapkal utamapla, Ali kaltapni ok tabuulin tunum ale, ti kaltap tap akal ti kuno Kristen keba nu kala-somdapla, ami aket kola-yaamin kaali ti dukum-kup kolan o.
PHM 1:17 Kemin, kabi kanola atamapla, Nali kapso alep Kraist ami ok maakup fukulin tunum u! kala-salap ultap, nami din uni, Ti yaap ke talap o! naka-laabap ulultap kelawa, nak-tunum Onesimus ami bokola-lomdap: Yaap ke talap o, akolap ko.
PHM 1:18 Kemin, sawaayak ali dok kanolin maan ma tiip-tinsa disa aye, kukup mafak ma nam-mafak-daase no, kalap namti, bokop-nawa, nata ami uluum uyo kuluulami kayi!
PHM 1:19 Kemin, yak Timoti ami sikil diim kabaku dolmin uyo kuluu-lomdi, weng anung ma namti kalabuu kemin, dola kup-tokomi. Kemin ti kalaata, Pol nalta Onesimus ami ban kep-tase, kaa molokomi. Kemin, kabi asuk utamawa yi, Pol ata Kraist ami sang uyo bakap-nam-balaya, nali tal aba tam kama tunum kebi no, kalbap kaali, nimi maan kapni tiip-tin tap kep-tasi kemin, kaami sang kaata, dukum-kup bokop-tokomi disa.
PHM 1:20 Kemin, nalmi nak-tunum kapsole, naso, alep nuli Kraist ami lak duu-sulup kemin ale, nak-tunum kabi Kamokim ami titil diim kawu, nami dik-daali kaali, Kabi Onesimus ali dabuu-lomdap tiin molan o kali, kaayo kanolawa, nayo fiyaap duulon o!
PHM 1:21 Nali utami yi, Kabi nami Onesimus ami sang bokop-ti kaali, kukup tambal kaata-kup dap-tal-fukulokomap disa yo; atin ti kabi kukup tambal dukum maso ma kuyak-tiptii ke-lokomap o, kalalila kemin, sukon kala dol-tambi ko.
PHM 1:22 Kemin, kulaata ibi God ayo beten kaman-bilipya, tiin molin ayo tildaa nam-baalak o, kalalila kemin, kaa kanop-na namti, din unokomi. Kemin, nak-tunum kapyo, am abiin kaa ma ukup-na kemapla, din unon o.
PHM 1:23 Epafras ali Yesus Kraist ami okok-kaman-bam laaba kaami kalan kaata, sok deduulipla, naso bombe kemin, akal ti kapni weng umuup-ta kayi!
PHM 1:24 Kemin, naso maakup okok kemin tunum kiili, Jon-Mak aso, Aristakus, Demas, Luk, kanolin iso, iyo weng umuup-tip ko.
PHM 1:25 Kemin, Kamokim Yesus Kraist ata disa masiim ipni kukup tambal-kup tibin kaata, kukaayin-bamda, tiin mola, bom-biliwa yi!
HEB 1:1 Sawaayak kaptoowu, God ayo yak liip kusnum yaapkan uyo kulii tildak kukuyilaya, ami weng kaali profet o, kalbip almi weng ku-fatap-daa bakayin tunum yaapkan yaapkan imi suunkup kukaayin-balala, ita taba nulmi awil-fakal kuliila taansip ita weng uyo bakayinbi una-una-kemsip.
HEB 1:2 Kesip la, am mafiing daan tiltam tabon o, ke-bulu bomdup talan-umbup kabak-ali Yesus kaa God ami sang tambal kaami miit kemin, God alalta taba-lomda uldaa-dabuule bokola-lom: Am ma daanokomu kabaku mafek mafek alik iyo kulaap-ti yak kapni sikil diim abam-nokomu no, anba-kup, kulaali God ayo Man almi sikil diim kawu abiil, tawaal alik kalawiili talalu kutiisa.
HEB 1:3 Kemin ale, man kalawaali atin ti tunum tambal utamdula kemin, nuli alami Aalap ayo kukuyilaya, God ayo atamuwa yi, Ali atin ti fan tambalim ale, titil soyim o, ken-umba le, kuno man akal atin ti faneng almi Aalap alaltap kala kalsup. Kemin, ami weng kabak-ali titil-kup taba-som ale, weng kulaata taba-lomdu mafek mafek alik uyo ku-titil-saan-umbu. Kemin, man kulaata taba ban kemin takan-tiimin kaami liip uyo, Talalu kutiiyilila, unang tunum iyo God ami tiin diim kawu tambal kelik o, kala kalba-kup, alalta tiltam kamokim ke-lomda, abiil tikiin kayaak Aalap God ami sikil tingtup diim kawu tiin-bom laaba no.
HEB 1:4 Ali God ami man kemin, Aalap almi win tokonsa kaata taba-lomdu ensel imi win uyo kabaak banu keya-lom atin tambal-kup kesu.
HEB 1:5 Kemin, nokol kabak utamupla, kabak-ali ti faneng kalbup kemin, sawaayak kaali God ali alami Man ami bokola-lomda: Kabi nalmi man yaan maak kemin, kamala kalawaali nalta ilmi diim kawu, kabi ulduuli tiltam nami mafek mafek alik iyo tiin molokomap o, yaka-lom weng ma kaata boko-lomda: Nalta ami Aalap kelile, kuno ata nalmi man kela ke-lokomup o, kalsa. Yale, God ayo ensel maakup ami diim kawu ma weng alep uyo ma kanum bokonsa dinim; ti almi man kaata-kup ensel iyo kabaak banip ata ata kesa utamduya kemin, ami diim kaata-kup kanum bokolase.
HEB 1:6 Kemin, almi man diil yaan maak ayo dabaala tildaak tawaal diim talala, weng ma uyo alami ensel imi bokoya-lomda: Ibi fiyaap duu-bamdiwa, nimi man ayo bakaan-bamdip: Kabi numi God o, akan-kaa-bamdiwa yo, kalsa. Kemin,
HEB 1:7 God ayo ensel imi sang kaata boko-lomda: Nalmi ensel aye ok tabuulin aa, iyo talalu-yimuli tiltam inim dulul tal-uneba tap e wing dawong bak-tam daka-bamda mafek mafek abiltap-siik dinim kebu ultap ke nami ok kaata titil-fak-daa okok-ken-umbip o, kalsa. Katale,
HEB 1:8 God ayo alami Man ami bokola-lomda: Kabi God kemin, suunkup king kelin-kup ke-bomdapla, tituun-kup tabin kukup kaata-kup kuluu-lomdap kapni unang tunum iyo tiin mosap.
HEB 1:9 Kemin, kabi ti tituun-kup tabin kukup kaami aket kaata-kup talalu kutal-fuku-som ale, lo duulmin kaali ti mafak kayi kala, kuyak daka-bam ken-umbap utamdula kemin, fan kaltapni God alalta taba-lomda kabi uldaa-tam-buula kabi tiltam win soyap ke-lomdap fiyaap duun-unbap. Kemin, kaptum kusal ili dok kano-somdipla, kanolin fiyaap uyo ma duun-unbip disa yo, kala kanum bokosa.
HEB 1:10 God ayo asuk weng ma kaata bokola-lomda: Kamasi miit-tem-lo kaptoowu kamokim kaltapta mep tawaal kalawaali talalu kutiilap tiltam tabamnule, abiil ukol kuno kaltapni titil kaata-kup talalu kutii kesap.
HEB 1:11 Kemin, abiil so, tawaal so, iyo disa ke-lokomip. Kata, kabi fan dinim kelamap disa; kabi ti suunkup kalapni kuno ilolap kemin, abiil so, tawaal so, alik kiili ti ilim kaal disapnin ulultap ke-lokomip. Kemin,
HEB 1:12 kabi kaali tunum ilim kaal disapnu kambola-yaabip ultap ke-lom kambola-lomdap kusnum talalu kutiilokomap. Kemin, aa kabi tunum ilim kusnum mikiba ultap kelap abiil so, tawaal so, iyo fal-siki kutiilap tiltam akal alik ke-lokomu. Katale, kabi fal-siki-du-siki-kemin tunum disale aa, kabi taan-yaamin tunum disa. Kaali ti kabi suunkup ti kuno ilin tunum o, kalsa.
HEB 1:13 Siin sawaayak kaptoowu, God ayo utama yi, Alami Man ali ensel kiili, kabaak banipla ata ata kesa nu, kala kala-somdala man kaami bokola-lomda: Kabi nalmi sikil tingtup kaldangu win kufuumin diim kawu tiin-balapla, am mafiing diim kawu kapni waasi iyo yim-tal-daalila, kapta kamokim kelawa kaltapni weng kaata-kup weng san-kaa-bamdip kapni minlo tem kulu ilokomip o, kalsa. Katale, God ali weng ma uyo ensel maakup ma ami diim uyo ma kanum bokonsa disa.
HEB 1:14 Kanolin kemin, ensel kii kanta ni? Ensel kiili sinik kemin, ili God ami okok kamalin. God ali unang tunum asuk ulela-lom yim-buulokoma kiimi aket kaata fukun-ilomda alami ensel ita yim-baala tal dong dakaayila-yaabip ko.
HEB 2:1 Kemin, God ami weng kala weng san-kan-tabasup kaa, talalu kutal-fukulin dinim, fokolin tap kelin tap ke-bamdup uktaalamup. Kemin, ensel ili kabaak banipla, God almi man kaata, ata ata kesa. Kemin, weng kala talalu kuyak aket tem daa kutal-fuku-bomduwa yo, kala-somla ko.
HEB 2:2 Sawaayak kawu, God ali almi weng awem o, kalin Lo ma ensel imi kuyila kuka-daalip tiltam titil-fak-daasu. Kata, unang tunum alik ili weng kalawuuli duul-bamdip saak kuyang tii-bilipla kemin, kaa ilmi kukup mafak kunu-bilip kuuta, God asiik kaami du kaata maan tiiyin-bamda angtiil yol uyo kukaayin-bisa. Lale,
HEB 2:3 kamala kulaata asuk God ali nuli asuk dong dokoyila uldaa-yim-buulon o, kalba kabak-ali atin kaa mafek mafek sakbaalim dukum te! Kabak-ali taba ensel imi kano-silip uyo kabaak banula uta uta kesu. Kemin, kanola nuli God ami kanumin kukup uyo daang ukuwup namti, nuli dok kano-somdupla, ban kemin kaami maan tiimin uyo akaawa, ukadaa yang banolup yoko? Kabak-ali ti akaawa ukadaa unokomup dinim te! Kamasi kaptoop-ali Kamokim alalta numi sang boko-lomda: Kuliili yim-bii tiltam nalmi miit tem daalokomi no, kalala unang tunum iyo ami weng kaata, weng san-ilomdipla, kiita taba nuyo bokoya-lomdip: Kanola Yesus ami weng bakayinsa kabak-ali atin ti tituun-kup o, kala-silip.
HEB 2:4 Kemin, God ami aket fukunin kaali, Kayak kayak ili nami unang tunum imi weng bakabip uyo faneng bakabip kayi! kalin o, kalalaya, yak okokmin dukum dukum kusnum ma kusnum ma uyo nuu-bam ale, alami Sinik Tambal ami sikil diim kawu God ayo titil tibin disa akal alami kusnum ma uyo unang tunum iyo God alami aket fukunin kaata-kup dal-kaayila-tabasa ko.
HEB 2:5 Mep nami weng kala bakabi kaali, kamala kalawaami tawaal diim kasel unang tunum imi tal-unemin, tiin-yaamin kusnum ma tiltam talen-umbu kaami sang kaata bakabi. Kemin, kaa God ali ensel ita ulela-lomda bokoya-lom: Ibi unang tunum kaa ilokomip kaali, imi tiin moyin o, kalsa disa. Kemin, alami man ami sang kaata-kup bokolase. Kemin,
HEB 2:6 God ami Sukon Tem uyo tunum ma boko-lomda: Tawaal diim kayaak tunum ayo ma win soyim aye, ma kamokim kesa disa; disa iip kulu kasel tunum. Katale, God kabi, kaami aket kaata-kup fukun-bam ami lak-kup duun-tabasap. Kemin,
HEB 2:7 tawaal diim kalawu ilsa kaali, kabi dabak ensel imi min lo tem daalap bom bii luuknin tap kelale, kulaata dap-tam lo so kelap tiltam kamokim kelaya, unang tunum iyo ami tong kaata-kup bakamsip.
HEB 2:8 Kemin, mafek mafek alik uyo kulii yak alami minlo tem telawa ata taba-lomda, akal mafek mafek alik iyo tiin mosa no, kala God ami Sukon Tem uyo kanum bokosu. Kemin, God ayo kano-somdala, mafek mafek uyo ma kambolaya disa kawu ma bombuu disa; mafek mafek alik uyo dabuula yak tunum imi diim abasu. Yale, kamala kulaata mafek mafek alik uyo ma tunum iyo ma tiin mosip kala utafiibup dinim. La,
HEB 2:9 nokol Yesus ayo atafiibup, ale sawaayak God ali unang tunum alik imi olen-daaya-lomdala, Yesus kulaata dabaali din unang tunum imi abiin kuluu taan-ilomda dong dokoyilak aa, kala-somdala, God ayo dap ensel imi minlo tem daala ilanin tap kelala, angtiil yol dukum uyo kuluu-lom taanala kemin, God ayo dap-tam tip daa, kamokim kela kambolala, unang tunum iyo ami tong kaata-kup bakaan-tabasip ko.
HEB 2:10 Kanola Yesus ami taanse kabak-ami miit kaali, God ami mafek mafek alik iyo dotu kutii-lomda tiin mola tambal-kup tiinsu. Kemin, God ami aket fukunin kabak-ali, Nalmi man kesip yaapkan iyo foko-kulii tam abiil tikiin tiilila, iyo naso tambal-kup ilum o, kala-somdala, Yesus ayo angtiil yol dukum uyo kolala, uta taba-lomdu Yesus ami dong dokolula, tiltam ti titil-foko-lomda ata liip uyo kelala, unang tunum iyo tildang atamipla, God ayo yim-tama tildang alami miit tem kaa dakan-tabasa. Kemin, God ami angtiil yol Yesus ami kola tiknu kelase, kabak-ali tambal kanose.
HEB 2:11 Kanose kaami miit kaali, nokol utamum, Yesus ayo unang tunum iyo foko kutalang tiilala, God alami man alik-daap ken-umbip. Kemin, Yesus so, aa unang tunum iso, alik kiimi aalap kaali God maakup kaata-kup kemin, Yesus ayo aket dinim fanang dinim boko-lomda: Kiili nalmi nak-tunum kusal o, yakan-kan-umba.
HEB 2:12 Kemin, Yesus ali God ami bokola-lomda: Nali kapni mafek mafek kaa kanubap kaami sang uyo nalami nak-tunum kusal imi diim kawu bakayin-bam ale, kanumin miin tala-tala-ke-mokomip kaami diim kawu, kapni win uyo kufu-bamdila, kapni tong uyo baka-bam ke-mokomi no, yakase.
HEB 2:13 Yesus ayo weng ma boko kanum bokosa: Nali utami yi, God ali ti nali tiin molama kala, kala-somdila, din ami sikil diim unokomi no, kalalala, weng ma kaali boko-lomda: Kabi nali natamtam, nali God ata taba man kulaap-na tildak nalmi diim aba-silip kiili, naso alimal maakup bom-bulup o, kala kanum bokolase ko.
HEB 2:14 Man o, kalase kuliilile, fan tunum fatap kiita kemin, Yesus akal kanola tiltam tunum fatap nulultap kese. Kemin, kaami miit kaali, Yesus ayo utamaya, Setaan ata taba-lomda tunum iyo anula taanalip kala, kala-somdaya, Setaan ami titil uyo dimili tiil banuk o, kalalaya, Yesus ayo taansa.
HEB 2:15 Kulaa, kanola unang tunum ili suunkup tawaal diim kala laabip kiili, taan-yaamin atul kaata suun-bilipla, ilmi suunin uta taba-lomdu sok de-yimulin tap kesu. La, Yesus nata taandila suunin-taba-lomdu sok de-yimulin tap kesu uyo takan-tiiyilon o, kala-lomdala kanose.
HEB 2:16 Faneng kemin, ali ensel imi dong dokoyilon o, kalala kanose disa. La, Abraham ami God kaali, Fan kanolokoma kala, kalase ulultap kanun-umbup, nuta dong dokoyon o, kalalala kanoyase.
HEB 2:17 Kanolin kaa tifan kemin, Yesus ayo unang tunum imi aket fukunin uyo, Nakal kaal-ke-lomdi, olen-daaya-lom dong dakaayon o, kala kala-lom ale, nili ti awem tunum diilim ke God ami tiin diim kawu, unang tunum imi kalan suunkup dong dakaayila unang tunum iyo utamiwa yi, Ali ti kanola dong dokoyalala kanolan o, kaliwa kala, kalba. Kemin, Yesus almi angtiil so, kukup so, yak kanumin kanumin kabak-ali fan, unang tunum alik numi angtiil so, kukup so, yak kanumin kanumin ulultap kesa no. Kanolin kemin, kanita Yesus ami lak uyo duuliwa kawu, Yesus ata unang tunum kukup mafak diim kawu bilip imi ban uyo takan-tiiya-lomda yim-tama din God ami miit tem daayala, ali boko-lom: Kii nami unang tunum kemin, maan tiiyokomi disa yo, kalsa.
HEB 2:18 Kemin, yak mafek mafek mafak yaapkan uta taba-lomdu angtiil yol kukaan-bam ale, kaami tem kabang liip Setaan ayo dap-kuku-bam ke-balala uyo, utamse. Katale, ayo daak abase disa; ali dok kanolin dok kanolin uta taba-lomdu unang tunum imi yam-kukulon o, kalu kaali, ata ti yaap dong dokoyokoma no.
HEB 3:1 Nak-tunum kusal kipyo, God ayo abiil tikiin bombe kawu, kipkal weng umuuyila tiltam ti Yesus almi unang tunum alik-daap ke-silip. Kemin, nokol unang tunum imi bokoya-lomdup: Nuli Yesus ami lak uyo duu-sulup o, kalbup. Kemin ale, Yesus kaata God ata dap-tam awem tunum diilim ke-lomdala, nuli dong dakaayin-bam ilsa. Kemin, God ali kanose. Kemin, ipkal kanola Moses ami aket kaata-kup fukunin disa; ti Yesus ami aket kaata-kup talalu fukun-bamdipla yo!
HEB 3:2 God ali ok kaali, Yesus ami kolala ayo kambolase disa; ali suunkup kutal-fuku-lomdaya, sawaayak Moses ata God ami unang tunum imi iipyak tem kawu bomdala, suunkup iyo dong dakaayin-kup kemsa altap kaa kanumsa.
HEB 3:3 Kemin, kanola unang tunum miit ma ma kiimi awil-fakal maakup maakup kaa bom ilsip. Kemin, kanola tunum ayo ma man loop tap-tiila tiltam tunum miit dukumnu namti, am ma daanokomu diim kaa, kayak kayak iyo tunum miit imi win kaali, kufuyokomip disa kayi! Tunum man loop tap-tiise ami win kaata-kup kufolokomip. Kemin, ultap o. Mafek mafek alik kaa talalu kutiisa tunum kaa, God kaata-kup kemin, God ali utama yi, Yesus ali nimi unang tunum imi miit kayaakim kese nu, kalalaya, aket fukun utama yi, Am ma daanokomu kawu, Yesus ami win so kesa uta, uta uta ke-lomdula Moses ami win soyim kesa uyo kabaak banula kambolokoma uyo falelokomu kala, kala-somdaya, Yesus ami win kaata-kup kufonsa. Moses ali God ami okok kemin tunum kemin, God ami tunum miit imi iipyak tem kawu bomdaya, God ami ok uyo tabuu-bom ilsa kemin, ok kaali kulaa bom ilsa disa; ali suunkup kutal-fuku-bomdala, am ma daanokomu kawu, God ami weng ma bokoyokoma kaami sang kaata bakayinsa.
HEB 3:6 Kata, Kraist ali God ami man kemin, ali alalta God ami tunum miit imi dabom ke-lomdaya, iyo tiin mo-lomda ok uyo kambonsa dinim. Kanola ti suunkup kutal-fukusa ko. Nuli kanola suunkup aket alep fukunin dinim ken-un-bom utamupla, Fan God ali kukup tambal kaata-kup kuyokoma kala, kal-bomdup fiyaap-kup duu-bam fenin-kup kem-unup namti, God ami unang tunum ke-lomdupla, uyo kanu-mokomup. Kemin,
HEB 3:7 nuli atin ti God ami Sinik Tambal ami weng kaata-kup weng san-kaa-bamduwa kayi! kala God ami Sukon Tem kabak Sinik Tambal ayo boko-lomda: Kamala-kup kulu God ata kipni weng bakayinba. Kemin ale, ibi bokola-lomdip: Daa, nuli weng sanokomup disa yo, kal-bomdipla, sawaayak iltipni kawil-fakal imi fuut tabe-bamdip God ami weng kuyang saak tensip ulultap kaata kanumin disa. Lale, atin ibi talalu weng san-ilom ale, kutal-fuku-bomdiwa yo. Sawaayak kabak-ami tunum dinim disanang kawu bom-biisip kabaku, imi aket fukunin uyo boko-lomdip: Na, God ali titil dinim kesa kulaa, ti nokol ami weng kuluu kuyang saak ten-bam atafiin-unupla, ayo dok kanola dok kanola kala kalum i! kala-lomdip, God ami weng uyo kuyang saak ten-bamdip dap-kukumsip o, kala God ami Sinik Tambal ata bokoyase. Kemin,
HEB 3:9 God alalta asuk weng ma bokola-lomda: Disanang bokon kawu bom-bilip, kukup yaapkan dukum uyo kanuyin-bili bombii wasital ulmi-kup 40 kiita dakan-tiisip. Katale, aket uyo ma fuku-daa-lomdip yak kanolin kukup kaali, God alalta kanuba nu, ke-bisip disa ti. Kano kela bomdip, kanola nam-kukumin kaata-kup ti kanumsip.
HEB 3:10 Kanola kanu-biliwa, nali unang tunum kiimi aket atul awak dukum uyo kukaayin-bamdila, Moses ami bokola-lomdi: Suunkup bakap-nam-bamdip; Kabi numi kamokim disa yo, yaka-lom ale, boko-lom: Nuli kapni kukup uyo kutal-fukulokomup disa yo, kal-bom kemsip o, kalasii. Kemin,
HEB 3:11 siin nami aket fukunin kaali, Israel iyo foko kutama bital tawaal ukdaa kutiiyinsi kaltam tiiliya, iyo kawu kun-fan-kaamik o, ke-bisi. Katale, ililta taba-lomdip nami weng uyo kuyang saak tiip-nanbip kala kalalila, aket atul dap-tiip-nu weng uyo dukum-kup boko kuka-daa-lomdi: Nali kiili kanola kun-fan-kaamin baan diim uyo kulii tam unokomip disa yo. Kuno kamboyilila disanang bom-bilip kulu bom ilokomip o, kala Moses ami kanum bokolasii te! kalalala, God alta kanum bokosa.
HEB 3:12 Naktum kusal kipyo. Kanola kaltipni kayaak maakup ma aket fukunin mafak ma ami aket tem kawu ilu namti, ami God ami lak dakaamin kaali, kambola ti tiin kawong miit kayaak God ayo daang ukolokoma. Kemin, ti kipkal kaa talalu-utafii-bamdiwa kayi!
HEB 3:13 Kemin, ban kemin umi kukup uta ma taba-lomdu iltipni iipyak tem kabak-ali ma disa ibokolu weng san-ilomda, God ami weng uyo kuyang saak tiilokoma. Kemin, kamala kuluwu God ami boko-lomda: Kamala-kup o, kalase kaa disa kelin disa bombuu. Kemin, am ma daanokomu kaami diim kabaku disa ke-lokomu kaa, tunum kaali dok kano-somdala, ami aket kabak fal-sikilokoma disa. Kemin, ipta taba-lomdip weng yam-titil-saanin uyo ti suunkup suunkup kukaayin-bam naktum kusal iyo dong dokola una-tala-kemin-kup ke-biliwa yo, kala-somla; kemin,
HEB 3:14 kamasi kaptoop-ali nuli Kraist ami lak uyo duusup. Kemin, ami lak kaami aket kaata dukum-kup kola-lom yakyak una-bulup butoop numi taanokomup kuyaku dilit kala kalum o. Kanola bomdup kanumup namti, utamuwa yi, Nuli Kraist alami fan unang tunum tituun-kup kala, kala-lomdupla, kabak-ali kanu-mokomup.
HEB 3:15 God ami Sukon Tem kabak boko-lomdu: Nali kamala kulu ipni weng kala bakayinbi kemin, kibi bokop-na-lomdip: Nuli weng sanokomup disa yo, kal-bomdip iltipni kawil-fakal imi sawaayak dalaal duu-bamdip nami weng kuyang saak tiip-nam-bisip ulultap, kaa kanumin disa. La, ibi atin talalu weng san kutal-fuku-bomdiwa yo, kalasu no.
HEB 3:16 Siin sawaayak kaali, dok kanolin kiita God ami weng uyo weng san-ilomdip, fuut tabe-bam, God ami weng kaali kuyang saak tensip i? Kiiye? Unang tunum kamosinim God ami weng kabak-ali tifan kala kalalip, Moses ayo im-tamala bokon Isip kelalip unsip unang tunum kuliita asuk mulo God ami weng namti kuyak saak ten-bam biisip te!
HEB 3:17 Kemin ale, God ali kawanami aket atul dukum kaata, kukaayila-yaabala bom bii wasital ulmi-kup 40 kaa dakan-tiisa ni? Kiiye? Unang tunum ban uku-lomdip taansip kiita, God ali aket atul dukum namti imi kukaayinsa ko!
HEB 3:18 Kanu-biliwa kemin, God ali kanimi sang kaata, weng dukum kutii-lomda, kiili kun-fan-kaamin kaami baan diim kaa foko-kulii tam tiilokomi dinim o, kala kanum bokose nema? Kuliiye? Unang tunum God ami weng kuyang saak tiimin kiimi sang bokoyase kayi!
HEB 3:19 Kalu kemin, nokol utamupla yi, Kaali ilta God ami lak uyo duulin disa kemin, kaata God ami tawaal daam kuyinsa uyo kamboyila, tam funu-dakamin baan diim uyo ma tam unsip disa kayi! kala kalbup.
HEB 4:1 Kula, God ami weng ma kuka-daa Israel imi bokoya-lomda kanum bokose: Ibi kuno tam nami kun-fan-kaamin diim uyo tam unokomip o, kalase kabak-ali disa kelin disa; nulmi diim kulawu bombuu. Faneng kemin, God ali utamala, Tunum ma numi iipyak tem bombe ali ma kun-fan-kaamin diim uyo ma uktakan kutiila kala, kalokoma kaata, fan yim-bak-saanbi yim-bak-mo keyokoma. Kemin ale, nokol ti utafii-bam suun-bamduwa yi.
HEB 4:2 Kemin, God ami weng tambal uyo kun-fan-kaamin diim kaami sang kaali, Israel imi bakayin-biliwa, iyo weng san-kaamsip ultap kemin, nokol weng san-kaam-tabasup. Katale, ili God ami lak uyo duulin disa bomdiwa, ami weng uyo kuyang saak tii-bamdiwa, ilsip. Kemin, weng kaa weng san-kaamsip kabak-ata taba-lomdu dong dakaayinsu disa. Kemin,
HEB 4:3 unang tunum God ami weng kutiisa uyo tifaneng u, kalbup nuta fan kun-fan-kaamin diim uyo tam umbup o. Tam umbup kaali, tifan o, kala utamup kaami miit kabak-ali, sawaayak God ami mafek mafek talalu-kutiisa diim kabaku mafek mafek alik uyo talalu kutiili dinimnu no, kalalaya kawu, kun-fan-kaa-bamdala, unang tunum imi kun-fan-kaamin diim uyo dotu kutiiya tiinsu. Yale, mulo kaata God ayo kun-fan-kaamin diim kaami sang kaata boko-lomda: Nali aket atul dukum dap-tiip-nula, weng uyo dukum-kup kutii-lomdi Israel kiili, kun-fan-kaamin diim kaali, foko kulii tam unokomi dinim o, kalasii no, kala-lomdala,
HEB 4:4 God alta kanum bokose kala kalalupla, utamuwa yi, Numi suunkup kun-fan-kaa-mokomup kaami diim namti kaa buu nu, kebup kaali, dok kata disa: kulaa, God ami Sukon Tem weng ma uyo am fet diim kaami sang uyo boko-lomdu: God ayo kanumin mafek mafek alik uyo talalbi kutii kelalala, am fet diim kabak-ata kun-fan-kaamsa no, kalbu-kup,
HEB 4:5 Sukon Tem weng ma uyo kabak-ami sang kaata boko-lomdu: Israel kiili kun-fan-kaamin baan diim uyo, yim-bitam unokomi dinim o, kala kanum boko kesu no.
HEB 4:6 Kanola sawaayak kaali, God ami weng tambal uyo kun-fan-kaamin sang kaali, bakayin-biliwa, iyo weng sandiwa, God ami weng uyo kuyang saak tiimip kala, kala-somdala, kuno kamboyila tam unsip disa. Weng kaali, disa kelin disa bom-sulula, God ayo malo ma kiita kamboyila tam kun-fan-kaamin baan diim uyo tam unokomip.
HEB 4:7 Kula, God ali am daan-yaamin kusnum ma asuk kutii-lomda, am daan-yaamin kaami win uyo bokowa-lomda: Kamala kayi! kala tukuwa tiinsula, weng kala bokolup kaa, God ali Devit ami kukolala, God almi Sukon Tem kabaku dola kutii-lomda bokola ko: Kamala kaali, nali ipni weng kala bakayinbi. Kemin, ibi bokop-na-lomdip: Nuli weng sanokomup disa yo, kal-bom sawaayak iltipni kawil-fakal imi fuut-tabe-bamdip nami weng kutoop kot dakamsip ultap kaali kanumin daa! Lale, ibi ti atin talalu weng san kutal-fuku-bomdiwa yo, kalase ko.
HEB 4:8 Siin sawaayak kaali, God ali weng kutii-lomda: nami kun-fan-kaamin kaa kuyokomi no, kalase. Yale, kanola kamokim Josua ali kanolin kun-fan-kaamin uyo Israel unang so, tunum so, imi kuyase dinam, asuk mulo kaa God ali yak am daan-laamin kusnum kaami sang uyo ma bokosa disa. La,
HEB 4:9 Josua kaa kolin disa kesa kemin, nuyo utamupla yi, Kun-fan-kaamin uyo bom-bulula, God ami unang tunum imi fenbu kala, kalbup. Kemin, kabak-ali sawaayak God ami am fet diim kun-fan-kaamsa ulultap kaata ko
HEB 4:10 Kemin, tunum ma ayo tam God ami kun-fan-kaamin baan diim uyo una namti, almi okok keba uyo kambola-somdala, siin sawaayak God almi ok kelala, kun-fan-kaamsa ulultap ke-somdala, akal kun-fan-kaa-mokoma no.
HEB 4:11 Kanola tunum ali ma God ami weng uyo saak kuyang ten-bamda sawaayak Israel kasel imi kanumsip ulultap kem tal-bomda, atin kulii daak aba-lom maaklo win dinim ke-lokoma. Kemin, nokol ti titil-fak-daa tam ilomdup kun-fan-kaamin baan diim uyo tam unum o, kala-somla ko.
HEB 4:12 Kula, God ami weng kaali, mafek mafek tiin kawong bombuu ultap ke titil-biki-bom-bulula bombuu te! Kemin, nokol utamsup wan kong kaali, malii so malii so kaa taalin kaata, tunum ayo bikila yak iipyak tem kabak ban-ilomdaya, kun matim kuyak-dii kutal-daak-dii-kesu kuso, kun kulaaso aa, kun awal aye kuso, biki tam banokomu. Kemin, ulultap God ami weng kaali, atin bal taalin kemin, numi iipyak tem uyo bikila, yak aket tem kuso, aket fukunin kuso, biki-kutii kela balaya, God ami weng kaata numi aket tem so, aket fukunin so, umi fukunbu uyo um-kuku-bamduya, utafiin-umbu.
HEB 4:13 Kemin, God akal mafek mafek alik kiiso, unang tunum alik iso, iyo talalu-yimusa. Kemin, dok kano-som God ami tibi diim kaa ma yang sawaanamip dinim. Alik kulaa God alami tiin diim kulaali ti fatapsu. Kemin, am ma daanokomu diim kaali, God maakup kaata-kup numi kanolin kukup alik kanun-tabasup uyo yam-kuku-bam dik-daka-balala, kawu nusiik weng uyo yan-telokomup ko.
HEB 4:14 Kulaa, atin tifan, numi awem tunum diildiil o, kala numi dong dakaayin tunum ayo yak aba tam God ami tibi diim kawu bombe kaali, God almi man Yesus ata kemin, nuli Yesus ami lak duu-bomdup unang tunum imi bakayila-tal-unen-umbu kabak-ali talalu dukum-kup yikik-kutal-fuku tabuu-bomduwa yo, kala-somla ko.
HEB 4:15 Kemin, kukup mafak kaa taba numi yam-kukun-unbu, kabak-ali alik tam numi diilim awem tunum Yesus akal kanola dap-kuku kesuu. Lale, ali ban ma kesa disa; nuli titil tabin dinim ale, ban ukduulum o, ken-umbu. Katale, ali numi yim-kuku-balala, fiit-bam bong fakabup kaali utamsa. Kemin, ali ti numi dong dakaayin-kup laaba.
HEB 4:16 Kemin, nuli kaal dinim din God ami miit tem mepso uyo unokomup. Kemin, God ali kukup tambal kukaayin tunum kemin, nuli suunin disa. La, almi fanang kaata-kup din dik-daalupla, kukup tambal kaata-kup kuyilaya, kuluulum o, kala kemin, kanola kukup mafak kaata taba nuli yam-kukulokomu namti, God ata numi olen-daayinba-kup; dong dokoyokoma ko.
HEB 5:1 Tunum tiltam awem tunum diilim o, kala hetpris kemin ami kukup kaali, God ayo tunum awem imi iipyak tem kawu tunum ma ulduulaya, tiltam awem tunum diilim ke-lomdala, unang tunum imi abiin uyo kuluu-lom, God ami okok kela-laamin kaali, unang tunum fiyaap duu-bam mafek mafek kalawaali yaap ke God ami kolum o, kala ili kutal tiilip, awem tunum ata God ami kukaan-bam ale, nuli ban kemup kala, kalale, mafek mafek kutal tiiliwa, awem tunum ata anu-fuula kiin-taba-lom tang fuun-balaya, unang tunum imi ban kemin uyo God ata takan-tiiyim-bam kemin tunum ata ko.
HEB 5:2 Kanola awem tunum diilim ali tunum unang kusnum kayak kayak ililtap ke kaakal ti ban kemama. Kemin, kanola tunum ayo ma utamala kaali, Ban kemin tunum kala kala-somdaya, disa maaklo ban wakama namti, awem tunum diilim ata abiltap taba aket atul uyo kukaalokoma dinim o.
HEB 5:3 Awem tunum diilim kaali, ban kemama. Kemin, ali mafek mafek kiita, fuuli kiin-tabamnu God ayo ban wakamin takan-tiimak o, kala kaa unang tunum imi mafek mafek so, alami mafek mafek so, iyo fuu God ami kola ban kemin takan-tiimin o.
HEB 5:4 Kemin, awem tunum diilim o, kala hetpris ami okok kemin kaali, win so ke-lomdala, okok dukum uyo kemin tunum ma ayo alami aket fukunin kaata-kup taba-lomdala, ok kaa kuluu-lomda win sinoyim ke-yaaba disa. La, God alalta sawaayak Moses ami fik Aron ami naan-daala tiltam awem tunum diilim kesa ultap kela, tunum ayo naan-daalaya tiltam okok uyo kuluula nuumin o.
HEB 5:5 Ultap kemin ale, Kraist ali almi win kaata kufo-lomda tiltam awem tunum diilim kesa disa; ali God alalta kuno uldaa-dabuu boko-lomda: Kabi nalmi man yaan maak kemin, kamala kalawaali nalta ilmi diim kawu kabi ulduuli kapta nami mafek mafek alik iyo tiin molokomap o, kalase. Kemin ale,
HEB 5:6 God ami Sukon Tem ma ukol boko-lomdu: Kabi tunum awem ke-lomdap, Melkisedek ami awem tunum ke-bom biisa alaltap ke-lomdapla, awem tunum imi okok kemin uyo suunkup tabuulokomap o, kala-lom kanum bokosu.
HEB 5:7 Siin sawaayak, Yesus ami tawaal diim tunum ke bom ilsa kawu, God ayo dukum-kup aman dakaan-biliya, alta taba-lom ayo dong dokop-nala taanokomi kaami liip uyo dik-daa nam-buulama no, kalalala, dukum-kup naan-bam ale, ama-bam ke-bam ale, alami aket fukunin uyo kela-lomda, ayo Aalap God almi minlo tem unala ayo kanola kala, kala-somdaya, God akal ami beten keba uyo weng sansa.
HEB 5:8 Kemin, Yesus kaali God alami man la, angtiil yol uyo kuluu-kuluu kelaya, angtiil yol kuuta taba-lomdu Yesus ayo kukoluya, God ami weng-kup weng san-kaamin kaami kukup uyo utamda kaal tiklin kesa.
HEB 5:9 Aalap God almi aket fukunin kaata, Kaata kanolan o, anba uyo alik dinimnu kelalaya, alalta tiltam unang tunum imi yim-buu-laamin miit kayaak kesa. Kemin, alik kawanta alami weng-kup weng san-kaamip namti, akal iyo yim-buulaya tambal-kup suunkup suunkup ilokomip.
HEB 5:10 Kaa dok kata naa kalolip: God alta ulduu dap-tii bokola-lomda: Kabi awem tunum diilim ke-lomdap, Melkisedek ami awem tunum diilim ke-bom ilsa altap kelap o, akalala, kanum bokonsa ko.
HEB 5:11 Kemin, Melkisedek ami sang kaali, yaapkan bombe. Kemin, nokol kipni bakayikin yale, kipni aket fukunin kaa abiltap-siik utam-ilom kaal-ke-lokomip disa; weng kabak-ami miit kabak-ali fiit-bamdupla kukuyokomup te!
HEB 5:12 Kemin, kipni tiltam utam-ilomdip kukuyin tunum kemakin kaami am kaa siin kulu disa kesuu. Katale, kipni aket kola-laamin uyo mepkan kesip. Kemin, tunum ma ata taba-lomda kibi asuk God ami weng miit uyo kukuyin-balala, utamin o. Ibi kanola titil-fokolin ima kaa ma inbip disa; muuk kaata-kup imbip.
HEB 5:13 Aa nokol utamsup, Unang tunum alik kiili muuk kaata-kup imbip ki! man katip katip iltap ke-bomdiwa kemin utam, Awu, kaluuta kukup tambal e? kaluuta kukup mafak e? kalalip utafiin-umbip disa.
HEB 5:14 Yale, inin-inin titil-fokolin kaali, tunum yaap yaap imi kemin ale, kanolin ultap unang tunum God ami aket kolin dukum kiimi aket fukunin kaali, Awu, kabak-ali ti kukup tambal, kabak-ali ti kukup mafak kal-bomdiwa taka-kayak taka-kayak ke-bomdipla kawu, kaal-tiklin-kesip ko.
HEB 6:1 Kanola kamasi kaptoop ali kukuyin tunum iyo Kraist ami sang malo ma kaata kukuyin-bamdip, bokoya-lom: Kipyo, kipni aket uyo fal-siki-lomdip taan-yaamin kaami liip kaami kukup uyo alik daang ukuwa-lom God ami aket kaata kolin o, kala-som ale, oksam wakayin akal kusnum akal kusnum kemin, sikil kuyak tunum ami dabom diim tii beten kemin kaami sang bakayin, aa yak alik taansip iyo asuk tam tiinokomip o, yakan-kaa-bamdip, yak ban kemin unang tunum ili God ata yim-bak-saanbi yim-tii-lomda, atin sok laabi yim-tiilokoma no, kal-bomdip kukuyinsip. Kemin, mep kanolin weng kaa kamasi kukuyinsip kaami miit kabak-ali fiit-bam utam-yaamin disa; ipkal kaali talalu utamsip. Kanolin weng uyo maso ma suunkup ibi bakayokomup disa. Katale, God ami weng kusnum ma bombuu kuuli fiitmin tap so, ale kamala kaata nokol titil-fak-daa fiitmin weng ukol ti kanola utafii-bam kanu-bulupla, numi Yesus ami lak dakaamin uyo titil-fak-daaluk o!
HEB 6:3 God ayo dong dakaayin-balala, mafek mafek fiitmin uyo kaal-ke-lokomup namti, kabak-ata kanu-mokomup ko.
HEB 6:4 Kanola unang tunum alep tap maakup tap iyo God ami yokon dawong iilfola falala-kalin diim tildang ilom God ami weng tambal uyo utam-som ale, God ami mafek mafek masiim kuyase uyo, kuluubip-kup, alik maakup iyo kuno God ami Sinik Tambal ayo kuluu-som ke-lomdip, God ami weng uyo um-kuku utamiwa yi, Kabak-ali atin ti tambalkan u, kalaliwa, God ami tiin-saan-unokoma kaami titil uyo utam-som ke-silip. La, tunum kanubip kii, God ami daang ukola-lomdip ami lak ayo kelip namti, nuli dok kano-somdupla mep kii dong dokoyulupla asuk maso imi aket kaa fal-siki-lom kuu tildang talokomip disa. Kemin, kanolin kukup kaami kanu-mokomip kulaali, yakal God ami man ayo aket mafak kukaan-bam asuk dibii yak as diim sil bikilin tap keliwa, kayak kayak iyo Yesus ami weng mafak uyo kukaalokomip.
HEB 6:7 Unang tunum nuli tawaal alaltap kemin suunkup om ayo tildaak abe-balala, tawaal uyo tambal-kup ma bom-bulula, unang tunum imi inin-inin san iyo dikibip uyo dong dakaayin-buluya kemin, kabak-ali God alalta tawaal tambal kalawaali tiin saan-bamdala inin-inin uyo kukaayila-tabasa te!
HEB 6:8 Katale, kanola tawaal kalawaali tikiin mafak sole, sok lingliing so, kanolin kiita-kup tiltam talemip namti, tawaal kalawaali disapnu. Kemin, mepso God ayo ku-mafak fuuli dinimnuk o, kala-lomda, wing uyo kulaala taba kiin-abokomu ko.
HEB 6:9 Atin ti nalmi nak-tunum kusal kipyo, God ami asuk daang ukola kela yang banemin kaami sang kabak weng uluum kuyimbii. Lale, nali ti fan utamsi, ibi ultap kelip mafak-nokomip disa. God ata ibi dik-daa yam-buu-lomda, yim-tama tam almi abip unokomip.
HEB 6:10 Ibi God ami aket uyo kola-silip. Kemin ale, uta taba-lomdu ibi kaata kanumin o, ke-bulula, Kraist ami unang tunum iyo dong dakaayila-tabasip. God ali kukup tambal kaata-kup kukaayin tunum kemin, dok kano-som God ali kipni okok ke-bam bom-bilip kaami aket kaali lokolokomu dinim. Ti yim-tama tam alami abip daalokoma.
HEB 6:11 Numi aket fukunin kaa, Alik ibi kanola ti titil-bikilin-kup ke-bomdiwa, kipni God ami lak dakaamin uyo dukum-kup kutal-fuku-bom ale, God ami yim-buulokoma kaata fen-bam kanum kutama una-biliwa, kutoop kipni dinim ke-lokomip kuyaku dilit kalin o, kala-somla ko.
HEB 6:12 Kanola unang tunum maakup tap alep tap ita God ami lak duu-lomdip asuk abiltap-siik daal tabemin disa ke-bamdip, alami ok uyo ti kutal-fukulin-kup ken-umbip kiili, kabak-ami liip diim kawu mafek mafek alik sawaayak God ami boko-lomda: Nalmi man kep-ninsip ita-kup kuyokomi no, kalsa uyo fan kaa kuluulokomip. Kemin, ipkal ti kanola daal tabemin disa kela bom la kiimi kukup kaata kuluu kutal-fuku una-biliwa yo.
HEB 6:13 Kemin, dok kanolin tunum ata taba-lomda God kaa dap-kan tii-lomda tam bansa disa; God ali tunum kaami win kaata kufo-lomda boko-lom: Kulaali nitaba. Kemin, tituun-kup weng kaata-kup bakabi no, kalokoma disa. Kemin, siin sawaayak kawu, God ata Abraham ami weng kuka-daansa uyo, almi win kaata-kup dafo-lomda weng uyo kutii bokola-lom:
HEB 6:14 Nalta ti God kemin, nali weng uli atin tituun-kup weng bokop-tokomi: Nami kukup tambal kukaap-tin uyo ti sakbaalim dukum, kemin ale, nata taba-lomdi man ayo dup-tila kapni man loop kaptoop ali yaapkan ke-lom dukumnu kep-talokomi no, kalsa ko.
HEB 6:15 God ayo weng kuka-daa-lomda kanum bokolaya, Abraham ayo abiltap daal taboma dinim; ali fen-bam biilaya, mulo kawu God ami man kup-tokomi no, kalsa uyo kolaya duusa ko.
HEB 6:16 Kemin, unang tunum numi boko-lomdup: Nami weng bakabi kabak ti atin tituun-kup bakabi no, kalin kaami kukup kaali kanumin kemin, nuli weng aal diki-buluwa, tunum ma ayo God ami win kaata kufo-lomda boko-lom: God ali nali nitaba. Kemin, atin tituun-kup weng kaa kaata-kup bakabi no, kala namti, kaa utamuwa yi, Nak-tunum kaa fan bakaba kala, kala-somdupla, nuyo weng aal dikibup uyo kulaalokomup.
HEB 6:17 Siin sawaayak kaali, God ami aket fukunin kaayo, Nuli tituun-kup tabin kukuyilila utamiwa yi, Awu, fan God ami aket fukunin uyo fal-siki-du-siki-ke-mokoma disa kala kalin o, kalalala weng alep ma kuyak-mim-daa Abraham ami bokonsa weng ma kabak-ata kutii boko-lomda: Kapni man loop iyo dong dokoyokomi no, kalba-kup; ale ma kaata kuu yam-titil-saanin weng kaa boko-lomda: Nali ti God kemin, weng kaa kuka-daap-ti uyo tifan kutal-fuku-bom ili no, kala kanum bokosa ko.
HEB 6:18 Kalsa kemin, God ami weng alep uyo fal-siki-du-siki-ke-lokomu dinim ale, God ali ti dok kanola mep weng alep uyo ma lolokoma disa; nokol utamuwa yi, God ali boko-lomda: Kapni man loop o, kalsa kaali Israel iso, Kristen unang tunum alik iso, numi sang kaata bokoyase nu, kalalupla, bina tildang God ami miit tem un-ilomdup sawaanupla, weng alep uta taba-lomdu numi aket tem kaldak-ali ku-titil-moyasu. Nuli God almi weng kuka-daa numi dong dokoyokomi no, kalsa kaami fiyaap kaata duu-bam kuu kuyak aket tem daa, fen-bam bom-bulupla yo!
HEB 6:19 God ami mafek mafek sang ma kaa boko-lomda: Fen-biliwa yo, kalsa kabak-ali numi tal-unemin, tiin-yaamin kaami dong dokoyu titil-tabemin namti kabuu. Numi fen-tabasup tunum ali Yesus ata; awem tunum diilim maakup ata ilim kaal dukum kutiisip kaami balang tem kaptam liip tam God ami am abiin awem unen-umba. Kemin, Yesus ata altap kelaya, tam God ami tibi kun diim tam unsa.
HEB 6:20 Kemin, Yesus ami tiltam awem tunum diilim kela suunkup tunum kesa kaali ti, Melkisedek alaltap ke-lomdala kemin, ali numi dong dakaayon o, kalalaya, asiik dusiin-daa tam am awem kaptam tam unsa ko.
HEB 7:1 Melkisedek kaali, abip dukum ma Salem kaptam-ami kamokim king ke-som ale, Atin Win Tibin God ami awem tunum pris o, kebip. Kemin, sawaayak kawu, Abraham aso, alami ok fukulin tunum iso, iyo king atalingkal ma kiimi tunum so, waasi din-bomdipla, king iyo anu-lomdip, asuk keya abip unum o, kalalip una-bilipla, Melkisedek ayo din Abraham ayo atama dabaal tulu-tulu ke kulaali, ayo sikil kuyak Abraham ami dabom diim tii God ami beten kamaan-bam kanum bokola ko: Kabi mep tunum kalawaali kukup tambal-kup kukaan-balawa yo, kal-bomda beten kema.
HEB 7:2 Abraham ayo tam waasi-miin imi bung mafek mafek alik dakabi kulii-talaba iyo, takelbi sikip nakalkal e kala kutii kutii kela yakyak kebi sikip bitikal kabak-ata kutiiba-kup, yak sikip maakup ma kabak-ata Melkisedek ami kola kesa ko. Kemin, Melkisedek o, kala fal-sikilokomup kaali tituun-kup tabin kukup kaata-kup, kulii-taba-bomdala, king kesa no, kalule, aa Salem kasel imi king kemin, kaami miit kaali, ali ti balili-kalin aket fukunin kukup kaata, kutal-fukulin kemin king kesa no, kala kanum bokosu ko.
HEB 7:3 Kanola God ami Sukon Tem kabak-ali ma boko-lomdu: Melkisedek ami awak aalap imi win aye, ami awil-fakal imi win aa, ami awak duusu kaami sang, aa yak ami taansa ami sang aye uyo ma bokosu disa. Kaali ti God almi man Yesus alaltap kela awem tunum ke suunkup ilin tunum alaltap ke-bomda biisa ko.
HEB 7:4 Ti kipkal Melkisedek ami aket uyo fuku-daalin; ali tam banin ke-lom win tibin tunum kemin kanola numi awaalik Abraham ayo waasi dinan-un-bomda yan-fakabi yim-tii keyila, imi mafek mafek tambal tambal kiita dakabi kuliila talaba iyo takelbi kutii sikip nakalkal kela talalu kutii kela yak sikip maakup ma kabaak kaata-kup Melkisedek ami konsa.
HEB 7:5 Ale malo kiita Livai ami man loop kaptoop-ali ti awem tunum pris o, kebip, kiimi ok kemip kaami lo kuuli bokoya-lomdu: Livai tunum kibi mafek mafek san kaa dikimin disa; aptum Israel kasel imi inin-inin iyo baan nakalkal imi maakup ma kaata-kup kuluu-yaamin o, kalsu. Kemin, Israel kiili ti fan ilmi kayaak ale, Abraham ami man loop. Yale, Livai tunum ili taba ilmi kayaak imi inin-inin kaa sikip maakup kaata-kup kuluu kuluu ken-umbip.
HEB 7:6 Kata, Melkisedek kaali, Livai imi man loop disa; Abraham ami baan nakalkal fak-tiilaya, Melkisedek ayo baan nakalkal imi maakup kabaak kaata-kup kuluusa. Kemin, kanola siin kaa God alta Abraham ami weng kuka-daala kabak kanolokomi kayi! kala dong dokolaya, Abraham ayo win soyap kesa. Katale, Melkisedek ata taba-lomda ami sikil uyo kuyak Abraham ami dabom diim tii-lomda God ami dik-daala ko: Kapyo, tunum kalawaali ti kukup tambal kup kukaan-balawa yi, kala beten kensa.
HEB 7:7 Nokol utamsup Juda-miin numi kukup kaali, tunum ayo sikil kuyak tam aptum ami dabom diim tii God ami aman dakaan-bam bokola: God kabi kukup tambal-kup kukaan-balawa yo, aka namti, sikil kutam aptum dabom diim daala ata tam lo unin tunum ale, ami dabom diim kawu sikil kuyak tiila ata tildaaklo so kelin kemin, Melkisedek ali kanosa. Kemin, ata tam lo unin ale, Abraham ata kuldaaklo so tiilin ko.
HEB 7:8 Livai imi tunum tiltam awem tunum kesip kiili, mafek mafek baan nakalkal fak-daalip kala kalbip-kup, tam sikip maakup ma kabaak-ata-kup kuluu-yaan-unbip. Kemin, kuliili taan kulila tabemin tunum ita yale, Melkisedek ali mafek mafek baan maakup kabaak kaata-kup kuluu-yaamin tunum ale, taan-yaamin dinim; ali ti suunkup tiin kawong ilin tunum o. Kanola God ami Sukon Tem uyo kaami sang kaali bokosu ko.
HEB 7:9 Numi weng yaap keyu bokolokomup ma namti kala buu. Livai imi tunum kiili, sikip maakup kabaak-ata kuluu-yaamin tunum yale, Livai ami awak uyo duulin disa bom-sulu Abraham ami mafek mafek ayo baan nakalkal fak-tii-lomda sikip maakup kabaak kaata-kup kuluu Melkisedek ami konsa kaali, Livai ata taba-lom Melkisedek ami kolin tap kesa uyo ali Abraham ami man loop
HEB 7:10 kemin, kanimin o, kalala kabak konsa? Kabak-aye? Livai kaali, Abraham ami angtiil anung maakup kemin, kamasi kaptoop-ali awak uli Livai ayo duulin disa bom ilule, Melkisedek ayo liip kawu, Abraham ayo dabaal tulu-tulu kelipla, Abraham ayo baan mafek mafek nakalkal kaami maakup ma man loop Livai ami win diim kawu Melkisedek ami konsa. Kemin, Melkisedek ata tamlo so unin ko.
HEB 7:11 Sawaayak kawu, God ayo Livai tunum iyo ulelnaya, tiltam awem tunum o, kala pris ke-bisip kabak-imi diim kawu ali almi Lo uyo Israel-miin imi kutiiya-lom kuyinsa. Livai kayaak imi awem tunum kiimi olti anu-lom fuulip kiin-tabemin kaali, fan titil-foko-lomdula, unang tunum imi dotu kutiiyilula, tiltam God ami tiin diim kawu tambal-nokomip disa yo, kala-lomdala kemin, God ayo awem tunum o, kala pris ayo kusnum ma uldaa-dabaala mafiing talse. Kemin, ali kamosinim ami tunum awem Livai ami man loop Aron alaltap disa; ali ti Melkisedek alaltap ko.
HEB 7:12 God ami tunum kaa dabaala talse kaali, numi Kamokim Yesus ata kemin, kulaa nokol utamsup taa; kaali Livai imi tunum disa; ali tal miit kusnum mep Juda imi tem kaptoowu tiltam fatawase. Kemin, kaali, Moses ayo boko-lomda: Juda imi tunum miit kaptoop-ali ma tiltam awem tunum kemin o, kalsa disa. Kiili siin kaa ma God ami lotu am diildiil kaami mafek mafek God ami kolum o, kala kutama din kuyak fuulip kiinin kaami baan diim uyo ma kanu-bam okok kemsip disa. La, God ayo utamala, Yesus kaa Juda imi man loop ke-lokoma kala, kala-somdala, kulaali tunum awem kemin kukup uta fal-siki kutiila tiltam kusnum kesule, lotu kemin kaami lo kukal kusnum kuka-daa kese no.
HEB 7:15 Nokol aket fuku-daaluwa, awem tunum kusnum Yesus ayo Melkisedek alaltap kela tiltam talse kala kalup ayo nami weng kaa bakabi kaami miit uyo atin ti talalu uta-mokomup.
HEB 7:16 Weng kanum bokolu uyo tifan o, kala utamsup, kaa dok kata naa kalolip: Lotu kemin kaami lo ma Yesus ami bokola-lomdu: Kabi Juda kayaak ita tamu-silip. Kemin, kabi tiltam awem tunum kelalap o, kalsu disa. Almi suunkup ilin taan-yaamin dinim kaami titil kaata taba dap-titil-diilula, tiltam awem tunum kesa. Kemin,
HEB 7:17 God ali numi Kamokim ami bokola-lomda: Kabi Melkisedek ami awem tunum ke-bom biisa alaltap ke-lomdapla, awem tunum imi okok kemin uyo suunkup tabuulokomap o, aka-lomda ansa.
HEB 7:18 Lotu kemin kaami lo kuuta ma taba-lomdu mafek mafek uyo ma talalu kutiiluya, tiltam atin ti tambal-kup ma kesu disale lotu kabak-umi lo kabak-ali titil dinim kemin, dok kano nuli dong dokoyimu disa kelu kala, kala-somdaya, God ayo siin lotu kaami lo kaa tak-binala yak banula, liip kusnum ma kabak-ata kukuyilaya, kulaali uta tambal ma kele uta uta ke-lomdu siin sawaayak lotu kaami lo uyo kabaak banula kewasuu. Kemin, numi kabang liip din God ami mepso unokomup kaami liip namti kaa bombuu no.
HEB 7:20 Kemin, sawaayak kaptoop-ami tunum tiltam awem tunum ke-bom biisip uyo, God ami weng atin ti titil-fak-daa-lom fan kayi kala-lomda ulela-laamin disa nosa. La, disa laap ta kuluwu ulelnaya, tiltam awem tunum ke-bam ilsip. Lale,
HEB 7:21 kamala kalawaami God ata Yesus ami uldaa-dabuula tiltam awem tunum kese kaali, disa laap ta kulu uldaa-dabuusa disa. God ali almi win awem kaata dafo-lomda, alami weng uyo dap-titil-diiluya, Yesus kaa uldaa-dabuula tiltam awem tunum kelaya kawu, God ayo bokola-lomda: Tunum dukum nata titil tibin weng uyo kuka-daali. Kemin, maso asuk aket fukunin kaa fal-siki-du-siki-ke-lokomi disa; kabi ti awem tunum imi okok kemin kaali, suunkup tabuulokomap o, aka-lomda ansa.
HEB 7:22 Kemin ale, almi win awem kaata weng bak-tam-daa kanum bokosa kaata-kup taba-lomdu kukuyiluya kemin, utamuwa yi, Yesus ata liip kese kala, kalbup-kup, God ami kama weng kutiise kaali ti, atin tambal dukum ke-lomdu God ami sawaayak sawaayak weng kutiisa uyo, kabaak banu kewasuu kala, kalalup kuu utafiibup ko.
HEB 7:23 Siin kaali, tunum yaapkan iyo ma isiik awem tunum pris e kela kela kemsip. Kemin, kaami miit kaa dok kata disa: Kiili suunkup ilin tunum disa; kuliili tunum kemin utamduya, taan-taan-kem-talan-solip. Yale,
HEB 7:24 Yesus ali ti suunkup tunum kaami tunum awem imi okok kemin kaali ti, atin amiit ok kaata suunkup kutal-fuku-laaba.
HEB 7:25 Ali suunkup ilin tunum kemin, kaami win diim unang tunum iyo tal God ami mepso tilip kaali, kamala kalawaso, siin kaptoop kaptoop unu kuso, ali ti suunkup ulduu-yim-taldang daa-daa ke-bamdala, God ami beten kamaan-balaya, unang tunum kii dong dakaayin-kup ken-umba no.
HEB 7:26 Yesus ali ti tunum tambal kemin, ami diim kaali, ban kemin katip maakup so ma ami diim kawu bombuu disa. Ali fakne dinim ale ban dinim; kaali ti akal almi man kusnum kanolin kemin, God ayo uldaa-dabuu-lom dafolaya, abiil tikiin kawu Aalap aso alim maakup bom-bilip, yak kanolin awem tunum diilim alta nuli ti yaap dong dokoyama no.
HEB 7:27 Ali siin kaami tunum awem diilim ililtap disa kemin, numi dong dokoyama no. Sawaayak kaami tunum awem diilim kiili am maakup e kala daan daan ke-balaya, suunkup mafek mafek ayo kulii-tal kuyak fuulip kiin-tabon o, kala-sala, God ayo dong dakaayin uyo kanumin-kup unan-solip. Kemin, kamosinim kaali, tal ilmi ban kemin usiik mafek mafek uyo kuyak fuulip kiin-tabamnule, God ayo imi ban kemin uyo takan-tiiyilale kawu, unang tunum imi ban kemin utale, mulo kawu mafek mafek uyo kulii-tal daalipla kuyak fuulip kiin-tabamnula kawu, imi ban kemin uyo God ata takan-tiiyin-bam ilsa. Katale, Yesus ami kanose kabak akal alami kusnum ali ti ban kemin dinim. Yesus ali liip maakup kaata-kup, mep awem tunum imi kanun-umbip ulultap ke-somdaya, mafek mafek uyo ma kuyak fuusa dinim. Alami angtiil kaata God ami kolon o, kala-somdala kuno kamboyila aalip saaknaya, God ayo ami Sinik kaa dabuuse.
HEB 7:28 Kemin, Moses ami Lo ta taba-lomdu, tunum titil dinim ti nulultap kuliita ulelnula tunum awem diilim ke-bom ilsip. Yale, mulo kawu God alami win kaata-kup kufole, almi weng uyo ku-titil-mo-lomdaya, weng kulaa almi man uldaa-dabuulala diil awem tunum diilim kelale, kulaali God ayo man ayo tikna kambolaya, yak kanumin kanumin alik kuuli Yesus almi sikil diim kabangu talal-balaya tildang talen-umbu ko.
HEB 8:1 Mep weng kaa bakabup kaami miit sakbaalim dukum kaali, kala bombuu; nuli kanolin tunum awem diilim o, kala hetpris o, kalbip ayo bombe. Kemin, kaa tam abiil tikiin kaptam-ami king dukum God ami miit tem tingtup kabangu tiin bomdaya,
HEB 8:2 God ami am awem tituun kaptamu okok ken-umba. Kemin ale, am awem kaalile, tunum ata ma desa disa; Dukum alalta-kup almi am tambal kaa desa.
HEB 8:3 Kemin, awem tunum diilim alik kiimi ok kaa mafek mafek tambal kaa God ami kukaan-bam ale, unang tunum imi olti kulii-tal tiilip ayo anu fuulip kiin-bulu, God ata taba unang tunum imi ban kemin uyo takan-tiiyim-bam kemin, Yesus akal kanola tal aba tam tunum awem diilim kesa utamduya, ami ok kakal kanola mafek mafek God ami kukaalin o.
HEB 8:4 Tunum awem iyo tawaal diim kalawu bomdiwa, Moses ami Lo kaata-kup kutal-fuku-somdipla, mafek mafek akal alik akal alik uyo God ami kukaala-laabip. Katale, Yesus ami ok kabak-ali ukol ulmi kusnum o. Ali tawaal diim kalawu bombe dinam, ali tunum awem diilim imi ok uyo disa. Yale, ali abiil tikiin kawu bombe.
HEB 8:5 Tunum awem alik iyo lotu am diildiil abiil tikiin lotu am bombu kaami sinik ultap kaami ok fukun-umbip kaata kukuyula utamuwa yi, Awu, Yesus ali abiil tikiin kawu bomda tunum awem imi ok tabuumin kaami ok uyo kutal-fukuba kala kalbup. Kemin, God ata Moses ami bokonsa ulultap kemin, kulaata Moses ayo lotu kemin sel am ma delon o, kem-salale, kulaa God ayo bokola ko: Kawo! tambal-kup talalu utafii-bamdawa yi. Kaa sel am lotu am delokomap kaali ti, abiil tikiin kaami lotu am kaa amdu tikiin kukup-tasii tap ke-lomdap talalulan o! akase. Yale,
HEB 8:6 Kraist ata tal aba tam tunum awem kemin kaami ok kaata kuluu-lomdaya, tunum awem kusnum alik imi okok kemin uyo yim-baala kabaak baniwa, kamboyase. Kemin, God ami kama weng uyo boko kutiise kaami diim kawu, kabak-ali Kraist ata taba God wak-kaptoop daa-som kuno unang tunum imi wak-kamet daa-som kela iip kaldaaku tola-lomda unang tunum yim-tamala din God ami miit tem daayon o, kala kanose te! God ami kama weng boko dal mo kutiise kaata, taba-lomda God ami weng siin de-kutiisa kuluuli, kulaak bansuu. Kemin, kabak-ali ti God ayo boko-lomda: Siin sawaayak kawu, nami weng de-kutiisi uyo, unang tunum iyo dong dokoyasu. La, unang tunum iyo dong dokoyilila atin ti tambal-kup ilokomip o, kalase no, kaami tem kabang liip almi kama weng boko kutiise uta, titil-fak-daaluya kewase. Kemin, kula tambal-kup bom-bulup uta taba-lomdu siin kaami bom ilsip kuluuli, kabaak ban-ilomdu win dinim kewasuu ko.
HEB 8:7 Kemin, siin sawaayak weng kutiisa kabak-ali alik ti tambal-kup tiinsu dinam, God ayo weng kusnum ma kutiilon i! kalsa disa.
HEB 8:8 Yale, God ali utamala, Sawaayak kawu weng ma kutiisi uyo, unang tunum ili atin tambal-kup dong dakaayin dinim u, kalalaya, unang tunum imi ban kemin uyo ku-fatap-daaya-lomda, alami Sukon Tem kabak boko-lomdu: Dukum nata bokolokomi. Kemin, weng san iliwa. Siin am ma daanokomu kaa, nali Israel unang tunum so, Juda unang tunum so, kuyaku-lomdi weng kusnum ma de kuka-daalokomi. Kemin,
HEB 8:9 kama alokso weng kala de kuka-daalokomi kaali, sawaayak kiimi awil-fakal iso, weng de-kutiisi alaltap disa; sawaayak kawu, nali weng kaa de-kutii-lomdi unang tunum ili ti tambal-kup tiin mo yim-tamali am bokon Isip kela unsip. Yale, weng de-kutiisi umi weng uyo ma kutal-fukulamip dinim kelip kala, kalalila, kulaata Dukum Nayo daang ukuyasi.
HEB 8:10 Kanola Dukum nalta weng kaa maso bokoyon o, kali. Kemin, siin am ma daan tiltam tulula, nali Israel unang tunum iso, weng kusnum ma kuka-daalokomi. Kemin, weng kaami miit namti kala buu. Nami lo akal alik ma kaami sang uyo kuyak imi aket tem daaya kabaku dola kuyale, nata imi God kelile, ita nami unang tunum kep-nip ke-lokomip.
HEB 8:11 Am kaa daan tiltam tabokoma kaali, unang tunum alik, fasel so, man so, atin talalu God sakbaalim nayo, nita-mokomip. Kemin, tunum maakup maakup alik ili dok kano imi aptum kusal aye, fik so, niing so, imi kukuyin-bamdip, Kabi Dukum ayo atamawa yo, ke-mokomip disa Yo.
HEB 8:12 Nami kanu-mokomi kaami miit kabak-ali, nali olen-daaya-lom imi kukup mafak so, imi ban kemin so, uyo takan-tiiyiliya, kabak-ami aket uyo maso ma fukunokomi disa yo, kala God ayo kanum bokosa ko.
HEB 8:13 God kaami kama alokso weng ma kuka-daalokomi no, kala kanum bokosa kaami sang kaata kemin; siin kamasi weng kutiisa kuluuli disapsu no, kalsa. Kemin, kaali mafek mafek men disap balal-tibin ultap kem-tabu kemin, mepso ilanin tap ken-un-bom ale, ilom atin ti disa ke-lokomu no.
HEB 9:1 God ami kamosinim weng kutiisa kaa lotu kemin kaami kukup alep tap maakup tap ayo Israel imi kanumin i! kala bokoyilale, kulaali lotu am uyo tawaal diim kulu kanu-bamdiwa, dinan-solip.
HEB 9:2 Kemin, lotu am uyo, sel am-kup de-lomdip ilim atin sakbalim dukum ma iip kulu kuk dii-lom kulaalip tildaak abamnula, anung abiin anung abiin kelin kemin, kamasi abiin tam unemin kaptam-ali ilaam iilfo kutam tiimin kaami baan sole, tunum awem imi ima balet kulii-tal tebol diim tii God ami kukaalin baan so be kemin, abiin kaptam-ami win baka-bamdip: God Ami Abiin o, ke-bisip.
HEB 9:3 Ale, abiin anung ma ilim kuk diilin kaami iipyak tem kaptam bombuu kaami win kaata boko-lomdip: Atin ti God Ami Abiin Awem o, kala kanum baka-bam kemsip o.
HEB 9:4 Abiin kaptam-ami mepso kawu tebol ma bombuu kaali, tebol kuu as so, gol lamlaam-kup langa-langa tambal-kup tabasa so, kiita kuluu dotuusip. Kemin, tebol akiim kabaaku as dan aye as kon aye ayo kuyak daalip kiin-bamda tang tambal ayo kiin-balala, God ayo fiyaap duumin kemin; abiin kaptam-ali God ami weng de-kutiisa kaami mafek mafek kiili, bokis tem kabaaku kutiilip bom-bilip, God ami weng kutiisa kaami bokis alik kaami tip diim kaali, gol ta alik akiisip. Kemin, kaami iipyak tem kabaak-ali ket ma gol ta kuluu talalu kutii-lomdip sawaayak ima mana fuu-bam in-bisip kaami anung kaa ket tem kaptoowu abuusip kasole, Aron ami katil sawaayak kawu, namnom tabasa so, aa tuum kom alep ma God ami weng kutii dolsa kiiso, kabaak bom-bilip.
HEB 9:5 Kanobip-kup, tam bokis tip diim kabaaku ensel alep ma talalu-lom tiisip; alep iyo kukuya-lomdip God ali am kaltamu bombe no kemin o, kalalip dotu kutiisip. Alep imi minlo kabaak-ali taloop kiim sing binalip daak abon kala-sala, God ata imi ban kemin kaa takan-tiiyilin. La, kamala kaatale, nali mafek mafek kaami miit kaa talalu ifi dik-toop-daa bokoyokomi disa ko.
HEB 9:6 Kanolin mafek mafek kaata talalbi kutii-biliwa, tunum awem tunum pris iyo diil abiin diildiil o, kala God ami abiin awem uyo tam ilomdip ilmi okok uyo tabuu-bisip. La,
HEB 9:7 yak abiin ma kaptoop atale, tunum awem diilim o, kalbip pris kaata-kup tam am unemin kaptam-ali wasital maakup maakup ami diim uyo du maakup e kala tam tiltam ke-bala am tiinu kela kela ke-bisa. Kemin, kabak-ali disa iip kaa tam unemin dinim; ti toloop ilem kaata-kup bokolula ali tam God ami kolale, awem tunum diilim almi maaklo ban wakan-tal-uneba so, unang tunum imi maaklo ban kema tal-unebip so, kaali God ata taba-lom takan-tiiya takan-tiiya ke-bisa.
HEB 9:8 Unang tunum iyo God ami abiin atin awem dukum kaptam unemin kaali, God ami Sinik Tambal ayo numi kukuyala kaata utamuwa yi, Sawaayak kawu, weng kutiiya-lomda, Unang tunum God ami abiin kamasi kaata-kup tam aba-lomdip God ami win uyo kufolik o, kalsu uyo, disa kelin disa bom-sulula kemin, numi tam God ami tibi diim unemin kaami liip kaali, atin tiltam fatap-nin disa kesu no, kalsup.
HEB 9:9 Lotu kemin sel am uyo sinik faldak-tii-lom numi kukuyulule, nuli am kula daansu uyo numi utamuwa yi, Juda kasel imi lotu kemin kukup kaa unang tunum kiili, God ami fiyaap duu-bam aa, ilmi ban kemin kaami aket uluum kaata fukun-bamdip, mafek mafek uyo kulii-tal lotu am kaptamu God ami kukaala-yaabip. Yale, yak kanolin mafek mafek yaapkan uta taba-lomdu, lotu kemin unang tunum imi aket tem kabak diing daaya-lom talalu-yimuluya, tiltam tambala-lom mokso keyamu dinim.
HEB 9:10 Kanola God ami mafek mafek kukaalin kaami kukup kaali, ima inin kaami mafek mafek sole, ok inin kaami mafek mafek so, aa yak disa ukol ulmi miit ma ma diingmin kaami mafek mafek so, kiita kemin kaa angtiil tiin saanin kaami lo kaata-kup aket diliit-saanin dinim. God ali angtiil tiin saanin kaami lo kuuli kutiilaya, kutal-fuku kulii-una-bilipla, umbutoop lotu kemin kukup alokso ma uyo ma dotuuli asuk tiltam tambal ke-lokomu kuyaku dilit kelin o, kalalaya, kuka-daasa ko.
HEB 9:11 Katale, kamala kuluwaali Kraist alta tiltam awem tunum diilim o, kala hetpris kese. Kemin, God ami kukup tambal numi kuyase kaali, Kraist alta kulii-talsa. Kemin, tal aba-lomdala, tam lotu sel am ma tam ilomda alami ok tituun-kup tabin uyo kema no. Am kaptam-ali ti atin tambalkan dukum kesu. Kemin ti uta uta ke-lomdu siin kaami lotu kemin sel am kanumsip ayo kabaak banula, uta uta kesuu. Kemin, kaptam-ali tunum ita ma sikil ta ma de-silip disa. Le kaa tawaal diim kaldaak-ami mafek mafek disa. La, am kaptam-ali abiil tikiin kaami mafek mafek o.
HEB 9:12 Kemin, Kraist ali kang meme imi ilem iluu-som ale, kang bulumaki man ami ilem uyo iluu-som, ke-lomda kuliila tam lotu am kaptam-ami abiin awem uyo tam unsa disa. Atin ti almi kiim tituun kaata-kup kuliila, du maakup fak-daa tam God ami am awem tambal abiil tikiin bombuu uyo tamdaya, God ami kolase. Kemin, nuli asuk mola disa kesuu kaali, suunkup ilokomu.
HEB 9:13 Kanola unang tunum iyo utamipla, Nulmi kukup mafak kaata taba-lomdu nuyo yam-mafak-daalula, God ami mepso kawu din unokomup dinim o, kebip kemin iyo tilipla, awem tunum ita tam meme so, bulumaki man so, imi kiim ayo kuluu-som ale, kang bulumaki yikis wan kulii-tal kuyak fuulip kiin-tabule, tip ayo kuluu ke-lomdip unang tunum imi angtiil diim ayo kabiiyiple, unang tunum imi win uyo asuk tiltam tambal ke tambal ke kem-solip. Yale, imi aket tem uyo tiltam tambal keyin disa biisu.
HEB 9:14 Kemin, Kraist ata taandala ami kiim kaata sing-tam-daale, uta uta ke-lomdu uyo kabaak banula kewasuu. Kraist ami diim kaali atin ti ban kemin katip maakup so ma ami diim kawu bombuu dinim. Ale ali toloop kaata ma kuluu-somdala, God ami ma kolase disa. Atin ti disa te! God ami Sinik suunkup iloma ata Kraist ayo dap-titil-diilaya, iyo mafek mafek God ami atin ti ami kukaalin tap kelaya, almi tiil kaata God kaa kuno kolaya kamboya aalip taanse. Kemin, sawaayak kaata, nuli taloop ata kulii-tal God kaa kukaala-solup. Yale, taloop kaami kiim kulaa taang-kala-lomdu, numi aket tem kabak-ali diing daaluya, tambal ma kelamu disa kemsu. La, Kraist ami kiim kaata taba-somdula, numi aket tem uyo ding daaya-lomdu, ban kemin uyo takan-tiiya-som kesuu. Kemin, nuli fanang tambal-kup fukun-bamdupla, suunkup ilin unang tunum God ami aket fukunin uyo kutal-fuku-bomduwa yo, kala-somla ko.
HEB 9:15 Kanolin kemin, Kraist ami aket fukunin kaali, Sawaayak kawu God ami weng kutiisa kabak-ami diim bomdipla, ban wakan-umbip kaata alik molon o, kala taanse. Kemin, ami aket fukunin kaa, unang tunum alik ili God ami weng uyo weng san ale, tabuu-bomdipla, sawaayak God ami boko-lomda: Suunkup ilin kaami miit kaa nalmi man kiimi kuyokomi no, kalase kaata kuluu-lomdip, suunkup tambal ilin o! kala-lomda God ami kama weng boko kutiisa kaami diim kawu kabak-ali Kraist ata God wak-kaptoop daa-som kuno unang tunum imi wak-kamet daa-som kela iip kaldaaku tola-lomda unang tunum yim-tamala din God ami miit tem daayon o, kala kanose te!
HEB 9:16 Kemin, weng dola kutiimin kukup kabak-ali tunum kaa kawanta ma alami taanokoma kaami aket uyo fukuna yi, Kawanami win kaata bokolila, taanokomi uyo kaata nami mafek mafek kutii ke-lokomi uyo kuluulokoma kala namti, kaami sang uyo Sukon Tem dol-nokoma. Kemin, weng kaa dol-nokoma kaali, disa kawu bombii tunum bung kayaakim ami taanokoma kabaku weng dola kutiisa uyo tiltam titil-fak-daalokomu no. Kanola almi man ayo aalap ami weng kutensa kaata tabuu-somdila, aatumen ami mafek mafek kep-namba uyo kuluulon o! kala namti, man ali aalap ami sukon dola konsa uyo kulii-tal gavman ami kukola utamala, Aalap ayo saakba kala kala-lomda, man ayo kuno kambolaya aalap ami bung mafek mafek kenba iyo kuluulokoma.
HEB 9:18 Ultap kemin, kamasi God ami weng kuka-daasa kaami kukup uyo titil-fak-daa-laamin kaali, siin kawu, Moses ali taloop kaata anu-lomda, kiim kaata kuluu God ami weng kutiise uyo tiltam titil-fak-daasu. Kemin ale,
HEB 9:19 kabak-ali kamasi kawu Moses ata Lo kaami sang alik uyo unang tunum alik bokoyimba-kup, mulo kaata bulumaki man sole, meme so, imi kiim kuluu-lomda ok kaaso, fal-siki kutii-lomda, as hisop ami kon tang soyim uyo tekela-lomda, sipsip kalim isak fulut ayo kuluu falala kutii-lomda kulaak kiim diim kabaaku taploop daa kulii tiltam asal kawu kuukula-mola kiim uyo fak-dii daak God ami lo sukon kaami tip diim aba-som, kuno yak unang tunum alik imi angtiil diim ayo aba kesuu.
HEB 9:20 Moses ali boko-lomda: Kiim kaali, God ami weng kutii kipni bokoya-lomda: Kalawuuli kutal-fukulin o, kalsa kaami ku-titil-saanin namti kala buu kayi, kalsa.
HEB 9:21 Ulultap kaakal kanola Moses ayo kiim kaa iluu-lomda lotu am o, kala sel am kaami sing-daala yak abe-bam ale, lotu kemin am kaami mafek mafek ket aye, laas aye, kikal kanola sing-daala yak abe-bamda ke-bisa.
HEB 9:22 Lotu kemin kaami lo kaami kukup ali kanumin kemin olti imi kiim kuuta taba-lomdu, mepso mafek mafek alik talalu kutiilu tambal kesuu. Kemin, kanola kiim kaa sing-tam-daa daak abin disa kelu kaali, God ali unang tunum imi ban kemin uyo kukan-tiiya-yaaba disa. Kemin, kaali kuno bombuu no.
HEB 9:23 Lotu kemin am o, kala sel am kaptam-ami mafek mafek bombuu kaalile, abiil tikiin kaptam-ami mafek mafek bombuu ultap buu. Kemin, lotu kemin kaami lo uta Moses ami bokolula, taloop imi kiim uyo kuluu balaka-bamdala, tawaal kaptam-ami lotu kemin am kaami mafek mafek uyo tambal nu, kewase. Lale, taloop imi kiim kaa dok kano taang-kala-somdula, abiil tikiin kaami mafek mafek fan bombuu kaa talalu kutiilula, atin tiltam tambal ke-lokomu dinim. La, God ata abiil tikiin kaami mafek mafek kusnum tambal-kup tabasu kaata-kup kuluu numi God ami fanang unemin liip uyo talalu kutiila tiltam tambal dukum ke-lokomu.
HEB 9:24 Kemin, sel am awem tawaal diim kala bombuu kaali, faldak abiil tikiin God ami am awem kaami diim tiisu. Kemin, Kraist ali tunum ilmi sikil tup diim lotu am desip kaami abiin awem kaptam-ali ma tam un-somdala, nuli ma dong dokoyinsa disa. La, ali din Aalap ayo dik-daala-lomda: Kii imi ban kemin uyo takan-tiiyak i! kala-lomda, fan tam abiil tikiin uyo tam-ilomdala, kamala kaali God ami tibi diim kulu bombe ko.
HEB 9:25 Kanola wasital alik kaa tal-unen-tabasu kaami iipyak tem kabak-ali awem tunum diilim ayo liip maakup fak-daa taloop kiim uyo iluu kulii-tam God ami kolale, tam God ami abiin awem tambal uyo tam kanoba-kup; kulaa kela tiltamba talen-umba. Lale, Yesus alile, atin-kup din abiil tikiin un-ilomda, alami tiil so, kiim so, kiita God ami kolase. Yale, kaali suunkup kukaala-yaaba disa; ti du maakup diim kanonsa ti kaata-kup.
HEB 9:26 Kemin, Yesus ami kanosa kabak-ali suunkup kanun-umba dinam, siin sawaayak God ami tawaal talal-bisa diim kaptoowu angtiil yol utafii-bam, taan-laamin-kup yakyak kutal kala diilakin lale, ali kanose disa kemin, kulaata wasital uyo mepso alik disa kelon e, kem-sulule, kulaali Kraist ayo unang tunum alik numi ban kemin uyo takan-tiiyon o, kalalaya, du maakup kaata-kup fak-daa tildaak tawaal diim tildaak ilomdala, almi angtiil uyo God ami konba-kup; kulaa kuno kamboya aaliwa, taanse no.
HEB 9:27 Unang tunum alik nuli ti du maakup ma fak-daa taanuple, siin ilom am ma daanokomu kawu din God ami yim-bak-saanin baan diim uyo din unupya, numi kukup uyo ifiiyokoma te!
HEB 9:28 Ultap kemin, Kraist ali liip maakup kaata-kup fak-daa almi tiil uyo God ami kolaya, unang tunum yaapkan yaapkan imi ban kemin uyo moyase. Kemin, mulo mafiing diim asuk talokoma. Kata, ali talda ban wakan-umbip kaa takan-tiiyon o, kalala talokoma dinim; kabak-ali unang tunum iyo ali talokoma no, kal-bomdip ami liip fen-tabasip kiimi God ayo mafek mafek tangbal imi kuyon o, kala-lomda kuka-daasa kaata kuyilala, imi fanang talokoma ko.
HEB 10:1 Uyo nokol utamsup, Mafek mafek kaami sinik atan diim tik-yongba kaa fan mafek mafek tituun disa. La, disa sinik nuumin kaata-kup, ultap kemin, Kraist ami unang tunum imi kukup tambal kukaayokoma kaali, fan atin ti mafek mafek tituun. Katale, Israel imi lotu kemin kaami lo kulaali disa atan umi sinik ulultap kemin, wasital yaapkan tal-unen-tabasu kaali, unang tunum ili lotu kemin kaami lo kuuta uli kutal-fuku-somdiwa, asuk suunkup kanolin taloop uyo kulii-din God ami kukaala-yaabip. Lale, ti ilmi lotu kemin kaami lo kaata-kup kutal-fukulin-kup ken-umbip kaa, taang-kala-somdula unang tunum tal lotu am tilip iyo talalu-yimulu tiltam atin tambal-kup kelamip disa yo.
HEB 10:2 Dinam, kanola unang tunum iyo tal lotu am uyo liip maakup diim kaata-kup fak-daa-lom mafek mafek uyo God ami kolale, talalu-yimula tiltam tambal-kup ke-lom utamipla, Imi aket tem uyo ban kulaa disa kebu kala-silip dinam, mafek mafek kaa maso ma God ami kolip talalu-yimusa disa.
HEB 10:3 Yale, kabak disa. Kaa bulumaki imak imi kiim so, meme imi ilem so, kiili fan taang-kala-lomdu, ban kem-tal-unemin uyo takan-tiiyuya, disa kelamu dinim. Wasital suunkup tal-unen-tabasu kaa, unang tunum kii awem tunum diilim ayo ata bom-bilipla, taloop iyo anu God ami kukaan-balale, kuluwu ilmi ban kebip kaami aket kaa asuk fuku-dakan-unbip o.
HEB 10:5 Kanolu kalale kulaali, Kraist ata tal tawaal diim talon e, ke-bam ale, kulaa almi taanokoma kaami sang uyo God ami bokola ko: Kapni aket fukunin uyo, Unang tunum ili taloop iyo kulii-tal anu kukaap-nokomip disa yo, kalbap. Katale, kabi tiil inang ma talalu kup-nambap kemin,
HEB 10:6 mafek mafek kulii-tal alik olso kuyak daalip kiin-tabemin sole, ban kemin takan-tiimin kaami mafek mafek so, kiili, kabi utam aket kolakin dinim nobap o, kalale,
HEB 10:7 Kraist ayo boko-lomda: God kapyo, sawaayak kawu nami sang kaata, kapni Sukon Tem kabaku dolsip. Kemin, kamala kulaakal nakal kapni kaata-kup kanolan o, nokokomap kaata-kup weng sandi kanolon o, kal-bomdi faksabi no, kalsa.
HEB 10:8 Kamosinim kawu, Kraist ali God ami bokola-lomda: Kapni aket fukunin ayo, Unang tunum imi olti kulii-tal anu kukaap-nin sole, mafek mafek kulii-tal alik kuyak fuulip kiinin so, ban kemin kaami takan-tiiyilin kaami mafek mafek kaaso, iyo kulii-tal kukaap-nin o, kala-lomdawa, utam aket kolakin dinim nobap o, kalaya tiinsu. Kanolin weng uyo God ayo kanum bokosa. La, almi fanang dakamin kaata, taba-lom lo uyo kutiilaya, unang tunum imi bokoya-lomdu: Olti an-ilom God ami kukaalin o, yinsu kaali, aket kolakin dinim nosa no.
HEB 10:9 Ale, mulo kaata God ayo bokola-lomda: Nali kapni kuuta kanolan o, nokokomap kaata-kup weng san-ilomdi kanolon o, kal-bomdi faksabi no, kalsa. Kemin, weng kaami miit namti kala buu: Kamasi kaami kukup uyo kukan-tii-lomdala, mulo kaami kukup kaata dukum-kup kutiilala, titil-bikisu.
HEB 10:10 Kemin, Yesus Kraist ali God ami kuuta kanolan i! kala kaata-kup kutal-fuku-lomdala, almi tiil kaata, du maakup kaata-kup fak-daa taloop God ami kukaala-laabip ultap ke kolaya, kaami tem kawu, nuli talalu-yimulaya tiltam fan alami unang tunum alik-daap ke-sulup o.
HEB 10:11 Kemin, awem tunum yaapkan iyo tola-bomdip kanolin olti kaata, God ami suunkup kukaalin-kup ke-bam laabip. Lale, kaa fan taang-kala-somdula, imi ban kemin uyo takan-tiiya-yaabu disa.
HEB 10:12 Katale, Kraist ali tal ban kemin kaata takan-tiiyon o, kala-somdaya, ali du maakup diim kaata-kup fak-daa almi tiil so, kiim so, kiita God ami kolale, taanse. Kemin, Kaa kanoli kaali ti, suunkup titil-biki ilokomu kala, kalsa kaata kukuyilula, utamuwa yi, Ali ti kanosa. Kemin, tal aba yang God ami sikil tingtuplo kabangu, tiin-bomda laaba no, kala-laabup o.
HEB 10:13 Kanola bomdala, God ali taba-lomda, Kraist ami waasi iyo fokola tal aba daak Kraist almi minlo tem unokomip kabak-ata fenba.
HEB 10:14 Almi tiil so, kiim so, iyo God ali liip maakup kaata-kup fak-daa kolaya kemin, du maakup fak-daase. Kuluuta taba-lomdu unang tunum imi ban kemin kaami uluum kaa dinimnu kewala alalta unang tunum iyo talalu-yimulale, kawu tiltam almi unang tunum alik-daap ke-silip. Kemin, iyo God aso suunkup ilokomip te!
HEB 10:15 God ami Sukon Tem kabaku almi Sinik Tambal akal ti kanola ami sang uyo kamasi kawu bokoya-lomda:
HEB 10:16 Dukum ayo boko-lomda: Nali kipni weng ma bokoyokomi. Kemin, kaa weng san iliwa. Nali am ma daanokomu kabaku nali unang tunum iso weng kusnum akal alik ma kuka-daayokomi. Weng kaa kutiiyokomi kaali, nami lo ayo alik kuyak aket tem tiiyilile, kuno imi aket fukunin tem kabak, akal dola kuya ke-lokomi no, kala kayi! kalba-kup,
HEB 10:17 mulo kaata, God ami Sinik alta God ami weng anung uyo ifi kuu numi bokoya-lomda: God ali boko-lom: Nali imi ban kemin so, imi kukup mafak sawaayak kanun-umbip so, kaami aket kuuli maso ma fuku-daayokomi disa yo, kalalala God ali kanum yakala kayi! kala, Sinik Tambal ayo kanum bokosa.
HEB 10:18 Kemin, God ali numi ban kemin uyo takan-tiiyase. Kemin, God ali maso ma bokoya-lomda: Ibi mafek mafek uyo ma kup-nipla kawu, ban kemin uyo takan-tiiyon o, yokokoma disa.
HEB 10:19 Kalsa kemin ale, nak-tunum kusal kipyo, Yesus ami taanse kaami win diim kabaku nuli suunin disa; ti awem tunum diilim ami suunkup tam God ami am awem tam unen-umba ultap kelupla, suunkup God ami tibi diim uyo din ilom aman-laabup.
HEB 10:20 Kama alokso tiin kawong liip unemin uyo nuli dalaal God ami am awem uyo tam unen-umbup. Kemin, weng do ma falaalu kuuli, Yesus alalta liip kalawaali ke-lomda, yak aba tam ilim dukum kuuli, saal liilin tap kesip kabang-bala tam unse. Kemin, mep ilim dukum sakbaalim o, ken-yaabip kabak-ali almi tiil kaami sang kaata te!
HEB 10:21 Numi fan tunum awem diilim o, kala hetpris ayo bombe kemin ata taba-lomda, God ami unang tunum iyo tiin mosa. Kemin,
HEB 10:22 almi kiim kaata, kuluu-balaaya, uyo talaba yak numi aket tem un-ilomdu ding-daayimule, numi uluum tabin alik fanang-daka-bam laabup uyo takan-tiiya kesuu. Kanolaya, nuli ok tambal sung ilol dinim ok kaata kuluu-lom, oksam ukuyin tap keyase. Kemin, numi aket tem kasen-fakamin uyo alik iyo kulaa-somdupla, nuli atin ti God alami lak kaata duu-lom din almi mepso unum o, kala-somla ko.
HEB 10:23 Nokol kabak uyo utamsup. God ami mafek mafek alik kii kanu-mokomi no, kalsa kabak-ali faneng kanu-mokoma. Kemin, okol fanang daa kanu-mokoma kalale, ami fen-bamdup kaami sang uyo unang tunum iyo bakayin-bam ken-unbup kemin, titil-biki-bom ti fenin-kup ke-buluwa yi!
HEB 10:24 Nokol nak-tunum kusal Kristen unang tunum kusnum imi aket uyo fukun-bam ale, wiis-saayin-bam imi aket fukunin uyo kufuyin-buluwa, yakal aptum kusal imi mok uyo inayin-bam ale, kukup tambal kaata-kup kutal-fuku kelin o.
HEB 10:25 Kanola tunum alep tap maakup tap ili Kristen unang tunum iso, tala-tala-ke-bam lotu kaami kukup kabak-ali kulaalip yangba un-silip. Lale, nuli ultap kelup kulaa-laamin disa. Ti kipkal utamin, Nuli Kraist ami talokoma kaali, mep ken-talabu kala, kal-bomdupla, titil-foko Kristen unang tunum imi dukum-kup wiis-saayin-bam ale, dong dokola una-tala-ke-bulupla, iyo titil-biki-bom biliwa yo!
HEB 10:26 Kristen unang tunum imi dukum-kup wiis-saayin-bam ale, dong dokola una-tala-ke-bulupla iyo titil-biki-bom-biliwa, kaami miit ayo kanola, nuli Kraist ami fan tituun weng uyo utabup-kup ale, mulo kaptoop nulmi aket fukunin kaata mamdet-kup ke-lom kukup mafak kaata, kutal-fukulokomup uyo, liip dinim kelula, nuli taang-kala-lomdup mafek mafek ma God ayo koluple, mulo asuk tam ban kemin uyo takan-tiiyokoma disa te!
HEB 10:27 Kemin, nuli ti atin suun-bam weng talal-mokomup kaata-kup fenokomup. Kemin, God ami waasi kesip unang tunum ili almi as mamin-kup tabasu kuuta, taba-lomdu fuu kutiilula kiin-taba unokomip.
HEB 10:28 Nokol utamsup, Kanola tunum ayo ma Moses ami Lo uyo lola namti, tunum alep tap asuumano tap ili ma ami ban keba uyo, utam-ilom ku-fatap-daalipla, weng talalmin tunum iyo ami ban keba uyo utenba-kup bokola: Kaa kaltapni san kemin taanokomap o, kala namti, tunum kaami aket ayo fukun-bam olen-daalokomip disa. Yale, tunum kaami aalip taanokoma kulaali katip sakap
HEB 10:29 ale, tunum God ami man daang ukola kambola yang banokoma kaali, kipni aket kaa kanimin o, kalbip i? Tunum kulaayo, atin ti uluum awak uyo kuluulokoma. Kemin, kabak dok ami kalan kaata daa: Sawaalak kawu Kraist ami kiim kaa sing-tam-daa-lomdu God ami weng dap-tiisa kaami um-titil-diisuu uta taba-lomdu, tunum ayo talalu dap-tiilu tiltam tambalase. La, ami aket fukunin ayo Kraist ali God disa le, ami kiim kunolin kuluuli win dinim o, kala kambola, alalta siin God ata olen-daalase ami Sinik ayo kukup mafak ami kukaala kala, kalalala, God ayo kaami kalan kaata, mep tunum ayo atin angtiil yol dukum dukum-kup kaata, kola maan telale, duuk-kup dakat kalokomu.
HEB 10:30 Kemin, kanola nokol utamsup. God alta boko-lomda: Tunum ayo aptum ami ban uk-dola kulaa, asiik maan tiila kem una-tala-kemin kaali, nalmi ok kemin kabak-ami maan uyo nalta taba-lomdi atin kukup mafak uyo kolokomi no, kalba-kup, weng ma kaata boko-lomda: Tunum Dukum nalta, weng talalmin kaami baan diim kabaaku nami unang tunum imi yam-kukulokomi no, kalsa. Kemin,
HEB 10:31 God ali tiin kawong bomda, titil soyim bombe. Kemin, kaa nuyo yim-bii-yang almi miit tem daa kukup mafak kaami maan tiiyin-bamda kanuyokoma uyo atin ti suunin dukum o.
HEB 10:32 Iltipni siin kawu Kristen kelip bom ilsip kaami aket kabak-ata asuk fanang daalin! Kayak kayak ili, ibi tiltam God ami lak duulip kala, kalaliwa, kabak-ami kalan kaata kukup mafak uyo kukaayin-bilipla, ibi fiit-bamdip ilsip. Lale, kibi titil-fak-daa tola God ami lak duu ilin kaali titil-foko kutal-fuku-bom ilsip.
HEB 10:33 Yak am ma daansuu kaali, kayak kayak ita taba-lomdip ibi yim-tama tam unang tunum alik imi tiin yaapkan tem daale, kibi weng mafak kukaayin-bam ale, angtiil yol uyo kukaayin-bam kemsip. Kuno iip ma kawu ibi utamiwa, Kayak kayak iyo kap-tunum kusal iyo kukup mafak kaptum kusal imi kukaayila-tabip kalbip-kup; ipkal kaptum kusal iyo dong dakaayin-bam imi uluum kaami anung uyo kipso kaa-bam kemsip. Ale,
HEB 10:34 ipkal ti utamipla, Iltipni kap-tunum kusal Kristen iyo sok de-yimulip tiin-bilip kala, kalalip, olen-daayin-bam ale, ipso yak kabak banip iso, maakup angtiil yol daka-bam kemsip. Kemin, ibi kusnum ma ita kipni mafek mafek duk-duuyip uyo kanola kipkal fiyaap kaata-kup duu-bamdip, kuno tiin itam kamboyip dakaayin kemsip. Kemin, kaali kanola ipkal utamiwa, God ami weng tambal-kup, Kabak kanolokomi kayi, kala kuka-daasa kabak-ali mafek mafek duk-duuyip uyo kabaak banaya uta uta ke-lomdu kipni diim kawu bomdu suunkup ilu kala utam-silip, uta utamduya, kukup kuuli kanumsip.
HEB 10:35 Kanum tabasip kemin, ipni God ami lak duu-yaamin kabak-ali ti titil-biki kulii-tabasip uyo, maas kewa lukuup lukuup kewa-yaamin disa; atin ti tambal-kup tabuu-bomdiwa kayi! Kemin, kaata kanu-bilipla, kawu bombii God ayo sisol kaa tambal dukum uyo kuyilala, iltipni diim kulu suunkup iluk o, kala-somla ko.
HEB 10:36 Kemin, kipni titil-foko-lom God ami lak dakaamin kaami kutal-fuku kutama yakyak unemin uyo mepkan kesuu. Kemin, ti titil-biki tola-lomdip, God ami weng kaata-kup kanumin o, keba kaata-kup yikik-kutal-fuku-bomdiwa. Sawaayak kawu, God ayo bokoya-lomda: Mafek mafek tambal ma kipni kuyokomi no, kalsa uyo, kuluulin o!
HEB 10:37 Kanola kaami sang uyo God ali boko-lomda: Bom bii ilanin tap ke-lokomu kabaku tunum kaa talon o, kalba ayo talokoma. Kemin, kaali fiyaap talokoma disa.
HEB 10:38 Katale, unang tunum nami weng tituun-kup kutal-fukulokomip kiita, nali itamila yi, Nami lak kaali duu-bilip u, kalokomi kaata, fan dong dakaayin-bilila, kiita tiin kawong ilokomip; ale, asuk kanola tunum iyo kambop-na yang banokomip kiita, nali aket tambal uyo kuyokomi dinim o, kala God ayo kanum bokosa.
HEB 10:39 Lale, nuli Kraist kaa kelalupla, yang maaklo ke win dinim kemin disa; nuli ti almi lak kaata-kup duu, suunkup ilin unang tunum kaali, nuta ko.
HEB 11:1 Nokol fanang-daa utamupya, God ali ti almi weng kuuli fan kutal-fukulokoma kala kalup namti, nokol talalu utamup yi, God ami weng kutii-lomda mafek mafek numi kuyokomi no, kalsa uyo fan ti kuyokoma kala kala-somdupla, uyo fenokomup. Mafek mafek ma kaali, God ali numi kuyin dinim bom-balaya, nulmi tiin alep alep kaa utamin disa bom-bulup. Yale, kabak nokol utamum, Kabak-ali fan bombuu ko.
HEB 11:2 Kemin, sawaayak awil-fakal bom-biisip kiili utamipla, God ami weng kanum bokola kabak-ali tifan kanolokoma kayi! ke-biliwa, God ayo bokola: Mep kiimi aket tem kabak-ami kanum bakabip kaali, tambal o, ke-bamda ilsa.
HEB 11:3 Kemin, kabak nokol utamupla, God ayo almi weng kaata kutal-fuku-bomdaya, kanun-umba kala, kalalup, nokol utamupya, God ali mafek mafek utamalup dinim ke-laabup, uyo fan disa kawu weng kaata-kup bokolale, weng kaata taba-lomdu abiil so, tawaal so, aa yak mafek mafek alik itafiin-umbup kiiso, uyo talalu-kutiisuu kala, kalalup utamsup te!
HEB 11:4 Abel ali utamala, Fan God ali bombe kala kalalaya, taloop ayo kulii-tal God ami kolale, God ayo utama yi, Abel ami taloop kup-na kaali ti, atin tambal dukum ke-lom uta uta ke-lomdu, almi fik Kein ami mafek mafek kulii-tal nami kup-na kuluuli disa kabaak banu kalalaya utamsa. Kemin, Abel ali fan God ali bombe no, kalalala kawu God ayo bokola-lomda: Kabi ti tituun-kup tabin tunum kelap kayi! anba-kup, Abel ami taloop kola kaami fiyaap ayo duu-bamda kuluu kesa. Abel ali taansa. Yale, kamala kaali tifan, God kaali bombe no, kalsa kabak aso, ami kukup kaaso, ita taba-lomdip nuli liip tambal uyo kukuyinsip ko.
HEB 11:5 Kano tiinsula, Enok akal ti utamala, God alami weng kaali ti faneng kanolokoma kala, kalalaya, God ayo kuno kambola taansa dinim. Enok ayo tiin kawong bom-salala, God ayo angtiil soyim dap-tamala tam abiil tikiin unala, aptum kusal iyo fen-tal-unebi atamin disa kela kuno kensip. Kemin, God ami Sukon Tem weng kabak-ayo boko-lomdu: Siin sawaayak kawu God ayo Enok ayo dibii tam unin disa kaptoop-ali Enok ali God ami kanolan o, kalba kaata-kup, tabuula kala, kala-somdala, God ayo Enok ami kanuba fiyaap uyo duu-bam ilsa no, kalsu.
HEB 11:6 Kemin, unang tunum ili yang God ami mepso unum o, kalip namti, unang tunum kiili utamipla, Faneng ti God ayo bombe kala, kalbip-kup kawu utamipla, Unang tunum God ami fanang tildang tala, God ayo kukup tambal kaata-kup kukaayila-yaaba kala, kala-lomdipla, din God ami mepso bombe kawu beten kamaalin o, kala-somla ko. Katale, tunum kawanta kaa kanolin disa kelip namti, kaa fan God kaa fiyaap duu-mokoma disa yo.
HEB 11:7 Kemin, kano, bom-laaba la, God ayo Noa ami bokola-lomda: Am ma daanokomu kaali, mafek mafek kanum tiltam tabokomu no, kalsa namti kulu Noa almi tiin dik-yak-dii atamin disa. Yale, ayo utamala, God ami kanum bokola kabak-ali tifan kanolokoma no, kalalaya, God ami weng kaata-kup weng san-somdala, tam sip awak dukum uyo dina-bi-lomda, almi kalel so, man imi unang tan so, ita-kup foko-kulii-tam sip awak dukum kaami tem unipla, ok ta anula taansip disa; Noa almi aket fukunin uyo God alami weng kaali, tifaneng kanolokoma kala kalsa uta taba-lomdula, tawaal diim kayaak unang tunum alik imi kukuya-lomdu, ibi kukup mafak nuubip o, yakan-kaam-somu kemin, God ali Noa ami atama yi, Faneng, God ali kala kanolokoma kalba kaata-kup God ayo Noa kaali tituun-kup tabin tunum o, akase. Aa, ti kuno unang tunum alik yakal utamipla, God almi weng kabak-ali tifaneng kanolokoma no, kebip kiili, God ata kanubip kiimi tituun-kup tabin unang tunum o, yakan-kaan-umba.
HEB 11:8 Siin sawaayak sawaayak kaptoowu, God ayo tawaal ma Abraham almi-kup kolon o, akalala, kulaali Abraham ami bokolaya, God almi weng kutiila kaali, tifan kup-nokoma kala, kalale, Abraham ayo God ami weng uyo kutal-fuku-lomda, alami abip uyo kelala tabansa. Yale, ali utamala, Kwin, nali dok banon o, kalalila talabi ni? kalsa dinim.
HEB 11:9 Kemin, mep tawaal kalawaali tunum miit kusnum ma imi bokon la, Abraham ali utamala, Tawaal kaptam-ali fan God ali kup-nokoma no, kala-somdala, abip samaan tunum alaltap kelala, abiin mafak tiin-bomdala, am tambal so ma de-somdala disa. Saak sel am tem kulu tiin-bom ilsa. Kuno Aisak sole, Jekop so, alep yakal ti kunolin ilin ultap bom-bisip. Kemin, sawaayak kawu God almi Sukon Tem uyo alep kiimi sang kaa boko-lomdu: Kapni man loop iso, alimal ibi tawaal kaptam-ali kuluulokomip o, kalsa.
HEB 11:10 Abraham ayo ilom am ma daanokomu uyo yakaba din abip sakbaalim dukum ilokoma kaami aket kaata-kup ti titil kutoop tini fukun-bamdala fen-laaba. La, abip dukum kaptam-ami aket fukun-bam tiinsa uyo ukol ukol alik ma kemin, God maakup kaata-kup abip dukum talalmin kaami aket uyo fukun, Awu, kanolokomi kala kalba-kup, alalta-kup talalu kutiisa. Kemin, abip dukum kaali suunkup ilin abip o.
HEB 11:11 Abraham ayo tunum sawal kelaya dok kano-somda man ayo duulama dinim kelale, kuno kalel Sela ukol man dinim bom bi-lom unang sawal ke-lomdu dok kano-somdula man kaa duulamu dinim kelu kanolip. Katale, God ayo atama yi, Abraham atam ayo God ami kanolokomi no, kalalala weng kuka-daasa uyo faneng ti kanolokoma kala, kalalala, kulaali God akal Abraham ami titil kolaya, man kaa duusa.
HEB 11:12 Kemin, tunum maakup Abraham ali tunum sawal ale, mepso taanon e, kalba diim kuyaku ami man loop iyo deng yaapkan ayo tap tiilaya, tunum miit iyo uku-lom tiltam dukum-nula, tam abiil kun diim wakalkan saanbu iltap aye, daak yol ok balang diim kaami ok dinin ultap ke, dok kano ili tik-tiilamip dinim kesip.
HEB 11:13 Kemin, Abraham, Aisak, Jekop, nikil kanolin kiili utamipla, God alami weng kanum bokosa uyo tifaneng kanolokoma kala, kalaliwa, kaata-kup kutal-fuku aket-kup fukun yakyak toop taan-taan-ke-bisip. God ami boko-lomda: Mafek mafek tambal kuyokomi kayi! kalsa kaa, tawaal diim kalawaami bom ilsip kaa, kabak kela bomdip ilsip disa. La, ili ti tunum imi utamiwa yi, Kuuli samaanlo kawu talabu no, kebip ultap kanu-bamdipla, fiyaap duu-bam ilsip. Kemin ale, weng uyo fan boko-lomdip: Nuli bokon kala bom-bulup kaali, abip ma tunum ililtap ke bom-bulup. Kemin, nuli kiin tunum tap kemin, tal tawaal kala bombii iluuk daalokomup disa yo, kemsip.
HEB 11:14 Kemin, kanola nokol utamupla, Tunum kanolin weng kaa bakabip uyo, fen-bamdup tawaal ma kuluulupla, kaata nulmi tawaal alik-daap keluk o, kal-bomdip kanum baka-bam bom ilsip kala kalum o.
HEB 11:15 Kanola imi fanang dakamin ayo, siin ilmi abip bombii kela tal-silip kaami aket kaata fukun-bisip dinam, asuk iyo unolip. Lale,
HEB 11:16 kabak-ali ma kanumin disa; imi aket fukunin kaali, tawaal akal kusnum ma atin ti tambal-kup tabasu kaami aket uta yelu fukun-bamdipla kemin kaali, abiil tikiin uta kemin God ayo abip awak sakbaalim ma dotu kutiiyinsa. Tunum kiili boko-lom: Kabi ti nulmi God kayi! kal-bom ilsip kaa, God ali imi fiyaap kaata duu-bamda iyo bokoya-lom: Ibi ti nalmi unang tunum o, yakan-kaamsa.
HEB 11:17 Kemin, sawaayak kawu, God ayo Abraham ami weng kuka-daala Aisak ami sang bokola-lomda: Am ma daanokomu diim kaptoowu Aisak ami miining imi loop kaptoop iyo boko-lomdip: Nuli Abraham ami man loop o, ke-mokomip o, kalsa. La, kula sang kulu bokop-na kulaali ti fan kanolokoma kala, kalba-kup God ayo Abraham ayo kuyaku dap-kukulon o, kala-lomda Abraham ami bokola-lomda: Kapyo, kapni man Aisak ayo an-ilomdapla nami kup-nan o, akala, Abraham ayo alami man yaan maak Aisak ayo mafek mafek kulii-tal kuyak fuulip kiin-tabamnula God ayo imi ban kemin takan-tiiya-yaamin ultap kela konsa.
HEB 11:19 Abraham ami aket fukunin uyo, Kano mep man kalawaali aali namti, atin olso taanokoma. Yale, God alalta yaap asuk dafola tam-tiin-ilomda man loop tap tiilaya, tunum miit ukulokomu no, kala-lomda yeng man ayo kuluule, ti foo tiika tuup foko aalon e, kem-salale, God ayo, Daa yo, kalalaya fak-duusa. Kemin, kaalile, Abraham ayo man kaali sakbal am lo asuk dabuu dibii tiltamba tilin tap kesa no.
HEB 11:20 Aisak ayo utamala, God ali almi weng kuu fan kanolokoma kala, kalalaya, kulaali almi man Jekop so, Iso so, alap iyo Jekop asiik sikil kuyak ami dabom diim tiile bokola ko: Bom bi-lom kaptamu God ayo kukup tambal tambal kaata, kabi kukaap-tokoma no, akale, kuno Iso akal ti kanum bokola kesa.
HEB 11:21 Bom biile kawu, Jekop ayo utamala, God almi weng kuuli tifan kanolokoma kala, kalalaya, kulaata atin ti mepso taanokomi kala, ken-um-bom ale, kuluwu sikil kuyak almi man Josep ami man alap imi dabom diim tiile, alap iyo weng bakayim-bii keyinba-kup bokola: Bii am ma daanokomu diim kaptoowu, God ayo dok kanolin kukup tambal tambal kaata-kup ipyo kukaayokoma no, kala kanum bokoyilale, kula Jekop ayo malal kuluu tola-lom dabuna daak tiin God ami fiyaap uyo duu-bam ale, beten kema ko.
HEB 11:22 Bom biile, Josep akal ti utamala, God ali almi weng uli tifan kanolokoma kala, kalalaya, ilom kulaata ti mepso taanon e, kali kala kalale, kulaali bokola ko: Am ma daanokomu kaali, Israel-miin ibi bokon Isip kaltam-ali kelalip unokomip. Kemin, nali taanokomi kaali, nami tiil so, kun so, iyo kuwaalip atata bom bii kipni Isip bokon kaltam kelalip bokon kusnum unokomip kabaku, nayo nam-tamalip umbiling Kenan bokon kawu din aba-lomdip, buluulin o, kala kanum bakaya ko.
HEB 11:23 Bom laabipla, bii Isip kasel imi king ayo lo ma kutiila kaali, Israel kasel kipni man tunum man ma fokolip namti, iyo anulip taan-laamik o, kalsa. Kemin, Moses ayo awak-aalap iyo duu dap-tii atafii-biliwa, Ti man o, kala disa akal man tambalim ma kela atam ale, kulaali awak-aalap akam iyo king ami lo kutiiba kaami atul kaali ma utam suun-daalamip dinim. Utamipla, God ali nuli tiin molokoma kala, kalalipla, kulaa akam iyo man ayo dap-tama din dip tiilip maaklo dawaalipla, bombii kayoop asuumano dakan-tiisa.
HEB 11:24 Bom biile, Moses ayo fasuu-lomdala, utama yi, Fan God ali ti yaap nakal Israel kemin nali dong dokop-nokoma kala, kalale, kusnum kayak kayak iyo boko-lomdip: Kabi Isip kaltam-ami king ami mun sii umi man o, nakan-kaamin daa yo, kalalaya kemin, king ami man unang uyo kambowansa. Kemin,
HEB 11:25 kaami miit kabak-ali, Moses ami aket fukunin kaali, yak Isip kasel imi iipyak tem kabak-banila, ban wakan-tal-unemin kaami kukup kaata, kutal-fuku kulii-taba-bom disa; kiin tap kaami fiyaap duumin kulii yakaba toop iip kuluba kela-yaamin uyo kulaa kambola-somdila, yak God ami unang tunum Israel-miin imi tem unila kawu iso, naso, nikil maakup angtiil yol uyo kaa-bam um-tal-daka-mokomup kuuta ti tambal o, kalalaya kemin,
HEB 11:26 ami aket fukunin uyo kanolaya kemin, nali Isip kayaak imi king ami mun sii uso, awaat ilokomup kaali, nali moni so, mafek mafek yaapkan iso, iyo kaa-mokomi kala kalale, kulaa kela yak God ami tunum unang imi tem kabak banila, Isip kasel unang tunum ita weng mafak kukaap-nam-bam God ami tunum uldaa-dabuula talokoma kaami kanolokomip ultap kamap-nokomip. Yale, weng mafak kukaap-nokomip kula kuno saak kuso bam tip fakamin daa. Kemin, God ami mafek mafek tambal kup-nokoma uta taba-lomdula, Isip kasel imi moni so, mafek mafek so, iyo kuluu kulaak banula, kambo-wokomi no, kala-lomdala, Moses ayo kanun unan-soma ko.
HEB 11:27 Moses ayo utama yi, God ali ti nali yaap dong dokop-nokoma kala kala-somdala, king ami aket atul tabemin kaami atul uyo suun-daalama dinim kelaya, kulaata Isip kaptam-ali kelalala, tabansa. God ali sawaan ilin tunum ale, Moses ata almi tiin kaata, atam-laamin tap kelala, titil-fak-daa tabansa.
HEB 11:28 Kemin, Moses ali utamala, Fan God ali almi kanolokomi no, kalba kala kala-lomdala, Israel imi bokoya-lomda: Ensel taba-lomda, man diil alik imi yan-talokoma. Kemin, yan-tal-bomda, tal numi am mepso talokoma. Kemin, nuli Pasova yo, kala uktakaya-laamin kaami sipsip iyo ma anu-lomdup, imi kiim kaata kulii yak nulmi amitom diim ilik daa daa ke-lokomup kaata, ensel akal tal utaba-kup, kawu soop akaayala yaap-kup ilokin o, kala-lomdala, bakayinsa ko.
HEB 11:29 Kanola Israel-miin yakal utamipla, God ali fan, nuli dong dokoyilala, unokomup kala, kalaliwa, yakyak bilin yol ok tiimaang o, ken-umbip kaami balang diim unipla ok ayo lo kulii alula kalnet kaltoop ke tawaal-kup kelala, kaami diim kawu liip yak malii aba kem-siliple, kuno ti Isip kasel nokol ti kanolokomup kawo! kala yakaba biyak iip-iip unokomip te! Ok ayo kalnet foko tala, kaltoop foko tala ke-lomda, yim-baak-moluya, ok taba yan dong dokoya-lomdu alik fokola taansip.
HEB 11:30 Kemin, Israel ili utamiwa yi, God almi weng kaali ti faneng kanolokoma kayi! kala, kalalipla, abip awak dukum Jeriko umi tuum uti fokosip uyo, falala tal-unemin-kup ke-bilipla, bombii am fetkal kem-siliple, tuum uti fokosip uyo balata dakela daak abe-yinsu.
HEB 11:31 Kanola, Rahap uli sadikimin unang lale, uli utamu yi, Israel imi God kaali, naso tiin mo ke-lokoma no, kala-somdula, uyo Israel imi tunum alep ma yim-baalip tal Jeriko kayaak imi yam-kukun talabip tunum imi dong dokoyulula, alep iyo asuk tabansip. Kemin, Israel iyo tal aba God ami weng kuyang saak tiimin unang tunum Jeriko kasel fokolip dinimsip kaa, unang kuuli uso welip taansu dinim ko.
HEB 11:32 Katale, kamala kulaata nali kanumin weng kaata maso ifiili toop unokomu ni? Kulaaye, am uyo mepkan kelu kala, kala-lomdila, nali Gideon, Barak, Samson, Jepta, Devit, Samuel aa, God ami weng bon tem tunum so, tunum kanolin kiimi sang uyo ma bokolokomi disa.
HEB 11:33 Kemin, unang tunum kiili, utamiwa yi, God ali almi weng tifan kanolokoma kala, kalaliwa, malo ma waasi dinan-tal-une-bam, king waasi dinan-tal-unemin deng yaapkan waasi dinin tunum iyo kulaak baniwa, ita ita ke-balale, iip malo ma ita kuno kukup tambal kutal-fuku-bamdipla kemin, unang tunum imi tangbal tiin saansip; malo ma iyo God ayo aman dakaan-bilipla, layon o, kala busi dukum tap ami aket atul uyo kukan-tiila tunum iyo ma anula taan kemsip disa.
HEB 11:34 Tunum unang malo ma iyo waasi ita fokolip wing tiil unokin. Yale, God ata imi dong dokoyila yang kuwaala-yaa-bilip; kuno malo ma waasi ita wan kong tup anulum o, kemiple, God ata dong dokoyila tambal ke-bala; kuno malo ma iyo titil dinim kesip. Lale, asuk mulo kawu tal God ami diim kawu titil uyo kuluu-yaabala; malo ma tiltam titil-biki-lom waasi dinin tunum ke-lomdip abip ma ma imi waasi dinin iso din bomdip ita ita ke-bam kanu-bisip ale,
HEB 11:35 man malo ma taanbip imi awak kusal ili utamipla, God ali almi weng ti fan kanolokoma no, kala kanubip o, kalba-kup, God ali asuk imi man iyo yim-foya tam tiiniwa awak kusal iyo asuk tiin saan-bisip. Unang tunum kusnum yakal kanola God ami lak ayo dukum-kup yikik-kutal-fuku-bisip. Yale, mafek mafek kusnum uta tiltam yim-baak-saan-bulula, bom ilsip. Kemin, God ami lak duulin iip maakup maakup iyo waasi ita taba-lomdip, sok ta de-yimu keya biwakan-tal-unebi kamboyip saaka-laa-bam ke-bisip. Kanola God ayo daang ukola tawaal kaldaak-ami kukup kaata-kup kutal-fukuliwa dinam, waasi-miin iyo fiyaap duu-bam ale, kamboyip tambal-kup ilolip. Yale, kom tem lo tam tiin-ilomdip tambal-kup ilokomip kaami aket kaata-kup fukun-ilomdiwa kemin, God ayo daang ukonsip disa.
HEB 11:36 Kuno, unang tunum iyo God almi weng tifan kanolokoma kalin malo ma kiili waasi ita taba weng mafak kukaayin-bam ale, ye-bam aye, kebip kaami aket uluum ita kuluu-laa-bilip, kuno waasi iyo sen sok dukum ta kuluu-lomdip, malo ma iyo de yim-tama din kalabus am daka-bam ale,
HEB 11:37 malo ma tuum ta anulip taan-yaa-bilip, malo ma waasi iyo so as falulmin ta kuluu-lomdip tunum iyo iip kuyaku fuunga yakyak duula-lom malela kutii anung-anung-ke-bamdip, kuno malo ma ita wan kong tup ye-bam kem-unan-solip. Kemin, unang tunum iip malo ma God almi weng tifan kanolokoma kalin kiili ti, kanola waasi ita kanu-bamdip atin kukup mafak uyo kukaayin-bilipla, atin ti aket uluum dukum-kup kaa-bam ale, imi diim ayo mafek mafek duluu-lomdip ilim tambal alokso ilim so ma miki-laamin dinim. Meme so, sipsip imi ipnaal uta, ilim kaal ke-lom bikibi miki tal-une-bam bom ilsip.
HEB 11:38 Kanola waasi ita kukup mafak uyo kanuyin-biliwa kemin, unang tunum malii iyo sak fun-taba biling unang tunum dinim bokon kawu sawaan-laa-balale, malii ma ukadaa bilin am du tikiin tikiin kawu sawaan-laa-bala malo ma iyo tuum tem sawaan-laa-bala, malo ma iyo din balbal tem kawu, sawaan-laa-bala kem-tal-unemsip. Kemin, unang tunum kanolin kiili, God almi weng tifan kanolokoma kalin uta, kutal-fukulin kiili, yak tawaal diim kalawaami unang tunum kukup mafak kutal-fukulin kiimi diim kawu bom ilsip. Yale, tawaal diim unang tunum ili utamiwa yi, Nak-tunum kusal kiili unang tunum tambal uu, kemsip disa ko.
HEB 11:39 Kemin, unang tunum alik God ami lak duusip ili utamipla, God almi weng uyo tifan kanolokoma kala, kalalipla, God ami tiin diim uyo win tambal-kup kuluusup. Yale, kukup tambal kaa sawaayak God ami bokoya-lom: Kano kuyokomi kayi! kalsa uyo kuluulin disa; ilomdipla kemin,
HEB 11:40 kabak-ami miit kaali dok kata naa kalolip: God ami aket fukunin tambal namti kala bombuu. Sawaayak Kraist ali tilin disa kama bom-salaya, God almi weng kaa tifan kanolokoma kalin unang tunum kiita, nuli yam-kan-tii-lomdip, isiik bon tem din ilomdip atin tambal kebip-kup, kuluulokomip disa yo. Fen-bam bom-silipla, nokol tiltam kabak-kabak-kelupla kawu iso, nuso, alik kuyak mim-daa atin tambal-kup ke-lomdup kawu kuluulokomup. Kemin, sawaayak kaali, God ali kabak-ata kanolokomip kaata tambal o, kala, kala-lomdaya, numi abiin tiinokomup ma kaali talalu kutiiyinsa ko.
HEB 12:1 Kanolin kemin nuli yi? Siin sawaayak kawu unang tunum yaapkan kanu-bisip kiili, kamala kulawu kukuyulu nuyo utamupla, God almi: Kaa kanolokomi kayi! kalsa uli tifan kanolokoma kalin kaami kukup namti kabuu nu, kebup. Kemin, nokol kanola abil unemin kukup kaami aket kaata fuku-daalupla, mafek mafek alik uluum tabasu no kala, ban wakan-tal-unemin uta taba numi sok de-yam-kaamin tap kem-tabasu uyo, kambola-somdupla, kulaali numi aket tem uyo titil-biki-lom God ami boko-lomda: Abiltap unemin o, kalalala, kuka-daayinba uyo titil-fak-daa kanu-bam ke-buluwa yo, kala-somla kemin,
HEB 12:2 bina din kuluwu fanang daalokomi no, kalbap ulmi-kup dik-yak-diwa bina unebap ultap ke-lom, Yesus ayo tituun dik-yak-dela ami aket-kup yan-bulula yo. Kemin, kamosinim kaali, Yesus ayo liip kukuyilala, nuli God ami lak uyo duu-sulup. Kemin, mulo kawu nuli dong dakaayin-balala, dukum-kup utamuwa yi, God almi weng kuu fan kanolokoma kala, kalbup te! Kanola siin sawaayak kaali, Yesus ali am ma daanokomu uyo, ami fiyaap duumin kuluulokoma kaami aket kaata titil-biki-somdala, angtiil yol dukum uyo utamdala, as diim uyo taansa. Kemin ale, unang tunum imi aket fukunin kaali, as diim taan-yaamin kabak-ali ti fatom i! kemsip. Yale, Yesus ayo fanang daala yi, Fatom yale, kuno saak taa kalalaya, taansa. Kemin, God ali titil-kup tabasa. Kemin, kamala kaali, Yesus ayo God ami titil kaata kuluu-lomda, talaba yak Aalap ami sikil tingtup diimlo kaldangu tiinba ko.
HEB 12:3 Ti ipkal, kabak talalu utamin. Sawaayak kaali, ban kemin tunum ita Yesus ayo atam suun-bamdip, saak weng mafak mafak so, angtiil yol so, uyo kukaan-biliwa, bom-bii-lomda atin yol dukum utamse. Yale, ali titil-foko sining-kala bom ilsa. Kemin, ipkal kaami aket uyo fukun-bamdiwa yi. Kipni aket tem kabak-ali mafak-yulula, daal tabemin daa;
HEB 12:4 ibi titil-fak-daa bomdiwa, ban kemin tunum imi kipni waasi kamayinbip kaa, ipkal kaa kulaayip yak banala tabasip. Katale, kaami kalan kaata, ma taba-lomdip, ibi anulip ma taanin disa bom-bilip o.
HEB 12:5 God ami Sukon Tem kabak-ali kipni yam-titil-saanin weng uyo bokoyasuu. Kemin, ibi kaami aket kuuli lukuuyasuu nema? Kabak-ali boko-lomdu: Ibi God almi man o, kala kanum bokolale, Nami man kapyo, Dukum ami taba-som aket uluum aye, angtiil yol aye, ma kup-ti namti, kapni kukup mafak kanubap uyo kambolan i! kalalala, kanup-timba uyo saak kunoluk o, kemin daa yo. Kanola ali weng tem kaata, kukaap-tam-bilila, kukup mafak uyo kambolan o, takan-kaaba uyo, kapni aket tem uyo mafak mafak ke-bam uluum tabemin daa.
HEB 12:6 Lale, ti kapkal utaman, Kanola Dukum ali tunum ma ami mook uyo inela namti, kaami kukup mafak kaata kulaalak o, kalalaya, aket uluum aye, angtiil yol aye uyo kukaalokoma. Le, akal kanola tunum ayo ma dap-talang-daa-lomda kabi nami man o, kala namti, ami ban kemin kaami kalan kaata angtiil yol uyo kukaan-bam ke-mokoma no, kala-lomda God ami Sukon Tem kawu kanum bokosa.
HEB 12:7 Tawaal diim kaldaak-ami awil-fakal alik ili ilmi man kiili weng titil tibin bakayin-bamdip ye-bam ale kukuyim-bamdip, mafek mafek mafak tal kipni diim abamnu uyo ti ipkal duluma sining-kala bom utamiwa yi, Kukup mafak kela-lomdup kukup tangbal kaata-kup kutal-fukulum o, kala-laabup kemin, God akal awil-fakal imi man kukuyila-yaabip ulultap ke, nuli kukuyinba kala, kalalipla, utamin o, kala-somla ko.
HEB 12:8 Kanola God nayo kukuyin-biliya, kukup mafak kanubip uyo kambolin o, kalalaya, mafek mafek mafak uyo kulaala tildaak ami man kesip ilmi kaal diim abe-bamduya, tildak kipni diim uyo abamnin disa kelu namti, ipkal kabak utamiwa yi, Nuli fan God ami man disa; nuli liip man ililtap kelup yakalaya kawu, nuli tambal-kup kukuyin disa keba no, kalokomup.
HEB 12:9 Kemin, ipkal kuumi aket kaata fuku-daa kelin o. Numi tawaal diim kaldaak-ami awil-fakal kalawiili, kanuyin-bulupla, man imi kukup mafak kanubip uyo kulaalin o, kal-bomdiwa nuyo titil weng bakayin-bam ale, ye-bamdip kanu-bam kukuya-lom kanuyin-biliwa kemin, nuli imi weng kaata-kup weng san-kaa-bamale, ilmi win uyo kufoyinsup. Kemin, ultap o. Nulmi Aalap abiil tikiin kayaak ami weng kaata-kup suunkup weng san-kaa-bamale, alami win-kup kufumum o, kala, kala-lomdupla kemin, aso maakup suunkup tambal-kup ilum o, kala-somla ko.
HEB 12:10 Numi tawaal diim kalawaami awil-fakal kiilile, ilmi aket fukunin kaata-kup titil weng bakayin-bamdip, ye-bam ale, kukuya kulii yakaba toop ilanin tap ke utamiwa yi, Tiknu kala kalip namti, ti kuyaku dilit kalu no, kala kulaa-yaabip. Yale, God alile, Ili ti kano dong dokoyila, abiin tambal-kup tiin bomdiwa, faneng ti nami kukup tambal kaata kuluulin o, kala-lomdala, aket uluum aa, angtiil yol aye uyo kukaayila-yaaba.
HEB 12:11 Kemin, Aatumen God ami kanu-bamdi kukuyon o, kal-bomda, mafek mafek mafak uyo kuno kewa, tildaak numi diim abam-nokomu kabak-ata fan, nuli fiyaap duu-mokomup disa. Numi aket tem uyo uluum-kup tabeyokomu. Yale, kanola nuli God ami numi aket uluum angtiil yol kukaayinba uyo, faleyilu no, kalalup fal-siki yak God ami kuuta kanumin o, kalba kaata-kup fukulup namti, mulo kawu nuyo kukup tambal uyo kanu-bamduwale, numi aket tem uyo balili-kup keyulala, bom-ilokomup o.
HEB 12:12 Kanolin kemin, kipni tal-unemin, tiin-yaamin uyo ipkal titil-fak-daale, kipni aket tem aa, uyo talal-bilip atin tambal-kup keya-buluya kayi!
HEB 12:13 Kemin, ibi dikil-dakal-kemin daa; tituun-kup tola tal-une-bamdipla, kipni kukup tambal tambal ke-mokomip kabak-ata taba-lomdu, kipni tal-unemin uyo yam-titil-diiluk o, kala-somla ko. Kanola yaan malii uyo mafak ilu no, kalalip uta kano bulu tal-unemin-kup ke-mokomip kaali, tilik uyo atin mafak ilokomu disa; asuk tambal-nokomu no.
HEB 12:14 Kemin, ipkal kano titil-fak-daa kaptum kusal alik iso aket maakup ke una-tala-ke-bam ale, atin kukup tambal tambal kaata-kup ke-bam kanu-biliwa yo. Tunum ayo kukup tambal kaa, ami diim kawu ma bombuu disa; ali Dukum kaa ma ata-mokoma disa te!
HEB 12:15 Ibi talalu utafii-bamdiwa yi! God ali Kristen nuli kukup tambal kaata-kup kukaayin-kup iloma. Katale, ipkal atamiwa yi, Tunum ayo ma God ami kela yang ban-ilomda Kristen iltipni iipyak tem bombe ayo ma aket mafak ke-lom aket uluum uyo imi kuyon o, kala, kalaliwa, kanumin daa yo, kal-bom liip kukolin o, kala-somla ko. Ale, ibi liip kukolin disa nolip namti, ami kukup mafak uyo atin dukum ke-lomdu, yam-mafak-dakan-tal-une-bulula, yaapkan ipyo God ami tiin diim uyo mafak-nokomip kemin, talalu utafii-bamdiwa kayi!
HEB 12:16 Tunum ma ayo sadiki-mokoma aye, mep siin sawaayak kawu, Jekop fik Iso ayo ami God daang wukonsa ultap ke-lokoma aye kemin, uyo talalu utafii-amdiwa. Iso ali man diil kemin, aalap ami mafek mafek anung dukum uyo Iso kaami kolakin. Yale, am ma daanule, Iso ayo ima tinap kelule, liip maakup fak-daa-lomda, niing ami inin-inin uyo mo-lomda inasa. Kemin ale, ami inin-inin kun mose kaali, fik Iso ali talalu aket fukunin disa ke-lom, alta fik diilim kesa kaami titil kaata kulaawala, yak niing ami diim abamnula, niing asiik tiltam fik keliya, kulu moli no, akalala mosa, kaali God ami daang ukonsa tap kesa. Lale,
HEB 12:17 mulo kabaku Iso ami aket fukunin kaali, Nali man diil kemin, aatumen ayo tambal ma ayo kup-nama no, kala, aalap ali daa yo, kala kaa kalba-kup, Iso ami weng so ma kolin dinim kela kaami kalan kaata suunkup fen-bam ama-bala bii, Awu, nali kulawaali yak niing ami diim ababu kaa dok kano-somdila, asuk yak kuluulokomi dinim o, kalalaya, kelase uyo ipkal utamsip taa.
HEB 12:18 Siin sawaayak Israel-miin iyo yak aba bilin Sainai Tikiin ami tawap tem yak unsip. Yale, kamala kalawaali ibi tildaak amdu tikiin umi mepso uyo tildaak tilin dinim bom-bilip kemin, Israel iyo din as dukum kiin-bokobu so, atin malang tini muma tinibu so, inim dulul dukum so,
HEB 12:19 fong ket ami naanba so, God ami weng kabaku bakabu uso, kaami mepso kuluba-lom, unang tunum iyo kano God ami weng kabaku bakaba kaami atul suun-daa-lomdip, Moses ami bokolip ko: Kapyo, nuli weng kaali maso ma weng sanokomup disa yo, kal-bomdip bakaansip.
HEB 12:20 Kabak-ami miit kaalile, dok kata naa kalolip: God ali boko-lomda: Kanola tunum ma sikil kuyak amdu uyo malela namti, ibi tuum tup aalip taanak o. Aa, kuno ti bulumaki aye, sipsip aye, kiikal yak amdu uyo malelip namti, kiikal ti anulip taanalip kayi! kalala kemin, unang tunum iyo suun-daalip ko.
HEB 12:21 Mep mafek mafek kaa utafiibip kaami atul kaata atin utam suun-biliwa, Moses akal bokoya-lomda: Nakal ti suun-daa-lomdi walwaal tap-tap-kebi kayi! yakan-kaamsa.
HEB 12:22 Ibi din kanolin mafek mafek kaami mepso uyo yang unin disa. La, ibi tildang amdu tikiin Saiyon o, kalbip uyo, God suunkup ilin ami tibi diim yang aba-lom, Jerusalam abip uyo abiil tikiin kaptam un-silip. Kemin, ami abip kaltam-ali ensel deng yaapkan kiita bom-bilip.
HEB 12:23 Ibi tal God alami man diil yaapkan imi tala-tala-ke-bamdip fiyaap duubip imi diim tal-silip. Ale, kiimi win kaali, God ali abiil tikiin kawu dola kutiiyase. Ibi tal mepso kulu tola-silip. Kemin, kaptam-ali God ali unang tunum alik imi yim-bak-saanokoma tunum kaali, bombe, aa sawaayak God ami bokola-lomda: Ibi tituun-kup tabin unang tunum o, kala-lomda, iyo talalu-yimula tiltam tambal-kup o, ke-silip iyo, God aso bom-bilip.
HEB 12:24 Kemin, God ami kama weng boko kutiisa kaami diim kawu, kabak-ali Kraist ata kaldaaku unang tunum yim-tamala din God ami miit tem daayon o, kalsa ata siin kaa almi kiim kaata balaka-bam lang daala taba-lomdu, mep kama weng ma kuka-daase uyo, ku-titil-diilula kewasuu kaa bombuu. Kemin, kaami kiim umi weng bakabu kaali, sawaayak Abel ami kiim kaami iipyak tem kabaku baka-bamdu: Ami maan uyo, telan o, kal-bom bakamsu ultap disa. La, Yesus ami kiim ta unang tunum imi ban uyo takan-tiiyasu kaata, uta uta ke-lomdula, Abel ami kiim uyo kulaak banu kewa-somdula, atin ti weng tambal kaata-kup bakan-umbu no.
HEB 12:25 Ipkal talalu utafii-bamdiwa kayi! Ibi kamala tunum kala weng bakaba uyo talang tem uyo katii ami weng kaa kuyang saak tiimin daa. Sawaayak kaali, tawaal diim kalawaali God ayo Israel unang tunum imi titil tibin weng kaata kutiiyinsa. Yale, ami weng uyo kuyang saak ten-bam ilsip. Kemin, utamdula, dok kano-somdip ukadaa un-bomdiwa, ilmi ban kemin kaami maan tiiyokoma uyo uktaansip disa. Kamala kaa God ayo abiil tikiin kawu bomdala, numi titil weng kaata, kukaayinba kemin, kanola ayo daang ukolup namti, dok kano-somdupla, nulmi ban kemin kaami maan tiiyokoma uyo uktaala yang banokomup disa. Atin ti disa te!
HEB 12:26 Kemin, siin kaali, God alta weng kulaata-kup baka-balaya, Sainai Tikiin kaptam-ali liinin aalap dukum kulaasu. Yale, kamala kalawaata bokoya-lomda: Tawaal kalawaali liip maakup ma fak-daa asuk kuukala-mo ke ke-lokomi. Yale, kaa tawaal kaata-kup disa; abiil so, tawaal so, maakup kuukala molokomi no, kalsa.
HEB 12:27 Weng kaa boko-lomda: Liip maakup maso ma fak-daa kelami no, kalase kabak-ata nuli kukuyulu utamsup. Kemin, ilom God ami sawaayak mafek mafek talalbi kutiisa kuuli, kuukala-mola liinbi kalula, kawu takan-tiilokoma. Asuk maso ma ilokomu disa. Yale, mafek mafek maakup tap alep tap ita liinin disa; kambolaya, uta suunkup kano ilokomu.
HEB 12:28 God ami miit tem tiltam tal-sulup kaali, tunum maakup inang ma ata taba-lomda, kuukala saan-balaya, liinokomu disa. Kemin, nokol kaali atin God ayo yaap ke yo, akan-kaa-bamduwa kayi! Numi God ali ti as dukum kiin-taba-lomdu, mafek mafek alik fuula kiin-aba-laabu ulultap ke-lokoma. Yale, ali numi am ma abiil tikiin kawu talalu kutiiyinsa. Kemin, nuli ami titil kaa kanun-umba kaami aket kaata talalu fukun-bam ami fiyaap kaata duu-bamduwa yo. Almi kala nuu-bamdiwa yi, yakan-kaa-bamda kukuyinba kaata-kup, kanu-bam ami lotu kaata-kup kamaan-buluwa yo, kala-somla ko.
HEB 13:1 Kibi suunkup kap-tunum kusal Kristen kesip imi mok uyo inela una-tala-ke-bamdiwa yo!
HEB 13:2 Uyo ipkal utamipla yi, Sawaayak kaali, tunum malo ma iyo tunum fatal tal imi am tiliple, dong dakaayila unan-solip. Kemin, am ma daanule utamiwa yi, Kiili ensel tilip u, kalolip disa; ti disa maaklo foko kutal ilmi am tii tiin molip un-un-kemsip. Kemin, ipkal kanolin umi aket uyo lukuuya-laamin disa ko.
HEB 13:3 Kemin, kanola kayak kayak iyo iltipni kap-tunum kusal Kristen kesip iyo sok de-yimulip kela kalip namti, ipkal aket fuku-daaliwa yi, Kayak kayak iyo nuso kanola de-yimulalip kala, kalalip, kaptum kusal de-yimulip bom-bilip kiimi aket kaata fukun-bamdiwa, dong dakaayin-bilip o, kala-somla kemin; aa ti kanola kaptum kusal iyo angtiil yol uyo kuluulip kala kalip namti, kipni sawaayak angtiil yol dukum utafiim-solip kaami aket kaata fukun-bamdiwa, kulaa kaptum kusal imi aket kaata fukun-bam dong dakaayin-biliwa yo!
HEB 13:4 Unang din, tunum din kemin kabak-ali ti tambal kemin, alik ibi kuu atin talalu tiin mo-bomdiwa; kalel so, imak so, kiili kuno maas kela kulu, akal-bala-ukol-bulu-kemin disa; atin tambal-kup kalel tiin mola imak tiin molu ke-bamdipla yo. Ale, kanumin disa kemip namti, bombii am ma daanokomu kaali, unang sadikimin so, unang din tunum din ku-mafak-dakamin so, kiilile, God ata imi kanun-umbip imi yim-bak-saan-bamda kaami maan uyo tiiyokoma kayi!
HEB 13:5 God ali boko-lomda: Nali atin kambop-tokomi disale, aa daang ukup-tokomi disa yo, kalase. Kemin, ibi moni kaami aket kaata-kup yan-bulula mok inin dinim; la, ipkal utamipla, Katip ma kuluu fukulup o, kalip namti, kipni aket kaali, fuku-daaliple: Kaali ti kemin tambal o, ke-bomduwa yo, kala-somla ko.
HEB 13:6 Kalase kemin, nokol numi aket tem uyo ti titil-fak-daa boko-lom: Dukum ali dong dakaap-nokoma. Kemin, suunbi disa; dok kanolin tunum ata taba-lomda, kalok nolin kaata nuup-nala suun daalokomi disa yo, kal-bomdupla yo, kala-somla ko.
HEB 13:7 Kemin, siin kipni Kristen kamok kamok kiimi God ami weng kipni kukaayinsip imi aket kaata asuk fukun-bam ale, yak imi tal-unemin, tiin-yaamin tambal so, kanum un-bomdiwa taansip so, kaami aket kabak-ayo fukun-bam ale, imi yak Kraist ami lak dakaan-un-silip kaami kukup kaata, kutal-fuku-lom ke-bamdipla yo!
HEB 13:8 Kanola Yesus Kraist ami aket fanang saanin tambal so, kukup tambal kanu-bam iloma so, kaali kaptoop tabasu so, kamala so, ilu ilu kaptoop ami kukup uli ukol ulmi alik kusnum disa; kemin ti maakup kanolin kaata-kup.
HEB 13:9 Kanolin kemin, tunum iyo ma weng ukol ulmi kusnum kusnum kaata kukuyin-biliwa, talaba yak kipni aket tem unokomu kaa, ipni Kraist ami lak dakamin kaa kambola-yaamin daa. God ata kukup tambal kukaayin-balala, uta taba kipni aket tem uyo ku-titil-moya dong dakaayuk o, kala-somla kemin; kanola nuyo kambola yak inin-inin kaami lo akal alik akal alik kaata ma kutal-fukulokomup kaali, titil-foko taang-kala numi aket tem uyo ku-titil-moyokomu disa te! Kanolin kukup uta taba-lomdu unang tunum kii dong dakaayila-tabasu disa yo.
HEB 13:10 Yesus ayo as diim taan-ilom kawu, numi ban uyo moyinsa kaata, kutal-fukun-umbup. La, unang tunum iyo Moses ami Lo kaata kuluu-lomdip God ami win uyo kufolum o, kala-lomdip daang baka-bilipla, Yesus ami kiim kaata, unang tunum imi ban kemin moyasu uyo imi dong dokoyamu disa yo.
HEB 13:11 Tunum awem diilim ayo tal olti ami kiim kaata-kup iluu kulii tam God ami abiin awem tam God ami kolala, unang tunum imi ban uyo takan-tiiyilale, kulaa olti kaami tiil ayo God ami kolin disa nolip kaata, kulii-tiltam abip aba kela yang am daang kabangu fuulip alik kiin-tal-une-bam kemsu no.
HEB 13:12 Ultap kanola, Yesus akal tiltam Jerusalam kaptam-ami daam tem abip ami am daang kaptamu taanse. Kemin, kanola unang tunum iyo talalu-yimuliya, tiltam atin tambalnin o, kalalaya, angtiil yol uyo kuluulaya, alami kiim kaata sing-tam-daa-lomda nuli talalu-yimusa.
HEB 13:13 Tunum ita tal tunum ma dibii-tam abip saaklo kawu dabak as diim daa aaliwa, taana namti, unang tunum iyo boko-lom: Atin fatom o, kalokomip. Yale, Yesus ayo numi kalan kaata tunum kamboyala, ita dibii-tal abip saak lo kawu aaliwa taanaya, unang tunum iyo boko-lomdip: Atin fatom o, kalsip. Kanolin kemin, Yesus alaltap ke-lomdupla, ami be kawu din ilum o, kala siin God ami win uyo kufon-bisip uyo atin ti kelum o, kala-somla ko.
HEB 13:14 Nokol utamsup, Tawaal diim kalawaali, numi suunkup abip dukum kaa ma bombuu disa. Lale, am ma daanokomu uyo suunkup abip ma tiltam tabokomu kuuta fenbup o.
HEB 13:15 Nuli Yesus ami win kufon-bamdup fiyaap duumin kaata God ayo kukaan-bam ale, yak God ami olti kukaala-yaabip ulultap ke win kufon-bamdup fiyaap duumin uyo suunkup God ami kukaan-bam ale, numi bon tem weng uyo, Nuli Yesus ami lak duusup o, kalin ami sang kaata-kup unang tunum imi bakayin-bam ke-bamduwa yo!
HEB 13:16 Kemin, ibi yak kukup tambal unang tunum imi kukaayin kaami aket kaa lukuuya-yaamin disa. Mafek mafek yak kipni diim buu uyo, kumup-daa kutii yak tunum mafek mafek duluuba ayo dong dakaan-bamdipla kala-somla kemin, kanolin kukup kaali ti, God ami mafek mafek masiim kukaalin ultap. Kemin, ali kanumin kukup kaata-kup fiyaap dukum duun-unba no.
HEB 13:17 Kristen kipni kamok kamok iyo dong dakaayin-bulup tambal-kup bom-bilipla bomduwa yo, kalaliwa, ibi suunkup tiin mosip. Kemin, bombii ilmi okok ken-umbip kaami sang uyo alik God ami kukaalokomip. Yak iyo aket uluum tabe-bamdip ipyo tiin molip namti, kaali ibi dong dokoyokomu disa; ipkal kiimi minlo tem kabang ban-ilomdip, imi weng-kup weng san-kaa-bamdipla yo. Kanola ibi kanu-mokomip kaata, iyo aket uluum tabeyokomu disa; kiimi okok kemin kaami fiyaap kaata duu-bam ale, okok kemin uyo tambal-kup tabuulokomip o.
HEB 13:18 Nulmi aket tem kabak utamupla, God ami tiin diim uyo tituun u, kalalup, nuli suunkup tituun-kup tabin tal-unemum o, kebup. Kemin, ibi God ami beten kamaan-bilip nuyo dong dakaayin-balaya, kanumum o, kala-somla
HEB 13:19 kemin ale, kap-tunum nami aket fukunin kaali, ibi God ami beten kamaan-bilipla, dong dokop-nala, nali asuk abiltap ipni fanang din unon o, kebi ko.
HEB 13:20 Nili ipni kalan God ami beten kamaala-laabi uyo, Yesus ami aalip taanse kaali, olti kulii-din God ami kukaalin ulultap keliwa, ami kiim ata taba-lomda God ami mafiing diim tam weng akal kusnum ma kuka-daase kaata, dap-titil-diilala, suunkup ti kano laaba. Kemin, God ali asuk numi Kamokim Yesus ayo dafose. Kemin, kaami taansa kaata ami sipsip nuyo, atin ti tambal-kup tiin saanin-kup laaba. Kanola God ali aket balili kemin ami miit kayaakim alta taba-lomda, kukup tambal yaapkan uyo ibi kukaayin-balaya, ibi yaap ami kuuta kanumin o, kalba kaata-kup kutal-fukulin o. God ami kuuta kanolon o, keba uyo, Yesus Kraist ami alik kolaya, alta alik numi aket tem kabak-ali kukuyilala, kanun-umbu. Kemin, Kraist ami win uyo kufon-bamdup suunkup suunkup fiyaap duu-bamduwa yo, kala-somla kemin kuluuta taa!
HEB 13:22 Kemin, nata sukon mepkan tap so ma kala kipni dola kuyili. Lale, nalmi nak-tunum kusal kipyo, Nali dong dakaayin weng ma dukum-kup bokoyon o, kali kemin, ibi weng kalawuuli weng san bom-silipla bokoyon o, kala-somla ko.
HEB 13:23 Ti ipkal utamin. Nulmi nak-tunum Timoti ayo sok tildaa dabaalipla, kalabus am kaptam-ali maso ma bombe disa. Kanola ayo abiltap tal nami diim uyo tala kala kali namti, kawu alep nuli din ibi ita-mokomup ko.
HEB 13:24 Mep numi weng umuuyup uyo ipni Kristen imi dabom dabom so, God ami unang tunum alik iso, iyo kuuyin o, kala-somla kemin, Provins Itali umi Kristen ibi weng umuuya kelip o.
HEB 13:25 Kemin, God ata taba-lom ibi alik kukup tambal disa misiim kawu kaata-kup talal-yim-bam tiin mola, tambal-kup biliwa yo!
JAM 1:1 Nak-tunum kusal kaa tiinsip o? Jems, nali God so, Kamokim Yesus Kraist so, alim imi okok-kemin tunum nita sukon kala dola-lomdi Israel tunum miit talangkal iltipni abip tituun kelalip, yak aba bilin abip ma ma unaasip ipni weng umuuyon o, kala-lomdila ko.
JAM 1:2 Nimi nak-tunum kusal Kristen kipyo! Nokol utamsup, Mafek mafek uluum tabin iyo tal yam-kukuliwa kawu, nuyo tildak God ami lak duubup uyo titil-fukulum o, kalup namti, titil-fak-daa yakyak unokomup o. Kanolin kanolin mafek mafek uluum tabin iyo tildak ipni diim abamnip namti, ipkal uyo fiyaap duu-bamdiwa yo.
JAM 1:4 Ibi suunkup titil-fak-daa-lomdip balili-kalin kukup uyo fuku-bom um-kukun-una-bilip umbutoop iltipni kukup alik disa keyuluya, God ami kukup tambal uyo uktiiwa-yaamin dinim, atin ti tiknu keyilaya, ibi tambal-kup kelin o, kala-somla ko.
JAM 1:5 Kanola ipni tunum ma ami aket fukunin tambal uyo, iipnu no, kala namti, baan ayo God ami dik-daalaya, God ata aket fukunin tambal uyo kolokoma. Kemin, God ami kukaayila-yaaba kaali, im-bak-saanokoma disa. Disa masiim kawu kukaayila-yaaba.
JAM 1:6 Kabi God ami mafek mafek sang dik-daalon o, kalokomap kaali, boko-lomdap: Kaata kup-nokoma ne? kep-nokoma ne? kala aket alep fukunin daa; ti kaata fan tituun kup-nokoma kala kala-lomdapla, dik-daalan o. Ale, kawanta aket alep fukun-bamda dik-daala namti, ali yol ok daang kun diim tap ke, inim ta fufu tal non-bala, ok daang ayo alin-alin tam aba daak aba kem-talebu tap o.
JAM 1:7 Tunum aket alep fukunin ami kukup uyo alik fal-siki-lom kaltam-daa, kuu kaldaak-daa-kemin o. Kanuba kaa, tunum, Nayo Aatumen God ami dik-daaliya, nami weng kaa maan tiip-na-lom mafek mafek kup-nokoma no, kaloma ni! Atin ti disa yo.
JAM 1:9 Tunum Kristen kesa ayo iip kulu ilin bafinim ila namti, ali utama yi, God ami tiin diim kawu nali win so kesi no, kalalala, fiyaap duumak o.
JAM 1:10 Ale, tunum Kristen kesa ayo mafek mafek soyap kesa namti, ali utamala, God ami tiin diim uyo, Nali win dinim kesi no, kalalala, fiyaap duumak o. Kanola tunum ami taanokoma kaali, as tes ulultap bam-daa-lomdu ilom aluula data-lomdu taan-yaabu ulultap o.
JAM 1:11 Kemin, atan tiltam tabokomu ayo mamin kuyak daa-lomdu as tes ayo data taan-ilom dekela daak aba-lomdu umi dawang uyo mafaka-yaabu ultap o. Tunum mafek mafek soyap akal kanola almi mafek mafek kiita-kup tiin saan-bamda taanokoma no.
JAM 1:12 Tunum ayo mafek mafek mafak uta taba-lomdu dap-kululula, titil-fak-daa-lomda kanuma namti, ali fiyaap duumak o. Siin kaali, God ayo weng kuka-daa-lomda: Ibi nami aket uyo dukum-kup kup-nip namti, ipni suunkup tiin kawang ilin uyo kuyokomi no, kalase. Kemin, kanola tunum ayo titil-fak-daa-bomda mafek mafek mafak uyo kuu-kayak daka-bamda ila namti, God ayo kaami suunkup tiin kawang ilin uyo kolaya, God so suunkup ilokoma no.
JAM 1:13 Ban wakamin kuuli, God ami sisii dibii-yang banokomu disa; ale, God ali tunum kii sisii imbang daalaya, ban waka-mokomip dinim; kanola mafek mafek mafak uta, tiltam ilomdu tunum ami diim aba-lom sisii dibii yang daalu ban kema namti, ali boko-lomda: God ata sisii nam-bang daalaya, kanubi no, kemin daa ko.
JAM 1:14 Daa! Tunum alami aket fukunin mafak kaata oko-tokola-lom ami ibokolalala, yang ilomda ban wakan-umba no.
JAM 1:15 Kaali man fakamin ultap kemin, unang uyo kumun so kebii, man duu ifa-bulu, yak aba butoop fasuu tunum aalap dukum ke-laaba tap, kanola tunum ayo aket kufolula ban kelon o, kala biile, yang ami ban kela uyo dukum-alomdu dap-mafak-daaluya taanokoma ko.
JAM 1:16 Atin nalmi nak-tunum kusal kipyo! God ali kukup mafak aye, mafek mafek mafak aa, kii ma kukaayila-yaaba nema? Disa! Ti ipkal fanang daatamin!
JAM 1:17 Ali kukup tambal so, mafek mafek tambal iso, kiita-kup kukaayila-yaaba. Kukup tambal, mafek mafek tambal alik iyo disa masiim kukaayin kaata, God ami diim kawu talen-umbu. Le falala-kalin miit kayaak alta-kup kulaala tildaak talen-unbu. Kemin, God ami kukup uyo fal-siki-du-siki-kemin dinim, ale ali am atan tiltam aba tala-buluya, umi mafek mafek sinik mepkan ke-som, batbat ke-som, kemin ultap disa ko.
JAM 1:18 Ali ti almi aket fukunin kaata-kup tituun weng uyo kuyilaya, weng sandupla, ami lak duuluple, ata numi aalap kelaya, ami tiin diim ayo win so ke-lomdup, tunum miit diildiil ke-sulup o.
JAM 1:19 Nalami nak-tunum kusal kipyo! Ibi dotu weng selin! Ibi abiltap weng bakamin daa; duluum-alom kap-tunum kusal imi weng uyo alik weng san-somdiwa yo. Tunum kaami aket atul ke-lokoma kaa dong dokolala, God ami kukup tambal kaa kuluu-lom titil-fokolokoma dinim; kemin, ibi abiltap-siik aket atul tabemin daa yo.
JAM 1:21 Kemin, kanola kukup mafak mafak ninak tiinsu kukup kaata yaapkan ipni aket tem kabaku bom-bilip iyo kanum-laabip kemin, kelaliwa yo, kala-somla ko. God ami weng kaata, ipni sinik iyo yim-tama tam God ami miit tem daalama kemin, ibi bilili kala-lomdip God ami weng kuyak ipni aket tem daayila bombu kuuli, dotu fuku-bom ilin o, kala-somla ko.
JAM 1:22 Ibi aket bam-daalin! God ami weng uyo disa kulu weng san ale, ti tiknin o, kemin disa; dotu weng san-kaa-bam ale nuumalip ko.
JAM 1:23 Tunum ali God ami weng uyo weng san-kaama. Katale, titil-fak-daalin dinim ke-lomda, disa kulu weng san-kaama namti, kaa tunum ami oktit kuluu-lomda tiyak daa almi tiin matum atafiiba ultap.
JAM 1:24 Kemin, almi tiin matum ayo tiyak daa utam kela tal-une-bamda asuk abiltap ami tiin matum utama kaami aket uyo lokolu le, aket uyo asuk fukunokoma dinim.
JAM 1:25 Kanola, tunum ma God ami weng miit o, kala lo kaami miit uyo dotu utafii-bam ale, weng disa weng san-kaamin daa; weng san-ilomda, kutal-fukula namti, kaali titil-foko-bom-balaya, God ata taba-lomda dong dokolala, fiyaap-kup duu-bamda ilokoma. God ami lo uyo atin ti tambal kemin, tunum unang kukup mafak ta sok de-yim-tiisu iyo weng seliwa, Faneng u, kala God ami lak duulipla, tildaa yim-baala tangbal-kup unen-umbip o.
JAM 1:26 Kanola tunum ali ma aket fukun-ilomda: Nali Kristen tambal aa, nali ti fan, God ami lotu kamaala-yaabi no kalokoma. Lale, ami weng uyo talalu aket fukun-bamda bokolokoma disa; ap-tunum kusal imi itafiimin weng baka-bamdala, nali yaap kepnula, tambal-kup kanubi no, kalokoma. Yale, ami aket fukunin kaa mafak kemin kaami God ami lak dakaamin ami lotu kemin so kula disa yo.
JAM 1:27 Aatumen God ayo kalok nolin tunum kaata atama yi, Kaali atin fan Kristen kesa kala kalokoma ni? Kulaa ye? Man bon aye, unang kaluun aa, iyo fiit-bam tal-unebip iyo dong dakaya-tal-une-bamda, kukup mafak taba-lomdu dap-mafak-daalon o, kalbu uyo akal titil-foko tituun-kup ke-bam ilin tunum ata te!
JAM 2:1 Nalmi nak-tunum kusal kipyo! Numi Kamokim Yesus Kraist kaali ti akal alami kusnum ale, win tibin o. Ibi ami lak duusip namti, ibi tunum win tibin kaata-kup tambal tambal ma kamayim-bam ale, tunum win dinim iyo keya-laamin daa.
JAM 2:2 Kanola tunum ma ilim akal kutook-soyim ma mikiba-kup, sikil duung diim gol iling o, kalbip uyo kutoop tini kela tam lotu am tam unale, kuno tunum ma ata, ilim mafak mikilin tiltam lotu am taltam talokomip kiili,
JAM 2:3 ibi tunum ilim tambal mikilin ata tambal tambal kamaan-bamdip bokolip ko: Nak-tunum kapyo, tal abiin tambal kaldaku tiinan o, anbip-kup, yak iiwaan mafek mafek balupyaap ata kanum bokolip ko: Kabi yak kuldaaku tolnan e! daak abiin diim nami yaan mepso kulu tiinan e, akokomip.
JAM 2:4 Kemin, ibi kanolin kukup kaata titil-fukulip namti, kaa ibi afet-bamdiwa, aa, yang kalaata tunum mafak tildang, kalaata tunum tangbal kebip uyo, ibi weng talalmin tunum mafak ke-bam ale, aket mafak kaata fukun-bam kanubip o.
JAM 2:5 Nak-tunum kusal kipyo, ibi weng selin! God ayo weng kutii boko-lomda: Kawanita nimi aket-kup kup-nip namti, yim-tama tiltam nalmi miit tem tiilokomi no, kalsa. Kemin, am kala daanu kaa, God ali tawaal diim kalaami mafek mafek dinim iiwaan unang tunum yaapkan iyo ulelnala, Kraist ami lak kaata duu-lom tiltam talebip. Kemin, imi lak duu-silip kaali ti sakbaalim dukum o.
JAM 2:6 Lale, ibi kap-tunum kusal mafek mafek dinimal imi kukup mafak so, fatom tabin kukup so, iyo kukaayin-bam ken-umbip. Nokol kiili utamsup kemin, mafek mafek soyal kiita, nuyo kukup mafak kuya, aket uluum kuya, kebip-kup yim-tama din kot baan diim kawu daka-bam kem-yaabip.
JAM 2:7 God ayo Kraist ami win tambal kaata numi kuyinsa. Yale, mafek mafek soyal itale, ami win kaa ku-mafak-daa atafiimin weng so, balopmin weng so, kiita bakan-tabasip ko.
JAM 2:8 Nulmi God King ami Baibel tem weng kabak-ali boko-lomdu: Kabi kaltapni angtiil lak duu-lom yaap-kup tiin saanbap tap kelap, kaptum kusal kayak kayak imi lak uta duu tangbal tangbal ma kamayin o, kala weng kutiisa. Kemin, ibi ti kanumip namti, atin kaa kukup tambal ke-mokomip. Kemin,
JAM 2:9 ibi tunum kii, malii ma tambal tambal ma kamayin-bam ale, malii ma ita daang ukuyip namti, kibi ban keliwale, Lo kaa weng kuka-daasa okol ti ibi bokoya-lomdu: Ibi lo kaa duula-laabip o, kebu ko.
JAM 2:10 Tunum ma ayo weng awem kutiimin Lo yo, kalbip uyo, alik titil-foko-lom kutal-fuku-unokoma. Lale, Lo maakup ma uta lola namti, kulaali ti Lo alik duulmin kaami uluum namti kulu kuluula no.
JAM 2:11 Siin sawaayak kawu, God ayo boko-lomda: Ibi kaptum kusal imi kalel kusal imak kusal kiiyo, sadikimin daa yo, kalale, asuk ti ulta boko-lomdu: Ibi unang tunum kii yelip taan-yaamin disa yo, kalsu. Kemin, kabi kaptum ami kalel sadikimin dinim. Ya, tunum ayo ma aalap taana namti, kulaali Lo alik duulmin tunum kelap te!
JAM 2:12 Kraist ami lo kutiise uta numi ban wakamin umi titil uyo wela kabaak banuya kewa, nuli dalaal kesup. Bii-lom God ayo Lo kalawaali utam-ilomda, numi kukup kanun-umbup uyo yam-kuku-balaya, kaata yim-bak-saanokoma kemin, ibi umi aket uyo fukun-bamdip, weng tambal kaata-kup baka-bam ale kukup tambal kaata titil-foko-lom kutal-fuku kemin o, kala-somya ko.
JAM 2:13 Kaa dok kata naa kalolip: Kanola, kabi kap-tunum kusal kii olen-dakaayin-bam imi dong dakaayin disa kemap namti, am mafiing diim kawu God ami yam-kuku-bamda yim-bak-saanokoma diim kulu, God akal olen-daap-tokoma dinim. Kemin, kabi kaptum kusal iyo olen-dakaayin-bam dong dakaaya-laabap namti, God akal olen-daap-ta-lomda ifan o, kala dong dokop-tama ko.
JAM 2:14 Nalmi nak-tunum kusal kipyo, tunum ma ayo boko-lomda: Nali Yesus ami lak duusi no, kalsa. Katale, kukup tambal uyo ma kutal-fukusa disa namti, ayo Yesus ami lak duusi no, kalba uyo disa kulu bakan-umba. Kemin, kanolin kukup kuuta kutal-fukula namti, God ali dabuulokoma disa.
JAM 2:15 Kanola, kabi kap-tunum Kristen kesa ayo atam talaalap, Ima so, ilim kaal so, iyo uktiip-nala atam bokola-lomdap:
JAM 2:16 Nak-tunum kapyo, balili-kup kala bomdawa, tambal-kup din-ilom ilim ayo miki-lomdap mamin foko-lom, ima ayo inbii tiikni kaa kalale, saan o, akap. Lale, mafek mafek iiba uyo kolin disa kelap, disa weng kaata-kup bokolap namti, kaata dong dokolokomu disa.
JAM 2:17 Kuno numi Kraist ami lak dakaamin kaakal ti kanolin o. Nuli ami lak duubup o, kalbup. Lale, kukup tambal uyo ma kutal-fukulin disa kelup namti, nuli ami lak duulup kaali, fan disa yo.
JAM 2:18 Tunum maakup ma ayo bokop-na-lomda: Daa; tunum alep bom-bilip kemin, ma kaata boko-lomda: Nili Yesus ami lak-kup duuli no, kalale, ma ata boko-lomda: Kukup tambal-kup nuumi no, kala namti, nali kaa nakal maan tela bokola-lomdi: Kaltapta, imi Yesus ami lak duu-bom kukup tambal titil-fukulin dinim bom-bilip uyo kukup-nap utam yam-kukuliya, imi Yesus ami lak duusip uyo disa kulu nun-umbip kaalile, kuno nakal nimi kukup tambal ukol kukup-ti, nakal imi lak duusi uyo utam nam-kukulawa yi, U faneng, ti ami lak duusa nakap kelum o, kalokomi.
JAM 2:19 Kabi God ami lak duulawa, God ali ti maakup ata-kup, kalbap kaali, tambal. Yale, kuno sinik mafak yakal ti God ami lak duuliwa, God ali ti maakup ata-kup o, kalsip. Katale, suun-bamdip wulwaal-kup tap-tap-ken-umbip.
JAM 2:20 Aket mafak fukunin kapyo! Kabi kalok no-lom, uta-mokomap i? Tunum Kraist ami lak duu-bomda kukup tambal kutal-fukulin dinim kemin, kaami Yesus ami lak duusa kulaa disa yo.
JAM 2:21 Ultap kemin, sawaayak kawu numi awaalik Abraham ami kanosa kaata aket fukunum. Ali almi man Aisak dibii tam an-ilomdi God ami kolon o, kemaya, God ayo Abraham ami kukup kanuba uyo, utam-ilomda bokola ko: Kabi tiltam tituun-kup tabin tunum kelap o, ansa.
JAM 2:22 Abraham ayo God ami lak duu-bom aa, kukup tambal kutal-fuku-bom kemsa uyo, God ami lak dakaamin kaali ti tiika bom-biisa. Kabi kaali utamap o?
JAM 2:23 God ami Sukon Tem dolsip kabak-ali boko-lomdu kanum bokosu ko: Abraham ali utama ya, God ami weng kup-na kabak-ali ti faneng kanolokoma kala, kalale, God ayo atamala, Abraham ali nimi lak duula kala kala-lomda ali tituun-kup tabin tunum kela no, kalsu. Kemin, Abraham ami Aisak kanonsa sang kaata Sukon Tem kaldaku dolniya, ipyo utamiwa, Abraham ayo God ami lak duu-bom biisa kaali, ti fan o, kalin o. Kemin, God ali baka-bamda: Abraham kaali nami naktum o, akan-kaa-bamda bom-biisa.
JAM 2:24 Kanola tunum ma ayo God ami lak duu-lom disa kulu ila namti, God ayo boko-lomda: Kaali tituun-kup tabin tunum disa yo, kalokoma. Aa, tunum God ami lak duu-lomda, kukup tambal uyo kutal-fuku kema namti, God ali bokola-lomda: Kaali tituun-kup tabin tunum kela no, kalokoma kaa, utamip o?
JAM 2:25 Kanolin o, sawaayak kawu unang sadikinkan Rahap uyo Josua ami tunum alep ma yim-baala din waasi imi abip yam baan tiilip tilin o, kala yim-baala din waasi imi abip din itamipla, uta alep imi tiin mo bom-ilula, am malang tinilaya, alep iyo yim-baalu liip kusnum liip kawu wakadaa unipla, God ayo boko-lomda: Rahap uli, tituun-kup tabin unang o, kalsa ko.
JAM 2:26 Nokol utamsup taa! Nak-tunum ami angtiil ayo sinik dinim o, kalup namti, ali ti taanba no, kalokomup. Kemin, kanola tunum ayo God ami lak duuba. Yale, kukup tambal kaa ma nun-umba disa yo, kalup namti, ayo God ami lak duuba ukol ti disa ke taan-laaba no, kalokomup.
JAM 3:1 Nimi duuk afin kipyo, utamsup kemin, am ma daanokomu uyo God ayo Kristen imi kukuyin tunum nuta dukum-kup yam-kuku-bam yim-bak-saanokoma. Kristen kusnum ita akolkup yam-kuku-bam yim-bak-saanokoma. Kemin, tunum yaapkan ibi kukuyin tunum kemin disa yo, kala-somla ko.
JAM 3:2 Alik numi kukup uyo maaklo kuyak-tini kutalak-tini-kemin kanola tunum ma weng kuyak-tini kutalak-tini-kemin weng uyo bakamin dinim kema namti, ali tituun-kup tabin tunum kemin, almi angtiil uyo tambal-kup tiin mo-bomda kanuba.
JAM 3:3 Tunum ami taloop dukum hos kaami tiin saanin umi kukup uyo kanumin kemin, ain katip ayo kutam bon tem daa, sok fuku-lomda, sok ayo biing aa kulii kawu-kawu-ke-balala, hos ayo utama yi, Awu, kawu liip unum o, kalba kala, kalale, unen-umba.
JAM 3:4 Aa, yol ok daang kun diim tal unemin sip awak dukum umi kukup ukol kanumin kemin, sip uyo sakbaalkan dukum. Yale, inim dukum ata tal iiwa yakyak unen-umbu. Lale, tunum sip muk tabuulin ayo muk fal-siki kabang liip unon o, kalale, sip umi muk ayo atin ti katip tiyok ayo fal-siki kem-salale, sip awak dukum uyo fal-siki tabale, unen-umbu.
JAM 3:5 Kanolin kemin, tunum numi bon tem kaakal kanolin o. Tunum numi bon tem kulaa katip sakap. Yale, weng yamyam baka-mokomup kaali kanola dukum-nokomu no. Ti ipkal utamin! Tikiin kulaakal wing katip kulaata, kuyak daalokomap. Yale, kwin dukum ke-lomda tikiinal aalap dukum ayo kiin-abokoma.
JAM 3:6 Kemin, tunum numi bon tem weng bakamin kaakal wing tukung kiinbu ultap kemin, bon tem kaali tunum numi angtiil anung kemin bomdula, numi kukup mafak mafak kutaltam fatap-daka-buluya, numi angtiil ayo ku-mafak-dakan-umbu. Kanolin kukup uyo Tunum Mafakim Setaan ata tikiin kuyak daalin tap ke-balaya, tiltam taba-lomdu nuso, naktum kusal kiiso, alik maakup as fuulin tap ken-umbu.
JAM 3:7 Tunum iyo alik kanumin kanumin saak olti, nuuk, awon, inap, yol ok kumun tem kaami mafek mafek kiiso, alik fakabi kulii-tal tiin molamip. Aa, kamala kulaakal kanu-bamdip tiin saanbip. Lale,
JAM 3:8 kalok kano-lom tunum ma ayo almi bon tem kaa tiin molama dinim; ale, alami bon tem ayo ti dil molama dinim ke-balaya kemin, weng mafak mafak uyo tiltam aba ap-tunum kusal iyo yam-mafak-dakan-unbu.
JAM 3:9 Kemin, numi bon tem uyo ti Aatumen God ami win kaata kufubup. La, kamasi God ami tunum talalu-yimusa kiili, alaltap dotusa. Yale, nak-tunum kusal iyo weng mafak bakayin-bam ken-yaabup.
JAM 3:10 God ami win kufumin so, nak-tunum kusal imi weng mafak bakayin so, iyo bon tem maakup kawu liip tiltam talen-umbip. Kemin, nimi nak-tunum kusal kipyo, kanumin kukup kaa kanumin daa yo.
JAM 3:11 Ok ami kukup ayo ok afun kabaak-ali ok tambal so, yol ok so, iyo kuyaku-lom tiltam taba-yaabip disa.
JAM 3:12 As fik umi lap abuulokomu kuuli, as oliv ken-umbu disa; aa, wain umi lap abuu-laabu kukal ti as fik ke-yaabu daa; ukol ulmi-kup kemin ale, kuno yol ok kumun iip kabaak-ali dok kano-lomdula, ok tambal ke-lokomu disa.
JAM 3:13 Kipni tunum maakup ma aket fukunin tambal aye, utam-laamin aa ma ken-umba, namti, ayo aket fukunin tambal kuuta utam balili-kala bomda almi kukup tambal uyo ap-tunum kusal kukuya utamiwa yi, Fan, ali aket fukunin tambal kuluusa nu kala kalokomip.
JAM 3:14 Lale, ibi kaptum kusal ilmi bung kalan kaata tuluya, bomdiwa, Nuta-kup o, kala iltipni aket-kup ken-umbip namti, ibi aket fukunin tambal uyo ma utamsip disa kayu! kanun-umbip. Kemin, ibi kasen-fokoya-lom, Nuli aket fukunin tambal kuluusup o, kemin daa.
JAM 3:15 Kanumin kukup so, aket fukunin so, iyo abiil tikiin kawu talen-umbip daa; kaa tawaal diim ulmi mafek mafek kiita. Tunum imi siin kukup kaami aket tem kawu bombuu kaali, Tunum Mafak Setaan ata umi aalap ke-balaya, kanun-tabasip.
JAM 3:16 Kaa dok kata naa kalolip: Tunum malo ma iyo aptum kusal imi bung kalan kaata tuluya bomdip, Nuta-kup o, kal-bomdip ilami aket-kup fukun-bam kemip namti, kanolin tunum kiili talalu abiin tiin-laamin disa; kukup mafak mafak kaata-kup kutal-fukulin-kup ilin ita ko.
JAM 3:17 Aket fukunin tangbal abiil tikiin kawu talen-umbu kaali ti, aket fukunin tambal-kup tabasu kaali, tunum iyo kanun-umbip kiita ti: aptum kusal so, dinin disa ke-lom, aket kola-una-tala-ke-bam, baliti-kup kala bom ale, aptum kusal imi weng uyo weng san-kaa-bam aptum kusal imi olen-yin-bam ale suunkup kukup tangbal uyo kamayim-bam aa, aptum kusal iyo alik maakup kukup tangbal kukaayim-bam ale, imi kukup tangbal kanun-umbip uyo kasen-fakamin disa; tifan tituun-kup kanu-bam nun-umbip.
JAM 3:18 Numi inin-inin san dikilup abuula daka-mokomup tap, dok nolin tunum ita waasi dinin kukup uyo welip tiil banula, balili-kalin kukup uyo ma kutaltam daalip namti, tituun-kup tibin kukup uyo tiltam tabamnuya, kuluulokomip.
JAM 4:1 Kipni weng aal diki-bam ale, din-bom ken-umbip kaami miit kaa, kanim kalan ni? Ibi tit itam-laamin aa, aket atul tabemin kaata nuu-bamdipla, weng diki-bam, dinan-kulii-tabe-bam ken-umbip te! Kaa dok kata naa kalolip:
JAM 4:2 Kibi mafek mafek uyo ma kuluulum o, kaliwa, liip dinim o, kalbip-kup, tunum yemin kaami aket uyo fukun-bam, aa mafek mafek sang bokoyip: Daa yo, kalip ilmi mafek mafek kalan tuluya, aket atul uyo tiltam tulule, weng aal diki-bam ale, dinan-kulii-tabe-bam ken-umbip o. Kaali ibi mafek mafek sang kaa God ami dik-dakalin dinim ke-bilipla kemin, God ali kukaayin disa ken-umba.
JAM 4:3 Mafek mafek sang dik-daalip uyo, ibi aket kaali alep fukun-bamdipla, iltipni mafek mafek sang kaata-kup, dik-dakaan-biliwa kemin, kukaayin dinim ken-umba te!
JAM 4:4 Ibi tawaal diim kaldaak-ami mafek mafek aket kaata-kup yan-bulula ilip namti, God ami daang ukola yang ban-ilomdip waasi kamaala-yaabip kemin, kaa utamip o? Kawanita tawaal diim kaldaak-ami mafek mafek aket aalu ilon o, kala namti, ali God ami waasi kela no.
JAM 4:5 Baibel tem uyo boko-lomdu: God ata tunum numi sinik ayo dabaaya tildak tunum numi iipyak tem un-ilom bombe kaali, God kaa atul-atul-bamda tiin mosa no, kalsu. Kemin, weng kalawuuli kasen-fakamin disa.
JAM 4:6 Kemin, God ali aket balili-kalin dukum kukaayin-bam ilin kemin, Baibel tem dolsip uyo boko-lomdu: God ali fuut tabin tunum iyo yim-baak tabi-lom ale, tunum dak-diiba bom ilin ita, aket bilili-kalin uyo kukaayila-yaaba no, kalsu.
JAM 4:7 Kemin, ipkal iltipni angtiil so, sinik so, alik iyo God ami koliwa, alta tiin molak o. Ibi Setaan Tunum Mafak ami tal oko-takaya talaba ayo, Daa yo, kala titil-fak-daaliwa, Setaan ayo ukadaa unokoma no.
JAM 4:8 Ibi din God ami mepso unipla, God akal tildang ipni mepso tala kelin o, kala-somla ko. Ibi ban kemin tunum kemin, ibi tunum ami sikil diingna tambal ke-laabu ultap ke-lomdip ban wakamin uyo kambola-somdipla, kukup tambal kaata-kup kutal-fukulin o. Ale, ibi aket alep fukunin tunum kemin, kipni aket fukunin mafak uyo kukan-tiilipya, dotulip tambal keluk o, kala-somya ko.
JAM 4:9 Iltipni kukup mafak kaami kalan uyo aket uluum tabeyulula ama-bamdiwa yo, kala-somla kemin, ipni dakmin-bamdip aban-diibip uyo kambolalip fal-siki-lom, iltipni kukup mafak kebip kaami kalan uyo ama-bam ale, fiyaap duumin uyo kela-lomdip, fal-siki-lom aket uluum kemin o.
JAM 4:10 Ibi God ami minlo tem kawu bilili-kup kala-lomdip bom-bilipla, bii-lom kawu God akal yim-folak o, kala-somla ko.
JAM 4:11 Nak-tunum kusal kipyo! Ibi kap-tunum kusal kiili, ita-fiimin weng uyo bakaya una-tala-kemin daa yo. Kawanta ap-tunum ami atafiimin weng uyo bakaan-bamda dap-kuku-bam atafiima namti, kaali God ami weng o, kala Lo kuka-daasa umi um-kuku-bam atafiimin weng uyo binala yak Lo umi diim abebu no. Kabi atafiimin weng uyo Lo umi bakawap namti, kabi weng uyo weng san-kaamin kaami kukup uyo kela akaawa-lomdap kapta kapta kelapla, Lo uyo kabaak banokomu.
JAM 4:12 God maakup ata-kup Lo kaa kutiisa le, ata-kup unang tunum iyo yam-kuku-bam itafii-bamda yam-bak-saanokoma. Kemin, alalta-kup tunum ayo dabuulokoma, aa dap-mafak-daalokoma kemin, kapni kap-tunum atafii-bam dabak-saanokoma kaa kapni mafek mafek disa.
JAM 4:13 Tunum iip maakup maakup ibi baka-bamdip bokolip ko: Kamala e, am sabi e, uyo din abip dukum kaptam ban-ilomdupla, wan-fakan-tal-une-bulup bom bii, wasital maakup ma duk-duu-lomdupla, moni yaapkan kaamum o, ken-umbip.
JAM 4:14 Kiwo! Kibi kanolin ok kaami kuluu-lom okok-bam ilin kaami weng kaa bakamin daa kayi! Numi tal-unemin kaa kalok nolin tap i? Numi ilin so, tal-unemin so, kiili kutim malang ibin dukum uyo tiltam taba-lomdu ilanin tap ke-lom disa ke-yaabu ultap kemin, nuli mafek mafek sabi tiltam talokomu kaa utabup disa yo.
JAM 4:15 Kanola ibi boko-lom: Dukum almi san kemin, alta bokoya-lomda: Ok kalaata okok kemin o, kala kula kuno tabuulalup; aa, ok kusnum kaata tabuulin o, kala kulaali kuno fukulamup kalokin. Lale,
JAM 4:16 ibi kela-silip kemin, fuut kuyak daa-bom iltipni win kaata-kup kufu-bam ale, iltipni tong-kup bakamin kaali, kukup mafak o.
JAM 4:17 Uyo ipkal utamin, kawanta ma utamala, Kanu-mokomi kaali tambal o kalba. Yale, kaa kambola-lom ayo kanumin disa kela namti, ali ban ke-bamdala, kukup mafak ken-umba no.
JAM 5:1 Mafek mafek soyal ipyo! Angtiil yol awak uyo tiltam ipni diim tolon o, kalbu kaami kalan uyo akal ma ke-bamdip amamin u!
JAM 5:2 Ipni bung alik iyo saak daabip le kuno ipni ilim kiikal ti, keng ita taba inabip.
JAM 5:3 Kipni gol so, silva so, kiiyo, ol fukubip kemin, ol fukusa kulaata taba-lomda, iltipni ban wakan-umbip uyo yam-fatap-daalaya, ipni angtiil ayo wing ta fuulin tap ke-lokomu. Am mafiing diim uyo dikiwa-tala-buluya, ibi mafek mafek yaapkan so, tuumon so, iyo afet-bam sikip fik-tin-tabasip kawi!
JAM 5:4 Kipya! ipta okok kemin tunum iyo kasen-fokoyipya, kipni langabip kaa dikiya-laabip. Yale, ibi molin dinim kelipla kemin, ili weng mafak ipni bakayinbip o. Ibi weng selin! Mep kiimi weng uyo tam abiil tikiin kasel imi Kamokim God ami diim kawu abamnula weng sanba no.
JAM 5:5 Suunkup tawaal diim kala ilip uyo ibi mafek mafek yaapkan suunkup faka-bam in-bomdipla fiyaap duu-bam ken-umbip. Kemin, ibi kang ifa-bilip faskaaba tap kesip kemin, kipni anula taanokomip kaami am uyo mep dikiwa tulu no.
JAM 5:6 Iltipta taba-lomdip tunum tituun-kup tabasip iyo miit dinim kawu yam kot baan diim daa-lom anu-silip kaa, ili ilmi angtiil kaa dil mo-silip disa yo!
JAM 5:7 Kanolin kemin, nami nak-tunum kusal kipyo! Duluma-lom bilili-kala bom fen-bilipla, Dukum ayo talak o. Nokol utamsup, langabip kayaak ayo tawaal talaluba-kup, inin-inin san iyo dikibi kutii kela bomda al diki-bamda fanang bom-balaya, atan so, om so, ita tale-bamdip muuk den-bilip bii yakaanuya tambal-kup dabuu-bam inan-umba.
JAM 5:8 Kemin, kipkal kanola bilili-kala bomdipla, fen-biliwa yi! Dukum ami talokoma kaali, mepso kelu kemin, titil-foko-bomdip fen-bilipla, talak o.
JAM 5:9 Nalmi nak-tunum kusal kipyo! Ti ipkal utamin, God ali tunum kiili yam-kuku-mokoma kaali, kukup mafak kanun-unbup kaami maan kaata tiiya-laa-mokoma. Kemin, ipni kaptum kusal imi itafiimin weng bakayin uyo kambolin o. Weng san-kaa-bam yim-bak-saanin tunum kaa mep tam saaklo amitom kaa tiinba kala daatamin aa!
JAM 5:10 Nak-tunum kusal kipyo, sawaayak kawu God ami profet imi kanu-bisip kaata fanang daalum. God Dukum ami weng, uyo weng san-ilomdip, unang tunum imi bakayin-bilipya, waasi ita kukup mafak kamayin-bilipya, um-tal-daa-lomdipla, Dukum ami lak kaata duu-lom titil-fak-daa-bom biisip. Kemin, nikil nokol kiimi titil kanumsip kaami tong kaata bakan-unbup. Ipkal imi yaan tem kanumsip kaata kanu-bilipla yo. Aa, nokol sawaayak kawu Job ami angtiil yol awak kuluu-bomda biisa kaami sang kaa nokol kaal-kesup. Ali titil-fak-daa-bom suunkup fen-balala, Dukum ayo tal dotulala, yaapsa. Kemin, Dukum ali suunkup numi aket bilili-kalin kuya-lom olen-yila-yaaba kaa kaal-kelip o?
JAM 5:12 Nimi nak-tunum kusal kipyo! Nimi weng kala bokoyokomi kalawaali, mafek mafek dukum kemin, dotu weng selin! Ibi boko-lomdip: Numi weng kaali, fan o, kalan o, kalip kaali, yak abiil aye, tawaal aa, mafek mafek kiimi win kiita kufo-lom fan o, kala kutam asal daa-lom, weng ku-titil-saanin disa yo. Kabak kanu-mokomip kaali, God ali kipni kanumin weng bakabip kaata yim-bak-saanokoma kemin, fan o, kalap namti, fan o, kalin kaata-kup. Aa, daa yo, kalap namti, disa yo, kalap kaata-kup kanu-bam bakamin o.
JAM 5:13 Iltipni iipyak tem kulu tunum ma aket uluum kuluuba namti, ayo God ami beten kelak o. Ale, tunum ma fiyaap duuba namti, ayo baal wii-bam ale, God ami win uyo kufu-bamda, ami tong kaata-kup bakamak o.
JAM 5:14 Aa, tunum ma ayo angtiil-alula tiinba namti, ayo Kristen unang tunum imi kamok kamok imi weng umuuyilaya, tal-ilomdip Kamokim Yesus ami win diim kawu angtiil kabiimin marasin uyo angtiil diim kawu kabela-lom, beten kelipla, God ayo dong dokolokoma.
JAM 5:15 Kemin, kamok kamok imi aket ayo talalu dukum-kup God ami konbip-kup, tunum mafak umuba ami beten ke-lokomip namti, Dukum ayo tunum mafak umuba ami dap-talalu-lomda, dafoba-kup, ami ban keba uyo ma bombuu namti, ayo kukan-telokoma.
JAM 5:16 Kanola ipkal iltipni ban kemin, uyo kaptum kusal imi diim kawu ku-fatap-daala una-tala-ke-bam ale, ap-tunum kusal iyo beten kela una-tala-ke-bilipla, God ayo dong dokoyilaya, tambal-kup kelin o kala-somya ko. Tunum tituun-kup tabasa ami beten kemokoma ayo, tam God ami talang tem unuya, ali weng sanba-kup dong dokolokoma.
JAM 5:17 Kemin, sawaayak kawu, God ami profet Elaija bom biisa, ayo nulultap kemin, Elaija ali titil-foko-lom God ami beten kelaya, God ayo ami beten kaata, weng san-ilomda ali om ayo dil molala, bom bii wasital asuumano le, kayoop bukupkal keluya,
JAM 5:18 ayo asuk God ami beten kelaya, abiil tikiin uyo busuulaya, om ayo tildaak abamnala, ima san titon san iyo asuk bikin-taba tiltam abasip ko.
JAM 5:19 Nalmi nak-tunum kusal kipyo! Kuu talalu weng san iliwa! Kanola kipni tunum ma God ami tituun-kup tabin liip uyo kela yang banala, aptum ma ata asuk dabuu dap-taldang God ami tituun-kup liip kawu daala namti,
JAM 5:20 kaali ap-tunum ata dong dokolaya kawu, God ata ami ban kemin yaapkan iyo kukan-telaya, saaknin disa ke-lom suunkup ilokoma ko.
1PE 1:1 Nak-tunum kusal kaa tiinsip o? Nali Yesus Kraist ami kalaan tunum Pita, nata God ami unang tunum ulelsa ibi iltipni am bokon kela ukadaa umbilin Provins Pontus bokon une-bala, Provins Galesia bokon une-bala, Provins Kapadosia bokon une-bala, Provins Esia bokon une-bala, Provins Bitinia bokon une-bala, ke-lom din kawu tiina tiina ke-bom-bilip kipni sukon kala dola kuyon o, kali ko.
1PE 1:2 Sawaayak, Aatumen God ata ibi itam-ilomda: Kibi nalmi no, kalsa. Kemin, mulo kawu ipta, God ami Sinik ami aket fukunin kaali, ibi talalu yim-tiilila, Yesus Kraist ami kiim sing-tam daasuu kuuta taba-lomdu, diing daayimuluya, tiltam tambal ma ke-lom, tituun-kup tola-lomdiwa, Yesus Kraist ami weng kaata, kutal-fuku kulii-tabin o, kala-lomdala, talalu-yimuse. Kemin, God ami naan-bilila, ata tambal tambal ma kamayim-balala, kipni aket ayo balili-kup kala-bomdiwa yo.
1PE 1:3 God ali numi Kamokim Yesus Kraist ami God ale, ali almi Aalap kemin, ami tong kaata-kup baka-bam ami win kaata-kup kufolum o. Umi miit kabak-ali dok kata naa kalolip: Yesus Kraist ami taanala God ata dafola tam tiinse umi tem kabangu God ali numi olenin dukum uyo kuya-lomda dotu-yimula tiltam alokso tunum unang ke-sulup. Kemin, nuli kabak-ata utamupla yi, Suunkup ilin tunum unang ke-sulup kala kalalupla, Kamokim ami liip kaali, fen-tabasup te!
1PE 1:4 God ali, Ibi nalmi no, kalale, boko-lomda: Ibi am ma daanula kawu, yim-bitam nalmi abip tambal kawu daaliya, suunkup ilokomip o, kalase. Kipni suunkup ilokomip kaali, disa ke-lokomu disa le, mafak-nokomu disa; disap-nokomu disa; kipni suunkup ilokomip kaali, God ata abiil tikiin kawu talalu kutiilala, bomdu kipni liip fenbu.
1PE 1:5 Kemin, ibi God ami lak kaayo, dukum-kup duulip kala, kala-lomdaya, ami aket fukunin kaali, Titil tabin kaa as kom tap kaata, kukaayin-bilila, ibi tambal-kup bomdiwa yo, kala-lomda ibi talalu tiin mosa. God ami aket fukunin kaali, ilom am mafiing mafiing daanokomu kawu, nayo yim-taltam nalmi suunkup ilin abip kawu daaliya, ilokomip o, kalalala, kaami liip uyo dotba ko.
1PE 1:6 Kanola God ata mafek mafek mafak ma kamboya kamala tiltam tale-bilip iyo, ibi aket uluum kaabip namti kuluu kiin tap kemin, ipkal titil-fokolipya, God ata kipni yim-tama tam almi suunkup ilin abip daalokoma ami fiyaap kaata, duu-bam biliwa kayi!
1PE 1:7 God ali ibi alami lak duu-yaamin kaami yam-kukumin kaali, fan e? kasen-fakayinbip e? yokon o, kal-bomdala kemin, ipni God ami lak dakaamin kaa tuum gol ultap kemin, tuum gol kaa sung ilol aye, so ma tabuubu nema yo? kalum o, kala-lomdip kuyak fuulip kiin-bam sung ilol iyo kiin bii disa keliple, gol almi tituun-kup ke atin tambal ma ke-laabu. Lale, gol kulaali, tawaal diim kuldaak-ami mafek mafek ale kulu disa ke-lokomu. Yale, God ali kipni ami lak dakaamin kaami aket kaata atin aasu. Kemin, kipni God ami lak dakaamin ayo ata ata kelala, gol kaami sisol dukum kaata, kulaak banin kesu. Kemin, kanu-bamdala, yak mafek mafek mafak iyo kamboyala, tildak ipni yam-kukun-umbip te! Bom ilom am ma daanula, Yesus Kraist ami asuk talala, unang tunum alik imi ata-mokomip kabaku, ipni God ami lak duu-laamin kaayo, utamala yi, Tiltam tituun-kup kelu no, kala namti, kawu win tambal so, fiyaap duumin dukum so, kiiyo kuyinba-kup, win kaayo kufuyokoma.
1PE 1:8 Yesus Kraist kaa iltipni tiin alep alep atam-silip disa. Yale, iltipni aket kaata ami kola-silip kaayo, kamala kalawaakal ibi ma atamin disa. La, ibi ami lak dakaabip, kipni Yesus Kraist ami lak kaa dukum-kup duulipla kemin, God ami dotu-yimuse kaa, atin ti fiyaap-kup duubip kayu, kanolin fiyaap kaata, atin ti sakbaalim dukum kemin, dok kano-lomdiwa, ipkal talalu ifin kutoop daaliwa, kaali fatap-nokomu dinim o.
1PE 1:10 Sawaayak kawu, God ami weng ku-fatap-daa-bakayin tunum profet o kebip iyo God ami kukup tangbal disa kulu kamala kipni kukaayinba ami sang kaayo kamasi kaptoop-ali bakayin-bilipla, ili God ata yim-buu-laamin kaami miit kaata, ilut kuyak daa-bom aket dukum-kup fukun-bilipla,
1PE 1:11 Kraist ami Sinik weng bakayin tunum imi iipyak tem kabaku bom ilsa ata weng kaal-ke-bam kalaan weng kaa boko-lom: Ilom am ma daanokomu kaali, God ami tunum ulduulala, kamokim kesa ayo kanolin angtiil yol uyo kuluu-lomda tam atamale, aalap God ayo dafolala, tam kaptoop ban-ilom win soyim kela ke-lokoma no, kal-bomda bakayila unale, kulaali isiik Sinik ami dik-daalip ko: Aa, ali dok kanumin diim kawu talokoma ni? Kalok nolin mafek mafek ita tiltam tabokomip yoko? kala-lomdip dik-dakamsip o.
1PE 1:12 God ali profet kiimi kukuyila iyo utamiwa yi, Weng sawaa bakayinbup kaali, nuli dong dakaayinbu disa yo, kala ilom am ma daanokomu kawu unang tunum tiltam tabokomip kiita-kup dong dakaayin-bam ke-mokomu kala, kalalipla, Kristen kipni sang ayo baka-bam ilsip. Kemin, taan-ilom tabamnip tiinsula, God ayo almi Sinik Tambal ayo abiil tikiin kawu dabaala tildaak tunum malo ma imi tiling tem un-ilomda ayo dong dokoyila iyo taldiwa, ibi numi sang o, kala God ami weng tambal kaayo, ibi bakayin-bilip, weng san-kan-tabasip. Kanola, God ami okok kemin tunum ensel yakal God ami weng tambal kaayo, talalu weng san dotu utamum o, kem-tabasip.
1PE 1:13 Kanum bokosa kemin ale, ipkal aket tambal-kup fukun-bam fen bom-iliwa, mafek mafek mafak waka-tokoyu, Kaa daa yo, kala-laamin kayi! Yesus Kraist ami asuk tal fatap-nokoma kawu, God ayo kukup tambal tambal kaata ipni kuyale, yim-tama tam abip kaptamu daalokoma. Kemin, ibi fan ti kanoyokoma kal-bomdip liip fenipla yo.
1PE 1:14 Kibi tiltam God ami man ke-silip uyo, ami kalaata kanolin o, kalba kaata-kup kutal-fuku-bomdipla kayi! Ipkal siin kaali, Yesus Kraist ami weng tambal ayo utamin disa bomdipla, kukup mafak mafak kiita-kup ti kanumum o, kal-bomdip fuku-bom-ilsip kaa, ibi asuk maso ma yang kanumin daa yo.
1PE 1:15 God ali kipni uldaa-yimbuule, Ibi ti nalmi man te! kalase kaali ti tambal dukum te! Ibi tiltam almi man ke-silip kemin ale, ibi kalok nolin kukup ma nuumip namti, ipkal ti kanola God ami kukup tituun-kup tabin kanuba ultap kaata-kup ti kanu-bamdipla, kukup tituun-kup tabin kaata, fuku-bom kulii-una-biliwa yo, kala-somla ko.
1PE 1:16 God ami Sukon Tem weng uyo alami man imi bokoya-lomda: Nali ti nalta God kemin, nali kukup mafak so ma nami diim kawu bombe disa. Ipkal ti kanola kukup tituun-kup tabin kaata, kutal-fuku-bom kulii-una-bilipla yo, kala-somla ko.
1PE 1:17 Numi God ami beten kamaalup kaali, Atok o, akan-kaan-umbup kaa, God ali maakup maakup numi kukup kaa kanun-umbup kaali, yim-bak-saan-umba. Kemin, God ali, Kaata win finin tunum o, kala-lomdala tunum kaa ke-lokoma disa; Kwin! alik nuli ti yim-tal tii tikip maak yam-kukula tituun ke-lokomu kawi! Kemin, kibi fatal tap tawaal diim kala ilip uyo, God ami kukup uyo kutal-fuku-bamdip, kipni kukup kutal-fuku kulii-unip kaayo, dotu utafii-bam tambal-kup tal-une-biliwa yo.
1PE 1:18 Sawaayak awil-fakal ilmi kukup mafak kaata, kukuyin-bilipla, kipsiik kanolin kukup uyo kutal-fuku-bom ilsip. Yale, kuuta taba-lomdu ibi dong dakaayinsu disa. Kemin, God alta kipni iliim uyo bo-kukan tiiya-lomda, kukup mafak kaami diim kawu tikduu-yim-kan tiise. Sisol kaa kuluu-lom mose kaa ipkal utamsip. Unang tunum imi aket fukunin kaa, gol so, tuumon so, kii atin mafek mafek sakbaalim dukum o, ken-umbip. Yale, kaa tawaal diim kalawaami mafek mafek. Am ma daanokomu kulaali, atin ti dinim-nokomip. Kemin, God ali gol so, tuumon so, kiita kuluu-lomda kipni iliim kaa boyase kaa, disa te!
1PE 1:19 Kwin! kabak-ali ti sisol dukum kaata, kuluu-lomda kipni iliim kaa boyase kawi! Ali Kraist ami kiim kaata, kuluu-lom kipni iliim kaa boyase. Kemin, Kraist ami kiim kaata, sipsip kulii-tal God ami kolup numi ban wakan-tal-unebup kaata, kukan-tiiyak o, ken-umbip umi kiim sing-tam-daalin tap kesu. Kemin, Kraist ami taanse kaali, Juda kayaak numi lo uyo boko-lomdu: Sipsip man mafak kaa disa; ninak dinim kaata-kup, kulii-tal God ami kukaalin o, kalsu; ultap ke-lomdala, Kraist kaa kanose.
1PE 1:20 Kemin, siin sawaayak kaptoowu God ayo abiil so, tawaal so, kii talulin disa ilomdala, kabaku Kraist ayo ulduu dap-tii: Kapta kaa kanolokomap kayi! kala tiinsa. La, bii kulaali, God ayo Kraist dabaala tal-ilomda ibi dong dokoyon o, kala-lomda, tawaal diim kalawaami unang tunum imi tiin diim kulu taanse.
1PE 1:21 Kanolaya, God ayo kom temlo kawu Kraist ayo dafolale, tam tiin win soyim kela kambolaya, Kraist ami win diim kabak-ata, kibi God ami lak uyo duu-lomdiwa kawu, talalu utamiwa yi, U fan, God ali nuli yim-biila tam almi abip unokoma kala, kalalipla, ipkal God ami liip kaali fen-umbip.
1PE 1:22 Kanola, ibi Yesus Kraist almi tituun-kup tabin weng kaata-kup weng san kutal-fuku-lomdip kukup mafak kaami aket kaa, maso ma fukunbip disa. Kipni aket tem kabak ninak dinim, alik tambal-kup kesip kemin utamduya, ibi Kristen unang tunum kii nak-tunum kusal keyup kayi! Ken-una-tala-kemin o; ti kaptum kela una-tala-ke-bamdiwa, kipni aket maakup uyo titil-foko Kristen iyo aket kola-una-tala-ke-bamdiwa yo, kala-somla ko.
1PE 1:23 Kaami miit kaali, God kaa iltipni Kaalap kemin, alta talalu-yimulala ipyo tiltam alokso unang tunum kelip, unang imi alokso man kuu-laabip tap ke-silip. Katale, kipni Kaalap yimuse ali le, taan-yaamin tunum disa; ali ti suunkup suunkup ilin tunum kaa, God ata kemin, ami weng kaayo, suunkup bomdula, tunum unang tiin kawang ilin kaami kukup uyo kuyila-yaabu. Kemin, God ali utama yi, Nami weng kaa, weng san-kan-umbip kala, kala-lomdala, yam-talaluse.
1PE 1:24 Ultap o. God ami Sukon Tem kabak-ayo boko-lomdu: Sinaan kon kaali, data-yaaba, aa kuno ami tes kukal data tildaak aba-yaaba. Unang tunum kiili, sinaan kon kanolin ale, kon ililtap alik imi win tibin kaata, sinaan tes tap kuno kiin bom-bilip. Lale,
1PE 1:25 Dukum ami weng kaali ti, suunkup kano laabu no, kalsu. Weng suunkup ilin o, kalbu kabak-ali, God ami weng tambal kaami sang kipni bokoya-silip kaata ko.
1PE 2:1 Kibi God ami weng diim kawu tiltam alokso unang tunum ke-silip. Kanolin kemin, kibi titul saanin kukup alik aye, ibakamin weng aa, kukup alep fukumin aye, yak kaptum kusal imi mafek mafek nenin, saak yak iltipni kaptum kusal imi daang tem weng bakayin aa, kanolin kukup mafak kiiyo alik keya-lomdip God ami weng kaata-kup weng san ale, kutal-fuku-bomdiwa yo, kala-somla ko.
1PE 2:2 Ti ipkal utamin! Awak uyo alokso man unaak ayo kuulule, man ayo kamasi kaa yak muuk ina atam talaala yi, Tambal uu, kalokoma ayo awak muuk aket-kup aalule, inokoma. Kemin, alaltap o, Kristen unang tunum kipkal kanola utamipla, Dukum akal ti kukup tambal uyo numi kukaayila-yaaba kala, kala-silip. Kemin, ibi God ami weng tambal kaami aket-kup yan-bulula, weng kuuta taba-lomdu kipni aket tem uyo yam-titil-diiluya, ipyo kipni God ami lak duu-laamin ayo tiltam titila-lomdu, awak man muuk dii-bam bom ilu, tiltam fasuu-yaaba tap kelaya, God ayo yim-talang daalale, aso ilokomip ko.
1PE 2:4 Kamokim Yesus Kraist alalta tiin kawong ilin kaami miit kayaakim kemin, ipkal tildang almi miit tem kulu talolip ko, kala-somla kemin, ali am kun altap ale, God ami aket fukunba kaali, Ali ti tambalim kelala, nami ok dukum kaa nuu-mokoma kala, kala-lomdala uldaa-dabuuse. Yale, tawaal diim kayaak am dinamin unang tunum ita taba-lom: Kaa am kun mafak dikil-dakal o, kala-lom kela-laabip tap ke, kulaa mafak o, kala daang ukola-silip. La,
1PE 2:5 God ali ibi talalu-yimulala, tiltam almi unang tunum kelin o, kalala, tiin kawong ilin kaa kuyase. Kemin, ipkal God ayo kelipla, alalta tunum imi am kun aa, abak aa, bom, kawu leng dap-tii ke-lom am dinabip ultap kela ibi ulela-yim-tiilaya, almi Sinik alta ibi kuyaku-diyaku-ke kuyak mim-daala, kibi tiltam God ami am diilim tap kelin o. Kanola siin sawaayak kawu, God ali tunum malo ma ulelnaya, tunum awem pris o, kebip imi ok kaata fuku-bomdip taloop iyo God ami kukaansip tap, God ata ibi ulelnala God almi Sinik ayo kambolip ata dong dakaayin-balala, win dukum aa, beten aye, lotu kemin uyo Yesus Kraist ami koliple, ata God ami kolaya, God ayo fiyaap duu-bala yo, kala-somla ko.
1PE 2:6 God ami Sukon Tem uyo kaami sang kaali kanum boko-lomdu: Nami weng kulu dotu weng selin! Nali tunum ma ulduulila din Saiyon kaptamu tiltam nalami am duwokop tambal ma ke-lokoma. Ali ulduusi. Kemin, ami win kaali, atin ti tambal dukum sisol dukum ultap o. Kemin, dok kanolin unang tunum iyo ma ami lak duuliwa kawu, ali imi daang ukuyilala, fatom duk-duulokomip disa yo, kala kanum bokosu.
1PE 2:7 Kipkal kanola am duwokop ami aket uyo yelule, utamiwa yi, Ali ti yaap ma ke-lomda tiltam nulmi am duwokop tambalim kesa kala, kala-lomdip ami lak uyo duubip. Yale, God ami Sukon Tem uyo unang tunum ili Kraist ami lak duulin dinim kesip imi sang uyo boko-lomdu: Kiili okok kemin tunum kiimi am dina-bomdip tiyak daaliwa, kun ma kaali, am kun mafak o, kala atam kela kuyang saak tii-laabip tap ke-lomdip tunum kaa kela-silip. Yale, kamokim ayo am kun kaa atam-ilomda, Kaali ti am kun tambalim kemin, am dubim am duwokop kelak o, kala-lomda, am kun ayo asuk kuluu kumolaya, tambal-kup tolna kayi! kalsu ko.
1PE 2:8 Aa, ma ukol ti boko-lomdu God ami Sukon Tem kabak-ali unang tunum Kraist ami lak duulin disa kesip unang tunum imi sang kaayo boko-lomdu: Ali am kun dukum altap kelala, tunum unang iyo yaan matum kuyak mo-lom kulii daak abokomip kayi! kalsu. Kemin, imi yaan matum kuyak mo daak abe-mokomip kaami miit kabak-ali, ili God ami weng kaali, weng sanamup disa yo, kala-lomdip Kraist ami daang ukonsip. Kemin, sawaayak kaali, God ali boko-lomda: Ili kaali, kanolokomip kayi! kalsa ko.
1PE 2:9 Weng kaa, sawaayak kawu, God ami Israel unang tunum imi kuyinsa kaata, asuk kamala ipsiik kuyimba. Kemin, God ali ibi ulelnala, tiltam God almi unang tunum keliwale, kuno God almi awem tunum ililtap ke-lomdip, nulmi King Yesus Kraist ami win kaata kufon-bam ale, kibi unang tunum miit maakup tap keliwa, maakup almi lak-kup duulipla, ayo ulelnala tiltam almi unang tunum alik-daap ke-silip. God ami kipni ulelsa kabak-ami miit kaali, alik ibi kukup tambal God ata kipni kukaayinsa ami sang kaata, unang tunum imi bakayila-tal-unemin o, kalalaya, God ayo ibi ulelase te! God ata ipyo naan-daayila, kutamiip tem kabang kelalip tildang tilipla, alta yim-tama tiltam almi falala-kalin tambal diim kaa daase.
1PE 2:10 Kaali fan o. Siin kaali, ibi God ami unang tunum kelin disa; ibi ti disa kulu bom-bisip. La, kamala kulu tildang God ami unang tunum ke-silip. Sawaayak kawu, God ali ibi olen-yim-bisa disa. Yale, kamala kuluwaata, God ayo olen-yin-bam dong dakaayin-bam keba ko.
1PE 2:11 Atin ti nak-tunum kusal kipyo! Tawaal diim kalawaali fatal tunum imi disa kiin laap tal bom-bilip ililtap ke-bom-bilip kemin, nali weng kaa ti dukum-kup bokoyokomi kemin, mep siin kaami kukup kipni aket tem kabaku bombe kaata, taba-lomda God ami Sinik Tambal kipni aket tem kabaku bombe aso, waasi dinum o, kebip kemin, ibi siin kaami kukup kipni aket tem bombe uta, taba-lom biing mo imbang daalale, yang kukup mafak mafak alik kiita kanubip kaayo, daang ukuwa kano kelin o!
1PE 2:12 Kewa-lomdipla, ibi unang tunum God ami lak duulin disa bom-bilip kiimi iipyak tem kawu ilip kaali, ti kukup tamba kaata-kup fuku-bom ale, tituun-kup bom-biliwa, ita weng mafak kaayo kukaayim-bamdip, ibi kukup mafak kebip o, kemip kaa, kuno kamboya bom-bilipla kawu, yakal itamiwa yi, Ibi kukup tangbal kaata-kup kutal-fukubip kala yikiwa, am ma daanokomu kawu, God ami unang tunum imi yim-bak-saanokoma diim kaali, ili bokola-lomdip: Nuta kukup mafak kaata kutal-fukuluple, yak Kristen ita, God ata imi dong dakaayin-balala, kukup tambal fukulip ke-sulup o, kala-lomdipla, God ami win kaayo kufolokomip ko.
1PE 2:13 Kibi ti Dukum ami kukup kaata kanumin o, kalba kaami aket kaata fukun-bamdiwa, tawaal diim tunum imi lo kutiisip uyo, ti fuku-bomdiwa yo. Rom kayaak imi king ata taba-lomda dabom kelaya, unang tunum alik yak kiiso, tildak kiiso, ata tiin moba. Kemin, ibi ami weng-kup weng san-kaamalip ko.
1PE 2:14 Kemin, ata tam-ilomda, provins alik imi kamok diildiil iyo ulelbi yim-tiilala, unang tunum kukup mafak kutal-fukulin imi angtiil yol uyo kukaayin-bam ale, yak unang tunum kukup tambal fukulin imi win kaata, kufuyin-bam ken-umbip.
1PE 2:15 Kemin, God ami aket fukunin kaali, kipni kukup tambal kutal-fukulokomip kaata, taba-lomdu unang tunum aket fukunin tangbal utamsip disa, kiimi kasen-foko, kipni daang tem weng bakayinbip imi kukuyilula, iyo utam-ilomdip, ibi kukup tangbal nuubip kala, kala-lomdip kulaali, kela weng dinim kelin o, kala God ami aket fukunin namti kanun-umba.
1PE 2:16 Kemin ale, God ali alik ibi tiin molale, tawaal diim alik kalawaami lo diim kawu aket uluum dinim, tambal-kup bom-bilip. Yale, God ali, Ibi moliya aket uluum disa; tambal-kup bomdip, kukup mafak kaata kutal-fukulin o, kalalaya disa; God ayo, Ibi kalaata kanumin o, keba kaata-kup, kutal-fuku-bomdiwa yo, kalalaya, ali asuk molaya kemin, ibi almi okok kemin unang tunum ke-silip.
1PE 2:17 Kipkal unang tunum alik imi win kaayo, tambal-kup kufuyin-bam ale, Kristen ke-silip unang tunum kusnum alik imi aket uyo kukaayin-bam, ke-bam kipkal fanang-daa utamipla, Awu, yak kukup mafak kanu-mokomup namti, God Dukum ali numi aket atul kuyokoma kala, kala-lomdip, kulaa kela, yak kukup tambal kaata-kup, kutal-fuku-bomdiwa ko. Rom kayaak imi king ali numi kamokim kesa no, kal-bomdipla, ami weng kaata-kup weng san-kaa-bam bomdiwa yo, kala-somla ko.
1PE 2:18 Disa kulu okok kemin tunum ibi! Iltipni wok tiin molin tunum imi minlo tem kulu bom, tambal-kup imi weng kaata-kup weng san-kaa-bamdiwa yo, kala-somla kemin, ili ipni tiin saanin kukup tangbal aye, aket balili-kalin aa, ipni kukaayinbip kaata-kup disa; ipni tiin molin ita, unang tunum titil eng bakayin kiiso kiimi minlo tem kulu un-bom ke-bamdiwa yo.
1PE 2:19 Kipni kanu-mokomip kaami miit kaali, kanola kipni tiin molin tunum iyo tal ipni disa kawu angtiil yol kaa kukaayip namti, ibi ti God ami aket kaata-kup fanang daa-lom kuno kamboyip ye-bilipla yo. Kanola ipni kaa kanuyimbip kaa, aket atul tabemin disa; bilili-kup kala ilokomip kaata, fan am ma daanokomu kawu, God ali kipni fiyaap ayo duu-bamda kukup tambal kaali, kukayokoma.
1PE 2:20 Lale, kanola ibi weng kuyak saak tiiya-lomdip, kiltipni aket fukunin kaata yak kaata kanumum o, kebip kaata kemiwa kawu, kamok iyo kipni ye-bilip, ibi aket atul tabemin disa kemip namti, kaali iltipni fuut tabemin kaami kalan kaata angtiil yol namti kaa kuluulokomip te! God ali kipni fiyaap kaa duulokoma disa; ibi kukup tambal kaata-kup kutal-fuku iliwa, iyo ipni ye-bilip, kipsiik ma maan tiilin disa; disa ti angtiil yol-kup kuluulip namti, God ali kipni kukup kaa kanu-mokomip kaami fiyaap kaa duu-mokoma ko.
1PE 2:21 God ami aket fukunin kaali, mep unang tunum iyo iltipni kukup tambal kanubip kaami kalan kaata mafak kamayip namti, ibi kalanolin kukup kaata kanumin o, kalalaya, ibi uldaa-yim-buuse. Kanola ti Kraist akal ibi dong dokoyon o, kalalala, kuno ti akal angtiil yol kaali, kuluu-lom um-tal-daa kelaya kawu, alta taba almi kukup tambal kutal-fuku-yaamin kaami angtiil yol kuluuse kabak-ali kipni kukuyase. Kemin, kipkal kanolin kukup tambal kaata, Kraist ayo kano-lomda angtiil yol dukum kaa kuluuse tap kanu-bamdiwa yo.
1PE 2:22 Kraist ali ban kemin aye, ibakamin weng aa, kii ma boko-laaba disa tunum.
1PE 2:23 Kemin, ili weng mafak bakaansip. Katale, akal ma taba-lomda imi weng mafak bakaanbip kaayo, ma maan tiiyase disa. Aa, ami angtiil yol dukum kuluuse kaa, asiik tunum kiimi suunin weng ma kuya-lomda, tunum angtiil yol kukaap-nambip kabak-ami maan kaayo ma tiiliya yo, kalsa disa; atin ti disa. Akal utamala yi, God ali ti dotu utafii-bamda weng talalmin God o, kala-lomdala, kuu binala yak God ami sikil diim abasu.
1PE 2:24 Kemin nuta ban ke-bulupla, God ayo kaami maan kaata kukaaya-laaba. Lale, Kraist alta numi abiin kaami tiim uyo kuluulaya, God ayo kambola as diim taan-ilom, numi uluum kaata kuluu-lomdala, almi angtiil lak kaayo duulin disa; maas kewase. Kemin, ban wakamin kukup alik kiiyo kela-lomdup, tiin kawang bom ale, kukup tituun-kup tabasu kaata nuu-buluwa yo, kalalaya, ali taanse. Kemin, tunum iyo taba-lomdip ami angtiil kaayo, ku-mafak-daala-silip. Kemin, kabak-ami tiim o, kala akal ibi asuk talalu-yimuse.
1PE 2:25 Kemin, kabak-ami miit kaa dok kata naa kalolip: God ali utamala yi, Ibi maaklo samaan kawu un-ilomdip sipsip kiimi liip kela yang saak kawu maaklo kebip ililtap kelip kala, kala-lomdala kemin, kamala kulu God alalta kibi asuk im-taldang iltipni tambal-kup tiin molin tunum Kraist ami diim kawu tiise ko.
1PE 3:1 Okok kemin tunum iyo ti ilmi kamok kamok imi weng kaata-kup weng san-kaa-mokomip tap kanola, unang tunum din kipkal ti, iltipni timak kusal imi weng kaata-kup weng san ale, kutal-fuku-bomdipla yo. Kanola, kipni timak kusal ili, God ami weng kaayo, ayo weng san-kaamin disa kemip namti, ilmi unang tan kipni weng yaapkan bakayokomip kaali, weng sandip Kraist ami lak kaa duulokomip disa. Ili ti itamiwa yi, Ibi iltipni imak kusal kiili, numi dabom o, kala imi weng-kup, weng san-kaa-bam ale, ibi kukup tambal kaata-kup kutal-fuku-bom kebip kala, kala-lom, iyo utamiwa yi, God ami weng uyo tambal u, kalalipla, yakal ilmi aket uyo fal-siki-lomdip Yesus Kraist ami lak kaayo, duulokomip ema?
1PE 3:3 Unang ibi Kraist ami ke-silip kemin, iltipni angtiil kaata-kup talal-bulupla, kayak kayak kiita itamin o, kalalip aket yaapkan iyo fukun-bam ale, yak dabom kon ang uyo dina-bom aye, yak gol o, kala kiit kon tiin buluusi soyim so, yak ilim kaal sisol dukum ta kuluu saanin kaayo, fala tam tii-bam kemin disa yo.
1PE 3:4 Kibi aket tem kabak-ami kiit kon tiipmin kaami aket kaata-kup yaapkan fukun-umbip ayo kela, aket tem kaali balili-kala bomdiwa, aket bilit-kalin kaata ti kukaayin-bam kanumin kukup kaata kuluu-lomdip, kiit kon tiipmin tap ke kutal-fuku-bomdiwa yo. Kanolin kukup kaa kanu-mokomip kaali, disa ke-lokomu disa. God ami tiin diim kawu kanu-mokomip ayo, atin tangbal.
1PE 3:5 Sawaayak kawu, unang malo ma God ami lak duu-bom ilsip ili utamipla yi, Fan, God almi kuu kanolokoma kala kemsip, ami kukup kaata kanu-bamdip, ilmi imak kusal imi weng kaata-kup, weng san-kaa-bam iyo kutal-fuku-bom ilsip uyo, ti imi aket tem kabak-ali kiit kon tangbal tii-bam ilsip namti kabak buu.
1PE 3:6 Sara uli kanolin kukup kaata kanu-bamdu, ulmi imak Abraham ami weng kaata-kup weng san-kaan-bam ale, uli, Kaa nami dabom o, akan-kaamsu. Kemin, kamala kaali, ibi yak mafek mafek atul kaa ma suunin disa, ti kukup tambal kaata-kup kanum-unip namti, ibi Sara ultap o.
1PE 3:7 Aa, kaata tunum unang din kipkal utamsip. Unang kiimi titil kaa tunum kipni titil kanolin tap disa. Kemin, ibi iltipni unang tan iso bomdipla, atin tambal-kup tiin mole, dukaa-bomdiwa yo, kala-somla ko. Ipkal utamsip taa! God ali kipso, iltipni unang tan iso, akmal maakup tambal tambal ma kamayim-bamda ipyo im-tam almi abip kawu daalala, suunkup ilokomip o. Ibi God ami aket kaata, fukun-bamdiwa, tambal tambal ma ke-bam, ibi kanolin kukup kaa, kutal-fukulokomip kaata, fan kipni kukup mafak kuuta ma taba-lomdu, ipni beten ke-mokomip kaami liip kaayo, bak-daalokomu disa.
1PE 3:8 Nali kabak-ami sang kaata maso ma bombuu kemin, bokolon o, kali. Alik fuut tabemin kaami kukup kaa, kap-tunum kusal kii kukaayin disa; ibi ti aket maakup ke-bomdiwa, kap-tunum kusal imi uluum kaabip imi aket uyo, fukun-bam aa, Kristen unang tunum imi aket kaayo, kukaayin-bam kukup tambal kaata ti kukaayin-bam, ke-bamdiwa yo, kala-somla ko.
1PE 3:9 Kanola tunum iyo ma kipni kukup mafak kukaayin-bam aa, weng mafak bakayim-bam kemip namti, ibi imi kukup kanubip kaata kuluu-lomdip, weng anung kaa, til-dakamin disa. Kipta taba-lom kalanolin kukup tambal kalawaata kuluu-lomdip, maan tiiyokomip. Ipta God ami beten kamaan-bilipla, ata kukup tambal uyo tunum imi kukaayin-bam, dong dakaayin-balala yo, kala-somla ko. Umi miit kabak-ali God ali, Ibi kanolin beten kaata kemin o, kala, ulelsa. Kanolin kemin, ibi kanumin kukup kaali, kutal-fuku bom-biliwa, kukup tambal kaata ipni kukaayin-bala yo.
1PE 3:10 God ami Sukon Tem kabak-ali kanola boko-lomdu: Kanola, unang tunum ili imi aket uyo tiltam tangbal ma ke-lom abiin tangbal-kup tiin-bom fiyaap duumum o kalip namti, kii ap-tunum kusal iyo weng mafak bakayin-bam ale, disa kasen-fakamin weng bakayin-bam kemin disa yo.
1PE 3:11 Kemin, kukup mafak uyo daang ukuwa kewa-lom, kukup tambal kaata-kup nuu-bam ale, titil-foko kaptum kusal unang tunum kusnum iso, ti aket maakup ke-lomdip, yak kanumin kukup kaata ti kutal-fuku taba-biliwa yo, kala-somla ko.
1PE 3:12 Umi miit kaali, unang tunum kukup tangbal kutal-fukulin ita, God ayo kiita ti tiin mo-bom ale, imi beten kemip kaata weng sandala, dong dakaayin-bam laaba kemin, mep unang tunum kukup mafak fukulin kiita, Dukum ayo waasi keyila, bomdala, ilmi kukup mafak umi tiim kaata, maan-tiiyila-tiiyila kem-tabasa no, kala God ami Sukon Tem uyo kanum bokosu ko.
1PE 3:13 Kanola kipkal titil-fak-daa kukup tambal kaata-kup kulii-tabip namti, kawanta ma yam-mafak-daalokoma ni? Kaa disa ema? Lale,
1PE 3:14 kanola ibi kukup tambal kaata kutal-fukulip kala yakalipla, tunum unang malo ma ita yam-mafak-dakamip namti, ipkal utamipla yi, Awu, nuli God ami kukup kalaata, Kanumin o, yakan-kaaba kaata, kanu-bulupya kemin, nuyo yam-mafak-dakan-tal-unebip kala, kalale, fiyaap duu-mokomip o, kala-somla kemin, ibi tunum kaa kipni yam-mafak-daka-mokomip kiimi atul kaayo, itam suun-bamdip aket yaapkan fukunin disa yo.
1PE 3:15 Ibi ti Kraist ami aket-kup fukun-bam utamiwa yi, Ali numi kamokim ke-lomda, nuli tiin molokoma kala, kalale, tunum unang iyo ibi itamipla, Fan, God ami kukup tambal kaali, kipni kuyokoma kaami aket kaata ibi fukun-bamdip, fenbip o, kebip umi miit kabak-ami sang dik-daalip uyo, nuli weng dinim maan tiiyokomup o, kala fen-bam siliwa yo. Ibi kiimi dik-dakamin umi tiiyum o, kalip kaa, titil eng kaa bakayin disa. Bilili-kup kala-lomdip, imi dik-dakamin kaayo, maan tiiyim-bamdiwa kayi! kala-somla ko.
1PE 3:16 Ibi ti kukup tambal kaata-kup fuku-bom, kipni aket tem uyo ti bilili-kup keyila bulu yo, kala-somla kemin, kanola, kayak kayak ili taba kipni Kraist ami daang bakaansip kaami kalan kabak-ata, weng mafak kaayo, kipni bakayokomip uyo, itamipla yi, Ipsiik kukup mafak kaa maan tiiyin disa ke, ibi kukup tambal kaata-kup kanubip kala kalokomip kaa, ilmi weng mafak kanubip kaami fatom kaayo, tabeyokomu.
1PE 3:17 La, umi miit uyo God ami aket fukunin kaa, nuli kukup tambal uta fuku-bom-bulupla, kayak kayak iyo ipni yam-mafak-daalokomip kaata, tangbal o, kala namti, kaali ti tambal dukum o. Nokol tal aba yang kukup mafak kaayo nuu-bam, umi angtiil yol uyo kuluulokomup kaali, mafak o, kalokoma ko.
1PE 3:18 Yesus Kraist ali ti kukup tambal kaata-kup kutal-fuku-balala, ayo aaliple, angtiil yol uyo kuluuse kaa, ali ti tunum tambalim kemin, tal tunum mafak numi abiin kaata ayo kuluu-lom taanse. Kemin, ali liip maakup kaata-kup fak-daa taan-ilomda, numi ban uyo takan-tiiyinba-kup, numi God ami waasi kamaalin kukup uyo disa kelu kamboyilale, nuyo yim-bii-tildang God ami diim kawu daasa. Kanola Yesus Kraist ali ti fan tunum kela bom ilale, ayo aalip taanse. Katale, ami Sinik kaa taanama disa, ilsa.
1PE 3:19 Ayo taandala, yak aba tam sakbal am unang tunum taansip imi sinik imi tam itama, God ata sok de-yimula bom-bilip, imi diim tam un-ilomda kawu, God ami weng kaayo bokoyase. Kemin,
1PE 3:20 God ata mep sinik kiimi sok de-yim-tiila tiinaasip kabak-ami miit kaali, siin sawaayak kawu Noa ata God ami weng unang tunum imi kukaayin-balaya, ili God ami weng kuyang saak tiilip itamdala, God ayo angtiil yol kaayo, abiltap-kup kuyon o, kalsa disa; kano keyila ita-bom fen-bam ilaya, Noa ayo sip awak sakbaalkan dukum ma uyo dina-bam ale, kawu God ami sang kaayo, unang tunum imi bakayin-bam kemsa. Katale, unang tunum mep alep ma, oklungkal kiita-kup, tam sip tem tam unipla kawu, God ayo ok kulaala tabasu. Kata, kii anulu taanamip disa, kelipla, unang tunum God ami weng kuyang saak tiisip kiita-kup, wok ta anula taandiwa din sakbaal am kawu unsip.
1PE 3:21 Wok kabak-ami sang uyo faldak God ami kamala kawu okok keba umi diim tii-lomduya kemin, unang tunum ili baptis kamayokomip kabaku, God ayo imi talalu-yimulokoma. Kemin, tunum iyo kuyaku baptis ke-lokomip ayo, imi angtiil ninak uyo diliit moyu tiltam tambal-nuk o, kalalip baptis ke-lokomip dinim. Kaa God ami beten kamaan-bilipla, dong dakaayin-balala, aket tem kabaku ban wakamin uyo kewa kukup tangbal kaata-kup fukumin kemin, God ami Yesus Kraist asuk kom tem kawu dafose kaami win diim kabaku God ayo nuli yam-talalu-lokoma te!
1PE 3:22 Yesus Kraist ali tam abiil tikiin tam-ilomda, God ami sikil tingtup diim kabaku bom-balaya, ensel-miin alik yakal ilmi titil e kala akal alik e kuluula kuluula kelin kiiso, sinik mafak alik iso, iyo ami minlo tem unipla, ata tiin mosa ko.
1PE 4:1 Kraist ayo aalip taan-ilomda, angtiil yol uyo utamse. Kemin, ipkal ti kanola Kraist ami aket fukun-tal-unemsa ultap ke-bamdip, nokol angtiil yol kuluulamup kaali ti tambal o, kal-bomdipla yo, kala-somla kemin, tunum ali kukup tambal kutal-fukuba kaami kalan kaata, angtiil yol kuluulokoma kaali, ban kemin kukup kaa maso ma kanu-mokoma disa. Ibi nuli kuno angtiil yol kuluulamup uyo, kuno kuluulalup o, kal-bomdiwa kayi! kala-somla kemin,
1PE 4:2 ibi tiin kawong bom tawaal diim kala ilip kaa, iltipni aket fukunin kaata taba ban kemin kukup kaa maso ma kanumin o, kalu kaa, ibi yang tawaal diim unang tunum imi kanum tal-unebip ultap uyo kanumin disa; God almi kukup tambal kaata-kup kanumin o, keba kaata, kutal-fuku-bomdiwa yo, kala-somla kemin,
1PE 4:3 kabak-ami miit kaali, God ami lak duulin disa imi kukup mafak kaami aket-kup yelula, fuku-silip kaali, siin kaa kipsiik kuluu fuku-bilip, bii dukumnu kewa-silip kemin, kaa maso ma kanumin disa. Kanola, kanolin kukup kaali, kukup mafak mafak kemin aye, sadikimin kukup aye; yak ok mafak in-bom babon-tal-unemin; aa, ima ina fakamin kaami diim kaptamu suunkup tiin-bom inin-kup ilin; aa, ok mafak titil-kup tabasu kaami ket yaapkan inbi-lom, kukup mafak kemin; aye, atin kukup mafak o, kala men awem umi bakaan-bam wiis-saanin; aye kiita, ipkal kanolin kukup kiita kanubi bii keyip disa ke-silip. Kemin,
1PE 4:4 kamala kalawaali, ibi yang itamip, tunum God ami lak duulin disa iso, atin kanolin kukup mafak mafak fuku-bilip, bii dukumnu kewa-silip uyo, maso ma kanubip disa kemin, iyo ipni itam fanan-biliwa, ibi weng mafak kukaayila-yaabip. Yale,
1PE 4:5 ibi aket yaapkan kaa fukunin disa; am ma daanokomu kaali, yakal din God ami weng talalmin baan diim kaptamu kukup kaa kanun-umbip kaami miit uyo, isiik God ami weng ayo maan ten-bam bakaalokomip; ali weng talalmin tunum dukum kemin, tunum unang tiin kawang bom-bilip iso, taansip iso, alik imi kukup uyo yam-kuku-mokomi no, kalalaya, dot-bamda bombe. Kemin ale,
1PE 4:6 God ami weng tambal uyo, unang tunum yakal imi kukuyilipla, Kraist ami lak duu-bomdip ilom taan-silip. Kabak-ami miit kaali, God ami weng tambal uyo kukuya-silip kaata, fan ili Kraist ami lak duu-silip kaami kalan kaata, unang tunum malo ma ita weng yim-bak-saan-bam yeliwa, taan taan ke-silip. Lale, ilmi angtiil kuu, taansu. La, ilmi sinik kiiyo, God aso tiin-bom-laabip.
1PE 4:7 God ami tawaal diim kaldaak-ami mafek mafek alik disa kelu ke-wokoma kaali, umbital mepso tulu kemin, kaltipni aket fukunin uyo, talalu tiin mo, utafii-bamdiwa yo, kala-somla ko. Ibi kanu-mokomip kaata, kipni beten ke-mokomip uyo tiltam tambal-nokomu.
1PE 4:8 Kemin, nali kabak bokoyokomi kaa, mafek mafek sakbaalim dukum kemin, kaami liip namti kalabuu kala daatamin! Ibi Kristen unang tunum kusnum imi aket-kup yan-bulula, bomdiwa yo. Umi miit kaa, ipkal kanola God ami unang tunum imi aket kaata atin yelu namti, kiimi ban kemin uyo, aket fuku-daalin dinim ke, lukuuyokomu.
1PE 4:9 Kemin, kibi kaptum kusal tal kipni am ba tilip kaa, itam fanan-bam, weng mafak yaapkan kaa bakayin disa; iyo tambal-kup tiin saan-bamdiwa,
1PE 4:10 maakup maakup alik ipkal, God ali disa masiim okokmin akal alik akal alik miit akal kusnum e kala kuya kuya kese. Kemin, ibi aket fukunin tambal God kuyase kaayo, ti tambal-kup tiin mo-bomdip, kaptum kusal Kristen unang tunum iyo dong dakaayin o, kala-somla kemin,
1PE 4:11 kanola God ali tunum maakup ma ata God ami weng kukaayin tunum o, kalala, dong dokola God ami weng uyo utama namti, kaata God ami weng uyo unang tunum imi bakayak o. Ale, kanola tunum ma ata, God ali titil koli unang tunum kusnum imi dong dakaayak o, kalala, titil uyo kola namti, kaata God ami titil konba uyo kuluu-lomdala, aptum kusal kii dong dakaayak. Kanola, ibi kanu-mokomip kaata, God ami unang tunum kiili utamipla yi, Yesus Kraist ayo mafek mafek alik kiiyo talal-balala, tiltam tabemu kala kalalipla kawu, God ami win ayo kufon-bilipla, Yesus Kraist ayo win soyim ke-lomda, ata mafek mafek alik kiiyo, suunkup tiin molokoma. Kemin, fan ko.
1PE 4:12 Atin ti nalmi nak-tunum kusal kiwe! Yam-kukumin awak dukum ma tiltam kipni God ami lak duu-lom kutal-fuku-laabip kaami yam-kukubu. Kata, ibi kuu utam fananbi fanang-daa, Fan nuta ti mafek mafek ukol kusnum uyo tiltam yam-kukubu kaa, Kristen unang tunum ili ma kanolin kukup mafak kaali ma tiltam yam-kukusu disa, kemin disa.
1PE 4:13 Kibi Yesus Kraist ami angtiil yol fakamsa tap ke, kipkal angtiil yol kaabip kaami fiyaap uyo duu-bamdiwa yo, kala-somla kemin, kanola, kamala ipkal kanumip kulaali, ilom am ma daanala kawu, Kraist ami asuk talala kawu, unang tunum iyo atamipla, ali win tabin tunum kesa kala, kalalip atamiple, kulu ibi fiyaap duu-bam ale, kipni aket tem uyo atin ti tambal tambal ma keyokomu kaali ti, ibi utamipla, Kraist ali win soyap, kela kala kalalipya, kaayo kanu-mokomip.
1PE 4:14 Ipkal Kraist almi daang-kup bakaalip kala kalalip, tawaal diim unang tunum bom-bilip kiita, weng mafak uyo kukaayip namti, kipkal utam, God ami Sinik titil-kup tabasa ata, numi diim kawu bombe kemin, fan ili numi weng mafak kukaayinbip o, kalalipla, kipkal fiyaap kaa duu-biliwa yo, kala-somla ko.
1PE 4:15 Katale, Kristen ke-salap kapyo, kabi disa kawu tam-mafak-daalokomip namti, atin tambal. Lale, kapkal ma taba-lom tunum ma aalap taanba aa; yukut inabap aa; yak kukup mafak mafak kemap aye; kaptum kusal imi mafek mafek utafiiyi kawo! kal-bomdap, faldak-tii-bam daang tem weng baka-bam kemap namti, gavman ata tal-ilom kapni kukup mafak kanubap kaami kalan uyo, maan tiip-tam-balala, angtiil yol uyo kuluulokomap kaali, atin tambal disa yo.
1PE 4:16 Kapni Kristen ke-salap kaami kalan kaata, angtiil yol kukaap-tip namti, kabi kuuli fatom dakamin disa; ti fiyaap-kup duu-bom, God ami yaap ke yo, akan-kaa-bam ale, kayak kayak iyo titamiwa yi! Ali Kristen kemin, angtiil yol kuluulak o, kebip kala kal-bomdawa, angtiil yol kaa, daka-balapla yo, kala-somla ko.
1PE 4:17 Kemin, umi miit kaali, God ali yam-kukumin uyo, kamala-kup kulu kufolon o, kalalaya, almi unang tunum nusiik yam-kuku-bamda, angtiil yol katip katip iyo keyila, iyo tildak numi diim abebip kemin, ilom am ma daanokomu kawu, God ayo tunum unang God ami weng tambal kaami kuyang saak tii-laabip iyo, yim-bak-molaya kawu, fan angtiil yol awak dukum uyo kuyilala, uta-mokomip.
1PE 4:18 Uyo ultap kemin, God ami Sukon Tem kabaku uyo boko-lomdu: God ali tunum unang tituun-kup tabin iyo yim-buu-yim-taldang nalmi miit tem daalon o, kalokoma kuyaku, ayo angtiil yol kusiik kuyila utam-laam-siliple kawu, yim-taldang daalokoma. Ale, tunum unang God ami daang ukola-bomdip kukup mafak-kup fukulin unang tunum kiita le, atin ti angtiil yol awak dukum-kup kuluulokomip. Kemin, God ali kanolin unang tunum kiili, yim-taldang almi miit tem kaa daalokoma disa yo, kala kanum bokosu.
1PE 4:19 Kanum bokosu kemin ale, kanola God ami aket fukunin kaali, Nalmi unang tunum iip maakup maakup iyo angtiil yol kuluuliwa yo! kala namti, nokol utam, Awu, numi yam-talalusa tunum ali, God alta nuli daang ukuyokoma disa; atin tambal-kup tiin mo iloma kalbup-kup, aa alta dong dokoyilaya, angtiil yol uyo kuluulokomup kala kalalupla kawu, yak God almi sikil diim aba-lomdup, kukup tambal kaata, kutal-fuku kulii-taba-buluwa, numi angtiil yol fakabup uta taba, nuyo dong dokoyulula, tiltam bilili-kup kalalupla yo, kala-somla ko.
1PE 5:1 Kristen unang tunum imi kamok kamok kipyo! Aa, nakal ti Kristen unang tunum imi kamokim kemin, nali ti iltipni tunum kamok kamok ke-bom-bilip, ililtap nakal kanola nalmi tiin alep alep Kraist ayo ata-bom iliya, as diim kawu angtiil yol uyo kuluula taanse. Kemin, ultap o. Am ma daanokomu kaali, Kraist ami asuk tal fapnala kawu, unang tunum iyo atamiwa yi, Ali win soyim kela kala, kalokomip kaali, aso, naso, win tibin ke-lokomup kala, kalalila, kamok kamok ibi weng kala bokoyon o, kalalila kuyi ko.
1PE 5:2 Ibi God ami unang tunum iyo ti tambal-kup tiin molipla, kipni sikil diim kawu sipsip ililtap ke-bom ale, kipni weng kaata-kup weng san-kaa-bam ke-biliwa yo, kala-somla kemin, kanola, nuli disa yo, kalbip. Lale, tunum kusnum ita taba, Ibi kamok kamok kelin o, kala-lomdip, disa iip kawu ibi ulduulipla, kibi kamok ke-lokomip kaali, mafak ale, kipni aket ayo kanu-bamduwa, sisol kaata-kup kaamum o, kemin disa; ibi kalanolin ok kaami aket kaata-kup yan-bulula, ok kalaali, God almi ti kaata kanumin o, kalba kaata-kup fuku-bom fiyaap duu-bamdiwa, titil-foko kaata-kup fuku kanu-biliwa yo, kala-somla ko.
1PE 5:3 Kipta kamok kamok kelipla, tunum unang God ata ulela yim-bak ipni sikil diim tiila tiin mobip imi yim-baak tibiimin disa yo, kala-somla ko. Ibi kukup tambal kaata-kup, God ami tunum unang o, kala sipsip iyo kukaayin-bam ale, liip tambal kaata-kup kukuyin-bam kelipla iyo utamdipla, yakal kipni kukup kanubip kaata-kup, kutal-fuku kulii-tabin o, kala-somla ko.
1PE 5:4 Kanola, kamok kamok ibi kaata kanumip namti, am ma daanokomu kawu, sipsip tiin molin imi dabom Kraist ata tal fatap-nokoma kawu, ibi suunkup tangbal-kup ilokomip kaayo, kuluu-lom, mafek mafek abiltap bina-tal-une-bam ata ata kela kala kalalip maan kukaanbip tap ke-lom, kuluulipya, kuu suunkup tambal ilokomu no.
1PE 5:5 Aa ti ultap o. Man tunum man ket kipkal, kamok kamok imi minlo tem bomdip, imi weng kaata-kup weng san-kaa-bamdiwa yo. Ibi fuut kutam dakamin disa; bilili-kalin aket kaata-kup kutal-fuku-bomdiwa, tiin kuyak kaptum kusal Kristen kesip imi, Kaata kanolin o, yimbip, kaami diim daa-bomdiwa yo! kala-somla kemin, ipkal utamsip, God ami Sukon Tem uyo boko-lomdu: God ali fuut-kup tabin unang tunum iyo yim-baak tabi-lom ale, ali unang tunum dak-diiba bom ilin imi tambal tambal ma kamayin-bam kukaayila-yaaba no, kala kanum bokosu.
1PE 5:6 Kanolin kemin, ibi God titil soyim ami sikil diim kaami minlo tem unipla, God ami aket fukunin kaali, Am ma daanokomu kawu, yim-buu-yim-folila tambal ma kelik o, kala-lom keyokoma.
1PE 5:7 Akal kipni aket ayo kuya-bomda, tiin saan-umba. Kemin, alik kipni aket yaapkan fukun-bamdip, aket uluum tabemin kiiyo kulaalip yak almi sikil diim kawu abamnu keyiwa, akal dotu-yimulak o.
1PE 5:8 Kipni waasi Setaan ali, busi dukum atul-kup tabasa layon alaltap ayo, tunum unang ma itamdila yan-inamnon o, kal-bomda, dukum-kup ola-tal-une-bam laaba alaltap ke-lom, Setaan akal ibi yam-mafak-dakamon o, kalala kanum tal-une-bam laaba. Kemin, mafek mafek mafak tildang waka-tokoyon o, kalu uyo talalu aket fukun-bam fen-bamdiwa kayi!
1PE 5:9 Alik kipni kayaak Kristen unang tunum kiimi tawaal diim kala dik-daa kulaasu kaami bom-bilip iyo, kipni angtiil yol faka-bam utafiin-umbip tap ke-bom bilip uyo, ipkal utamsip. Kemin, ipkal God ami lak ayo atin duu-lomdip titil-foko Setaan ayo an-bak-molip yak bane-balaya yo, kala-somla ko.
1PE 5:10 God ali suunkup nuli kukup tambal-kup kukaayin-bam laaba kemin, ali taba-lomda ibi Kraist ami diim kawu fep-nip kala, kala-lom, naan-daaya, tildang nami miit tem suunkup ilin o, kalalaya, ibi naan-daayase. Kemin, ipni angtiil yol kulu laap dakan yak aba toop iip kulu uniwa kawu, God alta kipni kukup so, aket fukunin so, kiiyo atin dotu kutiiya-lomda, kipni fanang-saanin so, Kraist ami lak dakamin so, iyo yam-titil-dii kelala, titil-fokolokomip.
1PE 5:11 Kemin, ali titil aalap dukum ayo ami diim kawu-kup bom laabu kemin, ami fiyaap kaata-kup duu-bamdup ilum o, kala-somla kemin, fan ko!
1PE 5:12 Kemin, nami aket fukunbi kaali, Sailas, ali fan nulmi kayaak ale, ali Kraist ami lak duulin tunum kala, kalaliya, ata dong dokop-naya, sukon mepkan kalawuuyo, dola kup-nala, kipni kulaayilila din unak o, kalalila kemin, kipni aket fukunin uyo dong dokoyi tangbal ma keyuk o, kalalila, bokoliya dola kup-na. Nami weng bokoyi kaali, God ami atin kukup tambal-kup kipni kukaayila-yaaba kaami sang kaata, dukum-kup bokoyi. Kemin, God ali numi kanuyin-bam laaba kala, kalaliwa, ali kela-laamin daa. Titil-foko kutal-fuku-bomdiwa yo!
1PE 5:13 Kristen unang tunum abip Babilon kawu bom-bilip ili, God ata ipso nikil alimal maakup ulelase kalawiili, kipni weng umuuya binalip din unu. Kuno tunum atin ti nalmi man tituun alaltap ami win kaali Mak o, akan-kaan-umbip, akal ti, ipni weng umuuya-lom, weng kulaayila din un kelu no.
1PE 5:14 Ibi alik Kristen unang tunum nulmi aket kola-una-tala-kemin, kukup kaata, kuluu-lomdip, kaptum kusal iyo weng fakayin-bamdiple, yim-tal miki yam-kiila una-tala-ke-bamdip ilin o, kala-somla ko. Alik ibi Kraist ami unang tunum kemin, God ata dong dakaayim-balala, kipni aket tem uyo balili-kup kala bom yaap-kup bomdiwa yo, kalalila ko. Pita nita sukon kalaayo, dola kuyili ko.
2PE 1:1 Nak-tunum kusal kaa tiinsip o. Nali Saimon Pita, Yesus Kraist ami wok tabuulin tunum ale, kalaan tunum ke kesi; nata sukon kala ipni dola kuyon o, kalalila kemin, Yesus Kraist ali numi God ale, ata numi iliim uyo bo-kuyak-tiiyase. Kemin, ami aket fukunin kaali, ma ata win soyap ale, ma ata win daa kabaak banin so no, kal-bomdala, kanun-umba disa. Kemin, alik nuli ti maakup dong dakaayin-balaya, ibi Kraist almi kalaan tunum numi tambal-kup God ami lak duu-sulup ultap ke-silip. Kemin, sukon kalawuuli alik kipni kulaayili din unuk o, kali.
2PE 1:2 Kemin, nakal beten kemi kaata, ibi kanola God sole, nulmi Kamokim Yesus so, imi lak kaata duu-lom talalu itamsip. Kemin, alim kiita taba-lomdip ti kukup tambal uyo ifiili tooplo unu kelule, kaata-kup kukaayin-bilipla, kipni aket tem ukol ti kano ifiiyi tooplo unu ke balili-kup kelule, kulaali ti tambal-kup bomdiwa yi!
2PE 1:3 Nuli utamuwa yi, Alim ita kanola mafek mafek tangbal kiita numi kanuyokomip o, kal-bom utamsup kaami miit namti kala bombu no. Yesus Kraist akal ti God ale, atin ti titil soyim kemin, almi titil ta ami liip uyo numi kukuyilala, atam-ilomdup alami kukup uyo tituun-kup dikela-un-bomdupla, aso ilin uyo suunkup suunkup kaptamu laabup o. God ayo almi kukuya-lomda numi dong dakaayin-balala kawu, nuyo utamuwa yi, Ali ti tunum win tibin dukum kala, kalalupla, ali numi lak o, kalala ok tangbal kaata ken-umba kemin, ayo naan-daaya-lomda: Tala-tala-ke-lom fep-nipla yo, kala kanum bokoyinsa kaali, utamsup o.
2PE 1:4 Siin kawu, mafek mafek tangbal dukum kanu-bamdi imi dong dokoyokomi no, kala weng titil numi dip-tiiyase. Kulaa, numi lak o, kala ayo titil-fak-daa-lomda dokoya-laaba. Kemin, kanumin mafek mafek kiita ma noyokomi no, kalase uyo tifan kanoyase ko. Tawaal diim kayaak iyo Yesus Kraist ami lak uyo duulin dinim bom-bilip ita, ilami angtiil umi mok inawin umi aket kaata dukum-kup keya-laaba. Kemin, ilmi kanubip kaata, atin ti aket tem ku-mafak-dakan-umbip ale, nuli kanola siin kawu kano bom ilsup. La, Yesus Kraist ayo, Titil-fak-daa-lom imi dong dokoyokomi no, kalase kemin, kanola dong dakaaya-laaba. Kemin, nulmi siin kaami kukup mafak uyo kewa ukadaa yang tangbal diim kawu un-bomdupya, nuyo Yesus Kraist aso, tala-tala-ke-lom fewa-sulup. Kemin, altap ke-lom ilokomup o.
2PE 1:5 Kanolin kemin, ibi kabak utam, umi aket uyo fukun-bamdiple, kukup tambal uyo titil-fak-daa-ke-bomdip, kuyaku iltipni God ami lak dakamin uyo anung ifiilip toop lo unule, God ami kukup uyo talalu utam kuluuliple, kuyak iltipni kukup tambal uyo anung ifiiyim-bamdiple,
2PE 1:6 aket tambal fukun-bam kukup mafak kuumi aket kela-laamin uyo kuluu-lomdip, kuyak iltipni talalu utam-laamin kaami anung til-daale; fiit-bam kutal-fukulin-kup kemin kukup uyo kuluule, kulii yak iltipni aket tambal fukun-bam kukup mafak kaami aket kela-laamin kaami anung til-daaliple; aa dukum-kup God ami kukup kutal-fukumin uyo kuluule, kulii yak iltipni fiit-bam kutal-fukulin-kup kemin kukup kaami anung til-daaliple; aa
2PE 1:7 mep Kristen unang tunum kipni kaptum kusal imi olen-dakaayin uyo kululiple, kipni dukum-kup God ami kukup kutal-fukumin kuso kuyaku kebip-kup; kaptum kusal alik imi aket-kup kukaayin kukup uyo kulule, kuyak dik-maak daa kipni Kristen kap-tunum kusal olen-dakaayin umi tem kabak banu, kuso kuyaku-som ke-bamdip kutal-fuku-bom biliwa yo, kala-somla ko.
2PE 1:8 Mep kanolin kukup uyo ti kipni diim kawu bom-bulula, tiltam dukuma toop-toop unu namti, kuuta taba-lomdu ibi daka kukuyilula, utamiwa yi, Kamokim Yesus Kraist ayo numi diim kawu bombe kala, kalalipla, talalu atamdiple, alta dong dokoyilale, God ami kukup kalawuuta kanumin o, yimba kaata kanu-mokomip.
2PE 1:9 Lale, kanolin kukup umi sang bokoyili kaa, unang tunum malo ma imi diim kawu bombu disa; kiilile, God ata siin imi ban ke-bam laabip kabak-ami alik diliit moyila tambal-kup ke-silip kaami aket-kup kaa fukunokomup disa yo, kalalip lukuuyila, kela-silip. Kemin, kiili tiin fiim ililtap ke kuu utamipla, Kuuli mafek mafek sakbaalim dukum o, kalbip disa te!
2PE 1:10 Kemin, nak-tunum kusal Kristen unang tunum kipyo, God ali ibi weng umuuyilala tildang atamipla ibi almi ulelase. Kemin, kibi kaata titil-foko naan-daayase kabak-ami liip kuuta, dikiwa-un-bom kanumin o. Kanumip namti, ibi kulii daak abokomip dinim.
2PE 1:11 Kanola kibi kanumin kukup uyo kanu-mokomip kaali, God ali fiyaap duu-bamdala, ibi kuno kamboyilala, tam iltipni suunkup ilin kaami abip ilokomip uyo unokomip. Mep abip kaptam-ali numi Kamokim Yesus Kraist nulmi iliim boyase alta taba-lomda, almi unang tunum nuli alta weng tangbal-kup umuuya-lomda tiin molokoma no.
2PE 1:12 Kibi mep weng kala dola kuyi kaa, fan eng u, kalalip utam-ilom dukum-kup yikik-kutal-fukusip. Katale, umi sang uyo kipni aket fukunin uyo kufuyin-bilila, fanang-dakamin-kup kemin o, kalalila, suunkup bakayila yakyak ke-mokomi.
2PE 1:13 Kula, numi Kamokim Yesus Kraist ayo nali bokop-na-lomda: Ilanin tap kelapla kawu saak-nokomap o, kala kanum bokop-nala, utamsii. Kemin ale, nami aket fukunin kaa, nali tawaal diim kalawu bombii luk-nokomi kaali, God ami mafek mafek numi kanuyinba kuumi sang kaata ibi asuk bakayin-bamdila, kipni aket fukunin uyo kufuyin-biliya, fuku-daa utam-utam-ke-mokomip kaata fan, yaap keyokomu kala, kala-lom kaptoop un-bom saak-nokomi.
2PE 1:15 Nali ti titil-foko, sukon tem kaldaku dola kuyilila, kabaku suunkup bom-bulula, nami kanola taandi keyokomi kaali, uta taba yak mafek mafek umi aket uyo yak kipni aket tem uyo kufuyin-bulula, asuk fuku-daa-daa ke-bilipla yo, kalalila, kabak-ami sang kaata mep sukon kala dola-lomdi kulaayi din unokomu ko.
2PE 1:16 Kula, kalaan tunum nuli Kamokim Yesus Kraist ami titil kaami sang so, ami am ma daanu asuk kalaba talokoma kaami sang so, uta bakayin-bulup utam kaal-kesip. Katale, Kraist ami sang kuuli, nuli utamsip tunum kusnum ilmi aket fukunin tituun disa imi sang kaata anung ma kuluu-lomdupla, kibi kukaayila-yaabup disa te! Fan ti nulmi tiin alep alep atamupla, Kraist kaa God ami titil kaa kuluulala tiltam kamokim kesa no, kala-lomdupla kemin, kaami sang kaata-kup ibi bakayila-tabasup.
2PE 1:17 Kemin ale, atam-sulup kaali, Aalap God ayo numi Kamokim Yesus Kraist ami win ayo atin dap-tam asal kaptoop tii kambolale, kulaali almi falala-kalin dukum kaata kolaya, disa akal almi kusnum ma kelaya, nokol atamupla, God Dukum ali abiil tikiin kaptamu bomdala, boko-lomda: Kaali nalmi man kemin, ami aket-kup nelu bomdila, nali kaami fiyaap kaata disa akal ma ke-bam laabi no, kalalaya, weng uyo kulaala tildaak Yesus ami diim abamnula,
2PE 1:18 kaptam-ali God nalmi am du tikiin kayi! kalba kaptamu almi miining kalaan tunum asuumano nuta, Yesus aso maakup bom ilupla, abiil tikiin kaptamu God ami weng uyo baka-balala, nuli weng san-sulup o.
2PE 1:19 Kanum bokola kala, kala-lomdupla, nuli profet o, kala God ami tiipmin weng bakamin tunum imi weng ma siin sawaalak kawu bokosip uyo ti faneng u, kalalupla, dukum-kup titil-fak-daa kutal-fukusup. Kemin, kipkal kanola kutal-fuku tabuulalip kulaali, ti dukum-kup yikik-kutal-fukulalip kulaa, ti tambal te! God ami weng tiipmin eng bakamin tunum ilmi weng dolsip kabak-ali le yokon ultap o. Yokon dawong uta taba-lomdu kutamiip tem umi iilfoyin-bulula, una-tala-ken-umbip, kukal ti kanola tiipmin weng bakamin tunum imi weng kuuta taba-lomdu, ibi dong dokoyilula utamipla yi, Kukuyin tunum imi weng kipni kukaayin-bilipla, kwin, kuuli faneng bakayinbip elile? kasen-fakayinbip e? kala kaal-ken-laabip o. Kemin ibi tiipmin weng bakayin tunum imi weng uyo mokop kutal-fuku fuku-bomdiwa, bom bii Kamokim Yesus Kraist ayo asuk tala kala, kalalipla, kipni aket tem uyo fiyaap duumin o, kala-somla kemin; kulu Yesus ami asuk tolon o, kalala talokoma kaali, am kel diim wakalkan dukum daan tilipkan kuumi tiltam tam-alaabu ulultap kanolin o.
2PE 1:20 Kanola God ami weng sawaa bakayin imi weng kuuli, kamasi kaa mafek mafek maakup ma kaata talalu utamdipla yo, kalbu kaali, God ami weng sawaa bakayin tunum iyo ilmi aket fukunin weng aa, yak tunum kusnum imi aket fukunin weng aye, ma kuluu-lomdipla, unang tunum iyo bakayin-bisip dinim. Tifan, God almi Sinik Tambal alta taba-lomda dong dakaayin-balala, God almi weng kukaayinba kaata kuluubip-kup, unang tunum iyo kukaayinsip.
2PE 2:1 Kemin, sawaayak kaali, tunum malo ma Israel ilmi unang tunum imi iipyak tem kulaaku tiltam taba-lom bokolip ko: Nuli God ami weng sawaa bakayin tunum te! kalbip. Yale, kuliili kasen-fakayin-bam ibakayinsip. Kanolin ultap kemin ale, am ma daanokomu kaali, tunum malo ma Kristen iltipni iipyak tem kulu tiltam tolbip-kup bokolip ko: Yi, nuli Kraist ami sang kaata bakayum o, ke-mokomip. Yale, kiili disa, ibakayokomip. Kemin, kukuyin tunum kii ipni disa ibakayin-bamdiple, weng atin weng mafak uyo kutal tam daaliple, weng kuuta taba-lomdu ibi yam-mafak-daalokomu. Yak Kamokim ali ipni moyase. Lale, ili Kamokim kaa daang ukola-lomdipla, yakal ti kanumin kukup kaata-kup fuku-bam ilum e, kulaali God ayo abiltap yam-mafak fuula maaklo dinim-nokomip te!
2PE 2:2 Katale, kaltipni unang tunum yaapkan iyo tiltam taba-lomdip, kukup mafak mafak kukuyup kayi kemin tunum imi kanubip tap ke-bam ale, Kamokim ami lak duulin disa kesip iyo utabip-kup, Yesus ami daang bakamin uyo utam suun-bam ale, weng mafak uyo kukaayokomip. Kemin,
2PE 2:3 kukuyin tunum kiilile, fan ti dikiin-bam neyin tunum yaapkan kemin, ili ti ilmi ibakamin weng yaapkan kaata-kup bakayin-bamdip: Numi sang bakabup uyo tifan kemin, kipni moni aa, bung mafek mafek kii kuyin o, kalipla, unang tunum iyo utamiwa yi, U, faneng! Ilimi weng tituun kemin, moni ma imi kuyum o, kalokomip. Yale, siin sawaayak kaali, God ami yim-bak-mola maaklo ke-lokomip kaami kama am uyo daanokomu kuyaku kala, kalalala talalu kutiisa. Kemin, ali akan-unsa disa; kiili yam-mafak-daali maaklo ke-lokomip o, kalin kaami aket kaata-kup suunkup fukun-bamda fen-bam be no.
2PE 2:4 Kemin, nokol ti kano utamum! Sawaayak kaali, ensel malo ma kiili ban kesip kaa, God kaa kamboyala bom-bilip dinim; sok de-yim-tii-lom fokola yang afun tem mafak o, kala-lom atin malang tinisu kawu bomdipla, God ata yim-bak-saanokoma kaami am uyo daan tiltam tabamnula kawu no, kalalipla kaptamu fen-bam tiinsip.
2PE 2:5 Kanola ti sawaayak kaami unang tunum kiimi God ami daang ukola bomdip ban waka-bisip ili kano keya-lomda tiin-kup itamsa no, disa. Yale, ayo wok kulaala taba-lomdu anulu saakniple, Noa ata tituun-kup tabin kukup kaami sang unang tunum imi kukaayin ata-kup, God ayo, ali aala taanin dinim kambolaya, asole, unang tunum fetkal iso, kiita-kup tiin molaya yaap ke-bisip.
2PE 2:6 Ale, ma kaata, abip dukum alep Sodom sole, Gomora so, kaptam-ami unang tunum kiikal ti kanola God kaa daang ukola bomdipla, ti ban wakamin kaata-kup ken-unip kala, kala-lomda, kabak-ami kalan kaata God ayo yim-bak-mo keyila-lom kanun-umbip kaami maan kaali, abiil kaptamu wing kulaala tildaak abip alep iyo kuyak daalala kiin-aba ilomdip tip-kup kelipla, abip kaptam-ali atin sang dinim kesip ko. Kanumin kukup kemin, am ma daanokomu kaali, God ami siin sawaayak yim-bak-saan-bisa uyo taba-lomdu kukuyilula, unang tunum God ami daang wokolokomip kiita utamiwa yi, Kuuli ti fan God kaa kano-lomdala, yim-bak-molokoma no, kala-lomdipla, ami atul kaata atam suun-daalokomip.
2PE 2:7 Katale, Lot maakup ata kukup tambal kutal-fukulin tunum ayo abip Sodom kaptamu bomda utamala yi, Abip kaptam kasel iyo God ami lo kuuli, duul-duul-bamdip le, sadikimin kaami kukup kaata-kup kanumip kala, kala-lomdala, atin ti aket uluum sakbaalim dukum uyo kewalala, kulaali God ayo Lot ami dabuu dap-kayak tiilaya kemin, ali aptum kusal iso taansa dinim.
2PE 2:8 Kaami miit kaayo, Lot ali tunum tambal ale, ami aket tem kaali atin ti tambal-kup bom-bulula, ayo Sodom kayaak imi iipyak tem kawu bomdala, suunkup kiimi kukup mafak nuubip aye, yak weng mafak bakabip aye, iyo kuno tiin-kup itafii-bamda, ami aket tem uyo uluum-kup tabela bom-bulula bom ilsa.
2PE 2:9 God ami kukup uyo kano-laaba kemin, nokol kuu utamum o. Kanola yam-kukuumin kuu tildak unang tunum God ami kukup fokolin imi diim kawu abamnu namti, Dukum ata kaami liip kuu utamsa kemin, yimbuu yam-kan tiilokoma. Ale, unang tunum iyo kukup mafak kaata fuku-lom kutal-fukulip namti, Dukum akal kaami liip uyo utamsa kemin, kiimi kukup mafak kaami maan uyo tii-balala, yak aba butoop unula kawu, God ayo taba-lomda almi unang tunum yim-bak-saanokoma kaami am daan tiltam tulule, kuyaku maan awak dukum namti kulu tiltam tulula kuyokoma.
2PE 2:10 Kemin, unang tunum malo ma imi aket tem kaali akal ma keyilule, yang sadikimin kukup mafak kaata kutal-fuku le, God ata le titil dinim o, kala atafiimin weng uyo bakaan-bam ale, dak-fanan-bam ke-bilipla kemin, God ali unang tunum kanubip kiimi atin angtiil yol awak suunin so uyo kukaayokoma te. Kemin, kukuyilin tunum mafak kiilile, dalaala tal-unemin-kup ke-bam ale nuta-kup o, ke-bamdipla ilmi aket fukunin kaata-kup, Nuta-kup o, ke-bomdipla, kaata-kup kutal-fuku kulii-taba-bomdipla kemin, kiili abiil tikiin kasel ili aket tambal so ma fukun-bamdip, weng tambal uyo ma kukaayila-yaabip disa; suunin dinim, itafiimin weng kukaayila-laabip.
2PE 2:11 Kanolin la, ensel malo ma ita titil-kup taba-lomdip, kiita yak kanolin kukuyin tunum iyo yim-baalip kabaak banip ita ita kesip. Kemin, kuno iyo itafiimin weng uyo abiil tikiin kasel imi kukaayilamip. Katale, ensel kii Dukum ami mepso kulu tolnip kiili, abiil tikiin kasel imi ban wakamin ayo ku-fatap-dakayin-bamdip weng mafak inang ma kukaayila-laabip disa.
2PE 2:12 Kemin, kukuyin-bam ibakamin tunum kiilile, aket tambal so ma fukunalip disa; kang e? kayaam e? imi aket fukunin ililtap, ili ti ilmi aket fukunin kaata-kup kutal-fuku bom ilin kemin, utamdula yak weng mafak mafak babonin so, kaa maaklo bakan-una-tala-ken-umbip kemin, kiili saak-inasu-inasu imi awak umi man fokolu tunum iyo batuun-tal-une-bamdip aa-bam, fuu-bam, inan-umbip iltap taa! Tunum ata inasu-inasu iyo anulip saaka-laabip ililtap, God akal kukuyin tunum iyo kano anula saak-nokomip.
2PE 2:13 Mep kiita aket uluum uyo ipni kukaayila-tabasip. Kemin ti, kanola God asiik mep iyo aket uluum so, angtiil yol so, iyo kuyokoma. Kemin, kiili fen-bilip, am malang tinilula kawu, ima uyo in-bom, ok mafak yaapkan iyo in-bom, aa sadiki-bam ken-umbip disa. Kemin, ale, am taap so, kutamiip so, kanumin-kup ken-umbip. Kemin, imi aket fukunin kaali, kanumin kukup kuu numi aket tem kabak-ami fiyaap duumin kukaayin namti kabuu te, kalaliwa, kanun-umbip. Fatom dinim tap, disa iip kawu kasen-foko fal-tii-yim-biliple, Ipyo kamboyum e, tam ipso tiin-bom kominion uyo inan-umbip. Katale, kanolin kukup kanun-umbip kuuli ti, atin kukup mafak fatom tabasu kaata kukup kanun-umbip.
2PE 2:14 Kemin, kukuyin tunum mafak kiilile, ti unang iso, kukup mafak kemum o, kal-bomdipla, unang imi tiin diim kawu-kup ilum o, kal-bom ale, imi aket fanang-dakamin kaali ti, ban wakamin aket kaata-kup ti yan-buluya kemin, kaa dok kano-lomdip kaali, kambolamip dinim. Ili tiltam taba unang tunum Yesus Kraist ami lak duusip. Yale, atuk-atuk-kem-tabasip iyo sisii imbii tildang daalip iso, maakup ban ke-bam ale, kanubip kabaku yim-bi tildang abiil tem diin-laamin tap keya-laabip. Kemin, kukuyin tunum iyo aptum kusal unang tunum kusnum imi mafek mafek tiin nen-bam, Nulumi alik kelum o, kala taluya-laamin uyo kano-somla kanu-malip ko, kala kanum bokosip kaami kukup kaata dukum-kup yikik-kutal-fuku-bom kanun-tabasip kemin, God ayo boko-lomda: Kanolin tunum kii ti atin mafak kemin ili yam-mafak-daalokomi no, kalsa.
2PE 2:15 Kemin, ili kukup tambal kuuli, daang ukuwa kewa-lomdip, yak disa ukol ulmi kukup mafak ma kaata kanun-umbip kaa, ili tunum kiimi liip akaala-lomdip saak kawu babon-tal-uneba ultap ke-bamdipla, kukuyin tunum ili sawaayak kawu Bio ami man Belam ami kukup kano-lomda, tuumon kaami aket kaata an-buluya, yak kukup mafak mafak uyo kanu-biliya, king ayo sisol kukaap-nak o, kal-bomdala, kanum unan-soma kabak-ami kukup kaata ili dukum-kup kutal-fuku-bomdip kanubip. Katale,
2PE 2:16 God ali, Belam ami kukup mafak kanu-balala, katen-bisa kaami miit kaali, dongki ayo, tunum imi weng bakamin tap disa, ili mep hos imi weng tap kaata-kup naanin. Yale, dongki kaami Belam ami daang kun diim tiinba ayo, tunum weng kaata diyak dii-lom boko-lomdu mep Belam ami kukup mafak kaa kanolon o, kalala kaami sang uyo bakaan-bamdu katen-bisu. Kemin, kanola mep dongki kuumi kukup kaa kanu-bisu kaalile, God alta weng tem bakayin tunum Belam ami babonin kukup kaa kanolon o, keba, kaami liip kaata kuwaala an-dalaasa ko.
2PE 2:17 Kula, kukuyin tunum mafak ili ti tawaal tem ok tabeba kaami dalapna kaa nuli dok kano-lom inam-nolup disa ke-laabup ultap ilile, mep ibin duut umi taba-lomdu wom binali tuluk o, kal-bomdu inim ta fotabamnu wom ayo tildaak aboma disa ke-yaaba ultap kemin, mep mafek mafek alep kalawiili nuli tildang dong dokoyamu disa; kanola mep kukuyin tunum kiimi weng uyo ti atin disa ibakamin weng kaata-kup ti baka-bilipla, imi weng kuu dok kanola unang tunum iyo dong dokoyimu disa kemu kala, kala-lomdala, God ayo imi abip malang-kup tinisu abip ma ukdaa kutiiya kukuyin tunum mafak kiili sok de-yim-baali din kaptamu ilokomip o,
2PE 2:18 kalalaya, kukuyin tunum ili weng tambal-kup bakabip. Katale, iyo babon-bamdiple, disa ilmi weng kaata-kup baka-bamdiple, aptum kusal iyo yim-talang daalipla, sadikimin umi aket uyo akal kusnum ma keyule, yang bansip uyo dakan-tal-unen-tabasip. Kemin, umi tem kabangu kukuyin tunum iyo unang tunum kamala kulawu aptum kusal imi kukup mafak kanolin kenbip uyo yam-mafak-dakabipla, kulaali asuk kela yang tawaal diim kaldaak-ami kukup mafak kaata fuku-lomdipla yang banbip.
2PE 2:19 Kemin, kukuyin tunum mafak ili bokolip ko: Kuuli ti tambalkan te! Lo uyo ma taba-lomdu iltipni aket fukunin kaata-kup kukup mafak o, ken-unbip kuumi kanumin kuuta tiin mobu disa. Kemin din unin o! Kulu ti kanumin kaata-kup te, kem-yaabip. Yale, kukuyin tunum mafak kiili, kukup mafak kaata de-yimusu. Kanola tunum ali kukup so, almi aket fukunin so, kiita kanumon o, keba kaami aket kaa tiltam dukum dabaak-molule, atin mafakna namti, kunumin kukup kuluuta taba-lomdu tunum kulaa dedulula dok kano-lomda kanolin kukup kalawuuli kewuma disa yo.
2PE 2:20 Aa, kula unang tunum malo ma yakal utamipla, Fan Yesus Kraist ali numi Kamokim kala, kala-som ale, numi iliim boyase ali ata kala, kala-lomdipla, kuyaku tawaal diim kayaak unang tunum imi kukup mafak mafak kanum-tabasip iyo kambo-wa-lomdip, tiin tip daalin tap ke-silip. Yale, ili asuk tal aba yang kukup mafak uyo kanu-bilipla, uta taba-lomdu dukum-alom yim-baak-molu namti, kaa dok kano-lomdipla ilokomip i? Ili kamasi kaptoowu kukup mafak kaa fuku-bomdiwa kemin, mafak-kup ilan-solip. Kemin, asuk mulo yang ban kemin uli kutal-fukulin-kup ke-mokomip kaata, atin ti kano fan mafak dukum ke-lokomip.
2PE 2:21 Kemin, kanola unang tunum God ami kaata kanumin o, kalsa kuu utamsip disa, ili yang ban kemin-kup kemip namti, ku-mafak tap so kemin God ayo yim-mafak-daalokoma. Ale, kanola unang tunum kawanita kamosinim kaptoowu God ami weng tambal so, almi ok tabuulin tunum ita kuya-silip uyo, utam kutal-fuku-bom biile, asuk maas kewa daang ukuwip namti, kuuli ti atin mafakan dukum kemin, iyo yim-mafak-dakamin kaali, atin sakbaalim dukum keyokoma.
2PE 2:22 Kemin ale, unang tunum ili kanolin kukup kii kanumip namti, nuli faldak-tiimin weng alep ma faldak-tii kukuyokomu. Ma kuu boko-lomdu: Miyaan ali almi usaan-fii kutii tala kaali, asuk yang inamnon o, kala unen-umba, ale ma uta boko-lomdu: Kang ali oksam ayo ukoliple, tam abip tam ilomda asuk alta daak laklak uyo wiin-umba kaata kanum boko-som kalasuu. Kemin, kamasi kaptoowu miyaan so, kang so, alep maakup ili tambal-kup bom bii le, mulo kawu mafak-nokomip. Kemin, ultap o. Unang tunum God ami weng daang ukuwa, kukup mafak kutal-fuku-bom bii kewa-silipla, asuk fukumin kuumi sang kabak-ata faldak-tiimin weng alep namti kaa bokosip ko.
2PE 3:1 Atin nalmi nak-tunum kusal kipyo, siin sawaayak kawu sukon ma dola kulaayili din unsula, asuk kalawu ma kala kulaayi din unuk o, kalalila, dol-yimbi kemin, sukon alep kabak-ami diim kaldak-ali mafek mafek ma kiimi sang kiita asuk bokoya-lomdi, kipni aket fukunin kaata dong dakaayin-bam aket kufoyin-bilila, tambal keyuk o, kalali sukon ma kuuli kulaali din unsuu. Ale, ma kalawukal kulaayili din unuk o, kalalila, mep mafek mafek sang kala dola kuyili kaali ti.
2PE 3:2 Ibi siin sawaayak kawu, God ami profet tunum imi am ma daanokomu kawu mafek mafek tiltam tabokomip kiimi sang bakayinsip, kaami aket uyo asuk fukun-bamdiple, aa ibi Kamokim ata numi iliim boyin tunum ami titil weng uyo God ami kalaan tunum nuli kuyilala, kipni bakayinsup kaami aket kaakal ti, asuk fuku-daka-bamdiwa yi!
2PE 3:3 Kemin, nali kamosinim kaa ibi kuu utamdipla yo, kalbi, am ma daanula, Yesus Kraist ami asuk tolon o, kalokoma uyo aban-fakalin tunum isiik tal-ilomdip ilmi aket fukunin mafak kaata-kup weng mafak uyo kanola bakaan-bam ale,
2PE 3:4 sawaayak kaali, Yesus ali boko-lomda: Nali asuk tal unang tunum imi yim-fo-lomdi yim-bak-molokomi kayi! kala kanum bokosa kaa, atamum o. Ali kaloku bombe ni? Kaali asuk talokoma disa; sawaalak kaa numi awil-fakal saaka yakyak kulii bital kala diilu kaali, God ami sawaayak mafek mafek alik talalu kutiisa uyo ti kanosa kaata-kup kano tiinsu. Kemin, yak kipni boko-lomdip: Mafek mafek kalawuuli tiltam ukol alik ma ke-lokomu no, ken-umbip uyo fan, tiltam kusnum kelamu disa yo, ke-mokomip.
2PE 3:5 Siin sawaalak kaali, God ali weng kaata-kup bokolala, abiil kuu disa ulta-kup tiltam abamnule, tawaal kuuli wok umi iipyak tem kabaaku tiltam taba-lom wok uyo kuu kabaak daa tiltam tip abasu kaali, iyo aket uyo kabaku fukun-bamdiwa dotuu uta-mokomup disa yo, kal-bom baka-mokomip o.
2PE 3:6 God ayo asuk weng kuuta-kup bokolala, tawaal diim kaldaak-ami bina tal-unemin wok so aa, abiil tikiin kaptam-ami wom tildaak abemin kaami wok so, uyo tulu-tulu dik-yak-dii-lomdu ok kumun maakup ma alala kutii-lom foko taba-lomdu mafek mafek alik tawaal diim kala bom-bilip iyo kulaak moliple, mafek mafek alik tiin kawong soyal bom-bilip, iyo yam-mafak-daalula, taansip. Kaptoop kanum tal-bisu, kaali ti tawaal kaa akal fanang tambal ma ke-lom kutal kula diilu. Yale, aban-fakayin tunum kuliili boko-lom: Nuli kuuli talalu ma utamsup disa yo, ke-mokomip.
2PE 3:7 Kemin, kamala kulaakal kanola, God ayo weng kaata-kup bokolala, abiil sole, tawaal so, kii bomdipla, God ami kuyak daala kiin-taba-unokomu kaata tiltam tabin dinim kama bombu kemin, God almi aket fukunba kaali, Unang tunum daang ukup-na-laabip kiili bom-biliwa, imi yim-bak-saanokomi kaami am uyo daanu kala, kalale, kuyaku abiil so, tawaal so, alik maakup kuyak mim-daa-lom kuyak daali kiin-tabamnuk o, ke-bamda, fen-bam bombe.
2PE 3:8 Kemin, nak-tunum kusal kipyo, ibi mep mafek mafek maakup-kup ma kaluumi aket uyo lukuuyima no. Kristen unang tunum malo ma imi aket fukunin kaali, siin kawu Yesus alta boko-lomda: Asuk talokomi no, kalase uyo akol-akol-kem-tabasa no. Kem-tabasa yale, Kamokim Yesus Kraist ami am ding bakamin kaali, tawaal diim kayaak unang tunum numi ding bakamin ulultap disa; Kamokim ami aket fukun-umba kaalile, ti am maakup daan-laamin kaali wasital ilmi-kup 1,000 tap ale wasital ilmi-kup 1,000 kiitale am maakup daan-laamin tap o, ken-umba. Kemin, ami aket fukunba uyo tunum maakup, unang maakup, ma maaklo ke-lokoma kaali ti, atin mafak kemin, unang tunum alik imi aket kaa fal-kela-lom nalmi lak kaata-kup duulip kala, kala-lomdila yi, kal-bomdala, tawaal diim kasel unang tunum numi aket kaata-kup fukun-bomda, alik nuli abiltap yim-bak-saanakin disa bomda kama fenba ko.
2PE 3:10 Fenba, lale, unang tunum malo ma ili boko-lomdip: Kamokim ami talokomi no, kalanse kaali, akol-akol-tabasa no, kem-tabasip. Yale, am ma daanula, Kamokim ami talokoma uyo tunum yukut-inin tunum imi maaklo atamin disa, ilipla, talebip tap kanolokoma. Kemin, am kulaa daan talokoma kuyaku ti biileng awak win sokan namti, uun-fakan-taba-lom, abiil uyo dinimnule, wakalkan alik iyo wing ta fuula kiin-taba uniple, tawaal so, yak unang tunum kaa bomdip imi mafek mafek yaapkan ilmi sikil diim talala-yaabip so, iyo ti alik fuula kiin-taba-lom ok tap ke bina talbun ke-lom atin dinim-nokomu.
2PE 3:11 Uyo kanum tiltam tabamnula, mafek mafek kuuli ti kanola dinim kelu ke-lokomu kemin, kamala kalawaali ibi kalok nolokomip i? Kanolokoma kemin, ibi kuu kewa-lomdip kukup tambal kaata-kup kanu-bamdipla, yak God alami kukup kaata-kup alik kutal-fuku fuku-bomdiwa yo, kala-somla ko.
2PE 3:12 Kemin, ibi God ami am mafiing diim daanokomu kaami fen-bam ilokomip kuuli ibi baan abil tiltam tuluk ii, kalalipla, fiit-dabak-daa-bom kanumin kukup uyo fukubip kala, kala-lomdaya, kawu God almi am mafiing am uyo abiltap-siik kulaala tiltam tabuk o, kala-somla kemin, God ami tunum unang yim-bak-saanokoma kaami am kala daanokoma kabaku abiil uyo kiin-aba-lom dinimnule, as mamin awak sakbaalkan uta taba-lom wakalkan alik iyo fuula kiin-aba-lomdip tiltam ok alaltap keliple, atin ti dinim-nokomip. Yale,
2PE 3:13 nokol kabak utamuwa yi, God almi kabak kanolokomi no, kala-lomda, weng kuka-daasa kaata kutal-fukulokoma kala, kalalupla, mafek mafek disa ke-lokomip kaami aket uyo yaapkan iyo fukunin disa. Kemin, God ami weng kuka-daasa kaami fen-talan-umbup kaali, abiil so, tawaal so, iyo yakal kusnum ma talalu kutiilaya, kulaali unang tunum alik bom-bilip iyo, kukup tambal kaata-kup kutal-fuku-bomdip, mafek mafek alik iyo tiltam tambal-kup ke-lokomip o, kalsa umi fen-bam bom-laabup o.
2PE 3:14 Kemin, atin nalmi nak-tunum kusal kiwe! Kanolin mafek mafek iyo tiltam tabokomip o, kalalipla fen-tabasip kaa, ti ipkal titil-fokobip-kup, yak kukup mafak mafak alik iyo yam-kayak-daka-bam kukup tambal kaata-kup ti kanu-bam ale, ibi God so aket maakup fanang maakup ke-bamdiwa, God alta utama yi, Ibi tambal-kup bom-bilip kala, kalala itamak o, kala-somla ko.
2PE 3:15 Ipyo, lukuuyima no. Kamokim ali asuk tolon o, kalala, ali fenin-kup keba kemin, ali numi kukup mafak kaa kanun-umbup uyo abiltap siin maan tiiyon o, kala-laaba disa; ali kuno fanang ta bomdala nuli maan tiiyila tabasa kemin, kuuta taba nuli kukuyulula utamupya, God ami aket fukunin uyo, Unang tunum imi aket uyo fal-kela-lom nalmi lak kaata-kup duuliple, yim-tama din nalmi abip daalon o, keba kala kalbup. Kemin, God ali nulmi nak-tunum Pol ami aket fukunin tambal uyo kolaya kemin, akal ti kanolin weng uyo ibi dola kuyase.
2PE 3:16 Kemin, Pol ami unang tunum imi sukon dol-yila-yaaba, kabak-ali kaami sang-kup bakan-umba ami weng dola-yaaba kuuli ti faneng. Yale, weng malo ma sukon tem kabaku bom-bilip kaami miit uyo fatap kulu bombuu disa; weng kaami miit uyo fiit-bam talalu uta-mokomup. Kemin, tunum malo ma God ami weng dik-daa kulu ami lak kaa tituun-kup duulin disa bom-bilip ita, Pol ami weng sole, God ami Sukon Tem kabak-ami weng so, iyo fal-siki kutii-lom kukaltam-kukaldaak-ke-bamdiwa, disa weng ukol ulmi kusnum kelule, bakayila-tabasip. Kemin ale, kabak-ami kalan kaata God ayo atin yim-bak-molala, yang ban-ilomdip aso mep kawu ma ilokomip disa.
2PE 3:17 Lale, nalmi naktum kusal kiwe, mep mafek mafek kii tiltam tabokomip kiiyo, kaa ipkal utamsip. God ami lo kuuli, weng sanamip dinim tunum kii ti kasen-faka-bam ibakamin weng kaata taba ibi yim-tama yang banu titil-foko tolnin disa ke-lokomip. Kemin, kipkal utafii-bamdiwa yi. Iltipni tal-unemin, tiin-laamin, kii talalu sokoso tiin mo-bomdiwa yo, kala-somla ko. Kata, kano ilmi weng uyo weng sanip namti, atin ti titil foko-bom Yesus ami lak uyo kulaa-lom tiil banokomip.
2PE 3:18 Kemin, Yesus Kraist nulmi Kamokim ata taba numi iliim uyo boyase. Kemin, ibi titil-foko Yesus ayo maso ma talalu dukum-kup ata-mokomip kaata, fan akal kipni almi lak duu-yilin uyo dotu kutiiyila, tiltam titil-foko-lomdipya, God ami fanang saanin uyo dukum kelula utamin o. Nami aket fukunbi kaali, tunum unang ili Yesus ami win kaata-kup kufon-bilipla, kamala kalawaali tiltam win tibin ke-lomdala, suunkup bom una-bala yo, kala-somla kemin, kalaata-kup taa! Kemin kaali ti faneng ko.
1JO 1:1 Ipyo, Yesus Kraist ami win ma kaali, God ami weng o, kalsip. Kemin, kaata numi suunkup ilin unang tunum kemin, kaami miit kaali, kaa bombe. Kemin, ami sang kaata kipni bakayon o, kalbi no. Ami kamasi miit tem kaptoop-ali kanun-umba kemin, siin kaali, ami daang bakaalin tunum nuli ami weng uyo weng san-kaa-bamduple, nulmi tiin talaa atam-ilomdup kuno, nokol dap-fuku-bam kemsup.
1JO 1:2 Kemin, numi suunkup ilin unang tunum kemin kaami miit kaali, tiltam fatapnala, nuyo atamdupla kawu, ami sang uyo ibi bakaya-tabasup. Kemin ale, suunkup tiin kawong ilin miit kayaak ayo Aalap God so laaba. Kemin, ami tiltam fatapnala, nuyo atam-ilomdup ami sang kaayo, bakaya-tabasup.
1JO 1:3 Kemin, Atok God aso, ami man Yesus Kraist so, alim ili nuso alimal maakup ke-lomdup miit maakup kesup. Kemin, ipso nuso, kano nikil alik miit maakup kelum o, kala-lomdupla, nuli nulmi atam-sulup sole, weng, weng san-sulup so, kiimi sang kiita, ibi bakaya-tabasup.
1JO 1:4 Kemin, alik numi Yesus Kraist ami fiyaap duumin kaata tiltam uta uta ke-lom dukum-nuk o, kala-lomdila, weng kaali dolbi ko.
1JO 1:5 Kemin, Yesus Kraist ami weng bokoya weng sandup, ipni bakaya-tabasup kaali kala bombu kemin, God ayo falala-kalin tunum kemin, ami diim uyo kutamiip katip ma bombu dinim; kemin, ali atin ti tambalim kemin, ami diim kaali kukup mafak anang ma bombu dinim.
1JO 1:6 Kemin, kanola nuyo boko-lomdup: God aso, nuso, alimal nuyo maakup kesup o kalokomup. Kata, nuyo kutamiip tem kabaku laabup o kala kukup mafak uyo kemup namti, tifaneng weng uyo weng san-ilomdup, kukup tambal uyo kufukulokomup disa; kemin, ibaka-mokomup te!
1JO 1:7 Kemin ale, kanola, nuli God ami falala-kalin diim kawu bombe alaltap ke-lom kukup tambal alik kiiyo, kutal-fukulup namti, alik nuyo nikil alimal maakup ke-lomdupla, God ami Man Yesus ami taana kiim sing-tam-daase kaata, taba-lomdu numi ban kemin uyo alik takan-tiiya-lom dilit moya, tambal ma keya ilokomup o.
1JO 1:8 Kemin, kanola nuyo boko-lomdup: Nuli ban kemin dinim o, kalup namti, kaali numi aket tem uyo bam-daalin dinim ke-lomduple, God ami tituun-kup weng uyo talalu utamsup disa yo, kalokomup.
1JO 1:9 Kemin, God ayo boko-lomda: Talalulokomi no kalase kaali, atin ti talalu-laaba. Kemin, unang tunum imi kukup kanubip kiimi maan tiiya-lomda kukaaya-laaba kaali, tambal kemin, kanola nuli nulmi ban kemin uyo ku-fatap-daka-mokomup kaali, God ayo numi ban kemin kaali, keya-lomda ali numi kukup mafak alik takan-tiiya-lomda alik dilit moya atin tangbal-kup ilokomup.
1JO 1:10 Kemin, sawaayak kawu God ayo boko-lomda: Unang tunum alik maakup iyo ban kemin unang tunum o, kalsa. Kata, kanola nuli boko-lomdup: Nuyo ma ban kesup disa yo, kalup namti, kaata nuli God ami atafiimin weng uyo boko-lomdup: God ali ibakamin tunum o, kala-laamin kukup namti kaabu. Kemin, God ami weng uyo talalu utam kufukulin dinim kela-lom laabup.
1JO 2:1 Nalmi man katip katip ipyo! Ibi ban kemalip o kalaliya, weng kala ipni dol-yimbi. Yale, tunum ma ban kela namti, nulmi kalaan tunum Yesus Kraist ayo numi lo un-ilom, Atok God ami bokola-lomda: Tunum kalaali ban tem kawu diinse kemin, Atok kabi ami ban kemin uyo kewalapla yo, aka-laaba. Kemin, Yesus ayo atin tunum tambal kemin, akal numi ban kemin uyo takan-tiiya-lomdi dilit moyi tambal ma kelin o, kala-lomda, alta numi ban kemin kaali, moyase. Kemin, numi ban kemin kaata-kup disa; alik tawaal kala dik-daa kulaasu kaami unang tunum kiimi ban kemin so ko.
1JO 2:3 Kanolin kemin, nuyo God ami weng kutii-lomda: Ibi kanumin o, kalsa kaata kutal-fukulup namti, nokol talalu utamupla yi, Fan God ami kukup uyo utabup kala kalokomup.
1JO 2:4 Kemin, tunum ma ayo boko-lomda: God ami kukup uyo utamsi no, kalba. Lale, God ami weng kutii-lomda: Ibi kanumin o, kalsa kaali, kuyang saak tiima namti, ata ibaka-bamdale, God ami tituun-kup tabin weng kaali, talalu utam kufukulin dinim, ke-bomdala kanun-umba.
1JO 2:5 Kemin ale, tunum ayo God ami weng, weng san kutal-fukusa kaali, fan atin ti God ami aket konsa tunum ayo kaa bombe. Kemin, kanola tunum ayo ma boko-lomda: Nili God ami diim kawu laabi no, kala namti, tunum kaali, sawaayak Yesus ami kukup kanumsa alaltap ke-bomdala yo, kala-somla kemin, kanu-mokoma kaata utamala yi, God ami diim kawu laabi no kalokoma.
1JO 2:7 Nak-tunum kusal kipyo! Kaata kanumin o kala-lomdila weng kala dolbi kaali, weng alokso disa; kaali siin kaami weng kemin, sawaayak miit tem kaptoowu bakayin-bulup ipkal weng san utamsip.
1JO 2:8 Kata, weng kaa ipni dol-yinbi kaali, weng alokso yo, kalalila dolbi. Kemin, kaali dok kata naa kalolip: Sawaayak kawu, Yesus Kraist asiik weng kaali, kutiiya-lomda: Ibi kaptum kusal imi aket uyo kuya una-tala-ke-bamdipla yo, kalsa. Kemin, ibi ti kutal-fuku kulii-tabasip. Kemin, aa ti kano, asuk nakal weng kaali, ipni bakayimbi no. Aa, yokon dawang ultap tunum ayo, iilfo-balala, unang tunum numi malang tinimin tap uyo disa ke-bulula, utamuwa yi, Kaami weng kaa kutiiyinsa kaali, fan o ken-umbup.
1JO 2:9 Kemin, kanola tunum ma ayo boko-lomda: Nili God ami yokon dawang iilfolin diim kawu bombi no, kalba. Lale, aptum kusal Kristen ayo ma atam fanan-daala namti, tunum kaali, malang tem uyo kelin disa bomdala, kukup mafak uyo suunkup kufuku bombe.
1JO 2:10 Kemin, aptum kusal Kristen imi aket uyo kuya namti, ali God ami yokon dawang iilfolin diim kawu bom-balala, aptum ayo ma ami kukup uyo utam-ilomda kela daak abokoma disa.
1JO 2:11 Katale, tunum ali aptum Kristen ayo ma atam fanan-daala namti, kaali kutamiip tem kawu bomdaya, kukup mafak ayo ken-umba. Kemin, kaali dok kata naa kalolip: Kutamiipyap o kala Tunum Mafakim ata taba-lom imi tiin kuwaalaya, talalu utam-laamin dinim ke-bamdaya babonba no.
1JO 2:12 Nalmi man katip katip kipyo! God ayo Yesus ami taanse kaata no kala-lomda ipni ban kemin kaali kukan-tiiyala, disa kesuu no, kalalila, weng kaayo, ipni dol-yili.
1JO 2:13 Kemin, awil-fakal ipyo! Yesus Kraist ali sawaayak kawu, ti kano bom-biisa yakyak kutal kamala kala diila kaakal kuno bombe no kemin, ali atamsip o kalalila kemin, weng kalaayo, ipni dol-yimbi no. Man tunum man kasaa kasaa ipyo! Ipta Tunum Mafakim ayo kabaak bana kela-lomdip, ipta ipta ke-silip o kalalila, weng kaayo, ipni dol-yimbi no. Nalmi man katip katip kipyo! Ibi Atok ayo atin talalu atamsip o, kalalila, weng kaayo, ipni dol-yimbi no.
1JO 2:14 Awil-fakal ipyo! Yesus Kraist ali sawaayak kawu, ti kano bom-biisa yakyak kutal kamala kala diila kaakal ti kuno bombe no kemin, ali atamsip o kalalila kemin, weng kalaayo, ipni dol-yimbi no. Man tunum man kasaa kasaa ipyo! Ipkal titil tabasip kemin, God ami weng uyo talalu utam kaal-kesip. Ipkal Tunum Mafakim ayo kabaak bana kela-lomdip, ipta ipta ke-silip o, kalalila, weng kaayo, ipni dol-yimbi no.
1JO 2:15 Ibi tawaal diim kalaami kukup so, mafek mafek iso, kiimi aket-kup kuya ilin daa yo! Kemin, kanola tunum ayo tawaal diim kaami mafek mafek kiimi aket-kup aalula kuya ila namti, ali Atok God ami aket kaayo, aalula kola-laaba disa yo.
1JO 2:16 Kaali dok kata naa kalolip: Tawaal diim kalaami kukup alik kiili, aket dakat yak abemin aye; sadikimin aye; mafek mafek atam mok ina-laamin aye; almi mafek mafek kiimi tong-kup bakamin aye; kanolin kiili, Atok ata kutiilala, tiltam tabasu disa; tawaal diim kaami tunum ilta kutiilipla, tiltam tabasu.
1JO 2:17 Kemin, tawaal diim kalaami kukup kutal-fukumin so, mafek mafek atam mok ina-laamin so, iyo alik disa ke-lokomu. Kemin, kiimi aket kaali kuya-laamin daa. Kemin ale, tunum ayo God ami aket fukunba kaata kutal-fukula namti, ata suunkup ilokoma no.
1JO 2:18 Nalmi miining kipyo! Am mafiing diim kaa mepso talabu. Kemin, ibi sawaayak kaa weng sanipla, Kraist ami waasi kamaalin tunum ayo tiltam talokoma no, kala weng san-silip. Kemin, kamali kulaata, Kraist ami waasi kiili, yaapkan tiltam talebip kemin, utamupla, Kamala kaali, am mafiing diim mepso talabu no, kala kalbup.
1JO 2:19 Kemin, sawaayak kawu nikil nuyo bom-laabup kaali, nikil maakup ke aket aye, fanang dakamin aye, kaali maakup kesup daa; aket alep kesip kiili, nokol nulmi miit alik o kalalipla, nuli keya-umbip. Kemin, kiili nulmi miit dinam, nikil maakup bom-bulup. Kata, nuli keya-umbip kemin, kabak-ata utamupla yi, Ili numi miit maakup daa yo, kalbup o.
1JO 2:20 Kemin ale, ipta Yesus Kraist ami Sinik Tambal ayo dabaala tal iltipni diim aba-lomda dong dokoyilala alik ibi utamipla yi, Yesus ami tituun-kup tabin weng kaali, kaa bombe kala kalbip.
1JO 2:21 Kemin, nali kipni aket kaata fukun-daalila yi, Ili Yesus ami tituun-kup tabin weng kaata, ma utamsip disa yo, kalaliya, sukon kalawu ma dol-yinbi disa; kibi tituun-kup tabin weng kuuli utamsip. Kemin ale, ipkal utamipla yi, Tunum ibakamin kiiyo, fan atin tituun-kup tabin weng kuu yaap keyilula, bakan-umbip disa yo kalbip. Kemin, talalu itafii-bam un-bomdiwa yo, kala-lom, sukon kala dol-yinbi no.
1JO 2:22 Tunum ibakamin weng bakamin tunum kiili kawanta ni? Kanolin tunum kiili boko-lomdip: Yesus kaali, God ami ulduulala Kamokim Kraist kesa tunum disa yo ken-umbip ita kemin, Aalap aso, Man so, alim imi weng uyo kuyang saak tii-bamdipla, waasi keya-laabip te!
1JO 2:23 Kemin, tunum kanta God ami Man ami weng uyo kuyang saak tiiba namti, Aalap God ami weng kaso kuyang saak tii-mokoma. Kemin, tunum kanta God ami Man ami lak kaali duula namti, Aalap ami lak kaaso duulokoma no.
1JO 2:24 Kamosinim Yesus ami lak duu-silip diim kawu, weng kulawuuli alik weng san yak aba kutal kala diilu kaali, ti dukum-kup kuyak aket tem daa kutal-fuku bom-biliwa yo; kanola ipkal weng kuuli, dukum-kup kuyak aket tem daa kutal-fukulokomip kaata, Man aso, Aalap so, alimal maakup ke ang-de-bom ilokomip.
1JO 2:25 Kemin, Yesus akal weng uyo kuka-daa-lom boko-lomda: Nalta talalu-yimuliya, ibi suunkup tiin kawong ilin unang tunum ilokomip o, kalsa.
1JO 2:26 Kemin, nali ibakamin tunum imi sang kaata, sukon kala dola kuuyila, kaal-ke-lom ipkal weng san uta-bomdipla, dok kanolin ata taba-lomda biing mo yim-tama tal liip kusnum ma daalokomip kaa, utafii-bamdiwa yo!
1JO 2:27 Kata, Yesus Kraist ayo alami Sinik Tambal ayo dabaalaya tal kipni aket tem kawu un-ilomda kukuyinba. Kemin, ibi kukuyin tunum kiili, iip-namip disa; Yesus Kraist ami Sinik Tambal ata ti, mafek mafek alik imi sang kaa kukuya-yaaba. Kemin, ami yam-kukumin kaali, ti ibakamin dinim kemin, atin ti fan tituun-kup tabin weng kaata-kup bakamin. Kemin, Kraist ami Sinik Tambal ami kukuyinba kaali, weng san kufuku-bomdipla, tiltam Yesus Kraist ami miit tem mepso kuluwu bomdipla yo, kala-somla ko.
1JO 2:28 Nalmi miining kipyo! Nuli Yesus almi miit tem mepso kuluwu bomdupla, asuk talak o kala-lomdupla kawu, ami talokoma kaata, fan nikil nuli suunin dinim, fatom dinim, sawaan-yaamin dinim; fiyaap-kup duumupla, ayo tala ata-mokomup.
1JO 2:29 Kemin, ipkal Yesus kaali atamsip kemin, ali God almi Man tituun-kup tabasa kaa, ti ipkal atamin. Alik kawanita kukup tambal-kup kutal-fuku-bomdip tituun-kup unang tunum ke ilip namti, kiita God almi man alik-daap kensip namti kulu bilip kayi!
1JO 3:1 Ibi ti kaa daatamin! Aatumen God ali ti numi aket kaali, dukum-kup kuya-bomdaya, Ibi nalmi man o keba. Kemin, tifaneng kemin, ti kaa daatamin. Kemin, tawaal diim kasel kukup mafak kutal-fukulin ili, God kaa talalu atamin disa kesip. Kemin, almi man nokol ti kanola itamipla yi, Kii God ami man o! yaka-laabip disa te!
1JO 3:2 Atin ti nak-tunum kusal kipyo! Kulaa, nikil nuli God almi man ke-sulup. Yale, nuyo utamuwa yi, Ilom am mafiing mafiing daanokomu kaa, nuli dok kanumin unang tunum iltap ma ke-lokomup i? Lale, nulmi utamsup kaalile, siin-ilom Yesus Kraist ami talokoma kaata, nokol ti alaltap ke-lokomup. Kemin, numi kawu utamsup kaali, kaa dok kata naa kalolip: Nokol utamupla yi, Kaali ti fan kaa bombe no, kalokomup.
1JO 3:3 Kanola, unang tunum alik ili kaa utam-ilomdip Yesus ami fenbip ilmi aket tem kawu tiin mo-lomdip Kraist almi aket tem ban kemin dinim, tambal-kup bombe altap ke-bom laabip.
1JO 3:4 Ban kemin kaami kukup ayo God ami weng awem o kala lo kuumi kuyang saak tiimin kaami kukup kaata, kemin, kawanta ban kema namti, kaali dak-fanan-bamdaya, God ami weng uyo kuyang saak tela-taba.
1JO 3:5 Kemin, ipkal kulaa utamsip taa, Yesus Kraist ami tal tawaal diim kalaba talse kaali, ti tawaal diim kasel numi ban kemin takan-tiiyon o kalalaya talse. Kemin, atin Yesus ali ti ban kemin dinim tunum o.
1JO 3:6 Kanola, tunum ma ayo Yesus ami mepso kulu ila namti, ali ban kemin kukup uyo ma suunkup kutal-fukun-umba disa; kemin ale, tunum ma ayo suunkup ban kemin kukup kaata-kup fukun-umba namti, nokol utamuwa yi, Mep tunum kalaali, Yesus kaa talalu atamsa disa yo! kalokomup.
1JO 3:7 Nalmi miining kipyo, utafii-bamdiwa yi! Kanola tunum ma ayo ipni disa iip bokoyokoma kaa, ibi ami weng uyo weng san-kaamin dinim o. Kemin, kanola tunum ma ayo kukup tambal kutal-fuku ila namti, ali ti Yesus Kraist alaltap ke tituun-kup tabasa tunum namti kulu bombe.
1JO 3:8 Kemin, tunum ma ayo ban kemin kukup kaata-kup kutal-fuku-bomda ban kem-tal-unemin-kup kema namti, kulaali Tunum Mafakim ami man ali kulu bombe ko! Sawaayak kawu Tunum Mafakim ayo ban kem yakyak kutal kula diila kemin, suunkup ban kemin-kup ke-bam ilin tunum kaali, Tunum Mafakim ami man namti kaa bombe no. Kemin, God ami Man ayo atamala yi, Tunum Mafakim ayo kanum-tabasa kala, kala-lomda, daak tawaal diim un-ilomdi Tunum Mafakim ami ok mafak uyo lo-lomdi kukan-telon o, kala-lomda taldaak fatawase.
1JO 3:9 Nuli tunum miit alep imi kukup kiiyo, yam-kuku itamum o kala kemin, kanita God ami man elile, kanita Tunum Mafakim ami man e kalokomup iyo kanumin kemin: kanita God ami man kela namti, ali God ayo dap-talalulala, tiltam atin ti kama tunum ke-lomda, God ami aket fukunin kaayo, kuluu-lom asuk ban kemin aket fukun-bam ban kemon o kalokoma disa. Kemin, ali ti God ami man alik-daap ke-lomda, God ata ti tunum kaa tiin moba kemin, asuk ali ban kemin kukup uyo tiltam dap-mafak-daalokomu disa. Kemin ale, tunum kukup tambal fukulin dinim ali, God ami man daa; tunum ayo ami aptum kusal iyo olen-daaya-lomda aket kuyin dinim kela namti, ali God ami man disa. Kemin, kii itamum.
1JO 3:11 Kamasi ipni weng, weng sansip namti kala bombuu. Kemin, nak-tunum kusal imi olen-daaya-lom aket-kuya-una-tala-ke-bamdupla yo.
1JO 3:12 Kemin, nuli Adam ami man diil Ken alaltap ke ami kukup mafak kaata, kutal-fuku-laamin disa. Kemin kaali, Tunum Mafakim ami man ke-lomdaya, niing ayo an-kutiila taansa. Kemin, kaa kanim kalan kaata, niing kaa aasa ni? Fik ami kukup kaali ti atin mafak ale, niing ami kukup kaata, tambal o kala-lomdala, fik ata niing ami waasi kenba-kup, niing ayo an-kutiila taansa te!
1JO 3:13 Nalmi nak-tunum kusal kipyo! Ti kano, tawaal diim kasel kalawiita kipni tit-itam-ilomdip kipni waasi keyip namti, ibi aket yaapkan fukun-bamdip aket uluum kaa kaamin daa yo.
1JO 3:14 Kemin, nuli ti nulmi nak-tunum kusal imi aket kukaayin-bam laabup kaata-kup atamupla yi, Numi taan-laamin liip kaata kambola-somdupya, tiltam tiin kawong kaami liip kawu, bom-bulup kala, kala-som ale, tunum ali ap-tunum kusal imi aket uyo kukaayin dinim ke-bamda ila namti, kulaali atamuwa yi, Awu, ali taan-yaamin kaami liip kawu bombe no kalolup o.
1JO 3:15 Kanola, tunum ali ti almi ap-tunum kusal imi aket atul-kup kukaayila namti, ali ti tunum an-kutiila taan-laaba altap ke-bamda kanuba. Kemin, kipkal utamsip kaali, tunum ma ata ap-tunum an-kutiila taana namti, ali suunkup ilin tunum disa.
1JO 3:16 Yesus ayo numi lak kaata duu-lomdaya, almi angtiil lak uyo duulin disa; maas kela-lomda numi dong dokoyase kaata, atamupla yi, Nak-tunum kusal imi lak dakaamin namti kaa bombuu no kalalupya atam-sulup. Kemin, nokol ti kano nak-tunum kusal imi aket uyo kuya-lomdup aket kuya-una-tala-ke-bamdupla, nak-tunum kusal imi yelum o kalip namti, imi abiin kaa kuluulami no, kal-bomdupla, dong dakayum o.
1JO 3:17 Kemin, kanola tawaal diim tunum mafek mafek soyap ayo ma ap-tunum mafek mafek iiba kaali, ma olen-daalama dinim kela namti, kulaali God ami lak duusa disa namti kulu bombe.
1JO 3:18 Nalmi miining kipyo! Nulmi nak-tunum kusal imi aket uyo kuyup o kala disa kasen-foko weng kaata-kup bakayin disa; le, disa iip bon tem kaata-kup takamin daa kayi! Numi aket aye, fanang aye, kiiyo ti olen-dakaayin-bamduple, nulmi nak-tunum kusal iyo ti aket kukaayin-bam disa tambal tambal ma kaata-kup kamayin-bamdup dong dakaayum o kala-somya ko.
1JO 3:19 God ali sakbaalim dukum kemin, numi aket fukunin kuluuli kabaak banula, ata ata ke-lom mafek mafek alik kiiyo kaal-kesa. Kemin, numi ban kemin uyo, takan-tiiyase. Kemin, kanola nokol aket fuku-daa utamupla yi, Nuli fan ban kemin tunum kala, kalalupla, aket mafak keyokomu kaali, God ami dik-daalupya, ata dong dokoyilaya, nulmi nak-tunum kusal imi olen-inbup kaali, utamupla yi, Nuli ti fan God almi man alik-daap ke-sulup kala, kala-lomdupla God ami tiin diim uyo suunin dinim ke, titil-fak-daa tol-nokomup.
1JO 3:21 Atin ti nak-tunum kusal kipyo! Kanola nokol aket fuku-daalupla, God ata numi ban kemin uyo kukan-tiiyase no kala, aket tambal keyokomu kaa, God ami tiin diim uyo, suunin disa ke-lom titil-fak-daa tol-nokomup.
1JO 3:22 Kemin ale, nuli ami weng kutiisa uyo, weng san-ilom kutal-fuku-lomdup dok kanolin kukup kaata, God ali kaami fiyaap kaa duun-umba ayo, kutal-fuku kelup namti, numi beten ke-bamdupla, mafek mafek sang ma dik-daalokomup kaali, akal maan tiiyokoma.
1JO 3:23 Kemin, God ami weng kuka-daasa namti kala bombuu. Kemin, kabak boko-lomda: Ibi nami man ami lak uyo duubip-kup ale, kuno kap-tunum kusal imi aket uyo kuya una-tala-ke-bam kemin o kalsa. Kemin, weng kala kuka-daasa kaa, Yesus Kraist alalta bokoya-lomda: Kaali, kanumin o yakase no.
1JO 3:24 Kemin, tunum kawanta God ami weng kaa kuka-daasa uyo, weng san kutal-fukula namti, tunum kaali, God aso bombe, aa ti kuno God akal tunum aso bombe. Kemin, nuli dok kano-lomdup, atamupla, God ali nuso bombe no kalokomup ma? God ami Sinik dabaala tal numi aket tem bombe ata kukuyila utamupla yi, Fan, God ali nuso bom-bulup o kalokomup te!
1JO 4:1 Atin ti, nalmi nak-tunum kusal kipyo! Ibakamin tunum yaapkan iyo tawaal diim kalaami abip alik tiina-tiina-ke-bom-bilip iyo ibokoya-lomdip: Nuli God ami weng kaata-kup bakan-unebup o kebip. Kemin, ibi imi weng kaata, weng san dikiwa-unemin disa. Ibi mep kiimi sinik atam yam-kuku-lomdipla, Kaa God ami diim kawu kela talse ema yo? kal-bomdiwa yi!
1JO 4:2 Ti ipkal tunum sinik so ayo atamipla yi, Tunum kalaali God ami Sinik e? kaa sinik kusnum e? ke-bamdip dap-kukumin kaami kukup namti kala bombe. Kemin, tunum ayo ma boko-lomda: Ii faneng, Yesus Kraist ali ti God ata dabaala tal tawaal diim kalawu ali ti fan tunum kese no kala namti, kaata ipkal atamipla yi, Mep kula God ami Sinik kaali, ami diim kawu bombe no, kalokomip.
1JO 4:3 Kemin ale, kuno tunum ma ayo bokola ko: Ii Yesus ali God ami diim kawu kela talse daa yo kala namti, kaata ibi atamipla yi, God ami Sinik kaa tunum aso bombe disa. Kemin, ali Kraist ami waasi ami sinik ata tal aso bombe no, akokomip. Kemin, sawaayak kawu, weng uyo weng sanipla, Sinik Mafak ayo talokoma no kalbip kala, kalalip weng san-silip kaata, alalta tal tawaal diim aba-lomda bombe no.
1JO 4:4 Nalmi miining kipyo! Ibi God ami man kemin, God ami Sinik kaali, ipni aket tem bombe kaata, ata ata ke, Sinik Mafak tawaal diim tunum aso bombe, ayo kabaak banaya kensa. Kemin, ibi ipta ipta ke-lomdip tawaal diim kalaami tunum ibakamin iyo keya-silip te!
1JO 4:5 Ibakamin tunum kiili, tawaal diim kaldaak-ami tunum kemin, tawaal diim kalawaami mafek mafek sang kiita-kup bakayin-bilipla, tawaal diim kasel God ami lak duulin disa yikal kanubip imi weng kaata-kup weng san-kan-umbip.
1JO 4:6 Kemin ale, nuli God ami man kemin, God ami atamsip tunum ili numi weng kaa, weng sanokomip; ale tunum God ami man kesip disa, ili numi weng kaa kelup o kala, weng sanokomip disa yo kalokomip kaata, fan kukuyulula utamupla yi, Numi weng uyo weng san-kaabip iyo ti God ami Sinik Tambal aso bom-biliple, kuno kanta numi weng uyo weng san-kaabip disa kiili, sinik mafak ata aso bom-bilip o.
1JO 4:7 Atin ti nak-tunum kusal ipyo! God ali numi aket kaayo dukum-kup kuya-laaba. Kemin, nokol ti kano alaltap ke-lomdup nak-tunum kusal imi aket uyo kuya kelum o kala-somla ko. Tunum ayo kawanta ma ap-tunum kusal imi aket aye, fanang aye, kuya namti, ata God almi tituun alik-daap kesa namti kaa bombe; kemin ale, tunum ayo God ami talalu atamsa.
1JO 4:8 God ali numi aket kaa ti dukum-kup kuya-laaba. Kemin, nokol ti kano almi man kela-sulup, nokol ti ami kukup kaata-kup ti yaan tem kutal-fuku kulii-taba-bomdupla yo. Kemin ale, tunum ayo ap-tunum kusal imi aket uyo kuyin dinim kemin, tunum ayo God kaa talalu atamsa disa ali kaa bombe te!
1JO 4:9 God ayo numi olen-daayinsa kaami liip namti kalabuu: God ali man yaan maak kaata-kup kemin, dabaali tildaak tawaal diim kawu taan-ilomda imi molaya, tiltam nami suunkup ilin unang tunum kep-nik o kala-lomda dabaayila talse.
1JO 4:10 God ali numi aket kuyase kaali, kalabu. Kemin, ali numi aket kukaayinba kaali, numi aket katip konbup ultap disa; ali numi aket kuyinsa kaali ti, atin sakbaalim dukum kemin, ami man yaan maak ayo dabaala tildaak tawaal diim kasel numi ban kemin diim kawu diin-ilomda numi ban kemin uyo takan-tiiya-lom moyase ko.
1JO 4:11 Atin ti nak-tunum kusal ipyo! God ami aket dukum kaa, numi kuyinsa. Kemin, nikil nokol ti kanola nak-tunum kusal imi aket dukum-kup kukaayin-bamduwa yo kala-somla ko.
1JO 4:12 Tunum kanta ma God kaa ma atamsa disa; kata, mafek mafek maakup ma uta-mokomup kaali ti, kanola nulmi nak-tunum kusal imi aket kaata-kup kukaayup namti, utamupla yi, God ali numi aket tem kawu bomda dong dakaayin-balaya, numi nak-tunum kusal imi aket kukaayin so, God ami aket kola-sulup so, uyo dukuma-unabu kala, kalalup uta-mokomup.
1JO 4:13 Kemin, God almi Sinik kaayo dabaala tal numi diim kawu aba-lomda nuso tiinsa. Kemin, nuli atamupla yi, Fan God ali nuso bombe le, kuno nuli aso bom-bulup o kalbup.
1JO 4:14 Kemin, Aalap ayo, Nalmi Man ayo dabaali tildaak tawaal diim kasel imi foko-yim-taldang nalmi miit tem tiila yaap ma kelik o kala-lomdaya, dabaala talse. Kemin, ami dabaala talse kaali, nikil nuli atam-ilomdup, kaami sang kaata ipni bakaya-tabasup.
1JO 4:15 Kemin, tunum kaa ma boko-lomda: Yesus ali ti fan God ami tituun-kup tabin man o kala namti, nuli kaata utamupla, God ali tunum aso bombe le, tunum ali God aso bombe kala, kalokomup te!
1JO 4:16 Nokol utamupla yi, Faneng, God ali numi aket kaa ti kukaayin-bam laaba no kalbup o. God ali aket kukaayin miit kayaakim kemin, kawanta almi aptum ayo aket kolin-kup ila namti, ali God aso bombe le kuno, God akal aso bombe.
1JO 4:17 Kemin, nikil nokol tawaal diim kala ilup kaa naktum kusal imi aket kukaayin uyo tiltam tambal-kup ke-lom dukum-nule, Yesus ami kukup ultap kelup namti, nuli Yesus ami tal afetu yim-tii yim-bak-saan-bam lek ilokoma kaali, nuli suunin dinim ke ti titil-foko tol-nokomup.
1JO 4:18 Kemin, God ali numi aket-kup kuyinsa. Kemin, nuli ami aket uyo kolupla, tiltam dukumnu namti, nuli ami atul suunin kaali, disa ke-lokoma. Kemin, tunum kaa kawanta suun-bamda ila namti, akal utamaya yi, God ali nami aket kaata-kup kukaap-nin o kala-lomda, utamsa disa namti ali kulube. Kemin, ilom am ma daanokomu kaali, God ayo tunum almi ban ken-unba kaami maan uyo maan tiiyokoma kaami atul kaata suunba no.
1JO 4:19 Kamosinim kaa, God asiik numi aket kaa kuyinsa. Kemin, kamala kulu nokol ami aket uyo konbup.
1JO 4:20 Kemin kanola, tunum ayo ma boko-lomda: Nali God almi aket-kup konsi no kalba. Lale, ali almi ap-tunum kusal iyo aket atul-kup kamaya namti, ali ibakamin tunum namti kulu bombe. Kemin, nuli nak-tunum kusal ili itafiin-umbup. Yale, nulmi tiin kaata, God kaa ma atamsup disa; kuno tunum ma ali ap-tunum kusal imi aket uyo kuyin disa nola namti, mep tunum kaakal ti kuno God ami aket kaa, kolokoma disa.
1JO 4:21 Ultap ti kano, Yesus ami weng ma kuka-daase kaa boko-lomda: Kabi kawanta ma God ami aket uyo kolap namti, aa ti kanubap ulultap ke kap-tunum kusal imi aket uyo kukaayin-bam ke-balawa yo kalase. Kemin, nak-tunum kusal imi aket uyo kuya una-tala-ke-bamduwa yo kala kanum bokose ko.
1JO 5:1 Tunum kawanita utamipla yi, Fan, Yesus kaali, God almi uldaa-dabuusa tunum Kraist o kalip namti, kiili God ami man o. Kemin, kanta Aatumen God ami aket uyo kola namti, ali unang tunum God ami man kelin imi aket kaakal kuya ke-lokoma.
1JO 5:2 Kemin, God ami aket kaa kola-lomdupla, God ami weng kaa kuka-daasa kulii-kutal-fukulup namti, uta kukuyuluya, nuli kawu utamupya yi, Awu, faneng nuli yak God ami man ke-bom-bilip kiimi aket kaali, kuyinbup kala, kalokomup.
1JO 5:3 Kemin, God ami weng kuka-daasa uyo kutal-fukulup namti, kaata fan kayak kayak iyo kukuyuluwa, numi God ami aket kola-sulup uyo kaa bombu no kalokomip. Kemin, God ami man ke-sulup nuli Yesus almi lak kaata duulupla, ami titil kaata numi diim aba yam-titil-diilaya, nuta nuta ke tawaal diim kalaami kukup mafak uyo welup kabaak banu kewa-lom nuta nuta ke-lomdup God ami weng kuka-daasa kaali, fiitmin dinim, kutal-fuku dikiwa-tabasup.
1JO 5:5 Kemin, kawanta tawaal diim kaldaak-ami kukup mafak uyo wela kabaak banu kewa-bomda ata ata ke-lokoma ni? Tunum ayo boko-lomda: Ii, ti faneng Yesus kaali ti fan God almi Man o! kala-laaba kaata-kup ata ata ke-lomda, kukup mafak uyo kabaak banu ke-wokoma ko.
1JO 5:6 God ami man Yesus Kraist ami sang bokose namti kalabuu. Kemin, Jon Baptis ata Yesus ami oksam okolase kaa, ok kaata kukola-lomdu: Kalawaali God almi Man namti kala bombe. Kemin, Yesus ami taanse kakal kanola ami kiim sing-tam-daasuu kaata kukuya-lomdu: Kalawaali God almi Man o kalasuu. Kemin, kaa ok kaata-kup Yesus ami miit kaali, kukuyasuu disa; ok so, kiim so, alep kiita Yesus ami miit uyo kukuya-silip te! Kemin, God ami Sinik kaali, tifan tituun-kup tabin weng kaata kukuyin-bam ale, bakayin-bam kemin tunum kemin, akal ti kanola Yesus ami sang uyo tituun-kup tabin weng kaata bakayila-yaaba.
1JO 5:7 Kemin, Yesus ami oksam wokose kaami iipyak tem so, ami taanala kiim sing-tam daasu kaami iipyak tem so, alep iyo tiltam fatap-nip talalu utamuwa yi, Yesus ali ti fan God ami Man kala, kala-sulup. Kemin, God ami Sinik kakal ti numi bokoya-lomda: Fan o kal-bom keba kemin, iipyak tem asuumano kiili, maakup o.
1JO 5:9 Kemin, nuli tunum imi weng kukaayinbip kulaali weng san-kan-umbup. Yale, God ami weng bakan-umba kaata, uta uta ke, tunum imi weng uyo kabaak bansu. Kemin, God ami weng asuumano kaa bokose kaali ti, ami Man Yesus ami miit kaata bokose te!
1JO 5:10 Tunum ayo ma God ami Man ami lak duula namti, ali God ami weng so weng san kutal-fukula namti kulu bombe. Lale, tunum ali God ami Man ami miit bokose kaali, talalu weng sanin disa kela namti, ata kukolula utamala yi, Tunum kaali boko-lomda: Yi, God ali ibakamin tunum o kalba kala, kalokomup. God ali boko-lomda: Kalawaali nami Man o kalsa. Yale, tunum kalawaata boko-lomda: Yesus ali God ami Man disa yo, kalba. Kemin, ami weng kunum bakaba kaami miit kaali ti, God ali ibakamin tunum o keba.
1JO 5:11 God ami weng kanum bokosa kaami weng tituun-kup tabin kaali kalabuu. Kemin, God ami aket kaali ti, Suunkup ilin unang tunum kelin o kala-lomdala, ami Man ayo dabaala tal as diim taan-ilomdaya, numi iliim uyo bolaya, nuli kawu tiltam almi suunkup ilin unang tunum ke-sulup.
1JO 5:12 Kemin, kawanita God ami Man ayo, kiimi diim kawu bom-balala, ilip namti, kiita suunkup ilin unang tunum kebip namti kaa bom-bilip ale, kawanita God ami Man ayo, imi diim kawu, bom-balala ilin disa kelip namti, kiili suunkup ilin unang tunum ili kaa bom-bilip disa.
1JO 5:13 God ami Man Yesus ami lak duulin kipyo! Nali sukon kalawaali dola kuyiliya utamipya yi, Fan nuli suunkup ilin unang tunum ke-sulup o kalin o kala dola kuyi ko.
1JO 5:14 Nuli God ami diim kawu ilup kaata, fan utamupla yi, God ali ti yo kalbup. Kemin, nuli ami mafek mafek kii nuumik o kalba uyo, dik-daalup namti, weng san-ilomda maan tiiyokoma.
1JO 5:15 Kemin, nuyo tituun-kup utamupla yi, God ali dok nolin sang ma dik-daalokomup kaali, suunkup weng san-kan-umba no kala-lom utamsup. Kemin, kakal ti kuno, atamupla, God ali kuyokomi no kalsa kemin, dok nolin dok nolin sang ma ami dik-daalokomup kaali, ayo maan tii-yin-bam kukaayokoma kala kalokomup o.
1JO 5:16 Kukup mafak alik ban kemin namti kala bom-bilip. Kemin ale, ban kemin kaami win alep namti kala bom-bilip. Kemin, God ali ma kaami sang kaata-kup boko-lomda: Atin kuuli ban kemin mafak kemin, tunum ayo kanta ma kanuma namti, ali ti maaklo ke-lokoma no kala-lomda kanum bokosale, ma kaami sang kaata ma bokolin disa kesa. Kemin, nuyo utamupla yi, Nak-tunum ami ban kemin kukup kanuba kaali, God ali boko-lomda: Atin kaa mafak o kalsa disa namti kulube kulup namti, nuli God ami weng umolupla, God ata ayo ulduu-lom dong dokolala, tiltam yaawa-lom suunkup ilin tunum ke-lokoma; ale, kuno ban kemin atin ti mafak kuuta kalabuu kemin, kanola tunum ayo ma kanolin kukup uyo nuuma namti, ali suunkup ilin tunum ke-lokoma disa; ami sinik kaali win dinim ke maaklo ke-lokoma. Kemin, kanolin kukup mafak ma kuuli, numi beten kemin kaami sang kaata bakabi disa yo.
1JO 5:17 Kukup tambal disa alik kiili, ban kemin namti kaa bom-bilip. Yale, ban kemin ma kuumi sang kaali, God ali boko-lomda: Tunum ata ma taba-lom kanolin ban kema namti, ali maak lo ke-lokoma no, kala titil weng kaa bokosa disa yo.
1JO 5:18 Nokol utamsup, Tunum ali ma tiltam God ami man kela-lom ban kemin kukup uyo kutal-fukun-umba dinim. Kemin, nuli ti God ami Man ayo tiin mola tangbal-kup bombe kemin, Tunum Mafakim ali dok kano-lomda dap-mafak-daalama dinim o.
1JO 5:19 Nuli utamsup kemin, nuli God ami man kelup kaa, ayo nuli tiin-tiin-bamda nuli tiin moba. Katale, Tunum Mafak Setaan ata tawaal diim tunum kusnum imi kamokim ke-bomdaya, biing mo yim-baala umbip talbip ke-bamdipla, kukup mafak ken-unbip o.
1JO 5:20 Nokol utamsup kemin, God ami Man ayo tildaak-ilomda dong dokoyin-bam kukuyalala kaata, atamupya yi, God kaa tifan kala, kala-lomdupla, nuli tituun-kup tabin tunum ke-lom, God so, ami Man Yesus Kraist aso, alimal bom-bulup. Kemin, Yesus Kraist akal tifan God ale, kuno ali numi suunkup ilin unang tunum ke-laamin kaami miit namti ata ko.
1JO 5:21 Nami miining ipyo! Ibi men awem aye, mafek mafek disa aman-dakaayin kiita, atin daang ukuya-lom kuno keyin o kala-somla ko.
2JO 1:1 Nafalop kupyo, God ami daang bakaalin unang uldaa-tam-buuse kupso, kupni man kaa Kristen unang tunum ke-silip iso, aptil kaa tiinsip o. Nali God ami unang tunum tiin molin dabom tunum nata, sukon kala aptil kipni dola kuyon o kali. Kemin, God ami tituun-kup tabin weng kaali, kuyak numi aket tem daa-yinsa kaali, suunkup laaba. Kemin, atin ti fan nami aket fanang kaali ti, kipni kuyasii. Kemin, kaa nata-kup daa; unang tunum kanta God ami tituun-kup tabin weng utamsip iso, alik imi aket fanang kaali, kipni kuuya kesip o.
2JO 1:3 Nili numi Aatumen God aso, ami man Yesus Kraist so, alim imi dik-dakaayin-bilila, alim ita alik numi kukup tambal kaata, disa masiim kawu kukaayin-bam, olen-kamayin-bam ale, yam-talal-bilipla, balili-kup kala-lomdup Kristen unang tunum imi aket dukum uyo kola-una-tala-kemin kaali, tifan tituun-kup kuyokomup o.
2JO 1:4 Siin sawaayak kawu, Aatumen God ali bokoya-lomda: Nami tituun-kup tabin weng kaa boko-lomdi kuka-daasi uyo, kutal-fukulin o yakase. Kemin, kulaata nali weng seli yi, Kupni man maakup maakup ili God ami tituun-kup tabin weng kaata, weng san-som ale, iyo kutal-fuku-som kebip o kala-somdiya, atin ti fiyaap dukum duu-bam tiinbi.
2JO 1:5 Nalmi unang kupyo, Nali aptil ibi weng ma bokoyon o kali kemin, weng san bom ilipla! Kipyo, alik numi aket aa, fanang saanin aa, kiili ti nak-tunum kusal imi kuya-una-tala-ke-bamduwa yo! kala-somya ko. Kemin, kaali kama kulu God ami weng kuka-daalaya, dola kulaayi din unu disa; kaali siin sawaayak God ami kanolin kukup kaata, kutal-fukulin o kalala, bokoyase ami weng kaa kutiiyinsa kaata-kup, dola-lomdi kulaali din unu kayi!
2JO 1:6 Kalawaali kanola God ami weng kuka-daasa uyo kanumup namti, kaata taba-lomdu kayak kayak ili kukuyuluya, numi God ami aket ayo kola-sulup uyo kabuu no, kalokomip. Kemin, nokol God ami weng kuka-daasa uyo kutal-fukulupla yo, kala-somla ko. Kemin, God ami weng kuka-daa-lomda: Ibi kaptum kusal, imi aket kola-una-tala-kemin kaata ti kutal-fuku kulii-taba bomdiwa yo, kalase kaali, kamasi kaptoowu bakayin-bilipya, ibi weng san yakyak talan-unbip o.
2JO 1:7 Tunum unang disa kulu ibakayin tunum kiili, yaapkan tiltam taba-lomdip unang tunum imi ibakayila-tal-unen-tabip. Kemin, ibi kii talalu itafii-bamdiwa yi! Ili unang tunum imi ibakayin-bamdip: Yesus Kraist ami tildaak tawaal diim talse kaali, tunum kese disa; ali sinik o kalalip kanum tal-unen-tabip. Kemin, kanubip tunum kiili, ibakayin tunum ale, Kraist ami waasi kamaalin tunum kayi!
2JO 1:8 Misii kipkal mep kanolin tunum kiimi weng kaayo, weng sanokomip kaali, Kraist ami weng so, kukup tambal so, iyo kela-lom, kipni fiit-bamdip ok fuku-bam God ami mafek mafek ma kuluulum o kebip uyo alik disa kelamip o. Kemin, talalu utafii-bamdiwa yi! Kraist ami weng kaali, talalu kutal-fukule, kulaali tal aba tam God ami mafek mafek tambal talalu kutiiyinsa uyo kuluulin o! kala-somya ko.
2JO 1:9 Unang tunum ili kanta Kraist ami weng kaa dukum-kup kutal-fukulin dinim kela-lomdip weng kusnum ma kaata kutal-fukulip namti, God ali iso ilokomip disale, aa unang tunum iyo kanta ma Kraist ami weng kaata ti kutal-fukulin-kup ilip namti, Aatumen God aso, almi man Yesus so, alim kiili alimal maakup ilokomip.
2JO 1:10 Kanola tunum ma kapni fanang tal-ilomda Kraist ami weng ayo kulii-talin disa ke-lomda disa almi weng kusnum ma kaali, ibakayin kiimi weng kaata, kulii-tala namti, kibi kaali weng fokola dibii tiltam kipni am kaa dakamin disa;
2JO 1:11 kemin ale, ibi kanolin tunum kaami weng fokonbip-kup ipyo dap-tam am daalokomip namti, kipni kanolip kaali, ami ok mafak kanuba kaata, dong dokolip kayi!
2JO 1:12 Nimi weng kala kipni bakayon o kalbi kaa katip daa; kaali dukum yale, nali sukon tem kuldaku-kup dola kuyokomi disa; nali din itamon o kebi kemin, nayo din kipni itamila kawu, nokol weng kaayo, baka-bamdup atin ti fiyaap duun-una-tala-ke-mokomup o.
2JO 1:13 Kemin, kipni unang God ami ulduuse umi man kiita, weng uyo umuuyip kemin, tambal-kup bom biliwa yi!
3JO 1:1 Nalmi nak-tunum Gayus atin nalmi aket maakup kaa tiinsap o. Nali God ami sios tiin molin tunum imi dabom nata kemin, nata sukon kala dola kup-ti. Nali atin ti fan kaltapni aket-kup nesu utamduya kemin, sukon kala dola kup-ti kayi!
3JO 1:2 Nak-tunum kapyo, nali kapni ok tambal kaata, tambal-kup ti unuk o kalbi-kup ale, aa kapni angtiil ayo kaltapni God ami lak duu-yaamin uyo tambal-kup laabu ultap ke, tambal-kup bom-bulu yo, tiki kemin, nali God ami naan-bamdi beten kamaanbi.
3JO 1:3 Kemin, kanola Kristen malo ma iyo tal bokop-na-lomdip: Gayus ali ti tituun-kup tabin tunum ke-bomdala, suunkup God ami tituun-kup tabin weng uyo kutal-fuku-som keba no nikiwa, nayo weng sandiya fiyaap duubi.
3JO 1:4 Nali kanola Gayus ami sang kaa, weng sandiya kemin, dok kanolin diim kawu iyo tal bokop-na-lomdip: Kapni man kiili, God ami tituun-kup tabin weng uyo kutal-fukubip te! kalipla kawu, nali fiyaap duu-yaabi. Kemin, kiimi fiyaap duuya-laabi kuuli, nami mafek mafek kusnum kiimi fiyaap duu-yaabi kuliili kabaak baniwa uta uta ke-laabu no.
3JO 1:5 Nalmi nak-tunum kapyo, kapni ok kaa tambal-kup nu-bamdapla, kapni abip Kristen unang tunum kiita-kup dong dakaayin disa; Kraist ami tunum kiili, kapni itamsap dinim ili fatal lale, iyo tilipla, kabi imi dong dakaayin-bam ken-umbap kaali, atin ti tambal ke-laabap o.
3JO 1:6 Kaali tunum ma iyo tal God ami unang tunum kiimi bokoya-lomdip: Kapni fatal kiimi aket kukaayin-bamdaple, dong dakaayin-bam kebap kaami sang kaayo, tal bokop-nambip kemin, kabi imi God ami ok kutal-fokonbip kaami aket uyo talalu fukun-bamdap, liip unokomip kaami ima so, mafek mafek so, iyo dong dokoyap namti, yaap kep-tokomu.
3JO 1:7 Imi abip kaayo kambola-lomdip, Yesus Kraist ami weng kaata kulii-tal bakaya-tal-unebip. Kata, Yesus Kraist ami lak duusip dinim iyo mafek mafek dong dakaayinbip kaata, Ma kuluulum o kalsip disa; iyo disa iip kawu tal-unebi talbip.
3JO 1:8 Kemin, God ami unang tunum nokol kiimi dong dakaayin-bulupla, iso, nuso maakup God ami tituun-kup tabin weng bakayin kaami ok kaayo, kutal-fuku kulii-taba-bomduwa yo! kala-somya ko.
3JO 1:9 Siin sawaayak kawu, weng katip ma dola-lomdi, God ami unang tunum imi kuyasii. Katale, Diotrefes ali ti, Nata tunum aalap dukum keliya yo kal-bomdaya kemin, nami weng uyo, weng sanama dinim kesa. Kemin,
3JO 1:10 din uni namti, ami kanum tabasa kaali, ku-fatap-daalokomi. Kemin, ali iboko-lomda numi weng mafak bakaya-tal-unen-umba kaata-kup daa; ali Kraist ami unang tunum fatal talemin kii ti, Yaap ke tilip o yakan-kaamin dinim ke-bamdale, tunum unang yaap ke tilip o kala yim-tam am daalum o, kebip iyo daa yo kalale, kuno keyiple boko-lomda: Ibi kap-tunum kusal Kristen unang tunum imi iipyak tem kaa kamboyilalip unin aa! yakan-kaa-bam kem-yaaba ko.
3JO 1:11 Nalmi nak-tunum aket-iip kapyo, kayak kayak imi kukup mafak mafak kanum tal-unebip uyo dikiwa-unon o kalolawi! Imi kukup tambal tambal kanum tal-unebip kaata, dikiwa-unolap o. Dok kanolin tunum kaata, kukup mafak uyo nuu-bamda, kutal-fuula namti, kaali God kaa atamsa dinim; aa tunum kaa kanta ma kukup tambal-kup, kutal-fukula namti, kaata fan God ami man o.
3JO 1:12 Unang tunum yaapkan iyo boko-lomdip: Demitrius kaali, tunum tambal o ke-bam ale, aa alik nuli utamupla, Fan kaata God ami tituun-kup tabin weng kaayo, kutal-fukuba no, kebip kemin, nakal ti kanola ami win kaayo, kufon-bam ke-bamdi ken-laabi kemin, kapkal nami kanum bakap-timbi uyo, utamawa yi, Kaa faneng u! kalbap o.
3JO 1:13 Nami weng yaapkan uyo kapni bakaap-ton o kalbi. Yale, uyo dukum kemin, sukon tem kuldaku alik dol-tolokomi disa.
3JO 1:14 Nali mepso din titamon o kalbi kemin, din kapni titamila, kulaali, alep nokol tiin-bom weng boko-una-tala-ke-mokomup kayi! Kemin, kapni kap-tunum kusal kala bom-bilip ita, weng kaa umuup-tip kayi! Aa ti, kapkal numi nak-tunum kusal maakup maakup kabangu bom-bilip yakal weng umuuyilan o. God ata kabi dong dakaap-tin-balaya, balili-kup kala tambal-kup bom balawa yi!
JUD 1:1 Nak-tunum kusal kaa tiinsip o? Nali Yesus Kraist ami okok kemin tunum Jut nata, nali Jerusalam kaptam-ami Kristen imi tiin molin tunum Jems ami niing nata kemin, sawaayak kaali, Aatumen God ata unang tunum ibi naan-daayila, tildang tilip kala, kalalaya, alta kipni aket-kup kuyale, aa Yesus Kraist akal tiin mo kelaya, tambal-kup bom-bilip ipni sukon kalawuuli dola kuyon o kali.
JUD 1:2 Kemin, God ami dik-dakaan-bilila, ata taba-lom atin ti dukum-kup ipni aket uyo kukaayin-bam ale, olenin kukup kaakal atin ti dukum-kup kukaayin-bam ke-balala, atin ti dukum-kup ipni aket tem uyo bilili-kup kala bomdipla yo, kala-somla ko.
JUD 1:3 Atin nalmi nak-tunum kusal kibi tiinsip o? Kamasi nami aket fukunin kaali, God ami ok tambal ma fuku-bam alik numi talalu-yimusa kaami sang kaata dola kuyon o, kebi. Yale, kamala kalaata itamila, Kipni ilin kaa kanola bom-bilip o, kali kemin, kambola ma kaami sang kaata, abiltap dola kuyon o kali, kala tunum iip ma ma ili disa kasen-fokoya-lomdip, God ami lak duusup o ken-umbip, ili din kipni iipyak tem umbip. Yale, kiili God kaa daang ukaan-bam ale, God ayo disa masiim olen-dakaayin kukup kaami sang kaali, fal-siki-du-siki-kelip, weng ukol alik ma kelule, imi aket fukunin kaali, Dok kanumin kukup mafak mafak sadikimin tap kaata, nolup namti, God ali kukup tambal kaata-kup kukaayokoma kayi! kalaliwa bakayila-laabip o. Kiili, Kamokim Maakup Yesus Kraist numi tiin molin tunum kaali, daang ukola-lomdip kanun-umbip kiimi sang kaata-kup dola kuyon o, kebi no. Siin sawaayak kaa, God ami Sukon Tem kabak-ali boko-lomdu: Mep kanolin tunum kiili, din God ami weng talalmin baan diim kaa din-ilom angtiil yol awak dukum kuluu-lomdip maaklo ke imi win dinim ke-lokomip o kalsu. Katale, God ami Weng Tambal kuuli, God ayo almi unang tunum numi kukuyilula atamuwa yi: Atin ti fan eng o, kala Yesus ami lak duusup o. God ami aket fukunin kaali, Tunum iyo God nami weng uyo fal-siki-du-siki-kemin dinim o, kala-laaba. Kemin, nali wiis-saayin-bilila, ibi God ami weng tambal kuumi utam suunin tunum kiimi weng uyo kuyang saak tiiyim-bam ale, kibi titil-fak-daa tunum unang ili God ami weng uyo atin ti talalu ifiyim-bam bakayin-bilip, yakal utamipla yi, God ami kukup kuuli, tambal kala ke-bamdiwa yo, kalalila sukon kaluuyo, dol-yimbi ko.
JUD 1:5 Kemin, uyo ipkal utamsip, Sawaayak kawu, Dukum ayo Israel iyo dong dokoyilala, Isip bokon uyo kela uniwale, ilom kawu Israel unang tunum malii ma iyo almi lak duulin disa keliwa, anula taanaasip kaami sang kaali, alik iyo weng san-silip. Yale, asuk maso ma bokoyilila, aket fukunin o.
JUD 1:6 Aa ti, kanola sawaayak kawu ensel malo yakal, fan almi ok dukum God ata kuyinsa kabak-ami diim uyo tambal-kup laabip dinim; kem-tal-bomdipla, almi abip uyo kambola-lomdipla, tabansip o, kala-somdala, God ayo sen tol dukum ta de-yimulala, malang tinisa tem kabaaku suunkup bomdiwa, God ami Am Dukum ma daan tiltam tulula, unang tunum iyo lek-yim-bam yim-bak-saanokoma diim kaata, fen-umbip o.
JUD 1:7 Siin sawaayak kaakal Sodom so, Gomora so, abip dukum dukum alep kaptam-ami abip mepso mepso bom-bilip iso, kaptam-ami unang tunum bom-bilip yakal ti, ensel mafak kaa kanu-bisip ililtap ke kanu-bamdiwa, sadikimin kaami kukup uyo kutal-fuku-bom ale, imi aket tem uyo akal alik keyu, unang so siin-yaamin kaami kukup kaata, kuluu-lomdipla, aptum kusal tunum kusnum so, siin-yaa-bam kemipla itam-ilomdala, God ayo ilmi kukup mafak kutal-fukusip kaami maan kaata, tiiya-lomda wing tiil kaata, imi kuya-laaba. Kemin, kaata taba-lomdu nuyo kukuyilula utamsup kemin, nuli kiimi kukup kanolin tabuu-bom bisip ultap kutal-fukulokomup namti, God ayo tal yim-baala daak suunkup kiinin-kup ilin kaami tem kawu un-ilomdup angtiil yol ayo suunkup daka-mokomup.
JUD 1:8 Kanola tunum din kipni iipyak tem kawu unbip kiili ti, kanumin kukup kaata ti kanu-bam ale; ilmi lom dakaan-umbip kaata taba-lomdu, ilmi aket fukunin uyo ku-mafak-daayilule, iyo sadiki-bam ilmi angtiil uyo ku-mafak-daka-bamdiple, numi Dukum ami atul kaayo, atam-suunin disa ke-bam fuut-kup kuyak dakan-tal-une-bam ale, aa yak abiil tikiin kayaak imi weng mafak uyo bakayin-bam ken-tabasip.
JUD 1:9 Lale, sawaayak kawu ensel imi dabom dukum Maikel ayo Setaan so, alep Moses ami as kuli kaami kalan kaata, weng aal dikin-taba-lom ale, Maikel ali Setaan ami dabak-saan-bam weng mafak kaa ma bokolin disa ke-lom bokola-lomda: Kabak-ali Dukum alta taba-lomda tam-bak-molak o! ansa.
JUD 1:10 Yale, mep tunum kaa din ipni iipyak tem umbip kiiyo, ili mafek mafek miit kaa ma utamsip disa kaami sang kaata, weng mafak uyo kola-laabip. Kemin, kukup malo ma kiili utamsip. Katale, ili aket fukun-daaliwa, Awu, kaali kang miyaan imi aket kanun-umbip ultap kemum o kala, kaata ti yakal kanu-bilipla, kunumin kukup kuluuta taba-lom, atin ti yam-mafak-dakan-umbu no.
JUD 1:11 Kanun-umbip kabak-alile, ti bom bii-lom God ayo angtiil yol awak dukum uyo imi kuyokoma kemin, kabak-ami miit kaalile, kiili sawaayak Kein ami kukup kanu-bisa ultap kaata, kanu-bamdiwa, sawaayak Belam ami moni kaamin kaami aket-kup an-bulula, bomda kukup mafak kanum-soma ultap kuuta kanu-bam ale, aa sawaayak Kora ami God ami weng kaa, weng sanami disa yo, ke-bisa tap ke-bam kanun-umbip. Kemin, aa ti God ayo Kora aalaya, taansa tap ke, kanumin tunum iyo anula taanokomip ko.
JUD 1:12 Kemin ti, ipkal aket maakup kaata-kup ke-bamdip kaptum kusal Kristen unang tunum iyo aket kola-una-tala-ken-umbip, ibi dok kanumin diim kawu tala-tala-ke-bam kaami fiyaap-kup duu-bam ima ina fakamin kaali, tunum kukup mafak tabuulin kiili, din kipso ima ina fakan-umbip. Yale, ili itam-suunin dinim; ili ti ilmi inin kaami aket kaata-kup kanu-bamdiwa, ipni fiyaap duumin aa, inin-inin aa, iyo ku-mafak-dakayilipla, ibi fatom duk-duubip te! Kiili, abiil kawu ibin de-lom wom talon o, kemala, inim ata ata ke-lom, an-bak-mola un-ilom disa ke-laaba tap ke-bam disa kawu, weng tambal tambal kaata-kup baka-bam ale, ili as lap abuumin am daanala, as lap uyo abuulamu disa kelula, tunum iyo tal atam-ilomdip miit so dola kulaalip yang saak aba data-yaabu tap kanu-bam ken-umbip.
JUD 1:13 Kiilile, ti fatom tabemin kaami kukup kaata, kanu-bilipla kemin, imi kukup mafak kanubip kabak-ami fatom kuuli, tiltam fatap-nula unang tunum kayak kayak iyo utafiin-umbip kaali, yol ok daang kun diim kaami fon-fon-tale-bamda sung ilol mafak uyo an-taldak balang saan-umba ultap ken-umbip. Yak kanola kukuyin tunum mafak kiili, abiil tikiin wakalkan kuumi disa liip kukuyin dinim disa, maaklo tal-unebu ultap o. God ali atin abip mafak malang tinisu ma talalu-yinsa kemin, ili kabaaku suunkup ilokomip te!
JUD 1:14 Kamasi diil tunum Adam ami diim kaptoowu man loop tip-tiilala yakyak bitoop bukupkal keliple, fet kulaata Inok namti tiltam taba-lomda kanolin tunum imi sang kaayo, aptum kusal imi tiipmin weng bokoyila ko: Nayo atamiya, Dukum ayo almi ensel tambal-kup tabasip, ilmi-kup deng yaapkan yaapkan tausin o kebip ita iso alimal tiliwa itami. Kemin,
JUD 1:15 Dukum ami aket fukunba kaali, Tunum unang alik iyo yim-bak-saan-bamdila, nami daang ukup-na-bomdip kukup mafak kanun-umbip so, weng mafak mafak bakap-na-laabip iso, kaami maan kaata tiiyim-bam ale, angtiil yol kukaayin-biliya, ili weng mafak dukum bakap-nam-bamdip, ban ken-yaabip kiitale, atin ti angtiil yol awak dukum kuluuliwa yo, keba kayi kala, Inok ata aptum kusal imi kanum bokoyinsa.
JUD 1:16 Kemin, kanola mep tunum mafak yaapkan din kipni iipyak tem umbip kiili, daang tem weng baka-bam ale, ili bokoyak imi diim tii-lomdiple, ilimi aket tem kabaku aket mafak fukunin akal alik akal alik iyo tiltam tabe-bilipla, iyo ti kano kutal-fukulin-kup bom ale, weng yaapkan-kup baka-bamdip, ilmi win-kup kufu-bam ale, Nak-tunum kusal imi tong kaata mokop bakayim-bulupla, yakal ilmi mafek mafek kaata, numi kukaayik o kal-bomdiwa, aptum kusal imi tong-kup bakayim-bamdip ken-umbip tunum ili kaa bilip te!
JUD 1:17 Katale, atin ti nak-tunum kusal kipyo, kibi nami Kamokim Yesus Kraist ami kalaan tunum imi weng bakamsip kaami aket kaata asuk fuku-daalin!
JUD 1:18 Kalaan tunum ili kanolin tunum mafak imi sang kaali, kipni bokoya-lomdip: Ilom am mafiing daanon o kalokomu kabaku tunum malo ita kipni God ami kukup kutal-fukusip uyo aban-diiyin-bam ale, ili God ami daang ukola-lomdiwa, kiimi aket mafak fukunin ayo akal kusnum keyilula, ilmi aket mafak fukunin kaata-kup fuku-lom ale, kanu-mokomip te! kemsip. Kemin,
JUD 1:19 atin kanolin tunum iyo tiltam taba-lom Kristen unang tunum iyo yam-mafak-daka-bilipla, lo kutii Kristen miit alep kemin, tunum kii tawaal diim tunum imi aket fukunin kaata-kup fuku-bomdipla kanun-umbip kiili, God ami Sinik Tambal ayo imi aket tem kabaku bombe disa yo.
JUD 1:20 Kanolin katale, atin nak-tunum kusal, kipyo God ali ti tambal-kup tabasa kemin, ipni God ami weng ayo tituun ale, tifan kemin kaali, yikik-kutal-fuku-bom ale, almi Sinik Tambal ami titil kaata, kuluu-lomdiwa, God ami beten kaman-bam, tambal-kup bom-biliwa yo, kala-somla ko.
JUD 1:21 Kemin, God ali kipni aket-kup kuya-laaba kemin, ibi suunkup almi mepso kulu bom-biliwa, dong dakaayin-balaya, numi Kamokim Yesus Kraist akal ti, ibi olen-daaya-lomda yim-buu-yim-tamala din almi abip daalaya, aso suunkup ilokomip o. Ibi kabak-ali ti fenin-kup ke-biliwa kayi!
JUD 1:22 Tunum unang maakup maakup ili, God ami lak duusip. Lale, ili aket alep fukun-bamdiwa boko-lom: Kwin! kaata fan Yesus kaali, numi iliim boyase ne? disa ye? kebip kemin, ibi olen-yin-bam dong dakaayin-bilipla, imi God ami lak dakaamin uyo tiltam titil-fokolik o.
JUD 1:23 Aa, unang tunum malo ma ili God ami lak duulin disa ke-lomdiwa, ili as kiinin abip kaami liip kawu bom-bilip kemin, ibi baan abiltap-kup yang foko im-taldang liip tambal kawu daabip-kup, kuno malii ma ita yang siin kukup tem un-ilomdip kukup mafak kaata, kutal-fuku-bomdiwa uta yam-mafak-daka-bam kebu kemin, ipkal kiiyo olen-dakaayin-bamdiwa yo. Katale, ipkal imi kukup mafak kaami atul kaayo, suun-bamdiwa takas kayaku bomdipla dong dakaayila-tal-une-bilipla yo.
JUD 1:24 Kemin, God ali ibi tambal-kup tiin molokoma kaa, ibi dok kano-somdipla daak abam-nokomip dinim; ale, ali ti yim-tama tam almi abip tambal-kup tabasu kawu daalaya, aso maakup ilokomip kaali, fatom dinim ke-bomdipla, atin fiyaap dukum-kup duu-mokomip.
JUD 1:25 God maakup ata-kup bom-balaya kemin, numi Kamokim Yesus Kraist ami win diim kawu yim-buu-lom dotulala, nuli yaawa-sulup. Ali falala-kalin dukum kaali, atan kiin-ilom tiin buluusi taba-laaba tap ale, ali sakbaalim dukum ale, ali faneng king titil soyim dukum o. Maakup ata-kup taba-lomda mafek mafek alik imi dabom kelaya bombe. Siin sawaayak sawaayak kaptoowu kulii bital kala diilu kaa, God ali kanola tiin mo-biisale, kamala kalaakal ti kanola bombe. Aa, sin kaptoop kaptoop unokomu kaakal ti kanola suunkup ilokoma kemin, ami tong kaata-kup bakamum o kala-somla kemin, fan ko.
REV 1:1 Sukon kala dolnon o, kali kalaali Yesus Kraist ami mafek mafek kanumin kanumin kukup-na nayo utabi kaami sang kaata kemin, God alalta Yesus ami kukola bokola-lom: Kabi bom bii-lom kukup kanumin kanumin tiltam talokomu kaami sang kaayo nami unang tunum kiimi kukuyim-bam bokoyan o kala. Kemin, Kraist ata, nami ok tabuulin tunum Jon ami bokolila, alik kiiyo bokoyapla, iyo weng san utamik o, kala-lomda, almi ensel ma dabaala taldala bokop-namba. Kemin ale,
REV 1:2 kaata nami alik utabi kaami sang kabak-ali, God ami weng so, Yesus Kraist ami weng aso, uli ti tituun weng kaata-kup kemin kala dolnon o, kalbi.
REV 1:3 Yak kanumin kukup kanumin kukup uyo ti mepso tiltam tabon e, kalbu kemin, kanta kanumin kanumin mafek mafek tiltam tabokomu kaami sang kalawuuli dukum-kup tik-tii-lom dukum-kup bakayokomip namti, fiyaap duu-mokomip. Ale, sukon tem weng kala dola kutiili kabak-ali, weng san kutal-fukulip namti, iyo fiyaap duu-bam ke-lokomip o.
REV 1:4 Yesus ami unang tunum Provins Esia kaptam-ami abip fetkal bom-bilip ibi yaap laabip o? Nali Jon nata sukon kala dolbi uyo, God ali kamala kalaaso, siin sawaayak aso, kaptoop talokoma kaaso, ali ti suunkup ilin God. Aa, ami okok kamaalin sinik fetkal God ami abiin tiin-yaamin sia diim ami mepso kulu bom laabip iso, Yesus Kraist ali God ami sang tituun weng bakayin tunum ale, taandala, asiik diildiil tam tiin kawang kesa tunum ale, tawaal diim kalawaami kamok kamok imi tiin molin tunum aso, alimal kanolin ita taba-lom kukup tangbal-kup kipni kukuyim-bam tambal tangbal ma kamayim-bam kipni aket tem uyo bilili-kup keyokoma. Kemin, Yesus ali numi aket kaata-kup fukun-bam ilin; almi kiim kaata sing-tam-daalu taan-ilomdala, uyo numi ban kemin sok ayo boba-kup,
REV 1:6 nuli yim-bii-din almi miit tem tiilaya aso maakup ke-sulup. God ayo Yesus ami God ale, almi aalap kemin, Yesus kaa nuli uldaa-yim-buulaya, tiltam God almi pris tap ke-sulup. Kraist ali talaba tam kamokim kese. Kemin, ti tambal o, nuli suunkup kaami tong ayo bakaan-bamduple, ami titil tabin uyo suunkup iluk o, kala baka-bamduwa yo, kala-somya kemin tifan ko.
REV 1:7 Kipyo, ali ibin tem kaptam liip talon o, kalba kemin, talokoma kabaku unang tunum so, ami aalip taansa alik iso, iyo atam-ilomdipla, am bokon alik tawaal kala dik-daa kulaasu kalawaami tunum miit kusnum kusnum iyo ami atul ata atam-fanan-bamdipla, dukum-kup ama-mokomip. Kemin, tifaneng kaa tiltam talokomu kayi!
REV 1:8 God Dukum ayo titil miit kayaakim kemin, ali sawaayak sawaayak kaptoop-ali bom biisa le, aa kamala kalaakal kano bombe, aa bom bii kaptoop unokomu kaakal ti kano ilokoma. Kemin, ata boko-lomda: Nali miitlo kulu kulii yak aba umbutoop fuul diim kuyaku dilit ke-lokomu uyo ti kano suunkup ilokomi no, kalba no.
REV 1:9 Kipsole, kaptum Jon naso, nikil nuli Yesus ami lak kaata duulupla, tiltam almi miit tem uyo tiltam tal-sulup. Kemin, kaami kalan kaata, Yesus ami waasi ita kukup mafak ayo kukaayim-biliwa, angtiil yol ayo dakan-tabasup. Kanolin la, ti suunkup titil-fak-daa tabasup. God ami weng so, Yesus ami weng kaa bakayila-yaabi kaami kalan uso, kiita sok de-nam-bu nam-tama yol ok daang kun diim liip nam-tal ok ding yol ok iipyak diim bokon biim katip Patmos o, kebip kaa daaliwa
REV 1:10 kawu bomdila, Kamokim Yesus ami iintang am ma daanu kulu, God ami Sinik ayo kukup-nam-balaya, lom tap dakan-um-bom weng seliya, nami daang tem kaltam-ali weng ma bikul weng tap ma dukum-kup naanba kala kem-silile, bokop-na ko:
REV 1:11 Kabi kanumin kanumin mafek mafek uta-mokomap uyo, sukon diim kabaku dola-lomdap kulaalap din nami unang tunum abip ma ma Efesis, Smena, Pegamum, Tayataira, Sadis, Filadelfia, Laodisia, kunolin abip fetkal bom-bilip imi bilip unuk o, naka ko.
REV 1:12 Kalale, nayo fal-siki taba kawanta weng kaa bakap-namba ni? kalon o, kala, fal-siki taba atam talaalila, Ilaam umi iilfo kutam tiimin umi baan fetkal ayo be kaa kalale, kaa gol ata kuluu dotusip. Kemin,
REV 1:13 tawaal diim tunum altap ma ata ilaam iilfo kutam tiimin baan diim iipyak tem kulu tolba, ali ilim batbat ma dildaak-tinila talaba daak yaan duung tem kuyaku dilit kalule, sen sok la gol ta sok unu-lom nosip kaata tiit iip kabaku kuyang dii mikisa.
REV 1:14 Tam ami dabom so, dabom kon so, ayo ti namaal alik-daap ali ti fan awon namayim kon e, abiil matak tap aye, alaltap kesa. Ami tiin dawang kaali, as dawang ulunba tap kelala, unang tunum kiimi aket kuso talalu utafiiyila ko.
REV 1:15 Ami yaan kaali, alokso tuumon katipkan kiin-abin ami dawang so, lamlaam sokan kebu ultap kelin, ami weng bakaba ayo ok fon eng dukum uunba tap ke-lomdala,
REV 1:16 abiil tikiin umi wakalkan fetkal ma kuluu-lom almi sikil tingtup diim iip kabaaku tiilaya bom-bilip, kemin, ami weng kaa bainat wan kong o, kebip balang malii so, malii so, taalin ultap kemin wan binalap yak tama biki-yaamin tap ke-bam bakaba, ami tibi kun diim kaa atan tal dibimnula kwin! atan atul dukum tik-daa-laaba tap kela atami ko.
REV 1:17 Atami yi, Kanoba kala, kalali suun-daa lamo daak almi miit tem kuluba-lomdi tunum saaka-laabip tap keliya, almi sikil tingtup ta kutaldak nalmi angtiil tii bokop-na: Kapyo, suunin-daa. Sawaayak bom biisile, aa kamala kalakal kuno bom bii le, ati kuno bom bii am mafiing diim kaakal ilokomi.
REV 1:18 Kemin, suunkup ilin tunum nalta te! Sawaayak kaa nali taansi. La, asuk tam tiindi tiin kawang keli bombi kemin, suunkup ilokomi kemin, nali tunum saakalip sakbal am unaasip imi saal busuuyi tam tiin kawang kemin tunum kaali nalta ko.
REV 1:19 Kemin, kabi kaa utamap kaami sang uyo dola-lom mafek mafek kala bombuu so, aa mafek mafek kaata bombii tiltam tabokomu uso, kaami sang uyo dola kutii kelan o, kala-somya ko.
REV 1:20 Kabi wakalkan fetkal iyo kutal nami sikil tingtup diim kala tiili bom-bilip isole, ilaam iilfo kutam tiimin kaami baan diim tangbal fetkal kala bom-bilip kiiso, itamap kiimi miit kiita bokop-tokomi. Kemin, wakalkan fetkal kalawiili, ensel ita nami unang tunum abip fetkal tiin mosip imi sang kaata, faldak kulu tiilu kemin ale, ilaam umi iilfo kutam tiimin kaami baan diim fetkal kalawaali, nami unang tunum abip fetkal bom-bilip imi sang kaata faldak kulu tiilu no, kala Kamokim Yesus ata kanum bokop-na no.
REV 2:1 Kamokim Yesus ayo asuk boko-lomda: Jon kabi nami weng ayo ma unang tunum abip Efesis kaptamu bilip imi tiin molin ensel ami dola kola bokola-lomdap: Kamokim Yesus ali bokop-na-lomda: Tunum wakalkan fetkal kuu nalmi sikil tingtup diim kaa tiiba kaali nalta ale, ilaam iilfo kutam tiimin kaami baan diim tangbal fetkal kaami iipyak tem kabangu tal-uneba kulaa nalta kemin, nami tunum unang kipni weng ma bokoyon o kalbi.
REV 2:2 Nali kipni kalok nolin kalok nolin kukup kanum-yaabip so, kipni ok fiita-yaabip uyo titil-foko yikik-kutal-fukusip so, uyo utam-som ale, ibi itam kesi. Kemin ipyo, tunum mafak kiili, kamboyip kipso laabip disa kalale, kuno tunum malo iyo tal kasen-fakayim-bam: Yi! nuli Yesus ami kalaan tunum o kebip kaa, ibi imi weng uyo um-kuku itamiwa yi: Kii kasen-fakan-talabip kala, ken-umbip iyo kanubipla itamsi no.
REV 2:3 Kemin, mep tunum iyo ipni itamiwa yi, Kiili ti fan Yesus ami lak kaata duusip o, kala-lomdipla, iyo kukup mafak kaa kukaayimbip. Kata, ibi nami kukup tangbal uyo ma kuno kewinsip dinim; ibi duluma-bomdip titil-foko nami kukup uyo tabuu-bom kanun-umbip kala, kalali itamsi.
REV 2:4 Lale, ti maakup ma kaami kalan kaata ipni dotu yim-bak-molon o, kalbi. Diildiil kamasi kaa nami aket-kup kup-na bom-ilsipla, mep am kula daansuu kuyaku nami aket ayo asuk lukuuyilu kelip katipsu.
REV 2:5 Kipni kamosinim nami aket kup-na bii kelip lukuuyilu katipsu kuumi aket ayo fukun-daalipla, asuk aket fal-siki iltipni kamasi diil kukup tambal kanumsip tap kaa, ti maso kanumin o, kala-somya. Kemin ale, ibi aket fal-sikilin disa ke-lokomip kaa, ipni ilaam iilfo kutam tiimin baan tambal dotu kutiisip ulmi baan diim kawu ilula, nayo tal-ilomdi kukan-tiilokomi.
REV 2:6 Aa ti kuno, kipni kukup tangbal ayo maso bombuu. Nikolas ami tunum imi kukup mafak kaa kanun-umbip uyo ililta utam suun-umbip. Kemin, nakal kuu utam suun-bam kem-yaabi.
REV 2:7 Ipkal talang tem so kemin, God ami Sinik alta taba-lom Kristen unang tunum imi weng kukaayimba uyo talalu weng sandiwa, suunkup ilin kuumi as ayo God ami langabip kulu tolba kemin, kanta nami kukup uyo tabuulin-kup taba una namti, kaata kambolila as kaami lap uyo dik-duu ina-lomdala suunkup ilokoma no kala, Kamokim Yesus alalta bokop-na-lomda: Jon kapta sukon diim kabaku dola kuyan o, kala-lom Kamokim Yesus ata kanum bokop-na ko.
REV 2:8 Kamokim Yesus ayo asuk bokola ko: Jon kabi nami weng kuluu ma kulaalap din nami unang tunum abip Smena bom-bilip kaptam-ami tiin molin ensel ami dola kala bokola-lomdap: Kamok Yesus ali bokop-na-lomda: Sawaayak nali bom-biisi le, kuno ti bombii am mafiing diim daanokomu uyo ti ilokomi. Kemin, siin kamasi tunum atin saakna dawaalip asuk tam tiin-ilomda tiin kawang bombe kaali, nalta, nami tunum unang ipni weng ma bokoyon o, kali ko.
REV 2:9 Nali kalok nolin mafek mafek mafak kaali tal kipni diim aben-umbu so, aa kipni tawaal diim mafek mafek dulu iiwa-laabip so, kulaa utamsi. Yale, ibi God ami mafek mafek soyal te! Ale, mep Juda kayaak malo ma baka-bamdip: Juda kayaak nuli God almi tunum alik o, kem-yaabip. Yale, kiili fan God almi tunum disa; Ibi Setaan ami tunum ita te! Kii Kristen ipni ibakayim-bam kipni win kaa ku-mafak-dakaya-tabasip kuluuli, utamsi.
REV 2:10 Kemin, kipyo kulaata Setaan ayo mepso tal yam-kukulila, kukup mafak ayo ma tabuulin o! kalalaya, tunum kii bokoya-tal-ilomdip malo ma ipni foko-kulii-din sok de-yimuliwa kawu, kukup mafak uyo tal kipni diim abamnula, bii am nakalkal ke-lokomu. Lale, kukup mafak tal ipni al abamnula, angtiil yol kuluulokomip kaami atul kaa suunin daa. Kanola tunum kii taba yelupla taanik o, kalokomip. La, ibi nami lak dakaamin uyo yikik-kutal-fuku-bom-biliwa, nayo mafek mafek tambal kaata ipni kuyilila suunkup ilokomip o.
REV 2:11 Kipkal talang tem so kemin, God ami Sinik alta taba-lom Kristen unang tunum imi weng bakayimba uyo talalu weng sandiwa yo. Kanta nami kukup uyo kutal-fukulin-kup unip namti, imi saaknip bombii kaali, ili kaal dinim, ili yak as suunkup kiin-bam laabu kaami tem so ma un-ilom saak-alom atin disa ke-lokomip dinim o, kala Kamokim Yesus alta bokop-na-lomda: Jon kapta sukon tem kabaku dola kuyan o, kala-lomda, Kamokim Yesus ata bokop-na ko.
REV 2:12 Kamokim Yesus ayo asuk bokop-na-lomda: Jon kabi nami weng uyo ma nami unang tunum abip Pegamum kaptam kayaak tiin molin ensel ami dola kola bokola-lomdap: Yesus Kamokim ali boko-lom: Tunum kaami weng kaali, wan kong fiil malii so, malii so, taalin atul ta, disa akal ma kesa tap kulaa nalta kemin ale, nami tunum unang ipyo, weng ma bokoyon o, kali ko.
REV 2:13 Kemin, nakal utamsi. Kipni abip tunum bilip ili Setaan almi man alik-daap ke-bomdipla, ibi kukup mafak uyo kukaayila-tabasip. Katale, ibi nalmi man diil tap kep-na bom-laabip. Kemin, sawaayak kaali, nami tunum ma Antipas ali, Setaan ami abip Pegamum kawu kipso bomdala, nami weng ayo kela-laamin dinim; unang tunum iyo bakayin-kup ke-bam kutal-fukusa. La, iyo kipni tiin diim kawu an-kutiilipla atam-silip. Lale, ibi boko-lomdip: Yak kanolip kemin, nuli ami lak duusup ayo kulaalum o, nansip dinim.
REV 2:14 Kuta, malo ma kiimi kalan kaata yim-bak-saanon o, kalbi kemin, ipni iipyak tem kawu, malo ma ibi siin sawaayak kawu profet ami weng sawaa bakamin tunum Belam ami kukup mafak uyo kutal-fukusip. Kemin, Belam ayo taba-lomda kamokim Balak ami kukolaya, ata Israel imi ukotaka-balaya, ili ban wakan-unan-solip kemin, tunum kusnum ta men awem kaami kang sipsip aye, bulumaki aye, iyo anu-lom kukaanbip ayo in-bom ale, sadiki-bam kemsip.
REV 2:15 Ipkal kanola ipni tunum malo iyo namboyip Nikolas almi tunum imi kukup mafak kaata kutal-fuku kulii-tabasip.
REV 2:16 Kibi aket kanubip uyo fal-siki-lom kulaa kelin o! Ale, ti kanola aket fal-sikilin disa ke-lokomip kaali, kipni fanang abiltap tal-ilomdi tunum iyo nami bon tem weng atul kaa wan kong atul altap kalaata aabi kutiilila iyo yol awak kuluulokomip o.
REV 2:17 Kipkal talang tem so kemin, God ami Sinik ata Kristen unang tunum imi weng kukaayimba kalawuuli talalu weng sandipla, kanta nami kukup uyo kutal-fukulin-kup una namti, God ami mana yo, kebip uyo ima sawaansu aket tem yam-titil-saanin uyo kola-som, tuum namaal ma kuluu-lom kama alokso win ma tuum kuumi diim kabaku dola kola ke-lokomi kemin, tunum kaa tuum kalawuuli kuluu-lomda utamala, U fan, nali God ami man kalokomi. La, alokso win kaluuli tunum kusnum ili utelokomip disa; ti alafin uta-mokoma kayi! kala, Kamokim Yesus alalta bokop-na-lomda: Jon kapta sukon tem kabaku dola kuyan o, kala-lomda Yesus ata bokop-na ko.
REV 2:18 Kamokim Yesus ayo asuk bokop-na-lomda: Jon kabi nami weng ayo ma nami unang tunum abip Tayataira kasel kaptam kayaak tiin molin ensel ami dola kola bokola-lomdap: Kamokim ayo boko-lom: Nali God ami Man kemin, tunum kaami tiin kaa, ti as kiinba tap, kaami yaan ayo moni alokso kiin abin kaami lamlaam sokan kebu tap kulaali, nalta kemin, nami unang tunum ibi weng uyo ma bokoyon o, kali.
REV 2:19 Nili itamsi. Kipni kunolin nun-umbip so, nami aket-kup kup-nansip so, kaptum kusal imi aket-kup kuyinsip so, nami lak duusip so, kaptum kusal imi dong dakaayila-yaabip uyo utam kesi. Kemin, ibi titil-foko kutal-fuku-bilip dukum-nula, kamala kulaami ipta ipta kebip kaa utam kesi.
REV 2:20 Lale, atin ti maakup ma kaami kalan kaata yim-bak-saanon o kali kemin, unang Jesebel kuuli, kuno kewip kawu ipso maakup bomdula: Nata God ami tiipmin unang kawo! kala weng ku-fatap-daa-bakayin unang keli kayi! kala-lomdu, nami lak duulin tunum malo ma ipni kukuyim-bamdu le, foko im-din tiilu tam ban kemip kawo! kala sadiki-bam ale, tunum kusnum ta awem men kaami kang sipsip aye, bulumaki aye ayo anu-kukaayim-bilip uyo in-bom kem-laabip o.
REV 2:21 Nali unang kuuli fen-biliya, aket kaa fal-sikilula, kaami ban ke-laabu uyo kukan-tiiwon o, kalalila, fen-tabasi. Lale, uyo boko-lom: Aket fal-siki-lomdi nami sadikin-umbi uyo kulaalokomi disa yo, kalsu no.
REV 2:22 Kipyo, nalta taba-lomdi sik ma kulaawi yak umi diim aba-lomdu angtiil yol awak uyo kuluulokomu kemin, dok kanolin kipta unang uso sadikin-umbip ibi aket fal-siki kutii kanola unang umi kanuwa-laabip umi kukup ayo kulaalin disa kelip namti, angtiil yol awak sakbaalkan kaata ma kuno kulaayi yak ipni angtiil diim abamnula uyo utamiple,
REV 2:23 unang kuumi daang bakaalin man kiiso, nalta anuli taan ke-lokomip o. Kanu-biliya, alik nami unang tunum abip ma ma bom-bilip ibi utamiwa yi, God ami Man kaali, tunum unang numi aket tem uyo dotu utam-somdala kanun-umbup kaami kalan kaata, kaa yaap ma kukup tambal aye, kukup mafak aa, uyo nuli kukaayila-yaaba no, nokokomip.
REV 2:24 Lale, Tayataira kasel malo ma ibi kukup mafak kuu ma kutal-fukusip dinim ale, Setaan ami mafek mafek yang sawaansu no kem-yaabip uyo ma dik-daa kuluu utamsip dinim kemin, Kiwe! nali bokoya-lomdi: Fiitmin kukup uyo maso ma kutal-fukulin o, yokokomi disa kemin,
REV 2:25 iltipni kukup kaa kanun-umbip kuuli, dukum-kup kano ti tabuulin-kup bom-bilipla, talon o, kala-somla ko.
REV 2:26 Kawanta titil-fak-daa nami kukup kaata kutal-fuku-bom-biile, taana namti, kaata nali dabuulila tiltam kamokim ke-lomdala, nami Aatumen nami uldaa-nam-buula tiltam kamokim kesi naltap kelala, kulaata am bokon malo ma imi unang tunum iyo titil-fak-daa dukum-kup tiin mo-bomdaya, tunum ami asukum kuluu-lomda ok ket kola kutii-yaaba tap kanu-bamdaya, God ami waasi iyo yim-baala kabaak bane-mokomip.
REV 2:28 Nalta am kel diim wakalkan dukum fala-fala tiltam taba-laabu tap kulaa nalta te! Nali aso ilokomup.
REV 2:29 Kipkal talang tem so kemin, ipkal God ami Sinik alta Kristen unang tunum imi weng bakayimba kuu dotu weng sanin o, kala Kamokim Yesus alta bokop-na-lomda: Jon kapta sukon tem kabaku dola kuyan o, kala-lomda Kamokim Yesus ata bokop-na ko.
REV 3:1 Kamokim Yesus ayo asuk bokop-na-lomda: Jon kabi nami weng ma nami unang tunum abip Sadis kaptam kayaak tiin molin ensel ami dola kola bokola-lomdap: Kamokim Yesus ayo boko-lomda: God ami sinik fetkal imi tiin molin tunum kulaali nalta; kemin ale, wakalkan fetkal kutal-fukulin tunum kulaa ti nalta kemin, nami unang tunum ipni weng ma bokoyon o, kali. Nali kipni kanumin kukup kanumin kukup kulu kanum-yaabip uyo utamsi. Tunum kusnum ili kipni sang ayo baka-bamdip: Kiita unang tunum tiin kawang bom-bilip tap ke-lomdipla, Kamokim Yesus ami lak ayo dukum-kup dakan-umbip o kebip, ibi win tangbal kulaa kuluusip. Yale, ibi tunum unang taansip iltap ke-lomdip nami lak uyo dukum-kup dakaabip disa yo!
REV 3:2 Nali kipni kukup kaa kanum tabasip uyo liiwuliya, Awu, kaata nami God ami tiin diim uyo fan tangbal-kup talala-laabip dinim o, kalbi. Kemin, ibi ti tam tiin baa-bomdiwa, kipni kukup tangbal mepso disa kelon o, kalu uyo titil-fak-daa asuk yikik-kutal-fukulin i!
REV 3:3 Siin kaa, ibi God ami weng kaa, weng san-ilomdipla, Tangbal u, kala-silip kaami aket kaata, asuk fukun-bamdiwa, aket fal-siki-lom ban kemin-kup ilin kuuli, kewa-lom God ami weng kaata, dukum-kup kutal-fukulin o! Ale, kanola ibi fan tam tiin baa-lom kawang ilokomip dinim kaa, yukut inin tunum ali maaklo kawu taleba tap nali maaklo tem kawu tilila, ibi nitam kaal-ke-lokomip disa yo.
REV 3:4 Kuta, kipni kukup kaali, ilim ninak dinim ultap kemin, Sadis kayaak ipni tunum unang malo ma ban waka-bamdiwa ilmi win uyo ku-mafak-dakan-umbip disa. Imi kukup tangbal talala-laabip kaali, yaap keyula iyo ilim namaalim ata mikilip namti, naso ilokomip.
REV 3:5 Kemin, kawanta nami kukup kaata-kup kutal-fukulin-kup ila namti, ilim namaal kanolin kaata mikilokoma. Nali utamila, Tunum ayo suunkup ilokoma kala kalalila, ami win kuu sukon diim kabaku dolalokomi ayo, takan-telokomi disa; ti nakal nalmi Atokim sole, ensel so, ilmi diim kawu tunum kaami win ayo kufola-lom: Kaali nalmi tunum o, akokomi no.
REV 3:6 Kipkal talang tem so kemin, God ami Sinik alta Kristen tunum unang imi weng bakayimba kaluuli talalu weng sandiwa yo, kala Yesus Kamokim alalta bokop-na-lomda: Jon kapta sukon tem kabaku dola kuyan o, kala-lomda Yesus Kamokim ata bokop-na ko.
REV 3:7 Kamokim Yesus ayo bokop-na-lomda: Jon kabi nami weng uyo ma nami unang tunum abip Filadelfia kaptam kayaak tiin-saanin ensel ami dola kola bokola-lomdap: Kamokim Yesus ayo boko-lom: Nali ti fan tunum tangbal ale, nami kaa ti kanu-mokomi kayi! kali uyo, suunkup tifan kanu-bam ken-umbi kemin, Devit ami siin sawaayak kamokim king ke-bomda unang tunum tiin mo-biisa tap kemin, kanola nakal king ami kii ayo kutal-fukuli bombuu kemin, nami abip kaami amitom saal busu-laabi uyo, tunum ali ma asuk lii-laaba disa yo. Nami abip umi amitom saal lii-laabi uyo tunum ali ma asuk busuu-laaba disa yo. Ti maakup nata-kup lii-bam ale, baskaa-bam kem-yaabi no. Nami tunum unang kipyo, weng kuu maso ma bokoyon o, kalbi kemin, weng san bom-iliwa.
REV 3:8 Nali kipni kukup kanumin kanumin num-laabip kuluuli utamsi, kipni titil kuuli katip. Lale, kipkal nami weng kaata dukum-kup kutal-fuku-tabasip. Nuli Yesus ami tunum daa, kalsip dinim. Kemin, nali kipni dabaal diimlo saal ayo busuu-yimbi kemin, dok kanolin tunum kaata taang-kala-somdala saal kaa liilama disa. Saal kaami miit uyo kipkal utamin. Nali ok yaapkan ayo kipni kuyokomi na! Taldiwa okokmin aa! kal-bomdu kanum bakabu te!
REV 3:9 Setaan ami tunum ili boko-lomdip: Juda kayaak nuli God almi tunum tituun alik-daap o, kem-laabip. Lale, ili fan God ami tunum disa; ili kasen-faka-bamdiwa ko. Nalalta kii yim-baalila, tal-ilomdip Filadelfia kasel ibi itamiwa yi, God ali unang tunum Kristen kalawiimi aket kaa kuyinsa kala kala-lomdip kamokim ami weng umkaayin ayo kanola tilik-duung fakela daak ipni miit tem kulu lamo daak aba dabuna-yaa-mokomip.
REV 3:10 Kibi nami weng kaa bokoyasi kaata weng sandiwa, nami kukup uyo kewa-laamin dinim, ipta-kup kutal-fuku kulii-tabasip kala, kalalila tiin mo-bili yaap-kup ilokomip. Bii kukup mafak dukum tiltam talokomu uyo am bokon kula dik-daa kulaasu unang tunum alik isole, kipso, ipni diim abe-bamdula, yam-kuku-mokomu. Lale, ibi nalta tiin mo-bom-bilila, ibi ma yam-mafak-daalokomu disa yo.
REV 3:11 Kemin, nali mepso talokomi kemin, ibi kamboyipla, tunum kusnum iyo ma tildang ilomdip yim-bii yang baniwa, nami mafek mafek tambal kuyon o, kalbi uyo uktawalalip. Kemin, kipni kukup kaa kanun-umbip kuuli ti, talalu kutal-fuku-biliwa yo, kala-somla ko.
REV 3:12 Kemin, kawanta nami kukup kaata kutal-fukulin-kup una namti, nalta ti kanola tunum ayo talalu duuliya, nami Atok God ami lotu am awak ulmi am kun kumola daak nek kala ding-ding tola-yaabu tap kanolokoma. Kemin, kela tam banokoma disa. Ali nalmi tunum kalalila, nakal nalmi Atok God ami win so, nalmi Atok God ami abip win, aa nalmi alokso win so, uyo tunum kaami angtiil diim kawu dolalokomi. Kemin, abip kaali, kama-kup alokso abip Jerusalam o, ke-mokomip. Nami Atok God ata kewalala abip kaali, abiil tikiinlo kawu kutal daak tawaal diim diilokomu no.
REV 3:13 Kulaa kipkal talang tem so kemin, ibi God ami Sinik alalta Kristen unang tunum iyo bakayimba kemin, kuuli dotu weng sandiwa kayi! kala, Kamokim Yesus alalta bokop-na-lomda: Jon kapta sukon tem kabaku dola kuyan i! kala, kanum bokop-nan o, kalalaya, Jon ayo kanum bokola ko.
REV 3:14 Asuk Yesus Kamokim ayo boko-lomda: Jon kabi nami weng ma nami unang tunum abip Laodisia kaptam kayaak ilmi tiin molin ensel ami dola kola bokola-lomdap: Yesus Kamokim ali bokop-na-lom: God ami weng kutiisa kaata, nita fuku-bom-bili, tiltam talebu ale, God alami bon tem weng kaata-kup, tituun bakayimba kemin tunum ali kalabii, ale God ata mafek mafek alik iyo talalusa kaami miit kaali, nalalta kemin, nami tunum unang kibi weng ma bokoyon o, kali ko.
REV 3:15 Kipni kukup kunumin kunumin kulu kanum-yaabip kiili, ibi ti fan tuum mamin fakabu ultap kemin disale, aa, tuum diisbu ultap daa. Kemin, ibi iip-iip kulu bomdiwa, nami lak ata dukum duubip disa le, nali ibi daang ukup-nambip disa. Kemin, nali bokoya-lomdi: Ibi aket alep kemin ayo kulaa-som, aket maakup ke-lomdip, nami lak kaata talalu duu-lom nalmi alik-daap kelin o! kalasii. Lale,
REV 3:16 nakal ibi itamila, Nami lak ayo atin dukum-kup duulin disa; aa daang ukup-nin disa; daa atuk-atukmin so kem-yaabip kala kalalila, nalmi bon-tem-lo usaan fiili tiil banin tap ke ibi foko yim-baali yang banokomip.
REV 3:17 Kibi boko-lomdip: Nuta mafek mafek soyal ale, wan sisol yam-kabiilin ale, win tabin kemin, nuli mafek mafek ayo ma dulu-lom uktiipsup dinim o kem-tabasip. Yale, ibi mokop-soyol ke-bilipla, nali olen-yimbi. Kibi tunum mafek mafek iiwa-lom duluba aye, tunum tiin mafak-anbu ne, tunum ilim mikimin dinim angtiil fatap bombe ne, ililtap ke-bomdiwa, God ami kukup tangbal uyo ma kutal-fuku-yaamin dinim. La, ibi utam, Awu, kaali kano-somdup bom-buluwa uyo ma kanum-yaabup dinim o.
REV 3:18 Nali ipni kanum-yaabip kaata, weng sawaa ma kuyon o, kali kemin, weng san bomalipla! Kamala kuluwaata, gol uyo kuyak fuu dotulip tambal kesu uyo nami diim kawu bombuu kemin, ipkal tal ma mo-lomdip tunum bung kayaakal ililtap ke-bam ale; ilim dinim kulu tal-une-bulup itafii-bilip fatom keyimu kala kalalip, tal nami diim kalawu ilim namaal ayo ma mo mikilipla, tunum suunkup ti ilim tangbal miki-bom laabip ililtap ke-bam ale; tal nami diim kalawu marasin ayo ma mo-lomdip iltipni tiin ayo aba-bilip yaap keyilula, tunum tiin tangbal baaba alaltap ke-bam kemin o. Kanu-mokomip kaata, God ami kukup tambal uyo talalu kutal-fukulokomip.
REV 3:19 Nali kanola dok kanolin tunum kaami aket-kup koli namti, nali taba-lomdi ayo Aalap ta almi man biiwaka-bamda liip kukonba ultap, ti nakal kiili ti lek-yim-bamdile, angtiil yol uyo kuya kelila, iyo utafii-bam ke-mokomip. Kemin, kipni aket-kup kuyinsi kemin, ipkal titil-foko iltipni kukup mafak ayo kela aket ayo fal-sikilin o, kala-somla ko.
REV 3:20 Kipyo, nitamin o! Nali kipni amitom diim kulu tola-bomdila, saal kaa dok-dok-kebi kemin, tunum ma ayo kanta nami weng uyo weng sanda saal busup-na namti, nali tam atamila aso, naso, alep maakup tiin-bom ima im-bom ale, fiyaap duu-mokomup o.
REV 3:21 Siin kaali, nata nata ke-lomdi Setaan ayo dabaali kulaak bana kelila, nami Atok ata kambop-nala, aso, naso, almi tiin saanin baan diim kawu tiin-bom kem-tabasup. Ultap kemin, kanita unang tunum ita ita ke-lomdip Setaan ayo dabaalip kulaak banokoma namti, kamboyilala, yakal ti, naso, nalmi tiin saanin baan diim kawu tiin-bom ke-mokomup.
REV 3:22 Ipkal talang tem so kemin, ibi God ami Sinik ata Kristen unang tunum nami weng bakayimba uyo dotu weng sandiwa yo! kala Yesus Kamokim alta bokop-na-lomda: Jon kapta sukon tem kabaku dola kuyan i! kala kanum bokop-nan o, kalalaya, Jon ayo kanum bokola ko.
REV 4:1 Ma kaali, Jon nayo lom tap visin o kebip duuliya abiil tikiin kaali, saal uyo ma busuulula utami ko. Kamosinim ayo bikul weng tap ma uta bokop-nu weng sebi kemin, asuk weng seliya, kanolin weng ultap ma abiil tikiin kaptamu bokop-na-lomdu: Tiltam talawa, bom ilom mafek mafek kaami tiltam tabokomu kaptoop-ata kukup-ton o, kalule,
REV 4:2 kulu maak fak-daalin tap, God ami Sinik ata nami sinik ayo dap-tam abiil tikiin daalaya, utam-talaalila, Tunum ma kamokim king o, kala-laabip ami tiin-bomda alik kiimi tiin-saanin baan diim kabaaku tiinba kaa kali ko.
REV 4:3 Nali atam talaalila, Ami dabaal kun diim kaali, titup-kup sipying-sapyang ma tiinsa kala atami, uyo tuum taa bii kutiilip atin tambal ma kutookso ke-lom, titup-kup biila taba isakfulut kelu, ma uta as kon wiis tap elile, mep asak-lamlaam kaa as kon wiis dik-daalin kaata-kup, tambal ma tiin buluusi so kesu uta taba-lomdu mep ami baan sia diim ayo falala dabak mobu kala atamile,
REV 4:4 kulaa, kamok kamok ilmi-kup 24 o, kala-laabip iyo kuno God ami baan tiin-yaamin sia ayo falala kuyak mo-lom ale, kulaa tunum maakup maakup iyo kamok ilmi sia diim e kala tiina-tiina ke-lom ilim namaal ata-kup miki nam-bola tam kamok imi dafalum tangbal gol ta dotusip ayo dildaak tini-tini kelipla itam keli ko.
REV 4:5 Kanola, Dukum ami tiin-bom ilin sia diim kulu baabaa dabakabi kalale, weng baka-balale, taman bikin-taba kelula, sia miit tem kulu ilaam fetkal ma iilfo kutiilip kiin-bilip kiimi itam-som keli kemin, ilaam fetkal kiili, God almi sinik fetkal imi sang faldak-tii-lom dotu kutiisip kiita ko.
REV 4:6 Kuno Dukum ami tiin bom ilin sia diim mepso kuluwu mafek mafek ok kumun tap ma alalsu kabak-ali ti disa tambal ma ke-lom dawong-kup tabasu umi utami kaali, mafek mafek kabaak bombuu uyo tiyak daa fitap-kup utamami kaa am umi glas ultap ko. Kanola Dukum ami tiin bom-ilin kaami mepso ayo God ami mafek mafek tunum tap atalingkal ma tola-bilip; ma kaami dabal kunlo kawu tolnale, ma uta daang tem kawu tolna, ma kaata awaanlo kawu tolna, mafiing kaata tingtuplo kawu tolna kebip. Kemin, kanobip kiimi ol ban tem so, daang diim so, angtiil diim alik kawu tiin yaapkan uyo bilip kala itamila;
REV 4:7 mafek mafek kamosinim kaali, busi dukum elile layon ultap. Ale, ma kaata, kau imak tap; kuno ma kaali, tunum tiin matum altap atam ale, ma kaata awon bokol tam-daa-tal-une-bamdula tiin dakabu tap ke utam-som, keli ko.
REV 4:8 Kemin, God ami mafek mafek tunum keyap saak kanolin mafek mafek keyap atalingkal alik ti kanolin maakup maakup kiili, balkun bukupkal kiimi balkun tip diim kakal ti kuno tiin yaapkan iyo bom-bala, balkun tawap tem akal kuno tiin yaapkan ayo bom-bala kelin kemin, ili suunkup kutamiip so, am daanin diim so, ayo ti baal-kup wii-bam baal kabak-ali boko-lomdip: God dukum kabi tambal-kup tabasap. Kabi tituun-kup tabasap. Kabi titil tabin alik kaami miit kayaakim kemin, sawaayak kaa kano suunkup bom-biisap aa, kamala kuluwakal bom-balap, bii kaptoop kaptoop unokin kakal kuno suunkup ilokomap o, kal-bomdiwa baal kaali, kal-bom win-umbip.
REV 4:9 Kemin, mafek mafek keyap ale, tunum kelin atalingkal kiili, baal kuten-bamdip suunkup ilin tunum God tiinba ami win uyo kufon-bam ale, ami fiyaap-kup don-bam ti yaap ke yo kala, bakaan-bam ke-bam kanu-biliple,
REV 4:10 kamok kamok 24 alik ikal ti kuno suunkup ilin tunum God ami tiin mo-bom ilin baan diim kabaaku tiinba, almi dabaal kun diimlo kulu suunkup tilik-duung fakela daak tiin-ilom bokola-lomdip: Kabi numi Kamokim kemin, nuli kapni win diim kaata-kup tunum unang kii tiin mobup o kal-bom ale, ilmi nafalum ayo dilduu kulaak tiinba kaami miit tem kawu kutii-lom fiyaap duu-bam bokolip ko:
REV 4:11 Numi God Dukum, kapyo, kapni aket fukunin ayo mafek mafek alik kulaa talalulami no, kalsap. Kemin, fan, kabi mafek mafek kalawaali dotulapla kiili bom-bilip o, kalalupya, nuli yaap ma keyulala kapni tong baka-bam fiyaap duu-bamdup tan ke yo kalum o kalbup kemin, kapni win kaa aalap dukum ale, titil miit kayaakim o, kalalupla, kapni baal kutiip-tinbup o, kem-yaabip ko.
REV 5:1 Jon nayo utamiya, God Dukum ami tiin mo-bom ilin baan diim kabaaku tiinba ata sukon batbat falanin ma almi sikil tingtuplo kawu kutal-fukula atamila, sukon kaami tip diim kaptam dola-som, minlo tem akal dola kelin kala atamila, as dan ma fuk-duu-lomda sukon fetkal iyo falala um-bomdala as dan ilik daala ayo yak nek kala fep-na, kela yakyak kem toop dinimnaya de kutiisa. Kemin, umi kaa kanosa kabak-ali tunum ali ma utamda tik-tiilama disa yo, kali ko.
REV 5:2 Kulaa ensel titil-kup tabasa ma ayo atamile, Dukum-kup naan-daap-na-lom dik-daap-na ko: Tunum tambal-kup tabasa ayo kawanta tiksa namti as dan kaali, tik-daa kuyak tii-lomdala sukon kaayo, bam-daa kutiilokoma yoko? kala katale,
REV 5:3 abiil tikiin so, tawaal diim so, tunum taansip so, imi abip uyo, tunum tangbal-kup tabasa ayo ma taba-lomda yak as dan kaa tuk-duu kuyak daa baa kutii sukon kalawaali, baa kutii-lomda weng kabak-ali tik-tiilama disa yo,
REV 5:4 kala-somdila, nali utamila, Ata tunum tambal-kup tabasa kemin, ata ma sukon kaayo, ma baa kutii weng kabak-ali tik-tiilama dinim o, kalalila, nami aket tem ayo uluum-kup kep-nula dukum-kup amamile,
REV 5:5 kamok kamok 24 imi maakup ma ata bokop-na-lomda: Kabi amamin daa yo, kalale, weng san-bom-ilapya! tunum kaami sang kaali boko-lomdip: Kaami win kaa busi sakbaalim o, kala layon o, kem-yaabip. Kemin, win kaami miit kaa Juda imi man loop imi kamokim o, kal-bom ale, kuno ami win ma ayo King Devit ami man loop diil o, kal-bom, kanum-yaabip. Ali titil-kup tabale, mafek mafek mafak iyo alik kabaak banip, ata ata kesa kemin, maakup ata-kup yaap sukon diim as dan kaa-biisa ayo tuk-duu kuyak tii-lomda sukon kalawaali baalama no, kala bokop-na ko.
REV 5:6 Nali Jon nita atam talaala yi, Sipsip Man ma ata God ami tiin-yaamin baan diim mepso kulu tolba kaa kalile, ayo God ami mafek mafek tunum tap kelin atalingkal iso, kamok kamok iso, imi iipyak tem kabaaku tolba kala, atamila, Sipsip Man Yesus ayo aalip saakba. Katale, ali tiin kawang bombe kemin, ami dabom diim kaali, kong fetkal, kuno ami tiin kaa fetkal, kanolin tiin fetkal kuliili, God ami sinik fetkal kiimi sang kaata faldak-tii-lomdala, God ali kiita yim-baala din am bokon alik kala bombe kawu din unsip.
REV 5:7 Kemin, Sipsip Man ata sukon ayo God Dukum ami sikil tingtup diim kawu buu uyo kuluu-lomda,
REV 5:8 mafek mafek tunum tap atalingkal iso, kamok kamok 24 kiiso, ili Sipsip Man ami dabal kun diim kulu tilik-duung fakela daak tiin-ilomdip alik maakup maakup iyo gita tap so, as dan aye, as kon tangbal tangbal tang-fuunin kaami as kuyak daalip kiin tabemin aye, gol ket so, uyo kutal-fuku-ke-lomdip as dan so, as kon so, ami ket kaali, God ami unang tunum imi tam taba-bom beten kemin kaami sang kaata faldak-tii-lom kanum bokosu.
REV 5:9 Kemin, kulaata alik iyo alokso baal ma wii-bam Sipsip Man Yesus kaami bokolip ko: Kabi teliwa saaka-lomdap, kapni kiim tambalim ayo sing-tam-daa taba-lomdu tunum miit malo ma iso, tunum yakal ilmi miit kusnum ilmi weng kusnum bakamin so, abip ma ma kiimi unang tunum so, tunum miit yakal ilmi angtiil kusnum kusnum so, alik kiimi unang tunum iip maakup maakup imi kukup mafak kiita moya-lom iliim boya im-taldang God ami miit tem kawu tiilapla, iyo tiltam kaltapni kama unang tunum miit ke-silip. Kemin, kamala kalawaali, God ami pris o kala awem tunum imi siin kanumsip tap ke-lomdip, numi God ami okok kamaanbip. Kemin, bii-lom kaptoop-ata taba-lomda am bokon kala diyak diisu kalawaami tunum unang iyo alik tiin molokomip kaali, kapta yaap ma kano-lomdap sukon falala kutiisa uyo kuluu-lomdapla, as dan kaa tuk-duu-lomdap sukon kalawaali baalokomap o, kala mafek mafek tunum tap atalingkal kiiso, kamok kamok 24 kiiso, kiita fiyaap duu-bam Sipsip Man ami win ayo kufolip o.
REV 5:11 Kuno ti ensel yaapkan o, kala-lom, tunum kaali ma ding bokolama dinim iyo de kulii-din God ami tiin-yaamin baan diim mepso kulu God ami mafek mafek tunum tap so, kamok kamok iso, iyo ami mepso kulu falala yim-bak-mobip kala itam ale,
REV 5:12 weng seli yi, Alik maakup baal ayo dukum-kup wiibip kaa kalile, iyo boko-lomdip: Sipsip Man kabi telip taan-ilomdapla, tunum imi iliim ayo boya-salap. Kemin, nuli titamupla kabi sakbaalim dukum o, kalbup. Aa, kabi titil miit kayaakim kala, tambup. Kabi bung mafek mafek soyap kala tambup. Kabi aket fanang tambal-kup fukunin kala takalupla, nuli yaap ma keyu kapni fiyaap-kup duu-bam ale, ti yaap ke yo, ke-bam kanubup o, kala baal kaa kutelip.
REV 5:13 Kemin, nayo weng san-ilomdila, mafek mafek alik tiin kawang-bilip, imi abiil tikiin bom-bilip iso, tawaal diim bom-bilip, tunum unang taansip imi abip bom-bilip aa, yol ok kumun tem bilip iso, iyo alik maakup baal wiibip kala weng seliya, baal wiibip kabak-ali boko-lomdip: Alik numi tiin molin tunum God asole, Sipsip Man aso, alim ibi Dukum ale, titil miit kayaakal o, kalalupla, alim kipni fiyaap ayo tabe-bam yaap ke yo, kemum o, kala-somla kemin, nuli suunkup baal wiiyim-bam ale, kipni fiyaap ayo duu-bam ke-mokomup kayi! kal-bom baal kutiiyip.
REV 5:14 Aa ti kuno mafek mafek tunum tap ke, kanolin atalingkal iyo: Ti, faneng o! kaliple, kamok kamok 24 yakal kuno tilik-duung fakela daak tiin-ilom Dukum asole, Sipsip Man aso, alim imi win ayo kufuuyim-bam lotu kamayip ko.
REV 6:1 Jon nayo, Sipsip Man Yesus ayo ata-bom ilila, sukon falala kutiilin kaa kuluu-lomda, God ami as dan fik-tiisa ayo, maakup usiik tuk-duu-lom sukon anung katip ma baala kala atamila, kulu weng selila, God ami mafek mafek tunum tap kelin atalingkal imi ma bombe kulaata taman bikinin tap kelala, weng uluum-kup tibin dukum ma waasi dinin tunum ami naan-daala ko. Tiltam siplo talawa yo, kalba kala, kalile,
REV 6:2 kulaali, hos namaal ma amitom liip tiltam taba atamila, Tunum hos kaami daang kun diim tiinba ayo, wan kutal-fukulin kala atami kemin, ayo waasi dinan-taba tunum kaa ata ata kela ami nafalum uyo kolala, kulaata asuk tawaal diim ami waasi kiiso din-bom yim-baak tibii ata ata kelon o, kalaya tala ko.
REV 6:3 Sipsip Man ayo God almi as dan fik-tiisa alep diim uyo tuk-duu sukon anung katip ma bam-daa kutiilale, kulu nali mafek mafek tunum tap maakup ma ami weng ma uyo weng saniya, waasi dinin tunum kusnum ma ami naan-daala, Tiltam saaklo kawu talawa yo, kala atamile,
REV 6:4 kulu hos fiingim ma amitom tiltam taba kaa! Kaami daang kun diim kawu tunum tiinba kaali, God ata titil konba-kup, wan kong batbat ayo kola kelale, tunum kaata taba-lomda tawaal diim kasel imi yim-bak-daalaya, din-bomdip aptum kusel iyo aala-aala-ke-lomdip saak-nokomip ko.
REV 6:5 Sipsip Man ayo God ami as dan fik-tiisa asuum diim uyo tuk-duu sukon anung katip ma bam-daa kutiilale, kulu nayo mafek mafek tunum tap asuum ami weng uyo weng seni yi, Ima tinap ol futam kuyak dakamin tunum ami weng umola-lomda: Tiltam saak talawa yo, aka kala, kalaliya, kulu hos angtiil duut ayo amitom liip tiltam taba atamile, tunum hos daang kun diim tiinba ayo skel mafek mafek uluum imi win dolsip kaami kilo utafii-bam saanin uyo sikil tem kabak kutal-fuku kela atamila,
REV 6:6 mafek mafek tunum tap kelin atalingkal imi iipyak tem kuluwu tunum weng tap ma bokolu weng san, tunum hos daang kun diim tiinba ami bokola ko: Kapyo, ol futam kulaala tildaak tawaal diim abamnuya, ima kaami sisol uyo tambanula, tunum okok kebi am atan maakup kemin umi sisol uyo, kuluu-lomda ima maakup tap waan asuumano tap kiita-kup ma molak o. Kabi inin-inin aket iip kiili, ima so, waan so, kaa ku-mafak-daalap iip-nuk o. Katale, sok wain lang so, as oliv so, kaata kamboyapla lap iyo abuulula, oliv kaami matak ok so, sok lap wain ok so, kaata malo ma ayo tildaak abamnuk o, kala ko.
REV 6:7 Kemin, Sipsip Man ayo God ami as dan fik-tiisa atalingkal diim ayo kuno asuk tuk-duu sukon anung katip ma bam-daa kutiilale, kulu nayo God ami mafek mafek tunum tap atalingkal ami weng uyo weng sanila, tunum alep ma imi naan-daayila ko. Tiltam saaklo tilip yo, kalba kala, kalile,
REV 6:8 kulaa hos titak ma amitom liip tiltam taba atamile, tunum hos daang kun diim tiinba ayo unang tunum yim-bak-daalaya yelip saaka-yaamin ale, kuno tunum ma ami daang tem kulu tiinba ali unang tunum imi sinik kulii-din Sakbal am dakamin tunum kemin, God ali taba-lom mep tunum alep kiimi titil kuyilala, din tawaal diim kasel unang tunum iyo sikip e kala, kutii-kutii-ke sikip atalingkal fik-tii-lom unang tunum alik sikip maakup ma bom-bilip imi yelip taanokomip kaami kukup namti kala bombe, tam malo ma kiita ami waasi iso, din-bomdiwa, waasi ita anulip taanipla; ol futam uyo tiltam tulula, unang tunum malo ma iyo taaniple; mafak-alin awak uyo tiltam tabule, unang tunum malo iyo saakniple; saak olti mafak tunum yemin yakal, tam aba unang tunum malo ma anulip saaka-laa-bilip ke-mokomip o.
REV 6:9 Kulaa, Sipsip Man ayo God ami as dan fik-tiisa awakal diim ayo tuk-duu sukon anung katip ma bam-daa kutiilale, kulu nali mafek mafek kuyak fuulip kiina God ami kukaalin diim kuyak daala atami kemin, baan diim kabaak-ami minlo tem kaali, tunum unang God ami weng kulii yang aptum kusal imi dukum-kup titil-foko bakayim-bilipla, waasi ita tal-ilom anulip taan-ilom unaasip imi sinik iyo din bom-bilip kala itamile,
REV 6:10 iyo dukum-kup naan-bam bokolip ko: Dukum Titil Miit Kayaakim kapyo, kabi atin ti tituun-kup tabin tunum tambal-kup tabasap. Ale, kabi kuuta kanu-mokomi no, kalsap ayo, suunkup kanu-bam ken-umbap kemin, nuli bom-bulup bombii kalok nuumin diim kawu, kabi tawaal diim kasel unang tunum ita anulip taansup, numi kalan uyo yim-bak-saan-bam angtiil yol kaa kukaayokomap yoko? akiwa,
REV 6:11 God ayo ti alik maakup maakup iyo ilim namaal batbat ayo kuyila mikilipla, bokoyila ko: Tawaal diim unang tunum ili kipni kaptum kusal yaapkan iyo nami lak duu-bom nami okok kebip ili kipni yelip taan-silip ililtap kanola, nami unang tunum malo ma ulelasii iyo ye-bilip bii disa kelu kamboyipla, imi sinik ayo tal kipso bom ilokomip kabaku, nami weng kutiisi uyo kanu-bamdila, tunum kaa taba ipni yelip saaksip kiimi yim-bak-saan-bamdi angtiil yol kukaayilokomi. Kemin, ibi fen-bam iliwa, ilanin tap kawu kipni kaptum kusal iyo alik anulip taan-taan-kelipla, alik dinim-nokomip kuyaku kanuyokomi kayi! kala God alta taba-lom unang tunum kiimi kanum bakayila ko.
REV 6:12 Asuk Sipsip Man ayo God ami as dan fik-tiisa bukupkal diim ayo tuk-duu-lom sukon anung katip ma bam-daa kem-salale, kulaa bim aalap ma tiltam taba kem-salale, atan ukol simit-kup kala-lom malang-tini ilim duut ultap kelule, kulaa kayoop akal kiinin dinim kelale, fiingim ke-lom kiim tap kela ko.
REV 6:13 Kanolule, kuno inim aalap ma kutaltam daa-lom as tang yam iyo duula kulaala une-bala-tale-bala-keba no, ka-lom as lap yamnin disa kiiyo, dakela tildaak tawaal aben-umbu ultap ke, wakalkan ukol abiil tikiin lo kawu dakela tildaak tawaal diim abe-bam kemu kemin,
REV 6:14 God ayo, sukon falalbip tap ke-lom, abiil tikiin ayo falala kutii kasentap tap disa kelule, tawaal ukol liin una-tala-ke-bamdu alik, amdu tikiin so, yol ok daang diim so, tawaal biim ulmi baan diim e kala tina-tina-kem-unsu uyo kambola une-bulu-tale-bulu-kem tiltam abamnu ko.
REV 6:15 Aa, tawaal kalawaami tunum kamok kamok iso, tunum win finin iso, waasi dinin tunum imi kamok kamok iso, bung kayaak kiiso, tunum titil tabin iso, sok de-yimulip disa kulu ok fukulin tunum iso, moni okok kemin tunum iso, tunum unang alik God ami lak duulin dinim iyo, kanuba kaami atul uyo utam suun-daa-lomdip, malo iyo sak fun-taba din tuum tem sawaan-laa-balale, kuno malo ma din amdu tikiin imal tem kawu sawaan-laa-bala ke-bamdipla,
REV 6:16 utamiwa yi, Dukum so, Sipsip Man aso, alim imi dukum-kup yim-bak-saan-bam, angtiil yol dukum kukaayin diim uyo tiltam tabon o, kebu kala, kala-somdipla, utamipya, Umi tiltam talokomu uyo tunum kaa ma taang-kala-lom angtiil yol uyo soop akaawokoma disa kala kalalipla, amdu so, tuum dukum dukum so, uta baltamda taba nuyo yim-baak-mo katii-yulala, God Dukum ayo itamin disa kelale, Sipsip Man Yesus ata yim-bak-saan-bam angtiil yol ayo kuyin disa ke kanolin o, kalalipla, sak fun-taba din imal tem kawu sawaanalip o.
REV 7:1 Nami lom tap ayo kanumsi disa kelule, kulaa lom tap kusnum ma duuli kaali, ensel atalingkal iyo tawaal kala dik-daa kulaasu kaami yaang atalingkal kawu tolna-tolna-keliwa, inim dulul aalap ma kutaltam daa-lom tawaal kalaaso, yol ok so, as aye uyo ku-mafak-daalamu no, kala-lomdip alik ti maakup maakup ita inim ayo ilela ilela ke-lom tolna-tolna-kebip kala, kalaali itami.
REV 7:2 Kulaa atam talaalila, Ensel kusnum ma atan talebu lo kawu talaba kala atamile, ami sikil diim uyo God ali suunkup ilin tunum ami mafek mafek tunum unang imi angtiil diim dolmin ayo kutal-fuku-som ale, kulaata taba aptum kusal atalingkal ma God ayo ulelna yam-titil-diila tika-lom tawaal so, yol ok so, uyo ku-mafak-daalokomip kayi! kala, ulelsa imi dukum-kup naan-daa bokoya-lom,
REV 7:3 tawaal so, yol ok so, as aye, kaa ku-mafak-dakamin daa; kano bom-ilip, naso nami naktum kusal ensel inang nuli nulmi God ami win ayo almi bon tem ti kutam daa bom ilin tunum unang God ulelna almi kesip imi tibi kun diim kawu dolilup disa kelula o, kalba-kup;
REV 7:4 fal-siki taba nami bokop-na ko: God ami unang tunum alik ulelna almi kensip ili 144 tausin kemin, nuta imi tibi kun diim kawu God ami win ayo dol-ila-sulup. Kemin, unang tunum 144 tausin kiimi awaalik kaali, Israel kemin, kaami win kusnum ma kaali Jekop o, ken-umbip ami man ayo talangkal kemin,
REV 7:5 fik diilim ami win kaali Juda, ami tamon kaa Ruben, toop Gat, Asa, Naptali, Manase, Simeon, Livai, Isaka, Sebulun, Josep, ken yakaba butoop Benjamin kulaata afung, nikil kalanolin ita foko-tiisa. Kemin, God ayo tunum talangkal alik iyo maakup maakup kiimi tunum miit kaptoop imi iipyak tem kabaku tunum unang almi 12 tausin ulduu-ulduu-ke-bi-lomdala, tiltam almi tunum unang kesip o, kala ensel ayo bokop-na ko.
REV 7:9 Kulu utami disa kelu tal-unule, ilanin tap ke talaalila, God almi sia diim tiinba so, Sipsip Man Yesus aso, alim imi dabaal kun diim kawu tunum unang yaapkan o, kala-som disa akal ma tunum ayo ma ding bokolama dinim, iyo tolbip kala itamile, tunum miit disa yakal ilmi angtiil kusnum kusnum so, tunum miit yakal abip ma abip ma unang tunum miit yakal ilmi weng kusnum bakamin iso, iyo tolbip kala itamile, alik kiili ti almi ilim namaal batbat-kup miki-miki-ke-lomdip, God ami fiyaap dolum o, kala as bapliim ayo fakabi fuku-bom fiyaap duu-bam dukum-kup bokolip ko:
REV 7:10 Numi God Dukum almi baan diim tiinba so, Sipsip Man so, alim ili ita ita ke-lom numi waasi uyo ita welip kulaak bana dabaak-mo kela-lomdip numi iliim uyo boya-silip kemin, nuli fiyaap-kup duu-bam ami win ayo kufolum o, ke-bam kanu-biliwale,
REV 7:11 ensel-miin yakal God ami sia diim mepso kulu falala kuyak mobip kemin iso, kamok kamok ilimi-kup 24 kiiso, tam God ami mafek mafek tunum tap tiinbip atalingkal iso, iyo alik God ami dabaal kun diim kulu tilik-duung fakela daak tiin-ilom imi tiin matum uyo ukdaalip tawaal unala, God ami lotu kamaan-bam ami win ayo kufon-bam bokola-lomdip:
REV 7:12 Faneng taa! Nokol yaap keyula numi God ami fiyaap ayo duu-bam ale, yaap ke yo, ke-bam ale boko-lom: Kabi sakbaalim ale, kabi ti aket tambal-kup fukunin ale, kabi ti titil so, kaluung so, imi miit kayaak kemin, kabi kapta kapta kesap o, kala suunkup kapni tong bakamum o, kalalupla kanu-mokomup kemin, fan ko, ke-bam kemip ko.
REV 7:13 Kulaali, kamok kamok 24 imi maakup ma dik-daap-na-lomda: Kapyo, kabi tunum unang ilim namaal tuuptuup mikibip kiili, itamap kii, dok ami unang tunum o kalbap i? nakale,
REV 7:14 nayo bokoli ko: Kiili ma itamsi daa. Kiili kamokim kaltapta-kup itamsap kemin, bokop-nan o, akila, ayo bokop-na ko: Kiili, angtiil yol awak dukum kaami diim tabemin kuyaku God ami unang tunum waasi ta angtiil yol awak dukum uyo kukaayim-bilip, aket uluum tabemsip. Lale, ili ti mamdet dabak-daa God ami lak-kup duu-bilipla, bii imi angtiil yol awaalik uyo disa kelula, Sipsip Man Yesus ata taan-ilomdala, ami kiim kaata sing-tam-daa-lomdu unang tunum kiimi ban kemin ayo diing daayimulula, ilim namaal dildaak tinilin tap ke-lom kutookso-kup keliple,
REV 7:15 God Dukum ayo itamala, Ti yaap ma kelip kala, kala-somdala, iyo ulelnala almi tiin diim uyo suunkup kutamiip so, am taap so, ayo liip fen-bam bomdipya God ami okok kamaan-bam, sawaayak pris imi tawaal diim lotu am awem kaptam-ami okok kemsip tap kamaan-bilipya, Dukum almi baan diim tiinba ali tunum unang iso, suunkup bomda buku tiin moba.
REV 7:16 Kemin, kiili asuk maso ma ima tinap keyokomu disa. Ok del ma dap-tii-yokoma disa. Kiili, atan mamin aa, wing mamin diim ayo maso ma kiin-abam-nokomip disa yo.
REV 7:17 Sipsip Man ata taba-lom Dukum ami tiin-bom ilin baan iip kulu tolba kulaata, ili sipsip tiin molin tunum almi sipsip tangbal-kup tiin mo-laaba ultap yaap-kup tiin mo-lomdaya, yim-tamala din tuum tem wok bina talemin suunkup ilin wok inin kawu im-din daalaya, ina-lomdip suunkup ilokomip. Kiimi angtiil yol so, imi aket uluum so, uyo disa kelula, God ami tiin ok ayo alik maakup dilit moyokoma no kala-lomda, kamokim maakup ma ata kanum bokop-na ko.
REV 8:1 Sipsip Man Yesus ayo God ami as dan fak-tiisa fet diim ata tuk-duu-lom sukon ami mutum ayo alik bam-daa kutiile, unang tunum alik abiil tikiin bom-bilip iyo duluma bom ilanin tap keliple,
REV 8:2 nayo itami yi, Ensel fetkal iyo God ami tibi diim kulu tolbip-kup, maakup maakup ita bikul maakup uyo kuluu-kuluu-keliwa, itami.
REV 8:3 Kemin, kamasi kaali, as dan aye, as kon aa, fuumin ami baan tebol kabaak-ali as so, gol so, kuyak-mim-daa dotu-lom ale, kulii-din God ami tiin-yaamin mepso kutiilip tiinsula, unang tunum alik ili God ami beten kamaalip. Kemin, ensel ma ali suunkup din as dan so, as kon so, uyo kuyak daala kiin-bala, ami tang ayo tangbal-kup tabasu. Kemin, tang ayo God ami mutum tem tam unu utamdala, almi unang tunum imi beten uyo weng san-kaaba. Kemin, kuluu Jon nayo utamila, Fuumin kaami ensel ali din as dan so, as kon so, kiili gol ket kuluu-lomda umi kuyak dakamin baan umi mepso kuluwu tolnala, ensel kusnum ma ata as dan so, as kon yaapkan so, ayo maso kulii-tal-ilomda kamosinim ensel ami tolba ami kola kala, kalile, kulaali
REV 8:4 ensel ma ata as dan so, kon so, unang tunum imi beten kamaalin so, kiiyo kuluu-lomda as kuyak daalaya, kiin-taba-lom as lak tang tangbal ayo kutam daalala, God ayo tang tangbal ayo utamale, almi unang tunum imi beten uyo weng san-kaaba kala, kali ko.
REV 8:5 Kemin, ensel ayo as dan so, as kon so, kiimi ket uyo kulii yang olti aye, mafek mafek fuu-lom God ami kukaalin kaami baan diim kuluba-lom ale, as mol uyo fokola daak ket tem unu dongnala, kulii yang dukum-kup binala tildaak tawaal diim abamnule, ayo kanolala kulu, weng yaapkan ma bakan-tabamnule, taman ayo kol-bulu, abiil tikiin ayo baabaa-kup dabaka-balale, bim ami kutaltam daa liin-bala kemu ko.
REV 8:6 Kemin, kulaa ensel fetkal iyo bikul fetkal kutal-fukubip iyo dotu-lomdip kulaata naan-tabum o, kalip ko.
REV 8:7 Kamasi diildiil kaali, ensel maakup ma ami bikul kasiik fong kala naan-balaya, wom lap tuum tap sole, baabaa so, kiim so, kiiyo tal kabak-kabak-ke-lomdip am bokon kulaa dik-daa kulaasa ayo tildaak abamnu. Katale, tawaal alik ma kiin-abam-noma disa; tawaal iip maakup maakup ma kiin-aba-kiin-aba-kelu umi siksiilu uyo tawaal umi daam asuumano umi maakup ma uta kiin abamna. Kemin, as yakal ti tawaal kanolin tap ke balaasaal as kon wiis dik-daalin alik uyo ti kiin-tabamnu ko.
REV 8:8 Kulaa, ensel alep ma akal almi bikul ayo naan-balala, mafek mafek ma amdu aalap dukum, disa kawu as kiinba tap ayo binalip daak yol ok kumun tem unu ko. Ayo kanolule, yol ok anung ma tiltam tulu uyo, ti fan kiim alik-daap kelu. Katale, yol wok anung alep ma kabang-ali kano kelula, kabang yaap-kup ilu ko.
REV 8:9 Kanoluya, yol ok anung ma amdu tikiinlo kawu kulii-tildaak abamnu kabaak-ali aniing yaapkan ayo alik saak tem daalipla, sip uyo kiin-taba-lomdu alik kiin-taba disa kelule,
REV 8:10 kuno ensel asuum ma ayo almi bikul uyo naan-buluya, wakalkan dukum as dawang bak-tam-dakaba tap uyo, abiil tikiinlo kawu dik-tam daa, umbital tawaal kala dik-daa kulaasu kalawaami tawaal tem ok umbilaak liip tem ok fak-tam-daka-bam tal-unebu kuso, tip diim kawu wok bina tal-unebu so, ami diim abamnula, wok ayo mafak-alom kok alik kelula, unang tunum iyo ok tangbal kaa dok kata ma inam-nolip dinim kelip. Uyo kanolule, wakalkan kuumi win kaali, Kok Umi Miit o, ken-umbip kemin, unang tunum yaapkan deng-kup fikip-fikip bom-bilip iyo ok kok-kup tabamnala, ita ina-lom alik saaknip. Katale, tawaal alik disa; iip maakup maakup ma tawaal kaami liip tem ok taleba so, ok tal tam tip diim kawu uneba so, iyo ti kok alik ke-lom mafak kelu, umi siksiilu kaali, bokon asuumano kaami maakup ma uta kok taba-lom mafaknu ko.
REV 8:12 Kulaa, ensel ataling ma ayo bikul uyo naan-buluya, atan so, kayoop so, tam wakalkan so, imi atuk ayo mafaknula, am daan-yaamin kaami am anung alep ayo yaap-kup atan tik-daa-balala, am ayo falat-kup kalule, am daan-yaamin kaami am anung ma uta atan ayo kiinama disa kelu. Kemin, kutamiiwa-yaamin tap kelu. Kemin, am kutamiiwa-yaamin kaami am anung alep uyo kayoop so, wakalkan kaaso, kiin-taba-lom falala-kup kala bulula, am kutamiip ami anung maakup kaata kayoop so, wakalkan so, kiita kiin-ilom falala-kup kalolip disa ke-lomdu atin malang mafak tinilu ko.
REV 8:13 Kanola Jon nali awon bokol ma utamila, Abiil tikiin kaptamu falala tal-uneba kala, atam weng senile, ayo dukum-kup boko-lomda: Ensel kusnum asuumano bikul naanin disa tiinbip imi bikul dakaa-mokomip uyo tawaal diim unang tunum iyo alik ti tikip maakup angtiil yol awak uyo uta-mokomip o, kalalila, kaata atin aket uluum dap-tiip-nale, aket mafak kep-na kelula, tawaal diim kasel imi olen-yim-bam kebi no, kala awon bokol ayo kanum bakaba kala, kalali weng seni no.
REV 9:1 Kulaa, ensel awak akal kuno almi bikul naan-bulula, nayo wakalkan ma utami yi, Daak tawaal diim abebu uyo God ata tawaal kabaak-ami tem aalap kaa kaluusa kaami saal kii ayo, wakalkan ami kola atam kemile, tawaal kabaak-ami tem dukum uyo sinik mafak iyo imi angtiil yol kuluu-laamin am daanokomu ayo fenbip kemin,
REV 9:2 wakalkan ayo kii kaa kuluu-lomda tawaal kaami tem aalap sakbaalim dukum kaami saal ayo busuulala, wing aalap dukum ami as lak ultap o, kebip ayo tiltam taba-lomdu atan so, kayoop so, abiil kaaso, iyo katii tilnong mo-lomdu atan ayo dok kano kiinama dinim kelula,
REV 9:3 kuno keng kupluum as kon kanumin kon alik inin iyo abiil tikiinlo kaptamu as lak tem kutamu yakaba tildaak tawaal diim tilip kala, kalile, God ata titil tabin kuyalala, tawaal diim kalawaami malepkan ultap ke-lomdip unang tunum kiiyo, yemip o.
REV 9:4 God ayo bokoya-lomda: Ipta taba-lomdip iltipni kukup uyo kuluu-lom tikiin kon aa, as kon aa, mafek mafek tiltam tabemin kusnum kaaso uyo ku-mafak-dakamin daa; tunum unang imi tibi kun diim kawu God nami win dolnin dinim kesip, kiita-kup yam-mafak-dakamin o.
REV 9:5 Ibi tunum unang kii yelip taan-yaamin daa. Kela disa angtiil yol dukum ata-kup ti suunkup kuno kukaayim-bilip bii, kayoop awakal duk-duulin i! Kemin, kupluum tap kiimi tunum ye-bam yol kukaayila-yaabip kaali, malepkan kaami yol kuyila-yaabip tap kanum-yaabip o.
REV 9:6 Kayoop awakal kabak-ali ti unang tunum iyo ti angtiil yol dukum kaa-bamdipla, imi aket dukum fukunin kaali, taanupla kaata numi angtiil yol ayo dinimnuk o kem-yaabip. Lale, God ali kamboyila taanamip disa. Iyo ti kano-bomdipla angtiil yol ayo kuluu-laabip o.
REV 9:7 Yak kupluum kiili kalanolin ko: Ili hos tiin molin tunum imi hos kulu waasi dinan-unum o, kala yam-talal-kaabip tap kemin, keng kupluum kiimi dabom diim kaali, kamok kamok imi nafalum gol ta talalusip altap, kaata-kup kulaak tinilin, ale imi tiin matum kaali, tunum imi tiin matum kanolin tap kemin,
REV 9:8 kuno imi dabom kon kaali, taabala unang malo ma kiimi dabom kon batbat tap aa, imi kiil kaa batbat ale, atin taalin kemin, kaali ti busi elile layon e, imi kiil kanolin.
REV 9:9 Ili ain ta naam dotusip tap ayo kulaak tina-lom tup kun akiilipla, imi tam daa tal-unemin uyo ilmi bal kun weng kaa wok fon dukum umi biileng tap kemip.
REV 9:10 Kemin, imi wamsan kaa, melepkan umi ol duuk tap atul-kup tabin imi atul kaa ti akal ma kemin unang tunum ye-bilip, bii kayoop awakal kemin,
REV 9:11 keng o, kalin kupluum kiimi kamokim king tiin mosa kaali ti, ensel mafak dukum kemin, ali asuk tawaal kaami tem sakbaalkan dukum kaluulin kaami tiin mosa kemin, ami win kaali, Hibru kasel ili boko-lomdip Abadon o ken-yaabip. Grik kayaak ita boko-lomdip: Apolyon o, ke-bala ken-umbip. Kemin, win alep kaami miit kaali, mafek mafek ku-mafak-dakamin o, kebu ko.
REV 9:12 Kukup mafak so, angtiil yol dakamin so, umi tiltam taba-lomdu disa keluya, kulaa maakup diim kemin, kukup mafak so, angtiil yol dakamin so, okol alik ma alep diim so, asuumalo diim so, kiita kama tiltam tabam-nokomu no!
REV 9:13 Kulaa, ensel bukup ayo almi bikul uyo naan-bulula, as dan aye, as kon fuumin baan diim aso, gol so, kuyak-mim-daa dotusip uyo, God ami tibi diim kulu tolbu kemin, kaami iipyak tem kabangu, weng ma tildang tulu weng seniya,
REV 9:14 ensel bukup kaami bikul kutal-fukuba kaami bokola-lomda: Wok aalap dukum Yufretis dal kawu God ayo ensel atalingkal ili wok dal kawu sok ta de-yimulaya, kawu kutii-bam ilsip kemin, din-ilomdap til-daa-yim-baalawa tabanik o, kebu kala, kali ko.
REV 9:15 Kanubu kabak-ami miit kaali, God ali utamala, Tawaal diim kasel unang tunum iyo baan asuumano kemin, ensel atalingkal kiita, taba-lomdip baan ma kabaak-ata anulip taan-taan-ke disa ke-lokomip. Ale, baan alep ma ita kamboyip tambal-kup ilokomip o, kala-somdala, sok de-yimu dukum-kup nakat mo imtii-imtii-kela bombii ulmi am kutiisii uyo tiltam tulu kala, kalaliya kaata baayon o kalsa. Am kunolin diim kulu daan ilala kanolokomi no, kalsa uyo, tiltam tulula, God ayo ensel bukup kaami bokolala, ata til-daa-yim-baalala tabanip.
REV 9:16 Tal-daa-yim-baalala tabamniple, waasi dinin tunum yaapkan iyo hos daang kun diim kawu tiin tala-tala-keliwale, ensel bukup ayo bokop-na-lomda: Waasi dinin tunum ilmi-kup deng-kup fikip-fikip 200 miliyon o, kebip, kalawiita-kup bom-bilip o, nakale,
REV 9:17 kulaa lom tap visin o kebip anung uyo kukup-na utamiya, Hos yaapkan sole, tunum imbii-tal-unemin so, ili kanolin u kalile, waasi dinin tunum imi naam dildaak tinabip ayo bokon fiingim so, bokon binbin so, tuum titak ata fokoliwa, kiinala, tang mafak awon win butup tap ke mep hos dabom kaa busi dukum atul tabasa layon ami dabom dikin ke-lom ale, as dawang so, as lak so, tang mafak awon win butup tap so, ayo imi bon tem liip tiltamba tabebu kala, kali ko.
REV 9:18 Hos ami bon tem so, wamsan so, alep kabak-ali titil-kup tabin ale, atul-kup tabin kemin, tunum unang iyo yan-umbu kemin, hos ami wamsan kaali, inap dabom ultap ke-lomdula, unang tunum iyo yan-fakamsu ko. As dawang so, as lak so, tang mafak awon win butup tap kaaso, ke mafek mafek mafak asuumalo kanolin kiita, hos umi bon tem liip kawu tiltamdipla, tawaal diim kalawaami unang tunum malii ma ukdaa kuyak tii anulu taaniwa, tunum unang malii alep ita-kup tal aka ilula yawa-silip ko.
REV 9:20 Mafek mafek mafak asuum kuuta taba-lomdu unang tunum malo alep-kup kiili yelu taan-silip disa. Lale, asuk ili mafek mafek tiltam tabasuu kaali, utam-silip. Lale, imi aket fukunin ayo ma fal-siki kukup mafak kebip uyo kulaalin dinim ke-lomdiwa, imi kasen-fakamin kukup ilmi sikil tup talalu-silip uyo daang ukuwa, kewin dinim ke-lom, sinik mafak so, awem men so, kiimi fiyaap kaata-kup duu-bam aman dakaayin-bam ale, gol aye, silva aye, tuum kopa so, saak yak as aye, uta dotbi-lom kaata tunum so, olti so, imi sinik kiita talalu kutii kela kuyak tii-bomdiwa, kiita numi God namti kaa bilip kayi! kal-bomdip, kiimi fiyaap kaata duu-bam ale, aman dakaayin-bam kem-laabip. Kemin, kukup kaali, kulaa kensip disa; kanolin mafek mafek uyo disa kulu atam-laamin dinim, weng san-kaamin disa, tal-unemin daa. Lale, ti aman dakaayin-kup kem-tabasip.
REV 9:21 Kemin, tunum unang ili aket fal-siki-lom imi tunum yemin so, yokoop wakamin so, sadikimin aye, yukut inin so, umi kukup ayo kulaasip disa, ti kano yikik-kutal-fukusip ko.
REV 10:1 Mafek mafek tiltam tale-bulu utafii bokobi uyo disa kelule, kulaa ensel akal kusnum ma abiil tikiinlo tildaak tala atami. Ensel kaali, ti dukum ale, titil soyim ayo, ibin tem kutamu ibin ayo de-falala dap-tiilula, ke-bamda asak-lamlaam kutii-laaba tap ke-lom, ami dabom diim de-falala kutii kelula, ami tiin matum diim dawang ayo atan dawang tap falala-kup o, kalin ale, ami yaan kiiyo, alik am kun as kiin-bam dawang tabebu ultap kela atamila,
REV 10:2 ensel ayo sukon daam katip almi sikil diim buu namti, yak baa kutii, almi yaan tingtup ayo kulaak yol wok diim tiiba-kup, yaan awaan ata kulaak tawaal diim daa ke-lomda,
REV 10:3 ensel ami weng ayo dukum-kup layon atulim dukum ami weng tap naan-daalale, kulaa taman usiik fakabi dum fetkal fak-daalula, ensel ami maan telu ko.
REV 10:4 Taman fakabu uyo ditang kalule, kulu nayo maak fak-daa kaami weng ayo dolnon o, kem-silile, weng ma abiil lo kawu abiltap-kup tulu uyo tal bokop-nu: Aa, kapyo, taman fakabi dum fetkal fak-daalu kaami weng kaa dola-yaamin daa yo, kuu sawaanin weng kemin, kaltapni aket tem-kup bom-bulu yo, nakule,
REV 10:5 kulaa asuk ensel yaan malii binala daak yol ok daang kun diim aba, yaan malii binala daak tawaal diim aba kela atam kemile, ami sikil tingtup kaata kufo-lom abiil kaltam daa-lomda,
REV 10:6 God ami win awem kaata-kup kufo tituun weng boko-lomda: God suunkup ilin tunum ata abiil so, tawaal so, yol ok, mafek mafek alik abiil tikiin so, kawu bom-bilip iso, iyo God ata talalusa. God ami win diim weng ma uyo boko-lomda: God ali suunkup fenokoma disa. Kamala kulu, God ami weng kutiisa uyo lap abuulin tap kelu no, kema atami bokola ko.
REV 10:7 Sawaayak kawu, God ayo almi kuwaalin weng almi profet imi bokoya-lom: Sokomu kaali, kanu-mokomi no, kalsa uyo, ensel fet diim ami bikul naan-tabokoma kuyaku, God ami aket fukun-bamda kanolokomi no kalsa uyo, alik dinimnu kulaalokoma no, kala, ensel ata kanum bokola ko.
REV 10:8 Kulaa kamasi abiil kawu weng bokop-nu weng sanbi tap asuk boko-lomdu: Kapyo, yak ensel sukon katip kaa bam-daa kutii-kutal-fuku yaan malii kuu yol ok daang kun diim daa, malii kaata kutalak tawaal dii-som kela tolba kaali, sukon kup-ton o, kalba kemin, yak kuluulan o, naku.
REV 10:9 Kanola nayo yang ensel ami dik-daalile, Sukon katip kulaa kup-nan o! akile, ayo bokop-na-lomda: Kabi kuluu-lomdap inamnan aa! kala. Yale, bokop-na-lom: Inam-nokomap kala, daak mat tem unula, mat tem kaa yol tabep-tokomu. La, bon tem inapya kawu, mumu wok ami abaal tap inam-nokomap kayi! kala kanum bokop-nale,
REV 10:10 sukon katip kaa kup-na ayo kuluu inamnila, nami bon tem ali tifan mumu wok abaal altap kelu; katale, ina weli daak nalmi mat unu uyo ti mat tem ayo mafaknu ko. (Kaami miit kaali dok kata naa kalolip: Sukon katip tem kabaku ami miit kaali, mafek mafek tiltam talokomu kaami sang bokolu kaata ko.)
REV 10:11 Kemin, ensel ayo bokop-na-lomda: Asuk kulaata mafek mafek mafak tiltam abip malo ma kaami unang tunum iso, tunum miit yakal ilmi kusnum angtiil akal alik akal alik iso, tunum miit yakal ilmi weng kusnum bakamin iso aa, abip ma tiin molin tunum o, kala king aye, imi diim tiltam tabokomu kaami sang kaata bakayan o, kala ko.
REV 11:1 Kemin, ensel ayo as daang siksiila tika-yaamin ayo kup-na-lom bokop-na-lomda: Din Jerusalam din-ilomdap God ami lotu am diildiil kaptamu tiilawa, tiknu kala, kalalap kuluu-lom mafek mafek fuu God ami kukaalin baan diim kawu siksiilap, tiknu kalbap-kup, tunum unang tal lotu kebip iyo ding bokolawa, kanim kal kelu kalokomap. Yale,
REV 11:2 tam daak uti miit tem fatap diim kaali, tunum fatal imi tal God aman dakaalin baan kemin, kaa siksiimin daa yo. Am ma daanokomu kabaku tunum yakal miit ma waasi ita talaba-lom God ami abip awem Jerusalam kaptamu bom bii wasital asuumalo le, anung ma ke-lomdip abip kutam atin ku-mafak-daalip mafaknu kewip kemin, kiimi baan diim kaa siksiimin daa yo.
REV 11:3 God ayo bokop-na-lom: Nami tunum alep ma aket uluum dukum kuluu-lom tawaal fakabi talokomip kiili, nami profet kemin, kii nami win diim din unang tunum imi angtiil yol kuluulokomip kaami sang kaata bakayim-bulupla, imi aket ayo fal-siki-lom ban kemin kaa kambolin o, kalalip din bakayimbi am sin-yaamin ulmi-kup 1,260 ke wasital asuumanole, anung ma dakan-tiilokomip o, kala ensel ayo kanum bokop-na.
REV 11:4 Kemin, profet tunum alep iyo as oliv ultap kemin, kaami lap ok ayo ilaam tem wok abuu iilfolipla, kiin-umba tunum alep kiili, ilaam kiinbu ultap kemin, am bokon kala kuyak diisu kaami tiin molin God ami miit tem kulu ku-mikil-daa, tola-bom fenbip.
REV 11:5 Kemin, kanola waasi iyo ma taba-lomdip tunum alep kii yam-mafak-daalum o, ken-umbip. Lale, as dawang kaata, tunum alep imi bon tem liip tiltam waasi iyo fuulu taan-laan-umbip kemin, kawanta kanola yam-mafak-daalum o, kebip ili kanoyiwa saaka-laabip o.
REV 11:6 God ali tunum alep kiili titil kuyilaya, alep iyo God ami weng uyo unang so, tunum so, imi bakayim-bamdip, iyo God ami bokolipla, God alalta wom ayo dil mo-balaya, wom ayo tildaak abemin disa ke bii, imi weng uyo bakayim-bilip bii dinim kemin, asuk alep iyo God ayo bokolipla, alalta liip tem wok ayo fal-sikila tiltam kiim kelu kambolala liin aye, mafek mafek mafak so, uyo tawaal diim kalawu tiltam abamnu. Kemin, dok nolin kaata alep iyo God ami dik-daa-lom dong dokoyap kanolum o, kalip namti, God ayo alep imi beten weng uyo weng san maan tiiya-laaba no.
REV 11:7 Kanola lom dakan-unbom utamila, God ami weng uyo kuluu unang tunum bakayim-bilip bii dinimnule, kwin, saak wolti aalap dukum ma tawaal tem dukum kaluusu kabaaku tiltam taba-lomdu kutaltam kabak daalu alep iso, din-bi-lom alep ili kulaak banipla, saak wolti uta uta ke-lomdu alep iyo anulipla saaknip ko.
REV 11:8 Saaknip la, Jerusalam kasel ili kukup tambal uyo ma kuluu-lomdip tunum alep kii tambal-kup ma imaasip disa. Kuno kamboyiwa, alep imi as kuli uyo abip awaalik Jerusalam liip aalap kawu tiilip ilip kemin, sawaayak imi kamokim Yesus ayo Jerusalam kawu dabak as diim daa an-silip tap, ke-lomdip tunum alep kiikal Jerusalam kawu anula taan-silip. Mep kukup mafak kaa Jerusalam kawu tiltam tabasuu kaami win uyo boko-lomdip: Sodom o, kala-som Isip o, kala-som kem-yaabip.
REV 11:9 Kemin, tawaal kala dik-daa kulaasu kalawaami abip malo ma umi unang tunum so, miit ma ma so, tunum miit yakal alik weng kusnum bakamin so, tunum miit kusnum yakal ilmi angtiil kusnum kutiiyin aa, Jerusalam kaptam bom-bilip iso, alik iyo kuno tunum alep iyo tiin itam kamboya alep imi as kuli uyo talalu foko im-din buluulin disa, kuno maas kamboyipla kemin, tal itafiin una-tala-ke-bilip bii, am asuumano le, anung ma kelip.
REV 11:10 Siin sawaayak kaptoowu God ami profet alep kiili, saaknin disa ilomdiwa, alep imi bon tem liip kawu angtiil yol kuuli, kutaltam daa-lom tawaal diim kayaak unang tunum imi diim abamnu kamboya-silip. Kemin, tunum unang ili bokoya-lom: Alep kii, ti tanke taanip o, kal-bomdip, tong diliil fakayim-bamdip ima waan tini-bam im-bom ale, mafek mafek masiim aptum e kola una-tala-ke-bam kanumip ko.
REV 11:11 Kanola bii am asuumanole, anung ma uyo disa kelule, God ayo tunum alep iyo yim-fola asuk tam tiiniwa, tunum unang kii itamiwa yi, Daa tunum alep kii taanbip. La, asuk alep tam tiinip kala, kala-somdiwa, unang tunum iyo suunin dukum ayo kuluuliwa,
REV 11:12 kulaa profet alep iyo weng seniwa yi, Abiil kawu weng ma tulu uyo bokoya-lomdu: Alep ibi tiltam tilin o, kalu kalaliwa, abiil kaptam bana-biliple, alep imi waasi iyo titam daa itafii-bam kem-silip, alep iyo yakaba tam ibin tem abalip tam abiil tikiin unip ko.
REV 11:13 Alep una-bilipya kawu, bim aalap ma kutaltam daa-lomdu tawaal kulaaso filifili ke-buluya, abip aalap Jerusalam abip malii ma balata daak tawaal abamnale, malii betikal ma ata-kup yaap kelu kemin, abip malii kaa balata daak tawaal abamnu kaali, as so, tuum so, ayo duula binalu une-bulu tale-bulu ke-bamdu, tunum unang tausin o kala-laabip almi-kup fetkal (7,000) kalawiita bim uta anulu taaniwale, aptum kusal malo ma kamboyu iyo utamipla, Kaali ti atin kukup mafak u, kalalipla, atin suunin awaalik dukum ke, God ami win ayo kufon-bam ale, God kapta-kup titil miit kayaak o, kemip ko.
REV 11:14 Kukup mafak so, angtiil yol dakamin so, imi maakup diim sole, alep diim so kawu tiltam taba-lomdip disa keliwa kemin, kukup mafak so, angtiil yol dakamin so, wokol alik ma asuumalo diim kaata-kup kama tiltam tabam-nokomu no!
REV 11:15 Ensel fet diim ayo kulaa mafiing mafiing ami bikul ayo naan-bulula, weng seniya abiil tikiin kawu aptum kusal ensel iyo weng dukum-kup boko-lom: Numi God Dukum so, ami Uldaa-dabuula Tiltam Kamokim Kesa Tunum Kraist aso, alim ita ita ke mafek mafek mafak uyo alik welip kabaak banu, alim imi titil uta uta kelu kemin, alim ita-kup am bokon kala dik-daa kulaasu kaa suunkup ita tiin moliwa, ilokomu no, kebip kala, kali ko.
REV 11:16 Kanu-bilipla, tunum kamok kamok 24 iyo sia diim God ami mepso kulu tiinbip kii, alik tilik-duung fakela daak tiin-ilom tiin mutum ayo wak-banalip tawaal una ke-lomdip, God ami lotu kamaan-bam ami win uyo kufon-bam ke-bam ale,
REV 11:17 bokolip: Titil miit kayaakim God kabi sakbaalim ale, kabi siin kaali, kano bom-biisap aa, kamala kalakal kano bom-balap kemin, kapni titil ayo, uta uta ke kaltapta tiin mobap kaa, yaap ke yo, takan-kaabup o.
REV 11:18 Kulaa, kapni unang tunum saaknin daa bom-bilip imi yim-bak-saan-bam, angtiil yol kukaayim-bam ke-mokomap kulu mepso tulule, kapni unang tunum taansip imi yim-bak-saanokomap wokol ti kuno umbital mep tal kelu. Kemin, kapni profet weng tem bakamin tunum kapni ok kutal-fukusip iso, tunum kusnum iyo kapni lak duu win kufup-tin tunum iso, ili mafek mafek tangbal kuya maan tiiyokomap kaali, tika-lomdu, tunum win dinim so, win tibin so, alep maakup tik-nokomip uyo mep tulu kemin, kulu kapni tawaal diim unang tunum yan-umbip tunum kiili, anulap disa ke-lokomip kulaa, mepso tulu kemin, am bokon kapni lak duulin disa unang tunum ili utamipya, God kaali, nulmi ban kemin kaami kalan kaata, aket atul dap-telula, angtiil yol uyo kuyokoma kala kalaliwa, iyo aket atul tabeyu no kala, kamok kamok 24 yo, kala-laabip kiiyo, kanum bakamip ko.
REV 11:19 Ensel ali God almi am diildiil abiin awem abiil tikiin kaptam bombuu kaami saal ayo busuulala, unang tunum iyo titam-daa atamipla, God ami weng de kutiisa kaami mafek mafek bokis namti kabuu nu, kalalipla utamsip ko. Utamiwale, abiil tikiin ayo baabaa-kup dabaka-balale, weng yaapkan ma bakan-tabamnule, taman ayo kol-bulule, bim ayo abiil tikiin kaptamu tiltam tabamnula, wom lap awak ayo tildak abamna kala, utami ko.
REV 12:1 Kalawaali Jon nami lom tap du utamsii kaami sang kaata bokolokomi. Kemin, abiil tikiin uyo mafek mafek disa akal almi kusnum ma tiltam tulu namti kalabe. Unang ma bom buu kuuli, man fuk-duulon o, kem-sulule, atan ta de-falala umulaya, kayoop ayo umi yaan minlo tem tiltam yaan ayo kufowula, umi yaan ayo kulaak kayoop ami diim tii bomdu fan-kaa-bam ilu ko. Unang kuumi dabom diim kaa wakalkan talangkal kii tam tolnipla, man ayo ti tolon e, ke-balaya, awok uyo yol aalap dukum kewa-balala, dukum-kup wolmu ko.
REV 12:3 Mafek mafek daa akal almi kusnum ma asuk abiil kawu tiltam tabu atami kaali, Makalim ma ayo tiinba, ami angtiil kaa isakfulut ale, ami dabom kaa fetkal, kuno tam ami dabom diim kaa kong nakalkal kelale, tam dabom fetkal kanolin ayo ti alik maakup maakup kano kamok kamok imi nafalum kanolin kaaso bom ilin.
REV 12:4 Kemin, Makalim kaami umsan faklet ta dabaa-lomda wakalkan malii dikelna tildaak tawaal diim abamnip. Katale, wakalkan malii alep ma ita-kup uktayila abiil tikiin kawu ilip kemin, inap dukum ayo bom-ilila, unang uyo man du kem-sulule, man ayo an-inamnon o kalala, tal unang ulmi mepso kulu tiin-lom, bon-toko kutii fen-sili man ayo duulu kala, kalali yo, kala fena ko.
REV 12:5 Unang uyo man tunum duu kem-sulule, abil maak fak-daalin tap ensel ayo tal dabuu dap-tama tam God ami kolale, yaap-kup ila kemin, man kaali, God ata ulduulaya, ali kamokim kesa tunum kemin, kaata am bokon dik-daa kulaasu kaami unang tunum miit ma miit ma imi titil-biki-lomda tiin ma baa tiin mo-balaya, ili ami weng so, ami kukup so, ayo ke-lokomip dinim. Ami kukup so, weng so, kaata-kup kutal-fuku kulii-tabe-mokomip o.
REV 12:6 God ami aket fukunin kaali, yang sep disanang bokon kawu unang kuumi sawaan-yaamin baan diim dotu kutiiwiya kawu bom-buluya, nami ensel ita din tiin molip bii am almi-kup 1,260, wasital asuumano le anung ma kiita dakan-tiilokomu no, kala dotu kutiilale, kulu unang uyo ukadaa din kaptam banu ko.
REV 12:7 Maikel so, aptum kusal ensel kusnum iso, nikil yakal keliple, Makalim akal almi ensel mafak iyo tiin mo kelaya, nikil abiil tikiin kawu, waasi dinan-kulii taba din-bi-lomdip,
REV 12:8 Maikel nikil ita ita ke Makalim so, ami ensel iso, iyo yim-baak tabiilipla, God ayo Makalim ami bokola-lomda: Kapso, kapni kaptum kusal ensel mafak kiiso, ibi abiil tikiin kalawu kamboyi suunkup ilokomip disa yo, yakale,
REV 12:9 God ami ensel Maikel nikil iyo taba-lomdip Makalim nikil iyo alik yan-buk-duu yim-baalip tildaak tawaal diim tilip ko. Makalim tunum mafak ali sawaayak God ami waasi kela-bomda, weng mafak bakaan-bam ke-bisa. Kemin, ami win kaa Setaan ata taba-lomdala, tawaal diim kayaak unang tunum iyo kasen-fakayim-balaya, alik iyo ami weng kaata-kup weng san-kaa-bamdip ban wakan-yaabip o.
REV 12:10 Jon nami weng ma weng seni namti kala bombuu. Weng ma uyo abiil tikiin kawu dukum-kup naan-bam bokolu ko: Siin kaa, Setaan ali God ami miit tem tola-bomda kutamiip so, am taap so, numi naktum kusal God ami lak duulin unang tunum iyo yim-bak-saanin weng uyo bakaala-laaba. La, kamala kalawaali, God alimal ita ita ke-lomdipla, tam taba-lom Setaan nikil kii fotabam-nipla, abiil tikiin kalawaali kelalip tawaal diim daak unsip. Kemin, God ayo almi unang tunum iyo dong dokoya imi iliim ayo boya disa kelu kewale, almi titil kaata mafek mafek alik uyo tiin mole, almi man ayo ulduula tiltam kamokim kesa tunum Kraist ata tawaal diim kalawaami kamokim ke tiin mo ke-lokoma.
REV 12:11 Kemin, God ami Sipsip Man Yesus ami tiil kaata numi kuya as diim taanala, ami kiim kaata sing-tam-daa-lomda numi iliim ayo boyase. Kemin, kaami liip kabangu nulmi nak-tunum kusal God ami lak duulin tunum unang ili titil-foko-lom, God ami tituun weng uyo titil-foko unang tunum iyo bakayila-tal-une-bam Setaan ayo ilelip tiil bana kambolip ko. Kiilile, ilmi angtiil kaami aket ayo ma duu-somdipla daa; imi aket dukum kaali ti, Yesus ami waasi ita taba-lom nuyo yelip taanokomup. Lale, okok kemin ayo ti suunkup kanumum o, kem-yaabip.
REV 12:12 Setaan ali abiil tikiin ayo kambola tabana. Kemin, abiil tikiin kasel ibi fiyaap duubip ale, tawaal diim kasel kiptale, aket uluum awak dukum uyo fakabip. Kemin, kaami miit kaa, am kamala kuluwaami diim kaali, Setaan ayo daak tawaal diim so, yol ok daang kun diim so, kaba-somda ayo utamala yi, Nali ti kukup mafak ayo suunkup kanu-mami. La, uyo kanubile, God ata taba nami ok ayo lo kutiip-na dinim ke-lokomu kaa mepso tilbu kala, kalalaya, Setaan ayo ti aket atul dukum ayo God ami kola-somdala, tawaal diim kasel so, yol ok daang kun diim kasel iso, ibi ti yam-mafak-daka-balaya, aket uluum dukum uyo tiltam tabe-mokomu no kala, weng uyo abiil tikiin kawu kanum bakabu kala, kali no.
REV 12:13 Kemin, kanola Makalim ali utamaya: Awu, nali nam-baalip tildaak tawaal diim kalaba tili kala, kala-somdala, ayo kama alokso man ma duubu ami awak uyo welon i! kala-lomda fon-babala tabanu. La,
REV 12:14 God ami awon bokol balkun dukum dukum alep ultap uta unang kuumi kuwala tam daa unbilin God ami saak am unang tunum dinim bokon ku-umba kawu din bom-buluya, God ami ensel ita tiin mo-bom-bilip bii wasital asuumano le, anung ma kelu kabaku Setaan ali dok kano-som welama dinim; kuno kewala yaap-kup ilu.
REV 12:15 Makalim ami aket fukuna kaali, ti unang kuu ok ta wan kulii una-bala mam bapliwa taanuk i! kala-lomda, kulaali ami bon tem kaptamu wok busuu kulaala, taba fakan-um-bom unang ulmi daang-tem-lo kutoop bana. Katale,
REV 12:16 God ali unang kuumi dong dokowa-lomda, tawaal bikilala, wok ayo alik Makalim ami bon tem kawu bisuu kulaala tulu ayo kalo tawaal tem kulaak ban-ilomda data disa kelale,
REV 12:17 Makalim ali unang kuuli, wan dalaali kala-lomda, aket atul dap-telula, kulaali unang umi man loop kusnum kiiso dinum o, kala-lomda ayo din aba fen-tal-unema. Kemin, unang umi man loop malo ma kiili, God ami lak duulin tunum unang kiita kemin, God ami weng bokoya-lomda: Ti kanumin o, keba, kaata ti dotu kutal-fuku-bom ale, Yesus ami sang so, Yesus ami tituun weng so, kaata-kup ti titil-fak-daa bakayim-bam kem-yaabip. Kemin, Makalim ayo din yol ok balang tem kulu tola bom ila ko.
REV 13:1 Kulaali Jon nalmi asuk lom tap du utamsii uyo saak wolti ma yol ok kumun tem liip kawu tiltam tala atami, ayo ti dabom fetkal kelale, ami dabom diim kaali, kong nakalkal kelin kemin, maakup maakup imi tip diim kaayo, kamokim king imi nafalum uyo bombe ale, imi dabom alik kanolin fetkal kiili, win maakup e kala dola-dola-kesip kiiyo, God ami atafiimin weng bakaalin kaata dolsip kala, kali.
REV 13:2 Kemin, yol ok kumun tem kabaak-ali saak wolti kaali, lepat o, kala busi aalap dukum atul-kup tabasa altap ale, ami sikil bulung kaa wolti ma beya yo, kebip ami sikil bulung batbat kanolin tap ke, ami weng kaali, layon ami olmin dukum tap kemin, Makalim Setaan ata taba-lomda ami titil sakbaalim ayo yol ok kumun tem saak wolti ami konba-kup, bokola ko: Kabi nami okok kemin tunum kemin, nami titil ata-kup kuluu-lomdap, God ami unang tunum iyo kuno yam-mafak-dakan-tal-uneman o, aka ko.
REV 13:3 Setaan ami ibakamin kukup namti kabuu. Kanolaya, am bokon kala dik-daa kulaasu kalaami unang tunum iyo utamiwa yi, Yol ok kumun tem umi wolti ami dabom ma wan kong tup aalip taanakin tap ke, ami abang ayo tak-tam-daa umbu no! kala-lom awal-bamdip iyo tiltam yol ok kumun tem kayaak ami saak wolti ami unang tunum ke-silip.
REV 13:4 Alik iyo utamipla, Makalim ata kanolin titil dukum ayo saak wolti ami konba no, kala-lomdip Makalim kaami fiyaap ayo don-bam aman dakaan-bam, saak wolti ami fiyaap kaayo, don-bam aman dakaan-bam ke-bam bokolip ko: Alik ibi yol ok kumun tem kayaak saak wolti titil soyim altap ma bom-bilip disa le, ibi taang-kala-lomdip saak wolti ayo dimelip kabaak banoma disa yo, kemip ko.
REV 13:5 Kanola, God ali yol ok kumun tem saak wolti ayo kambolaya, ayo boko-lomda: Nali nalta nalta ke-lom God ayo akaansi no, kal-bomda God ami win uyo ku-mafak-daala-lomda, unang tunum iyo ata tiin mola bii kayoop almi-kup 42 kiiyo dakan-tiilip kemin, kanolin kabak-ali wasital asuumano le, anung ma kiita duk-duulip kemin,
REV 13:6 saak wolti ali God ami weng mafak mafak uyo bakaan-bamda, ami win ayo ku-mafak-dakaan-bam ale, God ami abip abiil tikiin kaali, atafiimin weng baka-bam ale, kuno abiil tikiin kasel imi itafiimin weng uyo bakayim-bam kema ko.
REV 13:7 Kanola God ayo kuno kambolaya, Yesus ami unang tunum iso din-bilipla, bii saak wolti ata ata ke-lomda, Yesus ami unang tunum kiili kulaak banipla, God ali kuno Setaan ayo ata-balala, tunum miit malo ma iso, abip ma ma imi unang tunum so, miit kusnum yakal ilmi weng kusnum bakamin tunum so, akal miit kusnum kusnum iso, ata alik imi kamokim keya bomda tiin mo-balaya,
REV 13:8 kamosinim kawu, God ami tawaal kala dotuulin dinim ilomdaya, Unang tunum, kalawiita nalmi unang tunum kep-nokomip o, kala-lomdaya, imi win ayo sukon tem kabaku dola kutii-lomda, kalawiita naso suunkup ilokomup o, kalsa. Sipsip Man Yesus aalip taanda asuk tam tiinse ata sukon kala tiin mo kutal-fukusa. Kemin, tawaal dik-daa kulaasa kaami unang tunum ili saak wolti ami fiyaap ayo don-bam ami aman dakaalokomip. La, God ami suunkup ilin unang tunum kiita-kup, saak wolti ami fiyaap kaa don-bam aman dakaalokomip disa ko.
REV 13:9 Kipyo, God ami unang tunum kipta talang tem so kemin, nami weng kala baka-mokomi kalawaali, dotu weng senin o kala-somla kemin,
REV 13:10 kanola God ali waasi kii fokola tal Yesus ami unang tunum maakup tap alep tap iyo sok de-yimulin aa! kala namti, kuno sok de-yimulokomip. Ale, God ayo waasi malo ma ili kuno wan kong tup anulip taan-yaamin o kala namti, kuno wan kong tup anulip taanokomip. Yesus ami lak duulin tunum unang, ibi kaptum kusal ita mafak kamayip uyo ipkal duu-tiimin daa. Aa, daal keyu God ami weng so, kukup so, kaa kela-yaamin daa. Ti kano dotu yikik God ami lak uyo duu-bomdiwa yo!
REV 13:11 Jon nayo, kuno utamila, Saak wolti ma tawaal tem kawu tiltam taba atami, kaami kong alep kiili, sipsip man ami dabom diim kong altap kala atam-somale, ami weng kaa weng seniya, Makalim ami weng dukum tap ami weng ma bakaba kalali weng seni ko.
REV 13:12 Tawaal tem kabaak-ami saak wolti kaali, yol ok kumun tem kabaak-ami saak wolti ami okok kemin ok kumun tem kayaak ami titil kaa katip daa, akal ma kelin kemin, ali tawaal tem kayaak saak wolti ami kolala, tawaal tem saak wolti ayo ami tiin diim kawu bomda, ayo fiit kuyak daa-bomda, tawaal kala dik-daa kulaasa kaami unang tunum alik imi bokoya: Ibi boko-lom yol ok kumun tem saak wolti abang dal-soyim kaali, numi kamokim o, kemin o, kala fiit kuyak daka-bam bakaya ko.
REV 13:13 Tawaal tem kayaak saak wolti ayo dot kaamin o, kala mirakel dukum akal kusnum kusnum ayo nuu-bamda, ma kaali ti, disa weng ata-kup bakamala abiltap-siik abiil tikiin kawu as dawang uyo tildaak tawaal diim abamnula, unang so, tunum so, alik iyo utam aket alik tam banu ko.
REV 13:14 God ali kano tiin-kup ata-bom-balaya, tawaal tem kayaak saak wolti ayo kanolin mirakel ayo yol ok kumun kayaak saak wolti ami tiin diim kawu kanu-bamdala, ami tem kabangu tawaal diim kasel imi waka-taka-bam kasen-fakayim-bamda; Yol ok kumun kayaak ayo wan kong tup aalip mepso taanakin. Lale, asuk tam tiinse, kibi as fuk-duu-lom taa kutii-lomdip, yol ok kumun kayaak ami sinik tii-lomdipla, Kulaa numi god o, kala lotu kamaalin aa! kalala,
REV 13:15 kuno ma kaata, God ali tawaal tem kayaak saak wolti ayo kuno kambolaya, ata taba-lomda yol ok kumun kayaak ami sinik dotu kutiibip ami mam kolaya, sinik dotu kutiibip ayo tam tiin kawang ke-lom weng bokola ko: Alik kibi nami fiyaap kaata-kup duu-bamdip aman dakaap-nin disa kebip kemin, ibi anuli saak-nokomip o, kema.
REV 13:16 Kemin, tawaal tem wolti almi okok kemin imi bokoya-lomda: Ibi din yol ok kumun tem kayaak ami win ayo ti unang tunum alik imi sikil tingtup diim aye, dabaal kun diim aye, kabaku dolmin o kalala, fan kulaa dolmip kemin, kiili kamok kamok iso, tunum unang iso, bung kayaakal iso, iip kulu ilin iso, sok de-yimulip disa kulu okok kemin unang tunum iso, disa yaap-kup ilin unang tunum iso, alik kiimi sikil diim aye dabaal kun diim aye uyo ti yol ok kumun kayaak saak wolti ami win-kup dolmip ko.
REV 13:17 Yol ok kumun kayaak okok kemin tunum unang alik, imi namba ukuya-ukuya-keliwa, namba kaami sang uyo faldak yol ok kumun kayaak ami win diim kulu tiilu kemin, kanta ma yol ok kumun tem kayaak ami win ayo ma ami diim kawu ma dolnin dinim kela namti, ili kaa keyipla tal mafek mafek ma molokoma disa le, mafek mafek ma kuyala ita molokomip dinim o.
REV 13:18 Kanola tunum aket fukunin tangbal ata nami weng bokolokomi kaluumi miit uyo utamdala, dok ami miit kaata bakaba kalala, uta-mokoma kemin, ibi kaa talalu aket fukunin aa! Kalawaali faldak-tiimin weng kemin, yol ok kumun tem kayaak saak wolti ami namba uyo 666 kalawaata kemin, namba kalaali tawaal diim tunum ma ami win ultap kelu, kemin kanita aket fukunin tambal so namti, ali kuu utafii-bamda kaami miit uyo, U, kuu kanolin kemin u, kalolip ko.
REV 14:1 Jon nayo lom tap ma duulila, mafek mafek kusnum akal alik ma utamsii kaali, Saiyon Tikiin kaa God ami abip diildiil Jerusalam kawu bombuu kemin, Sipsip Man ali Saiyon Tikiin kawu, tola-bom-balaya, unang tunum almi-kup 144,000 kiita iso tolnip. Imi dabal kun diim kaali, God ata Sipsip Man Kraist ami win so, almi aalap God almi win so, kiita dolsa.
REV 14:2 Kemin, nali weng seniya, weng ma abiil tikiin kawu, tulu kaami biileng kaali ti, wok fon eng dukum uunba tap elile, taman bikin-yaabu tap aye, tunum yaapkan imi gita so, buung bengkan tambal ma dakaamin kaami weng tambal ultap ma weng seni yo.
REV 14:3 God ali, almi baan diim tiin-bomda alik imi tiin mo-laaba kawu kuno God ami mafek mafek tunum tap atalingkal yakal kelip, kuno kamok kamok 24 iyo God almi mepso kulu laabip. Kemin, tunum unang almi-kup 144,000 kiita, God alimal imi tiin diim kuluwu tola-bomdip alokso baal ma wiimip ko. Tawaal diim tunum unang alik imi iipyak tem kawu, Yesus ata taba-lom unang tunum 144,000 kiita-kup ulela-lom imi iliim kaata, boyase kiita-kup baal kaali, yaap utam-ilom kaal-kelamip.
REV 14:4 Tunum unang kalawiili sadikimin dinim aye, tunum din unang din iyo yam-mafak-dakamin dinim kebip iltap ke-lomdipya, ili atin tangbal-kup laabip kemin, atin God ami lak kaata dukum-kup duulin. God ami Sipsip Man kaami dok una uyo ti iso, yakyak ken-tal-unemin kemin, tawaal diim kalawaami unang tunum imi iip kabaaku God ali kiita-kup ulelnala, Yesus ata saak-alomda, kiimi iliim ayo boya-lom yim-taldang daase. Kamasi langabip ima diildiil kulii-tal kapni kup-tup o kala, kukaayin ultap ke, 144,000 unang tunum kiita-kup God aso, Sipsip Man so, alim ita kamasi kiisiik foko nulmi alik-daap kelip o, kalsip.
REV 14:5 Kemin, ili tawaal diim kalawu bomdip ilmi angtiil lak kaata-kup dakaamin aye, kasen-fakayim-bam ken-laabip disa kemin, ili ti God almi tiin diim ayo uluum disa.
REV 14:6 Kemin, Jon nali talaalila, Ensel kusnum ma umbitam asal iip-iip kabaaku tam-daa tal-bomdaya, God ami weng tangbal disa ke-yaamin disa; suunkup ti kano ilin uyo kulii-tala atamila, weng kaa tawaal diim unang tunum imi tal bakayon o, kala, uyo ti tunum miit yakal ilmi angtiil kusnum so, tunum miit ma ma so, tunum miit kusnum yakal ilmi weng kusnum bakamin aa, abip ma ma kaami unang tunum iso, alik imi weng dukum-kup bokoya-lomda:
REV 14:7 Kipyo, God ami yim-bak-saanin am daanokomu uyo ti mepso talabu kemin, kibi ami atul kaa suun-bamdipya kayi! Yale, ami win uyo kufon-bam, fiyaap duu-bam tunum unang imi bakayim-bamdiple, Ali tunum dukum ale, ali titil tabasa no, yakan-kaamin o. Alta mafek mafek alik iyo dotusa tawaal so, abiil so, yol ok so, tawaal iipyak tem wok so, talalu kutiisa. Kemin, kaami fiyaap kaata, don-bam aman dakaalin o, kala-somya ko.
REV 14:8 Kamasi ensel ma asiik weng kutal daala unala, kulaa asuk ma asiik tal-ilomda boko-lom: Ibi weng tambal kalawuuli, weng sanalip ko, kala kanum bokolale, abip diildiil Babilon uyo kulii daak aba disa kelula, siin kaali, Babilon kasel ita ti kukup mafak nuu-bam ale, tawaal diim kalawaami tunum miit ma iyo sadikimin miit alik uyo kukuyim-bam ke-bilipla, kulaa yakal kanolin kukup uyo dik-daa kuluu kaal-kesip. Kemin, Babilon kasel imi kukup kanun-umbip kaalile, ok mafak kukaayin-bilip, inbi-lom babon-tal-unemin aalap dukum ken-umbip tap. Lale, kaata Babilon uyo alik disa kelu no, kala ko.
REV 14:9 Ensel iip ma tala akal weng uyo kulii-tal boko unale, kulaa ma ayo atin mafiing tem tala ata weng dukum-kup boko-lom: Dok nolin kapta yol ok kumun tem kaami saak wolti so, wolti ami sinik tunum ililta dotu kutiibip so, kiimi bakayim-bamdip: Alep ibi numi kamok te! kemip namti, imi namba yo, kala win faldak kuluu tiisu uyo dabal kun diim so, sikil diim so kawu dolnip buu namti,
REV 14:10 kiimi kukup mafak uta, God ayo aket atul dap-telula angtiil yol ayo kukaayim-bala, uta-mokomip o. Angtiil yol kabak-ali wok mafak titil-kup tabasu ayo sing daala daak kap tem unu kuyila inamnip imi mat tem kabaak-ami yol tabeyila-laabu tap ke-lomda, God ayo kiili fokola yak as aalap dukum kiin-bamdu tang mafak awon win butup tang tabeba tap kutam dakan-umba umi tem un-ilomdiwa, angtiil yol awak dukum ayo kuluu-lomdip, titildak daaliwa yi, God ami ensel tituun-kup tabasip so, Sipsip Man Yesus aso, ili God ami abip kawu bom-bilip kala, kalalip itafii-mokomip.
REV 14:11 Kemin, unang tunum kiili, yol ok kumun tem saak wolti so, ami sinik talalu kutiibip so, iyo bokoya-lomdip: Alep ibi numi kamok o, kala kamboyip saak wolti ami okok kemin ita taba-lom imi namba yo, kala win faldak kuluu tiisu uyo, unang tunum kiimi angtiil diim kawu dolbip kala, kala-somdaya, God ayo yim-baala yang as tiil un-ilomdip, angtiil yol dukum kuu ma utamsip dinim kuuta kuluu-laa-mokomip kemin, wing kabaak-ali ti, kano suunkup kiin-bulula, angtiil yol dukum uyo disa ke-lokomu disa; ti suunkup kiinin-kup ke-bam ilokomip o, kala ko.
REV 14:12 Kanola God ami lekmin am uyo mepso talabu kemin, Jon nali Yesus ami unang tunum kipni weng ma bokoyon o, kalalila kemin, weng san bom-iliwa. Ibi God ami weng kuka-daasa uyo, dukum-kup kutal-fuku-som ale, Yesus ami lak ayo dakaa-bam kemipla, kanola, mafek mafek mafak tiltam talokomu ayo ti kanola kela-laamin daa; dukum-kup titil-foko Yesus ami diim kabaku fewa-bomdip ami lak kaata ti kano duu-biliwa yo.
REV 14:13 Kulaa nayo weng seniya, abiil tikiin kawu weng ma bokop-na-lomda: Kabi weng kalawuuli sukon tem kabaku dola boko-lomdap: Kamala kulawu dok kanolin kipta Kamokim Yesus ami diim fewa-biliwa, waasi iyo tal yelip taanip namti, ibi yaap God aso bom fiyaap-kup duu-mokomip. Kanolin kemin, ibi aket dukum fukunin disa yo, kala-lom dolnan o, kalale, kulaa God ami Sinik ata maan tii-lom bokola ko: Ee, tifan yaap bokolap ko. Kiimi ok dukum fiitbip so, aket uluum so, namti kulu disa keyilula, kun-fan-kaa-mokomip. Kemin, God kaa imi ok uyo utamala, Ok tangbal kebip kala kalalaya, kiimi fiyaap uyo duu-bam yaap kelip o, yakale, yakal aket filit kala bom fiyaap duu-bam ke-mokomip o, kala maan tiiya ko.
REV 14:14 Jon nayo, asuk lom tap ma duuli kabak-ali utamila, Tawaal diim tunum altap ma tam ibin namaal diim kabaaku tiinba kala atami, ami dabom diim kaali, kamok kamok imi nafalum gol ta talalusip kaata kulaak tini-lomda, ami sikil kabaku yeng atulim ma kutal-fuku kela atami ko.
REV 14:15 Ensel ma ali God am lotu am diildiil awak dukum abiil tikiin kawu tal-ilomda, ata dukum-kup tunum ibin diim tiinba ami naan-daala bokola: Mafek mafek alik tawaal diim kala bombuu uyo kulaata as lap abusuu kemin, kuumi am mafiing namti kulu tiltam tulu, kaltapni yeng ayo kuluu-lomdap as lap iyo dakaman o, kalale,
REV 14:16 kulaa, fan tunum ibin namaal diim tiinba namti kulu tildaak tawaal aba-lom yeng kuluu-lomda tawaal diim kaami ima tiilba maakup bakel bii alik disa kelule, kulaala ko.
REV 14:17 Nayo asuk talaalila, Ensel akal alik ma God ami lotu am diildiil abiil tikiin kawu yeng atulim akal kusnum ma kaata kulii-tala atami ko.
REV 14:18 Ensel ma kaa bombe ata God ami as dan aye, as kon fuumin baan diim abiil tikiin buu umi as kaa tiin moba kemin, kulaa kelala tal ensel ma yeng kutal-fukuba ami weng umola-lom bokola ko: Kulaata tawaal diim kaami sok iil wain lap uyo yam tem daabu kemin, kapni yeng kaakal kuluu-lomdap sok iil wain lap yam tem daabu uyo dakaman aa! aka ko.
REV 14:19 Kula bokola aka-kem-salale, ensel yeng kulii-tildaak tala kemin, tunum yeng kuluu sok wain lap iyo bo-lom fokolip daak yaan baan diim unula, yaan tibin una-tala-ke-bilipla, sok lap wain ok tildaak abe-bulu lan-umbip tap, kanola, ensel ayo unang tunum fokola daak angtiil yol dakamin baan diim abamnipya, God ami aket atul aalap dukum ayo kulaala din unang tunum kiimi diim abemu atamile,
REV 14:20 yak yaan baan diim kaa tam Jerusalam kaami uti miit tem kawu buu kemin, tunum unang wain lap diim tibii-bilip, wain lap ok tiltam tale-bulu lan-umbip ultap ke, ensel ayo tunum kiiyo, yim-bak-mo yan-tiklit-bilipla, kwin! imi kiim ok an-kutama taba ami kilomita ayo ti 300 o, kala-laabip kelaya, ayo sakbaalim dukum ke-lomdu kiim ok kaami alala kaltam banemin kulaa, uta uta ke-lom tunum ayo akaalu ko.
REV 15:1 Kalawaali Jon nami lom tap du utamsii kaami sang kaata kemin, nali abiil tikiin titam daalila, Disa ukol ulmi mafek mafek kusnum ma tiltam tulu utami uyo ti sakbaalim, nayo utamila, Ensel fetkal iyo mafek mafek fetkal kulii-tilip kiiyo, ti angtiil yol unang tunum imi kukaayokomip kaami mafek mafek fetkal kiita ko. Tunum kii kanolin angtiil yol dukum atin mafiing namti kulu utam ale, God ami aket atul uyo disa kelula, God ayo unang tunum kii ma keyila angtiil yol uyo maso ma kuluulokomip disa yo.
REV 15:2 Kuno mafek mafek kusnum ma atam talaalila, Kaali ok kumun altap ma alalsa ayo ti milim wok dinim falala-kup kalsa uyo am glas ultap ale, kaami dawong kaa as dawang tap kanolin. God ami tunum unang ili mafek mafek yol ok kumun tem umi saak wolti ami sinik kaata talalu kutii-bom aman dakan-bamdip kambolip kuno ami namba o, kala faldak kulu tiisu ma imi dabal kun diim kawu dolsip disa, ita ita ke yol ok kayaak saak wolti kulaa kulaak bana kela-lomdipla, kulaa nikil alimal iyo wok kumun falala-kup kalsu kaami balang diim kawu tola-bom gita yo, kebip buung bengkan God ata kuyimba uyo dakaa-bam ale, baal ayo wiimip ko.
REV 15:3 God ami okok kemin tunum Moses ami baal wiimsa so, God ami Sipsip Man ami baal iso, kiita wii-bam bokolip: God sakbaalim dukum, kabi titil miit kayaakim ale, kapni kukup kaali ti sakbaalim dukum akal almi kusnum o. God kabi am bokon kala dik-daa kulaasa kalawaami kamok kamok imi dabom kemin, kapni kukup uli ti tituun-kup tabasu no, ke-bamdip wiimip ko.
REV 15:4 Kapta-kup atin tambal-kup tabasap; kapta-kup titil melmel miit kayaakim kemin, alik kanolin tawaal kala dik-daa kulaasu kaami tunum miit kusnum ili kapni atul kaata-kup suun-bam ale, alik ili kapni titil aalap dukum kaata utam-somdiwa, kapni win kufup-tokomip kawu, alik kii utamiwa yi, Kabi ti suunkup aket tambal-kup fukun-bamdap yaap-kup kukup tangbal kaata kutal-fuku kesap o, takalipla, tal lotu kamap-tam-bam kapni fiyaap duup-tokomip o, kala baal ayo kanu-bam wiimip ko.
REV 15:5 Kulaa, baal ayo kanola uluulip disa kelule, talaaliya, Ensel ayo abiil tikiin lotu am dukum kaami abiin awem God ami bombe saal ayo busuula atam kemile,
REV 15:6 ensel fetkal iyo lotu am kulu angtiil yol um-tal-daa-laamin ami mafek mafek fetkal kiiyo kulii tiltam aba-lom ilim namaal falala-kup kalin kaata miki-lom tam naam gol ta nonsip ilet kaa, miki-lom tiltam tabip kala
REV 15:7 itamile, sawaayak kawu suunkup ilin tunum God ata tawaal diim kasel ban kemin tunum unang imi aket atul itam-ilomda, angtiil yol fakamin kaami-kup fetkal kaata kuluu binala daak gol ta dotusip kabas fetkal kaami diim unule, God ami mafek mafek tunum tap atalingkal imi iipyak tem maakup ma ata kabas fetkal kiiyo ensel fetkal imi kuyila.
REV 15:8 Kemin, God ali lotu am diildiil kaptamu bombe ali titil so, dawang soyap ami dawang kaali, as dawang bak-tam dakaba tap kesu. Ami titil so, dawang so, kaa as lak ta am buku-laabu tap ke, lotu am aalap dukum ayo muupsu kala, kalalila, tunum iyo ma din kaptamu God kaa ma atamalip disa ke-biliwa, bii ensel fetkal ita angtiil yol dukum kuluu-laamin uyo ling daalip daak tawaal diim kayaak bom-bilip imi diim aba-lomdula, kanolin yol awak ma utamsip dinim uyo utam um-tal-daa-somdiwa dinimnip ko.
REV 16:1 Kulaa nayo weng saniya, God ami lotu am diildiil kawu weng dukum ma ensel fetkal imi bokoya-lomda: Kipyo, ibi din-ilomdiwa, God ami aket atul itam-ilomda angtiil yol kuya-laamin kaami kabas fetkal ayo sing daalipla daak tawaal diim kasel bom-bilip imi diim abamnuk o! kalaya atamila,
REV 16:2 kulaa fan, ensel ma asiik ami kabas uyo kulii yakaba tam ling daalala, daak tawaal diim kasel unang tunum bom-bilip imi diim kawu abamnu, kaa kawanta ma kamboyip yol ok kumun tem saak wolti ami tunum kii, almi namba kuluu-lom ti dabal kun diim dola kuya-silip so, aa kanta saak wolti ami sinik dotu kutii-silip ami aman dakaala-yaabip so, ita ko. Abang mafak o, kala yol ta disa akal ma kesu uyo, tiltam unang tunum kanun-umbip kiimi diim kawu abamnu ko.
REV 16:3 Ensel alep diim ma akal kuno ami kabas ayo kulii tam ling daalala, daak yol ok kumun tem unula, yol ok ayo atin fan tiltam kiim duk-duu ke-lomdu tunum saakna ami kiim alaltap ke-lomdu, alik yol ok kumun kaami aniing yaapkan taanaasip.
REV 16:4 Kuno ensel asuum diim ma akal almi kabas uyo kulii tam ling daalala umbi kalo umbalaak tawaal tem ok tabeba sole, bina taleba ami daang diim so, aba-lomdu fan ti tiltam kiim alik kelula,
REV 16:5 nali asuk weng saniya, ensel ma ok bina tal-unemin alik kiiyo, ata ti tiin molin kemin, ayo boko-lom: God kabi atin ti tambal-kup tabasap ale, kabi sawaayak kaptowu bom-biisap. La, kamala kulaakal kano bom-balap, angtiil yol mafak kuuli, kukup mafak tabuulin unang tunum imi kuyon o, kalbap namti, kabi tituun-kup tabasap kemin, angtiil yol kuyokomap kaali ti, yaap so kep-nokomu no, kalbap kaata-kup kuyokomap.
REV 16:6 Kanola siin kaali, kapni lak duulin dinim tunum ita taba-lomdip kapni lak duulin tunum iyo aa-bam ale, kuno kapni tunum profet iyo ye-bam ke-biliwa, imi kiim ayo sing-tam-dakan-umbu. La, kamala kulaata kiim kulaa kapta kukup mafak unang tunum imi iluu kuyawa, isiik in-bomdiwa, ilmi angtiil kaa ku-mafak-dakabip kayi! kala, ok bina tal-unemin kaami tiin mo ilin ensel ata God ami kanum bokola ko.
REV 16:7 Nali bom weng sanila, Weng ma tala ayo mafek mafek kuyak fuulip kiin-bam God ami kukaalin baan diim minlo tem liip tal boko-lom: Tifaneng, God dukum titil miit kayaak namti kulu be: Kapni unang tunum yim-bak-saan-yaabap kaa, kapni weng talalmin kuuli, tituun kaata-kup, yim-bak-saan-bam imi kukup mafak uyo kanum-yaabip kaami maan kaa kukaaya-laabap o, keba kala atabi no.
REV 16:8 Ensel ataling diim ma akal ti ami kabas uyo kulii tiltam aba sing-daa kulaala yang atan diim aba-lomdu mamin awak ma disa akal ma ke-lomdu mamin kuluuta taba unang tunum kulii fuulula,
REV 16:9 kiin-bam ale, aket fanang daalipla, Kulaa God ali titil soyim kemin, angtiil yol kaluuli, kulaala tal numi diim aba-lom kiin-taba disa ke-lokomup o, kalalipya, God ami win ku-mafak-dakaan-bam kebip. Lale, ili aket fukunin ayo ma fal-siki ilmi ban kemin uyo kulaamalip dinim. Ale, ami win ayo ma kufon-bam bokola: God kapta-kup titil miit kayaak kemin, kapta no, kalolip disa ke-bam kanumip ko.
REV 16:10 Ensel awak diim ma ami kabas kaata, kulii tam sing-daa kulaala daak yol ok kumun kayaak saak wolti ami tiin-yaamin baan sia diim abamnula, abip ma ma alta tiin-moba diim abamnula, abip ayo malang tiniluya, tawaal diim unang tunum yol ok kumun tem kabaak-ami saak wolti ata tiin moba iyo utamipla, Angtiil yol uyo dukuma tabu kala, kala-lom kiil eng-kup dalat saan-bam,
REV 16:11 ilmi abang so, angtiil yol kaabip so, kaami kalan kiita abiil tikiin kayaak God ami weng mafak bakaan-bam balaan-bam kemip. Katale, imi aket ayo fal-sikilamip disa. Yak kukup mafak kaa ma kulaalamip dinim kelip.
REV 16:12 Kemin, ensel bukup ayo kuno almi kabas ayo kulii tam sing daa kulaala daak ok dukum Yufretis ami daang diim abamnula, Ok Yufretis ayo dalawa disa kela ko. Kemin, sawaayak kaali, Ok Yufretis ali ti dukum. Tunum kaa dok kanola daak ok aalap dukum kaa yakan da yak malii unolip dinim wok. Lale, wok kaa dalawa-lom liip kelula, waasi kamok kamok imi waasi dinin tunum iyo foko kutal atan talemin lo tiila talaba tam-ilomdip, yol ok kumun saak wolti asole, ami waasi dinin tunum iso, nikil iyo dinan-kulii-tabokomip ko.
REV 16:13 Nali utam talaaliya, Sinik mafak mafak asuumano ma kol tap dii-lomdip, ma ata Makalim dukum o, kala Setaan ami bon tem liip tiltam talale, ma ata yol ok kumun kayaak saak wolti ami bon tem liip tiltam talale, kuno ma ata tawaal tem kayaak saak wolti ibakamin weng bakayin o, kala profet mafak ami bon tem liip tiltam tal kelip itami.
REV 16:14 Kemin, sinik mafak asuumano imi mirakel o kala, akal almi kukup kusnum kusnum iyo tale-bamdiwa, iyo yakaba din tawaal kala dik-daa kulaasu kalawaami abip kamok kamok iyo dik-daaliwa, kamok kamok iyo akal almi waasi dinin tunum iyo kulii-tala-tala-ke-lomdipla, God Titil Miit Kayaak ami lekmin am daanokomu kawu iyo baa kutal, Yesus so, ensel iso, imi itamiwa dinokomip o.
REV 16:15 Kemin, Kamokim Yesus ayo kaal-kemin weng ma boko-lomda: Nami nak-tunum kusal, kibi weng san-iliwa, nami talokomi kaali, yukut inin tunum ami maaklo taleba tap, kano maaklo abiltap talokomi kemin, tunum alami ilim ayo alik dilela kutii disa angtiil fitap akan-bom-ilala, yukut inin tunum ayo talaba ami ilim dilela kutii akanba ayo duk-duu kulela una namti, tunum kaa kuno angtiil fitap yukut inin ami foo abip unokoma kaali ti, fatom dap-telokomu. Kemin, ilim kaa dulduu kutii-laamin dinim ke-lomda, kawang tiin-bombe tap ke-lokoma kaata, tambal o. Ultap kemin, nali maaklo kulu talokomi kemin, ibi tunum ilim dilela kutiila angtiil fitap akan-unemin iltap kemiliwi! Ibi dotu liip feniwa, talokomi uyo fatom dinim ipyo, yaap fiyaap duumalip ko.
REV 16:16 Kanola sinik mafak asuumano ili tunum kamok kamok isole, ami tunum waasi dinin iso, iyo afetbi kutii kulii-tal waasi dinin baan diim tilip kemin, waasi dinin baan diim ayo Hibru kasel imi weng ayo boko-lomdip: Amagedon o, kala Megido Tikiin o, ke-bam ken-umbip kaata ko.
REV 16:17 Ensel fet ayo almi kabas mafiing uyo kulii tiltam sing-daala daak abiil iip-iip kaami diim abamnula kulu, God ami lotu am dukum kaptamu, weng uta dukum-kup boko-lomdu: Ko, kulaata angtiil yol ayo mafiing mafiing disa kelon o, kala ko, kalala,
REV 16:18 kulaali abiil tikiin ayo baabaa wii falala-kup kalale, weng yaapkan ma bakan-tabamnule, taman ayo kol-bulule, tam bim aalap kawo kala, disa akal almi ma ayo tiltam aba-lomdu, tawaal ayo ku-mafak-daa kelu, uyo ti sawaayak God ami unang tunum imi talalu-yimu yam tawaal diim kala daala yakyak kulii umbital kala diilu kaali, kanolin bim ayo ma tiltam tabasa disa.
REV 16:19 Kano-lomda abip aalap win finin Babilon abip ayo bakelbi kutiiluya, abip sikip asuumano kela kulaalu kemin, tawaal alik kala dik-daa kulaasu kaami abip dukum dukum iyo alik mafak-alomdip, fakela tabu kaami tem kawu God ami aket fukunin kaali, Babilon iyo kanolin angtiil yol ata kuyokomi no, kalba, ali kulu tiltam tulu. Babilon kasel kiili, kukup mafak kuuta, God ayo aket atul awak dukum uyo dap-telula, alalta sing-daala daak wok mafak titil-kup tabasa altap ayo, sing-daa kulaala daak ok ket tem unu kuya inam-nipla, as dukum kiinin ke-bulula, angtiil yol dukum uyo kuluulip.
REV 16:20 Kemin, bim aalap ami kutaltam daalu kaali, yol ok daang kun diim kaami bokon daam katip katip bom-bilip kiiyo, alik bakel-bakel binalu daayak wok kumun tem kabaak-kabaak-kelule, kuno amdu uyo balela tildaak tawaal aba, komnip le,
REV 16:21 ma kaata, wom lap dukum ma tildaak abemu uyo ti tuum dukum tildaak abemin tap kemu, wom lap maakup maakup umi uluum uyo 50 kilo kaa abiil kawu dabuula tildaak tunum bom-bilip imi diim abe-buluya, iyo ti wom lap awak dukum ta ye-bulu utam um-tal-daaliwa God ami weng mafak bakaan-bam ale, ami win ayo ku-mafak-dakaan-bam kemip.
REV 17:1 Kemin, ensel fetkal imi kabas kutal-fukubip imi iipyak tem kulu ensel ma tal bokop-na-lomda: Talawa alep din kukup-ti utamapla, God ayo sadikimin unang win so kesu umi angtiil yol ayo kuuwa kala kalan o. Weng kaa bakabi kaami miit kaali, sadikimin unang kuumi sang uyo faldak abip dukum Babilon umi diim kabak tii bakabi kemin, Babilon uyo ti wok teta unsu dakmat diim mepso kuluwu tiinsu te!
REV 17:2 Am bokon kala dik-daa kulaasu kaami kamok kamok iyo sadikimin kukup ultap ke, unang kuuso kanu un-bam ale, kuno kewipya, uta taba-lomdu umi kukup mafak kaata kamok kamok imi unang tunum imi kukuyin-bulula, kanun-unbip kemin, tunum wok mafak ina-lomda babonba tap, tawaal kala dik-daa kulaasu kaami unang tunum iyo sadikimin kukup kaaltap kaata, unang kuuso duka-bom kanu-bam ale, umi kukup mafak uyo kutal-fuku-bomdiwa, babon-bam God ayo kela yang banip o, kala ensel ayo kanum bokop-nala no.
REV 17:3 Kemin, God ami Sinik ata kukup-nam-balaya, lom tap ayo dakaan-um-bom utam talaaliya, Ensel kaali tal nam-tama umbilin am bokon disanang ma ka daala kaa kalile, ensel ayo kukup-na utam talaaliya, Unang ma talaba tam saak wolti isakfulut ami daang kun diim tiinbu kala utamile, saak wolti kaami dabom kaali, fetkal ale, dabom diim ayo kong nakalkal; God ami win ku-mafak-dakaalin kiita, imi angtiil diim kawu alik dolsip iyo itamila, kaali yol ok kumun tem kaami saak wolti fingim kalaali atami.
REV 17:4 Kemin, kanola unang kuumi ilim kutam tinilu uyo, ti unang kamokan kwiin o, kala-laabip umi ilim miki-laabu tap ke, uyo ilim isakfulut tambal tambal alep kiita mikilu kemin, kiit kon kaali gol so, tuum titup-kup sipying-sapyang-tabin so, bukupsan aye, kiita miki-lomdu umi sikil diim kaali, gol ta kap dotusip ayo kutal-fukubu kabaak-ali sok wain ok daa, kabaak-ali mafek mafek ninak tiinsu kukup sadikimin aye, kukup mafak mafak kiita ulmi kap kaptoowu abuu kutii kutal-fukubu kala, kalali utami.
REV 17:5 Kemin, unang kuuli ulmi win kuwaasu ayo ulmi dabal kun diim kulu dolnin: Nali abip dukum titil so abip Babilon, nali am bokon kala dik-daa kulaasu kalawaami unang tunum sadikimin kukup so, atin ti kukup mafak mafak fatom tabin kukup so, tabuusip alik imi awak o kala dolsip.
REV 17:6 Kemin, Babilon iyo God ami weng kutal-fukulin unang tunum titil-biki Yesus ami diim fep-nin iyo anulip saaknip kala, kala-somdula, unang kuuli imi tong fakayim-bam ale, imi kiim ayo ina-lomdu, babon-bulula, utam-ilomdi suun-daa angtiil angkaal dap-tiip-na ko.
REV 17:7 Ensel ayo bokop-na-lomda: Kabi kaa angtiil angkaal kemin daa; nali unang kanubu kaami miit ayo ku-fatap-daap-ta-som ale, mafek mafek dabom fetkal so, kong nakalkal so, ami daang kun diim tiinbu saak wolti ami miit ayo ku-fatap-daap-ta ke-lokomi kemin, weng san-ilapya.
REV 17:8 Kaali yol ok kumun tem umi saak wolti ata siin kawu kamokim ke-lom unang tunum iyo tiin mo-bom ilsa. Yale, kamala kalawaatale, ali kamokim ke-lom tiin moba disa. Kemin, umbalaak tawaal tem, tem aalap dukum kaluusu kabaaku bombe, kemin, bii luuka-somdala asuk kabaak liip tiltam bom-ilala, God ayo atin an-kutiila disa ke-lokoma. Sawaayak, God ami tawaal kala dotuulin disa ilomdala, kabak itamala, tunum malo ma tawaal diim kala ilokomip ili nami tunum ke-lokomip disa kala, kala-somdaya imi win ayo sukon tem kabak-ali dol-yinsa disa. Ili ami suunkup abip uyo iso ilokomip dinim. Kemin, kunolin unang tunum iyo utamiwa yi, Yol ok kumun tem kaami saak wolti ayo asuk talba kala, kala-lomdip aket tam baneyulala, fiyaap duu-mokomip.
REV 17:9 Kanolin kemin, dok kanolin kapta tunum aket fukunin tangbal namti, nami weng miit uyo, utam dok ami miit kaata bakaba kala kalalap utam bam-daa kaal-kelon o kalap namti, kabi kabak dotu aket fukunan! Yol ok kumun saak wolti fetkal uyo faldak muk akiim fetkal unang o, kala abip awaalik dukum buu kaami diim tii-som ale, mafek mafek fetkal kulaa faldak kamok kamok fetkal abip sakbaalim kaptam-ami king fetkal imi diim tii kelu ko.
REV 17:10 Kamok kamok o, kala king awakal kiili, isiik unang tunum tiin mo bii taana-taana-ke-silipla, kamala kalawaata kamokim king maakup ata-kup tunum unang iyo tiin moba. Kemin, ilom am ma daanokomu am mafiing diim kulaata, tiltam kamokim mafiing king ke-lomda, ata unang tunum iyo tiin molokoma. Ami tiltam king ke-lokoma kaali, God ali kuno kelaya, ayo king ke, ilomda ilanin tap ke-lokoma no.
REV 17:11 Kamosinim yol ok kumun kayaak kaami saak wolti ayo kamokim ke-lom unang tunum iyo tiin mo ilsa. Lale, kamala kalawaata, ali kamokim ke-lom tiin moba disa; ali king fetkal imi iipyak tem kawu tunum maakup ata-kup bom-ilomdala taanse. Lale, ilom alta asuk tam tiin daa, ata asuk king kela, tunum unang kii tiin mo bom-ilala, God ayo taba atin aala disa ke-lokoma no.
REV 17:12 Kong nakalkal ultap kaali, faldak-tii am ma daanokomu kawu, tunum nakalkal ita tiltam king ke-lokomip kiimi diim tiilu. Kemin, iso, yol ok kumun tem saak wolti aso, iyo titil kuluu-lomdipla, akal almi abip e kala tiin mola tiin mola ke luuk daalin tap so ke-lokomip.
REV 17:13 King nakalkal kiili, aket maakup ke-lomdip imi tunum unang iyo yim-baalip yak yol ok kumun saak wolti ami unang tunum alik keliwale, king bom-bilip ita, ilmi titil uyo ok kumun kayaak ami kolaliwa, ata tunum unang iyo tiin mo ke-lokoma.
REV 17:14 Yol ok kumun kabaak-ami saak wolti so, king nakalkal so, iyo Sipsip Man Yesus aso, waasi dinokomip. La, Sipsip Man ata kamok kamok alik imi dabom keba-kup, ata atin kamokim titil-kup tabasa. Kemin, ami titil kaata king alik imi titil kuluu kulaak banu keya-lomda ata ata ke-lokoma. God ali Sipsip Man ami tunum unang ita-kup ulelna tiltam ami okok kemin tunum ke-lom titil-fak-daa ami diim kawu fep-niwa, Sipsip Man so, ami tunum unang iso, iyo yol ok kumun kayaak so, king nakalkal so, imi tunum unang iso, dinokomip kaali, Sipsip Man alimal nikil ita ita ke-lokomip kayi! kala ensel ayo kanum bokop-na ko.
REV 17:15 Ma kaata ensel ayo bokop-na-lomda: Sadikimin unang o, kala abip Babilon ayo ok teta taban-unsu wok dakmat diim mepso kulu tiinsu kala, kalbap kaami miit kaali, tawaal kala dik-daa kulaasu kaami abip ma ma kaami unang tunum so, tunum miit kusnum ma iso, ma tunum angtiil akal kusnum kusnum aye, tunum miit yakal ilmi weng kusnum bakamin iso, iyo Babilon kasel imi minlo tem unipla, tiin molip bilip.
REV 17:16 Kemin, God ami aket fukunin kaali, Kanolin o, kalala, yol ok kumun tem saak wolti so, king nakalkal iso, iyo maaklo kanolum o, kala king nakal iyo aket maakup ke-lomdip imi tunum unang iyo yim-baalip yak yol ok kayaak ami unang tunum alik-daap kelipla, king ita ami okok kemin tunum kela-som; ok kumun kayaak ata king nakalkal imi kamok ke-lomda, ami tunum unang iyo tiin molokoma. Kemin, ok kumun kayaak aso, king nakalkal iso, ili unang sadikimin o, kala abip Babilon umi waasi kela, aket atul kola ke-lom unang umi mafek mafek tangbal uyo alik kukan-tiiwa, disa angtiil fatap kewa-lomdiwa, umi tiil uyo bakela ina-lom as kuyak daalip kiin abam-nokomu umi kanolokomu kaali, abip Babilon umi mafek mafek tangbal kaami sang kemin, alik kukan-tii duula kutii as kuyak daalip kiinbi tip fal-daa disa sang dinim keluya, God ami weng kaata abuulokomu no.
REV 17:18 Kemin, unang utamap kuuli, faldak abip awaalik win naanin kaami diim tiilu kemin, sawaayak kawu abip kasel imi king o, kala kamok kamok ita ita ke tawaal kala dik-daa kulaasu imi king kusnum kuliili kulaak banipla, keya-lom ita tawaal kala dik-daa kulaasu kaami abip malo ma uyo tiin mo bii taana-taana-kem-tabasip o kala, ensel ayo kanum bakayila ko.
REV 18:1 Kanumsi bii ensel ami weng uyo disa kelule, kulaa Jon nayo talaalila, Ensel ma abiil tikiin kawu tala kaali, God ami titil dukum kuuta, kola kulii-tala kala, kalila, kaami dawang kaali, ti kulip yokon dawang tap iila, kulii-tilin tap kelaya, am bokon kala dik-daa kulaasu uyo alik falala-kup kalula utami.
REV 18:2 Kulaa, ensel ayo dukum-kup naanbi bokola ko: Ibi weng tangbal kalawuuli weng san-iliwa! Abip aalap dukum Babilon uyo dekela tildaak aba-lomdu disa kelon o, kalbu kemin, kunolon o, kalbu kuyaku mafek mafek mafak tiltam tabokomu namti kabuu no. Kemin, Babilon kaali ti, awem tem kasel so, awon mafak alik iso, imi abip ke-lokomu.
REV 18:3 God ami taba abip kaptam ku-mafak-daala disa ke-lokomu kaami miit kabak-ali, unang o, kala abip Babilon uyo taba kuumi kukup mafak uyo tawaal kala dik-daa kulaasu kaami unang tunum iyo kukuyin-buluya, kanum-tabasip. Kemin, kanola tunum ok mafak inamnala, ami dabom tem babonba ultap, kanola tawaal dik-daa kulaasu kalawaami tunum unang iyo sadikimin kukup ultap kaata, unang kuuso kanu-bam ale, kaami kukup mafak kaata kutal-fuku-bomdiwa, baboneng duku-bomdip God ayo kela yang banaasip; tawaal kala kulii una-tala-kesu umi kamok kamok iyo sadikimin kukup ultap kaata unang kuuso kanu-bilipla, Babilon kasel kamok kamok iyo am bokon kusnum unang tunum imi mafek mafek yaapkan uyo ma molum o, ke-bilip, am bokon kusnum kalawaami bisnis kemin tunum ita kukaayim-bilip saan-bi-lom bii tiltam bung kayaakal ke-biliwa, kaami kalan kaata God namti taba Babilon kasel iyo yam-mafak-daa anu-lon o, kalba kayi! kalba-kup, ensel ayo kanum bokola ko.
REV 18:4 Kanola nayo weng seliya, God ami weng uyo abiil tikiinlo tulu kala utamile, bokolu ko: Nami tunum unang kipyo, Kibi Babilon kutam kelalip tabanin aa! Babilon kasel imi kukup mafak kanubip uyo ti sakbaalim dukum kaa kala, utabi kemin, uyo ti mepso angtiil yol kuyon o, kalbi ko. Nami unang tunum kep-nansip ibi talalu weng san-iliwa! Ibi Babilon kasel iso kuyaku-diyaku-ke-bom kukup mafak kutal-fuku ilip namti, kuno ti kipso maakup angtiil yol uyo kuluulokomip. Kibi imi kanubip kaa kipso kanumin daa kayi! Kiili imi kukup mafak kaa kanubip kaami maan kaata angtiil yol uyo ilta kuluulokomip o. Ibi ti kamboya tabanin aa! kalala, God ayo kanum bokola ko.
REV 18:6 Kala-som ale, asuk God ayo bokola: Kipyo, Babilon kasel ita taba-bomdip atin kukup mafak uyo kukaayila-tabasip. Kemin, ipsiik maan tiiya-lom atin kukup mafak ayo ma kukaayin-bilip bii utamik. Kipsiik imi kukup mafak uyo maan uyo tiiyim-bilip bii liip alep fak-daalin o, kala-somla ko. Kanola ita kipni yam aba saanbip kipyo, kukup mafak ok mafak kala insip ultap ke-lom, kipsiik atin ti wok mafak titil-kup tabasu ayo kuyak diiyip inin ultap ke-lom, atin kukup mafak kaata kukaayim-bilip, bii-lom utam um-tal-daalik o, kala-somla ko.
REV 18:7 Abip aalap Babilon uyo unang kamokan ultap uta tiin-bom aket fukun-bamdula: Nali Kamokan Kwiin kemin, abiin tangbal-kup tiin-ilom kaptoop-ali nali unang kaluun kaami aket uluum kuluu-lomdu aket uluum awak fukunbu tap kaa kanolokomi disa yo, kal-bomdula, mafek mafek tangbal tangbal yaapkan iyo afetbi fak-tii kela, kiit kon tambal-kup tiibi kenbu-kup, kulaa atin ti akal akal ma tambal-kup tiinu. La, ulmi angtiil yol dukum kuwokomip uyo, ulmi kukup mafak kanun-yaabu kulaata, kuwipla tik-nokomu no.
REV 18:8 Unang o, kala faldak abip Babilon ti umi kukup mafak kaa kanum tabasu kuluuta, God Dukum Titil Miit Kayaak nali, um-bak-saanbi kalile, abiltap mafak-ilin uyo tildaak umi diim aba, umi tunum unang saak tem daabip imi aket uluum dukum ayo dap-tiiwa-som ale, ima tinap am uyo kutaltam daa ke-bulula, bii as kaami fak-tam-daa-lomdu uyo kiin-bulu, bii dinim-nokomu no, kala God ayo kanum bokola ko.
REV 18:9 Kemin, am bokon dik-daa kulaasu kamok kamok ili mep unang o, kala abip Babilon kayaak imi sadikimin kukup kaata nuu-bam ale, imi mafek mafek afetmin kukup uyo nuu-bam kanun-umbipla, samaanlo kawu iyo tilii umbilin daalipla, as lak aalap ma babilik-babilik tiltam tabu kala, kala-somdip utamipya, Kwin! Babilon namti kiin-tabu kala! kalaliwa, Kwin! Babilon kaptam-ami mafek mafek kaa maso ma fokolokomup dinim o! kal-bomdiwa, aket uluum dukum dap-tiiya-buluya, dukum-kup ol-bamdip aman dulum saanokomip.
REV 18:10 Kamok kamok-miin iyo suunip. Kemin, kanolin angtiil yol kuuli, nuli kuluu-laamin disa yo, kalalip, tildang mepso talemin dinim, umbiyang samaan kabangu bom ale, bokolip: Yak kanolin kukup kuu atin mafak kawi! Abip aalap dukum Babilon kaali, atin sakbaalim dukum titil-fokolin. La, God ayo maak fak-daalin tap, angtiil yol dukum kuuwa, abip uyo as kuyak daala, abiltap dinimnu kewa ni! kala-lomdip suun-bam kanumip.
REV 18:11 Ultap kemin, am bokon dik-daa kulaasu, kaami bisnis kemin tunum iyo utamiwa yi, Mafek mafek wan fakamin abip Babilon uyo kiin-taba disa ke-som ale, tunum unang bom-bilip imi mafek mafek kulii-din saanakin ayo alik disa ke-som kelip kala, kalaliwa, numi bisnis kebup kaluuli kulii daak aba disa kelu no, kalalip, iyo aket uluum dukum dap-tiiyilula, dukum-kup amamip ko.
REV 18:12 Sawaayak kaali, bisnis kemin tunum ili mafek mafek yaapkan iyo kulii-din Babilon abip tii-biliwa, Babilon kaptam-ami unang tunum ita saan-umbip. Kemin, kiit kon uyo gol, silva, pel o, kebip bukupsan tap, tuum titup-kup sipying-sapyang-tabin kaata faka-bam talalusip so, ilim kaal namaal aye, ilim isakfulut aye, ilim ilangdaa-ilangdaa kutook so kesu so, mafek mafek namamin uyo, as tang tambal fuunin mafek mafek tang soyim so, as tangbal kusnum so, wolti dukum elafan kaami isum aso, kopa so, ain so, tuum namaal-kup tabin mabol o, kebip so, kelin naman-unsip so, mafek mafek tang tangbal fuunin inin aye, angtiil ilikmin meya yo kebip aye, as kuyak daalip kiin-taba tang tangbal fuunin so, ale inin-inin uyo, sok iil lap wain ok so, oliv kaami matak ok so, flawa so, wiit so, bulumaki so, sipsip aye, hos aa, hos ami daang tem tiinala kuu delip sisii kulii-tal-unemin kanolin yam ayo kulii-din saan-bam ale, waasi din-bomdip tunum unang yim-tal-fuku sok de-yimulip disa iip kulu okok kemin iyo yim-bii-din daalip kayak kayak ita unang tunum iyo saan-bam kem-yaabip. Kemin, kanola siin kaali, kulin tiiliwa, Babilon kasel ita kanolin mafek mafek ayo moni sakbaalim dukum kuya-lomdip saan-umbip. La, kamala kalawaata unang tunum iyo ma saanokomip dinim. Numi bisnis kuuli, disa kelu kala, kala-somdip bisnis kemin tunum iyo ama-mokomip.
REV 18:14 Bisnis kemin tunum ili boko-lomdip: Babilon kasel imi mafek mafek kaami aket kaata yan-buluya, ima tambal so, kiit kon tambal so, uyo disa kebu kaa, ili asuk kalok no kuluuliwa, kaami baan uyo kuluulokomu daa yo, ke-mokomip o.
REV 18:15 Kemin, siin kaali, bisnis kaamin tunum iyo din Babilon une-bam mafek mafek wan faka-bamdupla, tunum win tibin kelum o, kal-bom kanun-umbip namti, kulaata numi bisnis namti disa kelu no, kalaliwa, iyo aket uluum dukum dap-tiiyula, dukum-kup aman duluu-mokomip. Lale, imi aket fukunin uyo, Babilon kasel imi angtiil yol utabip ultap nokol kuluulalup o, kalaliwa, suun-bam tildang abip Babilon umi mepso talolip dinim; kalo umbiyang samaan kabangu bomdiwa boko-lom:
REV 18:16 Kwin! Babilon kasel so, um-tal-daalip kawi! Babilon kasel ili ilim namaal tangbal, ilim fiingim tangbal kaata-kup miki-bam ale, kiit kon uyo, gol so, tuum titup-kup biila tabin so, bukupsan pel o, kebip iso, iyo dotusip ayo tii-bam kem-tabasip. La,
REV 18:17 kanolin mafek mafek uyo maak fak-daalin tap disa keyilu no, ke-mokomip o. Kanolula, tunum alik sip kaami muk tabuulin sole, unang tunum sip tem liip unum o, kebip iso, sip tem okok kemin tunum iso, bisnis kemin tunum mafek mafek binalip sip tem unemin tunum so, iyo alik umbiyang samaan kawu bom ale,
REV 18:18 tital-dang-daaliwa, as lak namti baplika-tabu, uyo ti abip aalap dukum namti kiin-tabu kala, kalaliwa, dukum-kup ol-bam, Kayak kayak tunum imi abip uyo Babilon ultap so ma bombuu dinim o, ke-mokomip.
REV 18:19 Kemin, tunum nikil kiimi aket tem ayo aket uluum dukum-kup dap-tiiyula, tawaal ta tiin matum til-daka-bam ama-bamdip boko-lom: Kwin! Babilon kasel so um-tal-daalip kawi! ke-bam ale, Kwin! numi bung sii tem kutal Babilon kaptam tii-bamdup moni wan saan-bam win so, ken-umbup kaso, abiltap maak fak-daalin tap tip fal-daalula bafinal kelup kawo we! ke-mokomip.
REV 18:20 Kanum baka-mokomip. La, abiil tikiin kasel so, Yesus ami lak duulin tunum so, God ami profet tunum kaa bom-bilip so, God ami tunum unang kusnum kiiso kipyo, Jon nami lom dulum tap weng liip mafek mafek kaa tiltam tabokomu kabak-ami utabi kaali, kano kamala kulu God ayo Babilon kasel iyo taba-lom kipni ye-bilip, taan-laan-umbip kaami kalan kaata, abip Babilon kasel uyo ku-mafak-daala disa ke-lokomu kemin, ibi kaami fiyaap uyo duumin aa!
REV 18:21 Ensel titil-kup tabasa ata tuum dukum uluum-kup tabasu uyo kuluu kufo kulaala um-bi-lom umbalaak yol ok kumun tem unula bokola ko: Tuum kaa duk-duu kulaali unu tap ke, waasi ita tal taba abip aalap Babilon umi tuum am dukum kiili, dakela balatnip tildaak aba disa ke-lokomu. Kaa dok kanola asuk abip kaptam dotulip uta-mokomip disa yo.
REV 18:22 Tunum ali ma Babilon kasel imi gita weng so, bikul weng so, baaleng aye, uyo ma weng senokoma dinim o. Babilon kaptam-ali tunum malo ma talalmin kukup kaal-tiklin-kesip iyo mafek mafek tambal uyo, maso ma talalbip kala, kalalip ita-mokomip dinim ale, Babilon kasel unang tunum imi tuum eng tabu wiit tii-bilip flawa ke-laaba uyo, ma weng sanokomip disa.
REV 18:23 Aa, Babilon kaptam ilaam dawang ma iilfo-bulula, uta-mokomip disa. Kaptam kayaak imi tunum unang kuluula, unang tunum dabuulu kelipla, fiyaap duubip kala, kalalip ma itam-ilom weng sanokomip disa. Atin malaneng dinim ke-lokomu te! Kanola Babilon kaptam-ami bisnis kemin tunum ili, moni umi titil diim kawu bomdipla, am bokon dik-daa kulaasu kalaami tunum ili kabaak banip keyinsip. Kemin, Babilon kasel ili kasen-fakamin kukup kaata nuu-bamdiwa, tawaal dik-daa kulaasu kaami unang tunum imi aket uyo dong dokoyula, liip tambal uyo kela yang wiis liip aba Babilon kasel imi kukup mafak kaata kemsip o, kala ensel ayo kanum bakama.
REV 18:24 Kemin, God ali utamala, Babilon kasel iyo taba nami profet nami weng ku-fatap-dakamin tunum so, nami tunum unang kusnum so, yak abip malo ma mep so, abip malo ma samaan iso, yaapkan bom-bilip iyo, yem-tal-une-bisip kala, kala-somdala, God asiik angtiil yol awak uyo kuyokoma ko.
REV 19:1 Kemin, ensel ami weng uyo dinimnula, Jon nali weng seniya, abiil tikiinlo kawu, baaleng aalap ma tulu utamila, Unang tunum yaapkan kii, fiyaap duu-bam boko-lom: God ami kukup alik uyo atin tangbal fan ti tituun-kup tabasu kemin, ami win kufola-laamin aa! God ali, ami tunum unang dong dokoya imi iliim bomin ok uyo disa kelu kewa-lomda, ali titil-kup tabasa God kemin, ami titil diim alik mafek mafek uyo tiin mo-som ale, sadikimin unang o, kala Babilon uta taba-lomdu sadikimin kukup so, kukup mafak akal kusnum so, uyo tawaal dik-daa kulaasu kalawaami unang tunum kii kukuyim-bulula, imi aket fukunin uyo ku-mafak-daayila kebu-kup, God ami okok kemin tunum anulu saaka-kelip kala kala-somdala, God ayo taba um-bak-saanbi kewa angtiil yol uyo kuwa kela no, kal-bom ale,
REV 19:3 asuk dukum-kup naan-bam bokolip: Nikil nuli maso God ami win kufolum o. God ali waasi imi noyilala, abip aalap Babilon uyo kuyak daalip kiinbu kemin, umi as lak ayo suunkup kiin tam banemu. Kemin, Babilon kasel ili kukup mafak uyo maso tunum unang kii asuk ma kuyokomip dinim o, kal-bom fiyaap duubip kala, kalali itami.
REV 19:4 Kemin, God ami tiin-bom alik imi tiin mo ilin sia baan diim kabaaku tiin bom-balaya, kamok kamok 24 iso, God ami mafek mafek tunum tap atalingkal tiin kawang soyal iso, ili unang tunum imi weng uyo weng sandiwa, isiik God ami miit tem kulu tilik-duung fakela daak kuluba bom beten kamaan-bam fiyaap don-bam bokola-lomdip: Kiimi weng ayo tifan tituun kemin, nuso kanola God ami win uyo kufolum o, kemip ko.
REV 19:5 Weng ma uyo God ami sia diim tiin-yaamin mepso kulu boko-lom: God ami okok kemin tunum alik kipyo! alik maakup God ami weng uyo weng san kutal-fuku kelin unang tunum win soyal so, iip kulu fak-daalin man God ami weng kutal-fuku tabuulin man iso, alik numi God kaami win ayo kufon-bam yaap ke yo, akan-kaa-bam kemum o, kema ko.
REV 19:6 Jon nali weng sanila, biileng ma kaami tuluk dukum kaa, ok fon dabaala tiilba tale-bam weng dukum uunba tap elile, taman bikin-una-talabu ne tap kabak boko-lom: Nikil alimal nuli God ami win kufon-bam ami fiyaap duumum o, kala-somla kemin, numi God Dukum Ali Titil Miit Kayaak ale, ata-kup mafek mafek alik kaami dabom ke-som kesa.
REV 19:7 Am kula kunum tulu kulaata, Sipsip Man Yesus ali boko-lom: Kristen unang tunum alik ili ti tunum miit maakup kesu kemin, uyo nami kalel kelu kemin, kutal nalmi am daa-bomdila, tiin molokomi no, kalaya, unang kukal talal-bamdu fenbu. Kemin, nuli ami fiyaap kaata-kup duu-bam ale, ami win ayo kufon-bam boko-lom: Kaali sakbaalim dukum ale, titil soyim tunum o, kemum o, kala-somla ko.
REV 19:8 God ayo ilim namaal tambalim falala-kup kalsa kaata unang umi kuwa, mikilu. Kemin, unang o, kalip kaali, faldak Yesus ami unang tunum imi diim kabak tii-som ale, (umi ilim namaal o, kalip kaata, faldak Yesus ami unang tunum imi kukup tambal nuumin umi diim tii kelip) ko.
REV 19:9 Siin kamasi ensel bokop-namba ata asuk bokop-na-lomda: Weng kaluuli sukon tem dolnan, weng kalawuuli, God ami tifan tituun weng kaata kup-na bokop-ti kemin, ami weng uyo tituun weng o. God ali boko-lom: Kanta ma naan-daali tala-tala-ke-bam Sipsip Man, unang kuluulon o, kalba ami atamip tiin-bom ima im-bom aso, fiyaap duumip namti, kiita tifan abiin tangbal ayo tiinokomip kayi! kala, ensel ata bokop-na.
REV 19:10 Nali ensel almi miit tem kulu ami fiyaap ayo duu-bam aman dakaalon o, kalaliya, tilik-duung fakel-bam kemile, ensel ayo bokop-na: Daa te! Kabi nami fiyaap kaa duu-bam aman dakaap-nin disa te! God maakup ata-kup ami fiyaap don-bam aman kaalin te! kala, kanum bokop-nale bokola: Kapso, kaltapni kaptum kusal Kristen ke, Yesus ami tituun weng kutal-fuku-bom titil-fak-daa-lom bakayila-yaabip iso, ibi God almi bon tem tii kultam daa bom-ilin unang tunum kemin, aa ti nakal kanolin God almi bon tem tii kultam daa ilin tunum kesi kemin, kabi nami fiyaap ayo duu-bam aman dakaap-nin daa yo, naka. Kemin, fan Yesus ami tituun weng ku-fatap-daase ukol sawaayak God ami weng profet imi diim bokolala, Sukon Tem dolsip ukol weng alep kaami miit uyo maakup o.
REV 19:11 Nali talaaliya, Abiil tikiin kaali, tem kalulale, kulaa hos namaal ma tiltam taba kala kalile, umi daang kun diim ayo tunum ma tiinba ami sang uyo boko-lomdip: Tunum kalawaami weng dap-tii kanolokomi kayi! kala uyo iiwa-yaamin dinim, uyo ti kanu-bam ale, tifan tituun weng kaata-kup bakayin-bam kemin o, ken-umbip kaayo, unang tunum imi afet-mokoma so, waasi dinokoma iso, iyo ami aket fukunin uyo, ili tifan tituun kukup uyo fan, kanumin o, kal-bomda suunkup yim-bak-saanokoma.
REV 19:12 Ami tiin dawang kaali, as yokon dawang ulunba tap, maakup ata-kup king alik imi dabom. Ata king imi nafalum yam kaata dabom diim daka daak tini, ami angtiil diim win dolbip kaali, maaklo sawaanin win kaa dok kano-som alik ili utamalip dinim, ti maakup alafin ata-kup utamsa.
REV 19:13 Yale, ami win unang tunum imi utamsip kaali ti, God ami Weng o, kala Kraist ali le, waasi imi kiim kaata ami ilim kaa kiim til daalin kaata miki una-balaya,
REV 19:14 abiil tikiin tunum waasi dinin iyo tiltam aba-lom ale, tam hos namaal imi daang kun diim tiin-ilomdip tunum unaba ami daang aba unip kemin, kiili almi daang bakaalin man. La, waasi ita anulip taansip kiita kemin, God ali itama yi, Ili atin tunum tambal kelip kala kalalaya, ilim namaal kuyimba kaata mikilipla, unip. Kemin,
REV 19:15 ami weng atul kaa wan kong bal dalat kalin tap kelin, ami titil ata ata ke, tawaal kala dik-daa kulaasu kaami tunum miit malo ma iyo kabaak banip kamboyimba-kup, alalta tiin mo almi kukup so, weng so, kiita-kup ti kano kutal-fuku kulii-taba bom-biliwa yo! kalokoma o. God ami Weng o, kala Kraist ami taba ami waasi imi angtiil yol dukum ma kuyokoma. Kemin, Kraist ali sok wain lang kayaak ami okok kemin tunum imi sok lap diim yaan tibii une-tale-bilipla, bii sok lap ok ayo alik tiilba unu kaa kalalip kulaa-laabip tap ke, kiikal angtiil yol kukaayim-bala utafii-bilipla, bii God titil miit kayaak ami aket atul awak kuluu dinim-nokomu.
REV 19:16 Ami ilim diim so, ingkun diim so, uyo dola boko-lom: Kalawaali kamok kamok-miin alik imi kamokim ke-som ale, ali tunum dukum dukum imi kamokim diildiil o, kala-lom dolsip.
REV 19:17 Kulaa, nali talaaliya, Ensel ma atan tip diim kabaaku tolba kala atami kemin, awon dukum dukum nuuk aa-bam iniwal imi iipyak tem kuyaku aso balala, tal-unebip imi ensel ta dukum-kup imi bokoya ko: God ayo ima dukum kukaayon o, kalba kemin, nikil ibi tala-tala-keliwa,
REV 19:18 tunum saaknip imi tiil ata waka-bam inin aa! kaliya, awon kipta daak-ilom waasi imi king so, waasi dinin imi kamok kamok so, waasi dinin tunum iso, waasi imi hos so, tunum imi hos daang kun tiinbip so, aa tunum moni ok tabuulin so, tunum disa iip kulu misiim ok tabuulin so, tunum win tabin so, tunum win dinim iso, alik kanolin kiimi tiil kaata waka-bam in-bilip bii disa kelik o, kala ko.
REV 19:19 Ke-bam talaali, Yol ok kumun tem kayaak saak wolti so, am bokon dik-daa kulaasu kaami kamok kamok o, kala king isole, imi waasi dinin tunum afetbip iso, ita tunum ma hos daang kun diim tiinba aso, ami waasi tunum iso, iyo dinan-tabum o, kalalip diimaanbip kala, itami. Kemin,
REV 19:20 Kraist ayo hos daang kun diim tiinba kemin, ayo taba yol ok kumun kayaak saak wolti ami dap-tal-fuku sok de-yimula kuno tawaal diim kayaak sinik mafak ami, Nata profet keli kawo! kala kasen-fakaya-yaaba ayo dap-tal-fuku sok deyimula alep iyo saaknin disa bom-ilip yim-baala umbalaak suunkup as kiin-bam laaba kaami tem kabaak banip. Suunkup kiin-bam ilin kuuli, tuum umi mamin manga-lomdu, mamin dukum miyaan falang ke-laabu tap ke-lom, kabaaku suunkup as kiin-bam tang mafak awon win butup kaami ninin tap-kup kuyak dakamu kemin, kaami iipyak tem kabaaku ilokomip o. Ibakamin profet ayo yol ok kumun tem saak wolti ami ok tabuulin tunum ata mirakel o, kala kukup kusnum akal alik akal alik ayo kanu-bam, kasen-fakayin weng ayo bakayim-bam ke-balaya, tunum unang yaapkan ili ami weng kaata weng san-kaa-bam ale, tituun liip ayo kambola yang wiis liip aba ban kemip kemin, yol ok kumun tem kayaak saak wolti ami namba yo, kala win faldak kulu tiisu uyo imi dabal kun diim kawu dola-silip ami sinik talalu kutiisip kaami fiyaap kaata tabe-bam ale, aman dakaansip.
REV 19:21 Kanola Kraist ami hos namaal daang kun diim tiinba ami weng uyo wan kong ultap disa atul dalat kalin mep yol ok kumun saak wolti so, ibakamin profet aso, imi waasi dinin tunum iyo anula taaniple, imi tiil ayo awon ita taba bisil kuyak daa im-bilip, bombii imi mat uyo bikinin tap keyu ko.
REV 20:1 Kulaa, Jon nali utam talaali, Ensel ma abiil tikiin kaptamu tala atami, ami sikil diim kaali, tawaal tem aalap ma umi kaluusu umi saal kii so, sen sok aalap uluum-kup tabasa kaami kutal-fuku keba kala atami kemin,
REV 20:2 Makalim sawaayak God ami waasi kela bom, God ami unang tunum imi weng mafak bakayim-bam kem-tal-une-bam ilsa, Setaan ayo dap-tal-fuku sen sok ta de-du dabaala umbalaak tawaal tem dukum kaluusa kabaak bana kela, saal dukum-kup nakat mo kambolala, kawanta ma saal busolama dinim kelaya, Setaan ayo kabaaku bom-bala bii, wasital almi-kup 1,000 kaami dakan-tiilokoma kabak-ali kalok no-somdala, asuk tiltam daa am bokon dik-daa kulaasu kaami unang tunum kii kasen-fakayim-bam yam-mafak-daka-bam ke-mokoma disa. Kano biilaya, wasital almi-kup 1,000 kiita dakan-tii-somdala kawu, God ayo bokolaya, asuk tildaa dabaala tiltam tal-unemsi, bii luk daalokoma.
REV 20:4 Kemin, nali Yesus ami unang tunum anulip kuliila tabasip imi sinik iyo itamila, Tunum saaksip kiimi Yesus tituun weng ku-fatap-daayinsa so, God ami weng so, kaa titil-fak-daa bom kulii yang aptum kusal kusnum imi dukum-kup bakaya-tal-une-bam kukuyin-bam kemsip kemin, ili yol ok kumun kayaak so, saak wolti sinik mafak kutiisip so, imi aman dakaansip dinim; aa kuno kamboyip saak wolti ami ok tabuulin ita ami namba yo, kala win faldak kulu tiisu dabal kun diim so, sikil diim so, dol-yinsip dinim o kemin, kaami kalan kaata Yesus ami waasi ita taba-lom kaabaak ta imi dabom ukantii-yinsip. La, God ali yim-fola tam tiiniwa kawu, titil kuya-lom, ipta tunum unang kii tiin molin o, kala-som, Yesus Kraist aso, kipso, kipta unang tunum iyo tiin mo-bilip bombii wasital almi-kup 1,000 keliwa dakan-tiiluk o, kala-som kelaya, nayo asuk itam talaali, Ili king sia tiin bom-ilin uyo tiinip kala kalalila itami ko.
REV 20:5 Unang tunum taansip imi bilip iipyak tem kabak-ali Yesus ami lak ayo duubip kala, kala-lomdip anulip taan-silip ita, God ata kamosinim asuk yim-fola tam tiinokomip. Tunum unang kiili ti, God almi alik-daap kensip kiita kemin, atin imi kaal dinim, ili as suunkup kiin-bam ilin kaami tem kabaak ban-ilom atin ili win dinim ke-lokomip disa; ili God so, Kraist so, alim ilmi pris o kala unang tunum awem kela bom alim imi ok kaata-kup nuu-biliple, iso, Kraist aso, ili am bokon kalawaami unang tunum kii, tiin mo bii wasital 1,000 kala dakan-tiilokomip. (Kemin, aptum kusal malo miin taansip ita tawaal tem kabaaku bom-bilip bii wasital almi-kup 1,000 kalawiita dakan-tiilip dinimnula kulaa, yakal tam tiin kawang ke-lokomip o.)
REV 20:7 Kanola bombii wasital 1,000 ilmi-kup kalawiiyo, dakan-tiilip disa ke-lokomip kuyaku, ensel ayo asuk Setaan ami tem bak-daa-lom kabaak daalip tiinsa ayo saal busola-lom sok baalaya, tiltam ba-talokoma.
REV 20:8 Kaami ma tiltam aba-lomda, am bokon alik kalawaami unang tunum iyo kasen-fakayim-bam, yam-mafak-dakan-tal-une-biliya, nami aket-kup kup-nin o, kala-lomdala, ibakayila-tal-une-mokoma. Kemin, God ami lak duulin disa bilip unang tunum malii kiimi win uyo Gok kasel o, yakan-kaa-bam ale, kuno tunum malii ma imi win kaa Megok kasel o, yakan-kaa-bam ken-umbip. Kemin, Setaan ayo tunum miit alep kiiyo, kuyak-mim-daa-lom alik afetu yim-tiiliya, God ami tunum iso, imi dinum kala kalokomip o. Tunum miit alep kiimi tunum iyo ti yaapkan yam yol ok balang kaami ok dinin ultap kaa kalok no-som ding bokolamup dinim. Kemin,
REV 20:9 kiimi sekela taba am bokon kala dik-daa kulaasu uyo butuuwa taba buku kulaalokomip. Kemin, God ami abip aalap dukum aket kuuwa laaba uyo, Jerusalam kaptamu unang tunum iyo alik afetbi waasi imi liip-kup fen-bilipla, waasi iyo din woop falal-bi-lom aamum o kala, kutiilokomip. La, God alalta abiil tikiin kaptamu as dawang kulaala tildaak ilom, alik kii fuu dip-tiila kiin aba tip fal-daalokomip.
REV 20:10 Kemin, Kraist ata tunum kiimi kasen-fakaayin tunum Setaan ayo dabaala umbalaak suunkup as kiin-bam ilin kabaak banokoma. Sawaayak kawu, yol ok kumun kayaak saak wolti sole, tawaal tem kabaak-ami kasen-fakamin profet aso, Kraist ayo fokola umbalaak as kiinin tem kabaak ba keliwa, alep iso, Setaan aso, nikil maakup kabaaku bom angtiil yol awak uyo taap so, kutamiip so, kaali awak um-tal-daka-bam suunkup bom ilokomip. Suunkup as kiinin kaami tuum maman uyo fuu-bam maanga-lom mamin ok fak-dii daak abe-bamda, ok kumun alalnin tap keluya, kabaaku suunkup as kiin-bam awon win butup kaami ninin tap uyo kuyak daka-bam ke-bam ilomu kaami iipyak tem kabaaku Setaan alimal kii kabaaku ilokomip o.
REV 20:11 Nali talaaliya, God ali almi abiin sia kabaaku tiinba kala, atami kemin, ami baan diim tiin ilin uyo sakbaalkan namaalim dukum kawu tiin-bomda, ami weng kulaata bakam-salale, tawaal so, abiil so, iyo kulu kasen tap maaklo keliple, dok kano maso ma itamalip dinim kelip ko.
REV 20:12 Nali utam talaalila, Unang tunum saaksip iyo tam tiinin disa bom-bilip iyo, tunum win soyal sole, tunum win dinim so, imi saaksip ita kala kalile, alik iyo yakaba din God ami tibi diim kawu tolniwale, God ami buk ma bilip kabak-ali tunum imi kukup mafak sole, kukup tambal so, kanun-yaabip kiili, kabaku dola-yaabip kemin, ensel iyo buk uyo baa-kutii-lom, buk ma kuuli God ata unang tunum suunkup ilokomip imi win dolsa uyo bam-daa kutii kelip kemin, kulaa God ayo tunum imi kukup kanubi taansip kaami sang kaata talalu utafii-bam tik-tiiyim-bam ale, imi kukup kaa kanun-umbip kaata, maan tiiyim-bam ke, tiiya ko.
REV 20:13 Tunum yol ok ta yan dong dokola mam bapliiya taansip ili asuk tam tiin kawang ke, tiltam atamiwale, tunum abip kalawu taan-laa-bala, saak kawu taan-laa-bala ken-unsip iyo asuk tiin kawang ke, sakbal am uyo kela tal-ilom ke, nikil alimal maakup kuyak-mim-daa tam God ami tiin diim kawu tolniwa, God ayo imi kukup kanu-bam taansip kaami sang uyo talalu lii-bamda maan tiiyim-bam, imi kukup kanun-umbip kaata-kup maan tiiya.
REV 20:14 Kemin, nali talaalila, Ensel iyo taan-laamin kaami liip so, sakbalam kaaso, iyo alula kulaala daak ok kumun alalnin tap ke-lom kano suunkup as kiinin-kup ilin kaami tem kabaaku un-ilom suunkup angtiil yol dakan kaptoop kaptoop unokomip uyo, utami kemin, daak suunkup as kiin-bam ilin kaami tem unemin uyo dum alep diim asuk taan-laamin kaata kemin
REV 20:15 God ami yim-bak-saanokoma kaa, unang tunum kanta ami win kaa God ami suunkup ilin tunum unang ke-lokomip imi buk tem kabaku ma ilin dinim o, kala namti, ali alik fokola daak as kiin-bam ilin kaami tem unokomip o.
REV 21:1 Kulaa, Jon nayo asuk lom tap ma duuli uyo utamila, Alokso tawaal so, abiil so, dotula kiita, tiltam tabamnip o. Siin kaami tawaal so, abiil tikiin so, yol ok so, iyo talalulala bombi disapsu usiik maaklo kebu kemin, kulaa utami.
REV 21:2 Kemin, kuno nali talaalila, God almi kama alokso abip Jerusalam uyo abiil tikiin kaptamu kutal-daak tawaal diila utamile, alokso abip uyo disa akal ma kutookso kiit kon tiibi ke-umbip kaali, unang ilim tambal mikilu tunum ket dabuulon o, kalalu imak liip fenbu tap ke;
REV 21:3 God ami abiin baan tiin-laamin sia diim bombe kawu, weng dukum ma bakaba ayo weng seniya ayo boko-lom: Kipyo, weng san bom-iliwa, kamala kula tabup uyo, God almi unang tunum iso, bomda almi mepso kulu suunkup bom tiin molaya, unang tunum iyo tal almi miit tem unipla, ata imi God keya-lom tiin moyokoma.
REV 21:4 Kemin, God ata mafek mafek mafak tal unang tunum imi diim aben-umbu uyo, alik kukan-tiiyokoma kemin, aket uluum ke-mokomip disa; ama-mokomip dinim. Kemin, tawaal kala disapsu kaami mafek mafek mafak kuluu disa ke-lokomu. Kemin, taan-laamin so, angtiil yol tabemin kulaaso, aket uluum dukum so, amamin aye, kiiyo asuk maso ma tiltam talokomip dinim; atin disa. Ili ti atin alik maaklo disa ke-lokomip o, kema ko.
REV 21:5 God almi sia diim kabaaku bombe weng boko-lomda: Kipyo, weng selin! Kamala kulu, nali mafek mafek alik kaa talaluli ukol kusnum ma kelon o, kalu, kalba-kup, kulaa fal-siki taba nami bokop-na-lomda: Weng kala weng senap kaa, fan ti tituun weng kemin, kabi utam-ilom, Alik kii bokoyapla, weng sandip kala, utamipla, U fan, kalokomip kala-somdapya kawu, tunum kaami weng uyo kuyak sukon tem kabaku dolnan o! kalba-kup,
REV 21:6 asuk bokop-na-lomda: Nali kaa kanolokomi kayi! kalasi uyo, alik noli disa kelu kewi kemin, sawaayak uyo nali bombii le, aa kamala kalawaakal bii, aa bii kaptoop kaakal ti kano ilokomi; ti maakup nata-kup, alik kanolin mafek mafek miit kayaakim ale, nata-kup mafek mafek alik iyo mafiing mafiing dotuli disa kelip keyokomi le, nata-kup suunkup ilokomi. Kemin, kawanta ma ok del dap-tiiyimbu namti, nata suunkup ilin kaami ok miit kayaak kemin, nata laa-yim-bili inokomip kaa, saanokomip disa, masiim nata kukaayim-bili, im-bom suunkup ilokomip.
REV 21:7 Tunum kanta ma ita ita ke, Setaan ayo dabaalip kulaak banala kela, titil-fak-daa nami kukup kaata kutal-fukulin-kup ke-lom bii taanip namti, nami kanolokomi namti kalabe kemin, nata imi God kelile, ita nami man alik-daap kep-nip ke-lokomip. Lale,
REV 21:8 kawanta fatom dap-ten-bam ale, suun-bam nami weng uyo tunum unang imi bakayin disa kema aye, kanta God ami aket fukunin tambal uyo kutal-fukuli daa yo, kalala ayo daang ukup-na aye, kanta kukup mafak ayo kutal-fuku-bomda ban bomin aye, kanta tunum yemin, aa kanta sadikimin aa, kanta usong falela yokoop daka-bam ale, yokoop waka-bam kemin, kanta awem men so, mafek mafek kiimi sinik dotu kutii-lomdip, kiimi fiyaap umi duu-bam aman dakaalin aye, kanta ibakamin kasen-kasenmin aye, iyo kanuma namti, nata mep kanun-umbip imi abip kaa talal-yimbi kemin, foko-yim-baali daak ok kumun alalnin tap ke-lomdu, suunkup as almi ti kano kiin-bam awon win butup kaami ninin tap kuyak daalin-kup ilin kabaak-ami tem un-ilom, kano ti kiinin-kup ke-bam suunkup angtiil yol daka-bam ilokomip kemin, imi dum alep diim taan-laamin namti kaa bombu ko.
REV 21:9 Ensel fet ata atin kabas mafiing mafiing kaami angtiil yol tiltam tabokomu kaami kabas fetkal sing-daabip imi iipyak tem kulu ensel ma tal bokop-na ko: Talawa, nayo unang Sipsip Man Yesus kuluula ami kalel ke-lokomu uta kukup-ton o, naka ko.
REV 21:10 Kemin, God ami Sinik ata kukup-nam-balaya, lom tap ayo dakaan-um-bom talaali, Ensel kaali, nam-tamala umbitam amdu tikiin batbat ma kaa daala kalile, ensel ayo kukup-na utamila, God almi alokso abip Jerusalam kuu abiil tikiin kawu kutal-daak tawaal diila atam kemile, ensel ayo bokop-na: Kawe! abip kutamali Sipsip Man ami kalel ultap te! naka.
REV 21:11 Kemin, uyo God ali abip Jerusalam kaptamu bom-balaya, ami dawang uta taba-lomdu atan ami tik-daala kulaala talaba yak am umi glas diim aba-lom am kaptam-ali alik wii falala-kup kala-laabu tap ke, abip ayo alik falala-kup kala, kali kemin, abip uyo tifan tuum win sokan isakfulut Jaspa o, kalbip taasip umi lamlaam uta kelula,
REV 21:12 abip kaptam tuum uti fokosip uyo titil-kup tabale, batbat miinok tuum uti kaali, abip ayo alik falala kuyak mosip. Uti kaami daam atalingkal kawu, amitom asuumano e kala, kalu kalu kem falala kuyak mosip kemin, amitom talangkal kiili, ensel iyo amitom maakup e kala tiin mosala tiin mosala kemsip; imi tip lo kaptam-ali win ma dolsip uyo, Israel kasel imi tunum miit talangkal imi win kiita kuyak daa-daa kesip.
REV 21:14 Uti umi minlo tem kawu tuum dukum dukum ulmi ku-titil-diimin-kup talangkal kiimi diim kawu win ma dolsip uyo, Sipsip Man ami kalaan tunum talangkal imi win kiita dola-dola kesip kala utami.
REV 21:15 Ensel ayo tola-lom nami weng bakap-nam bokoba ata, as daang o, kala mafek mafek siksimin ma kutal-fukuba, ali gol ta mafek mafek siksimin dotusip kemin, as daang kaata kuluu-lomda abip so, abip daam so, amitom so, iyo tiila ko.
REV 21:16 Abip kaptam-ami daam daam atalingkal iyo ti, kanolin atalingkal alik maakup. Ensel ayo ami as daang siksimin ayo dabuu-lomda, abip kaptam banemin uyo kuyaku-som ale, abip balang balang atalingkal uyo kuyaku-som ke-lom, siksiila umi kilomita 2,400 kelula, umi siksimin kaa ti maakup kalale,
REV 21:17 uti daam kaali, iing kela-lom fokosip kemin, ensel ali uti iing dukum uyo tiila yi, mita ayo 60 kelula, ami siksimin kukup kaali, tawaal diim tunum numi siksimin kukup ultap ke-lomdala, kano-lom siksila ko.
REV 21:18 Kemin, tuum uti fokosip kaa dawang tangbal ke-lom falala-kalin, tuum fiingim bak-daa as kon wiis bak-daa kelin Jaspa ale, abip dukum kaptam ali gol tambal kaata-kup kuluu dotuliwa, atin kutookso yaap ma kelula, glas lamlaam ultap kesu.
REV 21:19 Uti umi minlo tem tuum dukum dukum talangkal iyo kiit kon tangbal kawo! kala-lom, disa tuum akal kusnum tangbal dawang sokan, uta kuluu-lom kuyak daam minlo tem diim kabaku tabuu fewa-fewa-kebi kulaasip. Tuum kuuli, ukol ulmi angtiil kusnum akal alik, akal alik, falala-kalin tuum kuuta kuluu kuyak kabak mo fewa-fewa-kensip kemin, tuum ukol ma kuuli isakfulut bak-daa, as kon wiis bak-daa kelin umi win kaa Jaspa o, ke-bam ale; tuum alep abiilkun dik-daalin umi win kaa sapaya o, ke-bam; kuno tuum asuumano imuul ke namaal ke umi win kuu aaget o, ke-bom ale; tuum ataling as kon wiis dik-daalin umi win kaa emeral o, kal-bom ale;
REV 21:20 tuum awak isakfulut ukol alik ma umi win kaa boko-lom sadonikis o, kal-bom; tuum bukup fingim kusnum umi win kaali konilian o, kal-bom; tuum fet titak umi win kaali krisolait o, kal-bom; tuum oklung as kon wiis dik-daalin ukol alik ma uta beril o, kal-bom; tuum beti titak ukol alik ma uta boko-lom topas o, ke-bam; tuum nakal as kon wiis dik-daalin ukol alik ma uta krisopres o, kal-bom; tuum kum abiilkun dik-daalin ukol alik ma uta boko-lomdip ayasin o, kal-bom; kuno, tuum talang abiilkun dik-daalin ukol alik ma uta ametis o, ke-bam
REV 21:21 ken-umbip. Kemin, uti daam kabak-ami amitom talangkal umi amitom maakup maakup uyo tuum namaal titup-kup sipying-sipyang-tabasu, dukum uta tem kalu kalu ke, kuyak mo kela yakyak kesip kemin, tuum kanosip kaami win kaa pel o kem-yaabip. Abip kaptam-ami liip ken-unsip uyo tuum gol tambal-kup kaata dikela kulii-tal maltin un-bomdipla, liip kaa ken-unsip kanolipla, liip kaa, dawang ayo glas ami lukluk tap kesa ko.
REV 21:22 Kanolin abip dukum kemin, abip kaptam-ali lotu am so ma utamami disa. Kaa dok kata naa kalolip: Abip kasel alik imi aket fukunin kaali, God Dukum Titil Miit Kayaak sole, Sipsip Man Yesus aso, alim ili numi mepso kulu suunkup laabip uta uta ke-lom, numi tam lotu am lotu kemin, kuluuli kabaak banula, kulaasu no, kalaliwa, abip kulu alim imi lotu ke-bam ilokin o.
REV 21:23 Kemin, God so, Sipsip Man so, alim imi dawang dukum kaata kulaalip taba-lom abip uyo iilfo falala-kup kalula, abip kasel imi mafek mafek iyo talalu uta-mokomip. Abip kaptam-ali atan dinim, kayoop dinim. La, abip kasel ili alim imi dawang diim kawu mafek mafek iyo soko talalu uta-mokomip.
REV 21:24 Kemin, am bokon alik kalawaami unang tunum ili, alim ilmi falala-kalin kulaata, dotu utamdiwa, tal-une-bam mafek mafek ayo nuu-bam kemip kemin, tawaal kala dik-daa kulaasu kiimi kamok kamok ili, God ami fiyaap kaata duumum o, kala-lom mafek mafek tambal uyo kulii-tal abip fak-tii-lom God ami kukaalokomip.
REV 21:25 God ami yokon dawang kaa kama alokso tawaal uyo ma fal-siki-lom kuu kaldaak ulu malang tinilokomu disa; ti suunkup ti, kano ilokomu. Kemin, am tiinala kaata, tawaal diim kalawaami abip uti fokosip kaami saal kaa lii-yaabip. Lale, God ami alokso abip kaami saal utale, lii-mokomip disa; uli ti suunkup saal ayo busuu kuno ilokomu no.
REV 21:26 Am bokon kala dik-daa kulaasu kaami abip ma ma tunum unang alik, God ami fiyaap kaata-kup duumum o, kalaliwa, mafek mafek tambal dukum so, katip katip so, yaapkan iyo kulii-tal abip fik-tii-bi-lomdip, God ami kukaalokomip.
REV 21:27 Kemin, ili mafek mafek mafak ma kulii tiltam abip kaltam kulii tiltam talokomip dinim. Dok kanolin unang tunum ita fatom tabin kaami kukup aye, kasen-fakamin kukup aa, kutal-fukulin kiili, abip kaptam tam unokomip disa. Atin disa; unang tunum tituun-kup tabasip imi win kiita Sipsip Man ami buk tem kabaku dol-yinsa ita-kup tam atamiple, aso maakup suunkup ilokomip o.
REV 22:1 Kemin, ensel ayo Jon nami kukup-nala atamiya, suunkup ilin ok ayo milmil tawaal tem ok kemin, God aso, Sipsip Man Yesus aso, alim imi tiin-bom ilin baan diim kaami minlo tem kulu foko bina kulaala abip liip aalap dukum kaptoop ba an-kulii una, ayo ok kaami iipyak tem ayo asak-lamlaam-kup sikinbi kuusa le, mep fan am ami glas tap kelin, unang tunum iyo kanta ok kalawaali inokomip uyo, suun ilokomip ale, yak ok malii so, tildak malii so, ok balang diim kaa suunkup ilin as tolsa kaami lap ayo abuubu kemin, umi abuumin uyo abu-abu kemsi deng talangkal wasital maakup ami diim ayo kanumin kemin, uyo kayoop maakup maakup kaa abuubu ke-laabu no. Tunum unang imi tal as lap kala duk-duu inam-nokomip, uyo suunkup iyo ilokomip. Kemin, am bokon alik kala dik-daa kulaasu kaami unang tunum miit ma miit ma ili suunkup ilin kaami as kalaami kon kaa, marasin ultap o, kalaliwa, inan-yaabip kemin, uta dong dakaayim-bulula, imi angtiil so, aket fanang dakamin so, uyo mafak dinim, tambal-kup ilokomip.
REV 22:3 God ali mafek mafek so, unang tunum so, ili ma: Daa yo! Kibi mafak u, kaloma kaali, God ami abip uyo tiltam talokomip dinim o. Alokso Jerusalam uyo God so, Sipsip Man so, alim imi tiin-bom kama tawaal dotulip tiltam tabokomu kaami alik tiin molokomip kaami baan diim namti kaa bombe. Kemin, God almi unang tunum kaptam-ali alik God ami lotu kaata kamaan-bam ale,
REV 22:4 kulu ili God ami tibi kun namti utelokomip ale, God ami aket fukunin kaali, Nalmi unang tunum o, kala, kalalaya, ensel iyo bokoyilaya, yakal God ami win uyo God almi unang tunum kesip imi tibi kun diim kulu dol-yilokomip o.
REV 22:5 Mep God ami dawang aalap kaata, ila bom-balaya, maso malang tinilokomu dinim; kano ti buluya, iyo talalu mafek mafek uyo alik utafii-mokomip uyo, ilaam dawang kaa disa; atan dawang disa kelula, imi tal-unemin, tiin-yaamin uyo, king alaltap ke-lomdip suunkup suunkup yaap bom ilokomip ko.
REV 22:6 Kulaa ensel ayo bokop-na-lomda: Sukon tem weng kala bakabu kaali, fan ti tituun-kup tabin weng kemin, alik ili kaa weng san faneng u! kalin o! kala-somla ko. Kemin, God Dukum ami Sinik Tambal ata dabaala din Yesus ami profet weng ku-fatap-daa bakayin tunum imi dong dokoyalaya, kulaali God ami weng uyo bakayila-yaabip o. Kanolin kemin, kamala kulaakal God almi ensel nayo, nam-baala taldi almi lak duulin unang tunum imi bokoyila-lomdi: Kunolin mafek mafek uyo kulaata tiltam talon o, kem-tabu kayi! kalali kaata, kukuya tili ko.
REV 22:7 Kemin, weng senin! Kamokim Yesus ali boko-lom: Nali asuk mepso talokomi kayi! keba no, kala, ensel ayo kanum bokop-na: Kapyo, kanta God ami weng boko-lomda: Kanolin mafek mafek uyo tiltam tabokomu no! kalala sukon tem kala dolbi kaluuli kutal-fukulip namti, ko kaata tambal-kup ilokoma no, keba no kala, ensel ayo kanum bokop-na ko.
REV 22:8 Nali Jon nata kemin, nalta weng alik uyo weng san-ilom ale, mafek mafek alik ensel kukup-na uyo utam kelila kulu, alik uyo disa kelu kala, kalaliya, nali ensel almi miit tem kulu ami fiyaap don-bam beten kamaalon o, kala-lom tilik-duung dekela daak tiin kem-silile, ensel ayo bokop-na-lom:
REV 22:9 Daa yo! Kabi nami fiyaap kaa duu-bam beten kamaap-nin disa te! God maakup ami fiyaap kaata-kup duu-bam ale, beten kamaalan o, kalale, kula tam bokop-na: Kapso, kaltapni kaptum kusal profet God ami weng ku-fatap-daa bakayin tunum iso, kii kawanta sukon tem weng kala dolbap kaluuyo weng san kutal-fukusip kiiso, ibi God ami miit tem tii kultam daa bom-ilin unang tunum kemin, nakal ti kunolin God ami bon tem tii kultam daa bom-ilin tunum kemin, kabi nami fiyaap kaa duu-bam beten kamaap-nin disa yo, namba-kup,
REV 22:10 asuk bokop-na-lomda: Mafek mafek alik sukon tem kabak dolnap uyo, mepso abuulon e kemu kemin, mafek mafek kanuman o, kalbu kaami sang kuu, kuwakamin daa! Ku-fatap-daa bakayim-balawa, alik ili utamalip ko.
REV 22:11 Kemin, God ali utama yi, Dikipnu kala, kala-somdaya kamboyilala, alik ilmi kanumin kukup kanumin kukup kaata nuu-bam bii luuk-nokomip uta kemin, kanita kukup mafak uyo kutal-fukubip namti, ili ti suunkup kukup mafak uyo kutal-fuku ilokomip. Ale, kawanta sadiki-bam waka-taka-bam kemip namti, kiili ti, suun kanumin-kup ilokomip. Aa, kawanta kukup tangbal-kup kemip namti, kiili ti, kukup tangbal kaata-kup nuu-bam ilokomip. Aa, kawanta God ami lak duulin tunum unang namti, yakal ti kuno God ami lak suunkup dakaa-bam ke-mokomip kayi! kala ensel ayo bokop-na ko.
REV 22:12 Kemin, kulaa Yesus asiik bokola: Kipyo, weng san-iliwa, nali asuk mepso talon o, kalbi kemin, nami talokomi kabak-ali mafek mafek kukaayim-bamdi maan tiiya-tiiya-ke-mokomi uyo ti, unang tunum kukup tangbal aye, kukup mafak aye, kanun-umbip uta tiiyim-bamdile, maan tela yakyak ke-mokomi no.
REV 22:13 Siin sawaayak kaali, nali biisi. Aa, kamala kuluwakal kaata kuno bom bii aa, bii kaptoop kaptoop unokomu kaata kano ti ilokomi. Nata-kup alik mafek mafek miit kayaakim, nata-kup mafek mafek uyo mafiing mafiing dotuli disa kelu kulaalami uyo ti, nata-kup ale, nata-kup suun kano ilokomi no.
REV 22:14 Kanola unang tunum ilim diingnip tambal-kup ke-laabu tap ke, kanta ilmi kukup mafak kambola dotu kukup tambal kaata-kup kutal-fukulip namti, kaa nali kamboyi, maaklo nami abip uti amitom kaa liip tiltam suunkup ilin kaami as lap kuu duk-duu ina-lomdiwa yaap mokso suunkup ilokomip.
REV 22:15 Lale, nali kamboyi, tunum ayo kukup mafak kaata tabuu-bom ban dakaamin so, tunum ok tit tem tiyak daa atafiimin, yokoop daka-bam, nong molap saal duk-duu-laamin, sadikimin tunum unang so, unang tunum aamin tunum so, men awem so, mafek mafek sinik dotu kutii-bom fiyaap duu-bom aman dakaalin so, tunum suunkup kasen-kasen-bam ibakamin kukup, kanumin tunum ili talaba tam nami abip kaa ma talaba tam nita-mokomip disa; ili kalo tal saaklo kutamu ilokomip ko.
REV 22:16 Kemin, Yesus nali ti King Devit ami man loop kemin, God ata uldaa-nam-buula Devit ami abiin kaa kuluusi. Am kel diim wakalkan daan tilipkan awak dukum kaami tiltam tamalu utam ale, U mepso am daanon o, kalalup tiltam tamalon o, kala-laabup ultap, nakal nalmi unang tunum abip ma ma kaa bom-bilip ipni bokoya-lomdi: Alik mafek mafek kuluu tiltam ukol alik ma talalulon o, kalbi uyo mepso tulu kayi! yokon o, kalalila, nami ensel ayo dabaali, tal ipni weng tem kala kukaayimba kayi! kala Yesus ayo kanum bokola ko.
REV 22:17 God ami Sinik Tambal so, Yesus ami lak duulin tunum unang miit maakup kelu almi kalel kuluulin tap ke yim-bii almi abip unokoma kiiso, ita kemin, Yesus ami bokola-lom: Kamokim kapyo, baan abiltap tal o, ke-biliple, kanola ultap alik ibi kanita weng kaa weng sanip namti, Yesus ami bokola-lomdip, Kamokim, kapyo abiltap tal o, akin o, kala-somla ko. Kanola alik ibi kawanta ok del keya del kala ke-yimbu kalip namti, suunkup ilin malmil ok dis kulaa ma inamnum o, kalip namti, Yesus ami suunkup ok kaali, molokomip disa. Disa kulu kuuyokoma uyo, tal kuluu inamnin aa! Kemin, kaami inam-nokomip uyo, suunkup suunkup ilokomip ko.
REV 22:18 Tunum unang weng san-bilip, sukon tik-tii-bilipla, weng san-kaabip kipyo, Ibi mep mafek mafek kaa tiltam tabokomu kaami sang uyo weng san-kaabip kemin, nali Jon nata, sukon tem kaldaku dol-yimbi nami weng kalawuuli, dukum-kup bokoyokomi. Kemin, nami weng kaluu, dotu weng san kutal-fukulalip ko! Kanta ma almi aket fukunin weng kusnum so ma kuyaku-som ale, sukon tem kala dolbi ami weng uyo kuyaku ke-lomda almi ibakamin weng so bakaya namti, kanuba kaami kukup uyo God alalta tela, angtiil atul kusnum kusnum kaata tiltam talokomu kayi! kalaya, sukon tem kala dolbi kaami angtiil atul umi kuyaku-som ban kusnum kaami angtiil atul umi kuyaku-som ke, kalala, awak um-tal-daalokoma te!
REV 22:19 Ultap kemin, kawanta mafek mafek kanu-mokoma kaami weng anung sukon tem dolbi kuu ma takan-tiilip namti, God ayo tam taba imi mafek mafek weng kutii kuyokomi no! kalsa uyo takan-tiiyilila, ili tiltam nami suunkup abip uyo ma ilokomip disa. Suunkup ilin as kaami lap uyo ma inam-nokomip disa yo, kala ko.
REV 22:20 Mep weng alik kula dolbi kuluuli, Kamokim Yesus almi weng alta kup-nala, ibi bokoyi kemin, ali boko-lom: Ti fan tituun weng kemin, fan nali mepso talokomi no, kalalaya, Kamokim Yesus ayo kanum bokola. Numi Kamok Yesus kapyo, baan abil talawa, titamum i! takan-kaabup. Baan tal o!
REV 22:21 Nali dik-dakaan-bilila, Kamokim Yesus alalta aket filit so, kukup tambal so, kiita God ami unang tunum kipni kukaayim-bam, tiin mo-balaya, alik yaap tambal-kup bom-biliwa yi!
