﻿Yunan.
2.
Yesséwey-in Amaɣlol ǎsolmi mǎqqeren, yelmeẓ Yunan, yeqqim Yunan dɣ tesa n ǎsolmi keraḍ ihilan d keraḍ iheḍan. 
Dɣ tesa n ǎsolmi, yeqqim Yunan itimuhud fol Amaɣlol, Messineɣ ennét, yenna : 
« Dɣ mihi, eɣréɣ Amaɣlol, Yǎjeweb ahi ; Dɣ ammas n ǎkal n inemmuttan, eǧmeyeɣ telilt, Tesgeded i awalin. 
Tenḍew-d ahi dɣ édér n ǧeréw, Tihiw n aman eɣleynet ahi ; Tihiw emdanet, aman emdan okeyen foli. 
Nk ǧannéɣ dɣ imanin : “Etwestaɣeɣ, oǧeǧeɣ ǎhenay ennek ! Beššan abedǎh eǧareɣ eṭṭema n éd eyneɣ éhen ennek wan ǎmud wa heddigen.” 
Aman éweḍen ahi ar tǎkorseyt, Tihay eɣleynet ahi, Tǎleggit tekres fol éɣefin. 
Ereseɣ ar ikéwen n tidreɣén, ǎmǎḍal yergelen foli tinassén ennét ar abedǎh ; Beššan tesseǧmeḍed ahí-d anu eddareɣ, É Messineɣ, Amaɣlolin ! 
Awad edhašen imanin dɣ ammasin, Ektéɣ-d Amaɣlol, tittarin éweḍnet key, éweḍnet éhen ennek n ǎmud wa heddigen. 
Wi elkemnén i elṣnam wrn elé tenfa, wr ilkém éd ennejjin. 
Nk, éd hak eǧeɣ tikutawén, timmuyuɣ ǎsiɣeréɣ, Awas ennéɣ édt eǧeɣ, tidet as édt eǧeɣ : ǎnejji wr-t iteǧ ar Amaɣlol. » 
Dédih yesséwel Amaɣlol i ǎsolmi, yoq-d Yunan fol ǎmǎḍal. 
