﻿‑Yusu a ‑tɩ, ‑tɛ Matie ‑mɛ ‑ye, ɔ nu la 'a 'crɩɩlɛ.
1.
'Crɩɩnɩɛ ‑gbo, ‑Yusu 'Klɩsʋ a ‑tɩ ɛɛ ꞊tu. ‑Yusu 'Klɩsʋ a ‑gbɛ, ɔ mɔ bodɩɔ Dafidɩ a 'yuo a 'yu a 'Yuu nɩ. Dafidɩ a ‑gbɛ, ɔ mɔ ‑wɛ Abrahamʋ a 'yuo a 'yu a 'yuu nɩ. 
Abrahamʋ a ‑gbɛ, ɔ kɔ Yisakɩ, 
Juda kɔ Tama 'hɛɛn, 'ʋ kɔ Falɛsɩ kɔ Sala, 
Alamʋ 'ɔ kɔ Aminada, 
Sala kɔ Rahabʋ 'hɛɛn 'ʋ kɔ Bʋasɩ, 
Yisai 'ɔ kɔ Dafidɩ, 
Salomɔ 'ɔ kɔ Rʋbʋamʋ, 
Asafʋ 'ɔ kɔ Sosafatɩ, 
Osiasɩ 'ɔ kɔ Sʋatamʋ, 
Esekiasɩ 'ɔ kɔ Manase, 
Sosiasɩ 'ɔ kɔ Yekonia kɔ 'a ‑dɩayuo 'hɛɛn. Ti a ‑gbɛ 'yri, tʋ klɩ la Yisraɛkʋɛ nɩ, 'ʋ gbʋ la 'le Babilɔnɩblʋgba 'mʋ. 
‑Tɛ ʋ gbʋ la 'le, 
Solobabɛlɩ 'ɔ kɔ Abiudɩ, 
Asɔ 'ɔ kɔ Sadɔkɩ, 
Eliudɩ 'ɔ kɔ Ɛlɩasa, Ɛlɩasa 'ɔ kɔ Mata, Mata 'ɔ kɔ Sakɔbʋ, Sakɔbʋ 'ɔ kɔ Sosɛfʋ. Sosɛfʋ, nɔ‑ mɔ Mari a tɔ, ‑Yusu 'Klɩsʋ a 'dii. 
‑Yusu a ‑gbɛ, nɔ‑ mɔ Waanyɔ, Nyɩsʋa po la lɛ, ɔ di la ‑a mʋ ye ya. 
Kʋɛ 'le Abrahamʋ ‑wɔn gbo, ‑bo yɛ bodɩɔ Dafidɩ ke, ‑tʋnahuin a ꞊hrɩn a gbleii ‑pu ꞊tu 'o ‑hɛn, nʋ‑ nɩ la 'o 'waa ‑gbahlɔn. Kʋɛ 'le Dafidɩ ‑wɔn gbo, ‑bo yɛ ti ꞊nʋ ‑kɔ 'yri ʋ gba la 'le Yisraɛkʋɛ Babilɔnɩblʋgba 'mʋ, ‑tʋnahuin a ꞊hrɩn a gbleii ‑pu ꞊tu 'o ‑hɛn, nʋ‑ nɩ la 'o 'waa ‑gbahlɔn. Kɔ, kʋɛ 'le ti a ‑gbɛ 'yri, ‑bo yɛ ‑Yusu, ‑ɔ mɔ Waanyɔ ꞊nʋ a kɔɔlɛ ke, ‑tʋnahuin a ꞊hrɩn a gbleii ‑pu ꞊tu 'o ‑hɛn, nʋ‑ nɩ la 'o 'waa ‑gbahlɔn. 
‑Tɛ ʋ nu la ‑Yusu 'Klɩsʋ a kʋkɔ, ɛ nɛ‑ ‑gbo: 'A 'dii Mari a ‑gbɛ, Sosɛfʋ, nɔ‑ dio kɔ, kɛɛ, ʋ 'de la bʋɩ na ye po, 'ɔ nɩ la 'kwli 'mʋ, 'ke 'le Nyɩsʋa a ‑Hihiu a 'klɩ 'kwli 'mʋ. 
Sosɛfʋ a ‑gbɛ, ‑ɔ dio la kɔ, 'a 'yrinaabʋɩ 'sii 'o ye, 'ke 'o Nyɩsʋa ye. Nɛ‑ nue, 'ɔ 'nɩnɩ ‑hʋa bɔ yɔɔ ‑tɩ, 'ke 'o nahuin ye, ‑ɛ die nu, Mari a 'dʋ 'nɩ ꞊han 'yi lɛ nyre. Ɛ nɛ‑ nue, 'ɔ pue 'le, 'ke nahuon ꞊de nɩ 'wɩn 'le, 'bɔɔ Mari gbo tɛ. 
Bɔɔ 'klɛɛ 'lu lɛ ‑hie, ‑ye Nyɩsʋa a lɛleenyɔ 'hrɩɩ ꞊nɔ ye, 'ke 'le yain 'kwli 'mʋ, ɔ nɔ: «Sosɛfʋ o, Dafidɩ a 'yu a 'Yu, ꞊nɩ pɩ 'le hʋannʋ, 'ke ‑bo kɔ Mari, ‑ɛ nue, Nyɩsʋa a ‑Hihiu a 'klɩ, nɩ‑ nue, 'ɔ nɩ 'kwli ꞊nʋ 'mʋ. 
Ɔ di kɔ 'yu nyɩbɛyu. 'Yu a ‑gbɛ, ꞊tuo 'o ‑Yusudʋ, ‑ʋ ꞊hɛn 'nyrɛ Waanyɔ, ‑ɛ nue, nɔ‑ di Nyɩsʋa a dakʋ waa, 'ke 'o 'waa dɛ 'kuku ‑wɔn.» 
‑Tɩ ꞊nʋ, Nyɩsʋa ꞊tu la 'a winwlɔn‑hɛnyɔ wlɔn, ɩ nyre 'o ꞊o. ‑Tɩ a ‑gbɛ, ɩ nɩ‑ ‑gbo: 
«Nyrʋgba ꞊nʋ, ‑ɔ 'de nyɩbɛdɛ yi, nɔ‑ di 'kwli 'mʋ nɩ, ɔ 'mʋ 'yu nyɩbɛyu kɔ. 'A 'dʋ di 'mʋ 'ya Emanuɛ, ‑ɛ ꞊hɛn 'nyrɛ, Nyɩsʋa nɩ 'o ‑a mʋ ‑wɔn.» 
‑Tɛ Sosɛfʋ 'ba ye 'mʋ, ‑ye dɛ ꞊nʋ, Nyɩsʋa a lɛleenyɔ le ꞊nɔ, nɛ‑ ɔ ꞊tuu 'o, 'ɔ kɔ Mari. 
Kɛɛ, ɔ kɔ ꞊nɔ 'hɛɛn, ʋ 'de la bʋɩ na ye po, Mari 'ɔ kɔ 'yu nyɩbɛyu a ‑gbɛ, Sosɛfʋ 'ɔ ꞊tuo ‑Yusudʋ. 
