﻿Sabo.
128.
Sabo-Pionjonañe Hene haha ondaty mañeveñe am’ Iehovà, ie mañavelo amo lala’eoo. 
Ho kamae’o ty fitoloñam-pità’o, le ho ehake vaho hierañerañe. 
Hanahake ty vahe mirotrarotra ty tañ’anjomba’o añ’akiba’o ao, hoe zeite tora’e miariseho ty fandambaña’o o ana’oo. 
Eka, izay ty fitahiañe ondaty mañeveñe am’ Iehovào. 
Hañasoa azo boake Tsiône ao t’Iehovà le ho oni’o ty hasoa’ Ierosalaime amy ze hene andro hiveloma’o; 
Eka, ho isa’o o anan’ ana’oo. Fañanintsiñe am’ Israele. 
