﻿Sabo.
26.
Meo to iraho, ry Iehovà, fa mitrantràñe ami’ty havañonako; tsy nifejofejo ty fiatoako am’ Iehovà, vaho tsy hasiotse iraho. 
Biribirio iraho ry Iehovà vaho tsoho; hotsohotsò ty añ’ovako naho an-troko. 
Aolo’ o masokoo ty fiferenaiña’o, vaho manjotik’ amo figahiña’oo iraho. 
Tsy fitraofako toboke o mpamañahio, naho tsy fiharoako fijelanjelañe o soamiatrekeo. 
Hejeko ty fifañosoña’ o tsivokatseo, vaho tsy fitraofako toboke o lo-tserekeo. 
Hanasa tañañ’ an-kalio tahin-draho, vaho harikohoeko ty kitreli’o ry Iehovà, 
Ho poñafeko ty feom-pañandriañañe, ho talilieko iaby o fitoloña’o fanjakao. 
Ry Iehovà, teako ty fimoneñañe añ’anjomba’o ao, naho i kivoho fañialoañ’ enge’oy. 
Ko aharo’o fitontoñe amo mpanan-kakeoo ty troko, ndra ty fiaiko am’ondaty mampiori-dioo; 
o mitan-kilily an-taña’eo, ie pea vokàñe ty an-taña’e havana ao; 
Aa naho izaho, hitsontik’ an-kalio-tahiko; jebaño, vaho matariha amako. 
Mijohañe an-tane mira ty tomboko; andriañeko am-pivory ao t’Iehovà. 
