PSA 1:1 Ema nebee hetan ksolok mak ema nebee la moris tuir ema aat sira nia lia menon, la sama sala nain sira nia ain fatin, la tuur hamutuk ho ema kontra door sira,
PSA 1:2 maibee nia gosta teb-tebes NAI Maromak nia lei; loron-kalan nia medita ba lei nee.
PSA 1:3 Ema nee hanesan ai huun ida nebee kuda besik iha bee dalan, nia foo fuan tebar tuir nia tempu, nia tahan nunka namlaik. Nia halo saida deit, hetan rezultadu diak.
PSA 1:4 Ema aat sira nee oin seluk; sira hanesan hare kulit mamuk nebee anin huu lakon tiha.
PSA 1:5 Entaun ema aat sira nee sei la aguenta iha loron justisa; sala nain sira nee la bele tama hamutuk ho ema nebee moris loos.
PSA 1:6 Tanba NAI Maromak kuidadu lalaok ema moris loos nian, maibee ema aat sira nia lalaok lori sira ba mate.
PSA 2:1 Nusaa mak nasaun jentiu sira kombina malu? Povu sira tau lia ba malu atu manaan saida?
PSA 2:2 Liurai sira iha mundu hamriik hamutuk; nai ulun sira nee futu lia kontra NAI Maromak no kontra liurai nebee mak Nia foti tiha ona. Ema sira nee dehan,
PSA 2:3 “Mai ita halo ita nia aan livre husi Maromak ho liurai nebee Nia hili nee; mai ita harahun tiha korenti nebee mak futu metin ita.”
PSA 2:4 Nai Maromak hamnasa fali sira; Nia tuur iha lalehan hodi goza sira.
PSA 2:5 Depois Nia hasee sira ho hirus; Nia hatauk sira ho laran nakali dehan,
PSA 2:6 “Hau hatuur tiha ona Hau nia liurai iha Siaun, Hau nia foho santu.”
PSA 2:7 Liurai dehan, “Hau sei foo sai buat nebee NAI Maromak deklara tiha ona mai hau. Nia deklara nunee: ‘O nee Hau nia oan. Agora ba oin, Hau o nia Aman.
PSA 2:8 Husu mai Hau mak Hau sei foo nasaun hotu-hotu ba o; husi rai ulun too rai ikun sei sai o nia riku-soin.
PSA 2:9 O sei baku tohar sira ho rota besi; o sei halo rahun sira hanesan ema baku rahun sanan rai.’”
PSA 2:10 Nee duni liurai sira, sai matenek ba; nai ulun mundu nian, aprende di-diak ba.
PSA 2:11 Serbi NAI Maromak ho hamtauk, hakruuk ba Nia ho nakdedar. Se lae Nia hirus, halo imi mate derepenti iha dalan, tanba Nia laran nakali lalais. Ema hotu nebee hamahon aan iha Nia, sira hetan ksolok.
PSA 3:1 Salmu David nian, bainhira nia halai sees husi nia oan Absalão. NAI Maromak, hau nia inimigu barak loos; iha ema barak hamriik kontra hau!
PSA 3:2 Ema barak koalia kona ba hau dehan, “Maromak sei la salva nia.”
PSA 3:3 Maibee NAI, Ita Boot defende hau; Ita Boot tane aas hau no foti sae hau nia ulun.
PSA 3:4 Hau bolu NAI Maromak; husi Nia foho santu Nia hataan hau.
PSA 3:5 Hau toba hakmatek no hadeer fali ho diak, tanba NAI kuidadu hau.
PSA 3:6 Hau la tauk hau nia inimigu rihun ba rihun nebee asalta hau husi sor-sorin.
PSA 3:7 NAI, hamriik ba; hau nia Maromak, mai salva hau ba! Tuku tiha hau nia inimigu sira nia hasan; halo tohar tiha ema aat sira nia nehan.
PSA 3:8 NAI Maromak, salvasaun mai husi Ita Boot. Foo bensaun ba Ita Boot nia povu.
PSA 4:1 Salmu David nian, ba dirijenti koru. Akompanha ho viola. Maromak, Ita Boot sempre defende hau; hataan hau bainhira hau bolu Ita Boot! Uluk hau iha fatin kloot, Ita Boot foo fatin luan mai hau; hanoin hau ba, rona hau nia orasaun.
PSA 4:2 Imi ema sira nee, imi atu hafoer hau nia naran too bainhira? Too bainhira loos mak imi gosta buat nebee la iha folin, no duni tuir lia falsu?
PSA 4:3 Keta haluha katak NAI Maromak hili tiha ona ema nebee moris loos hodi sai Ninian; NAI rona bainhira hau bolu Nia.
PSA 4:4 Maski tauk ho nakdedar, maibee la bele halo sala; bainhira o iha o nia toba fatin, hakmatek hodi reflete aan.
PSA 4:5 Fiar ba NAI Maromak hodi oferese sakrifisiu nebee loos ba Nia.
PSA 4:6 Iha ema barak mak husu, “See mak sei foo moris diak ba ami? NAI, leno ami ho Ita Boot nia oin.”
PSA 4:7 Ksolok nebee Ita Boot foo tiha ona mai hau boot liu fali ksolok nebee sira hetan husi sira nia ai haan ho tua bar-barak.
PSA 4:8 NAI, hau sei toba dukur ho hakmatek; Ita Boot deit mak halo hau moris seguru.
PSA 5:1 Salmu David nian, ba dirijenti koru. Akompanha ho korneta. NAI Maromak, see tilun ba hau nia liafuan; foo atensaun ba hau nia halerik.
PSA 5:2 Hau nia Liurai, hau nia Maromak, hau harohan husu tulun ba Ita Boot deit; rona hau nia orasaun ba.
PSA 5:3 NAI Maromak, dadeer-dadeer Ita Boot rona hau nia lian; iha dadeer-saan hau hasae hau nia orasaun ba Ita Boot hodi hein Ita Boot nia resposta.
PSA 5:4 Tanba Ita Boot Maromak ida nebee la haksolok ho hahalok aat; buat aat la bele hela iha Ita Boot nia prezensa.
PSA 5:5 Ema nebee foti aan la bele hamriik iha Ita Boot nia oin; Ita Boot odi ema aat hotu-hotu.
PSA 5:6 NAI Maromak, Ita Boot sempre harahun bosok-teen sira; Ita Boot hakribi ema nebee hamrook raan ho lohi door sira.
PSA 5:7 Maibee tanba Ita Boot nia domin rohan-laek, hau bele tama iha Ita Boot nia uma; hau hakruuk ba Ita Boot nia fatin santu hodi adora Ita Boot.
PSA 5:8 NAI Maromak, hanorin hau atu moris tuir Ita Boot nia lia loos tanba hau iha inimigu barak; halo tetuk Ita Boot nia dalan iha hau nia oin para hau bele lao tuir.
PSA 5:9 Liafuan nebee sai husi hau nia inimigu sira nia ibun, la iha ida mak loos; sira nia laran nakonu ho hanoin aat. Sira nia kakorok hanesan rate nebee nakloke; sira nia liafuan kos-kose ema.
PSA 5:10 Maromak, tesi sira nia lia hodi kastigu sira; husik sira nia manobra halo sira rasik monu. Sira kontra ona Ita Boot; hasai sira husi Ita Boot nia prezensa tanba sira nia sala barak.
PSA 5:11 Maibee see-see deit mak buka mahon iha Ita Boot, sira kontenti; sira sempre hananu haksolok. Proteje ema nebee hadomi Ita Boot atu nunee sira nia laran bele haksolok.
PSA 5:12 Tebes duni, NAI Maromak, Ita Boot foo bensaun ba ema nebee moris loos; Ita Boot nia laran diak haleu sira hodi defende sira.
PSA 6:1 Salmu David nian, ba dirijenti koru. Akompanha ho viola tali walu. NAI Maromak, maski Ita Boot hirus hela hau, maibee keta siak hau; maski Ita Boot nia laran nakali hela, maibee keta kastigu hau.
PSA 6:2 NAI, hau nia forsa lakon tiha, hanoin hau ba! NAI, hau nia ruin sira moras hotu kura hau ba!
PSA 6:3 Hau nia laran susar teb-tebes. Too bainhira NAI, too bainhira?
PSA 6:4 NAI, see Ita Boot nia oin mai hau; salva hau ba! Hatudu Ita Boot nia domin rohan-laek mai hau hodi hasai hau husi susar laran.
PSA 6:5 Tanba ema nebee mate ona la temi tan Ita Boot nia naran. Iha ema mate sira nia fatin, see mak atu hahii Ita Boot?
PSA 6:6 Hau halerik too kole teb-tebes; kalan tomak, hau nia matan been suli habokon hau nia kama; hau tanis too hau nia toba fatin bokon hotu.
PSA 6:7 Hau nia matan sai malahuk tiha tanba hau nia laran dodok nee; hau nia matan haree la moos ona tanba hau nia inimigu sira nia hahalok.
PSA 6:8 Imi hotu nebee halo buat aat, hadook aan husi hau, tanba NAI Maromak rona ona hau nia halerik.
PSA 6:9 Hau husu tulun ba NAI, Nia rona ona hau; NAI simu hau nia orasaun.
PSA 6:10 Hau nia inimigu sira hotu sei moe ho tauk teb-tebes; derepenti sira hakiduk ho moe boot.
PSA 7:1 Salmu nee David kanta ba NAI Maromak kona ba Kuxe, ema ida husi suku Benjamim. NAI, hau nia Maromak, hau hamahon aan iha Ita Boot. Iha ema buka atu halo aat hau; tulun hau no salva hau ba.
PSA 7:2 Se lae, sira hanesan liaun lees matak tiha hau; sira sei lees hau nia isin halo rohan-rohan, ema atu salva hau la iha.
PSA 7:3 NAI, hau nia Maromak, hau nia sala saida? Hau halo aat ba hau nia belun ka? Hau halo violensia arbiru deit hasoru hau nia inimigu ka? Se karik hau halo buat sira nee,
PSA 7:5 entaun husik hau nia inimigu duni hau hodi kaer tiha hau ba; husik nia sama hau ba rai too latan tiha hau iha rai rahun.
PSA 7:6 NAI Maromak, hamriik ho hirus ba. Tuba rai metin hodi hasoru hau nia inimigu tanba sira nia laran nakali. Hau nia Maromak, hadeer ona ba hodi foo sai lia loos.
PSA 7:7 Halibur hamutuk povu husi rai hotu-hotu para haleu Ita Boot; tuur iha fatin aas hodi ukun sira.
PSA 7:8 NAI mak tesi povu sira nia lia. NAI, hau ema ida nebee moris loos no la sala ida. Maromak Aas Liu, foo justisa mai hau ba.
PSA 7:9 Maromak, Ita Boot sempre halo buat nebee loos; Ita Boot koko ema nia neon ho laran. Hapara tiha ema aat sira nia hahalok aat; foo hakmatek ba ema nebee moris loos.
PSA 7:10 Maromak mak defende hau; Nia salva ema sira nebee laran moos.
PSA 7:11 Maromak sempre tesi lia ho loos; loro-loron Nia hamonu kastigu ba ema aat.
PSA 7:12 Se sira la hakribi sira nia sala, entaun Maromak sei kadi Nia surik, Nia sei dada Nia rama atu hana.
PSA 7:13 Sasaan kroat para hamate ema, Nia prepara tiha ona; rama oan nebee Nia atu hana, Nia sunu lakan tiha ona.
PSA 7:14 Haree ba, ema sira nee kuda hahalok aat, sira haburas hanoin aat hodi foo rezultadu liafuan bosok.
PSA 7:15 Sira kee rai kuak ba ema seluk, maibee sira rasik monu tama ba laran.
PSA 7:16 Hahalok aat nebee sira halo kona fali sira; violensia nebee sira halo hanehan fali sira nia ulun.
PSA 7:17 Hau sei foo agradese ba NAI Maromak tanba Nia sempre halo buat nebee loos; hau sei hananu hahii NAI Maromak Aas Liu nia naran.
PSA 8:1 Salmu David nian, tuir muzika Gitit. Ba dirijenti koru. NAI Maromak, ami nia Nai, Ita Boot nia naran furak teb-tebes iha mundu tomak! Ita Boot nia naran aas liu lalehan;
PSA 8:2 labarik ho kiikoan sira nebee sei susu hela hahii Ita Boot. Ita Boot hatuur tiha ona Ita nia kbiit hodi hasoru Ita Boot nia inimigu sira, halo funu baluk sira ho ema nebee mak rai odi sai nonook tiha.
PSA 8:3 Hau hateke sae ba lalehan; lalehan nee Ita Boot nia liman fuan mak halo; hau haree ba fulan ho fitun nebee mak Ita Boot hatuur tiha ona iha nia fatin.
PSA 8:4 Ami ema kriatura see loos, too Ita Boot interese ami? Ami ema kbiit-laek nee see loos, too Ita Boot tau matan mai ami?
PSA 8:5 Ita Boot halo ami kiik liu uitoan anju sira; Ita Boot foo fatin aas ba ami hodi foti aas ami nia naran.
PSA 8:6 Ita Boot foti ami ukun buat hotu-hotu nebee Ita Boot nia liman halo tiha ona; Ita Boot halo buat hotu-hotu hakruuk mai ami:
PSA 8:7 bibi ho karau sira hotu, ho mos animal fuik sira,
PSA 8:8 manu fuik iha lalehan, ikan iha tasi laran ho saida deit mak moris iha tasi laran.
PSA 8:9 NAI Maromak, ami nia Nai, Ita Boot nia naran furak teb-tebes iha mundu tomak!
PSA 9:1 Salmu David nian, ba dirijenti koru. Tuir muzika “Oan mane mate.” NAI Maromak, hau sei agradese ba Ita Boot ho hau nia laran tomak; hau sei hatete sai buat furak hotu nebee Ita Boot halo.
PSA 9:2 Hau sei kontenti ho haksolok tanba Ita Boot nia diak; Maromak Aas Liu, hau sei hananu hahii Ita Boot nia naran.
PSA 9:3 Hau nia inimigu sira hakiduk tiha ona; sira sidi monu, sira mate iha Ita Boot nia oin.
PSA 9:4 Tanba Ita Boot tuur iha kadeira ukun nudar Juis nebee loos, Ita Boot defende hau hodi foo justisa lo-loos mai hau.
PSA 9:5 Ita Boot siak ona nasaun jentiu sira; Ita Boot halo rahun ona ema aat sira; Ita Boot halakon tiha ona sira nia naran too tinan ba tinan.
PSA 9:6 Hau nia inimigu sira mate mohu ona, sira hanesan uma nebee rahun tiha ona. Ita Boot fokit sai tiha sira nia sidade hotu; ema nunka atu hanoin tan sira tinan ba tinan.
PSA 9:7 Maibee NAI Maromak ukun tinan ba tinan; Nia hametin tiha ona Nia kadeira ukun para tesi lia.
PSA 9:8 Nia ukun mundu ho justisa; Nia tesi lia ba ema hotu ho lo-loos.
PSA 9:9 NAI nee abrigu ba ema kbiit-laek sira; Nia sai sira nia abrigu iha tempu susar.
PSA 9:10 NAI, ema nebee konhese Ita Boot konfia Ita Boot, tanba Ita Boot nunka husik ema nebee mak harohan ba Ita Boot.
PSA 9:11 Hananu hahii NAI Maromak ba, Nia ukun iha Siaun; foo sai ba nasaun jentiu sira kona ba buat nebee Nia halo tiha ona.
PSA 9:12 Tanba Maromak buka tuir ema oho door; Nia sempre hanoin ema kbiit-laek sira; Nia la haluha sira nia halerik.
PSA 9:13 NAI Maromak, haree ba, hau nia inimigu sira hanehan hau! Hanoin hau ba, hasees tiha hau husi odamatan mate nian,
PSA 9:14 atu hau bele baa tuur iha odamatan sidade Jerusalém nian hodi konta sai Ita Boot nia diak no haksolok tanba Ita Boot salva tiha ona hau.
PSA 9:15 Nasaun jentiu sira monu tiha ona ba rai kuak nebee sira rasik mak kee; sira nia ain belit tiha ona iha lasu nebee sira rasik mak monta subar.
PSA 9:16 Bainhira NAI Maromak foo justisa, Nia hatudu sai Nia Aan; ema aat sira nia hahalok rasik sai lasu hodi halo sira monu.
PSA 9:17 Ema aat sira tuun dadauk ba ema mate sira nia fatin; nasaun hotu-hotu nebee mak haluha Maromak sei sai nunee.
PSA 9:18 Maibee Maromak sei la haluha ema kiak sira; ema kbiit-laek sira nia esperansa sei la mohu.
PSA 9:19 NAI Maromak, hamriik ba! Keta husik ema kriatura mak manaan fali Ita Boot; haruka nasaun jentiu sira hotu hataan iha Ita Boot nia oin.
PSA 9:20 NAI, hatauk sira ba; nasaun sira nee tenki hatene katak sira ema kriatura deit.
PSA 10:1 NAI Maromak, tansaa mak Ita Boot hamriik dook nunee? Tansaa mak Ita Boot subar Aan bainhira ami iha susar laran?
PSA 10:2 Ema aat sira foti aan hodi hanehan ema kbiit-laek sira; husik sira monu ba lasu nebee mak sira rasik halo tiha ona.
PSA 10:3 Ema aat sira gaba aan kona ba saida mak sira nia laran kaan; ema nebee matan naklosu ba sasaan hatete aat NAI Maromak hodi hatuun Nia naran.
PSA 10:4 Ema aat sira nee foti aan dehan Maromak sei la husu tuir sira; iha sira nia neon tomak la iha fatin ba Maromak.
PSA 10:5 Sira nia moris diak hela deit; sira la interese Maromak nia lei; sira sempre hamoe sira nia inimigu.
PSA 10:6 Sira hatete ba sira nia aan, “La iha buat ida mak atu doko hau; susar nunka atu kona hau.”
PSA 10:7 Sira nia ibun nakonu ho hotar, lia bosok ho ameasa; sira kaan koalia liafuan nebee halo susar ema no halo aat ema.
PSA 10:8 Sira subar nonook besik aldeia; husi sira nia subar fatin sira oho ema nebee la hatene buat ida. Sira hafuhu ema nebee sira atu oho;
PSA 10:9 sira hein hanesan liaun nebee helik iha ai huun. Sira hein atu kaer ema kbiit-laek; sira kaer ema kbiit-laek sira nee ho lasu hodi dada sai.
PSA 10:10 Ho sira nia forsa sira hamonu tiha vitima sira nee hodi sama hanehan ba rai.
PSA 10:11 Sira hatete ba sira nia aan, “Maromak sei la nota ida; Nia taka tiha ona Nia matan, Nia la haree saida mak hau halo.”
PSA 10:12 NAI Maromak, hamriik ba! Maromak, foti Ita Boot nia liman hasoru sira; keta haluha ema kbiit-laek sira.
PSA 10:13 Tansaa mak ema aat sira hatete aat Maromak? Tansaa mak sira dehan ba sira nia aan, “Nia sei la kastigu hau”?
PSA 10:14 Maibee Ita Boot nia matan haree duni ema nebee iha terus ho susar laran; Ita Boot nia liman sempre prontu hodi tulun sira. Vitima sira nee oferese sira nia aan ba Ita Boot; Ita Boot mak ajudador ba oan kiak sira.
PSA 10:15 Silu tohar tiha ema aat sira nia liman ba; eziji sira para hataan hotu hahalok aat nebee sira halo tiha ona.
PSA 10:16 NAI Maromak nee Liurai tinan ba tinan; nasaun jentiu sira sei lakon mohu husi Nia rain.
PSA 10:17 NAI, Ita Boot rona ema mukit sira nia hakarak; Ita Boot hametin sira nia laran hodi see tilun ba sira nia halerik.
PSA 10:18 Ita Boot defende oan kiak sira ho vitima sira nebee ema hanehan, atu nunee ema iha mundu la bele halo teror tan.
PSA 11:1 Salmu David nian, ba dirijenti koru. NAI Maromak mak hau nia mahon. Nusaa mak imi dehan fali mai hau, “Salva o nia aan hanesan manu fuik nebee mak semo ba foho.
PSA 11:2 O haree ka lae, ema aat sira prepara hela sira nia rama; sira tau hela rama oan ba rama inan; sira hein iha fatin nakukun atu hana ema diak sira.
PSA 11:3 Bainhira lei nia huun rahun tiha ona, ema nebee moris loos atu halo saida tan?”
PSA 11:4 NAI Maromak iha hela Nia uma santu; NAI tuur hela iha Nia kadeira ukun iha lalehan. Nia matan haree tu-tuir ema hotu-hotu iha mundu hodi koko sira.
PSA 11:5 Ema nebee moris loos ho mos ema aat sira, NAI koko hotu; ema nebee gosta violensia, Maromak hakribi.
PSA 11:6 Nia sei fakar tuun ahi klaak ho fatuk lakan ba ema aat sira; Nia sei haruka anin manas hodi halo terus sira.
PSA 11:7 NAI sempre halo buat nebee loos; Nia gosta hahalok nebee loos; ema diak sei haree Nia oin.
PSA 12:1 Salmu David nian, ba dirijenti koru. Akompanha ho viola tali walu. NAI Maromak, salva ami ba! Tanba ema nebee moris loos la iha tan ona; ema nebee foo laran ba Ita Boot, sira lakon mohu tiha ona husi mundu nee.
PSA 12:2 Hela deit ema nebee gosta lohi sira nia maluk; sira nia ibun kos-kose ema; sira nia laran nakonu ho buat bosok.
PSA 12:3 Hau harohan atu NAI Maromak taka tiha ibun nebee kos-kose ema, hapara tiha nanaal nebee nakonu ho gaba aan.
PSA 12:4 Ema sira nee dehan, “Hodi ami nia liafuan, ami sei manaan; saida mak ami hakarak koalia, ami koalia deit; see mak atu manda tan ami?”
PSA 12:5 NAI Maromak dehan, “Sira hanehan ema kiak; sira halo ema kbiit-laek halerik. Nunee Hau sei hamriik; Hau sei hatuur ema kbiit-laek sira iha fatin seguru nebee durante nee sira hein hela.”
PSA 12:6 NAI nia promesa perfeitu hotu, hanesan osan mutin nebee hamoos dala hitu ona iha ahi.
PSA 12:7 NAI Maromak, Ita Boot sei kuidadu ema kbiit-laek sira; Ita Boot sei hamahon ami husi ema aat sira tinan ba tinan.
PSA 12:8 Ema hotu-hotu iha mundu gaba hahalok aat, too ema aat sira lao livre iha fat-fatin.
PSA 13:1 Salmu David nian, ba dirijenti koru. NAI Maromak, Ita Boot atu haluha hau too bainhira? Too tinan ba tinan ka? Ita Boot atu subar oin husi hau too bainhira?
PSA 13:2 Too bainhira mak hau nia laran tenki susar nunee; hau nia fuan loron-kalan taridu hela deit? Too bainhira mak hau nia inimigu sira manaan hela deit?
PSA 13:3 NAI, hau nia Maromak, hateke mai hau, no hataan hau ba; foo iis foun mai hau. Se lae hau mate,
PSA 13:4 depois hau nia inimigu dehan, nia manaan tiha ona; haree hau monu nunee, hau nia funu baluk haklalak.
PSA 13:5 Maibee hau konfia Ita Boot nia domin rohan-laek; hau nia laran haksolok tanba Ita Boot sei salva hau.
PSA 13:6 Hau sei hananu ba NAI Maromak tanba Nia halo tiha ona buat diak mai hau.
PSA 14:1 Salmu David nian, ba dirijenti koru. Ema beik sira koalia iha sira nia laran dehan, “Maromak la iha!” Ema sira nee mesak aat deit; sira nia hahalok aat teb-tebes; la iha ema ida mak halo buat diak.
PSA 14:2 NAI Maromak hateke tuun husi lalehan mai ita ema hodi haree iha ema balu matenek ka lae, ema balu harohan ba Maromak ka lae.
PSA 14:3 Maibee ema hotu lao sala dalan ona, sira hotu sai aat tiha ona; la iha ema ida mak halo buat diak; ida mos la iha.
PSA 14:4 Ema aat sira nee la hatene buat ida ka? Sira haan matak hau nia povu hanesan fali sira haan halimar paun fuan ida; sira nunka bolu NAI Maromak nia naran.
PSA 14:5 Maibee haree ba, ema sira nee sei tauk teb-tebes, tanba Maromak hamutuk ho ema nebee moris loos.
PSA 14:6 Imi ema aat sira hamnasa fali ema kbiit-laek sira nia planu, maibee NAI Maromak foo mahon ba kbiit-laek sira nee.
PSA 14:7 Hau harohan atu Maromak hamriik iha foho Siaun hodi salva Israel. Bainhira NAI Maromak hadia fali Nia povu nia moris, Jacó nia jerasaun sei haksolok, Israel sei kontenti.
PSA 15:1 Salmu David nian. NAI Maromak, see mak bele tama ba iha Ita Boot nia uma kreda? See mak bele sae ba iha Ita Boot nia foho santu?
PSA 15:2 Ema nebee lao iha dalan loos, no halo buat nebee loos; nia koalia lia loos husi nia laran.
PSA 15:3 Nia la hatete aat ema, no la halo buat aat hasoru nia maluk; nia la hatuun ema seluk.
PSA 15:4 Nia hakribi ema aat, maibee respeita ema nebee hamtauk NAI Maromak; nia kaer metin nia promesa maski todan ba nia.
PSA 15:5 Nia foo empresta osan ba ema kiak, la husu funan. Nia lakohi simu ema nia osan para foo sasin falsu kontra ema nebee la sala. See deit mak halo buat sira nee nunka atu nakdoko.
PSA 16:1 Salmu David nian. Maromak, kuidadu hau ba, tanba hau hamahon aan iha Ita Boot.
PSA 16:2 NAI Maromak, hau hatete ba Ita Boot dehan, “Ita Boot mak hau nia Nai; buat diak hotu-hotu nebee hau iha mai husi Ita Boot.”
PSA 16:3 Maromak nia povu santu iha rai nee furak teb-tebes; hau kontenti liu ho sira.
PSA 16:4 Ema nebee halai ba maromak sel-seluk sei susar ba beibeik. Hau sei la foo oferta raan nian ba maromak sira nee; hau nia ibun sei la temi sira nia naran.
PSA 16:5 NAI Maromak, hau nia riku-soin mak Ita Boot; Ita Boot foo bensaun mai hau; hau nia destinu iha Ita Boot nia liman laran.
PSA 16:6 Fatin nebee Ita Boot foo mai hau furak; riku-soin nebee Ita Boot foo mai hau kapaas teb-tebes.
PSA 16:7 Hau sei hahii NAI Maromak, tanba Nia hatudu dalan mai hau; iha oras kalan mos hau nia konsiensia hanorin hau.
PSA 16:8 Hau nia matan sempre hateke ba NAI; Nia iha hela hau nia sorin, nunee la iha buat ida mak bele halo hau nakdoko.
PSA 16:9 Nee mak hau nia laran haksolok, hau nia fuan kontenti; hau nia isin mos hakmatek hela.
PSA 16:10 Tanba Ita Boot sei la husik hau iha ema mate sira nia fatin; ema ida nebee moris loos, Ita Boot la husik nia isin dodok iha rate laran.
PSA 16:11 Ita Boot hatudu ona dalan moris mai hau; Ita Boot sei halo hau nia laran haksolok teb-tebes iha Ita Boot nia oin; hau kontenti tinan ba tinan iha Ita Boot nia liman loos.
PSA 17:1 Orasaun David nian. NAI Maromak, hau husu justisa, rona hau ba; foo atensaun ba hau nia halerik. See tilun ba hau nia orasaun tanba hau nia ibun la bosok ida.
PSA 17:2 Ita Boot sei deklara sai katak hau la sala, tanba Ita Boot hatene saida mak loos.
PSA 17:3 Ita Boot hatene mo-moos hau nia laran; iha kalan Ita Boot mai investiga hau. Ita Boot koko tiha ona hau maibee la hetan buat aat ida iha hau; hau nia ibun sempre koalia buat nebee loos.
PSA 17:4 Hau la halo tuir ema aat nia hahalok; hau hadook aan husi dalan violensia nian, tanba hau kaer metin Ita Boot nia ukun fuan.
PSA 17:5 Hau sempre lao tuir Ita Boot nia dalan; hau nia ain la sidi ida.
PSA 17:6 Maromak, hau harohan ba Ita Boot, tanba Ita Boot sei hataan hau; see tilun hodi rona hau nia lian.
PSA 17:7 Hatudu Ita Boot nia domin rohan-laek mai hau. Ita Boot mak salva ema nebee buka mahon iha Ita Boot; Bainhira sira iha Ita Boot nia liman loos, sira nia inimigu la bele halo buat ida.
PSA 17:8 Proteje hau hanesan Ita Boot kuidadu Ita Boot nia matan fuan; subar hau iha Ita Boot nia liras okos
PSA 17:9 atu ema aat la bele ataka hau; atu inimigu sira nebee haleu hau la bele oho hau.
PSA 17:10 Ema sira nee fuan toos; sira koalia gaba aan.
PSA 17:11 Agora sira lao toman ona hau hodi haleu hau, sira nia matan lakan atu soe tuun hau ba iha rai.
PSA 17:12 Sira hanesan liaun nebee mak hakarak atu lees hau; sira hanesan liaun siak nebee mak hafuhu hela atu ataka hau.
PSA 17:13 NAI Maromak, hamriik hasoru sira ba, hamonu sira ba; ho Ita Boot nia surik salva hau husi ema aat sira nee.
PSA 17:14 NAI, hodi Ita Boot nia liman salva hau husi sira, husi ema sira nebee mak hetan diak deit iha mundu nee. Hau harohan atu buat nebee Ita Boot rai ba ema aat sira bele enxe sira nia kabun halo nakonu, too sira nia oan sira bosu di-diak; sira nia oan nurak sira mos hetan hotu.
PSA 17:15 Maibee hau nia matan sei haree Ita Boot, tanba hau moris loos; bainhira hau hadeer fali, hau sei haksolok haree Ita Boot nia ilas.
PSA 18:1 Salmu husi NAI Maromak nia atan David, ba dirijenti koru. Salmu nee nia kanta ba NAI Maromak bainhira NAI Maromak hasai nia husi Saul nia liman laran ho mos husi nia inimigu sira. David kanta nunee. NAI Maromak, hau hadomi Ita Boot; Ita Boot mak hau nia forsa.
PSA 18:2 NAI mak fatuk kuak boot nebee hau subar iha laran; Nia mak lutu haleu hau; Nia hau nia Salvador. Nia mak hau nia Maromak; Nia mak fatuk kuak boot nebee hau subar iha laran. Nia defende hau; Nia kbiit salva hau; Nia mak hau nia abrigu.
PSA 18:3 Hahii NAI Maromak! Tanba hau temi Nia naran, Nia salva hau husi hau nia inimigu sira.
PSA 18:4 Uluk tali mate nian bobar tiha hau; mota tuun makaas halo hau mout;
PSA 18:5 korenti rate nian futu ona hau; lasu mate nian iha hela hau nia oin.
PSA 18:6 Iha susar laran hau temi NAI Maromak nia naran; hau halerik husu tulun ba Maromak. Husi Nia hela fatin, Nia rona hau nia lian; hau nia lia halerik tama too iha Nia tilun.
PSA 18:7 Depois rai nakdoko no nakdedar; foho nia huun nakdoko no nakdedar hotu, tanba Nia hirus.
PSA 18:8 Suar sai husi Nia inus laran; ahi lakan makaas sai husi Nia ibun laran; ahi klaak lakan mean sai husi Nia ibun.
PSA 18:9 Nia loke lalehan hodi tuun mai; kalohan metan iha hela Nia ain okos.
PSA 18:10 Nia manda anju tula Nia semo mai; Nia haruka anin lori Nia mai lalais.
PSA 18:11 Nia falun Aan ho nakukun; Nia taka Aan ho kalohan metan.
PSA 18:12 Iha Nia oin rai lakan fera kalohan metan nee, jelu fatuk ho ahi lakan monu tuun.
PSA 18:13 NAI Maromak nia lian tarutu husi lalehan; Maromak Aas Liu nia lian sai mai.
PSA 18:14 Nia hana Nia rama, inimigu sira halai namkari; Nia haruka rai lakan boot duni lakon tiha sira.
PSA 18:15 NAI, Ita Boot siak sira hodi huu iis makaas sai husi inus. Ho nunee Ita Boot halo tasi been sai maran tiha, no kolu molik tiha mundu.
PSA 18:16 Husi fatin aas nebaa, Maromak nia liman kaer metin hau; Nia dada hau sai husi bee naruk nia laran.
PSA 18:17 Nia salva hau husi hau nia inimigu nebee forti, husi ema nebee odi hau no makaas liu hau.
PSA 18:18 Iha dezastre laran sira ataka hau, maibee NAI Maromak tane hau.
PSA 18:19 Nia lori hau ba iha rai luan; Nia salva hau tanba Nia haksolok ho hau.
PSA 18:20 NAI haree hau diak tanba hau moris loos; Nia halo diak mai hau tanba hau nia liman moos.
PSA 18:21 Hau lao tuir nafatin NAI nia dalan; hau nunka fila kotuk ba hau nia Maromak.
PSA 18:22 Nia lei tomak sempre iha hau nia oin; hau la lao sees husi Nia ukun fuan.
PSA 18:23 Nia haree hau nia laran moos hela; hau kuidadu hau nia aan atu la bele halo sala.
PSA 18:24 NAI halo diak mai hau tanba hau moris loos, Nia hatene hau nia liman moos.
PSA 18:25 NAI Maromak, Ita Boot foo laran ba ema nebee foo laran ba Ita Boot; Ita Boot hatudu laran diak ba ema nebee laran moos.
PSA 18:26 Ita Boot sempre halo loos ba ema nebee moris loos, maibee Ita Boot hatene oinsaa hasoru ema nebee halo manobra.
PSA 18:27 Ita Boot salva ema kbiit-laek sira, maibee hatuun ema nebee mak foti aan.
PSA 18:28 NAI Maromak, Ita Boot mak halakan hau nia ahi oan: Hau nia Maromak leno hau iha nakukun laran.
PSA 18:29 Ho Ita Boot nia tulun hau bele avansa hodi kontra tropas inimigu sira; ho hau nia Maromak nia ajuda hau bele haksoit liu sira nia moru aas hodi tama ba laran.
PSA 18:30 NAI Maromak nee, Nia dalan perfeitu: Nia liafuan sempre loos; Nia defende ema nebee mak buka mahon iha Nia.
PSA 18:31 So NAI deit mak Maromak, la iha tan seluk. So ita nia Maromak deit mak fatuk lolon boot nebee hau helik ba.
PSA 18:32 Maromak mak foo forsa mai hau; Nia kuidadu hau iha dalan.
PSA 18:33 Nia halo hau nia ain hanesan rusa fuik nian; Nia halo hau hamriik metin iha fatin aas.
PSA 18:34 Nia treinu hau atu halo funu, nunee hau bele uza rama diak nian hodi hana.
PSA 18:35 NAI Maromak, Ita Boot defende hau hodi salva hau nia moris; Ita Boot tane hau; Ita Boot nia tulun halo hau sai ema boot.
PSA 18:36 Ita Boot prepara dalan luan atu hau lao tuir, ho nunee hau nia ain la sidi ba buat ida.
PSA 18:37 Hau duni tuir hau nia inimigu sira too toman sira; hau la hakiduk too sira mohu hotu.
PSA 18:38 Hau halo rahun tiha sira too sira la bele hamriik tan; sira monu iha hau nia ain okos.
PSA 18:39 Ita Boot foo forsa mai hau atu halo funu; Ita Boot halo ema nebee kontra hau hakruuk mai hau.
PSA 18:40 Ita Boot halo hau nia inimigu sira halai rungu-ranga; hau halo rahun tiha ema nebee odi hau.
PSA 18:41 Sira tanis husu tulun, maibee la iha ema ida atu salva sira; sira halerik husu tulun ba NAI Maromak, maibee Nia la hataan.
PSA 18:42 Hau baku rahun sira hanesan rai rahun nebee anin lori; hau sama sira hanesan ema sama tahu iha dalan.
PSA 18:43 Ita Boot salva hau bainhira povu ataka hau; Ita Boot halo hau sai nai ulun ba nasaun jentiu sira; ema nebee uluk hau la konhese agora serbi hau.
PSA 18:44 Ema rai liur foin rona hau nia lian, sira halo tuir kedas; sira lao hakruuk too iha hau nia oin.
PSA 18:45 Sira nia fuan lakon; sira sai husi sira nia abrigu ho tauk no nakdedar.
PSA 18:46 Hahii NAI Maromak! Maromak nee moris! Nia mak fatuk lolon boot nebee hau helik ba. Foti aas Nia naran! Nia mak hau nia Salvador.
PSA 18:47 Maromak mak selu fali buat nebee hau nia inimigu sira halo mai hau; Nia hamonu nasaun jentiu sira iha hau nia okos;
PSA 18:48 Maromak salva hau husi hau nia inimigu sira. Tebes, Ita Boot foti hau aas liu hau nia funu baluk sira; Ita Boot salva hau husi ema nebee gosta violensia.
PSA 18:49 Tanba nee NAI Maromak, hau sei hahii Ita Boot iha nasaun hotu-hotu nia klaran; hau sei hananu hahii Ita Boot nia naran.
PSA 18:50 Maromak foo vitoria ba liurai nebee Nia hili hodi halo nia manaan liu dook; Nia hatudu Nia laran luak ba liurai nebee mak Nia fihir, ba David ho nia jerasaun nafatin ba nafatin.
PSA 19:1 Salmu David nian, ba dirijenti koru. Lalehan konta sai Maromak nia kbiit boot hodi deklara buat furak nebee Nia liman kria tiha ona.
PSA 19:2 Loron hatoo lia menon ba loron; kalan foo sai matenek ba kalan.
PSA 19:3 Lalehan nee la koalia, la uza liafuan; la iha lian ruma mak atu bele rona husi nebaa.
PSA 19:4 Maski nunee lalehan nia lian sai ba iha rai tomak; nia liafuan too iha rai ulun rai ikun iha mundu tomak. Iha lalehan Maromak harii hela tenda ba loro matan.
PSA 19:5 Loromatan nee mosu mai hanesan noivu ida nebee hakat sai husi nia festa kazamentu; nia lao hanesan mane forti ida nebee haksolok hodi halai tuir dalan.
PSA 19:6 Loromatan lao tuir lalehan husi rohan ba rohan; buat hotu-hotu senti loron nia manas.
PSA 19:7 NAI Maromak nia lei perfeitu, halo ita nia moris sai matak. NAI nia mandamentu ita bele konfia, halo ema matan tomak sai matenek.
PSA 19:8 NAI nia regra loos, halo haksolok ita nia laran. NAI nia ukun fuan nabilan, leno ita nia matan.
PSA 19:9 Ita hamtauk ba NAI, nee diak, dura tinan ba tinan. NAI nia desizaun sempre loos, justu ba ema hotu-hotu.
PSA 19:10 Buat sira nee folin boot liu osan mean, liu fali osan mean moos nian; midar liu bani been, liu fali bani been nebee husi nia knuuk.
PSA 19:11 Buat sira nee hanorin Ita Boot nia atan; see mak kaer metin, hetan bensaun boot.
PSA 19:12 Maibee see mak bele hatene nia sala rasik? Perdua hau nia sala nebee hau rasik la rekonhese.
PSA 19:13 Kuidadu mos Ita Boot nia atan hau husi hahalok nebee hau rasik hatene katak nee sala; keta husik sala hirak nee domina hau. Nunee hau sei livre husi hahalok aat; hau sei la halo sala hasoru Ita Boot.
PSA 19:14 Hau harohan atu hau nia liafuan ho hau nia reflesaun monu ba Ita Boot nia laran. NAI Maromak, Ita Boot mak fatuk lolon boot nebee hau helik ba; Ita Boot mak hau nia Salvador.
PSA 20:1 Salmu David nian, ba dirijenti koru. Hau harohan atu NAI Maromak hataan o nia orasaun bainhira o iha susar laran; atu Jacó nia Maromak hamahon o.
PSA 20:2 Hau harohan atu Nia haraik tulun ba o husi Nia fatin santu; atu Nia foo suporta ba o husi foho Siaun.
PSA 20:3 Hau harohan atu Nia konsidera o nia oferta hotu; animal nebee o tunu hodi halo sakrifisiu mos monu ba Nia laran.
PSA 20:4 Hau harohan atu Maromak foo buat nebee o nia laran hakarak, no halo o nia planu hotu sai diak.
PSA 20:5 Depois ita sei haklalak kontenti tanba o manaan; ita sei foti sae ita nia bandeira hodi ita nia Maromak nia naran. Hau harohan atu NAI Maromak foo hotu buat nebee o husu.
PSA 20:6 Agora hau hatene katak, NAI Maromak salva liurai nebee Nia hili ona; husi Nia lalehan santu, Nia hataan liurai nia orasaun; hodi Nia kbiit, Nia halo liurai manaan.
PSA 20:7 Ema balu konfia nia kareta funu, balu konfia nia kuda, maibee ami konfia ami nia NAI Maromak nia naran.
PSA 20:8 Sira sei monu hakdasak, maibee ami sei hadeer hodi tuba rai metin.
PSA 20:9 NAI, halo liurai manaan ba; bainhira ami harohan ba Ita Boot, hataan ami ba!
PSA 21:1 Salmu David nian, ba dirijenti koru. NAI Maromak, liurai haksolok haree Ita Boot nia kbiit; nia kontenti teb-tebes tanba Ita Boot halo nia manaan.
PSA 21:2 Ita Boot foo buat nebee nia laran hakarak; buat nebee nia ibun husu, Ita Boot hataan duni.
PSA 21:3 Ita Boot simu liurai hodi foo bensaun boot ba nia; Ita Boot tau koroa osan mean diak nian ba iha nia ulun.
PSA 21:4 Nia husu Ita Boot atu foo vida naruk, Ita Boot foo; Ita Boot halo nia moris nafatin ba nafatin.
PSA 21:5 Ita Boot halo liurai manaan, nunee nia naran sai boot; Ita Boot halo nia sai konhesidu, no ema respeita teb-tebes nia.
PSA 21:6 Loos duni, Ita Boot foo bensaun ba nia la hotu la remata; Ita Boot halo nia haksolok teb-tebes iha Ita Boot nia oin.
PSA 21:7 Liurai konfia NAI Maromak; Maromak Aas Liu nia domin rohan-laek halo liurai la nakdoko.
PSA 21:8 Liurai, o nia liman sei kaer o nia inimigu sira hotu; o nia liman loos sei kaptura ema nebee odi o.
PSA 21:9 Bainhira o mosu iha sira nia oin, o sei soe sira ba iha ahi lakan boot. NAI Maromak sei hirus hodi tolan tiha sira; Nia ahi sei haan mutuk tiha sira.
PSA 21:10 O sei halo rahun tiha sira nia jerasaun iha mundu; sira nia bei-oan sei lakon mohu husi ema nia klaran.
PSA 21:11 Maski o nia inimigu sira kombina malu hasoru o hodi halo manobra oi-oin, sira sei la manaan.
PSA 21:12 O hana sira ho o nia rama, halo sira halai tiha.
PSA 21:13 NAI Maromak, hodi Ita Boot nia forsa hamriik ba! Ami sei hananu hodi hahii Ita Boot nia kbiit.
PSA 22:1 Salmu David nian, ba dirijenti koru. Tuir muzika Rusa Dadeer-saan. Hau nia Maromak, hau nia Maromak, tansaa mak Ita Boot husik hau mesak? Hau halerik ho laran dodok para Ita Boot tulun hau; tansaa mak Ita Boot dook loos husi hau?
PSA 22:2 Hau nia Maromak, loron hau halerik husu tulun, maibee Ita Boot la hataan; hau halerik kalan, maibee la hetan pas.
PSA 22:3 Ita Boot mak santu; Ita Boot mak Liurai nebee ema Israel sira adora.
PSA 22:4 Ami nia bei-ala sira fiar Ita Boot; sira fiar mak Ita Boot tulun sira.
PSA 22:5 Sira tanis hakilar ba Ita Boot mak Ita Boot salva sira; sira fiar ba Ita Boot la saugati.
PSA 22:6 Maibee hau hanesan ular oan deit, laos ema; ema hotu hatete aat hau, no hakribi hau.
PSA 22:7 Ema hotu nebee haree hau hamoe hau; sira dulas ibun mai hau hodi doko ulun.
PSA 22:8 Sira dehan, “Nia fiar NAI Maromak; husik Maromak mak salva nia. Se Maromak kontenti ho nia, entaun Maromak mak hasai nia ba.”
PSA 22:9 Maibee Ita Boot mak lori hau sai husi hau nia inan nia kanotak; Ita Boot hatoba hau iha hau nia inan nia hirus matan.
PSA 22:10 Husi kedas hau moris, hau nee Ita Boot nian; desde hau sei iha hau nia inan nia kabun laran, Ita Boot sai tiha ona hau nia Maromak.
PSA 22:11 Keta dook husi hau, tanba susar besik hela hau, no ema atu tulun hau la iha.
PSA 22:12 Karau aman barak haleu hau; karau aman mesak forti deit mak serku hau.
PSA 22:13 Sira hanesan liaun nebee hakilar hodi lees ema; sira loke sira nia ibun luan hodi kontra hau.
PSA 22:14 Hau nia forsa hanesan bee nebee fakar sai ba rai; hau nia ruin sira hotu naksalak tiha ona. Hau nia fuan hanesan lilin nebee nabeen tiha ona iha hau nia laran.
PSA 22:15 Hau nia ibun maran dekor hanesan sanan rai; hau nia nanaal toos tiha ona iha hau nia ibun laran; Ita Boot latan tiha ona hau iha rai rahun.
PSA 22:16 Ema aat lubuk ida hobur hau; sira serku hau hanesan asu; sira sona borus hau nia liman ho ain.
PSA 22:17 Hau nia ruin tomak bele sura; ema hateke mai hau no fihir hau.
PSA 22:18 Sira fahe hau nia hena ba malu; sira dada rifa para hatene, hau nia hena nee monu ba see.
PSA 22:19 Maibee NAI Maromak, Ita Boot keta dook husi hau. Ita Boot mak hau nia forsa; mai lalais tulun hau.
PSA 22:20 Salva hau husi surik; salva hau nia moris husi asu forti sira nee.
PSA 22:21 Dada sai hau husi liaun nia ibun laran; salva hau husi karau fuik nia dikur.
PSA 22:22 Hau sei koalia sai ba hau nia maluk sira kona ba Ita Boot nia diak; iha povu nia leet hau sei hahii Ita Boot.
PSA 22:23 Imi sira nebee hamtauk NAI Maromak, hahii NAI ba! Imi Jacó nia jerasaun, hotu-hotu foti aas NAI ba! Imi Israel nia jerasaun, hotu-hotu respeita Nia ho tauk ba!
PSA 22:24 Tanba Nia la hakribi no la hatuun ema nebee terus ho susar. Nia la subar oin ba sira, maibee see tilun ba sira bainhira sira halerik husu tulun.
PSA 22:25 Hau sei hahii Ita Boot iha ema lubuk boot nia leet; iha fiar nain sira nia oin hau sei foo oferta nebee hau promete tiha ona atu foo ba Ita Boot.
PSA 22:26 Ema kiak sira sei haan too bosu; ema nebee buka NAI Maromak sei hahii Nia. Hau hein katak sira hetan moris diak too tinan ba tinan.
PSA 22:27 Ema husi rai ulun too rai ikun iha mundu tomak sei hanoin NAI Maromak hodi fila ba Nia; ema husi suku hotu-hotu sei hakneak hakruuk iha Nia oin.
PSA 22:28 Tanba NAI mak Ukun Nain; Nia ukun nasaun hotu-hotu.
PSA 22:29 Ema riku hotu-hotu iha mundu sei halo festa hodi adora Nia; ema nebee atu tuun ba iha rai rahun, sira hotu sei hakneak iha Nia oin.
PSA 22:30 Ema nebee seidauk moris sei serbi Nia; jerasaun sira aban-bainrua sei koalia kona ba Nai Maromak.
PSA 22:31 Sira sei foo sai Nia salvasaun; sira sei foo hatene ba ema sira nebee seidauk moris katak Maromak salva tiha ona Nia povu.
PSA 23:1 Salmu David nian. NAI Maromak mak hau nia Bibi Atan; hau la falta buat ida.
PSA 23:2 Nia halo hau toba iha duut matak; Nia lori hau ba iha bee matan.
PSA 23:3 Nia hafoun fali hau nia laran; Nia lori hau tuir dalan loos atu ema foti aas Nia naran.
PSA 23:4 Maski hau lao iha fatin nebee nakukun teb-tebes, hau la tauk buat ida tanba Ita Boot hamutuk ho hau. Ita Boot nia ai tonka ho rota proteje hau hodi halo hau nia laran hakmatek.
PSA 23:5 Ita Boot tau meza mai hau iha hau nia inimigu sira oin; Ita Boot simu hau hanesan bainaka boot ida, no enxe hau nia kopu too nakonu.
PSA 23:6 Tebes duni, Ita Boot nia diak ho Ita Boot nia laran luak sei hamutuk ho hau iha hau nia moris tomak; hau sei hela iha NAI Maromak nia uma nafatin ba nafatin.
PSA 24:1 Salmu David nian. Mundu ho buat hotu iha mundu nee, NAI Maromak nian; rai ho buat hotu nebee moris iha rai nee, Ninian hotu.
PSA 24:2 Tanba Nia mak harii buat hirak nee iha tasi leten; Nia hatuur buat sira nee hotu iha bee leten.
PSA 24:3 See mak bele sae ba NAI Maromak nia foho? See mak bele hamriik iha Nia fatin santu?
PSA 24:4 Ema nebee liman moos ho laran moos, ema nebee la adora fatuk lulik ka ai lulik, ema nebee la halo juramentu falsu.
PSA 24:5 Ema sira nee sei simu bensaun husi NAI Maromak; Maromak nudar sira nia Salvador sei deklara katak sira la sala.
PSA 24:6 Ema hanesan nee mak harohan ba Maromak; sira hakbesik aan ba Jacó nia Maromak.
PSA 24:7 Imi portaun sira, foti sae imi nia ulun ba; imi odamatan antigu nian, loke aan ba, para Liurai kbiit boot bele tama mai.
PSA 24:8 Liurai kbiit boot nee see? Nia nee NAI Maromak, Nia forsa teb-tebes ho kbiit boot; Nia nee NAI Maromak, funu nain boot.
PSA 24:9 Imi portaun sira, foti sae imi nia ulun ba; imi odamatan antigu nian, loke aan ba, para Liurai kbiit boot bele tama mai.
PSA 24:10 Liurai kbiit boot nee see? NAI Maromak Aswain, Nia mak Liurai kbiit boot.
PSA 25:1 Salmu David nian. NAI, hau nia Maromak, hau konfia Ita Boot.
PSA 25:2 Hau fiar Ita Boot; keta husik hau moe leet; keta husik hau nia inimigu sira mak manaan.
PSA 25:3 Ema nebee laran metin ba Ita Boot, sei la moe leet; ema nebee traidor nar-naran deit, nia mak moe.
PSA 25:4 NAI Maromak, hatudu Ita Boot nia dalan mai hau; hanorin hau atu lao tuir Ita Boot nia ain fatin.
PSA 25:5 Tulun hau atu moris tuir Ita Boot nia lia loos, no hanorin hau, tanba Ita Boot mak hau nia Salvador; loron-kalan hau laran metin ba Ita Boot.
PSA 25:6 NAI, hori uluk kedas Ita Boot hatudu ona Ita Boot nia laran luak ho domin rohan-laek; hatudu nafatin ba.
PSA 25:7 Keta hanoin tan pekadu nebee hau halo bainhira sei joven; haluha tiha sala nebee hau halo kontra Ita Boot. NAI, hanoin hau ba, tanba Ita Boot nia domin ho Ita Boot nia diak.
PSA 25:8 NAI Maromak nee laran diak no laran moos, nunee mak Nia hanorin sala nain sira tuir Nia dalan.
PSA 25:9 Nia tulun ema mukit sira atu halo buat nebee loos; Nia hanorin sira kona ba Nia dalan.
PSA 25:10 NAI nia dalan nakonu ho domin ho lia loos; Nia hatudu dalan nee ba ema sira nebee kaer metin Nia promesa ho Nia lei.
PSA 25:11 NAI Maromak, hau nia sala boot, perdua hau ba, atu nunee ema foti aas Ita Boot nia naran.
PSA 25:12 Ema nebee mak hamtauk NAI Maromak, Maromak sei hanorin sira oinsaa atu moris.
PSA 25:13 Sira sei moris diak; sira nia jerasaun sei hela metin nafatin iha sira nia rain.
PSA 25:14 NAI sai belun ba ema nebee hamtauk Nia; Nia foo hatene Nia promesa ho Nia lei ba sira.
PSA 25:15 Hau nia matan hateke metin ba NAI, tanba so Nia deit mak sei hasai hau nia ain husi lasu laran.
PSA 25:16 See oin mai hau hodi hanoin hau ba, tanba hau mesak deit no kbiit-laek.
PSA 25:17 Halo kamaan susar nebee iha hau nia laran; hasai hau husi terus laran.
PSA 25:18 Hateke ba hau nia naha todan ho hau nia laran taridu; hamoos tiha hau nia sala hotu.
PSA 25:19 Haree ba, hau nia inimigu barak teb-tebes; sira odi loos hau!
PSA 25:20 Kuidadu hau nia moris hodi salva hau; keta husik ema hamoe hau, tanba hau hamahon aan iha Ita Boot.
PSA 25:21 NAI Maromak, hau hein katak hau nia hahalok loos ho laran moos bele proteje hau, tanba hau laran metin iha Ita Boot.
PSA 25:22 Maromak, salva Israel husi susar laran ba!
PSA 26:1 Salmu David nian. NAI Maromak, foo justisa mai hau, tanba hau ema nebee moris loos; hau konfia NAI ho laran tomak.
PSA 26:2 NAI, koko hau no prova hau ba; tetu di-diak hau nia neon ho laran,
PSA 26:3 tanba hau sempre hanoin hela deit Ita Boot nia domin rohan-laek, no hau konfia Ita Boot tanba Ita Boot sempre kaer metin Ita Boot nia liafuan.
PSA 26:4 Hau la tuur hamutuk ho ema lohi door; hau mos la ranxu ema nebee koalia oin ida hahalok oin seluk.
PSA 26:5 Hau haree ema aat sira halibur hamutuk, hau hakribi; hau lakohi tuur hamutuk ho ema nebee hahalok aat.
PSA 26:6 NAI Maromak, hau nia liman moos hatudu katak hau la sala; hau lao haleu Ita Boot nia altar
PSA 26:7 hodi hahii Ita Boot ho lian makaas no konta sai buat furak nebee Ita Boot halo tiha ona.
PSA 26:8 NAI Maromak, hau gosta uma nebee mak Ita Boot hela ba, fatin nebee mak Ita Boot nia naroman nabilan horik ba.
PSA 26:9 Keta dasa sai hau hamutuk ho sala nain sira; keta hasai hau nia vida hamutuk ho ema nebee hamrook ba raan.
PSA 26:10 Sira nia liman toman halo buat aat; sira nia liman loos nakonu ho korupsaun.
PSA 26:11 Maibee hau nee ema nebee moris loos; salva hau, hatudu Ita Boot nia laran luak mai hau.
PSA 26:12 Hau nia ain hamriik metin iha rai tetuk; Hau sei hahii NAI Maromak iha ema lubuk boot nia leet.
PSA 27:1 Salmu David nian. NAI Maromak nia naroman leno hau nia dalan; Nia mak hau nia Salvador. Hau atu tauk see? NAI mak abrigu ba hau nia moris. Hau atu nakdedar ba see?
PSA 27:2 Bainhira ema aat mai atu tolan hau, hau nia inimigu ho funu baluk sira nee mak sei sidi no monu.
PSA 27:3 Maski tropas mai serku hau, hau nia laran sei la tauk; maski funu mosu kontra hau, hau fiar nafatin.
PSA 27:4 Iha deit buat ida mak hau husu ba NAI Maromak; ida nee deit mak hau buka. Hau hakarak atu loro-loron durante hau nia moris tomak, hau hela iha NAI nia uma hodi hateke ba NAI nia furak, no harohan ba Nia iha Nia uma kreda.
PSA 27:5 Tanba iha tempu susar, Nia sei halo hau hakmatek iha Nia tenda laran; Nia sei subar hau iha Nia fatin santu; Nia sei hatuur hau iha fatuk boot ida nia leten.
PSA 27:6 Nia foti aas tiha ona hau iha hau nia inimigu sira hotu nia klaran. Hau sei haklalak hodi lori sakrifisiu ba iha Nia fatin santu; hau sei hananu no halo muzika ba NAI.
PSA 27:7 NAI Maromak, bainhira hau bolu Ita Boot, see tilun mai hau; hatudu Ita Boot nia laran diak hodi hataan mai hau.
PSA 27:8 Hau hatete ba hau nia aan, “Adora Nia ba!” NAI, hau sei adora duni Ita Boot.
PSA 27:9 Keta subar Ita Boot nia oin mai hau; keta duni sai Ita Boot nia atan ho hirus, tanba Ita Boot tulun tiha ona hau. Maromak hau nia salvador, keta duni hau fila, keta husik hau mesak.
PSA 27:10 Maski hau nia inan-aman husik hau mesak mos, NAI, Ita Boot sei simu hau.
PSA 27:11 NAI Maromak, hanorin Ita Boot nia dalan mai hau; lori hau tuir dalan loos tanba hau iha inimigu barak.
PSA 27:12 Keta saran hau ba hau nia funu baluk sira, tanba iha sasin falsu hamriik hasoru hau; sira duun matak hau hodi ameasa hau.
PSA 27:13 Hau fiar katak hau sei moris hodi haree NAI nia diak.
PSA 27:14 Laran metin ba NAI; sai forti ba, aten brani ba. Laran metin ba NAI!
PSA 28:1 Salmu David nian. NAI Maromak, hau harohan ba Ita Boot. Ita Boot mak fatuk lolon boot nebee hau helik ba; keta taka tilun mai hau. Se Ita Boot nonook nafatin, hau sei sai hanesan sira nebee mak tuun ba rai kuak.
PSA 28:2 Hau see oin ba iha Ita Boot nia Fatin nebee Lulik Liu hodi foti sae hau nia liman; hau halerik husu tulun ba Ita Boot; rona hau nia lian ba!
PSA 28:3 Keta duni sai hau hamutuk ho ema aat sira, hamutuk ho sira nebee mak toman halo buat aat, sira nebee mak finji koalia diak ba sira nia maluk, maibee rai odi iha laran.
PSA 28:4 Selu fali sira tuir saida mak sira halo; foo ba sira tuir sira nia hahalok aat. Selu fali sira tuir saida mak sira nia liman halo tiha ona; foo todan ba sira tuir sira merese simu.
PSA 28:5 Sira la rekonhese buat nebee mak NAI Maromak halo tiha ona ho buat nebee mak Nia liman kria tiha ona. Nunee Nia sei sobu sira, no nunka atu harii fila fali.
PSA 28:6 Hahii NAI Maromak, tanba Nia rona ona hau nia halerik husu tulun.
PSA 28:7 NAI mak hau nia forsa, Nia defende hau; hau nia laran metin ba Nia; Nia tulun hau hodi halo hau nia laran haksolok teb-tebes; hau hananu hau nia kantiku hodi hahii Nia.
PSA 28:8 NAI Maromak foo forsa ba Nia povu; Nia mak abrigu hodi salva liurai nebee mak Nia hili tiha ona.
PSA 28:9 NAI, salva Ita Boot Nia povu. Sira nee Ita Boot nia riku-soin, foo bensaun ba! Sai sira nia Bibi Atan hodi tau matan ba sira tinan ba tinan.
PSA 29:1 Salmu David nian. Imi sira nebee hela iha lalehan, hahii NAI Maromak ba; hahii NAI tanba Nia kbiit boot ho forsa.
PSA 29:2 Hahii NAI tanba nia naran boot; adora Nia tanba Nia santu ho furak.
PSA 29:3 NAI Maromak nia lian baku iha tasi leten; Maromak kbiit boot nia lian tarutu; NAI nia lian tarutu iha tasi boot nia leten.
PSA 29:4 NAI nia lian makaas teb-tebes; NAI nia lian hatudu sai Nia kbiit.
PSA 29:5 NAI nia lian silu tohar ai huun boot sedru; too ai huun boot iha foho Líbanu nian mos NAI fera tiha sai rohan-rohan.
PSA 29:6 Nia halo foho Líbanu nian haksoit hanesan fali karau oan; foho Sirión mos haksoit hanesan karau fuik nia oan.
PSA 29:7 NAI nia lian halo rai lakan makaas.
PSA 29:8 NAI nia lian doko rai fuik maran; NAI doko rai fuik maran Kades nian.
PSA 29:9 NAI nia lian dulas ai huun boot, too ai huun sira iha ai laran tuan mos tahan namtate hotu. Iha Nia uma kreda, ema hotu-hotu haklalak dehan, “Foti aas Nia naran!”
PSA 29:10 NAI Maromak tuur iha Nia kadeira ukun iha bee boot leten; NAI tuur hodi ukun nudar Liurai tinan ba tinan.
PSA 29:11 NAI foo kbiit ba Nia povu; NAI foo bensaun ba Nia povu hodi foo pas ho hakmatek ba sira.
PSA 30:1 Salmu David nian. Kantiku bainhira selebra loron inaugurasaun uma kreda. NAI Maromak, hau sei gaba Ita Boot, tanba Ita Boot dada tiha ona hau sai husi rai kuak; Ita Boot la husik hau nia inimigu sira foti aan hasoru hau.
PSA 30:2 NAI, hau nia Maromak, uluk hau halerik husu tulun ba Ita Boot; agora Ita Boot kura tiha ona hau.
PSA 30:3 NAI, Ita Boot lori ona hau sai husi matebian sira nia fatin; Ita Boot la husik hau lao hamutuk ho ema sira nebee tuun dadauk ba rai kuak.
PSA 30:4 Imi povu nebee foo laran ba NAI Maromak, hananu hahii Nia ba; hahii Nia naran santu,
PSA 30:5 tanba Nia hirus iha tempu badak deit, maibee Nia hatudu Nia laran luak ba ita durante ita nia moris tomak. Ita bele tanis halerik iha oras kalan, maibee iha dadeer-saan ita hetan ksolok.
PSA 30:6 Uluk hau senti hakmatek, hau dehan, “Hau nunka atu nakdoko.”
PSA 30:7 NAI Maromak, bainhira Ita Boot hatudu Ita Boot nia laran luak mai hau, Ita Boot halo hau hamriik metin hanesan foho boot ida. Maibee bainhira Ita Boot subar oin mai hau, hau nia fuan taridu.
PSA 30:8 NAI Maromak, uluk hau harohan ba Ita Boot; hau husu atu Nai hanoin hau.
PSA 30:9 Hau dehan, “Se karik hau mate, se karik hau tuun ba iha rai kuak, iha folin saida? Rai rahun bele hahii Ita Boot ka? Rai rahun bele deklara katak Ita Boot nia laran diak dura nafatin ka?
PSA 30:10 NAI, rona hau, hatudu Ita Boot nia laran luak mai hau; NAI, ajuda hau ba!”
PSA 30:11 Uluk hau tanis lelir, maibee Ita Boot foo ksolok mai hau, halo hau bidu. Ita Boot hasai tiha hena lutu nian husi hau hodi foo hatais fali hena ksolok nian.
PSA 30:12 Nunee hau sei la nonook; hau sei hananu hahii Ita Boot. NAI, hau nia Maromak, hau sei agradese ba Ita Boot tinan ba tinan.
PSA 31:1 Salmu David nian, ba dirijenti koru. NAI Maromak, hau hamahon aan iha Ita Boot; keta husik hau moe leet; salva hau tanba Ita Boot sempre halo buat nebee loos.
PSA 31:2 See tilun mai hau; mai lalais hodi salva hau. Sai hau nia subar fatin, hanesan fatuk lolon boot para hau helik ba; sai hanesan lutu metin ida hodi satan netik hau.
PSA 31:3 Ita Boot mak fatuk kuak nebee hau subar iha laran; Ita Boot mak lutu haleu hau. Lori hau hodi hatudu dalan mai hau, atu nunee ema foti aas Ita Boot nia naran.
PSA 31:4 Kuidadu hau para hau la bele monu ba lasu nebee ema prepara hela ba hau, tanba Ita Boot mak hau nia subar fatin.
PSA 31:5 Hau entrega hau nia moris ba iha Ita Boot nia liman; NAI Maromak, Ita Boot nia laran sempre hanoin hau, salva hau ba.
PSA 31:6 NAI Maromak, hau odi ema nebee adora estatua lulik, buat sira nee la iha folin. Hau laos hanesan ema sira nee, hau konfia Ita Boot.
PSA 31:7 Hau sei kontenti haksolok tanba Ita Boot nia domin rohan-laek. Ita Boot haree tiha ona hau nia terus; Ita Boot hatene ona hau nia laran susar.
PSA 31:8 Ita Boot la entrega hau ba inimigu sira nia liman laran, maibee tau hau nia ain iha fatin luan.
PSA 31:9 NAI Maromak, hau iha fatin kloot laran; hanoin hau ba. Hau nia matan sai malahuk tiha tanba hau nia laran dodok; hau nia isin ho klamar terus hotu.
PSA 31:10 Hau nia vida nakonu ho tristi; hau nia moris tomak hau halerik hela deit. Terus ho susar nee halo hau nia forsa tuun ba dadauk too hau nia ruin sira mamar hotu ona.
PSA 31:11 Hau nia inimigu sira hatuun hau; hau nia vizinhu sira hatete aat hau; hau nia belun sira haree hau, sira tauk; ema nebee hasoru hau iha estrada halai sees tiha.
PSA 31:12 Ema haluha hau hanesan fali hau mate tiha ona; hau hanesan vazu nebee nakfera tiha ona.
PSA 31:13 Hau rona ema barak bis-bisu hodi hatauk hau husi sor-sorin. Sira kombina malu hodi kontra hau; sira halo planu atu hasai hau nia vida.
PSA 31:14 Maibee NAI, hau konfia Ita Boot; hau dehan, “Ita Boot mak hau nia Maromak.”
PSA 31:15 Hau nia vida tomak iha Ita Boot nia liman laran; hasai hau husi hau nia inimigu sira nia liman, husi ema nebee halo terus hau.
PSA 31:16 Halo Ita Boot nia oin leno Ita Boot nia atan hau; salva hau hodi Ita Boot nia domin rohan-laek.
PSA 31:17 NAI, hau harohan ba Ita Boot; keta husik hau moe leet. Husik ema aat sira mak moe ba; husik sira tuun lian-laek ba iha ema mate nia fatin.
PSA 31:18 Halo sira nia ibun nonook tiha, tanba sira foti aan hatuun ema nebee moris loos hodi hatete aat sira.
PSA 31:19 Ita Boot rai hela buat mesak furak hodi foo ba ema nebee hamtauk Ita Boot; iha ema hotu nia oin, Ita Boot haraik buat diak sira nee ba ema nebee buka mahon iha Ita Boot.
PSA 31:20 Ita Boot subar sira iha Ita Boot nia prezensa atu ema nia planu aat la bele kona sira; Ita Boot halo sira seguru iha Ita Boot nia fatin, dook husi ema nebee duun sira.
PSA 31:21 Hahii NAI Maromak, tanba Nia hatudu Nia domin nebee furak teb-tebes mai hau. Bainhira inimigu sira serku hau,
PSA 31:22 hau tauk hodi hanoin, “Maromak dasa sai tiha ona hau husi Nia oin!” Maibee lae, bainhira hau halerik husu tulun ba Nia, Nia rona hela hau nia orasaun.
PSA 31:23 Povu hotu nebee foo laran ba NAI Maromak, hadomi Nia ba! NAI tau matan ba ema nebee moris loos, maibee ema nebee foti aan, Nia foo kastigu tuir sira nia hahalok.
PSA 31:24 Imi sira nebee laran metin ba NAI, sai forti ba, aten brani ba!
PSA 32:1 Salmu David nian para hanorin ema. Se ema kontra Maromak nia lei maibee Maromak foo perdaun, ema nee hetan bensaun. Se nia halo sala maibee Maromak hamoos tiha nia sala, ema nee hetan ksolok.
PSA 32:2 Se NAI Maromak la husu tuir ona nia sala, no ema nee la hatene bosok, ema nee hetan bensaun.
PSA 32:3 Uluk bainhira hau lakohi foo sai hau nia sala, loron tomak hau halerik hela deit, too hau nia ruin sira sai mamar hotu.
PSA 32:4 Tanba loron-kalan Ita Boot nia liman hanehan makaas hau; hau nia forsa lakon tiha hanesan bee nebee maran iha bailoron.
PSA 32:5 Too ikus hau foo sai tiha hau nia sala ba Ita Boot; hau la subar tan hau nia pekadu. Hau dehan, “Hau sei konfesa hau nia hahalok aat ba NAI Maromak.” Nunee Ita Boot hamoos tiha hau nia sala hodi halo hau livre.
PSA 32:6 Nee duni diak liu ema nebee foo laran ba Ita Boot aproveita harohan ba Ita Boot durante sira sei bele. Bainhira bee boot sae, sei la too iha sira.
PSA 32:7 Ita Boot mak hau nia subar fatin; Ita Boot kuidadu hau para susar la bele kona hau. Ema sei haleu hau hodi haklalak hahii Ita Boot tanba Ita Boot salva ona hau.
PSA 32:8 Hau sei hanorin o hodi hatudu dalan ba o; Hau sei sai o nia matadalan hodi tau matan ba o.
PSA 32:9 Keta neon-laek hanesan kuda ka kuda buru, tenki tau tali ba iha nia ibun laran para bele domina nia; se lae nia la halo tuir o nia hakarak.
PSA 32:10 Ema aat hetan terus barak, maibee NAI Maromak nia domin rohan-laek haleu ema nebee mak konfia iha Nia.
PSA 32:11 Imi nebee moris loos, haksolok ho kontenti tanba NAI nia diak; imi nebee laran moos, haklalak ho hananu ba!
PSA 33:1 Imi nebee moris loos, haklalak ba NAI Maromak; ema laran moos hahii Nia, nee buat furak ida.
PSA 33:2 Toka viola hodi hahii NAI; halo muzika ba Nia ho viola tali sanulu.
PSA 33:3 Hananu kantiku foun ba Nia; toka di-diak muzika hodi haklalak.
PSA 33:4 Tanba NAI Maromak nia liafuan loos; Nia sempre halo buat nebee loos.
PSA 33:5 NAI gosta lia loos ho justisa; Nia domin rohan-laek halo nakonu mundu rai klaran.
PSA 33:6 NAI Maromak koalia deit, lalehan iha; Nia huu deit iis husi ibun, loro matan, fulan ho fitun mosu.
PSA 33:7 Nia butuk hamutuk tasi been iha fatin ida; Nia haloot tasi been iha armazen laran.
PSA 33:8 Mundu tomak, hamtauk NAI Maromak ba; ema hotu iha mundu, admira ba,
PSA 33:9 tanba Nia koalia deit, buat hotu iha; Nia foo orden deit, buat hotu hamriik metin.
PSA 33:10 NAI Maromak teri netik tiha nasaun jentiu sira nia planu; Nia halo povu jentiu sira nia hakarak la sai realidade.
PSA 33:11 Maibee NAI nia planu dura nafatin ba nafatin; buat nebee Nia laran hakarak, sempre realiza husi jerasaun ba jerasaun.
PSA 33:12 Nasaun nebee rekonhese katak NAI mak sira nia Maromak, sira hetan ksolok; povu nebee Nia hili sai Ninian, sira hetan bensaun.
PSA 33:13 NAI Maromak hateke tuun husi lalehan hodi haree ema hotu-hotu;
PSA 33:14 husi Nia kadeira ukun, Nia fihir buat hotu nebee moris iha mundu.
PSA 33:15 Nia mak foo neon ba ema hotu; Nia hatene buat hotu nebee sira halo.
PSA 33:16 Liurai ida bele iha militar barak too iha nebee mos, sira la bele salva nia; funu nain ida bele iha forsa boot too iha nebee mos, sei la ajuda nia.
PSA 33:17 Ema laran metin ba kuda forti ida atu manaan funu, laran metin saugati; kuda bele makaas too iha nebee mos, la bele salva nia.
PSA 33:18 Maibee NAI Maromak nia matan hateke ba ema nebee hamtauk Nia; Nia tau matan ba ema nebee laran metin ba Nia domin rohan-laek,
PSA 33:19 atu salva sira husi mate; atu foo moris ba sira iha tempu rai hamlaha.
PSA 33:20 Ita hein ho laran metin ba NAI Maromak; Nia mak tulun ita no defende ita.
PSA 33:21 Ita nia laran haksolok, tanba ita konfia Nia naran santu.
PSA 33:22 NAI, haraik Ita Boot nia domin rohan-laek nafatin mai ami, tanba ami laran metin ba Ita Boot.
PSA 34:1 Salmu David nian, bainhira nia finji bulak iha Abimelek nia oin, nunee Abimelek duni sai nia. Hau sei foti aas NAI Maromak iha hau nia moris tomak; hau nia ibun sei hahii nafatin Nia.
PSA 34:2 Hau sei hahii adora NAI; ema kbiit-laek sira, rona hodi haksolok ba.
PSA 34:3 Mai ita hamutuk foti aas NAI nia naran; hamutuk ho hau tane aas Nia.
PSA 34:4 Uluk hau harohan ba NAI Maromak, Nia hataan hau; Nia salva tiha hau husi buat hotu nebee hatauk hau.
PSA 34:5 Ema nebee hateke ba Nia sei kontenti haksolok; sira nunka atu moe.
PSA 34:6 Iha tempu nebaa hau, ema kbiit-laek nee halerik, NAI Maromak rona hau; Nia hasai hau husi terus hotu-hotu.
PSA 34:7 NAI nia anju harii nia tenda haleu ema nebee hamtauk Maromak hodi salva sira.
PSA 34:8 Mai koko hodi haree NAI nia diak; ema nebee hamahon aan iha Nia, sira hetan ksolok.
PSA 34:9 Imi NAI Maromak nia povu, hamtauk Nia ba, tanba ema nebee hamtauk Nia, sira la falta buat ida.
PSA 34:10 Liaun karik bele hamlaha tanba la hetan hahaan, maibee ema nebee buka NAI Maromak, buat diak ida la falta ba nia.
PSA 34:11 Oan sira, mai rona hau nia liafuan; hau sei hanorin imi oinsaa hamtauk NAI Maromak.
PSA 34:12 Imi sira nee, see mak buka moris diak, no hakarak teb-tebes atu hetan moris naruk ho haksolok?
PSA 34:13 Tenki kuidadu imi nia ibun para la bele koalia aat, no la bele koalia bosok.
PSA 34:14 Fila kotuk ba buat aat hodi halo buat nebee diak; hakaas aan atu moris dame malu ho ema hotu-hotu, buka nafatin dame too hetan.
PSA 34:15 NAI Maromak tau matan ba ema nebee mak moris loos; Nia see tilun ba sira nia halerik.
PSA 34:16 Maibee NAI kontra ema nebee mak halo aat, too hasai tiha sira nia naran husi mundu.
PSA 34:17 Ema moris loos halerik, NAI rona sira; Nia hasai sira husi sira nia susar.
PSA 34:18 NAI besik ba ema nebee laran dodok; Nia salva ema nebee lakon esperansa.
PSA 34:19 Ema moris loos hetan terus oi-oin, maibee NAI Maromak hasai sira husi terus hirak nee hotu.
PSA 34:20 Nia kuidadu ema nee nia ruin tomak; ruin ida mos la tohar.
PSA 34:21 Ema aat sei mate ho nia hahalok rasik; see mak odi ema moris loos, sira sei hetan kastigu.
PSA 34:22 NAI Maromak sei salva Nia atan sira; ema nebee buka mahon iha Nia, la iha ida mak hetan kastigu.
PSA 35:1 Salmu David nian. NAI Maromak, ema nebee halo funu hasoru hau, Ita Boot halo funu hasoru sira ba; ema nebee ataka hau, Ita Boot ataka sira ba.
PSA 35:2 Kaer metin ekipamentu funu nian hodi satan netik hau; hamriik hodi mai tulun hau.
PSA 35:3 Foti Ita Boot nia diman ho baliu funu nian kontra ema nebee mak duni tuir hau. Hatete mai hau katak, Ita Boot mak hau nia Salvador.
PSA 35:4 Hau harohan atu ema nebee hakarak halakon hau nia vida sai moe boot ho oin tuun. Hau husu atu ema nebee hanoin aat mai hau hakiduk ho oin mean.
PSA 35:5 Haruka NAI nia anju duni sai tiha sira hanesan anin huu lakon hare kulit.
PSA 35:6 NAI nia anju duni hela sira, husik dalan nebee sira liu sai nakukun ho namdoras.
PSA 35:7 Tanba sira subar lasu mai hau maski hau la sala; maski hau la sala, sira kee rai kuak mai hau.
PSA 35:8 Hau harohan atu dezastre boot kona sira derepenti; husik sira monu ba iha lasu nebee sira rasik monta mai hau; husik sira mate mohu iha rai kuak laran.
PSA 35:9 Nunee hau nia laran sei haksolok; hau sei kontenti tanba NAI Maromak salva ona hau.
PSA 35:10 Ho hau nia aan tomak hau sei deklara, “NAI, see mak hanesan Ita Boot?! Ita Boot salva kbiit-laek sira husi ema nebee forsa liu sira; ema kiak ho ema kbiit-laek sira nebee ema hanehan, Ita Boot tulun sira.”
PSA 35:11 Ema aat sira hamriik foo sasin falsu hasoru hau; sira husu hau kona ba buat nebee hau la hatene.
PSA 35:12 Hau nia diak, sira selu fali ho hahalok aat; hau tristi teb-tebes.
PSA 35:13 Uluk sira moras, hau hatais hena lutu hodi haraik aan ho jejun. Hau hakruuk hodi harohan
PSA 35:14 hanesan fali hau harohan ba hau nia belun ka hau nia maun-alin. Hau hakruuk hodi tanis ho laran susar hanesan fali hau tanis halerik ba hau nia inan.
PSA 35:15 Maibee bainhira hau monu, sira hotu kontenti; sira haleu hau hodi hatete aat hau. Ema fuik nebee hau la konhese koalia aat hau la para.
PSA 35:16 Ema nebee la fiar Maromak, tarata aat hau; sira ruun nehan mai hau.
PSA 35:17 NAI Maromak, Ita Boot hateke deit nunee too bainhira? Salva hau tanba sira ataka hau; salva hau nia moris husi liaun sira nee.
PSA 35:18 Depois hau sei agradese ba Ita Boot iha povu nia leet; hau sei hahii Ita Boot iha ema lubun boot nia klaran.
PSA 35:19 Keta husik hau nia inimigu bosok-teen sira nee haksolok fali ho hau nia terus. Sira odi hau maski hau la sala; keta husik sira baku matan ba malu kona ba hau.
PSA 35:20 Sira la koalia liafuan dame nian, maibee sira konta fali istoria falsu kontra ema sira nebee hela hakmatek iha rai nee.
PSA 35:21 Sira halo ibun luan hodi hatete, “Ha! Buat nebee o halo, ami haree rasik ho matan.”
PSA 35:22 NAI Maromak, Ita Boot haree ona ida nee; keta nonook deit; Nai, keta dook husi hau.
PSA 35:23 Hadeer ona, hamriik hodi defende hau; hau nia Nai, hau nia Maromak, sai hau nia Defensor ba!
PSA 35:24 NAI hau nia Maromak, Ita Boot sempre halo buat nebee loos; deklara ba katak hau la sala ida. Keta husik sira haksolok fali ho hau nia terus.
PSA 35:25 Keta husik sira dehan ba malu, “Haree ba, saida mak ita hakarak nee akontese tiha ona!” Keta husik sira dehan, “Ita tolan tiha ona nia.”
PSA 35:26 Hau harohan atu ema nebee kontenti bainhira susar kona hau, sira sai moe too bilaan tiha; husik ema nebee mak foti aan hasoru hau, sira moe boot ho oin tuun.
PSA 35:27 Hau harohan atu ema nebee hakarak haree hau manaan justisa, ema sira nee haklalak ho haksolok hodi hatete fila-fila, “NAI Maromak nee boot! Nia kontenti bainhira Nia atan hetan diak.”
PSA 35:28 Hau nia ibun sei foo sai Ita Boot nia justisa; loron-kalan hau sei hahii Ita Boot.
PSA 36:1 Husi NAI Maromak nia atan David. Ba dirijenti koru. Ema aat sira nia hahalok aat sai fali matadalan ba sira; ema sira nee la hatene hamtauk Maromak.
PSA 36:2 Iha sira nia matan rasik, sira diak loos, too sira la haree sira nia sala, no la hakribi sira nia hahalok.
PSA 36:3 Liafuan nebee sai husi sira nia ibun mesak aat ho bosok; sira lakohi halo tan buat nebee mak diak ho buat nebee loos.
PSA 36:4 Maski iha sira nia toba fatin mos, sira planu buat aat; sira tau sira nia aan iha dalan nebee la loos; sira nunka fila kotuk ba buat aat.
PSA 36:5 NAI Maromak, Ita Boot nia domin too iha lalehan aas ba; Ita Boot nia lia loos too iha kalohan.
PSA 36:6 Ita Boot nia diak hanesan foho aas sira; Ita Boot nia justisa hanesan tasi nia klean. NAI, Ita Boot foo mahon ba ema ho mos ba animal.
PSA 36:7 Maromak, Ita Boot nia domin folin boot; ema hotu hamahon aan iha Ita Boot nia liras okos.
PSA 36:8 Sira haan too bosu ho hahaan diak nian husi Ita Boot nia uma; Ita Boot foo bee ksolok nian husi Ita Boot nia mota ba sira hemu.
PSA 36:9 Tanba Ita Boot mak buat moris hotu nia huun; husi Ita Boot nia naroman ami bele hetan naroman.
PSA 36:10 Foo domin nafatin ba ema nebee mak konhese Ita Boot; foo Ita Boot nia justisa ba ema nebee mak moris loos.
PSA 36:11 Keta husik ema foti aan sira sama hau; la bele husik ema aat sira nia liman duni lakon hau.
PSA 36:12 Haree ba, ema aat sira nee monu oinsaa; sira monu tuun ba rai too la bele hamriik fali!
PSA 37:1 Salmu David nian. Keta preokupa ho ema aat sira; keta laran moras ba ema nebee halo sala.
PSA 37:2 Tanba sira hanesan duut nebee fasil namlaik; sira sei mate hanesan ai matak nebee la kleur maran tiha.
PSA 37:3 Fiar ba NAI Maromak no halo buat nebee diak; hela iha rai nee ho hakmatek.
PSA 37:4 Buka o nia ksolok husi NAI mak Nia sei foo buat nebee o nia laran hakarak.
PSA 37:5 Entrega o nia moris ba NAI Maromak; fiar ba Nia mak Nia sei halo ida nee ba o:
PSA 37:6 Nia sei leno sai o nia hahalok loos hanesan loro matan dadeer nian leno rai; ema sei haree katak o nee loos hela, hanesan ema haree loro matan meudia nian.
PSA 37:7 Hakmatek iha NAI Maromak nia oin ba; pasiensia hodi hein Nia. Keta preokupa ema nia planu aat; lalika laran susar bainhira ema aat hetan moris diak.
PSA 37:8 Hadook aan husi hirus, keta laran nakali; lalika preokupa, nee sei lori o ba dalan aat.
PSA 37:9 Tanba ema aat sei lakon mohu, maibee ema nebee laran metin ba NAI Maromak, sira sei hela nafatin iha rai nee.
PSA 37:10 La kleur tan, ema aat sira nee sei mohu tiha; o buka sira mos la hetan.
PSA 37:11 Maibee ema nebee haraik aan sei hela metin iha rai nee; sira sei moris haksolok iha pas ho hakmatek nia laran.
PSA 37:12 Ema aat halo planu foer hasoru ema nebee moris loos hodi ruun nehan ba sira.
PSA 37:13 Maibee NAI Maromak hamnasa fali ema aat sira nee, tanba Nia hatene katak sira nia loron besik ona.
PSA 37:14 Ema aat losu sai sira nia surik no dada sira nia rama atu hamonu ema kiak ho kbiit-laek sira, atu hamate ema nebee lao tuir dalan loos.
PSA 37:15 Maibee sira nia surik sei sona borus fali sira nia fuan rasik; sira nia rama sei silu tohar.
PSA 37:16 Diak liu moris loos ho sasaan uitoan deit duke sai ema aat ho riku-soin barak.
PSA 37:17 Tanba ema aat sira nia liman sei silu tohar, maibee NAI Maromak tane ema nebee moris loos.
PSA 37:18 NAI Maromak tau matan ba ema laran moos; rai nebee Nia foo ba sira sai sira nian nafatin ba nafatin.
PSA 37:19 Iha tempu susar, sira laos mes-mesak; rai hamlaha, sira hetan hahaan too bosu.
PSA 37:20 Maibee ema aat sei mate mohu. NAI Maromak nia inimigu hanesan ai funan iha rai fuik; sira sei mohu, sei mohu lakon hanesan ahi suar.
PSA 37:21 Ema aat empresta, la foo fila, maibee ema nebee moris loos gosta foo ba ema.
PSA 37:22 Ema nebee NAI Maromak foo bensaun, sira sei hela metin iha rai nee, maibee ema nebee Maromak foo malisan, sei lakon mohu.
PSA 37:23 Ema nebee halo haksolok NAI Maromak nia laran, Maromak sei hatudu dalan ba nia.
PSA 37:24 Maski nia sidi maibee nia la monu, tanba NAI kaer metin nia liman.
PSA 37:25 Hori uluk hau sei joven too agora hau katuas ona, hau seidauk haree Maromak husik ema laran moos moris mesak; hau seidauk haree sira nia oan sira tane liman hodi husu hahaan ba ema.
PSA 37:26 Sira foo ho laran luak no sempre prontu foo sasaan ba ema empresta; sira nia oan sira sai bensaun ba ema.
PSA 37:27 Fila kotuk ba buat aat hodi halo buat diak, nunee o sei hela iha rai nee tinan ba tinan.
PSA 37:28 Tanba NAI Maromak gosta justisa; ema nebee foo laran ba Nia, Nia nunka husik mesak. Ema aat sira sei rahun hotu; sira nia jerasaun sei lakon mohu.
PSA 37:29 Ema moris loos sei hela metin iha rai nee; sira sei horik iha rai nee tinan ba tinan.
PSA 37:30 Ema moris loos nia ibun foo sai buat matenek nian; nia nanaal hatete buat nebee loos.
PSA 37:31 Nia rai Maromak nia lei iha nia laran; nia ain sei la sidi.
PSA 37:32 Ema aat hafuhu ema moris loos hodi buka dalan atu oho sira.
PSA 37:33 Maibee NAI Maromak sei la husik sira iha ema aat nia liman laran; ema lori sira too iha tribunal mos, Maromak la husik juis hamonu kastigu ba sira.
PSA 37:34 Laran metin ba NAI Maromak; lao tuir nafatin Nia dalan. Nia sei foti o hela metin iha rai nee; bainhira ema aat mohu hotu, o sei haree.
PSA 37:35 Hau haree ona ema aat sira hanehan ema; ema aat sira nee moris buras hanesan ai huun boot.
PSA 37:36 Maibee hau liu tan husi nebaa, sira la iha tiha ona; maski hau buka sira, la hetan tan.
PSA 37:37 Hateke ba ema nebee laran moos; haree ba ema nebee moris loos. Tanba ema nebee mak buka dame sei hetan futuru nebee diak.
PSA 37:38 Maibee sala nain sira sei mate mohu; ema aat sira nia futuru sei la iha.
PSA 37:39 NAI Maromak mak salva ema nebee moris loos; iha tempu susar, Nia mak sira nia subar fatin.
PSA 37:40 NAI tulun sira hodi lori sira sai; Nia hasai sira husi ema aat hodi salva sira, tanba sira buka mahon iha Nia.
PSA 38:1 Salmu David nian, husu Maromak atu hanoin nia. NAI Maromak, maski Ita Boot hirus hela hau, maibee keta siak hau; maski Ita Boot nia laran nakali hela, maibee keta kastigu hau.
PSA 38:2 Ita Boot nia rama oan tama ona hau nia isin; Ita Boot nia liman hanehan hela hau.
PSA 38:3 Ita Boot nia laran nakali halo hau nia isin sai moras hotu; hau nia sala halo hau nia isin lolon tomak sai fraku tiha.
PSA 38:4 Hau mout tiha iha hau nia hahalok aat nia laran; hau senti hau nia sala todan liu ona.
PSA 38:5 Hau nia hahalok beik halo hau nia kanek sai dodok dois.
PSA 38:6 Hau hakruuk too bonko; loro-loron hau laran susar hela deit.
PSA 38:7 Isin manas sunu hau nia aan tomak; hau nia isin sai moras hotu.
PSA 38:8 Hau la bele liu ona; hau nia forsa mohu ona; hau laran dodok hodi halerik.
PSA 38:9 Nai Maromak, Ita Boot hatene hotu hau nia hakarak; Ita Boot rona hau nia halerik.
PSA 38:10 Hau nia fuan nakdedar; hau nia forsa la iha ona; hau nia matan sai malahuk tiha ona.
PSA 38:11 Hau nia belun sira ho maluk sira lakohi besik hau tanba hau nia kanek, too hau nia familia sira mos hamriik husi dook deit.
PSA 38:12 Ema nebee hakarak oho hau monta lasu mai hau; ema nebee hakarak halo terus hau kombina malu atu hamonu hau; loro-loron sira halo manobra tuun-sae.
PSA 38:13 Hau hanesan fali ema tilun diuk, la bele rona buat ida; hau hanesan ema monok, la hatene koalia.
PSA 38:14 Hau hanesan ema nebee la rona buat ida; hau hanesan ema nebee la bele foo resposta.
PSA 38:15 NAI Maromak, hau hein hela Ita Boot; Nai, hau nia Maromak, Ita Boot sei hataan hau,
PSA 38:16 tanba hau husu tiha ona ba Ita Boot dehan, “Keta husik sira haksolok fali ho hau nia terus ka foti aan hasoru hau bainhira hau monu.”
PSA 38:17 Hau besik atu monu; hau terus la hotu.
PSA 38:18 Hau foo sai hau nia sala; hau nia hahalok aat halo hau la hakmatek.
PSA 38:19 Hau nia inimigu sira mesak bo-boot deit; iha ema barak teb-tebes odi hau, maski hau la halo buat aat ba sira.
PSA 38:20 Hau nia hahalok diak, sira selu fali ho hahalok aat; sira kontra hau tanba hau hakarak halo buat nebee diak.
PSA 38:21 NAI Maromak, keta husik hau mesak; hau nia Maromak, keta dook nafatin husi hau.
PSA 38:22 Hau nia Nai, hau nia Salvador, mai lalais hodi tulun hau.
PSA 39:1 Salmu David nian, ba dirijenti koru Jedutun. Iha tempu ida hau dehan, “Hau sei kuidadu hau nia lalaok atu hau nia ibun la bele koalia sala; bainhira ema aat iha hela hau nia oin, hau sei taka hau nia ibun.”
PSA 39:2 Hau nonook deit, la hatete buat ida; atu koalia buat diak mos lae. Maski hau nonook, maibee hau nia laran susar ba beibeik;
PSA 39:3 hau nia fuan la hakmatek. Hau hanoin hela, hau nia neon aumenta susar too hau loke ibun hodi koalia:
PSA 39:4 “NAI Maromak, foo hatene took mai hau kona ba hau nia destinu, no hau moris too tinan hira; foo hanoin mai hau katak, hau nia moris badak deit.
PSA 39:5 Ita Boot halo hau nia tinan badak hanesan sasukat liman ida-rua deit. Tuir Ita Boot haree, hau nia vida tomak hanesan buat malahuk ida, hanesan fali anin nebee huu liu deit.
PSA 39:6 Loos duni, ema kriatura hanesan lalatak nebee liu ona; sira moris fadigadu hela hodi rai riku-soin, maibee saugati deit; sira la hatene aban-bainrua see mak atu hetan riku-soin nee.
PSA 39:7 Nai Maromak, agora hau hein tan saida? Hau laran metin ba Ita Boot.
PSA 39:8 Hasai hau husi hau nia hahalok aat hotu; keta husik ema beik hamnasa fali hau.
PSA 39:9 Hau nonook, la loke hau nia ibun, tanba Ita Boot rasik mak halo ida nee mai hau.
PSA 39:10 Hasai tiha Ita Boot nia kastigu husi hau; hau la bele ona, tanba Ita Boot nia liman baku hela hau.
PSA 39:11 Bainhira Ita Boot siak ema hodi kastigu nia tanba nia sala, Ita Boot estraga tiha nia riku-soin hanesan fali ular mak haan. Loos duni, ema hotu-hotu nia moris hanesan anin nebee huu liu deit.
PSA 39:12 NAI Maromak, rona hau nia orasaun; see tilun mai hau nia halerik husu tulun; keta fila kotuk ba hau nia matan been. Tanba hau iha nee hanesan Ita Boot nia bainaka ida; hau ema lao rai hanesan hau nia bei-ala sira.
PSA 39:13 Hasees tiha Ita Boot nia oin husi hau, atu hau bele kontenti fali molok hau baa no la iha tan.”
PSA 40:1 Salmu David nian, ba dirijenti koru. Hau hein NAI Maromak ho pasiensia; too ikus Nia fila oin mai hau hodi rona hau nia halerik.
PSA 40:2 Nia foti hau sai husi rai kuak perigu nian; Nia hasai hau husi tahu boot nia laran. Nia tau hau nia ain iha fatuk leten hodi foo fatin seguru atu hau hamriik metin.
PSA 40:3 Nia tau knananuk foun iha hau nia ibun, kantiku hodi hahii ita nia Maromak. Ema barak sei haree; sira sei hamtauk NAI Maromak hodi konfia Nia.
PSA 40:4 See mak konfia NAI Maromak, see mak la sadere ba ema nebee foti aan, see mak la lao hamutuk ho ema nebee adora maromak falsu, ema sira nee mak hetan ksolok.
PSA 40:5 NAI, hau nia Maromak, Ita Boot halo tiha ona buat furak barak mai ami; Ita Boot nia planu ba ami nia moris mos boot. La iha ida mak hanesan Ita Boot; hau atu konta sai buat nebee Ita Boot halo, barak teb-tebes, hau sura la bele.
PSA 40:6 Ita Boot nia hakarak laos atu ema lori oferta no oho animal sai sakrifisiu ba Ita Boot; Ita Boot la presiza animal nebee ema tunu halo sakrifisiu. Ita Boot la husu sakrifisiu nebee ema foo hodi husu perdaun, maibee Ita Boot loke ona hau nia tilun.
PSA 40:7 Entaun hau dehan, “Maromak, hau mak nee, hau mai ona. Hau gosta teb-tebes halo tuir Ita Boot nia hakarak, hanesan hakerek ona kona ba hau iha Livru Sagradu. Ita Boot nia lei iha hela hau nia laran.”
PSA 40:9 NAI Maromak, hau foo sai tiha ona iha povu nia leet katak Ita Boot salva ami. Ita Boot hatene katak hau la taka hau nia ibun.
PSA 40:10 Hau la subar Ita Boot nia lia loos iha hau nia laran; hau koalia sai katak Ita Boot sempre foo laran ba Ita Boot nia povu, Ita Boot mak Salvador. Hau la taka ba ema lubuk boot katak, Ita Boot sempre hadomi Ita Boot nia povu no kaer metin Ita Boot nia liafuan.
PSA 40:11 NAI Maromak, keta taka Ita Boot nia laran luak mai hau; halo Ita Boot nia domin ho Ita Boot nia lia loos hamahon hau nafatin.
PSA 40:12 Tanba susar nebee haleu hau barak teb-tebes, hau sura la bele; hau nia sala butuk aas liu ona, halo hau la haree rai; hau nia sala barak liu fali hau nia fuuk lahan; hau nia forsa la iha tiha.
PSA 40:13 NAI Maromak, favor salva hau; NAI, mai lalais tulun hau ba.
PSA 40:14 Hau harohan atu ema hotu nebee hakarak hasai hau nia vida moe boot ho oin tuun; husik ema nebee hakarak atu hau hetan dezastre hakiduk ho naran aat.
PSA 40:15 Husik ema nebee hamnasa hahaek mai hau sai moe boot too bilaan tiha.
PSA 40:16 Maibee halo ema hotu nebee harohan ba Ita Boot sai kontenti ho haksolok; husik ema nebee buka Ita Boot nia salvasaun dehan beibeik, “NAI Maromak nee boot!”
PSA 40:17 Hau nee ema kiak ho kbiit-laek, maibee Nai Maromak hanoin hau. Ita Boot mak tulun hau no salva hau; hau nia Maromak, keta demora.
PSA 41:1 Salmu David nian, ba dirijenti koru. Ema nebee konsidera ema kiik, sira hetan ksolok; bainhira sira iha susar laran, NAI Maromak salva sira.
PSA 41:2 NAI foo mahon ba sira hodi kuidadu sira; sira moris haksolok iha rai nee. Nia la husik sira monu iha sira nia inimigu nia liman laran.
PSA 41:3 Bainhira sira moras iha sira nia toba fatin, NAI tau matan ba sira hodi foo fali isin diak ba sira.
PSA 41:4 Uluk hau harohan nunee: “NAI Maromak, hanoin hau ba! Hau halo sala kontra Ita Boot; kura hau ba.”
PSA 41:5 Hau nia inimigu sira hatete aat hau dehan, “Bainhira mak nia mate, atu nia naran la temi tan?”
PSA 41:6 Kuandu sira ida mai haree hau, sira finji koalia diak mai hau, maibee sira nia laran hakarak buka hatene hau nia susar, depois sira sai baa konta iha fat-fatin.
PSA 41:7 Ema nebee odi hau bis-bisu ba malu kona ba hau; sira hanoin buat aat mai hau dehan,
PSA 41:8 “Moras aat kona ona nia; atu hamriik tan husi nia toba fatin mos la bele ona.”
PSA 41:9 Maski hau nia belun diak, hau konfia loos nia, nia tuur haan hamutuk ho hau, nia sai fali hau nia inimigu.
PSA 41:10 NAI Maromak, hanoin hau ba; foti sae hau, nunee hau bele selu fali sira.
PSA 41:11 Hau hatene katak Ita Boot nia laran haksolok ho hau, tanba hau nia inimigu la manaan hau.
PSA 41:12 Ita Boot tulun hau tanba hau nia laran moos; Ita Boot hatuur hau iha Ita Boot nia oin too tinan ba tinan.
PSA 41:13 Hahii NAI, Israel nia Maromak, nafatin ba nafatin. Amen, amen.
PSA 42:1 Salmu husi Korá nia oan para hanorin ema. Ba dirijenti koru. Hanesan rusa hamrook teb-tebes atu hemu bee mota nian, nunee mos hau hamrook teb-tebes ba Ita Boot, hau nia Maromak.
PSA 42:2 Hau hamrook ba Ita Boot, Maromak Moris. Bainhira loos mak hau baa too iha Ita Boot nia oin?
PSA 42:3 Loron-kalan matan been mak sai fali hau nia hahaan, tanba loron tomak ema hatete mai hau dehan, “O nia Maromak iha nebee?”
PSA 42:4 Hau nia laran susar; hau hanoin hetan uluk hau baa iha Maromak nia uma, iha Kbiit Nain nia mahon. Hau hamutuk ho ema lubun boot haklalak haksolok hahii Maromak.
PSA 42:5 Hau husu ba hau nia aan, “Tansaa mak o tristi? Tansaa mak o nia laran la hakmatek?” Laran metin ba Maromak ba, tanba hau sei hahii fila fali Nia, hau nia Salvador ho hau nia Maromak.
PSA 42:6 Hau nia laran tristi teb-tebes; tanba nee, husi rai Jordaun nian nee, husi foho Hermon nia tutun, husi foho Mizar, hau hanoin Ita Boot.
PSA 42:7 Ita Boot nia mota tuun ho lian makaas too bee boot mos tarutu simu malu iha fat-fatin. Ita Boot nia laloran nadodon mai, halo mout tiha hau.
PSA 42:8 Iha loron, NAI Maromak hatudu Nia domin rohan-laek; iha kalan, hau hananu ba Nia, hanesan orasaun ida ba Maromak, hau nia moris huun.
PSA 42:9 Maromak mak fatuk kuak boot nebee hau subar iha laran. Hau hatete ba Nia, “Tansaa mak Ita Boot haluha hau? Tansaa mak hau nia inimigu hanehan hau too hau moris halerik nunee?”
PSA 42:10 Hau nia inimigu hamoe hau, halo hau nia ruin sira rahun tiha. Loron tomak sira hatete mai hau dehan, “O nia Maromak iha nebee?”
PSA 42:11 Hau husu ba hau nia aan, “Tansaa mak o tristi? Tansaa mak o nia laran la hakmatek?” Laran metin ba Maromak ba, tanba hau sei hahii fila fali Nia, hau nia Salvador ho hau nia Maromak.
PSA 43:1 Hau nia Maromak, tesi hau nia lia ba hodi deklara katak hau la sala; defende hau kontra nasaun nebee la fiar Ita Boot; salva hau husi ema sira nebee laran aat ho bosok-teen.
PSA 43:2 Tanba Ita Boot mak Maromak, hau nia subar fatin. Tansaa mak Ita Boot soe hela hau? Tansaa mak hau nia inimigu hanehan hau too hau moris halerik nunee?
PSA 43:3 Haruka Ita Boot nia naroman ho Ita Boot nia lia loos hodi gia hau; husik buat sira nee lori hau ba iha Ita Boot nia foho santu, ba iha fatin nebee Ita Boot hela ba.
PSA 43:4 Too iha nebaa, hau sei baa iha Maromak nia altar oin; hau sei baa iha Maromak, hau nia ksolok nia huun. Maromak, hau nia Maromak, hau sei toka viola hodi hahii Ita Boot.
PSA 43:5 Hau husu ba hau nia aan, “Tansaa mak o tristi? Tansaa mak o nia laran la hakmatek?” Laran metin ba Maromak ba, tanba hau sei hahii fila fali Nia, hau nia Salvador ho hau nia Maromak.
PSA 44:1 Salmu husi Korá nia oan para hanorin ema. Ba dirijenti koru. Maromak, ami rona tiha ona ho ami nia tilun rasik; ami nia bei-ala sira konta tiha ona mai ami buat nebee Ita Boot halo iha sira nia tempu, iha tempu uluk nian.
PSA 44:2 Ho Ita Boot nia liman, Ita Boot duni sai tiha nasaun jentiu sira hodi tau fali ami nia bei-ala sira; Ita Boot halo rahun tiha povu jentiu sira, no halo ami nia bei-ala sira sai buras.
PSA 44:3 Sira laos uza sira nia surik mak hadau rai nee; sira laos uza sira nia forsa rasik mak manaan, maibee sira manaan tanba Ita Boot nia liman loos ho Ita Boot nia forsa, ho mos Ita Boot nia oin nabilan, tanba Ita Boot nia laran kontenti ho sira.
PSA 44:4 Ita Boot mak hau nia Liurai ho hau nia Maromak; Ita Boot deklara katak Jacó nia jerasaun sei manaan.
PSA 44:5 Ho Ita Boot nia kbiit ami duni sai ami nia inimigu sira; ho Ita Boot nia naran ami sama ami nia funu baluk sira.
PSA 44:6 Hau la tau hau nia fiar iha hau nia rama; hau nia surik la halo hau manaan.
PSA 44:7 Maibee Ita Boot mak halo ami manaan ami nia inimigu sira; Ita Boot halo moe ami nia funu baluk sira.
PSA 44:8 Iha loron tomak ami konta Ita Boot nia diak; ami sei hahii Ita Boot nia naran nafatin ba nafatin.
PSA 44:9 Maibee agora Ita Boot fila kotuk hodi hatuun fali ami; Ita Boot la hamutuk tiha ona ho ami nia militar sira.
PSA 44:10 Ita Boot halo ami hakiduk iha ami nia inimigu sira nia oin; ami nia funu baluk sira hadau tiha ami nia sasaan.
PSA 44:11 Ita Boot husik ema oho ami hanesan fali ema oho bibi; sira halo ami namkari iha nasaun jentiu sira.
PSA 44:12 Ita Boot faan Ita Boot nia povu ho folin baratu deit, la interese atu husu folin diak nian.
PSA 44:13 Ita Boot halo ami moe iha vizinhu sira nia oin; ema nebee haleu ami hatete aat ami no hatuun ami.
PSA 44:14 Ita Boot halo ami sai naran aat iha nasaun jentiu sira nia leet; estranjeiru sira doko ulun ba ami.
PSA 44:15 Loron-kalan hau senti hau nia naran sai foer tiha ona; hau moe boot,
PSA 44:16 tanba rona ema hatuun ami ho tarata ami, no haree inimigu sira ho ema nebee odi ami.
PSA 44:17 Buat hirak nee hotu mai iha ami nia leten, afinal ami la haluha Ita Boot; ami la kontra Ita Boot nia lei ho promesa.
PSA 44:18 Ami la fila kotuk ba Ita Boot; ami la lao sees husi Ita Boot nia dalan.
PSA 44:19 Maibee Ita Boot harahun tiha ami iha animal fuik nia hela fatin; Ita Boot falun ami ho nakukun boot.
PSA 44:20 Se karik ami haluha tiha ami nia Maromak nia naran ka tane liman fali ba maromak seluk,
PSA 44:21 Ita Boot hatene hela, tanba Ita Boot hatene hotu ema nia segredu iha laran.
PSA 44:22 Loron-kalan ema buka dalan atu oho ami tanba ami tuir Ita Boot. Sira haree ami hanesan bibi malae nebee mak sira atu oho.
PSA 44:23 Nai Maromak, hadeer ona ba! Nusaa mak Ita Boot toba dukur? Hamriik ba! Keta husik hela ami tinan ba tinan.
PSA 44:24 Tansaa mak Ita Boot subar Ita Boot nia oin? Tansaa Ita Boot haluha ami nia terus ho susar?
PSA 44:25 Ami monu tuun tiha ona ba iha rai rahun; ami monu taka rabat iha rai.
PSA 44:26 Hamriik hodi tulun ami ba; salva ami tanba Ita Boot nia domin rohan-laek.
PSA 45:1 Salmu husi Korá nia oan, para hanorin ema. Kantiku kazamentu nian, tuir muzika “Ai funan liriu.” Ba dirijenti koru. Hau nia laran nakonu ho liafuan murak; hau nia ibun hanesan matenek nain nia lapizeira; hau hakarak oferese hau nia poezia ba liurai.
PSA 45:2 O mak bonitu liu ema hotu-hotu; liafuan mesak furak sai husi o nia ibun; Maromak foo bensaun ba o nafatin ba nafatin.
PSA 45:3 Aswain, sikat o nia surik iha o nia kanotak; hatudu sai o nia kbiit ho o nia furak!
PSA 45:4 Uza o nia kbiit nee lao ba oin too manaan hodi defende lia loos, hahalok haraik aan ho justisa; uza o nia forsa hodi halo buat boot.
PSA 45:5 Liurai, o nia rama oan kroat, tama borus o nia inimigu sira nia fuan; nasaun jentiu sira monu iha o nia ain okos.
PSA 45:6 Nai, o sei ukun tinan ba tinan; o sempre ukun o nia reinu ho lo-loos.
PSA 45:7 O haksolok bainhira ema halo buat diak; o hakribi hahalok aat. Tanba nee, Nai o nia Maromak foti o aas liu o nia maluk sira; Nia kose mina ba o nia ulun hodi halo o nia laran haksolok.
PSA 45:8 O nia ropa hotu-hotu tau ai morin ho mina morin diak nian ho ai kameli; o nia palasiu enfeita ho elefante nia nehan; muzika viola nian halo kontenti o nia laran.
PSA 45:9 Feto nebee hela iha o nia palasiu, balu raan liurai; liurai nia noiva hatais osan mean husi rai Ofir hodi tuur iha o nia sorin loos.
PSA 45:10 Liurai feto, rona mai, hanoin di-diak hodi see tilun; haluha tiha o nia o nia povu ho o nia aman nia uma laran.
PSA 45:11 O nia furak halo liurai gosta teb-tebes o; nia mak o nia nai; hakruuk ba nia.
PSA 45:12 Povu husi sidade Tiru sei mai foo prezenti; ema riku sira iha povu nia leet sei buka manaan o nia laran.
PSA 45:13 Liurai feto nee iha nia kuartu laran, nia bonita teb-tebes. Nia vestidu naruk enfeita ho osan mean;
PSA 45:14 nia hena kor oi-oin deit. Ema lori nia ba iha liurai nia oin; nia maluk feto raan sira akompanha nia husi kotuk.
PSA 45:15 Ho kontenti ho haksolok, sira hakat dadauk mai tama iha liurai nia palasiu.
PSA 45:16 Liurai, o sei iha oan mane hodi tuur iha o nia kadeira ukun; o sei foti sira hodi ukun rai tomak.
PSA 45:17 Hau sei foti aas o nia naran husi jerasaun ba jerasaun, nunee nasaun hotu-hotu sei gaba o tinan ba tinan.
PSA 46:1 Kantiku ida husi jerasaun Korá nian, tuir muzika Alamot. Ba dirijenti koru. Maromak mak foo mahon mai ita no foo forsa mai ita; Nia sempre tulun ita iha susar laran.
PSA 46:2 Tanba nee ita sei la tauk, maski rai nakdoko too foho naksobu tuun ba tasi klaran.
PSA 46:3 Maski tasi siak nafurin sae too laloran baku makaas halo foho nakdoko, ita sei la nakdedar.
PSA 46:4 Iha mota ida halo haksolok povu iha Maromak nia sidade, Maromak Aas Liu hela iha fatin santu nee.
PSA 46:5 Maromak iha fatin nee, nunee sidade nee sei la monu. Dadeer-saan rai huun mutin, Maromak sei tulun sidade nee.
PSA 46:6 Nasaun jentiu sira rungu-ranga, liurai sira nakdoko; Maromak nia lian tarutu halo rai nabeen tiha.
PSA 46:7 NAI Maromak Aswain hamutuk ho ita; Jacó nia Maromak mak ita nia abrigu.
PSA 46:8 Mai hodi haree saida mak NAI Maromak halo tiha ona. Haree ba! Nia hatudu buat boot iha mundu.
PSA 46:9 Nia hapara funu husi rai ulun too rai ikun iha mundu tomak. Nia silu tohar tiha rama no halo rahun tiha diman. Ai belar nebee ema uza hodi defende aan, Nia sunu tiha.
PSA 46:10 Maromak dehan, “Hakmatek ba, no rekonhese katak Hau mak Maromak. Ema iha nasaun hotu-hotu haboot Hau nia naran; ema iha mundu tomak foti aas Hau nia naran.”
PSA 46:11 NAI Maromak Aswain hamutuk ho ita; Jacó nia Maromak mak ita nia abrigu.
PSA 47:1 Salmu husi Korá nia oan, ba dirijenti koru. Povu husi nasaun hotu-hotu, basa liman ba; haklalak hahii Maromak ho haksolok.
PSA 47:2 Tanba NAI Maromak Kbiit Nain nee makaas; Nia mak Liurai boot hodi ukun mundu tomak.
PSA 47:3 Nia halo nasaun jentiu sira hakruuk mai ita; Nia halo povu jentiu sira monu iha ita nia ain okos.
PSA 47:4 Nia hili rai nee hodi foo ba ita povu Israel; Nia hadomi teb-tebes ita, ita mos kontenti ho rai nee.
PSA 47:5 NAI Maromak sae dadauk baa tuur iha Nia kadeira ukun, povu haklalak; NAI hakat sae, korneta lian akompanha Nia.
PSA 47:6 Hananu hahii Maromak, hananu hahii ba Nia; hananu hahii ba ita nia Liurai, hananu hahii ba,
PSA 47:7 tanba Maromak nee mundu tomak nia Liurai; hananu salmu hodi hahii Nia ba.
PSA 47:8 Maromak ukun nasaun hotu-hotu; Maromak tuur iha Nia kadeira ukun santu nian.
PSA 47:9 Nai ulun nasaun sira nee halibur hamutuk ho povu nebee Abraão nia Maromak hili nanis ona, tanba liurai hotu-hotu iha mundu nee Maromak nian; Nia mak boot liu hotu-hotu.
PSA 48:1 Salmu husi Korá nia oan. Kantiku ida. NAI Maromak nee boot; ita nia Maromak merese duni atu ita hahii iha Nia sidade, iha Nia foho santu.
PSA 48:2 Foho nee aas ho furak, halo haksolok mundu tomak. Nee mak foho Siaun, iha liu parte norte, Liurai boot nia sidade.
PSA 48:3 Iha sidade nia moru laran, Maromak hatudu ona katak Nia rasik mak defende sidade nee.
PSA 48:4 Liurai nasaun sel-seluk halibur sira nia tropas; sira hamutuk avansa ba oin.
PSA 48:5 Bainhira sira haree sidade nee, sira hakfodak; sira tauk hodi halai.
PSA 48:6 Iha nebaa, sira nakdedar makaas; sira terus hanesan feto nebee atu tuur ahi;
PSA 48:7 sira hanesan roo Tarsis nebee anin lorosae riba tuun-sae.
PSA 48:8 Uluk ita rona tiha ona; agora ita mos haree ona iha NAI Maromak Aswain nia sidade, iha ita nia Maromak nia sidade. Maromak harii metin sidade nee too tinan ba tinan.
PSA 48:9 Maromak, iha Ita Boot nia uma kreda, ami medita Ita Boot nia domin rohan-laek.
PSA 48:10 Maromak, ema iha fat-fatin temi Ita Boot nia naran, too ema husi rai ulun rai ikun iha mundu tomak mos hahii Ita Boot; Ita Boot nia liman loos nakonu ho justisa.
PSA 48:11 Foho Siaun haksolok; Judá oan sira kontenti tanba Ita Boot nia justisa.
PSA 48:12 Lao haleu Siaun, hadulas sidade nee tomak; sura took nia tore aas;
PSA 48:13 fihir di-diak sidade nia moru; sukat moru nia aas no mahar, atu nunee o bele konta ba jerasaun tuir mai katak,
PSA 48:14 Maromak nee mak ita nia Maromak nafatin ba nafatin; Nia sai ita nia matadalan too tinan ba tinan.
PSA 49:1 Salmu husi Korá nia oan, ba dirijenti koru. Imi husi nasaun hotu-hotu, rona mai! Kiik ho boot, riku ho kiak, hotu-hotu nebee moris iha mundu, see tilun mai.
PSA 49:3 Hau nia ibun sei koalia buat matenek; buat nebee hau nia laran medita sei halo imi kompriende.
PSA 49:4 Hau sei see tilun ba lia matenek nian; hau sei toka viola hodi esplika lia matenek nee.
PSA 49:5 Iha loron dezastre, bainhira ema aat haleu hau, hau atu tauk saida?
PSA 49:6 Sira nee konfia sira nia riku-soin; sira foti aan tanba riku boot.
PSA 49:7 La iha ema ida mak bele selu kotu nia vida ka foo nia riku ba Maromak atu salva nia moris.
PSA 49:8 Tanba ema nia vida folin karun liu; nia selu ho riku-soin saida deit mos la too
PSA 49:9 atu nia bele moris nafatin ba nafatin, atu nia la bele tama ba rai kuak.
PSA 49:10 Ita hotu haree katak ema matenek mate, hanesan mos ema nebee beik-teen la hatene buat ida. Sira hotu husik sira nia riku-soin ba ema seluk.
PSA 49:11 Uluk sira iha rai luan; too ikus rate mak sai fali sira nia uma tinan ba tinan; rai kuak mak sai sira nia hela fatin husi jerasaun ba jerasaun.
PSA 49:12 Maski ema riku, nia la bele moris nafatin; nia hanesan animal nebee too tempu ida sei mate.
PSA 49:13 Ema nebee konfia nia aan, nia dalan mak nee; ida nee mak destinu ba ema nebee mak laran metin ba nia lia fuan rasik.
PSA 49:14 Sira nia destinu mak mate; sira hanesan bibi malae, mate mak sira nia bibi atan hodi lori sira ba matebian sira nia fatin; sira tuun kedas ba iha rai kuak. Rai sei haan tiha sira nia isin; sira dook tiha ona husi sira nia uma diak nian.
PSA 49:15 Maibee Maromak sei salva hau husi matebian sira nia fatin; Nia sei dada hau sae ba iha Nia prezensa.
PSA 49:16 Keta preokupa bainhira ema seluk hetan riku; se nia riku-soin aumenta ba beibeik mos lalika tauk,
PSA 49:17 tanba ema nee mate, sei la lori buat ida; nia riku-soin la baa hamutuk ho nia.
PSA 49:18 Iha nia moris tomak nia konsidera nia aan ema nebee hetan bensaun; ema nebee moris diak hanesan nee, ema seluk sempre gaba.
PSA 49:19 Maski nunee nia sei baa hamutuk ho sira nebee baa uluk ona; nia nunka atu haree tan naroman moris nian.
PSA 49:20 Ema nebee riku maibee falta kompriensaun, sira hanesan animal nebee too tempu ida sei mate.
PSA 50:1 Salmu Asaf nian. NAI Maromak Kbiit Nain lia tuun hodi bolu ema iha mundu tomak, husi lorosae too loromonu.
PSA 50:2 Maromak nia naroman leno sai husi foho Siaun, fatin nebee furak teb-tebes.
PSA 50:3 Ita nia Maromak mai, Nia sei la nonook; ahi lakan boot iha hela Nia oin; anin makaas haleu Nia.
PSA 50:4 Nia bolu lalehan ho rai atu asisti bainhira Nia foo justisa ba Nia povu; Nia dehan,
PSA 50:5 “Halibur povu nebee foo laran mai Hau; sira nee halo promesa ho Hau liu husi sakrifisiu tunu.”
PSA 50:6 Lalehan foo sai katak Maromak tesi lia sempre loos, tanba Nia nee Justisa Nain.
PSA 50:7 “Hau nia povu, rona mai, Hau sei koalia; Israel, Hau sei foo sasin kontra o. Hau mak Maromak, o nia Maromak.
PSA 50:8 Laos tanba o nia sakrifisiu la too mak Hau foo sala ba o; sakrifisiu tunu nebee imi foo, sempre iha Hau nia oin.
PSA 50:9 Hau la presiza karau husi o nia luhan ka bibi husi o nia luhan laran,
PSA 50:10 tanba animal hotu-hotu iha ai laran Hau nian; karau iha foho rihun ba rihun mos Hau nian.
PSA 50:11 Hau hatene manu hotu-hotu iha foho; buat saida deit mak book aan iha rai fuik, Hau nian hotu.
PSA 50:12 Se Hau hamlaha karik, Hau la hatete ba o, tanba mundu ho buat hotu nebee mak iha laran, nee Hau nian.
PSA 50:13 Imi hanoin katak Hau haan naan karau aman ka? Hau hemu bibi aman nia raan ka?
PSA 50:14 Diak liu foo agradesimentu nudar o nia sakrifisiu ba Maromak; halo tuir o nia promesa ba Maromak Aas Liu.
PSA 50:15 Bainhira o iha susar laran, harohan mai Hau mak Hau sei salva o, no o sei foti aas Hau nia naran.”
PSA 50:16 Maibee ba ema aat, Maromak hatete nunee: “O temi beibeik Hau nia ukun fuan atu halo saida? O nia ibun koalia hela deit hau nia promesa atu halo saida?
PSA 50:17 Afinal o lakohi atu Hau koriji o; o soe Hau nia liafuan ba kotuk.
PSA 50:18 Bainhira o haree naok-teen, o baa hamutuk ho nia; o ranxu ema nebee halo sala seksual.
PSA 50:19 O husik o nia ibun koalia buat aat; o foo o nia nanaal ba liafuan bosok.
PSA 50:20 O tuur koalia aat o nia maun-alin; o hatete aat o nia inan nia oan.
PSA 50:21 Bainhira o halo buat sira nee, Hau nonook deit, too o hanoin Hau mos hanesan ho o. Maibee agora Hau foo sala ba o hodi foo sai o nia hahalok ida-idak.
PSA 50:22 Imi sira nebee haluha Maromak, rona mai! Se lae Hau sei lees tiha imi, la iha ema ida bele salva imi.
PSA 50:23 Bainhira ema foo agradese mai Hau, nee mak sakrifisiu ida nebee foti aas Hau nia naran; ema nebee mak lao iha dalan loos, Hau, Maromak sei hatudu Hau nia salvasaun ba nia.”
PSA 51:1 Salmu David nian, bainhira profeta Natan mai hasee David tanba nia halo sala ho Batseba. Ba dirijenti koru. Nai Maromak, hanoin hau ba! Tanba Ita Boot nia domin nunka hotu. Ita Boot nee laran luak, nunee halakon tiha hau nia hahalok aat hotu-hotu.
PSA 51:2 Fase moos hau nia pekadu; hamoos hau nia sala.
PSA 51:3 Tanba hau rekonhese hau nia hahalok aat; hau nia sala sempre mosu iha hau nia hanoin.
PSA 51:4 Hau halo sala kontra Ita Boot, so Ita Boot deit; hau halo tiha ona buat nebee aat iha Ita Boot nia oin. Nunee Ita Boot hakotu hau nia lia, kona duni; Ita Boot hatuun kastigu mai hau nee loos.
PSA 51:5 Tebes duni, hau moris mai sala nanis kedas; hau sala nain husi tempu nebee hau nia inan foin isin rua.
PSA 51:6 Maibee Ita Boot hakarak atu hau nia laran tenki moos, nunee hanorin hau atu hau sai matenek.
PSA 51:7 Hisik bee ba hau hodi ai hisopu para hau sai moos; fase moos tiha hau mak hau sei sai mutin liu fali kabas rahun.
PSA 51:8 Foo ksolok ho kontenti mai hau. Ita Boot harahun tiha ona hau nia ruin; agora husik hau hamriik fali ho haksolok.
PSA 51:9 Keta haree ba hau nia sala; halakon tiha hau nia pekadu.
PSA 51:10 Maromak, halo hau nia neon moos; hafoun hau nia laran halo hau laran metin ba Ita Boot.
PSA 51:11 Keta duni sai hau husi Ita Boot nia oin; keta hasai Ita Boot nia Espiritu Santu husi hau.
PSA 51:12 Halo hau haksolok fila fali tanba Ita Boot salva tiha ona hau; halo hau nia laran prontu atu moris tuir Ita Boot nia hakarak.
PSA 51:13 Depois hau sei hanorin Ita Boot nia dalan ba ema sala nain sira, atu nunee sira bele fila fali ba Ita Boot.
PSA 51:14 Maromak hau nia Salvador, salva hau husi ema nebee mak eziji hau nia raan fakar. Nunee hau sei hananu kona ba Ita Boot nia salvasaun.
PSA 51:15 Nai Maromak, loke hau nia ibun mak hau sei hahii Ita Boot.
PSA 51:16 Se hau oho animal hodi halo sakrifisiu ba Ita Boot, nee la halo haksolok Ita Boot nia laran; Maski hau lori sakrifisiu tunu mos, la halo Ita Boot kontenti.
PSA 51:17 Maromak, hau nia sakrifisiu mak hau nia fuan nebee rahun, hau nia laran nebee dodok, nakonu ho arependimentu. Sakrifisiu nee monu duni ba Ita Boot nia laran.
PSA 51:18 Hatudu Ita Boot nia laran diak ba povu Siaun para povu bele hetan diak; harii fila fali moru haleu sira nia sidade Jerusalém nee.
PSA 51:19 Depois Ita Boot nia laran sei kontenti ho sakrifisiu lo-loos, sakrifisiu tunu nebee ami oferese tomak ba Ita Boot. Ami sei oferese karau aman boot hodi tunu iha Ita Boot nia altar.
PSA 52:1 Salmu David nian, bainhira ema Edom ida naran Doeg baa kesar ba Saul dehan, “David baa tiha ona iha Ahimelek nia uma.” Salmu nee para hanorin ema. Ba dirijenti koru. Eroi boot, nusaa mak o gaba aan kona ba hahalok aat hasoru ema nebee Maromak hadomi?
PSA 52:2 Lohi door, o iha planu atu halo aat ema; o nia ibun kroat hanesan tudik.
PSA 52:3 O gosta buat aat liu fali buat diak; o gosta koalia bosok liu fali koalia buat nebee loos.
PSA 52:4 Lohi-teen, o gosta koalia liafuan nebee halo terus ema.
PSA 52:5 Nee duni, Maromak sei riba tuun o tinan ba tinan; Nia sei kaer o hodi rakut o sai husi o nia tenda; Nia sei fokit o sai husi ema moris sira nia rain.
PSA 52:6 Ema nebee moris loos sei haree no tauk; sira sei hamnasa o hodi dehan,
PSA 52:7 “Haree took ema nee! Nia la buka mahon iha Maromak, maibee konfia fali nia riku-soin bar-barak, no hamahon aan iha hahalok nebee aat.”
PSA 52:8 Maibee hau nee hanesan ai huun oliveira nebee moris buras iha Maromak nia uma. Hau konfia Maromak nia domin rohan-laek nafatin ba nafatin.
PSA 52:9 Maromak, hau sei agradese ba Ita Boot tinan ba tinan tanba buat nebee Ita Boot halo tiha ona; hau sei haklaken Ita Boot nia naran iha Ita Boot nia povu nia leet, tanba Ita Boot nee diak.
PSA 53:1 Salmu David nian para hanorin ema. Tuir muzika “Mahalat.” Ba dirijenti koru. Ema beik sira koalia iha sira nia laran dehan, “Maromak la iha!” Ema sira nee mesak aat deit; sira nia dalan aat teb-tebes; la iha ema ida mak halo buat diak.
PSA 53:2 Maromak hateke tuun husi lalehan mai ita ema hodi haree, iha ema balu matenek ka lae, ema balu harohan ba Maromak ka lae.
PSA 53:3 Maibee ema hotu lao sala dalan ona, sira hotu sai aat tiha ona; la iha ema ida mak halo buat diak; ida mos la iha.
PSA 53:4 Ema aat sira nee la hatene buat ida ka? Sira haan matak hau nia povu hanesan fali sira haan halimar paun fuan ida; sira nunka bolu Maromak nia naran.
PSA 53:5 Maibee haree ba, ema sira nee sei tauk teb-tebes; tauk nee laos tauk baibain nebee sira senti iha sira nia moris. Maromak nia povu, ema nebee ataka imi, Maromak sei halo sira nia ruin naklekar; Maromak lakohi simu sira, nunee imi sei hatuun sira.
PSA 53:6 Hau harohan atu Maromak hamriik iha foho Siaun hodi salva Israel. Bainhira Maromak hadia fali Nia povu nia moris, Jacó nia jerasaun sei haksolok, Israel sei kontenti.
PSA 54:1 Salmu David nian, bainhira ema Zifi sira baa kesar ba Saul dehan, “David subar hela iha ami nia leet.” Salmu nee para hanorin ema. Akompanha ho viola. Ba dirijenti koru. Maromak, hodi Ita Boot nia naran salva hau ba; hodi Ita Boot nia kbiit foo justisa mai hau.
PSA 54:2 Maromak, rona hau nia orasaun; see tilun ba hau nia lia fuan.
PSA 54:3 Ema foti aan sira mai hodi ataka hau; ema laran aat hakarak hasai hau nia vida; sira la interese Maromak.
PSA 54:4 Maibee Maromak mak ajuda hau; Nai Maromak sempre kuidadu hau.
PSA 54:5 Husik hau nia inimigu sira nia hahalok aat fila fali ba sira; harahun tiha sira, tanba Ita Boot sempre halo buat nebee loos.
PSA 54:6 NAI Maromak, ho laran tomak hau sei oferese sakrifisiu ba Ita Boot; hau sei hahii Ita Boot nia naran, tanba Ita Boot nee diak.
PSA 54:7 Ita Boot salva tiha ona hau husi susar laran; hau nia matan haree tiha ona hau nia inimigu sira lakon.
PSA 55:1 Salmu David nian para hanorin ema. Akompanha ho viola. Ba dirijenti koru. Maromak, see tilun ba hau nia orasaun; keta fila kotuk ba hau nia hamulak.
PSA 55:2 Rona hau hodi hataan hau ba; hau hanoin la hetan too hau nia laran dodok.
PSA 55:3 Tanba hau nia inimigu sira hakilar hau; ema aat ameasa hau; sira hanehan hau; sira odi hau ho laran nakali.
PSA 55:4 Hau nia fuan nakdedar; ameasa mate nian hanehan hau.
PSA 55:5 Hau tauk ho nakdedar too isin fulun hamriik.
PSA 55:6 Hau hanoin, “Diak liu hau iha liras manu pombu nian, atu hau bele semo sai hodi hakmatek.
PSA 55:7 Hau atu semo dook baa hela iha rai fuik;
PSA 55:8 hau atu baa lalais buka fatin mahon, dook husi anin boot ho udan boot.”
PSA 55:9 Nai Maromak, halo ema aat sira nia neon lakon tiha; husik sira koalia arbiru ba, tanba hau haree violensia ho rungu-ranga iha sidade laran.
PSA 55:10 Loron-kalan sira lao haleu sidade hodi kontrola iha moru leten; iha moru laran nakonu ho hanoin aat ho krimi.
PSA 55:11 Estraga door sira lao hela iha sidade nee; iha estrada ninin sira hanehan ema no haan matak ema nia riku-soin la para.
PSA 55:12 Se karik hau nia inimigu mak hatete aat hau, hau sei aguenta; se karik funu baluk ida mak foti aan hasoru hau, hau sei bele subar aan husi nia.
PSA 55:13 Maibee o mak halo fali, o ho hau hanesan; o nee hau nia maluk, hau nia belun diak.
PSA 55:14 Ita nain rua uluk ranxu malu diak loos; ita tama iha Maromak nia uma kreda iha ema barak nia leet.
PSA 55:15 Husik hau nia inimigu sira mate mean; husik sira tuun moris ba ema mate sira nia fatin, tanba hahalok aat iha hela sira nia uma, iha hela sira nia laran.
PSA 55:16 Maibee hau harohan ba NAI Maromak mak Maromak salva hau.
PSA 55:17 Iha tempu kalan, dadeer-saan ho meudia, hau halerik ho laran susar; Nia rona hau nia lian.
PSA 55:18 Nia salva hau; maski ema nadodon mai hodi ataka hau, buat ida la kona hau.
PSA 55:19 Maromak nee Liurai hori uluk kedas; Nia sei rona hau hodi hatuun sira, tanba sira nee lakohi arepende, no la hamtauk Maromak.
PSA 55:20 Hau nia kolega ataka fali nia maun-alin koran sira; nia kontra fali nia promesa ho sira.
PSA 55:21 Nia koalia ho ibun midar, maibee nia laran hakarak funu; nia liafuan kabeer liu fali mina, maibee kroat hanesan surik.
PSA 55:22 Entrega o nia preokupasaun ba NAI Maromak mak Nia sei kuidadu o; Nia nunka husik ema nebee moris loos atu nakdoko.
PSA 55:23 Maibee Maromak, Ita Boot sei soe tuun tiha ema aat sira ba iha rai kuak naruk; oho-door ho traidor sira nia vida sei la naruk; sira mate ho tinan badak. Maibee hau nee konfia Ita Boot.
PSA 56:1 Salmu David nian, bainhira ema Filístia sira kaer nia iha sidade Gat. Salmu nee para hanorin ema. Tuir muzika “Manu pombu iha ai huun nebee dook.” Ba dirijenti koru. Maromak, hatudu Ita Boot nia laran luak mai hau, tanba ema sama hela hau; loron-kalan hau nia inimigu sira hanehan hau.
PSA 56:2 Hau nia funu baluk sira sama hela hau loron-kalan; ema barak foti aan ataka hau.
PSA 56:3 Maromak Aas Liu, bainhira hau tauk, hau konfia Ita Boot.
PSA 56:4 Hau hahii Maromak tanba buat nebee Nia promete ona; hau fiar Nia, nunee hau la tauk. Ema mundu nee bele halo saida ba hau?
PSA 56:5 Loron-kalan hau nia inimigu sira bobar hau nia liafuan; sira sempre iha hanoin aat ba hau.
PSA 56:6 Sira kombina malu; sira hafuhu hau; sira haree tu-tuir hau nia dalan; sira hakarak atu hasai hau nia vida.
PSA 56:7 Maromak, keta husik sira moris, tanba sira nia hahalok aat; hamonu nasaun jentiu sira ho hirus ba.
PSA 56:8 Hau nia terus Ita Boot mak sura; hau nia matan been Ita Boot tau iha botir. Buat sira nee hotu Ita Boot hakerek iha Ita Boot nia livru.
PSA 56:9 Bainhira hau harohan, hau nia inimigu sira sei hakiduk. Hau hatene katak Maromak hamutuk ho hau.
PSA 56:10 Hau hahii Maromak tanba buat nebee Nia promete ona; hau hahii NAI Maromak tanba promesa nebee Nia halo.
PSA 56:11 Hau fiar Maromak, nunee hau la tauk. Ema mundu nee bele halo saida ba hau?
PSA 56:12 Maromak, hau sei kumpri hau nia juramentu ba Ita Boot; hau sei foo oferta agradesimentu nian ba Ita Boot.
PSA 56:13 Tanba Ita Boot hasai tiha ona hau husi mate; Ita Boot kuidadu hau nia ain la sidi, nunee hau bele lao iha Maromak nia oin, iha naroman moris nian.
PSA 57:1 Salmu David nian, bainhira nia halai sees husi Saul hodi tama iha fatuk kuak laran. Salmu nee para hanorin ema. Tuir muzika “Keta harahun.” Ba dirijenti koru. Maromak, hatudu Ita Boot nia laran luak mai hau; hanoin hau ba, tanba hau hamahon aan iha Ita Boot. Hau sei hamahon aan iha Ita Boot nia liras okos too dezastre liu tiha.
PSA 57:2 Hau harohan ba Maromak Aas Liu; hau husu tulun ba Maromak tanba Nia halo buat diak mai hau.
PSA 57:3 Nia sei hatuun salvasaun husi lalehan mai hau; Nia sei hamoe ema sira nebee mak sama hau. Maromak haraik Nia domin rohan-laek ho Nia lia loos.
PSA 57:4 Hau toba hela iha liaun nia klaran; sira gosta lees matak ema hodi haan; sira nia nehan hanesan diman ho rama oan; sira nia nanaal kroat hanesan surik.
PSA 57:5 Maromak, hatudu Ita Boot nia Aan aas liu lalehan; halo Ita Boot nia kbiit domina mundu tomak.
PSA 57:6 Hau nia inimigu sira monta tiha ona redi ba hau nia ain; hau sai muroon tiha; sira kee rai kuak iha dalan nebee hau atu liu, maibee sira rasik mak monu tama ba laran.
PSA 57:7 Maromak, hau laran metin ba Ita Boot; hau nia laran metin; hau sei toka muzika hodi hananu hahii Ita Boot.
PSA 57:8 Hau hatete ba hau nia aan, hadeer ba! Viola ho viola tali sanulu, hadeer ba! Hau sei fanu loro matan.
PSA 57:9 Nai Maromak, hau sei hahii Ita Boot iha nasaun hotu-hotu nia klaran; hau sei hananu ba Ita Boot iha povu sira nia leet,
PSA 57:10 tanba Ita Boot nia domin boot too iha lalehan; Ita Boot nia lia loos firmi too iha kalohan.
PSA 57:11 Maromak, hatudu Ita Boot nia Aan aas liu lalehan; halo Ita Boot nia kbiit domina mundu tomak.
PSA 58:1 Salmu David nian para hanorin ema. Tuir muzika “Keta harahun.” Ba dirijenti koru. Ukun nain sira, imi koalia lia loos ka? Imi tesi ema nia lia ho lo-loos ka lae?
PSA 58:2 Lae, imi nia hanoin aat; imi nia liman halao violensia iha rai.
PSA 58:3 Husi kabun laran kedas ema aat lao sala dalan; moris mai kedas sira lao sala hodi bosok ema.
PSA 58:4 Sira iha veneno hanesan samea nia veneno, hanesan samea kobra nebee taka tiha nia tilun
PSA 58:5 para nia nain toka muzika, nia la bele rona; muzika bele kapaas mos, nia lakohi atu rona.
PSA 58:6 Maromak, harahun tiha sira nia nehan iha sira nia ibun laran; NAI, halo tohar tiha liaun sira nee nia nehan ba.
PSA 58:7 Husik sira lakon hanesan bee nebee suli lakon; husik sira sai namlaik hanesan duut iha dalan.
PSA 58:8 Halo sira mohu hanesan karakol nia kabeen nebee maran tu-tuir; halo sira hanesan bebee nebee abortu tiha, nunka hetan loro matan.
PSA 58:9 Molok ema bele sunu ai sanak lotuk hodi hamanas sanan, Maromak sei dasa sai tiha ema aat sira.
PSA 58:10 Ema moris loos sei haksolok bainhira sira haree Maromak kastigu ema aat sira; sira sei solur sira nia ain iha ema aat sira nia raan laran.
PSA 58:11 Ema sei dehan, “Loos duni, ema moris loos sei simu nia kolen; tebes, Maromak mak foo justisa ba mundu.”
PSA 59:1 Salmu David nian, bainhira Saul haruka ema hafuhu David nia uma para oho nia. Salmu nee para hanorin ema. Tuir muzika “Keta harahun.” Ba dirijenti koru. Maromak, salva hau husi hau nia inimigu sira; satan netik hau husi sira nebee mak ataka hau.
PSA 59:2 Salva hau husi ema sira nebee halo aat; hasai hau husi ema oho door sira nia liman laran.
PSA 59:3 NAI Maromak, haree ba, sira hein hela hau atu hakotu hau nia vida; ema forti sira kombina malu hodi kontra hau; afinal hau la halo buat ida ba sira.
PSA 59:4 Hau la sala, maibee sira halai mai atu asalta hau. Hamriik hodi tulun hau, haree rasik ba.
PSA 59:5 NAI Maromak Aswain, Ita Boot mak Israel nia Maromak; hadeer ba hodi kastigu nasaun jentiu sira; keta hanoin tan traidor laran aat sira.
PSA 59:6 Sira fila iha oras kalan, hakilar hanesan asu nebee hatenu hodi lao haleu sidade.
PSA 59:7 Haree ba, sira fakar sai liafuan tarata husi sira nia ibun; liafuan nebee sai husi sira nia ibun kroat hanesan surik; sira hanoin dehan, “See mak atu rona?”
PSA 59:8 Maibee NAI Maromak, Ita Boot hamnasa fali sira; Ita Boot goza fali nasaun jentiu sira nee hotu.
PSA 59:9 Ita Boot mak hau nia forsa, hau laran metin ba Ita Boot; Maromak, Ita Boot mak hau nia abrigu.
PSA 59:10 Hau nia Maromak nia domin rohan-laek, Nia sei mai simu hau; hau nia Maromak sei halo hau manaan hau nia inimigu sira.
PSA 59:11 Nai Maromak, Ita Boot defende ami; keta oho sira, atu nunee hau nia povu la bele haluha. Ho Ita Boot nia kbiit halo sira namkari hodi hatuun tiha sira ba.
PSA 59:12 Sala sai husi sira nia ibun; sira nia ibun koalia buat aat, nunee husik sira nia hahalok foti aan sai lasu ba sira nia aan rasik. Sira gosta foo malisan no koalia liafuan bosok,
PSA 59:13 nunee hamohu sira ho Ita Boot nia hirus ba; hamohu sira too sira la iha tan. Depois ema husi rai ulun too rai ikun hatene katak, Maromak ukun Jacó nia jerasaun.
PSA 59:14 Sira fila iha oras kalan, hakilar hanesan asu nebee hatenu hodi lao haleu sidade.
PSA 59:15 Sira lao rai buka ai haan; bainhira sira la bosu, sira hakilar.
PSA 59:16 Maibee hau sei hananu kona ba Ita Boot nia forsa; iha dadeer-saan hau sei kanta sai Ita Boot nia domin rohan-laek, tanba Ita Boot mak hau nia abrigu, hau nia subar fatin iha tempu susar.
PSA 59:17 Ita Boot mak hau nia forsa; hau hananu hahii Ita Boot; Maromak, Ita Boot mak hau nia abrigu; hau nia Maromak, Ita Boot hadomi hau.
PSA 60:1 Salmu David nian, bainhira David funu hasoru ema Aram Naharaim ho Aram Zoba. Iha tempu nebaa, Joab fila fali hodi oho tiha ema Edom rihun sanulu resin rua iha Rai Masin. Salmu nee para hanorin ema. Tuir muzika “Ai funan promesa nian.” Ba dirijenti koru. Maromak, Ita Boot soe tiha ona ami, halo ami lakon; Ita Boot hirus hela ami, simu fali ami ba!
PSA 60:2 Ita Boot halo rai nakdoko hodi fera rai nakloke tiha; halo tomak fila fali ba, tanba atu naksobu ona.
PSA 60:3 Ita Boot halo Ita Boot nia povu terus aat liu ona; Ita Boot obriga ami hemu tua too lanu todan.
PSA 60:4 Maibee ema nebee hamtauk Ita Boot, Ita Boot foo sinal atu sira sees aan husi rama oan.
PSA 60:5 Hodi Ita Boot nia liman loos salva ami no tulun ami ba, atu nunee ema nebee Ita Boot hadomi bele hetan salvasaun.
PSA 60:6 Maromak lia tuun husi Nia hela fatin dehan, “Hau sei manaan! Hau sei fahe rai Sikem ba Hau nia povu; Hau sei sukat rai Sukot.
PSA 60:7 Rai Gileade Hau nian, rai Manassés mos Hau nian; ema Efraim Hau nia kapaseti, ema Judá Hau nia rota.
PSA 60:8 Rai Moab Hau nia basia hodi fase liman; rai Edom fatin para soe Hau nia sandalias ba; Hau haksolok haklalak tanba Hau manaan rai Filístia.”
PSA 60:9 Maromak, see loos mak atu lori hau ba iha sidade nebee forti? See loos mak atu lori hau ba iha rai Edom?
PSA 60:10 Maromak, Ita Boot soe duni ami ka? Maromak, Ita Boot lakohi avansa ho ami nia militar sira ka?
PSA 60:11 Tulun ami hodi kontra inimigu sira, tanba ema kriatura nia ajuda la iha folin.
PSA 60:12 Hamutuk ho Maromak ita sei manaan; Nia sei sama ita nia inimigu sira.
PSA 61:1 Salmu David nian, akompanha ho viola. Ba dirijenti koru. Maromak, rona hau nia halerik; see tilun ba hau nia orasaun.
PSA 61:2 Husi rai dook hau harohan ba Ita Boot, tanba senti la bele ona. Lori hau baa tau iha fatuk nebee aas liu hau,
PSA 61:3 tanba Ita Boot mak hau nia fatin seguru; Ita Boot mak fatin seguransa nebee metin hasoru inimigu sira.
PSA 61:4 Husik hau hela iha Ita Boot nia tenda tinan ba tinan; husik hau hamahon aan iha Ita Boot nia liras okos.
PSA 61:5 Tanba Maromak, Ita Boot rona tiha ona hau nia promesa; bensaun nebee Ita Boot rai ba ema nebee hamtauk Ita Boot, hau mos simu ona.
PSA 61:6 Foo vida naruk ba liurai; husik nia moris too jerasaun ba jerasaun.
PSA 61:7 Hau husu atu liurai bele ukun iha Maromak nia prezensa nafatin ba nafatin; proteje nia hodi Ita Boot nia domin rohan-laek ho lia loos.
PSA 61:8 Nunee hau sei hananu hahii Ita Boot nia naran nafatin ba nafatin; hau sei halo tuir hau nia promesa loron ba loron.
PSA 62:1 Salmu David nian, ba dirijenti koru Jedutun. Hau besik Maromak mak hau nia laran hakmatek; so Nia deit mak bele salva hau.
PSA 62:2 Nia mak fatuk lolon boot nebee hau helik ba; Nia mak hau nia Salvador. Nia mak hau nia abrigu; la iha buat ida bele doko hau.
PSA 62:3 Imi hotu atu ataka hau too bainhira?! Imi atu hamonu hau hanesan fali imi hamonu moru nebee haliis tiha ona ka lutu nebee besik naksobu.
PSA 62:4 Ema sira nee halo planu atu hatuun hau husi hau nia fatin aas; sira gosta bosok. Sira nia ibun foo bensaun, maibee sira nia laran foo malisan.
PSA 62:5 Hau besik Maromak mak hau nia laran hakmatek; Nia deit mak foo esperansa mai hau.
PSA 62:6 Nia mak fatuk lolon boot nebee hau helik ba; Nia mak hau nia Salvador. Nia mak hau nia abrigu; la iha buat ida bele doko hau.
PSA 62:7 Maromak mak salva hau no tane aas hau; Nia mak fatuk lolon boot teb-tebes nebee hau helik ba; Nia mak foo mahon mai hau.
PSA 62:8 Maluk sira, konfia ba Maromak iha imi nia moris tomak; saida mak iha imi nia laran fakar sai ba Nia, tanba Maromak mak foo mahon mai ita.
PSA 62:9 Ema kiik sira hanesan buat mamuk ida; ema boot sira hanesan lia mamuk deit. Se tetu iha dasin karik, sira hotu kamaan liu fali anin.
PSA 62:10 Keta mehi atu uza violensia hodi sai riku; keta laran metin ba sasaan nebee o hadau husi ema. Se karik o nia riku-soin aumenta barak mos, lalika laran metin ba riku-soin nee.
PSA 62:11 Maromak koalia tiha ona; hau rona fila-fila ona katak, kbiit tomak Maromak nian;
PSA 62:12 Nai Maromak, Ita Boot nia domin nunka hotu. Ita Boot selu ema ida-idak tuir buat nebee sira halo tiha ona.
PSA 63:1 Salmu David nian, bainhira nia iha rai fuik maran Judá nian. Maromak, Ita Boot mak hau nia Maromak; hau hakarak teb-tebes atu besik Ita Boot; hau nia laran hamrook ba Ita Boot; hau nia aan tomak buka Ita Boot; hau hanesan rai nebee maran dekor, krekas, la iha bee.
PSA 63:2 Hau haree tiha ona Ita Boot iha fatin santu; hau fihir Ita Boot nia kbiit ho Ita Boot nia forsa.
PSA 63:3 Ita Boot nia domin diak liu fali vida, nunee hau nia ibun sei hahii Ita Boot.
PSA 63:4 Hau nia moris tomak hau sei agradese ba Ita Boot; hau sei foti sae hau nia liman hodi harohan ba Ita Boot.
PSA 63:5 Ita Boot sei habosu hau ho hahaan mesak di-diak deit; hau sei hananu ho haksolok hodi hahii Ita Boot.
PSA 63:6 Iha hau nia toba fatin hau hanoin kona Ita Boot; iha kalan tomak hau medita kona ba Ita Boot,
PSA 63:7 tanba Ita Boot mak tulun hau; iha Ita Boot nia liras okos, hau hamahon aan hodi hananu ho haksolok.
PSA 63:8 Hau neon metin ba Ita Boot; Ita Boot nia liman loos tane hau.
PSA 63:9 Maibee ema nebee hakarak hakotu hau nia vida, sira sei tuun ba iha rai kuak naruk nia laran.
PSA 63:10 Sira sei mate ho surik; sira sei sai asu fuik nia ai haan.
PSA 63:11 Maibee liurai sei haksolok tanba Maromak nia diak; ema hotu nebee jura hodi Maromak nia naran sei hahii Nia, tanba ema bosok-teen sira nia ibun sei taka metin tiha.
PSA 64:1 Salmu David nian, ba dirijenti koru. Hau nia Maromak, rona hau nia lia halerik; hau nia inimigu hatauk hau, kuidadu hau nia vida ba.
PSA 64:2 Ema aat sira kombina malu hasoru hau, subar hau ba; ema lubun boot gosta halo buat aat, proteje hau ba.
PSA 64:3 Sira halo kroat sira nia liafuan hanesan fali halo kroat surik; sira nia ibun foo sai liafuan moruk hanesan rama inan tiru sai rama oan.
PSA 64:4 Sira hafuhu ema laran moos hodi tiru; sira tiru lalais deit, la tauk buat ida.
PSA 64:5 Sira foo korajen ba malu ho planu aat; sira foo ideia ba malu atu monta sira nia lasu iha fatin subar; sira dehan, “See mak atu haree?”
PSA 64:6 Sira kombina malu ho planu aat hodi dehan, “Ita prontu ona, ita nia planu diak loos ona.” Tebes, ema nia fuan ho laran klean duni!
PSA 64:7 Maibee Maromak sei hana sira ho rama oan; sira kanek derepenti deit.
PSA 64:8 Nia sei halo sira nia liafuan rasik kona fali sira hodi hamohu tiha sira; ema hotu nebee haree sei doko ulun hodi hatete aat sira.
PSA 64:9 Nunee ema hotu-hotu sei tauk; sira sei rekonhese Maromak nia servisu; sira sei foo sai buat diak nebee Maromak halo tiha ona.
PSA 64:10 Ema moris loos sei haksolok tanba NAI Maromak nia diak; sira sei hamahon aan iha Nia; ema hotu nebee moris ho laran moos sei tane aas Maromak nia naran.
PSA 65:1 Salmu David nian. Kantiku ida, ba dirijenti koru. Maromak, ami hahii Ita Boot iha sidade Siaun; ami sei halo tuir ami nia promesa ba Ita Boot.
PSA 65:2 Ita Boot hataan ema nebee harohan ba Ita Boot; ema hotu-hotu sei mai adora Ita Boot.
PSA 65:3 Bainhira sala barak hanehan ami, Ita Boot hamoos tiha ami nia sala sira nee.
PSA 65:4 Ema sira nebee Ita Boot hili hodi lori baa hela iha Ita Boot nia fatin santu, ema sira nee hetan ksolok. Iha Ita Boot nia uma, iha Ita Boot nia uma kreda santu, ami hetan buat mesak diak deit, halo ami bosu.
PSA 65:5 Maromak ami nia Salvador, Ita Boot hatudu Ita Boot nia forsa hodi hataan ami no salva ami. Ema husi rai ulun too rai ikun iha mundu tomak konfia Ita Boot; ema nebee hela iha tasi balu mos laran metin ba Ita Boot.
PSA 65:6 Ita Boot mak forma foho hodi Ita Boot nia kbiit, Ita Boot hatudu sai Ita Boot nia forsa.
PSA 65:7 Ita Boot hapara tasi siak ho laloran boot; Ita Boot hakalma nasaun sira nebee rungu-ranga.
PSA 65:8 Ema husi rai ulun too rai ikun iha mundu tomak admira ho Ita Boot nia milagre; ema husi lorosae too loromonu, Ita Boot halo sira haklalak ho haksolok.
PSA 65:9 Ita Boot tau matan ba rai nee hodi rega rai sai buras teb-tebes. Mota Maromak nian, bee nakonu; Ita Boot prepara rai nunee para povu bele hetan ai haan.
PSA 65:10 Ita Boot hatuun udan ba rai nebee toos nain fila tiha ona; Ita Boot foo udan been hodi halo rai sai mamar tiha; Ita Boot foo bensaun ba ai horis sira.
PSA 65:11 Tanba Ita Boot nia diak mak tin-tinan Ita Boot foo rezultadu diak ba toos; Ita Boot nia ain fatin halo rai sai bokur tiha.
PSA 65:12 Duut iha rai fuik sai matak ho buras; foho sira mos haksolok hotu.
PSA 65:13 Iha rai luan bibi nakonu; iha toos trigu buras; hotu-hotu haklalak hananu ho haksolok.
PSA 66:1 Salmu. Kantiku ida, ba dirijenti koru. Mundu tomak, haklalak ho haksolok ba Maromak;
PSA 66:2 hananu foti aas Nia naran ba; hahii tane aas Nia naran!
PSA 66:3 Hatete ba Maromak dehan, “Ita Boot halo buat mesak furak! Ita Boot nia kbiit boot teb-tebes, halo Ita Boot nia inimigu hakruuk lambe rai iha Ita Boot nia futar oin.
PSA 66:4 Mundu tomak hakruuk ba Ita Boot; sira hananu hahii Ita Boot; sira hananu hahii Ita Boot nia naran.”
PSA 66:5 Mai hodi haree buat nebee Maromak halo tiha ona; Nia halo buat mesak furak ba ita ema.
PSA 66:6 Nia halo tasi fila ba rai maran; Nia povu lao ain hodi hakur mota. Mai ita haksolok tanba Nia diak.
PSA 66:7 Nia ukun ho kbiit tinan ba tinan; Nia matan haree nasaun jentiu sira; ema nebee kontra Maromak lalika foti aan.
PSA 66:8 Povu jentiu sira, hahii ami nia Maromak ba; hasae imi nia lian sai makaas hodi hahii Nia.
PSA 66:9 Nia kuidadu ami nia moris; Nia halo ami nia ain hamriik metin.
PSA 66:10 Maromak, Ita Boot koko ona ami, hanesan ema koko osan mutin.
PSA 66:11 Ita Boot lori tiha ona ami ba iha dadur laran; Ita Boot tula naha todan ba iha ami nia kabaas.
PSA 66:12 Inimigu sira sae kuda sama ami nia ulun, Ita Boot husik deit; ami lao ona liu husi ahi laran ho bee laran, maibee too ikus Ita Boot lori ami ba iha fatin nebee nakonu ho buat diak.
PSA 66:13 Hau sei mai iha Ita Boot nia uma lori sakrifisiu tunu; hau sei kumpri hau nia promesa
PSA 66:14 nebee mak hau nia ibun temi tiha ona, buat nebee hau promete bainhira hau iha susar laran.
PSA 66:15 Hau sei oferese animal nebee bokur ba Ita Boot nudar sakrifisiu tunu; hau sei tunu bibi malae aman halo suar morin sae; hau sei oferese karau aman ho bibi aman ba Ita Boot.
PSA 66:16 Imi hotu nebee hamtauk Maromak, mai rona ba; hau hakarak foo sai ba imi buat nebee mak Nia halo ona mai hau.
PSA 66:17 Uluk hau nia ibun husu tulun ba Nia ho lian makaas; hau nia nanaal hahii hela Nia.
PSA 66:18 Se karik hau rai hela buat aat ruma iha hau nia laran, Nai Maromak la rona hau nia orasaun.
PSA 66:19 Maibee Maromak rona duni; Nia see tilun tiha ona ba hau nia orasaun.
PSA 66:20 Hahii Maromak, tanba Nia nunka fila kotuk ba hau nia orasaun; Nia la hakotu Nia domin rohan-laek mai hau.
PSA 67:1 Salmu. Kantiku ida, akompanha ho viola, ba dirijenti koru. Maromak, hanoin ami no foo bensaun ba ami; halo Ita Boot nia oin nabilan leno ami,
PSA 67:2 atu nunee ema iha mundu nee bele hatene Ita Boot nia dalan; nasaun hotu-hotu bele rekonhese Ita Boot nia kbiit atu salva ema.
PSA 67:3 Maromak, hau harohan atu povu hotu-hotu hahii Ita Boot; nasaun hotu-hotu hahii Ita Boot.
PSA 67:4 Halo nasaun sira nee kontenti hodi hananu haksolok, tanba Ita Boot ukun ema ho justisa no hatudu dalan ba nasaun sira iha mundu.
PSA 67:5 Maromak, hau harohan atu povu hotu-hotu hahii Ita Boot; nasaun hotu-hotu hahii Ita Boot.
PSA 67:6 Toos foo tiha ona nia rezultadu; Maromak, ita nia Maromak, foo ona bensaun ba ita.
PSA 67:7 Maromak foo bensaun ba ita, atu ema husi rai ulun too rai ikun iha mundu tomak hamtauk Nia.
PSA 68:1 Salmu David nian. Kantiku ida, ba dirijenti koru. Bainhira Maromak hamriik, Nia inimigu sira halai namkari; Nia funu baluk sira halai sees husi Nia oin.
PSA 68:2 Nia huu lakon tiha sira hanesan huu ahi suar; ema aat sira sei mate mohu iha Maromak nia oin hanesan lilin nebee nabeen bainhira besik ahi.
PSA 68:3 Maibee ema moris loos haksolok; sira kontenti iha Maromak nia oin; sira haklalak ho haksolok.
PSA 68:4 Hananu ba Maromak; hananu hahii Nia naran. Nia tuur iha kalohan leten; foti aas Nia naran ba! Nia naran mak NAI; haksolok haklalak iha Nia oin ba!
PSA 68:5 Maromak iha hela Nia fatin santu, Nia mak aman ba oan kiak sira; Nia mak defende feto faluk sira.
PSA 68:6 Maromak foo uma ba ema nebee mak la iha maluk; Nia hasai ema dadur sira hodi foo moris diak ba sira, maibee kontra door sira hela deit iha rai fuik maran.
PSA 68:7 Maromak, bainhira Ita Boot lao iha Ita Boot nia povu nia oin; bainhira Ita Boot marxa liu husi rai fuik maran,
PSA 68:8 rai nakdoko, lalehan mos hatuun udan tanba Sinai nia Maromak mai tiha ona; Israel nia Maromak too tiha ona.
PSA 68:9 Maromak, Ita Boot hatuun udan boot mai hodi halo Ita Boot nia rai nebee maran dekor sai matak fali ona.
PSA 68:10 Nunee Ita Boot nia povu hela metin iha nebaa; Maromak, Ita Boot habosu tiha ona ema kbiit-laek sira tanba Ita Boot laran diak.
PSA 68:11 Nai Maromak hatuun Nia orden; feto barak mos hatutan Nia liafuan dehan,
PSA 68:12 “Liurai sira ho militar sira halai hotu!” Sasaan nebee tropas sira hadau, feto sira iha uma mak fahe ba malu.
PSA 68:13 Too ema nebee toba deit iha bibi luhan mos simu manu pombu, nia liras taka ho osan mutin, nia fulun osan mean nebee nabilan.
PSA 68:14 Maromak Kbiit Nain halo liurai sira namkari hanesan neve nebee monu iha foho Zalmon leten.
PSA 68:15 Foho Basán, foho boot; foho Basán, foho nebee iha tutun barak.
PSA 68:16 Foho tutun barak nee, tansaa mak o laran moras ba foho nebee Maromak hili atu sai Nia hela fatin? NAI Maromak sei hela iha nebaa tinan ba tinan.
PSA 68:17 Maromak nia kuda kareta rihun ba rihun, tokon ba tokon; Nai Maromak mai tiha ona husi Sinai, tama iha fatin santu.
PSA 68:18 Bainhira Nia sae ba iha fatin aas, Nia lori inimigu sira nebee Nia kaer iha funu laran; Nia simu prezenti husi ema, too ema kontra door sira mos foo prezenti. Depois NAI Maromak hela iha nebaa.
PSA 68:19 Hahii Nai Maromak, ita nia Salvador; loro-loron Nia lori ita nia naha.
PSA 68:20 Ita nia Maromak nee Maromak Salvador; NAI Maromak Kbiit Nain hasai ita husi mate.
PSA 68:21 Tebes duni, Maromak sei baku rahun tiha Nia inimigu sira nia ulun; ema sira nebee moris nafatin iha sala laran, Maromak sei halo rahun tiha sira nia ulun fatuk.
PSA 68:22 Nai hatete, “Hau sei lori inimigu sira mai husi rai Basán; sira nebee iha tasi kidun mos, Hau sei lori hotu
PSA 68:23 atu o nia ain bele sama iha funu baluk sira nee nia raan, no o nia asu sira mos lambe hotu.”
PSA 68:24 Maromak, ami haree Ita Boot nia prosisaun lao mai; Hau nia Maromak, hau nia Liurai, Ita Boot nia prosisaun lao ba iha fatin santu.
PSA 68:25 Koru lao iha oin, tokador sira toka husi kotuk; iha klaran feto klosan sira baku babadook.
PSA 68:26 Sira kanta, “Hahii Maromak iha ema lubuk boot nia leet; Israel oan sira, hahii NAI Maromak ba.”
PSA 68:27 Haree ba, suku kiik Benjamim lao uluk iha prosisaun; nai ulun Judá sira lao hamutuk; nai ulun Zebulón ho nai ulun Naftali lao tuir.
PSA 68:28 Maromak, manda Ita Boot nia kbiit ba; Maromak, hatudu Ita Boot nia forsa mai ami hanesan uluk Ita Boot hatudu tiha ona.
PSA 68:29 Bainhira Ita Boot sai mai husi Ita Boot nia uma kreda iha Jerusalém, liurai sira lori oferta ba Ita Boot.
PSA 68:30 Siak tiha animal fuik sira nebee subar hela iha duut manulain nia laran; hasee makaas karau aman forti sira nebee helik iha karau oan nia leet. Sama hanehan tiha sira nebee mak duni tuir osan mutin; duni lakon tiha nasaun sira nebee mak gosta funu.
PSA 68:31 Ema lori sasaan folin karun husi rai Ejitu; rai Etiópia sei lolo liman ba Maromak.
PSA 68:32 Imi povu husi nasaun hotu-hotu, hananu ba Maromak; hananu hahii Nai Maromak ba.
PSA 68:33 Nia sae kuda haleu kalohan antigu nian; rona ba, Nia lian sai mai boot makaas hanesan rai tarutu.
PSA 68:34 Foo sai Maromak nia kbiit; Nia ukun iha Israel; Nia forsa iha kalohan laran.
PSA 68:35 Maromak nee makaas iha Nia fatin santu; Israel nia Maromak foo forsa ho kbiit ba Nia povu. Hahii Maromak!
PSA 69:1 Salmu David nian, tuir muzika “Ai funan liriu.” Ba dirijenti koru. Maromak, salva hau, tanba bee sae too tiha ona hau nia kakorok.
PSA 69:2 Hau mout iha tahu been naruk laran; hau nia ain la sama metin ba rai. Hau iha hela bee boot laran; korenti makaas atu halo hau mout.
PSA 69:3 Hau halerik husu tulun too fraku ona; hau nia kakorok sai maran tiha; hau hein Maromak nia tulun too hau nia matan sai kole tiha.
PSA 69:4 Ema odi hau maski hau la halo aat ba sira; sira nee barak liu fali hau nia fuuk lahan. Ema barak loos sai hau nia inimigu maski hau la halo sala hasoru sira; sira hakarak atu halakon hau nia vida. Sira eziji hau atu foo fali sira nia sasaan; afinal hau nunka hadau buat ida husi sira.
PSA 69:5 Maromak, Ita Boot hatene hau nee ema beik ida; Ita Boot haree mo-moos hau nia sala.
PSA 69:6 NAI, Nai Maromak Aswain, keta husik ema nebee laran metin ba Ita Boot sai moe bainhira haree hau. Israel nia Maromak, keta husik ema nebee buka Ita Boot sai moe too oin tuun tanba hau.
PSA 69:7 Ema tarata hau tanba hau tuir Ita Boot; sira hamoe hau aat loos.
PSA 69:8 Hau sai tiha ona ema fuik ba hau nia familia rasik; hau sai ema leet ba hau nia maun-alin sira.
PSA 69:9 Hau foo aan tomak hodi defende Ita Boot nia uma, maski ida nee lori hau ba mate; ema hatete aat Ita Boot, sira nia liafuan kona hotu hau.
PSA 69:10 Bainhira hau haraik aan ho jejun, ema insulta fali hau;
PSA 69:11 bainhira hau tau hena lutu, ema soe piadas mai hau.
PSA 69:12 Ema nebee tuur iha portaun sidade nian konta hau nia vida; ema lanu-teen sira mos kanta kona ba hau.
PSA 69:13 Maibee NAI Maromak, hau harohan ba Ita Boot; Maromak, iha tempu nebee Ita Boot desidi, hataan hau hodi salva hau tanba Ita Boot nia domin boot teb-tebes no Ita Boot sempre halo buat nebee loos.
PSA 69:14 Hasai hau husi tahu laran; keta husik hau mout. Salva hau husi ema nebee mak odi hau; dada sai hau husi bee naruk laran.
PSA 69:15 Keta husik mota boot halo mout hau ka bee naruk tolan hau; keta husik rai kuak naruk taka tiha hau.
PSA 69:16 NAI Maromak, hataan hau, tanba Ita Boot nia domin rohan-laek nee diak; Ita Boot laran luak teb-tebes, see oin mai hau.
PSA 69:17 Keta subar Ita Boot nia oin ba Ita atan hau; hau iha hela susar laran, hataan ho lalais ba.
PSA 69:18 Mai besik hau hodi foo liberdade mai hau; salva hau husi hau nia inimigu sira.
PSA 69:19 Ita Boot hatene katak ema hatete aat hau, ema hamoe hau no hafoer hau nia naran; hau nia inimigu sira, Ita Boot hatene hotu.
PSA 69:20 Sira nia liafuan aat kona ba hau halo hau laran dodok too hau lakon esperansa; hau hein atu ema hanoin netik hau, maibee la iha; hau hein atu ema foo korajen mai hau, maibee ida mos la mosu.
PSA 69:21 Sira kahur buat moruk ba hau nia hahaan; bainhira hau hamrook, sira foo fali tua siin.
PSA 69:22 Hau harohan atu hahaan nebee prepara hela iha sira nia oin sai lasu ba sira; husik sira nia selebrasaun sai fali rai kuak ba sira.
PSA 69:23 Husik sira nia matan sai delek atu sira la bele haree; husik sira lori todan too sira nia kotuk bonko tinan ba tinan.
PSA 69:24 Fakar tiha Ita Boot nia hirus ba iha sira nia leten; husik Ita Boot nia laran nakali kona sira ba.
PSA 69:25 Husik sira nia fatin sai fuik; la iha ema ida hela tan iha sira nia tenda laran.
PSA 69:26 Tanba ema nebee mak Ita Boot baku, sira halo nia terus tan; ema nebee Ita Boot hakanek, sira konta ba-mai kona ba nia terus.
PSA 69:27 Foo sai sira nia sala ida-ida; la bele salva tan sira.
PSA 69:28 Hasai tiha sira nia naran husi lista ema moris nian; keta husik sira nia naran hakerek hamutuk ho ema nebee mak moris loos.
PSA 69:29 Maibee hau nee terus ho laran susar; Maromak, foo Ita Boot nia salvasaun hodi hamahon hau.
PSA 69:30 Depois hau sei kanta hodi hahii Maromak; hau sei agradese hodi foti aas Nia naran.
PSA 69:31 Ida nee sei halo haksolok NAI Maromak nia laran liu fali oferta karau aman, liu fali sakrifisiu karau aman dikur naruk.
PSA 69:32 Bainhira ema mukit haree hau hahii Maromak, sira sei kontenti; imi nebee adora Maromak, laran metin fali ba.
PSA 69:33 Tanba NAI Maromak rona ema nebee kiak; Nia la fila kotuk ba Nia ema sira nebee mak iha dadur laran.
PSA 69:34 Lalehan ho rai, hahii Nia ba; tasi ho buat hotu nebee moris iha laran, hahii Nia ba!
PSA 69:35 Tanba Maromak sei salva Siaun; Nia sei harii fali sidade sira nebee mak iha rai Judá, depois Nia povu sei hela iha nebaa hodi sai nain ba rai.
PSA 69:36 Too Nia atan sira nia jerasaun mos sei sai nain nafatin ba rai nee; ema nebee hadomi Nia naran sei hela iha nebaa.
PSA 70:1 Salmu David nian, husu atu Maromak hanoin nia. Ba dirijenti koru. Maromak, favor salva hau; NAI, mai lalais tulun hau.
PSA 70:2 Hau harohan atu ema nebee hakarak hasai hau nia vida, sai moe boot ho oin tuun; husik ema nebee hakarak atu hau hetan dezastre, hakiduk ho naran aat.
PSA 70:3 Husik ema nebee hamnasa hahaek mai hau fila ho moe boot.
PSA 70:4 Maibee halo ema hotu nebee harohan ba Ita Boot sai kontenti ho haksolok; husik ema nebee buka Ita Boot nia salvasaun dehan beibeik, “Maromak nee boot!”
PSA 70:5 Hau nee ema kiak ho kbiit-laek; Maromak, mai lalais ona. Ita Boot mak tulun hau no salva hau; NAI, keta demora.
PSA 71:1 NAI Maromak, hau hamahon aan iha Ita Boot; keta husik hau moe leet.
PSA 71:2 Ita Boot sempre halo buat nebee loos; salva hau ba, hasai tiha hau husi susar laran; see tilun mai hau hodi salva hau.
PSA 71:3 Ita Boot mak fatuk lolon boot, husik hau helik ba; hatuun orden atu salva hau, tanba Ita Boot mak fatuk kuak nebee hau subar iha laran; Ita Boot mak lutu haleu hau.
PSA 71:4 Hau nia Maromak, hasai tiha hau husi ema aat sira nia liman laran; salva hau husi ema laran aat ho hanehan door sira.
PSA 71:5 Nai Maromak, Ita Boot mak hau nia esperansa; NAI, husi joven kedas hau konfia Ita Boot.
PSA 71:6 Husi kedas hau moris mai, hau sadere nanis ona ba Ita Boot; husi hau nia inan nia kabun laran, Ita Boot tau matan mai hau. Hau sempre hahii Ita Boot.
PSA 71:7 Hau sai tiha ona ezemplu ba ema barak; Ita Boot mak fatin seguru diak nian mai hau.
PSA 71:8 Hau nia ibun sempre hahii Ita Boot; iha loron tomak hau haklaken Ita Boot nia furak.
PSA 71:9 Keta soe hau bainhira hau idade ona; keta husik hau bainhira hau nia forsa hotu.
PSA 71:10 Tanba hau nia inimigu sira hatete aat hau; ema nebee hein atu oho hau, sira kombina malu hela.
PSA 71:11 Sira dehan, “Maromak husik ona nia. Mai ita duni nia hodi kaer tiha nia, tanba la iha ida mak atu salva nia.”
PSA 71:12 Hau nia Maromak, keta dook husi hau; Maromak, mai lalais tulun hau.
PSA 71:13 Hau harohan atu ema nebee kontra hau, Ita Boot hatuun sira hodi halo sira lakon; husik ema nebee mak hakarak halo aat hau, sai moe boot ho oin tuun.
PSA 71:14 Maibee hau nee sempre laran metin ba Ita Boot; hau sei kontinua hahii Ita Boot liu tan.
PSA 71:15 Hau nia ibun sei foo sai buat diak nebee Ita Boot halo tiha ona; loron-kalan hau sei foo sai Ita Boot nia salvasaun, maski hau sura la bele.
PSA 71:16 NAI Maromak Kbiit Nain, hau sei gaba buat makaas nebee Ita Boot halo; hau sei gaba Ita Boot nia justisa, so Ita Boot nian deit.
PSA 71:17 Maromak, husi kedas hau joven, Ita Boot hanorin ona hau; too agora hau foo sai nafatin buat furak nebee Ita Boot halo.
PSA 71:18 Maromak, agora hau katuas fuuk mutin ona, keta husik hau mesak, atu hau foo sai Ita Boot nia kbiit ba jerasaun tuir mai, atu hau konta Ita Boot nia forsa ba ema hotu nebee sei moris aban-bainrua.
PSA 71:19 Maromak, Ita Boot nia justisa too iha lalehan; Ita Boot halo buat mesak boot. Maromak, see mak hanesan Ita Boot?
PSA 71:20 Maski Ita Boot halo hau terus ho susar barak, Ita Boot sei halo hau moris fali; hau too iha rai kuak laran mos, Ita Boot sei dada hau sai.
PSA 71:21 Ita Boot sei halo hau nia naran boot liu fali uluk; Ita Boot sei foo ksolok fali mai hau.
PSA 71:22 Hau nia Maromak, hau sei toka viola hodi hahii Ita Boot, tanba Ita Boot sempre kaer metin Ita Boot nia liafuan. Israel nia Maromak santu, hau sei hananu hahii Ita Boot ho muzika viola tali walu.
PSA 71:23 Hau nia ibun sei haklalak ho haksolok; hau sei hananu hahii Ita Boot, tanba Ita Boot salva tiha ona hau.
PSA 71:24 Loron-kalan hau nia ibun sei koalia sai Ita Boot nia justisa, tanba ema sira nebee hakarak halo aat hau sai moe boot ho oin tuun tiha.
PSA 72:1 Salmu Salomão nian. Maromak, hanorin Ita Boot nia justisa ba liurai; hanorin Ita Boot nia lia loos ba liurai oan,
PSA 72:2 atu liurai bele foo justisa ba Ita Boot nia povu tuir dalan loos, atu nia bele tesi lia lo-loos ba Ita Boot nia ema nebee kbiit-laek.
PSA 72:3 Nunee foho sira nee sei buras hodi foo moris diak ba povu, no ema iha rai nee bele moris loos.
PSA 72:4 Hau harohan atu liurai bele defende ema kbiit-laek iha povu nia leet, salva ema kiak nia oan, no halakon tiha hanehan door sira.
PSA 72:5 Hau harohan atu liurai dura hanesan loro matan, dura hanesan fulan, husi jerasaun ba jerasaun.
PSA 72:6 Halo liurai sai hanesan udan been monu tuun mai rai hodi rega duut nebee foin lere.
PSA 72:7 Durante nia ukun, halo ema moris loos sai buras hodi moris diak, too fulan lakon tiha husi lalehan.
PSA 72:8 Hau harohan atu liurai ukun husi tasi ba tasi, husi Mota Eufrates too rai ulun rai ikun iha mundu tomak.
PSA 72:9 Halo suku sira iha rai fuik maran hakneak hakruuk iha liurai nia oin; halo nia inimigu sira lambe rai.
PSA 72:10 Hau harohan atu liurai Tarsis ho liurai sira husi tasi balu lori prezenti ba nia, no liurai sira husi rai Sabá ho Seba lori prezenti foo ba nia.
PSA 72:11 Hau harohan atu liurai hotu-hotu hakneak hakruuk ba nia, no nasaun hotu-hotu serbi nia.
PSA 72:12 Tanba liurai salva ema kiak sira nebee halerik ba nia; nia ajuda ema kbiit-laek sira nebee mak la iha ema atu tau matan.
PSA 72:13 Nia hanoin ema kiik ho ema kiak sira hodi salva sira nia moris.
PSA 72:14 Nia salva sira husi ema nebee hanehan sira ho ema nebee halo violensia ba sira, tanba sira nia moris folin boot iha nia matan.
PSA 72:15 Viva liurai! Hau harohan atu ema lori oferta osan mean husi rai Sabá foo ba liurai, no ema sempre halo orasaun ba nia hodi foo bensaun ba nia iha loron tomak.
PSA 72:16 Hau harohan atu iha nia rai tomak iha hahaan barak; iha foho tutun mos toos bele buras. Hau husu atu ai fuan tebar hanesan iha rai Líbanu, no nia povu iha sidade mos buras hanesan duut matak iha rai fuik.
PSA 72:17 Hau harohan atu liurai nia naran dura ba nafatin, dura hanesan loro matan iha lalehan. Hau husu atu nasaun hotu-hotu hetan bensaun liu husi nia, no ema bolu nia ema ida nebee hetan ksolok.
PSA 72:18 Hahii NAI Maromak, Israel nia Maromak! Nia mesak deit mak halo buat furak.
PSA 72:19 Hahii, foti aas Nia naran tinan ba tinan. Hau harohan atu Maromak nia kbiit hakonu mundu tomak. Amen, amen.
PSA 72:20 Orasaun husi David, Jessé nia oan too iha nee deit.
PSA 73:1 Salmu Asaf nian. Maromak nee diak ba Israel; tebes, Nia diak ba ema nebee mak laran moos.
PSA 73:2 Maibee hau nee, hau nia ain besik atu sidi; uitoan tan hau atu monu ona,
PSA 73:3 tanba hau laran moras ba ema nebee foti aan; hau haree sira moris diak maski sira nia hahalok aat.
PSA 73:4 Ema sira nee la hatene terus; sira nia isin diak no forti.
PSA 73:5 Sira la hetan susar nebee ema baibain hetan iha mundu nee; dezastre la kona sira hanesan ema seluk.
PSA 73:6 Tanba nee sira hahenu sira nia hahalok foti aan; sira foo hatais sira nia aan ho violensia.
PSA 73:7 Sira nia laran hakiak sala; sira nia neon nakonu ho buat nebee la iha folin.
PSA 73:8 Sira soe lia hodi hatete buat mesak aat; sira foti aan hodi ameasa atu hanehan ema seluk.
PSA 73:9 Sira loke ibun hodi kontra lalehan; sira nia liafuan foti aan lao haleu mundu tomak.
PSA 73:10 Tanba nee povu fila hodi tuir sira, no fiar sira nia liafuan hotu.
PSA 73:11 Sira dehan, “Oinsaa Maromak atu hatene buat sira nee? Maromak Aas Liu hatene saida?”
PSA 73:12 Ema aat sira hanesan nee duni; sira sempre moris diak, sira nia riku-soin aumenta ba beibeik.
PSA 73:13 Hau kuidadu beibeik atu moris ho laran moos, maibee saugati deit; hau fase hau nia liman hanesan sinal katak hau la sala ida, maibee la vale buat ida.
PSA 73:14 Tanba loron tomak hau terus hela deit; iha dadeer-dadeer hau hetan kastigu.
PSA 73:15 Se karik hau dehan nunee, entaun hau hanesan fali traidor ba Ita Boot nia povu.
PSA 73:16 Bainhira hau koko atu kompriende buat sira nee, hau senti susar teb-tebes.
PSA 73:17 Too hau tama iha Maromak nia uma kreda mak foin hau kompriende ema sira nee nia destinu.
PSA 73:18 Tebes duni, Ita Boot tau sira iha fatin namdoras; Ita Boot halo sira monu too rahun tiha.
PSA 73:19 Derepenti deit sira mohu; sira tauk teb-tebes too tauk nee hamate fali sira.
PSA 73:20 Sira hanesan mehi deit, ita hadeer mai la iha tiha; Nai Maromak, bainhira Ita Boot hamriik, Ita Boot sei la hanoin tan sira.
PSA 73:21 Bainhira hau nia laran senti tristi no hau nia fuan moras,
PSA 73:22 hau sai beik tiha, la kompriende buat ida; hau nia hahalok hasoru Ita Boot hanesan fali animal fuik.
PSA 73:23 Maski nunee hau nafatin besik Ita Boot; Ita Boot kaer metin hau nia liman loos.
PSA 73:24 Ita Boot hanorin hau no hatudu dalan mai hau; too ikus Ita Boot sei simu hau hodi foti sae hau.
PSA 73:25 Iha lalehan nebaa, Ita Boot mak tulun hau; se laos Ita Boot, see tan? Iha mundu nee, hau hakarak mak Ita Boot deit.
PSA 73:26 Hau nia isin ho hau nia laran bele sai fraku, maibee Maromak mak hakbiit hau nia laran; hau nia riku-soin mak Nia too tinan ba tinan.
PSA 73:27 Ema nebee dook husi Ita Boot sei mate mohu; Ita Boot harahun tiha ema nebee mak la foo laran ba Ita Boot.
PSA 73:28 Maibee hau nee gosta liu besik Maromak; hau hamahon aan iha NAI Maromak Kbiit Nain; hau sei foo sai buat diak nebee Ita Boot halo.
PSA 74:1 Salmu Asaf nian para hanorin ema. Maromak, tansaa mak Ita Boot soe ami nafatin ba nafatin? Tansaa mak Ita Boot laran nakali hasoru Ita Boot nia bibi sira?
PSA 74:2 Hori uluk kedas Ita Boot hili povu ida nee; Ita Boot salva tiha ona povu nee sai Ita Boot nian; hanoin fila fali ami ba! Uluk Ita Boot hela iha foho Siaun; hanoin fali fatin nee ba.
PSA 74:3 Hakmaan Ita Boot nia ain lao ba iha fatin santu; fatin nee rahun aat liu ona; buat hotu-hotu inimigu estraga tiha ona.
PSA 74:4 Ita Boot nia funu baluk haklalak ona iha Ita Boot nia fatin santu; sira hasae tiha ona sira nia bandeira.
PSA 74:5 Sira tama hanesan fali ema nebee kaer baliu hodi tesi ai huun buras.
PSA 74:6 Sira kaer baliu ho martelu hodi sobu rahun tiha uma nia didin nebee ema bahat halo furak.
PSA 74:7 Sira sunu mutuk tiha Ita Boot nia fatin santu too rai; sira hafoer Ita Boot nia hela fatin.
PSA 74:8 Sira hatete iha sira nia laran, “Mai ita hanehan makaas ema sira nee hotu!” Fatin hotu-hotu nebee ema adora Maromak iha rai nee, sira sunu hotu ona.
PSA 74:9 Ami la haree tan sinal husi Maromak; profeta mos la iha ona; ami sira nee la iha ida mak hatene bainhira mak hotu.
PSA 74:10 Maromak, inimigu sira sei hatete aat Ita Boot too bainhira? Funu baluk sira nee sei koalia aat Ita Boot nia naran nafatin ba nafatin ka?
PSA 74:11 Tansaa mak Ita Boot dada fali Ita Boot nia liman loos? Foti Ita Boot nia liman hodi halo mohu tiha sira ba.
PSA 74:12 Maibee Maromak nee hau nia Liurai hori uluk kedas; Ita Boot lori salvasaun ba mundu.
PSA 74:13 Uluk Ita Boot hafahe tasi hodi Ita Boot nia kbiit; Ita Boot mak fera samea boot nia ulun iha tasi laran.
PSA 74:14 Samea boot Leviatán nia ulun fatuk bar-barak, Ita Boot harahun tiha hodi foo haan animal nebee hela iha rai fuik maran.
PSA 74:15 Ita Boot loke tiha bee matan ho mota; mota sira nebee suli la para, Ita Boot hamaran tiha.
PSA 74:16 Loron Ita Boot nian, kalan mos Ita Boot nian; Ita Boot hatuur fulan ho loro matan.
PSA 74:17 Ita Boot tau mundu nia baliza; tempu udan no tempu bailoron, Ita Boot halo rua nee hotu.
PSA 74:18 NAI Maromak, keta haluha katak inimigu hamnasa fali Ita Boot; ema beik-teen sira nee hatete aat Ita Boot nia naran.
PSA 74:19 Keta entrega Ita Boot nia manu pombu ba animal fuik; keta haluha Ita Boot nia povu kbiit-laek sira tinan ba tinan.
PSA 74:20 Hanoin nafatin Ita Boot nia promesa mai ami, tanba fatin nakukun iha rai nee mesak violensia nia knuuk deit.
PSA 74:21 Keta husik ema hamoe tan vitima sira; halo ema kiak ho kbiit-laek hahii Ita Boot nia naran.
PSA 74:22 Maromak, hamriik ba! Defende Ita Boot nia lia; keta haluha katak ema beik-teen sira hatete aat Ita Boot iha loron tomak.
PSA 74:23 Keta haluha Ita Boot nia inimigu sira nia lian; ema nebee kontra Ita Boot hakilar la para.
PSA 75:1 Salmu Asaf nian, tuir muzika “Keta halo rahun.” Ba dirijenti koru. Maromak, ami hahii Ita Boot. Ami hahii Ita Boot tanba Ita Boot besik ami. Ema konta sai buat furak nebee Ita Boot halo.
PSA 75:2 Ita Boot dehan, “Hau hili tiha ona tempu atu foo justisa; too tempu nee Hau sei tesi lia ho lo-loos.
PSA 75:3 Bainhira mundu ho ema hotu iha mundu nakdoko, Hau mak halo metin mundu nia huun.
PSA 75:4 Ba ema nebee foti aan, Hau dehan, ‘Keta foti aan tan.’ Ba ema aat, Hau dehan, ‘Keta foti sae imi nia dikur.
PSA 75:5 Keta foti sae imi nia dikur hasoru lalehan; keta koalia kontra demais.’”
PSA 75:6 La iha ema ida mak bele foti sae nia aan; atu husi lorosae ka loromonu ka husi rai fuik maran, la bele hotu.
PSA 75:7 Maromak mak Justisa Nain; Nia mak hatuun ema balu no foti sae ema seluk.
PSA 75:8 Iha NAI Maromak nia liman laran iha kopu ida nakonu ho tua ulun; Nia fui tua nee foo ba ema aat ida-idak iha mundu; sira tenki hemu too tua nia teen hotu kedas.
PSA 75:9 Maibee hau sei foo sai Maromak nia diak nafatin ba nafatin; hau sei kanta hahii Jacó nia Maromak.
PSA 75:10 Maromak dehan, “Hau sei tesi sai tiha ema aat sira nia dikur hotu, maibee ema moris loos sira nia dikur, Hau sei foti sae.”
PSA 76:1 Salmu Asaf nian. Kantiku ida, akompanha ho viola. Ba dirijenti koru. Maromak konhesidu iha rai Judá; Nia naran boot iha Israel.
PSA 76:2 Nia uma harii tiha ona iha Jerusalém; Nia hela fatin iha Siaun.
PSA 76:3 Iha nebaa Nia silu tohar ona inimigu nia rama oan nebee nabilan; surik ho ekipamentu funu nian sel-seluk, Nia halo tohar hotu.
PSA 76:4 Ita Boot nabilan furak tebes; Ita Boot makaas liu fali foho nebee iha hori uluk kedas.
PSA 76:5 Inimigu aswain sira nia sasaan ema hadau tiha; inimigu sira nee toba latan tiha ona; funu nain sira nia forsa lakon tiha ona.
PSA 76:6 Jacó nia Maromak, Ita Boot nia lian makaas halo kuda ho nia nain toba latan hotu.
PSA 76:7 Ita Boot makaas teb-tebes! Bainhira Ita Boot hirus, see mak aguenta hamriik iha Ita Boot nia oin?
PSA 76:8 Maromak, Ita Boot hamriik tiha ona hodi foo justisa, atu salva ema mukit sira hotu iha mundu. Bainhira Ita Boot hatuun Ita Boot nia desizaun husi lalehan, mundu tauk hodi nonook tiha.
PSA 76:10 Ema bele hirus mos, sira sei hahii liu tan Ita Boot; mate restu sira sei adora Ita Boot.
PSA 76:11 Halo promesa ba NAI o nia Maromak, no halo tuir promesa nee; ema hotu nebee hela haleu Nia, lori imi nia oferta foo ba Ida nebee halo ema tauk.
PSA 76:12 Nia halo ukun nain sira lakon esperansa; liurai sira iha mundu hamtauk Nia.
PSA 77:1 Salmu Asaf nian, ba dirijenti koru Jedutun. Hau halerik husu tulun ba Maromak; hau halerik ba Maromak atu Nia rona hau.
PSA 77:2 Iha susar laran, hau buka Nai Maromak; kalan-kalan hau lolo liman la kole, maibee hau la hetan ksolok.
PSA 77:3 Bainhira hau hanoin kona ba Maromak, hau halerik; bainhira hau medita, hau lakon esperansa liu tan.
PSA 77:4 Ita Boot halo hau toba la dukur; hau laran susar too hau la iha liafuan.
PSA 77:5 Hau hanoin fila fali loron uluk nian; hau hanoin hetan tempu uluk nian.
PSA 77:6 Iha tempu nebaa hau kanta iha oras kalan. Agora hau nia laran medita, hau husu ba hau nia aan,
PSA 77:7 “Nai Maromak soe tiha ona ita nafatin ba nafatin ka? Nia lakohi hatudu tan ona Nia laran diak ka?
PSA 77:8 Nia domin rohan-laek nee lakon tinan ba tinan ka? Nia promesa nebee Nia halo la vale tan ona ka?
PSA 77:9 Maromak haluha ona Nia laran diak ka? Nia hirus taka tiha Nia laran luak ka?”
PSA 77:10 Nunee hau hanoin, “Maromak Aas Liu nia liman loos la tulun ita hanesan uluk ona; ida nee mak halo hau nia laran moras.”
PSA 77:11 Maibee NAI Maromak, hau sei hanoin buat diak nebee Ita Boot halo; hau sei la haluha Ita Boot nia milagre husi tempu uluk nian.
PSA 77:12 Hau sei hanoin beibeik Ita Boot nia servisu hotu hodi medita buat furak nebee Ita Boot halo.
PSA 77:13 Maromak, Ita Boot nia dalan nee santu; la iha tan maromak ida mak boot hanesan ami nia Maromak.
PSA 77:14 Ita Boot Maromak ida nebee halo milagre; Ita Boot hatudu sai Ita Boot nia kbiit iha nasaun hotu-hotu nia leet.
PSA 77:15 Ita Boot salva ona Ita Boot nia povu hodi Ita Boot nia liman rasik; Ita Boot salva Jacó ho José nia jerasaun.
PSA 77:16 Maromak, uluk bee haree Ita Boot mai; bainhira haree, bee nakdoko tiha, too tasi klean boot mos nakdedar.
PSA 77:17 Kalohan fakar tuun bee; lalehan tarutu makaas; Ita Boot nia rama oan semo baa semo mai nabilan loos.
PSA 77:18 Ita Boot halo rai tarutu makaas iha anin fuik laran; rai lakan husi Ita Boot leno mundu; rai nakdedar too nakdoko.
PSA 77:19 Ita Boot lao liu husi tasi laran; Ita Boot nia dalan liu husi bee boot, maibee Ita Boot nia ain fatin la haree hetan.
PSA 77:20 Ita Boot foti Moisés ho Arão hodi lori Ita Boot nia povu hanesan bibi atan nebee lori nia bibi.
PSA 78:1 Salmu Asaf nian para hanorin ema. Hau nia povu, rona hau nia hanorin; see tilun ba hau nia liafuan.
PSA 78:2 Hau sei konta istoria; hau sei foo sai liafuan matenek nian nebee desde uluk taka hela.
PSA 78:3 Buat sira nee ita rona tiha ona no hatene tiha ona; ita nia bei-ala sira konta tiha ona mai ita.
PSA 78:4 Ita sei la subar buat sira nee ba sira nia oan sira; ita sei konta ba jerasaun tuir mai buat furak nebee mak NAI Maromak halo, Nia kbiit, ho milagre nebee mak Nia halo tiha ona.
PSA 78:5 Nia foo Nia regra ba Jacó nia jerasaun; Nia hatuur Nia lei iha Israel. Nia haruka ita nia bei-ala sira nee hanorin tutan lei nee ba sira nia oan sira,
PSA 78:6 atu nunee jerasaun tuir mai bele hatene, too jerasaun nebee seidauk moris mos bele hanorin tutan ba sira nia oan sira.
PSA 78:7 Nunee sira sei konfia iha Maromak; sira sei la haluha buat nebee mak Nia halo tiha ona, maibee sira sei moris tuir Nia lei.
PSA 78:8 Sira sei la hanesan sira nia bei-ala sira uluk. Bei-ala sira nee ulun toos no kontra door; sira nia laran la metin ba Maromak; sira la foo laran ba Nia.
PSA 78:9 Uluk tropas suku Efraim nian kaer hela rama, too iha loron funu nian, sira hakiduk.
PSA 78:10 Sira la kaer metin Maromak nia promesa; sira lakohi moris tuir Nia lei.
PSA 78:11 Sira haluha saida mak Nia halo tiha ona, milagre nebee Nia hatudu tiha ona ba sira.
PSA 78:12 Nia halo buat boot iha sira nia bei-ala sira nia oin, iha rejiaun Zoan iha Ejitu nia rain.
PSA 78:13 Nia fahe tiha tasi halo dalan para sira bele hakur; Nia halo tasi been hamriik hanesan moru.
PSA 78:14 Loron, Nia foo kalohan hodi hatudu dalan ba sira; kalan tomak, Nia foo ahi hodi leno sira nia dalan.
PSA 78:15 Nia fera tiha fatuk bo-boot iha rai fuik hodi foo bee ba sira hemu, bee nee boot hanesan tasi.
PSA 78:16 Nia halo bee suli sai husi fatuk kuak, too bee suli tuun hanesan mota.
PSA 78:17 Maski nunee sira halo sala nafatin hasoru Maromak; iha rai fuik maran, sira kontra Maromak Aas Liu.
PSA 78:18 Sira koko Maromak hodi eziji hahaan nebee mak sira kaan.
PSA 78:19 Sira sadik Maromak dehan, “Maromak bele tau meza iha rai fuik nee ka?
PSA 78:20 Loos duni, Nia fera tiha fatuk hodi halo bee fakar sai; bee nee suli sai makaas. Maibee Nia bele foo paun ba ita ka? Nia bele fahe naan ba Nia povu ka?”
PSA 78:21 Bainhira NAI Maromak rona ida nee, Nia hirus teb-tebes; Nia ahi lakan makaas kontra Jacó nia jerasaun; Nia laran nakali hasoru Israel,
PSA 78:22 tanba sira la fiar ba Nia; sira la fiar Nia kbiit atu salva sira.
PSA 78:23 Maibee Maromak foo orden ba kalohan; Nia loke odamatan lalehan nian.
PSA 78:24 Nia hamonu paun manaa ba sira hanesan udan para sira bele haan; Nia foo hahaan lalehan nian ba sira.
PSA 78:25 Ema mundu nian haan tiha ona hahaan anju sira nian; Nia foo hahaan ba sira too sira bosu di-diak.
PSA 78:26 Nia foo orden ba anin lorosae nian; hodi Nia kbiit Nia halo anin tasi mane huu,
PSA 78:27 lori manu fuik barak loos hanesan rai henek iha tasi ibun; Nia hamonu naan manu barak teb-tebes hanesan rai rahun.
PSA 78:28 Nia halo manu sira nee monu tuun ba iha sira nia akampamentu, haleu sira nia tenda hotu.
PSA 78:29 Sira haan too bosu di-diak, tanba Nia foo tiha ona ba sira buat nebee mak sira kaan.
PSA 78:30 Maibee naan nee sei iha hela sira nia ibun laran, sira sei kaan nafatin atu haan tan,
PSA 78:31 Maromak nia laran nakali hasoru sira. Nia hamate mane forti sira iha sira nia leet; Nia lere tiha mane klosan Israel nian.
PSA 78:32 Maski Maromak halo nunee mos, sira halo sala nafatin; maski Nia halo tiha ona milagre, sira la fiar nafatin.
PSA 78:33 Entaun sira nia moris la vale buat ida, no tauk domina sira, too Nia hakotu sira nia iis, Nia habadak sira nia tinan.
PSA 78:34 Bainhira Maromak oho sira balu, sira seluk sempre hakbesik ba Nia; sira fila fali hodi harohan ba Nia.
PSA 78:35 Sira hanoin fali katak Maromak mak fatuk lolon boot hodi satan netik sira; Maromak Aas Liu mak sira nia Salvador.
PSA 78:36 Maibee sira gaba Nia ho sira nia ibun tutun deit; sira nia nanaal bosok Nia.
PSA 78:37 Sira nunka foo laran ba Nia; sira la kaer metin Nia promesa.
PSA 78:38 Bele nunee mos Nia hatudu nafatin Nia laran diak ba sira; Nia hamoos sira nia sala hodi la halo mohu sira. Dala barak Nia hirus iha Nia laran deit; Nia la fakar sai Nia laran nakali.
PSA 78:39 Nia rekonhese katak ema sira nee isin ho raan deit, hanesan anin nebee huu liu tiha la fila ona.
PSA 78:40 Dala barak sira kontra Maromak iha rai fuik; iha rai fuik maran nee sira halo Nia laran dodok!
PSA 78:41 Sira koko Maromak fila-fila; sira halo Israel nia Maromak Santu laran moras.
PSA 78:42 Sira haluha tiha Nia kbiit; sira la hanoin tan tempu nebee Nia liberta sira husi inimigu sira.
PSA 78:43 Iha tempu nebaa Nia hatudu sai sinal iha rai Ejitu; Nia hatudu milagre iha rejiaun Zoan nian.
PSA 78:44 Mota iha sira nia rain, Nia halo nakfilak sai raan hotu, nunee sira la bele hemu tan bee husi mota.
PSA 78:45 Nia haruka lalar barak hobur sira hodi haan tiha sira; Nia manda manduku hodi estraga rai nee.
PSA 78:46 Ai haan nebee iha sira nia toos laran, Nia foo ba lakataru haan; produsaun toos nian, gafanhotu haan tiha.
PSA 78:47 Nia halo mate sira nia uvas ho udan jelu fatuk; Nia hamate sira nia ai figeira ho jelu fatuk.
PSA 78:48 Nia halo udan jelu fatuk monu ba sira nia karau leten; Nia husik rai lakan kona sira nia bibi.
PSA 78:49 Nia fakar sai Nia laran nakali ba sira; Nia hirus teb-tebes, Nia hakribi sira nia hahalok, Nia kontra sira. Nia haruka Nia anju lubuk ida atu baa hamohu sira.
PSA 78:50 Nia prepara dalan atu hasai Nia hirus; Nia la salva sira husi mate, maibee Nia entrega sira ba iha moras aat.
PSA 78:51 Nia oho dasa tiha ema Ejitu sira nia oan mane boot hotu; husi Ham nia jerasaun, oan mane primeiru mate mohu.
PSA 78:52 Depois Nia lori sai Nia povu liu husi rai fuik hanesan bibi atan lori nia bibi.
PSA 78:53 Nia tau matan ba sira iha dalan, nunee sira la tauk, maibee tasi halo mout tiha sira nia inimigu.
PSA 78:54 Nia lori Nia povu ba iha Nia rai santu, ba iha foho nebee Nia hadau tiha ona ho Nia kbiit.
PSA 78:55 Nia duni sai tiha nasaun sira nebee hela iha nebaa para Nia povu avansa ba oin. Nia fahe rai nee ba Nia povu para sai sira nian; ema sira nee nia uma Nia foo ba suku Israel mak hela fali.
PSA 78:56 Maibee ema Israel koko nafatin Maromak Aas Liu hodi kontra Nia; sira la halo tuir Nia regra.
PSA 78:57 Sira la foo laran ba Maromak, sira fila kotuk ba Nia hanesan sira nia bei-ala sira; sira nee kleuk tuun-sae hanesan rama aat ida.
PSA 78:58 Sira halo Maromak hirus tanba sira hamulak iha sira nia foho lulik; sira halo Nia laran moras tanba sira adora fali estatua lulik.
PSA 78:59 Haree nunee Maromak nia laran nakali; Nia fila kotuk ba ema Israel sira.
PSA 78:60 Nia husik tiha Nia hela fatin iha sidade Silo; Nia abandona tenda nebee Nia harii tiha ona iha ema mundu nia leet.
PSA 78:61 Nia husik tiha inimigu sira hadau kaixoti promesa nian; kaixoti nebee hatudu sai Nia kbiit ho Nia furak monu fali ba inimigu sira nia liman laran.
PSA 78:62 Nia hirus teb-tebes Nia povu; Nia husik Nia ema rasik mate ho surik.
PSA 78:63 Ahi haan tiha sira nia mane klosan sira; sira nia feto klosan sira la kanta tan iha festa kazamentu.
PSA 78:64 Sira nia nai lulik sira mate ho surik; feto faluk sira la bele tanis lelir.
PSA 78:65 Depois Nai Maromak hadeer fali hanesan ema hadeer husi matan dukur, hanesan funu nain tua lanu nebee hatene tuir nia aan fali.
PSA 78:66 Nia duni lakon tiha Nia inimigu sira; Nia halo sira moe tinan ba tinan.
PSA 78:67 Maibee Nia la simu José nia jerasaun; Nia la hili ona suku Efraim.
PSA 78:68 Nia hili fali suku Judá; Nia laran monu ba foho Siaun.
PSA 78:69 Iha nebaa Nia harii Nia uma kreda hanesan foho aas ida; uma kreda nee dura nafatin ba nafatin hanesan mundu.
PSA 78:70 Nia hili Nia atan David sai liurai; Nia fihir David husi nia servisu nudar bibi atan.
PSA 78:71 David tau matan hela ba bibi, Maromak bolu nia atu sai fali bibi atan ba Maromak nia povu rasik, ba ema Israel, Jacó nia jerasaun.
PSA 78:72 David tau matan ba sira ho fuan ho laran; nia ukun sira ho matenek.
PSA 79:1 Salmu Asaf nian. Maromak, nasaun jentiu sira tama tiha ona iha Ita Boot nia rain; sira halo foer Ita Boot nia uma kreda santu; sira sobu rahun tiha ona sidade Jerusalém.
PSA 79:2 Sira husik Ita Boot nia atan sira nia mate isin sai fali manu fuik nia hahaan; Ita Boot nia povu nia mate isin sai tiha ona hahaan ba animal fuik.
PSA 79:3 Sira halo Ita Boot nia povu nia raan suli haleu Jerusalém tomak hanesan fali bee; la iha ema ida atu hakoi mate isin sira nee.
PSA 79:4 Ami moe iha vizinhu sira nia oin; ema nebee haleu ami hatete aat ami no hatuun ami.
PSA 79:5 NAI Maromak, Ita Boot atu hirus ami too bainhira? Too tinan ba tinan ka? Too bainhira mak Ita Boot nia laran nakali mai ami?
PSA 79:6 Fakar tuun Ita Boot nia hirus ba nasaun sira nebee la konhese Ita Boot, ba iha nasaun sira nebee la bolu Ita Boot nia naran.
PSA 79:7 Tanba sira haan hotu tiha ona Jacó nia jerasaun; sira estraga tiha ona nia hela fatin.
PSA 79:8 Keta sura ami nia bei-ala sira nia sala ba iha ami nia leten; hatudu lalais ita Boot nia laran luak mai ami, tanba ami fraku liu ona.
PSA 79:9 Maromak, ami nia Salvador, tulun ami ba atu ema foti aas Ita Boot nia naran; salva ami no perdua ami nia sala atu ema tane aas Ita Boot nia naran.
PSA 79:10 La bele husik nasaun jentiu sira dehan fali, “Ema sira nee nia Maromak iha nebee?” Halo ami haree Ita Boot selu fali nasaun jentiu sira tanba sira fakar Ita Boot nia atan sira nia raan.
PSA 79:11 See tilun ba ema dadur sira nia halerik; hodi Ita Boot nia forsa salva sira nebee mak ema atu oho.
PSA 79:12 Nai, liafuan aat nebee mak ami nia vizinhu sira koalia hasoru Ita Boot, tiru fali ba iha sira nia hirus matan dala hitu.
PSA 79:13 Nunee ami nudar Ita Boot nia povu, nudar bibi nebee Ita Boot tau matan, ami sei agradese ba Ita Boot tinan ba tinan; ami sei hahii Ita Boot husi jerasaun ba jerasaun.
PSA 80:1 Salmu Asaf nian, tuir muzika “Ai funan liriu promesa nian.” Ba dirijenti koru. Bibi atan Israel, Ita Boot hatudu dalan ba José nia jerasaun hanesan bibi atan ida lori nia bibi; see tilun mai ami ba. Ita Boot tuur iha anju kerubin nia leten hodi ukun; hatudu Ita Boot nia naroman nabilan
PSA 80:2 ba Efraim, Benjamim ho Manassés sira nia jerasaun. Hatudu Ita Boot nia kbiit; mai salva ami ba.
PSA 80:3 Maromak, hadia fali ami nia moris ba; halo Ita Boot nia oin nabilan leno ami, atu nunee ami bele hetan salvasaun.
PSA 80:4 NAI Maromak Aswain, too bainhira mak Ita Boot nia laran nakali hodi lakohi rona Ita Boot nia povu nia orasaun?
PSA 80:5 Ita Boot foo laran tristi ba ami hanesan fali hahaan; Ita Boot foo ami hemu matan been manko nakonu.
PSA 80:6 Ita Boot halo nasaun vizinhu sira istori malu kona ba ami nia rain; Ita Boot husik ami nia inimigu sira hamnasa hahaek mai ami.
PSA 80:7 Maromak Aswain, hadia fali ami nia moris ba; halo Ita Boot nia oin nabilan leno ami, atu nunee ami bele hetan salvasaun.
PSA 80:8 Ami nee hanesan ai uvas huun ida nebee Ita Boot lori sai husi rai Ejitu; Ita Boot duni sai tiha nasaun jentiu sira hodi kuda fali ai uvas nee.
PSA 80:9 Ita Boot hamoos tiha rai ba ai uvas nee, nunee nia abut tama klean iha rai too buras nakonu rai nee.
PSA 80:10 Foho sira hamahon aan iha nia lalatak; ai huun boot sedru helik iha nia sanak.
PSA 80:11 Nia sanak naruk too iha tasi Mediteráneu; nia dikin too iha mota Eufrates.
PSA 80:12 Maibee tansaa mak Ita Boot halo rahun tiha lutu? Agora ema nebee liu bele foti uvas nee nia fuan;
PSA 80:13 fahi fuik husi ai laran mai estraga hela; animal husi rai fuik mai haan dadauk.
PSA 80:14 Maromak Aswain, fila fali mai ami; hateke tuun husi lalehan hodi haree. Tau matan ba uvas huun nee;
PSA 80:15 ida nee Ita Boot nia liman loos mak kuda; ida nee oan mane nebee Ita Boot rasik foti sae sai Ita Boot nian.
PSA 80:16 Ita Boot nia uvas huun ema tesi tuun tiha ona; ahi haan mutuk tiha ona. Hatudu Ita Boot nia oin hirus ba ema sira nee; halo sira mate mohu tiha.
PSA 80:17 Proteje ema ida nebee mak iha hela Ita Boot nia liman loos; nia nee ema nia oan mane nebee Ita Boot rasik foti sae sai Ita Boot nian.
PSA 80:18 Depois ami sei la fila kotuk ba Ita Boot; halo ami moris nafatin mak ami sei temi Ita Boot nia naran.
PSA 80:19 NAI Maromak Aswain, hadia fali ami moris ba; halo Ita Boot nia oin nabilan leno ami, atu nunee ami bele hetan salvasaun.
PSA 81:1 Salmu Asaf nian, tuir muzika Gitit. Ba dirijenti koru. Haklalak haksolok ba Maromak, Nia mak ita nia forsa; hananu haklalak ba Jacó nia Maromak!
PSA 81:2 Hananu ba, baku babadook ba; toka viola ho viola tali sanulu.
PSA 81:3 Huu karau dikur iha tempu fulan nurak; huu tan bainhira fulan nakonu hodi loke ita nia loron boot.
PSA 81:4 Ida nee mak Israel nia lei, regulamentu husi Jacó nia Maromak.
PSA 81:5 Bainhira Maromak baa kontra ema Ejitu, Nia foo orden nee ba José. Hau rona ona lian ida nebee hau la konhese dehan,
PSA 81:6 “Hau muda sai tiha naha todan iha imi nia kabaas; imi nia liman livre ona husi bote todan.
PSA 81:7 Uluk imi iha susar laran, imi harohan mai Hau, Hau salva tiha imi; Hau hataan imi husi kalohan ho rai tarutu nia laran; Hau koko tiha ona imi iha bee Meriba nian.
PSA 81:8 Hau nia povu, rona mai, Hau sei foo atensaun ba imi; Israel, tuir loos imi rona mai Hau!
PSA 81:9 Iha imi nia leet maromak seluk la bele iha; imi la bele adora maromak falsu.
PSA 81:10 Hau mak NAI imi nia Maromak; Hau mak lori imi sai husi rai Ejitu. Loke imi nia ibun ba mak Hau foo haan imi too bosu.
PSA 81:11 Maibee Hau nia povu lakohi rona Hau; Israel lakohi hakruuk mai Hau.
PSA 81:12 Nunee Hau halo sira nia fuan toos tiha hodi tuir deit sira nia hanoin rasik.
PSA 81:13 Hau hakarak atu Hau nia povu rona mai Hau; Hau hakarak tebes atu Israel lao tuir Hau nia dalan.
PSA 81:14 Se sira rona Hau, Hau sei halo sira nia inimigu sira lakon lalais deit; Hau fila Hau nia liman hodi kontra sira nia funu baluk.
PSA 81:15 Ema nebee odi NAI Maromak, sira sei tauk ho nakdedar iha Nia oin; sira sei hetan kastigu tinan ba tinan.
PSA 81:16 Maibee Hau sei foo haan paun diak nian ba imi; Hau sei habosu imi ho bani been husi fatuk kuak.”
PSA 82:1 Salmu Asaf nian. Maromak tuur iha Nia fatin iha tribunal lalehan nian hodi foo justisa ba maromak sel-seluk.
PSA 82:2 Nia dehan, “Too bainhira mak imi tesi lia la loos hodi defende fali ema aat?
PSA 82:3 Imi tenki foo justisa lo-loos ba ema kiik ho oan kiak sira; defende ema kbiit-laek ho ema mukit sira nia direitu.
PSA 82:4 Salva ema kiik ho kiak sira; hasai sira husi ema aat sira nia liman laran.
PSA 82:5 Maromak sel-seluk nee la hatene buat ida, sira la kompriende; sira lao iha nakukun laran; nunee mundu rai klaran nakdoko tiha.
PSA 82:6 Hau dehan, ‘Imi sira nee maromak; imi hotu Maromak Aas Liu nia oan.’
PSA 82:7 Maski nunee too tempu ida imi sei mate hanesan ema hotu mate; imi nia vida sei remata hanesan ukun nain sira seluk.”
PSA 82:8 Maromak, hamriik ba hodi foo justisa mai mundu, tanba nasaun hotu-hotu Ita Boot nian.
PSA 83:1 Salmu Asaf nian. Kantiku ida. Maromak, la bele nonook deit; keta taka tilun; Maromak, keta lian-laek nunee.
PSA 83:2 Haree ba, Ita Boot nia inimigu sira book aan ona; ema nebee odi Ita Boot foti aas sira nia ulun.
PSA 83:3 Sira futu lia hasoru Ita Boot nia povu; sira kombina malu kontra ema nebee Ita Boot tau matan.
PSA 83:4 Sira dehan, “Mai ita harahun tiha sira nia nasaun atu nunee ema la temi tan Israel nia naran.”
PSA 83:5 Sira lian ida halo planu; sira konkorda hamutuk atu kontra Ita Boot.
PSA 83:6 Sira nee mak ema Edom ho ema Ismael, ema Moab ho ema Hagar,
PSA 83:7 ema Gebál, Amon ho Amalék, ema Filístia, ho ema husi sidade Tiru.
PSA 83:8 Ema Asíria mos hamutuk tiha ona ho sira hodi haforsa Ló nia jerasaun sira nee.
PSA 83:9 Halakon sira ba, hanesan Ita Boot uluk halakon ema Midián, hanesan Ita Boot halakon komandante Sízera ho liurai Jabín iha mota Kisón;
PSA 83:10 sira nee mate mohu iha rai Endor; sira sai tiha ona adubu ba rai nee.
PSA 83:11 Halo sira nia ema boot sira sai hanesan jeneral Oreb ho Zeeb; halo sira nia ukun nain sira hotu sai hanesan liurai Zebah ho Zalmuna;
PSA 83:12 sira nain rua dehan, “Mai ita hadau tiha rai nebee Maromak tau matan hodi sai fali ita nian.”
PSA 83:13 Hau nia Maromak, halo sira hanesan rai rahun nebee anin fuik lori, hanesan duut maran nebee anin huu lakon tiha.
PSA 83:14 Duni tuir sira ho Ita Boot nia anin makaas; hatauk sira ho Ita Boot nia anin fuik, hanesan ahi haan ai laran, hanesan ahi sunu mutuk foho.
PSA 83:16 NAI Maromak, halo sira moe boot, atu nunee sira bele buka Ita Boot.
PSA 83:17 Halo sira moe ho oin tuun tinan ba tinan; husik sira mate ho naran aat.
PSA 83:18 Halo sira rekonhese katak Ita Boot mak NAI Maromak; Ita Boot mesak mak Maromak Aas Liu iha mundu rai klaran.
PSA 84:1 Salmu husi Korá nia oan, tuir muzika “Gitit.” Ba dirijenti koru. NAI Maromak Aswain, Ita Boot nia hela fatin furak teb-tebes!
PSA 84:2 Hau lakohi hein tan, hau hakarak teb-tebes atu tama iha NAI nia uma kreda; hau nia isin ho klamar haklalak haksolok ba Maromak Moris.
PSA 84:3 NAI Maromak Aswain, hau nia Liurai, hau nia Maromak, besik iha Ita Boot nia altar, manu liin halo nia knuuk; manu lakateu mos halo nia uma para luut sira nia oan iha nebaa.
PSA 84:4 Ema nebee hela iha Ita Boot nia uma hodi adora hela deit Ita Boot, sira hetan ksolok.
PSA 84:5 Ema nebee mak hetan kbiit husi Ita Boot, ema nebee hakarak ho laran atu baa iha Ita Boot nia foho santu, sira hetan ksolok.
PSA 84:6 Bainhira sira lao liu husi Rai Klean Tanis nian, bee matan barak mosu iha nebaa; udan monu rai hodi foo bensaun ba rai nee.
PSA 84:7 Sira lao forti ba dadauk, too sira ida-ida tama iha Maromak nia prezensa iha foho Siaun.
PSA 84:8 NAI Maromak Aswain, rona hau nia orasaun; Jacó nia Maromak, see tilun mai hau.
PSA 84:9 Maromak, haree di-diak liurai nebee mak defende ami; tau matan ba liurai nebee mak Ita Boot hili ona nee.
PSA 84:10 Diak liu loron ida iha Ita Boot nia uma kreda duke loron rihun ida iha fatin seluk. Hau gosta liu hein odamatan iha hau nia Maromak nia uma duke hela iha ema aat nia tenda laran.
PSA 84:11 Tanba NAI Maromak mak loro matan hodi leno ita, Nia defende ita; Nia hatudu laran diak ba ita no foti aas ita; NAI nunka subar buat diak ba ema nebee lao tuir dalan loos.
PSA 84:12 NAI Maromak Aswain, ema hotu nebee laran metin ba Ita Boot, sira hetan ksolok.
PSA 85:1 Salmu husi Korá nia oan, ba dirijenti koru. NAI Maromak, uluk Ita Boot hatudu laran diak ba Ita Boot nia rain hodi halo Jacó nia jerasaun moris diak fali.
PSA 85:2 Ita Boot perdua tiha ona hahalok aat nebee Ita Boot nia povu halo hodi taka tiha sira nia sala hotu-hotu.
PSA 85:3 Ita Boot lakohi hirus tan sira, no la fakar tan Ita Boot nia laran nakali ba sira.
PSA 85:4 Maromak ami nia Salvador, hadia fali ami nia moris ba; halakon tiha Ita Boot nia laran moras ba ami.
PSA 85:5 Ita Boot sei hirus ami nafatin ba nafatin ka? Ita Boot atu hanaruk Ita Boot nia hirus husi jerasaun ba jerasaun ka?
PSA 85:6 Halo Ita Boot nia povu moris fali ba atu ami bele haksolok ho Ita Boot nia diak.
PSA 85:7 NAI Maromak, hatudu Ita Boot nia domin rohan-laek mai ami hodi salva ami.
PSA 85:8 Hau sei see tilun ba buat nebee NAI Maromak koalia; Nia promete pas ba Nia povu, ba ema nebee foo laran ba Nia, naran katak sira la bele fila fali ba buat beik.
PSA 85:9 Tebes, Nia salvasaun besik ema nebee mak hamtauk Nia, nunee Nia kbiit sei hela metin iha ita nia rain.
PSA 85:10 Domin ho lia loos hasoru malu; justisa ho pas rei malu.
PSA 85:11 Lia loos sei moris buras husi rai; justisa sei hateke tuun husi lalehan.
PSA 85:12 Loos duni, NAI Maromak sei haraik buat nebee diak; ita nia toos sei foo ai haan barak.
PSA 85:13 Lia loos lao uluk iha Nia futar oin hodi prepara dalan ba Nia atu lao tuir.
PSA 86:1 Orasaun David nian. NAI Maromak, rona hau hodi hataan hau ba, tanba hau kiak ho kbiit-laek.
PSA 86:2 Kuidadu hau nia moris, tanba hau foo laran ba Ita Boot; salva Ita Boot nia atan hau, tanba hau konfia Ita Boot. Ita Boot mak hau nia Maromak.
PSA 86:3 Nai, loron-kalan hau halerik ba Ita Boot; hanoin hau ba.
PSA 86:4 Nai, foo ksolok ba Ita Boot nia atan hau, tanba hau fiar Ita Boot.
PSA 86:5 Nai, Ita Boot nee diak no gosta perdua ema; Ita Boot sempre hatudu domin rohan-laek ba ema nebee mak harohan ba Ita Boot.
PSA 86:6 NAI Maromak, rona hau nia orasaun; hau halerik husu tulun ba Ita Boot, see tilun ba.
PSA 86:7 Iha tempu susar, hau harohan ba Ita Boot; Ita Boot sei hataan hau.
PSA 86:8 Nai Maromak, iha maromak sel-seluk nia leet, la iha ida mak hanesan Ita Boot; la iha buat ida mak bele kompara ho buat nebee Ita Boot halo tiha ona.
PSA 86:9 Nai, nasaun hotu-hotu nebee Ita Boot halo sei mai adora Ita Boot; sira sei foti aas Ita Boot nia naran.
PSA 86:10 Tanba Ita Boot makaas no halo buat mesak furak; Ita Boot deit mak Maromak.
PSA 86:11 NAI Maromak, hanorin Ita Boot nia dalan mai hau, atu hau bele moris tuir Ita Boot nia lia loos; halo hau nia laran firmi, atu hau bele hamtauk deit ba Ita Boot nia naran.
PSA 86:12 Nai, hau nia Maromak, hau sei hahii Ita Boot ho hau nia laran tomak; hau sei foti aas Ita Boot nia naran tinan ba tinan.
PSA 86:13 Tanba Ita Boot nia domin mai hau boot teb-tebes; Ita Boot salva tiha ona hau nia vida husi matebian sira nia fatin.
PSA 86:14 Maromak, ema foti aan sira ataka hela hau; grupu laran aat hakarak hasai hau nia vida; sira la interese Ita Boot.
PSA 86:15 Maibee Nai, Ita Boot nee Maromak laran diak no laran luak; Ita Boot Pasiensia Nain, nakonu ho domin rohan-laek no sempre halo buat nebee mak loos.
PSA 86:16 Fila oin mai hau hodi hanoin hau ba; haraik Ita Boot nia forsa ba Ita Boot nia atan hau; hau Ita Boot nia atan feto nia oan, salva hau ba.
PSA 86:17 Hatudu netik sinal ida katak Ita Boot laran diak mai hau. Nunee ema nebee odi hau bele haree no moe, tanba NAI Maromak, Ita Boot tulun ona hau no foo ksolok mai hau.
PSA 87:1 Salmu husi Korá nia oan. Kantiku ida. NAI Maromak harii tiha ona Nia sidade iha foho santu.
PSA 87:2 NAI gosta portaun sidade Siaun nian liu fali hela fatin hotu-hotu iha rai Israel.
PSA 87:3 Maromak nia sidade, ema konta buat mesak furak kona ba o.
PSA 87:4 Maromak dehan, “Bainhira Hau temi ema sira nebee rekonhese Hau, Hau temi mos rai Rahab ho Babilónia nia naran, ho tan rai Filístia, Tiru ho Etiópia. Hau sei foo sai dehan, sira mos Siaun oan.”
PSA 87:5 Loos duni, kona ba Siaun ema sei dehan, “Sira nee hotu moris iha nebaa, no Maromak Aas Liu rasik sei harii sidade nee.”
PSA 87:6 Bainhira NAI rejista Nia povu, Nia sei hakerek, “Ida nee moris iha Siaun.”
PSA 87:7 Ema sei bidu rame-rame hodi hananu, “Siaun, o mak hau nia bee matan inan.”
PSA 88:1 Salmu husi Korá nia oan, tuir muzika “Mahalat Leanot.” Kantiku ida husi Heman, ema Kanaán, para hanorin ema. Ba dirijenti koru. NAI Maromak, hau nia Salvador, loron-kalan hau halerik husu tulun ba Ita Boot.
PSA 88:2 Simu hau nia orasaun ba; see tilun ba hau nia harohan.
PSA 88:3 Hau nia laran nakonu ho susar; hau besik ona ba iha ema mate nia fatin.
PSA 88:4 Ema sura tiha ona hau hamutuk ho ema nebee lao tuun dadauk ba rai kuak; hau hanesan ema ida nebee la iha forsa.
PSA 88:5 Hau hela mes-mesak iha ema mate sira nia klaran; hau hanesan vitima nebee ema oho hodi latan iha rate laran. Ema mate sira nee Ita Boot la hanoin tan ona; Ita Boot la tulun ona sira.
PSA 88:6 Ita Boot soe tiha ona hau tuun liu iha rai kuak naruk, iha fatin nakukun teb-tebes.
PSA 88:7 Ita Boot nia hirus halo todan hau; Ita Boot halo laloran makaas mai hotu hodi hanehan hau.
PSA 88:8 Ita Boot haketak tiha hau husi hau nia belun diak; Ita Boot halo sira hakribi hau; hau iha hela fatin kloot, no sai la diak;
PSA 88:9 hau nia matan malahuk tanba hau tristi liu. NAI Maromak, loro-loron hau harohan ba Ita Boot; hau hasae hau nia liman ba Ita Boot.
PSA 88:10 Ita Boot hatudu milagre ba ema mate sira ka? Matebian sira hadeer fali hodi hahii Ita Boot ka?
PSA 88:11 Ema foo sai Ita Boot nia domin iha rate laran ka? Ema deklara Ita Boot nia salvasaun iha mate sira nia rain ka?
PSA 88:12 Iha fatin nakukun nian, ema rekonhese Ita Boot nia milagre ka? Iha fatin nebee ema haluha buat hotu-hotu, ema sei hatene Ita Boot nia justisa ka?
PSA 88:13 Maibee NAI Maromak, hau harohan husu tulun ba Ita Boot; dadeer-dadeer hau nia orasaun sae ba iha Ita Boot nia oin.
PSA 88:14 NAI, tansaa mak Ita Boot la simu hau? Tansaa mak Ita Boot subar oin mai hau?
PSA 88:15 Komesa husi joven, hau hetan terus no besik atu mate; Ita Boot husik hela todan iha hau nia leten too hau lakon esperansa.
PSA 88:16 Ita Boot nia laran nakali domina hela hau; Ita Boot asalta hau halo hau mohu.
PSA 88:17 Iha loron tomak Ita Boot nia hirus hanesan bee boot ida nebee dulas haleu, halo hau mout sal-sala.
PSA 88:18 Ita Boot hasai tiha ona hau husi hau nia belun ho vizinhu sira; agora nakukun mak sai fali hau nia belun.
PSA 89:1 Salmu husi Etán, ema Kanaán, para hanorin ema. NAI Maromak, hau sei hananu tinan ba tinan kona ba Ita Boot nia domin rohan-laek; husi jerasaun ba jerasaun hau nia ibun sei foo sai katak Ita Boot sempre halo buat nebee mak loos.
PSA 89:2 Hau sei deklara katak Ita Boot nia domin metin nafatin ba nafatin; Ita Boot nia lia loos dura hanesan lalehan.
PSA 89:3 Uluk Ita Boot hatete nunee: “Hau halo ona promesa ho ema ida nebee Hau hili; Hau jura tiha ona ba Hau nia atan David dehan,
PSA 89:4 ‘Hau sei halo o nia jerasaun ukun tinan ba tinan; sira sei sai liurai husi jerasaun ba jerasaun.’”
PSA 89:5 NAI Maromak, lalehan hahii buat furak nebee Ita Boot halo; espiritu bo-boot sira halibur malu hahii NAI tanba NAI sempre halo buat nebee mak loos.
PSA 89:6 Iha lalehan, see mak bele kompara ho NAI? Hotu-hotu nebee iha lalehan, see mak hanesan NAI?
PSA 89:7 Maromak makaas liu fali espiritu bo-boot nebee haleu Nia; sira hotu hamtauk teb-tebes Nia.
PSA 89:8 NAI Maromak Aswain, see mak makaas hanesan Ita Boot? NAI, Ita Boot sempre halo buat nebee mak loos.
PSA 89:9 Ita Boot mak ukun tasi nebee nafurin sae; bainhira laloran makaas, Ita Boot mak halo hakmatek fali.
PSA 89:10 Ita Boot buti mate samea boot Rahab; hodi Ita Boot nia liman forti Ita Boot halo inimigu sira halai namkari tiha.
PSA 89:11 Lalehan nee Ita Boot nian, rai mos Ita Boot nian hotu; mundu ho buat hotu-hotu iha laran, Ita Boot mak harii.
PSA 89:12 Parte norte ho sul, Ita Boot mak kria; foho Tabor ho Hermon haksolok hodi hahii Ita Boot nia naran.
PSA 89:13 Ita Boot nia liman forsa; Ita Boot nia liman forti; Ita Boot nia liman loos makaas teb-tebes.
PSA 89:14 Ita Boot ukun nudar Liurai tuir lia loos ho justisa; Ita Boot ukun ho domin, no sempre halo buat nebee mak loos.
PSA 89:15 NAI Maromak, ema nebee hatene haklalak hodi hahii Ita Boot, ema nebee lao iha Ita Boot nia futar oin naroman, sira nee hetan ksolok.
PSA 89:16 Loron-kalan sira haksolok tanba Ita Boot nia naran; sira haksolok haklalak tanba Ita Boot nia lia loos.
PSA 89:17 Tanba Ita Boot mak sira nia kbiit no sira nia forsa; Ita Boot nia laran diak halo ami manaan.
PSA 89:18 Tebes duni, NAI Maromak mak hili ema ida sai ami nia defensor; ami nia liurai nee nia Nain mak Israel nia Maromak Santu.
PSA 89:19 Uluk Ita Boot koalia liu husi mehi hodi hatete ba Ita Boot nia povu santu dehan, “Hau tau tiha ona koroa liurai nian ba iha aswain ida nia ulun; Hau foti sae mane joven ida husi povu nia leet.
PSA 89:20 Hau hetan Hau nia atan David; Hau kose Hau nia mina santu ba nia hodi halo nia sai liurai.
PSA 89:21 Hau nia liman sei tane nia; Hau nia liman sei halo nia forsa.
PSA 89:22 Inimigu sira sei la liu nia; ema aat sei la hanehan nia.
PSA 89:23 Hau sei sama hanehan nia funu baluk sira iha nia oin; ema nebee odi nia, Hau sei oho tiha.
PSA 89:24 Hau sei hadomi nia hodi kaer metin Hau nia promesa ba nia; hodi Hau nia naran, nia sei manaan.
PSA 89:25 Hau sei halo nia liman ukun tasi; nia liman loos ukun mota.
PSA 89:26 Nia sei dehan sai mai Hau, ‘Ita Boot mak hau nia Aman, hau nia Maromak; Ita Boot mak fatuk lolon boot nebee hau helik ba para hetan salvasaun.’
PSA 89:27 Hau sei foti nia nudar Hau nia oan mane boot; nia mak liurai boot liu iha mundu.
PSA 89:28 Hau sei foo Hau nia domin ba nia tinan ba tinan; Hau nia promesa ho Hau nia lei la hotu la remata.
PSA 89:29 Hau sei halo nia jerasaun ukun tinan ba tinan; sira nia ukun sei dura hanesan lalehan.
PSA 89:30 Se karik nia oan sira husik tiha Hau nia lei, no la tuir Hau nia regulamentu,
PSA 89:31 se karik sira viola Hau nia regra, no la kaer metin Hau nia ukun fuan,
PSA 89:32 entaun Hau sei kastigu sira ho rota tanba sira halo sala hasoru Hau; Hau sei baku sira ho sikoti tanba sira halo pekadu.
PSA 89:33 Maibee Hau sei la hasai fali Hau nia domin husi nia; Hau sei la haluha Hau nia promesa.
PSA 89:34 Hau sei la kontra hau nia promesa ho nia; liafuan nebee sai husi Hau nia ibun, sei la muda.
PSA 89:35 Hau sei la bosok David; Hau jura tiha ona dala ida hodi Hau nia naran santu; juramentu nee dura ba nafatin katak,
PSA 89:36 nia jerasaun sei ukun tinan ba tinan; nia ukun dura iha Hau nia oin hanesan loro matan;
PSA 89:37 nia ukun harii metin nafatin ba nafatin hanesan fulan; fulan nee mos foo sasin lo-loos husi kalohan.”
PSA 89:38 Maibee agora Ita Boot la simu liurai hodi soe tiha nia; Ita Boot hirus teb-tebes ho ema nebee mak Ita Boot hili ona nee.
PSA 89:39 Ita Boot kansela tiha promesa ho Ita Boot nia atan; Ita Boot soe nia koroa ba iha rai rahun.
PSA 89:40 Ita Boot baku rahun tiha hotu moru sidade nian hodi estraga tiha nia fatin seguru.
PSA 89:41 Ema hotu nebee liu husi nebaa hadau nia sasaan; nia vizinhu sira hamnasa fali nia.
PSA 89:42 Ita Boot halo nia funu baluk sira manaan; Ita Boot halo nia inimigu sira hotu kontenti.
PSA 89:43 Ita Boot mos fila tiha nia surik nia kroat, no la ajuda nia iha funu laran.
PSA 89:44 Ita Boot hasai tiha nia poder; nia kadeira ukun, Ita Boot soe tiha ba rai.
PSA 89:45 Ita Boot habadak tiha ona nia vida joven; Ita Boot falun nia ho moe.
PSA 89:46 NAI Maromak, Ita Boot subar Aan beibeik too bainhira? Too tinan ba tinan ka? Ita Boot nia hirus lakan hanesan ahi too bainhira?
PSA 89:47 Keta haluha katak hau nia moris badak deit; Ita Boot kria ema umanu la iha folin.
PSA 89:48 See mak bele moris ba beibeik no nunka mate? See mak bele halai sees husi forsa rai kuak nian?
PSA 89:49 Nai Maromak, uluk Ita Boot jura ho laran atu foo domin rohan-laek ba David. Agora Ita Boot nia domin nee iha nebee ona?
PSA 89:50 Nai, haree ba, ema tarata Ita Boot nia atan hau; hau hulan hela liafuan aat nebee ema barak hatete kona ba hau.
PSA 89:51 NAI, Ita Boot nia inimigu sira tarata hau; iha nebee-nebee deit sira hatete aat liurai nebee Ita Boot hili tiha ona.
PSA 89:52 Hahii NAI Maromak tinan ba tinan! Amen, amen.
PSA 90:1 Orasaun husi Moisés, Maromak nia ema uma laran. Nai Maromak, Ita Boot mak ami nia hela fatin husi jerasaun ba jerasaun.
PSA 90:2 Molok Ita Boot halo mundu rai klaran, foho sira seidauk mosu, Ita Boot Maromak nanis kedas ona; Ita Boot Maromak nafatin ba nafatin.
PSA 90:3 Ita Boot halo ema fila fali ba rai rahun; Ita Boot dehan, “Imi ema isin ho raan, fila fali ba rai rahun ba.”
PSA 90:4 Ba Ita Boot, tinan rihun ida hanesan fali loron ida, liu lalais deit, hanesan oras balu nebee ema seguransa hein iha tempu kalan.
PSA 90:5 Ita Boot dasa sai tiha ema, sira lakon hanesan mehi; sira hanesan duut nebee moris iha dadeer-saan.
PSA 90:6 Iha dadeer duut nee tubun buras, maibee iha lokraik namlaik tiha too maran.
PSA 90:7 Ita Boot nia hirus halo ami atu mohu; Ita Boot nia laran nakali halo ami tauk teb-tebes.
PSA 90:8 Ita Boot halekar ami nia pekadu iha Ita Boot nia oin; ami nia sala segredu Ita Boot leno sai mo-moos.
PSA 90:9 Loron ba loron Ita Boot nia hirus taka tomak ami nia moris; ami nia moris remata ho halerik.
PSA 90:10 Ami nia vida too tinan hitu-nulu deit; se ami iha forsa karik, bele too walu-nulu. Bele nunee mos, tinan hirak nee hotu ami hetan susar ho terus; tempu nee liu lalais deit, depois ami semo lakon tiha.
PSA 90:11 La iha ema ida bele hatene Ita Boot nia hirus nee forsa too iha nebee. Ita Boot nia laran nakali makaas liu, halo ami hamtauk teb-tebes Ita Boot.
PSA 90:12 Hanorin ami atu hatene sura ami nia loron, nunee ami bele sai matenek.
PSA 90:13 NAI Maromak, fila mai ba! Ita Boot atu hirus too bainhira? Hanoin Ita Boot nia atan sira ba.
PSA 90:14 Iha dadeer-saan, habosu ami ho Ita Boot nia domin rohan-laek, atu ami bele kanta haksolok ho kontenti iha ami nia moris tomak.
PSA 90:15 Durante tempu naruk Ita Boot halo ami terus; foo ksolok fali mai ami durante tempu naruk ba; durante tinan barak ami hetan susar; halo ami haksolok fali durante tinan barak.
PSA 90:16 Husik Ita Boot nia atan ami haree buat nebee mak Ita Boot halo; husik ami nia oan sira haree Ita Boot nia furak.
PSA 90:17 Nai ami nia Maromak, hatudu laran diak mai ami; halo ami nia servisu lao ba oin; halo ami nia knaar lao ba oin.
PSA 91:1 Ema nebee moris hamahon aan iha Maromak Aas Liu, ema nebee hakmatek iha Maromak Kbiit Nain nia mahon,
PSA 91:2 nia sei hatete ba NAI Maromak, “Ita Boot mak fatin seguru mai hau, Ita Boot mak lutu haleu hau; hau nia Maromak, hau konfia Ita Boot.”
PSA 91:3 Tebes duni, Maromak sei salva o husi lasu nebee kasador sira tau iha dalan, no husi moras aat nebee hamate ema.
PSA 91:4 Nia sei falun o hodi Nia liras; o sei hamahon aan iha Nia liras okos; Nia domin sei haleu o hodi defende o.
PSA 91:5 O sei la tauk buat aat iha kalan; o sei la tauk rama oan nebee semo iha loron.
PSA 91:6 Moras aat nebee lao iha nakukun laran, ka moras nebee ameasa ema iha loron manas mos o sei la tauk.
PSA 91:7 Maski ema rihun ida monu iha o nia sorin, maski ema rihun sanulu monu iha o nia liman loos, maibee buat ida la kona o.
PSA 91:8 O nia matan sei hateke tuir deit; o sei haree oinsaa ema aat hetan kastigu.
PSA 91:9 Se o halo NAI Maromak sai o nia fatin seguru, se o halo Maromak Aas Liu sai o nia hela fatin,
PSA 91:10 entaun buat aat sei la kona o; dezastre sei la mai besik o nia hela fatin.
PSA 91:11 Tanba Maromak sei haruka Nia anju sira mai kuidadu o iha o nia moris tomak.
PSA 91:12 Sira sei lolo liman hodi tane o, atu o nia ain la bele kona fatuk.
PSA 91:13 O sei sama liaun ho samea kobra; o sei sama hanehan liaun forti ho samea boot.
PSA 91:14 NAI Maromak dehan, “Hau sei salva ema nebee hadomi Hau; Hau sei proteje ema nebee hatene tuir Hau nia naran.
PSA 91:15 Bainhira nia husu tulun mai Hau, Hau sei hataan; Hau sei hamutuk ho nia iha susar laran; Hau sei defende nia no foti aas nia.
PSA 91:16 Hau sei haraik vida naruk ba nia hodi halo nia kontenti; Hau sei hatudu Hau nia salvasaun ba nia.”
PSA 92:1 Salmu. Kantiku ba loron Sabadu. Hahii NAI Maromak nee buat diak ida; Maromak Aas Liu, hananu hahii Ita Boot nia naran nee furak.
PSA 92:2 Iha dadeer-saan hau toka viola hodi foo sai Ita Boot nia domin rohan-laek; iha kalan hau halo muzika ho viola tali sanulu hodi deklara katak Ita Boot sempre halo buat nebee loos; hahii Ita Boot nunee buat furak ida.
PSA 92:4 NAI Maromak, hau kontenti tanba buat nebee Ita Boot halo; hau hananu haksolok tanba buat nebee Ita Boot nia liman halo tiha ona.
PSA 92:5 NAI, Ita Boot nia servisu furak loos; Ita Boot nia hanoin klean teb-tebes.
PSA 92:6 Ema sira nebee kakutak mamuk la hatene; ema beik-teen la kompriende katak,
PSA 92:7 ema aat bele buras lalais hanesan duut; ema nebee gosta hahalok aat bele moris diak, maibee too ikus sira sei mohu tinan ba tinan.
PSA 92:8 Maibee NAI Maromak, Ita Boot iha fatin aas tinan ba tinan.
PSA 92:9 Tebes duni NAI, ema nebee hahalok aat sei halai namkari hotu; Ita Boot nia inimigu sira sei mate mohu.
PSA 92:10 Ita Boot hasae tiha ona hau nia dikur hanesan karau aman fuik nia dikur; Ita Boot fui mina morin diak nian ba hau nia leten.
PSA 92:11 Hau nia matan haree ona hau nia inimigu sira monu; hau nia tilun rona ona hau nia funu baluk sira halai saruntu malu.
PSA 92:12 Ema nebee moris loos sei buras hanesan ramus huun; sira sei sai forti hanesan ai huun sedru iha rai Líbanu.
PSA 92:13 Sira nee kuda tiha ona iha NAI Maromak nia uma; sira sei buras iha ita nia Maromak nia uma kreda.
PSA 92:14 Maski sira idade ona mos, sira sei matak ho buras; sira sei foo fuan ba beibeik.
PSA 92:15 Sira foo sai dehan, “NAI Maromak nee sempre halo buat nebee loos; Nia mak fatuk lolon boot nebee hau helik ba; la iha buat aat ida iha Nia.”
PSA 93:1 NAI Maromak mak Liurai, Nia hatais murak mean; NAI hatudu sai Nia kbiit. Nia harii metin mundu nee, mundu nunka atu nakdoko.
PSA 93:2 Ita Boot ukun nanis kedas; Ita Boot iha hori uluk liu.
PSA 93:3 NAI Maromak, laloran tasi hasae lian; tasi nia lian makaas; laloran tasi tarutu hasae nia lian.
PSA 93:4 NAI iha fatin aas ba, Nia makaas teb-tebes; makaas liu bee boot nebee tarutu, makaas liu laloran tasi nebee baku ba-mai.
PSA 93:5 NAI, Ita Boot nia mandamentu dura nafatin; Ita Boot nia uma santu teb-tebes too tinan ba tinan.
PSA 94:1 NAI Maromak, Ita Boot mak kastigu ema nebee halo buat aat; Ita Boot mak selu fali buat aat nebee sira halo; Maromak, hatudu Aan ba!
PSA 94:2 Juis mundu tomak nian, hamriik ba; selu fali ema foti aan sira tuir buat nebee sira merese hetan.
PSA 94:3 NAI, ema aat sira atu kontenti too bainhira? Ema aat sira nee sei haklalak too bainhira?
PSA 94:4 Sira muta sai liafuan gaba aan; ema nebee hahalok aat, sira mesak foti aan deit.
PSA 94:5 NAI, sira sama rahun Ita Boot nia povu; sira hanehan povu nebee Ita Boot rasik hili.
PSA 94:6 Sira oho feto faluk ho ema lao rai; sira hakotu oan kiak sira nia vida.
PSA 94:7 Sira dehan, “NAI la haree ida; Jacó nia Maromak la preokupa.”
PSA 94:8 Imi kakutak mamuk sira iha povu nia leet, rona mai. Imi ema beik-teen sira nee, bainhira mak imi bele kompriende?
PSA 94:9 Ida nebee kria tilun nee la rona fali ka? Ida nebee halo matan nee la haree fali ka?
PSA 94:10 Ida nebee foo disiplina ba nasaun jentiu sira la hatene foo kastigu ka? Ida nebee hanorin ema, Nia konhesimentu la iha fali ka?
PSA 94:11 NAI hatene ema hotu nia hanoin; Nia konsidera ema nia hanoin buat mamuk ida.
PSA 94:12 NAI Maromak, ema nebee Ita Boot koriji, ema nebee Ita Boot hanorin kona ba Ita Boot nia lei, sira nee hetan ksolok.
PSA 94:13 Ita Boot halo sira hakmatek iha tempu susar, too rai kuak prontu ona ba ema aat sira.
PSA 94:14 Tanba NAI Maromak nunka soe Nia povu; Nia nunka husik hela povu nebee Nia rasik hili ona.
PSA 94:15 Justisa sei bazeia fali ba lia loos, no ema nebee laran moos sei moris tuir.
PSA 94:16 See mak sei hamriik defende hau hodi hasoru ema aat? See mak atu firmi defende hau kontra ema nebee gosta halo aat?
PSA 94:17 Se laos NAI Maromak mak ajuda hau, la kleur tan hau sei baa hela iha rai kuak nebee la iha lian.
PSA 94:18 NAI, bainhira hau dehan, “Hau nia ain kois,” Ita Boot nia domin rohan-laek suporta hau.
PSA 94:19 Bainhira hau preokupa buat barak iha hau nia laran, Ita Boot konsola hau, halo hau haksolok.
PSA 94:20 Ukun nain laran aat nebee uza lei hodi hanehan povu bele koopera ho Ita Boot ka?
PSA 94:21 Ema aat sira nee kombina malu kontra ema nebee moris loos; sira foo kastigu mate ba ema nebee laran moos.
PSA 94:22 Maibee NAI sai tiha ona hau nia abrigu; hau nia Maromak mak fatuk lolon boot nebee hau helik ba.
PSA 94:23 Nia sei kastigu sira tuir buat aat nebee sira halo; Nia sei oho tiha sira tanba sira nia hahalok aat; NAI ita nia Maromak sei dasa sai tiha sira.
PSA 95:1 Mai ita hananu haksolok ba NAI Maromak; mai ita haklalak makaas tanba Nia mak fatuk lolon boot hodi salva ita.
PSA 95:2 Mai ita baa iha Nia oin hodi foo agradese, no toka muzika hodi hananu hahii Nia.
PSA 95:3 Tanba NAI nee Maromak boot; Nia mak Liurai boot, Nia aas liu maromak sel-seluk.
PSA 95:4 Rai nee nia klean iha Nia liman laran; foho aas hotu-hotu Ninian.
PSA 95:5 Tasi nee Ninian, tanba Nia mak kria; Nia liman mak forma rai maran.
PSA 95:6 Mai ita hakruuk hodi adora Nia; mai ita hakneak iha NAI Maromak ita nia Kriador nia oin.
PSA 95:7 Tanba Nia mak Ita nia Maromak; ita nee Nia povu nebee Nia tau matan, bibi nebee Nia kuidadu. Ohin loron, imi tenki rona Nia liafuan;
PSA 95:8 la bele ulun toos hanesan imi nia bei-ala sira uluk halo iha rai Meriba, hanesan uluk sira halo iha area Masá iha rai fuik maran.
PSA 95:9 Iha nebaa sira haree Hau nia milagre, maibee sira koko Hau nafatin; sira sadik nafatin Hau.
PSA 95:10 Durante tinan haat-nulu Hau hirus sira hodi dehan, “Sira nee povu ida nebee sempre lao sees husi dalan loos, no lakohi rona Hau nia liafuan.”
PSA 95:11 Nee mak Hau hirus too Hau jura dehan, “Ema sira nee sei la tama iha Hau nia fatin deskansa.”
PSA 96:1 Hananu kantiku foun ba NAI Maromak; mundu tomak, hananu ba NAI.
PSA 96:2 Hananu ba NAI, hahii Nia naran; loro-loron foo sai Nia salvasaun.
PSA 96:3 Deklara sai ba nasaun hotu-hotu kona ba Nia kbiit; konta sai ba povu hotu-hotu kona ba buat furak nebee Nia halo tiha ona.
PSA 96:4 NAI Maromak nee boot, Nia serve atu ita hahii; ema tenki hamtauk Nia liu fali maromak sel-seluk.
PSA 96:5 Tanba nasaun jentiu sira nia maromak la vale buat ida, maibee NAI mak halo lalehan.
PSA 96:6 Nia hatudu sai Nia naran boot ho Nia naroman nabilan; Nia kbiit ho Nia furak iha hela Nia fatin santu.
PSA 96:7 Imi nasaun sira hotu, hahii NAI Maromak; hahii NAI tanba Nia kbiit boot ho forsa.
PSA 96:8 Foti aas NAI nia naran, tanba Nia merese duni; lori oferta hodi mai iha Nia uma kreda.
PSA 96:9 Adora NAI iha Nia fatin santu ho furak; mundu tomak, nakdedar iha Nia oin ba.
PSA 96:10 Hatete ba nasaun hotu-hotu dehan, “NAI Maromak mak Liurai. Mundu nee hamriik metin no nunka atu muda; Nia sei tesi lia ba povu hotu-hotu ho lo-loos.”
PSA 96:11 Lalehan, haksolok ba; mundu, kontenti ba; tasi ho buat hotu iha laran, hasai lian ba;
PSA 96:12 rai maran ho buat hotu nebee iha rai leten, haklalak ba. Ai huun hotu-hotu iha ai laran sei hananu ho haksolok
PSA 96:13 iha NAI Maromak nia oin tanba Nia mai, Nia mai atu foo justisa ba mundu. Nia sei foo justisa ba mundu ho lo-loos; Nia tesi povu nia lia tuir Nia lia loos.
PSA 97:1 NAI Maromak mak Liurai; mundu rai klaran, kontenti ba; rai sira iha tasi balu, haksolok ba!
PSA 97:2 Kalohan nakukun haleu hela Nia; Nia ukun nudar Liurai tuir lia loos ho justisa.
PSA 97:3 Ahi lakan iha Nia oin hodi haan Nia inimigu sira iha fat-fatin.
PSA 97:4 Rai lakan husi Nia leno mundu; haree nunee, rai nakdedar tiha.
PSA 97:5 Foho sira nabeen iha NAI Maromak nia oin hanesan fali lilin; iha mundu tomak nia Nai nia prezensa, foho sira nabeen tiha.
PSA 97:6 Lalehan foo sai katak Maromak sempre halo buat nebee loos; nasaun hotu-hotu haree Nia kbiit boot.
PSA 97:7 Ema hotu nebee adora estatua lulik, sira nebee gaba aan kona ba buat maten, sira sei moe leet; maromak hirak nee hotu-hotu tenki hakruuk ba Nia.
PSA 97:8 NAI Maromak, bainhira Ita Boot foo justisa, ema iha sidade Siaun rona hodi haksolok; vila hotu-hotu iha rai Judá kontenti.
PSA 97:9 Tanba NAI, Ita Boot mak ukun mundu tomak; Ita Boot aas liu dook maromak sel-seluk.
PSA 97:10 Imi nebee hadomi NAI Maromak, hakribi buat aat ba, tanba Nia tau matan ba ema nebee foo laran ba Nia; Nia hasai sira husi ema aat nia liman laran.
PSA 97:11 Naroman leno ema nebee moris loos; ksolok leno ema nebee laran moos.
PSA 97:12 Imi sira nebee moris loos, haksolok tanba NAI nia diak; hahii Nia naran santu ba.
PSA 98:1 Salmu. Hananu kantiku foun ba NAI Maromak, tanba Nia halo ona buat furak teb-tebes. Hodi Nia liman loos; hodi Nia liman santu, Nia manaan tiha ona Nia inimigu.
PSA 98:2 NAI deklara tiha ona Nia vitoria; Nia hatudu sai Nia justisa ba nasaun hotu-hotu.
PSA 98:3 Nia hatudu Nia domin rohan-laek ba Israel; Nia kaer metin Nia promesa ba ita; rai ulun too rai ikun iha mundu tomak haree tiha ona salvasaun husi ita nia Maromak.
PSA 98:4 Mundu tomak, haklalak haksolok ba NAI Maromak ba; toka muzika hodi hananu ho haksolok.
PSA 98:5 Toka viola halo muzika ba NAI; toka viola ho knananuk murak.
PSA 98:6 Huu korneta, huu karau dikur; haklalak haksolok iha NAI nia oin; Nia mak Liurai.
PSA 98:7 Tasi ho buat hotu iha laran, hasai lian ba; mundu ho buat hotu nebee moris iha laran mos hasae lian ba.
PSA 98:8 Mota sira, basa liman ba; foho sira, hananu rame-rame hodi haksolok ba.
PSA 98:9 Hananu iha NAI Maromak nia oin, tanba Nia mai atu foo justisa ba mundu. Nia sei foo justisa ba mundu ho lo-loos; Nia foo justisa ba povu tuir lia loos.
PSA 99:1 NAI Maromak nee Liurai; nasaun hotu-hotu tauk ho nakdedar. Nia tuur iha anju kerubin nia leten hodi ukun; rai nakdoko.
PSA 99:2 NAI Maromak nee Ukun Nain boot iha Siaun; Nia domina nasaun hotu-hotu.
PSA 99:3 Sira sei hahii Nia tanba Nia naran boot ho makaas; Nia nee santu.
PSA 99:4 Liurai Kbiit Nain, Ita Boot gosta justisa; Ita Boot hatuur lia loos; Ita Boot harii justisa ho lo-loos iha Israel.
PSA 99:5 Foti aas NAI ita nia Maromak; hakruuk iha Nia ain hodi adora Nia; Nia nee santu.
PSA 99:6 Uluk Moisés ho Arão serbi Nia nudar nai lulik; Samuel mos ema ida nebee bolu Maromak nia naran. Sira harohan ba NAI Maromak mak Nia hataan sira.
PSA 99:7 Husi kalohan riin laran, Nia koalia ba sira; sira kaer metin lei no mandamentu nebee Nia foo ba sira.
PSA 99:8 NAI ami nia Maromak, Ita Boot hataan sira; Maromak, Ita Boot perdua sira nia sala, maibee Ita Boot mos kastigu sira tanba sira nia sala.
PSA 99:9 Foti aas NAI ita nia Maromak; adora Nia iha Nia foho santu, tanba NAI ita nia Maromak nee santu.
PSA 100:1 Salmu agradesimentu nian. Mundu tomak, haklalak haksolok ba NAI Maromak;
PSA 100:2 adora NAI Maromak ho kontenti; mai iha Nia oin ho hananu haksolok.
PSA 100:3 Rekonhese katak NAI mak Maromak; Nia mak halo ita, ita nee Ninian. Ita nee Nia povu; ita hanesan bibi nebee iha Nia luhan laran.
PSA 100:4 Hakat tama liu husi portaun boot ba iha Nia uma oin hodi foo agradese ba Nia no foti aas Nia naran.
PSA 100:5 Tanba NAI Maromak nee diak; Nia domin dura tinan ba tinan; Nia foo laran ba ita husi jerasaun ba jerasaun.
PSA 101:1 Salmu David nian. NAI Maromak, hau sei kanta kona ba domin ho justisa; hau sei hananu hahii Ita Boot.
PSA 101:2 Hau sei kuidadu hau nia aan hodi moris tuir dalan loos. Bainhira mak Ita Boot atu mai? Hau sei moris ho laran moos iha hau nia uma laran.
PSA 101:3 Hau sei la tau buat aat iha hau nia oin; hau hakribi buat nebee ema fiar-laek sira halo; hau sei la hola parte iha sira nia hahalok.
PSA 101:4 Hau sei hadook aan husi ema nebee hanoin kleuk; hau sei la partisipa iha buat aat saida deit.
PSA 101:5 Ema nebee mak hatete aat nia maluk iha kotu-kotuk, hau sei halo nia mohu; see-see deit mak foti aan no gaba aan, hau la tolera.
PSA 101:6 Hau nia matan sei fihir ema nebee foo laran ba Maromak iha rai nee, atu sira hela hamutuk ho hau; ema nebee moris tuir dalan loos sei serbi hau.
PSA 101:7 Lohi door sira sei la hela iha hau nia uma; bosok-teen sira sei la hamriik iha hau nia oin.
PSA 101:8 Dadeer-dadeer hau sei halo mohu tiha ema aat hotu-hotu iha rai nee; ema nebee gosta halo buat aat, hau sei halakon tiha husi NAI Maromak nia sidade.
PSA 102:1 Ema kbiit-laek ida nia orasaun, bainhira nia fraku, nunee nia fakar sai nia susar ba NAI Maromak. NAI Maromak, rona hau nia orasaun; simu hau nia halerik ba.
PSA 102:2 Keta subar Ita Boot nia oin mai hau bainhira hau iha susar laran. See Ita Boot nia tilun mai hau; bainhira hau harohan, hataan hau ho lalais ba.
PSA 102:3 Tanba hau nia moris liu lalais deit hanesan ahi suar; hau nia isin tomak manas hanesan ahi klaak.
PSA 102:4 Hau nia fuan namlaik tiha hanesan duut nebee ema baku ba rai; hau la hanoin tan atu haan.
PSA 102:5 Iha terus laran hau halerik makaas; hau sai krekas, kulit taka ruin.
PSA 102:6 Hau hanesan manu kakuuk iha rai fuik, hanesan manu kakuuk iha uma dodok nia laran.
PSA 102:7 Hau toba la dukur, hau hanesan manu fuik nebee mes-mesak loos iha uma kakuluk leten.
PSA 102:8 Loron tomak hau nia inimigu sira hatete aat hau; sira nebee koalia hasoru hau temi hau nia naran hodi foo malisan mai hau.
PSA 102:9 Hau nia hahaan mak ahu kdesan; hau hemu fali hau nia matan been.
PSA 102:10 Tanba Ita Boot hirus teb-tebes hau; Ita Boot foti hau hodi soe tiha ona hau.
PSA 102:11 Hau nia moris hanesan lalatak nebee mohu bainhira loro matan monu; hau namlaik hanesan tiha duut.
PSA 102:12 Maibee NAI Maromak, Ita Boot ukun tinan ba tinan; Ita Boot nia naran dura husi jerasaun ba jerasaun.
PSA 102:13 Ita Boot sei hamriik hodi hatudu Ita Boot nia domin ba sidade Siaun, tanba tempu ona atu Ita Boot hatudu Ita Boot nia diak ba sidade nee; tempu nebee Ita Boot marka nee too tiha ona.
PSA 102:14 Tanba Ita Boot nia atan sira hadomi sidade nee nia fatuk; too rai rahun nebee iha dalan mos, sira hanoin teb-tebes.
PSA 102:15 Nasaun hotu-hotu sei hamtauk NAI nia naran; liurai sira iha mundu sei tauk Ita Boot nia kbiit.
PSA 102:16 Tanba NAI Maromak sei harii fila fali Siaun hodi hatudu sai Nia kbiit boot.
PSA 102:17 Nia sei hataan ema kiak rabat rai sira nia orasaun; Nia sei la fila kotuk ba sira nia hamulak.
PSA 102:18 Hakerek ida nee ba jerasaun tuir mai, atu ema nebee seidauk moris bele hahii NAI Maromak.
PSA 102:19 NAI iha Nia fatin santu iha leten aas ba hateke tuun; husi lalehan Nia haree mai mundu
PSA 102:20 hodi rona ema dadur sira nia halerik, no hasai sira nebee hetan kastigu mate.
PSA 102:21 Nunee liurai sira ho povu sira sei halibur hamutuk hodi adora NAI Maromak. Sira sei hahii NAI Maromak iha Jerusalém; sira sei foo sai Nia naran iha Siaun.
PSA 102:23 Hau nia moris foin too iha klaran, Maromak halo hau nia isin nebee forti sai fraku tiha; Nia habadak hau nia vida.
PSA 102:24 Nunee hau dehan, “Hau nia Maromak, Ita Boot moris tinan ba tinan; hau foin too iha dalan klaran, keta hasai hau nia iis.”
PSA 102:25 Hori uluk liu Ita Boot halo mundu nee; lalehan nee Ita Boot nia liman fatin.
PSA 102:26 Buat sira nee hotu aban-bainrua sei lakon, maibee Ita Boot iha nafatin; buat sira nee sei sai bosan hanesan faru tuan. Ita Boot sei troka buat sira nee hanesan troka hena, no sei la iha tan.
PSA 102:27 Maibee Ita Boot nunka muda; Ita Boot nia moris sei la remata.
PSA 102:28 Ita Boot nia atan sira nia oan sei moris ho hakmatek; sira nia jerasaun sei dura iha Ita Boot nia oin.
PSA 103:1 Salmu David nian. Hau hatete ba hau nia aan, hahii NAI Maromak ba; ho laran tomak, hahii Nia naran santu ba.
PSA 103:2 Hau hatete ba hau nia aan, hahii NAI Maromak ba; keta haluha Nia laran diak.
PSA 103:3 Tanba Nia foo perdaun ba o nia sala hotu, no kura o nia moras hotu-hotu.
PSA 103:4 Nia hasai o husi rai kuak laran hodi foo domin rohan-laek no laran luak ba o.
PSA 103:5 Nia foo buat diak ba o tuir o nia hakarak, atu nunee Nia halo o joven fila fali hanesan manu makikit.
PSA 103:6 NAI Maromak sempre halo buat nebee loos hodi foo justisa ba vitima sira nebee ema hanehan.
PSA 103:7 Nia foo hatene Nia dalan ba Moisés; Nia hatudu Nia hahalok ba ema Israel.
PSA 103:8 NAI Maromak nee laran diak no laran luak; Nia Pasiensia Nain, no nakonu ho domin rohan-laek.
PSA 103:9 Nia bele foo sala mai ita maibee laos beibeik; Nia bele hirus ita maibee la rai hirus nafatin ba nafatin.
PSA 103:10 Nia bele kastigu ita maibee kastigu nia todan la too buat nebee ita merese simu; Nia foo kastigu ita laos tuir buat aat hotu nebee ita halo tiha ona.
PSA 103:11 Tanba hanesan lalehan aas liu mundu, nunee mos Maromak nia domin aas teb-tebes ba ema nebee mak hamtauk Nia.
PSA 103:12 Hanesan lorosae dook husi loromonu, nunee mos Nia hadook ita nia sala husi ita.
PSA 103:13 Nudar aman hadomi nia oan sira, nunee mos NAI Maromak hadomi ema nebee mak hamtauk Nia.
PSA 103:14 Tanba Nia hatene ita nee halo husi saida; Nia la haluha katak ita nee rai rahun.
PSA 103:15 Ita ema nia moris hanesan duut; ita buras hanesan ai funan iha rai fuik.
PSA 103:16 Bainhira anin huu, semo lakon tiha; ema atu buka tuir nia fatin, la hetan ona.
PSA 103:17 Maibee husi huun too rohan NAI Maromak hadomi ema nebee mak hamtauk Nia, no Nia laran diak hamutuk ho sira nia oan bei-oan sira,
PSA 103:18 ho ema nebee kaer metin Nia promesa, no la haluha halo tuir Nia lei.
PSA 103:19 NAI Maromak harii tiha ona Nia kadeira ukun iha lalehan; Nia mak Liurai hodi ukun buat hotu-hotu.
PSA 103:20 Imi anju sira, hahii NAI ba. Imi nee iha forsa boot hodi halao Nia orden; imi halo tuir Nia liafuan.
PSA 103:21 Tropas lalehan nian, hahii NAI ba. Imi nee Nia atan hodi halo tuir Nia hakarak.
PSA 103:22 Buat hotu nebee Nia halo, iha nebee-nebee deit mak Nia ukun, hahii NAI ba. Hau hatete ba hau nia aan, hahii NAI Maromak ba.
PSA 104:1 Hau hatete ba hau nia aan, hahii NAI Maromak ba. NAI hau nia Maromak, Ita mak boot teb-tebes; Ita Boot hatudu sai Ita nia naran boot ho naroman nabilan.
PSA 104:2 Ita Boot falun Aan ho naroman hanesan fali hena naruk; Ita Boot haluan lalehan hanesan ema dada tenda.
PSA 104:3 Ita Boot harii Ita Boot nia hela fatin iha kalohan mahar nia leten; Ita Boot halo kalohan sai Ita Boot nia kuda kareta; Ita Boot sae anin nia liras hanesan ema sae kuda.
PSA 104:4 Ita Boot haruka anin lori Ita Boot nia lia menon, no halo ahi lakan sai Ita Boot nia atan.
PSA 104:5 Ita Boot hatuur mundu ba iha nia fatin; mundu nunka atu sees husi nia fatin nee.
PSA 104:6 Ita Boot falun mundu ho bee naruk hanesan hena naruk; bee nee taka tomak foho aas sira.
PSA 104:7 Depois Ita Boot siak halo bee halai tiha; Ita Boot nia lian tarutu halo bee suli sees tiha.
PSA 104:8 Bee suli liu husi foho tuun ba iha rai klean, too iha fatin nebee Ita Boot hatudu ona.
PSA 104:9 Ita Boot tau baliza atu bee la bele suli liu; bee sei la taka mundu tan.
PSA 104:10 Ita Boot halo bee matan suli ba mota kiik; bee nee suli tuun liu husi foho nia leet.
PSA 104:11 Nunee animal fuik bo-boot sira bele hemu; kuda buru fuik hemu too hamrook lakon.
PSA 104:12 Manu fuik halo nia knuuk besik bee nee; manu sira nee hananu iha ai sanak leten.
PSA 104:13 Husi Ita Boot nia uma iha leten, Ita Boot hatuun udan been ba foho; Ita Boot nia liman fatin halo rai nee bosu.
PSA 104:14 Ita Boot halo duut buras ba animal, no halo ai horis atu ema bele uza. Nunee rai bele produs ai haan,
PSA 104:15 tua hodi halo ema nia laran kontenti, mina hodi halo ema nia oin nabilan, no hahaan hodi halo sira forti.
PSA 104:16 Ai huun sedru rai Líbanu nian hetan bee diak; ai huun nee NAI Maromak nian, Nia mak kuda.
PSA 104:17 Iha nebaa manu fuik halo sira nia knuuk; manu fuik boot halo nia uma iha ai sentru nia sanak.
PSA 104:18 Foho aas sai bibi fuik sira nia hela fatin; fatuk kuak sai laku nia subar fatin.
PSA 104:19 Ita Boot halo fulan hodi marka tempu; loro matan hatene bainhira mak atu tuun.
PSA 104:20 Ita Boot foo nakukun, halo rai kalan tiha, nunee animal ai laran nian sai mai.
PSA 104:21 Liaun forti lian boot hodi kasa animal, atu buka ai haan nebee Maromak prepara.
PSA 104:22 Bainhira loro matan sae, liaun sira nee fila fali hodi latan aan iha sira nia hela fatin.
PSA 104:23 Depois ema lao sai baa halao sira nia servisu; sira halo sira nia knaar too kalan.
PSA 104:24 NAI Maromak, Ita Boot nia liman fatin barak teb-tebes! Ita Boot halo buat sira nee hotu ho matenek; mundu nee nakonu ho buat nebee Ita Boot halo.
PSA 104:25 Haree ba, iha tasi boot teb-tebes, luan teb-tebes; iha tasi laran iha buat moris kiik no boot, barak loos, sura la bele.
PSA 104:26 Iha nebaa roo lao baa lao mai; iha mos samea boot Leviatán, Ita Boot forma nia atu halimar iha tasi laran.
PSA 104:27 Kriatura hotu-hotu laran metin ba Ita Boot atu foo ai haan ba sira tuir nia tempu.
PSA 104:28 Bainhira Ita Boot foo ba sira, sira foti tiha; bainhira Ita Boot loke liman, sira bosu ho hahaan mesak diak nian.
PSA 104:29 Bainhira Ita Boot subar Ita Boot nia oin, sira fuan lakon tiha; bainhira Ita Boot hasai tiha sira nia iis, sira mate hodi fila fali ba rai rahun.
PSA 104:30 Bainhira Ita Boot foo Ita Boot nia iis mak kriatura sira hetan moris; Ita Boot hafoun mundu rai klaran.
PSA 104:31 Maromak nia naroman nabilan sei dura nafatin ba nafatin; hau hein atu NAI haksolok ho buat nebee Nia kria tiha ona.
PSA 104:32 Bainhira Nia hateke ba mundu, rai nakdedar; Nia liman kaer kona foho, foho suar sae.
PSA 104:33 Iha hau nia moris tomak hau sei hananu ba NAI; durante hau sei iha iis, hau sei hananu hahii hau nia Maromak.
PSA 104:34 Hau hein katak hau nia liafuan hirak nee bele halo kontenti Nia laran; hau haksolok tanba NAI Maromak.
PSA 104:35 Hau harohan atu sala nain sira bele lakon husi mundu, no ema aat la iha tan. Hau hatete ba hau nia aan, hahii NAI Maromak ba. Hahii NAI Maromak!
PSA 105:1 Foo agradese ba NAI Maromak, haboot Nia naran ba; foo konhese ba nasaun jentiu sira kona ba saida mak Nia halo tiha ona.
PSA 105:2 Hananu ba Nia, kanta hahii ba Nia; foo sai buat furak hotu nebee Nia halo.
PSA 105:3 Tane aas Nia naran santu; imi sira nebee mak buka NAI, haksolok ba.
PSA 105:4 Foti matan ba NAI Maromak, hateke ba Nia kbiit; buka beibeik Nia oin.
PSA 105:5 Imi Maromak nia atan Abraão nia jerasaun sira, Jacó nia oan sira, Maromak hili ona imi, keta haluha buat furak nebee Nia halo tiha ona, Nia milagre ho Nia desizaun nebee Nia hatuun nudar Juis.
PSA 105:7 Nia mak NAI ita nia Maromak; Nia foo justisa ba iha mundu tomak.
PSA 105:8 Nia hanoin nafatin Nia promesa too tinan ba tinan; buat nebee Nia promete ona, Nia kaer metin nafatin too jerasaun rihun ba rihun.
PSA 105:9 Nee mak promesa nebee Nia halo ho Abraão, juramentu nebee Nia halo ho Isac.
PSA 105:10 Nia hametin juramentu nee ba Jacó nudar lei ida; Nia promesa ba Israel nee vale tinan ba tinan.
PSA 105:11 Nia promete dehan, “Hau sei foo rai Kanaán ba o hodi sai o nia riku-soin.”
PSA 105:12 Fo-foun bei-ala sira nee ema uitoan deit, uitoan teb-tebes; sira sei oin foun hela iha rai Kanaán nee.
PSA 105:13 Iha tempu nebaa sira lao rai husi nasaun ba nasaun, husi liurai ida nia reinu ba liurai seluk nia rain.
PSA 105:14 Bele nunee mos Maromak la husik atu ema hanehan sira; Nia defende sira hodi siak liurai sira dehan,
PSA 105:15 “Keta book ema nebee Hau hili; keta halo aat Hau nia profeta sira.”
PSA 105:16 Depois Maromak hamosu rai hamlaha hodi halo aat tiha ai haan hotu-hotu iha rai Kanaán.
PSA 105:17 Nia haruka ema ida baa uluk iha rai Ejitu; nee mak José, ninia maun sira faan tiha nia nudar atan.
PSA 105:18 Ema hakanek nia ain ho korenti besi; sira tau besi kabuar ba iha nia kakorok,
PSA 105:19 too buat nebee nia foo sai akontese duni, no NAI Maromak nia liafuan hatudu katak nia nee loos.
PSA 105:20 Too ikus liurai haruka ema hasai José husi dadur laran; ukun nain nasaun halo nia livre.
PSA 105:21 Liurai foti nia sai nai ulun iha palasiu, atu tau matan ba liurai nia riku-soin hotu,
PSA 105:22 atu manda liurai nia liman-ain sira tuir nia hakarak, no hanorin matenek ba katuas lia nain sira.
PSA 105:23 Hotu tiha Jacó tama ba iha rai Ejitu; Israel hela iha ema Ham nia rain nudar estranjeiru.
PSA 105:24 NAI Maromak halo Nia povu sai buras teb-tebes; Nia halo sira forsa liu fali sira nia funu baluk sira.
PSA 105:25 Nia halo funu baluk sira nia laran fila atu odi Nia povu, atu kombina malu hodi kontra Nia atan sira.
PSA 105:26 Maromak haruka Nia atan Moisés hamutuk ho ema ida nebee Nia hili, nee mak Arão.
PSA 105:27 Sira nain rua hatudu Maromak nia milagre iha Ham nia rain; sira hatudu sai Nia sinal iha povu nia klaran.
PSA 105:28 Maromak haruka nakukun taka metin rai tanba Ejitu oan sira kontra tiha ona Nia liafuan.
PSA 105:29 Nia halo sira nia bee nakfilak ba raan hodi hamate tiha ikan hotu-hotu.
PSA 105:30 Sira nia rai nakonu tiha ho manduku, too tama iha ukun nain sira nia kuartu laran.
PSA 105:31 Nia foo orden mak lalar barak mosu mai, susuk nakonu tiha sira nia nasaun.
PSA 105:32 Nia la hatuun udan ba sira nia rain, maibee hatuun fali udan jelu fatuk; rai lakan taa ba-mai iha sira nia rain.
PSA 105:33 Nia baku tuun tiha sira nia ai uvas ho ai figeira; ai huun iha sira nia rain tomak, Nia silu tohar tiha.
PSA 105:34 Nia foo orden mak gafanhotu mosu mai, barak teb-tebes, sura la bele.
PSA 105:35 Gafanhotu hirak nee haan ai horis hotu-hotu iha sira nia rain; buat nebee moris iha rai leten, gafanhotu haan hotu kedas.
PSA 105:36 Nia oho dasa tiha sira nia oan mane boot hotu iha rai nee; sira nia oan mane primeiru mate mohu.
PSA 105:37 Depois Maromak lori Israel oan sira sai husi rai Ejitu; sira sai lori ho osan mutin ho osan mean; husi Israel nia suku hotu, la iha ema ida mak lao sidi.
PSA 105:38 Bainhira sira hakat sai, ema Ejitu sira laran kamaan, tanba sira tauk ona ema Israel.
PSA 105:39 Maromak habelar kalohan hodi taka Nia povu, no prepara ahi lakan atu foo naroman iha kalan.
PSA 105:40 Sira husu naan, Nia haruka manu kiukae barak ba sira; Nia hatuun paun husi lalehan, sira haan too bosu.
PSA 105:41 Nia loke fatuk boot, bee haksoit sai, suli iha rai fuik maran hanesan mota.
PSA 105:42 Tanba Nia hanoin nafatin Nia promesa santu nebee uluk Nia foo ba Nia atan Abraão.
PSA 105:43 Nunee Maromak lori sai Nia povu ho haksolok; povu nebee Nia hili, Nia halo sira livre ho haklalak ho kontenti.
PSA 105:44 Nia foo tiha nasaun sira seluk nia rain ba sira; buat nebee ema seluk halo too kosar metan suli, sira mak sai nain fali,
PSA 105:45 atu nunee sira kaer metin Nia ukun fuan, no halo tuir Nia lei. Hahii NAI Maromak!
PSA 106:1 Hahii NAI Maromak! Foo agradese ba NAI Maromak, tanba Nia nee diak; Nia domin dura tinan ba tinan.
PSA 106:2 See mak bele foo sai buat boot nebee NAI halo? See mak bele hahii lo-loos Nia?
PSA 106:3 Ema nebee mak kaer metin justisa, ema nebee sempre halo buat nebee loos, sira nee hetan ksolok.
PSA 106:4 NAI Maromak, bainhira Ita Boot hatudu laran luak ba Ita Boot nia povu, keta haluha hau; bainhira Ita Boot salva povu nee, tulun hotu hau ba,
PSA 106:5 atu hau bele moris diak hamutuk ho ema sira nebee Ita Boot hili tiha ona, atu hau bele haksolok ho Ita Boot nia povu, atu hau bele tane aas Ita Boot hamutuk ho Ita Boot nia ema rasik.
PSA 106:6 Ami halo tiha ona sala, hanesan mos ami nia bei-ala sira; ami halo tiha ona pekadu, ami nia hahalok aat.
PSA 106:7 Uluk bainhira ami nia bei-ala sira iha rai Ejitu, sira la foo folin ba milagre nebee Ita Boot halo; sira la hanoin tan domin rohan-laek nebee Ita Boot hatudu fila-fila ba sira; sira kontra Maromak Aas Liu iha Tasi Mean.
PSA 106:8 Maski nunee Maromak salva sira, atu ema bele foti aas Nia naran, atu Nia bele hatudu sai Nia kbiit boot.
PSA 106:9 Nia siak Tasi Mean, tasi maran kedas; Nia lori sira liu husi tasi klaran hanesan fali liu iha rai fuik maran.
PSA 106:10 Nia salva sira husi funu baluk sira nia liman; Nia liberta sira husi inimigu sira nia liman laran.
PSA 106:11 Bee halo mout tiha ema nebee kontra sira; ema sira nee la iha ida mak moris.
PSA 106:12 Depois bei-ala sira fiar ba Nia promesa, no hananu hahii Nia.
PSA 106:13 Maibee lalais deit sira haluha fali buat nebee Maromak halo tiha ona; sira lakohi hein tan Nia lia menon.
PSA 106:14 Iha rai fuik, sira kaan teb-tebes atu haan hahaan diak nian; iha rai fuik maran sira koko Maromak.
PSA 106:15 Nunee Nia foo ba sira buat nebee sira husu, maibee Nia mos haruka moras aat ba iha sira nia leet.
PSA 106:16 Iha sira nia akampamentu, sira laran moras ba Moisés ho Arão, Arão nee NAI Maromak mak hili sai nai lulik.
PSA 106:17 Nunee rai nakloke aan hodi tolan tiha Datan; rai taka hakoi tiha Abiram ho nia grupu.
PSA 106:18 Ahi lakan sae iha sira nia klaran hodi haan mutuk tiha ema aat sira nee.
PSA 106:19 Iha foho Horeb ami nia bei-ala sira halo estatua karau oan; sira adora fali estatua nebee fui husi osan mean.
PSA 106:20 Maromak ida nebee kbiit boot sira husik tiha; sira troka fali ho estatua karau aman, animal nebee haan duut deit.
PSA 106:21 Sira haluha tiha Maromak, sira nia Salvador; Maromak nee mak halo buat boot iha rai Ejitu,
PSA 106:22 Nia halo milagre iha ema Ham nia rain, no halo buat nebee makaas iha Tasi Mean.
PSA 106:23 Nee mak Nia dehan, Nia hakarak halo mohu tiha sira. Maibee Moisés, ema ida nebee Nia hili tiha ona hamriik iha klaran hodi tahan netik Nia hirus ba sira. Nunee Maromak la konsege halo mohu sira.
PSA 106:24 Depois bei-ala sira nee lakohi simu rai nebee furak nee; sira la fiar ba Nia promesa.
PSA 106:25 Sira murmura iha sira nia tenda laran, no lakohi rona NAI Maromak.
PSA 106:26 Nunee Nia foti Nia liman hodi jura katak, Nia sei hamate tiha sira iha rai fuik maran.
PSA 106:27 Nia sei halo sira nia jerasaun namkari iha nasaun sel-seluk; sira sei lao lemo rai iha rai sel-seluk.
PSA 106:28 Sira entrega aan ba estatua Baal iha foho Peor hodi haan fali naan sakrifisiu nebee ema foo ba matebian sira.
PSA 106:29 Sira nia hahalok nee halo Maromak hirus, nunee moras aat mosu iha sira nia klaran.
PSA 106:30 Maibee Fineias hamriik hodi tahan netik, nee mak moras aat nee para tiha.
PSA 106:31 Buat nebee Fineias halo nee, buat diak ida, no ema sei la haluha husi jerasaun ba jerasaun.
PSA 106:32 Iha bee Meriba nian, bei-ala sira halo NAI Maromak hirus; Moisés hetan terus tanba sira nia hahalok aat nee,
PSA 106:33 tanba sira kontra Maromak nia Espiritu, nunee Moisés la hatene tuir liafuan nebee sai husi nia ibun laran.
PSA 106:34 Sira lakohi halo mohu nasaun jentiu sira nebee NAI Maromak haruka sira halo mohu,
PSA 106:35 maibee sira ba ranxu fali nasaun sira nee hodi halo tuir fali sira nia lisan.
PSA 106:36 Sira adora fali ema jentiu sira nia estatua; ida nee lori sira ba rai kuak.
PSA 106:37 Sira oho sira nia oan mane ho oan feto nudar sakrifisiu ba maromak falsu.
PSA 106:38 Sira oho ema nebee la sala; sira fakar sira nia oan feto ho oan mane nia raan hodi foo ba ema Kanaán nia maromak falsu nudar sakrifisiu. Nunee raan nebee fakar nee halo rai nee sai foer tiha.
PSA 106:39 Sira hafoer sira nia aan ho buat nebee sira halo; sira nia hahalok nee hanesan feto kaben nain nebee halai tuir fali mane seluk.
PSA 106:40 Tanba nee NAI Maromak nia laran nakali ba Nia povu; Nia hakribi fali povu nebee Nia hili nudar Nia riku-soin.
PSA 106:41 Nia entrega sira ba iha nasaun jentiu sira nia liman laran, atu sira nia funu baluk mak ukun fali sira.
PSA 106:42 Sira nia inimigu hanehan sira hodi ukun sira ho kroat.
PSA 106:43 Dala barak Maromak salva sira, maibee sira fila kontra fali Nia, nunee sira mout dadauk ba iha sira nia sala.
PSA 106:44 Maski nunee Nia rona sira nia halerik; Nia foo atensaun ba sira iha susar laran.
PSA 106:45 Nia hanoin nafatin Nia promesa ba sira; Nia la kastigu sira, tanba Nia domin boot teb-tebes.
PSA 106:46 Inimigu sira hotu nebee dadur tiha Nia povu, Nia halo sira nia laran hanoin fali dadur sira nee.
PSA 106:47 NAI ami nia Maromak, salva ami ba; halibur fali ami husi nasaun sel-seluk, atu ami bele foo agradese ba Ita Boot nia naran santu, no haksolok hahii Ita Boot.
PSA 106:48 Hahii NAI, Israel nia Maromak, nafatin ba nafatin. Ema hotu-hotu dehan, “Amen!” Hahii NAI Maromak!
PSA 107:1 Foo agradese ba NAI Maromak tanba Nia nee diak; Nia domin dura tinan ba tinan.
PSA 107:2 Imi sira nebee NAI salva ona, konta imi nia istoria ba; Nia hasai tiha ona imi husi funu baluk sira nia liman laran;
PSA 107:3 Nia halibur imi fila fali husi nasaun sel-seluk, husi lorosae-loromonu, husi tasi feto tasi mane.
PSA 107:4 Iha ema balu lao lemo-lemo tiha iha rai fuik maran, la hetan dalan ba sidade ida atu hela.
PSA 107:5 Sira hamlaha-hamrook; sira lakon esperansa ona.
PSA 107:6 Iha susar laran, sira halerik ba NAI Maromak; Nia salva tiha sira husi susar nee.
PSA 107:7 Nia lori sira tuir dalan loos too iha sidade ida nebee sira bele hela.
PSA 107:8 Sira tenki foo agradese ba NAI tanba Nia domin rohan-laek; agradese ba buat furak nebee mak Nia halo ba ita ema.
PSA 107:9 Tanba sira nebee hamrook, Nia foo hemu too hamrook lakon; sira nebee hamlaha, Nia foo ai haan diak nian ba sira too bosu.
PSA 107:10 Iha ema balu dadur tiha, sira tuur hela iha fatin nebee nakukun teb-tebes; korenti besi halo sira terus,
PSA 107:11 tanba sira kontra tiha ona Maromak nia liafuan, no lakohi simu Maromak Aas Liu nia lia menon.
PSA 107:12 Nunee Nia hatodan sira ho servisu too kosar metan suli; sira atu monu sal-sala no la iha ema ida mak tulun.
PSA 107:13 Iha susar laran, sira halerik ba NAI Maromak; Nia salva sira husi susar nee.
PSA 107:14 Nia lori sira sai husi fatin nakukun liu, no hakotu tiha korenti nebee kesi sira.
PSA 107:15 Sira tenki foo agradese ba NAI tanba Nia domin rohan-laek; agradese ba buat furak nebee mak Nia halo ba ita ema.
PSA 107:16 Tanba Nia sobu aat tiha portaun boot nebee halo husi riti; Nia taa kotu tiha besi nebee satan portaun.
PSA 107:17 Iha ema balu hetan moras tanba sira nia hahalok aat; sira hetan terus tanba sira nia pekadu rasik.
PSA 107:18 Sira baruk ho hahaan hotu-hotu; sira besik too ona iha odamatan mate nian.
PSA 107:19 Iha susar laran, sira halerik ba NAI Maromak; Nia salva sira husi susar nee.
PSA 107:20 Nia lia tuun mak sira hetan kura; Nia salva sira husi rai kuak.
PSA 107:21 Sira tenki foo agradese ba NAI tanba Nia domin rohan-laek; agradese ba buat furak nebee mak Nia halo ba ita ema.
PSA 107:22 Sira tenki foo oferta agradesimentu nian, no kanta ho haksolok hodi foo sai buat nebee Nia halo.
PSA 107:23 Iha ema balu sae roo hodi lao iha tasi laran; sira hakur tasi boot hodi halo kontratu.
PSA 107:24 Sira haree buat nebee mak NAI Maromak halo, buat furak nebee Nia halo iha tasi klean.
PSA 107:25 Nia lia tuun, anin boot sai mai hodi hiit sae laloran.
PSA 107:26 Laloran hirak nee sae too lalehan, tuun too rai klean; marineiru sira iha perigu laran, sira tauk teb-tebes.
PSA 107:27 Sira oin halai no lao rungu-ranga hanesan ema lanu; sira nia neon lakon tiha.
PSA 107:28 Iha susar laran, sira halerik ba NAI Maromak; Nia hasai sira husi susar nee.
PSA 107:29 Nia hapara anin boot, no halo laloran hakmatek.
PSA 107:30 Sira hotu kontenti tanba buat sira nee sai kalma fali; Nia lori sira ba rai nebee mak sira atu baa.
PSA 107:31 Sira tenki foo agradese ba NAI tanba Nia domin rohan-laek; agradese ba buat furak nebee mak Nia halo ba ita ema.
PSA 107:32 Sira tenki foti aas Nia naran iha ema lubuk boot nia klaran, no hahii Nia iha nai ulun sira nia leet.
PSA 107:33 Maromak halo mota sai tiha rai fuik maran; Nia halo bee matan sai fali rai maran dekor.
PSA 107:34 Rai nebee bokur sai tiha rai masin, tanba ema nebee hela iha fatin nee, sira nia hahalok aat.
PSA 107:35 Nia halo rai fuik maran nakfilak ba bee lihun; rai maran dekor, Nia halo sai fali bee matan.
PSA 107:36 Ema sira nebee hamlaha, Nia lori sira baa moris iha nebaa; sira mos harii sidade iha nebaa atu bele hela.
PSA 107:37 Sira kari fini iha toos no kuda uvas; sira hetan rezultadu barak.
PSA 107:38 Nia foo bensaun ba sira, nunee sira aumenta barak; sira nia animal mos la menus.
PSA 107:39 Depois ema hanehan sira no halo sira susar ho tristi hodi hatuun sira no halo sira balu mate.
PSA 107:40 Maromak hamoe fali nai ulun hanehan door sira hodi halo sira lao lemo rai iha rai fuik nebee la iha dalan.
PSA 107:41 Maibee Nia foti sae ema kiak sira husi susar laran, no halo sira nia familia aumenta barak hanesan bibi.
PSA 107:42 Ema moris loos haree hodi haksolok, maibee ema aat hotu-hotu taka sira nia ibun.
PSA 107:43 Ema nebee iha matenek sei foo atensaun ba buat sira nee hodi medita NAI Maromak nia domin rohan-laek.
PSA 108:1 Salmu David nian. Maromak, hau laran metin ba Ita Boot; ho hau nia laran tomak, hau sei toka muzika hodi hananu hahii Ita Boot. Hau hatete ba hau nia aan, hadeer ba!
PSA 108:2 Viola ho viola tali sanulu, hadeer ba! Hau sei fanu loro matan.
PSA 108:3 NAI Maromak, hau sei foo agradese ba Ita Boot iha nasaun hotu-hotu nia klaran; hau sei hananu hahii Ita Boot iha povu sira nia leet.
PSA 108:4 Tanba Ita Boot nia domin aas liu lalehan; Ita Boot nia lia loos firmi too iha kalohan.
PSA 108:5 Maromak, hatudu Ita Boot nia Aan aas liu lalehan; halo Ita Boot nia kbiit domina mundu tomak.
PSA 108:6 Hodi Ita Boot nia liman loos salva ami no tulun ami ba, atu nunee ema nebee Ita Boot hadomi bele hetan salvasaun.
PSA 108:7 Maromak lia tuun husi Nia hela fatin dehan, “Hau sei manaan! Hau sei sukat rai Sikem hodi foo ba Hau nia povu; Hau sei fahe rai Sukot ba sira.
PSA 108:8 Rai Gileade Hau nian, rai Manassés mos Hau nian; ema Efraim Hau nia kapaseti, ema Judá Hau nia rota liurai.
PSA 108:9 Rai Moab Hau nia basia hodi fase liman; rai Edom fatin para soe Hau nia sandalias ba; Hau haksolok haklalak tanba Hau manaan rai Filístia.”
PSA 108:10 Maromak, see loos mak atu lori hau ba iha sidade nebee forti? See loos mak atu lori hau ba iha rai Edom?
PSA 108:11 Maromak, Ita Boot soe duni ami ka? Maromak, Ita Boot lakohi avansa ho ami nia militar sira ka?
PSA 108:12 Tulun ami hodi kontra inimigu sira, tanba ema kriatura nia ajuda la iha folin.
PSA 108:13 Hamutuk ho Maromak ita sei manaan; Nia sei sama ita nia inimigu sira.
PSA 109:1 Salmu David nian, ba dirijenti koru. Hau nia Maromak, hau hahii Ita Boot; keta nonook deit,
PSA 109:2 tanba ema aat ho ema lohi door loke sira nia ibun hodi kontra hau; sira nia ibun koalia lia bosok hasoru hau.
PSA 109:3 Sira haleu hau hodi foo sai liafuan odi; sira ataka hau maski hau la sala.
PSA 109:4 Hau hadomi sira no halo orasaun ba sira, maibee sira duun fali hau.
PSA 109:5 Hau nia hahalok diak, sira selu fali ho aat; hau hadomi sira maibee sira odi fali hau.
PSA 109:6 Foti ema aat ruma hodi kontra hau nia inimigu; haruka ema ida hamriik iha nia liman loos hodi foo sala ba nia.
PSA 109:7 Bainhira juis tesi nia lia, hau husu atu juis hatuun desizaun katak nia sala duni; konsidera nia orasaun mos hanesan pekadu ida.
PSA 109:8 Habadak tiha nia vida ba; husik ema seluk hadau tiha nia kargu.
PSA 109:9 Husik nia oan sira sai oan kiak, no nia feen sai faluk tiha.
PSA 109:10 Husik nia oan sira lao lemo rai hodi tane liman ba ema seluk; husik ema duni sira sai husi sira nia uma nebee naksobu tiha ona.
PSA 109:11 Halo nia la bele selu fali nia tusan too osan nain foti tiha nia riku-soin hotu; husik ema fuik mai hadau hotu tiha buat nebee nia hetan husi nia kosar been.
PSA 109:12 Hau husu atu la iha ema ida halo tan buat diak ba nia, ka hanoin nia oan nebee nia husik hela.
PSA 109:13 Halo nia jerasaun sira lakon mohu, nunee sira nia naran hasai tiha husi jerasaun tuir mai.
PSA 109:14 NAI Maromak, hanoin hetan nafatin nia bei-ala sira nia sala ba; keta hamoos nia inan nia pekadu.
PSA 109:15 Husik sira nia sala hela nafatin iha NAI Maromak nia oin, atu nia naran la temi tan iha mundu nee.
PSA 109:16 Tanba nia nunka hanoin atu hatudu laran diak ba ema, maibee nia halo terus ema kiak ho kbiit-laek sira ho ema nebee lakon esperansa hodi oho sira.
PSA 109:17 Nia gosta foo sai malisan ba ema; husik malisan nee fila fali ba nia. Nia lakohi foo bensaun ba ema; husik bensaun mos dook tiha husi nia.
PSA 109:18 Malisan sai tiha hanesan fali hena nebee nia hatais loro-loron; halo malisan tama tiha ona iha nia isin lolon hanesan bee nebee nia hemu; halo malisan tama liu ba iha nia ruin hanesan mina nebee nia kose.
PSA 109:19 Halo malisan falun nia hanesan ropa nebee nia hatais, no sempre kesi metin nia hanesan sintu.
PSA 109:20 NAI Maromak, hatuun kastigu hirak nee hodi selu fali ema nebee duun hau; foo kastigu nee ba ema nebee mak hatete aat hau.
PSA 109:21 Maibee NAI Maromak Kbiit Nain, tulun hau, atu ema foti aas Ita Boot nia naran; salva hau, tanba Ita Boot nia domin nee diak teb-tebes.
PSA 109:22 Tanba hau kiak no kbiit-laek, no hau nia fuan kanek too laran.
PSA 109:23 Uitoan tan hau lakon hanesan lalatak nebee mohu bainhira loro matan monu; hau hanesan gafanhotu nebee anin huu lakon tiha.
PSA 109:24 Hau nia ain tuur nakdedar tanba jejun; hau nia isin sai krekas, kulit taka ruin.
PSA 109:25 Ema nebee duun hau hamnasa fali hau; sira haree hau, sira doko ulun.
PSA 109:26 NAI hau nia Maromak, tulun hau ba; salva hau tuir Ita Boot nia domin rohan-laek.
PSA 109:27 Foo hatene ba sira katak Ita Boot nia liman mak halo ida nee, NAI Maromak mak salva hau.
PSA 109:28 Sira bele hotar hau, maibee Ita Boot sei foo bensaun; husik ema nebee ataka hau hetan moe, maibee Ita Boot nia atan hau hetan ksolok.
PSA 109:29 Husik ema nebee duun hau hetan naran foer hodi falun aan ho moe hanesan fali taka hena.
PSA 109:30 Hau nia ibun sei agradese ba NAI Maromak; hau sei hahii Nia iha ema lubuk boot nia klaran.
PSA 109:31 Tanba Maromak defende ema kbiit-laek sira hodi salva sira husi ema nebee atu hamonu kastigu mate ba sira.
PSA 110:1 Salmu David nian. NAI Maromak hatete ona ba hau nia nai nunee: “Mai tuur iha Hau nia sorin loos, too Hau halo o nia inimigu sira taka rabat iha o nia ain okos.”
PSA 110:2 NAI Maromak sei haboot o nia kbiit nudar liurai; o ukun husi Siaun; too o nia inimigu sira mos o sei ukun!
PSA 110:3 Iha loron nebee o hamriik iha foho santu atu halo funu, o nia tropas sira sei prontu; o nia mane joven sira sei mai hanesan mahobeen iha dadeer-saan.
PSA 110:4 NAI Maromak jura tiha ona, no sei la muda Nia promesa dehan, “O sai nai lulik tinan ba tinan, hanesan Melkizedek.”
PSA 110:5 Nai Maromak iha hela o nia sorin loos; iha loron nebee Nia fakar sai Nia hirus, Nia sei hamohu tiha liurai husi rai sel-seluk.
PSA 110:6 Nia sei hamonu kastigu ba nasaun jentiu sira hodi halakon tiha ukun nain sira iha mundu tomak, too mate isin bar-barak bou hamutuk.
PSA 110:7 Liurai sei hemu bee husi mota oan iha dalan ninin, nunee nia sei forti fali hodi foti sae nia ulun.
PSA 111:1 Hahii NAI Maromak! Hau sei agradese ba NAI Maromak ho hau nia laran tomak bainhira hau halibur malu ho ema nebee moris loos.
PSA 111:2 NAI Maromak halo buat mesak furak; see mak gosta haree buat nebee Maromak halo, sira medita buat sira nee.
PSA 111:3 Nia hahalok hatudu sai Nia naran boot ho Nia naroman nabilan; Nia sempre halo buat nebee loos too tinan ba tinan.
PSA 111:4 Nia halo ita la bele haluha Nia milagre; NAI nee laran luak no laran diak.
PSA 111:5 Nia foo ai haan ba ema nebee mak hamtauk Nia; Nia hanoin nafatin Nia promesa tinan ba tinan.
PSA 111:6 Nia hatudu Nia kbiit ba Nia povu hodi entrega nasaun seluk nia rai ba sira.
PSA 111:7 Nia sempre halo buat nebee loos ho justu; Nia lei tomak ita bele konfia.
PSA 111:8 Lei sira nee vale too tinan ba tinan; ita tenki moris tuir ho fuan tomak ho laran moos.
PSA 111:9 Maromak foo liberdade ba Nia povu; Nia hatuur Nia promesa ho lei ba sira tinan ba tinan. Nia naran santu, Nia makaas teb-tebes.
PSA 111:10 Matenek nia huun mai husi hamtauk NAI Maromak; ema hotu nebee halo tuir Nia liafuan sei hatene klean. Hahii Nia tinan ba tinan!
PSA 112:1 Hahii NAI Maromak! Ema nebee hamtauk NAI Maromak, no gosta teb-tebes Nia ukun fuan, sira hetan ksolok.
PSA 112:2 Sira nia oan sira naran boot iha rai nee; ema moris loos nia jerasaun sei hetan bensaun.
PSA 112:3 Sira nia uma laran sei iha riku-soin bar-barak; sira nia hahalok diak nafatin too tinan ba tinan.
PSA 112:4 Maski iha nakukun laran, naroman sempre leno ema nebee laran moos; sira nee laran diak, laran luak no moris loos.
PSA 112:5 Ema nebee liman nakloke hodi foo empresta osan ba ema seluk, no halao sira nia moris ho lo-loos, sira hetan diak.
PSA 112:6 Tebes duni, ema nebee moris ho laran moos nunka atu nakdoko; ema seluk sei hanoin nafatin sira tinan ba tinan.
PSA 112:7 Sira sei la tauk bainhira rona notisia nebee la diak; sira nia laran metin, sira abut metin iha NAI Maromak.
PSA 112:8 Sira nia laran hakmatek, sira sei la tauk; too ikus sira haree sira nia inimigu lakon.
PSA 112:9 Sira fahe buat bar-barak ba ema kiak sira; sira nia hahalok diak iha nafatin too tinan ba tinan; sira sei makaas, no hetan respeitu.
PSA 112:10 Haree nunee, ema aat sira sei hirus; sira sei ruun nehan too sira lakon mohu tiha; ema aat sira nia hakarak sei la vale tiha.
PSA 113:1 Hahii NAI Maromak! NAI Maromak nia atan sira, hahii Nia ba; hahii NAI nia naran.
PSA 113:2 Foti aas NAI nia naran agora too tinan ba tinan.
PSA 113:3 Husi lorosae too loromonu, hahii NAI nia naran ba.
PSA 113:4 NAI Maromak nee domina nasaun hotu-hotu; Nia kbiit aas liu lalehan.
PSA 113:5 See mak hanesan ita nia NAI Maromak? Nia tuur iha leten aas ba hodi ukun.
PSA 113:6 Husi nebaa Nia hakruuk hodi hateke tuun mai lalehan ho rai.
PSA 113:7 Nia foti sae ema kiak husi rai rahun; Nia hasae ema kbiit-laek husi ahu kdesan laran.
PSA 113:8 Nia halo sira tuur hamutuk ho liurai oan sira; sira tuur hamutuk ho nai ulun sira nebee ukun Nia povu.
PSA 113:9 Feto nebee la kous, Maromak halo nia hetan oan, nunee nia moris ho haksolok iha nia uma laran. Hahii NAI Maromak!
PSA 114:1 Uluk povu Israel sai husi rai Ejitu; Jacó nia jerasaun sai husi rai nebee koalia lian estranjeiru.
PSA 114:2 Iha tempu nebaa rai Judá sai Maromak nia fatin santu; ema Israel sai povu nebee Nia ukun.
PSA 114:3 Tasi haree, halai sees tiha; mota Jordaun hakiduk fali ba kotuk.
PSA 114:4 Foho boot sira haksoit hanesan bibi aman; foho kiik sira haksoit hanesan bibi oan.
PSA 114:5 Tasi, tansaa mak o halai sees tiha? Mota Jordaun, tansaa mak o hakiduk fali ba kotuk?
PSA 114:6 Foho boot sira, tansaa mak imi haksoit hanesan bibi aman? Foho kiik sira, tansaa mak imi haksoit hanesan bibi oan?
PSA 114:7 Mundu tomak, tauk ho nakdedar iha Nai Maromak nia oin ba; hamtauk iha Jacó nia Maromak nia oin.
PSA 114:8 Nia halo fatuk lolon boot sai fali bee lihun; fatuk nebee toos sai tiha bee matan.
PSA 115:1 NAI Maromak, ami laos husu atu Ita Boot tane aas ami nia naran, nee lae! Maibee tane aas Ita Boot nia naran, tanba Ita Boot nia domin rohan-laek no Ita Boot sempre kaer metin Ita Boot nia liafuan.
PSA 115:2 Tansaa mak nasaun jentiu sira husu fali dehan, “Sira nia Maromak iha nebee?”
PSA 115:3 Ami nia Maromak iha lalehan; Nia halo saida deit tuir Nia hakarak.
PSA 115:4 Maibee ema jentiu sira adora fali estatua lulik nebee ema kriatura mak halo husi osan mean ho osan mutin.
PSA 115:5 Iha ibun maibee la bele koalia; iha matan maibee la bele haree.
PSA 115:6 Iha tilun maibee la bele rona; iha inus maibee la bele horon.
PSA 115:7 Iha liman maibee la bele senti; iha ain maibee la bele lao; sira la bele hasai lian husi sira nia kakorok.
PSA 115:8 Ema nebee kria estatua lulik sira nee, sira sai hanesan fali buat nebee sira kria nee; ema nebee fiar ba estatua sira nee mos sei sai nunee hotu.
PSA 115:9 Israel oan sira, laran metin ba NAI Maromak ba; Nia mak tulun imi no defende imi.
PSA 115:10 Arão nia jerasaun, laran metin ba NAI Maromak ba; Nia mak tulun imi no defende imi.
PSA 115:11 Imi sira nebee hamtauk NAI Maromak, laran metin ba NAI Maromak ba; Nia mak tulun imi no defende imi.
PSA 115:12 NAI hanoin ita, no sei foo bensaun ba ita; Nia sei foo bensaun ba povu Israel; Nia sei foo bensaun ba Arão nia jerasaun.
PSA 115:13 Ema kiik ka ema boot nebee hamtauk NAI, Nia sei foo bensaun ba sira.
PSA 115:14 Hau harohan atu NAI Maromak halo imi sai buras, atu imi ho imi nia oan sira aumenta barak.
PSA 115:15 NAI foo bensaun ba imi; Kriador lalehan ho rai nian foo bensaun ba imi.
PSA 115:16 Lalehan nebaa NAI nian, maibee mundu nee Nia foo tiha ona ba ema kriatura.
PSA 115:17 Laos ema mate mak hahii NAI; laos ema nebee mak tuun tiha ona ba fatin lian-laek mak gaba Nia.
PSA 115:18 Maibee ita nee mak hahii adora NAI, agora too tinan ba tinan. Hahii NAI Maromak!
PSA 116:1 Hau hadomi NAI Maromak tanba Nia rona hau nia lian; Nia rona hau bainhira hau husu tulun.
PSA 116:2 Nia see tilun mai hau, nunee durante hau sei moris, hau sei harohan nafatin ba Nia.
PSA 116:3 Uluk tali mate nian bobar hela hau; susar rate nian haleu hau; hau tristi ho laran dodok.
PSA 116:4 Depois hau bolu NAI Maromak nia naran; hau harohan, “NAI, mai salva hau ba!”
PSA 116:5 NAI nee laran diak no sempre halo buat nebee loos; ita nia Maromak nee laran luak.
PSA 116:6 NAI foo mahon ba ema nebee mak matan tomak; Nia salva hau bainhira hau la bele halo buat ida.
PSA 116:7 Hau hatete ba hau nia aan, “Hakmatek fila fali ba, tanba NAI halo buat diak ba o.”
PSA 116:8 NAI, Ita Boot hasai tiha ona hau husi mate; Ita Boot hamaran tiha hau nia matan been, no halo hau nia ain la sidi.
PSA 116:9 Nunee hau lao iha NAI nia prezensa, iha ema moris sira nia rain.
PSA 116:10 Uluk hau dehan, “Hau terus aat liu.” Bele nunee mos hau konfia NAI Maromak.
PSA 116:11 Iha konfuzaun laran hau dehan, “Ema hotu-hotu bosok-teen.”
PSA 116:12 Oinsaa mak hau bele selu fali NAI Maromak nia diak tomak nebee Nia halo ona mai hau?
PSA 116:13 Hau sei hasae oferta tua hodi agradese tanba NAI salva tiha ona hau; hau sei bolu NAI nia naran.
PSA 116:14 Ho nunee hau kumpri hau nia promesa ba NAI iha Nia povu hotu nia oin.
PSA 116:15 NAI Maromak hanoin teb-tebes bainhira Nia ema ida mate.
PSA 116:16 Tebes duni NAI, hau serbi Ita Boot; hau nee Ita Boot nia atan, hanesan mos hau nia inan. Ita Boot hasai tiha ona hau husi lasu.
PSA 116:17 Hau sei foo oferta agradesimentu nian ba Ita Boot hodi bolu Ita Boot nia naran.
PSA 116:18 Hau sei kumpri hau nia promesa ba NAI iha Nia povu hotu nia oin,
PSA 116:19 iha NAI nia uma oin iha Jerusalém. Hahii NAI Maromak!
PSA 117:1 Imi nasaun hotu-hotu, hahii NAI Maromak; povu hotu-hotu, haboot Nia naran ba.
PSA 117:2 Tanba NAI nia domin mai ita boot teb-tebes, no Nia promesa ba ita dura tinan ba tinan. Hahii NAI Maromak!
PSA 118:1 Foo agradese ba NAI Maromak, tanba Nia nee diak; Nia domin dura tinan ba tinan.
PSA 118:2 Israel oan sira, dehan sai ba, “Nia domin dura tinan ba tinan.”
PSA 118:3 Arão nia jerasaun sira, dehan sai ba, “Nia domin dura tinan ba tinan.”
PSA 118:4 Ema nebee hamtauk NAI Maromak, dehan sai ba, “Nia domin dura tinan ba tinan.”
PSA 118:5 Bainhira susar hanehan hau, hau halerik ba NAI Maromak; Nia lori tiha hau ba iha rai luan.
PSA 118:6 NAI hamutuk ho hau, nunee hau la tauk ida. Ema mundu nee bele halo saida ba hau?
PSA 118:7 NAI hamutuk ho hau; Nia mak tulun hau; hau sei haree hau nia inimigu sira lakon.
PSA 118:8 Diak liu hamahon aan iha NAI duke tau laran ba ema mundu nee.
PSA 118:9 Diak liu hamahon aan iha NAI duke tau laran ba ukun nain sira.
PSA 118:10 Uluk nasaun jentiu hotu-hotu mai serku hau, maibee hodi NAI nia naran, hau baku tuun tiha sira.
PSA 118:11 Sira serku hau husi sor-sorin, maibee hodi NAI nia naran, hau baku tuun tiha sira.
PSA 118:12 Sira hobur hau hanesan bani, maibee ahi haan sira lalais hanesan fali ahi haan ai tarak; hodi NAI nia naran hau baku tuun tiha sira.
PSA 118:13 Ema dudu hau ba kotuk, hau besik atu monu, maibee NAI tulun tiha hau.
PSA 118:14 NAI mak hau nia forsa; hau hananu ba Nia; Nia sai tiha ona hau nia Salvador.
PSA 118:15 Ema moris loos haksolok iha sira nia tenda laran tanba sira manaan; sira haklalak dehan, “NAI nia liman loos halo ona buat boot!
PSA 118:16 NAI foti aas tiha ona Nia liman loos; NAI nia liman loos halo ona buat boot!”
PSA 118:17 Hau sei la mate maibee moris, no hau sei foo sai buat nebee mak NAI halo tiha ona.
PSA 118:18 NAI foo ona kastigu todan mai hau, maibee Nia la entrega hau ba mate.
PSA 118:19 Loke portaun moris loos nian mai hau, atu hau bele tama ba laran hodi foo agradese ba NAI Maromak.
PSA 118:20 Ida nee mak NAI nia portaun; ema nebee moris loos sei tama husi nee.
PSA 118:21 Hau foo agradese ba Ita Boot, tanba Ita Boot rona ona hau; Ita Boot sai tiha ona hau nia Salvador.
PSA 118:22 Iha fatuk ida nebee badaen fatuk sira lakohi uza, maibee agora fatuk nee mak sai fali fatuk nebee prinsipal.
PSA 118:23 NAI Maromak rasik mak hili fatuk nee; ita haree ba furak teb-tebes.
PSA 118:24 Ohin loron mak NAI Maromak halo nunee; mai ita haksolok ho kontenti iha loron ida nee.
PSA 118:25 NAI Maromak, favor salva ami! NAI, foo rezultadu diak ba ami nia servisu.
PSA 118:26 NAI foo bensaun ba ema ida nebee mai lori NAI nia naran; husi NAI nia uma ami foo bensaun ba imi.
PSA 118:27 NAI mak Maromak; Nia foo tiha ona Nia naroman hodi leno ita. Kaer ramus tahan iha liman laran ba hodi halo prosisaun too iha altar.
PSA 118:28 Ita Boot mak hau nia Maromak, hau sei hahii Ita Boot; Ita Boot mak hau nia Maromak, hau sei foti aas Ita Boot nia naran.
PSA 118:29 Foo agradese ba NAI Maromak, tanba Nia nee diak; Nia domin dura tinan ba tinan.
PSA 119:1 Ema nebee moris livre husi sala, no lao tuir NAI Maromak nia lei, sira hetan bensaun.
PSA 119:2 Ema nebee kaer metin Nia mandamentu, no buka Nia ho laran tomak, sira hetan bensaun.
PSA 119:3 Sira la halo sala; sira lao tuir Nia dalan.
PSA 119:4 NAI, Ita Boot hatuur tiha ona regra atu ami halo tuir tomak.
PSA 119:5 Hau hakarak teb-tebes atu iha hau nia moris tomak, hau kaer metin Ita Boot nia lei.
PSA 119:6 Nunee hau sei la moe leet bainhira hau fihir metin Ita Boot nia ukun fuan hotu-hotu.
PSA 119:7 Ita Boot nia regulamentu loos; hau aprende dadauk hodi hahii Ita Boot ho laran moos.
PSA 119:8 Hau sei halo tuir Ita Boot nia lei; keta husik hau mesak.
PSA 119:9 Oinsaa mak joven ida bele moris loos nafatin? Nia presiza moris tuir Ita Boot nia liafuan.
PSA 119:10 Hau buka Ita Boot ho hau nia laran tomak; keta husik hau lao sees fali husi Ita Boot nia ukun fuan.
PSA 119:11 Hau rai metin Ita Boot nia liafuan iha hau nia laran atu hau la bele halo sala hasoru Ita Boot.
PSA 119:12 NAI Maromak, hau hahii Ita Boot; hanorin Ita Boot nia lei mai hau.
PSA 119:13 Regulamentu hotu-hotu nebee Ita Boot nia ibun hatete sai, hau sei konta sai.
PSA 119:14 Hau kontenti halo tuir Ita Boot nia mandamentu hanesan fali ema kontenti ho nia riku-soin boot.
PSA 119:15 Hau medita Ita Boot nia regra, no fihir metin Ita Boot nia dalan.
PSA 119:16 Hau haksolok teb-tebes ho Ita Boot nia regulamentu; hau sei la haluha Ita Boot nia liafuan.
PSA 119:17 Halo diak ba Ita Boot nia atan hau, atu hau bele moris hodi halo tuir Ita Boot nia liafuan.
PSA 119:18 Loke hau nia matan atu hau bele haree buat furak iha Ita Boot nia lei.
PSA 119:19 Hau ema lao rai iha mundu nee; keta subar Ita Boot nia ukun fuan mai hau.
PSA 119:20 Loron-kalan hau hamlaha-hamrook ba Ita Boot nia regulamentu.
PSA 119:21 Ita Boot siak ema nebee foti aan; see mak lao sees husi Ita Boot nia ukun fuan, sira hetan malisan.
PSA 119:22 Hasai tiha liafuan insulta no liafuan aat nebee sira hatete mai hau, tanba hau kaer metin Ita Boot nia mandamentu.
PSA 119:23 Maski nai ulun sira tuur hodi kombina malu hasoru hau, maibee Ita Boot nia atan hau sei medita Ita Boot nia lei.
PSA 119:24 Ita Boot nia mandamentu mak hau nia ksolok; mandamentu nee mak hau nia matadalan.
PSA 119:25 Hau tuur hakdasak hela iha rai rahun; hodi Ita Boot nia liafuan hafoun fali hau nia moris ba.
PSA 119:26 Hau nia lalaok moris nian hau konta tiha ona ba Ita Boot, no Ita Boot hataan; hanorin Ita Boot nia lei mai hau.
PSA 119:27 Halo hau kompriende Ita Boot nia regra nia lalaok oinsaa, atu hau bele medita buat furak nebee Ita Boot halo.
PSA 119:28 Hau tristi ho laran susar; hodi Ita Boot nia liafuan haforsa hau ba.
PSA 119:29 Hadook hau husi dalan bosok nian; hanoin hau, hanorin Ita Boot nia lei mai hau.
PSA 119:30 Hau hili tiha ona dalan loos nian; hau foo aan tomak hodi halo tuir Ita Boot nia regulamentu.
PSA 119:31 NAI Maromak, hau kaer metin hela Ita Boot nia mandamentu; keta husik hau moe leet.
PSA 119:32 Hau duni tuir Ita Boot nia ukun fuan, tanba Ita Boot halo hau kompriende klean.
PSA 119:33 NAI Maromak, hanorin hau kona ba Ita Boot nia lei nia lalaok, atu hau bele lao tuir too rohan.
PSA 119:34 Halo hau kompriende, nunee hau sei kaer metin Ita Boot nia lei hodi halo tuir ho laran tomak.
PSA 119:35 Tulun hau atu moris tuir Ita Boot nia ukun fuan, tanba ida nee foo ksolok mai hau.
PSA 119:36 Halo hau nia laran ba deit Ita Boot nia mandamentu, laos ba riku-soin.
PSA 119:37 Hasees tiha hau nia matan husi buat nebee la iha folin; hodi Ita Boot nia liafuan hafoun fali hau nia moris ba.
PSA 119:38 Halo tuir Ita Boot nia promesa ba Ita Boot nia atan hau; promesa nee foo ba ema nebee hamtauk Ita Boot.
PSA 119:39 Ema nia liafuan insulta halo hau laran todan atu rona; hasai tiha ba, tanba Ita Boot nia regra diak.
PSA 119:40 Hau hakarak teb-tebes halo tuir Ita Boot nia regra; hafoun fali hau nia moris tanba Ita Boot nee diak.
PSA 119:41 NAI Maromak, hau husu atu Ita Boot nia domin rohan-laek mai too iha hau; salva hau tuir Ita Boot nia promesa.
PSA 119:42 Nunee hau bele hataan ema nebee mak hatete aat hau, tanba hau kaer metin Ita Boot nia liafuan.
PSA 119:43 Keta hasai lia loos husi hau nia ibun, tanba hau laran metin ba ita Boot nia regulamentu.
PSA 119:44 Hau sei halo tuir Ita Boot nia lei beibeik, too tinan ba tinan.
PSA 119:45 Hau sei lao ho livre, tanba hau buka Ita Boot nia regra.
PSA 119:46 Hau sei koalia kona ba Ita Boot nia mandamentu iha liurai sira nia oin; hau sei la moe.
PSA 119:47 Hau haksolok teb-tebes ho Ita Boot nia ukun fuan, tanba hau nia laran monu ba ukun fuan sira nee.
PSA 119:48 Hau nia laran monu, nunee hau tane aas ita Boot nia ukun fuan sira nee; hau medita Ita Boot nia lei.
PSA 119:49 Hanoin nafatin Ita Boot nia liafuan ba Ita Boot nia atan hau, tanba liafuan nee foo esperansa mai hau.
PSA 119:50 Buat nebee konsola hau iha terus laran mak nee: Ita Boot nia promesa hafoun fali hau nia moris.
PSA 119:51 Ema foti aan sira sempre hatuun hau, maibee hau la lao sees husi Ita Boot nia lei.
PSA 119:52 NAI Maromak, hau hanoin nafatin regulamentu nebee Ita Boot foo hori uluk liu; regulamentu nee halo hau nia laran hakmatek.
PSA 119:53 Bainhira ema aat fila kotuk ba Ita Boot nia lei, hau nia laran nakali.
PSA 119:54 Hau hela iha nebee deit, hau hananu kona ba Ita Boot nia lei.
PSA 119:55 NAI Maromak, iha kalan hau hanoin Ita Boot nia naran; hau kaer metin Ita Boot nia lei.
PSA 119:56 Hau sempre halo tuir Ita Boot nia regra; ida nee mak hau nia lalaok moris.
PSA 119:57 NAI Maromak, hau nia riku-soin mak Ita Boot; hau promete tiha ona atu halo tuir Ita Boot nia liafuan.
PSA 119:58 Ho laran tomak hau husu atu Ita Boot haree hau diak; hanoin hau tuir Ita Boot nia promesa.
PSA 119:59 Hau tetu hau nia hahalok; hau fila hodi hakat tuir Ita Boot nia mandamentu haruka.
PSA 119:60 Hau sei halo tuir kedas Ita Boot nia ukun fuan; hau sei la demora.
PSA 119:61 Ema aat sira nia talin kesi metin hau; bele nunee mos hau sei la haluha Ita Boot nia lei.
PSA 119:62 Iha kalan boot hau hadeer hodi foo agradese ba Ita Boot, tanba Ita Boot nia regulamentu nee loos.
PSA 119:63 Hau sai belun ba ema hotu nebee mak hamtauk Ita Boot, ba ema nebee mak kaer metin Ita Boot nia regra.
PSA 119:64 NAI Maromak, mundu nee nakonu ho Ita Boot nia domin rohan-laek; hanorin Ita Boot nia lei mai hau.
PSA 119:65 NAI Maromak, Ita Boot halo ona buat diak ba Ita Boot nia atan hau tuir Ita Boot nia lia fuan.
PSA 119:66 Hanorin hau atu hau bele matenek hodi foti desizaun ho loos, tanba hau fiar ba Ita Boot nia ukun fuan.
PSA 119:67 Uluk hau lao sala dalan, Ita Boot halo hau terus, maibee agora hau kaer metin Ita Boot nia liafuan.
PSA 119:68 Ita Boot nee diak, no buat nebee Ita Boot halo mos diak; hanorin Ita Boot nia lei mai hau.
PSA 119:69 Ema foti aan sira bosok hodi hafoer hau nia naran, maibee ho laran tomak hau kumpri ita Boot nia regra.
PSA 119:70 Sira nia fuan toos, maibee hau haksolok teb-tebes ho Ita Boot nia lei.
PSA 119:71 Uluk Ita Boot halo hau terus, nee diak ba hau atu hau bele aprende Ita Boot nia lei.
PSA 119:72 Lei nebee sai husi Ita Boot nia ibun nee diak ba hau liu fali osan mean osan mutin rihun ba rihun.
PSA 119:73 Ita Boot nia liman mak kria hau no forma hau; loke hau nia neon atu hau aprende Ita Boot nia ukun fuan.
PSA 119:74 Ema sira nebee hamtauk Ita Boot haksolok bainhira sira haree hau, tanba hau laran metin ba Ita Boot nia liafuan.
PSA 119:75 NAI Maromak, hau hatene Ita Boot sempre tesi lia ho lo-loos; uluk Ita Boot halo hau terus, tanba Ita Boot sempre hakarak atu hau sai diak.
PSA 119:76 Hau husu atu Ita Boot nia domin rohan-laek bele halo hau nia laran hakmatek, hanesan Ita Boot promete ona ba Ita Boot nia atan hau.
PSA 119:77 Hatudu Ita Boot nia laran luak mai hau atu hau bele moris, tanba Ita Boot nia lei halo haksolok hau nia laran.
PSA 119:78 Halo ema foti aan sira moe leet tanba sira duun matak hau; hau medita hela Ita Boot nia regra.
PSA 119:79 Hau harohan atu ema sira nebee hamtauk Ita Boot, hakbesik mai hau, atu sira bele kompriende Ita Boot nia mandamentu.
PSA 119:80 Tulun hau atu halo tuir Ita Boot nia lei ho laran moos, atu nunee hau la bele moe leet.
PSA 119:81 Hau hein Ita Boot nia salvasaun too fraku ona, maibee hau laran metin ba Ita Boot nia liafuan.
PSA 119:82 Hau nia matan kole ona hodi buka Ita Boot nia promesa; hau dehan, “Bainhira loos mak Ita Boot atu foo konsola hau?”
PSA 119:83 Hau hanesan tua fatin nebee kuak tiha ona; bele nunee mos hau la haluha Ita Boot nia lei.
PSA 119:84 Ita Boot nia atan hau tenki hein too bainhira tan? Bainhira loos mak Ita Boot kastigu ema nebee halo terus hau?
PSA 119:85 Ema foti aan sira kee rai kuak atu hamonu hau; hahalok nee kontra Ita Boot nia lei.
PSA 119:86 Ita Boot nia ukun fuan hotu-hotu ema bele konfia; tulun hau tanba ema halo terus hau maski hau la sala.
PSA 119:87 Sira besik atu halakon hau nia vida husi mundu nee, maibee hau la husik Ita Boot nia regra.
PSA 119:88 Hodi Ita Boot nia domin rohan-laek hafoun fali hau nia moris ba, atu hau bele kaer metin mandamentu nebee sai husi Ita Boot nia ibun.
PSA 119:89 NAI Maromak, Ita Boot nia liafuan dura nafatin ba nafatin; liafuan nee firmi iha lalehan.
PSA 119:90 Ita Boot kaer metin Ita Boot nia liafuan husi jerasaun ba jerasaun; Ita Boot mak harii mundu nee, nunee mundu iha nafatin.
PSA 119:91 Buat hirak nee hotu dura too ohin loron tanba hotu-hotu tuir Ita Boot nia orden.
PSA 119:92 Se karik hau la haksolok ho Ita Boot nia lei, entaun iha momentu hau hetan terus, hau mate tiha ona.
PSA 119:93 Hau nunka atu haluha Ita Boot nia regra, tanba liu husi regra sira nee mak ita Boot hafoun hau nia moris.
PSA 119:94 Hau Ita Boot nian, salva hau ba, tanba hau buka Ita Boot nia regra.
PSA 119:95 Ema aat sira hein hela atu halakon hau nia vida, maibee hau sei reflete Ita Boot nia regra.
PSA 119:96 Hau haree buat hotu-hotu iha rohan, maibee Ita Boot nia ukun fuan la iha rohan.
PSA 119:97 Hau gosta teb-tebes Ita Boot nia lei; hau medita lei nee iha loron tomak.
PSA 119:98 Ita Boot nia ukun fuan sempre hamutuk ho hau, halo hau matenek liu hau nia inimigu sira.
PSA 119:99 Hau kompriende liu fali hau nia mestri sira, tanba hau medita Ita Boot nia mandamentu.
PSA 119:100 Hau kompriende klean liu fali ferik-katuas sira, tanba hau halo tuir Ita Boot nia regra.
PSA 119:101 Hau kuidadu hau nia aan husi dalan aat saida deit, atu nunee hau bele halo tuir Ita Boot nia liafuan.
PSA 119:102 Hau nunka lao sees husi Ita Boot nia regulamentu, tanba Ita Boot rasik mak hanorin hau.
PSA 119:103 Ita Boot nia liafuan midar tebes mai hau, midar liu bani been iha hau nia ibun.
PSA 119:104 Hau hetan matenek husi Ita Boot nia regra; tanba nee hau hakribi hahalok aat saida deit.
PSA 119:105 Ita Boot nia liafuan foo naroman atu hau bele lao ba oin; liafuan nee ahi oan hodi leno hau nia dalan.
PSA 119:106 Ita Boot nia regulamentu loos hotu, hau jura tiha ona atu halo tuir, no hau sei kumpri juramentu nee.
PSA 119:107 NAI Maromak, hau terus liu ona; hodi Ita Boot nia liafuan hafoun fali hau nia moris ba.
PSA 119:108 Hau hasae orasaun agradesimentu nian ba Ita Boot nudar oferta ida; NAI, simu ba hodi hanorin Ita Boot nia regulamentu mai hau.
PSA 119:109 Maski dala barak hau iha perigu laran, hau sei la haluha Ita Boot nia lei.
PSA 119:110 Ema aat sira tau ona lasu mai hau, maibee hau la lao sees husi Ita Boot nia regra.
PSA 119:111 Ita Boot nia mandamentu mak hau nia riku-soin tinan ba tinan, no halo hau nia laran haksolok.
PSA 119:112 Hau foo laran hodi halo tuir Ita Boot nia lei agora too rohan.
PSA 119:113 Hau odi ema nebee laran ru-rua, maibee hau gosta teb-tebes Ita Boot nia lei.
PSA 119:114 Ita Boot mak hau nia subar fatin; Ita Boot mak defende hau; hau tau fiar ba Ita Boot nia liafuan.
PSA 119:115 Imi ema aat sira, dook tiha husi hau, atu hau bele halo tuir hau nia Maromak nia ukun fuan.
PSA 119:116 Tane hau tuir Ita Boot nia promesa, atu nunee hau bele moris; hau laran metin ba Ita Boot, keta husik hau moe leet.
PSA 119:117 Tulun hau mak hau sei hetan salvasaun; nunee hau sei foo laran beibeik ba Ita Boot nia lei.
PSA 119:118 Ita Boot la simu ema sira nebee lao sees husi Ita Boot nia lei; sira lohi tuun lohi sae mos la iha folin.
PSA 119:119 Ita Boot haree ema aat iha mundu nee hanesan lixu; tanba nee hau gosta teb-tebes Ita Boot nia mandamentu.
PSA 119:120 Hau nia isin nakdedar tanba hau tauk Ita Boot; hau tauk Ita Boot nia justisa.
PSA 119:121 Hau halo tiha ona buat nebee loos ho justu; la bele husik hela hau iha hanehan door sira nia liman laran.
PSA 119:122 Kuidadu hau ata nia moris; keta husik ema foti aan sira hanehan hau.
PSA 119:123 Hau nia matan kole ona tanba hein hela Ita Boot atu salva hau tuir Ita Boot promete tiha ona.
PSA 119:124 Halo diak ba Ita Boot nia atan hau, tuir Ita Boot nia domin rohan-laek; hanorin Ita Boot nia lei mai hau.
PSA 119:125 Hau nee Ita Boot nia atan, halo hau kompriende, atu hau hatene Ita Boot nia mandamentu.
PSA 119:126 NAI Maromak, agora mak tempu ba Ita Boot atu hamriik, tanba ema la halo tuir tiha ona Ita Boot nia lei.
PSA 119:127 Hau gosta Ita Boot nia ukun fuan liu fali osan mean, liu fali osan mean diak nian.
PSA 119:128 Hau haree Ita Boot nia regra hotu-hotu loos; tanba nee hau hakribi hahalok aat saida deit.
PSA 119:129 Ita Boot nia mandamentu furak; tanba nee hau halo tuir.
PSA 119:130 Ita Boot nia liafuan nakloke hodi foo naroman, halo ema matan tomak sira kompriende.
PSA 119:131 Hau hamrook teb-tebes ba Ita Boot nia ukun fuan, hanesan ema nebee hamrook too kakorok maran.
PSA 119:132 Fila mai hau hodi hanoin hau, hanesan Ita Boot hanoin ema hotu nebee hadomi Ita Boot.
PSA 119:133 Hatudu dalan mai hau atu hau bele lao tuir Ita Boot nia liafuan; keta husik buat aat ukun hau.
PSA 119:134 Salva hau husi ema nebee hanehan hau, atu hau bele halo tuir Ita Boot nia regra.
PSA 119:135 Halo Ita Boot nia oin leno Ita Boot nia atan hau; hanorin Ita Boot nia lei mai hau.
PSA 119:136 Hau nia matan been suli hanesan bee mota nian, tanba ema la halo tuir Ita Boot nia lei.
PSA 119:137 NAI Maromak, Ita Boot sempre halo buat nebee loos; Ita Boot nia regulamentu loos hotu.
PSA 119:138 Mandamentu nebee Ita Boot hatuur nee loos; ema bele konfia.
PSA 119:139 Hau nia laran nakali tanba hau nia inimigu sira la interese Ita Boot nia liafuan.
PSA 119:140 Promesa nebee Ita Boot halo nunka falha; nee mak Ita Boot nia atan hau gosta teb-tebes.
PSA 119:141 Hau nee kiik no ema haree hau la iha folin, maibee hau la haluha Ita Boot nia regra.
PSA 119:142 Ita Boot sempre halo buat nebee loos nafatin ba nafatin; Ita Boot nia lei sempre loos.
PSA 119:143 Susar ho terus iha hela hau nia leten, maibee hau haksolok ho Ita Boot nia ukun fuan.
PSA 119:144 Ita Boot nia mandamentu loos nafatin ba nafatin; halo hau kompriende ba, atu hau bele moris.
PSA 119:145 NAI Maromak, ho laran tomak hau halerik husu tulun, hataan hau ba; hau sei halo tuir Ita Boot nia lei.
PSA 119:146 Hau hasae lia ba Ita Boot, salva hau ba, atu hau bele kaer metin Ita Boot nia mandamentu.
PSA 119:147 Hau hadeer iha dadeer-saan nakukun hodi halerik husu tulun; hau laran metin ba Ita Boot nia liafuan.
PSA 119:148 Hau nia matan loke nafatin iha kalan tomak, atu hau bele medita Ita Boot nia promesa.
PSA 119:149 Hodi Ita Boot nia domin rohan-laek rona hau nia lian ba; NAI Maromak, hodi Ita boot nia justisa hafoun fali hau nia moris ba.
PSA 119:150 Ema sira nebee duni tuir hau ho hanoin aat, sira besik dadauk hau; sira nee dook husi Ita Boot nia lei.
PSA 119:151 Maibee NAI, Ita Boot besik hela hau; Ita Boot nia ukun fuan hotu-hotu loos.
PSA 119:152 Husi kiik kedas hau aprende Ita Boot nia mandamentu; husi nebaa hau kompriende katak, Ita Boot hatuur mandamentu nee atu dura tinan ba tinan.
PSA 119:153 Haree ba, hau terus hela, hasai hau husi terus laran nee, tanba hau la haluha Ita Boot nia lei.
PSA 119:154 Ema duun hela hau, defende hau hodi salva hau ba; hafoun fali hau nia moris tuir Ita Boot nia promesa.
PSA 119:155 Salvasaun dook husi ema aat sira, tanba sira la buka Ita Boot nia lei.
PSA 119:156 NAI Maromak, Ita Boot laran luak teb-tebes; hodi Ita Boot nia regulamentu hafoun fali hau nia moris ba.
PSA 119:157 Iha funu baluk barak mak halo terus hau, maibee hau nunka lao sees husi Ita Boot nia mandamentu.
PSA 119:158 Hau haree traidor sira, hau hakribi fali, tanba sira la kaer metin Ita Boot nia liafuan.
PSA 119:159 Haree ba, hau gosta teb-tebes Ita Boot nia regra; NAI Maromak, hodi Ita Boot nia domin rohan-laek hafoun fali hau nia moris ba.
PSA 119:160 Ita Boot nia liafuan loos hotu; Ita Boot nia regulamentu hotu-hotu loos no dura nafatin ba nafatin.
PSA 119:161 Nai ulun sira halo terus hau maski hau la sala, maibee hau nia laran tauk ho nakdedar deit ba Ita Boot nia liafuan.
PSA 119:162 Hau haksolok ho Ita Boot nia liafuan hanesan ema nebee hetan riku-soin boot.
PSA 119:163 Hau la simu lia bosok, hau hakribi liu, maibee hau gosta teb-tebes Ita Boot nia lei.
PSA 119:164 Hau loro-loron hahii Ita Boot dala hitu, tanba Ita Boot nia regulamentu loos.
PSA 119:165 Ema nebee gosta Ita Boot nia lei, sira hetan pas no hakmatek nebee boot; la iha buat ida mak halo sira sidi.
PSA 119:166 NAI Maromak, hau hein hela Ita Boot atu salva hau; hau moris tuir Ita Boot nia ukun fuan.
PSA 119:167 Hau halo tuir Ita Boot nia mandamentu, tanba hau gosta teb-tebes.
PSA 119:168 Hau halo tuir Ita Boot nia regra ho mandamentu, tanba Ita Boot hatene hotu hau nia lalaok moris.
PSA 119:169 NAI Maromak, simu hau nia lia halerik ba; hodi Ita Boot nia liafuan halo hau kompriende.
PSA 119:170 Simu hau nia orasaun ba; salva hau tuir Ita Boot nia promesa.
PSA 119:171 Hau nia ibun sei la para hahii Ita Boot, tanba Ita Boot hanorin Ita Boot nia lei mai hau.
PSA 119:172 Hau nia nanaal hananu kona ba Ita Boot nia liafuan, tanba Ita Boot nia ukun fuan hotu-hotu loos.
PSA 119:173 Hau harohan atu Ita Boot nia liman prontu hodi tulun hau, tanba hau hili atu tuir Ita Boot nia regra.
PSA 119:174 NAI Maromak, hau hakarak teb-tebes atu Ita Boot salva hau; Ita Boot nia lei halo haksolok hau nia laran.
PSA 119:175 Halo hau moris atu hau bele hahii Ita Boot; hau harohan atu Ita Boot nia regulamentu ajuda hau.
PSA 119:176 Hau lao sala dalan ona hanesan bibi nebee lakon; buka tuir Ita Boot nia atan hau ba, tanba hau la haluha Ita Boot nia ukun fuan.
PSA 120:1 Kantiku peregrinasaun nian. Iha susar laran hau halerik ba NAI Maromak; Nia hataan hau.
PSA 120:2 NAI, salva hau husi ema bosok-teen ho lohi door sira.
PSA 120:3 Imi lohi door sira, Imi sei simu todan saida husi Maromak? Nia sei foo kastigu imi oinsaa?
PSA 120:4 Nia sei uza aswain nia rama oan nebee kroat, no ahi klaak boot.
PSA 120:5 Hau terus hela, tanba hau ema lao rai iha rai Mezek; hau tenki hela iha ema Kedar nia tenda nia leet.
PSA 120:6 Hau hela kleur liu ona hamutuk ho ema nebee la gosta pas.
PSA 120:7 Hau hakarak pas ho hakmatek; maibee bainhira hau koalia sai, sira hakarak funu.
PSA 121:1 Kantiku peregrinasaun nian. Hau foti matan hateke ba foho; hau atu hetan tulun husi nebee?
PSA 121:2 Hau hetan tulun husi NAI Maromak, Ida nebee halo lalehan ho rai.
PSA 121:3 Nia sei la husik o nia ain sidi; Ida nebee tau matan ba o sei la dukur.
PSA 121:4 Tebes duni, Ida nebee tau matan ba Israel nee, Nia matan sei la dukur, Nia matan moos hela deit.
PSA 121:5 NAI Maromak tau matan ba o; NAI iha hela o nia sorin loos hodi foo mahon ba o.
PSA 121:6 Loromatan meudia nian sei la halo o terus; fulan iha kalan mos lae.
PSA 121:7 NAI Maromak sei kuidadu o husi buat aat hotu-hotu; Nia sei tau matan ba o nia moris.
PSA 121:8 NAI sei kuidadu o bainhira o sai husi uma no fila fali ba uma, agora too tinan ba tinan.
PSA 122:1 Kantiku peregrinasaun husi David. Hau haksolok bainhira ema dehan mai hau, “Mai ita baa iha NAI Maromak nia uma.”
PSA 122:2 Jerusalém, ami nia ain hakat tama tiha ona ba iha o nia portaun boot.
PSA 122:3 Jerusalém nee harii metin nudar sidade nebee la nakdoko.
PSA 122:4 Suku sira iha Israel sae mai iha nee; NAI Maromak nia povu sae mai, atu hahii NAI nia naran tuir mandamentu nebee Nia foo tiha ona ba Israel.
PSA 122:5 Iha nee liurai David nia jerasaun sira tuur iha kadeira ukun hodi tesi povu nia lia.
PSA 122:6 Halo orasaun atu ema Jerusalém bele moris diak: “Jerusalém, hau harohan atu ema nebee hadomi o, bele moris hakmatek,
PSA 122:7 o nia palasiu laran iha pas, iha o nia moru laran ema bele hela hakmatek.”
PSA 122:8 Hau hakarak atu hau nia familia ho kolega sira bele hetan diak, nunee hau dehan, “Imi ema Jerusalém, moris iha pas nia laran ba.”
PSA 122:9 Hau hakarak atu NAI ita nia Maromak nia uma bele hetan diak, nunee hau buka atu povu Jerusalém moris diak.
PSA 123:1 Kantiku peregrinasaun nian. NAI, hau foti matan hateke ba Ita Boot; Ita Boot tuur iha kadeira ukun iha lalehan.
PSA 123:2 Hanesan atan sira nia matan hateke ba patraun, hanesan atan feto ida nia matan hateke ba patraun feto, nunee mos ami nia matan hateke ba NAI ami nia Maromak, too Nia hatudu laran luak mai ami.
PSA 123:3 NAI Maromak, hatudu Ita Boot nia laran luak mai ami; hanoin ami ba, tanba ema hamoe ami la hotu-hotu.
PSA 123:4 Ami terus aat liu ona, tanba ema nebee moris diak, sira hatete aat ami; ema foti aan sira hamoe ami.
PSA 124:1 Kantiku peregrinasaun husi David. Se uluk NAI Maromak la tulun ita karik, ita oinsaa loos? Povu Israel koalia tuir ba:
PSA 124:2 “Se uluk NAI Maromak la tulun ita karik bainhira inimigu ataka ita, ita oinsaa loos?”
PSA 124:3 Bainhira sira nia laran nakali hasoru ita, sira sei tolan ita moris.
PSA 124:4 Bee sei sae hodi taka ita; mota boot sei halo ita mout;
PSA 124:5 korenti bee sei sae makaas hodi dasa sai tiha ita.
PSA 124:6 Hahii NAI Maromak, tanba Nia la husik atu ema lees ita ho sira nia nehan.
PSA 124:7 Kasador sira tau lasu mai ita, maibee ita halai sai tiha ona hanesan manu fuik; lasu nee kotu tiha ona, nunee ita sai ho livre.
PSA 124:8 Ita hetan tulun husi NAI Maromak; Nia mak halo lalehan ho rai.
PSA 125:1 Kantiku peregrinasaun nian. Ema nebee laran metin ba NAI Maromak, sira hanesan foho Siaun; sira nunka atu nakdoko, sira metin nafatin ba nafatin.
PSA 125:2 Hanesan foho haleu Jerusalém, nunee mos NAI Maromak haleu Nia povu agora too tinan ba tinan.
PSA 125:3 Nai ulun laran aat ukun iha ema moris loos nia rain, sira nia ukun sei la dura; se lae keta halo be ema moris loos lolo sira nia liman hodi halo fali buat aat.
PSA 125:4 NAI, halo diak ba ema nebee diak; foo bensaun ba ema nebee laran moos.
PSA 125:5 Maibee ema nebee tuir fali dalan kleuk, NAI sei soe sai hamutuk ho ema nebee hahalok aat. Pas ho hakmatek ba Israel!
PSA 126:1 Kantiku peregrinasaun nian. Uluk NAI Maromak hadia fila fali povu Siaun nia moris, ita senti ida nee mehi deit.
PSA 126:2 Iha tempu nebaa ita nia ibun nakonu ho hamnasa; ita nia nanaal hananu haksolok. Ema husi nasaun sel-seluk dehan, “NAI halo tiha buat boot ba sira.”
PSA 126:3 Loos duni, iha tempu nebaa NAI halo duni buat boot ba ita, nunee ita haksolok.
PSA 126:4 NAI, agora hadia fali ami nia moris ba, hanesan bee suli hodi haburas rai fuik maran Negebe.
PSA 126:5 Ema nebee kuda fini ho matan been, too tempu kolheta sei hananu haksolok.
PSA 126:6 Ema nebee tanis tuir dalan bainhira lori fini atu kuda iha toos, sira sei lori rezultadu toos nian ba uma hodi hananu ho haksolok.
PSA 127:1 Kantiku peregrinasaun husi Salomão. Se karik NAI Maromak la harii uma, badaen uma nian servisu saugati. Se karik NAI la foo seguransa ba sidade, ema nebee kontrola sidade servisu saugati deit.
PSA 127:2 Imi nebee hadeer molok rai huun mutin hodi servisu haluha aan too fali kalan boot atu buka moris, imi servisu saugati deit, tanba NAI foo deskansa ba ema nebee Nia hadomi.
PSA 127:3 Oan sira hanesan riku-soin husi NAI Maromak; sira nee prezenti nebee Nia foo.
PSA 127:4 Oan mane nebee moris bainhira nia aman sei joven, sira hanesan rama oan iha funu nain nia liman laran.
PSA 127:5 Ema nebee iha rama oan barak, ema nee hetan ksolok. Bainhira nia koalia hasoru nia inimigu sira iha fatin tesi lia nian, nia sei la moe leet.
PSA 128:1 Kantiku peregrinasaun nian. Ema nebee hamtauk NAI Maromak hodi lao tuir Nia dalan, ema nee hetan ksolok.
PSA 128:2 O sei haan husi o nia kosar been rasik; o sei hetan bensaun no moris diak.
PSA 128:3 O nia feen sei hanesan ai uvas nebee foo fuan barak iha o nia uma; o nia oan sira sei hanesan ai oliveira dikin hodi haleu o nia meza.
PSA 128:4 Loos duni, ema nebee hamtauk NAI Maromak, sei hetan bensaun nunee.
PSA 128:5 Hau harohan atu NAI Maromak foo bensaun ba o husi Siaun; hau harohan atu o haree Jerusalém moris diak iha o nia vida tomak.
PSA 128:6 Hau harohan atu o moris too haree o nia bei-oan sira. Pas ho hakmatek ba Israel!
PSA 129:1 Kantiku peregrinasaun nian. “Hau nia inimigu sira hanehan hau husi joven kedas.” Israel oan sira hatete tuir ba:
PSA 129:2 “Hau nia inimigu sira hanehan hau husi joven kedas, maibee sira nunka manaan hau.
PSA 129:3 Sira taa hau nia kotuk too kanek todan, hanesan fali toos nain taa rai.
PSA 129:4 Maibee NAI Maromak sempre halo buat nebee loos; ema aat nia talin nebee futu hau, Nia hakotu tiha.”
PSA 129:5 Hau harohan atu Siaun nia inimigu sira hotu hakiduk ho moe.
PSA 129:6 Husik sira sai hanesan duut nebee moris iha uma kakuluk; foin tubun, namlaik tiha ona.
PSA 129:7 La iha ema ida mak interese atu tesi duut nee; la iha ida mak hakarak atu futu hamutuk.
PSA 129:8 Hau hein katak ema nebee liu husi nebaa nunka kumprimenta sira dehan, “NAI Maromak nia bensaun hela ho imi; ami foo bensaun ba imi hodi NAI nia naran.”
PSA 130:1 Kantiku peregrinasaun nian. NAI Maromak, hau iha hela susar boot laran, nee mak hau halerik husu tulun ba Ita Boot.
PSA 130:2 Nai, rona hau nia lian ba; see tilun ba hau nia harohan.
PSA 130:3 NAI Maromak, se karik Ita Boot hanoin nafatin ami nia sala, Nai, see mak bele aguenta?
PSA 130:4 Maibee Ita Boot foo perdaun, atu ami bele hamtauk Ita Boot.
PSA 130:5 Hau laran metin hodi hein NAI Maromak; hau nia aan tomak hein hela Nia; hau konfia Nia liafuan.
PSA 130:6 Hau laran metin hodi hein Nai Maromak, liu fali ema seguransa hein loro matan sae; liu fali ema seguransa hein atu rai loron lalais.
PSA 130:7 Israel, laran metin ba NAI Maromak ba, tanba NAI nia domin rohan-laek, no Nia gosta teb-tebes atu salva ita.
PSA 130:8 Nia rasik sei halo ema Israel livre husi sira nia sala hotu.
PSA 131:1 Kantiku peregrinasaun husi David. NAI Maromak, hau la foti aan; hau la gaba aan. Hau la duni tuir buat nebee boot liu hau nia kapasidade, ka buat nebee aas liu mai hau.
PSA 131:2 Maibee hau kalma hela, hau hakmatek hela. Hanesan bebee nebee susu bosu tiha hakmatek hela iha nia inan nia sorin, hau mos hakmatek nunee.
PSA 131:3 Israel oan sira, laran metin ba NAI Maromak ba, agora too tinan ba tinan.
PSA 132:1 Kantiku peregrinasaun nian. NAI Maromak, hanoin nafatin David ba; keta haluha terus ho susar nebee nia hasoru.
PSA 132:2 Nia jura ba NAI; Nia halo ona juramentu ba Jacó nia Maromak Kbiit Nain dehan,
PSA 132:3 “Hau sei la tama iha hau nia uma laran ka deskansa iha hau nia toba fatin;
PSA 132:4 hau sei halo hau nia matan lakan hela deit; hau lakohi dukur,
PSA 132:5 too hau hetan fatin ida ba NAI Maromak; too hau hetan hela fatin ba Jacó nia Maromak Kbiit Nain.”
PSA 132:6 Iha rai Efrata ita rona kona ba kaixoti promesa nian; ita hetan kaixoti nee iha rejiaun Jaar nian.
PSA 132:7 Depois ita dehan, “Mai ita baa iha NAI nia hela fatin; mai ita hakruuk iha Nia ain hodi adora Nia.”
PSA 132:8 NAI Maromak, hamriik ba hodi tama iha Ita Boot nia fatin deskansa; lori ho kaixoti promesa nian, ida nee hatudu sai Ita Boot nia kbiit.
PSA 132:9 Hau harohan atu Ita Boot nia nai lulik sira hatais lia loos, no Ita Boot nia povu santu hananu haksolok.
PSA 132:10 Keta fila kotuk ba liurai nebee Ita Boot hili ona, tanba Ita Boot promete tiha ona ba Ita Boot nia atan David.
PSA 132:11 NAI Maromak jura tiha ona ba David; Nia jura ho lo-loos, no sei la dada fila fali. Nia dehan, “Hau sei foti o nia oan ida hodi sai liurai iha o nia fatin.
PSA 132:12 Se o nia oan sira kaer metin hau nia promesa no halo tuir lei nebee Hau hanorin ba sira, entaun sira nia oan sira mos sei tuur hodi ukun iha o nia fatin tinan ba tinan.”
PSA 132:13 NAI Maromak hili tiha ona Siaun; Nia hakarak sidade nee sai Nia hela fatin. Nia dehan,
PSA 132:14 “Ida nee Hau nia fatin deskansa tinan ba tinan; Hau sei hela iha nee tanba Hau nia hakarak mak nee duni.
PSA 132:15 Hau sei haraik bensaun ba sidade nee too ai haan nakonu; Hau sei foo ai haan ba ema kiak sira haan too bosu.
PSA 132:16 Nai lulik sira iha sidade nee, Hau sei foo hatais ho salvasaun; povu santu nebee hela iha sidade nee sei hananu haksolok.
PSA 132:17 Iha sidade nee Hau sei foo kbiit ba David; Hau sei halo nia ahi oan lakan beibeik tanba Hau mak hili nia sai liurai.
PSA 132:18 Hau sei halo nia inimigu sira moe boot, maibee liurai nia koroa sei nabilan.”
PSA 133:1 Kantiku peregrinasaun husi David. Bainhira maluk sira moris neon ida laran ida, nee diak no furak teb-tebes.
PSA 133:2 Unidade nee hanesan mina folin karun nian nebee fui ba iha nai lulik boot Arão nia ulun; mina nee suli tuun ba iha nia hasan rahun; suli too kona nia batina nia gola.
PSA 133:3 Unidade nee hanesan mahobeen foho Hermon nian nebee turu tuun ba iha foho Siaun. Tanba iha foho Siaun nee NAI Maromak hatuun Nia bensaun, moris tinan ba tinan.
PSA 134:1 Kantiku peregrinasaun nian. NAI Maromak nia atan hotu-hotu, hahii NAI ba; imi nebee serbi iha NAI nia uma iha oras kalan, hahii NAI ba.
PSA 134:2 Foti sae imi nia liman iha fatin santu hodi hahii NAI.
PSA 134:3 NAI Maromak mak kria lalehan ho rai; hau harohan atu husi foho Siaun Nia haraik bensaun ba imi.
PSA 135:1 Hahii NAI Maromak! Hahii NAI nia naran; NAI nia atan sira, hahii Nia ba.
PSA 135:2 Imi nebee halao knaar iha NAI nia uma, iha ita nia Maromak nia uma kreda laran, hahii Nia ba.
PSA 135:3 Hahii NAI Maromak tanba NAI nee diak; hananu hahii Nia naran, tanba nee buat furak ida.
PSA 135:4 Tanba NAI hili ona Jacó atu sai Ninian; Nia hili povu Israel sai nudar Nia riku-soin rasik.
PSA 135:5 Hau hatene katak NAI Maromak nee boot; ita nia Nai nee boot liu maromak sel-seluk.
PSA 135:6 NAI halo saida deit tuir Nia hakarak, iha lalehan no iha rai, iha tasi leten no mos iha tasi okos.
PSA 135:7 Nia halo kalohan mosu husi rai ulun too rai ikun iha mundu tomak; Nia haruka rai lakan akompanha udan; Nia lori sai anin husi Nia armazen laran.
PSA 135:8 Nia oho dasa tiha ema Ejitu nia oan mane boot; ema nia oan primeiru ho mos animal nia oan primeiru, Nia oho hotu.
PSA 135:9 Imi ema Ejitu, uluk Nia haruka Nia sinal ho milagre ba iha imi nia klaran hodi kontra imi nia liurai ho nia atan sira hotu.
PSA 135:10 Nia hamonu nasaun barak hodi oho liurai bo-boot,
PSA 135:11 hanesan Sihon, ema Amori nia liurai, Og, rai Basán nia liurai, ho liurai hotu-hotu iha rai Kanaán.
PSA 135:12 Nia foo rai nee ba Nia povu Israel nudar sira nia riku-soin.
PSA 135:13 NAI Maromak, Ita Boot nia naran dura tinan ba tinan; NAI, Ita Boot nia naran sei temi beibeik husi jerasaun ba jerasaun.
PSA 135:14 Tanba NAI sei foo justisa ba Nia povu; Nia sei hanoin Nia atan sira.
PSA 135:15 Nasaun jentiu sira adora fali estatua lulik nebee ema kriatura mak halo husi osan mean ho osan mutin.
PSA 135:16 Iha ibun maibee la bele koalia, iha matan maibee la bele haree.
PSA 135:17 Iha tilun maibee la bele rona, no la iha iis sai husi sira nia ibun.
PSA 135:18 Ema nebee kria estatua lulik sira nee, sira sai hanesan fali buat nebee sira kria nee; ema nebee fiar ba estatua sira nee mos sei sai nunee hotu.
PSA 135:19 Israel oan sira, hahii NAI ba; Arão nia jerasaun sira, hahii NAI ba;
PSA 135:20 Levi nia jerasaun sira, hahii NAI ba; imi sira nebee hamtauk NAI, hahii NAI ba.
PSA 135:21 Hahii NAI iha Siaun, iha Nia hela fatin Jerusalém. Hahii NAI Maromak!
PSA 136:1 Foo agradese ba NAI Maromak, tanba Nia nee diak; Nia domin dura tinan ba tinan.
PSA 136:2 Foo agradese ba maromak sel-seluk nia Maromak; Nia domin dura tinan ba tinan.
PSA 136:3 Foo agradese ba nai hotu-hotu nia Nai; Nia domin dura tinan ba tinan.
PSA 136:4 Nia mesak deit mak halo milagre bo-boot; Nia domin dura tinan ba tinan.
PSA 136:5 Hodi Nia matenek, Nia halo lalehan; Nia domin dura tinan ba tinan.
PSA 136:6 Nia hatuur mundu iha bee leten; Nia domin dura tinan ba tinan.
PSA 136:7 Nia halo loro matan ho fulan hodi foo naroman; Nia domin dura tinan ba tinan.
PSA 136:8 Nia halo loro matan hodi domina tempu loron; Nia domin dura tinan ba tinan.
PSA 136:9 Nia halo fulan ho fitun hodi domina tempu kalan; Nia domin dura tinan ba tinan.
PSA 136:10 Nia oho dasa tiha ema Ejitu nia oan mane boot sira; Nia domin dura tinan ba tinan.
PSA 136:11 Nia lori povu Israel sai husi ema Ejitu nia klaran; Nia domin dura tinan ba tinan.
PSA 136:12 Hodi Nia liman forti, hodi Nia liman makaas, Nia lori sira sai; Nia domin dura tinan ba tinan.
PSA 136:13 Nia fera tiha Tasi Mean fahe ba rua; Nia domin dura tinan ba tinan.
PSA 136:14 Nia lori sai ema Israel liu husi tasi klaran; Nia domin dura tinan ba tinan.
PSA 136:15 Maibee Nia soe tiha liurai Ejitu ho nia militar sira ba iha Tasi Mean; Nia domin dura tinan ba tinan.
PSA 136:16 Nia lori Nia povu lao liu husi rai fuik maran; Nia domin dura tinan ba tinan.
PSA 136:17 Nia oho dasa tiha liurai bo-boot; Nia domin dura tinan ba tinan.
PSA 136:18 Nia oho tiha liurai nebee forti; Nia domin dura tinan ba tinan.
PSA 136:19 Nia oho tiha Sihon, ema Amori nia liurai; Nia domin dura tinan ba tinan.
PSA 136:20 Nia mos oho Og, ema Basán nia liurai; Nia domin dura tinan ba tinan.
PSA 136:21 Nia foo sira nia rai ba Nia povu nudar sira nia riku-soin; Nia domin dura tinan ba tinan.
PSA 136:22 Nia foo rai nee nudar riku-soin ba Nia atan Israel sira; Nia domin dura tinan ba tinan.
PSA 136:23 Nia hanoin ita bainhira ema hatuun ita; Nia domin dura tinan ba tinan.
PSA 136:24 Nia hasai ita husi ita nia inimigu sira nia liman laran; Nia domin dura tinan ba tinan.
PSA 136:25 Nia foo ai haan ba kriatura ida-idak; Nia domin dura tinan ba tinan.
PSA 136:26 Foo agradese ba Maromak iha lalehan; Nia domin dura tinan ba tinan.
PSA 137:1 Iha mota Babilónia nia ninin, ami tuur hodi tanis halerik bainhira ami hanoin kona ba Siaun.
PSA 137:2 Iha mota ninin nee ami tara ami nia viola iha ai huun nia sanak.
PSA 137:3 Tanba iha nebaa ema nebee halo ami dadur haruka ami kanta; ema nebee halo ami terus obriga ami hananu knananuk ksolok nian; sira haruka ami hananu kantiku ida kona ba Siaun iha sira nia oin.
PSA 137:4 Oinsaa mak ami bele hananu ba NAI Maromak durante ami iha hela ema nia rain?
PSA 137:5 Jerusalém, se karik hau haluha o, husik ba, hau nia liman loos nia forsa lakon tiha ba.
PSA 137:6 Jerusalém, se karik hau la hanoin kona o, se karik hau la konsidera o nudar ksolok ida nebee boot liu mai hau, husik hau nia nanaal toos tiha iha hau nia ibun laran ba.
PSA 137:7 NAI Maromak, keta haluha buat nebee mak ema Edom halo iha loron nebee sidade Jerusalém monu. Sira hakilar dehan, “Halo rahun tiha; halo rahun too nia huun!”
PSA 137:8 Babilónia oan sira, susar boot sei kona imi. Ema nebee mak selu fali imi nia hahalok aat hasoru ami, sira hetan ksolok.
PSA 137:9 Ema nebee hadau imi nia oan kiik oan sira hodi riba ba fatuk, sira hetan ksolok.
PSA 138:1 Salmu David nian. NAI Maromak, ho laran tomak hau foo agradese ba Ita Boot; iha maromak sel-seluk nia oin, hau hananu hahii Ita Boot.
PSA 138:2 Hau see oin hakruuk ba iha Ita Boot nia fatin santu, no hahii Ita Boot nia naran, tanba Ita Boot nia domin rohan-laek no Ita Boot sempre kaer metin Ita Boot nia liafuan; Ita Boot tane Ita Boot nia naran ho Ita Boot nia liafuan aas liu buat hotu-hotu.
PSA 138:3 Bainhira hau halerik husu tulun, Ita Boot hataan hau; Ita Boot nia kbiit halo hau aten brani.
PSA 138:4 NAI Maromak, hau harohan atu liurai hotu-hotu iha mundu nee bele hahii Ita Boot bainhira sira rona liafuan nebee sai husi Ita Boot nia ibun.
PSA 138:5 Hau harohan atu sira hananu kona ba NAI nia dalan, tanba NAI nia kbiit boot.
PSA 138:6 Maski NAI iha leten aas ba, Nia haree diak ema kiik, maibee ema foti aan sira, Nia konhese husi dook deit.
PSA 138:7 Maski hau lao iha susar laran, Ita Boot proteje hau nia vida. Bainhira hau nia funu baluk sira hirus, Ita Boot nia liman kontra sira; Ita Boot salva hau hodi Ita Boot nia liman loos.
PSA 138:8 NAI, Ita Boot nia planu ba hau sei sai realidade; Ita Boot nia domin dura tinan ba tinan; NAI, keta husik hela Ita Boot nia liman fatin mes-mesak.
PSA 139:1 Salmu David nian, ba dirijenti koru. Kantiku. NAI Maromak, Ita Boot koko tiha ona hau, no konhese hau mo-moos.
PSA 139:2 Atu hau tuur ka hau hamriik, Ita Boot hatene hotu; husi dook Ita Boot hatene hau nia hanoin.
PSA 139:3 Atu hau lao ka hau toba, Ita Boot haree tuir; Ita Boot hatene hau nia moris tomak.
PSA 139:4 NAI, molok liafuan ruma sai husi hau nia ibun, Ita Boot hatene hotu ona.
PSA 139:5 Ita Boot besik loos hau husi oin no husi kotuk; Ita Boot tula Ita Boot nia liman ba iha hau nia leten.
PSA 139:6 Ita Boot konhese mo-moos hau nunee, furak teb-tebes mai hau; matenek hanesan nee aas teb-tebes, hau la bele kompriende too iha nebaa.
PSA 139:7 Hau tenki baa iha nebee atu bele haketak aan husi Ita Boot nia Espiritu? Hau tenki halai baa iha nebee atu bele sees husi Ita Boot nia oin?
PSA 139:8 Hau sae ba iha lalehan, Ita Boot iha nebaa; hau halo hau nia toba fatin iha matebian sira nia fatin, Ita Boot iha nebaa.
PSA 139:9 Se hau semo ba iha lorosae, ka halo hau nia hela fatin iha tasi nia rohan ba,
PSA 139:10 iha nebaa mos Ita Boot nia liman sei hatudu dalan mai hau; Ita Boot nia liman loos kaer metin hau.
PSA 139:11 Karik hau dehan, “Husik nakukun subar tiha hau; husik naroman nebee haleu hau sai fali nakukun.”
PSA 139:12 Maibee iha nakukun laran mos Ita Boot nia matan haree borus; ba Ita Boot, kalan iha naroman hanesan fali loron nian; ba Ita Boot, nakukun ho naroman hanesan deit.
PSA 139:13 Ita Boot mak kria hau nia laran; Ita Boot soru hau hamutuk iha hau nia inan nia kabun laran.
PSA 139:14 Hau hahii Ita Boot tanba Ita Boot nee makaas; hau rekonhese ho laran tomak katak, Ita Boot nia liman fatin furak teb-tebes.
PSA 139:15 Bainhira Ita Boot forma hau iha fatin segredu, iha momentu Ita Boot suku hau iha hau nia inan nia kabun laran hanesan ema suku borda, Ita Boot haree mo-moos hau nia ruin sira nee.
PSA 139:16 Hau nia isin lolon seidauk forma hamutuk, Ita Boot nia matan haree tiha ona hau. Hau nia loron moris mai seidauk too, loron hotu-hotu nebee Ita Boot atu foo mai hau, hakerek tiha ona iha Ita Boot nia livru.
PSA 139:17 Maromak, Ita Boot nia hanoin, hau imajina la hetan; Ita Boot nia ideia barak teb-tebes, sura la bele.
PSA 139:18 Hau atu sura karik, barak liu fali rai henek musan iha mundu; bainhira hau hadeer, hau sei hamutuk nafatin ho Ita Boot.
PSA 139:19 Maromak, hau hein atu Ita Boot hamate tiha ema aat sira. Imi sira nebee hamrook ba raan, dook tiha husi hau.
PSA 139:20 Sira koalia aat kona ba Ita Boot; sira hatete aat Ita Boot nia naran.
PSA 139:21 NAI, hau odi ema nebee mak odi Ita Boot; hau hakribi ema nebee kontra Ita Boot.
PSA 139:22 Hau odi loos sira; hau konsidera sira nee hau nia inimigu.
PSA 139:23 Maromak, koko hau hodi hatene tuir hau nia laran; prova hau hodi hatene hau nia hanoin.
PSA 139:24 Haree ba, keta hau halo buat aat ruma karik; lori hau tuir dalan moris rohan-laek nian.
PSA 140:1 Salmu David nian, ba dirijenti koru. NAI Maromak, salva hau husi ema aat ba; proteje hau husi ema nebee gosta violensia.
PSA 140:2 Sira sempre hanoin aat; loron-kalan sira sadik ema atu halo funu.
PSA 140:3 Sira halo sira nia liafuan kroat hodi hakanek ema hanesan samea nebee tata ema; liafuan nebee sai husi sira nia ibun hanesan samodok nia veneno.
PSA 140:4 NAI Maromak, kuidadu hau atu ema aat nia liman keta kona hau; proteje hau husi ema nebee gosta violensia, tanba sira kombina malu atu hamonu hau.
PSA 140:5 Ema foti aan sira tau ona lasu mai hau; sira nahe redi mai hau; sira monta gaiola iha hau nia dalan.
PSA 140:6 Hau hatete ba NAI, “Ita Boot mak hau nia Maromak.” NAI, hau halerik husu tulun, rona hau ba.
PSA 140:7 NAI, hau nia Maromak, Ita Boot nia kbiit makaas hodi salva hau; Ita Boot taka hau nia ulun iha funu laran.
PSA 140:8 NAI, keta foo dalan ba ema aat sira nia hakarak; keta husik sira nia planu sai realidade, se lae sira sei foti aan.
PSA 140:9 Ema nebee haleu hau foti sira nia ulun; husik liafuan aat nebee sira hatete mai hau, fila fali ba sira.
PSA 140:10 Halo ahi klaak monu tuun iha sira nia leten; halo sira monu tama ba iha rai kuak klean, nunka atu sai fali.
PSA 140:11 Hau hein katak sira nebee gosta hatete aat ema, la bele hela metin iha rai nee; husik dezastre duni tuir ema nebee gosta violensia.
PSA 140:12 Hau hatene katak NAI Maromak foo justisa lo-loos ba ema kbiit-laek hodi defende ema kiak sira.
PSA 140:13 Loos duni, ema nebee moris loos sei hahii Ita Boot nia naran; ema nebee laran moos sei hela iha Ita Boot nia prezensa.
PSA 141:1 Salmu David nian. NAI Maromak, hau harohan ba Ita Boot, mai lalais tulun hau; rona hau nia lia halerik ba.
PSA 141:2 Bainhira hau hasae orasaun ba Ita Boot, simu ba nudar ai been morin; bainhira hau hasae liman ba Ita Boot, simu ba nudar oferta sakrifisiu iha oras kalan.
PSA 141:3 NAI Maromak, tau seguransa ba hau nia ibun; kontrola hau nia liafuan.
PSA 141:4 Keta husik hau nia laran monu ba buat nebee la diak; la bele husik hau mete hahalok aat hamutuk ho ema nebee gosta halo buat aat; hau lakohi tama iha sira nia festa hodi haan hamutuk ho sira.
PSA 141:5 Se ema moris loos baku hau karik, nee hatudu domin; se nia siak hau, nee hanesan kose mina ba hau nia ulun; hau sei simu. Maibee hau sempre halo orasaun kontra ema aat sira nia hahalok.
PSA 141:6 Bainhira ema entrega sira ba iha juis atu hamonu kastigu ba sira, ema aat sira sei rekonhese katak hau nia liafuan loos duni.
PSA 141:7 Hanesan fatuk nebee ema baku rahun iha rai, nunee mos sira nia ruin sei naklekar iha portaun rate nian.
PSA 141:8 Maibee NAI Maromak Kbiit Nain, hau nia matan hateke nafatin ba Ita Boot; hau hamahon aan iha Ita Boot, keta husik hau sai mate mean.
PSA 141:9 Kuidadu hau husi lasu nebee ema aat tau ona mai hau; proteje hau husi gaiola nebee sira monta ba hau.
PSA 141:10 Husik ema aat monu tama ba sira nia redi rasik, maibee hau lao liu ho livre.
PSA 142:1 Salmu David nian para hanorin ema. Orasaun bainhira David iha fatuk kuak laran. Hau harohan ba NAI Maromak ho lian makaas; hau hasae hau nia lian ba NAI hodi husu Nia tulun.
PSA 142:2 Hau fakar sai hau nia lia halerik iha Nia oin; hau konta hau nia susar ba Nia.
PSA 142:3 Bainhira hau lakon esperansa, Ita Boot hatene tuir hau nia moris. Iha dalan nebee hau lao tuir, ema subar lasu ba hau.
PSA 142:4 Haree ba, la iha ema ida iha hau nia liman loos; la iha ema ida interese mai hau; la iha tan subar fatin ba hau; la iha ema ida hanoin hau.
PSA 142:5 NAI Maromak, hau halerik husu tulun ba Ita Boot; hau dehan, “Ita Boot mak hau nia fatin seguru; Ita Boot mak hau nia riku-soin iha mundu nee.”
PSA 142:6 Rona hau nia lia halerik ba, tanba hau la bele liu ona; salva hau husi ema nebee duni tuir hau, tanba sira forsa liu hau.
PSA 142:7 Hasai hau husi dadur laran, atu hau bele hahii Ita Boot nia naran. Depois ema moris loos sei mai hodi haleu hau, tanba Ita Boot haree hau diak.
PSA 143:1 Salmu David nian. NAI Maromak, rona hau nia orasaun; see tilun ba hau nia halerik, tanba Ita Boot sempre kaer metin Ita Boot nia liafuan; hataan hau ba, tanba Ita Boot sempre halo buat nebee loos.
PSA 143:2 Keta haruka hau ata hataan iha Ita Boot nia oin kona ba sala nebee hau halo tiha ona, tanba la iha ema ida mak moris loos iha Ita Boot nia futar oin.
PSA 143:3 Inimigu sira duni tuir hau; sira sama hau ba rai; sira dadur hau iha fatin nakukun hanesan fali ema nebee mak mate kleur ona.
PSA 143:4 Nunee hau lakon esperansa; hau nia laran tauk teb-tebes.
PSA 143:5 Hau hanoin fila fali tempu uluk nian; hau reflete Ita Boot nia servisu hotu; hau medita saida mak Ita Boot nia liman halo tiha ona.
PSA 143:6 Hau hasae hau nia liman halo orasaun ba Ita Boot; hau hamrook ba Ita Boot hanesan rai maran dekor nebee hamrook ba udan been.
PSA 143:7 NAI Maromak, hataan hau lalais ba; hau nia esperansa lakon ba dadauk. Keta subar Ita Boot nia oin mai hau; se lae hau sei hanesan ema nebee mak lao tuun dadauk ba rai kuak.
PSA 143:8 Dadeer-dadeer foo hanoin mai hau kona ba Ita Boot nia domin rohan-laek, tanba hau laran metin ba Ita Boot. Hatudu dalan nebee mak hau atu lao tuir, tanba hau entrega hau nia moris ba Ita Boot.
PSA 143:9 NAI Maromak, salva hau husi hau nia inimigu sira, tanba hau helik aan iha Ita Boot.
PSA 143:10 Hanorin hau atu halo tuir Ita Boot nia hakarak, tanba Ita Boot mak hau nia Maromak. Ita Boot nia Espiritu laran diak; haruka Nia lori hau ba iha rai tetuk.
PSA 143:11 NAI Maromak, kuidadu hau nia moris atu ema foti aas Ita Boot nia naran; hasai hau husi susar laran, tanba Ita Boot sempre halo buat nebee loos.
PSA 143:12 Ita Boot hadomi teb-tebes hau, nunee halo hau nia inimigu sira nonook tiha ba; halo rahun tiha hau nia funu baluk sira, tanba hau nee Ita Boot nia atan.
PSA 144:1 Salmu David nian. Hahii NAI Maromak, Nia mak fatuk lolon boot nebee satan netik hau; Nia mak treinu hau nia liman atu halo funu; Nia treinu hau nia liman fuan atu kaer kroat.
PSA 144:2 Nia nee hau nia Maromak Domin Nain, Nia mak lutu haleu hau, hau nia abrigu no hau nia Salvador. Nia mak defende hau, no hau hamahon aan iha Nia; Nia halo nasaun sira seluk hakruuk mai hau.
PSA 144:3 NAI Maromak, ami ema kriatura nee see loos, too Ita Boot hanoin ami? Ami ema kbiit-laek nee see loos, too Ita Boot interese ami?
PSA 144:4 Ami nee hanesan fali anin nebee huu liu deit; ami nia moris hanesan lalatak nebee liu lalais deit.
PSA 144:5 NAI Maromak, loke Ita Boot nia lalehan hodi tuun mai; kaer kona foho, atu nunee foho suar sai.
PSA 144:6 Haruka rai lakan hodi halo inimigu sira halai namkari; hana Ita Boot nia rama oan halo sira halai lakon.
PSA 144:7 Husi leten aas ba hatuun Ita Boot nia liman mai hodi hasai hau husi bee boot laran; salva hau husi inimigu rai liur sira nia liman laran.
PSA 144:8 Tanba sira nia ibun nakonu ho buat bosok; sira foti liman hodi halo juramentu falsu.
PSA 144:9 Maromak, hau sei hananu kantiku foun ba Ita Boot; hau sei toka muzika ba Ita Boot ho viola tali sanulu.
PSA 144:10 Ita Boot mak halo liurai manaan; Ita Boot salva Ita Boot nia atan David.
PSA 144:11 Salva hau husi surik nebee hamate ema; hasai hau husi inimigu rai liur nia liman laran. Sira nia ibun nakonu ho buat bosok; sira foti liman hodi halo juramentu falsu.
PSA 144:12 Ami harohan atu ami nia oan mane joven sira sai hanesan ai huun nebee buras ba dadauk, no ami nia oan feto sira sai hanesan ai riin palasiu nian nebee bahat tiha halo furak.
PSA 144:13 Ami husu atu ami nia armazen nakonu ho ai haan oi-oin, ami nia bibi aumenta rihun ba rihun, tokon ba tokon iha ami nia rai,
PSA 144:14 no ami nia karau kabuk todan. Ami harohan atu inimigu sira la bele baku rahun moru nebee haleu ami nia sidade, inimigu sira la bele lori ami baa dadur iha rai seluk, no la iha tanis halerik iha ami nia estrada boot.
PSA 144:15 Povu nebee mak moris hanesan nee, sira hetan ksolok; povu nebee adora NAI nudar sira nia Maromak, sira hetan ksolok.
PSA 145:1 Salmu hahii nian husi David. Hau nia Maromak, hau nia Liurai, hau sei foti aas Ita Boot; hau sei hahii Ita Boot nia naran too tinan ba tinan.
PSA 145:2 Loro-loron hau sei hahii Ita Boot; hau sei tane aas Ita Boot nia naran tinan ba tinan.
PSA 145:3 NAI Maromak nee boot, Nia serve atu ita hahii; Nia boot teb-tebes, la iha ida mak bele kompriende too iha nebaa.
PSA 145:4 Jerasaun ida sei gaba Ita Boot nia servisu ba jerasaun tuir mai; sira konta tutan buat boot nebee Ita Boot halo.
PSA 145:5 Hau sei foo sai Ita Boot nia naran boot ho kbiit nebee furak; hau sei medita buat furak nebee Ita Boot halo tiha ona.
PSA 145:6 Sira sei konta buat makaas nebee Ita Boot halo; hau sei foo sai katak Ita Boot nee makaas teb-tebes.
PSA 145:7 Sira selebra Ita Boot nia laran osan mean, no haksolok hananu kona ba Ita Boot nia lia loos.
PSA 145:8 NAI Maromak nee laran luak no laran diak; Nia Pasiensia Nain, no nakonu ho domin rohan-laek.
PSA 145:9 NAI diak ba ema hotu-hotu; Nia hadomi buat hotu nebee Nia kria ona.
PSA 145:10 NAI, Ita Boot nia liman fatin sei agradese ba Ita Boot; Ita Boot nia povu santu sei hahii Ita Boot.
PSA 145:11 Sira foo sai Ita Boot nia kbiit boot nudar Liurai, no konta kona ba Ita Boot nia forsa,
PSA 145:12 atu nunee ema hotu bele hatene buat makaas nebee Ita Boot halo, no Ita Boot nia ukun makaas ho furak teb-tebes.
PSA 145:13 Ita Boot mak Liurai tinan ba tinan; Ita Boot ukun husi jerasaun ba jerasaun. NAI Maromak sempre kaer metin Nia promesa; Ninia hahalok tomak nakonu ho domin.
PSA 145:14 NAI tane ema nebee monu ba susar laran; Nia foti sae ema nebee bonko tanba naha todan.
PSA 145:15 Kriatura hotu-hotu nia matan hateke ba Ita Boot, atu Ita Boot foo ai haan ba sira tuir nia tempu.
PSA 145:16 Ita Boot loke liman, buat moris hotu-hotu hetan ai haan too bosu.
PSA 145:17 NAI halo saida deit sempre loos; Ninia hahalok tomak nakonu ho domin.
PSA 145:18 NAI besik ema nebee harohan ba Nia; Nia besik ba see-see deit mak harohan ba Nia ho laran.
PSA 145:19 Nia hataan ema nebee hamtauk Nia tuir sira nia hakarak; Nia rona sira nia halerik hodi salva sira.
PSA 145:20 NAI tau matan ba ema hotu nebee hadomi Nia, maibee Nia sei halo rahun tiha ema aat sira hotu.
PSA 145:21 Hau nia ibun sei hahii NAI Maromak; kriatura ida-idak hahii Nia naran santu tinan ba tinan.
PSA 146:1 Hahii NAI Maromak! Hau hatete ba hau nia aan, hahii NAI ba!
PSA 146:2 Iha hau nia moris tomak, hau sei hahii NAI; durante hau sei moris hau hananu hahii hau nia Maromak.
PSA 146:3 Lalika tau laran ba ukun nain sira; keta tau fiar ba ema kriatura, tanba sira la bele salva ema.
PSA 146:4 Bainhira sira nia iis kotu, sira fila fali ba rai rahun; iha loron nee kedas, sira nia planu mos mate ona.
PSA 146:5 Ema nebee rekonhese Jacó nia Maromak nudar sira nia Ajudador, ema nebee laran metin ba NAI nudar sira nia Maromak, sira hetan ksolok.
PSA 146:6 Nia mak Kriador lalehan ho rai, tasi ho buat hotu iha laran; Nia kaer metin Nia liafuan too tinan ba tinan.
PSA 146:7 Nia foo justisa ba sira nebee ema seluk hanehan; Nia foo ai haan ba sira nebee hamlaha. NAI hasai dadur sira;
PSA 146:8 NAI halo ema matan delek bele haree; NAI foti sae ema nebee bonko tanba naha todan; NAI hadomi ema nebee moris loos.
PSA 146:9 NAI tau matan ba ema lao rai; Nia tulun oan kiak ho feto faluk sira, maibee Nia halo kleuk tiha ema aat sira nia dalan.
PSA 146:10 NAI Maromak ukun tinan ba tinan; Siaun oan sira, imi nia Maromak ukun husi jerasaun ba jerasaun. Hahii NAI Maromak!
PSA 147:1 Hahii NAI Maromak! Ita hananu hahii ita nia Maromak, nee diak no furak teb-tebes, tanba Nia serve duni atu ita hahii.
PSA 147:2 NAI Maromak harii fali Jerusalém; Nia halibur fila fali Israel oan sira nebee ema soe ba iha rai seluk.
PSA 147:3 Nia kura ema nebee laran dodok, no kurtivu sira nia kanek.
PSA 147:4 Nia desidi fitun hira mak iha lalehan hodi foo naran ba fitun ida-idak.
PSA 147:5 Ita nia Nai nee boot ho kbiit makaas; Nia matenek la iha rohan.
PSA 147:6 NAI Maromak foti sae ema mukit, maibee soe ema aat tuun ba iha rai.
PSA 147:7 Hananu kantiku agradese nian ba NAI Maromak; toka viola halo muzika ba ita nia Maromak.
PSA 147:8 Nia hodi kalohan taka lalehan; Nia foo udan ba rai hodi halo duut moris iha foho leten.
PSA 147:9 Nia foo ai haan ba animal ho mos ba manu metan oan nebee lian hodi husu ai haan.
PSA 147:10 Laos kuda nia forsa mak halo kontenti NAI nia laran; Nia laos haksolok tanba funu nain nebee forti.
PSA 147:11 Maibee NAI kontenti ho ema nebee mak hamtauk Nia; Nia haksolok ho ema nebee mak laran metin ba Nia domin rohan-laek.
PSA 147:12 Jerusalém, tane aas NAI Maromak ba; Siaun, hahii o nia Maromak ba.
PSA 147:13 Tanba Nia haforsa o nia portaun boot, no foo bensaun ba o nia povu.
PSA 147:14 Nia halo o nia fronteira seguru, no habosu o nia povu ho hahaan diak nian.
PSA 147:15 Nia hatuun Nia orden ba iha rai; Nia liafuan semo lalais liu.
PSA 147:16 Nia kari neve hanesan bibi fulun mutin; Nia halo namkari jelu fatuk rahun hanesan ahu kdesan.
PSA 147:17 Nia tuda tuun udan jelu fatuk hanesan britas. See mak bele aguenta malirin boot nebee Nia hatuun nee?
PSA 147:18 Nia foo orden mak jelu nee nabeen; Nia haruka anin mak bee suli tuun.
PSA 147:19 Nia foo sai Nia liafuan ba Jacó nia jerasaun; Nia hatuun Nia lei ho regulamentu ba Israel.
PSA 147:20 Nia nunka halo nunee ba nasaun sel-seluk; sira la hatene Nia lei. Hahii NAI Maromak!
PSA 148:1 Hahii NAI Maromak! Imi nebee iha lalehan, hahii NAI Maromak ba; buat hotu iha leten aas ba, hahii Nia ba.
PSA 148:2 Maromak nia anju sira hotu, hahii Nia; tropas lalehan nian, hahii Nia ba.
PSA 148:3 Loro matan ho fulan, hahii Nia; fitun sira hotu nebee lakan nabilan, hahii Nia ba.
PSA 148:4 Lalehan leten aas ba, hahii Nia, nunee mos bee hotu iha kalohan leten.
PSA 148:5 Buat sira nee hotu hahii NAI Maromak nia naran ba, tanba Nia foo orden mak buat sira nee iha.
PSA 148:6 Nia harii buat sira nee nafatin ba nafatin; orden nebee Nia foo nee vale tinan ba tinan.
PSA 148:7 Buat hotu-hotu iha mundu, hahii NAI Maromak ba! Tasi laran klean ho animal bo-boot tasi nian,
PSA 148:8 rai lakan ho udan jelu fatuk, neve ho abu-abu, anin boot makaas nebee halao Nia orden,
PSA 148:9 foho bo-boot ho foho kiik sira hotu, ai nebee foo fuan ho ai huun sedru hotu-hotu,
PSA 148:10 animal fuik ho karau hotu-hotu, animal nebee dolar iha rai ho mos manu fuik,
PSA 148:11 liurai mundu nian ho povu nasaun hotu-hotu, liurai oan sira ho ukun nain sira hotu iha mundu,
PSA 148:12 mane klosan ho feto klosan sira, ferik-katuas ho labarik sira.
PSA 148:13 Hotu-hotu hahii NAI Maromak nia naran ba, tanba Nia naran boot liu hotu-hotu; Nia kbiit aas liu lalehan ho rai.
PSA 148:14 Nia halo Nia povu sai forti tiha, atu sira bele hahii Nia. Sira nee mak ema nebee foo laran ba Nia; sira nee ema Israel, ema nebee besik Nia. Hahii NAI Maromak!
PSA 149:1 Hahii NAI Maromak! Hananu kantiku foun ba NAI Maromak; hahii Nia iha Nia povu santu sira nia klaran.
PSA 149:2 Israel oan sira, kontenti ba, tanba Nia mak ita nia Kriador; Siaun oan sira, haksolok ba, tanba Nia mak ita nia Liurai.
PSA 149:3 Mai ita bidu hodi hahii Nia naran; mai ita baku tambor ho toka viola hodi halo muzika ba Nia,
PSA 149:4 tanba NAI Maromak nia laran haksolok ho Nia povu; Nia tane aas ema mukit sira hodi halo sira manaan.
PSA 149:5 Maromak nia povu santu, mai ita haksolok tanba Nia foti aas ita; mai ita hananu haksolok iha ita nia toba fatin.
PSA 149:6 Ita nia ibun sei hahii Maromak; ita nia liman kaer surik oin-kotuk kroat hotu
PSA 149:7 hodi selu fali nasaun jentiu sira nia hahalok aat, no kastigu sira nia povu;
PSA 149:8 atu kesi sira nia liurai ho korenti; atu futu sira nia nai ulun sira ho korenti besi,
PSA 149:9 atu kastigu nasaun sira nee tuir desizaun nebee Maromak hatuun tiha ona. Ho nunee Nia povu santu sai naran boot. Hahii NAI Maromak!
PSA 150:1 Hahii NAI Maromak! Hahii Maromak iha Nia fatin santu; hahii Nia iha Nia lalehan aas nebaa.
PSA 150:2 Hahii Nia tanba Nia halo buat mesak furak; hahii Nia tanba Nia boot liu buat hotu-hotu.
PSA 150:3 Huu karau dikur hodi hahii Nia; toka viola oi-oin hodi hahii Nia.
PSA 150:4 Baku tambor no bidu hodi hahii Nia; toka viola no huu fafulu hodi hahii Nia.
PSA 150:5 Baku taxu hodi hahii Nia; baku taxu halo lian boot hodi hahii Nia.
PSA 150:6 Buat hotu-hotu nebee iha iis, hahii NAI Maromak ba. Hahii NAI Maromak!
MAT 1:1 Livru nee koalia kona ba Jesus Kristu. Jesus husi liurai David nia jerasaun, i David nee husi Abraão nia jerasaun.
MAT 1:2 Jesus nia bei-ala sira nia naran komesa husi Abraão too liurai David hanesan tuir mai nee: Abraão nia oan Isac. Isac nia oan Jacó. Jacó nia oan Judá ho ninia maun-alin sira.
MAT 1:3 Judá nia oan Perez ho Zerá, sira nia inan naran Tamar. Perez nia oan Hesron. Hesron nia oan Aram.
MAT 1:4 Aram nia oan Aminadab. Aminadab nia oan Nahason. Nahason nia oan Salmon.
MAT 1:5 Salmon nia oan Boaz, nia inan naran Rahab. Boaz nia oan Obed, nia inan naran Rute. Obed nia oan Jessé.
MAT 1:6 Jessé nia oan liurai David. Jesus nia bei-ala sira husi liurai David too nia jerasaun nebee mak militar lori baa dadur iha rai Babilónia, sira nia naran mak tuir mai nee: David nia oan Salomão, nia inan nee uluk Urias nia feen.
MAT 1:7 Salomão nia oan Roboão. Roboão nia oan Abias. Abias nia oan Aza.
MAT 1:8 Aza nia oan Josafat. Josafat nia oan Jorão. Jorão nia oan Uzias.
MAT 1:9 Uzias nia oan Jotam. Jotam nia oan Ahaz. Ahaz nia oan Ezequias.
MAT 1:10 Ezequias nia oan Manassés. Manassés nia oan Amon. Amon nia oan Jozias.
MAT 1:11 Jozias nia oan mak Jekonias ho nia alin sira. Iha sira nia tempu mak militar lori povu Israel baa dadur iha Babilónia.
MAT 1:12 Jesus nia bei-ala sira husi tempu dadur nee ba oin mak tuir mai nee: Jekonias nia oan Salatiel. Salatiel nia oan Zorobabel.
MAT 1:13 Zorobabel nia oan Abiud. Abiud nia oan Eliakim. Eliakim nia oan Azur.
MAT 1:14 Azur nia oan Zadok. Zadok nia oan Jakim. Jakim nia oan Eliud.
MAT 1:15 Eliud nia oan Eleazar. Eleazar nia oan Matan. Matan nia oan Jacó.
MAT 1:16 Jacó nia oan José. José kaben ho Maria, i Maria mak kous Jesus. Jesus nee, ema mos bolu Nia Mesias, nee dehan katak, Salvador nebee Maromak promete hori uluk kedas atu haruka mai.
MAT 1:17 Nunee, komesa husi Abraão too David hamutuk jerasaun sanulu resin haat. Husi David too militar lori povu Israel baa dadur iha Babilónia mos jerasaun sanulu resin haat. I husi jerasaun nebee dadur iha Babilónia too Mesias hamutuk jerasaun sanulu resin haat tan.
MAT 1:18 Istoria kona ba Jesus Kristu nia moris hanesan nee: Nia inan Maria troka prenda ona ho José. Maibee bainhira sira nain rua seidauk moris hamutuk nudar feen ho laen, Maria hatene ona katak nia isin rua liu husi Espiritu Santu nia kbiit.
MAT 1:19 Bainhira José hatene katak Maria isin rua ona, nia hakarak atu hakotu sira nain rua nia relasaun. Maibee José lakohi halo moe Maria iha ema barak nia oin, tanba nia ema ida nebee laran moos. Nunee nia desidi atu hakotu nonook deit.
MAT 1:20 Maibee bainhira José hanoin hela buat nee, Nai Maromak nia anju ida mai hatudu aan ba nia liu husi mehi. Anju nee dehan, “José, liurai David nia jerasaun, la bele tauk atu kaben ho Maria. Tanba Labarik nebee mak iha Maria nia kabun laran nee mai husi Espiritu Santu.
MAT 1:21 Maria sei tuur ahi oan mane ida. O tenki foo naran Jesus, tanba Nia mak sei salva Nia povu husi sira nia sala.”
MAT 1:22 Buat hirak nee hotu sai nunee tuir saida mak Nai Maromak nia profeta hori uluk kedas hakerek ona dehan,
MAT 1:23 “Aban-bainrua iha feto raan ida sei isin rua hodi tuur ahi oan mane ida. Labarik nee nia naran Emanuel.” Nee dehan katak “Maromak hamutuk ho ita”.
MAT 1:24 Bainhira José hadeer, nia halo tuir saida mak anju nee hatete ba nia. Nia kaben ho Maria.
MAT 1:25 Maibee nia la halo relasaun ho Maria hanesan feen-laen too Maria tuur ahi. I José foo naran ba Labarik nee, Jesus.
MAT 2:1 Jesus moris iha aldeia Belém iha provinsia Judeia. Iha tempu nebaa liurai Herodes mak ukun rai nee. Iha loron ida matenek nain balu nebee hatene siik sinal iha fitun, sira mai husi rai dook, husi parte lorosae. Too iha sidade Jerusalém,
MAT 2:2 sira husu, “Kosok Oan nebee moris atu sai ema Judeu sira nia liurai nee iha nebee? Ami haree tiha ona fitun ida iha parte lorosae nebee foo sinal kona ba Nia moris. Tanba nee mak ami mai atu adora Nia.”
MAT 2:3 Bainhira liurai Herodes rona sira nia liafuan nee, nia laran susar teb-tebes, nunee mos povu iha Jerusalém tomak.
MAT 2:4 Depois Herodes halibur nai lulik nia ulun sira ho mestri relijiaun sira hotu hodi husu, “Mesias, Salvador nebee Maromak promete hori uluk kedas atu haruka mai nee, sei moris iha nebee?”
MAT 2:5 Sira hataan, “Iha aldeia Belém iha provinsia Judeia. Tanba hori uluk kedas Maromak nia profeta hakerek dehan,
MAT 2:6 ‘Imi ema Belém, iha povu Judá nia rain, keta hanoin dehan imi mak kiik liu iha Judá nee. Tanba ukun nain ida sei mai husi imi nia rain, Nia mak sei sai bibi atan ba Hau nia povu Israel.’”
MAT 2:7 Rona nunee, Herodes bolu nonook matenek nain sira nee hodi husu ba sira, hori-bainhira loos mak fitun nee mosu. I sira mos esplika ba nia.
MAT 2:8 Depois nia haruka sira baa Belém. Nia hameno hela dehan, “Senhor sira baa buka di-diak Labarik nee. Bainhira hetan ona Nia, mai fali foo hatene hau, para hau mos bele baa adora Nia.”
MAT 2:9 Rona tiha liurai nia liafuan, matenek nain sira nee komesa lao ba dadauk. Derepenti fitun nebee sira uluk haree iha lorosae nee, mosu fila fali iha sira nia oin. Haree nunee, sira mos kontenti teb-tebes, i sira lao tuir fitun nee. Too iha Labarik nee nia hela fatin, fitun nee mos para iha uma leten.
MAT 2:11 Nunee sira tama liu ba uma laran haree Labarik nee ho Nia inan Maria, i sira hakneak hakruuk too rai hodi adora Nia. Depois sira hasai sira nia prezenti karun teb-tebes, sira foo ba Labarik nee osan mean, ai been morin ho mina morin diak nian.
MAT 2:12 Hotu tiha Maromak foo hanoin ba sira liu husi mehi katak sira la bele fila fali ba Herodes. Entaun sira fila ba sira nia rain liu husi dalan seluk.
MAT 2:13 Bainhira matenek nain sira fila tiha, Nai Maromak nia anju mai hatudu aan ba José liu husi mehi. Anju nee foo hatene dehan, “Hadeer ona! Lori Labarik nee ho Nia inan halai ba iha rai Ejitu, tanba Herodes buka hela Labarik nee atu oho Nia. Hela iha nebaa too hau foo hatene fali ba o katak imi bele fila.”
MAT 2:14 Iha kalan nee kedas, José hadeer lori Labarik nee ho Nia inan halai ba Ejitu,
MAT 2:15 i sira hela iha nebaa too Herodes mate. Uluk kedas Nai Maromak koalia liu husi Nia profeta dehan, “Hau bolu Hau nia Oan sai husi Ejitu.” Agora sai duni nunee.
MAT 2:16 Bainhira liurai Herodes hatene katak, matenek nain sira halo beik tiha nia hodi fila liu husi dalan seluk, nia hirus teb-tebes. Nia foo orden ba soldadu sira atu baa Belém vila ho rai nebee besik hodi oho hotu labarik mane kiikoan nebee tinan rua mai kraik. Nia foo orden nunee tuir informasaun husi matenek nain sira kona ba tempu nebee mak sira haree fitun nee mosu.
MAT 2:17 Buat nee akontese tuir saida mak Maromak nia profeta Jeremias foo sai uluk kedas dehan,
MAT 2:18 “Iha ema tanis hakilar iha aldeia Rama. Rakél tanis halerik tanba nia oan sira la iha ona. Ema hamaus nia atu la bele tanis maibee nia lakohi rona.”
MAT 2:19 Ikus mai liurai Herodes mate. Iha tempu nebaa Nai Maromak nia anju hatudu aan ba José liu husi mehi iha rai Ejitu.
MAT 2:20 Anju nee dehan, “Hadeer ona! Lori Labarik nee ho Nia inan fila fali ba rai Israel, tanba ema nebee hakarak oho Labarik nee mate tiha ona.”
MAT 2:21 Entaun José hadeer i lori Labarik nee ho Nia inan fila fali ba Israel.
MAT 2:22 Maibee too iha nebaa, José rona katak liurai Herodes nia oan Arquelau mak ukun fali iha provinsia Judeia, nunee nia tauk atu fila ba nebaa. Maromak mos foo hanoin ba nia liu husi mehi. Entaun sira baa hela fali iha provinsia Galileia,
MAT 2:23 iha aldeia ida naran Nazaré. Nunee buat nebee profeta sira uluk koalia akontese duni. Sira dehan, “Ema sei bolu Nia Nazaré oan.”
MAT 3:1 Molok Jesus hahuu Nia knaar, João Sarani Nain komesa hanorin ema iha rai fuik maran iha rai Judeia.
MAT 3:2 Nia foo sai dehan, “Hakribi ona imi nia sala, tanba tempu besik ona atu Maromak ukun imi.”
MAT 3:3 Uluk liu Maromak nia profeta Isaias hakerek ona kona ba João dehan, “Iha ema ida foo sai ho lian makaas iha rai fuik maran dehan, ‘Imi tenki hadia dalan para simu ita nia Nai. Halo loos tiha dalan nebee kleuk para Nia lao tuir.’ ”
MAT 3:4 João nia hena halo husi kuda kamelu nia fulun, i nia sintu halo husi animal nia kulit. Nia hahaan mak gafanhotu ho bani been.
MAT 3:5 Ema barak mai husi fatin oi-oin atu haree João. Sira mai husi sidade Jerusalém, husi provinsia Judeia tomak ho mos husi aldeia sira nebee mak besik iha mota Jordaun.
MAT 3:6 Sira foo sai sira nia sala, depois João foo sarani sira iha mota Jordaun.
MAT 3:7 Iha mos ema barak husi grupu Farizeu ho Saduseu mai atu João foo sarani sira. Maibee bainhira João haree sira, nia siak sira dehan, “Hoi! Samea nia oan! Maromak sei kastigu imi tanba imi nia hahalok aat. Karik ema bosok imi dehan imi bele sarani para sees aan husi kastigu nee.
MAT 3:8 Imi tenki muda imi nia hahalok hodi hatudu katak imi husik duni imi nia sala.
MAT 3:9 I lalika hanoin dehan, imi loos ona tanba deit imi Abraão nia jerasaun. Lae! Hau hatete ba imi, fatuk sira nee mos, Maromak bele halo sai Abraão nia jerasaun.
MAT 3:10 Maromak hanesan toos nain nebee kaer hela baliu atu tesi ona ai huun too abut. Ai huun hotu-hotu nebee la foo fuan diak, Nia sei tesi tiha hodi soe ba ahi laran.
MAT 3:11 Hau foo sarani imi ho bee deit para hatudu katak, imi hakribi ona imi nia sala. Maibee la kleur tan, Ema ida boot liu hau sei mai. Atu lori deit Nia sandalias mos, hau la serve. Ema nee laos foo sarani imi ho bee, maibee Nia sei foo sarani imi hodi Espiritu Santu ho mos ahi.
MAT 3:12 Nia hanesan natar nain nebee prontu ona atu haketak hare isin ho hare kulit sira nee. Hotu tiha, hare isin nia sei rai di-diak iha armazen, maibee hare kulit nia soe tiha ba ahi ida nebee nunka mate.”
MAT 3:13 Iha tempu nebaa Jesus mai husi rai Galileia ba iha mota Jordaun para João foo sarani Nia.
MAT 3:14 Maibee João lakohi. Nia dehan, “Tuir lo-loos Ita Boot mak foo sarani hau. Nusaa mak Ita Boot mai fali iha hau?”
MAT 3:15 Jesus hataan, “Husik ba, agora nee ita mak foo sarani Hau para halo tuir Maromak nia hakarak.” João mos simu.
MAT 3:16 Sarani hotu tiha, Jesus sai kedas husi bee laran. Derepenti lalehan nakloke, i Nia haree Maromak nia Espiritu hanesan manu pombu tuun ba iha Nia.
MAT 3:17 Depois lian ida husi lalehan hatete, “Ida nee Hau nia Oan Doben; Nia halo Hau nia laran haksolok teb-tebes.”
MAT 4:1 Hotu tiha, Maromak nia Espiritu domina Jesus i lori Nia ba iha rai fuik maran atu Satanás bele koko Nia.
MAT 4:2 Iha nebaa Jesus jejun durante loron haat-nulu, kalan haat-nulu, too Nia hamlaha.
MAT 4:3 Depois diabu tentador mai koko Jesus. Diabu nee dehan, “Se O Maromak nia Oan duni, haruka fatuk sira nee sai paun.”
MAT 4:4 Maibee Jesus hataan, “Iha Livru Sagradu hakerek, ‘Ema kriatura laos moris husi hahaan deit, maibee presiza mos Maromak nia liafuan hotu-hotu.’”
MAT 4:5 Depois Satanás lori Jesus ba iha Jerusalém, Maromak nia sidade. Satanás lori Nia baa hamriik iha uma kreda boot nia tutun,
MAT 4:6 i dehan, “Se O Maromak nia Oan duni, soe aan tuun ba rai. Tanba iha Livru Sagradu hakerek dehan, ‘Maromak sei haruka Nia anju sira mai kuidadu O.’ ‘Sira sei lolo liman hodi tane O, atu O nia ain la bele kona fatuk.’”
MAT 4:7 Maibee Jesus hataan dehan, “Iha Livru Sagradu mos bandu ema dehan, ‘La bele koko Maromak, o nia Nai.’”
MAT 4:8 Depois Satanás lori tan Jesus ba iha foho ida aas teb-tebes nia tutun, i hatudu ba Jesus nasaun hotu-hotu iha mundu tomak ho sira nia riku-soin hotu.
MAT 4:9 Satanás dehan ba Jesus, “Buat sira nee hotu hau sei foo ba O, naran katak O hakneak hodi adora hau.”
MAT 4:10 Maibee Jesus hataan fali dehan, “Satanás, sai tiha husi nee! Tanba iha Livru Sagradu haruka ema hotu-hotu nunee: ‘O tenki adora Maromak, o nia Nai, i serbi mak Nia deit.’”
MAT 4:11 Hotu tiha Satanás husik tiha Jesus, i anju sira mai serbi Nia.
MAT 4:12 Iha loron ida, Jesus rona katak ema kaer tiha João Sarani Nain hodi baa dadur iha komarka. Nunee Jesus husik tiha provinsia Judeia baa fali iha provinsia Galileia.
MAT 4:13 Too iha nebaa, Nia baa uluk iha Nia aldeia Nazaré, depois baa hela fali iha sidade Kafarnaum. Sidade nee iha tasi Galileia nia sorin, iha rai Zebulón ho Naftali.
MAT 4:14 Nunee Jesus halo tuir saida mak Maromak nia profeta Isaias hakerek nanis ona dehan,
MAT 4:15 “Rai Zebulón ho rai Naftali, besik tasi Galileia, iha mota Jordaun nia sorin ba, rai Galileia, ema nebee laos Judeu nia hela fatin.
MAT 4:16 Iha rai nee, ema uluk moris iha nakukun laran, maibee agora sira hetan ona naroman boot. Iha sira nia rain, uluk nakukun atu lori sira ba mate haketak aan husi Maromak, maibee agora naroman mosu ona hodi leno sira.”
MAT 4:17 Iha tempu nebaa Jesus komesa foo sai ba ema dehan, “Hakribi ona imi nia sala, tanba tempu besik ona atu Maromak ukun imi.”
MAT 4:18 Iha loron ida Jesus lao hela iha tasi ibun Galileia. Nia haree peskador nain rua soe hela dai iha tasi. Sira nain rua nee maun-alin, maun naran Simão, ema mos bolu nia Pedro. Alin naran André.
MAT 4:19 Jesus dehan ba sira, “Mai tuir Hau! Imi nee peskador ikan nian, maibee agora Hau sei hanorin imi atu sai peskador ba ema.”
MAT 4:20 Sira mos husik kedas sira nia dai hodi tuir Jesus.
MAT 4:21 Jesus lao nafatin, Nia haree tan ema nain rua, Tiago ho nia alin João. Sira nain rua hadia hela redi iha roo laran hamutuk ho sira nia aman Zebedeu. Jesus bolu tan sira nain rua atu tuir Nia.
MAT 4:22 Tiago ho João mos husik kedas sira nia aman ho sira nia roo hodi tuir Jesus.
MAT 4:23 Jesus lao iha provinsia Galileia tomak hodi hanorin iha ema Judeu sira nia uma kreda. Nia foo sai Liafuan Diak kona ba oinsaa Maromak ukun nudar Liurai. I ema nia moras oi-oin deit, Nia kura hotu kedas.
MAT 4:24 Buat nebee Jesus halo, ema konta iha nebee-nebee too iha provinsia Síria tomak. Ema barak mai lori sira nia maluk nebee moras oi-oin, balu diabu tama iha laran, balu moras bibi maten, liman-ain mate ho moras sel-seluk tan. I Jesus kura moras sira nee hotu.
MAT 4:25 Ema barak teb-tebes mak tuir Jesus. Iha ema husi Galileia, husi rai Dekápolis, husi sidade Jerusalém ho provinsia Judeia, balu tan mai husi mota Jordaun nia sorin ba.
MAT 5:1 Iha loron ida Jesus haree ema barak mai hobur Nia, entaun Nia baa sae iha foho ida. Too iha nebaa, Nia tuur, i Nia eskolante sira mai haleu Nia.
MAT 5:2 Depois Nia komesa hanorin sira.
MAT 5:3 Jesus hanorin nunee: “Ema sira nebee hatene aan dehan sira presiza hela Maromak, sira simu bensaun nunee: Sira nee Maromak nia reinu.
MAT 5:4 Ema sira nebee tanis ho laran susar, sira simu bensaun nunee: Maromak sei hamaran sira nia matan been.
MAT 5:5 Ema sira nebee haraik aan, sira simu bensaun nunee: Maromak sei foo mundu foun ba sira atu hela.
MAT 5:6 Ema sira nebee hakarak teb-tebes atu moris loos, sira simu bensaun nunee: Maromak sei foo tuir sira nia hakarak nee.
MAT 5:7 Ema sira nebee mak hatudu laran luak ba ema seluk, sira simu bensaun nunee: Maromak sei hatudu Nia laran luak ba sira.
MAT 5:8 Ema sira nebee laran moos, sira simu bensaun nunee: Sira sei haree Maromak.
MAT 5:9 Ema sira nebee gosta tulun ema seluk atu moris iha dame nia laran, sira simu bensaun nunee: Maromak sei bolu sira nee Nia oan.
MAT 5:10 Ema nebee hetan terus tanba moris tuir Maromak nia hakarak, sira simu bensaun nunee: Sira nee Maromak nia reinu.
MAT 5:11 Bainhira ema hatete aat imi i halo terus imi tanba imi tuir Hau, ka sira bobar lia tuun-sae hodi hatete aat imi nia naran tanba Hau, imi hetan bensaun.
MAT 5:12 Kuandu ema halo imi terus nunee, simu ho haksolok i kontenti deit ba, tanba Maromak sei foo premiu boot ba imi iha lalehan. Keta haluha katak, Maromak nia profeta sira nebee moris iha tempu uluk mos, ema halo terus sira hanesan nee.”
MAT 5:13 “Imi hanesan masin ba mundu. Maibee se masin nee sai miis ona karik, ita la bele halo meer fila fali, la iha folin tan ona. Ita soe tiha deit i ema sama.
MAT 5:14 Imi mos hanesan ahi-oan nebee foo naroman ba mundu. Imi nia naroman hanesan sidade nebee mak harii iha foho leten, ema hotu-hotu bele haree.
MAT 5:15 Nunee mos bainhira ema sunu ahi-oan, nia nunka taka fali ho sanan. Maibee ahi-oan tenki tau iha fatin aas para bele foo naroman ba ema hotu nebee iha uma laran.
MAT 5:16 Imi nia moris mos tenki nunee, imi tenki sai naroman ba ema seluk atu nunee sira bele haree buat diak nebee imi halo. Nunee sira sei hahii imi nia Aman iha lalehan.”
MAT 5:17 “La bele hanoin katak, Hau mai iha mundu nee atu halakon Moisés nia lei ho profeta sira nia liafuan. Lae! Hau mai laos atu halakon maibee atu kumpri lo-loos buat hotu-hotu nebee mak sira hakerek tiha ona.
MAT 5:18 Hau hatete lo-loos ba imi, bainhira lalehan ho rai sei iha, buat hotu nebee hakerek iha lei nee, buat kiikoan ida mos sei la lakon, too buat hotu nebee Maromak hatete, sai realidade.
MAT 5:19 Nunee, see mak kontra lei ruma tanba dehan lei nee kiikoan deit, depois hanorin ema seluk atu lalika halo tuir, Maromak sei konsidera nia ema kiik liu iha Nia reinu. Maibee see mak moris tuir lei nee i hanorin ema seluk mos atu halo tuir, Maromak sei konsidera nia ema boot iha Nia reinu.
MAT 5:20 Hau dehan ba imi, imi tenki moris loos liu fali mestri relijiaun sira ho ema Farizeu sira. Se lae, imi la bele tama iha Maromak nia reinu.”
MAT 5:21 Jesus hanorin nafatin Nia eskolante sira dehan, “Imi rona ona katak uluk ita nia bei-ala sira hetan lei ida nebee dehan, ‘La bele oho ema. See mak oho ema, nia sei hetan kastigu.’
MAT 5:22 Maibee Hau hatete ba imi, see mak hirus ema seluk, nia sei hetan kastigu. See mak hirus ema seluk too tolok, nia sei baa hataan iha tribunal. I see mak hirus ema seluk dehan, ‘O beik-teen’, ema nee lao dadauk ona ba iha ahi infernu.
MAT 5:23 Nunee, se o baa iha altar atu foo o nia oferta ba Maromak, maibee too iha nebaa o hanoin hetan ema ruma hirus o tanba o nia hahalok,
MAT 5:24 husik lai o nia oferta iha altar oin. Depois baa dame malu ho ema nee lai mak foin fila fali mai hodi foo oferta nee ba Maromak.
MAT 5:25 Se ema ruma atu lori o ba iha tribunal, diak liu molok too tribunal o dame malu kedas ho nia. Se lae, ema nee bele entrega o ba iha juis, juis bele entrega o ba iha polisia, i polisia hatama o iha kadeia.
MAT 5:26 Hau dehan lo-loos ba o, o selu kotu tiha multa mak foin bele sai fali husi kadeia.”
MAT 5:27 “Imi rona ona lei nebee dehan, ‘La bele halo sala seksual ho ema nia feen ka laen.’
MAT 5:28 Maibee Hau hatete ba imi, se mane ida fihir feto ida hodi hanoin foer ba nia, mane nee halo ona sala seksual ho nia iha nia laran.
MAT 5:29 Se o nia matan sorin loos halo o monu ba sala karik, sukit sai o nia matan nee i soe tiha. Diak liu o moris ho matan sorin deit, duke o tama ba iha infernu ho matan kompletu.
MAT 5:30 Se o nia liman loos halo o monu ba sala karik, tesi sai o nia liman nee i soe tiha. Diak liu o moris ho liman ida deit, duke o tama ba iha infernu ho liman kompletu.”
MAT 5:31 “Iha lei ida nebee dehan, ‘See mak hakarak soe nia feen, tenki halo surat deklarasaun ida foo ba nia.’
MAT 5:32 Maibee Hau hatete ba imi, mane so bele soe nia feen kuandu nia feen halo ona sala seksual ho ema seluk. Se nia feen la sala ida, maibee mane nee soe nia, nee dehan katak, mane nee mak dudu nia feen atu halo sala seksual. Tanba se nia feen hola fali mane seluk, nee sala ona. I se mane ida kaben fali ho feto nebee nia laen soe tiha nee, mane nee mos halo sala seksual.”
MAT 5:33 “Nunee mos imi rona ona katak, uluk ita nia bei-ala sira simu lei ida nebee dehan, ‘Buat nebee mak o jura ba Nai Maromak, o tenki halo tuir duni, la bele kontra fali.’
MAT 5:34 Maibee Hau hatete ba imi, la bele halo juramentu saida deit. La bele jura temi lalehan, tanba lalehan nee Maromak nia kadeira hodi tuur kaer ukun.
MAT 5:35 La bele jura temi rai, tanba rai nee fatin hodi Maromak tau Nia ain. La bele jura temi Jerusalém, tanba Jerusalém nee Liurai Boot nia sidade.
MAT 5:36 I la bele jura temi imi nia ulun rasik, tanba imi nia fuuk lahan ida mos, imi la bele halo metan ka halo mutin.
MAT 5:37 Entaun se imi promete atu halo buat ruma, dehan deit, ‘Sin, hau sei halo.’ Se lae, dehan deit, ‘Lae.’ Se imi aumenta tan para haforsa imi nia promesa, entaun liafuan sira nee mai husi aat nain.”
MAT 5:38 “Imi rona ona lei nebee dehan, ‘Matan tenki selu ho matan, nehan tenki selu ho nehan.’
MAT 5:39 Maibee Hau hatete ba imi, la bele halo aat fali ba ema nebee mak halo aat imi. Se ema ruma basa imi nia hasan sorin loos karik, foo tan hasan sorin ba nia.
MAT 5:40 Se iha ema ruma hakarak hadau imi nia faru, foo mos imi nia faru manas ba nia.
MAT 5:41 Se iha militar ruma mak obriga imi atu hulan nia sasaan lao too kilometru ida, kontinua lao ho nia too kilometru rua.
MAT 5:42 Se ema husu imi nia sasaan ruma, foo deit ba. Se ema hakarak empresta buat ruma husi imi, foo empresta ba.”
MAT 5:43 “Imi rona ema dehan, ‘Hadomi o nia maluk, odi o nia inimigu.’
MAT 5:44 Maibee Hau hatete ba imi, hadomi imi nia inimigu sira, i harohan atu Maromak tulun ema nebee mak halo terus imi.
MAT 5:45 Se imi halo nunee, imi hatudu katak imi halo tuir imi nia Aman iha lalehan. Tanba Nia halo loro matan sae hodi foo naroman ba ema diak ho mos ema aat. I Nia foo udan ba ema nebee moris loos ho mos ema nebee moris iha sala laran.
MAT 5:46 Se imi hadomi deit ema nebee mak hadomi imi, imi atu manaan saida? Tanba kobrador impostu sira gosta han-matak ema maibee sira mos hadomi ema nebee mak hadomi sira.
MAT 5:47 Se imi kumprimenta deit imi nia maluk, imi nia hahalok nee diak liu ema seluk ka? Lae! Ema nebee la konhese Maromak mos halo ida nee.
MAT 5:48 Imi tenki laran diak teb-tebes, hanesan mos imi nia Aman iha lalehan laran diak.”
MAT 6:1 Jesus hanorin nafatin nunee: “Kuidadu, keta foti aan hatudu imi nia hahalok diak iha ema nia oin atu sira bele haree. Se imi halo nunee, imi nia Aman iha lalehan sei la selu imi nia kolen.
MAT 6:2 Bainhira o foo buat ruma ba ema kiak, la bele konta tuun-sae hanesan fali ema nebee buka oin. Sira sempre konta tuir sira nia diak iha uma kreda laran ho mos iha estrada ibun para ema bele gaba sira. Hau dehan lo-loos ba imi, sira simu hotu ona sira nia kolen.
MAT 6:3 Maibee bainhira o foo buat ruma ba ema kiak, saida mak o nia liman loos foo, o nia liman karuk lalika hatene.
MAT 6:4 Ho nunee, o foo sub-subar deit. O nia Aman iha lalehan haree hotu saida mak ema halo sub-subar, i Nia sei selu o nia kolen.”
MAT 6:5 “Bainhira imi halo orasaun, la bele hanesan ema nebee buka oin. Sira gosta hamriik halo orasaun iha uma kreda laran ho mos iha estrada boot atu ema bele haree. Hau dehan lo-loos ba imi, sira simu hotu ona sira nia kolen.
MAT 6:6 Maibee bainhira imi halo orasaun, tama iha kuartu laran, taka odamatan i halo orasaun ba imi nia Aman iha lalehan. Imi nia Aman nee, ema ida la haree. Maibee Nia haree hotu saida mak ema halo sub-subar, i Nia sei selu imi nia kolen.
MAT 6:7 Bainhira imi halo orasaun, la bele koalia fila ba fila mai hanesan fali jentiu sira, tanba sira hanoin dehan harohan ho liafuan naruk mak foin sira nia maromak simu.
MAT 6:8 La bele halo orasaun hanesan sira, tanba molok imi husu buat ruma ba imi nia Aman iha lalehan, Nia hatene uluk ona buat nebee mak imi presiza.
MAT 6:9 Nunee, halo orasaun hanesan nee: ‘Ami nia Aman iha lalehan, tulun ema atu foti aas Ita Boot nia naran santu.
MAT 6:10 Mai ukun ema hotu-hotu ba. Tulun ema iha mundu nee atu halo tuir Ita Boot nia hakarak, hanesan sira iha lalehan mos halo tuir.
MAT 6:11 Foo ai haan natoon mai ami iha loron ida nee.
MAT 6:12 Perdua ami nia sala, hanesan ami mos perdua ona ba ema nebee halo sala mai ami.
MAT 6:13 Keta husik ami atu monu ba tentasaun, maibee hasai ami husi buat aat. [Ita Boot mak Liurai, Ita Boot mak Kbiit Nain, Ita Boot mak serve atu ema hotu-hotu hahii, too tinan ba tinan. Amen.]’
MAT 6:14 Se imi perdua ema nebee mak halo sala hasoru imi, entaun imi nia Aman iha lalehan mos sei perdua imi nia sala.
MAT 6:15 Maibee se imi la perdua ema nebee mak halo sala hasoru imi, imi nia Aman mos sei la perdua imi nia sala.”
MAT 6:16 “Bainhira imi halo jejun, la bele halo imi nia oin tristi hanesan fali ema sira nebee buka oin. Sira hatudu aan nunee para ema bele hatene katak sira jejun hela. Hau dehan lo-loos ba imi, sira simu hotu ona sira nia kolen.
MAT 6:17 Maibee bainhira imi halo jejun, fase imi nia oin halo moos i sui imi nia fuuk halo kabeer,
MAT 6:18 para ema nebee haree imi la nota katak imi jejun hela. So imi nia Aman iha lalehan mak hatene. Ema ida la haree Nia, maibee Nia haree hotu saida mak ema halo sub-subar, i Nia sei selu imi nia kolen.”
MAT 6:19 “La bele rai riku-soin mundu nian ba imi nia aan, tanba iha mundu nee nehek mutin bele estraga, bele fuhuk tiha, i naok-teen bele tama baa foti.
MAT 6:20 Diak liu rai riku-soin ba imi nia aan iha lalehan. Iha nebaa nehek mutin la estraga, la fuhuk, i naok-teen mos la tama baa foti.
MAT 6:21 Tanba imi nia riku-soin tau iha nebee, imi nia laran mos iha nebaa.”
MAT 6:22 “Imi nia matan hanesan ahi-oan nebee foo naroman ba imi nia aan tomak. Se imi nia matan haree moos, imi nia aan mos naroman.
MAT 6:23 Maibee se imi nia matan aat, imi nia aan mos sai nakukun tiha. I kuandu naroman nebee iha imi nia aan la iha ona, entaun imi nia moris nakukun teb-tebes.”
MAT 6:24 “La iha ema ida mak bele serbi patraun nain rua. Tanba nia sei odi ida, i hadomi ida seluk. Nia sei foo laran ba ida, i lakohi interese ida seluk. Nunee mos imi la bele serbi Maromak i serbi osan dala ida.
MAT 6:25 Tanba nee, Hau hatete ba imi, lalika preokupa ho imi nia moris loro-loron, atu haan saida, ka atu hemu saida ka atu hatais saida. Ita nia moris folin liu hahaan, i ita nia isin lolon folin liu ropa.
MAT 6:26 Haree took manu fuik sira nebee semo iha leten nebaa. Manu sira nee la kuda batar, la silu batar, la rai hahaan iha armazen. Maibee imi nia Aman iha lalehan foo ai haan ba sira. Imi folin liu manu sira nee.
MAT 6:27 Se imi preokupa kona ba imi nia moris, nee bele aumenta imi nia tinan ka? Lae! Atu aumenta oras ida deit mos la bele.
MAT 6:28 Entaun nusaa mak imi preokupa kona ba imi nia ropa? Haree took ai funan nebee moris iha rai fuik nebaa. Ai funan nee la halo servisu, la soru tais.
MAT 6:29 Maibee Hau dehan ba imi, liurai Salomão, maski riku teb-tebes, nia hatais kapaas halo nusaa mos, ai funan sira nee kapaas liu nafatin.
MAT 6:30 Duut nebee ohin loron matak iha rai fuik, aban ema soe fali ba ahi laran mos, Maromak halo furak. Saa tan imi! Nia sei foo ropa ba imi hatais. Entaun nusaa mak imi nia fiar fraku hanesan nee?!
MAT 6:31 Nee duni lalika preokupa dehan, ‘Ita atu haan saida?’ ka ‘Ita atu hemu saida?’ ka ‘Ita atu hatais saida?’
MAT 6:32 Ema nebee la konhese Maromak, sira buka tuun-sae buat sira nee. Maibee imi nia Aman iha lalehan hatene hotu imi nia presiza nee.
MAT 6:33 Hakaas aan liu-liu atu serbi Maromak nudar imi nia Liurai hodi moris loos iha Nia oin mak Maromak sei foo tan buat sira nee ba imi.
MAT 6:34 Entaun lalika preokupa kona ba loron aban, tanba loron aban nee preokupasaun ketak fali. Susar nebee ita hetan iha loron ida nee, too ona ba loron nee.”
MAT 7:1 Jesus hanorin nafatin Nia eskolante sira dehan, “La bele ansi foo sala ba ema, atu nunee Maromak la foo sala ba o.
MAT 7:2 Imi tetu ema seluk nia sala oinsaa, Maromak mos sei tetu imi nunee. I sasukat nebee mak imi uza ba ema seluk, Maromak sei uza fali sasukat nee ba imi.
MAT 7:3 Nusaa mak o haree ai uut iha ema seluk nia matan, maibee ai kabelak nebee taka o nia matan rasik, o la senti?
MAT 7:4 Oinsaa mak o brani dehan ba o nia maluk, ‘Mai hau hasai tiha ai uut nee husi o nia matan.’ Afinal iha ai kabelak ida taka hela o nia matan rasik.
MAT 7:5 Imi nee koalia oin seluk, hahalok oin seluk! Hasai tiha uluk ai kabelak iha o nia matan rasik mak foin o haree hetan para bele hasai ai uut husi o nia maluk nia matan.
MAT 7:6 Buat nebee Maromak nian, la bele foo ba ema nebee lakohi rona. Nee hanesan imi foo fali ba asu, ka foo buat murak mean ba fahi. Se imi halo nunee, fahi sei sama tiha ba rai, i asu sei fila hodi ataka imi.”
MAT 7:7 “Husu beibeik ba Maromak, Nia sei foo. Buka beibeik, o sei hetan. Dere beibeik odamatan, odamatan sei nakloke ba o.
MAT 7:8 Tanba, see mak husu beibeik ba Maromak, nia sei simu. See mak buka beibeik, nia sei hetan. See mak dere beibeik odamatan, Maromak sei loke ba nia.
MAT 7:9 Imi aman sira, bainhira imi nia oan husu paun, imi foo fali fatuk ka?
MAT 7:10 Se nia husu ikan, imi foo fali samea ka? Nunka!
MAT 7:11 Maski imi ema aat, maibee imi hatene foo buat diak ba imi nia oan sira. Saa tan imi nia Aman iha lalehan! Bainhira imi husu, Nia sei foo buat diak teb-tebes ba imi.”
MAT 7:12 “Saida mak o hakarak atu ema seluk halo ba o, o mos tenki halo buat nee ba ema seluk. Ida nee mak Moisés nia lei ho profeta sira nia livru hanorin hori uluk kedas.”
MAT 7:13 “Atu tama ba moris rohan-laek, tenki liu husi odamatan kloot. Tanba odamatan ba infernu luan, nia dalan mos fasil atu ema liu, i ema barak mak tama liu husi odamatan nee.
MAT 7:14 Maibee odamatan atu tama ba moris rohan-laek kloot, nia dalan mos susar, i ema uitoan deit mak buka odamatan nee too hetan.”
MAT 7:15 “Kuidadu ho ema nebee bosok dehan, sira Maromak nia profeta. Sira finji maus hanesan bibi malae, afinal sira gosta estraga ema hanesan asu fuik.
MAT 7:16 Imi sei hatene sira husi sira nia hahalok, hanesan ita hatene ai huun ida husi nia fuan. Ai tarak nunka foo fuan fali uvas ka ai fuan figeira.
MAT 7:17 Ai huun nebee diak sei foo fuan nebee diak. I ai huun nebee la diak sei foo fuan nebee aat.
MAT 7:18 Ai huun diak la bele foo fuan nebee mak aat. I ai huun nebee aat la bele foo fuan diak.
MAT 7:19 Ai nebee mak la foo fuan diak, sei tesi tiha hodi soe ba ahi.
MAT 7:20 Nunee mos ho profeta falsu sira, imi bele konhese sira husi sira nia hahalok.”
MAT 7:21 “Ema barak bolu Hau dehan, ‘Nai, Nai!’ Maibee laos sira hotu-hotu mak sei tama ba Maromak nia reinu. So sira nebee moris tuir Hau nia Aman iha lalehan nia hakarak mak bele tama.
MAT 7:22 Iha loron ikus bainhira Maromak tesi ema hotu-hotu nia lia, ema barak sei mai dehan, ‘Nai, Nai, ami uluk foo tutan Maromak nia lia menon hodi Nai nia naran. Ami mos temi Ita Boot nia naran hodi duni sai diabu husi ema, i halo milagre oi-oin.’
MAT 7:23 Maibee Hau sei koalia mo-moos ba sira dehan, ‘Hau nunka konhese imi. Imi ema aat, sai husi nee!’ ”
MAT 7:24 “Ema nebee rona Hau nia liafuan nee i halo tuir, nia hanesan ema matenek ida nebee harii nia uma iha fatuk leten.
MAT 7:25 Depois udan boot mai, mota tuun, anin boot mos baku makaas uma nee. Maibee uma nee la monu, tanba harii metin iha fatuk leten.
MAT 7:26 Ema nebee rona Hau nia liafuan maibee la halo tuir, nia hanesan ema beik ida nebee harii nia uma iha rai henek leten.
MAT 7:27 Depois udan boot mai, mota tuun, anin boot mos baku makaas uma nee. I uma nee naksobu tiha too rai.”
MAT 7:28 Bainhira Jesus hanorin tiha hotu, ema barak nebee rona nee admira,
MAT 7:29 tanba Nia hanorin ho kbiit, la hanesan ho mestri relijiaun sira nia hanorin.
MAT 8:1 Jesus lao tuun mai husi foho, ema lubun boot nee mos lao tuir Nia.
MAT 8:2 Derepenti ema ida moras lepra mai hakneak iha Jesus nia oin hodi husu tulun dehan, “Nai, Ita Boot iha kbiit atu kura hau nia moras hodi halo hau nia isin sai moos fali, naran katak Ita Boot hakarak.”
MAT 8:3 Jesus lolo liman ba tau iha nia isin hodi dehan, “Hau hakarak. O diak ona ba!” I ema nee nia isin moos kedas.
MAT 8:4 Depois Jesus dehan ba nia, “La bele konta sai buat nee ba ema seluk. Maibee baa aprezenta aan iha nai lulik, atu nia haree katak o nia isin moos ona. Depois foo oferta tuir lei Moisés nian, para ema hotu bele hatene katak o diak ona.”
MAT 8:5 Depois Jesus tama ba iha sidade Kafarnaum. Iha nebaa komandante Roma ida mai hasoru Jesus hodi husu tulun
MAT 8:6 dehan, “Nai, Hau nia atan mane ida moras todan iha uma. Nia la bele book aan hodi hadeer husi toba fatin, nia terus atu mate.”
MAT 8:7 Jesus hataan, “Hau sei baa kura nia.”
MAT 8:8 Maibee komandante nee hataan fali dehan, “Nai, hau la serve atu simu Ita Boot iha hau nia uma. Nai foo deit orden ba moras nee mak moras nee sai husi hau nia atan.
MAT 8:9 Hau hatene nunee tanba hau nia komandante sira mos iha kbiit atu foo orden mai hau. Nunee mos, hau iha kbiit atu foo orden ba hau nia soldadu sira. Se hau manda hau nia soldadu ida dehan, ‘Baa nebaa!’, nia mos baa. Se hau hatete, ‘Mai iha nee!’, nia mai. Se hau haruka hau nia atan dehan, ‘Halo ida nee!’, nia halo duni.”
MAT 8:10 Rona nunee, Jesus admira, i Nia hatete ba ema sira nebee tuir Nia, “Hau dehan lo-loos ba imi, Hau seidauk haree ema Israel ida nebee fiar makaas hanesan ema Roma nee.
MAT 8:11 Rona mai. Ema barak sei mai husi fat-fatin, husi lorosae-loromonu, sira sei mai tuur haan hamutuk ho Ita nia bei-ala Abraão, Isac ho Jacó iha Maromak nia festa boot iha lalehan.
MAT 8:12 Hori uluk Maromak hili ema Israel atu sai Nia reinu hodi tama iha nebaa. Maibee barak mak Nia sei soe sai ba iha fatin nakukun. Iha nebaa sira sei tanis hakilar i ruun nehan.”
MAT 8:13 Depois Jesus dehan ba komandante nee, “Bele baa ona. Buat nebee ita fiar nee sei akontese duni.” Iha oras nee kedas komandante nia atan hetan fali isin diak.
MAT 8:14 Loron ida, Jesus baa iha Pedro nia uma. Nia tama baa haree Pedro nia banin feto toba hela, tanba nia isin manas.
MAT 8:15 Jesus kaer nia liman, derepenti nia isin manas lakon tiha, i nia hadeer kedas baa prepara hahaan foo ba Jesus.
MAT 8:16 Bainhira kalan ona, ema barak mai lori sira nia maluk nebee mak diabu tama iha laran. Depois Jesus foo orden deit, diabu sira nee sai kedas. Nia mos kura ema moras hotu-hotu.
MAT 8:17 Nunee Nia halo tuir saida mak Maromak nia profeta Isaias hakerek nanis ona dehan, “Nia rasik hasai ita nia moras. Ita nia moras aat, Nia mak lori.”
MAT 8:18 Iha loron ida, Jesus haree ema barak mai haleu Nia. Entaun Nia haruka Nia eskolante sira prepara roo para baa iha tasi sorin.
MAT 8:19 Jesus seidauk sae roo, mestri relijiaun ida mai dehan ba Nia, “Mestri, Ita Boot baa nebee deit, hau prontu atu tuir.”
MAT 8:20 Jesus hataan, “Asu fuik iha nia fatin hodi hela. Manu fuik mos iha nia knuuk. Maibee Hau, Ema Umanu nia Oan la iha fatin ida hodi tau Hau nia ulun ba.”
MAT 8:21 Iha tan ema ida nebee baibain tuir Jesus dehan ba Nia, “Nai, husik hau fila baa hakoi hau nia aman lai mak foin hau tuir Ita Boot.”
MAT 8:22 Maibee Jesus hataan, “Mai tuir Hau! Ema nebee lakohi rona Maromak, sira hanesan ema nebee mate tiha ona. Husik sira mak hakoi malu.”
MAT 8:23 Hotu tiha Jesus sae roo, i Nia eskolante sira mos tuir Nia.
MAT 8:24 Iha tasi klaran derepenti anin boot mai, too laloran boot halo tasi been tama iha roo laran. Maibee Jesus dukur hela.
MAT 8:25 Nia eskolante sira fanu Nia dehan, “Nai, salva lai ami, ita atu mout ona!”
MAT 8:26 Jesus hataan, “Imi nee fiar fraku. Nusaa mak imi tauk hanesan nee?” Depois Nia hadeer hodi siak anin ho laloran boot nee. Anin para kedas, tasi mos hakmatek liu.
MAT 8:27 Nia eskolante sira admira dehan, “Ema nee see loos mak too anin ho laloran mos rona Nia?”
MAT 8:28 Depois Jesus too iha tasi sorin, iha ema Gadara sira nia rain. Iha nebaa iha mane nain rua diabu tama iha sira nia laran. Sira nee siak loos, too la iha ema ida mak brani atu lao liu husi nebaa. Sira sai mai husi fatuk kuak nebee ema halo ba rate, i hasoru Jesus.
MAT 8:29 Sira hakilar dehan, “Maromak nia Oan, O hakarak halo saida mai ami? Tempu seidauk too mos, O atu kastigu ami ka?”
MAT 8:30 Iha momentu nebaa iha fahi barak teb-tebes haan hela iha foho lolon, laduun dook husi fatin nee.
MAT 8:31 Diabu sira husu fila-fila ba Jesus, “Se O atu duni sai ami karik, entaun haruka ami tama ba iha fahi sira nebaa.”
MAT 8:32 Jesus haruka sira dehan, “Baa ona!” Entaun diabu sira sai tiha husi ema nain rua nee hodi tama fali iha fahi. Derepenti fahi sira nee halai saruntu malu tuun husi foho nee, monu hotu ba tasi laran, i mout too mate hotu.
MAT 8:33 Haree nunee, fahi atan sira halai ba vila laran hodi konta sai kona ba ema nain rua nebee uluk diabu domina nee, ho mos istoria nee tomak.
MAT 8:34 Depois ema hotu sai mai husi vila hasoru Jesus, i sira husu fila-fila atu Nia sai ona husi rai nee.
MAT 9:1 Hotu tiha Jesus sae fali roo fila ba iha tasi sorin hodi baa iha Nia sidade.
MAT 9:2 Iha nebaa ema balu mai hulan mane ida liman-ain mate, latan hela iha nia toba fatin. Sira lori nia ba Jesus. Bainhira Jesus haree sira nia fiar, Nia dehan ba ema isin mate nee, “Oan, laran metin ba! O nia sala hamoos tiha ona.”
MAT 9:3 Mestri relijiaun sira rona liafuan nee, sira murmura dehan, “Ema nee foti Aan hanesan fali Maromak!”
MAT 9:4 Maibee Jesus hatene hela sira nia hanoin, entaun Nia dehan, “Nusaa mak imi hanoin aat nunee?
MAT 9:5 Se Hau dehan ba ema nee katak, nia sala hamoos tiha ona, imi seidauk hatene, sai duni nunee ka lae. Maibee se Hau haruka nia hamriik ona hodi lao, imi bele haree ho matan.
MAT 9:6 Agora Hau sei hatudu mo-moos ba imi katak, iha mundu nee Hau, Ema Umanu nia Oan iha kbiit hodi hamoos ema nia sala.” Depois Jesus hatete ba ema liman-ain mate nee, “Hamriik ona! Foti o nia toba fatin hodi fila ba uma.”
MAT 9:7 Ema nee mos hamriik kedas hodi lao ba uma.
MAT 9:8 Ema barak haree buat nebee Jesus halo nee. Sira hakfodak ho tauk, i sira hahii Maromak tanba Nia foo tiha ona kbiit hanesan nee ba ema.
MAT 9:9 Depois Jesus husik tiha fatin nee. Nia lao dadauk, Nia hetan ema kobrador impostu ida naran Mateus, tuur hela iha nia servisu fatin. Jesus dehan ba nia, “Mai tuir Hau!” Mateus mos hamriik hodi tuir Jesus.
MAT 9:10 Depois Jesus ho Nia eskolante sira baa haan iha Mateus nia uma, i kobrador impostu barak ho ema aat sira seluk mai haan hamutuk ho sira.
MAT 9:11 Ema husi grupu Farizeu sira haree, i sira husu ba Jesus nia eskolante sira, “Nusaa mak imi nia mestri haan hamutuk fali ho kobrador impostu ho ema aat sira nee?”
MAT 9:12 Maibee bainhira Jesus rona sira nia liafuan nee, Nia dehan, “So ema moras mak presiza doutor, ema isin diak lae.
MAT 9:13 Baa aprende di-diak Maromak nia liafuan nebee dehan, ‘Hau hakarak atu imi hatudu laran luak ba malu. Se lae, imi lori sakrifisiu foo mai Hau mos la iha folin.’ Hau mai atu bolu ema aat sira, laos atu bolu ema nebee konsidera nia aan moris loos ona.”
MAT 9:14 Depois João Sarani Nain nia eskolante sira mai husu Jesus nunee: “Ami nebee tuir João Sarani Nain baibain halo jejun. Ema Farizeu sira nia eskolante sira mos hanesan. Maibee tansaa mak Ita Boot nia eskolante sira la jejun?”
MAT 9:15 Jesus hataan ho komparasaun dehan, “Hau hanesan noivu ida nebee selebra nia festa kazamentu. Bainhira noivu sei hamutuk ho nia bainaka sira, sira la bele tristi. Maibee too iha loron ida, ema sei lori lakon tiha noivu nee. Iha loron nee mak nia bainaka sira sei jejun.
MAT 9:16 La iha ema ida uza hena foun hodi taka fali ba hena bosan nebee kuak. Se lae, hena foun dada hamutuk sai kiik tiha too estraga fali hena bosan nee halo naklees liu tan.
MAT 9:17 Nunee mos ema halo tua, la tau iha tua fatin nebee halo husi animal nia kulit nebee tuan ona. Tanba tua foun sempre nafurin sae hodi halo kulit tuan nee nakfera tanba toos tiha ona. Nunee tua mos fakar sai. Tua foun, tenki tau iha tua fatin foun. Nunee tua fatin bele dura i tua mos la fakar sai.”
MAT 9:18 Jesus sei koalia hela ho João Sarani Nain nia eskolante sira, responsavel uma kreda ida mai hakneak iha Jesus nia oin hodi husu tulun dehan, “Hau nia oan feto foin mate. Hau husu atu Ita Boot baa tau liman ba nia hodi halo nia moris fali.”
MAT 9:19 Entaun Jesus hamriik lao tuir responsavel nee, i Nia eskolante sira mos baa hamutuk ho Nia.
MAT 9:20 Iha dalan klaran, iha feto ida, nia fulan mai la para durante tinan sanulu resin rua. Feto nee hanoin nunee: “Naran katak hau kona kois deit Nia hena mos, hau nia moras sei diak.” Entaun nia bes-besik ba iha Jesus nia kotuk hodi kona Jesus nia hena rohan.
MAT 9:22 Jesus fila ba kotuk i haree feto nee hodi dehan, “Oan, laran metin ba! O hetan kura tanba o fiar mai Hau.” I nia moras diak kedas.
MAT 9:23 Bainhira Jesus too iha responsavel nia uma, Nia haree ema toka muzika mate nian i ema barak tanis halerik.
MAT 9:24 Jesus dehan ba sira, “Imi hotu sai. Menina nee la mate ida, nia toba deit.” Maibee sira hamnasa fali Nia.
MAT 9:25 Bainhira ema sira nee sai hotu, Jesus tama ba laran hodi kaer menina nee nia liman, i menina nee hadeer fali.
MAT 9:26 Buat nebee Jesus halo nee, ema konta lemo-lemo, too ema iha rejiaun nee tomak hatene.
MAT 9:27 Depois Jesus sai husi fatin nee. Nia lao dadauk, iha ema matan delek nain rua lao tu-tuir Nia hodi bolu ho lian makaas dehan, “Liurai David nia Jerasaun, hanoin ami ba!”
MAT 9:28 Jesus tama iha uma laran, ema matan delek nain rua nee mos tama tuir Nia. Jesus husu ba sira dehan, “Imi fiar katak Hau bele kura imi nia matan ka?” Sira hataan, “Ami fiar, Nai.”
MAT 9:29 Depois Jesus tau liman ba sira nia matan hodi dehan, “Tanba imi nia fiar mak imi hetan kura.”
MAT 9:30 Sira nain rua nia matan haree moos kedas. Jesus bandu makaas sira dehan, “La bele foo hatene buat nee ba see-see deit.”
MAT 9:31 Maibee sira sai baa konta lemo-lemo kona ba Jesus iha rejiaun nee tomak.
MAT 9:32 Bainhira sira nain rua nee sai dadauk, ema lori tan sira nia maluk ida ba Jesus. Ema nee diabu domina ona too nia koalia la diak.
MAT 9:33 Jesus duni sai tiha diabu, ema nee bele koalia kedas. Ema barak nebee haree buat nee, sira hotu admira dehan, “Buat ida hanesan nee foin mak akontese iha rai Israel.”
MAT 9:34 Maibee ema Farizeu sira dehan, “Nia duni sai diabu tanba diabu nia xefi mak foo kbiit ba Nia.”
MAT 9:35 Jesus lao husi sidade ba sidade ho aldeia ba aldeia hodi hanorin iha uma kreda laran. Nia foo sai Liafuan Diak kona ba oinsaa Maromak ukun nudar Liurai. I ema nebee moras oi-oin Nia kura tiha hotu.
MAT 9:36 Bainhira Jesus haree ema barak nee, Nia hanoin loos sira, tanba sira la hatene atu halo oinsaa, i la iha ema ida atu tulun sira. Sira hanesan bibi malae nebee la iha bibi atan atu hatudu dalan ba sira.
MAT 9:37 Depois Jesus soe lia ba Nia eskolante sira dehan, “Batar iha toos laran maran tiha ona. Batar nee barak teb-tebes, maibee ema atu silu, uitoan deit.
MAT 9:38 Tanba nee, harohan ba Toos Nain atu haruka tan ema hodi silu batar nee.”
MAT 10:1 Iha loron ida Jesus halibur Nia eskolante nain sanulu resin rua. Nia foti sira sai Nia apostolu hodi foo kbiit ba sira atu duni sai diabu husi ema i kura ema nia moras oi-oin.
MAT 10:2 Sira nain sanulu resin rua nia naran mak hanesan tuir mai nee: Primeiru, Simão (ema mos bolu nia Pedro), ho nia alin André, Tiago ho nia alin João (sira nain rua Zebedeu nia oan),
MAT 10:3 Filipe ho Bartolomeu, Tomé ho Mateus (nia kobrador impostu), Tiago (nia Alfeu nia oan) ho Tadeu,
MAT 10:4 Simão (nia ema Patriota), ho Judas Iscariotes (ikus mai nia mak faan Jesus).
MAT 10:5 Jesus foo knaar ba apostolu nain sanulu resin rua hanesan nee: “Imi baa ona. Imi tenki baa iha ema Israel sira deit, tanba sira hanesan bibi malae nebee lao sala dalan ona. La bele baa tama iha ema jentiu sira nia leet. Ema Samaria nia aldeia sira mos la bele tama.
MAT 10:7 Baa foo hatene ema Israel sira dehan, ‘Tempu besik ona atu Maromak ukun imi.’
MAT 10:8 Baa kura ema moras, halo moris fali ema mate, foo isin diak ba ema nebee moras lepra, i duni sai diabu husi ema nia laran. Imi simu kbiit nee ho gratis, tenki foo mos ho gratis.
MAT 10:9 La bele lori osan mean ka osan mutin, atu doit ida mos la bele.
MAT 10:10 Lalika lori pasta, lalika lori hena tahan rua ka sandalias atu troka iha dalan, i lalika lori imi nia ai tonka. Tanba ema nebee servisu, nia iha direitu atu ema foo buat nebee mak nia presiza.
MAT 10:11 Bainhira imi tama iha sidade ida ka aldeia ida, baa buka uluk ema ida nebee laran diak, i hela iha nia uma too imi sai fali husi fatin nee.
MAT 10:12 Bainhira imi tama iha uma laran, harohan ba Maromak atu foo bensaun ba uma kain nee.
MAT 10:13 Se uma nain simu imi ho diak, sira sei hetan duni bensaun nee. Se lae, dada fila fali imi nia liafuan bensaun nee.
MAT 10:14 Se imi baa too iha uma ida ka aldeia ida mak ema la simu imi ka lakohi rona imi nia liafuan, husik tiha fatin nee. I hisik rai rahun husi imi nia ain okos nudar sinal katak sira rasik mak sei lori todan.
MAT 10:15 Hau hatete lo-loos ba imi, iha loron ikus bainhira Maromak tesi ema hotu-hotu nia lia, ema iha aldeia nee sei simu kastigu todan liu fali ema aat sira nebee uluk hela iha rai Sodoma ho Gomora.”
MAT 10:16 Jesus hatutan tan dehan, “Rona di-diak, Hau haruka imi baa hanesan bibi malae nebee tama iha asu fuik nia leet. Imi tenki matenek hanesan samea. I imi nia laran tenki moos hanesan manu pombu.
MAT 10:17 Kuidadu, tanba ema sei mai kaer imi hodi lori imi ba iha tribunal. Sira sei baku imi ho sikoti iha sira nia uma kreda laran.
MAT 10:18 Sira mos sei foo sala ba imi iha nai ulun ho liurai sira nia oin. Buat sira nee hotu sai nunee tanba imi tuir Hau. Ho nunee imi sei foo sasin kona ba Hau iha sira nia oin ho mos iha ema nebee laos Judeu nia oin.
MAT 10:19 Bainhira ema lori imi baa hataan iha tribunal, lalika preokupa atu koalia saida ka atu hataan oinsaa. Tanba iha oras nee duni Maromak sei foo hatene ba imi liafuan nebee mak imi atu koalia sai.
MAT 10:20 Iha tempu nee, laos imi mak koalia, maibee imi nia Aman nia Espiritu mak koalia liu husi imi.
MAT 10:21 Iha uma laran ida, se iha ema ida mak fiar mai Hau, nia maun-alin rasik mak sei entrega nia ba nai ulun sira para oho. Se oan ida fiar mai Hau, nia aman rasik mak entrega nia ba ema seluk para oho. Se inan-aman mak fiar, sira nia oan rasik mak hamriik hasoru sira hodi foo ba ema oho.
MAT 10:22 Ema iha nebee-nebee deit sei odi imi tanba imi tuir Hau. Maibee ema nebee mak aguenta nafatin too rohan, Maromak sei salva sira.
MAT 10:23 Bainhira ema halo terus imi iha sidade ida tanba imi fiar mai Hau, halai ba sidade seluk. Hau hatete lo-loos ba imi, imi seidauk haleu sidade hotu iha Israel laran, Hau, Ema Umanu nia Oan mai fali ona.
MAT 10:24 Estudante ida la bele boot liu nia mestri, i atan ida la bele boot liu fali nia patraun.
MAT 10:25 Se estudante ida sai hanesan nia mestri, nee too ona. I atan ida sai hanesan nia patraun, nee mos too ona. Hau hanesan imi nia xefi familia, maibee ema hatete aat Hau dehan, Hau diabu nia xefi Belzebu. Entaun imi nebee tama iha Hau nia familia mos, ema sei hatete imi aat loos.”
MAT 10:26 “Nunee lalika tauk ema sira nee. Tanba buat hotu-hotu nebee agora taka hela, loron ida sei nakloke. I buat hotu-hotu nebee agora subar hela, aban-bainrua ema sei hatene.
MAT 10:27 Buat nebee mak Hau foo hatene ba imi iha kotu-kotuk, imi tenki hatete sai. I saida mak Hau hanorin bis-bisu deit ba imi, imi tenki foo sai ho lian makaas iha ema barak nia oin.
MAT 10:28 La bele tauk ema nebee mak hakarak oho imi, tanba sira so bele oho deit imi nia isin, imi nia klamar sira la bele oho. Diak liu imi tauk mak Maromak, tanba Nia iha kbiit atu oho imi nia isin hodi soe imi nia klamar iha infernu laran.
MAT 10:29 Hanoin took manu liin. Manu liin rua, ema faan sentavus ida deit. Maski baratu liu, maibee la iha ida mak monu ba rai, se imi nia Aman iha lalehan la foo lisensa.
MAT 10:30 Laos nee deit, maibee Maromak mos hatene lo-loos imi nia fuuk lahan hira mak iha imi nia ulun.
MAT 10:31 Nee duni lalika tauk, tanba imi folin boot liu manu liin barak.”
MAT 10:32 “See mak foo sai iha ema nia oin katak nia fiar mai Hau, aban-bainrua Hau mos sei foo sai iha Hau nia Aman iha lalehan nia oin katak, nia Hau nia ema.
MAT 10:33 Maibee see mak foo sai iha ema nia oin katak nia la konhese Hau, aban-bainrua Hau mos sei foo sai iha Hau nia Aman iha lalehan nia oin katak, nia laos Hau nia ema.”
MAT 10:34 “Keta hanoin dehan Hau mai iha mundu nee atu lori dame. Hau mai laos atu lori dame, maibee atu lori konflitu.
MAT 10:35 Hau mai para halo ‘oan mane kontra nia aman, oan feto kontra nia inan, feto foun kontra nia banin feto.
MAT 10:36 Ema nia inimigu mai husi nia uma laran rasik.’
MAT 10:37 See mak hadomi liu nia inan-aman duke nia hadomi Hau, nia la serve atu sai Hau nia ema. Nunee mos ema nebee mak hadomi nia oan mane ka oan feto liu fali Hau, nia la serve sai Hau nian.
MAT 10:38 See mak hakarak sai Hau nia ema, nia tenki tuir Hau, i nia tenki prontu atu simu terus, hanesan ema nebee lori nia krus too mate. Se lae, nia la serve sai Hau nia ema.
MAT 10:39 Ema nebee hanoin liu nia moris iha mundu nee, sei lakon fali nia moris. Maibee see mak lakon nia moris iha mundu nee tanba nia tuir Hau, nia sei hetan moris rohan-laek.”
MAT 10:40 “See mak simu imi, nia simu ona Hau. See mak simu Hau, nia simu ona Ida nebee mak haruka Hau mai.
MAT 10:41 See mak simu profeta ida tanba profeta nee foo tutan Maromak nia lia menon, iha loron ikus bainhira Maromak selu profeta sira nia kolen, ema nee mos simu hanesan. I see mak simu ema ida nebee moris loos tanba nia moris nee loos, iha loron ikus bainhira Maromak selu ema moris loos sira nia kolen, ema nee mos simu hanesan.
MAT 10:42 Hau dehan lo-loos ba imi, see mak foo tulun ba ema kiik ida tanba ema nee tuir Hau, maski nia foo bee kopu ida deit mos, Maromak la haluha nia kolen.”
MAT 11:1 Bainhira Jesus hanorin tiha buat sira nee hotu ba Nia eskolante nain sanulu resin rua, Nia husik tiha fatin nee. Depois Nia lao husi aldeia ba aldeia iha rejiaun nee hodi hanorin ema i foo sai Maromak nia liafuan.
MAT 11:2 Iha tempu nebaa João Sarani Nain dadur tiha ona iha kadeia. Nia rona buat nebee Mesias halo. Nunee nia haruka nia eskolante balu baa hasoru Jesus hodi husu,
MAT 11:3 “Ita Boot mak Ema ida nebee Maromak promete atu haruka mai ka, ami tenki hein fali ema seluk?”
MAT 11:4 Jesus hataan dehan, “Imi fila baa konta ba João kona ba buat hotu-hotu nebee imi ohin rona ho saida mak imi haree.
MAT 11:5 Ema matan delek bele haree. Ema ain aat bele lao. Ema moras lepra, isin sai moos. Ema tilun diuk bele rona. Ema mate moris fila fali. I ema kiak rona Liafuan Diak.
MAT 11:6 Hatete mos ba João dehan, ‘Ema nebee fiar nafatin mai Hau too rohan, nia hetan bensaun.’ ”
MAT 11:7 Bainhira João nia eskolante sira fila dadauk, Jesus komesa koalia kona ba João. Nia husu ema barak nebee haleu Nia nunee: “Uluk imi baa iha rai fuik maran atu haree see loos? Imi baa atu haree ema nebee nakdoko ba-mai tuir anin hanesan fali duut manulain ka? Lae!
MAT 11:8 Entaun imi baa atu haree see? Imi baa atu haree ema nebee hatais hena folin karun ka? Lae! Ema nebee hatais hena folin karun hela iha uma liurai nian.
MAT 11:9 Entaun imi baa atu haree see? Imi hanoin atu haree Maromak nia profeta ka? Loos duni! Maibee Hau hatete ba imi, João nee boot liu fali profeta.
MAT 11:10 Nia nee uluk kedas Livru Sagradu temi tiha ona dehan, ‘Rona mai! Hau haruka Hau nia ema ida baa uluk hodi prepara dalan ba O.’
MAT 11:11 Hau hatete lo-loos ba imi, hori uluk kedas, la iha ema ida iha mundu nee mak hetan bensaun boot liu João Sarani Nain. Maski nunee komesa agora ba oin, see mak hakruuk ba Maromak nudar Liurai, bele ema nee kiik mos, nia sei hetan bensaun boot liu fali João.
MAT 11:12 Husi tempu João Sarani Nain mai too agora, iha ema uza violensia kontra Maromak nia reinu atu hatuun Maromak nudar Liurai.
MAT 11:13 Molok João mai, profeta sira ho mos Moisés nia lei foo sai antes tiha ona kona ba saida mak akontese agora dadauk.
MAT 11:14 Se imi hakarak fiar buat nebee mak loos, entaun imi sei hatene katak João mak profeta Elias nebee durante nee ema hein hela.
MAT 11:15 Imi nebee iha tilun, rona di-diak ba!”
MAT 11:16 Jesus dehan tan, “Ema agora dadauk nee, Hau atu kompara ho saida? Sira hanesan labarik nebee tuur iha merkadu hodi hakilar ba sira nia kolega halimar dehan,
MAT 11:17 ‘Ami toka muzika kapaas loos, maibee imi la dansa. Ami tanis lelir, maibee imi la tanis.’
MAT 11:18 Nunee mos João mai, nia sempre jejun i la hemu tua, depois ema dehan, diabu tama iha nia laran.
MAT 11:19 Maibee Hau, Ema Umanu nia Oan mai, Hau haan ho hemu tua hanesan ema baibain, depois ema dehan, Hau kaan-teen ho lanu-teen, i halo belun ho kobrador impostu sira ho ema aat sira. Maibee ema hotu-hotu nebee moris tuir Maromak nia matenek, sira hatudu katak Maromak nia matenek nee loos duni.”
MAT 11:20 Depois Jesus komesa kritika ema iha aldeia balu, tanba iha aldeia hirak nee mak Nia halo milagre barak liu, maibee ema sira nee lakohi hakribi sira nia sala.
MAT 11:21 Jesus dehan, “Imi ema Korazim sei terus. Imi ema Betsaida sei terus. Hau halo ona milagre bar-barak iha imi nia leet, maibee imi lakohi hakribi imi nia sala. Ema jentiu sira nebee uluk liu hela iha sidade Tiru ho Sidon nunka haree milagre sira nee. Se sira haree karik, entaun sira tuur hakdasak iha ahu kdesan i hatais hena lutu hodi hatudu katak sira hakribi ona sira nia sala.
MAT 11:22 Maibee Hau hatete ba imi, iha loron ikus bainhira Maromak tesi ema hotu-hotu nia lia, imi sei simu kastigu todan liu fali ema Tiru ho ema Sidon.
MAT 11:23 Nunee mos imi ema Kafarnaum sira, keta hanoin katak, Maromak sei foti sae imi ba lalehan. Lae! Nia sei soe imi ba infernu. Se karik uluk ema jentiu sira iha sidade Sodoma haree milagre nebee Hau halo iha imi nia rai nee, entaun sira husik sira nia sala, i Maromak la sunu mutuk sidade nee.
MAT 11:24 Hau dehan ba imi, iha loron ikus bainhira Maromak tesi ema nia lia, Maromak sei foo kastigu ba imi todan liu fali ema Sodoma sira nian.”
MAT 11:25 Iha tempu nee, Jesus hahii Maromak dehan, “Hau nia Aman, lalehan ho rai nia Nain. Hau hahii Ita Boot, tanba Ita Boot taka buat sira nee ba ema matenek ho ema eskola boot, maibee Ita hatudu fali ba ema nebee kiik.
MAT 11:26 Hau nia Aman, ida nee halo Ita Boot nia laran haksolok duni.”
MAT 11:27 Hotu tiha, Jesus koalia ba ema iha nebaa nunee: “Hau nia Aman foo ona kbiit ho matenek hotu-hotu mai Hau. La iha ema ida konhese lo-loos Hau, so Hau nia Aman deit. I la iha ema ida mak konhese lo-loos Hau nia Aman, so Nia Oan, Hau deit. Hau mos hili ema seluk hodi hatudu Hau nia Aman ba sira, para sira mos bele konhese Nia.
MAT 11:28 Imi nebee kole, imi nebee loro-loron lori naha todan, mai iha Hau, i Hau sei halo kamaan imi nia todan.
MAT 11:29 Mai aprende husi Hau i moris tuir Hau nia hanorin, tanba Hau nee laran maus ho haraik Aan. Nunee imi nia laran bele senti kamaan.
MAT 11:30 Tanba buat nebee Hau hanorin la susar, i naha nebee Hau foo ba imi atu lori mos la todan.”
MAT 12:1 Iha loron Sabadu ida, Jesus ho Nia eskolante sira lao liu husi ema nia toos. Nia eskolante sira hamlaha, entaun sira komesa korut trigu musan hodi haan.
MAT 12:2 Iha ema husi grupu Farizeu haree, i sira hasee Jesus dehan, “Haree took. Ita Boot nia eskolante sira servisu fali iha loron Sabadu. Ida nee kontra ita nia lei!”
MAT 12:3 Jesus hataan, “Imi lee tiha ona liurai David nia istoria. Nusaa mak imi la kompriende nafatin? Iha loron ida David ho nia ema sira hamlaha loos.
MAT 12:4 Nia tama ba tenda orasaun. Iha nebaa iha paun nebee nai lulik sira oferese ona ba Maromak. Tuir lo-loos, so nai lulik sira deit mak bele haan paun nee, David ho nia ema sira nee la bele. Maibee David foti tiha paun nee, i nia ho nia ema sira haan.
MAT 12:5 Imi mos lee tiha ona Moisés nia lei. Tuir lei nee dehan, se nai lulik ida nia loron atu servisu iha uma kreda boot monu iha Sabadu, entaun nia tenki servisu duni. Maski kontra lei Sabadu nian, maibee Maromak la foo sala ba nia.
MAT 12:6 Hau dehan ba imi, agora iha imi nia leet iha Ema ida boot liu uma kreda nee.
MAT 12:7 Iha Livru Sagradu hakerek dehan, ‘Hau hakarak atu imi hatudu laran luak ba malu. Se lae, imi lori sakrifisiu foo mai Hau mos la iha folin.’ Maibee liafuan nee, karik imi la simu. Nee mak imi hatudu liman ba ema nebee mak la sala.
MAT 12:8 Hau, Ema Umanu nia Oan mak loron Sabadu nia Nain. Hau mak iha direitu atu desidi, ema bele halo saida iha loron nee.”
MAT 12:9 Depois Jesus lao husi toos nee, baa tama fali iha uma kreda.
MAT 12:10 Iha nebaa iha mane ida nia liman sorin mate. Ema Farizeu sira buka dalan atu foo sala ba Jesus. Entaun sira husu ba Jesus dehan, “Tuir lei Moisés nian, bele kura ema moras iha loron Sabadu ka lae?”
MAT 12:11 Jesus hataan, “Se karik loron Sabadu mak imi nia bibi ida monu tama ba rai kuak laran, imi baa hasai ka lae?
MAT 12:12 Entaun halo buat diak ba ema iha loron Sabadu mos la kontra lei. Tanba kompara ho bibi, ema mak folin boot liu.”
MAT 12:13 Depois Jesus dehan ba ema liman sorin mate nee, “Lolo o nia liman mate nee mai!” Ema nee lolo ba, nia liman diak kedas hanesan fali nia liman sorin.
MAT 12:14 Maibee ema Farizeu sira sai tiha ba liur hodi kombina malu para oho Jesus.
MAT 12:15 Jesus hatene hela ema Farizeu sira nia planu, nunee Nia husik tiha fatin nee. Ema barak tuir Nia, i Nia kura sira nia moras hotu.
MAT 12:16 Maibee Nia bandu sira atu la bele hatete sai kona ba Nia.
MAT 12:17 Nunee Nia halo tuir buat nebee mak Maromak foo sai tiha ona liu husi profeta Isaias. Maromak dehan,
MAT 12:18 “Haree ba! Nee Hau nia Atan, Hau mak hili Nia. Hau hadomi Nia, i Nia halo haksolok Hau nia laran. Hau sei tau Hau nia Espiritu iha Nia, i Nia sei foo sai lia loos ba ema husi suku hotu-hotu.
MAT 12:19 Nia la diskuti malu ho ema, i la hakilar. Nia la koalia ho lian makaas tuir dalan.
MAT 12:20 Ai sanak lotuk nebee mak besik atu tohar, Nia la silu tohar. Ahi-oan nebee mak besik atu mate, Nia la huu mate. Nia sei hatudu Nia laran luak beibeik too lia loos mak manaan.
MAT 12:21 Ema iha suku hotu-hotu sei laran metin ba Nia.”
MAT 12:22 Depois ema balu lori mane ida ba Jesus. Ema nee diabu domina too nia matan delek i la hatene koalia. Jesus kura nia, nunee nia bele koalia ho haree fila fali.
MAT 12:23 Ema hotu admira hodi dehan, “Keta halo be Ema nee mak David nia Jerasaun nebee Maromak promete atu haruka mai?”
MAT 12:24 Maibee bainhira ema husi grupu Farizeu rona nunee, sira dehan, “Ema nee duni sai diabu tanba deit Nia simu kbiit husi diabu nia xefi Belzebu.”
MAT 12:25 Maibee Jesus hatene sira hotu nia hanoin. Nunee Nia hatete ba sira, “Se iha nasaun ida, nia povu haan malu hela deit, nasaun nee sei rahun. Se iha sidade ida ka uma kain ida, nia ema sira istori malu hela deit, sira sei naksobu.
MAT 12:26 Se Satanás mak duni sai Satanás, entaun diabu sira haan malu hela deit, i Satanás nia ukun sei la dura.
MAT 12:27 Imi duun Hau dehan, hodi Belzebu nia kbiit mak Hau duni sai diabu. Entaun bainhira imi nia eskolante sira duni sai diabu, sira mos uza Belzebu nia kbiit ka? Lae! Imi nia eskolante sira rasik mak sei hatete sai katak, buat nebee imi duun Hau nee, la loos.
MAT 12:28 Hau duni sai diabu hodi Maromak nia Espiritu. Nee hatudu katak Maromak ukun ona iha imi nia leet nudar Liurai.
MAT 12:29 Hau foo ezemplu tan. Se ema ida hakarak tama baa foti sasaan husi ema forti ida nia uma, nia tenki futu metin tiha ema forti nee uluk mak foin bele lalin sasaan sai husi nia uma.
MAT 12:30 Ema nebee la hamutuk ho Hau, nia kontra Hau. I ema nebee la servisu hamutuk ho Hau, nia estraga Hau nia servisu.
MAT 12:31 Nunee Hau dehan ba imi, ema nebee halo sala, too hatete aat Maromak mos, Maromak sei foo perdaun. Maibee see mak hatete aat Maromak nia Espiritu, Maromak la foo perdaun ba nia.
MAT 12:32 Nunee mos ema nebee mak koalia aat Hau, Ema Umanu nia Oan, nia sei hetan perdaun. Maibee see mak koalia aat Espiritu Santu, Maromak la foo perdaun ba nia too tinan ba tinan.”
MAT 12:33 Jesus koalia nafatin ba ema Farizeu sira dehan, “Ai huun nebee diak sei foo fuan diak. Maibee ai huun nebee la diak sei foo fuan la diak. Tanba ai nee nia fuan mak hatudu sai katak ai huun nee diak ka la diak.
MAT 12:34 Imi nee samea nia oan! Imi ema laran aat bele koalia buat diak ka? Lae! Tanba buat nebee mak rai iha ema nia laran, ida nee mak sei sai husi nia ibun.
MAT 12:35 Ema nebee diak koalia liafuan diak, tanba nia laran nakonu ho buat diak. I ema nebee aat koalia buat aat, tanba nia laran nakonu ho buat aat.
MAT 12:36 Hanoin di-diak! Iha loron ikus bainhira Maromak tesi ema hotu-hotu nia lia, Nia sei tetu ema nia liafuan ida-ida. Imi nia liafuan nebee mak imi koalia arbiru, imi tenki hataan iha Maromak nia oin.
MAT 12:37 Atu Maromak desidi foo kastigu ka, desidi dehan imi la sala, depende ba imi nia liafuan.”
MAT 12:38 Depois ema Farizeu ho mestri relijiaun balu husu ba Jesus dehan, “Mestri, ami hakarak haree milagre husi Ita Boot hodi hatudu katak Ita Boot nia kbiit mai husi Maromak.”
MAT 12:39 Jesus hataan, “Imi ema agora nee mesak aat deit i la foo laran ba Maromak! Imi husu Hau halo milagre hanesan sinal atu imi bele fiar. Maibee Hau sei la halo. Milagre nebee Maromak uluk halo liu husi profeta Jonas too ona.
MAT 12:40 Jonas hela iha ikan boot nia kabun laran loron tolu kalan tolu. Nunee mos Hau, Ema Umanu nia Oan sei hela iha rai okos loron tolu kalan tolu.
MAT 12:41 Iha loron ikus bainhira Maromak tesi ema hotu-hotu nia lia, ema jentiu sira husi sidade Nínive sei hamriik hodi foo sala ba imi. Tanba uluk bainhira Jonas baa foo sai Maromak nia liafuan ba sira, sira husik kedas sira nia sala. Agora iha Ema ida nebee boot liu fali Jonas iha imi nia leet, maibee imi lakohi husik imi nia sala.
MAT 12:42 Laos povu Nínive deit mak sei foo sala ba imi. Liurai feto husi rai Seba mos sei moris fali, i hamriik hodi foo sala ba imi nebee moris agora, tanba uluk nia mai husi rai dook atu rona rasik liafuan matenek nian husi liurai Salomão. Agora iha Ema ida boot liu fali Salomão iha imi nia leet, maibee imi lakohi rona Nia.”
MAT 12:43 “Bainhira espiritu aat sai husi ema ida, espiritu aat nee baa lao lemo-lemo iha rai fuik maran hodi buka fatin atu hela. Maibee nia la hetan fatin nebee diak.
MAT 12:44 Entaun nia dehan, ‘Diak liu hau fila fali ba hau nia hela fatin uluk.’ Kuandu nia fila, nia haree fatin nee mamuk, hamoos tiha ona i buat hotu-hotu tau tuir nia fatin.
MAT 12:45 Depois espiritu aat nee baa bolu tan espiritu hitu nebee aat liu fali nia, i sira hotu baa hela iha ema nee. Nunee ema nee nia moris aat liu fali uluk. Ema aat nebee moris agora mos sei sai hanesan nee.”
MAT 12:46 Jesus sei koalia hela ba ema lubun boot, Nia inan ho Nia alin mane sira mai hamriik iha liur atu koalia ho Nia.
MAT 12:47 Iha ema ida foo hatene ba Jesus dehan, “Ita Boot nia inan ho alin sira hamriik iha liur. Sira husu atu koalia ho Ita Boot.”
MAT 12:48 Maibee Jesus hataan ba ema nee dehan, “Hau nia inan mak see? I Hau nia alin sira mak see?”
MAT 12:49 Depois Nia hatudu ba Nia eskolante sira hodi dehan, “Sira nee mak Hau nia inan ho Hau nia alin sira.
MAT 12:50 Tanba see mak halo tuir Hau nia Aman iha lalehan nia hakarak, sira nee mak Hau nia inan, Hau nia feton ho Hau nia alin sira.”
MAT 13:1 Iha loron nebaa, Jesus sai husi uma nee i baa tuur iha tasi ibun.
MAT 13:2 Ema barak teb-tebes mak mai haleu Nia, nunee Nia baa tuur iha roo laran, i ema sira nee hamriik deit iha tasi ibun.
MAT 13:3 Nia hanorin buat barak uza komparasaun. Nia dehan nunee: “Iha toos nain ida baa kari fini iha nia toos.
MAT 13:4 Bainhira nia kari fini nee, balu monu iha dalan. I manu fuik mai haan tiha hotu.
MAT 13:5 Fini balu monu iha fatuk leten, fini nee moris lalais deit tanba rai mihis.
MAT 13:6 Maibee bainhira loro matan sae, loro manas sunu fini nebee foin moris sai mai nee too namlaik tiha, tanba abut la tama iha rai okos.
MAT 13:7 Fini balu monu iha duut tarak laran. Fini nee moris, maibee duut tarak habit tiha too la buras sae.
MAT 13:8 Iha fini balu tan monu iha rai bokur. Fini nee moris too foo isin barak, balu too musan atus ida, balu too musan neen-nulu, i balu too tolu-nulu.
MAT 13:9 Imi nebee iha tilun, rona di-diak ba!”
MAT 13:10 Depois Jesus nia eskolante sira mai husu Nia dehan, “Nusaa mak Ita Boot hanorin sira uza fali komparasaun?”
MAT 13:11 Jesus hataan, “Uluk ema seidauk hatene, oinsaa mak Maromak ukun nudar Liurai. Agora Hau foo sai mo-moos ba imi deit, ba ema seluk lae.
MAT 13:12 Tanba ema nebee kompriende ona, Maromak sei halo nia kompriende liu tan. Maibee ema nebee lakohi hatene, buat uitoan nebee nia kompriende tiha ona mos, Maromak sei hasai tiha husi nia hanoin.
MAT 13:13 Hau hanorin sira uza komparasaun tanba ‘Sira haree hela, maibee hanesan la haree. Sira rona hela, maibee hanesan la rona i la kompriende.’
MAT 13:14 Maromak nia liafuan liu husi profeta Isaias kona loos sira. Maromak dehan, ‘Imi sei rona beibeik, maibee la kompriende nafatin. Imi sei haree beibeik, maibee nafatin la hatene tuir.
MAT 13:15 Tanba povu nee nia laran toos tiha ona, sira lakohi rona ho sira nia tilun, sira nia matan taka metin. Sira halo nunee atu sira nia matan la bele haree, sira nia tilun la bele rona, i sira nia laran la bele kompriende. Nunee sira la bele fila fali mai Hau, atu Hau salva sira.’
MAT 13:16 Maibee imi nee hetan bensaun tanba imi nia matan haree, imi nia tilun rona.
MAT 13:17 Hau hatete lo-loos ba imi, uluk profeta barak ho ema seluk nebee moris loos, hakarak teb-tebes atu haree buat nebee mak agora imi haree, maibee sira la haree. Sira hakarak teb-tebes atu rona buat nebee agora imi rona, maibee sira la rona.”
MAT 13:18 “Entaun rona mai, istoria kona ba ema kari fini nee dehan saida?
MAT 13:19 Fini nebee monu iha dalan mak ema nebee rona Maromak nia liafuan kona ba oinsaa Nia ukun nudar Liurai, maibee ema nee la kompriende. Depois aat nain mai hadau tiha liafuan nebee iha tiha ona nia laran.
MAT 13:20 Fini nebee monu iha fatuk leten mak ema nebee rona Maromak nia liafuan, i simu kedas ho laran haksolok.
MAT 13:21 Maibee liafuan nee la iha abut. Nunee nia fiar duni maibee la kleur ida. Bainhira susar kona nia, ka ema seluk halo terus nia tanba nia simu liafuan nee, nia husik tiha kedas.
MAT 13:22 Fini nebee monu iha duut tarak laran mak ema nebee rona Maromak nia liafuan, maibee nia preokupa ho nia moris loro-loron nian, i matan naklosu ba riku-soin mundu nian. Nia preokupasaun nee la foo fatin ba Maromak nia liafuan, nunee liafuan nee la muda nia moris.
MAT 13:23 Maibee fini nebee monu iha rai bokur mak ema nebee rona Maromak nia liafuan hodi kompriende. Depois ema nee moris tuir, hanesan fini nebee moris too foo isin, balu too musan atus ida, balu musan neen-nulu, i balu musan tolu-nulu.”
MAT 13:24 Depois Jesus halo tan komparasaun dehan, “Maromak ukun nudar Liurai, nee hanesan toos nain ida baa kari fini diak iha nia toos.
MAT 13:25 Kalan boot ema hotu toba dukur tiha, toos nain nia inimigu ida mai kari tan duut nia musan ba iha toos nee nia laran. Hotu tiha inimigu nee fila.
MAT 13:26 Bainhira fini nee moris i fulin komesa sai mai, duut fuik mos moris buras.
MAT 13:27 Haree nunee, atan sira nebee mak servisu iha toos nee baa foo hatene toos nain dehan, ‘Patraun, uluk ita kari deit fini diak. Nusaa mak duut fuik mosu hotu?’
MAT 13:28 Toos nain nee hataan, ‘Hau nia inimigu mak halo ida nee.’ Atan sira dehan tan, ‘Se patraun hakarak, ami baa fokit sai tiha.’
MAT 13:29 Maibee toos nain hataan dehan, ‘La bele. Keta fokit lai, tanba se imi fokit sai duut fuik nee, imi mos bele fokit sai fini diak nebee moris ona nee.
MAT 13:30 Husik sira moris hamutuk. Bainhira too nia tempu atu koa mak hau haruka ema nebee servisu atu baa fokit sai duut nee hodi futu hamutuk ba sunu tiha. Depois toos nia rezultadu tau hamutuk hodi rai iha armazen laran.’ ”
MAT 13:31 Jesus halo tan komparasaun dehan, “Maromak Nia reinu, nee hanesan ai musan kiikoan loos nebee mak ema kuda iha nia toos.
MAT 13:32 Maski ai musan nee kiik liu musan sira seluk, maibee nia moris i buras too sai ai huun ida nebee mak boot liu iha toos laran. Nunee manu fuik sira mai halo knuuk iha nia sanak.”
MAT 13:33 Jesus halo tan komparasaun seluk dehan, “Maromak ukun Nia reinu, nee hanesan fermentu nebee senhora ida kahur ho trigu saka ida hodi halo paun. Too ikus, fermentu uitoan nee halo trigu tomak sae.”
MAT 13:34 Jesus esplika reinu lalehan ba ema lubun boot nee ho komparasaun oi-oin. Nia sempre hanorin sira uza komparasaun.
MAT 13:35 Nunee Nia halo tuir saida mak Maromak nia profeta hakerek tiha ona dehan, “Hau sei hanorin uza komparasaun. Hau sei foo sai buat nebee mak ema nunka rona komesa husi Maromak halo mundu too agora.”
MAT 13:36 Depois Jesus sai tiha husi ema barak nee nia leet hodi tama ba iha uma laran. Nia eskolante sira mai tuir Nia hodi husu dehan, “Esplika mai ami komparasaun kona ba duut fuik nee.”
MAT 13:37 Jesus hataan dehan, “Ema nebee mak kari fini diak mak Hau, Ema Umanu nia Oan.
MAT 13:38 Toos mak mundu nee. Fini diak mak Maromak nia reinu, i duut fuik mak ema nebee tuir Satanás.
MAT 13:39 Inimigu nebee kari duut fuik nee mak Satanás. Tempu koa nian mak bainhira mundu remata, i ema nebee hatama rezultadu toos mak Maromak nia anju sira.
MAT 13:40 Duut fuik fokit tiha hodi sunu iha ahi laran. Nunee mos bainhira mundu nee atu remata.
MAT 13:41 Hau, Ema Umanu nia Oan sei haruka Hau nia anju sira baa iha Hau nia povu nia leet hodi fokit sai see-see deit mak halo sala ho mos ema nebee mak halo ema seluk too monu ba sala.
MAT 13:42 Hau nia anju sira sei soe ema aat sira nee ba iha ahi lakan laran, iha nebaa sira sei tanis hakilar i ruun nehan.
MAT 13:43 Maibee ema nebee mak moris loos, sira sei tama iha lalehan hodi hela hamutuk ho Maromak, Nia mak sira nia Aman ho sira nia Liurai. Iha nebaa sira sei nabilan hanesan loro matan. See mak iha tilun, rona di-diak ba!”
MAT 13:44 “Maromak ukun nudar Liurai, ita bele kompara ho riku-soin ida karun teb-tebes nebee subar hela iha rai okos. Iha ema ida hetan riku-soin nee. Nia kontenti loos, entaun nia hakoi fila fali, i baa faan tiha nia sasaan hotu-hotu hodi sosa rai nee, para riku-soin nee bele sai ninian.
MAT 13:45 Maromak ukun nudar Liurai, ita mos bele kompara hanesan nee: Iha kontratu nain ida buka hela buat murak mean atu sosa.
MAT 13:46 Bainhira nia hetan ida nebee diak liu, nia baa faan tiha nia sasaan hotu-hotu hodi sosa buat murak mean nee.”
MAT 13:47 “Maromak ukun nudar Liurai, bele mos kompara hanesan nee. Iha peskador balu hatuun redi ba iha tasi laran hodi hetan ikan oi-oin deit.
MAT 13:48 Bainhira redi nee ikan nakonu ona, sira dada sai ba iha tasi ibun. Depois sira tuur hodi hasai tiha ikan barak nee husi redi. Ikan diak nian, sira hatama ba iha nia fatin. Ikan nebee mak aat, sira soe tiha.
MAT 13:49 Nunee mos bainhira mundu nee atu remata, anju sira sei mai haketak tiha ema aat husi ema nebee mak moris loos.
MAT 13:50 Ema aat, sei soe ba iha ahi lakan laran, iha nebaa sira sei tanis hakilar i ruun nehan.”
MAT 13:51 Depois Jesus husu Nia eskolante sira dehan, “Buat nebee ohin Hau hanorin nee, imi kompriende hotu ka lae?” Nia eskolante sira hataan, “Ami kompriende.”
MAT 13:52 Jesus dehan, “Se nunee imi hanesan mestri relijiaun nebee hatene ona Maromak nia liafuan uluk nian i hatene mos buat nebee mak agora Hau hanorin kona ba Maromak ukun nudar Liurai. Imi hanesan uma nain nebee mak rai riku-soin antigu nian ho riku-soin foun hamutuk iha fatin ida, depois hatudu sai ba ema.”
MAT 13:53 Bainhira Jesus hanorin hotu komparasaun hirak nee, Nia husik tiha fatin nee
MAT 13:54 hodi baa fali iha Nia aldeia rasik. Iha nebaa Nia tama iha uma kreda hodi hanorin. Ema nebee rona Nia admira hodi husu ba malu, “Ema nee hetan matenek husi nebee? Nia hetan kbiit husi nebee mak bele halo milagre boot hanesan nee?
MAT 13:55 Ita hatene hela Nia. Nia aman badaen ai ida. Nia inan mak Maria, i nia alin sira Tiago, José, Simão ho Judas.
MAT 13:56 Nia alin feto sira mos hela iha nee hotu. Entaun Ema nee hetan buat sira nee husi nebee?”
MAT 13:57 Nunee sira laran moras too lakohi simu Nia. Maibee Jesus hatete ba sira, “Ema iha nebee-nebee deit respeita Maromak nia profeta. So ema husi nia aldeia rasik ho nia familia rasik mak la respeita nia.”
MAT 13:58 Entaun Jesus halo milagre uitoan deit iha sira nia leet, tanba sira lakohi fiar ba Nia.
MAT 14:1 Iha tempu nebaa liurai Herodes mak ukun iha provinsia Galileia. Nia rona buat oi-oin kona ba Jesus,
MAT 14:2 too nia hatete ba nia funsionariu sira, “Keta halo be Ema nee João Sarani Nain mak moris fali ona husi mate. Nee mak Nia iha kbiit hodi halo milagre.”
MAT 14:3 João Sarani Nain ho Herodes nia istoria nunee: Uluk Herodes hola fali nia alin Filipe nia kaben, naran Herodias. Iha tempu nebaa João hasee nia fila-fila dehan, “Ita la bele hola fali ita nia alin nia kaben, hahalok nee kontra Maromak nia lei!” Tanba nee, Herodes haruka ema kaer João i futu nia hodi hatama ba iha komarka.
MAT 14:5 Tuir lo-loos Herodes hakarak atu oho João, maibee nia la brani tanba povu hanoin dehan João nee Maromak nia profeta ida.
MAT 14:6 Iha loron ida Herodes halo nia tinan, i Herodias nia oan feto mai dansa iha bainaka sira nia oin. Menina nee nia dansa halo Herodes nia laran kontenti teb-tebes,
MAT 14:7 too nia jura ba menina nee atu foo saida deit mak nia husu.
MAT 14:8 Menina nia inan rona kona ba juramentu nee, i nia hamaus nia oan atu husu João Sarani Nain nia ulun. Entaun menina nee husu ba Herodes, “Hau hakarak João nia ulun, tau iha bandeja ida, entrega kedas mai hau.”
MAT 14:9 Liurai laran susar teb-tebes. Maibee nia jura tiha ona iha bainaka sira nia oin, entaun nia haruka ema baa halo tuir saida mak menina nee husu.
MAT 14:10 Sira baa iha komarka hodi tesi tiha João nia ulun,
MAT 14:11 i tau iha bandeja foo ba menina nee. Depois menina nee lori baa entrega ba nia inan.
MAT 14:12 Hotu tiha João nia eskolante sira baa lori sai João nia mate isin baa hakoi tiha. Depois sira baa foo hatene Jesus.
MAT 14:13 Jesus rona katak ema oho tiha ona João. Entaun Nia husik tiha fatin nee hodi sae roo ba iha rai fuik ida. Maibee ema rona katak Nia atu baa iha nebaa, nunee ema barak husi aldeia oi-oin lao liu husi tasi ibun hodi tuir Nia.
MAT 14:14 Bainhira Jesus tuun husi roo, Nia haree ema lubun boot hein hela Nia iha nebaa. Nia hanoin loos sira, i Nia kura sira nebee mak moras.
MAT 14:15 Bainhira lokraik ona, Jesus nia eskolante sira mai hatete ba Nia dehan, “Iha nee rai fuik, rai mos besik kalan ona. Diak liu haruka ema sira nee baa iha aldeia hodi sosa hahaan rasik.”
MAT 14:16 Maibee Jesus dehan, “Lae, sira la presiza baa sosa hahaan. Imi mak foo hahaan ba sira.”
MAT 14:17 Nia eskolante sira hataan, “Ami iha deit paun fuan lima ho ikan rua.”
MAT 14:18 Jesus hataan fali, “Lori mai.”
MAT 14:19 Depois Jesus haruka ema lubun boot nee tuur hotu iha duut leten. Nia foti paun fuan lima ho ikan rua nee, i hateke ba lalehan hodi foo agradese ba Maromak. Nia silu paun ho ikan halo pedasuk-pedasuk, i foo ba Nia eskolante sira. Depois Nia eskolante sira hodi baa fahe ba ema lubun boot nee.
MAT 14:20 Sira hotu haan too bosu, hahaan mos resin. Nia eskolante sira tau hamutuk hahaan restu sira nee iha bote sanulu resin rua nakonu.
MAT 14:21 Ema nebee haan nee maizoumenus rihun lima. Nee foin sura mane deit, feto ho labarik la sura.
MAT 14:22 Hotu tiha, Jesus haruka kedas Nia eskolante sira sae roo hodi baa uluk iha tasi sorin. Maibee Nia sei hela iha nebaa, atu haruka ema lubun boot nee fila.
MAT 14:23 Bainhira sira fila hotu ona, Jesus mesak sae ba foho ida hodi halo orasaun. Rai besik kalan ona, Nia mes-mesak iha foho leten.
MAT 14:24 Iha momentu nebaa roo nebee Nia eskolante sira sae nee iha tiha ona tasi klaran. Roo nee halai hasoru anin boot, laloran mos baku makaas.
MAT 14:25 Iha dadeer-saan nakukun Jesus lao iha bee leten baa hasoru Nia eskolante sira.
MAT 14:26 Bainhira Nia eskolante sira haree Nia lao iha bee leten, sira tauk hodi hakilar makaas dehan, “Mate klamar mai nee!”
MAT 14:27 Maibee Jesus hataan kedas, “Brani ba! Nee Hau. La bele tauk!”
MAT 14:28 Pedro hataan, “Nai, se Nai mak iha nebaa duni, entaun haruka hau lao iha bee leten baa hasoru Ita Boot.”
MAT 14:29 Jesus dehan, “Mai ba!” Nunee Pedro tuun husi roo i lao iha bee leten atu baa Jesus.
MAT 14:30 Maibee bainhira Pedro haree anin boot, nia komesa tauk i mout dadauk iha tasi laran. Nia hakilar makaas ba Jesus dehan, “Nai, salva hau ba!”
MAT 14:31 Jesus lolo kedas Nia liman ba Pedro hodi kaer nia dehan, “O nee fiar fraku! Nusaa mak o duvida hanesan nee?”
MAT 14:32 Depois sira nain rua tama iha roo laran, i anin mos para kedas.
MAT 14:33 Sira hotu nebee iha roo laran komesa adora Jesus dehan, “Ita Boot mak Maromak nia Oan duni!”
MAT 14:34 Bainhira Jesus ho Nia eskolante sira too iha tasi sorin, sira tuun iha rai Genesaré.
MAT 14:35 Ema iha nebaa konhese kedas Jesus, i sira baa foo hatene ema iha rejiaun nee tomak. Nunee ema lori sira nia maluk sira nebee moras ba Jesus.
MAT 14:36 Sira husu ba Jesus atu ema moras sira nee bele kona deit Nia hena rohan. I ema moras sira nebee konsege kona Nia hena rohan, sira hetan kura hotu.
MAT 15:1 Loron ida ema balu husi grupu Farizeu ho mestri relijiaun balu mai husi Jerusalém atu hasoru malu ho Jesus. Too iha nebaa, sira husu Nia,
MAT 15:2 “Tuir ita nia bei-ala sira nia lisan, molok atu haan tenki fase liman lai. Maibee Ita Boot nia eskolante sira lae. Nusaa mak sira kontra fali ita nia lisan nee?”
MAT 15:3 Jesus hataan dehan, “Nusaa mak imi kontra Maromak nia lei tanba deit imi hakarak tuir imi nia lisan?
MAT 15:4 Tanba Maromak hatete, ‘Respeita o nia inan-aman.’ Nia mos dehan, ‘See mak koalia liafuan aat hasoru nia inan-aman, ema nee sei hetan kastigu mate.’
MAT 15:5 Maibee imi hanorin oin seluk fali. Tuir imi, ema bele hatete ba nia inan-aman dehan, ‘Sasaan nebee apaa ho amaa presiza, hau la bele foo, tanba hau promete ona atu foo ba Maromak.’
MAT 15:6 Nunee imi hanorin ema atu la respeita sira nia inan-aman. Imi halakon tiha Maromak nia lei tanba deit imi hakarak halo tuir imi nia lisan.
MAT 15:7 Imi koalia oin seluk, hahalok oin seluk! Buat nebee hori uluk kedas profeta Isaias hakerek, kona loos imi. Nia foo tutan Maromak nia liafuan nunee:
MAT 15:8 ‘Ema sira nee hahii Hau ho ibun tutun, maibee sira nia laran dook husi Hau.
MAT 15:9 Sira adora Hau maibee la iha folin. Sira hanorin deit lei ema nian, maibee bosok fali dehan, sira nia hanorin nee mai husi Hau.’ ”
MAT 15:10 Depois Jesus bolu ema hotu iha nebaa atu mai besik. Nia dehan ba sira, “Rona mai, i kompriende di-diak Hau nia liafuan nee.
MAT 15:11 Hahaan saida mak hatama husi ema nia ibun, nee la halo foer nia iha Maromak nia oin. Maibee liafuan nebee mak sai husi ema nia ibun, nee mak halo foer nia.”
MAT 15:12 Jesus nia eskolante sira mai dehan ba Nia, “Ita Boot hatene ka lae? Ita Boot nia liafuan ohin nee xoke loos ema Farizeu sira.”
MAT 15:13 Maibee Jesus soe lia hodi hataan sira dehan, “Ai horis hotu-hotu nebee laos Hau nia Aman iha lalehan mak kuda, Nia sei fokit sai tiha.
MAT 15:14 Husik sira hirus ba! Sira nee hanesan ema matan delek nebee hakarak hatudu dalan ba ema matan delek seluk, too ikus sira monu hotu ba rai kuak.”
MAT 15:15 Pedro husu, “Ohin Mestri koalia kona ba buat nebee halo foer ema. Liafuan nee dehan saida?”
MAT 15:16 Jesus hataan, “Imi la kompriende nafatin ka?
MAT 15:17 Imi hatene katak buat nebee ema haan liu husi nia ibun sei tama iha nia kabun laran depois sai fali.
MAT 15:18 Maibee buat nebee mak sai husi ema nia ibun mai husi nia laran. Ida nee mak halo foer nia.
MAT 15:19 Tanba hanoin aat nebee mosu husi ema nia laran mak lori nia ba oho ema, halo sala ho ema nia feen ka laen ho sala seksual sel-seluk, naok, foo sasin falsu i hatete aat ema seluk.
MAT 15:20 Hahalok sira nee mak halo ema sai foer iha Maromak nia oin. Laos haan la fase liman mak halo sira sai foer.”
MAT 15:21 Depois Jesus husik tiha fatin nee hodi baa fali iha rai ida besik sidade Tiru ho Sidon.
MAT 15:22 Iha nebaa iha feto Kanaán ida husi rai nee mai hasoru Jesus. Nia husu fila-fila ho lian makaas dehan, “Nai, Liurai David nia Jerasaun, hanoin hau ba! Hau nia oan feto, diabu tama iha nia laran halo nia terus liu.”
MAT 15:23 Maibee Jesus la hataan buat ida. Nunee Nia eskolante sira mai hatete ba Nia dehan, “Senhora nee hakilar la para iha ita nia kotuk, diak liu haruka nia fila.”
MAT 15:24 Maibee Jesus hataan dehan, “Maromak haruka Hau mai atu ajuda deit ema Israel, tanba sira hanesan bibi malae nebee lao sala dalan ona.”
MAT 15:25 Maski nunee senhora nee mai hakneak iha Jesus nia oin hodi dehan, “Nai, ajuda hau!”
MAT 15:26 Jesus soe lia dehan, “La bele foti labarik nia hahaan hodi soe fali ba asu. Nee la loos.”
MAT 15:27 Senhora nee hataan fali dehan, “Loos duni Nai, maibee asu sira bele hili labarik nia hahaan nebee mak monu iha meza okos.”
MAT 15:28 Rona nunee Jesus dehan, “Senhora, ita nia fiar makaas! Saida mak ita husu sei akontese duni.” Iha oras nee kedas senhora nee nia oan feto diak fali.
MAT 15:29 Depois Jesus husik tiha fatin nee, lao tuir tasi Galileia nia ninin. Nia sae ba foho ida hodi tuur,
MAT 15:30 i ema barak teb-tebes mai iha Nia. Sira lori sira nia maluk nebee ain mate, ain aat, matan delek, koalia la diak, ho ema moras oi-oin tan. Sira tau ema sira nee iha Jesus nia oin, i Nia kura sira hotu kedas.
MAT 15:31 Bainhira sira haree saida mak Jesus halo nee, sira hotu admira. Ema nebee uluk koalia la diak agora bele koalia, ema ain mate ho ain aat bele lao, i ema matan delek bele haree. Entaun sira hotu hahii Israel nia Maromak.
MAT 15:32 Depois Jesus bolu Nia eskolante sira hamutuk, foin Nia dehan ba sira, “Hau hanoin loos ema barak nee. Sira hamutuk ho Hau loron tolu ona, i sira nia hahaan la iha ona. Hau lakohi haruka sira fila ho kabun mamuk. Se lae, sira oin nakukun, bele monu iha dalan.”
MAT 15:33 Nia eskolante sira hataan, “Rai nee fuik. Ita atu hetan hahaan husi nebee mak atu foo hahaan ba ema barak hanesan nee?”
MAT 15:34 Jesus husu, “Imi sei iha paun fuan hira?” Sira hataan, “Iha deit paun fuan hitu, ho ikan kiik, uitoan deit.”
MAT 15:35 Depois Jesus haruka ema lubun boot nee tuur hotu iha rai.
MAT 15:36 Nia foti paun fuan hitu ho ikan nee hodi foo agradese ba Maromak. Nia silu halo rohan-rohan tiha, i foo ba Nia eskolante sira. Depois Nia eskolante sira fahe ba ema lubun boot nee.
MAT 15:37 Sira hotu haan too bosu, hahaan mos resin. Nia eskolante sira tau hamutuk hahaan restu sira nee iha bote hitu nakonu.
MAT 15:38 Ema nebee haan nee, rihun haat. Nee foin sura mane deit, feto ho labarik la sura.
MAT 15:39 Hotu tiha Jesus haruka ema lubun boot nee fila. Depois Nia baa sae roo hodi baa iha rai Magadán.
MAT 16:1 Iha loron ida ema balu husi grupu Farizeu ho Saduseu mai koko Jesus. Sira husu para Nia halo tan milagre hodi hatudu katak Nia kbiit nee mai duni husi Maromak.
MAT 16:2 Maibee Jesus hataan, “Bainhira loro matan atu besik monu, imi haree kalohan mihis sai mean, imi siik dehan, aban la udan.
MAT 16:3 Iha dadeer-saan fali, bainhira imi haree loro matan leno kalohan mahar, imi siik dehan, karik orsida udan. Imi hatene siik sinal nebee mosu iha kalohan. Maibee sinal nebee mak akontese iha imi nia oin agora dadauk nee, imi la hatene siik.
MAT 16:4 Imi ema agora nee mesak aat deit i la foo laran ba Maromak! Imi husu Hau halo milagre hanesan sinal atu imi bele fiar. Maibee Hau sei la halo. Milagre nebee Maromak uluk halo liu husi profeta Jonas too ona.” Koalia tiha hotu, Jesus lao husik tiha sira.
MAT 16:5 Jesus ho Nia eskolante sira baa iha tasi sorin. Too iha nebaa, Nia eskolante sira foin hanoin katak sira haluha lori paun.
MAT 16:6 Depois Jesus hatete ba sira, “Kuidadu! Hadook aan husi ema Farizeu ho Saduseu sira nia fermentu.”
MAT 16:7 Nunee Nia eskolante sira komesa hatete ba malu dehan, “Karik Nia koalia hanesan nee tanba ita la lori paun.”
MAT 16:8 Jesus hatene hela saida mak sira koalia. Entaun Nia hatete, “Imi nee fiar fraku! Nusaa mak imi diskuti malu fali kona ba paun?
MAT 16:9 Imi seidauk kompriende ka? Imi haluha ona paun fuan lima nebee mak Hau fahe ba ema rihun lima ka? Iha tempu nebaa imi tau hamutuk hahaan restu too bote hira?
MAT 16:10 Depois oinsaa ho paun fuan hitu nebee Hau fahe ba ema rihun haat? Imi tau hamutuk hahaan restu too bote hira?
MAT 16:11 Nusaa mak ohin Hau temi fermentu, imi hanoin kedas Hau koalia kona ba paun? Laos nunee! Maibee Hau foo hanoin ba imi atu kuidadu ho ema Farizeu ho Saduseu sira nia fermentu.”
MAT 16:12 Nee mak foin Nia eskolante sira kompriende katak, Nia laos koalia kona ba fermentu nebee mak halo trigu sae. Maibee Nia koalia kona ba ema Farizeu ho Saduseu sira nia hanorin nebee mak lori ema lao sala dalan.
MAT 16:13 Depois Jesus baa iha rai ida nebee besik sidade Sezareia Filipi. Too iha nebaa, Nia husu ba Nia eskolante sira dehan, “Tuir ema konta, Hau, Ema Umanu nia Oan nee see?”
MAT 16:14 Sira hataan, “Iha balu dehan, Ita Boot João Sarani Nain. Balu tan dehan, profeta Elias. Seluk tan dehan, Jeremias ka profeta ida seluk.”
MAT 16:15 Jesus husu tan, “Tuir imi rasik, Hau nee see?”
MAT 16:16 Simão Pedro hataan, “Ita Boot nee Mesias, Salvador nebee Maromak promete hori uluk ona atu haruka mai. Ita Boot mak Maromak Moris nia Oan.”
MAT 16:17 Jesus dehan, “Simão, Jonas nia oan, o hetan bensaun, tanba laos ema mak foo hatene ba o kona ba buat nee. Maibee Hau nia Aman iha lalehan mak foo hatene ba o.
MAT 16:18 Hau hatete ba o, Hau bolu o Pedro. (Nee dehan katak ‘fatuk isin’.) Hau sei harii Hau nia povu iha fatuk nee nia leten, hanesan igreja ida nebee hamriik metin, too mate mos la bele manaan sira.
MAT 16:19 Hau sei foo xavi reinu lalehan nian ba o. Saida mak o bandu iha mundu nee, Maromak iha lalehan mos bandu. I saida mak o foo lisensa atu halo iha mundu nee, Maromak iha lalehan mos foo lisensa.”
MAT 16:20 Depois Jesus bandu Nia eskolante sira atu la bele hatete sai ba see-see deit katak Nia mak Mesias.
MAT 16:21 Komesa husi loron nee, Jesus hatete sai ba Nia eskolante sira katak, Nia tenki baa iha Jerusalém i tenki simu terus oi-oin. Nai ulun Judeu sira, nai lulik nia ulun sira ho mestri relijiaun sira sei halo terus Nia. Ema sei oho tiha Nia, maibee too iha loron tolu, Maromak sei halo Nia moris fila fali.
MAT 16:22 Rona nunee, Pedro dada Jesus ba sorin hodi siak Nia dehan, “Lae, Nai! Maromak sei la foo lisensa atu buat nee akontese.”
MAT 16:23 Maibee Jesus fila ba Pedro hodi siak fali nia dehan, “Satanás, sees tiha husi Hau nia oin! O atu taka dalan mai Hau! O nia hanoin nee laos mai husi Maromak, maibee mai husi ema nia hanoin.”
MAT 16:24 Depois Jesus dehan ba Nia eskolante sira, “See mak hakarak tuir Hau, nia tenki husik tiha nia hakarak rasik, i tenki prontu simu terus, hanesan ema nebee lori nia krus too mate. I nia tenki tuir Hau nafatin.
MAT 16:25 Tanba see mak hakarak salva nia aan, nia sei lakon fali. I see mak lakon nia moris tanba nia tuir Hau, nia sei hetan moris rohan-laek.
MAT 16:26 Se ema ida hetan riku-soin mundu nian hotu-hotu, maibee too ikus la hetan moris rohan-laek karik, nia manaan saida loos? La iha buat ida mak nia bele foo hodi troka nia klamar.
MAT 16:27 Tanba aban-bainrua Hau, Ema Umanu nia Oan sei fila fali mai husi lalehan ho Hau nia Aman nia kbiit tomak, i Nia anju sira haleu Hau. Iha tempu nee mak Hau sei foo justisa ba ema ida-idak tuir saida mak nia halo.
MAT 16:28 Hau hatete lo-loos ba imi, husi imi sira nee, balu sei moris too haree Hau, Ema Umanu nia Oan mai ukun nudar Liurai mak foin sira mate.”
MAT 17:1 Liu tiha loron neen, Jesus lori Pedro, Tiago ho Tiago nia alin João, sira mes-mesak baa sae ba foho aas ida.
MAT 17:2 Too iha nebaa, Nia eskolante nain tolu nee haree Jesus nakfilak Aan tiha. Nia oin nabilan hanesan loro matan, i Nia hena sai mutin nabilan.
MAT 17:3 Derepenti sira mos haree profeta Moisés ho Elias koalia hela ho Jesus.
MAT 17:4 Haree nunee Pedro dehan ba Jesus, “Nai, ita hamutuk iha nee, furak. Se Nai hakarak, hau halo tenda tolu iha nee, ida ba Ita Boot, ida ba Moisés, ho ida ba Elias.”
MAT 17:5 Pedro sei koalia hela nunee, derepenti kalohan nabilan ida mai falun tiha sira. I lian ida sai husi kalohan nee dehan, “Ida nee Hau nia Oan doben. Nia halo Hau nia laran haksolok teb-tebes. Imi tenki rona Nia!”
MAT 17:6 Rona lian nee, sira nain tolu tauk teb-tebes, i sira taka rabat iha rai.
MAT 17:7 Maibee Jesus mai kaer sira hodi dehan, “Hamriik ona! Keta tauk.”
MAT 17:8 Bainhira sira hateke sae, sira la haree tan ema seluk, so Jesus deit.
MAT 17:9 Hotu tiha Jesus ho Nia eskolante sira tuun fali husi foho. Sira lao tuun dadauk, Jesus bandu dehan, “Saida mak ohin imi haree nee, la bele hatete ba ema ida. Bainhira Maromak halo Hau, Ema Umanu nia Oan moris fali husi mate mak foin imi bele foo sai ba ema.”
MAT 17:10 Depois Nia eskolante sira husu ba Jesus dehan, “Entaun nusaa mak mestri relijiaun sira dehan, Elias tenki mai uluk mak foin Mesias mai?”
MAT 17:11 Jesus hataan, “Loos duni, Elias mai atu prepara buat hotu-hotu.
MAT 17:12 Maibee Hau hatete ba imi, Elias mai tiha ona, i ema la hatene nia, too halo aat nia tuir sira nia hakarak. Hau, Ema Umanu nia Oan mos sira sei halo terus hanesan nee.”
MAT 17:13 Rona nunee, Nia eskolante sira foin kompriende katak Elias ida nebee Jesus konta nee mak João Sarani Nain.
MAT 17:14 Bainhira Jesus ho Nia eskolante sira fila fali ba iha ema barak nia leet, iha mane ida mai hakneak iha Jesus nia oin
MAT 17:15 hodi dehan, “Nai, hanoin hau nia oan ba! Nia moras bibi maten, i terus liu. Dala barak nia monu tama ba ahi laran ka bee laran.
MAT 17:16 Hau lori ona nia ba Ita Boot nia eskolante sira, maibee sira la bele kura nia.”
MAT 17:17 Jesus siak sira hotu dehan, “Imi ema nebee sempre halo aat i la fiar ba Maromak. Hau tenki hela ho imi too bainhira tan? Hau tenki pasiensia ho imi too iha nebee?! Lori labarik nee mai.”
MAT 17:18 Depois Jesus foo orden ba diabu. Diabu mos sai husi labarik nee, i labarik nee diak kedas.
MAT 17:19 Bainhira Jesus mesak fali, Nia eskolante sira mai besik hodi husu, “Nusaa mak ami ohin la bele duni sai diabu nee?”
MAT 17:20 Jesus hataan, “Tanba imi nia fiar fraku liu. Hau hatete lo-loos ba imi, se imi nia fiar kiikoan hanesan mostarda musan ida mos, imi bele foo orden ba foho ida dehan, ‘Muda husi nee, baa iha nebaa.’ I foho nee sei muda duni. Imi atu halo saida deit, bele.
MAT 17:21 [Maibee atu duni sai diabu hanesan ida ohin nee, imi tenki halo orasaun i halo jejun.]”
MAT 17:22 Iha loron ida, Jesus ho Nia eskolante sira halibur hamutuk iha provinsia Galileia. Iha nebaa Jesus hatete ba sira, “Aban-bainrua ema sei faan Hau, Ema Umanu nia Oan ba ema aat.
MAT 17:23 Sira sei oho Hau, maibee iha loron tolu Maromak sei halo Hau moris fali husi mate.” Rona nunee, Nia eskolante sira tristi loos.
MAT 17:24 Jesus ho Nia eskolante sira too iha sidade Kafarnaum. Iha nebaa kobrador impostu balu mai husu Simão Pedro dehan, “O nia mestri baibain selu impostu ba iha uma kreda boot ka lae?”
MAT 17:25 Pedro hataan, “Nia selu.” Bainhira Pedro tama ba uma laran, Jesus husu kedas nia dehan, “Simão, hanoin took. Liurai sira iha mundu nee husu impostu husi see? Husi sira nia oan rasik ka husi ema seluk?”
MAT 17:26 Pedro hataan, “Husi ema seluk.” Jesus dehan, “Se nunee, liurai nia oan rasik la selu ida.
MAT 17:27 Maibee atu sira la bele laran moras ba ita tanba deit ita la selu impostu nee, o baa kail ikan iha tasi. Ikan primeiru nebee o hetan, loke tiha nia ibun, foin foti osan mutin ida iha ikan nee nia ibun laran. Osan nee too atu selu ita nain rua nia impostu.”
MAT 18:1 Iha tempu nebaa Jesus nia eskolante sira mai husu Nia dehan, “Ema nebee mak boot liu iha Maromak nia reinu?”
MAT 18:2 Entaun Jesus bolu labarik ida mai hamriik iha sira nia klaran,
MAT 18:3 i Nia dehan ba sira, “Hau hatete lo-loos ba imi, see mak atu sai Maromak nia reinu, nia tenki muda nia moris hodi sai hanesan labarik kiik ida. Se lae, la bele.
MAT 18:4 Nunee see mak haraik aan nudar labarik nee, nia mak boot liu iha Maromak nia reinu.
MAT 18:5 See mak simu labarik ida hanesan nee hodi Hau nia naran, nia simu Hau.
MAT 18:6 Maibee see mak halo labarik kiik ida monu ba sala too la fiar mai Hau, ema nee sei simu kastigu todan. Ba nia, diak liu ema kesi fatuk boot ida iha nia kakorok depois soe nia tama ba tasi laran! Tanba kastigu nebee nia sei simu todan liu fali ida nee.
MAT 18:7 Koitadu, mundu nee sei terus tanba iha buat barak mak halo ema monu ba sala. Loos duni, buat hanesan nee sempre iha. Maibee see mak lori ema seluk atu monu ba sala, nia sei terus.
MAT 18:8 Se o nia liman ka o nia ain halo o monu ba sala karik, tesi i soe tiha. Diak liu o tama iha lalehan ho liman ka ain sorin deit duke o tama ba iha infernu ho liman-ain kompletu.
MAT 18:9 Se o nia matan halo o monu ba sala karik, sukit sai tiha o nia matan nee i soe tiha. Diak liu o tama ba iha lalehan ho matan sorin deit duke o tama ba iha infernu ho matan kompletu.”
MAT 18:10 “Kuidadu, keta hanoin dehan ema kiik sira nee la iha folin, atu hatuun ema kiik ida mos la bele. Hau hatete ba imi, anju sira iha lalehan nebee mak tau matan ba sira sempre hamriik iha Hau nia Aman iha lalehan nia oin hodi husu atu tulun ema kiik sira nee.
MAT 18:11 [Hau, Ema Umanu nia Oan mai atu salva ema nebee mak lao sala dalan.]
MAT 18:12 Imi nia hanoin oinsaa? Se ema ida iha bibi atus ida, depois bibi ida lao sala dalan, bibi nain sei halo saida? Nia sei husik hela bibi sia-nulu resin sia iha foho, i baa buka tuir bibi ida nebee lao sala dalan nee.
MAT 18:13 Hau dehan lo-loos ba imi, kuandu nia hetan ona bibi nee, nia kontenti liu ho bibi ida nee duke bibi sia-nulu resin sia seluk nebee nunka lao sala dalan.
MAT 18:14 Nunee mos imi nia Aman iha lalehan, Nia lakohi atu ema ida lakon, atu ema kiik ida lakon mos Nia lakohi.”
MAT 18:15 Jesus hatutan tan dehan, “Se o nia maluk ida halo sala hasoru o, baa koalia ho nia hodi foo hatene nia sala, maibee imi nain rua deit, la bele iha ema nia oin. Se nia simu o nia liafuan, entaun o diak malu fali ho nia.
MAT 18:16 Maibee se nia lakohi rona o, entaun lori ema ida-rua baa koalia tan ho nia, atu sira sai sasin ba buat nebee imi koalia. Tanba iha Livru Sagradu hakerek dehan, ‘Tenki iha sasin nain rua ka tolu mak foin bele tesi lia.’
MAT 18:17 Se nia lakohi rona imi, baa foo hatene Maromak nia povu. Se Maromak nia povu mos nia lakohi rona, lalika liga nia, konsidera nia hanesan kobrador impostu ida ka ema ida nebee mak la konhese Maromak.
MAT 18:18 Hau hatete lo-loos ba imi, saida mak imi bandu iha mundu nee, Maromak iha lalehan mos bandu. I saida mak imi foo lisensa atu halo iha mundu nee, Maromak iha lalehan mos foo lisensa.
MAT 18:19 Iha tan buat ida mak Hau hakarak hatete: Husi imi sira nee, se iha nain rua mak lian ida iha mundu nee hodi husu buat ruma ba Hau nia Aman iha lalehan, entaun Nia sei foo.
MAT 18:20 Tanba se iha ema nain rua ka tolu halibur hamutuk hodi Hau nia naran, Hau mos iha sira nia klaran.”
MAT 18:21 Depois Pedro mai husu Jesus, “Nai, se hau nia maluk halo sala fila-fila hasoru hau karik, hau tenki perdua nia dala hira? Too dala hitu ka?”
MAT 18:22 Jesus hataan, “Lae, laos dala hitu deit! Maibee o tenki perdua nia fila-fila too hitu-nulu dala hitu.
MAT 18:23 Tanba Maromak ukun nudar Liurai hanesan komparasaun nee: Iha loron ida, liurai ida hakarak sura tuir nia osan nebee mak nia funsionariu sira deve.
MAT 18:24 Bainhira nia hahuu sura, iha ema balu lori nia funsionariu ida mai. Funsionariu nee deve osan mean bornal rihun sanulu.
MAT 18:25 Maibee funsionariu nee la iha kbiit atu selu. Entaun liurai foo orden ba nia soldadu sira atu baa faan tiha ema nee, nia feen ho oan sira ho mos nia riku-soin hotu.
MAT 18:26 Rona nunee, funsionariu nee hakneak hakruuk too rai iha liurai nia ain hodi husu dehan, ‘Favor ida, foo tempu mai hau! Hau sei selu hotu hau nia tusan nee.’
MAT 18:27 Liurai hanoin loos nia, too hamoos tiha nia tusan hotu hodi husik nia baa ho livre.
MAT 18:28 Bainhira funsionariu nee sai mai, nia hetan nia maluk funsionariu ida nebee mak deve nia osan mutin atus ida deit. Nia baa kaer ema nee i buti nia kakorok hodi sisi dehan, ‘O tenki selu hotu o nia tusan nee!’
MAT 18:29 Rona nunee, nia maluk funsionariu nee hakneak hakruuk too rai hodi husu dehan, ‘Favor ida, foo tempu mai hau! Hau sei selu hau nia tusan nee.’
MAT 18:30 Maibee funsionariu nee la simu, nia sulan nia maluk nee ba iha komarka too selu hotu nia tusan.
MAT 18:31 Bainhira liurai nia funsionariu sira seluk haree, sira nia laran susar teb-tebes i sira baa kesar iha liurai.
MAT 18:32 Depois liurai bolu funsionariu nee hodi dehan, ‘Funsionariu laran aat! O nia tusan hau hamoos hotu tiha ona tanba o hakneak hodi husu mai hau.
MAT 18:33 Hau hatudu tiha ona laran luak ba o. Nusaa mak o la hatudu laran luak ba o nia maluk nee?’
MAT 18:34 Liurai nee hirus teb-tebes too haruka ema baa lori funsionariu aat nee kastigu iha komarka laran too selu hotu nia tusan.”
MAT 18:35 Jesus taka Nia istoria dehan, “Hau nia Aman iha lalehan mos sei halo nunee ba imi ida-idak, se imi la perdua imi nia maluk ho laran tomak.”
MAT 19:1 Jesus hanorin hotu tiha, Nia lao sai husi Galileia hodi baa iha provinsia Judeia iha mota Jordaun nia sorin ba.
MAT 19:2 Ema barak teb-tebes tuir Nia, i Nia kura sira nia moras.
MAT 19:3 Depois ema balu husi grupu Farizeu mai koko atu hamonu Nia. Sira husu dehan, “Tuir Moisés nia lei, laen soe nia feen ho razaun saida deit, bele ka lae?”
MAT 19:4 Jesus hataan, “Imi la lee iha Livru Sagradu kona ba Maromak halo ema ka? Iha nebaa hakerek dehan, ‘Nia halo sira mane ho feto.’
MAT 19:5 I hakerek tan dehan, ‘Tanba nee, mane sei husik nia inan-aman hodi baa moris neon ida laran ida ho nia feen, i sira nain rua sai ona ida.’
MAT 19:6 Entaun sira laos ona ema nain rua, maibee sai ona ida. Nee duni se Maromak tau feto ho mane hamutuk sai feen-laen ona, ema keta fahe fali.”
MAT 19:7 Depois ema Farizeu sira nee husu fali ba Jesus, “Se nunee, nusaa mak Moisés dehan, laen bele soe nia feen, naran katak nia foo surat deklarasaun soe malu nian?”
MAT 19:8 Jesus hataan, “Moisés nia lei foo lisensa atu imi soe imi nia feen tanba imi nia ulun toos. Maibee fo-foun Maromak halo lalehan ho rai laos nunee.
MAT 19:9 Hau hatete ba imi, mane so bele soe nia feen kuandu nia feen halo ona sala seksual ho ema seluk. Se nia feen la halo sala nee, maibee mane nee soe nia hodi hola fali feto seluk, mane nee halo sala seksual.”
MAT 19:10 Rona nunee, Jesus nia eskolante sira dehan, “Se hanesan nee, diak liu lalika kaben.”
MAT 19:11 Jesus hataan, “Laos ema hotu-hotu mak bele simu liafuan nee. So ema nebee Maromak foo kbiit ba sira mak bele simu.
MAT 19:12 Iha ema balu la kaben tanba moris mai sira la bele duni. Iha ema balu la kaben tanba ema seluk mak halo sira nunee. Iha mos ema balu la kaben tanba sira hakarak foo aan tomak atu serbi Maromak nudar Liurai. See mak bele simu liafuan nee, simu ba.”
MAT 19:13 Depois ema balu mai lori labarik ba Jesus atu Nia tau liman ba sira hodi husu Maromak foo bensaun ba sira. Maibee Jesus nia eskolante sira bandu.
MAT 19:14 Entaun Jesus siak Nia eskolante sira dehan, “Husik labarik sira nee mai iha Hau, la bele bandu. Tanba ema hanesan labarik sira nee mak sai Maromak nia reinu.”
MAT 19:15 Nia tau liman ba labarik sira nee, depois Nia sai husi nebaa.
MAT 19:16 Iha loron ida, iha mane joven ida mai husu Jesus dehan, “Mestri, hau tenki halo buat diak saida para hau bele hetan moris rohan-laek?”
MAT 19:17 Jesus hataan dehan, “Nusaa mak ita husu mai Hau kona ba saida mak diak? So Maromak deit mak diak. Se ita hakarak hetan moris rohan-laek, halo tuir Nia ukun fuan.”
MAT 19:18 Joven nee husu fali, “Ukun fuan nebee?” Jesus hataan, “La bele oho ema, la bele halo sala ho ema nia kaben, la bele naok, la bele foo sasin falsu,
MAT 19:19 respeita o nia inan-aman, i hadomi o nia maluk hanesan o hadomi o nia aan rasik.”
MAT 19:20 Joven nee hataan dehan, “Ukun fuan sira nee hau halo tuir hotu ona. Saida mak sei falta?”
MAT 19:21 Jesus hataan, “Se ita hakarak moris kompletu, entaun baa faan tiha ita nia riku-soin hotu, i osan nee fahe ba ema kiak. Nunee mak ita sei hetan fali riku-soin iha lalehan. Fahe hotu tiha, mai tuir Hau.”
MAT 19:22 Bainhira joven nee rona nunee, nia fila ho laran susar tanba nia riku teb-tebes.
MAT 19:23 Depois Jesus dehan ba Nia eskolante sira, “Hau hatete lo-loos ba imi, susar teb-tebes ema riku ida atu sai Maromak nia reinu.
MAT 19:24 Dala ida tan Hau dehan ba imi, kuda kamelu tama liu husi daun kuak susar teb-tebes. Maibee susar liu tan, ema riku ida atu sai Maromak nia reinu hodi hakruuk ba Nia nudar Liurai.”
MAT 19:25 Bainhira Jesus nia eskolante sira rona nunee, sira admira teb-tebes hodi husu, “Se nunee, see loos mak sei hetan salvasaun?”
MAT 19:26 Jesus hateke ba sira hodi dehan, “Ba ema, la bele duni. Maibee ba Maromak, buat hotu-hotu bele.”
MAT 19:27 Depois Pedro dehan, “Ami husik tiha ona buat hotu-hotu hodi tuir Ita Boot. Entaun ami sei hetan saida?”
MAT 19:28 Jesus hatete ba sira, “Hau dehan lo-loos ba imi, iha mundu foun Hau, Ema Umanu nia Oan sei tuur iha kadeira ukun, i naroman lalehan nian haleu hela Hau. Imi sira nebee agora tuir Hau, imi mos sei tuur iha kadeira ukun sanulu resin rua hodi ukun Israel nia suku sanulu resin rua hotu.
MAT 19:29 See mak husik ona nia uma, nia maun-alin, nia inan-aman, nia oan sira ka nia toos tanba nia tuir Hau, ema nee sei simu fali dala atus ida i sei hetan moris rohan-laek.
MAT 19:30 Maibee ema barak nebee agora boot sei sai kiik. I ema barak nebee agora kiik sei sai boot.”
MAT 20:1 “Maromak ukun nudar Liurai, nee hanesan komparasaun tuir mai: Iha toos nain ida, dadeer-saan deit nia baa iha merkadu hodi buka ema atu servisu iha nia toos uvas nian.
MAT 20:2 Hetan tiha ema, nia konkorda malu ho sira atu selu loron ida osan mutin ida, i nia haruka sira baa servisu kedas iha nia toos.
MAT 20:3 Tuku sia dadeer, toos nain baa fali merkadu, nia haree tan ema balu hamriik hela, la halo buat ida.
MAT 20:4 Nia hatete ba sira, ‘Imi baa servisu iha hau nia toos, hau sei selu imi ho lo-loos.’
MAT 20:5 I sira mos baa. Tuku sanulu resin rua, toos nain sai baa bolu tan ema seluk. Nunee mos tuku tolu lokraik.
MAT 20:6 Tuku lima mos, nia baa merkadu, hetan ema seluk tan nebee hamriik hela deit. Nia husu sira, ‘Nusaa mak loron tomak imi hamriik iha nee deit, la halo buat ida?’
MAT 20:7 Sira hataan, ‘La iha ema ida mak foo servisu mai ami.’ Toos nain dehan, ‘Se nunee, imi baa servisu iha hau nia toos deit.’
MAT 20:8 Rai besik kalan ona, nia hatete ba mandor dehan, ‘Baa bolu ema sira nebee mak servisu iha toos hodi selu sira ida-ida. Maibee selu uluk ema sira nebee mak tama ikus. Sira nebee mak tama uluk, selu ikus.’
MAT 20:9 Nunee mandor bolu uluk ema nebee mak mai servisu iha tuku lima lokraik, i sira ida-ida simu osan mutin ida.
MAT 20:10 Entaun ema sira nebee mak mai servisu husi dadeer-saan hanoin katak sira atu simu barak liu fali. Afinal sira mos simu osan mutin ida.
MAT 20:11 Bainhira sira simu hotu sira nia osan, ema nebee mak tama servisu husi dadeer nee mai murmura ba toos nain
MAT 20:12 dehan, ‘Sira nebee mai ikus servisu oras ida deit. Nusaa mak sira simu osan hanesan fali ho ami? Ami nee servisu mate aan husi dadeer too lokraik, loron manas mos ami servisu nafatin.’
MAT 20:13 Rona nunee, toos nain nee hataan ba ema ida husi sira dehan, ‘Belun, hau la halo sala hasoru o. Ita konkorda malu tiha ona katak, o atu simu osan mutin ida iha loron ida, loos ka lae?
MAT 20:14 Foti o nia osan nee hodi fila ona. Hau hakarak atu ema nebee tama servisu ikus mos simu osan hanesan ho imi.
MAT 20:15 Nee hau nia osan. Hau iha direitu atu uza tuir hau nia hakarak. Keta halo be o laran moras ba hau tanba hau halo buat diak ba ema seluk.’ ”
MAT 20:16 Jesus taka Nia liafuan dehan, “Nunee mos ema nebee mak ikus aban-bainrua sai fali primeiru. I ema nebee mak primeiru sai fali ikus.”
MAT 20:17 Jesus lao dadauk ba sidade Jerusalém, Nia halibur Nia eskolante nain sanulu resin rua hamutuk hodi koalia ba sira deit dehan,
MAT 20:18 “Rona mai! Ita lao dadauk ba Jerusalém. Too iha nebaa, ema sei entrega Hau, Ema Umanu nia Oan ba iha nai lulik nia ulun sira ho mestri relijiaun sira. Ema sira nee sei tesi Hau nia lia katak, Hau tenki hetan kastigu mate.
MAT 20:19 Sira sei entrega Hau ba iha ema nebee la fiar Maromak. I ema sira nee sei tarata Hau, baku Hau ho sikoti, i prega Hau iha krus. Maibee iha loron tolu Maromak sei halo Hau moris fali husi mate.”
MAT 20:20 Depois Zebedeu nia feen mai hamutuk ho nia oan Tiago ho João. Senhora nee mai hakneak iha Jesus nia oin hodi husu atu Jesus foo buat ruma ba nia.
MAT 20:21 Jesus husu, “Senhora hakarak saida?” Senhora nee hataan, “Hau husu atu aban-bainrua kuandu Ita Boot ukun nudar Liurai, hau nia oan nain rua nee, ida tuur iha Ita Boot nia sorin loos, ida iha sorin karuk.”
MAT 20:22 Maibee Jesus hatete ba Tiago ho João dehan, “Imi la kompriende saida mak imi husu. La kleur tan Hau sei simu terus todan. Imi mos prontu simu terus nee ka lae?” Sira hataan, “Ami prontu.”
MAT 20:23 Jesus hatete ba sira, “Loos duni, imi sei simu duni terus hanesan Hau. Maibee Hau la iha direitu atu hili see mak atu tuur iha Hau nia sorin loos ho sorin karuk. Kona ba ida nee, Hau nia Aman iha lalehan desidi tiha ona.”
MAT 20:24 Bainhira eskolante nain sanulu rona buat nebee mak Tiago ho João husu, sira hirus maun-alin nain rua nee.
MAT 20:25 Entaun, Jesus bolu sira hamutuk hodi dehan, “Imi hatene katak, iha nasaun sel-seluk, nai ulun sira manda ema tuun-sae, i ukun nain sira hanehan sira nia povu.
MAT 20:26 Maibee imi la bele halo hanesan nee. Husi imi sira nee, see mak hakarak sai boot, nia tenki haraik aan hodi serbi nia maluk sira seluk.
MAT 20:27 See mak hakarak sai ema boot liu, nia tenki sai atan ba nia maluk sira seluk hodi serbi sira.
MAT 20:28 Nia tenki hanesan Hau, Ema Umanu nia Oan. Hau mai iha mundu nee laos atu ema serbi Hau. Maibee Hau mai atu serbi ema seluk i foo Aan ba mate atu ema barak hetan liberdade.”
MAT 20:29 Depois Jesus ho nia eskolante sira sai husi sidade Jerikó, i ema lubun boot mos tuir Nia.
MAT 20:30 Iha nebaa iha ema matan delek nain rua tuur hela iha dalan ninin. Bainhira sira rona katak Jesus mak liu, sira bolu ho lian makaas dehan, “Nai, liurai David nia Jerasaun, hanoin ami ba!”
MAT 20:31 Ema lubun boot nee siak sira nain rua hodi haruka sira nonook. Maibee sira nain rua bolu makaas liu tan dehan, “Nai, liurai David nia Jerasaun, hanoin ami ba!”
MAT 20:32 Rona nunee, Jesus mos para, i Nia bolu sira mai hodi husu, “Imi hakarak Hau halo saida ba imi?”
MAT 20:33 Sira hataan, “Nai, ami hakarak haree.”
MAT 20:34 Rona nunee, Jesus hanoin sira nain rua. Nia tau liman ba sira nia matan, i sira haree kedas. Depois sira tuir Jesus.
MAT 21:1 Bainhira Jesus ho Nia eskolante sira besik ona sidade Jerusalém, sira too iha aldeia Betfagé iha foho Oliveira nia lolon, Nia haruka Nia eskolante nain rua baa uluk.
MAT 21:2 Nia dehan ba sira, “Imi baa iha aldeia nebaa. Bainhira imi tama, imi hetan kedas kuda buru inan ida kesi hela, nia oan iha hela nia sorin. Imi kore tiha dada mai.
MAT 21:3 Se iha ema ruma husu imi karik, foo hatene dehan, ‘Nai mak presiza.’ Ema nee sei haruka imi dada kedas kuda buru nee.”
MAT 21:4 Nee tuir saida mak Maromak koalia liu husi Nia profeta hori uluk kedas dehan,
MAT 21:5 “Hatete ba Jerusalém oan sira nunee: ‘Haree ba, imi nia Liurai mai iha imi. Nia mai ho haraik Aan, sae deit kuda buru oan.’ ”
MAT 21:6 Depois eskolante nain rua nee baa halo tuir saida mak Jesus haruka.
MAT 21:7 Sira dada kuda buru inan nee ho nia oan lori ba Jesus. Too iha nebaa, sira hasai sira nia hena tau ba iha kuda nia kotuk, depois Jesus sae.
MAT 21:8 Ema barak hasai sira nia hena hodi nahe tu-tuir dalan. Iha mos ema balu taa ramus latan tuir dalan.
MAT 21:9 Ema balu lao uluk iha Jesus nia oin, iha balu lao husi kotuk. Sira hotu haklalak hahii Maromak dehan, “Hosana, liurai David nia Jerasaun! Maromak foo bensaun ba Ida nebee mak mai lori Nai Maromak nia naran. Hosana, hahii Nia iha fatin aas liu!”
MAT 21:10 Bainhira Jesus tama iha Jerusalém, ema hotu iha sidade nee hakfodak hodi husu malu tuun-sae dehan, “Ema nee see loos?”
MAT 21:11 Ema barak nebee mak lao hamutuk ho Jesus nee hataan dehan, “Nia nee Jesus, Maromak nia Profeta husi Nazaré iha provinsia Galileia.”
MAT 21:12 Depois Jesus tama iha area uma kreda boot nian, Nia duni sai ema sira nebee mak halo kontratu iha fatin nee. Nia baku fila tiha meza nebee mak ema uza hodi troka osan, banku nebee mak ema tuur hodi faan manu pombu mos Nia baku fila hotu.
MAT 21:13 Nia siak sira dehan, “Iha Maromak nia liafuan hakerek tiha ona dehan, ‘Tuir lo-loos Hau nia uma nee fatin para halo orasaun.’ Maibee imi halo fali hanesan ema naok-teen sira nia subar fatin.”
MAT 21:14 Hotu tiha, ema matan delek ho ema ain aat sira mai hasoru Jesus iha area uma kreda boot nee, i Nia kura sira hotu.
MAT 21:15 Bainhira nai lulik nia ulun sira ho mestri relijiaun sira haree milagre nebee mak Jesus halo, sira hirus. Sira mos hirus tanba labarik sira haklalak dehan, “Hosana, liurai David nia Jerasaun!”
MAT 21:16 Nunee sira hasee Jesus dehan, “Labarik sira haklalak saida ba O nee?! O la rona ka?” Jesus hataan, “Hau rona. Maibee iha Livru Sagradu dehan, ‘Maromak, Ita Boot hanorin labarik sira ho kiikoan sira nebee sei susu hela atu hahii Ita Boot.’ Liafuan nee imi la lee ka?”
MAT 21:17 Depois Jesus husik tiha sira hodi baa fali iha aldeia Betánia, i Nia hela iha nebaa kalan ida.
MAT 21:18 Aban dadeer-saan fali, Jesus fila ba iha Jerusalém. Iha dalan Nia hamlaha.
MAT 21:19 Nia haree ai figeira huun ida iha dalan ninin, i Nia baa besik ai huun nee hodi buka nia fuan. Maibee la iha, tahan deit mak iha. Haree nunee, Jesus hatete ba ai huun nee dehan, “O sei la foo fuan tan!” Derepenti ai nee namlaik tiha.
MAT 21:20 Bainhira Jesus nia eskolante sira haree, sira admira hodi husu dehan, “Nusaa mak ai huun nee namlaik tiha derepenti hanesan nee?”
MAT 21:21 Jesus hataan, “Hau hatete lo-loos ba imi, se imi nia fiar la nakdoko maibee metin nafatin, entaun imi mos bele halo saida mak Hau halo tiha ona ba ai figeira huun nee. Laos ida nee deit, maibee imi mos bele haruka foho nee muda ba iha tasi laran, i sei muda duni.
MAT 21:22 Saida deit mak imi husu liu husi orasaun, imi sei hetan, naran katak imi fiar.”
MAT 21:23 Jesus tama iha area uma kreda boot hodi hanorin iha nebaa. Nia sei hanorin hela, nai lulik nia ulun sira ho katuas lia nain sira mai husu dehan, “O iha direitu saida para halo buat sira nee? See mak foo direitu nee ba O?”
MAT 21:24 Jesus hataan, “Hau mos atu husu buat ida. Se imi hataan ho lo-loos mak Hau foo hatene imi, see mak foo direitu mai Hau hodi halo buat sira nee.
MAT 21:25 Hau nia pergunta mak nee: See mak foo direitu ba João Sarani Nain hodi foo sarani ema? Maromak mak foo ka, ema mak foo?” Sira diskuti malu dehan, “Ita susar ona. Se ita hataan, ‘Maromak mak foo direitu ba nia’, Jesus sei husu fali ita dehan, ‘Entaun, nusaa mak imi la fiar ba nia?’
MAT 21:26 Maibee se ita dehan, ‘Ema mak foo direitu’, entaun ita tauk povu, tanba povu sira hanoin dehan, João nee Maromak nia profeta ida.”
MAT 21:27 Nunee sira hataan dehan, “Ami la hatene.” Jesus dehan ba sira, “Se nunee, Hau mos la hatete ba imi, see mak foo direitu mai Hau hodi halo buat sira nee.”
MAT 21:28 Depois Jesus hatete ba nai ulun relijiaun sira dehan, “Imi hanoin took komparasaun nebee Hau atu koalia nee. Iha senhor ida iha oan mane nain rua. Loron ida nia hatete ba nia oan mane boot dehan, ‘Oan, loron ida nee o baa servisu iha toos uvas nian.’
MAT 21:29 Nia oan mane boot hataan, ‘Hau lakohi.’ Maibee too ikus nia arepende i baa duni servisu iha toos.
MAT 21:30 Depois senhor nee haruka tan nia oan kiik atu baa servisu iha toos. Nia oan mane kiik hataan, ‘Diak apaa, hau sei baa.’ Maibee too ikus nia la baa.”
MAT 21:31 Konta tiha hotu, Jesus husu ba sira dehan, “Tuir imi nia hanoin, oan ida nebee mak halo tuir nia aman nia hakarak?” Sira hataan, “Oan mane boot.” Jesus dehan ba sira, “Hau hatete lo-loos ba imi, kobrador impostu ho feto luroon sira sei tama iha Maromak nia reinu uluk liu fali imi.
MAT 21:32 Tanba uluk João Sarani Nain mai hanorin imi oinsaa mak bele moris loos, i imi lakohi rona. Maibee kobrador impostu sira ho feto luroon sira rona hodi halo tuir. Imi haree hela sira hakribi sira nia sala, maibee imi rasik lakohi hakribi imi nia sala i la simu nafatin João nia liafuan.”
MAT 21:33 Jesus hatutan tan dehan, “Rona tan komparasaun ida nee. Iha toos nain ida kuda uvas iha nia toos ida tomak. Nia halo lutu haleu tiha toos nee, i kee rai kuak halo tanki ida atu hasai uvas been. Nia mos harii fatin aas ida ba seguransa sira atu hein toos nee. Hotu tiha, nia foo ba ema aluga, depois nia baa hela iha rai liur.
MAT 21:34 Bainhira uvas besik tasak ona, toos nain haruka nia atan balu fila baa hodi simu uvas nebee mak ema aluga toos nee tenki foo ba nia.
MAT 21:35 Maibee ema aluga toos nee kaer tiha atan sira nee. Ida sira baku, ida sira tuda ho fatuk, ida seluk sira oho.
MAT 21:36 Depois toos nain haruka nia atan barak liu tan. Maibee ema aluga toos nee halo aat nafatin.
MAT 21:37 Too ikus toos nain haruka nia oan rasik mak baa, tanba nia hanoin dehan, ‘Sira sei respeita hau nia oan.’
MAT 21:38 Maibee bainhira ema aluga toos nee haree toos nain nia oan, sira dehan ba malu, ‘Nia mak sei hetan nia aman nia riku-soin tomak. Diak liu ita oho tiha nia, atu toos nee sai ita nian fali.’
MAT 21:39 Nunee sira kaer nia, rasta nia sai husi toos laran, i oho tiha nia.”
MAT 21:40 Konta hotu tiha, Jesus husu ba nai ulun relijiaun sira dehan, “Tuir imi nia hanoin, bainhira toos nain nee fila fali mai, nia sei halo saida ba ema sira nebee aluga toos nee?”
MAT 21:41 Sira hataan dehan, “Nia sei kastigu mate tiha ema aat sira nee. I nia sei foo fali toos ba ema diak mak aluga, atu nunee too tempu kuu uvas, sira prontu foo toos nain nia parte.”
MAT 21:42 Depois Jesus hatete ba sira, “Iha Livru Sagradu kompara Mesias hanesan fatuk ida. Imi nunka lee ka? Iha nebaa dehan, ‘Iha fatuk ida nebee badaen fatuk sira lakohi uza, maibee agora fatuk nee mak sai fali fatuk nebee prinsipal. Nai Maromak rasik mak hili fatuk nee, ita haree ba furak teb-tebes.’ ”
MAT 21:43 Jesus foo atensaun ba sira dehan, “Imi la simu Fatuk nee. Nee duni Hau dehan ba imi, Maromak sei hasai imi sira nee husi Nia reinu. Nia sei hili fali povu seluk, i sira sei moris tuir Nia hakarak.
MAT 21:44 [Ema nebee monu kona Fatuk nee, nia sei nakfera. I se karik Fatuk nee mak monu kona ema ruma, ema nee sei rahun.]”
MAT 21:45 Bainhira nai lulik nia ulun sira ho ema Farizeu sira rona komparasaun hirak nee, sira hatene katak Jesus soe lia ba sira.
MAT 21:46 Entaun sira buka dalan atu kaer Jesus, maibee sira tauk ema lubun boot nee, tanba povu fiar katak Jesus nee profeta ida.
MAT 22:1 Depois Jesus koalia tan ho sira uza komparasaun dehan,
MAT 22:2 “Maromak ukun ema nudar Liurai, hanesan istoria tuir mai nee: Iha liurai ida halo preparasaun ba nia oan mane nia festa kazamentu.
MAT 22:3 Bainhira buat hotu besik prontu ona, liurai haruka nia atan sira baa foo hatene fali ema nebee mak nia konvida tiha ona hodi bolu sira mai ona. Maibee konvidadu sira hotu lakohi baa festa nee.
MAT 22:4 Depois liurai haruka nia atan seluk baa foo hatene tan dala ida ba konvidadu sira. Nia hameno dehan, ‘Hahaan prepara ona. Hau oho tiha ona karau aman ho karau oan bokur. Buat hotu-hotu prontu ona. Mai ona!’
MAT 22:5 Atan sira mos baa, maibee konvidadu sira nee la interese nafatin. Sira balu baa fali sira nia toos, balu baa sira nia servisu fatin.
MAT 22:6 Konvidadu sira seluk kaer tiha atan sira nee hodi halo terus sira i oho sira.
MAT 22:7 Rona nunee, liurai hirus teb-tebes i haruka nia soldadu sira baa oho tiha ema oho door sira nee i sunu mutuk sira nia sidade.
MAT 22:8 Depois liurai hatete ba nia atan sira dehan, ‘Festa kazamentu prontu ona, maibee ema nebee mak hau konvida la serve atu tuir festa nee.
MAT 22:9 Agora imi baa iha estrada boot iha sidade laran. See-see deit mak imi hetan iha nebaa, bolu sira mai deit.’
MAT 22:10 Nunee atan sira baa iha estrada bo-boot. See-see deit mak sira hetan, atu ema diak ka ema aat, sira halibur hotu, too halo nakonu fatin kazamentu nee.
MAT 22:11 Depois liurai tama iha fatin kazamentu atu hasoru bainaka sira. Iha nebaa nia haree ema ida la hatais ropa festa nian.
MAT 22:12 Entaun nia husu, ‘Belun, o la hatais ropa festa nian, oinsaa mak o bele tama mai?’ Maibee ema nee la hataan buat ida.
MAT 22:13 Nunee liurai hatete ba nia atan sira dehan, ‘Futu ema nee nia liman-ain i soe sai ba iha fatin nakukun. Iha nebaa ema sei tanis hakilar i ruun nehan.’ ”
MAT 22:14 Jesus taka komparasaun nee dehan, “Nunee mos Maromak konvida ema barak, maibee uitoan deit mak Nia hili atu sai Nia reinu.”
MAT 22:15 Depois ema Farizeu sira sai husi nebaa hodi kombina malu atu hamonu Jesus liu husi pergunta oi-oin.
MAT 22:16 Nunee sira haruka ema balu baa atu koko Jesus. Ema sira nee mak Farizeu nia eskolante ho partidu Herodes nia membru. Sira finji husu ba Jesus dehan, “Mestri, ami hatene katak Ita Boot ema nebee mak moris loos i sempre hanorin Maromak nia dalan ho lo-loos. Ita Boot la preokupa ema seluk nia hanoin, tanba Ita Boot la fihir ema.
MAT 22:17 Ita Boot nia hanoin oinsaa? Tuir ita nia lei relijiaun, ita selu impostu ba liurai boot César, nee loos ka la loos?”
MAT 22:18 Maibee Jesus hatene sira nia hanoin aat, i Nia dehan ba sira, “Imi nee laran makerek! Nusaa mak imi hakarak hamonu Hau?
MAT 22:19 Hatudu took mai Hau osan nebee mak uza hodi selu impostu.” Depois sira lori osan mutin ida foo ba Nia.
MAT 22:20 Jesus husu ba sira, “See nia oin mak iha osan nee? I see nia naran?”
MAT 22:21 Sira hataan, “Liurai boot César nian.” Jesus hatete ba sira, “Se nunee, foo ba estadu buat nebee mak estadu nian, i foo ba Maromak buat nebee mak Maromak nian.”
MAT 22:22 Bainhira sira rona Jesus nia liafuan nee, sira hotu admira, i sira husik hela Jesus iha nebaa hodi baa fali fatin seluk.
MAT 22:23 Iha loron nee ema husi grupu Saduseu mos mai koko Jesus. Ema Saduseu sira hanorin dehan, ema mate sei la moris fali. Entaun sira husu ba Jesus,
MAT 22:24 “Mestri, Moisés dehan, se mane ida mate, maibee la iha oan, mane nia alin tenki kaben fali ho feto faluk nee para bele foo jerasaun ba nia maun.
MAT 22:25 Entaun, hanesan nee: Uluk iha ami nia rain iha maun-alin nain hitu. Maun boot kaben, depois nia mate, la iha oan. Entaun nia alin ida tuir nia nee kaben fali ho feto faluk nee.
MAT 22:26 Nia mos mate, la iha oan. Nunee beibeik too alin ikun mos kaben ho feto faluk nee, depois mate, la iha oan.
MAT 22:27 Too ikus feto faluk nee mos mate.
MAT 22:28 Agora ami husu nunee: Feto nee kaben ho mane nain hitu. Aban-bainrua Maromak halo moris fali ema mate, feto nee nia kaben mak ida nebee loos?”
MAT 22:29 Jesus hataan dehan, “Imi nia hanoin nee la loos tanba imi la hatene saida mak hakerek iha Livru Sagradu, i la kompriende Maromak nia kbiit.
MAT 22:30 Bainhira ema mate moris fila fali, sira la kaben tan ona. Maibee sira hanesan anju sira iha lalehan.
MAT 22:31 Kona ba ema mate moris fali, Maromak koalia ona ba imi iha Livru Sagradu. Imi lee tiha ona ka lae? Maromak dehan,
MAT 22:32 ‘Hau mak o nia bei-ala Abraão nia Maromak, Isac nia Maromak ho Jacó nia Maromak, sira hotu adora nafatin Hau too agora.’ Nee hatudu katak ema mate sei moris fali. Tanba so ema moris deit mak bele adora Maromak, ema mate lae.”
MAT 22:33 Bainhira ema lubun boot nee rona Jesus nia hanorin nee, sira admira teb-tebes.
MAT 22:34 Ema Farizeu sira rona katak Jesus halo ema Saduseu sira la brani atu koalia tan. Nunee Farizeu sira halibur malu atu koko tan Jesus.
MAT 22:35 Entaun mestri relijiaun ida husi sira mai husu Jesus,
MAT 22:36 “Mestri, iha Moisés nia lei, ukun fuan ida nebee mak importante liu?”
MAT 22:37 Jesus hataan, “‘O tenki hadomi Maromak, o nia Nai, ho o nia aan tomak, ho laran tomak, ho neon tomak.’
MAT 22:38 Ida nee mak ukun fuan nebee boot liu i importante liu.
MAT 22:39 Iha tan ukun fuan ida nebee atu hanesan: ‘O tenki hadomi o nia maluk hanesan o hadomi o nia aan rasik.’
MAT 22:40 Moisés nia lei tomak ho profeta sira nia liafuan hotu nia huun mak ukun fuan rua nee.”
MAT 22:41 Bainhira ema Farizeu sira sei halibur malu iha nebaa, Jesus husu ba sira dehan,
MAT 22:42 “Imi hanoin saida kona ba Mesias? Mesias nee see nia Jerasaun?” Sira hataan, “Nia nee liurai David nia Jerasaun.”
MAT 22:43 Jesus husu tan dehan, “Se nunee, nusaa mak Maromak nia Espiritu foo hanoin ba liurai David atu bolu Mesias nee ‘Nai’? David hakerek dehan,
MAT 22:44 ‘Nai Maromak hatete ona ba hau nia Nai dehan, “Mai tuur iha Hau nia sorin loos, too Hau hamonu O nia inimigu sira iha O nia ain okos.”’
MAT 22:45 Iha nee liurai David rasik bolu Mesias nee nia Nai. Entaun oinsaa mak Mesias nee bele sai fali David nia Jerasaun?”
MAT 22:46 Sira hotu la bele hataan. Komesa iha loron nee la iha ema ida brani atu husu tan pergunta ba Nia.
MAT 23:1 Hotu tiha Jesus foo hanoin ba Nia eskolante sira ho ema barak nebee mak halibur hamutuk iha fatin nee. Nia dehan nunee:
MAT 23:2 “Mestri relijiaun sira ho mos ema Farizeu sira iha direitu atu hanorin Moisés nia lei.
MAT 23:3 Nee duni imi tenki rona sira i halo tuir sira nia hanorin. Maibee la bele halo tuir sira nia hahalok, tanba sira la moris tuir buat nebee mak sira rasik hanorin.
MAT 23:4 Sira foo regulamentu todan liu ba povu, maibee sira la ajuda netik ema atu bele halo tuir.
MAT 23:5 Sira halo saida deit, sira halo so atu ema seluk bele haree hodi gaba. Ezemplu, sira hakerek Maromak nia liafuan taka ba sira nia reen toos i suku fita iha sira nia batina tutun tuir lei Moisés nian. Maibee sira halo sira nian boot liu atu ema seluk gaba.
MAT 23:6 Kuandu iha festa ka iha uma kreda laran, sira gosta tuur iha oin hanesan ema boot.
MAT 23:7 Sira gosta ema kumprimenta sira iha merkadu, i gosta ema bolu sira ‘mestri’.
MAT 23:8 Maibee imi la bele halo tuir sira nia hahalok nee. Imi la bele husik ema gaba imi hodi bolu imi ‘mestri’, tanba imi nia Mestri ida deit, i imi hotu mesak maun-alin.
MAT 23:9 Imi la bele foti aas ema ida iha mundu nee dehan ‘aman’, tanba imi nia Aman iha ida deit, Nia iha lalehan.
MAT 23:10 Imi la bele husik atu ema bolu imi ‘xefi’, tanba imi nia Xefi iha ida deit, Nia mak Mesias.
MAT 23:11 Husi imi sira nee, see mak boot liu, nia sei haraik aan hodi serbi nia maluk sira seluk.
MAT 23:12 Tanba see mak foti aan sai boot, Maromak sei hatuun nia. Maibee see mak haraik aan, Maromak sei foti sae nia.”
MAT 23:13 Depois Jesus hatete ba nai ulun relijiaun sira dehan, “Imi mestri relijiaun sira ho Farizeu sira, imi sei terus. Imi koalia oin seluk, hahalok oin seluk. Imi rasik lakohi tama Maromak nia reinu. Se iha ema seluk hakarak tama mos, imi taka odamatan ba sira, atu sira la bele tama.
MAT 23:14 [Imi mestri relijiaun sira ho Farizeu sira, imi sei terus. Imi koalia oin seluk, hahalok oin seluk. Imi gosta han-matak feto faluk sira hodi hadau sira nia uma, i finji harohan nar-naruk para taka falta imi nia hahalok aat. Nee duni Maromak sei kastigu imi todan liu fali ema seluk.]
MAT 23:15 Imi mestri relijiaun sira ho Farizeu sira, imi sei terus. Imi koalia oin seluk, hahalok oin seluk. Imi baa iha nebee-nebee too hakur tasi hodi buka ema ida atu tuir imi nia hanorin. Maibee bainhira imi hetan tiha, imi halo nia moris aat liu tan too nia merese hetan kastigu iha infernu todan liu fali imi dala rua.
MAT 23:16 Imi mestri matan delek! Imi sei terus. Imi hanorin dehan, ‘Se ema ida jura temi uma kreda boot nia naran, nia la halo tuir mos la buat ida. Maibee se nia jura temi osan mean nebee mak iha uma kreda laran, entaun nia tenki halo tuir.’
MAT 23:17 Imi matan delek i beik-teen! Ida nebee mak importante liu? Osan mean ka Maromak nia uma kreda boot nebee mak halo osan mean nee sai lulik?
MAT 23:18 Imi mos hanorin dehan, ‘Se ema ida jura temi altar iha uma kreda boot, nia la halo tuir mos la buat ida. Maibee se nia jura temi oferta nebee mak iha altar nee nia leten, nia tenki halo tuir.’
MAT 23:19 Imi nee matan delek duni! Ida nebee mak importante liu? Oferta ka altar nebee mak halo oferta nee sai lulik?
MAT 23:20 Nee duni se ema jura temi altar, nee dehan katak nia temi mos buat hotu-hotu nebee mak iha altar nee nia leten.
MAT 23:21 Se nia jura temi uma kreda boot, nee dehan katak nia temi mos Maromak tanba Nia mak hela iha uma kreda nee.
MAT 23:22 Se nia jura temi lalehan, nee dehan katak nia temi Maromak nia kadeira ukun i temi mos Maromak tanba Nia mak tuur iha kadeira nee.
MAT 23:23 Imi mestri relijiaun sira ho Farizeu sira, imi sei terus. Imi koalia oin seluk, hahalok oin seluk. Bainhira imi kuu modo tahan, imi badinas foo parte ida husi parte sanulu nudar oferta ba Maromak. Too modo tahan kiikoan-kiikoan hanesan ortelaun ho ruku mos imi foo. Maibee imi la interese kona ba buat nebee mak importante liu iha Maromak nia lei, hanesan justisa, ajuda ema kbiit-laek ho foo laran ba Maromak. Tuir loos buat sira nee mak tenki halo uluk. Maibee keta haluha foo mos parte ida husi sanulu ba Maromak.
MAT 23:24 Imi mestri matan delek! Imi bele taes bee hodi hasai lalar nebee mak monu tama ba imi nia kopu laran, maibee kuda kamelu imi tolan tomak!
MAT 23:25 Imi mestri relijiaun sira ho Farizeu sira, imi sei terus. Imi koalia oin seluk, hahalok oin seluk. Imi badinas hamoos kopu ho bikan nia liur. Maibee imi nia laran foer nafatin tanba imi gosta hadau ema nia sasaan hodi hanoin deit imi nia aan.
MAT 23:26 Imi Farizeu matan delek duni! Fase uluk bikan nia laran mak nia liur sai moos hotu.
MAT 23:27 Imi mestri relijiaun sira ho Farizeu sira, imi sei terus. Imi koalia oin seluk, hahalok oin seluk. Imi hanesan rate nebee mak ema pinta mutin. Husi liur haree ba furak, maibee iha laran iha mate ruin ho buat oi-oin nebee halo ema hakribi.
MAT 23:28 Imi mos nunee. Bainhira ema haree imi husi liur, imi ema diak. Afinal imi nia laran hakarak kontra Maromak nia ukun fuan, i imi finji sai ema nebee moris loos.
MAT 23:29 Imi mestri relijiaun sira ho Farizeu sira, imi sei terus. Imi koalia oin seluk, hahalok oin seluk. Imi hada Maromak nia profeta sira nia rate halo bo-boot, ema moris loos sira nia rate mos imi enfeita halo kapaas.
MAT 23:30 Depois imi dehan, ‘Se ami moris iha ami nia bei-ala sira nia tempu karik, ami lakohi hamutuk ho sira hodi oho profeta sira nee.’
MAT 23:31 Afinal imi nia liafuan nee hatudu sai katak, imi nee jerasaun husi ema sira nebee mak oho profeta sira.
MAT 23:32 Entaun buat aat nebee mak imi nia bei-ala sira husik hela ba imi, husik imi hatutan ba too hotu!
MAT 23:33 Samea nia oan! Oinsaa mak imi bele halai sees husi kastigu nebee atu kona imi iha infernu?
MAT 23:34 Tanba nee, rona di-diak! Hau sei haruka nafatin profeta ho ema matenek ho mos mestri nebee mak hanorin Maromak nia liafuan. Maibee imi sei oho balu, i prega balu ba iha krus. Sira seluk imi baku ho sikoti iha imi nia uma kreda i duni husi aldeia ba aldeia.
MAT 23:35 Nunee, ema moris loos hotu-hotu nebee imi nia bei-ala sira oho, imi nebee moris agora mak sei lori todan. Nee sura husi Abel, ema ida nebee moris loos, too iha Zacarias, Barakias nia oan. Ema oho Zacarias iha area uma kreda boot besik meza sakrifisiu.
MAT 23:36 Hau hatete lo-loos ba imi, sira hotu nia mate, imi nebee moris agora mak tenki lori todan.”
MAT 23:37 “Koitadu, imi ema Jerusalém! Imi oho Maromak nia profeta sira, i ema nebee Maromak haruka ba imi, imi tuda ho fatuk too mate. Dala barak Hau hakarak halibur imi hanesan manu inan halibur nia oan sira atu luut, maibee imi lakohi.
MAT 23:38 Rona mai! Maromak husik tiha ona imi nia hela fatin. Agora imi mesak ona.
MAT 23:39 Hau hatete ba imi, imi sei la haree tan Hau too imi foo sai dehan, ‘Maromak foo bensaun ba Ema ida nebee mai lori Nai Maromak nia naran.’ ”
MAT 24:1 Koalia hotu tiha, Jesus lao sai husi uma kreda boot. Nia lao dadauk, Nia eskolante sira mai besik hodi hatudu uma kreda nia furak ba Nia.
MAT 24:2 Maibee Jesus hataan, “Imi haree di-diak ba! Hau hatete lo-loos ba imi, too loron ida, buat sira nee sei rahun hotu. Fatuk sira nee hotu sei tetuk too rai.”
MAT 24:3 Depois Jesus lao baa tuur mesak iha foho Oliveira. Nia eskolante sira baa besik Nia hodi husu, “Hatete took mai ami, buat nebee ohin Ita Boot koalia nee, bainhira mak sei akontese? Kuandu Ita Boot atu fila fali mai, sinal saida mak sei mosu? I sinal saida mak sei hatudu katak mundu atu remata ona?”
MAT 24:4 Jesus hataan dehan, “Kuidadu di-diak para ema la bele bosok imi.
MAT 24:5 Ema barak sei mai lori Hau nia naran dehan sira nee mak Mesias, Salvador nebee Maromak promete ona hori uluk atu haruka mai. I sira lohi ema barak atu lao sala dalan.
MAT 24:6 Imi sei rona kona ba funu oi-oin, i ema sei konta tutan kona ba funu iha fat-fatin. Maibee keta tauk. Buat sira nee tenki akontese uluk, maibee nee laos dehan katak mundu atu remata ona.
MAT 24:7 Nasaun sei funu hasoru nasaun, estadu sei funu hasoru estadu. Sei iha rai hamlaha boot, i rai sei nakdoko iha fat-fatin.
MAT 24:8 Maibee susar sira nee foin mak hahuu, hanesan feto isin rua nebee foin kanotak moras atu tuur ahi.
MAT 24:9 Ema iha nasaun hotu-hotu sei odi imi tanba imi tuir Hau. Sira sei entrega imi ba ema seluk atu halo terus imi i oho imi.
MAT 24:10 Iha tempu nee mos ema nebee fiar mai Hau, barak sei fila kotuk mai Hau. Sira sei odi malu i faan malu ba inimigu sira.
MAT 24:11 Profeta falsu barak sei mosu hodi bosok ema barak atu tuir sira.
MAT 24:12 Hahalok aat iha mundu nee aumenta ba beibeik too ema barak liu mak la hatudu domin ba malu tan.
MAT 24:13 Maibee see mak tuir nafatin Hau too rohan, Maromak sei salva nia.
MAT 24:14 Liafuan Diak kona ba oinsaa Maromak ukun nudar Liurai, ema sei haklaken iha mundu tomak, atu nunee ema husi nasaun hotu-hotu bele hatene. Haklaken hotu tiha mak foin mundu nee remata.
MAT 24:15 Hori uluk profeta Daniel hakerek kona ba buat ida aat liu nebee sei tama ba iha Fatin Lulik iha uma kreda boot, halo too Maromak hakribi. See mak lee liafuan nee, kompriende ba! Bainhira imi haree buat aat nee,
MAT 24:16 imi nebee iha provinsia Judeia tenki halai ona ba foho.
MAT 24:17 Iha loron nee, ema nebee iha hela liur, la bele tama baa foti sasaan iha uma laran.
MAT 24:18 I ema nebee iha hela toos, la bele fila baa foti nia hena iha uma.
MAT 24:19 Iha tempu nee, feto isin rua ho inan sira nebee foo susu nia oan, sei terus teb-tebes.
MAT 24:20 Harohan ba Maromak atu loron nebee mak imi halai ba foho nee, la bele monu iha tempu malirin ka iha loron Sabadu, ita ema Judeu nia loron deskansa.
MAT 24:21 Tanba iha tempu nee, ema sei terus aat liu. Komesa husi Maromak halo mundu too agora, seidauk iha terus aat ida hanesan nee. I kuandu terus boot nee liu tiha, sei la akontese tan hanesan nee.
MAT 24:22 Se Maromak la habadak tempu terus nee, la iha tan ema ida mak moris. Maibee Nia sei habadak duni, tanba Nia hadomi ema nebee mak Nia hili tiha ona.
MAT 24:23 Iha tempu nee, se ema ruma dehan ba imi, ‘Haree took, Mesias iha nee’ ka ‘Mesias iha nebaa’, keta fiar.
MAT 24:24 Tanba ema sei mai bosok dehan sira mak Mesias ka sira Maromak nia profeta. Sira sei hatudu milagre bo-boot nebee halo ema admira, atu nunee sira bele lohi ema hotu-hotu atu lao sala dalan. Too ema nebee Maromak hili mos sira hakarak hamonu.
MAT 24:25 Entaun hanoin di-diak! Aban-bainrua buat sira nee akontese, lalika hakfodak, tanba Hau foo hatene ona ba imi.
MAT 24:26 Nunee se ema mai bosok imi dehan, ‘Haree ba, Mesias iha rai fuik maran nebaa’, lalika sai baa buka. Se ema dehan, ‘Mesias iha hela subar fatin nee’, lalika fiar.
MAT 24:27 Tanba bainhira Hau, Ema Umanu nia Oan fila fali mai husi lalehan, ema hotu sei haree mo-moos, hanesan rai lakan nebee mak naroman husi lorosae too loromonu.
MAT 24:28 Bainhira imi haree manu metan semo hamutuk ba iha fatin ida, nee sinal hodi hatudu mo-moos katak iha mate isin dodok iha nebaa.”
MAT 24:29 “Bainhira loron terus nee liu tiha, loro matan sai nakukun tiha, fulan mos la foo naroman tan. Fitun sira iha lalehan sei monu namtate, i forsa hotu-hotu iha kalohan leten sei nakdoko.
MAT 24:30 Ema hotu-hotu iha mundu sei haree sinal ida iha lalehan hatudu sai katak Hau, Ema Umanu nia Oan atu mai ona. Haree nunee, sira nebee lakohi simu Hau sei tanis ho laran susar. Depois ema hotu-hotu sei haree Hau, Ema Umanu nia Oan tuun mai iha kalohan leten, ho kbiit boot ho naroman lalehan nian.
MAT 24:31 I Hau sei haruka Hau nia anju huu korneta ho lian makaas hodi bolu anju sira atu halibur ema sira nebee mak Hau hili tiha ona husi mundu tomak, husi rai ulun too rai ikun.
MAT 24:32 Hanoin took ai figeira, i aprende husi ai nee. Bainhira ai figeira nia sanak komesa matak i nia dikin komesa sai, imi hatene katak bailoron besik ona.
MAT 24:33 Nunee mos bainhira imi haree buat sira nee hotu akontese, imi hatene katak Hau besik mai ona, Hau iha ona odamatan oin.
MAT 24:34 Hau hatete lo-loos ba imi, husi ema hotu nebee mak moris iha tempu nee, iha balu sei moris too buat sira nee hotu akontese.
MAT 24:35 Lalehan ho rai sei remata, maibee Hau nia liafuan sei la remata.”
MAT 24:36 “Kona ba loron ho oras nebee mak Hau atu fila fali mai, la iha ema ida mak hatene. Anju sira iha lalehan mos la hatene. So Aman Maromak deit mak hatene.
MAT 24:37 Bainhira loron too atu Hau, Ema Umanu nia Oan fila fali mai, ema sei moris baibain hanesan iha Noé nia tempu uluk.
MAT 24:38 Iha tempu nebaa molok bee boot sae, ema haan-hemu i halo festa kazamentu hanesan baibain, too loron Noé tama ba roo boot laran.
MAT 24:39 Bainhira bee sae lori lakon tiha ema sira hotu foin sira nia matan nakloke hodi hatene saida mak akontese. Nunee mos bainhira Hau, Ema Umanu nia Oan fila fali mai.
MAT 24:40 Iha tempu nee, ema nain rua servisu hela iha toos laran, Maromak sei lori tiha ida i husik hela ida seluk.
MAT 24:41 Iha feto nain rua fai hela hare, Maromak sei lori tiha ida, i husik hela ida seluk.
MAT 24:42 Entaun imi tenki matan moris, tanba imi la hatene saa loron mak Hau, imi nia Nai fila fali mai.
MAT 24:43 Hanoin di-diak! Se iha uma nain ida hatene lo-loos iha oras nebee mak naok-teen atu mai, nia matan moris nafatin atu naok-teen la bele tama.
MAT 24:44 Nee duni imi tenki prontu nafatin. Tanba aban-bainrua Hau, Ema Umanu nia Oan sei fila fali mai derepenti deit iha oras nebee imi la hatene.”
MAT 24:45 “Entaun imi tenki hanesan atan ida nebee matenek toma konta nia patraun nia sasaan, i foo laran ba nia patraun. Patraun sei foo fiar ba ema nee atu fahe hahaan ba nia atan sira seluk tuir oras.
MAT 24:46 Bainhira patraun fila ba uma, haree atan nee badinas halao nia servisu, atan nee sorti boot.
MAT 24:47 Hau hatete lo-loos ba imi, patraun sei foti nia hodi toma konta nia riku-soin hotu.
MAT 24:48 Maibee karik atan nee ema aat ida, nia hanoin dehan, ‘Patraun sei kleur mak fila.’
MAT 24:49 Depois nia komesa baku nia maluk atan sira seluk, i haan-hemu hamutuk ho ema lanu-teen sira.
MAT 24:50 Se nunee, iha loron nebee nia la hein, i oras nebee nia la hatene, derepenti deit nia patraun fila mai.
MAT 24:51 Depois patraun sei tetak rahun tiha atan nee i soe hamutuk ho ema sira nebee koalia oin ida hahalok oin seluk. Iha nebaa ema sei tanis hakilar i ruun nehan.”
MAT 25:1 Jesus koalia tan dehan, “Aban-bainrua Hau fila fali mai hodi ukun nudar Liurai, sei sai hanesan komparasaun ida nee: Iha kalan ida, ema atu halo festa kazamentu. Iha feto raan nain sanulu baa hein noivu iha liur, ida-idak lori nia ahi-oan.
MAT 25:2 Husi feto raan nain sanulu nee, nain lima matenek, nain lima seluk beik.
MAT 25:3 Nain lima beik nee lori deit ahi-oan, la lori mina rezerva.
MAT 25:4 Maibee nain lima matenek nee lori mina rezerva iha botir.
MAT 25:5 Sira hotu baa hein noivu. Maibee noivu nee kleur loos foin too, nunee sira matan dukur toba tiha.
MAT 25:6 Iha kalan boot ema ida hakilar dehan, ‘Noivu mai ona! Imi mai hasoru nia ona!’
MAT 25:7 Rona nunee, feto raan nain sanulu nee hadeer hodi prepara sira nia ahi-oan.
MAT 25:8 Nain lima beik nee, sira nia mina atu hotu ona. Nunee sira hatete ba nain lima matenek dehan, ‘Foo imi nia mina uitoan mai, tanba ami nia ahi besik atu mate.’
MAT 25:9 Maibee nain lima matenek nee hataan, ‘Ami la bele foo. Se ami foo, entaun ami nia ahi mos bele mate. Diak liu imi baa sosa iha ema sira nebee faan mina.’
MAT 25:10 Bainhira sira baa buka mina atu sosa, noivu mos too. I feto raan nain lima nebee prontu hela atu simu noivu nee, tama hamutuk ho noivu iha festa laran. Depois ema taka tiha odamatan.
MAT 25:11 Too ikus feto raan nain lima beik nee mos too mai iha odamatan oin hodi bolu dehan, ‘Senhor! Senhor! Favor loke odamatan mai ami.’
MAT 25:12 Maibee noivu hataan, ‘Hau dehan lo-loos ba imi, hau la konhese imi.’ ”
MAT 25:13 Konta hotu tiha, Jesus dehan, “Entaun matan moris neon nain nafatin ba. Tanba imi la hatene loron ho oras nebee mak Hau atu fila fali mai.”
MAT 25:14 “Hau foo komparasaun ida tan kona ba Hau nia loron atu fila fali mai. Iha ema riku ida atu baa iha rai dook. Molok atu baa, nia bolu nia atan sira hodi foo fiar ba sira kaer nia osan too nia fila.
MAT 25:15 Nia foo ba atan sira nee tuir ida-idak nia kapasidade. Atan ida, nia entrega osan mutin bornal lima. Ida seluk, nia entrega osan mutin bornal rua. Ida seluk tan, nia entrega osan mutin bornal ida. Fahe hotu tiha, nia sai ona ba rai liur.
MAT 25:16 Atan ida nebee simu osan mutin bornal lima nee, baa fila liman kedas, i nia manaan tan osan mutin bornal lima.
MAT 25:17 Nunee mos atan ida nebee simu osan mutin bornal rua. Nia baa fila liman i manaan tan osan mutin bornal rua.
MAT 25:18 Maibee atan ida nebee simu osan mutin bornal ida, nia baa kee rai kuak hodi hakoi subar tiha nia patraun nia osan.
MAT 25:19 Kleur loos mak foin atan sira nia patraun fila. Too iha uma, patraun bolu sira hodi husu tuir, sira ida-idak manaan fali osan hira.
MAT 25:20 Atan ida nebee simu osan mutin bornal lima nee mai uluk. Nia lori osan mutin bornal sanulu hodi dehan, ‘Patraun, uluk patraun entrega osan mutin bornal lima mai hau. Agora haree took, hau manaan tan bornal lima.’
MAT 25:21 Nia patraun hatete ba nia, ‘Diak loos! O nee atan diak, i foo laran ba hau duni. O halo buat kiikoan nee ho loos, nunee hau sei foo tan buat boot atu o tau matan. Mai haksolok hamutuk ho hau.’
MAT 25:22 Nunee mos atan nebee mak simu osan mutin bornal rua. Nia mai dehan, ‘Patraun, uluk patraun entrega osan mutin bornal rua mai hau. Haree took, hau manaan tan bornal rua.’
MAT 25:23 Nia patraun hataan, ‘Diak loos! O nee atan diak, i foo laran ba hau duni. O halo buat kiikoan nee ho loos, nunee hau sei foo tan buat boot atu o tau matan. Mai haksolok hamutuk ho hau.’
MAT 25:24 Depois atan nebee simu osan mutin bornal ida deit mai dehan, ‘Patraun, hau hatene ita boot siak-teen. Ita boot gosta kuu buat nebee laos ita boot mak kuda, i simu buat nebee laos ita boot nia kosar been.
MAT 25:25 Nee mak hau tauk, i hau baa hakoi subar tiha patraun nia osan. Haree ba, ita boot nia osan mak nee.’
MAT 25:26 Maibee nia patraun hataan, ‘Atan aat i baruk-teen! O hatene katak hau gosta kuu buat nebee laos hau mak kuda, i simu buat nebee laos hau nia kosar been.
MAT 25:27 Tuir lo-loos o rai hau nia osan iha banku para hau fila mai, bele simu fali osan nee ho nia funan.’
MAT 25:28 Depois patraun hatete ba nia atan seluk, ‘Foti tiha osan nee husi nia hodi foo fali ba atan ida nebee mak iha ona osan mutin bornal sanulu.
MAT 25:29 Tanba ema nebee iha ona, sei simu tan too nakonu resin. Maibee ema nebee la iha, uitoan nebee nia iha mos, sei hasai tiha husi nia.
MAT 25:30 Agora kaer tiha atan nebee la iha folin nee hodi soe sai ba iha fatin nakukun. Iha nebaa ema sei tanis hakilar i ruun nehan.’ ”
MAT 25:31 Jesus hatutan tan dehan, “Hau, Ema Umanu nia Oan sei fila fali mai husi lalehan ho naroman nabilan, i anju sira hotu mai hamutuk ho Hau. Hau sei tuur iha kadeira ukun nudar Liurai.
MAT 25:32 Depois anju sira sei halibur ema husi nasaun hotu-hotu iha Hau nia oin, i Hau sei fahe ema sira nee ba grupu rua, hanesan bibi atan haketak bibi malae ho bibi timur.
MAT 25:33 Ema nebee moris loos, Hau tau iha Hau nia sorin loos, sira seluk Hau tau iha Hau nia sorin karuk.
MAT 25:34 Nudar Liurai, Hau sei hatete ba ema sira nebee mak iha Hau nia sorin loos dehan, ‘Imi sira nee mak hetan bensaun husi Hau nia Aman, mai tama ona ba imi nia fatin iha reinu lalehan. Fatin nee prepara nanis ona ba imi bainhira Maromak halo mundu nee.
MAT 25:35 Tanba uluk bainhira Hau hamlaha, imi foo hahaan mai Hau. Hau hamrook, imi foo Hau hemu. Hau hanesan ema lao rai ida iha imi nia rain, imi simu Hau iha imi nia uma.
MAT 25:36 Hau la iha hena atu hatais, imi foo hena mai Hau. Hau moras, imi tau matan mai Hau. Hau dadur iha komarka, imi baa vizita Hau.’
MAT 25:37 Depois ema nebee moris loos nee husu, ‘Nai, hori bainhira mak ami haree Ita Boot hamlaha, i foo hahaan ba Ita, ka Ita hamrook i ami foo Ita hemu?
MAT 25:38 Hori bainhira mak Ita Boot hanesan ema lao rai, depois ami simu Ita iha uma? Hori bainhira mak Ita Boot la iha hena, i ami foo hena ba Ita?
MAT 25:39 Hori bainhira mak ami haree Ita Boot moras ka dadur iha komarka, depois ami baa vizita Ita?’
MAT 25:40 Hau sei hataan dehan, ‘Rona di-diak! Bainhira imi halo buat diak sira nee ba Hau nia maluk ida, maski ema kiik ida mos, nee hanesan imi halo ona mai Hau.’
MAT 25:41 Depois Hau hatete ba ema sira nebee mak iha Hau nia sorin karuk dehan, ‘Imi sira nee hetan ona malisan. Sai tiha husi fatin nee, i baa tama iha ahi nebee mak nunka mate tinan ba tinan. Ahi nee prepara tiha ona ba Satanás ho nia anju sira.
MAT 25:42 Tanba uluk bainhira Hau hamlaha, imi la foo hahaan mai Hau. Hau hamrook, imi la foo Hau hemu.
MAT 25:43 Hau hanesan ema lao rai ida iha imi nia rain, imi la simu Hau iha imi nia uma. Hau la iha hena atu hatais, imi la foo hena mai Hau. Hau moras ka dadur iha komarka, imi la tau matan ba Hau.’
MAT 25:44 Sira mos husu, ‘Nai, hori bainhira mak ami haree Ita Boot hamlaha ka hamrook, depois ami la foo haan-hemu? I hori bainhira mak Ita Boot hanesan ema lao rai, ka la iha hena atu hatais, ka moras ka dadur iha komarka, depois ami la tau matan?’
MAT 25:45 Hau sei hataan, ‘Rona di-diak! Bainhira imi la halo buat diak sira nee ba Hau nia maluk ida, maski ema kiik ida mos, nee hanesan imi la halo mai Hau.’
MAT 25:46 Hotu tiha ema sira nee sei sai husi Hau nia sorin hodi hetan kastigu tinan ba tinan. Maibee ema nebee mak moris loos sei hetan moris rohan-laek.”
MAT 26:1 Bainhira Jesus hanorin tiha hotu buat sira nee, Nia hatete ba Nia eskolante sira dehan,
MAT 26:2 “Imi hatene katak, hela deit loron rua atu festa Paskua. Iha tempu nee, ema sei entrega Hau, Ema Umanu nia Oan ba ema aat atu prega iha krus too mate.”
MAT 26:3 Iha tempu nebaa nai lulik nia ulun sira ho katuas lia nain sira halibur hamutuk iha nai lulik boot Kaifás nia uma.
MAT 26:4 Sira kombina malu atu kaer Jesus nonook deit hodi oho.
MAT 26:5 Maibee sira hatete, “La bele kaer Nia iha loron festa nee, se lae povu bele halo rungu-ranga.”
MAT 26:6 Jesus baa iha aldeia Betánia hodi haan iha Simão ida nebee uluk moras lepra nia uma.
MAT 26:7 Bainhira Jesus haan hela, feto ida mai lori botir ida halo husi fatuk murak, mina morin karun teb-tebes mak iha laran. Nia baa besik Jesus hodi fui mina morin nee ba iha Jesus nia ulun.
MAT 26:8 Bainhira Jesus nia eskolante sira haree, sira hirus hodi dehan ba malu, “Nusaa mak nia estraga deit mina morin folin karun nee?
MAT 26:9 Se mina morin nee faan karik, bele hetan osan barak hodi ajuda ema kiak sira.”
MAT 26:10 Maibee Jesus hatene hela sira nia hanoin, nunee Nia dehan, “Imi keta hirus feto nee, tanba nia halo ona buat furak mai Hau.
MAT 26:11 Ema kiak sira sempre iha imi nia leet, maibee Hau laos atu hela nafatin ho imi.
MAT 26:12 Nia fui mina morin nee ba Hau nia isin para Hau mate karik, hein hakoi deit.
MAT 26:13 Hau hatete lo-loos ba imi, aban-bainrua bainhira ema foo sai Liafuan Diak iha mundu tomak, sira mos sei konta kona ba buat nebee mak nia halo mai Hau, atu ema hanoin nafatin nia.”
MAT 26:14 Depois Judas Iscariotes, eskolante ida husi sanulu resin rua nee, baa hasoru nai lulik nia ulun sira.
MAT 26:15 Too iha nebaa, nia husu, “Se hau entrega Nia ba imi nia liman, imi sei foo saida ba hau?” Entaun sira sura osan mutin tolu-nulu hodi foo ba nia.
MAT 26:16 I Judas sai kedas hodi buka dalan atu entrega Jesus ba sira.
MAT 26:17 Festa Paun la Tau Fermentu hahuu ona. Iha loron primeiru Jesus nia eskolante sira baa husu Nia dehan, “Ita Boot hakarak ami baa prepara hahaan atu selebra festa Paskua iha nebee?”
MAT 26:18 Jesus hataan, “Baa iha sidade laran, iha nebaa imi sei hasoru ema ida. Hatete ba nia nunee: ‘Mestri hameno katak, Nia loron nebee Maromak desidi nee besik ona, i Nia hakarak selebra festa Paskua hamutuk ho Nia eskolante sira iha ita nia uma.’ ”
MAT 26:19 Depois Nia eskolante sira baa halo tuir buat nebee mak Jesus haruka. Sira halo preparasaun ba festa Paskua iha nebaa.
MAT 26:20 Bainhira kalan ona, Jesus tuur hamutuk ho Nia eskolante nain sanulu resin rua iha meza.
MAT 26:21 Sira haan daudaun, Nia dehan, “Hau hatete lo-loos ba imi, husi imi sira nee, ida sei faan Hau ba Hau nia inimigu sira.”
MAT 26:22 Rona nunee, Nia eskolante sira tristi teb-tebes. I sira ida-ida komesa husu ba Nia dehan, “Nai, laos hau, loos ka lae?”
MAT 26:23 Jesus hataan, “Ida nebee agora haan lisuk ho Hau iha manko, nia mak sei faan Hau.
MAT 26:24 Hau, Ema Umanu nia Oan tenki mate duni tuir buat nebee hakerek tiha ona iha Livru Sagradu. Maibee ema nebee faan Hau nee, sei terus teb-tebes. Diak liu uluk kedas nia lalika moris.”
MAT 26:25 Depois Judas, ida nebee atu faan Jesus nee husu, “Mestri, laos hau, loos ka lae?” Jesus hataan, “O duni.”
MAT 26:26 Bainhira sira haan hela, Jesus foti paun hodi foo agradese ba Maromak. Nia silu paun nee hodi fahe ba Nia eskolante sira dehan, “Simu hodi haan ba. Nee Hau nia isin.”
MAT 26:27 Depois Nia foti tua kopu ida. Nia foo agradese ba Maromak, i foo ba Nia eskolante sira dehan, “Imi hotu hemu ba.
MAT 26:28 Tua nee Hau nia raan. Liu husi Hau nia raan fakar mak Maromak kumpri Nia promesa hodi hamoos ema barak nia sala.
MAT 26:29 Hau hatete ba imi, Hau sei la hemu tan tua nee. Bainhira Hau nia Aman iha lalehan ukun Nia povu hotu mak foin Hau hemu fali tua foun hamutuk ho imi.”
MAT 26:30 Hotu tiha Jesus ho Nia eskolante sira kanta hamutuk hodi hahii Maromak. Depois sira sai baa iha foho Oliveira.
MAT 26:31 Jesus hatete ba Nia eskolante sira dehan, “Iha kalan nee kedas, imi hotu-hotu sei halai husik hela Hau tanba imi haree saida mak akontese mai Hau. Tanba iha Livru Sagradu hakerek dehan, ‘Hau sei oho tiha bibi atan, i bibi sira sei halai namkari hotu.’
MAT 26:32 Hau sei mate duni. Maibee bainhira Hau moris fali, Hau baa hein imi iha provinsia Galileia.”
MAT 26:33 Pedro hataan, “Maski sira hotu halai namkari tanba buat nebee mak akontese ba Ita Boot, maibee hau sei la halai.”
MAT 26:34 Jesus dehan ba nia, “Hau hatete lo-loos ba o, iha kalan nee duni, molok manu kokoreek, o sei nega Hau dala tolu.”
MAT 26:35 Pedro hataan fali, “Maski hau tenki mate hamutuk ho Ita Boot mos, hau sei la nega.” Eskolante sira seluk mos hatete nunee.
MAT 26:36 Depois Jesus lao hamutuk ho Nia eskolante sira baa iha fatin ida naran Getsémani. Too iha nebaa, Nia hatete ba sira, “Imi tuur iha nee, Hau sei baa halo orasaun iha nebaa lai.”
MAT 26:37 Nia lao tan uitoan, lori ho Pedro ho Zebedeu nia oan nain rua, Tiago ho João. Iha tempu nee Jesus nia laran susar teb-tebes i la hakmatek.
MAT 26:38 Jesus hatete ba sira nain tolu, “Hau nia laran susar teb-tebes, too senti atu besik mate ona. Imi hein Hau iha nee hodi hadeer nafatin.”
MAT 26:39 Jesus lao tan uitoan husi sira, depois Nia taka rabat ba rai hodi harohan dehan, “Hau nia Aman, se bele karik hasai tiha terus ida nee husi Hau. Maibee la bele halo tuir Hau nia hakarak, halo tuir deit Ita Boot nia hakarak.”
MAT 26:40 Depois Nia fila fali ba nia eskolante nain tolu nee, Nia haree sira toba dukur hela. Nia hatete ba Pedro, “Imi atu hadeer deit oras ida hamutuk ho Hau mos la bele ka?
MAT 26:41 Hadeer hodi halo orasaun atu imi la bele monu ba tentasaun. Tanba imi nia laran hakarak atu halo buat nebee loos, maibee imi ema nebee fraku.”
MAT 26:42 Dala ida tan Jesus baa halo orasaun dehan, “Hau nia Aman, se Hau tenki simu terus nee, entaun halo tuir Ita Boot nia hakarak ba.”
MAT 26:43 Bainhira Nia fila fali, Nia haree sira nain tolu toba fali, tanba sira nia matan dukur loos.
MAT 26:44 Entaun Nia husik sira i fila fali hodi halo orasaun ba dala tolu. Nia harohan hanesan ohin.
MAT 26:45 Hotu tiha Nia fila fali ba Nia eskolante sira hodi dehan, “Imi sei toba deskansa ka? Agora oras too ona atu ema faan Hau, Ema Umanu nia Oan ba iha ema aat nia liman.
MAT 26:46 Hadeer ona. Haree ba! Ema nebee mak faan Hau ba ema aat nee mai daudaun ona. Mai ita baa took iha sira.”
MAT 26:47 Jesus sei koalia hela, Judas, eskolante ida husi sira nain sanulu resin rua nee, too mai. Ema barak mai hamutuk ho nia, lori surik ho ai dona. Ema sira nee, nai lulik nia ulun sira ho katuas lia nain sira mak haruka.
MAT 26:48 Molok too iha nebaa, Judas foo tiha ona sinal ba sira dehan, “Ema nebee mak hau rei, Nia mak nee, imi kaer Nia.”
MAT 26:49 Entaun Judas baa kedas kumprimenta Jesus dehan, “Mestri.” I nia rei Jesus.
MAT 26:50 Jesus hatete, “Belun, halo tuir o nia planu ba.” Depois ema sira nee mai kaer Jesus.
MAT 26:51 Derepenti Jesus nia eskolante ida losu nia surik hodi tesi kotu tiha ema ida nia tilun. Ema nee nai lulik boot nia atan.
MAT 26:52 Haree nunee, Jesus hatete, “Hatama tiha o nia surik nee ba iha nia fatin. Tanba see-see deit mak hodi surik hasoru ema, nia sei mate mos ho surik.
MAT 26:53 Hau hatete lo-loos ba o, se Hau husu tulun ba Hau nia Aman iha lalehan, Nia haruka kedas anju barak teb-tebes, liu fali batalhaun sanulu resin rua, para ajuda Hau.
MAT 26:54 Maibee se Hau husu nunee karik, saida mak hakerek iha Livru Sagradu kona ba Hau nee la sai realidade.”
MAT 26:55 Depois Jesus hatete ba ema barak nee dehan, “Nusaa mak imi mai lori surik ho ai dona atu kaer Hau? Imi hanoin Hau ema kriminozu ka? Afinal loro-loron Hau iha hela area uma kreda boot hodi hanorin, i imi la kaer Hau.
MAT 26:56 Maibee buat sira nee hotu akontese hodi kumpri saida mak profeta sira foo sai tiha ona iha Livru Sagradu.” Depois Jesus nia eskolante sira husik hela Nia hodi halai namkari hotu.
MAT 26:57 Depois ema nebee kaer Jesus lori Nia ba iha nai lulik boot Kaifás nia uma. Iha nebaa mestri relijiaun sira ho katuas lia nain sira halibur hamutuk ona atu foo justisa ba Jesus.
MAT 26:58 Pedro lao tu-tuir Jesus husi dook deit, i tama liu ba moru laran. Nia tuur hamutuk ho ema seguransa sira iha uma oin, atu hatene tuir saida mak akontese ba Jesus.
MAT 26:59 Iha uma laran, nai lulik nia ulun sira ho justisa nain relijiaun Judeu sira seluk buka hela ema atu foo sasin falsu para bele kastigu mate Jesus.
MAT 26:60 Maski ema barak mai hamriik iha oin hodi duun Nia, maibee justisa nain sira la hetan sala ida atu bele kastigu Nia. Too ikus ema nain rua tan baa hamriik iha oin
MAT 26:61 hodi foo sasin dehan, “Ema nee hatete hanesan nee: ‘Hau bele halo rahun Maromak nia uma kreda boot nee, depois iha loron tolu nia laran Hau bele harii fila fali.’ ”
MAT 26:62 Depois nai lulik boot hamriik hodi dehan ba Jesus, “Ema sira nee foo sasin tiha ona kona ba O nia sala. Nusaa mak O la hataan sira?”
MAT 26:63 Maibee Jesus nonook deit. Nunee nai lulik boot dehan, “Jura took hodi Maromak Moris nia naran, O mak Mesias, Maromak nia Oan, ka?”
MAT 26:64 Jesus hataan, “Ita dehan nee loos. Maibee Hau hatete ba imi, aban-bainrua imi sei haree Hau, Ema Umanu nia Oan tuur iha Maromak Kbiit Nain nia sorin loos. I imi sei haree Hau tuun mai husi lalehan iha kalohan laran.”
MAT 26:65 Rona nunee, nai lulik boot nee hirus too lees tiha nia batina hodi dehan ba justisa nain sira, “Agora imi rona rasik ona Nia liafuan. Nia hatete aat Maromak! Nusaa mak ita hein tan sasin seluk?
MAT 26:66 Imi foo justisa oinsaa?” Justisa nain sira hataan, “Nia merese mate.”
MAT 26:67 Depois sira tafui kabeen ba Jesus nia oin i baku Nia. Balu basa Nia hasan
MAT 26:68 hodi husu, “He, Mesias, Profeta, foo sai took, see mak baku O nee?”
MAT 26:69 Pedro sei tuur hela iha uma oin, iha kriada ida mai besik nia dehan, “O mos hamutuk ho Jesus, Ema Galileia nee.”
MAT 26:70 Maibee Pedro nega iha ema hotu nia oin dehan, “Hau la hatene buat nebee o koalia nee.”
MAT 26:71 Depois Pedro sai ba iha portaun, kriada ida tan haree nia i hatete ba ema nebee mak besik dehan, “Ema nee ohin hamutuk ho Jesus, Ema Nazaré.”
MAT 26:72 Pedro nega tan dala ida hodi dehan, “Hau jura, hau la konhese Ema nee.”
MAT 26:73 La kleur ema sira nebee hamriik iha nebaa mai besik Pedro hodi dehan, “O nee Nia ema duni. Tanba o koalia hanesan ema Galileia.”
MAT 26:74 Maibee Pedro jura dehan, “Hau la konhese Ema nee. Se hau bosok karik, husik Maromak kastigu hau ba.” Derepenti manu kokoreek.
MAT 26:75 Rona nunee, Pedro hanoin fila fali liafuan nebee uluk Jesus dehan, “Molok manu kokoreek, o sei nega Hau dala tolu.” Entaun Pedro sai husi nebaa i tanis ho laran dodok.
MAT 27:1 Dadeer-saan deit, nai lulik nia ulun sira ho katuas lia nain sira foti desizaun atu kastigu mate Jesus.
MAT 27:2 Depois sira futu Nia hodi lori Nia baa entrega ba governador Pilatus.
MAT 27:3 Bainhira Judas, eskolante nebee mak faan Jesus nee, hatene katak sira atu kastigu mate Jesus, nia laran tristi teb-tebes. Nunee nia entrega fali osan mutin tolu-nulu nee ba nai lulik nia ulun sira ho katuas lia nain sira.
MAT 27:4 Nia hatete, “Hau halo sala ona! Ema ida nebee la iha sala sei mate tanba hau mak faan.” Maibee sira hataan, “Ami la interese. O halo sala ka lae, nee o mak hatene.”
MAT 27:5 Entaun Judas soe osan nee ba iha uma kreda boot laran. Depois nia sai baa tara aan mate tiha.
MAT 27:6 Nai lulik nia ulun sira hili tiha osan nebee mak Judas soe nee hodi dehan, “Osan nee raan nia folin. Lei bandu atu hatama fali hamutuk ho osan uma kreda boot nian.”
MAT 27:7 Entaun sira desidi uza osan nee hodi sosa rai pedasuk nebee uluk badaen sanan rai nian. I sira foo rai nee atu sai fatin hodi hakoi ema estranjeiru.
MAT 27:8 Too agora ema bolu rai nee Rai Raan.
MAT 27:9 Nunee sira halo tuir liafuan nebee profeta Jeremias hakerek hori uluk dehan, “Ema Israel sira desidi tiha ona katak, Nia folin mak osan mutin tolu-nulu. Entaun sira foti osan nee
MAT 27:10 hodi sosa rai nebee uluk badaen sanan rai nian, tuir orden nebee mak Nai Maromak foo mai hau.”
MAT 27:11 Bainhira Jesus hamriik iha governador Pilatus nia oin, governador husu ba Nia, “Loos ka, O mak ema Judeu sira nia Liurai ka?” Jesus hataan, “Ita dehan nee loos.”
MAT 27:12 Maibee bainhira nai lulik nia ulun sira ho katuas lia nain sira duun Jesus iha Pilatus nia oin, Jesus la hataan buat ida.
MAT 27:13 Entaun Pilatus hatete ba Jesus dehan, “O la rona ka? Ema sira nee foo sasin oi-oin hodi hasoru O!”
MAT 27:14 Maibee Nia la hataan, uitoan mos lae, halo governador Pilatus admira loos.
MAT 27:15 Tin-tinan, bainhira ema Judeu halo festa Paskua, governador sempre hasai ema dadur ida tuir povu nia hakarak.
MAT 27:16 Iha tempu nebaa iha ema dadur ida naran Barabás, ema hotu konhese nia kriminozu boot ida.
MAT 27:17 Entaun bainhira ema barak halibur hamutuk ona, Pilatus husu ba sira dehan, “Imi hakarak hau husik ida nebee? Barabás ka Jesus nebee ema bolu Mesias?”
MAT 27:18 Pilatus koalia nunee tanba nia hatene hela nai ulun Judeu sira laran moras ba Jesus, nee mak sira entrega Jesus ba nia.
MAT 27:19 Bainhira Pilatus tuur iha kadeira juis nian atu tesi Jesus nia lia, nia feen haruka lia menon dehan, “Keta halo buat ruma ba Ema nee tanba Nia la sala ida. Hau ohin mehi aat kona ba Nia, halo hau hanoin barak.”
MAT 27:20 Maibee nai lulik nia ulun sira ho katuas lia nain sira obriga deit ema barak nee husu ba Pilatus atu husik Barabás, i oho Jesus.
MAT 27:21 Depois governador Pilatus husu fali dehan, “Husi ema nain rua nee, imi hakarak hau husik ida nebee?” Sira hataan, “Barabás!”
MAT 27:22 Rona nunee Pilatus husu tan, “Entaun hau atu halo saida ba Jesus nebee ema bolu Mesias nee?” Sira hotu hakilar, “Prega tiha Nia ba krus!”
MAT 27:23 Depois Pilatus husu, “Tansaa? Nia halo krimi saida?” Maibee sira hakilar makaas liu tan, “Prega tiha Nia ba krus!”
MAT 27:24 Pilatus haree katak ema barak nee atu halo rungu-ranga, i nia la bele halo buat ida. Entaun nia foti bee hodi fase nia liman iha ema barak nee nia oin dehan, “Kona ba Ema nee nia mate, hau la hatene! Imi mak sei lori todan.”
MAT 27:25 Sira hotu hataan, “Husik ba, Ema nee nia raan, ami ho ami nia jerasaun sira mak lori.”
MAT 27:26 Entaun Pilatus halo tuir sira nia hakarak hodi hasai Barabás husi kadeia. I nia haruka ema baku Jesus ho sikoti, depois entrega Jesus ba soldadu sira atu prega iha krus.
MAT 27:27 Hotu tiha soldadu sira lori Jesus ba iha governador Pilatus nia rezidensia i sira halibur sira nia maluk soldadu sira seluk nebee hela iha nebaa hodi mai haleu Nia.
MAT 27:28 Sira kolu tiha Jesus nia hena hodi foo hatais fali batina kor mean ida hanesan liurai sira baibain hatais.
MAT 27:29 Sira mos dulas ai tarak halo kabuar hanesan koroa liurai nian hodi tau ba Nia ulun. Sira tau ai sanak lotuk ida iha Nia liman loos hanesan ai tonka. Sira hakneak iha Nia oin hodi hamoe Nia dehan, “Viva, ema Judeu sira nia Liurai!”
MAT 27:30 Sira mos tafui kabeen ba Nia i foti fali ai sanak nee husi Nia liman laran hodi baku Nia ulun fila-fila.
MAT 27:31 Sira hamoe tiha Nia nunee, sira kolu fali batina mean hodi foo hatais fali Nia hena rasik. Hotu tiha sira lori Nia sai atu baa prega iha krus.
MAT 27:32 Iha dalan klaran, soldadu sira nebee mak lori Jesus nee hetan ema ida husi sidade Sirene, naran Simão. Sira obriga nia lori Jesus nia krus.
MAT 27:33 Sira too iha fatin ida naran Golgota, katak “Fatin Ulun Ruin”.
MAT 27:34 Iha nebaa sira kahur tua ho aimoruk hodi foo ba Jesus. Nia koko tiha maibee lakohi hemu.
MAT 27:35 Depois sira prega Jesus iha krus. I soldadu sira dada rifa atu hatene see mak bele hetan Jesus nia hena.
MAT 27:36 Hotu tiha sira tuur hodi hein Nia.
MAT 27:37 Sira mos iha ai kabelak ida nebee hakerek nunee: “Nee Jesus, ema Judeu sira nia Liurai.” Nee foo hatene razaun saida mak Jesus simu kastigu mate. I sira prega ai kabelak nee iha Nia ulun leten.
MAT 27:38 Sira prega tan ema naok-teen boot nain rua iha krus, ida iha Jesus nia sorin loos, ida iha sorin karuk.
MAT 27:39 Ema nebee liu husi fatin nee, sira doko ulun hodi koalia aat Jesus.
MAT 27:40 Sira hatete, “Uluk O dehan atu halo rahun uma kreda boot, depois harii fali iha loron tolu nia laran. Se O Maromak nia Oan duni, entaun salva took O nia Aan hodi tuun husi krus nee.”
MAT 27:41 Nai lulik nia ulun sira, mestri relijiaun sira ho katuas lia nain sira mos hatete aat Jesus dehan,
MAT 27:42 “Nia salva ona ema seluk, maibee Nia la bele salva Nia Aan rasik. Nia dehan, Nia mak ema Israel nia Liurai, entaun diak liu agora Nia tuun husi krus atu ita fiar.
MAT 27:43 Nia fiar ba Maromak. Se Maromak gosta Nia, entaun ita haree took Maromak mai salva Nia ka lae. Tanba Nia rasik hatete katak Nia Maromak nia Oan.”
MAT 27:44 Naok-teen nain rua nebee mak iha Jesus nia sor-sorin mos tarata aat Jesus nunee.
MAT 27:45 Komesa meudia, nakukun taka metin rejiaun nee tomak too tuku tolu lokraik.
MAT 27:46 Iha tuku tolu lokraik, Jesus hakilar ho lian makaas dehan, “Eloi, Eloi, lama sabaktani?” Nee dehan, “Hau nia Maromak, Hau nia Maromak, tansaa mak Ita Boot husik Hau mesak?”
MAT 27:47 Rona nunee, ema balu nebee hamriik besik dehan, “Nia bolu profeta Elias.”
MAT 27:48 Sira ida halai kedas baa foti esponza rohan ida habokon ho tua siin, tau ba ai naruk ida hodi lolo ba iha Jesus nia ibun atu hemu.
MAT 27:49 Maibee sira seluk dehan, “Hein lai! Ita haree took, Elias mai salva duni Nia ka lae.”
MAT 27:50 Depois Jesus hakilar dala ida tan ho lian makaas, i Nia hakotu Nia iis.
MAT 27:51 Bainhira Jesus nia iis kotu, kurtina boot nebee taka Fatin Lulik iha uma kreda boot, naklees husi leten too kraik fahe tiha ba rua. Rai nakdoko makaas i fatuk bo-boot sira nakfera tiha.
MAT 27:52 Rate sira mos nakloke. I Maromak nia ema balu nebee mate tiha ona, Nia halo moris fali.
MAT 27:53 Sira ida-idak sai husi sira nia rate. Bainhira Jesus moris fila fali, sira mos tama iha sidade santu Jerusalém, i ema barak haree.
MAT 27:54 Bainhira komandante Roma ho soldadu sira nebee hein Jesus nee haree rai nakdoko ho buat seluk nebee akontese, sira tauk teb-tebes hodi dehan, “Loos duni! Ema nee Maromak nia Oan.”
MAT 27:55 Iha nebaa iha senhora barak asisti husi dook deit. Sira nee uluk tuir Jesus husi Galileia too iha Jerusalém hodi serbi Nia.
MAT 27:56 Sira nee mak Maria Madalena, Maria ida seluk (Tiago ho José nia inan), Zebedeu nia feen (Tiago ho João nia inan) ho mos sel-seluk tan.
MAT 27:57 Iha ema riku ida husi sidade Arimateia, naran José. Nia mos Jesus nia eskolante ida. Loro matan atu monu ona,
MAT 27:58 nia baa hasoru Pilatus hodi husu Jesus nia mate isin atu hakoi. Entaun Pilatus haruka soldadu sira entrega Jesus nia mate isin ba José.
MAT 27:59 Depois José simu Jesus nia mate isin, i falun ho hena mutin diak nian nebee foun.
MAT 27:60 Nia lori Jesus nia mate isin baa haloot iha rate nebee nia prepara tiha ona ba nia aan rasik. Fatin nee fatuk lolon nebee ema bahat tiha ona atu sai rate. Depois nia duir fatuk boot ida hodi taka rate nee. Hotu tiha nia fila.
MAT 27:61 Maibee Maria Madalena ho Maria ida seluk tuur hela hodi hateke ba rate nee.
MAT 27:62 Iha fali aban, loron Sabadu, nai lulik nia ulun sira ho ema Farizeu sira baa hasoru malu ho governador Pilatus.
MAT 27:63 Sira dehan, “Senhor, ami hanoin hela Ema bosok-teen nee nia liafuan. Uluk Nia sei moris, Nia dehan katak too iha loron tolu Maromak sei halo Nia moris fali.
MAT 27:64 Nee duni haruka ita boot nia soldadu sira baa halo seguransa iha rate too iha loron tolu. Keta halo be Nia eskolante sira mai naok tiha Nia mate isin, depois sira dehan, Maromak halo Nia moris fali ona husi mate. Se ida nee mak akontese, entaun sira nee bosok aat liu fali sira nia Mestri.”
MAT 27:65 Pilatus hataan, “Entaun lori soldadu balu ba iha rate hodi halo seguransa metin iha nebaa.”
MAT 27:66 Nunee nai ulun Judeu sira hamutuk ho soldadu sira baa iha rate. Sira tau sinal ba rate nee nia odamatan atu ema keta tama. Depois soldadu sira halo seguransa nafatin iha nebaa.
MAT 28:1 Aban fali iha loron Domingu dadeer-saan nakukun, Maria Madalena ho Maria ida seluk baa haree rate.
MAT 28:2 Derepenti rai nakdoko makaas teb-tebes tanba Nai Maromak nia anju ida tuun mai husi lalehan hodi duir tiha fatuk nebee taka rate nee. Depois nia tuur iha leten.
MAT 28:3 Anju nee nia oin nabilan hanesan rai lakan, i nia hena mutin loos.
MAT 28:4 Haree nunee, seguransa sira tauk teb-tebes too sira nakdedar i monu tiha ba rai hanesan ema mate.
MAT 28:5 Depois anju hatete ba senhora nain rua nee dehan, “La bele tauk. Hau hatene imi buka hela Jesus, Ida nebee ema prega tiha ona ba krus nee.
MAT 28:6 Nia la iha nee ona, tanba Maromak halo moris fali ona Nia, tuir buat nebee uluk Nia hatete tiha ona. Mai haree fatin nebee mak ema tau Nia mate isin nee.
MAT 28:7 Haree tiha, imi baa lalais foo hatene Nia eskolante sira dehan, ‘Maromak halo moris fali ona Jesus husi mate. Nia sei baa iha Galileia hodi hein imi, i imi sei haree Nia iha nebaa.’ Keta haluha hau nia lia menon nee.”
MAT 28:8 Nunee senhora nain rua nee husik kedas rate. Sira tauk maibee sira mos haksolok teb-tebes. Sira halai lalais atu baa foo hatene Jesus nia eskolante sira.
MAT 28:9 Iha dalan klaran, derepenti Jesus hasoru sira i kumprimenta sira. Entaun sira baa besik Nia i hakruuk hakuak Nia ain hodi adora Nia.
MAT 28:10 Depois Jesus hatete ba sira, “La bele tauk. Baa foo hatene Hau nia maluk sira atu sira baa iha Galileia. Iha nebaa sira sei haree Hau.”
MAT 28:11 Bainhira senhora sira nee lao dadauk, seguransa sira balu hamriik hodi baa iha sidade Jerusalém. Too iha nebaa, sira konta ba nai lulik nia ulun sira kona ba buat hotu-hotu nebee mak ohin akontese iha rate.
MAT 28:12 Entaun nai lulik nia ulun sira hasoru malu ho katuas lia nain sira hodi halo planu. Sira foo osan barak ba soldadu sira nebee kontrola rate nee.
MAT 28:13 I sira hameno dehan, “Imi tenki foo sai dehan, ‘Iha kalan boot bainhira ami toba dukur hela, Nia eskolante sira mai naok tiha Nia mate isin.’
MAT 28:14 Se governador rona karik, ami mak baa koalia ho nia atu nunee imi la bele hetan kastigu.”
MAT 28:15 Entaun ema seguransa sira simu osan nee i habelar lia falsu nebee mak hameno tiha ona ba sira. Too agora istoria nee ema Judeu sira sei konta nafatin.
MAT 28:16 Depois Jesus nia eskolante nain sanulu resin ida baa sae foho ida iha provinsia Galileia, tuir buat nebee Jesus hameno tiha ona ba sira.
MAT 28:17 Bainhira sira haree Jesus, sira adora Nia. Maibee sira balu sei duvida hela.
MAT 28:18 Depois Jesus baa besik sira hodi dehan, “Maromak foo tiha ona kbiit tomak mai Hau atu ukun buat hotu-hotu iha lalehan ho rai.
MAT 28:19 Tanba nee, baa hanorin ema iha nasaun hotu-hotu atu sira sai Hau nia eskolante. Foo sarani sira hodi Aman, Oan ho Espiritu Santu sira nia naran.
MAT 28:20 Hanorin sira atu halo tuir buat hotu-hotu nebee mak Hau hatete ona ba imi. Keta haluha, Hau sempre hamutuk ho imi too mundu nee remata.”
MAR 1:1 Nee Liafuan Diak kona ba Maromak nia Oan Jesus Kristu. Liafuan Diak nee hahuu hanesan tuir mai nee.
MAR 1:2 Hori uluk kedas profeta Isaias hakerek Maromak nia lia menon kona ba ema nebee prepara dalan ba Jesus. Maromak dehan nunee: “Rona mai! Hau haruka Hau nia ema ida baa uluk hodi prepara dalan ba O.
MAR 1:3 Nia sei foo sai ho lian makaas iha rai fuik maran dehan, ‘Imi tenki hadia dalan atu simu ita nia Nai. Halo loos tiha dalan nebee kleuk para Nia lao tuir.’ ”
MAR 1:4 Ema nee mak João Sarani Nain. Nia baa iha rai fuik maran hodi foo hatene ba povu dehan, “Hakribi ona imi nia sala hodi mai sarani, para Maromak hamoos imi nia sala.”
MAR 1:5 Ema barak mai husi provinsia Judeia laran tomak ho sidade Jerusalém. Sira foo sai sira nia sala, depois João foo sarani sira iha mota Jordaun.
MAR 1:6 João hatais hena nebee halo husi kuda kamelu nia fulun, i nia sintu halo husi animal nia kulit. Nia hahaan mak gafanhotu ho bani been.
MAR 1:7 Nia foo sai dehan, “Iha Ema ida boot liu hau sei mai, atu hakruuk hodi kore deit Nia sandalias talin mos, hau la serve.
MAR 1:8 Hau foo sarani imi ho bee deit, maibee Nia sei foo sarani imi hodi Espiritu Santu.”
MAR 1:9 Iha tempu nebaa Jesus mai husi aldeia Nazaré iha provinsia Galileia ba iha mota Jordaun, i João foo sarani Nia iha mota nee.
MAR 1:10 Sarani hotu tiha Jesus sai husi bee laran. Derepenti Nia haree lalehan nakloke, i Maromak nia Espiritu hanesan manu pombu tuun ba iha Nia.
MAR 1:11 Depois lian ida husi lalehan dehan, “O mak Hau nia Oan doben. O halo Hau nia laran haksolok teb-tebes.”
MAR 1:12 Hotu tiha Espiritu Santu lori kedas Jesus ba iha rai fuik maran.
MAR 1:13 Durante loron haat-nulu, kalan haat-nulu Jesus hela iha rai fuik maran iha animal fuik nia leet, i Satanás koko Nia fila-fila. Maibee anju sira serbi Nia.
MAR 1:14 Iha loron ida, ema kaer João Sarani Nain hodi baa dadur iha komarka. João tama tiha komarka, Jesus baa iha provinsia Galileia hodi foo sai Maromak nia Liafuan Diak.
MAR 1:15 Iha nebaa Nia dehan, “Tempu too ona. La kleur tan Maromak sei ukun imi. Nee duni, hakribi ona imi nia sala hodi fiar Liafuan Diak.”
MAR 1:16 Iha loron ida Jesus lao liu husi tasi ibun Galileia. Nia haree peskador nain rua, Simão ho nia alin André soe hela dai iha tasi.
MAR 1:17 Jesus hatete ba sira, “Mai tuir Hau! Imi nee peskador ikan nian, maibee agora Hau sei hanorin imi atu sai peskador ba ema.”
MAR 1:18 Sira mos husik kedas sira nia dai hodi tuir Jesus.
MAR 1:19 Depois Jesus lao tan uitoan, Nia haree Zebedeu nia oan nain rua, Tiago ho João hadia hela redi iha sira nia roo laran.
MAR 1:20 Jesus bolu kedas sira nain rua atu tuir Nia. Sira mos husik sira nia aman Zebedeu iha roo laran hamutuk ho ema nebee servisu ho sira. Depois sira nain rua baa tuir Jesus.
MAR 1:21 Hotu tiha Jesus ho Nia eskolante sira baa iha sidade Kafarnaum. Iha loron Sabadu Jesus baa iha uma kreda i komesa hanorin.
MAR 1:22 Ema nebee rona nee admira, tanba Nia hanorin ho kbiit, la hanesan ho mestri relijiaun sira nia hanorin.
MAR 1:23 Iha uma kreda laran, iha mos mane ida espiritu aat domina hela nia. Derepenti nia hakilar dehan,
MAR 1:24 “Jesus, Ema Nazaré. O hakarak halo saida ba ami? O mai atu halakon ami ka? Hau hatene O. O mak Ema Santu nebee Maromak haruka mai.”
MAR 1:25 Maibee Jesus siak espiritu aat dehan, “Nonook! Sai husi ema nee!”
MAR 1:26 Depois espiritu aat doko makaas ema nee i hakilar makaas hodi sai husi nia.
MAR 1:27 Ema hotu admira hodi husu ba malu dehan, “Saida mak nee? Hanorin nee foun! Ema nee nia hanorin iha kbiit. Too Nia foo orden ba espiritu aat mos, espiritu aat halo tuir.”
MAR 1:28 Entaun saida mak Jesus halo nee ema konta ba-mai too ema iha provinsia Galileia tomak rona.
MAR 1:29 Bainhira Jesus ho Nia eskolante sira sai husi uma kreda, Jesus baa tama kedas iha Simão ho André nia uma. Tiago ho João mos tuir.
MAR 1:30 Momentu nee Simão nia banin feto isin manas toba hela iha kama. Ema konta kedas nia moras nee ba Jesus.
MAR 1:31 Nunee Jesus baa kaer senhora nee nia liman hodi ajuda nia hadeer. Derepenti nia isin manas lakon tiha, i nia hadeer kedas baa prepara hahaan foo ba sira.
MAR 1:32 Loro matan monu ona, ema barak mai lori sira nia maluk sira nebee moras ka diabu tama iha laran.
MAR 1:33 Ema husi sidade nee tomak mai halibur iha uma oin.
MAR 1:34 Jesus kura ema barak nebee moras oi-oin deit. Nia mos duni sai diabu husi ema barak. Nia bandu diabu sira la bele koalia, tanba sira konhese hela Nia.
MAR 1:35 Iha dadeer-saan nakukun, Jesus hadeer, Nia sai husi uma baa iha rai fuik ida hodi halo orasaun.
MAR 1:36 Simão ho nia kolega sira seluk sai baa buka Nia.
MAR 1:37 Bainhira sira hetan Nia, sira dehan, “Ema hotu-hotu buka Ita Boot!”
MAR 1:38 Maibee Jesus hataan, “Mai ita baa iha aldeia sira nebee besik atu Hau bele foo sai Maromak nia liafuan iha fatin sira nee. Tanba Hau mai atu halo ida nee duni.”
MAR 1:39 Nunee Jesus lao haleu provinsia Galileia tomak hodi hanorin iha sira nia uma kreda i duni sai diabu husi ema.
MAR 1:40 Iha mane ida moras lepra mai hakneak iha Jesus nia oin hodi husu tulun dehan, “Nai, Ita Boot iha kbiit atu kura hau nia moras hodi halo hau nia isin sai moos fali, naran katak Ita Boot hakarak.”
MAR 1:41 Jesus hanoin ema nee, nunee Nia lolo liman ba tau iha ema nee nia isin hodi dehan, “Hau hakarak. O diak ona ba!”
MAR 1:42 Derepenti ema nee nia moras lakon, i nia isin sai moos tiha.
MAR 1:43 Depois Jesus haruka nia baa ona, i hameno dehan,
MAR 1:44 “La bele konta sai buat nee ba ema seluk. Maibee baa aprezenta aan iha nai lulik, atu nia haree katak o nia isin moos ona. Depois foo oferta tuir lei Moisés nian, para ema hotu bele hatene katak o diak ona.”
MAR 1:45 Maibee ema nee baa foo sai lemo-lemo katak Jesus kura tiha ona nia moras. Nunee Jesus la bele hatudu Aan ona iha sidade laran. Nia baa hela tiha iha rai fuik. Maski nunee ema husi fatin nebee-nebee deit baa nafatin iha Jesus.
MAR 2:1 Liu tiha loron ida-rua, Jesus fila fali ba Kafarnaum. Ema rona katak Jesus mai fali ona.
MAR 2:2 Nunee ema nadodon mai sena malu metin iha uma laran, too iha odamatan oin mos, ema nakonu. Depois Jesus foo sai Maromak nia liafuan ba sira.
MAR 2:3 Jesus koalia dadauk, ema nain haat mai hulan mane ida liman-ain mate atu lori ba Jesus.
MAR 2:4 Maibee iha uma laran ema nakonu, too sira obriga atu tama mos, tama la diak. Entaun sira lori nia sae ba iha uma leten, i sira sobu uma kakuluk halo kuak hodi hatuun nia ho nia toba fatin, iha loos Jesus nia oin.
MAR 2:5 Bainhira Jesus haree sira nia fiar, Nia dehan ba ema isin mate nee, “Oan, o nia sala hamoos tiha ona.”
MAR 2:6 Iha mos mestri relijiaun balu tuur hela iha nebaa. Sira komesa hanoin dehan,
MAR 2:7 “Nusaa mak Nia koalia fali nunee? Nia hatete aat Maromak! So Maromak deit mak bele hamoos ema nia sala.”
MAR 2:8 Jesus hatene kedas sira nia hanoin, entaun Nia husu sira, “Nusaa mak imi hanoin nunee?
MAR 2:9 Se Hau dehan ba ema liman-ain mate nee katak, nia sala hamoos tiha ona, imi seidauk hatene, sai duni nunee ka lae. Maibee se Hau haruka nia hamriik ona hodi lori nia toba fatin i lao, imi bele haree ho matan.
MAR 2:10 Agora Hau sei hatudu mo-moos ba imi katak iha mundu nee Hau, Ema Umanu nia Oan iha kbiit hodi hamoos ema nia sala.” Nunee Jesus hatete ba ema liman-ain mate nee dehan,
MAR 2:11 “Hamriik ona! Foti o nia toba fatin hodi fila ba uma.”
MAR 2:12 Ema nee hamriik kedas, i foti nia toba fatin hodi lao sai ba liur. Ema hotu iha fatin nee haree, i sira admira hodi hahii Maromak dehan, “Ita foin mak haree buat ida hanesan nee.”
MAR 2:13 Hotu tiha Jesus sai ba iha tasi ibun Galileia, ema barak mai hasoru Nia, i Nia komesa hanorin sira.
MAR 2:14 Jesus lao dadauk, Nia haree kobrador impostu ida naran Levi, Alfeu nia oan tuur hela iha nia servisu fatin. Jesus dehan ba nia, “Mai tuir Hau!” Levi mos hamriik hodi tuir Jesus.
MAR 2:15 Depois Jesus ho Nia eskolante sira baa haan iha Levi nia uma, i kobrador impostu barak ho ema aat sira seluk mos haan hamutuk ho sira. Tanba ema hanesan nee, barak mak tuir Jesus.
MAR 2:16 Iha mestri relijiaun balu husi grupu Farizeu haree Jesus haan hamutuk ho kobrador impostu ho ema aat sira. Nunee sira husu ba Jesus nia eskolante sira, “Nusaa mak Nia haan hamutuk fali ho kobrador impostu ho ema aat sira nee?”
MAR 2:17 Bainhira Jesus rona sira nia liafuan nee, Nia dehan ba sira, “So ema moras mak presiza doutor, ema isin diak lae. Hau mai atu bolu ema aat sira, laos atu bolu ema nebee konsidera nia aan moris loos ona.”
MAR 2:18 Iha loron ida João Sarani Nain nia eskolante sira ho mos ema Farizeu sira halo jejun. Ema balu mai husu Jesus nunee: “Ema nebee tuir João Sarani Nain halo jejun. Ema Farizeu sira nia eskolante sira mos hanesan. Maibee tansaa mak Ita Boot nia eskolante sira la jejun?”
MAR 2:19 Jesus hataan ho komparasaun dehan, “Hau hanesan noivu ida nebee selebra nia festa kazamentu. Bainhira noivu sei hamutuk ho nia bainaka sira, sira bele jejun ka? La bele! Durante noivu iha hela sira nia klaran, sira la bele jejun.
MAR 2:20 Maibee too iha loron ida, ema sei lori lakon tiha noivu nee. Iha loron nee mak nia bainaka sira sei jejun.
MAR 2:21 La iha ema ida uza hena foun hodi taka fali ba hena bosan nebee kuak. Se lae, hena foun dada hamutuk sai kiik tiha too estraga fali hena bosan nee halo naklees liu tan.
MAR 2:22 Nunee mos ema halo tua, la tau iha tua fatin nebee halo husi animal nia kulit nebee tuan ona. Tanba tua foun sempre nafurin sae hodi halo kulit tuan nee nakfera tanba toos tiha ona. Nunee tua mos fakar sai. Tua foun, tenki tau iha tua fatin foun.”
MAR 2:23 Iha loron Sabadu ida, Jesus ho Nia eskolante sira lao liu husi ema nia toos. Sira lao dadauk, nia eskolante sira komesa korut trigu musan.
MAR 2:24 Haree nunee, ema husi grupu Farizeu hasee Jesus dehan, “Haree took. Sira servisu fali iha loron Sabadu. Ida nee kontra ita nia lei!”
MAR 2:25 Jesus hatete ba sira, “Imi lee tiha ona liurai David nia istoria. Nusaa mak imi la kompriende nafatin? Iha loron ida David ho nia ema sira hamlaha loos i presiza hahaan.
MAR 2:26 Nia tama ba tenda orasaun. Iha nebaa iha paun nebee nai lulik sira oferese ona ba Maromak. Tuir lo-loos, so nai lulik sira deit mak bele haan paun nee, ema seluk la bele. Maibee David foti tiha paun nee hodi haan, i nia fahe mos ba nia ema sira haan. Ida nee akontese iha nai lulik boot Abiatar nia tempu.”
MAR 2:27 Jesus hatutan tan dehan, “Maromak halo loron Sabadu atu ajuda ema, laos atu foo todan ba ema.
MAR 2:28 Nee duni Hau, Ema Umanu nia Oan mak loron Sabadu nia Nain. Hau mak iha direitu atu desidi, ema bele halo saida iha loron nee.”
MAR 3:1 Iha loron Sabadu ida, Jesus baa tama fali iha uma kreda. Iha nebaa iha mane ida nia liman sorin mate.
MAR 3:2 Ema Farizeu balu buka hela dalan atu foo sala ba Jesus. Entaun sira haree tu-tuir Nia atu kura ema nee iha loron sabadu ka lae.
MAR 3:3 Jesus bolu ema liman sorin mate nee hodi dehan, “Mai hamriik iha nee.”
MAR 3:4 Depois Nia husu ba ema sira nee, “Tuir ita nia lei relijiaun, ita bele halo saida iha loron Sabadu? Ita bele halo buat diak ka, aat? Ita bele salva ema ka, oho ema?” Maibee sira hotu nonook deit.
MAR 3:5 Jesus hateke ba sira ida-ida ho hirus. Nia mos laran susar teb-tebes tanba sira ulun toos. Depois Nia dehan ba ema liman sorin mate nee, “Lolo o nia liman mate nee mai!” Ema nee lolo ba, i nia liman diak kedas.
MAR 3:6 Haree nunee, ema Farizeu sira sai tiha husi uma kreda. I sira komesa kombina malu ho partidu Herodes nia membru sira, oinsaa mak bele oho Jesus.
MAR 3:7 Hotu tiha Jesus ho Nia eskolante sira husik tiha fatin nee hodi baa fali tasi Galileia, i ema barak lao tuir sira. Ema sira nee mai husi provinsia Galileia
MAR 3:8 ho Judeia. Iha balu mai husi sidade Jerusalém, husi Idumeia, husi mota Jordaun nia sorin ba, ho mos husi sidade Tiru ho Sidon. Ema sira nee mai tanba sira rona kona ba buat hotu nebee Jesus halo.
MAR 3:9 Tanba ema barak tebes, entaun Jesus haruka Nia eskolante sira prepara roo ida atu Nia bele tuur iha laran para ema lubun boot nee la bele sena malu ho nia.
MAR 3:10 Nia kura tiha ona ema moras barak, nee mak ema moras sira seluk mai hadau malu atu kona Nia.
MAR 3:11 Iha ema balu espiritu aat tama iha sira nia laran. Bainhira sira haree Jesus, ema sira nee monu ba rai hodi hakilar dehan, “O nee Maromak nia Oan!”
MAR 3:12 Maibee Jesus bandu makaas atu la bele foo sai katak Nia nee see.
MAR 3:13 Iha loron ida Jesus sae ba foho ida. Iha nebaa Nia bolu ema balu hakbesik ba Nia, i sira mos baa.
MAR 3:14 Depois Nia hili nain sanulu resin rua sai Nia apostolu. Nia foti sira atu sira akompanha Nia, i atu haruka sira baa foo sai Liafuan Diak.
MAR 3:15 Nia mos foo kbiit ba sira atu bele duni sai diabu husi ema.
MAR 3:16 Sira nain sanulu resin rua nebee Nia hili nee, sira nia naran mak hanesan tuir mai nee: Simão (Jesus mos bolu nia Pedro),
MAR 3:17 Tiago ho João (sira nain rua Zebedeu nia oan. Jesus bolu sira Boanerjes, nee katak “hanesan rai tarutu”),
MAR 3:18 André, Filipe, Bartolomeu, Mateus, Tomé, Tiago (Alfeu nia oan), Tadeu, Simão (nia ema Patriota),
MAR 3:19 ho Judas Iscariotes (ikus mai nia mak faan Jesus).
MAR 3:20 Hotu tiha Jesus tuun fali husi foho hodi baa tama iha uma ida. Ema barak mai hobur hamutuk iha fatin nee, too Jesus ho Nia eskolante sira atu haan mos la bele.
MAR 3:21 Bainhira Nia familia sira rona nunee, sira mai atu lori Nia sai tiha, tanba ema dehan, “Nia bulak tiha ona!”
MAR 3:22 Iha mestri relijiaun balu mai husi Jerusalém, sira dehan, “Diabu nia xefi Belzebu tama ona Nia laran. Belzebu nee mak foo kbiit ba Nia hodi duni sai diabu.”
MAR 3:23 Rona nunee, Jesus bolu ema sira nee mai hodi hatete ba sira uza komparasaun dehan, “Oinsaa mak Satanás bele duni sai Satanás?
MAR 3:24 Se iha nasaun ida, nia povu haan malu hela deit, nasaun nee sei monu.
MAR 3:25 Se iha uma kain ida, nia ema sira istori malu hela deit, sira sei naksobu.
MAR 3:26 Se Satanás kontra nia aan rasik, i diabu sira haan malu hela deit, entaun Satanás la bele hamriik metin, i nia ukun sei la dura.
MAR 3:27 Hau foo ezemplu tan. Se ema ida hakarak tama baa foti sasaan husi ema forti ida nia uma, nia tenki futu metin tiha ema forti nee uluk mak foin bele lalin sasaan sai husi nia uma.
MAR 3:28 Hau hatete lo-loos ba imi, sala saida deit mak ema halo, Maromak foo perdaun, too ema hatete aat Maromak mos Maromak sei foo perdaun.
MAR 3:29 Maibee see mak hatete aat Espiritu Santu, Maromak sei la foo perdaun ba nia. Ema nee sei lori nia sala nee too tinan ba tinan.”
MAR 3:30 Jesus hatete nunee tanba sira dehan, “Ema nee, espiritu aat tama tiha ona Nia laran.”
MAR 3:31 Depois Jesus nia inan ho Nia alin mane sira too mai. Sira hamriik iha liur hodi haruka ema tama baa bolu Nia.
MAR 3:32 Iha uma laran, ema barak tuur haleu hela Jesus, sira dehan ba Nia, “Ita Boot nia inan ho alin sira iha liur hela, sira husu atu hasoru malu ho Ita Boot.”
MAR 3:33 Jesus hataan, “Hau nia inan mak see? I Hau nia alin sira mak see?”
MAR 3:34 Depois Nia hateke ba ema nebee tuur haleu Nia nee hodi dehan, “Imi sira nee mak Hau nia inan ho Hau nia alin sira.
MAR 3:35 See mak halo tuir Maromak nia hakarak, sira nee mak Hau nia inan, Hau nia feton ho Hau nia alin mane sira.”
MAR 4:1 Iha loron ida Jesus komesa hanorin iha tasi ibun Galileia. Ema barak teb-tebes mai haleu Nia, nunee Nia baa tuur iha roo ida nebee para hela iha tasi ninin, i ema barak nee hamriik deit iha tasi ibun.
MAR 4:2 Nia hanorin buat barak uza komparasaun. Nia dehan nunee:
MAR 4:3 “Rona mai! Iha toos nain ida baa kari fini iha nia toos.
MAR 4:4 Bainhira nia kari fini nee, balu monu iha dalan. I manu fuik mai haan tiha hotu.
MAR 4:5 Fini balu monu iha fatuk leten, fini nee moris lalais deit tanba rai mihis.
MAR 4:6 Bainhira loro matan sae, loro manas sunu fini nebee foin moris sai mai nee too namlaik tiha, tanba abut la tama iha rai okos.
MAR 4:7 Fini balu monu iha duut tarak laran. Fini nee moris, maibee duut tarak habit tiha too la foo isin.
MAR 4:8 Iha tan fini balu monu iha rai bokur. Fini nee moris diak, buras, too foo isin barak, balu too musan tolu-nulu, balu too musan neen-nulu i balu too musan atus ida.”
MAR 4:9 Jesus hatutan tan dehan, “Imi nebee iha tilun, rona di-diak ba!”
MAR 4:10 Bainhira Jesus mesak ho Nia eskolante sanulu resin rua ho ema balu tan nebee baibain tuir Nia, sira husu ba Nia kona ba komparasaun hirak nee.
MAR 4:11 Jesus dehan ba sira, “Uluk ema seidauk hatene, oinsaa mak Maromak ukun nudar Liurai. Agora Hau foo sai mo-moos ba imi deit, maibee ba ema seluk Hau sempre uza komparasaun,
MAR 4:12 atu nunee ‘Sira haree duni, maibee la kompriende saida mak sira haree. Sira rona hela, maibee la kompriende saida mak sira rona. Nunee sira la bele fila fali ba Maromak atu Nia hamoos sira nia sala.’ ”
MAR 4:13 Depois Jesus dehan tan, “Imi la kompriende komparasaun nee ka? Se imi la kompriende ida nee, entaun komparasaun sira seluk imi atu kompriende oinsaa?
MAR 4:14 Komparasaun nee nunee: Toos nain nebee kari fini nee mak ema nebee foo sai Maromak nia liafuan.
MAR 4:15 Fini nebee monu iha dalan mak ema nebee rona Maromak nia liafuan. Rona hotu tiha, Satanás mai hadau kedas liafuan nebee iha tiha ona sira nia laran.
MAR 4:16 Fini nebee monu iha fatuk leten mak ema nebee rona Maromak nia liafuan, i simu kedas ho laran haksolok.
MAR 4:17 Maibee liafuan nee la iha abut. Nunee sira fiar duni maibee la kleur ida. Depois susar kona sira, ka ema seluk halo terus sira tanba sira simu liafuan nee, sira husik tiha kedas.
MAR 4:18 Fini nebee monu iha duut tarak laran mak ema nebee rona Maromak nia liafuan,
MAR 4:19 maibee sira preokupa ho sira nia moris loro-loron nian, sira nia matan naklosu ba riku-soin mundu nian, i sira nia laran nakonu ho hakarak oi-oin deit. Sira nia preokupasaun nee la foo fatin ba Maromak nia liafuan, nunee liafuan nee la muda sira nia moris.
MAR 4:20 Maibee fini nebee monu iha rai bokur mak ema nebee rona Maromak nia liafuan hodi simu. Depois sira moris tuir, hanesan fini nebee moris too foo isin, balu musan tolu-nulu, balu musan neen-nulu, i balu too musan atus ida.”
MAR 4:21 Jesus foo tan komparasaun ida nunee: “Bainhira ema sunu ahi-oan, sira taka tiha ho sanan ka tau fali iha kama okos ka? Lae! Ahi-oan tenki tau iha fatin aas.
MAR 4:22 Nunee mos, buat hotu-hotu nebee agora sei subar hela, iha loron ida sei hatudu mo-moos. I buat hotu-hotu nebee agora taka hela, iha loron ida sei nakloke para ema bele hatene.
MAR 4:23 See mak iha tilun, rona di-diak ba!”
MAR 4:24 Depois Jesus hatutan tan dehan, “Hanoin di-diak buat nebee mak imi rona. Se imi hakaas aan hodi kompriende Hau nia liafuan, Maromak sei tulun imi atu kompriende tuir imi nia esforsu nee. Laos nee deit, maibee Maromak sei foo liu fali imi nia esforsu.
MAR 4:25 Tanba ema nebee kompriende ona, Maromak sei halo nia kompriende liu tan. Maibee ema nebee lakohi hatene, buat uitoan nebee nia kompriende tiha ona mos, Maromak sei hasai tiha husi nia hanoin.”
MAR 4:26 Jesus halo tan komparasaun dehan, “Maromak ukun nudar Liurai, nee hanesan toos nain kuda fini iha nia toos laran.
MAR 4:27 Kalan nia deskansa loron nia hadeer fali. Tempu lao dadauk, fini nee moris too buras ba beibeik, maibee toos nain la kompriende oinsaa mak fini nee bele buras hanesan nee.
MAR 4:28 Rai nee rasik mak halo moris, primeiru iha kain, depois iha funan mak foin iha isin.
MAR 4:29 Bainhira tasak ona, toos nain mai silu tanba tempu ona.”
MAR 4:30 Jesus dehan tan, “Maromak ukun Nia reinu, oinsaa loos? Hau atu halo komparasaun ho saida?
MAR 4:31 Nee hanesan ai musan kiikoan loos nebee mak ema kuda iha toos. Maski ai musan nee kiik liu musan sira seluk iha mundu nee,
MAR 4:32 maibee nia moris i buras too sai ai huun ida nebee mak boot liu iha toos laran, nia sanak mos boot. Nunee manu fuik sira bele mai hamahon aan hodi halo knuuk iha nebaa.”
MAR 4:33 Jesus uza beibeik komparasaun hanesan nee hodi hanorin Maromak nia liafuan ba ema lubun boot. Nia hanorin tuir saida mak sira bele kompriende.
MAR 4:34 Nia sempre hanorin sira uza komparasaun. Maibee bainhira Nia ho Nia eskolante sira mesak ona, Nia esplika mo-moos ba sira.
MAR 4:35 Iha loron nee, loro matan besik monu ona, Jesus hatete ba Nia eskolante sira, “Mai ita baa iha tasi sorin.”
MAR 4:36 Nunee sira husik hela ema barak nee hodi lao, sira sae roo nebee mak ohin Jesus tuur hodi hanorin nee. Iha mos roo seluk tuir sira.
MAR 4:37 Jesus tau ulun iha sumasu hodi toba dukur iha roo nia kotuk. La kleur anin boot mosu. I laloran baku roo nee halo tasi been tama ba roo laran too bee besik nakonu. Haree nunee, Jesus nia eskolante sira fanu Nia hodi dehan, “Mestri, Ita atu mate ona! Mestri la interese ka?”
MAR 4:39 Jesus hadeer hodi siak anin i hatete ba laloran nunee: “Para ona! Hakmatek ba!” Anin para kedas, tasi mos hakmatek liu.
MAR 4:40 Depois Jesus hatete ba sira, “Nusaa mak imi tauk hanesan nee?! Imi la fiar Hau ka?”
MAR 4:41 Nia eskolante sira tauk teb-tebes hodi dehan ba malu, “Ema nee see loos mak too anin ho laloran mos rona Nia?”
MAR 5:1 Jesus ho Nia eskolante sira ho roo too rai Gerasa, iha tasi Galileia nia sorin ba.
MAR 5:2 Iha nebaa iha mane ida, espiritu aat tama iha nia laran. Bainhira Jesus tuun husi roo, ema nee lao sai mai husi rate atu hasoru Nia.
MAR 5:3 Ema nee hela deit iha rate, i la iha tan ema ida mak bele kesi nia, maski ho korenti besi mos la bele.
MAR 5:4 Dala barak ona ema kesi nia liman-ain ho korenti besi, maibee nia sempre rasta kotu tiha korenti iha nia liman, i korenti iha nia ain mos nia halo rahun hotu. Nia forti liu, too la iha ema ida bele kaer metin.
MAR 5:5 Loron-kalan nia lao ba-mai iha rate leet ho mos lao tuun-sae foho hodi hakilar beibeik i tuku kanek nia aan ho fatuk.
MAR 5:6 Bainhira ema nee haree Jesus husi dook, nia halai ba iha Jesus hodi hakruuk too rai iha Jesus nia oin.
MAR 5:7 Jesus haruka espiritu aat nee dehan “Espiritu aat, sai husi ema nee!” Ema nee hakilar ho lian makaas dehan, “Jesus, Maromak Aas Liu nia Oan, O hakarak halo saida mai hau? Hau husu O atu jura hodi Maromak nia naran katak O sei la kastigu hau.”
MAR 5:9 Jesus husu ba nia, “O naran saa?” Ema nee hataan, “Hau nia naran Batalhaun, tanba ami barak.”
MAR 5:10 Depois nia husu beibeik ba Jesus atu la bele duni sai espiritu aat sira nee sai husi rai nee.
MAR 5:11 Iha momentu nebaa, iha fahi barak teb-tebes haan hela iha foho lolon, la dook husi fatin nee.
MAR 5:12 Espiritu aat sira husu fila-fila ba Jesus dehan, “Haruka ami baa tama iha fahi sira nebaa.”
MAR 5:13 Jesus mos foo lisensa. Entaun espiritu aat sira sai husi ema nee baa tama fali iha fahi sira. I fahi sira nee halai saruntu malu tuun husi foho lolon nee hodi monu hotu ba tasi laran. Nunee fahi sira nee mout too mate hotu. Fahi nebee mate nee hamutuk maizoumenus rihun rua.
MAR 5:14 Hotu tiha fahi atan sira halai baa konta sai iha sidade ho fatin sira nebee besik. I ema barak mai atu haree saida mak akontese tiha ona.
MAR 5:15 Too iha nebaa, sira haree ema nebee uluk espiritu aat batalhaun ida hela iha nia laran nee, diak tiha ona. Nia tuur hakmatek hela, hatais tiha ona hena, i hanoin normal fali ona. Haree nunee, sira hotu tauk.
MAR 5:16 Ema sira nebee ohin haree Jesus duni sai diabu nee, sira konta ba sira nebee foin mai, kona ba oinsaa mak Jesus kura ema nee, i saida mak akontese ba fahi sira nee.
MAR 5:17 Depois ema iha rai nee husu fila-fila atu Jesus sai tiha husi sira nia rain.
MAR 5:18 Bainhira Jesus atu sae fali ba roo laran, ema nebee ohin espiritu aat sai husi nia nee, husu atu bele baa hamutuk ho Jesus.
MAR 5:19 Maibee Jesus lakohi. Nia dehan, “Diak liu o fila ba o nia maluk sira hodi konta saida mak Nai Maromak halo ona ba o, i oinsaa Nai Maromak hatudu Nia laran luak ba o.”
MAR 5:20 Entaun ema nee baa lao lemo-lemo iha rai Dekápolis hodi konta sai kona ba buat hotu nebee Jesus halo ba nia. Ema nebee rona, sira hotu admira.
MAR 5:21 Jesus ho roo fila fali ba tasi sorin. Nia foin too iha tasi ninin, ema barak teb-tebes mai hobur Nia.
MAR 5:22 Iha ema ida naran Jairo, nia responsavel ida iha uma kreda iha sidade nee, nia mos mai. Bainhira nia haree Jesus, nia hakruuk too rai iha Jesus nia oin
MAR 5:23 hodi husu tulun dehan, “Hau nia oan feto besik atu mate. Hau husu atu Ita Boot baa tau liman ba labarik nee para nia bele diak fali i bele moris.”
MAR 5:24 Nunee Jesus baa ho Jairo. Sira lao dadauk, ema barak lao tuir Jesus too sena malu kona Nia.
MAR 5:25 Iha ema lubun boot nee, iha feto ida, nia fulan mai la para durante tinan sanulu resin rua.
MAR 5:26 Nia gasta tiha ona nia riku-soin hotu hodi baa konsulta iha doutor, maibee doutor sira la bele kura nia moras. Tratamentu nebee sira foo nee halo nia terus liu, i nia moras aumenta tan deit.
MAR 5:27 Feto nee rona ona kona ba Jesus. Nunee nia sena malu husi ema barak nia leet hodi baa bes-besik iha Jesus nia kotuk, nia kona Jesus nia hena.
MAR 5:28 Tanba nia hanoin nunee: “Naran katak hau kona kois deit Nia hena mos, hau nia moras sei diak.”
MAR 5:29 Nia foin kona Jesus nia hena, nia raan para kedas, i nia senti nia moras nee diak fali ona.
MAR 5:30 Iha momentu nee kedas Jesus senti iha kbiit sai husi Nia. Nunee Nia hateke ba kotuk hodi haree ba ema barak nee, i Nia husu, “See mak ohin kona Hau nia hena nee?”
MAR 5:31 Nia eskolante sira hataan, “Ita Boot rasik haree deit ba, iha ema barak mak sena malu kona Ita Boot. Halo nusaa mak Ita Boot husu fali, ‘See mak ohin kona Hau nia hena?!’”
MAR 5:32 Maibee Jesus haree ba-mai atu buka hatene see loos mak ohin kona Nia hena nee.
MAR 5:33 Feto nebee ohin kona Jesus nia hena nee, tauk teb-tebes ho nakdedar, tanba nia hatene saida mak ohin akontese ba nia. Nunee nia baa hakneak hakruuk too rai iha Jesus nia ain hodi konta sai hotu.
MAR 5:34 Depois Jesus dehan, “Hau nia oan, o hetan kura tanba o fiar mai Hau. O nia moras nee kura hotu tiha ona. Fila ho laran hakmatek.”
MAR 5:35 Jesus sei koalia hela, ema balu mai husi Jairo nia uma foo hatene ba Jairo dehan, “Senhor nia oan iis kotu tiha ona. Ita halo kole tan mestri hodi halo saida?”
MAR 5:36 Rona nunee Jesus hatete ba Jairo, “Lalika tauk. Fiar deit.”
MAR 5:37 Jesus lori deit Pedro, Tiago ho Tiago nia alin João hodi akompanha Jairo. Ema sira seluk Nia bandu la bele tuir.
MAR 5:38 Bainhira sira too iha Jairo nia uma, Jesus haree ema barak rungu-ranga, i ema tanis lelir.
MAR 5:39 Jesus tama ba iha uma laran. Depois Nia dehan ba sira, “Nusaa mak imi rungu-ranga hodi tanis lelir hanesan nee? Labarik nee la mate ida, nia toba deit.”
MAR 5:40 Maibee sira hamnasa fali Nia. Jesus haruka sira hotu sai. Depois Nia bolu labarik nee nia inan-aman ho Nia eskolante nain tolu nee, para sira tama hamutuk iha labarik nee nia kuartu laran.
MAR 5:41 Depois Jesus kaer labarik nee nia liman hodi dehan ba nia, “Talita kum!” Nee dehan katak, “Noi, Hau haruka o hadeer ona!”
MAR 5:42 Derepenti deit labarik feto nee hadeer, i lao kedas. Haree nunee, sira hotu admira teb-tebes. Labarik nee tinan sanulu resin rua.
MAR 5:43 Jesus bandu sira la bele konta sai ba ema seluk. I nia haruka sira foo hahaan ba labarik nee.
MAR 6:1 Jesus husik tiha fatin nee hodi baa fali iha Nia aldeia rasik, i Nia eskolante sira mos baa hotu.
MAR 6:2 Too ona loron Sabadu, Jesus tama ba iha uma kreda hodi hanorin. Ema nebee rona, barak mak admira hodi husu ba malu, “Ema nee hetan buat sira nee husi nebee? Oinsaa mak Nia bele hetan matenek hanesan nee? Nia kbiit mai husi nebee mak Nia bele halo milagre?
MAR 6:3 Ita hatene hela Nia. Nia nee badaen ai ida. Nia inan mak Maria, i nia alin sira Tiago, José, Judas ho Simão. Nia alin feto sira mos hela iha nee.” Nunee sira laran moras too lakohi simu Nia.
MAR 6:4 Jesus hatete ba sira, “Ema iha nebee-nebee deit respeita Maromak nia profeta. So ema husi nia aldeia rasik ho nia maluk rasik ho nia familia rasik mak la respeita nia.”
MAR 6:5 Ema sira nee lakohi fiar ba Jesus. Nee mak Nia la bele halo milagre barak iha sira nia leet, Nia so tau liman ba ema moras balu deit hodi kura sira. Nia hakfodak tanba ema iha nebaa la fiar ba Nia.
MAR 6:6b Hotu tiha Jesus lao husi aldeia ida ba aldeia seluk hodi hanorin Maromak nia liafuan.
MAR 6:7 Nia bolu Nia eskolante nain sanulu resin rua i haruka sira lao ru-rua hodi foo kbiit ba sira atu duni sai espiritu aat.
MAR 6:8 Nia haruka sira nunee: “Bainhira imi lao, lori ai tonka. La bele lori pasta, bukae ka osan iha bolsu.
MAR 6:9 Tau sandalias, maibee keta lori hena hodi troka.”
MAR 6:10 Nia hatutan tan, “Kuandu ema simu imi iha sira nia uma, hela deit iha uma nee too imi sai fali husi aldeia nee.
MAR 6:11 Se imi baa too iha fatin ida mak ema la simu imi ka la rona imi nia liafuan, husik tiha fatin nee, i hisik rai rahun husi imi nia ain okos nudar sinal katak sira rasik mak sei lori todan.”
MAR 6:12 Nunee eskolante sira lao ba iha fat-fatin hodi foo sai katak ema tenki hakribi sira nia sala.
MAR 6:13 Sira duni sai diabu barak husi ema, i kose mina ba ema moras barak hodi kura sira.
MAR 6:14 Iha tempu nee, ema barak temi ona Jesus nia naran. Liurai Herodes mos rona kona ba saida mak Jesus halo. Balu dehan, “Ema nee João Sarani Nain mak moris fali ona husi mate. Nee mak Nia iha kbiit hodi halo milagre.”
MAR 6:15 Balu tan dehan, “Nia nee profeta Elias.” Seluk tan dehan, “Nia nee Maromak nia profeta ida, hanesan mos profeta sira iha tempu antigu.”
MAR 6:16 Rona nunee Herodes dehan, “João ida hau tesi nia kakorok nee mak moris fali ona husi mate.”
MAR 6:17 João Sarani Nain ho Herodes nia istoria nunee: Uluk Herodes hola fali nia alin Filipe nia kaben, naran Herodias. Iha tempu nebaa João hasee nia fila-fila dehan, “Ita la bele hola fali ita nia alin nia kaben, hahalok nee kontra Maromak nia lei!” Tanba nee, Herodes haruka ema kaer João i futu nia hodi hatama ba iha komarka.
MAR 6:19 Nunee Herodias rai odi ba João, i hakarak atu oho. Maibee nia la bele oho,
MAR 6:20 tanba Herodes respeita João i defende nia. Herodes hatene katak João nee ema ida nebee moris loos, i Maromak mak haruka nia mai. Bainhira Herodes rona João koalia, nia laran la hakmatek. Maski nunee, nia gosta rona.
MAR 6:21 Too ikus Herodias hetan oportunidade atu halakon João, iha tempu nebee Herodes halo tinan. Iha loron nee nia halo festa boot. Nia konvida nia funsionariu bo-boot, komandante militar ho mos ema boot sira iha Galileia laran.
MAR 6:22 Festa too klaran ona, Herodias nia oan feto tama mai dansa iha bainaka sira nia oin. Menina nee nia dansa halo Herodes ho bainaka sira nia laran kontenti teb-tebes. Liurai Herodes hatete ba menina nee, “O hakarak husu saida deit, husu ba! Hau sei foo.”
MAR 6:23 Nia jura ba menina nee dehan, “Saida deit mak o husu mai hau, hau sei foo ba o. Se o hakarak ukun hau nia rai sorin balu mos hau sei foo ba o.”
MAR 6:24 Menina nee sai baa husu nia inan nunee, “Hau husu saida mak diak?” Nia inan hataan, “O baa husu João Sarani Nain nia ulun.”
MAR 6:25 Menina nee halai kedas ba iha liurai Herodes hodi husu, “Hau hakarak João Sarani Nain nia ulun, tau iha bandeja ida, entrega kedas mai hau.”
MAR 6:26 Liurai laran susar teb-tebes. Maibee nia jura tiha ona iha bainaka sira nia oin, entaun nia tenki halo tuir.
MAR 6:27 Nia haruka kedas nia soldadu ida baa hasai João nia ulun atu lori mai. Soldadu nee mos baa iha komarka hodi tesi João nia kakorok,
MAR 6:28 i tau nia ulun iha bandeja lori baa foo ba menina nee. Depois menina nee lori baa foo ba nia inan.
MAR 6:29 Bainhira João nia eskolante sira rona dehan ema oho tiha João, sira baa lori sai João nia mate isin baa haloot iha rate.
MAR 6:30 Iha loron ida, Jesus nia apostolu sira nebee uluk Nia haruka baa nee, sira fila fali mai hamutuk ho Nia. Sira konta ba Nia buat hotu-hotu nebee mak sira halo ona, ho buat nebee mak sira hanorin ona.
MAR 6:31 Iha tempu nee ema barak lao ba lao mai, halo Jesus ho Nia eskolante sira haan mos la bele. Entaun Jesus hatete ba Nia eskolante sira, “Mai ita baa iha fatin ida hakmatek hodi deskansa.”
MAR 6:32 Nunee Jesus ho Nia eskolante sira sae roo hodi baa iha rai fuik ida.
MAR 6:33 Maibee ema barak haree hela roo nee lao, i hatene see mak iha laran. Nunee ema husi aldeia hotu-hotu halai liu husi tasi ibun. I ema sira nee mak too uluk.
MAR 6:34 Bainhira Jesus tuun husi roo, i haree ema barak nee, Nia hanoin loos sira, tanba sira hanesan bibi malae nebee la iha bibi atan atu hatudu dalan ba sira. Entaun Nia komesa hanorin sira buat barak.
MAR 6:35 Bainhira lokraik ona, Jesus nia eskolante sira mai hatete ba Nia dehan, “Iha nee rai fuik, rai mos atu kalan ona.
MAR 6:36 Diak liu haruka ema sira nee baa iha aldeia sira nebee besik hodi sosa hahaan rasik.”
MAR 6:37 Maibee Jesus hataan, “Imi mak foo hahaan ba sira.” Nia eskolante sira hataan fali, “Ami mak atu hola hahaan ba sira hotu ka? Se nunee ita tenki gasta osan barak teb-tebes, hanesan ema badaen nia salariu fulan walu nian!”
MAR 6:38 Jesus husu, “Imi iha paun fuan hira? Baa haree took!” Nunee sira baa buka hatene, depois sira mai fali dehan, “Iha paun fuan lima ho ikan rua.”
MAR 6:39 Jesus haruka Nia eskolante sira baa foo hatene ema barak nee tuur tuir grupu iha duut matak leten.
MAR 6:40 Entaun sira tuur tuir grupu, grupu balu ema atus ida, balu lima-nulu.
MAR 6:41 Nia foti paun fuan lima ho ikan rua nee, i hateke ba lalehan hodi foo agradese ba Maromak. Nia silu paun halo rohan-rohan, i foo ba Nia eskolante sira. Depois Nia eskolante sira hodi baa fahe ba ema lubun boot nee. Ikan rua mos Nia halo pedasuk-pedasuk, depois fahe ba sira.
MAR 6:42 Sira hotu haan too bosu,
MAR 6:43 hahaan mos resin. Nia eskolante sira tau hamutuk hahaan restu sira nee iha bote sanulu resin rua nakonu.
MAR 6:44 Ema nebee haan nee rihun lima. Nee foin sura mane deit, feto ho labarik la sura.
MAR 6:45 Hotu tiha, Jesus haruka kedas Nia eskolante sira sae roo hodi baa uluk iha aldeia Betsaida iha tasi sorin. Maibee Nia sei hela iha nebaa atu haruka ema lubun boot nee fila.
MAR 6:46 Depois Jesus mesak sae ba foho ida hodi halo orasaun.
MAR 6:47 Rai kalan ona, roo nebee mak eskolante sira sae nee too tiha ona tasi klaran, i Jesus mesak iha rai maran.
MAR 6:48 Nia haree Nia eskolante sira hean roo makaas teb-tebes maibee roo la lao ba oin tanba halai hasoru anin boot. Iha dadeer-saan nakukun, Jesus lao iha bee leten ba iha Nia eskolante sira. Nia atu lao liu ona,
MAR 6:49 maibee bainhira Nia eskolante sira haree Nia lao iha bee leten, sira hanoin dehan mate klamar. Nunee sira hakilar
MAR 6:50 tanba sira hotu haree Nia i sira tauk teb-tebes. Jesus hatete kedas ba sira, “Brani ba! Nee Hau. La bele tauk!”
MAR 6:51 Depois Nia tama iha roo laran hamutuk ho sira, i anin mos para kedas. Eskolante sira hakfodak loos.
MAR 6:52 Maski Jesus halo milagre hodi foo haan ema rihun lima resin, maibee eskolante sira la kompriende nafatin kona ba Jesus nia kbiit, tanba sira nia ulun toos.
MAR 6:53 Bainhira Jesus ho Nia eskolante sira too iha tasi sorin, iha rai Genesaré, sira kesi sira nia roo iha nebaa.
MAR 6:54 Sira foin tuun husi roo, ema barak konhese kedas Jesus.
MAR 6:55 Nunee ema sira nee halai baa foo hatene ema iha rejiaun nee tomak. Ema rona dehan Jesus iha nebee, sira hulan moras sira ba iha nebaa.
MAR 6:56 Jesus baa iha aldeia ida ka sidade ka rejiaun nebee deit, ema lori sira nia maluk nebee mak moras hodi tau iha fatin publiku. Sira husu ba Jesus atu ema moras sira nee bele kona deit Nia hena rohan. Ema moras sira nebee konsege kona Nia hena rohan, sira hetan kura hotu.
MAR 7:1 Iha loron ida ema balu husi grupu Farizeu ho mestri relijiaun balu mai husi Jerusalém atu hasoru malu ho Jesus.
MAR 7:2 Sira haree Jesus nia eskolante balu haan la fase liman tuir bei-ala sira nia kostumi.
MAR 7:3 Ema Judeu hotu-hotu, liu-liu sira husi grupu Farizeu, kaer metin sira nia bei-ala nia kostumi oinsaa fase liman molok haan.
MAR 7:4 Bainhira fila husi merkadu, antes atu haan sira tenki fase liman tuir sira nia lisan. Iha tan regra seluk mak sira halo tuir, hanesan fase kopu, buli ho mos sanan.
MAR 7:5 Entaun ema Farizeu sira ho mestri relijiaun sira husu Jesus dehan, “Tansaa mak Ita Boot nia eskolante sira la moris tuir ita nia bei-ala sira nia lisan? Nusaa mak sira haan la fase liman?”
MAR 7:6 Jesus hataan, “Imi koalia oin seluk, hahalok oin seluk! Buat nebee hori uluk kedas profeta Isaias hakerek, kona loos imi. Nia foo tutan Maromak nia liafuan nunee: ‘Ema sira nee hahii Hau ho ibun tutun, maibee sira nia laran dook husi Hau.
MAR 7:7 Sira adora Hau maibee la iha folin. Sira hanorin deit lei ema nian, maibee bosok fali dehan, sira nia hanorin nee mai husi Hau.’
MAR 7:8 Imi husik tiha ona Maromak nia ukun fuan hodi kaer metin fali lisan nebee mai husi ema.”
MAR 7:9 Nia hatutan tan dehan, “Imi fasil loos tau Maromak nia ukun fuan iha imi nia kotuk para imi bele halo tuir imi nia lisan rasik.
MAR 7:10 Tanba Moisés dehan, ‘Respeita o nia inan-aman.’ Nia mos dehan, ‘See mak koalia liafuan aat hasoru nia inan-aman, ema nee sei hetan kastigu mate.’
MAR 7:11 Maibee imi hanorin oin seluk fali. Tuir imi, ema bele hatete ba nia inan-aman dehan, ‘Sasaan nebee apaa ho amaa presiza, hau la bele foo, tanba hau promete ona atu foo ba Maromak.’
MAR 7:12 Nunee imi bandu ema atu la bele ajuda sira nia inan-aman ona.
MAR 7:13 Liu husi lisan nebee mak imi hanorin nee, imi halakon tiha Maromak nia lei. Iha buat barak mak imi halo hanesan nee.”
MAR 7:14 Depois Jesus bolu tan ema hotu iha nebaa atu mai besik. Nia dehan ba sira, “Imi hotu-hotu rona mai, i kompriende di-diak Hau nia liafuan nee.
MAR 7:15 Buat nebee mak tama ba ema nia laran, nee la halo foer nia iha Maromak nia oin. Maibee buat nebee mak sai husi ema nia laran, nee mak halo foer nia.
MAR 7:16 [See mak iha tilun, rona di-diak ba!]”
MAR 7:17 Hanorin hotu tiha Jesus husik ema barak nee hodi tama ba iha uma ida. Depois Nia eskolante sira husu kona ba komparasaun nebee ohin Nia koalia nee.
MAR 7:18 Jesus hataan ba sira, “Entaun imi la kompriende nafatin ka? Imi hatene katak, buat nebee tama iha ema nia isin liu husi nia ibun nee la halo foer nia.
MAR 7:19 Tanba buat nebee ema haan, laos tama ba iha nia fuan laran, maibee hahaan nee tama ba iha nia kabun laran, depois sai fali.” Ho nunee Jesus hatete katak, hahaan saida deit ema bele haan, la bandu ida.
MAR 7:20 Jesus hatutan tan dehan, “Saida mak sai husi ema nia laran, ida nee mak halo foer nia.
MAR 7:21 Tanba hanoin aat nebee mosu husi ema nia laran mak lori nia ba halo sala ho ema nia feen ka laen, halo sala seksual sel-seluk, naok, oho ema, kaan ema nia sasaan, halo buat aat, han-matak ema nia sasaan, la hatene moe, laran moras ema, hatete aat ema seluk, foti aan, i ulun toos.
MAR 7:23 Hahalok sira nee hotu sai husi ema nia laran, nee mak halo ema foer iha Maromak nia oin.”
MAR 7:24 Hotu tiha Jesus sai husi fatin nee hodi baa iha rai ida besik sidade Tiru. Iha nebaa Nia tama iha uma ida. Nia lakohi atu ema seluk hatene katak Nia iha fatin nee, maibee Nia atu subar Aan la diak.
MAR 7:25 Iha fatin nee iha senhora ida, nia oan feto espiritu aat tama iha laran. Bainhira senhora nee rona katak Jesus iha hela fatin nee, nia mai kedas hakneak hakruuk too rai iha Jesus nia oin.
MAR 7:26 Senhora nee ema jentiu ida, laos Judeu, nia moris iha rai Fenísia iha provinsia Síria. Nia husu fila-fila ba Jesus atu duni sai espiritu aat husi nia oan.
MAR 7:27 Jesus soe lia dehan, “Husik labarik sira haan lai too bosu mak foin foo restu ba asu. La bele foti labarik nia hahaan hodi soe fali ba asu. Nee la loos.”
MAR 7:28 Maibee senhora nee hataan fali dehan, “Loos duni Nai, maibee asu iha meza okos bele hili labarik nia hahaan nebee mak monu iha rai.”
MAR 7:29 Jesus dehan, “Ita boot hataan ho diak. Entaun bele fila ona ba uma. Diabu sai tiha ona husi ita boot nia oan feto.”
MAR 7:30 Senhora nee fila ba uma, nia haree nia oan toba hela, diabu sai tiha ona husi nia.
MAR 7:31 Hotu tiha Jesus sai husi rejiaun Tiru baa fali iha Sidon. Depois Nia baa iha tasi Galileia hodi tama ba iha rai Dekápolis.
MAR 7:32 Iha nebaa ema balu mai lori sira nia maluk ida nebee tilun diuk i koalia la moos. Sira lori nia ba iha Jesus hodi husu fila-fila atu Jesus tau liman ba nia.
MAR 7:33 Jesus lori ema nee sees husi ema barak nia klaran. Nia hatama Nia liman fuan ba iha ema nee nia tilun. Depois Nia tafui kabeen ba iha Nia liman hodi tau ba ema nee nia nanaal.
MAR 7:34 Hotu tiha Nia hateke sae ba lalehan, Nia dada iis naruk hodi dehan ba ema nee, “Efata!” Nee katak “Nakloke ba!”
MAR 7:35 Derepenti ema tilun diuk nee bele rona fali, nia nanaal mos mamar tiha, i nia komesa koalia moos.
MAR 7:36 Jesus bandu ema sira iha nebaa atu la bele hatete sai ba ema ida. Maski Jesus bandu makaas, maibee sira baa konta liu tan.
MAR 7:37 Sira admira teb-tebes hodi dehan, “Nia halo saida deit, furak teb-tebes. Ema tilun diuk bele rona, ema nebee la hatene koalia bele koalia.”
MAR 8:1 Iha tempu nebaa, iha tan ema barak mai halibur hamutuk ho Jesus. Sira nia hahaan la iha ona, nunee Jesus bolu Nia eskolante sira hodi dehan,
MAR 8:2 “Hau hanoin loos ema barak nee. Sira hamutuk ho Hau loron tolu ona, i sira nia hahaan la iha ona.
MAR 8:3 Se Hau haruka sira fila ba sira nia uma ho kabun mamuk deit, sira bele monu iha dalan, tanba sira balu mai husi fatin dook.”
MAR 8:4 Jesus nia eskolante sira hataan, “Rai nee fuik. Ita atu hetan hahaan husi nebee mak atu foo hahaan ba ema sira nee?!”
MAR 8:5 Jesus husu ba sira, “Imi iha paun fuan hira?” Sira hataan, “Iha hitu.”
MAR 8:6 Depois Jesus haruka ema lubun boot nee tuur hotu iha rai. Nia foti paun fuan hitu nee hodi foo agradese ba Maromak. Nia silu halo rohan-rohan tiha foo ba Nia eskolante sira, depois sira fahe ba ema lubun boot nee.
MAR 8:7 Sira mos iha ikan kiik, uitoan deit. Jesus foo agradese ba Maromak ba ikan nee, i haruka Nia eskolante sira fahe ba ema lubun boot nee.
MAR 8:8 Sira hotu haan too bosu, hahaan mos resin. Nia eskolante sira tau hamutuk hahaan restu sira nee iha bote hitu nakonu.
MAR 8:9 Ema nebee haan nee maizoumenus rihun haat. Hotu tiha Jesus haruka ema lubun boot nee fila.
MAR 8:10 Depois Nia baa sae kedas roo hamutuk ho Nia eskolante sira hodi baa iha rai Dalmanuta.
MAR 8:11 Ema Farizeu balu mai litik Jesus. Sira hakarak koko Nia, nunee sira husu para Nia halo milagre hodi hatudu katak Nia kbiit nee mai duni husi Maromak ka lae.
MAR 8:12 Jesus dada iis naruk hodi dehan, “Tanba saa mak imi ema agora nee husu Hau halo milagre hanesan sinal atu imi bele fiar? Hau hatete lo-loos ba imi, Hau sei la halo ba imi.”
MAR 8:13 Depois Jesus husik tiha sira. Nia sae fali roo hodi baa iha tasi sorin.
MAR 8:14 Iha tasi klaran, Jesus nia eskolante sira foin hanoin katak sira haluha lori paun, sira so iha deit paun fuan ida iha roo laran.
MAR 8:15 Depois Jesus foo hanoin ba sira, “Kuidadu! Hadook aan husi ema Farizeu ho Herodes sira nia fermentu.”
MAR 8:16 Nia eskolante sira komesa hatete ba malu dehan, “Karik Nia koalia hanesan nee tanba ita la iha paun.”
MAR 8:17 Jesus hatene hela saida mak sira koalia. Entaun Nia hatete, “Nusaa mak imi diskuti malu fali kona ba paun? Imi seidauk kompriende ka? Tuir loos imi hatene ona! Nusaa mak imi ulun toos hanesan nee?
MAR 8:18 Imi iha matan, maibee imi la haree. Imi iha tilun, maibee imi la rona buat ida. Imi haluha ona ka?
MAR 8:19 Foin dadauk Hau silu paun fuan lima fahe ba ema rihun lima, imi tau hamutuk hahaan restu too bote hira?” Sira hataan, “Bote sanulu resin rua.”
MAR 8:20 Jesus husu tan, “Depois oinsaa ho paun fuan hitu nebee Hau fahe ba ema rihun haat? Imi halibur hamutuk hahaan restu too bote boot hira?” Sira hataan, “Bote boot hitu.”
MAR 8:21 Jesus dehan ba sira, “Nee mos imi la kompriende nafatin ka?”
MAR 8:22 Jesus ho Nia eskolante sira baa iha aldeia Betsaida. Too iha nebaa ema balu lori ema matan delek ida ba iha Jesus. Sira husu ba Jesus atu tau liman ba ema nee hodi kura nia.
MAR 8:23 Jesus kaer ema matan delek nia liman hodi lori nia sai husi aldeia nee. Nia tafui ba ema nee nia matan, depois tau liman ba nia matan hodi husu, “O haree hetan buat ruma ka lae?”
MAR 8:24 Ema nee hateke ba-mai, depois dehan, “Hau haree hetan ema, maibee hanesan fali ai huun mak lao ba-mai.”
MAR 8:25 Depois Jesus tau Nia liman ba ema nee nia matan dala ida tan. Ema nee koko atu haree, derepenti nia matan diak fali, i bele haree buat hotu-hotu ho moos.
MAR 8:26 Jesus haruka ema nee fila ba nia uma. Nia dehan, “O bele fila ona, maibee liu husi dalan seluk. La bele tama ba aldeia Betsaida.”
MAR 8:27 Jesus ho Nia eskolante sira baa iha aldeia sira nebee besik Sezareia Filipi. Iha dalan klaran, Nia husu ba sira, “Tuir ema konta, Hau nee see?”
MAR 8:28 Sira hataan, “Ema balu dehan, Ita Boot nee João Sarani Nain. Balu tan dehan, profeta Elias. Seluk tan dehan, profeta ida seluk.”
MAR 8:29 Jesus husu tan, “Tuir imi rasik, Hau nee see?” Pedro hataan, “Ita Boot nee Mesias, Salvador nebee Maromak promete hori uluk kedas atu haruka mai.”
MAR 8:30 Jesus bandu sira atu la bele konta sai ba ema ida.
MAR 8:31 Hotu tiha Jesus foo sai ba Nia eskolante sira katak, Nia, Ema Umanu nia Oan tenki simu terus oi-oin. Nai ulun Judeu sira, nai lulik nia ulun sira ho mestri relijiaun sira sei la simu Nia. Ema sei oho tiha Nia, maibee too iha loron tolu, Nia sei moris fila fali.
MAR 8:32 Jesus hatete buat nee mo-moos deit. Rona nunee, Pedro dada Jesus ba sorin hodi siak Nia.
MAR 8:33 Jesus fila oin hodi hateke ba Nia eskolante sira. I Nia siak Pedro dehan, “Satanás, sees tiha husi Hau nia oin! O nia hanoin nee laos mai husi Maromak, maibee mai husi ema nia hanoin.”
MAR 8:34 Depois Jesus bolu ema barak nebee halibur iha nebaa atu mai besik hamutuk ho Nia eskolante sira. Nia dehan, “See mak hakarak tuir Hau, nia tenki husik tiha nia hakarak rasik, i tenki prontu simu terus, hanesan ema nebee lori nia krus too mate. I nia tenki tuir Hau nafatin.
MAR 8:35 Tanba see mak hakarak salva nia aan, nia sei lakon fali. I see mak lakon nia moris tanba nia tuir Hau hodi foo sai Liafuan Diak, nia sei hetan moris rohan-laek.
MAR 8:36 Se ema ida hetan riku-soin mundu nian hotu-hotu, maibee too ikus la hetan moris rohan-laek karik, nia manaan saida loos?
MAR 8:37 La iha buat ida mak nia bele foo hodi troka fali nia klamar.
MAR 8:38 Ema agora nee mesak aat deit i la foo laran ba Maromak. Se ema ruma moe atu simu Hau i lakohi simu Hau nia liafuan, aban-bainrua Hau, Ema Umanu nia Oan mos sei moe atu rekonhese nia bainhira Hau fila fali mai husi lalehan. Hau sei tuun mai ho Aman Maromak nia kbiit tomak, i Maromak nia anju sira akompanha Hau.”
MAR 9:1 Jesus hatutan tan dehan, “Hau hatete lo-loos ba imi, husi imi sira nee, balu sei moris too haree Maromak ukun ho kbiit boot mak foin sira mate.”
MAR 9:2 Liu tiha loron neen, Jesus lori Pedro, Tiago ho João, sira mes-mesak baa sae ba foho aas ida. Too iha nebaa, Nia eskolante nain tolu nee haree Jesus nakfilak Aan tiha.
MAR 9:3 Nia hena mos mutin nabilan tiha. Iha mundu nee, la iha ema ida mak bele halo hena sai mutin nabilan hanesan nee.
MAR 9:4 Derepenti sira haree profeta Elias ho Moisés koalia hela ho Jesus.
MAR 9:5 Haree nunee, Pedro dehan ba Jesus, “Mestri, ita hamutuk iha nee, furak. Diak liu ami halo tenda tolu, ida ba Ita Boot, ida ba Moisés, ho ida ba Elias.”
MAR 9:6 Pedro la hatene atu koalia saida tanba sira nain tolu tauk teb-tebes.
MAR 9:7 Depois kalohan ida mai falun tiha sira. I lian ida sai husi kalohan nee dehan, “Ida nee Hau nia Oan doben. Imi tenki rona Nia!”
MAR 9:8 Eskolante nain tolu nee hateke ba-mai, sira la haree ema ida, so Jesus deit.
MAR 9:9 Hotu tiha Jesus ho Nia eskolante sira tuun fali husi foho. Sira lao tuun dadauk, Jesus bandu dehan, “Saida mak ohin imi haree nee, la bele hatete ba ema ida. Bainhira Maromak halo Hau, Ema Umanu nia Oan moris fali husi mate mak foin imi bele foo sai ba ema.”
MAR 9:10 Buat nebee akontese nee, eskolante sira la foo sai ba ema ida. Maibee sira komesa husu ba malu dehan, “‘Moris fali husi mate’ nee dehan saida?”
MAR 9:11 Depois sira husu ba Jesus dehan, “Nusaa mak mestri relijiaun sira dehan, Elias tenki mai uluk mak foin Mesias mai?”
MAR 9:12 Jesus hataan, “Loos duni, Elias sei mai uluk atu prepara buat hotu-hotu. Maski nunee keta haluha, iha Livru Sagradu mos hakerek dehan, Ema Umanu nia Oan tenki hetan terus barak i ema sei fila kotuk ba Nia.
MAR 9:13 Maibee Hau hatete ba imi, Elias mai tiha ona, i ema halo aat nia tuir sira nia hakarak, hanesan saida mak hakerek ona iha Livru Sagradu.”
MAR 9:14 Depois Jesus ho Nia eskolante nain tolu nee fila fali ba iha eskolante sira seluk. Too iha nebaa, sira haree ema barak haleu eskolante sira, i mestri relijiaun sira diskuti malu hela ho sira.
MAR 9:15 Bainhira ema barak nee haree Jesus, sira admira, i sira halai kedas atu baa simu Nia.
MAR 9:16 Jesus husu sira, “Imi diskuti malu kona ba saida?”
MAR 9:17 Husi ema barak nee iha mane ida hataan, “Mestri, hau mai lori hau nia oan mane atu hasoru Ita Boot, tanba espiritu aat iha nia laran halo nia la bele koalia.
MAR 9:18 Kuandu espiritu aat nee ataka ona nia, espiritu nee riba nia ba rai. Labarik nee nia kabeen mutin sai, nia ruun nehan, i nia isin toos tiha. Hau husu tiha ona Ita Boot nia eskolante sira atu duni sai espiritu aat nee, maibee sira la bele.”
MAR 9:19 Jesus siak sira dehan, “Imi ema nebee la fiar ba Maromak. Hau tenki hela ho imi too bainhira tan? Hau tenki pasiensia ho imi too iha nebee?! Lori labarik nee mai.”
MAR 9:20 Nunee sira lori labarik nee ba Jesus. Maibee espiritu aat nee foin hetan Jesus, nia riba kedas labarik nee ba rai too labarik nee duir ba duir mai, i kabeen mutin mos sai husi ibun.
MAR 9:21 Jesus husu ba labarik nia aman, “Hori bainhira mak ita boot nia oan hetan moras hanesan nee?” Nia aman hataan, “Komesa nia sei kiik.
MAR 9:22 Dala barak espiritu aat nee soe nia ba iha ahi laran, ka halo nia mout iha bee laran, tanba hakarak atu oho nia. Maibee se Ita Boot bele halo buat ruma ba nia, entaun hanoin ami i tulun ami ba!”
MAR 9:23 Jesus hataan, “Nusaa mak o dehan, ‘se Ita Boot bele’? See mak fiar, buat hotu bele deit.”
MAR 9:24 Labarik nia aman hataan kedas ho lian makaas, “Hau fiar! Tulun hau atu hametin hau nia fiar nebee fraku nee.”
MAR 9:25 Jesus haree ema barak liu tan halai ba iha fatin nee. Nunee Nia foo orden ba espiritu aat nee dehan, “Espiritu nebee halo labarik nee tilun diuk ho la bele koalia, Hau haruka o sai ona husi labarik nee! I la bele tama tan iha nia!”
MAR 9:26 Rona nunee, espiritu aat hakilar makaas i doko labarik nee makaas loos, depois sai tiha husi nia. Labarik nee haree ba hanesan ema mate. Nunee ema barak dehan, “Nia mate tiha ona!”
MAR 9:27 Maibee Jesus kaer labarik nia liman hodi ajuda nia hamriik. I labarik nee hamriik kedas.
MAR 9:28 Depois Jesus ho Nia eskolante sira tama fali iha uma ida, Nia eskolante sira husu Nia mes-mesak, “Nusaa mak ami ohin la bele duni sai espiritu aat nee?”
MAR 9:29 Jesus hataan, “Atu duni sai espiritu aat hanesan ida ohin nee, imi tenki halo orasaun [ho jejun]. Se lae, la bele.”
MAR 9:30 Hotu tiha Jesus ho Nia eskolante sira husik tiha fatin nee hodi lao liu husi provinsia Galileia. Jesus lakohi atu ema seluk hatene Nia iha nebee,
MAR 9:31 tanba Nia atu hanorin deit Nia eskolante sira. Nia hatete ba sira, “Aban-bainrua ema sei faan Hau, Ema Umanu nia Oan ba ema aat. Sira sei oho Hau, depois iha loron tolu Maromak sei halo Hau moris fali.”
MAR 9:32 Maibee Nia eskolante sira la kompriende, i sira mos tauk atu husu ba Nia.
MAR 9:33 Jesus ho Nia eskolante sira too iha sidade Kafarnaum. Sira tama iha uma ida, depois Jesus husu ba Nia eskolante sira dehan, “Ohin ita iha dalan, imi diskuti malu kona ba saida?”
MAR 9:34 Maibee Nia eskolante sira nonook deit, tanba ohin iha dalan sira diskuti malu kona ba ida nebee mak boot liu.
MAR 9:35 Jesus tuur, depois bolu Nia eskolante sanulu resin rua nee hamutuk hodi hanorin dehan, “See mak hakarak sai ema boot liu, nia tenki haraik aan sai ema ida nebee kiik liu hodi serbi nia maluk sira seluk hanesan atan.”
MAR 9:36 Depois Jesus lori labarik ida mai hamriik iha eskolante sira nia klaran, i Nia hakuak labarik nee hodi dehan ba sira,
MAR 9:37 “See mak simu labarik ida hanesan nee hodi Hau nia naran, nia simu Hau. I see mak simu Hau, nia laos simu Hau deit, maibee nia simu mos Ida nebee haruka Hau mai.”
MAR 9:38 João foo hatene ba Jesus dehan, “Mestri, ami haree ema ida duni sai diabu hodi Ita Boot nia naran. Ami bandu nia, tanba nia laos ita nia ema.”
MAR 9:39 Maibee Jesus hataan, “La bele bandu! Tanba la iha ema ida mak halo milagre hodi Hau nia naran depois iha tempu badak nia laran nia hatete aat fali Hau.
MAR 9:40 Ema nebee la kontra ita, nia hamutuk ho ita.
MAR 9:41 Hau dehan lo-loos ba imi, see mak foo tulun ba imi tanba imi lori Mesias nia naran, maski nia foo bee kopu ida deit mos, Maromak la haluha nia kolen.”
MAR 9:42 Jesus hatutan tan dehan, “See mak halo labarik kiik ida monu ba sala too la fiar mai Hau, ema nee sei simu kastigu todan. Ba nia, diak liu ema kesi fatuk boot ida iha nia kakorok depois soe nia tama ba tasi laran! Tanba kastigu nebee nia sei simu todan liu fali ida nee.
MAR 9:43 Se o nia liman halo o monu ba sala karik, tesi tiha. Diak liu o tama iha lalehan ho liman sorin deit duke o tama ba iha infernu ho liman kompletu.
MAR 9:44 [Iha nebaa ular nunka mate, i ahi lakan hela deit.]
MAR 9:45 Se o nia ain halo o monu ba sala karik, tesi tiha. Diak liu o tama iha lalehan ho ain sorin deit duke o tama ba iha infernu ho ain kompletu.
MAR 9:46 [Iha nebaa ular nunka mate, i ahi lakan hela deit.]
MAR 9:47 Se o nia matan halo o monu ba sala karik, sukit sai tiha o nia matan nee. Diak liu o tama ba iha Maromak nia reinu ho matan sorin deit duke o tama ba iha infernu ho matan kompletu.
MAR 9:48 Iha nebaa, ‘ular nunka mate, i ahi lakan hela deit.’
MAR 9:49 Ema hotu-hotu sei liu husi ahi para sai meer tiha.
MAR 9:50 Masin nee buat diak ida. Maibee se masin nee sai miis tiha ona karik, ita la bele halo meer fila fali. Imi mos tenki sai meer hanesan masin hodi moris dame malu.”
MAR 10:1 Jesus sai husi fatin nee hodi baa iha provinsia Judeia ho fat-fatin iha mota Jordaun nia sorin ba. Iha nebaa mos ema barak mai haleu Nia, i Jesus hanorin sira hanesan baibain.
MAR 10:2 Depois ema balu husi grupu Farizeu mai koko atu hamonu Nia. Sira husu, “Tuir Moisés nia lei, laen soe nia feen, bele ka lae?”
MAR 10:3 Jesus hataan, “Moisés nia lei hatete saida?”
MAR 10:4 Sira hataan, “Moisés foo lisensa dehan, laen bele soe nia feen, naran katak nia foo surat deklarasaun soe malu nian.”
MAR 10:5 Jesus hataan, “Moisés hakerek lei nee tanba imi nia ulun toos.
MAR 10:6 Maibee fo-foun Maromak halo lalehan ho rai, Maromak ‘halo sira mane ho feto.’
MAR 10:7 ‘Tanba nee, mane sei husik nia inan-aman hodi baa moris neon ida laran ida ho nia feen,
MAR 10:8 i sira nain rua sai ona ida.’ Entaun sira laos ona ema nain rua, maibee sai ona ida.
MAR 10:9 Nee duni se Maromak tau feto ho mane hamutuk sai feen-laen ona, ema keta fahe fali.”
MAR 10:10 Hotu tiha Jesus ho Nia eskolante sira tama fali ba iha uma, depois eskolante sira husu kona ba Nia liafuan ohin nee.
MAR 10:11 Jesus hataan ba sira dehan, “Se mane soe nia feen hodi hola fali feto seluk, mane nee halo sala seksual hasoru nia feen.
MAR 10:12 I feto mos hanesan. Se nia soe tiha nia laen hodi hola fali mane seluk, nia mos halo sala seksual.”
MAR 10:13 Iha loron ida, ema balu mai lori labarik ba Jesus atu Nia tau liman ba sira hodi foo bensaun ba sira. Maibee Jesus nia eskolante sira bandu.
MAR 10:14 Haree nunee, Jesus siak Nia eskolante sira dehan, “Husik labarik sira nee mai iha Hau, la bele bandu. Tanba ema hanesan labarik sira nee mak sai Maromak nia reinu.
MAR 10:15 Hau hatete lo-loos ba imi, see mak atu sai Maromak nia reinu, nia tenki laran metin ba Maromak hanesan labarik sira nee. Se lae, la bele.”
MAR 10:16 Jesus hakuak labarik sira nee, i tau liman ba labarik ida-idak nia ulun hodi foo bensaun ba sira.
MAR 10:17 Jesus foin sai husi fatin nee, ema riku ida halai mai hasoru Jesus. Nia hakruuk iha Jesus nia oin hodi husu, “Mestri nebee diak, hau tenki halo saida para hau bele hetan moris rohan-laek?”
MAR 10:18 Jesus hataan, “Tanba saa mak ita dehan, Hau ema diak? La iha ema ida mak diak, so Maromak deit.
MAR 10:19 Ita hatene ona, Nai Maromak nia ukun fuan nebee dehan, ‘La bele oho ema. La bele halo sala ho ema nia feen ka laen. La bele naok. La bele foo testemunhu falsu. La bele han-matak ema nia sasaan. I respeita o nia inan-aman.’ ”
MAR 10:20 Ema nee hataan, “Mestri, komesa hau sei kiik, ukun fuan sira nee hau halo tuir hotu ona.”
MAR 10:21 Jesus hateke ba nia ho domin hodi dehan, “Maibee ita sei falta buat ida. Agora baa faan tiha ita nia riku-soin hotu, i osan nee foo ba ema kiak. Nunee mak ita sei hetan fali riku-soin iha lalehan. Fahe hotu tiha, mai tuir Hau.”
MAR 10:22 Rona nunee, ema nee hatudu nia oin tristi, i nia fila ho laran susar tanba nia riku teb-tebes.
MAR 10:23 Depois Jesus haree ba-mai, i hatete ba Nia eskolante sira, “Ema riku susar teb-tebes atu sai Maromak nia reinu.”
MAR 10:24 Rona tiha liafuan nee, Jesus nia eskolante sira hakfodak. Maibee Jesus hatete dala ida tan, “Oan sira, susar teb-tebes atu sai Maromak nia reinu.
MAR 10:25 Kuda kamelu tama liu husi daun kuak susar teb-tebes. Maibee susar liu tan, ema riku ida atu sai Maromak nia reinu hodi hakruuk ba Nia nudar Liurai.”
MAR 10:26 Jesus nia eskolante sira admira teb-tebes hodi husu, “Se nunee, see loos mak sei hetan salvasaun?”
MAR 10:27 Jesus hateke ba sira hodi dehan, “Ba ema, la bele duni. Maibee ba Maromak buat hotu-hotu bele. La iha buat ida mak la bele.”
MAR 10:28 Pedro dehan, “Ami husik tiha ona buat hotu-hotu hodi tuir Ita Boot.”
MAR 10:29 Jesus hataan, “Hau hatete lo-loos ba imi, Maromak sei foo bensaun ba see-see deit mak husik ona nia uma, nia maun-alin, nia inan-aman, nia oan sira ka nia toos tanba nia tuir Hau i foo sai Liafuan Diak.
MAR 10:30 Uma, maun-alin, inan, oan ho rai nebee nia husik ona nee, nia sei simu tan dala atus ida iha mundu nee. Nia mos sei hetan terus tanba nia tuir Hau. I bainhira nia husik ona mundu nee, nia sei hetan moris rohan-laek.
MAR 10:31 Maibee ema barak nebee agora boot sei sai kiik. I ema barak nebee agora kiik sei sai boot.”
MAR 10:32 Jesus ho Nia eskolante sira lao dadauk sae ba iha Jerusalém. Jesus lao uluk. Nia eskolante sira admira, i ema barak nebee mak lao husi kotuk tauk. Dala ida tan Jesus halibur Nia eskolante nain sanulu resin rua mesak deit hodi foo sai ba sira saida mak atu akontese ba Nia.
MAR 10:33 Nia hatete, “Rona mai! Ita lao dadauk ba Jerusalém. Too iha nebaa, ema sei entrega Hau, Ema Umanu nia Oan ba iha nai lulik nia ulun sira ho mestri relijiaun sira. Ema sira nee sei tesi Hau nia lia katak, Hau tenki hetan kastigu mate. Sira sei entrega Hau ba iha ema nebee la fiar Maromak.
MAR 10:34 Depois ema sira nee sei hamoe Hau, tafui kabeen mai Hau, baku Hau ho sikoti, i oho Hau. Maibee iha loron tolu Hau sei moris fali.”
MAR 10:35 Hotu tiha Zebedeu nia oan Tiago ho João baa husu Jesus, “Mestri, ami hakarak Ita Boot halo tuir buat nebee mak ami atu husu nee.”
MAR 10:36 Jesus husu fali, “Imi hakarak Hau halo saida ba imi?”
MAR 10:37 Sira hataan, “Ami husu atu aban-bainrua Ita Boot tuur iha naroman lalehan nian, ami nain rua nee, ida tuur iha Ita Boot nia sorin loos, ida seluk tuur iha Ita Boot nia sorin karuk.”
MAR 10:38 Maibee Jesus hatete ba sira dehan, “Imi la kompriende saida mak imi husu. La kleur tan Hau sei simu susar ho terus todan. Imi mos prontu simu susar ho terus nee ka lae?”
MAR 10:39 Sira hataan, “Ami prontu.” Jesus hatete ba sira, “Loos duni, imi sei simu duni susar ho terus hanesan Hau.
MAR 10:40 Maibee Hau la iha direitu atu hili see mak atu tuur iha Hau nia sorin loos ho sorin karuk. Kona ba ida nee, Maromak desidi tiha ona.”
MAR 10:41 Bainhira eskolante nain sanulu rona buat nebee mak Tiago ho João husu, sira hirus maun-alin nain rua nee.
MAR 10:42 Entaun Jesus bolu sira hamutuk hodi dehan, “Imi hatene katak, iha nasaun sel-seluk, ema sira nebee hanaran nai ulun, sira manda ema tuun-sae, i ukun nain sira hanehan sira nia povu.
MAR 10:43 Maibee imi la bele halo hanesan nee. Husi imi sira nee, see mak hakarak sai boot, nia tenki haraik aan hodi serbi nia maluk sira seluk.
MAR 10:44 See mak hakarak sai ema boot liu, nia tenki sai atan ba ema hotu-hotu hodi serbi sira.
MAR 10:45 Hau, Ema Umanu nia Oan mos mai iha mundu nee laos atu ema serbi Hau. Maibee Hau mai atu serbi ema seluk i foo Aan ba mate atu ema barak hetan liberdade.”
MAR 10:46 Depois Jesus ho Nia eskolante sira too iha sidade Jerikó. Bainhira sira lao sai fali husi sidade nee, ema barak mos tuir. Iha ema matan delek ida tuur hela iha dalan ninin hodi husu ezmola. Nia naran Bartimeu, nee katak “Timeu nia oan”.
MAR 10:47 Bainhira nia rona dehan, ema ida liu nee Jesus husi Nazaré, nia komesa bolu ho lian makaas dehan, “Jesus, liurai David nia Jerasaun, hanoin hau ba!”
MAR 10:48 Ema barak siak nia hodi haruka nia nonook. Maibee nia bolu makaas liu tan dehan, “Liurai David nia Jerasaun, hanoin hau ba!”
MAR 10:49 Jesus mos para tiha hodi dehan, “Bolu nia mai!” Entaun sira bolu ema matan delek nee dehan, “Keta tauk! Hamriik ba! Mestri bolu o.”
MAR 10:50 Rona nunee, Bartimeu soe tiha nia hena, hamriik kedas i baa hasoru Jesus.
MAR 10:51 Jesus husu, “O hakarak Hau halo saida ba o?” Ema matan delek nee hataan, “Mestri, hau hakarak haree.”
MAR 10:52 Jesus hatete, “O hetan kura tanba o fiar mai Hau. O bele baa ona.” Ema nee nia matan diak kedas. I nia lao tuir Jesus.
MAR 11:1 Bainhira Jesus ho Nia eskolante sira besik ona sidade Jerusalém, sira too iha aldeia Betfagé ho Betánia iha foho Oliveira nia lolon, Nia haruka Nia eskolante nain rua baa uluk.
MAR 11:2 Nia dehan ba sira, “Imi baa iha aldeia nebaa. Bainhira imi tama, imi haree kedas kuda buru oan ida kesi hela, ema ida seidauk sae. Kore tiha dada mai.
MAR 11:3 Se ema ruma husu karik, ‘Nusaa mak imi halo buat nee?’, hatete ba nia, ‘Nai mak presiza.’ Ema nee sei haruka imi dada kedas kuda buru nee.”
MAR 11:4 Entaun sira nain rua mos baa. Sira hetan kuda buru oan nee kesi hela iha uma oin, iha dalan ibun. Bainhira sira kore dadauk kuda nia talin,
MAR 11:5 ema balu nebee hamriik hela iha nebaa husu, “Imi halo saida iha nee? Nusaa mak imi kore fali kuda buru nee?”
MAR 11:6 Sira hataan tuir buat nebee Jesus hatete ona ba sira, depois ema sira nee husik sira lori kuda buru nee.
MAR 11:7 I sira dada kuda buru nee lori ba Jesus. Too iha nebaa, sira hasai sira nia hena tau ba iha kuda nia kotuk, depois Jesus sae.
MAR 11:8 Ema barak hasai sira nia hena hodi nahe tu-tuir dalan. Iha mos ema balu taa ramus tahan iha toos hodi nahe tuir dalan.
MAR 11:9 Ema balu lao uluk iha Jesus nia oin, iha balu lao husi kotuk. Sira hotu haklalak hahii Maromak dehan, “Hosana! Maromak foo bensaun ba Ida nebee mak mai lori Nai Maromak nia naran.
MAR 11:10 Maromak foo bensaun ba liurai David nia Jerasaun nebee mai atu ukun. Hosana, hahii Nia iha fatin aas liu!”
MAR 11:11 Jesus tama iha Jerusalém, Nia baa iha uma kreda boot hodi haree buat hotu iha nebaa. Tanba rai atu kalan ona, Nia ho Nia eskolante sanulu resin rua fila fali ba iha Betánia.
MAR 11:12 Aban fali Jesus ho Nia eskolante sira sai husi Betánia. Iha dalan Jesus hamlaha.
MAR 11:13 Husi dook Nia haree tiha ona ai figeira huun, nia tahan buras. Nunee Nia baa atu haree ai nee nia fuan iha ka lae. Maibee bainhira too iha ai huun, Nia haree ai fuan ida mos la iha, so tahan deit, tanba laos tempu atu foo fuan.
MAR 11:14 Jesus hatete ba ai huun nee dehan, “Hahuu agora la iha ema ida mak haan tan o nia fuan.” Nia eskolante sira rona hela liafuan nee.
MAR 11:15 Depois Jesus ho Nia eskolante sira too iha Jerusalém. Jesus tama iha area uma kreda boot, i duni sai ema sira nebee mak halo kontratu iha fatin nee. Nia baku fila tiha meza nebee mak ema uza hodi troka osan, banku nebee mak ema tuur hodi faan manu pombu mos Nia baku fila hotu.
MAR 11:16 Nia mos bandu ema atu la bele lori sasaan liu husi area uma kreda boot.
MAR 11:17 Depois Jesus hanorin ema sira iha nebaa dehan, “Iha Maromak nia liafuan hakerek tiha ona dehan, ‘Hau nia uma nee fatin ba ema husi nasaun hotu-hotu atu halo orasaun.’ Maibee imi halo fali hanesan ema naok-teen sira nia subar fatin.”
MAR 11:18 Nai lulik nia ulun sira ho mestri relijiaun sira rona saida mak akontese nee. Entaun sira komesa buka dalan atu oho Jesus. Sira tauk Jesus tanba Nia hanorin halo ema barak admira.
MAR 11:19 Rai besik kalan ona, Jesus ho Nia eskolante sira sai fali husi sidade.
MAR 11:20 Aban dadeer-saan, Jesus ho Nia eskolante sira liu husi fatin horiseik, sira haree ai figeira nee mate tiha ona, too nia abut maran hotu.
MAR 11:21 Pedro hanoin fali Jesus nia liafuan nebee natoon Nia hatete ba ai figeira nee, entaun Pedro dehan ba Jesus, “Mestri, haree ba! Ai figeira huun nebee Ita Boot foo malisan nee mate tiha ona.”
MAR 11:22 Jesus hataan, “Fiar ba Maromak!
MAR 11:23 Hau hatete lo-loos ba imi, see deit mak haruka foho ida nee muda ba iha tasi laran, foho nee sei muda duni. Naran katak nia laran metin ba buat nebee nia husu, i la duvida.
MAR 11:24 Nee duni Hau hatete ba imi, bainhira imi husu saida deit liu husi orasaun, imi tenki fiar katak imi sei simu. Se imi fiar nunee mak imi sei hetan duni.
MAR 11:25 Se imi halo orasaun i hanoin hetan ema ruma halo sala hasoru imi, perdua nia sala ba, atu nunee imi nia Aman iha lalehan mos perdua imi nia sala.
MAR 11:26 [Maibee se imi la perdua ema, imi nia Aman iha lalehan mos sei la perdua imi nia sala.”]
MAR 11:27 Jesus ho Nia eskolante sira tama fali iha Jerusalém. Jesus lao hela iha area uma kreda boot, nai lulik nia ulun sira, mestri relijiaun sira ho katuas lia nain sira mai hasoru Nia.
MAR 11:28 Sira husu dehan, “O iha direitu saida para halo buat sira nee? See mak foo direitu nee ba O?”
MAR 11:29 Jesus hataan, “Hau mos atu husu buat ida. Hataan mai took. Depois mak Hau foo hatene imi, see mak foo direitu mai Hau hodi halo buat sira nee.
MAR 11:30 Foo hatene took Hau: See mak foo direitu ba João Sarani Nain hodi foo sarani ema? Maromak mak foo ka, ema mak foo?”
MAR 11:31 Sira diskuti malu dehan, “Ita susar ona. Se ita hataan, ‘Maromak mak foo direitu ba nia,’ Jesus sei husu fali ita dehan, ‘Entaun, nusaa mak imi la fiar ba nia?’
MAR 11:32 Maibee ita mos la bele dehan, ‘Ema mak foo direitu.’ ” Sira dehan nunee tanba sira tauk povu, tanba povu sira hanoin dehan, João nee Maromak nia profeta ida duni.
MAR 11:33 Nunee sira hataan dehan, “Ami la hatene.” Jesus dehan ba sira, “Se nunee, Hau mos la hatete ba imi, see mak foo direitu mai Hau hodi halo buat sira nee.”
MAR 12:1 Jesus koalia nafatin ho nai lulik nia ulun sira, mestri relijiaun sira, ho katuas lia nain sira. Nia halo komparasaun nunee: “Iha toos nain ida kuda uvas iha nia toos ida tomak. Nia halo lutu haleu tiha toos nee, i kee rai kuak halo tanki ida atu hasai uvas been. Nia mos harii fatin aas ida ba seguransa sira atu hein toos nee. Hotu tiha, nia foo ba ema aluga, depois nia baa hela iha rai liur.
MAR 12:2 Too tempu kuu uvas, toos nain haruka nia baa simu ninia parte husi ema nebee mak aluga toos.
MAR 12:3 Maibee sira kaer nia, baku nia, i duni nia fila ho liman mamuk.
MAR 12:4 Depois toos nain haruka tan nia atan ida baa. Maibee sira baku kanek nia ulun, i tarata nia.
MAR 12:5 Toos nain haruka tan atan ida seluk, maibee ida nee sira oho tiha. Toos nain haruka nafatin nia atan sel-seluk, balu sira baku i balu sira oho.
MAR 12:6 Too ikus la iha tan ema ida mak nia bele haruka baa foti nia parte, hela deit nia oan mane nebee nia hadomi. Entaun nia haruka nia oan nee baa. Nia hanoin dehan, ‘Sira sei respeita hau nia oan.’
MAR 12:7 Maibee bainhira toos nain nia oan too iha nebaa, ema aluga toos nee dehan ba malu, ‘Nia mak sei hetan nia aman nia riku-soin tomak. Diak liu ita oho tiha nia, atu toos nee sai ita nian fali.’
MAR 12:8 Nunee sira kaer nia, oho nia, depois rasta nia mate isin sai husi toos laran.”
MAR 12:9 Konta hotu tiha, Jesus husu ba nai ulun relijiaun sira dehan, “Agora, toos nain sei halo saida? Nia sei baa oho tiha sira hotu, depois foo fali toos nee ba ema seluk aluga.
MAR 12:10 Iha Livru Sagradu kompara Mesias hanesan fatuk ida. Imi nunka lee ka? Iha nebaa dehan, ‘Iha fatuk ida nebee badaen fatuk sira lakohi uza, maibee agora fatuk nee mak sai fali fatuk nebee prinsipal.
MAR 12:11 Nai Maromak rasik mak hili fatuk nee, ita haree ba furak teb-tebes.’ ”
MAR 12:12 Nai ulun relijiaun sira rona komparasaun nee, sira hatene katak Jesus konta istoria nee hodi hatudu sira nia sala. Nunee sira buka dalan atu kaer Nia, maibee sira tauk ema lubun boot nee, entaun sira husik Nia sai husi fatin nee.
MAR 12:13 Hotu tiha nai ulun relijiaun sira haruka ema Farizeu balu ho partidu Herodes nia membru balu baa hasoru Jesus hodi husu pergunta oi-oin ho intensaun atu hamonu Nia.
MAR 12:14 Too iha Jesus, sira husu, “Mestri, ami hatene katak Ita Boot ema nebee mak moris loos. Ita Boot la preokupa ema seluk nia hanoin, tanba Ita Boot la fihir ema. Ita Boot sempre hanorin ho loos kona ba Maromak nia hakarak. Ami nia pergunta mak nee: Tuir ita nia lei relijiaun, ita selu impostu ba liurai boot César, nee loos ka la loos? Ita tenki selu ka lae?”
MAR 12:15 Maibee Jesus hatene katak sira koalia oin ida hahalok oin seluk, nunee Nia dehan ba sira, “Nusaa mak imi hakarak hamonu Hau? Lori took osan mutin ida mai Hau haree.”
MAR 12:16 Sira lori osan mutin ida foo ba Jesus, i Nia husu ba sira, “See nia oin mak iha osan nee? I see nia naran?” Sira hataan, “Liurai boot César nian.”
MAR 12:17 Jesus hatete ba sira, “Entaun foo ba estadu buat nebee mak estadu nian, i foo ba Maromak buat nebee mak Maromak nian.” Rona nunee, sira admira.
MAR 12:18 Depois ema husi grupu Saduseu mos mai koko Jesus. Ema Saduseu sira hanorin dehan, ema mate sei la moris fali. Entaun sira husu ba Jesus,
MAR 12:19 “Mestri, Moisés hakerek lei ida rai hela mai ita dehan nunee: Se mane ida mate husik hela nia kaben, maibee la iha oan, mane nia alin tenki kaben fali ho feto faluk nee, para bele foo jerasaun ba nia maun.
MAR 12:20 Entaun, hanesan nee: Uluk iha maun-alin nain hitu. Maun boot kaben, depois nia mate, la iha oan.
MAR 12:21 Entaun nia alin ida tuir nia nee, kaben fali ho feto faluk nee. La kleur nia mos mate, la iha oan. Nunee mos ho nia alin tuir mai. Nia kaben ho feto faluk nee, maibee nia mate, la iha oan.
MAR 12:22 Nunee nafatin too nain hitu nee mate hotu, la iha oan. Ikus liu feto nee mos mate.
MAR 12:23 Agora ami husu nunee: Feto nee kaben ho mane nain hitu. Aban-bainrua Maromak halo moris fali ema mate, feto nee nia kaben mak ida nebee loos?”
MAR 12:24 Jesus hataan dehan, “Imi nia hanoin nee sala liu! Tanba imi la hatene saida mak hakerek iha Livru Sagradu, i la kompriende Maromak nia kbiit.
MAR 12:25 Bainhira ema mate moris fila fali, sira la kaben tan ona. Maibee sira hanesan anju sira iha lalehan.
MAR 12:26 Agora, kona ba ema mate moris fali, imi nunka lee Moisés nia livru nebee hakerek kona ba ahi lakan iha ai huun kiikoan ida ka? Iha momentu nebaa Maromak foo hatene ba Moisés dehan, ‘Hau mak o nia bei-ala Abraão nia Maromak, Isac nia Maromak ho Jacó nia Maromak, sira hotu adora nafatin Hau too agora.’
MAR 12:27 Nee hatudu katak ema mate sei moris fali. Tanba so ema moris deit mak bele adora Maromak, ema mate lae. Imi nia hanoin sala duni.”
MAR 12:28 Iha mestri relijiaun ida mai rona Jesus diskuti malu ho ema Saduseu sira. Mestri relijiaun nee haree katak Jesus hataan sira nia pergunta ho diak, entaun nia husu ba Jesus, “Husi ukun fuan hotu-hotu, ida nebee mak importante liu?”
MAR 12:29 Jesus hataan, “Ukun fuan ida importante liu mak nee: ‘Rona mai Israel oan sira! Maromak, ita nia Nai, Nia mesak ida deit.
MAR 12:30 O tenki hadomi Maromak, o nia Nai, ho o nia aan tomak, ho laran tomak, ho neon tomak, ho forsa tomak.’
MAR 12:31 Ukun fuan ida segundu mak nee: ‘O tenki hadomi o nia maluk hanesan o hadomi o nia aan rasik.’ La iha tan ukun fuan seluk mak importante liu ukun fuan rua nee.”
MAR 12:32 Mestri relijiaun nee hataan fali, “Mestri, Ita Boot nia resposta nee diak! Ita Boot dehan nee loos duni. Maromak mesak ida deit, la iha tan Maromak seluk.
MAR 12:33 Ita tenki hadomi Maromak ho laran tomak, ho hanoin tomak, ho forsa tomak. I ita mos tenki hadomi ita nia maluk hanesan ita hadomi ita nia aan rasik. Buat rua nee importante liu fali sakrifisiu tunu ho mos sakrifisiu sel-seluk.”
MAR 12:34 Jesus haree mestri relijiaun nee hataan ho matenek. Nunee Nia dehan, “Ita boot besik atu sai Maromak nia reinu.” Hotu tiha la iha ema ida brani husu tan pergunta ba Jesus.
MAR 12:35 Jesus hanorin hela ema barak iha area uma kreda boot, Nia dehan, “Nusaa mak mestri relijiaun sira dehan, Mesias liurai David nia Jerasaun?
MAR 12:36 Afinal Espiritu Santu foo hanoin ba David atu foo sai dehan, ‘Nai Maromak hatete ona ba hau nia Nai dehan, “Mai tuur iha Hau nia sorin loos, too Hau hamonu O nia inimigu sira iha O nia ain okos.”’
MAR 12:37 Iha nee liurai David rasik bolu Mesias nee nia Nai. Entaun oinsaa mak Mesias nee bele sai fali David nia Jerasaun?” Ema barak nebee rona Jesus nia hanorin nee, sira gosta loos.
MAR 12:38 Momentu Jesus sei hanorin ema barak nee, Nia dehan, “Imi tenki kuidadu di-diak ho mestri relijiaun sira. Sira gosta lao hatais batina naruk, i gosta ema kumprimenta sira iha merkadu.
MAR 12:39 Kuandu iha uma kreda laran ka iha festa, sira gosta tuur iha oin hanesan ema boot.
MAR 12:40 Maibee sira mos gosta han-matak feto faluk sira hodi hadau sira nia uma, i sira finji harohan nar-naruk para ema haree. Maromak sei kastigu sira todan liu fali ema seluk.”
MAR 12:41 Jesus tuur besik kaixa oferta iha uma kreda boot hodi haree ema tau osan ba iha kaixa oferta nee. Iha ema riku barak tau osan boot.
MAR 12:42 Iha mos feto faluk kiak ida mai tau osan oferta sentavus rua ba iha kaixa laran, osan nee nia folin kiik loos.
MAR 12:43 Haree nunee, Jesus bolu Nia eskolante sira hodi dehan, “Hau hatete lo-loos ba imi, oferta nebee feto faluk kiak nee foo, nia folin boot liu fali oferta sira sel-seluk.
MAR 12:44 Sira seluk foo husi sira nia osan restu. Maibee feto faluk nee foo hotu buat nebee nia iha. Atu hola hahaan mos, la iha ona.”
MAR 13:1 Hotu tiha Jesus ho Nia eskolante sira sai husi uma kreda boot. Sira sai dadauk, Nia eskolante ida dehan nunee: “Mestri, haree took uma kreda nee! Uma sira nee hada ho fatuk bo-boot deit, haree ba kapaas loos.”
MAR 13:2 Jesus dehan ba nia, “Haree di-diak uma bo-boot sira nee. Too loron ida, buat sira nee sei rahun hotu. Fatuk sira nee hotu sei tetuk too rai.”
MAR 13:3 Depois Jesus lao baa tuur iha foho Oliveira hodi hateke ba uma kreda boot. Pedro, Tiago, João ho André husu Nia mes-mesak,
MAR 13:4 “Hatete took mai ami, buat nebee ohin Ita Boot koalia nee, bainhira mak sei akontese? Kuandu buat sira nee atu akontese, sinal saida mak sei mosu?”
MAR 13:5 Jesus hataan dehan, “Kuidadu di-diak para ema la bele bosok imi.
MAR 13:6 Ema barak sei mai lori Hau nia naran dehan sira nee mak Mesias. I sira lohi ema barak atu lao sala dalan.
MAR 13:7 Imi sei rona kona ba funu oi-oin, i ema sei konta tutan kona ba funu iha fat-fatin. Bainhira imi rona nunee, keta tauk. Buat sira nee tenki akontese uluk, maibee nee laos dehan katak mundu atu remata ona.
MAR 13:8 Nasaun sei funu hasoru nasaun, estadu sei funu hasoru estadu. Rai sei nakdoko iha fat-fatin, sei iha rai hamlaha boot. Maibee susar sira nee foin mak hahuu, hanesan feto isin rua nebee foin kanotak moras atu tuur ahi.
MAR 13:9 Kuidadu, tanba ema sei mai kaer imi hodi lori imi ba iha tribunal. Sira sei baku imi ho sikoti iha sira nia uma kreda laran. Sira mos sei foo sala ba imi iha nai ulun ho liurai sira nia oin, tanba imi tuir Hau. Ho nunee imi sei foo sasin kona ba Hau iha sira nia oin.
MAR 13:10 Liafuan Diak kona ba Hau, tenki foo sai iha nasaun hotu-hotu, depois mak foin mundu remata.
MAR 13:11 Bainhira ema kaer imi hodi lori imi ba iha tribunal, lalika preokupa kona ba saida mak imi atu hataan iha nebaa. Hataan deit saida mak Maromak foo hatene ba imi iha momentu nebaa. Tanba liafuan nebee imi koalia nee laos imi nia liafuan rasik, maibee mai husi Espiritu Santu.
MAR 13:12 Ema sei sai traidor hodi faan nia maun-alin rasik atu ema oho. Nunee mos aman sira sei entrega sira nia oan atu ema oho. Oan sira sei kontra sira nia inan-aman, i entrega ba ema aat atu oho.
MAR 13:13 Ema hotu-hotu sei odi imi tanba imi tuir Hau. Maibee see mak tuir nafatin Hau too rohan, Maromak sei salva nia.
MAR 13:14 Iha buat ida aat liu mak sei tama ba iha fatin lulik iha uma kreda boot, halo too Maromak hakribi. See mak lee liafuan nee, kompriende ba! Bainhira imi haree buat aat nee, imi nebee iha provinsia Judeia tenki halai ona ba foho.
MAR 13:15 Iha loron nee, ema nebee iha hela liur, la bele tama ba iha uma laran hodi foti sasaan.
MAR 13:16 I ema nebee iha hela toos, la bele fila baa foti nia hena iha uma.
MAR 13:17 Iha tempu nee, feto isin rua ho inan sira nebee foo susu nia oan, sei terus teb-tebes.
MAR 13:18 Harohan ba Maromak atu buat nee la bele akontese iha tempu malirin.
MAR 13:19 Tanba iha tempu nee, ema sei terus aat liu. Komesa husi Maromak halo lalehan ho rai too agora, seidauk iha terus aat ida hanesan nee. I kuandu terus boot nee liu tiha, sei la akontese tan hanesan nee.
MAR 13:20 Se Nai Maromak la habadak tempu terus nee, la iha tan ema ida mak moris. Maibee Nia sei habadak duni, tanba Nia hadomi ema nebee mak Nia hili tiha ona.
MAR 13:21 Iha tempu nee, se ema ruma dehan ba imi, ‘Haree took, Mesias iha nee’ ka ‘Mesias iha nebaa’, keta fiar.
MAR 13:22 Tanba ema sei mai bosok dehan sira mak Mesias ka sira Maromak nia profeta. Sira sei hatudu milagre bo-boot nebee halo ema admira, atu nunee sira bele lohi ema hotu-hotu atu lao sala dalan. Too ema nebee Maromak hili mos sira hakarak hamonu.
MAR 13:23 Entaun matan moris! Hau foo sai tiha ona buat hotu-hotu ba imi molok buat sira nee akontese.”
MAR 13:24 “Bainhira loron terus nee liu tiha, loro matan sai nakukun tiha, fulan mos la foo naroman tan.
MAR 13:25 Fitun sira iha lalehan sei monu namtate, i forsa hotu-hotu iha kalohan leten sei nakdoko.
MAR 13:26 Depois ema hotu-hotu sei haree Hau, Ema Umanu nia Oan tuun mai iha kalohan leten, ho kbiit boot ho naroman lalehan nian.
MAR 13:27 I Hau sei haruka Hau nia anju sira halibur ema sira nebee mak Hau hili tiha ona husi mundu tomak, husi rai ulun too rai ikun.
MAR 13:28 Hanoin took ai figeira, i aprende husi ai nee. Bainhira ai figeira nia sanak komesa matak i nia dikin komesa sai, imi hatene katak bailoron besik ona.
MAR 13:29 Nunee mos bainhira imi haree buat sira nee akontese, imi hatene katak Hau besik mai ona, Hau iha ona odamatan oin.
MAR 13:30 Hau hatete lo-loos ba imi, husi ema hotu nebee mak moris iha tempu nee, iha balu sei moris too buat sira nee hotu akontese.
MAR 13:31 Lalehan ho rai sei remata, maibee Hau nia liafuan sei la remata.”
MAR 13:32 “Kona ba loron ka oras nebee mak Hau atu fila fali mai, la iha ema ida mak hatene. Anju sira iha lalehan mos la hatene, i Hau, Maromak nia Oan mos lae. So Aman Maromak deit mak hatene.
MAR 13:33 Nee duni matan moris neon nain ba. Tanba imi la hatene bainhira loos mak Hau atu fila fali mai.
MAR 13:34 Nee sei hanesan uma nain ida nebee sai husi uma atu baa iha rai dook. Nia haruka nia atan sira mak tau matan ba nia uma, i foo knaar ba atan ida-idak. Ba ida hein odamatan, nia hameno hela atu halo seguransa di-diak.
MAR 13:35 Entaun imi tenki matan moris, tanba imi la hatene bainhira loos mak uma nain fila fali mai. Nia atu mai lokraik ka kalan boot ka, dadeer-saan nakukun ka loron matan sae, imi la hatene.
MAR 13:36 Keta halo be nia fila derepenti, nia haree imi toba dukur hela.
MAR 13:37 Nunee, saida mak Hau hatete ba imi nee, Hau hatete mos ba ema hotu-hotu: Imi tenki matan moris neon nain. ”
MAR 14:1 Falta loron rua tan festa Paskua ho Festa Paun la Tau Fermentu. Nai lulik nia ulun sira ho mestri relijiaun sira buka dalan atu kaer Jesus ho nonook deit hodi oho.
MAR 14:2 Maibee sira hatete, “La bele kaer Nia iha loron festa nee, se lae povu bele halo rungu-ranga.”
MAR 14:3 Jesus baa iha aldeia Betánia hodi haan iha Simão ida nebee uluk moras lepra nia uma. Jesus sei haan hela, feto ida mai lori botir ida halo husi fatuk murak, mina morin karun teb-tebes mak iha laran. Nia baa besik Jesus, i baku rahun tiha botir nee nia ibun hodi fui mina morin ba iha Jesus nia ulun.
MAR 14:4 Ema balu iha nebaa hirus hodi dehan ba malu, “Nusaa mak nia estraga fali mina morin nee?
MAR 14:5 Se faan karik, bele hetan osan liu fali ema badaen nia salariu tinan ida nian. Depois osan nee bele foo ba ema kiak.” Nunee sira siak loos feto nee.
MAR 14:6 Maibee Jesus dehan, “Nia halo ona buat furak mai Hau. Husik nia halo ba! Imi keta hirus nia.
MAR 14:7 Ema kiak sira sempre iha imi nia leet. Bainhira deit mak imi hakarak ajuda sira, bele deit. Maibee Hau laos atu hela nafatin ho imi.
MAR 14:8 Feto nee halo tiha ona buat nebee nia bele. Nia fui mina morin nee hodi prepara Hau nia isin molok atu hakoi.
MAR 14:9 Hau hatete lo-loos ba imi, aban-bainrua bainhira ema foo sai Liafuan Diak iha mundu tomak, sira mos sei konta kona ba buat nebee mak nia halo mai Hau, atu ema hanoin nafatin nia.”
MAR 14:10 Depois Judas Iscariotes, eskolante ida husi sanulu resin rua nee, baa hasoru nai lulik nia ulun sira para bele faan Jesus ba sira.
MAR 14:11 Rona nunee sira kontenti teb-tebes, i sira promete atu foo osan ba nia. Judas mos konkorda. Nunee nia komesa buka dalan atu entrega Jesus ba sira.
MAR 14:12 Festa Paun la Tau Fermentu hahuu ona. Iha loron primeiru, ema Judeu oho bibi malae oan para kalan bele selebra festa Paskua. Iha loron nee Jesus nia eskolante sira baa husu Nia dehan, “Ita Boot hakarak ami baa prepara hahaan atu selebra festa Paskua iha nebee?”
MAR 14:13 Depois Jesus haruka Nia eskolante nain rua hodi dehan ba sira, “Imi baa iha sidade Jerusalém. Too iha nebaa imi sei hasoru mane ida lori hela sanan rai ho bee iha laran, imi tuir deit nia.
MAR 14:14 Nia tama ba uma nebee, imi mos tama hodi hatete ba uma nain nunee: ‘Mestri husu kona ba fatin nebee mak prepara ona ba Nia atu haan hamutuk ho Nia eskolante sira hodi selebra festa Paskua. Fatin nee iha nebee?’
MAR 14:15 Depois uma nain sei hatudu salaun ida iha uma andar leten, nia prepara tiha ona fatin nee. Hela deit imi nain rua baa prepara hahaan iha nebaa.”
MAR 14:16 Nunee sira nain rua baa ona. Too iha sidade, sira hetan buat hotu-hotu tuir lo-loos saida mak Jesus ohin hatete ba sira. I sira halo preparasaun ba festa Paskua iha nebaa.
MAR 14:17 Bainhira kalan ona, Jesus ho Nia eskolante nain sanulu resin rua too iha uma.
MAR 14:18 Sira haan daudaun iha meza, Jesus dehan, “Hau hatete lo-loos ba imi, husi imi sira nebee haan hamutuk ho Hau agora dadauk, ida sei faan Hau ba Hau nia inimigu sira.”
MAR 14:19 Rona nunee, Nia eskolante sira tristi teb-tebes. I sira ida-ida husu ba Nia dehan, “Laos hau, loos ka lae?”
MAR 14:20 Jesus hataan, “Ema nebee mak atu faan Hau nee, ema ida husi imi nain sanulu resin rua nebee agora haan lisuk ho Hau iha manko.
MAR 14:21 Hau, Ema Umanu nia Oan tenki mate duni tuir buat nebee hakerek tiha ona iha Livru Sagradu. Maibee ema nebee faan Hau nee, sei terus teb-tebes. Diak liu uluk kedas nia lalika moris.”
MAR 14:22 Sira haan hela, Jesus foti paun hodi foo agradese ba Maromak. Nia silu paun nee hodi fahe ba sira dehan, “Simu ba. Nee Hau nia isin.”
MAR 14:23 Depois Nia foti tua kopu ida. Nia foo agradese ba Maromak, i foo ba Nia eskolante sira hotu hemu.
MAR 14:24 Nia dehan ba sira, “Tua nee Hau nia raan. Liu husi Hau nia raan fakar mak Maromak kumpri Nia promesa hodi hamoos ema barak nia sala.
MAR 14:25 Hau hatete lo-loos ba imi, Hau sei la hemu tan tua nee. Bainhira Maromak ukun nudar Liurai iha mundu foun mak foin Hau hemu fali tua foun.”
MAR 14:26 Hotu tiha Jesus ho Nia eskolante sira kanta hamutuk hodi hahii Maromak. Depois sira sai ba iha foho Oliveira.
MAR 14:27 Jesus hatete ba Nia eskolante sira dehan, “Imi hotu-hotu sei halai husik hela Hau. Tanba iha Livru Sagradu hakerek dehan, ‘Hau sei oho tiha bibi atan, i bibi sira sei halai namkari hotu.’
MAR 14:28 Hau sei mate duni. Maibee bainhira Hau moris fali, Hau baa hein imi iha provinsia Galileia.”
MAR 14:29 Pedro hataan, “Maski sira hotu halai namkari, maibee hau sei la halai.”
MAR 14:30 Jesus dehan ba nia, “Hau hatete lo-loos ba o, iha kalan nee duni, molok manu kokoreek dala rua, o sei nega Hau dala tolu.”
MAR 14:31 Pedro hataan ho makaas dehan, “Maski hau tenki mate hamutuk ho Ita Boot mos, hau sei la nega.” Eskolante sira seluk mos hataan hanesan.
MAR 14:32 Depois sira baa iha fatin ida naran Getsémani. Too iha nebaa, Jesus hatete ba Nia eskolante sira, “Imi tuur iha nee, Hau sei baa halo orasaun lai.”
MAR 14:33 Nia lao tan uitoan, lori Pedro, Tiago ho João. Iha tempu nee Jesus nia laran susar teb-tebes i la hakmatek.
MAR 14:34 Jesus hatete ba sira nain tolu, “Hau nia laran susar teb-tebes, too senti atu besik mate ona. Imi hein iha nee hodi hadeer nafatin.”
MAR 14:35 Jesus lao tan uitoan husi sira, depois Nia taka rabat ba rai hodi harohan atu se bele karik terus ida nee la bele kona Nia.
MAR 14:36 Nia husu, “Hau nia Aman doben, Ita Boot bele halo buat hotu-hotu. Hasai tiha terus ida nee husi Hau. Maibee la bele halo tuir Hau nia hakarak, halo tuir deit Ita Boot nia hakarak.”
MAR 14:37 Depois Nia fila fali ba nia eskolante nain tolu nee, Nia haree sira toba dukur hela. Nia hatete ba Simão Pedro, “Simão, o dukur ka? O atu hadeer deit oras ida hamutuk ho Hau mos la bele ka?”
MAR 14:38 Depois Jesus hatete ba sira nain tolu dehan, “Hadeer hodi halo orasaun atu imi la bele monu ba tentasaun. Tanba imi nia laran hakarak atu halo buat nebee loos, maibee imi ema nebee fraku.”
MAR 14:39 Dala ida tan Jesus baa halo orasaun ho liafuan nebee hanesan.
MAR 14:40 Bainhira Nia fila fali, Nia haree sira nain tolu toba fali, tanba sira nia matan dukur loos. Kuandu Nia fanu tan sira, sira la hatene atu koalia saida ba Nia.
MAR 14:41 Depois Jesus baa harohan tan, ida nee dala tolu ona. Hotu tiha Nia fila fali ba Nia eskolante sira hodi dehan, “Imi sei toba deskansa ka? Too ona! Agora oras too ona atu ema faan Hau, Ema Umanu nia Oan ba iha ema aat nia liman.
MAR 14:42 Hadeer ona. Haree ba! Ema nebee mak faan Hau ba ema aat nee mai daudaun ona. Mai ita baa took iha sira.”
MAR 14:43 Jesus sei koalia hela, Judas, eskolante ida husi sira nain sanulu resin rua nee, too mai. Ema barak mai hamutuk ho nia, lori surik ho ai dona. Ema sira nee, nai lulik nia ulun sira, mestri relijiaun sira ho katuas lia nain sira mak haruka.
MAR 14:44 Molok too iha nebaa, Judas foo tiha ona sinal ba sira dehan, “Ema nebee mak hau rei, Nia mak nee, imi kaer Nia hodi lori Nia ho seguransa metin.”
MAR 14:45 Bainhira Judas too, nia baa kedas iha Jesus hodi dehan, “Mestri.” I nia rei Jesus.
MAR 14:46 Depois ema sira nee kaer Jesus.
MAR 14:47 Derepenti ema ida nebee hamriik iha nebaa losu nia surik hodi tesi kotu tiha ema ida nia tilun. Ema nee nai lulik boot nia atan.
MAR 14:48 Jesus hatete ba ema barak nee dehan, “Nusaa mak imi mai lori surik ho ai dona atu kaer Hau? Imi hanoin Hau ema kriminozu ka?
MAR 14:49 Afinal loro-loron Hau hamutuk ho imi iha area uma kreda boot hodi hanorin, i imi la kaer Hau. Maibee saida mak akontese mai Hau nee tenki sai nunee duni tanba hakerek nanis ona iha Livru Sagradu.”
MAR 14:50 Depois Jesus nia eskolante sira husik hela Nia hodi halai namkari hotu.
MAR 14:51 Iha nebaa iha mane klosan ida nebee lao tuir Jesus, nia falun nia isin ho deit hena ida. Ema balu kaer nia,
MAR 14:52 maibee nia halai sai ho isin tanan, husik hela nia hena iha sira nia liman laran.
MAR 14:53 Depois ema nebee kaer Jesus, lori Nia ba iha nai lulik boot nia uma. Iha nebaa nai lulik nia ulun sira, katuas lia nain sira ho mestri relijiaun sira hotu halibur hamutuk ona atu foo justisa ba Jesus.
MAR 14:54 Pedro lao tu-tuir Jesus husi dook deit, i tama liu ba moru laran. Depois Nia tuur hamutuk ho ema seguransa sira iha uma oin hodi haneruk ahi.
MAR 14:55 Iha uma laran, nai lulik nia ulun sira ho justisa nain relijiaun Judeu sira seluk buka hela ema atu foo sasin para bele kastigu mate Jesus. Maibee justisa nain sira la hetan sala ida atu bele kastigu Nia.
MAR 14:56 Iha ema barak mai foo testemunhu falsu. Maibee testemunhu sira nee, liafuan la haan malu.
MAR 14:57 Depois ema balu hamriik hodi foo testemunhu falsu nunee:
MAR 14:58 “Ami rona ema nee dehan, ‘Hau sei halo rahun uma kreda boot nebee ema halo ho liman nee. Depois iha loron tolu nia laran Hau sei harii fali uma kreda foun ida nebee laos ema mak halo.’ ”
MAR 14:59 Maibee sira nia liafuan nee mos la haan malu.
MAR 14:60 Depois nai lulik boot hamriik iha sira nia oin hodi husu Jesus, “Ema sira nee foo sasin tiha ona kona ba O nia sala. Nusaa mak O la hataan sira?”
MAR 14:61 Maibee Jesus nonook deit, la hataan buat ida. Nunee nai lulik boot husu tan, “O mak Mesias, Nai Maromak nia Oan ka?”
MAR 14:62 Jesus hataan, “Hau duni. Aban-bainrua imi sei haree Hau, Ema Umanu nia Oan tuur iha Maromak Kbiit Nain nia sorin loos. I imi sei haree Hau tuun mai husi lalehan iha kalohan laran.”
MAR 14:63 Rona nunee, nai lulik boot nee hirus too lees tiha nia hena hodi dehan ba justisa nain sira, “Ita hein tan sasin seluk atu halo saida?
MAR 14:64 Imi rona rasik ona Nia liafuan. Nia hatete aat Maromak! Imi foo justisa oinsaa?” Justisa nain sira hotu hatuun desizaun katak Jesus merese mate.
MAR 14:65 Depois ema balu tafui kabeen ba Jesus, sira kesi hena ba Nia matan, i baku Nia hodi husu, “He, Profeta, foo sai took, see mak baku O nee?” Depois sira entrega Jesus ba seguransa sira, i seguransa sira mos baku Nia.
MAR 14:66 Pedro sei tuur hela iha kraik iha uma oin, nai lulik boot nia kriada ida mai.
MAR 14:67 Nia haree Pedro haneruk hela ahi, nia fihir di-diak Pedro i dehan, “O mos hamutuk ho Jesus, Ema Nazaré nee.”
MAR 14:68 Maibee Pedro nega dehan, “O hatete saida mak nee? Hau la kompriende o nia liafuan.” Depois Pedro hamriik hodi baa iha portaun. [Iha momentu nee kedas, manu kokoreek.]
MAR 14:69 Kriada nee haree tan nia i hatete ba ema nebee mak hamriik besik dehan, “Ema ida nee mos Jesus nia ema.”
MAR 14:70 Pedro nega tan dala ida. La kleur ema sira nebee hamriik iha nebaa dehan ba Pedro, “O nee Nia ema duni. Tanba o mos ema Galileia.”
MAR 14:71 Maibee Pedro jura dehan, “Hau la konhese Ema nebee imi temi nee. Se hau bosok karik, husik Maromak kastigu hau ba.”
MAR 14:72 Derepenti manu kokoreek dala ida tan. Rona nunee, Pedro hanoin fila fali liafuan nebee Jesus hatete ba nia dehan, “Molok manu kokoreek dala rua, o sei nega Hau dala tolu.” Entaun Pedro tanis ho laran dodok.
MAR 15:1 Dadeer-saan deit, nai lulik nia ulun sira, katuas lia nain sira, mestri relijiaun sira ho justisa nain sira hotu foti desizaun kona ba Jesus nia mate. Entaun sira futu Nia i lori Nia baa entrega iha governador Pilatus.
MAR 15:2 Too iha nebaa Pilatus husu ba Jesus, “Loos ka? O mak ema Judeu sira nia Liurai duni ka?” Jesus hataan, “Ita dehan nee loos.”
MAR 15:3 Nai lulik nia ulun sira duun Jesus kona ba buat oi-oin deit.
MAR 15:4 Entaun Pilatus husu fila fali ba Jesus, “O lakohi hataan ka? Haree ba, sira foo sala ba O kona ba buat barak.”
MAR 15:5 Maibee Jesus la hataan buat ida, nunee Pilatus admira.
MAR 15:6 Tin-tinan, bainhira ema Judeu halo festa Paskua, povu husu governador atu hasai ema dadur ida, i governador sempre halo tuir.
MAR 15:7 Iha momentu nebaa iha ema ida naran Barabás kastigu hela iha komarka laran hamutuk ho nia maluk balu. Sira dadur hela tanba sira oho ema bainhira sira nia grupu halo rungu-ranga hasoru estadu Roma.
MAR 15:8 Iha tempu nee ema lubun boot baa husu Pilatus atu hasai tiha ema ida husi kadeia hanesan baibain.
MAR 15:9 Pilatus hataan, “Imi hakarak hau husik ema Judeu sira nia Liurai ka?”
MAR 15:10 Nia koalia nunee tanba nia hatene hela nai lulik nia ulun sira laran moras ba Jesus, nee mak sira entrega Jesus ba nia.
MAR 15:11 Maibee nai lulik nia ulun sira tau lia ba ema barak nee atu husu ba Pilatus hodi hasai tiha Barabás ba sira.
MAR 15:12 Entaun Pilatus hatete ba ema barak nee, “Se nunee hau tenki halo saida ba Ema nebee imi bolu Judeu nia Liurai nee?”
MAR 15:13 Sira hakilar makaas dehan, “Prega Nia ba krus!”
MAR 15:14 Depois Pilatus husu ba sira, “Tansaa? Nia halo krimi saida?” Maibee sira hakilar makaas liu tan, “Prega tiha Nia ba krus!”
MAR 15:15 Entaun Pilatus halo tuir sira nia hakarak hodi hasai Barabás husi kadeia. I nia haruka ema baku Jesus ho sikoti, depois entrega Jesus ba soldadu sira atu prega iha krus.
MAR 15:16 Hotu tiha soldadu sira lori Jesus ba iha governador Pilatus nia rezidensia. Sira bolu sira nia maluk soldadu sira halibur hamutuk hotu iha nebaa.
MAR 15:17 Depois sira foo hatais batina kor mean ida ba Jesus. Sira mos dulas ai tarak halo kabuar hanesan koroa liurai nian hodi tau ba Nia ulun.
MAR 15:18 Sira goza Nia hodi kumprimenta fila-fila dehan, “Viva, ema Judeu sira nia Liurai!”
MAR 15:19 Sira baku Jesus nia ulun fila-fila ho ai tonka, i tafui kabeen ba Nia. Sira mos finji hakneak hakruuk iha Nia oin.
MAR 15:20 Sira hamoe tiha Nia, sira kolu fali batina mean nee hodi foo hatais Nia hena rasik. Hotu tiha sira lori Nia sai atu baa prega iha krus.
MAR 15:21 Iha dalan klaran, iha ema ida naran Simão, Alexandre ho Rufu nia aman, husi sidade Sirene, nia mai husi foho atu tama ba sidade. Soldadu sira obriga Simão nee hulan Jesus nia krus.
MAR 15:22 Sira lori Jesus ba iha Golgota, katak “Fatin Ulun Ruin”.
MAR 15:23 Iha nebaa sira kahur tua ho aimoruk hodi foo ba Jesus, maibee Nia lakohi hemu.
MAR 15:24 Depois sira prega Jesus iha krus. I soldadu sira dada rifa atu hatene see mak bele hetan Nia hena ida-idak.
MAR 15:25 Oras nebee sira prega Jesus ba iha krus nee tuku sia dadeer.
MAR 15:26 Iha ai kabelak ida nebee hakerek razaun saida mak Jesus simu kastigu mate. Iha ai kabelak nee hakerek nunee: “Ema Judeu sira nia Liurai.”
MAR 15:27 Sira prega tan ema naok-teen boot nain rua iha krus, ida iha Jesus nia sorin loos, ida iha Nia sorin karuk.
MAR 15:28 [Nee tuir saida mak hakerek iha Livru Sagradu dehan, “Ema konsidera Nia hanesan ema nebee kontra Maromak nia lei.”]
MAR 15:29 Ema nebee liu husi fatin nee, sira doko ulun hodi koalia aat Jesus. Sira hatete, “Hei! Uluk O dehan atu halo rahun uma kreda boot, depois harii fali iha loron tolu nia laran.
MAR 15:30 Entaun salva took O nia Aan hodi tuun husi krus nee.”
MAR 15:31 Nai lulik nia ulun sira ho mestri relijiaun sira mos hatete aat Jesus. Sira dehan ba malu, “Nia salva ona ema seluk, maibee Nia la bele salva Nia Aan rasik.
MAR 15:32 Nia dehan, Nia mak Mesias, ema Israel nia Liurai, entaun diak liu agora Nia tuun husi krus atu ita haree i fiar Nia.” Ema nain rua nebee prega iha krus hamutuk ho Jesus mos hatete aat Nia fila-fila.
MAR 15:33 Komesa meudia, nakukun taka metin rejiaun nee tomak too tuku tolu lokraik.
MAR 15:34 Iha tuku tolu lokraik, Jesus hakilar ho lian makaas dehan, “Eloi, Eloi, lama sabaktani?” Nee dehan, “Hau nia Maromak, Hau nia Maromak, tansaa mak Ita Boot husik Hau mesak?”
MAR 15:35 Rona nunee, ema balu nebee hamriik besik dehan, “Imi rona ba! Nia bolu profeta Elias.”
MAR 15:36 Ema ida halai baa foti esponza rohan ida habokon ho tua siin, tau ba ai naruk ida hodi lolo ba iha Jesus nia ibun atu Nia hemu. Ema nee dehan, “Hein lai! Ita haree took, Elias mai hatuun Nia husi krus ka lae?”
MAR 15:37 Depois Jesus hakilar tan ho lian makaas, i Nia iis mos kotu.
MAR 15:38 Bainhira Jesus nia iis kotu, kurtina boot nebee taka fatin lulik iha uma kreda boot, naklees husi leten too kraik fahe tiha ba rua.
MAR 15:39 Komandante nebee hamriik iha krus oin nee haree Jesus nia mate oinsaa. I nia dehan, “Loos duni! Ema nee Maromak nia Oan.”
MAR 15:40 Iha nebaa iha senhora balu asisti husi dook deit. Sira nee mak Maria Madalena, Maria ida Tiago kiik ho José nia inan, ho mos Salomé.
MAR 15:41 Sira nain tolu nee uluk tuir Jesus iha rai Galileia hodi serbi Nia. Iha tan feto barak mak uluk mai iha Jerusalém hamutuk ho Nia.
MAR 15:42 Loron nee Sesta, loron atu prepara ba Sabadu, ema Judeu nia loron deskansa. Rai atu kalan ona,
MAR 15:43 nunee José husi sidade Arimateia brani baa hasoru Pilatus hodi husu Jesus nia mate isin. José nee membru ida nebee konhesidu iha tribunal relijiaun Judeu nian, i nia hein hela Maromak atu ukun nudar Liurai.
MAR 15:44 Bainhira Pilatus rona katak Jesus mate tiha ona, nia hakfodak. Nunee nia haruka ema baa bolu komandante mai hodi husu, Jesus mate ona ka seidauk.
MAR 15:45 Rona hotu tiha informasaun husi komandante, Pilatus foo lisensa ba José hodi foti Jesus nia mate isin.
MAR 15:46 Nunee José baa sosa hena mutin diak nian. Depois nia baa hatuun Jesus nia mate isin husi krus hodi falun ho hena nee, i nia lori baa haloot iha rate. Rate nee fatuk lolon nebee ema bahat tiha ona atu sai rate. Hotu tiha nia duir fatuk boot ida hodi taka rate kuak.
MAR 15:47 Maria Madalena ho Maria ida José nia inan haree hela fatin nebee mak sira haloot Jesus nia mate isin.
MAR 16:1 Loron Sabadu liu ona, Maria Madalena, Maria ida Tiago nia inan ho Salomé baa sosa ai been morin atu lori baa tau iha Jesus nia mate isin.
MAR 16:2 Iha Domingu dadeer-saan, bainhira loro matan foin sae, sira baa iha rate.
MAR 16:3 Iha dalan klaran sira husu ba malu, “Orsida see mak sei ajuda ita hodi duir fatuk boot nebee taka rate nee?”
MAR 16:4 Maibee too iha rate, sira hateke sae, sira haree fatuk boot teb-tebes nee muda sees tiha ona.
MAR 16:5 Depois sira tama ba iha rate laran. Sira haree ba liman loos, iha mane klosan ida hatais batina mutin tuur hela. Haree nunee sira hakfodak ho tauk.
MAR 16:6 Depois nia hatete ba sira dehan, “La bele hakfodak. Hau hatene imi buka hela Jesus, ema Nazaré, Ida nebee ema prega tiha ona ba krus nee. Nia moris fali ona, Nia la iha nee ona! Mai haree fatin nebee mak ema tau Nia mate isin nee.
MAR 16:7 Agora, imi baa foo hatene Nia eskolante sira ho mos Pedro dehan nunee: ‘Nia sei baa iha Galileia hodi hein imi, i imi sei haree Nia iha nebaa, hanesan Nia hatete tiha ona ba imi.’”
MAR 16:8 Feto sira nee hakfodak too nakdedar. Sira sai husi rate hodi halai. Sira la foo hatene ba ema ida, tanba sira tauk.
MAR 16:9 Iha Domingu dadeer-saan bainhira Jesus moris fali husi mate, Nia hatudu Nia Aan uluk ba Maria Madalena. Maria nee uluk Jesus duni sai espiritu aat hitu husi nia laran.
MAR 16:10 Haree tiha Jesus, Maria baa atu foo hatene ba ema sira nebee tuir Jesus. Too iha nebaa, sira tristi ho tanis hela.
MAR 16:11 Maibee bainhira Maria konta katak Jesus moris fali ona, i Maria haree tiha ona Nia, sira la fiar.
MAR 16:12 Depois Jesus hatudu nia Aan ba Nia eskolante nain rua nebee lao tuir dalan atu baa iha aldeia ida. Iha momentu nebaa Jesus nia oin seluk tiha.
MAR 16:13 Haree tiha Nia, sira nain rua fila fali baa foo hatene eskolante sira seluk, maibee eskolante sira seluk la fiar nafatin.
MAR 16:14 Hotu tiha Jesus hatudu Aan ba Nia eskolante sanulu resin ida. Iha tempu nebaa Nia eskolante sira haan hela, Nia hasee sira tanba sira ulun toos i lakohi fiar ema sira nebee mak haree tiha ona Nia moris fali husi mate.
MAR 16:15 Depois Jesus hatete ba sira, “Imi baa iha mundu tomak hodi foo sai Hau nia Liafuan Diak ba ema hotu-hotu.
MAR 16:16 Ema nebee fiar hodi simu batizmu, Maromak sei salva nia. Maibee see mak la fiar, sei hetan kastigu.
MAR 16:17 Sira nebee fiar mai Hau, sei halo milagre hodi hatudu Maromak nia kbiit, hanesan tuir mai nee: Sira sei duni sai diabu hodi Hau nia naran. Sira sei koalia ho lian nebee mak sira nunka aprende.
MAR 16:18 Bainhira sira kaer samea ka hemu veneno, sira diak hela. I sira tula liman ba ema moras, ema moras sira nee sei hetan kura.”
MAR 16:19 Nai Jesus koalia hotu tiha, Maromak foti Nia sae ba lalehan, i Nia tuur iha Maromak nia liman loos.
MAR 16:20 Depois Nia eskolante sira baa foo sai Liafuan Diak iha nebee-nebee. Nai Jesus servisu hamutuk ho sira. Nia foo kbiit ba sira hodi halo milagre, i milagre sira nee hatudu katak Liafuan Diak nebee sira foo sai nee loos.]
LUK 1:1 Senhor Teófilo mak hau respeita. Iha ema barak hakerek ona kona ba buat nebee mak Maromak halo ona iha ami nia leet.
LUK 1:2 Sira hakerek tuir lo-loos istoria nebee mak ami rona husi ema sira nebee akompanha Jesus nia moris husi primeiru kedas. Nia ema sira nee mak foo tutan Nia hanorin mai ami.
LUK 1:3 Hau rasik mos estuda di-diak ona istoria nee tomak husi huun too rohan. Nee duni hau desidi atu hakerek ba senhor, saida loos mak akontese,
LUK 1:4 para senhor mos bele hatene katak, buat nebee mak ema hanorin ona ba senhor kona ba Jesus, loos duni.
LUK 1:5 Istoria nee hahuu bainhira liurai Herodes sei ukun iha provinsia Judeia. Iha tempu nebaa iha nai lulik relijiaun Judeu ida naran Zacarias. Nia tama iha grupu nai lulik Abias nian. Zacarias nia kaben naran Isabel, sira nain rua husi nai lulik Arão nia jerasaun.
LUK 1:6 Sira nee ema nebee moris loos tuir Maromak haree, sira halo tuir hotu Nai Maromak nia lei.
LUK 1:7 Zacarias ho Isabel katuas ho ferik liu ona, maibee la iha oan, tanba hori uluk kedas Isabel la bele hetan oan.
LUK 1:8 Iha loron ida, Zacarias nia grupu mak baa halao servisu iha Nai Maromak nia uma kreda boot. Nunee Zacarias mos halao nia servisu hanesan nai lulik iha Maromak nia oin.
LUK 1:9 Tuir nai lulik sira nia kostumi, sira dada rifa hodi hatene see mak bele tama ba iha uma kreda boot nia laran hodi sunu ai morin iha Maromak nia oin. Iha loron nee, rifa monu ba Zacarias.
LUK 1:10 Entaun Zacarias tama ba laran. Bainhira nia sunu ai morin, ema barak halo hela orasaun iha liur.
LUK 1:11 Derepenti deit Nai Maromak nia anju ida mosu mai, hamriik iha altar sunu ai morin nian, iha sorin loos.
LUK 1:12 Haree nunee, Zacarias hakfodak i tauk teb-tebes.
LUK 1:13 Maibee anju nee hatete, “Zacarias, la bele tauk! Tanba Maromak rona ona o nia orasaun. O nia kaben Isabel sei tuur ahi, oan mane ida. O tenki tau nia naran João.
LUK 1:14 Nia sei halo imi nia laran haksolok teb-tebes. Bainhira nia moris mai, ema barak sei haksolok hamutuk ho imi.
LUK 1:15 Nai Maromak sei konsidera nia hanesan ema boot ida. Durante nia vida tomak, imi nia oan nee la bele hemu tua. I Espiritu Santu sei domina nia dezde iha nia inan nia kabun laran.
LUK 1:16 Nia sei lori ema Israel barak fila fali ba Maromak, sira nia Nai.
LUK 1:17 João nia espiritu ho kbiit sei hanesan Maromak nia profeta Elias. João sei mai uluk hodi prepara povu atu simu ita nia Nai. Depois mak foin ita nia Nai mai. João sei halo aman sira nia laran hadomi fila fali sira nia oan. I ema sira nebee fila kotuk ba Maromak, nia sei halo sira tuir fali Maromak nia hakarak.”
LUK 1:18 Zacarias husu ba anju nee, “Hau katuas liu ona, i hau nia kaben mos ferik liu ona. Oinsaa mak hau bele hatene katak buat nee loos?”
LUK 1:19 Anju hataan, “Hau Gabriel. Hau sempre hamriik iha Maromak nia futar oin. I Nia rasik mak haruka hau mai hatoo lia menon nee ba o.
LUK 1:20 Maibee o la fiar hau nia liafuan. Nee duni komesa agora o sei la koalia tan too labarik nee moris. Tanba too tempu nebee Maromak desidi, buat sira nee sei sai duni.”
LUK 1:21 Ema barak nebee halo hela orasaun iha liur, hein Zacarias atu sai mai. Sira admira tanba nia kleur iha laran.
LUK 1:22 Depois, bainhira nia sai mai, nia la koalia liafuan ida ba sira. Nia halo sinal deit ho liman, maibee koalia la diak. Entaun sira kompriende katak, Maromak hatudu sinal ruma ba nia iha uma kreda laran.
LUK 1:23 Too nia tempu servisu iha uma kreda boot hotu ona, Zacarias fila ba uma.
LUK 1:24 La kleur nia kaben Isabel isin rua. Durante fulan lima, Isabel hela deit iha uma laran.
LUK 1:25 Nia dehan, “Nai Maromak mak halo ida nee mai hau. Nia hatudu Nia laran diak mai hau, para ema ida la bele hamoe tan hau.”
LUK 1:26 Bainhira Isabel isin rua fulan neen ona, Maromak haruka anju Gabriel baa iha aldeia Nazaré iha provinsia Galileia
LUK 1:27 hodi hasoru feto raan ida naran Maria. Menina nee troka prenda ona ho mane ida naran José, husi liurai David nia jerasaun.
LUK 1:28 Entaun anju Gabriel baa hasoru Maria hodi kumprimenta nia dehan, “Maria, Nai Maromak foo bensaun boot ba o, i Nia hamutuk ho o.”
LUK 1:29 Rona nunee, Maria sai bilaan tiha hodi hanoin, liafuan nee dehan saida loos.
LUK 1:30 Maibee anju hatutan tan dehan, “Maria, keta tauk! Tanba Maromak nia domin ba o boot teb-tebes.
LUK 1:31 La kleur tan, o sei isin rua, i sei tuur ahi, oan mane ida. O tenki tau Nia naran Jesus.
LUK 1:32 Nia sei sai boot teb-tebes. I Maromak Aas Liu sei bolu Nia dehan, ‘Hau nia Oan.’ Nai Maromak sei foti Nia hodi kaer ukun, hanesan Nia bei-ala liurai David.
LUK 1:33 O nia oan nee mak sei ukun ema Israel tinan ba tinan nafatin. Nia ukun sei la remata.”
LUK 1:34 Maria husu ba anju, “Oinsaa mak hau bele isin rua? Hau seidauk hola mane.”
LUK 1:35 Anju hataan, “Espiritu Santu sei tuun ba iha o, i Maromak Aas Liu nia kbiit sei hamahon o. Nunee, labarik nebee atu moris mai nee, santu teb-tebes, i ema sei bolu Nia ‘Maromak nia Oan’.
LUK 1:36 Laos nee deit. O nia maluk Isabel mos kous ona, maski nia ferik liu ona. Ema dehan nia la bele hetan oan, maibee agora nia isin rua fulan neen ona.
LUK 1:37 Tanba Maromak bele halo buat hotu-hotu.”
LUK 1:38 Maria hataan, “Hau Nai Maromak nia atan. Hau hein buat hotu-hotu sai tuir ita boot nia liafuan.” Depois anju husik tiha nia.
LUK 1:39 La kleur Maria prepara aan hodi baa lalais iha Zacarias nia uma iha aldeia ida iha foho provinsia Judeia nian. Too iha nebaa, nia tama liu ba uma laran hodi kumprimenta Isabel.
LUK 1:41 Bainhira Isabel rona Maria nia liafuan, bebee iha nia kabun laran book aan kedas. Espiritu Santu domina Isabel,
LUK 1:42 i nia koalia sai ho lian makaas dehan, “Maromak foo bensaun ba o liu feto hotu-hotu, i foo bensaun mos ba o nia Oan nebee atu moris mai.
LUK 1:43 Maromak foo buat diak liu mai hau, too hau nia Nai nia inan mai vizita hau!
LUK 1:44 Bainhira hau rona anoi kumprimenta hau, labarik iha hau nia kabun laran book aan kedas tanba haksolok.
LUK 1:45 Nai Maromak foo bensaun ba o, tanba o fiar katak buat nebee Nia promete ona ba o, sei akontese duni.”
LUK 1:46 Maria dehan, “Ho hau nia laran tomak hau hahii Nai Maromak!
LUK 1:47 Hau nia laran haksolok, tanba Maromak hau nia Salvador.
LUK 1:48 Nia tau matan mai hau, Ninia atan kiik ida. Komesa agora ba oin, ema hotu sei konsidera hau nudar ema ida nebee simu bensaun boot husi Maromak,
LUK 1:49 tanba Maromak Forsa Teb-tebes halo ona buat furak mai hau. Nia naran santu.
LUK 1:50 Maromak sempre hatudu laran luak ba ema hotu nebee respeita i adora Nia, husi jerasaun ba jerasaun.
LUK 1:51 Nia hatudu Nia forsa hodi halo ema nebee foti aan halai namkari.
LUK 1:52 Nia hatuun ukun nain sira husi sira nia kadeira, maibee Nia foti aas ema nebee haraik aan.
LUK 1:53 Nia foo hahaan mesak di-diak deit ba ema nebee hamlaha, too sira bosu, maibee Nia haruka ema riku sai ho liman mamuk.
LUK 1:54 Nia tulun Nia atan ema Israel sira, i sempre hatudu Nia laran luak ba sira.
LUK 1:55 Nunee Maromak halo tuir Nia promesa uluk ba ita nia avoo Abraão ho nia jerasaun too tinan ba tinan.”
LUK 1:56 Maria hela ho Isabel durante fulan tolu nia laran, depois fila ba nia uma.
LUK 1:57 Bainhira nia tempu too ona, Isabel tuur ahi, oan mane ida.
LUK 1:58 Nia familia ho ema nebee hela besik rona katak, Nai Maromak hatudu ona Nia laran luak ba Isabel, i sira hotu haksolok hamutuk ho nia.
LUK 1:59 Kuandu bebee nee halo ona loron walu, sira halibur malu para sunat nia, tuir ema Judeu nia lisan. Sira atu tau naran ba labarik nee, Zacarias, tuir nia aman nia naran.
LUK 1:60 Maibee nia inan dehan, “La bele! Nia naran mak João.”
LUK 1:61 Sira hataan, “Maibee iha imi nia familia tomak la iha ema ida mak naran João.”
LUK 1:62 Entaun sira foo sinal ba Zacarias para buka hatene, nia hakarak foo naran saida.
LUK 1:63 Depois Zacarias halo sinal husu ai kabelak oan ida hodi hakerek. I nia hakerek dehan, “Nia naran João.” Sira hotu admira.
LUK 1:64 Iha momentu nee kedas, Zacarias bele koalia fali, i nia komesa hahii Maromak.
LUK 1:65 Ema nebee hela besik, sira hotu tauk ho admira. Iha foho-foho provinsia Judeia nian, ema hotu-hotu koalia kona ba buat nee.
LUK 1:66 I see-see deit mak rona, hanoin dehan, “Aban-bainrua labarik nee sei sai saida loos?” Tanba sira hatene katak Nai Maromak nia kbiit iha nia.
LUK 1:67 Depois Espiritu Santu domina João nia aman Zacarias, i nia foo tutan Maromak nia lia menon nunee:
LUK 1:68 “Hahii Maromak, ema Israel nia Nai! Tanba Nia mai ona para foo liberdade ba Nia povu.
LUK 1:69 Maromak foti ona Ema ida husi Nia atan David nia jerasaun. Ema nee nia kbiit boot teb-tebes hodi salva ita.
LUK 1:70 Nunee Maromak halo tuir buat nebee Nia promete tiha ona hori uluk liu husi Nia profeta sira.
LUK 1:71 Ema nee sei salva ita husi ita nia inimigu, i husi ema hotu-hotu nebee odi ita.
LUK 1:72 Maromak halo nunee para hatudu Nia laran luak ba ita nia bei-ala sira hodi kumpri Nia promesa ba sira.
LUK 1:73 Uluk Nia jura ba ita nia avoo Abraão katak,
LUK 1:74 Nia sei hasai ita husi ita nia inimigu sira nia liman laran, atu ita la tauk tan hodi serbi Nia,
LUK 1:75 i bele moris loos ho laran moos iha Nia oin durante ita nia vida tomak.”
LUK 1:76 Depois Zacarias hatete ba nia oan, “Hau nia oan, ema sei bolu o Maromak Aas Liu nia profeta. O sei baa uluk hodi prepara povu atu simu sira nia Nai mai.
LUK 1:77 O sei foo hatene ba Maromak nia povu dehan, Maromak sei hamoos sira nia sala hodi salva sira,
LUK 1:78 tanba ita nia Maromak nee laran luak teb-tebes. Nunee loro matan sei sae, lori naroman husi lalehan tuun mai ita
LUK 1:79 hodi leno ema nebee moris iha nakukun laran ho ema nebee tauk mate, hodi lori ita ba dalan dame nian.”
LUK 1:80 Loron ba loron, João boot ba dadauk, i nia espiritu mos forti ba beibeik. Depois nia baa hela iha rai fuik maran too tempu nebee nia hahuu nia servisu iha ema Israel sira nia leet.
LUK 2:1 Iha tempu nebaa liurai boot César Augusto foo orden para estadu Roma tenki halo sensus hodi rejistu nia povu hotu-hotu.
LUK 2:2 Nee foin primeira ves mak sira halo sensus, i momentu nebaa, governador Kirinu mak ukun iha provinsia Síria.
LUK 2:3 Entaun ema hotu-hotu fila ba ida-idak nia knua hodi rejistu.
LUK 2:4 José mos sai husi Nazaré iha Galileia hodi baa rejistu iha liurai David nia moris fatin Belém iha provinsia Judeia, tanba José husi liurai David nia jerasaun.
LUK 2:5 Nia lori mos Maria, tanba sira nain rua troka prenda ona. Iha tempu nebaa, Maria isin rua hela.
LUK 2:6 Sira too iha Belém, Maria nia loron hodi tuur ahi too ona.
LUK 2:7 Nia tuur ahi nia oan mane boot. Nia falun ho neras, i hatoba iha animal nia haan fatin, tanba la iha fatin ba sira hodi hela.
LUK 2:8 Iha kalan nee, bibi atan balu hein hela sira nia bibi malae iha rai luan besik Belém.
LUK 2:9 Derepenti deit Nai Maromak nia anju ida mosu ba sira, i naroman husi Nai Maromak haleu sira, halo sira tauk teb-tebes.
LUK 2:10 Maibee anju hatete, “Lalika tauk! Hau mai hatoo liafuan diak ida ba imi. Liafuan nee sei halo ema hotu haksolok boot.
LUK 2:11 Ohin imi nia Salvador moris iha liurai David nia moris fatin Belém. Nia mak imi nia Nai. I Nia mak Mesias, Ema nebee Maromak promete ona hori uluk atu haruka mai.
LUK 2:12 Sinal atu hatene Nia mak nee: Imi sei hetan Kosok Oan ida falun hela ho neras i toba hela iha animal nia haan fatin.”
LUK 2:13 Derepenti anju lubuk boot ida husi lalehan mosu hamutuk ho anju nee. Sira hotu hahii Maromak dehan,
LUK 2:14 “Foti aas Maromak nia naran. Nia tuur iha fatin aas liu. Maromak foo pas ba ema iha mundu nebee Nia hadomi liu.”
LUK 2:15 Depois anju sira fila fali ba lalehan. I bibi atan sira hatete ba malu, “Mai ita baa Belém hodi haree buat nebee Nai Maromak foo hatene ona mai ita.”
LUK 2:16 Entaun sira baa kedas. Too iha nebaa, sira hetan Maria ho José ho Kosok Oan. Kosok Oan nee toba hela iha animal nia haan fatin.
LUK 2:17 Haree tiha Labarik nee, bibi atan sira konta ba ema hotu, saida mak anju sira hatete ona ba sira kona ba Labarik nee.
LUK 2:18 Ema hotu nebee rona bibi atan sira nia liafuan, sira admira.
LUK 2:19 Maibee Maria rai hela buat sira nee hotu iha nia laran hodi hanoin di-diak buat sira nee dehan saida.
LUK 2:20 Depois bibi atan sira fila fali ba hein sira nia bibi. Sira hahii Maromak hodi foti aas Nia naran tanba buat nebee sira rona i haree nee tuir lo-loos saida mak anju foo hatene ona ba sira.
LUK 2:21 Liu tiha loron walu, tempu too ona atu halao serimonia sunat ba Kosok Oan nee, Nia inan-aman tau Nia naran Jesus. Naran nee mak anju foo hatene ba Nia inan, bainhira nia seidauk isin rua.
LUK 2:22 La kleur tempu mos too para José ho Maria halo tuir Moisés nia lei kona ba feto nebee foin tuur ahi. Entaun sira nain rua baa sidade Jerusalém hodi halo tuir lei nee. Sira lori mos Kosok Oan Jesus ba iha uma kreda boot hodi aprezenta ba Nai Maromak.
LUK 2:23 Nunee sira halo tuir Nai Maromak nia lei ida nebee dehan, “Ema hotu-hotu tenki entrega sira nia oan mane boot ba Nai Maromak.”
LUK 2:24 Tuir Nai Maromak nia lei, inan-aman mos tenki foo lakateu par ida ka manu pombu oan rua hanesan sakrifisiu. José ho Maria mos halo tuir.
LUK 2:25 Tempu nebaa, iha katuas ida naran Simeão hela iha sidade Jerusalém. Nia ema ida nebee moris loos i hamtauk Maromak. Nia hein hela Maromak atu salva ema Israel. Espiritu Santu domina nia,
LUK 2:26 i foo hatene ona ba nia katak, nia sei haree tiha Mesias, Ida nebee Nai Maromak promete hori uluk ona, nee mak foin nia mate.
LUK 2:27 Iha loron nee, Maromak nia Espiritu foo hanoin ba Simeão para baa iha area uma kreda boot nian. Nunee, bainhira José ho Maria lori Jesus baa entrega ba Maromak hodi kumpri lei,
LUK 2:28 Simeão mos iha nebaa. Depois nia kous Kosok Oan nee hodi hahii Maromak dehan,
LUK 2:29 “Nai, Ita Boot kumpri ona Ita Boot nia promesa mai hau ata. Agora Ita Boot bele husik ona hau mate ho hakmatek.
LUK 2:30 Tanba hau nia matan haree ona Ema nebee mak Ita Boot haruka mai atu salva ami.
LUK 2:31 Ita Boot prepara ona Nia para nasaun hotu-hotu bele haree.
LUK 2:32 Nia sai naroman ba nasaun sira seluk, i halo Ita Boot nia povu Israel sai naran boot.”
LUK 2:33 Bainhira Jesus nia inan-aman rona buat nebee Simeão hatete kona ba sira nia Oan, sira admira.
LUK 2:34 Depois Simeão foo bensaun ba sira, i hatete ba Jesus nia inan Maria, “Maromak desidi ona katak, ema Israel barak sei monu tanba la simu Labarik nee, maibee sira seluk Nia sei foti sae. Nia sei hatudu sai Maromak nia planu, maibee ema barak sei koalia kontra Nia.
LUK 2:35 Ho nunee, sira sei hatudu lo-loos saida mak iha sira nia laran. I Maria, o mos sei laran tristi teb-tebes, hanesan surik sona borus o nia laran.”
LUK 2:36 Iha uma kreda boot, iha mos Maromak nia profeta ida naran Ana. Nia aman naran Fanuel, husi suku Asér. Nia ferik loos ona. Uluk nia kaben, maibee liu tiha tinan hitu, nia laen mate,
LUK 2:37 husik nia faluk. Too tempu nee nia halo tinan walu-nulu resin haat tiha ona. Nia nunka husik uma kreda boot, maibee hela iha nebaa hodi adora Maromak loron-kalan ho orasaun i ho jejun.
LUK 2:38 Simeão sei koalia hela ho José ho Maria, profeta Ana mos too mai. Nia hahii Maromak, i foo sai kona ba Jesus ba ema hotu nebee hein hela Maromak atu foo liberdade ba povu Israel.
LUK 2:39 Bainhira José ho Maria halo tuir tiha hotu Nai Maromak nia lei, sira fila fali ba sira nia aldeia Nazaré iha provinsia Galileia.
LUK 2:40 Jesus boot ba dadauk, isin mos diak ho forti. Nia matenek teb-tebes, i Maromak foo bensaun ba Nia.
LUK 2:41 Tin-tinan Jesus nia inan-aman baa iha sidade Jerusalém hodi tuir festa Paskua.
LUK 2:42 Bainhira Jesus tinan sanulu resin rua, sira baa hamutuk tuir festa hanesan baibain.
LUK 2:43 Paskua hotu ona, Jesus nia inan-aman fila fali ba Nazaré, maibee Jesus sei hela iha Jerusalém. Nia inan-aman la hatene. Sira hanoin Jesus lao hamutuk ho Nia maluk sira, tanba iha ema barak lao rame-rame. Nunee sira lao tiha loron tomak mak foin buka Nia iha maluk ho kolega sira nia leet.
LUK 2:45 Maibee sira buka la hetan, entaun sira fila fali ba Jerusalém hodi buka Nia iha nebaa.
LUK 2:46 Liu tiha loron tolu foin Nia inan-aman hetan Nia iha area uma kreda boot nian. Nia tuur hamutuk hela ho mestri relijiaun sira hodi rona sira i husu pergunta ba sira.
LUK 2:47 Ema hotu-hotu nebee rona, admira teb-tebes, tanba Nia hatene klean i hataan mestri sira nia pergunta ho matenek.
LUK 2:48 Haree nunee, Nia inan-aman mos admira. Depois Nia inan dehan, “Oan, nusaa mak O halo nunee mai ami? O nia aman ho hau laran susar hodi buka O tuun-sae!”
LUK 2:49 Maibee Jesus hataan, “Tansaa mak apaa ho amaa tenki buka Hau? Tuir loos imi hatene katak, Hau tenki iha Hau nia Aman nia uma.”
LUK 2:50 Maibee sira la kompriende saida mak Nia hatete.
LUK 2:51 Depois Jesus fila ba Nazaré hamutuk ho Nia inan-aman, i halo tuir sira nia hakarak. Nia inan rai buat sira nee hotu iha nia laran.
LUK 2:52 Jesus boot ba dadauk i Nia matenek mos aumenta ba beibeik. Nia halo Maromak Nia laran haksolok, i ema mos gosta Nia.
LUK 3:1 Bainhira liurai boot Tibério César ukun besik tinan sanulu resin lima ona iha Roma, Pónsiu Pilatus mak governador iha provinsia Judeia. Herodes ukun iha Galileia, Herodes nia maun Filipe ukun iha Itureia ho Trakonitis, i Lisánias ukun iha Abilene.
LUK 3:2 Anás ho Kaifás mak nai lulik boot. Iha tempu nebaa, Zacarias nia oan João hela iha rai fuik maran, i Maromak hatoo lia menon ba nia iha nebaa.
LUK 3:3 Entaun João baa iha fat-fatin besik mota Jordaun hodi foo sai ba povu dehan, “Imi tenki hakribi ona imi nia sala hodi mai sarani, para Maromak hamoos imi nia sala.”
LUK 3:4 Maromak nia profeta Isaias hakerek nanis ona kona ba João dehan, “Iha ema ida foo sai ho lian makaas iha rai fuik maran dehan, ‘Imi tenki hadia dalan para simu ita nia Nai. Halo loos dalan para Nia lao tuir.
LUK 3:5 Tate rai iha foho-foho nia leet halo tetuk, kee foho hotu-hotu halo tetuk tiha. Dalan nebee kleuk, halo loos tiha, dalan nebee aat, halo kabeer tiha.
LUK 3:6 Depois ema hotu-hotu iha mundu sei haree Ema nebee mak Maromak haruka mai atu salva sira.’”
LUK 3:7 Ema barak mai husi fat-fatin hodi husu para João foo sarani sira. Maibee nia siak sira dehan, “Hoi! Samea nia oan! Maromak sei kastigu imi tanba imi nia hahalok aat. See mak bosok imi dehan, imi bele mai sarani para sees aan husi kastigu nee.
LUK 3:8 Imi tenki muda imi nia hahalok hodi hatudu katak imi husik duni imi nia sala. I lalika hanoin dehan, imi loos ona tanba deit imi Abraão nia jerasaun. Lae! Hau hatete ba imi, fatuk sira nee mos, Maromak bele halo sai Abraão nia jerasaun.
LUK 3:9 Maromak hanesan toos nain nebee kaer hela baliu atu tesi ona ai huun too abut. Ai huun hotu-hotu nebee la foo fuan diak, Nia sei tesi tiha hodi soe ba ahi laran.”
LUK 3:10 Ema lubuk boot nee husu, “Entaun, ami tenki halo saida?”
LUK 3:11 João hataan, “Se o iha faru tahan rua, foo ida ba ema nebee la iha. Se o iha hahaan, fahe mos ba ema nebee la iha.”
LUK 3:12 Iha mos kobrador impostu balu mai atu sarani. Sira husu dehan, “Mestri, ami tenki halo saida?”
LUK 3:13 Nia hataan, “La bele husu impostu liu fali governu haruka.”
LUK 3:14 Iha mos militar balu husu ba João, “Ami tenki halo saida?” Nia hataan, “La bele obriga ema foo osan ba imi. La bele duun matak ema. Salariu nebee imi simu, natoon ona.”
LUK 3:15 Ema hotu-hotu iha nebaa laran metin katak buat diak ruma atu mosu. Sira hanoin dehan, “Keta halo be João nee mak Mesias, Ida nebee Maromak promete atu haruka mai!”
LUK 3:16 Maibee João hatete ba sira hotu, “Hau foo sarani imi ho bee deit. Maibee la kleur tan, Ema ida boot liu hau sei mai. Atu kore deit Nia sandalias talin mos, hau la serve. Ema nee laos foo sarani imi ho bee, maibee Nia sei foo sarani imi hodi Espiritu Santu ho mos ahi.
LUK 3:17 Nia hanesan natar nain nebee prontu ona atu haketak hare isin ho hare kulit sira nee. Hotu tiha, hare isin nia sei rai di-diak iha nia armazen, maibee hare kulit nia soe tiha ba ahi ida nebee nunka mate.”
LUK 3:18 Nunee João foo hanoin ba ema ho dalan oi-oin hodi foo sai Maromak nia Liafuan Diak ba sira.
LUK 3:19 Maibee João kritika liurai Herodes, tanba liurai hadau nia alin rasik nia feen Herodias hodi kaben fali ho nia. João mos foo sala ba nia hahalok aat sel-seluk tan.
LUK 3:20 Maibee Herodes halo buat aat liu tan, nia haruka kaer João hatama ba komarka.
LUK 3:21 Molok João tama komarka, iha loron ida, nia foo sarani ema barak, nia mos foo sarani Jesus. Sarani tiha, Jesus halo hela orasaun, lalehan nakloke,
LUK 3:22 i Espiritu Santu tuun ba Nia, haree ba hanesan manu pombu ida. Depois lian ida husi lalehan hatete, “O mak Hau nia Oan doben. O halo Hau nia laran haksolok teb-tebes.”
LUK 3:23 Bainhira Jesus komesa halao Maromak nia servisu, Nia tinan maizoumenus tolu-nulu. Ema konhese Nia nudar José nia Oan. José nia bei-ala sira mak hanesan tuir mai nee: José nia aman Eli.
LUK 3:24 Eli nia aman Matat. Matat nia aman Levi. Levi nia aman Melki. Melki nia aman Janai. Janai nia aman José.
LUK 3:25 José nia aman Matatias. Matatias nia aman Amós. Amós nia aman Nahum. Nahum nia aman Esli. Esli nia aman Nagai.
LUK 3:26 Nagai nia aman Maat. Maat nia aman Matatias. Matatias nia aman Semei. Semei nia aman Josek. Josek nia aman Jodá.
LUK 3:27 Jodá nia aman Joanan. Joanan nia aman Resa. Resa nia aman Zorobabel. Zorobabel nia aman Salatiel. Salatiel nia aman Neri.
LUK 3:28 Neri nia aman Melki. Melki nia aman Adi. Adi nia aman Kosam. Kosam nia aman Elmadam. Elmadam nia aman Er.
LUK 3:29 Er nia aman Josué. Josué nia aman Eliezer. Eliezer nia aman Jorim. Jorim nia aman Matat. Matat nia aman Levi.
LUK 3:30 Levi nia aman Simeão. Simeão nia aman Judá. Judá nia aman José. José nia aman Jonam. Jonam nia aman Eliakim.
LUK 3:31 Eliakim nia aman Melea. Melea nia aman Mená. Mená nia aman Matatá. Matatá nia aman Natan. Natan nia aman David.
LUK 3:32 David nia aman Jessé. Jessé nia aman Obed. Obed nia aman Boaz. Boaz nia aman Salmon. Salmon nia aman Nahason.
LUK 3:33 Nahason nia aman Aminadab. Aminadab nia aman Admin. Admin nia aman Arni. Arni nia aman Hesron. Hesron nia aman Perez. Perez nia aman Judá.
LUK 3:34 Judá nia aman Jacó. Jacó nia aman Isac. Isac nia aman Abraão. Abraão nia aman Tera. Tera nia aman Naor.
LUK 3:35 Naor nia aman Serug. Serug nia aman Reú. Reú nia aman Peleg. Peleg nia aman Eber. Eber nia aman Xela.
LUK 3:36 Xela nia aman Kenán. Kenán nia aman Arpaxad. Arpaxad nia aman Sem. Sem nia aman Noé. Noé nia aman Lamek.
LUK 3:37 Lamek nia aman Matusalém. Matusalém nia aman Enoke. Enoke nia aman Jared Jared nia aman Malaliel. Malaliel nia aman Kenán.
LUK 3:38 Kenán nia aman Enos. Enos nia aman Set. Set nia aman Adão. Adão, Aman Maromak mak halo.
LUK 4:1 Sarani hotu tiha, Jesus husik mota Jordaun. Maromak nia Espiritu domina hela Nia i lori Nia ba iha rai fuik maran.
LUK 4:2 Iha nebaa, Satanás koko Jesus durante loron haat-nulu atu halo Nia monu ba sala. Iha tempu nee tomak, Jesus la haan buat ida, too Nia hamlaha.
LUK 4:3 Depois Satanás dehan ba Nia, “Se O Maromak nia Oan duni, haruka fatuk nee sai paun.”
LUK 4:4 Maibee Jesus hataan, “Iha Livru Sagradu hakerek, ‘Ema kriatura laos moris husi hahaan deit.’”
LUK 4:5 Depois Satanás lori Jesus sae ba iha fatin aas ida, i hatudu kedas ba Jesus nasaun hotu-hotu iha mundu tomak.
LUK 4:6 Satanás dehan ba Jesus, “Hau sei foo kbiit ba O para ukun nasaun sira nee hotu, i sei foo sira nia riku-soin hotu ba O. Tanba buat sira nee hotu hau nian ona, i hau bele foo ba see-see deit, konformi hau.
LUK 4:7 Hau foo hotu ba O, naran katak O hakneak hodi adora hau.”
LUK 4:8 Maibee Jesus hataan fali, “Iha Livru Sagradu haruka ema hotu-hotu nunee: ‘O tenki adora Maromak, o nia Nai, i serbi mak Nia deit.’”
LUK 4:9 Depois Satanás lori Jesus ba iha sidade Jerusalém, i lori Nia baa hamriik iha uma kreda boot nia tutun. Satanás dehan, “Se O Maromak nia Oan duni, soe Aan tuun ba rai.
LUK 4:10 Tanba iha Livru Sagradu hakerek dehan, ‘Maromak sei haruka Nia anju sira mai kuidadu O.
LUK 4:11 Sira sei lolo liman hodi tane O, atu O nia ain la bele kona fatuk.’”
LUK 4:12 Maibee Jesus hataan, “Iha Livru Sagradu mos dehan, ‘La bele koko Maromak, o nia Nai!’”
LUK 4:13 Ho nunee Satanás koko Jesus ho dalan oi-oin deit. Hotu tiha, Satanás husik hela Jesus hodi hein fali tempu diak para koko tan.
LUK 4:14 Hotu tiha, Jesus fila fali ba provinsia Galileia, i Maromak nia Espiritu domina hela Nia. Ema iha rejiaun nee tomak komesa konta ba-mai kona ba Nia.
LUK 4:15 Jesus hanorin iha ema Judeu sira nia uma kreda iha fat-fatin, i ema hotu gaba Nia.
LUK 4:16 Iha loron ida, Jesus baa iha Nia aldeia Nazaré. Iha loron Sabadu, Nia baa iha uma kreda hanesan baibain. Depois Nia hamriik atu lee Livru Sagradu.
LUK 4:17 Sira foo profeta Isaias nia livru, i Nia loke hodi buka liafuan nebee dehan,
LUK 4:18 “Nai Maromak nia Espiritu hamutuk ho Hau. Tanba Nia foti ona Hau para foo sai Liafuan Diak ba ema kiak sira. Nia haruka ona Hau foo hatene dehan, ema dadur sira sei livre fali, ema matan delek sira sei haree, sira nebee ema hanehan, sei moris livre,
LUK 4:19 i tempu too ona para Nai Maromak hatudu Nia laran diak.”
LUK 4:20 Lee tiha hotu, Jesus taka livru hodi entrega fila fali ba responsavel, depois Nia tuur. Ema hotu-hotu iha uma kreda laran fihir ba Nia,
LUK 4:21 i Nia hatete ba sira, “Maromak nia liafuan nebee imi ohin rona nee, ohin loron sai realidade duni.”
LUK 4:22 Ema hotu komesa gaba Jesus. Sira admira tanba buat nebee Nia koalia nee kapaas loos. Maibee sira mos husu ba malu, “Nia nee José nia oan. Oinsaa mak Nia bele koalia hanesan nee?!”
LUK 4:23 Jesus hatete ba sira, “Imi atu soe lia ida nee mai Hau, ‘Doutor, kura ita boot nia aan lai!’ Imi sei dehan, ‘Ami rona kona ba milagre nebee Ita Boot halo iha sidade Kafarnaum. Entaun halo took milagre nee iha Ita Boot nia aldeia rasik!’
LUK 4:24 Maibee Hau hatete lo-loos ba imi, ema nunka simu Maromak nia profeta iha nia aldeia rasik.
LUK 4:25 Hanesan iha profeta Elias nia tempu, udan la monu rai durante tinan tolu ho balu, too rai hamlaha boot. Momentu nebaa, iha duni feto faluk barak iha Israel,
LUK 4:26 maibee Maromak la haruka Elias ba sira. Nia haruka fali ba iha inan faluk ida iha aldeia Sarepta besik sidade Sidon.
LUK 4:27 Nunee mos ho profeta Eliseu. Iha tempu nebaa ema Israel barak moras lepra. Maibee Maromak la kura sira, Nia so kura deit Naaman husi rai Síria.”
LUK 4:28 Rona Jesus koalia nunee, ema hotu iha uma kreda laran hirus teb-tebes.
LUK 4:29 Sira hamriik rame-rame hodi obriga Nia sai husi vila. Vila nee iha foho leten, nunee sira lori Nia baa tan uitoan atu dudu tuun ba iha rai naruk.
LUK 4:30 Maibee Jesus lao sai husi sira nia leet hodi baa liu fatin seluk.
LUK 4:31 Depois Jesus tuun baa sidade Kafarnaum iha provinsia Galileia. Iha loron Sabadu Nia hanorin iha uma kreda.
LUK 4:32 Nia hanorin nee halo ema admira, tanba Nia hanorin ho kbiit.
LUK 4:33 Iha uma kreda laran, iha mos mane ida, diabu domina hela nia. Ema nee komesa hakilar makaas dehan,
LUK 4:34 “Hoi! Jesus, Ema Nazaré. O hakarak halo saida ba ami? O mai atu halakon ami ka? Hau hatene O. O mak Ema Santu nebee Maromak haruka mai.”
LUK 4:35 Maibee Jesus siak diabu dehan, “Nonook! Sai husi ema nee!” Derepenti diabu riba ema nee ba rai iha sira hotu nia oin, i diabu sai husi nia, la halo kanek nia.
LUK 4:36 Ema hotu admira hodi hatete ba malu, “Liafuan nee makaas! Ema nee nia liafuan iha kbiit. Too Nia foo orden ba diabu atu sai, diabu mos sai kedas.”
LUK 4:37 Entaun ema konta ba-mai kona ba Jesus iha rejiaun nee tomak.
LUK 4:38 Bainhira Jesus sai husi uma kreda, Nia baa iha Simão nia uma. Momentu nee Simão nia banin feto isin manas makaas, i nia maluk sira husu Jesus atu kura nia moras.
LUK 4:39 Entaun Jesus lao baa hamriik iha nia sorin hodi haruka nia isin manas nee sai. Derepenti nia moras nee lakon, i nia hadeer kedas baa prepara hahaan ba sira.
LUK 4:40 Bainhira loro monu dadauk, ema barak lori sira nia maluk sira nebee moras oi-oin ba iha Jesus. Nia tau liman ba sira ida-ida hodi kura sira nia moras hotu.
LUK 4:41 Nia mos haruka diabu sai husi ema barak nia laran, i sira sai duni hodi hakilar dehan, “O mak Maromak nia Oan!” Maibee Jesus siak diabu sira nee i bandu sira la bele koalia, tanba sira hatene katak Nia mak Mesias, Salvador nebee Maromak promete hori uluk ona atu haruka mai.
LUK 4:42 Iha fali aban dadeer rai huun mutin, Jesus husik tiha sidade hodi baa iha rai fuik ida. Ema barak buka Nia iha nebee-nebee. Bainhira sira hetan tiha Nia, sira husu ba Nia atu la bele husik hela sira.
LUK 4:43 Maibee Nia hataan, “Hau mos tenki baa iha aldeia sira seluk hodi foo sai Liafuan Diak kona ba oinsaa Maromak ukun nudar Liurai. Tanba Maromak haruka Hau mai hodi halo ida nee.”
LUK 4:44 Nunee Nia lao nafatin husi aldeia ba aldeia iha provinsia Judeia hodi hanorin iha sira nia uma kreda.
LUK 5:1 Iha loron ida, Jesus hamriik iha tasi ibun Galileia hodi hanorin Maromak nia liafuan, I ema barak mai hobur Nia hodi rona.
LUK 5:2 Iha nebaa iha mos peskador balu fase hela redi iha tasi ibun. Jesus haree roo mamuk rua para hela iha tasi ninin,
LUK 5:3 roo ida Simão nian. Jesus baa sae roo nee hodi husu Simão dudu ba tasi laran uitoan. I Jesus hanorin ema barak nee husi roo laran.
LUK 5:4 Hanorin tiha hotu, Jesus dehan ba Simão, “Hean roo ba iha tasi klean hodi hatuun redi, para bele hetan ikan.”
LUK 5:5 Simão hataan, “Mestri, ami servisu makaas kalan tomak ona, la hetan buat ida. Maibee tanba Ita Boot haruka mak ami mos halo tuir.”
LUK 5:6 Nunee sira baa hatuun redi. Bainhira sira dada sae fali, sira hetan ikan barak teb-tebes too redi atu naklees.
LUK 5:7 Entaun sira foo sinal ba sira nia kolega iha roo seluk para mai ajuda. Sira mai, hotu-hotu hamutuk raut ikan tau ba roo rua nee nakonu, too roo besik atu mout.
LUK 5:8 Bainhira sira haree saida mak akontese, Simão Pedro ho nia kolega sira iha roo laran nee admira teb-tebes. Nia maluk peskador Tiago ho João, Zebedeu nia oan, mos admira. Entaun Simão baa hakneak kedas iha Jesus nia ain hodi dehan, “Nai, Ita Boot keta besik hau, tanba hau ema sala nain.” Maibee Jesus hataan, “Lalika tauk. Imi baibain buka ikan. Maibee komesa agora imi sei buka fali ema para tuir Hau.”
LUK 5:11 Depois sira dada sira nia roo ba iha rai maran, i husik tiha buat hotu-hotu hodi tuir Jesus.
LUK 5:12 Iha aldeia ida, Jesus hasoru mane ida, nia isin nakonu ho moras lepra. Bainhira ema nee haree Jesus, nia baa hakneak hakruuk too rai iha Jesus nia oin hodi husu tulun dehan, “Nai, Ita Boot iha kbiit atu kura hau nia moras hodi halo hau nia isin sai moos fali, naran katak Ita Boot hakarak.”
LUK 5:13 Jesus lolo liman ba tau iha nia isin hodi dehan, “Hau hakarak. O diak ona ba!” I ema nee nia moras lakon kedas.
LUK 5:14 Depois Jesus haruka nia dehan, “La bele konta buat nee ba ema seluk. Maibee baa aprezenta aan iha nai lulik, atu nia haree katak o nia isin moos ona. Depois foo oferta tuir lei nebee Maromak foo ba Moisés, para ema hotu bele hatene katak o diak ona.”
LUK 5:15 Maski Jesus bandu, maibee istoria kona ba Jesus ema konta liu tan, too iha fat-fatin. Nunee ema barak nadodon mai atu rona Nia hanorin i hetan kura.
LUK 5:16 Maibee dala barak Jesus sees aan ba iha rai fuik hodi halo orasaun.
LUK 5:17 Iha loron ida, Jesus hanorin hela iha uma ida. Iha ema husi grupu Farizeu ho mestri relijiaun balu tuur besik hodi rona. Sira balu husi aldeia ida-ida iha provinsia Galileia, balu husi provinsia Judeia, i balu husi sidade Jerusalém. Tempu nee, Nai Maromak foo kbiit ba Jesus para kura ema moras.
LUK 5:18 Iha momentu nee, iha mos mane ida liman-ain mate, nia maluk sira hulan nia mai iha nia toba fatin. Sira hakaas aan atu lori ema nee tama ba uma laran atu hatoba iha Jesus nia oin.
LUK 5:19 Maibee iha uma laran ema nakonu, too sira obriga atu tama mos, tama la diak. Entaun sira lori nia sae ba iha uma leten, i sira sobu uma kakuluk halo kuak hodi hatuun nia ho nia toba fatin iha ema barak nia klaran, iha loos Jesus nia oin.
LUK 5:20 Jesus haree sira nia fiar, i hatete ba ema ain aat nee dehan, “Belun, o nia sala hamoos tiha ona.”
LUK 5:21 Rona Jesus koalia nunee, ema Farizeu ho mestri relijiaun sira komesa koalia ba malu dehan, “Nia hanoin Nia Maromak ka? So Maromak deit mak bele hamoos ema nia sala! Nia liafuan nee hatete aat Maromak.”
LUK 5:22 Maibee Jesus hatene sira nia hanoin, i Nia dehan, “Nusaa mak imi hanoin nunee?
LUK 5:23 Se Hau dehan ba ema nee katak, nia sala hamoos tiha ona, imi seidauk hatene, sai duni nunee ka lae. Maibee se Hau haruka nia hamriik ona hodi lao, imi bele haree ho matan.
LUK 5:24 Agora Hau sei hatudu mo-moos ba imi katak, iha mundu nee Hau, Ema Umanu nia Oan, iha kbiit hodi hamoos ema nia sala.” Nunee Jesus hatete ba ema liman-ain mate nee dehan, “Hamriik ona! Foti o nia toba fatin hodi fila ba uma.”
LUK 5:25 Ema nee hamriik kedas iha ema hotu-hotu nia oin, foti nia toba fatin, i fila ba uma. Nia lao dadauk, hahii dadauk Maromak iha dalan.
LUK 5:26 Ema hotu-hotu hakfodak i admira teb-tebes. Sira hahii Maromak dehan, “Buat nee kapaas teb-tebes, iha ita nia moris foin mak ita haree.”
LUK 5:27 Hotu tiha Jesus sai husi uma nee, Nia hetan kobrador impostu ida naran Levi tuur hela iha nia servisu fatin. Jesus dehan ba nia, “Mai tuir Hau!”
LUK 5:28 Levi hamriik kedas i husik tiha buat hotu-hotu hodi tuir Jesus.
LUK 5:29 La kleur Levi halo festa boot ida hodi konvida Jesus baa iha nia uma. Nia mos konvida nia kolega kobrador impostu sira ho bainaka sira seluk.
LUK 5:30 Maibee iha mestri relijiaun balu husi grupu Farizeu ho mos ema Farizeu balu tan, sira baa iha Jesus nia eskolante sira hodi kritika dehan, “Nusaa mak imi haan-hemu hamutuk fali ho kobrador impostu ho ema aat sira nee?”
LUK 5:31 Jesus hatete ba sira, “So ema moras mak presiza doutor, ema isin diak lae.
LUK 5:32 Hau mai atu bolu ema sala nain sira atu husik sira nia sala, laos atu bolu ema nebee konsidera nia aan moris loos ona.”
LUK 5:33 Depois ema Farizeu sira nee hatete ba Jesus dehan, “João Sarani Nain nia eskolante sira jejun i halo orasaun beibeik. Ema Farizeu sira nia eskolante sira mos hanesan. Maibee nusaa mak ita boot nia eskolante sira haan-hemu hela deit?”
LUK 5:34 Jesus hataan ho komparasaun dehan, “Hau hanesan noivu ida nebee selebra nia festa kazamentu. Bainhira noivu sei hamutuk ho nia bainaka sira, sira bele jejun ka? La bele!
LUK 5:35 Maibee too iha loron ida, ema sei lori lakon tiha noivu nee. Iha loron nee mak nia bainaka sira sei jejun.”
LUK 5:36 Jesus halo tan komparasaun nunee: “La iha ema ida lees nia ropa foun hodi taka fali ba ropa bosan nebee kuak. Se nunee, nia estraga nia ropa ida foun nee. I hena foun ho hena bosan nee mos la haan malu.
LUK 5:37 Nunee mos ema halo tua, la tau iha tua fatin nebee halo husi kulit nebee tuan ona. Tanba tua foun sempre nafurin sae hodi halo kulit tuan nee nakfera tanba toos tiha ona. Nunee tua mos bele fakar sai.
LUK 5:38 Tua foun, tenki tau iha tua fatin foun.
LUK 5:39 Maibee kuandu ema hemu ona tua nebee rai kleur, nia lakohi ona hemu tua nebee foun, tanba tuir nia hanoin, tua nebee rai kleur ona mak diak liu.”
LUK 6:1 Iha loron Sabadu ida, Jesus ho Nia eskolante sira lao liu husi ema nia toos. Nia eskolante sira korut dadauk trigu musan, i dulas halo moos hodi haan.
LUK 6:2 Iha ema husi grupu Farizeu haree, i sira hasee Jesus dehan, “Nusaa mak imi servisu iha loron Sabadu? Ida nee kontra ita nia lei relijiaun!”
LUK 6:3 Jesus hataan, “Imi lee tiha ona liurai David nia istoria. Nusaa mak imi la kompriende nafatin? Iha loron ida David ho nia ema sira hamlaha loos.
LUK 6:4 Nia tama ba tenda orasaun. Iha nebaa iha paun nebee nai lulik sira oferese ona ba Maromak. Tuir lo-loos, so nai lulik sira deit mak bele haan paun nee. Maibee David foti tiha paun nee hodi haan, i nia fahe mos ba nia ema sira haan.”
LUK 6:5 Jesus hatutan tan, “Hau, Ema Umanu nia Oan mak loron Sabadu nia Nain. Hau mak iha direitu atu desidi, ema bele halo saida iha loron nee.”
LUK 6:6 Iha loron Sabadu ida fali, Jesus baa hanorin iha uma kreda. Iha uma kreda laran, iha mane ida, nia liman sorin mate.
LUK 6:7 Iha mos ema Farizeu ho mestri relijiaun balu buka hela dalan atu foo sala ba Jesus. Entaun sira haree tu-tuir, Nia atu kura ema iha loron Sabadu ka lae.
LUK 6:8 Maibee Jesus hatene tiha ona sira nia hanoin. Nee mak Nia bolu ema liman sorin mate nee hodi dehan, “Mai hamriik iha oin.” I nia mos baa.
LUK 6:9 Depois Jesus husu ba ema sira nee, “Tuir ita nia lei relijiaun, ita bele halo saida iha loron Sabadu? Ita bele halo diak ka, aat? Ita bele salva ema ka, halakon ema nia vida?”
LUK 6:10 Jesus hateke ba sira ida-ida, depois Nia dehan ba ema liman sorin mate nee, “Lolo o nia liman mate nee mai!” Ema nee lolo nia liman ba, diak kedas.
LUK 6:11 Haree nunee, ema Farizeu ho mestri relijiaun sira raan nakali. I sira komesa kombina malu oinsaa atu hamonu Jesus.
LUK 6:12 Iha loron seluk, Jesus sae ba foho ida hodi halo orasaun ba Maromak. Nia halo orasaun durante kalan tomak.
LUK 6:13 Iha dadeer-saan fali, Nia bolu ema sira nebee tuir Nia. I husi sira nee, Nia hili ema nain sanulu resin rua hodi foti sira sai Nia apostolu. Sira nee mak tuir mai nee:
LUK 6:14 Simão (Jesus mos bolu nia Pedro), André (Simão nia alin), Tiago, João, Filipe, Bartolomeu,
LUK 6:15 Mateus, Tomé, Tiago (nia Alfeu nia oan), Simão (ema bolu nia Patriota),
LUK 6:16 Judas (Tiago nia oan), ho Judas Iscariotes (ikus mai nia mak faan Jesus).
LUK 6:17 Hotu tiha Jesus ho Nia apostolu sira tuun mai husi foho nee. Too iha rai tetuk oan ida, sira para, tanba iha ema lubun boot ida hein hela sira iha nebaa. Husi ema sira nee, iha barak mak baibain tuir Nia. Iha mos ema bar-barak mai husi sidade Jerusalém ho provinsia Judeia tomak, i husi sidade Tiru ho Sidon besik tasi ibun.
LUK 6:18 Sira mai atu rona Jesus nia liafuan i atu Jesus kura sira nia moras. Ema nebee diabu tama iha sira nia laran mos, Jesus duni sai diabu hodi kura sira nia moras.
LUK 6:19 Ema hotu-hotu buka dalan atu kona Jesus, tanba iha kbiit sai husi Nia hodi kura sira hotu.
LUK 6:20 Jesus hateke ba Nia eskolante sira hodi dehan, “Imi nebee kiak, imi simu bensaun nunee: Imi Maromak nia reinu.
LUK 6:21 Imi nebee agora hamlaha, imi simu bensaun nunee: Maromak sei halo imi bosu. Imi nebee agora tanis, imi simu bensaun nunee: Imi sei hamnasa.
LUK 6:22 Bainhira ema odi imi, lakohi simu imi, tarata imi i duun dehan imi ema aat, tanba tuir Hau, Ema Umanu nia Oan, imi simu bensaun.
LUK 6:23 Kuandu ema halo imi terus nunee, haksolok deit ba, i haksoit ho kontenti, tanba Maromak sei foo premiu boot ba imi iha lalehan. Keta haluha katak, sira nia bei-ala sira uluk mos halo terus Maromak nia profeta hanesan nee.
LUK 6:24 Maibee imi nebee agora riku, imi sei terus, tanba imi goza tiha hotu ona.
LUK 6:25 Imi nebee agora hahaan iha hela deit, imi sei terus, tanba imi sei hamlaha boot. Imi nebee agora hamnasa, imi sei terus, tanba imi sei tanis halerik.
LUK 6:26 Imi nebee mak ema hotu-hotu gaba, imi sei terus, tanba ema nebee gaba imi, sira nia bei-ala sira mos uluk gaba profeta falsu sira.”
LUK 6:27 Jesus hatutan tan dehan, “Imi nebee rona hela Hau, Hau hatete ba imi nunee: Hadomi o nia inimigu sira, i halo diak ba ema nebee odi o.
LUK 6:28 Harohan para Maromak foo bensaun ba ema nebee foo malisan ba o. Husu para Nia tulun ema nebee halo aat ba o.
LUK 6:29 Se ema ruma basa o nia hasan sorin karik, foo tan hasan sorin ba. Se ema ruma hadau o nia faru manas, hasai tan o nia faru seluk foo ba nia.
LUK 6:30 Se ema husu o nia sasaan ruma, foo deit ba. Se ema hadau o nia sasaan ruma, husik deit ba, la bele baa husu fali.
LUK 6:31 Buat nebee mak o hakarak atu ema seluk halo ba o, o mos tenki halo buat nee ba ema seluk.
LUK 6:32 Se o hadomi deit ema nebee mak hadomi o, o atu manaan saida? Tanba ema aat sira mos hadomi ema nebee mak hadomi sira.
LUK 6:33 Se o halo diak deit ba ema nebee mak halo diak ba o, o atu manaan saida? Tanba ema aat sira mos halo nunee.
LUK 6:34 I se o foo empresta osan ba deit ema nebee bele selu fila fali, o atu manaan saida? Tanba ema aat sira mos foo empresta ba malu, naran katak selu fila fali.
LUK 6:35 Maibee tuir lo-loos hanesan nee: Hadomi o nia inimigu sira, i halo diak ba sira. Foo empresta ba sira, i lalika hein atu sira selu fila fali. Ho nunee, o sei hetan premiu boot, i o sei hatudu katak, o Maromak Aas Liu nia oan. Tanba Maromak mos halo diak ba ema aat ho ema nebee la hatene foo obrigadu.
LUK 6:36 Nee duni o tenki hatudu laran luak ba ema, hanesan mos o nia Aman iha lalehan hatudu laran luak ba sira.”
LUK 6:37 Jesus hanorin nafatin dehan, “La bele ansi foo sala ba ema mak ema mos la ansi foo sala ba o. La bele hatudu liman ba ema, para ema la bele hatudu liman ba o. Foo perdaun ba ema mak ema mos foo perdaun ba o.
LUK 6:38 Foo tulun ba ema mak Maromak sei foo fila fali ba o barak liu too nakonu resin. Nee hanesan ema enxe sasaan nakonu, depois sena tan, doko tan too fakar sai iha ita nia hitin. Se o foo uitoan, o sei simu fali mos uitoan. Maibee se o foo barak, o sei simu fali mos barak.”
LUK 6:39 Jesus mos halo komparasaun dehan, “Ema matan delek ida, nia la bele hatudu dalan ba ema matan delek seluk. Se lae, sira nain rua monu hotu ba rai kuak.
LUK 6:40 Estudante ida la bele boot liu nia mestri, maibee se nia estuda too remata, nia bele hanesan nia mestri.
LUK 6:41 Nusaa mak o haree ai uut iha ema seluk nia matan, maibee ai kabelak nebee taka o nia matan rasik, o la senti?
LUK 6:42 Oinsaa mak o brani dehan, ‘Belun, mai hau hasai tiha ai uut nee husi o nia matan.’ Afinal iha ai kabelak ida taka hela o nia matan rasik. Imi nee koalia oin seluk, hahalok oin seluk! Hasai tiha uluk ai kabelak iha o nia matan rasik mak foin o haree hetan para bele hasai ai uut husi o nia maluk nia matan.”
LUK 6:43 Jesus halo tan komparasaun ida nunee: “Ai huun nebee diak nia fuan mos diak. I ai huun nebee la diak nia fuan mos la diak.
LUK 6:44 Ema hatene ai huun ida-idak liu husi nia fuan. Ita la kuu uvas ka ai fuan figeira husi ai tarak.
LUK 6:45 Nunee mos ho ema. Ema nebee diak koalia buat diak, tanba nia laran mos diak. I ema nebee aat koalia buat aat, tanba nia laran mos aat. Tanba buat nebee nia koalia, sai husi nia laran.”
LUK 6:46 Jesus hatutan tan dehan, “Imi bolu beibeik Hau dehan, ‘Nai, Nai.’ Maibee nusaa mak imi la halo tuir buat nebee Hau haruka?
LUK 6:47 Ema nebee rona Hau nia liafuan i halo tuir, nia hanesan
LUK 6:48 ema nebee harii uma ida. Nia kee rai halo klean hodi hatama uma riin ba, i tau tan fatuk hodi halo metin. Nunee kuandu mota boot halo bee baku makaas ba uma nee mos, uma nee la nakdoko, tanba nia riin metin.
LUK 6:49 Maibee ema nebee rona Hau nia liafuan i la halo tuir, nia hanesan ema nebee harii uma, nia riin tidin deit iha rai leten. Bainhira mota boot tama, bee sobu rahun kedas.”
LUK 7:1 Jesus hanorin tiha hotu ema barak nee, Nia fila fali ba sidade Kafarnaum.
LUK 7:2 Iha nebaa iha komandante Roma ida. Nia iha atan ida nebee nia hadomi teb-tebes, atan nee moras todan, besik atu mate.
LUK 7:3 Bainhira komandante nee rona kona ba Jesus, nia haruka katuas lia nain Judeu balu baa bolu Jesus atu mai kura atan nee nia moras.
LUK 7:4 Too iha nebaa, sira husu ho laran tomak atu Jesus baa kura atan nee. Sira dehan, “Komandante nee serve duni atu Ita Boot tulun nia,
LUK 7:5 tanba nia hadomi ita ema Judeu, i harii ona uma kreda ida ba ita.”
LUK 7:6 Entaun Jesus baa hamutuk ho sira. Sira besik too ona iha uma, komandante haruka nia kolega balu baa hatete ba Jesus dehan, “Nai, Ita Boot la presiza lao kole too mai, tanba hau la serve atu simu Ita Boot iha hau nia uma.
LUK 7:7 I hau mos la serve atu baa hasoru Ita Boot. Nai foo deit orden ba moras nee mak moras nee sai husi hau nia atan.
LUK 7:8 Hau hatene nunee tanba hau nia komandante sira mos iha kbiit atu foo orden mai hau. Nunee mos, hau iha kbiit atu foo orden ba hau nia soldadu sira. Se hau manda hau nia soldadu ida dehan, ‘Baa nebaa!’, nia mos baa. Se hau hatete, ‘Mai iha nee!’, nia mai. I se hau haruka hau nia atan dehan, ‘Halo ida nee!’ mak nia sei halo.”
LUK 7:9 Rona nunee, Jesus admira, i Nia fila oin ba ema barak nebee tuir Nia nee hodi dehan, “Hau hatete lo-loos ba imi, Hau seidauk haree ema Israel ida nebee fiar makaas hanesan ema Roma nee.”
LUK 7:10 Entaun komandante nia kolega sira nee fila fali. Too iha uma, sira haree atan nee diak tiha ona.
LUK 7:11 La kleur tan, Jesus ho Nia eskolante sira baa iha vila ida naran Nain. Ema barak akompanha sira.
LUK 7:12 Bainhira sira besik ona portaun atu tama ba vila, ema barak sai mai hulan mate isin ida atu baa hakoi. Ida mate nee, feto faluk ida nia oan mane mesak.
LUK 7:13 Bainhira Nai Jesus haree feto faluk nee, Nia hanoin teb-tebes hodi dehan, “Keta tanis tan.”
LUK 7:14 Depois Jesus baa besik hodi tau liman ba hadak nebee mak tula mate isin nee, i ema sira nebee hulan mate nee para tiha. Jesus dehan ba ema mate nee, “Anoo, hadeer ona.”
LUK 7:15 Joven nee mos hadeer tuur kedas hodi komesa koalia. I Jesus entrega nia fila fali ba nia inan.
LUK 7:16 Ema hotu iha nebaa tauk teb-tebes, i sira hahii Maromak dehan, “Maromak nia profeta boot ida mai tiha ona iha ita nia leet. Maromak mai ona hodi salva Nia povu.”
LUK 7:17 Buat nee, ema konta lemo-lemo iha provinsia Judeia tomak, ho mos too rai vizinhu sira.
LUK 7:18 João Sarani Nain nia eskolante sira konta ba João kona ba buat hotu-hotu nebee mak Jesus halo. Entaun João haruka eskolante nain rua
LUK 7:19 baa hasoru Nai Jesus hodi husu, “Ita Boot mak Ema ida nebee Maromak promete atu haruka mai ka, ami tenki hein fali ema seluk?”
LUK 7:20 Sira too iha Jesus, sira mos husu, “João Sarani Nain haruka ami mai husu, Ita Boot mak Ema ida nebee Maromak promete atu haruka mai ka, ami tenki hein fali ema seluk?”
LUK 7:21 Iha tempu nee, Jesus kura hela ema moras barak. Nia duni sai diabu husi ema lubun ida, i halo ema matan delek barak mos haree.
LUK 7:22 Entaun Jesus hataan ba João nia eskolante sira nunee: “Imi fila baa konta ba João kona ba buat hotu-hotu nebee imi ohin haree ho saida mak imi rona. Ema matan delek bele haree. Ema ain aat bele lao. Ema moras lepra, isin sai moos. Ema tilun diuk bele rona. Ema mate moris fila fali. I ema kiak rona Liafuan Diak.
LUK 7:23 Hatete mos ba João dehan, ‘Ema nebee fiar nafatin mai Hau too rohan, nia hetan bensaun.’”
LUK 7:24 Bainhira sira nain rua fila tiha, Jesus komesa koalia kona ba João. Nia husu ema barak nebee haleu Nia nunee: “Uluk imi baa iha rai fuik maran atu haree see loos? Imi baa atu haree ema nebee nakdoko ba-mai tuir anin hanesan fali duut manulain ka? Lae!
LUK 7:25 Entaun imi baa atu haree saida? Atu haree ema nebee hatais hena folin karun ka? Lae! Ema nebee hatais hena diak i moris diak, hela iha uma ema boot nian.
LUK 7:26 Entaun imi baa atu haree saida? Imi hanoin atu haree Maromak nia profeta ka? Loos duni! Maibee João nee boot liu fali profeta.
LUK 7:27 Nia nee uluk kedas Livru Sagradu temi tiha ona dehan, ‘Rona mai! Hau haruka Hau nia ema ida baa uluk hodi prepara dalan ba O.’
LUK 7:28 Hau hatete ba imi, hori uluk kedas, la iha ema ida iha mundu nee boot liu João. Maski nunee komesa agora ba oin, see mak hakruuk ba Maromak nudar Liurai, bele ema nee kiik mos, nia sei liu fali João.”
LUK 7:29 Ema hotu-hotu nebee rona Jesus nia liafuan nee, liu-liu kobrador impostu sira, sira rekonhese katak, Maromak nia dalan mak loos, nee mak uluk João sarani sira.
LUK 7:30 Maibee ema husi grupu Farizeu sira ho mestri relijiaun Judeu sira lakohi tuir Maromak nia hakarak. Nee mak sira lakohi atu João foo sarani sira.
LUK 7:31 Depois Jesus husu, “Ema agora dadauk nee, oinsaa? Hau atu kompara sira ho saida?
LUK 7:32 Sira hanesan labarik nebee tuur iha merkadu hodi hakilar ba malu dehan, ‘Ami toka muzika kapaas loos, maibee imi la dansa. Ami tanis lelir, maibee imi la tanis.’
LUK 7:33 Nunee mos João Sarani Nain mai, nia la hemu tua, i sempre jejun, depois imi dehan, diabu tama iha nia laran.
LUK 7:34 Maibee Hau, Ema Umanu nia Oan mai, Hau haan ho hemu tua hanesan ema baibain, depois imi dehan, Hau kaan-teen ho lanu-teen, i halo belun ho kobrador impostu sira ho ema aat sira.
LUK 7:35 Maibee ema hotu-hotu nebee moris tuir Maromak nia matenek, sira hatudu katak Maromak nia matenek nee loos duni.”
LUK 7:36 Iha ema Farizeu ida naran Simão, nia konvida Jesus baa haan iha nia uma. Entaun Jesus baa. Too iha uma, sira tuur iha meza atu haan.
LUK 7:37 Iha sidade nee, iha mos feto aat ida, nia rona katak Jesus haan iha Simão nia uma. Nunee nia kaer botir ida halo husi fatuk murak, mina morin karun teb-tebes mak iha laran. Nia lori tama ba uma laran
LUK 7:38 hodi hamriik iha Jesus nia kotuk, besik loos Nia ain. Nia tanis too nia matan been turu kona Jesus nia ain, depois hamaran matan been nee ho nia fuuk. I nia mos rei Jesus nia ain fila-fila hodi kose mina morin ba.
LUK 7:39 Haree feto nee nia hahalok, uma nain ema Farizeu nee, hanoin dehan, “Se Jesus nee Maromak nia profeta karik, entaun Nia sei hatene feto nebee kona Nia nee, feto aat ida.”
LUK 7:40 Maibee Jesus hatene uma nain nia hanoin, i Nia dehan, “Simão, Hau hakarak hatete buat ida ba ita.” Simão hataan, “Bele, mestri, koalia deit.”
LUK 7:41 Depois Jesus soe lia ba nia dehan, “Iha senhor ida foo empresta osan ba ema nain rua. Ba ida, nia foo osan mutin atus lima, ba ida seluk, nia foo deit osan mutin lima-nulu.
LUK 7:42 Maibee too iha loron atu foo fila fali osan nee, sira nain rua selu la bele. Entaun senhor nee hamoos tiha sira nain rua nia tusan. Tuir ita nia hanoin, husi sira nain rua nee, ida nebee mak sei hadomi liu osan nain nee?”
LUK 7:43 Simão hataan, “Ida nebee tusan boot liu karik.” Jesus dehan, “Loos duni!”
LUK 7:44 Depois Nia fila oin ba feto nee, i hatete ba Simão, “Ita haree took feto nee. Ohin Hau tama iha ita nia uma, ita la prepara bee hodi fase Hau nia ain tuir ita nia lisan. Maibee nia habokon Hau nia ain ho nia matan been, depois nia hamaran ho nia fuuk.
LUK 7:45 I ohin Hau tama iha ita nia uma, ita la rei Hau tuir ita nia lisan. Maibee feto nee, komesa ohin Hau tama mai iha nee, nia rei Hau nia ain fila-fila.
LUK 7:46 Ita mos haluha tau mina mai Hau nia ulun, maibee nia tau mina morin ba Hau nia ain.
LUK 7:47 Nunee, Hau hatete ba ita katak, feto nee maski halo sala barak, maibee nia sala hamoos hotu tiha ona. Nee mak nia hatudu domin boot mai Hau. Maibee se karik ema halo sala uitoan deit, bainhira nia sala nee hamoos tiha ona, ema nee hadomi mos uitoan deit.”
LUK 7:48 Depois Jesus hatete ba feto nee, “O nia sala hamoos tiha hotu ona.”
LUK 7:49 Ema sira nebee tuur haan hamutuk ho Jesus nee komesa bis-bisu ba malu dehan, “Nia hanoin Nia nee see?! Too Nia bele brani dehan Nia hamoos ema nia sala.”
LUK 7:50 Maibee Jesus hatete ba feto nee, “Tanba o fiar Hau, nee mak Maromak salva ona o. Fila ho laran hakmatek.”
LUK 8:1 Hotu tiha, Jesus lao husi sidade ba sidade ho aldeia ba aldeia hodi foo sai Liafuan Diak kona ba oinsaa Maromak ukun nudar Liurai. Nia eskolante nain sanulu resin rua akompanha Nia.
LUK 8:2 Iha mos feto balu nebee tuir. Sira nee uluk iha moras oi-oin, balu diabu tama iha sira nia laran, maibee Jesus kura tiha hotu. Ida mak Maria Madalena, uluk Jesus duni sai diabu hitu husi nia.
LUK 8:3 Iha mos Joana ho Susana. Joana nia kaben Kuza mak toma konta liurai Herodes nia uma. Sei iha tan feto barak lao hamutuk ho Jesus. Sira hodi sira nia osan rasik ajuda sustenta Jesus ho Nia eskolante sira.
LUK 8:4 Iha loron ida, ema husi aldeia oi-oin mai iha Jesus. Bainhira ema barak halibur hamutuk ona, Jesus halo komparasaun ida hanesan nee:
LUK 8:5 “Iha toos nain ida baa kari fini iha nia toos. Fini balu monu iha dalan. Ema sama deit, i manu fuik mai haan tiha hotu.
LUK 8:6 Fini balu monu iha fatuk leten. Fini nee moris duni, maibee la kleur namlaik tiha, tanba rai uitoan deit.
LUK 8:7 Fini balu monu iha duut tarak laran. Buat rua nee moris hamutuk, maibee la kleur duut tarak nee habit tiha too mate.
LUK 8:8 Iha tan fini balu monu iha rai bokur, i moris too foo isin. Fini sira nee, ida-idak foo fali musan atus ida.” Konta tiha hotu, Jesus hatete ho lian makaas, “Imi nebee iha tilun, rona di-diak ba!”
LUK 8:9 Depois Jesus nia eskolante sira husu ba Nia, komparasaun nee dehan saida.
LUK 8:10 Jesus hataan, “Uluk ema seidauk hatene, oinsaa mak Maromak ukun nudar Liurai. Agora Hau foo sai mo-moos ba imi. Maibee ba ema seluk, Hau hanorin uza deit komparasaun, atu nunee ‘sira haree hela maibee hanesan la haree, sira rona hela maibee la kompriende.’”
LUK 8:11 Jesus hatutan tan, “Komparasaun nee dehan nunee: Fini nee mak Maromak nia liafuan.
LUK 8:12 Fini nebee monu iha dalan mak ema nebee rona Maromak nia liafuan, maibee Satanás mai hadau tiha husi sira nia laran. Entaun sira la fiar ba Maromak, i la hetan salvasaun.
LUK 8:13 Fini nebee monu iha fatuk leten mak ema nebee rona Maromak nia liafuan i simu ho haksolok, maibee sira nia abut la tama ba rai. Sira fiar duni, maibee kuandu provasaun ruma kona sira, sira husik fali.
LUK 8:14 Fini nebee monu iha duut tarak laran mak ema nebee rona Maromak nia liafuan, maibee sira preokupa ho sira nia moris ho sira nia riku-soin, i buka goza deit. Nunee, sira nia fiar la baa oin, i sira nia moris nunka foo rezultadu diak.
LUK 8:15 Maibee fini nebee monu iha rai bokur mak ema nebee moris loos ho laran moos. Bainhira sira rona Maromak nia liafuan, sira rai di-diak iha sira nia laran hodi kaer metin nafatin too foo rezultadu diak teb-tebes.”
LUK 8:16 Jesus halo tan komparasaun ida nunee: “La iha ema ida mak sunu ahi-oan, depois taka tiha ho sanan ka tau fali iha kama okos. Maibee ahi-oan tenki tau iha fatin aas, atu bele foo naroman ba ema nebee tama mai.
LUK 8:17 Nunee mos, buat hotu-hotu nebee agora sei subar hela, iha loron ida sei hatudu mo-moos. I buat hotu-hotu nebee agora taka hela, iha loron ida sei nakloke para ema bele hatene.
LUK 8:18 Nunee, imi tenki rona Hau nia hanorin ho atensaun. Tanba ema nebee kompriende ona, Maromak sei halo nia kompriende liu tan. Maibee ema nebee lakohi hatene, buat uitoan nebee nia kompriende tiha ona mos, Maromak sei hasai husi nia hanoin.”
LUK 8:19 Iha loron ida, Jesus nia inan ho Nia alin mane sira mai atu hasoru Nia, maibee sira la konsege besik, tanba ema barak haleu hela Nia.
LUK 8:20 Iha ema ida foo hatene ba Jesus dehan, “Ita Boot nia inan ho alin sira hamriik hela iha liur. Sira hakarak hasoru Ita Boot.”
LUK 8:21 Maibee Jesus hataan, “Hau nia inan ho Hau nia alin sira mak ema nebee rona Maromak nia liafuan hodi halo tuir.”
LUK 8:22 Iha loron ida, Jesus hatete ba Nia eskolante sira, “Mai ita baa iha tasi sorin.” Entaun sira sae roo hodi baa.
LUK 8:23 Roo lao dadauk, Jesus toba dukur tiha. La kleur anin boot mai, halo tasi been tama ba roo laran, too roo atu mout sal-sala.
LUK 8:24 Nia eskolante sira fanu Nia dehan, “Mestri, mestri, ita atu mout ona!” Jesus hadeer hodi siak anin ho laloran boot nee. Anin para kedas, tasi mos hakmatek fali.
LUK 8:25 Depois Nia siak Nia eskolante sira dehan, “Nusaa mak imi la fiar Hau?” Sira tauk ho admira hodi husu ba malu dehan, “Ema nee see loos? Nia foo orden ba anin ho laloran, sira mos halo tuir!”
LUK 8:26 Jesus ho Nia eskolante sira ho roo too rai Gerasa, iha tasi Galileia nia sorin ba.
LUK 8:27 Iha fatin nee, iha mane ida, diabu tama iha nia laran kleur ona. Nia husi sidade, maibee la hela iha uma, hela deit iha rate, i la hatais buat ida. Diabu ataka nia dala barak ona. Ema kesi nia liman-ain beibeik ho korenti besi i hein nia loron-kalan, maibee nia sempre rasta kotu tiha korenti, depois diabu obriga nia halai ba iha rai fuik. Momentu Jesus tuun husi roo, ema bulak nee mai hasoru Nia. Ema nee hakilar i hakneak hakruuk too rai iha Jesus nia ain. Depois Jesus haruka diabu sai husi nia. Ema bulak nee hakilar dehan, “Jesus, Maromak Aas Liu nia Oan, O hakarak halo saida mai hau? Hau husu boot, keta kastigu hau!”
LUK 8:30 Jesus husu ba nia, “O naran saa?” Nia hataan, “Batalhaun”. Nia hataan nunee tanba diabu barak loos hela iha nia laran.
LUK 8:31 Depois diabu sira husu beibeik ba Jesus atu la bele haruka sira baa iha rai kuak klean nakukun nian.
LUK 8:32 Iha momentu nebaa iha fahi barak teb-tebes haan hela iha foho lolon. Diabu sira husu fila-fila ba Jesus para husik sira tama iha fahi sira nee. I Jesus foo lisensa.
LUK 8:33 Entaun diabu sira sai tiha husi ema nee baa tama fali iha fahi sira. I fahi sira nee halai saruntu malu tuun husi foho nee, monu hotu ba bee laran, i mout too mate hotu.
LUK 8:34 Fahi atan sira haree saida mak akontese, i sira halai baa konta sai iha sidade ho fatin sira nebee besik.
LUK 8:35 Rona nunee, ema barak sai baa atu haree rasik ho matan. Too iha nebaa, sira haree ema nebee uluk diabu domina nee, diak tiha ona. Nia tuur hakmatek hela iha Jesus nia ain, hatais tiha ona hena, i hanoin normal fali ona. Haree nunee, sira hotu tauk.
LUK 8:36 Ema sira nebee ohin haree Jesus duni sai diabu nee, sira konta ba sira nebee foin mai kona ba oinsaa mak Jesus kura ema nee.
LUK 8:37 Depois ema hotu-hotu iha rai Gerasa husu atu Jesus sai tiha husi nebaa, tanba sira tauk atu-mate. Entaun Jesus baa sae roo atu fila fali ba iha tasi sorin.
LUK 8:38 Ema nebee ohin diabu sai husi nia nee, husu atu bele tuir Jesus. Maibee Jesus hataan,
LUK 8:39 “Diak liu o fila ba uma hodi konta saida mak Maromak halo ona ba o.” Entaun ema nee baa lao lemo-lemo iha sidade nee tomak hodi konta sai kona ba buat hotu nebee Jesus halo ba nia.
LUK 8:40 Bainhira Jesus fila fali husi tasi sorin, ema barak hein hela Nia, i simu Nia ho haksolok.
LUK 8:41 Iha nebaa iha ema ida naran Jairo, nia mak responsavel uma kreda iha sidade nee. Nia oan ida deit, feto ida ho tinan sanulu resin rua. Labarik nee moras boot, besik atu mate. Entaun Jairo baa hakneak i hakruuk too rai iha Jesus nia oin hodi husu ho laran tomak atu Jesus baa iha nia uma. Jesus lao dadauk ba Jairo nia uma, ema barak akompanha Nia too sena malu.
LUK 8:43 Iha ema lubun boot nee, iha feto ida, nia fulan mai la para durante tinan sanulu resin rua. Nia faan tiha nia sasaan hotu hodi baa konsulta iha doutor, maibee la iha ema ida mak bele kura nia moras.
LUK 8:44 Feto nee bes-besik ba iha Jesus nia kotuk, nia kona Jesus nia hena rohan, i nia raan para kedas.
LUK 8:45 Jesus husu, “See mak ohin kona Hau nee?” Sira hotu dehan, lae. Pedro mos hatete, “Mestri, iha ema barak mak sena malu ho Ita Boot.”
LUK 8:46 Maibee Jesus hataan, “Lae, ohin Hau senti iha kbiit sai husi Hau. Nee mak Hau hatene, iha ema ida kona Hau.”
LUK 8:47 Bainhira feto nee hatene katak nia la bele subar, nia tauk teb-tebes ho nakdedar, i nia baa hakneak i hakruuk too rai iha Jesus nia ain. Depois nia konta nia problema nee ba Jesus iha ema hotu-hotu nia oin, i foo hatene katak, momentu nia kona Jesus, nia moras diak kedas.
LUK 8:48 Jesus dehan ba nia, “Oan, o hetan kura tanba o fiar mai Hau. Fila ho laran hakmatek.”
LUK 8:49 Jesus sei koalia hela, ema ida mai husi Jairo nia uma foo hatene ba Jairo, “Senhor nia oan iis kotu tiha ona. Lalika halo kole tan mestri.”
LUK 8:50 Rona nunee, Jesus hatete ba Jairo, “Lalika tauk. Fiar deit mak ita nia oan sei moris fali.”
LUK 8:51 Bainhira sira too iha Jairo nia uma, ema barak iha tiha ona nebaa, sira tanis lelir hela. Jesus hatete ba sira, “Imi lalika tanis tan ona. Labarik nee la mate ida, nia toba deit.” Maibee sira hamnasa fali Jesus, tanba sira rasik haree labarik nee mate tiha ona. Jesus husu ba labarik nia inan-aman, ho mos Pedro, João ho Tiago, tama ba laran hamutuk ho Nia. Sira seluk Nia bandu la bele tama.
LUK 8:54 Sira tama tiha ba laran, Jesus kaer labarik nia liman hodi dehan, “Hau nia oan, hadeer ona!”
LUK 8:55 Derepenti deit labarik nee nia iis iha fila fali, nia hadeer i hamriik kedas. Jesus haruka sira foo hahaan ba nia.
LUK 8:56 Labarik nia inan-aman admira teb-tebes, maibee Jesus bandu sira la bele konta sai ba ema seluk kona ba buat nebee mak akontese.
LUK 9:1 Iha loron ida, Jesus halibur apostolu nain sanulu resin rua hodi foo kbiit ba sira atu bele duni sai diabu husi ema i kura ema nia moras.
LUK 9:2 Nia haruka sira baa atu foo sai kona ba oinsaa Maromak ukun nudar Liurai, i atu kura ema moras.
LUK 9:3 Nia hatete ba sira, “Imi lao, la bele lori buat ida. La bele lori ai tonka, pasta, bukae, ka osan. Hena hodi troka mos la bele.
LUK 9:4 Kuandu ema simu imi iha sira nia uma, hela deit iha uma nee too imi sai fali ba aldeia seluk.
LUK 9:5 Maibee se imi tama iha aldeia ida mak ema lakohi simu imi, husik tiha aldeia nee. I hisik rai rahun husi imi nia ain okos hodi hatudu katak, Maromak sei kastigu sira.”
LUK 9:6 Depois apostolu sira lao husi aldeia ba aldeia hodi foo sai Maromak nia Liafuan Diak i kura ema moras.
LUK 9:7 Liurai Herodes rona kona ba buat hotu-hotu nebee Jesus halo. Nia konfuzaun, tanba iha ema balu dehan, “Jesus mak João Sarani Nain, nia moris fila fali ona husi mate.”
LUK 9:8 Balu tan dehan, “Nia Maromak nia profeta Elias mak mosu fali.” Iha seluk tan dehan, “Nia nee profeta seluk ida nebee mate kleur ona, i agora moris fali.”
LUK 9:9 Maibee Herodes dehan, “Hau rona buat oi-oin kona ba Ema ida nee. João nia kakorok, hau haruka tesi tiha ona. Entaun ema ida nee see tan?” Nunee Herodes buka atu hasoru malu ho Jesus.
LUK 9:10 Bainhira apostolu sira fila fali mai, sira konta ba Jesus buat hotu-hotu nebee sira halo ona. Depois Jesus lori sira sees aan baa iha aldeia Betsaida.
LUK 9:11 Maibee ema barak rona katak Jesus atu baa nebaa, i sira mos tuir. Too iha nebaa, Jesus simu sira ho diak. Nia foo sai ba sira kona ba oinsaa Maromak ukun nudar Liurai, i kura sira nia moras hotu.
LUK 9:12 Loro atu monu ona, apostolu nain sanulu resin rua mai hatete ba Jesus dehan, “Diak liu haruka ema sira nee baa buka hahaan iha aldeia sira nebee besik. Haruka sira mos baa buka fatin hodi toba, tanba iha nee rai fuik.”
LUK 9:13 Jesus hataan, “Imi mak foo hahaan ba sira.” Apostolu sira dehan, “Ita so iha paun fuan lima ho ikan rua deit. Halo nusaa mak ita bele sosa hahaan ba ema barak hanesan nee?!”
LUK 9:14 Tanba ema iha nebaa maizoumenus rihun lima. Nee foin sura mane deit, feto ho labarik la sura. Jesus dehan ba sira, “Haruka ema sira nee hotu tuur tuir grupu. Grupu ida ema nain lima-nulu.”
LUK 9:15 Sira mos halo tuir. Kuandu ema tuur hotu ona,
LUK 9:16 Jesus foti paun fuan lima ho ikan rua nee, i hateke ba lalehan hodi foo agradese ba Maromak. Nia silu paun ho ikan halo pedasuk-pedasuk, i foo ba Nia eskolante sira hodi baa fahe ba ema lubun boot nee.
LUK 9:17 Sira hotu haan too bosu, hahaan mos resin. Nia eskolante sira tau hamutuk hahaan restu sira nee iha bote sanulu resin rua nakonu.
LUK 9:18 Iha loron ida, Jesus halo hela orasaun mes-mesak iha fatin ida, i Nia eskolante sira besik Nia. Hotu tiha, Nia husu ba sira, “Tuir ema konta, Hau nee see?”
LUK 9:19 Sira hataan, “Iha balu dehan, Ita Boot João Sarani Nain. Balu tan dehan, profeta Elias. Balu mos dehan, profeta seluk ida nebee mate kleur ona, i agora moris fali.”
LUK 9:20 Jesus husu tan, “Tuir imi rasik, Hau nee see?” Pedro hataan, “Ita Boot nee Mesias, Salvador nebee Maromak promete hori uluk ona atu haruka mai.”
LUK 9:21 I Jesus bandu sira la bele foo hatene ba see-see deit.
LUK 9:22 Jesus hatutan dehan, “Hau, Ema Umanu nia Oan tenki simu terus oi-oin. Nai ulun Judeu sira, nai lulik nia ulun sira ho mestri relijiaun sira sei la simu Hau. Ema sei oho tiha Hau, maibee too iha loron tolu, Maromak sei halo Hau moris fila fali.”
LUK 9:23 Depois Nia foo hatene ba sira hotu dehan, “See mak hakarak tuir Hau, nia tenki husik tiha nia hakarak rasik, i tenki prontu simu terus, hanesan ema nebee loro-loron lori nia krus too mate. I nia tenki tuir Hau nafatin.
LUK 9:24 Tanba see mak hakarak salva nia aan, nia sei lakon fali. I see mak lakon nia moris tanba nia tuir Hau, nia sei hetan moris rohan-laek.
LUK 9:25 Se ema ida hetan riku-soin mundu nian hotu-hotu, maibee too ikus la hetan moris rohan-laek karik, nia manaan saida loos?
LUK 9:26 Se ema ruma moe atu simu Hau i lakohi simu Hau nia liafuan, aban-bainrua Hau, Ema Umanu nia Oan mos sei moe atu rekonhese nia bainhira Hau fila fali mai husi lalehan. Hau sei tuun mai ho naroman lalehan nian, ho Aman Maromak nia kbiit tomak, i Maromak nia anju sira nabilan haleu Hau.
LUK 9:27 Hau hatete lo-loos ba imi, husi imi sira nee, balu sei moris too haree Maromak ukun nudar Liurai mak foin mate.”
LUK 9:28 Liu tiha loron walu hanesan nee, Jesus lori Pedro, João ho Tiago sae ba iha foho ida hodi halo orasaun.
LUK 9:29 Jesus halo hela orasaun, Nia oin nakfilak aan, i Nia hena mos sai mutin nabilan hanesan rai lakan.
LUK 9:30 Derepenti deit Maromak nia profeta nain rua, Moisés ho Elias mosu mai
LUK 9:31 ho naroman lalehan nian hodi koalia ho Jesus. Sira nain tolu koalia kona ba Jesus nia mate, tanba la kleur tan Nia sei mate iha Jerusalém hodi kumpri Maromak nia planu.
LUK 9:32 Momentu nee, Pedro ho nia kolega nain rua nee toba dukur tiha. Sira hadeer mai, haree Jesus naroman nabilan loos, hamriik hela ho ema nain rua nee.
LUK 9:33 Bainhira Moisés ho Elias atu baa ona, Pedro nia hanoin lakon tiha, i nia koalia arbiru deit dehan, “Mestri, ita hamutuk iha nee, furak. Diak liu ami halo tenda tolu, ida ba Ita Boot, ida ba Moisés, ho ida ba Elias.”
LUK 9:34 Pedro sei koalia hela nunee, kalohan ida tuun mai falun tiha sira, halo eskolante nain tolu nee tauk.
LUK 9:35 I lian ida husi kalohan nee dehan, “Nee Hau nia Oan, Hau hili ona Nia. Imi tenki rona Nia.”
LUK 9:36 Rona tiha lian nee hotu, eskolante sira la haree tan ema ida, so Jesus deit. Iha tempu nebaa sira nain tolu la konta sai ba ema seluk kona ba buat nebee mak sira haree.
LUK 9:37 Aban fali Jesus tuun husi foho nee hamutuk ho Nia eskolante nain tolu, i ema barak teb-tebes mai hasoru Nia.
LUK 9:38 Husi ema barak nia leet nee, iha senhor ida bolu ho lian makaas dehan, “Mestri, favor ida, haree lai hau nia oan mane. Nia hau nia oan mesak.
LUK 9:39 Iha diabu ida dala barak ataka nia halo nia hakilar derepenti i tebe liman tebe ain too kabeen mutin sai husi ibun. Diabu nee book nia beibeik i halo terus liu nia.
LUK 9:40 Hau husu tiha ona ba Ita Boot nia eskolante sira atu duni sai tiha diabu nee, maibee sira la bele halo buat ida.”
LUK 9:41 Jesus siak sira hotu dehan, “Imi ema nebee sempre halo aat i la fiar ba Maromak. Hau tenki hela ho imi too bainhira tan? Hau tenki pasiensia ho imi too iha nebee?!” Depois Nia hatete ba senhor nee, “Lori ita nia oan mai.”
LUK 9:42 Labarik nee lao dadauk ba Jesus, diabu riba nia ba rai i halo nia tebe liman tebe ain. Maibee Jesus foo orden ba diabu para sai husi labarik nee, i nia diak kedas. Depois Jesus entrega fali labarik nee ba nia aman.
LUK 9:43 Ema hotu-hotu admira tanba haree Maromak nia kbiit boot nee. Momentu ema hotu-hotu sei admira hela ho milagre oi-oin nebee Jesus halo, Nia hatete ba Nia eskolante sira,
LUK 9:44 “Imi rona di-diak saida mak Hau atu hatete nee. La kleur tan, ema sei faan Hau, Ema Umanu nia Oan ba ema aat.”
LUK 9:45 Maibee Nia eskolante sira la kompriende. Tanba liafuan nia signifikadu sei taka hela, atu sira la bele hatene. I sira mos tauk atu husu ba Jesus.
LUK 9:46 Jesus nia eskolante sira komesa haksesuk malu kona ba ida nebee mak boot liu.
LUK 9:47 Maibee Jesus hatene sira nia hanoin. Entaun Nia lori labarik oan ida mai hamriik iha Nia sorin.
LUK 9:48 Nia hatete ba sira, “See mak simu labarik nee hodi Hau nia naran, nia simu Hau. I see mak simu Hau, nia simu mos Ida nebee mak haruka Hau mai. Ema nebee haraik aan nudar ema kiik, nia mak boot liu iha Maromak nia oin.”
LUK 9:49 João foo hatene ba Jesus dehan, “Mestri, ami haree ema ida duni sai diabu hodi Ita Boot nia naran. Ami bandu nia, tanba nia laos ita nia ema.”
LUK 9:50 Maibee Jesus hataan, “La bele bandu! Tanba ema nebee la kontra imi, nia hamutuk ho imi.”
LUK 9:51 Jesus nia loron atu sae ba lalehan besik ona, entaun Nia desidi, bele halo nusaa mos, Nia tenki baa iha sidade Jerusalém.
LUK 9:52 Nia haruka ema balu baa uluk, i sira tama iha aldeia ida iha provinsia Samaria atu prepara fatin ba Nia.
LUK 9:53 Maibee ema iha nebaa lakohi simu Jesus, tanba sira hatene katak Nia atu baa iha Jerusalém.
LUK 9:54 Bainhira Jesus nia eskolante Tiago ho João haree ema Samaria sira nia hahalok nee, sira husu ba Jesus, “Nai, se Ita Boot hakarak, ami haruka ahi tuun mai husi lalehan haan mutuk tiha sira.”
LUK 9:55 Maibee Jesus fila ba sira nain rua hodi siak sira.
LUK 9:56 Depois sira hotu baa fali aldeia seluk.
LUK 9:57 Bainhira Jesus ho Nia eskolante sira lao dadauk, ema ida dehan ba Jesus, “Ita Boot baa nebee deit, hau prontu atu tuir.”
LUK 9:58 Jesus hataan, “Asu fuik iha nia fatin hodi hela. Manu fuik mos iha nia knuuk. Maibee Hau, Ema Umanu nia Oan la iha fatin ida hodi tau Hau nia ulun ba.”
LUK 9:59 Jesus hatete ba ema ida seluk dehan, “Mai tuir Hau.” Ema nee hataan, “Nai, husik hau fila baa hakoi hau nia aman lai mak foin hau tuir.”
LUK 9:60 Jesus hatete ba nia, “Ema nebee lakohi rona Maromak, sira hanesan ema nebee mate tiha ona. Husik sira mak hakoi malu. Maibee o nia servisu mak baa foo sai kona ba oinsaa Maromak ukun nudar Liurai.”
LUK 9:61 Iha ema ida tan dehan, “Nai, hau hakarak tuir Ita Boot, maibee husik hau baa halo despedida lai ho hau nia familia mak foin hau tuir.”
LUK 9:62 Jesus hataan, “Ema nebee komesa ona tuir Hau, maibee haree fali ba kotuk, nia la merese serbi Maromak nudar nia Liurai.”
LUK 10:1 Hotu tiha, Nai Jesus hili tan eskolante nain hitu-nulu resin rua, depois haruka sira ru-rua baa uluk iha fat-fatin nebee Nia atu baa.
LUK 10:2 Nia soe lia dehan, “Batar iha toos laran, barak teb-tebes maran tiha ona, maibee ema atu silu batar nee, uitoan deit. Tanba nee, husu ba Toos Nain para haruka tan ema hodi silu batar nee.
LUK 10:3 Agora, baa ona! Hau haruka imi baa hanesan bibi malae oan nebee tama iha asu fuik nia leet.
LUK 10:4 Imi lalika lori osan ka pasta, sandalias rezerva mos la bele. I lalika dada lia ho ema iha dalan.
LUK 10:5 Bainhira imi tama iha uma ida, hatete ba sira, ‘Maromak foo pas ba uma kain nee.’
LUK 10:6 Se uma nain gosta moris iha pas nia laran, entaun Maromak foo duni pas ba sira. Se lae, Maromak la foo.
LUK 10:7 Hela deit iha uma nee, la bele muda husi uma ida ba uma seluk. Haan-hemu saida deit mak sira foo ba imi, tanba ema nebee servisu iha direitu atu ema selu nia kolen.
LUK 10:8 Bainhira imi tama iha aldeia ida, i ema simu imi ho diak, haan deit saida mak sira foo ba imi.
LUK 10:9 Kura ema moras iha aldeia nee, i foo hatene ba ema hotu dehan, ‘Maromak nia tempu atu ukun nudar Liurai too ona.’
LUK 10:10 Maibee se iha aldeia ruma, nia ema la simu imi, baa hamriik iha estrada hodi hatete,
LUK 10:11 ‘Rai rahun husi aldeia nee, ami baku husi ami nia ain okos hodi hatudu katak, imi rasik mak sei simu todan. Maibee keta haluha, Maromak nia tempu atu ukun nudar Liurai too ona.’”
LUK 10:12 Jesus hatutan tan dehan, “Hau hatete ba imi, iha loron ikus bainhira Maromak foo justisa ba ema hotu, ema iha aldeia nee sei simu kastigu todan liu fali ema aat sira nebee uluk hela iha sidade Sodoma.”
LUK 10:13 Jesus mos dehan, “Imi ema Korazim sei terus. Imi ema Betsaida sei terus. Hau halo ona milagre bar-barak iha imi nia leet, maibee imi lakohi hakribi imi nia sala. Ema jentiu sira nebee uluk liu hela iha sidade Tiru ho Sidon nunka haree milagre sira nee. Se sira haree karik, entaun sira tuur hakdasak iha ahu kdesan i hatais hena lutu hodi hatudu katak sira hakribi ona sira nia sala.
LUK 10:14 Iha loron ikus bainhira Maromak tesi ema hotu-hotu nia lia, imi sei simu kastigu todan liu fali ema Tiru ho ema Sidon.
LUK 10:15 Nunee mos imi ema Kafarnaum sira, keta hanoin katak, Maromak sei foti sae imi ba lalehan. Lae! Nia sei soe imi ba infernu.”
LUK 10:16 Depois Jesus hatete ba Nia eskolante sira, “Ema nebee rona imi, nia rona mos Hau. I ema nebee lakohi simu imi, nia mos lakohi simu Hau. I ema nebee lakohi simu Hau, nia mos lakohi simu Ida nebee mak haruka Hau mai.”
LUK 10:17 Bainhira eskolante nain hitu-nulu resin rua nee fila fali, sira haksolok teb-tebes hodi konta ba Jesus dehan, “Nai, bainhira ami hodi Ita Boot nia naran haruka diabu sira sai husi ema, diabu sira mos sai kedas!”
LUK 10:18 Jesus hataan, “Nee loos! Momentu imi halo nunee, Hau haree Satanás monu tuun husi lalehan hanesan rai lakan.
LUK 10:19 Hau foo ona kbiit ba imi atu sama samea ho sakunar. Kbiit nebee Hau foo nee, boot liu fali imi nia inimigu Satanás nia kbiit. La iha buat ida bele halo aat imi.
LUK 10:20 Maski nunee lalika haksolok tanba deit diabu sira hakruuk ba imi. Diak liu haksolok tanba Maromak hakerek ona imi nia naran iha lalehan.”
LUK 10:21 Iha tempu nee, Espiritu Santu halo Jesus nia laran haksolok, i Jesus hahii Maromak dehan, “Hau nia Aman, lalehan ho rai nia Nain. Hau hahii Ita Boot, tanba Ita Boot taka buat sira nee ba ema matenek ho ema eskola boot, maibee Ita hatudu fali ba ema nebee kiik. Hau nia Aman, ida nee halo Ita Boot nia laran haksolok duni.”
LUK 10:22 Depois Jesus dehan ba ema hotu iha nebaa, “Hau nia Aman foo ona kbiit ho matenek hotu-hotu mai Hau. La iha ema ida konhese lo-loos Hau, so Hau nia Aman deit. I la iha ema ida mak konhese lo-loos Hau nia Aman, so Nia Oan Hau deit. Hau mos hili ema seluk hodi hatudu Hau nia Aman ba sira, para sira mos bele konhese Nia.”
LUK 10:23 Depois Jesus fila ba Nia eskolante sira hodi hatete ba sira deit dehan, “Imi simu bensaun tanba imi haree buat furak nebee akontese dadauk.
LUK 10:24 Hau hatete ba imi, uluk iha liurai ho profeta barak mak hakarak teb-tebes atu haree buat nebee mak agora imi haree, maibee sira la haree. Sira hakarak teb-tebes atu rona buat nebee agora imi rona, maibee sira la rona.”
LUK 10:25 Iha loron ida, mestri relijiaun Judeu ida hamriik hodi koko Jesus. Nia husu, “Mestri, hau tenki halo saida para hau bele hetan moris rohan-laek?”
LUK 10:26 Jesus hataan, “Maromak nia Lei dehan saida? Ita kompriende oinsaa?”
LUK 10:27 Nia hataan, “Maromak nia liafuan dehan, ‘O tenki hadomi Maromak, o nia Nai, ho o nia aan tomak, ho laran tomak, ho forsa tomak, ho neon tomak.’ I hakerek mos dehan, ‘O tenki hadomi o nia maluk hanesan o hadomi o nia aan rasik.’”
LUK 10:28 Jesus hataan fali, “Ita nia resposta nee loos. Entaun halo tuir, atu ita bele hetan moris.”
LUK 10:29 Maibee mestri relijiaun nee hakarak hatudu aan hanesan ema nebee moris loos. Entaun nia husu ba Jesus, “Maibee hau nia maluk nee see loos?”
LUK 10:30 Jesus hataan liu husi istoria ida nunee: “Iha ema Judeu ida sai husi Jerusalém lao tuun ba sidade Jerikó. Too iha dalan klaran, naok-teen sira asalta nia, baku nia too besik atu mate, i hadau tiha nia ropa hotu, depois husik hela nia iha dalan.
LUK 10:31 La kleur nai lulik Judeu ida mos lao tuun liu husi dalan nee. Bainhira nia haree ema nee, nia lao sees tiha husi dalan sorin.
LUK 10:32 Nunee mos ema Levi ida nebee servisu iha uma kreda boot. Nia too iha nebaa, haree ema nee, maibee lao liu fali husi dalan sorin.
LUK 10:33 Tuir mai, ema Samaria ida liu husi dalan nee. Nia laos ema Judeu, maibee bainhira nia haree ema Judeu nee, nia hanoin teb-tebes.
LUK 10:34 Nia baa tau tua ho mina ba ema nee nia isin kanek hodi kurtivu, i falun kanek sira nee halo di-diak. Depois nia tula ema nee ba nia kuda buru rasik lori ba too iha uma ida hodi kuidadu nia iha nebaa.
LUK 10:35 Aban fali ema Samaria nee foo uluk osan mutin rua ba uma nain hodi dehan, ‘Uza osan nee hodi tau matan ba nia. Se la too karik, hau fila mai mak hau selu hotu.’”
LUK 10:36 Konta tiha istoria nee hotu, Jesus husu ba mestri relijiaun nee dehan, “Entaun tuir ita nia hanoin, entre sira nain tolu nee, ida nebee mak sai hanesan maluk ba ema nebee monu iha naok-teen sira nia liman?”
LUK 10:37 Nia hataan, “Ida nebee hatudu laran luak ba nia.” Jesus hatete, “Entaun, baa halo tuir.”
LUK 10:38 Jesus ho Nia eskolante sira kontinua lao ba Jerusalém. Too iha aldeia ida, senhora ida naran Marta konvida Jesus atu baa iha nia uma, i Nia mos baa.
LUK 10:39 Marta iha alin ida naran Maria. Maria nee tuur besik hela Nai Jesus hodi rona Nia hanorin.
LUK 10:40 Maibee Marta preokupa halo preparasaun buat oi-oin. Entaun nia baa hatete ba Jesus, “Nai, Ita Boot la hanoin hau ka? Hau nia alin husik hela hau servisu mes-mesak deit! Hatete ba nia mai ajuda hau lai.”
LUK 10:41 Nai Jesus hataan, “Marta, Marta, o preokupa ho buat oi-oin deit.
LUK 10:42 Afinal iha buat ida deit mak importante liu. Maria hili ona ida nee, i Hau sei la bandu nia.”
LUK 11:1 Iha loron ida, Jesus halo hela orasaun iha fatin ida. Hotu tiha, Nia eskolante ida husu ba Nia, “Nai, hanorin ami halo orasaun, hanesan mos João Sarani Nain hanorin ona nia eskolante sira.”
LUK 11:2 Entaun Jesus hatete ba sira, “Bainhira imi halo orasaun, halo hanesan nee: ‘Ami nia Aman, tulun ema atu hamtauk Ita Boot nia naran santu. Mai ukun ema hotu-hotu ba.
LUK 11:3 Foo ai haan natoon mai ami loro-loron.
LUK 11:4 Perdua ami nia sala, tanba ami mos perdua ba ema nebee halo sala mai ami. Keta husik ami monu ba tentasaun.’”
LUK 11:5 Depois Jesus halo komparasaun nunee: “Karik iha kalan boot, imi ida baa iha kolega nia uma hodi dere odamatan dehan, ‘Belun, foo lai paun fuan tolu mai.
LUK 11:6 Tanba iha kolega ida foin too mai husi rai dook, i hau la iha buat ida atu foo ba nia haan. Loron seluk mak hau foo fali.’
LUK 11:7 Karik o nia kolega hataan, ‘Keta book hau! Odamatan xavi tiha ona, i hau ho hau nia oan sira mos toba tiha ona. Hau la bele hadeer hodi foo buat ruma ba o.’
LUK 11:8 Maski imi nain rua kolega, maibee nia lakohi hadeer hodi foo ba o. Maibee Hau hatete ba o: Se o la moe dere beibeik nia odamatan mak too ikus nia hadeer duni hodi foo buat nebee mak o presiza.
LUK 11:9 Nunee mos ho orasaun. Hau hatete ba imi: Husu beibeik ba Maromak, Nia sei foo. Buka beibeik, o sei hetan. Dere beibeik odamatan, odamatan sei nakloke ba o.
LUK 11:10 Tanba see mak husu beibeik ba Maromak, nia sei simu. See mak buka beibeik, nia sei hetan. See mak dere beibeik odamatan, Maromak sei loke ba nia.
LUK 11:11 Imi aman sira, bainhira imi nia oan husu ikan, imi foo fali samea ka?
LUK 11:12 Se nia husu mantolun, imi foo fali sakunar ka? Nunka!
LUK 11:13 Maski imi ema aat, maibee imi hatene foo buat diak ba imi nia oan sira. Saa tan imi nia Aman iha lalehan! Se imi husu para Nia foo Nia Espiritu Santu ba imi, Nia sei foo duni.”
LUK 11:14 Iha loron ida, Jesus duni sai diabu husi ema ida nebee koalia la diak. Diabu sai tiha, ema nee komesa koalia kedas, halo ema barak admira.
LUK 11:15 Maibee iha balu dehan, “Nia duni sai diabu, tanba diabu nia xefi Belzebu mak foo kbiit ba Nia.”
LUK 11:16 Iha ema seluk hakarak koko Jesus. Sira husu para Nia halo tan milagre hodi hatudu katak, Nia kbiit nee mai duni husi Maromak.
LUK 11:17 Maibee Jesus hatene sira hotu nia hanoin. Nunee Nia hatete ba sira, “Se iha nasaun ida, nia povu haan malu hela deit, nasaun nee sei rahun. Se iha uma kain ida, sira istori malu hela deit, uma kain nee sei naksobu.
LUK 11:18 Nunee mos, se diabu sira haan malu hela deit, diabu nia boot Satanás ukun sei la dura. Maski nunee imi duun dehan, Hau uza fali Belzebu nia kbiit hodi duni sai diabu.
LUK 11:19 Entaun bainhira imi nia eskolante sira duni sai diabu, sira mos uza Belzebu nia kbiit ka? Lae! Imi nia eskolante sira rasik mak sei hatete sai katak, buat nebee imi duun Hau nee, la loos.
LUK 11:20 Hau duni sai diabu hodi Maromak nia kbiit. Nee hatudu katak Maromak ukun ona iha imi nia leet nudar Liurai.
LUK 11:21 Se ema forti ida kaer kroat hein nia uma rasik, entaun nia sasaan sei la lakon.
LUK 11:22 Nia laran metin ba nia kroat nee. Maibee too ikus, iha ema ida forti liu fali nia, mai ataka nia. Ema ida forti liu nee sei hadau nia kroat hotu, i foti nia riku-soin hotu-hotu hodi fahe ba ema seluk.
LUK 11:23 Ema nebee la hamutuk ho Hau, nia kontra Hau. I ema nebee la servisu hamutuk ho Hau, nia estraga Hau nia servisu.”
LUK 11:24 Jesus hatutan tan dehan, “Bainhira espiritu aat sai husi ema ida, espiritu aat nee baa lao lemo-lemo iha rai fuik maran hodi buka fatin atu hela. Maibee nia la hetan fatin nebee diak. Entaun nia dehan, ‘Diak liu hau fila fali ba hau nia hela fatin uluk.’
LUK 11:25 Kuandu nia fila, nia haree fatin nee hamoos tiha ona i buat hotu-hotu tau tuir nia fatin.
LUK 11:26 Depois espiritu aat nee baa bolu tan espiritu hitu nebee aat liu fali nia, i sira hotu baa hela iha ema nee. Nunee, ema nee nia moris aat liu fali uluk.”
LUK 11:27 Jesus sei koalia hela, feto ida iha ema barak nee nia leet hatete ho lian makaas dehan, “O nia inan hetan bensaun boot! Tanba nia kous O, i foo susu O.”
LUK 11:28 Jesus hataan, “Maibee ema nebee rona Maromak nia liafuan hodi halo tuir, nia mak hetan bensaun boot liu.”
LUK 11:29 Ema barak liu tan mai hobur Jesus. Nia dehan ba sira, “Imi ema agora nee mesak aat deit! Imi husu beibeik atu Hau halo milagre hanesan sinal atu imi bele fiar. Maibee Hau sei la halo. Milagre nebee Maromak uluk halo liu husi profeta Jonas too ona.
LUK 11:30 Saida mak uluk akontese ba profeta Jonas, nee hanesan sinal ba ema jentiu sira iha sidade Nínive katak, Maromak mak haruka nia baa. Nunee mos ho Hau, Ema Umanu nia Oan. Saida mak sei akontese mai Hau, sei sai hanesan sinal ba ema sira nebee moris agora katak, Maromak mak haruka Hau mai.
LUK 11:31 Aban-bainrua kuandu mundu nee remata, Maromak sei tesi ema hotu-hotu nia lia. I liurai feto husi rai Seba sei moris fali, i hamriik hanesan sasin. Nia sei foo sala ba imi nebee moris agora, tanba uluk nia mai husi rai dook atu rona rasik liafuan matenek nian husi liurai Salomão. Agora iha Ema ida boot liu fali Salomão iha imi nia leet, maibee imi lakohi rona Nia.
LUK 11:32 I laos liurai feto nee deit. Ema jentiu sira husi sidade Nínive mos sei hamriik hodi foo sala ba imi, tanba uluk bainhira Jonas baa foo sai Maromak nia liafuan ba sira, sira husik kedas sira nia sala. Agora iha Ema ida nebee boot liu fali Jonas iha imi nia leet, maibee imi lakohi husik imi nia sala.”
LUK 11:33 Jesus hatutan tan dehan, “La iha ema ida sunu ahi-oan, depois subar tiha ahi-oan nee, ka taka fali ho sanan. Ema nebee sunu ahi-oan, sempre tau iha fatin aas, para foo naroman ba ema nebee tama iha nebaa.
LUK 11:34 Ita nia matan hanesan ahi-oan nebee foo naroman ba ita nia aan tomak. Se ita nia matan haree moos, ita nia aan mos naroman. Maibee se ita nia matan malahuk, ita nia aan sai nakukun.
LUK 11:35 Tanba nee, hakaas aan para imi nia aan naroman duni. Keta halo be imi hanoin katak naroman, afinal nakukun.
LUK 11:36 Kuandu imi nia aan naroman, i la iha nakukun ida, entaun imi nia moris tomak mos naroman, hanesan ahi-oan boot leno imi nia moris.”
LUK 11:37 Jesus koalia tiha hotu, ema ida husi grupu Farizeu konvida Nia baa haan iha uma. Entaun Jesus baa. Too iha uma, Nia tama baa tuur iha meza.
LUK 11:38 Ema Farizeu nee hakfodak, tanba nia haree Jesus haan, la fase liman uluk tuir ema Judeu nia lisan.
LUK 11:39 Nai Jesus hatete ba nia, “Imi ema Farizeu sira, imi badinas hamoos kopu ho bikan nia liur. Maibee imi nia laran nakonu ho buat aat i kaan ema nia sasaan.
LUK 11:40 Imi beik-teen! Keta haluha, Maromak halo ita nia isin, Nia mos halo ita nia laran.
LUK 11:41 Duke hamoos deit bikan nia liur, diak liu foo buat nebee imi iha ba ema kiak sira. Se imi halo nunee mak imi sai moos iha Maromak nia oin.
LUK 11:42 Imi ema Farizeu sira, imi sei terus. Bainhira imi kuu modo tahan, imi badinas foo parte ida husi parte sanulu ba Maromak. Too modo tahan kiikoan-kiikoan hanesan ortelaun ho ruku mos imi foo. Maibee kona ba justisa ho hadomi Maromak, imi la interese. Tuir loos justisa ho domin nee mak tenki halo uluk. Maibee keta haluha foo mos parte ida husi sanulu ba Maromak.
LUK 11:43 Imi ema Farizeu sira, imi sei terus. Tanba imi gosta loos tuur iha fatin ema boot nian iha uma kreda laran, i gosta atu ema kumprimenta imi ho respeitu iha merkadu.
LUK 11:44 Imi ema Farizeu sira, imi sei terus. Tanba imi hanesan rate nebee la iha marka. Ema sama tan, la hatene katak iha rai okos iha mate isin dodok.”
LUK 11:45 Iha mestri relijiaun Judeu ida dehan ba Jesus, “Mestri, Ita Boot nia liafuan ohin nee xoke mos ami mestri sira.”
LUK 11:46 Jesus hataan, “Imi mestri relijiaun sira, imi mos sei terus. Tanba imi foo regulamentu todan liu ba povu, maibee imi la ajuda netik sira atu bele halo tuir.
LUK 11:47 Imi sei terus. Tanba imi hada rate kapaas ba Maromak nia profeta sira uluk. Afinal, imi nia bei-ala sira mak oho.
LUK 11:48 Sira oho profeta sira, i imi mak hada sira nia rate. Nee hatudu katak, imi mos konkorda ho imi nia bei-ala sira nia hahalok nee.
LUK 11:49 Tanba nee, Maromak koalia sai Nia matenek kona ba imi dehan, ‘Hau sei haruka Hau nia profeta sira ho apostolu sira ba ema sira nee maibee sira sei halo terus balu, i oho balu.’
LUK 11:50 Nunee, profeta sira hotu-hotu nebee imi nia bei-ala sira oho, komesa husi Maromak halo mundu too ohin loron, imi nebee moris agora nee mak tenki lori todan.
LUK 11:51 Nee sura husi Abel nia mate too iha Zacarias. Ema oho Zacarias nee iha meza sakrifisiu ho uma kreda boot nia klaran. Hau hatete lo-loos ba imi katak, sira nia mate hotu, imi nebee moris agora mak tenki simu todan.
LUK 11:52 Imi mestri relijiaun sira, imi sei terus. Tanba imi mak kaer xavi hodi loke odamatan ba ema para sira bele hatene Maromak nia hakarak. Maibee imi rasik lakohi tama ba iha nebaa. Aat liu tan, imi taka dalan ba ema seluk nebee atu tama.”
LUK 11:53 Hotu tiha, Jesus sai husi fatin nee. Komesa husi tempu nee, mestri relijiaun ho ema Farizeu sira kontra makaas Nia. Sira sempre husu pergunta oi-oin ba Nia
LUK 11:54 hodi koko atu hamonu Nia.
LUK 12:1 Iha tempu nebaa ema rihun ba rihun mai sena malu atu rona Jesus nia hanorin. Jesus koalia uluk ba Nia eskolante sira dehan, “Kuidadu ho ema Farizeu sira. Tanba sira nee koalia oin ida, hahalok oin seluk. Sira nia hahalok nee hanesan fermentu, ema tau uitoan deit ba mos, trigu sae hotu.
LUK 12:2 Buat hotu-hotu nebee agora taka hela, loron ida sei nakloke. I buat hotu nebee agora subar hela, aban-bainrua ema sei hatene.
LUK 12:3 Buat nebee mak agora imi koalia sub-subar, loron ida ema sei rona mo-moos. I saida mak imi koalia bis-bisu iha kuartu laran, aban-bainrua ema sei foo sai ho lian makaas iha ema barak nia oin.”
LUK 12:4 “Hau nia belun sira, la bele tauk ema nebee mak hakarak oho imi, tanba sira so bele oho deit imi nia isin, maibee la bele halo buat ida ba imi nia klamar.
LUK 12:5 Agora Hau foo hatene ba imi, see loos mak imi tenki tauk. Imi tenki tauk mak Maromak. Tanba Nia bele oho imi nia isin, depois Nia mos iha kbiit hodi soe imi nia klamar ba infernu. Nunee imi tenki tauk mak Nia.
LUK 12:6 Hanoin took manu liin. Manu liin lima, ema faan sentavus rua deit. Maski baratu liu, maibee manu ida deit mos Maromak la haluha.
LUK 12:7 Laos nee deit. Maibee Maromak mos hatene lo-loos imi nia fuuk lahan hira mak iha imi nia ulun. Nee duni lalika tauk, tanba imi folin boot liu manu liin barak.”
LUK 12:8 Jesus koalia nafatin ba Nia eskolante sira dehan, “Rona di-diak mai! See mak foo sai iha ema nia oin katak nia fiar mai Hau, aban-bainrua Hau, Ema Umanu nia Oan mos sei foo sai iha Maromak nia anju sira nia oin katak nia Hau nia ema.
LUK 12:9 Maibee see mak nega Hau iha ema nia oin, aban-bainrua Hau mos sei nega nia iha Maromak nia anju sira nia oin.
LUK 12:10 Ema nebee hatete aat Hau, Ema Umanu nia Oan, nia sei hetan perdaun. Maibee see mak hatete aat Espiritu Santu, Maromak la foo perdaun ba nia.
LUK 12:11 Aban-bainrua, kuandu ema lori imi baa hataan iha uma kreda ka iha ukun nain sira tanba imi fiar Hau, lalika preokupa kona ba oinsaa imi atu defende aan ka saida mak imi atu koalia.
LUK 12:12 Tanba iha oras nee duni Espiritu Santu sei hanorin imi, oinsaa mak imi atu hataan sira.”
LUK 12:13 Ema ida husi ema barak nee husu ba Jesus, “Mestri, hatete ba hau nia maun atu fahe ami nia aman matebian nia riku-soin ho hau.”
LUK 12:14 Jesus hataan, “Belun, see mak foti Hau atu tesi imi nain rua nia problema nee?”
LUK 12:15 Depois Jesus foo hanoin ba ema barak nee dehan, “Kuidadu! Matan moos, para imi nia matan la bele naklosu ba sasaan. Tanba ema nia moris la depende ba nia riku-soin.”
LUK 12:16 Tuir mai, Jesus halo komparasaun ida hanesan nee: “Iha ema riku ida hetan ai haan barak husi nia toos.
LUK 12:17 I nia hanoin dehan, ‘Hau nia armazen hodi tau ai haan nakonu hotu ona. Agora hau atu halo oinsaa tan?
LUK 12:18 Diak liu hau halo hanesan nee. Hau sobu tiha armazen tuan sira nee, i harii fali halo boot liu. Nunee hau bele rai ai haan sira nee hotu ho mos hau nia sasaan sel-seluk.
LUK 12:19 Depois hau hatete ba hau nia aan rasik: Hau moris diak ona! Buat hotu-hotu iha tiha ona, too hela ba tinan naruk nia laran. Agora deskansa ona ba, haan-hemu i goza ona ba.’
LUK 12:20 Maibee Maromak hatete ba nia, ‘Beik-teen! Kalan nee kedas Hau sei hasai o nia iis. Depois, see mak hetan sasaan bar-barak nebee o rai ba o nia aan nee?’”
LUK 12:21 Jesus hatutan tan dehan, “Nunee mos ho ema nebee halibur riku-soin ba nia aan rasik, maibee sai kiak iha Maromak nia oin tanba lakohi buka riku-soin lalehan nian.”
LUK 12:22 Depois Jesus hatete ba Nia eskolante sira dehan, “Tanba nee, Hau hatete ba imi, lalika preokupa ho imi nia moris loro-loron, atu haan saida, ka atu hatais saida.
LUK 12:23 Tanba ita nia moris folin liu hahaan, i ita nia isin lolon folin liu ropa.
LUK 12:24 Haree took manu metan sira. Manu sira nee la kuda batar, la silu batar, la iha armazen hodi haloot ai haan, maibee Maromak foo ai haan ba sira. Imi folin liu manu sira nee.
LUK 12:25 Se imi preokupa kona ba imi nia moris, nee bele aumenta imi nia tinan ka? Lae! Atu aumenta oras ida deit mos la bele.
LUK 12:26 Se buat kiikoan nee, imi la bele halo, nusaa mak imi hakarak preokupa ho buat sira seluk?
LUK 12:27 Haree took duut nebee funan iha rai fuik. Duut nia funan nee la halo servisu, la soru tais. Maibee Hau dehan ba imi, liurai Salomão, maski riku teb-tebes, nia hatais kapaas halo nusaa mos, duut funan sira nee kapaas liu nafatin.
LUK 12:28 Duut nebee ohin loron matak, aban ema soe fali ba ahi laran mos, Maromak halo furak. Saa tan imi! Nia sei foo ropa ba imi hatais. Entaun nusaa mak imi nia fiar fraku hanesan nee?!
LUK 12:29 Lalika hanoin barak kona ba haan-hemu.
LUK 12:30 Ema nebee la konhese Maromak, sira sempre buka tuun-sae buat sira nee. Maibee imi nia Aman iha lalehan hatene ona saida mak imi presiza.
LUK 12:31 Nee duni imi tenki hakaas aan atu serbi Maromak nudar imi nia Liurai mak Maromak sei foo tan buat sira nee ba imi.”
LUK 12:32 Jesus koalia nafatin ba Nia eskolante sira dehan, “Lalika tauk! Imi ema uitoan deit, maibee imi nia Aman iha lalehan haksolok hili imi atu ukun hamutuk ho Nia.
LUK 12:33 Entaun, baa faan tiha sasaan nebee imi iha hodi fahe osan nee ba ema kiak sira. Nunee imi rai fali riku-soin iha lalehan, para bele dura. Iha nebaa, imi nia riku-soin sei la hotu, naok-teen la besik, i nehek mutin mos la estraga.
LUK 12:34 Tanba imi nia riku-soin tau iha nebee, imi nia laran mos iha nebaa.”
LUK 12:35 “Imi tenki prontu serbi Maromak loron-kalan, hanesan atan nebee hatais hela ropa servisu nian i nia ahi-oan lakan hela deit.
LUK 12:36 Imi tenki sai hanesan atan sira nebee hadeer hein hela sira nia patraun fila husi festa kazamentu. Bainhira patraun fila i dere odamatan, sira baa loke kedas.
LUK 12:37 Kuandu patraun haree nia atan sira hein hela nia, sira sorti boot. Hau hatete lo-loos ba imi, patraun rasik sei haruka sira tuur, depois nia hatais fali ropa atan nian hodi serve nia atan sira nee.
LUK 12:38 Loos duni, atan sira nee sorti boot se sira nia patraun haree sira hein hela nia, maski nia fila iha kalan boot ka dadeer-saan nakukun.
LUK 12:39 Hanoin di-diak! Se iha uma nain ida hatene lo-loos tuku hira mak naok-teen atu mai, nia sei hadeer hodi hein atu naok-teen la bele tama.
LUK 12:40 Nunee mos, imi tenki prontu nafatin. Tanba aban-bainrua Hau, Ema Umanu nia Oan sei fila fali mai derepenti deit iha oras nebee imi la hatene.”
LUK 12:41 Pedro husu ba Jesus, “Nai, komparasaun ohin nee kona ba ami deit ka ba ema hotu?”
LUK 12:42 Nai Jesus hataan, “Komparasaun nee kona ba ema see deit mak hanesan atan diak ida, nia matenek toma konta nia patraun nia sasaan, i foo laran ba nia patraun. Patraun sei foo fiar ba ema nee atu fahe hahaan ba nia atan sira seluk tuir oras.
LUK 12:43 Bainhira patraun fila ba uma, haree atan nee badinas halao nia servisu, atan nee sorti boot.
LUK 12:44 Hau hatete lo-loos ba imi, patraun sei foti nia hodi toma konta nia riku-soin hotu.
LUK 12:45 Maibee karik atan nee hanoin dehan, ‘Patraun sei kleur mak fila’, depois nia komesa baku atan feto ho atan mane sira, i haan-hemu too lanu.
LUK 12:46 Se nunee, iha loron nebee nia la hein, i oras nebee nia la hatene, derepenti deit nia patraun fila mai. Patraun sei tetak rahun tiha atan nee i soe hamutuk ho ema sira nebee la halo tuir patraun nia hakarak.
LUK 12:47 Tanba atan nebee deit mak hatene patraun nia hakarak, maibee la prepara aan i la halo tuir, nia sei hetan kastigu todan.
LUK 12:48 Maibee atan nebee mak halo servisu la loos tanba la hatene patraun nia hakarak, nia sei simu kastigu kamaan. Tanba ema nebee simu barak ona, Maromak mos sei husu barak ba nia. I ema nebee simu knaar boot, nia responsabilidade mos boot.”
LUK 12:49 Jesus koalia nafatin dehan, “Hau mai iha mundu nee atu sunu ahi. Ahi nee sei halo ema kontra malu. Tuir loos Hau hakarak atu ahi nee lakan ona.
LUK 12:50 Maibee Hau tenki simu terus todan lai, i Hau nia laran susar teb-tebes too terus nee hotu.
LUK 12:51 Imi hanoin Hau mai iha mundu nee para halo ema moris iha dame nia laran ka? Lae! Ema sei kontra malu tanba Hau.
LUK 12:52 Komesa agora, se iha uma kain ida iha ema nain lima, entaun nain tolu kontra rua, i nain rua kontra tolu.
LUK 12:53 Sira sei fahe malu: Aman kontra nia oan mane, oan mane kontra nia aman. Inan kontra nia oan feto, oan feto kontra nia inan. Banin feto kontra nia feto foun, feto foun kontra nia banin feto.”
LUK 12:54 Depois Jesus hatete ba ema barak nee dehan, “Bainhira imi haree kalohan metan mosu iha loromonu, imi dehan, ‘Nee sinal hatudu katak, udan atu mai ona.’ I udan mai duni.
LUK 12:55 I kuandu anin boot mai husi rai fuik maran, imi dehan, ‘Orsida loro manas makaas.’ I sai nunee duni.
LUK 12:56 Imi nee matenek mamuk deit! Imi hatene siik sinal nebee mosu iha kalohan ho rai. Entaun nusaa mak imi la kompriende buat nebee akontese dadauk iha imi nia leet?”
LUK 12:57 Jesus koalia nafatin dehan, “Nusaa mak imi la hatene hili rasik saida mak loos?
LUK 12:58 Se ema lori imi ba tribunal, hakaas aan para rezolve tiha imi nia problema molok imi too iha nebaa. Se lae, nia bele obriga imi baa iha juis nia oin, juis entrega ba polisia, i polisia soe imi ba iha kadeia.
LUK 12:59 Hau hatete ba imi, imi selu kotu tiha multa mak foin bele sai fali husi kadeia.”
LUK 13:1 Iha tempu nee, ema foo hatene ba Jesus dehan, governador Pilatus oho tiha ema Galileia balu momentu sira oho animal hanesan sakrifisiu ba Maromak iha uma kreda boot.
LUK 13:2 Rona nunee Jesus husu, “Tuir imi nia hanoin oinsaa? Sira terus hanesan nee hatudu katak, sira sala boot liu ema Galileia sira seluk ka?
LUK 13:3 Lae! Maibee se imi la husik imi nia sala, imi mos sei mate hanesan sira.
LUK 13:4 I oinsaa ho ema nain sanulu resin walu nebee mate iha Siloé bainhira uma andar monu hanehan sira? Tuir imi nia hanoin, sira nia sala boot liu ema seluk iha Jerusalém ka?
LUK 13:5 Lae! Maibee se imi la husik imi nia sala, imi mos sei mate hanesan sira.”
LUK 13:6 Depois Jesus halo komparasaun ida nunee: “Ema ida iha ai figeira huun ida iha nia toos laran. Loron ida nia baa haree, ai nee iha fuan ka lae, maibee la iha.
LUK 13:7 Entaun nia hatete ba ema nebee hein nia toos nee dehan, ‘Tinan tolu ona, hau mai beibeik buka ai nee nia fuan, maibee fuan ida mos la iha. Ai nee estraga deit rai nia bokur. Entaun tesi tiha deit!’
LUK 13:8 Maibee ema nebee hein toos nee hataan, ‘Senhor, foo tempu ba ai nee tinan ida tan. Husik hau kee haleu nia huun hodi tau adubu para halo buras.
LUK 13:9 Dala ruma tinan oin mai ai nee bele foo fuan. Se la fuan mak ita tesi.’”
LUK 13:10 Iha loron Sabadu ida, Jesus hanorin hela iha uma kreda.
LUK 13:11 Iha nebaa iha senhora ida nebee bonko durante tinan sanulu resin walu ona, tanba diabu mak halo nia nunee. Nia kotuk bonko loos, atu hamriik loos uitoan mos la bele.
LUK 13:12 Jesus haree senhora nee, i bolu nia mai hodi hatete, “Senhora, ita nia moras kura tiha ona.”
LUK 13:13 Depois Jesus tau liman ba nia. Senhora nee nia kotuk loos kedas i nia hahii Maromak.
LUK 13:14 Maibee responsavel uma kreda nee hirus, tanba Jesus kura fali ema iha loron Sabadu. Nia hatete ba ema hotu iha uma kreda laran nee dehan, “Semana ida iha loron neen hodi halo servisu. Nunee, ema moras sira mai deit iha loron servisu nee para bele hetan kura. La bele mai fali iha loron Sabadu.”
LUK 13:15 Nai Jesus hataan, “Imi koalia oin ida, hahalok oin seluk! Iha loron Sabadu mos imi kore imi nia karau ho kuda hodi dada baa foo hemu. Nee mos servisu.
LUK 13:16 Senhora nee Abraão nia jerasaun hanesan mos ita. Satanás kesi metin nia durante tinan sanulu resin walu ona. Ohin Hau hasai nia husi Satanás nia liman laran iha loron Sabadu, halo nusaa mak bele sala?!”
LUK 13:17 Rona nunee, Jesus nia inimigu sira moe loos. Maibee povu kontenti teb-tebes tanba Nia halo buat mesak furak deit.
LUK 13:18 Depois Jesus dehan, “Maromak ukun Nia reinu, oinsaa loos? Hau atu kompara ho saida?
LUK 13:19 Nee hanesan ai musan nebee ema kuda iha nia toos. Ai musan nee moris, i buras ba beibeik, too ikus sai ai huun boot. Depois manu fuik sira mai halo knuuk iha nia sanak.”
LUK 13:20 Jesus dehan tan, “Maromak ukun Nia reinu, Hau atu kompara ho saida tan?
LUK 13:21 Nee hanesan fermentu nebee senhora ida kahur ho trigu saka ida hodi halo paun. Too ikus, fermentu uitoan nee halo trigu tomak sae.”
LUK 13:22 Jesus lao dadauk ba Jerusalém, Nia lao husi aldeia ba aldeia ho sidade ba sidade hodi hanorin.
LUK 13:23 Iha ema ida husu ba Nia, “Nai, ema uitoan deit mak sei hetan salvasaun ka?”
LUK 13:24 Jesus hataan, “Odamatan tama ba lalehan, kloot. Nunee, hakaas aan para imi bele tama. Hau hatete ba imi, ema barak sei koko atu tama ba, maibee la bele.
LUK 13:25 Aban-bainrua uma nain sei hamriik hodi taka odamatan nee, i imi nebee sei hamriik iha liur sei dere odamatan hodi husu, ‘Senhor, loke lai odamatan mai ami.’ Maibee nia hataan, ‘Hau la konhese imi. I hau la hatene imi mai husi nebee.’
LUK 13:26 Depois imi dehan, ‘Uluk ami haan-hemu hamutuk ho ita boot, i ita boot mos hanorin tuir dal-dalan iha ami nia aldeia.’
LUK 13:27 Uma nain hataan fali, ‘Hau la konhese imi. I hau la hatene imi mai husi nebee. Imi ema aat, sai husi nee!’
LUK 13:28 Depois imi sei tanis hakilar i ruun nehan. Tanba imi haree Abraão, Isac, Jacó ho profeta sira hotu tama iha Maromak nia reinu, maibee imi rasik, Maromak soe sai.
LUK 13:29 Ema sei mai husi mundu tomak, i sira sei tuur hamutuk ho Maromak nia reinu hotu-hotu hodi haan rame-rame iha Maromak nia festa boot.
LUK 13:30 Iha tempu nebaa ema balu nebee agora kiik, sei sai boot fali, i ema balu nebee agora boot, sei sai kiik fali.”
LUK 13:31 Depois ema balu husi grupu Farizeu mai hasoru Jesus hodi foo hatene, “Diak liu sees tiha husi fatin nee baa fali fatin seluk, tanba liurai Herodes atu oho Ita Boot.”
LUK 13:32 Jesus hataan, “Hatete ba asu fuik nee katak, ohin ho aban Hau duni sai diabu husi ema i kura ema moras sira. Too loron tolu mak foin Hau nia servisu hotu.
LUK 13:33 Bele halo nusaa mos, Hau tenki halao nafatin Hau nia servisu ohin loron, aban ho bainrua. Too iha Jerusalém mak foin ema bele oho Hau. Tanba ema sempre oho Maromak nia profeta sira iha nebaa.
LUK 13:34 Koitadu, imi ema Jerusalém! Imi oho Maromak nia profeta sira, i tuda mate ema nebee Maromak haruka ba imi. Dala barak Hau hakarak halibur imi hanesan manu inan halibur nia oan sira atu luut, maibee imi lakohi.
LUK 13:35 Rona mai! Maromak husik tiha ona imi nia hela fatin. Hau hatete ba imi, imi sei la haree tan Hau too imi foo sai dehan, ‘Nai Maromak foo bensaun ba Ema ida nebee mai lori Nai Maromak nia naran.’”
LUK 14:1 Iha loron Sabadu, ema boot ida husi grupu Farizeu konvida Jesus baa haan iha nia uma. Iha nebaa ema haree tu-tuir saida mak Jesus atu halo.
LUK 14:2 Iha Jesus nia oin, iha mane ida moras isin bubu.
LUK 14:3 Jesus husu ba mestri relijiaun ho ema Farizeu sira, “Tuir ita nia lei relijiaun, bele kura ema moras iha loron Sabadu ka lae?”
LUK 14:4 Maibee la iha ema ida hataan. Entaun Jesus tau liman ba ema moras nee hodi kura nia, i haruka nia fila.
LUK 14:5 Depois Jesus husu ba sira, “Se karik loron Sabadu mak imi nia oan ka imi nia karau monu tama ba bee posu laran, imi baa dada sai kedas ka lae?”
LUK 14:6 La iha ema ida mak bele hataan.
LUK 14:7 Jesus haree bainaka barak baa hili fatin iha oin. Entaun Nia halo komparasaun ida nunee:
LUK 14:8 “Kuandu ema konvida o baa iha festa kazamentu, la bele baa tuur iha fatin ema boot nian. Keta halo be festa nain konvida mos ema nebee boot liu o.
LUK 14:9 Se nunee, festa nain sei mai hatete ba o, ‘Hamriik tiha, foo fatin ba senhor nee.’ Pasensi, o tenki muda baa tuur iha kotuk liu nebaa, i o sei moe boot.
LUK 14:10 Maibee bainhira ema konvida o, baa tuur deit iha kotuk liu. Nunee, festa nain sei mai hatete, ‘Belun, mai tuur tiha iha oin.’ Hanesan nee o hetan respeitu iha bainaka hotu-hotu nia oin.
LUK 14:11 Tanba ema nebee foti aan, Maromak sei hatuun nia, i ema nebee haraik aan, Maromak sei foti aas nia.”
LUK 14:12 Depois Jesus hatete ba uma nain, “Kuandu senhor halo festa, la bele konvida ita nia kolega, ita nia familia ho vizinhu sira nebee riku. Tanba loron seluk sira sei konvida fali ita, i nunee sira selu fali buat nebee ita halo ba sira.
LUK 14:13 Maibee kuandu senhor halo festa, konvida mak ema kiak sira, ema nebee ho defisiensia, ema nebee lao la diak ho ema matan delek sira.
LUK 14:14 Se ita halo nunee, Maromak sei foo bensaun ba ita. Ema sira nee la bele selu fali buat nebee ita halo ba sira. Maibee aban-bainrua bainhira Maromak sei halo moris fali ema nebee moris loos, Nia sei selu fali ita nia hahalok diak nee.”
LUK 14:15 Rona nunee, iha ema ida nebee tuur hamutuk ho Jesus iha meza, dehan ba Nia, “See mak haan hamutuk ho Maromak nia reinu iha Maromak nia festa boot, nia hetan bensaun boot.”
LUK 14:16 Jesus hataan ho komparasaun ida nunee: “Iha ema ida halo festa boot, i konvida ema barak.
LUK 14:17 Bainhira oras too ona atu hahuu festa, nia haruka nia atan ida baa foo hatene ba ema sira nebee nia konvida tiha ona dehan, ‘Mai ona, tanba buat hotu-hotu prontu ona.’
LUK 14:18 Maibee sira hotu lakohi baa, i foo razaun oi-oin. Ida dehan, ‘Deskulpa! Hau foin hola rai pedasuk ida, hau tenki baa haree lai.’
LUK 14:19 Ida seluk dehan, ‘Deskulpa! Hau foin hola karau par lima, hau sei baa koko karau sira nee hodi fila rai.’
LUK 14:20 Ida seluk tan dehan, ‘Hau foin kaben. Neebee hau la baa.’
LUK 14:21 Depois atan nee fila fali hodi foo hatene ba nia patraun. Nia patraun hirus teb-tebes, i nia foo orden ba atan nee dehan, ‘Baa lalais iha estrada-estrada too mos iha dalan kloot sira iha sidade nee, lori ema kiak, ema nebee ho defisiensia, ema matan delek, ho ema nebee lao la diak.’
LUK 14:22 Atan nee mos halo tuir. Bainhira nia fila, nia foo hatene dehan, ‘Patraun, sira mai hotu ona, maibee fatin mamuk sei iha.’
LUK 14:23 Entaun patraun dehan, ‘Se nunee, o sai husi sidade nee tama too dalan kintu-kantu sira. O hetan see-see deit iha dalan, obriga sira mai, atu halo nakonu fatin nee.
LUK 14:24 Hau hatete ba imi, husi ema sira nebee Hau konvida uluk, ida mos la bele haan iha Hau nia festa.’”
LUK 14:25 Iha loron ida, ema barak lao akompanha Jesus. Nia fila oin ba sira hodi dehan,
LUK 14:26 “See mak hakarak sai Hau nia ema, nia tenki hadomi Hau liu buat hotu-hotu. Nia tenki hadomi Hau liu fali nia inan-aman, liu nia kaben, liu nia oan, liu nia maun-alin sira ho mos liu nia aan rasik. Se lae, nia la serve sai Hau nia eskolante.
LUK 14:27 Nia tenki tuir hau, i nia tenki prontu atu simu terus, hanesan ema nebee lori nia krus too mate. Se lae, nia la bele sai Hau nia eskolante.
LUK 14:28 Hanoin took ema nebee atu halo uma andar. Nia tenki tuur sura di-diak lai, atu halo uma nee, tenki gasta osan hira. I nia tenki haree lai, nia osan too ka lae.
LUK 14:29 Se lae, dala ruma foin hahuu hada fatuk deit, osan hotu tiha ona. Nunee ema bele hamnasa nia,
LUK 14:30 dehan, ‘Ema nee foin hahuu halo uma, osan hotu tiha ona!’
LUK 14:31 Hau foo ezemplu ida tan. Liurai ida hakarak funu hasoru liurai seluk, nia tenki tuur hodi tetu di-diak lai. Se nia iha deit soldadu rihun sanulu, nia bele manaan inimigu rihun rua-nulu ka lae?
LUK 14:32 Se liurai nee hanoin katak nia atu lakon, entaun bainhira nia inimigu sei dook, nia haruka kedas nia reprezentante sira hodi husu atu dame malu.
LUK 14:33 Nunee mos, se o atu tuir Hau, o tenki prontu atu husik buat hotu-hotu. Se lae, o la serve atu sai Hau nia eskolante.”
LUK 14:34 Jesus foo ezemplu tan dehan, “Masin diak duni. Maibee se masin nee sai miis ona karik, ita la bele halo meer fila fali, la iha folin tan ona. Ita soe tiha deit. Imi nebee iha tilun, rona di-diak ba!”
LUK 15:1 Iha loron ida, kobrador impostu sira ho ema aat sira seluk mai rona Jesus.
LUK 15:2 Haree nunee, ema Farizeu ho mestri relijiaun sira murmura dehan, “Ema ida nee halo belun fali ho sala nain sira, i tuur haan hamutuk tan ho sira.”
LUK 15:3 Nunee, Jesus foo hanoin ba sira liu husi komparasaun ida dehan,
LUK 15:4 “Se karik imi ida iha bibi malae atus ida, depois bibi ida lakon tiha, bibi nain sei halo saida? Nia husik hela bibi sia-nulu resin sia iha rai luan, i baa buka kedas bibi ida nebee lakon too hetan.
LUK 15:5 Bainhira nia hetan ona bibi nee, nia kaer tau ba nia kabaas hodi fila ba uma ho kontenti.
LUK 15:6 Too iha uma, nia foo hatene nia kolega ho vizinhu sira dehan, ‘Mai ita haksolok hamutuk, tanba hau hetan fali hau nia bibi nebee lakon.’
LUK 15:7 Hau hatete ba imi, iha lalehan mos nunee. Maromak ho Nia anju sira haksolok teb-tebes bainhira sala nain ida hakribi nia sala. Nee halo Sira haksolok liu fali duke ema sia-nulu resin sia nebee moris loos i la presiza hakribi sira nia sala.”
LUK 15:8 Jesus halo tan komparasaun ida dehan, “Senhora ida iha osan mutin sanulu, depois osan mutin ida lakon tiha. Agora nia atu halo saida? Nia sei sunu ahi-oan, i dasa uma laran tomak hodi buka di-diak osan nee too hetan.
LUK 15:9 Bainhira nia hetan ona, nia foo hatene ba nia kolega ho vizinhu sira dehan, ‘Mai ita haksolok hamutuk, tanba hau hetan fali hau nia osan nebee lakon.’
LUK 15:10 Hau hatete ba imi, iha lalehan mos nunee. Maromak nia anju sira haksolok teb-tebes bainhira sala nain ida hakribi nia sala.”
LUK 15:11 Jesus halo komparasaun ida tan nunee: “Senhor ida iha oan mane nain rua.
LUK 15:12 Loron ida, oan mane kiik dehan ba nia aman, ‘Apaa, apaa nia riku-soin sira nee, fahe ona hau nian mai.’ Entaun nia aman fahe nia riku-soin ba sira nain rua.
LUK 15:13 La kleur oan mane kiik faan tiha riku-soin hotu nebee nia hetan nee hodi baa rai dook. Iha nebaa nia gasta osan arbiru hodi moris goza hela deit.
LUK 15:14 Too ikus nia osan hotu ona. Iha tempu nebaa rai nee hamlaha boot, i nia moris susar.
LUK 15:15 Entaun nia baa buka servisu. Ema rai nain ida simu nia i haruka nia baa hein fahi.
LUK 15:16 Nia hamlaha teb-tebes, too nia haree fahi nia hahaan, nia kaan teb-tebes. Maibee la iha ema ida mak foo netik hahaan ba nia.
LUK 15:17 Too ikus nia matan moos hodi hanoin, ‘Ema sira nebee servisu ba hau nia aman, sira simu ai haan barak too resin, i hau iha nee hamlaha atu-mate.
LUK 15:18 Diak liu, hau fila deit ba hau nia aman, i hau hatete ba nia katak, hau halo sala ona hasoru Maromak i hasoru apaa.
LUK 15:19 Hau la serve atu sai tan apaa nia oan. Hau sai deit apaa nia kriadu mos, la iha buat ida.’
LUK 15:20 Entaun nia hamriik hodi fila ba nia aman. Husi dook nia aman haree ona nia, i hanoin teb-tebes. Katuas nee halai baa simu nia oan hodi hakuak i rei nia.
LUK 15:21 Nia oan hatete ba nia aman, ‘Apaa, hau halo sala ona hasoru Maromak i hasoru apaa. Hau la serve atu sai tan apaa nia oan.’
LUK 15:22 Maibee nia aman haruka nia atan sira dehan, ‘Lalais! Baa foti ropa nebee diak liu hodi foo hatais nia. Tau kadeli ba nia liman, i tau sandalias ba nia ain.
LUK 15:23 Baa dada karau oan bokur ida mai oho, para ita halo festa rame-rame.
LUK 15:24 Tanba hau nia oan nee hanesan mate tiha ona, maibee agora nia moris fila fali. Nia lakon tiha, maibee agora hau hetan fali ona.’ Nunee sira hahuu halo festa rame-rame.
LUK 15:25 Momentu nee, oan mane boot iha hela toos. Bainhira nia fila, atu besik too uma, nia rona muzika lian ho ema dansa.
LUK 15:26 Entaun nia bolu atan ida hodi husu, ‘Imi halo saida mak rame loos nee?’
LUK 15:27 Atan nee hataan, ‘Senhor nia alin mai fali ona. Nee mak ita nia apaa haruka oho karau oan bokur ida hodi halo festa, tanba nia fila ona ho diak.’
LUK 15:28 Rona nunee, oan mane boot hirus teb-tebes, i lakohi tama ba uma laran. Depois nia aman sai baa hamaus nia atu tama ba laran.
LUK 15:29 Maibee nia hataan, ‘Apaa, hanoin took! Durante tinan barak nia laran hau servisu hanesan fali atan ba apaa, i apaa haruka hau halo saida deit, hau sempre halo tuir. Maski nunee apaa nunka foo bibi oan ida mai hau para halo festa ho hau nia kolega sira.
LUK 15:30 Maibee apaa nia oan nee gasta tuun-sae apaa nia riku-soin ho feto luroon. Depois nia fila fali mai, apaa oho kedas ita nia karau bokur ida hodi simu nia.’
LUK 15:31 Maibee nia aman hataan, ‘Hau nia oan doben, durante nee o sempre hela hamutuk ho hau. Buat hotu-hotu nebee hau nian, o nian.
LUK 15:32 Maibee agora ita tenki halo festa hodi haksolok, tanba o nia alin nee hanesan mate tiha ona, maibee agora nia moris fila fali. Nia lakon tiha, maibee agora hau hetan fali ona.’”
LUK 16:1 Jesus koalia ba Nia eskolante sira ho komparasaun ida nunee: “Iha ema riku ida foti funsionariu ida sai xefi hodi toma konta nia sasaan hotu. La kleur patraun rona dehan xefi nee gasta arbiru patraun nia osan.
LUK 16:2 Entaun nia bolu ema nee hodi hatete, ‘Hau rona o halo saida mak nee?! Agora o tenki halo relatoriu ida mai hau, tanba o la bele kaer tan kargu nee ona.’
LUK 16:3 Xefi nee komesa hanoin barak, ‘Patraun atu hasai hau ona, agora hau tenki halo saida? Kee rai, hau la iha forsa, husu ezmola, hau moe.
LUK 16:4 Aah! Hau hatene ona saida mak atu halo. Nunee bainhira hau sai ona husi servisu nee, ema barak prontu simu hau iha sira nia uma.’
LUK 16:5 Depois xefi nee bolu ema sira nebee iha tusan iha nia patraun. Nia husu ba ida primeiru, ‘Kolega deve hau nia patraun hira?’
LUK 16:6 Ema nee hataan, ‘Hau deve mina azeite bidoon rua-nulu.’ Xefi dehan, ‘Nee o nia nota. Tuur lalais hakerek fali dehan, o deve deit mina bidoon sanulu.’
LUK 16:7 Ba ema tuir mai, nia husu, ‘Ita deve hira?’ Nia hataan, ‘Hau deve trigu karoon rihun ida.’ Xefi dehan, ‘Foti ita nia nota nee, i hakerek fali, karoon atus walu deit.’
LUK 16:8 Maski nia halo manipulasaun nunee, maibee too ikus nia patraun gaba nia, tanba nia kakutak lao duni.” Jesus hatutan tan dehan, “Loos duni, ema mundu nian hatene liu hadau ema nia laran duke ema nebee moris iha naroman laran.
LUK 16:9 Nunee, Hau hatete ba imi, tenki uza imi nia riku-soin mundu nian hodi ajuda ema. Ho nunee, imi bele hetan belun barak, i bainhira riku nee hotu ona, Maromak sei prepara fatin ba imi iha lalehan.
LUK 16:10 Se ema halao buat kiik ho lo-loos, buat boot mos nia sei halao ho lo-loos. Maibee se nia bosok iha buat kiik, buat boot mos nia sei bosok.
LUK 16:11 Se imi kaer riku-soin mundu nian la loos, oinsaa Maromak bele foo fiar ba imi kaer riku-soin lalehan nian? Tanba riku-soin lalehan nee mak folin boot liu.
LUK 16:12 Se imi kaer ema seluk nia riku-soin la loos, la iha ema ida brani foo riku-soin ba imi atu sai imi nian rasik.
LUK 16:13 Atan ida la bele serbi patraun nain rua. Tanba nia sei odi ida, i hadomi ida seluk. Nia foo laran ba ida, i lakohi interese ida seluk. Nunee mos imi la bele serbi Maromak i serbi osan dala ida.”
LUK 16:14 Iha ema balu husi grupu Farizeu rona Jesus nia koalia ohin nee. Sira hamnasa fali Nia, tanba sira hadomi liu osan.
LUK 16:15 Maibee Jesus dehan ba sira, “Iha ema nia oin, imi hatudu aan hanesan ema nebee moris loos, maibee Maromak hatene imi nia laran. Iha buat barak mak ema dehan folin boot, maibee Maromak hakribi.
LUK 16:16 Moisés nia lei ho profeta sira nia liafuan lao nafatin too João Sarani Nain mai. Depois komesa husi João, ema foo sai Liafuan Diak kona ba oinsaa Maromak ukun nudar Liurai, i ema barak hakaas aan sai Maromak nia reinu.
LUK 16:17 Maski Liafuan Diak nee foo sai ona, maibee Maromak nia lei sei la lakon. Lalehan ho rai bele lakon, maibee lei nia letra ida deit mos sei la lakon.
LUK 16:18 Se mane ida soe nia kaben, depois kaben fali ho feto seluk, nia halo sala seksual. I se mane ida kaben fali ho feto nebee nia laen soe tiha nee, mane nee mos halo sala seksual.”
LUK 16:19 Depois Jesus konta istoria ida nunee: “Iha ema riku ida sempre hatais ropa mesak furak deit. Loron-kalan nia halo festa hela deit.
LUK 16:20 Iha mos ema kiak ida naran Lázaro, nia isin lolon nakonu ho kanek dodok. Loro-loron nia latan hela deit iha ema riku nee nia portaun hodi husu ezmola.
LUK 16:21 Nia hakarak teb-tebes atu haan hahaan nebee monu iha ema riku nia meza okos, maibee la hetan buat ida. I asu mai lambe fali nia kanek dodok nee.
LUK 16:22 Too ikus, Lázaro mate, i Maromak nia anju mai foti nia lori ba iha fatin diak nian iha Abraão nia sorin. La kleur ema riku nee mos mate, i ema hakoi nia.
LUK 16:23 Depois nia terus teb-tebes iha ahi infernu. Iha nebaa, nia foti matan, haree Abraão husi dook, i Lázaro tuur hela iha nia sorin.
LUK 16:24 Entaun nia bolu, ‘Pai Abraão, hanoin hau ba! Haruka Lázaro habokon nia liman fuan ba bee, para halo turu netik mai hau nia nanaal. Tanba ahi nee halo hau terus teb-tebes.’
LUK 16:25 Maibee Abraão hataan, ‘Oan, keta haluha, uluk o sei moris iha mundu, buat diak ida la falta ba o, maibee Lázaro so hetan terus deit. Agora Maromak halo haksolok Lázaro iha nee, i o terus iha nebaa.
LUK 16:26 Laos nee deit, ema husi nee la bele baa nebaa, i ema husi nebaa mos la bele mai iha nee. Tanba entre o ho ami iha rai kuak ida klean i luan teb-tebes mak haketak ita.’
LUK 16:27 Ema riku nee hataan, ‘Se nunee pai, hau husu boot atu pai haruka Lázaro baa lai iha hau nia apaa nia uma.
LUK 16:28 Tanba hau sei iha alin mane nain lima iha nebaa. Haruka Lázaro baa foo hanoin ba sira atu husik ona sira nia sala, para aban-bainrua sira mate, sira keta tama iha fatin terus ida nee.’
LUK 16:29 Maibee Abraão hataan, ‘Moisés ho Maromak nia profeta sira seluk rai hela lia menon. O nia alin sira tenki rona ba sira.’
LUK 16:30 Ema riku nee protesta dehan, ‘Nee la too, pai Abraão! Maibee se ema mate moris fila fali i baa foo hatene sira mak sira sei husik sira nia sala.’
LUK 16:31 Abraão hataan, ‘Se sira lakohi rona Moisés ho profeta sira nia liafuan, maski ema mate moris fali hodi foo hatene ba sira mos, sira sei la rona.’”
LUK 17:1 Jesus hatete ba Nia eskolante sira dehan, “Sempre iha buat ruma mak halo ema monu ba sala. Maibee see mak halo ema seluk monu ba sala, nia sei terus.
LUK 17:2 Ba nia, diak liu ema kesi fatuk boot ida iha nia kakorok depois soe nia tama ba tasi laran! Tanba se nia halo labarik ida monu ba sala, nia sei simu kastigu todan liu fali ida nee.
LUK 17:3 Nee duni imi tenki kuidadu para la bele halo ema seluk monu ba sala! Se imi nia maluk ida halo sala, koriji nia. Se nia hakribi nia sala, foo perdaun ba nia.
LUK 17:4 Se nia halo sala hasoru o, depois mai dehan, ‘Deskulpa, hau sala’, i husu tiha deskulpa, nia halo sala fali, mai husu deskulpa tan, bele too dala hitu iha loron ida mos, o tenki simu nia.”
LUK 17:5 Depois apostolu sira husu ba Nai Jesus, “Aumenta tan ami nia fiar!”
LUK 17:6 Jesus hataan, “Se imi nia fiar kiikoan hanesan mostarda musan ida mos, imi bele foo orden ba ai huun boot ida dehan, ‘Sai tiha husi nee, i muda baa hamriik fali iha tasi laran.’ I ai huun nee sei tuir duni imi nia orden.”
LUK 17:7 Jesus foo ezemplu ida dehan, “Hanoin took, imi mak hanesan patraun. Imi nia atan ida baa fila rai iha toos ka hein bibi malae. Bainhira atan nee fila husi servisu, imi konvida kedas nia atu mai haan ka?
LUK 17:8 Lae! Imi sei haruka dehan, ‘O baa prepara hahaan mai hau lai, depois troka tiha o nia ropa hodi serve hau iha meza. Hotu tiha mak o bele haan-hemu.’
LUK 17:9 Tuir imi nia hanoin, se atan nee halo tuir buat nebee patraun haruka, patraun sei foo obrigadu ba nia ka? Lae!
LUK 17:10 Imi mos hanesan. Se imi halo hotu ona servisu nebee Maromak foo, imi tenki hatete, ‘Ami nee atan deit, la serve atu simu obrigadu. Ami so halao deit ami nia obrigasaun.’”
LUK 17:11 Jesus kontinua lao ba Jerusalém. Too dalan klaran, Nia lao tuir baliza entre provinsia Galileia ho Samaria.
LUK 17:12 Bainhira Nia atu tama ba aldeia ida, mane nain sanulu moras lepra mai atu hasoru Nia. Sira hamriik husi dook deit
LUK 17:13 hodi bolu ho lian makaas dehan, “Jesus, Mestri, hanoin ami ba!”
LUK 17:14 Bainhira Jesus haree sira, Nia hatete ba sira, “Imi baa hatudu imi nia isin ba nai lulik sira, para sira haree.” Entaun sira baa. Tuir dalan, derepenti deit sira hotu hetan isin diak.
LUK 17:15 Ema ida husi nain sanulu nee, bainhira nia haree katak nia diak tiha ona, nia fila kedas ba Jesus hodi hahii dadauk Maromak ho lian makaas.
LUK 17:16 Too iha nebaa, nia hakneak ho hakruuk too rai iha Jesus nia ain hodi foo agradese ba Nia. Ema nee ema Samaria, laos ema Judeu.
LUK 17:17 Jesus husu, “Ohin iha ema nain sanulu mak hetan isin diak, loos ka lae? Sira nain sia iha nebee?
LUK 17:18 Nusaa mak so ema estranjeiru ida nee deit mak fila mai foo agradese ba Maromak?”
LUK 17:19 Depois Jesus hatete ba ema nee, “O hetan kura tanba o fiar mai Hau. Hamriik ba. Bele baa ona.”
LUK 17:20 Iha loron ida, ema Farizeu balu mai husu Jesus, “Bainhira mak Maromak komesa ukun nudar Liurai?” Jesus hataan, “Maromak halao nia ukun iha mundu, laos buat ida nebee ema bele haree ho matan.
LUK 17:21 Nunee ema la bele dehan, ‘Maromak ukun iha nee’ ka, ‘Nia ukun iha nebaa.’ Tanba Maromak ukun iha ema nia laran.”
LUK 17:22 Depois Jesus hatete ba Nia eskolante sira, “Iha tempu oin mai, imi sei hakarak teb-tebes atu haree Hau, Ema Umanu nia Oan fila fali mai, maibee la haree.
LUK 17:23 Ema sei hatete ba imi, ‘Ema Umanu nia Oan iha nee’ ka, ‘Nia iha nebaa.’ Lalika fiar.
LUK 17:24 Tanba bainhira Hau, Ema Umanu nia Oan fila fali mai husi lalehan, ema sei haree mo-moos, hanesan rai lakan makaas foo naroman husi rohan ba rohan.
LUK 17:25 Maibee Hau tenki hetan terus oi-oin uluk, i ema sira nebee moris agora sei fila kotuk mai Hau.
LUK 17:26 Bainhira loron too atu Hau, Ema Umanu nia Oan fila fali mai, ema sei moris baibain hanesan iha Noé nia tempu uluk.
LUK 17:27 Iha tempu nebaa sira haan-hemu i halo festa kazamentu hanesan baibain, too loron Noé tama ba roo boot laran. Derepenti, bee boot sae, halo sira mate mohu.
LUK 17:28 Nunee mos iha Ló nia tempu. Ema haan-hemu, halo kontratu, halo toos, i harii uma, hanesan baibain.
LUK 17:29 Maibee iha loron nebee Ló sai husi sidade Sodoma, derepenti deit ahi ho ahi klaak monu tuun husi lalehan, halo ema Sodoma sira mate mohu.
LUK 17:30 Nunee mos, bainhira Hau, Ema Umanu nia Oan fila mai i ema hotu-hotu haree mo-moos Hau.
LUK 17:31 Iha loron nee, ema nebee iha hela liur, la bele tama ba uma laran hodi foti nia sasaan. Ema nebee iha hela toos, la bele fila baa foti buat ruma iha uma.
LUK 17:32 Keta haluha saida mak akontese ho Ló nia kaben.
LUK 17:33 See mak hakarak salva nia aan, nia sei lakon fali. I see mak lakon nia moris, nia sei hetan moris rohan-laek.
LUK 17:34 Hau hatete ba imi, bainhira Hau fila mai, ema nain rua toba hela iha kama ida, Maromak sei lori tiha ida, i husik hela ida seluk.
LUK 17:35 Iha feto nain rua fai hela hare, Maromak sei lori tiha ida, i husik hela ida seluk.
LUK 17:36 [Iha mane nain rua servisu hela iha toos, Maromak sei lori tiha ida, i husik hela ida seluk.]”
LUK 17:37 Jesus nia eskolante sira husu, “Nai, buat sira nee sei akontese iha nebee?” Jesus soe lia dehan, “Bainhira imi haree manu metan semo hamutuk ba iha fatin ida, nee sinal hodi hatudu mo-moos katak iha mate isin dodok iha nebaa.”
LUK 18:1 Depois Jesus halo komparasaun hodi hanorin Nia eskolante para sira tenki halo orasaun nafatin i la bele lakon esperansa.
LUK 18:2 Nia istoria nunee: “Iha sidade ida iha juis ida la tauk Maromak, i la interese ema ida.
LUK 18:3 Iha mos feto faluk ida nebee baa hasoru beibeik juis hodi husu nia direitu dehan, ‘Tesi hau nia lia ho lo-loos.’
LUK 18:4 Fo-foun juis lakohi simu feto faluk nee, maibee too ikus nia dehan ba nia aan, ‘Hau la tauk Maromak, i la interese ema ida,
LUK 18:5 maibee feto faluk nee mai sateia beibeik hau. Diak liu hau tesi nia lia ho lo-loos. Se lae, nia mai beibeik halo hau kole deit.’”
LUK 18:6 Depois Nai Jesus hatete, “Imi hanoin took, juis laran aat nee nia liafuan.
LUK 18:7 Too ikus, nia tulun duni feto faluk nee. Saa tan Maromak! Ema nebee Maromak hili ona, sira loron-kalan harohan husu tulun ba Nia. Nia sei tesi sira nia lia ho lo-loos, i sei la demora.
LUK 18:8 Hau hatete ba imi, Maromak sei foo kedas desizaun diak ba sira. Maibee Hau hakarak husu nunee: Aban-bainrua Hau, Ema Umanu nia Oan fila mai iha mundu, Hau sei hetan ema nebee fiar mai Hau ka lae?”
LUK 18:9 Jesus konta tan istoria ida ba ema nebee foti aan dehan sira mak moris loos liu, i la konsidera ema seluk. Nia halo komparasaun hanesan nee:
LUK 18:10 “Iha loron ida, ema nain rua baa halo orasaun iha uma kreda boot. Ida husi grupu Farizeu, ida seluk kobrador impostu.
LUK 18:11 Ema Farizeu nee hamriik hodi halo orasaun nunee: ‘Maromak, hau agradese tanba hau ema diak, laos hanesan ema seluk. Sira seluk mesak ema aat, naok-teen, ho ema nebee halo sala ho ema nia kaben. Hau foo agradese ba Ita Boot, tanba hau laos ema aat hanesan kobrador impostu ida nebaa.
LUK 18:12 Hau jejun semana ida dala rua. I buat hotu-hotu nebee hau hetan, hau sempre foo parte ida husi parte sanulu ba Ita Boot.’
LUK 18:13 Maibee kobrador impostu nee hamriik husi dook, i la brani foti matan ba leten. Nia hakruuk ho laran tristi teb-tebes tanba nia halo sala. I nia harohan dehan, ‘Maromak, hau ema sala nain. Hanoin hau ba.’
LUK 18:14 Hotu tiha, ema nain rua nee fila ba uma.” Jesus hatutan, “Hau hatete ba imi, Maromak simu mak ida kobrador impostu nee, laos ema Farizeu. Tanba ema nebee foti aan, Maromak sei hatuun, i ema nebee haraik aan, Maromak sei foti aas.”
LUK 18:15 Ema balu mai lori labarik kiikoan sira ba Jesus, atu Nia tau liman hodi foo bensaun ba sira. Haree nunee, Jesus nia eskolante sira bandu netik.
LUK 18:16 Maibee Jesus bolu labarik sira nee ba Nia. I Nia siak Nia eskolante sira dehan, “Husik labarik sira nee mai iha Hau, la bele bandu. Tanba ema hanesan labarik sira nee mak sai Maromak nia reinu.
LUK 18:17 Hau hatete lo-loos ba imi, see mak atu sai Maromak nia reinu, nia tenki laran metin ba Maromak hanesan labarik sira nee. Se lae, la bele.”
LUK 18:18 Loron ida, iha ema Judeu nia boot ida husu ba Jesus, “Mestri nebee diak, hau tenki halo saida para hau bele hetan moris rohan-laek?”
LUK 18:19 Jesus hataan, “Tanba saa mak ita dehan, Hau ema diak? La iha ema ida mak diak, so Maromak deit.
LUK 18:20 Ita rasik hatene ukun fuan sira nee: La bele halo sala ho ema nia kaben, la bele oho ema, la bele naok, la bele foo sasin falsu, respeita o nia inan-aman.”
LUK 18:21 Ema nee hataan, “Komesa hau sei kiik, ukun fuan sira nee hau halo tuir hotu ona.”
LUK 18:22 Rona nunee, Jesus hataan, “Maibee ita sei falta buat ida. Agora baa faan tiha ita nia riku-soin hotu, i osan nee fahe ba ema kiak. Nunee mak ita sei hetan fali riku-soin iha lalehan. Fahe hotu tiha, mai tuir Hau.”
LUK 18:23 Rona tiha Jesus nia resposta, ema nee laran tristi liu, tanba nia riku teb-tebes.
LUK 18:24 Jesus hateke ba nia hodi dehan, “Ema riku susar teb-tebes atu sai Maromak nia reinu.
LUK 18:25 Kuda kamelu tama liu husi daun kuak susar teb-tebes. Maibee susar liu tan, ema riku ida atu sai Maromak nia reinu hodi hakruuk ba Nia nudar nia Liurai.”
LUK 18:26 Ema sira nebee rona Jesus koalia nunee, sira husu, “Entaun see loos mak bele hetan salvasaun?”
LUK 18:27 Jesus hataan, “Ba ema, la bele duni. Maibee ba Maromak, buat hotu-hotu bele.”
LUK 18:28 Pedro hatete, “Ami husik tiha ona buat hotu-hotu hodi tuir Ita Boot.”
LUK 18:29 Jesus dehan, “Hau hatete lo-loos ba imi, Maromak sei foo bensaun ba see-see deit mak husik ona nia uma, nia kaben, nia maun-alin, nia inan-aman, ka nia oan sira, tanba nia serbi Maromak nudar nia Liurai.
LUK 18:30 Iha mundu nee, ema nee sei simu barak liu fali buat nebee mak nia husik. I bainhira nia husik ona mundu nee, nia sei hetan moris rohan-laek.”
LUK 18:31 Jesus bolu Nia eskolante nain sanulu resin rua halibur hamutuk iha fatin ida. Nia hatete ba sira, “Rona mai! Ita lao dadauk ba Jerusalém. Too iha nebaa, buat hotu-hotu nebee Maromak nia profeta sira uluk hakerek ona kona ba Ema Umanu nia Oan sei akontese duni.
LUK 18:32 Ema sei entrega Hau ba ema nebee la fiar Maromak. Depois ema sira nee sei hamoe Hau, tarata Hau, tafui kabeen mai Hau,
LUK 18:33 baku Hau ho sikoti, i oho Hau. Maibee iha loron tolu Hau sei moris fali.”
LUK 18:34 Nia eskolante sira la kompriende buat ida. Liafuan nee taka hela ba sira, i sira la hatene, Jesus koalia kona ba saida.
LUK 18:35 Bainhira Jesus besik atu tama ona iha sidade Jerikó, iha ema matan delek ida tuur hela iha dalan ninin hodi husu ezmola.
LUK 18:36 Ema matan delek nee rona ema barak lao liu husi nebaa, nia husu saida mak akontese.
LUK 18:37 Ema dehan ba nia, “Jesus husi Nazaré mak liu.”
LUK 18:38 Entaun nia bolu ho lian makaas dehan, “Jesus, liurai David nia Jerasaun, hanoin hau ba!”
LUK 18:39 Ema sira nebee lao iha Jesus nia oin, siak ema matan delek nee i haruka nia nonook. Maibee ema nee bolu ho lian makaas liu tan dehan, “Liurai David nia Jerasaun, hanoin hau ba!”
LUK 18:40 Rona nunee, Jesus mos para, i haruka ema lori nia mai. Bainhira ema nee too, Jesus husu ba nia,
LUK 18:41 “O hakarak Hau halo saida ba o?” Nia hataan, “Nai, hau hakarak haree.”
LUK 18:42 Jesus hatete ba nia, “Entaun haree ona ba. Tanba o nia fiar mak o hetan kura.”
LUK 18:43 I ema nee nia matan diak kedas. Depois nia lao tuir Jesus, hahii dadauk Maromak. Ema hotu-hotu nebee haree buat nee, sira mos hahii Maromak.
LUK 19:1 Depois Jesus tama iha sidade Jerikó i lao liu husi sidade laran.
LUK 19:2 Iha nebaa iha ema ida naran Zaqueu. Nia xefi kobrador impostu, i riku teb-tebes.
LUK 19:3 Zaqueu buka atu haree Jesus, maibee la hetan, tanba ema barak teb-tebes, i nia badak oan ida.
LUK 19:4 Entaun nia halai uluk baa sae tiha ai huun ida iha dalan ninin atu bele haree Jesus, tanba Jesus atu liu husi nebaa.
LUK 19:5 Too iha ai huun nee, Jesus hateke ba leten hodi dehan, “Zaqueu, tuun lalais mai! Orsida kalan Hau tenki toba iha ita nia uma.”
LUK 19:6 Zaqueu tuun kedas, i lori Jesus ba nia uma ho laran haksolok.
LUK 19:7 Ema hotu-hotu nebee haree nunee, murmura dehan, “Nia nee ema aat ida. Nusaa mak Jesus baa vizita fali iha nia uma?”
LUK 19:8 Too iha uma, Zaqueu hamriik hodi dehan ba Nai Jesus, “Nai, agora kedas riku-soin hotu-hotu nebee hau iha, sorin balu hau foo ba ema kiak sira. I se hau han-matak ema ruma karik, hau sei selu fali dala haat.”
LUK 19:9 Jesus hatete ba nia, “Iha loron nee kedas, Maromak salva ita nia uma kain, tanba ita nia hahalok hatudu katak, ita Abraão nia jerasaun.
LUK 19:10 Hau, Ema Umanu nia Oan mai iha mundu para buka ema nebee lakon hodi salva sira.”
LUK 19:11 Momentu nebaa, ema barak rona hela Jesus nia hanorin. Nia besik dadauk Jerusalém, i povu hanoin katak, too iha nebaa, Maromak atu ukun kedas nudar Liurai. Entaun Jesus hanorin sira ho komparasaun ida.
LUK 19:12 Nia konta nunee: “Iha ema raan liurai ida atu baa rai dook para liurai boot foti nia sai liurai, depois mak nia fila fali mai ukun.
LUK 19:13 Molok nia atu baa, nia bolu nia atan nain sanulu hodi entrega osan mean ida ba sira ida-idak. Nia foo orden dehan, ‘Imi uza osan nee hodi fila liman too hau fila fali mai, para hau bele hetan funan.’ Depois nia baa.
LUK 19:14 Maibee nia povu odi nia, nunee sira haruka sira nia reprezentante balu tuir kedas hodi foo hatene ba liurai boot dehan, ‘Ami lakohi ema ida nee ukun ami.’
LUK 19:15 Maski nunee liurai boot foti duni nia sai liurai. Depois nia fila ba nia rain. Too iha uma, nia bolu nia atan nain sanulu nee hodi husu kona ba osan nebee nia entrega ba sira nee, sira manaan fali hira.
LUK 19:16 Atan primeiru mai hatete, ‘Patraun, osan mean ida nebee ita boot foo mai hau nee, manaan fali sanulu.’
LUK 19:17 Patraun hatete ba nia, ‘Diak loos! O nee atan diak duni. Tanba o halo buat kiikoan nee ho loos, nunee hau konfia o, i agora hau foti o hodi ukun sidade sanulu.’
LUK 19:18 Tuir mai, atan segundu mai dehan, ‘Patraun, osan mean nebee ita boot foo mai hau nee, manaan fali lima.’
LUK 19:19 Patraun hatete ba nia, ‘Hau foti o hodi ukun sidade lima.’
LUK 19:20 Maibee atan ida seluk mai dehan, ‘Patraun, ita boot nia osan hau falun ho hena hodi rai di-diak.
LUK 19:21 Hau halo nunee tanba hau tauk. Hau hatene ita boot ema siak-teen ida. Ita boot gosta foti buat nebee laos ita boot mak rai, i kuu buat nebee laos ita boot mak kuda.’
LUK 19:22 Patraun hataan, ‘Atan aat! O nia liafuan rasik mak hamonu fali o. O hatene katak hau ema siak-teen, hau gosta foti buat nebee laos hau mak rai, i kuu buat nebee laos hau mak kuda.
LUK 19:23 Se nunee, nusaa mak o la rai hau nia osan iha banku, para hau fila mai, bele simu fali osan nee ho nia funan?’
LUK 19:24 Depois patraun hatete ba ema sira nebee hamriik besik dehan, ‘Foti tiha osan nee husi nia hodi foo ba atan ida nebee manaan sanulu.’
LUK 19:25 Sira protesta dehan, ‘Patraun, nia hetan ona sanulu!’
LUK 19:26 Patraun hataan, ‘Hau hatete ba imi, ema nebee iha ona, sei simu tan. Maibee ema nebee la iha, uitoan nebee nia iha mos, sei hasai tiha husi nia.
LUK 19:27 Agora, hau nia inimigu sira nebee lakohi simu hau hanesan liurai, imi baa kaer sira, lori mai oho tiha hotu iha hau nia oin.’”
LUK 19:28 Konta tiha hotu, Jesus kontinua lao sae ba Jerusalém, i ema barak tuir Nia.
LUK 19:29 Bainhira Nia besik ona aldeia Betfagé ho Betánia iha foho Oliveira nia lolon, Nia haruka Nia eskolante nain rua baa uluk. Nia dehan ba sira,
LUK 19:30 “Imi baa iha aldeia nebaa. Bainhira imi tama, imi sei haree kuda buru oan ida kesi hela, ema ida seidauk sae. Kore tiha dada mai.
LUK 19:31 Se ema ruma husu karik, ‘Nusaa mak imi kore fali kuda buru nee?’, hatete ba nia, ‘Nai mak presiza.’”
LUK 19:32 Entaun sira nain rua baa, sira haree buat hotu-hotu tuir lo-loos saida mak Jesus ohin koalia.
LUK 19:33 Bainhira sira kore dadauk kuda nia talin, kuda nain husu ba sira, “Nusaa mak imi kore fali kuda buru nee?”
LUK 19:34 Sira hataan, “Nai mak presiza.”
LUK 19:35 Depois sira dada kuda buru nee lori ba Jesus. Too iha nebaa, sira hasai sira nia hena tau ba iha kuda nia kotuk hodi hasae Jesus ba.
LUK 19:36 Jesus liu dadauk, ema barak hasai sira nia hena nahe tu-tuir dalan.
LUK 19:37 Too iha dalan besik atu tuun husi foho Oliveira, ema barak nebee tuir Nia nee komesa hahii Maromak tanba milagre hotu-hotu nebee sira haree ona.
LUK 19:38 Sira haklalak ho haksolok dehan, “Maromak foo bensaun ba Nai Liurai. Nia mak mai lori Nai Maromak nia naran. Agora Maromak iha lalehan ho ema iha rai klaran dame malu ona. Hahii Nia iha fatin aas liu!”
LUK 19:39 Maibee ema Farizeu balu iha ema barak nee nia leet, dehan ba Jesus, “Mestri, haruka Ita nia ema sira nee nonook.”
LUK 19:40 Jesus hataan, “Hau hatete ba imi, se sira nonook karik, fatuk sira nee sei haklalak.”
LUK 19:41 Bainhira sira besik atu tama ona Jerusalém, Jesus haree sidade nee, Nia tanis
LUK 19:42 hodi dehan, “Koitadu, imi ema Jerusalém! Tuir lo-loos, ohin loron imi hatene ona dalan nebee mak bele lori imi ba moris iha pas ho hakmatek nia laran. Maibee imi la hatene nafatin, i agora imi la hetan tan ona.
LUK 19:43 Too tempu ida, imi nia inimigu sira sei halo moru haleu imi nia sidade too imi sai la diak.
LUK 19:44 Sira sei harahun tiha imi nia sidade halo tetuk too rai. I sira sei kaer imi ho imi nia oan sira riba ba rai too mate. Buat sira nee hotu sei akontese tanba Maromak mai tiha ona atu salva imi, maibee imi la hatene tuir.”
LUK 19:45 Jesus tama ba iha area uma kreda boot nian, Nia duni sai ema sira nebee mak halo hela kontratu iha uma oin.
LUK 19:46 Nia siak sira dehan, “Iha Maromak nia liafuan hakerek tiha ona dehan, ‘Hau nia Uma nee fatin para halo orasaun.’ Maibee imi halo fali hanesan ema naok-teen sira nia subar fatin.”
LUK 19:47 Loro-loron Jesus baa hanorin iha uma kreda boot. Nai lulik nia ulun sira, mestri relijiaun sira, ho nai ulun Judeu sira buka dalan atu oho Nia.
LUK 19:48 Maibee sira la hetan dalan, tanba povu hotu-hotu gosta teb-tebes rona Jesus nia liafuan.
LUK 20:1 Loron ida, Jesus hanorin i foo sai Maromak nia Liafuan Diak iha area uma kreda boot nian. Nia sei koalia hela, nai lulik nia ulun sira, mestri relijiaun sira ho katuas lia nain sira mai hasoru Nia
LUK 20:2 hodi husu, “O iha direitu saida para halo buat sira nee? See mak foo direitu nee ba O?”
LUK 20:3 Jesus hataan, “Hau mos atu husu buat ida ba imi. Foo hatene took Hau.
LUK 20:4 See mak foo direitu ba João Sarani Nain hodi sarani ema? Maromak mak foo ka, ema mak foo?”
LUK 20:5 Sira koalia ba malu, “Ita susar ona. Se ita hataan, ‘Maromak mak foo direitu ba nia’, Jesus sei husu fali dehan, ‘Entaun, nusaa mak imi la fiar ba nia?’
LUK 20:6 Maibee se ita dehan, ‘Ema mak foo direitu’, entaun ema lubun boot nee sei foti fatuk hodi tuda mate ita. Tanba sira fiar katak, João nee Maromak nia profeta ida.”
LUK 20:7 Entaun sira dehan ba Jesus, “Ami la hatene, see mak foo direitu nee ba João.”
LUK 20:8 Jesus dehan ba sira, “Se nunee, Hau mos la hatete ba imi, see mak foo direitu mai Hau hodi halo buat sira nee.”
LUK 20:9 Depois Jesus hanorin povu iha nebaa ho komparasaun ida nunee: “Iha toos nain ida kuda uvas iha nia toos ida tomak. Hotu tiha, nia foo ba ema aluga, depois nia baa hela kleur iha rai liur.
LUK 20:10 Too tempu kuu uvas, toos nain haruka nia atan ida fila baa simu ninia parte. Maibee ema aluga toos nee baku nia, i duni nia fila ho liman mamuk.
LUK 20:11 Depois toos nain haruka tan nia atan ida baa. Maibee sira mos baku nia, tarata nia, i haruka nia fila ho liman mamuk.
LUK 20:12 Tuir mai nia haruka tan nia atan ida baa, maibee sira halo kanek nia, i soe sai tiha nia husi toos laran.
LUK 20:13 Too ikus, toos nain hatete, ‘Hau atu halo tan saida? Diak liu hau haruka deit hau nia oan doben mak baa. Sira sei respeita nia karik.’
LUK 20:14 Maibee bainhira ema aluga toos nee haree toos nain nia oan, sira dehan ba malu, ‘Nia mak sei hetan nia aman nia riku-soin tomak. Diak liu ita oho tiha nia, atu toos nee sai ita nian fali.’
LUK 20:15 Nunee sira rasta nia sai husi toos laran, i oho tiha nia.” Konta hotu tiha, Jesus husu ba nai ulun relijiaun sira dehan, “Agora, toos nain sei halo saida ba ema sira nebee aluga toos nee?
LUK 20:16 Nia sei baa oho tiha sira hotu, depois foo fali toos nee ba ema seluk aluga.” Bainhira povu rona Jesus koalia nunee, sira dehan, “Husu boot, la bele sai nunee!”
LUK 20:17 Jesus hateke ba sira hodi husu, “Entaun nusaa mak Maromak nia profeta hakerek nunee kona ba Mesias: ‘Iha fatuk ida nebee badaen fatuk sira lakohi uza, maibee agora fatuk nee mak sai fali fatuk nebee prinsipal.’
LUK 20:18 Ema nebee monu kona Fatuk nee, nia sei nakfera. I se karik Fatuk nee mak monu kona ema ruma, ema nee sei rahun.”
LUK 20:19 Mestri relijiaun ho nai lulik nia ulun sira rona komparasaun nee, sira hatene katak Jesus konta istoria nee hodi hatudu sira nia sala. Nunee, sira buka dalan atu kaer kedas Nia. Maibee sira tauk povu.
LUK 20:20 Nunee mestri relijiaun ho nai lulik nia ulun sira haree tu-tuir Jesus. Sira haruka sira nia ema balu baa hodi husu pergunta ba Nia. Ema sira nee finji hakarak hatene, afinal buka atu halo monu Nia. Se Nia hataan sala karik, sira bele kesar Nia ba governador, para nia haruka kaer Jesus.
LUK 20:21 Sira dehan nunee: “Mestri, ami hatene katak Ita Boot sempre koalia buat nebee mak loos, i la fihir ema. Ita Boot sempre hanorin ho loos kona ba Maromak nia hakarak.
LUK 20:22 Ami nia pergunta mak nee: Tuir ita nia lei relijiaun, ita selu impostu ba liurai boot César, nee loos ka la loos?”
LUK 20:23 Maibee Jesus hatene katak sira koko deit Nia. Nunee Nia hataan,
LUK 20:24 “Hatudu lai osan mutin ida mai Hau haree took. See nia oin mak iha osan nee? I see nia naran?” Sira hataan, “Liurai boot César nian.”
LUK 20:25 Jesus hataan, “Se nunee, foo ba estadu buat nebee mak estadu nian, i foo ba Maromak buat nebee mak Maromak nian.”
LUK 20:26 Resposta nee halo sira admira teb-tebes, tanba sira la konsege hetan liafuan sala atu bele hamonu Nia iha ema barak nia oin. Entaun sira mos nonook ona.
LUK 20:27 Ema balu husi grupu Saduseu mos mai koko Jesus. Ema Saduseu sira hanorin dehan, ema mate sei la moris fali. Entaun sira husu ba Jesus,
LUK 20:28 “Mestri, Moisés hakerek lei ida rai hela mai ita dehan nunee: Se mane ida mate husik hela nia kaben, maibee la iha oan, mane nia alin tenki kaben fali ho feto faluk nee, para bele foo jerasaun ba nia maun.
LUK 20:29 Entaun, hanesan nee: Uluk iha maun-alin nain hitu. Maun boot kaben, depois nia mate, la iha oan.
LUK 20:30 Depois nia alin ida tuir nia nee, kaben fali ho feto faluk nee. La kleur nia mos mate, la iha oan.
LUK 20:31 Nunee mos ho nia alin tuir mai. Nia kaben ho feto faluk nee, maibee nia mate, la iha oan. Nunee nafatin too nain hitu nee mate hotu, la iha oan.
LUK 20:32 Ikus mai feto faluk nee mos mate.
LUK 20:33 Agora ami husu nunee: Feto nee kaben ho mane nain hitu. Aban-bainrua kuandu Maromak halo moris fali ema mate sira, feto nee nia kaben mak ida nebee loos?”
LUK 20:34 Jesus hataan, “Iha mundu nee, ema kaben.
LUK 20:35 Maibee aban-bainrua iha mundu foun, ema nebee serve atu moris fali husi mate, sira la kaben tan ona.
LUK 20:36 Sira Maromak nia oan, tanba Nia mak halo sira moris fali ona. Sira hanesan anju, i la mate tan ona.
LUK 20:37 Hori uluk Moisés rasik hatudu katak, ema mate sei moris fali, bainhira nia hakerek kona ba ahi lakan iha ai huun kiikoan ida. Iha momentu nebaa Nai Maromak dehan, ‘Hau mak o nia bei-ala Abraão nia Maromak, Isac nia Maromak ho Jacó nia Maromak, sira hotu adora nafatin Hau too agora.’
LUK 20:38 Maromak nee laos Maromak ba ema mate, maibee Nia Maromak ba ema nebee moris. Tanba tuir Nia haree, Nia povu nebee mate tiha mos, sei moris hela.”
LUK 20:39 Rona nunee, mestri relijiaun balu dehan, “Mestri, Ita Boot hataan diak loos.”
LUK 20:40 Hotu tiha ema ida la brani husu tan pergunta ba Jesus.
LUK 20:41 Depois Jesus husu ba sira, “Ema dehan katak, Mesias liurai David nia Jerasaun. Se nunee, nusaa mak
LUK 20:42 uluk liurai David rasik hakerek iha livru Salmus dehan, ‘Nai Maromak hatete ona ba hau nia Nai dehan, “Mai tuur iha Hau nia sorin loos,
LUK 20:43 too Hau halo O nia inimigu sira taka rabat iha O nia ain okos.” ’
LUK 20:44 Iha nee liurai David rasik bolu Mesias nee nia Nai. Entaun oinsaa mak Mesias bele sai fali David nia Jerasaun?”
LUK 20:45 Ema barak rona hela Jesus nia liafuan. Iha ema sira nee nia oin, Jesus hatete ba Nia eskolante sira nunee:
LUK 20:46 “Imi tenki kuidadu di-diak ho mestri relijiaun sira. Sira gosta lao hatais batina naruk, i gosta ema kumprimenta sira iha merkadu. Kuandu iha uma kreda laran ka iha festa, sira gosta tuur iha oin hanesan ema boot.
LUK 20:47 Maibee sira mos gosta han-matak feto faluk sira hodi hadau sira nia uma, i sira finji harohan nar-naruk para ema haree. Maromak sei kastigu sira todan liu fali ema seluk.”
LUK 21:1 Jesus hateke ba kaixa oferta uma kreda boot nian, Nia haree ema riku balu tau osan ba kaixa laran.
LUK 21:2 Nia mos haree feto faluk kiak ida mai tau osan oferta sentavus rua.
LUK 21:3 Haree nunee, Jesus dehan, “Hau hatete lo-loos ba imi, feto faluk kiak nee foo osan folin boot liu fali sira sel-seluk.
LUK 21:4 Sira seluk foo husi sira nia osan restu. Maibee feto faluk nee foo tiha nia osan hotu ba Maromak. Atu hola hahaan mos, la iha ona.”
LUK 21:5 Iha tempu nee, Jesus nia eskolante balu gaba loos uma kreda boot dehan, uma nee enfeita ho fatuk mesak di-diak deit ho mos sasaan kapaas oi-oin nebee ema foo ba Maromak. Maibee Jesus hatete,
LUK 21:6 “Buat nebee imi nia matan haree dadauk, too loron ida sei rahun hotu. Fatuk sira nee hotu sei tetuk too rai.”
LUK 21:7 Jesus nia eskolante sira husu, “Mestri, buat nebee ohin Ita Boot koalia nee, bainhira mak sei akontese? Kuandu nia tempu besik ona, sinal saida mak sei mosu?”
LUK 21:8 Jesus hataan, “Kuidadu di-diak para ema la bele bosok imi. Ema barak sei mai lori Hau nia naran dehan, sira nee mak Mesias. I ema sei bosok dehan, mundu besik remata ona. Maibee la bele fiar!
LUK 21:9 Se imi rona katak, nasaun ho nasaun funu malu i povu hamriik hasoru nai ulun sira iha fat-fatin, keta tauk. Buat sira nee tenki akontese uluk, maibee nee laos dehan katak mundu atu remata kedas.
LUK 21:10 Nasaun sei funu hasoru nasaun, estadu sei funu hasoru estadu.
LUK 21:11 Rai sei nakdoko makaas iha fat-fatin, sei iha rai hamlaha boot, i moras aat oi-oin sei halo ema barak mate. Sinal bo-boot mos sei mosu iha lalehan, halo ema nia isin fulun hamriik.
LUK 21:12 Molok buat sira nee atu akontese, ema sei kaer imi, i halo terus imi. Sira sei entrega imi ba iha uma kreda para tesi imi nia lia, i sei hatama imi ba kadeia. Sira mos sei foo sala ba imi iha liurai ho nai ulun sira nia oin. Buat sira nee hotu sai nunee tanba imi tuir Hau.
LUK 21:13 Nunee imi hetan oportunidade diak para foo sai ba sira kona ba Hau.
LUK 21:14 Maibee imi tenki hatete ba imi nia aan antes kedas katak, imi sei la preokupa kona ba oinsaa atu defende aan iha ema boot sira nia oin.
LUK 21:15 Tanba Hau sei foo liafuan ho matenek ba imi, halo imi nia inimigu sira la hatene atu dehan tan saida.
LUK 21:16 Imi nia inan-aman, maun-alin, maluk ho kolega sira sei sai traidor hodi faan fali imi, too imi balu mos ema oho.
LUK 21:17 I ema iha nebee-nebee deit sei odi imi tanba imi tuir Hau.
LUK 21:18 Maibee imi nia fuuk lahan ida mos sei la lakon.
LUK 21:19 Se imi aguenta ho pasiensia nafatin, imi sei hetan moris rohan-laek.”
LUK 21:20 Jesus koalia tan dehan, “Bainhira imi haree inimigu sira haleu ona sidade Jerusalém, imi hatene ona katak, sidade atu rahun ona.
LUK 21:21 Haree nunee, ema iha provinsia Judeia tenki halai ona ba foho. Sira nebee iha sidade laran tenki halai sai ona, i sira nebee iha liur lalika tama fali ba sidade laran.
LUK 21:22 Tanba iha loron nee, Maromak sei foo kastigu hodi kumpri buat nebee Nia profeta sira hakerek ona hori uluk.
LUK 21:23 Iha tempu nee, feto isin rua ho inan sira nebee foo susu nia oan, sei terus teb-tebes. Iha nasaun nee tomak, ema sei hetan terus boot, tanba Maromak fakar Nia hirus ba povu nee.
LUK 21:24 Inimigu sei oho sira balu, i lori sai balu baa kastigu iha nasaun sel-seluk. I ema husi rai liur nebee la fiar Maromak sei mai sama hanehan povu Jerusalém, too tempu nebee Maromak desidi ba sira nee remata.”
LUK 21:25 Jesus hatutan tan dehan, “Sei iha sinal iha loro matan, iha fulan, ho iha fitun. Iha mundu nee mos, tasi siak i laloran boot baku ba-mai, halo ema iha nasaun hotu-hotu laran susar, too sira hanoin la hetan.
LUK 21:26 Fitun hotu-hotu sei nakdoko halai rungu-ranga. Haree nunee, ema sei tauk too dezmaia, tanba sira hatene dezastre boot atu mosu ona iha mundu tomak.
LUK 21:27 Depois mak sira haree Hau, Ema Umanu nia Oan tuun mai iha kalohan laran, ho kbiit boot ho naroman lalehan nian.
LUK 21:28 Kuandu sinal sira nee hahuu akontese, hamriik metin ho laran haksolok ba, tanba tempu besik ona atu Maromak salva imi.”
LUK 21:29 Depois Jesus halo komparasaun ida dehan, “Imi hanoin took ai figeira ho ai huun sira seluk.
LUK 21:30 Kuandu ai nee dikin ona, nee sinal katak, atu tama ona tempu manas.
LUK 21:31 Nunee mos bainhira imi haree buat sira nee akontese, imi hatene katak, tempu besik ona atu Maromak ukun nudar Liurai.
LUK 21:32 Hau hatete lo-loos ba imi, husi ema hotu nebee mak moris iha tempu nee, iha balu sei moris too buat sira nee hotu akontese.
LUK 21:33 Lalehan ho rai sei remata, maibee Hau nia liafuan sei la remata.”
LUK 21:34 Jesus hatutan tan dehan, “Kuidadu di-diak! Keta moris festa hela deit, keta sai lanu-teen, i keta preokupa liu ba imi nia moris loro-loron. Se lae, aban-bainrua Hau fila fali mai, imi neon beik hanesan fali animal fuik ida nebee lao-lao, hakfodak mai tama tiha iha lasu laran.
LUK 21:35 Tanba bainhira Hau fila fali mai, la iha ema ida iha mundu mak bele sees aan.
LUK 21:36 Nee duni atensaun beibeik, i sempre halo orasaun, atu imi bele liu husi susar nee ho diak. Nunee too ikus imi sei la tauk hamriik iha Ema Umanu nia Oan nia oin.”
LUK 21:37 Loro-loron Jesus baa hanorin iha uma kreda boot. Maibee kalan Nia sai husi Jerusalém baa toba iha foho Oliveira.
LUK 21:38 Dadeer-saan rai huun mutin, ema barak lao ba iha uma kreda boot para rona Nia hanorin.
LUK 22:1 Festa Paun la Tau Fermentu besik ona, festa nee hanaran mos Paskua.
LUK 22:2 Momentu nee, nai lulik nia ulun sira ho mestri relijiaun sira buka hela dalan atu oho Jesus, maibee oho subar deit, tanba sira tauk, se povu hatene, bele halo rungu-ranga.
LUK 22:3 Depois Satanás tama iha Judas nia laran. Judas nee Jesus nia eskolante ida husi sira nain sanulu resin rua, ema mos bolu nia Iscariotes.
LUK 22:4 Entaun Judas baa buka nai lulik nia ulun sira ho uma kreda boot nia xefi seguransa sira hodi kombina para faan Jesus ba sira.
LUK 22:5 Nia planu nee halo sira kontenti teb-tebes, i sira promete atu foo osan ba nia.
LUK 22:6 Judas mos konkorda. Nunee nia komesa buka dalan atu entrega nonook Jesus ba sira, atu povu la bele hatene.
LUK 22:7 Too ona Festa Paun la Tau Fermentu. Iha loron nee, ema Judeu tenki oho bibi malae oan para kalan nee bele selebra festa Paskua.
LUK 22:8 Entaun Jesus haruka Pedro ho João dehan, “Imi nain rua baa uluk halo preparasaun para orsida ita bele haan hamutuk hodi selebra festa Paskua.”
LUK 22:9 Sira husu, “Ita Boot hakarak ami baa prepara iha nebee?”
LUK 22:10 Jesus hataan, “Bainhira imi tama ba iha sidade Jerusalém, imi sei hasoru mane ida lori hela sanan rai ho bee iha laran. Imi tuir deit nia too nia tama ba iha uma ida.
LUK 22:11 Too iha uma, husu ba uma nain nunee: ‘Mestri husu kona ba fatin nebee mak prepara ona ba Nia atu haan hamutuk ho Nia eskolante sira hodi selebra festa Paskua. Fatin nee iha nebee?’
LUK 22:12 Depois uma nain sei hatudu salaun ida iha uma andar leten, nia prepara tiha ona fatin nee. Hela deit imi nain rua baa prepara hahaan iha nebaa.”
LUK 22:13 Nunee sira nain rua baa, hetan buat hotu-hotu tuir lo-loos saida mak Jesus hatete ba sira. I sira halo preparasaun ba festa Paskua iha nebaa.
LUK 22:14 Oras too ona, Jesus ho Nia eskolante sira tuur haleu meza atu haan hamutuk.
LUK 22:15 Jesus dehan ba sira, “Hau hakarak teb-tebes haan hamutuk ho imi iha festa Paskua nee, molok Hau terus.
LUK 22:16 Tanba Hau sei la haan tan hahaan Paskua nian too Maromak ukun iha mundu foun hodi halo festa nee nia signifikadu sai realidade.”
LUK 22:17 Depois Jesus foti tua kopu ida hodi foo agradese ba Maromak. I Nia foo tua nee ba sira hodi dehan, “Simu ba, imi ida-idak hemu.
LUK 22:18 Hau hatete ba imi, Hau sei la hemu tan tua too Maromak ukun nudar Liurai iha mundu foun.”
LUK 22:19 Depois Nia foti paun hodi agradese ba Maromak. Nia silu paun nee fahe ba Nia eskolante sira hodi hatete, “Nee Hau nia isin, Hau foo hodi salva imi. Halo hanesan nee nafatin hodi hanoin Hau.”
LUK 22:20 Bainhira sira haan hotu ona, Jesus foti tan tua kopu ida hodi dehan, “Tua nee hatudu Maromak nia promesa foun nebee Nia halo liu husi Hau nia raan, tanba Hau nia raan nee sei fakar hodi salva imi.
LUK 22:21 Maibee iha ema ida haan hamutuk hela ho Hau iha meza nee mak sei faan Hau.
LUK 22:22 Hau, Ema Umanu nia Oan tenki mate duni tuir Maromak nia planu. Maibee ema nebee faan Hau nee, sei terus teb-tebes.”
LUK 22:23 Rona nunee, Jesus nia eskolante sira komesa husu ba malu, see mak atu halo buat aat nee.
LUK 22:24 Depois Jesus nia eskolante sira komesa haksesuk malu kona ba eskolante ida nebee mak boot liu.
LUK 22:25 Maibee Jesus dehan ba sira, “Iha nasaun sel-seluk, liurai sira manda sira nia reinu tuun-sae. Maski nunee sira hakarak para povu bolu sira dehan, ‘Liurai laran luak’.
LUK 22:26 Maibee imi la bele nunee. See mak boot liu, nia tenki sai hanesan ema nebee kiik liu. I ema nebee ukun, tenki sai hanesan atan hodi serbi ema seluk.
LUK 22:27 Hanoin took. Ida nebee mak boot liu: ema nebee tuur haan iha meza ka, ida nebee serbi nia? Ida nebee tuur haan iha meza mak boot. Maibee Hau iha imi nia leet hanesan ema nebee serbi.
LUK 22:28 Bainhira Hau iha susar nia laran, imi mak hamutuk ho Hau.
LUK 22:29 Hau nia Aman foti ona Hau sai Liurai para ukun. Nunee mos, agora Hau foti imi para ukun,
LUK 22:30 atu nunee aban-bainrua Hau ukun Hau nia reinu, imi bele tuur iha meza hodi haan-hemu hamutuk ho Hau. I imi mos sei tuur iha kadeira ukun hodi ukun Israel nia suku sanulu resin rua hotu.”
LUK 22:31 Jesus hatete ba Simão Pedro, “Simão, Simão, Satanás simu ona lisensa atu koko imi. Nia hakarak haketak imi husi Hau, hanesan ema tahek foos para hasai nia kulit.
LUK 22:32 Maibee Simão, Hau halo ona orasaun ba o, atu o nia fiar la bele lakon. I bainhira o fila fali mai Hau, o tenki hametin o nia maluk sira nia laran.”
LUK 22:33 Pedro hataan, “Lae, Nai! Hau prontu tama kadeia hamutuk ho Ita Boot. Atu mate hamutuk ho Ita Boot mos, hau prontu.”
LUK 22:34 Maibee Jesus hataan fali dehan, “Pedro, rona mai. Orsida molok manu kokoreek, o sei nega Hau dala tolu dehan, o la konhese Hau.”
LUK 22:35 Depois Jesus husu ba Nia eskolante sira, “Uluk Hau haruka imi baa foo sai Hau nia Liafuan Diak, Hau hatete para imi la bele lori osan, pasta, ho sandalias rezerva. Iha tempu nebaa imi falta buat ruma ka?” Sira hataan, “Lae, ami la falta buat ida.”
LUK 22:36 Jesus dehan, “Maibee agora oin seluk. Se imi iha osan, lori ho. Se iha pasta, lori mos. Se la iha surik, faan tiha imi nia faru ida hodi sosa.
LUK 22:37 Tanba uluk Maromak nia profeta hakerek hanesan nee kona ba Hau: ‘Ema konsidera Nia hanesan ema nebee halo krimi.’ Agora tenki sai realidade. Tebes, buat nebee hakerek kona ba Hau nee besik akontese ona.”
LUK 22:38 Sira dehan, “Nai, ami iha surik rua.” Jesus hataan, “Too ona, lalika koalia tan ona.”
LUK 22:39 Hotu tiha, Jesus sai husi sidade baa iha foho Oliveira, hanesan baibain. Nia eskolante sira akompanha Nia.
LUK 22:40 Too iha nebaa, Nia dehan ba sira, “Imi tenki halo orasaun atu imi la bele monu ba tentasaun.”
LUK 22:41 Depois Jesus sees aan uitoan husi sira, i Nia hakneak hodi halo orasaun dehan,
LUK 22:42 “Hau nia Aman, se Ita Boot hakarak, hasai tiha terus ida nee husi Hau. Maibee la bele halo tuir Hau nia hakarak, halo tuir deit Ita Boot nia hakarak.”
LUK 22:43 [Anju ida mai husi lalehan hodi foo forsa ba Nia.
LUK 22:44 Jesus laran susar teb-tebes, nee mak Nia halo orasaun makaas liu tan, too Nia kosar sai turu ba rai hanesan raan.]
LUK 22:45 Harohan tiha hotu, Jesus hamriik hodi fila fali ba Nia eskolante sira, Nia haree sira toba dukur hela, tanba sira nia laran tristi halo sira kole liu.
LUK 22:46 Jesus hatete ba sira, “Nusaa mak imi toba? Hadeer ona hodi halo orasaun atu imi la bele monu ba tentasaun.”
LUK 22:47 Jesus sei koalia hela, Judas, eskolante ida husi sira nain sanulu resin rua nee, mai lori ema barak. Nia besik baa hodi rei Jesus.
LUK 22:48 Maibee Jesus hatete, “Judas, o rei Hau, Ema Umanu nia Oan, para faan Hau ka?”
LUK 22:49 Kuandu Jesus nia eskolante sira seluk hatene saida mak atu akontese, sira husu ba Jesus, “Nai, ami bele hasoru sira ho surik ka?”
LUK 22:50 Depois eskolante ida tesi kotu tiha ema ida nia tilun sorin loos. Ema kanek nee nai lulik boot nia atan.
LUK 22:51 Maibee Jesus hatete, “Para ona!” Depois Nia kaer atan nee nia tilun hodi halo tomak fali.
LUK 22:52 Ema sira nebee mai atu kaer Jesus nee mak nai lulik Judeu nia ulun sira, xefi seguransa sira iha uma kreda boot, ho katuas lia nain sira. Jesus husu ba sira, “Nusaa mak imi mai lori surik ho ai dona? Imi hanoin Hau ema kriminozu ka?
LUK 22:53 Loro-loron Hau iha hela area uma kreda boot nian, hanesan mos imi, i imi la kaer Hau. Maibee agora imi nia tempu, i forsa nakukun nian mak ukun.”
LUK 22:54 Depois sira kaer Jesus, i lori Nia ba iha nai lulik boot nia uma. Pedro lao tu-tuir husi dook deit.
LUK 22:55 Iha uma oin ema balu sunu ahi hodi haneruk, i Pedro mos baa tuur hamutuk ho sira.
LUK 22:56 Iha kriada ida haree Pedro tuur hela besik ahi. Kriada nee baa fihir di-diak Pedro nia oin, depois hatete, “Ema ida nee hamutuk ho Jesus!”
LUK 22:57 Maibee Pedro nega dehan, “Lae, menina! Hau la konhese Nia.”
LUK 22:58 La kleur ema ida tan haree Pedro, i dehan, “O nee Nia ema duni!” Maibee Pedro dehan, “Lae, maun! Laos hau.”
LUK 22:59 Liu tiha oras ida hanesan nee, iha tan ema ida hatete dehan, “Ema nee hamutuk ho Jesus duni. La iha duvida, tanba nia mos ema Galileia.”
LUK 22:60 Maibee Pedro nega dehan, “Maun, hau la hatene saida mak ita koalia nee.” Pedro sei koalia nunee, derepenti manu kokoreek.
LUK 22:61 Nai Jesus fila ba kotuk hodi hateke loos ba Pedro. I Pedro hanoin fali Nai Jesus nia liafuan ohin dehan, “Orsida molok manu kokoreek, o sei nega Hau dala tolu.”
LUK 22:62 Entaun Pedro sai husi nebaa hodi tanis ho laran dodok.
LUK 22:63 Ema sira nebee hein Jesus nee komesa hamoe Nia i baku Nia fila-fila.
LUK 22:64 Sira kesi tiha Nia matan ho hena hodi goza Nia dehan, “He, profeta, siik took ba, see mak baku o nee?”
LUK 22:65 I sira mos hatete liafuan aat oi-oin hodi tarata Nia.
LUK 22:66 Dadeer-saan, loro matan foin sae, justisa nain relijiaun Judeu nian halibur malu. Sira nee mak katuas lia nain sira, nai lulik nia ulun sira ho mestri relijiaun sira. Depois ema nebee hein Jesus lori Nia baa aprezenta ba sira para tesi Nia lia.
LUK 22:67 Justisa nain sira husu ba Nia, “Hatete mai, O mak Mesias ka?” Jesus hataan, “Se Hau hatete ba imi, imi sei la fiar.
LUK 22:68 Se Hau husu ba imi, imi sei la hataan.
LUK 22:69 Maibee la kleur tan Hau, Ema Umanu nia Oan sei tuur iha Maromak Kbiit Nain nia sorin loos.”
LUK 22:70 Rona nunee, sira rame-rame husu fali, “Entaun, O Maromak nia Oan ka?” Jesus hataan, “Imi dehan nee loos.”
LUK 22:71 Depois sira dehan ba malu, “Ita la presiza tan sasin ona. Ita rona ona, Nia liafuan rasik mak hamonu Nia.”
LUK 23:1 Depois justisa nain sira hotu hamriik hodi lori Jesus ba governador Pilatus.
LUK 23:2 Too iha governador nia oin, sira komesa foo sala ba Jesus dehan, “Ami kaer toman Ema nee tau lia ba povu para kontra estadu. Nia haruka povu la bele selu impostu ba liurai boot César. Nia mos deklara katak, Nia mak Mesias, ema Judeu sira nia Liurai.”
LUK 23:3 Entaun Pilatus husu ba Jesus, “Loos ka? O mak ema Judeu sira nia Liurai duni ka?” Jesus hataan, “Ita dehan nee loos.”
LUK 23:4 Depois Pilatus foo sai nia desizaun ba nai lulik nia ulun sira ho ema lubun boot nee dehan, “Hau la hetan Ema nee nia sala ida atu bele kastigu Nia.”
LUK 23:5 Maibee sira ulun toos nafatin hodi protesta dehan, “Lae, Nia hanorin hodi tau lia ba povu iha nebee-nebee atu halo rungu-ranga, komesa husi provinsia Galileia, too iha rai Judeia tomak, mai too iha nee.”
LUK 23:6 Rona nunee, governador Pilatus husu ba sira, “Se hanesan nee, Nia ema Galileia ka?”
LUK 23:7 Sira hataan dehan, loos. Nunee governador haruka Jesus ba iha liurai Herodes, tanba nia mak ukun iha provinsia Galileia, i tempu nebaa nia iha hela sidade Jerusalém.
LUK 23:8 Bainhira Herodes haree Jesus, nia kontenti teb-tebes, tanba kleur ona hakarak atu hasoru Nia. Herodes rona ona istoria barak kona ba Jesus, i hakarak atu haree Nia halo milagre ruma.
LUK 23:9 Entaun Herodes husu pergunta oi-oin ba Jesus, maibee Nia la hataan liafuan ida.
LUK 23:10 Nai lulik nia ulun sira ho mestri relijiaun sira mos hamriik besik hodi duun makaas dehan, Nia halo ona sala todan oi-oin.
LUK 23:11 Depois liurai Herodes ho nia soldadu sira komesa hamoe Jesus i goza Nia. Sira foo hatais Nia ho ropa nabilan ida nebee baibain liurai sira mak hatais, depois haruka Nia fila ba governador Pilatus.
LUK 23:12 Uluk Herodes ho Pilatus odi malu, maibee iha loron nee sira nain rua diak malu fali.
LUK 23:13 Governador Pilatus halibur nai lulik nia ulun sira, ukun nain sira ho tan povu.
LUK 23:14 Depois nia foo sai nia desizaun dehan, “Imi lori Ema nee mai hau hodi foo sala ba Nia dehan, Nia sempre tau lia ba povu para kontra estadu. Maibee hau investiga tiha ona Nia iha imi nia oin, i la hetan Nia sala ida atu bele kastigu Nia.
LUK 23:15 Liurai Herodes mos la hetan Nia sala ida. Tanba nee mak liurai haruka Nia fila fali mai ita. Imi haree ona, Ema nee la halo sala ida atu hau bele foo kastigu mate ba Nia.
LUK 23:16 Tanba nee mak hau hakotu nunee: Hau sei haruka baku Nia ho sikoti, depois husik fali Nia.”
LUK 23:17 [Iha tempu nebaa bainhira ema Judeu sira halo festa Paskua, governador sempre hasai ema dadur ida tuir sira nia hakarak.]
LUK 23:18 Entaun sira hotu hakilar rame-rame dehan, “Oho tiha Nia! Hasai mak Barabás!”
LUK 23:19 Barabás nee tama kadeia tanba nia halo rungu-ranga iha sidade Jerusalém kontra estadu Roma, i nia mos oho ema.
LUK 23:20 Pilatus hakarak husik Jesus. Entaun nia koalia ba sira dala ida tan.
LUK 23:21 Maibee sira hotu hakilar dehan, “Prega tiha Nia ba krus! Prega tiha Nia ba krus!”
LUK 23:22 Pilatus koalia ba sira ba dala tolu dehan, “Tansaa? Nia halo krimi saida? Hau la hetan razaun ida para hau bele foo kastigu mate ba Nia. Nee mak hau haruka ema baku deit Nia ho sikoti, depois husik fila fali.”
LUK 23:23 Maibee ema barak nee hakilar beibeik ho lian makaas hodi obriga para prega Jesus iha krus too mate. Ikus mai, sira mak manaan.
LUK 23:24 Entaun Pilatus desidi tuir sira nia hakarak deit.
LUK 23:25 Nia hasai ema nebee mak sira husu, ida nebee dadur hela tanba halo rungu-ranga kontra estadu i oho ema. I nia entrega Jesus ba sira nia liman atu halo tuir sira nia hakarak.
LUK 23:26 Depois soldadu sira lori Jesus sai husi governador Pilatus nia uma. Iha dalan klaran sira hasoru ema ida naran Simão husi Sirene, nia foin mai husi foho atu tama ba sidade. Sira obriga Simão lori Jesus nia krus hodi lao tuir Nia.
LUK 23:27 Ema barak lao tuir Jesus, i senhora balu tanis halerik ba Nia.
LUK 23:28 Jesus fila oin ba sira hodi dehan, “Senhora Jerusalém oan sira, lalika tanis mai Hau. Diak liu tanis halerik ba imi nia aan rasik, i tanis ba imi nia oan sira.
LUK 23:29 Tanba aban-bainrua susar boot sei kona imi too ema dehan, ‘Feto nebee sorti mak sira nebee la iha oan, sira nebee nunka kous i nunka foo susu bebee.’
LUK 23:30 Bainhira susar nee mai, ema sei halerik ba foho dehan, ‘Monu hanehan ona ami ba!’ Sira sei dehan ba foho kiik sira, ‘Hakoi tiha ami ba!’
LUK 23:31 Se ai nebee matak mos ahi haan, saa tan ai nebee maran tiha ona.”
LUK 23:32 Bainhira soldadu sira lori Jesus, sira lori mos kriminozu nain rua para kastigu mate hamutuk ho Nia.
LUK 23:33 Too iha fatin ida naran Ulun Ruin, sira prega Jesus ba iha krus. Sira prega mos kriminozu nain rua nee, ida iha Jesus nia sorin loos, ida iha Nia sorin karuk.
LUK 23:34 [Jesus halo orasaun dehan, “Hau nia Aman, perdua ema sira nee nia sala, tanba sira la hatene saida mak sira halo.”] Depois soldadu sira dada rifa atu hatene see mak bele hetan Jesus nia hena.
LUK 23:35 Ema barak hamriik hela hodi haree. I ema Judeu nia boot sira tarata Jesus dehan, “Nia salva ona ema seluk. Se Nia mak Mesias, Ida nebee mak Maromak hili, entaun husik Nia salva Nia Aan rasik.”
LUK 23:36 Soldadu sira mos besik Jesus hodi goza Nia. Sira lolo tua siin ba Nia
LUK 23:37 hodi dehan, “Se O mak ema Judeu nia liurai, salva O nia Aan ba!”
LUK 23:38 Sira prega ai kabelak ida ba krus iha Jesus nia ulun leten. Iha ai kabelak nee hakerek dehan, “Nee ema Judeu sira nia Liurai.”
LUK 23:39 Kriminozu ida nebee prega hela iha Jesus nia sorin mos hatete aat Jesus dehan, “O mak Mesias ka? Entaun, salva O nia Aan, salva mos ami!”
LUK 23:40 Maibee kriminozu ida seluk siak nia dehan, “O la tauk Maromak ka? O simu kastigu mate hanesan mos Nia.
LUK 23:41 Ita nain rua merese duni simu kastigu nee, tanba ita nia hahalok aat. Maibee Ema nee la halo sala buat ida.”
LUK 23:42 Depois nia dehan, “Jesus, bainhira Ita Boot kaer ona ukun nudar Liurai, hanoin hau ba.”
LUK 23:43 Jesus hataan, “Hau promete ba o, ohin loron kedas o sei hamutuk ho Hau iha fatin furak nian.”
LUK 23:44 Iha meudia, nakukun komesa taka metin rejiaun nee tomak too tuku tolu lokraik,
LUK 23:45 tanba loro matan la foo naroman tiha. Iha uma kreda boot iha kurtina boot ida hodi haketak Fatin nebee Lulik Liu. Derepenti deit kurtina nee naklees fahe ba rua.
LUK 23:46 Jesus harohan ho lian makaas dehan, “Hau nia Aman, Hau entrega Hau nia klamar ba Ita Boot nia liman.” Koalia tiha nunee, Nia iis mos kotu.
LUK 23:47 Komandante Roma haree buat nebee mak akontese, i nia hahii Maromak dehan, “Tebes duni! Ema nee Ema ida nebee moris loos.”
LUK 23:48 Ema hotu-hotu nebee ohin mai asisti nee, sira haree saida mak akontese, i sira fila ba uma ho laran tristi liu.
LUK 23:49 Maibee senhora sira nebee uluk tuir Jesus husi Galileia too iha Jerusalém, sira sei hamriik hela husi dook hodi haree. Nunee mos Nia maluk sira seluk.
LUK 23:50 Iha ema ida naran José, husi sidade Arimateia iha provinsia Judeia, hakarak atu hakoi Jesus nia mate isin. Nia ema ida nebee diak i moris loos, i nia hein hela Maromak atu ukun nudar Liurai. José mos membru tribunal relijiaun Judeu nian, maibee nia la konkorda ho nia kolega sira nia desizaun hodi kastigu mate Jesus.
LUK 23:52 Entaun nia baa hasoru governador Pilatus hodi husu lisensa atu hatuun Jesus nia mate isin husi krus.
LUK 23:53 Hetan tiha lisensa, José baa hatuun Jesus nia mate isin. Depois nia falun ho hena mutin diak nian. Hotu tiha nia lori baa haloot iha rate. Fatin nee fatuk lolon nebee ema bahat tiha ona atu sai rate, maibee seidauk iha ema ida hakoi iha laran.
LUK 23:54 Momentu nee Sesta lokraik ona, besik atu tama ona ba loron Sabadu, ema Judeu nia loron deskansa.
LUK 23:55 Senhora sira nebee akompanha Jesus husi Galileia, sira lao tuir José too iha rate. Sira haree rate nee i haree José latan Jesus nia mate isin ba.
LUK 23:56 Hotu tiha, sira fila ba uma hodi prepara ai been morin ho mina morin oi-oin. Too iha loron Sabadu, sira deskansa tuir lei.
LUK 24:1 Iha loron Domingu dadeer-saan nakukun, senhora sira nee fila fali ba iha Jesus nia rate. Sira lori ai been morin ho mina morin nebee sira prepara tiha ona atu tau ba Jesus nia isin.
LUK 24:2 Too iha nebaa, sira haree fatuk boot nebee hodi taka rate ibun, ema duir tiha ona ba ninin.
LUK 24:3 Entaun sira tama ba rate laran, maibee sira la hetan Nai Jesus nia mate isin.
LUK 24:4 Sira bilaan tiha hodi hanoin hela buat nee. Derepenti deit mane nain rua hatais hena nabilan hanesan rai lakan hamriik hela iha sira nia sorin.
LUK 24:5 Senhora sira nee tauk teb-tebes, i hakruuk too rai iha sira nia oin. Ema nain rua nee husu, “Nusaa mak imi mai buka ema moris iha ema mate sira nia fatin?
LUK 24:6 Nia la iha nee ona. Nia moris fali ona! Keta haluha buat nebee Nia hatete ba imi bainhira Nia sei hamutuk ho imi iha Galileia.
LUK 24:7 Nia foo hatene kedas ona dehan, ema sei faan Ema Umanu nia Oan ba iha ema aat sira nia liman, i sei prega Nia iha krus too mate. Maibee iha loron tolu Nia sei moris fila fali.”
LUK 24:8 Rona nunee, sira foin hanoin hetan Jesus nia liafuan uluk nee.
LUK 24:9 Depois sira fila husi rate hodi konta buat sira nee hotu ba apostolu nain sanulu resin ida ho ema sira seluk nebee tuir Nia.
LUK 24:10 Senhora sira nebee baa iha rate nee mak Maria Madalena, Joana, Tiago nia inan Maria, ho mos feto seluk tan. Sira konta buat sira nee ba apostolu sira.
LUK 24:11 Maibee apostolu sira la fiar, sira hanoin dehan senhora sira koalia nar-naran deit.
LUK 24:12 Maski nunee Pedro hamriik lalais hodi halai ba rate. Too iha nebaa, nia hakruuk hodi hateke ba rate laran, maibee nia so haree deit hena mutin nebee ohin falun mate nee. Nia fila ba uma hodi hanoin hela kona ba saida mak akontese.
LUK 24:13 Iha loron nee kedas, Jesus nia eskolante nain rua sai husi Jerusalém atu baa iha aldeia ida naran Emaus. Aldeia nee kala kilometru sanulu resin ida husi Jerusalém.
LUK 24:14 Tuir dalan, sira koalia dadauk kona ba buat hotu-hotu nebee foin akontese nee.
LUK 24:15 Sira koalia namanas hela, Jesus rasik toman sira hodi lao hamutuk ho sira.
LUK 24:16 Maibee sira la konhese katak, nee Jesus, tanba Maromak taka tiha sira nia hanoin.
LUK 24:17 Depois Jesus husu ba sira, “Ohin iha dalan, imi koalia saida?” Sira nain rua hamriik iha fatin hodi hatudu oin tristi loos.
LUK 24:18 Ida naran Cleopas dehan ba Jesus, “Husi ema hotu-hotu nebee mai vizita Jerusalém nee, karik Ita Boot mesak deit mak la hatene buat nebee mak foin akontese dadauk nee.”
LUK 24:19 Jesus husu fali, “Buat saida?” Sira hataan, “Buat nebee mak akontese ba Jesus husi Nazaré. Nia Maromak nia Profeta, Nia halo milagre boot i Nia liafuan mos hatudu katak Nia iha kbiit. Maromak rasik konsidera Nia Profeta boot, saa tan povu.
LUK 24:20 Maibee nai lulik nia ulun sira ho ita nia ukun nain sira entrega fali Nia ba governador para kastigu mate Nia. Depois sira prega tiha Nia iha krus too mate.
LUK 24:21 Uluk ami laran metin katak, Nia mak atu foo liberdade ba povu Israel. Maibee agora buat sira nee akontese loron tolu liu ba ona.
LUK 24:22 Agora ami sai bilaan liu tan. Tanba ohin dadeer-saan senhora balu husi ami nia grupu baa iha rate,
LUK 24:23 maibee sira la hetan Jesus nia mate isin. Depois sira fila hodi konta mai ami dehan, sira haree anju, i anju sira nee hatete katak, Jesus moris fali ona.
LUK 24:24 Nunee ami nia kolega balu halai kedas ba rate. Too iha rate, sira haree katak, buat nebee senhora sira ohin konta nee, loos duni. Sira mos la haree Jesus.”
LUK 24:25 Jesus hatete ba sira, “Imi ulun toos duni! Nusaa mak imi la fiar nafatin liafuan sira nebee Maromak nia profeta sira foo sai ona hori uluk?!
LUK 24:26 Sira hakerek dehan, Mesias tenki terus hanesan nee duni, foin Maromak foti aas Nia.”
LUK 24:27 Depois Jesus esplika ba sira kona ba buat hotu-hotu nebee hakerek ona iha Livru Sagradu kona ba Nia Aan, komesa husi Moisés nia livru, too iha profeta sira seluk.
LUK 24:28 Bainhira sira besik too ona iha Emaus, Jesus halo finji lao ba oin nafatin.
LUK 24:29 Maibee sira nain rua dehan, “Husu boot, Senhor deskansa lai ho ami kalan nee, tanba lokraik ona, loro matan atu besik monu ona.” Entaun Jesus tama hamutuk ho sira ba uma laran.
LUK 24:30 Bainhira sira tuur iha meza atu haan, Jesus foti paun, i foo agradese ba Maromak. Depois Nia silu paun nee halo rohan-rohan hodi foo ba sira nain rua.
LUK 24:31 Momentu nee kedas Maromak loke sira nia hanoin, i sira hatene katak, ema nee Jesus. Maibee derepenti deit Nia lakon tiha husi sira nia oin.
LUK 24:32 Sira konta ba malu, “Ohin iha dalan Nia koalia ho ita hodi esplika Livru Sagradu, ita nia laran haksolok teb-tebes.”
LUK 24:33 Sira nain rua mos hamriik kedas hodi fila ba Jerusalém. Too iha nebaa, sira hasoru malu ho apostolu nain sanulu resin ida ho sira seluk nebee halibur hamutuk hela.
LUK 24:34 Ema sira nee hatete ba sira nain rua, “Loos duni! Nai Jesus moris fali ona! Ohin Nia hatudu Aan ba Simão Pedro.”
LUK 24:35 Depois sira nain rua mos konta buat nebee akontese iha dalan, too sira konhese Jesus bainhira Nia silu paun.
LUK 24:36 Sira sei koalia hela nunee, derepenti deit Jesus rasik hamriik iha sira nia klaran. Nia kumprimenta sira dehan, “Maromak foo pas ba imi!”
LUK 24:37 Sira hakfodak ho tauk teb-tebes, tanba sira hanoin katak, Nia nee mate klamar ida.
LUK 24:38 Maibee Jesus dehan, “Nusaa mak imi tauk? Nusaa mak imi laran ru-rua?
LUK 24:39 Haree took Hau nia liman ho ain. Hau rasik mak nee! Lolo liman hodi kaer rasik ba, para imi bele hatene katak, Hau laos mate klamar. Tanba mate klamar la iha isin ho ruin, maibee imi haree ona, Hau iha duni isin ho ruin.”
LUK 24:40 Koalia tiha hotu, Jesus mos hatudu Nia liman ho ain ba sira.
LUK 24:41 Sira seidauk fiar, tanba sira haksolok demais ho admira. Entaun Jesus husu ba sira, “Hahaan ruma iha karik, foo uitoan mai.”
LUK 24:42 Sira foo ikan tunu pedasuk ida.
LUK 24:43 Jesus simu tiha ikan nee hodi haan iha sira nia oin.
LUK 24:44 Hotu tiha Jesus dehan ba sira, “Uluk Hau sei hamutuk ho imi, Hau hatete hanesan nee: Buat hotu nebee hakerek ona kona ba Hau iha Livru Sagradu tenki akontese duni, komesa husi Moisés nia livru, too iha livru profeta sira nian ho mos Salmus.”
LUK 24:45 Depois Nia loke sira nia hanoin para sira bele kompriende di-diak Livru Sagradu nee.
LUK 24:46 Nia dehan, “Iha Livru Sagradu hakerek nunee: Mesias tenki terus, i mate, depois iha loron tolu, Nia moris fali.
LUK 24:47 I ema sei foo sai hodi Mesias nia naran katak, see mak hakribi nia sala, Maromak foo perdaun ba nia. Sira sei foo sai nunee iha rai hotu-hotu, hahuu husi Jerusalém.
LUK 24:48 Imi tenki foo sasin kona ba buat sira nee hotu.
LUK 24:49 Hau sei haruka Espiritu Santu ba imi, tuir Hau nia Aman promete tiha ona. Maibee imi tenki hein iha sidade nee, too imi simu kbiit husi lalehan.”
LUK 24:50 Loron ida Jesus lori sira sai husi sidade. Besik too iha aldeia Betánia, Nia foti liman hodi foo bensaun ba sira.
LUK 24:51 Nia foo dadauk bensaun, Maromak foti Nia sae ba lalehan, husik hela sira.
LUK 24:52 Sira hotu-hotu adora Nia, i sira fila ba Jerusalém ho haksolok teb-tebes.
LUK 24:53 Loro-loron sira sempre iha uma kreda boot hodi hahii Maromak.
JOH 1:1 Hori uluk liu, lalehan ho rai seidauk iha, Ida nebee hanaran Liafuan iha nanis ona. Nia hamutuk ho Maromak, i Nia Maromak duni.
JOH 1:2 Nia hamutuk ho Maromak hori uluk kedas.
JOH 1:3 Maromak foo fiar ba Nia hodi halo lalehan ho rai. Se Nia la halo karik, buat hotu-hotu la iha.
JOH 1:4 Nia mak moris nia huun, i Nia moris nee foo naroman ba ita ema.
JOH 1:5 Naroman nee leno iha nakukun laran, i nakukun la iha forsa atu hamate Naroman nee.
JOH 1:6 Iha loron ida, Maromak haruka ema ida mai, nia naran João.
JOH 1:7 Nia mai atu foo sasin kona ba Naroman nee, atu ema hotu-hotu bele fiar liu husi nia sasin.
JOH 1:8 João rasik laos Naroman nee, nia so mai atu foo sasin deit kona ba Naroman nee.
JOH 1:9 Iha tempu nebaa Naroman nee atu mai ona iha mundu. Nia mak Naroman lo-loos nebee leno ema hotu nia moris.
JOH 1:10 Hori uluk kedas Maromak foo fiar ba Nia mak halo mundu. Nia iha mundu nanis, maibee ema iha mundu la hatene Nia.
JOH 1:11 Nia mai iha Nia rain rasik, maibee Nia maluk rasik lakohi simu Nia.
JOH 1:12 Maski nunee ema hotu nebee simu Nia i fiar ba Nia, Nia foo direitu ba sira hodi sai Maromak nia oan.
JOH 1:13 Sira sai Maromak nia oan nee laos tanba moris husi ema, i laos liu husi feen-laen nia hakarak atu hetan oan, maibee Maromak rasik mak foo moris ba sira.
JOH 1:14 Ida nebee hanaran Liafuan nee nakfilak ba ema, i hela iha ita nia klaran durante tempu badak. Ita haree tiha ona Nia kbiit boot nudar Maromak nia Oan mane mesak. Nia mai husi Maromak, Nia laran diak nunka hotu i Nia koalia sempre loos.
JOH 1:15 João foo sasin ho lian makaas kona ba Ema nee dehan, “Nia nee mak uluk hau dehan tiha ona, ‘Iha Ema ida sei mai. Maski hau mak mai uluk maibee Nia boot liu hau, tanba molok hau moris mai, Nia iha nanis tiha ona.’ ”
JOH 1:16 Husi Nia laran diak teb-tebes mak ita hotu hetan bensaun fila-fila.
JOH 1:17 Tanba Maromak foo Nia lei liu husi Moisés, maibee Nia laran diak ho lia loos ita hetan liu husi Jesus Kristu.
JOH 1:18 La iha ema ida mak haree ona Maromak. Maibee Maromak nia Oan mane mesak mak hela iha Aman Maromak nia sorin, i Nia mak foo konhese Maromak ba ita.
JOH 1:19 Iha loron ida, nai ulun Judeu sira iha Jerusalém haruka nai lulik ho ema Levi balu ba iha João hodi husu dehan, “Ita boot nee see?” João hataan kona ba nia aan,
JOH 1:20 nia la bosok, maibee foo sai mo-moos dehan, “Hau laos Mesias, Salvador nebee Maromak atu haruka mai.”
JOH 1:21 Sira husu tan dehan, “Se nunee ita boot see loos? Ita boot mak Maromak nia profeta Elias ka?” João hataan nafatin, “Lae.” Sira husu tan, “Ita boot nee Profeta nebee mak ami hein hela ka?” João hataan, “Lae.”
JOH 1:22 Too ikus sira husu, “Entaun ita boot nee see? Hatete mai ami kona ba ita boot nia aan atu nunee ami bele foo hatene fali ba ema nebee mak haruka ami mai.”
JOH 1:23 João hataan tuir liafuan nebee profeta Isaias uluk foo sai tiha ona dehan, “Hau nee ema ida nebee foo sai ho lian makaas iha rai fuik maran dehan, ‘Hadia dalan nebee kleuk para simu ita nia Nai mai.’ ”
JOH 1:24 Iha mos ema Farizeu balu nebee nai ulun Judeu sira haruka mai.
JOH 1:25 Sira husu ba João, “Se ita boot laos Mesias, laos profeta Elias, i laos Profeta nebee ami hein hela, entaun nusaa mak ita boot foo sarani ema?”
JOH 1:26 João hataan, “Hau foo sarani hodi bee deit, maibee iha Ema ida iha imi nia klaran, imi la konhese Nia.
JOH 1:27 Maski hau mak mai uluk, maibee atu kore deit Nia sandalias talin mos, hau la serve.”
JOH 1:28 Buat sira nee hotu akontese iha rai Betánia, iha mota Jordaun nia sorin ba, iha fatin nebee João foo sarani ema.
JOH 1:29 Aban fali João haree Jesus lao mai, i nia dehan, “Haree ba! Maromak nia Bibi Oan nebee hasai mundu nia sala, Nia mak nee.
JOH 1:30 Hau foo sai tiha ona kona ba Nia dehan, ‘Iha Ema ida sei mai. Maski hau mak mai uluk maibee Nia boot liu hau, tanba molok hau moris mai, Nia iha nanis tiha ona.’
JOH 1:31 Uluk hau rasik la hatene Nia nee see loos. Maibee hau mai foo sarani ema hodi bee atu povu Israel bele konhese Nia.”
JOH 1:32 Depois João foo sasin hanesan nee: “Iha loron ida hau haree Maromak nia Espiritu tuun mai husi lalehan hanesan manu pombu, i hela iha Ema nee.
JOH 1:33 Uluk hau la hatene Nia nee see loos. Maibee Maromak haruka hau foo sarani hodi bee, i Nia hatete nanis mai hau dehan, ‘O sei haree Espiritu Santu tuun mai hela iha Ema ida. Ema nee mak sei foo sarani hodi Espiritu Santu.’ Husi nee mak foin hau konhese lo-loos Nia.
JOH 1:34 Hau haree ho matan rasik, nunee hau foo sasin katak Nia nee Maromak nia Oan.”
JOH 1:35 Iha loron tuir mai João ho nia eskolante nain rua iha fali fatin nee.
JOH 1:36 Bainhira nia haree Jesus lao liu, nia dehan, “Haree ba! Maromak nia Bibi Oan mak nee!”
JOH 1:37 Rona nunee, João nia eskolante nain rua nee baa tuir kedas Jesus.
JOH 1:38 Jesus hateke ba kotuk, haree sira nain rua tuir hela Nia. I Nia husu sira, “Imi buka saida?” Sira hataan, “Rabi, Ita Boot hela iha nebee?” (Liafuan rabi dehan “mestri”.)
JOH 1:39 Jesus hataan, “Mai haree rasik.” Nunee sira baa hamutuk ho Jesus, i haree Nia hela fatin. Iha loron nee tuku haat lokraik ona, entaun sira hela ho Nia too kalan.
JOH 1:40 Eskolante nain rua nebee rona João nia liafuan hodi tuir Jesus, ida mak André, Simão Pedro nia alin.
JOH 1:41 André baa kedas buka nia maun Simão hodi hatete ba nia, “Ami hetan ona Mesias!” (Mesias katak “Kristu”, Salvador nebee Maromak atu haruka mai.)
JOH 1:42 Depois André lori nia maun ba Jesus. Jesus hateke ba Simão hodi dehan, “O nee Simão, João nia oan. Ema sei bolu o Cefas.” (Cefas katak “Pedro” ka “fatuk isin”.)
JOH 1:43 Aban fali Jesus desidi atu baa iha provinsia Galileia. Nia hasoru Filipe, i dehan, “Mai tuir Hau.”
JOH 1:44 Filipe nee husi aldeia Betsaida, Pedro ho André mos husi nebaa.
JOH 1:45 Depois Filipe hetan Natanael hodi dehan, “Ami hetan tiha ona Ema nebee mak Moisés foo sai iha Maromak nia lei, profeta sira seluk mos hakerek kona ba Ema nee. Nia nee Jesus husi aldeia Nazaré, José nia oan.”
JOH 1:46 Natanael hataan, “Buat diak ida hanesan nee bele mosu fali husi Nazaré ka?” Filipe dehan, “Mai haree rasik.”
JOH 1:47 Bainhira Jesus haree Natanael lao dadauk mai, Nia koalia kona ba Natanael dehan, “Ema nee Israel isin, nia la hatene bosok.”
JOH 1:48 Natanael husu ba Jesus, “Oinsaa mak Ita Boot bele konhese hau?” Jesus hataan, “Molok Filipe bolu o mai, Hau haree tiha ona o iha ai figeira huun.”
JOH 1:49 Depois Natanael foo sai dehan, “Mestri, Ita Boot mak Maromak nia Oan. Ita Boot nee ema Israel sira nia Liurai.”
JOH 1:50 Jesus dehan, “O fiar tanba Hau foo sai katak Hau haree o iha ai figeira huun ka? O sei haree buat makaas liu fali ida nee.”
JOH 1:51 Depois Jesus hatutan tan, “Hau dehan lo-loos ba imi. Imi sei haree lalehan nakloke i Maromak nia anju sira sae-tuun mai iha Hau, Ema Umanu nia Oan.”
JOH 2:1 Iha loron tolu, ema halo festa kazamentu iha aldeia Kaná iha provinsia Galileia. Jesus nia inan baa iha festa nee,
JOH 2:2 Jesus ho Nia eskolante sira mos ema konvida hotu.
JOH 2:3 Bainhira tua hotu ona, Jesus nia inan hatete ba Nia, “Sira nia tua la iha ona.”
JOH 2:4 Jesus hataan, “Hau nia inan, tansaa mak hatete fali mai Hau? Hau nia tempu seidauk too.”
JOH 2:5 Maibee Nia inan hatete ba ema sira nebee serve iha festa nee dehan, “Halo tuir saida deit mak Nia haruka.”
JOH 2:6 Besik iha nebaa iha sanan boot neen halo husi fatuk. Sanan nee baibain enxe bee iha laran atu ema bele hamoos aan tuir lisan Judeu nian. Sanan ida-ida bele enxe bee maizoumenus litru atus ida.
JOH 2:7 Jesus hatete ba ema nebee serve iha festa nee dehan, “Enxe bee iha sanan sira nee.” Entaun sira enxe sanan sira nee too nakonu hotu.
JOH 2:8 Depois Jesus hatete ba sira, “Agora kuru uitoan foo ba mestri tenda hemu.” Nunee sira mos halo tuir.
JOH 2:9 Mestri tenda koko tiha, afinal bee nee sai tiha ona tua. Nia la hatene tua nee mai husi nebee, maibee ema nebee ohin kuru bee nee hatene. Depois mestri tenda bolu noivu
JOH 2:10 hodi dehan, “Baibain ema halo festa, sira hasai uluk tua diak nian, kuandu bainaka sira hemu barak ona mak foin hasai tua baratu. Maibee ita boot hasai fali tua diak nian ikus.”
JOH 2:11 Milagre nebee Jesus halo iha Kaná iha Galileia nee mak milagre primeiru nebee Jesus halo. Nunee Nia hatudu sai Nia kbiit lalehan nian, i Nia eskolante sira fiar ba Nia.
JOH 2:12 Hotu tiha Jesus baa iha sidade Kafarnaum hamutuk ho Nia inan, Nia alin sira ho mos Nia eskolante sira. Sira hela iha nebaa loron hira nia laran.
JOH 2:13 Bainhira ema Judeu nia loron boot Paskua besik ona, Jesus baa iha sidade Jerusalém.
JOH 2:14 Iha area uma kreda boot, Nia haree ema faan karau, bibi ho manu pombu, iha mos ema balu tuur iha meza hodi troka osan.
JOH 2:15 Entaun Nia halo sikoti husi tali hodi duni sai sira hotu husi area uma kreda boot nee, karau ho bibi mos Nia duni sai hotu. Nia soe namkari tiha osan nebee ema troka, i baku fila hotu sira nia meza.
JOH 2:16 Nia hatete ba ema nebee faan manu pombu dehan, “Lori sai tiha manu nee hotu! La bele halo Hau nia Aman nia uma hanesan fali merkadu.”
JOH 2:17 Jesus nia eskolante sira hanoin hetan buat nebee hakerek iha Livru Sagradu dehan, “Hau foo Aan tomak hodi defende Ita Boot nia uma, maski ida nee sei lori Hau ba mate.”
JOH 2:18 Depois nai ulun Judeu sira sadik Jesus hodi dehan, “Hatudu took mai ami milagre ruma atu sai sinal katak O iha direitu hodi halo buat sira nee.”
JOH 2:19 Jesus hataan, “Halo rahun took uma kreda boot nee, i Hau sei harii fali iha loron tolu nia laran.”
JOH 2:20 Sira hataan fali dehan, “Uma nee halo durante tinan haat-nulu resin neen, O atu harii fali iha loron tolu deit ka?”
JOH 2:21 Afinal uma kreda boot nebee mak Jesus temi nee mak Nia isin lolon rasik.
JOH 2:22 Bainhira Maromak halo Jesus moris fila fali husi mate mak foin Nia eskolante sira hanoin hetan fali Nia liafuan nee. I sira fiar buat nebee hakerek iha Livru Sagradu ho mos buat nebee Jesus koalia tiha ona.
JOH 2:23 Jesus hela iha Jerusalém durante tempu Paskua. Iha momentu nebaa ema barak haree milagre nebee mak Nia halo, i sira fiar ba Nia.
JOH 2:24 Maski nunee Jesus la fiar sira, tanba Nia konhese mo-moos ita ema.
JOH 2:25 Nia hatene nanis ona ita nia laran, nunee la presiza ema ida foo hatene fali Nia kona ba ita.
JOH 3:1 Iha justisa nain relijiaun Judeu ida naran Nicodemos, nia ema husi grupu Farizeu.
JOH 3:2 Iha kalan ida nia baa hasoru Jesus hodi dehan, “Mestri, ami hatene katak Maromak haruka Ita Boot mai atu hanorin ami. Tanba Maromak hamutuk ho ema ida mak foin ema nee bele halo milagre hanesan Ita Boot halo nee.”
JOH 3:3 Jesus hataan dehan, “Hau hatete lo-loos ba ita, ema tenki moris fila fali mak foin bele hola parte iha Maromak nia reinu. Se lae, la bele.”
JOH 3:4 Nicodemos husu fali, “Nee halo nusaa? Ema nebee boot ona bele tama fali ba iha nia inan nia kabun laran atu nia bele moris fila fali ka?!”
JOH 3:5 Jesus hataan, “Hau hatete lo-loos ba ita, see-see deit mak hakarak sai Maromak nia reinu, nia tenki moris fila fali liu husi bee ho mos Maromak nia Espiritu. Se lae, la bele.
JOH 3:6 Ema nia isin hetan moris husi ema. Maibee moris tuir Espiritu, Maromak nia Espiritu mak foo.
JOH 3:7 La bele hakfodak ba Hau nia liafuan ohin dehan, ‘Imi tenki moris fila fali.’
JOH 3:8 Hau foti ezemplu husi anin. Anin huu tuir nia hakarak. Ita bele rona nia lian, maibee la hatene mai husi nebee ka atu baa iha nebee. Maromak nia Espiritu foo moris foun ba ema mos hanesan nee.”
JOH 3:9 Nicodemos husu tan, “Oinsaa mak buat nee bele akontese?”
JOH 3:10 Jesus hataan, “Ita boot ema Israel nia mestri ida. Nusaa mak la kompriende buat sira nee?
JOH 3:11 Hau hatete lo-loos ba ita, Ami nee hanorin kona ba buat nebee Ami hatene tuir. I Ami foo sasin tuir buat nebee mak Ami haree tiha ona. Maibee imi sira nee la simu nafatin Ami nia sasin.
JOH 3:12 Hau koalia tiha ona ba imi kona ba buat mundu nian, maibee imi la fiar. Saa tan Hau koalia kona ba buat lalehan nian, imi atu fiar oinsaa?
JOH 3:13 La iha ema ida mak sae tiha ona ba lalehan. So Hau, Ema Umanu nia Oan deit mak tuun mai husi nebaa.
JOH 3:14 Uluk bainhira ita nia bei-ala sira iha rai fuik maran, Moisés halo samea husi riti i hasae ba iha ai riin ida. See-see deit mak samea tata, bainhira hateke ba samea riti nee, sira la mate. Nunee mos Hau, Ema Umanu nia Oan. Ema tenki hasae Hau iha ai
JOH 3:15 atu see-see deit mak fiar mai Hau hetan moris rohan-laek.”
JOH 3:16 Maromak nia domin ba ema iha mundu nee boot teb-tebes, too Nia entrega Nia Oan mane mesak. Nunee see-see deit mak fiar ba Nia Oan nee, la mate haketak aan husi Maromak, maibee hetan moris rohan-laek.
JOH 3:17 Tanba Maromak haruka Nia Oan mai iha mundu nee laos atu foo justisa ba ema, maibee atu liu husi Nia, ema iha mundu nee bele hetan salvasaun.
JOH 3:18 Ema nebee mak fiar ba Maromak nia Oan, Maromak nia kastigu la monu ba sira. Maibee ema nebee mak la fiar, Maromak desidi nanis ona atu kastigu sira tanba sira la fiar ba Maromak nia Oan mane mesak.
JOH 3:19 Sira hetan kastigu nee tanba naroman mai tiha ona iha mundu, maibee ema gosta liu moris iha nakukun laran duke moris iha naroman laran, tanba sira nia hahalok aat.
JOH 3:20 Ema hotu nebee halo buat aat, sira odi naroman. Sira lakohi mai iha naroman tanba sira tauk atu naroman nee hatudu sai sira nia hahalok aat.
JOH 3:21 Maibee see-see deit mak moris tuir dalan loos, sira mai iha naroman, atu ema bele haree mo-moos katak sira nia hahalok diak tanba Maromak tulun sira.
JOH 3:22 Hotu tiha Jesus ho Nia eskolante sira baa iha rai Judeia. Nia hela hamutuk ho sira iha nebaa iha tempu badak nia laran hodi foo sarani ema.
JOH 3:23 Iha tempu nebaa João seidauk tama iha komarka. Nia foo sarani ema iha rai Enon, besik aldeia Salim, tanba iha nebaa iha bee barak. Ema nadodon mai iha fatin nee atu João foo sarani sira.
JOH 3:25 João nia eskolante sira ho ema Judeu ida komesa diskuti malu kona ba serimonia hamoos aan.
JOH 3:26 Sira baa iha João hodi dehan, “Mestri, ita boot sei hanoin Ema ida nebee uluk hamutuk ho ita boot iha mota Jordaun nia sorin ba, ita foo sasin kona ba Nia. Agora Nia mos foo sarani ema too ema halai hotu ba Nia!”
JOH 3:27 João hataan, “Ita ema so bele simu deit buat nebee Maromak foo mai ita.
JOH 3:28 Imi rasik rona tiha ona hau dehan, ‘Hau laos Mesias, Salvador nebee Maromak atu haruka mai. Maibee Maromak haruka hau mai uluk hodi prepara dalan ba Nia.’
JOH 3:29 Iha loron kazamentu, noivu mak kaben ho noiva. Noivu nia kolega hamriik hela iha nia sorin hodi asisti, i haksolok teb-tebes rona noivu nia lian. Nunee mos, agora hau haksolok teb-tebes tanba ema barak tuir Jesus.
JOH 3:30 Nia tenki sai boot liu, hau tenki sai kiik fali.
JOH 3:31 Nia nee mai husi leten nebaa, nunee Nia boot liu hotu-hotu. See mak mai husi mundu nee, nia ema mundu nian deit, nunee koalia hanesan ema mundu nian deit. Maibee Ida nebee mai husi lalehan, Nia boot liu hotu-hotu.
JOH 3:32 Nia foo sasin kona ba buat nebee mak Nia haree i rona rasik, maski nunee ema lakohi simu Nia liafuan.
JOH 3:33 Maibee sira nebee simu Nia liafuan, sira deklara katak Maromak sempre koalia loos.
JOH 3:34 Ema nebee Maromak mak haruka, Nia hatoo Maromak nia liafuan, tanba Maromak foo tomak Espiritu Santu ba Nia.
JOH 3:35 Aman Maromak hadomi Nia Oan i entrega tiha ona buat hotu-hotu ba iha Nia liman laran.
JOH 3:36 See deit mak fiar ba Maromak nia Oan, nia hetan ona moris rohan-laek. Maibee see-see deit mak lakohi simu Maromak nia Oan, nia sei la hetan moris rohan-laek, maibee Maromak fakar Nia hirus ba ema nee.”
JOH 4:1 Iha tempu nebaa ema balu husi grupu Farizeu rona katak, ema nebee tuir Jesus barak liu fali ema nebee tuir João. Sira mos rona dehan, Jesus foo sarani ema barak liu.
JOH 4:2 Afinal Jesus rasik la foo sarani ema, Nia eskolante sira mak foo sarani.
JOH 4:3 Jesus hatene katak istoria nee too ona iha ema Farizeu nia tilun. Nunee Nia ho Nia eskolante sira sai husi provinsia Judeia baa fali iha provinsia Galileia.
JOH 4:4 Atu baa Galileia tenki liu husi provinsia Samaria.
JOH 4:5 Entaun sira too iha sidade ida iha Samaria naran Sikar, besik rai nebee uluk Jacó foo ba nia oan José.
JOH 4:6 Bee posu Jacó nian iha nebaa. Tanba sira lao dook ona, entaun Jesus kolen liu, i Nia baa tuur iha bee posu nee nia leten. Iha momentu nebaa meudia ona,
JOH 4:7 nunee Jesus nia eskolante sira baa iha sidade atu sosa hahaan. Depois feto Samaria ida mai atu kuru bee, i Jesus husu ba nia, “Foo netik bee uitoan mai Hau hemu lai.”
JOH 4:9 Feto Samaria nee dehan, “Ita Boot ema Judeu, hau feto Samaria. Nusaa mak husu fali bee mai hau?” Nia hatete nunee tanba ema Judeu la gosta liga ema Samaria.
JOH 4:10 Jesus hataan, “Se karik ita hatene tuir buat nebee Maromak atu foo, i hatene See loos mak husu bee nee, entaun ita sei husu bee mai Hau, nunee Hau sei foo bee moris nian.”
JOH 4:11 Feto nee hataan, “Senhor, Ita Boot nia kanaba la iha, i bee posu nee naruk. Ita Boot atu hetan bee moris nian husi nebee?
JOH 4:12 Uluk ami nia bei-ala Jacó mak kee bee posu nee. Nia ho nia oan sira ho mos nia animal sira hemu bee husi posu nee. Senhor boot liu fali nia ka?”
JOH 4:13 Jesus hataan, “Ema nebee hemu bee ida nee, la kleur hamrook fali.
JOH 4:14 Maibee see mak hemu bee nebee Hau foo, nia sei la hamrook tan. Tanba bee nebee Hau foo ba nia nee sei sai hanesan bee matan ida iha nia laran, bee nee sei suli nafatin hodi foo moris rohan-laek ba nia.”
JOH 4:15 Feto nee dehan ba Jesus, “Senhor, se nunee foo bee nee mai hau atu hau la bele hamrook tan, para hau lalika mai beibeik kuru bee iha nee.”
JOH 4:16 Jesus hatete ba nia, “Baa bolu ita nia kaben, imi nain rua mai.”
JOH 4:17 Feto nee hataan fali, “Hau laos kaben nain.” Jesus hatete ba nia, “Saida mak ita koalia nee loos, ita la iha kaben duni.
JOH 4:18 Ita kaben dala lima ona i mane nebee moris hamutuk ho ita agora nee laos ita nia kaben. Buat nebee ohin ita koalia nee loos duni.”
JOH 4:19 Feto nee dehan, “Senhor, agora hau hatene ona katak, senhor nee Maromak nia profeta ida.
JOH 4:20 Ami nia bei-ala sira adora Maromak iha foho nebaa, maibee imi Judeu dehan ema tenki adora Maromak iha Jerusalém.”
JOH 4:21 Jesus hatete, “Senhora, fiar Hau nia liafuan nee. Too tempu ida imi la presiza sae tan foho nebaa ka baa iha Jerusalém mak foin adora Aman Maromak.
JOH 4:22 Imi ema Samaria adora Maromak maski la konhese Nia. Ami ema Judeu adora Nia i konhese Nia. Tanba Maromak sei foo salvasaun ba ema liu husi ema Judeu.
JOH 4:23 Too tempu ida, tempu nee mak komesa agora nee, ema nebee adora lo-loos Aman Maromak sei adora Nia tuir Nia Espiritu hanorin i tuir buat nebee loos. Ida nee mak Maromak hakarak.
JOH 4:24 Maromak nee Espiritu. I see deit mak adora Nia tenki adora Nia tuir Nia Espiritu hanorin i tuir buat nebee loos.”
JOH 4:25 Feto nee dehan, “Hau hatene katak Mesias sei mai. Bainhira Nia mai, Nia sei foo sai buat hotu-hotu ba ita.” (Mesias katak “Kristu”, Salvador nebee Maromak atu haruka mai.)
JOH 4:26 Depois Jesus hatete, “Ida nebee ita temi Mesias mak agora dadauk koalia hela ho ita nee.”
JOH 4:27 Jesus sei koalia hela, Nia eskolante sira fila husi sidade. Sira hakfodak haree Jesus dada lia hela ho feto ida. Maibee sira ida mos la husu, “Ita presiza saida?” La iha ida mak husu Jesus dehan, “Nusaa mak Ita Boot dada lia ho nia?”
JOH 4:28 Depois feto nee husik hela nia sanan iha nebaa, i fila ba iha sidade laran hodi foo hatene ba ema sira iha nebaa dehan,
JOH 4:29 “Mai haree! Iha ema ida foo sai buat hotu nebee hau halo tiha ona! Karik Nia nee Mesias?”
JOH 4:30 Nunee ema sira nee sai husi sidade atu baa haree Jesus.
JOH 4:31 Sira seidauk too, Jesus nia eskolante sira hatete, “Mestri, haan lai.”
JOH 4:32 Maibee Nia hataan, “Hau iha hahaan nebee imi la hatene.”
JOH 4:33 Nunee Nia eskolante sira husu ba malu dehan, “Keta ema ruma mai foo hahaan ba Nia karik?”
JOH 4:34 Jesus dehan, “Hau nia hahaan mak halo tuir Maromak nia hakarak, i halo hotu knaar nebee Nia foo mai Hau.
JOH 4:35 Baibain imi dehan, ‘Fulan haat tan, tempu silu batar.’ Hau hatete ba imi, loke matan hodi haree ema sira nebee mai nee. Sira hanesan batar iha toos nebee maran ona, prontu atu silu.
JOH 4:36 Hanesan ema silu batar hodi hatama ba armazen, nunee mos imi lori ema mai iha Hau para sira bele hetan moris rohan-laek. Nunee imi simu ona imi nia kolen. Too ikus ema nebee kuda ho ema nebee silu sei haksolok hamutuk.
JOH 4:37 Ema baibain soe lia dehan, ‘Ida kuda, ida seluk mak silu.’ Nee loos duni.
JOH 4:38 Hau haruka ona imi atu silu batar nebee ema seluk kuda. Sira servisu mate aan hodi halo toos i imi hein silu deit.”
JOH 4:39 Iha tempu nebaa ema Samaria barak husi sidade nee fiar ba Jesus tanba sira rona feto nee foo sasin dehan, “Nia foo sai buat hotu nebee hau halo tiha ona.”
JOH 4:40 Entaun bainhira ema Samaria sira too iha Jesus, sira husu fila-fila atu Nia hela hamutuk ho sira. Nunee Jesus hela loron rua iha nebaa.
JOH 4:41 Too ikus ema barak liu tan fiar ba Jesus tanba sira rona rasik Nia hanorin.
JOH 4:42 Sira hatete ba feto nee, “Agora ami fiar ba Nia tanba ami rona rasik Nia hanorin, laos deit tanba o nia liafuan. Agora ami hatene katak Nia mak atu salva ema hotu.”
JOH 4:43 Liu tiha loron rua Jesus baa liu iha provinsia Galileia.
JOH 4:44 Nia rasik hatete tiha ona katak, ema la respeita profeta ida iha nia rain rasik.
JOH 4:45 Maibee bainhira Nia too iha nebaa, ema Galileia simu Nia ho diak tanba foin dadauk sira asisti festa Paskua iha Jerusalém, sira haree hotu buat nebee Nia halo iha nebaa.
JOH 4:46 Iha Galileia, Jesus fila ba iha aldeia Kaná, fatin nee mak uluk Nia halo bee sai fali tua. Iha funsionariu boot ida hela iha sidade Kafarnaum, nia oan moras hela,
JOH 4:47 besik atu mate. Bainhira funsionariu nee rona katak Jesus mai tiha ona husi provinsia Judeia too iha Galileia, nia baa iha Kaná hasoru Jesus hodi husu ho haraik aan atu Jesus baa kura nia oan.
JOH 4:48 Maibee Jesus hatete ba nia, “Imi sira nee so fiar bainhira imi haree milagre ho sinal oi-oin nebee halo imi admira. Se lae imi la fiar.”
JOH 4:49 Funsionariu nee hatete, “Senhor, favor baa lalais, se lae hau nia oan mate.”
JOH 4:50 Jesus hataan, “Ita bele fila ona, ita nia oan diak ona, la mate ida.” Funsionariu nee fiar Jesus nia liafuan nee, i nia fila kedas.
JOH 4:51 Iha dalan klaran, nia atan sira mai hasoru nia hodi foo hatene dehan, “Ita boot nia oan diak fali ona.”
JOH 4:52 Depois funsionariu nee husu ba sira, saa oras mak nia oan hetan fali isin diak. Nia atan sira hataan, “Horiseik lokraik tuku ida nia isin manas lakon.”
JOH 4:53 Depois labarik nia aman hanoin fali katak, iha duni oras hanesan nee mak Jesus hatete ba nia, “Ita nia oan diak ona, la mate ida.” Nunee nia ho nia uma laran tomak fiar ba Jesus.
JOH 4:54 Jesus halo milagre nee bainhira Nia fila husi Judeia. Ida nee mak milagre segundu nebee Nia halo iha provinsia Galileia.
JOH 5:1 Hotu tiha Jesus baa iha Jerusalém atu tuir loron boot ema Judeu nian.
JOH 5:2 Iha nebaa iha bee kolan ida, varanda lima haleu, iha lian Ebreu naran Betesda. Bee kolan nee besik portaun boot naran Portaun Bibi Malae.
JOH 5:3 Ema moras barak mak toba hela iha varanda nee, hanesan ema matan delek, ema ain aat, ho ema liman-ain mate. [Sira hein hela bee nee nakdoko.
JOH 5:4 Tanba dala ruma Nai Maromak nia anju tuun mai halo bee nee nakdoko. Depois see mak tama uluk iha bee laran, nia moras saida deit hetan kura.]
JOH 5:5 Iha mos mane ida ain aat lao la diak durante tinan tolu-nulu resin walu ona.
JOH 5:6 Bainhira Jesus haree nia latan hela iha nebaa, Jesus hatene katak ema nee moras kleur loos ona. Entaun Jesus husu ba nia, “O hakarak hetan isin diak ka?”
JOH 5:7 Ema nee hataan, “Senhor, bainhira bee nakdoko, la iha ema ida atu ajuda hau tama ba iha bee laran. Bainhira hau hakaas aan atu tama, ema seluk tama uluk tiha ona.”
JOH 5:8 Depois Jesus hatete ba nia, “Hamriik ona! Foti o nia biti, lao ona!”
JOH 5:9 Iha momentu nee kedas ema nee hetan isin diak, nia foti nia biti hodi lao. Loron nee loron Sabadu.
JOH 5:10 Nunee nai ulun Judeu sira hatete ba ema nebee foin hetan kura nee dehan, “Ohin loron Sabadu, lei bandu loron Sabadu la bele lori o nia biti.”
JOH 5:11 Maibee nia hataan, “Ema nebee kura hau mak haruka hau dehan, ‘Foti o nia biti, lao ona!’ ”
JOH 5:12 Entaun sira husu ba nia, “Nia nee see fali mak haruka o foti o nia biti hodi lao?”
JOH 5:13 Ema nebee foin hetan kura nee la hatene see mak kura nia, tanba iha fatin nee ema barak, i Jesus sai tiha ona husi nebaa ho nonook.
JOH 5:14 La kleur Jesus hetan fali ema nee iha uma kreda boot, i hatete ba nia, “Agora o isin diak ona. Kuidadu, la bele halo sala tan, se lae buat aat liu tan bele kona o.”
JOH 5:15 Depois ema nee fila fali ba iha nai ulun Judeu sira hodi foo hatene katak, Ema nebee kura nia nee naran Jesus.
JOH 5:16 Nunee nai ulun Judeu sira komesa hatete aat Jesus tanba Nia kura ema iha loron Sabadu.
JOH 5:17 Maibee Jesus hatete ba sira, “Hau nia Aman servisu nunka para, Hau mos servisu nunee.”
JOH 5:18 Jesus nia liafuan nee halo nai ulun Judeu sira hakarak liu tan atu oho Jesus, tanba Nia kontra beibeik regra loron Sabadu nian. Laos nee deit maibee Nia mos dehan Maromak mak Nia Aman rasik, nunee Nia halo Nia Aan hanesan fali Maromak.
JOH 5:19 Rona nunee Jesus dehan ba sira, “Hau hatete lo-loos ba imi, Maromak nia Oan la bele halo buat ida mes-mesak, Nia haree buat nebee mak Nia Aman halo, Nia mos halo tuir. Saida deit mak Nia Aman halo, ida nee mak Nia halo.
JOH 5:20 Tanba Nia Aman hadomi Nia, i buat hotu-hotu nebee Nia Aman halo, hatudu ba Nia. Nia Aman sei hatudu ba Nia buat nebee makaas liu tan, halo imi admira.
JOH 5:21 Nia Aman halo moris fali ema mate, i foo moris rohan-laek ba sira. Nunee mos Nia Oan sei foo moris foun ba ema nebee mak Nia hili.
JOH 5:22 Nia Aman la foo justisa ba ema ida. Maibee Nia foo fiar tiha ona ba Nia Oan atu foo justisa ba ema,
JOH 5:23 atu ema hotu respeita Nia Oan hanesan sira respeita Nia Aman. See deit mak la respeita Nia Oan, la respeita mos Nia Aman nebee haruka Nia mai.”
JOH 5:24 Jesus hatutan tan dehan, “Hau hatete lo-loos ba imi, see deit mak rona Hau nia liafuan i fiar ba Ida nebee haruka Hau mai, sira hetan ona moris rohan-laek, sira sei la hetan kastigu. Sira sai tiha ona husi mate hodi tama ba moris rohan-laek.
JOH 5:25 Hau hatete lo-loos ba imi, too tempu ida, tempu nee mak komesa agora nee, ema nebee hanesan mate tiha ona tanba haketak aan husi Maromak, sira sei rona Maromak nia Oan nia lian. I see mak rona sei hetan moris.
JOH 5:26 Tanba Aman Maromak mak moris nia huun, i Nia foo tiha ona kbiit ba Nia Oan atu foo moris ba ema.
JOH 5:27 Nia mos foo tiha ona kbiit ba Nia Oan atu foo justisa ba ema, tanba Nia mak Ema Umanu nia Oan.
JOH 5:28 La bele hakfodak. Too loron ida, matebian sira hotu sei rona Maromak nia Oan nia lian.
JOH 5:29 Depois matebian sira nee sei sai mai. Sira nebee uluk halo buat diak, hetan moris rohan-laek. Maibee sira nebee uluk halo buat aat, sei hetan kastigu.
JOH 5:30 Hau la bele halo buat ida mes-mesak, Hau so foo justisa tuir buat nebee mak Hau rona husi Hau nia Aman. Justisa nebee Hau foo nee loos. Tanba Hau laos halo tuir Hau nia hakarak rasik. Maibee Hau halo tuir Hau nia Aman nia hakarak, tanba Nia mak haruka Hau mai.”
JOH 5:31 “Se karik Hau mesak mak foo sasin kona ba Hau nia Aan, entaun Hau nia sasin la vale ida.
JOH 5:32 Maibee iha Ida mak foo sasin kona ba Hau, nee mak Aman Maromak rasik. Hau hatene katak Nia sasin kona ba Hau nee loos.
JOH 5:33 Imi haruka ona ema ba iha João, i nia foo sasin ba buat nebee loos.
JOH 5:34 Afinal Hau la presiza ema ida atu foo sasin kona ba Hau. Maibee Hau so foo hanoin fila fali ba imi kona ba João nia liafuan atu imi bele hetan salvasaun.
JOH 5:35 Bainhira João hela iha imi nia leet, nia hanesan ahi-oan nebee lakan iha tempu badak nia laran, i imi kontenti simu nia naroman nee.
JOH 5:36 Maibee iha buat seluk nebee foo sasin boot liu fali João nian, nee mak servisu nebee Hau nia Aman foo mai Hau atu halao too hotu. Servisu nee mak Hau halo durante nee, i servisu nee hatudu katak Hau nia Aman mak haruka Hau mai.
JOH 5:37 Hau nia Aman nebee haruka Hau mai nee, Nia rasik foo sasin kona ba Hau. Imi nunka rona Nia lian, i nunka haree Nia oin.
JOH 5:38 Imi la simu Nia liafuan, tanba imi lakohi fiar Ida nebee mak Nia haruka mai.
JOH 5:39 Imi badinas estuda Livru Sagradu, tanba imi hanoin katak liu husi Livru nee imi hetan moris rohan-laek. Afinal Livru Sagradu nee rasik foo sasin kona ba Hau,
JOH 5:40 maibee imi lakohi mai iha Hau atu hetan moris.
JOH 5:41 Hau la buka atu ema gaba Hau.
JOH 5:42 Maibee Hau hatene imi nia laran, Hau hatene imi la hadomi Maromak.
JOH 5:43 Hau mai hodi Hau nia Aman nia naran maibee imi la simu Hau. Ema seluk mai hodi nia naran rasik, nee mak imi simu fali.
JOH 5:44 Imi la buka atu Maromak gaba imi, maski Nia mesak deit mak Maromak. Imi buka fali atu imi nia maluk sira mak gaba. Entaun oinsaa mak imi atu fiar mai Hau?
JOH 5:45 Keta hanoin dehan Hau sei hamriik iha Hau nia Aman nia oin hodi foo sala ba imi. Moisés mak sei foo sala ba imi, maski imi laran metin ba nia.
JOH 5:46 Se karik imi fiar Moisés nia liafuan, entaun imi fiar mos Hau, tanba nia hakerek tiha ona kona ba Hau.
JOH 5:47 Maibee imi la fiar buat nebee Moisés hakerek, nunee oinsaa mak imi atu fiar buat nebee Hau koalia?”
JOH 6:1 Hotu tiha Jesus ho Nia eskolante sira baa iha tasi Galileia nia sorin ba, tasi nee nia naran seluk mak Tiberiades.
JOH 6:2 Ema barak teb-tebes tuir Nia tanba sira haree milagre nebee mak Nia halo tiha ona ba ema moras sira.
JOH 6:3 Depois Jesus sae ba foho ida, i Nia tuur hamutuk ho Nia eskolante sira.
JOH 6:4 Iha tempu nee ema Judeu nia loron boot Paskua besik ona.
JOH 6:5 Jesus hateke tuun, iha ema barak teb-tebes nadodon sae mai. Nunee Nia hatete ba Filipe, “Ita atu sosa paun iha nebee para sira hotu bele haan?”
JOH 6:6 Nia hatete nunee para koko Filipe, afinal Nia rasik hatene ona saida mak Nia atu halo.
JOH 6:7 Filipe hataan, “Ema badaen nia salariu fulan walu nian mos la too atu sosa hahaan ba ema barak hanesan nee. Atu ema ida-ida hetan deit paun pedasuk ida mos la too.”
JOH 6:8 Depois eskolante ida seluk naran André, Simão Pedro nia alin foo hatene dehan,
JOH 6:9 “Labarik mane ida iha nee, nia lori paun baratu nian fuan lima ho ikan rua, maibee nee la too atu foo haan ba ema barak hanesan nee.”
JOH 6:10 Iha nebaa iha duut matak barak. Jesus foo hatene ba Nia eskolante sira dehan, “Haruka sira tuur.” Sira mos tuur iha duut leten. Ema sira nee maizoumenus rihun lima, nee mane deit, seidauk konta feto ho labarik.
JOH 6:11 Depois Jesus foti paun nee i foo agradese ba Maromak. Hotu tiha Nia foo ba Nia eskolante sira hodi fahe ba ema sira nebee tuur nee. Ikan sira nee mos hanesan. Ema lubun boot nee haan too bosu.
JOH 6:12 Sira hotu bosu ona, Jesus haruka Nia eskolante sira dehan, “Tau hamutuk hahaan restu atu la bele estraga.”
JOH 6:13 Nunee eskolante sira tau hamutuk hahaan restu husi paun fuan lima nebee ema barak haan nee, hamutuk bote sanulu resin rua nakonu.
JOH 6:14 Bainhira ema barak nee haree milagre nebee Jesus halo, sira dehan, “Tebes duni, Ema nee Profeta nebee atu mai iha mundu.”
JOH 6:15 Jesus hatene katak ema barak nee hakarak obriga Nia atu sai sira nia liurai, nunee Nia sai husi sira nia klaran hodi baa mes-mesak iha foho ida.
JOH 6:16 Rai besik kalan ona, Jesus nia eskolante sira tuun ba iha tasi ibun.
JOH 6:17 Rai nakukun ona, Jesus seidauk mai hamutuk ho sira. Nunee sira sae roo atu hakur tasi ba iha sidade Kafarnaum.
JOH 6:18 Sira lao dadauk, anin komesa huu makaas, i laloran mos boot.
JOH 6:19 Bainhira sira hean roo too tiha ona kilometru lima ka neen, sira haree Jesus lao mai iha bee leten, halo sira tauk teb-tebes.
JOH 6:20 Maibee Jesus dehan ba sira, “Nee Hau. Keta tauk!”
JOH 6:21 Rona nunee, sira kontenti simu Nia tama ba iha roo laran. Derepenti roo nee too iha fatin nebee sira atu baa.
JOH 6:22 Ema barak nebee ohin Jesus foo haan nee sei hela iha tasi sorin. Aban fali sira hakarak haree tan Jesus. Sira hatene katak, horiseik roo ida deit mak para iha nebaa, i Jesus nia eskolante sira deit mak sae roo nee, Jesus la sae hamutuk ho sira.
JOH 6:23 La kleur iha roo balu mai husi sidade Tiberiades. Roo sira nee para iha fatin nebee horiseik Nai Jesus foo agradese ba Maromak hodi foo paun ba ema barak nee haan.
JOH 6:24 Ema barak nee haree katak Jesus ho Nia eskolante sira nee la iha tiha ona. Nunee sira sae roo hirak nee hodi baa iha Kafarnaum buka Jesus.
JOH 6:25 Bainhira ema lubun boot nee too iha tasi sorin, sira hetan Jesus iha nebaa. Sira husu ba Nia, “Mestri too hori bainhira?”
JOH 6:26 Jesus hataan, “Hau hatete lo-loos ba imi, imi buka Hau laos tanba imi aprende buat ruma husi milagre nebee mak Hau halo. Maibee imi buka Hau tanba paun nebee mak imi haan too bosu di-diak.
JOH 6:27 La bele servisu para hetan deit hahaan nebee la dura. Maibee servisu para hetan hahaan nebee mak iha nafatin hodi foo moris tinan ba tinan. Hau, Ema Umanu nia Oan mak sei foo hahaan nee ba imi, tanba Aman Maromak foo fiar tiha ona mai Hau atu halo ida nee.”
JOH 6:28 Depois sira husu ba Nia, “Ami tenki halo servisu saida atu bele halo tuir Maromak nia hakarak?”
JOH 6:29 Jesus hataan, “Servisu nebee Maromak hakarak atu imi halo mak nee: Imi tenki fiar ba Ida nebee Nia haruka mai.”
JOH 6:30 Sira husu fali, “Se nunee hatudu lai sinal ruma mai ami para ami bele haree hodi fiar. Ita Boot sei halo saida?
JOH 6:31 Uluk ita nia bei-ala sira haan paun manaa iha rai fuik maran, hanesan hakerek iha Livru Sagradu dehan, ‘Nia foo paun husi lalehan para sira haan.’ ”
JOH 6:32 Jesus dehan ba sira, “Hau hatete lo-loos ba imi, uluk imi nia bei-ala sira hetan paun husi lalehan, laos Moisés mak foo. Agora Paun lalehan nian lo-loos mos, Hau nia Aman mak foo ba imi.
JOH 6:33 Paun nebee Maromak foo mak Ema ida nebee tuun mai husi lalehan hodi foo moris rohan-laek ba ema iha mundu.”
JOH 6:34 Sira hatete ba Nia, “Senhor, foo paun nee mai ami loro-loron.”
JOH 6:35 Depois Jesus hatete, “Hau mak Paun nebee foo moris. See-see deit mak mai iha Hau, nia la hamlaha tan, i see mak fiar mai Hau, sei la hamrook tan.
JOH 6:36 Maibee Hau dehan tiha ona ba imi, maski imi haree tiha ona Hau mos, imi la fiar Hau nafatin.
JOH 6:37 Ema hotu nebee Hau nia Aman entrega tiha ona mai Hau, sira sei mai iha Hau. I kuandu sira mai iha Hau, Hau sei la duni sai sira.
JOH 6:38 Tanba Hau mai husi lalehan laos atu halo tuir Hau nia hakarak, maibee atu halo tuir Hau nia Aman nia hakarak, tanba Nia mak haruka Hau mai.
JOH 6:39 I Nia hakarak mak nee: Ema nebee Nia entrega ona mai Hau, ida mos la bele lakon, i bainhira mundu nee remata, Hau halo sira moris fali husi mate.
JOH 6:40 Hau nia Aman hakarak atu see-see deit mak konhese katak Hau Maromak nia Oan i fiar mai Hau, sei hetan moris rohan-laek. I Hau sei halo moris fali sira bainhira mundu nee remata.”
JOH 6:41 Entaun nai ulun Judeu sira komesa murmura kona ba Jesus tanba Nia dehan, “Hau mak Paun nebee tuun mai husi lalehan.”
JOH 6:42 Sira dehan, “Nia nee Jesus, José nia oan. Ita konhese hela Nia inan-aman. Nusaa mak Nia bele dehan fali, Nia tuun mai husi lalehan? ”
JOH 6:43 Jesus hatete ba sira, “Imi la bele murmura tan.
JOH 6:44 Hau nia Aman mak haruka Hau mai. La iha ema ida bele mai mesak iha Hau. So Hau nia Aman lori nia mak foin bele. I see deit mak mai iha Hau, Hau sei halo nia moris fali bainhira mundu remata.
JOH 6:45 Iha Livru Sagradu Maromak nia profeta hakerek dehan, ‘Maromak sei hanorin ema hotu.’ Nunee ema hotu nebee rona Hau nia Aman i aprende husi Nia sei mai iha Hau.
JOH 6:46 La iha ema ida mak haree ona Aman Maromak. So Hau deit mak haree tiha ona Nia tanba Hau mai husi Nia.
JOH 6:47 Hau hatete lo-loos ba imi, ema nebee fiar mai Hau, sei hetan moris rohan-laek.
JOH 6:48 Hau mak Paun nebee foo moris.
JOH 6:49 Imi nia bei-ala sira haan duni paun manaa iha rai fuik maran, maibee too ikus sira mate.
JOH 6:50 Maibee Paun nebee tuun mai husi lalehan agora dadauk iha nee hela. See deit mak haan Paun nee sei la mate.
JOH 6:51 Hau mak Paun Moris nian nebee tuun ona husi lalehan. See deit mak haan Paun Moris nian nee sei moris tinan ba tinan. Paun nee mak Hau nia isin nebee Hau foo atu ema iha mundu nee hetan moris.”
JOH 6:52 Rona nunee, ema Judeu sira komesa haksesuk malu makaas hodi dehan, “Oinsaa mak Ema nee bele foo Nia isin atu ita haan?”
JOH 6:53 Entaun Jesus dehan ba sira, “Nudar Ema Umanu nia Oan, Hau hatete lo-loos ba imi, imi tenki haan Hau nia isin i hemu Hau nia raan, se lae imi la hetan moris.
JOH 6:54 See deit mak haan Hau nia isin ho hemu Hau nia raan hetan ona moris rohan-laek. I Hau sei halo moris fali nia bainhira mundu nee remata.
JOH 6:55 Tanba Hau nia isin ho Hau nia raan mak haan-hemu lo-loos.
JOH 6:56 See deit mak haan Hau nia isin i hemu Hau nia raan, nia ida deit ho Hau.
JOH 6:57 Hau nia Aman mak moris nia huun, Nia mak haruka Hau mai, i Hau moris tanba Nia. Nunee mos ema nebee haan Hau nia isin sei moris tanba Hau.
JOH 6:58 Hau mak Paun nebee tuun mai ona husi lalehan. Ema nebee mak haan Paun nee sei moris tinan ba tinan. Laos hanesan paun manaa nebee imi nia bei-ala sira haan, maski sira haan maibee too ikus mate.”
JOH 6:59 Jesus hanorin buat sira nee iha uma kreda laran iha Kafarnaum.
JOH 6:60 Rona Jesus nia hanorin nee, ema barak nebee baibain tuir Nia hodi sai Nia eskolante komesa dehan ba malu, “Nia hanorin nee susar atu kompriende, see mak bele simu?”
JOH 6:61 Jesus hatene katak Nia eskolante sira murmura ba malu kona ba buat nebee Nia hanorin nee. Nunee Nia hatete ba sira dehan, “Hau nia hanorin nee xoke imi nia laran ka?
JOH 6:62 Entaun aban-bainrua imi haree Hau, Ema Umanu nia Oan sae fila fali ba Hau nia fatin uluk, imi sei hanoin saida loos?
JOH 6:63 Maromak nia Espiritu mak foo moris, ema la bele. Liafuan nebee Hau hanorin nee mai husi Maromak nia Espiritu hodi foo moris ba ema.
JOH 6:64 Maski nunee iha ema balu iha imi nia leet la fiar.” Jesus hatete nunee tanba Nia hatene nanis ona see mak la fiar, i see mak atu faan Nia.
JOH 6:65 Jesus hatutan tan dehan, “Tanba nee mak Hau hatete tiha ona ba imi katak, la iha ema ida bele mai mesak iha Hau. So Hau nia Aman ajuda nia mak foin nia bele mai iha Hau.”
JOH 6:66 Komesa husi loron nee Jesus nia eskolante sira barak husik tiha Nia i lakohi tuir tan.
JOH 6:67 Jesus husu ba Nia eskolante nain sanulu resin rua dehan, “Imi sira nee mos hakarak atu husik Hau ka?”
JOH 6:68 Simão Pedro hataan, “Nai, ami atu baa loos nebee? Ita Boot nia liafuan mak foo moris rohan-laek.
JOH 6:69 Ami fiar, i ami hatene katak Ita Boot mak Ema Santu nebee Maromak haruka mai.”
JOH 6:70 Depois Jesus hataan, “Hau rasik mak hili imi sanulu resin rua nee sai Hau nia eskolante. Maibee imi ida diabu.”
JOH 6:71 Jesus koalia kona ba Judas, Simão Iscariotes nia oan. Maski Judas nee eskolante ida husi sira nain sanulu resin rua, maibee too ikus nia mak faan Jesus.
JOH 7:1 Hotu tiha Jesus lao haleu provinsia Galileia laran. Nia lakohi baa iha provinsia Judeia, tanba nai ulun Judeu sira iha nebaa hakarak oho Nia.
JOH 7:2 Iha tempu nebaa ema Judeu nia loron boot nebee bolu “Baraka” besik ona.
JOH 7:3 Nunee Jesus nia alin sira hatete ba Nia, “Diak liu sai husi fatin nee hodi baa iha Judeia, atu Ita Boot nia eskolante sira iha nebaa bele haree Ita Boot nia milagre.
JOH 7:4 Tanba see mak hakarak sai boot, nia la bele subar buat nebee nia halo. Se Ita Boot halo ona milagre, entaun hatudu Aan ba mundu atu ema hotu haree.”
JOH 7:5 Sira hatete nunee tanba maski sira Jesus nia alin maibee sira la fiar ba Nia.
JOH 7:6 Nunee Jesus hataan ba sira dehan, “Agora Hau nia tempu seidauk too. Maibee ba imi, tempu saida deit imi bele baa.
JOH 7:7 Ema mundu nee laos odi imi, sira odi mak Hau tanba Hau foo hatene beibeik ba sira katak sira nia hahalok aat.
JOH 7:8 Imi baa tuir selebrasaun nee. Hau la baa tanba Hau nia tempu seidauk too.”
JOH 7:9 Koalia tiha nunee, Nia hela iha Galileia.
JOH 7:10 Maibee bainhira Nia alin sira baa tiha, Nia mos baa nonook deit tuir festa nee, ema seluk la hatene.
JOH 7:11 Iha festa nee, nai ulun Judeu sira buka Jesus hodi husu tuun-sae dehan, “Ema nee iha nebee?”
JOH 7:12 Ema barak nebee tuir festa nee komesa bis-bisu ba malu kona ba Jesus. Iha ema balu dehan, “Nia ema diak.” Balu tan dehan, “Lae, Nia lohi ema barak lao sala dalan.”
JOH 7:13 Maibee la iha ema ida mak brani koalia mo-moos kona ba Nia, tanba sira tauk nai ulun Judeu sira.
JOH 7:14 Selebrasaun Baraka nee lao too klaran ona, Jesus baa iha uma kreda boot hodi hanorin.
JOH 7:15 Nai ulun Judeu sira admira hodi dehan, “Ema nee laos eskola boot ida. Nia aprende buat sira nee husi nebee?”
JOH 7:16 Nunee Jesus dehan, “Buat nebee Hau hanorin nee laos mai husi Hau nia Aan rasik, maibee mai husi Ida nebee haruka Hau mai.
JOH 7:17 Ema nebee prontu halo tuir Maromak nia hakarak, nia sei hatene, Hau nia hanorin mai husi Maromak ka mai husi Hau nia hanoin rasik.
JOH 7:18 See mak hanorin husi nia hanoin rasik, nia buka atu ema foti aas nia. Maibee see mak buka atu foti aas Ida nebee haruka nia mai, ema nee sempre koalia deit buat loos i la hatene bosok.
JOH 7:19 Moisés foo lei ba imi, maibee imi ida la halo tuir lei nee. Entaun nusaa mak imi atu oho fali Hau?”
JOH 7:20 Ema lubun boot hataan, “Diabu tama ona O nia laran! See mak atu oho O?”
JOH 7:21 Jesus hataan, “Foin dadauk Hau halo milagre ida iha loron Sabadu, imi hotu hakfodak.
JOH 7:22 Maibee se labarik mane ida nia loron atu sunat monu iha Sabadu, imi rasik mos sunat nia iha loron nee, atu nunee imi kumpri Moisés nia lei. Afinal sunat nee nia huun laos Moisés nia lei, maibee tuun husi bei-ala sira.
JOH 7:23 Entaun atu halo tuir Moisés nia lei, imi sunat labarik mane iha loron Sabadu. Se nunee, nusaa mak imi hirus Hau tanba Hau kura ema moras iha loron Sabadu? Afinal Hau halo nia isin lolon tomak sai diak.
JOH 7:24 Tetu ho lo-loos mak foin dehan ema seluk sala ka la sala. La bele ona foo sala ba ema tuir deit buat nebee imi haree husi liur.”
JOH 7:25 Depois ema Jerusalém balu husu ba malu dehan, “Ema nee mak nai ulun sira buka hela atu oho nee ka lae?
JOH 7:26 Haree took, agora Nia koalia iha ema barak nia oin, i nai ulun sira la hatete buat ida hasoru Nia. Keta halo be sira konhese ona katak Nia mak Mesias, Salvador nebee Maromak atu haruka mai.
JOH 7:27 Maibee oinsaa mak bele? Tanba bainhira Mesias mai, la iha ema ida mak hatene Nia mai husi nebee. Ema nee, ita hatene hela Nia.”
JOH 7:28 Iha tempu nee, Jesus sei hanorin hela iha area uma kreda boot. Bainhira Nia rona ema koalia nunee, Nia hatete ba ema barak nee ho lian makaas dehan, “Imi konhese duni Hau, i imi hatene Hau husi nebee. Hau mai laos tanba Hau nia hakarak rasik. Ida nebee haruka Hau mai, Nia sempre koalia lia loos. Imi la konhese Nia,
JOH 7:29 maibee Hau konhese Nia, tanba Hau mai husi Nia i Nia mak haruka Hau mai.”
JOH 7:30 Rona nunee, sira hakarak atu kaer Jesus, maibee la iha ida mak konsege tau liman ba Nia, tanba Nia loron seidauk too.
JOH 7:31 Maski nunee povu barak komesa fiar ba Nia. Sira dehan ba malu, “Ema nee halo milagre barak. Kuandu Mesias mai, Nia atu halo liu fali Ema nee ka?”
JOH 7:32 Ema Farizeu sira rona hela ema barak bis-bisu ba malu nunee kona ba Jesus. Entaun sira hamutuk ho nai lulik nia ulun sira haruka seguransa uma kreda boot nian atu baa kaer Jesus.
JOH 7:33 Jesus hatete, “Hau hamutuk ho imi iha tempu badak deit, depois Hau sei fila fali ba Ida nebee haruka Hau mai.
JOH 7:34 Imi sei buka Hau, maibee la hetan Hau, tanba imi la bele baa iha fatin nebee mak Hau hela.”
JOH 7:35 Nunee nai ulun Judeu sira hatete ba malu, “Ema nee atu baa iha nebee mak ita la bele hetan Nia? Keta halo be Nia atu baa iha ita nia maluk Judeu sira nebee namkari iha ema jentiu sira nia rai hodi hanorin ema jentiu sira iha nebaa.
JOH 7:36 Ohin Nia dehan, ‘Imi sei buka Hau maibee la hetan Hau.’ I ‘Imi la bele baa iha fatin nebee mak Hau hela.’ Nia liafuan nee dehan saida?”
JOH 7:37 Iha loron ikus selebrasaun Baraka nian, loron nee mak loron importante liu, Jesus hamriik foo sai ho lian makaas dehan, “See deit mak hamrook, mai iha Hau hodi hemu bee.
JOH 7:38 Hanesan hakerek ona iha Livru Sagradu dehan, ema nebee fiar mai Hau, ‘bee moris nian sei suli sai husi nia laran.’ ”
JOH 7:39 Nunee Jesus koalia kona ba Maromak nia Espiritu, ema nebee fiar ba Jesus sei simu Espiritu nee. Maibee momentu Jesus koalia, Maromak seidauk foo Nia Espiritu tanba Maromak seidauk foti aas Jesus.
JOH 7:40 Rona Jesus koalia nunee, povu balu dehan, “Loos duni. Ema nee Profeta nebee mak ita hein hela.”
JOH 7:41 Iha balu dehan, “Nia nee Mesias, Salvador nebee Maromak atu haruka mai.” Balu tan husu, “Mesias mai husi Galileia fali ka?
JOH 7:42 Iha Livru Sagradu dehan Mesias sei mai husi liurai David nia jerasaun, husi David nia aldeia Belém.”
JOH 7:43 Nunee povu barak haksesuk malu kona ba Jesus.
JOH 7:44 Sira balu hakarak kaer Jesus maibee la iha ida mak konsege tau liman ba Nia.
JOH 7:45 Too ikus seguransa uma kreda boot nian fila fali ba nai lulik nia ulun sira ho ema Farizeu sira. Sira nee husu ba seguransa dehan, “Nusaa mak imi la lori Nia mai?”
JOH 7:46 Sira hataan, “Seidauk iha ema ida mak hanorin hanesan Ema nee.”
JOH 7:47 Ema Farizeu sira nee dehan, “Keta halo be Nia lohi tan imi.
JOH 7:48 Ami nai ulun sira ho Farizeu sira fiar ba Nia ka? La iha!
JOH 7:49 Maibee povu sira nee beik, la hatene Moisés nia lei. Malisan sei kona sira.”
JOH 7:50 Iha nebaa iha ema Farizeu ida naran Nicodemos, nia mak uluk baa hasoru Jesus. Nia hatete ba sira,
JOH 7:51 “Tuir ita nia lei, ita desidi kedas atu kastigu ema ka, ita rona uluk lai husi nia ibun kona ba saida mak nia halo, depois mak foin tesi nia lia?”
JOH 7:52 Sira hataan, “O mos ema Galileia ka?! Baa buka di-diak iha Livru Sagradu, o sei hatene katak la iha profeta ida mak mai husi Galileia.”
JOH 7:53 [Hotu tiha sira ida-idak fila ba sira nia uma.
JOH 8:1 Maibee Jesus baa iha foho Oliveira.
JOH 8:2 Iha dadeer-saan deit, Nia baa fali iha area uma kreda boot. Ema barak nadodon mai iha Nia, i Nia tuur hodi hanorin sira.
JOH 8:3 Depois mestri relijiaun ho ema Farizeu sira lori feto ida ba iha Jesus. Feto nee ema kaer toman bainhira nia halo hela relasaun seksual ho ema nia laen. Sira obriga feto nee hamriik iha ema barak nia oin.
JOH 8:4 Depois sira husu ba Jesus, “Mestri, feto nee ema kaer toman bainhira nia halo hela relasaun seksual ho ema nia laen.
JOH 8:5 Tuir Moisés nia lei, feto hanesan nee ita tenki tuda mate ho fatuk. Tuir Ita Boot nia hanoin oinsaa?”
JOH 8:6 Sira husu nunee atu lasu Nia tanba sira buka razaun atu foo sala ba Nia. Maibee Jesus hakruuk i hakerek iha rai ho Nia liman fuan.
JOH 8:7 Nai ulun sira husu beibeik ba Nia. Nunee Nia hamriik i hatete ba sira, “Imi sira nee, see mak nunka halo sala, nia mak tuda uluk fatuk ba feto nee.”
JOH 8:8 Depois Nia hakruuk fali i hakerek iha rai.
JOH 8:9 Bainhira sira rona Jesus nia liafuan nee, sira lao ida-idak nian, komesa husi katuas sira too joven. Ikus mai Jesus mesak iha nebaa ho feto nee.
JOH 8:10 Depois Jesus hamriik fali hodi husu ba feto nee, “Senhora, ema sira ohin nee iha nebee tiha ona? La iha ema ida mak atu kastigu senhora ka?”
JOH 8:11 Feto nee hataan, “La iha Senhor!” Jesus hatete ba nia, “Hau mos la kastigu ita. Agora bele baa ona. Maibee la bele halo sala tan.”]
JOH 8:12 Hotu tiha Jesus koalia tan ho ema lubun boot nee dehan, “Hau mak naroman mundu nian. See deit mak tuir Hau, nia sei moris iha naroman nee nia laran. Nia dalan la nakukun tan ona.”
JOH 8:13 Depois ema Farizeu sira hatete, “O mesak mak foo sasin kona ba O nia Aan, entaun O nia sasin nee la vale ida.”
JOH 8:14 Jesus hataan dehan, “Maski Hau mesak mak foo sasin kona ba Hau nia Aan, maibee sasin nebee Hau foo nee loos nafatin. Tanba Hau hatene hela, Hau mai husi nebee i Hau sei baa iha nebee, maibee imi la hatene Hau husi nebee i sei baa iha nebee.
JOH 8:15 Imi tesi lia tuir dalan mundu nian, Hau laos mai atu tesi ema ida nia lia.
JOH 8:16 Maibee se Hau tesi lia, Hau halo ho lo-loos. Tanba Hau laos foo justisa mes-mesak, maibee Hau hamutuk ho Hau nia Aman nebee mak haruka Hau mai.
JOH 8:17 Iha imi nia lei dehan, ema nain rua foo sasin nebee hanesan mak foin sasin nee vale.
JOH 8:18 Iha Testemunhu rua mak foo sasin kona ba Hau. Ida mak Hau rasik, Ida seluk mak Hau nia Aman nebee haruka Hau mai.”
JOH 8:19 Entaun sira husu ba Nia, “O nia Aman iha nebee?” Jesus hataan, “Imi la konhese Hau ho Hau nia Aman. Se karik imi konhese Hau, entaun imi mos konhese Hau nia Aman.”
JOH 8:20 Jesus hatete buat sira nee bainhira Nia hanorin iha area uma kreda boot besik kaixa oferta. Maski Nia hanorin iha fatin nee, maibee la iha ema ida mak kaer Nia, tanba Nia loron seidauk too.
JOH 8:21 Dala ida tan Jesus hatete ba ema barak nee, “Hau sei baa, i imi sei buka Hau. Maibee imi la bele baa iha fatin nebee mak Hau baa, i imi sei mate ho imi nia sala.”
JOH 8:22 Rona nunee nai ulun Judeu sira husu ba malu, “Nia atu oho Aan karik. Tanba nee mak Nia dehan, ‘Imi la bele baa iha fatin nebee mak Hau baa.’ ”
JOH 8:23 Maibee Jesus hatete ba sira, “Imi husi kraik, Hau husi leten nebaa. Imi ema mundu nian, Hau lae.
JOH 8:24 Tanba nee mak Hau hatete ba imi katak imi sei mate ho imi nia sala. Se imi la fiar katak Hau mak Ida nebee imi hein hela nee, imi sei mate duni ho imi nia sala.”
JOH 8:25 Sira husu ba Jesus, “Entaun Ita Boot nee see fali?” Jesus hataan, “Hori uluk too agora Hau foo hatene tiha ona kona ba Hau nia Aan.
JOH 8:26 Tuir loos Hau bele hatete buat barak kona ba imi hodi hatudu sai imi nia sala. Maibee Hau laos atu halo ida nee. Ida nebee haruka Hau mai nee sempre koalia buat nebee loos. I saida mak Hau rona husi Nia, nee deit mak Hau hatoo ba ema iha mundu nee.”
JOH 8:27 Sira la kompriende katak Jesus koalia kona ba Nia Aman iha lalehan.
JOH 8:28 Tanba nee Jesus dehan, “Bainhira imi hasae Hau, Ema Umanu nia Oan ba iha fatin aas mak foin imi hatene katak Hau mak Ida nebee imi hein hela nee. I imi sei hatene katak Hau la halo buat ida mes-mesak, maibee Hau koalia deit buat nebee mak Hau nia Aman hanorin tiha ona mai Hau.
JOH 8:29 Ida nebee haruka Hau mai, Nia sempre hamutuk ho Hau, Nia nunka husik Hau mesak, tanba Hau sempre halo haksolok Nia laran.”
JOH 8:30 Bainhira Jesus koalia nunee, ema barak komesa fiar ba Nia.
JOH 8:31 Jesus hatete ba ema Judeu sira nebee fiar tiha ona ba Nia dehan, “Se imi kaer metin Hau nia hanorin, imi Hau nia eskolante duni.
JOH 8:32 Nunee imi sei hatene lia loos, i lia loos nee sei halo imi livre.”
JOH 8:33 Sira hataan, “Ami nee Abraão nia jerasaun, ami nunka sai ema ida nia atan. Nusaa mak Ita Boot dehan, ami sei sai livre?”
JOH 8:34 Jesus hataan, “Hau hatete lo-loos ba imi, see mak halo sala, nia sai ona atan ba sala.
JOH 8:35 Atan ida la bele laran metin atu hela nafatin ho patraun nia familia. So patraun nia oan rasik mak nafatin iha familia nee too tinan ba tinan.
JOH 8:36 Entaun se Patraun nia Oan mak halo imi livre, imi livre duni.
JOH 8:37 Hau hatene imi nee Abraão nia jerasaun, maibee imi hakarak oho fali Hau, tanba imi lakohi simu Hau nia hanorin.
JOH 8:38 Hau foo hatene ba imi saida mak Hau nia Aman hatudu ona mai Hau. Maibee imi halo saida mak imi nia aman hatete ona ba imi.”
JOH 8:39 Sira hataan, “Ami nia aman mak Abraão.” Jesus dehan, “Se imi Abraão nia jerasaun duni, entaun imi sei halo tuir Abraão nia hahalok.
JOH 8:40 Maibee imi lae. Imi sira nee buka dalan atu oho Hau, maski Hau foo hatene ba imi lia loos nebee Hau rona husi Maromak. Buat nebee imi halo nee, Abraão nunka halo.
JOH 8:41 Imi halo tuir fali saida mak imi nia aman rasik halo.” Sira hataan, “Ami nee laos oan hili. Ami nia Aman ida deit, nee mak Maromak rasik, aman seluk la iha.”
JOH 8:42 Jesus dehan ba sira, “Se Maromak mak imi nia Aman duni, entaun imi sei hadomi Hau, tanba Hau mai husi Maromak. Hau laos mai tanba Hau nia hakarak rasik, maibee Maromak mak haruka Hau mai.
JOH 8:43 Nusaa mak imi la kompriende buat nebee Hau koalia? Tanba imi lakohi rona.
JOH 8:44 Imi nia aman mak Satanás, imi gosta tuir imi nia aman nee nia hakarak. Hori uluk kedas Satanás nee oho door i sempre kontra lia loos, tanba lia loos la bele hela iha nia laran. Bainhira nia koalia, nia bosok, tanba nia kakutak nakonu ho buat bosok deit. Nia rasik bosok-teen, i Nia mak bosok-teen hotu-hotu nia aman.
JOH 8:45 Maibee Hau foo sai buat nebee loos ba imi, nee mak imi lakohi fiar Hau.
JOH 8:46 Husi imi sira nee, see mak bele hatudu dehan, Hau halo sala? Se Hau koalia buat nebee loos, nusaa mak imi lakohi fiar Hau?
JOH 8:47 Ema nebee mai husi Maromak, nia rona Maromak nia liafuan. Maibee imi laos husi Maromak, tanba nee mak imi lakohi rona.”
JOH 8:48 Entaun ema Judeu sira hatete ba Jesus, “Ami dehan nanis katak O nee ema Samaria, diabu tama tiha ona O. Nee loos duni.”
JOH 8:49 Jesus hatete, “Diabu la tama iha Hau ida. Hau respeita Hau nia Aman, imi hatuun fali Hau.
JOH 8:50 Hau la buka atu ema foti aas Hau, maibee iha Ida mak hakarak atu ema foti aas Hau. Nia mak sei desidi see mak loos i see mak sala.
JOH 8:51 Hau hatete lo-loos ba imi, see mak halo tuir Hau nia liafuan, nia sei la mate.”
JOH 8:52 Rona nunee, ema Judeu sira dehan, “Agora ami hatene mo-moos katak diabu tama iha O nia laran! Abraão rasik mate tiha ona, profeta sira mos mate ona, maibee O dehan, see mak halo tuir O nia liafuan sei la mate.
JOH 8:53 O hanoin O makaas liu ami nia bei-ala Abraão ka? Afinal Abraão mate tiha ona, profeta sira mos mate ona. O hanoin O nee see fali?”
JOH 8:54 Jesus hataan, “Se Hau rasik mak foti aas Hau nia Aan, nee la iha folin ida. Maibee Ida nebee foti aas Hau mak Hau nia Aman, Nia nee mak imi bolu imi nia Maromak.
JOH 8:55 Afinal imi la konhese Nia. Hau konhese Nia, se karik Hau dehan Hau la konhese Nia, entaun Hau bosok-teen hanesan mos imi. Maibee Hau konhese duni Nia i halo tuir Nia liafuan.
JOH 8:56 Imi nia bei-ala Abraão hakarak teb-tebes atu haree Hau mai. Bainhira nia hanoin kona ba Hau nia loron, nia laran haksolok. Nia haree duni, i nia kontenti.”
JOH 8:57 Depois ema Judeu sira dehan ba Nia, “O nia tinan seidauk too lima-nulu maibee O haree tiha ona Abraão ka?”
JOH 8:58 Jesus hataan, “Hau hatete lo-loos ba imi, molok Abraão moris, Hau iha uluk ona.”
JOH 8:59 Rona nunee, sira foti fatuk atu tuda mate Nia tanba Nia halo Nia Aan hanesan Maromak. Maibee Jesus lao helik tiha husi sira nia klaran hodi sai husi area uma kreda boot.
JOH 9:1 Jesus lao dadauk, Nia haree mane ida nebee moris mai matan delek nanis.
JOH 9:2 Nia eskolante sira husu, “Mestri, see nia sala mak halo ema nee moris mai matan delek? Nia sala rasik ka nia inan-aman nian?”
JOH 9:3 Jesus hataan, “Nia matan delek laos tanba nia sala rasik ka tanba nia inan-aman nia sala. Maibee nia sai nunee para ema bele haree Maromak nia kbiit iha nia.
JOH 9:4 Maromak mak haruka Hau mai. Ita tenki halao Nia servisu durante rai sei loron. Kuandu rai kalan ona, ema ida la bele halao servisu tan.
JOH 9:5 Durante Hau sei iha mundu nee, Hau mak naroman mundu nian.”
JOH 9:6 Koalia tiha nunee Jesus tafui kabeen ba rai, kahur ho rai halo tahu, depois kose ba ema nee nia matan.
JOH 9:7 Nia hatete ba ema nee, “Baa fase o nia matan iha kolan Siloé.” (Siloé katak “haruka”.) Entaun ema nee baa fase nia matan. Bainhira nia fila fali, nia bele haree.
JOH 9:8 Nia vizinhu sira ho mos ema seluk nebee baibain haree nia husu ezmola hatete ba malu dehan, “Ema nee mak baibain tuur hodi husu ezmola nee ka lae?”
JOH 9:9 Iha balu dehan, “Nia duni.” Balu dehan, “Lae, nia oin mak atu hanesan.” Maibee ema nee rasik dehan, “Hau duni.”
JOH 9:10 Nunee sira husu, “Entaun halo nusaa mak o nia matan bele haree?”
JOH 9:11 Nia hataan, “Ema ida naran Jesus halo tahu kose ba hau nia matan, i haruka hau baa fase iha bee Siloé. Hau baa fase tiha, depois hau bele haree.”
JOH 9:12 Sira husu fali, “Ema nee iha nebee?” Nia hataan, “Hau la hatene.”
JOH 9:13 Depois ema lori mane nebee uluk matan delek nee ba iha ema husi grupu Farizeu.
JOH 9:14 Tanba loron nebee Jesus halo tahu hodi kura ema matan delek nee loron Sabadu, ema Judeu nia loron deskansa.
JOH 9:15 Nunee ema Farizeu sira husu ba ema nee, “Halo nusaa mak o nia matan bele haree?” Nia hataan, “Nia kose tahu ba iha hau nia matan, depois hau baa fase tiha, agora hau bele haree.”
JOH 9:16 Ema Farizeu balu dehan, “Ema nee laos mai husi Maromak, tanba Nia halo fali servisu iha loron Sabadu.” Maibee balu dehan, “Sala nain ida bele halo milagre hanesan nee ka?” Nunee sira haksesuk malu.
JOH 9:17 Too ikus ema Farizeu sira husu fali ba ema nebee uluk matan delek nee dehan, “Nia kura o nia matan. Entaun oinsaa o nia hanoin kona ba Nia?” Ema nee hataan, “Nia Maromak nia profeta ida.”
JOH 9:18 Maibee nai ulun Judeu sira nee la fiar nafatin katak, ema nee uluk matan delek i agora bele haree. Nunee sira haruka ema baa bolu nia inan-aman mai.
JOH 9:19 Depois nai ulun sira nee husu dehan, “Ema nee imi nia oan ka? Nia mak imi dehan moris mai matan delek ka? Se nunee halo nusaa mak nia bele haree?”
JOH 9:20 Nia inan-aman hataan, “Loos duni, nia ami nia oan. Ami hatene nia moris mai matan delek.
JOH 9:21 Maibee oinsaa mak nia bele haree, ami la hatene. Ami mos la hatene see mak kura nia matan. Ita boot sira bele husu rasik ba nia. Nia boot ona, nia bele hataan mesak.”
JOH 9:22 Nia inan-aman hataan nunee tanba sira tauk. Tanba nai ulun Judeu sira kombina malu tiha ona katak see mak foo sai dehan Jesus mak Mesias, nia la bele tama tan iha uma kreda.
JOH 9:23 Nee mak nia inan-aman dehan, “Nia boot ona, ita boot sira bele husu rasik ba nia.”
JOH 9:24 Nunee nai ulun Judeu sira bolu fila fali ema nebee uluk matan delek nee hodi dehan, “O jura took iha Maromak nia oin atu hataan ho lo-loos. Ami hatene katak Ema nee sala nain ida.”
JOH 9:25 Nia hataan, “Ema nee sala nain ka lae, hau la hatene. Buat nebee hau hatene mak uluk hau matan delek, maibee agora hau bele haree.”
JOH 9:26 Nunee sira husu fali, “Nia halo saida ba o? Oinsaa mak Nia kura o nia matan?”
JOH 9:27 Nia hataan, “Hau hatete tiha ona ba ita boot sira maibee ita boot sira lakohi rona. Nusaa mak ita boot sira hakarak rona tan? Keta halo be ita boot sira mos hakarak sai Nia eskolante?”
JOH 9:28 Depois sira hatete aat nia. I sira dehan tan, “O mak Ema nee nia eskolante, ami lae! Ami Moisés nia eskolante.
JOH 9:29 Ami hatene katak Maromak koalia ba Moisés. Maibee kona ba Ema nee, Nia mosu husi nebee ami la hatene.”
JOH 9:30 Nunee nia hataan, “Hau admira! Ita boot sira dehan la hatene Ema nee mai husi nebee. Afinal Nia kura tiha ona hau nia matan.
JOH 9:31 Ita hotu hatene katak Maromak la rona ema sala nain, Nia so rona ema nebee adora Nia i halo tuir Nia hakarak.
JOH 9:32 Hori uluk liu too agora seidauk iha ema ida mak kura ema nebee moris mai matan delek, atu nia bele haree.
JOH 9:33 Se karik Ema nee laos mai husi Maromak, entaun Nia la bele halo buat ida.”
JOH 9:34 Rona nunee sira hataan, “O nee moris mai nakonu ho sala tiha ona. O mak hanorin fali ami ka?” Depois sira duni sai tiha nia husi uma kreda.
JOH 9:35 Jesus rona katak nai ulun Judeu sira duni sai tiha ona ema nebee uluk matan delek nee husi uma kreda. Nunee Nia baa hasoru ema nee hodi dehan, “O fiar Ema Umanu nia Oan ka lae?”
JOH 9:36 Ema nee husu fali ba Jesus, “Senhor, Ema Umanu nia Oan nee see? Foo hatene hau atu hau bele fiar.”
JOH 9:37 Jesus hatete ba nia, “O haree tiha ona Nia, agora dadauk Nia mak koalia ho o nee.”
JOH 9:38 Ema nee hataan, “Hau fiar, Nai.” I nia hakneak hodi adora Jesus.
JOH 9:39 Depois Jesus dehan, “Hau mai iha mundu nee atu hatudu see mak sala i see mak loos. Nunee ema nebee hatene aan dehan nia matan tomak hela, nia sei haree hetan. Maibee ema nebee hanoin dehan nia haree moos hela, nia sei sai matan tomak fali.”
JOH 9:40 Iha ema Farizeu balu rona Jesus nia liafuan nee, i sira husu, “O hanoin ami nee matan tomak kona ba Maromak ka?”
JOH 9:41 Jesus hataan, “Se imi matan tomak duni, nee la sala ida. Maibee imi dehan imi bele haree, nunee imi sei lori nafatin imi nia sala.”
JOH 10:1 Jesus hatutan tan dehan, “Hau hatete lo-loos ba imi, ema nebee tama iha bibi luhan laran laos liu husi odamatan maibee liu fali dalan seluk, ema nee naok-teen ho hadau door.
JOH 10:2 Bibi atan lo-loos sempre liu husi odamatan.
JOH 10:3 Ema nebee hein odamatan nee sei loke odamatan ba nia, bibi sira mos rona nia. Nia bolu bibi ida-ida nia naran, i sira tuir nia sai ba liur.
JOH 10:4 Bainhira bibi atan lori nia bibi sira hotu sai ba liur ona, nia lao uluk, nia bibi sira lao tuir tanba sira konhese nia lian.
JOH 10:5 Ema nebee sira la konhese, sira la tuir. Sira sei halai dook tiha, tanba la konhese ema nee nia lian.”
JOH 10:6 Jesus halo komparasaun nee maibee sira la hatene Nia liafuan nee dehan saida.
JOH 10:7 Entaun Jesus koalia tan dehan, “Hau hatete lo-loos ba imi, Hau mak bibi luhan nia odamatan.
JOH 10:8 Bibi atan sira nebee mai uluk, sira nee naok-teen ho hadau door, bibi sira lakohi rona sira.
JOH 10:9 Hau mak odamatan. See mak tama liu husi Hau, nia sei hetan salvasaun. Nia sei tama-sai ho livre hodi hetan ai haan.
JOH 10:10 Naok-teen mai so hakarak naok deit, oho deit, i estraga deit. Maibee Hau mai atu Hau nia ema sira bele hetan moris too nakonu resin.
JOH 10:11 Hau nee Bibi Atan nebee diak. Bibi atan nebee diak prontu foo nia moris hodi salva nia bibi sira.
JOH 10:12 Maibee ema nebee simu osan atu tau matan ba ema seluk nia bibi, se nia haree asu fuik ida mai, nia sei halai husik tiha bibi sira nee, tanba laos ninian. Depois asu fuik tata bibi balu, i bibi sira seluk halai namkari.
JOH 10:13 Ema nee halai husik tiha bibi tanba nia servisu atu hetan deit osan, nia la interese ho bibi sira nee.
JOH 10:14 Hau mak Bibi Atan nebee diak, Hau konhese Hau nia bibi sira, i sira mos konhese Hau,
JOH 10:15 hanesan Hau nia Aman iha lalehan konhese Hau i Hau mos konhese Hau nia Aman. Hau foo Hau nia moris hodi salva Hau nia bibi sira.
JOH 10:16 Hau sei iha tan bibi seluk nebee laos husi luhan ida nee. Hau tenki lori sira mai. Sira mos sei rona Hau, depois sira hotu sei sai luhan ida deit ho bibi atan ida deit.
JOH 10:17 Hau nia Aman hadomi Hau tanba Hau foo Aan ba mate atu nunee Hau bele moris fila fali.
JOH 10:18 La iha ema ida mak hasai Hau nia moris, maibee Hau rasik mak foo Hau nia Aan ba mate. Hau iha kbiit atu foo Hau nia Aan ba mate, Hau mos iha kbiit atu moris fila fali. Ida nee mak knaar nebee Hau simu husi Hau nia Aman.”
JOH 10:19 Bainhira ema Judeu sira rona Jesus nia hanorin nee, sira komesa haksesuk malu dala ida tan.
JOH 10:20 Sira barak dehan, “Nia bulak tiha ona, diabu tama hela iha Nia laran. Ita rona Nia atu manaan saida?”
JOH 10:21 Maibee iha ema seluk dehan, “Ema nebee diabu tama iha laran sei la koalia hanesan nee. Diabu bele kura ema matan delek ka?”
JOH 10:22 Too iha tempu malirin, ema Judeu sira halo festa hodi hanoin fila fali inaugurasaun uma kreda boot iha Jerusalém.
JOH 10:23 Jesus lao hela iha area uma kreda boot iha parte ida naran Varanda Salomão.
JOH 10:24 Depois ema Judeu sira mai haleu Nia hodi husu, “Kleur loos ona ami hein Ita Boot atu foo sai ba ami kona ba Ita Boot nia Aan. Hatete lo-loos mai ami, Ita Boot mak Mesias, Salvador nebee Maromak atu haruka mai ka lae?”
JOH 10:25 Jesus hataan, “Hau hatete tiha ona ba imi, maibee imi la fiar. Milagre sira nebee Hau halo hodi Hau nia Aman nia naran hatudu katak Hau nee see.
JOH 10:26 Maibee imi la fiar Hau, tanba imi laos Hau nia bibi.
JOH 10:27 Hau nia bibi sira rona Hau. Hau mos konhese sira i sira tuir Hau.
JOH 10:28 Hau foo moris rohan-laek ba sira, i sira sei la mate haketak aan husi Maromak. La iha ema ida bele hadau sira husi Hau nia liman laran.
JOH 10:29 Hau nia Aman mak foo sira mai Hau, Nia kbiit boot liu hotu-hotu. Nee mak la iha ema ida bele hadau sira husi Nia liman laran.
JOH 10:30 Hau ho Hau nia Aman ida deit.”
JOH 10:31 Rona nunee, dala ida tan ema Judeu sira foti fatuk atu tuda mate Jesus.
JOH 10:32 Maibee Jesus dehan ba sira, “Imi haree Hau halo buat diak barak hodi Hau nia Aman nia naran. Hau nia hahalok diak ida nebee mak la kona imi nia laran too imi hakarak tuda mate Hau?”
JOH 10:33 Ema Judeu sira hataan, “Ami atu tuda O laos tanba O halo buat diak sira nee, maibee tanba O hatete aat Maromak. O ema baibain deit mos hakarak halo O nia Aan hanesan fali Maromak.”
JOH 10:34 Jesus hataan, “Iha imi nia lei Maromak dehan, ‘Imi sira nee maromak oan.’
JOH 10:35 Maromak rasik koalia ba sira hodi hanaran sira nee ‘maromak oan’. I imi hatene katak buat hotu nebee hakerek iha Livru Sagradu loos nafatin.
JOH 10:36 Entaun bainhira Hau dehan, ‘Hau Maromak nia Oan’, oinsaa mak imi dehan fali, Hau hatete aat Maromak? Afinal Nia mak hili Hau i haruka Hau mai iha mundu nee.
JOH 10:37 Se karik Hau la halo knaar nebee Hau nia Aman hatudu tiha ona mai Hau, entaun imi lalika fiar Hau.
JOH 10:38 Maibee Hau halo duni. Entaun imi tenki fiar ba buat nebee mak Hau halo, maski imi la fiar Hau. Nunee imi sei hatene mo-moos katak Hau nia Aman ho Hau ida deit.”
JOH 10:39 Nunee dala ida tan sira atu kaer Jesus, maibee Nia konsege sai husi sira nia klaran.
JOH 10:40 Depois Jesus baa iha mota Jordaun nia sorin ba hodi hela iha nebaa. Fatin nee mak uluk João foo sarani ema.
JOH 10:41 Ema barak baa hasoru Jesus iha nebaa. Sira dehan ba malu, “João nunka halo milagre, maibee buat hotu nebee nia foo sai kona ba Ema nee loos duni.”
JOH 10:42 I sira barak fiar ba Jesus.
JOH 11:1 Iha ema ida naran Lázaro moras todan. Nia hela iha aldeia Betánia hamutuk ho nia feton nain rua, Maria ho Marta.
JOH 11:2 Maria nee feto ida nebee fui mina morin ba iha Nai Jesus nia ain i hamaran ho nia fuuk. Tanba Lázaro moras todan,
JOH 11:3 nunee nia feton nain rua nee haruka lia menon ba Jesus dehan, “Nai, Ita Boot nia belun nebee Ita Boot hadomi nee moras hela.”
JOH 11:4 Rona nunee Jesus dehan, “Moras nee sei la halo nia mate. Maibee nia moras nee foo fatin atu Maromak hatudu sai Nia kbiit boot, atu nunee ema hahii adora Maromak nia Oan.”
JOH 11:5 Jesus hadomi Marta, Maria ho Lázaro.
JOH 11:6 Maski nunee Nia rona katak Lázaro moras, Nia la baa lalais. Liu tiha loron rua
JOH 11:7 foin Nia hatete ba Nia eskolante sira, “Mai ita fila ba Judeia.”
JOH 11:8 Maibee eskolante sira hataan dehan, “Mestri, foin dadauk ema Judeu atu tuda mate Ita Boot ho fatuk iha nebaa. Agora Ita Boot hakarak baa fali ka?”
JOH 11:9 Jesus hataan, “Loron ida iha oras sanulu resin rua, loos ka lae? Ema nebee lao iha rai loron, nia sei la sidi tanba naroman mundu nian leno hela nia dalan.
JOH 11:10 Maibee ema nebee lao iha rai kalan, nia sei sidi tanba la iha naroman iha nia.”
JOH 11:11 Koalia hotu tiha Jesus hatutan tan dehan, “Ita nia belun Lázaro toba tiha ona, maibee Hau atu baa fanu nia.”
JOH 11:12 Nia eskolante sira hataan, “Nai, se Lázaro toba ona, nee hatudu katak nia sei diak fali.”
JOH 11:13 Sira hanoin Jesus koalia kona ba ema toba baibain, afinal Nia koalia kona ba Lázaro nia mate.
JOH 11:14 Entaun Jesus hatete mo-moos ba sira dehan, “Lázaro mate tiha ona.
JOH 11:15 Foin dadauk nia mate, Hau la iha nebaa. Nee halo Hau kontenti, tanba foo oportunidade ba imi atu fiar liu tan mai Hau. Agora mai ita baa iha nebaa.”
JOH 11:16 Depois Jesus nia eskolante ida naran Tomé, baibain ema bolu Kaduak nee, hatete ba nia maluk eskolante sira seluk dehan, “Mai ita baa hotu, atu ita mate hamutuk ho Nia.”
JOH 11:17 Bainhira Jesus ho Nia eskolante sira too iha Betánia, sira rona dehan, ema hakoi Lázaro loron haat liu ba.
JOH 11:18 Betánia nee besik sidade Jerusalém, maizoumenus kilometru tolu.
JOH 11:19 Nunee ema Judeu barak mai iha Marta ho Maria nia uma hodi foo korajen sira tanba sira nia alin mate tiha ona.
JOH 11:20 Bainhira Marta rona katak Jesus mai dadauk, nia sai baa hasoru Jesus, maibee Maria hela iha uma.
JOH 11:21 Too iha nebaa, Marta hatete ba Jesus, “Nai, se Nai iha nee karik, Hau nia alin la mate ida.
JOH 11:22 Maski nunee hau hatene katak saida mak Ita Boot husu agora, Maromak sei foo.”
JOH 11:23 Jesus hatete ba nia, “O nia alin sei moris fali.”
JOH 11:24 Marta hataan, “Hau hatene katak bainhira mundu remata i Maromak halo ema hotu moris fali, Nia mos sei halo hau nia alin moris fila fali.”
JOH 11:25 Jesus dehan ba nia, “Hau mak halo moris fali ema mate. Hau mak moris nia huun. Ema nebee fiar mai Hau, nia sei moris nafatin, maski nia mate.
JOH 11:26 Ema nebee moris hodi fiar mai Hau, nia sei la mate haketak aan husi Maromak. O fiar liafuan nee ka lae?”
JOH 11:27 Marta hataan, “Nai, hau fiar. Hau fiar katak Ita Boot mak Mesias, Maromak nia Oan nebee atu mai iha mundu.”
JOH 11:28 Koalia hotu tiha, Marta fila baa bolu nia alin Maria mes-mesak hodi foo hatene dehan, “Mestri mai tiha ona. Nia haruka bolu o.”
JOH 11:29 Rona nunee, Maria hamriik lalais hodi baa hasoru Jesus.
JOH 11:30 Iha momentu nee, Jesus seidauk tama iha aldeia laran, Nia sei iha hela fatin nebee mak ohin Marta hasoru malu ho Nia.
JOH 11:31 Ema Judeu sira nebee hamutuk ho Maria iha uma hodi foo korajen ba nia, sira haree Maria hamriik hodi sai lalais. Sira hanoin nia atu baa tanis iha Lázaro nia rate, entaun sira mos tuir nia ba.
JOH 11:32 Maria too iha fatin nebee Jesus hein hela, nia haree Jesus. I nia hakneak kedas iha Jesus nia ain hodi dehan, “Nai, se Nai iha nee karik, Hau nia alin la mate ida.”
JOH 11:33 Jesus haree Maria tanis, i ema Judeu sira nebee tuir Maria mos tanis, Nia fuan dodok ho laran susar teb-tebes.
JOH 11:34 Nia husu dehan, “Imi hakoi nia iha nebee?” Sira hataan, “Nai, mai haree rasik.”
JOH 11:35 Jesus mos tanis.
JOH 11:36 Haree nunee, ema Judeu sira koalia ba malu dehan, “Haree ba! Nia hadomi teb-tebes Lázaro.”
JOH 11:37 Maibee iha balu dehan, “Ema nee kura ona ema matan delek. Nusaa mak Nia la bele halo buat ida para Lázaro la mate?”
JOH 11:38 Ho laran dodok Jesus baa iha Lázaro nia rate. Rate nee fatuk kuak ida nebee taka ho fatuk boot.
JOH 11:39 Jesus haruka dehan, “Dudu sees tiha fatuk nee.” Maibee Marta, matebian nia feton nee dehan, “Nai, ami hakoi nia loron haat ona. Nia dois ona!”
JOH 11:40 Jesus dehan ba nia, “Ohin Hau hatete ona ba o katak, se o fiar, o sei haree Maromak nia kbiit. Loos ka lae?”
JOH 11:41 Nunee sira muda sees tiha fatuk nee. Depois Jesus hateke sae hodi halo orasaun nunee: “Hau nia Aman, Hau agradese ba Ita Boot tanba Ita Boot rona Hau.
JOH 11:42 Hau hatene nanis katak Ita Boot sempre rona Hau, maibee Hau koalia nunee atu ema sira nebee hamriik iha nee, bele fiar katak Ita Boot mak haruka Hau mai.”
JOH 11:43 Jesus halo orasaun hotu tiha, Nia bolu ho lian makaas dehan, “Lázaro, sai mai ona!”
JOH 11:44 Nunee Lázaro, ema ida nebee mate tiha ona nee sai mai. Nia liman ho nia ain sei bobar hela ho hena, nia oin mos taka hela ho hena ida. Depois Jesus haruka sira dehan, “Hasai tiha hena nebee bobar nia isin nee atu nia bele lao.”
JOH 11:45 Ema Judeu sira nebee mai vizita Maria i haree buat nebee Jesus halo nee, sira barak komesa fiar ba Nia.
JOH 11:46 Maibee iha ema balu baa konta fali ba ema Farizeu sira kona ba buat nebee mak Jesus halo nee.
JOH 11:47 Nunee ema Farizeu sira ho nai lulik nia ulun sira foo hatene justisa nain relijiaun Judeu sira atu halibur hamutuk. Justisa nain sira nee foo hanoin ba malu dehan, “Ema nee halo milagre barak. Ita atu halo saida?
JOH 11:48 Se ita husik deit Nia, ema hotu sei fiar ba Nia. I se sira hotu tuir Nia, entaun estadu Roma sei mai halo rahun tiha ita nia uma kreda i hadau ita nia rain.”
JOH 11:49 Husi justisa nain sira nee, iha ida naran Kaifás, nia mak nai lulik boot iha tinan nebaa. Nia dehan nunee: “Imi la hatene buat ida!
JOH 11:50 Imi la hili saida mak diak ba imi. Diak liu ema ida mate ba ita hotu duke ita ema Judeu tomak mate mohu.”
JOH 11:51 Kaifás hatete nunee laos tuir nia hanoin rasik. Maibee tanba iha tempu nebaa nia mak nai lulik boot, entaun Maromak foo sai liu husi nia katak, Jesus sei mate ba ema Judeu tomak.
JOH 11:52 Afinal Jesus mate laos ba ema Judeu deit, maibee Nia mos mate ba Maromak nia oan sira nebee namkari iha rai sel-seluk, atu nunee Nia halibur sira hodi halo sira sai ida deit.
JOH 11:53 Komesa husi loron nebaa, nai ulun Judeu sira kombina malu atu oho Jesus.
JOH 11:54 Tanba nee, Jesus la lao livre tan iha ema Judeu nia leet. Maibee Nia baa fali iha aldeia ida naran Efraim, besik rai fuik maran. I Nia hela ho Nia eskolante sira iha nebaa.
JOH 11:55 Iha tempu nee ema Judeu nia loron boot Paskua besik ona. Ema husi aldeia bar-barak baa iha sidade Jerusalém atu halo serimonia hamoos aan molok festa Paskua nee.
JOH 11:56 Sira buka Jesus tuun-sae. Bainhira sira hamriik hela iha area uma kreda boot, sira husu ba malu dehan, “Tuir imi nia hanoin oinsaa? Nia mai iha festa nee ka lae? Lae karik!”
JOH 11:57 Sira hatete nunee tanba nai lulik nia ulun sira ho ema Farizeu sira foo orden tiha ona katak, se iha ema ruma hatene Jesus iha nebee, nia tenki mai foo hatene, atu sira bele baa kaer Jesus.
JOH 12:1 Falta loron neen atu tama ba festa Paskua, Jesus too iha Betánia, Lázaro nia aldeia. Lázaro nee mak foin lalais Jesus halo moris fali husi mate.
JOH 12:2 Ema iha fatin nee prepara hahaan kalan nian hodi simu Jesus. Marta serve iha meza, i Lázaro tuur iha meza ho bainaka sira seluk hodi haan hamutuk ho Jesus.
JOH 12:3 Depois Maria mai lori mina morin folin karun teb-tebes litru sorin. Nia fui mina morin nee ba iha Jesus nia ain, depois hamaran ho nia fuuk. Nunee uma laran tomak morin hotu.
JOH 12:4 Maibee Judas Iscariotes, Jesus nia eskolante ida nebee sei faan Jesus dehan,
JOH 12:5 “Nusaa mak nia la faan mina morin nee, depois nia osan foo ba ema kiak sira? Tanba mina nee folin karun, hanesan ema badaen nia salariu ba tinan ida tomak.”
JOH 12:6 Judas hatete nunee laos tanba nia interese ba ema kiak maibee tanba nia naok-teen ida. Nia mak toma konta Jesus ho Nia eskolante sira nia osan, maibee nia gosta foti osan balu husi kofre ba nia aan rasik.
JOH 12:7 Jesus hataan, “Keta hirus nia! Tanba nia prepara mina morin nee atu hamorin Hau nia isin para hakoi.
JOH 12:8 Ema kiak sira sempre iha imi nia leet, maibee Hau laos atu hela nafatin ho imi.”
JOH 12:9 Ema Judeu barak rona katak Jesus iha Betánia hela, nunee sira mos baa iha nebaa. Sira baa laos atu haree deit Jesus, maibee sira mos hakarak haree Lázaro tanba Jesus halo moris fali nia husi mate.
JOH 12:10 Nunee nai lulik nia ulun sira halo planu atu oho hotu Lázaro,
JOH 12:11 tanba nia istoria nee halo ema Judeu barak husik tiha nai lulik sira hodi fiar ba Jesus.
JOH 12:12 Aban fali ema barak nebee too uluk ona iha Jerusalém atu tuir festa Paskua rona katak Jesus iha hela dalan atu baa iha nebaa.
JOH 12:13 Nunee sira foti ramus hodi baa simu Nia. Sira haklalak hahii Maromak dehan, “Hosana! Nai Maromak foo bensaun ba Ida nebee mak mai hodi Maromak nia naran. Maromak foo bensaun ba ema Israel sira nia Liurai.”
JOH 12:14 Jesus hetan kuda buru oan ida, i Nia sae kuda buru nee. Nunee Nia halo tuir buat nebee hakerek iha Livru Sagradu dehan,
JOH 12:15 “Jerusalém oan sira, keta tauk! Haree ba, imi nia Liurai mai, sae kuda buru oan.”
JOH 12:16 Iha tempu nebaa Jesus nia eskolante sira la kompriende saida mak akontese nee. Bainhira Maromak foti aas Jesus foin sira kompriende katak, buat nebee sira halo nee hakerek nanis ona iha Livru Sagradu.
JOH 12:17 Ema barak nebee uluk haree Jesus bolu Lázaro sai husi rate hodi halo moris fali nia, sira konta nafatin istoria nee ba ema seluk.
JOH 12:18 Nee mak ema barak sai baa hodi simu Jesus, tanba sira rona katak Nia halo ona milagre ida nee.
JOH 12:19 Entaun ema Farizeu sira hatete ba malu dehan, “Ita la bele halo buat ida ona. Haree took, ema iha mundu tomak halai hotu ba Nia!”
JOH 12:20 Husi ema barak nebee mak baa iha Jerusalém atu adora Maromak iha festa Paskua nee, balu ema Gregu, laos ema Judeu.
JOH 12:21 Sira baa hasoru malu ho Filipe husi aldeia Betsaida, provinsia Galileia hodi husu, “Senhor, ami hakarak hasoru malu ho Jesus.”
JOH 12:22 Depois Filipe hatete ba André, i sira nain rua baa foo hatene Jesus.
JOH 12:23 Jesus dehan, “Tempu too ona atu Maromak foti aas Hau, Ema Umanu nia Oan.
JOH 12:24 Hau hatete lo-loos ba imi, se trigu fini ida la kuda ba rai i mate, nia nafatin musan ida deit. Fini nee mate mak foin foo fali trigu musan barak.
JOH 12:25 Ema nebee hadomi liu nia moris iha mundu nee, sei lakon fali nia moris. Maibee see mak tau nia moris nee iha kotuk fali, nia sei hetan moris rohan-laek.
JOH 12:26 Ema nebee halao Hau nia servisu, nia tenki tuir Hau. Nunee Hau iha nebee deit, nia mos hamutuk ho Hau. I Hau nia Aman sei respeita nia.
JOH 12:27 Agora Hau nia laran susar. Hau atu dehan saida? Hau atu husu Hau nia Aman hasai Hau husi tempu terus nee ka? Lae. Hau la bele husu nunee, tanba Hau mai iha mundu atu hetan terus nee duni.
JOH 12:28 Nee mak Hau husu dehan, ‘Hau nia Aman, foti aas Ita Boot nia naran ba!’ ” Derepenti iha lian ida husi lalehan dehan, “Hau foti aas tiha ona Hau nia naran, i Hau sei foti aas fali tan.”
JOH 12:29 Ema barak nebee hamriik iha nebaa rona lian nee. Balu dehan rai tarutu. Balu tan dehan Maromak nia anju ida koalia ho Jesus.
JOH 12:30 Jesus dehan, “Lian nebee imi rona nee laos atu tulun Hau, maibee atu tulun imi.
JOH 12:31 Agora tempu too ona atu Maromak foo justisa ba mundu nee, agora Nia atu hamonu ona Satanás, liurai mundu nee nian.
JOH 12:32 Maibee bainhira ema foti sae Hau iha fatin aas, Hau sei dada ema hotu-hotu mai iha Hau.”
JOH 12:33 Jesus hatete nunee para foo sai oinsaa mak Nia atu mate.
JOH 12:34 Ema lubuk boot nee husu dehan, “Ami rona ema lee sai husi Livru Sagradu dehan, Mesias sei moris tinan ba tinan. Entaun nusaa mak Ita Boot dehan, ‘Ema sei foti sae Ema Umanu nia Oan’? Ema Umanu nia Oan nee see loos?”
JOH 12:35 Depois Jesus soe lia kona ba nia Aan dehan, “La kleur tan, naroman la hamutuk ho imi ona. Entaun durante naroman nee sei hamutuk ho imi, imi tenki moris nafatin iha naroman nee, atu nakukun la bele taka imi. Tanba ema nebee lao iha nakukun laran, nia la hatene nia baa loos nebee.
JOH 12:36 Bainhira naroman sei hamutuk ho imi, imi tenki fiar ba naroman nee, atu nunee imi mos bele sai hanesan naroman nee.” Koalia hotu tiha, Jesus sai husi fatin nee, i Nia la hatudu Nia Aan ba sira tan.
JOH 12:37 Maski Jesus halo milagre bar-barak iha ema Judeu sira nia klaran, maibee sira la fiar nafatin ba Nia.
JOH 12:38 Nee hanesan Maromak nia profeta Isaias hakerek nanis tiha ona dehan, “Nai, ema uitoan deit mak fiar ba liafuan nebee mak ami foo sai. Ita Boot nia kbiit hatudu sai ba see loos?”
JOH 12:39 Sira la bele fiar tanba buat nebee profeta Isaias hakerek nanis ona kona loos sira. Nia dehan,
JOH 12:40 “Maromak halo sira nia matan delek tiha, i halo sira nia hanoin sai beik tiha, atu nunee sira la bele haree i la bele kompriende. Nunee sira la bele fila fali ba Maromak, atu Maromak salva sira.”
JOH 12:41 Isaias koalia hanesan nee tanba nia haree tiha ona Jesus nia kbiit lalehan nian, nunee nia konta kona ba Jesus.
JOH 12:42 Maski ema barak la fiar ba Jesus, maibee iha mos ema barak fiar. Nai ulun Judeu balu mos fiar ba Nia, maibee sira lakohi foo sai dehan sira fiar ba Jesus, tanba sira tauk ema Farizeu sira bandu la bele tama tan iha uma kreda.
JOH 12:43 Tanba nai ulun sira nee gosta liu ema mak gaba sira duke Maromak mak gaba.
JOH 12:44 Depois Jesus foo sai ho lian makaas ba ema barak dehan, “Ema nebee mak fiar mai Hau, nia laos fiar deit Hau maibee nia fiar mos Ida nebee mak haruka Hau mai.
JOH 12:45 Ema nebee haree Hau, nia haree mos Ida nebee mak haruka Hau mai.
JOH 12:46 Hau mai iha mundu nee nudar naroman, atu ema hotu nebee fiar mai Hau la bele hela tan iha nakukun laran.
JOH 12:47 Ema nebee rona Hau nia hanorin maibee la halo tuir, laos Hau mak atu hamonu kastigu ba nia. Tanba Hau mai laos atu tesi lia ba ema iha mundu nee, maibee atu salva sira.
JOH 12:48 Maski nunee ema nebee lakohi simu Hau i la simu Hau nia liafuan, bainhira mundu nee remata, liafuan nebee Hau hatoo tiha ona mak sai hanesan juis hodi hamonu kastigu ba nia.
JOH 12:49 Tanba Hau koalia laos tuir Hau nia hanoin rasik, maibee Hau nia Aman nebee haruka Hau mai mak foo orden mai Hau oinsaa atu koalia.
JOH 12:50 Hau hatene katak buat nebee Nia haruka Hau foo sai nee lori ema ba moris rohan-laek. Tanba nee, Hau koalia tuir lo-loos Hau nia Aman haruka.”
JOH 13:1 Festa Paskua besik ona, Jesus hatene katak Nia oras too ona atu husik mundu nee hodi fila fali ba Nia Aman. Nia sempre hadomi Nia ema sira iha mundu nee, I Nia hadomi nafatin sira too rohan.
JOH 13:2 Jesus ho Nia eskolante sira tuur atu haan kalan hamutuk. Satanás foo hanoin tiha ona ba Judas, Simão Iscariotes nia oan atu faan Jesus.
JOH 13:3 Jesus hatene katak Nia Aman entrega tiha ona buat hotu-hotu ba iha Nia liman laran. Nia mos hatene katak Nia mai husi Maromak i atu fila fali ona ba Maromak.
JOH 13:4 Nunee sira sei haan hela, Jesus hamriik, hasai tiha Nia batina, i foti toalha ida kesi ba iha Nia kanotak.
JOH 13:5 Depois Nia fui bee ba iha basia ida i komesa fase Nia eskolante sira nia ain hodi hamaran ho toalha nebee mak kesi hela iha Nia kanotak.
JOH 13:6 Bainhira too iha Simão Pedro, Pedro hatete ba Jesus, “Nai, Ita Boot atu fase fali hau nia ain ka?”
JOH 13:7 Jesus hataan dehan, “Agora o seidauk kompriende saida mak Hau halo nee, maibee too loron ida o sei kompriende.”
JOH 13:8 Pedro dehan, “Lae! Ita Boot la bele fase fali Hau nia ain.” Jesus hataan, “Se Hau la fase o nia ain, entaun o laos Hau nian.”
JOH 13:9 Simão Pedro hataan fali, “Nai, se nunee la bele fase deit hau nia ain, maibee fase hotu hau nia liman ho ulun.”
JOH 13:10 Jesus dehan, “Ema nebee hariis ona, so fase deit nia ain, tanba nia isin moos ona. Imi sira nee moos ona, maibee laos imi hotu-hotu mak moos.”
JOH 13:11 Jesus hatene tiha ona see mak atu faan Nia. Tanba nee mak nia dehan, laos sira hotu-hotu mak moos.
JOH 13:12 Bainhira Jesus fase hotu sira nia ain, Nia hatais fali Nia batina hodi baa tuur fali iha Nia fatin. Depois Nia husu ba sira dehan, “Imi kompriende buat nebee Hau halo ba imi nee ka lae?
JOH 13:13 Imi bolu Hau ‘Mestri’ ho ‘Nai’. Nee loos, tanba Hau nunee duni.
JOH 13:14 Agora imi nia Mestri ho imi nia Nai fase tiha ona imi nia ain, entaun imi mos tenki halo nunee ba malu.
JOH 13:15 Hau halo ida nee hanesan ezemplu ida atu imi bele halo tuir.
JOH 13:16 Hau hatete lo-loos ba imi, atan ida la bele boot liu fali nia patraun. Nunee mos ema nebee lori ema seluk nia lia menon, nia la bele boot liu fali ida nebee mak haruka nia baa.
JOH 13:17 Agora imi hatene ona buat sira nee, se imi halo tuir, imi sei hetan bensaun.
JOH 13:18 Hau nia liafuan nee laos kona imi hotu. Hau konhese di-diak imi nebee mak Hau hili tiha ona. Maibee saida mak atu akontese nee hanesan lo-loos buat nebee hakerek tiha ona iha Livru Sagradu dehan, ‘Ema nebee tuur haan hamutuk ho Hau, nia sai fali Hau nia inimigu.’
JOH 13:19 Ida nee Hau foo hatene kedas ba imi, atu nunee bainhira buat nee akontese, imi bele fiar katak, Hau mak Ida nebee imi hein hela nee.
JOH 13:20 Hau hatete lo-loos ba imi, see mak simu ema nebee Hau haruka, nia simu ona Hau. See mak simu Hau, nia simu ona Ida nebee haruka Hau mai.”
JOH 13:21 Koalia tiha nunee, Jesus laran susar teb-tebes, i Nia hatete sai dehan, “Hau hatete lo-loos ba imi, husi imi sira nee, ida sei faan Hau ba Hau nia inimigu sira.”
JOH 13:22 Rona nunee, Nia eskolante sira hateke ba malu. Sira bilaan tiha, la hatene Jesus koalia kona ba see.
JOH 13:23 Iha eskolante ida nebee Jesus hadomi liu tuur iha Jesus nia sorin.
JOH 13:24 Entaun Simão Pedro foo sinal ba nia hodi dehan, “Husu took, Nia koalia kona ba see loos?”
JOH 13:25 Eskolante nee sadere ba Jesus hodi husu, “Nai, see mak atu halo ida nee?”
JOH 13:26 Jesus hataan, “Hau sei hatama paun pedasuk ba iha manko laran depois foo ba ema ida, nia mak nee.” Depois Jesus foti paun pedasuk hatama ba iha manko laran hodi foo ba Judas, Simão Iscariotes nia oan.
JOH 13:27 Judas simu tiha paun nee, Satanás tama kedas iha nia laran. Jesus hatete ba Judas, “O atu halo saida, halo lalais ona ba.”
JOH 13:28 Sira nebee tuur haan hamutuk ho Jesus, la iha ida mak kompriende tansaa mak Jesus hatete nunee.
JOH 13:29 Sira balu hanoin dehan Jesus haruka Judas atu baa sosa buat ruma ba festa Paskua ka foo osan ba ema kiak sira, tanba Judas mak toma konta sira nia osan.
JOH 13:30 Simu tiha paun, Judas sai kedas husi fatin nee. Rai mos kalan ona.
JOH 13:31 Judas sai tiha, Jesus hatete ba Nia eskolante sira seluk dehan, “Agora Maromak atu foti aas Hau, Ema Umanu nia Oan. Agora Maromak atu hatudu sai Nia kbiit liu husi Hau.
JOH 13:32 Tanba Nia hatudu Nia kbiit liu husi Hau, nunee la kleur tan Nia rasik sei foti aas Hau.
JOH 13:33 Hau nia oan doben sira, Hau hela ho imi la kleur tan ona. Imi sei buka Hau, maibee hanesan Hau hatete tiha ona ba nai ulun Judeu sira katak, iha fatin nebee mak Hau atu baa, imi la bele baa.
JOH 13:34 Agora Hau foo ukun fuan foun ba imi nunee: Hadomi malu ba. Hanesan Hau hadomi imi, nunee mos imi tenki hadomi malu.
JOH 13:35 Se imi hadomi malu nunee, ema hotu sei hatene katak imi nee Hau nia eskolante.”
JOH 13:36 Simão Pedro husu ba Jesus, “Nai, Ita Boot atu baa iha nebee?” Jesus hataan, “Fatin nebee Hau atu baa nee, o la bele tuir agora. Aban-bainrua mak o tuir.”
JOH 13:37 Pedro husu fali, “Nai, tansaa mak hau la bele tuir agora? Hau prontu mate ba Ita Boot.”
JOH 13:38 Jesus hataan, “Tebes ka? O prontu mate ba Hau ka? Hau hatete lo-loos ba o, molok manu kokoreek, o sei nega Hau dala tolu.”
JOH 14:1 Jesus hatutan tan dehan, “Imi keta laran susar. Fiar ba Maromak, fiar mos mai Hau.
JOH 14:2 Iha Hau nia Aman nia uma iha fatin barak. Hau hatete nunee tanba fatin iha duni, se lae, Hau la hatete ida. Agora Hau atu baa uluk prepara fatin ba imi iha nebaa.
JOH 14:3 Hau prepara tiha imi nia fatin mak Hau mai fali hodi lori imi ba atu imi bele hamutuk ho Hau. Nunee fatin nebee mak Hau hela, imi mos hela hotu iha nebaa.
JOH 14:4 Fatin nebee Hau baa, imi hatene nia dalan.”
JOH 14:5 Tomé husu, “Nai, ami la hatene Ita Boot atu baa iha nebee. Oinsaa mak ami bele hatene nia dalan?”
JOH 14:6 Jesus hataan, “Hau mak dalan, Hau mak lia loos, Hau mak moris nia huun. See mak atu baa iha Hau nia Aman, nia tenki liu husi Hau.
JOH 14:7 Se imi konhese lo-loos ona Hau, entaun imi konhese mos Hau nia Aman. Komesa agora imi konhese duni Nia i haree ona Nia.”
JOH 14:8 Filipe dehan, “Nai, hatudu Ita Boot nia Aman mai ami, nee too ona ba ami.”
JOH 14:9 Jesus hataan, “Filipe, Hau hela kleur ona ho imi, maibee imi seidauk konhese lo-loos Hau ka? Ema nebee haree ona Hau, nia haree ona Hau nia Aman. Entaun nusaa mak o husu fali atu Hau hatudu Hau nia Aman ba imi?
JOH 14:10 O la fiar katak Hau ho Hau nia Aman ida deit ka? Buat nebee Hau foo sai ba imi laos mai husi Hau nia Aan. Maibee Hau nia Aman hela iha Hau hodi halao Nia servisu.
JOH 14:11 Hau hatete ba imi, Hau ho Hau nia Aman ida deit, imi tenki fiar Hau nia liafuan nee. Se imi la fiar Hau nia liafuan nee, entaun fiar netik buat nebee Hau halo tiha ona.
JOH 14:12 Hau hatete lo-loos ba imi, see mak fiar Hau, nia sei halo buat nebee mak Hau halo, nia mos sei halo buat nebee makaas liu tan, tanba Hau baa hela hamutuk ho Hau nia Aman.
JOH 14:13 I saida deit mak imi husu hodi Hau nia naran, Hau sei halo, atu nunee ema foti aas Hau nia Aman nia naran tanba buat nebee mak Nia Oan halo nee.
JOH 14:14 Imi bele husu saida deit hodi Hau nia naran, Hau sei halo.”
JOH 14:15 “Se imi hadomi Hau, imi sei halo tuir Hau nia ukun fuan.
JOH 14:16 Hau sei husu ba Hau nia Aman, i Nia sei foo Ajudador ida atu mai hela hamutuk ho imi tinan ba tinan.
JOH 14:17 Nia nee Maromak nia Espiritu, Nia hatudu sai lia loos. Ema mundu nian la bele simu Nia tanba sira la haree Nia i la konhese Nia. Maibee imi konhese Nia tanba Nia sei hela hamutuk ho imi i hela iha imi nia laran.
JOH 14:18 Hau sei la husik imi mesak hanesan oan kiak, Hau sei mai fali.
JOH 14:19 La kleur tan, ema mundu nian la haree tan Hau, maibee imi sei haree. Tanba Hau moris, entaun imi mos sei moris.
JOH 14:20 Bainhira imi haree fali Hau mak imi sei hatene katak Hau laran ida ho Hau nia Aman i imi mos ida deit ho Hau.
JOH 14:21 See mak simu Hau nia ukun fuan hodi halo tuir, nia nee hadomi Hau. Hau nia Aman hadomi ema nebee hadomi Hau nee. Hau mos hadomi nia, i sei hatudu Hau nia Aan ba nia.”
JOH 14:22 Depois eskolante ida naran Judas, laos Judas Iscariotes, dehan ba Jesus, “Nai, nusaa mak Nai atu hatudu Aan mai ami deit, maibee lakohi hatudu Aan ba ema seluk iha mundu nee?”
JOH 14:23 Jesus dehan, “Ema nebee hadomi Hau, nia sei halo tuir Hau nia liafuan. Hau nia Aman sei hadomi nia, i Hau ho Hau nia Aman sei mai hela hamutuk ho nia.
JOH 14:24 Ema nebee la hadomi Hau, nia la halo tuir Hau nia liafuan. Buat nebee imi rona husi Hau laos mai husi Hau nia Aan, maibee mai husi Hau nia Aman nebee mak haruka Hau mai.
JOH 14:25 Buat sira nee hotu Hau hatete ba imi bainhira Hau sei hamutuk ho imi.
JOH 14:26 Maibee Hau nia Aman sei haruka Ajudador ba imi hodi troka Hau, Nia nee mak Espiritu Santu. Nia sei hanorin buat hotu ba imi i foo hanoin fila fali ba imi kona ba buat hotu-hotu nebee Hau hanorin tiha ona ba imi.
JOH 14:27 Hau husik hela pas ho hakmatek ba imi. Pas ho hakmatek nebee Hau foo nee, la hanesan imi bele hetan iha mundu nee. Entaun la bele laran susar i la bele tauk!
JOH 14:28 Imi rona tiha ona Hau nia liafuan dehan, ‘Hau atu baa ona, i Hau sei fila fali mai.’ Se imi hadomi duni Hau, entaun bainhira Hau baa iha Hau nia Aman, imi sei kontenti, tanba Hau nia Aman boot liu Hau.
JOH 14:29 Hau foo hatene kedas ba imi molok buat sira nee akontese, atu bainhira akontese imi bele fiar mai Hau.
JOH 14:30 Hau koalia ho imi la kleur tan ona, tanba Satanás, liurai mundu nee ninian atu mai ona. Nia la bele domina Hau.
JOH 14:31 Maibee buat sira nee akontese atu ema iha mundu nee hatene katak Hau hadomi Hau nia Aman i halo tuir lo-loos buat nebee mak Nia haruka.” Hotu tiha Jesus dehan, “Mai ita baa ona!”
JOH 15:1 Jesus halo komparasaun ida nunee: “Hau mak uvas huun lo-loos, Hau nia Aman mak Toos Nain.
JOH 15:2 Hau iha sanak barak. Sanak nebee la foo fuan, Toos Nain sei tesi sai tiha hotu. Maibee sanak nebee foo fuan, Toos Nain aparu halo moos atu bele foo fuan barak liu tan.
JOH 15:3 Imi nee moos tiha ona tanba imi simu ona hanorin nebee Hau foo ba imi.
JOH 15:4 Imi tenki laran ida ho Hau nafatin, Hau mos sei laran ida ho imi nafatin. Tanba ai sanak nebee haketak aan ona husi nia huun la bele foo fuan, nia tenki hamutuk ho nia huun mak foin foo fuan. Nunee mos imi, imi tenki laran ida ho Hau nafatin mak foin imi bele foo fuan.
JOH 15:5 Hau mak uvas huun, imi mak nia sanak. Se imi ho Hau nafatin ida deit, imi hanesan sanak ida nebee foo fuan barak. Se imi haketak aan husi Hau, imi la bele halo buat ida.
JOH 15:6 See mak haketak aan husi Hau, nia hanesan uvas sanak nebee la iha folin. Nunee toos nain soe tiha too maran, depois raut soe ba ahi hodi sunu tiha.
JOH 15:7 Se imi laran ida nafatin ho Hau, i imi rai nafatin Hau nia hanorin iha imi nia laran, imi bele husu saida deit ba Hau nia Aman, Nia sei foo.
JOH 15:8 Bainhira imi hanesan uvas sanak nebee foo fuan barak, nee halo ema foti aas Hau nia Aman nia naran. Nunee imi mos hatudu katak, imi nee Hau nia eskolante duni.
JOH 15:9 Hanesan Hau nia Aman hadomi Hau, nunee mos Hau hadomi imi. Imi tenki moris nafatin iha Hau nia domin nee.
JOH 15:10 Hau halo tuir buat nebee Hau nia Aman haruka hodi moris nafatin iha Nia domin. Se imi halo tuir Hau nia ukun fuan, imi mos sei moris nafatin iha Hau nia domin.
JOH 15:11 Hau hatete buat sira nee hotu ba imi atu nunee imi nia laran haksolok teb-tebes hanesan mos Hau nia laran haksolok.
JOH 15:12 Hau nia ukun fuan mak nee: Hadomi malu hanesan Hau hadomi imi.
JOH 15:13 Ema nebee hadomi liu nia belun sira mak ema nebee foo nia moris atu salva sira, domin boot liu ida nee la iha.
JOH 15:14 Imi nee mak Hau nia belun sira, naran katak imi halo tuir buat nebee Hau haruka.
JOH 15:15 Hau sei la bolu tan imi ‘atan’ tanba atan la hatene saida mak nia patraun halo. Hau bolu imi ‘belun’ tanba buat hotu nebee Hau rona husi Hau nia Aman, Hau foo hatene hotu ba imi.
JOH 15:16 Laos imi mak hili Hau, maibee Hau mak hili imi. Hau foti ona imi atu baa halao Hau nia servisu hodi foo fuan nebee mak dura nafatin. Nunee imi husu saida deit ba Hau nia Aman hodi Hau nia naran, Nia sei foo.
JOH 15:17 Ida nee mak Hau nia ukun fuan: Hadomi malu ba.”
JOH 15:18 Jesus hatutan tan dehan, “Bainhira ema mundu nian odi imi, keta haluha katak, sira odi uluk tiha ona Hau.
JOH 15:19 Se karik imi hanesan sira, entaun sira sei hadomi imi hanesan sira hadomi sira nia ema. Maibee imi la hanesan ho sira, Hau haketak tiha ona imi husi sira. Nee mak sira odi imi.
JOH 15:20 Hanoin di-diak liafuan nebee uluk Hau hatete tiha ona ba imi: ‘Atan ida la bele boot liu fali nia patraun.’ Ema mundu halo terus ona Hau, entaun sira mos sei halo terus imi. Se sira halo tuir buat nebee Hau hanorin, sira mos sei halo tuir imi nia hanorin.
JOH 15:21 Sira sei halo terus imi tanba imi tuir Hau. Sira halo nunee tanba sira la konhese Ida nebee haruka Hau mai.
JOH 15:22 Se karik Hau la mai foo sai Maromak nia liafuan ba sira, entaun Maromak la foo sala ba sira. Maibee Hau foo sai duni, nunee agora sira la iha tan razaun atu defende aan.
JOH 15:23 Ema nebee odi Hau, nia odi mos Hau nia Aman.
JOH 15:24 Hau halo ona milagre iha sira nia oin, milagre nebee ema seluk nunka halo. Se karik hau nunka halo milagre sira nee, entaun Maromak la foo sala ba sira. Maibee Hau halo duni, i sira haree ho matan rasik. Maski nunee sira odi nafatin Hau, too odi mos Hau nia Aman.
JOH 15:25 Maibee buat nee akontese hodi halo tuir saida mak hakerek iha sira nia Livru Sagradu dehan, ‘Sira odi Hau maski la iha razaun.’
JOH 15:26 Hau sei haruka Ajudador mai. Nia mai husi Hau nia Aman. Nia nee mak Espiritu nebee hatudu sai lia loos. Bainhira Nia mai, Nia sei foo sasin kona ba Hau.
JOH 15:27 Imi mos tenki foo sasin kona ba Hau, tanba hori uluk too agora imi hamutuk ho Hau.
JOH 16:1 Hau hatete buat sira nee hotu ba imi atu imi la bele lao sala dalan.
JOH 16:2 Aban-bainrua ema Judeu sei bandu imi la bele tama tan iha uma kreda. Laos nee deit, maibee too tempu ida, ema sei oho imi, sira hanoin katak sira oho imi para serbi Maromak.
JOH 16:3 Sira halo nunee tanba sira la konhese Hau nia Aman i la konhese mos Hau.
JOH 16:4 Maibee Hau hatete kedas buat nee ba imi atu aban-bainrua akontese karik, imi lalika hakfodak, tanba Hau foo sai tiha ona ba imi. Fo-foun Hau la foo sai buat sira nee ba imi tanba iha tempu nebaa Hau sei hamutuk ho imi.”
JOH 16:5 “Agora Hau atu fila fali ba Ida nebee haruka Hau mai. Maibee imi sira nee la iha ida mak husu, ‘Ita Boot atu baa nebee?’
JOH 16:6 Imi nia laran tristi teb-tebes tanba Hau foo sai buat sira nee.
JOH 16:7 Maibee Hau hatete lo-loos ba imi, se Hau baa, nee diak liu ba imi. Se Hau la baa karik, Ajudador sei la mai iha imi. Hau baa mak Hau haruka Nia mai.
JOH 16:8 Bainhira Nia too mai, Nia sei halo ema iha mundu nee rekonhese buat tolu: Sira nia sala, saida mak loos, i Maromak hamonu Nia kastigu ba mundu.
JOH 16:9 Kona ba sala, Ajudador sei hatudu ba sira katak, sira sala tanba sira lakohi fiar mai Hau.
JOH 16:10 Kona ba saida mak loos, Ajudador sei halo sira kompriende katak, Hau nee moris loos. Sira hatene nunee tanba Hau atu baa ona iha Hau nia Aman i imi sei la haree tan Hau.
JOH 16:11 Kona ba Maromak nia kastigu, Ajudador sei foo hanoin ba sira katak, iha duni justisa ba aban-bainrua, tanba Maromak hamonu ona kastigu ba Satanás, liurai mundu nee nian.
JOH 16:12 Sei iha buat barak mak Hau atu foo sai ba imi, maibee agora imi seidauk bele simu hotu.
JOH 16:13 Maibee bainhira Espiritu Santu mai, Nia sei hatudu sai lia loos ba imi atu imi hatene hotu. Nia laos koalia tuir Nia hanoin rasik, maibee Nia koalia tuir buat nebee Nia rona husi Hau nia Aman. I Nia sei foo hatene ba imi kona ba saida mak sei akontese aban-bainrua.
JOH 16:14 Nia sei foti aas Hau tanba buat nebee Nia hatoo ba imi, Nia simu husi Hau.
JOH 16:15 Buat hotu nebee Hau nia Aman nian, nee Hau nian. Tanba nee mak Hau dehan, buat nebee Espiritu Santu hatoo ba imi, Nia simu husi Hau.”
JOH 16:16 Jesus hatutan dehan, “La kleur tan imi la haree ona Hau. Depois iha tempu badak nia laran, imi sei haree fali Hau.”
JOH 16:17 Jesus nia eskolante balu husu ba malu dehan, “Liafuan nee dehan saida? Nia foo sai mai ita dehan, la kleur tan ita la haree ona Nia. Depois iha tempu badak nia laran, ita sei haree fali Nia. I Nia mos dehan Nia atu baa ona iha Nia Aman.”
JOH 16:18 Sira husu nafatin dehan, “Liafuan ‘la kleur tan’ nee dehan saida? Ita la kompriende.”
JOH 16:19 Jesus hatene hela sira atu husu Nia kona ba buat nee. Entaun Nia dehan ba sira, “Ohin Hau hatete, ‘La kleur tan imi la haree ona Hau. Depois iha tempu badak nia laran, imi sei haree fali Hau.’ Imi husu malu kona ba ida nee ka?
JOH 16:20 Hau hatete lo-loos ba imi, bainhira Hau baa, imi sei tanis halerik ho laran susar, maibee ema mundu nian sei haksolok. Imi nia laran sei tristi maibee imi nia laran tristi nee sei sai fali haksolok.
JOH 16:21 Nee hanesan inan ida nebee tempu too ona atu tuur ahi, nia tanis hakilar. Maibee bainhira nia oan moris ona, nia haluha tiha nia terus nee. Nia laran haksolok, tanba labarik ida moris mai ona iha mundu nee.
JOH 16:22 Nunee mos ho imi. Agora imi nia tempu atu tristi. Maibee aban-bainrua Hau fila fali mai haree imi, imi nia laran sei haksolok. La iha ema ida mak bele hasai fali imi nia ksolok nee.
JOH 16:23 Bainhira Hau hasoru malu fali ho imi, imi sei la husu tan buat ida ba Hau. Hau hatete lo-loos ba imi, imi husu saida deit hodi Hau nia naran, Hau nia Aman sei foo.
JOH 16:24 Too agora imi seidauk husu buat ruma hodi Hau nia naran. Husu deit ba. Imi sei simu, atu imi nia laran bele haksolok teb-tebes.”
JOH 16:25 “Durante nee Hau hanorin imi ho komparasaun. Maibee too tempu ida Hau sei la uza tan komparasaun, Hau koalia mo-moos ba imi kona ba Hau nia Aman.
JOH 16:26 Too iha tempu nee, imi ida-idak sei husu rasik ba Hau nia Aman hodi Hau nia naran, la presiza Hau mak hatoo ba Nia.
JOH 16:27 Hau nia Aman rasik hadomi imi, tanba imi hadomi Hau i imi fiar ona katak Hau mai husi Maromak.
JOH 16:28 Loos duni, Hau mai iha mundu nee, Hau mai husi Nia. Agora Hau atu husik fali mundu nee, Hau fila fali ba Nia.”
JOH 16:29 Depois Nia eskolante sira dehan, “Agora Ita Boot koalia mo-moos, la uza komparasaun tan ona.
JOH 16:30 Agora ami kompriende katak, Ita Boot hatene buat hotu-hotu, ami seidauk husu buat ruma mos, Ita Boot hatene uluk ona ami nia hanoin. Nee mak ami fiar katak Ita Boot mai husi Maromak.”
JOH 16:31 Jesus husu fali ba sira, “Entaun agora imi fiar ona ka?
JOH 16:32 Too tempu ida, tempu nee mak komesa agora nee, imi sei halai namkari, imi ida-ida halai ba nia uma husik hela Hau mesak. Maibee Hau laos mesak, tanba Hau nia Aman hamutuk ho Hau.
JOH 16:33 Hau hatete buat sira nee hotu ba imi atu imi bele moris iha pas ho hakmatek tanba imi laran ida ho Hau. Iha mundu nee imi sei hetan susar. Maibee aten brani ba, tanba Hau manaan tiha ona mundu.”
JOH 17:1 Jesus koalia hotu tiha nunee, Nia hateke ba lalehan hodi harohan, “Hau nia Aman, agora oras too ona. Hau husu atu Ita Boot foti aas Ita Boot nia Oan, Hau, atu nunee Hau foti aas Ita Boot nia naran.
JOH 17:2 Tanba Ita Boot foo tiha ona kbiit mai Hau hodi ukun ema hotu-hotu, atu Hau bele foo moris rohan-laek ba ema nebee mak Ita Boot entrega ona mai Hau.
JOH 17:3 Moris rohan-laek katak ema konhese Ita Boot mak Maromak loos, la iha tan seluk. I sira konhese mos Hau, Jesus Kristu, nebee Ita Boot haruka mai.
JOH 17:4 Hau halo hotu ona servisu nebee mak Ita Boot foo mai Hau. Nunee Hau hatudu sai tiha ona Ita Boot nia kbiit iha mundu nee.
JOH 17:5 Hau nia Aman, Hau husu atu Ita Boot foti aas fali Hau iha Ita Boot nia prezensa, hanesan uluk Hau hamutuk ho Ita Boot bainhira mundu nee seidauk iha.”
JOH 17:6 Jesus halo orasaun nafatin dehan, “Hau foo konhese tiha ona Ita Boot ba ema sira nebee Ita Boot entrega mai Hau iha mundu nee. Sira nee Ita Boot nian. Ita Boot foo sira mai Hau, i sira halo tuir Ita Boot nia liafuan.
JOH 17:7 Agora sira hatene ona katak, buat hotu nebee Ita Boot foo ba Hau mai husi Ita Boot.
JOH 17:8 Tanba Hau hatoo tiha ona liafuan hotu-hotu nebee Ita Boot foo mai Hau, i sira simu tiha ona. Sira hatene katak Hau mai duni husi Ita Boot, i sira fiar katak Ita Boot mak haruka Hau mai.
JOH 17:9 Hau harohan ba sira. Hau laos harohan ba ema hotu iha mundu nee, maibee Hau harohan ba sira nebee mak Ita Boot foo mai Hau, tanba sira nee Ita Boot nian.
JOH 17:10 See deit mak Hau nian, Ita Boot nian. Ita Boot mak foo sira nee mai Hau, i sira hatudu sai ona Hau nia kbiit.
JOH 17:11 Agora Hau atu fila ona ba Ita Boot, Hau la hela tan ona iha mundu, maibee sira sei hela iha mundu nee. Aman Santu, kuidadu sira ho Ita Boot nia kbiit nebee mak Ita Boot foo tiha ona mai Hau. Ho nunee sira hamutuk ida deit hanesan Ita Nain rua ida deit.
JOH 17:12 Durante Hau hamutuk ho sira, Hau kuidadu sira ho Ita Boot nia naran nebee Ita Boot foo mai Hau. Hau tau matan ba sira. Nunee sira iha hotu, so ida deit mak lakon. Ema ida nee tenki lakon duni tuir buat nebee hakerek nanis ona iha Livru Sagradu.
JOH 17:13 Agora Hau atu baa ona iha Ita Boot, maibee Hau harohan buat sira nee bainhira Hau sei iha mundu nee, atu sira nia laran bele haksolok teb-tebes hanesan mos Hau nia laran haksolok.
JOH 17:14 Hau foo hatene tiha ona Ita Boot nia liafuan ba sira. Hau laos ema mundu nian, sira mos lae. Nee mak ema seluk iha mundu nee odi sira.
JOH 17:15 Hau la husu atu Ita Boot hasai sira husi mundu nee, maibee Hau husu atu Ita Boot proteje sira husi aat nain.
JOH 17:16 Sira laos mundu nian, hanesan Hau mos laos mundu nian.
JOH 17:17 Uza Ita Boot nia liafuan hodi halo sira nia laran moos, tanba Ita Boot nia liafuan sempre loos.
JOH 17:18 Hanesan Ita Boot haruka Hau mai iha mundu nee, nunee mos Hau haruka sira baa iha mundu tomak.
JOH 17:19 Hau entrega Hau nia Aan tomak ba Ita Boot atu sira mos bele entrega sira nia aan tomak sai Ita Boot nian lo-loos.”
JOH 17:20 Jesus harohan nafatin dehan, “Hau halo orasaun laos ba Hau nia eskolante sira deit, maibee Hau mos halo orasaun ba ema nebee aban-bainrua sei fiar mai Hau liu husi sira nia liafuan.
JOH 17:21 Hau nia Aman, Hau husu atu sira hotu hamutuk ida deit, hanesan Ita Boot ho Hau mos ida deit. Hau harohan atu sira laran ida ho Ita Nain rua, atu nunee ema iha mundu nee bele fiar katak Ita Boot mak haruka Hau mai.
JOH 17:22 Ita Boot foti aas tiha ona Hau, i Hau mos foti aas tiha ona sira atu nunee sira sai laran ida hanesan Ita Nain rua mos laran ida.
JOH 17:23 Nunee Hau ida deit ho sira, i Ita Boot ida deit ho Hau, too sira sai neon ida laran ida. Ho nunee ema iha mundu sei hatene katak Ita Boot mak haruka Hau mai, i Ita Boot sempre hadomi sira, hanesan Ita Boot hadomi Hau.
JOH 17:24 Hau nia Aman, ema sira nebee Ita Boot foo tiha ona mai Hau nee, Hau hakarak atu sira hela hamutuk ho Hau. Nunee sira bele haree katak Ita Boot foti aas tiha ona Hau tanba Ita Boot hadomi nanis Hau molok mundu nee iha.
JOH 17:25 Hau nia Aman, Ita Boot sempre halo buat nebee mak loos. Maski ema mundu nian la konhese Ita Boot, maibee Hau konhese, i Hau nia eskolante sira nee hatene katak Ita Boot mak haruka Hau mai.
JOH 17:26 Hau foo konhese tiha ona ita Boot ba sira, i Hau sei foo konhese nafatin ba sira atu nunee Ita Boot nia domin mai Hau bele hela iha sira, i Hau mos hela iha sira.”
JOH 18:1 Bainhira Jesus halo orasaun hotu ona, Nia ho Nia eskolante sira baa iha mota Sedron nia sorin ba. Iha nebaa iha toos oliveira ida, i Jesus ho Nia eskolante sira tama iha toos nee.
JOH 18:2 Judas ida nebee faan Jesus mos hatene fatin nee, tanba dala barak Jesus ho Nia eskolante sira halibur hamutuk iha nebaa.
JOH 18:3 Nunee Judas mai hamutuk ho tropas Roma lubuk ida ho mos seguransa uma kreda boot nian balu. Ema seguransa sira nee mai tanba nai lulik nia ulun sira ho ema Farizeu sira mak haruka. Sira hotu lori ahi-oan, ahi ho mos sasaan kroat.
JOH 18:4 Jesus hatene ona buat nebee mak atu akontese ba Nia, nunee Nia sai baa hodi husu ema sira nee dehan, “Imi buka see?”
JOH 18:5 Sira hataan, “Jesus, Ema Nazaré.” Jesus hataan, “Hau mak nee.” Judas ida nebee faan Jesus mos hamriik hamutuk ho sira.
JOH 18:6 Bainhira Jesus dehan, “Hau mak nee”, sira hotu hakiduk monu ba rai.
JOH 18:7 Jesus husu fali ba sira dehan, “Imi buka see?” Sira hataan, “Jesus, Ema Nazaré.”
JOH 18:8 Jesus hataan, “Hau hatete tiha ona ba imi, Hau mak nee. Se imi buka duni Hau, entaun husik Hau nia eskolante sira nee fila ona.”
JOH 18:9 Jesus koalia nunee atu halo tuir Nia liafuan nebee uluk Nia harohan ba Nia Aman dehan, “Ema nebee Ita Boot foo mai Hau nee, ida mos la lakon.”
JOH 18:10 Iha tempu nee, Simão Pedro lori hela surik. Nia losu surik nee hodi tesi kotu tiha nai lulik boot nia atan ida nia tilun sorin loos. Atan nee naran Malku.
JOH 18:11 Jesus dehan ba Pedro, “Hatama tiha o nia surik ba iha nia fatin. O hanoin Hau la bele simu terus nebee Hau nia Aman desidi tiha ona ka?”
JOH 18:12 Depois tropas Roma ho sira nia komandante, ho mos ema Judeu nebee halo seguransa iha uma kreda boot kaer Jesus i futu Nia.
JOH 18:13 Sira lori Nia baa uluk iha Anás nia uma, Anás nee Kaifás nia banin. Kaifás mak nai lulik boot iha tinan nebaa,
JOH 18:14 nia mak uluk foo hanoin ba nai ulun Judeu sira katak, diak liu ema ida mate hodi povu tomak nia fatin.
JOH 18:15 Simão Pedro ho eskolante ida seluk lao tu-tuir Jesus husi kotuk too nai lulik boot nia uma. Eskolante ida seluk nee nai lulik boot konhese hela, nunee bainhira ema lori Jesus tama too uma oin, eskolante nee mos tama.
JOH 18:16 Maibee Pedro la bele tama, nia hamriik iha liur deit besik portaun. Tanba nai lulik boot konhese hela eskolante ida seluk nee, entaun eskolante nee baa koalia ho atan feto nebee mak hein portaun, nunee Pedro bele tama.
JOH 18:17 Depois feto nebee hein portaun nee husu ba Pedro, “O mos Ema nee nia eskolante ida, loos ka lae?” Maibee Pedro hataan, “Lae.”
JOH 18:18 Iha kalan nee rai malirin, nunee atan sira ho mos seguransa uma kreda boot sunu ahi, i sira hamriik haneruk hela ahi. Entaun Pedro mos hamriik hamutuk ho sira hodi haneruk ahi.
JOH 18:19 Iha tempu nee, nai lulik boot husu Jesus kona ba Nia eskolante sira ho mos kona ba Nia hanorin.
JOH 18:20 Jesus dehan, “Hau baibain koalia iha ema barak nia oin, Hau nunka koalia subar. Hau sempre hanorin iha area uma kreda boot nian ho mos iha uma kreda sel-seluk, fatin sira nee mak ema Judeu sira baibain halibur hamutuk.
JOH 18:21 Entaun nusaa mak ita husu fali buat sira nee mai Hau? Husu deit ba sira nebee mak rona tiha ona Hau nia hanorin. Sira hatene kona ba buat nebee Hau hatete.”
JOH 18:22 Jesus koalia nunee, seguransa ida nebee hamriik besik Nia basa Nia oin hodi dehan, “O brani hataan nunee ba nai lulik boot ka?”
JOH 18:23 Jesus hataan dehan, “Se karik Hau koalia sala, hatudu took Hau nia sala iha nebee. Maibee se Hau koalia loos, nusaa mak o basa fali Hau?”
JOH 18:24 Depois Anás haruka ema lori Jesus ba iha nai lulik boot Kaifás nia uma. Bainhira sira lori Nia, Nia liman futu metin hela.
JOH 18:25 Iha tempu nebaa Simão Pedro sei hamriik haneruk hela ahi. Iha ema balu husu dehan, “O mos Nia eskolante ida, loos ka lae?” Maibee Pedro nega dehan, “Lae!”
JOH 18:26 Iha nebaa iha nai lulik boot nia atan ida, nia sei maluk ho ema nebee mak Pedro tesi kotu nia tilun nee. Atan nee husu ba Pedro, “Hau haree ohin o hamutuk ho Nia iha toos oliveira laran, loos ka lae?”
JOH 18:27 Maibee Pedro nega dala ida tan. Iha momentu nee kedas manu kokoreek.
JOH 18:28 Iha dadeer-saan, ema Judeu sira lori Jesus husi Kaifás nia uma ba iha governador Roma nia uma. Too iha nebaa, sira lakohi tama liu ba laran, tanba governador laos ema Judeu, nunee se sira tama karik, lei Judeu bandu sira la bele tuir festa Paskua.
JOH 18:29 Entaun governador Pilatus sai mai hasoru malu ho sira hodi husu, “Nia halo sala saida mak imi mai kesar iha hau?”
JOH 18:30 Sira hataan, “Se Nia laos ema kriminozu, ami la lori Nia mai iha ita boot.”
JOH 18:31 Pilatus dehan, “Lori Nia baa hodi foo justisa tuir imi nia lei rasik.” Maibee sira hataan, “Ami ema Judeu la iha direitu atu foo kastigu mate ema.”
JOH 18:32 Sira hatete nunee atu Jesus nia liafuan kona ba oinsaa mak Nia atu mate bele sai realidade.
JOH 18:33 Nunee Pilatus tama fali iha uma laran. Nia bolu Jesus mai hodi husu, “O mak ema Judeu sira nia Liurai ka?”
JOH 18:34 Jesus hataan, “Pergunta nee mai husi ita rasik ka, ema ruma mak foo hatene ba ita kona ba Hau?”
JOH 18:35 Pilatus hataan fali dehan, “O hatene hau nee see. Hau ema Judeu ka?! O nia maluk Judeu rasik ho nai lulik nia ulun sira mak entrega O mai Hau. O nia sala saida?”
JOH 18:36 Jesus hataan, “Laos ema mundu nian mak hili Hau sai Liurai. Se nunee karik, entaun ohin ema Judeu sira baa kaer Hau nee, Hau nia reinu sei funu hasoru sira. Maibee Hau nia kbiit atu ukun laos husi nee.”
JOH 18:37 Pilatus husu, “Entaun O nee Liurai ka?” Jesus hataan, “Ita rasik mak dehan katak Hau Liurai. Hau mai iha mundu atu foo sasin kona ba lia loos. See mak kaer metin lia loos, nia rona Hau.”
JOH 18:38a Pilatus hataan fali dehan, “Lia loos? Saida mak nee?!”
JOH 18:38b Hotu tiha Pilatus sai fali ba liur hodi koalia ba ema Judeu sira dehan, “Hau la hetan sala ida iha Ema nee.
JOH 18:39 Maibee tin-tinan iha tempu Paskua hau sempre hasai ema dadur ida ba imi. Agora imi hakarak hau husik imi nia Liurai nee ka?”
JOH 18:40 Rona nunee, sira hataan ho hakilar dehan, “Lae! Laos Nia! Hasai mak Barabás.” Afinal Barabás nee ema naok-teen boot ida.
JOH 19:1 Depois Pilatus haruka nia tropas sira baku Jesus ho sikoti.
JOH 19:2 Sira mos dulas ai tarak halo kabuar hanesan koroa liurai nian hodi tau ba Nia ulun. Sira foo hatais batina kor mean ida hanesan ema boot nian.
JOH 19:3 Depois sira ida-ida mai hakbesik Nia hodi goza Nia dehan, “Viva, ema Judeu sira nia Liurai!” I sira basa Nia oin fila-fila.
JOH 19:4 Hotu tiha Pilatus sai fali mai liur hatete ba ema barak nee dehan, “Haree ba, hau lori Nia sai mai atu imi hatene katak hau la hetan sala ida iha Nia.”
JOH 19:5 Nunee Jesus sai mai ho koroa ai tarak iha Nia ulun i hatais hena mean. Pilatus hatete ba sira dehan, “Haree took, Nia mak nee!”
JOH 19:6 Bainhira nai lulik nia ulun sira ho seguransa uma kreda boot nian haree Jesus, sira hakilar dehan, “Prega tiha Nia ba krus! Prega tiha Nia ba krus!” Maibee Pilatus hataan, “Imi lori Nia baa prega ba! Hau la hetan sala ida iha Nia.”
JOH 19:7 Ema Judeu sira hataan, “Tuir ami nia lei, Nia tenki hetan kastigu mate tanba Nia foti Nia Aan dehan Nia mak Maromak nia Oan.”
JOH 19:8 Bainhira Pilatus rona sira nia liafuan, nia tauk loos.
JOH 19:9 Nunee nia lori Jesus tama fali ba uma laran. Depois nia husu, “O nee ema nebee?” Maibee Jesus la hataan buat ida.
JOH 19:10 Pilatus dehan, “Nusaa mak O lakohi hataan mai hau? O la hatene hau ka? Hau iha kbiit atu husik O, hau mos iha kbiit atu prega O ba krus too mate.”
JOH 19:11 Jesus hataan, “Ita boot nia kbiit nee mai husi leten. Se laos husi leten, ita boot la bele halo buat ida mai Hau. Nee duni ema nebee entrega Hau ba ita boot, nia sala boot liu fali ita boot nian.”
JOH 19:12 Rona tiha Jesus nia liafuan nee, Pilatus buka dalan atu husik tiha Jesus. Maibee ema Judeu sira hakilar tan dehan, “Se senhor husik Ema nee, entaun senhor sai inimigu ba liurai boot César. Tanba ema nebee foti aan hanesan liurai, nia kontra César.”
JOH 19:13 Bainhira Pilatus rona liafuan nee, nia haruka ema lori Jesus sai fali ba liur. Depois Pilatus baa tuur iha kadeira juis nian iha fatin ida ema bolu Fatin Nahe Fatuk, iha lian Ebreu dehan Gabata.
JOH 19:14 Momentu nee besik meudia ona, iha loron preparasaun ba festa Paskua nian. Pilatus hatete ba ema sira nee dehan, “Imi nia Liurai mak nee!”
JOH 19:15 Sira hakilar dehan, “Halakon tiha Nia! Halakon tiha Nia! Prega tiha Nia ba krus!” Pilatus husu fali, “Imi hakarak hau prega imi nia Liurai ba krus ka?” Maibee nai lulik nia ulun sira hataan, “Ami nia liurai mak César deit. La iha tan seluk.”
JOH 19:16a Too ikus Pilatus entrega Jesus ba sira atu prega ba krus too mate.
JOH 19:16b Nunee tropas sira lori Jesus sai.
JOH 19:17 Jesus rasik hulan hela Nia krus. Sira sai husi sidade lao too iha fatin ida naran Fatin Ulun Ruin, iha lian Ebreu dehan Golgota.
JOH 19:18 Too iha nebaa, sira prega Jesus iha krus. Sira mos prega ema nain rua tan iha krus iha Jesus nia sor-sorin, Jesus mak iha klaran.
JOH 19:19 Pilatus haruka ema hakerek liafuan iha ai kabelak ida, depois taka iha Jesus nia krus leten. Liafuan nee hakerek hanesan nee: “Jesus Ema Nazaré, ema Judeu sira nia Liurai.”
JOH 19:20 Ema Judeu barak lee liafuan nee, tanba fatin nebee prega Jesus ba iha krus nee la dook husi sidade, i liafuan nee hakerek iha lian Ebreu, Latin, ho lian Gregu.
JOH 19:21 Maibee nai lulik Judeu nia ulun sira baa hatete ba Pilatus dehan, “Senhor la bele hakerek ‘ema Judeu sira nia Liurai’! Diak liu hakerek hanesan nee: ‘Ema nee dehan, Nia mak ema Judeu sira nia Liurai.’ ”
JOH 19:22 Maibee Pilatus hataan, “Buat nebee hau hakerek tiha ona, la bele troka fali.”
JOH 19:23 Bainhira tropas sira prega tiha Jesus iha krus, sira nain haat fahe Jesus nia hena ba malu. Hela deit Nia hena naruk ida nebee soru tomak husi leten too kraik, la suku.
JOH 19:24 Depois tropas sira hatete ba malu, “Ita lalika lees hena naruk nee. Mai ita dada rifa deit, atu hatene see mak bele hetan.” Buat nee akontese hodi halo tuir saida mak hakerek iha Livru Sagradu dehan, “Sira fahe Hau nia hena ba malu; sira dada rifa para hatene, Hau nia hena naruk monu ba see.” Nunee tropas sira halo tuir duni liafuan nee.
JOH 19:25 Iha momentu nee Jesus nia inan, Nia inan nia alin feto, Kleofas nia kaben Maria, ho Maria Madalena hamriik besik hela krus.
JOH 19:26 Jesus haree Nia inan iha nebaa i haree Nia eskolante ida nebee Nia hadomi liu nee mos hamriik besik, depois Nia dehan ba Nia inan, “Hau nia inan, ida nee ita nia oan.”
JOH 19:27 I Nia hatete ba Nia eskolante nee dehan, “Ida nee o nia inan.” Komesa husi loron nee, eskolante nee lori Jesus nia inan baa hela iha nia uma.
JOH 19:28 Jesus hatene katak Nia halo hotu ona Nia knaar. Nunee, atu halo tuir buat nebee hakerek iha Livru Sagradu, Nia dehan, “Hau hamrook.”
JOH 19:29 Iha nebaa iha manko ida, tua siin iha laran. Ema ida baa foti esponza rohan ida habokon ho tua siin nee, tau ba iha ai hisopu hodi lolo ba iha Jesus nia ibun.
JOH 19:30 Jesus koko tiha tua siin nee, Nia dehan, “Hotu ona.” Depois Nia hakruuk hodi hakotu Nia iis.
JOH 19:31 Loron nee Sesta, loron preparasaun ba Sabadu, aban fali loron boot Paskua nian. Nai ulun Judeu sira lakohi atu ema nia mate isin tara nafatin iha krus leten iha loron Sabadu. Entaun sira baa husu Pilatus atu haruka ema baa baku tohar tiha ema nebee tara iha krus nee nia ain para sira bele mate lalais.
JOH 19:32 Nunee tropas sira baa uluk ema nain rua nebee mak prega iha Jesus nia sorin loos ho sorin karuk hodi baku tohar sira nia ain.
JOH 19:33 Maibee bainhira sira too iha Jesus, sira haree Nia mate tiha ona. Nunee sira la baku tohar Nia ain.
JOH 19:34 Maibee soldadu ida hodi diman sona Jesus nia sorin, derepenti raan ho bee suli sai.
JOH 19:35 Ida nebee konta buat nee ba imi, nia haree ho matan rasik, nee mak nia hatene katak buat nebee nia konta nee loos duni. Nia foo sasin atu imi mos bele fiar.
JOH 19:36 Buat nee akontese ba Jesus tuir saida mak hakerek nanis ona iha Livru Sagradu dehan, “Nia ruin ida mos ema la baku tohar.”
JOH 19:37 Iha Livru Sagradu mos hakerek dehan, “Sira sei hateke ba Ida nebee mak sira sona.”
JOH 19:38 Depois José husi sidade Arimateia baa husu lisensa ba Pilatus atu hasai Jesus nia mate isin. José nee Jesus nia eskolante ida, maibee nia sub-subar deit tanba nia tauk nai ulun Judeu sira. Pilatus foo lisensa, nunee José baa hasai Jesus nia mate isin.
JOH 19:39 Nicodemos, ida nebee uluk mai hasoru Jesus iha kalan, nia mos baa hamutuk ho José. Nia lori ai morin ho mina morin diak nian hamutuk maizoumenus kilu tolu-nulu.
JOH 19:40 Ema nain rua nee lori Jesus nia mate isin, depois falun ho hena mutin diak nian hamutuk ho ai morin ho mina morin nee. Ida nee tuir ema Judeu sira nia kultura hakoi mate.
JOH 19:41 Iha fatin nebee ema prega Jesus, iha toos ida. Iha toos laran nee iha rate foun ida mak seidauk uza hodi hakoi mate.
JOH 19:42 Tempu badak ona tanba atu tama ona ba loron Sabadu, ema Judeu nia loron deskansa. Nunee sira nain rua haloot Jesus nia mate isin iha rate nee, tanba besik hela.
JOH 20:1 Iha loron Domingu, dadeer-saan nakukun, Maria Madalena baa iha rate. Too iha nebaa, nia haree fatuk ida hodi taka rate nee muda sees tiha ona.
JOH 20:2 Nunee nia halai baa foo hatene Simão Pedro ho eskolante ida nebee Jesus hadomi liu nee. Nia dehan, “Ema foti tiha ona ita nia Nai nia mate isin husi rate, sira tau iha nebee ami la hatene.”
JOH 20:3 Nunee Pedro ho eskolante ida seluk nee baa iha rate.
JOH 20:4 Sira nain rua halai, maibee eskolante ida seluk nee halai makaas liu i nia mak too uluk iha rate.
JOH 20:5 Nia hakruuk hateke tama ba rate laran, nia haree hetan hena mutin nebee uza hodi falun mate isin, maibee nia la tama liu ba laran.
JOH 20:6 Simão Pedro too ikus, i nia tama kedas ba rate laran. Nia haree hena mutin nee iha nebaa.
JOH 20:7 Nia mos haree hena nebee mak ema bobar ba Jesus nia ulun, hena nee hikar tiha ona, la tau hamutuk ho hena seluk.
JOH 20:8 Depois eskolante ida nebee too uluk nee mos tama ba laran. Nia haree i fiar.
JOH 20:9 Iha tempu nebaa sira nain rua seidauk kompriende buat nebee hakerek nanis ona iha Livru Sagradu dehan Jesus tenki moris fali husi mate.
JOH 20:10 Depois eskolante nain rua nee fila ba uma.
JOH 20:11 Maibee Maria sei hamriik tanis hela iha rate oin. Tanis dadauk, nia hakruuk hodi hateke ba rate laran.
JOH 20:12 Nia haree anju rua hatais hena mutin. Sira tuur iha fatin nebee foin dadauk Jesus nia mate isin latan ba nee. Ida tuur iha ulun, ida seluk tuur iha ain.
JOH 20:13 Sira husu ba Maria, “Senhora, tansaa mak ita tanis?” Nia hataan, “Ema hasai tiha ona hau nia Nai nia mate isin, sira tau iha nebee hau la hatene.”
JOH 20:14 Koalia hotu tiha Maria hateke ba kotuk, nia haree Jesus hamriik hela iha nebaa, maibee nia la hatene katak nee Jesus.
JOH 20:15 Jesus husu nia dehan, “Senhora, tansaa mak ita tanis? Ita buka see?” Maria la konhese Jesus, nia hanoin toos nain mak koalia ho nia. Entaun nia husu fali dehan, “Senhor, se karik ita boot mak lori Nia baa tau fali iha fatin seluk, foo hatene mai hau, ita boot tau Nia iha nebee, atu hau bele baa foti Nia.”
JOH 20:16 Jesus hatete ba nia, “Maria!” Maria fila oin hodi hateke ba Jesus dehan, “Raboni”, iha lian Ebreu dehan “Mestri.”
JOH 20:17 Jesus dehan, “La bele kaer Hau, tanba Hau seidauk sae fali ba iha Hau nia Aman. Maibee baa foo hatene ba Hau nia maun-alin sira katak agora Hau atu sae fali ona ba iha Hau nia Aman, Nia mos imi nia Aman. Nia nee Hau nia Maromak ho mos imi nia Maromak.”
JOH 20:18 Nunee Maria Madalena baa foo hatene Jesus nia eskolante sira dehan, “Ohin hau haree ita nia Nai!” Depois nia foo hatene Jesus nia lia menon ba sira.
JOH 20:19 Iha Domingu kalan, Jesus nia eskolante sira halibur hamutuk, sira xavi odamatan metin tanba tauk nai ulun Judeu sira. Derepenti deit Jesus mai hamriik iha sira nia klaran hodi kumprimenta sira dehan, “Maromak foo pas ba imi!”
JOH 20:20 Koalia tiha nunee, Jesus mos hatudu Nia liman kanek ho sorin kanek ba sira. Bainhira sira haree sira nia Nai, sira kontenti teb-tebes.
JOH 20:21 Depois Jesus hatete ba sira dala ida tan, “Maromak foo pas ba imi. Hanesan Hau nia Aman haruka Hau mai, nunee mos Hau haruka imi baa.”
JOH 20:22 Depois Nia huu Nia iis ba sira hodi dehan, “Simu Espiritu Santu ba.
JOH 20:23 Se imi foo perdaun ba ema ruma nia sala, Maromak mos foo perdaun ba nia. Se imi la foo perdaun ba nia sala, Maromak mos la foo perdaun ba nia.”
JOH 20:24 Husi Jesus nia eskolante nain sanulu resin rua, iha ida naran Tomé, baibain ema bolu Kaduak. Bainhira Jesus hatudu Aan ba Nia eskolante sira, Tomé nee la iha.
JOH 20:25 Nunee eskolante sira seluk dehan ba nia, “Ami haree tiha ona ita nia Nai!” Maibee Tomé hatete ba sira dehan, “Hau haree lai pregu fatin iha Nia liman hodi hatama hau nia liman fuan ba, i hau hatama lai hau nia liman ba iha Nia sorin kanek. Nee mak foin hau fiar!”
JOH 20:26 Liu tiha semana ida, Jesus nia eskolante sira halibur malu fali iha uma, Tomé mos iha nebaa. Odamatan xavi metin hotu, maibee Jesus mai hamriik iha sira nia klaran hodi kumprimenta sira dehan, “Maromak foo pas ba imi!”
JOH 20:27 Depois Jesus hatete ba Tomé, “Haree Hau nia liman, i hatama o nia liman fuan ba! Lolo o nia liman mai hodi hatama iha Hau nia sorin kanek nee. Keta duvida tan maibee fiar ba!”
JOH 20:28 Tomé dehan ba Jesus, “Hau nia Nai. Hau nia Maromak!”
JOH 20:29 Depois Jesus hatete ba Tomé, “O fiar tanba o haree tiha ona Hau. Maibee ema nebee fiar maski nia la haree Hau, nia hetan bensaun boot liu tan.”
JOH 20:30 Jesus halo milagre barak tan iha Nia eskolante sira nia oin hodi hatudu Maromak nia kbiit. Milagre sira nee la hakerek hotu iha livru nee.
JOH 20:31 Maibee buat sira nee hakerek atu imi bele fiar katak Jesus mak Mesias, Maromak nia Oan. Liu husi imi nia fiar ba Nia mak imi hetan moris rohan-laek.
JOH 21:1 Iha loron ida Jesus hatudu Aan ba Nia eskolante sira dala ida tan, iha tasi Tiberiades. Istoria nee hanesan nee:
JOH 21:2 Iha tempu nee Jesus nia eskolante balu hamutuk iha fatin ida. Sira nee mak Simão Pedro, Tomé ema baibain bolu Kaduak, Natanael husi aldeia Kaná provinsia Galileia, Zebedeu nia oan nain rua ho mos eskolante nain rua tan.
JOH 21:3 Iha momentu nebaa Simão Pedro dehan, “Hau atu baa tasi hodi tiha ikan.” Eskolante sira seluk hataan, “Ami baa hotu.” Entaun sira baa sae roo, maibee tiha ikan kalan tomak, la hetan buat ida.
JOH 21:4 Iha dadeer-saan rai huun mutin, Jesus hamriik iha tasi ibun, maibee eskolante sira nee la konhese katak Nia nee Jesus.
JOH 21:5 Jesus bolu sira hodi husu, “Belun sira, imi hetan ikan ruma ka lae?” Sira hataan, “Ami la hetan buat ida.”
JOH 21:6 Entaun Nia hatete ba sira, “Soe imi nia redi baa iha roo nia sorin loos mak imi sei hetan.” Bainhira sira soe redi, sira atu dada fali redi nee ba iha roo, dada la bele, tanba iha ikan barak teb-tebes.
JOH 21:7 Depois eskolante ida nebee Jesus hadomi liu nee hatete ba Pedro, “Ita nia Nai mak iha nebaa.” Bainhira Simão Pedro rona katak sira nia Nai mak iha nebaa, nia hatais fali nia faru, tanba ohin nia hasai nia faru atu bele servisu. Depois nia haksoit tuun ba bee laran hodi nani ba tasi ibun.
JOH 21:8 Eskolante sira seluk mak hean roo, dada tuir redi nebee nakonu ho ikan nee. Sira hean roo too iha tasi ibun laduun dook, maizoumenus metru atus ida.
JOH 21:9 Bainhira sira tuun husi roo, sira haree ahi lakan, ikan balu tunu hela iha ahi nee, iha mos paun.
JOH 21:10 Depois Jesus hatete ba sira, “Ikan nebee imi foin hetan nee, lori balu mai.”
JOH 21:11 Entaun Simão Pedro sae ba roo leten hodi dada redi nee ba tasi ibun. Redi nee nakonu ho ikan bo-boot, hamutuk atus ida lima-nulu resin tolu. Maski ikan barak hanesan nee, maibee redi la naklees.
JOH 21:12 Jesus hatete ba sira, “Mai haan ona.” Eskolante sira la iha ida mak brani husu tuir Nia nee see. Sira hatene katak Nia nee sira nia Nai.
JOH 21:13 Depois Jesus baa foti paun hodi foo ba sira, ikan mos Nia halo nunee.
JOH 21:14 Durante Jesus moris fali husi mate, ida nee mak dala tolu ona Nia hatudu Aan ba Nia eskolante sira.
JOH 21:15 Bainhira sira haan hotu tiha, Jesus husu ba Simão Pedro dehan, “Simão, João nia oan, o hadomi Hau liu fali sira hotu ka?” Pedro hataan, “Loos Nai, Ita Boot hatene hau hadomi Ita Boot.” Jesus dehan, “Entaun hein Hau nia bibi oan sira.”
JOH 21:16 Dala ida tan Jesus husu ba nia, “Simão, João nia oan, o hadomi Hau ka?” Nia hataan, “Loos Nai, Ita Boot hatene hau hadomi Ita Boot.” Jesus dehan tan, “Entaun tau matan ba Hau nia bibi sira.”
JOH 21:17 Jesus husu ba dala tolu dehan, “Simão, João nia oan, o hadomi Hau ka?” Pedro laran susar tanba Jesus husu nia dala tolu kedas dehan, “O hadomi Hau ka?” Nunee nia dehan, “Nai, Ita Boot hatene buat hotu, Ita Boot hatene katak hau hadomi Ita Boot.” Jesus hatete ba nia, “Entaun hein Hau nia bibi sira.
JOH 21:18 Hau hatete lo-loos ba o, uluk o sei joven, o kesi o nia kanotak hodi lao tuir o nia hakarak rasik. Maibee aban-bainrua o katuas ona, o sei lolo o nia liman atu ema seluk kesi i lori o ba iha fatin nebee mak o lakohi atu baa.”
JOH 21:19 Jesus nia liafuan nee foo sai oinsaa mak Pedro atu mate hodi hatudu sai Maromak nia kbiit boot. Hotu tiha Jesus hatete ba Pedro, “Mai tuir Hau!”
JOH 21:20 Pedro hateke ba kotuk, nia haree eskolante ida nebee Jesus hadomi liu lao tuir sira. Eskolante nee mak uluk tuur sadere ba Jesus bainhira haan kalan hamutuk, nia mak husu ba Jesus dehan, “Nai, see mak atu faan Ita Boot?”
JOH 21:21 Bainhira Pedro haree eskolante nee, nia husu ba Jesus, “Nai, oinsaa kona ba nia?”
JOH 21:22 Jesus hataan, “Se karik Hau hakarak nia moris nafatin too Hau fila fali mai, o la presiza hatene. O tenki tuir Hau.”
JOH 21:23 Tanba Jesus koalia nunee mak ema nebee fiar ba Nia komesa konta ba malu katak eskolante ida nee sei la mate. Afinal Jesus laos dehan eskolante nee aban-bainrua la mate. Maibee Nia dehan, “Se karik Hau hakarak nia moris nafatin too Hau fila fali mai, o la presiza hatene.”
JOH 21:24 Eskolante ida nee mak foo sasin kona ba akontesimentu sira nee. Nia mak hakerek buat sira nee, i ita hatene katak buat nebee nia foo sai nee loos hotu.
JOH 21:25 Sei iha buat barak tan mak Jesus halo. Se karik hakerek buat sira nee hotu, hau hanoin fatin iha mundu nee la too atu rai livru sira nee.
ACT 1:1 Senhor Teófilo mak hau respeita. Iha hau nia livru ida uluk, hau hakerek kona ba buat hotu-hotu nebee Jesus halo, ho buat hotu-hotu nebee Nia hanorin,
ACT 1:2 too loron nebee mak Nia sae fali ba lalehan. Jesus hetan terus too mate tiha, depois Nia moris fila fali hodi hatudu Nia Aan ba Nia apostolu sira fila-fila durante loron haat-nulu. Nunee Nia hatudu katak Nia moris fali duni husi mate. Nia mos koalia ho sira kona ba Maromak ukun nudar Liurai. Molok Nia sae ba lalehan, Nia foo tan lia menon hodi kbiit Espiritu Santu nian ba Nia apostolu sira nebee Nia hili tiha ona.
ACT 1:4 Iha loron ida, Jesus hamutuk ho Nia apostolu sira, Nia foo orden ba sira dehan, “Keta husik lai Jerusalém. Maibee hein iha nee too Hau nia Aman foo Espiritu Santu ba imi, tuir Nia promete ona, i tuir imi mos rona ona husi Hau.
ACT 1:5 Uluk João foo sarani ema hodi bee, maibee la kleur tan, Maromak sei foo sarani imi hodi Espiritu Santu.”
ACT 1:6 Dala ida Jesus hasoru malu ho Nia apostolu sira, sira husu, “Nai, agora Ita Boot atu hasai Israel husi okupasaun Roma hodi halo ita ukun aan fali ka seidauk?”
ACT 1:7 Jesus hataan, “Kona ba tempu ho loron nee, so Hau nia Aman mak iha direitu hodi desidi, imi lalika buka hatene.
ACT 1:8 Maibee bainhira Espiritu Santu tuun iha imi, Nia sei foo kbiit ba imi. Depois mak imi baa foo sasin kona ba Hau iha sidade Jerusalém, iha provinsia Judeia ho Samaria tomak, too mundu tomak.”
ACT 1:9 Jesus koalia tiha hotu, Maromak halo Nia sae ba lalehan iha apostolu sira nia oin. Depois kalohan taka tiha Nia, i sira la haree tan Nia ona.
ACT 1:10 Sira sei hateke nafatin ba lalehan, derepenti ema nain rua hatais hena mutin hamriik iha sira nia sorin
ACT 1:11 hodi dehan, “Galileia oan sira, nusaa mak imi hateke nafatin ba lalehan? Ohin imi haree Jesus sae ba lalehan. Nia sae oinsaa, aban-bainrua Nia fila fali mai husi lalehan mos hanesan nee.”
ACT 1:12 Depois apostolu sira tuun husi foho Oliveira hodi fila fali ba sidade Jerusalém, lao maizoumenus kilometru ida.
ACT 1:13 Too iha sidade, sira baa tama iha uma ida hodi sae liu ba andar leten, fatin nee mak durante nee sira hela. Apostolu sira nia naran mak tuir mai nee: Pedro ho João, Tiago ho André, Filipe ho Tomé, Bartolomeu ho Mateus, Tiago (Alfeu nia oan) ho Simão (nia ema Patriota), ho mos Judas (Tiago nia oan).
ACT 1:14 Apostolu sira nee halibur malu beibeik hodi halo orasaun ho neon ida laran ida, hamutuk ho Jesus nia inan Maria, ho feto balu tan, ho mos Jesus nia alin sira.
ACT 1:15 Iha loron ida, sarani sira maizoumenus atus ida rua-nulu halibur hamutuk. Pedro hamriik iha sira nia klaran
ACT 1:16 hodi hatete, “Maun-alin sira, uluk kedas Espiritu Santu foo hatene liu husi liurai David kona ba Judas, i Nia liafuan hakerek iha Livru Sagradu. Buat nebee Nia foo sai nee tenki akontese duni. Judas mak lori ema baa kaer Jesus.
ACT 1:17 Afinal nia nee ita nia ema ida, i nia mos servisu hamutuk ho ita.”
ACT 1:18 Bainhira Judas faan Jesus, nia uza osan nebee nia hetan husi nia hahalok aat nee hodi sosa rai pedasuk ida. Iha fatin nee nia monu riba ba rai too nia kabun nakfera, i nia tee oan fakar sai tiha.
ACT 1:19 Ema hotu iha sidade Jerusalém rona kona ba nia mate. Tanba nee mak sira bolu fatin nee hodi sira nia lian dehan Akeldama, nee katak “rai raan nian”.
ACT 1:20 Pedro hatutan tan, “Iha livru Salmus hakerek nanis ona kona ba Judas dehan, ‘Nia hela fatin sei sai fuik; la iha ema ida hela tan iha nebaa.’ I hakerek mos dehan, ‘Nia knaar nee sei foo ba ema seluk.’
ACT 1:21 Nee duni ita tenki hili fali ema seluk hodi troka Judas. Ita tenki hili ema ida nebee sempre hamutuk ho ita hodi akompanha Nai Jesus ba nebee-nebee
ACT 1:22 komesa husi João foo sarani Nia too Nia sae ba lalehan. Ema nee sei hamutuk ho ita hodi foo sasin kona ba Jesus moris fali husi mate.”
ACT 1:23 Pedro koalia hotu tiha, sarani sira hatudu ema nain rua. Ida naran José, baibain ema bolu Barsabás, nia naran ida tan mak Justo. Ema ida seluk naran Matias.
ACT 1:24 Tuir mai sira halo orasaun hamutuk nunee: “Nai Maromak, Ita Boot hatene ema hotu-hotu nia laran. Nee duni, hatudu mai ami husi ema nain rua nee, Ita Boot hili ida nebee
ACT 1:25 hodi troka Judas, para halao knaar nudar Jesus nia apostolu. Tanba Judas mate tiha ona husik nia knaar hodi baa iha fatin nebee mak nia merese atu hela.”
ACT 1:26 Harohan hotu tiha, sira dada rifa, i rifa monu kona Matias. Nunee sira foti nia sai apostolu hamutuk ho sira nain sanulu resin ida.
ACT 2:1 Too iha Loron Pentakosta, sarani sira halibur hamutuk iha uma ida. Derepenti sira rona lian ida husi lalehan hanesan anin boot. Lian nee makaas teb-tebes, too sira hotu iha fatin nee la rona tan ema seluk nia lian.
ACT 2:3 I sira haree buat ida hanesan nanaal, hanesan ahi lakan namkari tuun ba sira ida-idak nia ulun leten.
ACT 2:4 Espiritu Santu domina sira hotu, i sira komesa koalia lian oi-oin nebee sira nunka aprende, tuir Espiritu Santu foo ba sira.
ACT 2:5 Iha tempu nee, iha ema Judeu barak nebee hamtauk Maromak, sira mai hamutuk ona iha Jerusalém husi nasaun hotu-hotu.
ACT 2:6 Bainhira sira rona lian nee, ema barak halai mai halibur hamutuk. Sira bilaan tiha tanba sira ida-idak rona sira nia lian rasik husi sarani sira nia ibun.
ACT 2:7 Nee mak sira hotu admira hodi dehan ba malu, “Sira nebee koalia nee mesak ema Galileia!
ACT 2:8 Oinsaa mak ita bele rona sira koalia ho ita ida-idak nia lian rasik?
ACT 2:9 Ita mai husi rai Pártia, Média ho Elam, husi Mezopotámia, Judeia ho Kapadósia, husi Pontu ho Ázia,
ACT 2:10 husi Frígia ho Panfília, husi Ejitu, ho mos husi parte Líbia nebee besik sidade Sirene. Ita balu mai husi sidade Roma.
ACT 2:11 Ita nebee husi Roma nee, balu ema Judeu, i balu laos ema Judeu maibee tama ona iha relijiaun Judeu. Iha tan ema balu mai husi ilha Kreta, i balu mai husi rai Arabi. Maibee ita hotu bele rona ema sira nee koalia fali ho ita nia lian kona ba milagre nebee Maromak halo ona.”
ACT 2:12 Sira hotu admira teb-tebes i bilaan tiha hodi husu ba malu dehan, “Saida mak nee?”
ACT 2:13 Maibee ema seluk goza fali sarani sira dehan, “Sira tua lanu.”
ACT 2:14 Depois Pedro hamriik ho nia maluk apostolu sanulu resin ida. I nia koalia ho lian makaas ba ema barak nee dehan, “Maluk Judeu sira ho imi hotu nebee mak hela iha sidade Jerusalém nee. See tilun mai hodi rona di-diak buat nebee mak hau atu hatoo.
ACT 2:15 Imi hanoin ami nee tua lanu. Laos nunee! Agora foin tuku sia dadeer!
ACT 2:16 Buat nebee imi haree nee hanesan Maromak nia profeta Joel hakerek nanis ona dehan,
ACT 2:17 ‘Maromak hatete, “Molok mundu atu remata, Hau sei haruka Hau nia Espiritu tuun ba iha ema hotu-hotu. Imi nia oan mane sira ho oan feto sira sei foo tutan Hau nia lia menon. Imi nia joven sira sei haree buat nebee mak Hau hatudu ba sira. I imi nia ferik-katuas sira sei mehi buat nebee mak Hau foo ba sira.
ACT 2:18 Hau sei haruka Hau nia Espiritu tuun ba iha Hau nia atan mane ho atan feto sira, i sira sei foo tutan Hau nia lia menon.
ACT 2:19 Hau sei halo sinal oi-oin iha lalehan nebee halo ema admira, i sei halo sinal oi-oin iha mundu, hanesan raan, ahi ho ahi suar makaas.
ACT 2:20 Loro matan sei sai nakukun, fulan sei sai mean hanesan raan. Hotu tiha mak foin Nai Maromak nia loron nee too. Iha loron furak ida nee Nai Maromak sei hatudu sai Nia kbiit boot.
ACT 2:21 I see mak husu tulun ba Nai, sei hetan salvasaun.”’ ”
ACT 2:22 Pedro hatutan tan dehan, “Israel oan sira, see tilun mai. Maromak halo milagre ho sinal oi-oin iha imi nia leet liu husi Jesus, Ema Nazaré. Imi rasik hatene buat nee. Maromak halo nunee atu imi hatene katak, Nia rasik mak haruka Jesus mai.
ACT 2:23 Tuir Maromak nia planu nebee Nia desidi tiha ona hori uluk kedas, ema entrega Jesus ba imi. I imi entrega tutan ba ema aat atu prega Nia iha krus, nunee imi oho Nia.
ACT 2:24 Maibee Maromak halo Nia moris fila fali husi mate, i hasai Nia husi terus mate nian. Tanba mate la iha kbiit atu kaer metin Nia.
ACT 2:25 Hori uluk liurai David foo sai kona ba Jesus nunee: ‘Hau haree Nai Maromak sempre iha Hau nia oin. Nia sempre iha Hau nia sorin, nunee la iha buat ida mak bele halo Hau nakdoko.
ACT 2:26 Nee mak Hau nia laran haksolok, i Hau nia ibun hahii beibeik Nia. Hau hakmatek tanba laran metin ba Nia.
ACT 2:27 Tanba Nai Maromak la husik Hau iha ema mate sira nia fatin, Nia la husik Nia Ema Santu nia isin dodok iha rate laran.
ACT 2:28 Nai Maromak hatudu ona dalan moris mai Hau. Nia halo Hau nia laran haksolok teb-tebes iha Nia oin.’
ACT 2:29 Maun-alin sira, ita nia bei-ala David koalia nee, la hatudu ba nia aan. Tanba nia mate tiha ona, ema hakoi, i nia rate sei iha hela ita nia leet too ohin loron.
ACT 2:30 Maibee David nee Maromak nia profeta ida, i nia hatene katak Maromak jura ona ba nia atu halo nia jerasaun ida sai liurai.
ACT 2:31 David haree ba aban-bainrua. Nia foo hatene antes kedas dehan, Mesias, Salvador nebee Maromak atu haruka mai, sei moris fila fali husi mate. Maromak sei la husik hela Mesias iha ema mate sira nia fatin, i Nia mate isin sei la dodok iha rate laran.
ACT 2:32 Agora Maromak halo Jesus moris fali ona husi mate. Ami sira nee hotu haree ho ami nia matan rasik.
ACT 2:33 Maromak foti aas tiha ona Jesus hodi tuur iha Nia sorin loos. I Jesus simu Espiritu Santu husi Nia Aman, depois Nia haruka tuun mai ami, tuir Maromak promete ona hori uluk. Saida mak imi rona ho haree agora nee, Maromak nia Espiritu.
ACT 2:34 David rasik la sae ba lalehan, maibee nia hakerek kona ba Jesus dehan, ‘Nai Maromak hatete ba hau nia Nai dehan, “Mai tuur iha Hau nia sorin loos,
ACT 2:35 too Hau halo O nia inimigu sira taka rabat iha O nia ain okos. ” ’
ACT 2:36 Nunee imi ema Israel hotu-hotu tenki hatene katak, Jesus ida nebee imi prega iha krus too mate nee mak Mesias, Salvador nebee Maromak haruka mai. Maromak mos foti tiha ona Nia sai ita nia Nai.”
ACT 2:37 Rona nunee, ema sira nee laran susar hodi husu ba Pedro ho apostolu sira seluk dehan, “Maun sira, ami tenki halo saida?”
ACT 2:38 Pedro hataan, “Imi ida-idak tenki hakribi ona imi nia sala, i tenki simu batizmu hodi Jesus Kristu nia naran atu Maromak hamoos imi nia sala. Depois imi sei simu Espiritu Santu.
ACT 2:39 Tanba Maromak promete ona atu foo Nia Espiritu ba see-see deit mak Nia bolu atu tuir Nia. Promesa nee Nia foo ba imi ho imi nia jerasaun sira. Nia mos foo Nia promesa nee ba ema sira nebee hela iha rai dook.”
ACT 2:40 Pedro koalia liafuan barak tan hodi foo hanoin ba sira atu hakribi sira nia sala. Nia hatete fila-fila, “Agora dadauk ema barak lao sees husi dalan loos. Keta tuir sira nia dalan, atu imi bele hetan salvasaun.”
ACT 2:41 Ema nebee simu Pedro nia liafuan nee, sira simu batizmu. Iha loron nee, ema nebee fiar ba Jesus aumenta maizoumenus rihun tolu.
ACT 2:42 Sira badinas rona apostolu sira nia hanorin, i sira haree malu diak. Sira haan hamutuk, i halo orasaun hamutuk beibeik.
ACT 2:43 Iha tempu nee, apostolu sira halo milagre ho sinal barak, halo ema hotu-hotu admira hodi hamtauk Maromak.
ACT 2:44 Ema sira nebee fiar ba Jesus sempre moris neon ida laran ida. Sira senti, sasaan nebee mak sira iha, sira hotu nian.
ACT 2:45 Too balu faan sira nia riku-soin, i osan nee sira fahe ba sarani sira nebee presiza.
ACT 2:46 Loro-loron sira halibur hamutuk iha uma kreda boot Judeu nian. Sira sempre haan hamutuk husi uma ba uma ho laran luak ho haksolok.
ACT 2:47 Sira hahii Maromak beibeik, i ema seluk gosta sira. Sarani sira aumenta ba beibeik tanba loro-loron Nai Jesus salva ema foun.
ACT 3:1 Iha loron ida, Pedro ho João baa iha uma kreda boot iha tuku tolu lokraik, ema Judeu sira nia tempu halo orasaun.
ACT 3:2 Too iha uma kreda nia portaun ida naran Portaun Kapaas, iha ema balu hulan hela mane ida ain aat, nia lao la diak komesa nia moris. Loro-loron sira hulan nia mai atu husu ezmola ba ema nebee mak tama ba iha uma kreda.
ACT 3:3 Bainhira nia haree Pedro ho João atu tama ba laran, nia husu osan ba sira.
ACT 3:4 Sira nain rua fihir nia, i Pedro hatete, “Hateke mai ami!”
ACT 3:5 Ema nee hateke ba sira ho laran metin atu simu buat ruma.
ACT 3:6 Maibee Pedro hatete, “Hau la iha osan doit ida atu foo ba o. Maibee saida mak hau iha, hau foo. Hodi Jesus Kristu Ema Nazaré nia naran, hau hatete ba o, hamriik i lao ona!”
ACT 3:7 Pedro kaer nia liman loos hodi ajuda nia hamriik, i nia ain forti kedas.
ACT 3:8 Nia hamriik lalais i komesa lao. Depois nia lao tuir sira nain rua tama ba area uma kreda boot nian hodi haksoit-haksoit ho hahii Maromak.
ACT 3:9 Ema hotu-hotu haree nia lao ho hahii Maromak,
ACT 3:10 i sira konhese katak nia sempre tuur iha Portaun Kapaas hodi husu ezmola. Sira admira teb-tebes i sai bilaan tiha tanba buat nebee mak akontese ba nia.
ACT 3:11 Ema ida nebee foin hetan kura nee lao tuir Pedro ho João too iha Varanda Salomão. Nia kaer metin hela sira, i ema barak admira hodi halai mai hobur sira.
ACT 3:12 Haree nunee, Pedro hatete, “Israel oan sira, tanba saa mak imi admira nunee? Nusaa mak imi hateke beibeik mai ami? Imi hanoin ami nia kbiit rasik mak halo ema nee lao ka? Imi hanoin ami moris tuir Maromak nia hakarak mak bele kura nia ain ka?
ACT 3:13 Laos nunee! Maromak mak kura nia. Maromak nee mak Abraão, Isac, Jacó, ho ita nia bei-ala sira seluk adora, i Nia foti aas tiha ona Nia Atan Jesus. Jesus nee uluk imi entrega tiha ba governador Pilatus atu oho. Afinal governador desidi ona atu hasai Nia, maibee imi lakohi.
ACT 3:14 Imi lakohi simu Ida nebee santu i moris loos. Imi husu ba Pilatus atu hasai fali ema oho door ida husi kadeia ba imi.
ACT 3:15 Imi oho tiha Ida nebee moris nia huun. Maibee Maromak halo Nia moris fali husi mate. Ami haree rasik ho matan.
ACT 3:16 Fiar ba Jesus mak halo ema ain aat nee sai forti. Imi haree rasik ona, i imi konhese hela nia. Liu husi fiar ba Jesus mak ema nee diak loos ona, hanesan agora dadauk imi haree.
ACT 3:17 Maun-alin sira, hau hatene katak bainhira imi ho imi nia nai ulun sira halo aat Jesus, imi la hatene saida mak imi halo.
ACT 3:18 Maibee ho nunee Maromak halo tuir Nia liafuan nebee Nia foo sai uluk liu husi profeta sira dehan, Mesias, Salvador nebee Maromak atu haruka mai nee, tenki hetan terus.
ACT 3:19 Nee duni imi tenki hakribi ona imi nia sala hodi fila ba Maromak, atu Nia bele hamoos imi nia sala hotu.
ACT 3:20 Depois Nai Maromak sei halo imi nia laran hakmatek. I Nia sei haruka Mesias mai dala ida tan iha imi. Mesias nee Maromak hili nanis ona, i Nia nee mak Jesus.
ACT 3:21 Jesus tenki hela iha lalehan too tempu nebee Maromak halo buat hotu-hotu sai foun, tuir Nia promete tiha ona liu husi Nia profeta sira.
ACT 3:22 Uluk Moisés koalia kona ba Jesus dehan, ‘Maromak imi nia Nai sei foti Ema ida husi imi nia klaran para sai Nia Profeta, hanesan hau. Imi tenki rona buat hotu nebee mak Nia foo sai ba imi.
ACT 3:23 See mak lakohi rona Profeta nee, Maromak sei fila kotuk ba nia, i haketak nia husi Maromak nia povu.’
ACT 3:24 Profeta sira nebee foo tutan Maromak nia lia menon, komesa husi Samuel too profeta sira nebee tuir mai, sira hotu foo sai kona ba tempu agora nee.
ACT 3:25 Lia menon nebee Maromak foo liu husi profeta sira tuun hotu ba imi. I promesa nebee Maromak foo ba ita nia bei-ala sira mos tuun hotu ba imi. Maromak promete ba Abraão dehan, ‘Liu husi o nia jerasaun, Hau sei foo bensaun ba ema hotu-hotu iha mundu.’
ACT 3:26 Bainhira Maromak haruka Nia Atan Jesus mai, Maromak haruka uluk Nia ba iha imi, atu Nia tulun imi ida-ida hakribi imi nia hahalok aat, ho nunee Nia foo bensaun ba imi.”
ACT 4:1 Bainhira Pedro ho João sei koalia hela ho ema sira nee, nai lulik relijiaun Judeu sira, xefi seguransa uma kreda boot, ho mos ema husi grupu Saduseu too mai.
ACT 4:2 Sira hirus tanba Pedro ho João sempre hanorin povu hodi foo sai katak Jesus moris fali ona husi mate, i nunee Nia loke dalan ba ema mate sira mos bele moris fali.
ACT 4:3 Entaun sira kaer apostolu nain rua nee. Maibee tanba kalan ona, entaun sira hatama ba iha kadeia para aban bele tesi lia.
ACT 4:4 Maibee ema sira nebee rona apostolu sira nia hanorin, barak fiar ba Jesus. Nunee sarani sira aumenta barak, too maizoumenus ema rihun lima. Nee mane deit, feto ho labarik seidauk sura.
ACT 4:5 Iha aban fali, justisa nain relijiaun Judeu sira halibur hamutuk iha Jerusalém. Sira nee mak nai ulun relijiaun sira, katuas lia nain sira ho mestri relijiaun Judeu sira.
ACT 4:6 Nai lulik boot Anás mos iha. Nunee mos Kaifás, João, Alexandre ho nai lulik boot nia familia balu tan.
ACT 4:7 Bainhira sira hotu hamutuk ona, sira foo orden para lori Pedro ho João mai aprezenta ba sira. Kuandu apostolu nain rua nee too mai, ulun boot sira husu, “Imi uza see nia kbiit ho see nia naran hodi kura ema ain aat nee?”
ACT 4:8 Depois Espiritu Santu domina Pedro, i Pedro hataan ba sira dehan, “Nai ulun sira ho katuas lia nain nasaun Israel nian.
ACT 4:9 Senhor sira atu investiga ami tanba deit ami ajuda ema ain aat ida. Senhor sira husu ami, oinsaa mak ema nee bele hetan kura.
ACT 4:10 Hau hakarak foo hatene ba senhor sira ho povu Israel tomak katak, ema nee agora bele hamriik iha ita boot sira nia oin tanba hetan kura hodi Jesus Kristu Ema Nazaré nia naran. Ita boot sira prega tiha Nia iha krus too mate. Maibee Maromak halo moris fali Nia husi mate.
ACT 4:11 Iha Livru Sagradu kompara Jesus ho fatuk ida hanesan nee: ‘Iha fatuk ida nebee imi badaen sira lakohi uza, maibee agora fatuk nee mak sai fali fatuk nebee prinsipal.’
ACT 4:12 So Jesus mak bele salva ita, ema seluk la bele. Iha mundu tomak, la iha dalan seluk mak Maromak foo ba ita ema hodi hetan salvasaun.”
ACT 4:13 Justisa nain relijiaun sira haree Pedro ho João nee brani, i sira hatene katak apostolu nain rua nee ema baibain deit, laos ema eskola boot. Nunee sira admira, i sira hanoin hetan katak, apostolu sira nee uluk hamutuk ho Jesus.
ACT 4:14 Maibee sira la bele koalia buat ida hasoru Pedro ho João, tanba ema nebee hetan kura nee hamriik hela iha sira nia oin.
ACT 4:15 Entaun sira haruka apostolu nain rua nee sai ba liur atu justisa nain sira bele diskuti hamutuk.
ACT 4:16 Sira husu ba malu, “Ita atu halo saida ba ema nain rua nee? Tanba ema hotu-hotu iha Jerusalém hatene ona katak sira mak halo milagre boot nee. Ita la bele nega.
ACT 4:17 Ita lakohi atu povu barak liu tan rona kona ba milagre nee. Nunee diak liu ita bandu sira nain rua atu la bele koalia ba see-see deit hodi Jesus nia naran.”
ACT 4:18 Depois sira haruka bolu apostolu nain rua nee tama fali ba laran hodi bandu sira atu la bele koalia ka hanorin ba see-see deit hodi Jesus nia naran.
ACT 4:19 Maibee Pedro ho João hataan, “Senhor sira tetu rasik ba. Iha Maromak nia oin, ida nebee mak loos? Halo tuir ita boot sira nia hakarak ka halo tuir Maromak nia hakarak?
ACT 4:20 Buat nebee mak ami rasik haree ho matan, i rona ho tilun, ami tenki foo sai nafatin!”
ACT 4:21 Justisa nain sira ameasa tan apostolu nain rua nee, depois husik sira sai. Sira la hatene atu kastigu oinsaa, tanba povu hotu hahii hela Maromak ba milagre
ACT 4:22 nebee mak Nia halo ba ema ain aat nee. Tanba ema nee tinan haat-nulu resin ona mak foin hetan kura.
ACT 4:23 Bainhira justisa nain sira husik tiha Pedro ho João, sira nain rua nee fila ba sira nia maluk sira. Too iha nebaa sira konta buat hotu-hotu nebee mak nai lulik nia ulun sira ho katuas lia nain sira hatete ona ba sira.
ACT 4:24 Rona tiha hotu, sarani sira neon ida laran ida halo orasaun hamutuk nunee: “Nai Maromak Kbiit Nain, Ita Boot mak halo lalehan ho rai, ho tasi ho buat hotu-hotu iha laran.
ACT 4:25 Uluk Espiritu Santu foo sai Ita Boot nia liafuan ba Ita Boot nia atan ami nia bei-ala David. Ita Boot koalia nunee kona ba ema nebee kontra Jesus: ‘Nusaa mak nasaun sira hirus? Povu sira tau lia ba malu atu manaan saida?
ACT 4:26 Liurai sira iha mundu hamriik hamutuk; nai ulun sira nee futu lia kontra Nai Maromak i hasoru Mesias, Liurai nebee Nia foti tiha ona.’
ACT 4:27 Liafuan nee sai realidade ona. Tanba iha sidade nee, liurai Herodes ho governador Pónsiu Pilatus kombina malu ho ema jentiu sira ho ema Israel hodi kontra Jesus. Afinal Nia nee Ita Boot nia Atan santu, Ita Boot mak haruka Nia mai.
ACT 4:28 Maibee buat sira nee hotu akontese tuir Ita nia planu nebee hori uluk kedas Ita Boot desidi tiha ona ho Ita Boot nia kbiit.
ACT 4:29 Nai Maromak, haree ba sira nia ameasa nee. Halo Ita Boot nia atan ami sira nee brani atu foo sai Ita Boot nia liafuan.
ACT 4:30 Foo kbiit mai ami liu husi Ita Boot nia Atan Jesus nia naran, atu ami bele kura ema moras i halo milagre ho sinal oi-oin.”
ACT 4:31 Sira halo orasaun hotu tiha, uma nee nakdoko. Espiritu Santu domina sira hotu, i sira foo sai Maromak nia liafuan ho brani.
ACT 4:32 Iha tempu nebaa ema hotu nebee fiar ba Jesus, sira moris neon ida laran ida. La iha ema ida mak dehan sasaan nebee nia iha, ninian mesak. Sasaan saida mak nia iha, hotu-hotu uza.
ACT 4:33 Apostolu sira hetan kbiit boot hodi foo sasin kona ba Nai Jesus moris fali husi mate. I sarani sira hotu hetan bensaun husi Maromak.
ACT 4:34 Sira hotu la falta buat ida. Tanba sira balu faan sira nia rai ka uma, i osan nee sira lori baa
ACT 4:35 entrega ba apostolu sira hodi fahe ba ema nebee presiza.
ACT 4:36 Ezemplu ida mak José, ema Levi husi rai Xipre. Apostolu sira bolu nia Barnabé, nee dehan katak “konsolador”.
ACT 4:37 Nia faan nia rai pedasuk ida, i nia lori osan rai nian nee baa entrega ba apostolu sira.
ACT 5:1 Iha mos ema ida naran Ananias, nia kaben naran Safira. Loron ida, sira nain rua faan sira nia rai pedasuk ida.
ACT 5:2 Ananias lori osan rai nian nee balu baa entrega ba apostolu sira. Nia dehan nia entrega osan tomak, afinal nia rai tiha osan balu ba sira nia aan. Nia halo nunee, nia feen mos hatene hotu.
ACT 5:3 Pedro hatete, “Ananias, nusaa mak o husik Satanás domina o nia laran too o bosok fali Espiritu Santu? Nusaa mak o subar osan rai nian balu ba o nia aan rasik?
ACT 5:4 Rai nee o nian. O atu faan ka lae, konformi o. Se o faan mos, o atu foo nia osan hotu ka, balu deit, konformi o. Nusaa mak o hanoin atu halo nunee? O laos bosok ema, maibee o bosok Maromak!”
ACT 5:5 Rona Pedro koalia nunee, Ananias monu ba rai i mate kedas iha fatin. Ema nebee rona kona ba nia mate nee, sira tauk teb-tebes.
ACT 5:6 Depois mane klosan sira baa falun Ananias nia mate isin hodi hulan sai baa hakoi.
ACT 5:7 Liu tiha oras tolu nunee, Ananias nia kaben mos tama, maibee nia la hatene saida mak ohin akontese.
ACT 5:8 Pedro husu ba nia, “Hatete mai, imi nain rua faan rai nee, nia folin mak nee ka?” Nia hataan, “Loos, folin mak nee.”
ACT 5:9 Pedro dehan, “Nusaa mak imi nain rua kombina malu hodi koko Nai Maromak nia Espiritu? Haree ba! Sira nebee ohin lori o nia laen baa hakoi, agora iha hela odamatan. Sira mos sei hulan o.”
ACT 5:10 Iha momentu nee kedas, Safira monu ba rai i mate iha fatin. Mane klosan sira tama ba laran, haree nia mate tiha ona. Entaun sira hulan nia mate isin hodi baa hakoi iha nia laen nia sorin.
ACT 5:11 Sarani sira ho ema sira seluk nebee rona kona ba Ananias ho Safira nia mate nee, sira tauk teb-tebes.
ACT 5:12 Iha tempu nee, apostolu sira halo milagre ho sinal barak iha povu nia oin, halo povu admira. Sarani sira sempre halibur malu iha uma kreda boot, iha fatin ida naran Varanda Salomão.
ACT 5:13 Ema barak respeita sira. Maibee see mak seidauk fiar ba Jesus, la brani baa hamutuk ho sira.
ACT 5:14 Loron ba loron feto ho mane nebee fiar ba Nai Jesus aumenta ba beibeik.
ACT 5:15 Tanba milagre nebee apostolu sira halo, ema hulan ema moras sira hodi baa hatoba iha biti iha dalan ninin, atu Pedro liu husi nee karik, nia lalatak bele kona sira.
ACT 5:16 Ema barak nadodon mai husi aldeia sira besik sidade Jerusalém. Sira lori sira nia maluk nebee moras ho mos ema nebee terus tanba espiritu aat tama iha sira nia laran, i sira hotu hetan kura.
ACT 5:17 Iha tempu nee, nai lulik boot ho nia maluk sira husi partidu Saduseu laran moras teb-tebes apostolu sira.
ACT 5:18 Nunee sira baa kaer tiha apostolu sira hodi baa hatama iha kadeia.
ACT 5:19 Maibee iha kalan nee Nai Maromak nia anju ida baa loke odamatan kadeia nian hodi lori sira sai ba liur. Anju nee hatete,
ACT 5:20 “Imi baa hamriik iha area uma kreda boot hodi foo sai ba povu buat hotu-hotu kona ba moris foun.”
ACT 5:21 Apostolu sira mos halo tuir. Iha dadeer-saan deit sira baa iha area uma kreda boot hodi hanorin povu. Bainhira nai lulik boot ho nia maluk sira too mai, sira halibur fali justisa nain sira hotu, sira nee povu Israel nia nai ulun sira. Depois sira haruka ema seguransa baa hasai apostolu sira husi kadeia para bele tesi sira nia lia.
ACT 5:22 Maibee bainhira seguransa sira too iha kadeia, sira la hetan apostolu sira. Entaun sira fila baa foo hatene dehan,
ACT 5:23 “Ami too iha kadeia, ami haree odamatan kadeia nian xavi metin hela, seguransa sira mos hamriik hela iha odamatan oin. Maibee bainhira ami loke odamatan, ami haree ema ida la iha.”
ACT 5:24 Rona nunee, xefi seguransa uma kreda boot ho nai lulik nia ulun sira sai bilaan tiha, sira hanoin la hetan, saida mak atu mosu tan.
ACT 5:25 Depois iha ema ida mai foo hatene sira dehan, “Senhor sira rona mai! Ema sira nebee Ita Boot sira hatama iha kadeia nee agora hamriik hela iha area uma kreda boot hodi hanorin povu.”
ACT 5:26 Rona nunee, xefi seguransa uma kreda boot nian baa hamutuk ho nia elementu sira hodi kaer fali apostolu sira. Sira kaer ho di-diak deit, sira la kaer ho brutu tanba tauk povu bele tuda sira ho fatuk.
ACT 5:27 Sira lori apostolu sira baa aprezenta iha justisa nain sira nia oin. Depois nai lulik boot husu ba apostolu sira dehan,
ACT 5:28 “Ami bandu ona imi para la bele hanorin ema kona ba Jesus nee. Maibee imi kontra fali, imi baa hanorin iha sidade Jerusalém tomak. Imi mos duun dehan, ami mak halo Ema nee mate.”
ACT 5:29 Entaun Pedro ho apostolu sira seluk hataan, “Ami tenki halo tuir Maromak nia hakarak, laos ema nia hakarak.
ACT 5:30 Jesus nee, imi prega tiha iha krus too mate. Maibee Maromak ida nebee ita nia bei-ala sira adora nee, Nia mak halo moris fali Jesus husi mate.
ACT 5:31 Agora Maromak foti tiha ona Jesus tuur iha Nia sorin loos hodi ukun nudar Liurai ho Salvador. Nia halo nunee para tulun povu Israel hakribi sira nia sala i hetan perdaun husi Maromak.
ACT 5:32 Ami sai sasin ba buat sira nee. Maromak foo ona Espiritu Santu ba ema sira nebee halo tuir Nia hakarak, i Espiritu Santu nee mos foo sasin kona ba Jesus.”
ACT 5:33 Rona nunee, justisa nain sira hirus teb-tebes too sira hakarak oho apostolu sira.
ACT 5:34 Maibee iha justisa nain ida husi grupu Farizeu, naran Gamaliel. Nia mestri relijiaun, i ema hotu respeita nia. Nia hamriik i haruka ema lori apostolu sira sai lai ba liur.
ACT 5:35 Depois nia hatete ba nia maluk justisa nain sira nunee: “Maluk Israel sira, tetu di-diak saida mak imi atu halo ba ema sira nee.
ACT 5:36 Ita hatene, foin dadauk ema ida naran Teudas foti nia aan sai ema boot, i maizoumenus ema nain atus haat tuir nia. Too ikus ema oho tiha nia, depois nia ema sira halai namkari too lakon tiha deit.
ACT 5:37 Depois too tempu governu Roma haruka halo sensus, iha ema ida naran Judas husi provinsia Galileia, nia hamriik hasoru governu Roma. Ema barak tuir nia, maibee ikus mai ema oho tiha nia, i nia ema sira mos halai namkari hotu.
ACT 5:38 Nee duni, kona ba kazu nee, hau foo hanoin ba imi hanesan nee: La bele halo buat ida ba ema sira nee! Husik sira baa deit. Tanba se sira nia planu ho buat nebee sira halo nee mai husi ema, entaun aban-bainrua sira sei lakon hanesan Teudas ho Judas.
ACT 5:39 Maibee se mai husi Maromak, entaun imi la iha kbiit atu taka dalan. Keta halo be imi kontra fali Maromak!” Rona nunee, sira hotu simu.
ACT 5:40 Depois sira bolu apostolu sira tama fali ba laran, i haruka ema baku ho sikoti. Hotu tiha sira bandu apostolu sira la bele koalia tan kona ba Jesus, depois husik tiha sira baa.
ACT 5:41 Apostolu sira sai husi tribunal relijiaun ho laran haksolok tanba Maromak konsidera sira serve atu simu terus tanba sira tuir Jesus.
ACT 5:42 Loro-loron sira sempre hanorin Liafuan Diak kona ba Jesus, dehan Nia mak Mesias, Salvador nebee Maromak haruka mai. Sira foo sai nunee beibeik iha area uma kreda boot ho mos husi uma ba uma.
ACT 6:1 Iha tempu nee, ema nebee tuir Jesus aumenta barak ba beibeik. Depois sarani sira nebee koalia lian Gregu haksesuk malu ho sarani sira nebee koalia lian Aram. Sira dehan, “Bainhira fahe hahaan loro-loron, ami nia feto faluk sira la simu sira nia parte.”
ACT 6:2 Tanba nee, apostolu nain sanulu resin rua halibur ema hotu nebee tuir Jesus hodi dehan, “Ami tenki foo aan hodi hanorin Maromak nia liafuan. Se ami husik fali knaar nee hodi toma konta imi nia hahaan, nee la loos.
ACT 6:3 Nee duni maun-alin sira, diak liu imi hili mane nain hitu husi imi. Buka ema nebee naran diak, matenek, i Espiritu Santu mak domina nia. Depois ami sei foti sira hodi toma konta kona ba fahe hahaan nian.
ACT 6:4 Nunee ami foo aan tomak hodi halo orasaun i hanorin Maromak nia liafuan.”
ACT 6:5 Sira hotu simu. Entaun sira hili ema nain hitu ho naran tuir mai nee: Estevão, nia fiar makaas ba Jesus, i Espiritu Santu domina nia, Filipe, Prócoro, Nikanor, Timão, Pármenas, ho Nicolau. Nicolau nee husi sidade Antiokia. Nia laos ema Judeu maibee tama tiha ona relijiaun Judeu.
ACT 6:6 Depois sarani sira lori ema nain hitu nee baa aprezenta ba apostolu sira. I apostolu sira tau liman ba sira nia ulun hodi halo orasaun.
ACT 6:7 Nunee Maromak nia liafuan namkari too iha fat-fatin. Ema sira nebee fiar ba Jesus aumenta makaas iha Jerusalém. Nai lulik Judeu barak mos halo tuir Maromak nia hakarak hodi fiar ba Jesus.
ACT 6:8 Maromak hatudu Nia laran diak ba Estevão hodi foo kbiit ba nia para halo milagre ho sinal oi-oin iha povu nia klaran, halo sira admira.
ACT 6:9 Maibee iha ema Judeu balu komesa kontra nia. Sira nee mai husi sidade Sirene ho Alexandria, provinsia Silísia ho Ázia, i sira baibain halo orasaun iha uma kreda ida nebee ema hanaran Livre husi Atan. Sira komesa diskuti malu ho Estevão,
ACT 6:10 maibee Espiritu Santu foo matenek ba nia hodi koalia, nunee sira la bele manaan nia.
ACT 6:11 Tanba nee, sira baa selu ema para foo sai dehan, “Ami rona ema nee hatete aat Moisés i hatete aat Maromak!”
ACT 6:12 Sira tau lia ba povu, katuas lia nain sira ho mos mestri relijiaun sira. Sira baa kaer Estevão, lori baa aprezenta iha justisa nain relijiaun sira.
ACT 6:13 Sira bolu mos ema balu nebee foo testemunhu falsu kona ba Estevão dehan, “Ema nee sempre hatete aat Maromak nia uma kreda boot, i nia sempre koalia aat lei nebee Maromak foo ba Moisés.
ACT 6:14 Ami rona nia dehan, Jesus Ema Nazaré sei harahun uma kreda boot nee, i sei muda ita nia lisan nebee Moisés rai hela ba ita.”
ACT 6:15 Ema hotu iha tribunal fihir hela Estevão, sira haree nia oin hanesan tiha anju nia oin.
ACT 7:1 Depois nai lulik boot husu ba Estevão dehan, “Buat nebee sira hatete kona ba o nee, loos ka lae?”
ACT 7:2 Estevão hataan, “Hau nia aman sira ho maun-alin sira, rona mai. Hori uluk ita nia bei-ala Abraão sei hela iha Mezopotámia, molok nia muda ba sidade Haran, Maromak Kbiit Nain hatudu Aan ba nia.
ACT 7:3 Maromak dehan, ‘Husik tiha o nia rain ho o nia maluk sira hodi baa iha rai nebee Hau sei hatudu ba o.’
ACT 7:4 Entaun Abraão husik tiha ema Kaldeu sira nia rain hodi muda ba Haran. Bainhira nia aman mate tiha, Maromak haruka Abraão muda mai iha rai nebee agora ita boot sira hela ba nee.
ACT 7:5 Iha tempu nebaa Maromak la foo rai nee ba Abraão atu sai ninian, atu pedasuk ida mos lae. Maibee Nia promete atu foo rai nee tomak ba Abraão ho nia jerasaun sira. Momentu Maromak promete nee, Abraão seidauk iha oan.
ACT 7:6 Maibee Maromak dehan ba nia, ‘O nia jerasaun sei baa hela iha ema nia rain. Ema rai nain sei halo sira hanesan atan, i hanehan sira durante tinan atus haat.
ACT 7:7 Maibee liu tiha tinan atus haat nee, Hau sei kastigu nasaun nebee halo sira hanesan atan nee. Hotu tiha, o nia jerasaun sei sai husi nasaun nee, i mai adora Hau iha fatin nee.’
ACT 7:8 Depois Maromak halo promesa ho Abraão. Nia haruka Abraão ho nia jerasaun mane hotu sunat atu sai sinal katak sira simu Maromak nia promesa nee. Nunee bainhira Abraão nia oan Isac moris mai, liu tiha loron walu Abraão mos sunat nia. Isac sunat nia oan mane Jacó, i Jacó mos sunat nia oan mane sanulu resin rua, sira nee sai ita ema Judeu nia bei-ala sira.
ACT 7:9 Ita nia bei-ala sira nee laran moras ba sira nia alin José, too sira faan tiha nia ba iha rai Ejitu hanesan atan. Maibee Maromak sempre hamutuk ho nia,
ACT 7:10 i hasai nia husi susar hotu-hotu. Maromak foo matenek ba nia, halo nia manaan liurai Ejitu nia laran. Nunee liurai foti nia sai governador iha rai Ejitu tomak ho mos xefi iha liurai nia palasiu.
ACT 7:11 Depois rai hamlaha boot mosu iha Ejitu ho rai Kanaán tomak, halo ema terus teb-tebes. Ita nia bei-ala sira mos la hetan hahaan.
ACT 7:12 Jacó rona dehan iha rai Ejitu iha hahaan, entaun nia haruka nia oan sira baa hola hahaan iha nebaa.
ACT 7:13 Bainhira hahaan nee hotu ona, sira baa tan dala ida. Nee mak foin José foo hatene ba sira dehan, nia nee see. I nia mos foo hatene ba liurai Ejitu kona ba nia familia.
ACT 7:14 Depois José husu atu nia aman ho nia familia hotu muda ba rai Ejitu. Sira nee hamutuk ema hitu-nulu resin lima.
ACT 7:15 Nunee Jacó muda ba rai Ejitu. Nia ho ita nia bei-ala sira seluk mate iha nebaa.
ACT 7:16 Sira nia jerasaun lori fila sira nia ruin ba iha aldeia Sikem iha rai Kanaán. I sira hakoi mate ruin sira nee iha rate nebee uluk Abraão sosa husi Hamór nia jerasaun sira.”
ACT 7:17 Estevão hatutan tan dehan, “Uluk Maromak promete ona dehan, Nia sei foo rai nee ba Abraão. Kuandu loron besik ona atu Maromak kumpri Nia promesa nee, ita nia povu Judeu iha rai Ejitu aumenta barak teb-tebes.
ACT 7:18 Depois iha liurai foun ida mak komesa ukun iha Ejitu, nia la hatene buat ida kona ba José.
ACT 7:19 Liurai nee buka dalan atu halo terus ita nia povu. Nia hanehan ita nia bei-ala sira hodi obriga sira soe sira nia oan nurak iha liur para sira mate.
ACT 7:20 Iha tempu nee, Moisés moris, nia isin diak i forti. Nia inan-aman tau matan ba nia sub-subar iha uma too fulan tolu.
ACT 7:21 Bainhira sira la bele subar tan labarik nee ona, sira lori nia baa husik tiha iha liur. Maibee liurai Ejitu nia oan feto ida hetan nia i foti nia hodi baa hakiak hanesan nia oan rasik.
ACT 7:22 Nunee Moisés aprende ema Ejitu nia matenek tomak. Nia sai ema boot, i nia matenek koalia, ho matenek halo servisu.
ACT 7:23 Bainhira Moisés tinan haat-nulu ona, nia desidi baa vizita nia maluk Israel sira.
ACT 7:24 Too iha nebaa, nia haree ema Ejitu ida baku hela ema Israel ida. Nia baa defende nia maluk, i baku mate tiha ema Ejitu nee.
ACT 7:25 Moisés hanoin, nia maluk Israel sira hatene ona katak Maromak mak haruka nia baa hasai sira husi terus nia laran. Afinal sira seidauk kompriende.
ACT 7:26 Aban fali nia haree ema Israel nain rua baku malu. Nia baa sori sira hodi dehan, ‘Maun sira, imi nain rua nee mesak maluk deit. Nusaa mak imi baku malu fali?’
ACT 7:27 Maibee ema ida nebee baku nia kolega nee, dudu tiha Moisés ba sorin hodi dehan, ‘See mak foti o sai ami nia xefi ho ami nia juis?
ACT 7:28 O atu oho hau hanesan horiseik o oho tiha ema Ejitu nee ka?’
ACT 7:29 Rona nunee, Moisés halai sai husi Ejitu, baa hela iha rai Midián. Nia hela iha nebaa hanesan ema lao rai ida. Iha nebaa nia hola feto, i sira hetan oan mane nain rua.
ACT 7:30 Liu tiha tinan haat-nulu, loron ida Moisés iha hela rai fuik maran besik Foho Sinai. Iha nebaa anju ida mosu ba nia husi ahi lakan iha ai huun kiikoan ida.
ACT 7:31 Haree nunee, Moisés admira. Nia baa besik atu haree saida mak nee. Derepenti nia rona Nai Maromak nia lian dehan,
ACT 7:32 ‘Hau nee o nia bei-ala Abraão, Isac, ho Jacó sira nia Maromak.’ Rona nunee, Moisés tauk ho nakdedar, i nia la brani foti oin hodi haree.
ACT 7:33 Depois Nai Maromak koalia tan dehan, ‘Hasai tiha o nia sandalias, tanba rai ida nebee o sama nee santu.
ACT 7:34 Hau haree tiha ona ema halo terus Hau nia povu iha rai Ejitu, i Hau rona tiha ona sira nia halerik. Agora Hau tuun atu hasai sira husi terus nee. Mai ona! Hau atu haruka o fila fali ba iha Ejitu.’
ACT 7:35 Moisés nee mak ida nebee uluk povu Israel lakohi simu. Sira dehan, ‘See mak foti o sai ami nia xefi ho ami nia juis?’ Afinal ida nebee sira lakohi simu nee mak Maromak foti para sai sira nia xefi hodi hasai sira husi terus laran. Maromak foti Moisés liu husi anju nebee hatudu aan ba nia iha ai huun kiikoan nee.
ACT 7:36 Depois Moisés lori povu Israel sai husi rai Ejitu. Nia halo milagre ho sinal bo-boot iha Ejitu, iha Tasi Mean ho mos durante tinan haat-nulu iha rai fuik maran, halo ema admira.
ACT 7:37 Moisés nee mak foo hatene ba povu Israel dehan, ‘Maromak sei foti Ema ida husi imi nia klaran para sai Nia Profeta, hanesan hau.’
ACT 7:38 Moisés moris hamutuk ho povu Israel iha rai fuik maran. Nia hasoru malu ho anju ida iha foho Sinai, i anju nee foo sai liafuan nebee hatudu dalan moris ba ita. Depois Moisés rai hela liafuan sira nee ba ita.
ACT 7:39 Maski nunee ita nia bei-ala sira lakohi rona Moisés. Sira la simu nia, i hakarak fila fali ba Ejitu.
ACT 7:40 Sira dehan ba Arão, ‘Halo estatua lulik mai ami atu sai ami nia maromak hodi lori ami ba oin. Tanba Moisés ida nebee lori ami sai husi Ejitu, agora nia iha nebee, ami la hatene.’
ACT 7:41 Entaun sira halo estatua ida hanesan karau oan. Hotu tiha sira oho animal hodi halo sakrifisiu ba estatua lulik nee. Sira halo festa rame-rame, tanba sira haksolok ho buat nebee mak sira halo ho sira nia liman rasik.
ACT 7:42 Haree nunee, Maromak fila kotuk ba sira. Nia husik sira adora loro matan, fulan ho fitun. Nee tuir lo-loos buat nebee profeta hakerek hori uluk dehan, ‘Imi ema Israel sira, durante tinan haat-nulu imi haleu rai fuik maran, imi lori sakrifisiu ho oferta hodi adora Hau ka? Lae!
ACT 7:43 Imi tau estatua lulik ida nebee naran Molok iha nia fatin rasik hodi hiit ba-mai, i imi lori tu-tuir estatua fitun naran Refan. Imi adora fali estatua sira nebee mak imi rasik halo para sai imi nia maromak. Nee duni Hau sei soe tiha imi ba iha rai Babilónia nia sorin ba.’ ”
ACT 7:44 Estevão hatutan tan dehan, “Iha rai fuik maran nee, ita nia bei-ala sira harii tenda orasaun para adora Maromak. Tenda nee sira halo tuir modelu nebee Maromak hatudu ona ba Moisés.
ACT 7:45 Liu tiha tempu naruk, Maromak duni ema sira seluk sai husi rai Kanaán, i Josué ho ita nia bei-ala sira seluk hadau fali rai nee husi sira. Iha tempu nee mos sira lori tuir tenda orasaun nee, i tenda nee harii iha rai nee too David sai liurai.
ACT 7:46 Liurai David nee halo haksolok Maromak nia laran. I nia husu ba Maromak atu nia bele harii uma ba Maromak, Ida nebee nia bei-ala Jacó uluk adora.
ACT 7:47 Maibee David nia oan Salomão mak harii uma nee.
ACT 7:48 Maski nunee Maromak Aas Liu la hela iha uma nebee ema mak halo. Hanesan uluk profeta ida dehan,
ACT 7:49 ‘Nai Maromak dehan nunee: “Lalehan mak Hau nia kadeira hodi tuur kaer ukun, i rai mak fatin hodi tau Hau nia ain. Entaun imi atu halo uma hanesan nebee mai Hau? Imi atu halo Hau nia hela fatin iha nebee loos?
ACT 7:50 Tanba buat hotu-hotu iha lalehan ho iha rai, Hau mak halo.”’ ”
ACT 7:51 Estevão dehan tan, “Imi nee ulun toos duni! Imi hanesan ema nebee la konhese Maromak, i lakohi rona. Imi hanesan imi nia bei-ala sira, imi sempre kontra Espiritu Santu.
ACT 7:52 Imi nia bei-ala sira sempre halo terus Maromak nia profeta sira. Imi dehan took, profeta ida nebee mak sira la halo terus? Sira oho tiha profeta sira nebee foo sai dehan Ema ida nebee Moris Loos atu mai. Too Ema nee mai mos, imi rasik faan tiha Nia i oho Nia.
ACT 7:53 Imi simu ona Maromak nia lei liu husi Nia anju. Maibee imi la halo tuir.”
ACT 7:54 Bainhira justisa nain relijiaun sira rona Estevão nia liafuan nee, sira hirus teb-tebes too ruun nehan.
ACT 7:55 Maibee Espiritu Santu domina Estevão. I nia foti matan hateke ba lalehan, nia haree naroman lalehan nian haleu Maromak, i Jesus hamriik hela iha Maromak nia sorin loos.
ACT 7:56 Estevão dehan, “Rona mai! Hau haree lalehan nakloke, i Jesus, Ema Umanu nia Oan hamriik hela iha Maromak nia sorin loos.”
ACT 7:57 Rona nunee, sira taka tilun hodi hakilar makaas, i halai rame-rame
ACT 7:58 baa rasta nia sai husi sidade. Ema nebee ohin foo sasin nee hasai sira nia faru foo ba ema foinsae ida naran Saulo mak hein. Depois sira komesa tuda Estevão ho fatuk.
ACT 7:59 Sira tuda nia dadauk, nia halo orasaun fila-fila dehan, “Nai Jesus! Simu hau nia klamar ba!”
ACT 7:60 Nia hakneak, i hakilar ho lian makaas dehan, “Hau nia Nai, la bele foo todan ba sira tanba sira nia sala nee!” Koalia tiha hotu nia iis kotu.
ACT 8:1a Saulo konkorda ho Estevão nia mate nee.
ACT 8:1b Bainhira Estevão mate, iha ema balu nebee hamtauk Maromak, sira baa foti Estevão nia mate isin hodi baa hakoi, i sira tanis lelir. Hahuu iha loron nee, ema komesa halo terus sarani sira iha sidade Jerusalém, too sira hotu halai namkari ba iha provinsia Judeia ho Samaria. So apostolu sira mak la halai.
ACT 8:3 Saulo mos buka dalan hodi halo rahun sarani sira. Nia tama-sai uma hodi buka sarani sira. Atu feto ka mane, nia kaer deit hodi rasta baa hatama iha kadeia.
ACT 8:4 Sarani sira nebee halai namkari nee, sira foo sai Liafuan Diak iha fat-fatin.
ACT 8:5 Iha tempu nee, Filipe baa iha sidade ida iha provinsia Samaria hodi foo hatene kona ba Mesias, Salvador nebee Maromak haruka mai.
ACT 8:6 Ema barak rona Filipe nia liafuan i haree milagre nebee mak nia halo. Nunee sira hotu rona ho atensaun saida mak nia hatete.
ACT 8:7 Filipe duni sai espiritu aat husi ema barak, i espiritu sira nee sai mai hakilar makaas. Ema ain aat lao la diak ho ema lao kudeik, barak hetan kura.
ACT 8:8 Nunee ema iha sidade nee haksolok teb-tebes.
ACT 8:9 Iha ema matan-dook ida naran Simão. Kleur ona ema Samaria sira hotu admira ho buat nebee mak nia halo. Nia sempre gaba aan katak nia ema ida nebee makaas.
ACT 8:10 Nunee iha sidade nee, ema kiik-boot hotu-hotu rona nia i konta kona ba nia dehan, “Ema nee makaas teb-tebes, nia iha kbiit husi Maromak.”
ACT 8:11 Sira tuir nia tanba kleur ona nia lulik nee halo sira admira.
ACT 8:12 Maibee agora sira rona Filipe hanorin Liafuan Diak kona ba oinsaa Maromak ukun nudar Liurai ho mos kona ba Jesus Kristu. Nunee feto-mane barak fiar ba Jesus hodi simu batizmu.
ACT 8:13 Simão mos fiar ba Jesus hodi simu batizmu, i nia tuir Filipe ba iha nebee-nebee. Bainhira nia haree Filipe halo milagre ho sinal boot oi-oin, nia admira teb-tebes.
ACT 8:14 Apostolu sira nebee hela iha Jerusalém rona katak ema iha Samaria simu ona Maromak nia liafuan. Entaun sira desidi atu Pedro ho João baa iha nebaa.
ACT 8:15 Bainhira sira nain rua too, sira halo orasaun husu atu sarani sira nee bele simu Espiritu Santu,
ACT 8:16 tanba sira seidauk simu Espiritu Santu, sira foin sarani hodi Nai Jesus nia naran.
ACT 8:17 Nunee Pedro ho João tau liman ba sira nia ulun, i sira simu Espiritu Santu.
ACT 8:18 Simão haree katak sarani sira simu Espiritu Santu bainhira apostolu sira tau liman. Entaun nia hakarak foo osan ba sira.
ACT 8:19 Nia dehan, “Foo kbiit nee mai hau, para hau tau liman ba see-see deit, sira mos simu Espiritu Santu.”
ACT 8:20 Maibee Pedro hataan, “O sei mohu hamutuk ho o nia osan nee! Tanba buat nebee Maromak foo nee, o hanoin o bele sosa fali ho osan.
ACT 8:21 O la bele hamutuk ho ami hodi halao knaar nee, tanba o nia laran la moos iha Maromak nia oin.
ACT 8:22 Nee duni hakribi ona o nia hahalok aat nee, i harohan ba Nai Maromak para se bele karik, Nia foo perdaun ba o nia hanoin aat nee.
ACT 8:23 Tanba hau haree o laran moras hela ami, i sala mak domina o!”
ACT 8:24 Entaun Simão husu, “Harohan ba Nai Maromak mai hau, para buat nebee ohin ita boot sira koalia nee, keta kona hau.”
ACT 8:25 Depois Pedro ho João foo sasin kona ba Nai Jesus i foo sai Nai Maromak nia liafuan iha sidade nee. Hotu tiha sira fila ba Jerusalém. Tuir dalan sira iha aldeia barak iha provinsia Samaria hodi foo sai Liafuan Diak kona ba Jesus.
ACT 8:26 Loron ida Nai Maromak nia anju mai hatete ba Filipe, “O lao ba dalan ida nebee tuun husi sidade Jerusalém ba iha Gaza. Dalan nee liu husi rai fuik maran.”
ACT 8:27 Filipe baa kedas. Too iha dalan nee, nia hasoru funsionariu boot ida husi rai Etiópia, nia mak toma konta liurai feto Kandase nia riku-soin. Ema nee foin dadauk baa iha Jerusalém hodi adora Maromak,
ACT 8:28 agora nia iha dalan atu fila fali ba uma. Nia tuur iha kuda kareta leten, lee hela profeta Isaias nia livru.
ACT 8:29 Maromak nia Espiritu hatete ba Filipe, “Baa besik kuda kareta nee.”
ACT 8:30 Filipe halai baa besik, nia rona ema nee lee hela profeta Isaias nia livru. Filipe husu, “Ita boot kompriende saida mak ita lee ka lae?”
ACT 8:31 Ema nee hataan, “Oinsaa mak hau bele kompriende se ema ida la esplika mai hau?” Depois nia husu Filipe sae baa tuur hamutuk ho nia.
ACT 8:32 Liafuan nebee nia lee iha Livru Sagradu dehan hanesan nee: “Ema dada Nia hanesan fali dada bibi malae baa oho. Nia la loke ibun, hanesan bibi malae oan nebee nonook bainhira ema tesi nia fulun.
ACT 8:33 Ema hatuun Nia, i tesi Nia lia la loos. Nia jerasaun la iha, tanba ema halakon tiha Nia vida husi mundu.”
ACT 8:34 Lee tiha hotu nunee, funsionariu nee husu ba Filipe, “Esplika took mai hau, profeta nia liafuan nee kona ba nia aan rasik ka kona ba ema seluk?”
ACT 8:35 Entaun Filipe foti liafuan nebee ohin sira lee hodi komesa esplika Liafuan Diak kona ba Jesus.
ACT 8:36 Sira lao nafatin tuir dalan too hetan bee. Ema Etiópia nee hatete ba Filipe, “Haree took bee nee! Se bele ita boot foo sarani hau.”
ACT 8:37 [Filipe hataan, “Se ita boot fiar ba Jesus ho laran tomak, ita boot bele sarani.” Funsionariu nee dehan, “Hau fiar duni katak, Jesus Kristu mak Maromak nia Oan.”]
ACT 8:38 Entaun ema Etiópia nee haruka kuda kareta nee para. Sira nain rua tuun tama ba bee laran, i Filipe foo sarani nia.
ACT 8:39 Bainhira sira sai husi bee laran, derepenti Nai Maromak nia Espiritu lori tiha Filipe ba iha fatin seluk, i funsionariu nee la haree tan nia ona. Maibee funsionariu nee lao nafatin ho laran haksolok.
ACT 8:40 Depois Filipe mosu fali iha aldeia ida naran Azotu. I nia lao husi aldeia ba aldeia hodi foo sai Liafuan Diak, too iha sidade Sezareia.
ACT 9:1 Iha tempu nee, Saulo ameasa nafatin ema sira nebee tuir Nai Jesus. Nia tuur la metin atu oho sira. Nunee nia baa iha nai lulik Judeu nia boot
ACT 9:2 hodi husu karta rekomendasaun atu lori foo ba responsavel uma kreda Judeu sira iha sidade Damasku. Ho karta nee nia hetan lisensa, se nia hasoru ema nebee tuir Jesus nia dalan iha nebaa, atu feto ka mane, nia bele kaer hodi lori ba Jerusalém.
ACT 9:3 Simu tiha karta nee, Saulo lao ba Damasku. Besik ona sidade nee, derepenti naroman husi lalehan leno nia.
ACT 9:4 Nia monu kedas ba rai, i nia rona lian ida dehan, “Saulo! Saulo! Tansaa mak o halo terus Hau?”
ACT 9:5 Saulo husu, “Nai, Ita Boot nee see?” Lian nee hataan, “Hau mak Jesus, ida nebee o halo terus nee.
ACT 9:6 Hadeer ona hodi tama ba sidade. Iha nebaa ema ida sei foo hatene ba o saida mak o tenki halo.”
ACT 9:7 Ema nebee lao hamutuk ho Saulo mos rona lian nee, maibee sira la haree ema ida. Nunee sira hotu sai bilaan tiha.
ACT 9:8 Saulo hamriik, i loke matan, maibee nia matan la haree buat ida. Entaun nia maluk sira kaer nia liman hodi lori nia lao too iha Damasku.
ACT 9:9 Durante loron tolu nia matan delek, i nia la haan la hemu buat ida.
ACT 9:10 Iha Damasku nee, iha Jesus nia eskolante ida naran Ananias. Nai Jesus hatudu hanesan mehi ida ba nia hodi bolu nia dehan, “Ananias!” Nia hataan, “Nai.”
ACT 9:11 Nai Jesus hatete, “Baa iha Judas nia uma, iha dalan ida nebee naran Estrada Loos. O baa husu atu hasoru malu ho ema ida naran Saulo, husi sidade Tarsu. Agora nia halo hela orasaun.
ACT 9:12 Hau mos foo ona hanesan mehi ida ba nia, iha mehi nee nia haree ema ida naran Ananias mai hasoru nia hodi tau liman ba nia, atu nia bele haree fila fali.”
ACT 9:13 Ananias hataan, “Maibee Nai, hau rona ona ema konta ba-mai dehan, ema nee halo terus Ita Boot nia povu iha Jerusalém.
ACT 9:14 Agora nia mai iha nee, nia hetan lisensa husi nai lulik nia ulun sira atu kaer ema hotu nebee tuir Ita Boot.”
ACT 9:15 Maibee Nai Jesus koalia tan, “O baa deit! Tanba Hau hili ona nia atu serbi Hau hodi lori Hau nia Liafuan Diak ba jentiu sira, ba sira nia liurai sira, ho mos ba povu Israel.
ACT 9:16 Hau rasik sei foo sai ba nia katak, nia tenki hetan terus barak tanba nia tuir Hau.”
ACT 9:17 Nunee Ananias baa. Too iha uma nia tama liu ba laran. I nia tau liman ba Saulo hodi dehan, “Irmaun Saulo. Nai Jesus, Ida nebee hatudu Aan ba ita iha dalan klaran, Nia mak haruka hau mai atu ita bele haree fila fali, i atu Espiritu Santu domina ita boot.”
ACT 9:18 Momentu nee kedas, buat ida hanesan ikan kulit monu sai husi Saulo nia matan, i nia haree fila fali. Nia hamriik kedas hodi simu batizmu.
ACT 9:19a Depois nia haan, i nia isin forti fila fali.
ACT 9:19b Saulo sei hela loron ida-rua ho Jesus nia eskolante sira iha Damasku.
ACT 9:20 Iha nebaa nia komesa kedas tama-sai ema Judeu sira nia uma kreda hodi foo sai ba sira dehan, “Jesus nee Maromak nia Oan.”
ACT 9:21 Ema hotu nebee rona nia koalia, sira admira hodi dehan ba malu, “Ema nee mak halo terus ema sira nebee tuir Jesus iha Jerusalém, loos ka lae?! Nia mai tan iha nee atu kaer ema nebee tuir Jesus hodi lori sira baa entrega iha nai lulik nia ulun sira.”
ACT 9:22 Maibee Saulo nia kbiit atu hanorin aumenta ba beibeik. Nia hatudu mo-moos ba ema Judeu sira iha Damasku katak Jesus nee mak Mesias, Salvador nebee Maromak haruka mai. Nunee la iha tan ema ida atu kontra nia.
ACT 9:23 Too loron ida ema Judeu balu kombina malu atu oho Saulo.
ACT 9:24 Loron-kalan sira hein iha portaun sidade nian atu oho nia. Maibee nia rona kona ba sira nia planu nee.
ACT 9:25 Too kalan ida, nia maluk sarani balu mai lori nia hodi hatuun nia ho bote ida husi moru sidade nian. Nunee nia halai sai husi sidade Damasku.
ACT 9:26 Tuir mai, Saulo baa iha Jerusalém. Too iha nebaa, nia hakarak tama hamutuk ho Jesus nia eskolante sira. Maibee sira hotu tauk nia, tanba sira hanoin dehan nia halo finji sai Jesus nia eskolante para bele kaer sira.
ACT 9:27 Maibee Barnabé lori Saulo baa aprezenta ba apostolu sira. Barnabé konta ba sira katak, Saulo hasoru malu tiha ona ho Nai Jesus iha dalan, i Nai Jesus koalia ho nia. Barnabé mos dehan, Saulo brani foo sai Liafuan Diak hodi Nai Jesus nia naran ba ema iha Damasku.
ACT 9:28 Nunee Saulo hela hamutuk ho sira. Nia lao ba nebee-nebee deit iha Jerusalém, nia brani koalia kona ba Nai Jesus iha nebaa.
ACT 9:29 Nia koalia i diskuti malu ho ema Judeu sira nebee koalia lian Gregu, maibee sira buka dalan atu oho nia.
ACT 9:30 Bainhira sarani sira rona nunee, sira lori tiha nia ba iha sidade Sezareia, depois haruka nia baa fali sidade Tarsu.
ACT 9:31 Hotu tiha sarani sira iha provinsia Judeia, Galileia ho Samaria moris ho hakmatek. Sira nia fiar buras ba beibeik. Espiritu Santu hametin sira nia laran, nunee sarani sira aumenta barak liu tan, i moris hamtauk ba Nai Maromak.
ACT 9:32 Iha tempu nebaa Pedro lao lemo rai. Iha loron ida, nia baa vizita sarani sira iha aldeia Lida.
ACT 9:33 Iha nebaa nia hetan ema ida ain aat, naran Eneias. Ema nee lao la diak, toba deit iha biti durante tinan walu ona.
ACT 9:34 Pedro dehan ba nia, “Eneias, Jesus Kristu kura o. Hadeer ona! Aruma o nia biti.” Eneias mos hamriik kedas.
ACT 9:35 Ema hotu iha aldeia Lida ho Sarona haree Eneias diak tiha ona, i sira mos fiar ba Nai Jesus.
ACT 9:36 Iha Jesus nia eskolante feto ida naran Tabita hela iha sidade Jope. (Nia naran hodi lian Gregu bolu Dorcas, nee dehan katak “bibi rusa”.) Nia sempre halo buat diak ba ema, i sempre foo ezmola ba ema kiak sira.
ACT 9:37 Iha tempu nee, Dorcas moras, depois nia mate. Ema foo hariis tiha nia mate isin, i lori baa hatoba iha kuartu ida iha andar leten.
ACT 9:38 Eskolante sira seluk rona katak Pedro iha Lida, laduun dook husi Jope. Nunee sira haruka ema nain rua baa bolu nia dehan, “Favor baa lalais Jope.”
ACT 9:39 Pedro mos tuir sira. Too iha mate uman, sira lori nia sae liu ba andar leten. Iha feto faluk barak mai hamriik haleu Pedro. Sira tanis hodi hatudu ba Pedro sira nia vestidu ho sira nia ropa seluk tan nebee Dorcas uluk suku foo ba sira.
ACT 9:40 Pedro haruka sira hotu sai husi kuartu nee, depois nia hakneak hodi halo orasaun. Hotu tiha nia see oin ba mate isin nee hodi dehan, “Tabita, hadeer ona!” Derepenti senhora nee loke nia matan. Nia haree Pedro, nia hadeer hodi tuur.
ACT 9:41 Pedro kaer nia liman hodi ajuda nia hamriik. Depois nia bolu feto faluk sira ho sarani sira seluk hodi hatudu ba sira katak Dorcas moris fali ona.
ACT 9:42 Ema iha sidade Jope tomak rona kona ba milagre nee. Nunee ema barak fiar ba Nai Jesus.
ACT 9:43 Pedro hela kleur uitoan iha Jope, iha ema ida naran Simão nia uma. Simão nia servisu mak hamoos animal nia kulit.
ACT 10:1 Iha sidade Sezareia iha militar Roma ida naran Cornélio. Nia komandante kompanhia husi Itália.
ACT 10:2 Nia ho nia familia uma laran tomak hamtauk Maromak. Nia sempre foo ajuda ho laran luak ba ema Judeu sira nebee kiak, i sempre halo orasaun ba Maromak.
ACT 10:3 Iha loron ida, maizoumenus tuku tolu lokraik, Cornélio hetan hanesan mehi ida, nia haree mo-moos Maromak nia anju ida mai bolu nia dehan, “Cornélio!”
ACT 10:4 Nia hateke ba anju nee ho tauk teb-tebes hodi husu, “Ita hakarak saida Nai?” Anju nee hataan, “Maromak rona ona o nia orasaun, i Nia haksolok ho ajuda nebee o foo ba ema kiak sira.
ACT 10:5 Nee duni agora o haruka ema ba sidade Jope hodi bolu ema ida naran Simão Pedro mai.
ACT 10:6 Nia hela ho Simão ida nebee hamoos animal nia kulit, nia uma besik tasi ibun.”
ACT 10:7 Kuandu anju nee baa tiha, Cornélio bolu nia atan nain rua ho nia eskoltu ida nebee baibain hein nia. Eskoltu nee mos hamtauk ba Maromak.
ACT 10:8 Cornélio hatete buat nee hotu ba sira, depois nia haruka sira ba Jope.
ACT 10:9 Aban fali iha meudia, Cornélio nia ema sira besik too ona iha Jope. Momentu nee, Pedro sae ba uma leten atu halo orasaun.
ACT 10:10 Nia senti hamlaha i hakarak atu haan. Ema sei tein hela, Maromak hatudu hanesan mehi ida ba nia.
ACT 10:11 Nia haree lalehan nakloke, i buat ida hanesan lensol boot, nia lidun haat kesi ho tali, tuun dadauk husi lalehan mai.
ACT 10:12 Iha lensol laran, nia haree animal oi-oin. Iha animal ain haat, animal nebee dolar iha rai, ho manu fuik oi-oin.
ACT 10:13 Nia mos rona lian ida dehan, “Pedro, hamriik ona! Oho animal sira nee hodi haan ba!”
ACT 10:14 Pedro hataan, “La bele, Nai! Hau nunka haan animal foer, animal nebee lei Moisés nian bandu.”
ACT 10:15 Maibee lian nee simu fali dehan, “Buat nebee Maromak dehan bele haan ona, o la bele konsidera foer tan.”
ACT 10:16 Nee akontese dala tolu, depois lensol nee sae fali ba lalehan.
ACT 10:17 Pedro sei hanoin hela buat nebee nia haree nee dehan saida, Cornélio nia ema nebee nia haruka mai nee hetan Simão nia uma. Sira hamriik iha portaun
ACT 10:18 hodi husu, “Simão Pedro hela iha nee ka lae?”
ACT 10:19 Pedro sei hanoin hela mehi nee dehan saida, Espiritu Santu foo hatene ba nia dehan, “Pedro, iha ema nain tolu mai buka o.
ACT 10:20 Hamriik ona hodi tuun baa hasoru sira. Lalika laran ru-rua atu akompanha sira, maski sira laos ema Judeu, tanba Hau mak haruka sira mai.”
ACT 10:21 Entaun Pedro tuun baa hodi dehan ba sira, “Hau mak nee. Tanba saa mak imi mai buka hau?”
ACT 10:22 Sira hataan, “Komandante Cornélio mak haruka ami mai. Nia ema ida nebee moris loos i hamtauk ba Maromak. Ema Judeu sira hotu respeita nia. Horiseik Maromak nia anju haruka nia bolu senhor ba iha nia uma, para nia bele rona senhor nia liafuan.”
ACT 10:23 Depois Pedro husu ba sira atu toba lai kalan ida iha nebaa. Aban fali Pedro prepara aan hodi baa hamutuk ho sira. Sarani balu husi Jope mos akompanha sira.
ACT 10:24 Sira toba kalan ida iha dalan, depois iha aban fali sira too iha sidade Sezareia. Cornélio mos hein hela sira iha uma. Nia halibur tiha ona nia familia ho nia belun diak sira iha nebaa.
ACT 10:25 Bainhira Pedro atu tama ba uma laran, Cornélio baa simu nia, i hakneak iha Pedro nia oin atu adora nia.
ACT 10:26 Maibee Pedro foti nia hamriik hodi dehan, “Hamriik tiha! La bele hanesan nee, tanba hau ema hanesan mos ita.”
ACT 10:27 Entaun sira nain rua komesa koalia hodi tama dadauk ba uma laran. Iha nebaa Pedro haree ema barak hein hela.
ACT 10:28 Nia hatete ba sira, “Imi hatene ona, tuir ami Judeu nia lei, ami la bele liga ema nebee laos Judeu, saa tan tama iha nia uma. Maibee Maromak hatudu ona mai hau katak, hau la bele dehan ema ida foer, hau la bele hakribi tan ema nebee laos Judeu.
ACT 10:29 Nee mak bainhira imi bolu hau mai, hau la senti todan, hau mai kedas. Agora hau hakarak hatene, tanba saa mak imi bolu hau mai.”
ACT 10:30 Cornélio hataan, “Loron tolu liu ba, iha tuku tolu lokraik, oras hanesan agora nee, hau halo hela orasaun iha uma. Derepenti mane ida hamriik iha hau nia oin, nia hena nabilan loos.
ACT 10:31 Nia dehan, ‘Cornélio, Maromak rona ona o nia orasaun, i Nia haksolok ho ajuda nebee o foo ba ema kiak sira.
ACT 10:32 Nee duni agora o haruka ema ba sidade Jope hodi bolu ema ida naran Simão Pedro mai. Nia hela ho Simão ida nebee hamoos animal nia kulit, nia uma besik tasi ibun.’
ACT 10:33 Nee mak hau haruka kedas ema baa bolu ita. Ami agradese teb-tebes tanba ita mai duni. Agora ami hotu halibur hamutuk iha nee iha Maromak nia oin hodi rona saida mak Nai Maromak haruka ita atu foo sai mai ami.”
ACT 10:34 Pedro dehan, “Agora hau foin hatene katak Maromak haree ema hotu-hotu hanesan.
ACT 10:35 Ema husi nasaun nebee deit mak hamtauk Maromak i moris tuir Maromak nia hakarak, Maromak simu nia.
ACT 10:36 Imi hatene Liafuan Diak nebee mak Maromak foo sai ona ba ami ema Israel. Liafuan Diak nee dehan, ita ema bele dame malu ho Maromak liu husi Jesus Kristu, Salvador nebee Maromak haruka mai. Jesus Kristu nee mak ema hotu-hotu nia Nai.
ACT 10:37 Imi mos hatene saida mak akontese iha provinsia Galileia too iha provinsia Judeia tomak, komesa husi João haruka ema hakribi sira nia sala hodi simu batizmu.
ACT 10:38 Imi rona ona katak Maromak foo Nia Espiritu Santu ho Nia kbiit ba Jesus, Ema Nazaré. Maromak hamutuk ho Nia, nunee Nia baa iha nebee-nebee hodi halo diak ba ema i kura ema nebee Satanás halo terus.
ACT 10:39 Ami haree ho ami nia matan rasik, saida mak Nia halo iha sidade Jerusalém ho mos iha ema Judeu nia rai tomak. Ema prega Jesus iha krus too mate.
ACT 10:40 Maibee iha loron tolu, Maromak halo Nia moris fali depois hatudu sai ba ema balu.
ACT 10:41 Laos ema hotu-hotu haree Nia, so ami deit. Ami nee, Maromak hili antes tiha ona atu sai sasin kona ba Jesus. Bainhira Jesus moris fila fali, ami mak baibain haan-hemu hamutuk ho Nia.
ACT 10:42 Nunee Nia haruka ami baa foo sai Liafuan Diak ba ema iha fat-fatin. Nia haruka ami foo sasin katak, Maromak foti ona Jesus nee atu tesi lia ba ema moris ho ema mate.
ACT 10:43 Profeta sira hotu-hotu foo sai kona ba Jesus katak, see mak fiar ba Jesus, Maromak sei hamoos nia sala liu husi Nia.”
ACT 10:44 Pedro sei koalia hela nunee, derepenti Espiritu Santu tuun ba ema hotu nebee rona nia liafuan.
ACT 10:45 Bainhira sarani Judeu sira nebee ohin mai hamutuk ho Pedro haree ema nebee laos Judeu nee simu Espiritu Santu, sira admira.
ACT 10:46 Tanba sira rona ema sira nee hahii Maromak hodi koalia lian oi-oin nebee sira nunka aprende. Depois Pedro dehan,
ACT 10:47 “Haree ba! Ema sira nee simu ona Espiritu Santu hanesan mos ita. Entaun la iha ema ida mak atu bandu dehan la bele foo sarani sira ho bee.”
ACT 10:48 Nunee Pedro hatete ba sira atu simu batizmu ona hodi Jesus Kristu nia naran. Sarani hotu tiha, sira husu ba Pedro atu hela tan loron ida-rua ho sira.
ACT 11:1 Apostolu sira ho sarani sira seluk iha provinsia Judeia rona dehan, ema nebee laos Judeu mos simu ona Maromak nia liafuan.
ACT 11:2 Bainhira Pedro baa too iha Jerusalém, iha sarani Judeu balu foo sala ba nia.
ACT 11:3 Sira dehan, “Nusaa mak o baa tama fali ema nebee laos Judeu nia uma hodi haan hamutuk ho sira tan?!”
ACT 11:4 Nunee Pedro konta buat hotu-hotu nebee akontese husi huun too rohan. Nia dehan,
ACT 11:5 “Loron ida iha sidade Jope, hau halo hela orasaun, Maromak hatudu hanesan mehi ida mai hau. Hau haree buat ida hanesan lensol boot, nia lidun haat kesi ho tali, tuun husi lalehan mai too iha hau nia oin.
ACT 11:6 Bainhira hau fihir tama ba lensol laran, hau haree animal oi-oin. Iha animal ain haat, animal fuik, animal nebee dolar iha rai, ho manu fuik oi-oin. Animal sira nee hotu, ita ema Judeu la bele haan.
ACT 11:7 Depois hau rona lian ida dehan, ‘Pedro, hamriik ona! Oho animal sira nee hodi haan ba!’
ACT 11:8 Hau hataan, ‘La bele, Nai! Hau nunka haan animal foer, animal nebee lei Moisés nian bandu.’
ACT 11:9 Maibee lian husi lalehan nee dehan tan, ‘Buat nebee Maromak dehan bele haan ona, o la bele konsidera foer tan.’
ACT 11:10 Nee akontese dala tolu, depois lensol ho animal sira nee sae fali ba lalehan.
ACT 11:11 Iha momentu nee kedas, iha ema nain tolu husi sidade Sezareia too mai iha uma, komandante Roma ida mak haruka sira mai atu buka hau.
ACT 11:12 Maromak nia Espiritu foo hatene mai hau atu la bele laran ru-rua hodi akompanha sira, maski sira laos ema Judeu. Depois ita nia maluk sarani nain neen nee akompanha hau baa too iha Sezareia, i ami hotu tama ba iha komandante nee nia uma.
ACT 11:13 Nia konta ba ami dehan, nia haree ona anju ida hamriik iha nia uma hodi hatete, ‘Haruka ema ba Jope bolu Simão Pedro.
ACT 11:14 Nia sei foo hatene oinsaa Maromak bele salva o ho o nia uma laran tomak.’
ACT 11:15 Hau foin hahuu foo sai Liafuan Diak, Espiritu Santu tuun kedas ba sira, hanesan mos uluk Nia tuun mai ita.
ACT 11:16 Haree sira simu Espiritu Santu nunee, hau hanoin fali Nai Jesus nia liafuan nebee dehan, ‘Uluk João foo sarani ema hodi bee, maibee Maromak sei foo sarani imi hodi Espiritu Santu.’
ACT 11:17 Maromak rasik mak foo Nia Espiritu Santu ba sira nebee laos ema Judeu, hanesan lo-loos uluk Nia foo mai ita bainhira ita fiar ba Nai Jesus Kristu. Entaun hau atu taka dalan ba Maromak oinsaa?”
ACT 11:18 Rona nunee, sira la foo sala ba nia tan. Sira komesa hahii Maromak dehan, “Entaun Maromak loke ona dalan ba ema nebee laos Judeu, atu sira bele husik sira nia sala hodi moris hamutuk ho Nia.”
ACT 11:19 Uluk bainhira ema oho Estevão, ema mos komesa halo terus sarani sira too sira halai namkari. Agora sira balu too ona iha provinsia Fenísia, balu too iha rai Xipre, i balu too iha sidade Antiokia. Sira foo sai nafatin Liafuan Diak, maibee sira so foo sai ba ema Judeu deit.
ACT 11:20 Maski nunee iha mos ema sarani balu husi ilha Xipre ho husi sidade Sirene, sira baa iha sidade Antiokia. Sira mos foo sai Nai Jesus nia Liafuan Diak ba ema nebee laos Judeu.
ACT 11:21 Nai Maromak foo Nia kbiit ba sira, too ema barak teb-tebes fiar hodi tuir Nai Jesus.
ACT 11:22 Bainhira sarani sira iha Jerusalém rona dehan ema iha Antiokia mos fiar ona ba Jesus, sira haruka Barnabé baa iha nebaa.
ACT 11:23 Nia ema ida nebee laran diak, fiar makaas ba Maromak, i Espiritu Santu sempre domina nia. Too iha nebaa, Barnabé haree Maromak foo ona bensaun ba sira. Nunee nia laran haksolok. Nia husu ba sira atu sira tuir nafatin Nai Jesus ho laran tomak. I ema barak tan komesa fiar ba Nai Jesus.
ACT 11:25 Hotu tiha Barnabé baa iha sidade Tarsu hodi buka Saulo.
ACT 11:26 Bainhira nia hetan tiha, nia lori Saulo fila fali ba Antiokia. Durante tinan ida tomak sira nain rua hamutuk ho sarani sira iha nebaa, i sira hanorin ema barak. Iha Antiokia nee mak foin ema komesa hanaran sarani sira Kristaun.
ACT 11:27 Bainhira sira nain rua sei iha Antiokia, iha profeta balu mai husi Jerusalém.
ACT 11:28 Ida naran Ágabu. Maromak nia Espiritu foo hatene liu husi nia dehan, rai sei hamlaha boot iha mundu tomak. Buat nee akontese duni bainhira liurai Cláudio ukun iha Roma.
ACT 11:29 Rona Ágabu nia liafuan nee, sarani sira iha Antiokia koalia hamutuk atu haruka ajuda ba sarani sira iha provinsia Judeia. Sira ida-idak foo tuir buat nebee sira iha.
ACT 11:30 Depois sira entrega oferta nee ba Barnabé ho Saulo hodi lori ba iha responsavel sarani sira nian iha Jerusalém.
ACT 12:1 Iha tempu nee, liurai Herodes kaer sarani sira balu atu halo terus.
ACT 12:2 Nia haruka ema oho João nia maun Tiago ho surik.
ACT 12:3 Bainhira Herodes haree katak Tiago nia mate nee halo nai ulun Judeu sira haksolok, nia kaer tan Pedro iha tempu Festa Paun la Tau Fermentu.
ACT 12:4 Depois nia lori Pedro baa hatama iha kadeia, i entrega ba soldadu grupu haat hodi hein loron-kalan. Grupu ida iha ema nain haat. Herodes hakarak hein too festa Paskua hotu mak foin tesi Pedro nia lia iha ema barak nia oin.
ACT 12:5 Nunee Pedro iha kadeia, maibee sarani sira halo orasaun beibeik ho laran tomak atu Maromak tau matan ba nia.
ACT 12:6 Hela deit loron ida atu Herodes tesi Pedro nia lia, iha kalan Pedro toba dukur hela iha soldadu rua nia klaran, nia liman kesi ho korenti rua. Iha tan soldadu balu hein iha kadeia nia odamatan.
ACT 12:7 Derepenti deit Nai Maromak nia anju ida mosu, i kuartu nee sai naroman tiha. Anju nee baku Pedro nia sorin para fanu nia hodi dehan, “Hadeer lalais!” Korenti mos namkore kedas husi Pedro nia liman.
ACT 12:8 Depois anju hatete ba nia, “Hatais o nia faru, i tau o nia sandalias.” Pedro mos halo tuir. Anju dehan tan, “Hatais o nia batina hodi tuir hau.”
ACT 12:9 Pedro tuir anju nee sai husi kadeia laran. Nia la hatene katak buat nee realidade, nia hanoin mehi deit.
ACT 12:10 Sira lao liu husi soldadu nebee halo seguransa iha fatin rua. Depois sira too iha odamatan besi atu sai ba sidade. Odamatan nee mesak nakloke, i sira nain rua sai ba liur. Sira lao tuir estrada ida, derepenti anju nee lakon tiha, husik hela Pedro mesak.
ACT 12:11 Nee mak foin Pedro hatene saida mak akontese. Nia dehan, “Loos duni, Nai Maromak haruka tiha ona Nia anju mai hasai hau husi Herodes nia liman laran. Anju nee salva hau husi buat aat hotu nebee mak ema Judeu sira atu halo mai hau.”
ACT 12:12 Bainhira nia hatene ona nunee, Pedro baa iha João nia inan Maria nia uma, João nee ema mos bolu Marcos. Iha nebaa ema barak halibur hamutuk halo hela orasaun.
ACT 12:13 Pedro too iha uma nee, nia tuku odamatan. Iha menina ida naran Roda servisu iha uma nee, nia baa haree see mak mai nee.
ACT 12:14 Rona Pedro nia lian, nia hatene kedas. Nia kontenti demais, entaun nia la hanoin atu loke odamatan, nia halai ba laran hodi hatete ba sira, “Pedro iha hela odamatan liur!”
ACT 12:15 Sira hataan, “O bulak karik!” Maibee nia hatete nafatin, “Tebes! Pedro iha liur nebaa.” Sira hataan fali, “Karik Pedro nia anju da guarda.”
ACT 12:16 Maibee Pedro tuku odamatan nafatin. Bainhira sira loke odamatan, sira haree nia, sira hakfodak.
ACT 12:17 Pedro halo sinal ho liman para sira nonook. Depois nia konta oinsaa Nai Maromak hasai nia husi kadeia. Nia dehan, “Imi baa foo hatene buat hirak nee hotu ba Tiago ho maluk sarani sira seluk.” Depois nia sai ba fatin seluk.
ACT 12:18 Iha aban dadeer-saan, soldadu sira haree Pedro la iha tiha ona, sira mos laran susar ho konfuzaun.
ACT 12:19 Depois Herodes haruka ema baa buka Pedro tuun-sae, maibee sira la hetan. Entaun Herodes litik soldadu sira nebee halo seguransa nee. Hotu tiha nia haruka oho sira. Depois Herodes sai tiha husi provinsia Judeia, baa hela iha sidade Sezareia.
ACT 12:20 Iha tempu nebaa Herodes hirus loos ema sidade Tiru ho Sidon. Maibee sira presiza hahaan husi Herodes nia rain. Entaun sira hamutuk haruka delegasaun atu hasoru malu ho nia. Too iha Sezareia, sira hetan apoiu husi liurai nia funsionariu boot ida naran Blastu, i sira husu atu bele dame malu fali ho Herodes.
ACT 12:21 Sira marka loron para hasoru malu ho Herodes. Iha loron nee, Herodes hatais tiha hena liurai nian depois baa tuur iha nia kadeira ukun nian hodi hatoo liafuan ba sira.
ACT 12:22 Sira komesa haklalak dehan, “Nee laos ema nia lian, nee ita nia maromak ida nia lian!”
ACT 12:23 Derepenti deit Nai Maromak nia anju foo moras todan ida ba Herodes, tanba nia husik deit ema sira nee hahii nia, nia la haruka sira hahii Maromak. Entaun ular haan nia isin too mate.
ACT 12:24 Maibee ema barak liu tan rona Maromak nia liafuan, i sarani sira aumenta ba beibeik.
ACT 12:25 Bainhira Barnabé ho Saulo lori tiha sarani Antiokia sira nia oferta ba Jerusalém, sira fila fali ba Antiokia. Sira lori ho ema ida naran João, ema mos bolu nia Marcos.
ACT 13:1 Sarani sira iha sidade Antiokia, balu profeta hodi foo tutan Maromak nia lia menon, i balu mestri hodi hanorin Maromak nia liafuan. Sira nee mak: Barnabé, Simeão, ema mos bolu Metan, Lúcio husi sidade Sirene, Manaen, nia liurai Herodes nia kolega komesa sira sei kiik, ho mos Saulo.
ACT 13:2 Iha loron ida, sira halo jejun hodi adora Nai Maromak, Espiritu Santu dehan ba sira, “Haketak Barnabé ho Saulo mai Hau atu halao servisu nebee Hau prepara tiha ona ba sira.”
ACT 13:3 Entaun sira halo orasaun ho jejun tan, depois sira tau liman ba Barnabé ho Saulo hodi haruka sira baa halao servisu nee.
ACT 13:4 Nunee Espiritu Santu haruka Barnabé ho Saulo baa. João Marcos mos akompanha hodi ajuda sira. Sira lao uluk ba iha sidade Seléusia, depois sae roo ba rai Xipre, i tuun iha sidade Salamina. Too iha nebaa, sira tama-sai ema Judeu nia uma kreda hodi foo sai Maromak nia liafuan.
ACT 13:6 Depois sira lao husi aldeia ba aldeia iha rai Xipre tomak too iha sidade Pafos. Iha Pafos nee, sira hetan matan-dook ida naran Barjesus. Nia ema Judeu, i sempre lohi ema dehan nia Maromak nia profeta.
ACT 13:7 Nia belun diak ho governador rai nee, naran Sérgio Paulo. Governador nee ema matenek, i nia haruka ema baa bolu Barnabé ho Saulo, tanba nia hakarak rona Maromak nia liafuan.
ACT 13:8 Maibee Barjesus tau lia ba governador para la bele fiar ba Jesus. Barjesus nee nia naran seluk Elimas, nee katak “matan-dook”.
ACT 13:9 Depois Espiritu Santu domina Saulo, ema mos bolu Paulo. Nia fihir di-diak ba matan-dook nee hodi dehan,
ACT 13:10 “O nee Satanás nia oan! O bosok-teen, i o nia laran nakonu ho buat aat. Buat hotu-hotu nebee diak, o kontra hotu. O sempre bobar lia loos kona ba Nai Maromak.
ACT 13:11 Tanba nee, Nai Maromak sei kastigu o. O nia matan sei delek tiha, too o la haree tan loro matan nia naroman durante tempu ida.” Derepenti abu-abu nakukun ida taka tiha nia, too nia la haree buat ida. Nia lamas ba-mai buka ema para kaer nia liman hodi hatudu dalan ba nia.
ACT 13:12 Bainhira governador haree saida mak akontese, nia fiar ba Jesus. Nia admira ho apostolu sira nia hanorin kona ba Nai Jesus.
ACT 13:13 Husi sidade Pafos, Paulo ho nia kolega sira sae roo hodi baa iha sidade Perga iha provinsia Panfília. Too iha nebaa, João Marcos lao husik hela sira hodi fila ba Jerusalém.
ACT 13:14 Husi Perga, sira lao ain ba iha sidade Antiokia iha provinsia Pisídia. Iha loron Sabadu, Paulo ho Barnabé baa tuur iha ema Judeu sira nia uma kreda.
ACT 13:15 Iha nebaa ema lee liafuan balu husi Moisés nia livru ho mos livru profeta sira nian. Depois responsavel sira iha uma kreda nee haruka ema baa husu ba Paulo ho Barnabé dehan, “Maun sira, se imi iha liafuan ruma atu foo sai mai ami para hametin ami nia laran, halo favor bele koalia.”
ACT 13:16 Entaun Paulo hamriik, i halo sinal ho liman husu para sira nonook. Depois nia hahuu koalia dehan, “Israel oan sira ho imi husi nasaun seluk nebee adora Maromak, rona mai!
ACT 13:17 Maromak, Ida nebee ita ema Israel adora nee, hili ita nia bei-ala sira hori uluk. Nia halo sira nia jerasaun aumenta barak durante sira hela nudar ema lao rai iha Ejitu. Too ikus Maromak hatudu Nia kbiit boot hodi hasai sira husi Ejitu nee.
ACT 13:18 Durante tinan haat-nulu sira iha rai fuik maran, Maromak pasiensia ho sira nia hahalok.
ACT 13:19 Ikus mai, Maromak halo lakon tiha nasaun hitu iha rai Kanaán hodi foo rai nee ba ita nia bei-ala sira para sai sira nian.
ACT 13:20 Nee hotu haan tinan atus haat lima-nulu. Depois Maromak foti juis hodi ukun sira, too tempu profeta Samuel.
ACT 13:21 Bainhira Samuel ukun sira, ita nia bei-ala sira husu para bele iha liurai. Nunee Maromak foti Kis nia oan Saul, husi suku Benjamim sai liurai, i Saul ukun durante tinan haat-nulu.
ACT 13:22 Depois Maromak hatuun tiha Saul hodi foti fali David sai liurai. Maromak dehan, ‘Jessé nia oan David nee monu ba Hau nia laran. Nia sei halo tuir hotu buat nebee Hau hakarak.’
ACT 13:23 Maromak promete atu haruka David nia Jerasaun ida mai hodi salva povu Israel. Salvador nee mak Jesus.”
ACT 13:24 “Molok Jesus hahuu Nia servisu, João foo sai ba ema Israel tomak katak sira tenki hakribi sira nia sala hodi simu batizmu.
ACT 13:25 Maibee bainhira João nia servisu atu remata, nia hatete, ‘Imi hanoin hau nee see? Imi hanoin hau mak Ida nebee imi hein hela nee ka? Lae. Maibee Ema nee atu mai ona. Nia boot liu hau. Atu kore deit Nia sandalias talin mos, hau la serve.’
ACT 13:26 Maun-alin sira, imi nebee Abraão nia jerasaun, ho mos imi husi nasaun seluk nebee hamtauk ba Maromak. Liafuan Diak kona ba salvasaun nee, Maromak hatoo tiha ona mai ita.
ACT 13:27 Povu Jerusalém ho sira nia nai ulun sira la hatene katak, Jesus nee mak Ema nebee atu mai salva sira. Sira la kompriende profeta sira nia liafuan nebee Sabadu-Sabadu ema lee sai iha uma kreda. Tanba nee, sira desidi kastigu mate Jesus. Maibee sira nia hahalok nee tuir lo-loos profeta sira nia liafuan nebee sira rona beibeik nee.
ACT 13:28 Sira la hetan razaun ida para hamonu kastigu mate ba Jesus. Bele nunee mos, sira husu ba governador Pilatus atu haruka ema oho Nia.
ACT 13:29 Depois sira halo tuir hotu buat nebee hakerek ona iha Livru Sagradu kona ba Jesus. Hotu tiha sira hatuun fila fali Nia mate isin husi krus hodi lori baa haloot iha rate.
ACT 13:30 Maibee Maromak halo Jesus moris fali husi mate.
ACT 13:31 Bainhira Jesus moris fila fali, Nia hatudu Aan fila-fila durante loron barak nia laran ba ema sira nebee uluk lao hamutuk ho Nia husi provinsia Galileia too Jerusalém. Sira nee mak agora sai sasin ba ita nia povu Israel nee.”
ACT 13:32 Paulo hatutan tan dehan, “Ami nain rua hatoo Liafuan Diak ba imi kona ba buat nebee mak Maromak promete ona ba ita nia bei-ala sira.
ACT 13:33 Ba ita nebee sira nia jerasaun, Maromak kumpri ona promesa nee bainhira Nia halo Jesus moris fali husi mate. Nee tuir liafuan nebee hakerek iha livru Salmus kapitulu rua dehan, ‘O nee Hau nia Oan. Ohin loron Hau deklara katak Hau nee O nia Aman.’
ACT 13:34 Hori uluk Maromak promete ona dehan, Nia sei halo Jesus moris fali, i Jesus sei la mate tan. Nunee Maromak halo tuir Nia liafuan nebee dehan, ‘Bensaun nebee uluk Hau promete atu foo ba David, agora Hau sei foo ba imi.’
ACT 13:35 Iha Salmus seluk mos hatete, ‘Maromak la husik Nia Ema Santu nia isin dodok iha rate laran.’
ACT 13:36 Nee laos koalia kona ba liurai David. Tanba liurai David serbi nia povu tuir Maromak nia hakarak, depois nia mate. Ema hakoi nia hamutuk ho nia bei-ala sira, i nia mate isin dodok tiha ona.
ACT 13:37 Maibee Salmus nee koalia kona ba Ema ida nebee Maromak halo moris fali husi mate, Ema nee nia mate isin la dodok.
ACT 13:38 Nee duni maun-alin sira, ami foo sai ba imi para imi hatene, so liu husi Jesus deit mak ita bele hetan perdaun.
ACT 13:39 Nee dehan katak, see-see deit mak fiar ba Jesus, Maromak hamoos hotu nia sala hodi simu nia. Moisés nia lei la bele halo ita sai moos iha Maromak nia oin.
ACT 13:40 Kuidadu para buat nebee Maromak hatoo liu husi profeta sira la bele akontese ba imi. Sira dehan,
ACT 13:41 ‘Imi nebee gosta hatete aat Hau, rona mai! Imi sei admira, depois mohu tiha. Tanba Hau atu halo buat ruma iha imi nia tempu. Ema konta buat nee ba imi mos, imi sei la fiar.’ ”
ACT 13:42 Hotu tiha Paulo ho Barnabé sai husi uma kreda. Sira sai dadauk, ema sira iha nebaa husu atu Sabadu oin sira fila fali mai hodi esplika buat sira nee diak liu tan.
ACT 13:43 Bainhira sira hotu sai, ema Judeu ho mos ema laos Judeu nebee hamtauk Maromak, barak lao tuir Paulo ho Barnabé. I apostolu nain rua nee koalia tan ho sira hodi foo hanoin ba sira atu laran metin nafatin ba Maromak, tanba Nia hatudu ona Nia laran diak ba sira.
ACT 13:44 Sabadu tuir mai, kuaze ema hotu iha sidade nee mai rona Maromak nia liafuan kona ba Nai Jesus.
ACT 13:45 Bainhira nai ulun Judeu sira haree ema barak mai rona Paulo ho Barnabé, sira laran moras. Nunee sira hatete aat Paulo i kontra nia liafuan.
ACT 13:46 Maibee Paulo ho Barnabé koalia ho aten brani dehan, “Maromak haruka ami foo uluk Nia Liafuan ba ema Judeu. Maibee imi lakohi simu. Nee hatudu katak imi la merese atu hetan moris rohan-laek. Nunee agora, ami sei lori Liafuan Diak nee ba ema nebee laos Judeu.
ACT 13:47 Tanba Nai Maromak foo ona orden mai ami dehan, ‘Hau foti ona o hanesan ahi-oan hodi lori naroman ba ema nebee laos Judeu, atu o lori Maromak nia salvasaun ba iha mundu tomak.’ ”
ACT 13:48 Bainhira ema sira nebee laos Judeu rona nunee, sira kontenti. Sira gaba Maromak nia liafuan kona ba Nai Jesus, i ema sira nebee mak Maromak desidi ona para hetan moris rohan-laek, sira hotu fiar ba Jesus.
ACT 13:49 Nunee Maromak nia liafuan kona ba Nai Jesus hatutan husi ibun ba ibun iha rejiaun nee tomak.
ACT 13:50 Maibee ema Judeu sira tau lia ba senhora balu nebee riku i hamtauk ba Maromak, ho mos ba nai ulun sira iha sidade nee. I sira tuu lia ba povu para halo terus Paulo ho Barnabé, too duni sai sira husi rejiaun nee.
ACT 13:51 Molok sira nain rua sai, sira hisik rai rahun husi sira nia ain hanesan sinal katak, ema iha sidade nee lakohi rona ba Maromak. I sira baa fali iha sidade Ikóniu.
ACT 13:52 Maibee sarani sira iha Antiokia laran haksolok, i Espiritu Santu domina sira.
ACT 14:1 Bainhira Paulo ho Barnabé too iha sidade Ikóniu, sira nain rua baa iha ema Judeu nia uma kreda, hanesan baibain. Iha nebaa sira hanorin kona loos ema nia laran, too ema Judeu ho mos ema nebee laos Judeu, barak fiar ba Jesus.
ACT 14:2 Maibee ema Judeu sira nebee lakohi fiar, sira tau lia ba ema balu nebee laos Judeu para odi sarani sira.
ACT 14:3 Maski nunee Paulo ho Barnabé hela kleur iha nebaa. Sira nain rua brani koalia kona ba Nai Jesus. I Nia foo kbiit ba sira hodi halo milagre ho sinal oi-oin nebee halo ema admira. Nunee Nia hatudu mo-moos katak buat nebee sira koalia kona ba Nia laran diak nee loos.
ACT 14:4 Povu iha sidade nee fahe ba rua. Balu tuir ema Judeu sira nebee lakohi fiar ba Jesus, ema seluk tuir apostolu sira.
ACT 14:5 Iha ema Judeu balu ho ema balu nebee laos Judeu, hamutuk ho sira nia boot sira, kombina malu atu halo terus apostolu sira i tuda sira ho fatuk.
ACT 14:6 Maibee sira nain rua rona kona ba planu nee, entaun sira halai. Sira baa sidade Listra ho Derbe iha provinsia Likaónia, ho mos ba rai sira nebee besik.
ACT 14:7 Iha nebaa sira foo sai nafatin Liafuan Diak.
ACT 14:8 Iha Listra, iha mane ida ain aat komesa nia moris mai, nia nunka lao. Nia tuur
ACT 14:9 hodi rona Paulo koalia. Paulo fihir di-diak nia, i haree katak ema nee fiar dehan Jesus bele kura nia.
ACT 14:10 Entaun nia bolu, “Hamriik ona!” Rona nunee, ema nee haksoit sae kedas i komesa lao.
ACT 14:11 Ema barak haree buat nebee Paulo halo, entaun sira hakilar ho sira nia lian Likaónia dehan, “Nee maromak nain rua nebee nakfilak aan ba ema hodi tuun mai iha mundu.”
ACT 14:12 Sira hanoin Barnabé mak sira nia maromak ida naran Zeus. I Paulo, sira hanoin dehan maromak Hermes, tanba baibain nia mak koalia.
ACT 14:13 Iha uma lulik ida besik loos sidade nee, baibain ema adora Zeus iha nebaa. Ema nebee toma konta uma lulik nee dada karau aman balu i kesi ai funan halo kabuar lori ba iha portaun sidade nee. Nia ho ema barak nee hakarak halo sakrifisiu hodi adora apostolu nain rua nee.
ACT 14:14 Maibee bainhira Barnabé ho Paulo rona katak ema atu adora sira, sira lees tiha sira nia ropa hanesan sinal katak sira la konkorda. I sira halai tama iha ema lubun boot nee nia leet hodi hakilar dehan,
ACT 14:15 “Maluk sira! Nusaa mak imi halo fali nunee? Ami laos Maromak! Ami nee ema hanesan mos imi. Ami mai hatoo Liafuan Diak ba imi, atu imi husik tiha imi nia lulik sira nebee la iha folin nee hodi tuir Maromak Moris. Nia mak halo lalehan, rai, tasi ho buat hotu-hotu iha laran.
ACT 14:16 Uluk Maromak husik nasaun sira moris tuir sira ida-idak nia hakarak.
ACT 14:17 Maibee Maromak hatudu sinal oi-oin atu nasaun hotu hatene katak, Maromak nee diak duni. Nia mak haruka udan mai imi. Nia mak halo imi nia toos foo ai haan tuir nia tempu. Nia mak foo hahaan ba imi, i halo imi nia laran kontenti.”
ACT 14:18 Maski Barnabé ho Paulo koalia nunee, maibee ema lubun boot nee ulun toos nafatin atu oho karau sira nee hodi halo sakrifisiu ba sira. Maibee too ikus sira nain rua konsege bandu sira.
ACT 14:19 Depois ema Judeu balu too mai husi sidade Antiokia ho Ikóniu. Sira tau lia ba povu hodi kontra apostolu nain rua, too sira mos tuda Paulo ho fatuk, i rasta nia sai husi sidade. Sira hanoin dehan nia mate tiha ona.
ACT 14:20 Maibee sarani sira mai hamriik haleu Paulo, depois nia mos hamriik fali hodi tama ba sidade. Aban fali nia ho Barnabé sai ba sidade Derbe.
ACT 14:21 Paulo ho Barnabé foo sai Liafuan Diak iha Derbe, i ema barak komesa tuir Jesus. Depois sira nain rua fila fali ba Listra. Husi nebaa sira lao ba Ikóniu, depois kontinua baa Antiokia iha provinsia Pisídia.
ACT 14:22 Iha fatin hirak nee, sira nain rua hametin sarani sira nia laran atu sira kaer metin nafatin sira nia fiar ba Jesus. Sira dehan, “Ita tenki hetan terus barak lai foin ita tama iha Maromak nia reinu iha lalehan.”
ACT 14:23 Paulo ho Barnabé foti ema balu sai responsavel ba sarani sira iha fatin ida-idak. Sira halo orasaun ho jejun hodi entrega responsavel sira ba Nai Jesus tanba sira laran metin ba Nia.
ACT 14:24 Paulo ho Barnabé kontinua lao liu husi provinsia Pisídia too iha provinsia Panfília.
ACT 14:25 Sira foo sai Maromak nia liafuan iha sidade Perga, depois baa iha sidade Atália.
ACT 14:26 Iha nebaa sira sae roo hodi fila ba sidade Antiokia iha provinsia Síria. Iha sidade nee mak sarani sira uluk entrega sira nain rua ba Maromak nia liman hodi halao Nia servisu. Agora sira nia servisu nee remata ona.
ACT 14:27 Too iha Antiokia, Paulo ho Barnabé halibur sarani sira hodi konta buat hotu-hotu nebee Maromak halo ona liu husi sira. Sira mos foo hatene dehan Maromak loke ona dalan ba ema sira nebee laos Judeu hodi fiar ba Jesus.
ACT 14:28 I sira nain rua hela kleur ho sarani sira iha nebaa.
ACT 15:1 Iha tempu nebaa ema sarani balu mai husi Judeia too iha Antiokia. Sira hanorin sarani sira dehan, “Se imi hakarak hetan salvasaun, imi tenki sunat tuir lisan nebee Moisés rai hela ba ita.”
ACT 15:2 Maibee Paulo ho Barnabé haksesuk malu makaas ho sira. Tanba sira kontra malu nunee, sarani sira desidi para haruka Paulo ho Barnabé ho mos sarani balu husi Antiokia lori problema nee ba apostolu sira ho responsavel sira iha Jerusalém.
ACT 15:3 Entaun sarani sira iha Antiokia haruka delegasaun nee baa. Sira lao liu husi provinsia Fenísia ho Samaria, i sira konta ba sarani sira iha nebaa katak, ema nebee laos Judeu mos fiar ona ba Jesus. Rona nunee sarani sira haksolok.
ACT 15:4 Bainhira sira too iha Jerusalém, apostolu sira ho responsavel sira ho mos sarani sira tomak simu sira ho diak. Paulo ho Barnabé foo hatene buat hotu nebee Maromak halo ona liu husi sira.
ACT 15:5 Maibee sarani Judeu balu husi grupu Farizeu hamriik hodi dehan, “Se ema nebee laos Judeu hakarak tuir Jesus, entaun sira tenki sunat ho mos tuir lei seluk nebee Maromak foo liu husi Moisés.”
ACT 15:6 Entaun apostolu sira ho responsavel sira halibur hamutuk hodi rezolve problema ida nee.
ACT 15:7 Sira diskuti ba-mai. Too ikus, Pedro hamriik hodi dehan, “Maun-alin sira, imi hatene katak, uluk Maromak hili hau husi imi atu lori Liafuan Diak ba ema sira nebee laos Judeu, atu sira mos bele fiar ba Jesus.
ACT 15:8 Maromak hatene ita ida-idak nia laran. Nia mak foo Espiritu Santu ba sira, hanesan uluk Nia foo ba ita. Ho nunee Maromak hatudu mai ita katak Nia simu sira.
ACT 15:9 Nia haree sira ho ita hanesan. Nia hamoos ona sira nia laran tanba sira fiar ba Jesus, hanesan mos Nia hamoos ona ita nia laran.
ACT 15:10 Entaun nusaa mak imi koko Maromak hodi foo todan ba sarani sira nebee laos Judeu nee?! Ita ho ita nia bei-ala sira nunka bele halo tuir Moisés nia lei tomak. Agora imi hakarak obriga fali sira halo tuir buat sira nee hotu ka?
ACT 15:11 La bele! Tanba ita fiar katak, liu husi ita nia Nai Jesus nia laran diak mak ita ema Judeu hetan salvasaun. Ema nebee laos Judeu mos nunee.”
ACT 15:12 Hotu tiha Barnabé ho Paulo konta milagre ho sinal oi-oin nebee Maromak halo liu husi sira iha ema laos Judeu nia leet. Ema nebee tuir enkontru nee nonook hodi rona.
ACT 15:13 Bainhira sira nain rua koalia hotu, Tiago dehan, “Maun-alin sira, imi rona hau lai!
ACT 15:14 Simão Pedro konta ona mai ita kona ba tempu nebee Maromak fo-foun hatudu Nia domin ba ema nebee laos Judeu hodi foti sira sai Nia povu.
ACT 15:15 Nee hanesan ho buat nebee Maromak foo sai liu husi Nia profeta sira nunee:
ACT 15:16 ‘David nia ukun monu tiha ona, nia uma naksobu tiha ona. Maibee too tempu ida, Hau sei fila fali mai hodi harii fila fali nia ukun, i halo metin fila fali.
ACT 15:17 Nunee ema husi nasaun sel-seluk bele mai buka Hau nudar sira nia Nai. Jentiu sira nebee Hau bolu tiha ona sai Hau nia povu, sei mai hotu. Hau, Nai Maromak mak koalia.
ACT 15:18 Hau foo hatene tiha ona buat sira nee hori uluk kedas.’ ”
ACT 15:19 Tiago hatutan tan dehan, “Nee duni tuir hau nia hanoin, ita keta foo todan ba ema laos Judeu nebee desidi atu tuir Maromak.
ACT 15:20 Ita tenki hakerek karta ida ba sira, para foo hatene dehan sira la presiza tuir ita nia lei hotu. Ita foo hanoin deit ba sira dehan, sira la bele haan naan nebee mak hamulak tiha ona ba lulik. Sira la bele halo sala seksual. Sira la bele haan animal nia raan. I la bele haan naan husi animal nebee la koa kakorok hodi hasai nia raan.
ACT 15:21 Buat sira nee laos foun ba sira. Tanba hori uluk too agora, Sabadu-Sabadu ema lee sai Moisés nia lei iha uma kreda Judeu nian hotu-hotu, i ema esplika lei nee iha aldeia ida-ida.”
ACT 15:22 Depois apostolu sira ho responsavel sira ho sarani sira hotu iha Jerusalém konkorda atu haruka ema baa foo hatene kona ba sira nia desizaun ba sarani sira iha sidade Antiokia. Sira hili ema nain rua nebee sarani sira respeita. Ida naran Judas, ema mos bolu Barsabás. Ida seluk naran Silas. Sira haruka ema nain rua nee baa hamutuk ho Paulo ho Barnabé.
ACT 15:23 Sira lori karta ida hakerek nunee: “Ba ami nia maluk sarani nebee laos Judeu iha sidade Antiokia, iha provinsia Síria tomak, ho mos provinsia Silísia. Kumprimentus husi ami apostolu ho responsavel sira iha Jerusalém.
ACT 15:24 Ami rona dehan, iha ema balu husi Jerusalém baa hanorin imi la loos, halo imi nia laran susar ho laran ru-rua kona ba salvasaun. Ema sira nee, laos ami mak haruka baa.
ACT 15:25 Entaun ami hotu laran ida desidi haruka ema balu ba imi atu hatoo rasik saida mak hakerek iha karta laran nee. Ami hili Judas ho Silas. Sira sei baa hamutuk ho ita nia maluk doben Barnabé ho Paulo. Barnabé ho Paulo nee foo aan ba mate tanba tuir ita nia Nai Jesus Kristu.
ACT 15:28 Espiritu Santu foo hatene ona ba ami, i ami mos konkorda atu la bele foo todan ba imi hodi obriga imi tuir lei Judeu nian tomak. Iha deit lei balu mak imi presiza halo tuir mak nee:
ACT 15:29 La bele haan naan nebee mak hamulak tiha ona ba lulik. La bele haan animal nia raan. La bele haan naan husi animal nebee la koa kakorok hodi hasai nia raan. La bele halo sala seksual. Se imi halo tuir buat hirak nee, diak ona. Mak nee deit. Adeus.”
ACT 15:30 Sira nain haat simu tiha karta nee, sira lori ba sidade Antiokia. Too iha nebaa, sira halibur sarani sira hotu hodi entrega karta nee ba sira.
ACT 15:31 Bainhira sarani sira lee tiha surat nee, sira haksolok, tanba liafuan nee hametin sira nia laran.
ACT 15:32 Judas ho Silas mos profeta, i sira koalia buat barak ba sarani sira hodi hametin sira nia laran i halo sira nia fiar sai forti.
ACT 15:33 Sira hela laduun kleur. Depois sira fila fali ba Jerusalém, lori kumprimentus husi sarani sira iha Antiokia ba sarani sira nebee mak haruka sira mai nee.
ACT 15:34 [Maibee Silas desidi hela nafatin iha nebaa.]
ACT 15:35 Maibee Paulo ho Barnabé hela iha Antiokia. Hamutuk ho ema barak tan, sira nain rua hanorin ho foo sai Maromak nia liafuan kona ba Nai Jesus.
ACT 15:36 Too loron ida Paulo hatete ba Barnabé, “Mai ita fila fali baa vizita fatin sira nebee uluk ita foo sai Nai Maromak nia liafuan. Ita baa haree took sarani sira nia moris oinsaa.”
ACT 15:37 Barnabé konkorda. Nia hakarak lori João baa hamutuk ho sira, João nee ema mos bolu Marcos.
ACT 15:38 Maibee Paulo lakohi lori nia, tanba uluk Marcos servisu hamutuk ho sira la too rohan, nia husik hela sira iha provinsia Panfília.
ACT 15:39 Paulo ho Barnabé diskuti malu makaas, too sira nain rua fahe malu. Barnabé lori Marcos baa sae roo hodi baa tiha rai Xipre.
ACT 15:40 Maibee Paulo hili Silas atu lao hamutuk ho nia. Sarani sira iha nebaa halo orasaun ba sira hodi entrega sira ba iha Nai Maromak nia liman. Depois sira nain rua baa ona.
ACT 15:41 Sira lao lemo-lemo iha provinsia Síria ho Silísia hodi hametin sarani sira nia laran.
ACT 16:1 Paulo ho Silas baa iha sidade Derbe, depois kontinua lao ba iha sidade Listra. Iha nebaa sira hasoru sarani ida naran Timóteo. Nia aman ema Gregu, nia inan ema Judeu nebee fiar ba Jesus.
ACT 16:2 Sarani sira iha Listra ho Ikóniu dehan Timóteo nee ema nebee diak.
ACT 16:3 Paulo hakarak Timóteo lao hamutuk ho sira. Maibee ema Judeu iha fatin nee hatene katak Timóteo seidauk sunat tuir lisan Judeu, tanba nia aman ema Gregu. Nunee Paulo sunat nia.
ACT 16:4 Depois sira lao husi sidade ba sidade hodi foo sai desizaun nebee apostolu sira ho responsavel sira foti ona iha Jerusalém para ema nebee laos Judeu bele halo tuir.
ACT 16:5 Ho nunee, sarani sira nia fiar metin liu tan, i loron ba loron, sarani sira aumenta barak ba beibeik.
ACT 16:6 Hotu tiha Espiritu Santu taka dalan para Paulo ho nia maluk sira la bele foo sai Liafuan Diak iha provinsia Ázia. Nunee sira lao haleu rejiaun Frígia ho Galásia.
ACT 16:7 Kuandu sira too iha fatin ida nebee baliza ho provinsia Mízia, sira buka atu tama ba iha provinsia Bitínia, maibee Jesus nia Espiritu la foo lisensa.
ACT 16:8 Nunee sira lao liu husi Mízia, too iha sidade Tróade.
ACT 16:9 Iha kalan nee, Maromak hatudu ba Paulo hanesan mehi ida. Nia haree mane ida husi provinsia Masedónia hamriik hela hodi husu makaas dehan, “Mai iha nee hodi ajuda lai ami.”
ACT 16:10 Paulo haree tiha nunee, ami hanoin katak Maromak haruka ami baa foo sai Liafuan Diak ba ema iha Masedónia. Nunee ami prepara aan kedas atu baa iha nebaa.
ACT 16:11 Ami sae roo iha sidade Tróade hodi baa rai Samotrásia. Aban fali ami lao ho roo nafatin too ami tuun iha sidade Neápolis.
ACT 16:12 Husi nebaa, ami lao ba iha Filipi, sidade prinsipal ida iha provinsia Masedónia, sidade nee governu Roma mak ukun. Ami hela loron ida-rua iha nebaa.
ACT 16:13 Loron Sabadu, ami lao sai uitoan husi sidade too iha mota ibun, tanba ami hanoin ema Judeu sira nia fatin orasaun iha nebaa. Too iha mota ibun, ami tuur koalia ho senhora balu nebee halibur malu hela iha nebaa.
ACT 16:14 Husi sira nee, iha ida naran Lídia husi sidade Tiatira. Senhora nee kontratu hena mesak folin kar-karun deit. Nia ema ida nebee adora Maromak. Bainhira nia rona Paulo nia liafuan, Nai Maromak loke nia laran hodi simu buat nebee Paulo koalia.
ACT 16:15 Depois ami foo sarani Lídia ho nia uma laran tomak. Hotu tiha nia konvida ami ba nia uma. Nia dehan, “Se imi konsidera hau fiar tebes ba Nai Jesus, entaun imi baa hela lai iha hau nia uma.” Nia husu beibeik, too ikus ami mos simu.
ACT 16:16 Iha loron ida, ami baa fali iha fatin orasaun nee, ami hasoru menina ida iha dalan. Nia ema nia atan. Espiritu aat tama iha nia, nunee nia bele foo hatene saida mak atu akontese aban-bainrua. Ema foo osan barak ba nia patraun para menina nee bele siik sira nia destinu.
ACT 16:17 Bainhira ami lao dadauk, menina nee hakilar tu-tuir ami dehan, “Ema sira nee serbi Maromak Aas Liu! Sira mai hatudu dalan ba imi, oinsaa imi bele hetan salvasaun.”
ACT 16:18 Loro-loron nia hakilar nunee, too Paulo la aguenta ona. Entaun nia fila oin ba menina nee hodi foo orden ba espiritu aat nee dehan, “Hodi Jesus Kristu nia naran, hau haruka o sai husi nia!” I espiritu aat nee sai kedas.
ACT 16:19 Menina nee nia patraun sira hatene katak sira nia atan la bele manaan tan osan ba sira. Entaun sira kaer Paulo ho Silas, rasta ba iha nai ulun sira nia oin, iha merkadu.
ACT 16:20 Sira lori Paulo ho Silas too iha justisa nain sira nia oin hodi dehan, “Ema sira nee ema Judeu. Sira halo rungu-ranga iha ita nia sidade nee,
ACT 16:21 tanba sira mai hanorin fali sira nia lisan. Lisan nee, ita ema Roma la bele simu, i la bele halo tuir.”
ACT 16:22 Rona nunee, ema lubun boot iha nebaa hirus teb-tebes too atu baku Paulo ho Silas. Justisa nain sira haruka ema lees sai tiha sira nain rua nia ropa, depois baku sira ho rota.
ACT 16:23 Sira baku Paulo ho Silas too dolar, depois lori baa sulan iha kadeia laran. Justisa nain sira haruka xefi kadeia halo seguransa metin ba sira nain rua.
ACT 16:24 Nunee xefi hatama sira ba iha kadeia segredu. Iha nebaa sira nia ain hatama ba iha ai kabelak kuak.
ACT 16:25 Iha kalan boot, Paulo ho Silas halo orasaun ho kanta hodi hahii Maromak. Ema dadur sira seluk iha kadeia rona hela.
ACT 16:26 Derepenti deit rai nakdoko makaas, too uma tomak nakdoko. Odamatan kadeia nian nakloke hotu, korenti nebee kesi ema dadur sira mos namkore hotu.
ACT 16:27 Iha momentu nee, xefi kadeia hadeer, nia haree odamatan kadeia nian nakloke hotu. Haree nunee, nia hanoin ema dadur sira halai tiha ona, entaun nia losu nia surik atu oho aan.
ACT 16:28 Maibee Paulo bolu ho lian makaas dehan, “La bele oho aan! Ami hotu sei iha nee.”
ACT 16:29 Xefi kadeia husu ahi-oan, i halai tama ba kadeia laran. Nia tauk ho nakdedar hodi hakneak iha Paulo ho Silas nia ain.
ACT 16:30 Depois nia lori sira sai husi kadeia laran, i nia husu dehan, “Senhor sira, hau tenki halo saida atu hau bele hetan salvasaun?”
ACT 16:31 Sira nain rua hataan, “Fiar ba Nai Jesus mak Maromak sei salva ita. Nunee mos ho ita nia uma laran tomak.”
ACT 16:32 Depois Paulo ho Silas esplika Maromak nia liafuan kona ba Nai Jesus ba xefi kadeia ho ema hotu nebee iha hela nia uma.
ACT 16:33 Iha oras nee kedas, xefi nee lori Paulo ho Silas baa hamoos sira nia kanek. I sira foo sarani nia ho mos ema hotu nebee hela iha nia uma laran.
ACT 16:34 Depois nia lori sira nain rua ba iha nia uma hodi foo hahaan ba sira. Nia ho ema hotu iha nia uma laran kontenti teb-tebes tanba fiar ona ba Maromak.
ACT 16:35 Iha aban dadeer-saan, justisa nain sira haruka polisia hatoo orden ba xefi kadeia para hasai tiha Paulo ho Silas husi kadeia.
ACT 16:36 Nunee xefi foo hatene ba Paulo dehan, “Justisa nain sira foo orden ona atu hasai ita ho Silas. Entaun senhor sira bele baa ona. Fila ho laran hakmatek!”
ACT 16:37 Maibee Paulo hatete ba polisia sira, “Ami ema sidadaun Roma. Nunee ami iha direitu atu governu tesi ami nia lia lai mak foin bele kastigu ami. Maibee sira seidauk buka hatene ami nia sala saida, sira baku uluk ami iha ema barak nia oin. Depois sira hatama ami ba kadeia. Agora sira hakarak atu hasai ami nonook husi kadeia ka?! Nee la bele! Haruka ema boot sira mai rasik hodi akompanha ami sai.”
ACT 16:38 Polisia sira nee baa hatoo Paulo nia lia menon nee ba justisa nain sira. Bainhira sira rona katak Paulo ho Silas sidadaun Roma, sira tauk teb-tebes.
ACT 16:39 Nunee justisa nain sira baa iha kadeia. Sira husu deskulpa ba Paulo ho Silas, depois lori sira nain rua sai husi kadeia, i husu atu sira sai tiha husi sidade nee.
ACT 16:40 Bainhira Paulo ho Silas sai tiha husi kadeia, sira baa tan iha Lídia nia uma. Iha nebaa sira koalia ho sarani sira hodi hametin sira nia laran, depois sira sai husi sidade nee.
ACT 17:1 Paulo ho Silas kontinua sira nia viajen liu husi sidade Anfípolis ho Apolónia, too sidade Tesalónika. Iha sidade nee, iha uma kreda ema Judeu nian.
ACT 17:2 Entaun Paulo baa tama iha uma kreda nee, tanba iha nebee-nebee deit nia baibain halo hanesan nee. Durante Sabadu tolu tu-tuir malu nia foti liafuan husi Livru Sagradu hodi diskuti ho sira.
ACT 17:3 Nia esplika liafuan nee ba sira hodi hatudu katak Mesias, Salvador nebee Maromak haruka mai tenki hetan terus too mate, depois moris fila fali. Paulo hatete, “Jesus ida nebee hau foo sai ba imi nee mak Mesias.”
ACT 17:4 Iha ema barak simu Paulo nia liafuan, i sira tuir Paulo ho Silas. Sira nee mak ema Judeu balu, ema Gregu barak nebee hamtauk Maromak, ho mos senhora balu nebee naran boot iha sidade nee.
ACT 17:5 Maibee ema Judeu sira balu laran moras ba Paulo ho Silas. Nunee sira halibur ema bandidu sira husi merkadu hodi halo rungu-ranga boot iha sidade laran. Depois ema lubun boot nee asalta ema ida naran Jason nia uma hodi buka Paulo ho Silas atu bele dada sira sai mai iha ema barak nee nia oin.
ACT 17:6 Maibee sira buka la hetan. Nunee sira kaer fali Jason ho ema sarani balu hodi lori ba iha justisa nain sidade nee ninian. Too iha nebaa sira hakilar dehan, “Ema sira nebee halo rungu-ranga iha mundu tomak, agora tama ona iha ita nia sidade,
ACT 17:7 i Jason simu sira iha nia uma. Ema sira nee hotu kontra liurai boot César nia lei. Sira dehan Ema ida naran Jesus mak Liurai.”
ACT 17:8 Rona nunee, justisa nain sira ho ema lubun boot nee konfuzaun.
ACT 17:9 Justisa nain sira haruka Jason ho sarani sira seluk selu multa para sira la bele halo tan. Depois justisa nain sira husik tiha sira.
ACT 17:10 Iha kalan nee kedas, sarani sira iha sidade Tesalónika haruka Paulo ho Silas ba iha sidade Bereia. Too iha nebaa, sira baa tama iha uma kreda ema Judeu nian hodi hanorin.
ACT 17:11 Ema Judeu sira iha Bereia, sira nia laran nakloke atu rona Paulo nia hanorin, laos hanesan ema Tesalónika. Sira haksolok teb-tebes simu Liafuan Diak kona ba Jesus. Loro-loron sira lee Livru Sagradu hodi buka hatene, Paulo nia liafuan nee loos ka lae.
ACT 17:12 Ema Judeu barak fiar ba Jesus. Nunee mos senhora Gregu balu nebee naran boot ho mos mane Gregu barak.
ACT 17:13 Maibee bainhira ema Judeu sira iha Tesalónika rona dehan Paulo hanorin Maromak nia liafuan iha Bereia, sira baa tau lia ba ema sira iha nebaa para kontra Paulo.
ACT 17:14 Entaun sarani sira iha Bereia lori sai kedas Paulo ba iha tasi ibun. Maibee Silas ho Timóteo hela nafatin iha Bereia.
ACT 17:15 Sarani sira nebee akompanha Paulo nee baa hamutuk ho nia too iha sidade Atenas. Depois sira fila fali ba Bereia, sira lori lia menon husi Paulo atu Silas ho Timóteo baa lalais hasoru nia iha nebaa.
ACT 17:16 Bainhira Paulo sei hein hela Silas ho Timóteo iha Atenas, nia laran susar teb-tebes, tanba nia haree estatua lulik iha nebee-nebee.
ACT 17:17 Nunee Paulo baa iha uma kreda ema Judeu nian hodi diskuti ho ema Judeu ho mos ema laos Judeu nebee mak hamtauk Maromak. Loro-loron nia mos baa iha merkadu hodi koalia ho ema see deit mak iha nebaa.
ACT 17:18 Depois ema matenek balu husi grupu Epikureu ho grupu Estoiku komesa diskuti malu ho nia. Kuandu Paulo foo sai Liafuan Diak kona ba Jesus ho mos kona ba ema mate moris fali, matenek nain sira nee balu dehan, “Regador nee koalia saida mak nee?!” Balu tan hatete, “Keta halo be nia haklaken kona ba rai seluk nia maromak fali.”
ACT 17:19 Depois sira lori Paulo ba iha fatin nebee matenek nain sira baibain halibur malu, iha foho kiik ida naran Areópagu. Too iha nebaa, sira husu ba nia, “Buat nebee senhor hanorin nee foun. Ami hakarak hatene senhor hanorin saida loos.
ACT 17:20 Tanba buat nebee senhor koalia nee, ami foin rona, i ami hakarak kompriende di-diak.”
ACT 17:21 Sira husu nunee tanba ema Atenas sira ho ema estranjeiru sira nebee hela iha sidade nee gosta loos rona ideia foun hodi debate ideia sira nee, too la foo tempu ba buat seluk.
ACT 17:22 Entaun Paulo hamriik iha ema matenek nain sira nia oin hodi hataan nunee: “Ema Atenas sira, hau haree imi badinas teb-tebes moris tuir relijiaun.
ACT 17:23 Tanba bainhira hau lao lemo-lemo iha sidade nee, hau haree imi iha fatin oi-oin hodi adora lulik. Hau mos haree altar ida hakerek dehan, ‘Fatin hamulak ba maromak ida nebee ita la hatene.’ Maromak nebee imi adora maski la hatene nee mak agora hau atu foo hatene ba imi.
ACT 17:24 Maromak nee mak halo mundu ho buat hotu-hotu iha mundu nee. Nia mak lalehan ho rai nia Nai. Nunee Nia la hela iha uma lulik nebee mak ema halo.
ACT 17:25 Nia mak foo iis ho foo moris ba ita ema hotu-hotu. Buat hotu-hotu nebee ita iha, Nia mak foo. Nunee Nia la presiza atu ita ema foo ajuda ba Nia.
ACT 17:26 Husi ema ida, Maromak halo nasaun hotu-hotu, atu nunee sira nia povu hela keta-ketak iha mundu tomak. Nia haketak nasaun sira ida-idak ho sira nia rain rasik. Nia desidi nanis, nasaun ida-idak nia tempu harii i tempu atu monu.
ACT 17:27 Maromak halo nunee atu ita ema buka hatene Nia, i karik buka di-diak too hetan. Afinal Maromak la dook husi ita ida-ida.
ACT 17:28 Iha ema dehan, ‘Nia mak halo ita moris, i halo ita book aan. Ita iha tanba Nia.’ Hakerek nain ida husi imi nia rai mos dehan, ‘Ita nee Nia oan.’
ACT 17:29 Loos duni. Ita nee Maromak nia oan. Tanba nee, keta hanoin dehan Maromak nee hanesan estatua nebee ema badaen halo ho osan mean ka osan mutin ka fatuk, tuir sira nia hanoin.
ACT 17:30 Uluk ema halo buat beik hanesan nee, Maromak husik deit. Maibee agora Nia foo orden ba ema hotu-hotu iha mundu tomak atu hakribi sira nia sala hodi tuir Maromak nia hakarak.
ACT 17:31 Nia marka ona loron ida para Nia foo justisa ba ema hotu-hotu ho lo-loos. I Nia foti ona Ema ida atu sai Juis. Ema nee, Maromak halo moris fali ona husi mate, atu nunee ema hotu-hotu bele hatene katak Nia mak sei foo justisa ba mundu.”
ACT 17:32 Bainhira sira rona Paulo dehan, iha Ema ida moris fila fali ona husi mate, balu goza nia. Maibee iha ema balu hatete ba Paulo, “Loron seluk ami sei hakarak rona tan kona ba buat nee.”
ACT 17:33 Depois Paulo sai husi enkontru nee.
ACT 17:34 Sira balu tuir Paulo, i fiar ona ba Jesus. Husi sira nee iha matenek nain ida naran Dionísio, ho mos feto ida naran Dámaris, ho ema seluk tan.
ACT 18:1 Hotu tiha Paulo husik Atenas hodi baa iha sidade Korintu.
ACT 18:2 Iha nebaa nia hasoru malu ho ema Judeu ida naran Akila husi provinsia Pontu, ho nia kaben Priscila. Sira nain rua foin mai husi sidade Roma iha provinsia Itália, tanba liurai boot Cláudio haruka ema Judeu sira hotu-hotu sai husi sidade nee. Paulo baa vizita sira,
ACT 18:3 depois hela ho sira i servisu hamutuk ho sira, tanba sira nia servisu mak suku animal nia kulit hodi halo tenda, hanesan mos Paulo nian.
ACT 18:4 Sabadu-Sabadu, Paulo baa tama iha ema Judeu sira nia uma kreda hodi koalia ho ema Judeu ho mos ema Gregu atu dada sira fiar ba Jesus.
ACT 18:5 Bainhira Silas ho Timóteo mai husi provinsia Masedónia, Paulo husik tiha nia servisu suku tenda hodi foo tempu tomak atu foo sai Liafuan Diak ba ema Judeu. Nia foo hatene ba sira katak Jesus mak Mesias, Salvador nebee Maromak promete hori uluk kedas atu haruka mai.
ACT 18:6 Maibee ema Judeu balu kontra beibeik Paulo i hatete aat nia. Entaun Paulo hisik rai rahun husi nia hena hodi dehan ba sira, “Imi rasik mak sei lori todan. Hau la iha tan responsabilidade ona ba imi ema Judeu. Komesa agora hau sei baa foo sai Liafuan Diak ba ema sira nebee laos Judeu.”
ACT 18:7 Depois Paulo sai husi uma kreda nee hodi baa tama iha Tísiu Justo nia uma, iha uma kreda nia sorin. Tísiu Justo nee laos ema Judeu, maibee nia hamtauk Maromak.
ACT 18:8 Iha ema ida naran Krispu, responsavel iha uma kreda nee, nia ho nia uma laran tomak komesa fiar ba Nai Jesus. Nunee mos ema Korintu seluk nebee rona Paulo nia liafuan, barak fiar ba Jesus hodi simu batizmu.
ACT 18:9 Iha kalan ida, Nai Jesus hatete ba Paulo hanesan iha mehi dehan, “Keta tauk! O tenki foo sai Liafuan Diak nafatin. La bele para!
ACT 18:10 Hau hamutuk ho o, la iha ema ida bele halo aat ba o. Koalia nafatin tanba ema barak iha sidade nee Hau nia ema.”
ACT 18:11 Nunee Paulo hela tinan ida ho balu iha sidade Korintu hodi hanorin Maromak nia liafuan.
ACT 18:12 Momentu Gálio sai governador iha provinsia Akaia, ema Judeu balu halibur hamutuk hodi kontra Paulo, i lori nia baa kesar ba governador iha tribunal.
ACT 18:13 Sira foo sala ba Paulo dehan, “Ema nee dada povu atu adora Maromak tuir dalan nebee sala, kontra fali ita nia lei.”
ACT 18:14 Maibee kuandu Paulo foin atu hataan, governador Gálio hatete ba ema Judeu sira nebee lori nia mai nee dehan, “Se imi ema Judeu mai halo keixa hasoru ema ruma nebee halo aat ka halo krimi todan, hau prontu rona.
ACT 18:15 Maibee imi so diskuti deit kona ba imi nia lei relijiaun ho liafuan ho naran. Problema nee, imi mak tenki rezolve rasik, hau sei la tesi lia kona ba buat hanesan nee.”
ACT 18:16 Depois governador duni sira sai husi tribunal.
ACT 18:17 Ema lubuk boot nee kaer fali Sóstenes, responsavel uma kreda Judeu sira nian, i sira baku nia iha governador nia oin. Maibee governador la interese.
ACT 18:18 Paulo hela iha Korintu kleur uitoan. Depois nia despede sarani sira hodi baa iha sidade Senkreia, hamutuk ho Priscila ho Akila. Iha nebaa Paulo koi tiha nia fuuk halo molik hanesan sinal katak, buat nebee uluk nia promete ba Maromak, agora nia kumpri ona. Husi fatin nee sira sae roo nebee atu baa provinsia Síria.
ACT 18:19 Too iha sidade Éfezu, sira tuun husi roo. Paulo husik hela Priscila ho Akila, i baa tama iha ema Judeu sira nia uma kreda hodi diskuti ho ema Judeu iha nebaa.
ACT 18:20 Sira husu ba Paulo atu hela kleur uitoan ho sira, maibee nia lakohi.
ACT 18:21 Nia despede malu ho sira hodi dehan, “Se Maromak hakarak, hau sei mai fali.” Depois nia sae roo hodi baa ona.
ACT 18:22 Too iha sidade Sezareia, Paulo tuun husi roo, i nia lao sae ba Jerusalém hodi vizita sarani sira iha nebaa. Hotu tiha nia fila fali ba iha sidade Antiokia.
ACT 18:23 Nia hela kleur uitoan iha nebaa, depois nia baa lao haleu provinsia Galásia ho Frígia hodi hametin sarani sira nia fiar.
ACT 18:24 Iha tempu nee, ema Judeu ida naran Apolo too iha sidade Éfezu. Nia husi sidade Alexandria. Nia matenek koalia i hatene mo-moos Livru Sagradu.
ACT 18:25 Nia aprende ona kona ba Nai Jesus nia dalan, i nia badinas teb-tebes konta fila fali ba ema seluk. Nia hanorin kona ba Jesus nee, loos duni. Maibee nia so hatene deit saida mak João hanorin bainhira nia sarani ema.
ACT 18:26 Nia koalia ho brani iha ema Judeu sira nia uma kreda. Priscila ho Akila mos rona hela nia hanorin. Entaun sira konvida Apolo baa iha sira nia uma hodi esplika di-diak ba nia kona ba Maromak nia dalan.
ACT 18:27 Depois Apolo desidi atu baa provinsia Akaia. Sarani sira iha Éfezu mos konkorda. Sira hakerek karta ida ba sarani sira iha nebaa, husu atu sira simu Apolo ho diak. Too iha Akaia, Apolo ajuda teb-tebes sira nebee fiar ona ba Jesus tanba Maromak hatudu Nia laran diak ba sira.
ACT 18:28 Apolo debate makaas ho ema Judeu sira iha ema barak nia oin, too la iha ema ida manaan nia. Nia foti liafuan husi Livru Sagradu hodi hatudu ba sira katak, Jesus mak Mesias, Salvador nebee Maromak promete hori uluk kedas atu haruka mai.
ACT 19:1 Bainhira Apolo sei iha Korintu, Paulo lao husi aldeia ba aldeia, too iha sidade Éfezu. Iha nebaa nia hasoru malu ho ema balu nebee fiar ona ba Jesus.
ACT 19:2 Nia husu ba sira, “Uluk imi fiar ba Jesus, imi simu Espiritu Santu ka lae?” Sira hataan, “Lae. Ami nunka rona dehan, iha Espiritu Santu.”
ACT 19:3 Paulo husu tan, “Se nunee, imi sarani tuir see nia hanorin?” Sira hataan, “Tuir João nian.”
ACT 19:4 Paulo hatete, “João sarani ema hanesan sinal katak sira husik ona sira nia sala. Maibee nia mos hanorin ema katak, sira tenki fiar ba Ema ida nebee atu mai, Ema nee mak Jesus.”
ACT 19:5 Rona nunee, sira mos simu batizmu hodi Nai Jesus nia naran.
ACT 19:6 Momentu Paulo tau liman ba sira nia ulun hodi halo orasaun, Espiritu Santu tuun kedas ba sira. Sira mos komesa koalia lian oi-oin nebee sira nunka aprende, i sira foo tutan Maromak nia lia menon.
ACT 19:7 Sira hamutuk maizoumenus mane nain sanulu resin rua.
ACT 19:8 Durante fulan tolu nia laran, Paulo baa beibeik iha ema Judeu sira nia uma kreda hodi koalia ho aten brani kona ba oinsaa Maromak ukun nudar Liurai. Nia foo razaun forti atu bele dada sira fiar ba Jesus.
ACT 19:9 Maibee sira balu ulun toos, sira lakohi fiar, i hatete aat Jesus nia dalan iha ema barak nia oin. Nunee Paulo ho sarani sira husik tiha uma kreda nee, i loro-loron sira halibur hamutuk iha salaun Tiranu hodi koalia kona ba Maromak nia liafuan.
ACT 19:10 Sira halo nunee durante tinan rua. Nunee ema Judeu ho mos ema laos Judeu nebee hela iha provinsia Ázia, sira hotu rona Maromak nia liafuan kona ba Nai Jesus.
ACT 19:11 Maromak halo milagre bo-boot liu husi Paulo.
ACT 19:12 Lensu ka hena nebee mak kona ona Paulo nia isin, bainhira ema lori ba iha ema moras, ema moras nee diak kedas, i espiritu aat nebee tama iha ema nia laran mos sai kedas.
ACT 19:13 Iha tempu nebaa iha ema Judeu balu lao lemo rai hodi duni sai espiritu aat husi ema. Sira koko temi Nai Jesus nia naran hodi haruka espiritu aat sira sai. Sira dehan nunee: “Hau haruka o sai husi ema nee hodi Jesus nia naran, Jesus ida nebee Paulo foo sai nee.”
ACT 19:14 Iha maun-alin nain hitu mos halo nunee. Sira nia aman nai lulik Judeu nia ulun, naran Seva.
ACT 19:15 Loron ida sira koko uza liafuan nee hodi haruka espiritu aat sai, espiritu nee hataan, “Hau hatene Jesus, hau mos hatene Paulo. Maibee imi nee see?”
ACT 19:16 Ema ida nebee iha espiritu aat nee, asalta sira. Nia baku sira too kanek i lees sira nia ropa, too sira halai sai husi uma ho isin molik.
ACT 19:17 Ema Judeu ho mos laos Judeu nebee hela iha Éfezu rona istoria nee, sira tauk i sira foti aas Nai Jesus nia naran.
ACT 19:18 Husi sira nebee foin fiar ba Jesus, barak mai foo sai sira nia sala iha ema barak nia oin.
ACT 19:19 Husi sira nee, iha balu uluk kaer ai kulit aat. Sira halibur sira nia livru buan nian hodi sunu tiha hotu iha ema barak nia oin. Livru sira nee nia folin osan mutin rihun lima-nulu.
ACT 19:20 Nunee ema barak liu tan rona Maromak nia liafuan kona ba Nai Jesus, i sarani sira aumenta barak ba beibeik.
ACT 19:21 Hotu tiha Paulo desidi atu baa iha provinsia Masedónia ho Akaia, depois mak baa Jerusalém. Nia dehan, “Bainhira hau baa tiha Jerusalém, hau mos tenki baa iha Roma.”
ACT 19:22 Nia haruka nia ajudante nain rua Timóteo ho Erastu ba uluk iha Masedónia, i nia rasik sei hela iha provinsia Ázia.
ACT 19:23 Iha tempu nee, rungu-ranga boot ida mosu iha sidade Éfezu kona ba Jesus nia dalan.
ACT 19:24 Problema nee nia huun nunee: Iha fatin nee, iha badaen osan mutin ida naran Demétriu. Nia servisu mak halo uma lulik kiikoan-kiikoan ho osan mutin ba sira nia maromak ida naran Ártemis. Nia kontratu nee manaan osan boot, i nia foo servisu ba badaen barak.
ACT 19:25 Iha loron ida, Demétriu halibur nia badaen sira ho badaen sira seluk hodi hatete nunee: “Maluk sira, imi hatene katak ita manaan osan boot tanba servisu nee.
ACT 19:26 Maibee agora imi haree ho rona rasik, ema nia aman Paulo lori ema barak lao sala dalan ona. Tanba nia dehan, estatua maromak nebee ita ema halo ho liman, laos maromak. Laos ema iha sidade Éfezu deit mak rona ba nia, maibee kuaze iha provinsia Ázia tomak.
ACT 19:27 Nunee ita nia servisu, ema sei la respeita tan ona. Laos nee deit, maibee povu mos sei la foo folin ba uma lulik Ártemis nian, i sei la fiar ba Ártemis tan. Ártemis maromak ida nebee makaas loos nee, ema sei hatuun, maski agora dadauk ema iha provinsia Ázia tomak i too iha mundu tomak adora nia.”
ACT 19:28 Rona nunee, badaen sira nia laran nakali kedas, i sira komesa hakilar dehan, “Viva Ártemis, ema Éfezu nia maromak!”
ACT 19:29 La kleur sidade tomak sai rungu-ranga. Ema nebee halo rungu-ranga nee kaer tiha Paulo nia maluk Gaio ho Aristarku. Sira nain rua nee husi Masedónia, i sira baibain lao hamutuk ho Paulo. Depois ema lubun boot nee dada sira nain rua hodi halai rame-rame ba iha estadiun.
ACT 19:30 Paulo hakarak baa koalia ho ema sira nebee halo konfuzaun nee, maibee sarani sira la foo.
ACT 19:31 Nai ulun provinsia Ázia nian, balu Paulo nia belun. Sira mos haruka ema baa foo hatene Paulo atu keta tama ba iha nebaa.
ACT 19:32 Iha estadiun laran, ema hotu konfuzaun. Iha balu hakilar oin ida, balu tan hakilar oin seluk. Afinal ema barak la hatene tanba saa mak sira halibur malu iha nebaa.
ACT 19:33 Ema Judeu balu dudu ema ida naran Alexandre ba iha povu nia oin para koalia. Povu balu hatete ba nia saida mak nia tenki koalia. Depois Alexandre foti liman husu para sira nonook, i nia komesa esplika katak, laos sira Judeu mak hamosu problema nee.
ACT 19:34 Maibee kuandu povu hatene katak nia ema Judeu, sira hotu lia ida hodi hakilar dehan, “Viva Ártemis, ema Éfezu nia maromak!” Sira hakilar nunee maizoumenus oras rua.
ACT 19:35 Too ikus sekretariu sidade Éfezu nian konsege hakalma povu. Nia dehan, “Éfezu oan sira, mundu tomak hatene katak maromak boot Ártemis nia estatua monu tuun husi lalehan mai iha ita ema Éfezu nia leet, i ita mak hein nia uma lulik i hein nia estatua.
ACT 19:36 La iha ema ida bele nega buat sira nee. Nee duni hakmatek ba i la bele halo arbiru.
ACT 19:37 Imi lori ema nain rua nee mai, afinal sira la naok buat ida husi ita nia uma lulik, i nunka hatete aat ita nia maromak Ártemis.
ACT 19:38 Ita iha tribunal, juis sira mos hein hela. Nunee, se Demétriu sira hakarak baa kesar, sira bele lori kazu nee ba tribunal.
ACT 19:39 I se iha problema seluk mak imi hakarak foti mos, baa rezolve ho justisa nain sira.
ACT 19:40 Keta halo be governu Roma foo sala mai ita tanba ohin loron ita halo rungu-ranga nunee. Se sira hakarak buka hatene problema nee nia huun, ita atu hataan oinsaa? Tanba problema nee nia huun la iha.”
ACT 19:41 Koalia hotu nunee, sekretariu nee haruka sira fila, i sira mos fahe malu ona.
ACT 20:1 Bainhira sidade Éfezu hakmatek fila fali, Paulo halibur ema nebee tuir Jesus hodi hametin sira nia laran. Depois nia despede sira hodi baa iha provinsia Masedónia.
ACT 20:2 Too iha nebaa, nia lao lemo-lemo hodi koalia buat barak atu hametin sarani sira nia fiar, too nia tama iha provinsia Grésia.
ACT 20:3 Nia hela fulan tolu iha Grésia. Nia foin atu baa sae roo para fila fali ba provinsia Síria, nia rona katak, ema Judeu balu kombina malu atu oho nia. Entaun nia desidi atu fila ba Síria liu husi provinsia Masedónia.
ACT 20:4 Iha grupu kiik ida mak akompanha Paulo. Sira nee mak Piru nia oan Sópatro husi Bereia, Aristarku ho Sekundu husi Tesalónika, Gaio husi Derbe, ho Timóteo. Iha tan Tíkiku ho Trófimu husi provinsia Ázia.
ACT 20:5 Sira nee sai uluk baa hein Paulo ho hau iha sidade Tróade.
ACT 20:6 Festa Paun la Tau Fermentu hotu tiha, ami baa sae roo iha sidade Filipi. Ami iha tasi laran loron lima foin ami too iha Tróade. Iha nebaa ami hasoru malu fali ho sira seluk, i ami hela iha nebaa semana ida.
ACT 20:7 Iha loron Domingu, ami halibur malu ho sarani sira hodi haan hamutuk. Paulo koalia ba sira too kalan boot tanba aban nia atu baa ona.
ACT 20:8 Fatin nebee ami halibur malu nee iha andar leten, ahi-oan barak lakan hela.
ACT 20:9 Iha mane foinsae ida naran Éutiku tuur hela iha janela hodi rona Paulo nia hanorin. Tanba Paulo koalia kleur teb-tebes, entaun Éutiku matan dukur tiha, too ikus nia haluha rai, i monu tuun husi andar tolu nee. Bainhira ema tuun baa foti nia, nia iis la iha ona.
ACT 20:10 Paulo tuun baa hakneak hodi latan aan iha joven nee nia leten i hakuak nia. Nia dehan, “Lalika tauk! Nia moris fali ona!”
ACT 20:11 Hotu tiha ami hotu sae fila fali ba andar leten hodi haan hamutuk. Depois Paulo koalia tan too loro matan sae, foin nia baa.
ACT 20:12 Sarani sira lori joven nee fila ba nia uma. Sira hotu haksolok tanba nia moris fali.
ACT 20:13 Depois ami sae roo atu baa iha sidade Asós. Paulo desidi tiha ona katak nia lao ain deit ba iha nebaa. Iha Asós foin Paulo hakarak sae roo hamutuk ho ami.
ACT 20:14 Bainhira Paulo hasoru ami iha Asós, nia mos sae roo hamutuk ho ami hodi baa iha sidade Mitilene.
ACT 20:15 Aban fali ami sai husi nebaa i lao too besik rai ida naran Kios. Loron tuir mai, ami hakur tasi ba iha rai Samos. Aban fali ami too iha sidade Miletu.
ACT 20:16 Paulo lakohi hela kleur iha provinsia Ázia. Nia hakarak too lalais iha Jerusalém, atu se bele molok loron Pentakosta nia iha nebaa ona. Nunee nia desidi lakohi vizita Éfezu.
ACT 20:17 Bainhira ami too iha Miletu, Paulo haruka lia menon ba responsavel sarani sira iha Éfezu, atu sira mai hasoru nia.
ACT 20:18 Kuandu sira too mai, Paulo foo hatene ba sira dehan, “Imi hatene ona hau nia moris durante hau hamutuk ho imi, komesa loron primeiru hau tau ain iha provinsia Ázia too oras nee.
ACT 20:19 Hau sempre serbi Nai Jesus ho haraik aan ho matan been. Hau mos hetan terus barak tanba ema Judeu iha planu aat mai hau.
ACT 20:20 Liafuan nebee bele ajuda imi, hau sempre foo sai ba imi, hau nunka subar buat ida. Hau hanorin imi iha fatin publiku ho mos husi uma ba uma.
ACT 20:21 Hau foo hatene ona ba ema Judeu, ho mos ema nebee laos Judeu, atu sira husik ona sira nia sala hodi tuir Maromak nia hakarak i fiar ba ita nia Nai Jesus.
ACT 20:22 Agora Maromak nia Espiritu haruka hau ba Jerusalém. Hau tuir deit, hau la hatene saida mak atu akontese mai hau iha nebaa.
ACT 20:23 Hau hatene deit katak, iha sidade hotu-hotu nebee hau baa nee, Espiritu Santu foo hatene tiha ona mai hau katak, hau sei tama komarka i hetan terus oi-oin.
ACT 20:24 Maibee mai hau, atu moris ka mate la importante. Hau so hanoin deit atu luta too rohan, i halo hotu knaar nebee Nai Jesus foo fiar ona mai hau. Knaar nee mak foo sai Liafuan Diak kona ba oinsaa Maromak hatudu Nia laran diak ba ema.
ACT 20:25 Agora hau hatene katak, husi imi sira nebee hau hanorin kona ba oinsaa Maromak ukun nudar Liurai, ida mos sei la hasoru tan hau.
ACT 20:26 Nee duni iha loron ida nee, hau hatete mo-moos ba imi katak, se imi ruma mate haketak aan husi Maromak, nee laos hau nia sala.
ACT 20:27 Tanba hau foo sai ona Maromak nia hakarak hotu ba imi, la iha buat ida mak hau subar.
ACT 20:28 Imi tenki kuidadu di-diak imi nia aan, ho mos Maromak nia povu. Tanba Espiritu Santu foti imi hodi tau matan ba sira hanesan bibi atan ida hein nia bibi. Keta haluha, Maromak sosa kotu tiha ona sira nee ho Nia Oan nia raan rasik.
ACT 20:29 Hau hatene katak, bainhira hau baa tiha, ema aat sei mai iha imi nia leet hanesan asu fuik, i sei buka atu estraga bibi sira.
ACT 20:30 Iha mos ema balu husi imi nia leet sei bobar fali lia loos, atu dada sarani sira husik tiha Jesus hodi tuir fali sira.
ACT 20:31 Nee duni imi tenki matan moris! Keta haluha, durante tinan tolu nia laran hau hela hamutuk ho imi, hau loron-kalan foo hanoin ba imi ida-idak ho matan been.
ACT 20:32 Agora hau entrega imi hotu ba iha Maromak nia liman, atu nia kuidadu imi. Imi tenki kaer metin liafuan nebee mak hau foo sai ona ba imi kona ba Maromak nia laran diak. Liu husi liafuan nee, Maromak bele halo forti imi nia fiar, i sei foo ba imi buat hotu-hotu nebee uluk Nia promete ona atu foo ba Nia povu.
ACT 20:33 Durante nee hau nunka hein atu simu imi nia osan mutin ka osan mean ka imi nia hena.
ACT 20:34 Imi hatene katak, hau servisu ho hau nia liman rasik hodi sustenta hau nia aan ho mos sustenta sira nebee akompanha hau.
ACT 20:35 Nunee hau sempre hatudu ezemplu atu imi mos bele servisu makaas hodi ajuda ema kiak sira. Hanoin di-diak Nai Jesus nia liafuan nebee dehan, ‘Diak liu ita foo, duke ita simu.’ ”
ACT 20:36 Paulo koalia hotu nunee, nia hakneak hamutuk ho sira hotu hodi halo orasaun.
ACT 20:37 Depois sira hotu tanis hodi hakuak Paulo i rei nia.
ACT 20:38 Sira laran tristi liu tanba Paulo dehan sira sei la haree tan nia oin. Depois sira akompanha nia baa too iha roo.
ACT 21:1 Ami fahe malu ho responsavel sarani Éfezu nian ho laran susar. Hotu tiha ami sae roo hodi baa loos rai ida naran Kos. Aban fali ami too iha rai Rodes, depois lao nafatin ba iha sidade Pátara.
ACT 21:2 Iha nebaa ami tuun husi roo, depois sae fali roo seluk nebee atu baa provinsia Fenísia.
ACT 21:3 La kleur ami haree rai Xipre iha ami nia sorin karuk, maibee ami liu deit. Depois ami too iha sidade Tiru, iha provinsia Síria. Iha fatin nee, roo para atu hatuun sasaan.
ACT 21:4 Nunee ami tuun baa vizita sarani sira, i hela ho sira semana ida. Espiritu Santu foo hatene ba sira para foo hanoin ba Paulo atu la bele liu ba Jerusalém.
ACT 21:5 Maibee bainhira tempu nee hotu, ami husik tiha sira hodi lao nafatin. Sarani sira hotu hamutuk ho sira nia feen ho oan sira akompanha ami sai husi sidade ba iha tasi ibun. Too iha nebaa, ami hotu hakneak hodi halo orasaun hamutuk.
ACT 21:6 Despede tiha hotu, ami sae roo, i sarani sira mos fila.
ACT 21:7 Ami sai husi Tiru, baa iha sidade Tolemais. Ami tuun husi roo hodi baa kumprimenta sarani sira, i hela ho sira loron ida.
ACT 21:8 Aban fali ami sai husi nebaa, depois baa iha sidade Sezareia. Too iha nebaa, ami hela ho Filipe, ema ida nebee haklaken Liafuan Diak. Nia mos ema ida husi sira nain hitu nebee uluk sarani sira iha Jerusalém hili hodi tau matan ba feto faluk sira.
ACT 21:9 Filipe iha oan feto nain haat, sira hotu sei klosan. Sira nain haat nee profeta hodi foo tutan Maromak nia lia menon.
ACT 21:10 Ami hela iha nebaa loron ida-rua ona, iha ema ida naran Ágabu too mai husi provinsia Judeia. Nia mos profeta ida.
ACT 21:11 Nia lao mai ami, i nia foti Paulo nia sintu hodi futu nia liman-ain rasik. Nia dehan, “Espiritu Santu hatete nunee: ‘Ema Judeu sira iha Jerusalém sei futu sintu nee nia nain hanesan nee. Depois sira sei entrega nia ba ema nebee laos Judeu.’ ”
ACT 21:12 Rona nunee, ami ho sarani sira iha nebaa husu boot ba Paulo atu nia la bele baa iha Jerusalém.
ACT 21:13 Maibee nia hataan, “Nusaa mak imi tanis? Imi halo hau nia laran dodok deit. Maski ema futu hau ka oho hau iha Jerusalém tanba hau tuir Nai Jesus, hau prontu simu.”
ACT 21:14 Bainhira ami haree katak Paulo la simu ami nia hanoin, ami mos nonook deit hodi dehan, “Tuir deit Nai Maromak nia hakarak ba.”
ACT 21:15 Ami nia vizita hotu ona, ami prepara aan hodi baa iha Jerusalém.
ACT 21:16 Iha sarani balu husi Sezareia akompanha ami too iha ema ida naran Manason nia uma. Nia husi rai Xipre, i nia tuir Jesus kleur ona.
ACT 21:17 Kuandu ami too iha Jerusalém, sarani sira simu ami ho diak.
ACT 21:18 Aban fali Paulo hamutuk ho ami sira seluk baa hasoru Tiago. Responsavel sarani Jerusalém sira mos iha hotu.
ACT 21:19 Paulo kumprimenta sira, depois nia hatoo buat hotu nebee Maromak halo tiha ona liu husi Paulo nia servisu iha ema laos Judeu nia leet. Nia konta husi huun too rohan.
ACT 21:20 Rona nunee, sira hotu hahii Maromak. Depois sira hatete ba Paulo, “Irmaun, ita hatene katak, iha ema Judeu rihun ba rihun mak fiar ba Jesus, i sira hotu sei kaer metin nafatin lei nebee Maromak foo ba Moisés.
ACT 21:21 Ema balu mai foo hatene dehan, irmaun hanorin ema Judeu sira iha rai liur para lalika tuir tan Moisés nia lei. Sira dehan, irmaun haruka sira lalika sunat sira nia oan mane, i lalika tuir ita nia lisan seluk.
ACT 21:22 Sira sei rona dehan ita boot too ona iha nee. Entaun ita atu halo oinsaa?
ACT 21:23 Diak liu irmaun halo hanesan nee: Iha nee iha ema nain haat nebee halo tiha ona juramentu ba Maromak.
ACT 21:24 Irmaun mak lori sira nain haat nee ba iha uma kreda boot hodi tuir serimonia hamoos aan hamutuk ho sira. Irmaun mak selu osan oferta nebee mak sira tenki foo atu bele koi sira nia fuuk halo molik tuir ita nia lisan. Se irmaun halo nunee, ema hotu sei hatene katak ita boot rasik sei moris tuir nafatin Moisés nia lei, i buat nebee sira rona kona ba ita boot nee la loos.
ACT 21:25 Maibee kona ba sarani sira nebee laos Judeu, ami haruka ona surat ba sira hodi foo hatene ami nia desizaun katak, sira la presiza tuir ita nia lei hotu. Ami foo hanoin deit ba sira dehan, sira la bele haan ai haan nebee mak hamulak tiha ona ba lulik, la bele haan animal nia raan, la bele haan naan husi animal nebee la koa kakorok hodi hasai nia raan, i la bele halo sala seksual.”
ACT 21:26 Nunee aban fali, Paulo lori ema nain haat nee baa tuir serimonia hamoos aan hamutuk ho sira. Depois nia baa iha uma kreda boot hodi foo hatene ba nai lulik katak, loron hira tan mak serimonia hamoos aan nee hotu. Nia mos dehan, bainhira serimonia nee hotu, nia sei foo sira nain haat nee nia ida-idak nia oferta.
ACT 21:27 Loron hitu nee besik hotu ona, iha ema Judeu balu husi provinsia Ázia haree Paulo iha uma kreda boot. Sira tau lia ba ema barak nebee iha fatin nee. I sira kaer Paulo
ACT 21:28 hodi hakilar dehan, “Israel oan sira, ajuda lai ami! Ema ida nee mak hanorin ema hotu iha nebee-nebee hodi hatete aat ita nia povu Israel, ita nia lei ho mos uma kreda boot nee. Aat liu tan nia lori ema laos Judeu mai iha uma kreda boot hodi halo foer fatin santu nee.”
ACT 21:29 Sira hatete nunee tanba foin dadauk sira haree Trófimu, ema Éfezu ida nebee laos Judeu hamutuk ho Paulo iha sidade laran. Nunee sira hanoin Paulo lori tiha ona nia tama ba iha uma kreda boot. Afinal lae.
ACT 21:30 Entaun sidade Jerusalém tomak sai rungu-ranga. Ema barak halai nadodon mai husi nebee-nebee, i sira kaer Paulo dada sai ba liur. Depois ema taka kedas portaun uma kreda boot nian.
ACT 21:31 Bainhira sira komesa atu oho Paulo, ema foo hatene ba komandante batalhaun Roma nian katak, sidade Jerusalém tomak sai tiha ona rungu-ranga.
ACT 21:32 Komandante bolu kedas kapitaun ho tropas balu hodi halai ba iha ema barak nee. Bainhira povu haree komandante ho tropas mai, sira la baku tan Paulo ona.
ACT 21:33 Too iha nebaa, komandante kaer tiha Paulo, i haruka futu nia ho korenti rua. Depois nia husu ba ema barak nee dehan, “Ema nee see? Nia halo sala saida?”
ACT 21:34 Maibee balu hakilar oin ida, balu tan hakilar oin seluk. Nunee komandante la hatene ida nebee mak loos, tanba ema barak hakilar ida-idak nian. Entaun nia haruka lori Paulo ba iha tropas sira nia hela fatin.
ACT 21:35 Bainhira too iha eskada, tropas sira hiit Paulo tau ba sira nia kabaas, tanba ema sira nee dudu malu makaas atu halo aat ba nia.
ACT 21:36 Ema lubuk boot nee hakilar beibeik husi kotuk dehan, “Oho tiha nia!”
ACT 21:37 Momentu tropas sira atu lori Paulo tama ba iha sira nia fatin, Paulo husu ba komandante ho lian Gregu dehan, “Hau bele hatete buat ruma ba ita boot ka?” Komandante hakfodak hodi husu fali dehan, “O hatene lian Gregu ka?
ACT 21:38 Entaun o laos ema Ejitu ida nebee uluk halibur ema atu hatuun governu ka? Nia lori ema rihun haat nebee kaer kroat ba iha rai fuik.”
ACT 21:39 Paulo hataan fali, “Lae, senhor! Hau ema Judeu, husi Tarsu, sidade prinsipal ida iha provinsia Silísia. Hau husu senhor foo lisensa mai hau hodi koalia ba ema sira nee.”
ACT 21:40 Komandante mos simu. Entaun Paulo hamriik iha eskada leten, nia foti liman husu para sira nonook. Bainhira sira hotu nonook ona, nia koalia ba sira ho sira nia lian Aram.
ACT 22:1 Nia komesa koalia dehan, “Aman sira ho maun-alin sira hotu, hau husu imi rona lai, tanba hau atu hataan ba ema nebee foo sala mai hau.”
ACT 22:2 Bainhira sira rona Paulo koalia ho sira nia lian rasik, sira nonook hotu. Depois Paulo dehan,
ACT 22:3 “Hau ema Judeu, moris iha sidade Tarsu iha provinsia Silísia, maibee boot iha Jerusalém. Hau nia profesor naran Gamaliel. Nia hanorin hau klean kona ba lei nebee Moisés rai hela ba ita nia bei-ala sira. Iha tempu nebaa hau mos badinas teb-tebes serbi Maromak, hanesan mos imi hotu.
ACT 22:4 Hau sempre halo terus ema sira nebee tuir Jesus nia dalan too sira balu mate. Hau kaer sira, mane ho feto hodi hatama ba kadeia.
ACT 22:5 Ita nia nai lulik boot ho justisa nain relijiaun Judeu sira hotu hatene katak, buat nebee hau koalia nee loos duni. Tanba sira mak foo surat rekomendasaun mai hau atu entrega ba ema Judeu iha sidade Damasku. Ho surat nee hau hetan lisensa para baa kaer sarani sira iha nebaa hodi lori mai kastigu iha Jerusalém.”
ACT 22:6 “Nunee hau baa iha Damasku. Iha meudia ami atu besik too ona iha sidade, derepenti naroman makaas husi lalehan leno mai hau.
ACT 22:7 Hau monu kedas ba rai, i rona lian ida dehan mai hau, ‘Saulo! Saulo! Tansaa mak o halo terus Hau?’
ACT 22:8 Hau husu, ‘Nai, Ita Boot nee see?’ Lian nee hataan, ‘Hau mak Jesus, Ema Nazaré, Ida nebee o halo terus nee.’
ACT 22:9 Ema sira nebee akompanha hau mos haree naroman nee, maibee sira la kompriende lian nebee koalia mai hau.
ACT 22:10 Depois hau husu fali, ‘Nai, hau tenki halo saida?’ Nai Jesus dehan, ‘Hadeer ona hodi baa iha sidade Damasku. Iha nebaa o sei rona kona ba buat hotu-hotu nebee Hau foo ba o atu halo.’
ACT 22:11 Hau nia matan delek tiha, tanba naroman leno makaas liu. Nunee hau nia kolega sira kaer deit hau nia liman hodi lori hau lao too iha Damasku.
ACT 22:12 Ema ida naran Ananias hela iha nebaa. Nia ema ida nebee badinas halo tuir lei Moisés nian, i ema Judeu hotu-hotu iha sidade nee respeita nia.
ACT 22:13 Nia mai vizita hau, i hamriik iha hau nia sorin hodi hatete, ‘Irmaun Saulo, haree fila fali ba!’ Momentu nee kedas, hau haree hetan nia.
ACT 22:14 Depois nia hatete mai hau, ‘Maromak, Ida nebee ita nia bei-ala sira adora, hili ona irmaun hodi kompriende klean Nia hakarak, i haree Ema ida nebee Moris Loos, ho mos rona Nia lian rasik.
ACT 22:15 Irmaun sei sai sasin hodi hatoo ba ema hotu-hotu saida mak ita haree, ho saida mak ita rona.
ACT 22:16 Agora ita hein tan saida?! Hamriik ona, simu batizmu! Harohan ba Nai Jesus atu Nia hamoos ita nia sala hotu.’ ”
ACT 22:17 Paulo hatutan tan dehan, “Hau fila mai iha Jerusalém. Loron ida, hau halo orasaun iha uma kreda boot, hau hetan hanesan mehi ida.
ACT 22:18 Hau haree Nai Jesus foo orden mai hau dehan, ‘Lalais! Sai kedas husi Jerusalém! Tanba ema iha nee sei la fiar o nia sasin kona ba Hau.’
ACT 22:19 Hau hataan, ‘Maibee Nai! Sira hotu hatene katak, uluk hau tama-sai uma kreda Judeu nian iha fat-fatin hodi kaer ema sira nebee fiar ba Ita Boot. Hau baku sira i hatama sira ba komarka.
ACT 22:20 Saa tan bainhira ema oho Ita Boot nia sasin Estevão, hau hamriik hela iha nebaa i hau mos konkorda ho nia mate nee. Kuandu ema tuda mate nia, hau mak hein sira nia hena.’
ACT 22:21 Maibee Nai Jesus hatete, ‘Baa ona! Tanba Hau sei haruka o ba iha fatin dook hodi foo sasin ba ema nebee laos Judeu.’ ”
ACT 22:22 Bainhira ema barak nee rona Paulo dehan, Maromak haruka nia baa foo sasin ba ema nebee laos Judeu, sira lakohi rona tan nia. Sira hotu hakilar rame-rame dehan, “Oho tiha ema nee! Nia la serve atu moris tan!”
ACT 22:23 Sira hakilar nunee, sira mos hasai sira nia hena balu hodi soe sae tiha, i raut rai uut soe ba leten, tanba sira hirus teb-tebes.
ACT 22:24 Nunee komandante haruka soldadu sira lori Paulo tama ba laran. Nia haruka sira baku nia ho sikoti i investiga nia atu bele hatene tanba saa mak ema Judeu hakilar atu oho nia.
ACT 22:25 Momentu sira kesi Paulo nia liman atu baku, nia husu ba kapitaun nebee hamriik besik dehan, “Lei hatete saida kona ba sidadaun Roma? Se seidauk tesi nia lia, imi bele baku uluk ho sikoti ka lae?”
ACT 22:26 Rona nunee, kapitaun baa foo hatene ba nia komandante dehan, “Ema nee sidadaun Roma. Ita boot atu halo saida ba nia?”
ACT 22:27 Entaun komandante baa husu rasik ba Paulo dehan, “Hatete mai hau, o sidadaun Roma ka?” Paulo hataan, “Loos duni. Hau sidadaun Roma.”
ACT 22:28 Komandante dehan, “Hau mos hanesan. Hau selu karun teb-tebes hodi hetan direitu sidadaun nian.” Maibee Paulo hataan, “Hau moris mai sidadaun Roma kedas.”
ACT 22:29 Rona nunee, soldadu sira nebee atu investiga Paulo nee hakiduk kedas. Komandante mos tauk, tanba nia mak haruka futu Paulo ho korenti, afinal Paulo nee sidadaun Roma ida.
ACT 22:30 Komandante hakarak buka hatene lo-loos tanba saa mak ema Judeu sira foo sala ba Paulo. Entaun aban fali nia foo orden hodi halibur nai lulik Judeu nia ulun sira ho mos ema boot sira seluk nebee baibain tuur iha tribunal relijiaun Judeu nian. Nia hasai tiha Paulo husi dadur laran, i lori nia baa aprezenta iha sira nia oin.
ACT 23:1 Paulo hateke di-diak ba justisa nain sira hodi dehan, “Maun-alin sira, hau senti komesa husi kiik too agora, hau serbi Maromak ho laran moos.”
ACT 23:2 Rona Paulo koalia nunee, nai lulik nia boot Ananias foo orden ba ema sira nebee hamriik besik Paulo para basa nia ibun.
ACT 23:3 Paulo hatete ba Ananias, “Nai Maromak sei basa fali ita. Tanba ita hanesan moru nebee foin pinta mutin, maibee nia laran lahuk tiha ona. Ita tuur iha nee atu tesi hau nia lia tuir lei. Maibee ita haruka ema atu basa hau, nunee ita rasik kontra fali lei nee.”
ACT 23:4 Ema sira nebee hamriik besik Paulo nee dehan, “O la bele hatete aat nai lulik boot, nia nee serbi Maromak!”
ACT 23:5 Paulo hataan, “Maun-alin sira, hau la hatene dehan, nia mak nai lulik boot. Tanba iha Livru Sagradu hakerek dehan, ‘Imi la bele hatete aat imi nia nai ulun sira.’ ”
ACT 23:6 Paulo haree justisa nain sira nee, balu husi grupu Saduseu, balu husi grupu Farizeu. Nunee nia hatete ho lian makaas dehan, “Maun-alin sira, hau ema Farizeu. Hau nia aman ho hau nia avoo sira mos ema Farizeu. Agora imi atu foo justisa mai hau tanba hau laran metin katak ema mate sei moris fali.”
ACT 23:7 Bainhira Paulo koalia nunee, ema Farizeu ho ema Saduseu sira komesa haksesuk malu, too sira la rona malu.
ACT 23:8 Tanba ema Saduseu sira dehan katak ema mate sei la moris fali, anju la iha i espiritu mos la iha. Maibee ema Farizeu fiar buat hirak nee hotu.
ACT 23:9 Sira haksesuk malu too buat hotu sai estrundu boot. Iha mestri relijiaun balu husi grupu Farizeu hamriik hodi defende makaas Paulo dehan, “Ita la hetan sala ida iha ema nee! Keta halo be espiritu ida ka anju ida mak koalia ba nia.”
ACT 23:10 Sira haksesuk malu makaas liu tan, too komandante nee tauk, keta halo be sira dada baa dada mai, Paulo bele mate. Entaun nia haruka nia soldadu sira baa hasai tiha Paulo husi ema sira nee nia liman laran hodi lori baa tama iha soldadu sira nia hela fatin.
ACT 23:11 Iha kalan nee, Nai Jesus hatudu Aan ba Paulo. Nia hamriik besik Paulo hodi dehan, “Aten brani ba! Agora o foo sasin ona ba ema iha Jerusalém kona ba Hau. Nunee mos, o tenki baa foo sasin kona ba Hau iha sidade Roma.”
ACT 23:12 Iha aban dadeer-saan, ema Judeu haat-nulu resin kombina malu hodi jura katak, sira sei la haan la hemu too sira oho Paulo.
ACT 23:14 Entaun sira baa foo hatene ba nai lulik nia ulun sira ho katuas lia nain sira dehan, “Ami jura tiha ona dehan, ami sei la haan buat ida too ami oho Paulo.
ACT 23:15 Entaun senhor sira hamutuk ho justisa nain sira hotu baa husu iha komandante atu nia lori fali Paulo ba iha tribunal relijiaun nian. Senhor sira finji atu husu informasaun klean liu tan kona ba nia kazu nee. Ami sei hein iha dalan atu oho nia.”
ACT 23:16 Maibee Paulo nia subrinhu ida rona sira nia planu, nunee nia baa tropas nia hela fatin hodi foo hatene Paulo.
ACT 23:17 Depois Paulo bolu kapitaun ida hodi hatete, “Ita lori joven nee ba iha komandante. Nia atu foo hatene buat ruma.”
ACT 23:18 Entaun kapitaun lori joven nee ba iha nia komandante hodi dehan, “Paulo, ida nebee ita dadur hela nee, bolu hau hodi husu para hau lori joven nee mai ita, tanba nia atu hatete buat ruma.”
ACT 23:19 Komandante kaer joven nee nia liman hodi lao sees uitoan husi fatin nee, i nia husu, “O atu hatete saida mai hau?”
ACT 23:20 Paulo nia subrinhu dehan, “Ema Judeu kombina ona atu mai husu ba senhor para aban lori Paulo baa fali tribunal relijiaun nian. Sira finji dehan sira atu husu informasaun klean liu tan kona ba nia kazu.
ACT 23:21 Senhor lalika halo tuir sira nia hakarak. Tanba iha ema haat-nulu resin mak atu hein iha dalan para oho nia. Sira jura tiha ona dehan, sira sei la haan la hemu too sira oho nia. Sira prepara tiha ona, hein deit senhor nia resposta.”
ACT 23:22 Komandante nee bandu dehan, “La bele foo sai ba ema ida katak, o mai foo hatene buat nee mai hau.” Depois nia haruka joven nee fila.
ACT 23:23 Hotu tiha komandante bolu nia kapitaun nain rua hodi foo orden ba sira dehan, “Prepara soldadu atus rua, ho soldadu hitu-nulu nebee sae kuda, ho mos soldadu atus rua nebee lori diman. Orsida kalan tuku sia imi baa sidade Sezareia.
ACT 23:24 Prepara mos kuda ba Paulo atu sae, i lori nia ho di-diak too iha governador Felix.”
ACT 23:25 Depois nia hakerek surat ba governador Felix dehan nunee:
ACT 23:26 “Sua eselensia senhor governador Felix, kumprimentus husi hau, Cláudio Lísias.
ACT 23:27 Ema Judeu sira kaer ema nee, i sira atu oho nia. Maibee hau rona dehan nia ema sidadaun Roma. Nunee hau baa hamutuk ho hau nia soldadu sira hodi hasai nia husi ema Judeu sira nia liman laran.
ACT 23:28 Hau hakarak hatene, sira foo sala ba nia kona ba saida loos. Tanba nee mak hau lori nia ba iha ema Judeu sira nia tribunal relijiaun nian.
ACT 23:29 Afinal sira foo sala ba nia tanba deit sira haksesuk malu kona ba sira nia lei rasik. Laos kona ba sala ruma nebee halo nia merese hetan kastigu mate ka kastigu iha komarka.
ACT 23:30 Depois hau rona dehan iha ema balu kombina malu atu oho ema nee. Entaun hau foo orden kedas para lori nia ba iha senhor governador. Hau mos haruka ema nebee foo sala ba nia nee atu sira baa kesar iha ita boot.”
ACT 23:31 Nunee iha kalan nee kedas, soldadu sira halo tuir komandante nia orden hodi lori Paulo too iha sidade Antipátride.
ACT 23:32 Iha aban fali, soldadu sira nebee sae kuda lori Paulo lao nafatin, i soldadu sira seluk fila ba Jerusalém.
ACT 23:33 Kuandu sira too iha Sezareia, sira foo surat nee ba governador, i entrega Paulo ba iha nia liman.
ACT 23:34 Lee tiha surat nee, governador husu ba Paulo, “O husi provinsia nebee?” Paulo hataan, “Hau husi provinsia Silísia.”
ACT 23:35 Governador dehan, “Hau sei tesi o nia lia. Maibee ita tenki hein lai ema sira nebee foo sala ba o nee too mai.” Depois nia haruka soldadu sira lori Paulo baa dadur iha liurai Herodes nia palasiu.
ACT 24:1 Liu tiha loron lima, nai lulik boot Ananias mai husi Jerusalém too iha Sezareia, hamutuk ho katuas lia nain Judeu balu ho mos ema ida naran Tértulu nebee matenek koalia kona ba lei. Sira hotu baa iha governador Felix atu hatoo sira nia keixa hasoru Paulo.
ACT 24:2 Depois governador bolu Paulo tama ba laran. Tértulu hahuu aprezenta kazu nee ba iha governador nunee: “Senhor governador ukun ami tinan barak ona, i durante tempu naruk nee ami nia rain hakmatek. Senhor lori mudansa barak iha nasaun ida nee, tanba senhor hatene antes saida mak diak ba ami.
ACT 24:3 Governador Felix mak hau respeita, buat hotu nebee senhor halo tiha ona ba ami, ami simu ho kontenti, i ami agradese teb-tebes.
ACT 24:4 Maibee atu habadak tempu para senhor la bele kole, hau husu tempu uitoan atu foo sai problema nee nia huun.
ACT 24:5 Tuir ami haree, ema nee gosta provoka problema. Nia baa iha mundu tomak hodi tau lia ba ema Judeu halo rungu-ranga. Nia lider iha grupu relijiaun foun ida naran Nazaré.
ACT 24:6 Aat liu tan, nia atu halo foer Maromak nia uma kreda boot. Nee mak ami kaer nia. [Ami hakarak atu tesi nia lia tuir ami nia lei.
ACT 24:7 Maibee komandante Lísias mai hadau tiha nia husi ami nia liman.
ACT 24:8 I nia haruka ema sira nebee foo sala ba nia atu mai iha senhor governador para rezolve.] Se senhor husu ba nia, senhor sei hatene rasik katak ami nia keixa kona ba nia nee loos hotu.”
ACT 24:9 Ema Judeu sira seluk mos foo sala ba Paulo, sira dehan katak keixa nebee Tértulu hatoo nee loos hotu.
ACT 24:10 Governador foo sinal ba Paulo para koalia. Nunee Paulo hataan, “Senhor governador, hau hatene katak senhor sai juis ba ami nia nasaun durante tinan barak ona. Nunee hau brani atu defende hau nia aan iha senhor nia oin.
ACT 24:11 Senhor rasik bele hatene katak, foin loron sanulu resin rua liu ba, hau baa iha Jerusalém para adora Maromak iha uma kreda boot.
ACT 24:12 Ema sira nebee foo sala mai hau nunka hetan hau haksesuk malu ho ema ida iha uma kreda boot. Hau mos nunka kria problema iha uma kreda seluk ka iha sidade laran.
ACT 24:13 Sira duun hau, maibee sira la iha evidensia nebee hatudu katak buat nebee sira duun nee loos.
ACT 24:14 Maibee hau foo sai katak, hau adora duni Maromak, Ida nebee ami nia bei-ala sira adora. Hau tuir Jesus nia dalan. Sira konsidera fali ami nee grupu relijiaun foun. Afinal hau fiar ba buat hotu-hotu nebee hakerek iha lei Moisés nian ho mos iha livru profeta sira nian.
ACT 24:15 Hau laran metin ba Maromak hanesan mos ema sira nebee kontra hau nee. Ami hotu fiar katak, ema moris loos ho ema aat, hotu-hotu too loron ida sei moris fila fali.
ACT 24:16 Nee mak hau sempre hakaas aan atu bele moris ho laran moos iha Maromak nia oin ho mos iha ema nia oin.
ACT 24:17 Hau hela iha rai liur tinan barak, foin hau fila ba Jerusalém, lori osan atu foo ba ema Judeu nebee susar, ho mos atu foo sakrifisiu ba Maromak iha uma kreda boot.
ACT 24:18 Bainhira ema sira nee hetan hau iha nebaa, hau foin tuir serimonia hamoos aan. Iha momentu nee, la iha ema barak hamutuk ho hau iha uma kreda boot, i la iha rungu-ranga.
ACT 24:19 Iha nebaa iha ema Judeu balu husi provinsia Ázia. Se sira iha problema ho hau, tuir loos sira rasik tenki mai iha nee hodi hatete hau nia sala saida.
ACT 24:20 Se lae, ema Judeu sira iha nee tenki hatete sai, uluk sira tesi hau nia lia iha tribunal relijiaun nian, sira hetan hau nia krimi saida.
ACT 24:21 Karik iha buat ida deit mak bele halo sira foo sala mai hau. Iha sira hotu nia oin, hau foo sai ho lian makaas dehan, ‘Agora imi atu foo justisa mai hau tanba hau fiar katak too loron ida ema mate sei moris fali.’ ”
ACT 24:22 Governador Felix nee hatene barak kona ba Jesus nia dalan. Nia mos marka fali ba loron seluk dehan, “Bainhira komandante Lísias mai foin hau hakotu lia nee.”
ACT 24:23 Depois governador haruka kapitaun ida lori Paulo baa dadur, maibee atu foo mos livre uitoan ba nia i foo lisensa atu nia maluk sira mai ajuda nia ho saida mak nia presiza.
ACT 24:24 Liu tiha loron ida-rua, governador Felix mai ho nia kaben Drusila, ema Judeu. Governador haruka ema lori Paulo mai, i nia rona Paulo esplika kona ba fiar ba Kristu Jesus.
ACT 24:25 Depois Paulo komesa esplika kona ba oinsaa moris loos, kona ba domina aan, i kona ba Maromak foo justisa iha loron ikus. Rona nunee, Felix tauk hodi dehan, “Too iha nee deit ona! O bele fila ona. Tempu iha mak hau bolu fali o.”
ACT 24:26 Nia hein atu Paulo foo osan para bele hasai nia husi kadeia. Tanba nee, nia haruka bolu Paulo baa beibeik hodi koalia ho nia.
ACT 24:27 Liu tiha tinan rua, iha governador foun ida mai troka Felix, naran Pórsiu Festu. Felix atu halo kontenti nai ulun Judeu sira, nunee nia husik nafatin Paulo iha kadeia.
ACT 25:1 Governador foun Festu muda ba sidade Sezareia hodi komesa ukun provinsia. Liu tiha loron tolu, nia baa kedas iha Jerusalém.
ACT 25:2 Iha nebaa nai lulik nia ulun sira ho nai ulun Judeu sira baa hasoru nia hodi hatoo sira nia keixa kona ba Paulo.
ACT 25:3 Sira husu ba governador Festu atu hanoin netik sira hodi haruka lori Paulo fila fali ba iha Jerusalém. Afinal sira kombina malu tiha ona atu oho Paulo iha dalan.
ACT 25:4 Maibee Festu hataan, “Paulo sei dadur hela iha Sezareia i hau rasik mos la kleur tan fila fali ba iha nebaa.
ACT 25:5 Nee duni se nia halo sala ruma karik, imi nai ulun sira balu tenki akompanha hau baa iha Sezareia para bele hatoo imi nia keixa iha nebaa.”
ACT 25:6 Festu hela iha Jerusalém maizoumenus loron walu ka sanulu, depois nia fila ba Sezareia. Aban fali nia komesa tesi Paulo nia lia. Nia haruka ema lori Paulo baa hamriik iha nia oin.
ACT 25:7 Bainhira Paulo too mai, ema Judeu sira nebee tuir governador husi Jerusalém hamriik haleu Paulo hodi foo sala todan oi-oin ba nia. Maibee la iha evidensia ida atu hatudu nia sala.
ACT 25:8 Depois Paulo defende nia aan dehan, “Hau nunka kontra lei Moisés nian. Hau la halo sala hasoru Maromak nia uma kreda boot. I hau mos la halo sala hasoru liurai Roma, César.”
ACT 25:9 Maibee governador Festu hakarak halo kontenti ema Judeu sira nia laran. Nunee nia husu ba Paulo, “Se hau tesi o nia lia iha Jerusalém, o simu ka lae?”
ACT 25:10 Paulo hataan, “Hau agora hamriik iha tribunal governu Roma nian. Tribunal nee mak serve atu tesi hau nia lia. Senhor rasik hatene ona, hau la halo sala ida kontra ema Judeu sira.
ACT 25:11 Se karik hau halo duni sala ruma para merese atu hetan kastigu mate, hau prontu simu. Maibee se ema Judeu sira nee duun matak deit hau, entaun la iha ema ida iha direitu atu entrega hau ba sira nia liman. Tanba nee, hau husu atu liurai boot César rasik mak tesi hau nia lia!”
ACT 25:12 Rona nunee, Festu husu matenek nain sira nia hanoin. Depois nia hatete ba Paulo, “Ohin o husu atu lori kazu nee ba iha liurai boot César, o sei baa duni.”
ACT 25:13 La kleur liurai Agripa ho nia feton Berenise mai iha Sezareia atu vizita governador foun Festu hodi kumprimenta nia.
ACT 25:14 Sira hela loron barak iha nebaa. Nunee loron ida, governador Festu konta Paulo nia kazu ba liurai dehan, “Iha nee iha ema dadur ida nebee governador Felix uluk husik hela iha kadeia.
ACT 25:15 Foin dadauk, kuandu hau baa iha Jerusalém, nai lulik nia ulun sira ho katuas lia nain Judeu nian mai hasoru hau hodi foo sala ba ema nee. Sira husu para hau tesi nia lia hodi foo kastigu ba nia.
ACT 25:16 Maibee hau hatete ba sira dehan, tuir lei Roma nian, la bele hatuun kedas kastigu ba ema ida. Ema nebee hatoo keixa tenki hamriik iha oin hodi foo sala ba nia, depois nia iha direitu atu defende nia aan. Nee mak foin bele hamonu kastigu ba nia.
ACT 25:17 Bainhira hau fila fali mai, sira akompanha hau. Aban fali hau komesa kedas tesi lia nee. Hau haruka lori ema dadur nee mai iha tribunal.
ACT 25:18 Ema sira nebee hatoo keixa nee hamriik hodi foo sala ba nia. Hau hanoin sira atu dehan nia halo krimi ruma, maibee lae.
ACT 25:19 Sira kontra nia tan deit sira nia opiniaun mak la hanesan kona ba sira nia relijiaun, ho mos tanba Ema ida naran Jesus. Jesus nee mate tiha ona, maibee Paulo sempre hatete, Nia moris fila fali ona.
ACT 25:20 Hau la hatene oinsaa atu investiga nia. Nee mak hau husu ba nia, se nia konkorda baa iha Jerusalém para hau tesi nia lia iha nebaa.
ACT 25:21 Maibee nia lakohi. Nia husu atu lori lia nee baa tesi iha liurai boot César. Nee mak hau haruka dadur nia nafatin iha kadeia, too hau iha tempu diak ida atu haruka nia ba liurai boot iha Roma.”
ACT 25:22 Depois liurai Agripa dehan, “Se bele, hau hakarak rona rasik husi ema nee.” Festu hataan, “Bele! Aban mak liurai rona rasik husi nia.”
ACT 25:23 Aban fali liurai Agripa ho Berenise too mai iha salaun governador nian. Sira hatais hena liurai nian mesak kapaas-kapaas deit. Komandante tropas sira ho mos ema boot sira husi sidade Sezareia akompanha sira tama ba salaun. Bainhira sira hotu iha laran ona, governador Festu haruka bolu Paulo tama.
ACT 25:24 Festu dehan, “Liurai Agripa, ho senhor sira nebee marka prezensa iha nee, haree took ema nee. Ema Judeu sira hotu-hotu, iha Jerusalém ho mos iha nee kesar mai hau kona ba nia. Sira hakilar dehan nia la merese atu moris tan.
ACT 25:25 Hau la hetan nia sala ida para nia merese hetan kastigu mate. Maibee nia husu atu lori kazu nee ba iha liurai boot iha Roma. Nunee hau desidi haruka nia baa.
ACT 25:26 Maibee hau tenki hakerek surat ida ba liurai boot, i hau la hatene atu hakerek saida loos. Nee mak hau lori nia mai iha ita boot sira nia oin, liu-liu iha liurai Agripa nia oin, atu ita bele investiga nia. Nunee hau bele hetan buat ruma nebee mak hau bele hakerek ba liurai boot.
ACT 25:27 Tanba hau senti, se hau haruka ema dadur ida ba iha liurai boot, hau tenki foo hatete nia halo sala saida loos. Se lae, la tama ulun.”
ACT 26:1 Depois liurai Agripa hatete ba Paulo, “Agora o bele defende o nia aan.” Paulo foo sinal ho liman, i komesa koalia nunee:
ACT 26:2 “Liurai Agripa, hau kontenti tanba ohin loron hau bele hamriik iha liurai nia oin hodi defende hau nia aan kona ba keixa hotu nebee ema Judeu sira hatoo tiha ona.
ACT 26:3 Hau kontenti, liu-liu tanba liurai hatene klean ema Judeu nia lisan. Ita boot mos hatene problema sira nebee mak halo ami haksesuk malu. Nee duni hau husu ita boot pasiensia uitoan hodi rona lai hau.
ACT 26:4 Ema Judeu sira hotu-hotu hatene hau nia moris oinsaa, komesa husi kiik iha hau nia rain rasik, too iha Jerusalém.
ACT 26:5 Sira konhese hau kleur ona. Nunee, se sira hakarak atu foo sasin karik, sira bele hatete katak hau moris nudar ema Farizeu. Ami ema Farizeu mak fanatiku liu tuir ami nia lei relijiaun.
ACT 26:6 Agora ita boot sira atu foo justisa mai hau tanba hau hein ho laran metin atu Maromak kumpri Nia promesa ba ita nia bei-ala sira.
ACT 26:7 Ema Israel husi suku sanulu resin rua nee hotu mos adora Maromak loron-kalan hodi hein atu Maromak kumpri Nia promesa nee. Liurai Agripa, maski ema Judeu sira mos fiar nunee, sira foo sala mai hau tanba deit hau laran metin ba promesa nee.
ACT 26:8 Nusaa mak imi susar loos atu fiar katak Maromak halo moris fali ema nebee mate tiha ona?
ACT 26:9 Uluk hau fiar katak, hau tenki halo buat saida deit hodi kontra ema nebee tuir Jesus, Ema Nazaré.
ACT 26:10 Ida nee mak hau halo iha Jerusalém. Iha tempu nebaa nai lulik nia ulun sira foo kbiit mai hau hodi baa kaer Jesus nia ema sira i hatama ba kadeia. Hau mos konkorda bainhira atu foo kastigu mate ba sira balu.
ACT 26:11 Dala barak hau tama-sai uma kreda Judeu nian hodi halo terus sarani sira atu obriga sira hatete aat Jesus. Hau hirus teb-tebes sarani sira too hau mos baa buka sira iha sidade oi-oin iha rai liur hodi halo terus sira.”
ACT 26:12 Paulo hatutan tan dehan, “Iha loron ida, nai lulik nia ulun sira foo orden ho surat rekomendasaun mai hau hodi baa kaer Jesus nia ema sira iha sidade Damasku.
ACT 26:13 Liurai Agripa, bainhira ami sei iha dalan klaran, meudia derepenti hau haree naroman ida husi lalehan leno kona hau ho hau nia kolega sira. Naroman nee makaas liu loro matan.
ACT 26:14 Ami hotu monu ba rai. I hau rona lian ida koalia mai hau ho lian Ebreu dehan, ‘Saulo, Saulo! Tansaa mak o halo terus Hau? Se o kontra Hau nia hakarak, entaun o halo terus o nia aan.’
ACT 26:15 Hau husu, ‘Nai, Ita Boot nee see?’ Nai hataan fali, ‘Hau mak Jesus, Ida nebee o halo terus nee.
ACT 26:16 Agora, hadeer hodi hamriik ona! Hau hatudu Hau nia Aan ba o hodi foti o sai Hau nia atan. O tenki baa foo sasin ba ema seluk kona ba saida mak o haree ona husi Hau iha loron nee, ho mos kona ba buat nebee Hau sei hatudu ba o aban-bainrua.
ACT 26:17 Hau sei salva o husi o nia maluk Judeu sira ho mos husi ema laos Judeu nebee hakarak halo aat o. Hau haruka o baa iha ema nebee laos Judeu
ACT 26:18 atu loke sira nia matan, para sira bele sai husi nakukun laran hodi moris iha naroman. Nunee Satanás la ukun tan sira, maibee Maromak mak ukun. Sira sei fiar mai Hau, nunee Maromak sei hamoos sira nia sala, i sira hola parte iha Maromak nia povu.’ ”
ACT 26:19 Paulo hatutan tan dehan, “Tanba nee liurai Agripa, hau halo tuir duni buat nebee hau simu husi lalehan nee.
ACT 26:20 Primeiru hau foo sai Jesus nia dalan ba ema Judeu sira iha Damasku, depois ba ema Judeu sira iha Jerusalém ho provinsia Judeia tomak, ho mos ba ema nebee laos Judeu. Hau foo sai katak sira tenki husik ona sira nia sala hodi fila ba Maromak. Sira mos tenki halo buat nebee diak hodi hatudu katak sira tuir duni Maromak.
ACT 26:21 Tanba hau halo servisu nee mak ema Judeu balu kaer hau iha uma kreda boot, i sira atu oho hau.
ACT 26:22 Maibee Maromak sempre tulun hau. Nee mak hau bele hamriik iha nee hodi foo sasin kona ba Jesus ba ema kiik-boot hotu. Saida mak hau koalia nee, hanesan lo-loos ho saida mak Moisés ho profeta sira uluk foo sai tiha ona
ACT 26:23 kona ba Mesias, Salvador nebee Maromak atu haruka mai. Sira dehan nunee: Mesias sei terus too mate. Nia mak Ema primeiru nebee moris fali husi mate. Depois Nia sei foo sai Liafuan Diak hodi foo naroman ba ema Judeu ho mos ba ema nebee laos Judeu.”
ACT 26:24 Paulo sei koalia hela, Festu hakilar dehan, “Paulo! O bulak ona! O estuda demais halo o sai bulak tiha.”
ACT 26:25 Maibee Paulo hataan, “Senhor governador mak hau respeita, hau laos bulak. Buat hotu nebee hau foo sai nee loos duni, hau laos koalia nar-naran.
ACT 26:26 Liurai rasik hatene ona buat sira nee, tanba laos akontese iha fatin subar. Nunee hau brani koalia mo-moos iha liurai nia oin.
ACT 26:27 Liurai Agripa, saida mak profeta sira uluk foo sai, ita boot fiar ka lae? Hau hatene ita boot fiar.”
ACT 26:28 Agripa dehan, “O hanoin o bele dada hau atu sai Kristaun lalais deit nunee ka?”
ACT 26:29 Paulo hataan, “Atu lalais ka kleur, hau harohan ba Maromak, atu liurai bele sai Jesus nia ema, hanesan hau. Laos deit liurai, maibee ema hotu nebee ohin loron rona hau nia liafuan, naran katak senhor sira keta sai dadur hanesan hau.”
ACT 26:30 Depois liurai hamriik tiha. Nunee mos governador Festu, Berenise ho ema sira hotu nebee tuur iha nebaa.
ACT 26:31 Bainhira sira lao sai tiha, sira hatete ba malu, “Ema nee la halo sala ida atu merese hetan kastigu mate ka tama kadeia.”
ACT 26:32 Agripa hatete ba Festu, “Se ema nee la husu atu lori nia kazu baa tesi iha liurai boot César karik, ita hasai tiha nia.”
ACT 27:1 Hotu tiha governador desidi katak ami tenki sae roo ba iha Itália. Nunee nia entrega Paulo ho ema dadur balu tan ba iha komandante kompanhia ida naran Júlio, husi Batalhaun Liurai Boot Roma nian.
ACT 27:2 Depois ami baa hamutuk sae roo ida nebee mai husi sidade Adramítiu. Tuir planu, roo nee sei halai tuir pontikais sira iha provinsia Ázia. Aristarku, ema Masedónia husi sidade Tesalónika, akompanha ami.
ACT 27:3 Aban fali ami too iha sidade Sidon. Komandante Júlio haree Paulo diak loos, i hatete ba nia para bele tuun baa haree nia kolega sira iha rai maran, atu sira bele foo buat nebee Paulo presiza.
ACT 27:4 Depois ami baa sae fali roo hodi lao tan. Maibee tanba anin boot hasoru ami, ami lao liu husi rai Xipre ho rai Síria nia klaran para bele sees uitoan husi anin.
ACT 27:5 Ami lao liu husi tasi provinsia Silísia ho Panfília nian. Depois ami too iha sidade Mira, iha rai Lísia. Iha nebaa ami tuun husi roo.
ACT 27:6 Komandante Júlio buka roo seluk nebee atu baa Itália. Nia hetan roo ida nebee mai husi sidade Alexandria, i ami hotu sae roo nee.
ACT 27:7 Durante loron barak nia laran, roo nee halai neineik tanba hasoru anin boot. Maski susar loos, too ikus ami konsege besik uitoan sidade Knidu. Anin makaas nafatin halo roo nee la bele lao ba oin. Entaun ami ho roo halai tuir fali tasi ninin rai Kreta nian, liu husi inur Salmona, atu bele sees uitoan husi anin.
ACT 27:8 Roo nee halai tuir tasi ninin Kreta nian ho susar loos, maibee ami konsege too iha fatin ida naran Pontikais Diak, besik sidade Laseia.
ACT 27:9 Ami lakon tempu barak ona iha dalan. Loron boot Hamoos Sala nian liu ona, nunee tama ona iha tempu anin boot nian, se roo halai nafatin bele hetan dezastre. Entaun Paulo hatete ba sira dehan,
ACT 27:10 “Maun-alin sira, hau hanoin se ita lao nafatin, ita bele hetan azar. Roo bele mout, sasaan sira lakon, ita mos bele mate.”
ACT 27:11 Maibee komandante lakohi rona Paulo nia liafuan. Nia rona liu ema ida kaer roo ho roo nain.
ACT 27:12 Pontikais nee la serve atu roo para durante tempu malirin. Entaun sira barak liu hakarak atu halai tan uitoan too iha sidade Feniks iha rai Kreta hodi hela iha nebaa too tempu anin boot liu tiha. Feniks nee pontikais diak ida tanba taka netik anin husi lorosae.
ACT 27:13 Bainhira anin komesa huu neineik husi parte sul, sira hanoin katak tempu diak ona atu lao ba Feniks. Entaun sira hasae ankor para roo bele lao, i sira ho roo halai tuir tasi ninin Kreta nian.
ACT 27:14 Maibee la kleur, anin komesa huu makaas loos husi rai nee, anin nee ema bolu “anin lorosae”.
ACT 27:15 Anin nee halo roo la bele lao nafatin ba oin, entaun ami husik roo tuir anin deit.
ACT 27:16 Too besik rai kiikoan ida naran Kauda, rai satan netik anin. Roo oan hodi salva vida sei kesi hela iha roo kotuk. Ho susar teb-tebes ami dada sae roo oan nee tau iha roo leten.
ACT 27:17 Bainhira sira hasae tiha ona roo salva vida nee ba roo leten, sira bobar haleu roo boot nee ho tali halo metin. Sira tauk, keta halo be anin huu roo baa metin iha rai henek besik Sirte. Nunee sira hatuun laan atu roo halai neineik uitoan.
ACT 27:18 Tanba laloran baku roo ba-mai makaas loos, nunee aban fali, sira komesa foti naha soe tuun ba tasi.
ACT 27:19 Iha loron tuir mai, sira foti tan material roo nian soe ba iha tasi laran.
ACT 27:20 Durante loron barak nia laran, anin boot nee huu makaas nafatin, i ami la hetan loro matan ho fitun. Too ikus ami hanoin ami la moris tan ona.
ACT 27:21 Kleur ona, ami hotu-hotu la haan buat ida. Too ikus Paulo hamriik iha ami nia oin hodi dehan, “Maun-alin sira, haree ka lae?! Uluk hau dehan ita la bele sai husi rai Kreta. Se imi rona hau karik, ita la estraga sasaan i la lakon sasaan hanesan nee.
ACT 27:22 Maibee agora hau husu ba imi hotu atu aten brani, tanba imi ida sei la mate. So roo deit mak sei mout.
ACT 27:23 Hori kalan Maromak, Ida nebee hau adora ho serbi nee haruka Nia anju ida mai hamriik iha hau nia sorin.
ACT 27:24 Anju nee hatete, ‘Paulo, o lalika tauk! O sei baa hamriik iha liurai César nia oin para tesi o nia lia. Maromak hatudu Nia laran diak ba o. Nee mak Nia mos salva ema hotu nebee hamutuk ho o iha roo nee.’
ACT 27:25 Nee duni maun-alin sira, aten brani ba. Hau fiar ba Maromak katak, saida mak Nia foo hatene mai hau nee sei akontese duni.
ACT 27:26 Maibee roo nee sei xoke tiha iha rai kiik ida.”
ACT 27:27 Durante loron sanulu resin haat ona roo nee namlele iha Tasi Adriátiku tuir deit anin. Depois, iha kalan boot, ema sira nebee servisu iha roo senti ami besik ona iha rai maran.
ACT 27:28 Entaun sira hatuun prumu hodi buka hatene tasi nia klean, i sira sukat hetan metru tolu-nulu resin hitu. Roo halai uitoan ba oin tan, sira sukat fali, hetan metru rua-nulu resin hitu.
ACT 27:29 Sira tauk, keta halo be roo nee xoke fatuk. Entaun sira hatuun ankor haat husi roo kotuk hodi halo roo metin, i sira hotu hamulak atu rai naroman lalais.
ACT 27:30 Sira nebee servisu iha roo nee kombina malu atu halai husik hela roo. Nunee sira hatuun roo oan, halo finji atu hatuun tan ankor balu husi roo ulun.
ACT 27:31 Maibee Paulo foo hatene ba komandante ho soldadu sira dehan, “Se ema sira nee la hela iha roo laran, imi sei mate hotu.”
ACT 27:32 Entaun soldadu sira tesi kotu tiha roo oan nia talin hodi husik laloran lori sees.
ACT 27:33 Bainhira rai besik naroman ona, Paulo husu atu ema sira nee hotu-hotu haan. Nia hatete, “Durante loron sanulu resin haat ona, imi nia fuan kii hela deit too imi la haan buat ida.
ACT 27:34 Nunee hau husu atu imi haan buat ruma lai, para imi bele iha forsa fali. Imi nia fuuk lahan ida mos sei la monu.”
ACT 27:35 Depois Paulo foti paun, nia halo orasaun foo agradese ba Maromak iha sira hotu nia oin, i nia silu paun pedasuk ida hodi haan.
ACT 27:36 Entaun ami mos laran metin, i haan buat ruma.
ACT 27:37 Ami iha roo nee nia laran hamutuk ema atus rua hitu-nulu resin neen.
ACT 27:38 Ami haan hotu too bosu. Depois sira foti trigu iha karoon-karoon soe ba tasi laran para halo roo kamaan liu tan.
ACT 27:39 Rai loron ona, sira haree hetan rai maran, maibee sira la hatene rai nebee mak nee. Sira haree tasi ibun ho rai henek, laloran iha nebaa laduun boot tanba iha foho oan satan netik husi sor-sorin. Nunee sira desidi atu koko lori roo tama too rai maran nebaa.
ACT 27:40 Entaun sira tesi kotu tiha ankor nia talin husik iha tasi. Sira kore tiha tali nebee mak kesi kamudi, i hatuun kamudi ba tasi laran atu bele fila roo hodi lao tuir dalan. I sira hasae laan ida iha roo ulun, atu anin bele huu roo ba tasi ibun.
ACT 27:41 Maibee seidauk too tasi ibun, roo nee halai sae tiha rai henek leten, i roo ulun metin tiha iha rai henek nee. Roo nia kotuk, laloran boot komesa baku rahun tiha.
ACT 27:42 Soldadu sira halo planu atu oho tiha ema dadur sira hotu para dadur sira la bele nani ba rai maran hodi halai.
ACT 27:43 Maibee komandante bandu sira, tanba nia hakarak salva Paulo. Nia foo orden uluk ba ema sira nebee hatene nani atu haksoit ba tasi laran hodi nani ba rai maran.
ACT 27:44 Depois ema sira nebee la hatene nani, nia haruka atu sira kaer ai kabelak ka naran buat ida hodi tuir laloran ba rai maran. Nunee ami hotu too iha rai maran ho diak.
ACT 28:1 Ami too iha rai maran ho diak, foin ami hatene katak rai nee naran Malta.
ACT 28:2 Ema rai nain sira simu ami ho diak teb-tebes. Udan boot i rai malirin, nunee sira tau ahi iha tasi ibun atu ami haneruk.
ACT 28:3 Paulo baa hili ai sunu. Momentu nia tau ai nee ba ahi, derepenti samodok ida nebee subar hela iha ai nee halai sai tanba ahi manas, depois tata metin tiha iha Paulo nia liman.
ACT 28:4 Bainhira ema rai nain sira haree samodok nee tabele hela iha Paulo nia liman, sira dehan ba malu, “Ema nee oho door ida karik. Maski nia konsege salva aan husi tasi siak, maibee ita nia maromak ida nebee Justisa Nain nee la husik nia moris.”
ACT 28:5 Maibee Paulo hisik tiha samodok nee ba ahi laran, nia la moras buat ida.
ACT 28:6 Ema sira nee hanoin katak la kleur tan, Paulo nia liman bubu ka nia mate derepenti. Maibee sira hein kleur loos, Paulo la iha buat ida. Entaun sira muda sira nia hanoin dehan Paulo nee maromak ida.
ACT 28:7 Administrador Malta nian, naran Públiu, nia iha rai ho uma besik tasi ibun nee. Nia simu ami iha nia uma ho diak teb-tebes, i nia tau matan mai ami durante loron tolu.
ACT 28:8 Iha tempu nee, administrador nia aman isin manas ho tee been. Paulo tama baa haree nia. Paulo halo orasaun i tau liman ba nia, i katuas nee diak fali.
ACT 28:9 Bainhira ema iha fatin nee rona nunee, ema moras sira seluk mos mai, i sira hotu hetan kura.
ACT 28:10 Depois sira lori prezenti hodi hatudu respeitu ba ami. Too tempu ami atu sae roo, sira lori buat hotu-hotu nebee ami presiza.
ACT 28:11 Ami hela iha Malta durante fulan tolu, depois ami baa sae roo ida. Iha roo nee nia oin iha estatua Dioskuri, nee dehan katak “maromak kaduak”. Roo nee mai husi sidade Alexandria, maibee para hela iha Malta durante tempu malirin ho anin boot.
ACT 28:12 Ami ho roo too iha sidade Sirakuza, depois ami hela loron tolu iha nebaa.
ACT 28:13 Hotu tiha roo nebee ami sae nee halai tuir tasi ninin too iha sidade Régiu. Aban fali anin komesa huu makaas husi parte sul. Nunee iha loron tuir mai, ami too iha pontikais Poteoli.
ACT 28:14 Iha nee ami tuun husi roo. Ami hasoru malu ho sarani sira, i sira konvida ami hela ho sira semana ida. Depois ami lao liu ba Roma.
ACT 28:15 Sarani sira iha Roma rona ona katak ami atu too iha nebaa. Entaun sira mai hasoru ami iha dalan. Sira balu hasoru ami iha Merkadu Ápiu, sira seluk hasoru ami iha fatin ida naran Loja Tolu. Bainhira Paulo haree sira, nia mos laran metin, i nia foo agradese ba Maromak.
ACT 28:16 Too iha Roma, komandante husik Paulo livre hodi hela mesak, i soldadu ida hein nia.
ACT 28:17 Liu tiha loron tolu, Paulo konvida ulun relijiaun Judeu sira iha Roma atu mai hasoru malu ho nia. Bainhira sira halibur malu ona, nia hatete ba sira, “Maun-alin sira, hau mai iha nee tanba ema kaer hau iha Jerusalém hodi entrega hau ba governu Roma, maski hau la halo sala ida. Hau la kontra ita nia nasaun, i hau mos la kontra lisan nebee ita nia bei-ala sira rai hela ba ita.
ACT 28:18 Governu Roma tesi tiha ona hau nia lia iha nebaa, maibee sira la hetan sala ida nebee halo hau merese atu hetan kastigu mate. Nunee sira hakarak hasai hau.
ACT 28:19 Maibee ema Judeu nia boot sira la simu. Entaun hau husu atu mai iha liurai boot César hodi tesi hau nia lia. Tuir loos hau lakohi foo sala ba hau nia maluk Judeu rasik, maibee dalan seluk la iha ona.
ACT 28:20 Tanba nee mak hau husu atu ita boot sira mai iha nee para hau bele koalia ho imi. Hau hakarak para ita boot sira hatene katak, hau nia liman futu ho korenti nee tanba hau serbi Ema ida nebee ita povu Israel hein ho laran metin atu Maromak haruka mai.”
ACT 28:21 Sira hataan, “Ami seidauk simu surat ida husi Judeia hodi foo hatene kona ba ita. Nunee mos, maluk Judeu sira nebee mai husi nebaa, la iha ida mak koalia aat kona ba ita.
ACT 28:22 Maibee ami hakarak rona saida mak ita fiar, tanba ami rona ona dehan, iha fatin hotu-hotu ema la simu saida mak ita nia grupu nee hanorin.”
ACT 28:23 Entaun sira marka loron ida atu sira hasoru malu fali. Too iha loron nee, ema barak mai iha Paulo nia uma. Nia komesa esplika ba sira oinsaa Maromak ukun nudar Liurai. I nia foti liafuan husi lei Moisés nian ho mos husi profeta sira seluk nia livru atu dada sira hodi fiar ba Jesus. Nia koalia husi dadeer-saan too kalan.
ACT 28:24 Iha ema balu fiar liafuan nebee Paulo foo sai, maibee balu lakohi fiar.
ACT 28:25 Sira haksesuk malu too sira atu fahe malu ona. Maibee molok sira fila, Paulo hatete, “Buat nebee Espiritu Santu uluk foo sai liu husi profeta Isaias ba ita nia bei-ala sira kona loos imi.
ACT 28:26 Nia dehan, ‘O baa hatete ba povu nee dehan, “Imi sei rona beibeik, maibee la kompriende nafatin. Imi sei haree beibeik, maibee nafatin la hatene tuir.”
ACT 28:27 Tanba povu nee nia laran toos tiha ona, sira lakohi rona ho sira nia tilun, sira nia matan taka metin. Sira halo nunee atu sira nia matan la bele haree, sira nia tilun la bele rona, i sira nia laran la bele kompriende. Nunee sira la bele fila fali mai Hau, atu Hau salva sira.’ ”
ACT 28:28 Paulo hatutan tan dehan, “Nee duni imi tenki hatene katak, agora Maromak haruka ona Nia liafuan kona ba salvasaun ba ema sira nebee laos Judeu, i sira sei rona.”
ACT 28:29 [Paulo koalia nunee, ema Judeu sira mos fila hodi haksesuk malu iha dalan.]
ACT 28:30 Durante tinan rua Paulo hela iha uma nebee nia aluga. Nia simu ho laran haksolok ema hotu-hotu nebee baa vizita nia.
ACT 28:31 Nia foo sai ba sira kona ba Maromak ukun nudar Liurai, i hanorin kona ba Nai Jesus Kristu. Nia hanorin ho brani, i la iha ema ida bandu nia.
ROM 1:1 Surat nee husi hau, Paulo. Hau Kristu Jesus nia atan. Maromak mak hili hau sai Jesus nia apostolu hodi haruka hau foo sai Nia Liafuan Diak.
ROM 1:2 Liafuan Diak nee hori uluk kedas Maromak promete tiha ona liu husi Nia profeta sira, i sira hakerek iha Livru Sagradu.
ROM 1:3 Liafuan Diak nee koalia kona ba Maromak nia Oan Jesus Kristu, ita nia Nai. Nudar ema, Jesus moris mai husi liurai David nia jerasaun. Maibee Maromak hatudu mo-moos katak, Jesus nee mos Maromak nia Oan. Ita hatene nunee tanba Espiritu nebee mak iha Jesus nee santu teb-tebes hanesan Maromak, i Maromak halo Jesus moris fali husi mate.
ROM 1:5 Maromak hatudu Nia laran diak mai hau liu husi Jesus too Nia hili hau sai apostolu. Nia hili hau para lori ema husi nasaun hotu-hotu bele fiar ba Jesus hodi halo tuir Nia liafuan, atu nunee ema hotu-hotu bele foti aas Nia naran.
ROM 1:6 Nunee mos imi iha Roma, Maromak mos hili ona imi atu sai Jesus Kristu nia ema.
ROM 1:7 Hau haruka surat nee ba imi. Maromak hadomi imi, i hili ona imi sai Nia povu. Hau harohan atu ita nia Aman Maromak ho mos ita nia Nai Jesus Kristu hatudu Sira nia laran diak ba imi, i foo pas ho hakmatek ba imi.
ROM 1:8 Uluk nanain, hau foo agradese ba hau nia Maromak hodi Jesus Kristu nia naran tanba imi hotu fiar ba Jesus. Tanba ema iha nebee-nebee deit konta kona ba imi nia fiar nee.
ROM 1:9 Maromak rasik hatene katak hau harohan beibeik ba imi. Maromak nee mak hau serbi ho laran tomak hodi foo sai Liafuan Diak kona ba Nia Oan.
ROM 1:10 Bainhira hau halo orasaun, hau sempre harohan ba imi. I hau mos husu atu Maromak bele loke dalan mai hau atu baa haree imi, tanba kleur ona hau hakarak nunee.
ROM 1:11 Hau hakarak teb-tebes atu baa vizita imi, para hau bele fahe ba imi kbiit nebee hau hetan husi Maromak. Nunee imi nia fiar bele metin liu tan.
ROM 1:12 Hau hakarak atu hau nia fiar bele foo forsa ba imi, i imi nia fiar mos bele foo forsa mai hau.
ROM 1:13 Maun-alin sira, hau hakarak para imi hatene katak, dala barak ona hau halo planu atu baa vizita imi, maibee too agora sempre iha buat ruma mak taka dalan. Hau hakarak baa para hau bele lori ema barak iha nebaa hodi fiar metin ba Kristu, hanesan mos hau lori ona ema nebee mak laos Judeu iha fatin sel-seluk atu fiar metin ba Nia.
ROM 1:14 Hau iha obrigasaun atu foo sai Liafuan Diak ba ema hotu-hotu: Atu ema nebee tuir kultura Gregu ka ema fuik, atu ema matenek ka ema beik.
ROM 1:15 Tanba nee mak hau hakarak teb-tebes baa foo sai Liafuan Diak mos ba imi iha Roma.
ROM 1:16 Hau la moe foo sai Liafuan Diak kona ba Jesus. Tanba Liafuan Diak nee iha kbiit husi Maromak hodi salva see-see deit mak fiar, primeiru ba ema Judeu sira, depois ba ema husi nasaun sira seluk.
ROM 1:17 Tanba Liafuan Diak foo sai oinsaa Maromak hamoos ita nia sala hodi simu ita. Nia dalan mak nee: Ita tenki fiar ba Nia. Dalan seluk la iha. Nee hanesan buat nebee hakerek ona iha Livru Sagradu dehan, “Ema tenki fiar ba Maromak mak foin Maromak simu nia hodi foo moris rohan-laek ba nia.”
ROM 1:18 Maromak iha lalehan hatudu sai katak, Nia hirus teb-tebes too kastigu ema nebee mak la interese Nia ho ema nebee mak hahalok aat. Sira nia hahalok aat nee taka ema seluk nia matan atu la bele haree dalan loos.
ROM 1:19 Tuir loos buat nebee ita ema bele hatene kona ba Maromak, ema aat sira nee mos hatene, tanba Maromak hatudu mo-moos ona ba sira.
ROM 1:20 Tanba desde Maromak halo lalehan ho rai, ita ema bele hatene klaru katak Nia nee Maromak i Nia kbiit la hotu la remata, maski ita nia matan la haree. Nunee la iha razaun ida ba sira atu dehan katak sira la hatene Maromak, tanba sira bele hatene liu husi buat nebee mak Nia halo tiha ona nee.
ROM 1:21 Maski sira hatene Maromak, maibee sira lakohi hahii adora Nia nudar Maromak, i lakohi foo agradese ba Nia. Sira nia hanoin la loos ona, sira nia neon mos nakukun tiha.
ROM 1:22 Sira foti aan dehan, sira ema matenek, afinal sira sai beik-teen.
ROM 1:23 Sira la adora Maromak ida nebee Kbiit Nain i moris tinan ba tinan. Maibee sira adora fali estatua nebee ema halo tuir modelu oi-oin, hanesan ema, manu, animal ain haat ho animal nebee dolar iha rai. Afinal buat sira nee hotu tenki mate.
ROM 1:24 Nee mak Maromak husik tiha liman para sira moris tuir deit sira nia hakarak hodi halo buat aat oi-oin nebee iha ona sira nia laran. Sira foo sira nia isin lolon ba malu hodi halo sala foer oi-oin ba malu.
ROM 1:25 Maromak ida nebee loos, sira troka tiha ho buat nebee falsu. Sira la adora Maromak ida nebee halo buat hotu-hotu, maibee sira adora fali buat nebee mak Maromak halo. Tuir lo-loos Maromak nee mak ita tenki hahii too tinan ba tinan. Amen.
ROM 1:26 Tanba nee mak Maromak husik tiha liman para sira bele halo sala foer saida deit tuir sira nia hakarak, too feto sira mos la hola mane hanesan baibain, maibee hola fali sira nia feto maluk.
ROM 1:27 Nunee mos mane sira husik tiha relasaun seksual ho feto hodi kaan fali sira nia mane maluk, too mane ho mane halo sala foer. Tanba nee, sira hetan ona kastigu tuir sira nia hahalok aat nee.
ROM 1:28 Ema sira nee la interese atu hanoin tan Maromak ona. Nee mak Maromak husik tiha liman para sira hanoin mak buat aat deit, i halo buat nebee tuir lo-loos la bele halo.
ROM 1:29 Sira nia moris nakonu ho buat aat. Sira halo sala oi-oin, sira matan osan, i rai odi. Sira laran moras ba ema, oho door, gosta istori malu, bosok-teen, i laran aat. Sira gosta konta ema nia vida,
ROM 1:30 i hatete aat ema seluk. Sira odi Maromak, malkriadu, foti aan i halo aan. Sira hanoin aat hela deit, i gosta kontra sira nia inan-aman.
ROM 1:31 Sira lakohi atu hatene saida mak loos, i la halo tuir buat nebee mak sira promete. Sira la hatene hadomi ema, i la iha karidade.
ROM 1:32 Sira hatene ona Maromak nia lei nebee dehan, ema nebee halo buat aat nunee, merese hetan kastigu mate. Maski sira hatene ona lei nee, maibee sira halo nafatin buat aat sira nee. Laos nee deit, maibee sira gosta atu ema seluk mos halo tuir buat sira nee.
ROM 2:1 Entaun, belun, se o tesi lia mesak katak o nia maluk merese hetan kastigu, kuidadu! O nia liafuan nee hamonu fali o. Tanba o mos halo sala hanesan nia. Nunee bainhira o hatudu liman ba nia, o deklara katak o rasik mos tenki hetan kastigu nee.
ROM 2:2 Ita hatene, bainhira Maromak desidi atu foo kastigu ba ema nebee halo buat aat sira nee, Nia desizaun nee sempre loos.
ROM 2:3 Nunee, se o hatudu liman ba ema seluk, maibee o rasik halo aat hanesan ema nee, keta hanoin dehan o bele halai sees husi Maromak nia kastigu!
ROM 2:4 O hatene katak, Maromak laran diak teb-tebes i Nia aguenta hela ho pasiensia naruk. Nusaa mak o la respeita Nia laran diak nee? Keta halo be o la kompriende katak, Nia hatudu Nia laran diak ba o para o bele hakribi o nia sala hodi fila fali ba Nia.
ROM 2:5 Maibee o ulun toos i lakohi hakribi o nia sala. Nunee iha loron ikus bainhira Maromak hatudu Nia hirus hodi kastigu ema nebee mak halo sala, o nia kastigu sei todan liu tan. Iha tempu nebaa ema hotu-hotu sei haree katak, Maromak tesi lia ho lo-loos.
ROM 2:6 Nia sei foo ba ema ida-ida tuir nia hahalok.
ROM 2:7 Iha ema balu halo buat diak beibeik tanba sira hakarak atu Maromak respeita sira hodi foti aas sira nia naran, i halo sira moris tinan ba tinan. Ba sira nee Maromak sei foo moris rohan-laek.
ROM 2:8 Maibee iha mos ema balu mak hanoin sira nia aan deit, i lakohi halo tuir buat nebee mak loos, sira halo aat hela deit. Ba sira nee Maromak sei hirus teb-tebes too foo kastigu todan.
ROM 2:9 Ema sira nebee halo buat aat, sira sei hetan susar ho terus. Atu ema Judeu ka laos ema Judeu, sira hetan hotu.
ROM 2:10 Maibee ema sira nebee halo buat diak, Maromak sei respeita sira hodi foti aas sira nia naran, i foo pas ho hakmatek ba sira. Atu ema Judeu ka laos ema Judeu, sira hotu simu,
ROM 2:11 tanba Maromak la fihir ema.
ROM 2:12 See-see deit mak halo sala sei hetan kastigu, nia sei mate haketak aan husi Maromak. Ema nebee laos Judeu, la hatene lei nebee Maromak foo ba Moisés. Maromak kastigu sira, la bazeia ba lei nee. Maibee ema Judeu hatene lei Moisés nian, i Maromak sei kastigu sira tuir lei nee.
ROM 2:13 Se ita ema atu moris loos iha Maromak nia oin, ita rona Nia lei husi tilun deit la too, maibee Maromak dehan, ema nebee moris tuir lei, sira mak moris loos.
ROM 2:14 Maski ema nebee laos Judeu la hatene Maromak nia lei, maibee dala ruma sira halo tuir duni buat nebee lei nee haruka, tanba sira rasik hanoin hahalok nee loos. Nee hatudu katak, sira nia neon rasik hanesan lei ida ba sira nia moris.
ROM 2:15 Buat nebee ema laos Judeu halo nee hatudu katak, saida mak Maromak tau iha Nia lei, iha tiha ona sira nia neon ho laran. Tanba dala ruma sira rasik hatene katak sira nia hahalok sala, i dala ruma mos sira rasik hatene dehan sira halo buat nebee mak loos.
ROM 2:16 Tuir Liafuan Diak nebee hau baibain hanorin katak, iha loron ikus bainhira Maromak foti Jesus Kristu para tesi ema hotu-hotu nia lia, Nia sei tesi tuir sira ida-idak nia hahalok. Too ema nia segredu mos Nia sei foo justisa hotu.
ROM 2:17 Entaun, oinsaa ho imi nebee ema Judeu? Imi laran metin katak imi diak ona tanba imi hatene Maromak nia lei, i imi gaba aan kona ba imi nia relasaun ho Maromak.
ROM 2:18 Imi hatene Maromak nia hakarak, i hatene saida mak diak liu, tanba mestri sira hanorin ona ba imi husi Maromak nia lei.
ROM 2:19 Imi fiar aan dehan, imi bele hatudu dalan ba ema matan delek. Imi konsidera imi nia aan hanesan naroman nebee leno ema nebee moris iha nakukun laran.
ROM 2:20 Imi hanoin katak imi bele hanorin ema beik i imi bele sai mestri ba labarik kiikoan nebee la hatene buat ida. Imi hanoin nunee tanba husi Maromak nia lei nee ema bele hatene buat loos.
ROM 2:21 Imi hanorin ona ema seluk, nusaa mak imi la hanorin imi nia aan rasik? Imi koalia makaas dehan keta naok, maibee imi la naok ka?
ROM 2:22 Imi dehan, la bele halo relasaun seksual ho ema nebee laos o nia feen ka laen. Afinal imi rasik halo buat nee. Imi hakribi teb-tebes adora lulik, maibee imi naok fali sasaan husi uma lulik.
ROM 2:23 Imi foti aan dehan imi mak hatene Maromak nia lei, maibee imi rasik kontra fali lei nee hodi hatuun Maromak nia naran.
ROM 2:24 Hori uluk hakerek ona iha Livru Sagradu dehan, “Tanba imi ema Judeu nia hahalok mak ema nebee laos Judeu hatete aat Maromak nia naran.”
ROM 2:25 Bainhira imi sunat, nee hatudu katak imi tama ona ba Maromak nia povu. Nunee se imi halo tuir Maromak nia lei, sunat iha folin ba imi. Maibee se imi la halo tuir Nia lei, imi hanesan ema nebee la sunat.
ROM 2:26 Se iha ema ruma nebee la sunat maibee nia moris tuir Maromak nia lei, entaun Maromak sei simu nia hanesan fali ema nebee sunat tiha ona.
ROM 2:27 Ema sira nebee la sunat maibee moris tuir Maromak nia lei, sira sei foo sala ba imi ema Judeu. Tanba imi hatene lei nee hori uluk kedas i imi mos sunat tiha ona, maibee imi kontra fali lei nee.
ROM 2:28 Ema Judeu isin, laos haree husi liur. I sunat lo-loos laos buat nebee ema halo iha isin lolon deit.
ROM 2:29 Maibee ema Judeu isin, haree husi nia laran. I sunat nebee loos mak sunat husi laran, nebee Maromak nia Espiritu mak halo, laos sunat iha isin deit tuir lei. Ema nebee sunat husi laran nee, Maromak mak gaba nia, laos ema mak gaba.
ROM 3:1 Entaun, sai ema Judeu iha folin ka lae? I sunat tuir lei Judeu nian iha folin saida?
ROM 3:2 Iha folin boot oi-oin! Ida boot liu mak Maromak foo fiar ba ema Judeu atu kuidadu di-diak Nia liafuan.
ROM 3:3 Maski nunee ema Judeu balu la moris tuir Maromak nia liafuan. Kuandu sira la moris tuir, Maromak halo saida? Nia halo tuir nafatin Nia liafuan ka lae?
ROM 3:4 Nia kumpri nafatin! Maski ema hotu-hotu iha mundu bosok tuun-sae mos, Maromak loos nafatin. Nee hanesan hakerek tiha ona iha Livru Sagradu dehan, “Iha ema balu foo sala dehan, Maromak tesi lia la loos. Maibee sira sei haree mo-moos katak, saida mak Nia koalia sempre loos, i Nia sempre tesi lia ho lo-loos.”
ROM 3:5 Keta halo be ema ruma hanoin nunee: “Kuandu ita halo buat aat, nee hatudu katak, Maromak la hanesan ita ema, Nia sempre halo buat nebee mak loos. Se nunee, nusaa mak Maromak kastigu nafatin ita bainhira ita halo buat aat?” Nee ema kriatura nia hanoin deit.
ROM 3:6 Maibee laos nunee! Tanba se Maromak la iha direitu atu kastigu ema, oinsaa mak Nia bele foo justisa ba ema hotu-hotu iha mundu?
ROM 3:7 Keta halo be ema ruma dehan tan nunee: “Kuandu hau bosok, ida nee halo ema seluk hahii adora liu tan Maromak, tanba Maromak sempre koalia lia loos. Entaun se hau nia sala halo ema seluk hahii Maromak, nusaa mak Nia foo sala fali hau dehan hau nee sala nain?”
ROM 3:8 Se ida nee loos karik, entaun bele mos dehan, “Diak liu ita halo buat aat, atu buat nebee diak mos bele aumenta.” Iha ema balu duun hau dehan hau mak hanorin hanesan nee. Ema nebee koalia hanesan nee, merese duni hetan kastigu nebee Maromak atu foo ba sira.
ROM 3:9 Nunee, oinsaa ho ita nebee ema Judeu? Ita diak liu fali ema nebee laos Judeu ka? Lae liu! Hau esplika ona ba imi katak, sala ukun ita ema hotu-hotu, atu ema Judeu ka laos Judeu.
ROM 3:10 Hanesan hakerek ona iha Livru Sagradu dehan, “La iha ema ida mak moris loos, ida mos la iha.
ROM 3:11 La iha ema ida mak kompriende kona ba Maromak, la iha ema ida mak buka Nia.
ROM 3:12 Hotu-hotu sees ona husi dalan nebee loos, sira hotu la iha folin ona. La iha ema ida mak halo buat nebee diak, ida mos la iha.
ROM 3:13 Sira nia liafuan dodok dois hanesan rate nebee ema kee fila fali. Sira nia ibun so hasai deit liafuan bosok. Liafuan nebee sai husi sira nia ibun hanesan samea nia veneno.
ROM 3:14 Sira nia ibun nakonu ho liafuan aat, sira gosta hotar ema.
ROM 3:15 Sira lalais loos atu oho ema.
ROM 3:16 Sira estraga door, i sempre halo ema seluk laran susar.
ROM 3:17 Sira la hatene moris hakmatek,
ROM 3:18 i la hatene hamtauk Maromak.”
ROM 3:19 Entaun, ita hatene katak, liafuan hotu-hotu nebee hakerek iha Maromak nia lei koalia kona ba ema Judeu, tanba ema Judeu mak moris iha lei nia okos. Maromak foo lei nee para ema ida la bele defende aan dehan nia nunka halo sala. Aban-bainrua ema hotu-hotu iha mundu tenki hataan iha Maromak nia oin.
ROM 3:20 La iha ema ida mak halo tuir Maromak nia lei tomak too Maromak bele dehan, ema nee moris loos. Maibee husi lei nee ita bele hatene mo-moos katak ita ema sala nain.
ROM 3:21 Maibee agora nee Maromak hatudu ona dalan ba ita, oinsaa mak ita bele diak malu ho Nia. Dalan nee la haree ba ita atu moris tuir lei ka lae. Uluk kedas Moisés nia lei ho mos profeta sira nia livru hakerek kona ba dalan nee.
ROM 3:22 Dalan mak nee: See mak fiar ba Jesus Kristu, Maromak hamoos nia sala hodi simu nia. Atu nia ema Judeu ka laos Judeu, Maromak la haree ba ida nee.
ROM 3:23 Tanba ema hotu-hotu halo sala. Maromak nia hakarak mai ita aas teb-tebes, maibee la iha ida mak too iha nebaa.
ROM 3:24 Maibee tanba deit Maromak nia laran diak mai ita mak Nia hamoos ita nia sala hodi simu ita, tanba Kristu Jesus selu kotu ona ita.
ROM 3:25 Maromak foo Jesus para fakar Nia raan too mate hanesan sakrifisiu ida hodi hamoos ita nia sala, naran katak ita fiar ba Nia mate nee. Maromak halo nunee hodi hatudu katak, Nia sempre tesi lia ho lo-loos. Tanba uluk Nia sei pasiensia ho ema nia hahalok aat, Nia seidauk kastigu sira.
ROM 3:26 Maibee agora, liu husi Jesus nia mate, Maromak hatudu Nia justisa, para ema bele haree katak Nia sempre tesi lia ho lo-loos. I liu husi Jesus nia mate nee, ita mos haree katak, Maromak simu ema nebee mak fiar ba Jesus.
ROM 3:27 Se nunee, ita bele gaba aan ka? La bele! Tansaa mak la bele? Tanba laos ita tuir Maromak nia lei mak Maromak simu ita. Maibee Nia simu ita tanba ita fiar ba Jesus.
ROM 3:28 Tanba ita hatene katak, ema nebee Maromak simu mak ema nebee fiar ba Jesus, Nia laos simu ita tanba ita halo tuir Nia lei.
ROM 3:29 Maromak nee ema Judeu nia Maromak deit ka? Lae. Nia ema hotu-hotu nia Maromak.
ROM 3:30 Maromak nee ida deit. Nia simu ema Judeu kuandu sira fiar ba Nia. I ema nebee laos Judeu mos, Nia simu tanba sira nia fiar.
ROM 3:31 Entaun, se ita fiar ba Jesus Kristu, nee dehan katak ita soe tiha Maromak nia lei ka? Lae liu! Ita respeita liu tan lei nee.
ROM 4:1 Ita bele aprende husi ita nia bei-ala Abraão.
ROM 4:2 Tansaa mak Maromak simu nia? Tanba nia halo buat nebee diak ka? Se nunee, Abraão bele iha razaun atu foti aan dehan nia mak diak liu, maski iha Maromak nia oin ita ema la bele foti aan. Maibee laos nunee.
ROM 4:3 Iha Livru Sagradu hakerek dehan, “Abraão fiar ba Maromak, nee mak Maromak hamoos nia sala hodi simu nia.”
ROM 4:4 Ema nebee servisu, bainhira patraun selu nia kolen, osan nee laos prezenti, nia patraun iha obrigasaun atu foo.
ROM 4:5 Maibee ita ho Maromak laos nunee. Ita laos halo tuir Maromak nia lei para Nia tenki simu ita. Maibee ita fiar deit ba Nia, tanba ita laran metin katak, Maromak mak bele hamoos ema aat nia sala hodi simu sira. Nunee, Maromak simu ita tanba deit ita nia fiar.
ROM 4:6 Liurai David mos hatete nunee. Nia dehan, se Maromak la haree ba ema ida nia hahalok, maibee simu nafatin ema nee, entaun ema nee hetan bensaun. David dehan nunee:
ROM 4:7 “Se ema kontra Maromak nia lei maibee Maromak foo perdaun, ema nee hetan bensaun. Se nia halo sala maibee Maromak hamoos tiha nia sala, ema nee hetan bensaun.
ROM 4:8 Se Nai Maromak la husu tuir ona nia sala, ema nee hetan bensaun.”
ROM 4:9 Bensaun nee so ba ema Judeu nebee sunat ka? Ema seluk lae ka? Laos nunee! Ami foo hanoin ba imi ona katak, tanba Abraão fiar ba Maromak mak Maromak hamoos nia sala hodi simu nia.
ROM 4:10 Hori-bainhira mak Maromak simu nia? Molok Abraão sunat ka, depois? Molok nia sunat, laos depois!
ROM 4:11 Maromak simu Abraão tanba nia fiar, depois mak nia sunat. Sunat nee hanesan sinal ida atu hatudu katak Maromak simu tiha ona nia tanba nia fiar ba Maromak. Nunee Abraão sai aman ba ema hotu-hotu nebee fiar ba Maromak maibee la sunat, atu nunee Maromak hamoos sira nia sala hodi simu sira tanba sira nia fiar.
ROM 4:12 Abraão mos sai aman ba ema Judeu nebee sunat, naran katak ita fiar ba Maromak, hanesan ita nia bei-ala Abraão mos fiar bainhira nia seidauk sunat.
ROM 4:13 Maromak promete ba Abraão ho nia jerasaun katak, aban-bainrua mundu nee sei sai sira nian. Maromak promete nunee laos tanba Abraão moris tuir lei, maibee tanba nia fiar ba Maromak. Husi Abraão nia fiar nee mak Maromak hamoos nia sala hodi simu nia.
ROM 4:14 Tanba se ita ema halo tuir Maromak nia lei mak foin bele simu buat nebee mak Maromak promete, entaun ita nia fiar ba Maromak la iha folin, i Maromak nia promesa mos la vale buat ida.
ROM 4:15 Tanba se lei iha, entaun ita ema halo sala kontra lei nee, halo Maromak hirus teb-tebes too kastigu ita. Maibee se lei la iha karik, entaun sala kontra lei mos la iha.
ROM 4:16 Nee mak ita tenki fiar ba Maromak mak foin bele simu buat nebee Nia promete atu foo. Nunee, nudar Abraão nia jerasaun, ita bele laran metin katak, Maromak sei foo ba ita ho gratis. Atu ita ema Judeu nebee moris tuir lei ka, ita moris fiar ba Maromak hanesan Abraão, ita hotu sei simu. Tanba Abraão mak sai aman ba ita hotu.
ROM 4:17 Iha Livru Sagradu, Maromak promete ba Abraão dehan, “Hau sei halo o sai nasaun barak nia aman.” Abraão fiar Maromak, tanba Maromak mak halo moris fali ema mate, i Nia koalia deit, buat nebee la iha, bele iha.
ROM 4:18 Abraão laran metin hodi hein nafatin Maromak nia promesa, maski tuir ita ema nia haree la bele akontese. Tanba nee, nia sai duni nasaun barak nia aman, hanesan Maromak hatete ona ba nia dehan, “O nia jerasaun sei sai barak teb-tebes.”
ROM 4:19 Abraão fiar metin nafatin, maski nia hatene aan katak, nia katuas liu ona, maizoumenus tinan atus ida, i nia feen Sara mos la bele hetan oan ona.
ROM 4:20 Abraão nia fiar la nakdoko, nia la duvida katak Maromak sei kumpri Nia promesa. Maibee Abraão fiar metin liu tan i nia foti aas Maromak nia naran.
ROM 4:21 Nia laran metin katak Maromak iha kbiit atu halo saida mak Nia promete tiha ona.
ROM 4:22 Nee mak Livru Sagradu dehan, “Maromak hamoos nia sala hodi simu nia.”
ROM 4:23 Liafuan nebee hakerek nee, laos ba Abraão deit,
ROM 4:24 maibee mos ba ita. Maromak mos sei simu ita tanba ita fiar ba Nia. Maromak nee mak halo moris fali ita nia Nai Jesus husi mate.
ROM 4:25 Nia entrega Jesus ba ema oho tanba ita ema nia sala. Depois Maromak halo moris fali Nia para Maromak bele simu fali ita.
ROM 5:1 Maromak simu ona ita tanba ita fiar ba Kristu. Liu husi ita nia Nai Jesus Kristu mak agora ita moris dame malu ona ho Maromak.
ROM 5:2 Kristu mos halo ita hatene Maromak nia laran diak mai ita iha ita nia moris agora, tanba ita fiar. Ita nia laran mos haksolok, tanba ita laran metin katak, aban-bainrua Maromak sei foo naroman lalehan nian mai ita.
ROM 5:3 Laos nee deit, maibee ita nia laran mos haksolok iha terus laran, tanba ita hatene katak, husi terus nee ita aprende atu aguenta liu tan.
ROM 5:4 Se ita aguenta iha terus laran, ita nia moris halo haksolok Maromak nia laran. Se ita moris halo haksolok Nia laran, nee halo ita laran metin ba Maromak nia promesa.
ROM 5:5 Ita nia laran metin nee la saugati, tanba Maromak foo ona Nia Espiritu Santu mai ita, nunee ita hatene Maromak nia domin boot teb-tebes mai ita.
ROM 5:6 Iha tempu nebee mak ita ema la interese Maromak i la iha kbiit atu salva aan, iha tempu nee mak Kristu mate hodi troka ita.
ROM 5:7 Ita ema atu mate troka ema ida nebee moris loos, nee susar. Karik iha ema ida-rua prontu atu mate troka ema nebee laran diak teb-tebes.
ROM 5:8 Maibee Maromak hatudu Nia domin boot teb-tebes mai ita nunee: Kristu mate iha ita nia fatin bainhira ita sei moris iha sala nia laran.
ROM 5:9 Maromak simu ona ita tanba Kristu nia raan fakar too mate ba ita. Nunee ita hatene ona katak, Kristu sei salva ita iha loron ikus bainhira Maromak fakar Nia hirus mai mundu.
ROM 5:10 Uluk bainhira ita sei inimigu ho Maromak, Nia halo ita dame malu ho Nia liu husi Nia Oan nia mate. Saa tan agora ita dame malu ona, ita sei hetan salvasaun tanba Nia Oan moris fila fali.
ROM 5:11 Laos nee deit, maibee agora ita mos haksolok tanba Maromak hatudu Nia laran diak liu husi ita nia Nai Jesus Kristu, tanba Kristu nee mak halo ita dame malu ho Maromak.
ROM 5:12 Hori uluk liu, sala tama iha mundu tanba ema ida deit, ema nee mak Adão. Nia mate tanba nia sala. Too ikus, ema hotu-hotu iha mundu tenki mate tanba sira hotu mos halo sala tuir nia.
ROM 5:13 Uluk, bainhira Maromak seidauk foo Nia lei ba Moisés, ema iha mundu nee halo ona sala. Maibee tanba seidauk iha lei, entaun ema nia sala ida-ida seidauk sura.
ROM 5:14 Maski nunee husi tempu Adão too tempu Moisés nian, mate ukun ona ema hotu-hotu. Laos deit ema nebee kontra Maromak nia orden hanesan Adão mak mate, maibee ema nebee halo sala sel-seluk mos mate hotu. Adão nee ita bele kompara ho Ema ida nebee mak atu mai, nee mak Kristu.
ROM 5:15 Maibee Maromak nia diak la hanesan Adão nia sala. Adão nee ema ida deit, maibee tanba nia kontra Maromak nia orden, entaun ema hotu-hotu tenki mate. Jesus Kristu mos Ema ida deit, maibee tanba Kristu nia laran diak, entaun Maromak mos hatudu mo-moos Nia laran diak ba ema hotu. Ida nee hanesan prezenti ida nebee Nia foo ba ita gratis deit.
ROM 5:16 Prezenti nebee Maromak foo ba ita nee, la hanesan ho buat nebee ita hetan husi Adão nia sala. Bainhira ema ida nee halo sala, Maromak foo justisa dehan ita ema tenki hetan kastigu. Maibee agora ita ema halo sala barak liu ona. Maski nunee Maromak foo Nia prezenti mai ita nunee: Nia hamoos ita nia sala hodi simu ita.
ROM 5:17 Uluk ema ida Adão nee kontra Maromak nia orden, nunee mate ukun ema hotu-hotu. Maibee agora Ema ida seluk, Jesus Kristu halo mudansa boot liu tan. Nia hatudu Nia laran diak teb-tebes mai ita too Nia hamoos ita nia sala hodi simu ita. Nunee Nia lori ita ba moris rohan-laek hodi foti ita kaer ukun hamutuk ho Nia.
ROM 5:18 Entaun ema ida halo sala, lori Maromak nia kastigu ba ema hotu-hotu. I Ema ida seluk halo buat nebee loos, halo Maromak simu ita hodi foo moris rohan-laek ba ita.
ROM 5:19 Ema ida lakohi halo tuir Maromak nia liafuan, halo ema barak sai sala nain. Ida seluk halo tuir Maromak nia liafuan, i nunee sei halo ema barak diak malu ho Maromak.
ROM 5:20 Maromak foo Nia lei ba Moisés para ema hotu-hotu bele hatene lo-loos, sala nee saida. Maibee bainhira ema nia sala aumenta, Maromak mos hatudu liu tan Nia laran diak.
ROM 5:21 Uluk sala domina ema hotu-hotu, lori sira ba mate. Maibee agora Maromak nia laran diak domina ita, too Maromak mos simu fali ita, i lori ita ba moris tinan ba tinan liu husi ita nia Nai Jesus Kristu.
ROM 6:1 Nunee, agora atu dehan saida? Keta halo be ema ruma hanoin nunee: Diak liu ita halo sala nafatin para Maromak hatudu liu tan Nia laran diak mai ita.
ROM 6:2 Nee la loos! Ita atu moris nafatin iha sala nia laran, la bele ona! Tanba kona ba sala, ita hanesan mate tiha ona, i ema nebee mate la halo tan sala ona.
ROM 6:3 Tuir lo-loos imi hatene, momentu ita simu batizmu para ita sai laran ida ho Kristu Jesus, nee hanesan ita mos mate hamutuk ho Nia.
ROM 6:4 Bainhira ita simu batizmu, ita hanesan mate tiha ona i hakoi hamutuk ho Kristu. Ita tenki mate uluk ho Nia atu ita bele moris tuir fali dalan foun, hanesan mos Kristu moris fali ona ho Aman Maromak nia kbiit boot.
ROM 6:5 Ita sai laran ida ona ho Kristu tanba ita hanesan mate tiha ona hamutuk ho Nia. Entaun klaru katak aban-bainrua ita mos sei moris fali hanesan Nia.
ROM 6:6 Ita hatene katak, uluk ita hakarak halo buat aat oi-oin. Maibee agora, bele dehan, ita nia aan ida uluk nee la iha tiha ona, tanba mate tiha ona iha krus hamutuk ho Kristu. Nunee ita laos ona atan ba sala,
ROM 6:7 tanba ema nebee mate tiha ona, nia livre ona husi sala.
ROM 6:8 Entaun, se ita mate ona ho Kristu, ita fiar katak ita mos sei moris hamutuk ho Nia.
ROM 6:9 Ita hatene katak, tanba Kristu moris fali ona husi mate, entaun Nia sei la mate tan. Mate la ukun ona Nia.
ROM 6:10 Nia mate dala ida hodi halakon tiha sala nia kbiit. Maibee agora, Nia moris fali hodi foti aas Maromak nia naran.
ROM 6:11 Imi mos tenki konsidera imi nia aan nunee: Kona ba sala, imi hanesan mate tiha ona, maibee kona ba moris, imi moris hodi foti aas Maromak nia naran liu husi Kristu Jesus.
ROM 6:12 Nee duni la bele husik atu sala ukun imi nia isin nebee too loron ida sei mate nee. La bele tuir fali buat aat sira nebee mak imi nia isin hakarak halo.
ROM 6:13 La bele foo imi nia isin lolon para halo sala, hanesan fali sasaan nebee ema uza hodi halo buat aat. Maibee foo imi nia aan tomak ba Maromak. Nia lori ona imi husi mate ba moris. Nunee entrega imi nia isin lolon ba Nia para Nia uza hodi halo buat nebee mak loos.
ROM 6:14 Tanba sala la ukun ona imi. Agora imi la moris ona iha Moisés nia lei nia okos, maibee Maromak nia laran diak mak domina fali imi.
ROM 6:15 Se ita la moris ona iha lei nia okos, maibee Maromak nia laran diak mak domina fali ita, entaun ita bele moris nafatin iha sala nia laran ka? La bele!
ROM 6:16 Imi hatene katak, se imi foo imi nia aan ba ema seluk atu halo tuir nia hakarak, nee hanesan imi sai ona atan ba ema nee. Nunee mos se imi foo aan atu halo sala, imi sai atan ba sala, i too ikus sala nee halo imi mate haketak aan husi Maromak. Se imi foo aan atu halo tuir Maromak nia hakarak, imi sei moris loos.
ROM 6:17 Hau foo agradese ba Maromak, maski uluk imi atan ba sala, maibee agora ho laran tomak imi moris tuir ona hanorin loos nebee imi simu tiha ona.
ROM 6:18 Maromak hasai ona imi husi sala nia laran, i agora imi sai fali atan ba moris loos nian.
ROM 6:19 Hau foo ezemplu loro-loron nian husi patraun ho atan tanba se lae, susar ba imi atu kompriende. Uluk imi foo imi nia isin lolon sai atan ba buat foer, too imi nia hahalok aat aumenta ba beibeik. Agora nee imi tenki foo imi nia isin lolon sai atan ba moris loos nian, too imi sai ema nebee moris ho laran moos.
ROM 6:20 Uluk bainhira imi sei atan ba sala, imi la hatene moris loos.
ROM 6:21 Iha tempu nebaa imi simu buat diak saida husi imi nia sala nee? La iha! Imi nia sala so halo moe deit imi, i too ikus lori imi ba mate.
ROM 6:22 Maibee agora nee Maromak halo imi livre ona husi sala, i imi sai fali Maromak nia atan. Buat diak nebee imi simu mak nee: Imi sai ema nebee moris ho laran moos, nunee aban-bainrua imi sei hetan moris rohan-laek.
ROM 6:23 Tanba ema nebee mak atan ba sala, nia sei simu kastigu mate haketak aan husi Maromak. Maibee ema nebee mak laran ida ho Kristu Jesus ita nia Nai, nia sei simu moris rohan-laek, ida nee Maromak foo mai ita gratis deit.
ROM 7:1 Maun-alin sira, imi ema nebee hatene lei, entaun imi kompriende katak, lei so vale ba ema moris deit.
ROM 7:2 Hau foti ezemplu husi lei kazamentu nian. Tuir lei nee dehan, feto nebee kaben ona la bele husik nia laen durante nia laen sei moris. Maibee se nia laen mate, feto nee livre ona husi lei kazamentu.
ROM 7:3 Nunee, se nia hola fali mane seluk bainhira nia laen sei moris hela, nia halo sala seksual. Maibee se nia laen mate tiha ona, nia livre ona husi lei nee. Nia kaben fali ho ema seluk mos, la sala ida.
ROM 7:4 Maun-alin sira, agora ita laos moris iha lei nia okos. Tanba kona ba lei, ita hanesan mate tiha ona hamutuk ho Kristu. Maibee ita sai fali atan ba Patraun ida seluk, Patraun nee mak Kristu. Nia moris fali ona husi mate, atu ita bele serbi Maromak.
ROM 7:5 Uluk bainhira ita nia hakarak aat sei domina ita, lei foo hanoin mai ita atu la bele halo sala. Maibee bainhira ita hatene tiha lei nee, ita hakarak atu kontra liu tan, too ita halo sala oi-oin, i sala nee lori ita ba mate haketak aan husi Maromak.
ROM 7:6 Maibee agora ita livre ona husi lei, tanba kona ba lei ita hanesan mate tiha ona. Nunee agora ita bele serbi Maromak laos tuir dalan uluk nian mak halo tuir deit lei nebee hakerek iha livru. Maibee ita serbi Nia liu husi dalan foun, dalan nee mak Maromak nia Espiritu.
ROM 7:7 Nunee, agora ita atu dehan saida? Maromak nia lei nee buat aat ida ka? Lae liu! Tanba husi lei nee mak foin hau hatene, sala nee saida. Por ezemplu, iha lei ida dehan, “La bele kaan ema nia sasaan.” Husi lei ida nee mak foin hau kompriende katak, kaan sasaan nee buat aat ida.
ROM 7:8 Maibee sala iha nanis ona iha hau nia laran, nunee bainhira lei nee bandu atu la bele kaan ema nia sasaan, nee halo hau kaan buat oi-oin deit. Se la iha lei nebee bandu, sala mos la iha kbiit atu domina ita.
ROM 7:9 Uluk hau moris seidauk kompriende Maromak nia lei. Maibee bainhira hau aprende lei nee, sala mak buras fali iha hau nia moris,
ROM 7:10 halo hau hanesan mate haketak aan husi Maromak. Uluk hau hanoin dehan, Maromak nia lei bele lori hau ba moris rohan-laek, afinal lori hau ba mate.
ROM 7:11 Tanba sala nebee iha hau nia laran nee, uza fali lei nee atu lohi hau i halo mate hau.
ROM 7:12 Entaun Maromak nia lei nee santu, i buat hotu-hotu iha lei nia laran mos santu, loos ho diak.
ROM 7:13 Se nunee, lei nebee diak nee mak halo hau mate ka? Lae! Sala nebee iha hau nia laran mak uza fali lei nee hodi halo mate hau. Nunee mak foin hau bele hatene katak, hau nia hahalok aat nee sala duni i Maromak hakribi teb-tebes.
ROM 7:14 Ita hatene katak, lei nee Maromak nia Espiritu mak foo. Maibee hau ema kriatura fraku ida, i sala kesi metin hau hanesan fali nia atan.
ROM 7:15 Hau la kompriende hau nia hahalok. Buat nebee hau hakarak halo, hau la halo. Buat nebee hau hakribi, ida nee mak hau halo fali.
ROM 7:16 Sala nebee hau halo nee, hau rasik lakohi halo. Nee hatudu katak, hau konkorda ho Maromak nia lei.
ROM 7:17 Entaun, bele dehan, ida nebee halo buat aat nee, laos ona hau, maibee sala nebee iha hau nia laran mak halo.
ROM 7:18 Hau hatene katak, nudar sala nain la iha buat diak ida iha hau nia laran. Tanba hau hakarak duni halo buat nebee mak diak, maibee la konsege.
ROM 7:19 Buat diak nebee hau hakarak halo, hau la halo. Buat aat nebee mak hau lakohi halo, nee mak hau halo fali.
ROM 7:20 Nunee se hau baibain halo buat nebee mak hau lakohi atu halo, nee hatudu katak, ida nebee halo buat aat nee, laos ona hau, maibee sala nebee iha hau nia laran mak halo.
ROM 7:21 Entaun buat nebee hau haree iha hau nia moris mak nee: Bainhira hau hakarak halo buat diak, buat aat iha hau nia laran sempre kontra.
ROM 7:22 Hau nia laran haksolok teb-tebes ho Maromak nia lei,
ROM 7:23 hau nia neon mos konkorda ho lei nee. Maski nunee hau haree katak, sala mak servisu fali iha hau nia aan hodi kontra lei nee. Sala nee kesi metin hau hanesan dadur ida.
ROM 7:24 Koitadu! Hau susar liu! See mak bele salva hau husi buat aat iha hau nia aan nebee lori hau ba mate haketak aan husi Maromak?
ROM 7:25 Obrigadu ba Maromak! Nia mak salva hau liu husi Jesus Kristu ita nia Nai. Entaun realidade mak nee: Hau nia laran hakarak teb-tebes halo tuir Maromak nia lei, maibee nudar sala nain hau halo sala beibeik.
ROM 8:1 Ita nebee laran ida ho Kristu Jesus, Maromak nia kastigu la kona tan ita.
ROM 8:2 Tanba uluk sala ukun ita, lori ita ba mate, maibee agora liu husi Kristu Jesus, Maromak nia Espiritu hasai tiha ona ita husi sala nia ukun hodi lori ita ba moris.
ROM 8:3 Lei Moisés nian la bele hasai ita husi sala nia ukun, tanba ita ema sala nain la iha kbiit atu halo tuir lei nee hotu. Maibee Maromak bele hasai ita duni. Nia haruka Nia Oan rasik mai iha mundu para sai ema kriatura hanesan fali ita ema sala nain sira, i mate nudar sakrifisiu ida hodi halakon sala husi ita ema nia laran.
ROM 8:4 Maromak halo nunee atu loke dalan ba ita para bele halo tuir Nia hakarak nebee hakerek tiha ona iha Nia lei. Ita bele halo tuir tanba ita moris tuir Maromak nia Espiritu, laos ona tuir ita nia hakarak aat.
ROM 8:5 Ema sira nebee moris tuir sira nia hakarak aat, sira so hanoin buat aat deit. Maibee ema nebee moris tuir Maromak nia Espiritu, sira so hanoin buat nebee Nia Espiritu hakarak.
ROM 8:6 Se o nia hakarak aat domina o nia hanoin, o sei mate haketak aan husi Maromak. Maibee se Maromak nia Espiritu mak domina o nia hanoin, o sei moris i o nia laran sei hakmatek.
ROM 8:7 Se o nia hanoin nakonu ho buat aat, o sai inimigu ho Maromak, o la hakruuk ba Maromak nia lei, i la bele duni.
ROM 8:8 Se o moris tuir o nia hakarak aat, o la bele halo haksolok Maromak nia laran.
ROM 8:9 Maibee imi laos nunee. Imi la moris tuir imi nia hakarak aat, maibee moris tuir Maromak nia Espiritu, tanba Nia Espiritu hela iha imi nia laran. See mak la iha Kristu nia Espiritu, ema nee laos Kristu nian.
ROM 8:10 Imi nia isin lolon sei mate tanba imi nia sala. Maibee agora Kristu moris iha imi nia laran, nunee imi nia klamar sei moris nafatin, tanba Maromak hamoos imi nia sala hodi simu imi.
ROM 8:11 Maromak mak halo Jesus Kristu moris fali husi mate. Agora Nia Espiritu hela iha imi. Nunee aban-bainrua bainhira imi mate tiha ona, Maromak mos sei halo imi nia isin lolon moris fali, liu husi Nia Espiritu nebee hela iha imi nia laran.
ROM 8:12 Nee duni maun-alin sira, ita iha obrigasaun, maibee ita nia obrigasaun nee laos atu moris tuir ita ema nia hakarak aat.
ROM 8:13 Tanba se imi moris tuir imi nia hakarak aat, imi sei mate haketak aan husi Maromak. Maibee se imi hamate hahalok aat hodi Espiritu Santu nia kbiit, imi sei hetan moris.
ROM 8:14 Tanba ema nebee moris tuir dalan nebee Maromak nia Espiritu hatudu ba nia, ema nee mak Maromak nia oan.
ROM 8:15 Espiritu nebee ita simu nee, laos halo ita sai fali hanesan atan nebee moris iha tauk nia laran. Maibee Espiritu nee halo ita hatene katak ita nee Maromak nia oan. Nee mak ita brani bolu Maromak “hau nia Aman doben.”
ROM 8:16 Maromak nia Espiritu rasik hametin ita nia laran katak ita Maromak nia oan.
ROM 8:17 Se ita sai ona Maromak nia oan, nee dehan katak aban-bainrua ita sei simu riku-soin nebee mak Maromak rai hela ba Nia oan sira, hanesan mos Kristu simu. Naran katak ita mos hola parte iha Kristu nia terus, para aban-bainrua Maromak bele foti aas ita hanesan mos Nia foti aas Kristu.
ROM 8:18 Hau hanoin, terus nebee ita hetan agora hanesan buat kiik ida se ita kompara ho naroman lalehan nian nebee Maromak sei hatudu sai ba ita aban-bainrua.
ROM 8:19 Lalehan ho rai ho buat hotu-hotu iha laran, buat sira nee hotu hein hela atu haree Maromak hatudu sai see-see loos mak sai Nia oan.
ROM 8:20 Mundu ho buat hotu-hotu iha nia laran la konsege halo tuir Maromak nia planu, tanba Maromak mak desidi nunee, laos tanba mundu rasik mak hakarak. Bele nunee mos, mundu nee sei iha esperansa nunee:
ROM 8:21 Maski agora dadauk buat hotu-hotu tenki rahun ka mate, maibee aban-bainrua buat sira nee la rahun i la mate tan ona. Tanba Maromak sei foo liberdade ba buat hotu-hotu, hanesan mos Nia foo ba Nia oan sira. I liberdade nee furak teb-tebes.
ROM 8:22 Ita hatene katak hori uluk liu too agora nee, mundu ho buat hotu nebee mak Maromak halo, hotu-hotu halerik hanesan feto ida nebee mak kanotak moras atu tuur ahi.
ROM 8:23 Laos mundu deit mak halerik. Maibee ita nebee simu ona Maromak nia Espiritu, ita mos halerik hodi hein hela atu simu tan direitu tomak nudar Maromak nia oan hakiak. Nee dehan katak ita nia isin lolon livre ona, mate la ukun tan.
ROM 8:24 Tanba komesa ita foin simu salvasaun, ita hein ho laran metin atu Maromak foo buat nee mai ita. Maibee se buat nebee ita hein, ita hetan ona, ita sei la hein tan. Tanba ema la hein tan buat nebee mak nia hetan ona.
ROM 8:25 Maibee se ita seidauk hetan, ita hein ho pasiensia nafatin.
ROM 8:26 Nunee mos, Maromak nia Espiritu tulun ita, tanba ita ema nebee fraku. Ita la hatene saida mak ita atu husu ba Maromak liu husi ita nia orasaun. Maibee Maromak nia Espiritu rasik halerik ba Maromak hodi harohan mai ita. Buat nebee Nia harohan, ita ema nia liafuan la too.
ROM 8:27 Maromak hatene ita nia laran, Nia mos hatene Nia Espiritu nia hanoin. Bainhira Espiritu harohan ba Maromak nia povu, buat nebee Nia husu sempre tuir Maromak nia hakarak.
ROM 8:28 Ita hatene katak, se ita hadomi Maromak, entaun saida deit mak ita esperiensia iha ita nia moris, atu diak ka la diak, Maromak uza esperiensia nee hodi halo diak ba ita. Tanba Maromak bolu ona ita sai Nia ema, tuir Nia planu rasik.
ROM 8:29 Hori uluk liu, Nia konhese ona ita, i hili ita para sai hanesan Nia Oan Jesus, nunee Jesus mak maun boot, i ita sai Nia alin sira.
ROM 8:30 Ita nebee Maromak hili ona hori uluk liu nee, Nia bolu sai Nia ema. Ita nebee Nia bolu ona, Nia hamoos ita nia sala hodi simu ita. I ita nebee Nia simu ona, Nia mos foti aas.
ROM 8:31 Nunee, ita atu dehan tan saida kona ba buat sira nee? Maromak defende ita, entaun see mak bele kontra ita?
ROM 8:32 Maromak laran luak teb-tebes, too Nia Oan rasik mos Nia foo para mate iha ita hotu nia fatin. Husi nee ita bele hatene katak, Nia sei foo tan mai ita buat hotu-hotu nebee diak.
ROM 8:33 Maromak mak hili ita. Entaun see mak brani foo sala mai ita iha Maromak nia oin? Maromak hamoos tiha ona ita nia sala hodi simu ita.
ROM 8:34 Entaun see mak atu hamonu kastigu mai ita? La iha! Tanba Kristu Jesus mate ona ba ita, maibee laos nee deit, Nia moris fali ona, i agora Nia iha Maromak nia sorin loos hodi harohan mai ita.
ROM 8:35 Entaun see mak bele haketak ita husi Kristu nia domin? La iha! Bele ita hetan problema ka susar oi-oin, bele ita hetan terus tanba tuir Kristu, bele ita hamlaha ka la iha hena para hatais, bele ita iha situasaun perigu nia laran ka ema atu oho ita ho surik, maibee buat sira nee hotu sei la hakotu Kristu nia domin mai ita.
ROM 8:36 Nee hanesan hakerek tiha ona iha Livru Sagradu dehan, “Maromak, loron-kalan ema buka dalan atu oho ami tanba ami tuir Ita Boot. Sira haree ami hanesan bibi malae nebee mak sira atu oho.”
ROM 8:37 Maski ita hetan susar oinsaa mos, ita manaan ona, ita manaan liu dook tanba Kristu hadomi teb-tebes ita.
ROM 8:38 Hau fiar metin katak la iha buat ida mak bele haketak ita husi Maromak nia domin. Atu mate ka moris, atu anju ka forsa nakukun, atu buat nebee mosu agora ka buat nebee mosu aban-bainrua, atu forsa saida deit,
ROM 8:39 atu buat iha loro leten ka iha rai, atu buat sel-seluk nebee Maromak halo, la iha ida mak bele hakotu Maromak nia domin nebee Nia hatudu ona mai ita liu husi ita nia Nai Kristu Jesus.
ROM 9:1 Agora hau hakarak hatoo hau nia laran tristi ba imi. Nudar Kristu nia ema, hau koalia lo-loos ba imi, hau la bosok. Espiritu Santu mos hametin hau nia laran katak, buat nebee mak hau atu koalia nee loos.
ROM 9:2 Loron-kalan hau tristi teb-tebes, hau nia laran dodok,
ROM 9:3 tanba hau nia maluk Israel sira nebee lakohi simu Kristu. Se karik Maromak bele kastigu hau iha sira nia fatin hodi soe hau dook husi Kristu para sira bele hetan salvasaun, hau prontu simu.
ROM 9:4 Afinal ema Israel sira nee simu ona bensaun boot. Maromak hili ona sira sai Nia oan, Nia hatudu Nia naroman lalehan nian ba sira, Nia halo promesa oi-oin ho sira i foo Nia lei ba sira. Nia hanorin sira oinsaa atu adora Nia, i promete buat barak ba sira.
ROM 9:5 Sira nia bei-ala sira naran boot. Tuir raan, Kristu nebee Maromak promete hori uluk atu haruka mai nee mos husi sira nia jerasaun. Maibee Kristu nee mos Maromak, Nia boot liu buat hotu-hotu. Mai ita hahii Nia too tinan ba tinan. Amen.
ROM 9:6 Maski ema Israel barak seidauk simu Kristu, maibee keta hanoin dehan, Maromak la halo tuir Nia promesa. Tanba laos ema Israel hotu mak sai Maromak nia povu.
ROM 9:7 I laos ita nia bei-ala Abraão nia jerasaun hotu mak Maromak hili. Tanba Maromak dehan tiha ona ba Abraão, “Liu husi Isac mak o sei hetan jerasaun nebee Hau promete ona.”
ROM 9:8 Nee dehan katak, Maromak laos hili Abraão nia jerasaun tuir raan para sai Nia oan. Maibee Nia so hili deit jerasaun nebee mak Nia promete tiha ona atu foo.
ROM 9:9 Nia promesa mak nee: “Tinan oin Hau fila fali mai, o nia kaben Sara iha ona oan mane ida.”
ROM 9:10 Nunee mos ho ita nia bei-ala Isac ho nia kaben Rebeca, sira hetan oan mane kaduak.
ROM 9:11 Molok labarik sira nee moris, sira seidauk halo buat diak ka buat aat, maibee Maromak hatete ona ba Rebeca, “Maun sei serbi ba nia alin.” Nee hatudu katak, bainhira Maromak hili ema ida, Nia la haree ba ema nee nia hahalok, maibee Nia hili tuir Nia planu rasik.
ROM 9:13 Iha Livru Sagradu, Maromak dehan kona ba oan kaduak nee, “Hau hadomi Jacó, maibee Esaú lae.”
ROM 9:14 Nunee, ita atu dehan saida? Maromak tesi lia la loos ka? Laos nunee!
ROM 9:15 Uluk Maromak foo hatene ba Moisés dehan, “Hau sei hatudu domin ba ema nebee mak Hau rasik hakarak hadomi. I Hau sei hatudu Hau nia laran diak ba ema nebee mak Hau rasik hili.”
ROM 9:16 Nunee, Maromak nia domin la haree ba ita ema nia hakarak ka ita nia esforsu rasik, maibee Maromak hadomi tanba deit Nia laran luak.
ROM 9:17 Iha Livru Sagradu, Maromak dehan ba liurai Ejitu nunee: “Hau foti o sai liurai, tanba Hau hakarak uza o hodi hatudu Hau nia kbiit atu Hau nia naran sai boot iha mundu tomak.”
ROM 9:18 Nunee, se Maromak hakarak hatudu Nia domin ba ema ida, Nia halo deit. I se Nia hakarak halo ema ida nia fuan toos, Nia halo deit.
ROM 9:19 Karik imi ida protesta mai hau dehan, “Se Maromak hakarak halo ita nunee, nusaa mak Nia foo sala nafatin mai ita? Ita atu kontra Nia hakarak la bele.”
ROM 9:20 Maibee o nee see fali mak brani koalia hasoru Maromak hanesan nee? O nee ema deit! Hanoin took, kuandu ema halo sanan rai, sanan nee la bele husu fali ba ema nee, “Nusaa mak o halo hau hanesan nee?”
ROM 9:21 Ema nebee halo sanan rai, nia iha direitu atu halo sanan tuir nia hakarak. Husi rai mean kabuar ida, nia bele halo sanan rai oi-oin, balu diak nian, balu hodi uza ba foer fatin deit.
ROM 9:22 Maromak mos iha direitu nunee. Nia hakarak hatudu sai Nia kbiit boot hodi fakar Nia hirus ba ema nebee mak Nia atu kastigu, sira nee mak merese atu Nia harahun. Maski Nia atu kastigu sira, maibee Nia sei aguenta hela ho pasiensia.
ROM 9:23 Nia pasiensia lai ho sira nunee para hatudu ba ema hotu-hotu katak, Nia laran diak teb-tebes ba ita nebee mak Nia hadomi. Ita nee mak Nia prepara antes tiha ona atu aban-bainrua Nia sei foti aas ita.
ROM 9:24 Nia bolu ita nanis ona atu sai Nia ema. Nia laos bolu deit ema Judeu, maibee Nia bolu mos ema nebee laos Judeu.
ROM 9:25 Uluk profeta Oseias hakerek Maromak nia liafuan kona ba ema nebee mak laos Judeu nunee: “Ema nebee uluk laos Hau nia povu, Hau sei bolu ‘Hau nia povu.’ Ema nebee uluk Hau la hadomi, Hau sei dehan, ‘Hau hadomi imi.’”
ROM 9:26 Nia mos hakerek nunee: “Iha fatin nebee mak uluk Maromak dehan ba sira, ‘Imi laos Hau nia povu’, iha fatin nee duni mak Maromak Moris sei bolu sira ‘Hau nia oan’.”
ROM 9:27 Maibee kona ba ema Israel, profeta Isaias halerik nunee: “Ema Israel sira barak teb-tebes hanesan rai henek iha tasi ibun, maibee uitoan deit mak sei hetan salvasaun.
ROM 9:28 Tanba too nia tempu, Nai Maromak sei hamonu kedas Nia kastigu mai mundu. Nia sei la demora.”
ROM 9:29 Profeta Isaias mos foo hatene nanis ona kona ba ema Israel dehan, “Se uluk Nai Maromak Kbiit Nain la husik ita nia povu balu moris karik, entaun ita mate mohu ona hanesan ema iha sidade Sodoma ho Gomora.”
ROM 9:30 Nunee ita atu dehan saida? Ema nebee laos Judeu, sira uluk la hakaas aan atu diak malu ho Maromak. Too ikus Nia simu sira tanba sira fiar ba Jesus Kristu.
ROM 9:31 Maibee ema Israel hakaas aan moris tuir lei atu sira bele diak malu ho Maromak, i la konsege.
ROM 9:32 Nusaa mak sira la konsege? Tanba sira buka diak malu fali ho Nia liu husi sira nia hahalok rasik, laos liu husi fiar. Nee hanesan sira sidi ba fatuk.
ROM 9:33 Fatuk nee mak Jesus Kristu. Iha Livru Sagradu, Maromak koalia kona ba Jesus Kristu nunee: “Haree ba! Hau tau hela fatuk ida iha foho Siaun. Fatuk nee halo ema sidi, i halo sira monu. Maibee see mak fiar ba Nia, sira nia fiar la saugati.”
ROM 10:1 Maun-alin sira, hau hakarak teb-tebes atu hau nia maluk ema Israel sira hetan salvasaun, i hau harohan beibeik atu Maromak salva sira.
ROM 10:2 Hau hatete lo-loos, sira nia laran hakarak teb-tebes serbi Maromak, maibee sira la hatene dalan loos.
ROM 10:3 Sira la kompriende dalan nebee mak Maromak foo atu sira diak malu fali ho Nia, maibee sira tuir fali sira nia dalan rasik. Dalan nebee mak Maromak hatudu, sira la simu.
ROM 10:4 Kristu kumpri ona Moisés nia lei tomak. Nunee see-see deit mak fiar ba Kristu, Maromak simu nia.
ROM 10:5 Iha Livru Sagradu, Moisés hakerek dehan, ema bele diak malu ho Maromak se sira halo tuir Maromak nia lei tomak. Nia hakerek nunee: “Ema nebee mak halo tuir buat sira nee hotu, nia sei hetan moris.”
ROM 10:6 Maibee kona ba diak malu ho Maromak liu husi fiar ba Jesus Kristu, Livru Sagradu dehan, “Keta hanoin iha imi nia laran dehan, see mak atu sae ba lalehan para lori Kristu tuun mai salva ita?
ROM 10:7 Lalika husu, see mak atu tuun ba iha matebian sira nia fatin atu fanu Kristu fila fali husi mate?”
ROM 10:8 Lalika buka Nia iha fatin dook, tanba iha Livru Sagradu mos hakerek dehan, “Maromak nia liafuan besik loos imi, iha imi nia ibun, ho mos iha imi nia laran.” Liafuan nee mak ami baibain foo sai kona ba fiar, nunee:
ROM 10:9 Se o nia ibun foo sai dehan, “Jesus mak Nai”, i o fiar ho laran katak, Maromak halo moris fali ona Jesus husi mate, o sei hetan salvasaun.
ROM 10:10 Tanba imi nia laran fiar ba Kristu mak Maromak hamoos imi nia sala hodi simu imi. I tanba imi nia ibun foo sai dehan, “Jesus mak Nai”, nee mak Maromak salva imi.
ROM 10:11 Hanesan hakerek iha Livru Sagradu dehan, “See-see deit mak fiar ba Nia, sira nia fiar la saugati.”
ROM 10:12 Atu ema Judeu ka laos Judeu, hanesan deit. Tanba ita hotu iha Nai ida deit, Nia mak Nai ba ema hotu-hotu, i Nia hatudu Nia laran diak teb-tebes ba see-see deit mak husu tulun ba Nia.
ROM 10:13 Hanesan hakerek ona iha Livru Sagradu dehan, “Ema see deit mak husu tulun ba Nai, Nia sei salva sira.”
ROM 10:14 Maibee oinsaa mak ema bele husu tulun ba Ema ida se sira la fiar ba Nia? Oinsaa mak sira bele fiar se nunka rona kona ba Nia? Oinsaa mak sira bele rona kona ba Nia se la iha ema ida mak baa foo sai ba sira?
ROM 10:15 I oinsaa mak ema bele baa foo sai ba sira, se la iha ema ida mak haruka? Iha Livru Sagradu hakerek dehan, “Ita haksolok teb-tebes simu ema nebee mak lori liafuan diak mai ita.”
ROM 10:16 Maski ema Israel rona Liafuan Diak, maibee balu deit mak simu. Hanesan profeta Isaias dehan, “Nai, ema uitoan deit mak fiar ba liafuan nebee mak ami foo sai.”
ROM 10:17 Nunee, ema rona Liafuan Diak mak foin bele fiar. I atu rona, tenki iha ema ruma mai foo sai ba sira kona ba Kristu.
ROM 10:18 Entaun hau hakarak husu, ema Israel nunka rona kona ba Kristu ka? Sira rona tiha ona! Hanesan hakerek iha Livru Sagradu dehan, “Liafuan diak foo sai tiha ona iha mundu tomak, husi rai ulun too rai ikun.”
ROM 10:19 Hau husu tan: Keta halo be ema Israel la kompriende liafuan nebee mak sira rona nee? Sira kompriende! Primeiru, Moisés hatoo Maromak nia liafuan ba ema Israel dehan, “Hau sei foo bensaun ba ema nebee laos Judeu, halo imi laran moras ba sira. Hau sei hatudu laran diak ba povu nebee beik, halo imi hirus.”
ROM 10:20 Tuir mai, profeta Isaias brani hakerek Maromak nia liafuan kona ba ema nebee mak laos Judeu nunee: “Ema nebee la buka Hau, hetan ona Hau. Hau hatudu ona Hau nia Aan ba ema nebee mak la buka hatene kona ba Hau.”
ROM 10:21 Maibee kona ba ema Israel, Nia dehan, “Loron-kalan Hau nia liman nakloke atu simu sira, maibee sira ulun toos i lakohi rona Hau.”
ROM 11:1 Se nunee hau husu tan: Entaun Maromak fila kotuk ba Nia povu Israel ka? Lae liu! Hau rasik ema Israel, hau Abraão nia jerasaun, husi suku Benjamim.
ROM 11:2 Maromak nunka fila kotuk ba Nia povu. Sira nee Nia hili hori uluk kedas. Imi hatene saida mak hakerek iha Livru Sagradu kona ba profeta Elias, bainhira nia kesar ema Israel ba Maromak dehan,
ROM 11:3 “Nai, ema oho hotu ona Ita Boot nia profeta, i halo rahun Ita Boot nia meza sakrifisiu. Hela deit hau mesak, i ema atu oho tan hau!”
ROM 11:4 Maibee Maromak hataan dehan, “Laos o mesak! Hau salva hela Hau nia ema rihun hitu. Sira nee nunka hakneak adora estatua Baal.”
ROM 11:5 Nunee mos agora, sei iha ema Israel balu nebee tuir Maromak nafatin, sira nee Maromak hili ona tanba Nia laran diak.
ROM 11:6 Nia hili sira tanba deit Nia laran diak, laos tanba buat diak nebee mak sira halo. Se Maromak hili ema bazeia ba sira nia hahalok karik, entaun bele dehan Nia laran diak la vale ona. Maibee laos nunee.
ROM 11:7 Entaun oinsaa? Ema Israel hakaas aan atu diak malu ho Maromak, maibee barak la konsege. So sira nebee Maromak hili tiha ona mak hetan. Maibee ema Israel sira seluk sai ulun toos liu tan.
ROM 11:8 Iha Livru Sagradu hakerek kona ba ema sira nee dehan, “Hori uluk too agora Maromak halo sira nia neon sai beik, sira nia matan la haree, sira nia tilun la rona.”
ROM 11:9 Liurai David mos hakerek, “Husik atu sira halo festa haan-hemu, molok hakfodak sira monu tama ba lasu laran hodi hetan kastigu tuir sira nia hahalok aat.
ROM 11:10 Husik sira nia matan sai delek atu sira la bele haree. Husik sira lori todan, too sira nia kotuk bonko tinan ba tinan.”
ROM 11:11 Entaun hau husu nunee: Bainhira ema Judeu sira sidi, sira monu too la bele hamriik tan ka? Laos nunee! Maibee tanba sira lakohi rona Maromak mak dalan nakloke ba ema nebee laos Judeu atu hetan salvasaun. Nee para ema Judeu bele laran moras hodi hakarak atu sira mos simu salvasaun nee.
ROM 11:12 Entaun ema Judeu nia sala lori fali bensaun ba ema iha mundu tomak. Nunee ema Judeu lakon, i ema seluk mak hetan bensaun fali. Se ema Judeu nia sala lori bensaun, saa tan aban-bainrua ema Judeu tomak fila fali ba Maromak! Nee lori bensaun liu tan!
ROM 11:13 Agora hau koalia ba imi nebee mak laos Judeu. Maromak foti hau sai apostolu atu baa foo sai Nia Liafuan Diak ba ema nebee laos Judeu. Hau foo aan tomak hodi halao servisu boot nee.
ROM 11:14 Hau hein katak, hau bele sadik hau nia maluk Judeu para sira mos hakarak simu bensaun nebee mak imi simu tiha ona. Ho nunee sira balu bele hetan salvasaun.
ROM 11:15 Bainhira Maromak la simu ema Judeu, nee loke dalan atu ema iha mundu tomak bele diak malu ho Maromak. Saa tan aban-bainrua, Maromak simu fali sira, nee hanesan ema mate moris fali!
ROM 11:16 Hau foti ezemplu kona ba ema Judeu. Bainhira ema halo paun, sira oferese ida primeiru ba Maromak, nunee paun nee hotu sai Maromak nian. Nunee mos, se ema oferese ai nia abut ba Maromak, ai huun nee tomak sai Maromak nian.
ROM 11:17 Ita mos bele kompara ema Judeu ho ai oliveira nebee ema kuda iha toos laran. Maromak tesi sai tiha ona ai nee nia sanak balu. Maibee imi nebee mak laos Judeu, imi hanesan ai oliveira fuik nia sanak nebee Maromak taka iha ai huun hakiak nee. Nunee imi sanak husi ai huun fuik hetan moris husi ai huun hakiak nee.
ROM 11:18 Maibee la bele foti aan dehan, imi husi liur nee diak liu fali sanak nebee mak Maromak tesi soe tiha ona nee! Keta haluha, imi nee ai sanak deit! Laos sanak mak hametin ai huun. Maibee ai nee nia huun mak halo metin nia sanak.
ROM 11:19 Karik imi ida hakarak dehan, “Maibee Maromak tesi sai tiha ai sanak balu atu Nia bele taka fali hau iha sira nia fatin.”
ROM 11:20 Loos duni, maibee keta haluha katak, Maromak soe tiha ona ai sanak sira nee tanba sira lakohi fiar ba Kristu. I o troka fali sira tanba o fiar. Entaun la bele foti aan. Diak liu kuidadu!
ROM 11:21 Tanba ai sanak orijinal mos Nia bele tesi sai tiha, saa tan imi!
ROM 11:22 Nunee ita haree katak, Maromak laran diak, maibee Nia mos hatene foo kastigu todan. Nia foo kastigu ba ema nebee lakohi rona Nia. Maibee ba imi, Nia hatudu Nia laran diak, naran katak imi la fila kotuk ba Nia laran diak nee. Se imi fila kotuk karik, Nia mos sei tesi sai tiha imi husi huun.
ROM 11:23 Nunee mos se ema Judeu sira desidi fiar ba Kristu, Maromak sei taka fila fali sira iha ai huun orijinal nee, tanba Nia iha kbiit hodi halo buat nee.
ROM 11:24 Tuir loos ai sanak husi ai oliveira fuik la bele taka ba iha ai oliveira hakiak, maibee Maromak konsege halo duni. Saa tan ai sanak nebee Nia uluk tesi tiha ona husi ai oliveira hakiak nee. Nia iha kbiit atu taka fila fali ba iha nia huun rasik.
ROM 11:25 Maun-alin sira, hau hakarak atu imi hatene Maromak nia planu nebee uluk segredu hela, para imi la bele foti aan. Nia planu mak nee: Agora dadauk ema Israel barak ulun toos hasoru Maromak. Sira sei ulun toos too ema seluk nebee Maromak hili ona tama hotu ba Maromak nia povu, foin sira mos fiar ba Nia.
ROM 11:26 Nunee, Maromak sei salva ema Israel hotu, hanesan Nia dehan tiha ona iha Livru Sagradu, “Iha Salvador ida sei mai husi foho Siaun, Nia sei halo Jacó nia jerasaun hakribi sira nia hahalok aat hasoru Hau.
ROM 11:27 Hau nia promesa ba sira mak nee: Hau sei hamoos sira nia sala hotu.”
ROM 11:28 Tanba ema Judeu la simu Liafuan Diak, entaun sira sai inimigu ba Maromak. Nee loke dalan ba imi nebee laos Judeu atu bele simu salvasaun. Maski nunee Maromak hadomi nafatin sira, tanba uluk kedas Nia hili sira nia bei-ala sira.
ROM 11:29 Tanba bainhira Maromak foo buat ruma, Nia nunka foti fila fali. I bainhira Nia bolu ema ida sai Ninian, Nia nunka nega fali.
ROM 11:30 Imi nebee laos Judeu, uluk lakohi rona Maromak. Maski nunee agora Maromak hatudu Nia laran luak ba imi, tanba durante nee ema Judeu lakohi rona.
ROM 11:31 Nunee mos, maski ema Judeu agora nafatin lakohi rona Maromak, maibee aban-bainrua Nia sei hatudu Nia laran luak ba sira, tanba Nia hatudu uluk ona ba imi.
ROM 11:32 Nunee, Maromak husik ema hotu-hotu sai atan ba sala, para Nia bele hatudu Nia laran luak ba sira hotu.
ROM 11:33 Nai Maromak nia matenek klean liu, Nia kompriende husi huun too rohan. La iha ema ida mak bele kompriende Nia desizaun, la iha ema ida mak bele hanoin hetan Nia dalan.
ROM 11:34 See mak bele hatene tuir Nai Maromak nia hanoin? See mak bele hanorin fali Nia?
ROM 11:35 See mak bele foo prezenti ba Maromak atu Maromak troka fali prezenti ho nia?
ROM 11:36 Tanba buat hotu-hotu iha lalehan ho rai mai husi Nia, i sei iha nafatin tanba Nia, Nia halo buat hotu-hotu atu hahii Nia. Mai ita hahii adora Nia too tinan ba tinan. Amen.
ROM 12:1 Maun-alin sira, Maromak hatudu ona Nia laran luak ba ita. Nee duni hau husu atu foo imi nia aan tomak ba Nia hanesan sakrifisiu ida nebee sei moris, sakrifisiu ida nebee moos i halo haksolok Maromak nia laran. Liu husi hahalok nee mak imi adora Maromak ho lo-loos.
ROM 12:2 La bele halo tuir ema iha mundu nee nia hahalok. Maibee husik Maromak halo foun imi nia hanoin hodi muda imi nia laran. Nunee imi bele hatene lo-loos Maromak nia hakarak ba imi. Maromak nia hakarak nee buat ida nebee diak, loos i halo Nia laran haksolok.
ROM 12:3 Tanba Maromak hatudu Nia laran diak mai hau too Nia hili hau sai apostolu, hau foo hanoin ba imi ida-ida: La bele foti aan. Diak liu kompriende kbiit nebee mak Maromak foo tiha ona ba imi ida-idak tanba imi nia fiar, atu nunee imi bele hatene imi nia aan.
ROM 12:4 Hau foo ezemplu ida husi ema nia isin lolon. Isin lolon ida iha parte oi-oin, i parte ida-idak nia knaar la hanesan.
ROM 12:5 Nunee mos ita sarani sira. Ita barak, maibee tanba ita laran ida ho Kristu, ita hamutuk hanesan isin lolon ida deit.
ROM 12:6 Maromak foo kbiit ba ita ida-ida, tuir Nia laran diak. Kbiit nebee ita simu nee la hanesan. Ema nebee mak simu kbiit atu foo tutan Maromak nia lia menon, nia tenki koalia tuir liafuan nebee mak nia fiar katak Maromak foo tiha ona ba nia.
ROM 12:7 Ema nebee simu kbiit atu serbi ema seluk, nia tenki serbi duni. Ema nebee mak simu kbiit atu hanorin, nia tenki hanorin.
ROM 12:8 Ema nebee mak simu kbiit atu hametin ema nia laran, nia tenki halo nunee. Ema nebee mak simu kbiit atu foo tulun ba ema seluk ho buat nebee mak nia iha, nia tenki foo ho laran. Ema nebee simu kbiit atu sai responsavel, nia tenki sai responsavel nebee badinas. Ema nebee mak simu kbiit atu ajuda ema seluk nebee susar, nia tenki ajuda ho laran haksolok.
ROM 12:9 Hatudu imi nia domin lo-loos ba ema seluk, la bele finji. Hakribi buat nebee aat, kaer metin buat nebee mak diak.
ROM 12:10 Hadomi malu hanesan maun-alin. Haraik aan hodi hatudu respeitu ba malu.
ROM 12:11 La bele baruk, maibee foo aan serbi Nai Jesus nafatin ho laran tomak.
ROM 12:12 Imi tenki haksolok tanba imi laran metin ba Maromak. Aguenta ho pasiensia iha susar laran. Halo orasaun beibeik.
ROM 12:13 Uza buat nebee imi iha hodi ajuda maluk sarani sira nebee presiza. Simu ema seluk iha imi nia uma ho laran tomak.
ROM 12:14 Se iha ema ruma halo terus imi, husu atu Maromak foo bensaun ba sira. Tenki husu bensaun, la bele husu atu Nia foo malisan.
ROM 12:15 Se iha ema ruma laran kontenti, kontenti hamutuk ho sira ba. I se iha ema ruma tanis tanba tristi, tanis hamutuk ho sira ba.
ROM 12:16 Imi tenki moris neon ida, laran ida. La bele halo aan, maibee hamaluk ema kiik. Keta foti aan dehan, o mesak mak hatene.
ROM 12:17 Se ema ruma halo buat aat ba imi, la bele halo aat fali ba ema nee. Hakaas aan halo buat nebee ema seluk mos konsidera diak.
ROM 12:18 Esforsu aan halo o nia parte atu moris dame malu ho ema hotu-hotu.
ROM 12:19 Maluk doben sira, la bele halo aat ba ema nebee mak halo aat imi. Husik atu Maromak foo kastigu sira. Tanba iha Livru Sagradu hakerek ona, “Nai Maromak dehan, ‘Hau mak iha direitu atu foo kastigu ema, ema nebee mak halo aat imi, Hau mak foo kastigu.’ ”
ROM 12:20 Maibee imi tenki moris tuir liafuan nebee dehan, “Se o nia inimigu hamlaha, foo hahaan ba nia. Se nia hamrook, foo nia hemu. Se o halo nunee, nia sei moe.”
ROM 12:21 Entaun keta husik buat aat manaan imi. Maibee halo beibeik buat diak, atu nunee imi bele halakon buat aat.
ROM 13:1 Ita hotu tenki hakruuk ba nai ulun sira, tanba nai ulun sira hotu-hotu simu kbiit husi Maromak atu kaer ukun. Maromak mak foti sira.
ROM 13:2 Nunee, ema nebee kontra nai ulun, nia kontra saida mak Maromak desidi ona. Husi nia hahalok nee, nia sei hetan kastigu.
ROM 13:3 Ema nebee halo buat loos, nia sei la tauk nai ulun sira, so ema nebee halo sala mak tauk. Entaun se imi lakohi moris iha tauk nia laran, diak liu halo buat nebee loos, para sira bele gaba imi.
ROM 13:4 Tanba nai ulun sira nee Maromak nia atan para halo diak ba imi. Maibee se imi halo sala, imi tenki tauk, tanba sira iha kbiit atu kastigu imi. Sira nee Maromak nia atan, Nia haruka sira kastigu ema nebee mak halo sala.
ROM 13:5 Nunee imi tenki hakruuk ba nai ulun sira, laos deit tanba imi lakohi atu simu kastigu, maibee tanba imi hatene katak hahalok nee mak loos.
ROM 13:6 Nunee mos imi tenki selu taxa, tanba nai ulun sira nee serbi Maromak, i foo sira nia aan hodi ukun imi.
ROM 13:7 Entaun foo ba nai ulun sira tuir imi nia obrigasaun. Se imi tenki selu taxa, selu ba. Se imi tenki selu impostu, selu ba. Se ema ruma serve atu imi respeita, respeita nia ba. Se ema ruma serve atu imi gaba, gaba nia ba.
ROM 13:8 Se imi deve osan ruma karik, tenki selu hotu, para hela tusan ida deit, tusan nee mak tenki hadomi malu. Tanba see mak hadomi nia maluk, nia kumpri ona Maromak nia lei hotu.
ROM 13:9 Maromak nia ukun fuan dehan, “La bele halo sala ho ema nia feen ka laen, la bele oho ema, la bele naok, la bele kaan ema nia sasaan.” Ukun fuan hirak nee ho ukun fuan sira seluk nia huun mak nee: “O tenki hadomi o nia maluk hanesan o hadomi o nia aan rasik.”
ROM 13:10 Ema nebee mak hadomi nia maluk, la halo aat ba nia. Nunee se ita hadomi ita nia maluk, nee dehan katak ita halo tuir Maromak nia lei tomak.
ROM 13:11 Imi tenki halo buat sira nee hotu tanba imi kompriende tempu agora nee oin seluk ona. Oras too ona atu imi hadeer. Tanba loron nebee Maromak atu salva ita besik dadauk ona, laos hanesan uluk bainhira ita foin fiar ba Kristu.
ROM 13:12 Oras kalan atu liu ona, rai besik loron ona. Nunee ita tenki soe tiha hahalok nakukun nian hodi uza fali ekipamentu funu hanesan tropas naroman nian.
ROM 13:13 Mai ita moris loos, hanesan ema nebee moris iha naroman. La bele halo festa haan-hemu too lanu arbiru tuun-sae. La bele halo sala seksual ho buat foer oi-oin. La bele istori malu, i la bele laran moras ema.
ROM 13:14 Maibee imi tenki halo tuir Nai Jesus Kristu nia moris. I la bele hanoin tan atu halo tuir imi nia hakarak aat.
ROM 14:1 Simu di-diak sarani sira nebee mak sei duvida, i la bele diskuti malu ho sira kona ba sira nia duvida nee.
ROM 14:2 Ema sarani balu fiar katak ita bele haan hahaan saida deit. Balu sei duvida, sira haan modo tahan deit tanba sira hanoin dehan naan nee lulik ba sira.
ROM 14:3 Ema nebee dehan bele haan saida deit, nia la bele hatuun ema nebee mak lakohi haan naan. Nunee mos, ema nebee mak lakohi haan naan, la bele foo sala ba ema nebee haan naan nee, tanba Maromak simu tiha ona nia.
ROM 14:4 Imi nee see fali mak imi foo sala ba Patraun seluk nia atan? Sira nia Patraun mak Maromak. Entaun Maromak deit mak bele tesi sira nia lia dehan, sira nee hamriik ka monu. I Nia mak bele tulun sira para sira hamriik.
ROM 14:5 Nunee mos, iha ema balu konsidera katak, loron balu loron boot, loron seluk loron baibain deit. Maibee iha ema seluk dehan, loron hotu-hotu hanesan deit iha Maromak nia oin. Ema ida-idak tenki desidi rasik kona ba buat nee.
ROM 14:6 Ema nebee konsidera liu loron balu, nia halo nunee atu hatudu nia respeitu ba ita nia Nai. I ema nebee haan naan, nia haan naan atu hatudu respeitu ba ita nia Nai, tanba nia foo agradese ba Maromak. Nunee mos ba ema nebee mak lakohi haan naan, nia mos halo nunee atu hatudu respeitu ba ita nia Nai, i nia mos foo agradese ba Maromak.
ROM 14:7 Tanba durante ita moris, ita moris laos deit ba ita nia aan. Ita mate mos laos mate ba ita nia aan deit.
ROM 14:8 Bainhira ita sei moris, ita moris ba ita nia Nai. Ita mate mos, ita mate ba ita nia Nai. Nunee atu ita moris ka ita mate, ita nafatin Nai Maromak nian.
ROM 14:9 Tanba nee duni mak Kristu mate i moris fila fali, atu Nia bele sai Nai ba ema nebee mak mate tiha ona ho mos ba ema nebee mak sei moris.
ROM 14:10 Se nunee nusaa mak imi foo sala ba imi nia maluk sarani? Nusaa mak imi hatuun sira? Afinal ita hotu-hotu sei hamriik iha Maromak nia oin para Nia tesi ita nia lia.
ROM 14:11 Hanesan mos hakerek iha Livru Sagradu dehan, “Nai Maromak dehan, ‘Hau, Maromak Moris jura katak, ema hotu-hotu sei hakruuk mai Hau, ema hotu-hotu sei foo sai katak, Hau mak Maromak.’ ”
ROM 14:12 Entaun ita ida-idak tenki responsabiliza iha Maromak nia oin kona ba ita nia hahalok rasik.
ROM 14:13 Tanba nee, la bele foo sala ba malu tan. Maibee kuidadu di-diak para imi nia hahalok la bele halo too imi nia maluk sarani sidi ka monu ba sala.
ROM 14:14 Tanba hau laran ida ho Nai Jesus, hau fiar metin katak, hahaan saida deit Maromak la bandu. Maibee se ema ida hanoin katak Maromak bandu hahaan ruma, entaun ema nee la bele haan duni.
ROM 14:15 Se karik o haan buat nee iha nia oin, nia sei laran susar. Nunee bainhira o halo ida nee, o la hatudu domin ba nia. La bele estraga fali o nia maluk tanba deit o hakarak haan buat nee. Tanba Kristu mos mate ba nia.
ROM 14:16 Kuidadu, keta halo be o nia hahalok nebee o konsidera diak nee, halo ema seluk hatete aat fali o.
ROM 14:17 Tanba se Maromak ukun ita, saida mak ita haan-hemu nee, laos problema. Nia hakarak para ita moris loos, dame malu, i laran haksolok, tanba Espiritu Santu hela iha ita.
ROM 14:18 Ema nebee serbi Kristu nunee, nia halo haksolok Maromak nia laran, i ema seluk mos gaba nia.
ROM 14:19 Tanba nee, ita hotu tenki hakaas aan tulun malu atu moris iha dame nia laran, i hametin ita nia maluk sira nia fiar.
ROM 14:20 La bele estraga Maromak nia servisu iha ema seluk nia moris tanba deit problema haan-hemu. Hahaan saida deit Maromak la bandu. Maibee se o haan buat ruma mak halo o nia maluk sidi, o sala.
ROM 14:21 Diak liu ita la bele haan naan ka hemu tua ka halo saida deit mak halo too ita nia maluk monu.
ROM 14:22 Husik Maromak deit mak hatene o nia hanoin kona ba buat sira nee. Se o fiar katak buat nebee o halo nee loos hela, i senti nee la sala ida, nee bensaun ida husi Maromak.
ROM 14:23 Maibee se o haan buat ruma ho duvida katak, hahaan nee Maromak keta bandu karik, entaun Maromak foo sala ba o, tanba o la kumpri saida mak o rasik fiar. Tanba ema nebee la kumpri buat nebee nia rasik fiar, nia halo sala.
ROM 15:1 Ita nebee fiar metin tenki iha pasiensia hodi ajuda maluk sira nebee mak duvida kona ba saida mak loos i saida mak sala. Ita la bele halo haksolok deit ita nia aan.
ROM 15:2 Maibee ita ida-idak tenki halo haksolok ita nia maluk hodi halo diak ba nia, para hametin nia fiar.
ROM 15:3 Tanba Kristu rasik mos la moris halo haksolok deit Nia Aan. Iha Livru Sagradu, Kristu dehan ba Maromak, “Liafuan aat nebee ema hatete ba Ita Boot monu kona mos Hau.”
ROM 15:4 Buat hotu-hotu nebee hakerek nanis ona iha Livru Sagradu, hakerek atu hanorin ita. Livru Sagradu nee tulun ita atu aguenta iha terus laran i foo korajen mai ita, atu nunee ita laran metin ba Maromak.
ROM 15:5 Maromak sempre tulun ita atu aguenta iha terus laran i foo korajen ba ita. Hau harohan atu Nia halo imi moris neon ida laran ida hodi tuir Kristu Jesus.
ROM 15:6 Nunee mak imi hamutuk lian ida hodi hahii adora Maromak. Nia mak ita nia Nai Jesus Kristu nia Aman.
ROM 15:7 Tanba nee, imi tenki simu malu, hanesan Kristu simu tiha ona imi. Bainhira ema haree imi simu malu, sira sei foti aas Maromak nia naran.
ROM 15:8 La bele haluha, Kristu foo Nia Aan para serbi ema Judeu hodi hatudu ba sira katak, Maromak sempre halo tuir Nia promesa. Maromak nia promesa ba ita nia bei-ala sira, Kristu rasik mak kumpri.
ROM 15:9 Nunee ema nebee laos Judeu mos sei hahii adora Maromak tanba Nia mos hatudu Nia laran luak ba sira. Nee hanesan hakerek ona iha Livru Sagradu dehan, “Tanba nee, hau sei hahii Ita Boot iha ema nebee laos Judeu nia leet. Hau sei hananu hodi hahii Ita Boot nia naran.”
ROM 15:10 Iha fatin seluk hakerek dehan, “Imi sira nebee laos Judeu, haksolok hamutuk ho Maromak nia povu.”
ROM 15:11 Hakerek mos dehan, “Imi nebee laos Judeu, hahii ita nia Nai! Ema husi nasaun hotu-hotu, hahii Nia!”
ROM 15:12 Profeta Isaias mos dehan kona ba Kristu, “Jessé nia Jerasaun ida sei mai, Nia sei ukun nasaun hotu-hotu. Ema nebee laos Judeu laran metin ba Nia.”
ROM 15:13 Maromak rasik mak halo ita laran metin ba Nia. Hau harohan atu Nia halo imi haksolok teb-tebes i foo pas ho hakmatek ba imi, tanba imi fiar ba Nia. Nunee kbiit Espiritu Santu nian sei halo imi laran metin beibeik ba Maromak.
ROM 15:14 Maun-alin sira, hau fiar katak, imi nia laran diak teb-tebes, imi kompriende ona buat barak, i imi bele ona hanorin malu.
ROM 15:15 Maski nunee iha surat nee hau koalia mo-moos ba imi kona ba buat balu, tanba hau hakarak foo hanoin fila fali ba imi. Hau brani hakerek nunee tanba Maromak hatudu Nia laran diak mai hau.
ROM 15:16 Nia foti hau sai Kristu Jesus nia atan para serbi ema nebee laos Judeu. Hau kaer knaar hanesan nai lulik ida hodi foo sai Maromak nia Liafuan Diak. Nunee ema nebee laos Judeu bele sai hanesan oferta ida nebee diak ba Maromak, oferta ida nebee Nia hakarak simu tanba Espiritu Santu halo sira sai moos tiha ona.
ROM 15:17 Nee mak hau nia laran haksolok loos ho hau nia servisu ba Maromak, tanba hau laran ida ho Kristu Jesus.
ROM 15:18 Hau la brani koalia buat seluk, hau so brani foo sai deit kona ba buat nebee Kristu halo ona liu husi hau. Ema nebee laos Judeu agora rona ba Maromak tanba hau nia liafuan ho hau nia hahalok,
ROM 15:19 ho sinal ho milagre bo-boot nebee mak hau halo ho Maromak nia Espiritu nia kbiit. Hau foo sai tiha ona Liafuan Diak kona ba Kristu husi Jerusalém too iha provinsia Ilíriku, hau nia servisu iha rai nee hotu ona.
ROM 15:20 Hori uluk kedas hau nia hakarak mak nee: Atu foo sai Liafuan Diak iha fatin nebee mak ema seidauk rona kona ba Kristu. Tanba hau hakarak harii uma mesak, laos kontinua deit halo uma nebee ema seluk hahuu harii ona.
ROM 15:21 Nunee hau halo tuir liafuan nebee hakerek iha Livru Sagradu dehan, “Ema nebee seidauk rona kona ba Nia, sira sei hatene. Ema nebee seidauk simu Nia Liafuan, sira sei kompriende.”
ROM 15:22 Durante tinan barak nia laran hau hakarak teb-tebes atu baa haree imi, maibee too agora la konsege tanba hau nia servisu iha nee. Agora servisu nee hotu ona.
ROM 15:24 Nunee hau hanoin atu vizita imi molok hau baa iha Espanha, para kontenti hamutuk ho imi lai, depois imi bele ajuda hau baa liu Espanha.
ROM 15:25 Maibee agora, hau baa Jerusalém lai, atu lori osan entrega ba Maromak nia povu sira iha nebaa.
ROM 15:26 Tanba sarani sira iha provinsia Masedónia ho Akaia hakarak foo tulun ba Maromak nia povu nebee mak kiak iha Jerusalém.
ROM 15:27 Sira foo ho kontenti, i sira iha duni obrigasaun atu foo. Tanba sira nebee laos Judeu simu tiha ona bensaun husi Maromak liu husi ema Judeu. Tanba nee mak ema nebee laos Judeu iha obrigasaun atu ajuda ema Judeu.
ROM 15:28 Entaun hau baa entrega lai osan nebee mak sira foo. Entrega hotu tiha, hau baa vizita imi mak foin baa liu iha Espanha.
ROM 15:29 Hau laran metin katak bainhira hau baa vizita imi, hau lori bensaun boot husi Kristu.
ROM 15:30 Maun-alin sira, tanba Jesus Kristu sai ona ita nia Nai, i tanba Maromak nia Espiritu halo ita hadomi malu, nunee hau husu boot atu imi harohan makaas hamutuk ho hau para Maromak tulun hau.
ROM 15:31 Husu atu Maromak kuidadu hau iha provinsia Judeia, atu ema nebee mak lakohi fiar ba Maromak la bele halo aat hau. I husu atu bainhira hau entrega osan ba sarani sira iha Jerusalém, sira bele simu ho di-diak.
ROM 15:32 Depois, se Maromak hakarak, hau bele baa vizita imi ho laran haksolok, i ita nia laran bele hakmatek hamutuk.
ROM 15:33 Hau harohan atu Maromak Dame Nain akompanha imi hotu. Amen.
ROM 16:1 Liu husi surat nee hau foo konhese ita nia irman Febe. Nia nee serbi sarani sira iha sidade Senkreia.
ROM 16:2 Simu nia ho di-diak, hanesan ita sarani sira baibain tenki simu malu, tanba nia tuir ita nia Nai. Se nia presiza buat ruma, ajuda nia ba, tanba nia ajuda hau makaas, i nia mos ajuda ema barak tan.
ROM 16:3 Hatoo hau nia kumprimentus ba Priscila ho nia laen Akila. Sira nain rua halao Kristu Jesus nia servisu hanesan ho hau.
ROM 16:4 Uluk sira atu mate sal-sala bainhira sira salva hau. Laos hau mesak deit mak foo obrigadu ba sira, maibee sarani sira hotu nebee laos Judeu mos foo obrigadu ba sira nia laran diak.
ROM 16:5 Kumprimentus ba sarani sira nebee baibain halibur malu halo orasaun iha Priscila ho Akila nia uma. Kumprimentus ba hau nia belun diak Epenetus. Nia mak ema primeiru nebee fiar ba Kristu iha provinsia Ázia.
ROM 16:6 Kumprimentus ba Maria, nia servisu makaas ba imi.
ROM 16:7 Kumprimentus ba Andróniku ho Júnias. Sira nee hau nia maluk Judeu, ami uluk dadur hamutuk iha komarka. Sira mak fiar uluk ba Kristu, bainhira hau seidauk fiar. Sira nain rua naran boot iha apostolu sira nia leet.
ROM 16:8 Kumprimentus ba Amplíatu. Hau hadomi nia tanba ami nain rua laran ida ho ita nia Nai.
ROM 16:9 Kumprimentus ba Urbano. Nia halao Kristu nia servisu hamutuk ho ami. Kumprimentus mos ba hau nia belun diak Estakis.
ROM 16:10 Kumprimentus ba Apeles, nia liu ona provasaun hodi fiar metin nafatin ba Kristu. Kumprimentus ba ema hotu nebee hela iha Aristóbulo nia uma.
ROM 16:11 Kumprimentus ba Herodiaun, hau nia maluk Judeu. Kumprimentus ba maluk sira iha Narciso nia uma nebee fiar ba ita nia Nai.
ROM 16:12 Kumprimentus ba ita nia maluk feto Trifena ho Trifosa. Sira nain rua servisu makaas ba ita nia Nai. Kumprimentus ba hau nia belun diak Pérsida. Irman nee mos servisu makaas loos ba ita nia Nai.
ROM 16:13 Kumprimentus ba Rufu, ita nia Nai mak hili nia. Kumprimentus mos ba nia inan, hau konsidera nia hanesan hau nia inan rasik.
ROM 16:14 Kumprimentus ba Asínkritu, Flegonte, Hermes, Pátrobas, Hermas ho mos maluk sarani sira seluk nebee baibain halibur hamutuk ho sira.
ROM 16:15 Kumprimentus ba Filólogu, Júlia, Nereu ho nia feton, ba Olimpas ho mos ba sarani sira seluk nebee mak baibain halibur hamutuk ho sira.
ROM 16:16 Rei malu hanesan maluk sarani. Kristu nia povu iha fat-fatin mos foo kumprimentus ba imi.
ROM 16:17 Maun-alin sira, hau husu atu imi kuidadu teb-tebes ho ema nebee mak hakarak halo imi sarani sira fahe malu i halo imi nia fiar nakdoko. Sira kontra fali hanorin nebee imi simu tiha ona. Nunee hadook aan husi ema hanesan nee.
ROM 16:18 Tanba ema hanesan nee laos serbi Kristu ita nia Nai, maibee serbi deit sira nia aan. Sira uza liafuan midar hodi kos-kose ema, ho nunee sira konsege bosok ema nebee mak la hatene tetu ema nia liafuan.
ROM 16:19 Ema hotu-hotu rona tiha ona katak imi moris tuir Maromak nia hakarak. Nee halo hau nia laran haksolok. Maibee Hau hakarak atu imi mos matenek halo buat nebee mak diak, i lalika halo buat aat.
ROM 16:20 La kleur tan Maromak Dame Nain sei sama rahun tiha Satanás iha imi nia ain okos. Hau harohan atu ita nia Nai Jesus hatudu Nia laran diak ba imi.
ROM 16:21 Timóteo, hau nia kolega servisu foo kumprimentus ba imi, nunee mos Lúcio, Jason ho Sosípatru, sira nee hau nia maluk Judeu.
ROM 16:22 Hau, Tércio mak hakerek Paulo nia liafuan iha surat nee. Hau foo kumprimentus ba imi, tanba ita hotu tuir ita nia Nai.
ROM 16:23 Gaio mos foo kumprimentus ba imi. Hau, Paulo hela iha nia uma, i hau nia maluk sarani sira baibain halibur malu halo orasaun iha nee. Erastu, xefi finansas iha sidade nee, ho ita nia maluk Quarto mos foo kumprimentus ba imi.
ROM 16:24 [Hau harohan atu ita nia Nai Jesus Kristu hatudu Nia laran diak ba imi hotu. Amen.]
ROM 16:25 Hahii Nai Maromak! Nia mak iha kbiit atu halo ita sai forti, liu husi Liafuan Diak nebee mak hau foo sai kona ba Jesus Kristu. Hori uluk liu, ema la hatene Maromak nia planu kona ba Kristu, tanba sei segredu hela.
ROM 16:26 Maibee agora Maromak Rohan-Laek hatudu sai tiha ona planu nee ba ita ema. Fo-foun Nia haruka Nia profeta sira hakerek Nia planu segredu nee, agora Nia haruka ami foo sai iha nebee-nebee deit, atu ema husi nasaun hotu-hotu bele fiar ba Nia i halo tuir Nia hakarak.
ROM 16:27 Nia deit mak Maromak, Nia deit mak hatene buat hotu-hotu. Mai ita hahii adora Nia too tinan ba tinan liu husi Jesus Kristu. Amen.
1CO 1:1 Surat nee husi hau, Paulo hamutuk ho ita nia maluk sarani Sóstenes. Maromak hili tiha ona hau hodi foti hau sai Kristu Jesus nia apostolu.
1CO 1:2 Hau hakerek surat nee ba imi, Maromak nia povu iha sidade Korintu. Maromak bolu ona imi sai Nia ema, i halo imi nia laran moos ona liu husi Kristu Jesus. Nia mos halo nunee ba ema barak iha mundu tomak, sira nee hotu adora ita nia Nai Jesus Kristu. Jesus nee sira nia Nai ho mos ita nia Nai.
1CO 1:3 Ami harohan atu ita nia Aman Maromak ho mos ita nia Nai Jesus Kristu hatudu Sira nia laran diak ba imi, i foo pas ho hakmatek ba imi.
1CO 1:4 Hau sempre foo agradese ba Maromak, tanba Nia hatudu ona Nia laran diak ba imi liu husi Kristu Jesus.
1CO 1:5 Liu husi Kristu, Maromak foo ona bensaun oi-oin deit ba imi, para imi bele kompriende klean, i bele foo sai Nia liafuan ho diak.
1CO 1:6 Nee hatudu katak, buat nebee mak uluk ami foo sai ba imi kona ba Kristu, abut metin ona iha imi nia laran.
1CO 1:7 Maromak foo tiha ona kbiit oi-oin ba imi, nunee imi la falta buat ida atu halao Nia servisu durante imi hein ita nia Nai Jesus Kristu fila fali mai husi lalehan.
1CO 1:8 Maromak sei hametin imi nia fiar too rohan. Nunee, bainhira ita nia Nai Jesus Kristu fila fali mai husi lalehan hodi foo justisa ba ema hotu-hotu, imi livre ona husi sala.
1CO 1:9 Maromak sei halo imi nia fiar metin duni, tanba Nia sempre halo tuir saida mak Nia hatete, i Nia bolu ona imi atu sai laran ida ho Nia Oan Jesus Kristu, ita nia Nai.
1CO 1:10 Maun-alin sira, hau husu hodi ita nia Nai Jesus Kristu nia naran atu imi haree malu diak. La bele haan malu beibeik, maibee moris neon ida laran ida.
1CO 1:11 Maun-alin doben sira, iha ema husi Cloe nia uma hatete ba hau dehan, imi balu haksesuk malu hela deit
1CO 1:12 kona ba ami responsavel sira. Imi balu hatete, “Hau tuir Paulo.” Iha balu dehan, “Hau tuir Apolo.” Balu dehan, “Hau tuir Pedro.” Balu tan dehan, “Hau tuir Kristu deit.”
1CO 1:13 Bainhira imi fahe malu nunee, imi hanesan fahe fali Kristu! Hau, Paulo mak mate iha krus ba imi ka? Lae! Ema foo sarani imi hodi hau nia naran ka? Lae!
1CO 1:14 Hau foo agradese ba Maromak, tanba uluk hau hamutuk ho imi iha nebaa, hau la foo sarani ema, so Krispu ho Gaio deit mak hau foo sarani.
1CO 1:15 Nunee imi ida la bele dehan, imi simu batizmu hodi hau nia naran.
1CO 1:16 Hau foin hanoin hetan, hau mos foo sarani Estéfanas ho nia uma laran. Maibee hau hanoin katak, la iha tan ema seluk mak hau foo sarani.
1CO 1:17 Tanba Kristu haruka hau laos atu foo sarani ema, maibee atu foo sai Liafuan Diak. Nia lakohi atu hau foo sai ho matenek mundu nian. Se lae, bainhira hau foo sai kona ba Kristu nia mate iha krus, la iha folin ba sira.
1CO 1:18 Iha ema balu hanoin dehan, buat nebee ami hanorin kona ba Kristu nia mate iha krus nee, beik liu. Sira nee lao dadauk tuir dalan mate nian. Maibee ba ita nebee mak lao tuir dalan salvasaun, Kristu nia mate nee hatudu sai Maromak nia kbiit.
1CO 1:19 Nee hanesan Maromak hatete tiha ona iha Livru Sagradu dehan, “Ema nebee halo aan dehan kompriende klean, Hau sei hatuun sira nia matenek. Matenek nain sira nia hanoin, Hau sei halakon tiha.”
1CO 1:20 Entaun ema matenek sira nee oinsaa? Matenek nain relijiaun ho lia nain sira oinsaa? Sira nee matenek tuir mundu nian, maibee Maromak halo sira nia matenek nee la vale tiha.
1CO 1:21 Maromak nia matenek makaas teb-tebes. Nia desidi katak, ita ema la bele konhese Nia liu husi ita nia matenek rasik. Maibee Nia hakarak uza Liafuan Diak kona ba Kristu nia mate atu salva see-see deit mak fiar, maski ema iha mundu nee dehan Liafuan Diak nee buat beik ida.
1CO 1:22 Ema Judeu sira hakarak haree lai milagre mak foin sira fiar. Ema Gregu sira hakarak rona lai buat nebee mak tama iha sira nia kakutak mak foin sira fiar.
1CO 1:23 Maibee ami nee foo sai deit kona ba Kristu nia mate iha krus. Kristu nee Salvador nebee Maromak promete hori uluk kedas atu haruka mai. Kristu nia mate nee xoke ema Judeu nia laran. I ba ema Gregu, buat nee la tama sira nia ulun.
1CO 1:24 Maibee ba ita nebee Maromak bolu ona atu sai Nia ema, atu ita ema Judeu ka laos Judeu, Kristu nia mate nee hatudu Maromak nia kbiit ho Maromak nia matenek.
1CO 1:25 Ema balu konsidera Maromak nia matenek nee buat beik ida, afinal Nia matenek liu sira. Sira hanoin dehan Maromak la iha kbiit, afinal Nia kbiit boot liu sira nian.
1CO 1:26 Maun-alin sira, hanoin took uluk bainhira Maromak bolu imi atu sai Nia ema, imi nee oinsaa? Imi uitoan deit mak matenek tuir mundu nian, uitoan deit mak ema boot, uitoan deit mak liurai nia jerasaun.
1CO 1:27 Maibee Maromak hili ema sira nebee mak ema baibain konsidera beik atu hamoe ema nebee mak gaba aan dehan matenek. Nia hili ema sira nebee mak ema baibain konsidera fraku atu halo moe ema nebee mak gaba aan dehan iha kbiit.
1CO 1:28 Nia hili ema sira nebee kiik iha mundu nee, sira nebee ema seluk hatuun, sira nebee ema seluk konsidera la iha folin. Nia hakarak uza ema kiik sira nee hodi hatuun fali ema nebee gaba aan dehan iha kbiit.
1CO 1:29 Maromak halo nunee atu ema ida la bele foti aan iha Nia oin.
1CO 1:30 Maromak mak halo imi sai laran ida ho Kristu Jesus, i Kristu hatudu Maromak nia matenek mai ita. Nee dehan katak, Kristu halo ita diak malu ho Maromak, Nia halo ita sai ema nebee moris ho laran moos, i Nia selu kotu ita nia tusan hodi foo liberdade mai ita.
1CO 1:31 Tanba nee, hanesan hakerek tiha ona iha Livru Sagradu dehan, “Diak liu gaba buat nebee mak ita nia Nai halo, duke gaba ita nia aan rasik.”
1CO 2:1 Maun-alin sira, uluk bainhira hau baa iha imi, hau foo sai ba imi Maromak nia planu nebee uluk taka hela. Maibee hau laos uza liafuan aas hodi hatudu aan hanesan ema matenek ida.
1CO 2:2 Tanba hau desidi katak, durante hau hamutuk ho imi, hau sei haluha tiha buat hotu-hotu. Hau so hatene deit kona ba Jesus Kristu, liu-liu Nia mate iha krus.
1CO 2:3 Iha tempu nebaa bainhira hau hamutuk ho imi, hau senti hau la iha kbiit, hau tauk loos too nakdedar.
1CO 2:4 Hau nia liafuan ho hau nia hanorin simples deit. Hau la uza liafuan ema matenek nian atu dada ema, maibee kbiit Espiritu Santu nian mak hatudu ba imi katak liafuan nee loos.
1CO 2:5 Nunee Maromak nia kbiit mak halo imi fiar, laos tanba ema nia matenek rasik.
1CO 2:6 Maski nunee bainhira ami koalia ho ema nebee abut metin ona iha Kristu, ami uza duni liafuan matenek nian. Maibee laos matenek mundu nian, i laos matenek tuir ukun nain sira iha mundu agora, tanba sira sei lakon hotu.
1CO 2:7 Matenek nebee mak ami foo sai nee, matenek Maromak nian. Molok mundu hahuu, Maromak iha planu nanis ona atu foti aas ita liu husi Jesus nia mate, maibee durante nee Nia planu nee sei taka hela.
1CO 2:8 Nai Jesus nee Kbiit Nain. Maibee ukun nain sira iha mundu nee, la iha ida mak kompriende Maromak nia planu kona ba Nia. Se sira kompriende karik, sira la brani oho ita nia Nai iha krus.
1CO 2:9 Iha Livru Sagradu hakerek kona ba Maromak nia planu nebee mak uluk sei segredu nee dehan, “Ita ema nia matan seidauk haree, ita nia tilun seidauk rona, ita nia neon seidauk hanoin hetan buat nebee mak Maromak prepara tiha ona ba ema nebee mak hadomi Nia.”
1CO 2:10 Agora Maromak foo sai tiha ona Nia planu nee ba ita liu husi Nia Espiritu. Nia Espiritu nee buka hatene buat hotu-hotu too nia huun. Too Maromak nia hanoin nebee klean mos, Nia Espiritu buka tuir hotu.
1CO 2:11 Ema ida la bele hatene lo-loos ema seluk nia hanoin, so ema nee rasik mak bele hatene. Maromak mos nunee. So Maromak nia Espiritu mak bele hatene Maromak nia hanoin.
1CO 2:12 Ita simu ona Maromak nia Espiritu, laos espiritu mundu nian. Nunee ita bele kompriende bensaun boot nebee mak Maromak foo ona mai ita ho gratis.
1CO 2:13 Buat sira nee mak ami hatete sai ba ema. Ami laos uza liafuan nebee ema matenek hanorin mai ami, maibee ami uza liafuan nebee mak Maromak nia Espiritu foo. Nunee ami uza Espiritu nia liafuan hodi esplika buat nebee mak Espiritu nee foo sai mai ami.
1CO 2:14 Maibee se Maromak nia Espiritu la hela iha ema ida nia laran, ema nee sei la simu saida mak Maromak nia Espiritu koalia. Nia la bele kompriende, nia hanoin liafuan nee buat beik ida, tanba so ho Espiritu nia tulun mak ema bele kompriende.
1CO 2:15 Se Maromak nia Espiritu hela iha ema ida, ema nee bele tetu buat hotu-hotu hodi hatene saida mak loos, saida mak sala. Maibee ema seluk la hatene oinsaa atu tetu fali nia.
1CO 2:16 Iha Livru Sagradu hakerek dehan, “See mak bele kompriende Nai Maromak nia hanoin? See mak bele foo hanoin fali Nia?” Maibee ita nebee Maromak nia Espiritu domina ona nee hanoin hanesan Kristu.
1CO 3:1 Maun-alin sira, uluk hau hamutuk ho imi, hau koalia ba imi hanesan fali hau koalia ba ema nebee moris tuir mundu nia hakarak, ka ema nebee mak foin fiar ba Kristu. Hau la bele koalia ba imi hanesan hau koalia ba ema nebee moris tuir Espiritu Santu nia hakarak.
1CO 3:2 Iha tempu nebaa hau tenki hanorin imi buat kamaan deit. Imi seidauk bele simu buat todan, tanba imi hanesan bebee nebee sei susu deit, seidauk bele haan. Too agora mos imi seidauk bele.
1CO 3:3 Imi sei hanoin hanesan fali ema mundu nian. Imi laran moras ba malu, i haksesuk malu. Nee hatudu katak imi tuir nafatin mundu nia hakarak. Nunee imi nia hahalok hanesan fali ema mundu nian.
1CO 3:4 Imi balu dehan, “Hau tuir Paulo.” Balu dehan, “Hau tuir Apolo.” Hahalok nee hatudu katak imi nafatin hanesan ema mundu nian.
1CO 3:5 Apolo nee see loos? I hau, Paulo nee see? Ami nee hanesan atan deit. Ami hatudu dalan ba imi atu imi bele fiar ba Kristu. Ami ida-idak halao knaar nebee ita nia Nai foo tiha ona ba ami.
1CO 3:6 Hau mak kuda Liafuan Diak iha imi, Apolo mak rega, maibee Maromak mak halo buras.
1CO 3:7 Entaun ema nebee kuda fini ho mos ida nebee rega, ru-rua la importante hotu. Importante mak Maromak, tanba Nia mak halo fini nee moris too sai buras.
1CO 3:8 Ema nebee kuda ho mos ema nebee rega, iha objetivu nebee hanesan, i Maromak sei selu ida-idak nia kolen.
1CO 3:9a Ami nain rua nee halao Maromak nia servisu. I imi nee hanesan Maromak nia toos.
1CO 3:9b Imi mos hanesan uma ida nebee Maromak harii dadauk.
1CO 3:10 Maromak hatudu ona Nia laran diak mai hau hodi halo hau sai ema primeiru nebee hanorin imi kona ba Kristu. Hau hanesan badaen matenek ida nebee kee rai hodi hada fatuk para sai uma nia alsesu. Agora ema seluk hanorin tan imi. Sira nee hanesan badaen nebee harii uma iha alsesu nee nia leten. Maibee badaen ida-idak tenki kuidadu, oinsaa mak nia halo uma nee.
1CO 3:11 Tanba Maromak tau tiha ona uma nee nia alsesu, nee mak Jesus Kristu. Ita la bele tau tan seluk.
1CO 3:12 Badaen sira bele harii uma iha alsesu nee nia leten, uza buat folin oi-oin, hanesan osan mean, osan mutin, fatuk murak, ai, duut manulain ho duut sel-seluk.
1CO 3:13 Maibee iha loron ikus bainhira Maromak tesi ema hotu-hotu nia lia, Nia sei tau ahi hodi koko badaen sira nia servisu. Ahi nee sei hatudu mo-moos, badaen ida-idak nia servisu dura ka lae.
1CO 3:14 Se uma nee dura nafatin, entaun Maromak sei selu badaen nee nia kolen.
1CO 3:15 Se uma nee mutuk tiha, entaun badaen nee lakon leet deit. Nia rasik mos atu mutuk sal-sala, maibee too ikus nia hetan salvasaun.
1CO 3:16 Imi hatene katak, imi Maromak nia uma kreda, i Maromak nia Espiritu hela iha imi.
1CO 3:17 Se karik ema ruma sobu rahun Maromak nia uma, Maromak mos sei halo rahun nia. Tanba Maromak nia uma nee santu, i Nia uma mak imi sira nee.
1CO 3:18 Keta bosok imi nia aan. Se iha ema ida iha imi nia klaran hanoin dehan nia matenek tuir mundu nian, entaun diak liu nia husik tiha matenek nee, atu nia bele sai matenek iha Maromak nia oin.
1CO 3:19 Tanba Maromak konsidera matenek mundu nian buat beik ida. Nee hanesan hakerek tiha ona iha Livru Sagradu dehan, “Maromak sei hamonu matenek nain sira ho sira nia matenek rasik.”
1CO 3:20 Iha Livru Sagradu hakerek mos dehan, “Nai Maromak hatene katak, ema matenek sira nia hanoin la iha folin.”
1CO 3:21 Nee duni la bele foti aan tan dehan imi tuir ema ida nee ka ema ida nebaa, tanba Maromak foo tiha ona buat hotu-hotu ba imi.
1CO 3:22 Atu hau Paulo ka, Apolo ka, Pedro, atu mundu nee ka, atu moris ka mate, atu buat nebee agora iha ka buat nebee aban-bainrua sei mai, buat sira nee imi nian hotu.
1CO 3:23 Imi nee Kristu nian. I Kristu nee Maromak nian.
1CO 4:1 Nee duni imi tenki konsidera ami nee Kristu nia atan deit. Maromak foo fiar mai ami atu foo sai Nia planu segredu.
1CO 4:2 Baibain kuandu patraun foo fiar ba nia atan ida, atan nee tenki foo laran ba nia patraun.
1CO 4:3 Hau nee atan ida oinsaa? Mai hau, imi atu dehan hau atan diak ka la diak, hau la preokupa. Atu tribunal mak desidi mos, hau la interese. Hau rasik mos la tetu hau nia moris hodi desidi, hau atan ida nebee diak ka lae.
1CO 4:4 Hau hanoin hau nia laran moos, maibee nee laos dehan katak hau la iha sala. Nai Jesus mak sei desidi, hau nee sala ka la sala.
1CO 4:5 Nee duni la bele sai juis ba ema seluk, tanba tempu atu tesi lia seidauk too. Hein too Nai Jesus fila fali mai husi lalehan. Nia sei tesi ema hotu-hotu nia lia. Saida deit mak ema subar iha nakukun laran, Nia sei foo sai iha ema hotu nia oin. Too ema nia hakarak nebee segredu hela mos, Nia sei hatudu sai. Depois Maromak sei gaba ema ida-ida tuir nia hahalok.
1CO 4:6 Maun-alin sira, iha hau nia liafuan ohin nee, hau hakarak uza hau ho Apolo hanesan ezemplu, para imi bele kompriende liafuan nebee dehan, “Halo tuir saida mak hakerek iha Livru Sagradu, la bele halo liu ida nee.” Se imi halo tuir liafuan nee, imi sei la foti aas responsavel ida i hatuun fali ida seluk.
1CO 4:7 Imi hanoin dehan imi liu ema seluk ka? Buat hotu-hotu nebee imi iha, Maromak mak foo. Entaun nusaa mak imi foti aan hanesan fali imi hetan buat sira nee husi imi nia kbiit rasik?
1CO 4:8 Imi hanoin katak imi iha ona buat hotu-hotu, imi riku ona, imi ukun ona hanesan liurai. Maibee ami lae. Se imi sai liurai duni, entaun ami mos kontenti, tanba ami bele ukun hamutuk ho imi.
1CO 4:9 Tuir hau nia hanoin, Maromak halo ami apostolu sira hamriik iha fatin nebee ikus liu. Ami hanesan ema dadur nebee mak atu simu kastigu mate iha ema hotu-hotu nia oin. Ema iha mundu tomak hateke ba ami, anju sira mos hateke hela.
1CO 4:10 Ema hanoin dehan ami nee beik tanba ami tuir Kristu, maibee imi senti aan dehan imi matenek tanba imi Kristu nian. Ema konsidera ami fraku, maibee imi senti imi nia aan iha kbiit. Ema hatuun ami, maibee sira respeita fali imi.
1CO 4:11 Too agora ami hamlaha-hamrook, i ami nia hena aat loos ona. Dala barak ema baku ami. Ami nia uma rasik la iha.
1CO 4:12 Ami servisu makaas ho ami nia liman rasik hodi sustenta ami nia aan. Bainhira ema foo malisan mai ami, ami husu Maromak foo bensaun ba sira. Bainhira ema halo terus ami, ami aguenta deit.
1CO 4:13 Bainhira ema hatete aat ami, ami hataan ho diak. Too agora ema iha mundu nee konsidera ami hanesan buat foer ida, hanesan buat dodok ida nebee ema soe deit.
1CO 4:14 Hau hakerek buat sira nee laos atu halo moe imi. Maibee hau hakarak foo hanoin ba imi nudar hau nia oan doben.
1CO 4:15 Iha ema rihun ba rihun mak hatudu dalan ba imi kona ba Kristu Jesus, maibee hau mesak deit mak sai imi nia aman. Tanba hau mak ema primeiru nebee foo sai ba imi Liafuan Diak kona ba Kristu Jesus.
1CO 4:16 Nunee hau husu atu imi moris tuir hau nia ezemplu.
1CO 4:17 Tanba nee, hau haruka Timóteo atu baa ajuda imi. Hau hadomi nia hanesan hau nia oan rasik, nia mos ema ida nebee foo laran ba ita nia Nai. Timóteo sei foo hanoin ba imi kona ba hau nia lalaok moris nudar ema nebee tuir Kristu Jesus. Iha hau nia moris nee, hau sempre halo tuir buat nebee mak hau hanorin ba sarani sira iha nebee-nebee.
1CO 4:18 Iha imi balu hanoin dehan, hau la baa tan vizita imi. Nunee sira foti aan.
1CO 4:19 Maibee se ita nia Nai hakarak, la kleur tan hau baa iha nebaa. Depois hau sei haree, ema sira nebee foti aan nee koalia ho ibun boot deit ka sira iha duni kbiit.
1CO 4:20 Tanba Maromak ukun ema ida nia moris, haree husi kbiit nebee Maromak foo ba nia, laos haree husi ema nee nia liafuan deit.
1CO 4:21 Agora imi hili deit. Imi hakarak hau baa ho rota atu koriji imi ka, imi hakarak hau baa hatudu domin ho laran maus?
1CO 5:1 Hau rona katak, iha ema ida husi imi mak halo sala seksual, nia hola fali nia aman nia feen kiik. Saida mak nia halo nee aat liu fali ema nebee mak la konhese Maromak.
1CO 5:2 Maibee imi foti aan nafatin hanesan fali buat ida la kona imi. Tuir loos imi tenki moe ho laran susar. I ema nee, imi tenki bandu atu la bele hamutuk tan ho imi sarani sira.
1CO 5:3 Maski hau dook husi imi, maibee hau nia laran hamutuk ho imi. Nunee hau desidi tiha ona ema nee nia kastigu oinsaa, hanesan fali hau mos iha nebaa.
1CO 5:4 Entaun imi tenki halibur malu hamutuk hodi Nai Jesus nia naran. Hau nia laran mos sei hamutuk ho imi iha nebaa. Depois hodi Nai Jesus nia kbiit
1CO 5:5 imi tenki duni sai ema nee husi sarani sira nia leet hodi entrega nia ba iha Satanás nia liman. Nunee nia sei hetan susar ho terus iha mundu nee, atu nia bele husik nia hahalok aat i bele hetan salvasaun bainhira Nai Jesus fila fali mai husi lalehan hodi foo justisa ba ema hotu.
1CO 5:6 La bele foti aan tan! Keta haluha katak, ita kahur fermentu uitoan deit ba trigu, bele halo masa trigu tomak nee sae. Nunee mos se imi husik ema halo buat aat iha imi nia klaran, sarani sira seluk mos bele halo tuir.
1CO 5:7 Nee duni soe tiha fermentu tuan nee, para imi bele sai hanesan paun foun nebee la tau fermentu. Loos duni, imi nia sala hamoos tiha ona, tanba Kristu mate tiha ona hanesan bibi malae oan nebee ema Judeu oho nudar sakrifisiu iha tempu Paskua.
1CO 5:8 Tanba nee, mai ita moris hanesan ema nebee selebra festa Paskua. Nunee ita la haan ona paun nebee mak tau fermentu tuan, nee dehan katak, ita la bele halo ona sala ho buat aat oi-oin. Maibee ita haan fali paun nebee mak la tau fermentu, nee dehan katak, ita moris ho laran moos i koalia buat nebee loos.
1CO 5:9 Uluk hau hakerek ba imi dehan, imi la bele liga ema nebee mak halo sala seksual.
1CO 5:10 Maibee hau laos bandu imi atu liga ema jentiu sira nebee mak halo sala seksual ka sala sel-seluk, hanesan matan fuan naklosu ba osan, han-matak ema nia sasaan, ka adora fali lulik. Se ita lakohi liga ema jentiu sira hanesan nee, diak liu ita husik tiha mundu nee.
1CO 5:11 Hau hakarak hatete mak nee: La bele liga ema nebee dehan nia fiar ba Kristu, maibee nia halo sala seksual, nia matan fuan naklosu ba osan, adora fali lulik, hatete aat ema, lanu-teen ka han-matak ema nia sasaan. La bele liga ema hanesan nee, atu tuur haan hamutuk mos la bele.
1CO 5:12 Kona ba ema nebee la fiar ba Kristu, hau la iha direitu atu tesi sira nia lia. Maromak mak hatene sira sala ka la sala. Maibee kona ba imi nia maluk sarani, imi rasik tenki tesi sira nia lia. Hanesan hakerek tiha ona iha Livru Sagradu dehan, “Duni sai tiha ema aat husi imi nia klaran.”
1CO 6:1 Bainhira imi sarani ho sarani mak halo problema, nusaa mak imi brani lori malu ba iha juis ida nebee la konhese Maromak? Nusaa mak la foo ba Maromak nia povu mak rezolve?
1CO 6:2 Imi hatene katak aban-bainrua Maromak nia povu mak sei tesi ema mundu nee nia lia. Entaun nusaa mak imi la bele rezolve problema kiik?
1CO 6:3 Imi mos hatene katak aban-bainrua ita sei tesi anju sira nia lia. Entaun tuir loos imi bele rezolve problema nebee mosu iha imi nia moris loro-loron.
1CO 6:4 Nusaa mak problema hanesan nee, imi entrega fali ba juis nebee la iha naran diak iha sarani sira nia leet?
1CO 6:5 Hau koalia nunee atu halo imi moe. Keta halo be imi la iha ema ida nebee matenek atu tesi imi sarani sira nia lia.
1CO 6:6 Too imi lori fali imi nia maluk sarani baa kesar iha tribunal, iha loos ema jentiu sira nia oin.
1CO 6:7 Bainhira imi lori malu ba iha tribunal, bele dehan imi lakon ona. Se imi nia maluk sarani halo problema ho imi, diak liu simu tiha deit. Se sira han-matak imi nia sasaan ruma, diak liu husik deit ba.
1CO 6:8 Maibee imi la husik, imi rasik mos han-matak ema nia sasaan i halo problema ho ema. Aat liu tan, imi halo ba imi nia maluk sarani rasik.
1CO 6:9 Keta bosok imi nia aan. Imi hatene ona katak, ema aat sei la tama iha Maromak nia reinu. Hanesan ema nebee halo sala seksual, adora fali lulik, halo relasaun seksual ho ema nebee laos nia feen ka laen, mane ho mane hola fali malu,
1CO 6:10 naok-teen, matan fuan naklosu ba osan, lanu-teen, hatete aat ema, ka han-matak ema nia sasaan. See mak moris hanesan nee sei la tama iha Maromak nia reinu.
1CO 6:11 Afinal uluk imi balu mos hahalok hanesan nee. Maibee agora Maromak hamoos tiha ona imi nia sala, Nia halo imi moris ho laran moos, i Nia simu ona imi. Ita nia Maromak halo buat sira nee hotu liu husi Nai Jesus Kristu hodi Maromak nia Espiritu nia kbiit.
1CO 6:12 Ema balu dehan, “Ita iha direitu atu halo buat saida deit.” Maibee nee laos dehan katak, buat hotu diak ba ita. Hau rasik mos lakohi atu buat ruma domina fali hau.
1CO 6:13 Ema balu mos dehan, “Ita nia kabun iha para simu hahaan, hahaan nia fatin mak kabun. Entaun haan deit ba!” Maibee too loron ida Maromak sei halo buat rua nee la iha tiha. Ita nia isin laos para halo sala seksual, maibee para serbi Nai Jesus, i Nia mak Nain ba ita nia isin.
1CO 6:14 Bainhira ita nia isin nee mate, Maromak sei uza Nia kbiit hodi halo ita moris fila fali ho isin lolon foun, hanesan mos uluk Nia halo moris fali Nai Jesus husi mate.
1CO 6:15 Keta haluha katak, imi nia isin lolon hola parte iha Kristu. Entaun hau nia isin lolon nebee sai tiha ona Kristu nian nee, hau atu uza fali hodi baa hamutuk ho feto luroon ka? La bele!
1CO 6:16 Imi hatene ona katak, ema nebee foo nia aan ba feto luroon, nia sai ona ida ho feto nee. Tanba iha Livru Sagradu hakerek dehan, “Sira nain rua sai ona ida.”
1CO 6:17 Maibee ema nebee mak foo nia aan ba ita nia Nai, sai laran ida ho Nia.
1CO 6:18 Imi tenki halai dook husi sala seksual. Tanba see mak halo sala seksual, nia halo sala hasoru nia isin rasik, sala sel-seluk laos hasoru nia isin.
1CO 6:19 Keta haluha katak imi nia isin lolon hanesan uma kreda ba Espiritu Santu atu hela. Maromak rasik mak foo Nia Espiritu nee ba imi, i Nia Espiritu hela iha imi nia laran. Nee duni imi nia isin nee laos imi nian, maibee Maromak nian.
1CO 6:20 Maromak sosa kotu tiha ona imi ho folin nebee karun. Nee duni imi tenki uza imi nia isin hodi foti aas Maromak nia naran.
1CO 7:1 Agora hau hakarak hataan buat nebee mak imi husu iha imi nia surat dehan, “Se mane la hola feto, nee diak ka lae?” Diak duni.
1CO 7:2 Maibee iha ema barak halo sala seksual. Entaun diak liu mane ida-idak iha nia feen rasik i feto ida-idak mos iha nia laen rasik.
1CO 7:3 Imi kaben nain sira tenki halo tuir imi nia obrigasaun nudar feen-laen. Laen la bele hadook aan husi nia feen, nunee mos feen la bele hadook aan husi nia laen.
1CO 7:4 Feen la bele dehan nia isin nee ninian rasik, tanba nia foo tiha ona ba nia laen. Nunee mos laen la bele dehan nia isin nee ninian rasik, tanba nia foo tiha ona ba nia feen.
1CO 7:5 Imi feen-laen sira la bele hadook aan ba malu. Maibee se karik imi desidi hamutuk atu hadook aan para bele foo aan ba orasaun durante tempu badak, entaun bele. Maibee bainhira tempu nee hotu ona, imi tenki hamutuk fali nudar feen-laen. Keta halo be Satanás tenta imi tanba imi la aguenta.
1CO 7:6 Hau hatete ida nee laos atu haruka imi hadook aan ba malu durante tempu badak, maibee atu foo lisensa deit.
1CO 7:7 Tuir loos hau hakarak para ema hotu-hotu moris hanesan hau, lalika kaben. Maibee hau hatene katak, Maromak foo kbiit ba ema balu atu la kaben, i foo kbiit ba ema seluk atu kaben.
1CO 7:8 Hau hakarak hatete ba klosan sira ho mos feto faluk sira katak, diak liu imi hanesan hau, lalika kaben.
1CO 7:9 Maibee se imi senti la domina aan tan, diak liu imi kaben duke la aguenta tan ona.
1CO 7:10 Agora hau foo orden ba kaben nain sira. Orden nee laos husi hau rasik, maibee husi Nai Jesus. Feen la bele soe nia laen.
1CO 7:11 Maibee se nia soe nia laen karik, nia la bele kaben tan ho ema seluk. Nia bele mesak nafatin, se lae, dame malu fali ho nia laen. Laen mos la bele soe nia feen.
1CO 7:12 Agora hau koalia ba sira seluk. Ida nee husi hau, laos husi Nai Jesus. Se mane ida fiar ba Kristu i nia feen la fiar, maibee feto nee hakarak atu sira moris hamutuk nafatin, la bele soe nia.
1CO 7:13 Nunee mos, se feto ida fiar ba Kristu i nia laen la fiar, maibee mane nee hakarak atu sira moris hamutuk nafatin, la bele soe nia.
1CO 7:14 Tanba mane nebee la fiar ba Kristu nee, Maromak konsidera moos tanba nia laran ida ho nia feen. Nunee mos feto nebee la fiar ba Kristu, Maromak konsidera moos tanba nia laen nebee fiar. Sira nia oan mos Maromak konsidera moos. Se laos nunee, sira nia oan hanesan fali ema jentiu.
1CO 7:15 Maibee se ema nebee la fiar ba Kristu hakarak husik nia kaben nebee fiar, entaun husik ba. Nia kaben nebee fiar nee livre ona. Tanba Maromak bolu imi atu moris iha pas ho hakmatek nia laran.
1CO 7:16 Feen sira nebee mak fiar, dala ruma imi bele lori imi nia laen ba Kristu para nia mos hetan salvasaun, maibee dala ruma mos lae. Nunee mos laen sira nebee mak fiar, dala ruma imi bele lori imi nia feen ba Kristu para hetan salvasaun, maibee dala ruma lae.
1CO 7:17 Ita nia Nai foo ba ita ida-idak dalan moris nebee la hanesan. Balu kaben nain, balu klosan, balu sunat, balu lae, balu atan, balu livre. Nunee diak liu imi ida-idak tuir nafatin imi nia dalan moris uluk nian bainhira Maromak fo-foun bolu imi atu tuir Nia. Regra nee hau hanorin ba sarani sira iha nebee-nebee.
1CO 7:18 Ezemplu, se ema ida sunat ona bainhira Maromak bolu nia, keta buka dalan atu halakon fali sunat nee. Nunee mos ho ema nebee mak seidauk sunat bainhira Maromak bolu nia, lalika husu atu sunat.
1CO 7:19 Tanba sunat ka la sunat, nee la importante. Importante mak ita halo tuir Maromak nia ukun fuan.
1CO 7:20 Diak liu imi ida-idak tuir nafatin imi nia dalan moris uluk nian bainhira Maromak fo-foun bolu imi atu tuir Nia.
1CO 7:21 Karik uluk Maromak bolu imi atu tuir Nia, imi ema nia atan, la buat ida. Maibee se imi nia patraun bele husik imi sai livre husi atan, diak liu tan.
1CO 7:22 Keta haluha, bainhira Maromak bolu ema ida atu tuir Nai Jesus, Nia la haree ba ema nee atan ka laos atan. Se ema nee atan ba patraun ida, iha Nai Jesus nia oin, nia livre. Se nia laos atan ba ema, nia sai fali atan ba Kristu.
1CO 7:23 Maromak sosa kotu tiha ona imi ho folin nebee karun. Nee duni imi la bele sai tan atan ba ema seluk.
1CO 7:24 Entaun maun-alin sira, iha imi nia moris hamutuk ho Maromak, diak liu imi ida-idak moris nafatin hanesan uluk bainhira Maromak bolu imi atu tuir Nai.
1CO 7:25 Imi husu hau kona ba ema nebee mak seidauk kaben. Ita nia Nai la foo hatene hau kona ba buat nee. Maibee tanba Nai Maromak nia laran luak mai hau mak hau sai ema ida nebee imi bele konfia.
1CO 7:26 Tuir hau nia hanoin, diak liu klosan sira sai klosan nafatin tanba agora dadauk mundu nakonu ho terus oi-oin.
1CO 7:27 Imi nebee iha feen, la bele fahe malu ho nia. Imi nebee la iha feen, lalika buka dalan atu kaben.
1CO 7:28 Maibee se imi kaben, nee la sala ida. Nunee mos se feto klosan kaben, la sala ida. Maibee ema nebee mak kaben sei hetan susar oi-oin iha mundu nee, i hau hakarak atu imi la bele hetan susar nunee.
1CO 7:29 Maun-alin sira, hau nia hanoin nunee: Tempu besik hotu ona. Nunee komesa agora, ema nebee iha feen la bele hanoin deit nia feen.
1CO 7:30 Ema nebee tanis la bele hanoin deit nia laran tristi nee. Ema nebee haksolok la bele hanoin deit nia haksolok nee. Ema nebee sosa sasaan la bele hanoin deit nia sasaan nee.
1CO 7:31 Ema nebee halo saida deit iha mundu nee la bele laran metin ba buat sira nee. Tanba la kleur tan mundu nebee ita haree dadauk nee la iha ona.
1CO 7:32 Hau lakohi atu imi preokupa kona ba buat oi-oin. Mane nebee la kaben, nia preokupa liu ba ita nia Nai, nia hakarak halo haksolok ita nia Nai nia laran.
1CO 7:33 Maibee mane nebee iha feen, nia preokupa liu ba moris iha mundu nee, nia hakarak halo haksolok nia feen nia laran.
1CO 7:34 Nee halo nia hanoin fahe ba rua. Nunee mos feto nebee nia laen la iha ona ka feto nebee sei klosan, nia preokupa liu ba ita nia Nai, nia hakarak foo nia isin ho klamar tomak ba ita nia Nai. Maibee feto nebee iha laen, nia preokupa liu ba moris iha mundu nee, nia hakarak halo haksolok nia laen nia laran.
1CO 7:35 Hau foo hanoin buat sira nee ba imi atu ajuda imi, laos atu bandu imi kaben ka la kaben. Hau hakarak atu imi moris tuir dalan nebee loos hodi serbi ita nia Nai ho laran tomak.
1CO 7:36 Ba mane nebee troka prenda ona, se nia hakarak atu kaben ona tanba nia senti la aguenta tan i feto nebee nia atu kaben mos tinan boot ba dadauk, entaun kaben deit ba. Nee la sala ida.
1CO 7:37 Maibee se nia desidi atu la kaben, nee mos buat diak ida. Naran katak nia bele domina aan, i nia rasik mak foti desizaun nee, laos ema seluk mak obriga.
1CO 7:38 Nunee, se nia kaben ho nia namorada nee, nia halo buat nebee loos. Maibee se nia desidi atu la kaben, nee diak liu tan.
1CO 7:39 Feto nebee kaben ona, nia sai ida deit ho nia laen durante nia laen sei moris. Maibee se nia laen mate, nia bele kaben fali, naran katak nia laen ida foun nee mos fiar ba Nai Jesus.
1CO 7:40 Tuir hau nia hanoin, se feto faluk nee la kaben fali, nee diak liu tan. Hau hanoin liafuan nee mai husi Maromak nia Espiritu.
1CO 8:1 Agora hau hakarak koalia kona ba naan nebee mak ema hamulak tiha ba lulik. Ita sarani sira senti aan dehan ita hotu hatene ona kona ba buat nee. Baibain ema nebee hatene buat ruma, nia foti aan, maibee ema nebee iha domin, hametin nia maluk nia fiar.
1CO 8:2 Ema nebee fiar aan dehan hatene ona buat ruma, afinal nia seidauk hatene lo-loos.
1CO 8:3 Maibee ema nebee hadomi Maromak, ema nee mak Maromak konhese.
1CO 8:4 Agora, kona ba naan nebee mak ema hamulak tiha ba lulik: Ita hotu hatene katak, lulik nebee ema adora iha mundu nee la vale buat ida. Tanba Maromak nee ida deit, la iha tan maromak seluk.
1CO 8:5 Ema adora buat bar-barak iha lalehan ho iha rai hanesan fali sira nia nai. Sira dehan buat sira nee mak sira nia maromak.
1CO 8:6 Maibee ba ita sarani sira, Maromak ida deit, Nia mak ita hotu nia Aman. Nia mak huun ba buat hotu-hotu, i ita moris atu serbi Nia. Ita nia Nai mos ida deit, Nia mak Jesus Kristu. Bainhira mundu seidauk iha, Maromak foo fiar ba Kristu atu halo lalehan ho rai ho buat hotu-hotu iha laran, ita mos hetan moris liu husi Nia.
1CO 8:7 Maski nunee sarani balu seidauk kompriende too iha nebaa. Uluk sei jentiu, sira toman ona adora lulik. Nunee se sira haan naan nebee mak ema hamulak tiha ona ba lulik, sira hanoin dehan sira mos tama hotu iha nebaa. Sira senti sira halo sala, tanba sira nia laran ru-rua.
1CO 8:8 Maibee hahaan la bele lori ita hakbesik ba Maromak. Ita haan mos, la halo ita sai diak, la haan mos, la halo ita sai aat.
1CO 8:9 Maski nunee kuidadu. O livre atu haan naan saida deit, maibee keta halo be o uza o nia liberdade nee halo fali o nia maluk sarani nebee sei laran ru-rua monu ba sala.
1CO 8:10 O hatene katak haan naan nebee mak ema hamulak tiha ba lulik la sala. Maibee se ema nebee duvida hela haree o haan naan iha uma lulik, nia mos bele brani atu haan, maski nia hanoin katak sala karik.
1CO 8:11 Nunee ho buat nebee o hatene nee, o estraga fali o nia maluk sarani nebee mak laran ru-rua. Afinal Kristu mos mate ba nia.
1CO 8:12 Bainhira o halo sala hanesan nee hasoru o nia maluk sarani, o halo kanek nia laran nebee mak ru-rua nee, i o halo sala mos hasoru Kristu.
1CO 8:13 Entaun, se naan nebee hau haan nee halo hau nia maluk monu ba sala, hau prontu atu la haan naan tan. Tanba hau lakohi halo hau nia maluk monu.
1CO 9:1 Imi hanoin hau laos livre atu halo saida deit mak loos ka? Imi hanoin hau nee laos apostolu ka? Imi hanoin hau nunka haree ita nia Nai Jesus ka? Hau haree duni ho matan rasik! I liu husi hau nia servisu mak imi sira nee fiar ba Nai Jesus.
1CO 9:2 Maski iha ema balu la rekonhese hau nudar apostolu, maibee ba imi, hau nee apostolu duni. Hau nia rezultadu servisu mos hatudu katak hau nee apostolu, tanba liu husi hau nia servisu mak imi fiar ba Nai Jesus.
1CO 9:3 Ba ema sira nebee foo sala hau, hau hakarak hataan nunee:
1CO 9:4 Imi hanoin dehan hau ho Barnabé la iha direitu atu imi foo haan-hemu ami ka? Ami iha duni direitu.
1CO 9:5 Imi hanoin dehan ami la iha direitu atu kaben ho feto sarani hodi akompanha ami ka? Afinal Pedro ho apostolu sira seluk ho mos Nai Jesus nia alin sira lori sira nia kaben akompanha sira.
1CO 9:6 Imi hanoin hau ho Barnabé deit mak tenki servisu hodi sustenta ami nia aan ka?
1CO 9:7 Hanoin took. Soldadu nebee halo funu, nia la selu nia hahaan rasik. Ema nebee kuda uvas, nia bele haan nia fuan. Ema nebee hakiak bibi, nia bele hemu bibi nee nia susu been.
1CO 9:8 Hau koalia nunee laos tuir ita ema nia hanoin deit. Moisés nia lei mos foo hatene hanesan nee.
1CO 9:9 Iha lei nee hakerek dehan, “Se uza karau hodi halao servisu ruma, la bele kesi nia ibun, atu nunee nia bele haan.” Maromak hanoin deit karau nee ka,
1CO 9:10 Nia mos hanoin ita ema? Loos duni, liafuan nee hakerek ba ita. Tanba ema nebee mak halai natar ho ema nebee mak sama hare, sira hotu laran metin katak too ikus sira sei simu sira nia parte.
1CO 9:11 Nunee mos ami nebee kuda Maromak nia liafuan iha imi nia laran, ami iha direitu atu imi foo haan-hemu ami.
1CO 9:12 Ema seluk nebee hanorin imi, sira iha direitu atu imi foo haan-hemu. Saa tan ami. Ami nia direitu liu fali sira! Maski nunee ami nunka uza ami nia direitu nee. Ami hanoin diak liu simu susar saida deit, tanba se ami husu karik, keta halo be taka fali dalan ba ema atu simu Liafuan Diak kona ba Kristu.
1CO 9:13 Imi hatene katak, nai lulik sira nebee mak serbi iha uma kreda boot, sira moris husi oferta nebee mak ema lori. I sira nebee serbi iha meza sakrifisiu, sira bele haan naan husi animal nebee mak ema lori.
1CO 9:14 Nunee mos ita nia Nai foo orden dehan, ema nebee iha knaar hodi foo sai Liafuan Diak, sira bele moris husi sira nia servisu nee.
1CO 9:15 Maski hau iha direitu, maibee hau nunka husu atu ema selu hau nia kolen. Hau mos la haruka surat nee ba imi atu husu imi foo buat ruma. Mai hau, diak liu hau mate duke hau husu! Tanba se hau husu, oinsaa mak hau bele gaba aan dehan hau foo sai Liafuan Diak ho gratis?
1CO 9:16 Maibee kona ba foo sai Liafuan Diak, hau la bele gaba aan, tanba Maromak mak haruka hau halo ida nee. Se hau la halo tuir, hau sei terus!
1CO 9:17 Se karik hau rasik mak hakarak atu foo sai Liafuan Diak nee, entaun hau bele hein atu simu hau nia kolen. Maibee Maromak mak foo fiar mai hau atu halao servisu nee. Nunee hau la hein atu simu buat ida, tanba hau halo tuir deit buat nebee mak Nia foo mai hau.
1CO 9:18 Entaun hau sei hetan saida hodi selu hau nia kolen? Buat nebee hau hetan mak nee: Hau bele haksolok foo sai Liafuan Diak ho gratis. Nee mak bainhira hau foo sai Liafuan Diak, hau nunka husu atu simu hau nia direitu.
1CO 9:19 Hau livre, laos ema ida nia atan. Maski nunee hau halo hau nia aan sai atan ba ema hotu atu nunee hau bele manaan ema barak liu tan hodi tuir Kristu.
1CO 9:20 Ba ema Judeu, bainhira hau hamutuk ho sira, hau halo hau nia aan hanesan ema Judeu, atu nunee bele manaan sira. Ba ema nebee kaer metin Moisés nia lei, bainhira hau hamutuk ho sira, hau halo hau nia aan hanesan ema nebee kaer metin lei nee. Afinal hau laos moris iha lei nia okos, maibee hau halo nunee atu hau bele manaan sira.
1CO 9:21 Ba ema jentiu nebee la hatene Moisés nia lei, hau halo hau nia aan hanesan ema nebee mak la hatene lei nee, atu nunee bele manaan sira. Maibee hau la haluha Maromak nia lei, hau hakruuk ba Kristu nia ukun fuan.
1CO 9:22 Ba ema nebee fraku, hau mos sai fraku, atu nunee bele manaan sira. Nunee ba see-see deit, hau halo hau nia aan hanesan sira, hau prontu halo saida deit atu bele lori sira balu ba salvasaun.
1CO 9:23 Hau halo buat sira nee hotu atu ema barak bele moris tuir Liafuan Diak. Liu husi nee hau hetan bensaun hamutuk ho sira.
1CO 9:24 Bainhira ema halai taru, ema barak halai, maibee ida deit mak manaan premiu. Tanba nee, imi tenki halai makaas atu imi bele hetan premiu nee.
1CO 9:25 Ema hotu nebee mak atu tama kompetisaun, sira tenki treinu sira nia aan ho disiplina. Sira halo nunee atu bele manaan premiu ida nebee la dura. Maibee ita nee treinu ita nia aan atu hetan premiu ida nebee dura tinan ba tinan.
1CO 9:26 Nunee hau la halai arbiru. Se kompara ho kompetisaun tuku malu, hau laos tuku mamuk deit.
1CO 9:27 Hau treinu makaas hau nia aan, too hau domina hau nia aan tomak. Se lae, hau foo sai Liafuan Diak ba ema, maibee too ikus hau rasik la simu premiu.
1CO 10:1 Maun-alin sira, keta haluha ita nia bei-ala sira nia istoria. Uluk bainhira sira iha rai fuik maran, sira hotu lao iha kalohan ida nia okos, i sira hotu lao hakur tasi.
1CO 10:2 Liu husi kalohan ho tasi nee, bele dehan sira hotu simu batizmu atu sai Moisés nia ema.
1CO 10:3 Sira hotu haan hahaan nebee mak Maromak nia Espiritu foo.
1CO 10:4 Sira hotu hemu bee nebee mak Maromak nia Espiritu foo ba sira. Bee nee sai husi fatuk boot ida nebee akompanha sira. Fatuk nee mak Kristu.
1CO 10:5 Maski nunee sira barak mak la halo haksolok Maromak nia laran, nunee too ikus sira mate namkari iha rai fuik maran.
1CO 10:6 Buat nebee akontese ba ita nia bei-ala sira nee hanesan lisaun ida mai ita, atu keta husik hahalok aat domina fali ita nia hanoin.
1CO 10:7 La bele adora fali lulik hanesan sira balu. Iha Livru Sagradu hakerek dehan, “Sira halo festa haan-hemu, depois komesa bidu-tebe hodi foti aas sira nia estatua lulik.”
1CO 10:8 Ita la bele halo sala seksual hanesan sira balu. Tanba sira nia hahalok nee mak ema rihun rua-nulu resin tolu mate iha loron ida deit.
1CO 10:9 Ita la bele koko Kristu hanesan sira balu. Tanba sira nia hahalok nee mak samea tata mate tiha sira.
1CO 10:10 Ita mos la bele murmura hela deit hanesan sira balu. Tanba sira nia hahalok nee mak Maromak haruka Nia anju ida mai oho sira. Anju ida nee mak baibain lori kastigu husi Maromak.
1CO 10:11 Buat nebee akontese ba sira nee hanesan lisaun ida mai ita atu la bele halo tuir sira. I ema hakerek para foo hanoin mai ita nebee moris iha tempu ikus.
1CO 10:12 Entaun se imi hanoin dehan imi hamriik metin, kuidadu atu imi la bele monu.
1CO 10:13 Bainhira imi hasoru tentasaun, keta haluha katak, ema seluk hasoru uluk tiha ona tentasaun nebee hanesan. Maromak mos sempre kumpri Nia liafuan. Nia sei la husik imi atu hasoru tentasaun nebee liu fali imi nia forsa. Maibee bainhira imi hasoru tentasaun, Nia sei hatudu dalan ba imi, atu imi bele hamriik nafatin.
1CO 10:14 Nee duni maluk doben sira, halai sees tiha husi buat adora lulik nee.
1CO 10:15 Imi ema nebee matenek. Entaun imi rasik mak tetu hau nia liafuan nee.
1CO 10:16 Bainhira ita halibur hamutuk hodi selebra Kristu nia mate, ita foo agradese ba kopu ho tua, depois hemu. Nee hatudu katak, ita hola parte iha Kristu nia raan. Nunee mos bainhira ita silu paun hodi haan, ita hola parte iha Kristu nia isin.
1CO 10:17 Ita hotu haan husi paun fuan ida. Nunee, maski ita barak, maibee ita hotu sai hanesan isin lolon ida deit, tanba paun nebee ita haan nee ida deit.
1CO 10:18 Hanoin took. Ema Israel baibain oho animal halo sakrifisiu ba Maromak iha meza sakrifisiu. Bainhira sira haan naan nee, sira hotu sai laran ida ho Maromak.
1CO 10:19 Hau koalia nunee, keta halo be imi hanoin sakrifisiu nebee mak ema foo ba estatua lulik iha folin buat ruma ka, lulik nee iha kbiit.
1CO 10:20 Lae! Maibee saida mak ema jentiu sira foo ba iha lulik nee, sira foo ba diabu, laos foo ba Maromak. I hau lakohi atu imi hola parte iha diabu sira nee.
1CO 10:21 Imi nebee hemu tiha ona tua husi Nai Jesus nia kopu, la bele hemu tan tua husi diabu nian. Imi nebee haan tiha ona iha Nai Jesus nia meza, la bele haan tan iha diabu nian.
1CO 10:22 Ita brani provoka Nai Jesus ka? Ita senti ita nia aan forti liu fali Nia ka?
1CO 10:23 Ema balu dehan, “Ita iha direitu atu halo buat saida deit.” Maibee nee laos dehan katak, buat hotu diak ba ita. I laos buat hotu bele hametin ita nia maluk nia fiar.
1CO 10:24 La bele buka diak ba o nia aan rasik, maibee buka diak ba ema seluk.
1CO 10:25 Se sosa naan iha merkadu, lalika husu, naan nee keta hamulak tiha ona ba lulik karik. Lalika tauk atu haan,
1CO 10:26 tanba iha Livru Sagradu hakerek dehan, “Mundu ho buat hotu-hotu iha mundu nee, Nai Maromak nian.”
1CO 10:27 Se iha ema jentiu ruma konvida imi baa haan iha nia uma, i imi hakarak baa, entaun baa deit. Haan saida deit mak sira foo ba imi, lalika husu, naan nee keta hamulak tiha ona ba lulik karik.
1CO 10:28 Maibee karik ema ida mai foo hatene dehan, “Naan nee ema hamulak tiha ona ba lulik.” Se nunee, diak liu lalika haan, tanba tuir ema nee nia hanoin, sarani sira la bele haan naan hanesan nee.
1CO 10:29 Maski imi rasik hanoin katak haan naan nee la sala, maibee halo tuir deit ema nee nia hanoin ba. Nusaa mak hau tenki tuir fali ema seluk nia hanoin? Afinal hau livre atu haan saida deit!
1CO 10:30 Nusaa mak bainhira hau haan, ema foo sala fali hau? Afinal hau foo agradese tiha ona ba Maromak mak foin haan.
1CO 10:31 Entaun, atu imi haan ka hemu ka halo saida deit, halo buat sira nee hotu para foti aas Maromak nia naran.
1CO 10:32 La bele halo ema seluk monu ba sala. Atu ema Judeu, ka ema nebee laos Judeu, ka Maromak nia povu, keta halo sira monu.
1CO 10:33 Maibee halo hanesan hau. Hau koko atu halo haksolok ema hotu nia laran iha buat hotu. Hau laos buka diak ba hau nia aan, maibee buka diak ba ema barak, atu sira mos hetan salvasaun.
1CO 11:1 Halo tuir hau nia ezemplu, hanesan mos hau halo tuir Kristu nia ezemplu.
1CO 11:2 Hau gaba imi tanba imi sempre hanoin hau i sempre halo tuir hanorin nebee hau foo tutan ona ba imi.
1CO 11:3 Agora hau hakarak atu imi kompriende buat tuir mai nee: Mane sira nia ulun mak Kristu, feen sira nia ulun mak sira nia laen, i Kristu nia ulun mak Maromak.
1CO 11:4 Se mane ida halo orasaun ka foo tutan Maromak nia lia menon, nia la bele taka ulun. Se lae nia la hatudu respeitu ba Kristu nudar nia ulun.
1CO 11:5 Maibee bainhira feto halo orasaun ka foo tutan Maromak nia lia menon, nia tenki taka nia ulun. Se lae, nia la hatudu respeitu ba nia laen nudar nia ulun. Nia hanesan fali feto nebee mak ema koi tiha nia ulun halo molik.
1CO 11:6 Se iha feto ida lakohi taka nia ulun para hatudu respeitu ba nia laen, diak liu nia koi tiha nia fuuk halo molik. Maibee se nia senti nia ulun molik nee halo moe nia, diak liu nia taka nia ulun.
1CO 11:7 Mane la presiza taka nia ulun, tanba Maromak halo mane hanesan Nia Aan, nunee mane hatudu sai Maromak nia kbiit boot. Maibee feto hatudu sai mane nia kbiit.
1CO 11:8 Bainhira Maromak halo mundu nee, Nia halo feto husi mane, laos halo mane husi feto.
1CO 11:9 I Nia halo feto foo ba mane, laos halo mane foo ba feto.
1CO 11:10 Tanba nee, feto tenki taka nia ulun hodi hatudu katak nia iha direitu atu halo orasaun i hatoo Maromak nia lia menon. Se lae anju sira la gosta.
1CO 11:11 Maibee ba ita nebee laran ida ho Nai Jesus, feto ho mane la bele lao ida-idak nian.
1CO 11:12 Tanba uluk liu, Maromak halo feto husi mane, maibee husi tempu nebaa too agora, mane hotu-hotu mai husi feto. I buat hotu-hotu mai husi Maromak.
1CO 11:13 Imi rasik tenki tetu di-diak: Se feto la taka nia ulun bainhira nia halo orasaun ba Maromak, nee diak ka lae?
1CO 11:14 Iha mundu nee ita baibain haree, se mane nia fuuk naruk hanesan feto, nee moe boot ida.
1CO 11:15 Maibee se feto nia fuuk naruk, nee furak loos, tanba Maromak foo fuuk naruk atu taka nia ulun.
1CO 11:16 Se ema ruma hakarak atu diskuti malu kona ba buat nee, hau hakarak hatete deit, ami baibain halo hanesan nee, nunee mos Maromak nia povu iha fatin sel-seluk.
1CO 11:17 Agora hau hakarak hatete tan buat ida. Iha buat nee hau la gaba imi, tanba bainhira imi sarani sira halibur hamutuk, imi nia hahalok laduun ajuda ema, maibee halo susar fali sira.
1CO 11:18 Primeiru, hau rona katak, bainhira imi halibur hamutuk, imi halo grupu keta-ketak. Hau hanoin informasaun nee balu loos,
1CO 11:19 tanba hanoin la hanesan sempre iha. Husi nee mak ema bele haree, see mak halo tuir Maromak nia hakarak, i see mak la halo tuir.
1CO 11:20 Maibee bainhira imi haan hamutuk atu selebra Nai Jesus nia mate, buat nebee imi halo nee laos halo hodi hanoin ita nia Nai.
1CO 11:21 Tanba imi haan, la hein malu. Nunee balu la hetan hahaan too hamlaha, i balu haan bosu i hemu too lanu.
1CO 11:22 Imi halo saida mak nee? Imi la iha uma rasik atu haan-hemu ka? Keta halo be imi hakarak estraga sarani sira nia naran ka imi hakarak halo moe ema kiak. Hau atu dehan tan saida? Hau atu gaba imi nia hahalok nee ka? Lae liu!
1CO 11:23 Hanorin tuir mai hau simu husi Nai Jesus rasik, i hau mos foo tutan tiha ona ba imi. Iha kalan ikus, molok ema atu faan Nai Jesus ba Nia inimigu, Nia foti paun
1CO 11:24 hodi agradese ba Maromak. Nia silu paun nee hodi hatete, “Nee Hau nia isin, Hau foo hodi salva imi. Halo hanesan nee nafatin hodi hanoin Hau.”
1CO 11:25 Nunee mos bainhira sira haan hotu ona, Nia foti tan tua kopu ida hodi dehan, “Tua nee hatudu Maromak nia promesa foun nebee Nia halo liu husi Hau nia raan. Bainhira deit mak imi hemu tua hanesan nee, imi tenki hanoin Hau.”
1CO 11:26 Entaun bainhira deit mak imi haan paun ho hemu tua hanesan nee, imi foo sai ita nia Nai nia mate. Imi halo nunee nafatin too loron nebee Nia fila fali mai husi lalehan.
1CO 11:27 Nee duni ema nebee mak haan ita nia Nai nia paun ho hemu Nia tua nee maibee la foo folin, ema nee halo sala hasoru Nai Jesus nia isin ho raan.
1CO 11:28 Tanba nee, ema ida-ida tenki hatene tuir nia aan lai mak foin nia haan paun i hemu tua nee.
1CO 11:29 Tanba ema nebee haan-hemu la konsidera Nai Jesus nia isin, nia rasik husu kastigu ba nia aan.
1CO 11:30 Nee mak ema barak iha imi nia klaran moras ho fraku, i balu mos mate tiha ona.
1CO 11:31 Maibee se ita rasik hatene tuir ita nia aan, entaun ita la hetan kastigu.
1CO 11:32 Se ita nia Nai kastigu ita agora, nee para hanorin ita, atu nunee iha loron ikus bainhira Maromak kastigu ema aat sira iha mundu nee, ita la simu kastigu hamutuk ho sira.
1CO 11:33 Entaun maun-alin sira, bainhira imi halibur hamutuk hodi selebra Nai Jesus nia mate, imi haan tenki hein malu.
1CO 11:34 Se imi hamlaha karik, haan lai buat ruma iha uma, atu nunee imi halibur hamutuk, la bele hetan Maromak nia kastigu. Hau nia lia menon seluk, hau too iha nebaa mak hau foo.
1CO 12:1 Maun-alin sira, hau hakarak atu imi kompriende kbiit nebee mak Maromak nia Espiritu foo ba ita ida-idak atu halao Maromak nia servisu.
1CO 12:2 Imi hatene katak, uluk imi seidauk konhese Maromak, imi nar-naran tuir buat nebee lori imi lao sala dalan, too imi adora fali buat lulik, maski buat lulik sira nee la hatene koalia.
1CO 12:3 Tanba nee, hau foo hanoin ba imi nunee: Ema nebee Maromak nia Espiritu domina mak foin bele dehan, “Jesus hau nia Nai.” Ema nee nunka bele foo malisan ba Jesus, tanba Espiritu Santu domina hela nia.
1CO 12:4 Ita simu kbiit oi-oin, maibee Espiritu ida deit mak foo.
1CO 12:5 Ita simu servisu oi-oin, maibee ita serbi Nai ida deit.
1CO 12:6 Ita simu knaar oi-oin, maibee Maromak ida deit mak tulun ita atu halo knaar nee.
1CO 12:7 Maromak hatudu sai Nia Espiritu liu husi ita ida-idak nia moris atu ita bele tulun ema seluk.
1CO 12:8 Ema balu, Maromak nia Espiritu foo kbiit atu foo sai Maromak nia dalan atu ema bele kompriende. Iha ema seluk, Espiritu nee foo kbiit atu foo sai liafuan matenek husi Maromak.
1CO 12:9 Iha ema balu, Espiritu foo kbiit atu fiar metin ba Jesus Kristu. Iha tan balu mak Espiritu nee foo kbiit atu kura ema moras.
1CO 12:10 Ema balu simu kbiit atu halo milagre oi-oin. Ema balu simu kbiit atu foo tutan Maromak nia lia menon. Ema balu simu kbiit atu bele hatene, Espiritu nebee mak Maromak nian, espiritu nebee mak lae. Iha tan ema balu simu kbiit atu koalia lian oi-oin nebee sira nunka aprende, i ema seluk tan simu kbiit atu sai durbasa ba liafuan sira nee.
1CO 12:11 Buat sira nee hotu, Espiritu ida deit mak halo. Nia foo kbiit ba ita ida-idak tuir Nia hakarak rasik.
1CO 12:12 Hau foo ezemplu ida husi ema nia isin lolon. Isin lolon ida iha parte oi-oin. Maski iha barak, maibee parte sira nee hamutuk isin lolon ida deit. Nunee mos Kristu nia povu.
1CO 12:13 Atu ema Judeu ka laos Judeu, atu atan ka laos atan, ita hotu simu batizmu ho Espiritu nebee hanesan. Nunee Nia halo ita hotu sai hanesan isin lolon ida deit. Espiritu nee hanesan bee nebee Maromak foo mai ita hotu hemu.
1CO 12:14 Loos duni, ita nia isin lolon laos parte ida deit, maibee iha parte barak.
1CO 12:15 Se karik ita nia ain dehan, “Hau nee laos liman. Nunee hau la halo parte o nia isin lolon.” Maski nia koalia nunee, maibee nia tama nafatin iha isin lolon nee.
1CO 12:16 Se karik ita nia tilun dehan, “Hau nee laos matan. Nunee hau la halo parte o nia isin.” Maski nia koalia nunee, maibee nia tama nafatin iha isin lolon nee.
1CO 12:17 Hanoin took ba! Se karik ita nia isin lolon tomak matan deit, oinsaa mak bele rona? Se ita nia isin lolon tomak tilun deit, oinsaa mak bele horon buat ruma?
1CO 12:18 Maibee Maromak halo parte ida-idak tau iha nia fatin, tuir Maromak nia hakarak rasik.
1CO 12:19 Se iha parte ida deit, entaun laos isin lolon ona!
1CO 12:20 Iha parte barak, maibee isin lolon ida deit.
1CO 12:21 Ita nia matan la bele hatete ba ita nia liman, “Hau la presiza o.” I ita nia ulun la bele hatete fali ba ita nia ain, “Hau la presiza o.”
1CO 12:22 Iha ita nia isin lolon, iha parte balu mak ita konsidera fraku, afinal parte sira nee mak importante liu.
1CO 12:23 Iha parte balu mak ita konsidera laduun iha folin, maibee parte hirak nee mak ita kuidadu liu. Iha parte balu mak ita haree ba laduun furak, parte hirak nee mak ita foo hatais halo furak.
1CO 12:24 Maibee parte nebee ita haree ba furak ona, laduun presiza atu ita tau matan. Entaun Maromak tau parte ida-idak tuir nia fatin, i Nia foo folin liu ba parte nebee mak ema konsidera laduun iha folin.
1CO 12:25 Nia halo nunee atu parte hotu-hotu iha ita nia isin lolon bele haree malu diak, i tau matan ba malu.
1CO 12:26 Se parte ida hetan terus, hotu-hotu senti. Se parte ida simu respeitu, hotu-hotu kontenti.
1CO 12:27 Nunee mos imi. Imi hotu hanesan Kristu nia isin lolon, imi ida-idak halo parte iha Nia isin nee.
1CO 12:28 Husi ita sarani sira, Maromak foti ema atu halo servisu oi-oin. Primeiru apostolu, segundu profeta, terseiru mestri. Nia mos hili ema balu atu halo milagre oi-oin, balu tan simu kbiit atu kura ema nia moras oi-oin, balu hatene ajuda ema, balu iha kbiit atu lidera ema seluk, i balu bele koalia lian oi-oin nebee sira nunka aprende.
1CO 12:29 Ita hotu-hotu sai apostolu ka? Ita hotu sai profeta ka? Ita hotu sai mestri ka? Ita hotu halo milagre ka?
1CO 12:30 Ita hotu simu kbiit atu kura ema nia moras ka? Ita hotu hatene koalia lian oi-oin nebee ita nunka aprende ka? Ita hotu bele sai durbasa ba liafuan sira nee ka? Lae!
1CO 12:31 Entaun, imi tenki husu ba Maromak ho laran tomak atu imi simu kbiit nebee mak folin boot liu. Agora hau hakarak hatudu ba imi dalan nebee mak diak liu tan.
1CO 13:1 Se karik hau bele koalia lian oi-oin, atu ema nia lian ka anju nia lian, maibee hau la iha domin, hau nia liafuan mamuk deit, hanesan tambor nebee tarutu ka sinu nebee lian arbiru.
1CO 13:2 Se karik hau iha kbiit atu foo tutan Maromak nia lia menon, hau kompriende Nia segredu hotu, hau hatene buat hotu, i hau fiar makaas too hau bele muda foho, maibee hau la iha domin, hau la iha folin ida.
1CO 13:3 Se karik hau fahe hau nia riku-soin tomak ba ema kiak, ka entrega hau nia aan atu ema sunu mutuk, maibee hau la iha domin, hau la manaan buat ida.
1CO 13:4 Domin nee pasiensia, domin nee laran diak, domin la laran moras ba ema, domin la gaba aan, domin la foti aan.
1CO 13:5 Domin konsidera ema seluk, domin lakohi manaan mesak deit, domin la hirus lalais, domin la hatene rai odi.
1CO 13:6 Domin la haksolok bainhira ema halo aat, maibee haksolok ho buat nebee mak loos.
1CO 13:7 Domin tahan nafatin buat hotu, fiar nafatin, hein ho laran metin nafatin, i aguenta nafatin.
1CO 13:8 Domin nunka hotu nunka remata. Maibee kbiit nebee Espiritu foo ba ita, bainhira mundu remata ita la presiza tan. Ema sei la foo tutan Maromak nia lia menon tan, sira la simu tan kbiit atu koalia lian oi-oin, i buat nebee sira hatene, sei la iha tiha.
1CO 13:9 Tanba agora ita hatene parte balu deit, i profeta nebee foo tutan Maromak nia lia menon mos foo parte balu deit.
1CO 13:10 Maibee aban-bainrua Maromak sei halo buat hotu-hotu kompletu. Iha loron nee, buat nebee la kompletu, sei lakon.
1CO 13:11 Uluk hau sei kiik, hau koalia hanesan labarik, kompriende hanesan labarik, hanoin hanesan labarik. Maibee bainhira hau boot ona, hau husik tiha hahalok labarik nian.
1CO 13:12 Saida mak ita agora dadauk haree nee, la moos, hanesan ema nebee haree nia lalatak iha vidru. Maibee too loron ida ita sei haree mo-moos, oin ho oin. Agora hau hatene buat balu deit, maibee aban-bainrua hau sei hatene mo-moos, hanesan mos Maromak agora hatene mo-moos hau.
1CO 13:13 Entaun, iha buat tolu mak sei hela nafatin, nee mak fiar, esperansa ho domin. Husi buat tolu nee, ida importante liu mak domin.
1CO 14:1 Hakaas aan atu hadomi ema. I husu ho laran atu Maromak nia Espiritu foo kbiit ba imi para bele halao Maromak nia servisu. Liu-liu husu nafatin kbiit hodi foo tutan Maromak nia lia menon.
1CO 14:2 Tanba ema nebee hetan kbiit atu koalia lian oi-oin nebee nia nunka aprende, nia laos koalia ba ema, tanba ema ida la kompriende. Maromak nia Espiritu halo nia koalia buat nebee mak segredu hela, i nia liafuan nee hatoo ba Maromak deit.
1CO 14:3 Maibee ema nebee mak foo tutan Maromak nia lia menon, nia koalia ba ema. Nia foo forsa ba sira, hametin sira nia laran, i foo aten brani ba sira nebee laran susar.
1CO 14:4 Ema nebee mak koalia lian oi-oin husi Espiritu Santu, nia so hametin nia fiar rasik. Maibee ema nebee mak foo tutan Maromak nia lia menon, nia hametin sarani sira hotu nia fiar.
1CO 14:5 Tuir loos hau hakarak atu imi hotu bele koalia lian oi-oin husi Espiritu Santu. Maibee hau hakarak liu atu imi bele foo tutan Maromak nia lia menon. Tanba ema nebee foo tutan Maromak nia lia menon, folin boot liu fali ema nebee mak koalia lian oi-oin husi Espiritu Santu. Koalia ho lian oi-oin nee diak, naran katak iha ema ida bele durbasa, atu nunee bele foo forsa ba sarani sira.
1CO 14:6 Maun-alin sira, hanoin took. Karik hau baa iha imi, depois hau koalia ho imi ho lian nebee mak imi la kompriende, imi manaan saida? La manaan buat ida! Bainhira hau koalia ho imi, diak liu hau foo sai ba imi buat nebee mak Maromak hatudu ona mai hau. Diak liu hau foo tutan matenek ka lia menon ruma nebee mak Nia foo mai hau, ka hau hanorin buat ruma ba imi.
1CO 14:7 Ita bele kompara ho instrumentu muzika nebee lian maibee la iha iis, hanesan flauta ho viola. Se ita toka muzika maibee ita toka la tuir nia dalan, oinsaa mak ema bele hatene muzika nee?
1CO 14:8 I se ema huu korneta la loos, oinsaa mak soldadu sira bele hatene atu prepara aan ba funu?
1CO 14:9 Nunee mos ho imi, se imi koalia ho lian nebee ema la kompriende, ema ida sei la hatene saida mak imi koalia. Nee hanesan fali imi koalia ba anin deit.
1CO 14:10 Iha mundu nee ema koalia lian oi-oin, lian ida-idak iha nia signifikadu rasik.
1CO 14:11 Maibee se hau la kompriende buat nebee ema seluk hatete mai hau, ami nain rua sai ema fuik ho leet ba malu.
1CO 14:12 Imi hakarak teb-tebes atu simu kbiit husi Espiritu Santu atu halao Maromak nia servisu. Entaun diak liu imi hakaas aan atu simu kbiit nebee mak imi bele uza atu foo forsa ba sarani sira.
1CO 14:13 Nee duni se imi iha ona kbiit atu koalia lian oi-oin husi Espiritu Santu, diak liu imi harohan ba Maromak atu foo mos kbiit hodi bele durbasa.
1CO 14:14 Tanba se hau harohan ho lian nebee ema la kompriende nee, hau nia klamar mak harohan, maibee hau nia kakutak la kompriende saida mak hau hatete.
1CO 14:15 Entaun diak liu oinsaa? Hau sei uza hau nia klamar ho kakutak hotu. Hau sei harohan ho hau nia klamar, i hau mos harohan ho liafuan nebee mak hau hatene. Hau sei kanta ba Maromak ho hau nia klamar, i hau mos kanta ho liafuan nebee mak hau hatene.
1CO 14:16 Tanba se ita nia klamar deit mak hahii Maromak, oinsaa mak ema seluk bele kompriende hodi hahii Maromak hamutuk ho ita? Se ita foo agradese ba Maromak, ema nee la bele hataan, “Amen, loos duni!”, tanba nia la kompriende saida mak ita koalia.
1CO 14:17 Ita nia obrigadu ba Maromak bele diak too iha nebee mos, la hametin ema nee nia fiar.
1CO 14:18 Hau foo agradese ba Maromak tanba hau simu kbiit husi Espiritu Santu atu koalia lian oi-oin liu fali imi hotu.
1CO 14:19 Maibee bainhira sarani sira halibur hamutuk, diak liu hau hanorin sira uza liafuan lima nebee sira kompriende, duke hau uza liafuan rihun ba rihun nebee ema ida la kompriende.
1CO 14:20 Maun-alin sira, imi nia hanoin sei hanesan labarik kiikoan. La bele nunee! Imi nia hanoin tenki hanesan ema boot. Maibee kona ba hahalok aat, imi tenki hanesan bebee nebee la hatene halo buat aat.
1CO 14:21 Iha Livru Sagradu hakerek nunee: “Ita nia Nai dehan, ‘Hau sei haruka ema husi rai liur hatoo Hau nia liafuan ba povu Israel. Hau sei koalia ba sira liu husi lian ida nebee sira nunka rona. Maski nunee sira lakohi rona Hau nafatin.’ ”
1CO 14:22 Husi liafuan nee ita bele hatene katak, se ita koalia lian oi-oin husi Espiritu Santu, nee hatudu sai Maromak nia kbiit ba ema nebee mak la fiar ba Maromak, laos ba ema nebee fiar ona. Maibee se ita foo tutan Maromak nia lia menon, nee ajuda ema nebee fiar, laos ema nebee mak la fiar.
1CO 14:23 Imajina took, imi sarani sira halibur hamutuk, depois ema matan foun ka ema nebee la fiar tama iha imi nia klaran. Se karik imi hotu koalia lian oi-oin husi Espiritu Santu, entaun ema sira nee sei dehan imi bulak hotu ona.
1CO 14:24 Maibee se imi foo tutan Maromak nia lia menon mak ema hanesan nee tama, buat nebee imi koalia nee kona loos nia hahalok. Nunee nia sei hatene aan katak nia nee sala nain i sei hetan kastigu.
1CO 14:25 Depois buat nebee nia subar iha nia laran sei foo sai hotu. I nia hakneak adora Maromak hodi dehan, “Maromak iha duni imi nia klaran!”
1CO 14:26 Entaun maun-alin sira, diak liu oinsaa? Bainhira imi sarani sira halibur hamutuk, imi ida-idak tenki uza kbiit nebee Maromak foo. Balu kanta, balu hanorin, balu hatoo buat nebee mak Maromak foo sai ba sira ida-idak, balu koalia lian oi-oin husi Espiritu Santu, i balu sai durbasa. Buat sira nee hotu imi tenki halo atu hametin sarani sira nia fiar.
1CO 14:27 Se ema atu koalia lian oi-oin husi Espiritu Santu, nee diak. Maibee nain rua ka tolu deit too ona, la bele barak liu. Ema ida koalia hotu tiha lai, foin ida seluk koalia fali. I tenki iha ema ruma atu durbasa.
1CO 14:28 Se la iha ema ida atu durbasa, entaun la bele koalia sai lian sira nee iha sarani sira nia klaran. Diak liu koalia mes-mesak deit ba Maromak.
1CO 14:29 Bainhira imi halibur hamutuk, foo fatin ba ema nain rua ka tolu atu foo tutan Maromak nia lia menon, depois sira seluk tenki tetu di-diak sira nia liafuan nee.
1CO 14:30 Maibee se karik ema ida koalia hela, depois Maromak foo sai buat ruma ba ema ida seluk nebee tuur hela iha nebaa, entaun ida nebee koalia uluk nee tenki para.
1CO 14:31 Nunee imi hotu bele troka malu foo tutan Maromak nia lia menon, atu imi hotu bele aprende i bele laran metin liu tan.
1CO 14:32 Profeta nebee mak foo tutan Maromak nia lia menon, nia tenki domina aan hodi hein nia tempu.
1CO 14:33 Tanba Maromak la gosta atu ita rungu-ranga, Nia gosta mak pas ho hakmatek.
1CO 14:34 Hanesan mos iha fatin sel-seluk, bainhira imi sarani sira halibur malu, feto sira tenki nonook, la bele koalia. Sira tenki hakruuk hodi rona, tuir buat nebee hakerek iha Moisés nia lei.
1CO 14:35 Se feto sira hakarak hatene buat ruma, diak liu fila ba uma mak husu sira nia laen. Se sira husu iha ema nia oin, nee moe boot.
1CO 14:36 Imi hanoin Maromak nia liafuan nia huun mak imi ka? Nia liafuan too deit iha imi ka?
1CO 14:37 Se iha ema ruma senti katak nia profeta ida ka hetan kbiit seluk husi Maromak nia Espiritu, ema nee sei foo sai katak buat nebee mak hau hakerek ba imi nee orden ida husi Nai Jesus.
1CO 14:38 Se iha ema ruma mak la simu orden nee, imi lalika simu nia.
1CO 14:39 Tanba nee, maun-alin sira, imi nia laran tenki hakarak teb-tebes sai ema nebee foo tutan Maromak nia lia menon. I la bele bandu ema koalia lian oi-oin husi Espiritu Santu.
1CO 14:40 Maibee halo buat hotu ho lo-loos i tuir nia dalan.
1CO 15:1 Maun-alin sira, agora hau hakarak foo hanoin fila fali kona ba Liafuan Diak. Uluk hau foo sai tiha ona ba imi, imi mos simu ho diak, i imi abut metin nafatin too agora.
1CO 15:2 Se imi kaer metin nafatin Liafuan Diak nee, imi hetan salvasaun. Se lae, imi nia fiar saugati deit.
1CO 15:3 Hanorin nebee hau simu, hau mos foo tutan ona ba imi. Hanorin nee nia huun mak nee: Kristu mate tanba ita nia sala, hanesan hakerek nanis ona iha Livru Sagradu.
1CO 15:4 Ema hakoi tiha Nia, depois iha loron tolu Maromak halo Nia moris fali, hanesan hakerek iha Livru Sagradu.
1CO 15:5 Bainhira Nia moris fali, Kristu hatudu Aan ba Pedro. Depois Nia hatudu Aan ba Nia apostolu nain sanulu resin rua.
1CO 15:6 Tuir mai iha loron ida Nia hatudu Aan ba ita nia maluk sarani atus lima resin. Husi sira nee, iha barak mak sei moris, uitoan deit mak mate tiha ona.
1CO 15:7 Depois Nia hatudu Aan fali ba Tiago, foin ba apostolu sira hotu.
1CO 15:8 Ikus mai Nia hatudu Aan mos ba hau. Afinal hau hanesan bebee nebee moris mai seidauk too nia loron, tuir loos abortu.
1CO 15:9 Apostolu sira seluk boot liu hau. Tuir loos, hau la serve atu ema bolu hau apostolu, tanba hau uluk halo terus Maromak nia povu iha nebee-nebee.
1CO 15:10 Maibee Maromak hatudu Nia laran diak mai hau mak hau nia moris muda sai hanesan agora nee. I Nia laran diak mai hau la saugati, tanba durante nee hau servisu makaas liu fali hau nia maluk apostolu sira seluk. Maibee laos hau mak servisu, Maromak nia laran diak iha hau mak halo servisu nee.
1CO 15:11 Entaun, atu hau mak foo sai Liafuan Diak ba imi ka, apostolu sira seluk mak foo sai, ami hotu hanorin buat nebee hanesan, i hanorin nee mak imi fiar.
1CO 15:12 Ami sempre foo sai dehan, Maromak halo ona Kristu moris fali husi mate. Entaun nusaa mak imi balu dehan, ema mate sei la moris fali?
1CO 15:13 Se karik ema mate la moris fali, nee dehan katak Kristu mos la moris fali.
1CO 15:14 I se Kristu la moris fali karik, buat hotu nebee mak ami foo sai ba ema, la iha folin, imi nia fiar ba Nia mos saugati deit.
1CO 15:15 Laos nee deit. Se karik ema mate la moris fali, entaun ami nee mos foo sasin falsu kona ba Maromak. Tanba durante nee ami foo sasin katak, Maromak halo Kristu moris fila fali. Maibee se karik ema mate la moris fali, nee dehan katak Maromak nunka halo moris fali Kristu.
1CO 15:16 Tanba se ema mate la moris fali, entaun Kristu mos la moris fali.
1CO 15:17 Se Kristu la moris fali, entaun imi nia fiar la vale buat ida, imi sei moris iha sala nia laran,
1CO 15:18 i Kristu nia ema nebee mate tiha ona mos haketak aan ona husi Maromak.
1CO 15:19 Ita laran metin ba Kristu atu tulun ita so durante ita moris iha mundu nee deit ka? Se nunee koitadu, husi ema hotu-hotu iha mundu nee, ita mak sorti aat liu.
1CO 15:20 Maibee laos nunee! Kristu mak ema primeiru nebee Maromak halo moris fali husi mate. Husi ida nee mak ita bele hatene mo-moos katak, ema seluk nebee mate mos sei moris fila fali.
1CO 15:21 Mate tama iha mundu tanba ema ida nia hahalok, ema nee mak Adão. Nunee mos ita hotu sei moris fali husi mate tanba Ema ida seluk nia hahalok, Ema nee mak Kristu.
1CO 15:22 Nudar Adão nia jerasaun, ita hotu mate. Maibee see-see deit mak laran ida ho Kristu sei moris fila fali.
1CO 15:23 Maibee ida-idak tuir nia tempu. Kristu mak Ema primeiru nebee Maromak halo moris fali husi mate. Bainhira Nia fila fali mai husi lalehan foin Nia ema sira mos moris fila fali.
1CO 15:24 Depois mak mundu nee remata. Iha tempu nee, Kristu sei halakon nai ulun sira, autoridade sira ho espiritu bo-boot sira hotu nebee kontra Maromak. Hotu tiha Nia sei entrega fila fali Nia direitu tomak nudar Liurai ba Nia Aman Maromak.
1CO 15:25 Tanba Kristu tenki ukun nafatin too Nia hamonu Nia inimigu sira iha Nia ain okos.
1CO 15:26 Inimigu nebee Nia halakon ikus liu mak buat nebee ita bolu mate nee. Nunee mate la iha tan ona.
1CO 15:27 Iha Livru Sagradu hakerek dehan, “Maromak sei halo buat hotu-hotu hakruuk iha Nia ain okos.” Bainhira dehan Maromak halo buat hotu-hotu hakruuk ba Kristu, Maromak rasik la tama iha laran. Nee klaru! Tanba Maromak mak halo buat hotu-hotu hakruuk ba Kristu.
1CO 15:28 Hotu tiha Kristu, nudar Maromak Nia Oan sei hakruuk ba Nia Aman, Ida nebee mak halo tiha ona buat hotu-hotu hakruuk ba Nia Oan. Too ikus Maromak ukun buat hotu-hotu iha nebee-nebee deit.
1CO 15:29 Iha ema balu hakarak simu batizmu atu troka ema mate nebee mak seidauk sarani. Maibee se ema mate la moris fali, nusaa mak sira hakarak troka fali ema mate? Se nunee, la iha folin.
1CO 15:30 Se ema mate la moris fali, nusaa mak oras ba oras ami foo aan ba mate?
1CO 15:31 Maun-alin sira, hau loro-loron besik atu mate. Ida nee loos! Iha tan buat seluk mak loos: Hau kontenti tanba imi fiar ba ita nia Nai Kristu Jesus.
1CO 15:32 Se hau nia moris mak iha mundu nee deit, entaun hau luta hasoru ema siak-teen sira iha sidade Éfezu nee, hau manaan saida? Se ema mate la moris fila fali, diak liu ita halo tuir ema nebee baibain dehan, “Mai ita haan-hemu rame-rame, tanba aban ita mate ona.”
1CO 15:33 Keta husik ema bosok imi. “Se o ranxu ho ema aat, o nia hahalok diak sei sai aat.”
1CO 15:34 Imi tenki hatene tuir imi nia aan fila fali. La bele halo sala tan! Tuir loos imi tenki moe, tanba imi balu matan tomak hela kona ba Maromak nia dalan.
1CO 15:35 Karik ema ruma husu, “Oinsaa mak ema mate moris fila fali? Sira moris fali ho isin lolon modelu oinsaa?”
1CO 15:36 Beik liu! Bainhira imi kuda fini, fini nee tenki sai dodok iha rai okos mak foin bele moris sae.
1CO 15:37 Fini nebee imi kuda nee, so musan deit, karik trigu musan ka musan seluk ruma. Maibee bainhira moris sae, nia modelu oin seluk fali,
1CO 15:38 tuir modelu nebee mak Maromak foo. Fini ida-idak moris mai iha nia modelu rasik, tuir Maromak nia hakarak.
1CO 15:39 Nunee mos buat nebee iha iis, nia modelu oi-oin. Ema nia isin lolon oin ida, animal nia isin lolon oin seluk, manu fuik ho ikan mos isin lolon la hanesan.
1CO 15:40 Laos nee deit. Buat nebee iha lalehan ho buat nebee iha rai, iha nia furak hotu, maibee la hanesan.
1CO 15:41 Loro matan nia furak oin ida, fulan nian oin seluk, fitun oin seluk fali. Too fitun ida-idak mos furak la hanesan.
1CO 15:42 Nunee mos bainhira ema mate moris fila fali. Mate isin nebee ema hakoi, sei dodok, maibee ita moris fila fali ho isin lolon nebee la dodok tan ona.
1CO 15:43 Isin lolon nebee ema hakoi, ita haree ba aat loos, maibee ita moris fila fali ho isin lolon nebee furak. Isin lolon nebee ema hakoi, la iha kbiit, maibee ita moris fila fali ho isin lolon nebee forti.
1CO 15:44 Isin lolon nebee ema hakoi nee, mundu nian, maibee bainhira ita moris fali, Maromak nia Espiritu sei foo fali isin lolon lalehan nian. Se isin lolon mundu nian iha, entaun isin lolon lalehan nian mos iha.
1CO 15:45 Iha Livru Sagradu hakerek dehan, “Ema primeiru nebee Maromak foo iis mak Adão. Ikus mai iha tan Adão seluk, nee mak Kristu. Adão ida ikus nee Ema lalehan nian, i Nia mak huun ba moris rohan-laek.”
1CO 15:46 Maski nunee isin lolon mundu nian iha uluk mak foin isin lolon lalehan nian iha.
1CO 15:47 Adão ida primeiru husi rai rahun, Adão ida segundu husi lalehan.
1CO 15:48 Ema iha mundu nee, sira nia isin lolon hanesan Adão ida primeiru nebee husi rai. Ema nebee lalehan nian, sira nia isin lolon hanesan Adão ida segundu nebee mai husi lalehan.
1CO 15:49 Agora dadauk ita nia ilas hanesan ema ida nebee husi rai. Nunee mos aban-bainrua ita nia ilas sei sai hanesan Ema ida nebee mai husi lalehan.
1CO 15:50 Nunee maun-alin sira, hau hatete ba imi, isin ho raan la bele tama iha reinu lalehan. Ita nia isin nebee sei dodok, la bele tama ba iha fatin moris rohan-laek nian.
1CO 15:51 Rona di-diak! Hau hakarak loke segredu ida ba imi. Husi ita sira nee, balu deit mak sei mate. Maibee too loron ikus Maromak sei troka ita hotu nia isin lolon sai foun.
1CO 15:52 Nee sei akontese derepenti deit lais liu fali ema taka-loke matan, bainhira korneta ikus lian. Iha tempu nee, ema mate sei moris fila fali ho isin lolon nebee la dodok tan. I ita nebee mak sei moris, Maromak sei troka ita hotu nia isin lolon sai foun.
1CO 15:53 Tanba ita nia isin lolon nebee sei dodok nee, tenki troka ho isin lolon ida nebee nunka dodok. Ita nia isin lolon nebee sei mate nee, tenki troka ho isin lolon ida nebee nunka mate.
1CO 15:54 Buat nee sei akontese tuir saida mak hakerek iha Livru Sagradu dehan, “Maromak halakon tiha mate nia kbiit, i manaan tiha ona.”
1CO 15:55 “Hei, mate! O lakon tiha ona! Hei, mate! O la iha veneno tan atu oho ami!”
1CO 15:56 Veneno nebee lori ita ba mate mak ita nia sala. I buat nebee hatudu sai ita nia sala mak Maromak nia lei.
1CO 15:57 Maibee ita foo agradese ba Maromak! Tanba liu husi ita nia Nai Jesus Kristu, Nia halo ita manaan.
1CO 15:58 Nunee maun-alin doben sira, hamriik metin nafatin. La bele nakdoko. Halao nafatin Nai Jesus nia servisu ho laran tomak. Tanba imi hatene katak, imi nia servisu makaas ba ita nia Nai la saugati.
1CO 16:1 Agora hau hakarak hakerek kona ba osan nebee mak imi tau hamutuk atu ajuda Maromak nia povu iha Jerusalém. Hau foo hatene uluk ona ba sarani sira iha provinsia Galásia, oinsaa atu tau osan hamutuk. Diak liu imi mos halo tuir dalan nee.
1CO 16:2 Domingu-Domingu, imi ida-idak tenki rai osan balu tuir osan hira mak nia simu iha semana ida nia laran. Rai kedas osan nee, la bele hein too hau baa mak foin imi komesa tau osan hamutuk.
1CO 16:3 Depois, bainhira hau too iha imi, hau sei hakerek surat hodi foo konhese ema sira nebee mak imi hili, i sira bele lori osan ho surat nee ba iha Jerusalém.
1CO 16:4 Se ita senti dehan diak liu hau mos baa, entaun sira akompanha deit hau.
1CO 16:5 Hau sei baa uluk provinsia Masedónia. Hau vizita fatin balu iha nebaa mak foin hau baa haree imi.
1CO 16:6 Dala ruma hau hela ho imi kleur uitoan, karik durante tempu malirin tomak. Depois imi bele ajuda hau baa iha fatin seluk tan.
1CO 16:7 Hau la baa vizita imi agora tanba hau lakohi vizita lalais deit. Maibee se ita nia Nai foo lisensa, hau hakarak atu hela kleur uitoan ho imi.
1CO 16:8 Agora dadauk hau iha sidade Éfezu. Hau sei hela iha nee too loron Pentakosta,
1CO 16:9 tanba odamatan nakloke mai hau atu halao Maromak nia servisu iha nee ho diak, maski ema barak kontra hau.
1CO 16:10 Kuandu Timóteo baa iha imi, simu nia ho diak atu nia la bele senti tauk iha imi nia klaran, tanba nia servisu ba ita nia Nai, hanesan mos hau.
1CO 16:11 Nee duni keta husik ema ida halo moe nia. Ajuda nia atu nia fila mai ho diak, tanba hau ho maluk sarani sira seluk hein hela nia iha nee.
1CO 16:12 Iha tan buat ida. Hau husu fila-fila ona ba ita nia irmaun Apolo atu nia akompanha maluk sarani sira seluk hodi baa vizita imi. Maibee nia lakohi baa agora. Nia iha oportunidade mak nia baa.
1CO 16:13 Imi tenki matan moris neon nain, kaer metin imi nia fiar, brani ba, i forsa nafatin.
1CO 16:14 Halo buat hotu-hotu ho domin.
1CO 16:15 Maun-alin sira, imi hatene katak Estéfanas ho nia uma laran sai ema primeiru nebee fiar ba Kristu iha provinsia Akaia, i sira foo aan tomak atu serbi sarani sira seluk. Nunee hau husu ho laran
1CO 16:16 atu imi rona ema hanesan nee, rona mos ema seluk nebee foo aan hanesan sira hodi serbi sarani sira.
1CO 16:17 Bainhira Estéfanas, Fortunato ho Akaiku too iha nee, hau nia laran haksolok. Tanba ajuda nebee imi la bele foo ba hau, sira mak foo hodi imi nia naran.
1CO 16:18 Sira hametin hau nia laran, hanesan mos sira hametin imi nia laran. Imi tenki respeita ema hanesan nee.
1CO 16:19 Sarani sira iha provinsia Ázia hatoo hela kumprimentus ba imi. Akila ho Priscila foo hakuak boot ba imi hodi Nai Jesus nia naran. Sarani sira nebee baibain halibur hamutuk iha sira nia uma mos foo hakuak boot.
1CO 16:20 Maluk sarani sira hotu iha nee foo kumprimentus ba imi. Rei malu hanesan maluk sarani.
1CO 16:21 Hau, Paulo mak hakerek kumprimentus nee ho hau nia liman rasik.
1CO 16:22 See mak la hadomi Nai Jesus, nia sei hetan malisan. Nai Jesus, mai ona ba!
1CO 16:23 Ami harohan atu ita nia Nai Jesus hatudu Nia laran diak ba imi.
1CO 16:24 Hau hadomi imi hotu nebee laran ida ho Kristu Jesus. Amen.
2CO 1:1 Surat nee husi hau, Paulo hamutuk ho ita nia maluk sarani Timóteo. Maromak foti hau sai Kristu Jesus nia apostolu. Ami haruka surat nee ba imi, Maromak nia povu iha sidade Korintu ho mos sarani sira hotu iha provinsia Akaia.
2CO 1:2 Ami harohan atu ita nia Aman Maromak ho mos ita nia Nai Jesus Kristu hatudu Sira nia laran diak ba imi, i foo pas ho hakmatek ba imi.
2CO 1:3 Mai ita hahii Maromak! Nia mak ita nia Nai Jesus Kristu nia Aman. Nia nee Aman ida nebee laran luak teb-tebes, i Nia sempre hametin ita nia laran.
2CO 1:4 Iha susar saida deit, Nia sempre foo ksolok mai ita, atu ksolok nebee ita simu husi Nia, ita mos bele foo tutan ba ema seluk nebee hetan susar saida deit.
2CO 1:5 Ita hetan terus oi-oin, hanesan mos Kristu uluk hetan terus. Maibee ita hetan terus too iha nebee mos, Maromak hametin nafatin ita nia laran liu husi Kristu.
2CO 1:6 Bainhira ami hetan susar, ida nee atu hametin imi nia laran i hasai imi husi buat aat. I bainhira Maromak hametin ami nia laran, ida nee atu ami bele hametin fali imi nia laran. Nunee bainhira imi hetan terus hanesan ami, imi mos sei aguenta ho pasiensia.
2CO 1:7 Ami laran metin ba imi, tanba ami hatene katak imi terus hanesan mos ami, i Maromak sei foo ksolok ba imi hanesan mos Nia foo mai ami.
2CO 1:8 Maun-alin sira, hau hakarak atu imi hatene kona ba susar nebee ami hetan iha provinsia Ázia. Susar nee todan teb-tebes, liu fali ami nia kbiit, too ami hanoin ami atu mate ona.
2CO 1:9 Iha tempu nebaa ami senti katak ami hetan ona kastigu mate. Maibee buat sira nee akontese atu ami la bele laran metin ba ami nia aan, maibee ami laran metin ba Maromak. Tanba Nia mak halo moris fali ema mate.
2CO 1:10 Nia salva ona ami husi ameasa boot, i ami laran metin katak Nia sei salva ami nafatin.
2CO 1:11 Imi mos tenki ajuda ami liu husi imi nia orasaun. I Maromak sei hataan ema barak nia orasaun hodi foo bensaun mai ami. Too ikus ema barak mos sei foo agradese ba Nia.
2CO 1:12 Ami orgulhu, tanba ami hatene katak saida deit mak ami halo iha mundu nee, liu-liu iha imi nia leet, ami halo ho lo-loos ho laran moos, tanba Maromak tulun ami halo nunee. Ami laos uza ita ema nia matenek, maibee Maromak nia laran diak mak servisu iha ami.
2CO 1:13 Bainhira ami haruka surat ba imi, ami sempre hakerek deit buat nebee mak imi bele lee ho kompriende. Agora imi kompriende balu deit kona ba ami nia hahalok, maibee hau hein katak too loron ida imi bele kompriende hotu. Nunee, bainhira Nai Jesus fila fali mai husi lalehan hodi foo justisa ba ema hotu-hotu, imi sei konta ami nia diak hanesan mos ami konta imi nia diak.
2CO 1:15 Hau laran metin nunee mak foin dadauk hau halo planu atu baa vizita imi dala rua, atu imi bele simu bensaun mos dala rua.
2CO 1:16 Tuir planu nee, hau atu baa uluk iha imi, depois baa liu provinsia Masedónia. Fila husi nebaa, hau atu baa tan vizita imi, depois mak imi ajuda hau baa liu provinsia Judeia.
2CO 1:17 Maibee planu nee la sai realidade. Karik imi hanoin hau halo planu arbiru deit, ka hau nia ibun dehan “Sin”, maibee iha laran dehan “Lae”, hanesan fali ema aat sira iha mundu nee.
2CO 1:18 Maibee Maromak sempre halo tuir buat nebee Nia koalia. Ami mos nunee. Bainhira ami nia ibun dehan “Sin”, ami nia laran nunka dehan “Lae.”
2CO 1:19 Tanba bainhira Maromak nia Oan Jesus Kristu dehan “Sin”, Nia sempre halo tuir, laos ibun dehan “Sin”, laran dehan “Lae.” Kristu nee mak durante nee hau, Silas ho Timóteo foo sai tiha ona ba imi.
2CO 1:20 Liu husi Kristu, Maromak halo tuir buat hotu-hotu nebee Nia promete ona. Nunee Maromak dehan “Sin” ba Nia promesa hotu. Liu husi Kristu mos ita hataan “Amen, loos duni.” Nunee ita foti aas Maromak nia naran.
2CO 1:21 Maromak foti ita sai Nia ema, i Nia mak halo ami ho mos imi hamriik metin hodi tuir Kristu.
2CO 1:22 Nia mos foo tiha ona Nia Espiritu hodi hela iha ita nia laran, hanesan marka nebee hatudu katak ita nee Maromak nian. Husi nee ita hatene katak aban-bainrua Nia sei foo tan buat hotu-hotu nebee Nia promete ona.
2CO 1:23 Hau husu Maromak sai sasin katak, foin dadauk hau la fila ba Korintu tanba deit hau lakohi atu siak tan imi.
2CO 1:24 Ami laos atu obriga imi kona ba saida mak imi atu fiar, tanba imi nia fiar metin ona. Maibee ami servisu hamutuk ho imi atu imi nia laran bele haksolok.
2CO 2:1 Nee duni hau kansela hau nia planu atu baa vizita fali imi para la bele halo imi laran moras hanesan uluk.
2CO 2:2 Se hau baa duni, hau sei halo imi nia laran susar tan. Nunee la iha ema ida mak atu foo ksolok mai hau, tanba imi hotu laran susar ona.
2CO 2:3 Ho razaun ida nee mak molok hau baa, hau haruka uluk surat ida hodi foo hanoin imi atu muda imi nia hahalok, atu hau baa karik, imi la halo hau nia laran susar. Tuir lo-loos imi halo hau nia laran haksolok. I hau fiar katak, bainhira hau haksolok, imi mos haksolok hamutuk ho hau.
2CO 2:4 Iha tempu nebaa hau hakerek ho laran susar ho tristi too matan been suli. Hau hakerek laos atu halo imi laran susar, maibee atu imi hatene katak hau hadomi teb-tebes imi.
2CO 2:5 Imi nia maluk sarani ida nia hahalok halo hau nia laran susar, saa tan imi hotu, maski imi balu senti laduun todan. Maibee hau lakohi koalia makaas liu kona ba ida nee.
2CO 2:6 Imi maioria foti ona desizaun hodi kastigu nia, i kastigu nee natoon ona ba nia.
2CO 2:7 Agora imi tenki foo perdaun ba nia i hametin fali nia laran, atu nia la bele tristi demais too lakon esperansa.
2CO 2:8 Nunee hau husu ho laran atu imi hatudu fila fali imi nia domin ba ema nee.
2CO 2:9 Hau hakerek hau nia surat ida uluk nee atu koko imi, imi sei halo tuir buat hotu-hotu nebee hau haruka ka lae.
2CO 2:10 Se imi foo perdaun ba ema nee, hau mos foo perdaun ba nia. Se karik nia halo sala hasoru hau, hau foo perdaun iha Kristu nia oin para ajuda imi.
2CO 2:11 Hau foo perdaun atu la bele foo fatin ba Satanás atu hamonu fali ita. Tanba ita hatene hela nia planu aat.
2CO 2:12 Uluk bainhira hau baa iha sidade Tróade atu foo sai Liafuan Diak kona ba Kristu, Nai Maromak loke dalan ba hau.
2CO 2:13 Maibee hau nia laran la hakmatek tanba hau la hasoru hau nia maluk sarani Tito iha nebaa. Entaun hau sai husi Tróade hodi mai iha provinsia Masedónia.
2CO 2:14 Maibee agradese ba Maromak! Ami nebee uluk Maromak nia inimigu, Nia kaer tiha ona. Nia halo ami sai laran ida ho Kristu hodi lori ami tu-tuir Nia, atu ema hotu-hotu haree katak Kristu mak manaan. Agora Nia uza fali ami hodi foo konhese Kristu iha nebee-nebee deit, hanesan buat morin nebee ema hotu horon.
2CO 2:15 Ami hanesan Kristu nia mina morin nebee halo haksolok Maromak nia laran. Ema nebee lao dadauk tuir dalan mate nian ho ema nebee lao tuir dalan salvasaun, sira horon hotu.
2CO 2:16 Ba ema nebee lao dadauk tuir dalan mate nian, sira senti ami nee hanesan buat dodok dois ida nebee lori sira ba mate. Maibee ba ema nebee lao tuir dalan salvasaun, ami nee hanesan buat morin ida nebee lori sira ba moris rohan-laek. See mak serve atu halo servisu nee? La iha!
2CO 2:17 Iha mestri barak mak hanorin Maromak nia liafuan ho objetivu atu manaan osan deit. Maibee ami la hanesan sira. Ami nee hanorin ho laran hodi Kristu nia naran, tanba Maromak mak haruka ami, i Nia haree hela ami.
2CO 3:1 Karik imi hanoin dehan ami koalia hanesan nee, ami komesa gaba aan fali. Imi hanoin ami hanesan mestri seluk nebee tenki lori surat rekomendasaun foo ba imi ka? Ami presiza hetan surat rekomendasaun husi imi atu foo konhese ami iha fatin seluk ka? Lae!
2CO 3:2 Tanba imi sira nee mak ami nia surat rekomendasaun nebee rai iha ami nia laran. Ema hotu nebee lee imi nia moris sei hatene katak, ami halao duni ami nia servisu ho diak.
2CO 3:3 Loos duni, imi nee hanesan surat rekomendasaun nebee Kristu rasik hakerek foo mai ami atu lori. Nia laos hakerek ho tinta, i laos hakerek iha fatuk belar. Maibee Nia hakerek ho Maromak Moris nia Espiritu iha ita nia laran.
2CO 3:4 Ami brani koalia nunee tanba Kristu halo ami laran metin ba Maromak.
2CO 3:5 Maibee laos dehan ami bele halo buat ida ho ami nia kbiit rasik. Ami nia kbiit mai husi Maromak.
2CO 3:6 Nia mak foo kbiit mai ami atu foo sai ba ema kona ba Nia promesa foun. Promesa foun nee laos foo liu husi Moisés nia lei nebee hakerek tiha ona. Lei nebee hakerek nee lori ita ba mate, tanba ita la bele halo tuir hotu. Maibee Maromak foo Nia promesa foun nee liu husi Nia Espiritu, i Nia Espiritu nee lori ita ba moris rohan-laek.
2CO 3:7 Uluk bainhira Maromak hakerek Nia ukun fuan iha fatuk belar foo ba Moisés, naroman lalehan nian sai husi Moisés nia oin, too ema Israel la aguenta atu hateke ba nia oin. Naroman nee makaas teb-tebes, maibee la kleur lakon tiha. Se Maromak nia lei nebee lori mate nee mai ho makaas hanesan nee,
2CO 3:8 entaun Maromak nia promesa foun nebee Nia foo liu husi Nia Espiritu nee makaas liu tan.
2CO 3:9 Se lei nebee lori kastigu mai ho naroman makaas, saa tan promesa foun nebee halo ita ema diak malu fali ho Maromak.
2CO 3:10 Lei ida uluk nee makaas duni, maibee Maromak nia promesa foun makaas liu tan. Kompara ho ida nee, lei uluk nee hanesan fali buat kiik ida.
2CO 3:11 Se lei ida uluk nian nebee troka tiha ona nee mai ho naroman lalehan nian, saa tan promesa foun nebee dura tinan ba tinan!
2CO 3:12 Ami laran metin nunee mak ami brani koalia.
2CO 3:13 Ami la halo hanesan Moisés. Bainhira naroman lalehan nian sai husi nia oin, nia sempre taka ho hena atu ema Israel la bele hateke ba nia oin, maski naroman nee la kleur lakon tiha.
2CO 3:14 Maibee ema Israel sira nee sai beik tiha. Too agora mos, bainhira ema lee Maromak nia lei ho promesa antigu nian, sira rona hela, maibee hanesan fali hena ida taka sira nia oin. Ita fiar ba Kristu mak foin Maromak hasai hena nee.
2CO 3:15 Nee mak too ohin loron, bainhira sira rona ema lee livru Moisés nian hanesan fali hena taka sira nia hanoin.
2CO 3:16 Maibee see-see deit mak fila ba ita nia Nai, ita nia Nai sei loke fali nia hanoin.
2CO 3:17 Ita nia Nai nebee hau temi nee mak Nai Maromak nia Espiritu. Se Nia Espiritu hela iha ema ida nia laran, ema nee livre ona.
2CO 3:18 Agora ita hotu nia oin la taka ona. Nunee ita haree hetan ita nia Nai nia kbiit boot. I Maromak nia Espiritu muda beibeik ita nia aan too ita sai hanesan ita nia Nai. Nunee Nia halo ita nia Nai nia naroman sai nabilan ba beibeik iha ita nia aan.
2CO 4:1 Maromak hatudu ona Nia laran luak mai ami hodi haruka ami halao Nia servisu nee. Tanba nee, ami la hakiduk.
2CO 4:2 Ami lakohi hamoe ami nia aan ho hahalok nakukun nian. Ami la bosok, i la inventa Maromak nia liafuan, maibee ami koalia mo-moos kona ba buat nebee loos. Ho nunee ami hatudu ba ema hotu-hotu katak ami halao ami nia servisu ho lo-loos. Maromak mos hatene ida nee.
2CO 4:3 Maski nunee, ba ema nebee lao dadauk tuir dalan mate nian, Liafuan Diak nebee ami foo sai nee sei taka hela ba sira.
2CO 4:4 Satanás hanesan fali sira nia maromak. Ema nebee la fiar ba Kristu, Satanás taka tiha sira nia hanoin, halo sira la bele kompriende Liafuan Diak, maski Liafuan Diak nee naroman ida hodi foo sai Kristu nia kbiit boot. Kristu nee hanesan lo-loos Maromak.
2CO 4:5 Ami haklaken katak Jesus Kristu mak Nai. Ami laos haklaken kona ba ami nia aan rasik, ami so dehan deit katak ami nee imi nia atan tanba ami serbi Jesus.
2CO 4:6 Uluk, bainhira Maromak halo lalehan ho rai, Nia dehan, “Tenki iha naroman hodi leno iha nakukun laran.” Agora mos Maromak foo Nia naroman hodi leno ita nia laran. Nunee ita bele hatene katak Maromak nee makaas teb-tebes, tanba ita haree naroman lalehan nian iha Kristu nia oin.
2CO 4:7 Liafuan Diak nee buat murak mean ida, i ami nee hanesan sanan rai deit. Maibee Maromak rai fali buat murak mean nee iha ami, atu hatudu ba ema hotu katak kbiit boot nee mai husi Maromak, laos mai husi ami.
2CO 4:8 Hau kompara nunee tanba ema habit ami husi sor-sorin, maibee ami sei bele dada iis. Ami hanoin la hetan, maibee la lakon esperansa.
2CO 4:9 Ema halo terus ami, maibee Maromak la husik ami mesak. Ema baku ami, maibee la konsege halo lakon ami.
2CO 4:10 Liu husi terus nee, ami sempre senti Jesus nia mate iha ami nia isin lolon, atu nunee Jesus nia moris mos ema haree iha ami nia isin.
2CO 4:11 Iha ami nia moris nee, ami dala barak atu mate sal-sala tanba tuir Jesus. Nunee ema mos haree katak, Jesus moris iha ami nia isin lolon nebee loron ida sei mate nee.
2CO 4:12 Entaun ami sempre foo aan ba mate, atu nunee imi hetan moris rohan-laek.
2CO 4:13 Iha Livru Sagradu hakerek dehan, “Hau fiar, nee mak hau koalia.” Ami mos nunee. Ami fiar ba Maromak, nee mak ami koalia.
2CO 4:14 Tanba ami hatene katak Maromak halo moris fali ona Nai Jesus husi mate, i Nia mos sei halo ami moris fila fali hamutuk ho Jesus. Aban-bainrua Maromak sei lori ami ho imi hamutuk baa hamriik iha Nia oin.
2CO 4:15 Buat hotu nebee akontese ba ami nee lori diak ba imi, atu nunee ema nebee senti Maromak nia laran diak bele aumenta ba beibeik. Liu husi nee ema barak liu tan sei foo agradese ba Maromak hodi hahii adora Nia.
2CO 4:16 Tanba nee, ami la lakon esperansa. Maski ami nia isin fraku ba beibeik, maibee loron ba loron Maromak hafoun ami nia laran.
2CO 4:17 Terus nebee ami hetan agora dadauk nee hanesan buat kamaan ida nebee la kleur sei hotu. Liu husi terus nee, aban-bainrua ami sei moris iha naroman lalehan nian too tinan ba tinan. Kompara ho ida nee, ami nia terus agora nee buat kiik ida.
2CO 4:18 Nunee ami la hateke ba buat nebee mak ami haree ho matan, tanba buat sira nee la dura. Ami so hateke ba buat nebee ami nia matan la haree, tanba buat sira nee mak dura tinan ba tinan.
2CO 5:1 Ita nia isin lolon agora nee hanesan tenda ida nebee loron ida sei dodok. Maibee ita hatene katak, Maromak prepara tiha ona isin lolon lalehan nian ba ita, hanesan uma ida nebee dura tinan ba tinan. Uma nee laos ema mak harii.
2CO 5:2 Agora nee ita halerik, ita hakarak teb-tebes atu hetan isin lolon lalehan nian.
2CO 5:3 Aban-bainrua ita laos klamar deit, maibee sei hetan fali isin lolon foun.
2CO 5:4 Durante ita sei moris ho isin lolon mundu nian, ita senti todan hodi halerik hela deit. Maski nunee ita lakohi atu sai klamar deit, la iha isin lolon. Ita hakarak hetan fali isin lolon lalehan nian, atu nunee ita nia isin nebee sei mate nee, troka ho isin nebee moris tinan ba tinan.
2CO 5:5 Maromak rasik mak prepara ita atu hetan isin lolon foun nee. Nia mos foo uluk ona Nia Espiritu mai ita atu ita laran metin katak, aban-bainrua Nia sei foo tan buat hotu-hotu nebee Nia promete ona atu foo.
2CO 5:6 Tanba nee, ita brani nafatin. Ita hatene katak, durante ita sei iha ita nia isin lolon mundu nian, ita seidauk hela hamutuk ho ita nia Nai iha lalehan.
2CO 5:7 Ita moris laos liu husi buat nebee mak ita bele haree ho matan, maibee liu husi ita nia fiar ba Maromak.
2CO 5:8 Nunee ita brani nafatin. Tuir loos ita hakarak atu husik tiha ita nia isin lolon mundu nian hodi hela hamutuk ho ita nia Nai iha lalehan.
2CO 5:9 Entaun, atu ita sei moris iha mundu nee ka ita husik ona mundu, ita nia hakarak mak nee: Atu halo haksolok ita nia Nai nia laran.
2CO 5:10 Tanba aban-bainrua ita hotu sei hamriik iha Kristu nia oin para Nia tesi ita nia lia. I ita ida-idak nia hahalok iha mundu nee atu diak ka aat, ita sei simu tuir ida nee.
2CO 5:11 Ami hamtauk ba ita nia Nai. Tanba nee, ami hakaas aan dada ema seluk atu fiar ba Maromak. Nia hatene lo-loos ami nia laran, hau hein katak imi mos hatene.
2CO 5:12 Ami laos atu gaba aan iha imi nia oin. Maibee ami hakarak atu imi hatene ami, para imi bele konta ami nia diak. Nunee imi bele hataan ba ema sira nebee gosta gaba deit buat nebee sira bele haree husi liur, maibee la haree ba ema nia laran.
2CO 5:13 Karik imi konsidera ami nee ema bulak, husik ba. Afinal buat nebee imi konsidera bulak nee, ami halo atu serbi Maromak. Dala ruma imi konsidera ami iha hanoin nebee loos, ami halo hanesan nee atu serbi imi.
2CO 5:14 Bele halo nusaa mos Kristu nia domin ukun nafatin ami nia moris. Tanba ami fiar katak Kristu mate tiha ona iha ema hotu nia fatin. Nunee bele dehan ita ema mos mate hotu ona.
2CO 5:15 Kristu mate ba ita hotu-hotu, atu ita hotu nebee moris iha mundu nee la bele tuir ona ita nia hakarak rasik. Maibee ita tenki moris tuir Kristu nia hakarak, tanba Kristu mate i moris fila fali ba ita.
2CO 5:16 Entaun komesa agora ami la tetu tan ema nia moris tuir buat nebee ita ema bele haree husi liur. Uluk ami tetu duni Kristu nunee, maibee agora lae ona.
2CO 5:17 Ema nebee laran ida ho Kristu sai tiha ona ema foun. Nia moris ida uluk nee la iha ona, troka tiha ona ho moris foun.
2CO 5:18 Maromak mak halo ida nee. Nia halo ona ita dame malu ho Nia liu husi Kristu. Depois Nia foo knaar mai ami atu lori ema seluk mos dame malu ho Nia.
2CO 5:19 Ami foo sai katak liu husi Kristu, Maromak halo ema iha mundu nee dame malu fali ho Nia, Nia la sura ona ita nia sala. Nia mos foo fiar mai ami atu haklaken kona ba dame nee.
2CO 5:20 Ami nee Kristu nia embaixador. Nunee bainhira ami foo sai Maromak nia hakarak, nee hanesan Maromak rasik mak koalia liu husi ami. Hodi Kristu nia naran, ami husu ho laran atu imi simu Maromak nia dame.
2CO 5:21 Kristu rasik nunka halo sala. Maibee Maromak halo Nia lori ita nia sala, atu ita nebee laran ida ho Kristu bele diak malu ho Maromak.
2CO 6:1 Ami servisu hamutuk ho Maromak, nunee ami husu atu imi la bele fila kotuk ba Maromak nia laran diak nebee Nia hatudu ona ba imi.
2CO 6:2 Tanba iha Livru Sagradu Maromak dehan, “Iha tempu nebee Hau hili, Hau rona ona o. Iha loron nebee Hau salva ema, Hau tulun ona o.” Hanoin di-diak! Tempu nebee Maromak hili mak agora nee. Loron atu Nia salva ema mak agora.
2CO 6:3 Ami hakaas aan atu ami nia hahalok la bele halo ema seluk monu, atu nunee ema la bele hatete aat ami nia servisu.
2CO 6:4 Nunee, iha buat saida deit, ami sempre hatudu katak ami nee Maromak nia atan nebee diak. Ami hetan terus ho susar, i hasoru problema oi-oin, maibee ami aguenta ho pasiensia nafatin.
2CO 6:5 Ema baku tasak ami, dadur ami iha komarka, i ema rame-rame ataka ami. Ami servisu too kosar metan suli, ami kalan la toba, i dala barak hamlaha.
2CO 6:6 Ami moris ho laran moos, iha matenek husi Maromak, iha pasiensia, halo diak ba ema, sadere ba Espiritu Santu, i hadomi ema ho laran.
2CO 6:7 Ami sempre koalia buat nebee loos, i Maromak nia kbiit servisu iha ami. Ami moris loos, tanba nee, ami bele hasoru see-see deit mak kontra ami, nunee ami hanesan soldadu nebee kaer ekipamentu funu nian iha nia liman loos ho karuk.
2CO 6:8 Atu ema foti aas ami ka hatuun ami, atu ema gaba ami ka hatete aat ami, ami la hakiduk. Ami sempre koalia lia loos, maibee ema bolu ami bosok-teen.
2CO 6:9 Ami naran boot, maibee ema dehan la konhese ami. Ami atu mate sal-sala, maibee sei iha iis. Ami simu kastigu todan, maibee la mate.
2CO 6:10 Ami laran tristi, maibee haksolok nafatin. Ami kiak, maibee halo ema barak sai riku. Ami buat ida la iha, maibee ami iha buat hotu-hotu.
2CO 6:11 Maluk Korintu sira, ami koalia mo-moos ona ba imi, i ami hadomi imi ho laran tomak.
2CO 6:12 Ami hatudu ona ami nia domin ba imi, maibee imi la hatudu domin mai ami.
2CO 6:13 Nunee agora hau husu ba imi hanesan hau husu ba hau nia oan rasik, atu imi mos bele hatudu domin mai ami ho laran tomak.
2CO 6:14 La bele laran ida ho ema nebee la fiar ba Kristu. Hanoin took. Ema nebee moris loos bele par ho ema nebee halo buat aat ka? Naroman ho nakukun bele hamutuk ka? Lae!
2CO 6:15 Kristu ho Satanás hanoin hanesan ka? Ema nebee fiar ba Kristu, sira nia moris hanesan ho ema nebee la fiar ka? Lae!
2CO 6:16 Buat lulik merese atu tau fali iha Maromak nia uma kreda boot ka? Lae! Ita nee mak Maromak Moris nia uma kreda. Iha Livru Sagradu Maromak dehan, “Hau sei hela iha sira nia klaran, i moris hamutuk ho sira. Hau sei sai sira nia Maromak, i sira sei sai Hau nia povu.”
2CO 6:17 Nai Maromak dehan tan, “Nee duni imi tenki sai husi ema aat sira nia klaran, i haketak aan husi sira. Hadook aan husi buat nebee Hau hakribi, nunee mak Hau sei simu imi.”
2CO 6:18 “Hau sei sai imi nia Aman, i imi sei sai Hau nia oan feto ho oan mane. Liafuan nee mai husi Nai Maromak Kbiit Nain.”
2CO 7:1 Maluk doben sira, Maromak promete tiha ona buat sira nee ba ita. Tanba nee, mai ita hamoos ita nia isin ho klamar husi saida deit mak halo foer ita. Ita tenki hamoos tu-tuir nafatin halo ita nia laran moos liu, tanba ita hamtauk Maromak.
2CO 7:2 Hau husu atu imi simu ami ho laran. Tanba ami nunka halo sala hasoru ema ida, ami nunka lori ema ida ba buat aat, ami nunka han-matak ema ida nia sasaan.
2CO 7:3 Hau hatete nunee laos atu foo sala ba imi. Ohin hau dehan tiha ona katak ami hadomi imi. Atu ami mate ka moris, imi nafatin iha ami nia laran.
2CO 7:4 Hau fiar imi, i imi halo hau orgulhu teb-tebes. Imi hametin hau nia laran. Maski ami hetan susar oi-oin, maibee hau nia laran haksolok liu tanba imi.
2CO 7:5 Uluk bainhira ami too mai iha provinsia Masedónia, ami kole atu mate. Ami hasoru susar husi nebee-nebee, susar nee husi ami nia laran ho mos husi liur. Husi laran ami preokupa, husi liur ema kontra ami.
2CO 7:6 Maibee Maromak sempre foo ksolok ba ema nebee laran susar. Nia mos foo ksolok mai ami bainhira Nia haruka Tito mai iha ami.
2CO 7:7 Ami nia laran haksolok nee laos deit tanba Tito mai ona, maibee tanba nia konta katak imi hametin nia laran bainhira nia iha nebaa. Nia mos dehan, imi hakarak teb-tebes atu hasoru malu fali ho hau, imi tristi loos ho problema nebee mak akontese iha imi nia leet, i imi foo laran mai hau. Rona nunee, hau nia laran haksolok liu tan.
2CO 7:8 Iha hau nia surat ida uluk hau koriji makaas imi nebee halo sala, too halo imi nia laran tristi. Iha momentu nebaa hau mos preokupa, tanba hau hatene katak hau nia liafuan nee xoke imi nia fuan, maibee la kleur ida. Nunee agora hau la preokupa tan.
2CO 7:9 Hau kontenti. Laos imi nia laran tristi mak halo hau kontenti. Maibee imi nia laran tristi nee halo imi hakribi ona imi nia sala, nee mak hau kontenti. Imi nia hahalok nee hatudu katak imi nia tristi nee tuir Maromak nia hakarak. Entaun ami nia surat ida uluk nee la halo imi tristi saugati deit.
2CO 7:10 Tristi tuir Maromak nia hakarak halo ita hakribi ita nia sala, nunee ita hetan salvasaun, i la preokupa tan ona ita nia sala nee. Maibee tristi tuir mundu nian la halo ita hakribi ita nia sala, nunee lori ita ba mate.
2CO 7:11 Haree ba! Imi nia laran tristi tuir Maromak nia hakarak nee lori imi ba buat nebee diak. Agora imi foo aan atu moris loos, imi hakaas aan halo morin imi nia naran, imi hakribi hahalok aat, i tauk atu halo sala. Imi hakarak teb-tebes atu haree hau, i imi mos hakarak teb-tebes atu ema nebee halo sala tenki hetan kastigu. Iha buat sira nee hotu imi hatudu katak imi halo buat nebee loos.
2CO 7:12 Entaun hau hakerek surat ida uluk nee laos atu dehan see mak halo sala hasoru see. Maibee hau hakerek atu imi rasik bele haree katak imi foo laran ba ami. Maromak mos haree nunee.
2CO 7:13 Buat sira nee hotu hametin ami nia laran. Laos nee deit, maibee ami mos haksolok teb-tebes bainhira ami haree Tito fila mai ho kontenti tanba imi haree nia diak hodi halo kamaan nia laran.
2CO 7:14 Molok Tito baa vizita imi, hau konta tiha ona ba nia kona ba imi nia diak. Nia too iha nebaa, nia rasik haree katak buat nebee hau konta ba nia nee loos duni, hanesan mos hau nia liafuan ba imi durante nee sempre loos. Nunee imi la halo moe hau.
2CO 7:15 Agora Tito nia domin ba imi boot liu, tanba nia hanoin nafatin oinsaa imi rona nia i simu nia ho respeitu ho tauk.
2CO 7:16 Hau nia laran haksolok tanba hau bele konfia imi iha buat hotu.
2CO 8:1 Maun-alin sira, ami hakarak atu imi hatene tuir Maromak nia laran diak ba sarani sira iha provinsia Masedónia.
2CO 8:2 Iha susar todan loos mak koko sira, i sira kiak rabat rai. Maski nunee Maromak nia laran diak halo sira haksolok teb-tebes hodi foo ajuda ho laran luak ba maluk sarani sira seluk.
2CO 8:3 Hau rasik bele foo sasin dehan, sira foo tuir sira nia kbiit, too foo liu tan. Ida nee tuir sira nia desizaun rasik.
2CO 8:4 Sira husu fila-fila atu sira mos bele foo kontribuisaun ba sarani sira iha Jerusalém nebee mak hetan susar.
2CO 8:5 Sira mos foo liu fali buat nebee ami hanoin. Tanba primeiru sira hakruuk ba Nai Jesus, depois sira mos hakruuk ba ami, tuir Maromak nia hakarak.
2CO 8:6 Entaun ami husu atu Tito baa ajuda fali imi atu imi prepara hotu osan nebee mak imi atu foo. Tanba uluk nia mak foo dalan ba imi atu halao karidade ida nee.
2CO 8:7 Durante nee imi halo buat hotu-hotu ho diak teb-tebes. Imi fiar metin, imi matenek koalia, imi hatene klean, imi badinas tuir Maromak, i imi hadomi teb-tebes ami. Nunee agora hau husu ba imi atu foo mos kontribuisaun nee ho laran luak teb-tebes.
2CO 8:8 Hau laos manda imi atu halo buat nee. Maibee hau hakarak kompara imi ho sarani sira seluk nebee badinas ajuda, atu nunee hau bele hatene imi nia domin ba ema seluk too iha nebee.
2CO 8:9 Tanba imi hatene ita nia Nai Jesus Kristu nia laran diak nebee Nia hatudu ba imi. Nia riku nanis, maibee Nia halo Nia Aan sai ema kiak atu imi bele hetan diak. Nia sai kiak atu imi bele sai riku.
2CO 8:10 Tinan liu ba, imi mak sarani primeiru nebee komesa tau osan hamutuk atu foo ba sarani sira iha Jerusalém. Laos nee deit, maibee imi mos sarani primeiru nebee hakarak atu foo. Entaun hau foo hanoin ba imi nunee: Diak liu
2CO 8:11 imi prepara hotu osan nebee mak imi atu foo. Uluk imi hakarak ho laran atu foo, agora halo tuir imi nia hakarak nee. Foo tuir imi nia kbiit.
2CO 8:12 Tanba se imi foo ho laran tuir buat nebee mak imi iha, Maromak simu. Buat nebee mak imi la iha, Nia la husu.
2CO 8:13 Hau nia hanoin laos atu halo todan imi hodi halo ema seluk kamaan fali. Maibee hau hakarak atu ema hotu-hotu bele moris hanesan.
2CO 8:14 Agora dadauk imi iha barak, i imi bele ajuda maluk sarani sira nebee la iha. Se aban-bainrua imi presiza buat ruma, sira mos bele foo ba imi. Ho nunee hotu-hotu bele moris hanesan.
2CO 8:15 Nee tuir buat nebee hakerek ona iha Livru Sagradu dehan, “Ema nebee hetan barak, sei la resin. Ema nebee hetan uitoan, natoon ba sira.”
2CO 8:16 Hau foo agradese ba Maromak, tanba Nia mak halo Tito hakarak ajuda imi hanesan mos hau hakarak ajuda.
2CO 8:17 Ami husu ona Tito atu baa vizita imi, i nia simu ho laran. Afinal nia mos hakarak hela atu baa.
2CO 8:18 Ami mos haruka maluk sarani ida tan atu akompanha Tito. Sarani sira hotu gaba ema nee tanba nia badinas foo sai Liafuan Diak.
2CO 8:19 I sira mak hili nia atu akompanha ami bainhira ami lori osan oferta ba iha Jerusalém. Ami halao servisu nee atu foti aas ita nia Nai nia naran i hatudu katak ami mos hakarak ajuda sira.
2CO 8:20 Ami kuidadu teb-tebes ho osan barak nebee imi atu foo nee, para ema la bele duun ami dehan ami kaer osan la loos.
2CO 8:21 Ami hakaas aan atu halo buat nebee loos iha Nai Maromak nia oin ho mos iha ema nia oin.
2CO 8:22 Ami mos haruka maluk sarani ida tan hamutuk ho Tito ho nia kolega nee. Dala barak ona ami haree nia nee badinas halao Maromak nia servisu. Agora nia hakarak liu tan atu ajuda imi, tanba nia fiar loos ba imi.
2CO 8:23 Se iha ema ruma husu kona ba Tito, foo hatene katak Tito nee hau nia kolega nebee servisu hamutuk ho hau atu ajuda imi. Kona ba maluk nain rua nee, sarani sira iha nee mak haruka, i sira nain rua nia hahalok foti aas Kristu nia naran.
2CO 8:24 Nee duni imi tenki hatudu domin ba ema sira nee, atu sarani sira iha nebee-nebee mos bele haree imi nia domin. Nunee sira hatene katak imi merese atu ami gaba.
2CO 9:1 Tuir lo-loos hau la presiza hakerek ba imi kona ba foo ajuda ba sarani sira iha Jerusalém.
2CO 9:2 Tanba hau hatene imi hakarak teb-tebes atu ajuda. Hau mos konta beibeik imi nia diak ba ema Masedónia sira. Hau konta ba sira katak, tinan liu ba imi iha provinsia Akaia prontu ona atu foo ajuda. Rona nunee, sira barak mos hakarak foo sira nia kontribuisaun.
2CO 9:3 Hau hein katak imi nia osan oferta prontu duni, tuir hau konta ona ba sira. Tanba nee mak hau haruka maluk sarani nain tolu nee baa iha imi atu haree kona ba ida nee. Hau lakohi atu buat nebee hau konta ba sira nee saugati deit.
2CO 9:4 Keta halo be ema Masedónia lao hamutuk ho hau baa vizita imi, i sira haree imi nia osan seidauk tau hamutuk. Se nunee, ami moe tanba ami fiar ba imi saugati deit. I imi sei moe liu tan!
2CO 9:5 Tanba nee, hau desidi katak, diak liu hau haruka ita nia maluk sarani nain tolu nee baa uluk iha imi, atu ajuda imi prepara osan oferta nee tuir buat nebee imi uluk promete tiha ona. Nunee oferta nebee imi foo nee, imi bele foo ho laran, laos tanba obriga.
2CO 9:6 Keta haluha, ema nebee kuda fini uitoan, nia hetan rezultadu mos uitoan. Ema nebee kuda fini barak, nia hetan rezultadu mos barak.
2CO 9:7 Ema ida-idak tenki desidi rasik, nia atu foo hira. La bele foo ho laran todan ka ema mak obriga, tanba Maromak gosta ema nebee foo ho haksolok.
2CO 9:8 Maromak iha kbiit hodi foo bensaun bar-barak ba imi. Nunee imi sempre hetan buat hotu-hotu nebee mak imi presiza, i liu fali imi nia presiza, para imi mos bele halo buat diak oi-oin deit ba ema seluk.
2CO 9:9 Nee hanesan hakerek ona iha Livru Sagradu dehan, “Nia fahe buat bar-barak ba ema kiak sira, nia hahalok diak nee iha nafatin too tinan ba tinan.”
2CO 9:10 Maromak mak foo fini ba ema toos nain kuda, i Nia mak foo ai haan atu ita bele haan. Nunee mos Nia sei foo bensaun ba imi, i aumenta bensaun nee loron ba loron, atu nunee imi nia hahalok diak mos aumenta ba beibeik.
2CO 9:11 Maromak sei halo imi riku iha buat oi-oin, atu bainhira deit imi mos bele fahe ho laran luak. I osan oferta nebee imi foo liu husi ami, sei halo ema barak foo agradese ba Maromak.
2CO 9:12 Imi nia ajuda nee laos deit hataan Maromak nia povu nia presiza, maibee ema barak sei foo obrigadu ba Maromak tanba imi nia hahalok nee.
2CO 9:13 Imi foo sai tiha ona katak imi fiar Liafuan Diak kona ba Kristu. Liu husi ajuda nebee imi foo nee, imi hatudu katak imi moris tuir duni Liafuan Diak nee. Ema barak sei haree imi nia laran luak nee, i sira sei hahii Maromak tanba ajuda nebee imi foo ba sira ho mos ba ema seluk tan.
2CO 9:14 Bainhira sira halo orasaun ba Maromak kona ba imi, sira hanoin teb-tebes imi, tanba Maromak nia laran luak nebee nakonu iha imi.
2CO 9:15 Agradese ba Maromak tanba Nia foo tiha ona prezenti furak teb-tebes mai ita, ita ema nia liafuan la too atu esplika.
2CO 10:1 Ema balu dehan, iha imi nia oin hau la brani koriji imi, husi dook mak foin hau brani. Agora ho Kristu nia laran maus ho haraik aan, hau, Paulo husu
2CO 10:2 atu bainhira hau too iha nebaa, imi la bele provoka tan hau. Tanba hau iha hanoin atu hatudu hau nia brani hodi kontra makaas ema sira nebee duun dehan ami moris tuir fali dalan mundu nian.
2CO 10:3 Loos duni, ami moris iha mundu nee, maibee ami luta laos tuir dalan mundu nian.
2CO 10:4 Tanba ami nia ekipamentu funu nian laos hanesan ema mundu nian. Maibee ami uza Maromak nia kbiit hodi sobu rahun tiha moru nebee haleu inimigu nia fatin.
2CO 10:5 Ema nebee foti aan hasoru Maromak, ami sobu rahun tiha sira nia hanorin falsu nebee halo ema la konhese Maromak. Ami halakon tiha hanoin hotu-hotu nebee la loos, para hanoin hotu-hotu tuir deit Kristu nia hakarak.
2CO 10:6 I bainhira imi halo tuir lo-loos ona Kristu nia hakarak, ami mos prontu atu foo kastigu ba see-see deit mak seidauk halo tuir.
2CO 10:7 Imi sira nee gosta haree husi liur deit. Se iha ema ruma fiar aan dehan Kristu mak haruka, entaun nia tenki hatene katak, ami mos Kristu mak haruka, laos nia deit.
2CO 10:8 Karik hau gaba aan kona ba kbiit nebee mak ita nia Nai foo mai ami, hau la moe atu gaba aan nunee. Tanba kbiit nee ami simu atu bele hametin imi nia fiar, laos atu halo rahun fali imi.
2CO 10:9 Keta halo be imi hanoin hau hakerek surat sira nee atu halo tauk imi.
2CO 10:10 Iha ema balu dehan, “Paulo nia liafuan iha surat laran makaas loos, maibee bainhira nia hamutuk ho ita, nia ema nebee fraku i nia koalia hanesan ema beik ida.”
2CO 10:11 Ema nebee koalia hanesan nee tenki hatene aan katak, ami nia hahalok iha imi nia oin sei hanesan ho buat nebee ami hakerek tiha ona iha surat laran.
2CO 10:12 Iha ema balu hatudu aan dehan sira mak diak. Sira sukat sira nia aan tuir sira nia hanoin rasik, i kompara sira nia aan ho ema nebee hanesan ho sira. Sira beik liu! Ami la brani gaba ami nia aan hodi kompara ami nia aan hanesan fali sira.
2CO 10:13 Ami nee so gaba deit kona ba ami nia servisu iha area nebee mak Maromak foo tiha ona mai ami. Ami lakohi gaba aan liu fali ida nee. Imi iha Korintu mos tama hotu iha ami nia area servisu nee.
2CO 10:14 Ami nee mak ema primeiru nebee foo sai ba imi Liafuan Diak kona ba Kristu. Se karik Maromak nunka haruka ami baa iha imi, maibee ami gaba aan kona ba ida nee, entaun nee la loos.
2CO 10:15 Ami mos la gaba aan kona ba servisu nebee ema seluk mak halo. Ami hakarak atu imi nia fiar buras ba beibeik. Ho nunee ami nia area servisu bele luan liu tan,
2CO 10:16 too ami mos bele hakat liu ba rai seluk hodi haklaken Liafuan Diak iha fatin nebee ema seidauk rona. Tanba ami lakohi gaba aan kona ba servisu nebee Maromak foo tiha ona ba ema seluk atu halo.
2CO 10:17 Iha Livru Sagradu dehan, “Diak liu gaba buat nebee mak ita nia Nai halo duke gaba ita nia aan rasik.”
2CO 10:18 Ita gaba ita nia aan, la iha folin. Folin liu mak Maromak gaba ita.
2CO 11:1 Agora hau gaba aan uitoan. Maski gaba aan nee buat beik ida, maibee hau husu atu imi pasiensia tan ho hau.
2CO 11:2 Tanba imi nee hanesan feto raan ida nebee hau promete tiha ona atu foo kaben ho mane ida, mane nee mak Kristu. Hau hakarak aprezenta imi ba Nia hanesan feto raan ida nebee moos. Se karik imi husik fali Kristu, hau nia laran moras liu, hanesan mos Maromak laran moras.
2CO 11:3 Agora dadauk imi tuir hela Kristu ho laran tomak. Maibee hau tauk, keta halo be ema ruma baa lohi imi para lao sees fali husi Kristu, hanesan iha tempu uluk samea lohi door mai lohi Eva.
2CO 11:4 Bainhira ema ruma baa hanorin imi la loos kona ba Jesus, imi simu deit! Afinal Jesus ida nebee sira hanorin nee la hanesan ho Ida nebee ami hanorin tiha ona ba imi. Se iha espiritu ida nebee oin seluk, imi simu tan. Se sira bobar fali Liafuan Diak nebee uluk imi simu husi ami mos, imi tuir hotu.
2CO 11:5 Mestri sira nee hanoin dehan sira nee apostolu boot, maibee hau hanoin sira la liu hau.
2CO 11:6 Karik hau la matenek koalia, maibee buat nebee hau hanorin, hau kompriende duni. Imi hatene buat nee mo-moos ona tanba ami hatudu fila-fila ba imi.
2CO 11:7 Uluk hau foo sai Maromak nia Liafuan Diak ba imi, hau la husu atu imi selu hau. Ho nunee hau halo hau nia aan hanesan ema kiik, atu bele foti aas imi. Hahalok nee sala ka?
2CO 11:8 Iha tempu nebaa sarani sira iha fatin seluk mak sustenta hau. Bele dehan hau hadau husi sira para bele serbi imi.
2CO 11:9 Uluk hau hela hamutuk ho imi, bainhira hau presiza buat ruma, hau la tau todan ba imi. Ita nia maluk sarani sira nebee mai husi provinsia Masedónia mak foo buat nebee hau presiza. Hau la tau todan ba imi, uitoan mos lae. I aban-bainrua mos hau lakohi halo todan imi.
2CO 11:10 Kristu nia liafuan loos, hau nia liafuan tuir mai nee mos loos: Hau sei la husu suporta husi imi. Hau sei gaba aan nafatin dehan hau la husu imi nia ajuda. Imi hotu iha provinsia Akaia la bele kontra fali hau nia liafuan nee.
2CO 11:11 Nusaa mak hau lakohi husu? Tanba hau la hadomi imi ka? Lae! Maromak hatene hau hadomi imi.
2CO 11:12 Maibee hau nafatin lakohi husu suporta husi imi, para ema nebee foti aan hanesan apostolu boot la bele dehan, sira halao sira nia servisu hanesan ami.
2CO 11:13 Ema sira nee bosok dehan Maromak mak haruka, sira finji halao Maromak nia servisu, i sira halo aan hanesan fali Kristu nia apostolu.
2CO 11:14 Lalika hakfodak ho sira nia hahalok nee, tanba Satanás mos finji hanesan anju naroman nian.
2CO 11:15 Nee duni imi lalika hakfodak se diabu nia atan sira nee finji hanesan atan nebee mak laran moos. Too ikus ema sira nee sei hetan kastigu tuir sira nia hahalok.
2CO 11:16 Hau repete tan dala ida: Keta hanoin dehan hau nee ema beik. Maibee se karik imi balu hanoin hau nee beik duni, entaun husik hau gaba aan uitoan hanesan ema beik.
2CO 11:17 Hau hakarak gaba aan, maski hahalok nee laos husi ita nia Nai, maibee hahalok ema beik nian.
2CO 11:18 Iha ema barak mak gosta gaba aan tuir ema mundu baibain halo. Nunee agora hau mos halo hanesan nee.
2CO 11:19 Imi konsidera aan hanesan ema matenek, maibee imi gosta simu ema beik.
2CO 11:20 Laos nee deit. Bainhira ema manda imi tuun-sae hanesan fali atan, imi simu deit. Bainhira sira haan imi nia osan saugati deit, foti sira nia aan sai boot, ka basa imi nia hasan, imi pasiensia ho sira.
2CO 11:21 Imi hanoin dehan, ami tenki moe tanba ami la iha forsa atu hanehan imi hanesan sira hanehan imi ka? Maibee sira brani gaba aan kona ba saida deit, hau mos brani gaba aan kona ba buat nee, maski hau nia liafuan nee hanesan ema beik nia liafuan.
2CO 11:22 Sira nee ema Ebreu isin ka? Hau mos Ebreu isin. Sira ema Israel ka? Hau mos ema Israel. Sira Abraão nia jerasaun ka? Hau mos Abraão nia jerasaun.
2CO 11:23 Sira nee Kristu nia atan ka? Hau koalia hanesan fali ema bulak, maibee hau Kristu nia atan nebee diak liu fali sira. Hau servisu makaas liu. Ema hatama hau ba komarka dala barak liu, ema baku hau makaas liu, i dala barak hau atu mate sal-sala.
2CO 11:24 Ema Judeu baku hau ho sikoti fila-fila too dala tolu-nulu resin sia, ida nee akontese dala lima.
2CO 11:25 Dala tolu ema baku hau ho ai dona, dala ida ema tuda ho fatuk atu oho hau, dala tolu roo nebee mak lori hau mout iha tasi laran, i dala ida hau namlele iha tasi leten loron ida kalan ida.
2CO 11:26 Hau sempre lao husi fatin ida ba fatin seluk. Iha buat oi-oin mak ameasa hau: Mota boot atu lori hau. Ema hadau hau nia sasaan. Hau nia maluk Judeu sira rasik halo aat hau, nunee mos ema nebee laos Judeu. Hau atu mate sal-sala iha sidade laran, iha rai fuik, ho mos iha tasi laran. Too ema nebee finji sai hau nia maluk sarani mos ameasa hau.
2CO 11:27 Hau servisu makaas la hatene kole. Dala barak hau kalan la toba, la iha hahaan i hamlaha-hamrook. Hau aguenta iha malirin tanba la iha hena.
2CO 11:28 Laos nee deit, maibee loro-loron hau mos senti todan tanba preokupa sarani sira iha nebee-nebee deit.
2CO 11:29 Se hau rona sarani ida senti fraku, hau mos senti fraku. Se hau rona dehan ema ruma lori sarani ida monu ba sala, hau mos hirus.
2CO 11:30 Se imi obriga hau atu gaba aan, entaun hau sei gaba kona ba hau nia frakeza.
2CO 11:31 Maromak hatene katak hau la bosok. Maromak nee ita nia Nai Jesus Kristu nia Aman, i ema hahii Nia too tinan ba tinan.
2CO 11:32 Uluk hau iha sidade Damasku, liurai Aretas nia reprezentante haruka soldadu sira hein iha portaun sidade nian atu kaer hau.
2CO 11:33 Maibee hau nia maluk sira hatama hau iha bote boot ida, depois sira hatuun hau liu husi janela ida iha moru nebee haleu sidade nee. Nunee hau konsege halai sai.
2CO 12:1 Hau tenki gaba aan nafatin, maski buat gaba aan nee la iha folin. Maibee hau hakarak konta kona ba buat oi-oin nebee ita nia Nai Jesus hatudu sai hanesan iha mehi.
2CO 12:2 Hau konhese Kristu nia ema ida. Iha tinan sanulu resin haat liu ba, Maromak foti nia sae ba iha lalehan, iha fatin nebee aas liu. Ema nee sae ho nia isin ka, nia haree deit iha mehi, hau la hatene, Maromak mak hatene.
2CO 12:3 Hau repete tan, ema nee sae ho nia isin ka, nia haree deit iha mehi, hau la hatene, Maromak mak hatene.
2CO 12:4 Maibee hau hatene nia sae too iha fatin furak nian. Iha nebaa nia rona liafuan nebee halo nia admira teb-tebes, ita ema nia liafuan la too atu bele esplika. Maromak mos bandu atu ema ida la bele foo sai.
2CO 12:5 Ema hanesan nee, hau gaba duni. Maibee hau lakohi gaba hau nia aan. Hau so gaba kona ba hau nia frakeza.
2CO 12:6 Afinal ema nebee sae ba lalehan nee mak hau nia aan rasik. Entaun se karik hau atu gaba aan, hau laos koalia nar-naran deit, tanba buat nebee hau koalia nee loos. Maibee hau lakohi konta tan. Diak liu ema respeita hau tuir buat nebee mak hau halo ho buat nebee hau koalia, la bele liu fali ida nee.
2CO 12:7 Maromak lakohi atu hau foti aan kona ba buat furak teb-tebes nebee Nia hatudu ona mai hau. Tanba nee, Nia husik hau hetan terus todan ida husi Satanás. Hau senti hanesan fali ai tarak ida sona hela hau nia isin.
2CO 12:8 Dala tolu ona hau husu ho laran atu Nai Jesus hasai moras nee husi hau.
2CO 12:9 Maibee Nia hataan fali dehan, “Hau sempre hatudu Hau nia laran diak ba o, nee too ba o. Tanba bainhira o la iha kbiit, iha tempu nee mak Hau hatudu mo-moos Hau nia kbiit iha o.” Nee mak hau sempre haksolok koalia kona ba hau nia frakeza, para Kristu nia kbiit bele hamahon nafatin hau.
2CO 12:10 Nunee hau haksolok bainhira hau la iha kbiit, ka ema hatete aat hau, ka hau iha susar laran, ka ema halo terus hau, ka hau hetan difikuldade oi-oin tanba tuir Kristu. Tanba iha tempu nebee hau fraku, iha tempu nee mak hau hetan kbiit.
2CO 12:11 Tuir lo-loos imi mak gaba hau. Maibee imi tau fali hau iha kotuk, nunee imi obriga fali hau atu gaba hau nia aan, hanesan ema beik ida. Hau la iha folin, maibee se kompara hau nia aan ho ema sira nebee foti aan dehan apostolu boot, sira la liu hau.
2CO 12:12 Uluk ho pasiensia boot hau halo milagre ho sinal oi-oin iha imi nia leet, halo ema admira. Ho nunee hau hatudu katak hau nee apostolu lo-loos.
2CO 12:13 Entaun nusaa mak imi hanoin katak, hau konsidera sarani sira iha fatin sel-seluk liu fali imi? Tanba deit hau simu sira nia suporta maibee la tau todan ba imi atu suporta hau ka? Se imi hanoin dehan nee sala, entaun keta hirus.
2CO 12:14 Agora hau prontu ona atu baa vizita tan imi, vizita ida nee mak dala tolu ona. Hau la husu imi atu sustenta hau. Hau hakarak imi nia aan, laos imi nia riku-soin. Tanba baibain inan-aman mak rai riku-soin ba nia oan sira, laos oan sira mak rai fali riku-soin ba nia inan-aman.
2CO 12:15 Nunee hau kontenti loos foo buat hotu-hotu nebee hau iha ba imi, too hau foo tan hau nia aan tomak. Hau nia domin ba imi boot ba beibeik. Entaun nusaa mak imi nia domin mai hau menus fali?
2CO 12:16 Imi hatene ona, hau la tau todan ba imi. Maibee sei iha ema balu duun dehan hau ema lohi door ida. Sira dehan hau halo manipulasaun hodi halo lakon imi.
2CO 12:17 Entaun ema nebee hau uluk haruka ba imi nee, iha ida mak han-matak imi nia osan ka?
2CO 12:18 Uluk hau husu ba Tito atu baa vizita imi, i haruka mos ita nia maluk sarani ida tan atu akompanha nia. Durante Tito iha nebaa, nia manipula tiha imi nia osan balu ka? Lae! Ami nain rua nia hanoin ho ami nia hahalok hanesan deit.
2CO 12:19 Maluk doben sira, dala ruma bainhira imi lee surat nee, imi hanoin dehan ami defende ami nia aan beibeik. Maibee laos hanesan nee. Ami laran ida ho Kristu, i buat hotu-hotu nebee ami koalia iha surat nee, Maromak mos haree. Buat hotu-hotu nebee ami halo nee, ami halo atu hametin imi nia fiar.
2CO 12:20 Hau tauk, bainhira hau baa iha nebaa, imi nia hahalok la monu ba hau nia laran, i hau nia hahalok mos la monu ba imi nia laran. Hau tauk imi istori malu hela, laran moras ba malu, nervozu aat, hanoin imi nia aan deit, hatete aat ema, konta aat ema nia vida, foti aan i halo rungu-ranga.
2CO 12:21 Hau tauk, kuandu hau too iha nebaa, Maromak halo moe hau iha imi nia oin. Keta halo be hau mos laran tristi tanba imi barak nebee uluk moris iha sala nia laran seidauk hakribi imi nia sala. Imi sei nafatin halo sala seksual ho sala foer oi-oin too la hatene moe.
2CO 13:1 Ida nee mak dala tolu ona hau atu baa haree imi. Hau sei tesi imi nia lia tuir liafuan nebee hakerek iha Livru Sagradu dehan, “Bainhira tesi lia, tenki iha ema nain rua ka tolu nebee foo sasin hanesan foin bele hakotu lia.”
2CO 13:2 Iha hau nia vizita segundu ba iha imi, hau foo hanoin kedas ona ba ema nebee halo sala. Agora liu husi surat nee, hau repete fali ba sira ho mos ba imi hotu katak, bainhira hau fila fali ba nebaa, hau sei kastigu see-see deit mak halo sala.
2CO 13:3 I kuandu hau koriji imi mak imi sei haree katak Kristu koalia duni liu husi hau, tanba durante nee imi hakarak haree ida nee. Keta hanoin dehan Kristu koriji imi ho fraku. Lae! Nia sei hatudu Nia kbiit boot iha imi.
2CO 13:4 Loos duni, bainhira ema prega Kristu iha krus too mate, Nia fraku. Maibee agora Nia moris ho Maromak nia kbiit. Nudar Kristu nia ema, ami mos fraku. Maibee Maromak foo kbiit mai ami atu moris laran ida ho Nia hodi serbi imi.
2CO 13:5 Imi kaer metin imi nia fiar ka lae? Imi rasik tenki tetu di-diak imi nia aan. Koko di-diak ba. Se imi kaer metin duni imi nia fiar, entaun imi sei hatene katak Kristu Jesus hela iha imi nia laran. Se lae, imi fiar ba Kristu ibun tutun deit.
2CO 13:6 Bainhira imi hatene tuir ona imi nia aan, hau hein katak imi mos sei hatene, ami nee apostolu lo-loos.
2CO 13:7 Ami harohan ba Maromak atu imi la bele halo sala saida deit. Ami harohan nunee laos para ema bele dehan ami nee apostolu lo-loos, maibee tanba ami hakarak atu imi halo buat nebee diak. Se ema balu konsidera ami nee laos apostolu mos, la buat ida.
2CO 13:8 Tanba ami sempre tuir buat nebee loos, la bele kontra fali.
2CO 13:9 Se imi forti, ami kontenti, maski ema konsidera ami fraku. Ami harohan atu imi sai ema nebee moris loos.
2CO 13:10 Ho razaun ida nee mak hau haruka surat nee ba imi molok hau baa, atu bainhira hau too iha nebaa, hau lalika uza hau nia kbiit nudar apostolu hodi siak imi. Tanba kbiit nee ita nia Nai foo mai hau atu bele hametin imi nia fiar, laos atu halo rahun fali imi.
2CO 13:11 Maun-alin sira, hau nia liafuan ikus mak nee: Haksolok ba! Hakaas aan atu halo beibeik buat nebee loos. Rona di-diak hau nia liafuan, moris neon ida laran ida, i buka atu moris dame malu ho ema hotu-hotu. Nunee Maromak Domin Nain ho Dame Nain sei hamutuk ho imi nafatin.
2CO 13:12 Rei malu hanesan maluk sarani.
2CO 13:13 Maromak nia povu iha nee hatoo kumprimentus ba imi.
2CO 13:14 Ami harohan atu ita nia Nai Jesus Kristu hatudu Nia laran diak ba imi, i Maromak foo Nia domin ba imi, i Espiritu Santu mos hela hamutuk ho imi hotu.
GAL 1:1 Hau Paulo, ho maluk sarani sira hotu nebee hamutuk ho hau, haruka surat nee ba sarani sira iha fat-fatin iha provinsia Galásia. Hau sai apostolu laos tanba ema kriatura ruma mak hili, maibee Jesus Kristu ho Aman Maromak mak foo knaar nee mai hau. Kristu nee mak Salvador nebee Maromak promete hori uluk kedas atu haruka mai. Nia mate tiha, maibee Aman Maromak halo Nia moris fali ona.
GAL 1:3 Ami harohan ba ita nia Aman Maromak ho Nai Jesus Kristu para hatudu Sira nia laran diak ba imi, i foo pas ho hakmatek ba imi.
GAL 1:4 Kristu foo Aan ba mate hodi hamoos ita nia sala i hasai ita husi buat aat iha mundu nee. Nia halo nunee tuir ita nia Aman Maromak nia hakarak.
GAL 1:5 Mai hahii adora Maromak too tinan ba tinan nafatin! Amen.
GAL 1:6 Hau admira! Nusaa mak bele sai nunee?! Maromak bolu ona imi atu hatene Nia laran diak. Maibee imi fila kotuk lalais deit ba Nia hodi tuir fali hanorin seluk
GAL 1:7 nebee la loos. Tuir lo-loos, Kristu nia Liafuan Diak ida deit, la iha tan seluk. Maibee agora iha ema balu mai bobar fali Liafuan Diak nee tuun-sae, halo imi la hatene atu tuir dalan ida nebee.
GAL 1:8 Kuidadu! See-see deit mak hanorin la hanesan ho Liafuan Diak nebee uluk ami hanorin ba imi, husik malisan kona nia ba! Maski ami rasik ka, anju husi lalehan mos, malisan sei kona.
GAL 1:9 Ami hatete tiha ona, agora hau repete dala ida tan: Se iha ema ruma hanorin fali oin seluk, la tuir Liafuan Diak nebee uluk imi simu tiha ona nee, Maromak sei kastigu nia tinan ba tinan nafatin.
GAL 1:10 Hau koalia hanesan nee atu ema bele gaba hau ka? Lae! Hau hakarak atu halo haksolok Maromak nia laran, laos atu halo haksolok ema nia laran. Se hau buka atu ema gaba hau karik, entaun hau la serve sai Kristu nia atan.
GAL 1:11 Maun-alin sira, hau foo hatene lo-loos ba imi katak, Liafuan Diak nebee hau hanorin nee, laos inventa.
GAL 1:12 Hau laos simu husi ema, laos ema mak hanorin hau, maibee Jesus Kristu rasik mak hatudu mai hau.
GAL 1:13 Imi rona ona kona ba hau nia moris uluk, bainhira hau sei tuir relijiaun Judeu nian. Iha tempu nebaa hau halo Maromak nia povu terus liu, i hakaas aan para halo rahun sira.
GAL 1:14 Hau foo neon ho laran tomak hodi estuda relijiaun Judeu nian i halo tuir, liu fali ema Judeu sira seluk nebee idade hanesan hau. Hau badinas liu halo tuir ita nia bei-ala sira nia lisan ho lei relijiaun hotu.
GAL 1:15 Maski nunee Maromak desidi atu hatudu Nia Oan Jesus mai hau. Bainhira hau sei iha hau nia inan nia kabun laran, Nia hatudu ona Nia laran diak mai hau hodi hili hau atu baa foo sai Liafuan Diak kona ba Jesus ba ema nebee laos Judeu. Bainhira Nia hatudu Nia Oan mai hau, hau la baa husu ema seluk nia hanoin.
GAL 1:17 Hau mos la baa iha sidade Jerusalém atu hasoru malu ho apostolu sira seluk nebee Jesus foti uluk ona. Maibee hau baa kedas iha rai Arabi. Hotu tiha hau fila fali mai iha sidade Damasku.
GAL 1:18 Liu tiha tinan tolu foin hau baa iha Jerusalém hodi hasoru malu ho Pedro. I hau hela ho nia durante loron sanulu resin lima.
GAL 1:19 Iha momentu nebaa hau mos hasoru Nai Jesus nia alin, Tiago. Maibee hau la haree apostolu sira seluk.
GAL 1:20 Buat nebee hau hakerek nee, loos duni. Maromak hatene hau la bosok.
GAL 1:21 Depois hau baa iha provinsia Síria ho Silísia.
GAL 1:22 Iha tempu nebaa Kristu nia povu iha fat-fatin iha provinsia Judeia seidauk konhese hau.
GAL 1:23 Sira rona deit ema konta dehan, “Ema ida nebee uluk halo terus ita nee mak agora foo sai fali Liafuan Diak kona ba Kristu. Afinal uluk nia obriga ita atu fila kotuk ba Kristu.”
GAL 1:24 I sira hahii Maromak tanba Maromak muda ona hau nia moris.
GAL 2:1 Liu tiha tinan sanulu resin haat, hau baa fali Jerusalém, hamutuk ho Barnabé. Ami lori mos Tito.
GAL 2:2 Hau baa tanba Maromak mak haruka. Iha nebaa hau hasoru malu ho nai ulun sarani sira hodi konta fali ba sira Liafuan Diak nebee mak durante nee hau foo sai ba ema nebee laos Judeu. Hau koalia ho nai ulun sira deit, atu sira bele tetu di-diak hau nia hanorin nee loos ka lae. Tanba hau lakohi para servisu nebee hau halao nee saugati deit.
GAL 2:3 Nai ulun sira simu hau nia liafuan ho diak. Sira simu mos Tito. Maski nia ema Gregu, laos ema Judeu, maibee sira la obriga nia atu sunat.
GAL 2:4 Iha duni ema balu hakarak obriga nia para sunat tuir ema Judeu sira nia lei relijiaun. Ema sira nee finji fiar ba Jesus hodi tama iha sarani sira nia leet. Kristu Jesus foo ona liberdade mai ita, maibee ema sira nee hakarak hadau fali liberdade nee hodi halo ita sai atan fali ba lei relijiaun Judeu nian. Nee mak sira atu obriga Tito para sunat.
GAL 2:5 Maski nunee ami nunka halo tuir, para imi bele fiar nafatin Liafuan Diak nebee imi simu husi ami, tanba Liafuan nee mak loos.
GAL 2:6 Nai ulun sira nee hanesan ema boot iha sarani sira nia oin. Maibee mai hau, atu boot ka kiik, hau la interese, tanba Maromak la haree ba ida nee. Bainhira hau hatoo hau nia hanorin ba sira, sira simu ho diak i la aumenta liafuan ida.
GAL 2:7 Laos nee deit, sira mos rekonhese katak Maromak foo fiar ona mai hau para foo sai Liafuan Diak ba ema nebee laos Judeu, hanesan mos Nia foo fiar ba Pedro lori Liafuan Diak ba ema Judeu.
GAL 2:8 Sira haree katak Maromak foo kbiit ba Pedro hodi halao nia servisu nudar apostolu ba ema Judeu. Nunee mos Nia foo kbiit mai hau nudar apostolu ba ema nebee laos Judeu.
GAL 2:9 Tiago, Pedro ho João rekonhese katak, Maromak foo ona knaar nee mai hau. Sira nain tolu nee, sarani sira respeita nudar ulun boot igreja nian. Sira kaer liman ho hau ho Barnabé hanesan sinal katak ami hotu laran ida. Sira konkorda para ami lori nafatin Liafuan Diak ba ema nebee laos Judeu, i sira mak lori ba ema Judeu.
GAL 2:10 So buat ida deit mak sira husu mai ami, atu ami tulun ema kiak sira iha Jerusalém. I hau mos hakarak duni halo nunee.
GAL 2:11 Depois iha loron ida, Pedro mai iha sidade Antiokia, hau siak nia iha sarani sira nia oin tanba nia hahalok la loos.
GAL 2:12 Bainhira Pedro foin too mai, nia kontenti haan hamutuk ho sarani sira nebee laos Judeu. Maibee kuandu Tiago nia kolega sira too mai, Pedro haketak aan tiha husi sarani sira nebee laos Judeu. Nia tauk nia maluk Judeu sira nee, tanba sira hanorin dehan sarani sira hotu tenki sunat tuir lei relijiaun Judeu nian.
GAL 2:13 Ema Judeu sira seluk mos komesa halo tuir Pedro nia hahalok finjidu nee, too Barnabé mos halo tuir i lakohi haan tan ho ema nebee laos Judeu.
GAL 2:14 Hau haree sira nia hahalok nee la tuir lia loos nebee mak Liafuan Diak hanorin. Nunee hau siak Pedro iha sira hotu nia oin dehan, “Irmaun moris mai ema Judeu. Maibee irmaun rasik la moris ona tuir lei relijiaun Judeu nian. Entaun nusaa mak agora ita hakarak obriga ema nebee laos Judeu atu sira tuir fali lei nee hotu?”
GAL 2:15 Loos duni, ami moris mai ema Judeu nanis, ami laos sala nain hanesan ema nebee laos Judeu.
GAL 2:16 Maibee agora ami hatene katak, la iha ema ida mak Maromak simu tanba nia tuir lei relijiaun. Maromak simu ema tanba fiar ba Jesus Kristu. Nee mak ami mos fiar ba Kristu, para Maromak bele simu ami tanba ami nia fiar, laos tanba ami tuir lei relijiaun.
GAL 2:17 Ami fiar katak Maromak simu ami tanba ami laran ida ho Kristu. Maibee too ikus ema Judeu balu foo sala mai ami dehan, ami halo sala tanba la tuir ona lei relijiaun. Se nunee, Kristu mak halo ami sala ka? Lae liu!
GAL 2:18 Hau husik tiha ona sistema lei relijiaun nian, hau la bele kaer fali. Se hau kaer fali, nee hau sala.
GAL 2:19 Uluk hau hakaas aan halo tuir lei relijiaun, maibee lei nee la bele halo hau diak malu ho Maromak. Agora kona ba lei nee, hau hanesan mate tiha ona, para hau bele foo hau nia moris tomak ba Maromak.
GAL 2:20 Bele dehan, hanesan hau mate tiha ona iha krus hamutuk ho Kristu. Agora laos hau mak moris tan, maibee Kristu mak moris iha hau. Durante hau moris iha mundu nee, hau laran metin deit ba Maromak nia Oan. Nia hadomi teb-tebes hau, too foo nia Aan hodi mate iha hau nia fatin.
GAL 2:21 Maromak simu hau tanba Nia laran diak. Hau lakohi fila kotuk ba Nia laran diak nee. Tanba se karik Maromak simu ita tanba ita halo tuir lei relijiaun, entaun nee dehan katak, Kristu nia mate la iha folin.
GAL 3:1 Imi ema Galásia, imi beik-teen liu! Keta ema lohi imi karik! Uluk hau foo hatene mo-moos tiha ona ba imi kona ba Jesus Kristu nia mate iha krus.
GAL 3:2 Agora hataan took mai. Tanba saa mak Maromak foo Nia Espiritu ba imi? Nia foo tanba imi tuir lei relijiaun ka? Lae! Nia Espiritu tuun ba iha imi tanba imi fiar Liafuan Diak nebee imi rona ona.
GAL 3:3 Entaun nusaa mak imi beik demais nunee?! Fo-foun imi moris tuir Espiritu Santu. Maibee agora imi hakarak lao too rohan ho imi nia kbiit rasik.
GAL 3:4 Imi hetan terus barak ona tanba imi fiar ba Kristu. Keta halo be imi nia terus nee hotu sai saugati deit.
GAL 3:5 Maromak foo Nia Espiritu ba imi, i halo milagre iha imi nia leet. Imi hanoin Nia halo nunee tanba imi halo tuir lei relijiaun ka? Lae! Nia halo nunee, tanba imi fiar ba Liafuan Diak nebee imi rona tiha ona.
GAL 3:6 Hanoin took ema Judeu sira nia bei-ala Abraão. Iha Livru Sagradu hakerek dehan, “Nia fiar ba Maromak, nee mak Maromak hamoos nia sala hodi simu nia.”
GAL 3:7 Imi tenki kompriende di-diak buat nee: Ema nebee fiar ba Maromak, nia mak sai hanesan Abraão nia oan.
GAL 3:8 Livru Sagradu foo hatene nanis ona dehan, Maromak sei simu mos ema nebee laos Judeu, naran katak sira fiar ba Nia. Tanba hori uluk kedas Nia hatete ona Liafuan Diak ba Abraão dehan, “Ema iha nasaun hotu-hotu sei hetan bensaun tanba o.”
GAL 3:9 Nee duni Maromak foo bensaun ba ema hotu nebee fiar ba Nia, hanesan mos Nia foo ba Abraão tanba nia fiar.
GAL 3:10 Ema nebee fiar aan katak Maromak sei simu nia tanba deit nia moris tuir lei relijiaun, ema nee hetan malisan. Tanba iha Livru Sagradu hakerek dehan, “Ema nebee mak la kumpri hotu lei relijiaun, nia hetan malisan.”
GAL 3:11 La iha ema ida mak bele kumpri lei nee tomak. Nunee la iha ema ida mak Maromak simu tanba nia moris tuir lei relijiaun. Nee klaru! Tanba hakerek ona dehan, “Ema tenki fiar ba Maromak mak foin Maromak simu nia hodi foo moris rohan-laek ba nia.”
GAL 3:12 Maibee lei la haree ba fiar, lei haree deit, ita kumpri tomak ka lae. Tanba iha lei nee hakerek dehan, “Ema nebee mak halo tuir buat sira nee tomak, nia sei hetan moris.”
GAL 3:13 Maibee Kristu foo nia Aan hodi hasai ita husi lei relijiaun nia okos, para lei nee la bele lori malisan mai ita. Hanesan nee Nia rasik simu fali ita nia malisan. Tanba iha Livru Sagradu hakerek dehan, “Ema nebee mate iha ai riin, nia hetan malisan.”
GAL 3:14 Kristu Jesus foo liberdade mai ita para bensaun nebee Maromak uluk foo ba Abraão, tuun mos ba ema nebee laos Judeu. Nunee se ita fiar ba Kristu, ita bele simu Maromak nia Espiritu nebee Nia promete tiha ona.
GAL 3:15 Maun-alin sira, agora hau hakarak foo ezemplu husi ita nia moris loro-loron. Se ema nain rua hakerek surat akordu ida, depois sira asina tiha, surat nee vale ona. Ema ida la bele kansela, i la bele aumenta tan liafuan ruma ba iha surat nee.
GAL 3:16 Nunee mos bainhira Maromak halo promesa ba Abraão ho nia jerasaun. Iha momentu nebaa Maromak dehan, “Hau halo promesa nee ho o nia jerasaun ida.” Nia laos dehan, “o nia jerasaun sira”, tanba Nia la foo promesa nee ba ema barak. Maibee Nia foo ba Abraão nia Jerasaun ida, nee mak Kristu.
GAL 3:17 Buat nebee hau hakarak hatete mak nee: Maromak halo promesa uluk ho Abraão. Liu tiha tinan atus haat tolu-nulu foin Nia hatuun lei relijiaun. Maibee lei nee laos troka Maromak nia promesa ida uluk nee, promesa nee lao nafatin.
GAL 3:18 Se karik Maromak foo bensaun ba ita tanba ita tuir lei relijiaun, entaun ita la simu ona bensaun tuir Maromak nia promesa. Maibee laos hanesan nee! Maromak hatudu Nia laran diak hodi foo bensaun ba Abraão tanba Nia promete tiha ona atu foo.
GAL 3:19 Entaun Maromak foo lei relijiaun atu halo saida? Nia foo lei relijiaun hodi hanorin katak, ita ema nee sala nain. Nia hakarak atu lei nee vale too deit Abraão nia Jerasaun ida nebee temi iha promesa nee too mai. Bainhira Maromak foo lei relijiaun ba ema Judeu sira, Nia foo ba anju sira mak entrega fali ba Moisés para foo tutan ba povu.
GAL 3:20 Maibee bainhira Nia halo promesa ho Abraão, Nia foo laos liu husi ema seluk. Maromak rasik mak koalia.
GAL 3:21 Karik imi hanoin katak, lei relijiaun kontra fali Maromak nia promesa. Lae liu! Se karik lei nee bele lori ita ba moris rohan-laek, entaun ita tuir lei, ita diak malu ho Maromak. Maibee la bele duni,
GAL 3:22 tanba iha Livru Sagradu hakerek dehan, sala kesi metin ema hotu-hotu iha mundu. Nee duni so ema nebee fiar ba Jesus Kristu deit mak bele simu buat nebee mak Maromak promete tiha ona.
GAL 3:23 Uluk, Jesus Kristu seidauk mai, lei relijiaun kesi metin hela ami ema Judeu. Ami hanesan fali dadur too Maromak foo sai katak ema tenki fiar ba Kristu.
GAL 3:24 Nunee lei relijiaun eduka ami too Kristu mai, para ami bele diak malu fali ho Maromak liu husi ami nia fiar ba Kristu.
GAL 3:25 Agora ami fiar ona ba Kristu, ami laos iha lei relijiaun nia okos ona.
GAL 3:26 Agora imi hotu-hotu sai ona Maromak nia oan, tanba imi fiar ba Kristu Jesus.
GAL 3:27 Imi simu ona batizmu atu sai ida deit ho Kristu, i agora imi moris tuir Nia ezemplu, bele dehan hanesan imi falun aan ho Kristu nia hahalok.
GAL 3:28 Imi hotu-hotu nebee fiar ba Kristu Jesus sai ona ida. Nunee, atu imi ema Judeu ka laos ema Judeu, atan ka laos atan, mane ka feto, hanesan deit.
GAL 3:29 Imi Kristu nia ema. Nunee imi mos sai ona Abraão nia jerasaun, i bensaun nebee mak Maromak promete ba Abraão, imi mos sei simu.
GAL 4:1 Hau foo ezemplu ida tan. Bainhira aman ida mate, nia oan iha direitu atu simu nia riku-soin. Maibee se nia oan nee tinan seidauk too, nia sei hanesan atan. Maski riku-soin hotu-hotu aban-bainrua sai ninian,
GAL 4:2 maibee ema seluk mak tau matan ba nia ho nia sasaan sira nee too tempu nebee mak nia aman desidi tiha ona.
GAL 4:3 Uluk Jesus seidauk mai, ita mos hanesan labarik nee. Ita sei hakruuk ba lisan mundu nee nian, hanesan atan.
GAL 4:4 Maibee too nia tempu, Maromak haruka Nia Oan mai. Maromak nia Oan nee moris husi feto ida, i moris iha lei relijiaun nia okos.
GAL 4:5 Nia mai atu foo liberdade ba ema hotu-hotu nebee moris iha lei relijiaun nia okos, para ita mos bele sai Maromak nia oan.
GAL 4:6 Imi sai ona Maromak nia oan. Tanba nee mak Maromak mos haruka Nia Oan nia Espiritu mai tama iha ita nia laran. I Espiritu iha ita nee halo ita brani bolu Maromak, “hau nia Aman doben.”
GAL 4:7 Entaun agora imi laos atan ona, maibee imi sai ona Maromak nia oan. Tanba imi sai Nia oan mak imi iha direitu simu riku-soin hotu-hotu nebee Nia promete ona ba Nia oan sira.
GAL 4:8 Uluk bainhira imi seidauk konhese Maromak, imi sai atan hodi adora buat nebee laos Maromak.
GAL 4:9 Maibee agora, imi konhese ona Maromak. Tuir loos hau dehan, Maromak mak konhese imi. Entaun nusaa mak imi hakarak fila fali baa tuir lisan mundu nian, maski lisan nee fraku, i la bele salva imi? Imi hakarak hakruuk fali ba buat sira nee hodi sai fali atan ka?
GAL 4:10 Hau rona dehan, imi halao serimonia tuir loron, fulan, loron boot ho tinan, ho objetivu atu Maromak simu imi.
GAL 4:11 Nee halo hau hanoin barak! Keta halo be hau hanorin imi durante nee, saugati deit.
GAL 4:12 Maun-alin sira, hau husu boot atu imi livre husi buat sira nee, hanesan mos hau. Tanba hau moris livre ona husi lei relijiaun Judeu, hanesan mos imi nebee laos ema Judeu. Uluk, bainhira ita sei hamutuk, imi la halo buat aat ida mai hau.
GAL 4:13 Imi hotu hatene, fo-foun hau baa foo sai Liafuan Diak ba imi, hau hamutuk ho imi tanba hau nia saude laduun diak.
GAL 4:14 Maski hau nia kondisaun nee foo todan ba imi, maibee imi la hakribi hau. Imi simu hau hanesan fali Maromak nia anju ida. I liu tan, imi simu hau hanesan imi simu Kristu Jesus rasik.
GAL 4:15 Iha tempu nebaa imi hotu haksolok teb-tebes. Nusaa mak agora imi la haksolok tan? Hau hatene, iha momentu nebaa imi hadomi teb-tebes hau, too imi prontu hasai imi nia matan fuan atu foo mai hau.
GAL 4:16 Maibee agora imi konsidera hau hanesan fali imi nia inimigu tanba hau koalia ba imi buat nebee mak loos ka?
GAL 4:17 Ema lohi door sira nee hakaas aan dada imi para tuir sira, laos atu halo diak ba imi. Sira hakarak halo imi dook tiha husi ami hodi tuir fali sira ho laran tomak.
GAL 4:18 Imi halo buat ruma ho laran tomak, nee diak, maibee imi tenki iha objetivu nebee mak diak. Entaun, atu hau hamutuk ho imi ka dook husi imi mos, hakaas aan halo nafatin buat nebee mak diak.
GAL 4:19 Hau nia oan doben sira, agora hau esforsu aan ho terus ba imi dala ida tan, hanesan feto nebee kanotak moras atu tuur ahi. I hau sei esforsu aan nafatin, too imi nia laran sai hanesan Kristu.
GAL 4:20 Maibee agora, hau la hatene atu halo saida tan. Tuir loos hau hakarak atu baa koalia rasik ho imi, atu hau la bele koalia makaas hanesan nee.
GAL 4:21 Se imi hakarak hakruuk ba ema Judeu sira nia lei relijiaun karik, diak liu imi kompriende lai, lei nee dehan saida loos.
GAL 4:22 Iha Livru Sagradu hakerek dehan, Abraão iha oan mane nain rua, ida husi nia atan feto Hagar, ida husi nia kaben Sara nebee ema livre.
GAL 4:23 Nia atan nee hetan oan tanba ema kriatura nia hakarak. Maibee nia kaben nebee livre nee hetan oan tanba Maromak promete ona nunee.
GAL 4:24 Feto nain rua nee, ita bele kompara ho promesa rua nebee Maromak halo ho ema. Promesa ida, Nia halo ho Moisés iha foho Sinai, bainhira Nia hatuun lei relijiaun ba ema Judeu sira. Ema sira nebee moris iha lei nia okos, sira mos sai atan hanesan Hagar.
GAL 4:25 Nunee Hagar kompara ho foho Sinai iha rai Arabi. I nia mos bele kompara ho ema Jerusalém nebee agora dadauk moris hanesan atan iha lei nee nia okos.
GAL 4:26 Maibee ita nebee fiar ba Kristu, ita laos atan ona, ita livre hanesan ita nia inan Sara. Nunee ita nia sidade mak Jerusalém foun iha lalehan.
GAL 4:27 Kona ba Sara ho Jerusalém foun, iha Livru Sagradu hakerek dehan, “Feto nebee nunka iha oan, haksolok ona ba! Feto nebee nunka senti kanotak moras atu tuur ahi, haklalak ona ba! Feto nebee nia laen husik hela, sei hetan oan barak liu fali feto nebee mak iha laen.”
GAL 4:28 Maun-alin sira, imi sai ona Maromak nia oan, tanba Maromak mak promete nunee. Entaun imi hanesan Sara nia oan Isac, tanba nia mos moris mai tuir Maromak nia promesa.
GAL 4:29 Iha tempu nebaa Abraão nia oan nebee moris mai tanba ema nia hakarak, bainhira boot ona, nia halo terus fali Isac, maski Isac nee moris mai tanba Maromak nia Espiritu nia hakarak. Agora dadauk mos ema nebee moris iha lei nia okos halo terus ema nebee moris livre.
GAL 4:30 Maibee iha Livru Sagradu hakerek dehan, “Duni sai tiha atan feto nee ho nia oan. Tanba atan nia oan la iha direitu simu nia aman nia riku-soin. So oan husi nia kaben nebee livre mak iha direitu.”
GAL 4:31 Entaun, maun-alin sira, ita laos atan nee nia oan, maibee ita hanesan oan husi Abraão nia kaben nebee livre.
GAL 5:1 Kristu hasai ona ita husi lei relijiaun nia okos, atu nunee ita bele moris livre. Neebee kaer metin imi nia liberdade nee, i keta husik ema halo imi sai atan fali.
GAL 5:2 Rona mai! Hau Paulo mak koalia. Se imi simu sunat para bele diak malu ho Maromak, entaun Kristu nia mate la iha folin ba imi.
GAL 5:3 Hau hatete dala ida tan: See mak simu sunat tuir ema Judeu nia lei relijiaun, nia mos tenki halo tuir lei nee tomak.
GAL 5:4 Ema nebee hakaas aan moris tuir lei para Maromak bele simu nia, ema nee moris haketak aan husi Kristu, nia fila kotuk ba Maromak nia laran diak.
GAL 5:5 Maibee Maromak nia Espiritu halo ita laran metin katak, Maromak sei simu ita tanba ita fiar ba Kristu.
GAL 5:6 Nunee, se ita laran ida ho Kristu Jesus, ita sunat ka la sunat, nee la iha buat ida. Importante mak nee: Ita fiar ba Kristu, i hatudu fiar nee liu husi hadomi ema seluk.
GAL 5:7 Fo-foun imi moris tuir Kristu ho lo-loos. See mak bosok imi hodi sees fali husi dalan loos nee?
GAL 5:8 Lia bosok nebee imi rona nee, laos mai husi Maromak. Tanba Nia mak bolu imi sai Nia oan.
GAL 5:9 Ema dehan, “Fermentu uitoan tau ba trigu halo masa tomak sae.” Nunee mos hanorin falsu, maski uitoan deit, bele lori ema barak ba dalan sala.
GAL 5:10 Bele nunee mos, hau laran metin ba Nai Jesus katak, imi sei la tuir sira nia hanorin falsu nee. I see-see deit mak halo imi konfuzaun, Maromak sei kastigu.
GAL 5:11 Maun-alin sira, se karik hau hanorin nafatin katak, ema tenki sunat, entaun nusaa mak ema Judeu halo terus hau? Se nunee, hau nia hanorin kona ba Jesus nia mate iha krus, la halo sira hirus.
GAL 5:12 Maibee ema nebee halo imi sai konfuzaun kona ba sunat, husik ba, sira halo liu tan too sira rasik kapa sira nia aan ba!
GAL 5:13 Maun-alin sira, Maromak bolu ona imi para sai ema nebee livre. Maibee la bele uza imi nia liberdade nee atu halo saida deit tuir imi nia hakarak rasik. Imi tenki hadomi malu hodi serbi malu.
GAL 5:14 Lei tomak nia huun mak ukun fuan ida nee: “O tenki hadomi o nia maluk hanesan o hadomi o nia aan rasik.”
GAL 5:15 Maibee se imi lees malu i haan malu hela deit mak imi sei haree. Imi sei rahun hotu.
GAL 5:16 Buat nebee hau atu hatete ba imi mak nee: Imi tenki moris tuir Espiritu Santu nia hakarak. Se imi moris nunee, entaun imi sei la halo buat aat tuir imi nia hakarak rasik.
GAL 5:17 Tanba ita ema nia hakarak la haan malu ho Espiritu nia hakarak. I Espiritu nia hakarak la haan malu ho ita ema nia hakarak. Buat rua nee kontra malu. Tanba nee mak buat nebee imi hakarak halo, imi la bele halo.
GAL 5:18 Maibee se Espiritu Santu mak imi nia matadalan, imi la moris tan iha lei relijiaun nia okos.
GAL 5:19 Imi hatene mo-moos ona, ema nebee halo aat tuir sira nia hakarak, sira nia hahalok oinsaa. Por ezemplu, halo sala seksual ho sala foer oi-oin too la hatene moe,
GAL 5:20 adora lulik, kaer ai kulit aat, odi malu, istori malu, kaan ema nia sasaan, nervozu aat, buka diak deit ba nia aan rasik, forma grupu keta-ketak hodi la simu malu,
GAL 5:21 laran moras ema, lanu-teen, festa too halo arbiru tuun-sae, i buat aat sel-seluk tan. Uluk hau foo hatene tiha ona ba imi, agora hau foo hanoin dala ida tan: Ema sira nebee moris hanesan nee, sira sei la tama iha Maromak nia reinu.
GAL 5:22 Maibee se ita moris tuir Espiritu Santu nia hakarak mak Nia halo ita sai ema nebee hatene hadomi, laran haksolok, pas, pasiensia, laran diak, tulun ema, halo tuir buat nebee ita promete,
GAL 5:23 laran maus, i domina aan. La iha lei ida mak bandu hahalok sira nee.
GAL 5:24 See mak sai ona Kristu Jesus nia ema, nia la moris tan tuir nia hakarak nebee aat. Tanba hakarak aat ho hanoin aat hotu-hotu, nia prega tiha ona iha krus.
GAL 5:25 Espiritu Santu foo ona moris foun mai ita, nunee ita tenki moris tuir Nia hakarak.
GAL 5:26 Ita la bele foti aan, la bele sadik malu, i la bele laran moras ba malu.
GAL 6:1 Maun-alin sira, se ema sarani ida monu ona ba sala, entaun imi nebee mak moris tuir Espiritu Santu nia hakarak, tenki baa koalia di-diak ho nia hodi lori nia fila fali ba dalan loos. Maibee kuidadu imi nia aan, para la bele monu tuir nia.
GAL 6:2 Se imi ruma hetan susar, imi tenki ajuda malu, i nunee imi halo tuir Kristu nia lei.
GAL 6:3 Se ema ruma hanoin dehan, nia diak liu ema seluk, afinal lae, nia bosok nia aan.
GAL 6:4 Neebee ema ida-idak tenki haree ba nia hahalok rasik. Se diak karik, kontenti ba. Maibee la bele kompara ho buat nebee ema seluk halo.
GAL 6:5 Tanba ema ida-idak tenki responsabiliza ba nia aan rasik.
GAL 6:6 Ema nebee hanorin Maromak nia liafuan ba imi, keta haluha suporta nia ho buat nebee imi iha.
GAL 6:7 Keta bosok imi nia aan dehan Maromak la hatene buat nebee mak imi halo. Tanba buat nebee ema kuda agora, ida nee mak aban-bainrua nia sei kuu.
GAL 6:8 Nunee mos, buat nebee nia halo agora, aban-bainrua nia sei simu nia rezultadu. See mak halo aat tuir nia hakarak rasik, nia sei rahun. Maibee see mak moris tuir Maromak nia Espiritu nia hakarak, nia sei simu moris rohan-laek husi Espiritu nee.
GAL 6:9 Nee duni la bele baruk halo buat nebee diak. Tanba too iha nia loron, ita sei simu rezultadu diak, naran katak ita halo diak nafatin.
GAL 6:10 Nunee, bainhira ita hetan oportunidade atu ajuda ema seluk, halo deit ba. Saa tan ita nia maluk sira nebee fiar ba Kristu.
GAL 6:11 Haree ba! Liafuan sira nee, hau rasik mak hakerek ho letra bo-boot.
GAL 6:12 Ema sira nebee hatudu aan iha ema Judeu sira nia oin, sira nee hakarak obriga imi atu sunat. Afinal sira halo nunee so atu ema Judeu la bele halo terus sira. Tanba se sira laran metin deit ba Kristu nia mate iha krus, entaun ema Judeu sei halo terus sira.
GAL 6:13 Maski sira sunat ona mos, sira rasik la tuir lei relijiaun tomak. Maibee sira hakarak atu imi sunat para sira bele gaba aan dehan, imi halo tuir ona lei nee.
GAL 6:14 Maibee ba hau, hau lakohi gaba buat ida, hau so gaba deit kona ba ita nia Nai Jesus Kristu nia mate iha krus. Tanba Nia mate iha krus mak buat mundu nian la iha tan folin mai hau. I tuir ema mundu nia hanoin, hau mos hanesan mate tiha ona.
GAL 6:15 Atu sunat ka la sunat, nee la importante. Importante mak Maromak halo foun ona ita nia moris.
GAL 6:16 Ema hotu-hotu nebee tuir hanorin nee, sira sai ona Maromak nia povu lo-loos. Maromak mos sei hatudu Nia laran luak ba sira i foo pas ho hakmatek ba sira.
GAL 6:17 Hau lakohi para ema halo tan problema ho hau. Tanba fitar sira iha hau nia isin nee hatudu katak hau serbi Jesus.
GAL 6:18 Maun-alin sira, hau harohan atu ita nia Nai Jesus Kristu hatudu Nia laran diak ba imi hotu. Amen.
EPH 1:1 Surat nee husi hau, Paulo. Maromak rasik mak foti hau sai Kristu Jesus nia apostolu. Hau hakerek surat nee ba imi, Maromak nia povu iha sidade Éfezu. Imi ida deit ho Kristu Jesus i tuir nafatin Nia ho laran tomak.
EPH 1:2 Hau harohan ba ita nia Aman Maromak ho Nai Jesus Kristu para hatudu Sira nia laran diak ba imi, i foo pas ho hakmatek ba imi.
EPH 1:3 Mai ita hahii Maromak! Nia mak ita nia Nai Jesus Kristu nia Aman. Nia foo ona bensaun bar-barak husi lalehan mai ita, tanba ita laran ida ona ho Kristu.
EPH 1:4 Molok Maromak halo mundu, Nia hili tiha ona ita sai Kristu nia ema. Nia hakarak atu ita moris ho laran moos iha Nia oin, i livre husi sala. Maromak hadomi ita,
EPH 1:5 nee mak Nia desidi ona hori uluk kedas atu foti ita sai Nia oan. Jesus Kristu mak halo Maromak nia desizaun nee sai realidade. Nee hotu tuir Maromak nia hakarak rasik, i halo Nia laran haksolok.
EPH 1:6 Mai ita hahii adora Nia! Tanba Nia laran diak teb-tebes, i Nia hatudu Nia laran diak nee liu husi Nia Oan doben.
EPH 1:7 Kristu nia raan fakar too mate para selu kotu ita nia tusan hodi foo liberdade mai ita, nee dehan katak ita nia sala hamoos tiha ona. Ho nunee Maromak hatudu Nia laran osan mean mai ita.
EPH 1:8 Nia mos foo matenek klean mai ita hodi loke ita nia neon.
EPH 1:9 I Nia planu nebee uluk taka hela ba ita ema, agora Nia hatudu ona mai ita. Nia planu nee, Nia desidi hori uluk ona atu Kristu mak halao. Nia hakarak atu ita hatene katak,
EPH 1:10 bainhira too ona nia tempu, Maromak sei halo buat hotu-hotu iha lalehan ho iha rai hamutuk ida deit, i Kristu mak sei ukun hotu-hotu.
EPH 1:11 Hori uluk kedas Maromak hili ami ema Judeu sai Nia povu para ami laran ida ho Kristu. Ida nee tuir Nia planu, i buat nebee Nia desidi ona Nia sempre halo tuir.
EPH 1:12 Nia hili ami atu ami nebee fiar uluk ba Kristu bele hahii adora Maromak tanba Nia nee Kbiit Nain!
EPH 1:13 Imi nebee laos ema Judeu mos rona ona Liafuan Diak kona ba Kristu hodi fiar ba Nia. Liafuan nee mak loos, i lori salvasaun ba imi. Bainhira imi fiar ba Kristu, Maromak mos foo Nia Espiritu Santu ba imi tuir Nia promesa uluk. Espiritu Santu nee hanesan sinal ida katak, imi sai tiha ona Kristu nia ema.
EPH 1:14 Tanba Maromak foo ona Nia Espiritu Santu ba ita mak ita laran metin katak, aban-bainrua Nia sei foo tan buat hotu-hotu nebee Nia promete ona. I ita nebee sai ona Nia povu, Nia sei hasai ita husi ita nia sala hotu. Mai ita hahii adora Maromak tanba Nia nee Kbiit Nain!
EPH 1:15 Hau rona dehan, imi fiar metin ba Nai Jesus i hadomi Maromak nia povu hotu. Dezde hau rona nunee,
EPH 1:16 hau sempre foo agradese ba Maromak tanba imi, i bainhira hau halo orasaun, hau sempre husu atu Maromak tulun imi.
EPH 1:17 Nia mak ita nia Nai Jesus Kristu nia Maromak. Nia mak ita nia Aman ida nebee Kbiit Nain. Hau husu atu Nia Espiritu loke imi nia neon i hatudu Maromak ba imi, para imi bele konhese Maromak diak liu tan.
EPH 1:18 Hau harohan atu Maromak foo naroman ba imi para imi bele kompriende buat hotu-hotu nebee Nia promete ona atu foo. Imi hein ho laran metin atu simu buat sira nee tanba Nia bolu ona imi sai Nia ema. Hau mos harohan atu imi kompriende katak, bensaun nebee Maromak promete ona atu foo ba Nia povu nee boot teb-tebes.
EPH 1:19 Hau harohan atu imi bele hatene Maromak nia kbiit. Nia kbiit nee makaas teb-tebes, boot liu hotu-hotu. Hodi kbiit nee mak Nia tulun ita nebee fiar ba Nia. Hodi kbiit ida nee mos
EPH 1:20 Nia halo Kristu moris fali husi mate, i foti Kristu tuur iha Nia sorin loos iha lalehan.
EPH 1:21 Kristu boot liu buat hotu-hotu iha lalehan ho rai. Nia boot liu nai ulun sira, autoridade sira ho espiritu bo-boot sira hotu. Nia naran aas liu see-see deit mak kaer ukun, laos deit sira nebee ukun agora, maibee mos sira nebee sei ukun aban-bainrua.
EPH 1:22 Maromak halo buat hotu-hotu hakruuk ba Kristu, i foti Kristu sai Ulun hodi ukun buat hotu-hotu, atu nunee Nia bele tulun Nia povu.
EPH 1:23 Kristu mak Ulun, i ita sarani sira hanesan Nia isin lolon. Ita simu ita nia moris tomak husi Kristu, nunee mos Kristu foo moris ba buat hotu-hotu iha lalehan ho rai.
EPH 2:1 Uluk imi hanesan mate tiha ona, tanba imi kontra Maromak nia lei i halo sala oi-oin.
EPH 2:2 Iha tempu nebaa imi moris tuir mundu nia hakarak i tuir Satanás nia hakarak. Satanás mak ukun espiritu aat sira, i agora nia servisu hela iha ema sira nebee lakohi tuir Maromak.
EPH 2:3 Uluk ita hotu moris nunee. Ita halo buat aat saida deit mak ita kaan atu halo, i tuir deit ita nia hakarak ho hanoin nebee aat. Tanba nee, Maromak atu kastigu ona ita, hanesan mos Nia atu kastigu ema aat sira seluk.
EPH 2:4 Maibee Maromak hadomi loos ita i hatudu Nia laran luak mai ita.
EPH 2:5 Maski ita hanesan mate tiha ona tanba ita nia sala, maibee Nia halo ita moris fali ona hamutuk ho Kristu. Tanba deit Maromak nia laran diak mak Nia salva ita.
EPH 2:6 Maromak halo moris fali ita hamutuk ho Kristu Jesus i foti ona ita tuur hamutuk ho Nia iha lalehan.
EPH 2:7 Maromak halo nunee para iha tempu oin mai Nia bele hatudu sai Nia laran diak mai ita liu husi Kristu Jesus. Nunee ita ema bele hatene Nia domin nebee boot teb-tebes, ita sukat la bele.
EPH 2:8 Maromak salva imi bainhira imi fiar ba Kristu. Nia salva imi tanba Nia laran diak, laos tanba imi nia diak. Salvasaun nee, Nia foo saugati deit,
EPH 2:9 laos tanba imi nia hahalok diak. Entaun imi ida la bele gaba aan.
EPH 2:10 Ita nee Maromak nia liman fatin. I Kristu Jesus foo moris foun mai ita para ita bele halao buat nebee diak iha ita nia moris loro-loron. Buat diak sira nee, Maromak prepara tiha ona ba ita hori uluk kedas.
EPH 2:11 Imi nebee laos Judeu, imi hatene katak, uluk ema Judeu sira la konsidera imi tanba imi la sunat tuir lei relijiaun Judeu nian. Afinal sunat nee, ema mak halo iha isin lolon deit, nee la muda ema nia laran.
EPH 2:12 Keta haluha, iha tempu nebaa imi dook husi Kristu. Imi hanesan ema lao rai, la iha direitu atu halo parte iha Maromak nia povu Israel, i la tama iha promesa nebee Maromak halo ba sira. Imi hela iha mundu nee, la iha relasaun ida ho Maromak, i la iha esperansa.
EPH 2:13 Maski iha tempu nebaa imi dook husi Maromak, maibee agora imi laran ida ho Kristu Jesus. Nunee Maromak halo ona imi besik malu ho Nia, tanba Kristu nia raan fakar too mate ba imi.
EPH 2:14 Uluk ami ema Judeu ho imi nebee laos Judeu odi malu, nee hanesan moru ida haketak ita. Maibee agora Kristu rasik halo ita dame malu ona. Nia halo rahun tiha moru nee hodi halo ita hotu sai povu ida.
EPH 2:15 Uluk lei relijiaun Judeu ho nia regra bar-barak haketak ema Judeu husi ema seluk. Maibee liu husi Kristu nia mate, Nia halo sistema lei nee la vale ona, atu nunee ema Judeu ho ema nebee laos Judeu hamutuk laran ida ho Nia. Ho nunee Kristu halo povu rua nee sai povu ida nebee moris iha dame nia laran.
EPH 2:16 Entaun Kristu mate iha krus halo povu rua nee sai ida deit, i halo ita mos dame malu ho Maromak, tanba Kristu harahun tiha ona buat hotu-hotu nebee uluk halo ita odi malu.
EPH 2:17 Kristu mai iha mundu hodi foo sai kona ba dame ba imi nebee uluk dook husi Maromak, ho mos ba ami ema Judeu nebee besik Nia.
EPH 2:18 Kristu loke ona dalan ba ita hotu too ba iha Aman Maromak nia futar oin. Atu ita ema Judeu ka laos Judeu, Maromak nia Espiritu tulun ita hotu atu bele hakbesik aan ba Maromak.
EPH 2:19 Entaun, maski uluk imi hanesan ema lao rai i la halo parte iha Maromak nia povu, maibee agora imi sai ona ema rai nain hamutuk ho Nia povu sira seluk. Imi mos sai ona Maromak nia familia uma laran.
EPH 2:20 Nee hanesan Maromak harii uma ida. Kristu Jesus hanesan fatuk prinsipal liu iha uma nee. Nia apostolu sira ho profeta sira nebee tatoli Nia liafuan mak hanesan fatuk nebee Maromak hada nudar alsesu. Depois Nia hada mos imi hamutuk iha fatuk sira nee nia leten.
EPH 2:21 Kristu mak halo uma nee hamriik metin i sae ba beibeik, too sai uma kreda santu ida para ita nia Nai hodi hela.
EPH 2:22 Entaun, tanba imi laran ida ona ho Kristu, Maromak hada mos imi nebee laos Judeu hamutuk ho Nia ema sira seluk, para ita hotu sai Maromak nia Espiritu nia hela fatin.
EPH 3:1 Hau, Paulo agora dadauk dadur hela iha komarka tanba hau halao servisu nebee Kristu Jesus foo mai hau. Servisu nee mak foo sai Liafuan Diak ba imi nebee laos Judeu.
EPH 3:2 Imi rona ona katak, Maromak foo fiar mai hau halo servisu nee ba imi tanba Nia laran diak mai hau.
EPH 3:3 Nia foo sai ona Nia planu segredu mai hau, hanesan hau hakerek tiha ona uitoan iha leten.
EPH 3:4 Bainhira imi lee ona ida nee, imi sei hatene katak hau kompriende Maromak nia planu kona ba Kristu.
EPH 3:5 Uluk segredu nee seidauk foo sai ba ema ida. Maibee agora Maromak foo sai ona liu husi Nia Espiritu ba Nia apostolu sira ho profeta sira.
EPH 3:6 Segredu nee mak nee: Se ema nebee laos Judeu fiar ba Liafuan Diak, entaun sira sei simu bensaun nebee Maromak foo ba Nia oan sira, hanesan mos ema Judeu. Sira ho ema Judeu hamutuk sai povu ida, nee hanesan sira halo parte iha isin lolon ida deit. Sira hotu simu buat nebee mak Maromak promete ona ba Nia povu tanba sira laran ida ho Kristu Jesus.
EPH 3:7 Maromak hatudu Nia laran diak mai hau hodi hili hau foo sai Liafuan Diak. I Nia foo Nia kbiit mai hau para halao servisu nee.
EPH 3:8 Husi Maromak nia ema hotu-hotu, hau mak kiik liu. Maski nunee Maromak foo fiar mai hau para foo hatene ba ema nebee laos Judeu kona ba bensaun boot nebee Kristu foo mai ita. Nia bensaun nee, ita sukat la too.
EPH 3:9 Desde Maromak halo mundu, Maromak nia planu segredu hela. Maibee agora Nia haruka hau esplika ba ema hotu-hotu kona ba oinsaa mak Nia atu halao Nia planu nee.
EPH 3:10 Liu husi Nia povu, Maromak hakarak hatudu Nia matenek klean teb-tebes para espiritu bo-boot sira nebee kaer ukun bele haree.
EPH 3:11 Maromak sei halo buat sira nee hotu tuir planu nebee Nia desidi tiha ona molok Nia halo mundu. I Nia foo planu nee ba Kristu Jesus ita nia Nai mak halao.
EPH 3:12 Ita nebee fiar ona ba Kristu i laran ida ho Nia, la bele tauk atu hakbesik aan ba iha Maromak, tanba odamatan sempre nakloke ba ita.
EPH 3:13 Tanba nee, hau husu ba imi, maski hau hetan terus tanba hau serbi imi nebee laos Judeu, maibee keta laran susar. Tanba hau nia terus nee lori diak ba imi.
EPH 3:14 Bainhira hau hanoin Maromak nia planu furak nee, hau hakneak hodi halo orasaun ba Aman Maromak.
EPH 3:15 Nia mak Aman ba familia hotu-hotu iha lalehan ho rai.
EPH 3:16 Maromak nia kbiit boot teb-tebes. Nunee Hau harohan atu Nia Espiritu foo kbiit ba imi hodi hametin imi nia laran.
EPH 3:17 Hau harohan atu Kristu hela metin iha imi nia laran, tanba imi fiar ba Nia. Hau mos harohan atu domin sai huun ba imi nia moris para imi sai hanesan ai huun nebee hamriik metin tanba nia abut tama klean ba rai.
EPH 3:18 Se nunee, imi hamutuk ho Maromak nia povu sira hotu bele kompriende Kristu nia domin, maski ita ema nunka bele kompriende. Tanba Nia domin nee boot teb-tebes, luan teb-tebes, aas teb-tebes i klean teb-tebes. Hau harohan atu imi bele hatene lo-loos Kristu nia domin nee, atu nunee imi bele hatudu Maromak nia diak ho Nia domin iha imi nia moris tomak.
EPH 3:20 Maromak nia kbiit makaas teb-tebes. Nia bele halo liu fali saida deit mak ita husu ba Nia, i bele halo liu fali saida deit mak ita bele hanoin. Hodi Nia kbiit boot nee mak Nia servisu iha ita nia laran.
EPH 3:21 Mai ita hahii adora Nia, tanba Nia kbiit nebee Nia hatudu ba Nia povu liu husi Kristu Jesus. Mai ita hahii adora Nia, husi jerasaun ba jerasaun, too tinan ba tinan. Amen.
EPH 4:1 Hau dadur hela tanba serbi ita nia Nai. Nunee hau husu boot atu imi bele moris tuir Maromak nia hakarak, tanba Nia bolu ona imi sai Nia ema.
EPH 4:2 Imi tenki moris haraik aan, laran maus, pasiensia ba malu, i hadomi malu. Se ema ruma halo sala hasoru imi, lalika lori ba lia.
EPH 4:3 Espiritu Santu foo ona unidade ba imi. Nee duni hakaas aan atu moris iha dame nia laran, para imi nia unidade nee bele metin nafatin.
EPH 4:4 Ita hamutuk halo parte iha isin lolon ida deit. Ita hotu simu ona Maromak nia Espiritu, Espiritu nee ida deit. Maromak bolu ona ita hotu sai Nia ema, entaun ita nia esperansa ba aban-bainrua mos hanesan.
EPH 4:5 Ita nia Nai ida deit, ita nia fiar ida deit, i ita hotu simu batizmu ida deit.
EPH 4:6 Maromak ida deit, Nia mak ita hotu nia Aman. Nia ukun ita hotu-hotu, Nia halao Nia servisu liu husi ita hotu-hotu, i Nia hela iha ita hotu nia laran.
EPH 4:7 Maski ita hotu ida deit, maibee Kristu fahe kbiit mai ita ida-idak para bele halao Nia servisu.
EPH 4:8 Nee tuir buat nebee hakerek tiha ona iha Livru Sagradu dehan, “Bainhira Nia sae ba iha fatin aas, Nia lori inimigu sira nebee Nia hadau iha funu laran, i Nia fahe prezenti oi-oin ba Nia ema.”
EPH 4:9 Liafuan “Nia sae” nee dehan saida? Nee dehan katak, uluk Nia tuun tiha ona mai iha mundu, iha fatin nebee kraik liu.
EPH 4:10 Ida nebee tuun mai nee, Ida nee mak sae fila fali ba lalehan, iha fatin nebee aas liu, atu nunee fatin nebee-nebee deit, Nia prezensa nakonu iha nebaa. Nia nee mak Kristu.
EPH 4:11 Kristu mak foo kbiit ba Nia ema, atu sira halao servisu nebee Nia fahe ba sira. Nia foti balu sai apostolu. Balu Nia foti sai profeta para tatoli Nia liafuan, balu sai ema nebee foo sai Nia Liafuan Diak ba ema nebee seidauk rona, i balu fali sai bibi atan ho mestri hodi tau matan ba Nia povu i hanorin sira.
EPH 4:12 Nia foti sira nee para sira bele prepara Maromak nia povu atu ita hotu-hotu halao Nia servisu. Ho nunee ita hotu, nudar Kristu nia isin lolon, sai forti ba beibeik,
EPH 4:13 too ita hotu neon ida laran ida fiar ba Maromak nia Oan i konhese di-diak Nia. Too ikus ita laos hanesan labarik tan, maibee sai boot ona, too ita sai hanesan lo-loos Kristu. Entaun, ita nia fiar la nakdoko ona hanesan laloran nebee anin huu ba-mai. Ema bosok-teen mai inventa tuun-sae hanorin buat nebee la loos mos, ita la tuir, ita la monu ba sira nia lia bosok.
EPH 4:15 Maibee ita so koalia buat nebee loos hodi hatudu domin ba malu. Se ita halo nunee, neineik-neineik ita sai hanesan Kristu iha ita nia moris tomak. Kristu nee mak Ulun.
EPH 4:16 I ita hanesan Nia isin lolon. Nia tau ita ida-idak tuir nia fatin, i halo ita hotu iha ligasaun ba malu. Se ita hadomi malu i ida-idak halao nia knaar mak ita hamutuk boot ba dadauk i sai forti.
EPH 4:17 Rona di-diak saida mak hau atu hatete agora, tanba hau koalia hodi Nai Jesus nia naran. Imi la bele moris tan hanesan ema nebee la fiar Maromak. Tanba sira nia hanoin arbiru deit.
EPH 4:18 Sira nia neon nakukun tiha ona. Sira moris dook husi Maromak, tanba sira ulun toos, i lakohi hatene Maromak nia dalan.
EPH 4:19 Sira la iha ona moe. Nee mak sira nia moris hanesan animal. Sira foo sira nia aan ba hahalok aat, i sempre hakarak atu halo sala tan.
EPH 4:20 Maibee bainhira imi aprende kona ba Kristu, imi nunka aprende atu moris aat hanesan nee!
EPH 4:21 Tanba hau hatene katak, ema nebee uluk hanorin imi kona ba Kristu, hanorin buat nebee mak loos.
EPH 4:22 Uluk imi hakarak halo buat aat oi-oin, i imi nia hakarak nee lohi imi, too estraga imi nia aan. Maibee ema nebee hanorin imi kona ba Kristu, sira haruka imi husik tiha imi nia moris uluk nee,
EPH 4:23 i foo fatin ba Maromak para halo foun imi nia neon ho laran.
EPH 4:24 Imi nia moris tomak tenki sai foun, tanba Maromak halo imi sai foun tiha ona para imi bele moris loos ho laran moos hanesan Nia.
EPH 4:25 Nee duni la bele bosok tan. Imi koalia ba malu, tenki koalia loos, tanba ita hotu halo parte iha isin lolon ida.
EPH 4:26 Se imi hirus, keta husik hirus nee lori imi ba sala, i la bele rai hirus too loro matan monu,
EPH 4:27 atu nunee imi la foo fatin ba diabu.
EPH 4:28 Ema nebee naok-teen, la bele naok tan ona. Maibee nia tenki servisu ho nia liman rasik atu nia bele iha buat ruma para fahe ba ema kiak sira.
EPH 4:29 Bainhira imi koalia, la bele koalia liafuan aat. Maibee koalia deit liafuan diak nebee ema presiza rona, para hametin sira nia laran, atu nunee imi nia liafuan bele ajuda sira.
EPH 4:30 La bele halo Maromak nia Espiritu Santu tristi. Tanba Espiritu Santu nee Maromak foo hanesan marka ida hodi hatudu katak, imi nee Maromak nian i loron ida Maromak sei hasai imi husi imi nia sala hotu.
EPH 4:31 La bele ona rai odi ba ema. La bele hirus. La bele hakilar ema. La bele istori malu. La bele hatete aat ema. I la bele halo buat aat saida deit.
EPH 4:32 Maibee imi tenki hadomi malu, i halo diak ba malu. Imi tenki foo perdaun ba malu, hanesan Maromak mos foo ona perdaun ba imi liu husi Kristu nia mate.
EPH 5:1 Imi Maromak nia oan doben. Nee duni moris tuir Nia ezemplu.
EPH 5:2 Moris iha domin nia laran, hanesan mos Kristu hadomi ita, too Nia foo Aan ba mate hodi troka ita. Ho Nia mate nee Nia sai hanesan sakrifisiu morin nebee halo haksolok Maromak nia laran.
EPH 5:3 Imi Maromak nia ema. Nee duni la bele halo sala seksual. Atu hanoin deit hahalok foer sira nee mos, la bele. La bele kaan ema nia sasaan.
EPH 5:4 La bele tolok, ka koalia nar-naran, ka konta liafuan aat, tanba buat sira nee la serve atu Maromak nia ema koalia. Maibee foo agradese ba Maromak.
EPH 5:5 Hanoin di-diak! Ema nebee halo sala seksual ka halo sala foer ka kaan ema nia sasaan, sira sei la halo parte iha Kristu ho Maromak nia reinu. Tanba sira adora buat sira nee hanesan fali sira nia maromak.
EPH 5:6 Karik ema ruma lohi imi dehan sala sira nee la buat ida, keta fiar. Tanba hahalok aat sira nee halo Maromak hirus teb-tebes hodi foo kastigu ba ema nebee la tuir Nia hakarak.
EPH 5:7 Nee duni la bele liga ema nebee moris hanesan nee.
EPH 5:8 Uluk imi moris iha nakukun laran. Maibee agora, imi laran ida ho Nai Jesus i tama ona iha naroman. Nee mak imi tenki moris hanesan ema naroman nian.
EPH 5:9 Ema nebee moris iha naroman, nia sei halo buat diak, moris loos, i koalia loos.
EPH 5:10 Hakaas aan buka hatene oinsaa mak imi bele halo haksolok Nai Maromak nia laran.
EPH 5:11 La bele halo parte iha hahalok nakukun nian, hahalok aat nee la iha folin ida. Buat nebee ema halo sub-subar nee aat teb-tebes, ita atu koalia mos, ita moe. Diak liu imi hatete sai katak hahalok nakukun nian nee sala.
EPH 5:13 Nee hanesan naroman leno buat nebee iha nakukun laran, atu ema bele haree buat hotu ho mo-moos.
EPH 5:14 Tanba naroman halo buat hotu-hotu sai klaru. Iha kantiku ida dehan, “Imi nebee dukur, hadeer ona ba; imi nebee mate, moris fali ona ba. I Kristu sei foo naroman ba imi.”
EPH 5:15 Tanba nee, kuidadu di-diak imi nia moris. La bele moris hanesan ema beik, maibee tenki moris hanesan ema matenek.
EPH 5:16 Ohin loron ema barak halo buat aat. Nee duni kuandu iha oportunidade saida deit para halo diak ba ema, halo ona ba.
EPH 5:17 Keta beik-teen, maibee hakaas aan atu kompriende saida mak ita nia Nai hakarak.
EPH 5:18 La bele tua lanu. Se lae, tua nee mak domina fali imi too imi halo buat aat oi-oin. Maibee husik Espiritu Santu mak domina imi.
EPH 5:19 Bainhira imi koalia ba malu, temi liafuan husi hananu oi-oin, hanesan husi livru Salmus, kanta nebee Espiritu Santu foo, ho hananu seluk nebee adora Maromak. Hananu hahii ita nia Nai ho laran tomak.
EPH 5:20 Iha situasaun saida deit, sempre agradese ba Aman Maromak ba buat hotu-hotu hodi ita nia Nai Jesus Kristu nia naran.
EPH 5:21 Imi hotu-hotu tenki hakruuk ba malu tanba imi respeita Kristu.
EPH 5:22 Imi feen sira, hakruuk ba imi nia laen, hanesan mos imi hakruuk ba Nai Jesus.
EPH 5:23 Tanba laen nudar ulun ba nia feen, hanesan mos Kristu mak Ulun ba Nia povu. Nia povu hanesan Nia isin lolon, i Nia mak salva sira.
EPH 5:24 Kristu nia povu hakruuk ba Nia. Nunee mos, feen sira tenki hakruuk ba sira nia laen iha buat hotu-hotu.
EPH 5:25 Imi laen sira mos tenki hadomi imi nia feen, hanesan Kristu hadomi Nia povu, too Nia entrega Nia Aan ba mate iha sira nia fatin,
EPH 5:26 para halo sira moris ho laran moos. Nia fase moos sira nia laran bainhira sira rona Nia liafuan i sarani ho bee.
EPH 5:27 Kristu halo nunee para Nia bele aprezenta Nia povu ba Nia Aan rasik hanesan feto raan ida nebee kapaas teb-tebes. Sira la iha foer ka noda i la namkurut, maibee laran moos i livre husi sala.
EPH 5:28 Nunee mos, imi laen sira tenki hadomi imi nia feen hanesan imi hadomi imi nia isin lolon rasik. See mak hadomi nia feen, nia hadomi nia aan.
EPH 5:29 La iha ema ida odi nia aan, maibee nia foo haan i kuidadu di-diak, hanesan Kristu mos kuidadu Nia povu,
EPH 5:30 tanba ita hanesan Nia isin lolon.
EPH 5:31 Iha Livru Sagradu hakerek dehan, “Tanba nee, mane tenki husik nia inan-aman, para baa moris laran ida ho nia feen, i sira nain rua sai ona ida.”
EPH 5:32 Liafuan nee klean teb-tebes, i tuir hau haree, hatudu mos ba Kristu ho Nia povu.
EPH 5:33 Nee duni laen ida-idak tenki hadomi nia feen hanesan nia hadomi nia aan rasik. I feen ida-idak mos tenki respeita nia laen.
EPH 6:1 Oan sira, nudar ema nebee tuir Nai Jesus, imi tenki rona imi nia inan-aman, tanba hahalok ida nee mak loos.
EPH 6:2 Husi ukun fuan sanulu, iha ida dehan, “O tenki respeita o nia inan-aman.” Husi ukun fuan sira nee, too iha ida nee mak Maromak foin foo promesa ba ema nebee halo tuir.
EPH 6:3 Nia promete dehan, “Se halo nunee, o sei moris diak i hetan vida naruk iha rai nee.”
EPH 6:4 Aman sira, la bele siak hela deit imi nia oan sira halo sira laran moras. Maibee tau matan di-diak ba sira husi kiik kedas hodi hanorin sira i foo hanoin ba sira tuir ita nia Nai nia hakarak.
EPH 6:5 Atan sira, imi tenki halo tuir orden nebee imi nia patraun iha mundu nee foo ba imi, hanesan imi halo tuir Kristu nia hakarak. Imi tenki respeita sira, rona sira, i servisu ba sira ho laran.
EPH 6:6 Nudar Kristu nia atan, imi la bele servisu hodi buka oin deit. Atu patraun iha ka la iha, imi tenki servisu ho lo-loos hodi halo tuir Maromak nia hakarak ho laran tomak.
EPH 6:7 Halo imi nia servisu ho haksolok, hanesan imi serbi ba Nai Jesus, laos ba ema deit.
EPH 6:8 Keta haluha katak, atu atan ka laos atan, se ita halo diak, aban-bainrua ita nia Nai sei selu fali ita nia kolen tuir buat diak nebee ita halo.
EPH 6:9 Patraun sira, imi mos tenki haree imi nia atan sira ho diak. La bele ameasa sira. Tanba imi hatene katak, sira ho imi iha Patraun ida deit iha lalehan, i Patraun nee la fihir oin.
EPH 6:10 Hau nia liafuan ikus mak nee: Sai forti ba! Tanba imi laran ida ho ita nia Nai, i Nia kbiit makaas teb-tebes foo forsa mai ita.
EPH 6:11 Imi tenki uza ekipamentu funu nian kompletu nebee Maromak foo ba imi, para imi bele hamriik metin hodi hasoru diabu nia manobra.
EPH 6:12 Tanba ita funu, laos hasoru ema. Maibee ita funu hasoru diabu bo-boot nebee ita la haree ho matan, hasoru espiritu aat oi-oin nebee ukun iha nakukun laran.
EPH 6:13 Nee duni imi tenki uza ekipamentu funu nian tomak nebee Maromak foo. Nunee bainhira loron aat nee too mai, imi bele tuba rai metin. I kuandu imi funu hotu ona, imi sei hamriik metin nafatin.
EPH 6:14 Entaun, hamriik metin ba. Kaer metin lia loos, nee hanesan imi kesi sintu iha imi nia kanotak. Moris loos, nee hanesan imi taka besi belar iha hirus matan para defende aan.
EPH 6:15 Imi tenki prontu foo sai Liafuan Diak kona ba oinsaa bele dame malu ho Maromak, nee hanesan imi tau sapatu tropas nian.
EPH 6:16 Imi mos tenki kaer metin nafatin imi nia fiar ba Jesus, nee hanesan imi kaer besi kabelak hodi defende imi nia aan. Nunee bainhira Satanás hana rama ahi ba imi, la borus, i ahi nee mate kedas.
EPH 6:17 Laran metin ba, katak Maromak salva tiha ona imi, nee hanesan imi taka kapaseti besi. Kaer metin Maromak nia liafuan, nee hanesan surik ida nebee Espiritu Santu foo ba imi.
EPH 6:18 Halo orasaun loron-kalan ho Espiritu Santu nia tulun. Iha situasaun saida deit, husu Maromak nia ajuda. Matan moris neon nain nafatin, i sempre halo orasaun ba Maromak nia povu hotu-hotu.
EPH 6:19 Keta haluha halo orasaun mos mai hau, para bainhira hau loke hau nia ibun, Maromak foo liafuan mai hau, atu hau bele foo sai segredu Liafuan Diak nian ho brani.
EPH 6:20 Jesus foti hau sai Nia embaixador para foo sai Liafuan Diak nee. Tanba nee mak agora hau dadur hela iha kadeia. Nee duni harohan mai hau, atu hau bele foo sai Nia Liafuan ho brani, tanba ida nee mak hau nia obrigasaun duni.
EPH 6:21 Hau haruka Tíkiku ba imi, para konta buat hotu-hotu kona ba hau, atu imi bele hatene kona ba hau nia situasaun ho hau nia servisu. Tíkiku nee ita nia irmaun doben, i nia badinas halao ita nia Nai nia servisu.
EPH 6:22 Hau haruka nia ba imi, atu nia bele konta kona ba ami nia moris iha nee, i bele hametin imi nia laran.
EPH 6:23 Maun-alin sira, hau harohan ba ita nia Aman Maromak ho Jesus Kristu ita nia Nai, para Sira foo pas ho hakmatek ba imi, i tulun imi atu hadomi malu i fiar nafatin ba Kristu.
EPH 6:24 Hau mos harohan atu Maromak hatudu Nia laran diak ba ema hotu-hotu nebee hadomi ita nia Nai Jesus Kristu ho domin ida nebee la iha rohan.
PHI 1:1 Surat nee husi Paulo ho Timóteo, Kristu Jesus nia atan. Ami haruka surat nee ba Kristu Jesus nia ema hotu iha sidade Filipi, ba responsavel sarani sira ho mos ba ema nebee ajuda responsavel sira.
PHI 1:2 Ami harohan ba ita nia Aman Maromak ho Nai Jesus Kristu para hatudu Sira nia laran diak ba imi, i foo pas ho hakmatek ba imi.
PHI 1:3 Bainhira hau hanoin imi, hau sempre agradese ba Maromak.
PHI 1:4 Hau sempre halo orasaun ba imi hotu ho laran haksolok,
PHI 1:5 tanba husi loron primeiru imi simu Maromak nia Liafuan Diak too agora, imi ajuda hau hodi foo sai Liafuan Diak nee.
PHI 1:6 Maromak hahuu ona halo servisu diak iha imi. I hau laran metin katak, Nia sei kontinua nafatin too Nia servisu nee hotu iha loron nebee Kristu Jesus fila fali mai husi lalehan.
PHI 1:7 Hau senti nunee kona ba imi tanba imi iha hau nia laran, tanba Maromak foo fiar ba imi atu servisu hamutuk ho hau. Bainhira Hau defende Nia Liafuan Diak hodi hatudu ba ema katak Liafuan nee loos, imi sempre halo parte iha servisu nee. Bainhira hau iha dadur laran mos, imi halo parte nafatin.
PHI 1:8 Maromak rasik hatene katak, hau hakarak teb-tebes atu haree imi, i hau hadomi imi hanesan Kristu Jesus mos hadomi imi.
PHI 1:9 Hau halo orasaun ba Maromak para imi nia domin bele buras ba beibeik. Hau mos harohan atu Nia aumenta beibeik matenek ba imi hodi halo imi hatene saida mak loos, saida mak sala.
PHI 1:10 Nunee imi bele hili saida mak diak hodi moris loos i livre husi sala too Kristu fila fali mai.
PHI 1:11 Liu husi Jesus Kristu nia tulun, imi sei hatudu hahalok diak iha imi nia moris tomak. Ho nunee, ema sei hahii Maromak i foti aas Nia naran.
PHI 1:12 Maun-alin sira, hau hakarak atu imi hatene katak, maski ema halo susar hau, maibee hau nia terus nee halo ema barak liu tan fiar ba Jesus nia Liafuan Diak.
PHI 1:13 Seguransa sira iha rezidensia nai ulun nian ho ema sira seluk iha nee mos hatene katak, hau dadur hela tanba serbi Kristu.
PHI 1:14 Tanba hau iha dadur laran mos, sarani sira barak liu mak laran metin ba Nai Jesus. Agora sira brani liu, i la tauk tan atu foo sai Maromak nia liafuan.
PHI 1:15 Iha ema balu foo sai kona ba Kristu ho hanoin nebee diak, maibee iha mos balu halo nunee tanba sira laran moras hau i hakarak para ema tuir deit sira.
PHI 1:16 Sira nebee ho hanoin diak, sira foo sai kona ba Kristu tanba sira hadomi hau. Sira hatene katak, Maromak tau hau iha fatin nee para defende Liafuan Diak.
PHI 1:17 Maibee sira nebee laran moras hau, sira foo sai kona ba Kristu para buka naran deit, laos ho objetivu nebee diak. Sira hanoin atu foo todan liu tan mai hau iha kadeia nee.
PHI 1:18 Maibee husik deit ba. Ema atu hanorin ho laran moos ka la moos, la buat ida, naran katak sira hanorin kona ba Kristu. Ida nee mak halo hau nia laran haksolok. Hau sei haksolok nafatin,
PHI 1:19 tanba hau hatene katak, ho imi nia orasaun mai hau, ho mos Jesus Kristu nia Espiritu nia tulun, too ikus Maromak sei salva hau.
PHI 1:20 Hau hakarak ho laran metin atu hau brani nafatin foo sasin kona ba Kristu, hanesan mos uluk, atu hau moris ka hau mate, hau foti aas nafatin Kristu nia naran. Se nunee, hau la moe.
PHI 1:21 Ba hau, se hau moris, hau moris ba Kristu. Se hau mate, nee diak liu tan.
PHI 1:22 Se karik hau moris nafatin iha mundu nee, hau bele halo servisu nebee iha folin. Entaun hau la hatene atu hili moris ka hili mate.
PHI 1:23 Susar atu hili ida nebee. Hau hakarak atu husik tiha mundu nee hodi baa moris hamutuk ho Kristu, tanba ida nee mak diak liu ba hau.
PHI 1:24 Maibee imi sei presiza hau, entaun diak liu hau hela lai iha mundu.
PHI 1:25 Tanba imi presiza mak hau laran metin katak, hau sei moris nafatin iha mundu. Hau sei hamutuk ho imi atu imi nia fiar ba Maromak bele buras i imi bele haksolok liu tan.
PHI 1:26 Nunee imi sei foti aas Kristu Jesus nia naran, tanba Nia mak loke dalan atu hau bele baa haree fali imi.
PHI 1:27 Bele halo nusaa mos, imi tenki moris tuir lo-loos Kristu nia Liafuan Diak. Nunee se hau rasik baa vizita fali imi ka rona deit husi ema mos, hau bele hatene katak, imi hamriik metin ho neon ida laran ida. I hau bele hatene katak, imi hotu servisu makaas para ema seluk mos fiar ba Liafuan Diak nee.
PHI 1:28 Bainhira ema kontra imi, la bele tauk sira. Imi nia brani nee sei hatudu ba sira katak, Maromak rasik sei salva imi maibee sei halo lakon tiha sira.
PHI 1:29 Maromak hatudu ona Nia laran diak ba imi hodi loke dalan ba imi para fiar ba Kristu. Laos nee deit, maibee Nia mos bolu imi atu terus tanba tuir Nia.
PHI 1:30 Imi nia luta hanesan ho hau nia luta. Uluk imi haree hau luta ba Kristu, i agora mos imi rona dehan hau luta nafatin.
PHI 2:1 Imi laran metin tanba imi sai ona ida ho Kristu. Imi nia laran hakmatek tanba Kristu hadomi imi. Imi lao hamutuk ho Maromak nia Espiritu. Imi hatudu laran diak ba malu, i hadomi malu.
PHI 2:2 Imi moris nunee, halo hau nia laran haksolok. Agora hau husu atu imi hanoin ida deit, i hadomi malu ho neon ida laran ida atu nunee hau bele haksolok liu tan.
PHI 2:3 La bele halo saida deit hodi buka naran. La bele foti aan, maibee tenki haraik aan hodi konsidera ema seluk diak liu fali imi.
PHI 2:4 La bele servisu deit ba imi nia interese privadu, maibee imi ida-idak mos tenki haree ba ema seluk nia interese.
PHI 2:5 Imi tenki haraik aan hanesan Kristu Jesus.
PHI 2:6 Nia nee Maromak. Maski nunee Nia prontu husik Nia pozisaun nudar Maromak.
PHI 2:7 Nia husik tiha buat hotu-hotu hodi sai ema i moris hanesan atan.
PHI 2:8 Nia sai tiha ema, Nia haraik Aan hodi moris tuir Maromak nia hakarak too foo Aan ba mate iha krus hanesan fali ema aat ida.
PHI 2:9 Tanba nee, Maromak foti aas Nia liu buat hotu-hotu, i foo ba Nia, naran ida nebee boot liu naran hotu-hotu.
PHI 2:10 Maromak halo nunee atu kriatura hotu-hotu iha lalehan ho iha rai, ho mos iha ema mate nia fatin, hakneak hodi adora Jesus.
PHI 2:11 Hotu-hotu sei hatete, “Jesus Kristu mak Nai!” Ho nunee sira foti aas Aman Maromak nia naran.
PHI 2:12 Maluk doben sira, uluk hau sei hamutuk ho imi, imi sempre halo tuir Maromak nia hakarak. Agora ita dook malu, imi tenki halo tuir liu tan. Maromak salva tiha ona imi. Atu salvasaun nee too iha rohan, imi tenki hakaas aan nafatin atu moris tuir Maromak nia hakarak hodi hamtauk ho respeita Nia.
PHI 2:13 Tanba Maromak rasik servisu iha imi nia laran. Nia halo imi prontu atu tuir Nia hakarak, i foo mos kbiit ba imi atu bele halo tuir.
PHI 2:14 Imi halo saida deit, la bele murmura, i la bele istori malu.
PHI 2:15 Nunee, nudar Maromak nia oan, imi bele moris ho laran moos, livre husi sala, buat aat ida mos la iha. Imi moris iha ema aat sira nia leet. Entaun imi tenki sai hanesan fitun iha lalehan hodi foo naroman ba sira.
PHI 2:16 Hatoo ba sira, Maromak nia liafuan nebee foo moris. Se imi halo nunee, entaun aban-bainrua Kristu fila fali mai husi lalehan, hau nia laran sei haksolok, tanba hau nia servisu ho hau nia kolen la saugati.
PHI 2:17 Tanba imi fiar ba Kristu, imi mos serbi Maromak hodi entrega imi nia aan tomak sai hanesan sakrifisiu ba Nia. Se hau tenki mate tanba tuir Kristu, bele dehan hau nia raan tau tan ba imi nia sakrifisiu nee hodi oferese ba Maromak. Se nunee mos, hau nia laran haksolok hamutuk ho imi.
PHI 2:18 Imi mos tenki haksolok hamutuk ho hau.
PHI 2:19 Hau hein katak, la kleur tan Nai Jesus foo dalan atu hau haruka Timóteo baa iha imi. Bainhira nia fila fali mai, nia bele konta mai hau kona ba imi, nunee halo hau nia laran haksolok.
PHI 2:20 Iha nee la iha ema seluk hanesan Timóteo. So nia deit mak iha interese teb-tebes ho imi.
PHI 2:21 Sira seluk so hanoin deit sira nia aan. Buat nebee Jesus Kristu hakarak, sira la interese.
PHI 2:22 Maibee imi rasik hatene, Timóteo servisu makaas hodi foo sai Liafuan Diak. Nia servisu hamutuk ho hau, hanesan oan ida servisu ho nia aman.
PHI 2:23 Nee duni hau hakarak hein too hau rona buat nebee mak atu akontese mai hau, depois mak hau haruka kedas nia ba imi.
PHI 2:24 I Nai Jesus halo hau laran metin katak, la kleur tan, hau mos bele baa vizita imi.
PHI 2:25 Uluk imi hili Epafroditu para mai tau matan ba hau. Durante nee nia sai hanesan hau nia alin ida hodi halao Maromak nia servisu hamutuk ho hau, i nia luta hamutuk ho hau hanesan funu nain ida. Maibee agora, hau hanoin hau tenki haruka nia fila fali ba imi.
PHI 2:26 Tanba nia hanoin teb-tebes imi hotu-hotu, i nia mos preokupa hela tanba imi rona dehan nia moras.
PHI 2:27 Loos duni, momentu nebaa, nia moras todan besik atu mate, maibee Maromak hatudu Nia laran luak ba nia hodi kura nia moras. Hanesan nee Maromak mos hatudu Nia laran luak mai hau, para hau la bele tristi liu tan.
PHI 2:28 Tanba nee mak hau hakarak liu tan haruka Epafroditu fila fali ba imi, para imi haree nia, imi haksolok, i hau mos laran hakmatek.
PHI 2:29 Imi tenki simu nia ho haksolok teb-tebes, nudar imi nia maluk sarani. I imi mos tenki respeita ema hotu nebee hahalok hanesan nia.
PHI 2:30 Tanba nia halao Kristu nia servisu too nia besik atu mate. Nia foo aan ba mate, para bele ajuda hau hodi imi nia fatin.
PHI 3:1 Maun-alin sira, haksolok ba, tanba imi laran ida ho Nai Jesus. Maski hau hakerek fali buat nebee uluk hau hakerek tiha ona, maibee hau la baruk foo hanoin ba imi dala ida tan, atu imi keta monu ba ema nia liafuan bosok.
PHI 3:2 Kuidadu ho asu sira nee! Ema sira nee halo buat aat hodi bosok dehan tenki sunat mak foin Maromak simu ita.
PHI 3:3 Afinal ita nee mak Maromak nia ema. Ita mak adora Maromak hodi Nia Espiritu nia tulun. Ita foti aas Kristu Jesus nia naran, i la depende ba saida deit mak ita ema halo.
PHI 3:4 Se karik Maromak bele simu ita tanba ita nia hahalok ka ita nia huun, entaun hau rasik bele dehan, hau loos tiha ona. Karik ema seluk gaba aan kona ba buat sira nee, hau bele gaba aan liu fali nia.
PHI 3:5 Hau moris mai, iha loron walu ema sunat hau tuir lei relijiaun. Hau ema Ebreu isin, husi suku Benjamim, husi ema Israel. Uluk hau seidauk tuir Kristu, hau nudar ema grupu Farizeu badinas teb-tebes halo tuir lei relijiaun,
PHI 3:6 too la iha ema ida foo sala mai hau. Laos nee deit, iha tempu nebaa hau mos halo terus sarani sira, tanba hau hanoin ema sira nee soe tiha ona ita nia lei relijiaun.
PHI 3:7 Uluk hau hanoin dehan, buat sira nee folin boot mai hau. Maibee agora hau konsidera la iha folin ida, tanba hau tuir Kristu.
PHI 3:8 Ida nebee hau konsidera folin boot liu mak nee: Hau bele konhese Kristu Jesus hau nia Nai. Buat sira seluk, hau husik tiha ona, i konsidera hanesan lixu deit, para hau bele besik liu Kristu,
PHI 3:9 i bele laran ida ho Nia. Maromak simu hau laos tanba hau tuir lei relijiaun, maibee tanba hau fiar ba Kristu. Tanba hau nia fiar mak Maromak simu hau.
PHI 3:10 Hau hakarak konhese Kristu liu tan. Hau hakarak para Maromak servisu iha hau nia laran ho kbiit ida nebee Nia uza hodi halo Kristu moris fali husi mate. Hau hakarak halo parte iha Kristu nia terus. Kona ba mate mos, hau hakarak sai hanesan Nia.
PHI 3:11 Tanba hau laran metin katak, aban-bainrua Nia sei halo moris fali hau husi mate.
PHI 3:12 Hau laos hatete katak, hau hetan ona buat sira nee ka hau moris loos ona. Maibee hau hakaas aan nafatin atu moris tuir Kristu Jesus nia hakarak, tanba ho objetivu nee mak Nia hili hau sai Nia ema.
PHI 3:13 Maun-alin sira, hau la hanoin katak hau too ona objetivu nee. Maibee buat nebee hau halo mak nee: Hau haluha tiha buat nebee iha kotuk hodi halai makaas ba oin.
PHI 3:14 Hau hakaas aan ba oin nafatin too rohan para manaan premiu. Hau nia premiu mak nee: Aban-bainrua Maromak bolu hau tama iha lalehan, tanba Kristu Jesus mate mai hau.
PHI 3:15 Tuir loos ita hotu nebee abut metin ona iha Kristu, tenki hanoin hanesan nee. Maibee se imi balu iha hanoin ruma la hanesan mak Maromak sei foo hanoin ba nia.
PHI 3:16 Bele halo nusaa mos, ita tenki halo tuir buat hotu nebee Maromak hatudu ona mai ita.
PHI 3:17 Maun-alin sira, imi tenki moris tuir hau nia ezemplu, i aprende di-diak husi ema seluk nebee tuir ona ezemplu nebee hau foo.
PHI 3:18 Hau hatete dala barak ona ba imi katak, iha ema barak moris hanesan Kristu nia inimigu, sira la foo folin ba Nia mate iha krus. Agora hau foo hanoin tan ho matan been.
PHI 3:19 Too ikus Maromak sei halo lakon tiha ema sira nee. Sira so buka halo kontenti deit sira nia isin. Hahalok aat nebee sira halo, tuir loos halo ema moe, maibee sira tebe rai dehan, diak loos. Sira hanoin deit buat mundu nian.
PHI 3:20 Maibee ita nee sai ona ema lalehan nian. Agora ita hein ho laran metin ita nia Salvador Nai Jesus Kristu tuun fila fali mai husi lalehan.
PHI 3:21 Bainhira Nia mai, Nia sei troka ita nia isin lolon mundu nian nebee fraku nee sai fali isin lolon lalehan nian nebee forti, hanesan Nia isin lolon rasik. Nia bele halo ida nee tanba Nia iha kbiit hodi ukun buat hotu-hotu.
PHI 4:1 Tanba nee, maun-alin doben sira, imi tenki hamriik metin ho Nai Jesus. Hau hakarak teb-tebes atu haree imi, tanba imi hanesan premiu ida husi hau nia servisu, i imi halo hau nia laran haksolok.
PHI 4:2 Hau husu boot ba Evódia ho Síntike atu imi nain rua la bele istori malu tan, maibee tenki neon ida laran ida, tanba imi nain rua Nai Jesus nia ema.
PHI 4:3 Hau nia kolega servisu nebee hau konfia, hau husu o ajuda hela senhora nain rua nee atu dame malu. Tanba uluk sira servisu makaas ajuda hau foo sai Liafuan Diak, hamutuk ho Clemente ho kolega sira seluk. Sira hotu nia naran, Maromak hakerek tiha ona iha lista ema moris rohan-laek nian.
PHI 4:4 Loron-kalan haksolok deit ba, tanba imi Nai Jesus nia ema. Dala ida tan hau hatete: Haksolok nafatin ba!
PHI 4:5 Hatudu laran maus ba ema hotu-hotu, tanba Nai Jesus besik fila mai ona.
PHI 4:6 La bele preokupa kona ba saida deit. Maibee iha situasaun nebee deit, halo orasaun ba Maromak. Saida mak imi presiza, hatoo ba Nia hodi husu Nia tulun i foo agradese ba Nia.
PHI 4:7 Se imi halo nunee, Maromak sei halo imi nia laran hakmatek. Hakmatek nebee Nia foo nee, ita ema la bele kompriende too iha nebaa. Ho hakmatek nee, Maromak sei kuidadu imi nia neon ho laran para imi la bele preokupa ona, tanba imi Kristu Jesus nia ema.
PHI 4:8 Entaun, maun-alin sira, imi tenki kuidadu di-diak imi nia hanoin. Hanoin beibeik kona ba buat nebee mak loos, ho buat nebee iha valor. Hanoin kona ba buat nebee moos i halo haksolok Maromak nia laran, ho buat furak nebee foo ksolok ba ema. Saida deit mak diak teb-tebes i saida deit mak ita bele gaba, nee mak imi tenki hanoin.
PHI 4:9 Halo tuir buat nebee imi aprende ona husi hau, liu husi hau nia liafuan ka hau nia hahalok. Kuandu imi halo nunee mak Maromak Dame Nain sei akompanha imi.
PHI 4:10 Hau haksolok teb-tebes hodi hahii Nai Jesus, tanba dala ida tan imi ajuda hau. Hau hatene katak, uluk kedas imi hadomi hau, maibee kleur ona imi la iha oportunidade hodi tulun.
PHI 4:11 Hau hatete nunee laos tanba hau falta buat ruma. Hau aprende ona moris kontenti ho buat nebee mak hau iha.
PHI 4:12 Hau hatene oinsaa moris iha susar nia laran, i hatene mos moris ho buat hotu-hotu kompletu. Hau aprende ona segredu nee: Oinsaa bele moris ho kontenti iha situasaun saida deit. Atu bosu ka hamlaha, atu iha buat barak ka iha deit uitoan, hau kontenti nafatin.
PHI 4:13 Hau bele hasoru situasaun saida deit tanba Kristu mak foo forsa mai hau.
PHI 4:14 Maski nunee foin dadauk imi ajuda hau iha susar laran, nee buat diak ida.
PHI 4:15 Uluk mos, bainhira imi foin simu Liafuan Diak, i hau sai husi provinsia Masedónia, so imi iha sidade Filipi deit mak foo ajuda mai hau. Sarani sira seluk lae. Maibee imi hatene ona istoria nee.
PHI 4:16 Bainhira hau sei iha sidade Tesalónika mos, imi haruka osan mai hau dala rua hodi suporta hau.
PHI 4:17 Hau koalia hanesan nee laos tanba hau hakarak atu imi foo tan. Maibee hau hakarak para Maromak foo bensaun ba imi tanba imi nia laran diak.
PHI 4:18 Hau simu ona ajuda hotu-hotu nebee imi haruka mai hau liu husi Epafroditu. Agora hau la falta buat ida, i sei iha resin tan. Imi nia tulun nee hanesan sakrifisiu morin ida nebee imi foo ba Maromak, Nia simu ho laran haksolok.
PHI 4:19 Hau nia Maromak riku teb-tebes. I Nia sei foo ba imi, buat hotu-hotu nebee imi presiza, tanba imi laran ida ho Kristu Jesus.
PHI 4:20 Mai ita hahii adora ita nia Aman Maromak too tinan ba tinan nafatin! Amen.
PHI 4:21 Hatoo hau nia kumprimentus ba Kristu Jesus nia ema hotu-hotu iha nebaa. Maluk sarani sira nebee hamutuk ho hau,
PHI 4:22 ho mos sarani sira seluk iha sidade nee, liu-liu sira nebee servisu iha liurai boot César nia uma, sira hotu hatoo kumprimentus.
PHI 4:23 Hau harohan atu Nai Jesus Kristu hatudu Nia laran diak ba imi hotu.
COL 1:1 Surat nee husi hau, Paulo hamutuk ho ita nia maluk sarani Timóteo. Maromak foti hau sai Kristu Jesus nia apostolu.
COL 1:2 Ami haruka surat nee ba maluk sarani sira iha sidade Kolose. Imi Maromak nia povu, i tuir Kristu ho laran tomak. Ami harohan ba ita nia Aman Maromak para hatudu Nia laran diak ba imi, i foo pas ho hakmatek ba imi.
COL 1:3 Bainhira ami halo orasaun ba imi, ami sempre agradese ba Maromak, ita nia Nai Jesus Kristu nia Aman.
COL 1:4 Ami agradese ba Nia tanba ami rona dehan, imi fiar ba Kristu Jesus i hadomi Maromak nia povu hotu.
COL 1:5 Imi nia fiar ho imi nia domin nee buras tanba imi hein ho laran metin atu simu bensaun nebee mak Maromak prepara tiha ona ba imi iha lalehan. Imi rona kona ba bensaun nee bainhira imi rona Liafuan Diak kona ba Jesus. Liafuan nee mak loos,
COL 1:6 i buras ba beibeik hodi muda ema nia moris iha fatin bar-barak. Nunee mos muda imi nia moris, komesa husi loron primeiru imi rona Liafuan Diak nee hodi kompriende lo-loos Maromak nia laran diak.
COL 1:7 Imi aprende Liafuan Diak nee husi ita nia maluk doben Epafras. Nia Kristu nia atan hanesan mos ami, i nia badinas halao Kristu nia servisu iha imi nia leet.
COL 1:8 Nia mak konta mai ami katak, imi hadomi malu tuir domin nebee mak Maromak nia Espiritu foo ba imi.
COL 1:9 Tanba nee, hahuu husi loron primeiru ami rona kona ba imi, ami halo orasaun beibeik ba imi. Ami husu ba Maromak atu imi bele hetan matenek hodi kompriende buat barak, tuir Espiritu Santu hanorin imi, atu nunee imi bele hatene lo-loos Nia hakarak.
COL 1:10 Ho nunee, imi nia moris sei foti aas Nai Jesus nia naran, i sempre halo haksolok Nia laran. Imi mos sei halo diak beibeik ba ema, i konhese Maromak diak liu tan.
COL 1:11 Ami harohan atu Maromak Kbiit Nain foo kbiit ba imi, para imi bele iha forsa hodi aguenta ho pasiensia iha terus laran.
COL 1:12 Ami harohan atu imi foo agradese beibeik ba Aman Maromak ho laran haksolok. Nia mak loke dalan para imi bele simu bensaun nebee mak Nia prepara tiha ona ba Nia povu iha lalehan. Nia hasai tiha ona ita husi forsa nakukun hodi halo ita moris iha naroman laran. I Nia foti Nia Oan doben Jesus Kristu sai ita nia Liurai.
COL 1:14 Jesus Kristu selu kotu ona ita nia tusan hodi foo liberdade mai ita. Nee dehan katak ita nia sala hamoos tiha ona.
COL 1:15 Kristu hanesan lo-loos Maromak. Ita ema la bele haree Maromak, maibee Kristu hatudu mai ita, Maromak nee oinsaa. Kristu mak boot liu hodi ukun buat hotu-hotu nebee Maromak halo.
COL 1:16 Tanba Maromak foo fiar ba Nia para halo lalehan ho rai ho buat hotu-hotu iha laran, buat nebee ita ema bele haree, ho mos buat nebee ita la bele haree. Nia halo nai ulun sira, liurai boot sira, autoridade sira ho espiritu bo-boot sira nebee kaer ukun. Maromak halo buat hotu-hotu para foo ba Kristu, i Nia foo fiar ba Kristu mak halao servisu nee.
COL 1:17 Kristu iha nanis tiha ona, molok buat hotu-hotu iha, i buat hotu-hotu lao nafatin tuir nia dalan tanba Nia mak tau matan.
COL 1:18 Kristu mak ema sarani sira nia Ulun, i sarani sira hanesan Nia isin lolon. Kristu mak moris nia huun. Nia mak Ema primeiru nebee Maromak halo moris fali husi mate, para Nia mak boot liu hotu-hotu.
COL 1:19 Buat hotu-hotu nebee iha Maromak nia Aan, iha mos iha Kristu, tanba Maromak hakarak hanesan nee.
COL 1:20 Liu husi Kristu nia mate, Maromak dame malu ho buat hotu-hotu Maromak diak malu fali ho buat hotu-hotu iha lalehan ho iha rai liu husi Kristu nia raan fakar too mate iha krus.
COL 1:21 Uluk imi moris dook husi Maromak. Imi hanoin buat aat iha imi nia ulun, i imi nia hahalok mos aat, halo imi sai Nia inimigu.
COL 1:22 Maibee, tanba Kristu sai ema hodi foo Aan ba mate, agora Maromak halo imi dame malu ona ho Nia. Kristu mate para bele lori imi baa aprezenta iha Maromak nia oin ho laran moos, la iha noda ida, i la iha ema ida bele hatudu liman ba imi.
COL 1:23 Naran katak imi hamriik metin hodi fiar nafatin. Keta nakdoko, maibee laran metin nafatin katak Maromak halo tuir duni buat nebee Nia promete ona iha Nia Liafuan Diak. Liafuan Diak nee, ema foo sai ona iha nebee-nebee deit iha mundu nee. I hau, Paulo, mos simu knaar para foo sai Liafuan nee.
COL 1:24 Agora dadauk hau terus hela ba imi. Maibee terus nee halo hau nia laran haksolok. Hanesan Kristu terus, nunee mos hau simu terus nebee mak hau tenki hasoru, atu bele ajuda Kristu nia povu, tanba Nia povu hanesan Nia isin lolon.
COL 1:25 Maromak foti ona hau para serbi imi hodi foo sai Nia planu tomak ba imi.
COL 1:26 Hori uluk liu, Maromak nia planu nee sei taka hela ba ita ema. Maibee agora, Maromak loke ona Nia planu ba Nia povu.
COL 1:27 Nia desidi atu hatudu ba sira katak, Nia planu ba imi nebee laos Judeu furak i boot teb-tebes. Nia planu mak nee: Kristu hela iha imi nia laran. Tanba nee mak imi laran metin katak, aban-bainrua Nia sei halo buat furak teb-tebes ba imi iha lalehan.
COL 1:28 Ami sempre foo hatene ba ema iha nebee-nebee deit kona ba Kristu. Ho matenek hotu nebee Maromak foo, ami hanorin sira i foo hanoin ba sira. Ami halo nunee atu aban-bainrua ami aprezenta sira ba Maromak, sira nee ema nebee abut metin ona iha Kristu.
COL 1:29 Ho objetivu nee mak hau servisu mate aan ho forsa tomak nebee Kristu foo mai hau. I Nia forsa nee makaas teb-tebes.
COL 2:1 Hau hakarak atu imi iha sidade Kolose hatene katak, hau servisu makaas ba imi, hanesan mos ba sarani sira iha sidade Laodiseia ho mos ba sira seluk nebee seidauk konhese hau.
COL 2:2 Hau hakaas aan nunee atu hametin imi hotu nia laran para imi hadomi malu ho neon ida laran ida. Ho nunee imi bele kompriende lo-loos Maromak nia planu nebee uluk segredu hela, i bele laran metin katak planu nee loos duni. Maromak nia segredu mak Kristu rasik.
COL 2:3 Kristu mak bele halo ita sai matenek hodi kompriende Maromak nia dalan. Tanba matenek nee hanesan osan mean nebee subar hela iha Nia.
COL 2:4 Hau foo hatene buat sira nee ba imi, atu ema la bele bosok imi ho liafuan midar.
COL 2:5 Maski hau dook husi imi, maibee imi sempre iha hau nia laran. I hau kontenti, tanba hau hatene, imi moris laran ida i fiar metin ba Kristu.
COL 2:6 Imi simu ona Kristu Jesus hanesan imi nia Nai. Agora imi mos tenki moris laran ida ho Nia nafatin.
COL 2:7 Fiar metin nafatin ba Nia, hanesan ai huun nebee abut tama klean ba rai, i hanesan uma nebee ema harii dadauk ho riin nebee mak forti. Kaer metin nafatin hanorin nebee imi simu ona, i sempre agradese ba Maromak.
COL 2:8 Kuidadu di-diak atu ema la bele bosok imi halo imi monu ba lasu laran. Tanba sira nia hanorin nee la huun la dikin, so mai deit husi matenek ema nian ho regra mundu nian, laos mai husi Kristu.
COL 2:9 Kristu sai ema. Maski nunee buat hotu-hotu nebee iha Maromak, iha mos iha Kristu.
COL 2:10 I tanba imi moris laran ida ho Kristu, entaun imi nia moris espiritual la falta buat ida. Tanba Nia mak boot liu nai ulun ho espiritu bo-boot sira hotu nebee kaer ukun.
COL 2:11 Tanba imi laran ida ho Kristu, entaun imi mos hanesan sunat tiha ona. Ida nee laos sunat nebee ema mak halo iha imi nia isin lolon, maibee Kristu mak halo iha imi nia laran hodi tesi soe tiha imi nia hakarak aat sira nebee uluk domina hela imi.
COL 2:12 Momentu imi simu batizmu, nee hanesan imi mate tiha ona i hakoi hamutuk ho Kristu. Liu husi batizmu, imi mos moris fali hamutuk ho Kristu, tanba imi fiar katak Maromak iha kbiit hodi halo Nia moris fali husi mate.
COL 2:13 Uluk imi hanesan mate tiha ona, tanba imi sala nain i imi nia hakarak aat sei domina hela imi. Maski nunee Maromak halo moris fali imi hamutuk ho Kristu. Nia hamoos tiha ona ita nia sala hotu.
COL 2:14 Nia kansela tiha dokumentu nebee mak hakerek ita nia sala hotu-hotu hodi prega dokumentu nee ba iha krus hamutuk ho Kristu.
COL 2:15 Ho Kristu nia mate iha krus, Maromak halo lakon tiha nai ulun ho espiritu aat sira hotu-hotu nebee kaer ukun. I Nia halo moe sira iha ema barak nia oin, hanesan tropas sira halo moe inimigu nebee sira hadau iha funu laran.
COL 2:16 Nee duni se ema ruma atu kritika imi kona ba regra haan-hemu, lalika rona. I se ema ruma halo problema ho imi tanba imi la tuir sira nia regulamentu ba loron boot, ka festa fulan foin mosu, ka deskansa iha loron Sabadu, lalika rona.
COL 2:17 Tanba buat sira nee hanesan símbolu deit hodi hatudu ba realidade. Maibee nia realidade mak Kristu.
COL 2:18 Se ema ruma kritika imi tanba imi la tuir regra nebee sira rasik mak halo, lalika rona. Sira hanorin dehan, ita tenki haraik aan hodi adora fali anju. Keta tuir! Se lae imi sei la simu premiu nebee Maromak promete tiha ona atu foo ba imi. Ema sira nee hatete, mehi mak hatudu regra nee ba sira, i sira foti aan dehan, sira diak liu ema seluk. Maibee lae. Sira inventa deit tanba sira nia hanoin tuir deit mundu nia hanoin.
COL 2:19 Ema sira nee haketak aan ona husi Kristu, maski Nia mak Ulun, i Nia povu hanesan Nia isin lolon. Kristu halo Nia povu hotu hamutuk sai ida deit, hanesan mos ita nia uat sira liga metin ita nia ruin iha isin lolon tomak. Nunee Kristu halo ita hotu buras ba beibeik, tuir Maromak nia planu duni.
COL 2:20 Imi mate tiha ona hamutuk ho Kristu. Nunee regra ema mundu nian la domina ona imi. Entaun, nusaa mak imi tuir nafatin regra sira nee? Hanesan:
COL 2:21 “Keta kaer ida nee. Keta haan ida nebaa. Keta kona buat nee.”
COL 2:22 Regra sira nee, ema mak halo i ema mak hanorin, maibee so koalia deit kona ba sasaan nebee ita uza i la kleur aat ona.
COL 2:23 Iha ema balu hanoin katak, regra sira nee diak, tanba se iha ema ida halo tuir karik, ema seluk konsidera nia hanesan ema matenek ida. Tanba bainhira nia halo tuir, nia hatudu aan hanesan ema nebee badinas adora Maromak, haraik aan, i halo terus nia aan. Maibee lae! Regra sira nee la iha folin ida, tanba kuandu ita hakarak atu halo buat aat, regra nee la iha kbiit atu muda ita nia hakarak aat nee.
COL 3:1 Maromak halo imi moris fali ona hamutuk ho Kristu. Agora Kristu tuur iha lalehan, iha Maromak nia sorin loos. Nee duni hanoin beibeik buat lalehan nian.
COL 3:2 Foo atensaun beibeik ba buat lalehan nian, la bele preokupa ho buat nebee iha mundu.
COL 3:3 Tanba imi mate ona hamutuk ho Kristu. I agora imi mos moris hamutuk ho Nia iha Maromak nia oin, maski ema seluk seidauk haree.
COL 3:4 Kristu foo ona moris foun ba imi. I aban-bainrua Nia fila fali mai, imi mos mosu hamutuk ho Nia, ho naroman lalehan nian.
COL 3:5 Nee duni imi tenki hamate tiha hahalok aat hotu-hotu iha imi nia moris, hanesan sala seksual, hanoin foer, kaan atu halo sala seksual, hakarak atu halo buat aat saida deit, ho kaan sasaan. Tanba se imi kaan sasaan, nee hanesan imi foti aas sasaan liu fali Maromak.
COL 3:6 Sala sira nee halo Maromak hirus teb-tebes too Nia atu kastigu ona ema sira nebee lakohi rona Nia.
COL 3:7 Uluk imi rasik mos moris nunee.
COL 3:8 Maibee agora, imi tenki halakon tiha hahalok aat sira nee. La bele ona hirus, laran nakali, ka odi ema. La bele tan konta aat ema nia vida, tolok,
COL 3:9 ka bosok malu. Tanba imi nia moris ida uluk ho hahalok aat sira nee, imi soe tiha ona. Agora imi troka tiha ona moris tuan nee ho moris foun. Nee hanesan ema soe tiha nia ropa bosan hodi hatais fali ropa foun. Maromak mak foo moris foun nee ba imi. I agora Nia kontinua hafoun imi nia moris hodi sai hanesan Nia, atu nunee imi bele konhese liu tan Nia.
COL 3:11 Iha moris foun nee, ema atu Judeu ka laos Judeu, sunat ka la sunat, ema lao rai ka ema fuik, atan ka livre, buat sira nee la importante. Importante mak Kristu. I Kristu hela iha ita ida-idak nia laran.
COL 3:12 Maromak hadomi teb-tebes imi i hili ona imi sai Nia povu hodi entrega imi nia moris tomak ba Nia. Nee duni imi tenki sai ema nebee laran diak, ajuda ema iha susar nia laran, haraik aan, laran maus, ho pasiensia.
COL 3:13 Kuandu ema halo buat ruma la monu ba imi nia laran, kompriende deit ba. I se ema ruma halo sala ba imi, foo perdaun ba nia, hanesan mos Nai Maromak foo perdaun ona ba imi nia sala.
COL 3:14 Laos buat sira nee deit. Maibee importante liu tan mak hadomi malu, tanba domin mak kesi metin imi hotu sai ida deit.
COL 3:15 Kristu foo pas ba imi. Entaun husik Nia pas nee domina imi nia laran. Tanba imi halo parte hamutuk iha isin lolon ida, i Maromak bolu imi para moris iha dame nia laran. I sempre agradese ba Maromak.
COL 3:16 Kristu nia liafuan tenki domina imi nia laran. Ho nunee imi hetan matenek klean hodi hanorin malu i foo hanoin ba malu. Hananu kantiku oi-oin, hanesan husi livru Salmus, kantiku nebee Espiritu Santu foo, ho kantiku seluk nebee adora Maromak. Hananu hodi agradese ba Maromak ho laran tomak.
COL 3:17 Imi halo saida deit, halo hodi Nai Jesus nia naran. I imi koalia saida deit, koalia hodi Nia naran. Sempre foo agradese ba Aman Maromak liu husi Nai Jesus.
COL 3:18 Imi feen sira, hakruuk ba imi nia laen, tanba ida nee imi nia obrigasaun nudar ema nebee tuir Nai Jesus Kristu.
COL 3:19 Laen sira, imi tenki hadomi imi nia feen, i la bele hanehan sira.
COL 3:20 Oan sira, imi tenki halo tuir buat hotu-hotu nebee imi nia inan-aman haruka, tanba ida nee mak halo haksolok ita nia Nai nia laran.
COL 3:21 Aman sira, keta hakaas demais imi nia oan halo sira nervozu, para sira la bele baruk atu rona tan.
COL 3:22 Atan sira, imi tenki halo tuir buat hotu-hotu nebee imi nia patraun iha mundu nee haruka. La bele halo tuir deit bainhira sira haree hela imi, para buka oin. Maibee servisu ho laran, tanba imi respeita Nai Maromak.
COL 3:23 Imi halo saida deit, halo ho laran tomak, hanesan imi servisu ba Nai Jesus Kristu, laos ba ema deit.
COL 3:24 Tanba imi serbi mak Nia. Keta haluha, aban-bainrua Nia sei selu imi nia kolen hodi foo bensaun nebee mak Nia promete tiha ona.
COL 3:25 Maibee se imi halo sala, Maromak sei kastigu imi, tanba atu atan ka patraun, Maromak la haree ba ida nee.
COL 4:1 Patraun sira, imi tenki tau matan di-diak ba imi nia atan sira. Keta haluha katak imi mos iha Patraun ida iha lalehan.
COL 4:2 Imi tenki badinas halo orasaun ho matan moris neon nain, i sempre agradese ba Maromak.
COL 4:3 Keta haluha harohan mos mai ami. Husu atu Maromak loke dalan para ami bele foo sai ba ema, buat nebee uluk segredu hela kona ba Kristu. Tanba hau foo hatene segredu nee mak hau agora iha kadeia laran.
COL 4:4 Harohan para hau bele foo sai ho klaru, tanba hau nia obrigasaun mak nee duni.
COL 4:5 Bainhira imi hamutuk ho ema nebee seidauk fiar ba Kristu, hatudu hahalok diak ba sira. Iha oportunidade saida deit, uza di-diak ba.
COL 4:6 Bainhira imi koalia, uza liafuan midar nebee monu ba ema nia laran. Nunee se ema ruma husu pergunta ba imi, imi bele hataan ho diak.
COL 4:7 Ita nia irmaun doben Tíkiku sei konta ba imi buat hotu-hotu kona ba hau. Nia badinas halao Nai Jesus nia servisu hamutuk ho hau.
COL 4:8 Hau haruka nia ba imi para imi bele hatene kona ba hau nia situasaun, i nia bele hametin imi nia laran.
COL 4:9 Ita nia irmaun doben Onésimu sei akompanha nia. Onésimu nee imi nia ema rasik, i nia mos tuir Kristu ho laran tomak. Sira nain rua sei konta saida mak akontese iha nee.
COL 4:10 Aristarku dadur hela iha kadeia hamutuk ho hau. Nia hatoo kumprimentus ba imi. Barnabé nia primu Marcos mos hatoo kumprimentus. Uluk hau hameno ona ba imi dehan, kuandu Marcos baa vizita imi, simu nia ho diak.
COL 4:11 Irmaun Jesus, ida nebee ema mos bolu Justo, nia mos hatoo kumprimentus ba imi. Husi maluk sarani sira nebee hamutuk ho hau hanorin kona ba Maromak ukun nudar Liurai, sira nain tolu deit mak ema Judeu. I sira hametin hau nia laran.
COL 4:12 Kumprimentus mos husi Epafras. Nia rai ida ho imi i serbi Kristu Jesus. Nia sempre halo orasaun makaas hodi husu Maromak foo forsa ba imi para hamriik metin, i halo imi kompriende di-diak Nia hakarak.
COL 4:13 Hau rasik haree katak, Epafras nee servisu makaas ba imi ho mos ba sarani sira iha sidade Laodiseia ho Hierápolis.
COL 4:14 Kumprimentus husi ita nia belun doben doutor Lucas ho mos husi Demas.
COL 4:15 Hatoo hau nia kumprimentus ba sarani sira iha Laodiseia, ho mos ba senhora Ninfa ho sarani sira nebee baibain halibur malu iha nia uma.
COL 4:16 Bainhira imi ida lee sai tiha ona surat nee ba imi sarani sira iha Kolose, haruka fali ba sarani sira iha Laodiseia para ema mos bele lee sai ba sira. Iha surat ketak ida nebee hau haruka tiha ona ba sira, ida nee mos imi tenki lee.
COL 4:17 Hatete ba Arkipu dehan, “Knaar nebee ita nia Nai foo ba o nee, o tenki kaer metin too rohan.”
COL 4:18 Hau rasik mak hakerek liafuan tuir mai nee: Kumprimentus husi hau, Paulo. La bele haluha katak, hau dadur hela. Hau harohan atu Maromak hatudu Nia laran diak ba imi.
1TH 1:1 Surat nee husi hau, Paulo hamutuk ho Silas ho Timóteo. Ami hakerek surat nee ba sarani sira iha sidade Tesalónika. Imi laran ida ho Aman Maromak ho Nai Jesus Kristu. Ami harohan ba Maromak atu hatudu Nia laran diak ba imi i foo pas ho hakmatek ba imi.
1TH 1:2 Bainhira ami halo orasaun, ami sempre temi imi hodi agradese ba Maromak.
1TH 1:3 Iha ita nia Aman Maromak nia oin, ami sempre rekonhese katak imi servisu makaas tanba imi nia fiar, imi mos badinas ajuda ema seluk tanba hadomi sira. I bainhira ema halo terus imi, imi aguenta ho pasiensia nafatin tanba imi laran metin ba ita nia Nai Jesus Kristu.
1TH 1:4 Maun-alin sira, Maromak hadomi imi. Ami hatene katak Nia hili tiha ona imi hodi sai Nia povu.
1TH 1:5 Tanba uluk ami baa hatoo Liafuan Diak ba imi, ami laos foo sai ho liafuan deit, maibee ami foo sai ho kbiit husi Espiritu Santu ho fiar metin katak Liafuan Diak nee loos duni. Imi hatene katak bainhira ami hela hamutuk ho imi, ami sempre halo diak ba imi.
1TH 1:6 Imi mos halo tuir ami nia ezemplu ho Nai Jesus nia ezemplu. Maski ema halo imi terus teb-tebes, maibee imi simu Liafuan Diak ho laran haksolok, tanba Espiritu Santu foo ksolok ba imi.
1TH 1:7 Nunee imi sai ezemplu ba sarani sira hotu iha provinsia Masedónia ho Akaia.
1TH 1:8 Tanba Liafuan Diak kona ba Nai Jesus namkari ona husi imi iha Tesalónika too iha provinsia rua nee tomak. Laos nee deit, maibee ema iha nebee-nebee deit hatene ona kona ba imi nia fiar ba Maromak. Nunee ami la presiza konta tan.
1TH 1:9 Ema sira nee rasik konta dehan, uluk imi simu ami ho laran tomak. Sira dehan, imi husik tiha hotu lulik sira nebee uluk imi adora hodi serbi fali Maromak ida nebee mak loos ho moris.
1TH 1:10 Sira konta tan dehan, imi hein hela Maromak nia Oan Jesus atu fila fali mai husi lalehan. Jesus nee Maromak halo moris fali ona husi mate, i Nia mak salva ita husi kastigu nebee Maromak atu fakar tuun mai.
1TH 2:1 Maun-alin sira, imi rasik hatene katak, uluk ami baa hela ho imi, ami laos lakon tempu deit.
1TH 2:2 Imi hatene katak molok ami atu baa iha imi nia rain, ema iha sidade Filipi halo terus ami i hatete aat ami. Maibee ho Maromak nia tulun ami brani foo sai Nia Liafuan Diak ba imi, maski ema barak kontra makaas.
1TH 2:3 Bainhira ami foo hanoin ba imi atu tuir Liafuan Diak nee, ami laos hanorin falsu, la iha hanoin aat i laos atu lohi imi.
1TH 2:4 Ami foo sai Liafuan Diak tanba Maromak mak foo fiar mai ami. Nunee ami laos atu halo kontenti ema nia laran, maibee atu halo kontenti Maromak, tanba Nia mak koko ami nia laran.
1TH 2:5 Imi hatene katak ami nunka kos-kose imi, i ami laos matan naklosu ba osan. Tebes! Maromak mak ami nia sasin katak ami nunka halo hanesan nee.
1TH 2:6 Ami laos buka oin atu imi bele gaba ami ka, ema seluk bele gaba ami. Nudar Kristu nia apostolu, ami iha direitu atu imi simu ami hanesan ema boot, maibee ami lakohi.
1TH 2:7 Ami hatudu ami nia laran maus iha imi nia leet, hanesan inan ida tau matan ba nia oan nurak.
1TH 2:8 Ami hadomi teb-tebes imi, nunee ami kontenti hatoo Liafuan Diak ba imi. Laos nee deit, maibee ami foo aan tomak hodi ajuda imi tanba imi sai ona ami nia maluk doben.
1TH 2:9 Maun-alin sira, imi sei hanoin uluk ami foo sai Maromak nia Liafuan Diak ba imi, ami servisu makaas loron-kalan atu bele sustenta ami nia aan. Ami halo nunee tanba ami lakohi tau todan ba imi.
1TH 2:10 Imi hotu sai sasin, Maromak mos sai sasin katak, bainhira ami sei hamutuk ho imi sarani sira, ami moris loos, ho laran moos i livre husi sala.
1TH 2:11 Imi hatene katak, ami haree imi hanesan aman ida haree nia oan rasik.
1TH 2:12 Ami hametin imi nia laran, konsola imi, i foo hanoin beibeik atu imi moris halo haksolok Maromak nia laran. Tanba Nia mak bolu imi atu tama iha Nia reinu hodi moris hamutuk ho Nia iha naroman lalehan nian.
1TH 2:13 Iha tan buat ida nebee halo ami sempre foo agradese ba Maromak, mak nee: Bainhira ami foo sai Maromak nia liafuan ba imi, imi rekonhese katak liafuan nebee imi rona nee mai husi Maromak, laos husi ema. I Nia Liafuan nee servisu hela iha imi sarani sira nia laran.
1TH 2:14 Maun-alin sira, imi nia maluk sira husi imi nia rain rasik halo terus imi tanba imi tuir Jesus. Nunee imi sai hanesan Maromak nia povu iha provinsia Judeia. Sira fiar ba Kristu Jesus mak sira nia maluk Judeu halo terus sira.
1TH 2:15 Ema Judeu nebee la fiar nee mak oho Nai Jesus, oho Maromak nia profeta, i ikus mai duni sai ami. Nunee sira sai inimigu ba ema hotu, i Maromak la gosta liu sira nia hahalok.
1TH 2:16 Sira hakaas aan taka dalan atu ami la bele foo sai tan Maromak nia Liafuan Diak ba ema nebee laos Judeu, tanba sira lakohi atu Maromak salva ema nebee laos Judeu. Nunee sira nia sala aumenta ba beibeik too demais liu ona. Ikus liu Maromak hirus teb-tebes sira, i atu kastigu ona sira.
1TH 2:17 Maun-alin sira, uluk ami tenki sees aan husi imi, maibee la kleur ida. Maski ami dook husi imi, maibee imi nafatin iha ami nia laran. Tanba ami hanoin teb-tebes imi, ami hakaas aan buka dalan atu baa haree fali imi.
1TH 2:18 Ami hakarak fila ba imi, i hau rasik koko fila-fila ona, maibee Satanás taka nafatin ami nia dalan.
1TH 2:19 Ami hakarak haree fali imi, tanba aban-bainrua Nai Jesus fila fali mai husi lalehan, imi mak sei halo ami laran metin ho haksolok iha Nia oin. Imi hanesan premiu nebee hatudu katak ami manaan tiha ona.
1TH 2:20 Loos duni! Imi mak halo ami nia naran sai boot i halo ami haksolok liu.
1TH 3:1 Ami hanoin teb-tebes imi, too ikus ami la aguenta tan ona. Nunee ami desidi haruka ita nia maluk Timóteo baa haree imi, ami hela deit iha sidade Atenas. Timóteo nee servisu hamutuk ho ami hodi foo sai Liafuan Diak kona ba Kristu. Ami haruka nia baa atu hametin imi nia laran i foo korajen ba imi atu imi fiar metin nafatin ba Kristu,
1TH 3:3 para imi la bele nakdoko bainhira ema halo terus imi. Imi hatene mo-moos katak ita tenki hetan terus hanesan nee.
1TH 3:4 Tanba uluk bainhira ami hamutuk ho imi, ami foo hatene fila-fila ona katak ita sei hetan terus tanba ita nia fiar. Imi rasik hatene, sai nunee duni.
1TH 3:5 Nee mak hau tauk, keta halo be diabu tentador konsege intenta imi atu fila kotuk ba Kristu. Se nunee, servisu boot nebee uluk ami halo nee saugati deit. Tanba nee, bainhira hau la aguenta tan ona, hau haruka Timóteo ba iha imi hodi buka hatene, imi sei fiar nafatin ba Kristu ka lae.
1TH 3:6 Agora Timóteo fila fali ona husi nebaa. Nia konta mai ami dehan, imi fiar nafatin ba Kristu i hadomi malu nafatin. Ida nee halo ami kontenti. Nia mos dehan, imi sempre hanoin ami ho kontenti, i imi hakarak teb-tebes atu hasoru ami, hanesan mos ami hakarak hasoru imi.
1TH 3:7 Nee duni maun-alin sira, maski ami hetan terus ho susar oi-oin, maibee bainhira ami rona katak imi fiar metin nafatin ba Kristu, nee halo ami nia laran kamaan tiha.
1TH 3:8 Agora ami senti moris fila fali tanba imi hamriik metin nafatin ho Nai Jesus.
1TH 3:9 Imi halo ami haksolok teb-tebes iha Maromak nia oin, too la hatene oinsaa atu foo agradese ba Nia!
1TH 3:10 Loron-kalan ami halo orasaun ba Maromak ho laran tomak, atu ami bele hasoru malu fali ho imi hodi hanorin buat nebee mak imi sei presiza para hametin imi nia fiar.
1TH 3:11 Ami harohan ba ita nia Aman Maromak ho ita nia Nai Jesus, atu loke dalan para ami baa hasoru tan imi.
1TH 3:12 Ami husu ba Nai Jesus atu tulun imi para hadomi malu liu tan i haboot mos imi nia domin ba ema hotu-hotu, hanesan ami hadomi imi.
1TH 3:13 Ami husu para Ita nia Nai Jesus hametin imi nia laran. Nunee bainhira Nai Jesus fila fali mai ho Nia povu hotu-hotu, imi bele laran moos i livre husi sala iha ita nia Aman Maromak nia oin.
1TH 4:1 Maun-alin sira, uluk ami hanorin tiha ona imi kona ba oinsaa imi bele moris halo haksolok Maromak nia laran. Imi agora moris duni nunee, maibee tanba ita laran ida ho Nai Jesus, ami husu atu imi halo liu tan.
1TH 4:2 Imi hatene ona saida mak ami hanorin ba imi hodi Nai Jesus nia naran.
1TH 4:3 Maromak nia hakarak ba imi nunee: Imi tenki moris ho laran moos. La bele halo sala seksual.
1TH 4:4 Ida-idak tenki hatene domina aan hodi moris loos, para ema bele respeita imi.
1TH 4:5 La bele nakar feto ka nakar mane hanesan ema jentiu, sira nee la konhese Maromak.
1TH 4:6 La bele halo sala hasoru imi nia maluk sarani hodi book nia feen. Hori uluk kedas ami foo hanoin fila-fila ba imi katak, ita nia Nai sei foo kastigu ba ema nebee halo sala hanesan nee.
1TH 4:7 Tanba Maromak bolu ita atu moris ho laran moos, laos atu moris tuir hahalok foer sira nee.
1TH 4:8 Nee duni see mak lakohi simu hanorin nee, nia laos kontra ema kriatura, maibee nia kontra Maromak, Ida nebee foo Nia Espiritu Santu ba imi.
1TH 4:9 Ami la presiza hakerek ba imi kona ba oinsaa hadomi maluk sarani sira, tanba Maromak rasik hanorin ona imi atu hadomi malu.
1TH 4:10 Loos duni, imi hadomi tiha ona maluk sarani sira hotu iha provinsia Masedónia. Maibee agora, maun-alin sira, ami husu atu imi hadomi malu liu tan.
1TH 4:11 Hakaas aan atu moris hakmatek, keta mete ema seluk nia moris, i servisu ho imi nia liman rasik hodi sustenta imi nia aan, tuir buat nebee ami hanorin ona ba imi.
1TH 4:12 Se imi moris nunee, imi sei la tane liman ba ema seluk, i ema nebee la fiar ba Kristu sei respeita imi.
1TH 4:13 Maun-alin sira, ami hakarak atu imi hatene tuir kona ba sarani sira nebee mate. Ami lakohi atu imi laran tristi demais hanesan ema sira nebee mak la iha esperansa.
1TH 4:14 Ita hatene katak Jesus mate, depois moris fali ona. Nee mak ita fiar katak see mak laran ida ho Jesus, se sira mate, aban-bainrua Maromak sei halo sira moris fali hodi halibur sira hamutuk ho Jesus.
1TH 4:15 Iha nee ami foo tutan Nai Jesus nia liafuan rasik kona ba sarani sira nebee mate tiha ona. Aban-bainrua Nai Jesus fila fali mai, laos ita nebee sei moris mak hasoru uluk Nia. Lae!
1TH 4:16 Nai Jesus sei tuun fali mai husi lalehan hodi foo orden ho lian makaas. Ema sei rona anju sira nia boot ida nia lian, ho Maromak nia korneta lian. Depois Kristu nia ema nebee mate tiha ona sei moris fila fali.
1TH 4:17 Nee mak foin Maromak foti ita nebee mak sei moris hela para ita hamutuk ho sira iha kalohan laran hodi rame-rame simu Nai Jesus iha nebaa. Depois ita sei hela hamutuk ho Nia tinan ba tinan.
1TH 4:18 Nee duni foo korajen ba malu ho liafuan sira nee.
1TH 5:1 Maun-alin sira, ami la presiza hakerek ba imi kona ba saa tempu ka saa loron mak Nai Jesus sei fila fali mai husi lalehan.
1TH 5:2 Tanba imi hatene lo-loos katak, ita nia Nai sei mai derepenti deit, hanesan naok-teen mai iha kalan boot.
1TH 5:3 Bainhira ema dehan, “Buat hotu lao diak, hakmatek hela”, iha tempu nee duni mak sira derepenti hetan dezastre, hanesan mos feto isin rua nebee derepenti kanotak moras atu tuur ahi. Kuandu dezastre nee akontese ona, sira atu sees mos la biban.
1TH 5:4 Maibee, maun-alin sira, imi laos moris iha nakukun laran. Nunee bainhira too iha Jesus nia loron atu fila fali mai, imi la hakfodak hanesan ema nebee haree naok-teen tama uma.
1TH 5:5 Imi hotu ema loron nian, imi moris iha naroman laran. Ita laos ema kalan nian para moris fali iha nakukun laran.
1TH 5:6 Entaun ita la bele dukur hanesan ema seluk. Maibee ita tenki hadeer nafatin i domina aan.
1TH 5:7 Tanba ema nebee atu toba, kalan mak toba. I ema nebee atu lanu, kalan mak lanu.
1TH 5:8 Maibee ita nee ema loron nian. Nunee ita tenki domina ita nia aan. Ita tenki fiar ba Kristu i hadomi ema seluk, nee hanesan tropas sira taka besi belar ba sira nia hirus matan hodi defende aan. Ita tenki laran metin katak Jesus sei salva ita, nee hanesan ita taka kapaseti besi ba ulun.
1TH 5:9 Maromak hili ita laos atu kastigu, maibee atu salva ita liu husi ita nia Nai Jesus Kristu.
1TH 5:10 Jesus mate tiha ona iha ita nia fatin. Nunee aban-bainrua Nia fila fali mai, bele ita sei moris hela ka ita mate tiha ona mos, ita sei moris hamutuk ho Nia.
1TH 5:11 Nee duni imi tenki foo korajen ba malu, i hametin imi nia maluk sira nia laran hanesan agora dadauk imi halo nee.
1TH 5:12 Maun-alin sira, ami husu atu imi respeita responsavel sarani sira nebee servisu makaas iha imi nia leet. Sira foo hanoin beibeik ba imi atu moris loos.
1TH 5:13 Respeita teb-tebes sira, i hadomi sira tanba sira nia servisu nee. Moris dame malu ba.
1TH 5:14 Maun-alin sira, ami husu para imi foo hanoin ba ema baruk-teen sira tenki servisu. Foo aten brani ba sira nebee moris iha tauk nia laran, ajuda sira nebee mak fraku, i pasiensia ho ema hotu-hotu.
1TH 5:15 La bele halo aat ba ema nebee mak halo aat imi. Maibee sempre hakaas aan halo buat diak ba imi nia maluk sarani sira ho mos ba ema hotu-hotu.
1TH 5:16 Haksolok beibeik ba!
1TH 5:17 Sempre halo orasaun.
1TH 5:18 Iha situasaun saida deit, agradese ba Maromak. Tanba Maromak hakarak imi nebee tuir Kristu Jesus tenki halo nunee.
1TH 5:19 La bele hamate ahi Espiritu Santu nebee lakan iha imi.
1TH 5:20 Se iha maluk sarani ida foo sai katak, nia simu lia menon husi Maromak, la bele dehan nee la iha folin.
1TH 5:21 Maibee tenki tetu di-diak atu hatene lia menon nee mai duni husi Maromak ka lae. Se loos duni, tenki simu.
1TH 5:22 Hadook aan husi buat aat saida deit.
1TH 5:23 Ami harohan atu Maromak Dame Nain halo imi moris ho laran moos iha imi nia vida tomak. Ami husu para Nia halo imi nia isin ho imi nia klamar ho espiritu tomak livre husi sala, too Nai Jesus Kristu fila fali mai.
1TH 5:24 Maromak bolu tiha ona imi atu sai Nia ema. Nia sei halo imi nia laran moos duni, tanba Nia sempre halo tuir Nia promesa.
1TH 5:25 Maun-alin sira, halo orasaun mai ami.
1TH 5:26 Rei Maromak nia povu hanesan maluk sarani.
1TH 5:27 Hodi Nai Jesus nia naran, hau haruka imi lee sai surat nee ba maluk sarani sira hotu.
1TH 5:28 Ami harohan atu ita nia Nai Jesus Kristu hatudu Nia laran diak ba imi.
2TH 1:1 Surat nee husi hau, Paulo hamutuk ho Silas ho Timóteo. Ami hakerek surat nee ba sarani sira iha sidade Tesalónika. Imi laran ida ho ita nia Aman Maromak ho Nai Jesus Kristu.
2TH 1:2 Ami harohan atu Aman Maromak ho Nai Jesus Kristu hatudu Sira nia laran diak ba imi i foo pas ho hakmatek ba imi.
2TH 1:3 Maun-alin sira, ami sempre agradese ba Maromak tanba imi nia fiar ba Kristu ho imi nia domin ba malu. Ami tenki agradese duni, tanba husi loron ba loron imi nia fiar buras ba beibeik i imi nia domin ba maluk sira mos aumenta ba beibeik.
2TH 1:4 Nee mak bainhira ami hasoru malu ho sarani sira iha fat-fatin, ami sempre konta sai imi nia diak. Ami konta ba sira katak, maski ema halo imi terus ho susar tanba imi tuir Kristu, maibee imi aguenta ho pasiensia hodi fiar metin nafatin ba Kristu.
2TH 1:5 Nee hatudu katak, Maromak sempre foo justisa ho lo-loos. Nunee imi nebee agora terus hela tanba imi hakruuk ba Maromak nudar Liurai, aban-bainrua Nia sei konsidera imi serve duni hola parte iha Nia reinu.
2TH 1:6 Maromak sempre tesi lia ho loos. Nunee aban-bainrua Nia sei halo terus fali ema nebee agora halo terus imi,
2TH 1:7 i Nia sei foo kamaan ba imi nebee terus, ho mos ba ami. Nee sei akontese bainhira Nai Jesus mosu mai husi lalehan hamutuk ho Nia anju sira mesak forti deit,
2TH 1:8 ho ahi lakan boot haleu sira. Depois Nai Jesus foo kastigu ba ema sira nebee lakohi hatene Maromak i lakohi halo tuir Nai Jesus nia Liafuan Diak.
2TH 1:9 Nai Jesus sei foo kastigu mate ba sira too tinan ba tinan, nunee sira dook husi Nai Jesus nia prezensa, i la hetan tan Nia kbiit lalehan nian.
2TH 1:10 Buat nee sei akontese bainhira Nai Jesus fila fali mai atu Nia povu foti aas Nia naran, i ema hotu-hotu nebee fiar ba Nia hahii Nia. Imi mos sei halo parte, tanba imi fiar tiha ona saida mak ami foo sai ba imi.
2TH 1:11 Nunee ami sempre harohan para ita nia Maromak haree imi nee serve atu moris nudar Nia povu, tanba Nia bolu ona imi ba ida nee. Imi nia fiar ba Jesus halo imi hakarak halo buat nebee diak. Ami harohan atu Maromak foo kbiit ba imi atu bele halo duni buat diak sira nee hotu.
2TH 1:12 Ami halo orasaun nunee atu ema foti aas ita nia Nai Jesus nia naran tanba imi, i Nia mos sei foti aas imi nia naran, tanba ita nia Maromak ho Nai Jesus Kristu sira nia laran diak.
2TH 2:1 Maun-alin sira, ami hakarak foo hanoin kona ba aban-bainrua ita nia Nai Jesus Kristu fila fali mai husi lalehan i ita halibur malu hamutuk ho Nia.
2TH 2:2 Bainhira ema foo hatene imi dehan Nai Jesus mai tiha ona, lalika hakfodak ka laran susar lalais. Maski sira dehan sira foo tutan Maromak nia lia menon, ka dehan sira rona tutan husi ema, ka dehan ami mak hakerek iha surat, la bele fiar.
2TH 2:3 Keta husik atu ema lohi imi. Tanba molok Nai Jesus fila, ema barak sei hamriik hodi kontra makaas Maromak. I ema aat ida sei mosu, ema nee iha ona dalan ba infernu.
2TH 2:4 Ema aat nee sei kontra Maromak, i kontra lulik sira ho buat hotu-hotu nebee ema adora hodi foti nia aan liu fali sira hotu. Too nia mos baa tuur iha Maromak nia uma kreda laran hodi deklara nia aan katak nia mak Maromak.
2TH 2:5 Keta haluha, uluk hau sei hela hamutuk ho imi, hau sempre foo hatene ba imi kona ba buat sira nee.
2TH 2:6 Imi hatene ona saida mak agora sei tahan hela ema aat nee, para too nia tempu mak foin nia hatudu aan.
2TH 2:7 Agora forsa nakukun nian servisu sub-subar hela halo ema kontra Maromak nia lei, maibee sei iha ida nebee tahan netik. Too iha loron ida, ida nebee tahan forsa nakukun nee sei sees tiha,
2TH 2:8 depois mak foin ema aat nee hatudu aan. Maibee bainhira Nai Jesus mai ho naroman lalehan nian, ema aat nee sei lakon kedas. Nai Jesus huu deit iis husi Nia ibun, ema nee mohu tiha.
2TH 2:9 Bainhira ema aat nee mai, nia mai ho Satanás nia kbiit hodi halo milagre ho sinal oi-oin nebee halo ema admira, too ema hanoin katak nia kbiit nee mai husi Maromak.
2TH 2:10 Ema aat nee sei halo buat aat oi-oin deit atu bosok ema. Sira nebee monu ba bosok nee mak ema nebee lao dadauk tuir dalan mate nian. Tuir lo-loos Maromak hakarak salva sira, maibee sira lakohi foo laran ba lia loos.
2TH 2:11 Nee mak Maromak halo sira hanoin la loos hotu para sira fiar ba lia bosok nee.
2TH 2:12 Ho nunee aban-bainrua Maromak hamonu kastigu todan ba sira hotu nebee gosta liu halo buat aat i lakohi fiar ba lia loos.
2TH 2:13 Maun-alin sira nebee Nai Jesus hadomi, ami sempre agradese ba Maromak, tanba hori uluk kedas Nia hili ona imi atu salva imi. Nia salva imi liu husi Espiritu Santu nia servisu hodi halo imi moris ho laran moos, ho mos liu husi imi nia fiar ba lia loos.
2TH 2:14 Maromak uza Liafuan Diak nebee ami hatoo ona ba imi, atu bolu imi ba salvasaun nee, atu nunee Nia bele foti aas imi hanesan mos Nia foti aas ita nia Nai Jesus Kristu.
2TH 2:15 Nee duni maun-alin sira, hamriik metin ba, i kaer metin nafatin hanorin nebee ami foo tutan tiha ona ba imi liu husi ami nia liafuan rasik ho mos liu husi surat.
2TH 2:16 Maromak hadomi teb-tebes ita. Tanba Nia laran diak mak Nia sempre foo ksolok ho esperansa boot mai ita iha susar laran. Nunee, ami harohan ba Jesus Kristu ita nia Nai, ho ita nia Aman Maromak, para hametin imi nia laran hodi tulun imi atu sempre halo buat nebee diak i koalia buat nebee diak.
2TH 3:1 Agora, maun-alin sira, ami husu atu imi halo orasaun mai ami, para Nai Jesus nia Liafuan Diak bele namkari lalais too iha fat-fatin. Harohan atu ema iha nebee-nebee bele simu Liafuan Diak nee ho respeitu, hanesan mos uluk imi simu.
2TH 3:2 Harohan mos atu Maromak bele salva ami husi ema aat sira nia liman laran. Tanba laos ema hotu-hotu fiar Liafuan Diak.
2TH 3:3 Maibee ita nia Nai sempre halo tuir buat nebee Nia koalia. Nia sei foo forsa ba imi, i kuidadu imi husi aat nain.
2TH 3:4 Ami laran metin katak Nai Jesus ajuda hela imi para halo tuir buat nebee ami hameno, i imi mos sei halo tuir nafatin.
2TH 3:5 Ami harohan atu Nai Jesus halo imi kompriende liu tan katak Maromak hadomi imi, i ajuda imi atu aguenta ho pasiensia iha terus laran, hanesan mos Jesus Kristu.
2TH 3:6 Maun-alin sira, hau foo orden ba imi hodi Nai Jesus Kristu nia naran atu imi la bele liga maluk sarani nebee baruk-teen i lakohi moris tuir hanorin nebee mak imi simu tiha ona husi ami.
2TH 3:7 Imi hatene katak imi tenki tuir ami nia ezemplu. Uluk ami sei hela hamutuk ho imi, ami laos baruk-teen.
2TH 3:8 Loron-kalan ami servisu makaas para la bele foo todan ba ema ida iha imi nia klaran, i bainhira ema ruma foo hahaan mai ami, ami sempre selu.
2TH 3:9 Tuir loos ami iha direitu atu husu imi nia ajuda, maibee ami lakohi, tanba ami hakarak hatudu ezemplu diak para imi mos bele halo tuir.
2TH 3:10 Iha tempu nebaa ami rai hela regra ida ba imi nunee: “See mak lakohi halo servisu, la bele haan.”
2TH 3:11 Agora ami rona fali dehan, imi balu baruk-teen, la halo servisu, i so mete deit ema nia vida.
2TH 3:12 Ami husu makaas i foo orden hodi Nai Jesus Kristu nia naran dehan, ema sira nee tenki moris ho lo-loos, i tenki servisu hodi foo haan sira nia aan rasik.
2TH 3:13 Maun-alin sira, la bele baruk atu halo buat nebee loos.
2TH 3:14 Se iha ema ruma lakohi halo tuir buat nebee mak ami hakerek iha surat nee, haree di-diak ema nee see. La bele liga nia, para nia moe tiha.
2TH 3:15 Maibee keta konsidera nia hanesan inimigu, kontinua foo hanoin nafatin ba nia nudar imi nia maluk sarani.
2TH 3:16 Ami harohan atu Nai Jesus sempre foo pas ho hakmatek ba imi iha situasaun saida deit, tanba Nia mak Dame Nain. Nai Jesus hamutuk ho imi hotu.
2TH 3:17 Hau, Paulo mak hakerek kumprimentus nee ho hau nia liman rasik. Iha hau nia surat hotu-hotu hau halo hanesan nee atu ema hatene katak surat nee husi hau duni.
2TH 3:18 Hau harohan atu ita nia Nai Jesus Kristu hatudu Nia laran diak ba imi hotu.
1TI 1:1 Surat nee husi hau, Paulo. Hau Kristu Jesus nia apostolu, tanba simu orden husi Maromak ita nia Salvador ho Kristu Jesus. Nia mak hametin ita nia laran.
1TI 1:2 Hau hakerek surat nee ba o, Timóteo. O hanesan hau nia oan rasik tanba o mos fiar ba Kristu. Hau harohan atu Aman Maromak ho ita nia Nai Kristu Jesus hatudu Sira nia laran diak ho laran luak ba o, i foo pas ho hakmatek ba o.
1TI 1:3 Uluk hau baa iha provinsia Masedónia, hau husu atu o hela nafatin iha sidade Éfezu hodi bandu mestri falsu sira iha nebaa atu la bele hanorin falsu tan. Agora hau husu nunee nafatin.
1TI 1:4 Haruka sira la bele soe tempu konta ai knanoik i konta tu-tuir sira nia bei-ala bar-barak. Tanba buat sira nee la ajuda ema atu fiar ba Maromak hodi halao Nia servisu, maibee provoka ema para istori malu fali.
1TI 1:5 Hau foo hanoin nunee, atu ema bele moris hadomi malu. Atu hadomi malu, ema tenki laran moos, hatene hili dalan loos, i fiar Maromak ho laran tomak.
1TI 1:6 Iha mestri balu husik ona buat sira nee hodi koalia fali buat nebee la iha folin.
1TI 1:7 Sira hakarak sai mestri relijiaun, i sira tebe rai dehan buat nebee sira hanorin nee mak loos. Maibee sira la hatene saida mak sira koalia.
1TI 1:8 Ita hatene katak Maromak nia lei nee diak, naran katak ita uza ho lo-loos.
1TI 1:9 Ita mos hatene katak, lei nee laos foo ba ema nebee moris loos. Maibee foo ba ema sira nebee kontra lei, lakohi hakruuk ba Maromak, la interese Nia, moris iha sala nia laran, laran foer, la respeita Maromak, i oho-door ema too oho sira nia inan-aman rasik.
1TI 1:10 Lei nee foo ba ema nebee halo sala seksual, ba mane ho mane nebee hola fali malu, ba ema nebee naok ema hodi faan, ba bosok-teen sira, ema nebee jura falsu, ho ema nebee halo saida deit mak kontra hanorin nebee loos.
1TI 1:11 Hanorin nebee loos nee mai husi Maromak nia Liafuan Diak. Maromak nee kbiit boot i buat diak hotu nia huun. Nia mak foo fiar mai hau atu foo sai Nia Liafuan Diak nee.
1TI 1:12 Hau agradese ba Kristu Jesus ita nia Nai tanba Nia konfia hau hodi foti hau atu halao Nia servisu, Nia mos foo forsa mai hau.
1TI 1:13 Afinal uluk hau hatete aat Nia i halo terus ema nebee tuir Nia hodi sama sira too rai. Maibee Nia la kastigu hau, tanba tempu nebaa hau seidauk fiar ba Nia, i hau la hatene saida mak hau halo.
1TI 1:14 Ita nia Nai hatudu Nia laran diak teb-tebes mai hau, too hau bele fiar ba Nia i sai laran ida ho Nia hodi hadomi ema seluk.
1TI 1:15 Kristu Jesus mai iha mundu nee para salva ema sala nain. Liafuan nee loos duni, ita tenki simu ho laran tomak. Husi ema sala nain hotu-hotu, hau mak aat liu.
1TI 1:16 Tanba nee mak Nai hatudu Nia laran luak mai hau, atu nunee ema bele haree Kristu Jesus nia pasiensia boot teb-tebes mai hau, sala nain nebee aat liu nee. Nunee hau sai ezemplu ba see-see deit mak sei fiar ba Nia para hetan moris rohan-laek.
1TI 1:17 Mai ita respeita i hahii adora Maromak too tinan ba tinan. Nia mak Liurai nebee ukun rohan-laek, Nia nunka mate, ema la bele haree Nia ho matan. So Nia deit mak Maromak. Amen.
1TI 1:18 Hau nia oan Timóteo, buat nebee agora hau haruka o halo nee, la sees husi Maromak nia lia menon kona ba o nia servisu. Se o kaer metin liafuan nee, entaun o sei luta nafatin hanesan funu nain diak ida.
1TI 1:19 Fiar metin nafatin ba Kristu, i kuidadu o nia aan para sempre halo buat nebee loos. Tanba iha ema balu hatene saida mak loos, maibee lakohi halo tuir. Nunee sira halo rahun tiha sira nia fiar, hanesan roo nebee mak mout iha tasi laran tanba kona fatuk.
1TI 1:20 Husi sira nee, ida mak Himeneu, ida Alexandre. Hau entrega tiha ona sira nain rua ba Satanás para sira bele aprende atu la bele hatete aat tan Maromak.
1TI 2:1 Nee duni hau husu liu-liu atu imi halo orasaun ba ema hotu-hotu. Harohan husu Maromak nia tulun, i agradese ba Nia.
1TI 2:2 Halo orasaun nunee ba liurai sira ho ukun nain sira hotu, atu ita bele moris iha pas ho hakmatek hodi moris tuir Maromak nia hakarak i hamtauk ba Nia.
1TI 2:3 Orasaun hanesan nee diak i halo haksolok Maromak ita nia Salvador,
1TI 2:4 tanba Nia hakarak atu ema hotu-hotu hetan salvasaun i kompriende lia loos.
1TI 2:5 Maromak mesak ida deit. I so Kristu Jesus deit mak bele halo dame entre Maromak ho ita ema. Nia rasik ema,
1TI 2:6 i Nia foo Nia Aan para selu kotu ita ema hotu-hotu nia tusan hodi foo liberdade ba ita. Ho nunee, tuir tempu nebee Maromak desidi ona, Nia hatudu mo-moos mai ita katak Nia hakarak salva ema hotu.
1TI 2:7 Tanba nee Nia hili hau sai apostolu hodi baa haklaken Liafuan Diak ba sira nebee laos ema Judeu, i hanorin Maromak nia lia loos ba sira atu sira mos fiar ba Jesus. Hau apostolu duni, hau la bosok.
1TI 2:8 Bainhira sarani sira halibur malu halo orasaun iha nebee-nebee, hau hakarak atu mane sira halo orasaun ho laran moos. La bele hirus ka istori malu.
1TI 2:9 Nunee mos hau hakarak atu feto sira hatais ropa tenki hatene aan, tenki tau ropa nebee hatudu respeitu. Lalika halo fuuk oi-oin ka uza osan mean ka morteen perola rebo-rebo, ka hatais ropa folin karun para enfeita aan.
1TI 2:10 Diak liu imi enfeita aan ho hahalok diak. Nee mak serve ba feto nebee dehan nia adora Maromak.
1TI 2:11 Bainhira ema hanorin Maromak nia liafuan, feto sira tenki nonook hodi rona ho respeitu tomak.
1TI 2:12 Hau la foo lisensa ba feto sira atu hanorin mane ka manda mane sira, feto tenki nonook.
1TI 2:13 Tanba Maromak halo uluk Adão mak foin halo Eva.
1TI 2:14 I laos Adão mak monu ba Satanás nia lia bosok, maibee Eva mak monu hodi kontra Maromak nia orden.
1TI 2:15 Maibee bele nunee mos, feto sira sei hetan salvasaun liu husi hetan oan, naran katak sira nafatin fiar ba Kristu, hadomi ema seluk, moris ho laran moos, i hatene aan.
1TI 3:1 Ema nebee hakarak sai responsavel ba sarani sira, nia hakarak halo servisu ida nebee iha folin. Liafuan nee loos duni.
1TI 3:2 Responsavel sarani nian tenki ema nebee naran diak, nia tenki moris ho feen ida deit, nia tenki hatene aan, domina aan, hahalok diak, simu bainaka iha uma ho laran haksolok, i hatene hanorin.
1TI 3:3 Responsavel sarani nian la bele lanu-teen, i laos ema nebee gosta baku malu, maibee tenki laran diak i gosta dame. Nia la bele matan fuan naklosu ba osan.
1TI 3:4 Nia tenki hatene eduka nia familia, i hanorin nia oan sira para rona nia ho respeitu.
1TI 3:5 Tanba se nia la hatene eduka nia familia uma laran, oinsaa mak nia bele tau matan ba Maromak nia povu?
1TI 3:6 La bele foti ema nebee foin fiar ba Jesus hodi sai responsavel ba sarani sira. Keta halo be nia foti aan dehan nia mak diak liu, nunee nia bele hetan kastigu hanesan kastigu nebee Maromak uluk foo ba Satanás.
1TI 3:7 Responsavel tenki naran diak iha komunidade nia leet. Se lae ema iha komunidade bele hatete aat nia, too ikus nia bele monu ba Satanás nia lasu.
1TI 3:8 Nunee mos ho ema nebee kaer knaar ajuda Maromak nia povu. Nia tenki ema nebee naran diak, la bele bosok-teen, la bele hemu tua barak liu, i la bele matan fuan naklosu ba osan.
1TI 3:9 Nia tenki kaer metin lia loos nebee Maromak hatudu mai ita, i tenki laran moos.
1TI 3:10 Bainhira atu foti ema ida kaer knaar ajuda Maromak nia povu, haree di-diak lai nia moris oinsaa. Se ema nee moris loos foin bele foti nia.
1TI 3:11 Nunee mos nia feen tenki hahalok diak para ema respeita. Nia tenki hatene aan, la bele konta ema nia vida, i ema bele konfia nia iha buat hotu-hotu.
1TI 3:12 Ema nebee kaer knaar ajuda Maromak nia povu tenki moris ho feen ida deit. I nia tenki hatene eduka nia oan sira ho nia ema uma laran.
1TI 3:13 Se nia serbi sarani sira ho diak, ema sei respeita loos nia, nunee nia sei brani liu tan koalia kona ba nia fiar ba Kristu Jesus.
1TI 3:14 Hau hein katak la kleur tan hau sei baa vizita o. Maski nunee hau hakerek buat sira nee ba o.
1TI 3:15 Nunee se hau demora karik, o sei hatene, Maromak nia familia tenki hahalok oinsaa. Maromak nee mak Maromak Moris. Nia familia mak Nia povu, i Nia povu hanesan alsesu ho uma riin nebee suporta lia loos.
1TI 3:16 Maromak foo sai ona segredu nebee mak lori ita moris tuir Nia hakarak. Segredu nee furak teb-tebes, la iha ema ida bele nega. Segredu nee foo sai kona ba Jesus nunee: Nia fila Aan sai Ema. Espiritu Santu hatudu katak, Nia moris loos duni. Anju sira haree Nia. Maromak foti sae tiha Nia ba iha fatin aas iha naroman lalehan nian. Ema foo sai kona ba Nia too iha nasaun hotu-hotu; ema iha mundu tomak fiar ba Nia.
1TI 4:1 Maromak nia Espiritu foo hatene mo-moos mai ita katak, molok mundu atu remata, sarani balu sei husik tiha sira nia fiar ba Kristu hodi tuir fali espiritu bosok-teen ho diabu sira nia hanorin.
1TI 4:2 Hanorin hanesan nee mai husi ema bosok-teen, sira koalia oin ida, hahalok oin seluk. Tanba sira halo sala beibeik, agora sira la hatene ona saida mak diak, saida mak aat.
1TI 4:3 Sira hanorin katak ema la bele kaben, i hahaan balu sira bandu la bele haan. Maibee hahaan sira nee hotu, Maromak mak halo. Nunee ita nebee fiar ba Kristu i hatene lia loos, ita bele simu hodi foo agradese ba Maromak.
1TI 4:4 Buat saida deit mak Maromak halo, diak hotu. Nunee la iha buat ida mak ita bele hakribi, naran katak ita simu hodi foo agradese ba Maromak.
1TI 4:5 Tanba liu husi Maromak nia liafuan ho ita nia orasaun, buat sira nee hotu sai moos tiha.
1TI 4:6 Hanorin buat sira nee hotu ba maluk sarani sira. Se o halo nunee mak o serbi Kristu Jesus nudar Nia atan ida nebee diak. I o sei sai forti tanba liafuan kona ba fiar ho mos hanorin diak nebee o moris tuir, nee hanesan hahaan diak ba o.
1TI 4:7 Hadook aan husi ai knanoik nebee la ajuda ema atu moris tuir Maromak nia hakarak, istoria sira nee la iha folin. Diak liu treinu o nia aan di-diak para moris tuir Maromak nia hakarak.
1TI 4:8 Treinu ita nia isin lolon iha folin. Maibee treinu ita nia aan para moris tuir Maromak nia hakarak iha folin boot liu, tanba ajuda ita nia moris agora iha mundu nee, ho mos aban-bainrua iha mundu seluk.
1TI 4:9 Liafuan nee loos duni, ita tenki simu ho laran tomak.
1TI 4:10 Nee duni ita hakaas aan hodi servisu makaas, tanba ita laran metin ba Maromak Moris. Nia mak Salvador ba ema hotu-hotu, liu-liu ba ita nebee fiar ba Jesus.
1TI 4:11 Hanorin buat sira nee hotu, i haruka ema halo tuir.
1TI 4:12 Keta husik ema ida hatuun o tanba deit o sei joven. O tenki hatudu ezemplu diak ba sarani sira, liu husi o nia koalia, o nia hahalok, o nia domin, o nia fiar, ho o nia laran moos.
1TI 4:13 Bainhira hau seidauk too iha nebaa, o tenki foo aan hodi lee Livru Sagradu ba sarani sira, foo sai Maromak nia liafuan ho mos hanorin sira.
1TI 4:14 O tenki badinas uza kbiit nebee o simu bainhira responsavel sarani sira tau liman ba o nia ulun hodi foo tutan Maromak nia lia menon ba o.
1TI 4:15 Halo buat sira nee hotu ho badinas, ho laran tomak, para ema hotu bele haree katak o lao ba oin.
1TI 4:16 Kuidadu di-diak o nia hahalok ho o nia hanorin. Halo nunee beibeik mak Maromak sei hasai o husi buat aat, i salva mos ema nebee rona o.
1TI 5:1 Bainhira o hasee mane nebee mak idade boot liu o, la bele siak nia, maibee foo hanoin ba nia ho respeitu, hanesan o halo ba o nia aman rasik. Konsidera mane joven sira hanesan o nia alin rasik.
1TI 5:2 Feto sira nebee idade boot liu o, o tenki haree hanesan o nia inan. I feto joven sira o tenki haree hanesan o haree o nia feton, o nia laran tenki moos ba sira.
1TI 5:3 Sarani sira tenki respeita i tulun feto faluk sira nebee moris mes-mesak.
1TI 5:4 Maibee se feto faluk ida iha oan ka bei-oan, entaun sira tenki aprende tau matan uluk ba nia hodi selu nia kolen. Nunee sira hatudu katak sira serbi Maromak, i sira halo kontenti Maromak nia laran.
1TI 5:5 Feto faluk nebee mes-mesak, la iha tan ema ida atu tau matan, nia so laran metin deit ba Maromak. Loron-kalan nia harohan husu tulun ba Maromak.
1TI 5:6 Maibee feto faluk nebee moris goza hela deit, nia hanesan ema nebee mate tiha ona, maski nia sei moris.
1TI 5:7 Hatoo regra sira nee ba sarani sira atu sira halo tuir, para ema la bele foo sala ba sira.
1TI 5:8 Se karik ema sarani ida la tau matan ba nia familia, liu-liu nia familia uma laran, nee hatudu katak nia nega tiha ona nia fiar ba Kristu. Ema hanesan nee aat liu fali ema nebee la fiar.
1TI 5:9 Bainhira halo lista feto faluk sira, hili deit ema hanesan tuir mai nee: Nia tinan neen-nulu ba leten, i uluk moris ho laen ida deit.
1TI 5:10 Ema rekonhese nia hanesan ema ida nebee sempre halo diak ba ema seluk. Ezemplu, nia tau matan ba nia oan sira ho diak, simu bainaka iha nia uma, serbi sarani sira ho haraik aan, ajuda ema nebee iha susar laran, i sempre halo buat diak oi-oin deit.
1TI 5:11 Feto faluk nebee seidauk ferik, la bele hatama sira nia naran iha lista faluk sira. Keta halo be sira nia hakarak atu hola mane domina fali sira, too sira laduun foo laran ona ba Kristu, i sira hakarak atu kaben fali.
1TI 5:12 Nunee sira hetan kastigu tanba sira la kumpri ona sira nia promesa uluk.
1TI 5:13 Feto faluk sira nee bele mos sai baruk-teen hodi tama uma sai uma. Laos nee deit, sira mos bele konta ema nia vida, mete ema nia problema, i koalia buat nebee la serve atu koalia.
1TI 5:14 Tanba nee, hau foo hanoin ba feto faluk sira nebee seidauk ferik, diak liu sira kaben fali, iha oan, i tau matan ba sira nia uma kain. Nunee ita nia inimigu la iha razaun atu hatete aat ita.
1TI 5:15 Hau hatete nunee tanba iha ona feto faluk balu mak sees husi dalan loos hodi tuir fali Satanás.
1TI 5:16 Se feto sarani ida nia familia ruma faluk, nia la bele foo todan ba Kristu nia povu atu tau matan ba feto faluk nee, nia rasik mak tenki tau matan. Nunee Kristu nia povu bele tau matan ba feto faluk sira nebee mak moris mes-mesak.
1TI 5:17 Responsavel sarani sira nebee mak halao sira nia knaar ho diak, sira serve simu sira nia kolen dala rua. Liu-liu sira nebee mak foo sai Maromak nia liafuan ho mos hanorin sarani sira.
1TI 5:18 Tanba iha Livru Sagradu dehan, “Se uza karau hodi halao servisu ruma, la bele kesi nia ibun, atu nunee nia bele haan.” Nunee mos, “Ema nebee servisu iha direitu atu ema selu nia kolen.”
1TI 5:19 Se iha ema ida foo sala ba responsavel sarani ruma, la bele rona lai. Tenki iha ema nain rua ka tolu foo sasin hanesan, foin o rona hodi tetu.
1TI 5:20 Se responsavel ida halo sala, koriji nia iha sarani sira nia oin, nee hanesan lisaun ba ema seluk atu la bele halo sala.
1TI 5:21 Ba responsavel see-see deit, o tenki uza regra sira nee hodi tesi sira nia sala, la bele fihir ema. Hau foo orden nee ba o iha Maromak nia oin, ho mos iha Kristu Jesus nia oin, i anju sira nebee Maromak hili mos sai sasin.
1TI 5:22 La bele ansi tau liman ba ema nia ulun hodi foti nia sai responsavel ba sarani sira. Maibee haree di-diak lai. Tanba se o foti ema, depois ema nee halo sala, o mos sei lori todan. Kuidadu o nia aan para o laran moos nafatin.
1TI 5:23 Tanba o nia kabun moras beibeik, diak liu la bele hemu bee deit, hemu mos tua uitoan hanesan aimoruk.
1TI 5:24 Iha ema balu halo sala, seidauk too iha justisa, sira nia sala ema seluk haree mo-moos tiha ona. Iha ema seluk halo sala, kleur foin ema hatene.
1TI 5:25 Hahalok diak mos nunee. Balu ema haree mo-moos agora. Maibee hahalok diak nebee seidauk haree agora mos, aban-bainrua sei la subar tan.
1TI 6:1 Atan nebee fiar ba Kristu tenki respeita nia patraun, atu nunee ema la bele hatete aat Maromak nia naran ka koalia aat ita nia hanorin.
1TI 6:2a Se nia patraun mos fiar ba Kristu, patraun ho atan nee maluk sarani. Maski nunee atan nee tenki respeita nafatin nia patraun, i tenki hakaas aan liu tan hodi serbi nia patraun ho diak. Tanba nia serbi nia maluk sarani nebee nia hadomi.
1TI 6:2b O tenki hanorin buat sira nee ba sarani sira, i hametin sira nia laran para halo tuir.
1TI 6:3 Ema balu hanorin fali buat seluk, la haan malu ho lia loos husi ita nia Nai Jesus Kristu. Sira nia hanorin la ajuda ema atu moris tuir Maromak nia hakarak.
1TI 6:4 Ema sira nee foti aan, maibee la kompriende buat ida. Sira nia moras aat ida mak gosta diskuti malu ho istori malu kona ba liafuan. Hahalok nee halo ema laran moras ba malu, tarata malu, hatete aat ema, i deskonfia ema nar-naran deit.
1TI 6:5 Sira sempre istori malu hela deit. Sira nia hanoin la loos ona, i sira la hatene ona saida mak loos. Sira hanoin dehan, hanorin kona ba Maromak nia hakarak bele halo sira manaan osan hodi sai riku.
1TI 6:6 Loos duni, se ita moris tuir Maromak nia hakarak, i ita kontenti ho buat nebee mak ita iha, ita manaan boot.
1TI 6:7 Tanba ita moris mai iha mundu nee, ita la lori buat ida. Ita sai husi mundu nee mos, la lori buat ida.
1TI 6:8 Nunee, naran katak ita iha ai haan ho hena para hatais, ita kontenti ona ho ida nee.
1TI 6:9 Maibee ema sira nebee hanoin deit atu sai riku, sira monu ba tentasaun i monu ba lasu. Sira hakarak buat beik oi-oin nebee estraga sira, halo sira terus too mohu.
1TI 6:10 Tanba ema nebee matan naklosu ba osan, nia prontu halo buat aat oi-oin deit. Iha ema balu buka demais osan, too sira husik tiha sira nia fiar. Nunee sira halo terus sira nia aan, hanesan sira rasik sona sira nia aan ho tudik.
1TI 6:11 Maibee Timóteo, o nee Maromak nia ema. Nunee, hadook aan tiha husi buat aat sira nee hotu. Hakaas aan atu moris loos tuir Maromak nia hakarak, atu fiar nafatin ba Kristu, hadomi ema seluk, aguenta ho pasiensia iha terus laran, i hatudu laran maus.
1TI 6:12 Hanesan ema nebee mak halai taru, o mos tenki luta iha o nia fiar. Uluk bainhira o deklara iha ema barak nia oin katak o fiar ba Jesus Kristu, Maromak bolu o tama iha moris rohan-laek. Kaer metin moris nee.
1TI 6:13 Agora hau manda o iha Maromak nia oin, ho mos Kristu Jesus nia oin. Tanba Maromak mak foo moris ba buat hotu-hotu, i Kristu Jesus foo sasin lo-loos kona ba Nia Aan iha governador Pónsiu Pilatus nia oin. Hau manda o hanesan nee:
1TI 6:14 Halo tuir Maromak nia orden tomak ho lo-loos too ita nia Nai Jesus Kristu fila mai husi lalehan
1TI 6:15 iha loron nebee Maromak desidi. Maromak nee buat diak hotu-hotu nia huun. Nia mesak deit mak kaer ukun. Nia mak liurai hotu-hotu nia Liurai, ho nai hotu-hotu nia Nai.
1TI 6:16 So Nia deit mak nunka mate. Nia moris iha naroman ida nebee mak ita ema la bele besik. Ema ida seidauk haree Nia, i la iha ema ida mak bele haree Nia. Mai ita respeita Nia! Nia mak iha kbiit hodi ukun tinan ba tinan. Amen.
1TI 6:17 Haruka ema nebee riku ho sasaan mundu nian, la bele foti aan, i la bele laran metin ba sira nia riku-soin, tanba riku-soin sira nee bele mohu. Haruka sira laran metin ba Maromak, tanba Nia mak foo buat hotu-hotu mai ita too resin, atu ita bele moris haksolok.
1TI 6:18 Hatete ba sira para halo beibeik buat nebee diak hodi tulun ema seluk, i la bele karak, maibee tenki prontu foo buat nebee mak sira iha.
1TI 6:19 Nunee sira nia hahalok diak nee sai hanesan riku-soin nebee mak sira rai ba loron ikus, para sira bele hetan moris nebee mak ema bolu “moris lo-loos.”
1TI 6:20 Timóteo, kuidadu di-diak knaar nebee Maromak tau ona iha o nia kabaas. Lalika diskuti malu ho ema nebee koalia la huun la dikin i kontra Maromak nia liafuan. Sira gaba aan dehan matenek, maibee lae.
1TI 6:21 Iha ema balu fiar ba sira nia liafuan bosok nee, too husik tiha sira nia fiar ba Maromak. Hau harohan ba Maromak atu hatudu Nia laran diak ba imi hotu.
2TI 1:1 Surat nee husi hau, Paulo. Maromak foti hau sai Kristu Jesus nia apostolu, i haruka hau baa foo sai kona ba moris rohan-laek. Moris nee Nia promete atu foo ba ema nebee laran ida ho Kristu Jesus.
2TI 1:2 Hau hakerek surat nee ba o, Timóteo. O hanesan hau nia oan doben. Hau harohan atu Aman Maromak ho ita nia Nai Kristu Jesus hatudu Sira nia laran diak ho laran luak ba o, i foo pas ho hakmatek ba o.
2TI 1:3 Loron-kalan hau halo orasaun ba o hodi foo agradese ba Maromak. Hau serbi Nia ho laran moos, hanesan mos hau nia bei-ala sira.
2TI 1:4 Hau hanoin fali uluk, kuandu ita nain rua fahe malu, o nia matan been turu. Agora hau hakarak loos haree o, atu hau nia laran bele haksolok.
2TI 1:5 Hau la haluha katak o fiar ba Kristu ho laran tomak. O nia avoo feto Lóide ho o nia inan Eunice mak fiar uluk, i hau laran metin katak agora o mos fiar hanesan sira.
2TI 1:6 Tanba nee hau foo hanoin fila fali ba o atu halakan beibeik kbiit nebee mak Maromak uluk foo ba o bainhira hau tau liman ba o nia ulun hodi halo orasaun.
2TI 1:7 Tanba Espiritu nebee mak Maromak foo mai ita laos halo ita sai tauk-teen. Maibee Espiritu nee halo ita forsa, hadomi ema i domina aan.
2TI 1:8 Nee duni keta moe atu foo sasin kona ba ita nia Nai, i la bele moe kona ba hau maski hau dadur hela iha komarka laran tanba hau serbi Nia. Diak liu o mos terus hamutuk ho hau para foo sai Liafuan Diak. I Maromak sei foo forsa ba o atu aguenta iha terus nee.
2TI 1:9 Maromak salva ona ita, i bolu ita sai Nia ema para ita moris ho laran moos. Nia halo nunee, laos tanba ita nia hahalok diak ruma, maibee tuir Nia planu rasik ho mos Nia laran diak. Molok Maromak halo lalehan ho rai, Nia laran diak mai ita liu husi Kristu Jesus iha nanis ona.
2TI 1:10 Agora ita haree tiha ona Nia laran diak nee, tanba ita nia Salvador Kristu Jesus mai tiha ona. Kristu halo rahun tiha ona mate nia kbiit. I Nia foo sai liu husi Liafuan Diak katak, Nia loke dalan ba ita atu hetan moris rohan-laek.
2TI 1:11 I Maromak foti hau sai apostolu ho mestri hodi foo sai Nia Liafuan Diak nee.
2TI 1:12 Tanba nee mak hau terus hela iha kadeia laran. Maibee hau la moe, tanba hau konhese Kristu i fiar ba Nia. I hau hatene lo-loos katak Nia sei kuidadu Nia Liafuan Diak nebee Nia tau ona iha hau nia kabaas, too Nia fila fali mai husi lalehan.
2TI 1:13 Buat nebee hau hanorin tiha ona ba o, o tenki kaer metin nudar matadalan hanorin loos nian. Fiar nafatin ba Jesus i hadomi ema seluk, tanba ita laran ida ona ho Kristu Jesus.
2TI 1:14 Hanorin loos nee hanesan osan mean nebee Maromak entrega ona ba o para o kuidadu. Defende lia loos nee hodi Espiritu Santu nia tulun, tanba Nia hela iha ita nia laran.
2TI 1:15 O hatene katak Fíjelu ho Hermójenes ho sira seluk nebee hela iha provinsia Ázia husik tiha ona hau.
2TI 1:16 Hau harohan ba Nai atu hatudu Nia laran luak ba Onesiforu ho nia familia tanba Onesiforu dala barak halo kamaan hau nia laran. Maski hau iha komarka laran maibee nia la moe kona ba hau.
2TI 1:17 Uluk, bainhira nia too iha sidade Roma, nia buka hau tuun-sae too hetan hau.
2TI 1:18 O hatene mo-moos katak uluk hau iha sidade Éfezu, nia mos foo ajuda oi-oin mai hau. Hau harohan atu aban-bainrua Nai Jesus tesi ema hotu-hotu nia lia, Nai Jesus hatudu Nia laran luak ba Onesiforu.
2TI 2:1 Entaun hau nia oan, sai forti ba! Tanba Kristu Jesus hatudu Nia laran diak ba o hodi foo kbiit ba o.
2TI 2:2 Uluk hau hanorin iha ema barak nia oin, o mos tuir hotu. Buat sira nebee o rona husi hau nee, o tenki foo tutan ba ema nebee o konfia, para sira mos bele hanorin tutan fali ba ema seluk.
2TI 2:3 Nudar Kristu Jesus nia soldadu diak, o tenki aguenta iha terus laran, hanesan ho ami.
2TI 2:4 Soldadu nebee halo dadauk funu, nia la hanoin tan atu halo buat seluk, tanba nia hakarak halo kontenti nia komandante.
2TI 2:5 Nunee mos, ema nebee halai taru tenki halai tuir nia regra, se lae nia la bele manaan premiu.
2TI 2:6 Haree mos ba toos nain nebee servisu mate aan, nia mak merese hetan uluk rezultadu toos nian.
2TI 2:7 Hanoin di-diak ezemplu hirak nee, i Nai sei halo o kompriende buat sira nee hotu.
2TI 2:8 Hanoin beibeik kona ba Jesus Kristu, liurai David nia Jerasaun. Maromak halo Nia moris fali ona husi mate. Ida nee mak Liafuan Diak nebee hau foo sai.
2TI 2:9 Tanba hau foo sai Liafuan Diak nee mak agora dadauk hau terus hela, too ema kesi tan hau ho korenti hanesan fali ema nebee halo krimi. Maibee la iha ema ida mak kesi Maromak nia liafuan.
2TI 2:10 Tanba nee, hau aguenta ho pasiensia iha terus saida deit, para ema sira nebee Maromak hili ona mos bele hetan salvasaun liu husi Kristu Jesus. Nunee sira mos moris iha naroman lalehan nian too tinan ba tinan.
2TI 2:11 Liafuan tuir mai nee loos duni. “Se ita mate hamutuk ho Kristu, ita mos sei moris hamutuk ho Nia.
2TI 2:12 Se ita aguenta iha terus laran, ita mos sei ukun hamutuk ho Nia. Se ita nega Nia, Nia mos sei nega ita.
2TI 2:13 Se ita la foo laran ba Nia, Nia nafatin foo laran mai ita, tanba Nia la bele nega Nia Aan.”
2TI 2:14 Foo hanoin beibeik sarani sira kona ba buat sira nee. Hatete ba sira hodi Maromak nia naran atu la bele istori malu kona ba liafuan. Hahalok hanesan nee la iha folin, i so estraga deit ema nebee rona.
2TI 2:15 Hakaas aan halao o nia knaar ho di-diak atu Maromak rekonhese o nudar servisu nain diak ida. Nunee o la moe kona ba o nia servisu, tanba o hanorin lia loos ho di-diak.
2TI 2:16 Hadook aan husi koalia la huun la dikin nebee kontra Maromak nia liafuan, tanba ema nebee koalia hanesan nee dook ba beibeik husi Maromak.
2TI 2:17 Sira nia liafuan hanesan kanek dodok nebee aumenta ba beibeik. Himeneu ho Filetu hanesan nee.
2TI 2:18 Sira nain rua hanorin dehan, ema sira nebee mate, moris fali tiha ona. Nunee sira sees tiha husi lia loos, i estraga ema balu nia fiar.
2TI 2:19 Maski nunee, uma nebee Maromak harii, nia huun forti i la nakdoko. Iha uma huun nee hakerek dehan, “Nai Maromak hatene see mak Ninian.” Hakerek mos dehan, “See mak foo sai katak nia tuir Nai Maromak, tenki fila kotuk ba buat aat.”
2TI 2:20 Iha ema riku nia uma, iha bikan oi-oin. Balu halo husi osan mean ka osan mutin. Iha mos balu halo husi ai ka husi rai. Bikan diak nian, uma nain uza ba loron boot deit. Maibee bikan baratu nian, uza hodi tau foer.
2TI 2:21 Nunee mos ho ita ema. See mak hadook aan husi buat nebee aat, nia hanesan bikan diak sira nee, i Maromak sei uza nia ba servisu nebee diak. Tanba nia laran moos ona, nia serve para nia Nain bele uza, i nia prontu halo buat diak saida deit.
2TI 2:22 Timóteo, o tenki halai sees husi buat aat nebee foinsae sira balu gosta halo. Hakaas aan atu moris loos, fiar nafatin ba Maromak, hadomi o nia maluk i moris pas ho ema seluk. Ema hotu nebee adora Nai Maromak ho laran moos tenki moris hanesan nee.
2TI 2:23 Bainhira ema diskuti malu kona ba buat nebee la iha folin, o lalika tama iha laran, tanba so halo ema istori malu deit.
2TI 2:24 Nai Maromak nia atan la bele istori malu ho ema, maibee tenki laran diak ba ema hotu, hatene hanorin ema, i pasiensia ba ema nebee halo problema.
2TI 2:25 Ema sira nebee kontra nia, nia tenki koriji ho laran maus, tanba dala ruma Maromak bele tulun sira atu husik sira nia sala hodi simu lia loos.
2TI 2:26 Nunee sira nia hanoin bele sai loos fali, i sira bele halai sai husi Satanás nia lasu, maski uluk Satanás halo sira dadur atu obriga sira tuir nia hakarak.
2TI 3:1 Hanoin di-diak, molok mundu atu remata, terus ho susar barak sei mosu.
2TI 3:2 Ema sei hadomi deit sira nia aan rasik, i matan fuan naklosu ba osan. Sira gaba aan, foti aan, gosta hatete aat ema, lakohi rona sira nia inan-aman, la hatene foo obrigadu, i la hamtauk Maromak.
2TI 3:3 Sira la hatene hadomi ema, i lakohi foo perdaun ba ema. Sira konta aat ema nia vida, la domina aan, gosta halo violensia, i nunka gosta buat nebee diak.
2TI 3:4 Sira traidor, la hanoin naruk, i foti aan dehan boot. Sira la hadomi Maromak, maibee hanoin mak goza deit.
2TI 3:5 Sira hatudu jeitu hanesan ema nebee fiar ba Maromak, maibee sira lakohi simu Maromak nia kbiit para bele moris loos. Ema hanesan nee, keta liga.
2TI 3:6 Ema sira nee balu buka dalan atu tama-sai iha feto beik-teen sira nia uma hodi dada feto sira nee tuir sira. Feto sira nee fasil loos tuir see-see deit, sira nia laran la hakmatek tanba sira halo sala barak ona, i sira nia hakarak aat oi-oin domina sira.
2TI 3:7 Sira gosta rona hanorin foun, maibee nunka hatene lia loos.
2TI 3:8 Mestri sira nee kontra lia loos, hanesan uluk Janes ho Jambres kontra Moisés. Mestri sira nee nia hanoin sai aat tiha ona, i saida mak sira fiar nee la vale buat ida.
2TI 3:9 Sira la lao ba oin, tanba ema hotu sei hatene katak sira beik-teen, hanesan mos uluk akontese ba Janes ho Jambres.
2TI 3:10 Maibee o nee akompanha ona hau nia moris tomak. O hatene hau nia hanorin, hau nia hahalok ho hau nia objetivu moris. O haree ona hau nia fiar, hau nia pasiensia, hau nia domin ba ema seluk, i oinsaa hau aguenta ho pasiensia iha terus laran.
2TI 3:11 O mos hatene katak ema hanehan hau i halo terus hau. Ema iha sidade Antiokia, Ikóniu ho Listra halo terus hau oinsaa, o hatene hotu. Maibee Nai Jesus hasai ona hau husi terus ho susar sira nee hotu.
2TI 3:12 Loos duni, see-see deit mak fiar ba Kristu Jesus i buka atu moris tuir Maromak nia hakarak, ema sei halo terus sira.
2TI 3:13 Maibee ema aat ho ema bosok-teen sira sei sai aat ba beibeik. Sira lohi ema, ema mos lohi sira.
2TI 3:14 Maibee o tenki kaer metin nafatin buat nebee o aprende tiha ona. O laran metin ona katak buat sira nee loos, tanba o hatene see mak hanorin ba o.
2TI 3:15 Komesa o sei kiik, o hatene ona Livru Sagradu. Husi Livru Sagradu nee, o hatene katak, Maromak salva o bainhira o fiar ba Kristu Jesus.
2TI 3:16 Liafuan hotu-hotu iha Livru Sagradu mai husi Maromak. Liafuan sira nee serve para hanorin ema, hatudu sai ema nia sala, koriji ema, i eduka ema para moris loos.
2TI 3:17 Nee hotu treinu di-diak ema nebee halao Maromak nia servisu atu sira bele halo buat diak oi-oin.
2TI 4:1 Kristu Jesus sei fila fali mai husi lalehan hodi ukun nudar Liurai, i Nia sei foo justisa ba ema sira nebee sei moris ho sira nebee mate tiha ona. Nunee, iha Maromak nia oin ho mos Kristu Jesus nia oin, hau foo orden ba o nunee:
2TI 4:2 Foo sai Maromak nia liafuan, iha tempu diak ka la diak mos, o tenki prontu. Hanorin Maromak nia liafuan ho pasiensia hodi koriji ema nebee halo sala, bandu sira para la bele halo tan i hametin ema hotu nia laran.
2TI 4:3 Tanba too loron ida, ema sei lakohi rona tan hanorin nebee mak loos. Sira sei tuir deit sira nia hakarak rasik hodi halibur mestri bar-barak para hanorin sira tuir saida mak sira gosta rona.
2TI 4:4 Sira sei taka tilun ba hanorin nebee mak loos hodi see tilun fali ba ai knanoik.
2TI 4:5 Maibee o nee tenki domina aan iha situasaun saida deit. Aguenta ho pasiensia iha terus laran. Baa foo sai Liafuan Diak ba ema sira nebee seidauk rona. Halao servisu hotu-hotu nebee Maromak tau ona iha o nia kabaas.
2TI 4:6 Kona ba hau nia aan, hau nia loron mate besik ona. Hau hanesan tua kopu ida nebee fakar dadauk ba altar leten hanesan oferta ida ba Maromak.
2TI 4:7 Hau luta tiha ona too hotu ho diak. Hau halai taru too ona nia rohan. Hau kaer metin nafatin hau nia fiar.
2TI 4:8 Agora Nai Jesus prepara tiha ona premiu ida atu foo mai hau. Premiu nee Nia prepara ba ema nebee moris loos, i Nia sei fahe bainhira Nia mai nudar Juis hodi tesi lia ho lo-loos. Laos deit hau, maibee ema hotu-hotu nebee hein ho laran haksolok atu Nai Jesus fila fali mai, sira mos sei hetan hotu.
2TI 4:9 Timóteo, hakaas aan mai lalais haree hau.
2TI 4:10 Tanba Demas husik tiha ona hau hodi baa iha sidade Tesalónika, tanba nia hadomi liu buat mundu nian. Kresente baa tiha ona provinsia Galásia, i Tito mos baa tiha ona rai Dalmásia.
2TI 4:11 So Lucas deit mak sei hamutuk ho hau. Bainhira o atu mai, o baa hasoru uluk Marcos, para imi nain rua mai hamutuk, tanba Marcos bele ajuda hau iha hau nia servisu.
2TI 4:12 Hau haruka ona Tíkiku baa iha sidade Éfezu.
2TI 4:13 Bainhira o mai, lori ho hau nia faru manas nebee hau rai hela iha Karpu nia uma iha sidade Tróade. Lori mos hau nia livru, liu-liu livru nebee halo husi animal nia kulit.
2TI 4:14 Alexandre, ida badaen besi nee halo ona buat aat barak mai hau. Nai Jesus sei kastigu nia tuir nia hahalok.
2TI 4:15 O tenki kuidadu ho ema nee, tanba nia kontra makaas ita nia hanorin.
2TI 4:16 Bainhira hau primeira ves hamriik iha juis nia oin hodi defende hau nia aan, la iha ema ida mak ajuda defende hau, sira hotu husik tiha hau. Hau harohan atu Maromak la bele foo sala ba sira.
2TI 4:17 Maski nunee iha momentu nebaa Nai Jesus hamriik iha hau nia sorin hodi foo forsa mai hau para hau bele foo sai Liafuan Diak too hotu, nunee sira nebee laos ema Judeu bele rona. I Nai Jesus hasai hau husi liaun nia ibun.
2TI 4:18 Nia sei hasai hau husi buat aat hotu. I Nia sei lori hau ho diak tama ba iha reinu lalehan. Mai ita hahii adora Nia too tinan ba tinan nafatin. Amen.
2TI 4:19 Hatoo kumprimentus ba Priscila ho nia kaben Akila. Kumprimentus mos ba Onesiforu nia uma kain.
2TI 4:20 Erastu hela nafatin iha sidade Korintu. I hau husik hela Trófimu iha sidade Miletu tanba nia moras.
2TI 4:21 Hakaas aan mai too iha nee molok tempu malirin. Eubulu, Pudente, Lino, Cláudia, ho sarani sira seluk hatoo kumprimentus ba o.
2TI 4:22 Hau harohan atu Nai Jesus hamutuk ho o, i Maromak hatudu Nia laran diak ba imi hotu.
TIT 1:1 Surat nee husi hau, Paulo. Hau Maromak nia atan ho Jesus Kristu nia apostolu. Maromak haruka hau tulun ema sira nebee Nia hili ona atu sira nia fiar ba Nia bele sai forti. Maromak mos haruka hau hanorin lia loos ba sira atu sira hatene moris tuir Nia hakarak.
TIT 1:2 Nunee sira bele laran metin katak, iha loron ida sira sei moris hamutuk ho Maromak too tinan ba tinan. Ida nee promesa nebee Maromak halo nanis kedas molok mundu nee iha, i Nia nunka bosok.
TIT 1:3 Agora, too ona nia tempu, Maromak foo sai Liafuan Diak kona ba moris rohan-laek nee. I Nia foo fiar mai hau atu haklaken Liafuan Diak nee ba ema. Hau halao servisu nee tanba orden husi Maromak ita nia Salvador.
TIT 1:4 Hau hakerek surat nee ba o, Tito. O hanesan hau nia oan rasik tanba ita nain rua fiar ba Kristu. Hau harohan ba Aman Maromak ho Kristu Jesus ita nia Salvador, para hatudu Sira nia laran diak ba o, i foo pas ho hakmatek ba o.
TIT 1:5 Uluk, hau sai husi rai Kreta, hau husu o hela nafatin iha nebaa para halo remata servisu balu nebee seidauk hotu. Momentu nebaa hau husu para o foti ema sai responsavel sarani iha vila ida-idak. Keta haluha hau nia lia menon nee.
TIT 1:6 Ema nebee sai responsavel ba sarani sira tenki hanesan tuir mai nee: Nia tenki livre husi sala, i tenki moris ho feen ida deit. Nia oan sira mos tenki fiar ba Jesus Kristu, keta halo be ema konhese sira nudar nakar-teen ka oan nebee lakohi rona nia inan-aman.
TIT 1:7 Responsavel sarani nia knaar mak toma konta Maromak nia servisu. Nee duni nia tenki livre husi sala. Nia la bele hakarak manaan mesak deit, la bele nervozu door, lanu-teen ka baku door ema, i la bele matan fuan naklosu ba osan.
TIT 1:8 Nia tenki simu bainaka iha uma laran ho haksolok, i gosta halo buat nebee diak. Nia tenki ema kalma, moris loos, laran moos i hatene domina aan.
TIT 1:9 Nia tenki kaer metin hanorin nebee uluk ita foo ba nia, tanba hanorin nee loos. Nunee nia bele hametin ema nia laran ho hanorin nebee loos, i bele koriji ema nebee mak kontra hanorin nee.
TIT 1:10 Tanba iha ema barak kontra hanorin nebee loos. Sira bosok-teen i koalia nar-naran deit, liu-liu ema nebee hanorin dehan, atu hetan salvasaun, tenki sunat tuir lei relijiaun Judeu nian.
TIT 1:11 Tuir loos sira la bele hanorin nunee. Haruka sira para tiha. Tanba sira nia hanorin estraga uma kain barak nia fiar, i sira hanorin so atu manaan osan deit.
TIT 1:12 Uluk matan-dook ida husi sira nia rai Kreta koalia kona ba nia ema rasik dehan, “Ema Kreta sira mesak bosok-teen, laran aat, baruk-teen, i moris atu foo haan kabun deit.”
TIT 1:13 Liafuan nee kona duni sira. Tanba nee, o tenki hasee sira makaas para sira bele fiar metin lia loos
TIT 1:14 hodi husik tiha ema Judeu sira nia ai knanoik, i la bele preokupa tan regra husi ema nebee fila kotuk ba lia loos.
TIT 1:15 Ema nebee laran moos, buat hotu-hotu moos ba sira. Maibee ba ema nebee laran foer i la fiar ba Nai Jesus, la iha buat ida mak moos, tanba sira nia hanoin aat tiha ona i sira la hatene ona saida mak diak, saida mak aat.
TIT 1:16 Sira dehan, sira konhese Maromak, maibee sira nia hahalok hatudu katak sira la konhese Nia. Sira nia hahalok aat halo ema hakribi, i sira lakohi halo tuir Maromak nia hakarak. Atu halo buat diak ida mos la iha.
TIT 2:1 Maibee Tito, o tenki hanorin buat nebee loos.
TIT 2:2 Hanorin katuas sira atu hatene aan i domina aan para ema bele respeita. Hanorin sira atu fiar metin ba Maromak, hadomi ema ho laran tomak, i pasiensia iha terus nia laran.
TIT 2:3 Nunee mos hanorin ferik sira atu moris nudar ema nebee respeita Maromak. Hatete ba sira la bele konta aat ema nia vida, i la bele sai tua atan. Maibee sira tenki hanorin buat nebee diak.
TIT 2:4 Ho nunee ferik sira eduka feto maluk sira nebee idade kiik liu sira atu hadomi sira nia laen ho sira nia oan,
TIT 2:5 domina aan, moris loos, badinas kaer servisu uma laran nian, laran diak, i hakruuk ba sira nia laen. Se sira moris nunee mak la iha ema ida atu hatete aat Maromak nia liafuan.
TIT 2:6 Nunee mos foo hanoin nafatin ba mane joven sira atu domina sira nia aan.
TIT 2:7 O tenki halo diak ba ema iha buat hotu-hotu, nunee o sai ezemplu diak ba joven sira nee. Bainhira o hanorin ema, hanorin ho laran, keta halimar ho o nia servisu nee,
TIT 2:8 i hanorin ho loos para ema la bele foo sala ba o. Nunee ema sira nebee kontra o, sei moe tanba sira la iha razaun atu hatete aat ita.
TIT 2:9 O tenki hanorin atan sira atu hakruuk ba sira nia patraun iha buat saida deit. Sira tenki hakaas aan halo haksolok patraun nia laran, la bele koalia hasoru patraun,
TIT 2:10 i la bele naok nia sasaan. Maibee sira tenki hatudu hahalok diak para patraun bele konfia sira. Nunee ema sei haree katak ita nia hanorin kona ba Maromak ita nia Salvador nee furak duni.
TIT 2:11 O tenki hanorin buat sira nee hotu tanba Maromak hatudu ona Nia laran diak ba ema hodi loke dalan ba ema hotu-hotu atu hetan salvasaun.
TIT 2:12 Maromak nia laran diak hanorin ita atu la bele fila kotuk ba Nia hakarak i la bele kaan tan buat aat mundu nian. Durante ita sei moris iha mundu, ita tenki domina aan, moris loos, i halo tuir Maromak nia hakarak.
TIT 2:13 Iha ita nia moris nee, ita laran haksolok hodi hein loron nebee Jesus Kristu fila fali mai mundu ho naroman lalehan nian. Jesus Kristu nee ita nia Maromak Kbiit Nain, Nia nee ita nia Salvador.
TIT 2:14 Nia foo Aan ba mate hodi hasai ita husi buat aat hotu-hotu i hamoos ita nia laran para ita sai Nia povu rasik i ita sempre prontu halo buat nebee diak.
TIT 2:15 Nee duni hanorin buat sira nee hotu ba sarani sira, hatete beibeik ba sira para halo tuir, i koriji see mak halo sala. Uza o nia autoridade tomak hodi halao knaar nee. Keta husik ema la respeita o.
TIT 3:1 Foo hanoin ba sarani sira atu hakruuk ba nai ulun sira hodi rona sira, i sempre prontu halo buat nebee diak.
TIT 3:2 Hatete ba sira la bele konta aat ema seluk i la bele istori malu, maibee tenki hatudu laran maus ho laran diak ba ema hotu.
TIT 3:3 Tanba uluk ita beik-teen hela, ita lakohi rona Maromak, i tuir fali lia bosok. Ita hakarak halo buat aat saida deit, ita halo ona. Ita nia moris nakonu ho hanoin aat, laran moras ema, i odi malu.
TIT 3:4 Maski nunee, Maromak ita nia Salvador hatudu Nia laran diak ho domin mai ita
TIT 3:5 hodi salva ita. Nia salva ita laos tanba ita halo buat diak ruma, maibee tanba Nia laran luak. Nia salva ita nunee: Liu husi Jesus Kristu ita nia Salvador, Maromak fakar Nia Espiritu Santu mai ita hanesan bee nebee fakar too nakonu resin. Espiritu Santu nee hamoos ita nia laran hodi halo foun ita nia moris, halo ita moris fila fali.
TIT 3:7 Maromak hamoos tiha ona ita nia sala hodi simu ita tanba Nia laran diak. Nunee Espiritu Santu halo ita laran metin katak, Maromak sei foo moris rohan-laek mai ita, hanesan Nia promete tiha ona atu foo ba Nia oan sira hotu.
TIT 3:8 Liafuan nee loos duni. Nunee o tenki koalia beibeik saida mak hau dehan nee, atu ema nebee mak fiar ba Maromak bele badinas halo buat nebee diak. Tanba hanorin nee diak i iha folin ba ema hotu.
TIT 3:9 Hadook aan husi diskusaun sira nebee la huun la dikin. Lalika dada lia kona ba ida-idak nia huun, ka haksesuk malu kona ba lei relijiaun Judeu nian. Buat sira nee hotu la iha folin ida, so halo ema lakon tempu deit.
TIT 3:10 Karik iha ema ruma fahe sarani sira, koriji nia. Se nia halo nafatin, koriji nia dala ida tan. Se nia lakohi rona nafatin, lalika liga tan nia.
TIT 3:11 Tanba o hatene katak, ema hanesan nee hanoin la loos tiha ona, i nia hahalok rasik hatudu katak nia sala.
TIT 3:12 Hau atu haruka Artemas se lae Tíkiku baa iha o. Bainhira nia too iha nebaa, o tenki hakaas aan mai lalais hasoru hau iha sidade Nikópolis, tanba hau desidi ona atu hela iha nebaa durante tempu rai malirin.
TIT 3:13 Esforsu aan atu ajuda advogadu Zenas ho nia kolega Apolo bainhira sira sai husi rai Kreta, para sira la bele falta buat ida iha dalan.
TIT 3:14 Ita nia maluk sarani sira tenki aprende hakaas aan halo buat nebee diak hodi ajuda ema nebee susar. Ho nunee sarani sira nia moris la saugati.
TIT 3:15 Ami hotu iha nee hatoo kumprimentus ba o. Hatoo mos kumprimentus ba ita nia maluk sarani sira nebee hadomi ami. Hau harohan atu Maromak hatudu Nia laran diak ba imi hotu.
PHM 1:1 Surat nee husi hau, Paulo hamutuk ho ita nia maluk sarani Timóteo. Hau dadur hela iha kadeia laran tanba hau tuir Kristu Jesus. Ami hakerek surat nee ba ami nia belun diak Filemón, senhor halao Maromak nia servisu hanesan ami.
PHM 1:2 Surat nee mos ba sarani sira nebee baibain halibur malu halo orasaun iha senhor nia uma, ho mos ba ami nia maluk feto Afia ho ami nia maluk luta nain Arkipu.
PHM 1:3 Hau harohan ba ita nia Aman Maromak ho Nai Jesus Kristu para hatudu Sira nia laran diak ba imi, i foo pas ho hakmatek ba imi.
PHM 1:4 Senhor Filemón, bainhira hau halo orasaun, hau sempre temi ita nia naran hodi foo agradese ba Maromak.
PHM 1:5 Tanba hau rona kona ba ita nia domin ba Maromak nia povu hotu ho mos ita nia fiar ba Nai Jesus.
PHM 1:6 Senhor nia fiar nee halo ita boot moris neon ida laran ida ho sarani sira seluk. Hau harohan atu liu husi senhor nia domin nee, senhor bele kompriende klean liu tan bensaun hotu-hotu nebee Maromak foo mai ita tanba ita laran ida ho Kristu.
PHM 1:7 Belun, Ita boot hadomi Maromak nia povu hodi halo sira nia laran haksolok. Hahalok nee halo hau nia laran mos haksolok teb-tebes, i foo forsa mai hau.
PHM 1:8 Tanba nee, hau hakarak husu buat ida. Nudar Kristu Jesus nia apostolu, hau iha direitu atu manda senhor halo buat nebee mak loos. Maibee hau lakohi manda, so husu deit, tanba senhor hadomi Maromak nia povu. Hau mos katuas ona, i hau dadur hela iha kadeia laran tanba hau tuir Kristu Jesus.
PHM 1:10 Nee mak hau husu atu senhor simu fali ita nia atan Onésimu ho diak. Iha komarka nee nia sai hanesan hau nia oan rasik, tanba hau mak lori nia atu fiar ba Jesus.
PHM 1:11 Uluk Onésimu nee la iha folin ba senhor, maibee agora nia iha folin, laos deit ba senhor, maibee iha folin mos mai hau.
PHM 1:12 Hau hadomi teb-tebes nia, maibee la iha buat ida, agora hau haruka nia fila fali ba senhor.
PHM 1:13 Hau iha kadeia laran nee tanba hau foo sai Maromak nia Liafuan Diak. Tuir loos hau hakarak atu Onésimu hela nafatin ho hau para bele foo ajuda mai hau hodi senhor nia naran.
PHM 1:14 Maibee se senhor seidauk hataan, hau lakohi foti desizaun. Hau hakarak atu tulun nebee ita foo mai hau sai husi ita nia laran, laos tanba hau mak obriga.
PHM 1:15 Uluk Onésimu halai lakon tiha husi senhor nia uma. Dala ruma Maromak husik nia sees aan husi ita iha tempu badak para agora nia bele fila fali baa hela metin ho senhor.
PHM 1:16 Uluk nia nee ita nia atan deit. Maibee agora nia fila fali, nia mos sai ita nia maluk sarani. Hau hadomi teb-tebes nia, maibee ita sei hadomi liu tan nia, tanba agora nia laos deit senhor nia atan, maibee nia mos tuir Nai Jesus hanesan ita.
PHM 1:17 Nee duni se senhor konsidera hau nudar ita nia maluk sarani nebee halao servisu hamutuk, entaun hau husu atu senhor simu Onésimu hanesan mos ita simu hau.
PHM 1:18 Se Onésimu uluk halo sala ruma hasoru senhor, ka nia iha tusan ruma, hau mak selu.
PHM 1:19 Hau hakerek ho hau nia liman rasik: Hau, Paulo promete atu selu hotu Onésimu nia tusan ba Filemón. Maibee keta haluha katak, senhor nia tusan ba hau nee boot liu, tanba liu husi hau mak ita hetan moris foun husi Maromak.
PHM 1:20 Entaun belun, halo ida nee para ajuda hau, tanba ita nain rua laran ida ona ho ita nia Nai Jesus Kristu. Nunee ita sei halo hau nia laran haksolok.
PHM 1:21 Hau hakerek surat nee ho kontenti tanba hau hatene katak senhor sei halo tuir, i sei halo liu fali buat nebee mak hau husu.
PHM 1:22 Iha tan buat ida. Prepara fatin ida mai hau, tanba hau hein katak Maromak sei rona imi nia orasaun hodi loke dalan atu hau bele baa fali haree imi.
PHM 1:23 Epafras dadur hela hamutuk ho hau tanba nia mos foo sai kona ba Kristu Jesus. Nia hatoo kumprimentus ba senhor.
PHM 1:24 Marcos, Aristarku, Demas, ho Lucas servisu hamutuk ho hau, i sira mos foo kumprimentus.
PHM 1:25 Hau harohan atu ita nia Nai Jesus Kristu hatudu Nia laran diak ba imi hotu.
HEB 1:1 Uluk, Maromak uza dalan oi-oin hodi koalia fila-fila ba ita nia bei-ala sira liu husi Nia profeta.
HEB 1:2 Maibee ohin loron, mundu besik remata ona, Maromak koalia ba ita liu husi Nia Oan rasik. Hori uluk liu Maromak foo fiar ba Nia Oan mak halo lalehan ho rai, i Maromak promete katak aban-bainrua Nia Oan mak sei simu buat sira nee hotu.
HEB 1:3 Maromak nia Oan hanesan lo-loos Maromak, Nia hatudu sai Maromak nia kbiit ho naroman lalehan nian, i Nia liafuan iha kbiit boot. Hodi Nia liafuan nee Nia tane nafatin buat hotu-hotu iha lalehan ho rai. Nia loke tiha ona dalan para Maromak bele hamoos ema nia sala. Hotu tiha Nia sae ba lalehan hodi tuur iha Maromak Aas Liu nia sorin loos.
HEB 1:4 Nunee Maromak foti Nia Oan aas liu Nia anju sira hotu. I fatin nebee mak Nia foo ba Nia Oan mos aas liu anju sira nia fatin.
HEB 1:5 Maromak hatete ba Nia Oan nunee: “O nee Hau nia Oan. Ohin loron Hau deklara katak Hau nee O nia Aman.” Nia mos foo sai dehan, “Hau nee Nia Aman, Nia, Hau nia Oan.” Maromak nunka koalia nunee kona ba anju sira.
HEB 1:6 Bainhira Maromak haruka Nia Oan mane mesak mai moris iha mundu, Nia dehan, “Hau nia anju sira hotu tenki adora Nia.”
HEB 1:7 Maibee kona ba anju sira, Maromak dehan, “Hau nia anju sira Hau nia atan. Hau haruka sira hanesan anin i hanesan ahi lakan.”
HEB 1:8 Maibee ba Nia Oan, Maromak dehan, “O nee Maromak, O sei ukun tinan ba tinan. O sempre ukun O nia reinu ho lo-loos.
HEB 1:9 O haksolok bainhira ema halo buat diak, i hakribi hahalok aat. Tanba nee Hau, O nia Maromak, foti O aas liu O nia maluk sira, i kose mina ba O nia ulun hodi halo O nia laran haksolok.”
HEB 1:10 Maromak mos dehan ba Nia Oan nunee: “Nai, hori uluk liu O halo mundu nee, lalehan nee O nia liman fatin.
HEB 1:11 Buat sira nee hotu aban-bainrua sei lakon, maibee O iha nafatin. Buat sira nee sei sai bosan hanesan faru tuan.
HEB 1:12 O sei lulun hanesan faru, i sei troka fali hanesan ema troka faru foun. Maibee O nunka muda, O nia moris sei la remata.”
HEB 1:13 Maromak koalia tan nunee ba Nia Oan: “Mai tuur iha Hau nia sorin loos too Hau halo O nia inimigu sira taka rabat iha O nia ain okos.” Maibee Maromak nunka koalia nunee ba Nia anju sira.
HEB 1:14 Entaun anju sira nee see? Sira nee espiritu nebee serbi Maromak. I Nia haruka sira mai tulun ema nebee mak atu hetan salvasaun.
HEB 2:1 Tanba nee, ita tenki kaer metin liu tan lia loos nebee ita rona tiha ona, para ita la bele lao sala dalan.
HEB 2:2 Uluk anju sira hatoo Maromak nia lia menon ba ita nia bei-ala sira. Buat nebee mak anju sira hatoo nee loos, i see mak kontra, nia simu kastigu tuir nia hahalok.
HEB 2:3 Saa tan salvasaun nebee mak Nai Jesus foo. Salvasaun nee boot teb-tebes, i see mak la interese, nia sei la sees husi Maromak nia kastigu. Tanba dalan salvasaun nee Nai Jesus rasik mak foo sai uluk, i ema sira nebee mak rona, sira foo sasin mai ita katak Nia liafuan nee loos.
HEB 2:4 Laos sira deit mak foo sasin, Maromak rasik foo sasin liu husi milagre ho sinal oi-oin nebee halo ema admira. Nia foo tan kbiit oi-oin liu husi Espiritu Santu tuir Nia hakarak. Buat sira nee hotu hatudu mai ita katak Jesus nia liafuan nee loos duni.
HEB 2:5 Agora ita koalia kona ba mundu foun nebee mak sei mai. Mundu foun nee laos foo ba anju sira mak ukun.
HEB 2:6 Iha Livru Sagradu dehan, “Maromak, ami ema kriatura nee see loos, too Ita Boot interese ami? Ami ema kbiit-laek nee see loos, too Ita Boot tau matan mai ami?
HEB 2:7 Ita Boot halo ami kiik liu uitoan anju sira; Ita Boot foo fatin aas ba ami i foti aas ami nia naran;
HEB 2:8 Ita Boot halo buat hotu-hotu hakruuk mai ami.” Tuir liafuan nee, Maromak foti ita ema para ukun buat hotu-hotu. Nee dehan katak, buat hotu-hotu tenki hakruuk ba ita ema. Agora ita seidauk haree nunee iha ita nia moris.
HEB 2:9 Maibee ita haree ona iha Jesus nia moris. Durante Jesus moris iha mundu nee, Nia kiik liu uitoan anju sira, i agora Maromak foo tiha ona fatin aas ba Nia hodi foti aas Nia naran, tanba Nia terus too mate iha ita hotu nia fatin. Nunee Nia hatudu sai Maromak nia laran diak.
HEB 2:10 Maromak halo lalehan ho rai, buat hotu-hotu nebee iha, iha tanba Nia. Nia mak desidi katak Jesus tenki terus, i liu husi Nia terus nee, Maromak halo Nia serve atu loke dalan ba ita ema hodi simu salvasaun. Nunee Jesus lori ema barak hamutuk ho Nia ba iha naroman lalehan nian. Maromak nia desizaun nee diak teb-tebes.
HEB 2:11 Bainhira Jesus hamoos ema ida nia sala, ema nee sai Maromak nia oan. Nunee Jesus ho ema sira nebee Nia halo moos ona nee, hotu-hotu Aman ida deit. Nee mak Jesus la moe bolu ita dehan, ita nee Nia alin.
HEB 2:12 Nia dehan ba Maromak, “Hau sei koalia sai ba Hau nia alin sira kona ba Ita Boot nia diak; hau sei hananu hahii Ita Boot iha sira nia leet.”
HEB 2:13 Jesus mos dehan, “Hau sei laran metin nafatin ba Maromak.” Nia dehan tan, “Hau mak nee, Hau hamutuk ho Maromak nia oan sira nebee mak Maromak foo ona mai Hau.”
HEB 2:14 Maromak nia oan sira nee iha isin ho raan. Nunee Jesus rasik mos sai ema para Nia bele mate, i liu husi Nia mate, Nia bele halo lakon tiha ida nebee mak ukun mate, nee mak Satanás.
HEB 2:15 I see-see deit mak tauk mate, too sira sai hanesan fali atan ba tauk nee durante sira nia moris tomak, Jesus foo liberdade ba sira.
HEB 2:16 Jesus laos tulun anju sira, maibee Nia tulun ita nebee mak mai husi Abraão nia jerasaun. Nee klaru.
HEB 2:17 Tanba nee, Jesus tenki sai hanesan lo-loos Nia maluk sira, para Nia bele sai Nai Lulik Boot ida nebee hadomi ho kompriende teb-tebes ita i serbi Maromak ho laran tomak. Nia foo Aan ba mate hodi hamoos ita ema nia sala.
HEB 2:18 Nia rasik terus bainhira hetan tentasaun. Nee mak Nia bele tulun ita bainhira ita mos hetan tentasaun.
HEB 3:1 Maun-alin sira, imi nee Maromak nian, i Nia hili ona imi atu tama iha lalehan. Imi tenki hanoin klean kona ba Jesus. Tanba ita rekonhese katak Nia mak Maromak nia Apostolu, i Nia nee Nai Lulik Boot.
HEB 3:2 Bainhira Maromak haruka Jesus mai, Jesus halo tuir lo-loos Maromak nia hakarak, hanesan mos Moisés uluk halo tuir Maromak nia hakarak hodi serbi Maromak nia povu hotu.
HEB 3:3 Maibee Jesus mak serve atu simu respeitu liu fali Moisés. Ita bele kompara ho ema nebee halo uma, ema seluk gaba liu ema nee duke sira gaba uma nebee mak nia halo.
HEB 3:4 Uma ida-idak, ema mak halo, maibee buat hotu-hotu nebee iha, Maromak mak halo.
HEB 3:5 Moisés halo tuir Maromak nia hakarak hodi serbi Maromak nia povu nudar atan ida iha Maromak nia uma laran. I nia koalia kona ba buat nebee mak Maromak atu foo sai aban-bainrua.
HEB 3:6 Maibee Jesus Kristu halo tuir Maromak nia hakarak hodi toma konta Maromak nia uma laran nudar Maromak nia Oan rasik. I ita nee Nia familia uma laran, naran katak ita brani nafatin hodi laran metin ba promesa nebee Maromak foo ona mai ita.
HEB 3:7 Tanba nee mak imi tenki halo tuir buat nebee Espiritu Santu dehan, “Ohin loron, se imi rona Maromak nia liafuan,
HEB 3:8 la bele ulun toos hanesan imi nia bei-ala sira uluk kontra Maromak hodi koko Nia iha rai fuik maran.
HEB 3:9 Durante tinan haat-nulu nia laran sira haree Nia milagre, maibee sira koko Nia nafatin.
HEB 3:10 Tanba nee mak Nia hirus sira hodi dehan, ‘Ema sira nee sempre lao sees husi dalan loos, i lakohi rona Hau nia liafuan.’
HEB 3:11 Maromak hirus too Nia jura dehan, ‘Ema sira nee sei la tama iha Hau nia fatin deskansa.’”
HEB 3:12 Nunee maun-alin sira, kuidadu! Keta halo be imi balu nia laran hakarak halo sala i lakohi fiar too fila kotuk ba Maromak Moris.
HEB 3:13 Agora sei tama iha tempu nebee Espiritu Santu bolu “ohin loron”. Nunee imi tenki foo hanoin ba malu loro-loron, para imi la bele monu ba sala hodi tuir fali lia bosok too sai ulun toos kontra Maromak.
HEB 3:14 Ita sai ona laran ida ho Jesus Kristu, naran katak ita kaer metin nafatin ita nia fiar husi huun too rohan.
HEB 3:15 Hanesan ohin hatete tiha ona iha leten: “Ohin loron, se imi rona Maromak nia liafuan, la bele ulun toos hanesan imi nia bei-ala sira uluk kontra Maromak.”
HEB 3:16 See mak rona Maromak nia liafuan maibee kontra fali nee? Sira nee mak ita nia bei-ala sira nebee Moisés lori sai tiha ona husi rai Ejitu.
HEB 3:17 Durante tinan haat-nulu nia laran Maromak hirus see? Nia hirus ita nia bei-ala sira nebee halo sala, sira mate namkari iha rai fuik maran.
HEB 3:18 Momentu nebaa Maromak jura dehan, “Ema sira nee sei la tama iha Hau nia fatin deskansa.” Nia koalia kona ba see? Nia koalia kona ba ema sira nebee mak lakohi rona Nia.
HEB 3:19 Nunee ita hatene ona katak, sira la bele tama iha fatin deskansa nee tanba sira lakohi fiar ba Maromak.
HEB 4:1 Maromak promete ona atu Nia povu bele tama ba iha Nia fatin deskansa, i Nia promesa nee sei vale nafatin. Entaun kuidadu atu imi hotu tama iha nebaa. Keta halo be husi imi balu la konsege tama.
HEB 4:2 Tanba ema foo sai tiha ona Liafuan Diak ba ita, hanesan mos uluk ema foo sai ba ita nia bei-ala sira. Maibee liafuan nebee sira rona nee la iha folin ba sira, tanba sira la fiar.
HEB 4:3 Ita nebee fiar Maromak nia liafuan bele tama iha fatin deskansa nee. Maibee kona ba ema nebee la fiar, Maromak hatete, “Hau hirus too Hau jura dehan, ‘Ema sira nee sei la tama iha Hau nia fatin deskansa.’” Maromak jura nunee, afinal uluk kedas Nia prepara tiha ona fatin deskansa nee bainhira Nia remata halo lalehan ho rai.
HEB 4:4 Iha Livru Sagradu hakerek nunee kona ba deskansa nee: “Too loron hitu, Maromak nia servisu hotu ona, Nia mos deskansa.”
HEB 4:5 Maibee iha liafuan ohin nee, Maromak bandu dehan, “Ema sira nee sei la tama iha Hau nia fatin deskansa.”
HEB 4:6 Nee dehan katak, ema nebee uluk rona Liafuan Diak maibee la halo tuir, sira la bele tama ba fatin deskansa nee. Maski sira la tama, maibee sei iha ema seluk mak bele tama.
HEB 4:7 Tanba nee mak liu tiha tinan barak nia laran, Maromak foo sai dehan Nia hili fali tempu seluk para ema bele tama iha Nia fatin deskansa. Tempu nee mak Nia bolu “ohin loron”. Maromak foo sai kona ba tempu nee liu husi liurai David, hanesan hau foin temi dadauk nee: “Ohin loron, se imi rona Maromak nia liafuan, la bele ulun toos.”
HEB 4:8 Uluk bainhira Josué lori ita nia bei-ala sira tama ba rai nebee mak Maromak promete ba sira, Josué la konsege foo deskansa lo-loos ba sira iha nebaa. Nee mak Maromak koalia fali kona ba tempu seluk.
HEB 4:9 Nunee ita hatene katak Maromak prepara ona tempu seluk para Nia ema sira deskansa, hanesan Nia mos deskansa iha loron hitu.
HEB 4:10 Ema nebee tama ona hodi deskansa hamutuk ho Maromak, nia para ona husi nia servisu, hanesan mos Maromak para husi Nia servisu.
HEB 4:11 Tanba nee, mai ita hakaas aan nafatin atu tama ba iha fatin deskansa nee. Keta halo be iha balu monu tanba halo tuir fali ita nia bei-ala sira nebee mak lakohi rona Maromak.
HEB 4:12 Keta haluha, Maromak nia liafuan moris i makaas teb-tebes. Nia liafuan kroat, borus too ita nia laran, hanesan surik ida oin-kotuk kroat hotu bele sona borus too haketak ita nia ruin ho uat hotu. Nia liafuan nee iha kbiit tama liu ba ita nia fuan ho laran hodi tetu ita nia hanoin ho ita nia hakarak hotu.
HEB 4:13 Iha lalehan ho rai la iha buat ida mak bele subar husi Maromak. Ba Nia, buat hotu-hotu nakloke, Nia haree borus hela. Too loron ida ita tenki hataan iha Maromak nia oin kona ba buat hotu-hotu nebee mak ita halo.
HEB 4:14 Ita iha Nai Lulik Boot ida nebee diak teb-tebes, Nia tama tiha ona too iha Maromak nia oin. Nia mak Jesus, Maromak nia Oan. Nee duni ita tenki kaer metin ita nia fiar.
HEB 4:15 Ita nia Nai Lulik Boot nee kompriende liu ita, Nia hatene katak ita ema nee fraku. Nia hatene tulun ita tanba uluk Nia rasik hasoru tentasaun oi-oin hanesan mos ita. Maski nunee Nia nunka monu ba sala.
HEB 4:16 Entaun mai ita brani hakbesik aan ba Maromak. Nia mak ukun buat hotu-hotu, i Nia sempre hatudu Nia laran diak mai ita. Se ita hakbesik ba Nia, Nia sei hatudu domin mai ita hodi tulun ita iha tempu susar nia laran.
HEB 5:1 Bainhira Maromak hili ema ida atu sai nai lulik boot, Nia sempre fihir ema ida husi povu nia leet hodi foti nia sai povu nia reprezentante iha Maromak nia oin. Nai lulik boot hasae povu nia oferta ba Maromak i oho animal nebee mak povu lori hanesan sakrifisiu para hamoos sira nia sala.
HEB 5:2 Se ema ruma la hatene dalan nebee loos ka lao sees husi dalan nee, nai lulik boot iha pasiensia ho ema nee, tanba nia rasik mos ema nebee fraku.
HEB 5:3 Nee mak nia tenki oho animal hodi halo sakrifisiu para hamoos nia sala rasik ho mos ba povu nia sala.
HEB 5:4 La iha ema ida bele foti nia aan rasik sai nai lulik boot, maibee Maromak mak foti nia, hanesan uluk Nia foti Arão.
HEB 5:5 Jesus Kristu mos nunee. Nia laos foti Nia Aan rasik sai Nai Lulik Boot, maibee Maromak mak foti Nia para kaer kargu boot nee. Maromak dehan, “O nee Hau nia Oan. Ohin loron Hau deklara sai katak Hau nee O nia Aman.”
HEB 5:6 Iha fatin seluk Maromak mos dehan, “O sai nai lulik too tinan ba tinan, O hanesan nai lulik Melkizedek uluk.”
HEB 5:7 Bainhira Jesus sei moris iha mundu nee, Nia harohan ho tanis hakilar ba Maromak, tanba Maromak mak bele salva Nia husi mate. I Maromak rona Nia orasaun, tanba Jesus haraik aan hodi hakruuk ba Maromak.
HEB 5:8 Jesus nee Maromak nia Oan rasik. Maski nunee Nia aprende rona Maromak liu husi Nia terus.
HEB 5:9 Nee mak Nia serve atu foo salvasaun rohan-laek nian ba ema nebee mak halo tuir Nia hakarak.
HEB 5:10 I Maromak foti Nia para sai Nai Lulik Boot hanesan Melkizedek uluk.
HEB 5:11 Sei iha buat barak mak hau hakarak koalia kona ba Kristu ho Melkizedek, maibee hau atu esplika ba imi susar, tanba imi ulun fatuk toos.
HEB 5:12 Tuir lo-loos, imi sai ona mestri hodi hanorin ema seluk. Maibee buat baziku husi Maromak nia liafuan mos, imi seidauk hatene, imi presiza nafatin ema seluk atu hanorin imi. Imi hanesan fali bebee nebee sei susu deit, i seidauk bele haan.
HEB 5:13 Ema nebee sei susu deit, nia hanesan labarik kiikoan, nia seidauk hatene saida mak diak, saida mak aat.
HEB 5:14 So ema nebee boot ona mak bele haan hahaan toos, nee dehan katak ema nebee hatoman aan tetu buat hotu-hotu too hatene lo-loos ona saida mak diak, saida mak aat.
HEB 6:1 Nee duni mai ita lao ba oin hodi aprende buat nebee klean liu. La bele aprende fila-fila lisaun primeiru kona ba Kristu. Tuir loos imi la presiza tan buat baziku nebee mak hanorin ita para husik ita nia sala nebee lori ita ba mate, i hanorin ita atu fiar ba Maromak.
HEB 6:2 Tuir loos imi la presiza tan hanorin kona ba batizmu, kona ba tau liman ba ema para Maromak foo bensaun, hanorin kona ba Maromak sei halo moris fali ema mate, ho hanorin kona ba aban-bainrua Maromak sei tesi ema hotu-hotu nia lia hodi desidi, see mak bele hetan moris rohan-laek, i see mak la hetan. Buat sira nee imi la presiza aprende fila-fila.
HEB 6:3 Se Maromak foo lisensa, mai ita muda ba hanorin nebee klean liu.
HEB 6:4 Tanba ema nebee fiar ona ba Kristu, se karik too ikus sira fila kotuk ba Nia, entaun ita atu lori sira husik fali sira nia sala, la bele ona. Tanba sira hetan ona naroman husi Maromak, sira koko ona bensaun lalehan nian, i sira simu ona Espiritu Santu.
HEB 6:5 Sira hatene husi sira nia esperiensia moris katak Maromak nia liafuan furak teb-tebes. Maromak nia kbiit nebee mak Nia sei hatudu iha tempu ikus mos, sira senti tiha ona.
HEB 6:6 Se karik too ikus sira fila kotuk ba Kristu, entaun ita atu halo sira husik sira nia sala hodi fila fali ba Maromak, la bele ona. Tanba sira hanesan prega mate fila fali Maromak nia Oan iha krus, i halo ema hatete aat Nia iha ema barak nia oin. Sira nia hahalok nee mos lori terus ba sira nia aan rasik.
HEB 6:7 Ita bele kompara ema ho rai. Rai nebee simu beibeik udan been, se rai nee foo rezultadu diak ba toos nain, entaun Maromak foo bensaun ba rai nee.
HEB 6:8 Maibee se rai nee nia rezultadu mak ai tarak deit, entaun la iha folin. Maromak sei foo malisan ba rai nee, too ikus sunu mutuk tiha.
HEB 6:9 Maluk doben sira, maski hau koalia nunee, maibee hau fiar metin katak imi laos ema nebee fila kotuk ba Kristu, imi sei halo buat nebee mak diak tanba Maromak salva tiha ona imi.
HEB 6:10 Maromak nee sempre halo buat nebee mak loos. Nia sei la haluha imi nia kolen ho imi nia domin ba Nia, tanba hori uluk too agora, imi tulun Maromak nia povu, nee hatudu katak imi mos hadomi Maromak.
HEB 6:11 Ami hakarak atu imi ida-idak hatudu nafatin imi nia domin nee too rohan, atu nunee imi bele laran metin katak, imi sei hetan buat nebee mak Maromak promete tiha ona atu foo ba imi.
HEB 6:12 Ami lakohi atu imi sai baruk-teen. Maibee imi tenki halo tuir ema sira nebee mak uluk fiar metin ba Maromak hodi hein nafatin ho pasiensia too sira hetan buat nebee mak Maromak promete ona atu foo ba sira.
HEB 6:13 Uluk bainhira Maromak halo promesa ba Abraão, Nia halo mos juramentu para hametin Nia promesa nee. La iha ida mak boot liu Maromak. Tanba nee Nia jura hodi Nia naran rasik.
HEB 6:14 Nia jura dehan, “Hau, Maromak sei foo bensaun ba o, i Hau sei halo o nia jerasaun sai barak teb-tebes.”
HEB 6:15 Entaun Abraão hein ho pasiensia, i too ikus hetan duni buat nebee mak Maromak promete ba nia.
HEB 6:16 Bainhira ema jura, nia baibain temi ida nebee boot liu nia, para ema hatene katak nia sei halo tuir duni buat nebee nia promete ona, i nunee ema la presiza diskuti tan.
HEB 6:17 Maromak hakarak para ema nebee simu Nia promesa nee, hatene mo-moos katak buat nebee Nia promete ona sei la muda. Tanba nee, Nia hametin Nia promesa ho juramentu.
HEB 6:18 Nia promesa ho Nia juramentu nee sei la muda, tanba Maromak la hatene bosok. Nunee Nia halo juramentu nee para ita nebee buka mahon ona iha Nia bele laran metin ba Nia promesa nee.
HEB 6:19 Ita nia laran metin nee hanesan besi ankor nebee kaer metin tasi kidun hodi halo roo ida para iha fatin. Nunee ita nia laran hakmatek i la nakdoko. Ita nia laran metin nee kuda tiha ona iha Maromak nia prezensa, iha Fatin nebee Lulik Liu, fatin nee haketak ho kurtina boot.
HEB 6:20 Jesus tama uluk tiha ona ba iha nebaa hodi harohan ba ita. Nia sai ona Nai Lulik Boot too tinan ba tinan, hanesan Melkizedek uluk.
HEB 7:1 Melkizedek nee liurai sidade Salém, i nia mos nai lulik hodi serbi Maromak Aas Liu. Iha loron ida, Abraão baa halo funu hasoru liurai nain haat, i nia mak manaan. Bainhira Abraão iha dalan atu fila fali ba uma, Melkizedek hasoru nia hodi foo bensaun ba nia.
HEB 7:2 Hotu tiha buat hotu-hotu nebee Abraão hadau husi nia inimigu sira, nia foo parte ida husi parte sanulu ba Melkizedek. Naran Melkizedek nee katak “liurai nebee moris loos”. I liurai Salém katak “liurai nebee lori dame”.
HEB 7:3 La iha ema ida hakerek kona ba Melkizedek nia inan-aman ho nia bei-ala sira, la iha ema ida hakerek nia loron moris ho loron mate. Nia hanesan Maromak nia Oan, tanba nia nai lulik too tinan ba tinan.
HEB 7:4 Hanoin took! Melkizedek nee ema boot duni, too ita nia bei-ala Abraão foo ba nia, sasaan parte ida husi parte sanulu.
HEB 7:5 Liu tiha tinan barak, lei Moisés nia foo sai katak, Levi nia jerasaun mak bele sai nai lulik, i nai lulik sira nee tenki simu oferta parte ida husi parte sanulu. Oferta nee povu mak foo. Afinal nai lulik sira ho povu sira seluk maun-alin, tanba sira hotu mesak Abraão nia jerasaun.
HEB 7:6 Maibee Melkizedek nee laos mai husi Levi nia jerasaun. Maski nunee Abraão foo sasaan parte ida husi parte sanulu ba nia. Melkizedek mos foo bensaun ba Abraão. Afinal Abraão nee uluk simu tiha ona Maromak nia promesa.
HEB 7:7 Ita hotu hatene katak, ema nebee foo bensaun nee, nia boot liu ema nebee simu.
HEB 7:8 Nai lulik sira husi Levi nia jerasaun simu oferta parte ida husi parte sanulu, maibee too ikus sira mate. Melkizedek mos simu oferta hanesan, maibee tuir Livru Sagradu nia moris nafatin.
HEB 7:9 Ita bele dehan katak, bainhira Abraão foo oferta ba Melkizedek, Levi mos foo nia parte.
HEB 7:10 Tanba maski Levi seidauk moris iha momentu nebaa, maibee ita bele konsidera katak, nia bei-ala Abraão foo mos Levi nia parte.
HEB 7:11 Tuir lei Moisés nian, nai lulik sira tenki mai husi Levi nia jerasaun. Nai lulik sira husi Levi nia jerasaun nee la iha kbiit atu halao buat hotu tuir Maromak nia hakarak. Nee mak ita presiza tan nai lulik ida oin seluk, nai lulik ida nebee hanesan Melkizedek, i laos hanesan Arão, Levi nia jerasaun primeiru nebee sai nai lulik boot.
HEB 7:12 Se troka sistema nai lulik nian nunee, entaun lei mos tenki troka.
HEB 7:13 Nai lulik ida oin seluk nebee ita temi nee mak ita nia Nai Jesus. Ita hotu hatene katak, Jesus husi Judá nia jerasaun, laos husi Levi nian. Ema husi Judá nia jerasaun nee nunka serbi iha altar nudar nai lulik, i Moisés mos nunka dehan sira bele sai nai lulik.
HEB 7:15 Entaun bainhira Jesus sai nai lulik hanesan Melkizedek, nee hatudu mo-moos katak lei muda tiha ona.
HEB 7:16 Jesus sai nai lulik, laos bazeia ba lei nebee dehan tenki Levi nia jerasaun mak bele sai nai lulik. Maibee Nia sai nai lulik tanba Nia iha kbiit hodi moris tinan ba tinan.
HEB 7:17 Iha Livru Sagradu hakerek kona ba Nia nunee: “O sai nai lulik tinan ba tinan, O hanesan nai lulik Melkizedek uluk.”
HEB 7:18 Ho nunee Maromak kansela tiha lei ida tuan, tanba lei nee fraku i la iha kbiit atu tulun ema.
HEB 7:19 Lei nee la bele halo ema moris loos. Maibee agora ita hetan ona esperansa boot liu, nunee ita bele hakbesik aan ba Maromak.
HEB 7:20 Uluk bainhira Maromak foti Levi nia jerasaun sai nai lulik, Nia la halo juramentu ho sira. Maibee bainhira Maromak foti Jesus sai nai lulik, Nia jura dehan, “Hau, Nai Maromak, jura tiha ona, i sei la muda Hau nia promesa: O sai nai lulik tinan ba tinan.”
HEB 7:22 Tanba Maromak jura nunee, Jesus halo ita nia laran metin katak Maromak sei kumpri duni Nia promesa ida nebee diak liu nee.
HEB 7:23 Iha tan diferensa ida. Nai lulik sira seluk barak, tanba sira mate husik hela sira nia servisu, i nunee troka fali ho nai lulik foun.
HEB 7:24 Maibee Jesus moris tinan ba tinan, nunee la iha ema ida atu troka Nia.
HEB 7:25 Tanba nee, Jesus iha kbiit atu salva see deit mak buka Maromak liu husi Nia. Nia bele salva sira agora i too tinan ba tinan, tanba Nia moris nafatin hodi harohan ba Maromak atu tulun sira.
HEB 7:26 Jesus nee Nai Lulik Boot nebee mak diak liu. Ita presiza teb-tebes nai lulik ida hanesan nee, tanba Nia ema ida nebee santu, livre husi sala, buat aat ida mos la iha. Maromak haketak ona Nia husi ema sala nain sira hodi foti Nia ba iha fatin aas liu iha lalehan.
HEB 7:27 Nai lulik sira seluk tenki oho animal loro-loron hodi halo sakrifisiu. Sira hasae uluk sakrifisiu atu hamoos sira nia sala rasik, hotu tiha mak foin hasae fali sakrifisiu para hamoos povu nia sala. Maibee Jesus entrega Nia Aan para sai sakrifisiu dala ida deit. Nee too ona para Maromak hamoos ema hotu-hotu nia sala too tinan ba tinan.
HEB 7:28 Ema nebee sai nai lulik boot tuir Moisés nia lei, sira ema nebee fraku. Maibee ikus mai, Maromak jura hodi foti Nia Oan sai Nai Lulik Boot, i Nia Oan nee sempre halo tuir Maromak nia hakarak.
HEB 8:1 Buat nebee ohin ita koalia nee nia pontu prinsipal mak nee: Agora ita iha ona Nai Lulik Boot nebee diak liu, Nia tuur hela iha Maromak nia sorin loos iha lalehan hodi kaer ukun.
HEB 8:2 Nia halao hela Nia servisu hanesan Nai Lulik Boot iha tenda orasaun nebee Nai Maromak rasik mak harii, laos ema mak harii.
HEB 8:3 Nai lulik boot hotu-hotu tenki hasae oferta ho sakrifisiu ba Maromak. Nee mak Jesus mos tenki hasae buat ruma hanesan sakrifisiu.
HEB 8:4 Se karik Jesus agora iha mundu, entaun Nia la bele sai nai lulik, tanba iha tiha ona nai lulik para foo oferta ho sakrifisiu ba Maromak tuir lei Moisés nian.
HEB 8:5 Nai lulik sira nee halao sira nia servisu iha tenda orasaun, maibee tenda orasaun ida iha mundu nee hanesan lalatak ka kopia deit. Tenda orasaun lo-loos mak iha lalehan. Tanba nee, bainhira Maromak haruka Moisés halo tenda orasaun, Nia foo hanoin dehan, “Kuidadu di-diak atu halo tenda orasaun nee tuir lo-loos modelu nebee Hau hatudu ona ba o iha foho leten.”
HEB 8:6 Maibee servisu nebee Jesus simu aas liu fali nai lulik hotu-hotu iha mundu. I Maromak nia promesa nebee mak Jesus lori mai ita mos diak liu fali Maromak nia promesa ba ita nia bei-ala sira.
HEB 8:7 Se karik promesa uluk nee bele halo ita dame malu ho Maromak, entaun Maromak la presiza halo tan promesa foun. Maibee presiza duni,
HEB 8:8 tanba Maromak hatene katak povu la moris tuir Nia hakarak. Nee mak Nia dehan, “Rona mai! Hau, Nai Maromak mak hatete: Iha tempu oin mai Hau sei halo promesa foun ho povu Israel ho mos povu Judá.
HEB 8:9 Promesa nee la hanesan ho promesa nebee uluk Hau halo ho sira nia bei-ala sira. Momentu nebaa Hau kaer sira nia liman hodi lori sira sai husi rai Ejitu. Maibee sira la halo tuir sira nia promesa mai Hau. Nee mak Hau husik tiha sira.
HEB 8:10 Agora Hau, Nai Maromak foo sai katak, promesa nebee Hau sei halo ho povu Israel mak nee: Hau sei tau Hau nia lei iha sira nia neon, i sei hakerek Hau nia ukun fuan iha sira nia laran. Hau sei sai sira nia Maromak, i sira sei sai Hau nia povu.
HEB 8:11 Sira sei la presiza tan hanorin sira nia maluk ka sira nia maun-alin dehan, ‘O tenki konhese Nai Maromak’, tanba sira hotu-hotu, husi kiik too boot, sei konhese Hau.
HEB 8:12 Hau sei hamoos sira nia sala hotu, i sei la hanoin tan sira nia hahalok aat.”
HEB 8:13 Bainhira Maromak koalia kona ba Nia promesa foun, nee dehan katak, Nia promesa tuan la vale ona. I buat nebee tuan i la vale ona, la kleur tan sei lakon.
HEB 9:1 Bainhira Maromak halo Nia promesa ida uluk ho ita nia bei-ala sira, Nia foo ho regra kona ba oinsaa atu adora Nia, i oinsaa atu harii fatin ida para adora Nia.
HEB 9:2 Entaun sira harii tenda orasaun, fahe ba kuartu rua. Kuartu ida iha oin naran Fatin Lulik. Iha kuartu nee iha ahi-oan riin ida ho meza ida para tau paun hodi oferese ba Maromak.
HEB 9:3 Iha tan kuartu ida iha kotuk naran Fatin nebee Lulik Liu. Kuartu nee taka ho kurtina boot.
HEB 9:4 Iha Fatin nebee Lulik Liu nee iha altar osan mean hodi sunu ai been morin. Iha mos kaixoti promesa nian, nia liur-laran taka tomak ho osan mean. Iha kaixoti nee nia laran iha sanan osan mean. Sanan nee paun manaa mak iha laran. Iha kaixoti laran nee iha mos Arão nia ai tonka nebee uluk dikin fali ona, ho mos fatuk belar rua. Iha fatuk nee hakerek Maromak nia ukun fuan.
HEB 9:5 Iha kaixoti nia leten, iha estatua rua hanesan kerubin. Kerubin rua nee hatudu Maromak Kbiit Nain nia prezensa. Sira nia liras nakloke hela hodi taka kaixoti nia matan. Iha fatin nee mak Maromak hamoos ema nia sala. Maibee agora laos tempu atu koalia klean liu kona ba buat sira nee.
HEB 9:6 Buat sira nee hotu tau tuir nia fatin. Depois nai lulik sira loro-loron tama ba iha kuartu oin hodi halo sira nia servisu.
HEB 9:7 Maibee Fatin nebee Lulik Liu, so nai lulik boot deit mak bele tama, i nia so bele tama tinan ida dala ida. Bainhira nia tama, nia tenki lori animal nia raan hodi oferese ba Maromak, para husu perdaun ba nia sala rasik ho mos ba povu sira nia sala nebee mak sira rasik la hatene tuir.
HEB 9:8 Liu husi regra sira nee, Espiritu Santu hatudu mai ita katak, durante tenda orasaun nee sei iha, dalan seidauk nakloke ba ita ema atu bele tama ba Fatin nebee Lulik Liu.
HEB 9:9 Buat sira nee foo hanoin mai ita nebee moris agora katak, oferta ho sakrifisiu nebee ema foo ba Maromak la bele halo kamaan sira nia laran, tanba sira hanoin nafatin sira nia sala.
HEB 9:10 Regra kona ba oferta ho sakrifisiu so koalia kona ba isin lolon nian deit, hanesan haan-hemu ho serimonia hamoos aan. Maski nunee regra sira nee lao nafatin too Maromak hatuun Nia promesa foun.
HEB 9:11 Maibee agora, Kristu mai tiha ona. Kristu nee mak Salvador nebee Maromak promete ona hori uluk kedas atu haruka mai. Nia sai ona Nai Lulik Boot hodi halo buat diak mai ita. Nia halao nia knaar hanesan nai lulik iha tenda orasaun ida nebee aas liu ho diak liu. Tenda orasaun nee laos iha mundu, nee katak laos ema kriatura mak halo.
HEB 9:12 Nai lulik boot sira seluk tama ba iha Fatin nebee Lulik Liu tinan ida dala ida, lori bibi nia raan ka karau nia raan. Maibee Kristu tama dala ida deit, lori Nia raan rasik. Ho Nia raan nee Nia hasai tiha ita husi ita nia sala too tinan ba tinan.
HEB 9:13 Tuir lei Moisés nian, ema nebee kontra lei nee konsidera foer. Maibee se nai lulik hisik nia ho bibi nia raan ka karau nia raan, ka ahu kdesan husi karau inan tunu, ema nee konsidera moos fali.
HEB 9:14 Se animal nia raan bele halo ema moos fali, saa tan Kristu nia raan! Tanba ho Espiritu rohan-laek nia tulun, Kristu foo Nia Aan ba Maromak nudar sakrifisiu ida nebee moos loos, foer uitoan mos la iha. Nee mak Nia raan hamoos ita nia laran para ita livre husi hahalok nebee mak lori ita ba mate, atu nunee ita bele adora Maromak Moris.
HEB 9:15 Tanba nee, Maromak foo fiar ba Kristu para lori Nia promesa foun mai ita ema. Nunee ema nebee Maromak bolu atu sai Nia povu bele simu buat hotu-hotu nebee Nia promete tiha ona atu foo, too tinan ba tinan. Ema nebee uluk moris iha promesa tuan nia okos mos sei simu buat sira nee hotu, tanba Kristu mate ona hodi hasai sira husi sala nebee mak sira halo iha tempu nebaa.
HEB 9:16 Hau foo ezemplu kona ba ema nebee hakerek surat deklarasaun hodi promete, see mak atu hetan nia riku-soin bainhira nia mate. Molok atu fahe nia riku-soin, tenki hatudu uluk lai katak ema nee mate tiha ona.
HEB 9:17 Tanba bainhira ema nee sei moris, promesa nebee mak nia hakerek iha surat nee seidauk halao. Nia mate tiha foin bele halao.
HEB 9:18 Nunee mos bainhira Maromak halo Nia promesa tuan ho ita nia bei-ala sira. Tenki ho raan hodi hatudu katak animal mate mak foin Nia promesa nee halao.
HEB 9:19 Iha tempu nebaa Maromak hatuun Nia promesa ho Nia lei dala ida liu husi Moisés. Depois Moisés halibur povu Israel tomak hodi foo sai ba sira Maromak nia lei tomak. Foo sai tiha hotu, nia oho karau ho bibi hodi hasai nia raan, i kahur raan nee ho bee. Nia kesi bibi fulun mean iha ai hisopu nia sanak, depois habokon ho raan nee hodi hisik ba livru nebee hakerek Maromak nia lei, i hisik mos ba povu.
HEB 9:20 Nia hisik raan nee hodi dehan, “Raan nee hanesan sinal katak Maromak halo ona Nia promesa ho imi i haruka imi halo tuir Nia lei nee hotu.”
HEB 9:21 Moisés mos hisik raan nee ba tenda orasaun ho mos ba sasaan hotu-hotu iha tenda laran nebee sira uza hodi adora Maromak.
HEB 9:22 Tanba tuir Maromak nia lei, kuaze buat hotu-hotu tenki hamoos ho raan. Atu hamoos ita ema nia sala mos, tenki fakar raan.
HEB 9:23 Sasaan sira nee hotu kopia deit tuir buat nebee mak iha lalehan. Atu hamoos buat sira nee para bele uza hodi adora Maromak, tenki oho animal halo sakrifisiu. Maibee buat lalehan nian presiza sakrifisiu nebee diak liu tan.
HEB 9:24 Kristu la tama ba Fatin Lulik nebee ema kriatura mak halo, ida nebee kopia tuir deit lalehan nian, maibee Nia tama liu ba lalehan. Agora Nia iha hela Maromak nia prezensa hodi harohan ba ita.
HEB 9:25 Nai lulik boot sira iha mundu tama ba iha Fatin nebee Lulik Liu tin-tinan, lori animal nia raan, laos sira nia raan rasik. Maibee Kristu tama ba iha lalehan, lori Nia raan rasik. Nia la presiza foo Nia Aan ba mate fila-fila.
HEB 9:26 Tanba se karik Nia tenki foo Nia Aan fila-fila, nee dehan katak Nia terus hela deit komesa Maromak halo mundu nee. Maibee laos nunee. Agora tempu ikus ona, Nia foo Nia Aan hanesan sakrifisiu dala ida deit hodi halakon ita nia sala.
HEB 9:27 Nudar ema, ita tenki mate dala ida, depois Maromak tesi ita nia lia.
HEB 9:28 Kristu mos mate dala ida deit, hanesan sakrifisiu hodi hamoos ema barak nia sala. Nia sei fila fali mai, laos atu kasu ita ema nia sala tan, maibee atu salva ema sira nebee mak hein hela Nia ho laran metin.
HEB 10:1 Lei Moisés nian la lori ita ba buat diak nebee mak Maromak atu foo mai ita aban-bainrua, lei nee so hatudu buat sira nee nia lalatak deit. Nunee, maski tin-tinan ema oho animal hodi halo sakrifisiu beibeik tuir lei, maibee sakrifisiu nee la bele hamoos sira nia laran.
HEB 10:2 Se bele hamoos sira nia laran karik, entaun sira lori sakrifisiu dala ida deit too ona. Tanba sakrifisiu ida nee bele hamoos ona sira nia sala hotu-hotu hodi halo sira senti kamaan fali. Maibee laos nunee.
HEB 10:3 Sakrifisiu nebee sira halo tin-tinan nee, so foo hanoin beibeik ba sira kona ba sira nia sala.
HEB 10:4 Tanba karau nia raan ka bibi nia raan nunka bele hamoos ema nia sala.
HEB 10:5 Tanba nee, bainhira Kristu mai iha mundu, Nia hatete ba Maromak nunee: “Ita Boot nia hakarak laos atu ema lori oferta i oho animal sai sakrifisiu ba Ita Boot. Nee mak Ita Boot foo isin lolon mai Hau atu Hau mak sai sakrifisiu.
HEB 10:6 Ita Boot la haksolok ho animal nebee ema tunu halo sakrifisiu, Ita Boot la kontenti ho sakrifisiu nebee ema foo hodi husu perdaun.
HEB 10:7 Entaun Hau dehan, ‘Maromak, Hau mak nee. Hau mai atu halo tuir Ita Boot nia hakarak, hanesan hakerek ona kona ba Hau iha Livru Sagradu.’”
HEB 10:8 Primeiru Kristu dehan, “Ita Boot nia hakarak laos atu ema lori oferta i oho animal sai sakrifisiu. Ita Boot nia hakarak laos atu ema tunu animal halo sakrifisiu ka foo sakrifisiu hodi husu perdaun. Buat sira nee hotu la halo Ita Boot nia laran haksolok.” Kristu dehan nunee maski lei Moisés nian haruka ema lori sakrifisiu sira nee hotu.
HEB 10:9 Depois Nia hatutan tan, “Hau mak nee, Hau mai atu halo tuir Ita Boot nia hakarak.” Nee dehan katak, Maromak halakon tiha lei tuan kona ba sakrifisiu hodi troka fali ho Kristu nia sakrifisiu.
HEB 10:10 Tanba Maromak nia hakarak mak nee: Jesus Kristu tenki mate hanesan sakrifisiu dala ida deit, i liu husi Nia sakrifisiu nee, Nia hamoos tiha ona ita nia laran too tinan ba tinan.
HEB 10:11 Loro-loron, nai lulik sira hamriik halao sira nia knaar hodi oho beibeik animal halo sakrifisiu. Afinal sakrifisiu sira nee nunka bele kasu ema nia sala.
HEB 10:12 Maibee Kristu foo Nia Aan sai sakrifisiu dala ida deit. Nee too ona hodi hamoos ita nia sala too tinan ba tinan. Hotu tiha, Nia baa tuur iha Maromak nia sorin loos.
HEB 10:13 Iha nebaa Nia hein hela too Maromak halo Nia inimigu sira taka rabat iha Nia ain okos.
HEB 10:14 Tanba liu husi Kristu nia sakrifisiu dala ida deit, Nia hamoos Nia ema sira nia laran, halo sira sai livre husi sala too tinan ba tinan.
HEB 10:15 Espiritu Santu mos foo hatene mai ita kona ba buat nee. Nia dehan,
HEB 10:16 “Agora Hau, Nai Maromak dehan, promesa nebee Hau sei halo ho sira mak nee: Hau sei tau Hau nia lei iha sira nia laran, i sei hakerek Hau nia ukun fuan iha sira nia neon.”
HEB 10:17 Depois Nia dehan tan, “Hau sei la hanoin tan sira nia sala ho sira nia hahalok aat hotu-hotu.”
HEB 10:18 Se Maromak hamoos tiha ona ita nia sala, entaun ita la presiza foo tan sakrifisiu para hamoos ita nia sala.
HEB 10:19 Maun-alin sira, ita brani tama ba iha Maromak nia prezensa iha Fatin nebee Lulik Liu, tanba Jesus nia raan fakar too mate mai ita.
HEB 10:20 Nunee Nia loke ona dalan foun para ita bele tama liu husi kurtina hodi simu moris, nee dehan katak, ita tama liu husi Nia isin lolon rasik.
HEB 10:21 Ita iha Nai Lulik ida nebee diak teb-tebes hodi toma konta Maromak nia uma laran tomak.
HEB 10:22 Tanba nee, mai ita hakbesik aan ba Maromak ho laran moos i fiar metin ba Nia. Tanba Jesus hamoos tiha ona ita nia laran, too ita la hanoin tan sala nebee uluk ita halo. Nee hanesan Nia fase ita nia isin lolon hodi bee nebee moos.
HEB 10:23 Mai ita hein ho laran metin nafatin atu simu buat nebee mak Maromak promete ona atu foo mai ita, hanesan mos ita foo sai tiha ona ba ema seluk. Lalika duvida, tanba Maromak sempre halo tuir Nia promesa.
HEB 10:24 Mai ita foo hanoin ba malu ho dalan oi-oin atu ita hotu hatudu domin ba ita nia maluk hodi halo diak ba sira.
HEB 10:25 I mai ita badinas halibur hamutuk ho maluk sarani sira seluk. La bele halo tuir ema sira nebee mak lakohi halibur hamutuk ona. Maibee ita tenki hametin ita nia maluk sira nia laran, liu-liu tanba ita hatene katak loron besik ona atu Jesus fila fali mai husi lalehan.
HEB 10:26 Ita hatene ona lia loos kona ba Jesus Kristu. Maibee se karik ita rasik desidi fila kotuk ba Nia hodi moris nafatin iha sala laran, entaun la iha tan sakrifisiu seluk mak bele hamoos ita nia sala.
HEB 10:27 Se ita fila kotuk ba Nia, ita so hein deit ho laran tauk atu Maromak kastigu ita, i ahi lakan boot haan mutuk tiha ema hotu nebee kontra Maromak.
HEB 10:28 Uluk, se ema ruma kontra lei nebee Maromak foo ba Moisés, i ema nain rua ka tolu sai sasin, ema nee la hetan perdaun, nia tenki mate.
HEB 10:29 Saa tan ema nebee sama Maromak nia Oan ba rai! Ema nee konsidera Jesus nia raan la iha folin, afinal Jesus nia raan nee mak hametin Maromak nia promesa hodi hamoos ema nee nia laran. Maromak nia Espiritu mos nia hatete aat hotu, maski Espiritu nee laran diak teb-tebes. Ema hanesan nee merese simu kastigu todan liu fali ema nebee kontra Moisés nia lei.
HEB 10:30 Tanba ita hatene Maromak rasik dehan nunee: “Hau mak iha direitu foo kastigu ba ema nebee halo aat. Hau sei halo aat ba sira tuir sira nia hahalok.” Hakerek mos dehan, “Nai Maromak sei foo justisa ba Nia ema.”
HEB 10:31 Se Maromak Moris hamonu Nia kastigu mai ita nunee, todan teb-tebes.
HEB 10:32 Keta haluha tempu uluk, bainhira imi foin hetan naroman. Iha tempu nebaa imi hamriik metin maski imi hasoru terus ho susar oi-oin.
HEB 10:33 Momentu nebaa ema koalia aat imi, i halo aat imi iha ema barak nia oin. Bainhira ema halo aat imi nia maluk sarani sira seluk, imi mos prontu terus hamutuk ho sira.
HEB 10:34 Imi hanoin ema dadur sira iha kadeia laran. I bainhira ema hadau imi nia sasaan, imi kontenti hodi husik deit, tanba imi hatene katak, imi sei simu fali riku-soin nebee diak liu, i riku-soin nee sei dura too tinan ba tinan.
HEB 10:35 Nee duni la bele husik imi nia fiar. Tanba se imi laran metin nafatin, Maromak sei foo premiu boot ba imi.
HEB 10:36 Aguenta ho pasiensia deit ba, atu nunee imi halo tuir nafatin Maromak nia hakarak, i too ikus imi simu buat hotu-hotu nebee Nia promete ona ba imi.
HEB 10:37 Tanba iha Livru Sagradu hakerek ona dehan, “La kleur tan, Ema ida nebee atu mai nee, sei too, Nia sei la demora.
HEB 10:38 Hau nia ema sira nebee moris loos, sira fiar mai Hau iha sira nia moris tomak. Se sira husik fali Hau karik, Hau nia laran la simu.”
HEB 10:39 Sira nebee husik hela Maromak, too ikus sei rahun. Maibee ita lae. Ita nee ema nebee fiar, i hetan salvasaun.
HEB 11:1 Entaun fiar nee saida loos? Fiar ba Maromak katak, ita laran metin nafatin ba buat nebee ita hein atu simu, i ita la duvida katak, buat nebee ita seidauk haree ho matan, iha duni.
HEB 11:2 Ita nia bei-ala sira nia fiar hanesan nee. Tanba nee mak Maromak gaba sira.
HEB 11:3 Tanba ita fiar ba Maromak mak ita bele kompriende katak, bainhira Maromak halo lalehan ho rai, Nia foo deit orden mak lalehan ho rai iha kedas. Nunee, buat nebee ita haree ho matan, Nia halo husi buat nebee mak ita ema la bele haree.
HEB 11:4 Abel fiar ba Maromak. Nee mak nia foo ba Maromak sakrifisiu ida nebee diak liu duke Kaín nian. Tanba Abel nia fiar mak Maromak simu nia sakrifisiu i konsidera nia ema ida nebee moris loos. Nunee, maski Abel mate kleur ona, maibee ita bele aprende nafatin husi nia fiar.
HEB 11:5 Enoke fiar ba Maromak. Nee mak nia la mate, maibee Maromak foti sae nia ba lalehan. Ema buka nia mos la hetan, tanba Maromak lori ona nia. Molok Maromak foti sae nia, Maromak dehan katak, Enoke ema ida nebee halo haksolok Maromak nia laran.
HEB 11:6 Se ita la fiar ba Maromak, ita la bele halo haksolok Maromak nia laran. Tanba ita tenki fiar katak Maromak iha duni, i ita mos tenki laran metin katak Nia sei foo buat diak ba ema nebee buka Nia. Nee mak foin ita bele hakbesik ba Nia.
HEB 11:7 Noé fiar ba Maromak. Nee mak bainhira Maromak foo hatene dehan, Nia atu halo rai nabeen, Noé mos rona. Maski Noé seidauk haree buat nee, maibee nia hamtauk ba Maromak, nunee nia halo roo hodi salva nia aan ho mos nia uma kain. Tanba nia fiar nee, Maromak konsidera nia ema ida nebee moris loos. Maibee ema sira seluk iha tempu nebaa hetan kastigu too mate mohu tanba sira la fiar ba Maromak hanesan Noé.
HEB 11:8 Abraão fiar ba Maromak. Nee mak nia halo tuir deit bainhira Maromak bolu nia i haruka nia baa iha rai nebee Maromak promete atu foo ba nia. Abraão baa deit, maski nia la hatene atu baa loos nebee.
HEB 11:9 Too tiha rai nebee Maromak promete atu foo ba nia nee, nia fiar nafatin. Nee mak nia prontu moris hanesan ema lao rai hodi hela iha tenda okos deit. Maromak nia promesa nebee Abraão simu nee tuun mos ba nia oan Isac ho nia bei-oan Jacó, i sira mos moris hanesan ema lao rai nafatin.
HEB 11:10 Abraão hein ho pasiensia tanba nia laran metin katak, aban-bainrua nia sei hela iha sidade ida nebee hamriik metin, sidade nee Maromak mak harii tuir Nia hakarak rasik.
HEB 11:11 Tanba Abraão fiar ba Maromak mak nia kaben Sara bele hetan oan, maski sira nain rua ferik-katuas liu ona, i desde uluk kedas Sara la bele hetan oan. Maibee too ikus sira hetan duni oan tanba Abraão fiar katak Maromak sei halo tuir Nia promesa.
HEB 11:12 Iha momentu nebaa Abraão nee katuas liu ona, maibee ikus mai nia jerasaun barak teb-tebes hanesan fitun iha lalehan ho rai henek iha tasi ibun, ema sura la bele.
HEB 11:13 Ema sira nee hotu fiar nafatin ba Maromak too mate. Iha sira nia moris sira seidauk simu buat nebee mak Maromak promete ona ba sira. Maski nunee sira hein nafatin ho laran haksolok, hanesan ema nebee haree ona buat sira nee husi dook. Sira dehan katak, sira hanesan ema rai liur ka ema lao rai deit iha mundu.
HEB 11:14 Ema nebee koalia nunee hatudu katak sira buka nafatin rai ida hodi sai sira nia rain rasik.
HEB 11:15 Rai nebee sira husik ona nee, sira la hanoin tan ona. Se karik sira hanoin nafatin rai ida uluk nee, entaun sira bele fila fali baa hela iha nebaa.
HEB 11:16 Maibee sira nia hakarak mak rai ida nebee diak liu, fatin nee mak iha lalehan. Nee mak bainhira sira dehan, Maromak mak sira nia Nai, nee halo Nia laran haksolok, tanba Nia prepara tiha ona sidade ida ba sira iha lalehan.
HEB 11:17 Tanba Abraão fiar ba Maromak mak bainhira Maromak koko nia hodi haruka nia oho nia oan Isac nudar sakrifisiu ba Maromak, Abraão prontu atu halo tuir. Isac nee Abraão nia oan mane mesak, i Maromak hatete ona ba nia dehan, “Liu husi Isac mak o sei hetan jerasaun nebee Hau promete ona ba o.” Maski nunee Abraão foo nia oan atu sai sakrifisiu ba Maromak,
HEB 11:19 tanba nia laran metin katak, Maromak bele halo moris fali ema mate. I momentu nebaa, hanesan fali Abraão simu duni nia oan husi mate, tanba Maromak salva tiha nia.
HEB 11:20 Isac fiar ba Maromak. Nee mak bainhira nia katuas ona, nia foo hatene ba nia oan Jacó ho Esaú kona ba bensaun nebee mak sira atu simu aban-bainrua.
HEB 11:21 Jacó fiar ba Maromak. Nee mak bainhira nia besik atu mate, nia harohan ba Maromak para foo bensaun ba nia oan José nia oan ida-idak. Depois Jacó hakruuk kaer ai tonka hodi adora Maromak.
HEB 11:22 José fiar ba Maromak. Nee mak bainhira nia atu mate, nia hatete katak, Maromak sei lori povu Israel sai husi rai Ejitu. I nia rai hela lia menon ba sira, para bainhira sira baa, tenki lori ho nia mate ruin.
HEB 11:23 Moisés nia inan-aman fiar ba Maromak. Nee mak bainhira nia moris mai, sira subar nia durante fulan tolu, tanba sira haree katak sira nia oan nee oin kapaas loos. Sira la tauk atu kontra liurai Ejitu nia orden nebee dehan, se ema Israel nia oan moris mai mane, tenki oho kedas.
HEB 11:24 Moisés fiar ba Maromak. Nee mak bainhira nia boot ona, nia lakohi atu ema konsidera nia hanesan liurai Ejitu nia bei-oan, maski liurai nia oan feto mak hakiak nia desde kiik.
HEB 11:25 Tuir nia hanoin, diak liu nia terus hamutuk ho Maromak nia povu Israel, duke iha tempu badak nia laran nia moris goza deit buat nebee mak la loos.
HEB 11:26 Iha tempu nebaa ema hatete aat nia tanba nia laran metin ba Kristu, Salvador nebee Maromak atu haruka mai. Maibee Moisés konsidera terus ida nee folin liu fali riku-soin rai Ejitu nian tomak, tanba nia laran metin katak aban-bainrua Maromak foo fali buat nebee diak liu ba nia.
HEB 11:27 Tanba Moisés nia fiar mak nia brani sai husi Ejitu. Maski liurai hirus, nia la tauk. Nia lao ba oin nafatin, tanba nia hanesan fali haree tiha ona Maromak, maski ita ema la bele haree.
HEB 11:28 Tanba Moisés nia fiar mak nia haruka povu Israel halo festa Paskua. Nia haruka sira hisik bibi nia raan iha sira nia odamatan. Nunee anju nebee Maromak haruka atu oho oan mane boot hotu-hotu iha rai Ejitu, la tama baa oho ema Israel nia oan sira.
HEB 11:29 Povu Israel fiar ba Maromak. Nee mak sira lao hakur Tasi Mean hanesan fali sira lao iha rai maran. Tropas Ejitu sira koko atu duni tuir, maibee sira mout mate hotu iha tasi laran.
HEB 11:30 Tanba povu Israel nia fiar mak sira lao haleu sidade Jerikó too loron hitu. Depois sidade nee nia moru mos rahun hotu.
HEB 11:31 Rahab, feto luroon iha sidade Jerikó, fiar ba Maromak. Nee mak bainhira Israel nia espiaun sira too iha Jerikó, nia simu ho diak. Too ikus Maromak halo mate hotu ema Jerikó sira nebee lakohi rona ba Nia, maibee Nia salva Rahab tanba nia fiar.
HEB 11:32 Hau sei bele koalia naruk tan kona ba ema seluk nebee fiar ba Maromak. Maibee tempu la too atu konta hotu kona ba Gideão, Barak, Sansão, Jefté, David, Samuel ho Maromak nia profeta sira seluk.
HEB 11:33 Sira hotu fiar ba Maromak. Nee mak sira balu manaan nasaun seluk, balu ukun nasaun ho lo-loos, i balu simu buat nebee mak Maromak promete atu foo ba sira. Balu taka liaun nia ibun,
HEB 11:34 balu hamate ahi lakan boot, i balu konsege halai sai husi ema nebee mak atu oho sira ho surik. Balu la iha forsa maibee Maromak foo forsa ba sira. Balu sai funu nain makaas too sira duni sai tropas inimigu nebee tama husi rai liur.
HEB 11:35 Senhora balu nia maluk mate tiha ona, Maibee Maromak halo moris fila fali. Iha mos balu, ema halo terus too mate tanba sira fiar ba Maromak. Sira lakohi nega Maromak para ema hasai sira husi terus nee, tanba sira laran metin katak, bainhira sira mate, sira sei simu fali moris ida nebee diak liu.
HEB 11:36 Balu ema tarata i baku ho sikoti. Balu ema kesi ho korenti hodi hatama ba kadeia laran.
HEB 11:37 Balu ema tuda ho fatuk too mate, balu ema kadoo fahe ba rua, balu ema oho hodi surik. Balu lao lemo rai hatais bibi nia kulit, sira moris kiak rabat rai, ema halo sira terus ho susar.
HEB 11:38 Sira lao lemo-lemo iha rai fuik maran i sae-tuun foho hodi hela deit iha fatuk kuak ho rai kuak. Ema fiar makaas hanesan nee, mundu nee la serve ba sira atu hela.
HEB 11:39 Maromak gaba ema sira nee hotu tanba sira nia fiar ba Nia. Maski nunee too sira mate mos, sira seidauk simu hotu buat nebee mak Maromak promete ona atu foo.
HEB 11:40 Nee tanba Maromak desidi atu halo buat nebee diak liu tan. Nia hakarak para sira tenki hein ita nebee moris agora mak foin bele simu hotu.
HEB 12:1 Entaun, oinsaa ho ita agora? Ita hanesan ema nebee halai taru. Ita nia bei-ala sira barak teb-tebes sai ona sasin kona ba fiar, i agora sira haleu hela ita hodi asisti. Tanba nee, mai ita soe tiha buat todan saida deit mak halo ita halai la bele, liu-liu ita nia sala nebee kesi metin ita. Mai ita hakaas aan halai nafatin too rohan tuir dalan nebee Maromak hatudu ona ba ita.
HEB 12:2 Ita tenki hateke deit ba Jesus, tanba ita nia fiar mai husi Nia, i Nia mak halo ita nia fiar sai metin too rohan. Bainhira Jesus terus iha krus, Nia aguenta ho pasiensia i la interese katak mate iha krus nee moe boot ida, tanba Nia hatene katak, Maromak sei halo Nia laran haksolok. I sai nunee duni. Agora Jesus tuur hela iha Maromak nia sorin loos hodi ukun hamutuk.
HEB 12:3 Hanoin di-diak, oinsaa Jesus aguenta bainhira ema aat sira kontra makaas Nia. Hanoin nafatin Nia ezemplu nee, para imi la bele lakon esperansa too sai baruk tiha.
HEB 12:4 Imi luta ona hasoru buat aat, maibee seidauk luta too imi nia raan fakar.
HEB 12:5 Keta halo be imi haluha ona Maromak nia liafuan domin nebee bolu imi nee Nia oan. Nia dehan nunee: “Hau nia oan, bainhira Nai Maromak koriji o, la bele hanoin katak buat nee la iha folin ba o. La bele lakon esperansa bainhira Nia hasee makaas o.
HEB 12:6 Tanba Nai Maromak koriji ema nebee mak Nia hadomi, i kastigu ema nebee mak Nia konsidera hanesan Nia oan.”
HEB 12:7 Nunee, bainhira imi hetan terus ho susar, aguenta ho pasiensia ba. Tanba terus nee hatudu katak Maromak hanorin imi hanesan aman ida hanorin nia oan. Aman sira hotu-hotu koriji sira nia oan.
HEB 12:8 Se Maromak la koriji imi, nee dehan katak imi laos Maromak nia oan, tanba Nia koriji Nia oan sira hotu.
HEB 12:9 Ita nia aman sira iha mundu koriji ita, i ita respeita sira. Saa tan ita nia Aman iha lalehan! Ita tenki hakruuk ba Nia para ita bele hetan moris rohan-laek.
HEB 12:10 Ita nia aman sira iha mundu nee koriji ita iha tempu badak, tuir sira nia matenek deit. Maibee Maromak koriji ita para tulun ita, atu ita bele moris ho laran moos hanesan Nia.
HEB 12:11 Bainhira Maromak koriji ita ka ema ruma koriji ita, ita senti tristi, laos kontenti. Maibee se ita aprende ona husi buat sira nee, too ikus halo ita moris loos ho laran hakmatek.
HEB 12:12 Nee duni, halo forti imi nia liman nebee mak fraku, i hametin imi nia ain tuur para la bele nakdedar.
HEB 12:13 Lao nafatin tuir dalan loos para imi nia belun sira nebee ain aat bele hetan kura i sira nia kondisaun la bele sai todan liu tan.
HEB 12:14 Hakaas aan para moris dame ho ema hotu-hotu. I buka atu moris ho laran moos, tanba so ema nebee moris ho laran moos mak aban-bainrua bele haree Nai Maromak.
HEB 12:15 Foo korajen ba malu nafatin para ema ida husi imi nia leet la bele dada aan husi Maromak nia laran diak. Kuidadu para imi ida la bele sai hanesan ai abut ida nebee moruk hodi estraga ema nia moris too halo sira lao sala dalan.
HEB 12:16 Kuidadu para ema ida la bele halo sala seksual, ka moris la interese Maromak, hanesan Esaú. Uluk Esaú nee faan tiha nia direitu nudar oan mane boot para hetan deit hahaan bikan ida.
HEB 12:17 Imi hatene katak, too ikus Esaú hakarak atu simu bensaun nee husi nia aman, maibee la bele ona. Maski nia husu ho tanis mos, nia la bele hetan fali buat nebee uluk nia soe ona nee.
HEB 12:18 Imi mai ona iha Maromak nia prezensa, maibee laos ona hanesan uluk bainhira Maromak hatuun nia promesa ba povu Israel iha foho Sinai. Sira baa iha foho ida nebee ema bele haree ho matan. Iha foho Sinai nee nia tutun, ahi lakan boot ho anin boot, i nakukun falun metin foho nee.
HEB 12:19 Iha momentu nebaa sira rona korneta lian. Sira mos rona Maromak nia lian makaas teb-tebes, too sira husu ho tauk para la bele rona tan Maromak nia lian nee.
HEB 12:20 Tanba sira la aguenta ho orden nebee haruka sira dehan, “Ema ka animal nebee deit mak lao sama foho nee, tenki tuda mate.”
HEB 12:21 Buat nebee povu Israel haree nee, halo sira tauk teb-tebes too Moisés mos dehan, “Hau tauk ho nakdedar.”
HEB 12:22 Maibee agora imi mai iha Maromak nia prezensa iha Jerusalém lalehan nian, iha foho Siaun, iha Maromak Moris nia sidade. Iha nebaa anju tokon ba tokon halibur malu ho haksolok.
HEB 12:23 Iha mos Maromak nia oan sira primeiru halibur hamutuk. Sira hotu nia naran hakerek ona iha lalehan. Imi mai ona iha Maromak. Nia mak Juis nebee sei tesi ema hotu-hotu nia lia. Imi mai iha matebian sira nebee mak uluk moris tuir dalan loos. Agora Maromak halo sira sai moos liu ona, sala uitoan mos la iha.
HEB 12:24 Imi mai ona iha Jesus. Nia mak lori Maromak nia promesa foun mai ita ema, i Nia raan fakar too mate hodi salva ita. Nia raan nee diak liu Abel nian, tanba Abel nia raan nee husu atu Maromak foo kastigu.
HEB 12:25 Tanba nee, bainhira Maromak koalia ba imi, see tilun di-diak hodi rona. Uluk Moisés hatoo Maromak nia liafuan iha mundu nee, maibee ita nia bei-ala sira lakohi rona. Nee mak Maromak kastigu sira, too sira halai la biban. Saa tan ita, se ita lakohi rona Maromak koalia mai ita husi lalehan.
HEB 12:26 Iha Moisés nia tempu, Maromak nia lian makaas teb-tebes, halo rai nakdoko. Maibee agora Nia promete dehan, “Hau sei halo rai nakdoko dala ida tan. Laos deit rai, maibee lalehan mos sei nakdoko hotu.”
HEB 12:27 Liafuan “dala ida tan” hatudu katak, too ikus buat hotu-hotu nebee Maromak halo sei nakdoko too lakon tiha hotu. So buat nebee metin too tinan ba tinan mak sei hela.
HEB 12:28 Nee duni mai ita agradese ba Maromak, tanba Nia simu ita sai Nia reinu, i Nia ukun la nakdoko. Mai ita adora Nia ho respeitu ho tauk tuir Nia hakarak.
HEB 12:29 Tanba ita nia Maromak hanesan ahi lakan boot nebee haan mutuk too mohu.
HEB 13:1 Hadomi nafatin imi nia maluk sarani hanesan maun-alin.
HEB 13:2 Keta haluha simu ema oin foun iha imi nia uma. Tanba ema balu simu tiha bainaka oin foun, sira hanoin dehan ema baibain, afinal bainaka nebee sira simu nee anju.
HEB 13:3 Tau matan ba ema dadur sira, hanesan fali imi iha kadeia hamutuk ho sira. I hanoin ema nebee terus tanba ema halo aat sira, hanesan imi rasik mak hetan terus nee.
HEB 13:4 Ema hotu-hotu tenki respeita kazamentu. Feen-laen tenki foo laran ba malu. Tanba see mak halo relasaun seksual ho ema nebee laos nia feen ka laen ka halo sala seksual sel-seluk, Maromak sei kastigu nia.
HEB 13:5 La bele matan naklosu ba osan, maibee tenki kontenti ho buat nebee mak imi iha. Tanba Maromak dehan nunee: “Hau nunka atu haluha imi, Hau nunka atu husik imi mesak.”
HEB 13:6 Tanba nee, ita laran metin hodi dehan, “Nai Maromak sempre tulun hau. Nunee hau la tauk ida. See mak bele halo aat hau?”
HEB 13:7 La bele haluha imi nia lider sira nebee uluk foo sai Maromak nia liafuan ba imi. Hanoin buat diak nebee mak sira halo iha sira nia moris loro-loron, i halo tuir sira nia fiar.
HEB 13:8 Tanba Jesus Kristu nunka muda. Nia nafatin deit, hori uluk too ohin loron too tinan ba tinan.
HEB 13:9 Nunee se ema hanorin buat falsu oi-oin deit, keta halo tuir hodi sees fali husi dalan loos. Atu hametin imi nia laran, tenki depende ba Maromak nia laran diak. La bele depende fali ba regra kona ba haan-hemu, tanba regra sira nee la ajuda ita.
HEB 13:10 Ita iha meza sakrifisiu ida nebee diak liu. Nai lulik Judeu nebee serbi iha tenda orasaun la iha direitu atu haan iha meza nee.
HEB 13:11 Tuir regra uluk, nai lulik boot tin-tinan oho animal i lori nia raan baa oferese iha Fatin nebee Lulik Liu, atu Maromak hamoos povu nia sala. Depois animal nee nia isin lori sai husi povu nia hela fatin hodi sunu mutuk iha liur.
HEB 13:12 Nunee mos ho Jesus. Nia terus too mate laos iha sidade laran, maibee iha liur, para Nia hamoos povu nia sala hodi Nia raan.
HEB 13:13 Nee duni mai ita baa hamutuk ho Jesus iha liur nebaa. La bele moe atu husik regra Judeu nian, maski ema hatete aat ita hanesan mos sira hatete aat Nia.
HEB 13:14 Tanba iha mundu nee, la iha sidade ida nebee permanente ba ita atu hela. Maibee ita hein atu aban-bainrua bele hela iha sidade ida nebee permanente.
HEB 13:15 Nunee mai ita hahii beibeik Maromak liu husi Jesus. Ida nee sai hanesan ita nia sakrifisiu ba Maromak, tanba ita foo sai katak Maromak mak ita nia Nai.
HEB 13:16 La bele haluha halo buat diak ba ema seluk, i se sira presiza buat ruma, ajuda sira. Tanba hahalok nee mos hanesan sakrifisiu nebee ita foo ba Maromak hodi halo haksolok Nia laran.
HEB 13:17 Imi tenki rona imi nia lider igreja hodi halo tuir buat nebee sira haruka. Tanba sira tau matan ba imi loron-kalan, i aban-bainrua sira tenki hataan ba Maromak kona ba sira nia servisu nee. Se imi rona sira mak sira sei servisu ho laran haksolok. Se lae, sira nia laran tristi, i nee la diak ba imi.
HEB 13:18 Halo orasaun mai ami nafatin. Ami laran metin katak ami nia laran moos, i ami sempre hakarak atu halo buat nebee mak loos.
HEB 13:19 Hau husu liu-liu atu imi harohan para hau bele fila lalais ba imi.
HEB 13:20 Maromak Dame Nain mak halo moris fali ita nia Nai Jesus husi mate. Liu husi Jesus nia mate, Maromak halo metin Nia promesa ho ita ema, i Nia promesa nee vale nafatin too tinan ba tinan. Nunee Jesus sai ona Bibi Atan diak liu hodi tau matan ba Nia bibi sira. Nee duni hau harohan
HEB 13:21 atu Maromak foo saida deit mak imi presiza atu imi bele halo tuir Nia hakarak. Hau mos harohan atu Nia servisu iha ita hotu liu husi Jesus Kristu nia tulun, atu nunee ita bele moris halo haksolok Nia laran. Mai ita hahii adora Nia too tinan ba tinan nafatin. Amen.
HEB 13:22 Maun-alin sira, hau hakerek surat ida nee para hametin imi nia laran. Surat nee la naruk ida, nunee hau husu atu imi rona ho pasiensia.
HEB 13:23 Hau hakarak foo hatene ba imi katak ita nia maluk Timóteo sai tiha ona husi komarka. Se nia too mai iha tempu badak, entaun hau sei lori nia baa vizita imi.
HEB 13:24 Hatoo hau nia kumprimentus ba imi nia lider sira hotu, ho mos ba Maromak nia povu hotu-hotu. Maluk sira husi Itália mos foo kumprimentus ba imi.
HEB 13:25 Hau harohan ba Maromak atu hatudu Nia laran diak ba imi hotu.
JAM 1:1 Surat nee husi hau, Tiago. Hau Maromak nia atan ho Nai Jesus Kristu nia atan. Hau hakerek surat nee ba maluk Judeu sira nebee namkari hela iha nasaun sel-seluk. Kumprimentus ba imi hotu.
JAM 1:2 Maun-alin sira, bainhira imi hasoru tentasaun oi-oin, haksolok deit ba.
JAM 1:3 Tanba imi hatene katak, se ita liu tentasaun nebee koko ita nia fiar mak ita aprende atu aguenta nafatin.
JAM 1:4 Imi tenki aguenta nafatin too imi sai ema nebee moris loos, kompletu, i la falta buat ida.
JAM 1:5 Maibee se iha imi ruma falta matenek hodi hatene Maromak nia hakarak, entaun husu ba Maromak mak Nia sei foo. Tanba Nia foo ba ema hotu-hotu ho laran luak, i Nia la litik ita bainhira ita husu.
JAM 1:6 Maibee bainhira imi husu, imi tenki husu ho laran metin, la bele laran ru-rua. Tanba see mak laran ru-rua, nia hanesan laloran nebee baku ba-mai iha anin boot.
JAM 1:7 Ema hanesan nee lalika mehi atu simu buat ruma husi Nai Maromak.
JAM 1:8 Ema nee ohin hanoin ida, aban hanoin seluk fali. Saida mak nia halo, nia namlele hela deit.
JAM 1:9 Ema sarani nebee kiak, tenki haksolok, tanba Maromak hasae tiha nia ba iha fatin aas.
JAM 1:10 I ema sarani nebee riku, tenki haksolok bainhira Maromak hatuun nia. Tanba ema riku sei la dura, hanesan ai funan fuik nebee la kleur namlaik ona.
JAM 1:11 Ai funan bele kapaas, maibee bainhira loro matan sae, nia manas halo ai nee namlaik tiha i nia funan monu, nunee nia furak lakon tiha. Ema riku mos sei sai hanesan nee. Iha tempu nebee nia sei fadigadu hela ho nia negosiu, nia namlaik monu tiha.
JAM 1:12 Maromak foo bensaun ba ema nebee aguenta ho pasiensia kuandu hasoru tentasaun oi-oin nebee koko nia fiar. Bainhira nia manaan, Maromak sei foo premiu ba nia. Premiu nee mak moris nebee Maromak promete ona atu foo ba ema nebee hadomi Nia.
JAM 1:13 Se iha buat ruma mak dada imi atu halo sala, imi la bele dehan, “Ida nee mai husi Maromak.” Tanba la iha buat ida mak bele dada Maromak atu halo sala, i Maromak mos nunka dada ema ida atu monu ba sala.
JAM 1:14 Maibee hakarak aat nebee iha ita nia laran mak provoka ita hodi rasta ita monu ba lasu.
JAM 1:15 Se ita halo tuir hakarak aat nebee mak iha ita nia laran nee, ita halo sala. I se sala nee buras iha ita nia aan, too ikus sala nee lori ita ba mate.
JAM 1:16 Maun-alin doben sira, bainhira ema bosok imi kona ba buat sira nee, keta fiar!
JAM 1:17 Prezenti diak ho furak hotu-hotu nebee ita simu, mai husi Aman Maromak. Nia mak halo loro matan, fulan ho fitun sira. Buat sira nee muda beibeik, maibee Maromak nunka muda.
JAM 1:18 Maromak desidi atu foo moris mai ita liu husi Nia liafuan, Nia liafuan nee loos. Nunee, husi buat hotu-hotu nebee Nia halo iha lalehan ho rai, Nia konsidera liu ita, hanesan batar fulin diak nian nebee toos nain taa uluk hodi oferese ba Maromak.
JAM 1:19 Maun-alin doben sira, hanoin di-diak! Imi tenki prontu hodi rona, keta ansi koalia, i keta hirus lalais.
JAM 1:20 Tanba ita ema nia hirus la lori ita atu moris loos tuir Maromak nia hakarak.
JAM 1:21 Nee duni imi tenki soe tiha imi nia hahalok foer ho hahalok aat sira hotu. Haraik aan hodi simu liafuan nebee Maromak kuda iha imi nia laran, liafuan nee mak bele salva imi.
JAM 1:22 Maromak nia liafuan nee, imi tenki halo tuir, la bele rona deit! Se lae, imi bosok imi nia aan rasik.
JAM 1:23 Kuandu ema rona ona liafuan nee, maibee la halo tuir, nee hanesan nia fihir nia aan iha lalenok.
JAM 1:24 Haree hotu tiha, nia fila kotuk haluha kedas nia oin halo nusaa.
JAM 1:25 Maromak nia lei nee diak teb-tebes i bele foo liberdade mai ita. Nunee imi tenki foo atensaun di-diak ba lei nee. Keta haluha fali buat nebee imi rona tiha ona, maibee hanoin beibeik hodi halo tuir. Se imi halo hanesan nee, imi hetan bensaun husi Maromak iha buat hotu-hotu nebee imi halo.
JAM 1:26 Se ema ruma hanoin nia badinas tuir relijiaun, maibee la sukat di-diak nia ibun, nia bosok nia aan rasik. Relijiaun hanesan nee saugati deit.
JAM 1:27 Relijiaun nebee ita nia Aman Maromak konsidera loos ho moos mak nee: Ita tenki tau matan ba oan kiak sira ho feto faluk sira nebee iha susar nia laran, i tenki kuidadu ita nia aan atu la bele tuir hahalok aat mundu nian.
JAM 2:1 Maun-alin sira, ita nia Nai Jesus Kristu nee Kbiit Nain. Nudar ema nebee fiar ba Nia, imi la bele fihir ema.
JAM 2:2 Ezemplu, iha ema nain rua baa tuir imi nia enkontru. Ida riku hatais ropa folin karun ho kadeli osan mean iha nia liman, ida kiak hatais hena bosan nebee naklees.
JAM 2:3 I imi simu kedas ema riku nee ho respeitu hodi dehan, “Senhor, favor mai tuur iha oin.” Maibee ba ida kiak nee, imi dehan, “O hamriik iha kotuk nebaa”, se lae, “Tuur deit iha rai.”
JAM 2:4 Se imi halo nunee, imi foti imi nia aan hanesan fali juis nebee laran aat hodi konsidera imi nia maluk sarani balu liu fali sira seluk.
JAM 2:5 Maun-alin doben sira, rona mai. Maromak hili ona ema kiak iha mundu nee atu riku iha fiar hodi tama iha Nia reinu, hanesan Nia promete tiha ona ba ema nebee hadomi Nia.
JAM 2:6 Maibee imi hatuun fali ema kiak. Afinal imi hatene katak ema riku mak hanehan imi hodi obriga imi baa hataan iha tribunal.
JAM 2:7 Sira mak hatete aat ita nia Nai nia naran nebee boot teb-tebes.
JAM 2:8 Iha Livru Sagradu ita nia Liurai foo ukun fuan ida nebee dehan, “O tenki hadomi o nia maluk hanesan o hadomi o nia aan rasik.” Se imi halo tuir ukun fuan nee, imi halo buat nebee loos.
JAM 2:9 Maibee se imi haree ema balu diak i la konsidera ema seluk, imi halo sala, i hatudu katak imi ema nebee kontra Maromak nia ukun fuan.
JAM 2:10 Se ema ruma halo tuir ukun fuan tomak maibee nia kontra fali ukun fuan ida deit mos, nia kontra tiha ona ukun fuan hotu kedas.
JAM 2:11 Ezemplu, Maromak foo ona ukun fuan ida nunee: “La bele halo sala ho ema nia feen ka laen.” Nia mos foo ukun fuan seluk dehan, “La bele oho ema.” Nunee, se imi la halo sala ho ema nia kaben, maibee imi oho ema, imi sai ona ema nebee kontra Maromak nia ukun fuan tomak.
JAM 2:12 Aban-bainrua Maromak sei foo justisa tuir ukun fuan nebee mak halo ita sai livre. Nee duni, imi nia liafuan ho imi nia hahalok tenki haan malu ho ukun fuan nee.
JAM 2:13 Tanba ema nebee mak la hatudu laran luak ba nia maluk sira, aban-bainrua Maromak tesi ema hotu nia lia, Nia mos la hatudu laran luak ba ema nee. Maibee see mak hatudu laran luak ba nia maluk, Maromak mos hatudu laran luak ba nia.
JAM 2:14 Maun-alin sira, se ema ruma dehan nia fiar ba Jesus Kristu maibee nia hahalok diak la iha, fiar hanesan nee iha folin saida? Fiar nee bele salva nia ka lae? La bele!
JAM 2:15 Hanoin took, se karik iha maluk sarani ruma presiza hena ka hahaan,
JAM 2:16 maibee imi la foo, i imi dehan deit, “Fila ho laran hakmatek. Hatais faru manas ba, i haan halo bosu ba!” Liafuan nee la iha folin buat ida.
JAM 2:17 Nunee mos ita nia fiar, se ita la hatudu liu husi hahalok, fiar nee buat maten ida.
JAM 2:18 Karik ema ruma dehan, “Iha ema balu fiar deit, i balu hatudu hahalok diak.” Hau hataan, “Se o la hatudu hahalok diak, oinsaa mak hau bele haree katak o fiar ba Kristu? Maibee o bele haree katak hau fiar, liu husi hau nia hahalok.”
JAM 2:19 O fiar Maromak mesak ida deit, la iha tan seluk. Nee loos! Maibee diabu sira mos fiar nunee, nee mak diabu sira nee nakdedar ho tauk.
JAM 2:20 Beik-teen! Imi hakarak hau esplika saida tan para imi bele kompriende katak, fiar ba Maromak maibee la hatudu liu husi hahalok, saugati deit?
JAM 2:21 Hanoin took ita nia bei-ala Abraão. Nia halo tuir Maromak nia orden hodi tau nia oan Isac ba iha meza sakrifisiu atu oferese ba Maromak. Tanba nee mak Maromak simu Abraão hodi konsidera nia ema ida nebee moris loos.
JAM 2:22 Nunee ita haree katak Abraão nia fiar ho nia hahalok lao hamutuk. Nia hahalok halo nia fiar sai kompletu.
JAM 2:23 Nee tuir lo-loos buat nebee hakerek iha Livru Sagradu dehan, “Abraão fiar ba Maromak, nee mak Maromak hamoos nia sala hodi simu nia.” I Maromak bolu nia dehan, “belun.”
JAM 2:24 Agora imi hatene ona katak, ita fiar deit la too, ita tenki hatudu hahalok diak foin Maromak simu ita.
JAM 2:25 Haree ezemplu ida tan husi Rahab, feto luroon ida. Bainhira espiaun Israel sira baa iha Rahab nia rain, nia subar sira iha uma, depois haruka sira halai sai liu husi dalan seluk, para ema la bele oho. Tanba Rahab nia hahalok diak nee mak Maromak simu nia hodi konsidera nia ema ida nebee moris loos.
JAM 2:26 Isin lolon nebee la iha iis, mate. Nunee mos fiar nebee la hatudu ho hahalok diak, nee hanesan buat maten ida.
JAM 3:1 Maun-alin sira, diak liu imi balu deit mak sai mestri hodi hanorin sarani sira, la bele barak. Tanba imi hatene katak, ita nebee hanorin sarani sira, Maromak sei foo justisa todan liu ba ita duke ba ema seluk.
JAM 3:2 Ita hotu halo sala oi-oin. Se iha ema ruma nebee nunka koalia sala karik, ema nee moris loos i nia konsege domina nia aan tomak.
JAM 3:3 Ita bele foti ezemplu husi kuda. Ita kesi tali iha kuda nia ibun para ita bele domina kuda nee. Nunee kuda lao ba-mai tuir ita nia hakarak.
JAM 3:4 Ezemplu ida tan mak roo. Maski roo boot, i anin nebee dudu roo nee mos makaas, maibee kapitaun roo bele dulas kamudi kiikoan hodi halo roo boot nee fila ba fila mai tuir nia hakarak.
JAM 3:5 Nunee mos ita nia ibun. Maski ita nia ibun nee parte kiikoan iha ita nia isin lolon, maibee ita uza hodi foti aan kona ba buat boot. Hanoin took. Ahi kiikoan ida bele sunu mutuk ai laran boot ida.
JAM 3:6 Ita nia ibun mos hanesan ahi. Iha ita nia isin lolon nee, ita nia ibun nakonu ho buat aat nebee estraga ita nia aan tomak. Nee hanesan ita nia ibun lori ahi infernu nian hodi sunu ita nia moris tomak.
JAM 3:7 Ita ema bele hamaus animal fuik oi-oin, manu fuik, animal nebee dolar iha rai, ho ikan iha tasi. Animal sira nee hotu ita domina tiha ona para halo tuir ita nia hakarak.
JAM 3:8 Maibee la iha ema ida mak bele domina nia ibun para halo tuir nia hakarak. Tanba ita nia ibun fuik ho aat, nakonu ho veneno nebee halo mate ema.
JAM 3:9 Ita uza ita nia ibun hodi hahii Nai Maromak ita nia Aman. Ita mos uza ita nia ibun nee hodi foo malisan ba ema seluk, afinal ema nee mos Maromak halo hanesan Nia Aan.
JAM 3:10 Nunee ita uza ita nia ibun hodi hahii Maromak ho mos foo malisan ba ema seluk. Maun-alin sira, la bele nunee!
JAM 3:11 Bee moos ho bee meer la bele sai husi bee matan ida deit.
JAM 3:12 Maun-alin sira, ai figeira bele foo fuan oliveira ka? Ai uvas bele foo fuan figeira ka? La iha. Nunee mos bee matan ida nebee meer la bele foo fali bee moos.
JAM 3:13 Iha ema ruma husi imi matenek hodi kompriende Maromak nia dalan ka? Se nunee nia tenki moris loos i halo buat diak ho haraik aan hodi hatudu katak matenek nee mai husi Maromak.
JAM 3:14 Maibee se o laran moras hela deit ema seluk i hakarak manaan mesak deit, entaun la bele bosok ema hodi gaba aan dehan o nee ema matenek.
JAM 3:15 Matenek hanesan nee laos mai husi lalehan maibee mai husi mundu. Matenek nee laos tuir Maromak nia Espiritu, maibee tuir fali diabu.
JAM 3:16 Se o laran moras hela deit ema seluk i hakarak manaan mesak deit, o sei halo rungu-ranga ho hahalok aat oi-oin deit.
JAM 3:17 Maibee matenek nebee mai husi Maromak mak nee: Primeiru tenki moos, depois halo ita gosta dame, konsidera ema seluk, rona ema seluk, laran luak, gosta ajuda ema, la haree ba ema boot ka kiik, i halo ho laran.
JAM 3:18 Bainhira dame nain sira lori dame, too ikus ema mos halo buat diak ba malu, hanesan mos toos nain kuda fini, too nia tempu nia hetan rezultadu barak.
JAM 4:1 Tanba saida mak imi istori malu beibeik, too baku malu? Tanba imi kaan buat oi-oin deit, halo imi nia laran la hakmatek.
JAM 4:2 Imi kaan atu hetan buat ruma, maibee la hetan, nunee imi atu oho malu tan. Imi hakarak teb-tebes atu hetan sasaan hanesan imi nia maluk nian, maibee imi la hetan, nunee imi istori malu i baku malu. Imi la hetan tanba imi la husu ba Maromak.
JAM 4:3 Imi husu ba Maromak mos, imi la hetan nafatin, tanba imi husu ho objetivu nebee la loos. Imi hakarak hetan para imi goza deit.
JAM 4:4 Imi nia laran la foo ba Maromak, hanesan feen nebee gosta fali mane seluk. Imi hatene katak see mak hadomi liu buat mundu nian, nia kontra Maromak. See mak hakarak halo belun ho buat aat iha mundu nee, nia sai Maromak nia inimigu.
JAM 4:5 Iha Livru Sagradu hatete, “Maromak tau tiha ona Nia Espiritu iha ita nia laran. Nia Espiritu nee hakarak atu ita foo laran ba Maromak mesak deit, se lae Nia lakohi simu.” Keta hanoin katak liafuan nee mamuk.
JAM 4:6 Maski nunee Maromak hatudu liu tan Nia laran diak ba ita. Nee hanesan hakerek iha Livru Sagradu dehan, “Maromak kontra ema nebee mak foti aan, maibee Nia hatudu Nia laran diak ba ema nebee mak haraik aan.”
JAM 4:7 Nee duni hakruuk ba Maromak. Tuba rai metin hodi hasoru Satanás mak Satanás sei halai sees husi imi.
JAM 4:8 Hakbesik aan ba Maromak mak Maromak mos hakbesik Aan ba imi. Imi nebee moris iha sala nia laran, hamoos imi nia aan ba. I imi nebee laran ru-rua, foo imi nia laran tomak ba Maromak.
JAM 4:9 Diak liu imi laran tristi hodi tanis halerik tanba imi nia sala. Lalika hamnasa tan, maibee tanis ba! Lalika kontenti tan, maibee tristi ba.
JAM 4:10 Imi tenki haraik aan iha ita nia Nai nia oin mak Nia sei foti sae imi.
JAM 4:11 Maun-alin sira, la bele hatete aat imi nia maluk sarani. Se o hatete aat o nia maluk hodi foo sala ba nia, entaun o hatete aat Maromak nia lei hodi dehan lei nee la diak. Se o foo sala ba Maromak nia lei nunee, entaun o laos ona ema nebee tuir Nia lei, maibee o foti aan hanesan fali juis nebee desidi lei nee vale ka la vale.
JAM 4:12 Maromak mak halo lei, i Nia deit mak iha direitu atu tesi ema nia lia. So Nia deit mak bele salva ema ka foo kastigu ba ema. O nee see fali mak o mos foo sala ba o nia maluk?!
JAM 4:13 Iha kontratu nain balu dehan, “Ohin ka aban ami sei baa iha sidade ida nee ka sidade ida nebaa. Ami sei hela iha nebaa tinan ida hodi kontratu manaan osan barak.” Imi nebee foti aan hanesan nee, rona mai!
JAM 4:14 Imi la hatene loron aban nee saida mak sei mosu. Ita ema nia moris hanesan abu-abu nebee ema haree lalais deit, depois lakon tiha.
JAM 4:15 Tuir loos imi tenki dehan, “Se Nai Maromak hakarak, ami sei moris hodi halo ida nee ka ida nebaa.”
JAM 4:16 Maibee imi gaba aan hodi hanoin katak planu hotu-hotu iha imi nia liman laran. Foti aan hanesan nee sala boot.
JAM 4:17 Hanoin di-diak! Se ita hatene buat diak nebee ita tenki halo, maibee ita la halo, nee sala ona.
JAM 5:1 Imi ema riku sira, rona mai! Tanis halerik ona ba, tanba terus ho susar atu kona ona imi.
JAM 5:2 Imi nia riku-soin nabeen hotu ona. Imi nia hena diak sira mos, barata haan halo kuak tiha ona.
JAM 5:3 Imi nia osan mean ho osan mutin aat tiha ona. Aban-bainrua osan nebee aat ona nee sei sai hanesan sasin hodi hatudu imi nia sala, i sai hanesan ahi hodi haan mutuk tiha imi nia isin. Maski mundu atu besik remata ona, maibee imi sei rai nafatin riku-soin barak ba imi nia aan.
JAM 5:4 Ema nebee servisu mate aan ba imi iha imi nia toos, imi la selu. Agora sira halerik tanba kole saugati deit, i sira nia halerik too tiha ona iha Nai Maromak Kbiit Nain nia tilun.
JAM 5:5 Iha mundu nee imi moris patarata hodi goza tuun-sae. Imi halo bokur imi nia aan hanesan karau nebee ema hakiak halo bokur di-diak para oho.
JAM 5:6 Ema nebee la iha sala, imi hamonu kastigu hodi oho sira, i sira la iha kbiit atu kontra imi.
JAM 5:7 Nee duni maun-alin sira, imi tenki pasiensia hodi hein Nai Jesus fila fali mai husi lalehan. Haree ba toos nain sira, sira pasiensia hodi hein too udan monu rai foin bele kuda fini. Depois hein tan udan atu rega toos para batar foo isin.
JAM 5:8 Imi mos tenki pasiensia nunee, i laran metin nafatin, tanba Nai Jesus besik fila ona.
JAM 5:9 Maun-alin sira, keta murmura ba malu, se lae Maromak sei kastigu imi. Haree ba, Juis Boot hamriik ona iha odamatan oin!
JAM 5:10 Maun-alin sira, profeta sira nebee koalia hodi Nai Maromak nia naran, foo ezemplu diak mai ita atu halo tuir. Maski sira hetan terus oi-oin, maibee sira pasiensia nafatin.
JAM 5:11 Keta haluha ema sira nebee aguenta nafatin iha terus laran, ita rekonhese katak sira nee ema nebee hetan bensaun. Ida mak Jó. Imi hatene oinsaa mak nia aguenta iha susar laran, too ikus Nai Maromak foo bensaun ba nia. Tanba Nai Maromak laran luak teb-tebes i sempre hanoin ema nebee terus.
JAM 5:12 Maun-alin sira, rona di-diak mai. La bele jura! Atu jura temi lalehan, ka jura temi rai ka buat sel-seluk tan mos, la bele. Se buat ruma loos, dehan deit “Loos.” Se lae, dehan deit “Lae”, para Maromak keta kastigu imi.
JAM 5:13 Se imi sira nee ida hetan terus ho susar, nia tenki harohan ba Maromak. Se imi ida haksolok, nia tenki hananu hahii Maromak.
JAM 5:14 Se iha ema ruma moras, nia tenki haruka bolu responsavel sarani sira nian atu sira mai harohan ba nia, i kose mina ba nia hodi Nai Jesus nia naran.
JAM 5:15 Se sira halo orasaun ho fiar, sira nia orasaun sei halo ema moras nee diak fali. Ita nia Nai sei kura nia, i se ema nee halo sala ruma, Maromak sei hamoos tiha nia sala nee.
JAM 5:16 Nee duni imi tenki foo sai imi nia sala ba malu i halo orasaun ba malu, atu nunee imi bele hetan kura. Ema nebee moris loos, sira nia orasaun iha forsa teb-tebes hodi halo buat barak.
JAM 5:17 Ezemplu ida mak profeta Elias. Nia ema hanesan mos ita, maibee bainhira nia harohan ho laran tomak para udan la bele monu iha rai Israel, udan la mai duni durante tinan tolu ho balu.
JAM 5:18 Depois nia harohan atu udan bele tuun fali mak udan tuun husi lalehan. Nunee ema nia toos foo fali rezultadu diak.
JAM 5:19 Maun-alin sira, se imi ida lao sees husi dalan loos, depois ema ruma lori nia fila fali ba Maromak,
JAM 5:20 hanoin di-diak. See mak halo ema sala nain ida fila kotuk ba nia sala, nia salva ona ema nee husi mate tinan ba tinan. I sala barak nebee ema nee halo tiha ona, Maromak sei hamoos.
1PE 1:1 Surat nee husi hau, Pedro, nudar Jesus Kristu nia apostolu. Hau hakerek surat nee ba imi hotu nebee mak Maromak hili tiha ona. Imi sai ema lao rai, namkari iha fat-fatin iha rai Pontu, Galásia, Kapadósia, Ázia ho mos Bitínia. Hori uluk kedas Aman Maromak hili tiha ona imi atu sai Nia ema para imi moris tuir Jesus Kristu nia hakarak. Jesus hisik Nia raan ba imi hodi hamoos imi nia sala. I Maromak nia Espiritu halo imi sai ema nebee moris loos. Hau harohan atu Maromak loron ba loron hatudu Nia laran diak ba imi, i foo pas ho hakmatek ida nebee boot teb-tebes ba imi.
1PE 1:3 Mai ita hahii Maromak! Nia mak ita nia Nai Jesus Kristu nia Aman. Maromak hadomi teb-tebes ita, too Nia foo moris foun mai ita. Ita bele simu moris foun nee tanba Nia halo moris fali ona Jesus Kristu husi mate. Nunee agora ita moris ho esperansa ida nebee metin
1PE 1:4 hodi hein atu simu riku-soin nebee mak Maromak prepara ona ba ita iha lalehan. Riku-soin nee nunka mohu, nunka dodok, i nunka menus.
1PE 1:5 Tanba imi fiar ba Maromak, entaun Nia sei kuidadu nafatin imi hodi Nia kbiit too imi simu salvasaun nebee Maromak prepara tiha ona atu hatudu sai bainhira mundu nee remata.
1PE 1:6 Tanba nee, imi nia laran haksolok, maski iha imi nia moris agora imi laran susar tanba tenki hasoru tentasaun oi-oin, maibee tentasaun nee la kleur ida.
1PE 1:7 Imi hetan tentasaun nee para bele hatudu katak imi fiar metin duni ba Maromak. Imi nia fiar nee bele kompara ho osan mean. Osan mean nee too loron ida sei aat. Maski la dura, maibee ita koko ho ahi. Saa tan imi nia fiar. Imi nia fiar folin aas liu fali osan mean. Nee mak Maromak husik imi hasoru tentasaun para koko imi nia fiar nee. Se imi fiar nafatin, entaun aban-bainrua bainhira Jesus Kristu fila fali mai husi lalehan iha ema hotu-hotu nia oin, Maromak sei gaba imi, respeita imi i foti aas imi nia naran.
1PE 1:8 Maski imi nia matan seidauk haree Jesus, maibee imi hadomi Nia. Maski imi seidauk haree Nia mos, imi fiar Nia. Imi nia laran haksolok liu too imi la hatene atu koalia oinsaa,
1PE 1:9 tanba liu husi imi nia fiar nee imi hetan ona salvasaun.
1PE 1:10 Maromak nia profeta sira uluk foo sai ona katak, Maromak atu hatudu Nia laran diak ba imi. Sira buka tu-tuir para bele hatene diak liu tan, oinsaa mak Maromak atu salva imi.
1PE 1:11 Iha momentu nebaa Kristu nia Espiritu hela iha sira nia laran i foo hatene katak, aban-bainrua Kristu sei hetan terus mak foin Maromak foti aas Nia. Entaun profeta sira buka hatene bainhira loos mak buat sira nee atu akontese i atu akontese oinsaa.
1PE 1:12 Kristu nia Espiritu foo hatene ba sira katak, buat nebee sira foo sai nee, laos sira mak atu haree, maibee imi mak sei haree. Liafuan Diak nebee profeta sira foo sai nee, ikus mai imi mos rona husi ema seluk. Espiritu Santu husi lalehan mak foo kbiit ba sira para haklaken Nia Liafuan Diak nee ba imi. Afinal anju sira mos hakarak teb-tebes atu hatene buat sira nee.
1PE 1:13 Tanba nee, matan moris neon nain hodi kompriende di-diak buat sira nee hotu. Imi tenki matan moos. Hein ho laran metin nafatin atu Maromak hatudu Nia laran diak ba imi bainhira Jesus Kristu fila fali mai iha ema hotu-hotu nia oin.
1PE 1:14 Imi tenki rona di-diak Maromak, hanesan labarik ida rona nia inan-aman. La bele halo tuir fali imi nia hakarak aat uluk nian bainhira imi seidauk konhese Maromak.
1PE 1:15 Nia bolu ona imi atu sai Nia ema, i Nia nee laran moos. Nunee iha imi nia moris tomak, imi mos tenki moris ho laran moos.
1PE 1:16 Tanba iha Livru Sagradu hakerek nunee: “Imi tenki moris ho laran moos, tanba Hau laran moos.”
1PE 1:17 Bainhira imi halo orasaun, imi bolu Maromak imi nia Aman. Ida nebee imi bolu Aman nee sei tesi ema hotu-hotu nia lia tuir ida-idak nia hahalok, Nia la fihir ba ema. Tanba nee, imi tenki hamtauk ho respeita Nia iha imi nia moris nudar ema lao rai iha mundu nee.
1PE 1:18 Uluk imi moris tuir dalan nebee mak imi nia bei-ala sira hatudu hela ba imi, dalan nee la iha folin. Maibee imi hatene katak Kristu selu kotu ona hodi hasai imi husi imi nia moris ida uluk nee. Nia laos selu imi nia moris nee ho buat ruma nebee too ikus sei mohu, hanesan osan mean ka osan mutin.
1PE 1:19 Maibee Nia selu ho Nia raan rasik. Nia raan nee folin karun teb-tebes! Kristu mate hanesan bibi malae oan nebee ema oho hodi halo sakrifisiu ba Maromak. Nia sai sakrifisiu ida nebee moos loos, sala uitoan mos la iha.
1PE 1:20 Uluk liu, molok Maromak halo mundu nee, Nia hili tiha ona Kristu atu selu kotu imi. Agora, mundu besik atu remata ona foin Maromak haruka Kristu mai para tulun imi.
1PE 1:21 Liu husi Kristu mak imi fiar ba Maromak. Tanba Maromak halo moris fali ona Kristu husi mate hodi foti aas Nia, atu ita fiar ba Nia, i laran metin ba Nia promesa.
1PE 1:22 Imi hamoos ona imi nia aan hodi hatudu imi nia domin lo-loos ba maluk sarani sira, tanba imi moris tuir buat nebee mak loos. Agora hau husu atu imi hadomi malu nafatin ho fuan ho laran,
1PE 1:23 tanba imi hetan ona moris foun. I moris foun nee, laos mai husi ema nebee la kleur tan sei mate, maibee mai husi Maromak, imi nia Aman nebee moris tinan ba tinan. Moris foun nee imi hetan liu husi Maromak nia liafuan, tanba Nia liafuan nee iha nafatin too tinan ba tinan hodi foo moris ba ita ema.
1PE 1:24 Iha Livru Sagradu dehan nunee: “Ema hotu-hotu hanesan duut; sira nia furak hanesan ai funan nebee moris iha rai fuik. Duut sei namlaik, nia funan sei monu ba rai.
1PE 1:25 Maibee Nai Maromak nia liafuan iha nafatin.” Nia liafuan nee mak Liafuan Diak nebee ema foo sai tiha ona ba imi.
1PE 2:1 Tanba nee, soe tiha hahalok aat hotu-hotu! La bele bosok, la bele koalia oin ida hahalok oin seluk, la bele laran moras ba ema, i la bele hatete aat ema seluk.
1PE 2:2 Hanesan bebee ida nebee foin moris hamrook atu susu, nunee mos imi tenki hamrook ba Maromak nia liafuan. Tanba Nia liafuan hanesan susu been diak nian ba imi nia klamar, halo imi loron ba loron buras ba beibeik, too imi hetan salvasaun.
1PE 2:3 Tanba imi senti ona Ita nia Nai nia laran diak.
1PE 2:4 Jesus Kristu hanesan fatuk isin nebee moris. Ema lakohi simu fatuk nee, maibee Maromak hili Nia i konsidera Nia folin teb-tebes. Imi hakbesik ona ba Jesus Kristu.
1PE 2:5 Nunee imi ida-ida mos hanesan fatuk isin nebee moris, i Maromak hada dadauk imi hotu too imi hamutuk sai uma ida para Nia Espiritu hela. Maromak mos halo imi sai hanesan nai lulik nebee moris ho laran moos hodi foo sakrifisiu espiritual ba Nia. Sakrifisiu nee Nia simu ho haksolok, liu husi Jesus Kristu.
1PE 2:6 Tanba iha Livru Sagradu Maromak dehan, “Haree ba! Hau tau hela fatuk ida iha foho Siaun. Fatuk nee folin boot teb-tebes, i Hau hili fatuk nee para sai fatuk ida nebee prinsipal liu iha sidade nee. See mak fiar ba Nia sei la moe.”
1PE 2:7 Fatuk nee mak Jesus Kristu. Nia folin boot ba imi nebee fiar Nia. Maibee ba ema nebee la fiar, Livru Sagradu hakerek dehan, “Iha fatuk ida nebee badaen fatuk sira lakohi uza, maibee agora fatuk nee mak sai fali fatuk nebee prinsipal.”
1PE 2:8 I hakerek mos nunee: “Fatuk nee halo ema sidi, i halo sira monu.” Sira sidi iha fatuk nee tanba sira lakohi rona Maromak nia liafuan. Maromak mos desidi nanis ona atu sira sai nunee.
1PE 2:9 Maibee imi nee laos nunee. Imi Maromak hili tiha ona hodi sai Nia povu. Imi hanesan nai lulik nebee mak serbi liurai. Imi hanesan nasaun ida nebee moris loos. Imi Maromak nia povu. Maromak hili imi nunee para imi bele konta sai buat diak nebee mak Nia halo tiha ona ba imi. Tanba Nia mak bolu imi sai husi nakukun hodi tama ba iha Nia naroman ida nebee furak teb-tebes.
1PE 2:10 Uluk imi laos Maromak nia povu, maibee agora imi sai tiha ona Nia povu. Uluk imi seidauk hatene Maromak nia laran luak, maibee agora imi hatene ona.
1PE 2:11 Maluk doben sira, imi nee ema lao rai deit, imi hela iha mundu nee la kleur ida. Tanba nee, hau husu atu imi hadook aan tiha husi imi nia hakarak nebee aat, tanba imi nia hakarak aat sempre halo funu hasoru imi nia aan.
1PE 2:12 Imi tenki hakaas aan para moris loos iha jentiu sira nia leet. Nunee, se sira duun matak imi, sira bele haree deit imi nia hahalok diak, i bainhira Jesus fila fali mai husi lalehan, jentiu sira nee sei hahii adora Maromak.
1PE 2:13 Ita nia Nai Jesus hakarak imi tenki hakruuk ba ukun nain hotu-hotu iha mundu nee. Imi tenki hakruuk ba liurai, tanba nia mak ukun nain nebee boot liu.
1PE 2:14 Hakruuk mos ba ukun nain sira seluk, tanba liurai foti sira para kastigu ema nebee mak halo aat i gaba ema nebee mak hahalok diak.
1PE 2:15 Tanba Maromak hakarak para imi halo buat nebee diak, atu ema beik-teen sira nebee mak la hatene buat ida, la iha liafuan ida atu koalia hasoru imi.
1PE 2:16 Imi simu ona liberdade husi Maromak. Nunee imi tenki moris hanesan ema nebee livre ona. La bele uza sala liberdade nee hodi halo fali buat aat, maibee moris serbi Maromak nudar Nia atan.
1PE 2:17 Hatudu respeitu ba ema hotu-hotu, hadomi imi nia maluk sarani sira, hamtauk Maromak, i respeita liurai.
1PE 2:18 Atan sira, hakruuk ba imi nia patraun, i respeita sira. La bele hakruuk deit ba patraun nebee mak laran diak i ibun midar. Maibee hakruuk mos ba patraun nebee mak siak-teen.
1PE 2:19 Se karik imi la halo sala maibee ema kastigu imi, depois imi aguenta ho pasiensia nafatin tanba imi hanoin Maromak, entaun imi nia hahalok nee halo haksolok Maromak nia laran.
1PE 2:20 Se karik imi halo sala mak ema baku, i imi simu terus nee ho pasiensia, imi manaan saida? Maibee se imi hetan terus tanba halo buat diak, depois imi aguenta, ida nee halo haksolok Maromak nia laran.
1PE 2:21 Maromak bolu imi para moris nunee, tanba Kristu mos terus ba imi. Nunee Nia sai ezemplu atu imi lao tuir Nia ain fatin.
1PE 2:22 Iha Livru Sagradu hakerek nunee: “Nia nunka halo sala. Liafuan bosok nunka sai husi Nia ibun.”
1PE 2:23 Bainhira ema tolok Nia, Nia la hataan. Bainhira ema halo Nia terus, Nia la ameasa atu halo aat fali sira. Maibee Nia entrega Nia Aan ba Maromak nia liman, tanba Maromak mak tesi lia ho lo-loos.
1PE 2:24 Kristu rasik mak lori ita nia sala iha ai krus leten para ita bele livre husi sala hodi moris loos. Nia kanek nee mak kura ona imi.
1PE 2:25 Uluk imi hanesan bibi malae nebee mak lao sala dalan. Maibee agora imi fila fali ona ba imi nia Bibi Atan, i Nia mak tau matan ba imi.
1PE 3:1 Hanesan ita hotu tenki hakruuk ba ita nia ukun nain sira, nunee mos imi feen sira tenki hakruuk ba imi nia laen. Nunee se imi nia laen sira la fiar ba Maromak nia liafuan karik, sira bele haree imi nia moris nebee hatudu laran moos ho respeitu. Too ikus sira mos bele fiar, laos husi imi nia liafuan, maibee husi imi nia hahalok nee.
1PE 3:3 Imi feto sira nia furak laos husi buat nebee mak imi tau ba imi nia isin lolon, hanesan hadia fuuk tuir modelu oi-oin deit, tara osan mean, ka hatais ropa folin karun.
1PE 3:4 Maibee buat nebee mak halo imi feto sira sai furak mak imi nia laran. Feto nebee laran maus ho kalma, sira nee mak furak ba nafatin, i Maromak mos foo folin ba sira nia hahalok nee.
1PE 3:5 Feto sira nebee uluk moris ho laran moos hodi laran metin ba Maromak, sira nia furak mos nunee. Sira hakruuk ba sira nia laen,
1PE 3:6 hanesan Sara. Nia rona nia kaben Abraão hodi respeita nia too bolu nia patraun. Imi mos sai hanesan Sara nia oan, se imi halo buat nebee mak loos i la tauk buat ida.
1PE 3:7 Nunee mos imi laen sira. Imi tenki uza matenek oinsaa mak atu moris hamutuk ho imi nia feen. Hatudu imi nia respeitu ba sira tanba imi kompriende katak sira nia forsa la hanesan imi nian, i sira sei simu moris rohan-laek husi Maromak nia laran diak hanesan mos imi. Halo nunee para Maromak rona nafatin imi nia orasaun.
1PE 3:8 Agora hau husu para imi hotu neon ida laran ida, hadomi imi nia maluk sarani sira, hatudu laran maus ba malu i haraik aan.
1PE 3:9 Se ema ruma halo aat ba imi, la bele halo aat fali ba sira. Se ema ruma hatete aat imi, la bele hatete aat fali sira, maibee harohan atu Maromak halo buat diak ba sira. Tanba Maromak bolu imi atu halo nunee para imi mos hetan bensaun husi Nia.
1PE 3:10 Iha Livru Sagradu hakerek dehan, “Ema nebee mak buka moris diak, i buka moris naruk, nia tenki kuidadu nia ibun para la bele koalia aat, i la bele koalia bosok.
1PE 3:11 Nia tenki fila kotuk ba buat aat hodi halo buat nebee diak. Nia tenki hakaas aan atu moris dame malu ho ema hotu-hotu, i buka nafatin dame too hetan.
1PE 3:12 Tanba Nai Maromak tau matan ba ema nebee mak moris loos, Nia see tilun ba sira nia orasaun. Maibee Nai Maromak kontra ema nebee mak halo aat.”
1PE 3:13 Se imi hakaas aan halo buat nebee diak, ema atu halo aat imi ka?
1PE 3:14 Maibee bele mos akontese. I se imi halo duni buat nebee loos mak ema halo terus imi, entaun imi hetan bensaun. Se nunee, la bele tauk ema i la bele hanoin barak.
1PE 3:15 Hamtauk Kristu nudar imi nia Nai. Se ema ruma husu imi, tanba saa mak imi laran metin ba Maromak, imi tenki prontu hataan. Maibee hataan ho liafuan mamar ho respeitu.
1PE 3:16 Imi nia laran tenki moos. Karik ema balu koalia aat imi hodi kritika buat diak nebee mak imi halo tanba imi tuir Kristu. Maibee se imi halo diak nafatin, too ikus sira rasik moe ba sira nia liafuan nee.
1PE 3:17 Se Maromak hakarak para ita hetan terus tanba halo buat diak, ida nee diak liu duke hetan terus tanba halo buat aat.
1PE 3:18 Kristu mate dala ida deit tanba ita ema nia sala. Ida nebee moris loos mate ba sala nain sira para lori imi ba Maromak. Nudar ema nebee iha isin ho raan, ema oho tiha Nia, maibee Maromak nia Espiritu halo moris fali Nia.
1PE 3:19 Maromak nia Espiritu mos foo kbiit ba Kristu hodi baa foo sai Maromak nia liafuan ba matebian sira nebee sei dadur hela.
1PE 3:20 Sira nee mak uluk lakohi halo tuir Maromak nia liafuan iha Noé nia tempu. Bainhira Noé halo roo boot, Maromak hein ho pasiensia para ema sira nee hakribi sira nia sala, maibee sira lakohi arepende. Too ikus bee sae, i ema nain walu deit mak hetan salvasaun iha roo laran.
1PE 3:21 Bee boot nee hanesan ezemplu kona ba batizmu, tanba agora nee batizmu mak foo salvasaun ba imi. Bainhira imi simu batizmu, bee nee laos atu hasai foer iha imi nia isin, maibee bee nee signifika katak, imi harohan atu Maromak hamoos imi nia neon ho laran. Batizmu nee bele foo salvasaun ba imi tanba Jesus Kristu moris fali ona husi mate.
1PE 3:22 Agora Nia sae tiha ona ba lalehan hodi tuur iha Maromak nia sorin loos. I anju sira ho espiritu bo-boot sira nebee kaer ukun, sira hotu-hotu hakruuk ba Nia.
1PE 4:1 Bainhira Kristu sei iha mundu, Nia hetan terus ho susar oi-oin. Entaun imi mos tenki prontu simu terus, tanba ema nebee mak terus iha nia moris, nia la halo tan sala.
1PE 4:2 Nunee agora ba oin, imi nia moris iha mundu nee sei tuir deit Maromak nia hakarak, imi nia hakarak rasik imi la tuir tan ona.
1PE 4:3 Tanba uluk imi soe tempu barak hodi moris hanesan ema nebee la konhese Maromak. Iha tempu nebaa imi moris la hatene moe, imi kaan atu halo sala seksual, imi sai lanu-teen, i halo festa hemu lanu too halo arbiru tuun-sae. Imi mos adora lulik, maski hahalok adora lulik nee Maromak hakribi.
1PE 4:4 Agora ema nebee la konhese Maromak, sira la kompriende nusaa mak imi la halo tuir ona sira nia hahalok aat oi-oin nee, i sira hatete aat imi.
1PE 4:5 Maibee aban-bainrua sira tenki hataan iha Maromak nia oin. Nia prontu atu tesi ema hotu-hotu nia lia, atu ema nebee mak mate tiha ona ka ema nebee mak sei moris.
1PE 4:6 Tanba nee mak uluk Jesus baa foo sai Liafuan Diak ba ema nebee mate tiha ona. Nunee maski nudar ema sira hetan kastigu iha mundu nee, maibee aban-bainrua sira nia klamar bele moris hamutuk ho Maromak.
1PE 4:7 Mundu nee besik remata ona. Tanba nee, imi tenki hanoin klean i domina aan para bele halo orasaun ho diak.
1PE 4:8 Importante liu tan mak imi tenki hadomi malu ho laran tomak. Tanba bainhira ita hadomi malu, ita hatene perdua ita nia maluk, maski nia halo sala barak hasoru ita.
1PE 4:9 Simu ema seluk iha imi nia uma ho laran haksolok.
1PE 4:10 Maromak foo kbiit ba imi ida-idak la hanesan. Uza di-diak kbiit nebee Nia foo ba imi nee hodi serbi ema seluk.
1PE 4:11 See mak hetan kbiit para koalia, nia tenki koalia liafuan husi Maromak. I see mak hetan kbiit para serbi ema seluk, nia tenki serbi ho forsa tomak nebee nia hetan husi Maromak. Se imi halo nunee, ema sei haree katak imi halo buat hotu-hotu tanba Jesus Kristu, i sira sei hahii Maromak. Mai ita hahii adora Nia too tinan ba tinan. Nia ukun la hotu la remata. Amen.
1PE 4:12 Maluk doben sira, agora dadauk imi terus hela, i terus nee koko imi. La bele hakfodak, i la bele hanoin dehan ema nebee fiar Maromak sei la hetan terus.
1PE 4:13 Maibee haksolok ba, tanba imi bele hetan terus hanesan Kristu uluk mos terus. Se imi haksolok nunee, aban-bainrua bainhira ema hotu-hotu haree Jesus Kristu fila fali mai ho naroman lalehan nian, imi sei haksolok liu tan.
1PE 4:14 Bainhira ema hatete aat imi tanba imi fiar ba Kristu, imi hetan bensaun, tanba Espiritu naroman lalehan nian hela iha imi. Espiritu nee mak Maromak nia Espiritu.
1PE 4:15 Keta halo be imi terus tanba imi sai oho-door, ka naok-teen, ka halo buat aat saida deit, ka sai ema nebee mete ema nia moris.
1PE 4:16 Maibee se imi hetan terus tanba imi sai Kristaun, la bele moe. Diak liu imi hahii Maromak tanba imi lori Kristu nia naran.
1PE 4:17 Tempu too ona atu Maromak tesi ema nia lia. Nia sei foo justisa uluk ba Nia oan sira. Se ita mos hetan justisa, saa tan ema nebee mak lakohi rona Maromak nia Liafuan Diak! Sira nia kastigu sei todan.
1PE 4:18 Tanba iha Livru Sagradu hakerek dehan, “Se ema nebee moris loos mos susar atu hetan salvasaun, saa tan ema nebee la interese Maromak hodi moris iha sala nia laran!”
1PE 4:19 Entaun se imi terus tanba Maromak hakarak nunee, imi tenki halo nafatin buat nebee mak diak hodi entrega imi nia aan tomak ba Nia. Tanba Nia mak imi nia Kriador i Nia sempre halo tuir Nia promesa.
1PE 5:1 Agora hau hakerek ba responsavel sarani sira. Hau mos responsavel sarani hanesan imi. Hau rasik akompanha Kristu nia terus. I aban-bainrua bainhira ema hotu-hotu haree Kristu fila fali mai ho naroman lalehan nian, hau mos sei simu naroman lalehan nee. Hau husu ba imi responsavel sira,
1PE 5:2 tau matan di-diak ba ema nebee mak Maromak entrega ona ba imi, hanesan bibi atan nebee tau matan ba nia bibi sira. Haree di-diak sira, laos tanba imi nia obrigasaun, maibee husi imi nia laran, tuir Maromak nia hakarak. Imi la bele servisu hanesan ema nebee mak hakarak manaan osan deit, maibee tenki servisu ho badinas hodi serbi sarani sira.
1PE 5:3 La bele foti aan hodi manda tuun-sae sarani sira nebee mak Maromak foo ba imi atu tau matan. Maibee imi tenki sai ezemplu nebee diak para sira bele halo tuir.
1PE 5:4 Se imi halo nunee, aban-bainrua bainhira bibi atan sira nia Xefi fila fali mai, imi sei simu premiu naroman lalehan nian, i premiu nee dura ba nafatin.
1PE 5:5 Nunee mos imi foinsae sira, imi tenki hakruuk ba ferik-katuas sira. Sarani hotu-hotu la bele foti aan, maibee tenki haraik aan ba malu, tanba iha Livru Sagradu hakerek nunee: “Maromak kontra ema nebee mak foti aan, maibee Nia hatudu Nia laran diak ba ema nebee mak haraik aan.”
1PE 5:6 Tanba nee, haraik aan ba Maromak Kbiit Nain, para bainhira too iha nia tempu, Nia foti aas imi.
1PE 5:7 La bele preokupa ba imi nia problema, maibee entrega hotu ba Maromak, tanba Nia sempre tau matan ba imi.
1PE 5:8 Matan moris neon nain, tanba imi nia inimigu Satanás hakarak estraga imi, hanesan liaun nebee mak lao ba-mai ho lian makaas hodi buka ema atu haan.
1PE 5:9 Imi tenki hamriik firmi hasoru nia hodi kaer metin imi nia fiar, tanba imi hatene katak imi nia maluk sarani sira iha mundu tomak mos hetan terus hanesan imi.
1PE 5:10 Maski agora imi terus, maibee la kleur tan Maromak rasik sei halo imi diak fila fali. Nia sei foo forsa ba imi, i halo imi hamriik metin hodi aguenta nafatin. Tanba Nia sempre hatudu Nia laran diak ba ita ema i Nia rasik mak bolu imi atu simu naroman lalehan nian too tinan ba tinan, hamutuk ho Kristu.
1PE 5:11 Maromak deit mak iha kbiit hodi ukun buat hotu-hotu too tinan ba tinan. Amen.
1PE 5:12 Silas mak ajuda hau hakerek surat badak nee. Nia nee ita nia maluk sarani nebee hau konfia. Hau hakerek surat nee ba imi para hametin imi nia laran, i foo sasin lo-loos kona ba Maromak nia laran diak. Hamriik metin ba, la bele fila kotuk ba Nia laran diak nee.
1PE 5:13 Sarani sira husi Babilónia foo kumprimentus ba imi. Maromak hili sira hanesan mos Nia hili imi. Marcos mos foo kumprimentus. Hau haree nia hanesan hau nia oan rasik.
1PE 5:14 Kumprimenta malu ho domin. Hau harohan atu imi hotu nebee fiar ba Kristu bele moris iha pas ho hakmatek.
2PE 1:1 Surat nee husi hau, Simão Pedro, nudar Jesus Kristu nia atan ho mos Nia apostolu. Hau hakerek surat nee ba imi nebee simu tiha ona fiar ida nebee folin boot, hanesan mos ami. Imi simu fiar nee tanba Jesus Kristu sempre halo buat nebee mak loos. Nia mak ita nia Maromak ho ita nia Salvador.
2PE 1:2 Hau harohan atu Maromak loron ba loron hatudu Nia laran diak ba imi i foo pas ho hakmatek ida nebee boot teb-tebes ba imi. Imi sei simu buat sira nee tanba imi konhese ona Maromak i konhese mos ita nia Nai Jesus.
2PE 1:3 Ita konhese ona Maromak. Tanba nee, husi Nia kbiit rasik Nia foo mai ita saida deit mak ita presiza atu ita bele moris loos tuir Nia hakarak. Nia mos bolu ona ita sai Nia ema, tanba Nia mak Kbiit Nain i diak liu.
2PE 1:4 Husi Nia boot ho Nia diak nee mak Nia foo mai ita promesa nebee boot ho folin teb-tebes. Hodi Nia promesa nee mak ita bele livre tiha husi hakarak aat hotu-hotu nebee estraga ema mundu nee nia moris, i ita nia laran bele sai hanesan fali Maromak nian.
2PE 1:5 Tanba nee, imi tenki hakaas aan moris loos para halo kompletu imi nia fiar. Moris loos mos seidauk too, imi presiza hatene tan saida mak loos i saida mak sala.
2PE 1:6 Laos atu hatene deit, imi mos tenki domina aan i hatene aguenta nafatin para la bele hakiduk. Esforsu aan mos atu moris halo tuir Maromak nia hakarak.
2PE 1:7 Laos nee deit, imi mos tenki laran diak ba imi nia maluk sarani sira, i hatudu domin ba ema hotu-hotu.
2PE 1:8 Se hahalok diak sira nee hotu buras ba beibeik iha imi nia moris, entaun imi sei konhese diak liu tan ita nia Nai Jesus Kristu, i imi nia moris iha folin i la saugati.
2PE 1:9 Maibee se ema ruma la moris tuir buat diak sira nee, entaun nia la haree saida mak iha nia oin, nia hanesan fali ema matan delek. Nia haluha katak Maromak hamoos tiha ona nia sala uluk nian.
2PE 1:10 Nunee maun-alin sira, sai badinas liu tan para hahalok diak sira nee buras iha imi nia moris. Hahalok nee hatudu katak Maromak hili tiha ona imi i bolu tiha ona imi sai Nia ema. Se imi moris nunee, imi sei la monu,
2PE 1:11 i aban-bainrua Maromak sei simu imi ho laran tomak hodi tama iha Jesus Kristu nia reinu. Jesus Kristu mak ita nia Nai ho ita nia Salvador, i Nia ukun la hotu la remata.
2PE 1:12 Imi hatene buat sira nee ona, imi mos hamriik metin ona tanba imi fiar ba buat nebee mak loos. Maski nunee hau hakarak foo hanoin fila-fila ba imi.
2PE 1:13 Hau hanoin hau iha obrigasaun para foo hanoin buat sira nee ba imi durante hau sei moris iha mundu.
2PE 1:14 Tanba hau hatene katak la kleur tan hau sei mate, tuir saida mak ita nia Nai Jesus Kristu foo sai tiha ona ba hau.
2PE 1:15 Nunee hau hakaas aan para foo hatene buat sira nee ba imi para aban-bainrua hau mate husik hela imi, imi la bele haluha.
2PE 1:16 Uluk ami foo sai ba imi katak ita nia Nai Jesus Kristu sei fila fali mai husi lalehan ho kbiit boot. Momentu nebaa ami laos konta tuir ai knanoik nebee mak ema inventa. Maibee ami rasik haree Nia kbiit nee ho matan,
2PE 1:17 bainhira ami hamutuk ho Nia iha Maromak nia foho. Iha nebaa Aman Maromak rasik foo respeitu i foti aas Jesus nia naran iha ami nia oin. Ami rona Maromak Aas Liu nia lian tuun mai husi lalehan dehan, “Nee Hau nia Oan doben. Nia halo haksolok Hau nia laran.”
2PE 1:19 Nee hatudu mai ita katak buat nebee Maromak nia profeta sira uluk koalia kona ba Jesus Kristu loos duni. Nunee imi tenki see tilun hodi rona di-diak profeta sira nia liafuan. Tanba sira nia liafuan nee hanesan ahi-oan nebee foo naroman iha fatin nakukun, too Jesus Kristu fila fali mai husi lalehan. Nia sei mai hanesan loro matan nebee foin sae, i hanesan fitun dadeer nian hodi foo naroman ba imi.
2PE 1:20 Liu-liu imi tenki hatene katak, profeta sira nia lia menon nebee hakerek iha Livru Sagradu, laos mai husi sira nia matenek rasik.
2PE 1:21 Tanba profeta sira nia lia menon nunka mai husi ema mundu nee nia hakarak. Maibee sira hatoo liafuan husi Maromak tuir saida mak Espiritu Santu hatudu ba sira.
2PE 2:1 Uluk profeta falsu mosu iha povu Israel nia leet. Nunee mos agora, iha mestri falsu iha hela imi nia leet. Sira taka falta hodi hanorin lia falsu too nega mos ita nia Nai Jesus. Afinal Nia mak sosa kotu tiha sira. Derepenti mestri sira nee sei rahun hotu. I se imi halo tuir sira, imi mos sei rahun.
2PE 2:2 Maski nunee ema barak sei tuir mestri falsu sira nee hodi halo arbiru too la hatene moe. Bainhira ema seluk haree sira nia hahalok aat nee, sira sei hatete aat fali Maromak nia dalan loos.
2PE 2:3 Mestri falsu sira nee matan osan liu. Sira inventa istoria tuun-sae para han-matak imi. Maibee hori uluk kedas Maromak desidi ona atu kastigu sira, i la kleur tan sira sei rahun.
2PE 2:4 Hanoin took! Uluk bainhira anju balu halo sala, Maromak la haluha kastigu sira. Nia sulan sira iha rai kuak nakukun, sira dadur hela iha nebaa too Maromak foo justisa ba sira.
2PE 2:5 Nunee mos Maromak la haluha kastigu ema sira nebee moris iha Noé nia tempu uluk. Iha tempu nebaa Maromak halo rai nabeen hodi halo mate ema hotu nebee la interese Nia. Maromak salva deit Noé hamutuk ho ema nain hitu. Noé nee hanorin ema para moris loos.
2PE 2:6 Nunee mos povu sidade Sodoma ho Gomora. Maromak kastigu sidade rua nee ho ahi too sai tiha ahu kdesan hotu. Nee hanesan ezemplu ida hodi hatudu katak, Maromak sei foo kastigu todan ba ema nebee mak la interese Nia.
2PE 2:7 Iha tempu nebaa Maromak salva deit Ló. Ló nee ema ida nebee moris loos, i nia laran tristi teb-tebes tanba povu kontra buat nebee mak loos hodi moris iha sala foer nia laran.
2PE 2:8 Maski Ló moris loos, maibee nia moris iha ema aat sira nia leet. Loro-loron nia haree i rona beibeik sira nia hahalok aat nee, halo nia laran susar teb-tebes.
2PE 2:9 Ezemplu hirak nee hatudu katak, Nai Maromak hatene salva ema nebee mak halo tuir Nia hakarak, bainhira sira hasoru tentasaun. Nia mos hatene foo kastigu ba ema nebee mak moris la loos. I Nia dadur nafatin sira too tempu atu Nia tesi ema hotu-hotu nia lia.
2PE 2:10 Kastigu nebee todan liu sei monu ba ema nebee toman halo buat foer tuir sira nia hakarak aat i lakohi rona see-see deit mak ukun iha lalehan ka iha rai. Mestri falsu sira nee la tauk ema ida. Sira foti aan liu, too sira mos brani atu koalia aat Maromak nia anju sira.
2PE 2:11 Afinal anju sira nee boot liu i forsa liu mestri falsu sira. Maski nunee anju sira la foo sala ba mestri sira nee hodi koalia aat sira iha Nai Maromak nia oin.
2PE 2:12 Maibee mestri falsu sira nee gosta koalia aat buat nebee mak sira rasik la kompriende. Sira hanesan animal nebee mak la iha neon maibee tuir deit sira nia hakarak rasik. Sira hanesan animal nebee too ikus tama ba lasu i rahun.
2PE 2:13 Maromak sei foo terus ba sira tuir terus nebee mak sira foo ona ba ema seluk. Mestri falsu sira nee, iha loron manas boot mos halo festa arbiru deit too halo sala oi-oin. Bainhira sira haan hamutuk ho imi mos, sira halo tuir deit sira nia hakarak aat. Sira nia hahalok nee halo moe deit ita.
2PE 2:14 Sira nia matan halai tuun-sae hodi buka feto nebee mak atu halo sala foer ho sira. Sira sempre kaan atu halo sala. Sira buka ema nebee mak fiar seidauk metin hodi lohi ema nee para lao sala dalan. Sira nia laran toman ona kaan sasaan. Maromak foo ona malisan ba sira!
2PE 2:15 Sira sees ona husi dalan loos hodi tuir fali Balaão, Beor nia oan. Balaão nee gosta liu manaan osan husi nia hahalok aat.
2PE 2:16 Maibee iha loron ida, nia kuda buru rasik siak nia para la bele halo tan nia hahalok beik-teen nee. Maski kuda buru nee la hatene koalia, maibee derepenti deit nia bele koalia hanesan fali ema.
2PE 2:17 Mestri falsu sira nee hanesan bee matan nebee maran hela. Sira hanesan abu-abu nebee anin huu halo lakon tiha. Maromak prepara tiha ona ba sira fatin ida nebee nakukun liu.
2PE 2:18 Tanba sira tebe rai loos, maibee koalia liafuan mamuk deit. Sira gosta buka ema nebee mak foin komesa husik nia sala. Depois sira dada ema nee para moris tuir fali buat aat saida deit mak ema nee kaan atu halo.
2PE 2:19 Mestri falsu sira nee promete katak ema nebee tuir sira sei moris livre. Afinal sira rasik sai tiha ona atan ba sira nia hahalok aat. Tanba ita ema sai atan ba saida deit mak ukun ita.
2PE 2:20 Ema nebee konhese ona Nai Jesus Kristu ita nia Salvador, nia husik tiha ona buat aat iha mundu nee. Maibee se nia monu fali ba hahalok aat too hahalok nee ukun fali nia, entaun too ikus nia moris aat liu fali uluk nian.
2PE 2:21 Diak liu uluk kedas ema nee la hatene dalan moris loos nian, duke nia hatene tiha maibee too ikus fila kotuk fali ba Maromak nia ukun fuan nebee nia rona tiha ona.
2PE 2:22 Iha ema soe lia nunee: “Bainhira asu muta, nia rasik sei lambe fila fali.” Iha mos seluk dehan, “Fahi nebee foo hariis moos tiha ona sei duir aan fali iha tahu laran.”
2PE 3:1 Maluk doben sira, ida nee hau nia surat segundu ba imi. Iha hau nia surat rua nee, hau foo hanoin ba imi kona ba buat nebee imi hatene ona, tanba hau hakarak dudu imi ba hanoin nebee mak loos.
2PE 3:2 Hau hakarak atu imi hanoin nafatin Maromak nia profeta sira nia liafuan uluk. Imi tenki hanoin mos hanorin nebee ita nia Salvador Nai Jesus foo ba imi liu husi Nia apostolu sira.
2PE 3:3 Liu-liu imi tenki hatene katak, bainhira mundu nee besik remata ona, sei iha ema nebee gosta goza imi. Sira sei moris tuir deit sira nia hakarak aat, i sei abuza imi
2PE 3:4 dehan, “Jesus promete atu mai fali. Agora Nia iha nebee? Komesa husi ita nia bei-ala sira mate too ohin loron mos, buat ida la muda. Hotu-hotu lao nafatin, komesa husi Maromak halo lalehan ho rai.”
2PE 3:5 Bainhira mestri falsu sira koalia nunee, sira finji haluha katak, uluk fo-foun Maromak foo deit orden mak lalehan ho rai iha kedas. Rai nee mai husi bee, i sai husi bee.
2PE 3:6 Hodi bee mos Maromak uluk kastigu ema iha mundu nee, bainhira Nia halo bee sae makaas hodi halo lakon tiha buat hotu-hotu.
2PE 3:7 Nunee mos Maromak foo orden mak lalehan ho rai nebee agora dadauk iha, hein hela too loron nebee mak Nia tesi ema hotu-hotu nia lia. Iha loron nee Maromak sei uza ahi hodi sunu tiha lalehan ho rai too halo mate mohu ema nebee mak la interese Nia.
2PE 3:8 Maluk doben sira, keta haluha buat nee: Ita nia Nai la sura tempu hanesan ita. Tuir Nia, loron ida hanesan fali tinan rihun ida. I tinan rihun ida hanesan fali loron ida.
2PE 3:9 Entaun, se ita nia Nai seidauk halo tuir Nia promesa, nee laos dehan Nia demora, maski ema balu hanoin hanesan nee. Maibee Nia sei pasiensia ho imi. Nia hakarak atu ema hotu-hotu tenki hakribi sira nia sala, tanba Nia lakohi atu ema ida mate haketak aan husi Nia.
2PE 3:10 Maibee Nai Jesus sei fila fali mai derepenti deit hanesan naok-teen. Lalehan sei tarutu makaas loos too lakon tiha. Loro matan, fulan ho fitun sira iha lalehan, ahi haan hotu kedas. I mundu ho buat hotu-hotu iha mundu nee mos sei lakon hotu.
2PE 3:11 Se buat hotu-hotu sei lakon tiha nunee, entaun imi tenki moris oinsaa? Imi tenki moris ho laran moos hodi tuir Maromak nia hakarak,
2PE 3:12 i hein nafatin atu Maromak nia loron too lalais. Iha loron nee, lalehan ahi haan mohu tiha. I loro matan, fulan ho fitun sira iha lalehan mos nabeen hotu tanba manas liu.
2PE 3:13 Maibee ita hein hela lalehan foun ho mundu foun, tuir buat nebee mak Maromak promete tiha ona. Fatin nee so ba ema nebee mak moris loos.
2PE 3:14 Nunee maluk doben sira, durante imi hein hela buat sira nee, imi tenki hakaas aan para sai ema nebee mak moos liu, livre husi sala, i moris diak malu ho Maromak.
2PE 3:15 Hanoin took. Kuandu Nai Maromak pasiensia ho ita ema, nee dehan katak Nia foo tempu ba ita para ita bele hetan salvasaun. Ita nia maluk doben Paulo mos hakerek ona ba imi nunee, ho matenek nebee mak nia simu husi Maromak.
2PE 3:16 Iha Paulo nia surat hotu-hotu nia koalia hanesan nee. Iha nia surat laran iha buat balu mak susar atu kompriende. Ema nebee beik-teen i fiar la metin bobar fali nia liafuan nee, hanesan mos sira bobar liafuan iha parte seluk iha Livru Sagradu. Ema hanesan nee sei mate haketak aan husi Maromak.
2PE 3:17 Maluk doben sira, imi hatene ona buat sira nee. Nunee kuidadu! Mestri falsu sira nee kontra buat nebee mak loos. Kuidadu para sira la bele lori imi sees husi dalan loos. Tanba imi hamriik metin ona, maibee se imi tuir sira, imi sei monu.
2PE 3:18 Hakaas aan para loron ba loron konhese diak liu Nai Jesus Kristu ita nia Salvador, i hatene liu tan Nia laran diak. Mai ita hahii adora Nia agora too tinan ba tinan. Amen.
1JO 1:1 Surat nee koalia kona ba Liafuan nebee foo moris. Liafuan nebee foo moris nee, Nia iha hori uluk kedas, molok Maromak halo mundu nee. Ami rona ona Nia lian, ami haree Nia ho ami nia matan rasik, ami akompanha Nia, ami mos kaer rasik ho liman.
1JO 1:2 Bainhira Ida nebee foo Moris nee mosu iha ami nia leet, ami haree Nia. Nee mak ami foo sasin kona ba Nia, i ami foo sai ba imi katak, Nia mak foo moris rohan-laek. Nia hamutuk ho Nia Aman Maromak hori uluk kedas, maibee agora Nia hatudu ona Nia Aan ba ami.
1JO 1:3 Saida mak ami haree i rona rasik, ida nee mak ami foo sai ba imi, para imi bele sai laran ida ho ami, i nunee ita hotu hamutuk laran ida ho Aman Maromak ho Nia Oan Jesus Kristu.
1JO 1:4 Ami hakerek buat sira nee ba imi para ita hotu bele haksolok liu tan.
1JO 1:5 Lia menon tuir mai ami rona husi Jesus Kristu i foo tutan fali ba imi: Maromak nee naroman, nakukun ida mos la iha.
1JO 1:6 Se ita dehan ita laran ida ho Nia, maibee ita sei moris iha nakukun laran, ita bosok ita nia aan i ita la moris tuir buat nebee mak loos.
1JO 1:7 Maibee se ita moris iha naroman laran, hanesan mos Maromak, entaun ita nia relasaun ho maluk sarani sira sai metin, i Nia Oan Jesus nia raan sei hamoos ita nia sala tomak.
1JO 1:8 Se ita dehan ita la iha sala, ita bosok ita nia aan rasik i ita la hatene buat nebee mak loos.
1JO 1:9 Maibee se ita foo sai ita nia sala ba Maromak, entaun Nia sei foo perdaun ba ita i sei hamoos ita nia hahalok aat hotu. Tanba Maromak la haluha Nia promesa, i Nia sempre halo buat nebee mak loos.
1JO 1:10 Maromak dehan ona katak ita hotu sala nain. Se ita dehan ita nunka halo sala, entaun ita dehan fali Maromak nee bosok-teen, i ita lakohi simu Nia liafuan.
1JO 2:1 Hau nia oan doben sira, hau hakerek buat sira nee ba imi, atu imi la bele halo sala. Maibee se ita halo sala, iha ona Ema ida mak koalia ba Aman Maromak para simu ita nafatin. Ema nee mak Jesus Kristu, Ida nebee sempre moris loos.
1JO 2:2 Nia foo Aan ba mate hanesan sakrifisiu hodi hamoos ita nia sala, i laos deit ita nia sala maibee ema hotu-hotu nia sala.
1JO 2:3 Oinsaa mak ita bele hatene lo-loos katak ita konhese Maromak? Ita hatene tanba ita halo tuir Nia liafuan.
1JO 2:4 Se karik ema ruma dehan, “Hau konhese Maromak”, maibee la halo tuir Maromak nia liafuan, ema nee bosok-teen, i la moris tuir lia loos.
1JO 2:5 Maibee ema nebee moris tuir Maromak nia liafuan, ema nee hadomi tebes Maromak. Oinsaa mak ita bele hatene katak ita laran ida ho Maromak?
1JO 2:6 Ita hatene tanba ita laos koalia ho ibun tutun deit, maibee ita mos halo tuir Jesus nia hahalok.
1JO 2:7 Maluk doben sira, hau foo hanoin ba imi kona ba ukun fuan ida nee: Imi tenki hadomi malu. Ukun fuan nee laos buat foun ida, maibee tuan ona, imi mos rona kleur ona.
1JO 2:8 Maski nunee ukun fuan nebee hau hakerek nee, sei foun hela, tanba ita foin hatene lo-loos ukun fuan nee nia lalaok liu husi Jesus Kristu nia moris. I ema mos sei haree domin nee iha imi, tanba iha imi nia moris, nakukun lakon dadauk i naroman mosu ona.
1JO 2:9 Ema nebee dehan nia moris iha naroman laran maibee sei odi nia maluk, afinal ema nee sei moris nafatin iha nakukun laran.
1JO 2:10 Maibee ema nebee hadomi nia maluk, nia moris iha naroman laran, i la iha buat ida mak bele halo nia monu ba sala.
1JO 2:11 Ema nebee sei odi nia maluk, nia moris nafatin iha nakukun laran. Nia la hatene atu baa loos nebee, tanba nakukun taka metin nia matan.
1JO 2:12 Hau nia oan doben sira, hau hakerek liafuan nee ba imi tanba Maromak hamoos tiha ona imi nia sala liu husi Jesus Kristu nia mate.
1JO 2:13 Inan-aman sira, hau hakerek ba imi tanba imi konhese Ema ida nebee iha ona hori uluk kedas. Joven sira, hau hakerek ba imi tanba imi halo lakon tiha aat nain.
1JO 2:14 Hau nia oan doben sira, hau hakerek ba imi tanba imi konhese ita nia Aman Maromak. Inan-aman sira, hau hakerek ba imi tanba imi konhese Ema ida nebee iha ona hori uluk kedas. Joven sira, hau hakerek ba imi tanba imi forti, moris tuir Maromak nia liafuan, i halo lakon tiha aat nain.
1JO 2:15 La bele hadomi buat mundu nian. See mak hadomi buat mundu nian, nia la hadomi Aman Maromak.
1JO 2:16 Tanba hahalok mundu nian hanesan nee: Hakarak moris goza deit, kaan sasaan oi-oin, foti aan kona ba sira nia riku-soin. Buat sira nee hotu laos mai husi Aman Maromak maibee mai husi mundu.
1JO 2:17 Mundu ho buat hotu-hotu nebee ema baibain buka nee aban-bainrua sei mohu. Maibee ema nebee tuir Maromak nia hakarak, nia sei moris tinan ba tinan nafatin.
1JO 2:18 Oan doben sira, mundu nee besik remata ona. Uluk ami hatete tiha ona ba imi katak Kristu nia inimigu ida nebee boot sei mai. Agora dadauk mos Kristu nia inimigu barak mosu tiha ona. Tanba nee mak ita hatene katak mundu besik remata ona.
1JO 2:19 Kristu nia inimigu balu uluk hamutuk ho ita sarani sira, maibee agora sees ona husi ita. Maski sira uluk iha ita nia klaran, maibee sira laos ita nia maluk sarani lo-loos, nee mak sira lakohi hamutuk ona ho ita. Sira husik tiha ita, nee hatudu katak, sira nee laos ita nia maluk sarani.
1JO 2:20 Maibee imi la hanesan ho sira. Jesus Kristu haraik ona Nia Espiritu Santu ba imi, i nunee imi hotu hatene ona lia loos.
1JO 2:21 Entaun hau hakerek surat nee ba imi laos tanba imi la hatene lia loos, lae. Hau hakerek tanba imi hatene duni i imi mos hatene katak, Maromak nia liafuan nunka bosok.
1JO 2:22 Entaun see mak bosok? Ida nebee hatete katak Jesus laos Kristu, nee dehan katak Jesus laos Salvador nebee Maromak promete hori uluk kedas atu haruka mai. See mak koalia nunee, nia sai Kristu nia inimigu. Nia nega Maromak nia Oan i nega mos Aman Maromak.
1JO 2:23 Ema nebee nega Maromak nia Oan, nia la bele sai laran ida ho Aman Maromak. Maibee see mak rekonhese Maromak nia Oan, nia sai laran ida ho Nia Aman.
1JO 2:24 Tanba nee, kaer metin nafatin lia loos nebee imi rona ona hori uluk. Se imi halo nunee, imi neon ida laran ida nafatin ho Aman Maromak ho mos Nia Oan.
1JO 2:25 I Maromak promete ba ita katak ita sei hetan moris rohan-laek.
1JO 2:26 Hau hakerek buat sira nee para foo hanoin ba imi kona ba ema nebee hakarak lohi imi lao sala dalan.
1JO 2:27 Maibee imi simu ona Maromak nia Espiritu, i Nia Espiritu hela nafatin ho imi. Nunee imi la presiza mestri seluk atu hanorin imi, tanba Maromak nia Espiritu rasik mak hanorin imi kona ba buat hotu-hotu, i saida mak Nia hanorin nee loos hotu, ida mos la sala. Entaun imi tenki moris laran ida nafatin ho Jesus Kristu tuir Nia Espiritu hanorin ona ba imi.
1JO 2:28 Nee duni oan doben sira, imi tenki moris laran ida ho Jesus Kristu nafatin, para aban-bainrua Jesus fila fali mai husi lalehan, ita la tauk i la moe hamriik iha Nia oin.
1JO 2:29 Imi hatene ona katak, Maromak sempre halo buat nebee mak loos. Nunee bainhira ema halo beibeik buat nebee mak loos, imi konhese katak, ema nee Maromak nia oan.
1JO 3:1 Ita nia Aman Maromak nia domin mai ita boot teb-tebes, ita sukat la bele! Nia hadomi ita too Nia mos konsidera ita nudar Nia oan. Loos duni, ita Maromak nia oan. Maibee ema nebee moris tuir mundu nia hakarak, sira la kompriende ita nee see, tanba sira la konhese Maromak.
1JO 3:2 Maluk doben sira, ita sai ona Maromak nia oan. Maibee Maromak seidauk foo sai ba ita, aban-bainrua ita sei sai oinsaa. Maski nunee ita hatene ona, bainhira Jesus Kristu fila fali mai husi lalehan, ita sei sai hanesan Nia, tanba ita sei haree Nia mo-moos.
1JO 3:3 Tanba nee, ema hotu-hotu nebee hein ho laran metin atu sai hanesan Nia, sira sempre kuidadu sira nia aan para moris loos, hanesan Jesus Kristu mos moris loos.
1JO 3:4 Ema nebee halo sala, nia kontra Maromak nia ukun fuan. Tanba sala katak, lakohi halo tuir Nia ukun fuan.
1JO 3:5 Imi hatene katak Jesus Kristu mai para hamoos ita ema nia sala, i Nia rasik la iha sala.
1JO 3:6 Tanba nee, ema nebee sai ona laran ida ho Kristu sei la moris ona iha sala nia laran. Se ema halo sala nafatin, nee hatudu katak nia seidauk konhese Jesus Kristu i seidauk kompriende Jesus nee see.
1JO 3:7 Oan doben sira, la bele tuir ema nebee mak hakarak lori imi lao sala dalan. See mak sempre halo buat nebee mak loos, ema nee laran moos, hanesan Jesus Kristu.
1JO 3:8 Maibee see mak halo sala beibeik, ema nee Satanás nia oan, tanba Satanás halo sala dezde uluk kedas. Maromak nia Oan mai iha mundu para harahun tiha Satanás nia servisu.
1JO 3:9 Nunee ema nebee sai ona Maromak nia oan, nia sei la halo sala beibeik, tanba nia hahalok tuir nia Aman Maromak. Nia la bele moris nafatin iha sala laran, tanba nia sai ona Maromak nia oan.
1JO 3:10 Maibee see mak la halo buat nebee loos ka la hatene hadomi nia maluk sarani, ema nee laos Maromak nia oan. Nunee mak imi bele hatene ida nebee mak Maromak nia oan, i ida nebee mak Satanás nia oan.
1JO 3:11 Hori uluk kedas imi simu lia menon ida nee: Ita ema sarani tenki hadomi malu.
1JO 3:12 La bele sai hanesan Kaín. Nia hanesan fali aat nain nia oan, too nia oho nia alin rasik. Nusaa mak Kaín oho nia alin? Tanba nia halo buat nebee mak aat, maibee nia alin halo buat nebee diak iha Maromak nia oin.
1JO 3:13 Nunee maun-alin sira, se ema nebee moris tuir mundu nia hakarak odi imi karik, lalika hakfodak.
1JO 3:14 Ita hatene katak, uluk ita hanesan mate tiha ona tanba ita haketak aan husi Maromak, maibee agora ita simu ona moris rohan-laek. Oinsaa mak ita bele hatene katak ita hetan ona moris rohan-laek? Tanba ita hadomi ita nia maluk. Maibee see mak la hadomi nia maluk, nia hanesan nafatin ema mate.
1JO 3:15 See mak odi nia maluk, nia hanesan fali oho door. I imi hatene ona katak, oho door la hetan moris rohan-laek.
1JO 3:16 Domin lo-loos mak saida? Liu husi Jesus Kristu mak ita bele hatene. Nia hadomi ita too foo Aan ba mate. Nee hanesan ezemplu para ita halo tuir.
1JO 3:17 Se ema ida iha hahaan ka hena, maibee la foo ba nia maluk nebee moris iha susar nia laran, oinsaa nia bele dehan nia hadomi Maromak?!
1JO 3:18 Oan doben sira, ita la bele hadomi ita nia maluk sira ho ibun tutun deit, maibee ita tenki hatudu ita nia domin lo-loos liu husi ita nia hahalok.
1JO 3:19 Se ita hadomi lo-loos ita nia maluk sira, nee hatudu katak ita moris tuir dalan loos. Nunee ita nia laran bele hakmatek iha Maromak nia oin.
1JO 3:20 Dala ruma ita sei duvida, keta halo be ita nia hahalok diak seidauk too. Maski nunee ita lalika tauk, tanba Maromak boot liu ita nia hanoin i Nia hatene buat hotu-hotu kona ba ita.
1JO 3:21 Maluk doben sira, se ita la duvida ba hahalok diak nebee mak ita halo, ita bele brani harohan ba Maromak.
1JO 3:22 Ita husu saida deit, Nia sei foo, tanba ita moris tuir Nia ukun fuan i halo haksolok Nia laran.
1JO 3:23 Maromak nia ukun fuan mak nee: Ita tenki fiar ba Nia Oan Jesus Kristu i tenki hadomi malu tuir Jesus Kristu hanorin.
1JO 3:24 Ema hotu-hotu nebee tuir Maromak nia ukun fuan, sira laran ida ho Maromak, i Nia mos hela ho sira. Oinsaa mak ita hatene katak Maromak hela ho ita? Tanba Nia foo ona Nia Espiritu hela iha ita nia laran.
1JO 4:1 Maluk doben sira, se ema ruma mai dehan, Maromak nia Espiritu iha nia, keta tuir lai. Imi tenki koko uluk para hatene, espiritu nebee sira iha nee mai duni husi Maromak ka lae. Tanba iha mundu nee profeta falsu barak ona.
1JO 4:2 Nunee imi tenki koko lai sira. Oinsaa mak imi bele hatene katak Maromak nia Espiritu hela iha sira? Se sira dehan katak Jesus Kristu mai iha mundu nee sai ema, entaun sira nia liafuan mai husi Maromak nia Espiritu.
1JO 4:3 Maibee se sira dehan Jesus Kristu la sai ema, entaun laos Maromak nia Espiritu mak hela iha sira nia laran. Espiritu nebee hela iha ema nee mai husi Kristu nia inimigu boot. Uluk imi rona tiha ona katak Kristu nia inimigu boot nee sei mai, i agora dadauk nia espiritu komesa servisu ona iha mundu nee.
1JO 4:4 Maibee oan doben sira, imi nee Maromak nia ema. I imi halo lakon tiha ona profeta falsu sira, tanba Espiritu nebee hela iha imi nee, forti liu espiritu ida nebee hela iha ema aat iha mundu nee.
1JO 4:5 Profeta falsu sira nee, nia huun mak mundu nee deit, nee mak sira sempre koalia tuir matenek mundu nian, i ema mundu nian mos rona sira.
1JO 4:6 Maibee ami nee Maromak nia ema. I ema nebee konhese ona Maromak, sira nee mak rona ami. Ema nebee laos Maromak nia ema, sira lakohi rona. Husi nee ita bele hatene, Espiritu nebee mak hanorin lia loos i espiritu nebee mak bosok.
1JO 4:7 Maluk doben sira, mai ita hadomi ita nia maluk, tanba domin nee mai husi Maromak. Ema nebee hadomi nia maluk, nia Maromak nia oan i nia konhese Maromak.
1JO 4:8 Maibee ema nebee la hadomi nia maluk, nia la konhese Maromak, tanba Maromak mak Domin Nain.
1JO 4:9 Maromak hatudu Nia domin nunee: Nia haruka nia Oan mane mesak mai iha mundu para lori ita ba moris rohan-laek.
1JO 4:10 Atu hatene domin lo-loos, keta haree ba ita ema nia domin ba Maromak, maibee haree ba Maromak nia domin mai ita. Nee mak Nia haruka Nia Oan mai foo Aan ba mate hanesan sakrifisiu hodi hamoos ita nia sala.
1JO 4:11 Maluk doben sira, Maromak hadomi teb-tebes ita, nunee ita mos tenki hadomi malu.
1JO 4:12 La iha ema ida mak haree ona Maromak, maibee se ita hadomi malu, Maromak hela ho ita i halo ita hatene domin lo-loos.
1JO 4:13 Maromak foo tiha ona Nia Espiritu ba ita, nee mak ita hatene ona katak, ita laran ida ho Maromak i Nia mos hela ho ita.
1JO 4:14 Ami rasik haree ona Maromak nia Oan, i ami foo sasin katak, Maromak haruka Nia Oan mai para salva ema hotu-hotu iha mundu nee.
1JO 4:15 Ema nebee dehan Jesus nee Maromak nia Oan, Maromak hela ho nia, i nia mos laran ida ho Maromak.
1JO 4:16 Ita hatene Maromak nia domin, i ita laran metin ba Nia domin nee. Nia sempre hadomi ita ema, nunee ema nebee sempre hadomi Maromak i hadomi nia maluk sira, ema nee laran ida ho Maromak, i Maromak mos hela ho nia.
1JO 4:17 Se ita hatene domin lo-loos, aban-bainrua iha loron nebee Maromak tesi ema hotu nia lia, ita sei la tauk, tanba iha mundu nee ita nia moris hanesan Jesus Kristu nian.
1JO 4:18 Se ita hatene domin, ita la tauk ona, tanba domin lo-loos halo lakon tiha ita nia tauk. Baibain ema tauk Maromak atu kastigu sira. Maibee ema nebee tauk nafatin Maromak nia kastigu, ema nee seidauk hatene domin lo-loos.
1JO 4:19 Ita hadomi ita nia maluk sira i hadomi Maromak tanba Nia mak hadomi uluk ita.
1JO 4:20 Se ema ruma dehan, “Hau hadomi Maromak”, maibee nia odi nia maluk, ema nee bosok-teen. Tanba nia maluk, nia bele haree, maibee Maromak, nia la haree ho matan. Nunee se nia la hadomi nia maluk, nia mos la bele hadomi Maromak.
1JO 4:21 Entaun Maromak foo Nia ukun fuan mai ita dehan, se o hadomi Maromak, o mos tenki hadomi o nia maluk sira.
1JO 5:1 See-see deit mak fiar katak Jesus mak Kristu, Salvador nebee Maromak promete hori uluk kedas atu haruka mai, ema nee Maromak nia oan. Se ita hadomi aman ida, ita mos hadomi nia oan.
1JO 5:2 Nunee mos, se ita hadomi Maromak i halo tuir Nia ukun fuan mak ita hatene katak ita mos hadomi Maromak nia oan sira.
1JO 5:3 Tanba se ita halo tuir Maromak nia ukun fuan, nee dehan katak, ita hadomi Maromak. I Nia ukun fuan la todan ida,
1JO 5:4 tanba ema nebee sai Maromak nia oan, nia la halo tuir tan buat aat mundu nian. Nia manaan ona tanba nia fiar ba Jesus.
1JO 5:5 See mak bele manaan buat aat mundu nian? So ema nebee mak fiar katak Jesus Maromak nia Oan.
1JO 5:6 Uluk Jesus Kristu mai iha mundu nee, ema foo sarani Nia ho bee, i too ikus Nia raan fakar too mate. Nia mai laos deit atu simu batizmu ho bee, maibee mos atu Nia raan fakar too mate. I Maromak nia Espiritu mak foo sasin kona ba Jesus, tanba Maromak nia Espiritu sempre koalia buat nebee mak loos.
1JO 5:7 Nunee iha buat tolu mak sai sasin kona ba Jesus:
1JO 5:8 Maromak nia Espiritu, bee sarani ho Jesus nia raan. Buat tolu nee foo sasin nebee hanesan.
1JO 5:9 Baibain ita fiar sasin nebee ema foo. Maibee sasin nebee Maromak foo nee forti liu fali ita ema nia sasin hotu, tanba Nia mak Maromak, i Nia foo sasin kona ba Nia Oan rasik.
1JO 5:10 Tanba nee, ema nebee fiar Maromak nia Oan, nia hatene mo-moos katak saida mak Maromak koalia kona ba Nia Oan nee loos. Maibee ema nebee la fiar Maromak nia sasin nee, nia dehan fali Maromak bosok-teen, tanba nia la fiar saida mak Maromak koalia kona ba Nia Oan.
1JO 5:11 Buat nebee Maromak koalia mak nee: Maromak loke ona dalan atu ita moris tinan ba tinan hamutuk ho Nia, i moris rohan-laek nee ita hetan tanba ita laran ida ho Nia Oan.
1JO 5:12 Ema nebee laran ida ho Maromak nia Oan, hetan moris rohan-laek. Maibee ema nebee la hamutuk ho Maromak nia Oan sei la hetan moris rohan-laek.
1JO 5:13 Hau hakerek surat nee ba imi nebee fiar ba Maromak nia Oan, para imi bele hatene katak, imi sei moris hamutuk ho Maromak nafatin too tinan ba tinan.
1JO 5:14 Nee mak ita la tauk atu harohan ba Maromak, tanba ita laran metin katak ita husu saida deit tuir Nia hakarak, Nia rona.
1JO 5:15 I tanba Nia rona, ita mos hatene katak, Nia sei foo buat nebee mak ita husu.
1JO 5:16 Se karik imi haree imi nia maluk sarani ida halo sala, maibee laos sala ida nebee bele lori nia ba mate, entaun imi tenki harohan ba Maromak para salva nia, i Maromak sei foo moris ba nia. Hau haruka imi harohan ba ema nebee nia sala la lori nia ba mate. Iha mos sala balu nebee halo ema haketak aan husi Maromak. Se imi nia maluk sarani ruma halo sala hanesan nee, hau laos haruka imi harohan ba nia.
1JO 5:17 Hahalok aat hotu-hotu sala, maibee laos sala hotu-hotu mak lori ema ba mate.
1JO 5:18 Ita hatene katak ema nebee sai ona Maromak nia oan, nia la halo sala beibeik, tanba Maromak nia Oan Jesus Kristu tau matan ba nia. Nunee aat nain la bele halo aat nia.
1JO 5:19 Ita hatene katak, ita sai ona Maromak nia ema, maski aat nain mak domina ema sira seluk iha mundu nee.
1JO 5:20 Ita hatene katak Maromak nia Oan mai ona, i Nia loke ona ita nia neon para ita bele konhese Ida nebee mak loos. Ita laran ida ona ho Ida nebee mak loos, ita mos laran ida ho Nia Oan Jesus Kristu. Nia mak Maromak lo-loos, i Nia mak moris rohan-laek nia huun.
1JO 5:21 Nunee, oan doben sira, kuidadu di-diak imi nia aan para la bele adora fali lulik.
2JO 1:1 Surat nee husi hau, nudar responsavel sarani sira nian. Senhora nebee Maromak hili, hau hakerek ba senhora ho mos ba senhora nia oan sira. Hau hadomi teb-tebes imi. Laos hau deit maibee ema hotu-hotu nebee hatene lia loos mos hadomi imi.
2JO 1:2 Hau hadomi imi tanba lia loos nee moris ona iha ita hotu nia laran, i lia loos nee sei metin nafatin iha ita too tinan ba tinan.
2JO 1:3 Hau harohan atu ita nia Aman Maromak ho Nia Oan Jesus Kristu hatudu Sira nia laran diak ba ita hotu, hadomi ita, i foo pas ho hakmatek ba ita, para ita kaer metin lia loos i hadomi malu.
2JO 1:4 Hau haksolok teb-tebes, tanba hau rona katak senhora nia oan sira balu moris tuir lia loos, tuir duni buat nebee mak Aman Maromak haruka ita halo.
2JO 1:5 Entaun senhora doben, hau husu para ita hotu hadomi malu. Ukun fuan nee laos buat foun ida, ita simu tiha ona hori uluk kedas.
2JO 1:6 Domin lo-loos mak nee: Ita moris tuir Maromak nia ukun fuan. I ukun fuan nebee mak imi rona hori uluk kedas mak nee: Imi tenki moris iha domin nia laran.
2JO 1:7 Ohin loron, bosok-teen barak lao lemo-lemo lori lia falsu dehan, Jesus Kristu moris iha mundu nee, Nia la iha isin ho raan. Ema nebee koalia nunee, sira bosok-teen, i sira Kristu nia inimigu.
2JO 1:8 Kuidadu di-diak, keta rona ema sira nee, maibee kaer metin lia loos, para aban-bainrua imi bele simu bensaun hotu nebee mak Maromak atu foo ba imi. Se lae, ami nia servisu ba imi mos saugati deit.
2JO 1:9 Ema nebee la kaer metin Kristu nia hanorin, maibee halai sees fali, ema nee la hamutuk ho Maromak. Maibee see mak kaer nafatin Kristu nia hanorin, nia laran ida ho Aman Maromak ho mos Nia Oan Jesus Kristu.
2JO 1:10 Nunee se karik ema ruma mai atu hanorin imi maibee sees fali husi buat nebee mak Kristu hanorin, lalika simu ema nee iha imi nia uma, lalika liga sira.
2JO 1:11 Tanba, see mak simu ema nunee, nia mos lori todan ba ema nee nia hahalok aat.
2JO 1:12 Iha buat barak mak hau hakarak hatete ba imi, maibee hau hanoin diak liu la bele liu husi surat. Hau hakarak baa vizita imi, i koalia rasik ho imi atu ita hotu-hotu bele haksolok liu tan.
2JO 1:13 Maromak mos hili ona senhora nia feto maluk iha nee. Nia oan sira foo kumprimentus ba ita boot.
3JO 1:1 Surat nee husi hau, nudar responsavel sarani sira nian. Belun Gaio mak hau hadomi teb-tebes, hau harohan ba Maromak atu buat hotu-hotu lao diak. Hau harohan para o nia isin forti nafatin hanesan o nia relasaun ho Maromak forti ona.
3JO 1:3 Hau nia laran haksolok teb-tebes, tanba sarani balu mai konta dehan, o kaer metin lia loos, i moris tuir nafatin buat nebee Maromak hanorin.
3JO 1:4 Bainhira hau rona katak hau nia oan sira moris tuir lia loos, ida nee mak halo hau nia laran haksolok liu.
3JO 1:5 Belun, o sempre ajuda maluk sira nebee mak lao haleu hodi haklaken Maromak nia liafuan, nee hatudu katak o serbi Maromak ho diak. Maski o seidauk konhese sira, maibee o simu sira ho diak.
3JO 1:6 Sira balu mai konta ba sarani sira iha nee kona ba o nia domin ba sira. Agora hau husu ba o atu foo ajuda nafatin buat nebee mak sira presiza iha dalan, tanba ajuda nee halo haksolok Maromak nia laran.
3JO 1:7 Sira nee lao haleu hodi Jesus Kristu nia naran. Maibee ema sira nebee mak la konhese Maromak, la foo suporta ba sira.
3JO 1:8 Entaun ita mak tenki suporta sira, atu nunee ita mos servisu hamutuk ho sira hodi foo sai lia loos.
3JO 1:9 Hau haruka ona surat ba sarani sira iha nebaa, maibee Diótrefes hakarak ukun iha igreja, i lakohi rona hau.
3JO 1:10 Tanba nee, bainhira hau too iha nebaa, hau sei konta sai Diótrefes nia hahalok aat nee, para sarani sira hotu hatene katak nia gosta koalia aat ami. I laos nee deit, maibee ita nia maluk sira baa iha nebaa, Diótrefes lakohi simu. Sarani sira seluk atu simu maluk sira nee, maibee Diótrefes bandu i hasai sarani sira nee husi igreja.
3JO 1:11 Belun, la bele halo tuir ema nia hahalok aat, maibee halo tuir nafatin ezemplu nebee diak. See mak halo buat diak, nia Maromak nia ema. Maibee see mak halo buat aat, nia seidauk konhese Maromak.
3JO 1:12 Kona ba Demétriu, nia ema ida nebee diak. Nia moris loos. Ema hotu-hotu gaba nia, ami mos gaba, i o hatene katak ami la bosok.
3JO 1:13 Iha buat barak mak hau hakarak hatete ba o, maibee hau hanoin diak liu la bele liu husi surat.
3JO 1:14 Hau hakarak atu la kleur tan ita hasoru malu, para ita bele koalia.
3JO 1:15 Hau harohan atu Maromak foo pas ho hakmatek ba o. Ita nia maluk sira iha nee foo kumprimentus. Hatoo mos hau nia kumprimentus ba hau nia maluk sarani sira ida-ida iha nebaa.
JUD 1:1 Surat nee husi hau, Judas. Hau Jesus Kristu nia atan ho Tiago nia alin. Hau hakerek surat nee ba imi nebee Maromak bolu tiha ona atu sai Nia ema. Aman Maromak hadomi imi i Jesus Kristu sempre kuidadu imi.
JUD 1:2 Hau harohan atu Maromak loron ba loron hatudu Nia laran luak ho domin ba imi, i foo pas ho hakmatek ida nebee boot teb-tebes ba imi.
JUD 1:3 Maluk doben sira, tuir lo-loos hau hakarak teb-tebes hakerek ba imi kona ba salvasaun nebee mak ita hotu-hotu hetan. Maibee agora hau senti katak, hau tenki hakerek fali buat seluk hodi foo hanoin ba imi atu defende lia loos nebee Maromak foo ona ba Nia povu. Lia loos nee dura nafatin too tinan ba tinan.
JUD 1:4 Hau foo hanoin ba imi nunee tanba iha ona ema balu tama sub-subar iha imi nia leet. Sira nee la interese Maromak, i fila lia tuun-sae kona ba Nia laran diak. Sira dehan, tanba Maromak nee laran diak, entaun ita bele halo sala saida deit konformi ita nia hakarak. Sira mos nega Jesus Kristu. Afinal Nia mak ita nia Liurai ho ita nia Nai. Iha Livru Sagradu hakerek nanis ona kona ba kastigu nebee mak sira sei hetan.
JUD 1:5 Imi hatene ona istoria nebee mak hau atu koalia, maibee hau hakarak foo hanoin fila fali ba imi. Uluk Nai Maromak lori povu Israel sai husi rai Ejitu. Maski Nia salva sira, maibee too ikus Nia halo rahun tiha sira nebee mak la fiar ba Nia.
JUD 1:6 Nunee mos anju nebee husik tiha sira nia knaar ho sira nia hela fatin. Maromak kesi metin sira ho korenti iha fatin nakukun laran hodi hein loron nebee Maromak tesi ema hotu-hotu nia lia.
JUD 1:7 I keta haluha povu sidade Sodoma ho Gomora, ho aldeia sira seluk nebee besik. Sira gosta halo sala seksual ho sala foer oi-oin deit. Too ikus Maromak kastigu sira iha ahi nebee nunka mate. Nee sai ezemplu ida hodi foo hanoin mai ita hotu.
JUD 1:8 Nunee mos ho ema aat sira nebee tama iha imi nia leet nee. Sira halo sala hodi hafoer sira nia aan rasik, i dehan mehi mak foo sai ba sira para halo nunee. Sira lakohi rona see-see deit mak kaer ukun iha lalehan ka iha rai, too hatete aat Maromak nia anju sira.
JUD 1:9 Maibee anju sira nia boot Miguel rasik la brani halo hanesan nee. Bainhira Moisés foin mate, Miguel haksesuk malu ho Satanás kona ba see mak atu hetan Moisés nia mate isin. Iha tempu nebaa Miguel la brani foo sala ba Satanás hodi koalia aat nia. Miguel so dehan deit, “Nai Maromak sei kastigu o.”
JUD 1:10 Maibee ema sira nee gosta hatete aat buat nebee mak sira la kompriende. Sira so hatene sira nia hakarak deit, hanesan fali animal nebee la iha neon. I hahalok nee mak halo rahun sira.
JUD 1:11 Sira sei terus! Tanba sira tuir Kaín nia dalan. Sira hakarak teb-tebes hetan osan, too monu ba sala hanesan Balaão. I sira hanesan Koré, too ikus rahun tanba kontra nai ulun sira.
JUD 1:12 Bainhira imi sarani sira halibur malu hodi haan-hemu hamutuk, ema sira nee mos haan hamutuk ho imi, maibee sira kaan-teen i la hatene moe. Nunee sira hanesan bibi atan nebee foo haan deit nia aan, i hanesan buat foer ida iha imi nia klaran. Sira hanesan kalohan nebee anin huu, maibee udan la tau. Sira hanesan ai nebee la foo fuan, maski too ona nia tempu. Ikus mai ai nee mate tiha tanba toos nain fokit nia huun too nia abut sai hotu.
JUD 1:13 Sira hatudu hahalok nebee halo moe deit ita, hanesan laloran boot nebee mak baku hasai nia furin iha bee leten. Sira hanesan fitun nebee lao la tuir dalan. Maromak prepara tiha ona fatin ida nakukun liu ba sira, para sira hela iha nebaa too tinan ba tinan.
JUD 1:14 Enoke foo sai hori uluk kedas kona ba ema hanesan nee. Se ita sura Adão nia jerasaun, Enoke tama ba jerasaun hitu. Nia dehan nunee: “Haree ba! Ita nia Nai mai ho Nia anju santu rihun ba rihun.
JUD 1:15 Nia mai atu tesi ema hotu-hotu nia lia. Nia sei kastigu ema sira nebee mak la interese Maromak, tanba sala hotu-hotu nebee ema aat sira nee halo hasoru Maromak, ho liafuan aat hotu-hotu nebee sira koalia kontra Nia.”
JUD 1:16 Ema sira nee so hatene murmura i foo sala ba ema seluk. Sira moris tuir deit sira nia hakarak aat rasik. Sira gaba aan, i kos-kose ema seluk para halo tuir sira nia hakarak.
JUD 1:17 Maibee maluk doben sira, la bele haluha liafuan nebee ita nia Nai Jesus Kristu nia apostolu sira foo sai tiha ona ba imi.
JUD 1:18 Sira foo sai katak, bainhira mundu nee besik remata ona, ema balu sei gosta goza Maromak nia povu, i moris tuir deit sira nia hakarak aat.
JUD 1:19 Agora ema sira nee iha tiha ona. Sira nee halo imi fahe malu. Sira nia hakarak aat domina tiha ona sira. I sira la iha Maromak nia Espiritu.
JUD 1:20 Maibee maluk doben sira, hakaas aan atu hametin liu tan imi nia fiar ba Jesus Kristu, tanba imi nia fiar nee santu. Halo orasaun ho Espiritu Santu nia tulun.
JUD 1:21 Imi hein hela ita nia Nai Jesus Kristu atu hatudu Nia laran luak ba imi hodi lori imi ba moris rohan-laek. Durante imi hein, keta husik Maromak nia domin.
JUD 1:22 Imi tenki hadomi ema sira nebee mak fiar la metin,
JUD 1:23 i dada sai ema seluk husi ahi laran para salva sira. Iha tan ema seluk mak imi tenki hadomi, maibee kuidadu. Maski imi hanoin sira, maibee imi mos tenki hakribi sira nia sala, too hakribi mos sira nia hena nebee foer tanba sira nia hahalok aat nee.
JUD 1:24 Mai ita hahii Maromak! Nia mak iha kbiit hodi kuidadu imi para imi la bele monu. Maromak Kbiit Nain mak bele halo imi livre husi sala hodi lori imi ba iha Nia futar oin ho haksolok teb-tebes.
JUD 1:25 So Nia mesak deit mak Maromak, Nia mak ita nia Salvador. Mai ita hotu-hotu hahii adora Nia liu husi ita nia Nai Jesus Kristu. Maromak nee boot teb-tebes, kbiit hotu-hotu Ninian, Nia mak kaer ukun, molok mundu nee iha, agora, i too tinan ba tinan nafatin. Amen.
REV 1:1 Iha livru nee hakerek kona ba buat nebee mak la kleur tan sei akontese. Maromak foo hatene ona buat sira nee ba Jesus Kristu atu nunee Jesus bele foo sai ba Nia atan sira. Depois Jesus Kristu haruka Nia anju ida mai hatudu sai ba Nia atan hau João.
REV 1:2 Hau haree ho matan rasik. Nunee agora hau konta Maromak nia liafuan nebee Jesus Kristu hatudu sai mai hau.
REV 1:3 See mak lee sai Maromak nia liafuan nebee hakerek iha livru nee, nia hetan bensaun. I see mak rona hodi halo tuir, nia mos hetan bensaun. Tanba buat sira nee besik atu akontese ona.
REV 1:4 Hau, João hakerek buat sira nee ba maluk sarani sira husi sidade hitu iha provinsia Ázia. Hau harohan atu Maromak, Espiritu Santu ho mos Jesus Kristu hatudu Sira nia laran diak ba imi i foo pas ho hakmatek ba imi. Maromak iha hori uluk kedas, agora iha, i iha nafatin too tinan ba tinan. Espiritu Santu nee hatudu Aan mai hau hanesan espiritu hitu nebee iha hela Maromak nia kadeira ukun nia oin. I Jesus Kristu sempre foo sasin nebee loos. Nia mak ema primeiru nebee moris fali husi mate, i Nia mak ukun liurai hotu-hotu iha mundu nee. Jesus hadomi ita, nee mak Nia raan fakar too mate para ita bele livre husi sala.
REV 1:6 Nia foti ona ita sai Nia reinu. Nia mos foti ita sai nai lulik para serbi Nia Aman Maromak. Nunee mai ita hahii adora Jesus Kristu, tanba Nia mak iha kbiit hodi ukun tinan ba tinan. Amen, loos duni!
REV 1:7 Haree ba! Jesus sei tuun mai husi lalehan iha kalohan laran, i ema hotu-hotu sei haree Nia, too ema nebee mak uluk sona Nia, sira mos sei haree. Ema husi nasaun hotu-hotu iha mundu nee sei tanis tanba Nia. Buat nee sei sai nunee duni. Amen.
REV 1:8 Nai Maromak dehan, “Hau mak primeiru ho ikus. Hau iha hori uluk kedas, agora iha, i iha nafatin too tinan ba tinan. Hau mak Kbiit Nain.”
REV 1:9 Hau João, imi nia maun. Ita hotu hetan susar ho terus tanba ita hakruuk ba Jesus nudar Liurai, maibee ita aguenta ho pasiensia nafatin tanba ita laran ida ho Jesus. Hau dadur hela iha rai oan Patmos tanba hau foo sai Maromak nia liafuan i foo sasin kona ba Jesus.
REV 1:10 Iha loron Domingu ida, Maromak nia Espiritu domina hau i hau rona lian makaas hanesan korneta lian iha hau nia kotuk.
REV 1:11 Lian nee dehan nunee: “Buat nebee mak o haree, o tenki hakerek iha livru lulun ida, depois haruka ba sarani sira iha sidade hitu tuir mai nee: Éfezu, Esmirna, Pérgamu, Tiatira, Sardis, Filadélfia ho Laodiseia.”
REV 1:12 Hau hateke ba kotuk atu haree see mak koalia mai hau nee. I hau haree fali ahi-oan riin hitu halo ho osan mean.
REV 1:13 Ema ida hamriik hela iha ahi-oan riin hitu nee nia klaran. Nia hanesan Ida nebee ema baibain temi Ema Umanu nia Oan. Nia hatais batina naruk too iha ain tutun. Iha nia hirus matan kesi hena naruk ida enfeita ho osan mean.
REV 1:14 Nia fuuk mutin teb-tebes. Nia matan hanesan fali ahi nebee mak lakan makaas.
REV 1:15 Nia ain lakan hanesan riti nebee mak ema tau ba ahi. Nia lian tarutu makaas hanesan mota tuun.
REV 1:16 Nia liman loos kaer hela fitun hitu, i surik ida oin-kotuk kroat hotu sai husi Nia ibun. Nia oin nabilan hanesan loro matan iha loron manas boot.
REV 1:17 Bainhira hau haree Nia, hau monu kedas iha Nia oin hanesan ema mate. Maibee Nia tau Nia liman loos ba hau hodi dehan, “Keta tauk. Hau mak huun ho rohan.
REV 1:18 Hau mak Moris Nain. Uluk Hau mate, maibee agora, haree ba, Hau moris tinan ba tinan. I Hau mak kaer xavi hodi loke odamatan ba matebian sira nia fatin, Hau mak iha kbiit hodi halo moris fali ema mate.
REV 1:19 Entaun o tenki hakerek buat hotu-hotu nebee o haree nee, kona ba buat nebee akontese agora dadauk ho mos buat nebee aban-bainrua sei mosu.
REV 1:20 Ohin o haree fitun hitu iha Hau nia liman loos, ho ahi-oan riin osan mean hitu. Nia signifikadu mak nee: Ahi-oan riin sira nee mak sarani sira iha sidade hitu. I fitun hitu nee mak anju hitu nebee tau matan ba sira.”
REV 2:1 Ida nebee koalia mai hau hatete, “Hakerek hanesan nee ba sarani sira iha sidade Éfezu: ‘Hau mak kaer fitun hitu iha Hau nia liman loos, i Hau lao haleu ahi-oan riin osan mean hitu nee. Hau nia lia menon mak nee:
REV 2:2 Hau hatene buat hotu-hotu nebee imi halo: Hau hatene imi servisu makaas hodi serbi Maromak, i imi aguenta ho pasiensia iha terus nia laran. Hau mos hatene imi la simu ema aat iha imi nia leet. Se iha ema ruma mai lohi imi dehan, sira nee Hau nia apostolu, imi sempre koko sira i deskobre katak sira bosok.
REV 2:3 Ema halo terus imi tanba imi fiar mai Hau, maibee imi aguenta nafatin, i la hakiduk.
REV 2:4 Maibee iha buat ida mak Hau la simu: Imi la hatudu tan imi nia domin mai Hau hanesan uluk.
REV 2:5 Imi monu aat liu ona! Agora, hanoin fila fali imi nia domin uluk. Hakribi tiha imi nia sala nee hodi moris fali tuir imi nia hahalok uluk nian. Se lae, Hau sei mai hasai imi nia ahi-oan riin.
REV 2:6 Maski nunee imi halo buat diak ida: Imi la simu Nicolau nia ema sira nia hahalok, Hau mos la simu.
REV 2:7 Imi nebee iha tilun, rona di-diak saida mak Maromak nia Espiritu hatete ba sarani sira. Ema nebee manaan, aban-bainrua Hau sei foo direitu ba nia para bele haan ai fuan nebee mak lori nia ba moris rohan-laek. Ai fuan nee nia huun moris iha Maromak nia toos.’ ”
REV 2:8 Depois Ida nebee koalia mai hau hatete, “Hakerek hanesan nee ba sarani sira iha sidade Esmirna: ‘Hau mak huun ho rohan. Uluk Hau mate maibee agora Hau moris fali ona. Hau nia lia menon mak nee:
REV 2:9 Hau hatene imi moris iha terus ho kiak nia laran. Maski nunee iha Maromak nia oin imi riku. Hau hatene ema balu hatete aat imi. Sira deklara sira nia aan dehan sira Maromak nia ema, afinal lae. Sira la hakruuk ba Maromak maibee hakruuk fali ba Satanás.
REV 2:10 Maski nunee imi lalika tauk kona ba terus nebee mak la kleur tan imi sei hetan. Hau hatete ba imi, Satanás sei halo imi balu baa dadur iha kadeia para koko imi, i imi sei hetan terus too loron sanulu. Ema atu oho imi mos, imi tenki tuir nafatin Hau. Se imi halo nunee, Hau sei foo premiu moris rohan-laek nian ba imi.
REV 2:11 Imi nebee iha tilun, rona di-diak saida mak Maromak nia Espiritu hatete ba sarani sira. See mak manaan, aban-bainrua nia sei la mate ba dala rua.’ ”
REV 2:12 Depois Ida nebee koalia mai hau hatete, “Hakerek hanesan nee ba sarani sira iha sidade Pérgamu: ‘Hau mak kaer surik oin-kotuk kroat hotu. Hau nia lia menon mak nee:
REV 2:13 Hau hatene imi nia hela fatin nee, Satanás mak hela iha nebaa hodi ukun. Maski nunee imi kaer metin nafatin Hau nia naran. Iha imi nia sidade nee mos, ema oho tiha Antipas, ema ida nebee sempre foo sasin lo-loos kona ba Hau. Sira oho tiha nia mos, imi la husik imi nia fiar mai Hau.
REV 2:14 Maibee iha buat balu mak Hau la simu: Imi balu tuir fali Balaão nia hanorin. Uluk Balaão hanorin ema ida naran Balak para lohi ema Israel monu ba sala. Nunee sira haan fali hahaan nebee mak ema foo haan tiha ba estatua lulik, i sira halo sala seksual.
REV 2:15 Imi balu mos tuir doutrina falsu nebee Nicolau nia ema sira hanorin.
REV 2:16 Hakribi ona imi nia sala nee! Se lae, la kleur tan Hau baa lori surik nebee mak iha Hau nia ibun laran nee hodi halo funu hasoru imi.
REV 2:17 Imi nebee iha tilun, rona di-diak saida mak Maromak nia Espiritu hatete ba sarani sira. See mak manaan, aban-bainrua Hau sei foo paun manaa, paun nee agora sei subar hela. Hau mos sei foo fatuk mutin ba sira ida-ida. Iha fatuk nee hakerek naran foun, naran nee ema seluk sei la hatene, so ema nebee simu fatuk nee mak hatene.’ ”
REV 2:18 Depois Ida nebee koalia mai hau hatete, “Hakerek hanesan nee ba sarani sira iha sidade Tiatira: ‘Hau Maromak nia Oan. Hau nia matan hanesan ahi lakan, i Hau nia ain lakan hanesan riti nebee mak ema sunu ba ahi. Hau nia lia menon mak nee:
REV 2:19 Hau hatene buat hotu-hotu nebee imi halo: Imi hadomi imi nia maluk, i fiar metin mai Hau. Imi serbi ema seluk i aguenta ho pasiensia iha terus laran. Hau mos hatene, agora imi halao Hau nia servisu ho badinas liu fali uluk.
REV 2:20 Maibee iha buat ida mak hau la simu: Imi husik deit feto Jezabel hanorin sala. Nia foti aan dehan nia Maromak nia profeta ida. Maibee nia hanorin sarani sira lao sala dalan, too sira mos halo sala seksual i haan fali hahaan nebee mak ema foo haan tiha ona ba estatua lulik.
REV 2:21 Hau foo ona tempu ba Jezabel atu hakribi nia sala nee, maibee nia lakohi.
REV 2:22 Nunee Hau sei riba tuun nia iha nia toba fatin halo nia terus iha nebaa. Ema nebee halo sala seksual ho nia mos, se sira la hakribi sira nia sala nee, Hau sei foo terus todan ba sira.
REV 2:23 Sira nebee tuir Jezabel hanesan fali oan halo tuir nia inan, Hau sei oho sira. Nunee sarani sira iha nebee-nebee deit sei hatene katak, Hau konhese mo-moos ema nia neon ho laran i Hau foo todan ba ema ida-ida tuir nia hahalok.
REV 2:24 Maibee imi balu iha Tiatira la tuir feto nee nia hanorin aat. Maski ema balu dehan nia hanorin “Satanás nia segredu boot” mos, imi lakohi rona. Ba imi sira nee, Hau la foo tan todan,
REV 2:25 naran katak imi kaer metin nafatin imi nia fiar too Hau fila fali mai.
REV 2:26 Ema nebee manaan hodi halo tuir nafatin Hau nia hakarak too rohan, Hau sei foo ba sira kbiit nebee mak Hau hetan husi Hau nia Aman. Hau foo kbiit ba sira para ukun nasaun sira nebee kontra Maromak. Sira sei ukun ho rota nebee mak halo ho besi, i hodi rota nee sira sei halo rahun tiha povu hanesan fali ema halo rahun sanan rai.
REV 2:28 Ba ema nebee halo tuir nafatin Hau nia hakarak too rohan, Hau sei foo tan fitun dadeer nian.
REV 2:29 Imi nebee iha tilun, rona di-diak saida mak Maromak nia Espiritu hatete ba sarani sira.’”
REV 3:1 Depois Ida nebee koalia mai hau hatete, “Hakerek hanesan nee ba sarani sira iha sidade Sardis: ‘Hau mak kaer Maromak nia espiritu hitu, i kaer fitun hitu. Hau nia lia menon mak nee:
REV 3:2 Hau hatene buat hotu-hotu nebee imi halo: Ema dehan imi sei moris hela maibee imi hanesan ema nebee mate tiha ona. Hadeer ona! Imi nia fiar besik atu mohu, entaun hametin ona ba. Tanba Hau haree imi nia hahalok, la iha ida mak tuir lo-loos Maromak nia hakarak.
REV 3:3 Tanba nee, hanoin fila fali hanorin nebee mak uluk imi rona i simu. Imi tenki halo tuir hanorin nee, i hakribi imi nia sala. Se imi dukur nafatin, Hau sei mai derepenti deit hanesan naok-teen, imi sei la hatene bainhira loos mak Hau mai.
REV 3:4 Maibee husi imi iha Sardis, iha balu mak laran moos nafatin, hanesan ema nebee la halo foer nia hena. Sira nee sei lao hamutuk ho Hau, hatais hena mutin, tanba sira serve duni.
REV 3:5 See mak manaan, nia mos sei hatais hena mutin hotu. Hau sei la hasai nia naran husi lista ema moris rohan-laek nian. I aban-bainrua iha Hau nia Aman nia oin ho mos anju sira nia oin, Hau sei foo sai katak, nia nee Hau nia ema.
REV 3:6 Imi nebee iha tilun, rona di-diak saida mak Maromak nia Espiritu hatete ba sarani sira.’ ”
REV 3:7 Depois Ida nebee koalia mai hau hatete, “Hakerek hanesan nee ba sarani sira iha sidade Filadélfia: ‘Hau mak santu i loos. Hau mak kaer xavi liurai David nian. Kuandu Hau loke odamatan, la iha ema ida mak bele taka fali. I kuandu hau taka odamatan, la iha ema ida mak bele loke. Hau nia lia menon mak nee:
REV 3:8 Hau hatene buat hotu-hotu nebee imi halo. Imi nia kbiit la too. Maibee imi tuir nafatin Hau nia liafuan, i la nega Hau. Haree ba! Hau loke tiha ona odamatan ba imi, i la iha ema ida mak bele taka fali.
REV 3:9 Iha ema balu dehan sira Maromak nia ema, maibee sira bosok, sira la hakruuk ba Maromak maibee hakruuk fali ba Satanás. Aban-bainrua Hau sei halo sira monu ain ba imi, i sira sei rekonhese katak Hau hadomi imi.
REV 3:10 Hau uluk haruka imi aguenta ho pasiensia iha terus nia laran, i imi halo tuir duni Hau nia liafuan nee. Tanba nee, aban-bainrua Hau sei kuidadu di-diak imi iha tempu susar ho terus nebee mak sei mai iha mundu tomak. Maromak sei uza susar ho terus nee hodi koko ema hotu-hotu iha mundu.
REV 3:11 Hau besik atu mai ona. Nee duni kaer metin buat nebee mak imi iha tiha ona para ema seluk la bele hadau fali premiu nebee mak prepara tiha ona ba imi.
REV 3:12 See mak manaan, Hau sei halo nia sai hanesan ai riin boot iha Hau nia Maromak nia uma kreda boot, i nia sei hela metin iha nebaa too tinan ba tinan. Hau sei hakerek Hau nia Maromak nia naran iha ema nee nia isin lolon, ho mos Jerusalém foun nia naran. Jerusalém foun nee Maromak nia sidade, i aban-bainrua sidade nee sei tuun husi lalehan, husi Hau nia Maromak. Hau mos sei hakerek Hau nia naran foun iha ema nee nia isin lolon.
REV 3:13 Imi nebee iha tilun, rona di-diak saida mak Maromak nia Espiritu hatete ba sarani sira.’ ”
REV 3:14 Depois Ida nebee koalia mai hau hatete, “Hakerek hanesan nee ba sarani sira iha sidade Laodiseia: ‘Hau mak Ida nebee ema bolu “Amen, loos duni”. Hau sempre foo sasin lo-loos. Hau mak huun ba lalehan ho rai ho buat hotu-hotu nebee Maromak halo. Hau nia lia menon mak nee:
REV 3:15 Hau hatene buat hotu-hotu nebee imi halo: Imi manas mos lae, malirin mos lae. Hau hakarak para imi manas karik, manas liu, malirin karik, malirin liu ba!
REV 3:16 Maibee imi hanesan bee morna deit, la manas, la malirin. Nunee mak Hau atu tafui sai imi husi Hau nia ibun.
REV 3:17 Imi dehan imi riku ona, moris diak ona, la presiza tan buat seluk. Maibee imi la hatene katak, imi hanesan fali ema nebee susar liu, moris la diak, kiak rabat rai, matan delek, i isin molik.
REV 3:18 Nunee diak liu imi sosa osan mean diak nian husi Hau para imi sai riku. Imi sosa hena mutin husi Hau hodi bele taka imi nia isin molik para imi la bele moe tan. I sosa aimoruk husi Hau hodi kose ba imi nia matan delek sira nee para bele haree fali.
REV 3:19 Ema nebee Hau hadomi, sira nee mak Hau koriji i Hau kastigu. Entaun imi tenki badinas hodi hakribi imi nia sala.
REV 3:20 Haree ba! Hau hamriik hela iha odamatan oin hodi dere odamatan. Ema nebee mak rona Hau nia lian hodi loke odamatan mai Hau, Hau sei tama ba laran i ami sei haan hamutuk.
REV 3:21 See mak manaan, Hau sei foo direitu ba nia para tuur ukun hamutuk ho Hau, hanesan mos Hau manaan tiha ona, i agora Hau tuur ukun hamutuk ho Hau nia Aman.
REV 3:22 Imi nebee iha tilun, rona di-diak saida mak Maromak nia Espiritu hatete ba sarani sira.’ ”
REV 4:1 Hotu tiha, hau haree tan buat seluk. Hau haree iha lalehan, odamatan ida nakloke hela. I hau rona fali lian ida nebee mak uluk hau rona, lian nee hanesan korneta lian. Agora lian nee hatete mai hau dehan, “Sae mai, Hau sei hatudu ba o saida mak sei akontese aban-bainrua.”
REV 4:2 Iha momentu nee kedas Maromak nia Espiritu domina hau. Derepenti deit hau haree kadeira ukun ida iha lalehan, i Ema ida tuur hela iha kadeira nee.
REV 4:3 Ema nee nabilan hanesan fatuk murak jaspe ho sardoniu. Iha arkuiris ida haleu hela kadeira ukun nee. Arkuiris nee nabilan hanesan fatuk murak esmeralda.
REV 4:4 Iha mos kadeira ukun rua-nulu resin haat mak haleu kadeira ukun nee, i katuas lia nain rua-nulu resin haat tuur hela iha kadeira sira nee. Sira hotu hatais hena mutin, sira nia ulun tau koroa liurai nian halo ho osan mean.
REV 4:5 Rai lakan ho rai tarutu makaas sai husi kadeira ukun nebee mak iha klaran nee. Iha mos ahi-oan hitu lakan hela iha kadeira ukun nee nia oin, ahi-oan nee mak Maromak nia espiritu hitu.
REV 4:6 Iha kadeira ukun nia oin iha mos buat ida hanesan tasi maibee moos loos hanesan vidru. Iha animal moris haat haleu hela kadeira ukun nee. Animal sira nee nia oin-kotuk matan nakonu.
REV 4:7 Animal primeiru hanesan liaun. Ida tuir mai hanesan karau aman. Ida seluk, nia oin hanesan ema nia oin. Ida ikus liu hanesan manu makikit ida nebee semo hela.
REV 4:8 Animal moris haat nee ida-idak iha liras neen. Matan nakonu iha sira nia isin tomak, too sira nia liras parte liur-laran matan nakonu hotu. Loron-kalan animal haat nee hananu la para dehan, “Santu, santu, Nai Maromak mak santu. Nia mak Kbiit Nain. Nia iha hori uluk kedas, agora iha, i iha nafatin too tinan ba tinan.”
REV 4:9 Animal moris sira nee hananu hodi hahii Ida nebee mak tuur iha kadeira ukun, Nia moris tinan ba tinan nafatin. Sira foti aas Nia naran hodi foo agradese ba Nia. Bainhira animal sira nee hananu,
REV 4:10 katuas lia nain rua-nulu resin haat nee hakneak hakruuk too rai iha kadeira ukun nee nia oin. Sira adora Ida nebee tuur iha kadeira ukun nee, Nia moris too tinan ba tinan. Sira mos hasai sira nia koroa liurai nian i tau iha kadeira ukun nia oin hodi hahii Nia dehan,
REV 4:11 “Maromak ami nia Nai, Ita Boot mak serve atu ema hotu-hotu hahii foti aas Ita Boot nia naran. Tanba Ita Boot mak forsa teb-tebes, Ita Boot mak halo buat hotu-hotu; buat sira nee hotu iha tanba Ita Boot mak hakarak.”
REV 5:1 Depois hau haree Ida nebee mak tuur iha kadeira ukun nee kaer hela livru lulun ida iha Nia liman loos. Livru lulun nee nia liur-laran hakerek nakonu hotu, i taka metin tiha ho lilin been iha fatin hitu, tau mos karimbu tuir lilin been fatin hitu nee ida-idak.
REV 5:2 I hau haree anju forti ida husu ho lian makaas dehan, “See mak serve atu loke karimbu fatin iha livru lulun nee hodi loke livru nee?”
REV 5:3 Maibee la iha ema ida iha lalehan ka iha rai ka iha rai okos mak bele loke livru nee para bele haree saida mak hakerek iha livru laran.
REV 5:4 Haree nunee, hau tanis tristi loos tanba la iha ema ida mak serve atu loke livru lulun nee para bele haree saida mak hakerek iha laran.
REV 5:5 Depois ema ida husi katuas lia nain rua-nulu resin haat nee dehan mai hau, “Keta tanis. Haree ba! Liurai David nia Jerasaun ida nebee makaas teb-tebes, ema bolu Nia ‘Liaun husi suku Judá’, Nia manaan tiha ona. Nunee Nia bele loke karimbu fatin hitu hodi loke livru nee.”
REV 5:6 Depois hau haree Bibi Oan ida hamriik hela iha klaran besik kadeira ukun. I animal moris haat ho katuas lia nain rua-nulu resin haat nee, sira hotu haleu kadeira ukun. Bibi Oan nee, hau haree, iha fitar iha Nia isin, hatudu katak uluk ema oho tiha ona. Nia iha dikur hitu ho matan hitu. Matan hitu nee nia signifikadu mak Maromak nia espiritu hitu nebee mak Nia haruka ona ba iha mundu tomak.
REV 5:7 Bibi Oan nee baa iha Ida nebee mak tuur iha kadeira ukun hodi simu livru lulun nee husi Nia liman loos.
REV 5:8 Bainhira Bibi Oan simu livru nee, animal moris haat ho katuas lia nain rua-nulu resin haat nee hakneak i hakruuk too rai iha Nia oin. Sira ida-idak kaer buat ida hanesan viola, i kaer mos manko osan mean ida, ai been morin nakonu iha laran. Ai been morin nee mak Maromak nia povu sira nia orasaun.
REV 5:9 Sira hotu hananu kantiku foun ida hanesan nee: “Ita Boot mak serve simu livru lulun nee hodi loke nia karimbu fatin, tanba ema oho tiha ona Ita Boot. Hodi Ita Boot nia raan, Ita Boot sosa kotu ona ema husi suku, lian, povu ho nasaun hotu-hotu para sai Maromak nia ema.
REV 5:10 Ita Boot foti sira sai Maromak nia reinu, i hili sira sai nai lulik para serbi ita nia Maromak. I sira sei kaer ukun iha mundu.”
REV 5:11 Depois hau haree tan, iha anju rihun ba rihun, tokon ba tokon. Sira haleu hela kadeira ukun ho mos animal moris haat ho katuas lia nain sira. Hau rona
REV 5:12 anju sira nee hananu ho lian makaas dehan, “Bibi Oan nebee mak ema oho tiha ona nee, Nia mak serve atu ema hotu-hotu respeita, hahii, i foti aas Nia naran. Tanba Nia kbiit boot liu, Nia riku teb-tebes, Nia matenek klean liu, Nia forsa teb-tebes!”
REV 5:13 Tuir mai, hau rona tan kriatura hotu-hotu iha lalehan, iha rai, iha rai okos ho mos iha tasi laran, sira hotu hananu hamutuk dehan, “Ida nebee mak tuur iha kadeira ukun ho mos Bibi Oan, Sira nee mak ami hahii, respeita i foti aas too tinan ba tinan. Sira nia kbiit la hotu la remata.”
REV 5:14 Depois animal haat nee hataan, “Amen, loos duni!” I katuas lia nain rua-nulu resin haat hakneak i hakruuk too rai hodi adora Ida nebee tuur iha kadeira ukun ho mos Bibi Oan.
REV 6:1 Hotu tiha hau haree Bibi Oan loke karimbu fatin primeiru husi karimbu fatin hitu nebee mak tau iha livru lulun nee. Depois hau rona animal ida husi animal moris haat nee hatete ho lian makaas hanesan rai tarutu dehan, “Mai ona!”
REV 6:2 Derepenti hau haree kuda mutin ida, ema ida sae kuda nee haree ba hanesan funu nain ida. Nia kaer hela rama, i agora nia simu tan koroa liurai nian. Depois nia baa atu halo tan funu halakon nia inimigu sira.
REV 6:3 Depois Bibi Oan loke karimbu fatin numeru rua. I hau rona animal moris segundu hatete, “Mai ona!”
REV 6:4 Kuda mean lakan ida mos sai mai. Ema nebee mak sae hela kuda nee, nia simu kbiit atu lori funu ba iha mundu para halo ema oho malu. Nia mos simu surik boot ida.
REV 6:5 Depois Bibi Oan loke karimbu fatin numeru tolu. I hau rona animal moris numeru tolu hatete, “Mai ona!” Hau haree kuda metan ida, ema ida sae kuda nee kaer hela dasin ida atu tetu ai haan.
REV 6:6 Depois hau rona buat ida hanesan ema nia lian sai husi animal haat nee nia klaran dehan, “La kleur tan, rai sei hamlaha boot. Osan nebee ema manaan iha loron ida, sei too deit para sosa trigu kilu tolu. Se trigu diak nian, hetan deit kilu ida. Maibee keta estraga ai oliveira ho ai uvas.”
REV 6:7 Depois Bibi Oan loke karimbu fatin numeru haat. I hau rona animal moris numeru haat hatete, “Mai ona.”
REV 6:8 Hau haree tan kuda ida kor kamutis. Ema nebee mak sae kuda nee, nia naran “Mate”. Iha ema ida tan naran “Matebian sira nia Fatin” lao tu-tuir nia. Sira nain rua simu kbiit atu baa oho ema lubun ida iha mundu, uza surik, ho rai hamlaha, ho moras, ho mos animal siak. Se ita fahe ema hotu-hotu iha mundu ba parte haat, parte ida sei mate hotu.
REV 6:9 Depois Bibi Oan loke karimbu fatin numeru lima. I hau haree ema sira nebee uluk ema oho, sira nia klamar iha meza sakrifisiu nia okos. Sira nee ema oho tanba sira kaer metin Maromak nia liafuan hodi foo sai ba ema seluk.
REV 6:10 Sira koalia ho lian makaas dehan, “Nai Maromak Kbiit Nain, Ita Boot mak santu i loos. Bainhira loos mak Ita Boot tesi lia ba ema iha mundu hodi kastigu ema sira nebee mak uluk oho ami?”
REV 6:11 Depois sira ida-idak simu batina mutin naruk. Sira mos simu orden atu hein tan uitoan, too sira nia numeru kompletu. Tanba husi sira nia maluk sarani sira nebee sei serbi Kristu iha mundu, iha balu mak ema sei oho tan, hanesan mos sira uluk.
REV 6:12 Depois hau haree Bibi Oan loke tan karimbu fatin numeru neen. Derepenti rai nakdoko makaas. Loro matan sai nakukun hanesan hena metan, fulan sai mean hanesan raan.
REV 6:13 Fitun sira namtate tuun ba rai, hanesan fali ai fuan figeira matak mak namtate ba rai bainhira anin huu makaas.
REV 6:14 Hau haree lalehan lulun aan too lakon tiha, hanesan fali ema lulun surat tahan. Foho ho ilha mos hotu-hotu muda tiha husi sira nia fatin.
REV 6:15 Haree nunee, liurai sira iha mundu, nai ulun sira, komandante militar, ema riku, ema boot too ema baibain ho atan, sira hotu-hotu halai ba iha foho hodi subar iha fatuk kuak ka subar iha fatuk leet.
REV 6:16 Sira halerik ba foho ho fatuk boot sira dehan, “Monu taka tiha ami ba! Subar ami para Nia nebee tuur iha kadeira ukun la bele haree ami, i Bibi Oan la bele kastigu ami.
REV 6:17 Tanba loron kastigu too ona. Agora Sira fakar Sira nia hirus mai ami, too la iha ema ida mak bele aguenta!”
REV 7:1 Hotu tiha, hau haree anju haat hamriik hela iha mundu nia lidun haat hodi satan netik anin para la bele huu ba rai maran ho tasi. Ai huun ida mos anin la kona.
REV 7:2 Anju haat nee simu ona kbiit atu estraga rai ho tasi. Depois hau haree anju ida seluk mai husi lorosae lori hela karimbu husi Maromak Moris. Anju nee koalia ho lian makaas ba anju haat nee
REV 7:3 dehan, “Hein lai! Ami sei tau marka iha ita nia Maromak nia atan sira nia reen toos lai. Marka hotu mak imi foin bele estraga rai maran ho tasi ho mos ai huun sira hotu.”
REV 7:4 Depois hau rona dehan, ema nebee simu marka nee, hamutuk rihun atus ida haat-nulu resin haat. Sira husi suku Israel hotu mak hanesan tuir mai nee:
REV 7:5 Husi suku Judá, ema rihun sanulu resin rua. Suku Ruben, ema rihun sanulu resin rua. Suku Gade, ema rihun sanulu resin rua.
REV 7:6 Suku Asér, ema rihun sanulu resin rua. Suku Naftali, ema rihun sanulu resin rua. Suku Manassés, ema rihun sanulu resin rua.
REV 7:7 Suku Simeão, ema rihun sanulu resin rua. Suku Levi, ema rihun sanulu resin rua. Suku Isakar, ema rihun sanulu resin rua.
REV 7:8 Suku Zebulón, ema rihun sanulu resin rua. Suku José, ema rihun sanulu resin rua. I suku Benjamim, ema rihun sanulu resin rua.
REV 7:9 Hotu tiha, hau haree ema barak loos, too sura la bele. Ema sira nee husi nasaun, suku, povu ho lian hotu-hotu iha mundu. Sira hotu hatais batina mutin, hamriik iha kadeira ukun nia oin ho Bibi Oan nia oin. Sira kaer ramus
REV 7:10 hodi haklalak dehan, “Ita nia Maromak tuur iha kadeira ukun. Nia ho Bibi Oan mak salva ita.”
REV 7:11 Anju hotu-hotu hamriik haleu kadeira ukun nee ho katuas lia nain sira ho mos animal moris haat. Sira hotu hakneak i hakruuk too rai iha kadeira ukun nia oin hodi adora Maromak
REV 7:12 dehan, “Amen, loos duni! Ami hahii Maromak, ami foti aas Ita Boot nia naran, ami agradese Ita Boot, ami respeita Ita Boot. Ita Boot nia matenek klean liu, Ita Boot mak kbiit Nain, Ita Boot forsa teb-tebes. Ita Boot deit mak ami adora too tinan ba tinan. Amen!”
REV 7:13 Depois katuas lia nain sira nee ida mai husu hau dehan, “Sira nebee hatais batina mutin nee, see? Sira mai husi nebee?”
REV 7:14 Hau hataan, “Hau la hatene senhor. Ita Boot mak hatene.” Katuas nee hatete mai hau, “Sira nee uluk hetan terus boot tanba sira nia fiar. Sira fase tiha ona sira nia batina ho Bibi Oan nia raan, nee mak sira nia batina sai mutin.
REV 7:15 Tanba nee, sira hamriik iha Maromak nia kadeira ukun nia oin hodi serbi Nia loron-kalan iha Nia uma kreda boot. I Nia nebee tuur iha kadeira ukun nee sei hamahon sira.
REV 7:16 Sira sei la hamlaha tan, i sei la hamrook tan. Loro manas sei la halo terus tan sira, i rai manas sei la halo sira senti atu mutuk.
REV 7:17 Tanba Bibi Oan nebee mak hamriik iha klaran besik kadeira ukun nee mak sei sai sira nia Bibi Atan. Nia sei lori sira ba bee matan hodi foo hemu bee nebee foo moris rohan-laek. I Maromak sei hamaran sira nia matan been.”
REV 8:1 Hotu tiha Bibi Oan loke karimbu fatin numeru hitu. Iha lalehan tomak nonook hotu maizoumenus oras sorin balu.
REV 8:2 Depois hau haree anju hitu nebee mak baibain hamriik iha Maromak nia oin, sira ida-idak simu korneta.
REV 8:3 Iha anju seluk mai lori manko osan mean ida hamriik iha altar oin. Nia simu ai been morin barak iha nia manko atu hasae ba Maromak hamutuk ho Maromak nia povu nia orasaun. Nia sunu ai been morin nee iha altar osan mean iha kadeira ukun nia oin.
REV 8:4 I ai been morin nia suar ho povu sira nia orasaun sae hamutuk husi anju nia liman too iha Maromak nia oin.
REV 8:5 Depois anju foti manko osan mean nee hodi enxe ahi husi altar leten ba manko laran halo nakonu, i nia riba tuun ba mundu. Derepenti rai tarutu makaas iha fat-fatin, rai lakan taa ba-mai, rai mos nakdoko.
REV 8:6 Hotu tiha anju hitu nebee mak kaer hela korneta prepara aan atu huu sira nia korneta.
REV 8:7 Anju primeiru huu nia korneta. Derepenti iha udan jelu fatuk ho ahi ho raan kahur malu fakar tuun mai iha mundu. Parte ida husi parte tolu husi mundu nee, ahi haan mutuk tiha. Nunee mos duut matak ho ai huun sira, ahi haan mutuk parte ida husi parte tolu.
REV 8:8 Anju numeru rua huu nia korneta. Derepenti iha buat boot ida hanesan fali foho boot nebee lakan makaas, riba tuun ba tasi laran. Tasi parte ida husi parte tolu sai tiha raan.
REV 8:9 Nunee ikan ho animal nebee moris iha tasi laran, parte ida husi parte tolu mate. I roo nebee lao iha tasi laran mos, parte ida husi parte tolu rahun.
REV 8:10 Anju numeru tolu huu nia korneta. Derepenti fitun boot ida nebee lakan makaas hanesan ahi lakan monu tuun husi lalehan. Fitun nee nia naran “Moruk”. Nia monu tama ba mota ho bee matan, halo parte ida husi parte tolu sai moruk. Too ikus ema barak mate tanba sira hemu bee moruk nee.
REV 8:12 Anju numeru haat huu nia korneta. Derepenti hanesan buat ruma xoke loro matan, fulan ho mos fitun, halo parte ida husi parte tolu sai nakukun tiha. Nunee, se oras loron ida nian ita fahe ba tolu, entaun oras rua iha naroman, oras ida sai nakukun tiha. Kalan mos hanesan.
REV 8:13 Depois hau haree manu makikit ida semo aas, i hau rona manu nee foo sai ho lian makaas dehan. “Aii, susar! Susar! Ema hotu-hotu iha mundu sei hetan susar boot liu tanba sei iha tan anju tolu mak sei huu sira nia korneta.”
REV 9:1 Anju numeru lima huu nia korneta. Derepenti hau haree fitun ida monu tiha ona iha rai. Fitun nee simu xavi ida para loke rai kuak klean nakukun.
REV 9:2 Momentu fitun nee loke rai kuak klean nee, ahi suar makaas sai kedas hanesan suar sai husi fornu boot. Suar nee taka metin loro matan, halo rai nakukun tiha.
REV 9:3 Gafanhotu barak teb-tebes sai husi ahi suar laran tuun mai mundu. Maromak foo kbiit ba gafanhotu sira nee atu bele tata ema hanesan fali sakunar tata ema.
REV 9:4 Maibee Nia bandu sira la bele estraga duut, ai huun ho ai horis sel-seluk. Sira so bele halo terus ema nebee mak la iha Maromak nia marka iha sira nia reen toos.
REV 9:5 Gafanhotu sira nee la simu lisensa atu oho ema sira nee maibee so halo terus deit durante fulan lima. Gafanhotu nee tata ema halo moras liu, hanesan fali sakunar mak tata.
REV 9:6 Durante fulan lima nia laran, ema sira nee hakarak atu mate lalais, too sira buka dalan oi-oin, maibee la konsege mate.
REV 9:7 Gafanhotu nee nia modelu hanesan kuda nebee prontu ona atu ema sae hodi baa halo funu. Iha sira nia ulun taka buat ruma hanesan koroa liurai nian halo ho osan mean. Sira nia oin hanesan fali ema nia oin.
REV 9:8 Sira nia fuuk naruk hanesan feto nia fuuk, i sira nia nehan kroat hanesan liaun nia nehan.
REV 9:9 Sira nia hirus matan taka ho buat ida hanesan besi funu nian. Sira nia liras tarutu makaas hanesan kuda kareta lubuk ida nebee halai makaas atu baa funu.
REV 9:10 Sira nia ikun forsa teb-tebes tanba iha veneno hanesan sakunar nian. Ho sira nia ikun nee sira bele halo terus ema too fulan lima.
REV 9:11 Gafanhotu sira nia liurai mak anju ida nebee toma konta ba rai kuak klean nakukun. Nia naran ho lian Ebreu dehan, Abadon, ho lian Gregu dehan, Apólion. Naran rua nee katak, “Harahun door”.
REV 9:12 Terus boot primeiru liu ona. Maibee sei iha tan terus boot rua.
REV 9:13 Hotu tiha anju numeru neen huu nia korneta. Hau rona lian ida sai husi altar osan mean nia lidun haat, altar nee iha hela Maromak nia oin.
REV 9:14 Lian nee hatete ba anju numeru neen dehan, “Baa kore tiha anju haat nebee kesi hela besik mota boot Eufrates.”
REV 9:15 Entaun anju nee baa kore tiha sira para sira bele baa oho ema. Tanba uluk kedas Maromak desidi katak anju haat nee mak tenki baa oho ema iha oras, loron, fulan ho tinan ida nee duni. Husi ema hotu-hotu iha mundu, parte ida husi parte tolu mak sira oho.
REV 9:16 Anju haat nia tropas nebee sae kuda barak teb-tebes, hau rona dehan, sira hamutuk tokon atus rua.
REV 9:17 Hau haree tropas ho sira nia kuda hanesan nee: Tropa sira nia hirus matan taka ho besi funu kor tolu: mean lakan, azul tuan, ho kinur. Kuda sira nee nia ulun hanesan fali liaun nia ulun. Ahi lakan, ahi suar ho fatuk dois naran enxofre sai husi sira nia ibun laran.
REV 9:18 Buat tolu nebee sai husi kuda sira nia ibun nee halo ema parte ida husi parte tolu iha mundu mate.
REV 9:19 Kuda sira nee nia forsa iha sira nia ibun ho mos sira nia ikun, tanba sira nia ikun hanesan fali samea. Sira nia ikun nee mos iha nia ulun rasik, i sira uza ulun nee hodi tata halo terus ema.
REV 9:20 Maski ema barak mate iha terus boot sira nee, maibee ema nebee sei moris lakohi hakribi sira nia hahalok aat. Sira adora nafatin diabu, adora mos estatua lulik nebee halo ho osan mean, osan mutin, riti, fatuk ho ai. Maski buat sira nee la book aan, la haree, i la rona, maibee sira adora nafatin.
REV 9:21 Sira mos lakohi hakribi sira nia sala sira seluk hanesan oho ema, uza ai kulit aat, halo sala seksual ho naok.
REV 10:1 Depois hau haree anju forti ida tan tuun mai husi lalehan. Kalohan falun metin nia isin, i arkuiris ida haleu nia ulun. Nia oin nabilan loos hanesan loro matan, i nia ain lakan makaas hanesan fali ahi.
REV 10:2 Nia kaer hela livru kiikoan ida. Livru nee baibain lulun maibee agora nakloke hela. Nia hamriik ain loos sama tasi, ain karuk sama rai maran.
REV 10:3 Depois anju nee koalia ho lian makaas hanesan liaun nia lian. Nia koalia tiha hotu, rai tarutu simu malu too dala hitu hodi hataan ba nia.
REV 10:4 Rai tarutu liu tiha, hau atu hakerek liafuan nebee mak sai husi rai tarutu nee. Maibee hau rona fali lian ida husi lalehan dehan, “O la bele konta sai buat nebee mak rai tarutu hitu nee foo sai, la bele hakerek nia liafuan.”
REV 10:5 Depois anju nebee mak hamriik ain sorin sama tasi ho ain sorin sama rai maran nee foti nia liman loos ba lalehan.
REV 10:6 I nia halo juramentu hodi Maromak nia naran, tanba Maromak moris tinan ba tinan i Nia mak halo lalehan, rai, tasi ho buat hotu-hotu iha laran. Anju nee jura dehan, “Maromak sei la demora tan.
REV 10:7 Bainhira anju numeru hitu huu nia korneta, Maromak sei halao Nia planu segredu, tuir lo-loos buat nebee uluk Nia foo hatene ona ba Nia atan sira nebee serbi Nia nudar profeta.”
REV 10:8 Depois lian nebee mak hau ohin rona husi lalehan nee koalia dala ida tan mai hau dehan, “Baa iha anju nebee mak hamriik ain sorin sama tasi ho ain sorin sama rai maran nee hodi simu livru lulun nebee mak nakloke hela iha nia liman laran.”
REV 10:9 Entaun hau baa iha anju nee hodi husu livru lulun kiikoan nee. Nia dehan mai hau, “Simu ba hodi haan. Bainhira o haan livru nee, o nia ibun sei midar hanesan bani been, maibee iha o nia kabun laran sei moruk.”
REV 10:10 Hau mos foti livru lulun nee husi anju nia liman i hau haan. Loos duni, iha hau nia ibun senti midar hanesan bani been, maibee bainhira hau tolan tiha, iha hau nia kabun senti moruk.
REV 10:11 Depois hau rona orden dehan, “O tenki foo sai fali Maromak nia lia menon kona ba saida mak sei akontese ba povu sira, nasaun sira, ema husi lian oi-oin, ho liurai sira.”
REV 11:1 Depois hau simu ai sukat ida. Hau mos simu orden nunee: “O baa sukat Maromak nia uma kreda boot, sukat mos nia meza sakrifisiu, i sura ema nain hira mak adora hela Maromak iha nebaa.
REV 11:2 Maibee lalika sukat area nebee haleu uma kreda boot iha moru laran, tanba area liur nee foo tiha ona ba ema jentiu sira. Aban-bainrua sira nee sei sama hanehan Maromak nia sidade nee too fulan haat-nulu resin rua.
REV 11:3 Hau sei haruka Hau nia sasin nain rua, i sira sei hatais hena lutu hodi foo sai Hau nia lia menon durante fulan hirak nee hotu. Nee hamutuk loron rihun ida atus rua neen-nulu.”
REV 11:4 Sasin nain rua nee hanesan ai huun oliveira rua ho mos hanesan ahi-oan riin rua nebee mak hamriik iha Nai Maromak nia oin, Nia mak ukun mundu tomak.
REV 11:5 Se inimigu ruma atu halo aat sasin nain rua nee, ahi lakan sei sai husi sira nain rua nia ibun laran hodi haan mutuk tiha sira. See-see deit mak hakarak halo aat sira, sei mate hotu.
REV 11:6 Sira nain rua sei iha kbiit hodi taka kalohan para udan la bele tuun durante sira foo tutan Maromak nia liafuan. Sira mos iha kbiit para halo bee sai fali raan, ho kbiit para halo dezastre sel-seluk tan iha mundu, tuir sira nia hakarak.
REV 11:7 Bainhira sasin nain rua nee foo sai hotu tiha Maromak nia lia menon, animal siak ida sei sai husi rai kuak klean nakukun. Animal nee sei ataka sira nain rua, nia mak forti liu i oho tiha sira
REV 11:8 iha sidade boot. Fatin nee mos uluk ema oho sasin nain rua nia Nai iha krus. Ema iha sidade nee hahalok aat teb-tebes hanesan ema Sodoma ho Ejitu uluk. Depois sasin nain rua nia mate isin husik hela deit iha estrada boot.
REV 11:9 Ema husi lian, suku ho nasaun hotu-hotu mai haree mate isin rua nee durante loron tolu ho balu, i sira la hataan para ema hakoi.
REV 11:10 Ema iha mundu tomak kontenti tanba sasin nain rua nee mate tiha ona, tanba sira nain rua halo terus ema iha mundu. Nunee sira rame-rame halo festa i foo prezenti ba malu.
REV 11:11 Liu tiha loron tolu ho balu, Maromak foo fali iis ba sira nain rua, i sira hadeer hamriik fali. Ema hotu-hotu nebee haree, tauk teb-tebes.
REV 11:12 Depois sira nain rua rona lian ida husi lalehan dehan, “Sae mai iha nee!” Sira mos sae ba lalehan iha kalohan laran, iha sira nia inimigu sira nia oin.
REV 11:13 Derepenti deit rai nakdoko makaas. Nunee se ita fahe sidade nee ba parte sanulu, parte ida rahun hotu. I ema rihun hitu mate. Ema nebee mak sei moris, tauk teb-tebes, i sira hahii adora Maromak iha lalehan.
REV 11:14 Nunee terus boot numeru rua liu ona. Maibee terus boot numeru tolu besik atu mai ona.
REV 11:15 Depois anju numeru hitu huu nia korneta. I hau rona anju iha lalehan haklalak dehan, “Agora ita nia Nai Maromak ukun ona mundu tomak. Mesias, Salvador nebee Maromak foti hori uluk kedas mos ukun hamutuk ho Nia. Nia ukun la hotu la remata.”
REV 11:16 Katuas lia nain rua-nulu resin haat nebee tuur hela iha kadeira ukun iha Maromak nia oin, sira hotu hakneak i hakruuk too rai iha Nai Maromak nia ain hodi adora Nia.
REV 11:17 Sira dehan, “Nai Maromak Kbiit Nain, Ita Boot iha hori uluk kedas. Ami agradese Ita Boot tanba agora Ita Boot hatudu sai ona Ita nia kbiit makaas hodi ukun mundu.
REV 11:18 Povu sira nebee mak la konhese Maromak, sira laran nakali. Maibee agora Ita Boot mos fakar sai Ita nia hirus, i too ona tempu atu Ita Boot tesi ema mate sira nia lia. Too ona tempu para Ita Boot foo premiu ba ema nebee mak uluk serbi Ita Boot, hanesan Ita Boot nia profeta sira ho mos Ita Boot nia povu sira kiik ho boot nebee mak hamtauk Ita Boot. Too ona tempu para Ita Boot halo rahun tiha ema sira nebee mak uluk halo rahun ema seluk iha mundu.”
REV 11:19 Depois Maromak nia uma kreda boot iha lalehan nia odamatan nakloke. I hau haree kaixoti promesa iha laran. Rai lakan mos taa ba-mai, rai tarutu makaas iha fat-fatin, rai nakdoko, i udan jelu fatuk bo-boot monu tuun mai rai.
REV 12:1 Hotu tiha, iha sinal ida oin seluk liu mosu iha lalehan. Iha senhora ida, nia isin falun ho loro matan, nia ain sama fulan. Iha nia ulun tau koroa liurai nian, koroa nee iha fitun sanulu resin rua.
REV 12:2 Senhora nee isin rua hela, besik atu tuur ahi, i nia tanis hakilar tanba nia kanotak moras loos.
REV 12:3 Iha tan sinal ida mosu iha lalehan. Iha samea mean boot ida, nia ulun hitu, dikur sanulu. Iha nia ulun hitu nee tau koroa liurai nian ida-ida.
REV 12:4 Samea ulun hitu nee uza nia ikun hodi baku makaas fitun parte ida husi parte tolu tuun ba mundu. Depois nia baa hamriik iha senhora isin rua nee nia oin para nia oan moris mai tolan kedas.
REV 12:5 Senhora nee tuur ahi, Oan mane ida, Nia mak sei ukun nasaun hotu-hotu ho kroat. Depois anju ida mai hadau tiha Labarik nee husi nia inan, i lori ba iha Maromak, iha Nia kadeira ukun.
REV 12:6 Senhora nee halai kedas ba iha rai fuik maran, iha fatin ida nebee mak Maromak prepara tiha ona ba nia. Maromak sei tau matan ba nia iha fatin nee too tinan tolu ho balu, nee hamutuk loron rihun ida atus rua neen-nulu.
REV 12:7 Depois funu boot mosu iha lalehan. Maromak nia anju boot ida naran Miguel ho anju sira nebee mak tuir nia, halo funu hasoru samea ulun hitu nee. Samea ulun hitu nee mos iha nia anju, nunee sira funu hasoru Miguel ho nia anju sira.
REV 12:8 Too ikus samea nee lakon, nunee nia ho nia anju sira la bele hela tan iha lalehan.
REV 12:9 Miguel ho nia anju sira soe sai tiha samea ulun hitu nee husi lalehan. Sira soe tiha samea mai mundu hamutuk ho nia anju sira hotu. Samea ulun hitu nee mak ema bolu “diabu nia boot” ka “Satanás”. Hori uluk kedas samea nee lohi ema hotu iha mundu para lao sala dalan.
REV 12:10 Depois hau rona lian makaas ida husi lalehan dehan nunee: “Agora tempu too ona atu Maromak salva ema. Ita nia Maromak hatudu ona Nia kbiit hodi ukun nudar Liurai. Mesias, Salvador nebee mak Nia foti hori uluk kedas mos hatudu ona Nia kbiit. Tanba uluk samea ulun hitu nee loron-kalan hamriik iha Maromak nia oin hodi foo sala ba ita nia maluk sarani sira, maibee agora samea nee soe sai tiha ona husi lalehan.
REV 12:11 Ita nia maluk sarani sira manaan tiha ona samea ulun hitu nee, tanba Bibi Oan nia raan fakar hodi salva sira, i tanba sira foo sai nafatin Maromak nia liafuan. Maski ema atu oho sira mos sira la hakiduk.
REV 12:12 Nunee lalehan ho buat hotu-hotu iha lalehan haksolok ba! Maibee buat hotu-hotu nebee moris iha rai ho tasi sei terus, tanba Satanás tuun ona baa iha imi. Nia laran nakali ona tanba nia hatene katak, nia tempu atu halo buat aat besik hotu ona.”
REV 12:13 Bainhira samea ulun hitu nee hatene katak, sira soe tuun tiha ona nia iha mundu, nia baa buka tuir senhora nebee mak tuur ahi Oan mane nee, atu halo terus nia.
REV 12:14 Maibee senhora nee simu liras rua hanesan manu makikit boot ida nia liras para semo ba fatin nebee prepara tiha ona ba nia iha rai fuik maran. Iha nebaa Maromak sei hamahon nia durante tinan tolu ho balu para samea ulun hitu nee la bele halo buat aat ba nia.
REV 12:15 Haree nunee, samea ulun hitu nee fakar sai bee barak hanesan mota boot husi nia ibun para mota bele lori senhora nee.
REV 12:16 Maibee rai mak ajuda senhora nee hodi tolan tiha bee nebee mak sai husi samea nia ibun.
REV 12:17 Nunee samea ulun hitu nee hirus teb-tebes senhora nee, too nia baa buka senhora nee nia oan sira seluk. Sira nee mak ema nebee halo tuir Maromak nia ukun fuan i foo sasin kona ba Jesus.
REV 12:18 Depois samea nee baa hamriik iha tasi ibun.
REV 13:1 Depois hau haree animal siak ida sai husi tasi laran. Animal nee nia ulun hitu, dikur sanulu. Iha nia dikur sanulu nee tau koroa liurai nian ida-idak. Iha nia ulun ida-idak hakerek naran nebee hatete aat Maromak.
REV 13:2 Animal nebee mak hau haree nee, nia isin hanesan tigre. Nia ain boot hanesan animal fuik ursu nia ain, i nia ibun hanesan liaun nia ibun. Samea ulun hitu nee foo nia kbiit ho forsa ba animal siak nee hodi entrega nia kadeira ukun ba nia.
REV 13:3 Animal siak nee, nia ulun ida iha fitar, haree ba hanesan uluk kanek boot. Tuir lo-loos nia mate, maibee kanek nee diak fali ona. Ema hotu-hotu iha mundu admira ho animal siak nee hodi tuir nia.
REV 13:4 Sira hotu adora samea ulun hitu hanesan fali Maromak, tanba samea nee foo tiha ona kbiit ba animal siak nee. Sira mos adora animal siak nee hodi dehan, “La iha ida mak forsa hanesan animal nee! La iha ida mak bele manaan nia.”
REV 13:5 Maromak husik deit animal siak nee foti aan i hatete aat Maromak. Animal nee mos hetan lisensa para kaer ukun durante fulan haat-nulu resin rua, nee hamutuk tinan tolu ho balu.
REV 13:6 Nia hatete aat Maromak, i hatete aat Maromak nia naran ho Nia hela fatin. Nia mos hatete aat hotu-hotu nebee hela iha lalehan.
REV 13:7 Animal siak nee hetan lisensa atu halo funu hasoru Maromak nia povu too manaan. Nia mos simu kbiit para ukun ema hotu-hotu husi suku, povu, lian ho nasaun hotu-hotu.
REV 13:8 Ema hotu-hotu iha mundu nee sei adora animal siak nee. So ema nebee naran hakerek ona iha lista ema moris rohan-laek nian mak la adora nia. Lista nee Bibi Oan nian, Ida nebee mak ema oho. Lista nee hakerek nanis ona molok Maromak halo mundu.
REV 13:9 Imi nebee iha tilun, rona di-diak ba!
REV 13:10 Se Maromak desidi ona katak, ema ruma tenki sai dadur, nia sei sai dadur duni. Se Maromak desidi ona katak, ema ruma tenki mate ho surik, nia sei mate duni ho surik. Nee duni sarani sira tenki aguenta ho pasiensia nafatin i fiar metin too rohan.
REV 13:11 Depois hau haree animal siak ida tan sai mai husi rai. Animal segundu nee nia dikur rua, hanesan bibi malae oan nia dikur, maibee nia lian hanesan samea ulun hitu nia lian.
REV 13:12 Nia simu kbiit husi animal siak primeiru, ida nebee uluk kanek boot i tuir loos mate maibee diak fali ona. Nunee nia halao servisu hodi animal siak primeiru nia naran, i nia obriga ema hotu-hotu iha mundu atu adora fali animal siak primeiru nee.
REV 13:13 Animal segundu nee halo milagre bo-boot halo ema hotu-hotu admira, too nia mos halo ahi monu tuun husi lalehan iha ema barak nia oin.
REV 13:14 Ho milagre nebee nia halo hodi animal siak primeiru nia naran nee, nia lohi ema hotu iha mundu. Nia haruka ema harii estatua animal primeiru nian para foti aas animal primeiru nee, ida nebee uluk ema halo kanek ho surik, maibee sei moris hela.
REV 13:15 Maromak husik animal segundu halo estatua nee bele iha iis para bele koalia. I estatua nee haruka oho tiha ema hotu-hotu nebee lakohi adora nia.
REV 13:16 Animal segundu nee obriga ema hotu-hotu, kiik-boot, riku-kiak, atan ka ema baibain, tenki simu marka iha sira nia liman loos ka iha sira nia reen toos.
REV 13:17 Ema nebee la iha marka nee, sira la bele faan sasaan ka sosa buat ida. Iha marka nee hakerek animal siak primeiru nia naran, ka numeru nebee reprezenta nia naran.
REV 13:18 Iha nee ita presiza uza matenek. Ema nebee hanoin klean bele kompriende kodigu numeru nee. Numeru nee mak 666, i hatudu ba ema ida.
REV 14:1 Depois hau haree tan buat foun ida. Hau haree Bibi Oan hamriik hela iha foho Siaun nia tutun, hamutuk ho ema rihun atus ida haat-nulu resin haat. Iha sira hotu nia reen toos hakerek Bibi Oan nia naran ho mos Bibi Oan nia Aman nia naran.
REV 14:2 I hau rona buat ida iha lalehan, hanesan laloran boot ka rai tarutu makaas. Lian nebee hau rona nee mos hanesan ema barak toka muzika ho viola.
REV 14:3 Ema rihun atus ida haat-nulu resin haat nee hamriik hela iha Maromak nia kadeira ukun nia oin ho animal moris haat ho katuas lia nain rua-nulu resin haat nia oin. Ema sira nee hananu kantiku foun ida. Kanta nee ema seluk la hatene, so ema sira nee mak hatene, tanba husi mundu tomak, sira nee mak Maromak sosa kotu tiha ona.
REV 14:4 Ema sira nee moris loos, hanesan mane klosan ida nebee mak sempre kuidadu nia aan para la bele halo sala seksual ho feto. Sira sempre lao tu-tuir Bibi Oan. Sira nee Maromak sosa kotu ona para sai Nia povu. Sira mos hanesan batar fulin diak nian nebee toos nain taa uluk hodi oferese ba Maromak ho mos ba Bibi Oan.
REV 14:5 Ema sira nee nunka bosok, i sira livre husi sala.
REV 14:6 Depois hau haree anju ida semo aas lori Liafuan Diak nebee rohan-laek para foo sai ba ema husi povu, suku, lian ho nasaun hotu iha mundu tomak.
REV 14:7 Anju nee hatete ho lian makaas dehan, “Hotu-hotu tenki hamtauk Maromak i hahii adora Nia, tanba tempu too ona atu Maromak tesi ema hotu-hotu nia lia. Adora Nia, tanba Nia mak halo lalehan ho rai, tasi ho bee matan.”
REV 14:8 Iha tan anju ida seluk semo tuir anju primeiru nee hodi dehan, “Sidade boot Babilónia rahun tiha ona! Rahun too rai! Tanba uluk sidade nee hanesan feto luroon nebee obriga nasaun hotu-hotu iha mundu hemu lanu too halo sala seksual tuun-sae.”
REV 14:9 Depois anju ida tan semo tuir anju rua nee. Anju nee foo sai ho lian makaas dehan, “See mak adora animal siak nee ho nia estatua, i simu nia marka iha sira nia reen toos ka liman,
REV 14:10 Maromak sei fakar Nia hirus ba sira. Nia hirus nee hanesan tua ulun nebee manas teb-tebes. Maski manas, sira tenki hemu. Maromak sei halo sira terus teb-tebes iha ahi lakan boot nia laran, iha anju santu sira ho Bibi Oan nia oin.
REV 14:11 Ema hotu-hotu nebee mak adora animal siak nee ho nia estatua i sira nebee iha marka animal nia naran, sei hetan terus loron-kalan iha ahi laran. I ahi nebee halo sira terus nee, nia suar sae la para too tinan ba tinan.”
REV 14:12 Entaun Maromak nia povu, ita nebee halo tuir Maromak nia ukun fuan i fiar metin ba Jesus too rohan, ita tenki aguenta ho pasiensia nafatin.
REV 14:13 Hotu tiha hau rona lian ida husi lalehan dehan, “Hakerek nunee: Komesa agora, ema nebee laran metin ba Nai Jesus too rohan, bainhira sira mate, sira simu bensaun.” Maromak nia Espiritu hataan, “Loos duni, sira sei deskansa, sira nia servisu todan sei remata, tanba Maromak sei selu fali sira nia kolen.”
REV 14:14 Depois hau haree kalohan mutin ida. Iha kalohan nee nia leten hau haree hanesan Ema ida mak tuur. Iha Nia ulun iha koroa liurai nian halo ho osan mean, i Nia kaer hela tudik koa hare nian kroat loos.
REV 14:15 Depois anju ida sai husi uma kreda boot. Anju nee koalia ho lian makaas ba Ema nebee tuur iha kalohan leten dehan, “Hodi tudik nee koa ona ba, tanba hare hotu-hotu iha mundu tasak ona, tempu too ona atu koa.”
REV 14:16 Entaun Ema nebee tuur iha kalohan leten nee, hodi Nia tudik kroat koa hare hotu-hotu iha mundu.
REV 14:17 Depois iha anju ida tan sai husi uma kreda boot iha lalehan, nia mos kaer tudik kroat ida.
REV 14:18 Iha anju ida seluk nebee toma konta sunu ai been morin iha altar, nia lao mai husi altar. Nia hatete ho lian makaas ba anju nebee kaer tudik kroat nee dehan, “Hodi tudik kroat nee koa tiha uvas ba! Tanba uvas hotu-hotu iha mundu tasak ona.”
REV 14:19 Anju nee mos hodi nia tudik koa uvas hotu-hotu husi nia sanak. Koa tiha hotu, nia soe ba iha tanki laran para sama hasai nia been. Sama uvas nee hatudu Maromak nia hirus.
REV 14:20 Fatin sama uvas nee iha liur, laos iha sidade laran. I bainhira sira sama uvas nee, raan mak suli sai husi fatin nee hanesan fali mota tuun. Mota raan nee nia naruk kilometru atus tolu, i nia klean metru ida ho balu.
REV 15:1 Hotu tiha hau haree tan sinal ida iha lalehan halo hau admira teb-tebes. Iha anju hitu, ida-idak ho nia kbiit para fakar terus boot ida mai mundu. Terus boot hitu nee mak terus ikus ona, tanba liu tiha nee, Maromak sei la fakar tan Nia hirus mai mundu.
REV 15:2 Depois hau haree buat ida hanesan tasi, maibee haree hanesan fali vidru kahur ho ahi. Hau mos haree ema barak nebee mak manaan tiha animal siak ho nia estatua tanba sira la adora nia i la simu nia marka ho nia numeru nebee mak reprezenta nia naran. Ema sira nee hamriik iha tasi ninin i kaer hela viola nebee Maromak foo ba sira.
REV 15:3 Sira hotu hananu kantiku ida husi Maromak nia atan Moisés ho Bibi Oan nunee: “Nai Maromak Kbiit Nain, buat hotu-hotu nebee mak Ita Boot halo makaas teb-tebes, halo ema admira! Ita Boot mak nasaun hotu-hotu nia Liurai; Ita Boot halo saida deit sempre loos.
REV 15:4 Nai, ema hotu-hotu tauk Ita Boot i hahii adora Ita Boot, tanba so Ita Boot deit mak santu. Ema husi nasaun hotu-hotu sei mai adora Ita Boot, tanba ema hotu-hotu haree ona katak Ita Boot halo saida deit sempre diak ho loos.”
REV 15:5 Bainhira sira hananu hotu ona, hau haree iha lalehan, fatin nebee mak lulik liu iha tenda orasaun nia laran, odamatan loke tiha.
REV 15:6 I anju hitu nebee mak lori terus boot nee sai mai. Sira hatais hena mutin nabilan i kesi hena naruk osan mean iha sira nia hirus matan.
REV 15:7 Depois animal moris haat nee ida fahe manko osan mean ba anju hitu nee ida-idak. Manko nee nakonu ho kastigu nebee Maromak atu fakar mai mundu. Maromak nee moris tinan ba tinan nafatin.
REV 15:8 La kleur tenda orasaun nee ahi suar nakonu tiha. Ahi suar nee hatudu Maromak nia kbiit ho Nia forsa. La iha ema ida mak bele tama ba iha tenda orasaun nee. Too terus boot hitu nebee anju hitu atu fakar mai mundu nee hotu ona mak foin bele tama fali.
REV 16:1 Depois hau rona lian makaas ida sai husi uma kreda boot hodi haruka anju hitu nunee, “Baa ona! Baa fakar tiha Maromak nia hirus nebee mak iha manko hitu nee ba mundu.”
REV 16:2 Anju numeru ida fakar uluk Maromak nia hirus nebee iha nia manko laran nee ba rai. Derepenti deit ema sira nebee mak simu animal siak nia marka i adora nia estatua, sira nia isin sai kanek dodok hotu, halo sira senti moras loos.
REV 16:3 Anju numeru rua fakar Maromak nia hirus nebee mak iha nia manko laran ba tasi. Derepenti tasi sai raan hanesan fali ema mate nia raan, i buat hotu-hotu nebee moris iha tasi laran mate mohu.
REV 16:4 Anju numeru tolu fakar Maromak nia hirus nebee mak iha nia manko laran ba mota ho bee matan, halo bee hirak nee sai tiha raan.
REV 16:5 Depois hau rona anju ida nebee toma konta bee hotu iha mundu dehan nunee: “Maromak santu, Ita Boot iha hori uluk kedas i iha nafatin. Kastigu nebee mak Ita Boot foo ba sira nee loos,
REV 16:6 tanba sira halo Ita Boot nia povu ho profeta sira nia raan fakar too mate, i agora Ita Boot obriga sira hemu fali raan. Sira merese duni hetan kastigu nee.”
REV 16:7 Depois hau rona lian ida husi meza sakrifisiu hataan nunee: “Loos duni! Nai Maromak Kbiit Nain, Ita Boot tesi lia ho loos. Sira merese duni simu kastigu nebee Ita Boot foo ba sira.”
REV 16:8 Hotu tiha anju numeru haat fakar Maromak nia hirus nebee mak iha nia manko laran ba loro matan. Derepenti loro matan simu kbiit para sai manas liu too sunu ema nia isin hanesan fali ahi.
REV 16:9 Loro manas makaas halo sira nia isin kanek, i sira hatete aat Maromak nia naran, tanba Nia mak iha kbiit hodi foo terus boot nee ba sira. Maski nunee sira la hakribi sira nia sala, i lakohi hahii adora Maromak.
REV 16:10 Anju numeru lima fakar Maromak nia hirus nebee mak iha nia manko laran ba animal siak nia kadeira ukun. Derepenti nakukun taka metin animal siak nee nia reinu hotu, i sira hotu-hotu tata nanaal tanba sira terus liu.
REV 16:11 Sira hotu-hotu koalia aat Maromak iha lalehan tanba sira nia kanek moras teb-tebes. Maski sira terus nunee, maibee la iha ema ida atu hakribi nia hahalok aat.
REV 16:12 Anju numeru neen fakar Maromak nia hirus nebee mak iha nia manko laran ba mota boot Eufrates. Derepenti mota nee sai maran tiha hodi loke dalan ba liurai sira husi lorosae bele liu.
REV 16:13 Depois hau haree tan espiritu aat tolu, haree hanesan manduku. Ida sai husi samea ulun hitu nia ibun, ida seluk sai husi animal siak primeiru nia ibun, ida tan sai husi profeta falsu nia ibun. Profeta falsu nee mak animal siak segundu.
REV 16:14 Espiritu aat tolu nee iha kbiit hodi halo milagre oi-oin. I sira baa konvida liurai sira iha mundu tomak atu mai halibur hamutuk hodi halo funu hasoru Maromak Kbiit Nain. Afinal tempu nebee sira marka atu funu nee mak Maromak nia loron para kastigu Nia inimigu sira.
REV 16:15 Fatin nebee liurai sira halibur atu halo funu nee ho lian Ebreu dehan Armagedon. Jesus Kristu hatete, “Rona di-diak! Hau sei mai derepenti deit hanesan naok-teen. Ema nebee hadeer hela deit hodi hatais nia ropa nafatin, ema nee hetan bensaun. Se lae, nia moe loos, tanba ema seluk haree nia lao isin molik hela.”
REV 16:17 Depois anju numeru hitu fakar Maromak nia hirus nebee mak iha nia manko laran ba anin. Derepenti lian makaas ida sai husi kadeira ukun iha uma kreda boot dehan, “Hotu ona!”
REV 16:18 Depois rai lakan taa ba-mai, rai tarutu makaas iha fat-fatin, rai mos nakdoko. Dezde Maromak halo ema, seidauk iha rai nakdoko makaas hanesan nee.
REV 16:19 Sidade boot Babilónia nakfera fahe ba tolu, i sidade hotu-hotu iha nasaun sira seluk mos rahun. Maromak la haluha ema Babilónia nia hahalok aat. Nee mak Nia fakar Nia hirus ba iha kopu tua nian halo nakonu hodi obriga sira hemu.
REV 16:20 Rai oan sira iha tasi klaran mout tiha, foho sira mos lakon hotu.
REV 16:21 Udan jelu fatuk bo-boot monu husi kalohan hanehan ema, udan jelu fatuk nee nia todan too kilu haat-nulu. Ema sira nee hatete aat Maromak nia naran tanba terus nebee sira simu nee todan liu.
REV 17:1 Depois anju ida husi anju hitu nebee kaer manko sira nee, mai iha hau hodi dehan, “Mai para hau hatudu ba o oinsaa Maromak kastigu sidade boot nebee harii besik mota barak. Sidade boot nee hanesan fali feto luroon nebee naran boot.
REV 17:2 Uluk liurai sira husi mundu tomak mai halo sala seksual ho nia. I povu husi mundu tomak mos hemu nia tua too lanu hodi halo tuir nia hahalok aat.”
REV 17:3 Depois Maromak nia Espiritu domina hau, i anju nee lori hau ba rai fuik maran. Iha nebaa hau haree feto ida tuur hela iha animal siak mean ida nia leten. Iha animal siak nee nia isin lolon tomak hakerek liafuan nebee hatete aat Maromak. Animal nee iha ulun hitu, dikur sanulu.
REV 17:4 Feto nee hatais hena folin karun teb-tebes, kor mean ho kor kafe. I nia tau osan mean, fatuk murak, ho morteen perola mesak karun. Nia kaer hela kopu osan mean ida. Kopu nee nakonu ho nia hahalok aat, hanesan sala seksual ho buat aat ho buat foer sel-seluk nebee mak nia halo.
REV 17:5 Iha feto nee nia reen toos hakerek naran ida, nia signifikadu sei segredu hela. Nia naran nunee: “Sidade boot Babilónia, feto luroon hotu-hotu nia inan, hahalok foer hotu-hotu iha mundu nia huun.”
REV 17:6 Hau haree feto aat nee, raan mak lanu tiha nia. Nia gosta liu oho Maromak nia povu, gosta oho ema nebee foo sasin kona ba Jesus Kristu. Bainhira hau haree nia, hau admira teb-tebes.
REV 17:7 Maibee anju nee husu mai hau, “Nusaa mak o admira nunee? Hau sei esplika ba o buat nebee mak sei subar hela kona ba feto nee ho mos animal ulun hitu dikur sanulu nebee nia sae nee.
REV 17:8 Animal siak nee uluk moris iha mundu, maibee agora la iha tiha ona. Aban-bainrua nia sei mosu fali mai husi rai kuak klean nakukun. Bainhira nia mosu fali mai, ema hotu-hotu iha mundu nebee naran la hakerek iha lista ema moris rohan-laek nian molok Maromak halo mundu nee, sira sei admira haree animal siak nee. Tanba animal siak nee uluk moris, depois la iha tiha ona, maibee sei mosu fila fali. Too ikus Maromak sei halo rahun tiha nia.
REV 17:9 Ema presiza uza matenek para bele kompriende animal siak nee. Nia ulun hitu nee hatudu ba foho hitu, feto nee baibain tuur iha foho hitu nee nia leten.
REV 17:10 Nia ulun hitu nee mos hatudu ba liurai nain hitu. Nain lima monu tiha ona, nain ida agora ukun hela, i ida seluk seidauk mai, maibee bainhira nia mai, nia tenki ukun lalais deit.
REV 17:11 Animal siak nebee mak uluk iha i agora la iha ona, nia mos uluk halo parte iha liurai nain hitu nee. Maibee aban-bainrua nia sei ukun fila fali para sai liurai numeru walu. Too ikus Maromak sei halo rahun tiha nia.
REV 17:12 Dikur sanulu nebee o haree nee, hatudu ba liurai nain sanulu tan nebee seidauk kaer ukun. Sira sei hetan kbiit para ukun hamutuk ho animal siak nee, maibee ukun too oras ida deit.
REV 17:13 Liurai nain sanulu nee laran ida deit hodi entrega sira nia kbiit ba animal siak nee.
REV 17:14 Sira sei halo funu kontra Bibi Oan. Maibee Bibi Oan ho Nia povu sei manaan, tanba Bibi Oan nee mak nai hotu-hotu nia Nai, ho liurai hotu-hotu nia Liurai. Nia povu nee mak ema nebee Nia hili ho bolu tiha ona, i sira foo laran ba Nia.”
REV 17:15 Anju nee esplika tan, “Ohin o haree feto luroon nee tuur besik iha mota barak. Mota nee hatudu ba ema husi suku, povu, lian ho nasaun hotu-hotu iha mundu.
REV 17:16 Ohin o mos haree dikur sanulu nebee hatudu ba liurai nain sanulu, liurai sira nee ho animal siak sei odi feto luroon nee. Sira sei hadau tiha feto nee nia sasaan hotu-hotu too kolu molik tiha nia. Sira sei haan tiha nia isin, depois nia isin restu soe ba ahi laran.
REV 17:17 Maromak mak halo liurai nain sanulu nee laran ida foo sira nia kbiit ba animal siak nee hodi ukun. I sira sei tuir animal siak nee too buat hotu nebee mak Maromak hatete tiha ona, sai realidade duni.
REV 17:18 Feto luroon nebee o haree nee hatudu ba sidade boot nebee mak ukun liurai hotu-hotu iha mundu.”
REV 18:1 Hotu tiha hau haree anju ida tan tuun mai husi lalehan. Anju nee nia kbiit boot, i nia nabilan too halo mundu nee sai naroman hotu.
REV 18:2 Nia koalia ho lian makaas dehan, “Sidade boot Babilónia rahun tiha ona! Rahun too rai. Sidade nee sai tiha ona diabu sira nia hela fatin, ho espiritu aat hotu-hotu nia subar fatin. Manu buan ho manu fuik sel-seluk nebee ema hakribi, halo nia knuuk iha nebaa.
REV 18:3 Tanba nasaun hotu-hotu iha mundu, mai hemu nia tua too lanu hodi halo sala seksual tuun-sae, i liurai hotu-hotu iha mundu mai halo sala seksual ho nia. Ema Babilónia kaan atu sosa sasaan di-diak deit, nunee halo kontratu nain sira husi mundu tomak sai riku.”
REV 18:4 Depois hau rona tan lian ida husi lalehan dehan nunee: “Hau nia povu, sai tiha husi sidade boot nee. La bele halo tuir nia hahalok aat, se lae imi mos hetan hotu kastigu hamutuk ho nia.
REV 18:5 Tanba nia sala butuk aas too ona lalehan, i Maromak la haluha nia hahalok aat.
REV 18:6 Nee duni foo terus ba nia tuir terus nebee mak nia foo ona ba ema seluk, maibee nia hahalok aat nee, tenki selu too dala rua. Uluk nia kahur tua manas foo ba ema seluk hemu, agora tenki obriga nia hemu tua nebee manas makaas liu dala rua.
REV 18:7 Uluk nia foti aan liu hodi moris goza deit, agora tenki foo fali terus ho susar boot liu ba nia. Feto luroon nee gaba aan dehan, ‘Hau nee liurai feto! Hau nunka sai feto faluk, i nunka hatene tristi.’
REV 18:8 Tanba nee, iha loron ida deit terus boot sei kona nia: tanis lelir, hamlaha ho mate, too ahi haan mutuk tiha nia isin. Tanba Nai Maromak Kbiit Nain mak foo justisa ba nia nunee.”
REV 18:9 Bainhira ahi haan nia, liurai sira husi mundu tomak nebee uluk mai halo sala seksual hodi moris goza hamutuk ho nia, sira sei haree ahi suar sae, i tanis lelir ba nia.
REV 18:10 Sira tauk nia terus nee kona mos sira, entaun sira hamriik husi dook deit hodi dehan, “Koitadu Babilónia! Koitadu sidade boot ho forti nee! Derepenti o hetan kastigu; iha oras ida deit o rahun tiha ona.”
REV 18:11 Kontratu nain sira husi mundu tomak mos tanis lelir ba sidade nee, tanba la iha tan ema ida atu sosa sira nia sasaan,
REV 18:12 sira nia osan mean, osan mutin, fatuk murak, ka morteen perola, sira nia hena mesak furak, sira nia hena diak nian kor mean ho kor kafe. Ema la sosa tan sira nia ai morin, sasaan oi-oin nebee halo husi elefante nia nehan, ai nebee karun, riti, besi ka fatuk marmore.
REV 18:13 Ema la sosa tan sira nia ai kanela ka temperus oi-oin, sira nia ai been morin ka mina morin oi-oin, sira nia tua, mina azeiti, trigu diak nian, ka trigu musan. La iha tan ema atu sosa sira nia karau, bibi malae ka kuda, sira nia kuda kareta ka sira nia atan.
REV 18:14 Kontratu nain sira sei dehan ba sidade nee, “Buat hotu-hotu nebee o kaan, mohu tiha ona. O nia riku-soin ho sasaan furak sira nee hotu-hotu nabeen tiha ona, i o sei la hetan tan.”
REV 18:15 Kontratu nain sira nee riku tiha ona tanba uluk mai faan sira nia sasaan iha sidade nee. Sira hotu sei hamriik husi dook deit, tanba tauk sidade nee nia terus kona mos sira. I sira sei tanis lelir dehan,
REV 18:16 “Koitadu! Koitadu sidade boot nee! Uluk o hatais hena mesak furak, kor mean ho kor kafe ho folin karun teb-tebes. Uluk o enfeita aan ho osan mean, fatuk murak ho morteen perola.
REV 18:17 Maibee iha oras ida nia laran deit, o nia riku-soin sira nee mohu tiha hotu.” Ema sira nebee kaer roo, ema nebee servisu iha roo laran, pasajeiru sira ho mos ema sira nebee mak buka moris iha tasi, sira hotu-hotu mos hamriik husi dook
REV 18:18 bainhira ahi haan sidade nee. Kuandu sira haree ahi suar sae, sira halerik ho lian makaas dehan, “La iha tan sidade seluk hanesan sidade boot ida nee!”
REV 18:19 Sira raut rai rahun tau ba sira nia ulun hodi hatudu sira nia laran tristi, i tanis lelir dehan, “Koitadu! Koitadu sidade boot nee! Ami nebee lori roo ba-mai iha tasi laran halo kontratu, ami hotu sai riku ona husi o nia riku-soin. Maibee iha oras ida nia laran deit, o rahun kedas.”
REV 18:20 Depois hau rona lian ida dehan, “Imi nebee moris iha lalehan, haksolok ba! Maromak nia povu, apostolu sira ho profeta sira, haksolok ba! Tanba Maromak kastigu ona sidade nee, tuir saida mak uluk nia halo ba imi.”
REV 18:21 Hotu tiha anju forti ida hiit sae fatuk boot hanesan meza, nia riba tuun ba tasi laran hodi dehan, “Hanesan nee mos Maromak sei riba tuun sidade boot Babilónia, i ema sei la haree tan.
REV 18:22 Iha fatin nee, sei la rona tan ema kanta; la rona tan ema toka viola ka huu flauta ho korneta. La iha tan badaen atu servisu tuir ida-idak nia area; la iha ona ema dulas hare.
REV 18:23 Ahi-oan sei la foo tan naroman ba sidade nee; La iha tan festa kazamentu. Tanba uluk nia kontratu nain sira mak sai ema boot liu iha mundu, i nia ema uza ai kulit aat hodi bosok nasaun hotu-hotu.
REV 18:24 Uluk ema Babilónia halo Maromak nia profeta sira ho Nia povu sira seluk raan fakar too mate. See-see deit mak ema oho iha mundu nee, Babilónia mak lori todan.”
REV 19:1 Hotu tiha hau rona hanesan ema barak teb-tebes haklalak iha lalehan dehan, “Aleluia! Hahii adora ita nia Maromak! Nia mak salva ita; Nia kbiit boot teb-tebes.
REV 19:2 Nia sempre tesi lia ho lo-loos; Nia foti ona desizaun atu kastigu feto luroon aat nee. Feto aat nee dada ema husi mundu tomak para halo sala seksual ho nia, nunee ema sira nee mos sai aat hotu. Nia halo Maromak nia atan sira raan fakar too mate; agora Maromak foo ona kastigu ba nia.”
REV 19:3 Depois ema barak nee haklalak tan dehan, “Aleluia! Hahii Maromak! Ahi haan mutuk tiha ona feto luroon nee; ahi nee nia suar sae beibeik too tinan ba tinan.”
REV 19:4 Depois katuas lia nain rua-nulu resin haat ho mos animal moris haat nee hakneak i hakruuk too rai iha Maromak nia kadeira ukun nia oin hodi adora Nia dehan, “Amen, aleluia! Hahii Maromak!”
REV 19:5 Depois lian ida mai husi kadeira ukun nee dehan, “Imi hotu-hotu nebee serbi Maromak, imi kiik-boot nebee hamtauk Nia, hahii ita nia Maromak ba!”
REV 19:6 Depois hau rona buat ruma hanesan ema barak teb-tebes nia lian, hanesan fali laloran boot, ka hanesan rai tarutu makaas. Lian nee dehan, “Aleluia! Hahii Maromak ita nia Nai, tanba Maromak Kbiit Nain mak ukun.
REV 19:7 Mai ita foti aas Maromak nia naran ho laran haksolok ho kontenti, tanba Bibi Oan nia loron kazamentu too ona, i Nia noiva hatais prontu ona atu kaben ho Nia.
REV 19:8 Vestidu mutin nabilan nebee nia hatais nee Maromak mak foo.” Vestidu nabilan nee signifika sarani sira nia hahalok diak.
REV 19:9 Depois anju nee dehan mai hau, “Hakerek nunee: See-see deit mak hetan konvite atu asisti Bibi Oan nia festa kazamentu nee, sira hetan bensaun.” Anju nee hatutan tan dehan, “Maromak nia liafuan nee loos duni!”
REV 19:10 Depois hau hakneak i hakruuk too rai iha anju nee nia oin atu adora nia, maibee nia bandu dehan, “La bele! Adora mak Maromak deit! Tanba hau nee Maromak nia atan hanesan mos o ho o nia maluk sira seluk nebee foo sasin kona ba Jesus. Tanba see mak foo sasin kona ba Jesus, nia foo tutan lo-loos Maromak nia lia menon.”
REV 19:11 Depois hau haree lalehan nakloke hela, i hau haree kuda mutin ida iha nebaa. Ema nebee tuur iha kuda leten nee, Nia naran mak “Kaer Metin Nia Promesa” ho “Ema Loos”. Bainhira Nia tesi ema nia lia, Nia tesi lia ho lo-loos, i bainhira Nia halo funu, Nia halo ho laran moos.
REV 19:12 Ema nee nia matan hanesan fali ahi nebee mak lakan makaas. Iha Nia ulun tau koroa liurai nian barak. Iha Nia isin lolon hakerek naran ida, maibee so Nia deit mak hatene naran nee, ema seluk la hatene.
REV 19:13 Nia hatais hena nebee habokon tiha ho raan. Ema temi Nia naran “Maromak nia Liafuan”.
REV 19:14 Iha mos tropas lalehan nian sae kuda mutin tuir Nia. Tropas sira nee hotu hatais hena mutin nabilan.
REV 19:15 Ema nee iha surik kroat ida sai husi nia ibun, i Nia sei uza surik nee para halo lakon nasaun hotu-hotu iha mundu. Depois Nia sei ukun nasaun sira nee ho kroat. Nia sei sama sira hanesan fali ema sama uvas iha tanki laran hodi hasai nia been. Nia halo nunee hodi hatudu katak, Maromak Kbiit Nain fakar Nia hirus ba sira.
REV 19:16 Iha Ema nee nia batina ho mos iha Nia kelen hakerek naran ida nunee: “Liurai hotu-hotu nia Liurai, nai hotu-hotu nia Nai.”
REV 19:17 Depois hau haree tan anju ida hamriik hela iha loro matan leten. Anju nee koalia ho lian makaas ba manu fuik hotu-hotu nebee mak semo aas. Nia dehan, “Mai halibur hamutuk hodi haan rame-rame iha Maromak nia festa boot.
REV 19:18 Iha mate isin bar-barak iha nee: husi liurai sira, komandante militar ho aswain sira, husi kuda ho soldadu sira nebee mak sae kuda, husi ema boot ho kiik, atan ho ema nebee livre. Mai haan tiha sira hotu nia mate isin ba!”
REV 19:19 Depois hau haree fali animal siak nebee uluk sai husi tasi laran nee. Nia halibur hamutuk ho liurai sira iha mundu ho sira nia tropas hodi halo funu hasoru Ema ida nebee mak sae kuda mutin nee ho Nia tropas.
REV 19:20 Maibee Ema nebee sae kuda mutin nee manaan tiha animal siak nee ho nia profeta falsu. Profeta falsu nee mak uluk hatudu nia milagre bo-boot hodi animal siak nia naran. Ho milagre sira nee nia bosok ema hotu-hotu nebee mak simu ona animal siak nia marka i adora animal nee nia estatua. Agora Ema ida nebee sae kuda mutin nee kaer animal siak nee ho nia profeta falsu, i soe moris sira nain rua ba iha ahi lakan boot nia laran.
REV 19:21 Depois Nia uza surik nebee sai husi Nia ibun laran hodi oho ema hotu nebee tuir animal siak nee. I manu fuik mai rame-rame hodi haan tiha sira nia isin too bosu di-diak.
REV 20:1 Depois hau haree anju ida tuun mai husi lalehan. Iha nia liman nia kaer hela xavi rai kuak klean nakukun nian ho mos korenti boot ida.
REV 20:2 Depois anju nee kaer tiha samea ulun hitu. Samea antigu nee, ema mos bolu diabu nia boot ka Satanás. Anju nee kesi tiha samea ulun hitu ho korenti, atu dadur too tinan rihun ida.
REV 20:3 Anju nee soe nia ba rai kuak klean nakukun laran i xavi metin tiha para nia la bele lohi tan ema husi nasaun hotu-hotu iha mundu. Liu tiha tinan rihun ida mak husik fali nia, maibee la kleur.
REV 20:4 Hau mos haree kadeira ukun barak, iha ema tuur hela iha kadeira ida-idak. Maromak foo ona kbiit ba ema sira nee hodi foo justisa. Uluk sira sei moris iha mundu, ema tesi tiha sira nia kakorok tanba sira foo sasin kona ba Jesus Kristu i foo sai Maromak nia liafuan. Sira nee nunka adora animal siak ho nia estatua, i la simu animal nee nia marka iha sira nia reen toos ka iha sira nia liman. Maski ema oho tiha ona sira, maibee Maromak halo moris fali sira, i sira ukun hamutuk ho Kristu too tinan rihun ida.
REV 20:5 Sira nee mak ema primeiru nebee Maromak halo moris fali husi mate. Ema mate sira seluk tenki hein too tinan rihun ida nee hotu foin Maromak halo moris fali sira.
REV 20:6 Sira nebee moris fali primeiru nee hetan ona bensaun. Sira sai ona Maromak nia povu santu. Sira la mate ba dala rua. Sira sei sai nai lulik hodi serbi Maromak ho Kristu, i sei ukun hamutuk ho Kristu durante tinan rihun ida.
REV 20:7 Bainhira tinan rihun ida nee hotu ona, Maromak sei haruka husik Satanás husi nia dadur fatin,
REV 20:8 i Satanás sei sai mai lohi nasaun hotu-hotu iha mundu tomak. Nasaun sira nee ema temi dehan, Gog ka Magog. Satanás sei bosok ema para sira halibur hamutuk hodi halo funu. Ema nebee mak halibur hamutuk nee barak teb-tebes, hanesan rai henek iha tasi ibun.
REV 20:9 Sira lao mai husi fatin hotu-hotu iha mundu hodi haleu Maromak nia povu nia hela fatin atu asalta. Fatin nee mak sidade nebee Maromak hadomi. Maibee ahi lakan ida monu tuun husi lalehan haan mutuk tiha sira hotu.
REV 20:10 Satanás, ida nebee uluk bosok sira hotu, sei soe tama tiha iha ahi lakan boot nia laran. Iha nebaa nia sei terus loron-kalan hamutuk ho animal siak ho nia profeta falsu too tinan ba tinan.
REV 20:11 Hotu tiha hau haree kadeira ukun mutin boot ida, ho mos Ida nebee tuur iha kadeira ukun nee. Derepenti deit lalehan ho rai halai sees husi Nia futar oin too lakon tiha.
REV 20:12 Hau haree ema sira nebee mate tiha ona, kiik-boot hotu-hotu hamriik hela iha kadeira ukun nia oin. Depois anju loke livru nebee mak hakerek ema hotu-hotu nia hahalok iha mundu. Anju mos loke livru ida seluk, iha livru nee hakerek ema nebee mak sei hetan moris rohan-laek. I Maromak tesi ema ida-idak nia lia tuir sira nia hahalok nebee mak hakerek tiha ona iha livru laran.
REV 20:13 Ema nebee mak uluk mate iha tasi laran, tasi nee entrega fila fali. Ema mate sira seluk mos, Mate ho Matebian nia Fatin entrega fali. I Maromak tesi sira ida-ida nia lia tuir saida mak sira uluk halo.
REV 20:14 Hotu tiha Matebian nia Fatin soe tiha ba iha ahi lakan boot nia laran, i buat ida naran Mate mos soe hotu iha nebaa. Ahi lakan boot nee mak ema bolu dehan, “mate ba dala rua”.
REV 20:15 Ema sira nebee naran la hakerek iha livru ema moris rohan-laek nian mos, soe tama hotu ba iha ahi lakan boot nee nia laran.
REV 21:1 Depois hau haree lalehan foun ho mundu foun. Lalehan ida uluk ho mundu ida uluk la iha tiha ona. Tasi mos la iha tiha ona.
REV 21:2 Hau haree Jerusalém foun tuun mai husi Maromak iha lalehan. Sidade nee sidade santu, i kapaas teb-tebes hanesan noiva ida nebee enfeita aan furak loos ona atu hasoru nia noivu iha sira nia loron kazamentu.
REV 21:3 Hau rona lian makaas ida sai husi kadeira ukun nee dehan, “Haree ba! Hahuu agora Maromak nia hela fatin iha ema sira nia leet. Nia hela hamutuk ho sira. Nia sai sira nia Maromak i sira sai Nia povu. Maromak rasik hela hamutuk ho sira.
REV 21:4 Nia sei hamaran sira nia matan been. La iha tan terus, la iha tan mate ka tanis lelir, la iha tan tristi. Tanba buat sira uluk nian nee liu tiha ona.”
REV 21:5 Depois Ida nebee tuur iha kadeira ukun nee dehan, “Rona mai! Agora Hau halo buat hotu-hotu sai foun.” Depois Nia koalia tan mai hau dehan, “Hakerek liafuan sira ohin nee, tanba liafuan sira nee loos, i ema hotu-hotu bele fiar.”
REV 21:6 Nia dehan tan, “Buat sira nee kumpri hotu ona! Hau mak primeiru ho ikus, huun ho rohan. Ema nebee hamrook, Hau sei foo bee husi bee matan nebee foo moris rohan-laek, para nia hemu gratis deit.
REV 21:7 Ema hotu-hotu nebee manaan, sira sei simu bensaun sira nee hotu. Hau sei sai sira nia Maromak, i sira sei sai Hau nia oan.
REV 21:8 Maibee sira nebee hakiduk tanba tauk, sira nebee la fiar, ema nebee halo sala foer oi-oin, oho-door, ema nebee halo sala seksual, ema nebee kaer ai kulit aat, sira nebee adora lulik, ema bosok-teen, sira nee hotu Hau sei soe tama ba iha ahi lakan boot nia laran. Ida nee mak mate ba dala rua.”
REV 21:9 Depois anju ida husi anju hitu nebee kaer manko nakonu ho Maromak nia kastigu ikus, nia mai dehan ba hau, “Mai, hau sei hatudu ba o noiva nebee mak atu kaben ho Bibi Oan.”
REV 21:10 Derepenti Maromak nia Espiritu domina hau, i anju nee lori hau ba iha foho ida aas teb-tebes. Iha nebaa anju nee hatudu sidade santu Jerusalém tuun mai husi Maromak iha lalehan.
REV 21:11 Sidade nee kapaas teb-tebes. Iha naroman lalehan nian sai husi Maromak, halo sidade nee nabilan hanesan fatuk murak nebee karun teb-tebes, lakan hanesan fatuk murak jaspe, i moos loos hanesan vidru.
REV 21:12 Iha moru boot haleu sidade nee. Moru nee aas ho mahar. Moru nee nia portaun sanulu resin rua, i anju ida-ida hamriik hein portaun sira nee. Iha portaun ida-ida hakerek naran ida husi suku Israel sanulu resin rua.
REV 21:13 Portaun tolu see oin ba lorosae, tolu see oin ba loromonu, tolu see oin ba norte i tolu tan see oin ba sul.
REV 21:14 Moru nee harii iha fatuk boot sanulu resin rua nia leten, iha fatuk ida-ida hakerek Bibi Oan nia apostolu nain sanulu resin rua nia naran.
REV 21:15 Anju nebee ohin koalia ho hau nee kaer hela ai sukat ida halo husi osan mean, para sukat sidade nee tomak ho mos nia portaun ho moru.
REV 21:16 Anju nee sukat uluk sidade ho nia ai sukat nee. Sidade nee nia naruk sasukat rihun sanulu resin rua, nia luan ho nia aas mos hanesan hotu.
REV 21:17 Depois anju nee sukat moru nia mahar tuir ita ema nia sasukat. Moru nia mahar sasukat liman atus ida haat-nulu resin haat.
REV 21:18 Moru nee halo husi fatuk murak jaspe, sidade nee tomak halo husi osan mean diak nian i lakan nabilan hanesan vidru.
REV 21:19 Fatuk boot sanulu resin rua nebee tane moru nee, enfeita ho fatuk murak oi-oin. Fatuk murak sira nee lakan kor oi-oin i karun teb-tebes. Fatuk boot primeiru halo ho fatuk jaspe, numeru rua halo ho fatuk safira, numeru tolu halo ho fatuk kalsedonia, numeru haat halo ho fatuk esmeralda,
REV 21:20 numeru lima halo ho fatuk sardoniu, numeru neen halo ho fatuk sardiu, numeru hitu halo ho fatuk krisolitu, numeru walu halo ho fatuk berilu, numeru sia halo ho fatuk topasiu, numeru sanulu halo ho fatuk krisoprazu, numeru sanulu resin ida halo ho fatuk jasintu, i numeru sanulu resin rua halo ho fatuk ametista.
REV 21:21 Moru nee nia portaun sanulu resin rua halo ho morteen perola sanulu resin rua, portaun ida-idak halo husi perola boot ida. Estrada iha sidade nee halo ho osan mean diak nian i lakan nabilan hanesan vidru.
REV 21:22 Iha sidade nee tomak hau la haree uma kreda boot, tanba Nai Maromak Kbiit Nain ho Bibi Oan, Sira rasik mak sai uma kreda ba sidade nee.
REV 21:23 Iha sidade nee la presiza loro matan ho fulan para foo naroman. Tanba naroman lalehan nian sai husi Maromak, i Bibi Oan mos hanesan ahi-oan hodi leno sidade nee.
REV 21:24 Nasaun hotu-hotu sei moris iha naroman nee nia laran. Liurai sira husi mundu tomak sei lori sira nia riku-soin ba iha sidade nee.
REV 21:25 Portaun atu tama sidade nunka taka, tanba iha nebaa la iha tan kalan.
REV 21:26 Ema husi nasaun hotu-hotu iha mundu lori sira nia riku-soin mesak kapaas deit ba iha sidade nee hodi foo ba Maromak i adora Nia.
REV 21:27 Maibee buat aat ida mos la bele tama iha nebaa. Ema nebee halo sala foer ka adora fali lulik, ho ema bosok-teen, sira hotu la bele tama. So ema nebee mak nia naran hakerek tiha ona iha Bibi Oan nia livru mak bele tama iha sidade nee, tanba livru nee hakerek see mak sei hetan moris rohan-laek.
REV 22:1 Depois anju nee hatudu mota ida mai hau, bee husi mota nee foo moris tinan ba tinan i moos loos hanesan vidru. Mota nee sai husi Maromak ho Bibi Oan nia kadeira ukun,
REV 22:2 i suli liu husi estrada boot nia klaran iha sidade nee. Iha mota nee nia sor-sorin iha ai nebee foo fuan, i ai fuan sira nee mos foo moris rohan-laek. Ai huun nee foo fuan tinan ida dala sanulu resin rua, fulan ida fuan dala ida. I ai nee nia tahan uza hanesan aimoruk hodi kura ema iha nasaun hotu-hotu.
REV 22:3 Buat nebee Maromak foo malisan la tama iha sidade nee. Maromak ho Bibi Oan nia kadeira ukun iha hela sidade nee nia laran, i Maromak nia povu serbi Nia iha nebaa.
REV 22:4 Sira haree Nia oin, i Nia naran hakerek iha sira nia reen toos.
REV 22:5 Iha sidade nee, la iha tan kalan. Maromak nia povu la presiza ona loro matan ka ahi-oan, tanba Nai Maromak rasik mak foo naroman ba sira. I Nia povu sei ukun iha nebaa too tinan ba tinan.
REV 22:6 Depois anju nee dehan mai hau, “Buat hotu-hotu nebee hau foo hatene ba o nee loos, i ema hotu-hotu bele fiar. Nai Maromak sempre foo nia Espirítu ba Nia profeta sira para sira bele foo tutan Nia liafuan. Agora Nai Maromak haruka tan Nia anju mai hatudu ba Nia atan sira, saida mak la kleur tan sei akontese.”
REV 22:7 Jesus dehan, “Rona mai! La kleur tan Hau sei mai. Ema nebee halo tuir Maromak nia lia menon iha livru nee, sira hetan bensaun.”
REV 22:8 Hau, João mak rona buat sira nee hotu, i haree rasik ho matan. Bainhira hau rona ho haree tiha hotu, hau hakneak i hakruuk too rai atu adora anju nebee mak hatudu buat sira nee mai hau.
REV 22:9 Maibee anju nee bandu hau dehan, “La bele! Adora mak Maromak deit! Tanba hau nee Maromak nia atan hanesan mos o ho o nia maluk profeta sira seluk ho mos ema hotu-hotu nebee mak halo tuir liafuan iha livru nee.”
REV 22:10 Depois anju nee dehan tan mai hau, “La bele taka liafuan sira nebee mak Maromak foo sai tiha ona iha livru nee, tanba loron besik ona atu buat sira nee akontese.
REV 22:11 Ema nebee halo buat aat, husik sira halo buat aat nafatin ba. Ema nebee halo buat foer, husik sira halo buat foer nafatin ba. Maibee ema nebee halo buat diak, sira tenki halo buat diak nafatin. I ema nebee moris ho laran moos, tenki moris ho laran moos nafatin.”
REV 22:12 Jesus dehan, “Rona mai! La kleur tan Hau sei mai. Hau lori premiu hodi selu ema ida-idak tuir buat nebee mak nia halo tiha ona.
REV 22:13 Hau mak primeiru ho ikus, Hau mak hahuu ho remata, Hau mak huun ho rohan.
REV 22:14 Ema nebee fase tiha ona sira nia hena too moos, sira hetan bensaun nunee: Sira iha direitu tama ba sidade laran liu husi portaun para bele haan ai fuan nebee mak foo moris rohan-laek.
REV 22:15 Maibee ema aat sira, ema nebee kaer ai kulit aat, halo sala seksual, oho-door, adora lulik, ka gosta bosok, sira nee sei hela hotu iha liur.
REV 22:16 Hau Jesus. Hau haruka ona Hau nia anju lori liafuan nee ba imi, para imi foo tutan ba sarani sira. Hau nee liurai David nia Jerasaun, Hau mak fitun dadeer, ida nebee lakan makaas.”
REV 22:17 Maromak nia Espirítu ho noiva nee dehan, “Mai ona!” Ema nebee rona mos tenki koalia tuir, “Mai ona!” See mak hamrook, mai ona. See mak hakarak hemu bee nebee foo moris tinan ba tinan, kuru deit tuir imi nia hakarak, lalika selu.
REV 22:18 Hau, João, foo hanoin ba ema hotu-hotu nebee sei rona Maromak nia lia menon iha livru nee: Se ema ruma aumenta tan buat ruma ba lia menon nee, Maromak mos sei aumenta kastigu todan ba nia, tuir kastigu nebee mak hakerek iha livru nee.
REV 22:19 I se ema ruma hasai liafuan ruma husi lia menon iha livru nee, Maromak mos sei hasai nia direitu atu tama ba iha sidade santu. Nia la bele haan ai fuan nebee foo moris tinan ba tinan, hanesan hakerek tiha ona iha livru nee.
REV 22:20 Ida nebee foo sai buat sira nee hotu dehan, “Loos duni! La kleur tan, Hau mai ona.” Amen. Nai Jesus, mai ona ba!
REV 22:21 Hau harohan atu Nai Jesus hatudu Nia laran diak ba Maromak nia povu hotu-hotu. Amen.
