﻿Salmu.
119.
Ema nebee moris livre husi sala, no lao tuir NAI Maromak nia lei, sira hetan bensaun. 
Ema nebee kaer metin Nia mandamentu, no buka Nia ho laran tomak, sira hetan bensaun. 
Sira la halo sala; sira lao tuir Nia dalan. 
NAI, Ita Boot hatuur tiha ona regra atu ami halo tuir tomak. 
Hau hakarak teb-tebes atu iha hau nia moris tomak, hau kaer metin Ita Boot nia lei. 
Nunee hau sei la moe leet bainhira hau fihir metin Ita Boot nia ukun fuan hotu-hotu. 
Ita Boot nia regulamentu loos; hau aprende dadauk hodi hahii Ita Boot ho laran moos. 
Hau sei halo tuir Ita Boot nia lei; keta husik hau mesak. 
Oinsaa mak joven ida bele moris loos nafatin? Nia presiza moris tuir Ita Boot nia liafuan. 
Hau buka Ita Boot ho hau nia laran tomak; keta husik hau lao sees fali husi Ita Boot nia ukun fuan. 
Hau rai metin Ita Boot nia liafuan iha hau nia laran atu hau la bele halo sala hasoru Ita Boot. 
NAI Maromak, hau hahii Ita Boot; hanorin Ita Boot nia lei mai hau. 
Regulamentu hotu-hotu nebee Ita Boot nia ibun hatete sai, hau sei konta sai. 
Hau kontenti halo tuir Ita Boot nia mandamentu hanesan fali ema kontenti ho nia riku-soin boot. 
Hau medita Ita Boot nia regra, no fihir metin Ita Boot nia dalan. 
Hau haksolok teb-tebes ho Ita Boot nia regulamentu; hau sei la haluha Ita Boot nia liafuan. 
Halo diak ba Ita Boot nia atan hau, atu hau bele moris hodi halo tuir Ita Boot nia liafuan. 
Loke hau nia matan atu hau bele haree buat furak iha Ita Boot nia lei. 
Hau ema lao rai iha mundu nee; keta subar Ita Boot nia ukun fuan mai hau. 
Loron-kalan hau hamlaha-hamrook ba Ita Boot nia regulamentu. 
Ita Boot siak ema nebee foti aan; see mak lao sees husi Ita Boot nia ukun fuan, sira hetan malisan. 
Hasai tiha liafuan insulta no liafuan aat nebee sira hatete mai hau, tanba hau kaer metin Ita Boot nia mandamentu. 
Maski nai ulun sira tuur hodi kombina malu hasoru hau, maibee Ita Boot nia atan hau sei medita Ita Boot nia lei. 
Ita Boot nia mandamentu mak hau nia ksolok; mandamentu nee mak hau nia matadalan. 
Hau tuur hakdasak hela iha rai rahun; hodi Ita Boot nia liafuan hafoun fali hau nia moris ba. 
Hau nia lalaok moris nian hau konta tiha ona ba Ita Boot, no Ita Boot hataan; hanorin Ita Boot nia lei mai hau. 
Halo hau kompriende Ita Boot nia regra nia lalaok oinsaa, atu hau bele medita buat furak nebee Ita Boot halo. 
Hau tristi ho laran susar; hodi Ita Boot nia liafuan haforsa hau ba. 
Hadook hau husi dalan bosok nian; hanoin hau, hanorin Ita Boot nia lei mai hau. 
Hau hili tiha ona dalan loos nian; hau foo aan tomak hodi halo tuir Ita Boot nia regulamentu. 
NAI Maromak, hau kaer metin hela Ita Boot nia mandamentu; keta husik hau moe leet. 
Hau duni tuir Ita Boot nia ukun fuan, tanba Ita Boot halo hau kompriende klean. 
NAI Maromak, hanorin hau kona ba Ita Boot nia lei nia lalaok, atu hau bele lao tuir too rohan. 
Halo hau kompriende, nunee hau sei kaer metin Ita Boot nia lei hodi halo tuir ho laran tomak. 
Tulun hau atu moris tuir Ita Boot nia ukun fuan, tanba ida nee foo ksolok mai hau. 
Halo hau nia laran ba deit Ita Boot nia mandamentu, laos ba riku-soin. 
Hasees tiha hau nia matan husi buat nebee la iha folin; hodi Ita Boot nia liafuan hafoun fali hau nia moris ba. 
Halo tuir Ita Boot nia promesa ba Ita Boot nia atan hau; promesa nee foo ba ema nebee hamtauk Ita Boot. 
Ema nia liafuan insulta halo hau laran todan atu rona; hasai tiha ba, tanba Ita Boot nia regra diak. 
Hau hakarak teb-tebes halo tuir Ita Boot nia regra; hafoun fali hau nia moris tanba Ita Boot nee diak. 
NAI Maromak, hau husu atu Ita Boot nia domin rohan-laek mai too iha hau; salva hau tuir Ita Boot nia promesa. 
Nunee hau bele hataan ema nebee mak hatete aat hau, tanba hau kaer metin Ita Boot nia liafuan. 
Keta hasai lia loos husi hau nia ibun, tanba hau laran metin ba ita Boot nia regulamentu. 
Hau sei halo tuir Ita Boot nia lei beibeik, too tinan ba tinan. 
Hau sei lao ho livre, tanba hau buka Ita Boot nia regra. 
Hau sei koalia kona ba Ita Boot nia mandamentu iha liurai sira nia oin; hau sei la moe. 
Hau haksolok teb-tebes ho Ita Boot nia ukun fuan, tanba hau nia laran monu ba ukun fuan sira nee. 
Hau nia laran monu, nunee hau tane aas ita Boot nia ukun fuan sira nee; hau medita Ita Boot nia lei. 
Hanoin nafatin Ita Boot nia liafuan ba Ita Boot nia atan hau, tanba liafuan nee foo esperansa mai hau. 
Buat nebee konsola hau iha terus laran mak nee: Ita Boot nia promesa hafoun fali hau nia moris. 
Ema foti aan sira sempre hatuun hau, maibee hau la lao sees husi Ita Boot nia lei. 
NAI Maromak, hau hanoin nafatin regulamentu nebee Ita Boot foo hori uluk liu; regulamentu nee halo hau nia laran hakmatek. 
Bainhira ema aat fila kotuk ba Ita Boot nia lei, hau nia laran nakali. 
Hau hela iha nebee deit, hau hananu kona ba Ita Boot nia lei. 
NAI Maromak, iha kalan hau hanoin Ita Boot nia naran; hau kaer metin Ita Boot nia lei. 
Hau sempre halo tuir Ita Boot nia regra; ida nee mak hau nia lalaok moris. 
NAI Maromak, hau nia riku-soin mak Ita Boot; hau promete tiha ona atu halo tuir Ita Boot nia liafuan. 
Ho laran tomak hau husu atu Ita Boot haree hau diak; hanoin hau tuir Ita Boot nia promesa. 
Hau tetu hau nia hahalok; hau fila hodi hakat tuir Ita Boot nia mandamentu haruka. 
Hau sei halo tuir kedas Ita Boot nia ukun fuan; hau sei la demora. 
Ema aat sira nia talin kesi metin hau; bele nunee mos hau sei la haluha Ita Boot nia lei. 
Iha kalan boot hau hadeer hodi foo agradese ba Ita Boot, tanba Ita Boot nia regulamentu nee loos. 
Hau sai belun ba ema hotu nebee mak hamtauk Ita Boot, ba ema nebee mak kaer metin Ita Boot nia regra. 
NAI Maromak, mundu nee nakonu ho Ita Boot nia domin rohan-laek; hanorin Ita Boot nia lei mai hau. 
NAI Maromak, Ita Boot halo ona buat diak ba Ita Boot nia atan hau tuir Ita Boot nia lia fuan. 
Hanorin hau atu hau bele matenek hodi foti desizaun ho loos, tanba hau fiar ba Ita Boot nia ukun fuan. 
Uluk hau lao sala dalan, Ita Boot halo hau terus, maibee agora hau kaer metin Ita Boot nia liafuan. 
Ita Boot nee diak, no buat nebee Ita Boot halo mos diak; hanorin Ita Boot nia lei mai hau. 
Ema foti aan sira bosok hodi hafoer hau nia naran, maibee ho laran tomak hau kumpri ita Boot nia regra. 
Sira nia fuan toos, maibee hau haksolok teb-tebes ho Ita Boot nia lei. 
Uluk Ita Boot halo hau terus, nee diak ba hau atu hau bele aprende Ita Boot nia lei. 
Lei nebee sai husi Ita Boot nia ibun nee diak ba hau liu fali osan mean osan mutin rihun ba rihun. 
Ita Boot nia liman mak kria hau no forma hau; loke hau nia neon atu hau aprende Ita Boot nia ukun fuan. 
Ema sira nebee hamtauk Ita Boot haksolok bainhira sira haree hau, tanba hau laran metin ba Ita Boot nia liafuan. 
NAI Maromak, hau hatene Ita Boot sempre tesi lia ho lo-loos; uluk Ita Boot halo hau terus, tanba Ita Boot sempre hakarak atu hau sai diak. 
Hau husu atu Ita Boot nia domin rohan-laek bele halo hau nia laran hakmatek, hanesan Ita Boot promete ona ba Ita Boot nia atan hau. 
Hatudu Ita Boot nia laran luak mai hau atu hau bele moris, tanba Ita Boot nia lei halo haksolok hau nia laran. 
Halo ema foti aan sira moe leet tanba sira duun matak hau; hau medita hela Ita Boot nia regra. 
Hau harohan atu ema sira nebee hamtauk Ita Boot, hakbesik mai hau, atu sira bele kompriende Ita Boot nia mandamentu. 
Tulun hau atu halo tuir Ita Boot nia lei ho laran moos, atu nunee hau la bele moe leet. 
Hau hein Ita Boot nia salvasaun too fraku ona, maibee hau laran metin ba Ita Boot nia liafuan. 
Hau nia matan kole ona hodi buka Ita Boot nia promesa; hau dehan, “Bainhira loos mak Ita Boot atu foo konsola hau?” 
Hau hanesan tua fatin nebee kuak tiha ona; bele nunee mos hau la haluha Ita Boot nia lei. 
Ita Boot nia atan hau tenki hein too bainhira tan? Bainhira loos mak Ita Boot kastigu ema nebee halo terus hau? 
Ema foti aan sira kee rai kuak atu hamonu hau; hahalok nee kontra Ita Boot nia lei. 
Ita Boot nia ukun fuan hotu-hotu ema bele konfia; tulun hau tanba ema halo terus hau maski hau la sala. 
Sira besik atu halakon hau nia vida husi mundu nee, maibee hau la husik Ita Boot nia regra. 
Hodi Ita Boot nia domin rohan-laek hafoun fali hau nia moris ba, atu hau bele kaer metin mandamentu nebee sai husi Ita Boot nia ibun. 
NAI Maromak, Ita Boot nia liafuan dura nafatin ba nafatin; liafuan nee firmi iha lalehan. 
Ita Boot kaer metin Ita Boot nia liafuan husi jerasaun ba jerasaun; Ita Boot mak harii mundu nee, nunee mundu iha nafatin. 
Buat hirak nee hotu dura too ohin loron tanba hotu-hotu tuir Ita Boot nia orden. 
Se karik hau la haksolok ho Ita Boot nia lei, entaun iha momentu hau hetan terus, hau mate tiha ona. 
Hau nunka atu haluha Ita Boot nia regra, tanba liu husi regra sira nee mak ita Boot hafoun hau nia moris. 
Hau Ita Boot nian, salva hau ba, tanba hau buka Ita Boot nia regra. 
Ema aat sira hein hela atu halakon hau nia vida, maibee hau sei reflete Ita Boot nia regra. 
Hau haree buat hotu-hotu iha rohan, maibee Ita Boot nia ukun fuan la iha rohan. 
Hau gosta teb-tebes Ita Boot nia lei; hau medita lei nee iha loron tomak. 
Ita Boot nia ukun fuan sempre hamutuk ho hau, halo hau matenek liu hau nia inimigu sira. 
Hau kompriende liu fali hau nia mestri sira, tanba hau medita Ita Boot nia mandamentu. 
Hau kompriende klean liu fali ferik-katuas sira, tanba hau halo tuir Ita Boot nia regra. 
Hau kuidadu hau nia aan husi dalan aat saida deit, atu nunee hau bele halo tuir Ita Boot nia liafuan. 
Hau nunka lao sees husi Ita Boot nia regulamentu, tanba Ita Boot rasik mak hanorin hau. 
Ita Boot nia liafuan midar tebes mai hau, midar liu bani been iha hau nia ibun. 
Hau hetan matenek husi Ita Boot nia regra; tanba nee hau hakribi hahalok aat saida deit. 
Ita Boot nia liafuan foo naroman atu hau bele lao ba oin; liafuan nee ahi oan hodi leno hau nia dalan. 
Ita Boot nia regulamentu loos hotu, hau jura tiha ona atu halo tuir, no hau sei kumpri juramentu nee. 
NAI Maromak, hau terus liu ona; hodi Ita Boot nia liafuan hafoun fali hau nia moris ba. 
Hau hasae orasaun agradesimentu nian ba Ita Boot nudar oferta ida; NAI, simu ba hodi hanorin Ita Boot nia regulamentu mai hau. 
Maski dala barak hau iha perigu laran, hau sei la haluha Ita Boot nia lei. 
Ema aat sira tau ona lasu mai hau, maibee hau la lao sees husi Ita Boot nia regra. 
Ita Boot nia mandamentu mak hau nia riku-soin tinan ba tinan, no halo hau nia laran haksolok. 
Hau foo laran hodi halo tuir Ita Boot nia lei agora too rohan. 
Hau odi ema nebee laran ru-rua, maibee hau gosta teb-tebes Ita Boot nia lei. 
Ita Boot mak hau nia subar fatin; Ita Boot mak defende hau; hau tau fiar ba Ita Boot nia liafuan. 
Imi ema aat sira, dook tiha husi hau, atu hau bele halo tuir hau nia Maromak nia ukun fuan. 
Tane hau tuir Ita Boot nia promesa, atu nunee hau bele moris; hau laran metin ba Ita Boot, keta husik hau moe leet. 
Tulun hau mak hau sei hetan salvasaun; nunee hau sei foo laran beibeik ba Ita Boot nia lei. 
Ita Boot la simu ema sira nebee lao sees husi Ita Boot nia lei; sira lohi tuun lohi sae mos la iha folin. 
Ita Boot haree ema aat iha mundu nee hanesan lixu; tanba nee hau gosta teb-tebes Ita Boot nia mandamentu. 
Hau nia isin nakdedar tanba hau tauk Ita Boot; hau tauk Ita Boot nia justisa. 
Hau halo tiha ona buat nebee loos ho justu; la bele husik hela hau iha hanehan door sira nia liman laran. 
Kuidadu hau ata nia moris; keta husik ema foti aan sira hanehan hau. 
Hau nia matan kole ona tanba hein hela Ita Boot atu salva hau tuir Ita Boot promete tiha ona. 
Halo diak ba Ita Boot nia atan hau, tuir Ita Boot nia domin rohan-laek; hanorin Ita Boot nia lei mai hau. 
Hau nee Ita Boot nia atan, halo hau kompriende, atu hau hatene Ita Boot nia mandamentu. 
NAI Maromak, agora mak tempu ba Ita Boot atu hamriik, tanba ema la halo tuir tiha ona Ita Boot nia lei. 
Hau gosta Ita Boot nia ukun fuan liu fali osan mean, liu fali osan mean diak nian. 
Hau haree Ita Boot nia regra hotu-hotu loos; tanba nee hau hakribi hahalok aat saida deit. 
Ita Boot nia mandamentu furak; tanba nee hau halo tuir. 
Ita Boot nia liafuan nakloke hodi foo naroman, halo ema matan tomak sira kompriende. 
Hau hamrook teb-tebes ba Ita Boot nia ukun fuan, hanesan ema nebee hamrook too kakorok maran. 
Fila mai hau hodi hanoin hau, hanesan Ita Boot hanoin ema hotu nebee hadomi Ita Boot. 
Hatudu dalan mai hau atu hau bele lao tuir Ita Boot nia liafuan; keta husik buat aat ukun hau. 
Salva hau husi ema nebee hanehan hau, atu hau bele halo tuir Ita Boot nia regra. 
Halo Ita Boot nia oin leno Ita Boot nia atan hau; hanorin Ita Boot nia lei mai hau. 
Hau nia matan been suli hanesan bee mota nian, tanba ema la halo tuir Ita Boot nia lei. 
NAI Maromak, Ita Boot sempre halo buat nebee loos; Ita Boot nia regulamentu loos hotu. 
Mandamentu nebee Ita Boot hatuur nee loos; ema bele konfia. 
Hau nia laran nakali tanba hau nia inimigu sira la interese Ita Boot nia liafuan. 
Promesa nebee Ita Boot halo nunka falha; nee mak Ita Boot nia atan hau gosta teb-tebes. 
Hau nee kiik no ema haree hau la iha folin, maibee hau la haluha Ita Boot nia regra. 
Ita Boot sempre halo buat nebee loos nafatin ba nafatin; Ita Boot nia lei sempre loos. 
Susar ho terus iha hela hau nia leten, maibee hau haksolok ho Ita Boot nia ukun fuan. 
Ita Boot nia mandamentu loos nafatin ba nafatin; halo hau kompriende ba, atu hau bele moris. 
NAI Maromak, ho laran tomak hau halerik husu tulun, hataan hau ba; hau sei halo tuir Ita Boot nia lei. 
Hau hasae lia ba Ita Boot, salva hau ba, atu hau bele kaer metin Ita Boot nia mandamentu. 
Hau hadeer iha dadeer-saan nakukun hodi halerik husu tulun; hau laran metin ba Ita Boot nia liafuan. 
Hau nia matan loke nafatin iha kalan tomak, atu hau bele medita Ita Boot nia promesa. 
Hodi Ita Boot nia domin rohan-laek rona hau nia lian ba; NAI Maromak, hodi Ita boot nia justisa hafoun fali hau nia moris ba. 
Ema sira nebee duni tuir hau ho hanoin aat, sira besik dadauk hau; sira nee dook husi Ita Boot nia lei. 
Maibee NAI, Ita Boot besik hela hau; Ita Boot nia ukun fuan hotu-hotu loos. 
Husi kiik kedas hau aprende Ita Boot nia mandamentu; husi nebaa hau kompriende katak, Ita Boot hatuur mandamentu nee atu dura tinan ba tinan. 
Haree ba, hau terus hela, hasai hau husi terus laran nee, tanba hau la haluha Ita Boot nia lei. 
Ema duun hela hau, defende hau hodi salva hau ba; hafoun fali hau nia moris tuir Ita Boot nia promesa. 
Salvasaun dook husi ema aat sira, tanba sira la buka Ita Boot nia lei. 
NAI Maromak, Ita Boot laran luak teb-tebes; hodi Ita Boot nia regulamentu hafoun fali hau nia moris ba. 
Iha funu baluk barak mak halo terus hau, maibee hau nunka lao sees husi Ita Boot nia mandamentu. 
Hau haree traidor sira, hau hakribi fali, tanba sira la kaer metin Ita Boot nia liafuan. 
Haree ba, hau gosta teb-tebes Ita Boot nia regra; NAI Maromak, hodi Ita Boot nia domin rohan-laek hafoun fali hau nia moris ba. 
Ita Boot nia liafuan loos hotu; Ita Boot nia regulamentu hotu-hotu loos no dura nafatin ba nafatin. 
Nai ulun sira halo terus hau maski hau la sala, maibee hau nia laran tauk ho nakdedar deit ba Ita Boot nia liafuan. 
Hau haksolok ho Ita Boot nia liafuan hanesan ema nebee hetan riku-soin boot. 
Hau la simu lia bosok, hau hakribi liu, maibee hau gosta teb-tebes Ita Boot nia lei. 
Hau loro-loron hahii Ita Boot dala hitu, tanba Ita Boot nia regulamentu loos. 
Ema nebee gosta Ita Boot nia lei, sira hetan pas no hakmatek nebee boot; la iha buat ida mak halo sira sidi. 
NAI Maromak, hau hein hela Ita Boot atu salva hau; hau moris tuir Ita Boot nia ukun fuan. 
Hau halo tuir Ita Boot nia mandamentu, tanba hau gosta teb-tebes. 
Hau halo tuir Ita Boot nia regra ho mandamentu, tanba Ita Boot hatene hotu hau nia lalaok moris. 
NAI Maromak, simu hau nia lia halerik ba; hodi Ita Boot nia liafuan halo hau kompriende. 
Simu hau nia orasaun ba; salva hau tuir Ita Boot nia promesa. 
Hau nia ibun sei la para hahii Ita Boot, tanba Ita Boot hanorin Ita Boot nia lei mai hau. 
Hau nia nanaal hananu kona ba Ita Boot nia liafuan, tanba Ita Boot nia ukun fuan hotu-hotu loos. 
Hau harohan atu Ita Boot nia liman prontu hodi tulun hau, tanba hau hili atu tuir Ita Boot nia regra. 
NAI Maromak, hau hakarak teb-tebes atu Ita Boot salva hau; Ita Boot nia lei halo haksolok hau nia laran. 
Halo hau moris atu hau bele hahii Ita Boot; hau harohan atu Ita Boot nia regulamentu ajuda hau. 
Hau lao sala dalan ona hanesan bibi nebee lakon; buka tuir Ita Boot nia atan hau ba, tanba hau la haluha Ita Boot nia ukun fuan. 
