﻿Salmu.
98.
Salmu. Hananu kantiku foun ba NAI Maromak, tanba Nia halo ona buat furak teb-tebes. Hodi Nia liman loos; hodi Nia liman santu, Nia manaan tiha ona Nia inimigu. 
NAI deklara tiha ona Nia vitoria; Nia hatudu sai Nia justisa ba nasaun hotu-hotu. 
Nia hatudu Nia domin rohan-laek ba Israel; Nia kaer metin Nia promesa ba ita; rai ulun too rai ikun iha mundu tomak haree tiha ona salvasaun husi ita nia Maromak. 
Mundu tomak, haklalak haksolok ba NAI Maromak ba; toka muzika hodi hananu ho haksolok. 
Toka viola halo muzika ba NAI; toka viola ho knananuk murak. 
Huu korneta, huu karau dikur; haklalak haksolok iha NAI nia oin; Nia mak Liurai. 
Tasi ho buat hotu iha laran, hasai lian ba; mundu ho buat hotu nebee moris iha laran mos hasae lian ba. 
Mota sira, basa liman ba; foho sira, hananu rame-rame hodi haksolok ba. 
Hananu iha NAI Maromak nia oin, tanba Nia mai atu foo justisa ba mundu. Nia sei foo justisa ba mundu ho lo-loos; Nia foo justisa ba povu tuir lia loos. 
