﻿Salmu.
23.
Salmu David nian. NAI Maromak mak hau nia Bibi Atan; hau la falta buat ida. 
Nia halo hau toba iha duut matak; Nia lori hau ba iha bee matan. 
Nia hafoun fali hau nia laran; Nia lori hau tuir dalan loos atu ema foti aas Nia naran. 
Maski hau lao iha fatin nebee nakukun teb-tebes, hau la tauk buat ida tanba Ita Boot hamutuk ho hau. Ita Boot nia ai tonka ho rota proteje hau hodi halo hau nia laran hakmatek. 
Ita Boot tau meza mai hau iha hau nia inimigu sira oin; Ita Boot simu hau hanesan bainaka boot ida, no enxe hau nia kopu too nakonu. 
Tebes duni, Ita Boot nia diak ho Ita Boot nia laran luak sei hamutuk ho hau iha hau nia moris tomak; hau sei hela iha NAI Maromak nia uma nafatin ba nafatin. 
