﻿Salmu.
16.
Salmu David nian. Maromak, kuidadu hau ba, tanba hau hamahon aan iha Ita Boot. 
NAI Maromak, hau hatete ba Ita Boot dehan, “Ita Boot mak hau nia Nai; buat diak hotu-hotu nebee hau iha mai husi Ita Boot.” 
Maromak nia povu santu iha rai nee furak teb-tebes; hau kontenti liu ho sira. 
Ema nebee halai ba maromak sel-seluk sei susar ba beibeik. Hau sei la foo oferta raan nian ba maromak sira nee; hau nia ibun sei la temi sira nia naran. 
NAI Maromak, hau nia riku-soin mak Ita Boot; Ita Boot foo bensaun mai hau; hau nia destinu iha Ita Boot nia liman laran. 
Fatin nebee Ita Boot foo mai hau furak; riku-soin nebee Ita Boot foo mai hau kapaas teb-tebes. 
Hau sei hahii NAI Maromak, tanba Nia hatudu dalan mai hau; iha oras kalan mos hau nia konsiensia hanorin hau. 
Hau nia matan sempre hateke ba NAI; Nia iha hela hau nia sorin, nunee la iha buat ida mak bele halo hau nakdoko. 
Nee mak hau nia laran haksolok, hau nia fuan kontenti; hau nia isin mos hakmatek hela. 
Tanba Ita Boot sei la husik hau iha ema mate sira nia fatin; ema ida nebee moris loos, Ita Boot la husik nia isin dodok iha rate laran. 
Ita Boot hatudu ona dalan moris mai hau; Ita Boot sei halo hau nia laran haksolok teb-tebes iha Ita Boot nia oin; hau kontenti tinan ba tinan iha Ita Boot nia liman loos. 
