﻿John Lekhathot Khatna.
1.
Keihon nangho kom'a kahillhang leu-atil abula pat a ana um jing, kanakol uva kajahsau, kamit uva kamusau chule kakhut uva kathamsau Hinna Thu chu ahi. 
Ama tah hinna ahi chu keiho henga kiphongdoh ahitai chule keihon Ama chu kamu tauve, chule tua hi keihon ka hettohsah uva chule Ama tah Tonsot Hinna ahi tia kasei phongu ahi. Ama Pa toh ana umsa chujouva keiho henga hung kiphongdoh ah ahi. 
Keiho tah in kamuchet uva chule kajahsau chu nangho henga kahillhangu ahin, hichu keiho toh ikiloikhom theina dingu ahi. Chule keiho toh kiloikhomna hi Pa le Achapa Jesu Christa toh kiloikhomna ahi. 
Hiche ho chengse kajih uhi nang hon keihoa kipana nanei bulhing-chamkim theina dingu ahi. 
Keihon Jesu a konna kajahsau thupoh chule tua naheng uva ka phondoh u chu hiche hi ahi-Pathen chu vah ahi, chule Ama a chu muthim umlouhel ahi. 
Hijeh a chu eihon Pathen to kiloikhom kahi itiuva ahia lhagao muthim lah a vahle nalai ihiuleh eihon thutah chu juijing lou ihiu ahi. 
Hinlah Pathen vah a aum banga vah a chu eiho ium uva ahileh, eiho khat le khat kiloikhom ihitauve, chule Achapa Jesu thisan chun ichonset nau jouse a konna eisil thengu ahitai. 
Eiho chonsetna nei louva ikiseidoh uva ahileh eimaho tah kilhemlha ihiuvin, thutah a hinga ihi lou u ahi. 
Hinlah eihon ichonset u Ama kom'a iphondoh uva ahileh, Ama chu ichonset nau ngaidam dinga tahsan um le kitah ahin, chule gitlouna jousea konna eisil theng theiyu ahi. 
Eiho chonse khalouva ikiseidoh uva ahileh eihon Pathen jou seiya ingoh u chule Athu chun ilung uva mun aneilou ahi ti ivetsah u ahi. 
