GEN 1:1 Pa kutendeka Leza waalengele myulu ni kyalo.
GEN 1:2 Ozo musita, kyalo kyaali kyali sie kibeebeebe, kabili tekuba mwali kantu, ni nfinzi yaali yakupiliile pa menda azikile. Inzi Mweo wakua Leza waali walela peulu menda.
GEN 1:3 Leza waalandile evi, “Kube kisue!” Ni kisue kya-alukileko.
GEN 1:4 Leza waamwene nangue kisue kyaali kyaweme. Waalekenkaniizie kisue ni nfinzi.
GEN 1:5 Kisue Leza waakiinikile musita wa koba, ni nfinzi waiinikile busiku. Kwa-alukile kyungulo, kabili kwa-alukile lukeelekeele. Bobo i bwaali busiku bwa mambo.
GEN 1:6 Kabili Leza waalandile evi, “Kube lweleele pa bukata bwa menda pakuti lulekenkanie menda ni menda.”
GEN 1:7 Evi Leza waakitile lweleele ni kulekekania menda ali pensina lweleele ku menda ali mu muulu. Evio i vikyaali.
GEN 1:8 Lweleele Leza waalwinikile lyulu. Kwa-alukile kyungulo, kabili kwa-alukile lukeelekeele. Bobo i bwaali busiku bwa bubili.
GEN 1:9 Kabili Leza waalandile evi, “Menda a pa kyalo akolonghane pa nkendo imo, evi musili umoneke.” Evio i vikyaali.
GEN 1:10 Musili Leza wawinikile kyalo, ni menda aakolongheene pamo waenikile lyezi. Leza waamwene nangue kyaali kyaweme.
GEN 1:11 Kabili Leza waalandile evi, “Kyalo kimenie bikusi ni saasa uliwaseekako mbezu ilekenkeene, ni bimuti bilibyaseekako mazabo kukonkana ni misango yabyo, mazabo ali ni mbezu mukati.” Evio i vikyaali.
GEN 1:12 Kyalo kyaameniizie bikusi ni saasa uliwaseekako mbezu ilekenkeene, ni bimuti bilibyaseekako mazabo kukonkana ni misango yabyo, mazabo ali ni mbezu mukati. Leza wamwene nangue kyaali kyaweme. Evio i vikyaali.
GEN 1:13 Kwa-alukile kyungulo, kabili kwa-alukile lukeelekeele. Bobo i bwaali busiku bwa butatu.
GEN 1:14 Kabili Leza waalandile evi, “Misaniko imoneke mu lyulu ya kuti ilekenkanie musita wa koba ni musita wa busiku, kuti iye yali tulangi twa nsita ni nsiku ni myaka,
GEN 1:15 kabili misaniko iye yali mu lyulu kuti iye yasanikila pa kyalo.” Evio i vikyaali.
GEN 1:16 Leza waakitile misaniko ibili ikata, musaniko utaniisie uye wasanikila musita wa koba, ni ukeepeleko uye wasanikila musita wa busiku. Kabili Leza waakitile ni ntanda.
GEN 1:17 Leza waabiikile misaniko mu lyulu kuti iye yasanikila pa kyalo,
GEN 1:18 iye yateeka musita wa koba ni wa busiku, evi iye yalekenkaniizie kisue ni nfinzi. Leza waamwene nangue kyaali kyaweme.
GEN 1:19 Kwa-alukile kyungulo, kabili kwa-alukile lukeelekeele. Bobo i bwaali busiku bwa buna.
GEN 1:20 Kabili Leza waalandile evi, “Mu menda mube bilengua bikose bilibyaenda, ni mu lweleele mube byoni bilibyapupuka peulu kyalo.”
GEN 1:21 Leza waalengele bilengua bikata bya mu lyezi mu misango yabyo, ni bilengua bikose bilibyaenda mu menda mu misango yabyo pamo ni byoni bilibyapupuka mu lweleele mu misango yabyo. Leza waamwene nangue kyaali kyaweme.
GEN 1:22 Leza waabipaalile walanda bivyalane, bisanduluke ni kwizula mu menda a mu lyezi, ni byoni bisanduluke mu kyalo.
GEN 1:23 Kwa-alukile kyungulo, kabili kwa-alukile lukeelekeele. Bobo i bwaali busiku bwa busaano.
GEN 1:24 Kabili Leza waalandile evi, “Kyalo kifumie misango yonse ya bilengua bikose mu misango ilekenkeene. Nama ya kuteekua, ni bilibyayibula pansi, ni nama ya mu kisonso mu misango ilekenkeene.” Evio i vikyaali.
GEN 1:25 Leza waakitile nama ya mu musitu mu misango yayo, ni nama ya kuteekua mu misango yayo, ni kubalua kilengua kilikyayibula pansi mu misango yayo. Leza waamwene nangue kyaali kyaweme.
GEN 1:26 Kabili Leza waalandile evi, “Ale kansi tubumbe muntu mu lukebu lwetu wapaleene ni fwefue. Kabili tumupeele buvinde bwa kuteeka masabi a mu lyezi, ni tooni twa mu lweleele, ni nama ya kuteekua, ni buvinde bwa kuteeka kyalo kyonse pamo ni bilengua byonse bilibyayibula pansi.”
GEN 1:27 Evi Leza waalengele muntu mu lukebu lwakue mwine. Mu lukebu lwakua Leza i mwaalengeelue muntu. Mwalalume ni mwanakazi, waabalengele.
GEN 1:28 Leza waabapaalile wabaana nangue, “Ale vyalane musanduluke. Izuzie kyalo ni kukinasia. Muye mwali bakateeka ba masabi a mu lyezi, ni ba byoni bya mu lweleele, ni ba bilengua byonse bikose bilibyayibula pansi.”
GEN 1:29 Leza waalandile evi, “Mone namipeela kubalua saasa uli pa kyalo kyonse uliwaseekako mbezu, ni kubalua kimuti kilikyaseekako mazabo ali ni mbezu mukati kuti bikabe bya kulia byenu.
GEN 1:30 Inzi nama yonse ya pa kyalo, ni tooni twa mu lweleele, ni kyonse kilikyayibula pansi kili ni bukose, nabipeela maani a saasa kuti bibe bilio byabo.” Evio i vikyaali.
GEN 1:31 Leza waamwene nangue byonse bi-aakitile byaali byakilile kuwama. Kwa-alukile kyungulo, kabili kwa-alukile lukeelekeele. Bobo i bwaali busiku bwa mutanda.
GEN 2:1 Evi i vyaapwile kulengua kwa lyulu ni kyalo pamo ni byonse bilimo.
GEN 2:2 Mu busiku bwa kilooba, Leza waali wasyapwile miilo yakue yonse i-aali wakita. Ni pakako, waatuziizie busiku bwa kilooba ni kulekela kubomba miilo yakue yonse i-aali wakita.
GEN 2:3 Leza waapaalile busiku bwa kilooba ni kubuzuukia pantu i busiku bu-atuziiziemo pa kyamba kya miilo ya kulenga bintu byonse.
GEN 2:4 Leli i lyasi lya kulengua kwa lyulu ni kyalo. Yawe Leza lu-aalengele lyulu ni kyalo,
GEN 2:5 pa kyalo tepaali pamenene kantu, ni saasa wa mu kisonso waali teunamene, pantu Yawe Leza waali tananokiepo nvula, kabili tepaali muntu wa kulima musili.
GEN 2:6 Inzi menda a pansi i-aali aleeta kinwanvi pa bulongo.
GEN 2:7 Yawe Leza waabuulile lufunko lwa bulongo, wabumba mwalalume ni kumupuzila mupuze wa bukose mu myona, ni ye wa-aluka kilengua kikose.
GEN 2:8 Kabili Yawe Leza waakitile bukaba mu Edeni lya ku kabanga ni kubiikamo muntu u-aabumbile.
GEN 2:9 Yawe Leza waameniizie misango yonse ya bimuti pa musili, bimuti biweme mu monekelo, bilibyaseekako mazabo aweme a kulia. Pa bukata bwa bukaba, paali pali kimuti kya bukose ni kimuti kya kumana biweme ni bibiipile.
GEN 2:10 Momo mu Edeni i mwaali mwafumine mwenzi waali waleeta kinwanvi mu bukaba. Ozo mwenzi waali wakasanikilemo myenzi ina.
GEN 2:11 Mwenzi wa mambo uliwakuutua Pishoni. Ozo mwenzi i uzyungulukiile kyalo kya Havila kilimo oro.
GEN 2:12 Oro ya mu kekio kyalo iwamiisie, kabili i muli butonvu bwa bunu ni mabue a oniksi.
GEN 2:13 Mwenzi wa bubili uliwakuutua Gioni. Ozo mwenzi i uzyungulukiile kyalo kya Kushi.
GEN 2:14 Mwenzi wa butatu uliwakuutua Tigri. Ozo i upitile lya ku kabanga ka Asiria. Ni mwenzi wa buna uliwakuutua Efrati.
GEN 2:15 Kabili Yawe Leza waamutweme muntu ni kuya kumuteeka mu bukaba bwa mu Edeni kuti aye wasekwila ni kubulabukila.
GEN 2:16 Yawe Leza waamwanine evi, “Mazabo onse a ku bimuti bya mu bukaba kuti wa-alia,
GEN 2:17 inga sie mazabo a ku kimuti kya kumana biweme ni bibiipile, kyene tekuti ukalieko. Busiku buwaakalia mazabo a ku keki kimuti, kisinka waakafua!”
GEN 2:18 Kabili Yawe Leza waalandile evi, “Muntu tapalile kuya waikeele bunke bwakue. Ndikumukitila mukwasi amupalile.”
GEN 2:19 Yawe Leza waabuulile bulongo ni kubumba kubalua nama wa mu kisonso, ni kubalua kyoni kya mu lweleele ni kumutwalila muntu, evi Leza amone vi-alikubiinika meena. Kubalua liina lyainikilue kilengua kikose, i lyaali liina lyakyo.
GEN 2:20 Muntu wainikile meena a nama ya kuteekua ni meena a byoni pamo ni meena a nama ya mu kisonso, inzi pa bebi byonse muntu taamwenepo mukwasi amupalile.
GEN 2:21 Yawe Leza waamuoniizie muntu tulo tukata. Lu-aali waonene, waamusomwenemo lubali lumo ni pa kyamba walinghaniapo munofu.
GEN 2:22 Yawe Leza waakitile mwanakazi na lolia lubali lu-aasomwene ku muntu mwalalume, ni kumutwala ozo mwanakazi kuli mwalalume.
GEN 2:23 Mwalalume waalandile evi, “Ozu i kikuza kya mu bikuza byane, ni munofu wa mu munofu wane. Evi alikuya wakuutua mwanakazi pantu afumiiziwe ku mwalalume.”
GEN 2:24 Ni pakako, kubalua mwalalume waakaba wasia se ni nghina ni kuya kulundana na mukazi wakue, ni bo baakaaluka mubili umo.
GEN 2:25 Mwalalume ni mukazi wakue baali bali sie bwamba, inzi tebaali baunvua busoni.
GEN 3:1 Kizoka kyaali kyakengeele kukila nama yonse ya mu kisonso yaalengelue na Yawe Leza. Kizoka kyaamwipuziizie mwanakazi, “Ati, ni kiine Leza waamikaniizie kulia mazabo a ku bimuti byonse bya mu bukaba?”
GEN 3:2 Mwanakazi wa-asukile evi, “Mazabo a ku bimuti byonse bya mu bukaba kuti twalia,
GEN 3:3 inzi Leza waalandile nangue, ‘Tekuti mukalie buzabo bwa ku kimuti kili pa bukata bwa bukaba, anzia kukumiako, pantu nga mwaakafua.’”
GEN 3:4 Kizoka kyaamwasukile mwanakazi, “Mwandi, temukafua.
GEN 3:5 Pantu Leza amanine nangue busiku bumwakaba kulia azo mazabo, menso enu akaba kwizuka, ni mwe mwakaba kwaluka nga Leza mu kumana biweme ni bibiipile.”
GEN 3:6 Mwanakazi lu-aamwene nangue mazabo a ku kekio kimuti aali aweme kuliiwa, ni aweme mu kumoneka, kabili apalilile kumuletela mulangue, waakunwineko buzabo, walia, wamupeelako mulume wakue, ni ye walia.
GEN 3:7 Penka papo, menso abo bonse babili aizuka ni kwinika nangue baali bali bwamba. Kupwako, babamba kutunga kumo maani a kimuti kya miku kuti bavwale.
GEN 3:8 Mwalalume ni mwanakazi lubaunvwile Yawe Leza walimukwenda mu bukaba musita wa kyungulo kwasyataleele, baamufyeme mu bimuti bya mu bukaba.
GEN 3:9 Yawe Leza waamukuutile muntu ni kumwipuzia, “Uli pi?”
GEN 3:10 Ni ye wa-asukile evi, “Naunvwanga lizui lyobe mu bukaba, ni ne natiinanga pantu ngiile nali bwamba, kusyali kufyama!”
GEN 3:11 Leza waamwipuziizie evi, “Eba! Nani wakwananga nangue wiile wali bwamba? Eba! Walyanga buzabo bwa ku kimuti kinakikukaania kuliako?”
GEN 3:12 Mwaalume wa-asukile evi, “Ozu mwanakazi uwan'mpeele i wan'mpelanga buzabo, ni ne nalia.”
GEN 3:13 Kabili Yawe Leza waamwipuziizie mwanakazi, “Ati, wakitilangaki evio?” Mwanakazi wa-asukile evi, “Kizoka i kyan'mbeepanga, ni ne nalia.”
GEN 3:14 Ni pakako, Yawe Leza waakyanine kizoka nangue, “Pantu wakitanga evio, watiipua pa nama yonse iliyateekua ni ya mu kisonso. Kutula lelo, waya wasyaendela na kavumo ni kuya walia lufunko nsiku yonse ya bukose bobe.
GEN 3:15 Ndikubiika bulwani pakati kobe ni mwanakazi, ni pakati ka luvyalo lobe ni lwa mwanakazi. Luvyalo lwa mwanakazi lwaakasyesyeta mutue obe, ni we waakasuma kasinghino kakue.”
GEN 3:16 Kabili Yawe waamwanine mwanakazi nangue, “Naakakizia maavia mu kuvyala kobe, pa kuvyala baana waakaba wakisua. Kutona kobe kwaakaba kwali ku mulume obe, kabili i waakaba wakuteekele.”
GEN 3:17 Yawe waamwanine mwalalume nangue, “Pantu waitabilanga bintu byalandanga mukazi obe ni kulia buzabo bwa ku kimuti kinakikukaania kuliako, bulongo bwatiipua pa mulandu obe. Mu bukose bobe bonse waakaba wabombesia na maka pa kusanga bilio.
GEN 3:18 Mu bulongo mwaakaba mwamena sie lubamba ni myunga, kabili waakaba walia saasa wa mu kisonso.
GEN 3:19 Mu kubombesia ni mu kusulwila kobe i muwaakaba wasangila bilio, mpaka paukabwelela ku bulongo kuwaafumine. Uli lufunko, waakabwelela ku lufunko.”
GEN 3:20 Mwalalume, liina lyakue Adamu, waamwinikile mukazi wakue liina lya Eva, pantu ozo i wa-alukile nghina wa bantu bonse.
GEN 3:21 Kabili Yawe Leza waabakitiile bivwalo bya mpapa ya nama ni kubavwika.
GEN 3:22 Kabili Yawe Leza waalandile evi, “Evi muntu wa-aluka nga fwefue mu kumana biweme ni bibiipile. Ni pakako, tapalile kupeelua nsambu ya kukununa buzabo bwa ku kimuti kya bukose ni kulia evi akeekalilila muyayaya.”
GEN 3:23 Yawe Leza waamukumbile Adamu mu bukaba bwa mu Edeni, evi aye alime mu bulongo bu-abumbiilueko.
GEN 3:24 Leza lu-aamukumbile Adamu mu bukaba, waabiikile makerubi pa nghingililo ya ku kabanga ka bukaba bwa mu Edeni, ni kipanga kya mulilo kyaali kyazyunguluka konse konse kusakilila nzila ya kuya ku kimuti kya bukose.
GEN 4:1 Adamu waaleele ni mukazi wakue Eva, ni ye waimitile ni kuvyala mwana mwalalume. Eva waalandile evi, “Ozu mwana napeelua na Yawe.” Ni pakako, waamwinikile Kaini.
GEN 4:2 Pa kyamba, waavyele unge mwana mwalalume ni kumwinika Abeli. Abeli waali wali kateeka wa mikooko, inzi Kaini waali mulimi.
GEN 4:3 Busiku bumo Kaini waatwele ngelelo ya buzombozi kuli Yawe.
GEN 4:4 Abeli ni ye waatwele libeli wa pa mikooko yakue, waipaya ni kufumiako munofu unonene kuti ube ngelelo. Yawe waawamiinue na Abeli pamo ni ngelelo yakue,
GEN 4:5 inzi taawaamiinue na Kaini pamo ni ngelelo yakue. Ni pakako, Kaini waafiitiisiwe mpaka ni pa menso pakalabana.
GEN 4:6 Yawe waamwipuziizie Kaini, “Eba, ale wafiitiluaki? Kabili wakalabaniiziaki pa menso?
GEN 4:7 Mona we Kaini uwamyenge, nga wawaminwanga. Inzi pantu waluvyanga, kibalo kikupembeele kyalimukukeba ku kuteeka. Inzi upalile kukyanzia.”
GEN 4:8 Kaini waamwanine mwalawakue Abeli nangue, “We mwalawane, twende mu kisonso.” Lubaafikile mu kisonso, Kaini waamwalukiile Abeli ni kumwipaya.
GEN 4:9 Yawe waamwipuziizie Kaini, “Mwalaobe ali pi?” Wa-asukile nangue, “Ne nsimanine. Eba! Nene i musungi wakua mwalawane?”
GEN 4:10 Kabili waamwipuziizie evi, “Wakitangaki? Mulopa wakua mwalaobe uwazuumiizyanga pa bulongo ulimukundilila.
GEN 4:11 Evi wewe watiipua ni kukumbua pa bulongo bwaizulanga kanua kakue ni kupokelela mulopa wakua mwalaobe waazuumiiwanga na kuboko kobe.
GEN 4:12 Paukalima mu bulongo, tebukakuleetela kibwezia, inzi waakaba wali kanukunta mwaya kyalo.”
GEN 4:13 Kaini waamwanine Yawe, “Kukanda kuwankanda kwangaviizia, nsivinda kusipikizia.
GEN 4:14 Mona wankumba mu keno kyalo ni ku menso obe. Evi naakaba nali sie kanukunta mwaya kyalo, ni onse waakan'mona, waakangipaya.”
GEN 4:15 Yawe waamwanine Kaini, “Onse waakakwipaya, waakalandwilua nghendo kilooba.” Ni pakako, Yawe waamubiikile kalangi, evi onse waakamumona tekuti akamwipaye.
GEN 4:16 Kaini waafumine ku menso akua Yawe ni kuya kwikala mu kyalo kya Nodi, nkendo ili ku kabanga ka Edeni.
GEN 4:17 Kaini waaleele ni mukazi wakue, ni ye waimitile ni kuvyala mwana mwalalume ni kumwinika Enoki. Kaini waakuulile muzi ni kuwinika liina lya mwana wakue mwalalume.
GEN 4:18 Enoki waavyele mwana mwalalume ni kumwinika Iradi, Iradi waavyele Mehuyaeli, Mehuyaeli waavyele mwana mwalalume ni kumwinika Metushaeli, Metushaeli waavyele Lameki.
GEN 4:19 Lameki waupile banakazi babili, umo waali wakuutua Ada, ni unge waali wakuutua Zila.
GEN 4:20 Ada waavyele Yabali waali kikolue wa bantu baali baikala mu maema ni kuya bali bateeki ba nama.
GEN 4:21 Mwalawakue waali wakuutua Yubali. Ozo mwalawakue i kikolue wa balia baali balizia bilimba ni mimpyeta.
GEN 4:22 Zila waavyele Tubali-Kaini. Ozo muntu i waali mutili wa bibombelo bya misango ilekenkeene, bya mukuba ni bya kyela. Nkaziize kwa Tubali-Kaini waali wakuutua Naama.
GEN 4:23 Lameki waabaanine bakazi bakue babili, “Ada ni Zila, ntwilizie mwe bakazi bakua Lameki unvue twebo twane. Nene nakiipaya muntu wakinkisia, mulumendo pantu wakinghuma.
GEN 4:24 Kaini kine waakalandwilua nghendo kilooba, Lameki waakalandwilua nghendo 77.”
GEN 4:25 Kabili Adamu waaleele ni mukazi wakue, Eva lu-aimitile waavyele unge mwana mwalalume ni kumwinika Seti. Waalandile evi, “Leza wan'mpeela unge mwana mwalalume wa kupyanikizia pali Abeli waipailue na Kaini.”
GEN 4:26 Seti ni ye waavyele mwana mwalalume ni kumwinika Enoshi. Ozo musita bantu i ubaatendekeelepo kumupupa Yawe ni kubombia Liina lyakue.
GEN 5:1 Keki i kitabu kya nvyalo yakua Adamu. Leza lu-aalengele muntu, waamukitile wapaleene ni Leza.
GEN 5:2 Leza waalengele mwalalume ni mwanakazi, waabapaalile ni kubenika liina lya muntu bobo busiku bubaalengelue.
GEN 5:3 Adamu lu-aakumaniizie myaka 130, waavyele mwana mwalalume mu lukebu lwakue, wapaleene nakue ni kumwinika Seti.
GEN 5:4 Pa kyamba kya kuvyala Seti, Adamu waikeele pa kyalo myaka 800 ni kuvyala bange baana balalume ni banakazi.
GEN 5:5 Adamu waafwile wali na myaka 930.
GEN 5:6 Seti lu-aakumaniizie myaka 105, waavyele mwana mwalalume ni kumwinika Enoshi.
GEN 5:7 Pa kyamba kya kuvyala Enoshi, Seti waikeele pa kyalo myaka 807 ni kuvyala bange baana balalume ni banakazi.
GEN 5:8 Seti waafwile wali na myaka 912.
GEN 5:9 Enoshi lu-aakumaniizie myaka 90, waavyele mwana mwalalume ni kumwinika Kenani,
GEN 5:10 pa kyamba kya kuvyala Kenani, Enoshi waikeele pa kyalo myaka 815 ni kuvyala bange baana balalume ni banakazi.
GEN 5:11 Enoshi waafwile wali na myaka 905.
GEN 5:12 Kenani lu-aakumaniizie myaka 70, waavyele mwana mwalalume ni kumwinika Mahalaleli.
GEN 5:13 Pa kyamba kya kuvyala Mahalaleli, Kenani waikeele pa kyalo myaka 840 ni kuvyala bange baana balalume ni banakazi.
GEN 5:14 Kenani waafwile wali na myaka 910.
GEN 5:15 Mahalaleli lu-aakumaniizie myaka 65, waavyele mwana mwalalume ni kumwinika Yaredi,
GEN 5:16 pa kyamba kya kuvyala Yaredi, Mahalaleli waikeele pa kyalo myaka 830 ni kuvyala bange baana balalume ni banakazi.
GEN 5:17 Mahalaleli waafwile wali na myaka 895.
GEN 5:18 Yaredi lu-aakumaniizie myaka 162, waavyele mwana mwalalume ni kumwinika Enoki,
GEN 5:19 pa kyamba kya kuvyala Enoki, Yaredi waikeele pa kyalo myaka 800 ni kuvyala bange baana balalume ni banakazi.
GEN 5:20 Yaredi waafwile wali na myaka 962.
GEN 5:21 Enoki lu-aakumaniizie myaka 65, waavyele mwana mwalalume ni kumwinika Metusela.
GEN 5:22 Pa kyamba kya kuvyala Metusela, Enoki waendele pamo ni Leza myaka 300, kabili waavyele ni bange baana balalume ni banakazi.
GEN 5:23 Enoki waafwile wali na myaka 365.
GEN 5:24 Enoki waendele pamo ni Leza, kabili taamwenekele pantu waatwemue na Leza wakosele.
GEN 5:25 Metusela lu-aakumaniizie myaka 187, waavyele mwana mwalalume ni kumwinika Lameki,
GEN 5:26 pa kyamba kya kuvyala Lameki, Metusela waikeele pa kyalo myaka 782 ni kuvyala bange baana balalume ni banakazi.
GEN 5:27 Metusela waafwile wali na myaka 969.
GEN 5:28 Lameki lu-aakumaniizie myaka 182, waavyele mwana mwalalume
GEN 5:29 ni kumwinika Noa. Waalandile evi, “Ozu i waakatusansamusia kukonkana ni miilo ikolele itulitwabomba pa kyalo kyaatiipilue na Yawe.”
GEN 5:30 Pa kyamba kya kuvyala Noa, Lameki waikeele pa kyalo myaka 595 ni kuvyala bange baana balalume ni banakazi.
GEN 5:31 Lameki waafwile wali na myaka 777.
GEN 5:32 Noa lu-aakumaniizie myaka 500, waavyele Shemu, ni Hamu, ni Yafeti.
GEN 6:1 Bantu lubaatendekele kusanduluka pa kyalo, baali bavyala ni baana banakazi.
GEN 6:2 Baana bena Leza lubaamwene nangue bakazyana bena bantu baali baweme, baisaakwiliilepo bamo kuba bali bakazi babo.
GEN 6:3 Yawe waalandile evi, “Mweo wane teukikanzyania na muntu muyayaya pantu wene ni wa kufua. Kutula lelo, myaka yakue teikikaba yakila pa myaka 120.”
GEN 6:4 Mu ezio nsiku Banefili baali bali pa kyalo. Pa kyamba baana bena Leza lubaile kuupa baana banakazi bena bantu, baavyelemo baana balalume. Babo i baali bali babipami ba bantu baali bamanikile pa ozo musita.
GEN 6:5 Yawe lu-aamwene nangue bubi bwa muntu bwakila pa kyalo, ni kumona nangue malanga a mu mutima wakue lyonse aali akila kubiipa,
GEN 6:6 Yawe waunvwile bulanda pantu waalengele muntu pa kyalo, ni mutima wakue waamukisile.
GEN 6:7 Yawe waalandile evi, “Nakaba kulovia muntu unaalengele pa kyalo, bonse muntu ni nama, ni bilibyayibula pamo ni tooni twa mu lweleele. Naunvua bulanda pantu naabilengele.”
GEN 6:8 Inzi Noa waali watonenue na Yawe.
GEN 6:9 Leli i lyasi lyakua Noa ni luvyalo lwakue. Noa waali wali mulunghami ni wa kisinka mu bantu ba pa musita wakue, kabili waali waenda ni Leza.
GEN 6:10 Noa waavyele baana balalume batatu, Shenu, Hamu, ni Yafeti.
GEN 6:11 Leza waamwene nangue kyalo kyainooneka, ni kukitilana bibiipile kwakila kukumana mwaya kyalo.
GEN 6:12 Leza waakentele ni kumona nangue kyalo kyabiipa pantu bantu bonse baali baikeele mu bwikazi bubi.
GEN 6:13 Leza waamwanine Noa nangue, “Mpeleezio ya bantu bonse yakumana pantu bubi bwabo bwaizula mu kyalo kyonse. Kabili nakaba kubaloviizia pamo ni kyalo.
GEN 6:14 We Noa, nakwana ukite safina ikata ya mbao ilumine, ni kuputulamo miputule, ukabe kusubako kabulimbu mukati ni panze.
GEN 6:15 Ukabe kukita safina ileepele metre 133, ni mu bukata metre 22, ni mu kutuuluka metre lyanondo ni itatu.
GEN 6:16 Ukabe kukitako mutenge ni kusiako mando ali ni santimetre 44. Ukabe kukitamo mpungu itatu yateekaleene yali ni mulyango mumbali,
GEN 6:17 pantu nakaba kubunzia kyalo ni kwinoona bilengua byonse bikose. Bilengua byonse bili pa kyalo byakaba kufua.
GEN 6:18 Inzi nakaba kupinghana nobe. Wewe ukengile mu safina ni mukazi obe, ni baana bobe balalume pamo ni bakazi babo.
GEN 6:19 Kabili pa bilengua byonse bikose ukabe kubuulapo bibili bibili ni kubingizia mu safina, ukabisunge byakosele kilume ni kikota.
GEN 6:20 Ukabe kubuula misango yonse ya nama, ni misango yonse ya tooni, ni ya byonse bilibyayibula. Bebi byonse, byaakeeza kuli wewe bibili bibili kuti ukabisunge byakosele.
GEN 6:21 Ukabe kubuula misango yonse ya bilio ukabe kubisunga, evi wewe ni nama pamo ni tooni mukabe mwabilia.”
GEN 6:22 Noa waakitile bintu byonse nga mwa-aniinue na Leza.
GEN 7:1 Yawe waamwanine Noa nangue, “Ale ingila mu safina pamo ni lupua lobe pantu nakikumona wali mulunghami pa bantu bonse.
GEN 7:2 Buulapo mpe kilooba ya misango yonse ya nama isambikile ndume ni ikota, inzi nama itiikeene ubuulepo mpe imo imo ndume ni ikota.
GEN 7:3 Kabili buula mpe kilooba ya misango yonse ya tooni tulume ni tukota. Ukite evio kumona sie misango yonse ya nama ni ya tooni ikasungue bwino, evi ikavyalane paakale ni kuvula pa kyalo,
GEN 7:4 pantu kwasyala nsiku kilooba nkabe kunokia nvula pa kyalo. Ezio nvula yakaba kunoka nsiku 40 busiku ni koba. Nakaba kwinoona bilengua byonse bikose binaalengele pa kyalo.”
GEN 7:5 Noa waakitile bintu byonse bya-aninue na Yawe.
GEN 7:6 Kyalo lukyaabundile, Noa waali wali na myaka 600.
GEN 7:7 Noa ni mukazi wakue ni baana bakue balalume pamo ni bakazi babo, baingiile mu safina evi tekuti bafue na azo menda a kibunda.
GEN 7:8 Misango yonse ya nama ni ya tooni kilume ni kikota, bisambikile ni bisisambikile pamo ni bilibyayibula pansi,
GEN 7:9 byaingiile bibili bibili mu safina pamo ni Noa nga mwaalandiile Leza.
GEN 7:10 Pa kyamba kya nsiku kilooba, kibunda kyaizile pa kyalo.
GEN 7:11 Noa lu-aali na myaka 600, mu mwezi wa bubili pa nsiku lyanondo ni kilooba, menda aabambile kusula na maka mu tusulo. Mu muulu ni mo mwaabambile kwituluka menda.
GEN 7:12 Ezio nvula yaanokele pa kyalo nsiku 40 busiku ni koba.
GEN 7:13 Bobo bwenka busiku, Noa ni mukazi ni baana bakue balalume batatu, Shemu, ni Hamu, ni Yafeti pamo ni bakazi babo, baingiile mu safina.
GEN 7:14 Baingiile mu safina pamo ni nama ya mu kisonso mu misango yayo. Nama ya kuteekua mu misango yayo, ikata ni iniini, ni bilibyayibula pansi mu misango yabyo, ni tooni pamo ni byonse bilibyapupuka mu misango yabyo.
GEN 7:15 Bilengua bikose, bibili bibili kilume ni kikota, byaingiile mu safina pamo ni Noa.
GEN 7:16 Kubalua kilengua kikose, kilume ni kikota byaingiile mu safina nga mwa-aniinue Noa na Leza. Kupwako, Yawe wamwizalila Noa.
GEN 7:17 Nvula yaatwaliliile kunoka mpaka nsiku 40 busiku ni koba. Menda aizwile pa kyalo mpaka ni safina yabamba kweleela.
GEN 7:19 Menda aizwile pa kyalo mpaka ni mpili yonse yatibila.
GEN 7:20 Azo menda atwaaliliile kwizula pa kyalo mpaka metre kilooba kufuma peulu lupili luleepeesie.
GEN 7:21 Kubalua kilengua kikose kyaali kyaenda pa kyalo, kyoni, ni nama wa kuteekua ni nama wa mu kisonso, ni kilikyayibula pa kyalo pamo ni muntu, byaafwile.
GEN 7:22 Bilengua byonse byaali byapeema pano pa kyalo byaafwile.
GEN 7:23 Yawe waloviizie bilengua byonse bya pano pa kyalo. Waaloviizie bantu ni nama pamo ni byoni. Paasyele sie Noa ni balia baali wali nabo mu safina.
GEN 7:24 Menda aasyele aizwile pa kyalo nsiku 150.
GEN 8:1 Leza waamulangulukile Noa ni bilengua byonse bikose bi-aali nabio mu safina. Leza waabuusiizie mwela pa kyalo, ni menda aatendekele kuya akama.
GEN 8:2 Monse mwaali mwafuma menda pansi mwaasinkile, lyulu lyaizalikile, ni nvula yaakatile,
GEN 8:3 menda aatwaliliile kuya akama buke buke mpaka nsiku 150.
GEN 8:4 Pa busiku bwa lyanondo ni kilooba mwezi wa kilooba, safina yaikeele peulu mpili ya Ararati.
GEN 8:5 Menda aatwaliliile kukeepa. Mu mwezi wa lyanondo pa busiku bwa mambo, mpili yaatendekele kumoneka.
GEN 8:6 Lupaapitile nsiku 40, Noa waizwile nzota
GEN 8:7 ni kutuma kazooko. Kazooko tekaabwelele, inzi kaali kaya kazyunguluka sie mu lweleele mpaka musita waakamine menda pa kyalo.
GEN 8:8 Kabili Noa waatumine kakunda kaye kamone kine menda akeepa pa kyalo,
GEN 8:9 inzi pantu menda aali teanakame pa kyalo kyonse, kakunda tekaamwene nkendo ya kuya kwikalapo. Ni pakako, kaabweleele kuli Noa. Noa wakakwata ni kukengizia mu safina.
GEN 8:10 Pa kyamba kya mulungu umo, kabili Noa waafumiizie kakunda mu safina ni kukatuma.
GEN 8:11 Bobo bwenka busiku kyungulo, kakunda kaabwelele katweme lyani lya muzeituni ku mulomo. Noa i lu-ainikile nangue menda akeepa.
GEN 8:12 Kabili Noa waapembeele ni unge mulungu. Waatumine kakunda paakale. Lolo lwendo lwene kakunda tekaabwelele.
GEN 8:13 Noa lu-aakumaniizie myaka 601, mu mwezi wa mambo pa busiku bwa mambo, menda aakamine pa kyalo. Noa waatupukwile ntupiko ya safina, ni kiine wamwene menda akamine.
GEN 8:14 Mu mwezi wa bubili pa nsiku 27, Musili waumine.
GEN 8:15 Leza waamwanine Noa nangue,
GEN 8:16 “Fuma mu safina, wewe ni mukazi obe, ni baana bobe balalume pamo ni bakazi babo.
GEN 8:17 Fumia kubalua kilengua kikosele ki-uli nakio mu safina, byoni, ni nama pamo ni kubalua kilengua kya pa kyalo, evi bivyalane ni kusanduluka pa kyalo.”
GEN 8:18 Ni kiine Noa waafumine pamo ni mukazi wakue, ni baana bakue balalume pamo ni bakazi babo.
GEN 8:19 Nama ni byoni pamo ni bilengua byonse bikose byaali byali mu safina, byaafumine.
GEN 8:20 Noa waamukuuliile Yawe kitale. Waabuulilepo misango yonse ya bilengua bisambikile, pa nama ni tooni, ni kubiziziizia byonse pa kitale kuti bibe ngelelo.
GEN 8:21 Yawe waawamiinue na bunu bwa ngelelo yaaziziiziwe. Yawe waalandile evi, “Nsikikatiipa kabili kyalo pa mulandu wa muntu, anzia kine malanga a muntu abiipile kutula ku bulumendo bwakue. Kabili nsikikeenoona bilengua byonse bikose mu ozu musango.
GEN 8:22 Lyonse kyalo lukikilipo, kuli kwaya kwali musita wa kubyala ni musita wa kuzombola, musita wa kasama ni musita wa lyuza, musita wa mwela ni musita wa likungulu, musita wa koba ni musita wa busiku, ni byo byaakabeelelela.”
GEN 9:1 Leza waamupaalile Noa pamo ni baana bakue balalume wabaana nangue, “Vyalane musanduluke evi luvyalo lobe lwizuzie kyalo.
GEN 9:2 Nama yonse ya pa kyalo ni tooni tonse twa mu lweleele, ni bilengua byonse bilibyayibula pansi, ni masabi onse a mu lyezi, byaakaba byaunvua mwezo ni kumitiina. Kabili namipeela buvinde pa bintu byonse bya pa kyalo.
GEN 9:3 Nama ya misango yonse ikosele yaakaba bilio byenu nga vinaamipeele saasa ulekenkeene.
GEN 9:4 Inzi tekuti mukaliililile nama pamo ni mulopa wakue, pantu i bukose bwakue.
GEN 9:5 Kisinka naakakita kibwelezi pa mulopa wa bukose bwenu, naakakita kibwelezi ku muntu ni ku nama, ni ku muntu ni muntu nakue.
GEN 9:6 Ozo waakeetila mulopa wa muntu, ni ye mulopa wakue waakeetilua na muntu, pantu muntu waalengelue wapaleene ni Leza.
GEN 9:7 “Inzi mwemue vyalane musanduluke evi luvyalo lobe lwizuzie kyalo.”
GEN 9:8 Kabili Leza waamwanine Noa ni baana bakue balalume nangue,
GEN 9:9 “Unvue, napinghana nenu pamo ni nvyalo yenu.
GEN 9:10 Napinghana na bilengua byonse bikose: Toni tonse, ni nama yonse ya kuteekua pamo ni nama yonse ya mu kisonso imwakifuma nayo mu safina.
GEN 9:11 Napinghana nenu nangue, nene nsikikeenoona kabili bilengua bikose na kibunda. Kabili tekukaba kinge kibunda kyaakeenoona kyalo.”
GEN 9:12 Leza waabaanine nangue, “Kaka i kalangi ka kipingo kinapinghana nenu pamo ni bilengua byonse bikose, kalangi ka muyayaya ku nvyalo yonse ya ku ntanzi.
GEN 9:13 Nabiika mukolanvula mu malezi kuti ube kalangi ka kipingo kinapinghana na kyalo.
GEN 9:14 Naakaba nakita kine nakolonghania malezi, ni mukolanvula wamoneka mu malezi,
GEN 9:15 naakaba nalangakana kipingo kinapinghana nenu, ni nama yonse ni tooni tonse pamo ni bilengua byonse bikose nangue nsikikabinoona kabili na kibunda.
GEN 9:16 Mukolanvula paukaba wamoneka mu malezi, naakaba nakentako kuti nanguluke kipingo kya muyayaya kili pakati kane ni bilengua byonse bikose bya pa kyalo.”
GEN 9:17 Leza waamwanine Noa, “Kaka i kalangi ka kipingo kinapinghana na bilengua byonse bikose bya pa kyalo.”
GEN 9:18 Meena a baana balalume bena Noa baafumine mu safina ni aza: Shemu, ni Hamu, Ni Yafeti. Hamu i waavyele Kanaani.
GEN 9:19 Babo baana batatu balalume bena Noa i babikolue ba bantu bonse baasalangheene mwaya kyalo.
GEN 9:20 Noa wa-alukile mulimi. Kabili i waali wa mambo kulima bukaba bwa mizabibu.
GEN 9:21 Busiku bumo Noa waaminine divai, wakolua, ngubo yakue yaapenukile paali waleele mu liema lyakue.
GEN 9:22 Hamu, se kwa Kanaani, lu-aamwene se waleele bwamba, waile kubwilako Shemu ni Yafeti.
GEN 9:23 Shemu ni Yafeti lubaunvwile evio, baatweme ngubo pa nkombe, babamba kuya nayo kinfwefue mpaka kuya kumuvimba sibo. Bene tebaamukentele sibo waali waleele bwamba.
GEN 9:24 Noa lu-aakololokelue ni kumana vyaakitile mwana wakue Hamu,
GEN 9:25 waalandile evi, “Kanaani atiipue! Kabili aye wali muzia wakua Shemu ni Yaferi.”
GEN 9:26 Kabili waalandile evi, “Yawe, Leza wakua Shemu apaalue! Kanaani aye wali muzia wakua Shemu!
GEN 9:27 Leza avuzie bunonsi bwakua Yafeti. Yafeti ekale mu maema akua Shemu, ni Kanaani aye wali muzia wakua Yafeti.”
GEN 9:28 Pa kyamba kya kibunda, Noa waikeele pa kyalo myaka 350.
GEN 9:29 Noa waafwile wali na myaka 950.
GEN 10:1 Noa waavyele baana batatu balalumenke: Shemu, ni Hamu, pamo ni Yafeti. Babo batatu ni bo baavyele baana balalume pa kyamba kya kibunda.
GEN 10:2 Yafeti waavyele Gomeri, ni Magogi, ni Madai, ni Yavani, ni Tubali, ni Mesheki, pamo ni Tirasi.
GEN 10:3 Gomeri waavyele Ashkenazi, ni Rifati, pamo ni Togarma.
GEN 10:4 Yavani waavyele Elisha, ni Tarshishi, ni Kitimu, pamo ni Dodanimu.
GEN 10:5 Babo i babikolue ba bantu baali baikeele mu bilila. Ezi i nvyalo yakua Yafeti yaali yaikeele kubalua mukowa mu kyalo kyakue. Kubalua libumba lyaali lyalanda lulimi lwakue.
GEN 10:6 Hamu waavyele Kushi, ni Misri, ni Puti, pamo ni Kanaani.
GEN 10:7 Kushi waavyele Seba, ni Havila, ni Sabuta, ni Raama, pamo ni Sabuteka. Raama i waavyele Sheba ni Dedani.
GEN 10:8 Kushi waavyele Nimrodi. Ozo Nimrodi i waali kalwisia wa maka pa kyalo.
GEN 10:9 Waali wali mbwela wa nama mwine mwine ku menso akua Yawe. Ni pakako, bantu balibalanda nangue, “Nga Nimrodi mbwela wa nama mwine mwine ku menso akua Yawe.”
GEN 10:10 Ntendeko ya bukolo bwakue yaali mu Babeli, ni mu Ereki, ni mu Akadi, pamo ni mu Kalne mu kyalo kya Sinari.
GEN 10:11 Nimrodi lu-aafumine koko, waile ku Asuria, wakuulako muzi wa Ninawe, ni muzi wa Rehoboti-Iri, ni muzi wa Kala,
GEN 10:12 pamo ni muzi ukata wa Reseni, muzi uli pa bukata bwa muzi wa Ninawe ni wa Kala.
GEN 10:13 Misri waavyele Baludia, ni Ba-anamu, ni Baleabu, ni Banafutui,
GEN 10:14 ni Bapatrusi, ni Bakaslui. Babo i babikolue ba Bafilistini ni Bakaftori.
GEN 10:15 Kanaani waavyele Sidona waali libeli wakue, kabili waavyele Heti.
GEN 10:16 Kanaani ni ye waali wali kikolue wa Bayebushi, ni Ba-amori, ni Bagirgashi,
GEN 10:17 ni Bahivi, ni Ba-ariki, ni Basini
GEN 10:18 ni Ba-arvati, ni Basemari, pamo ni Bahamati. Pa kyamba, nvyalo ya Bakanaani yaasalangheene.
GEN 10:19 Mipaka ya kyalo kyabo yaali yafumine ku Sidona yaile lya ku Gerasi mpaka ku Gaza. Kabili yaali yapitile lya ku Sodoma, ni lya ku Gomora, ni lya ku Adima, pamo ni lya ku Seboimu mpaka ku Lasha.
GEN 10:20 Ezi i nvyalo yakua Hamu yaali yaikeele kubalua mukowa mu kyalo kyakue. Kubalua libumba lyaali lyalanda lulimi lwakue.
GEN 10:21 Shemu, mukuluube kwa Yafeti, i waali kikolue wa Baeberi bonse.
GEN 10:22 Shemu waavyele Elamu, ni Ashuri, ni Arpakishadi, ni Ludi, pamo ni Aramu.
GEN 10:23 Aramu waavyele Uzi, ni Huli, ni Geteri, pamo ni Mashi.
GEN 10:24 Arpakishadi waavyele Sela. Sela ni ye waavyele Eberi.
GEN 10:25 Eberi waavyele baana babili balalume: Umo waali wakuutua Pelegi, pantu waavyelue musita ubaakaseene kyalo mu mikoa mikoa. Ni unge wainikilue Yoketani.
GEN 10:26 Yoketani waavyele Almodadi, ni Shelefu, ni Asarmaveti, ni Yera,
GEN 10:27 ni Hadoramu, ni Uzali, ni Dikla,
GEN 10:28 ni Obali, ni Abimaeli, ni Sheba,
GEN 10:29 ni Ofiri, ni Avila, pamo ni Yobabu. Babo bonse baali ba mu luvyalo lwakua Yoketani.
GEN 10:30 Kyalo kibaali baikeelemo kyaali kyatendekeele ku Mesha kine ulimukuya ku Sefari ku kapili ka ku kabanga ka kyalo.
GEN 10:31 Ezi i nvyalo yakua Shemu yaali yaikeele kubalua mukowa mu kyalo kyakue. Kubalua libumba lyaali lyalanda lulimi lwakue.
GEN 10:32 Babo bantu bonse ba mu luvyalo lwakua Noa, i ntundu yaafumine mu baana balalume bena Noa, ntundu yaasalangheene mwaya kyalo kyonse pa kyamba kya kibunda.
GEN 11:1 Pa ozo musita, bekala kyalo bonse baali balanda sie lulimi lumo ni twebo tumo.
GEN 11:2 Lubaali baya lya ku kabanga, baafikile mu lulambe lwa Sinari, ni momo i mubaikeele.
GEN 11:3 Baalanzyaniizie nangue, “Emwe, ize tukite mabiliki ni ku-azizia bwino.” Pa kifuka kya mabue, baakitile mabiliki, ni kukuulila na kabulimbu.
GEN 11:4 Baalandile nangue, “Tukuule muzi ni munara ufikile mu lyulu pakuti tuye twamanikile evi tekuti tukasalanghanine mwaya kyalo.”
GEN 11:5 Yawe waakookele kuya kumona muzi wa munara waali wakuulua na bena bantu.
GEN 11:6 Yawe waalandile evi, “Baba bantu bali mu mutundu umo, kabili balimukulanda lulimi lumo, ni ezi ikili sie ntendeko ya miilo yabo. Tekuli kyaakabanzia kukita kelia kiboomiine kukita.
GEN 11:7 Ale tukooke tuye tuvulunghanie nandilo yabo, evi tekuti bonvwane.”
GEN 11:8 Ni pakako, Yawe waabasalanghaniizie pa kyalo kyonse. Ni bo baalekeele kukuula muzi.
GEN 11:9 Evi muzi wainikilue Babeli, pantu papo Yawe i pa-aavulunghaniizie lulimi lwa bantu bonse. Kutula papo, Yawe waabasalanghaniizie mwaya kyalo.
GEN 11:10 Ezi i nvyalo yakua Shemu. Pa kyamba kya kibunda lupaali pasyapitile myaka ibili, Shemu lu-aakumaniizie myaka 100, waavyele mwana mwalalume ni kumwinika Arpakisadi.
GEN 11:11 Pa kyamba kya kuvyala Arpakisadi, Shemu waikeele pa kyalo myaka 500 ni kuvyala bange baana balalume ni banakazi.
GEN 11:12 Arpakisadi lu-aakumaniizie myaka 35, waavyele Sela.
GEN 11:13 Pa kyamba kya kuvyala Sela, Aripakisadi waikeele pa kyalo myaka 403 ni kuvyala bange baana balalume ni banakazi.
GEN 11:14 Sela lu-aakumaniizie myaka 30, waavyele mwana mwalalume ni kumwinika Eberi.
GEN 11:15 Pa kyamba kya kuvyala Eberi, Sela waikeele pa kyalo myaka 403 ni kuvyala bange baana balalume ni banakazi.
GEN 11:16 Eberi lu-aakumaniizie myaka 34, waavyele Pelegi.
GEN 11:17 Pa kyamba kya kuvyala Pelegi, Eberi waikeele pa kyalo myaka 430 ni kuvyala bange baana balalume ni banakazi.
GEN 11:18 Pelegi lu-aakumaniizie myaka 30, waavyele Reu.
GEN 11:19 Pa kyamba kya kuvyala Reu, Pelegi waikeele pa kyalo myaka 209 ni kuvyala bange baana balalume ni banakazi.
GEN 11:20 Reu lu-aakumaniizie myaka 32, waavyele Serugi.
GEN 11:21 Pa kyamba kya kuvyala Serugi, Reu waikeele pa kyalo myaka 207 ni kuvyala bange baana balalume ni banakazi.
GEN 11:22 Serugi lu-aakumaniizie myaka 30, waavyele Nahori.
GEN 11:23 Pa kyamba kya kuvyala Nahori, Serugi waikeele pa kyalo myaka 200 ni kuvyala bange baana balalume ni banakazi.
GEN 11:24 Nahori lu-aakumaniizie myaka 29, waavyele Tera.
GEN 11:25 Pa kyamba kya kuvyala Tera, Nahori waikeele pa kyalo myaka 119 ni kuvyala bange baana balalume ni banakazi.
GEN 11:26 Tera lu-aakumaniizie myaka 70, waavyele Abramu, ni Nahori pamo ni Harani.
GEN 11:27 Ezi i nvyalo yakua Tera se kwa Abramu, ni se kwa Nahori pamo ni Harani. Harani i waavyele Loti.
GEN 11:28 Harani waafwiliile mu kyalo ki-aavyaliiluemo, mu Uri, muzi wa Bakaldayo. Ozo musita sibo Tera waali wakikosele.
GEN 11:29 Abramu waupile Sarai, Nahori ni ye waupile Milka mwana mwanakazi mwina Harani. Harani i waavyele Milka ni Iska.
GEN 11:30 Sarai muka Abramu taali na mwana pantu waali nghumba.
GEN 11:31 Tera waamutweme mwana wakue Abramu ni mwinzikulu wakue Loti mwana mwalalume mwina Harani, pamo ni Sarai muka mwana wakue Abramu. Tera waafumine nabo mu Uri mu muzi wa Bakaldayo ni kuya nabo mu kyalo kya Kanaani. Inzi lubaafikile ku Harani, baikeele koko.
GEN 11:32 Tera waafwiliile ku Harani wali na myaka 205.
GEN 12:1 Yawe waamwanine Abramu nangue, “Fuma mu kyalo kyobe, sia bantu bobe pamo ni nghanda yakua so uye waya mu kyalo kindikukulangisia.
GEN 12:2 “Nene naakakukita kuba mutundu ukata, kabili naakakupaala. Naakalengia liina lyobe kumanika, ni we waakaba wali mapaalo.
GEN 12:3 Olia waakakupaala, ni ne naakamupaala. Inzi olia waakakutiipa, ni ne naakamutiipa. Kabili ntundu yonse ya pa kyalo yaakapaalilua muli wewe.”
GEN 12:4 Abramu waafumine mu Harani nga mwaalandiile Yawe. Pa ozo musita, Abramu waali wasyali na myaka 75. Loti ni ye waile pamo nakue.
GEN 12:5 Abramu waile ni mukazi wakue Sarai pamo ni Loti mwana mwalalume mwina mwalawakue Harani, kabili waatweme bunonsi bwabo pamo ni bantu babaanonkele mu Harani, ni kutendeka lwendo, waya kwingila nabo mu kyalo kya Kanaani. Lubaafikile ku Kanaani,
GEN 12:6 Abramu waile waendooka mu kyalo mpaka waya kufika ku muzi wa kimuti kikata kya More kya ku Sekemu. Pa ozo musita, Bakanaani baali bakikeele sie mwenka momo mu Kanaani.
GEN 12:7 Yawe waamumonekeele Abramu ni kumwana nangue, “We Abramu, keki i kyalo kinaakapeela nvyalo yobe.” Ku ezio nkendo, Abramu i ku-aamukuuliile Yawe kitale.
GEN 12:8 Abramu lu-aafumine papo, waile ku kapili ku kabanga ka muzi wa Beteli ni kuya kwimikako liema lyakue pa bukata bwa Beteli ni Ai. Beteli yaali yali ku mboosi, ni Ai yaali yali ku kabanga. Koko kwenka ku Ai, Abramu i ku-aamukuuliile Yawe kinge kitale ni kumupupa Yawe.
GEN 12:9 Kabili Abramu waatwaliliile kuya. Waile walungi ku Negebu.
GEN 12:10 Nzala luyaakilile mu Kanaani, Abramu waile kwikalanke ku Misri nga mweni.
GEN 12:11 Lu-aali wasyafika ku Misri, waamwanine mukazi wakue Sarai nangue, “N'manine nangue wewe uli mwanakazi aweme lukebu.
GEN 12:12 Bamisri pabaya kukumona ni kwinika nangue uli mukazi wane, baya bangipaye, ni we uye usyale wakosele.
GEN 12:13 Kansi pabaya kukwipuzia, uye ubaasuke nangue uli nkazyamwine pantu kine uye ulande evio, nakaba kusungua bwino.”
GEN 12:14 Abramu waile kufika mu Misri. Bantu ba mu Misri lubaamumwene Sarai, baamwene nangue ozo mwanakazi waali wakilile kuwama.
GEN 12:15 Babiloolo ni bo lubaamumwene, baile kumutasiizia Likolo Farao. Kupwako, bamutwama ni kumutwala ku nghanda yakua Farao.
GEN 12:16 Farao waamukitiile Abramu bintu biweme pa mulandu wakua Sarai, ni pakako waapeelue mikooko ni nghombe, ni punda ndume ni ikota, ni ba bombi balalume ni banakazi, pamo ni nghamia.
GEN 12:17 Inzi Yawe waamulwalikile Farao pamo ni bantu ba mu nghanda yakue, pantu waamutweme Sarai muka Abramu kuti aye wali mukazi wakue.
GEN 12:18 Farao waamukuutile Abramu ni kumwipuzia nangue, “Abramu, ni kiki kiwakinkitila? Ale wakinghaninaki nangue Sarai te mukazi obe?
GEN 12:19 Ale kabili wakilandilaki nangue Sarai ni nkaziizo? Wewe i wakilengia nene n'mutwame ni kumwalula mukazi wane. Ewe, mutwame mukazi obe uye waya.”
GEN 12:20 Farao wa-anine bantu bakue bamuseekezie Abramu ni mukazi wakue pamo ni bintu byonse bi-aali nabio.
GEN 13:1 Abramu ni mukazi wakue pamo ni byonse bi-aali nabio, baafumine ku Misri ni kuya ku Negebu.
GEN 13:2 Abramu waakilile kuba munonsi wa biteekua, ni wa mutofue pamo ni wa oro.
GEN 13:3 Waafumine ku Negebu mpaka waya kufika ku Beteli, palia paali waimikilenke liema lyakue pa bukata bwa Beteli ni Ai.
GEN 13:4 Papo i paali ni kitale ki-aakuulile pa mambo. Pa ezio nkendo Abramu i paali wamupupila Yawe.
GEN 13:5 Loti waile pamo ni Abramu, ni ye waali wakwete bisepe bya nghombe ni mikooko, kabili waali wakwete ni maema.
GEN 13:6 Inzi nkendo ya kulisiiziamo nama yabo yaamwenekele kukeepa, pantu baali bateekele nama ingi. Ni keki i kyaalengele tekuti bekale pamo.
GEN 13:7 Basungi ba biteekua byakua Abramu ni basungi ba biteekua byakua Loti baatendekele kukankabula. Ozo musita Bakanaani ni Baperizi, baali bakikeele sie mu kekio kyalo.
GEN 13:8 Abramu Waamwanine Loti, “Ewe, mona fwefue tuli benenke. Bantu bobe ni bantu bane, tebapalile kuya bakankabula.
GEN 13:9 Ni pakako, namona kuti tulekenkane. Saakula nkendo i utonene. Kine ulikuya lya kuso, nene ndikuya lya kulio, kine ulikuya lya kulio, nene ndikuya lya kuso.”
GEN 13:10 Loti waakentele ni kumona lulambe lonse lwa Yordani, mpaka ku Zoari kwaali kwali menda engi nga bukaba bwakua Yawe, ao nga kyalo kya Misri. Pa ozo musita Yawe waali tanainoone mizi ya Sodoma ni Gomora.
GEN 13:11 Loti waasaakwile lulambe lonse lwa Yordani ni kuya lya ku kabanga. Evi i vibaalenkenkeene.
GEN 13:12 Abramu waikeele mu kyalo kya Kanaani. Loti wene waikeele pa bukata bwa mizi mu lulambe ni kwimika maema akue pepi ni Sodoma.
GEN 13:13 Inzi bantu ba mu Sodoma baali bali babi ni ba bibalo bingi ku menso akua Yawe.
GEN 13:14 Loti lu-aile, Yawe waamwanine Abramu nangue, “Kenta lya ku nkungua ni lya ku nkungulua, kabili kenta lya ku kabanga ni lya ku mboosi.”
GEN 13:15 Yawe wamwanine Abramu nangue, “Keki kyalo kyonse kiwamona, naakakupeela wewe ni nvyalo yobe kuti kikabe kyenu lonse.
GEN 13:16 Naakakita nvyalo yobe kuba nga lufunko lwa pa kyalo, nvyalo isikavinda kupendua na muntu. Inzi kine muntu waakavinda kupenda lufunko lwa pa kyalo, ni vyalo yobe waakavinda kuipenda.
GEN 13:17 Ale endo waya mu kuleepa ni mu kutana kwa kyalo pantu i kindikukupeela.”
GEN 13:18 Abramu waakuusiizie liema ni kuya kwikala pepi na bimuti bya Mamure ku Hebroni ni kukuulako kitale kyakua Yawe.
GEN 14:1 Amrafeli likolo wa ku Sinari, ni Arioki likolo wa ku Elasari, ni Kedori-Laomeri likolo wa ku Elamu, pamo ni Tidali likolo wa ku Goimu,
GEN 14:2 baile kulua na Bera likolo wa ku Sodoma, ni Birsa likolo wa ku Gomora, ni Sinabu likolo wa ku Adima, ni Semeberi likolo wa ku Zeboimu, pamo ni likolo wa ku Bela (i Zoari).
GEN 14:3 Azo makolo asaano pamo ni balukale babo baakolongheene mu lulambe lwa Sidimu. Pa ono musita i muli Lyezi lya Mukele.
GEN 14:4 Azo makolo aabombeele likolo Kedori-Laomeri myaka lyanondo ni ibili. Inzi mu mwaka wa lyanondo ni itatu, azo makolo aasangukile.
GEN 14:5 Mu mwaka wa lyanondo ni ina, Kedori-Laomeri ni makolo a-aunvwene nao pamo ni balukale babo, baumine Barifaimu mu Hasteroti-Karnaimu, ni Bazuzimu mu Hamu, ni Baemi mu Sawe-Kiriataimu,
GEN 14:6 ni Bahoriti ku lupili lwa Seiri. Baile babakumbile mpaka kubafikia ku Eli-Parani pepi ni kaseeba.
GEN 14:7 Kabili baabweleele ku Eni-Misipati (kulikwakuutua Kadeshi), baumine kyalo kya Ba-amaleki, ni Ba-amori baali baikeele mu Hasasoni-Tamari.
GEN 14:8 Kabili likolo wa ku Sodoma, ni wa ku Gomora, ni wa ku Adima, ni wa ku Zeboimu, pamo ni wa ku Bela (i Zoari), baile kutantama mu lulambe lwa Sidimu pakuti balue nabo.
GEN 14:9 Kedori-Laomeri likolo wa ku Elamu, ni Tidali likolo wa ku Goimu, ni Amrafeli likolo wa ku Sinari, pamo ni Arioki likolo wa ku Elasari. Aza makolo ana aile kulua na makolo asaano.
GEN 14:10 Mu lolo lulambe lwa Sidimu mwaali mwali biina bingi bya kabulimbu. Likolo wa ku Sodoma ni wa ku Gomora lubaabutukile, baile kuponena mu biina. Inzi babo bange batatu baabutukiile ku mpili.
GEN 14:11 Azo makolo ana aatweme bunonsi bonse bwa mu Sodoma ni mu Gomora pamo ni bilio ni kuya nabio.
GEN 14:12 Loti mwina mwalawakue kwa Abramu waali waikeele mu Sodoma, ni ye kumo waatwaminiinue pamo ni bintu byakue.
GEN 14:13 Kwaali muntu umo waabutukile ku bobo bului ni kuya kutwala mpunda kuli Abramu. Abramu waali Muebrania waali waikeele pepi na bimuti byakua Mamure Muamori wa kwakue kwa Eskoli, ni wa kwakue kwa Aneri. Baba i baali bamukwasia Abramu.
GEN 14:14 Abramu lu-aunvwile nangue mwana mwina mwalawakue akwetue, waakolonghaniizie balalume 318 ba mu nghanda yakue, bantu baali basambiliziiziwe bului. Baile babakonkele mpaka ku Dani.
GEN 14:15 Musita wa busiku, Abramu waabasalanghaniizie bantu bakue mu mabumba mabumba ni kuya kusakukila balwani babo. Waaboomine ni kubakumba mpaka ku Hoba, ku nkungua ya Damaski.
GEN 14:16 Ni pakako, waabweziizie bintu byonse, ni kumubwezia Loti mwina mwalawakue pamo ni bintu byakue byonse. Kabili waabweziizie banakazi pamo ni bange bantu.
GEN 14:17 Abramu lu-aafumine ku kuuma balwani bakue, Kedori-Laomeri pamo ni ange makolo a-aunvwene nao, likolo wa ku Sodoma waile kusensekela Abramu mu lulambe lwa Sawe (ao Lulambe lwakua Likolo).
GEN 14:18 Ni Melkisedeki waali likolo wa ku Salemu, kabili waali kitambua wakua Leza Kabezia Mpungu, waatwele mukate ni divai kuli Abramu,
GEN 14:19 ni kumupaala walimukulanda nangue, “Abramu apaalue na Leza Kabezia Mpungu, Kalenga wa lyulu ni kyalo!
GEN 14:20 Alumbue Leza Kabezia Mpungu waakupeele maka a kuuma balwani bobe!” Abramu ni ye waamupeele Melkisedeki kamo ka pa lyanondo ka pa bintu byonse.
GEN 14:21 Likolo wa ku Sodoma waamwanine Abramu, “N'mpeeleko sie bantu we usyale ni bobo bunonsi.”
GEN 14:22 Abramu wa-anine likolo wa ku Sodoma nangue, “Nene nalapa ntanzi yakua Yawe Leza Kabezia Mpungu, Kalenga wa lyulu ni kyalo
GEN 14:23 nangue, nene nsitwamapo kantu pa bintu byobe byonse, anzia kine ni nyunzi ao mukonda wa pa nkwabilo, evi tekuti ukalande nangue, ‘Nene i waamunonsiizie Abramu.’
GEN 14:24 Inzi wewe lipako sie bilio byaaliile balukale ni kulipa bantu bankwasiizie: Aneri, ni Eskoli, pamo ni Mamure, evi baye nabio.”
GEN 15:1 Bebio byonse lubyaapitile, Yawe waamwanine Abramu mu kimonua nangue, “Tekutiina pantu nene ndi kisoolelo kyobe ni kilambu kyobe kikata.”
GEN 15:2 Abramu waipuziizie evi, “We Yawe Kabezia Mpungu, waakan'mpeelaki? Pantu nene nsili na mwana. Kubako Eliezeri wa ku Damaski i waakapyana bintu byane?”
GEN 15:3 Abramu waalandile evi, “Mona nene tewan'mpeele luvyalo. Kansi ozu mubombi wa mu nghanda yane i waakaba mupyani wa bintu byane!”
GEN 15:4 Yawe waamwanine Abramu nangue, “Ozu mubombi takaba mupyani wa bintu byobe, inzi mwana obe mwalalume wakwivyalila i waakaba mupyani wa bintu byobe!”
GEN 15:5 Yawe waamufumiiziizie Abramu panze ni kumwana nangue, “Ale kenta mu lyulu upende ntanda kine uli kuvinda kupenda.” Kabili wamwana nangue, “Evi nvyalo yobe i viyaakaba yavulile.”
GEN 15:6 Abramu waamuketekeele Yawe. Ni pakako, Yawe waamumwene wali mulunghami.
GEN 15:7 Kabili waamwanine evi, “Mona nene ndi Yawe waakufumiizie mu Uri mu kyalo kya Bakaldayo ni kukupeela keki kyalo kuti kibe kyobe.”
GEN 15:8 Abramu waipuziizie evi, “We Yawe Kabezia Mpungu! Ale kuti namana syani nangue kyaakaba kyane?”
GEN 15:9 Yawe waamwasukile evi, “Ale n'mpeelepo nghombe musoka wa myaka itatu, ni mbuzi mukota wa myaka itatu, ni mpanga wa myaka itatu, ni kibondo kya nkunda pamo ni kya kipeele.”
GEN 15:10 Abramu waatweme nama, waibazula pa bukata, ni kubiika bibazu byakenteene. Inzi byoni byene taabibazwile.
GEN 15:11 Ni makubi lu-aakookeele pa bibazu bya nama, Abramu wa-akumbile.
GEN 15:12 Koba lukaali kasyazimina, Abramu waonene tulo tukata, kabili waunvwile mwezo wa nfinzi ikata.
GEN 15:13 Yawe waamwanine evi, “Nvyalo yobe yaakaba yeni mu kyalo nghwana, kabili baakaba bazia ba bene kyalo, ni bo baakeemiwa na bene kyalo myaka 400.
GEN 15:14 Naakakanda ntundu yaakabateeka buzia, ni pa kyamba, baakafuma batweme bunonsi bwingi.
GEN 15:15 Inzi wewe waakafua wali ni mutende. Kabili waakaziikua wali ni bukote buweme.
GEN 15:16 Ni luvyalo lwa buna lwaakabwelela pano pantu bubi bwa Ba-amori tebunaakumane.”
GEN 15:17 Koba lukaazimiine, paizile nfinzi ikata. Kyunsi kikata pamo ni libeebe lyaamwenekele lyalimukupita pa bukata bwa bibazu bya nama.
GEN 15:18 Bobo busiku Yawe waakitile kipingo ni Abramu ni kumwana nangue, “Napeela keki kyalo ku nvyalo yobe kutula ku lyezi lya ku Misri mpaka ku mwenzi ukata wa Efrati,
GEN 15:19 pamo ni ku kyalo kya Bakeni, ni kya Bakenesi, ni kya Bakadmoni,
GEN 15:20 ni kya Bahiti, ni kya Baperizi, ni kya Barefaimu,
GEN 15:21 ni kya Ba-amori, ni Kya Bakanaani, ni kya Bagirgasi, pamo ni kya Bayebusi.”
GEN 16:1 Sarai muka Abramu waali wali nghumba. Inzi abanga wali ni mubombi umo mukazyana Mumisri liina lyakue Hagari.
GEN 16:2 Sarai waamwanine Abramu nangue, “Unvua, Yawe tan'mpeele luvyalo lwa kuvyala baana, kansi laala sie na ozu mubombi wane pantu pange waakanvyalila mwana.” Abramu waitabiile.
GEN 16:3 Sarai muka Abramu waabuulile mubombi wakue Hagari wa ku Misri ni kumupeela Abramu kuti aye wali mukazi mwanike. Bebi bintu byaakitikile Abramu lu-aali wasyaikeele myaka lyanondo mu Kanaani.
GEN 16:4 Abramu waaleele na Hagari, ni ye waimita. Hagari lu-ainikile nangue waimita, Sarai waamwenekele wa mpuni kuli Hagari.
GEN 16:5 Sarai waamwanine Abramu, “Bubi bwane bube pali wewe. Nene naakupeele mubombi wane mu nkulo yobe. Inzi lu-akimona nangue waimita, wakin'mona wampuni. Yawe atupingule, nene ni wewe!”
GEN 16:6 Abramu ni ye waamwanine Sarai, “Mona mubombi obe ali mu minue yobe, mukitile muutoneene.” Sarai waamwemizie, ni ye mpaka wamubutuka.
GEN 16:7 Malaika wakua Yawe waamusangile Hagari mu kaseeba pa kasulo ka menda, kasulo kaali mumbali nzila yaali yaile ku Suri
GEN 16:8 ni kumwana nangue, “We Hagari mubombi wakua Sarai, ulimukufuma pi? Kabili ulimukuya pi?” Wene wa-asukile evi, “N'mbutukile yangulenzi Sarai.”
GEN 16:9 Malaika wakua Yawe waamwanine evi, “Bwela uye umunakile nokolenzi.”
GEN 16:10 Kabili malaika wakua Yawe waamwanine evi, “Naakasandulula nvyalo yobe, ni yo teikapendeka kukonkana ni viyaakaba yavulile.”
GEN 16:11 Malaika wakua Yawe waamwanine evi, “Mona wewe wimisi, wakaba kuvyala mwana mwalalume, kabili wakaba kumwinika liina lyakue Isimaeli pantu Yawe wakyunvua malilo a maavia obe.
GEN 16:12 Ni ye waakaba nga punda wa mu kisonso pakati ka bantu. Waakaba mulwani wa bantu bonse, ni bantu bonse baakaba balwani bakue, ni bwikazi bwakue bwaakaba bwa bulwani ku lupwa lwakue lonse.”
GEN 16:13 Hagari waakuutile Liina lyakua Yawe u aalandile nakue. “Wewe uli Leza Aliwan'mona.” (Mu Kiebrania ni El-Roi) Pantu waalandile evi, “Na mumona aliwan'mona.”
GEN 16:14 Ni pakako, keki kiina kya menda i kikilikyakuutilua Beer-Lahai-Roi, ni kyo kili pa bukata bwa Kadesi ni Beredi.
GEN 16:15 Hagari waamuvyaliile Abramu mwana mwalalume, Abramu waamwinikile Isimaeli olia mwana waavyelue na Hagari.
GEN 16:16 Abramu waali na myaka 86 lu-aavyaliilue Isimaeli na Hagari.
GEN 17:1 Abramu lu-aakumaniizie myaka 99, Yawe waamumonekeele ni kumwana nangue, “Nene ndi Leza wa Maka onse, enda ku ntanzi yane ni kuba wapwililikile.
GEN 17:2 Ni ne naakakita kipingo kyane pakati kane ni wewe, kabili naakakila kusandulula nvyalo yobe.”
GEN 17:3 Kupwako, Abramu walaala kyuba, ni Leza waamwana nangue,
GEN 17:4 “Nene nakita kipingo ni wewe, ni we waakaba kikolue wa ntundu ingi.
GEN 17:5 Teukikakuutua kabili Abramu, inzi waya wasyakuutua Abrahamu pantu nakukita kuba kikolue wa ntundu ingi.
GEN 17:6 Naakavuzia nvyalo yobe, naakakukita kuba ntundu, ni makolo aakafuma muli wewe.
GEN 17:7 “Naakeemika kipingo pakati kane ni wewe, ni pakati ka nvyalo yobe ya ku ntanzi pamo ni nvyalo yabo kuti kikabe kipingo kya muyayaya. Pantu naakaba Leza obe, ni Leza wa luvyalo lobe lwa ku ntanzi.
GEN 17:8 Keki kyalo kimwikeelemo mwali baeni, kyalo kyonse kya Kanaani, naakakupeela wewe pamo ni luvyalo lobe lwa ku ntanzi kuba bupyani bwa muyayaya, ni nene naakaba Leza wabo.”
GEN 17:9 Leza waamwanine Abrahamu, “Ni we ukasunge bwino kipingo kyane, wewe pamo ni luvyalo lobe lwa ku ntanzi pamo ni nvyalo yabo.
GEN 17:10 Ni keki i kipingo kimwakaba kusunga pakati kenu, wewe ni luvyalo lobe lwa ku ntanzi. Kubalua mwalalume pakati kenu apalile kuteetua yando.
GEN 17:11 Mukabe mwateeta yando. Kaka i kaakaba kalangi ka kipingo pakati kane ni mwemue.
GEN 17:12 Mwana mwalalume wa nsiku mwanda pakati kenu apalile kuteetua yando, pamo ni olia avyelue mu nghanda yobe ao asitilue na nfolanga, ni kubalua mweni asili wa mu luvyalo lobe.
GEN 17:13 Olia avyelue mu nghanda yobe, ni asitilue na nfolanga yobe apalile kuteetua yando, kako i kalangi kaakaba ku mibili yenu, kalangi ka kipingo kyane kya muyayaya.
GEN 17:14 Ni mwalalume asiteetelue yando, waakafumiiwa pa ba kwakue pantu enoonene kipingo kyane.”
GEN 17:15 Leza waamwanine Abrahamu nangue, “Sarai mukazi obe teukiya wamukuuta Sarai, inzi waya wasyamukuutua Sara.
GEN 17:16 Naakamupaala, kabili naakakupeela mwana kupitila muli wene. Naakamupaala, ni ye waakaba nghina wa ntundu, ni makolo a bantu aakafuma muli wene.”
GEN 17:17 Abrahamu waaponene kyuba, waasekele ni kulandila mu mutima nangue, “Ati emwe! Ni kiine muntu wasyali na myaka 100 kuti wavyala ni mwana? Ni Sara ozu asyali na myaka 90 kuti wavyala?”
GEN 17:18 Abrahamu waamwanine Leza nangue, “Kansi nga wamuleka Isimaeli apokelele bulayo bobe.”
GEN 17:19 Inzi Leza waamwanine evi, “Ata, mukazi obe Sara waakakuvyalila mwana mwalalume, ni wewe waakamwinika liina lyakue Izaaki. Naakeemika sinta kipingo kyane pali wene ni nvyalo yakue kuti kikabe kya muyayaya.
GEN 17:20 Ni palwakua Isimaeli, nakikunvua. Naakamupaala ni kumusandulula. Kabili naakakila kumuvuzia. Waakavyala bakulu lyanondo ni babili, kabili naakamukita kuba mutundu ukata.
GEN 17:21 Inzi keki kipingo kyane naakakiimika sinta na Izaaki uwaakavyalilua na Sara pa musita nga ono ozu mwaka ulimukwiza.”
GEN 17:22 Kupwako, Leza walekela kulanda na Abrahamu, wamusia.
GEN 17:23 Bobo bwenka busiku, Abrahamu waamutweme Isimaeli pamo ni bonse baavyaliilue mu nghanda yakue, ni bonse baasitilue na nfolanga yakue, balalume bonse ba mu nghanda yakua Abrahamu, ni kuya kubateeta yando nga mwa-aniinue na Leza.
GEN 17:24 Abrahamu waateetelue yando wasyali na myaka 99.
GEN 17:25 Mwana wakue Isimaeli ni ye waateetelue yando wasyali na myaka 13.
GEN 17:26 Bobo bwenka busiku Abrahamu ni Isimaeli mwana wakue baateetelue yando.
GEN 17:27 Bantu bonse ba mu nghanda yakue, pamo ni baavyaliilue mu nghanda yakue, ni baasitilue na nfolanga ku baeni, baateetelue yando pamo nakue busiku bumo.
GEN 18:1 Kabili Yawe waamumonekeele Abrahamu lya ku bimuti bikata byakua Mamure lu-aali waikeele mu mulyango wa liema koba lukaali kazangukile.
GEN 18:2 Abrahamu waakentele ni kumona bantu batatu baimeene ku ntanzi yakue. Ni lu-aabamwene, waafumine lubilo mu mulyango wa liema ni kuya kusaakaana nabo. Kupwako, wafwinamina pansi
GEN 18:3 ni kulandapo na umo nangue, “We mulopue wane, kine kuti wangitabizia, nakulomba tekuti mupitilile pa mubombi wenu.
GEN 18:4 Pembelenke muleetelue menda aniini a kusamba ku makasa enu mane mutuuzie mwinsina kimuti,
GEN 18:5 n'mileetele ni ka kulia evi muteekieko mitima yenu, pa kyamba mane mulunduluke ni lwendo lwenu pantu mwaizanga kuli mubombi wenu.” Ni bo baalandile evi, “Ale kita muwalandila.”
GEN 18:6 Kupwako, Abrahamu waya lubilo lubilo mu liema ni kumwana Sara nangue, “Ewe, lenga uye uleete kilo 25 ya bunga buwamiisie ulenge ukite mikate.”
GEN 18:7 Kabili penka papo, wakundukila koko kwaali kisepe kya nghombe, watwamapo nghombe musoka enine ni kumutwala ku babombi balenge bamusinze.
GEN 18:8 Waabuulile mafuta ali afuma ku mabeele a nghombe, ni mabeele a kumina pamo ni bipusa byeleke, waya kubatwalila ku baali baikeele. Lubaali balimukulia, Abrahamu waali waimeene pambali mwinsina kimuti.
GEN 18:9 Baamwipuziizie Abrahamu, “Ewe, mukazi obe ali pi?” Wa-asukile nangue, “Ali mu liema.”
GEN 18:10 Yawe waalandile evi, “Kisinka nakaba kwiza kabili ozu mwaka waiza pa ono wenka musita, ni Sara mukazi obe wakaba kuvyala mwana mwalalume.” Sara ni ye waali waimeene ku kyamba kyakue lya ku mulyango watwiliziizie.
GEN 18:11 Abrahamu ni Sara baali basyakilile kukota, ni musita wakuvyala waali wasyapitile.
GEN 18:12 Sara lu-aunvwile evio, waasekeele sie mu mutima walanda nangue, “Kubako nasyakotele evi kuti nawaminua kulaala ni mulume wane mukote?”
GEN 18:13 Yawe waamwipuziizie Abrahamu, “Sara, wasekelaki evi ni kulanda nangue, ‘Kubako evi kuti navyala ni mwana nasyakotele?’
GEN 18:14 Eba, kuli ni kintu kili kya-anda kuli Yawe? Naakeeza kabili ozu mwaka waiza nga munalandilanga. Naakeeza kusanga mukazi obe Sara wavyele mwana mwalalume.”
GEN 18:15 Sara waakeene walanda nangue, “Nsisekele.” Pantu waali waunvwile mwezo. Inzi Yawe waamwanine evi, “Wasekanga.”
GEN 18:16 Balia bantu baafumine papo ni kulunghama lya ku Sodoma. Abrahamu waile kubaseekezia.
GEN 18:17 Yawe waalandile evi, “Nene nsivinda kumufiika Abrahamu bintu binghumiine kukita.
GEN 18:18 Pantu kulanda kisinka Abrahamu waakaba mutundu ukata waakaba walumine, ni muli wene ntundu yonse ya pa kyalo yaakapaaliluamo.
GEN 18:19 Pantu naamusaakwile kuti akabaane baana bakue pamo ni nghanda yakue pa kyamba kyakue kuti bakasunge nzila yakua Yawe, ni kukita nsambu pamo ni bupinguzi, pakuti Yawe ni ye akafikilizie bintu byonse bi-aamulaile Abrahamu.”
GEN 18:20 Yawe waalandile evi, “Pantu malilo a mu Sodoma ni mu Gomora akila, ni bibalo byabo byakila kuvula,
GEN 18:21 ndikukookelako ngie n'mone kine kibalimukukita kipaleene ni malilo anakyunvua, kine te evio nakaba kumana.”
GEN 18:22 Babo bantu babili baafuminepo ni kuya lya ku Sodoma, inzi Abrahamu waali wakiimeene ni Yawe.
GEN 18:23 Abrahamu waamupaleeme walanda nangue, “Ati, ni kiine wakaba kulovia bonse mulunghami ni mubi?
GEN 18:24 Kine mu muzi muli balunghami 50, wakaba kulovia muzi onse? Teukaba kubeeleela pa mulandu wa babo balunghami 50?
GEN 18:25 Nakupaapaata tekuti uye wipailile mulunghami pamo ni mubi, evi mulunghami tekuti aye wali nga mubi. Tekuti ukabe kukita evio. Eba, Mupinguzi wa kyalo kyonse tavinda kupingula mu nsambu?”
GEN 18:26 Yawe wa-asukile evi, “Kine naya kusangamo balunghami 50 mu Sodoma, nakaba kweleela muzi onse pa mulandu wabo.”
GEN 18:27 Abrahamu waalandile evi, “Natwalilila kulanda na Mulopue ne ali sie lufunko, kabili nali mito.
GEN 18:28 Ale kine pabula basaano pa balia balunghami 50, wakaba kulovia muzi onse pantu papusa bantu basaano?” Mulopue wa-asukile evi, “Kine naya kusangamo balunghami 45 nene nsikaba kulovia muzi.”
GEN 18:29 Kabili Abrahamu waipuziizie evi, “Ale kine bali sie 40?” Waamwasukile, “Kine bakabe 40, nsikakita kantu pa mulandu wa baba bantu 40.”
GEN 18:30 Abrahamu waalandile evi, “We Mulopue, tekufiitua. Ntonene nandepo kabili. Ale kine bali sie balunghami 30?” Waamwasukile, “Nsikakita kantu pa mulandu wa baba bantu 30.”
GEN 18:31 Abrahamu waalandile evi, “Natwalilila kulanda na Yawe, ale kine bali sie 20?” Waamwasukile, “Kine bali 20 nene nsikaba kubalovia.”
GEN 18:32 Abrahamu waalandile evi, “We Yawe, napaapaata tekufiitua. N'mpeleeziepo sie limo. Ale kine bali sie lyanondo?” Waamwasukile, “Kine bali lyanondo nsikaba kubalovia.”
GEN 18:33 Yawe lu-aapwile kulanda na Abrahamu, Waile. Abrahamu ni ye waabwelele kwakue.
GEN 19:1 Bobo bwenka busiku kyungulo, balia bamalaika babili baafikile mu Sodoma. Loti waali waikeele pa mulyango wa muzi wa Sodoma. Lu-aabamwene, waile kubasensekela. Lu-aafikile pa baali, waaleele kyuba
GEN 19:2 ni kubaana nangue, “Mwe balopue bane, namipaapaata twende mwingile mu nghanda yakua mubombi wenu, mulaale musambe ni ku makasa, mane lukeele lukeelekeele paakili mukatwalilile mu lwendo lwenu.” Ba-asukile evi, “Abe, fwefue tulikupunga sie pano penka panze.”
GEN 19:3 Inzi Loti waatwaliliile kubapaapaata mpaka bamwitabila ni kuya kwingila mu nghanda yakue. Loti waateaniizie matebeto, wabaapikila mikate isiliko ntutumusi. Ni bo balia.
GEN 19:4 Babo baeni lubaali tebanalaale, bantu ba mu Sodoma, balumendo ni bakote, baizile kuzyungulukila nghanda yaalimo baeni.
GEN 19:5 Baamwipuziizie Loti, “Balia baeni bawapokelanga keno kyungulo bali pi? Bafumiizie pano tupungule nabo.”
GEN 19:6 Loti waafumiine panze ni kusia waizalako.
GEN 19:7 Loti waabapaapaatile walanda nangue, “Mwe ba kwane, tekubakitile bintu bibiipile evio!
GEN 19:8 Unvue, ndi ni babinundue bane babili. Namipaapaata n'mbaleete kuli mwemue kuti mubakitile mumutoneene. Inzi tekuti mupungule na baeni, pantu basungilue bwino mu nghanda yane.”
GEN 19:9 Bene baalandile evi, “Wewe uli mweni mu ono muzi wetu! Eba, tewakeba kutupingula? Tupisie, kine wakaana, fwefue tulikukukitila kibiipile kukila baeni bobe.” Baamutintiile ku mulyango bakebele kupantula mulyango.
GEN 19:10 Inzi baeni bakua Loti baizwile mulyango, bamukulila Loti mukati ni kwizalako.
GEN 19:11 Babo bantu baali panze, bakulu ni banike, bauminue kafiifi na baeni bakua Loti mpaka ba-andua kumona mulyango.
GEN 19:12 Balia bantu babili baamwanine evi, Loti, “Kine mu ono muzi ulimo ni baana balalume ni baana banakazi, pamo ni bako bobe ao bantu ba kobe, baane bafumemo
GEN 19:13 pantu fwefue tulikwinoona ono muzi. Yawe wakyunvua malilo a ono muzi. Ni pakako, wakitwana kwiza kwinoona ono muzi.”
GEN 19:14 Loti waile kubaana balumendo baali basakile baana bakue nangue, “Lenge mufume mu ono muzi pantu Yawe alikwinoona ono Muzi.” Inzi bene baali baizi nangue alimukubasekia sie.
GEN 19:15 Lubwaali bwasyakia, bamalaika baamwanine evi, Loti, “Lenga ufumie mukazi obe ni baana bobe banakazi mukeeza kulobelela mu bubi bwa ono muzi.”
GEN 19:16 Loti lu-aali wasyatuubatuuba, bamalaika baamusakatiile ku kuboko kwakue ni kwa kwakua mukazi wakue pamo ni ku maboko a baana bakue banakazi babili pantu Yawe waamunvwiliile nkumbu. Baabafumiiziizie kunze ya muzi.
GEN 19:17 Kupwako, malaika umo wamwana nangue, “Butuka wipususie, tekwikebuka ao kwimana mu lulambe, butukila ku mpili ukeeza kuloba.”
GEN 19:18 Inzi Loti wa-asukile evi, “We mulopue, evio abe.
GEN 19:19 Mona, mubombi obe wamulanga buwame ni kumunvwila nkumbu mu kumupususia. Ni pakako, nsibutukila ku lupili nkakitikilua na kibiipile ni kufua.
GEN 19:20 Mona muzi uniini ozu uli papa pepi wa kubutukilamo. Eba, te uniini? Nakupaapaata ungitabizie, n'mbutukilemo, ngiipususie.”
GEN 19:21 Waamwasukile, “Ni makola, nakwitabizia nsikaba kwinoona ozo muzi.
GEN 19:22 Malaika waamwanine evi, Ale lenga ubutukilemo pantu nsivinda kukita kantu lu-usinafike ku ozo muzi.” Ni pakako, ozo muzi wainikilue Zoari. I kulanda nangue “kaniini.”
GEN 19:23 Loti lu-aafikile ku Zoari, koba kaali kasyatulile.
GEN 19:24 Kupwako, Yawe wanokia nvula ya mulilo mu muzi wa Sodoma ni wa Gomora, mulilo wa kibiliti kufuma mwiulu mwa Yawe.
GEN 19:25 Ni kulovia ezio mizi pamo ni lulambe lonse, ni bantu bonse baali balimo pamo ni byonse byaali byamenenemo.
GEN 19:26 Inzi muka Loti waali pa kyamba, waikebukile ni kwaluka lipumpu lya mukele.
GEN 19:27 Lukeele lwakue lukeelekeele, Abrahamu waile pa kifuka pa-aali waimeene ntanzi yakua Yawe.
GEN 19:28 Waakentele lya ku Sodoma ni lya ku Gomora ni mu lulambe lonse, waamwene kyunsi kyaafutumuka nga kyunsi kya mu kikuka kya mulilo.
GEN 19:29 Leza lu-ainoonene mizi ya mu lulambe yaali yaikeelemo Loti, Leza waalangulukile Abrahamu ni kumupususia Loti.
GEN 19:30 Loti ni baana bakue banakazi babili baile kwikala ku mpili mu lisele pantu waatiinine kwikala mu Zoari.
GEN 19:31 Mwana mukulu waamwanine mwalawakue nangue, “Situe wakota, kabili kono kutuli tekuli mwalalume wakutuupa kukonkana ni mibeele ya pa kyalo.
GEN 19:32 Kansi tumuminie situe divai, ni fwe tulaale nakue pakuti tumusungile situe luvyalo.”
GEN 19:33 Baamuminizie sibo divai bobo busiku, mwana mukulu waingiile ni kukumana nakue. Inzi Loti wene taamanine lwaaleele mwana ni lu-aabuukile.
GEN 19:34 Busiku bwaakonkelepo, mwana mukulu waamwanine mwalawakue, “Mona lukeele naakilaala ni tawe, kansi kabili tumuminie situe divai bono busiku, evi ni wewe uye ulaale nakue evi tusunge luvyalo lwakua situe.”
GEN 19:35 Baamuminiizie sibo divai, ni bobo busiku, mwana mwanike ni ye waile kulaala na se. Loti taamanine lwaleele mwana ni lu-aabuukile.
GEN 19:36 Evi i vyaimitile baana banakazi babili kuli sibo.
GEN 19:37 Mwana mukulu mwina Loti waavyele mwana mwalalume ni kumwinika Moabu. Ozo mwana i kikolue wa Bamoabu ni lenu kumo.
GEN 19:38 Mwana mwanike mwina Loti ni ye waavyele mwana mwalalume ni kumwinika Beni-Ami. Ozo mwana i kikolue wa Ba-amoni ni lenu kumo.
GEN 20:1 Abrahamu waafumine papo ni kuya ku kyalo kya Negebu, waile kwikala pa bukata bwa Kadesi ni Suri. Pa kyamba waile kwendela mu Gerari.
GEN 20:2 Abrahamu waalandile palua mukazi wakue Sara nangue, “Ozu ni nkazyamwine.” Abimeleki Likolo wa mu Gerari wa-anine bantu bamuleetele Sara.
GEN 20:3 Inzi Leza waamumonekeele Abimeleki busiku mu kilooto ni kumwana nangue, “Unvua, wafua wewe! Pantu watwamanga muka nghwana.”
GEN 20:4 Abimeleki ni ye waali tanapalamane nakue. Waamwanine evi, “Ati we Mulopue, ulikwipaya ntundu isili na mulandu?
GEN 20:5 Wene wakinghana nangue, Sara ni nkaziize. Mwanakazi ni ye wakinghana nangue, Abrahamu ni ndumeze. Nakikita evi na mutima waswetele.”
GEN 20:6 Leza waamwanine Abimeleki mu kilooto nangue, “Ee, n'manine nangue wewe wakikita evi na mutima waswetele, ni ne nakikukingilila tekuti ubale. Ni pakako, nsyakikulekeela kuti umukumie.
GEN 20:7 Ale kansi mubwezie ozu mwanakazi ku mulume wakue Abrahamu, pantu Abrahamu ni kabika, ni ye alikukulombela pantu wene ni kabika, ni we uli kuba mukose. Inzi kine teumubweziizie, umane nangue kisinka wakaba kufua pamo ni bonse bauli nabo.”
GEN 20:8 Abimeleki waabuukile paakili ni kukuuta babombi bakue bonse ni kubabwila milandu yonse. Ni babo bantu baatiinisie.
GEN 20:9 Kupwako, Abimeleki wamukuuta Abrahamu ni kumwipuzia nangue, “Ewe, ni kiki kiwaakitukitila? Ati, nene nakikuluviaki pakuti uleete kibalo kikata pali nene ni pa bukolo bwane? Waakinkitila bintu bisipalile.”
GEN 20:10 Kabili Abimeleki waamwipuziizie Abrahamu nangue, “Ati, wakilengiwa naki pakuti ukite evi?”
GEN 20:11 Abrahamu wa-asukile evi, “Nene nakimona nangue, kisinka pano tepali muntu aliwatiina Leza, kuti bangipaya pa mulandu wa mukazi wane.
GEN 20:12 Inzi kulanda kisinka ozu mwanakazi ni nkazyamwine pantu situe ni umo sie, inzi banghinetue i balekenkeene. Anzia kine kili evio, ozu ni mukazi wane.
GEN 20:13 Leza lu-aanghenziizie kufuma mu nghanda yakua tawe, naamwanine Sara nangue, ‘Konse kutwaakaba twaya ukabe wanandila biweme nangue nene ndi ndumezo.’”
GEN 20:14 Abimeleki waabuulile mikooko ni nghombe ndume pamo ni babombi balalume ni banakazi, wamupeela Abrahamu ni kumubweziizia mukazi.
GEN 20:15 Abimeleki waalandile evi, “Mona, keki kyalo kyonse kiumwene ni kyane, kuti waikala konse ku ulikutona.”
GEN 20:16 Kabili Abimeleki waamwanine Sara nangue, “Mona namupeela ndumezo nfolanga 1,000 kuti iye yali nfuto pa menso a bonse bauli nabo. Ni pakako, teuli na mulandu.”
GEN 20:17 Abrahamu waamulombele Leza, Leza wamukosia Abimeleki ni mukazi wakue pamo ni babombi bakue banakazi. Ni bo baavyele baana
GEN 20:18 pantu Yawe waali waimikile luvyalo lwa bantu ba mu nghanda yakua Abimeleki pa mulandu wakua Sara muka Abrahamu.
GEN 21:1 Yawe waizile kuli Sara nga mu-aalandiile. Yawe waamukitiile Sara nga mu-aalandiile.
GEN 21:2 Sara waimitile ni kumuvyalila Abrahamu mwana mwalalume wa mu bukote bwakue. Sara waavyele pa olia wenka musita waalandiilepo Leza.
GEN 21:3 Mwana waavyaliilue Abrahamu na Sara, Abrahamu waamwinikile liina lya Izaaki.
GEN 21:4 Izaaki lu-aakumaniizie nsiku mwanda, Abrahamu waamuteetele yando nga vya-aninue na Leza.
GEN 21:5 Izaaki lu-aavyelue, Abrahamu waali wasyali na myaka 100.
GEN 21:6 Sara waalandile evi, “Leza wane wanengia kuseka. Kubalua muntu wakaba kunvuako ezi mpunda, wakaba kuseka pamo nane.”
GEN 21:7 Kabili waatwaliliile kulanda nangue, “Emwe, nani waali wamanine nangue Abrahamu waakavyalilua baana na Sara! Inzi evi namuvyalila mwana mwalalume wa mu bukote bwakue.”
GEN 21:8 Mwana waakulile mpaka wasumunua. Busiku bwaasumwinue Izaaki, Abrahamu waakitile nsikunkulu ikata.
GEN 21:9 Sara waamwene mwana mwalalume mwina Hagari wa ku Misri waavyaliilue Abrahamu walimukumupunika mwana wakue Izaaki.
GEN 21:10 Sara waamwanine Abrahamu nangue, “Mukumbe ozu mwanakazi muzia pamo ni mwana wakue Isimaeli, pantu ozu mwana wakue takapyana pamo ni mwana wane Izaaki.”
GEN 21:11 Ozo mulandu waakilile kumubipila Abrahamu pantu Isimaeli ni ye waali mwana wakue.
GEN 21:12 Leza waamwanine Abrahamu, “Tekufiitua palwakua Isimaeli ni nghina Hagari, inzi konka sie twebo tonse twakwana Sara, pantu muli Izaaki i mwaakafuma nvyalo yobe.
GEN 21:13 Mwana mwalalume mwina mwanakazi muzia naakamukita kuba mutundu ukata, pantu ni ye ni mwana obe.”
GEN 21:14 Lukeele lwakue paakili, Abrahamu waabuukile ni kumupailila Hagari bilio ni menda a kumina mu mbukulu ya mpapa ya nama, wamutwika pa nkombe, ni kumwana ailepo ni mwana wakue. Ozo mwanakazi waile wazeezooka sie mu kaseeba ka Beri-Seba.
GEN 21:15 Menda a kumina lu-aapwile mu mbukulu ya mpapa ya nama, waamulaalikile mwana wakue mwinsina kavuule
GEN 21:16 ni kuya kwikala pa nkendo imo paleepele mu pepi metre 100 ni kulanda nangue, “Nsitonene kumona kufua kwa mwana wane.” Hagari lu-aali waikeele papo, waatendekele kulila wa-angwile.
GEN 21:17 Mwana ni ye waali walimukulila. Leza lu-aunvwile kulila kwa mwana, malaika wakua Leza kufuma mu mulu waamukuutile Hagari ni kumwana nangue, “Ati Hagari, wasakamanapoki papa? Unvua, tekutiina pantu Leza waunvwanga kulila kwa mwana obe.
GEN 21:18 Ale endo ubuusie mwana umusungilile, pantu naakamukita kuba mutundu ukata.”
GEN 21:19 Leza waamwizwile Hagari menso, ni ye waamwene kiina kya menda. Kupwako, waya kwizuzia menda mu mbukulu ya mpapa ya nama ni kumunwinsia.
GEN 21:20 Leza waali wali pamo ni ozo mwana, ni ye waakulile. Waile kwikala mu kaseeba ni kwaluka mbwela wa nama mu kubombia buta ni mivui.
GEN 21:21 Lu-aali waikeele mu kaseeba ka Parani, nghina waamukebeele mukazi wa ku Misri.
GEN 21:22 Pa ozo musita, Abimeleki ni Fikoli mukulu wa balukale bakue, baile kumwana Abrahamu nangue, “Leza obe ali pamo ni wewe mu bintu byonse bi-uliwakita.
GEN 21:23 Ale lapa mu kyeni kyakua Leza nangue teukikan'mbeepa ao kubeepa mwana wane, ao kubeepa mwinzikulu wane, inzi ukankitile biweme pamo ni keki kyalo kiwikeelemo nga evelia vinaakukitiile.”
GEN 21:24 Abrahamu waalandile evi, “Ee, ndikulapa.”
GEN 21:25 Kabili Abrahamu waamwanine Abimeleki nangue, “Nene nsiwamiinue pa mulandu wa kiina kya menda kyaapokelue na babombi bobe.”
GEN 21:26 Abimeleki waamwasukile evi, “Ewe, nene nsimanine muntu waakitile evio, ni we kumo tewan'mbwilileko, kabili nsinaunvuepo, ni evi vyenka lelo i kunvua.”
GEN 21:27 Kupwako, Abrahamu wabuula mikooko ni nghombe, wamupeela Abimeleki. Babo babili baakitile kipanghano.
GEN 21:28 Abrahamu waabuulile misoka kilooba ya mikooko ikota ni ku-ibiika pambali.
GEN 21:29 Abimeleki waamwipuziizie Abrahamu, “Ewe, ale ezi misoka kilooba ya mikooko ikota iwabiika pambali i kulanda syani?”
GEN 21:30 Abrahamu wa-asukile evi, “Ezi misoka ya mikooko ni ya kukupeela wewe, evi kiye kyali kisininkizizio kya kusininkizia nangue nene i mwine waimbile keki kiina kya menda.”
GEN 21:31 Ni pakako, pa ezio nkendo paakuutilue Beri-Seba i kulanda nangue, “Kiina kya menda kya kilooba ao kiina kya mulapo.” Pantu babo babili i pa baakitiile kipanghano.
GEN 21:32 Pa kyamba kya kwitabizyania ku Beri-Seba, Abimeleki ni Fikoli, mukulu wa balukale bakue, baabweleele ku kyalo kya Bafilistini.
GEN 21:33 Abrahamu waalimbilemo kamuti ka tamariski ni kukuutilapo Liina lyakua Yawe Leza wa muyayaya.
GEN 21:34 Abrahamu waikeele nsiku ingi mu kyalo kya Bafilistini wali mweni.
GEN 22:1 Pa kyamba, Leza waamweziizie Abrahamu. Leza waamukuutile, Abrahamu, Abrahamu ni ye waiteebe, “Ne ono pano.”
GEN 22:2 Leza waamwanine Abrahamu, “Ale twama mwana obe lyonga Izaaki, mwana u-utoneesie uye nakue mu kyalo kya Moria, uye umukite ngelelo ya kuzizia pa lupili lundikukulangilila.”
GEN 22:3 Abrahamu waabuukile paakili, waateania punda wakue, watwama babombi bakue babili pamo ni mwana wakue Izaaki, ni kutyaba nkuni ya ezio ngelelo ya kuzizia, watendeka lwendo waya mpaka kolia kwa-aninue na Leza.
GEN 22:4 Busiku bwa butatu, Abrahamu waamwene ku nkendo ku-aali walimukuya wakili kule.
GEN 22:5 Abrahamu waabaanine babombi bakue, “Syale pano ni ozu punda, nene ni ozu mulumendo tulikuya ku kupupa, pa kyamba mane tubwele.”
GEN 22:6 Kupwako, Abrahamu wamutwika mwana wakue Izaaki nkuni ya kuziziiziako ngelelo, ni ye watwamako mwele ni mulilo, bonse babili baya.
GEN 22:7 Izaaki waamukuutile se, “We tawe!” Se wa-asukile evi, “We mwana wane, ne ono pano.” Izaaki waamwipuziizie se, “Nkuni ni mulilo bebi. Ale musoka wa mukooko wakuti tukite ngelelo ya kuzizia ali pi?”
GEN 22:8 Abrahamu waamwasukile evi, “We mwana wane, Leza mwine alikwipeela musoka wa mukooko wa ngelelo ya kuzizia.” Kupwako, bonse babili batwalilila kuya.
GEN 22:9 Lubaile kufika kolia ku-aalangilue na Leza, Abrahamu waakuulile kitale, ni kulongapo nkuni, wamukaka mwana wakue Izaaki ni kumubiika pa kitale peulu nkuni.
GEN 22:10 Kupwako, Abrahamu wabuula mwele kuti amusinze mwana wakue.
GEN 22:11 Inzi malaika wakua Yawe kufuma mu muulu waamukuutile, “Abrahamu, Abrahamu!” Ni ye waitaba, “Ne ono pano.”
GEN 22:12 Malaika wamwana nangue, “Tekumukitila kintu kibiipile ao kumwipaya mwana obe. Evi nainika nangue ni kiine wewe umukindikile Leza, kabili umunakiile pantu tewakikaana kwelela mwana obe lyonga.”
GEN 22:13 Abrahamu lu-aikebukile, waamwene mpanga wakobelue na binkobankoba ku masengo akue. Waile kumukwata ni kwiza kumupyanika pa mwana wakue kuti aye wali ngelelo ya kuzizia.
GEN 22:14 Pa kekio kifuka Abrahamu wainikilepo liina lya “Yawe-Yire.” Ni pakako, i kikilikyalandilua nangue, “Pa lupili lwakua Yawe i payaakamoneka.”
GEN 22:15 Malaika wakua Yawe kufuma mu muulu waamukuutile Abrahamu lya bubili.
GEN 22:16 Ni kumwana nangue, “Yawe walanda nangue nalapa mu Liina lyane ne mwine nangue naakakupaala pantu tewakikaana kungelela mwana obe lyonga.
GEN 22:17 Kisinka naakakupaala, ni kusandulula nvyalo yobe, evi ikabe ingi nga ntanda ya mu lyulu, kabili nga musenga wa mumbali lyezi. Nvyalo yobe yaakanzia balwani babo.
GEN 22:18 Kupitila mu nvyalo yobe, ntundu yonse ya pa kyalo yaakapaalua pantu waanakiile mwano wane.”
GEN 22:19 Kupwako, Abrahamu wabwelelamo ku babombi bakue. Wabatwama ni kuya nabo ku Beri-Seba. Abrahamu waikeele koko ku Beri-Seba.
GEN 22:20 Pa kyamba kya bebi byonse, Abrahamu waaleeteelue mpunda nangue, “Milka wakimuvyalila mwaobe Nahori baana.”
GEN 22:21 Libeli wakue waali wakuutua Uzi, wa bubili waali wakuutua Buzi, waakonkelepo waali wakuutua Kemueli ozo waavyele Ba-aramu,
GEN 22:22 ni Kesedi, ni Hazo, ni Pildasi, ni Idilafu, pamo ni Betueli.
GEN 22:23 Betueli i waavyele Rebeka. Milka waamuvyaliile Nahori mwalawakue kwa Abrahamu baana balalume mwanda,
GEN 22:24 ni Reuma mukazi wa bubili waavyele Teba, ni Gahama, ni Tahasi, pamo ni Maaka.
GEN 23:1 Sara waikeele pa kyalo myaka 127
GEN 23:2 Sara waafwiliile ku Kiriati-Arba (i kulanda nangue Hebroni) mu kyalo kya Kanaani, ni Abrahamu waile paali mubili wakua Sara walimukulila ni kuloosia.
GEN 23:3 Abrahamu waafumine paali pabiikilue mubili wakua mukazi wakue, waya kubaana baana bakua Heti nangue,
GEN 23:4 “Nene kono ndi mweni ni mulendo pakati kenu, n'mpeeleko nkendo imulimwaziikapo, ni ne nziikepo mukazi wane evi aye wali kule ni nene.”
GEN 23:5 Bahiti baamwasukile Abrahamu.
GEN 23:6 “We mwinzio, unvua! Wewe uli mulombozi mukulu pakati ketu, tepali muntu alikukaana kukupeela kilibu kya kuziikamo mukazi obe. We muziike sie mu kilibu ki-ulikusaakulapo.”
GEN 23:7 Kupwako, Abrahamu wafwinamina bekala kyalo ni baana bakua Heti
GEN 23:8 ni kubaana nangue, “Mwe bamwinzio, kine mwangitabila kuziika mukazi wane kono, namilomba mumwane Efuroni mwana mwalalume mwina Zohari
GEN 23:9 ansisie lisele lya ku Makipela lili ku nkingo ya bukaba bwakue. Mumwane alande mutengo wa bolia bukaba pa menso enu, evi ikabe nkendo yane ya kuziikamo.”
GEN 23:10 Efuroni Muhiti waali waikeele pa bukata bwa baana bakua Heti, waamwasukile Abrahamu ntanzi ya baana bakua Heti pamo ni bonse baali baingila mu ozo muzi nangue,
GEN 23:11 “We mwinzio, unvua, nene nakupeela bukaba bonse pamo ni lisele lilimo, nakupeela bebi byonse pa menso a bantu bane. Ziikamo mukazi obe.”
GEN 23:12 Abrahamu waakontamiine ku bekala kyalo
GEN 23:13 ni kumwana Efuroni pa menso a bekala kyalo walanda nangue, “Inzi kine watona, nakulomba untwilizie. Ndikukusita bukaba. Ale twama nfolanga, ni ne ndikuziikamo mukazi wane.”
GEN 23:14 Efuroni waamwasukile Abrahamu nangue,
GEN 23:15 “We mwinzio, unvua, bobu bukaba kine bwasitua na shekeli 400, kuti byatukitaki nene ni wewe? Ni pakako, ziika sie mukazi obe.”
GEN 23:16 Abrahamu waamwitabiizie Efuroni, Abrahamu waamupendeele Efuroni nfolanga i-aalandile ntanzi ya baana bakua Heti shekeli 400 ya mutofue mu kipendo kya basulu.
GEN 23:17 Bukaba bwakua Efuroni bwa ku Makipela bwaali bwali lya ku kabanga ka Mamure, ni bimuti byonse, ni lisele, byaamanikile kuba
GEN 23:18 byakua Abrahamu ntanzi ya baana bakua Heti ni ntanzi ya bonse baali baingila pa mulyango wa muzi wakue.
GEN 23:19 Pa kyamba, Abrahamu waamuziikile mukazi wakue Sara mu lisele lya mu bukaba bwa ku Makipela bwaali bwali lya ku kabanga ka Mamure, (i kulanda nangue Hebroni) mu kyalo kya Kanaani.
GEN 23:20 Bukaba ni lisele lyaalimo byaamaniiziwe na baana bakua Heti kuba byakua Abrahamu, kuti biye byaali bunonsi bwakue ni nkendo ya kuziikamo.
GEN 24:1 Abrahamu waali wasyali mukote wa nsiku ingi, Yawe waali wamupaalile Abrahamu mu byonse.
GEN 24:2 Abrahamu waamwanine mubombi wakue mukulu wa mu Nghanda yakue, waali mukulu pa byonse bi-aali nabio nangue, “Biika kuboko kobe kwinsina litanta lyane.
GEN 24:3 Ndikukulapia kuli Yawe Leza wa mwiulu ni wa pa kyalo nangue, tekuti ukasaakwile mwana wane mukazi pa babinundue ba Bakanaani bangikeele nabo.
GEN 24:4 Inzi ukabe kuya ku kyalo kyane ni ku lupua lwane, umusaakwile mwana wane Izaaki mukazi.”
GEN 24:5 Mubombi waipuziizie evi, “Ale kine ozo mukazyana wakaana kwiza mu keno kyalo naakakita syani? Kuti namutwala mwana obe ku kyalo ku waafumine?”
GEN 24:6 Abrahamu waalandile evi, “Kengela, tekukeezia kubwezia mwana wane ku kyalo kunaafumine.
GEN 24:7 Yawe Leza wa mwiulu wanfumiizie mu nghanda yakua tawe ni mu kyalo kinaavyaliiluemo, ozo wandaile ni kulapa nangue waakapeela keki kyalo ku nvyalo yane, waakatangizia malaika ku ntanzi yobe kuti ukamusaakwila mwana wane mukazi wakue.
GEN 24:8 Kine ozo mukazyana wakaana kwiza pamo nobe, teukaba na mulandu pa keki kilapo. Inzi tekukeezia kubwezia mwana wane ku kelia kyalo.”
GEN 24:9 Kupwako, mubombi wabiika kuboko kwakue kwinsina litanta lyakua Abrahamu selenzi ni kulapa palua ozu mulandu.
GEN 24:10 Mubombi waatweme nghamia lyanondo yakua selenzi, watwama ni bintu biweme waya nabio lya ku Aramu-Naharaimu, ku muzi kwaali kwaikeele Nahori.
GEN 24:11 Lu-aafikile, waafukamikile nghamia lya ku kiina kya menda kyaali kumbali muzi. Ozo, waali musita wa kyungulo waali wailapo banakazi ku kutapa menda.
GEN 24:12 Waalombele evi, “We Yawe Leza wakua tawelenzi Abrahamu, nakulomba lelo un'mpaale ni kumulangisia tawelenzi buwame.
GEN 24:13 Mona ndi pano pa kiina kya menda palipaiza kutapa menda bakazyana bena bantu ba mu muzi.
GEN 24:14 Mukazyana undikwana atuule katondo kakue ka menda ni kumulomba n'minemo, alande nangue, ‘Mina, kabili ndikunwinsia ni nghamia yobe,’ ozo i wakuti uye wasaakwiliile mubombi obe Izaaki. Keki i kindikwinikilako nangue wamukitila tawelenzi buwame.”
GEN 24:15 Lu-aali tanapwililile kulanda, Rebeka mwina Betueli waizile watweme katondo ka menda pa nkombe. Ozo Betueli waali mwina Nahori mwalawakue kwa Abrahamu. Nahori waali waupile Milka.
GEN 24:16 Rebeka waali ni lukebu lwakilile kuwama, kabili waali wakili kinundue. Waakookeele ku kutapa menda, waizuzia katondo ni kusela.
GEN 24:17 Olia mubombi waile lubilo kumusensekela ni kumwana nangue, “Nakupaapaata un'mpeeleko menda aniini a mu katondo kobe n'mine.”
GEN 24:18 Waalandile evi, “We mwinzio, menda aza umine.” Penka papo watuula kale katondo ka-aali watweme pa nkombe ni kumupeela.
GEN 24:19 Lu-aapwile kumina, mukazyana waalandile evi, “Ndikuya kutapa ni ange menda a kunwinsia nghamia mpaka pailikupwila kumina.”
GEN 24:20 Penka papo wapongwela kale menda mu kiina kya kumininamo nama ni kuya lubilo ku kutapa ange, watapila nghamia yakue yonse.
GEN 24:21 Ozo mubombi mukulu waamutonokeele wataleele amone kine Yawe wakipaala lwendo lwakue ao abe.
GEN 24:22 Nghamia luyaapwile kumina, ozo mubombi waabuulile kazele ka oro kaali kafinine shekeli mutanda ni bikano bya oro bibili bya ku maboko byaali byafinine shekeli 120.
GEN 24:23 Ozo mubombi mukulu waamwanine evi, “Nakulomba unghane, wewe uli mwina ni? Ku nghanda yakua so kuli ni nkendo kwa kulaala busiku?”
GEN 24:24 Rebeka waamwanine evi, “Nene ndi mwina Betueli waavyelue na Milka muka Nahori.”
GEN 24:25 Kabili waamwanine evi, “Tukwete bikusi bingi pamo ni binge bilio, ni nkendo ya kulaalako.”
GEN 24:26 Ozo mubombi mukulu waafukeeme ni kumupupa Yawe.
GEN 24:27 Waalandile evi, “Yawe Leza wakua tawelenzi Abrahamu atasiiwe, pantu bukisinka ni bulayo bwakue bitwaliliile pali tawelenzi. Yawe wakinombola mu nzila mpaka ku nghanda ya balupua bakua tawelenzi.”
GEN 24:28 Rebeka waile lubilo ku nghanda yakua nghina ni kubabwila lyasi lyonse.
GEN 24:29 Labani ndumeze kwa Rebeka lu-aunvwile, waile lubilo ku ozo mubombi ku kiina kya menda.
GEN 24:30 Labani lu-aamwene kazele ni bikano byaali byavwele nkaziize Rebeka, ni kunvua vi-aalandile, waile lubilo kuli mubombi waali waimeene pepi ni nghamia ku kiina kya menda.
GEN 24:31 Labani waamwanine evi, “Twende ku nghanda we apaalilue na Yawe. Ale wimaniineki kono? Pantu nene nateanianga nghanda ni nkendo ya nghamia.”
GEN 24:32 Mubombi mukulu ni ye waingiile mu nghanda, ni Labani wakakula bitwamo pa nghamia, wapeela nghamia bikusi ni binge bilio, kabili waamuleeteele ozo muntu menda a kusamba ku makasa, wene, pamo ni bantu bakue.
GEN 24:33 Bilio lubyaaleetelue, mubombi wakua Abrahamu waalandile evi, “Nene nsilia kale kine nsinalandenke ka nghendeele.” Labani waamwanine evi, “Ale landa.”
GEN 24:34 Waalandile evi, “Nene ndi mubombi mukulu wakua Abrahamu.”
GEN 24:35 Yawe waakilile kumupaala tawelenzi, ni ye wakyaluka mukindami. Waamupeele mikooko ni nghombe, ni nfolanga, ni oro, ni babombi balalume ni banakazi, ni nghamia pamo ni punda.
GEN 24:36 Sara muka tawelenzi Abrahamu lu-aali wasyali mukote, waamuvyaliile Abrahamu mwana mwalalume wa mu bukote bwakue. Se waamupeele bintu byonse bi-aali nabio.
GEN 24:37 Tawelenzi wandapiizie walanda nangue, “Tekuti ukasaakwile mwana wane mukazi pa bakazyana ba Bakanaani ba mu kyalo kingikeelemo.
GEN 24:38 Inzi ukaye ku nghanda yakua tawe ni ku lupua lwane, ukaye kumusaakwila mwana wane mukazi wakue.”
GEN 24:39 Naamwipuziizie tawelenzi, “Ale kine mukazyana wakaana kwiza kono?”
GEN 24:40 Wangasukule, “Yawe undinanakila i waakatangizia malaika wakue ku waakaya, ni ye waakapaala nzila yobe, ni we waakasaakwila mwana wane mukazi wa mu lupua lwane ni wa mu nghanda yakua tawe.
GEN 24:41 Inzi paukaya kwana bantu bane, kine bakakaane kukupeela mukazyana, kupwako, wewe teukaba na mulandu.
GEN 24:42 “Lunafikanga ku kiina kya menda, nalombanga Yawe Leza wakua tawelenzi Abrahamu, namupaapaata ankwasie mu keki kindimukukita.
GEN 24:43 Mona ndi pano pa kiina kya menda. Kansi mukazyana alikwiza ku kutapa menda, ni undikulomba menda aniini a kumina mu katondo kakue,
GEN 24:44 kine waitabila kun'mpeela ni kunwinsia nghamia yane, i wakuti uye wasaakwile kuya wali muka mwana wakua tawelenzi.
GEN 24:45 Lunaba nasyapwililila mapepo ane a mukansongia, Rebeka wakookelanga ku kiina ku kutapa menda watweme katondo pa nkombe. Namwananga mukazyana, napaapaata kuti an'mpeeleko menda a kumina.
GEN 24:46 Penka papo watuula kale katondo ka menda, walanda nangue, ‘Poka umine, kabili ndikunwinsia ni nghamia yobe.’ Nene naminanga, kabili wanwisyanga ni nghamia yane.
GEN 24:47 Namwipuzyanga evi, ‘So nani?’ Wangasukanga nangue, ‘Tawe ni Betueli waavyelue na Milka muka Nahori.’ Kupwako, nabuula kazele namuvwika ku moona ni bikomo namuvwika ku maboko.
GEN 24:48 Namufukaminanga Yawe ni kumupupa. Namutasyanga Leza wakua tawelenzi Abrahamu wakinombola mu nzila iweme kwiza ku bantu bakua tawelenzi, kono kunaiza kusanga mwana mukazyana mwina wa kwakue kwa tawelenzi wa kuupua na mwina tawelenzi.
GEN 24:49 Kansi kine mulikwitabila ni kukita mwanghaniine tawelenzi, nghane. Kabili kine mulikukaana, nghane n'mane kwa kulunghama, kine ni kulio ao kuso.”
GEN 24:50 Labani ni Betueli ba-asukile, “Fwefue tetuli na kakulandapo pantu ozu mulandu ufumine kuli Yawe.
GEN 24:51 Rebeka ozu, mutwame aye oopue na mwina solenzi nga mwakilandila Yawe.”
GEN 24:52 Mubombi mukulu wakua Abrahamu lu-aunvwile evio, waakonteeme pansi ni kumupupa Yawe.
GEN 24:53 Ozo mubombi mukulu waafumiizie tuzele twa mutofue ni twa oro pamo ni ngubo, wamupeela Rebeka. Kabili waafumiizie byabupe bya mponvu ni kubapeela ba kwakue kwa mukazyana pamo ni nghina.
GEN 24:54 Mubombi mukulu wakua Abrahamu pamo ni bantu baizile nakue baaliile ni kumina, ni kulaala koko kwenka. Lubwaakiile, baabuukile. Mubombi mukulu wakua Abrahamu waalandile evi, “Emwe, n'mpeele nsambu ya kuti n'mbwelelemo kuli tawelenzi.”
GEN 24:55 Labani pamo ni nghina kwa Rebeka baalandile evi, “Ata, mulekenke twikale nakue mulungu umo ao nsiku lyanondo, mane akabe kuya.”
GEN 24:56 Inzi wene waalandile evi, “Emwe, tekunkaanie pantu Yawe wakin'mpaala mu lwendo lwane, kansi ndeke n'mbwelelemo kuli tawelenzi.”
GEN 24:57 Baalandile evi, “Kansi tumukuute mukazyana tumwipuzie tunvue vi-alikulanda.”
GEN 24:58 Kupwako, bamukuuta Rebeka, bamwipuzia nangue, “Ati, utonene kuya pamo ni mubombi wakua Abrahamu?” Wa-asukile nangue, “Ee, ndikuya nakue.”
GEN 24:59 Kupwako, bamupeela nsambu Rebeka kuti aye pamo ni mwanakazi wa mu nghanda waali wamusunga. Babo bonse babili baile pamo ni mubombi mukulu wakua Abrahamu pamo ni bantu baali baizile na mubombi mukulu wakua Abrahamu.
GEN 24:60 Baamupaalile Rebeka bamwana, “We mukwetu, ube nghina wa nvyalo ingi. Nvyalo yobe ikaanzie balwani babo!”
GEN 24:61 Rebeka pamo ni babombi bakue bakazyana baiteaniizie, basela pa nghamia ni kuya na mubombi mukulu wakua Abrahamu pamo ni bantu ba-aali nabo.
GEN 24:62 Izaaki waile mu nzila ya ku Beri-Lahai-Roi (i kulanda nangue, Kiina kya menda kyakua Mukose aliwan'mona), pantu waali waikeele ku Negebu.
GEN 24:63 Musita wa kyungulo Izaaki waile ku makaba ku kulangakana. Waakentele lwa kule ni kumona nghamia yalimukwiza.
GEN 24:64 Rebeka ni ye lu-aakentele lwa kule ni kumumona Izaaki, waakookele pa nghamia
GEN 24:65 ni kumwipuzia mubombi mukulu wakua Abrahamu, “Ale olia muntu alimukwenda mu bukaba waiza kutusensekela nani?” “Olia i tawelenzi Izaaki.” Kupwako, wabuula kiteebo ni kwikupilila pa menso.
GEN 24:66 Mubombi mukulu wakua Abrahamu waamwanine Izaaki bintu byonse bi-aakitile.
GEN 24:67 Izaaki waamwingiziizie Rebeka mu liema mwaali mwaikala nghina Sara. Kupwako, Rebeka wa-aluka mukazi wakue. Izaaki waamutonene Rebeka. Waakoseleziiziwe na kubapo kwakua Rebeka pantu nghina waali wasyafwile.
GEN 25:1 Abrahamu waupile unge mwanakazi liina lyakue Ketura.
GEN 25:2 Baana baavyaliilue Abrahamu na Ketura meena abo ni aza: Simurani, ni Yokisani, ni Medani, ni Midiani, ni Isibaki pamo ni Sua.
GEN 25:3 Yokisani waavyele Seba ni Dedani. Dedani waavyele Asuri ni Letusi pamo ni Lumi.
GEN 25:4 Midani waavyele Efa, ni Eferi, ni Hanoki, ni Abida pamo ni Elda. Babo bonse i ba mu luvyalo lwakua Ketura.
GEN 25:5 Abrahamu waamupeele Izaaki bintu byonse bi-aali nabio.
GEN 25:6 Abrahamu lu-aali wakikosele, waabuulile byabupe ni kupeela baana bakue ba-aavyele mu bakazi banike. Babo baana waabaanine baye bekale ku kyalo kya ku kabanga, kule ni kwaali kwaikeele Izaaki.
GEN 25:7 Myaka yaikeele Abrahamu yaali 175.
GEN 25:8 Abrahamu waafwile wa wamiinue mu bukote bwakue ni kuya kwikala pamo ni babikolue bakue baamutangiliile.
GEN 25:9 Baana bakue, Izaaki ni Isimaeli, baamuziikile mu lisele lya ku Makipela, mu bukaba bwaali bwakua Efuroni mwina Zohari Muhiti, bukaba bwaali lya ku kabanga ka Mamure,
GEN 25:10 Bobo bukaba bwaasitilue na Abrahamu ku baana bena Heti. Mu bobo bukaba i mwaaziikilue Abrahamu ni mukazi wakue Sara.
GEN 25:11 Pa kyamba kya kufua kwakua Abrahamu, Leza waamupaalile Izaaki. Izaaki waakuukiile pa kifuka kyaali kyakuutua Beri-Lahai-Roi. Beri-Lahai-Roi i kulanda nangue kiina kya menda kyakua Mukose aliwan'mona.
GEN 25:12 Nvyalo yakua Isimaeli mwina Abrahamu, mwana mwalalume u aavyaliilue na Hagari wa ku Misri, muzia wakua Sara,
GEN 25:13 meena abo ni aza mwaali mwabeleele nvyalo: Libeli wakue waali wakuutua Nebayoti. Balabakue ni bo meena abo ni aza: Kedari, ni Adibeli, ni Mibusani,
GEN 25:14 ni Misime, ni Duma, ni Masa,
GEN 25:15 ni Hadadi, ni Tema, ni Yeturi, ni Nafisi, pamo ni Kedema.
GEN 25:16 Babo i baali babikolue ba ntundu lyanondo ni ibili, ni mizi yabo yaali yakuutua azo enka meena, ni ku tutanda ni ko azo enka meena abo.
GEN 25:17 Myaka yaikeele Isimaeli pa kyalo yaali 137. Waafwile ni kuya kwikala pamo ni babikolue bakue baamutangiliile.
GEN 25:18 Baikeele kufuma ku Awila mpaka ku Suri ili ku ntanzi ya Misri kine ulimukuya mu nzila ya ku Asuria. Isimaeli waafwile ntanzi ya kufua ba kwakue bonse.
GEN 25:19 Nvyalo yakua Izaaki mwina Abrahamu ni ezi:
GEN 25:20 Izaaki waali na myaka 40 lu-aupile Rebeka mwina Betueli Muamea wa ku Padani-Aramu. Ndumeze kwa Rebeka waali wakuutua Labani.
GEN 25:21 Izaaki waamupepeele mukazi wakue Rebeka kuli Yawe pantu waali nghumba. Yawe waamwasukile, ni Rebeka waimitile.
GEN 25:22 Baana baabambile kulua munda. Rebeka waalandile evi, “Ale kyakitikilaki evi? Kine ni evi, ni kufua kwa wama.” Kupwako, waya kumwipuzia Yawe.
GEN 25:23 Yawe waamwanine evi, “Mu livumo lyobe muli ntundu ibili. Misango ibili ya bantu bali munda mobe yaakaba yapuseene. Mutundu umo waakaba wapamine kukila unge. Mukulu waakaba wabombela mwanike.”
GEN 25:24 Musita wa kuvyala kwakua Rebeka luwaakumeene, munda mwaali mwali bampundu.
GEN 25:25 Mwana wa mambo waavyelue wali wa kasi mubili onse ni bupipi nga ngubo ya masako a nama. Ni pakako, waanikilue Esau.
GEN 25:26 Pa kyamba, wa kwakue waavyelue wakwete ku kasinghino kakua Esau, ni pakako, wainikilue Yakobo. Rebeka lu-aavyele babo bampundu, Izaaki waali wasyali na myaka 60.
GEN 25:27 Babo baana lubaakulile. Esau wa-alukile mbwela wa nama, muntu waali wapisia nsita ingi mu kisonso, inzi Yakobo waali wateekameene wazikia sie mu liema.
GEN 25:28 Izaaki waali wamutonene Esau pantu waali wamuleetela nama i-aali waipaya, inzi Rebeka waali wamutonene Yakobo.
GEN 25:29 Busiku bumo Yakobo waelekele nseepa. Esau lu-aabwelele kufuma mu kukumba nama, waali wasyaumiine kupenzuka na nzala.
GEN 25:30 Esau waamwanine Yakobo, “Ewe, napaapaata n'mpeeleko kilunzi kya nseepa kikasikile, lenga nafua nzala.” (Ni pakako, i ki-aakuutiilue Edomu)
GEN 25:31 Yakobo waamwasukile evi, “Nsisienke nsambu ya bubeli bobe.”
GEN 25:32 Esau waalandile evi, “Kili sie bwino! Mona pasyanfue. Ale nsambu ya bubeli bwane ilikuya yali na kibweziaki?”
GEN 25:33 Yakobo waamwanine evi, “Kansi lapanke.” Esau waalapile ni kumusisia Yakobo nsambu ya bubeli bwakue.
GEN 25:34 Kupwako, Yakobo wamupeela Esau mukate pamo ni kilunzi kya nseepa. Esau lu-aaliile ni kumina, waafuminepo. Evi Esau i vi-aafuupwile nsambu ya bubeli bwakue.
GEN 26:1 Kabili pa kyalo paali kimina kya nzala kukila kimina kya nzala kyaali mu nsiku yakua Abrahamu. Izaaki waile kuli Abimeleki Likolo wa Bafilistini mpaka ku Gerari.
GEN 26:2 Yawe waamumonekeele Izaaki. Waamwanine evi, “Tekuya ku Misri, inzi nakaba kukulangisia kwa kuti ukabe kuya kwikala.
GEN 26:3 Ikala sie mu keki kyalo kya bweni, naakaba pamo nobe ni kukupaala pantu wewe pamo ni nvyalo yobe yonse nakaba kumipeela keki kyalo kyonse, kabili naakafikilizia kilapo kinaalapiile so Abrahamu.
GEN 26:4 Naakasandulula nvyalo yobe nga ntanda ya mu lyulu, kabili naakaipeela bebi byalo byonse. Ntundu yonse ya pa kyalo yaakapaalilua mu luvyalo lobe,
GEN 26:5 pantu Abrahamu waunvwiliile lizui lyane ni kusunga milao yane, ni mafunde ane, ni bupinguzi bwane pamo ni mizilo yane.”
GEN 26:6 Ni pakako, Izaaki waikeele mu Gerari.
GEN 26:7 Bantu ba mu Gerari lubaamwipuziizie palua mukazi wakue, waalandile nangue, “Ni nkazyamwine.” Taitabiile nangue waali mukazi wakue pantu waali watiina nangue pange bantu kuti bamwipaya ni kumutwama Rebeka, pantu Rebeka waali wa lukebu luweme.
GEN 26:8 Izaaki lu-aapwileko nsiku ingi, Abimeleki likolo wa Bafilistini waapuziizie menso pa nzota ni kumona Izaaki walimukusaapa na mukazi wakue Rebeka.
GEN 26:9 Abimeleki waamukuutile Izaaki ni kumwana nangue, “Kisinka nainika nangue Rebeka ni mukazi obe! Ale wakilandilaki nangue ni nkaziizo?” Izaaki waamwasukile evi, “Nandenge nangue ni mukazi wane, nga nakiipailuapo.”
GEN 26:10 Kabili Abimeleki waamwanine evi, “Wakitubeepelaki? Umo wa mu bantu bane akambulenge na mukazi obe, wewe nga i wakilengia bantu bane kuba ni kilubo.”
GEN 26:11 Ni pakako, Abimeleki waabasokele bantu bakue nangue, “Emwe, onse wakaba kumukitila ozu muntu pamo ni mukazi wakue bibiipile, wakaba kwipaiwa.”
GEN 26:12 Izaaki waabyele mbezu mu kekio kyalo, ni ozo mwaka, waazombwele mbezu ingi nghendo 100 kukila elia i-aabyele, pantu Yawe waamupaalile.
GEN 26:13 Izaaki waanonkele, ni bunonsi bwakue bwaatwaliliile mpaka wa-aluka munonsi mukata.
GEN 26:14 Bafilistini baamunvwiliile bunkua pantu waali ni bisepe bya mikooko, ni bya nghombe, pamo ni babombi bengi.
GEN 26:15 Ni pakako, Bafilistini baabiikiile bulongo mu biina byakue bya menda byaimbilue na babombi bakua se Abrahamu, Abrahamu lu-aali wakikosele.
GEN 26:16 Abimeleki waamwanine Izaaki, “Ewe, fuma pakati ketu pantu wa-aluka ni maka kukila fwefue.”
GEN 26:17 Izaaki waafumine papo, waya kwimika tutanda mu lulambe lwa Gerari, ni kwikala koko.
GEN 26:18 Izaaki waimbulwile biina bya menda byaali byaimbilue pa musita waali wakikosele Abrahamu, pantu Bafilistini baamubiikiilemo bulongo mu bebio biina bya menda Abrahamu lu-aali wasyafwile, kabili waabiinikile meena enka alia a byainikilue na se.
GEN 26:19 Babombi bakua Izaaki baimbile biina bya menda mu lulambe mpaka basanga tusulo twa menda.
GEN 26:20 Basungi ba ku Gerari baakankabwile na basungi bakua Izaaki. Basungi ba ku Gerari baalandile nangue, “Aza menda ni etu.” Ni pakako, keki kiina kya menda Izaaki waakiinikile “Mukanka.” Pantu baakankabwile nakue.
GEN 26:21 Kabili baimbile kinge kiina kya menda, inzi ni kyo baakankabwiliilepo. Ni pakako, Izaaki waakiinikile Sitina.
GEN 26:22 Izaaki waafumine papo ni kuya kwimba kinge kiina kya menda. Pa kekio kyene tebaakankabwiliilepo. Ni pakako, Izaaki waakiinikile Rehoboti. Waalandile evi, “Pantu evi Yawe watupeela nkendo ni fwe twaakavula mu kyalo.”
GEN 26:23 Izaaki waafumine papo ni kusela waya ku Beri-Seba.
GEN 26:24 Bobo busiku musita wa busiku, Yawe waamumonekeele. Waamwanine evi, “Nene ndi Leza wakua so Abrahamu. Tekutiina, pantu ndi pamo nobe. Naakakupaala ni kusandulula nvyalo yobe pa mulandu wa mubombi wane Abrahamu.”
GEN 26:25 Izaaki waakuulilepo kitale ni kukuuta Liina lyakua Yawe. Kabili waimikilepo liema lyakue. Babombi bakue baimbileko ni kinge kiina kya menda.
GEN 26:26 Abimeleki, ni kibuza wakue Ahuzati, pamo ni Fikoli mukulu wa balukale, baafumine ku Gerari ni kuya kuli Izaaki.
GEN 26:27 Izaaki waabaanine evi, “Mwemue temuntonene, kabili mwankumbile kwenu. Eba, ale mwaiza mwankonkeeleki?”
GEN 26:28 Ba-asukile evi, “Evi i vitwainika nangue Yawe ali pamo nobe, kabili twakimona nangue tupalile kunvwana nobe. Ni pakako, tutonene tupinghane nobe
GEN 26:29 nangue teukatukitila kibiipile pantu ni fwefue tetwaakukitiile kibiipile, inga sie kiweme, pamo ni kukupeela nsambu ya kuti uilepo bwino. Wewe lenu upaalilue na Yawe.”
GEN 26:30 Izaaki waabatebetele, ni bo baaliile ni kumina.
GEN 26:31 Lukeele lwakue paakili lukeelekeele, bonse baunvwene ni kupinghana. Kupwako, Izaaki wabalaya nangue, “Ale ilepo bwino.”
GEN 26:32 Bobo bwenka busiku, babombi bakua Izaaki baizile kumwana palua kiina kya menda kibaali balimukwimba nangue, “Twasanganga menda.”
GEN 26:33 Izaaki waakiinikile, “Siba.” Ni ozo muzi i kiwakuutilua Beri-Seba ni lenu kumo.
GEN 26:34 Esau lu-aakumaniizie myaka 40, waupile Bahiti babili, Yuditi mwana mwanakazi mwina Beri, ni Basemati mwana mwanakazi mwina Eloni.
GEN 26:35 Babo banakazi baaletele bulanda kuli Izaaki ni Rebeka.
GEN 27:1 Izaaki lu-aakotele ni kwaluka mpofu, waakuutile libeli wakue mwalalume Esau, “We mwana wane.” Mwana wakue waiteebe, “Ne ono pano.”
GEN 27:2 Izaaki waamwanine evi, “Mona nene nakota, nsimanine busiku bwa kufua kwane.
GEN 27:3 Ale iisape utwame bilwilo byobe, buta pamo ni mivui, uye waya mu kisonso evi uye ungipailemo nama,
GEN 27:4 mane wize ungelekele muto mu musango untonene. Pauya kundeetela, ni ne nalia, naya nkupaale ntanzi ya kufua kwane.”
GEN 27:5 Izaaki lu-aali walimukulanda na Esau, Rebeka waali watwiliziizie. Esau lu-aile mu kisonso mu kukumba nama aleete,
GEN 27:6 Rebeka waamwanine Yakobo, “We mwana wane, nene naunvua so walimukulanda na mukuluubo Esau nangue,
GEN 27:7 ‘Ndeetele nama ungelekele muto ndie, mane nkupaale pa menso akua Yawe lunsinafue.’
GEN 27:8 Kabili Rebeka waamwanine evi, ‘Kansi we mwana wane, nakulomba ukite kindikukwana.
GEN 27:9 Endo utwamepo misoka ibili ya mbuzi iweme, evi ngize n'mwelekele so muto mu musango u-atoneenemo.
GEN 27:10 Ni we waya umutwalile so alie, ni kukupaala ntanzi ya kufua kwakue.’”
GEN 27:11 Yakobo waamwanine nghina Rebeka, “We yangu, Esau ali ni bunkupili bwingi, inzi nene mubili uteleele.
GEN 27:12 Pange tawe kuti wankumia ni kwinika nangue naibeepezia kuba Esau, ni pakako, kuti naileetelela ntiipu pa kifuka kya mapaalo.”
GEN 27:13 Nghina waamwanine evi, “Ntiipu yobe ibe pali nene. Wewe kita sie munakwanina. Endo undeetele mbuzi.”
GEN 27:14 Yakobo waile kutwama mbuzi ni kumuleetela nghina. Nghina waelekele muto mu musango waali watoneenemo se kwa Yakobo.
GEN 27:15 Nghina waabuulile ngubo iwamiisie yakua Esau mwana mukulu, ngubo i-aali wamusungiile mu nghanda ni kumuvwika Yakobo mwana mwanike.
GEN 27:16 Rebeka waamukupiliile Yakobo mpapa ya mbuzi ku maboko ni mu mukosi.
GEN 27:17 Waamupeele Yakobo muto pamo ni mukate bi aateaniizie.
GEN 27:18 Kupwako, Yakobo waya kumwana se nangue, “We tawe, naiza.” Se waamwipuziizie evi, “We mwana wane, uli ni?”
GEN 27:19 Yakobo wa-asukile evi, “Ni nene libeli obe Esau. Nateania kale bintu biwanghananga. Ale buuka ulie minofu iwanghananga kuti nkuleetele, evi un'mpaale.”
GEN 27:20 Izaaki waamwipuziizie evi, “We mwana wane! Waipaya kale?” Waamwasukile, “Yawe Leza obe i wankwasia kuti ndenge ngipaye nama.”
GEN 27:21 Izaaki waamwanine Yakobo, “Ale palama pano nkukumie nghunvue kine uli wenka mwana wane Esau ao abe.”
GEN 27:22 Kupwako, Yakobo wamupalama se, se ni ye wamukumia ni kumwana nangue, “Lizui ni lyakua Yakobo, inzi maboko ni akua Esau.”
GEN 27:23 Izaaki taamwinikile pantu maboko akue aali akupiliilue na mpapa yaali ni masako nga bunkupili bwakua Esau. Kupwako, wamupaala.
GEN 27:24 Izaaki waamwipuziizie Yakobo, “Ati, kubako ni kiine wewe uli mwana wane Esau?” Yakobo wa-asukile evi, “Ee, i nene wenka.”
GEN 27:25 Izaaki waamwanine evi, “Ale n'mpalamikile minofu ya nama iwaipayanga ndie, evi nkupaale.” Yakobo waamupalamikiile bilio walia, wamuleetela ni bya kumina wamina.
GEN 27:26 Izaaki waamwanine evi, “We mwana wane, ale palama pano unkumbatile.”
GEN 27:27 Yakobo lu-aapaleeme ni kumukumbatila, Izaaki waunvwile bunu bwa ngubo yakue, wamupaala walanda, “Bunu bwa mwana wane buli nga bunu bwa kisonso kipaalilue na Yawe.
GEN 27:28 Leza akupeele lume lwa mwiulu, ni bunonsi bwa pa kyalo, bilio ni bya kumina bingi!
GEN 27:29 Ntundu ikubombele, ni mikowa ifwiname pa ntanzi yobe. Ube mukulu pa ba kobe, ni bena noko bafwiname pa ntanzi yobe. Atiipue kubalua muntu aliwakutiipa, ni aliwakupaala apaalue.”
GEN 27:30 Izaaki lu-aapwile kumupaala Yakobo, mu kufumapo sie, mukuluube Esau wafika wafuma mu kukumba nama.
GEN 27:31 Ni ye waelekele muto ni kumuleetela se walanda nangue, “We tawe, ale buuka ulie munani unakuleetela evi un'mpaale.”
GEN 27:32 Se Izaaki waamwipuziizie evi, “Eba! Ale wewe uli ni?” Esau wa-asukile evi, “Ni nene libeli obe Esau.”
GEN 27:33 Izaaki waakilile kukwaka walanda nangue, “Emwe! Ale olia muntu wandetelanga munani ni kumuliila byonse nani? Pantu i wenka unapaalanga. Ni azo mapaalo nsivinda ku-apokolola. Mapaalo ni akue.”
GEN 27:34 Esau lu-aunvwile evio, waalilile malilo akata waunvwile bulanda. Waalandile evi, “We tawe, ale ni nene n'mpaale!”
GEN 27:35 Izaaki wa-asukile evi, “Mwalaobe waizanga kun'mbeepa. Wene i wakutwaminanga mapaalo.”
GEN 27:36 Esau waalandile evi, “Kansi i ki-ainikiilue Yakobo pantu Lolu i lwendo lwa bubili kungibila. Lwendo lwa mambo wangibiile nsambu yane ya bubeli, kabili evi wangibila mapaalo ane. Ati we tawe, kubako tewansungilangapo mapaalo?”
GEN 27:37 Izaaki wa-asukile evi, “Unvua, namupeela kale nsambu ya kuba mukuluubo, ni ba kwakue bonse kuti baye bamubombela. Namupaalanga kuti aye wali ni bilio ni bya kumina bingi. Ni evi nsili na mapaalo a kuti nkupaale we mwana wane!”
GEN 27:38 Esau waamwanine se, “We tawe, Tekusyele ata kamo ka kuti un'mpaale ni nene?” Esau waali wapaapaata koku walimukulila.
GEN 27:39 Izaaki waamwanine evi, “Wewe waakeekala kule ni musili ufukile, kule ni lume lwa mwiulu.
GEN 27:40 Bwikazi bobe bwaakaba bwa bului, inzi waakaba wabombela mwalaobe. Luwaakamona kuti wilubule, waakatyona mupingo wa mu mukosi obe.”
GEN 27:41 Esau waamusuulile Yakobo pantu i waapaalilue na se. Waalandile evi, “Muleke sie, nsiku ya kumulila tawe ilimukuya yapalama, ni pa kyamba i panaakamwipaya mwalawane Yakobo.”
GEN 27:42 Rebeka lu-aunvwile palua mapange akua Esau, waamwanine Yakobo, “We mwana wane, mukuluubo Esau alimukwiteekia mutima palwakua wewe wakambila kukwipaya.
GEN 27:43 We mwana wane, unvua vindikukwana. Butukila ku Harani kuli ndumyamwine Labani,
GEN 27:44 evi uye wikaleko nsiku iniini mpaka kipuki kyakua mukuluubo kikapue
GEN 27:45 ni kukweleela kiwakimukitila, mane nkakulaizie ukeeze, pantu kuti kyakila kun'mbiipila kufwilua na bantu babili busiku bumo.”
GEN 27:46 Rebeka waamwanine Izaaki, “Nalwala, kabili napeleelua pa mulandu wa banakazi Bahiti. Kine Yakobo waupa umo wa pa baba banakazi Bahiti ba mu keno kyalo, kyawama sie ni kufua.”
GEN 28:1 Kupwako, Izaaki wamukuuta Yakobo. Wamupaala wamwana nangue, “Tekuti ukoope mwanakazi Mukanaani.
GEN 28:2 Inzi endo waya ku Padani-Aramu, ku nghanda yakua Betueli se kwa noko. Koko i kwa kuti ukaye kuupila. Ukoope mwana mwanakazi mwina mwinzyobo Labani.
GEN 28:3 Leza wa Maka onse akupaale ni kukusandulula ni kukuvuzia kuba libumba lya bantu!
GEN 28:4 Leza apaale nvyalo yobe nga vi-aapaalile Abrahamu, evi kyalo kiwikeelemo wali mweni kibe kyobe, kyalo kyaapeelue Abrahamu na Leza!”
GEN 28:5 Izaaki waamwanine Yakobo ailepo bwino ku Padani-Aramu kuli Labani waali mwana mwalalume mwina Betueli wa ku Aramea. Labani waali ndumeze kwa Rebeka nghinabo kwa Yakobo ni Esau.
GEN 28:6 Esau waamwene nangue Izaaki waamupaalile Yakobo ni kumutuma kuti aye oopile ku Padani-Aramu. Kabili waamwene nangue lu-aamupaalile, waamwanine tekuti akoope mwanakazi Mukanaani.
GEN 28:7 Esau waamwene nangue Yakobo waamunakiile se pamo ni nghina ni kuya ku Padani-Aramu.
GEN 28:8 Esau wainikile nangue se Izaaki taali wawamiinue na banakazi ba ku Kanaani.
GEN 28:9 Ni pakako, Esau waile kuupilapo mukazi unge pa balia bakazi ba-aali nabo. Ozo mwanakazi waali wakuutua Mahalati mwana mwanakazi mwina Isimaeli. Isimaeli waali mwana mwalalume mwina Abrahamu. Ozo mukazyana waali nkaziize kwa Nebayoti.
GEN 28:10 Yakobo waafumine ku Beri-Seba waya ku Harani.
GEN 28:11 Waafikile pa nkendo imo, walaala pantu busiku bwailile. Waabuulilepo libue limo ni kusaaminapo mutue wakue. Papo i pa-aaleele ni kuona.
GEN 28:12 Waalootele ni kumona kiselelo kyaimikilue pansi kyakumizie mwiulu, ni bamalaika bakua Leza balimukusela ni kukooka mu kiselelo.
GEN 28:13 Yawe waali waimeene peulu kiselelo ni kulanda nangue, “Nene ndi Yawe Leza wakua Abrahamu ni wakua Izaaki. Keki kyalo ki-uleelepo naakakupeela wewe pamo ni nvyalo yobe.
GEN 28:14 Nvyalo yobe yaakaba nga lufunko lwa pa kyalo. Kabili yaakakumana kufuma ku mboosi mpaka ku kabanga, kufuma ku nkungua mpaka ku nkungulua. Muli wewe pamo ni nvyalo yobe, ntundu yonse ya pa kyalo yaakapaaliluamo.
GEN 28:15 Nene ndi pamo nobe, naakakusunga konse ku waakaya, kabili naakakubweziizia mu keno kyalo, pantu nsikakusia mpaka nkafikilizie bulayo bunaakulaile.”
GEN 28:16 Yakobo lu-abuukile mu tulo waalandile evi, “Kisinka Yawe ali pano, nene nsyamananga!”
GEN 28:17 Yakobo waatiinine walanda nangue, “Iye, pano pantu pakila kutiinia! Pano te pange, inzi ni pa Nghanda yakua Leza, kabili i pa mulyango wa mwiulu.”
GEN 28:18 Lukeele lwakue paakili lukeelekeele, Yakobo waabuukile, wabuula libue li-aali wasaamiinepo, waliimika misiki nga lipumpu ni kupongwelapo mafuta.
GEN 28:19 Pa ezio nkendo waapeenikile Beteli. Ozo muzi kale waali wakuutua Luzi.
GEN 28:20 Yakobo waalapile walanda nangue, “We Yawe, kine ulikunsunga mu lwendo lwane ni kun'mpeela bilio ni ngubo ya kuvwala,
GEN 28:21 ni kubwela nakosele ku nghanda yakua tawe, Yawe waakaba Leza wane.
GEN 28:22 Leli libue linaimika nga lipumpu lyaakaba Nghanda yakua Leza, ni pa byonse biwaakan'mpeela, naakafumiapo kamo ka pa lyanondo ni kukupeela.”
GEN 29:1 Yakobo waatwaliliile mu lwendo lwakue ni kuya kufika mu kyalo kya bantu ba ku kabanga.
GEN 29:2 Waamwene kiina kya menda mu bukaba pamo ni bisepe bitatu bya mikooko yaali yaleele mumbali. Bebi bisepe byaali byanwinsiiwa menda pa kekio kiina kya menda, ni po paali patupikilue libue likata.
GEN 29:3 Bisepe byonse lubyaali byaiza pa kumina menda, basungi baali batupukulapo libue pakuti mikooko imine menda. Luyaali yapua kumina, kabili basungi baali batupikilapo.
GEN 29:4 Yakobo waabeepuziizie basungi, “Ati mwe ba kwane, muli ba kupi?” Baamwasukile nangue, “Fwefue tuli ba ku Harani.”
GEN 29:5 Waabeepuziizie evi, “Mumumanine Labani mwinzikulu wakua Nahori?” Baamwasukile nangue, “Ee, tumumanine.”
GEN 29:6 Kabili waabeepuziizie evi, “Ati, Labani akosele?” Ba-asukile evi, “Ee, akosele, ni Rakeli mwana wakue mwanakazi olia alimukwiza ni mikooko.”
GEN 29:7 Yakobo waalandile evi, “Emwe, mone kakili koba, ono te musita wakukolonghania mikooko ni kwinwinsia menda. Ale nwinsie mikooko mwitwale ku kulia bikusi.”
GEN 29:8 Baamwanine evi, “Ata, tetuvinda kunwinsia kale ezi mikooko inge luisinakolonghaniwe. Mpaka ni inge ileetuenke mane tutupukule keki kilibue ni kwinwinsia.”
GEN 29:9 Yakobo lu-aali wakilimukulanda nabo, Rakeli waafikile ni mikooko yakua se pantu wene i waali musungi.
GEN 29:10 Yakobo lu-aamwene Rakeli mwina Labani ndumeze kwa nghina, ni mikooko yakua mwinzioye, waile pa kiina kya menda ni kutupukulapo kilibue. Kupwako, wabamba kunwinsia mikooko yakua mwinzioye.
GEN 29:11 Yakobo waamukumbatiile Rakeli ni kutendeka kulila wa-angwile.
GEN 29:12 Yakobo waamwanine Rakeli nangue, “Nene ndi wa mu lupua lwakua so, kabili ndi mwina Rebeka.” Penka papo, Rakeli waya kale lubilo aye amubwileko se.
GEN 29:13 Labani lu-aunvwile sie nangue mwipua wakue waiza, waile kumusensekela wali lubilo. Luamusangile, waamukumbatiile. Kupwako, waingila nakue mu nghanda yakue, ni Yakobo waamulondolwela Labani byonse byaakitikile.
GEN 29:14 Labani waalandile evi, “Kisinka wewe uli lupua lwane, kabili tuli mubili umo ni mulopa umo.” Yakobo waikeele koko mwezi walingi.
GEN 29:15 Labani waamwanine Yakobo nangue, “Anzia kine uli mwipua wane, nsivinda kukubombia sie kya mpuni. Landa nsazio in'mpalile kuya nakusazia.”
GEN 29:16 Labani waali wali na baana babili bakazyana. Mukulu waali wakuutua Lea, ni mwanike waali wakuutua Rakeli.
GEN 29:17 Menso akua Lea aali atope, inzi Rakeli waali waweme mubili ni lukebu.
GEN 29:18 Yakobo waamutonene Rakeli. Waamwanine Labani nangue, “Naakakubombela myaka kilooba pa mulandu wakua Rakeli mwana obe mwanike.”
GEN 29:19 Labani waalandile evi, “Ee, kuti kyawama kukupeela wewe kukila unge. Ikala nane pamo.”
GEN 29:20 Yakobo waabombele myaka kilooba pa mulandu wakua Rakeli. Inzi yaamwenekele sie nga nsiku iniini pantu waali wamutoneesie.
GEN 29:21 Yakobo waamwanine Labani, “N'mpeele Rakeli abe mukazi wane, ndaale nakue pantu nsiku yane yakumana.”
GEN 29:22 Ni pakako, Labani waateaniizie matebeto ni kukupa bantu ba mu muzi.
GEN 29:23 Musita wa kyungulo, waamutweme Lea ni kumutwalila Yakobo, ni ye waleele nakue.
GEN 29:24 Labani waabuulile mubombi wakue mukazyana liina lyakue Silipa ni kumupeela Lea kuti aye wali mubombi wakue.
GEN 29:25 Lubwaakiile, Yakobo wainikile nangue waufiiziwe Lea. Yakobo waamwipuziizie Labani, “We mwinzio, ni syani? Ne naabombeele kuufiwa Rakeli. Ale wakin'mbeepelaki?”
GEN 29:26 Labani wa-asukile evi, “Kono kwetu tetuli na mibeele ya kuufianke mwanike kine mukulu tanaupue.
GEN 29:27 Pwilililanke mulungu umo wa nsikunkulu yakua Lea. Mane tukabe kukupeela Rakeli wakuti ukabombele inge myaka kilooba.”
GEN 29:28 Yakobo waitabiile. Lu-aapwile mulungu umo mu bwinga bwakue, Labani waufiizie Rakeli kuli Yakobo.
GEN 29:29 Labani waabuulile mubombi wakue mukazyana liina lyakue Biliha ni kumupeela Rakeli kuti aye wali mubombi wakue.
GEN 29:30 Yakobo waile kulaala ni Rakeli, kabili waali wamutoneesie Rakeli kukila Lea. Ni pakako, waamubombeele Labani inge myaka kilooba.
GEN 29:31 Yawe lu-aamwene nangue Lea taali watonenue, waapeelue buvyazi, inzi Rakeli waali wali nghumba.
GEN 29:32 Lea lu-aimitile, waavyele mwana mwalalume. Lea waalandile evi, “Yawe Leza wamona maavia ane, evi mulume wane alikuntona.” Ni pakako, ozo mwana waamwinikile Rubeni. Kabili waalandile evi, “Wakimona bwavia bwane.”
GEN 29:33 Kabili lu-aimitile, waavyele mwana mwalalume. Lea waalandile evi, “Yawe Leza wan'mpeela ozu mwana mwalalume pantu wakyunvua nangue nene nsitonenue.” Ni pakako, ozo mwana waamwinikile Simeoni.
GEN 29:34 Kabili lu-aimitile, waavyele mwana mwalalume. Lea waalandile evi, “Lono lwendo mulume wane alikukila kwampana ni nene pantu namuvyalila kale baana batatu balalumenke.” Ni pakako, ozo mwana waamwinikile Lawi.
GEN 29:35 Kabili lu-aimitile, waavyele mwana mwalalume. Lea waalandile evi, “Lono lwendo namutasia Yawe.” Ni pakako, ozo mwana waamwinikile Yuda. Kupwako ni luvyalo lwapela.
GEN 30:1 Rakeli lu-aamwene nangue wene taamuvyaliile Yakobo baana, waamunvwiliile mukuluube bunkua. Rakeli waamwanine Yakobo nangue, “We Yakobo, n'mpeele baana, kine teun'mpeele ndikufua.”
GEN 30:2 Yakobo waamufiitiilue Rakeli. Waalandile evi, “Eba, nene i Leza waakulengiizie kuba nghumba?”
GEN 30:3 Rakeli waamwanine Yakobo, “Ndi ni mubombi wane Biliha. Laala nakue anvyalile baana, evi kupitila muli wene ngie nali ni luvyalo.”
GEN 30:4 Rakeli waamupeele mulume wakue nsambu ya kuupa Biliha. Yakobo waaleele nakue.
GEN 30:5 Biliha lu-aimitile, waamuvyaliile Yakobo mwana mwalalume.
GEN 30:6 Rakeli waalandile evi, “Leza wapingula mulandu wane, waunvua mapepo ane ni kun'mpeela mwana mwalalume.” Ni pakako, ozo mwana waamwinikile Dani.
GEN 30:7 Kabili Biliha mubombi wakua Rakeli lu-aimitile, waamuvyaliile Yakobo mwana mwalalume wa bubili.
GEN 30:8 Rakeli waalandile evi, “Bului bunalwana na mukuluamwine ni bukata, inzi namwanzia.” Ni pakako, ozo mwana waamwinikile Nafutali.
GEN 30:9 Lea ni ye lu-aamwene nangue buvyazi bwapua, waufiizie mubombi wakue Silipa ku mulume wakue.
GEN 30:10 Silipa mubombi wakua Lea waamuvyaliile Yakobo mwana mwalalume.
GEN 30:11 Lea waalandile evi, “Nasyuka!” Ni pakako, ozo mwana waamwinikile Gadi.
GEN 30:12 Silipa mubombi wakua Lea waamuvyaliile Yakobo unge mwana mwalalume wa bubili.
GEN 30:13 Kabili Lea waalandile evi, “Nasansamuka! Pantu bakazyana balikuyabankuuta asyukile.” Ni pakako, ozo mwana waamwinikile Aseri.
GEN 30:14 Musita wa kuseepa nghano, Rubeni waile mu bukaba, waya kusangamo kitwabalindu ni kumutwalila nghina. Rakeli waamwanine Lea, “N'mpeele miti ya luvyalo yakua mwana obe Rubeni.”
GEN 30:15 Lea waamwanine evi, “Eba, we wan'mpokele mulume, kabili tewakeba kun'mpoka ni miti yakua mwana wane Rubeni?” Rakeli wa-asukile evi, “Lelo Yakobo alikulaala ku nghanda yobe pa mulandu wa miti ya luvyalo yakua mwana obe.”
GEN 30:16 Yakobo lu-aafumine ku makaba musita wa kyungulo, Lea waile kumusensekela ni kumwana nangue, “Lelo ulikulaala ku nghanda yane pantu nakusitanga kuli Rakeli na kitwabalindu kyakua mwana wane.” Ni pakako, bobo busiku waaleele ku nghanda yakua Lea.
GEN 30:17 Leza waunvwile mapepo akua Lea. Lea lu-aimitile, waamuvyaliile Yakobo mwana mwalalume wa busaano.
GEN 30:18 Lea waalandile evi, “Leza wanambula pantu naufiizie mubombi wane kuli mulume wane Yakobo.” Ni pakako, ozo mwana waamwinikile Isakari.
GEN 30:19 Kabili Lea lu-aimitile, waamuvyaliile Yakobo mwana mwalalume wa mutanda.
GEN 30:20 Lea waalandile evi, “Leza wanambula kilambu kiweme. Evi mulume wane waya wasyankindika pantu namuvyalila baana mutanda.” Ni pakako, ozo mwana waamwinikile Zabuloni.
GEN 30:21 Pa kyamba, waavyele mwana mwanakazi ni kumwinika Dina.
GEN 30:22 Kabili Leza waamulangulukile Rakeli. Leza lu-aunvwile mapepo akue, waizwile buvyazi bwakue.
GEN 30:23 Rakeli lu-aimititile, waavyele mwana mwalalume. Rakeli waalandile evi, “Leza wan'mpwisia busoni pantu wan'mpeela mwana mwalalume.”
GEN 30:24 Ni pakako, ozo mwana waamwinikile Yusufu, Kuti kyawama Yawe anundilepo ni unge mwana mwalalume.
GEN 30:25 Rakeli lu-aamuvyele Yusufu, Yakobo waamwanine Labani, “N'mpeele nsambu ya kubwelela ku kyalo kyetu,
GEN 30:26 un'mpeele bakazi bane pamo ni baana banaakubombeele ngie nabo pantu umanine mwilo unaakubombeele.”
GEN 30:27 Labani waamwanine Yakobo nangue, “Kine wangitabila, ikala sie kwenka kono pantu nakibuka ni kumona nangue Yawe wakin'mpaala kupitila muli wewe.”
GEN 30:28 Labani waalandile evi, “Nghane nsazio yobe ni ne ndikukusazia.”
GEN 30:29 Yakobo waamwanine evi, “We mwine umanine vinakikubombela ni nghombe viyakivula kuli nene.
GEN 30:30 Lunaali nsinaize, nama yobe teyaali yavulile, inzi evi ivulile. Yawe wakikupaala kupitila muli nene. Ale ni musitaki unakaba kubombela ba mu nghanda yane?”
GEN 30:31 Labani waamwipuziizie evi, “Ale ndikukupeelaki?” Yakobo wa-asukile evi, “Teun'mpeela kantu, kine ulikunkitila keki kintu, ndikutwalilila kuliisia ni kusunga kisepe kyobe.
GEN 30:32 Lelo ndikupita mu kisepe kyobe kyonse nalimukufumia kubalua nama wa mabala mabala ni mantolintoli, ni kubalua nama wa fi pa mikooko, ni wa mabala mabala pa mbuzi. Ezio i yaakaba nsazio yane.
GEN 30:33 Kisinka kyane kyaakamoneka bobo busiku buwaakeeza kumona nsazio yane. Kine ukeeze kusanga mbuzi asili na mabala mabala ao mantolintoli, ao kubalua mukooko asili wa fi, wewe waakaba wali ni nsambu ya kulanda nangue nakikwibila.”
GEN 30:34 Labani waamwanine evi, “Ee, kibe nga muwalandila.”
GEN 30:35 Bobo busiku Labani waafumiiziepo tupwata twa mabala mabala ni twa mingoloozio, ni mbuzi ikota ya mabala mabala ni mantolintoli, ni ya mabala mabala a sue pamo ni mikooko ya fi wapeela baana bakue.
GEN 30:36 Ezio nama baile nayo kule kwa kwenda nsiku itatu. Yakobo wene waasyele wasunga kisepe kyakua Labani.
GEN 30:37 Yakobo waabuulile misambo ibisi ya milibna ni ya mlozi ni ya mwaramoni, waubulako mamba pakuti mumoneke mingoloozio ya sue.
GEN 30:38 Ezio misambo i aubwileko waiimikile mu biziba bya menda byaali byaminamo nama yakentele ku misambo. Nama yaimitiile papo payaali yaiza kuminina menda.
GEN 30:39 Nama yaimitile ntanzi ya misambo yaali mu menda. Nama yaavyele twana twa mingoloozio, ni twa mabala mabala pamo ni twa mantolintoli.
GEN 30:40 Yakobo waakasaniizie mikooko, wabiika nama yakentele ku nama ili ni mingoloozio ni kubalua nama wa fi wakua Labani. Wabiika bisepe byakue kule, kabili taasanziizie pa bisepe byakua Labani.
GEN 30:41 Nama yaamwenekelepo yalumine luyaimitile, Yakobo waabiikile misambo ku ntanzi ya ezio nama palia payaali yaminina menda, evi iye yaimitila pa ezio misambo.
GEN 30:42 Inzi ezio misambo taibiikile ku ntanzi ya nama yaali itope. Evi Yakobo i vi-aakwete nama ilumine, ni Labani nama itope.
GEN 30:43 Yakobo waanonkeesie. Waali wakwete bisepe bingi. Waali wakwete babombi bengi balalume ni banakazi, ni nghamia pamo ni punda.
GEN 31:1 Yakobo waunvwile baana balalume bena Labani balanda nangue, “Mwamona! Yakobo watwama bunonsi bonse bwakua situe. Bobu bunonsi bonse wanonkela mu bunonsi bwakua situe.”
GEN 31:2 Yakobo waamwene lukebu lwakua Labani tekuba lwali nga vilwaali pa mambo.
GEN 31:3 Yawe waamwanine Yakobo, “Bwelela mu kyalo kya babikolue bobe uye wikale kwikeele bantu bobe, ni nene naakaba naali pamo nobe.”
GEN 31:4 Yakobo waamukuutile Rakeli ni Lea beze basaakaane nakue ku kisonso kwaali kwali bisepe byakue.
GEN 31:5 Waabaanine evi, “Namona lukebu lwakua sinue tekuba lwali nga vilwaali pa mambo. Inzi Leza wakua tawe ali pamo nane.
GEN 31:6 Kabili mumanine bwino nangue nene naamubombeele sinue na maka ane onse.
GEN 31:7 Sinue wan'mbiibikiziizie ni kwalulula nsazio yane nghendo lyanondo, inzi Leza wandabukiile.
GEN 31:8 Labani lu-aalandile nangue mikooko ya mabala mabala i yaakaba nsazio yobe, kisepe kyonse kyaavyele twana twa mabala mabala. Kabili lu-aalandile nangue ya mingoloozio i yaakaba nsazio yobe, kisepe kyonse kyaavyele twana twa mingoloozio.
GEN 31:9 Evi Leza i vi-aan'mpeele bisepe bi-aafumiizie mu bisepe byakua sinue.
GEN 31:10 “Musita wakuti ezi nama iimite, naalootele nama ndume ya mabala mabala ni ya mingoloozio pamo ni ya mantolintoli yalimukusela pa ikota.
GEN 31:11 Naalootele malaika wankuuta nangue, ‘Yakobo.’ Ni nene na-asukile, ‘Ne ono pano.’
GEN 31:12 Wanghanine evi, ‘Mona,’ nama ndume yonse ya ezi nama i uliwasunga, ilimukusela pa ikota yali ni mabala mabala, ni mingoloozio, ni mantolintoli. Nakita evi pantu n'mwene Labani vi-alimukukubiibikizia.
GEN 31:13 Nene ndi Leza waakumwenekeele ku Beteli lolia luwaapongweleele mafuta a mizeituni pa libue liwaasaamiinepo ni kundaya. Ale bwelela ku kyalo ku waavyaliilue.”
GEN 31:14 Rakeli ni Lea baamwanine evi, “Fwefue tetukili na kantu kakuti tukapyane mu nghanda yakua Situe.
GEN 31:15 Fwefue tupendelue sie nga baeni mu nghanda yakua situe. Wene waatusisiizie, ni nfolanga yonse waaliile sie bunke.
GEN 31:16 Bobu bunonsi bobe bonse buuli nabo bwaabuulile Leza pa bunonsi bwakua situe, i bunonsi bwetu pamo ni baana betu. Wewe kita sie kyonse kyakikwana Leza.”
GEN 31:17 Kupwako, Yakobo wasezia baana bakue pamo ni bakazi bakue peulu nghamia.
GEN 31:18 Mu lwendo lwakue lwa kubwelela kuli se mu kyalo kya Kanaani, waile ni biteekua byakue byonse pamo ni bunonsi bwakue bonse bu-aanonkele ku Padani-Aramu.
GEN 31:19 Labani lu-aali waile ku kutebula masako a mikooko yakue, Rakeli waibile baleza bakua se.
GEN 31:20 Yakobo waamuzembulukile Labani Muaramea pasili kumulaya.
GEN 31:21 Yakobo waatweme bintu byakue byonse waya. Lu-aile kwabuka mwenzi wa Efrati, waile walungheeme lya ku kyalo kya mpili kya Gileadi.
GEN 31:22 Pa busiku bwa butatu, Labani waabwililue nangue Yakobo wakibutuka.
GEN 31:23 Waile pamo ni ba kwakue wamukonkele Yakobo. Busiku bwa kilooba, waile kumusanga mu kyalo kya mpili kya Gileadi.
GEN 31:24 Leza waizile kumwana Labani Muaramea mu kilooto musita wa busiku nangue, “Kengela, tekwezia kumwana Yakobo kantu kaweme ao kabiipile.”
GEN 31:25 Labani lu-aamusangile Yakobo, Yakobo waali waimikile liema lyakue mu kyalo kya mpili kya Gileadi, Labani ni bantu bakue ni ye waimikile liema mu kyalo kya mpili kya Gileadi.
GEN 31:26 Labani waamwanine Yakobo, “Wakinzembulukilaki watwama ni baana bane banakazi nga banakazi bakwetue ku bului?
GEN 31:27 Ale wakinzembulukilaki pasili kunghana? Pantu unghanenge, nga nakikulaya bwino. Nga pakiimbua nghimbo ni kombua nghoma pamo ni kulizia bilimba.
GEN 31:28 Kabili tewakin'mpeela nsambu ya kubalaya nabakumbatila benzikulu bane pamo ni baana bane. Waakikita bintu bimo bya bulubi.
GEN 31:29 Nene ndi ni nsambu ya kukukitila kintu kibiipile, inzi Leza wakua so wakinsoka lukeele busiku kuti nkengele, kabili tekuti nkwane kantu kaweme ao kabiipile.
GEN 31:30 N'manine nangue uli ni nkulu ya kubwelela kuli so. Ale kiwakiibila baleza bane ni kiki?”
GEN 31:31 Yakobo waamwasukile evi, “Nakitiina kukulaya pantu nakimona nangue pange kuti wan'mpoka baana bobe bakazyana mu maka.
GEN 31:32 Kansi kine wasangapo umo pakati ketu wali ni babo baleza bobe, tapalile kuba mukose. Ale iza umone kine pali ni kintu kyobe, kine pakili ukitwame.” Yakobo waalandile evio pantu taali wamanine nangue Rakeli i waali waibile baleza bakua Labani.
GEN 31:33 Kupwako, Labani waingila mu liema lyakua Yakobo, ni mu liema lyakua Lea, ni mu liema lya babombi babili banakazi. Momo taasangilemo baleza bakue. Kabili waile kwingila ni mu liema lyakua Rakeli.
GEN 31:34 Rakeli i waali watweme babo baleza ba mu nghanda ni kuya wababiikile pensina mpapa i-aali wapanzikile pa nghamia ni kuya waikeelepo. Labani waakebele mu maema onse pasili kumona.
GEN 31:35 Rakeli waamwanine se nangue, “We tawe, tekunfiitilua pantu nsimeene pa ntanzi yobe. Ndimukutiina kwimana pantu ndwele malwele a banakazi.” Labani waakilile kukeba pasili kusanga baleza bakue.
GEN 31:36 Yakobo waakilile kufiitua. Waalandile evi, “Eba, nene nakikuluviaki pakuti wize wankonkele wafiitilue mu ozu musango?”
GEN 31:37 Mu bintu byane byonse biwakebamo, kine wasangamo kintu kyobe, kibiike papa kimonue na bantu bobe ni bantu bane, evi batupingule kine nani ali ni nsambu.
GEN 31:38 Nakiikala nobe myaka 20. Mikooko yobe ao mbuzi yobe teyaapulumwine ata livumo, kabili nsyaaliilepo mpanga wa pa bisepe byobe.
GEN 31:39 Naali nakita kine mukooko waipawa na kinama, napyanikiziapo unge. Nsyaali nakuleetela ni kukwana nangue te kilubo kyane. Mikooko yonse yaali yaibua musita wa koba ni musita wa busiku, waali wanomba kuti nkubweziizie.
GEN 31:40 Musita wa koba naali nazia na lyuza, ni musita wa busiku naali naumina na kasama. Nsyaali nalaala.
GEN 31:41 Evi i vinaemene myaka yonse 20 naali mu nghanda yobe. Pakuti ungufie baana bobe babili, naakubombeele myaka lyanondo ni ina. Kabili naakubombeele myaka mutanda pakuti un'mpeele bisepe bya nama anzia kine waali wa-alulula alulula sie nsazio yane nghendo yonse lyanondo.
GEN 31:42 Kabenge Leza wakua tawe ni Leza wakua Abrahamu, Leza waatiininue na Izaaki, tekuba wali pamo nane, kisinka wewe nga wankumbile kale pasili kun'mpeela kantu. Inzi Leza waamwene maavia ane ni kubomba kunaakubombeele. Kabili wakikusoka lukeele busiku.
GEN 31:43 Labani waamwanine Yakobo, “Babo baana banakazi, ni bane. Baana babo ni bo ni bane, ni bebi bisepe ni byo ni byane. Bebi byonse bi umwene ni byane. Inzi evi nsili na buvinde bwa kusunga babo baana bane pamo ni benzikulu.
GEN 31:44 Kansi evi, twende tupinghane pakuti kiye kyali kisininkizio pakati kobe ni nene.”
GEN 31:45 Kupwako, Yakobo wabuula libue ni kuliimika nga lipumpu.
GEN 31:46 Yakobo waabaanine bantu bakue batoole mabue ni ku-atuulika pepi na lelio libue. Kupwako, Yakobo ni Labani babamba kulia baikeele mumbali mabue.
GEN 31:47 Pa ezi nkendo Labani waapeenikile Yegari-Sahaduta. Inzi Yakobo wene waapeenikile Galedi.
GEN 31:48 Labani waamwanine Yakobo, “Aza mabue i-aakaba kisininkizio kyetu bonse babili.” Ni pakako, ozo mului wainikilue Galedi,
GEN 31:49 ni lelia libue ni lyo lyainikilue Misipa. Pantu Labani waalandile nangue, “Yawe aye watukenteleele fwe bonse babili pa tukalekana.”
GEN 31:50 Labani waalandile evi, “Kine ukeemie baana bane banakazi ao kuupilapo bange, anzia kine ne nsikaba namanine, ukamane sie nangue Leza i musininkizi pakati ketu.”
GEN 31:51 Labani waamwanine Yakobo, “Mona ozu mului wa mabue ni lipumpu linakiimika pakati kobe ni nene.
GEN 31:52 Ozu mului pamo ni leli lipumpu biye byali kisininkizio kya kulangulukilako nangue nene nsikataaluka ozu mului ni kwiza kukusakukila, ao wewe kutaaluka ozu mului ni kwiza kunsakukila.
GEN 31:53 Leza wakua Abrahamu ni Leza wakua Nahori, ni Leza wa babikolue babo, akatupingule fwe bonse babili.” Yakobo waalapile mu Liina lyakua Leza aliwatiinua na se Izaaki.
GEN 31:54 Yakobo waipaile nama ni kwelela peulu lupili, kabili waakupile bantu bakue kuti balie nakue ozo munani. Pa kyamba, baaleele penka papo peulu lupili.
GEN 31:55 Labani lu-aabuukile paakili lukeelekeele, waakumbatiile baana bakue pamo ni benzikulu ni kubaana bailepo bwino. Kupwako, Labani wabwelela kwakue.
GEN 32:1 Yakobo lu-aali walimukubwelela kwabo, bamalaika bakua Leza baasaakeene nakue.
GEN 32:2 Yakobo lu-aamwene babo bamalaika waalandile nangue, “Leli i libumba lyakua Leza.” Ni pakako, pa ezio nkendo wainikilepo Mahanaimu.
GEN 32:3 Yakobo waatumine mikenzi kuli mukuluube Esau mu Seiri, mu kyalo kya Edomu.
GEN 32:4 Waabalaiziizie wabaana baye balande nangue, “Mubombi obe Yakobo walanda evi, ‘We mukuluamwine, naile kwikala ni Labani nali mweni ezi myaka yonse,
GEN 32:5 ni evi naiza nali ni nghombe, ni punda, ni mikooko, ni mbuzi, pamo ni babombi balalume ni banakazi. Nalaizia evio naswapiile kwitabilua na we mukuluamwine.’”
GEN 32:6 Mikenzi yaizile kubwezia kapingu kuli Yakobo nangue, “Twayanga kuli mukuluubo Esau, ni ye alimukwiza kukupokelela wali ni bantu 400.”
GEN 32:7 Yakobo lu-aunvwile evio, waatoobokele ni kutiina. Ni pakako, waakasaniizie bantu ba-aali nabo pamo ni mikooko, ni mbuzi, ni nghombe, pamo ni nghamia mu mabumba abili.
GEN 32:8 Waalandile evi, “Kine Esau waiza kusakukila libumba limo, linge lilikupusuka.”
GEN 32:9 Kabili waamulombele Leza walanda nangue, “We Leza wakua tawekulu Abrahamu ni wakua tawe Izaaki, we Yawe wanghanine nangue, ‘Bwelela ku kyalo kyobe ni ku lupua lobe evi nkakukitile biweme.’
GEN 32:10 Naikeefia ku buwame ni ku kisinka kyobe kiwaanangisiizie ne mubombi obe, pantu mwenzi wa Yordani naawabukile tekuba natweme kantu inga sie kabango, inzi evi nabwela natweme mabumba abili.
GEN 32:11 Nakulomba un'mpususie kuli mukuluamwine Esau, pantu natiina nkeeza kusakukilua, nene ni bakazi bane pamo ni baana bane.
GEN 32:12 We Leza languluka bulayo buwandaile nangue waakankitila biweme ni kuvuzia nvyalo yane, ikabe yavulile nga musenga wa mumbali lyezi usili wavinda kupendua na muntu.”
GEN 32:13 Bobo busiku Yakobo waaleele penka papo. Kupwako, wabuulapo bimo pa bintu bi-aali nabio, evi amutwalile mukuluube Esau kilambu.
GEN 32:14 Waabuulile makota a mbuzi 200 ni tupwata 20 ni mikooko ikota 200 ni mpanga 20,
GEN 32:15 nghamia 30 yaali yaonsia pamo ni twana twabo, nghombe ikota 40 ni nghombe ndume lyanondo, punda ikota 20, ni punda ndume lyanondo.
GEN 32:16 Yakobo waakasaniizie bisepe, kubalua kisepe kyaali kyali ni musungi umo. Waabaanine basungi nangue, “Ale abuke mwenzi muntangilile, kubalua kisepe kiye kyaenda kyalekenkeene ni kinge.”
GEN 32:17 Yakobo waamwanine mubombi wa mambo nangue, “Esau pa-aya kusaakaana nobe ni kwipuzia nangue, ‘Wewe uli muntu wakua ni? Kabili ulimukuya pi? Ni ezi nama ikutangiliile ni yakua ni?’”
GEN 32:18 Uye umwane nangue, “Ezi nama ni yakua mubombi obe Yakobo. Wene wamutumina selenzi Esau. Inzi Yakobo alimukwiza pa kyamba kyetu.”
GEN 32:19 Evi i vya-anine ni musungi wa bubili, ni wa butatu, ni bange basungi ba bisepe. Evi i vyakuti muye mulande pamuya kusaakaana ni Esau.
GEN 32:20 Kabili muye mulande nangue, “Mubombi obe Yakobo alimukwiza pa kyamba.” Yakobo waali walangakana evi, “Bobu bupe bunamutumina, pange bulikumufuukiako mutima evi n'monane nakue ni kungeleela bilubo byane.”
GEN 32:21 Evi i vyaatangiile bupe bwakue. Yakobo waasyele kulaala papo pa tutanda.
GEN 32:22 Bobo bwenka busiku musita wa busiku Yakobo waabuukile, watwama bakazi bakue babili ni babombi bakue banakazi babili pamo ni baana bakue lyanondo ni umo, waya kwabuka pa musalala wa mwenzi wa Yaboki.
GEN 32:23 Yakobo wa-abusiizie lupua lwakue pamo ni bintu byakue byonse bi-ali nabio,
GEN 32:24 inzi waasyele bunke ku kyamba. Kwaizile muntu umo waabambile kukanzana nakue mpaka ku makia.
GEN 32:25 Ozo muntu lu-aamwene nangue wamwandua, waamukwete Yakobo pa kitungu, kitungu kyakua Yakobo kyaavyukile musita u-ali walimukulua nakue.
GEN 32:26 Ozo muntu waalandile evi, “Ndekele ngie naya! Mona pasyabukie.” Yakobo waalandile evi, “Nsikulekela kine teunan'mpaale.”
GEN 32:27 Ozo muntu waamwipuziizie evi, “Liina lyobe uli ni?” Wa-asukile nangue, “Nene ndi Yakobo.”
GEN 32:28 Ozo muntu waalandile evi, “Wewe teukiya wakuutua Yakobo pantu wakanzana na Leza ni bantu, ni we wa-anzia. Inzi waya wasyakuutua Izraeli.”
GEN 32:29 Yakobo waamwipuziizie evi, “Ale wewe uli ni?” Waamwasukile, “Wangipuziiziaki Liina lyane?” Kupwako, ozo muntu wamupaala Yakobo.
GEN 32:30 Yakobo waalandile evi, “Namonana ni Leza, kabili nasyala nakosele.” Ni pakako, pa ezio nkendo wainikilepo nangue, “Penueli.”
GEN 32:31 Koba lukaali kasyatula, Yakobo waafumine pa Penueli ni kubamba kuya wasunkuta pantu waali wavyulilue kitungu kyakue.
GEN 32:32 Ni pakako, Baizraeli i kibasilibaliila buzwazua bwa mu kitungu, pantu pa buzwazua i paakumiiziwe Yakobo ni kuvyulua kitungu.
GEN 33:1 Yakobo lu-aamumwene Esau walimukwiza pamo ni bantu 400, waalekenkaniizie baana bakue: Lea ni baana bakue, Rakeli ni baana bakue, ni babombi babili banakazi ni baana babo.
GEN 33:2 Waatangiziizie babombi bakue babili pamo ni baana babo, Lea ni baana bakue i baakonkelepo, Rakeli i waali wasyaliile pamo ni Yusufu.
GEN 33:3 Yakobo waabatangiliile koku walimukuya wafwinamina pansi mpaka nghendo kilooba ni kuya kufika mu kyeni kyakua mukuluube.
GEN 33:4 Inzi Esau waile kumusensekela wali lubilo. Lu-aafikile, waamukumbatiile mu mukosi ni kumufyompa, ni bonse babili batendeka kulila.
GEN 33:5 Esau akente evi, wamona banakazi baimeene pamo ni baana babo. Esau waipuzia kale, “Eba, ale baba bauli nabo ni bani?” Yakobo waalandile evi, “Baba i baana baapeelue mubombi obe na nkumbu yakua Leza.”
GEN 33:6 Babombi banakazi bakua Yakobo pamo ni baana babo baamupalamiine Esau ni kumufwinamina.
GEN 33:7 Lea ni baana bakue ni bo baile kumufwinamina. Pa mpeleezio, Yusufu ni Rakeli ni bo baile kumufwinamina.
GEN 33:8 Esau waamwipuziizie Yakobo, “Ewe, ale belia bisepe binasaakaananga nabio kolia ni byaki?” Yakobo waamwasukile evi, “Nakituma bebi bisepe pakuti n'mpokelelue na mukuluamwine.”
GEN 33:9 Esau wa-asukile evi, “Sunga sie bebi bisepe byobe, ni nene wenka nkwete sie bingi.”
GEN 33:10 Yakobo waalandile evi, “Napaapaata upokelele pakuti kiye kyali kisininkizio kya kulangisia nangue wan'mpokelela. Kumona kunakumona, ni kukonkana ni viwan'mpokelela, na-aluka nga ne wamona lukebu lwakua Leza.
GEN 33:11 Nakupaapaata upokelele bobu bupe bwane buwaleetelua pantu Leza wakin'mpaala ni kun'mpeela kubalua kantu.” Yakobo waakilile kumupaapaata Esau mpaka wafikiila kupokelela.
GEN 33:12 Esau waalandile evi, “Ale iza twende, ni ne ndikuya nakutangiliile.”
GEN 33:13 Yakobo waalandile evi, “We mukuluamwine, umwene baana vibanakile, kabili nene wenka i alimukusunga mikooko ni mbuzi ilimukonsia twana. Ezi nama yane kine yaenda kukila busiku bumo yonse ilikufua.
GEN 33:14 Ni pakako, wewe tangila sie, ne ozo alimukwiza buke buke kukonkana ni nghendelo ya baana ni bisepe byane. Twakaba kwiza kumonana koko kwenka ku Seiri.”
GEN 33:15 Esau waalandile evi, “Kansi nkusiile baba bantu bandi nabo wize pamo nabo.” Yakobo waalandile evi, “Ata, ale viwangeleela kale! Wewe endo waya sie.”
GEN 33:16 Kupwako, Esau wamusia ni kubwelela ku Seiri.
GEN 33:17 Yakobo ni ye waile ku Sukoti ku-aakuulile nghanda yakue ni bipata bya nghombe. Ni pakako, pa ezio nkendo i kipalipakuutilua Sukoti.
GEN 33:18 Yakobo lu-aabwelele kufuma ku Padani-Aramu, waabwelele sie bwino mpaka kuya kufika ku Sekemu mu kyalo kya Kanaani ni kwimika liema lyakue ntanzi ya muzi.
GEN 33:19 Ezi nkendo i aimikilepo liema, waasitile ku luvyalo lwakua Hamori se kwa Sekemu na shekeli 100 ya mutofue.
GEN 33:20 Waakuulilepo kitale ni kwi-inika Eli-Elohe-Izraeli.
GEN 34:1 Dina, se waali Yakobo, ni nghina waali Lea. Waile kupita wapempula bakazyana nakue ba mu kekio kyalo.
GEN 34:2 Sekemu mwana mwalalume mwina Hamori Muhivi, mukulu wa kyalo, lu-aamumwene Dina walimukupita, waamukwete ni kumupatikizia kukumana nakue.
GEN 34:3 Sekemu waawamiinue sana na ozo mukazyana Dina mwina Yakobo. Sekemu waabambile kumubembia ozo mukazyana na twebo tuweme.
GEN 34:4 Sekemu waamwanine se Hamori amutwamine ozo mukazyana kuti abe mukazi wakue.
GEN 34:5 Yakobo lu-aunvwile nangue mwana wakue Dina wakipatikiziiwa na Sekemu kuti alaale nakue, taalandile kantu pantu baana bakue balalume baali baile ku kusunga nama mu kisonso. Waapembeele mpaka musita ubaabwelele.
GEN 34:6 Hamori se kwa Sekemu waile kuli Yakobo kuti alanzyanie nakue.
GEN 34:7 Baana bena Yakobo lubaunvwile byaakitikile, baabwelele ku muzi, baafiitilue sana pantu Sekemu waakitile bintu bya bulubi mu Izraeli. Bintu bisipalile kukitika.
GEN 34:8 Hamori waamwanine Yakobo ni baana bakue, “Mwana wane Sekemu wamutona sana Dina. Kansi namipaapaata mumupeele nsambu ya kuti abe mukazi wakue.
GEN 34:9 Tunvwane sie kuti tuye twaufyania. Tupeele baana benu banakazi, ni fwe tumipeele baana betu banakazi.
GEN 34:10 Kuti mwaikala pamo ni fwefue mu keno kyalo. Kuti mwaikala konse kumwatona kwikala, ni kusuluzia kyonse kimwatona kusuluzia ni kwikwatila kazonga kenu.”
GEN 34:11 Sekemu waamwanine se kwa Dina ni bakuluube, “Namipaapaata kuti mungitabile, ni nene ndikumikitila kyonse kimulikutona kuti n'mikitile.
GEN 34:12 Anzia munundila mutengo ni bupe, ndikumipeela byonse bimulikun'mpingula, inzi mun'mpeele nsambu ya kuupa ozu mukazyana Dina kuti abe mukazi wane.”
GEN 34:13 Inzi pantu Sekemu waamupatikiizie Dina kukumana nakue, baana bena Yakobo baamwasukile Sekemu pamo ni Hamori mu bukengezi.
GEN 34:14 Baalandile evi, “Fwefue tetuvinda kuufia nkazyetu ku bantu basiteetelue yando. Keki ni kya busoni kuli fwefue.
GEN 34:15 Inzi kine mwaitabila kuya mwateetua yando nga fwefue, kuti twaitabila kuti muye mwaupila kono kwetu.
GEN 34:16 Baana benu kuti baupua na baana betu ni baana betu kuti baupua na baana benu. Kabili kuti twaikala nenu ni kuba mutundu umo.
GEN 34:17 Inzi kine mwakaana kuteetua yando, tulikumutwama Dina ni kukuuka tukuuke pa eno nkendo.”
GEN 34:18 Hamori ni mwana wakue Sekemu baawamiinue na kako kaalandilue.
GEN 34:19 Ni pakako, mulumendo taakokwele kuteetua yando pantu waali wamutoneesie Dina. Sekemu waali wakindikilue sana mu lupua lwakue.
GEN 34:20 Hamori ni mwana wakue baile pa mulyango wa muzi ni kulanzyania ni bantu ba mu muzi wabo nangue,
GEN 34:21 “Emwe, baba bantu ni bantu ba mutende. Kansi baleke bekale pamo ni fwefue mu keno kyalo ni kusuluzia. Keno kyalo ni kikata kuti baikala. Baana betu kuti baupua na baana babo, ni baana babo kuti baupua na baana betu.
GEN 34:22 Inzi tupalile sie kukita kintu kimo pakuti tuye twapwene nabo ni kuya twali mutundu umo. Balalume bonse mu lono lupua lwetu bapalile kuya bateetua yando.
GEN 34:23 Fwe bonse kine twaitabizyania, twaakeekala nabo, ni bunonsi bwabo bonse pamo ni bisepe byabo byonse bya nama ni inge nama, byonse byaakaba byetu.”
GEN 34:24 Bekazi bonse ba mu ozo muzi baitabiziizie bintu byaalandile Hamori ni mwana wakue Sekemu. Balalume bonse baateetelue yando.
GEN 34:25 Lupaapitile nsiku itatu bantu bakilimukukisua na bilonda bya yando i baateetelue, Simeoni ni Lawi bandumeze ba munda mumo ni Dina baatweme bipanga, baya kusakukila muzi mu kafiso ni kwipaya balalume bonse.
GEN 34:26 Hamori ni mwana wakue Sekemu ni bo kumo baipailue. Baamufumiizie Dina ku nghanda yakua Sekemu ni kuya nakue.
GEN 34:27 Pa kyamba kya kwipaiwa kwa babo bantu, baana bena Yakobo baatweme bintu bya babo baipailue, pantu Sekemu waamupatikiizie Dina kukumana nakue.
GEN 34:28 Bintu bibaabatwamiine ni bebi: Mikooko, ni mbuzi, ni punda, pamo ni binge byaali byali mu muzi ni mu makaba.
GEN 34:29 Kubalua nghanda baatwememo bunonsi bwabo bonse, ni baana babo bonse, ni bakazi babo bonse pamo ni bintu byonse bibaali nabio.
GEN 34:30 Yakobo waamwanine Simeoni ni Lawi, “Mwe baana bane, mone vimwakita! Evi mwanghingizia mu bwavia bukata ku bantu ba mu Kanaani ni ku bantu ba mu Perisi bekeele batuzyungulukiile. Evi bantu bonse bakaba kunsuula. Nene nsili na bantu bengi. Kine bakabe kukolonghana ni kwiza kunsakukila, bakaba kungipaya pamo ni bantu bane bonse.”
GEN 34:31 Inzi baana baalandile evi, “Fwefue tetuvinda kulekelela nkazyetu kwalulua nga mukambue.”
GEN 35:1 Leza waamwanine Yakobo nangue, “Ale bwela uye wikale ku Beteli kunaakumonekeele lolia luwaamubutukile mukuluubo Esau. Koko i kwa kuti ukabe kuya kukuula nghanda yobe pamo ni kunkuulila kitale.”
GEN 35:2 Yakobo wa-anine lupua lwakue pamo ni bantu ba-aali nakue nangue, “Ale fumie baleza baeni pakati kenu, musambe ni kuvwala ngubo inge.
GEN 35:3 Mane tuye twaya ku Beteli, koko kunakaba kuya kumukuulila Leza kitale. Wene i Leza wanghunvwile mu maavia ane, ni waali pamo nane konse kunaali naya.”
GEN 35:4 Baamupeele Yakobo baleza baeni bonse babaali nabo pamo ni ntimbi yabo. Yakobo waabuulile bebio byonse ni kubifiika mwinsina kimuti kya ku Sekemu.
GEN 35:5 Yakobo ni bantu bakue lubaali basyaya, bantu ba mu mizi yaali yabazyungulukiile baunvwile mwezo ukata. Kabili tekuli muntu waeziizie kukonka baana bena Yakobo.
GEN 35:6 Evi, Yakobo waafikile ku Luzi (i Beteli) mu kyalo kya Kanaani, wene pamo ni bantu bonse baali bali pamo nakue.
GEN 35:7 Pa ezio nkendo waakuulilepo kitale kyaali kyakuutua, “Eli-Beteli.” Papo Leza i pa-aamumwenekeele lu-aali wabutukile mukuluube Esau.
GEN 35:8 Ni Debora kalela wakua Rebeka waafwile ni kuziikua lya ku nkungulua ya Beteli, mwinsina kimuti kya Muterebinti. Kekio kimuti kyaakuutilue, “Aloni-Bakuti.”
GEN 35:9 Kabili Leza waamumonekeele Yakobo lu-aafumine ku Padani-Aramu ni kumupaala.
GEN 35:10 Leza waamwanine evi, “Liina lyobe uli Yakobo. Teukiya wakuutua Yakobo, inzi waya wasyakuutua Izraeli.” Kupwako wamwinika Izraeli.
GEN 35:11 Leza waamwanine evi, “Nene ndi Leza wa Maka onse. Sanduluka ni kuvula. Ntundu ni libumba lya ntundu ingi yaakafuma muli wewe, ni makolo aakafuma mu kitungu kyobe.
GEN 35:12 Kyalo kinaamupeele Abrahamu ni Izaaki, naakakupeela wewe pamo ni nvyalo yobe.”
GEN 35:13 Kupwako, Leza wafumapo ni kumusia Yakobo penka papo pa-aalandile nakue.
GEN 35:14 Ni Yakobo waimikile lipumpu lya libue pa kifuka ki-aalanziiziwepo na Leza, ni kwitililapo ngelelo ya bya kumina, ni mafuta.
GEN 35:15 Yakobo pa kelia kifuka ki-aalanziiziwepo na Leza, waapeenikile, Beteli.
GEN 35:16 Baafumine ku Beteli. Lubaali basyafika ku Efura, misa ya luvyalo yaamukwete Rakeli. Waakisilue sana na misa ya luvyalo.
GEN 35:17 Ozo musita misa ya luvyalo luyaakilile, kinghombe waamwanine evi, “Tekutiina! Ulikuvyala ni unge mwana.”
GEN 35:18 Rakeli lu-aali wasyafua, (pantu waafwile), waasiile wainika mwana nangue ni Benoni. Inzi se waasyele kumwinika Benyamina.
GEN 35:19 Rakeli lu-aafwile waaziikilue mu nzila ya kuya ku Efura. Linge liina lya ozo muzi ni Betlehemu.
GEN 35:20 Yakobo waimikile lipumpu lya libue lya kulangulukilako pa kilibu. Leli lipumpu lya libue ni lenu kumo lililyakuutua nangue kilibu kyakua Rakeli.
GEN 35:21 Izraeli waile kwimika liema lyakue ku bunge bwala bwa lupungu lwa Ederi.
GEN 35:22 Izraeli lu-aali wakiikeele mu kekio kyalo, Rubeni waaleele ni Biliha mukazi mwanike muka Izraeli. Izraeli waunvwile ezio mpunda. Baana bena Yakobo baali lyanondo ni babili.
GEN 35:23 Baana bena Lea meena abo ni aza: Rubeni (libeli wakua Yakobo), ni Simeoni, ni Lawi, ni Yuda, ni Isakari pamo ni Zabuloni.
GEN 35:24 Baana bena Rakeli meena abo ni aza: Yusufu ni Benyamina.
GEN 35:25 Baana bena Biliha mubombi wakua Rakeli meena abo ni aza: Dani ni Nafutali.
GEN 35:26 Baana bena Silipa mubombi wakua Lea meena abo ni aza: Gadi ni Aseri. Babo i baana bena Yakobo baavyaliilue ku Padani-Aramu.
GEN 35:27 Yakobo waile kuli se Izaaki ku Mamure pepi ni Kiriati-Arba, i Hebroni, koko kwaali kwaikeele Abrahamu ni Izaaki.
GEN 35:28 Izaaki waikeele pa kyalo myaka 180.
GEN 35:29 Izaaki waafwile ni kuya kwikala pamo ni bantu bakue wasyali mukote wa myaka ingi. Waaziikilue na baana bakue babili, Esau ni Yakobo.
GEN 36:1 Ezi i mpendua ya bantu ba mu lupua lwakua Esau. (Esau i Edomu).
GEN 36:2 Esau waupile banakazi ba mu Kanaani: Ada mwana mwanakazi mwina Eloni Muhiti i waali mukazi wa mambo. Mukazi wa bubili waali wakuutua Oholibama mwana mwanakazi mwina Ana, mwinzikulu wakua Sibeoni Muhivi.
GEN 36:3 Mukazi wa butatu waali wakuutua Basemati mwana mwanakazi mwina Isimaeli, ndumeze kwa Nebayoti.
GEN 36:4 Ada waavyele, Elifasi. Basemati waavyele, Rueli.
GEN 36:5 Oholibama waavyele Yeusi ni Yalama pamo ni Kora. Babo bonse baana balalume i baana bena Esau baavyaliilue mu kyalo kya Kanaani.
GEN 36:6 Esau waatweme bakazi bakue pamo ni baana bakue balalume ni banakazi, pamo ni bantu bonse ba mu nghanda yakue, kabili waatweme biteekua byakue byonse ni bunonsi bonse bu-aanonkele mu kyalo kya Kanaani. Waamusiile mwalawakue Yakobo ni kuya kwikala ku kyalo kinge.
GEN 36:7 Ba-aandilue kwikala pamo pantu bunonsi bwabo bwaali bwavulile, kabili mu kyalo kibailemo, temwaali nkendo pantu nama yabo yaali yavulile.
GEN 36:8 Esau, i Edomu, waile kwikala ku kyalo kya mpili kya Seiri.
GEN 36:9 Ezi i nvyalo yakua Esau kikolue wa Baedomu ba mu kyalo kya mpili kya Seiri.
GEN 36:10 Aza i meena a baana balalume bena Esau: Elifasi mwana mwalalume mwina Ada muka Esau. Rueli mwana mwalalume mwina Basemati muka Esau.
GEN 36:11 Baana balalume bena Elifasi ni baba: Temani, ni Omari, ni Zefo, ni Gatamu pamo ni Kenasi.
GEN 36:12 Timuna waali mukazi mwanike muka Elifasi mwana mwalalume mwina Esau. Timuna waamuvyaliile Elifasi mwana mwalalume liina lyakue Amaleki. Baba bonse i baana balalume bena Ada muka Esau.
GEN 36:13 Baana balalume bena Rueli ni baba: Nahati, ni Zera, ni Sama, pamo ni Miza. Baba i baana balalume bena Basemati muka Esau.
GEN 36:14 Baana bena Esau baavyelue na Oholibama mwana mwanakazi mwina Ana, mwinzikulu wakua Zibeoni, baali baana batatu balalumenke. Ni meena abo ni aza: Yeusi, ni Yalamu pamo ni Kora.
GEN 36:15 Baba i babikolue ba nvyalo yakua Esau. Baana bena Elifasi libeli wakua Esau, meena abo ni aza: Lisiiko Temani, ni Omari, ni Zefo, ni Kenasi,
GEN 36:16 ni Kora, ni Gatamu, pamo ni Amaleki. Baba i babikolue baafumine kuli Elifasi mu kyalo kya Edomu. Baba i baana balalume bena Ada.
GEN 36:17 Baana balalume bena Rueli mwana mwalalume mwina Esau, meena abo ni aza: Lisiiko Nahati, ni Zera, ni Sama pamo ni Miza, baba i babikolue baafumine kuli Rueli mu kyalo kya Edomu. Baba i baana balalume bena Basemati muka Esau.
GEN 36:18 Baana balalume bena Oholibama muka Esau, meena abo ni aza: Lisiiko Yeusi, ni Yalamu pamo ni Kora, baba i babikolue baafumine kuli Oholibama mwana mwanakazi mwina Ana muka Esau.
GEN 36:19 Babo bonse i baana balalume bena Esau, kabili i babikolue ba Baedomu.
GEN 36:20 Baana balalume bena Seiri Muhori, bene kyalo, meena abo ni aza: Lotani, ni Sobali, ni Sibeoni, ni Ana,
GEN 36:21 ni Disoni, ni Ezeri pamo ni Disani. Babo bantu i babikolue baafumine ku Bahori, baana balalume bena Seiri mu kyalo kya Edomu.
GEN 36:22 Baana balalume bena Lotani, meena abo ni aza: Hori ni Hemamu. Lotani waali ni nkaziize liina lyakue Timuna.
GEN 36:23 Baana balalume bena Sobali, meena abo ni aza: Alwani, ni Manahati, ni Ebali, ni Sefo pamo ni Onamu.
GEN 36:24 Baana balalume bena Sibeoni, meena abo ni aza: Aya ni Ana. Ozu Ana i olia waasangile nsulo ya menda a mwenzi mu kaseeba lu-aali wasunga punda yakua se Sibeoni.
GEN 36:25 Meena a baana bena Ana ni aza: Disoni ni Oholibama waali mwana mwanakazi mwina Ana.
GEN 36:26 Baana balalume bena Disoni, meena abo ni aza: Hemudani, ni Esibani, ni Itirani pamo ni Kerani.
GEN 36:27 Baana balalume bena Ezeri, meena abo ni aza: Bilihani, ni Zawani pamo ni Akana.
GEN 36:28 Baana balalume bena Disani, meena abo ni aza: Uzi ni Arani.
GEN 36:29 Babikolue baafumine mu Bahori, meena abo ni aza: Lotani, ni Sobali, ni Sibeoni, ni Ana,
GEN 36:30 ni Disoni, ni Ezeri, pamo ni Disani. Baba i babikolue ba Bahori, kukonkana ni mikowa yabo mu kyalo kya Seiri.
GEN 36:31 Baba i bamakolo baateekele mu kyalo kya Edomu lukwaali tekunabe likolo ku Baizraeli.
GEN 36:32 Bela mwana mwalalume mwina Beori waateekele mu Edomu. Liina lya muzi wakue lyaali lyakuutua Dinihaba.
GEN 36:33 Bela lu-aafwile, Yobabu mwana mwalalume mwina Zera wa ku Bosera waateekele pa kifuka kyakue.
GEN 36:34 Yobabu lu-aafwile, Husamu wa ku kyalo kya Batemani waateekele pa kifuka kyakue.
GEN 36:35 Husamu lu-aafwile, Hadadi mwana mwalalume mwina Bedadi, waumine Bamidiani mu bukaba bwakua Moabu, waateekele pa kifuka kyakue. Ozo muzi waali wakuutua Awiti.
GEN 36:36 Hadadi lu-aafwile, Samula wa ku Masireka, waateekele pa kifuka kyakue.
GEN 36:37 Samula lu-aafwile, Sauli wa ku Rehoboti ili mumbali mwenzi, waateekele pa kifuka kyakue.
GEN 36:38 Sauli lu-aafwile, Bali-Hanani mwana mwalalume mwina Akibori, waateekele pa kifuka kyakue.
GEN 36:39 Bali-Hanani mwana mwalalume mwina Akibori lu-aafwile, Hadari waateekele pa kifuka kyakue. Liina lya muzi wakue lyaali lyakuutua Pau, ni liina lya mukazi wakue lyaali lyakuutua Mehetabeli mwana mwanakazi mwina Matiredi, ni Matiredi ni ye waali mwana mwanakazi mwina Me-Zahaba.
GEN 36:40 Babikolue baafumine kuli Esau mu lupua lwabo ni mu nkendo yabo, meena abo ni aza: Timuna, ni Alwa, ni Yeteti,
GEN 36:41 ni Oholibama, ni Ela, ni Pinoni,
GEN 36:42 ni Kenasi, ni Temani, ni Mibusari,
GEN 36:43 ni Magdieli pamo ni Irama. Baba i baali babikolue ba Baedomu baali baikeele mu kyalo kibaapeelue. Esau i kikolue wa Baedomu.
GEN 37:1 Yakobo waatwaliliile kwikala mu kyalo kya Kanaani, momo mwaali mwaikeele se nga mweni.
GEN 37:2 Lyasi lyakua Yakobo ni leli. Yusufu lu-aali wakili na myaka lyanondo ni kilooba, waali wasunga mikooko ni mbuzi, kabili waali wali pamo ni bakuluube bena Biliha ni Silipa, bakazi bakua Yakobo. Yusufu waile kumubwila se bintu bibiipile byaali byakita bakuluube.
GEN 37:3 Inzi Izraeli waali wamutoneesie Yusufu kukila bange baana bonse pantu waali mwana wa mu bukote, kabili waamukitiile nkanzu ya mikumino ilekenkeene.
GEN 37:4 Bakuluube lubaamwene nangue Yusufu waali watonenue kukila bange bonse, baamusuulile sana mpaka balekela ni kulanda nakue bwino bwino.
GEN 37:5 Busiku bumo Yusufu waalootele kilooto kimo. Lu-aile kubwilako bakuluube kilooto kyakue, baakilile kumusuula.
GEN 37:6 Yusufu waalandile evi, “Emwe, unvue kilooto kinalootanga.
GEN 37:7 Twile twalimukukaka bisi bya nghano mu bukaba, kisi kyane kyabuukanga ni kwimana misiki, inzi bisi byenu byaimananga byazyungulukiile kisi kyane ni kukikontamina.”
GEN 37:8 Bakuluube baamwipuziizie evi, “Eba, umwene nangue wewe i wakaba kututeeka ao kuya wali ni buvinde pali fwefue?” Kabili baakilile sie kumusuula pa mulandu wa bilooto byakue ni pa mulandu wa bintu bi-aali walanda.
GEN 37:9 Kabili Yusufu waalootele ni kinge kilooto ni kubabwila bakuluube nangue, “Emwe, kabili nalootanga ni kinge kilooto. Namonanga koba ni kwezi pamo ni ntanda lyanondo ni lumo byankontamina.”
GEN 37:10 Inzi lu-aabwilileko se pamo ni bakuluube, se waamusasiliile wamwana nangue, “Eba, i kilooto kya musangoki keki kiwalootanga? Ulangakeene nangue noko ni nene pamo ni bakuluubo bonse twaakeeza kukukontamina?”
GEN 37:11 Bakuluube kwa Yusufu baamunvwiliile sana bunkua, inzi se waatwaliliile sie kuya walangakana palua bebio bilooto.
GEN 37:12 Busiku bumo bakuluube baile ku Sekemu ku kusunga mikooko yakua sibo.
GEN 37:13 Izraeli waamwanine Yusufu, “Unvua, bakuluubo balimukusunga mikooko ku Sekemu.” Ale iza nkutume uye wayako. Yusufu waalandile evi, “We tawe, kili sie bwino, kuti naya.”
GEN 37:14 Se waamwanine evi, “Ale endo waya umone kine bakuluubo bakosele, uye umone ni mikooko kine ili bwino, mane uye wize un'mbwile.” Evi i vyaatuminue Yusufu na se kufuma mu lulambe lwa Hebroni kuya ku Sekemu.
GEN 37:15 Muntu umo waamusangile walimukwenda mu kisonso. Ozo muntu waamwipuziizie Yusufu, “Ewe, ulimukukebaki?”
GEN 37:16 Yusufu wa-asukile evi, “Ndimukukeba bakuluamwine. Kuti wanangilila kubalimukusungila mikooko yabo?”
GEN 37:17 Ozo muntu waamwanine evi, “Pano baafumangapo kale, pantu naunvwanga balimukulanda nangue, ‘Twende ku Dotana.’” Kupwako, Yusufu wabakonka ni kuya kubasanga ku Dotana.
GEN 37:18 Bakuluube baamumwene walimukwiza lwa kule. Lu-aali tanafike papo pa baali, baunvwene kuti bamwipaye.
GEN 37:19 Baalandile evi, “Mone kaloota wa bilooto olia alimukwiza!
GEN 37:20 Ale tumwipaye ni kumupooza mu kiina kimo kya pa biina. Twaya tulande sie nangue bamwipayanga na kinama, evi tumone kine bilooto byakue byaakakitaki.”
GEN 37:21 Rubeni lu-aunvwile balanda evio, waamupokolwele walanda nangue, “Emwe, tekuti tumwipaye,
GEN 37:22 tekumukisie, inzi mupooze sie mu keki kiina kili mono mu kaseeba pasili kumukita kantu.” Mapange akua Rubeni aali a kuti aye eze amutwame ni kumutwala kuli se.
GEN 37:23 Yusufu lu-aafikile papo paali bakuluube, baamuvuulile nkanzu yakue ya mikumino ilekenkeene i-aali wavwele,
GEN 37:24 bamutwama ni kuya kumupooza mu kiina kyaali kyakaminemo menda.
GEN 37:25 Lubaikeele kuti balie, baamwene libumba lya Baisimaeli basulu pamo ni nghamia yabo, baali batweme manukato ni zeri ni manemane balimukukookela ku Misri.
GEN 37:26 Yuda waabaanine bakuluube, “Emwe, unvue! Kine twamwipaya mwalawetu ni kuzuumia mulopa wakue tulikunonkapoki?
GEN 37:27 Nene namona sie kuti tumusisie ku Baisimaeli pasili kumukisia pantu ni mwalawetu, kabili tuli sie nakue mubili umo ni mulopa umo.” Ba kwakue baamwitabiizie.
GEN 37:28 Basulu ba Bamidiani lubaali balimukupita lya papo, bakuluube baamufumiizie mu kiina ni kumusisia ku Baisimaeli na nfolanga 20. Babo bantu baamutweme ni kuya nakue ku Misri.
GEN 37:29 Rubeni lu-aabwelele ni kusanga Yusufu tekuba wali mu kiina, waunvwile bulanda bukata ni kuzabula ngubo yakue.
GEN 37:30 Waile kwaali kwali balabakue ni kubaana nangue, “Emwe, Yusufu mu kiina talimo! Ndikukita syani?”
GEN 37:31 Baabuulile nkanzu ni kutubia mu mulopa wa kapwata kabaipaile.
GEN 37:32 Baatweme nkanzu ya mikumino ilekenkeene ni kuya kumutwalila sibo balanda nangue, “We tawe, twatoolanga ezi ngubo! Monanke kine ni yakua mwana obe ao abe.”
GEN 37:33 Se wainikile ni kulanda nangue, “Ezi ni ngubo yakua mwana wane, waliiwanga na kinama. Kisinka Yusufu waazanghununwanga bipusa bipusa!”
GEN 37:34 Yakobo waazabwile ngubo yakue ni kuvwala lisaaka mu kitungu. Waamulilile mwana wakue nsiku ingi.
GEN 37:35 Baana bakue bonse, balalume pamo ni banakazi, baile kumutalazia, inzi wene waakeene kutalaziwa. Waalandile evi, “Nakaana. Nene nakaba kufua nalimukulila ni kuziikua pepi ni mwana wane.” Ni pakako, waatwaliliile sie kumulila mwana wakue Yusufu.
GEN 37:36 Balia Bamidiani baile kumusisia Yusufu ku Misri kuli Potifari kiloolo wakua Farao, kabili i waali kiloolo wa bakalinda.
GEN 38:1 Pa ozo musita Yuda waasiile bakuluube ni kuya kwikala na muntu umo wa ku Adulamu liina lyakue Hira.
GEN 38:2 Yuda waamweneko mukazyana mwina Mukanaani umo liina lyakue Sua, waamuupile ni kukumana nakue.
GEN 38:3 Ozo mwanakazi waimitile ni kuvyala mwana mwalalume ni kumwinika Eri.
GEN 38:4 Kabili waimitile, wavyala unge mwana mwalalume ni kumwinika Onanu.
GEN 38:5 Lu-aimitile lya butatu, waavyele unge mwana mwalalume ni kumwinika Sela. Ozo mwana lu-aavyelue, Yuda wali ku Kezibu.
GEN 38:6 Pa kyamba, Yuda waakebele mwanakazi wa kuupua na mwana wakue libeli liina lyakue Eri. Ozo mukazyana waali wakuutua Tamari.
GEN 38:7 Inzi Eri, libeli wakua Yuda, waali wali mubi ku menso akua Yawe. Ni pakako, Yawe waamwipaile.
GEN 38:8 Yuda waamwanine Onanu, “We mwana wane, pyana ozu mwanakazi muka Eri evi umuvyalile wa kobe baana.”
GEN 38:9 Inzi Onanu waamanine nangue baana tebakaba bakue. Ni pakako, lu-aali walaala na ozo mwanakazi, waali waitilila mbezu ya buvyazi pansi watiina kumuvyalila wa kwakue baana.
GEN 38:10 Yawe taawamiinue na misango yaakitile Onanu. Ni pakako, ni ye waamwipaile.
GEN 38:11 Yuda waamwanine Tamari muka mwana wakue nangue, “Ikala mu bumukanfwilua mu nghanda yakua so wapembeele mpaka musita waakakula mwana wane mwalalume Sela.” Ki-aalandiile evio, waali watiina nangue Sela ni ye kuti wafua nga vyaafwile bakuluube. Kupwako, Tamari wabwelela ku nghanda yakua se.
GEN 38:12 Lupaapitile myaka ingi, muka Yuda, mwana mwanakazi mwina Sua, waafwile. Malilo lu-aapwile, Yuda ni kibuza wakue Hira wa ku Adulamu, baile ku Timuna kwaali kwatebulua mikooko yakue.
GEN 38:13 Muntu umo waile kumubwila Tamari nangue sevyala waya kutebula mikooko yakue ku Timuna.
GEN 38:14 Tamari waavuulile ngubo yakue ya bumukanfwilua, waikupa kitambala ni kwikala pa mulyango wa nghingililo ya muzi wa Enaimu waali mumbali musebo uwile ku Timuna. Waakitile evi pantu waali wamanine nangue Sela mwana mwalalume mwina Yuda waali wasyakulile, kabili pantu tanapeelue Sela kuba mulume wakue.
GEN 38:15 Yuda lu-aapitiile paali paikeele Tamari, waalangakeene nangue ozo mwanakazi waali wali mukambue pantu waali waikupile pa menso.
GEN 38:16 Waamukonkele mumbali musebo ni kumwana nangue, “Nene natona kuti ndaale nobe.” Taali wamanine nangue i waali muka mwana wakue. Ozo mwanakazi waamwipuziizie evi, “Kine walaala ni nene ulikun'mpeelaki?”
GEN 38:17 Waamwasukile, “Nakaba kukupeela musoka wa mbuzi wa pa kisepe kyane.” Mwanakazi waamwanine evi, “Ale kansi n'mpeele kikwatizi kya kuti nsyale nakio mpaka paukantumina ozo mbuzi.”
GEN 38:18 Mwalalume waipuziizie evi, “Ale ndikukusiila kikwatiziki?” Mwanakazi waalandile evi, “Ulikunsiila kazele ka kumunue ni lwando pamo ni kabango kauliwaendelako.” Kupwako wamupeela. Lu-aaleele nakue, mwanakazi waimitile.
GEN 38:19 Kupwako, wabuuka waya, waivimbula kitambala kyakue ni kuvwala paakale ngubo ya bumukanfwilua.
GEN 38:20 Yuda waamutumine kibuza wakue Muadulamu kuti aye atwale mbuzi kuli ozo mwanakazi ni kupoka bintu bi-aasiileko, inzi taamusangile.
GEN 38:21 Waipuziizie bantu bamo ba ku Enaimu, “Emwe, olia mukambue waali waikeele papa mumbali musebo ali pi?” Baamwasukile nangue, “Pano tetunamonepo mukambue.”
GEN 38:22 Waabweleele kuli Yuda. Waamwanine evi, “Nsyamusanghanga. Ni bantu ba koko banghananga nangue pano tetunamonepo mukambue.”
GEN 38:23 Yuda waalandile evi, “Muleke sie asyale ni bikwatizi. Tetutonene kusekua na bantu. Namutuminanga mbuzi, inzi we tewamusanghanga.”
GEN 38:24 Lupaapitile myezi itatu, muntu umo waizile kumubwila Yuda nangue, “Tamari muka mwana obe waakikita bukambue, kabili ali ni liimi lya mu bukambue.” Yuda waalandile evi, “Ozo mwanakazi aziziiwe mu mulilo afue.”
GEN 38:25 Ozo mwanakazi lu-aali walimukutwalua, waatumine muntu umo kuli sevyala aye amwane nangue, “Nene nghimisiiziwe na mwine wa bebi bintu. Waalandile evi, ‘Nakulomba winike mwine wa kaka kazele ka ku munue ni lwando pamo ni kabango.’”
GEN 38:26 Yuda lu-aabiinikile, waalandile evi, “Ozu mwanakazi ali ni nsambu kukila nene, pantu nsyamupeele Sela mwana wane amuupe.” Ni pakako, taaleele nakue kabili.
GEN 38:27 Musita wakuvyala luwakumeene, kyaamwenekele nangue alikuvyala bampundu.
GEN 38:28 Misa luyaamukwete, mwana umo waafumiizie kuboko. Kinghombe waakakile nyunzi ya kasi ku kuboko. Waalandile evi, “Ozu i wa mambo.”
GEN 38:29 Inzi lu-aabweziizie kuboko, mwinakue waavyelue. Kinghombe waalandile evi, “Wewe i waizula nzila.” Ni pakako, ozo mwana wainikilue Perezi.
GEN 38:30 Mwinakue waakakilue nyunzi ya kasi ku kuboko lu-aavyelue, wainikilue Zera.
GEN 39:1 Yusufu waatwelue ku Misri. Potifari wa ku Misri, kiloolo wakua likolo, mukulu wa bakalinda, i waamusitile Yusufu ku Baisimaeli baamutwele koko.
GEN 39:2 Yawe waali pamo ni Yusufu ni kumupaala mu byonse bi-aali wakita mu nghanda yakua selenzi Mumisri.
GEN 39:3 Potifari wainikile nangue Yawe waali wali pamo ni Yusufu, kabili nangue waali wapaalilue mu byonse bi-aali wakita.
GEN 39:4 Potifari waawamiinue sana mpaka wamupeela Yusufu mwilo wa kulabukila nghanda yakue pamo ni bintu byonse bi-aali nabio.
GEN 39:5 Kutula musita u-aabiikilue kuba ndabukizi wa mu nghanda yakua Potifari ni wa bintu byonse bi-aali nabio, Yawe waapaalile nghanda yakua Potifari pa mulandu wakua Yusufu, ni kupaala bintu byonse bi-aali nabio mu nghanda ni mu makaba.
GEN 39:6 Waasiile bintu byonse mu maboko akua Yusufu, kabili taapoozeleko maano ku bintu byakue, inga sie ku bilio bi-aali walia Ni Yusufu waali ni mibeele iweme, ni lukebu lwaweme.
GEN 39:7 Pa kyamba kya bebi byonse, muka Potifari waamutokeemue Yusufu ni kumwana alaale nakue.
GEN 39:8 Inzi wene waakeene wamwana muka Potifari nangue, “Potifari tamanine bintu bindi nabio mono mu nghanda, wene an'mpeele nsambu ya kusunga byonse.
GEN 39:9 Mu eno nghanda temuli unge ankilile pa nsambu in'mpeelue, kabili n'mpeelue nsambu pa bintu byonse kufumiako sie wewe pantu uli mukazi wakue. Ale ndikukitilaki kintu kibiipile evi ni kumuluvia Leza?”
GEN 39:10 Anzia kine waali wamukebakeba sie kubalua busiku, wene taamwitabiizie kuti alaale nakue ao kuba pamo nakue.
GEN 39:11 Busiku bumo Yusufu lu-aingiile mu nghanda mu kubomba miilo yakue, ozo musita mu nghanda temwaali ata mubombi unge.
GEN 39:12 Muka Potifari waamukwete ku ngubo wamwana nangue, “Iza ulaala ni nene!” Yusufu waifompwele, wabutukila panze ni kumusia wakwete ngubo yakue.
GEN 39:13 Muka Potifari lu-aamwene nangue Yusufu wabutukila panze, ni ye wasyala sie wakwete ngubo yakua Yusufu mu minue,
GEN 39:14 waapundile wakuuta bantu ba mu nghanda yakue wabaana nangue, “Mone, waaleetele Muebrania kono kwetu kuti atuleebule! Wakiba waumiine kulaala ni nene, inzi nene nasamunanga na maka,
GEN 39:15 ni ye lu-aunvwanga nasamuna, wabutukilanga panze ni kunsiila ngubo yakue.”
GEN 39:16 Muka Potifari waasungile ngubo yakua Yusufu mpaka lwaizile mulume wakue.
GEN 39:17 Waamwanine mulume wakue lyasi lyonse nangue, “Ozu Muebrania muzia uwaatuleeteele, wakinghingilila wakebele kulaala ni nene.
GEN 39:18 Inzi lunakisamuna, wakibutukila panze ni kunsiila ngubo yakue.”
GEN 39:19 Mulume wakue Potifari lu-aunvwile bi-aabwililue na mukazi wakue nangue i vyakikita mubombi wakue, waafiitilue sana.
GEN 39:20 Potifari waamutweme ni kumukaka mu buloko mwaali mwakakilue bakakua bakua likolo.
GEN 39:21 Inzi Yawe waali wali pamo ni Yusufu ni kumulangisia ntono yakue ikata, evi mukulu wa buloko aye wawamiinue na Yusufu.
GEN 39:22 Kalinda wa buloko waamupeele Yusufu bukulu pa bakakua bonse, ni byonse bibaali bakita papo, wene i waali watantika.
GEN 39:23 Kalinda wa buloko taapoozeleko maano ku bintu byaali byatantika Yusufu pantu Yawe waali wali pamo nakue. Ni byonse bi-aali wakita, Yawe waali wabipaalile.
GEN 40:1 Bebi byonse lubyaapitile, muntu waali wapeelue nsambu ya kupeela likolo divai, ni olia kaapika wa mikate baamuluviizie Farao, likolo wa ku Misri.
GEN 40:2 Farao waabafiitiilue babo babiloolo babili, mukulu wa balia bapeelue nsambu ya kupeela likolo divai, ni mukulu wa bakaapika ba mikate.
GEN 40:3 Waabatumine kuya kusungua mu buloko mu nghanda ya mukulu wa bakalinda, momo mwaali mwakakilue Yusufu.
GEN 40:4 Mukulu wa buloko waamwanine Yusufu kuti aye wali mubombi wa babo babiloolo babili. Waabasuungile, ni bo baikeelemo musita uniini.
GEN 40:5 Busiku bumo busiku, babo bakakua babili, mukulu wa bakateania ba divai ni mukulu wa bakaapika ba mikate baali babombela likolo wa ku Misri, kubalua muntu waalootele kilooto kyaali ni ndubulwilo iibeeleele.
GEN 40:6 Yusufu lu-aile kubamona lukeelekeele, waabamwene baali ni bulanda.
GEN 40:7 Waipuziizie balia babiloolo babili bakua Farao baali bakakilue pamo nakue mu nghanda yakua Potifari nangue, “Ale lelo mumwenekeeleki mwali ni bulanda?”
GEN 40:8 Baamwasukile nangue, “Fwefue twalootanga kubalua muntu kilooto kyakue, ni evi tetuli na muntu wa kutulondolwela.” Yusufu waabaanine evi, “Eba, Leza te i ali ni buvinde bwa kulondolola bilooto? Ale n'mbwile vimwalootanga.”
GEN 40:9 Mukulu wa bakateania ba divai waamwanine Yusufu kilooto kyakue, “Nene nalootanga muzabibu waimeene ku ntanzi yane.
GEN 40:10 Ku ozo muzabibu kwakiba misambo itatu. Penka papo maani atomba kale, buluba ni bo bwatoota, ni bisansa bya mizabibu ni byo byapia.
GEN 40:11 Namonanga nakwete kikombe kyakua Farao, nabuula mizabibu, nafininamo ni kuya kumupeela Farao.”
GEN 40:12 Yusufu waalandile evi, “Elia misambo itatu, i nsiku itatu.
GEN 40:13 Nsiku itatu paikaba kupua, Farao wakaba kukufumia mu buloko, ni kukubweziizia mwilo obe u waali wabomba. Wewe wakaba kumupeela Farao kikombe kya divai mu minue nga viwaali wamupeela pa mambo luwaali wali kateania wa divai.
GEN 40:14 Inzi ukaananguluke paukapaalua, kabili tekukalaba kunandilako kuli Farao evi ni nene nkakakulue mono mu buloko.
GEN 40:15 Pantu kisinka lunaali ku kyalo kyetu kya Baebrania, naibilue. Kabili ni mono mwenka mu Misri nkakilue mu buloko tekuba nali na mulandu.”
GEN 40:16 Mukulu wa bakaapika ba mikate lu-aunvwile ndubulwilo ya kilooto yaweme, waamwanine Yusufu nangue, “Ni nene wenka nalootanga naitwikile bipanda bitatu bya mikate.
GEN 40:17 Mu kipanda kya pa muulu mwaba mwali bilio byapikilue bya misango ilekekeene byakua Farao, mu kekio kipanda mwakookelanga tooni twaizanga kulia ezio mikate.”
GEN 40:18 Yusufu waamwanine evi, “Ndubulwilo ya kilooto ni ezi: Bipanda bitatu i nsiku itatu.
GEN 40:19 Nsiku itatu paikaba kupua, Farao wakaba kuputula mutue ni kukulika mubili obe ku kimuti evi tooni tukabe ku kulia.”
GEN 40:20 Busiku bwa butatu bwa nsikunkulu ya kuvyalua kwakua Farao, Farao waabatebetele babombi bakue bonse. Mukulu wa bakateania ba bya kumina ni mukulu wa bakaapika ba mikate baakakwilue ni kuleetua pa ntanzi yakua Farao, ni pa ntanzi ya babombi bakue.
GEN 40:21 Mukulu wa bakateania ba bya kumina waabweziiziwe pa mwilo wakue, evi atendeke kumutwalila Farao kikombe.
GEN 40:22 Inzi mukulu wa bakaapika ba mikate waakulikilue. Byonse byaakitikile nga mwaalandiile Yusufu.
GEN 40:23 Inzi mukulu wa bakateania ba bya kumina taamulangulukile Yusufu. Waamulabile.
GEN 41:1 Ku mpeleezio ya myaka ibili, Farao waalootele waimeene mumbali Mwenzi wa Nile.
GEN 41:2 Waamwene nghombe kilooba iweme yainine yalimukufuma mu mwenzi. Luyaafumine, yaatendekele kulia bikusi.
GEN 41:3 Kabili waamwene inge nghombe kilooba yalimukufuma mu mwenzi. Nghombe yabiipile kabili yaondele. Ezio nghombe yaizile kwimana pepi na inge nghombe mumbali mwenzi.
GEN 41:4 Nghombe iinine yaweme yaatelekelue na nghombe yondele yabiipile. Mu kumona sie evio, Farao wasantamuka.
GEN 41:5 Farao waaleele paakale ni kuloota kinge kilooto. Waamwene misokoti kilooba ya nghano iweme yatanine yali ku kamuti kamo ka nghano.
GEN 41:6 Kabili waamwene, misokoti kilooba ya nghano yondele yapukilue na mwela wa ku kabanga.
GEN 41:7 Misokoti kilooba yaatelekele misokoti ya nghano yaali yatanine. Farao lu-aasantamukile, wainikile nangue waali walimukuloota.
GEN 41:8 Lubwaakiile, Farao waatoobokele. Waatumine bantu ba kuya kukuuta nghanga ni bantu ba maano ba mu Misri. Waababwilile kilooto kyakue, inzi tekwaali muntu waamulondolweleele.
GEN 41:9 Muntu waali wapeelue nsambu ya kupeela likolo divai waamwanine Farao, “Nene nalanguluka bilubo byane lelo.
GEN 41:10 Musita umo Farao waafiitiilue babombi bakue, wankakile mu nghanda ya mukulu wa bakalinda, nene pamo ni mukulu wa bakaapika ba mikate.
GEN 41:11 Busiku bumo fwe babili twaalootele kubalua muntu kilooto kili ni bulondolozi bwakue.
GEN 41:12 Kwaali mulumendo umo Muebrania utwaali twakakilue nakue, mubombi wakua mukulu wa bakalinda. Lutwaamwanine bilooto byetu, kubalua muntu waalondolweleelue ndubulwilo ya kilooto kyakue.
GEN 41:13 Byonse bi-aalandile byaatukitikiile. Wewe wan'mbweziizie nene pa mwilo wane, inzi mukulu wa bakaapika ba mikate wewe waamukulikile.”
GEN 41:14 Farao waatumine muntu wa kuya kumutwama Yusufu. Penka papo wakakulua kale mu buloko. Lu-aatebwilue misisi ni kuvwala ngubo yakue, waile kwimana ntanzi yakua Farao.
GEN 41:15 Farao waamwanine Yusufu, “Nakiloota bilooto, ni bebi bilooto bantu bakyandua kubilondolola. Inzi nakyunvua nangue wewe kuti wavinda kubilondolola.”
GEN 41:16 Yusufu waamwasukile Farao, “Nene na maano ane nsivinda, inga sie Leza mwine i alikumulondolwela Farao ndubulwilo ya kiine.”
GEN 41:17 Farao waalandile evi, “Nene nakiloota naimeene mumbali mwenzi.
GEN 41:18 Nakimona nghombe kilooba iweme yainine yalimukufuma mu mwenzi. Luyakifuma, yakitendeka kulia bikusi.
GEN 41:19 Kabili nakimona inge nghombe kilooba yondele itope yabiipile yalimukufuma mu mwenzi. Mono mu Misri nsinamonemo nghombe yondele nga ezio.
GEN 41:20 Nghombe yondele yabiipile yaatelekele nghombe kilooba ya mambo yaali yainine.
GEN 41:21 Luyaatelekele ezio nghombe, teyaamanikile nangue i yatelekanga nghombe iinine, inzi yaali yamwenekele sie yabiipile nga viyaali pa mambo. Kupwako, nasantamuka.
GEN 41:22 Kabili nakiloota misokoti kilooba ya nghano yatanine yaweme yaali yasyakosele yatweme ku kamuti kamo ka nghano.
GEN 41:23 Kabili nakimona misokoti kilooba ya nghano yondele yapukilue na mwela wa ku kabanga.
GEN 41:24 Nghano yaali yaondele yaatelekele misokoti kilooba iweme. Nakilootolwela banghanga, inzi tekuli muntu wakinondolwela ndubulwilo.”
GEN 41:25 Yusufu waamwanine Farao nangue, “Bebi bilooto byobe ni bimonke sie. Leza wakikulangisia vi-aliwakaba kukita pa kyamba kya musita uniini.
GEN 41:26 Elia nghombe kilooba iweme, i myaka kilooba, ni elia misokoti kilooba ya nghano iweme, ni yo i myaka kilooba. Bebi bilooto byonse ni bimonke sie.
GEN 41:27 Elia nghombe kilooba yondele ni ibiipile yaafumine pa kyamba kya inge, i myaka kilooba, ni elia misokoti kilooba musili kantu, i myaka kilooba ya nzala.
GEN 41:28 Kaka i keebo kanamwana Farao, Leza wakimulangisia Farao vi-aliwakaba kukita pa kyamba kya nsiku iniini.
GEN 41:29 Unvua, myaka kilooba mu Misri mwaakaba bya kulia bingi,
GEN 41:30 ni inge myaka kilooba yaakakonkapo, mwaakaba nzala. Ni bantu bonse baakalaba nangue mu kyalo kya Misri mwaali ni bya kulia bingi, pantu ezio nzala yaakeenoona kyalo.
GEN 41:31 Ni pakako, bwingi bwa bilio tebukalangulukua mu kyalo pantu ezio nzala yaakeeza, yaakaba yakilile kubiipa.
GEN 41:32 Keki kilooto kyakua Farao kikibweleele libili, ni pa mulandu wa kusininkizia mapange akaba kukitua na Leza pa kyamba kya nsiku iniini.
GEN 41:33 “Ni pakako, Farao akebe muntu wa maano ni mulangue wakuti abe ndabukizi wa kyalo kya Misri.
GEN 41:34 Kabili asaakwilepo ni bange babiloolo bakuti baye babiika kimo kya pa bisaano bya pa buzombozi bwa mu myaka kilooba ya bilio mu kyalo kya Misri,
GEN 41:35 bakolonghanie buzombozi mu eno myaka iweme ilimukwiza ni kuziba bobo buzombozi mu matala a mu mizi ni kubusunga.
GEN 41:36 Bebi bilio byaakasungua mu kyalo mu myaka kilooba ya nzala yaakaba mu kyalo kya Misri, evi kyalo tekuti kikeenoonue na nzala.”
GEN 41:37 Farao pamo ni babiloolo bakue bonse baawamiinue sana na bobo bulanzi.
GEN 41:38 Farao waipuziizie evi, “Ati, kubako ni kiine kuti twasanga unge muntu nga ozu ali ni Mweo wakua Leza?”
GEN 41:39 Farao waamwanine Yusufu, “Tekuli unge ali ni maano ni mulangue nga wewe, pantu wewe i wakifyulilua na Leza totu twebo tonse.
GEN 41:40 Ni pakako, wewe wenka i waakaba mukulu pa nghanda yane, ni bulanzi bobe bwaakanakilua na bantu bane bonse. Inzi naakaba mukulu wa kyalo kyonse kukila wewe.”
GEN 41:41 Farao waamwanine Yusufu, “Mona nakubiika kuba mukulu wa kyalo kyonse kya Misri.”
GEN 41:42 Farao waavuulile kazele kakue ka kalangi ni kumuvwika Yusufu ku munue, waamuvwika ni ngubo ya kitani kiweme, kabili wabuula ni mukufu wa oro wamuvwika mu mukosi.
GEN 41:43 Yusufu waaseziiziwe mu tyakala ya bubili yakua Farao kuya wali nkonkani wakua Farao. Bakalinda bakue baali baya bamutangiliile balimukupunda nangue, “Fukame.” Yusufu wapeelua bukulu bwa kuteeka kyalo kyonse kya Misri.
GEN 41:44 Farao waamwanine Yusufu nangue, “Nene ndi Farao, inzi mono mu Misri monse tekuli muntu wakulendula kuboko ao lukasa kine teumupeele nsambu.”
GEN 41:45 Farao waamwinikile Yusufu linge liina lya Zafenati-Panea ni kumuufia mwana mwanakazi liina lyakue Asenati mwina Potifera kitambua wa mu muzi wa Oni.
GEN 41:46 Yusufu waali na myaka 30 lu-aabiikilue pa mwilo na Farao, likolo wa ku Misri. Yusufu waafumine kuli Farao ni kuya kwenda mu kyalo kyonse kya Misri.
GEN 41:47 Mu ezio myaka kilooba, kyalo kyaameniizie bilio bingi.
GEN 41:48 Mu ezio myaka kilooba Yusufu waakolonghaniizie bilio byonse bya mu kyalo kya Misri ni kubiziba mu milue. Mu mizi yonse ya mu Misri mwaazibilue bilio bya mu makaba aali aizyungulukiile.
GEN 41:49 Yusufu waazibile bilio bingi sana byavulile nga musenga wa mumbali lyezi. Baalekeele ni kupenda pantu byaali byakilile kuvula.
GEN 41:50 Lubaali tebanaingile mu mwaka wa nzala, Asenati mwana mwanakazi mwina Potifera kitambua wa mu muzi wa Oni, waali wasyamuvyaliile Yusufu baana babili balalume.
GEN 41:51 Libeli wakue waamwinikile Manase. I kulanda nangue, “Leza wanengia kulaba maavia ane onse pamo ni lupua lwane.”
GEN 41:52 Mwana wa bubili waamwinikile Efraimu. I kulanda nangue, “Leza wan'mpeela luvyalo mu kyalo kya lyemo lyane.”
GEN 41:53 Myaka kilooba ya bilio yaali mu kyalo kya Misri yaapwile,
GEN 41:54 ni myaka kilooba ya nzala yaabambile nga mwaalandiile Yusufu, ni nzala yaakumeene mu kyalo kyonse. Inzi mu kyalo kya Misri temwaabulile bilio.
GEN 41:55 Nzala luyaakumeene mu kyalo kyonse kya Misri, bantu baile kumulilila Farao. Farao waabaanine Bamisri bonse nangue, “Endo mwaya kuli Yusufu. Kyonse ki-alikumyana, kite.”
GEN 41:56 Nzala luyaakumeene mu kyalo kyonse, Yusufu waizwile milue onse ni kubamba kubasisia Bamisri bilio, ni nzala yaali yakilile kubiipa mu kyalo kya Misri.
GEN 41:57 Bantu ba mu byalo byonse baali baya kusita bilio mu Misri kuli Yusufu pantu nzala yaali yakilile kubiipa pa kyalo.
GEN 42:1 Yakobo lu-aamanine nangue bilio bili ku Misri, waabaanine baana bakue nangue, “Mwe baana, ale mukentaniineki?
GEN 42:2 Nene nakyunvua nangue ku Misri bilio kubili. Kansi kookeleko muye mutusitileko, evi tekuti tufue na nzala.”
GEN 42:3 Kupwako, bakuluube lyanondo bakua Yusufu bakookelako baya ku kusita nghano.
GEN 42:4 Inzi Yakobo taamutumineko Benyamina mwalawakue kwa Yusufu pantu waali watiina nangue pange kuti wakitikilua na kibiipile.
GEN 42:5 Baizraeli baile pamo ni bange bantu ku kusita bilio ku Misri pantu mu kyalo kya Kanaani nzala yaali yakilile.
GEN 42:6 Ozo musita, Yusufu waali wali ndabukizi wa kyalo, kabili i waali wasisia bilio ku bantu bonse ba mu byalo. Bakuluube kwa Yusufu baizile kumufukamina ni kulaala kyuba.
GEN 42:7 Yusufu lu-ainikile nangue ni bakuluube, waabambile kulanda nabo wasasile nga asibenikile. Waabeepuziizie evi, “Mufumine pi?” Baamwasukile nangue, “Fwefue tufumine ku kyalo kya Kanaani. Twizile kono ku kusita bilio.”
GEN 42:8 Anzia kine Yusufu waabenikile, bene tebaamwinikile.
GEN 42:9 Yusufu waalangulukile bilooto bi-aali waloota. Waabaanine evi, “Mwemue muli nengu. Mwiziile sie kumona bunake bwa kyalo.”
GEN 42:10 Baakeene balanda nangue, “Ata we mukulu, fwefue tuli babombi bobe, twiziile sie kusita bilio.
GEN 42:11 Fwefue tuli bena umo, tetuli nengu. We mukulu, fwefue tuli bantu ba kisinka.”
GEN 42:12 Yusufu waabaanine evi, “Tekukaane, mwemue mwiziile kulengula bunake bwa kyalo.”
GEN 42:13 Baalandile evi, “Fwe babombi bobe twaavyelue lyanondo ni babili, baana bena muntu umo wa mu kyalo kya Kanaani, mwalawetu wa mpeleezio asyele na situe, ni unge umo talipo.”
GEN 42:14 Yusufu waalandile evi, “Mwemue muli nengu, nga munamyaninanga.
GEN 42:15 Ni pakako, namilapila mu liina lyakua Farao nangue mupalile kweziiwanke. Kine mwalawenu tanamoneke pano temukapeelua nsambu ya kubwelela kwenu.
GEN 42:16 Tume umo pakati kenu wakuti aye amutwame mwalawenu, ni mwe bange musyale mwakakilue mpaka lwakaba kusininkiziwa bintu bimwalanda. Inzi kulanda kisinka ntanzi yakua Farao mwemue muli nengu.”
GEN 42:17 Kupwako, wabakaka bonse mu buloko nsiku itatu.
GEN 42:18 Busiku bwa butatu Yusufu waabaanine evi, “Kite bindikumyana mukeeza kufua pantu nene ndinatiina Leza.
GEN 42:19 Kine muli bantu ba kisinka, mukwenu umo asyale wakakilue molia mu buloko mumukakilue, inzi mwe bange endo mutwale bilio bya kupwisia nzala kwenu.
GEN 42:20 Mukabe kumuleeta mwalawenu pano evi nkabe kusininkizia nangue bulanzi bwenu ni bwa kisinka. Kine mukabe kukita evio nsikaba kumiipaya.” Ni bo baakitile evio.
GEN 42:21 Baalanzyaniizie nangue, “Emwe, kisinka tulubile pantu twaakeene kunvwila mwalawetu nkumbu lu-aali watupaapaata. Keki i kitwaingilila mu aza maavia.”
GEN 42:22 Rubeni waalandile evi, “I kalia kanaamyanine nangue tekumukitile kibiipile, inzi mwe mwaakeene. Te mwamona! Mulopa wakue ulimukukebua pali fwefue.”
GEN 42:23 Tebaamanine nangue Yusufu waabenikile pantu waali walanda nabo kupitila mu muntu waali walondolola bulanzi bwabo.
GEN 42:24 Yusufu lu-aafumine papo pa baali, waatendekele kulila. Lu-aabweleelepo kabili, waamukwete Simeoni wamukaka ni bonse bamwene.
GEN 42:25 Yusufu wa-anine bantu babeezuziizie bilio mu masaaka ni kubabiikilamo nfolanga yabo, kabili babapailile ni mpamba ya mu nzila. Evi i vibaabakitiile.
GEN 42:26 Baaseziizie masaaka abo pa punda. Kupwako, babamba kuya.
GEN 42:27 Lubaafikile pa nkendo ya kuti balaale, umopo waakakwile lisaaka lyakue abuulemo bilio bya kuliisia punda wakue, waamwene nfolanga yakue yali mukati.
GEN 42:28 Waabaanine benakue nangue, “Emwe, ize mumone nfolanga yane inabweziiziwanga ezi ili momu mu lisaaka lyane.” Bonse baabambile kukwaka na mwezo balanda nangue, “Ni kiki keki kyatukitilanga Leza?”
GEN 42:29 Lubaile kufika kuli sibo Yakobo ku kyalo kya Kanaani, baamubwilile byonse byaabakitikiile nangue,
GEN 42:30 “Ozo mukulu wa kekio kyalo waali walanda wasasile sana kuli fwefue, kabili waali walanda nangue, ‘Tuli nengu ya kyalo.’”
GEN 42:31 Twaamwanine, “We mukulu, fwefue tetuli nengu, inzi tuli sie bantu ba kisinka.
GEN 42:32 Fwefue tuli benenke baana lyanondo ni babili bena situe umo. Mwana umo talipo, mwana mukala wene asyele ku kyalo kya Kanaani kuli situe.”
GEN 42:33 Ozo mukulu wa kyalo wakitwana evi, “Pakuti nsininkizie nangue mwemue muli bantu ba kisinka, umo pakati kenu alikusyala kono, inzi bange babwelelemo ni bilio pantu kuli nzala.
GEN 42:34 Endo mumutwame mwalawenu mumuleete, mane nkabe kusininkizia nangue temuli nengu, kabili mane nkabe kumibweziizia muntu wenu. Kabili ni mwe mwaakaba mwasuluzia mu keno kyalo.”
GEN 42:35 Bonse lubaapongwele bilio mu masaaka abo, kubalua muntu waamwene kafunda kakue ka nfolanga mu lisaaka. Baana bonse pamo ni sibo lubaamwene evio, baatiinine.
GEN 42:36 Sibo Yakobo waabaanine evi, “Mwemue mulimukun'mpwila baana bane! Yusufu talipo, ni Simeoni talipo, kabili evi mulimukukeba mumutwame ni Benyamina! Ena we lyemo!”
GEN 42:37 Rubeni waamwanine se, “We tawe, kine nsikakubweziizia ozu mwana obe, ukepailemo baba baana bane babili. N'mpeele, ni ne nakaba kumubwezia”
GEN 42:38 Waalandile evi, “Ata, ozu mwana wane wene temuya nakue. Unvue, mukuluube waafwile, ozu i wenka asyelepo sie. Pa-akaba kukitikilua na kibiipile mu nzila, nga mwakaba kunengia kufua na kikonko kya mu bukote bwane.”
GEN 43:1 Ozo musita, nzala yaakilile kubiipa mu kyalo.
GEN 43:2 Lubaapwile bilio byonse bibaile kusita ku Misri, sibo waabaanine evi, “Endo mutusitileko binge bilio.”
GEN 43:3 Yuda waamwanine evi, “Olia muntu waatwaanine nangue, ‘Kine temukeeza ni mwalawenu, tekuti tukamonane nenu.’
GEN 43:4 Kine ulikutupeela mwalawetu kuti tuye nakue, tulikukooka kuya ku kusitila bilio.
GEN 43:5 Inzi kine wakaana kuti tuye nakue, fwefue tetukookelako pantu olia muntu waatwaanine nangue, ‘Kine temukeeza pamo ni mwalawenu, tekuti tukamonane nenu.’”
GEN 43:6 Izraeli waalandile evi, “Mwandeetela bwavia bukata sana. Ale mwaamubwiliileki nangue muli ni unge mwalawenu?”
GEN 43:7 Baamwasukile nangue, “Ozo muntu waatwipuziizie biipuzio bingi sana palua lupua lwetu nangue, ‘Sinue akikosele? Temuli na mwalawenu?’ Fwefue twaamwasukile kukonkana ni vikili, inzi tetwaali twamanine nangue kuti watwana tukeeze ni mwalawetu.”
GEN 43:8 Yuda waamwanine se Izraeli, “N'mpeele mulumendo ngie nakue, ni fwe tulikuya, tetukafua na nzala, inzi twaakaba twakosele, fwefue ni wewe pamo ni baana betu.
GEN 43:9 Nene naakaba kikwatizi kyakue. Kine nsikamubwezia wakosele, ukansonze, ni kilubo kyaakaba kyali kyane muyayaya.
GEN 43:10 Pantu kabenge tekukokola, evi nga tetusyabweleleko ni lya bubili.”
GEN 43:11 Sibo Izraeli waabaanine evi, “Kine ni evio, kite evi: Twame mazabo awamiisie a mu keno kyalo mu bitwamo byenu mumutwalile ozo muntu byabupe: Zeri iniini, ni kapelo kaniini, ni manukato, ni manemane, ni batani, pamo ni lozi.
GEN 43:12 Mutwame nfolanga ya kuya kusitamo bilio ni ya kuya kubweziizia pa elia nfolanga i mwaiziliile nayo mu masaaka enu pantu pange baalabiliile kubiikamo.
GEN 43:13 Mumutwame ni mwalawenu muye nakue kuli ozo muntu.
GEN 43:14 Leza wa Maka onse akalengie ozo muntu kumyunvwila nkumbu, evi mukabwele ni Benyamina pamo ni mukuluube. Kine kufwilua na baana bonse, nkafwilue sie.”
GEN 43:15 Kupwako, babo baana batwama byabupe ni Benyamina pamo ni nfolanga ya kusitamo bilio ni ya kuya kubwezia. Baabambile lwendo, bakookela ku Misri ni kuya kwimana pa ntanzi yakua Yusufu.
GEN 43:16 Yusufu lu-aabamwene bali pamo ni Benyamina, waamwanine mubombi wakue nangue, “Bengizie mu nghanda yane, sinza nama uteanie pantu baba bantu lelo ndikulia nabo bilio bya musita wa koba.”
GEN 43:17 Mubombi waabengiziizie mu nghanda mwa Yusufu nga mwa-aniinue.
GEN 43:18 Bakuluube baatiinine pantu baingiziiziwe mu nghanda mwa Yusufu. Baalandile evi, “Twaingiziiwa mono pa mulandu wa nfolanga i twatwaaminiine mu masaaka etu lolia lutwaizile kusita bilio lwa mambo, evi atupeele mulandu ni kutupingula, apoke punda yetu ni kutwalula bazia bakue.”
GEN 43:19 Baamupaleeme kalinda wa nghanda yakua Yusufu, babamba kulanda nakue pa mulyango nangue,
GEN 43:20 “We mukulu, kisinka twaakookele kono lwa mambo kukusita bilio.
GEN 43:21 Lutwaafikile pa nkendo ya kulaala, twaakakwile masaaka etu, kubalua muntu waamwene nfolanga yakue elia itwaasitilemo bilio yali mu lisaaka lyakue nga muyaali yabeeleele. Nfolanga ezi i twabwela nayo.
GEN 43:22 Kabili twaiza ni inge nfolanga ya kusitilako binge bilio. Fwefue tetumanine muntu waabiikile nfolanga yetu mu masaaka etu.”
GEN 43:23 Mubombi waalandile evi, “Mutende ube nenu, tekutiine. Leza wenu, Leza wakua sinue i waamipeele nfolanga mu masaaka enu. Pantu nene mwan'mpeele yakumeene.” Kupwako, wabaleetela Simeoni.
GEN 43:24 Mubombi waabengiziizie mu nghanda yakua Yusufu, wabapeela menda a kusamba ku makasa, kabili waya kuliisia ni punda yabo.
GEN 43:25 Baateaniizie byabupe bya kupeela Yusufu, pantu waabaanine kwiza kulia nabo musita wa koba.
GEN 43:26 Yusufu lu-aizile kwakue, baamupeele byabupe bibaizile nabio mu nghanda ni kumukontamina.
GEN 43:27 Waabeepuziizie wabaana nangue, “Ale sinue mukote umwaalandile palwakua wene, ali sie bwino? Ni lenu kumo akikosele?”
GEN 43:28 Baamwasukile nangue, “Mubombi obe, situe, ali sie bwino, ni lenu kumo akikosele.” Kabili baafukeeme ni kumukontamina.
GEN 43:29 Lu-aamumwene mwalawakue Benyamina, mwana mwina nghina, waalandile evi, “Ati, ozu i mwalawenu umwan'mbwilile? Waalandile evi, ‘We mwana wane, Leza akunvwile nkumbu.’”
GEN 43:30 Kupwako, Yusufu wafumapo pantu waali wasyakeba kulila na nsansa ya kumona mwalawakue. Waingiile mu nghanda ku kati ni kubamba kulila.
GEN 43:31 Pa kyamba, waasambile ku menso, wafuma waisipikiizie ni kubaana bateanie bilio.
GEN 43:32 Yusufu waateaniiziiziwe pa bunke, ni bakuluube pa bunke, Bamisri baali balia koko ni bo pa bunke pantu kyaali kya busoni Bamisri kuliila pamo ni Baebrania.
GEN 43:33 Balupua bakua Yusufu baikeele pa ntanzi yakue bakonkeene, libeli pa nsambu yakue ya bubeli, ni mukala pa nsambu yakue ya bumukala. Ni bo, baali basyaipapa sie.
GEN 43:34 Waabapeele bilio byaali byafuma pa ntanzi yakue. Benyamina waatuulikiiluepo lisaano kukila bakuluube. Baaminine ni kuwaminua pamo nakue.
GEN 44:1 Yusufu wa-anine mubombi wa mu nghanda yakue nangue, “Izuzia bilio mu masaaka a baba bantu kukonkana ni vibalikuvinda kutwama, ubabiikilemo ni nfolanga yabo.
GEN 44:2 Kabili ubiike ni kikombe kyane kya mutofue mu lisaaka lyakua ozu mwanike, ubiikemo ni nfolanga yakue.” Ni ye waakitile mwa-aniinue na Yusufu.
GEN 44:3 Lukeele lwakue paakili ba-aninue kuti baye pamo ni punda yabo.
GEN 44:4 Lubaali tebanafike kule ni muzi, Yusufu waamwanine mubombi wa mu nghanda yakue nangue, “Lenga ubakonke balia bantu bayanga. Pauya kubasanga, uye ubeepuzie evi, ‘Mwakitilangaki bibiipile ku muntu waamikitiile biweme?
GEN 44:5 Temuli na kikombe kyakua tawelenzi? ki-aliwamininamo ni kubukilako? Mwaluvia sana.’”
GEN 44:6 Lu-aabasangile, waabaanine totu twebo.
GEN 44:7 Baamwanine evi, “We mulopue, walandilaki evio? Kulanda kisinka tetwakitanga kintu kya ozu musango.
GEN 44:8 Unvua, lolia lutwaatwaminiine nfolanga mu masaaka etu mpaka ku Kanaani, twakikubweziizia. Eba, ale tulikwibilaki mutofue ao oro yakua solenzi?
GEN 44:9 Ewe, kansi kine pa fwefue babombi bobe palikusangua umo ali nakio, afue, ni fwefue bange bonse tukabe bazia benu.”
GEN 44:10 Waalandile evi, “Kibe nga mumwalandila. Olia alikusangua nakio, alikuya wali muzia wane, ni mwe bange temuya mwali na kilubo.”
GEN 44:11 Kupwako, penka papo bakoosiizia masaaka abo pansi, kubalua muntu wabamba kukakula lisaaka lyakue.
GEN 44:12 Waabambiile kukeba mu lisaaka lyakua mukulu mpaka wapeleezia mu lisaaka lyakua mwanike. Kikombe kyaamonekele mu lisaaka lyakua Benyamina.
GEN 44:13 Kupwako, bonse bazabula ngubo yabo, kubalua muntu wabiika lisaaka lyakue pa punda wakue ni kubwelela ku Misri.
GEN 44:14 Yuda ni bakuluube baile mu nghanda yakua Yusufu, ni ye waali wakili penka palia. Bonse baaleele kyuba.
GEN 44:15 Yusufu waabaanine evi, “Mwakitilangaki evi? Temumanine nangue muntu nga nene kuti nabuka ni kumana bintu byonse?”
GEN 44:16 Yuda waamwasukile evi, “We mukulu, tulikukwanaki? Kabili tulikulandaki? Tulikukaana syani kibalo? Leza mwine i-amwene bubi bwa babombi bobe. Evi fwe bonse tuli bazia bobe pamo ni olia wakwatwanga watweme kikombe.”
GEN 44:17 Yusufu waalandile evi, “Ata, nene nsivinda kukita evio! Nalanda evi, olia wenka wakwatwanga wali ni kikombe i muzia wane. Inzi mwemue bange ilepo bwino kuli sinue.”
GEN 44:18 Yuda waamupaleeme ni kumwana nangue, “We mulopue, napaapaata nandepo keebo kamo ka kunvwika ku matui akua tawelenzi. Tekufiitilua mubombi obe pantu wewe uli nga Farao.
GEN 44:19 We Tawelenzi, waatwipuziizie fwe babombi bobe nangue, ‘Kubako muli ni sinue ao mwalawenu?’
GEN 44:20 Fwefue twa-asukile evi, ‘Ee, tuli ni situe mukote ni mwana wa mu bukote bwakue, inzi mukuluube kwa ozo mwanike waafwile. Ozo mwana i asyelepo sie wakosele mu livumo lyabo, ni se amutonene.’
GEN 44:21 Wewe waatwanine fwe babombi bobe tumuleete umumone,
GEN 44:22 Inzi fwefue twa-asukile nangue, ‘Mulumendo tavinda kumusia se, pantu kine wamusia, se kuti wafua.’
GEN 44:23 Wewe wa-anine babombi bobe nangue, ‘Kine temukeeza ni mwalawenu, tekuti tukamonane nenu.’
GEN 44:24 “Lutwaabweleele kuli situe, twaamubwilile byonse bitwa-aninue na tawelenzi.
GEN 44:25 Situe waalandile evi, ‘Kabili endo mwaye mutusitileko binge bilio.’
GEN 44:26 Fwefue twaalandile evi, ‘Tetuvinda kukookelako. Inzi kine tulikuya ni mwalawetu, tulikukookelako, pantu tetuvinda kuya kumonana na olia muntu kine tetuiile ni mwalawetu.’
GEN 44:27 Mubombi obe, tawe, waatwanine, ‘Mumanine nangue mukazi wane Rakeli wanvyaliile sie baana babili balalumenke.
GEN 44:28 Umo nsikili nakue, kisinka waaputwilue sie tuniini tuniini, kabili nsyamumwene.
GEN 44:29 Kine mwantwamina ni ozu, ni ye waya kukitikilua na kibiipile, kuti mwangipailila sie na bulanda bwa mu bukote bwane.’
GEN 44:30 “Ni pakako kine naya kuli tawe, mubombi obe, tekuba nali na ozu mulumendo, pantu maswapi a bukose bwakua tawe ali mu ozu mwana,
GEN 44:31 pa-akaba kumona nangue mulumendo tetuli nakue wakaba kufua. Ni babombi bobe baakeepaizia sibo mukote wali ni bulanda.
GEN 44:32 Pantu mubombi obe waikitile kikwatizi kuli se walanda nangue, ‘Kine nsikaba kumubwezia kuli wewe, naakaba ni kilubo kya muyayaya kuli we tawe.’
GEN 44:33 Kansi evi ne mubombi obe nakulomba nsyale nali muzia kuli we tawelenzi pa kifuka kyakua ozu mulumendo, inzi ozu mulumendo asele aye pamo ni bakuluube.
GEN 44:34 Ale ndikubwela syani kuli tawe tekuba namutweme ozu mulumendo? Nsitonene kuya kumona kyakaba kumukitikila tawe.”
GEN 45:1 Yusufu wa-andilue kusipikizia ntanzi yabo bonse baali baimeene pepi nakue. Waalandile evi, “Mwe babombi bonse ba mu Misri, fume.” Lwaafuminepo babombi bonse ba mu Misri, Yusufu waimaniizie ku bakuluube.
GEN 45:2 Wa-angwile walila mpaka ni Bamisri baali bali panze baunvua, pamo ni ba mu nghanda yakua Farao.
GEN 45:3 Yusufu waabaanine bakuluube, “Nene ndi Yusufu. Tawe akikosele ni lenu kumo?” Bakuluube lubaunvwile evio, ba-andilue kumwasuka pantu baamutiinine.
GEN 45:4 Yusufu waabaanine bakuluube, “Namilomba mun'mpalame.” Baamupaleeme. Waabaanine evi, “Nene ndi Yusufu umwasisiizie ni kuleetua kono ku Misri.
GEN 45:5 Kansi tekunvue bulanda ao kufiitilwane pantu mwansisiizie, inzi waminue sie pantu Leza wantangiziizie kono pakuti n'mpususie bukose bwa bantu.
GEN 45:6 Eno ikili sie myaka ibili ya nzala mu kyalo. Kusyele ni inge myaka isaano ya nzala. Mu ezio myaka tekukaba kulima ao kuzombola.
GEN 45:7 Leza wantangiziizie ntanzi yenu pakuti n'misunge mwe basyelepo, kuti luvyalo lwenu lukatwalilile pa kyalo ni kumipususia na bupusuko bukata.
GEN 45:8 Kansi te mwemue bandeetele pano, inzi ni Leza. Ni ye wankitile kuba nga se kwa Farao ni mukulu wa mu nghanda yakue yonse, ni ndabukizi wa kyalo kyonse kya Misri.
GEN 45:9 “Ale lenge musele kuli tawe mumwane nangue Yusufu mwana obe walanda evi, ‘Leza anteekele kuba ndabukizi wa kyalo kyonse kya Misri. Lenga ukookele kono kuli nene,
GEN 45:10 ukabe kwiza kwikala ku Goseni, koko i kuwaakaba wapalameene ni nene. Wewe ni baana bobe, ni benzikulu bobe, ni mikooko yobe, ni nghombe yobe pamo ni binge byonse byuli nabio.
GEN 45:11 Papo i panaakakusunga pantu kukili ni inge myaka isaano ya nzala, evi tekuti ukabe mupabi, wewe ni lupua lobe pamo ni byonse byuli nabio.’
GEN 45:12 “Evi mwaimwena na menso enu, ni mwalawane Benyamina waimwena na menso akue nangue nene i wenka Yusufu alimukulanda nenu.
GEN 45:13 Mukabe kuya kumubwila tawe bulumba bwane bonse bundi nabo mu kyalo kya Misri, ni bintu byonse bimwamona. Kabili mukabe kulenga kumukoosiizia tawe kono.”
GEN 45:14 Kupwako, wamukumbatila Benyamina watendeka kulila. Benyamina ni ye wamukumbatila ni kutendeka kulila.
GEN 45:15 Kabili waakumbatiile bakuluube bonse ni kubalilila. Pa kyamba, bakuluube baalanzyenie nakue.
GEN 45:16 Mpunda luyaunvwikile ku nghanda yakua Farao nangue bakuluube kwa Yusufu bakiiza, Farao ni babombi bakue baawamiinue.
GEN 45:17 Farao waamwanine Yusufu, “Baane bakuluubo nangue, ‘Kite evi, longele bintu pa nama yenu musele muye ku kyalo kya Kanaani,
GEN 45:18 muye mu mutwame sinue ni lupua lwenu mwize kono kwane, ni ne naakamipeela biweme bya mu kyalo kya Misri, kabili mwaakaba mwalia binonene bya mu kyalo.’
GEN 45:19 Kabili baane nangue, ‘Twame matyakala a mono mu Misri a kuti muye mutwaminemo baana benu ni bakazi benu pamo ni sinue mwize nakue.
GEN 45:20 Kabili tekusakamane palua bintu byenu pantu bintu biweme bya mu kyalo kyonse kya Misri byaakaba byenu.’”
GEN 45:21 Baizraeli baakitile muba-aniinue. Yusufu waabapeele matyakala ni mpao ya mu nzila nga mwaalandiile Farao.
GEN 45:22 Kubalua muntu waapeelue ngubo ya lenu, inzi Benyamina wene waapeelue ngubo isaano ya lenu ni nfolanga ya mutofue 300.
GEN 45:23 Waamutumiine se punda lyanondo yaali yatweme bintu biweme bya mu Misri ni punda ikota lyanondo yaali yatweme nghano ni mikate pamo ni binge bilio bya mpao ya mu nzila.
GEN 45:24 Lu-aabapeele nsambu ya kuya, waabaanine evi, “Tekukankabule mu nzila.”
GEN 45:25 Kupwako, basela kufuma ku Misri ni kuya ku kyalo kya Kanaani kuli sibo Yakobo.
GEN 45:26 Baamwanine nangue, “Yusufu akikosele ni lenu kumo, kabili i ndabukizi wa mu kyalo kyonse kya Misri!” Yakobo lu-aunvwile evio, waapenzukile pantu taabaketekeele.
GEN 45:27 Baamulondolweleele byonse biba-aninue na Yusufu. Lu-aamwene matyakala aatuminue na Yusufu akuti atwamuemo, mutima wakua sibo Yakobo waateekameene.
GEN 45:28 Izraeli waalandile evi, “Emwe! Eyo mwana wane akikosele! Mpaka nkabe kuya kumumona lunsinafue.”
GEN 46:1 Izraeli waile pamo ni byonse bi-aali nabio waya kufika ku Beri-Seba, wamwelela Leza wakua se Izaaki ngelelo.
GEN 46:2 Leza waamwanine Izraeli mu kimonua kya busiku. Waamukuutile, “Yakobo, Yakobo.” Wa-asukile nangue, “Ne ono pano.”
GEN 46:3 Waamwanine, “Nene ndi Leza, Leza wakua so. Tekutiina kukookela ku Misri pantu i kunaakakukita kuba mutundu ukata.
GEN 46:4 Ndikukooka pamo nobe ku Misri, kabili naakakusezia paakale. Yusufu i waakakuziika.”
GEN 46:5 Yakobo waafumine ku Beri-Seba. Baizraeli baamutweme sibo Yakobo, ni baana babo pamo ni bakazi babo mu matyakala aatuminue na Farao kuti bamutwamemo.
GEN 46:6 Kupwako, batwama nama yabo pamo ni bunonsi bwabo bubaanonkele mu kyalo kya Kanaani. Yakobo waya ku Misri pamo ni luvyalo lwakue lonse.
GEN 46:7 Baana bakue balalume, ni baana bakue banakazi, ni benzikulu bakue balalume ni banakazi, waile nabo ku Misri.
GEN 46:8 Yakobo ni baana bakue baile ku Misri. Meena a baana bena Yakobo, aliwakutua Izraeli, ni aza: Rubeni i libeli.
GEN 46:9 Ni bena Rubeni ni baba: Hanoki, ni Palu, ni Hesroni pamo ni Karmi.
GEN 46:10 Ni meena a baana balalume bakua Simeoni ni aza: Yemueli, ni Yaminu, ni Ohadu, ni Yakini, ni Zohari pamo ni Sauli mwina mwanakazi wa ku Kanaani.
GEN 46:11 Ni meena a baana balalume bakua Lawi ni aza: Gershoni, ni Kohati pamo ni Merari.
GEN 46:12 Ni meena a baana balalume bakua Yuda ni aza: Eri, ni Onanu, ni Sela, ni Peresi, ni Zera. Inzi Eri ni Onanu baafwiliile mu kyalo kya Kanaani. Ni meena a baana balalume bakua Perezi ni aza: Hesroni ni Hamuli.
GEN 46:13 Ni meena a baana balalume bakua Isakari ni aza: Tola, ni Pua, ni Iobu pamo ni Simuroni.
GEN 46:14 Ni meena a baana balalume bakua Zabuloni ni aza: Seredi, ni Eloni pamo ni Yaleli.
GEN 46:15 Babo i bena Lea ba-aamuvyaliile Yakobo ku Padani-Aramu pamo ni Dina mwana mwanakazi. Baana bakue bonse, balalume ni banakazi, baali 33.
GEN 46:16 Ni meena a baana balalume bakua Gadi ni aza: Sifioni, ni Hagi, ni Suni, ni Eziboni, ni Eri, ni Arodi pamo ni Areli.
GEN 46:17 Ni meena a baana balalume bakua Aseri ni aza: Imuna, ni Isiwa, ni Isiwi, ni Beria pamo ni nkazi yabo Sera. Ni meena a baana balalume bakua Beria ni aza: Heberi ni Malkieli.
GEN 46:18 Baba i baana bena Silipa waufiiziwe Yakobo. Lea waapeelue ozu Silipa na Labani kuti aye wali mubombi wakue. Bonse pamo baali lyanondo ni mutanda.
GEN 46:19 Ni meena a baana balalume bakua Rakeli muka Yakobo ni aza: Yusufu ni Benyamina.
GEN 46:20 Yusufu waavyele baana babili balalume muli Asenati mwina Potifera kitambua wa mu muzi wa Oni, ni bo meena abo ni aza: Manase ni Efraimu.
GEN 46:21 Ni meena a baana balalume bakua Benyamina ni aza: Bela, ni Bekeri, ni Asibeli, ni Gera, ni Naamani, ni Ehi, ni Rosi, ni Mupimu, ni Hupimu pamo ni Ardi.
GEN 46:22 Baba i baana lyanondo ni bana bakua Yakobo ba-aavyele muli Rakeli.
GEN 46:23 Dani waavyele mwana mwalalume Husimu.
GEN 46:24 Ni meena a baana balalume bakua Nafutali ni aza: Yazeli, ni Guni, ni Yezeri pamo ni Silemu.
GEN 46:25 Baba i baana kilooba bakua Yakobo ba-aavyele muli Biliha. Rakeli waapeelue Biliha na Labani kuti aye wali mubombi wakue.
GEN 46:26 Bantu baile na Yakobo mu Misri, bantu ba mu luvyalo lwakue pasili kupendako bamuka baana bakue, baali bantu 66.
GEN 46:27 Yusufu lu-aali ku Misri waavyele baana babili balalume. Bantu bonse ba mu luvyalo lwakua Yakobo baile ku Misri baali bantu 70.
GEN 46:28 Yakobo waamutumine Yuda kuti abatangilile kuya kumwana Yusufu bakabe kuya kusaakaana nakue mu Goseni. Lubaafikile ku Goseni,
GEN 46:29 Yusufu waingiile mu tyakala yakue aye asaakaane ni se Izraeli ku Goseni. Lubaamoneene, Yusufu waile kumukumbatila mu mukosi. Waalilile musita ukata.
GEN 46:30 Izraeli waamwanine Yusufu nangue, “Evi vinakumona wakosele mpaka lenu, kansi kuti nafua.”
GEN 46:31 Kabili Yusufu waabaanine bakuluube pamo ni lupua lonse lwakua se nangue, “Evi ndikusela ngie n'mubwile Farao nangue, ‘Bakuluamwine pamo ni lupua lwakua tawe bakifuma ku Kanaani, baiza.
GEN 46:32 Baba bantu ni basungi ba nama, kabili bezile ni bisepe byabo bya nghombe ni bya mikooko pamo ni bintu byabo byonse.’
GEN 46:33 Kine Farao akabe kumikuuta ni kumiipuzia nangue, ‘Mulimwabomba mwiloki?’
GEN 46:34 Mukabe kumwana nangue, ‘Fwefue tuli basungi ba nama kutula ku bwanike bwetu nga mwaali mwakitila babikolue betu.’ Ni pakako, wakaba kumyana mukabe kwikala ku Goseni, pantu kubalua musungi wa mikooko, Bamisri bamumwene kuba wa mpuni.”
GEN 47:1 Yusufu waile kumwana Farao nangue, “Tawe ni bakuluamwine kufuma ku Kanaani, bakiiza ni bisepe bya nghombe ni bya mikooko pamo ni bintu byonse bibali nabio. Evi bali ku Goseni.”
GEN 47:2 Waatweme bakuluube basaano ni kuya kubalangisia kuli Farao.
GEN 47:3 Farao waabeepuziizie babo bantu, “Mulimwabomba mwiloki?” Baamwasukile Farao, “Fwefue tuli basungi ba nama nga vyaali babikolue betu.
GEN 47:4 Twaiza twikale mu keno kyalo pantu mu kyalo kya Kanaani nzala yakila kubiipa, kabili ni bikusi bya kuliisia nama yetu tekuli. Ni pakako, twapaapaata utwitabizie kwikala ku Goseni.”
GEN 47:5 Farao waamwanine Yusufu, “Kyawama pantu so ni bakuluubo bakiiza.
GEN 47:6 Kyalo kya Misri kili mu maboko obe. Baleke bakuluubo pamo ni so bekale pa nkendo iwamiisie ya Goseni. Kabili kine umaninepo bantu bapamine, ukababiike pa busungi bwa nama yane.”
GEN 47:7 Yusufu waile kumulangisia se Yakobo kuli Farao. Yakobo waamupaalile Farao.
GEN 47:8 Farao waamwipuziizie Yakobo, “Uli na myaka inga?”
GEN 47:9 Yakobo wa-asukile evi, “Ndi sie na myaka 130, kabili naali nakuukakuuka sie. Babikolue bane ni bo baali bakuukakuuka sie. Inzi bene baikeele myaka ingi, kabili ni bwikazi bwabo tebwaali bwabiipile nga bwane.”
GEN 47:10 Kupwako, Yakobo wamupaala Farao ni kufumamo waya.
GEN 47:11 Yusufu waamupeele se ni bakuluube nkendo yaali yawamiisie ya mu kyalo kya Misri pepi ni muzi wa Ramese nga mwa-aniinue na Farao.
GEN 47:12 Yakobo ni baana bakue pamo ni luvyalo lwakue lonse, baali bapeelua bilio na Yusufu kukonkana ni bwingi bwa baana babo.
GEN 47:13 Nzala yaakilile kubiipa mpaka bilio byapwililika mu kyalo kyonse, bantu ba mu Misri ni ba ku Kanaani baemiiziwe sana na nzala.
GEN 47:14 Yusufu waakolonghaniizie nfolanga yonse yaamwenekele mu kyalo kya Misri ni mu kyalo kya Kanaani, ezio yaanonkelue lubaasisiizie nghano. Yusufu waatwele nfolanga mu nghanda yakua Farao.
GEN 47:15 Nfolanga yonse luyaapwile mu kyalo kya Misri ni kya Kanaani, Bamisri baile kumwana Yusufu nangue, “Tupeele bilio tukeeza kufua na nzala pa ntanzi yobe pantu tetukili na nfolanga.”
GEN 47:16 Yusufu waabaanine evi, “Kine temukwete nfolanga, n'mpeele nama yenu ni nene n'mipeele bilio.”
GEN 47:17 Bamisri baamupeele Yusufu farasi, ni mikooko, ni mbuzi, ni nghombe, pamo ni punda. Ni wene waabapeele bilio bya kulia mwaka onse walingi.
GEN 47:18 Mwaka waakonkelepo, baile kumwana Yusufu nangue, “Tetuvinda kukufiika kantu. We mukulu, nfolanga yetu yonse yapua, ni bisepe bya nama bitwaali nabio twaakupeele. Evi tetukili kabili na kantu ka kukupeela, inga sie mibili yetu ni kyalo kyetu.
GEN 47:19 Tekutulekeela tufue pa ntanzi yobe, fwefue ni kyalo kyetu. Kansi twaipeela sie utusite fwefue benka ni kyalo kyetu na bilio, evi tuye twali bazia bakua Farao, twalomba utupeele bilio tulie tukafua, ni kyalo kyetu kikeeza kusyala kibolia.”
GEN 47:20 Yusufu waamusitiile Farao kyalo kyonse kya Misri. Bamisri baasisiizie kyalo pa mulandu wa nzala yaakilile kubiipa. Kyalo kyonse kya Misri kya-alukile kyakua Farao.
GEN 47:21 Yusufu waakuusiizie Bamisri kufuma mu mipaka yonse ya Misri ni kubaleeta mukati mizi.
GEN 47:22 Inga sie nkendo yaali yaikeelemo babitambua i isyaasitilue pantu Farao waali wabapeela bilio bya kulia. Keki i kyaalengele tekuti basisie nkendo yabo.
GEN 47:23 Yusufu waabaanine bantu nangue, “Unvue, kyalo pamo ni mwemue namusitila Farao. Ale poke mbezu ezi mubyale mu makaba enu.
GEN 47:24 Pa musita wa kuzombola, mukabuulepo kimo kya pa bisaano ni kumupeela Farao, ni byaakasyalapo i bimwaakaba mwafumiapo mbezu ni bilio bimwaakaba mwalia ni baana benu pamo ni ba mu nghanda yenu.”
GEN 47:25 Baalandile evi, “We mukulu, wabomba. Evi watupususia. Twaitabila kuya twali bazia bakua Farao.”
GEN 47:26 Ozu mulandu Yusufu waukitile kuba muzilo nangue, kimo kya pa bisaano kiye kyapeelua likolo. Leli lifunde ni lenu kumo likiliko. Inga sie mu nkendo yaali yaikeelemo babitambua.
GEN 47:27 Baizraeli baikeele ku Goseni mu Misri momo mubaanonkele, baasandulukile ni kukila kuvula.
GEN 47:28 Yakobo waikeele mu Misri myaka lyanondo ni kilooba. Myaka yonse yaikeele Yakobo pa kyalo yaali 147.
GEN 47:29 Kufua kwakua Izraeli lukwaapaleeme, waamukuutile mwana wakue Yusufu wamwana nangue, “Kine wangitabizia, biika kuboko kobe kwinsina litanta lyane unkitile kiweme ni kisinka. Nakulomba tekuti ukanziike mu Misri.
GEN 47:30 Inzi pankafua ntonene ukanziike kolia kwaaziikilue babikolue bane.” Yusufu wa-asukile evi, “Nakaba kukita nga muwalandila.”
GEN 47:31 Izraeli waalandile evi, “Ale ndapile.” Yusufu walapa. Kupwako, Izraeli wafwinamina pa bulita lya ku mitue.
GEN 48:1 Pa kyamba kya nsiku, muntu umo waamubwilile Yusufu nangue se Yakobo alwele ku Goseni. Kupwako, Yusufu watwama baana bakue, Manase ni Efraimu, baya.
GEN 48:2 Lubaafikile, muntu umo waamubwilile Yakobo nangue, “Mwana obe Yusufu waiza,” Izraeli waikoseleziizie, wabuuka ni kwikala pa bulita.
GEN 48:3 Yakobo waamwanine Yusufu nangue, “Leza wa Maka onse lu-aan'mwenekeele ku Luzi mu kyalo kya Kanaani, waan'mpaalile.
GEN 48:4 Wanghanine nangue, ‘Naakakuvuzia ni kukusandulula, kabili naakakukita kuba libumba lya ntundu, ni pa kyamba kyobe, nvyalo yobe naakaipeela keki kyalo kuba bupyani bwabo lonse.’
GEN 48:5 “Ni evi baba baana babili bawaavyaliile mu Misri lunaali nsinaize kuli wewe, ni baana bane. Efraimu ni Manase baakaba bane nga Rubeni, ni Simeoni.
GEN 48:6 Inzi baana bawaakavyala pa kyamba kya baba, baakaba bobe, ni bupyani bwabo bwaakaba kuli Efraimu ni Manase.
GEN 48:7 Nakita evi pa mulandu wakua noko Rakeli waafwiliile mu Kanaanni pepi ni Efura lunaali nalimukufuma ku Padani-Aramu. Naamuziikile mu Kanaani mumbali musebo ulungi ku Efura.” (Eno nsiku Efura i Betlehemu).
GEN 48:8 Izraeli lu-aamwene bena Yusufu waipuziizie evi, “Ale baba ni bani?”
GEN 48:9 Yusufu wa-asukile evi, “Baba ni baana bane banaapeelue na Leza mono mu Misri.” Yakobo waalandile evi, “Ale bapalamike pano n'mbapaale.”
GEN 48:10 Menso akua Yakobo te aali amona pa mulandu wa bukote. Yusufu waamupalamikiile baana, Yakobo ni ye waabakwete ni kubakumbatila.
GEN 48:11 Izraeli waamwanine Yusufu, “Nsyaali naswapiile nangue twaakamonana kabili. Inzi evi Leza wan'mpaala namonako ni baana bobe.”
GEN 48:12 Kupwako, Yusufu wabafumia mu kyeni kyakua Izraeli. Yusufu waakontamiine pansi.
GEN 48:13 Yusufu waabakwete baana bonse babili. Efraimu ku kuboko kwakue kwa kulio walungheeme ku kuboko kuso kwakua Izraeli, ni Manase ku kuboko kwakue kwa kuso walungheeme ku kuboko kulio kwakua Izraeli ni kubapalamika kuli wene.
GEN 48:14 Inzi Izraeli waakilinghaniizie maboko akue, kuboko kulio wabiika pa mutue wakua Efraimu waali wali mwanike, ni kuboko kwakue kwa kuso wabiika pa mutue wakua Manase waali wali mukulu.
GEN 48:15 Yakobo waamupaalile Yusufu walanda, “Leza waali watangiliile tawekulu Abrahamu ni tawe Izaaki, Leza waali wanombwele mu bukose bwane bonse mpaka lenu,
GEN 48:16 olia malaika wan'mpususiizie mu maavia onse, abapaale baba balumendo. Bakabe bakuutua mu liina lyane, ni mu liina lyakua tawekulu Abrahamu ni lyakua tawe Izaaki. Bakakile kusanduluka mu kyalo kyonse.”
GEN 48:17 Yusufu lu-aamwene nangue se wabiika kuboko kwakue kwa kulio pa mutue wakua Efraimu, taawaamiinue. Ni pakako, waakwete kuboko kwakua se, wafumia pa mutue wakua Efraimu wabiika pa mutue wakua Manase.
GEN 48:18 Waamwanine se nangue, “We tawe, tekukita evi pantu mukulu ni ozu. Wene i wakuti ubiikile kuboko kobe kwa kulio pa mutue wakue.”
GEN 48:19 Se waakeene walanda nangue, “We mwana wane, n'manine kindimukukita. Manase waakaba mutundu ukata. Inzi mwalawakue waakaba mukulu kukila wene, ni nvyalo yakue yaakaba libumba lya ntundu.”
GEN 48:20 Bobo busiku, Yakobo waabapaalile wabaana nangue ku ntanzi Baizraeli baakaba balombelana mapaalo balanda nangue, “Leza akupaale nga vi-aapaalile Efraimu ni Manase.” Yakobo waatangiziizie Efraimu pali Manase.
GEN 48:21 Kabili Izraeli waamwanine Yusufu, “Mona nene nsisyaumiine kufua, inzi Leza waakaba pamo nenu, kabili waakamilombola kuti mukabwelele mu kyalo kya babikolue betu.
GEN 48:22 Inzi wewe pantu uli nga mukulu pa ba kobe, nakulundilako nkendo imo pa nkendo inaapokele ku Ba-amori ku maka a kipanga ni buta bwane.”
GEN 49:1 Yakobo waakuutile baana bakue wabaana nangue, “Ize munkolonghane n'myane bintu byaakamikitikila mu nsiku ya ku ntanzi.
GEN 49:2 “Mwe bena Yakobo, kolonghane munvue. Mutwilizie sinue Izraeli.
GEN 49:3 “Rubeni, wewe uli libeli wane, maka ane ni ntendeko ya kuluma kwane, mukulu mu mukinzi, mukulu mu buvinde.
GEN 49:4 Wewe uliwabiluluka nga menda. Teukaba wakindeeme, pantu waaselele pa bulita bwakua so ni kubutiikaania.
GEN 49:5 “Simeoni ni Lawi, ni benenke. Bipanga byabo i bilwilo bya bubi.
GEN 49:6 We mutima wane, tekwingila mu mapange abo a mu kafiso. Bulumba bwane tekuti bwampane na kilie kyabo pantu baipaile muntu na kipuki kyabo, ni mubutaale bwabo baaputwile misipa ya nghombe ndume.
GEN 49:7 Kikonko kyabo kitiipue, pantu kikilile kusasa, ni kipuki kyabo pantu tekyaali na nkumbu. Naakabakasania muli Yakobo. Naakabasalanghania muli Izraeli.
GEN 49:8 “We Yuda, ba kobe baakakutasia. Kuboko kobe kwaakaba pa mukosi wa balwani bobe. Baana bena so baakakukontamina.
GEN 49:9 Yuda, i nkalamu musoka kufuma mu kwipaya nama, we mwana wane wakibwela. Wene waakonteeme, waifiika nga nkalamu, nga nkalamu mukota, nani waakamubuusia?
GEN 49:10 Nfimbo teikafuma mu Yuda, ao kabango ka bukolo mu maulu akue, mpaka Shilo akeeze, wene waakanakilua na ntundu.
GEN 49:11 Wene waakakakila punda wakue ku muzabibu, ni musoka wa punda ku muzabibu uwamiisie. Waakufula ngubo yakue mu divai, ni bivwalo byakue mu mulopa wa mizabibu.
GEN 49:12 Menso akue akaba akasikile na divai. Meeno akue aswetele na mabeele.
GEN 49:13 “Zabuloni waakeekala mumbali lyezi, ni ye waakaba kyabu kya maato. Mipaka yakue yaakaba yafikile ku Sidona.
GEN 49:14 “Isakari i punda alumine aliwaifiika mu bipata bya mikooko.
GEN 49:15 Amwene nkendo ya kutuuziapo paweme, ni kyalo nangue kyaali kyafwaniine. Akoosiizie kikoope kyakue kuti kitwame bitwamo, ni kuya wali mubombi wa miilo ikolele.
GEN 49:16 “Dani waakapingula bantu bakue nga umo wa mu mikoa yakua Izraeli.
GEN 49:17 Dani waakaba kizoka kya mumbali musebo, kizoka kiniini kya mumbali nzila kili ni bwimba kilikyasuma farasi ku kasinghino ni aselelepo wapona kansenia.
GEN 49:18 “We Yawe, n'mpembeele bupusuko bobe.
GEN 49:19 “Gadi, waakasakukilua na libumba, inzi wene waakabasakukila ni kubakonka.
GEN 49:20 “Mu kyalo kya Aseri mwaakaba bilio bingi, ni ye waakaba wafumia bya kulia biweme bya makolo.
GEN 49:21 “Nafutali i mbazi asikakilue aliwalanda twebo tuweme.
GEN 49:22 “Yusufu i musambo wa mazabo, musambo wa mazabo mumbali kasulo. Misambo yakue itambaleele mu kibumba.
GEN 49:23 Wene waasakukiilue na bantu bali ni mivui, baamulasile mivui ni kumwemia.
GEN 49:24 Inzi buta bwakue bwaasyele bwalumine, maboko akue aalumiiziwe na maboko akua wa Maka onse, wakua Yakobo. Wa-aalwilue musungi wa mikooko, libue lyakua Izraeli,
GEN 49:25 Na Leza wakua so waakakukwasia. Na Leza wa Maka onse waakakupaala. Na mapaalo a mwiulu mu muulu, mapaalo a mu biina bifikile pansi, mapaalo a konsia ni a kwimita.
GEN 49:26 Mapaalo akua so ni akata kukila mapaalo a mpili ya kale, kukila bintu bitonekele bya mpili ya muyayaya. Bebi byonse biye byali pa mutue wakua Yusufu, pa mpala yakua mulombozi pa bakuluube.
GEN 49:27 “Benyamina i mumbue asasile. Lukeelekeele alikulia mabingo, ni kyungulo alikukasania bi-aipayanga.”
GEN 49:28 Ezi i mikoa lyanondo ni ibili yakua Izraeli, kabili evi i viba-aninue na sibo ni kubapaala kubalua muntu mapaalo akue.
GEN 49:29 Yakobo waabaanine baana bakue nangue, “Evi pasyankabe kufua ni kuya ku bantu bane. Mukabe kunziika mu kilibu kili mu bukaba bwakua Efuroni Muhiti,
GEN 49:30 kilibu kili mu bukaba bwa ku Makipela lya ku kabanga ka Mamure mu kyalo kya Kanaani, kilibu kyaasitilue na Abrahamu pamo ni bukaba bwakua Efuroni Muhiti, evi iye yali nkendo ya kuziikamo bantu bakue.
GEN 49:31 Momo i mwaaziikilue Abrahamu ni mukazi wakue Sara, momo i mwaaziikilue Izaaki ni mukazi wakue Rebeka, kabili momo i munaaziikile mukazi wane Lea.
GEN 49:32 Bobo bukaba pamo ni kilibu kilimo, byaasitilue ku bena Heti.”
GEN 49:33 Yakobo lu-aapwile kulanda na baana bakue, waaleele pa bulita ni kufua. Waakolonghaniiziwe pamo ni bantu bakue.
GEN 50:1 Yusufu waipoozele pali se ni kubamba kumulila wamukumbatiile.
GEN 50:2 Yusufu wa-anine babombi bakue bakondapa, basube mubili wakua se na mafuta tekuti ubole.
GEN 50:3 Baapwile nsiku 40 bamusuba mafuta akusibola. Bamisri baamulilile nsiku 70.
GEN 50:4 Nsiku ya kumulila luyaapitile, Yusufu waabaanine babiloolo bakua Farao nangue, “Kine kuti mwangitabizia, namipaapaata muye mumwane Farao nangue,
GEN 50:5 ‘Tawe lu-aali wasyafua, wanghanine nkaye nkamuziike mu kilibu ki-aateaniizie mu kyalo kya Kanaani. Ni pakako, namilomba mun'mpeele nsambu ya kuya kuziika tawe, mane kabili nkabe kubwela.’”
GEN 50:6 Farao waamwanine evi, “Endo umuziike so nga mu-aakwaniine.”
GEN 50:7 Kupwako, Yusufu wasela ku Kanaani, waya kumuziika se. Babiloolo bonse bakua likolo, ni babikolue ba Baizraeli pamo ni babikolue ba Bamisri, baile pamo nakue.
GEN 50:8 Lupua lwakue lonse, ni bakuluube pamo ni bange bonse ba mu lupua lwakua se baile pamo nakue. Mu Goseni mwaasyele sie baana babo, ni mikooko yabo, ni mbuzi pamo ni nghombe.
GEN 50:9 Bantu baali baselele mu matyakala ni baali baselele pa punda, baile pamo nakue. Lyaali lyali libumba likata sana.
GEN 50:10 Lubaafikile ku Atadi pa nkendo ya kupupiiziapo lya ku kabanga ka Yordani, paapitile musita ukata balimukulila muzowa ukata. Yusufu pamo ni bange baamulilile se nsiku kilooba.
GEN 50:11 Bekazi ba mu Kanaani lubaamwene babo bantu balimukulila ku Atadi baalandile evi, “Azo malilo onvwikile, ni malilo akata a Bamisri!” Pa ezio nkendo i kipalipakuutilua Abeli-Misuraimu, ili ku bwala Yordani.
GEN 50:12 Baana bakue baamukitiile nga mu-aabaaniine.
GEN 50:13 Baamutweme ni kuya kumuziika mu kilibu kya ku Makipela lya ku kabanga ka Mamure, kilibu kyaasitile Abrahamu pamo ni bukaba kuli Efuroni Muhiti, pakuti ibe nkendo ya kuziikamo bantu bakue.
GEN 50:14 Yusufu lu-aapwile kumuziika se, waabweleele ku Misri ni bakuluube bonse pamo ni bonse baile pamo nakue.
GEN 50:15 Bakuluube kwa Yusufu lubaamwene nangue sibo wafua, baalandile evi, “Pange Yusufu waakaba kutusuula ni kutukitila kibwelezi kya belia byonse bitwaamukitiile.”
GEN 50:16 Ni pakako baatumine mpunda kuli Yusufu ya kulanda nangue, “So lu-aali tanaafue waatukonkobeziizie walanda,
GEN 50:17 Mukabe kuya kumwana Yusufu nangue, ‘Nakupaapaata weleele bubi bwa bakuluubo bubaakuluviizie.’ Ni pakako, twakupaapaata weleele bubi bwa babombi bakua Leza wakua so.” Mpunda Luyaamufikiile, Yusufu waalilile.
GEN 50:18 Bakuluube baile kumukontamina balanda nangue, “Ewe, mona fwefue tuli babombi bobe.”
GEN 50:19 Inzi Yusufu waabaanine evi, “Tekutiine! Nene nsili na nsambu ya kwalula bintu bitantikile Leza.
GEN 50:20 Mwemue mwantekeele kilie kya kunkitila bintu bibiipile, inzi Leza waatonene kuti mapange akue aweme akitue, mapange a kupususia bantu bengi nga vikili lelo.
GEN 50:21 Kansi evi tekutiine. Nakaba kumiliisia, mwemue pamo ni baana benu.” Waabakoseleziizie ni kulanda nabo bwino bwino.
GEN 50:22 Yusufu waatwaliliile kwikala mu Misri pamo ni lupua lwakua se. Yusufu waafwile wali na myaka 110.
GEN 50:23 Yusufu waikeele nsiku ingi mpaka waamwene kuvyalua kwa baana bena Efraimu ni bena benzikulu. Kabili waamwene ni benzikulu bakua Manase baavyelue na Makiri, ni babo baana waabapokeleele mu lupua lwakue.
GEN 50:24 Yusufu waabaanine bakuluube, “Kufua kwane kwapalama. Inzi kulanda kisinka, Leza waakamisunga, kabili waakamilombola ni kumisezia ku kyalo ki-aalaile Abrahamu, ni Izaaki pamo ni Yakobo.”
GEN 50:25 Yusufu waabalapiizie baana bakua Izraeli wabaana nangue, “Kisinka Leza waakamimona. Ni pakako, pamukaba mwaya, namyana mukatwame ni bikuza byane.”
GEN 50:26 Yusufu waafwile wali na myaka 110. Mubili wakue waasubilue mafuta tekuti ubole, ni pa kyamba, waabiikilue mu lisanduku.
EXO 1:1 Baana bena Izraeli baingiile mu Misri pamo ni basiibo, kubalua muntu ni lupua lwakue, meena abo ni aza:
EXO 1:2 Rubeni, ni Simeoni, ni Lawi, ni Yuda,
EXO 1:3 ni Isakari, ni Zabuloni, ni Benyamina,
EXO 1:4 ni Dani, ni Nafutali, ni Gadi, pamo ni Aseri.
EXO 1:5 Bantu bonse ba mu luvyalo lwakua Yakobo baali 70. Yusufu umo wa pa baana bena Yakobo waali wasyatangiile mu Misri.
EXO 1:6 Yusufu ni bakuluube pamo ni balia baizile mu Misri baafwile.
EXO 1:7 Inzi Baizraeli lubaali basyavyalana, baali baya bakila kuvula ni kusanduluka, ni bo baali bali babipami. Ni pakako kyalo kya Misri mwaali mwaizuzi sie benkanke.
EXO 1:8 Pa kyamba, mu Misri mwaizile likolo wa lenu asyaali wamanine kantu palwakua Yusufu, ni palua bintu bi-aaliwakita.
EXO 1:9 Ozo likolo wa-anine bantu bakue nangue, “Emwe, mone vyavula Baizraeli, kabili mone vibapamine kukila fwefue.
EXO 1:10 Kansi tupalile kubombia maano etu onse evi tekuti bakavule, pantu kine twasakukilua na balwani, ni baba Baizraeli bailunda kuli bene, kuti batuuma ni kutufumia mu keno kyalo.”
EXO 1:11 Ni pakako, baabiikile bakulu ba kubeemia mu buzia na miilo ikata. Baizraeli baamukuuliile Farao mizi ya kuzibamo bilio, Pitomu ni Ramisesi.
EXO 1:12 Inzi kukonkana ni vibaali bakila kwemiwa, i vibaali bakila kuvula ni kukumana mu kyalo. Bamisri baunvwile mwezo pa mulandu wa Baizraeli.
EXO 1:13 Baizraeli baabombiiziwe bubi bubi na Bamisri. Bwikazi bwa Baizraeli bwaakilile kubiipa. Baabombiiziwe mu kukandila mukando ni mu kukita mabiliki, ni mu misango yonse ya miilo ya makaba. Mu ezio miilo yaviizie Baizraeli baababombiizie bubi bubi.
EXO 1:15 Likolo wa mu Misri waalandile na bakinghombe ba Baebrania, Sifura ni Pua, nangue,
EXO 1:16 “Musita umulimwavyazia banakazi ba Baebrania, kine mwamona nangue mwanakazi wavyala mwana mwalalume, ipaye ozo mwana. Inzi kine ozo mwanakazi wavyala mwana mwanakazi, tekwipaye ozo mwana.”
EXO 1:17 Inzi babo bakinghombe tebaakitile nga mwaalandiile likolo wa ku Misri pantu baali bamunakila Leza. Ni pakako, baana balalume baali basiiwa bakosele.
EXO 1:18 Kupwako likolo wa ku Misri wakuuta bakinghombe ni kubeepuzia nangue, “Ale mwakitilaki evi? Ni kiki kimulimukusiila baana balalume bakosele?”
EXO 1:19 Bakinghombe baamwasukile Farao nangue, “Baba banakazi Baebrania tebali nga banakazi Bamisri, bene bakilile kuluma. Fwefue tulitwasanga basyavyele.”
EXO 1:20 Ni pakako, bakinghombe baakitiilue biweme na Leza. Baizraeli baakilile kuvula ni kukila kuya balumine. Pantu bakinghombe baali bamunakila Leza, ni ye waabapaalile na kuvyala baana.
EXO 1:22 Pa mpeleezio Farao wa-anine bantu bakue bonse nangue, “Kubalua mwana mwalalume Muebrania wakaba kuvyalua, mukabe kumupooza mu Mwenzi wa Nile, inzi mwana mwanakazi wakaba kuvyalua mukabe kumusia wakosele.”
EXO 2:1 Pa ozo musita kwaali muntu umo wa mu mukowa wakua Lawi waile kuupa mukazyana wa mu ozo wenka mukowa.
EXO 2:2 Ozo mwanakazi waimitile ni kuvyala mwana mwalalume. Lu-aamwene vyaali vyaweme ozo mwana, waamufiikile myezi itatu.
EXO 2:3 Inzi lu-aamwene nangue takili na musango wa kumufiika musita waleepele, waamusukiile mpuuto ya masanza ni kusingako kabulimbu. Waabiikile mwana mukati ni kuya ku-ibiika mu matete mumbali Mwenzi wa Nile.
EXO 2:4 Nkaziize kwa ozo mwana waali waimeene lwa kule wamweneneene kilikumukitikila mwana.
EXO 2:5 Mukazyana mwina likolo waile pamo ni babombi bakue ku mwenzi kuti aye asambe. Babombi bakue lubaali baenda mumbali mwenzi, mukazyana mwina likolo waamwene mpuuto mu matete. Waatumine mubombi wakue kuti aye aitwame ni kumuleetela.
EXO 2:6 Mukazyana mwina likolo lu-aatupukwile mpuuto ni kumonamo mwana mwalalume walimukulila, waamunvwiliile nkumbu. Mukazyana mwina likolo waalandile nangue, “Ozu mwana apalile kuba mwana mwina Baebrania.”
EXO 2:7 Nkaziize kwa ozo mwana waamwipuziizie mwina Farao nangue, “Kuti naya kukukebela mwanakazi Muebrania wakuti aye wakonsiizia ozu mwana?”
EXO 2:8 Mukazyana mwina likolo waamwasukile, “Endo umukebe.” Nkaziize kwa ozo mwana waile kumutwama nghina wa ozo mwana.
EXO 2:9 Mwina likolo waamwanine nghina wa ozo mwana nangue, “Twama mwana ozu uye wanghonsiizia, nakaba kuya nakusazia nsazio yobe.” Kupwako, nghina wamutwama ozo mwana ni kubamba kumonsia.
EXO 2:10 Mwana lu-aakulile, nghina wa ozo mwana waamubweziizie kuli mukazyana mwina Farao, ni ye waaamwalwile nga mwana wakue. Mukazyana mwina Farao waalandile evi, “Namufumia mu menda,” ni pakako ndikumwinika Musa.
EXO 2:11 Pa kyamba kya myaka, Musa wasyakulile, waile kupempula Baebrania nakue ni kumona vibaali babombiiwa kibombebombe. Mu kupempula kwakue, waamwene Muebrania nakue walimukuumua na Mumisri.
EXO 2:12 Musa lu-aakentele koku ni koku kuti asininkizie nangue tamwenue na muntu, waamwipaile ozo Mumisri ni kumufiika mu musenga.
EXO 2:13 Busiku bwaakonkelepo Musa lu-aile kupempula paakale Baebrania nakue, waamwene Baebrania babili balalume balimukulua. Musa waamwanine olia waali waluviizie nangue, “Ewe, ulimukuuminaki Muebrania nobe?”
EXO 2:14 Olia waali waluviizie waalandile evi, “Nani wakikubiika kuba kateeka ni mupinguzi wetu? Ulimukukeba kungipaya nga viwakiipaya olia Mumisri lukeele?” Ni pakako Musa waatiinine walanda nangue, “Kisinka mulandu unkitile umanikile.”
EXO 2:15 Farao lu-aunvwile nangue Musa wakiipaya Mumisri, waali wasyakambila kumwipaya Musa. Inzi Musa waamubutukile Farao ni kuya mu kyalo kya Midiani. Lu-aafikile ku kekio kyalo, waile kwikala mumbali kiina kya menda. Kwaali banakazi kilooba bena kitambua wa ku Midiani, babo baile ku kiina kya menda ku kutapa menda a kubiika mu mukondo kuti banwinsie mikooko yakua sibo.
EXO 2:17 Kwaali basungi bamo ba mikooko baizile kubakumba, inzi Musa waabasakiile ni kubakwasia kunwinsia mikooko yabo.
EXO 2:18 Lubaabweleele kuli sibo Yetoro, sibo waabepuziizie nangue, “Ale lelo kimusikokweleele ni kiki?”
EXO 2:19 Ni bo baamwasukile evi, “Basungi lubaizanga kutukumba, Mumisri umo waizanga kutusakila. Kabili watutapilanga menda etu ni menda a kunwinsia mikooko yetu.”
EXO 2:20 Sibo Yetoro waabeepuziizie baana bakue banakazi nangue, “Ale ozo muntu ali pi? Mwamusiilangaki? Endo mumukuute eze tulie nakue.”
EXO 2:21 Musa waawamiinue kwikala koko pamo ni Yetoro. Yetoro waufiizie mwana wakue mwanakazi kuli Musa. Ozo mwanakazi waali wakuutua Sipora.
EXO 2:22 Sipora lu-aavyele mwana mwalalume, Musa waamwinikile Gershomu walimukulanda nangue, “Nakyaluka mweni mu kyalo kya bweni.”
EXO 2:23 Pa kyamba kya nsiku ingi, likolo wa ku Misri waafwile. Baizraeli baatwaliliile kulila na bulanda bwa mu buzia ni kuya baitendooka mpaka ni Leza waunvua malilo abo.
EXO 2:24 Leza lu-aunvwile malilo abo, waalangakeene kipingo kyakue ki-aapingheene na Abrahamu, ni Izaaki pamo ni Yakobo.
EXO 2:25 Leza waamwene Baizraeli vibaali baema. Ni pakako, waabonvwiliile nkumbu.
EXO 3:1 Busiku bumo Musa lu-aali wasunga mikooko yakua sevyala Yetoro, kitambua wa ku Midiani, Musa waalombwele mikooko ni kuitwala lya ku mboosi ya kaseeba, waya kufika ku Horebu lupili lwakua Leza.
EXO 3:2 Koko i kwaamumonekeele malaika wakua Yawe wali nga libeebe lya mulilo mu kavuule. Musa waakentele ni kupapa kumona kavuule kalimukuleema mulilo inzi tekuuba kazia.
EXO 3:3 Ni pakako, Musa waalangakeene walanda nangue, “Ale kaka kavuule kikasilimukuziila ni kiki! Kansi n'mpalamenke n'mone keki kintu kya kupapia.”
EXO 3:4 Yawe lu-aamwene Musa waya wapalama kuti akentesie, lizui lyakua Yawe lyaunvwikile mu kavuule lyakuuta, “Musa! Musa!” Musa waiteebe nangue, “Ne ono pano.”
EXO 3:5 Yawe waamwanine nangue, “Tekupalama pano. Vuula nkwabilo yobe, pantu wimeene pa kifuka kizuuke.”
EXO 3:6 Kabili waalandile evi, “Nene ndi Leza wakua so, Leza wakua Abrahamu, wakua Izaaki, ni wakua Yakobo.” Kupwako, Musa waikupa pa menso akue pantu waatiinine kumukenta Leza.
EXO 3:7 Yawe waalandile nangue, “Namona lyemo lya bantu bane bali mu Misri, kabili naunvua malilo pa mulandu wa kwemiiwa na bakulu ba buzia. Kisinka nabonvwila nkumbu.
EXO 3:8 Ni pakako, nakooka kuti n'mbapususie mu maboko a Bamisri, n'mbafumie mu kekio kyalo, n'mbasezie ni kubatwala mu kyalo kiweme kyatanine, kyalo kiizuzimo mabeele ni kapelo, momo mwikeele Bakanaani, ni Bahiti, ni Ba-amori, ni Baperizi, ni Bahivi, pamo ni Bayebusi.
EXO 3:9 Kisinka naunvua malilo a Baizraeli, kabili namona lyemo libeemiiziwe na Bamisri.
EXO 3:10 Ni pakako, nakutuma kuli Farao kuti uye ufumie bantu bane, Baizraeli, kufuma mu Misri.”
EXO 3:11 Inzi Musa waamukanzile Leza waamwana, “Kubako nene ndi ni wakuti aye kuli Farao ni kufumia Baizraeli mu Misri?”
EXO 3:12 Leza waamwanine nangue, “Kisinka ndikuya nali pamo nobe. Kalangi kawakaba kusininkiziiziako nangue nkutumine ni kaka: Pa kyamba kya kufumia bantu mu Misri, mwakaba kun'mpupila pa lono lupili.”
EXO 3:13 Inzi Musa waamukanzile Leza nangue, “Ale kine nkabe kuya ku Baizraeli ni kubaana nangue, ‘Leza wa babikolue benu i wantuma kuli mwemue,’ Ni bo kine bakangipuzie nangue, ‘Ozo Leza Liina lyakue nani?’ Nakaba kubaanaki?”
EXO 3:14 Leza waamwasukile Musa nangue, “Ndi olia Ndi. Evi i vyakuti uye ubaane Baizraeli nangue, ‘Olia aliwakuutua NDI i antumine kuli mwemue.’”
EXO 3:15 Kabili Leza waamwanine Musa nangue, “Baane Baizraeli nangue, ‘Yawe Leza wa babikolue benu, Leza wakua Abrahamu, Leza wakua Izaaki, ni Leza wakua Yakobo, i-antumine kuli mwemue.’ Leli i Liina lyane muyayaya. Ni evio i vinaakaba nalangulukua na nvyalo yonse.
EXO 3:16 Endo ukolonghanie masiiko a Baizraeli ni kubaana nangue, ‘Yawe Leza wa babikolue benu, Leza wakua Abrahamu, wakua Izaaki, ni wakua Yakobo, wakin'monekela wanghana nangue kisinka amikentele ni kumona vimulimukwemiwa mu Misri.
EXO 3:17 Namilaya nangue naakamifumia mu lyemo lya mu Misri nkamisezie ni kumitwala mu kyalo kya Bakanaani, ni Bahiti, ni Ba-amori, ni Baperizi, ni Bahivi, pamo ni Bayebusi, kyalo kiizuzimo mabeele ni kapelo.’
EXO 3:18 “Masiiko a Baizraeli akaba kukunvua. Wewe pamo ni masiiko a Baizraeli mupalile kuya kuli likolo wa ku Misri ni kumwana nangue, ‘Yawe Leza wa Baebrania waakitumonekela. Kansi twakulomba utuleke tuye mu kaseeba lwendo lwa nsiku itatu kuti tuye twelele ngelelo kuli Yawe Leza wetu.’
EXO 3:19 Inzi n'manine nangue likolo wa ku Misri takaba kumilekeela kuya, anzia mukakita syani, inga sie kine wapatikiziiwa na kuboko kwa maka.
EXO 3:20 Anzia kikaba evio, nakaba kukanda Bamisri na bipezia maano binakaba kukita pali bene, mane pa kyamba akabe kumilekeela kuya.
EXO 3:21 “Nakaba kulengia Baizraeli kutonua na Bamisri, ni musita wa kuya kwenu, temukaya tonte.
EXO 3:22 Kubalua mwanakazi Muizraeli waakamulomba mwanakazi Mumisri u-apalameene nakue ni mweni wa mu nghanda yakue kuti amupeeleko bifwanizio bya mutofue, ni bya oro, ni ngubo, bebio bimwaakabavwika baana benu balalume ni banakazi, ni mwe mwaakatwama bunonsi bwa Bamisri.”
EXO 4:1 Inzi Musa waamukanzile Leza paakale walanda nangue, “Ale kyaakaba syani kine masiiko a Baizraeli aya kukaana kungitabila ao kunghunvua ni kunghana nangue Yawe takikumonekela?”
EXO 4:2 Yawe waamwipuziizie nangue, “Ukweteki ku minue yobe?” Wa-asukile evi, “Nkwete kabango.”
EXO 4:3 Inzi Yawe waamwanine nangue, “Pooza kabango pansi.” Musa lu-aapoozele pansi, kabango ka-alukile kizoka, ni Musa waiseeluka.
EXO 4:4 Kupwako Yawe wamwana Musa nangue, “Ale olola kuboko kobe ukwate ku mukila.” Musa waolola kuboko kwakue, wakikwata, ni kyo kya-aluka kabango paakale mu minue yakue.
EXO 4:5 Leza waamwanine Musa nangue, “Kaka kalangi i kakuti ukakite pakuti bakabe kwitabila nangue ne Yawe Leza wa babikolue babo, Leza wakua Abrahamu, Leza wakua Izaaki, ni Leza wakua Yakobo nakikumonekela.”
EXO 4:6 Kabili Yawe waamwanine Musa nangue, “Ale biika kuboko kobe mu nkanzu lya pa nkulo yobe.” Musa waabiikile kuboko kwakue mu nkanzu lya pa nkulo yakue. Lu-aafumiiziemo, kuboko kwa-alukile ni tembue ni kusweta nga kibue.
EXO 4:7 Yawe waamwanine nangue, “Kabili biika kuboko kobe mu nkanzu lya pa nkulo yobe.” Ni ye waabiikile kuboko kwakue mu nkanzu lya pa nkulo yakue. Lu-aafumiiziemo, kuboko kwa-alukile nga vikwaali pa mambo.
EXO 4:8 Yawe waamwanine nangue, “Kine tebakaba kukwitabila ao kukunvua pa kapapo ka mambo, bakaba kwitabila pa kapapo ka bubili.
EXO 4:9 Kine tebakaba kwitabila totu tupapo tubili, ao kukunvua, wakaba kutapula menda mu Mwenzi wa Nile ni kwitila pansi, ni menda awakaba kutapula mu mwenzi akaba kwaluka mulopa.”
EXO 4:10 Musa waamupaapaatile Yawe walanda, “We Yawe, nene nsimanine kulanda bwino bwino pantu umanine kisinka nangue kutula musita uwakibamba kulanda na nene, ndinameemeetela.”
EXO 4:11 Yawe waamwipuziizie Musa nangue, “Eba, nani waalengele kanua ka muntu? Nani aliwalengia muntu kulanda ao kuba kameme? Nani aliwalengia muntu kunvua ao kuba mpokoto? Nani aliwalengia muntu kumona ao kuba mpofu? Kubako te nene Yawe?
EXO 4:12 Ale endo waya, ndikuba nobe mu kulanda, ni kukusambilizia viupalile kulanda.”
EXO 4:13 Inzi kabili Musa waamupaapaatile Yawe walanda, “We Yawe nakupaapaata utumeko sie unge.”
EXO 4:14 Yawe waamufiitiilue Musa walanda nangue, “Eba, kubako wewe teuli na mukuluubo Haruni wa mu mukowa wa Balawi? N'manine nangue wene kuti walanda bwino. Ni evi vyenka alimukwiza kusaakaana nobe, musita u-alikukumona alikuwaminua.
EXO 4:15 Wewe ulikuyawalanda nakue ni kubiika twebo mu kanua kakue. Mwe babili nakaba kumikwasia kulanda, nene nakaba kumisambilizia kimupalile kukita.
EXO 4:16 Haruni i wakaba kuya wakulandila ku Baizraeli pantu i wakaba kuya wali kanua kobe. Wewe wakaba kuya wali nga Leza kuli wene mu kumubwila bi-upalile kulanda.
EXO 4:17 Twama kaka kabango mu minue yobe evi uye wakabombia kukitilako toto tupapo.”
EXO 4:18 Musa i lu-aabweleele kuli sevyala Yetoro ni kumwana nangue, “Nakupaapaata un'mpeele nsambu ya kubwelela ku lupua lwane luli mu Misri, pantu nsimanine kine bakikosele.” Yetoro waamwasukile evi, “Kili sie bwino, ale iilapo bwino.”
EXO 4:19 Musa lu-aali wakili mu kyalo kya Midiani, Yawe waamwanine nangue, “Bwelela ku Misri pantu balia baali baumiine kukwipaya bakifua.”
EXO 4:20 Kupwako, Musa wamutwama mukazi ni baana bakue balalume, wabasezia pa punda ni kubwelela ku kyalo kya Misri, watwama ni kabango kabiikiluemo buvinde na Leza mu minue yakue.
EXO 4:21 Yawe waamwanine Musa nangue, “Paukaba kubwela ku Misri, ukabe kuya kukita tupapo tonse ntanzi yakua Farao na buvinde bunakikupeela. Inzi nakaba kukosia mutima wakue, evi tekuti akabe kulekeela Baizraeli kuya.
EXO 4:22 Kabili ukabe kumwana Farao nangue ne Yawe nalanda evi, ‘Izraeli i mwana wane mwalalune, kabili i libeli wane.
EXO 4:23 Nakwana umuleke mwana wane kuti aye an'mpupe. Kine wamukaanina kuya, nakaba kwipaya mwana mwalalume, libeli obe.’”
EXO 4:24 Musa ni lupua lwakue lubaali bakili mu nzila balimukuya ku Misri, baafikile pa nghanda ya bweni pakuti balaale. Musita wa busiku, Yawe waile pali Musa wakebele kumwipaya.
EXO 4:25 Sipora muka Musa waabuulile libue litwile, wamuteeta yando mwana wakue mwalalume ni kupooza mpapa ku makasa akua Musa walimukulanda evi, “Kisinka wewe uli syabuinga wa mulopa kuli nene.” Ni pakako, Yawe taamukitiile Musa kintu kibiipile. Sipora waalandile evi, “Wewe uli syabuinga wa mulopa pa mulandu wa kuteeta yando.”
EXO 4:27 Yawe waamwanine Haruni nangue, “Endo usaakaane ni Musa mu kaseeba.” Haruni waile kusaakaana nakue ku lupili lwakua Leza ni kumukumbatila.
EXO 4:28 Musa waamwanine Haruni twebo tonse tu-aatuminue na Yawe kuti alande, kabili waamwanine tupapo tu-aali wa-aninue kukita.
EXO 4:29 Kupwako, Musa ni Haruni baya mu Misri, bakolonghania masiiko onse a Baizraeli.
EXO 4:30 Haruni waabaanine twebo tonse twakua Yawe twa-aninue Musa, waakitile tupapo ntanzi ya bantu,
EXO 4:31 ni bo baazumiine. Kabili lubaunvwile nangue Yawe waali wapoozele maano ku Baizraeli ni kumona lyemo lyabo, baakontamikile mitue yabo ni kumupupa.
EXO 5:1 Pa kyamba kya kulanda ni masiiko a Baizraeli, Musa ni Haruni baile kumwana Farao nangue, “Yawe Leza wa Baizraeli walanda evi, ‘Baleke bantu bane baye bankitile nsikunkulu mu kaseeba.’”
EXO 5:2 Farao waalandile nangue, “Eba, ozo Yawe nani wakuti nghunvue lizui lyakue ni kumwitabizia kuti ndekeele Baizraeli baye? Ozo Yawe nsimumanine, kabili nsivinda kwitabizia kulekeela Baizraeli baye.”
EXO 5:3 Musa ni Haruni baalandile evi, “Leza wa Baebrania wakitwana twize kuli wewe. Ale twitabizie tuye lwendo lwa nsiku itatu mu kaseeba, evi tuye tumwelele Yawe Leza wetu ngelelo akeeza kutwipaya na kimina kya malwele ao na bului.”
EXO 5:4 Inzi likolo wa ku Misri wa-anine Musa ni Haruni nangue, “Ni kiki kimwakeba kufumiizia bantu ku miilo yabo? Bwelele ku miilo yenu.”
EXO 5:5 Kabili Farao waalandile nangue, “Baba bantu bavula kukila Bamisri, ale kimulimwakebela baba bantu batuuzie ni kiki?”
EXO 5:6 Bobo bwenka busiku Farao waakuutile bakulu ba Bamisri pamo ni nombozi ya bazia wabaana nangue,
EXO 5:7 “Kutula lelo tekuli kupeela bantu bikusi bya kukitilako mabiliki nga vimulimwakita. Baleke baye baikebele bo bene.
EXO 5:8 Inzi bakinkizie sie kukita mabiliki ni kukumania mpendua yenka elia pasili kukeefiapo ata limo, pantu baba bantu ni bananghani. Ni pakako i kibalimukunghemiizia balimukulanda nangue, ‘Twitabizie tuye tumwelele Leza wetu ngelelo.’
EXO 5:9 Kizie kupeela baba bantu miilo ikolele, evi basulwile ni kulekela kutwilizia twebo twa bufi.”
EXO 5:10 Kupwako, bakulu ba Bamisri pamo ni nombozi ya bazia babaana Baizraeli nangue, “Farao walanda nangue nsikiya namipeela bikusi.
EXO 5:11 Endo mwaye mwikebele mwe bene koko kumulikuya kubisangila. Inzi mupalile kukita mpendua ya mabiliki nga mumulimwakitila lyonse.”
EXO 5:12 Ni pakako, bantu baasalagheene mu Misri mu kukeba bikusi bya kukitilako mabiliki.
EXO 5:13 Banombozi ba bazia baabakonkobeziizie babaana nangue, “Fikilizie mpendua ya mabiliki nga vimwaali mwakita kubalua busiku lutwaali twamipeela bikusi.”
EXO 5:14 Bakulu ba Bamisri baatendekele kuuma banombozi ba bazia ba Baizraeli koku balimukubeepuzia nangue, “Ni kiki kyakilengia lukeele ni lelo tekuti mukumanie mpendua ya mabiliki nga vimwakiba mwabomba ku mambo?”
EXO 5:15 Ni pakako, banombozi ba bazia ba Baizraeli baile kumupaapaata Farao balanda nangue, “Wakitilaki evi ku fwe babombi bobe?
EXO 5:16 Fwefue tetukilimukupeelua bikusi, inzi tulimukwanua tukumanie mpendua ya mabiliki ni kuya twaumua. Keki te kilubo kyetu, inzi ni kilubo kya bantu bobe.”
EXO 5:17 Inzi Farao waalandile nangue, “Mwe bananghani! Kisinka muli bananghani, kabili i kimulimukulandila nangue, ‘Twitabizie tuye tumwelele Yawe ngelelo.’
EXO 5:18 Ni evi vyenka bwele muye mubombe! Tekuli muntu alikumipeela bikusi, inzi mupalile mukumanie mpendua yenka elia ya mabiliki amulimwakita kubalua busiku.”
EXO 5:19 Kupwako, banombozi ba bazia ba Baizraeli baisanga kuba mu bwavia bukata pantu baabaanine nangue, “Tekuli kutuuzia ata kaniini kine temunakumanienke mpendua ya mabiliki amulimwakita kubalua busiku.”
EXO 5:20 Lubaafumine ku kipango kyakua Farao, baile kusaakaana ni Musa pamo ni Haruni baali babapembeele panze.
EXO 5:21 Kupwako, bamwana Musa ni Haruni nangue, “Yawe amipingule ni kumikanda, pantu mwakitulengia kukendua na Farao ni babombi bakue, kabili mwakilengia batendeke kutwipaya.”
EXO 5:22 Musa waile paakale kuli Yawe ni kumwana nangue, “We Yawe, wakitilaki bobu bwavia pa baba bantu bobe? Ale wakintuminaki kono?
EXO 5:23 Pantu kutula busiku bunakingila kwa Farao ni kumwana biwanghanine, kuleetele bwavia bukata ku bantu bobe, kabili teukitilepo kantu ka kulanga nangue waakabapususia!”
EXO 6:1 Inzi Yawe waamwanine Musa nangue, “Wewe wakaba kumona vinakaba kumukitila Farao, pantu nakaba kumupatikizia na maka ane kuti akabe kubetabizia kuya. Kisinka Farao wakaba kubakumba mu kyalo kyakue.”
EXO 6:2 Kabili Leza waamwanine Musa nangue, “Nene ndi Yawe.
EXO 6:3 Naifyulile kuli Abrahamu, kuli Izaaki ni Yakobo, nga Leza wa Maka onse, inzi nsyaifyulile mu Liina lya bu Yawe kuli bene.
EXO 6:4 Kabili naapingheene nabo ni kubalaya nangue naakabapeela kyalo kya Kanaani, momo mu baali baikeele nga baeni.
EXO 6:5 Nene nakyunvua malilo a Baizraeli kukonkana ni vibalimukupatikiziiwa na Bamisri kubomba miilo ya buzia. Ni pakako, nakilangakana kipingo kinaapingheene nabo.
EXO 6:6 Kansi ana Baizraeli nangue, ‘Nene ndi Yawe, nakaba kumifumia mu mutembo umutwikilue na Bamisri. Nakaba kumifumia mu buzia bubamiteekele, nakaba kubakanda bubi bubi ni kumilubula na maka ane.
EXO 6:7 Nakaba kumyalula kuba bantu bane. Nene naakaba Leza wenu, kabili mwaakamana nangue nene i Yawe Leza wenu waamifumiizie mu buzia ku Misri.
EXO 6:8 Nene naakamitwala mu kyalo kinaamulaile Abrahamu, ni Izaaki pamo ni Yakobo. Keki kyalo naakamipeela kuti kikabe kyenu, pantu nene ndi Yawe.’”
EXO 6:9 Ni pakako, Musa waabaanine Baizraeli twebo twaalandile Yawe, inzi bene tebaamutwiliziizie pa mulandu wa mutima misa, ni pa mulandu wa buzia bubi bubaali bateekelue.
EXO 6:10 Yawe i pakumwana Musa nangue,
EXO 6:11 “Endo umwane Farao likolo wa mu Misri abapeele Baizraeli nsambu ya kufuma mu kyalo kyakue.”
EXO 6:12 Inzi Musa waamwanine Yawe nangue, “Bantu bane tebalimukunghunvua ata kaniini. Ale Farao kuti wanghunvua syani ne aliwameemeetela?”
EXO 6:13 Yawe i pakumwana Musa ni Haruni palua Baizraeli nangue, “Mwane Farao likolo wa ku Misri afumie Baizraeli mu Misri.”
EXO 6:14 Babikolue ba mu mikowa ya Baizraeli meena abo ni aza: Bena Rubeni, libeli wakua Izraeli, meena abo ni aza: Hanoki, ni Palu, ni Hesroni pamo ni Karmi. Baba i ba mu lupua lwakua Rubeni.
EXO 6:15 Bena Simeoni meena abo ni aza: Yemueli, ni Yamini, ni Ohadu, ni Yakini, ni Zohari pamo ni Sauli mwina mwanakazi Mukanaani. Baba i ba mu lupua lwakua Simeoni.
EXO 6:16 Bena Lawi ni baba: Gershoni, ni Kohati pamo ni Merari. Lawi waikeele pa kyalo myaka 137.
EXO 6:17 Bena Gershoni meena abo ni aza: Libni ni Simei, kukonkana ni mikowa yabo.
EXO 6:18 Bena Kohati meena abo ni aza: Amramu, ni Izihari, ni Hebroni pamo ni Uzieli. Kohati waikeele pa kyalo myaka 133.
EXO 6:19 Bena Merari meena abo ni aza: Mali ni Musi. Baba i babikolue ba mu lupua lwakua Lawi.
EXO 6:20 Amramu waupile nghina senge Yokebedi, ozo waamuvyaliile Haruni ni Musa. Amramu waikeele pa kyalo myaka 137.
EXO 6:21 Bena Izihari meena abo ni aza: Kora, ni Nefegi pamo ni Sikiri.
EXO 6:22 Bena Uzieli meena abo ni aza: Misaeli, ni Elizafani pamo ni Sitiri.
EXO 6:23 Haruni waupile Eliseba mwina Abinadabu, nkaziize kwa Nasoni. Eliseba waavyele Nadabu, ni Abihu, ni Eleazari pamo ni Itamari.
EXO 6:24 Bena Kora meena abo ni aza: Asiri, ni Elkana, pamo ni Abiasafu. Baba i babikolue ba mu lupua lwakua Kora.
EXO 6:25 Eleazari mwina Haruni waupile mwanakazi umo wa pa baana bakazyana bena Putieli, ni ye waavyele mwana mwalalume liina lyakue Finehasi. Baba bonse i baali babikolue ba mu lupua lwa Balawi.
EXO 6:26 Haruni ni Musa i ba-aninue na Yawe nangue, “Fumie Baizraeli mu kyalo kya Misri bali mu mabumba mabumba.”
EXO 6:27 Baba babili, Musa ni Haruni, i baali balanda ni Farao likolo wa ku Misri palua kufumia Baizraeli mu Misri.
EXO 6:28 Mu ezio nsiku Yawe lu-aalandile kuli Musa mu kyalo kya Misri,
EXO 6:29 waamwanine nangue, “Nene ndi Yawe. Endo umwane Farao likolo wa ku Misri byonse bindikukwana.”
EXO 6:30 Inzi Musa waamukanzile Yawe nangue, “Nene nsivinda kukita evio pantu ndinameemeetela. Ale ni kiki kilikulengia Farao kuti antwilizie?”
EXO 7:1 Yawe i lu-aamwanine Musa nangue, “Unvua twebo tundikukwana, nene nakubiika kuba nga Leza ntanzi yakua Farao, ni Haruni alikuba kabika obe.
EXO 7:2 Ulikumwana Haruni byonse bindikukwana, ni ye alikumwana Farao etabizie Baizraeli bafume mu kyalo kyakue.
EXO 7:3 Inzi nakaba kufinia mutima wakua Farao, kabili anzia kine nakaba kukila kukita tupapo twane mu kyalo kya Misri, Farao takaba kumyunvua. Ni pakako, nakaba kulanga maka ane pa kyalo kya Misri ni kufumia bantu bane, Baizraeli, mu Misri na tupapo tukata.
EXO 7:5 Musita unakaba kulangisia tupapo twane pa kufumia Baizraeli, Bamisri i pa bakaba kumana nangue nene ndi Yawe.”
EXO 7:6 Kupwako Musa ni Haruni bakita nga muba-aniinue na Yawe.
EXO 7:7 Pa ozo musita ubaalandile ni Farao, Musa waali na myaka 80, ni Haruni waali na myaka 83.
EXO 7:8 Kabili Yawe wa-anine Musa ni Haruni nangue,
EXO 7:9 “Kine Farao akabe kumyana kukita kapapo ka kusininkizia, ukabe kumwana Haruni akabe kubuula kabango kakue ni kukapooza pansi ntanzi yakua Farao, ni ko kakaba kwaluka kizoka.”
EXO 7:10 Musa ni Haruni i lubaingiile kuli Farao ni kukita nga muba-aniinue na Yawe. Haruni waapoozele kabango kakue pansi ntanzi yakua Farao, ni ntanzi ya babombi bakue, ni ko ka-alukile kizoka.
EXO 7:11 Kupwako, penka papo Farao wakuuta kale bantu bakue ba mulangue ni bandozi pamo ni banghanga ba mu Misri beze bengile. Ni bo baakitile evio vyenka mu bunghanga bwabo.
EXO 7:12 Bonse baapoozele tubango twabo pansi, ni to twa-alukile bizoka. Inzi kabango kakua Haruni kaatelekele tubango twabo.
EXO 7:13 Anzia kyaali evio, Farao waali watwaliliile sie kufinia mutima, ni ye taabatwiliziizie nga mwaalandiile Yawe.
EXO 7:14 Kupwako Yawe wamwana Musa nangue, “Mutima wakua Farao ufinine, ni ye wakaana kwitabizia Baizraeli kuti baye.
EXO 7:15 Kansi lukeele lukeelekeele, Farao pa-akaba kuya waya ku menda, ukabe kuya kwimana kumbali Mwenzi wa Nile kuti ukabe kusaakaana nakue watweme ni kabango mu minue yobe, kabango kalia kakyaluka kizoka.
EXO 7:16 Mane ukabe kumwana nangue, ‘Yawe Leza wa Baebrania wakintuma kuli wewe kuti ubaleke Baizraeli baye ban'mpupe mu kaseeba. Inzi ni lenu kumo teunaunvue.
EXO 7:17 Ni pakako, ulikumwinika nangue Yawe nani. Ndikuuma pa menda a mwenzi na kaka kabango, ni menda onse alikwaluka mulopa.
EXO 7:18 Masabi ali mu mwenzi alikufua, mwenzi ulikununka, ni Bamisri balikwandua kumina menda a mwenzi.’”
EXO 7:19 Kabili Yawe waamwanine Musa nangue, “Mwane Haruni nangue, ‘Buula kabango kobe ni kuolwela kuboko pa menda a mu Misri: Pa myenzi yabo, ni pa twezi twabo, ni pa biina byabo bya menda, ni pa biziba byabo byonse bya menda, ni menda alikwaluka mulopa. Ozo mulopa wakaba kuya wali mu kyalo kyonse kya Misri, mu bibaya ni mu ngeso.’”
EXO 7:20 Ni pakako, Musa ni Haruni baakitile nga muba-aniinue na Yawe. Haruni waalendwile kabango ni kuuma pa menda a mwenzi ntanzi yakua Farao ni ntanzi ya babombi bakue. Menda onse a mwenzi a-alukile mulopa.
EXO 7:21 Masabi aali mu mwenzi aafwile. Mwenzi waanunkile, ni Bamisri ba-andilue kumina menda a mwenzi. Mulopa waakumeene mu kyalo kyonse kya Misri.
EXO 7:22 Inzi banghanga ba mu Misri ni bo baakitile evio vyenka mu bunghanga bwabo. Farao waatwaliliile kufinia mutima, kabili taamutwiliziizie Musa ni Haruni nga mwaalandiile Yawe.
EXO 7:23 Farao waabweleele ku nghanda yakue pasili kupoozako maano ku bintu byaakitikile.
EXO 7:24 Bamisri bonse i lubaimbile biina bya menda mumbali Mwenzi wa Nile evi bapate menda a kumina pantu ba-andilue kumina menda a ozo mwenzi.
EXO 7:25 Paapitile nsiku kilooba menda a mwenzi ainoonekele na kekio kimina.
EXO 8:1 Kabili Yawe waamwanine Musa nangue, “Endo umwane Farao nangue Yawe walanda evi, ‘Baleke bantu bane baye, evi bakabe kun'mpupa.
EXO 8:2 Kine ulikukaana, ndikukanda kyalo kyobe kyonse na kwizuziamo byula.
EXO 8:3 Mu Mwenzi wa Nile mulikwizula byula, ni byo bilikwingila mu nghanda yobe, ni mu muputule mu-uliwalaala, ni kusela pa bulita bobe, bilikwingila mu nghanda ya babombi bobe, ni mu kubalua nghanda ya bantu bobe, ni mu bipe biuliwa-apikilamo mikate, ni mu bipe byobe bya kukandilamo bunga.
EXO 8:4 Byula bilikusela pali wewe, ni pa bantu bobe, pamo ni pa babombi bobe bonse.’”
EXO 8:5 Yawe i lu-aamwanine Musa amwane Haruni nangue, “Olola kuboko kobe ni kabango kobe pa myenzi ni pa twezi, ni pa biziba, evi byula bifume ni kukumana pa kyalo kya Misri.”
EXO 8:6 Kupwako, Haruni waolwela kuboko kwakue pa menda onse, ni byula byafuma ni kukumana pa kyalo kya Misri.
EXO 8:7 Inzi banghanga ni bo mu bunghanga bwabo baakitile evio vyenka. Baaleetele byula pa kyalo kya Misri.
EXO 8:8 Pa kyamba, Farao waakuutile Musa ni Haruni ni kupaapaata walanda, “Nandileko kuli Yawe afumie byula pali nene ni pa bantu bane, ni ne ndikubaleka Baizraeli baye, evi bakabe kumwelela Yawe ngelelo.”
EXO 8:9 Musa waamwasukile Farao nangue, “Landa we mwine musita un'mpalile kukupepela wewe ni babombi bobe, ni bantu bobe, evi byula biloviiwe mu nghanda yenu, bisyalilile sie mu mwenzi!”
EXO 8:10 Farao waamwanine nangue, “Lukeele.” Musa wa-asukile evi, “Kibe nga muwalandila, evi uye wamanine nangue tekuli unge ali nga Yawe Leza wetu.
EXO 8:11 Byula byakaba kufuma pali wewe, ni mu nghanda yenu, ni pa babombi bobe, ni pa bantu bobe. Inzi byakaba kusyalilila sie mu Mwenzi wa Nile.”
EXO 8:12 Kupwako, Musa ni Haruni bafuma ku kipango kyakua Farao, ni Musa wamulilila Yawe amupususie Farao pa mulandu wa kimina kya byula.
EXO 8:13 Yawe waakitile mwaapepeele Musa. Waipaile byula byaali mu nghanda ni mu misolo pamo ni mu makaba.
EXO 8:14 Bamisri baatuulikile byula milui milui, ni kyalo kyonse kyaanunkile.
EXO 8:15 Inzi Farao lu-aamwene nangue bapeemako, kabili waafiniizie mutima wakue ni kukaana kutwilizia kuli Musa ni Haruni nga mwaalandiile Yawe.
EXO 8:16 Yawe i lu-aamwanine Musa nangue, “Mwane Haruni aolole kabango kakue aume pa lufunko, ni lo lwaluke nda mwaya kyalo kya Misri.”
EXO 8:17 Ni pakako, Musa ni Haruni baakitile nga muba-aniinue na Yawe. Haruni lu-aalendwile kuboko ni kuuma pa lufunko, nda yaakupile ku Bamisri ni ku biteekua byabo. Lufunko lonse lwa mu kyalo kya Misri lwa-alukile nda.
EXO 8:18 Banghanga bakua Farao ni bo mu bunghanga bwabo baeziizie kukita evio, inzi lolo lwendo lwene ba-andilue. Ni pakako, nda yaakupile ku bonse, muntu ni nama.
EXO 8:19 Banghanga baamwanine Farao nangue, “Maka akua Leza i akita evi.” Inzi Farao waafiniizie mutima wakue, kabili taabatwiliziizie nga mwaalandiile Yawe.
EXO 8:20 Kabili Yawe waamwanine Musa nangue, “Lukeele ukabe kubuuka paakili ukabe kuya kuli Farao pa-akaba kuya ku menda. Ukabe kumwana nangue Yawe walanda evi, ‘Baleke bantu bane baye ban'mpupe.
EXO 8:21 Kine ukaane kubetabizia kuya, nakaba kukukanda na kukutumina bisepe bya balunzi, kabili nakaba kubituma pa babombi bobe, ni pa bantu bobe, balunzi bakaba kwingila mu nghanda yenu. Mu nghanda yonse ya Bamisri mwakaba kwizula bisepe bya balunzi pamo ni pansi ponse mu kyalo kya Misri.
EXO 8:22 Inzi bobo busiku kyalo kya Goseni kikeelemo bantu bane nakaba kukikingilila. Momo mwene temukaba bisepe bya balunzi. Ni pakako, mwakaba kumana nangue ne Yawe ndimukubomba mu keno kyalo.
EXO 8:23 Kabili nakaba kubiika bupusano pakati ka bantu bane ni pakati ka bantu bobe. Kaka kalangi kakaba kukitika lukeele.’”
EXO 8:24 Ni Yawe waakitile mu-aalandiile. Bisepe bikata bya balunzi byaazoomokeele mu nghanda yakua Farao, pamo ni mu nghanda ya babombi bakue. Kyalo kyonse kya Misri kyainoonekele na bisepe bya balunzi.
EXO 8:25 Farao waakuutile Musa ni Haruni. Waabaanine evi, “Ale endo mumwelele Leza wenu ngelelo. Inzi mumwelele sie mu keno kyenka kyalo.”
EXO 8:26 Inzi Musa waamwasukile nangue, “Bila, tetuvinda kukita evio! Pantu kine twamwelela Yawe Leza wetu ngelelo, tulikukita mufuupula ku Bamisri, kine batumona twaelela ngelelo imwenekele yali mufuupula ku Bamisri, balikututoota mabue.
EXO 8:27 Fwefue tupalile kuya lwendo lwa nsiku itatu mu kaseeba, kuya kumwelela Yawe Leza wetu ngelelo nga vi-akitwana.”
EXO 8:28 Farao waalandile nangue, “Ndikumileka muye mu kaseeba kuti muye mumwelele Yawe Leza wenu ngelelo, inzi tekuye kuleepeesie. Muye mun'mpepeleko ni nene wenka.”
EXO 8:29 Musa waamwasukile evi, “Evi vyenka vinsyali nafuma pano, ndikuya kukupepela kuli Yawe evi lukeele bisepe bya balunzi bikabe kufuma pali wewe, ni pa babombi bobe, pamo ni pa bantu bobe. Inzi we Farao nakusoka tekuti utubeepe paakale, kabili tekukaana kwitabizia bantu baye bamwelele Yawe ngelelo.”
EXO 8:30 Kupwako, Musa wafuma mu nghanda mwa Farao, waya kumupaapaata Yawe.
EXO 8:31 Yawe waakitile mwaapaapaatiile Musa. Waafumiizie bisepe bya balunzi pali Farao, ni pa babombi bakue, pamo ni pa bantu bakue. Tepaali ata lunzi umo waasyelepo.
EXO 8:32 Inzi Farao waafiniizie mutima paakale ni kukaana kwitabizia kuti baye.
EXO 9:1 Kabili Yawe waamwanine Musa nangue, “Endo umwane Farao nangue Yawe wa Baebrania walanda evi, ‘Baleke bantu bane baye ban'mpupe.
EXO 9:2 Pantu kine wabakakatila ni kukaana kubaleka baye,
EXO 9:3 nakaba kukukanda na kuleeta kimina kya nfua pa biteekua byobe: Pa farasi ni pa punda, pa nghamia ni pa nghombe, pamo ni pa mikooko ni pa mbuzi.
EXO 9:4 Inzi nakaba kulekenkania paakale pakati ka biteekua bya Baizraeli ni pakati ka biteekua bya Bamisri. Tepali nama wa pa Baizraeli wakaba kufua.’”
EXO 9:5 Yawe waabiikile musita walanda nangue, “Lukeele i musita unakaba kukitilapo keki kintu mu Misri.”
EXO 9:6 Ni kiine kukeele lwakue lukeelekeele Yawe waakitile mu-aalandiile. Nama yonse ya Bamisri yaafwile. Inzi pa nama ya Baizraeli tepaafwile ata umo.
EXO 9:7 Farao i lu-aatumine babombi bakuya kukebelezia palua nama ya Baizraeli. Waizile kubwilua nangue pa nama ya Baizraeli tepaafwile ata umo. Anzia kyaali evio, Farao waali watwaliliile sie kufinia mutima ni kukaana kubaleka Baizraeli baye.
EXO 9:8 Yawe wa-anine Musa ni Haruni nangue, “Buule mito linsue limo mu kikuka, kusyali Musa aulwile mito mu muulu ntanzi yakua Farao.
EXO 9:9 Mito yaakaba tunkolopiilo twaakakumana pa kyalo kyonse kya Misri, ni yo yaakaaluka bipute byaakamena ku muntu ni ku nama mu kyalo kyonse kya Misri.”
EXO 9:10 Ni pakako, baabuulile mito ya mu kikuka kya mulilo ni kuya kwimana pa ntanzi yakua Farao. Musa waulwile mito mu muulu, ni yo ya-alukile bipute byaamenene ni kwaluka bilonda pa bantu ni pa biteekua.
EXO 9:11 Banghanga ba-andilue kwimana pa ntanzi yakua Musa pantu ni bo baamenenue na bipute pamo ni Bamisri bonse.
EXO 9:12 Inzi Yawe waafiniizie mutima wakua Farao, ni ye taamutwiliziizie Musa ni Haruni nga mwa-aninue Musa na Yawe.
EXO 9:13 Kabili Yawe waamwanine Musa nangue, “Buuka paakili lukeelekeele uye wimane pa ntanzi yakua Farao ni kumwana nangue Yawe Leza wa Baebrania walanda evi, ‘Baleke bantu bane baye ban'mpupe.
EXO 9:14 Kine teukitile evio, lono lwendo nakaba kumikanda bonse. Wewe ni babombi bobe pamo ni bantu bobe. Upalile kumana nangue mu byalo byonse temuli unge ali nga nene.
EXO 9:15 Pantu evi nga nsisyakukandile pamo ni bantu bobe na kimina, kabili nga teusyaloviiziwe pa kyalo.
EXO 9:16 Inzi n'milekeleele kuba bakose pa mulandu wakuti musininkizie vili maka ane, ni Liina lyane limanike mwaya kyalo.
EXO 9:17 Ni evi nsimwene kiulimukwitantamwina pa bantu bane pasili kubaleka baye.
EXO 9:18 Ni pakako, lukeele pa ono wenka musita nakaba kunokia nvula ikata ya kibue isinanokepo kutula kulengua kwa kyalo kya Misri mpaka lelo.
EXO 9:19 Kansi lenga wane babombi baye bengizie nama yobe mu nghanda, pamo ni byonse bi-uli nabio mu makaba, pantu kubalua muntu, ni nama ozo wakaba kusangililua ku makaba pasili kusungua mu nghanda, nvula ya kibue yakaba kumunoka ni kumwipaya.’”
EXO 9:20 Mubombi wa pa babombi bakua Farao, ozo waapoozele maano ku keebo kakua Yawe, waingiziizie babombi bakue pamo ni nama yakue mu nghanda.
EXO 9:21 Inzi olia asyaapoozele maano ku keebo kakua Yawe, waalekeleele babombi bakue ni nama yakue ku makaba.
EXO 9:22 Kabili Yawe waamwanine Musa nangue, “Olola kuboko kobe mu muulu evi nvula ya kibue inokele mu kyalo kyonse kya Misri, pa bantu, ni pa biteekua pamo ni pa bilimbua byonse bya mu makaba.”
EXO 9:23 Musa lu-aolwele kabango kakue mu muulu, Yawe waatumine mitukumo ni nvula ya kibue, ni nkuba yaaponeene pansi. Ni pakako, Yawe waanokiizie nvula ya kibue yakilile kubiipa mu kyalo kyonse kya Misri.
EXO 9:24 Ezio nvula ikata ya kibue yaali yalimo mitukumo ni bimpenimpeni, yaali teinanokepo kutula kutendeka kwa ntundu mu kyalo kyonse kya Misri.
EXO 9:25 Ezio nvula ya kibue yaanokele, yainoonene kubalua kantu kaali kali mu makaba a mu kyalo kyonse kya Misri ni bantu pamo ni nama. Ezio nvula yainoonene bilimbua byonse bya mu makaba ni kutyona bimuti byonse.
EXO 9:26 Inga sie mu kyalo kya Goseni kyaali kyalimo Baizraeli, i musyaanokele nvula ya kibue.
EXO 9:27 Pa kyamba, Farao waatumine muntu wa kuya kukuuta Musa ni Haruni. Waabaanine evi, “Lono lwendo naluvia. Yawe ni mulunghami, nene ni bantu bane tuluviizie.
EXO 9:28 Mupaapaate Yawe pantu ezi mitukumo ni nvula ya kibue byakila. Nene ndikumileka muye evi tekuti mutwalilile kwikala mono mu Misri.”
EXO 9:29 Musa waamwasukile nangue, “Musita undikufuma mu muzi, ndikupepa namulendwiliile Yawe maboko ane, mitukumo ni nvula ya kibue bilikupua pakuti winike nangue Yawe i mwine kyalo.
EXO 9:30 Inzi n'manine sie nangue wewe ni babombi bobe kumunakila Yawe Leza tekunabepo.”
EXO 9:31 (Kitani ni nghano ya shairi byainoonenue pantu shairi yaali yasyakosele, ni kitani kyasyatootele buluba.
EXO 9:32 Inzi nghano ni binge tebyainoonenue pantu byaali tebinakule.)
EXO 9:33 Kupwako, Musa wafuma kuli Farao ni kuya kunze ya muzi. Musa lu-aalendwile maboko akue kuli Yawe, mitukumo ni nvula ya kibue byaapwile, nvula teyaatwaliliile kabili kunoka.
EXO 9:34 Farao lu-aamwene nangue mitukumo ni nvula ya kibue byapua, waabalile paakale ni kufinia mutima wakue, wene pamo ni babombi bakue.
EXO 9:35 Ni pakako, Farao waafiniizie mutima ni kukaana kubaleka Baizraeli baye baya nga mwaalandiile Yawe kupitila muli Musa.
EXO 10:1 Yawe i lu-aamwanine Musa nangue, “Endo kuli Farao, pantu nakifinia mutima wakue ni wa babombi bakue pakuti n'mbalangisie tupapo twane pakati kabo,
EXO 10:2 evi ukabe wabalondolwela baana bobe ni benzikulu bobe bintu binaabakitiile Bamisri nafiitilue ni vinaalangisiizie tupapo twane pakati kabo, ni mwe mwaakamana nangue nene ndi Yawe.”
EXO 10:3 Ni pakako, Musa ni Haruni baile kuli Farao ni kumwana nangue, “Yawe Leza wa Baebrania walanda evi, ‘Eba, waakaba wakaanakaana sie pasili kunakila kuli nene? Baleke bantu bane baye ban'mpupe.
EXO 10:4 Kine wakaana kubalekela kuti baye, nakaba kuleeta luzie lukeele mu kyalo kyobe.
EXO 10:5 Lolo luzie lwakaba kukupilila kyalo, ni kyo kyakaba kwanda kumoneka. Lolo luzie lwakaba kulia byonse bisyakiinoonua na nvula ya kibue, lwakaba kulia kubalua kantu kali ku kimuti kilikyamena mu makaba enu.
EXO 10:6 Lolo luzie lwakaba kwizula mu nghanda yobe ni mu nghanda yonse ya babombi bobe pamo ni mu nghanda yonse ya bange Bamisri. Kekio kintu tekinamonekepo ku basiinue ni ku babikolue benu kutula busiku bubabambile kwikala mu keki kyalo mpaka lenu.’” Kupwako, Musa wafuma pali Farao ni kuya.
EXO 10:7 Babombi bakua Farao baamwipuziizie evi, “Emwe, kubako ozu muntu waakaba watwaliliile sie kuya wali muteo kuli fwefue? Baleke Baizraeli baye bamupupe Yawe Leza wabo. Kubako teumwene nangue kyalo kya Misri kilimukwinoonua?”
EXO 10:8 Kupwako, Musa ni Haruni bakuutua kuli Farao ni kubaana nangue, “Kuti mwaya kumupupe Yawe Leza wenu. Inzi nghane, ni bani bakaba kuyako?”
EXO 10:9 Musa wa-asukile nangue, “Twakaba kuya na balumendo betu ni bakote, baana betu balalume ni banakazi, mikooko ni mbuzi yetu, pamo ni nghombe yetu, pantu tupalile kumukitila Yawe nsikunkulu.”
EXO 10:10 Farao waabanine mu kapuni nangue, “Yawe abe pamo nenu kine namilekeela kuya ni lupua lwenu pantu n'mwene mwali na mapange abi.
EXO 10:11 Nakaana! Inzi pantu i mumwalombelanga, kuti mwaya sie bakulunke kumupupa Yawe.” Kupwako, Musa ni Haruni bakumbua pa ntanzi yakua Farao.
EXO 10:12 Kabili Yawe waamwanine Musa nangue, “Ale olwela kuboko kobe pa kyalo kya Misri, evi luzie lwize pa kyalo kya Misri ni kulia bilimbua byonse bya mu makaba byaasiiluepo na nvula ya kibue.”
EXO 10:13 Ni pakako, Musa waolweleele kabango kwakue pa kyalo kya Misri, ni Yawe waabuusiizie mwela wa kufuma ku kabanga, ni o waapuupiile pa kyalo koba konse ni busiku bonse. Musita wa lukeelekeele mwela wa ku kabanga waaleetele luzie.
EXO 10:14 Lolo luzie lwaasakukiile kyalo kyonse kya Misri ni kukupa nkendo yonse pantu lwaali lwakilile kuvula. Keki kimina kya luzie lwa ozu musango tekinamonekepo, kabili tekikikamonekapo.
EXO 10:15 Mu kyalo kyonse kya Misri mwa-alukile nfinzi pantu luzie lwaali lwakupiliile kyalo. Lolo luzie lwaaliile bilimbua byonse pamo ni mazabo onse a ku bimuti byaasyelepo musita waanokele nvula ya kibue. Pa kyalo kyonse kya Misri tepaasyele lyani libisi lya ku kimuti pamo ni bilimbua bya mu makaba.
EXO 10:16 Kupwako, penka papo Farao wakuuta kale Musa ni Haruni ni kubaana nangue, “Nene nakibala kuli Yawe Leza wenu ni kuli mwemue.
EXO 10:17 Ni pakako, ngeleele sie kibalo kyane lono lwendo ni kumupaapaata Yawe Leza wenu afumie keki kimina kya lufu pali nene.”
EXO 10:18 Kupwako, Musa wafuma pali Farao ni kuya kumupaapaata Yawe.
EXO 10:19 Yawe ni ye wa-asukile na kubuusia mwela ukata wa kufuma ku mboosi. Ozo mwela waululwile luzie lonse ni kulutwala ku Lyezi lya Kasi. Tekwaali luzie lwaasyele mu kyalo kya Misri.
EXO 10:20 Inzi Yawe waafiniizie paakale mutima wakua Farao. Ni pakako, waakeene kubalekeela Baizraeli kuti baye.
EXO 10:21 Kabili Yawe waamwanine Musa nangue, “Olwela kuboko kobe mwiulu, evi kwaluke nfinzi itikeeme pa kyalo kya Misri, nfinzi ya kuvinda kupaapaatua ni kunvwika.”
EXO 10:22 Ni pakako, Musa waolweleele kuboko kwakue mwiulu. Ni nfinzi itikeeme yaapwile nsiku itatu yakupiliile kyalo kyonse kya Misri.
EXO 10:23 Nsiku yonse itatu Bamisri ba-andilue kumonana, kabili ba-andilue kuteluluka ponse pa baali. Inzi kisue kyaali kyali sie koko kwaali kwaikeele Baizraeli.
EXO 10:24 Pa mpeleezio Farao waamukuutile Musa ni kumwana nangue, “Endo mumupupe Yawe. Banakazi ni baana benu kuti mwabatwama, inzi tekutwame mikooko, ni mbuzi pamo ni nghombe.”
EXO 10:25 Inzi Musa waalandile evi, “Wewe upalile kutupeela nsambu ya kutwama nama ya bupe bwa ngelelo ya kumuziziizia Yawe Leza wetu.
EXO 10:26 Fwefue tupalile kuya ni biteekua byetu. Tekuli lubondo lulikusyala pano, pantu pa bebi biteekua i patupalile kufumia nama wa kwelela Yawe Leza wetu, kabili tetumanine kine ni nama wapipo utwaya tumwelele patuya kufika kolia.”
EXO 10:27 Inzi Yawe waafiniizie mutima wakua Farao mpaka wakaana kubaleka Baizraeli kuti baye.
EXO 10:28 Farao waamusasiliile Musa wamwana nangue, “Fuma papa! Endo waya. Tekuti nkakumone kabili, pantu busiku buwaakamona lukebu lwane, waakafua!”
EXO 10:29 Musa waamwasukile nangue, “Walanda kisinka. Nene nsikikaba kumona lukebu lobe.”
EXO 11:1 Yawe waamwanine Musa nangue, “Kwasyala kimina kimo kinakaba kumuleetela Farao pamo ni bekazi ba mu Misri, mane pa kyamba akabe kumiitabizia kuya ni kumikumbilila sie lonse kufuma pano.
EXO 11:2 Ale endo ubaane Baizraeli bonse, balalume ni banakazi, baye balombe bifwanizio bya mutofue, ni bya oro ku Bamisri babapalameene nabo.”
EXO 11:3 Yawe waalengiizie Baizraeli kutonua na Bamisri. Musa ni ye waali wakindamiisie pa babombi bakua Farao, ni pa bantu bonse ba mu kyalo kya Misri.
EXO 11:4 Ni pakako, Musa waamwanine Farao nangue, “Yawe walanda evi, ‘Lelo pakati busiku ndikwiza kupita mu kyalo kyonse kya Misri.
EXO 11:5 Musita undikwiza kupita, kubalua libeli ali mu Misri alikufua, kubambila pa libeli obe wa kukupyana pa kitebe kya bukolo, mpaka ku libeli wakua mwanakazi muzia aliwapela nghano. Mabeli onse a biteekua ni o alikufua.
EXO 11:6 Mu kyalo kyonse kya Misri mwakaba kuya mwali malilo akata asinaunvwikemo ni asikikonvwikamo.
EXO 11:7 Inzi ku Baizraeli tekukaba kunvwika lizui lya kabua ka kuboza Baizraeli, ni ka kuboza nama. Papo i pa mwakaba kwinika Yawe vi-abiikile bupusano pakati ka Bamisri ni Baizraeli.
EXO 11:8 Babombi bobe bonse bakaba kwiza kun'mpaapaata kuti nfume ni bantu bane, ni ne nakaba kufuma.’” Kupwako, Musa wafuma pali Farao ni kuya wakilile kufiitua.
EXO 11:9 Yawe waamwanine Musa nangue, “Farao wakaba kukaana. Ni pakako, tupapo twane twakaba kutwalilila kukitika mu kyalo kya Misri.”
EXO 11:10 Musa ni Haruni baakitile toto tupapo tonse ntanzi yakua Farao. Inzi Yawe waafiniizie mutima wakua Farao. Farao ni ye waakeene kwitabizia Baizraeli kufuma mu kyalo kyakue.
EXO 12:1 Baizraeli lubaali bakili mu kyalo kya Misri, Yawe waamwanine Musa ni Haruni nangue,
EXO 12:2 “Ono mwezi waya wali mwezi wa mambo pa myezi kuli mwemue, i kulanda nangue mwezi wa mambo wa mwaka kuli mwemue.
EXO 12:3 Ane libumba lyonse lya Baizraeli nangue pa busiku bwa lyanondo bwa ono mwezi, kubalua lupua lukabe kusaakula musoka umo wa mukooko ao wa mbuzi kukonkana ni bwingi bwa bantu ba mu lupua lwakue.
EXO 12:4 Kine bantu ba mu lolo lupua baisanga bakeepele, bapalile kwilunda na lunge lupua lwa bantu bakeepele babapalameene nabo, kusyali kukasana nama ubalikuvinda kulia ni kupua.
EXO 12:5 Ozo musoka wa mukooko tekuti aye walemeene. Apalile aye wali mpanga wa mwaka umo. Mukabe kubuula pa mikooko ao pa mbuzi.
EXO 12:6 Ozo nama mukabe kumusunga mpaka busiku bwa lyanondo ni buna ya ozo wenka mwezi. Kubalua lupua lwa mu Baizraeli lwakaba kusinza nama wabo musita wa kyungulo.
EXO 12:7 Bakabuule mulopa ni ku-usuba ku miilimiili ibili ya mumbali mulyango, ni ku bulato bwa pa muulu ku ezio nghanda ya kuliilamo munani wa ozo nama.
EXO 12:8 Mu bobo bwenka busiku musita wa busiku, bakabe kwapika bipusa bya ozo nama ni kulia busikunke, bakabe kuliila na kolo pamo ni mukate usiliko ntutumusi.
EXO 12:9 Tekuti mukabe kulia minofu ibisi ao ifulumiiziwe, mupalile sie kwapika byonse, mutue, ni myendo pamo ni bya munda.
EXO 12:10 Tekuti mukabe kusiapo bya kulia lukeele. Inzi kine bikabe kusyalapo mpaka lukeelekeele, mukabe kubizizia.
EXO 12:11 Mafunde a kukonka pa kulia bebio bilio ni aza: Mukabe kuya mwaisapile, mwaikakile misipi mu bitungu byenu, mwavwele ni nkwabilo yenu ku makasa, mwakwete ni tubango mu minue yenu. Kusyali kulia lubilolubilo. Ezi i yaakaba Pasaka imwaakaba mwankitila nsikunkulu.
EXO 12:12 “Bobo busiku musita wa busiku, nakaba kupita mu kyalo kyonse kya Misri ni kwipaya mabeli onse alalume a bantu ni a nama. Kabili nakaba kukanda baleza bonse ba mu Misri, pantu nene ndi Yawe.
EXO 12:13 Mulopa i wakaba kuya wali kalangi kuli mwemue ka kulanga nghanda imwakaba kuya mwalimo. Musita unakaba kumona mulopa, nakaba kupita peulu pasili kumiinoona lunakaba kuya nakanda kyalo kya Misri.
EXO 12:14 Bobu busiku bupalile bukabe bwalangulukua na nvyalo ya ku ntanzi, kabili bukabe bwali busiku bwa nsikunkulu yakua Yawe kubalua mwaka.” Leli i lifunde lya kubalua nsita.
EXO 12:15 Yawe waalandile nangue, “Mu nsiku kilooba mwemue mwakaba kuya mwalia mikate isiliko ntutumusi. Busiku bwa mambo bwa mu ezio nsiku kilooba ya nsikunkulu, mukabe kufumia ntutumusi yonse ili mu nghanda yenu. Onse wakaba kulia mukate uliko ntutumusi mu ezio nsiku kilooba ya nsikunkulu, wakaba kufumiiwa mu libumba lya Baizraeli.
EXO 12:16 Pa busiku bwa mambo bwa nsikunkulu, kabili ni pa busiku bwa kilooba, bantu bonse bapalile kusunga busiku bwa kulonghana kuzuuke. Mu ezio nsiku tekukaba mwilo waakaba wabombua, inga sie mwilo wa kuteania bilio bya kulia kubalua muntu.
EXO 12:17 Mukasunge bobo busiku bwa nsikunkulu ya mikate isiliko ntutumusi, evi mukabe mwalanguluka busiku bunaamifumiizie mwe mabumba a Baizraeli mu kyalo kya Misri. Ezio nsikunkulu ipalile kusungua na nvyalo ya ku ntanzi kuba lifunde lya muyayaya.
EXO 12:18 Pa busiku bwa lyanondo ni ina ya mwezi wa mambo musita wa kyungulo, i pamwaakaba mwatendekela kulia mikate isiliko ntutumusi mpaka kyungulo kya nsiku 21 ya ozo wenka mwezi wa mambo.
EXO 12:19 Mu ezio nsiku kilooba, tekuti kukabe muntu waakaba ni ntutumusi mu nghanda yakue. Ni pakako, namyana nangue kubalua muntu waakalia mukate ututumukile, anzia akaba wali mweni ao avyaliilue mu kyalo, waakafumiiwa mu libumba lya Baizraeli.
EXO 12:20 Mu ezio nsiku kilooba tekuti mukabe mwaliamo kintu kiliko ntutumusi. Konse ku mwaakaba mwaikeele mukabe mwalia sie mukate usiliko ntutumusi.”
EXO 12:21 Musa i lu-aakuutile masiiko onse a Baizraeli ni kubaana nangue, “Endo musaakule musoka wa mukooko ao wa mbuzi wa pa bisepe byenu mu kubalua lupua, evi musinze ni kukita nsikunkulu ya Pasaka kubalua muntu ni lupua lwakue.
EXO 12:22 Muye mubuule misambo ya hisopo, mutubie mu mulopa uli mu kibakuli ni kusuba ku bulato bwa pa muulu, ni ku miilimiili ibili ya mu milyango ya nghanda yenu. Busiku bonse mpaka lukeelekeele tekuti kuye kwali muntu wakufuma mu nghanda,
EXO 12:23 pantu Yawe alikupita mu kyalo kyonse walimukwipaya Bamisri. Inzi musita u-alikumona mulopa ku bulato bwa pa muulu ni ku miilimiili, alikupita peulu, kabili tavinda kwitabizia malaika ngipaani kwingila mu nghanda yenu ni kumiipaya.
EXO 12:24 Mwemue pamo ni baana benu bonse, mupalile kulanguluka ni kunakila leli lifunde muyayaya.
EXO 12:25 Musita umwaakengila mu kekio kyalo kimwaakapeelua na Yawe nga vi-aamilaile, mupalile mukabe mwatwaliliile kukita musango wa ezi mbeela.
EXO 12:26 Kine baana benu bakamiipuzie ndubulwilo ya keki kimulimukukita,
EXO 12:27 mukaba-asuke evi, ‘Ezi i ngelelo ya Pasaka yakua Yawe lu-aapitile peulu nghanda ya Baizraeli mu kyalo kya Misri ni kutupususia fwefue lu-aali walimukwipaya Bamisri.’” Musa lu-aapwile kulanda, Baizraeli baakontamikile mitue ni kumupupa Yawe.
EXO 12:28 Kupwako, Baizraeli bakita nga muba-aniinue na Musa ni Haruni kukonkana ni mulao wakua Yawe.
EXO 12:29 Lubwaali bwasyali pakati busiku Yawe waipaile mabeli onse alalume a mu kyalo kya Misri, kubambila ku mwana libeli mwalalume wakua Farao waali wapalile kumupyana se pa kitebe kyakue kya bukolo, mpaka ku mwana mwalalume libeli wakua muntu waali wakakilue mu buloko, pamo ni ku mabeli onse a biteekua.
EXO 12:30 Farao ni babombi bakue pamo ni Bamisri baabuukile musita wa busiku, ni mizowa ikata yaunvwikile mwaya kyalo kyonse kya Misri pantu tekwaali nghanda yaasyele pasili kufwamo muntu.
EXO 12:31 Farao i lu-aakuutile Musa ni Haruni busikunke ni kubaana nangue, “Mwemue pamo ni Baizraeli fume mu bantu bane muye mumupupe Yawe nga mumwakilandila.
EXO 12:32 Twame bisepe byenu bya mikooko ni bya nghombe muye nga vimwakilanda. Ni nene muye mun'mpepeleko Leza an'mpaale.”
EXO 12:33 Bamisri baapimpiliziizie Baizraeli balenge bafume mu kyalo ni kubaana nangue, “Kine temufumine, fwe Bamisri tulikufua bonse.”
EXO 12:34 Baizraeli baatweme bunga bwa mikate bwaali bwakandiilue mu bipe lubwaali tebunaabiikueko ntutumusi. Baakakile mu ngubo yabo ni kupinga pa nkombe.
EXO 12:35 Baizraeli baakitile nga mwaalandiile Musa. Baalombele bifwanizio bya mutofue ni bya oro pamo ni ngubo ku Bamisri.
EXO 12:36 Yawe waalengiizie Baizraeli kutonua na Bamisri. Baizraeli baapeelue kubalua kantu kabaalombele. Evio i vibaatweme bunonsi bwa Bamisri.
EXO 12:37 Baizraeli baafumine paakili ku Ramese ni kuya lwa pansi mpaka ku Sukoti. Mpendua yabo yaali mupepi bantu 600,000 pasili kupendako banakazi ni baana.
EXO 12:38 Kwaali ni Bazima baisanziiziepo ni kuya nabo, pamo ni bisepe bya mbuzi, ni bya mikooko ni nghombe.
EXO 12:39 Kukonkana ni vibaafumine lubilo lubilo mu Misri, ba-andilue kuteania mpao ya mu nzila. Ni pakako, ba-apikile mikate isiliko ntutumusi ya bunga bwali bwakandiilue bubaafumine nabo mu Misri.
EXO 12:40 Baizraeli baikeele mu kyalo kya Misri myaka 430.
EXO 12:41 Ku mpeleezio ya mwaka wa 430, mu bobo bwenka busiku, mabumba a mikowa yonse ya bantu bakua Yawe aafumine mu kyalo kya Misri.
EXO 12:42 Bobo busiku musita wa busiku Yawe waapungile pa mulandu wa kufumia Baizraeli mu kyalo kya Misri. Ni pakako, bobo busiku bwapungile Yawe bupalile kuya bwalangulukua kubalua mwaka na nvyalo ya Baizraeli ni kuya bapunga mu kumukindika Yawe.
EXO 12:43 Yawe waamwanine Musa ni Haruni nangue, “Mafunde palua Pasaka ni aza: Kubalua mweni tapalile kuliako bilio bya Pasaka.
EXO 12:44 Kubalua muzia asitilue na nfolanga kine wateetua yando, apalile kuliako bilio bya Pasaka.
EXO 12:45 Inzi mweni ni kubalua mubombi aliwasaziiwa tapalile kuliako bilio bya Pasaka.
EXO 12:46 Kubalua mwana mukooko wa Pasaka apalile luliilua sie mu nghanda imo. Temupalile kutwama minofu kufuma mu ezio nghanda. Kabili temupalile kutyona kikuza kya ku ozo nama.
EXO 12:47 Libumba lyonse lya Baizraeli lipalile kuya lyakita ezio nsikunkulu ya Pasaka.
EXO 12:48 Kubalua mweni ali pakati kenu kine watona kwampana nenu ku nsikunkulu ya Pasaka mu kumukindika Yawe, balalume bonse ba mu lupua lwakue bapalile kuteetuanke yando, mane bapalame ku ezio nsikunkulu. Ni ozo muntu alikupendua kuba nga muntu avyaliilue mu kekio kyalo. Ni ye alikuba ni nsambu ya kuliako. Inzi olia asiteetelue yando tapalile kuliako bilio bya Pasaka.
EXO 12:49 Ozo wenka muzilo i waakaba wali ku Muizraeli avyaliilue mu kyalo ni ku mweni ekeele pakati kenu.”
EXO 12:50 Baizraeli bonse baakitile nga mwa-aniinue Musa ni Haruni na Yawe.
EXO 12:51 Ni mu bobo bwenka busiku, Yawe waafumiizie Baizraeli mabumba mabumba mu kyalo kya Misri.
EXO 13:1 Yawe waamwanine Musa nangue,
EXO 13:2 “Ale nzuukiizie kubalua mwana mwalalume wa mambo. Libeli mwalalume wa Baizraeli, pamo ni wa nama, waakaba wane.”
EXO 13:3 Musa wa-anine bantu nangue, “Mukabe mwalanguluka lyonse bono busiku bumwafumiiwa mu buzia bumwaali mwateekelue mu Misri, pantu Yawe wamifumiamo na maka a kuboko kwakue. Mu bobu busiku tekuti mukabe mwaliamo mukate uliko ntutumusi.
EXO 13:4 Mwemue mwafuma lelo mu keno kyalo kya Misri kuntendeko ya mwezi wa Abibu.
EXO 13:5 Musita umwaakafikiiwa na Yawe mu kyalo kya Bakanaani, ni kya Bahiti, ni kya Ba-amori, ni kya Bahivi, pamo ni kya Bayebusi, kyalo kyaalailue basinue nangue waakamipeela, kyalo kiizuzimo mabeele ni kapelo, mupalile mukabe mwakita ezi nsikunkulu kubalua mwaka mu ono wenka mwezi wa mambo.
EXO 13:6 Mu nsiku kilooba mwaakaba mwalia mikate isiliko ntutumusi, ni mu busiku bwa kilooba mwaakaba mwakitamo nsikunkulu ya kumukindika Yawe.
EXO 13:7 Mu ezio nsiku kilooba mwaakaba mwalia mikate isiliko ntutumusi, pakati kenu tekuti pakabe kintu kiliko ntutumusi, ni mu mipaka ya kyalo kyenu tekuti mukamoneke ntutumusi.
EXO 13:8 Pa busiku bwa kilooba mupalile kulondolwela baana benu nangue, ‘Tulimukukita nsikunkulu pa mulandu wa belia byaatukitiile Yawe lu-aatufumiizie mu kyalo kya Misri.’
EXO 13:9 Ezio nsikunkulu ya kubalua mwaka ikabe kalangi kuli mwemue ka kulangulukilako, nga kamanino kali ku kuboko kwenu ao pa mpala yenu, ikabe yamilangulusia kutwalilila kusambilila mizilo yakua Yawe, pantu Yawe waamifumiizie mu Misri na maka a kuboko kwakue.
EXO 13:10 Ni pakako, sunge leli lifunde lya ezi nsikunkulu pa musita utantikilue kubalua mwaka.
EXO 13:11 “Yawe pa-akaba kumifikia mu kyalo kya Bakanaani ni kumipeela kekio kyalo nga vi-aalapiile basiinue ni mwe benka,
EXO 13:12 mupalile kumupeela Yawe kubalua mwana mwalalume libeli, ni kubalua nama ndume libeli wa pa biteekua byenu pantu byonse ni bunonsi bwakue.
EXO 13:13 Kubalua punda ndume libeli mwaakamulubula na musoka wa mukooko, inzi kine temukamulubula, mwaakatyona mukosi wakue. Ni kubalua libeli mwalalume wa muntu mu baana benu mwaakamulubula.
EXO 13:14 Mu nsiku ilimukwiza baana benu pa bakaba kumiipuzia nangue kitulitwakitila evi ni kiki? Mukabaasuke evi, ‘Tulimukita evi pantu Yawe waatufumiizie mu Misri, mu nghanda ya buzia, na maka akue.
EXO 13:15 Farao lu-aakeene kutwitabizia kuya, Yawe waipaile mabeli onse alalume a bantu ni a nama mu kyalo kya Misri. Ni pakako, i kitulitwamwelela Yawe kubalua libeli ndume wa nama, inzi mabeli alalume a mu baana betu tuli twa-alubula.
EXO 13:16 Leli lifunde mwaakaba mwalilanguluka nga kamanino kali ku kuboko kwenu ao pa mpala yenu. Byaakaba byatulangulusia Yawe vi-aatufumiizie mu Misri na buvinde bwa kuboko kwakue.’”
EXO 13:17 Farao lu-aitabiizie bantu kuya, Leza taabalombwele kuti baye bapite mu kyalo kya Bafilistini anzia kine i yaali nzila iipipiisie. Leza waalandile nangue, “Kine baba bantu basakukilua, kuti ba-alulula malanga abo ni kubwelela ku Misri.”
EXO 13:18 Inzi Leza waazyungulusiizie bantu mu nzila ipitile ku kaseeba yalungi ku Lyezi lya Kasi. Baizraeli i kibaafumiine ku Misri bali mabumba mabumba nga balukale balimukuya ku bului.
EXO 13:19 Musa waile watweme bikuza byakua Yusufu, nga mwa-aniinue Baizraeli na Yusufu kuti balape ni kukita. Yusufu waalandile evi, “Leza pa-akaba kumipususia, mukatwame ni bikuza byane pa kufuma pa eno nkendo.”
EXO 13:20 Baizraeli lubaafumine ku Sukoti, baakuulile mitanda ku Etamu mumbali kaseeba.
EXO 13:21 Musita wa koba Yawe waali waya wabatangiliile mu lilezi lyaali nga lipumpu pakuti abalangisie nzila, ni musita wa busiku waali waya wabatangiliile mu mulilo waali nga lipumpu pakuti abasanikile, evi baye baendele busiku ni koba.
EXO 13:22 Ni Yawe taafumiiziepo lipumpu lya lilezi musita wa koba, ni lipumpu lya mulilo musita wa busiku pa nkendo yakue ntanzi ya bantu.
EXO 14:1 Yawe i lu-aamwanine Musa nangue,
EXO 14:2 “Baane Baizraeli babwele baye bakuule mitanda ku ntanzi ya Pi-Hahiroti, pa bukata bwa Migidoli ni lyezi, pepi ni Bali-Sefoni mumbali lyezi.
EXO 14:3 Farao wakaba kulangakana nangue Baizraeli bakilinghaniwa na kaseeba, ni kwandua kufuma mu kyalo.
EXO 14:4 Nene nakaba kufinia paakale mutima wakua Farao, ni ye wakaba kumikonka. Inzi nakaba kuipeela mukinzi na kuuma Farao ni libumba lyakue lyonse. Ni Bamisri bonse baakeenika nangue nene ndi Yawe.” Ni pakako, Baizraeli baakuulile mitanda ni kutuuzia nga muba-aniinue.
EXO 14:5 Farao lu-aabwililue nangue Baizraeli babutuka, wene pamo ni babombi bakue ba-alulwile malanga abo bai-ipuzia nangue, “Ati emue! Twakitapoki pa kulekelela Baizraeli baye tekuti batubombele?”
EXO 14:6 Ni pakako, Farao waateaniiziiziwe tyakala yakue ya bului ni kuya pamo ni balukale bakue.
EXO 14:7 Waatweme matyakala 600 awamiisie mu Misri. Kubalua tyakala mwaali mwali mukulu ni balukale besapiile.
EXO 14:8 Yawe waafiniizie mutima wakua Farao likolo wa ku Misri. Ni pakako Farao waile wabakonkele Baizraeli baali baya bapamine.
EXO 14:9 Bamisri ni bafarasi babo bonse pamo ni matyakala onse akua Farao, ni baseli ba pa farasi pamo ni balukale, baile babakonkele pa kyamba mpaka baya kubasanga ku mitanda lya kumbali lyezi ku ntanzi ya Pi-Hahiroti pepi ni Bali-Sefoni.
EXO 14:10 Baizraeli lubaikebukile ni kumona Farao walimukwiza wabakonkele pamo ni balukale bakue, baunvwile mwezo ukata. Kupwako, batendeka kumulilila Yawe.
EXO 14:11 Baamwanine Musa nangue, “Ewe, ni pa mulandu wa kubulua bilibu mu Misri i kiwakitufumiiziamo evi twize tufwile mu kaseeba? Ni kiki kyakikulengia utufumie mu Misri?
EXO 14:12 Lolia lutwakiba twakili mu Misri tetwakikwana nangue tuleke fwe bene tubombele Bamisri? Pantu kuti kyawama kubombela Bamisri kukila kufwila mu kaseeba.”
EXO 14:13 Inzi Musa waabaanine nangue, “Tekutiine! Sipe sie, ni mwe mulikumona Yawe vi-alikumipususia bono bukiile, pantu baba Bamisri bamumwene lelo temukikabamona kabili.
EXO 14:14 Teekamane sie Yawe mwine alikumilwila.”
EXO 14:15 Yawe i lu-aamwanine Musa nangue, “Ulimukundililaki? Baane Baizraeli baye baya.
EXO 14:16 Ni we lendula kabango kobe, uolwele kuboko kobe pa lyezi ni kulikasania, evi Baizraeli bapite mu lyezi pa musili uume.
EXO 14:17 Nene ndikufinia mitima ya Bamisri, ni bo balikwiza bamikonkele. Nene ndikuipeela mukinzi na kuuma Farao ni libumba lyakue lyonse, ni matyakala akue pamo ni baseli bakue ba pa farasi.
EXO 14:18 Bamisri bonse balikwinika nangue nene ndi Yawe musita undikuipeela mukinzi na kuuma Farao ni matyakala akue pamo ni baseli bakue ba pa farasi.”
EXO 14:19 Ni pakako, malaika wakua Leza waali watangiliile libumba lya Baizraeli, waabweleele ku kyamba kyabo, ni lilezi lyaali lyali nga lipumpu lyaafumine ku ntanzi ni kuya kwimana ku kyamba kyabo.
EXO 14:20 Lilezi lyaile kwimana pa bukata bwa libumba lya Bamisri ni Baizraeli. Lelio lilezi lyaaleetele nfinzi ku lubali lwa Bamisri, ni kuleeta kisue ku lubali lwa Baizraeli. Ni pakako, tekwaali libumba lyaapalamiine liinakue.
EXO 14:21 Kabili Musa waolwele kuboko kwakue pa lyezi, ni Yawe waatintile lyezi na mwela wa maka kufuma ku kabanga busiku bonse. Menda aakasanikile, ni palia paali menda paumine.
EXO 14:22 Baizraeli baile mu lyezi pa musili uume. Menda aimeene nga kibumba kuso ni kulio pa mulandu wabo.
EXO 14:23 Bamisri baakonkelemo, baingila mu lyezi ni farasi yonse yakua Farao, ni matyakala akue onse, pamo ni baseli bakue ba pa farasi.
EXO 14:24 Inzi lubwaali bwasyakia, Yawe mu lipumpu lya mulilo ni lya lilezi, waakentele pansi pa libumba lya Bamisri ni kubavulunghania.
EXO 14:25 Waafumiizie mipeto ku matyakala abo mpaka a-andua ni kwenda. Ni Bamisri baalandile evi, “Emwe, tumubutuke Izraeli, pantu Yawe alimukubalwila.”
EXO 14:26 Baizraeli bonse lubaafikile ku bunge bwala, Yawe waamwanine Musa nangue, “Ale olwela kuboko kobe paakale pa lyezi, evi menda abwele ni kubakupa Bamisri pamo ni matyakala abo, ni baseli ba farasi yabo.”
EXO 14:27 Ni kiine musita wa lukeelekeele paakili, Musa waolweleele kuboko kwakue pa lyezi, lyezi lyaabwelele na maka. Bamisri baeziizie kubutuka, inzi Yawe waabakupiliile mu lyezi.
EXO 14:28 Menda i lu-abwelele ni kukupilila matyakala a bului, ni baseli ba pa farasi pamo ni libumba lyonse lyakua Farao lyaali lyakonkele Baizraeli mu lyezi. Pakati kabo tepaali muntu waapusukile.
EXO 14:29 Inzi Baizraeli bene baile baenda mu lyezi pa musili uume, ni azo menda aali ali kibumba ku kuboko kwabo kwa kulio ni kwa kuso.
EXO 14:30 Evi Yawe i vi-aapususiizie Baizraeli bobo busiku mu maboko a Bamisri. Baizraeli baamwene Bamisri bafwile mumbali lyezi.
EXO 14:31 Baizraeli lubaamwene maka akata akua Yawe pa Bamisri, baamukindikile Yawe. Baamuketekeele Yawe pamo ni Musa mubombi wakue.
EXO 15:1 Musa ni Baizraeli i lubaamwimbiile Yawe lwimbo balanda nangue, “Ndikumwimbila Yawe pa mulandu wa bwanzio bwakue bwa bulumba, farasi ni museli bakipoozua mu lyezi.
EXO 15:2 Yawe i maka ane ni lwimbo lwane, wene i bwanzio bwane. Wene i Leza wane, ni ne ndikumutasia, wene i Leza wakua tawe, ni ne ndikumulumba.
EXO 15:3 Yawe i kalwisia wa bului. Yawe i Liina lyakue.
EXO 15:4 “Wene wakipooza matyakala akua Farao ni libumba lyakue mu lyezi. Babiloolo bakue baswapiilue bakitibiziiwa mu Lyezi lya Kasi.
EXO 15:5 Buziba bwakibakupilila. Bakitibiziiwa mu buziba nga libue.
EXO 15:6 “Kuboko kobe kwa kulio we Yawe, ni kwa buvinde ni maka. Kuboko kobe kwa kulio we Yawe, kulikwasansa balwani.
EXO 15:7 Ku bwingi bwa maka obe, balwani bakiponiiziwa pansi. Kikonko kyobe kyakibafita nga makapa omine.
EXO 15:8 Na mupuze wa mu myona yobe, menda akiseziiwa. Mabimbi akiimana nga kibumba. Buziba bwakikwatana mu mutima wa lyezi.
EXO 15:9 Mulwani waitantamwine walanda, ‘Ndikubakonka ni kubakwata. Ndikubapoka bunonsi bwabo, ndikububombia muntoneene. Ndikwisumba kipanga kyane, kuboko kwane kulikubalovia.’
EXO 15:10 Inzi wewe wakipuza na mupuze obe, ni lyezi lyakibakupilila. Bakitibila nga libue mu menda engi.
EXO 15:11 “We Yawe, pa baleza bonse nani ali nga wewe? Nani ali nga wewe mu bulumba ni buzuuke? Nani aliwatiinia mu kutasiiwa kwakue lu-aliwakita tupapo?
EXO 15:12 Wewe wakyolola kuboko kobe kwa kulio, ni kyalo kyakiteleka balwani betu.
EXO 15:13 Wewe na ntono yobe isili na mpeleezio, wakilombola bantu bawakilubula, wewe na maka obe, wakibalombola kuya mu kifuka kyobe kizuuke.
EXO 15:14 Ntundu yakyunvua ni kitutuma. Bafilistini bakilwala na mwezo.
EXO 15:15 Bakulu ba ku Edomu bakitooboka. Bakindami ba ku Moabu bakikwaka. Bakanaani bonse bakiswapulukua.
EXO 15:16 Lubebue ni mwezo byakiba pali bene. Na maka a kuboko kobe, bakiikala tondolo nga libue. Mpaka musita wakyabuka bantu bobe we Yawe, bantu bobe bawaalubwile mu buzia.
EXO 15:17 Wakaba kubengizia ni kubalimba mu lupili lwa bupyani bobe, pa nkendo i waiteaniiziizie we Yawe kuba pa kwikala pobe, pa kifuka kizuuke kiwaimikiile we mwine na kuboko kobe.
EXO 15:18 We Yawe, kuteeka kobe ni kwa muyayaya ni muyayaya.”
EXO 15:19 Farasi yakua Farao likolo wa ku Misri ni matyakala akue, ni baseli ba pa farasi lubaingiile mu lyezi pa musili uume, Yawe waabweziizie menda a lyezi pali bene. Inzi Baizraeli baendele pa musili uume mu lyezi.
EXO 15:20 Ni pakako, kabika Miriamu, nkaziize kwa Haruni, waabuulile nghoma yakue, ni banakazi bonse baile bamukonkele balimukomba nghoma koku balimukukinda.
EXO 15:21 Miriamu waabalombwele mukwimba nangue, “Mwimbile Yawe pantu wa-anzia na bulumba. Farasi ni amuselelepo bapoozua mu lyezi.”
EXO 15:22 Musa i lu-aalombwele Baizraeli kufuma ku Lyezi lya Kasi mpaka kuya kulapukila mu kaseeba ka Shuri. Baendele lwendo lwa nsiku itatu mu kaseeba pasili kumona menda.
EXO 15:23 Lubaafikile pa kalambe ka Mara, ba-andilue kumina menda a pa ezio nkendo pantu aali alulile. Ni pakako, pa ezio nkendo i kipainikiilue Mara.
EXO 15:24 Bantu baamwitendokeele Musa balimukumwipuzia nangue, “Tulikuminaki?”
EXO 15:25 Musa i lu-aamuliliile Yawe kuti abakwasie, ni Yawe waamulangisiizie kaputu ka kamuti. Musa waakapoozele pa menda, ni menda awama. Papo pa Mara, Yawe i pa-aabapeele Baizraeli mizilo ni mafunde pamo ni kubeezia amone kine kuti bamuketekela.
EXO 15:26 Waalandile evi, “Kine mulikunvua lizui lyakua Yawe Leza wenu mwapoozeleko ni maano, ni kukita biweme pa menso akue, ni kufikilizia milao yakue, pamo ni kusunga mafunde akue onse, nene nsikamikanda na kumilwalika malwele onse analwalikile Bamisri pantu nene ndi Yawe aliwamikosia.”
EXO 15:27 Pa kyamba kya kufuma pa Mara, Baizraeli baile kufika ku Elimu, koko kwaali tusulo lyanondo ni tubili twa menda ni bimuti 70 bya bikoma. Koko i kubaakuulile mitanda yabo pepi ni menda.
EXO 16:1 Pa busiku bwa lyanondo ni isaano bwa mwezi wa bubili pa kyamba kya kufuma ku Misri, libumba lyonse lya Baizraeli lyaafumine ku Elimu ni kuya kufika ku kaseeba ka Sini kali pa bukata bwa Elimu ni Sinai.
EXO 16:2 Lubaafikile mu kaseeba, baabambile kumwitendookela Musa ni Haruni balanda nangue,
EXO 16:3 “Kansi Yawe nga waatwipaile sie mu kyalo kya Misri, koko kutwaali twaikeele twazyungulukiile mipika iizuzimo minofu ya nama, ni kulia bilio byonse bitwatonene kulia. Inzi evi mwakituleeta kono kufuma Misri kuti mwize mutwipaye na nzala mono mu kaseeba.”
EXO 16:4 Yawe i lu-aamwanine Musa nangue, “Unvua, nakaba kuya nabanokiizia bilio kufuma mwiulu, evi kubalua busiku bantu bakabe kuya bafuma ni kutoolapo bilio bya kulia bobo busiku, pakuti nkabe kubeezia ni kumona kine kuti bakonka mizilo yane ao abe.
EXO 16:5 Inzi busiku bwa mutanda baakaba bateania bilio bya kulia nsiku ibili.”
EXO 16:6 Ni pakako, Musa ni Haruni baabaanine Baizraeli nangue, “Lelo kyungulo mulikwinika nangue Yawe i wakimifumia mu kyalo kya Misri.
EXO 16:7 Ni lukeelekeele mwakaba kumona bulumba bwakua Yawe, pantu wakyunvua vimwakiba mwamwitendookela. Ale fwefue tuli bani pakuti mutwitendookele?”
EXO 16:8 Kabili Musa waatwaliliile kulanda nangue, “Mwakaba kumona bulumba bwakua Yawe pa-akaba kumipeela munani wa kulia musita wa kyungulo, ni bilio bya kulia ni kwikuta musita wa lukeelekeele, pantu Yawe waunvua kwitendooka kwenu kumulimukumwitendookela. Ale fwefue tuli bani pakuti mutwitendookele? Mwemue mulimukwitendookela Yawe.”
EXO 16:9 Kabili Musa waamwanine Haruni nangue, “Ana Baizraeli bonse baye kuli Yawe pantu wakyunvua kwitendooka kwabo.”
EXO 16:10 Haruni lu-aali walanda na Baizraeli, penka papo bakenta kale ku kaseeba ni kumona bulumba bwakua Yawe bwalimuku-unguzima mu lilezi.
EXO 16:11 Yawe waamwanine Musa nangue,
EXO 16:12 “Nakyunvua kwitendooka kwa Baizraeli. Ale baane nangue kubalua kyungulo mwakaba kuya mwalia munani wa nama, ni kubalua lukeelekeele mwakaba kuya mwalia mikate. I pamwakaba kwinika nangue nene ndi Yawe Leza wenu.”
EXO 16:13 Musita wa kyungulo nkwale ingi yaizile kwikala monse mwaali mitanda. Ni lukeele lwakue lukeelekeele lume lwakumeene monse mwaali mitanda.
EXO 16:14 Lume palwaakunkikile, mu kaseeba mwaamwenekele tuntu twaali twamaatikile twaswetele nga kibue.
EXO 16:15 Baizraeli lubaamwene toto tuntu, baapapile ni kwipuzyania nangue, “Ale totu tuntu ni tuki?” Pantu tebaali batumanine. Musa waabaasukile evi, “Bebi i bilio bimwapeelua na Yawe kuti mulie.
EXO 16:16 Yawe waafumiizie mwano walanda nangue, ‘Kubalua lupua lutoole kukonkana ni vilulikuvinda kulia. Kubalua muntu ali mu mutanda apeelue tupe tubili.’”
EXO 16:17 Ni pakako, Baizraeli baakitile muba-aniinue. Bange baatolele bingi, ni bange baatoolele sie biniini.
EXO 16:18 Inzi lubaabiikile mu kalingo, kubalua muntu byaali byamukumeene, olia waatoolele bingi taali na bivuliisie, ni olia waatoolele biniini taali na bikeepeesie. Kubalua lupua lwaatoolele bya kuti bekute.
EXO 16:19 Ni pakako, Musa waabaanine nangue, “Tekusiepo bya kufika lukeele lukeelekeele.”
EXO 16:20 Anzia kyaali evio, tebaamunvwile Musa, bange pakati kabo baasiilepo mpaka lukeelekeele, inzi ni byo byaabolele, bya-alukamo myolo ni kutendeka kununka. Ni pakako, Musa waabafiitiilue.
EXO 16:21 Lyonse lukeelekeele kubalua muntu waali watoola bya kulia bya kuti ekute, ni koba lukaali kasaama, byaali byasunguluka.
EXO 16:22 Busiku bwa mutanda baatolele libili, kubalua muntu tupe tubili. Ni bakulu bonse ba libumba baizile kumubwila Musa.
EXO 16:23 Musa waabaanine nangue, “Yawe walanda evi, ‘Lukeele i busiku bwa kutuuzia, Sabata izuuke yakua Yawe. Kansi apike bimulikuvinda kwapika, ni kufulumia bimulikuvinda kufulumia. Bilikusyalapo mubisunge mpaka lukeelekeele.’”
EXO 16:24 Ni bo baasungile mpaka lukeelekeele nga muba-aniinue na Musa. Bebio bilio tebyaanunkile, kabili temwa-alukile myolo.
EXO 16:25 Musa waabaanine nangue, “Evi lelo vibuli busiku bwa Sabata, busiku buzuuke bwa kutuuzia bwakua Yawe, bebi bilio bilie lelo lyenka pantu lelo temutoola bilio.
EXO 16:26 Mwakaba kuya mwatoola bya kulia mu nsiku mutanda, inzi busiku bwa kilooba, busiku bwa Sabata tebikaba byamonekamo.”
EXO 16:27 Lubwaafikile busiku bwa kilooba, bantu bamo baile bakeba kutoola, inzi tebaabimwene.
EXO 16:28 Yawe waamwipuziizie Musa nangue, “Eba, mwaakaba mwakaanakaana sie kusunga milao ni mizilo yane mpaka musitaki?
EXO 16:29 Mupalile kumana nangue Yawe wakimipeela busiku bwa Sabata, ni pakako, pa busiku bwa mutanda i ki-akimipeelela bilio bya nsiku ibili. Kansi kubalua muntu apalile sie kuya waikeele mu busiku bwa kilooba. Tekuli muntu ali ni nsambu ya kufuma kuya mu kutoola bilio.”
EXO 16:30 Ni pakako, bantu tebaatoole bilio pa busiku bwa kilooba.
EXO 16:31 Baizraeli baabiinikile bebio bilio nangue maana. Byaali byaswetele nga masaka. Byaali ni mulio wakue waali wasonsele nga mukate umaatikile ukitiliilue na kapelo.
EXO 16:32 Musa waabaanine nangue, “Yawe wakitwana evi, ‘Sungepo kalingo kamo ka maana pa mulandu wa nvyalo yenu, evi ikamoneko bilio binaamilisiizie mu kaseeba, lunaamifumiizie mu kyalo kya Misri.’”
EXO 16:33 Musa waamwanine Haruni nangue, “Buula kape kamo ubiikemo kalingo kamo ka maana ni kukateeka pa ntanzi yakua Yawe, evi maana alabukilue bwino pa mulandu wa nvyalo ya ku ntanzi.”
EXO 16:34 Haruni waakitile mwa-aniinue Musa na Yawe, waabuulile kape kalimo maana ni kukateeka mu Lisanduku lya Kipingo pakuti azo maana alabukilue bwino.
EXO 16:35 Ni pakako, Baizraeli baaliile maana mu myaka 40, mpaka musita ubaile kufika mu kyalo kibaile kwikalamo. Baaliile maana mpaka kuya kufika ku mipaka ya kyalo kya Kanaani.
EXO 16:36 (Kako kape kaali kalingo kamo ka lyanondo mu efa imo.)
EXO 17:1 Baizraeli bonse baafumine mu kaseeba ka Sini ni kuya kukuukila ku inge nkendo kukonkana ni viba-aninue na Yawe. Baile kukuula mitanda ku Refidimu, inzi koko ku Refidimu tekwaali menda a kumina bantu.
EXO 17:2 Ni pakako, baamusakukiile Musa balanda nangue, “Lenga utupeele menda a kumina.” Musa waabaasukile evi, “Ale kimulimukungitendookela ni kiki? Mulimukumweziiziaki Yawe?”
EXO 17:3 Inzi bantu baakilile kunvua kyaka ni kukila kumwitendookela balanda nangue, “Eyo wakitufumia mu Misri ni kwiza kutwipaila mono na kyaka, fwe ni baana betu pamo ni nama yetu!”
EXO 17:4 Kabili Musa waamuliliile Yawe walanda nangue, “Ale baba bantu ndikubakitilaki? Evi tebakeba kuntoota mabue.”
EXO 17:5 Yawe waamwanine Musa nangue, “Twamapo masiiko amo a Baizraeli uye nao ku ntanzi ya libumba. Utwame ni kabango kawaumine pa Mwenzi wa Nile.
EXO 17:6 Ndikuya kwimana pa ntanzi yobe pa mwalala ku Horebu. Uye uume mwalala, evi menda a kumina bantu afume.” Musa waakitile evio pa menso a masiiko a Baizraeli.
EXO 17:7 Pa ezio nkendo Musa wainikilepo liina lya Masa ni Meriba pantu Baizraeli baamusakukiile Musa ni kumwezia Yawe lubaipuziizie nangue, “Ati emwe, kubako Yawe ali pamo ni fwefue ao abe?”
EXO 17:8 Baizraeli lubaali ku Refidimu, baizile kusakukilua na Ba-amaleki.
EXO 17:9 Musa waamwanine Yoshua nangue, “Saakulapo balalume pa bantu betu uye ulue na Ba-amaleki. Nene lukeele nakaba kuya kwimana pa lupili nakwete kabango kana-aninue na Leza kuba nako mu minue yane.”
EXO 17:10 Ni pakako, Yoshua waile kulua na Ba-amaleki nga mwa-aniinue na Musa. Ozo musita Musa ni Haruni pamo ni Huri baaselele peulu lupili.
EXO 17:11 Musa lyonse lu-aali walendula maboko akue waakwete ni kabango, Baizraeli baali ba-anzia. Inzi lu-aali wakoosia maboko akue, Ba-amaleki i baali ba-anzia.
EXO 17:12 Maboko akua Musa teakokwele kunaka ni ye waali wasya-andua kulendula maboko. Ni pakako, Haruni ni Huri baamuleeteele Musa libue lya kuti ekalepo. Kabili baimeene umo kulio ni unge kuso bakwatiliile maboko akua Musa aali alendukile mpaka kyungulo.
EXO 17:13 Ni pakako, Yoshua wa-anziizie balukale ba Ba-amaleki ku bului.
EXO 17:14 Pa kyamba kya kwanzia, Yawe waamwanine Musa nangue, “Lemba totu twebo twa bwanzio mu kitabu, evi kikabe kyalangulukua lyonse, ni pa kyamba umwane Yoshua nangue naakalovia Ba-amaleki, kabili tekuli muntu waakaba wabalanguluka pano pa kyalo.”
EXO 17:15 Musa waakuulile kitale ki-ainikile, “Yawe-Nisi.”
EXO 17:16 Musa waalandile evi, “Yawe walapa nangue waakaba watwaliliile kulua na Ba-amaleki, pantu maboko akilendulua ku kitebe kya bukolo kyakua Yawe.”
EXO 18:1 Yetoro kitambua wa ku Midiani, sevyala kwa Musa, waunvwile mpunda palua bintu byonse byaakitile Leza palwakua Musa ni palua Baizraeli, bantu bakue, pa kyamba kya kubafumia mu Misri.
EXO 18:2 Pa ozo musita Musa waali wasyapeele mukazi wakue Sipora nsambu ya kuya kuli se Yetoro. Ni ye waamupokeleele mwanaye
EXO 18:3 pamo ni baana bakue balalume babili. Wa mambo waali wainikilue liina lya Gershomu, pantu Musa waalandile evi, “Nakyaluka mweni mu kyalo kya bweni.”
EXO 18:4 Wa bubili waali wainikilue liina lya Eliezeri, pantu Musa waalandile evi, “Leza wakua tawe wakiba wali mukwasi wane wakin'mpususia mu lufu kuli Farao.”)
EXO 18:5 Yetoro sevyala kwa Musa waile kumupempula Musa. Waile pamo ni muka Musa waali ni baana bakue babili. Pa ozo musita Musa waali wakuulile mitanda mu kaseeba mumbali lupili lwakua Leza.
EXO 18:6 Yetoro waalaiziizie mpunda kuli Musa nangue, “Ne so vyala ndimukwiza kukupempula nali ni mukazi obe pamo ni baana bobe babili.”
EXO 18:7 Ni pakako, Musa waafumine ni kuya kumupokelela sevyala. Waamukontamiine, kabili waamukumbatiile koku balimukwipuzyania mutende. Pa kyamba, baingiile mu liema lyakua Musa.
EXO 18:8 Musa waamulondolweleele sevyala byonse byaakitile Yawe kuli Farao ni ku Bamisri pa mulandu wa Baizraeli, kabili waamulondolweleele palua Baizraeli vibaapususiiziwe na Yawe mu maavia aabakitikiile mu nzila.
EXO 18:9 Yetoro waakilile kuwamiinua lu-aunvwile palua bintu byonse biweme byaakitiilue Baizraeli na Yawe, ni palua kubapususia ku Bamisri.
EXO 18:10 Yetoro waalandile evi, “Yawe atasiiwe pantu waakupususiizie ku Bamisri ni kuli Farao. Ee, atasiiwe pantu waapususiizie bantu bakue ku Bamisri!
EXO 18:11 Evi nainika nangue Yawe i mukulu kukila baleza bonse pantu waapususiizie bantu bakue mu kukitilua bibiipile na kitoni kya Bamisri.”
EXO 18:12 Ni pakako Yetoro sevyala kwa Musa waaleetele ngelelo ya kuzizia ni kumwelela Leza. Haruni pamo ni masiiko onse a Baizraeli baizile kulia maliila a ngelelo pamo ni Yetoro sevyala kwa Musa ntanzi yakua Leza.
EXO 18:13 Lukeele lwakue Musa waikeele pa kitebe kya bupinguzi ni kuya wabatwiliziizie vibaali basongelana koku bamuzyungulukiile kutula lukeelekeele mpaka kyungulo.
EXO 18:14 Yetoro sevyala kwa Musa lu-aamwene miilo yaali yabomba Musa, waamwipuziizie evi, “Ewe, uliwabombelaki miilo yatanine evi we bunke ni bantu bakuzyungulukiile koba konse kutula lukeelekeele mpaka kyungulo?”
EXO 18:15 Musa wa-asukile evi, “Ndimukubomba evi pantu bantu balimukwiza bakebele kumana kutona kwakua Leza.
EXO 18:16 Bantu lubalibaiza ni milandu kuli nene, ndinapingula kubalua muntu ni kumonapo ali ni nsambu. Ndinabaana mafunde akua Leza ni kubapeela mizilo yakua Leza.”
EXO 18:17 Sevyala kwa Musa waamwanine evi, “Teulimukubomba bwino.
EXO 18:18 Wewe pamo ni baba bantu bauli nabo mwakaba kutopa. Ozu mwilo ukilile bukata, te mwilo wa kubomba we bunke.
EXO 18:19 Ale unvua nsokezi yane, ni Leza abe pamo nobe. Upalile kuya wali mwimanizi wa bantu kuli Leza ni kumwana milandu yabo.
EXO 18:20 Upalile kubasambilizia mizilo ni mafunde akua Leza pamo ni kubalanga ngikalilo ni miilo ibapalile kuya babomba.
EXO 18:21 Inzi saakulapo bantu ba maano, bantu ba kisinka, bantu balibamukindika Leza pamo ni basuulile bituulilo. Usaakulepo banombozi ba mabumba a bantu 1,000, ni a bantu 100, ni a bantu 50, pamo ni a bantu lyanondo.
EXO 18:22 Baba banombozi bapalile bakabe bapingula milandu ya bantu kubalua busiku. Mane bakabe kuya bakuleetelako sie milandu ikata, inzi milandu iniini bakabe kuya bapingula bo bene. Ni pakako, wakaba kuya wa-angukiilue pantu bakukwasiako miilo.
EXO 18:23 Kine wakonka ezi nsokezi, ni Leza kine wakwitabizia kukita evio, teukiya wanaka. Ni bantu bakaba kuya babwela kwabo bali ni mutende.”
EXO 18:24 Musa waunvwile nsokezi yakua sevyala Yetoro ni kukita kubalua kantu mwa-aniinue.
EXO 18:25 Musa waasaakwile bantu ba maano mu Baizraeli bonse ni kubabiika kuba banombozi ba bantu. Waababiikile kuba banombozi ba mabumba a bantu 1,000, ni a bantu 100, ni a bantu 50, pamo ni a bantu lyanondo.
EXO 18:26 Ni bo baali bapingula bantu kubalua busiku. Milandu ikata baali bamutwaalila Musa, inzi milandu iniini baali bapingula bo bene.
EXO 18:27 Pa kyamba kya bebio, Musa ni sevyala Yetoro balayene, ni Yetoro waabwelele ku kyalo kyakue.
EXO 19:1 Baizraeli baafumine ku Refidimumu, ni mu busiku bwa mambo bwa mwezi wa butatu pa kyamba kya kufuma ku Misri, baile kufika mu Kaseeba ka Sinai. Koko i kubaimikile mitanda yabo mwinsina Lupili lwa Sinai.
EXO 19:3 Pa kyamba, Musa waaselele ku lupili aye asaakaane ni Leza. Yawe waamukuutile ni kumwana nangue, “Peela aza mafunde ku Baizraeli, nvyalo yakua Yakobo ni kubaana nangue,
EXO 19:4 ‘Mwakimona vinakikita ku Bamisri, kabili mumanine vinakimitwama nga nzwiba atweme twana twakue pa mapaapi. Nene nakimipalamika mu kyeni kyane.
EXO 19:5 Ni pakako, kine mwanakila kisinka lizui lyane ni kusunga kipingo kyane, mulikuya mwali bunonsi bwane bwa mponvu pa ntundu yonse anzia kine kyalo kyonse ni bunonsi bwane.
EXO 19:6 Mulikuya mwali bukolo bwane bwa babitambua, kabili mulikuya mwali ntundu yane izuuke.’ Ezi i mpunda i wakaba kulanda ku Baizraeli.”
EXO 19:7 Ni pakako, Musa waakookele kufuma ku lupili. Waakuutile masiiko a bantu ni kubalondolwela twebo tonse mwaalandiile Yawe.
EXO 19:8 Ni bantu bonse baitabiile mwakimo balanda nangue, “Bintu byonse byalandanga Yawe tulikukita.” Kupwako, Musa waya kubwezia kapingu kuli Yawe.
EXO 19:9 Yawe waamwanine Musa nangue, “Ndikukwizila mu lilezi litikeeme evi bantu beyunvwile ni kukuketekela lyonse musita undikuya nalanda nobe.” Kupwako, Musa wamwana Yawe twebo twaalandilue na bantu.
EXO 19:10 Kabili Yawe waamwanine Musa nangue, “Ale kooka uye uteanie bantu pa mulandu wa kwiza kwane, ubazuukie lelo ni lukeele ni kubaana bafule ngubo yabo,
EXO 19:11 evi busiku bwa butatu bakabe kusangua baiteaniizie pantu bobo busiku nakaba kukookela pa Lupili lwa Sinai ni bantu bonse bamwene.
EXO 19:12 Ukabe kusakilila lupili lonse ni kubaana tekuti bakabe kusela ku lolu lupili, ao kwezia kukumiako, kabili tekuti bakabe kutaaluka lusako. Kubalua muntu wakaba kukumia ku lolu lupili wakaba kwipawa.
EXO 19:13 Ozo muntu wakaba kwipawa sie na kutootua mabue ao kulasua mivui pasili kukumiiwa. Anzia kine ni nama wakaba kwipawa evio nyenka. Inzi ntandala paikaba kulila yakonkeene, bantu bakabe kusela ku lupili.”
EXO 19:14 Ni pakako, Musa waakookele kufuma ku lupili ni kuya kuzuukia bantu, ni bo baafulile ngubo yabo.
EXO 19:15 Waabaanine bantu nangue, “Mu ezi nsiku itatu ikale mwaiteaniizie, kabili tekukumane na mwanakazi.”
EXO 19:16 Busiku bwa butatu lukeelekeele, ku lupili kwaali kwali bimpenimpeni ni mitukumo pamo ni lilezi litikeeme, kabili kwaunvwikile lizui likata lya ntandala, ni bantu bonse baali mu mitanda baatutumine na mwezo.
EXO 19:17 Musa waafumiizie bantu mu mitanda ni kubalombola kuti baye bakumane ni Leza. Baile kwimana mwinsina lupili.
EXO 19:18 Lupili lonse lwa Sinai lwaakupilue na kyunsi pantu Yawe waakookeelepo wali mu mulilo. Kyunsi kyaafutumukile mu lupili nga kyunsi kya kikuka kikata kya mulilo. Lupili lonse lwaatentele bubi bubi.
EXO 19:19 Lizui lya ntandala lulyaakilile kulila na maka, Musa waalandile, Leza ni ye waamwasukile mu mutukumo.
EXO 19:20 Yawe waakookeele peulu Lupili lwa Sinai ni kumukuuta Musa aselepo. Musa ni ye waaselele pa lupili.
EXO 19:21 Kabili Yawe waamwanine Musa nangue, “Kooka ubasoke bantu tekuti basakulule lusako ni kwiza kun'mona, pantu kine bakita evio, bengi pakati kabo nga balikufua.
EXO 19:22 Babitambua balikun'mpalamina ni bo bapalile kwizuukia, kine te evio ndikubakanda.”
EXO 19:23 Musa waamukanzile Yawe walanda nangue, “Bantu tebavinda kusela pa Lupili lwa Sinai pantu we mwine wakitusoka nangue, ‘Sakilile lusako lwazyungukiile lupili ni kuluzuukia.’”
EXO 19:24 Yawe waamwasukile evi, “Kooka uye umutwame Haruni usele nakue. Inzi babitambua pamo ni bantu bonse bene tekuti bezie kukiluka lusako ni kwiza kuli nene, pantu nga ndikubakanda.”
EXO 19:25 Ni pakako, Musa waakookeele ku bantu ni kuya kubaana nga mwa-aniinue Yawe
EXO 20:1 Leza waalandile totu twebo tonse nangue,
EXO 20:2 “Nene ndi Yawe Leza obe waakufumiizie mu kyalo kya Misri muwaali wateekelue buzia.
EXO 20:3 “Teupalile kuya wali na baleza bange inga sie nene.
EXO 20:4 “Tekwibaazila mikisi ipaleene na bilengua bya mu muulu mu myulu, ao bya pansi pa kyalo, ao bya mu menda pensina kyalo.
EXO 20:5 Tekufukamina mikisi ao kwipupa, pantu nene Yawe Leza obe ndi Leza wa bunkua, Leza aliwakanda baana pa mulandu wa bubi bwa basibo mpaka ku luvyalo lwa butatu ni lwa buna lwa balia bansuulile.
EXO 20:6 Inzi ndinalanga ntono ku nvyalo nfu ya mu balia bantonene ni kusunga mafunde ane.
EXO 20:7 “Tekuzimbula liina lyane pa mapange abi, pantu ne Yawe Leza obe ndinakanda muntu aliwazimbula Liina lyane pa lisipalile.
EXO 20:8 “Izukila kuzuukia busiku bwa Sabata.
EXO 20:9 Mu nsiku mutanda waya wabombamo miilo yobe yonse,
EXO 20:10 inzi busiku bwa kilooba, i Sabata yakua Yawe Leza obe, mu bobo busiku tekubombamo miilo, wewe pamo ni mwana obe mwalalume, ni mwana obe mwanakazi, ni mubombi obe mwalalume, ni mubombi obe mwanakazi, ni nama yobe, pamo ni mweni wa mu nghanda yobe,
EXO 20:11 pantu ne Yawe naalengele myulu ni kyalo, ni myenzi pamo ni byonse bilimo mu nsiku mutanda, ni mu busiku bwa kilooba naatuuziizie. Ni pakako, ne Yawe naapaalile bobu busiku bwa Sabata ni kubuzuukia.
EXO 20:12 “Kindika so ni noko evi uye wali na nsiku ingi ya kwikala mu kyalo kiulailue na Yawe Leza obe.
EXO 20:13 “Tekwipaya.
EXO 20:14 “Tekukita bukende.
EXO 20:15 “Tekwiba.
EXO 20:16 “Tekubeepezia mwinobe bya bufi.
EXO 20:17 “Tekutokamua nghanda ya mwino, tekutokamua muka mwino, ao mubombi wakue mwalalume ao mwanakazi, ao nghombe wakue, ao punda wakue, ao kubalua kantu ka mwino.”
EXO 20:18 Bantu lubaamwene bimpenimpeni ni kunvua mutukumo pamo ni lizui lya ntandala, ni lubaamwene lupili lwalimukufwinka kyunsi, baiseelukile koku balimukututuma na mwezo.
EXO 20:19 Baamwanine Musa nangue, “Ewe, landa ni fwefue, ni fwefue tulikukunvua, inzi Leza tekuti alande ni fwefue tukeeza kufua.”
EXO 20:20 Musa waabaasukile evi, “Tekutiine pantu Leza eziile kuti amyezie, evi mumane vili maka akue mukeeza kuya mwatwaliliile mu bibalo.”
EXO 20:21 Bantu baatwaliliile kwimana kule, inga sie Musa i waapalamiine nfinzi ikata ya lilezi lyaalimo Leza.
EXO 20:22 Kabili Yawe waamwanine Musa abaane Baizraeli nangue, “Mwakiimwena mwe bene vinakifuma mwiulu ni kwiza kulanda nenu.
EXO 20:23 Tekuye mwaikitila baleza ba mutofue ao ba oro ba kuya mwapupa pambali.
EXO 20:24 Ni pakako, kaba kunkitila kitale kya bulongo ni kwelelapo ngelelo yobe ya kuzizia, ni bupe bwa bupwanikizi bwa pa mikooko yobe ni mbuzi pamo ni nghombe. Kubalua nkendo inaakaba nakusaakwila kuti uye wan'mpupilapo, i panaakaba naiza kumipaalila.
EXO 20:25 Kine wankuulila kitale kya mabue, tekuti ukakuule na mabue abaazilue, pantu kine wabombia kyela ku azo mabue, waakatiikaania kitale.
EXO 20:26 Tekuti ukankuulile kitale kyaliko kiselelo, pantu pa kusela muntu kuti wakupunamina ni kumona mubili obe.
EXO 21:1 “Mizilo inge ya kwana Baizraeli ni ezi:
EXO 21:2 Kine wasita muzia Muebrania, waakakubombela sie myaka mutanda. Inzi mu mwaka wa kilooba, pa kulubuka kwa ozo muntu tapalile kusia walipako kantu.
EXO 21:3 Kine waizile kuteekua buzia tanaupe, alubulue wali bunke. Inzi kine waizile kuteekua buzia waupile, alubulue pamo ni mukazi wakue.
EXO 21:4 Kine selenzi waapeela mwalalume muzia mwanakazi wa kuupa, ni ozo mwalalume wavyalamo baana balalume ao banakazi, ozo mwalalume alubulue sie wene bunke. Inzi mukazi pamo ni baana balikusyala bakua selenzi.
EXO 21:5 Kine muzia wailandila nangue nene nsitonene kulubuka pantu n'mutonene tawelenzi, ni mukazi wane pamo ni baana bane,
EXO 21:6 selenzi alikuya nakue ku nghanda ya mpupo pa ntanzi yakua Leza ni kumwimika pa mulyango, ao mu miilimiili ya mulyango ni kumufutula kutui na muvui. Ni ozo muntu waakaba wali muzia wakue lonse.
EXO 21:7 “Kine muntu wasisia mwana wakue mwanakazi kuba muzia, wene tapalile kulubulua nga vilivyalubulua mwana mwalalume muzia pa kyamba kya myaka mutanda.
EXO 21:8 Kine mwana mwanakazi wasisiiwa ku muntu, ni ozo muntu watona kuti abe mukazi wakue, inzi pa kyamba takimutonene, apalile kumusisia paakale kuli se muvyazi. Selenzi tapalile kumusisia ku Bazima pantu taamukitiile biweme.
EXO 21:9 Kine muntu wasita mwanakazi muzia ni kutona kuti asakue na mwana wakue, ozo muntu asunge ozo mwanakazi nga vi-aliwasunga baana bakue banakazi.
EXO 21:10 Kine ozo mwana waufiiwa ozo mwanakazi watona kuupilapo unge mwanakazi, apalile kutwalilila kufikilizia bipalile kukitilua mukazi wa mambo mu kumupeela bilio ni ngubo pamo ni nsambu yonse ya kyupo.
EXO 21:11 Kine wa-andua kufikilizia bebi bintu bitatu, ozo mwanakazi wa mambo alubukile. Kuti waya pasili kusia walipako kantu.
EXO 21:12 “Muntu kine wauma mwinakue ni kumwipaya, apalile kwipawa.
EXO 21:13 Inzi kine ozo muntu tamwipaile na bufue, ni Leza kine walekelela kuti kikitike evio, ozo muntu apalile kubutukila kolia kundikukulanga.
EXO 21:14 Inzi kine muntu wamwipaya mwinakue na bufue, anzia abutukila ku kitale kyane, mupalile kumufumiako ni kumwipaya.
EXO 21:15 “Muntu kine wauma se ao nghina, apalile kwipawa.
EXO 21:16 “Muntu kine waiba muntu nakue kuti amusisie ao kumwalula muzia, apalile kwipawa.
EXO 21:17 “Muntu kine wafuupula se ao nghina, apalile kwipawa.
EXO 21:18 “Bantu kine balwana, ni umopo wamutoota mwinakue libue, ao kumuuma lupi, ni ye pasili kufua, inzi wa-aluka wa pa kasalo, pa-akaba kubuuka ni kutendeka kwendela na kabango kakue, olia wakimuuma alikulekelua, inzi apalile kumundapia ni kumufuta pa mulandu wa nsiku yakipita waleele pa kasalo.
EXO 21:20 “Selenzi kine wauma muzia wakue mwalalume ao mwanakazi na kabango, ni ye wafua na bebio bipumo, apalile kukandua.
EXO 21:21 Inzi kine muzia wakita busiku bumo ao nsiku ibili pasili kufua, selenzi tavinda kukandua pantu ozo muzia ni wa mu bunonsi bwakue.
EXO 21:22 “Kine balalume balimukulwana bapunka mwanakazi emisi mpaka ni liimi lyakue lyainooneka, inzi pasili kukisiiwa, olia wamupunkanga apalile kulipa nfolanga yonse ilikupingulua na mulume nga mulimwapingwila bapinguzi.
EXO 21:23 Inzi kine ozo mwanakazi wakitikilua na kibiipiisie, olia wapunkananga alikukitilua kibiipiisie. Kine waipayananga, ni ye alikwipawa,
EXO 21:24 linso pa linso, ni liino pa liino, ni kuboko pa kuboko, ni kuulu pa kuulu,
EXO 21:25 kine wazizyanianga, ni ye alikuziziiwa, kine wakisyanianga, ni ye alikukisiiwa, kine wafubulananga, ni ye alikufubulua.
EXO 21:26 “Kine selenzi wauma muzia wakue mwalalume ao mwanakazi ni kumutula linso, ozo muzia apalile kulubulua pa mulandu wa linso lyakue.
EXO 21:27 Kabili kine selenzi wauma muzia wakue mwalalume ao mwanakazi pa liino, ni lyo lyakuuka, muzia apalile kulubulua pa mulandu wa liino lyakue.
EXO 21:28 “Kine nghombe ndume wapunka mwalalume ao mwanakazi na masengo ni ozo muntu wafua, ozo nghombe apalile kwipawa na kutootua mabue, ni minofu yakue tekuti iliwe. Inzi mwine wa nghombe tekuti epawe.
EXO 21:29 Kine ozo nghombe ndume aliwapunkapunka bantu, ni mwine wa nghombe kine waasokeluemo kale, ni ye tekuba wamukaka, kusyali ozo nghombe waipaya muntu, nghombe alikwipawa na kutotua mabue, ni mwine wa nghombe alikwipawa.
EXO 21:30 Kine ozo muntu walombua nfolanga, apalile kulipa kukonkana ni kipendo kyali kulombua, pakuti alubule bukose bwakue.
EXO 21:31 Ozu muzilo waakaba wabomba ni ku nghombe ndume aliwapunka mwana mwalalume ao mwana mwanakazi.
EXO 21:32 Kine nghombe ndume waipaya muzia mwalalume ao mwanakazi na masengo, mwine wa nghombe amufute mwine wa muzia na shekeli 30 ya mutofue, nghombe ndume ni ye alikwipawa na kutootua mabue.
EXO 21:33 “Kine muntu watupukula kiina kyakue ao kine waimba kiina pasili kutupikilapo, ni nghombe ao punda nghwana waponenamo,
EXO 21:34 mwine wa kiina alikulipa ku mwine wa nama, ni ozo nama afwile atwamue na mwine wa kiina.
EXO 21:35 Kine nghombe ndume wakua muntu umo wakisia nghombe ndume wakua muntu unge, ni ozo nghombe ndume wafua, nghombe ndume waipaananga alikusisiiwa, ni baba bantu babili balikukasana ozo nghombe ndume afwile pamo ni nfolanga.
EXO 21:36 Inzi kine kimanikile nangue ozo nghombe ndume ali ni mibeele ya kupunkana na masengo, ni mwine tekuba wamukaka, ozo mwine apalile kulipilamo nghombe ndume akosele, ni nghombe ndume afwile alikutwamua na mwine nghombe ndume waipaananga.
EXO 22:1 “Kine muntu waiba nghombe ndume ao mukooko ni kumusinza ao kumusisia, ozo kabooko pa nghombe ndume umo alikulipa nghombe ndume isaano, ni pa mukooko umo alikulipa mikooko ina.
EXO 22:2 “Kine kabooko wasangililua walimukwiba mu nghanda musita wa busiku, waumua ni kwipawa, olia wamwipaya tali na mulandu palua kufua kwakue. Inzi kine wasangililua musita wa koba, waumua ni kwipawa, olia epeene alikuba ni mulandu wa kwipaana. Inzi ozo kabooko apalile kulipa. Kine tali na kantu apalile kusisiiwa nga muzia pa mulandu wa lwibo lwakue. Kine nama wakiibua wasangua wakosele mu minue yakua kabooko, kine ni nghombe ndume, ao kine ni punda, ao kine ni mukooko, ozo muntu apalile kulipilamo mutengo wa ozo nama nghendo ibili.
EXO 22:5 “Kine muntu walekelela biteekua byakue kulia bilimbua nghwana mu bukaba, ao mu bukaba bwa mizabibu, apalile kulipilamo biwamiisie bya mu makaba akue, ao bya mu makaba a mizabibu.
EXO 22:6 “Muntu kine wakozia mulilo mu bukaba bwakue, ni mulilo wazambukila mu bukaba nghwana ni kuya kuzizia buzombozi nghwana, ozo muntu wakikozia mulilo alikulipilamo belia byakizia.
EXO 22:7 “Muntu kine waitabila kumusungila mwinakue nfolanga ao binge bintu, ni ezio nfolanga ao bintu byaibua, ozo kabooko kine wamoneka, alikulipilamo nghendo ibili.
EXO 22:8 Inzi kine kabooko tamwenekele, ozo mwine wa nghanda alikutwalua ku bapinguzi evi aye asininkizie kine takimwibila mwinakue.
EXO 22:9 “Mu milandu yonse ya kupusana palua nghombe ndume, ao punda, ao mikooko, ao palua ngubo, ao palua kubalua kantu kazeezele, ni kubalua muntu walanda nangue ozu ni nama wane ao nangue kaka ni kantu kane, babo babili balikutwala milandu ku bapinguzi. Olia alikutanua nsambu na bapinguzi i alikumulipa mwinakue nghendo ibili ya bukindami bwa kekio kintu.
EXO 22:10 “Kine muntu wateekia nghombe ndume, ao punda, ao mikooko ku muntu nakue, ni ozo nama wafua ao kukisiiwa na nama nakue ao kine waibua muntu tekuba wamwene,
EXO 22:11 baba bantu babili balikukita mulapo ntanzi yakua Yawe. Kine Yawe wasininkizia nangue ozo muntu tali na mulandu, mwine wa nama apalile kwitabila bobo bupinguzi, ni olia wakimuteekela tapalile kulipa.
EXO 22:12 Inzi kine ozo nama kisinka ebilue, alikumulipa mwine wa nama.
EXO 22:13 Ozo nama kine wakizanghununua tupusa tupusa na kinama, apalile kutwamapo tupusa twa kusininkiziiziako, ni ye tapalile kulipa ozo nama wakizanghununua.
EXO 22:14 “Muntu kine wa-azimia nama wakue ku mwinakue, ni ozo nama wakisiiwa ao wafua, mwine wa nama tekuba walipo, ozo muntu wa-azimanga apalile kulipa.
EXO 22:15 Inzi kine mwine wa nama wasanguapo pa kufua kwa ozo nama, ozo muntu tapalile kulipa. Kine nama wakiba wali wa kusonkela alikulipako sie musonko wa nama u-akyazima.
EXO 22:16 “Mwalalume kine wabembia mukazyana wa kisungu asinasakue, ni ye wakumana nakue, apalile kulipa bwimazi ni kumuupa.
EXO 22:17 Inzi kine se kwa mwanakazi wakaana kuufia mwana wakue mwanakazi, mwalalume apalile kulipa nfolanga kukonkana ni vibalibalipa ku mukazyana wa kisungu.
EXO 22:18 “Mwanakazi ndozi tekumulekelela kuba mukose.
EXO 22:19 “Kubalua muntu aliwakumana na nama apalile kwipawa.
EXO 22:20 “Muntu aliwaelela ngelelo ku baleza mu kifuka kya kumwelela Yawe, apalile kuloviiwa.
EXO 22:21 “Tekukitile mweni bibiipile ao kumwemia pantu ni mwe kumo mwaali baeni mu kyalo kya Misri.
EXO 22:22 Tekubiibikizie mukanfwilua ao mwana nsiiwa.
EXO 22:23 Kine mwababiibikizia ni bo bandilila, kisinka ndikunvua malilo abo.
EXO 22:24 Naakafiitua ni kumiipaila ku bului, bakazi benu baakaaluka bamukanfwilua, ni baana benu baakaaluka baana nsiiwa.
EXO 22:25 “Kine wakopia nfolanga ku mupabi wa mu bantu bane babuliilue, tekuya wali nga balia balibakopia nfolanga ya kaloba, tekumulomba alundepo ni inge.
EXO 22:26 Kine muntu watwama ngubo ya muntu mupabi kuti iye yali kikwatizi, apalile kusangua waabweziizie koba lukasinazimine,
EXO 22:27 pantu i ngubo yakue ya kwivimba. Ale alikwivimbaki? Wene kine wandilila, ndikumunvua pantu ndi wa nkumbu.
EXO 22:28 “Tekumufuupula Leza ao kutiipa lisiiko wa bantu bobe.
EXO 22:29 “Tekukokola kun'mpeela mazabo a mambo a bya kumina byobe. “Kubalua libeli obe mwalalume upalile kun'mpeela nene.
EXO 22:30 Mupalile kukita evio ni ku mabeli enu a nghombe ni a mikooko ao a mbuzi. Aza mabeli kuti aikalanke kuli nghinabo nsiku kilooba, kusyali kundeetela busiku bwa mwanda.
EXO 22:31 “Mupalile kuba bantu bane bazuuke. Ni pakako, temupalile kuya mwalia minofu ya nama epailue na kinama mu kisonso, inzi mupalile sie kupoozela tubua.
EXO 23:1 “Tekuvumia mpunda ya bufi ni kwampana na muntu mubi mu kusininkizia bya bufi.
EXO 23:2 Tekukonkelela bantu bengi mu kukita bibiipile. Luuliwakuutua kusininkizia mu kilie, tekubembua na bwingi bwa bantu mukwinoona nsambu.
EXO 23:3 Kabili tekumupeela mupabi nsambu pantu ni mupabi.
EXO 23:4 “Kine wamona nghombe ndume ao punda wakua mulwani obe wazeezele, upalile kumubweziizia mwine.
EXO 23:5 Kine punda wakua mulwani obe wamusanga waponene wailikiilue na bitwamo, tekumulekeela pa-aponenanga. Sininkizia nangue wamukwasia mulwani obe na kubuusia ozo punda.
EXO 23:6 “Tekumubiibikizia mupabi mu milandu yakue.
EXO 23:7 Iikeke ku busongezi bwa bufi, kabili te kwipaya muntu asili na kilubo ao mulunghami, pantu muntu ali ni bubi nsikamupenda kuba asili na bubi.
EXO 23:8 Tekupoka bituulilo pantu bituulilo bilibyazibatika menso ni kukalanghania twebo twa balunghami.
EXO 23:9 “Tekwemia mweni pantu mumanine vili mutima wa mweni, pantu ni mwemue mwaali baeni mu kyalo kya Misri.
EXO 23:10 “Mu myaka mutanda ukabe wabyalamo ni kuzombola.
EXO 23:11 Inzi mu mwaka wa kilooba upalile kulekela bukaba butuuzie, evi bapabi bali pakati kobe bakabe basololamo, ni byaakaba byasyalamo bikabe byaliiwa na nama ya mu kisonso. Evi i vyakuti ukabe wakita mu bukaba bobe bwa mizabibu ni bwa mizeituni.
EXO 23:12 “Nsiku mutanda waya wabombamo miilo yobe, inzi busiku bwa kilooba upalile kutuuzia, evi nghombe yobe ni bapunda bobe batuuzie. Bazia bobe ni baeni bonse bawikeele nabo ni bo batuuzie.
EXO 23:13 “Pooze maano ku twebo tunaamyanine. Tekwezie kuzimbula liina lya baleza bange, kabili tekuti lyunvwiwe mu tunua twenu.
EXO 23:14 “Kubalua mwaka mukabe mwankitilamo nsikunkulu itatu.
EXO 23:15 Mukabe mwakita nsikunkulu ya mukate usiliko ntutumusi. Mu nsiku kilooba mukabe mwalia mukate usiliko ntutumusi nga vinaakwanine, mukabe mwakita evio pa nsita ipalile mu mwezi wa Abibu, (pantu mu ozu mwezi i mwezi umwaafumiinemo mu Misri) tekuti kukabe kwali muntu waakaba waiza kuli nene tekuba wali na kantu ka kun'mpeela.
EXO 23:16 “Mukabe mwakita nsikunkulu ya kuzombola mazabo a mambo a mu belia bimwaabyele mu makaba enu. “Mukabe mwakita nsikunkulu ya kuzombola kwa ku mpeleezio ya mwaka kine mwafumia bimwaabyele mu makaba.
EXO 23:17 Kubalua nghendo itatu pa mwaka, balalume bonse bapalile bakabe baiza kun'mpupa ne Yawe Kabezia Mpungu.
EXO 23:18 “Tekungelele ngelelo ya nama pamo ni kintu kisanziziweko ntutumusi. Mafuta a nama ya ngelelo yane ya kyungulo teapalile akabe asungua mpaka lukeele lwakue lukeelekeele.
EXO 23:19 “Buzombozi bwa mambo bwa mu makaba enu mupalile mukabe mwabutwala mu Nghanda yakua Yawe Leza wenu. “Tekuti mukabe mwaeleka mwina mbuzi mu mabeele akua nghina.
EXO 23:20 “Unvue, ndikumitumina malaika wakumitangilila ni kumisunga mu lwendo evi akabe kumifikia bwino ku nkendo inakimiteaniizia.
EXO 23:21 Kansi poozeko maano a kumunakila, tekumulengie kufiitua evi akamyeleele bilubo byenu, pantu aliwakita byonse mu Liina lyane.
EXO 23:22 Inzi kisinka kine mwemue mwaunvua ni kukita byonse bindimukulanda, ndikuya nali mulwani wa balwani benu, ni kulua na balia balibalwana nenu.
EXO 23:23 Malaika wane wakaba kumitangilila ni kumitwala ku kyalo kya Ba-amori, ni kya Bahiti, ni kya Baperizi, ni kya Bakanaani, ni kya Bahivi pamo ni kya Bayebusi, ni bo nakaba kubalovia.
EXO 23:24 Tekuti mukabe mwafukamina baleza babo ao kubapupa, tekuti mukabe mwakita mubalibakitila. Inzi mukabe kubeenoona, ni kuvunghania mapumpu abo.
EXO 23:25 Mwemue mupalile kumubombela sie Yawe Leza wenu, ni ye waakaba wapaalile bilio byenu, ni menda enu, ni ne naakamikingilila ku malwele.
EXO 23:26 Mu kyalo kyenu temukaba mwanakazi wa kupisia liimi, kabili temukaba nghumba. Mwaakeekala nsiku ingi
EXO 23:27 “Naakatuma bya kutiinia byane bikabe byamitangiliile ni kuvulunghania bantu bonse konse kumwaakalunghama, ni balwani benu bonse baakamifunghamina ni kubutuka.
EXO 23:28 Naakatuma nzuki yaakamitangilila kuya kukumba Bahivi, ni Bakanaani pamo ni Bahiti.
EXO 23:29 Nsikabakumba bonse mu mwaka umo, evi kyalo tekuti kikasyale kibolia, ni nama ya mu kisonso tekuti ikakile kuvula ni kumikila maka.
EXO 23:30 Naakaba nabakumba baniini baniini mpaka pamukasanduluka ni kupyana kyalo.
EXO 23:31 Kabili naakabiika mupaka wenu kutula ku Lyezi lya Kasi mpaka ku lyezi lya Bafilistini, ni kufuma ku kaseeba mpaka ku Mwenzi wa Efrati. Nene naakababiika bene kyalo mu maboko enu kuti mukabakumbe.
EXO 23:32 Tekuti mukakite nabo kipingo ao kukita kipingo na baleza babo.
EXO 23:33 Tekuti mukabeetabizie kwikala mu kyalo kyenu pantu nga baakamilengia kunduvia, kine mukabombele baleza babo, mwaakakwatua mu muteo wa kupupa mikisi.”
EXO 24:1 Pa kyamba, Yawe waamwanine Musa nangue, “Mutwame Haruni, ni Nadabu, ni Abihu pamo ni masiiko 70 a Baizraeli usele nabo kono ku lupili, evi mwize mun'mpupe mwaliko lwa kule.
EXO 24:2 Wewe sie bunke i etabiilue kumupalamina Yawe. Baba bange tekuti bezie kusela pamo nobe peulu lupili ni kun'mpalamina.”
EXO 24:3 Ni pakako Musa waile kubaana bantu twebo tonse ni milao yonse yaalandile Yawe pamo ni mafunde onse. Bantu bonse baitabiile balanda nangue, “Tulikukita byonse mwalandilanga Yawe.”
EXO 24:4 Kabili Musa waalembele kubalua keebo ka-aapeelue na Yawe. Lukeele lwakue paakili lukeelekeele waabuukile ni kukuula kitale mwinsina lupili ni kwimika mapumpu lyanondo ni abili a mabue emaniineko mikowa lyanondo ni ibili ya Baizraeli.
EXO 24:5 Pa kyamba, waatumine balumendo ba mu Baizraeli kuti baye bamwelele Yawe ngelelo ya kuzizia ni kumusinzila nghombe ndume kuba bupe bwa bupwanikizi.
EXO 24:6 Musa waabuulilemo ntibu ya mulopa, waubiika mu bibakuli, ni unge wausansila pa kitale.
EXO 24:7 Kabili waabuulile kitabu kya kipingo ni kubabelengela bantu batwiliziizie. Bonse baalandile evi, “Byonse byalanda Yawe tulikubikita ni kubinakila.”
EXO 24:8 Pa kyamba, Musa waabuulile mulopa waali mu bibakuli, wausansila ku bantu walanda nangue, “Ozu i mulopa wa kipingo kyakua Yawe ki-akikita pamo nenu pa kumipeela aza mafunde onse.”
EXO 24:9 Kabili Musa ni Haruni, ni Nadabu, ni Abihu pamo ni masiiko 70 a Baizraeli, baaselele ku lupili.
EXO 24:10 Koko ku lupili kubaile, baamumwene Leza wakua Izraeli. Mwinsina makasa akue mwaali mwali kintu kyaali kyakitilue na safiri, kyaali kyali nga lyulu lisambikile.
EXO 24:11 Anzia baamumwene Leza, tebaakitiilue kibiipile. Baaliile bilio ni kumina pa ntanzi yakue.
EXO 24:12 Yawe i lu-aamwanine Musa nangue, “Ale sela wize pano pandi peulu lupili, musita uulikuba pano, ndikukupeela bibazu bibili bya mabue anembelepo mizilo ni milao ya kubasambilizia.”
EXO 24:13 Ni pakako Musa waaseekeziiziwe na mubombi wakue Yoshua. Musa waaselele ku lupili lwakua Leza.
EXO 24:14 Musa ntanzi ya kusela wa-anine masiiko a Baizraeli nangue, “Syale mwatupembeele pano mpaka musita utwakaba kubwela. Unvue, kine muntu wa-aluka ni mulandu, autwale kuli Haruni ni Huri.”
EXO 24:15 Musa lu-aali wali koko ku lupili, lupili lwaakupiliilue na lilezi.
EXO 24:16 Bulumba bwakua Yawe bwaali pa lolo Lupili lwa Sinai. Lupili lwaakupiliilue na lilezi nsiku mutanda, ni mu busiku bwa kilooba, Musa waunvwile lizui lyakua Yawe lyamukuuta mu lilezi. Monekelo ya bobo bulumba bwakua Yawe, Baizraeli baabumwene bwaali nga mulilo uliwazizia peulu lupili.
EXO 24:18 Ni pakako, Musa waingiile mu lilezi ni kutwalilila kusela peulu lupili. Musa waikeele ku lupili nsiku 40 busiku ni koba.
EXO 25:1 Yawe waamwanine Musa nangue,
EXO 25:2 “Ana Baizraeli bandeetele bupe. Kubalua bupe bubalikufumia mutoneene mitima yabo, i bwa kuti mupokelele.
EXO 25:3 Bupe buwakaba kupokelela ni bobu: Oro, ni mutofue, ni mukuba,
EXO 25:4 ni nyunzi ya mukumino wa lyulu, ni ya mukumino wa bulumbi, ni ya mukumino wa kasi, ni ya kitani kiweme, ni masako a mbuzi,
EXO 25:5 ni kipapa kya mpanga kisubilueko mukumino wa kasi, ni kipapa kya kipomo, ni kimuti kya kasiiya,
EXO 25:6 ni mafuta a mizeituni a mu litala, ni manukato a kubiika ku mafuta azuuke, ni ku bubaani buweme,
EXO 25:7 ni mabue a oniksi, pamo ni mabue a kubiika ku efodi ni ku mufuko wa pa nkulo wakua Kitambua Mukulu.
EXO 25:8 Kabili bakankitile liema lizuuke, evi nkabe naikeele pakati kabo.
EXO 25:9 Bapalile kunghimikila Tabernakulo ni kukita kubalua kantu nga mundikukwanina.
EXO 25:10 “Baane bakakite lisanduku lya mbao ya kimuti kya kasiiya. Likabe lyaleepele metre imo ni santimetre 25, mu bukata likabe lyatanine santimetre 75, ni mu kutuuluka likabe lyatuulukile santimetre 75,
EXO 25:11 kabili bakakupeako oro isambikile mukati ni panze. Mumbali bakabe kuzyungulusiamo lufito lwa oro.
EXO 25:12 Bakakite bikobo bina bya oro ni kubibiika ku tufuli tuna twa lisanduku. Bibili ku bwala bumo ni bibili ku bunge bwala.
EXO 25:13 Kabili bakakite mipingo ibili ya kimuti kya kasiiya ni kukupako oro.
EXO 25:14 Mipingo ya kupingilako bakabe kwi-ingizia mu bikobo bya ku lisanduku kumbali yonse ibili.
EXO 25:15 Ezio mipingo ikabe yaikaliliile sie mu bikobo bya lisanduku pasili kufumiamo.
EXO 25:16 Mu lelio lisanduku ukabiikemo bibazu bibili bya mabue binakaba kukupeela, papo palembelue mizilo.
EXO 25:17 “Bakakite ntupiko ya oro isambikile. Ezio ntupiko ikabe yaleepele metre imo ni santimetre 25, ni mu bukata santimetre 75.
EXO 25:18 Bakakite makerubi abili atililue bwino ali a oro, ni kuemika ku mpeleezio ibili ya ntupiko mu kuleepa.
EXO 25:19 Bakakite likerubi limo ku mpeleezio imo, ni linge ku inge mpeleezio. Azo makerubi akabe akitiliilue ku ntupiko ku mpeleezio yakue ibili.
EXO 25:20 Azo makerubi akabe alendwile mapaapi abo mu muulu lya pa ntupiko akupilile lisanduku, ni nkebu yabo yakenteene lya pa ntupiko.
EXO 25:21 Mu lisanduku ukabiikemo belia bibazu bibili bya mabue binaakakapeela ni kutupikilapo ntupiko.
EXO 25:22 Papo i panaakaba nasaakaana nobe, kabili i panaakaba nalanda nobe peulu ntupiko, pa bukata bwa azo makerubi abili ali peulu Lisanduku lya Kipingo, ni kulanda nobe palua mafunde onse akuti ukabe wabaana Baizraeli.
EXO 25:23 “Bakakite meza ya kimuti kya kasiiya ileepele metre imo ni mu bukata yatanine santimetre 50, ni mu kutuuluka ikabe yatuulukile santimetre 75.
EXO 25:24 Bakakupeko oro isambikile, ni mumbali bakazyungulusiamo lufito lwa oro.
EXO 25:25 Bakazyungulusie lufito lwatuulukile santimetre mwanda, kusyali kupisia ni mukovio wa oro ku lufito.
EXO 25:26 Bakakite bikobo bina bya oro ni kubibiika ku tufuli tuna twa meza lya palia pabeeleele mikonzo.
EXO 25:27 Bakabiike bikobo pepi na mbao ya pa muulu. Momo i mwakwingizia mipingo ya kupingilako meza.
EXO 25:28 Bakakite mipingo ya kimuti kya kasiiya ni kukupako oro. Ezio mipingo ikabe ya kupingilako meza.
EXO 25:29 Bakakite masaani, ni mpindi, ni bibakuli pamo ni makopo a kubombia ku bupe bwa bya kumina. Bebio bibombelo byonse bya pa meza bakakite byali bya oro isambikile.
EXO 25:30 Ukabiike ni mikate ya kilangililo pa meza ya kuti ikabe yali pa ntanzi yane lyonse.
EXO 25:31 “Bakakite kya kuteekapo matala kya oro itililue yasambikile bwino. Kya kwimikapo pamo ni mukonzo wakue, ni tubakuli twakue twali nga maluba, ni mapingu akue pamo ni maani akue, bikabe byalundeene kumo.
EXO 25:32 Ku ozo mukonzo umo kukabe kwafumine misambo mutanda. Misambo itatu ku bwala bumo, ni inge itatu ku bunge bwala.
EXO 25:33 Ku musambo umo kukabe kwali tubakuli tutatu tuli nga maluba a almonde ali ni mapingu pamo ni maani a azo enka maluba. Ku musambo unge ni ko bakakiteko evio vyenka mpaka ku misambo yonse mutanda yakaba yafumine ku ozo mukonzo.
EXO 25:34 Ni ku mukonzo wa pa bukata uli pa kya kuteekapo kuye kwali tubakuli tuna tuli nga maluba a almonde ni mapingu pamo ni maani a azo enka maluba.
EXO 25:35 Ntanzi ya kufika pa misambo ibili pakabe lipingu lya liluba limo. Kikabe kyali evio ku misambo ibili ya mambo, ni ku misambo ibili ya bubili, pamo ni ku misambo ibili ya butatu.
EXO 25:36 Mukonzo ni misambo yakue yonse bikabe byakitiliilue kumo ni kya kuteekapo. Kyonse kikabe kyali kya oro itililue yasambikile.
EXO 25:37 Bakakite azo matala kilooba ni ku-aleemia kuti akabe asanikiile ku ntanzi.
EXO 25:38 Bakakite nmano pamo ni bisaani bya kekio kya kuteekapo matala, bebio byonse bikabe byali bya oro isambikile.
EXO 25:39 Bakakite kya kuteekapo matala pamo ni bibombelo byonse na kilo 35 ya oro isambikile.
EXO 25:40 Poozako maano kuti bakakite kubalua kantu nga vinaakulangisiizia ku lupili.
EXO 26:1 “Bakakite Tabernakulo yakua Leza na bipempe lyanondo bya kitani kiweme kipyatilue bwino na nyunzi ya mukumino wa lyulu, ni ya mukumino wa bulumbi pamo ni ya mukumino wa kasi. Balia bamanine kulenga bakalengemo makerubi.
EXO 26:2 Kubalua kipempe kikabe kyaleepele metre lyanondo ni ina, ni mu bukata kyatanine metre ibili. Bipempe byonse bikabe byalingheene.
EXO 26:3 Bipempe bisaano bakabilundanie kuti kikabe kimo, ni binge bisaano kubilundania kuti kikabe kimo.
EXO 26:4 Bakakite mikobelo ya ngubo ya mukumino wa lyulu ku mpeleezio ibili ya kipempe kimo, ni ku kinge kipempe bakakite evio vyenka.
EXO 26:5 Bakakite mikobelo 50 ku kipempe kimo, ni inge mikobelo 50 ku kipempe kinge. Ezio mikobelo ikabe yakenteene.
EXO 26:6 Bakabiike bikobo 50 bya oro bya kulundania kumo bipempe bibili pakuti Tabernakulo ikabe kintu kimo.
EXO 26:7 “Bakakite bipempe lyanondo ni kimo bya masako a mbuzi ni kubivimba peulu Tabernakulo.
EXO 26:8 Kubalua kipempe kikabe kyaleepele metre lyanondo ni isaano, ni mu bukata metre ibili. Bebio bipempe lyanondo ni kimo bikabe byalingheene.
EXO 26:9 Bipempe bisaano bakabilundanie kumo, ni binge mutanda ni byo kumo. Kelia kipempe kya mutanda bakakipete lya ku ntanzi pakuti Tabernakulo ikabe kintu kimo.
EXO 26:10 Bakakite mikobelo 50 lya ku mpeleezio ya kipempe kimo, ni inge mikobelo 50 lya ku mpeleezio ya kipempe kinge.
EXO 26:11 Kabili bakakite bikobo 50 bya mukuba ni kwingiziamo mikobelo pakuti bipempe bikabe byalundeene, evi Tabernakulo ikabe kintu kimo.
EXO 26:12 Ni kelia kiputu kya kipempe kyaakapulamo, ukakikupe ku kyamba kya Tabernakulo.
EXO 26:13 Kiputu kya kipempe kyaakasyalako mu kuleepa, kelia kyaakaba kyali santimetre 50 ku bwala bumo, ni ku bunge bwala santimetre 50, i kyaakaba kyakupiliile Tabernakulo.
EXO 26:14 “Bakakite mpapa ya mpanga isubilueko mukumino wa kasi ya kuvimba peulu Tabernakulo, kabili bakakite ni inge mpapa ya bipomo ni yo bakavimbe peulu mpapa ya mpanga.
EXO 26:15 “Bakeemike kipuupa kya Tabernakulo na mbao ya kasiiya.
EXO 26:16 Kubalua lubao lukabe lwaleepele metre isaano, kabili lukabe lwatanine santimetre 75.
EXO 26:17 Kubalua lubao lukabe lwali na matui abili kwinsina, matui a kukwatania mulongo wa mbao. Evi i vyakuti bakakite mbao yonse ya ku Tabernakulo.
EXO 26:18 Bakakite mbao 20 lya ku nkungulua ya Tabernakulo,
EXO 26:19 ni kukita bintu 40 bya mutofue bya kwimikuamo mbao 20. Mu bintu bibili mukabe mwaimikua matui abili a lubao lumo, ni mu binge bibili ni mo evio vyenka.
EXO 26:20 Ni ku bunge bwala bwa Tabernakulo, lya ku nkungua ni ko kukabe mbao 20,
EXO 26:21 ni bintu 40 bya mutofue bya kwimikuamo. Bya kwimikuamo bibili ni byo mukengiziiwe matui abili a lubao lumo.
EXO 26:22 Kumusana wa Tabernakulo, lya ku mboosi bakeemikeko mbao mutanda,
EXO 26:23 ni mbao ibili ikeemikue mu tufuli twa Tabernakulo ku kyamba.
EXO 26:24 Ezio mbao ibili ya mutufuli ipalile ikeemikue yakuminkeene kutula pansi, ni pa muulu ikakuminkaniiwe na kikobo, bakakite evio mu tufuli tonse tubili.
EXO 26:25 Ni pakako, yaakaba yali mbao mwanda, ni bintu bya mutofue bya kwimikuamo byakaba byali lyanondo ni mutanda. Bya kwimikuamo bibili bikabe byaingiziwamo matui abili a lubao lumo, ni binge evio vyenka.
EXO 26:26 “Bakakite mbango ya kimuti kya kasiiya, mbango isaano pa mbao ili ku lubali lumo lwa Tabernakulo,
EXO 26:27 ni inge isaano pa mbao ili ku bunge bwala bwa Tabernakulo, kabili inge isaano pa mbao ili ku kyamba kya Tabernakulo ku mboosi.
EXO 26:28 Lubango lwa pa bukata bwa mbao lwene lukabe lwapulilemo koku ni koku.
EXO 26:29 Ezio mbao bakakupeko oro, kabili bakakite ni bikobo bya oro bya kukwatizia mbango, ni ezio mbango bakakupeko oro.
EXO 26:30 Bakeemike Tabernakulo nga viwakilangisiiwa ku lupili.
EXO 26:31 “Kabili bakakite kipempe kya nyunzi ya mukumino wa lyulu, ni wa bulumbi pamo ni wa kasi, pamo ni ngubo ya kitani kiweme kya nyunzi ipyatilue, ni kukifwanizia na kubilamo nkebu ya makerubi. Ezio miilo ikabombue na bantu bamaniisie.
EXO 26:32 Bakakobeke kipempe ku mapumpu ana a kimuti kya kasiiya akupilueko oro. Bikobo byakue bikabe byali bya oro pa bintu bina bya mutofue bya kwimikuamo.
EXO 26:33 Bakakobeke kipempe ku bikobo evi Lisanduku lya Kipingo likabe ku kyamba kya kipempe, pantu kipempe i kyakaba kyalekenkaniizie Kifuka Kizuukiisie.
EXO 26:34 Bakabiike ntupiko peulu Lisanduku lya Kipingo mu kifuka kizuukiisie.
EXO 26:35 Kunze ya kipempe kikingiliile Kifuka Kizuukiisie bakabiikeko meza lya ku nkungua ya Tabernakulo, kusyali kubiika kinara lya ku nkungulua kyakenteene ni meza.
EXO 26:36 “Bakakite kipempe kya pa mulyango wa Tabernakulo, kipempe kya nyunzi ya mukumino wa lyulu, ni ya mukumino wa bulumbi, ni ya mukumino wa kasi pamo ni kitani kiweme kipyatilue. Ikabe yaali miilo ya muntu amaniisie kubila.
EXO 26:37 Bakakite mapumpu asaano a kimuti kya kasiiya ni kukupako oro, koko i kuwaakakobeka kipempe na bikobo bya oro. Bakasungulule ni bya kwimikuamo bisaano bya mukuba pa mulandu wa mapumpu.
EXO 27:1 “Bakakite kitale kya mbao ya kimuti kya kasiiya. Kitale kikabe kyaleepele metre ibili ni kitika, ni mu bukata kikabe kyali metre ibili ni kitika. Kekio kitale peulu kikabe kyalingheene monse monse, kabili kikabe kyatuulukile metre imo ni kitika.
EXO 27:2 Mu tufuli tuna bakabiikemo mbao ituulukile nga masengo, mbao yakuti ikabe yalundanizie kitale. Kekio kitale kikabe kyakupilueko mukuba.
EXO 27:3 Bakakite bya kuzoolelapo mito, ni bipawa, ni bibakuli, ni bikobo, ni bya kubiikapo mulilo. Bebi bibombelo byonse bya ku kitale bikabe byali bya mukuba.
EXO 27:4 Bakakite kasaaso ka mukuba ka ku kitale ni kubiika bikobo bina bya mukuba ku tufuli tuna twa kasaaso.
EXO 27:5 Bakabiike kako kasaaso mukati kitale, kwinsina lubao luzyungulukiile kitale, evi kako kasaaso kakabe kafikile pa bukata mu kutuuluka.
EXO 27:6 Bakakite mipingo ya kimuti kya kasiiya, mipingo ya kupingilako kitale. Bakakupeko mukuba ku ezio mipingo.
EXO 27:7 Ezio mipingo yaakengiziiwa mu bikobo evi ikabe yali mumbali ibili ya kitale musita wa kukipinga.
EXO 27:8 Kekio kitale kikakitue kyazikukile mukati. Ukabaane bakakite nga viwakilangisiiwa ku lupili.
EXO 27:9 “Kabili bakakite musolo wa Tabernakulo. Ku lubali lwa ku nkungulua bakakite luuba lwa kipempe kya kitani kiweme kipyatilue. Kekio kipempe kikabe kyaleepele metre 50 bwala bumo.
EXO 27:10 Bakakite mapumpu 20 ni bintu bya kwimikuamo 20 bya mukuba, bikobo bya ku mapumpu ni mikobelo yakue bikabe bya mutofue.
EXO 27:11 Ku lubali lwa ku nkungua ni ko bakakiteko evio vyenka. Kukabe kipempe kya kitani kileepele metre 50, ni mapumpu akue 20, ni bintu bya kwimikuamo 20 bya mukuba. Bikobo bya ku mapumpu ni mikobelo yakue bikabe bya mutofue.
EXO 27:12 Lya ku mboosi kukabe luuba lwa kipempe kileepele metre 25, kukabe mapumpu lyanondo ni bya kwimikuamo lyanondo.
EXO 27:13 Bukata bwa musolo lya ku kabanga kukabe metre 25 mu bukata.
EXO 27:14 Ni luuba lwa kipempe ku lubali lumo lwa mulyango lukabe lwaleepele metre kilooba ni kitika, mapumpu akue atatu, ni bya kwimikuamo bitatu. Ni ku bunge bwala kukabe luuba lwa kipempe luleepele metre kilooba ni kitika, mapumpu akue atatu, ni bya kwimikuamo bitatu.
EXO 27:16 Ku mulyango wa musolo kukabe luuba lwa kipempe kileepele metre lyanondo, kya mukumino wa lyulu, ni wa bulumbi, ni wa kasi pamo ni kitani kiweme kipyatilue. Ezio miilo ikabombue na bantu bamaniisie. Kekio kipempe kikabe kyakwatiliilue na mapumpu ana ni bya kwimikuamo bina.
EXO 27:17 Mapumpu onse a musolo mumbali monse akabe ni mikobelo ya mutofue, bikobo byonse ni byo bikabe bya mutofue, ni bya kwimikuamo bikabe byali bya mukuba.
EXO 27:18 Ozo musolo ukabe waleepele metre 50, ni mu bukata ukabe watanine metre 25 kubalua lubali. Luuba lwa musolo lukabe lwaatuulukile metre ibili ni kitika. Lukabe lwali lwa kitani kiweme kipyatilue, ni bya kwimikuamo bikabe bya mukuba.
EXO 27:19 Bibombelo byonse bya kubombiiwa ku Tabernakulo mu miilo ilekenkeene, pamo ni bikili byonse bya ku Tabernakulo ni ku luuba lwa musolo, bikabe bya mukuba.
EXO 27:20 “Ukabaane Baizraeli bakabe bakuleetela mafuta aweme a mizeituni pa mulandu wa kisue, evi matala akabe aleemene musita onse.
EXO 27:21 Azo matala ali mu Tabernakulo kunze ya kipempe kili ku ntanzi ya Lisanduku lya Kipingo, Haruni ni baana bakue balalume i baakaba ba-awamia evi akabe aleemene ntanzi yane kutula kyungulo mpaka lukeelekeele. Leli i lifunde lya muyayaya ku nvyalo ya ku ntanzi.
EXO 28:1 “Ale pa Baizraeli nsoobwelepo Haruni mukuluubo pamo ni baana bakue balalume, Nadabu, ni Abihu, ni Eliazari pamo ni Itamari, kuti ban'mombele mwilo wa bukitambua.
EXO 28:2 Ukamuzukiizie Haruni mukuluubo ngubo ya kuti ikabe yamuleeteele bulumba ni bukindami.
EXO 28:3 Ukabaane bantu bonse bakengeele mu kubomba, balia banaapeele mutima wa mulangue, bakakite ngubo yakua Haruni kuti ikazuukiiwe, evi akabe wan'mombela mwilo wa bukitambua.
EXO 28:4 Ngubo i baakakita ni ezi: Mufuko wa pa nkulo, ni efodi, ni kazula, ni nkanzu, ni kitambala pamo ni musipi. Bakamukitile Haruni mukuluubo ngubo izuuke, wene pamo ni baana bakue, evi bakabe bavwala musita wa kubomba mwilo wa bukitambua.
EXO 28:5 Bakengezi ba ozo mwilo bakabombie oro ni nyunzi ya mukumino wa lyulu, ni ya mukumino wa bulumbi, ni ya mukumino wa kasi pamo ni kitani kiweme.
EXO 28:6 “Bakengezi ba ozo mwilo bakakite efodi na oro, na nyunzi ya mukumino wa lyulu, ni ya mukumino wa bulumbi, ni ya mukumino wa kasi pamo ni kitani kiweme.
EXO 28:7 Ezio efodi ikabe yali na mikobelo ibili ya kupisia pa nkombe kuti ikabe yalundaniizie kya ku ntanzi ni kya ku musana.
EXO 28:8 Ni musipi upalile ukabe wakitilue bwino na bintu bikitiilueko efodi, kuti ukabe wali kimo nakio, ni o ukakitue na nyunzi ya mukumino wa oro, ni wa nyunzi ya mukumino wa lyulu, ni ya mukumino wa bulumbi, ni ya mukumino wa kasi pamo ni ya kitani kiweme kipyatilue.
EXO 28:9 Bakabuule mabue abili a oniksi ni kulembapo meena lyanondo ni abili a bena Izraeli.
EXO 28:10 Meena mutanda pa libue limo, ni ange mutanda pa linge libue kukonkana ni mubaavyaliilue.
EXO 28:11 Ozo mwilo ukabombue na muntu amanine kulemba pa mabue nga evelia vilivyalembua kamanino, akalembe meena a bena Izraeli pa mabue abili ni ku-abiika mu tukwatililo twa oro.
EXO 28:12 Ozo muntu akabililile azo mabue abili peulu mikobelo ipitile pa nkombe yafumine ku efodi, pakuti akabe aimaniineko mikowa lyanondo ni ibili ya Baizraeli. Evi Haruni i vi-aliwaakaba watwama meena abo pa nkombe ntanzi yakua Yawe, pakuti Yawe akabe wabalanguluka.
EXO 28:13 Toto tukwatililo twa azo mabue tukabe twa oro.
EXO 28:14 Akakite ni mikufu ibili ya oro isambikile. Akakite yali nga nkamba ipyatilue, kusyali kukobeka ku toto tukwatililo.
EXO 28:15 “Mukengezi wa ozo mwilo akamukitile Haruni mufuko wa pa nkulo wa kumaninako bupinguzi bwakua Leza, akakite na nyunzi yaakitiilueko efodi: Na nyunzi ya mukumino wa oro, ni ya mukumino wa lyulu, ni ya mukumino wa bulumbi, ni ya mukumino wa kasi pamo ni ya kitani kiweme kipyatilue. Evi i vyakuti akakite.
EXO 28:16 Ozo mufuko ukapimpuemo limo walingheene monse monse. Mu kuleepa ni mu bukata ukabe wali na santimetre 25.
EXO 28:17 Akakiteko milongo ina ya tukwatilililo twa kubiikamo mabue a mutengo ukata. Mu mulongo wa mambo akabiikemo libue lya akiki, ni lya topazi, pamo ni lya emerodi.
EXO 28:18 Mu mulongo wa bubili akabiikemo libue lya zumaridi, ni lya yakuti lya mukumino wa lyulu, ni lya almasi.
EXO 28:19 Mu mulongo wa butatu akabiikemo libue lya yakinto, ni lya agata, ni lya ametisti.
EXO 28:20 Mu mulongo wa buna akabiikemo libue lya berile, ni lya oniksi, ni lya yaspi. Azo mabue onse akabe akwatiliilue na tukwatililo twa oro.
EXO 28:21 Azo mabue akabe ali lyanondo ni abili, kubalua libue pakalembue liina limo lya pa meena a bena Izraeli. Kubalua libue limo pakalembue liina limo liimaniineko mukowa umo.
EXO 28:22 Ku ozo mufuko wa pa nkulo ukakitileko mikufu ya oro isambikile ili nga nkamba ipyatilue.
EXO 28:23 Kabili akakite tuzele tubili twa oro ni kutubiika ku tufuli tubili twa ozo mufuko wa pa nkulo.
EXO 28:24 Akakobeke mikufu ibili ya oro mu tuzele tubili tuli ku tufuli twa mufuko wa pa nkulo.
EXO 28:25 Mpeleezio inge ibili ya ezio mikufu akakobeke ku tukobo tubili twa oro ni ku-ilundania ku elia mikobelo ya pa nkombe ya ku efodi lya pa ntanzi.
EXO 28:26 Kabili akakite tuzele tubili twa oro ni kutubiika ku tufuli tubili twa ku mufuko wa pa nkulo kwinsina lya mukati pepi ni efodi.
EXO 28:27 Kabili akakite ni tunge tuzele tubili twa oro ni kutukobeka lya kwinsina mikobelo ya pa nkombe lya ku ntanzi ya efodi pepi ni kilundilo peulu musipi usukilue.
EXO 28:28 Tuzele twa ku mufuko wa pa nkulo tukalundaniwe ku tuzele twa ku efodi na mikobelo ya nyunzi ya mukumino wa lyulu, evi mufuko ukabe wali lya peulu musipi wa efodi usukilue bwino, ni ozo mufuko wa pa nkulo tekuti ukabe walekenkana na efodi.
EXO 28:29 “Evi Haruni i vi-aliwaakaba watwama meena a Baizraeli pa mufuko wa pa nkulo wa bupinguzi, pa mutima wakue musita u-aliwaakaba waingila mu kifuka kizuuke ntanzi yakua Yawe, pakuti Yawe akabe wabalanguluka.
EXO 28:30 Mu ozo mufuko wa pa nkulo wa bupinguzi, mukabiikue Urimu ni Tumimu, ni byo byaakaba peulu mutima wakua Haruni musita u-aliwaakaba waingila mu kifuka kizuuke ntanzi yakua Yawe. Evi Haruni i vi-aliwaakaba ni buvinde bwa kumana mutoneene Leza pa Baizraeli.
EXO 28:31 “Akakite kazula ka kuvwalilapo efodi ka mukumino wa lyulu.
EXO 28:32 Ni ko kakabe ni lipulo pa bukata lya kupuziamo mutue, kakabe kasukilue bwino mumbali lipulo, evi tekuti kakazabuke.
EXO 28:33 Kwinsina kazula konse bakakakeko komamanga isukilueko nyunzi ya mukumino wa lyulu, ni wa bulumbi, ni wa kasi. Bakabiike ni ndibu ya oro yatolokele komamanga imo imo yazyungulukile kwinsina konse. Evio i vyakuti bakabiike ndibu ya oro yatolokele komamanga imo imo yazyungulukile kwinsina konse.
EXO 28:35 Haruni waakaba wavwala kako kazula musita wa kubomba mwilo wa bukitambua, ni lizui lya ndibu lyaakaba lyaunvwika pa kwingila kwakue mu kifuka kizuuke ntanzi yakua Yawe, ni musita wakufuma akeeza kufua.
EXO 28:36 “Bakakite kalilata ka oro isambikile ni kulembapo nangue, ‘Muzuuke wakua Yawe.’ Ukalembe nga vilivyalembua kamanino.
EXO 28:37 Kako kalilata ka oro bakakakeko mikobelo ya mukumino wa lyulu, evi Haruni akabe wakavwala pa mpala peulu kitambala.
EXO 28:38 Nga Haruni vi-aliwaakaba wakavwala pa mpala lyonse, i vi-aliwaakaba watwama bubi bwa Baizraeli bubaakaba bakita pa kungelela ngelelo yabo ya bintu bizuuke, evi bakabe baitabilua ntanzi yakua Yawe.
EXO 28:39 “Bakamukitile Haruni kazula ka kitani kiweme, ni kitambala kya kitani kiweme, pamo ni musipi ufwaniziiziwe bwino.
EXO 28:40 “Baana balalume bena Haruni ni bo ukabakitile nkanzu ni misipi pamo ni bisote, bya kubaleeteela bulumba ni bukindami.
EXO 28:41 Ni we Musa, ukamuvwike mukuluubo Haruni bivwalo byakue, ni baana bakue bivwalo byabo, kabili ukabasube mafuta ni kubazuukia evi bakabe ban'mombela mwilo wa bukitambua.
EXO 28:42 Bakabakitile tuputula twa kitani evi tukabe twakupile mibili yabo, toto tuputula tukabe twafumine mu kitungu mpaka mu matanta.
EXO 28:43 Haruni ni baana bakue balalume bakabe bavwala toto tuputula musita wa kwingila mu Tabernakulo, ao musita wakusela ku kitale ku kwelela ngelelo mu kifuka kizuuke, evi tekuti bakabe balangisia mibili yabo bakeeza kufua. Ozu muzilo waakaba wali wa muyayaya kuli wene ni ku nvyalo yakue.”
EXO 29:1 “Pa kumuzuukia Haruni ni baana bakue balalume ni kubabiika pa mwilo wa bukitambua kuti ban'mombele, ukabuule nghombe ndume umo musoka ni mpanga ibili isilemeene.
EXO 29:2 Kabili ukabuule bunga bunekekele bwa nghano busiliko ntutumusi ni kukitamo mukate, ni mikate isonsele isanziiziweko mafuta, pamo ni mikate iniini yondele.
EXO 29:3 Ukabiike ezio mikate mu kipanda kimo ni kundeetela luwaakaba waelela nghombe ndume, ni mpanga ibili.
EXO 29:4 “Ukamuleete Haruni ni baana bakue balalume pa mulyango wa Tabernakulo ni kubasamba na menda mubeeleele lifunde.
EXO 29:5 Ukabuule nkanzu, ni kazula ni efodi pamo ni mufuko wa pa nkulo, kusyali kumuvwika Haruni pantu ezio i ngubo ya bukitambua, mane ukamukake ni musipi usukilue bwino wa efodi.
EXO 29:6 Ukamuvwike kitambala ku mutue wakue ni kukakilila kalilata kazuuke ka oro peulu kitambala.
EXO 29:7 Mane ukabuule mafuta azuuke ni kumwitilila pa mutue kuti ukamuzuukie.
EXO 29:8 “Ukabaleete baana balalume bena Haruni ni kubavwika kubalua muntu nkanzu yakue.
EXO 29:9 Ukabakake ni misipi mu bitungu, ni kubavwika bisote ku mitue. Evi i vyakuti ukamuzuukie Haruni ni baana bakue balalume kuti bakabe babomba mwilo wa bukitambua muyayaya.
EXO 29:10 “Ukaleete nghombe ndume ku ntanzi ya Tabernakulo, mane Haruni pamo ni baana bakue bakabiike maboko abo pa mutue wa nghombe ndume.
EXO 29:11 Ukamusinze ozo nghombe ndume ntanzi yakua Yawe pa mulyango wa Tabernakulo.
EXO 29:12 Ukatubie munue obe mu mulopa ni kusuba ku mbao ituulukile nga masengo ku kitale, ni mulopa wakasyalamo ukawitile kwinsina kitale.
EXO 29:13 Ukabuule mafuta onse ni bya munda, ni tuete twa ku mabu, ni nfio yakue ibili pamo ni mafuta aliko ni kubizizia peulu kitale kuba ngelelo.
EXO 29:14 Inzi minofu ya nghombe ndume, ni kipapa pamo ni bya munda, ukabizizie kunze ya mitanda. Ezi i ngelelo ya kufumia bibalo bya babitambua.
EXO 29:15 “Pa elia mpanga ibili ukabuulepo umo, ni kumwana Haruni ni baana bakue balalume bakabiike maboko abo pa mutue wa ozo mpanga.
EXO 29:16 Ukasinze mpanga, ni kubuula mulopa wakue ni kusansila ku kitale mumbali yonse.
EXO 29:17 Ozo mpanga ukamuteetanie bipusa bipusa, ukasambe bya munda ni myendo yakue, mane ukabibiike byonse pa kitale pamo ni mutue.
EXO 29:18 Ukazizie mpanga walingi pa kitale. Ozo mpanga akabe wali ngelelo ya kuzizia ya bunu buweme, bupe bwa kuzizia bupeelue Yawe.
EXO 29:19 “Ukabuule olia mpanga wa bubili, ni kumwana Haruni ni baana bakue balalume bakabiike maboko abo pa mutue wa ozo mpanga.
EXO 29:20 Ukamusinze ozo mpanga, ukatubie munue obe mu mulopa ni ku-usuba ku kalebelebe ka ku kutui kwa kulio kwakua Haruni ni ku matui a kulio a baana bakue balalume, ni ku binkumua byabo bya ku maboko a kulio pamo ni ku bikondo bikata bya ku makasa abo a kulio. Ozo mulopa waakasyalamo ukausansile ku kitale mumbali yonse.
EXO 29:21 Ukabuule mulopa wa pa kitale pamo ni mafuta azuuke, ukamusansile Haruni pamo ni baana bakue, kabili ukasansile ni ku ngubo yabo yonse, evi Haruni ni baana bakue balalume bakabe bali bazuuke pamo ni ngubo yabo yonse.
EXO 29:22 “Ku ozo mpanga ukabuuleko mafuta, ni mukila uli ni mafuta, ni mafuta akupilile bya munda, ni tuete twa ku mabu, ni nfio ibili pamo ni mafuta akupileko, ni mwendo wa kulio. Ukakite evio pantu ni mpanga wa ngelelo palua kubiikua kwa babitambua pa miilo izuuke.
EXO 29:23 Mu kipanda kya mikate isiliko ntutumusi kili ku ntanzi yakua Yawe ukabuulemo mukate umo wa munzyungulu, ni mukate umo utikeeme usanziiziweko mafuta a mizeituni, ni mukate umo umaatikile.
EXO 29:24 Bebi byonse ukabibiike mu minue yakua Haruni, ni mu minue ya baana bakue balalume, ni bo bakabitensie ntanzi yakua Yawe, kuba bupe bwa kutensia.
EXO 29:25 Kusyali ukabibuule mu minue yabo ni kubizizia pa kitale pamo ni ngelelo ya kuzizia kuti ikabe bunu bumuwamiine Yawe, bupe bwa kuzizia bupeelue Yawe.
EXO 29:26 “Ukabuule kabambo ka mpanga wa ngelelo palua kubiikua kwakua Haruni pa mwilo wa bukitambua, evi ukantensiizie ne Yawe. Ni kaka kabambo kaakaba kobe.
EXO 29:27 “Ukazuukie kabambo ka ngelelo ya kutensia, ni mwendo wa ngelelo ya kulendulua, bebio bifumiiziwe ku mpanga asaakwilue ku mwilo uzuuke. Kabambo kaakaba kakua Haruni, ni mwendo waakaba wa baana bakue babitambua.
EXO 29:28 Evi Baizraeli i vibaakaba bakitila Haruni ni baana bakue balalume babitambua. Bobo i bwaakaba bupe bwa bupwanikizi bubaakaba ban'mpeela ne Yawe. Ozu i waakaba wali muzilo wa muyayaya.
EXO 29:29 “Bivwalo bizuuke byakua Haruni, byaakaba byavwalua na kubalua muntu wa mu luvyalo lwakue waakaba wapyana pa ozo mwilo wa bukitambua, pa kyamba kya kufua kwakua Haruni.
EXO 29:30 Kitambua mwina Haruni waakamupyana Haruni pa kyamba kya kufua kwakue, waakakita nsiku kilooba wavwele ezio ngubo, mane pa kyamba akengile mu Tabernakulo kuti abombele mu kifuka kizuuke.
EXO 29:31 “Ukabuule bipusa bya ozo mpanga wa ngelelo palua kubiikua kwa babitambua pa miilo izuuke, ni kubifulumiizia mu musolo wa kifuka kizuuke.
EXO 29:32 Haruni ni baana bakue balalume bakabe balia bebio bipusa bya mpanga pamo ni mukate uli mu kipanda kili pa nghingililo ya Tabernakulo.
EXO 29:33 Bakabe balia belia bintu bibaapwanikiziiziweko pa kubabiika pa mwilo wa bukitambua ni kubazuukia, inzi muntu unge tekuti akalieko pantu bebio bilio bizuukile.
EXO 29:34 Ni bilio byeleelue palua kubiikua pa mwilo wa bukitambua kine byasyalapo mpaka lukeelekeele, tekuti bikaliiwe, inzi bikaziziiwe pantu bebio bilio bizuukile.
EXO 29:35 “Evi i vyakuti ukakitile Haruni ni baana bakue balalume kukonkana ni byonse binakikwana. Ozo mwilo wa kubabiika pa bukitambua ukakitue mu nsiku kilooba.
EXO 29:36 Kubalua busiku ukabe wafumia nghombe ndume wa bupe bwa kibalo pa mulandu wa bupwanikizi. Mu kukita evio waakaba wasamba kitale. Ukabe wasubako mafuta ni kwizuukia musita uwaakaba wabakitila bupwanikizi.
EXO 29:37 Mu nsiku kilooba kubalua busiku ukabe wakita bupwanikizi pa mulandu wa kitale, ni kitale kyaakaba kyazuukiisie. Kubalua kintu kyaakaba kyakumia ku kitale kyaakaba kyazuuka.”
EXO 29:38 “Ngelelo iwaakaba waelela pa kitale kubalua busiku ni ezi: Misoka ibili ya mpanga ya mwaka umo.
EXO 29:39 Ukabe waelela musoka umo lukeelekeele, ni unge kyungulo.
EXO 29:40 Pa elia ngelelo ya mambo ya musoka wa mpanga, ukabe waelela pamo ni kamo ka pa lyanondo ka bunga bunekekele butwilue bwino bwasanziiziwemo litre imo ni kitika ya mafuta a mizeituni, ni litre imo ni kitika ya divai kuti ikabe ngelelo ya kumina.
EXO 29:41 Ni pa musoka wa bubili wa mpanga wa ngelelo ya kyungulo ukabe wakita nga muwaakaba wakitila ngelelo ya mambo ya lukeelekeele, kuba bunu buweme, bupe bwa kuzizia bupeelue Yawe.
EXO 29:42 Evi i vyakuti ukabe wakita wewe pamo ni nvyalo ya ku ntanzi. Mwaakaba mwaelela ngelelo ya kuzizia pa mulyango wa Tabernakulo ntanzi yakua Yawe, papo panaakaba nasaakaana nobe ni kulanda nobe.
EXO 29:43 Papo i panaakaba nasaakaana na Baizraeli, ni pa ezio nkendo paakaba pazukiiwa na bulumba bwane.
EXO 29:44 Tabernakulo ni kitale naakabizuukia, kabili naakazuukia Haruni ni baana bakue balalume pakuti bakabe ban'mombela mwilo wa bukitambua.
EXO 29:45 Papo i panaakaba naikeele pamo ni Baizraeli, kabili naakaba Leza wabo.
EXO 29:46 Ni bo baakamana nangue nene ndi Yawe Leza wabo waabafumiizie mu kyalo kya Misri, evi ngie nali pamo nabo. Nene i Yawe Leza wabo.
EXO 30:1 “Ukakite kitale kya kimuti kya kasiiya kya kufunkiiziapo bubaani.
EXO 30:2 Ukakite kyalingheene monse monse, kikabe kyali na santimetre 50 mu kuleepa ni mu bukata. Mu kutuuluka kikabe kyali metre imo. Bintu bituulukile nga masengo bikabe byalundeene na kitale.
EXO 30:3 Peulu ni mumbali monse pamo ni ku mbao ituulukile nga masengo, ni ku mikonzo yonse ina ukakupeko oro isambikile, mane kabili peulu lya mumbali ukazyungulusiamo mukovio wa oro.
EXO 30:4 Ukakite bikobo bibili ku bwala bumo bwa kitale, ni binge bibili ku bunge bwala mwinsina olia mukovio wa oro. Mu bebio bikobo i mwakwingizia mipingo ya kupingilako.
EXO 30:5 Ezio mipingo ukakite ya kimuti kya kasiiya, kabili ukakupeko oro.
EXO 30:6 Kekio kitale ukakibiike pa ntanzi ya kipempe kili pepi ni Lisanduku lya Kipingo lili ni ntupiko, papo panaakaba nasaakaana nobe.
EXO 30:7 Kubalua busiku lukeelekeele, Haruni pa-akaba wawamia matala, akabe wafunkia bubaani buweme pa kekio kitale.
EXO 30:8 Ni musita wa kyungulo, Haruni pa-akaba waleemia matala, akabe wafunkia bubaani kuti bukabe ngelelo ya muyayaya ntanzi yakua Yawe ku nvyalo ya ku ntanzi.
EXO 30:9 Pa kekio kitale tekuli kufunkiapo bubaani busipalile, ao kwelelapo ngelelo ya kuziziiwa, ao bupe bwa bunga, ao kwitililapo bupe bwa bya kumina.
EXO 30:10 Limo mu mwaka, Haruni waakaba wakita bupwanikizi pa kitale pa elia mbao ituulukile nga masengo. Bobu bupwanikizi bwa limo mu mwaka, bupalile bukabe bwakitua na mulopa wa ngelelo ya bupwakizi pa mulandu wa bibalo bya nvyalo ya ku ntanzi, pantu keki ni kitale kizuukiisie kuli Yawe.”
EXO 30:11 Kabili Yawe waamwanine Musa nangue,
EXO 30:12 “Paukaba wapenda Baizraeli, kubalua mwalalume apalile akabe wamupeela Yawe nfuto pa mulandu wa bukose bwakue, evi kimina tekuti kikabe kyali pakati kabo musita wakubapenda.
EXO 30:13 Kubalua mwalalume waakaba wapendua, apalile akabe wafumia kipendo kya grama isaano ya mutofue kibiikilue mu kifuka kizuuke. Bobu bwaakaba bwali bupe bwakua Yawe.
EXO 30:14 Kubalua muntu wa mu balia baakaba bapendua ali na myaka 20 ni kukilapo, i waakaba wafumia bobo bupe bwakua Yawe.
EXO 30:15 Anzia aya wali munonsi ao mupabi, apalile kufumia kipendo kimonke kya grama isaano ya mutofue kibiikilue mu kifuka kizuuke lu-aliwamufumiizia Yawe bupe bwa bupwanikizi pa mulandu wa bukose bwakue.
EXO 30:16 Wewe waakapokelela bobo bupe bwa bupwanikizi kufuma ku Baizraeli ni kububombia kuwamiiziako Tabernakulo, evi bukabe bwali bupe bwa malanguluzi pa mulandu wa Baizraeli ntanzi yakua Yawe. Ezio i nfuto ya bukose bwenu.”
EXO 30:17 Yawe waamwanine Musa nangue,
EXO 30:18 “Ukakite musambilo wa mukuba wa kusambilamo ni kya kuteekapo kya mukuba. Ukauteeke pa bukata bwa kitale ni Tabernakulo, mane ukabiikemo menda.
EXO 30:19 Haruni ni baana bakue balalume bakabe basambamo ku maboko ni ku makasa abo.
EXO 30:20 Bapalile bakabe basamba ntanzi ya kwingila mu Tabernakulo, ni musita ubaakaba bapalama ku kitale kuti babombe mwilo wa kumufumiizia Yawe bupe bwa kuzizia.
EXO 30:21 Ni pakako, Haruni ni baana bakue balalume baakaba basamba ku maboko ni ku makasa abo bakeeza kufua. Ozu waakaba wali muzilo wa muyayaya kuli Haruni ni baana bakue balalume pamo ni ku nvyalo ya ku ntanzi.”
EXO 30:22 Yawe waamwanine Musa nangue,
EXO 30:23 “Ukabuule bintu bili ni bunu buweme: Manemane a menda kilo isaano, ni mudalasini ununkiile bwino kilo ibili ni kitika, ni kane inunkiile bwino kilo ibili ni kitika,
EXO 30:24 ni kida kilo isaano kukonkana ni kipendo kya mu kifuka kizuuke, pamo ni mafuta a mizeituni litre ina.
EXO 30:25 Ukakite mafuta azuuke. Azo mafuta akakitue na bantu bamanine kusanzia bebio bintu, akabe ali mafuta akuzuukiiziako.
EXO 30:26 Kabili ukasube mafuta ku Tabernakulo pamo ni ku Lisanduku lya Kipingo,
EXO 30:27 ni ku meza pamo ni ku bibombelo byakue byonse, ku kinara pamo ni ku bibombelo byakue byonse, ku kitale kya kufunkiiziapo bubaani,
EXO 30:28 ku kitale kya kuziziiziapo ngelelo pamo ni ku bibombelo byakue byonse, ku musambilo pamo ni ku kya kuteekapo.
EXO 30:29 Ukabizuukie kuti bikabe byazuukiisie. Kubalua kintu kyaakaba kyakumia bebio bibombelo kyaakaba kyazuuka.
EXO 30:30 Haruni ni baana bakue balalume ukabasube mafuta azuuke ni kubazuukia kuti bakabe ban'mombela mwilo wa bukitambua.
EXO 30:31 Ukabaane Baizraeli nangue, ‘Aza i akaba mafuta ane azuuke akaba asubua bantu pa mwilo wa bukitambua mu nvyalo ya ku ntanzi.
EXO 30:32 Aza mafuta tekuti akabe asubua pa mubili wa muntu asili kitambua, kabili tekuti ukabe wakita mafuta a ozu musango na bintu byaakakitiluako aza mafuta, pantu azuukile. Kabili aakaba ali azuuke lyonse kuli mwemue.
EXO 30:33 Kubalua muntu aliwasanzia mafuta nga aza ni kusuba muntu asili kitambua, waakafumiiwa pakati ka Baizraeli.’”
EXO 30:34 Kabili Yawe waamwanine Musa nangue, “Buula bintu bya bunu buweme: Bya butonvu bwa natafi, ni bwa shekeleti, ni bwa kelbena, ni bwa bubaani buweme. Bebi bintu byonse bikabe mu tulingo twalingheene.
EXO 30:35 Ku bebi i kuwaakakita bubaani bwa bunu buweme bukitilue na bantu bamanine kukita. Bobo bubaani bukabe bwalimo ni mukele pakuti bukabe bwasambikile ni buzuukile.
EXO 30:36 Ukapelepo bubaani buniini ukabubiike ntanzi ya Lisanduku lya Kipingo mu Tabernakulo pa nkendo inakaba nasaakaana nobe. Bwaakaba bwali bubaani buzuukiisie kuli wewe.
EXO 30:37 Kabili tekuti mukabe mwaikitila bubaani bwa ozu musango na bintu byaakakitiluako bobu bubaani, pantu bwaakaba bwali buzuuke kuli Yawe.
EXO 30:38 Kine kukabe muntu waakaikitila bubaani nga bobu kuti abubombie ku mubili wakue, waakafumiiwa pakati ka Baizraeli.”
EXO 31:1 Yawe waamwanine Musa nangue,
EXO 31:2 “Namusaakula Besaleli wa mu mukowa wakua Yuda, mwana mwalalume mwina Uri, mwinzikulu wakua Huri
EXO 31:3 ni kumwizuzia Mweo wane. Nakimupeela maano, ni mulangue, pamo ni kumana kubomba miilo ilekenkeene
EXO 31:4 kuti akite bintu bya maano mu kukita bintu bya oro, ni bya mutofue, pamo ni bya mukuba,
EXO 31:5 ni kukita mabue a kufwanizia, ni kubaza bimuti, pa mulandu wa kubomba miilo ilekenkeene.
EXO 31:6 Kabili unvua, nakimusaakula ni Aholiabu mwana mwalalume mwina Ahisamaki wa mu mukowa wakua Dani evi aye wamukwasia. Kabili ni bange bonse nakibapeela buvinde bwa kukita byonse binakikwana kukita:
EXO 31:7 Tabernakulo, ni Lisanduku lya Kipingo, ni ntupiko pamo ni bibombelo byonse bya mu Tabernakulo,
EXO 31:8 ni meza pamo ni bibombelo byakue, ni kinara kya oro isambikile ni bibombelo byakue byonse, pamo ni kitale kya bubaani,
EXO 31:9 ni kitale kya kuziziiziapo ngelelo ni bibombelo byakue, ni musambilo pamo ni kya kuteekapo,
EXO 31:10 ni ngubo isukilue bwino, ngubo izuuke yakua Haruni ni ya baana bakue balalume, ngubo ya kuvwala musita wa kubomba mwilo wa bukitambua,
EXO 31:11 ni mafuta azuuke, pamo ni bubaani bwa bunu buweme pa mulandu wa mu kifuka kizuuke. Bakakite bebio bintu byonse nga vinakikwana.”
EXO 31:12 Yawe waamwanine Musa nangue,
EXO 31:13 “Baane Baizraeli bakabe basunga busiku bwa Sabata yane, pantu i kalangi pakati kenu ni nene pamo ni nvyalo ya ku ntanzi, evi mukabe mwamanine nangue nene ndi Yawe aliwamizuukia.
EXO 31:14 Kansi mukabe mwasunga Sabata pantu ni izuuke. Kubalua muntu asikaba wasunga Sabata waakeepawa. Onse waakaba wabomba mwilo mu bobo busiku, waakafumiiwa pa Baizraeli.
EXO 31:15 Nsiku mutanda ya mu mulungu mwaakaba mwabombamo miilo. Inzi busiku bwa kilooba, bwene ni Sabata, busiku bwa kutuuzia kwine kwine, busiku buzuuke kuli Yawe. Onse wakabomba mu busiku bwa Sabata, waakeepawa.
EXO 31:16 Ni pakako, Baizraeli ni nvyalo ya ku ntanzi, bapalile kusunga bobu busiku bwa Sabata pantu i kipingo kya muyayaya.
EXO 31:17 Kaka i kalangi kaakabeelelela pakati ka Baizraeli ni nene, pantu ne Yawe naalengele myulu ni kyalo mu nsiku mutanda, inzi busiku bwa kilooba nsyaabombele, naatuuziizie.”
EXO 31:18 Yawe lu-aapwile kulanda na Musa ku Lupili lwa Sinai, waamupeele Musa bibazu bibili bya mabue byaali byalembeluepo mizilo na munue wakua Leza.
EXO 32:1 Bantu lubaamwene nangue Musa wakokola pasili kukooka kufuma ku lupili, baamukolonghaniine Haruni ni kumwana nangue, “Iza utukitile leza wakuti aye watutangiliile pantu ozu Musa wakitufumia mu kyalo kya Misri, tetumanine kyakimukitikila.”
EXO 32:2 Ni pakako, Haruni waabaanine evi, “Vuule ntimbi ya oro ku matui a bakazi benu, ni a baana benu balalume ni banakazi, mundeetele.”
EXO 32:3 Bantu bonse baavuulile ntimbi ya oro yaali ku matui abo ni kumutwalila Haruni.
EXO 32:4 Haruni waapokeleele ntimbi yabo ya oro, waisungulula ni kupongwela mu kintu kyaafumiizie mukisi wa nghombe musoka. Baizraeli baalandile evi, “We Izraeli, ozu i leza obe waakufumiizie mu kyalo kya Misri.”
EXO 32:5 Haruni lu-aamwene evio, waakuulile kitale ntanzi ya mukisi wa nghombe musoka. Waalandile nangue, “Lukeele kwakaba nsikunkulu yakua Yawe.”
EXO 32:6 Lukeele lwakue baabuukile paakili lukeelekeele baya kwelela ngelelo ya kuzizia ni kutwala bupe bwa bupwanikizi. Bantu baikeele pansi kuti balie ni kumina. Pa kyamba, baabuukile ni kutendeka kukinda.
EXO 32:7 Yawe waamwanine Musa nangue, “Lenga ukooke pantu bantu bobe baawafumiizie mu kyalo kya Misri babala kibalo kikata.
EXO 32:8 Baba bantu baluba kale pantu balekela kukonka binaabaanine. Basungulula oro ni kwikitila mukisi wa nghombe musoka. Baupupa pamo ni ku-uwelela ngelelo balimukulanda nangue, ‘We Izraeli ozu i leza obe waakufumiizie mu kyalo kya Misri.’
EXO 32:9 Yawe waamwanine Musa nangue namona baba bantu vibafinine mitima.
EXO 32:10 Ni pakako, tekunkania kubakanda ni kubalovia pantu nabafiitilua. Inzi wewe pamo ni nvyalo yobe ndikumikita kuba mutundu ukata.”
EXO 32:11 Inzi Musa waamupaapeete Yawe Leza wakue wamwipuzia nangue, “We Yawe, ni kiki kyalengia kufiitilua bantu bobe bawaafumiizie mu kyalo kya Misri na buvinde ni maka obe?
EXO 32:12 Kine wakita evi, Bamisri bakaba kulanda nangue Leza waabafumiizie Baizraeli mu Misri na mapange abi a kubeepaila mu mpili ni kubalovia pa kyalo. We Yawe, fuukia kipuki kyobe, tekukitila bantu bobe bibiipile.
EXO 32:13 Languluka babombi bobe, Abrahamu ni Izaaki pamo ni Yakobo, balia baawalaile we mwine nangue waakalengia nvyalo yabo ikasanduluke ni kuvula nga ntanda ya mu lyulu, ni kubapeela kyalo kiwaabalaile kuti baakakipyane muyayaya.”
EXO 32:14 Ni pakako, Yawe wa-alulwile mapange abi a mutima wakue palua bubi bu-aalandile kukitila bantu bakue.
EXO 32:15 Musa waapilibukile ni kubamba kukooka ku lupili watweme bibazu bibili bya mabue byaali byalembeluepo mizilo kumbali ibili kubalua kibazu.
EXO 32:16 Leza i waakitile bebio bibazu, ni azo malembo aali alembelue na mwine Leza.
EXO 32:17 Yoshua lu-aunvwile mazui a bantu baali basaamiizie, waamwanine Musa nangue, “Koku ku mitanda kuli nsungu ya bului.”
EXO 32:18 Musa waalandile evi, “Ezi nsungu te ya bwanzio bwa bului, ao ya kwanziwa ku bului, inzi ni nsungu ya bantu balimukwimba nghimbo ya nsansa.”
EXO 32:19 Lubaapaleeme ku mitanda, Musa waamwene mukisi wa nghombe musoka ni bantu balimukukinda. Musa waafiitilue ni kupooza bibazu bya mabue pansi mwinsina lupili, ni byo byatobeka.
EXO 32:20 Pa kyamba waabuulile ozo mukisi wa nghombe musoka ubaakitile, wauzizia mu mulilo, waupela mpaka wa-aluka nga lufunko. Waapuupiile lolo lufunko mu menda ni kubapatikizia Baizraeli bamine.
EXO 32:21 Musa waamwanine Haruni nangue, “Ewe, baba bantu bakikukitaki pakuti ubalengie kukita kibalo kyabiipile evi?”
EXO 32:22 Haruni wa-asukile nangue, “We tawelenzi, tekufiitua. Umanine bwino nangue baba bantu bali ni kasonto ka kukita bibiipile.
EXO 32:23 Baizile kunghana evi, ‘Iza utukitile leza wakuti aye watutangiliile pantu ozu Musa wakitufumia mu kyalo kya Misri, tetumanine kyakimukitikila.’
EXO 32:24 Nene i lunakibaana nangue onse ali ni ntimbi ya oro ku matui avuule andeetele, kupwako, ban'mpeela, ni ne naipoza mu mulilo, penka papo mukisi wa nghombe musoka wamoneka.”
EXO 32:25 Musa lu-aamwene nangue Haruni waabalekeleele kukita mubatoneene, ni kubalengia kuba ba mpuni ku balwani babo,
EXO 32:26 waile kwimana pa nghingililo ya mitanda walanda evi, “Onse amutonene Yawe eze kuli nene.” Balawi bonse baamukolongheene Musa.
EXO 32:27 Musa i lu-aabaanine nangue, “Yawe Leza wakua Izraeli walanda nangue kubalua muntu pakati kenu atwame kipanga kyakue ni kuya kupita mu mitanda waipaya wa kwakue, ni kibuza wakue pamo ni onse u-apalameene nakue.”
EXO 32:28 Balawi baakitile muba-aniinue na Musa. Bobo busiku baipaile bantu mu pepi 3,000.
EXO 32:29 Musa waabaanine Balawi nangue, “Lelo mwaizuukia mwe bene pantu temwakituntumbila kwipaya baana benu ni ba kwenu. Leza amipaale.”
EXO 32:30 Lukeele lwakue Musa waabaanine Baizraeli nangue, “Mwakibala kibalo kikata. Inzi ndikuya paakale ku lupili kuli Yawe ngie n'mipaapaatile, pange kuti wamyeleela kibalo kyenu.”
EXO 32:31 Musa lu-aile kuli Yawe, waalandile evi, “Ee, kisinka baba bantu bakibala kibalo kikata. Baakiikitila leza akitilue na oro.
EXO 32:32 Ni pakako, nakupaapaata weleele kibalo kyabo. Inzi kine wakaana, vuwa liina lyane liwaalembele mu kitabu kyobe kya bukose.”
EXO 32:33 Yawe waamwanine Musa nangue, “Onse wakinduvia i unakaba kuvuwila liina lyakue mu kitabu kyane kya bukose.
EXO 32:34 Ale endo ulombole Baizraeli ubatwale pa nkendo inakikwana, uye watangiliilue na malaika wane. Inzi musita paukaba kukumana, nakaba kubakanda pa mulandu wa kibalo kyabo.”
EXO 32:35 Yawe i lu-aakandile babo bantu na kimina kikata kya malwele pantu baamwanine Haruni abakitile mukisi wa nghombe musoka.
EXO 33:1 Yawe waamwanine Musa nangue, “Ale fuma pano, wewe ni bantu bawaafumizie mu kyalo kya Misri, uye nabo mu kyalo kinalaile kupeela Abrahamu, ni Izaaki pamo ni Yakobo lunaalandile nangue keki i kyalo kinaakapeela nvyalo yobe.
EXO 33:2 Naakatuma malaika wakuti akabe wamitangiliile, kabili naakakumba Bakanaani, ni Ba-amori, ni Bahiti, ni Baperizi, ni Bahivi pamo ni Bayebusi.
EXO 33:3 Mwakaba kwingila mu kyalo kiizuzimo mabeele ni kapelo, inzi nene nsikaba kuya pamo nenu nkeeza kumiloviizia mu nzila pantu muli babisanguka ni bafinine mitima.”
EXO 33:4 Bantu lubaunvwile ezio mpunda ibi, baalilile. Ni pakako, baavuulile bifwanizio byabo.
EXO 33:5 Pantu Yawe waali wamwanine Musa abaane Baizraeli nangue, “Mwemue muli bantu bafinine mitima. Kine naezia kuya nenu, anzia kine ni kamusita kaniini, ndikumilovia. Kansi vuule bifwanizio byenu, evi n'mone vindikukita.”
EXO 33:6 Ni pakako, kutula musita ubaafumine pa lupili lwa Horebu, Baizraeli te baavwele kabili bifwanizio byabo.
EXO 33:7 Musa waali ni mibeele ya kutwama liema ni kuliimika kunze, kule ni mitanda, ni lyo lyaali lyakuutua liema lya kusaakaaninamo. Kubalua muntu waali ni ka kumwipuzia Yawe, waali wafuma mu mitanda ni kuya mu liema lya kusaakaaninamo kunze ya mitanda.
EXO 33:8 Musa lu-aali wafuma ni kuya ku lelio liema, kubalua muntu waali waimana mu mulyango wa ku mutanda wakue wakenteleele mpaka musita u-alikwingila mu liema.
EXO 33:9 Musa lu-aaliwaingila mu liema, lipumpu lya lilezi lyaali lyakooka ni kwimana pa mulyango wa liema, Yawe lu-aali walanzyania ni Musa.
EXO 33:10 Bantu bonse lubaali bamona lipumpu lya lilezi lyaimana pa mulyango wa liema, kubalua muntu waali waimana ni kupupa pa mulyango wa mutanda wakue.
EXO 33:11 Yawe waali walanda bakenteene ni Musa nga muntu alimukulanzyania na kibuza wakue. Pa kyamba, Musa waali wafuma ni kubwelela ku mitanda. Inzi mulumendo Yoshua, mwana mwina Nuni, mubombi wakua Musa, taali wafuma mu liema.
EXO 33:12 Musa waamwanine Yawe nangue, “Unvua, wewe wakilanda evi, ‘Fumia baba bantu,’ inzi tewakinghana kine nani unakaba kuya nakue. Wakilanda sie nangue, ‘Nkumanine mu liina lyobe, ni evi nkwitabiile.’
EXO 33:13 Kansi evi kine ungitabiile, nsambilizie nzila yobe pakuti nkumane, ni kwitabilua ntanzi yobe. Nakulomba wizukile nangue ezi ntundu i bantu bobe.”
EXO 33:14 Yawe waamwasukile evi, “Nakaba kuya pamo nobe ni kukupeela kutuuzia. Kubalua kantu kaakaba ka kuwamiine”
EXO 33:15 Musa waamwanine evi, “Kine teukaba kuya pamo ni fwefue, tekuti ukabe kutufumia pano.
EXO 33:16 Ale bantu kuti bamana syani nangue ungitabiziizie nene ni bantu bobe kine teuya pamo ni fwefue? Kine waya pamo ni fwefue ulikutulengia kuba bantu bebeeleeleko pa bantu bonse bali pa kyalo.”
EXO 33:17 Yawe waamwanine Musa nangue, “Ndikukita evio vyenka muwalandila, pantu unghwamiine, kabili nkumanine mu liina lyobe.”
EXO 33:18 Musa waalandile evi, “Nakupaapaata unangisie bulumba bobe.”
EXO 33:19 Yawe waamwasukile evi, “Nakaba kupisia buwame bwane bonse pa ntanzi yobe ni kusimikila Liina lyane ‘Yawe’ pa ntanzi yobe. Kabili nakaba kulangisia buwame ku onse unaakatona kulangisia buwame, ni kweleela onse unaakatona kweleela.
EXO 33:20 Inzi wewe teuvinda kunkenta ku lukebu lwane, pantu muntu tavinda kumona lukebu lwane ni kusyala wakosele,
EXO 33:21 inzi wewe imana nane pa ozu mwalala.
EXO 33:22 Musita ulikupita bulumba bwane, ndikukuzindika mu mulale wa mwalala ni kupita nakuvimbiliile kuboko kwane.
EXO 33:23 Pa kyamba nasyapitile, ndikukuvimbula kuboko kwane, ni we ulikumonako sie musana wane, inzi lukebu lwane teulumona.”
EXO 34:1 Yawe waamwanine Musa nangue, “Ale kita bibazu bibili bya mabue nga belia bya mambo, evi nembepo twebo tumonke twaali pa belia bibazu bya mambo biwaatobele.
EXO 34:2 Iiteanie lukeele lukeelekeele ukabe kusela pano pa Lupili lwa Sinai ni kusaakaana ni nene peulu lupili.
EXO 34:3 Tekuti ukabe kwiza na unge muntu, ku lupili tekuti kukamoneke unge muntu, mwinsina lupili ni mo tekuti mukamoneke mukooko ao nghombe, ao mbuzi wa kulia bikusi.”
EXO 34:4 Ni pakako, Musa waabaazile bibazu bibili bya mabue byaali nga belia bya mambo, waabuuka paakili lukeelekeele, wasela ku Lupili lwa Sinai nga mwa-aniinue na Yawe, watwama ni bebio bibazu bibili bya mabue mu minue yakue.
EXO 34:5 Kupwako Yawe waakooka mu lilezi litikeeme, waimana ni Musa pa lupili, Yawe wasimikila Liina lyakue mwine, “Yawe.”
EXO 34:6 Kabili Yawe waapitile ku ntanzi yakua Musa walimukulanda nangue, “Yawe, Yawe! Ne Leza ezuzi nkumbu ni buwame, asiizi kulenga kufiitua, ne wa ntono ikata ni wa kisinka.
EXO 34:7 Ndi ni ntono ku nvyalo nfu ingi, ndinaeleela bubi ni bilubo pamo ni bibalo. Inzi nsiizi kubula kukanda mubi. Ndinakanda baana ni benzikulu, pa mulandu wa bubi bwa basiibo ni bwa basiibokulu mpaka ku luvyalo lwa butatu ni lwa buna.”
EXO 34:8 Penka papo Musa wafwinamina kale pansi ni kupupa.
EXO 34:9 Musa waalandile evi, “We Yawe, kine wangitabizia, nakupaapaata uye pamo ni fwefue anzia kine baba bantu ni babisanguka ni bafinine mitima. Eleela bubi bwetu ni bibalo byetu ututwame tuye twali bantu bobe.”
EXO 34:10 Yawe waamwanine Musa nangue, “Unvua, ndikukita nenu kipingo. Naakakita tupapo ntanzi ya bantu bobe bonse mu musango usinakituepo mu kyalo kyonse, ao mu ntundu yonse, ni bantu bonse bawikeele nabo baakamona miilo yakua Yawe, pantu kintu kinaakakita nobe kyaakaba kya kutiinia.
EXO 34:11 Poozeko maano ku twebo tundimukulanda lelo. Nene nakaba kumitangilila ku ntanzi ni kukumba Ba-amori, ni Bakanaani, ni Bahiti, ni Baperizi, ni Bahivi, pamo ni Bayebusi.
EXO 34:12 Ni pakako, ilabukile tekuti mukapwane na bekala kyalo koko kumulimukuya, evi tekuti mukabe mwakita bubi nga bene.
EXO 34:13 Inzi mupalile kutuuta bitale byabo ni kutyonania mapumpu abo azuuke pamo ni kuputulania mikisi yabo yakua Ashera.
EXO 34:14 “Temupalile kupupa leza unge, pantu Yawe Liina lyakue ni Bunkua, wene i Leza wa bunkua.
EXO 34:15 Temupalile kukita kipingo na bene kyalo, pantu musita ubaakaba baelela ngelelo ni kupupa baleza babo, babo bantu nga baakaba bamikupa ni kumibembia kulia bilio bibalibaelela ku baleza babo,
EXO 34:16 kabili nga mwaakeetabizia baana benu balalume kuupa baana babo banakazi balibapupa baleza babo. Babo banakazi baakaba babembia baana benu balalume kupupa baleza babo.
EXO 34:17 “Tekuti mukakite mikisi na mutofue usungulwilue.
EXO 34:18 “Mukabe mwakita nsikunkulu ya mukate usiliko ntutumusi. Mu nsiku kilooba mukabe mwalia mukate usiliko ntutumusi nga vinaamyanine. Mukabe mwakita evio pa musita upalile mu mwezi wa Abibu, pantu mu ozo mwezi i umwafumiinemo mu Misri.
EXO 34:19 “Libeli mwalalume wa Baizraeli ni wane, pamo ni kubalua libeli wa biteekua byobe, wa nghombe pamo ni wa mikooko.
EXO 34:20 Inzi punda ndume libeli mwaakamulubula na musoka wa mukooko. Kine temukamulubula, mwaakatyona mukosi wakue. Ni kubalua libeli mwalalume wa muntu mu baana benu mwaakamulubula. “Tekuti kukabe muntu wa kwiza pa ntanzi yane tekuba watweme bupe.
EXO 34:21 “Nsiku mutanda ya mu mulungu mwaakaba mwabombamo miilo. Inzi busiku bwa kilooba mwaakaba mwatuuzia, anzia kine ni pa musita wa kulima ao pa musita wa kuzombola, mwaakaba mwatuuzia.
EXO 34:22 “Mukabe kuya mwakita Nsikunkulu ya Milungu, ni yo i ya mazabo a mambo a buzombozi bwa nghano, pamo ni Nsikunkulu ya Buzombozi bwa mpeleezio ya mwaka.
EXO 34:23 “Balalume bonse ba mu libumba lyenu baakabe baiza ntanzi yakua Yawe Kabezia Mpungu wakua Izraeli nghendo itatu kubalua mwaka.
EXO 34:24 Nakaba kukumba ntundu ntanzi yenu ni kulundako kyalo kyenu. Kabili tekukaba muntu waakeezia kupoka kyalo kyenu musita umwaakaba mwaiza ntanzi yakua Yawe Leza wenu nghendo itatu mu mwaka.
EXO 34:25 “Tekuti mukabe mwangelela mulopa pamo ni mukate uliko ntutumusi. Tekuti mukabe mwasiapo minofu ya ngelelo ya nsikunkulu ya Pasaka ya kyungulo mpaka lukeelekeele.
EXO 34:26 “Buzombozi bwa mambo bwa mu makaba enu mupalile mukabe mwabutwala mu Nghanda yakua Yawe Leza wenu. “Tekuti mukabe mwaeleka mwina mbuzi mu mabeele akua nghina.”
EXO 34:27 Yawe i lu-aamwanine Musa nangue, “Lemba totu twebo pantu twaimaninako kipingo kinapinghana nobe pamo ni Baizraeli.”
EXO 34:28 Musa waikeele ku Lupili lwa Sinai pamo ni Yawe nsiku 40 busiku ni koba pasili kulia bilio ao kumina menda. Ni Yawe waalembele milao lyanondo pa bebio bibazu.
EXO 34:29 Musa lu-aali walimukukooka kufuma ku Lupili lwa Sinai watweme bibazu bibili bya busininkizio mu minue yakue, lukebu lwakue lwaali lwalimukubenghema pantu waalanzyenie ni Yawe, inzi taali wamanine.
EXO 34:30 Haruni ni Baizraeli bonse lubaamukentele Musa, baamwene lukebu lwakue lwalimukubenghema. Ni pakako, baatiinine kumupalama.
EXO 34:31 Inzi Musa waakuutile Haruni pamo ni banombozi bonse ba mabumba ni kulanda nabo.
EXO 34:32 Pa kyamba, Baizraeli bonse baamupaleeme Musa, ni ye waabaanine twebo tonse twa-aninue na Yawe ku Lupili lwa Sinai.
EXO 34:33 Musa lu-aapwile kulanda nabo, waikupile kitambala ku menso.
EXO 34:34 Inzi Musa lu-aali waingila ntanzi yakua Yawe kuti aye alande nakue, waali waikupulula kitambala mpaka musita wa kufuma. Lu-aali wafuma, waali wabaana Baizraeli twebo tu-aali wa-anua.
EXO 34:35 Baizraeli baali bamona lukebu lwakue lwaali lwabenghema. Musa waali waikupa kitambala paakale mpaka lu-aali waya kulanda ni Yawe paakale.
EXO 35:1 Musa waakolonghaniizie mabumba onse a Baizraeli. Waabaanine evi, “Totu i twebo twakilandua na Yawe kuti mukabe mwakita:
EXO 35:2 Nsiku mutanda ya mu mulungu mwaakaba mwabombamo miilo. Inzi busiku bwa kilooba, bwaakaba bwali busiku buzuuke kuli mwemue, Sabata ya kutuuzia yakua Yawe. Kubalua muntu waakabomba mu busiku bwa kutuuzia, waakeepawa.
EXO 35:3 Mu busiku bwa Sabata tekuti mukabe mwakozia mulilo mu nkendo yonse mumwakaba mwaikala.”
EXO 35:4 Musa wa-anine mabumba onse a Baizraeli nangue, “Twebo twakilanda Yawe kuti muye mwakita ni totu:
EXO 35:5 Mupeele Yawe bupe bwa bunonsi bumuli nabo. Kubalua muntu ali ni mutima wantono apalile kumupeela Yawe oro, ni mutofue, ni mukuba,
EXO 35:6 ni nyunzi ya mukumino wa lyulu, ni ya mukumino wa bulumbi, ni ya mukumino wa kasi, ni ya kitani kiweme, ni masako a mbuzi,
EXO 35:7 ni kipapa kya mpanga kisubilueko mukumino wa kasi, ni kipapa kya kipomo, ni mbao ya kasiiya,
EXO 35:8 ni mafuta a mizeituni a mu litala, ni manukato a kubiika ku mafuta azuuke, ni ku bubaani buweme,
EXO 35:9 ni mabue a oniksi, pamo ni mabue a kubiika ku efodi ni ku mufuko wa pa nkulo.
EXO 35:10 “Kubalua muntu ali ni maano akukita miilo imo pakati kenu, eze akite bintu byonse byaalandile Yawe:
EXO 35:11 Akite liema lizuuke ni nkupo ya ku liema, ni bipempe, ni bikobo, ni mbao, ni mbango yakue, ni mapumpu akue pamo ni bya kwimikuamo.
EXO 35:12 Akite Lisanduku lya Kipingo pamo ni mipingo ya kupingilako ni ntupiko, ni kipempe kya kukingako,
EXO 35:13 ni meza pamo ni mipingo ya kupingilako, ni bibombelo byonse bya ku meza, ni mikate ya kilangililo,
EXO 35:14 ni kya kuteekapo matala ni bibombelo byakue, ni matala pamo ni mafuta pa mulandu wa kisue,
EXO 35:15 ni kitale kya kufunkiiziapo bubaani, ni mipingo ya kupingilako, ni mafuta azuuke, ni bubaani buweme, ni kipempe kya pa mulyango wa liema lizuuke,
EXO 35:16 ni kitale kya kuziziiziapo ngelelo pamo ni kasaaso ka mukuba, ni mipingo ya kupingilako, ni bibombelo byonse, ni musambilo pamo ni kya kuteekapo,
EXO 35:17 ni bipempe bizyungulukiile musolo wa mukati, ni mapumpu a ku musolo pamo ni bya kwimikuamo, ni kipempe kya pa mulyango wa musolo,
EXO 35:18 ni bikili bya ku liema lizuuke, ni bikili bya ku luuba lwa musolo, ni nkamba yakue,
EXO 35:19 ni ngubo isukilue bwino, ngubo izuuke yakua Haruni ni baana bakue balalume, ngubo ya kuvwala musita wa kubomba mwilo wa bukitambua mu kifuka kizuuke.”
EXO 35:20 Ni pakako, libumba lyonse lya Baizraeli lyaafumine pa ntanzi yakua Musa ni kubwelela ku mitanda.
EXO 35:21 Kubalua muntu kukonkana ni mu-aatoneene mu mutima wakue, waile kuli Musa ni kumutwalila Yawe bupe bwa kubombia pa kukuula Tabernakulo ni bupe bwa mwilo wa kubombela Leza, pamo ni bupe bwa bya kukitilako bivwalo bizuuke.
EXO 35:22 Bonse, balalume ni banakazi, baali ni mutima wa kupeela, baaleetele bikomo, ni ntimbi, ni tuzele twa kusyusyutilako, ni bikano, pamo ni bibombelo byonse bya oro. Kubalua muntu waamuleetele Yawe bupe bwa oro kuti bube bupe bwa kutensia.
EXO 35:23 Kubalua muntu waali ni nyunzi ya mukumino wa lyulu, ni ya mukumino wa bulumbi, ni ya mukumino wa kasi, ni ya kitani kiweme, ni masako a mbuzi, ni kipapa kya mpanga kisubilueko mukumino wa kasi, pamo ni kipapa kya kipomo, waaleetele.
EXO 35:24 Kubalua muntu waafumiizie mutofue ni mukuba, waamuleeteele Yawe. Kubalua muntu waali ni kimuti kya kasiiya, waakileetele ku mwilo upalile.
EXO 35:25 Banakazi bonse baali ni maano a kusuka, baaleetele ngubo ibaasukile na minue yabo. Ngubo ya mukumino wa lyulu, ni ya mukumino wa bulumbi, ni ya mukumino wa kasi pamo ni ngubo ya kitani kiweme.
EXO 35:26 Ni banakazi baali ni maano a kusuka, baasukile masako a mbuzi.
EXO 35:27 Masiiko a Baizraeli baaleetele mabue a oniksi, pamo ni mabue a mponvu a kubiika ku efodi ni ku mufuko wa pa nkulo,
EXO 35:28 ni manukato, ni mafuta a mizeituni a mu matala, ni mafuta azuuke, ni bubaani bwa bunu buweme.
EXO 35:29 Baizraeli bonse, balalume ni banakazi, baaleetele bupe bwa kupeela Yawe bawamiinue mu mitima yabo pa mulandu wa miilo yonse ya-aninue Musa na Yawe.
EXO 35:30 Pa kyamba, Musa wa-anine Baizraeli nangue, “Yawe wakimusaakula Besaleli wa mu mukowa wakua Yuda, mwana mwalalume mwina Uri, mwinzikulu wakua Huri,
EXO 35:31 ni kumwizuzia Mweo wakue. Wakimupeela maano, ni mulangue, pamo ni kumana kubomba miilo ilekenkeene
EXO 35:32 kuti akite bintu bya maano mu kukita bintu bya oro, ni bya mutofue, pamo ni bya mukuba,
EXO 35:33 ni kukita mabue a kufwanizia, ni kubaza bimuti pa mulandu wa kubomba miilo ilekenkeene.
EXO 35:34 Besaleli ni Aholiabu mwina Ahisamaki wa mu mukowa wakua Dani, baapeelue buvinde na Yawe bwa kusambilizia bange.
EXO 35:35 Yawe waabapeele maano a kubomba miilo ilekenkeene: Mwilo wa kubaaza mabue, ni mwilo wa kufwanizia bivwalo na nyunzi ya mukumino wa lyulu, ni ya mukumino wa bulumbi, ni ya mukumino wa kasi, ni mwilo wa kukita kitani kiweme, pamo ni mwilo wa kusuka inge ngubo. Baba i bantu bakengeele mu kukita miilo ilekenkeene, kabili i baakaba bakita miilo ya misango yonse iweme.
EXO 36:1 “Ni pakako Besaleli ni Aholiabu pamo ni kubalua muntu apeelue mutima wa maano ni mulangue na Yawe pakuti abombe miilo yonse ya kukuula liema lizuuke, wakaba kubomba nga mwaalandiile Yawe.”
EXO 36:2 Musa i lu-aakuutile Besaleli ni Aholiabu pamo ni kubalua muntu apeelue mutima wa maano ni mulangue na Yawe, ni kubalua muntu epeele kubomba mwilo na mutima uweme.
EXO 36:3 Musa waapeele babo bantu bupe bonse bwaafumiiziwe na Baizraeli pa mulandu wa miilo ya kukuula liema lizuuke. Inzi Baizraeli baali batwaliliile sie kufumia bupe bwabo kubalua lukelekeele koku bawamiinue.
EXO 36:4 Babo bantu bonse ba mulangue baali babomba miilo ilekenkeene ya kwimika kifuka kizuuke, baafumine pa mwilo wabo ni
EXO 36:5 kuya kumwana Musa nangue, “Bantu baleeta bintu bingi kukila pa belia bipalile kuleetua mu miilo itwa-aninue na Yawe.”
EXO 36:6 Kupwako, Musa wapunda mu mitanda walimukulanda nangue, “Kubalua muntu, mwalalume ao mwanakazi, tekuti afumie kabili bupe pa mulandu wa kifuka kizuuke.” Ni pakako, baalekeele kutwala bupe,
EXO 36:7 pantu bintu bibaaleetele byaakilile kuvula, kabili byaakumeene bya kubombia ku miilo yonse.
EXO 36:8 Bonse baali ni mutima wa mulangue mu babo babombi, baakitile Tabernakulo na bipempe lyanondo bya kitani kiweme kyaali kyapyatilue bwino na nyunzi ya mukumino wa lyulu, ni ya mukumino wa bulumbi pamo ni ya mukumino wa kasi. Ni Besaleli waalengelemo nkebu ya makerubi.
EXO 36:9 Kubalua kipempe kyaali kyaleepele metre lyanondo ni isaano, ni mu bukata metre ibili. Bebio bipempe byonse byaali byalingheene.
EXO 36:10 Besaleli waalundaniizie bipempe bisaano kumo, ni binge bisaano evio vyenka.
EXO 36:11 Waabiikile mikobelo 50 ya nyunzi ya mukumino wa lyulu kupela lya kunze ya kipempe, ni ku kinge kipempe waakitile evio vyenka.
EXO 36:12 Mikobelo 50 ya ku kipempe kimo yaali yakenteene na mikobelo 50 ya ku kipempe kinge.
EXO 36:13 Kabili waakitile tukobo 50 twa oro twa kulundaniiziako bebio bipempe bibili pakuti Tabernakulo ibe kintu kimo.
EXO 36:14 Kabili waakitile bipempe lyanondo ni kimo bya masako a mbuzi bya kubivimba peulu Tabernakulo.
EXO 36:15 Kubalua kipempe kyaali kyaleepele metre lyanondo ni isaano, ni mu bukata metre ibili. Bebio bipempe lyanondo ni kimo byaali byalingheene.
EXO 36:16 Besaleli waalundaniizie kumo bipempe bisaano, ni binge mutanda ni byo waalundaniizie kumo.
EXO 36:17 Waabiikile mikobelo 50 kupela lya kunze ya kipempe, ni ku kinge kipempe waakitile evio vyenka.
EXO 36:18 Waakitile tukobo 50 twa kulundaniiziako bipempe bibili pakuti kiye kyali kimo.
EXO 36:19 Kabili waakitile nkupo ya lelio liema, nkupo ya mpapa ya mpanga isubilueko mukumino wa kasi, ni peulu ezio nkupo waakitiilepo nkupo ya mpapa ya kipomo.
EXO 36:20 Waakitile mbao ya kimuti kya kasiiya ya kwimikilako Tabernakulo.
EXO 36:21 Lubao lumo lwaali lwaleepele metre isaano, ni mu bukata lwaali lwatanine santimetre 75.
EXO 36:22 Kubalua lubao lwaali lwali na matui abili, evi i vi-aakitile ku mbao yonse ya ku Tabernakulo.
EXO 36:23 Waakitile mbao 20 ya ku Tabernakulo lya ku nkungulua,
EXO 36:24 Kabili waakitile bintu 40 bya mutofue bya kwimikuamo mbao 20. Mu bintu bibili bya kwimikuamo, mwaimikilue lubao lumo lwa matui abili, ni mu binge bibili ni mo evio vyenka.
EXO 36:25 Ku bunge bwala bwa liema lya ku nkungua, waakitileko mbao 20,
EXO 36:26 ni bintu 40 bya mutofue bya kwimikuamo. Mu bintu bibili bya kwimikuamo, mwaimikilue lubao lumo, ni mu binge bibili ni mo evio vyenka.
EXO 36:27 Kumusana wa liema, lya ku mboosi, waimikileko mbao mutanda,
EXO 36:28 ni mbao ibili yaimikilue mu tufuli twa Tabernakulo lya ku mboosi.
EXO 36:29 Ezio mbao ibili ya mutufuli waimikile yakuminkeene kutula pansi, ni pa muulu waakuminkaniizie na kikobo kimo. Evio i vi-aakitile ku tufuli tonse tubili.
EXO 36:30 Ni pakako, yaali mbao mwanda, ni bintu bya mutofue bya kwimikuamo byaali lyanondo ni mutanda. Bya kwimikuamo bibili byaimikiluemo lubao lumo.
EXO 36:31 Waakitile mbango ya kimuti kya kasiiya, mbango isaano pa mbao ili ku lubali lumo lwa Tabernakulo,
EXO 36:32 ni inge isaano pa mbao ili ku bunge bwala bwa Tabernakulo, kabili ni inge isaano pa mbao ili ku kyamba kya Tabernakulo kuzika koba.
EXO 36:33 Lubango lwa pa bukata bwa mbao lwene lwaali lwapulilemo koku ni koku.
EXO 36:34 Ezi mbao pamo ni mbango baakupileko oro, kabili baakitile ni bikobo bya oro bya kupisiamo mbango. Ni ezio mbango baakupileko oro.
EXO 36:35 Baakitile kipempe kya nyunzi ya mukumino wa lyulu, ni wa bulumbi, pamo ni wa kasi, pamo ni ngubo ya kitani kiweme kya nyunzi ipyatilue, ni kukifwanizia na kubilamo nkebu ya makerubi. Ezio miilo yaabombelue na bantu bamaniisie.
EXO 36:36 Baakitile mapumpu ana a kimuti kya kasiiya ni kukupako oro. Bikobo byakue ni byo byaali bya oro. Kabili baakitile bintu bina bya mutofue bya kwimikuamo.
EXO 36:37 Pa kyamba baakitile kipempe kya pa mulyango wa liema, kipempe kya nyunzi ya mukumino wa lyulu, ni ya mukumino wa bulumbi, ni ya mukumino wa kasi pamo ni kitani kiweme kipyatilue. Yaali yali miilo ya bantu bamaniisie kubila.
EXO 36:38 Bebio bipempe byaakitiilue mapumpu asaano pamo ni bikobo byakue. Baasubile oro ku mikobelo pamo ni peulu mapumpu. Inzi baakitile ni bya kwimikuamo bisaano bya mukuba.
EXO 37:1 Besaleli waakitile Lisanduku lya Kipingo lya mbao ya kimuti kya kasiiya. Lyaali lyaleepele metre imo ni santimetre 25, mu bukata lyaali lyatanine santimetre 75, ni mu kutuuluka lyaali lyatuulukile santimetre 75.
EXO 37:2 Waakupileko oro isambikile mukati ni panze, ni mumbali waazyungulusiiziemo lufito lwa oro.
EXO 37:3 Waakitile bikobo bina bya oro ni kubibiika ku tufuli tuna twa lisanduku. Bibili ku bwala bumo ni bibili ku bunge bwala.
EXO 37:4 Kabili waakitile mipingo ibili ya kimuti kya kasiiya ni kukupako oro.
EXO 37:5 Mipingo ya kupingilako wai-ingiziizie mu bikobo bya ku lisanduku kumbali yonse ibili.
EXO 37:6 Waakitile ntupiko ya oro isambikile. Ezio ntupiko yaali yaleepele metre imo ni santimetre 25, ni mu bukata santimetre 75.
EXO 37:7 Waakitile makerubi abili atililue bwino ali a oro ni kuemika ku mpeleezio ibili ya ntupiko mu kuleepa.
EXO 37:8 Waakitile likerubi limo ku mpeleezio imo, ni linge ku inge mpeleezio. Azo makerubi wa-akitiliile ku ntupiko ku mpeleezio yakue ibili.
EXO 37:9 Azo makerubi aali alendwile mapaapi abo mu muulu lya pa ntupiko akupiliile lisanduku, ni nkebu yabo yakenteene lya pa ntupiko.
EXO 37:10 Waakitile meza ya kimuti kya kasiiya yaali yaleepele metre imo ni mu bukata yatanine santimetre 50, ni mu kutuuluka yaali yatuulukile santimetre 75.
EXO 37:11 Waakupileko oro isambikile, ni mumbali waazyungulusiiziemo lufito lwa oro.
EXO 37:12 Waazyungulusiizie lufito lwatuulukile santimetre mwanda, kusyali kupisia ni mukovio wa oro ku lufito.
EXO 37:13 Waakitile bikobo bina bya oro ni kubibiika ku tufuli tuna twa meza lya palia pabeeleele mikonzo.
EXO 37:14 Bebio bikobo byaabiikilue pepi na mbao ya pa muulu. Momo i mwaali mwakwingizia mipingo ya kupingilako meza.
EXO 37:15 Waakitile mipingo ya kimuti kya kasiiya ni kukupako oro. Ezio mipingo yaali ya kupingilako meza.
EXO 37:16 Kabili waakitile masaani, ni mpindi, ni bibakuli pamo ni makopo a kubombia ku bupe bwa bya kumina. Bebio bibombelo byonse bya pa meza waabikitile byali bya oro isambikile.
EXO 37:17 Waakitile kya kuteekapo matala kya oro itililue yasambikile bwino. Kya kwimikapo pamo ni mukonzo wakue, ni tubakuli twakue twaali twali nga maluba, ni mapingu akue pamo ni maani akue, byaali byalundeene kumo.
EXO 37:18 Ku ozo mukonzo umo kwaali kwafumine misambo mutanda. Misambo itatu ku bwala bumo, ni inge itatu ku bunge bwala.
EXO 37:19 Ku musambo umo kwaali kwali tubakuli tutatu tuli nga maluba a almonde ali ni mapingu pamo ni maani a azo enka maluba. Ku musambo unge ni ko baakitileko evio vyenka mpaka ku misambo yonse mutanda yaali yafumine ku ozo mukonzo.
EXO 37:20 Ni ku mukonzo wa pa bukata uli pa kya kuteekapo kwaali kwali tubakuli tuna tuli nga maluba a almonde ni mapingu pamo ni maani a azo enka maluba.
EXO 37:21 Ntanzi ya kufika pa misambo ibili paali pali lipingu lya liluba limo. Kyaali kyali evio ku misambo ibili ya mambo, ni ku misambo ibili ya bubili, pamo ni ku misambo ibili ya butatu
EXO 37:22 Mukonzo ni misambo yakue yonse byaali byakitiliilue kumo ni kya kuteekapo. Kyonse kyaali kyali kya oro itililue yasambikile.
EXO 37:23 Besaleli waakitile matala kilooba, ni nmano pamo ni bisaani na oro isambikile.
EXO 37:24 Waakitile kya kuteekapo matala pamo ni bibombelo byonse na kilo 35 ya oro isambikile.
EXO 37:25 Waakitile kitale kya kimuti kya kasiiya kya kufunkiiziapo bubaani. Waakitile kyalingheene monse monse, kyaali kyali na santimetre 50 mu kuleepa ni mu bukata. Mu kutuuluka kyaali metre imo. Bintu bituulukile nga masengo byaali byalundeene na kitale.
EXO 37:26 Peulu ni mumbali monse pamo ni ku mbao ituulukile nga masengo, ni ku mikonzo yonse ina waakupileko oro isambikile, ni peulu lya mumbali waazyungulusiiziemo mukovio wa oro.
EXO 37:27 Waakitile bikobo bibili ku bwala bumo bwa kitale, ni binge bibili ku bunge bwala mwinsina olia mukovio wa oro. Mu bebio bikobo i mwaali mwakwingizia mipingo ya kupingilako.
EXO 37:28 Waakitile mipingo ya kimuti kya kasiiya ni kukupako oro.
EXO 37:29 Kabili waakitile mafuta azuuke, ni bubaani buweme bwa mafuta anunkiile. Azo mafuta aakitilue na bantu bamanine ozo mwilo.
EXO 38:1 Besaleli waakitile kitale kya kuziziiziapo ngelelo kya mbao ya kimuti kya kasiiya, kekio kitale kyaali kyaleepele metre ibili ni kitika, ni mu bukata kyaali metre ibili ni kitika. Kekio kitale peulu kyaali kyalingheene monse monse. Mu kutuuluka kyaali metre imo ni kitika.
EXO 38:2 Mu tufuli tuna waabiikilemo mbao yaali yatuulukile nga masengo, mbao ilundaniizie kitale. Kekio kitale kyaakupilueko mukuba.
EXO 38:3 Baakitile bibombelo byonse bya ku kitale: Bya kuzoolelapo mito, ni bipawa, ni bibakuli, ni bikobo, ni bya kubiikapo mulilo. Bebio bibombelo byonse bya ku kitale byaali bya mukuba.
EXO 38:4 Baakitile kasaaso ka mukuba ka ku kitale ni kukabiika mwinsina lubao luzyungulukiile kitale lya mwinsina. Kako kasaaso kaali kafikile pa bukata mu kutuuluka.
EXO 38:5 Baakitile bikobo bina bya kubiika ku tufuli tuna twa kasaaso ka mukuba, evi biye byali bya kwingiziamo mipingo ya kupingilako.
EXO 38:6 Baakitile mipingo ya kimuti kya kasiiya ni kukupako mukuba.
EXO 38:7 Ezio mipingo waingiziizie mu bikobo kuti iye yaali mumbali ibili ya kekio kitale musita wa kukipinga. Kitale kyaali kyakitilue na mbao, kyaali kyazikukile mukati.
EXO 38:8 Besaleli waakitile musambilo wa mukuba ni kya kuteekapo kya mukuba na biizino bya mukuba byaaleetelue na banakazi baali babomba pa mulyango wa Tabernakulo.
EXO 38:9 Besaleli waakitile musolo wa Tabernakulo. Ku lubali lwa ku nkungulua waakitile luuba lwa kipempe kya kitani kiweme kipyatilue. Kekio kipempe kyaali kyaleepele metre 50.
EXO 38:10 Waakitile mapumpu 20 ni bintu bya kwimikuamo 20 bya mukuba, bikobo bya ku mapumpu ni mikobelo yakue byaali bya mutofue.
EXO 38:11 Ku lubali lwa ku nkungua ni ko kwaali kipempe kyaali kyaleepele metre 50, ni mapumpu akue 20, ni bintu bya kwimikuamo 20 bya mukuba. Bikobo bya ku mapumpu ni mikobelo yakue byaali bya mutofue.
EXO 38:12 Lya ku mboosi kwaali luuba lwa kipempe kyaali kyaleepele metre 25, ni mapumpu akue lyanondo, ni bya kwimikuamo lyanondo. Bikobo byakue ni mikobelo yakue byaali bya mutofue.
EXO 38:13 Lya ku kabanga mu bukata kwaali metre 25.
EXO 38:14 Bipempe bya ku lubali lumo lwa mulyango byaali byaleepele metre kilooba ni kitika. Mapumpu akue atatu, ni bya kwimikuamo bitatu.
EXO 38:16 Luuba lonse lwaali lwazyungulukiile musolo, lwaali lwa kitani kiweme kipyatilue.
EXO 38:17 Bya kwimikuamo mapumpu byaali bya mukuba. Bikobo ni mikobelo yakue byaali bya mutofue. Peulu mapumpu paali pakupilue mutofue, ni mapumpu onse a ozo musolo aali alundaniiziwe na bikobo bya mutofue.
EXO 38:18 Kipempe kya pa mulyango wa musolo, kyaali kya nyunzi ya mukumino wa lyulu, ni ya mukumino wa bulumbi, ni ya mukumino wa kasi, pamo ni kitani kiweme kipyatilue. Ezio miilo yaabombelue na bantu bamaniisie. Kekio kipempe kyaali kyaleepele metre lyanondo, ni mu kutuuluka metre ibili ni kitika nga vyaali vyatuulukile luuba lwa kipempe kya musolo.
EXO 38:19 Mapumpu akue aali ali ana, ni bya kwimikuamo bina byaali bya mukuba. Bikobo ni mikobelo yakue byaali bya mutofue. Peulu mapumpu paali pakupilue mutofue.
EXO 38:20 Bikili byonse bya ku Tabernakulo ni bya ku luuba lwa musolo byaali bya mukuba.
EXO 38:21 Ezi i mpendua ya bibombelo byaabombele pa kukuula Tabernakulo ya kusungilamo bibazu bibili bya mabue a busininkizio nga vikyaalandilue na Musa kuti bipendue na Balawi. Itamari mwana mwalalume mwina kitambua Haruni i waali mukulu pa ezio miilo.
EXO 38:22 Besaleli wa mu mukowa wakua Yuda, mwana mwalalume mwina Uri, mwinzikulu wakua Huri, waakitile bintu byonse bya-aninue Musa na Yawe.
EXO 38:23 Waali wakwasiiziwe na Aholiabu mwana mwalalume mwina Ahisamaki wa mu mukowa wakua Dani, ozo waali wamaniisie kufwanizia ni waali wamanine miilo ilekenkeene, miilo ya kubila na nyunzi ya mukumino wa lyulu, ni ya mukumino wa bulumbi, ni ya mukumino wa kasi pamo ni kitani kiweme kipyatilue.
EXO 38:24 Oro yonse yaabombiiziwe ku mwilo wa ku kifuka kizuuke, yaali kilemo kya kilo 877 ni grama 300 kukonkana ni kalingo ka mu kifuka kizuuke.
EXO 38:25 Mutofue waaleetelue na libumba waali kilemo kya kilo 3,017 ni grama 750 kukonkana ni kalingo ka mu kifuka kizuuke.
EXO 38:26 Kubalua mwalalume waali na myaka kubambila pa 20 ni kukilapo, waali wafumia nfolanga grama isaano yaali yalombua. Mpendua ya balalume baapendelue yaali 603,550.
EXO 38:27 Mutofue waali wafinine kilo 3,000 waasungulwilue kuti ikituemo bya kwimikuamo 100 bya ku kifuka kizuuke, ni bya ku kekio kipempe. I kulanda nangue kilo 30 ku kya kwimikuamo kimo.
EXO 38:28 Waakitile bikobo bya ku mapumpu ni bya kukupa peulu mapumpu pamo ni mikobelo. Bebio bintu byaali na kilemo kya kilo 17 ni grama 750 yaasyelepo.
EXO 38:29 Bupe bonse bwa mukuba bwaafumiizie Baizareli bwaali bwafinine kilo 2,124.
EXO 38:30 Ozo mukuba waakitiluemo bya kwimikuamo bya pa mulyango wa Tabernakulo, ni kasaaso ka mukuba, ni kitale kisubilueko mukuba, ni bibombelo byonse bya ku kitale,
EXO 38:31 ni bya kwimikuamo bya ku luuba lwa musolo, ni bya kwimikuamo bya pa mulyango wa pa musolo, ni bikili byonse bya ku liema, pamo ni bikili byonse bya ku luuba lwa musolo.
EXO 39:1 Bivwalo bya kuvwala pa kubomba mu kifuka kizuuke byaakitilue na nyunzi ya mukumino wa lyulu, ni ya mukumino wa bulumbi pamo ni ya mukumino wa kasi. Bebi bivwalo byaali byasukilue bwino. Kabili baakitile ni bivwalo bizuuke byakua Haruni nga mwa-aniinue Musa na Yawe.
EXO 39:2 Besaleli ni bakwasi bakue baakitile efodi ya nyunzi ya mukumino wa oro, ni ya mukumino wa lyulu, ni ya mukumino wa bulumbi, ni ya mukumino wa kasi pamo ni kitani kiweme kipyatilue.
EXO 39:3 Baatilile oro mpaka yasyala kamutika kakeepeesie, kusyali kuteeta kuba nyunzi evi isukililue pamo ni nyunzi ya mukumino wa lyulu, ni ya mukumino wa bulumbi, ni ya mukumino wa kasi, ni ya kitani kiweme. Yaakitilue na muntu amanine ozo mwilo.
EXO 39:4 Baamukitiile mikobelo ibili ya kupisia pa nkombe kuti iye yalundaniizie kya ku ntanzi ni kya ku musana.
EXO 39:5 Ni musipi waali wasukilue bwino na bintu bikitiilueko efodi kuti uye wali kimo nakio, ni o waakitilue na nyunzi ya mukumino wa oro, ni ya mukumino wa lyulu, ni ya mukumino wa bulumbi, ni ya mukumino wa kasi pamo ni ya kitani kiweme kipyatilue kukonkana ni mwa-aniinue Musa na Yawe.
EXO 39:6 Baakitile mabue abili a oniksi ni ku-abiika mu tukwatililo twa oro. Azo mabue aali alembeluepo meena a bena Izraeli nga evelia vilivyalembua kamanino.
EXO 39:7 Baabililiile azo mabue peulu mikobelo ipitile pa nkombe yafumine ku efodi pakuti aye aimaniineko mikowa lyanondo ni ibili ya Baizraeli nga mwa-aniinue Musa na Yawe.
EXO 39:8 Besaleli ni bakwasi bakue baakitile mufuko wa pa nkulo na bintu bibaakitiileko efodi: Na nyunzi ya mukumino wa oro, ni ya mukumino wa lyulu, ni ya mukumino wa bulumbi, ni ya mukumino wa kasi, pamo ni kitani kiweme kipyatilue nga vyaakitilue efodi. Ozo mwilo waakitilue na bantu bamaniisie.
EXO 39:9 Ozo mufuko waali wapimpiluemo limo walingheene monse monse. Mu kuleepa ni mu bukata waali wali na santimetre 25.
EXO 39:10 Ku ozo mufuko baabiikileko milongo ina ya mabue a mutengo ukata. Mu mulongo wa mambo baabiikilemo libue lya akiki, ni libue lya topazi pamo ni libue lya emerodi.
EXO 39:11 Mulongo wa bubili baabiikilemo libue lya zumaridi, ni libue lya yakuti lya mukumino wa lyulu, ni libue lya almasi.
EXO 39:12 Mulongo wa butatu baabiikilemo libue lya yakinto, ni libue lya agata ni libue lya ametisti.
EXO 39:13 Ni mulongo wa buna baabiikilemo libue lya berile, ni lya oniksi, ni lya yaspi. Azo mabue onse aali akwatiliilue na tukwatililo twa oro.
EXO 39:14 Azo mabue aali ali lyanondo ni abili. Kubalua libue paalembelue liina limo lya pa meena a bena Izraeli. Kubalua libue limo paalembelue liina limo liimaniineko mukowa umo wa pa mikowa lyanondo ni ibili ya Baizraeli.
EXO 39:15 Ku ozo mufuko wa pa nkulo baakitiileko mikufu ya oro isambikile yaali yali nga nkamba ipyatilue.
EXO 39:16 Baakitile tukwatililo twa oro tubili ni tuzele tubili twa oro, ni kutubiika ku tufuli tubili twa ozo mufuko wa pa nkulo.
EXO 39:17 Baakobekele ezio mikufu ibili ya oro mu tuzele tubili tuli ku tufuli twa mufuko wa pa nkulo.
EXO 39:18 Mpeleezio inge ibili ya ezio mikufu baakobekele ku tukobo tubili twa oro ni ku-ilundania ku elia mikobelo ya pa nkombe ya ku efodi lya pa ntanzi.
EXO 39:19 Kabili waakitile tuzele tubili twa oro ni kutubiika ku tufuli tubili twa ku mufuko wa pa nkulo kwinsina lya mukati pepi ni efodi.
EXO 39:20 Kabili waakitile ni tunge tuzele tubili twa oro ni kutukobeka lya kwinsina mikobelo ya pa nkombe lya ku ntanzi ya efodi pepi ni kilundilo peulu musipi usukilue.
EXO 39:21 Baalundaniizie tuzele twa ku mufuko wa pa nkulo ku tuzele twa ku efodi na mikobelo ya nyunzi ya mukumino wa lyulu, evi mufuko wikale lya peulu musipi wa efodi usukilue bwino, ni ozo mufuko wa pa nkulo tekuti uye walekenkana na efodi nga mwa-aniinue Musa na Yawe.
EXO 39:22 Besaleli ni bakwasi bakue baakitile kazula ka kuvwalilapo efodi ka mukumino wa lyulu.
EXO 39:23 Kazula kaali ni lipulo pa bukata lya kupuziamo mutue, kabili kaali kasukilue bwino mumbali lipulo, evi tekuti kakazabuke.
EXO 39:24 Kwinsina kazula kwaali kwafukilue, kabili baabiikileko komamanga isukilueko nyunzi ya mukumino wa lyulu, ni wa bulumbi, ni wa kasi, ni kitani kiweme kipyatilue. Ni bo baakitile ndibu ya oro isambikile ni ku-ibiika kwinsina kazula yatolokele komamanga imo imo. Evi ivibaabiikile ndibu ni komamnga yazyungulukile kwinsina kazula konse, kuti kaye kavwalua musita wa kubomba mukati nga mwa-aniinue Musa na Yawe.
EXO 39:27 Baakitile makanzu a kitani kiweme, akuvwalua na Haruni ni baana bakue balalume,
EXO 39:28 ni kitambala kya kitani kiweme ni kisote kya kitani kiweme ni kaputula ka ngubo ya kitani kiweme kipyatilue,
EXO 39:29 ni musipi wa kitani kiweme kipyatilue, na nyunzi ya mukumino wa lyulu, ni ya mukumino wa bulumbi, pamo ni ya mukumino wa kasi. Byaakitilue na bantu bamanine ozo mwilo, nga mwa-aniinue Musa na Yawe.
EXO 39:30 Baakitile kalilata kazuuke ka oro isambikile ni kulembapo nangue, “Muzuuke wakua Yawe.” Baalembele nga vilivyalembua kamanino.
EXO 39:31 Baakakakile na mikobelo ya mukumino wa lyulu kuti kaye kali peulu kitambala lya pa mpala nga mwa-aniinue Musa na Yawe.
EXO 39:32 Evi i vyaapwile miilo yonse ya Tabernakulo, liema lya kusaakaaninamo. Baizraeli baakitile byonse nga mwa-aniinue Musa na Yawe.
EXO 39:33 Baamuleeteele Musa bibombelo bya liema, liema ni bibombelo byakue byonse: Bikobo byakue, ni mbao yakue, ni mbango yakue, ni mapumpu akue, ni bya kwimikuamo byakue,
EXO 39:34 ni nkupo ya mpapa ya mpanga isubilueko mukumino wa kasi, ni nkupo ya mpapa ya kipomo, ni kipempe kya kukingako,
EXO 39:35 ni Lisanduku lya Kipingo, ni mipingo yakue, ni ntupiko,
EXO 39:36 ni meza pamo ni bibombelo byakue byonse, ni mikate ya kilangililo,
EXO 39:37 ni kinara kya oro isambikile pamo ni matala akue, ni bibombelo byakue byonse pamo ni mafuta a mu matala,
EXO 39:38 ni kitale kya oro, ni mafuta azuuke, ni bubaani bwa bunu buweme, ni kipempe kya pa mulyango wa liema,
EXO 39:39 ni kitale kya mukuba ni kasaaso ka mukuba, ni mipingo yakue pamo ni bibombelo byakue byonse, ni musambilo pamo ni kya kuteekapo.
EXO 39:40 Luuba lwa kipempe lwa musolo, mapumpu akue ni bya kwimikuamo byakue, ni kipempe kya pa mulyango wa musolo, ni nkamba yakue, ni bikili byakue, pamo ni bibombelo byonse bya kubombiiwa mu mwilo wa mu Tabernakulo, mu liema lya kusaakaaninamo,
EXO 39:41 ni bivwalo bya mwilo uweme bya kubomba nabyo pa kifuka kizuuke, bivwalo bizuuke byakua kitambua Haruni, pamo ni bivwalo bya baana bakue bya kubomba nabyo mu mwilo wa bukitambua.
EXO 39:42 Baizraeli baakitile miilo yonse nga mwa-aniinue Musa na Yawe.
EXO 39:43 Musa lu-aamwene nangue miilo yonse yapua nga mwa-aniinue na Yawe, waabapaalile.
EXO 40:1 Kabili Yawe waamwanine Musa nangue,
EXO 40:2 “Pa busiku bwa mambo bwa mwezi wa mambo, ukeemike Tabernakulo, liema lya kusaakaaninamo.
EXO 40:3 Ukabiikemo Lisanduku lya Kipingo, mane ukakobeke ni kipempe kya kukingilila lisanduku.
EXO 40:4 Ukengiziemo meza ni kubiikapo bintu bya pa meza, kabili ukengizie kinara mukati ni kubiikapo matala akue.
EXO 40:5 Ukeemike kitale kya oro kya kufunkiiziapo bubaani ntanzi ya Lisanduku lya Kipingo ni kubiika kipempe kya pa mulyango wa Tabernakulo.
EXO 40:6 Ukabiike kitale kya kuziziiziapo ngelelo pa ntanzi ya nghingililo ya Tabernakulo, liema lya kusaakaaninamo.
EXO 40:7 Kabili ukabiike musambilo pa bukata bwa Tabernakulo ni kitale ni kubiikamo menda.
EXO 40:8 Ukeemike luuba luzyungulukile musolo ni kukobeka kipempe pa mulyango.
EXO 40:9 “Ukabuule mafuta azuuke, ukasube ku Tabernakulo pamo ni ku bintu byonse bilimo. Ni byo byaakaba bizuuke.
EXO 40:10 Kabili ukasube mafuta ku kitale kya kuziziiziapo ngelelo ni kuizuukia pamo ni bibombelo byakue byonse. Ni yo yaakaba yazuukiisie.
EXO 40:11 Ukasube mafuta ku musambilo ni ku kya kuteekapo, ni byo ukabizuukie.
EXO 40:12 “Ukamuleete Haruni ni baana bakue balalume pa mulyango wa liema lya kusaakaaninamo, ni kubasamba na menda.
EXO 40:13 Kabili ukamuvwike Haruni bivwalo bizuuke, ukamusube mafuta ni kumuzuukia, evi akan'mombele mu mwilo wa bukitambua.
EXO 40:14 Ni baana balalume bena Haruni ukabaleete ni kubavwika makanzu,
EXO 40:15 kabili ukabasube mafuta nga viwakasuba sibo pakuti bakabe ban'mombela mwilo wa bukitambua. Bobu busubo bwa mafuta bwaakabaalula kuba babitambua ba muyayaya mu nvyalo yabo yonse.”
EXO 40:16 Musa waafikiliziizie byonse mwa-aniinue na Yawe. Evi i vi-aakitile.
EXO 40:17 Pa busiku bwa mambo bwa mwezi wa mambo mu mwaka wa bubili pa kyamba kya kufuma ku Misri, Tabernakulo yaimikilue.
EXO 40:18 Musa lu-aimikile Tabernakulo, waabiikile bya kwimikuamo, kusyali waimikamo mbao ni kwalapo mbango, ni kwimika mapumpu.
EXO 40:19 Kabili waakobekele maema ku Tabernakulo ni kubiika nkupo ya liema peulu nga mwa-aniinue Musa na Yawe.
EXO 40:20 Pa kyamba, waabuulile bibazu bya mabue bya busininkizio ni kubibiika mu lisanduku. Kusyali kubiika mipingo ku Lisanduku lya Kipingo, ni kutupikilapo ntupiko.
EXO 40:21 Kabili waingiziizie Lisanduku lya Kipingo mu Tabernakulo, ni kukobeka kipempe kya kukingilila Lisanduku lya Kipingo nga mwa-aniinue Musa na Yawe.
EXO 40:22 Musa waingiziizie meza mu Tabernakulo, waibiika lya ku nkungua ntanzi ya kipempe
EXO 40:23 ni kubiikapo mikate ya kilangililo ntanzi yakua Yawe, nga mwa-aniinue na Yawe.
EXO 40:24 Waabiikile kinara mu Tabernakulo lya ku nkungulua kyakenteene ni meza,
EXO 40:25 ni kulemia matala ntanzi yakua Yawe nga mwa-aniinue na Yawe.
EXO 40:26 Waabiikile kitale kya oro kya kufunkiiziapo mu Tabernakulo ntanzi ya kipempe
EXO 40:27 ni kufunkiiziapo bubaani bwa manukato a bunu buweme nga mwa-aniinue na Yawe.
EXO 40:28 Waakobekele kipempe kya pa nghingililo ya Tabernakulo.
EXO 40:29 Pa kyamba, waabiikile kipempe pa nghingililo ya liema, wabiika kitale kya kuziziiziapo ngelelo pepi ni pa nghingililo ya Tabernakulo. Kusyali waziziiziapo ngelelo ya nama ni ngelelo ya bunga nga mwa-aniinue na Yawe.
EXO 40:30 Musa waabiikile musambilo pa bukata bwa Tabernakulo ni kitale kya kwelelapo ngelelo ya kuzizia, kusyali wabiika menda mu musabilo kuti babitambua baye basambamo.
EXO 40:31 Musa, ni Haruni pamo ni baana bakue, i mu baali baisambila ku minue ni ku makasa.
EXO 40:32 Baali baisamba musita ubaali baingila mu liema lya kusaakaaninamo, ni musita ubaali bapalamina ku kitale nga mwa-aniinue Musa na Yawe.
EXO 40:33 Kabili Musa waimikile luuba lwa musolo luzyungulukiile Tabernakulo ni kitale, kusyali wakobeka kipempe kya pa nghingililo ya musolo. Musa i vi-aapwile miilo.
EXO 40:34 Kupwako, lilezi lyakupa kale Tabernakulo, ni bulumba bwakua Yawe bwaizulamo.
EXO 40:35 Ni pakako, Musa wa-andilue kwingila mu Tabernakulo pantu yaali yakupiliilue na lilezi, ni bulumba bwakua Yawe bwaali bwaizwile mu Tabernakulo.
EXO 40:36 Lyonse Baizraeli mu lwendo lwabo, baali bateluluka sie kine lilezi lyalendulua kufuma pa Tabernakulo.
EXO 40:37 Inzi kine lilezi telinalendulue tebaali baya, baali bapempa sie mpaka busiku bulyaakalendulua.
EXO 40:38 Mu lwendo lwabo lonse baali bamona lilezi lyakua Yawe peulu Tabernakulo musita wa koba, ni musita wa busiku baali bamona mulilo waleemene peulu Tabernakulo.
RUT 1:1 Pa ozo musita, Bapinguzi lubaali balombola, kwaali kimina kya nzala mu kyalo. Muntu umo wa mu Betlehemu ya mu kyalo kya Yudea, wa mu mukowa wakua Efraimu, ni mukazi wakue pamo ni baana bakue balalume babili, baabutukiile mu kyalo kya Moabu.
RUT 1:2 Ozo muntu waali wakuutua Elimeleki. Mukazi wakue ni ye waali wakuutua Naomi. Meena a baana bakue balalume ni aza: Umo waali wakuutua Maloni, ni unge waali wakuutua Kilioni, baali Baefurati ba ku Betlehemu ya mu kyalo kya Yudea. Lubaafikile koko ku Moabu ni kwikala,
RUT 1:3 Elimeleki muka Naomi waafwile. Naomi waasyele sie ni baana bakue babili balalumenke.
RUT 1:4 Baba baana baupile banakazi ba mu kyalo kya Moabu. Mwanakazi umo waali wakuutua Orpa, ni unge waali wakuutua Rutu. Baikeele koko mupepi myaka lyanondo.
RUT 1:5 Maloni ni Kilioni ni bo baafwile. Evi Naomi waafwiliilue na baana bonse babili pamo ni mulume wakue.
RUT 1:6 Naomi lu-aunvwile nangue Yawe wakipaala bantu bakue ba ku Betlehemu na kubapeela bilio, waamwene kuti afume mu kyalo kya Moabu aye pamo ni bamuka baana bakue babili.
RUT 1:7 Waabambile kuya ni bamuka baana bakue, lwendo lwa kubwelela ku kyalo kya Yudea.
RUT 1:8 Naomi waabaanine bamuka baana nangue, “Bwelele kuli banghinenue. Yawe amikitile biweme nga vimwaakitile kuli nene ni ku balume benu baafwile.
RUT 1:9 Kabili Yawe amikwasie mukoopue, ni kubalua muntu akeekale bwino ni mulume wakue.” Kupwako, wabalaya bailepo. Inzi bene ba-angwile balila.
RUT 1:10 Baamwanine evi, “Twakaana. Fwefue tulikuya pamo nobe ku bantu bobe.”
RUT 1:11 Naomi waabaanine evi, “Mwe baana bane, bwele sie. Ale mulikunkonkelaki? Nsikikavyala kabili baana balalume bakuti bakamyupe.
RUT 1:12 Mwe baana bane, bwele, endo mwaya, pantu nene nsisyakotele, nsikikoopua. Kibenge evio, nga lelo lyenka naupua ni kuvyala baana balalume.
RUT 1:13 Anzia kibenge evio, kubako nga mwaapembeele baana bakule ni kuya mwaikeele pasili kuupua? Mwe baana bane, keki kyangaviizia nene kukila mwemue, pantu Yawe wandekeela.”
RUT 1:14 Kabili baatendekele kulila. Kupwako, Orpa wamulaya nghinavyala, inzi Rutu wene waasyele sie wamuuminiine.
RUT 1:15 Naomi waamwanine evi, “Ewe, mona muupua nobe wabwela ku bantu bakue ni ku baleza bakue. Kansi ni we bwela umukonke.”
RUT 1:16 Rutu wa-asukile evi, “Tekunkania kuya nobe, konse kuwaakaya, i kunaakaya ni nene. Pawaakeekala, i panaakeekala ni nene. Bantu bobe, baakaba bantu bane. Leza obe, waakaba Leza wane.
RUT 1:17 Palia pawaakafwila, i panaakafwila ni kuziikua. Ndimukumulomba Yawe ankitile evio ni kukiziapo. Nsikalekana nobe, inga sie kufua i kwaakandekania ni wewe.”
RUT 1:18 Naomi lu-aamwene nangue Rutu waali wamuuminiine sie kuya pamo nakue, taalandile kantu kabili.
RUT 1:19 Kupwako, bonse babili baya mpaka ku Betlehemu. Lubaafikile mu muzi wa Betlehemu, bantu bonse baapapile. Banakazi ba mu Betlehemu baipuzyaniizie, “Kubako ozu i Naomi?”
RUT 1:20 Naomi waabaanine evi, “Tekunkuute Naomi. Inzi nkuute sie Mara, Pantu wa Maka onse wakinkitila bintu bya bulanda.
RUT 1:21 Naile nakwete bintu bingi, inzi Yawe wan'mbwezia naikumbeete. Ale mulikunkuutilaki Naomi ne akandilue na Yawe? Ne waakitiilue bintu bya bulanda na Yawe wa Maka onse?”
RUT 1:22 Evi i vyaabwelele Naomi pamo ni Rutu muka mwana wakue wa ku kyalo kya Moabu. Lubaafikile ku Betlehemu, waali wasyali musita wa kuseepa nghano.
RUT 2:1 Boazi waali muntu munonsi kabili mukindami. Ozo Boazi, waali wa mu lupua lwakua Elimeleki muka Naomi.
RUT 2:2 Rutu wa ku kyalo kya Moabu waamwanine Naomi nangue, “N'mpeele nsambu ya kuya ku bukaba ku kusolola nghano. Nketekeele nangue naya nsangeko muntu umo waya angitabizie kubomba nakue.” Naomi waamwanine evi, “We mwana wane, endo.”
RUT 2:3 Kupwako, waya ku bukaba. Lu-aafikile, waatendekele kusolola molia mwaali mwapita mwaseepa babombi. Ni mu lisyuko lyakue, waingiile mu bukaba bwakua Boazi wa mu lupua lwakua Elimeleki.
RUT 2:4 Pa kyamba, Boazi waizile kufuma ku Betlehemu ni kuya kupozia babombi walanda nangue, “Yawe abe nenu.” Ni bene baamwitabiile balanda nangue, “Yawe akupaale.”
RUT 2:5 Boazi waamwipuziizie mubombi mukulu wabo nangue, “Ale olia mukazyana ni wa kupi?”
RUT 2:6 Mukulu wa babombi waamwasukile evi, “Olia mukazyana ni wa ku Moabu, wakiiza watwemue na Naomi kufuma mu kyalo kya Moabu.
RUT 2:7 Wakilanda evi, ‘Nalombako nsambu ya kuya napita nasolola molia mulimwapita mwaseepa babombi.’ Ni pakako, wabombanga kutula lukeelekeele mpaka ono musita, inzi ku katanda wayanga sie kutuuziako musita uniini.”
RUT 2:8 Boazi waamwanine Rutu, “We mwana wane, unvua nkusoke, tekuba waya kusolola mu ange makaba, inga sie mu bobu bukaba. Bomba sie na baba benka babombi bane bakazyana bali pano.
RUT 2:9 Pooza sie maano mu bobu bwenka bukaba bubalimukuseepamo, wali sie pano penka pamo nabo, kabili tekulekeela balumendo bakusaapile, inzi kine waunvua kyaka, upalile kumina sie mu katondo ka menda atapilue na balumendo.”
RUT 2:10 Kupwako, Rutu wafukama, wafwinamina pansi wamwana nangue, “Ale ne mweni nasyuka syani pakuti un'mpoozeko maano?”
RUT 2:11 Boazi waamwasukile evi, “Bakin'mbwila byonse biwaakitiile nokovyala lwaafwile mulume obe, ni viwaasiile noko ni so, ni kyalo kiwaavyaliiluemo, mpaka watona kwiza ku bantu bausyaali wamanine kutula ku kale.
RUT 2:12 Yawe akulambwilepo pa byonse biwakikita. Yawe wa Baizraeli uwakibutukilako mu kyeni kyakue akupaale.”
RUT 2:13 Rutu waalandile evi, “We mukulu, kisinka wankitila biweme. Wewe wanengia kwiunvua bwino mu kulanda kobe wafuukile anzia kine nsilingheene na mubombi umo wa pa babombi bobe banakazi.”
RUT 2:14 Kabili pa musita wa kulia, Boazi waamwanine Rutu nangue, “Iza ulie mukate utulitwaliako ni kutobela mu divai iseeme.” Kupwako, waikala pamo ni babombi, Boazi wamupeelako ni nghano ikangile, walia, waikuta ni kusiapo binge bilio.
RUT 2:15 Kabili lu-aabuukile kuti aye ku kusolola nghano, Boazi wa-anine babombi bakue nangue, “Anzia asomona ni ili mu bisi, tekumusasilile.
RUT 2:16 Mu elia milui imulimwatuulika, muye mwamusiilamo iniini ya kuti aye watoola, tekumukaanie.”
RUT 2:17 Ni pakako, Rutu waasolwele nghano mu bukaba mpaka kyungulo. Lu-aapuulile, wauluziizie mupepi kilo 22 ya nghano.
RUT 2:18 Waitwikile ni kubwelela ku muzi, waya kumulangisia nghinavyala nghano i-aasolwele. Kupwako, wamupeela bilio bi-aasiilepo lolia lu-aikutile.
RUT 2:19 Nghinavyala waamwipuziizie evi, “Lelo wayanga kusolwela pi? Wasololanga mu bukaba bwakua ni? Ozo muntu wakupoozangako maano apaalue!” Rutu waamwanine Naomi nangue, “Nasololanga mu bukaba bwakua Boazi.”
RUT 2:20 Ni Naomi waamwanine muka mwana wakue nangue, “Yawe olia atwaliliile kufikilizia bulayo bwakue ku bakosele ni bafwile, apaale ozo muntu wa mu lupua lwetu lwa pepi, pantu wene i wa mu bakalubula betu.”
RUT 2:21 Rutu wa ku Moabu waalandile evi, “Boazi wanghananga evi, ‘Ba wali pamo ni babombi bane mpaka pabakaba kupua kuseepa nghano yane yonse.’”
RUT 2:22 Kupwako, Naomi wamwana Rutu muka mwana wakue nangue, “We mwana wane, kyawama uye wabomba pamo ni babombi bakazyana bakua Boazi, kabili tekuti ukasangue na bange bantu mu bukaba nghwana ukeeza kukitikilua na kibiipile.”
RUT 2:23 Ni kiine, Rutu waabombele pamo nabo ni kuya wasololamo mpaka ku mpeleezio ya kuseepa shairi ni nghano. Kabili waatwaliliile kwikala ni nghinavyala.
RUT 3:1 Busiku bumo, Naomi waamwanine Rutu nangue, “Nene n'mpalile kukuufia evi ni we wikwatile nghanda yobe.
RUT 3:2 Upalile kumana nangue ozu Boazi wakiba wabombelua na bakazyana bawakiba nabo, i kalubula wetu. Ale unvua, lelo kyungulo alikuya wauluzia nghano ku kyuluziizio.
RUT 3:3 Ni pakako, nakwana usambe bwino wisube ni mafuta anunkiile, uvwale ngubo yobe i-umwene yawamiisie, mane uye wimane palia pa-alikuya wauluziizia. Inzi tekuti uye wilangisie kuli wene mpaka musita u alikuya kupwilapo kulia ni kumina.
RUT 3:4 Upoozeko maano kumana pa-alikuya kulaala. Musita u alikuya kuona, uye umuvimbule ku makasa ni kulaala lya koko kwenka. Ni ye waya akwane vyakukita.”
RUT 3:5 Rutu waamwaanine, “Naya nkite kubalua kantu kawanghana.”
RUT 3:6 Rutu ni ye waile ku kyuluziizio ni kukita kubalua kantu mwamwaaniine nghinavyala.
RUT 3:7 Boazi lu-aapwile kulia ni kumina, waasansamukile, waile kulaala mumbali mului wa nghano. Rutu waile buke buke, wamuvimbula Boazi ku makasa ni kulaala lya koko kwenka.
RUT 3:8 Pakati busiku Boazi waatulumukile, mukwana nangue apilibuke, waapapile kumona mwanakazi waleele lya ku makasa akue.
RUT 3:9 Boazi waamwipuziizie evi, “Uli ni?” Wa-asukile nangue, “Ni nene mubombi obe Rutu, nvimbeko sie lupipi lwa ngubo yobe pantu wewe uli kalubula wetu. Nakulomba ube mulume wane.”
RUT 3:10 Boazi waamwanine Rutu nangue, “We mwana wane, Yawe akupaale, pantu buwame buwakita, bwakila buwame buwaakitile pa mambo, pantu tewakibembua na balumendo, na bapabi ao na banonsi.
RUT 3:11 Kansi we mwana wane tekutiina, nene ndikukukitila byonse muwalandila pantu bantu bonse mu ono muzi bamanine nangue uli mwanakazi wa mibeele iweme.
RUT 3:12 Anzia kine nene ndi kalubula wa pepi, inzi kulanda kisinka, kuli ni unge kalubula apalamiisie kukila nene.
RUT 3:13 Wewe pembela sie bono busiku bukie, kine ozo muntu wakaba kwitabila kukukitila mukipaliile mu lupua, kyakaba kuwama. Inzi kine akabe kukaana, nene nakaba kukukitila mukipaliile, nene nalapa mu Liina lyakua Yawe Mukose nangue nakaba kukupoozako maano. Ale laala sie bukie.”
RUT 3:14 Kupwako, mwanakazi walaala ku ntambalilo mpaka ku makia. Waabuukile ku makia pa kamuntu uli ni, pantu Boazi waalandile nangue, “Tekipalile kimanike nangue ku kyuluziizio kwakiiza ni mwanakazi.”
RUT 3:15 Boazi waamwanine evi, “Leeta ngubo i-uvwele u-ipanzike papa.” Ni ye waapanzikile. Boazi waamupongweleelepo nghano kukila pa kilo 20 ni kumutwika. Kupwako, Rutu waya ku muzi.
RUT 3:16 Lu-aafikile ku nghanda, nghinavyala waamwipuziizie evi, “We mwana wane, ni syani?” Rutu waamubwilile byonse bi-aakitiilue na Boazi.
RUT 3:17 Kabili waamwanine nangue, “Nghano i an'mpeelanga ezi. Walandanga evi, ‘Tekubwela minue kuli nokovyala.’”
RUT 3:18 Nghinavyala waamwanine evi, “Ale teekamana sie upembele byakaba kukitika. Boazi tavinda kwikalapo sie pasili kupwisia ozu mulandu. Alikuupwisia lelo lyenka.”
RUT 4:1 Boazi waile pa kifuka kya kulonghaninapo ni kuya kwikala pa nghingililo ya muzi. Olia kalubula waali walanduapo na Boazi lu-aizile kupita lya papo, Boazi waamwanine evi, “Ewe, iza wikalenke pano.” Ni ye waile kwikala.
RUT 4:2 Boazi waakuutile babikolue lyanondo ba mu muzi ni kubaana bekale papo. Ni bo baikeele.
RUT 4:3 Pa kyamba, waamwanine olia kalubula nangue, “Naomi olia wakibwela kufuma ku kyalo kya Moabu, alimukusisia nkendo ya bulongo bwakua mukwetu Elimeleki.
RUT 4:4 Nene nakimona kuti nkubwileko ozu mulandu ni kukwana usite ezi nkendo ntanzi ya baba bantu bekeele papa ni ntanzi ya masiiko a bantu bane. Kine wewe ulikusita, sita. Inzi kine teusita, landa, pantu tekuli unge apalile kusita ezi nkendo, inga sie wewe. Kine te wewe, ni nene.” Ni ye waalandile evi, “Ndikusita.”
RUT 4:5 Boazi waalandile evi, “Mana nangue busiku buwakaba kusita ezi nkendo kuli Naomi ni kuli Rutu, i busiku buwakaba kumusita ni Rutu wa ku kyalo kya Moabu, evi akavyale mwana mwalalume waakapyana bintu byakua mulume wakue waafwile.”
RUT 4:6 Ozo kalubula wa-asukile evi, “Nene nsivinda kusita ezi nkendo nkeeza kwinoona bupyani bwane. Kansi nsambu yane ya bukalubula itwamue sie na wewe wenka, pantu nene na-andua.”
RUT 4:7 Mu ezio nsiku, Baizraeli baali ni mibeele yabo ya kusininkiziiziako pa kulubula ni kusintuzyania kintu. Muntu waali wavuula nkwabilo yakue ni kumupeela mwinakue. Keki i kyaali kisininkiziizio ku Baizraeli.
RUT 4:8 Ozo muntu waamwanine Boazi nangue, “Sita sie wewe wenka.” Kupwako, kalubula wavuula nkwabilo ni kumupeela Boazi.
RUT 4:9 Boazi ni ye wa-anine bantu bonse pamo ni alia masiiko aalipo nangue, “Mwe bonse bali pano muli basininkizi bakusininkizia nangue, lelo nasita kuli Naomi bintu byonse byaali byakua Elimeleki ni byakua Kilioni pamo ni byakua Maloni.
RUT 4:10 Kabili ni ozu Rutu wa ku Moabu muka Maloni ni ye kumo namusita kuti aye waali mukazi wane. Nakita evi kuti nsunge liina lya muntu waafwile, pakuti akabe walangulukilue mu muzi wetu ni mu lupua lwetu. Ni evi vyenka lelo muli basininkizi.”
RUT 4:11 Masiiko pamo ni bantu baali balipo baalandile evi, “Ee, fwefue tuli basininkizi. Ozu mwanakazi uwatwama kuba mukazi obe, twalomba Yawe amukite kuba nga Rakeli ni Lea, babo baamukuuliile Izraeli nghanda. Kabili twalomba wewe uye walumine mu Efrati ni kuya wamanikile mu Betlehemu.
RUT 4:12 Baana bawaakapeelua na Yawe mu ozu mukazyana bakalengie lupua lobe lukapalane ni lwakua Perezi lwaavyelue na Tamari kuli Yuda.”
RUT 4:13 Kupwako, Boazi wamutwama Rutu ni kumwalula mukazi. Yawe waamupaalile, waimita ni kuvyala mwana mwalalume.
RUT 4:14 Banakazi baamwanine Naomi nangue, “Yawe atasiiwe! Ozo asikulekeleele lelo kuti uye wali ni kalubula. Twalomba alengie ozu mwana kumanika mu Izraeli.
RUT 4:15 Ozu mwanavyala obe kisinka akutonene, wakikukitila bintu bikata kukila bintu bya kukitilua na baana balalume kilooba. Kabili wakuvyalila ni mwinzikulu, ozo waakaalula bwikazi bobe kuba bwa lenu ni kukusunga mu bukote bobe.”
RUT 4:16 Kupwako, Naomi wabuula mwana wamufukatila ni kutwalilila kumusunga.
RUT 4:17 Banakazi baali bali pepi nakue baamwinikile mwana liina lya Obedi. Baalandile evi, “Naomi wavyalilua mwana mwalalume!” Obedi i waavyele Yese, ni Yese i waavyele Daudi.
RUT 4:18 Bobu i butantiko bwa meena a lupua lwakua Perezi mpaka kuli Daudi. Perezi waavyele Hezroni, Hezroni waavyele Ramu, Ramu waavyele Aminadabu, Aminadabu waavyele Nasoni, Nasoni waavyele Salmoni, Salmoni waavyele Boazi, Boazi waavyele Obedi, Obedi waavyele Yese, Ni Yese waavyele Daudi.
EZR 1:1 Mu mwaka wa mambo wa kuteeka kwakua Kiro likolo wa ku Persia, Yawe waakoseleziizie mutima wakua likolo wa ku Persia kuti keebo kakua Yawe kaalandilue na kabika Yeremia kafikiliziwe. Waamwanine apunde mu bukolo bwakue bonse ni kulemba nangue:
EZR 1:2 Kiro likolo wa ku Persia walanda evi, “Yawe Leza wa mwiulu wakin'mpeela bukolo bonse bwa pa kyalo, ni kunghana kumukuulila nghanda mu Yeruzalemu ya mu Yudea.
EZR 1:3 Kubalua muntu pakati kenu wa mu bantu bakue, Leza aye waali pamo nakue, kabili aye ku Yeruzalemu ya mu Yudea ku kukuula paakale Nghanda yakua Yawe, Leza wakua Izraeli, wene i Leza ali mu Yeruzalemu.
EZR 1:4 Kubalua Muyuda ali mu Babeli konse kwaikeele kine watona kubwelela ku Yeruzalemu, bantu ba ku ezio nkendo bapalile kumukwasiako mutofue, ni oro, ni binge bintu, ni nama, pamo ni bupe bwa kupeela mu Nghanda yakua Leza mu Yeruzalemu.”
EZR 1:5 Kupwako, bakulu ba mu lupua lwakua Yuda ni lwakua Benyamina, ni babitambua, ni Balawi, pamo ni bonse baakoseleziiziwe mu mitima na Leza, baiteaniizie kuya kukuula paakale Nghanda yakua Yawe mu Yeruzalemu.
EZR 1:6 Bonse baali bapalameene nabo baabakwasiizie mutofue, ni oro, ni binge bintu, ni nama, ni bintu bikindeeme, pamo ni bupe bubaali bapeela mutoneene mitima yabo.
EZR 1:7 Ni pakako, Likolo Kiro waafumiizie bintu bya mu Nghanda yakua Yawe byaatwemue na Nebukadneza kufuma ku Yeruzalemu, ni kubibiika mu nghanda ya baleza bakue.
EZR 1:8 Bebio bintu, Kiro likolo wa ku Persia, waamupeele Mitiredati aliwalabukila bukonto, ni kumupendela Sesebasari mulombozi wa Bayuda.
EZR 1:9 Mpendua ya bintu ni ezi: Masaani 30 akata a oro, masaani 1,000 akata a mutofue, myele 29,
EZR 1:10 bibakuli 30 bya oro, bibakuli bya mutofue bikonkelepo pa bukindami 410, ni bintu binge 1,000.
EZR 1:11 Bintu byonse bya oro ni bya mutofue pamo ni binge bintu, byaali 5,400. Bebi byonse Sesebasari waabitwele lolia lwaabweziiziwe balia baali bafuma ku Babeli balimukuya ku Yeruzalemu.
EZR 2:1 Baba i bekazi ba mu nsempu ya kiputu kya kyalo baatwemue na Nebukadneza likolo wa ku Babeli mpaka ku Babeli, i baabwelele ku Yeruzalemu ni ku kyalo kya Yudea, kubalua muntu mu muzi wakue.
EZR 2:2 Baba bantu i baile pamo ni Zerubabeli, ni Yoshua, ni Nehemia, ni Seraia, ni Relaia, ni Mordekai, ni Bilsani, ni Misipari, ni Bigwai, ni Rehumu, ni Bana. Mpendua ya baana balalume ba mu Izraeli ni ezi:
EZR 2:3 Baana balalume bena Parosi baali 2,172.
EZR 2:4 Baana balalume bena Sefatia baali 372.
EZR 2:5 Baana balalume bena Ara baali 775.
EZR 2:6 Baana balalume bena Phati-Moabu, benzikulu bakua Yeshua ni Yoabu, baali 2,812.
EZR 2:7 Baana balalume bena Elamu baali 1,254.
EZR 2:8 Baana balalume bena Zatu baali 945.
EZR 2:9 Baana balalume bena Zakai baali 760.
EZR 2:10 Baana balalume bena Bani baali 642.
EZR 2:11 Baana balalume bena Bebai baali 623.
EZR 2:12 Baana balalume bena Agzadi baali 1,222.
EZR 2:13 Baana balalume bena Adonikamu baali 666.
EZR 2:14 Baana balalume ba mu luvyalo lwakua Bigwai baali 2,056.
EZR 2:15 Baana balalume bena Adini baali 454.
EZR 2:16 Baana balalume bena Ateri, benzikulu bakua Hezekia, baali 98.
EZR 2:17 Baana balalume bena Besai baali 323.
EZR 2:18 Baana balalume bena Yora baali 112.
EZR 2:19 Baana balalume bena Hasumu baali 223.
EZR 2:20 Baana balalume bena Gibari baali 95.
EZR 2:21 Baana balalume ba ku Betlehemu baali 123.
EZR 2:22 Baana balalume ba ku Netofa baali 56.
EZR 2:23 Baana balalume ba ku Anatoti baali 128.
EZR 2:24 Baana balalume ba ku Azimaweti baali 42.
EZR 2:25 Baana balalume ba ku Kiriati-Arimu, Kefira, ni Beroti, baali 743.
EZR 2:26 Baana balalume ba ku Rama ni Geba baali 621.
EZR 2:27 Baana balalume ba ku Mikimasi baali 122.
EZR 2:28 Baana balalume ba ku Beteli ni ku Ai baali 223.
EZR 2:29 Baana balalume ba ku Nebo baali 52.
EZR 2:30 Baana balalume ba ku Magibisi baali 156.
EZR 2:31 Baana balalume ba ku Eleamu unge baali 1,254.
EZR 2:32 Baana balalume ba ku Harimu baali 320.
EZR 2:33 Baana balalume ba ku Lodi, ni ku Adidi, ni ku Ono, baali 725.
EZR 2:34 Baana balalume ba ku Yeriko baali 345.
EZR 2:35 Baana balalume ba ku Sena baali 3,630.
EZR 2:36 Nvyalo ya babitambua bena Yedaia, wa mu nghanda yakua Yeshua, baali 973.
EZR 2:37 Baana balalume bena Imeri baali 1,052.
EZR 2:38 Baana balalume bena Pashuri baali 1,247.
EZR 2:39 Baana balalume bena Harimu baali 1,017.
EZR 2:40 Nvyalo ya Balawi baabwelele kufuma mu buzia ni ezi: Baana balalume bena Yeshua ni Kadimieli, benzikulu bakua Hodavia, baali 74.
EZR 2:41 Nvyalo ya bakemba, baana balalume bena Asafu, baali 128.
EZR 2:42 Nvyalo ya baana balalume bena bakalinda ba pa mulyango wa Nghanda yakua Leza, bena Salumu, ni bena Ateri, ni bena Talumoni, ni bena Akubu, ni bena Hatita, ni bena Sobai, bonse pamo baali 139.
EZR 2:43 Nvyalo ya babombi ba mu Nghanda yakua Leza baabwelele kufuma mu buzia ni ezi: Baana balalume bena Siha, ni bena Hasufa, ni bena Tabaoti,
EZR 2:44 ni bena Kerosi, ni bena Siaha, ni bena Padoni,
EZR 2:45 ni bena Lebana, ni bena Hegaba, ni bena Akubu,
EZR 2:46 ni bena Hagabu, ni bena Semaia, ni bena Hanani,
EZR 2:47 ni bena Gideli, ni bena Gahari, ni bena Reaia,
EZR 2:48 ni bena Resini, ni bena Nekoda, ni bena Gazamu,
EZR 2:49 ni bena Uza, ni bena Pasea, ni bena Besai,
EZR 2:50 ni bena Asina, ni bena Munimu, ni bena Nefisimu,
EZR 2:51 ni bena Bakubuki, ni bena Hakufa, ni bena Harihuri,
EZR 2:52 ni bena Basiluti, ni bena Mehida, ni bena Harsa,
EZR 2:53 ni bena Barkosi, ni bena Sisera, ni bena Tema,
EZR 2:54 ni bena Nesia, ni bena Hatifa.
EZR 2:55 Nvyalo ya babombi bakua Solomoni baabwelele kufuma mu buzia ni ezi: Baana balalume bena Sotai, ni bena Soferiti, ni bena Pedura,
EZR 2:56 ni bena Yala, ni bena Darkoni, ni bena Gideli,
EZR 2:57 ni bena Sefatia, ni bena Hatili, ni bena Pokereti-Hazebaimu, ni bena Ami.
EZR 2:58 Nvyalo ya babombi ba mu Nghanda yakua Leza, ni baana balalume bena babombi bakua Solomoni, baali 392.
EZR 2:59 Baba i balia baafumine ku Teli-Mela, ni ku Teli-Harsa, ni ku Kerubu, ni ku Adani, ni ku Imeri. Inzi tebaile kulondolola nangue babikolue babo pamo ni nvyalo yabo baali Baizraeli.
EZR 2:60 Nvyalo ya baana balalume bena Delaia, ni bena Tobia, ni bena Nekoda, baali 652.
EZR 2:61 Ni bena Hobaia, ni bena Hakosi, ni bena Barzilai waupile mukazyana wa mu lupua lwakua Barzilai Mugileadi, ni kwinikua liina lyabo.
EZR 2:62 Babo bantu baakebele mu butantiko bwa meena a nvyalo yabo, inzi tebaamwenekelemo. Ni pakako, baamwenekele kuba batiikeene, i kyaalengele kuti babafumie pa mwilo wa bukitambua.
EZR 2:63 Ndabukizi waabakaaniizie kulia bintu bizuukiisie, mpaka musita waakabapo kitambua wa kubombia Urimu ni Tumimu.
EZR 2:64 Bantu bonse baabwelele kufuma mu buzia baali 42,360
EZR 2:65 pasili kupendako babombi babo balalume ni banakazi baali 7,337, momo mwaali ni bakemba balalume ni banakazi 200.
EZR 2:66 Bafarasi babo baali 736 ni nyumbu twaali 245.
EZR 2:67 Nghamia yabo yaali 435 bapunda baali 6,720.
EZR 2:68 Lubaafikile mu Nghanda yakua Yawe ku Yeruzalemu, bamasiiko babo baapeele bupe bwa bunonsi bwabo na mutima onse pakuti Nghanda yakua Leza ikuulue paakale pa nkendo pa yaali yakuulilue.
EZR 2:69 Baapeele mwaali mwabeeleele buvinde bwabo, ni mu kipao baabiikilemo kilo 500 ya oro, ni kilo 2,800 ya mutofue, pamo ni nkanzu 100 ya babitambua.
EZR 2:70 Evi babitambua, ni Balawi, ni balia bakalinda ba pa mulyango wa Nghanda yakua Leza, ni bakemba, ni bange bantu, ni babombi ba mu Nghanda yakua Leza, pamo ni Baizraeli bonse, i vibaikeele mu mizi yabo.
EZR 3:1 Mwezi wa kilooba luwaakumeene, ni Baizraeli bonse lubaali basyali mu mizi yabo, bonse baakolongheene mu Yeruzalemu bali mu kimo.
EZR 3:2 Kupwako, Yoshua mwina Yozadaki wabuuka pamo ni ba kwakue babitambua ni Zerubabeli mwina Shealtieli pamo ni ba kwakue, ni kutendeka kukuula paakale kitale kyakua Leza wa Baizraeli, evi baye baelelapo ngelelo ya kuziziiwa nga mukilembeelue mu kitabu kya mizilo yakua Musa muntu wakua Leza.
EZR 3:3 Baakuulile paakale kitale palia payaali, anzia baali batiina baeni baali bali mu kyalo, baatendekele kumwelela Yawe ngelelo ya kuzizia ya lukeelekeele ni ya kyungulo.
EZR 3:4 Baakitile nsikunkulu ya mitanda nga mukilembeelue, kubalua busiku baali bafumia ngelelo ya kuzizia mukipaliile.
EZR 3:5 Pa kyamba, baeleele ngelelo ya kuziziiwa lyonse, ni ngelelo ya kubaluka kwa kwezi, ni ya nsikunkulu yonse yakua Yawe yaalandilue kuti izuukiwe, ni ya kubalua muntu waapeele bupe bwakue kuli Yawe na mutima wakue onse.
EZR 3:6 Kutula busiku bwa mambo bwa mwezi wa kilooba, baatendekele kumwelela Yawe ngelelo ya kuziziiwa, inzi kiputa kya Nghanda yakua Yawe Leza kyaali tekinaakuulue.
EZR 3:7 Bantu baalongiizie nfolanga ya kusazia babaazi ba mabue ni babaazi ba mbao, kabili baalongiizie ni bilio, ni bya kumina, ni mafuta, evi bitwalue ku bantu ba ku Sidona ni ba ku Tiro kuti bakite makabu na bimuti bya mumpelempele kufuma ku Lebanoni. Bebio bimuti byaaleetelue lya pa mendanke mpaka ku Yopa nga mubaapeleelue nsambu na Kiro likolo wa ku Persia.
EZR 3:8 Kupwako, mu mwezi wa bubili wa mu mwaka wa bubili lubaabweleele ku Nghanda yakua Leza ya mu Yeruzalemu, Zerubabeli mwina Shealtieli, ni Yoshua mwina Yozadaki, baabambile kubomba pamo ni ba kwabo, ni babitambua, ni Balawi babaafumine nabo mu buzia ni kubwelela ku Yeruzalemu. Baasaakwile Balawi baali bali na myaka kutendekela pa 20 ni mpuzio kuti baye bali bemanizi ba mwilo wa Nghanda yakua Yawe.
EZR 3:9 Yeshua i lu-aabuukile pamo ni baana bakue ni ba kwakue, ni Kadimieli ni baana bakue, ni baana bena Yuda, ni baana bena Henadadi pamo ni baana ba balupua babo Balawi, bonse pamo baabuukile ni kwimaninako bakuuli ba Nghanda yakua Leza.
EZR 3:10 Bakuuli lubaapwile kukuula kiputa kya Nghanda yakua Yawe, baabiikile babitambua bavwele makanzu a bukitambua koku bakwete ni ntandala, ni Balawi bena Asafu bakwete binsekelembue kuti bamutasie Yawe nga muba-aniinue na Daudi likolo wa Baizraeli.
EZR 3:11 Ni bo baimbile bamutasia Yawe balanda nangue, “Wene aweme, ni ntono yakue ku Baizraeli, ya muyayaya.” Bantu bonse baazanzwile mazui lubaali bamutasia Yawe, pantu kiputa kya Nghanda yakua Yawe kyaali kyasyakuulilue.
EZR 3:12 Inzi babitambua bengi ni Balawi, ni bakulu ba mikowa, pamo ni bamasiiko baamweneko Nghanda ya mambo yakua Yawe, lubaamwene kiputa kya ezi Nghanda kyakuulilue, baalilile bazanzwile mazui, ni bange bengi baasamwine na nsansa.
EZR 3:13 Bantu ba-andilue kwinika mazui a nsansa ni mazui a malilo, pantu bantu baakilile kusamuna ni mazui abo aunvwikile kule.
EZR 4:1 Balwani ba Bayuda ni ba mu mukowa wakua Benyamina lubaunvwile nangue, balia baafumine mu buzia balimukukuula paakale Nghanda yakua Yawe Leza wa Baizraeli,
EZR 4:2 baile kuli Zerubabeli, ni ku bakulu ba mikowa. Baabaanine nangue, “Twatona tumikwasie kukuula paakale, pantu ni fwefue benka tulitwamupupa Leza wenu nga mwemue, kabili tulitwaelela ngelelo kutula pa musita wakua Esari-Hadoni, likolo wa ku Asuria waatuleetele pano.”
EZR 4:3 Inzi Zerubabeli ni Yoshua, ni bakulu ba mikowa ya Baizraeli pamo ni bange ba-asukile nangue, “Mwemue temulipo na kantu ka kutukwasiizia kukuula paakale Nghanda yakua Leza wetu, inzi fwe bene twakaba kumukuulila Nghanda Yawe Leza wa Baizraeli, nga mutwa-aniinue na Kiro likolo wa ku Persia.”
EZR 4:4 Bekala kyalo baatoobwele mitima ya Bayuda ni kubatiinia sana evi tekuti batwalilile kukuula paakale.
EZR 4:5 Baapeele ni bituulilo ku babiloolo kuti banzie mapange a Bayuda mu nsiku yonse yakua Kiro likolo wa ku Persia, mpaka pa musita wa kuteeka kwakua Dario likolo wa ku Persia.
EZR 4:6 Ni mu buteeko bwakua Ahasuero, ku ntendeko ya buteeko bwakue, bantu baalembele lupapulo lwa kusongela bekazi ba mu Yudea ni ba mu Yeruzalemu.
EZR 4:7 Kabili mu nsiku yakua Artasasta, Bisilamu, ni Mitiredati, ni Tabeli, pamo ni benakue bonse, baamulembeele Artasasta likolo wa ku Persia. Lolo lupapulo lwaalembelue mu lulimi lwa Kishami, ni kubelengua mu lulimi lwa Kishami.
EZR 4:8 Kiloolo Rehumu, ni Simusai kalemba, baamulembeele likolo Artasasta lupapulo lwa busongezi palua Yeruzalemu nangue,
EZR 4:9 “Lupapulo kufuma kuli ndabukizi Rehumu kiloolo wa balukale, ni kalemba Simusai, ni ba mu mukowa wakue, ni bapinguzi, ni bange babiloolo baali bafumine ku mizi ya Ereki, ni ku Babeli, ni ku Susani, ni ku kyalo kya Elamu,
EZR 4:10 ni ntundu yonse yaasyeelepo, yaakumbilue na Osinapari mukulu mukindami, ni kubatwala mu muzi wa Samaria, ni mu nkendo ya kyalo yaali yasyele ku bwala mwenzi wa Efrati.”
EZR 4:11 Lupapulo lwaatumiinue likolo Artasasta lwaali lwalembelue evi, “Fwe babombi bobe bali ku bwala mwenzi wa Efrati twakupozia.
EZR 4:12 We Likolo, twalomba umane nangue, balia Bayuda baafumine kwenu ni kwiza kono kwetu ku Yeruzalemu, balimukukuula paakale muzi wa bukisanguka ni wa bubi, evi lenu balimukupwililila kibumba ni kukuula paakale kiputa.
EZR 4:13 Ni pakako we likolo upalile kumana nangue kine ozu muzi wakuulua ni bibumba byakue byapua, baba bantu tebakaba basonka musonko ni kulambula mulambu pamo ni kusonkela musebo, ni ku mpeleezio bukolo tebukaba na kibwezia.
EZR 4:14 Kabili ni fwefue benka pantu tuli ba kisinka ku nghanda ya bukolo, tetupapile kumona likolo wafuupulua. Ni pakako i kitwatumina lupapulo, evi likolo amane nangue
EZR 4:15 kipalile kukebelezia mu kitabu kya malanguluzi a babikolue bobe, momo i muulikumona ni kusanga nangue, ozu muzi, kisinka ni muzi wa bukisanguka, ni wa busanzo ku makolo ni ku biputu bya kyalo. Ezio nkendo, ni nkendo ya bwavia kutula pa kale, kabili i kyaalengele ozu muzi winoonue.
EZR 4:16 Twakubwila we likolo nangue kine ozu muzi wakuulua paakale ni bibumba byakue kine byapua, kisinka teukaba na nsempu ku bwala mwenzi wa Efrati.”
EZR 4:17 Likolo waamwasukile kiloolo Rehumu ni kalemba Simusai, ni benabo bange bonse baali baikele mu Samaria, pamo ni bonse baali baikeele ku bwala mwenzi wa Efrati nangue, “Namipozia.
EZR 4:18 Lupapulo lumwakitutumina bakilwalula mu lulimi lwetu ni kun'mbelengela,
EZR 4:19 ni nene nakibeetabizia, ni bo bakikebelezia, ni kusanga nangue ozu muzi, kisinka ni muzi wa bukisanguka, ni wa busanzo.
EZR 4:20 Bamakolo ba buvinde baali ku Yeruzalemu ni bo baali bateeka kyalo kyonse mpaka ku bwala mwenzi wa Efrati, kabili baali basonkia musonko ni kusonkia mulambu pamo ni kusonkia musebo, ni binge bintu byaali byafuma mu nkendo inge.
EZR 4:21 Kansi, biike lifunde lya kubalekezia baba bantu tekuti bakuule paakale ozu muzi mpaka pankaba kubapeela nsambu.
EZR 4:22 Kabili kengele tekulekelele ezi milandu inamyana, evi busanzo bukeeza kutwalilila kwemia makolo.”
EZR 4:23 Lupapulo lwakua likolo Artasasta pa lwaabelengelue pa menso akua Rehumu, ni Samusai kalemba, ni benabo, baile lubilo ku Bayuda ku Yeruzalemu kuya kubakaania na maka ni buvinde kuti balekele kukuula paakale.
EZR 4:24 Evi i vyaimeene miilo ya kukuula paakale Nghanda yakua Leza mu Yerualemu mpaka mu mwaka wa bubili wa kuteeka kwakua Dario likolo wa ku Persia.
EZR 5:1 Kupwako, bakabika babili Hagai ni Zakaria wa mu luvyalo lwakua Ido, babikwila Bayuda baali bali mu Yudea ni mu Yeruzalemu. Baababikwiliile mu Liina lyakua Leza wa Baizraeli waali wabasunga.
EZR 5:2 Zerubabeli mwina Shealtieli, ni Yoshua mwina Yozadaki, baile kutendeka kukuula paakale Nghanda yakua Leza ya mu Yeruzalemu, kabili baali bakwasiiziwe na bakabika bakua Leza.
EZR 5:3 Ozo wenka musita, Tatinai ndabukizi wa kiputu kya kyalo kya ku bwala mwenzi wa Efrati, ni Setari-Bozinai pamo ni benabo bange, baile kuli bene ni kubeepuzia nangue, “Nani wakimipeela nsambu ya kupwililila kukuula paakale ezi Nghanda yakua Leza ni kubiikamo byonse bipalile?”
EZR 5:4 Kabili baabepuziizie meena a bantu baali bakuula.
EZR 5:5 Inzi Leza waabalabukiile bakulu ba Bayuda. Ni pakako, babiloolo ba ku Persia ba-andilue kubakaania kukuula, mpaka pa bakalembanke lupapulo kuli likolo Dario ni kunvua bwasuko bwakue.
EZR 5:6 Lolu i lupapulo lwaatumiinue likolo Dario kuli Tatinai ndabukizi wa kiputu kya kyalo kya ku bwala mwenzi wa Efrati, ni Setari-Bozinai pamo ni benabo bange.
EZR 5:7 Lupapulo lwaali lwalembelue evi, “We likolo Dario twakupozia.
EZR 5:8 We likolo, twalomba umane nangue lutwakiya kwingila mu Yudea mpaka mu Nghanda yakua Leza Mukulu, twakisanga bantu balimukukuula na mabue akata balimukubiika ni mbao mu bibumba, ezi miilo yakiba yabombua bwino bwino, kabili itwaliliile kubombua lubilo lubilo.
EZR 5:9 Twakiipuzia bamasiiko batwane kine nani wakibapeela nsambu ya kupwililila kukuula paakale ezi Nghanda yakua Leza ni kubiikamo byonse bipalile.
EZR 5:10 Twakibeepuzia ni meena abo, evi tukulembele twasininkiziiziemo ni meena a bantu babalombwele.
EZR 5:11 Bakitwasuka nangue fwefue tuli babombi bakua Leza wa mwiulu ni pansi, kabili tulimukukuula paakale Nghanda yakua Leza nga muyaakuuliilue mu myaka yaapitileko na likolo mukulu wa Baizraeli ni kubiikamo byonse bipalile.
EZR 5:12 Inzi basiitue lubaaluviizie kuli Leza wa mwiulu, waabalekeleele kuti batwamue na Nebukadneza Mukaldea likolo wa ku Babeli, kabili i wenka wainoonene ni eno Nghanda yakua Leza.
EZR 5:13 Inzi mu mwaka wa mambo wakua Kiro likolo wa ku Babeli, ozu likolo waafumiizie nsambu ya kukuula paakale eno Nghanda yakua Leza,
EZR 5:14 kabili i waabweziizie ni bintu bya oro ni bya mutofue bya mu Nghanda yakua Leza, belia byaafumiiziwe na Nebukadneza mu Nghanda yakua Leza ya mu Yeruzalemu, ni kubitwala mu nghanda ya baleza ya ku Babeli. Likolo Kiro ni ye waafumiizie bebio bintu mu nghanda ya baleza ya ku Babeli ni kubitwala ku muntu umo liina lyakue Sesebasari waabiikilue kuba ndabukizi wa ku Yudea
EZR 5:15 ni kumwana nangue, ‘Twama bebi bintu bya mu Nghanda yakua Leza ukabe kutwala ku Yeruzalemu, ni kumwana kuti Nghanda yakua Leza ikakuulue paakale pa nkendo payaali yakuulilue.’
EZR 5:16 Kupwako Sesebasari waiza ye mwine ni kukuula biputa bya Nghanda yakua Leza ya mu Yeruzalemu. Kutula papo mpaka lenu, ilimukukuulua, ni lenu kumo teinapue.
EZR 5:17 Ni pakako, kine kuti kyamuwamina likolo, kuti wakeba mu kitabu kili mu Babeli kilembeluemo bintu byaali byakitika, evi amone kine kisinka likolo Kiro waafumiizie nsambu ya kukuula paakale ezi Nghanda yakua Leza mu Yeruzalemu, ni likolo atwane vili bupinguzi bwakue palua ozu mulandu.”
EZR 6:1 Kupwako, likolo Dario wapaana nsambu ya kukeba mu nghanda ya bitabu ili mu Babeli, bitabu byaali byalembeluemo bintu byaali byakitika.
EZR 6:2 Ni bo baasangile kitabu mu nghanda ikata ya ku Ekibatana mu kiputu kya kyalo kya ku Media, kekio kyaali kyalembeluepo twebo twa malanguluzi.
EZR 6:3 Likolo Kiro mu kuteeka kwakue kwa mwaka wa mambo, waapeene nsambu palua Nganda yakua Leza ya mu Yeruzalemu kuti ikuulue paakale pa nkendo payaali yakuulilue kuti ibe nkendo ya kwelelapo ngelelo ya kuzizia. Mu kutuuluka iye yali metre 27, ni mu kutana iye yali metre 27.
EZR 6:4 Bakakite milongo itatu ya mabue akata, ni mulongo umo wa bimuti bya lenu. Ni nfolanga ya kubombia ku ozu mwilo ikafume mu kipao kyakua likolo.
EZR 6:5 Ni bibombelo bya oro, pamo ni bya mutofue bya mu Nghanda yakua Leza belia byaatwemue na Nebukadneza kufuma ku Yeruzalemu kutwalua ku Babeli, bipalile bikabweziwe ni kubiikua paakale mu Nghanda yakua Leza ya mu Yeruzalemu, kubalua kintu pa nkendo yakyo, ni byo ukabibiike mu Nghanda yakua Leza.
EZR 6:6 Ni pakako, we Tatinai ndabukizi wa ku bwala mwenzi wa Efrati, ni Setari-Bozinai, pamo ni benenu bali mu kekio kiputu, fume pa ezio nkendo.
EZR 6:7 Tekubavulunghaniizie miilo ya kukuula. Muleke ndabukizi wa Bayuda, pamo ni masiiko a Bayuda bakuule paakale Nghanda yakua Leza pa nkendo pa yaali yakuulilue.
EZR 6:8 Unvue vimwaakakitila masiiko a Bayuda palua ezi miilo ya kukuula paakale Nghanda yakua Leza. Mupalile mukabe mwabapeela nfolanga ya pa musonko wa ku bwala mwenzi wa Efrati ya kufuma mu kipao kyakua likolo, evi miilo ya kukuula tekuti ikeemane.
EZR 6:9 Bintu byonse bilibyabombiiwa na babitambua ba mu Yeruzalemu, misoka ya nghombe, ni mpanga, ao twina mikooko, ni nghano, ni mukele, ni bya kumina, pamo ni mafuta kuba ngelelo ya kuzizia iliyaelelue Leza wa Mwiulu, bapalile kupeelua kubalua busiku,
EZR 6:10 evi baye baelela ngelelo ya bunu buweme kuli Leza wa mwiulu, ni kupepelela bukose bwakua likolo pamo ni baana bakue.
EZR 6:11 Kabili nafumia nsambu ya kulanda nangue kubalua muntu asikanakila totu twebo, mukafumie kimuti kimo ku nghanda yakue, mukakisongole ni kumusomekako, ni nghanda yakue ikaalulue mului wa bintu bituutikile.
EZR 6:12 Leza olia waalengele liina lyakue kuti liye lyali pa kekio kifuka, alovie makolo ni ntundu yonse yaakaba yatonene kwalulula kaka keebo ni kwinoona ezi Nghanda yakua Leza ili mu Yeruzalemu. Nene Dario i wafumia ezi nsambu, kuti ifikiliziiwe na maka onse.
EZR 6:13 Tatinai ndabukizi wa kiputu kya kyalo wa ku bwala mwenzi wa Efrati, ni Setari-Bozinai, pamo ni benabo, baakitile nga muba-aniinue na likolo Dario.
EZR 6:14 Masiiko a mu Bayuda baatwaliliile miilo ya kukuula koku balimukukoseleziiwa na kabika Hagai, ni kabika Zakaria wa mu luvyalo lwakua Ido. Baakuulile Nghanda yakua Leza nga muba-aniinue na Leza wa Baizraeli, ni mwaali mwabeeleele lifunde lyakua likolo Kiro, ni lyakua likolo Dario ni Artasasta likolo wa ku Persia.
EZR 6:15 Ezi Nghanda yakua Leza yaapwile mu busiku bwa butatu bwa mwezi wa Adari, mu mwaka wa mutanda wa mu buteeko bwakua likolo Dario.
EZR 6:16 Baizraeli, ni babitambua, ni Balawi, pamo ni bonse baali bafumine mu buzia, baakitile nsikunkulu ya kuzuukia Nghanda yakua Leza basansamukile.
EZR 6:17 Pa kuzuukia Nghanda yakua Leza, baafumiizie bupe bwa nghombe 100, ni mpanga 200, ni mpanga misoka 400, ni palua ngelelo ya bibalo bya Baizraeli, baafumiizie bupe bwa tupwata lyanondo ni tubili, nga mubeeleele mikowa lyanondo ni ibili ya Baizraeli.
EZR 6:18 Baababiikile babitambua mu mabumba abo, ni Balawi mu mabumba abo batantikilue kuti babombe miilo yakua Leza mu Yeruzalemu nga vikilembeelue mu kitabu kyakua Musa.
EZR 6:19 Busiku bwa lyanondo ni buna bwa mwezi wa mambo, balia baabwelele kufuma mu buzia, baakitile nsikunkulu ya Pasaka.
EZR 6:20 Pantu bobo busiku babitambua bonse pamo ni Balawi, baisambile ni kwiswesia kukonkana ni mbeela ya mpupo, ni kwipaya mukooko wa Pasaka pa mulandu wa bonse baali babwelele kufuma mu buzia, ni pa mulandu wa babitambua nabo, pamo ni pa mulandu wabo bene.
EZR 6:21 Baizraeli bonse baabwelele kufuma mu buzia, pamo ni bonse baali baikekele ku mibeele itiikeene ya Bazima kuti bamupalamine Yawe Leza wa Baizraeli, baaliile mukooko wa Pasaka.
EZR 6:22 Baakitile nsikunkulu ya mikate isili na ntutumusi mu nsiku kilooba basansamukile, pantu Yawe waabasansamusiizie ni kulengia mutima wakua likolo wa ku Asuria waluluke, evi abakwasieko mu mwilo wa kukuula paakale Nghanda yakua Leza, Leza wa Baizraeli.
EZR 7:1 Pa kyamba kya bebi byonse, mu buteeko bwakua Artasasta likolo wa ku Persia, Ezra mwina Seraia, Seraia mwina Azaria, Azaria mwina Hilkia,
EZR 7:2 Hilkia mwina Salumu, Salumu mwina Sadoki, Sadoki mwina Ahitubu,
EZR 7:3 Ahitubu mwina Amaria, Amaria mwina Azaria, Azaria mwina Merayoti,
EZR 7:4 Merayoti mwina Zerahia, Zerahia mwina Usi, Usi mwina Buki,
EZR 7:5 Buki mwina Abisua, Abisua mwina Finehasi, Finehasi mwina Eleazari, Eleazari mwina Haruni mukulu wa babitambua.
EZR 7:6 Ozu Ezra waizile kufuma ku Babeli, kabili i waali wamaniisie mizilo yaapeelue Musa kuli Yawe Leza wa Baizraeli. Likolo waamupeele Ezra byonse bi-aalombele nga mu-aalailue na Yawe.
EZR 7:7 Baizraeli bange, ni babitambua, ni Balawi, ni bakemba, ni bakalinda ba pa milyango, pamo ni babombi ba mu Nghanda yakua Leza baile ku Yeruzalemu mu mwaka wa kilooba wa kuteeka kwakua likolo Artasasta.
EZR 7:8 Ezra waafikile nabo ku Yeruzalemu mu mwezi wa busaano mu mwaka wa kilooba wa kuteeka kwakua likolo.
EZR 7:9 Pantu busiku bwa mambo bwa mu mwezi wa mambo, waatendekele kufuma ku Babeli, ni mu busiku bwa mambo bwa mwezi wa busaano waafikile mu Yeruzalemu, ni Leza waali wamulabukiile.
EZR 7:10 Kabili Ezra waali waipeele mu kusambilila mizilo yakua Yawe ni ku-ikonka, pamo ni kusambilizia milao ni bupinguzi ku Baizraeli.
EZR 7:11 Lupapulo lwaafumine kuli likolo Artasasta lu-aamulembeele kitambua Ezra, kalemba wa milao ni mizilo yakua Yawe ku Baizraeli lwaali evi,
EZR 7:12 “Nene Artasasta likolo wa makolo, natuma lupapulo kuli wewe kitambua Ezra kalemba wa mizilo yakua Leza wa mwiulu, nakupozia.
EZR 7:13 Nafumia nsambu ya kulanda nangue Baizraeli bonse, ni babitambua babo, pamo ni Balawi, bantu bonse bali mu bukolo bwane, balia batonene kuya ku Yeruzalemu kuti baya pamo ni wewe.
EZR 7:14 Pantu wewe watumua na likolo pamo ni bakasoka bakue kilooba kuti uye wipuzie palua Yudea ni Yeruzalemu, nga mubeeleele mizilo yakua Leza obe ili mu minue yobe,
EZR 7:15 ni kuya kutwama mutofue, ni oro byaafumiizie likolo ni bakasoka bakue kukonkana ni kutona kwabo ni kumupeela Leza wa Baizraeli ekeele mu Yeruzalemu.
EZR 7:16 Kabili upalile kutwama mutofue onse, ni oro yonse i waakasanga mu kiputu kyonse kya kyalo kya Babeli, pamo ni bupe bwaafumiizie bantu bonse kukonkana ni kutona kwabo, ni bwaafumiizie babitambua pa mulandu wa Nghanda yakua Leza wabo ili ku Yeruzalemu.
EZR 7:17 Ezio nfolanga upalile kukita maka obe onse ukabe kusitamo nghombe ndume, ni mpanga, ni twana twa mikooko, pamo ni ngelelo yabo ya bunga, ni ya divai ukaye kwelela pa kitale kya mu Nghanda yakua Leza wenu kili ku Yeruzalemu.
EZR 7:18 Mutofue onse ni oro yakaba kusyalapo, wewe ni ba kobe, mukabe kwibombia nga mu mutoneene kukonkana ni kutona kwakua Leza wenu.
EZR 7:19 Bibombelo biwaapeelue pa mulandu wa miilo ya mu Nghanda yakua Leza obe, ukabe kubitwala mu Yeruzalemu kuli Leza wa Baizraeli.
EZR 7:20 Kubalua kintu kyaakabula mu Nghanda yakua Leza obe, ukakisite na nfolanga ya mu nghanda ya bukonto yakua likolo.
EZR 7:21 Nene likolo Artasasta, napeela nsambu ku basungi bonse ba bukonto ba mu kiputu kya kyalo kya ku bwala mwenzi wa Efrati nangue kubalua kintu kyakaba kukebua na kitambua Ezra kalemba wa Mizilo yakua Leza wa mwiulu mukabe kumupeela pasili kutuntumbila,
EZR 7:22 mu kalingo ka talanta kilo 3,400 ya mutofue, ni kilo 10,000 ya nghano, ni litre 22,000 ya divai, ni litre 22,000 ya mafuta a mizeituni, pamo ni mukele wingi nga vi-ali waakalomba.
EZR 7:23 Kintu kyonse kyaakalombua na Leza wa mwiulu pa mulandu wa Nghanda yakua Leza, mupalile kukifikilizia bwino, kine te evio, busanzo bwakeeza pali likolo ni pa baana bakue.
EZR 7:24 Kabili namyana nangue, tekusonkie musonko ni kulambula mulambu pamo ni kusonkia musebo ku babitambua bakua Leza, ni ku Balawi, ni ku bakemba, ni ku bakalinda ba pa milyango, ni ku babombi ba mu Nghanda yakua Leza, ao babombi bange balibabombelamo.
EZR 7:25 Ni we Ezra, kukonkana ni maano awaapeelue na Leza obe, ukabe kusaakula babiloolo ba bapinguzi bakupingula bwino bantu ba mu kiputu kya kyalo kya ku bwala mwenzi wa Efrati. Ukabe kusaakula bantu bamanine mizilo yakua Leza obe. Ni balia basimanine mizilo ukabasambilizie.
EZR 7:26 Kubalua muntu asiliwanakila mizilo yakua Leza obe, ni yakua likolo, kisinka apalile kwipawa, ao kukumbua, ao kupokua bunonsi bwakue, ao kukakua mu buloko.”
EZR 7:27 Ezra waalandile evi, “Apaalue Yawe Leza wa babikolue wakinasia mutima wakua likolo Artasasta kuti apeele mukinzi ku Nghanda yakua Leza ili mu Yeruzalemu,
EZR 7:28 ni kunangisia buwame bwakue pa menso akua likolo ni a bakasoka bakue, ni pa menso a babiloolo bonse ba buvinde bakua likolo. Nakikoseleziiwa pantu Leza wane wakinkwasia. Nakikolonghania bakulu bonse ba mu Izraeli kuti babwele pamo ni nene.”
EZR 8:1 Baba i bakulu ba mikoa pamo ni nvyalo yabo, balia baabwelele pamo ni nene kufuma ku Babeli musita wa kuteeka kwakua likolo Artasasta.
EZR 8:2 Gershomu waali mukulu wa luvyalo lwakua Finehasi, Danieli waali mukulu wa luvyalo lwakua Itamari, Hatusi waali mukulu wa luvyalo lwakua Daudi
EZR 8:3 Bantu ba mu luvyalo lwakua Sekania, ni Parosi pamo ni Zakaria, mpendua yabo baali balalume 150.
EZR 8:4 Bantu ba mu luvyalo lwakua Pahati-Moabu: Elioenai mwina Zerahia, waali wali pamo ni balalume 200.
EZR 8:5 Bantu ba mu luvyalo lwakua Zatu, ni Sekania mwina Yahasieli, mpendua yabo baali balalume 300.
EZR 8:6 Bantu ba mu luvyalo lwakua Adini, ni Ebedi mwina Yonatana, mpendua yabo baali balalume 50.
EZR 8:7 Bantu ba mu luvyalo lwakua Elamu, ni Yesaia mwina Atalia, mpendua yabo baali balalume 70.
EZR 8:8 Bantu ba mu luvyalo lwakua Sefatia, ni Zebadia mwina Mikaeli, mpendua yabo baali balalume 80.
EZR 8:9 Bantu ba mu luvyalo lwakua Yoabu, ni Obadia mwina Yehieli, mpendua yabo baali balalume 218.
EZR 8:10 Bantu ba mu luvyalo lwakua Selomiti mwina Yosifia ni wa mu luvyalo lwakua Bani, mpendua yabo baali balalume 160.
EZR 8:11 Bantu ba mu luvyalo lwakua Bebai ni Zakaria mwina Bebai, mpendua yabo baali balalume 28.
EZR 8:12 Bantu ba mu luvyalo lwakua Azgadi, ni Yohana mwina Hakatani, mpendua yabo baali balalume 110.
EZR 8:13 Bantu ba mu luvyalo lwakua Adonikamu, lwaali lwa mpeleezio, meena abo ni aza: Elifeleti, Yueli, ni Semaia, mpendua yabo baali balalume 60.
EZR 8:14 Bantu ba mu luvyalo lwakua Bigwai, ni Utai mwina Zakuri, mpendua yabo baali balalume 70.
EZR 8:15 Nene Ezra naakolonghaniizie baba bonse mumbali mwenzi uile ku Ahava, papo patwaikeele nsiku itatu, naakebele mu bantu ni mu babitambua, nsyaasangilemo bantu ba mu luvyalo lwakua Lawi.
EZR 8:16 Ni pakako naakuutile Eliezeri, ni Arieli, ni Semaia, ni Elnatana, ni Yaribu, ni Elnatana, ni Natana, ni Zakaria, ni Mesulamu pantu i baali bakulu ba maano, pamo ni bakasambilizia babili Yoyaribu, ni Elnatana.
EZR 8:17 Baba bantu naabatumine kuli Ido mukulu wa ku Kasifia, baye bamwane Ido ni ba kwakue babombi ba mu Nghanda yakua Leza ba ku Kasifia batuleeteleko bantu ba kubomba mu Nghanda yakua Leza wetu.
EZR 8:18 Kukonkana ni buwame bwakua Leza pali fwefue, baatuleteele muntu wa maano, Serebia pamo ni baana bakue ni balupua bakue. Bonse pamo baali lyanondo ni mwanda. Ozo Serebia waali wa mu luvyalo lwakua Mali, Mali mwina Lawi, Lawi mwina Izraeli.
EZR 8:19 Kabili baatutumiine ni linge libumba lyaali lyalombwelue na Hasabia ni Yesaia ba mu luvyalo lwakua Merari, ni lupua lwabo pamo ni baana babo. Bonse pamo baali 20.
EZR 8:20 Baizile pamo ni babombi 220 baasaakwilue na Daudi ni masiiko kuti bakwasie miilo ya mu Nghanda yakua Leza. Ni meena abo amanikile.
EZR 8:21 Ni pakako, na-anine kuti twizilike kulia twali mumbali mwenzi wa Ahava, twikeefie ku menso akua Leza wetu, evi atwenzie bwino, fwefue, ni baana betu, pamo ni bunonsi bwetu bonse,
EZR 8:22 pantu naunvwile busoni bwa kumulomba likolo kuti atupeele libumba lya balukale, ni baseli ba pa farasi bakutukingilila ku balwani betu mu nzila, pantu twaamwanine likolo nangue, “Balia balibamukeba Leza, Leza aliwabakitila buwame, inzi kikonko ni kukanda kwakue kuli pa balia bonse balibamukaana.”
EZR 8:23 Kupwako, twaizilika bilio, twamulomba Leza wetu atusunge, ni ye watwitabila.
EZR 8:24 Naasaakwile bamakolo lyanondo ni babili ba babitambua: Serebia, ni Hasabia, pamo ni bange lyanondo ba mu lupua lwabo,
EZR 8:25 naabapimiine mutofue ni oro, pamo ni bibombelo, ni bulongio bwa mu Nghanda yakua Leza wetu, bwaalongiiziwe na likolo, ni bakasoka bakue, na masiiko akue, pamo ni bwaalongiiziwe na Baizraeli bonse baalipo.
EZR 8:26 Naabapiimiine talanta kilo 22,000 ya mutofue, ni bibombelo bya mutofue talanta 3,400, ni bya oro talanta 3,400,
EZR 8:27 ni bibakuli bya oro 20 byaali byafinine diriki kilo 8.5, ni bibombelo bibili bya mukuba bikindeeme byaali byabeeka nga oro.
EZR 8:28 Naabaanine nangue, “Mwemue muli bazuuke bakua Yawe, ni bibombelo ni byo bizuukile. Mutofue ni oro, byonse ni byabupe byakua Yawe Leza wa basiinue.
EZR 8:29 Kansi labukile bebi bintu ni kubisunga mpaka musita umwaakabipiima pa menso a nombozi ya babitambua, ni Balawi, ni bakulu ba mikowa ya Baizraeli bali mu Yeruzalemu, mu miputule ya Nghanda yakua Yawe.”
EZR 8:30 Kabili babitambua ni Balawi baapokeleele tulingo twa mutofue ni oro, ni bibombelo bizuuke, ni kubileeta ku Yeruzalemu mu Nghanda yakua Leza wetu.
EZR 8:31 Mu mwezi wa mambo, mu busiku bwa lyanondo ni ibili, twaafumine pa mwenzi wa Ahava ni kuya ku Yeruzalemu. Leza waali wali pamo ni fwefue ni kutupususia ku balwani, ni ku bantu baali batubenza mu nzila.
EZR 8:32 Lutwaafikile mu Yeruzalemu, twaatuuziizie nsiku itatu.
EZR 8:33 Ni mu busiku bwa buna, twaapiimiinue mutofue ni oro, pamo ni bibombelo bizuuke bya mu Nghanda yakua Leza wetu ni kumupeela Meremoti mwina kitambua Uria, pamo ni Eleazari mwina Finehasi, ni Balawi babili, Yozadaki mwina Yeshua, ni Noadia mwina Binui.
EZR 8:34 Bebio byonse byaalembelue mpendua yabyo ni kufina kwabyo.
EZR 8:35 Bonse baabwelele kufuma mu buzia, baamweleele Leza wa Baizraeli ngelelo ya kuziziiwa, nghombe ndume lyanondo ni ibili mubeleele mikowa ya Baizraeli, mpanga 96, twina mikooko 77, tupwata lyanondo ni tubili twa ngelelo ya bibalo. Bebi bintu byonse, byaali ngelelo ya kuziziiwa yakua Yawe.
EZR 8:36 Kabili baatwele mwano wakua likolo ku babiloolo ni ku bandabukizi ba ku bwala mwenzi wa Efrati, ni bo baakwasiizie bantu pamo ni Nghanda yakua Leza.
EZR 9:1 Pa kyamba kya bebi byonse, bakulu bamo baizile kun'mbwila nangue, Baizraeli ni babitambua pamo ni Balawi, tebakiikeka ku bekala kyalo ni mu kukita bubi nga Bakanaani, ni Bahiti, ni Baperizi, ni Bayebusi, ni Ba-amoni, ni Bamoabu, ni Bamisri, pamo ni Ba-amori.
EZR 9:2 Pantu Bayuda bakiya kuupila ku Bazima ni kuufia baana babo balalume ku banakazi Bazima. Ni pakako, luvyalo luzuuke lwakiisanzia ni lwa bekala kyalo mu bobu bubi. Baatendekeelepo ni banombozi pamo ni babiloolo.
EZR 9:3 Lunaunvwile toto twebo, kisinka naapeleleelue. Naazabwile ngubo yane ni nkanzu yane, naazukwile misisi ku mutue pamo ni ndevu, ni kwivopeka pansi napeleleelue.
EZR 9:4 Bantu bonse baali baunvwile mwezo wa twebo twakua Leza wa Baizraeli pa mulandu wa kilubo kya bantu baabwelele kufuma mu buzia. Baba bantu bankolongheene, ni ne naali nasyaikeele sie napeleleelue mpaka musita wa ngelelo ya kyungulo.
EZR 9:5 Lwaakumeene musita wa ngelelo ya kyungulo, naabuukile panaali nali ni bulanda, ni nkanzu yane yazabukile. Naafukeeme ni kulendula maboko ane kuli Leza wane
EZR 9:6 nalanda nangue, “We Leza wane, naunvua busoni ni kutooboka pakuti nkente kuli wewe Leza wane, pantu bibalo byetu byakila kiimo kyetu, ni bilubo byetu byakila kuvula, byafika mpaka mwiulu.
EZR 9:7 Kutula mu nsiku ya babikolue betu, twaali twali ba bibalo bikata mpaka lenu, ni pa mulandu wa bilubo byetu, fwefue ni makolo etu, ni babitambua betu, twaakwetue na makolo a byalo byeni evi twipawe, tukakue ni kutwalua mu buzia pamo ni kumoniiwa busoni nga vikili lelo.
EZR 9:8 Inzi lenu mu kasita kaniini, buwame bwakua Leza wetu bwakitufikila ni kutusiilapo bamo, ni kutupeela nkendo ya mutende pa kifuka kyakue kizuuke, kabili Leza wetu atusanikiile ni kuya watupeele bukose anzia kine tukili mu buzia bwetu.
EZR 9:9 Anzia kine tuli bazia, Leza takitulekelela mu buzia bwetu, inzi wakitulanga ntono yakue kupitila ku makolo a ku Persia, ni kutusia twakosele kuti tukuule paakale Nganda yakua Leza wetu, ni kuwamia bituuti, kabili wakitupeela nkendo ya mutende mu Yudea ni mu Yeruzalemu.
EZR 9:10 “We Leza wetu, ale evi lenu tulikulanda syani pa kyamba kya ezi milandu? Pantu twakilekela kukonka mafunde obe
EZR 9:11 awaatwanine kupitila mu babombi bobe bakabika walanda nangue kyalo kimulimukuya kupyana, kitiikeene na bya nkeni bya bekala kyalo, pantu mu kyalo bezuziiziemo bubi bwabo.
EZR 9:12 Ni pakako, tekulekelele bakazyana benu kuti boopue na baana babo, ao baana benu balalume kuti boope bakazyana babo, kabili tekuti mukakite nabo bukibuza pa musita uli onse, evi mukabe ni maka ni kulia bilio biweme bya mu kyalo, ni kusiila baana benu bupyani bwa muyayaya.
EZR 9:13 Ni pa kyamba kya bebi byonse byaatuponeene, byaakitikile pa mulandu wa bikitua byetu bibiipile, ni pa mulandu wa kilubo kyetu kikata, inzi twamona nangue wewe Leza wetu tewakitukanda nga mubeeleele bibalo byetu, wewe wakilengia kuti tusyalepo nga evi vituli.
EZR 9:14 Kubako kabili kuti twainoona mafunde obe mu kuupana ni bekala kyalo balibakita bebi bilubo? Eba, teulikutufiitilua ni kutulovia pasili kupususiapo ata umo?
EZR 9:15 We Yawe Leza wa Baizraeli! Wewe uli mulunghami, pantu fwefue i baasyelepo bapusukile, ni evi vyenka, mona tuluviizie ku menso obe, pantu tekuli muntu wakuvinda kwimana ku menso obe pa mulandu wa bobu bubi.”
EZR 10:1 Ezra lu-aali wapepa ni kulapila walimukulila ni kuya waipooza pansi pa ntanzi ya Nghanda yakua Leza, libumba likata lya Baizraeli, balalume ni banakazi pamo ni baana, baamukolongheene. Baba bantu baalilile sana ni bulanda bukata.
EZR 10:2 Ni Sekania mwina Yehieli, umo wa mu bena Elamu, waamwanine Ezra nangue, “Fwefue twakiluvia kuli Leza wetu pantu twakyupa banakazi Bazima, inzi anzia kili evio, maswapi akiliko ku Baizraeli palua ozu mulandu.
EZR 10:3 Kansi evi, tukite kipingo ni Leza wetu kya kukaana banakazi bonse, pamo ni bonse baavyelueko kukonkana ni nsokezi yakua tawelenzi, ni ya balia balibanakila milao yakua Leza wetu, kikitue kukonkana ni mizilo.
EZR 10:4 Kansi buuka pantu ozu ni mwilo obe we bunke, ni fwefue tuli pamo nobe. Ikoselezie sie.”
EZR 10:5 Kupwako, Ezra wabuuka ni kubalapizia bakulu ba babitambua, ni Balawi, ni Baizraeli bonse kuti bakabe kukita kukonkana ni totu twebo, ni bo balapa.
EZR 10:6 Ezra i lu-aabuukile kufuma pa ntanzi ya Nghanda yakua Leza, waingila mu muputule wakua Yohanani mwina Eliasibu, koko kwaaleele pasili kulia kantu ao kumina menda, pantu waali walimukulila pa mulandu wa bibalo bya balia baali bafumine mu buzia.
EZR 10:7 Baapundile mu Yudea ni mu Yeruzalemu ku bantu bonse baabwelele kufuma mu buzia kuti bakolonghane mu Yeruzalemu,
EZR 10:8 kabili onse asikasangua waizile mu ezi nsiku itatu, nga mwaalandiile masiiko ni babiloolo, waakapokua bunonsi bwakue bonse, ni ye mwine waakakumbua mu libumba lya balia baabwelele kufuma mu buzia.
EZR 10:9 Bantu bonse ba mu mukowa wakua Yuda ni wakua Benyamina, baakolongheene mu Yeruzalemu mu ezio nsiku itatu, ozo waali mwezi wa fundi pa nsiku 20 ya mwezi, ni bantu bonse baikeele pa kifuka kya pa musolo wa Nghanda yakua Leza balimukututuma na mwezo wa ezi milandu, kabili pantu kwaali ni nvula ikata.
EZR 10:10 Kitambua Ezra waimeene ni kubaana nangue, “Mwakiluvia pa kuupa banakazi Bazima, ni kulunda bilubo pa bilubo bya Baizraeli.
EZR 10:11 Ni pakako, lapile kuli Yawe Leza wa babikolue benu ni kukita mwatoneene, kabili mwikeke ku Bazima bonse ba mu kyalo, pamo ni ku bakazi Bazima.”
EZR 10:12 Kupwako, libumba lyonse lya-asuka na lizui likata nangue, “Tulikukita nga muwalandila.”
EZR 10:13 Baatwaliliile kulanda nangue, “Inzi bantu bavulile, ni nvula ilimukunoka, kabili tetuvinda kwimana panze, ezi miilo te ya busiku bumo ao nsiku ibili sie, pantu tuli ni bilubo bingi pa ozu mulandu.
EZR 10:14 Kansi evi, banombozi betu bemaniineko libumba lyonse, ni balia bonse ba mu mizi yetu boopile banakazi Bazima, baye baiza kubalua bantu pa musita ubapeelue baseekeziiziwe na masiiko ni bapinguzi ba mu muzi. Kine twakita evio, kikonko kyakua Leza kyakaba kufumiiwa pali fwefue, pa mulandu wa bilubo bitwakikita.”
EZR 10:15 Yonatana sie mwina Asaheli, ni Yazeia mwina Tikwa i basyaitabiile ozu mulandu, pamo ni Mesulamu, ni Sabetai Mulawi.
EZR 10:16 Inzi balia baabwelele kufuma mu buzia baakitile mukyaalandiilue, kitambua Ezra waasaakwile bakulu ba mikowa, kukonkana ni mpendua ya mikowa yabo, ni kubatantika kukonkana ni meena abo, baba bantu baikeele mu busiku bwa mambo bwa mwezi wa lyanondo kuti bakebelezie ozu mulandu.
EZR 10:17 Ni mu busiku bwa mambo bwa mwezi wa mambo, baapwile milandu ya balia bonse baupile banakazi Bazima.
EZR 10:18 Bantu baupile banakazi Bazima: Ba mu luvyalo lwakua Yoshua mwina Yozadaki ni ba mu luvyalo lwa ba kwakue mwaali: Maseia, ni Eliezeri, ni Yaribu, ni Gedalia.
EZR 10:19 Baba bantu baalaile nangue bakaba kukaana bakazi babo, kabili pantu baali ni kibalo, baeleele mpanga ya pa kisepe pa mulandu wa kibalo kyabo.
EZR 10:20 Mu luvyalo lwakua Imeri, mwaali Hanani ni Zebadia.
EZR 10:21 Mu luvyalo lwakua Harimu, mwaali Maseia, ni Elia, ni Semaia, ni Yehieli, ni Uzia.
EZR 10:22 Mu luvyalo lwakua Pashuri, mwaali Elioenai, ni Maseia, ni Isimaeli, ni Netaneli, ni Yozabadi, ni Elasa.
EZR 10:23 Yozabadi, ni Simei, ni Kelaia aliwakuutua Kelita, ni Petahia, ni Yuda, ni Eliezeri.
EZR 10:24 Eliasibu. Salumu, ni Telemu, pamo ni Uri.
EZR 10:25 Ba mu luvyalo lwakua Parosi mwaali: Ramia, ni Izia, ni Malkia, ni Miaminu, ni Eleazari, ni Malkia pamo ni Benaya.
EZR 10:26 Mu luvyalo lwakua Elamu, mwaali Matania, ni Zakaria, ni Yehieli, ni Abudi, ni Yeremoti, ni Elia.
EZR 10:27 Mu luvyalo lwakua Zatu, mwaali Elioenai, ni Eliasibu, ni Matania, ni Yeremoti, ni Zabadi, ni Aziza.
EZR 10:28 Mu luvyalo lwakua Bebai, mwaali Yohanani, ni Hanania, ni Zabai, ni Atilai.
EZR 10:29 Mu luvyalo lwakua Bani, mwaali Mesulamu, ni Maluku, ni Adaia, ni Yasubu, ni Seali, ni Yeremoti.
EZR 10:30 Mu luvyalo lwakua Pahati-Moabu, mwaali Adina, ni Kelali, ni Benaya, ni Maaseia, ni Matania, ni Besaleli, ni Binui, pamo ni Manase.
EZR 10:31 Mu luvyalo lwakua Harimu, mwaali Eliezeri, ni Isia, ni Malkia, ni Semaia, pamo ni Simeoni,
EZR 10:32 ni Benyamina, ni Maluku, ni Semaria.
EZR 10:33 Mu luvyalo lwakua Hasumu, mwaali Matenai, ni Matata, ni Zabadi, ni Elifeleti, ni Yeremai, ni Manase, pamo ni Simei.
EZR 10:34 Mu luvyalo lwakua Bani, mwaali Madai, ni Amramu, ni Ueli,
EZR 10:35 ni Benaya, ni Bedia, ni Keluhi,
EZR 10:36 ni Wania, ni Meremoti, ni Eliasibu,
EZR 10:37 ni Matania, ni Matenai, pamo ni Yasu.
EZR 10:38 Mu luvyalo lwakua Binui mwaali Simei,
EZR 10:39 ni Selemia, ni Natana, ni Adaia,
EZR 10:40 ni Makinadebai, ni Sasai, ni Sarai,
EZR 10:41 ni Azaraeli, ni Selenia, ni Semaria,
EZR 10:42 ni Salumu, ni Amaria, ni Yusufu.
EZR 10:43 Mu luvyalo lwakua Nebo mwaali Yeieli, ni Matitia, ni Zabadi, ni Zebina, ni Yadai, ni Yoeli, ni Benaya.
EZR 10:44 Baba bonse i baupile banakazi Bazima, ni bange pakati kabo baali ni banakazi baali basyabavyaliile ni baana. Babo banakazi baakumbilue pamo ni baana babo.
NEH 1:1 Totu i twebo twakua Nehemia mwina Hakalia. Lunaali mu Susani muzi ukata wa kyalo, mu mwezi wa Kisileu mu mwaka wa 20 mu kuteeka kwakua Artasasta,
NEH 1:2 Hanani, umo wa mu balupua bane waizile pamo ni bange balalume kufuma ku kyalo kya Yudea. Naabeepuziizie palua Bayuda baasyele pasili kutwalua mu buzia, ni mpunda palua Yeruzalemu.
NEH 1:3 Bangasukile nangue, pa balia baabwelele kufuma mu buzia, balia bekeele mu kiputu kya kyalo, bali mu lyemo likata ni kufuupulua sana. Kibumba kya Yeruzalemu ni kyo kyaatuutilue, ni milyango yakue yaaziziiziwe na mulilo.
NEH 1:4 Lunaunvwile evio, naikeele ni kutendeka kulila. Naakitile nsiku ingi nalimukulosia ni kuizilika bilio pamo ni kupepa kuli Leza wa mwiulu.
NEH 1:5 Naalandile nangue, “We Mulopue Leza wa mwiulu, Leza Mukulu aliwatiinia, we aliwafikilizia kipingo kyobe kya ntono ku balia bakutonene ni kunakila milao yobe,
NEH 1:6 twilizia mapepo ane ne mubombi obe lundinapepa busiku ni koba pa mulandu wa babombi bobe Baizraeli, nalapila bibalo byetu fwe Baizraeli, bibalo binaakubalile nene ni byaakubalile bantu ba mu nghanda ya babikolue bane.
NEH 1:7 Twaakitile bilubo bingi, kabili tetwaanakiile milao ni nsokezi pamo ni mizilo nga muwaamwaniine mubombi obe Musa.
NEH 1:8 Nakupaapaata wizukile keebo kawaamwanine mubombi obe Musa nangue, ‘Kine mwaluvia, naakamisalanghaniizia ku ntundu inge.
NEH 1:9 Inzi kine mwabwela kuli nene ni kunakila milao yane ni kwikita, anzia kine bantu benu bali mu buzia kule kupeleele kyalo, naakabaleeta ni kubakolonghania pa nkendo inaasaakwile kuti ngie nalanga kubapo kwane.’
NEH 1:10 “Baba i babombi bobe, kabili i bantu bobe bawaapususiizie na buvinde bobe bukata na maka a kuboko kobe.
NEH 1:11 We Mulopue, nakupaapaata utwilizie mapepo ane ne mubombi obe, ni mapepo a babombi bobe bawamiinue kukindika liina lyobe, kabili nakulomba un'mpaale bono busiku, ni kumulengia ozu muntu anghunvwileko nkumbu.” Pa ozo musita naali kateaniawa divai yakua likolo.
NEH 2:1 Mu mwezi wa Nisani, mu mwaka wa 20 mu kuteeka kwakua likolo Artasasta lu-aaleeteelue divai, naipokeleele ni kumutwalila likolo. Pa ozo musita naali nsinamonekepo wa bulanda ku menso akue, inga sie bobo bwenka busiku.
NEH 2:2 Likolo wangipuziizie, “Wewe teulwele, ale kiubeeleele ni bulanda ni kiki? Uli nga we ali ni bwavia mu mutima.” Ni nene naatiinine sana.
NEH 2:3 Na-asukile, “We likolo, ba wali ni bukose muyayaya. Ale ndikuwaminua syani koku muzi wane waaziikiluemo babikolue bane wasyele kibolia ni milyango yonse yaziziiziwe na mulilo?”
NEH 2:4 Likolo wangipuziizie, “Ukebeleki?” Ni ne naapepele kuli Leza wa mwiulu.
NEH 2:5 I lunaamwasukile likolo nangue, “Kine kuti kyamuwamina likolo, kabili kine ne mubombi obe naitabilua ku menso obe, kuti kyawama untume ku Yudea mu muzi uziikiluemo babikolue bane kuti nkabe kuya kukuula paakale.”
NEH 2:6 Likolo wangipuziizie ni nabeeza waikeele pepi nakue nangue, “Lwendo lobe lwaakaba lwa nsiku inga? Kabili waakabwela musitaki?” Evi kyamuwaamiine likolo kuti an'mpeele nsambu ya kuya, ni nene i pakumwana musita.
NEH 2:7 Kabili naamwanine likolo nangue kine kuti kyamuwamina, an'mpeele mpapulo ya kutwala ku ndabukizi ya mu biputu bya kyalo bya ku bwala mwenzi evi bakangitabizie kupita mpaka kuya kufika mu Yudea,
NEH 2:8 kabili nalomba n'mpeelue lupapulo lwa kutwala kuli Asafu aliwasunga musitu wakua likolo, evi nkapeelue mbao ya kukita milyango ya byubo bya Nghanda yakua Leza, ni milyango ya mu kibumba kya muzi, ni ya mu nghanda mu naakaba naikala. Ni likolo wan'mpeele mwaali mwabeeleele buwame bwakua Leza pali nene.
NEH 2:9 Kupwako, naya kufika ku ndabukizi ya mu biputu bya kyalo bya ku bwala mwenzi wa Efrati, nabapeela mpapulo yaafumine kuli likolo. Ni likolo wantumine pamo ni bakulu ba balukale, ni baseli ba pa bafarasi kuti ngie pamo nabo.
NEH 2:10 Sanibalati Muhori, ni kiloolo Tobia Muamoni lubaunvwile ezi mpunda, baafiitilue sana pa mulandu wa muntu waizile kukebela Baizraeli mutende.
NEH 2:11 Lunaafikile ku Yeruzalemu, naikeeleko nsiku itatu, pa kyamba kya nsiku itatu,
NEH 2:12 naabuukile busiku, pamo ni bange bantu, kabili nsyaabwilileko muntu keebo kana-aninue na Leza wane kakuti nkabe kukita ku Yeruzalemu, kabili nsyaile na tunge tunama, inga sie kalia kanaali naselelepo.
NEH 2:13 Naafumiine ku mulyango wa lulambe busikunke, lya ku lubali lwa kiina kya menda kya nghina nzoka, ni ku mulyango wa kizyalala, ni kumona kibumba kya Yeruzalemu vikyaali kyatuutilue, ni milyango viyaali yaziziiziwe na mulilo.
NEH 2:14 Kabili naile mpaka ku mulyango wa kasulo, ni ku kiziba kyakua likolo, inzi tekwaali nkendo ya kupitapo ni punda unaali naselelepo.
NEH 2:15 Kupwako, nasela busikunke mu lulambe nalimukukazia kibumba kya muzi. Pa kyamba naabwelele ni kuya kwingila pa mulyango wa lulambe unaafumiinepo.
NEH 2:16 Babiloolo tebaamanine kunaali naile, kabili tebaamanine kinaali nakita. Bayuda, ni babitambua, ni bamasiiko, ni babiloolo, pamo ni balia bonse baali babomba ezi miilo, nsyaababwilile.
NEH 2:17 Kupwako, nabaana nangue, “Mone maavia atuli nao, Yeruzalemu wasyala kibolia, ni milyango iziziiziwe na mulilo! Ize tukuule paakale kibumba kya Yeruzalemu, evi tekuti tuye twafuupulua kabili.”
NEH 2:18 Naabalondolweleele buwame bwakua Leza vibwaali bwali pali nene, ni vina-aninue kuli likolo. Baalandile nangue, “Ale twende tukuule paakale.” Kupwako, babamba ozu mwilo uweme.
NEH 2:19 Inzi Sanibalati Muhori, ni kiloolo Tobia Muamoni, pamo ni Gesemi Muarabu lubaunvwile ezi mpunda, baatusekele sana ni kutupunika balanda nangue, “Ni kiki keki kimulimukukeba kukita? Mulimwakeba kumusangukila likolo?”
NEH 2:20 Naabaasukile, “Leza wa mwiulu waakatupaala. Ni pakako, fwe babombi bakue twakaba kubamba kukuula paakale, inzi mwemue temuli na nsempu, ao nsambu, kabili temukalangulukua mu Yeruzalemu.”
NEH 3:1 Eliasibu Kitambua Mukulu, waabuukile ni kuya pamo ni lupua lwakue lwa babitambua ku kukuula mulyango wa mikooko. Bauzuukiizie ni kubiikamo milyango yakue kubambila ku lupungu lwa katua kamo mpaka ku lupungu lwa Hananeli.
NEH 3:2 Kufuma papo paapeziizie Eliasibu, bantu ba ku Yeriko i baatwaliliile kukuula paakale. Zakuri mwina Imuri ni ye i waatwaliliile kukuula paakale paapeziizie bantu ba ku Yeriko.
NEH 3:3 Baana balalume bena Hasena i baakuulile paakale mulyango wa lisabi. Baabiikile miilimiili, ni milyango, ni byela, ni minkolonto.
NEH 3:4 Meremoti mwina Uria, Uria mwina Hakosi, i waakuulile paakale kiputu kya kibumba kyaakonkelepo. Mesulamu mwina Berekia, Berekia mwina Mesezabeli, i waakuulile paakale kiputu kya kibumba kyaakonkelepo. Sadoki mwina Bana, i waakuulile paakale kiputu kya kibumba kyaakonkelepo.
NEH 3:5 Bantu ba ku Tekoa i baakuulile paakale kiputu kya kibumba kyaakonkelepo. Inzi bakulu babo tebaakwasiizieko miilo ya bemanizi ba miilo.
NEH 3:6 Yoyada mwina Pasea ni Mesulamu mwina Besodia, i baawamiizie mulyango wa kale, baabiikilemo miilimiili ni milyango, ni byela pamo ni minkolonto.
NEH 3:7 Melatia Mugibeoni, Yadoni Mumerono, ni bantu ba ku Gibeoni, ni ba ku Misipa, bantu ba mu buteeko bwakua ndabukizi wa kubwala mwenzi wa Efrati, i baakuulile paakale kiputu kya kibumba kyaakonkelepo.
NEH 3:8 Usieli mwina Harihaia, umo wa pa babombi baali basungulula oro, i waakuulile paakale kiputu kya kibumba kyaakonkelepo. Hanania umo wa pa babombi ba kukita manukato, i waakuulile paakale kiputu kya kibumba kyaakonkelepo. Baakuulile Yeruzalemu yalumine mpaka pa kelia kibumba kikata.
NEH 3:9 Refaia mwina Huri, kateeka wa kitika kya kiputu kya Yeruzalemu, i waakuulile paakale kiputu kya kibumba kyaakonkelepo.
NEH 3:10 Yedaia mwina Harumafi, i waakuulile paakale kiputu kya kibumba kyaakonkelepo kyakenteene ni nghanda yakue. Hatusi mwina Hasabunia i waakuulile paakale kiputu kya kibumba kyaakonkelepo.
NEH 3:11 Malkia mwina Harimu, ni Hasubu mwina Pahati-Moabu, i baakuulile paakale kiputu kya kibumba kyaakonkelepo ni lupungu lwa kikuka.
NEH 3:12 Salumu mwina Halohesi, kateeka wa kitika kya kiputu kya Yeruzalemu, pamo ni baana bakue bakazyana, i baamukwasiizie kukuula paakale kiputu kya kibumba kyaakonkelepo.
NEH 3:13 Hanuni, pamo ni bekazi ba mu Zanoa, i baakuulile paakale mulyango wa lulambe. Baukuulile ni kubiikamo mulyango, ni byela pamo ni minkolonto, ni kulundako metre 450 mu kuleepa kwa kibumba mpaka pa mulyango wa kizyalala.
NEH 3:14 Malkia mwina Rekabu, kateeka wa Beti-Karemu, i waakuulile paakale kiputu kya kibumba kyaakonkelepo ni kubiikamo milyango, ni byela pamo ni minkolonto.
NEH 3:15 Salumu mwina Kolihoze, kateeka wa ku Misipa, i waawamiizie mulyango wa kasulo, i waukuulile paakale ni kubiikapo mutenge, wabiikamo milyango, ni byela pamo ni minkolonto ni kukuula paakale kibumba kya kiziba kya Siloamu, pepi ni bukaba bwakua likolo, mpaka mu biselelo tukookele twafumine ku muzi wakua Daudi.
NEH 3:16 Nehemia, mwina Azibuku kateeka wa kitika kya kiputu kya ku Beti-Suri, i waakuulile paakale kiputu kya kibumba kyaakonkelepo mpaka ku nghanda ikata ikenteene ni kilibu kyakua Daudi, mpaka ku kiziba kya menda kyaimbilue na bantu, kabili mpaka ku nghanda ya babipami.
NEH 3:17 Balawi baali balombwelue na Rehumu mwina Bani, i baakuulile paakale kiputu kya kibumba kyaakonkelepo. Hasabia, kateeka wa kitika kya kiputu kya kyalo kya Keila, i waakuulile paakale kiputu kya kibumba kyaakonkelepo.
NEH 3:18 Binui mwina Henadadi, kateeka wa kitika kya kiputu kya kyalo kya Keila, i waakuulile paakale kiputu kya kibumba kyaakonkelepo.
NEH 3:19 Ezeri mwina Yeshua, kateeka wa ku Misipa, i waakuulile paakale kiputu kya kibumba kyaakonkelepo, kabili i waakuulile paakale ni ku nkendo inge kine uliwasela waya lya ku nghanda ya bilwilo, pa lipeto lya kibumba.
NEH 3:20 Baruku mwina Zabai, i waakuulile paakale kiputu kya kibumba kyaakonkelepo pamo ni mu nkendo inge kutula pa lipeto lya kibumba, mpaka pa mulyango wa nghanda yakua Eliasibu Kitambua Mukulu.
NEH 3:21 Meremoti mwina Uria, Uria mwina Hakosi, i waakuulile paakale kiputu kya kibumba kyaakonkelepo, kabili waakuulile paakale ni mu nkendo inge, kutendekela pa mulyango wa nghanda yakua Eliasibu, mpaka pa mpeleezio ya ezio nghanda.
NEH 3:22 Babitambua baafumine mumbali Yeruzalemu, i baakuulile paakale kiputu kya kibumba kyaakonkelepo.
NEH 3:23 Benyamina ni Hasubu, i baakuulile paakale kiputu kya kibumba kyaakonkelepo kyakenteene ni nghanda yabo. Azaria mwina Maseia, Maseia mwina Anania, i waakuulile paakale kiputu kya kibumba kyaakonkelepo lya mumbali nghanda yakue ye mwine.
NEH 3:24 Binui mwina Henadadi, i waakuulile paakale kiputu kya kibumba kyaakonkelepo, kabili waakuulile paakale ni kunge, kutendekela pa nghanda yakua Azaria, mpaka pa lipeto lya kibumba, kabili mpaka pa kafuli.
NEH 3:25 Palali mwina Uzai ni ye i waakuulile paakale kiputu kya kibumba kyaakonkelepo kutula pa lipeto lya kibumba, ni ku lupungu luleepeesie pa nghanda ya bukolo ili pepi ni musolo wa bakalinda. Pa kyamba kyakue, waakonkelepo ni Pedaia mwina Parosi,
NEH 3:26 pamo ni babombi ba mu Nghanda yakua Leza, babo baali baikeele ku lupili lwa Ofeli, babo i baakuulile paakale kibumba kikenteene ni mulyango wa menda lya ku kabanga ni ku lupungu luleepeesie.
NEH 3:27 Bantu ba ku Tekoa i baakuulile paakale kiputu kya kibumba kyaakonkelepo ni mu nkendo inge walungheeme lya kolia kufumine lupungu luleepeesie, kabili mpaka ku kibumba kya pa lupili lwa Ofeli.
NEH 3:28 Pa muulu mulyango wa farasi, paakuulilue paakale na babitambua, kubalua kitambua waakuulile paakale pa ntanzi ya nghanda yakue.
NEH 3:29 Sadoki mwina Imeri, i waakuulile paakale kiputu kya kibumba kyaakonkelepo kyaali kyali pa ntanzi ya nghanda yakue. Semaia mwina Sekania kalinda wa pa mulyango wa ku kabanga, i waakuulile paakale kiputu kya kibumba kyaakonkelepo.
NEH 3:30 Hanania mwina Selemia, ni Hanuni mwana wa mutanda mwina Zalafi, i baakuulile paakale kiputu kya kibumba kyaakonkelepo, kabili baakuulile paakale ni mu nkendo inge. Mesulamu mwina Berekia, i waakuulile paakale kiputu kya kibumba kyaakonkelepo kyaali kyali pa ntanzi ya nghanda yakue.
NEH 3:31 Malkia umo wa pa babombi baali basungulula oro, i waakuulile paakale kiputu kya kibumba kyaakonkelepo mpaka ku nghanda ya babombi ba mu Nghanda yakua Leza ni ya basulu ikenteene ni mulyango wa bakalinda ba pa mulyango, kabili mpaka pa muputule wa pa muulu wa mu kafuli.
NEH 3:32 Babombi baali basungulula oro pamo ni basulu, i baakuulile paakale kiputu kya kibumba kyaakonkelepo, kabili i baakuulile pa bukata bwa muputule wa pa muulu wa mu kafuli, mpaka pa mulyango wa mikooko.
NEH 4:1 Sanibalati lu-aunvwile nangue twaali twalimukukuula paakale kibumba, waafiitilue ni kukisua mutima, ni kutendeka kubapunika Bayuda.
NEH 4:2 Waalandile ntanzi ya balupua bakue, ni ntanzi ya balukale ba Basamaria nangue, “Kubako baba Bayuda bananghani kuti bakitaki? Eba, kuti baikuulila paakale kyubo? Kubako kuti baelelamo ni ngelelo? Kuti bapua mu busiku bumo? Kubako kuti babombia mabue elikiliilue na mului uziile wa bintu bituutikile?”
NEH 4:3 Kupwako, Tobia Muamoni waali wali pepi nakue walanda nangue, “Keki kibalimukukuula paakale anzia kine mumbue waiza kuselapo, kuti wabunghumuna kibumba kyabo kya mabue.”
NEH 4:4 Ni ne naapepele, “Twilizia we Leza wetu, pantu twakila kufuupulua. Ozu mufuupula ubabwelele bo bene, baleke bateekue buzia mu kyalo kya bweni,
NEH 4:5 kabili tekuvimba bubi bwabo ao kweleela bibalo byabo, pantu bakikuluvia ntanzi ya balia balibakuula.”
NEH 4:6 Ni pakako, fwefue twatwaaliliile kukuula paakale kibumba, kibumba kyonse twakikuulile mpaka pa bukata mu kutuuluka kwa kibumba, pantu bantu baali bali ni mutima wa kubomba miilo.
NEH 4:7 Kabili Sanibalati ni Tobia, ni Ba-arabu, ni Ba-amoni, ni Ba-asidodi, lubaunvwile nangue miilo ya kukuula paakale kibumba kya Yeruzalemu itwaliliile, ni palia paali patuutikile pakizibua, baakilile kufiitua.
NEH 4:8 Libumba lyabo lyonse, lyaabambile kukambila kuti beze balwisie Yeruzalemu ni kuleeta kinvulunghania mukati muzi.
NEH 4:9 Inzi twaapepele kuli Leza wetu, ni kubiika bakalinda bakutukingilila busiku ni koba.
NEH 4:10 Pa ozo wenka musita Bayuda baalandile evi, “Maka a balia balibatwama bitwamo akeepa, Kabili pali mului ukata wa bintu bituutikile bya kutwanzia kukuula paakale kibumba.”
NEH 4:11 Balwani ni bo baalandile nangue, “Tebakaba kumana ao kumona musita utwakaba kwiza pakati kabo ni kubeepaya, pamo ni kulovia ozu mwilo wabo.”
NEH 4:12 Bayuda baali baikeele pepi ni balwani betu lubaunvwile twebo twabo, baizile kutusoka nghendo lyanondo nangue, “Konse kumwaakaya, baakamisakukila.”
NEH 4:13 Ni pakako, naabiikile bantu ku kyamba kya kibumba kiipi ni paali pali tepanakuulue, naabiikilepo bantu mubabeelele mu lupua lwabo, bantu baali bali ni bipanga byabo, ni mikuuki, pamo ni mata abo.
NEH 4:14 Lunaamwene nangue bantu batooboka, naabaanine babiloolo, ni bemanizi, pamo ni bantu bange bonse nangue, “Tekutiine balwani benu, languluke vili bukulu bwakua Mulopue ni vi-ali ni maka. Kansi lue ni balwani benu pa mulandu wa lupua lwenu ni baana benu balalume ni banakazi, ni pa mulandu wa bakazi benu, pamo ni nghanda yenu.”
NEH 4:15 Balwani betu lubainikile nangue twaunvua kale mpunda, ni kwinika nangue Leza wakiinoona mapange abo, fwe bonse twaabweleele ku kibumba kubalua muntu pa mwilo wakue.
NEH 4:16 Kutula pa ozo musita, nsempu ya babombi bane baatwaliliile kubomba koku inge nsempu ya babombi yalimukubomba mwilo wa bukalinda batweme mikuuki, ni bisoolelo, ni mata, ni makanzu a byela. Babiloolo betu baali bali ku lubali lwa Bayuda
NEH 4:17 baali bakuula kibumba. Balia baali batwama bitwamo bya makuule, kubalua muntu waali wabomba na kuboko kumo ni kunge wakwete kilwilo.
NEH 4:18 Bakakuula ni bo, kubalua muntu waali wakuula wakakile kipanga mu kitungu. Ni wakulizia ntandala waali wali pepi ni nene.
NEH 4:19 Naabaanine babiloolo, ni bemanizi, pamo ni bantu bange bonse nangue, “Miilo ivulile, kabili itanine, ni fwefue twakisalanghaniwa mu kibumba kubalua muntu kule ni mwinakue,
NEH 4:20 lyonse kine mwaunvua ntandala yalila, palamineko, pantu Leza wetu alikutulwila.”
NEH 4:21 Ni pakako, twaatwaliliile kubomba, bangepo pakati ketu baali batweme mikuuki kutula lukeelekeele mpaka musita wa kumoneka kwa ntanda.
NEH 4:22 Ozo wenka musita, na-anine kubalua mwalalume pamo ni mubombi wakue bekale mu Yeruzalemu musita wa busiku, evi tuye twali ni bakutusunga musita wa busiku, ni musita wa koba baye batwaliliile kubomba.
NEH 4:23 Ni pakako, nene ni lupua lwane, ni babombi bane, ni bakalinda baali bankonkele, tetwaavuulile ngubo yetu. Kubalua muntu waali waya ku kutapa menda watweme ni kilwilo kyakue.
NEH 5:1 Pa kyamba kwaunvwikile mizowa ya bantu, ni ya bakazi babo, baali balimukwitendookela Bayuda nabo.
NEH 5:2 Bantu baali balanda nangue, “Fwefue ni baana betu balalume ni banakazi tuvulile, kansi tupalile kupeeluako nghano tulie tukeeza kufua.”
NEH 5:3 Kwaali ni bange baali balanda nangue, “Twakibiikia makaba etu kuba kikwatizi, ni makaba a mizabibu, ni nghanda yetu, pakuti tukabe ni nghano pa musita wa nzala.”
NEH 5:4 Kabili bange baali balanda nangue, “Twakikopa nfolanga ya kuti tukasonke musonko wa bisonso byetu, ni makaba a mizabibu kuli likolo.
NEH 5:5 Fwefue tuli sie bantu bamo, ni baana betu bali sie nga baana babo. Anzia kili evio, tupatikiziiziwe kutwala baana betu mu buzia, ni bamo ba mu baana betu bakazyana tebasyali kale bazia, tetuli na ka kukita pantu bisoka byetu, ni makaba etu a mizabibu tebisyapokelue na bantu bange.”
NEH 5:6 Naafiitilue sana lunaunvwile kwitendooka kwabo ni bulanzi bwabo.
NEH 5:7 Pa kyamba, naamwene kuti nsoke babiloolo ni bakateeka nabaana nangue, “Mwemue mulimwakopia bya kaloba ku bantu.” Ni pakako, naakolonghaniizie bantu bengi kuti nande nabo.
NEH 5:8 Naabaanine nangue, “Fwefue kukonkana ni buvinde bwetu, twakilubula Bayuda netu baasitilue na Bazima. Eba, kabili ni mwemue temwakeba kubasisia kuti ni fwe tubasite paakale?” Tepaali muntu waalandilepo kantu, bonse baikeele sie tondolo.
NEH 5:9 Kabili naalandile evi, “Bintu bimulimukukita tebiweme. Ale mwa-andiluaki kutiina Leza wetu evi balwani betu Bazima tekuti baye bali na nsambu ya kuya batutuka?
NEH 5:10 Ni nene wenka ni balupua bane pamo ni babombi bane, ndinabakopesia nfolanga ni nghano. Ni pakako, tulekele kukopia bya kaloba.
NEH 5:11 Ale babweziizie byonse bimwaali mwabakopia bya kaloba: bisonso byabo, makaba a mizabibu, ni makaba a mizeituni, ni nghanda yabo, pamo ni kibwezia kyonse kimwaalundilepo pa nfolanga, ni pa nghano, ni pa divai pamo ni pa mafuta.”
NEH 5:12 Kupwako, ni bo balanda nangue, “Tulikubabweziizia, kabili tetukasonza kantu ka kaloba kuli bene, tulikukita muwalandila.” Naakuutile babitambua, evi babiloolo ni bakateeka balape nangue baakakita nga mubaalandiile.
NEH 5:13 Pa kyamba, naakunkile nkanzu yane nalanda nangue, “Kubalua muntu asikaba kufikilizia keki kilapo, Leza amukunke ni kumufumia mu nghanda yakue pamo ni mu miilo yakue. Akunkike pasili kusyala na kantu.” Libumba lyonse lyaalandile nangue, “Evio sile. Yawe alumbue.” Bantu ni bo baakitile nga vibaalapile.
NEH 5:14 Kabili kutula sie lunaabiikilue kuba mulombozi wa mu kyalo kyakua Yuda, kutendeka mu mwaka wa 20 mpaka mu mwaka wa 32 mu kuteeka kwakua likolo Artasasta, nene ni lupua lwane twaapwile myaka lyanondo ni ibili, pasili kulia bilio bya bandabukizi.
NEH 5:15 Inzi bandabukizi bantangiliile, baali babiibikizia bantu ni kubapoka bilio ni bya kumina, kukila shekeli 40 ya nfolanga ya bityele, ku mpeleezio, babombi babo ni bo baatendekele kubiibikizia bantu, inzi nene nsyakikita evio pantu ndinatiina Leza.
NEH 5:16 Ee, naatwaaliliile ni miilo ya keki kibumba, kabili tetwaasitile bukaba, ni babombi bane bonse baali baiza kukolonghana pamo ni nene ku kubomba.
NEH 5:17 Ku meza yane kwaali kwaiza kulia bantu 150, Bayuda ni bakateeka, kubiikapo ni balia baafumine ku byalo byaali byatuzyungulukiile.
NEH 5:18 Ni bilio byaali byateaniwa bya busiku bumo, paali paelekua nghombe umo ndume, ni mikooko iweme mutanda, kabili baali bandeetela ni tooni, ni bukonto bwa bya kumina bya kubalua musango, lwendo lumo mu nsiku lyanondo, anzia evio, pa mulandu wa bebi bintu byonse, nsyaakebele bilio ku bantu, pantu kubiibikiziiwa kwaali kwakilile ku babo bantu.
NEH 5:19 We Leza wane nanguluke pa mulandu wa buwame bunakikitila baba bantu.
NEH 6:1 Sanibalati, ni Tobia, ni Gesemi Muarabu, pamo ni balwani betu baali basyelepo lubaunvwile mpunda nangue, nakikuula paakale kibumba, kabili nangue tekusyele nkendo ituutikile, anzia pa ozo musita naali nsinabiike milyango,
NEH 6:2 Sanibalati ni Gesemi baalaiziizie mikenzi ya kunghana nangue, “Iza mu muzi umo wa mu lulambe lwa Ono.” Inzi mapange abo aali a kunkitila kibiipile.
NEH 6:3 Ni nene naalaiziizie mikenzi kwabo ya kubaana nangue, “Ezi miilo indimukubomba ni ikata, ni pakako, nene nsiizako. Ale kindikwimikila miilo pa mulandu wa kwiza koko ni kiki?”
NEH 6:4 Ni bo baatwaliliile kulaizia nghendo yonse ina balanda sie twebo tumonke, ni ne nakaana sie.
NEH 6:5 Kabili Sanibalati waatumine mubombi wakue watweme ni lupapulo tekuba lwaizeelue. Lolu lwaali lwendo lwa busaano.
NEH 6:6 Mu lupapulo mwaali mwalembelue evi, “Mpunda ilimukunvwika ku Bazima, ni Gesemi alimukusininkizia nangue wewe pamo ni Bayuda, mulimukukambila kwisangula. Ni pakako, i kimulimukukuulila paakale kibumba. Kukonkana ni ezio mpunda, wewe ulimukukeba kuba likolo wabo.
NEH 6:7 Wewe usoobwele bakabika bakuti babikule pa mulandu obe mu Yeruzalemu nangue mu kyalo kya Yudea muli ni likolo, ni evi likolo wakaba kubwilua mubeeleele ezi milandu. Ni pakako tupalile kulanzyania.”
NEH 6:8 Ni nene na-asukile nangue, “Bebi biwalanda tebiliko, walanda sie bya mu mutue obe.”
NEH 6:9 Baba bonse balimukukeba sie kututiinia balanda nangue, “Bakaba kunakapo sie, ni miilo teikaba kubombeka.” Inzi naamulombele Leza nalanda, “Ale n'mpeele maka.”
NEH 6:10 Busiku bumo naile ku nghanda yakua Semaia mwina Delaia, Delaia mwina Mehetabeli waali waizaliilue mu nghanda yakue. Ni ye waalandile nangue, “Twende tusaakaane mu Nghanda yakua Leza ni kwikiikilila pantu bakambiile kwiza kukwipaya. Ee, kwiza kukwipaya busiku.”
NEH 6:11 Naalandile evi, “Kubako muntu ali nga nene kuti wabutuka? Kubako muntu ali nga nene kuti waingila mu Nghanda yakua Leza kuti epususie? Nene nsingilamo.”
NEH 6:12 Kisinka nainikile nangue taatuminue na Leza, inzi waakitile sie ezi mbiko pa mulandu wane, pantu Tobia ni Sanibalati baamulipile.
NEH 6:13 Baamulipile kuti eze antiinie, evi pa nduvia bamone mulandu ubi wa kunfuupwilapo.
NEH 6:14 “We Leza wane languluka Tobia ni Sanibalati kukonkana ni bikitua byabo, kabili languluka ni Noadia kabika mwanakazi, ni bange bakabika basyelepo balimukukeba kuntiinia.”
NEH 6:15 Kibumba kyaakuulilue nsiku 52, ni kyo kyaapwile pa nsiku 25 ya mwezi wa Eluli.
NEH 6:16 Balwani betu bonse lubaunvwile evio, balia Bazima bonse baali batuzyungulukiile ni bo baatiinine ni kwitoobokelela bo bene, pantu bainikile nangue ezio miilo yaabombelue na bukwasi bwakua Leza wetu.
NEH 6:17 Mu ezio nsiku, banombozi ba Bayuda baali bamutumiine Tobia mpapulo ingi, ni maasuko akua Tobia aali afika kuli bene.
NEH 6:18 Mu Yudea mwaali bantu bengi baali balapile pa mulandu wakue, pantu waali muko wakua Sekania mwina Ara, ni Yohanani mwanaye waali waupile mwina Mesulamu mwina Berekia.
NEH 6:19 Kabili baalandile bikitua byakue biweme kuli nene, ni ye baamwanine vinaalandile. Inzi Tobia ni ye waatwaliliile kuntumina mpapulo ya kuntiinia.
NEH 7:1 Kibumba lukyaali kyasyapwile kukuulua paakale, ni milyango luyaali yasyabiikilue, ni bakalinda ba milyango, ni bakemba, ni Balawi basyababiikile,
NEH 7:2 Naamubiikile Hanani umo wa mu lupua lwane kuba kalinda wa Yeruzalemu, pamo ni Hanania waali wali kiloolo wa balukale baali balinda kyubo kya Yeruzalemu pantu Hanania waali wa kisinka, kabili waali watiina Leza kukila vyaali vyatiina bange bantu.
NEH 7:3 Naabaanine nangue, “Milyango ya Yeruzalemu tekuti iye yaizulua mpaka sie koba kasyaselele, ni musita onse bakalinda lubakiimeene pa mwilo wa kulinda, milyango iye yaizeelue yakiikilue, kabili mubiikepo bekazi ba mu Yeruzalemu kuti baye bali bakalinda, kubalua muntu pa musita wakue, kabili kubalua muntu aye waimeene wakentele ku nghanda yakue.”
NEH 7:4 Muzi wa Yeruzalemu waali waleepele kabili watanine, inzi bantu tebaali bavulilemo, ni mo mwaali temunakuulue nghanda.
NEH 7:5 Mu mutima mwane Leza waabiikilemo malanga akukolonghania babiloolo, ni bakateeka, ni bantu bange kuti bapendue kukonkana ni mubabeeleele mu nvyalo. Naasangile kitabu kyaali kyalembeluemo balia baabwelele mu lwendo lwa mambo. Ni ne naamwene balembeluemo.
NEH 7:6 Baba i bekazi ba mu kiputu kya kyalo, balia baafumine mu buzia, bantu ba mu balia baatwelue kuli Nebukadneza likolo wa ku Babeli, baba bantu baabweleele mu Yeruzalemu ni mu Yudea, kubalua muntu mu muzi wakue.
NEH 7:7 Balia baizile pamo ni Zerubabeli meena abo ni aza: Yoshua, ni Nehemia, ni Azaria, ni Ramia, ni Nahamani, ni Mordekai, ni Bilsani, ni Misipereti, ni Bigwai, ni Nehumu, pamo ni Bana. Mpendua ya balalume Baizraeli ni ezi:
NEH 7:8 Bena Parosi baali 2,172.
NEH 7:9 Bena Sefatia baali 372.
NEH 7:10 Bena Ara baali 652.
NEH 7:11 Bena Pahati-Moabu, bena Yeshua ni Yoabu, baali 2,818.
NEH 7:12 Bena Elamu baali 1,254.
NEH 7:13 Bena Zatu baali 845.
NEH 7:14 Bena Zakai baali 760.
NEH 7:15 Bena Binui baali 648.
NEH 7:16 Bena Bebai baali 628.
NEH 7:17 Bena Azgadi baali 2,322.
NEH 7:18 Bena Adonikamu baali 667.
NEH 7:19 Bena Bigwai baali 2,067.
NEH 7:20 Bena Adini baali 655.
NEH 7:21 Bena Ateri, benzikulu bakua Hezekia, baali 98.
NEH 7:22 Bena Hasumu baali 328.
NEH 7:23 Bena Besai baali 324.
NEH 7:24 Bena Harifu baali 112.
NEH 7:25 Bena Gibeoni baali 95.
NEH 7:26 Bantu ba ku Betlehemu, ni ba ku Netofa baali 188.
NEH 7:27 Bantu ba ku Anatoti baali 128.
NEH 7:28 Bantu ba ku Beti-Asimaweti, baali 42.
NEH 7:29 Bantu ba ku Kiriati-Yearimu, ni ba ku Kefira, ni ba ku Beroti, baali 743.
NEH 7:30 Bantu ba ku Rama, ni ba ku Geba, baali 621.
NEH 7:31 Bantu ba ku Mikimasi baali 122.
NEH 7:32 Bantu ba ku Beteli, ni ba ku Ai baali 123.
NEH 7:33 Bantu ba ku muzi unge wa Nebo baali 52.
NEH 7:34 Bantu ba ku muzi unge wa Elamu baali 1,254.
NEH 7:35 Bena Harimu baali 320.
NEH 7:36 Bantu ba ku Yeriko baali 345.
NEH 7:37 Bantu ba ku Lodi, ni ba ku Hadidi, pamo ni ba ku Ono, baali 721.
NEH 7:38 Bena Sena baali 3,930.
NEH 7:39 Babitambua, bena Yedaia, ba mu nghanda yakua Yeshua, baali 973.
NEH 7:40 Bena Imeri baali 1,052.
NEH 7:41 Bena Pasuri baali 1,247.
NEH 7:42 Bena Harimu baali 1,017.
NEH 7:43 Balawi, bena Yeshua i kulanda nangue Kadimieli, pamo ni bena Hodavia baali 74.
NEH 7:44 Bakemba, bena Asafu baali 148.
NEH 7:45 Bakalinda ba pa mulyango, ni bena Salumu, ni bena Ateri, ni bena Talmoni, ni bena Akubu, ni bena Hatita, pamo ni bena Sobai, baali 138.
NEH 7:46 Babombi ba mu Nghanda yakua Leza, bena Siha, ni bena Hasufa, ni bena Tobaoti,
NEH 7:47 ni bena Kerosi, ni bena Sia, ni bena Padoni,
NEH 7:48 ni bena Lebana, ni bena Hagaba, ni bena Salmai,
NEH 7:49 ni bena Hanani, ni bena Gideli, ni bena Gahari,
NEH 7:50 ni bena Reaia, ni bena Resini, ni bena Nekoda,
NEH 7:51 ni bena Gazamu, ni bena Uza, ni bena Pasea,
NEH 7:52 ni bena Besai, ni bena Munimu, ni bena Nefusemu,
NEH 7:53 ni bena Bakibuki, ni bena Hakufa, ni bena Harihuri,
NEH 7:54 ni bena Basiliti, ni bena Mehida, ni bena Harsa,
NEH 7:55 ni bena Barkosi, ni bena Sisera, ni bena Tema,
NEH 7:56 ni bena Nezia, ni bena Hatifa.
NEH 7:57 Bantu ba mu luvyalo lwa babombi bakua Solomoni: Bena Sitai, ni bena Sofereti, ni bena Perida,
NEH 7:58 ni bena Yala, ni bena Darkoni, ni bena Gideli,
NEH 7:59 ni bena Sefatia, ni bena Hatili, ni bena Pokereti-Hazebaimu, ni bena Amoni.
NEH 7:60 Babombi bonse ba mu Nghanda yakua Leza pamo ni bena Solomoni, baali 392.
NEH 7:61 Baba i balia baabwelele kufuma ku Teli-Mela, ni ku Teli-Harsa, ni ku Kerubu, ni ku Adoni, pamo ni ku Imeri, inzi ba-andilue kulondolola bikolue ni masiiko abo pakuti kisininkiziiwe nangue baali Baizraeli.
NEH 7:62 Bena Delaia, ni bena Tobia, ni bena Nekoda, baali 642.
NEH 7:63 Bena babitambua, ni bena Hobaia, ni bena Hakosi, ni bena Barzilai, olia waupile mukazyana mwina Barzilai Mugileadi wa mu mukowa wakua Barzilai, ni kwinikua liina lyabo.
NEH 7:64 Babo bantu baakebele butantiko bwa meena abo mu balia baapendeelue nvyalo, inzi tebaamwenekelemo. Ni pakako, baamwenekele kuba batiikeene, i kyaalengele kuti babafumie pa mwilo wa bukitambua.
NEH 7:65 Ndabukizi waabakaaniizie kulia bintu bizuukiisie, mpaka musita waakabapo kitambua wa kubombia Urimu ni Tumimu.
NEH 7:66 Bantu bonse pamo, baali 42,360.
NEH 7:67 Babombi babo, balalume ni banakazi, baali 7,337. Bakemba balalume ni banakazi baali 245.
NEH 7:68 Bafarasi babo baali 736. Nyumbu 245.
NEH 7:69 Nghamia yabo yaali 435. Punda yabo yaali 6,720.
NEH 7:70 Bamasiiko bamo ba mu basibo, baafumiizie bunonsi bwabo pa mulandu wa ezi miilo. Tirshata waafumiizie mu kipao darkoni 1,000 ya oro, bibakuli 50, bya kuvwala babitambua 530.
NEH 7:71 Bange bamasiiko ba mu basibo baabiikile mu bukonto bwa miilo, darkoni 20,000 ya oro, ni manemane 2,200 ya mutofue.
NEH 7:72 Ni bantu baasyelepo, baafumiizie darkoni 20,000 ya oro, ni manemane 2,000 ya mutofue, ni bya kuvwala 67 bya babitambua.
NEH 7:73 Evi babitambua, ni Balawi, ni balia bakalinda ba pa mulyango wa Nghanda yakua Leza, ni bakemba, ni bange bantu, ni babombi ba mu Nghanda yakua Leza, pamo ni Baizraeli bonse, baikeele mu mizi yabo. Mu mwezi wa kilooba, Baizraeli bonse baile kwikala mu mizi yabo.
NEH 8:1 Bantu bonse baakolongheene nga muntu umo pa kifuka kimo kikata kyaali pa ntanzi ya mulyango wa menda. Baamwanine Ezra kasambilizia wa mizilo aleete kitabu kya mizilo yakua Musa yaalailue Baizraeli kuli Yawe.
NEH 8:2 Mu busiku bwa mambo bwa mwezi wa kilooba, kitambua Ezra waaleetele kitabu kya mizilo ku libumba lya balalume ni banakazi, ni ku bonse baali ni buvinde bwa kunvua.
NEH 8:3 Ezra waabelengele kitabu pa ntanzi yabo bonse pa musolo waali wali lya pa mulyango wa menda, kutendeka lukeelekeele mpaka koba mukati, ntanzi ya babo balalume ni banakazi, pamo ni bonse baali ni buvinde bwa kunvua, bantu bonse baali batwiliziizie vyaali vyabelengua kitabu kya mizilo.
NEH 8:4 Ezra kasambilizia wa mizilo waali waimeene pa kintamba kya bimuti, kyaali kyakitiilue sie pa mulandu wa ezio miilo. Ku kulio kwakue kwaali kwaimeene Matitia ni Sema, ni Anaia, ni Uria, ni Hilkia, ni Maseia, ni ku kuso kwakue kwaali kwaimeene Pedaia, ni Misaeli, ni Malkia, ni Hasumu, ni Hasubadana, ni Zakaria pamo ni Mesulamu.
NEH 8:5 Ezra waavingulwile kitabu ni bantu bonse bamumwene, pantu waali wali pa muulu kukila bantu bonse, ni lu-aavingulwile sie kekio kitabu, bantu bonse baimeene.
NEH 8:6 Ezra waamutasiizie Yawe Leza Mukulu. Kupwako, bantu bonse baitabizia balanda nangue, “Evio sile! Evio sile!” Koku balendwile maboko mu muulu. Pa kyamba baafukeeme, bakontama ni kumupupa Yawe ni nkebu yabo yakumiizie pansi.
NEH 8:7 Bantu lubaimeene kubalua muntu pa kifuka kyakue, baba Balawi, Yeshua, ni Bani, ni Serebia, ni Yamini, ni Akubu, ni Sebetai, ni Hodia, ni Maseia, ni Kelita, ni Azaria, ni Yozabadi, ni Hanania, ni Pelaia, baatendekele kubalondolwela bantu mizilo.
NEH 8:8 Baabelengele bwino bwino mu kitabu kya mizilo yakua Leza, ni kulondolola mpaka ni bantu baunvwisia byaali byabelengua.
NEH 8:9 Bantu bonse lubaunvwisiizie mizilo, baatendekele kulila. Ni pakako, Nehemia waali ndabukizi, ni kitambua Ezra kabili kasambilizia wa mizilo, pamo ni Balawi balia baali basambilizia bantu, baabaanine bantu bonse nangue, “Bono i busiku buzuuke bwakua Yawe Leza wenu, kansi tekuloosie, ao kulila.”
NEH 8:10 Nehemia waalandile evi, “Ale bwelele ku nghanda muye mukite nsikunkulu, mulie manone, ni kumina divai isonsele. Inzi tekulabe kubapeelako balia basili na bilio bingi pantu bono busiku i busiku buzuuke bwakua Yawe Leza wetu. Tekuye mwali ni bulanda pantu nsansa yakua Yawe i maka enu.”
NEH 8:11 Ni pakako, Balawi baatalaziizie bantu bonse balanda nangue, “Talale pantu bono busiku buzuukile, kabili tekuye mwali ni bulanda.”
NEH 8:12 Kupwako, bantu bonse baya ku kulia ni kumina, ni kutwalilako basikwete nsempu ya bilio, ni kusangalala sana, pantu baunvwisiizie twebo tubaabelengeelue.
NEH 8:13 Busiku bwa bubili, bamasiiko ba mikowa pamo ni babitambua ni Balawi, baamukolonghaniine kalemba Ezra kuti basambilile bwino bwino twebo twa mizilo.
NEH 8:14 Ni bo baasangile mwalembelue mizilo ya-aninue Musa na Yawe nangue Baizraeli bapalile bakabe baikala mu mitanda pa busiku bwa nsikunkulu ya mwezi wa kilooba,
NEH 8:15 kabili nangue, bapalile kupunda mu mizi yabo yonse pamo ni mu Yeruzalemu balanda nangue, “Sele ku lupili muye mutwame misambo ya mizeituni, ni misambo ya mizeituni ya mu kisonso, ni misambo ya ngazi, ni ya bunkindu, ni ya bimuti binge bikata, evi muye mwimike mitanda nga mulandiile mizilo.”
NEH 8:16 Kupwako, bantu baya kutwama misambo, bakitilako mitanda kubalua muntu pa muulu wa nghanda yakue, ni mu misolo yabo, ni mu misolo ya Nghanda yakua Leza, ni pa kifuka kikata kili pa mulyango wa menda, pamo ni pa kifuka kikata kya pa mulyango wa Efraimu.
NEH 8:17 Ni bonse baafumine mu buzia, baakitile mitanda, ni kwikalamo, pantu kutula ku nsiku yakua Yoshua mwina Nuni, mpaka pa bobo busiku, Baizraeli baali tebanakitepo nsikunkulu ya ozu musango. Kabili yaali nsansa ikata sana.
NEH 8:18 Kubalua busiku, kutula busiku bwa mambo, mpaka busiku bwa mpeleezio, Ezra waali wababelengela bantu kitabu kya mizilo yakua Leza. Ni busiku bwa kilooba, baakitile nsikunkulu. Busiku bwa mwanda kwaali kulonghana kuzuuke nga mubeeleele mafunde.
NEH 9:1 Mu ozo mwezi pa nsiku 24 Baizraeli baakolongheene ni kuizilika bilio bavwele masaaka, ni kuya baipuupile bulongo ku mitue.
NEH 9:2 Baizraeli baikekele ku baeni bonse, baimeene ni kutendeka kulapila bibalo byabo ni bilubo bya basibo.
NEH 9:3 Baimeene pa kifuka kyabo ni kubelengelua kitabu kya mizilo yakua Yawe Leza wabo mwila wa nsita itatu, ni inge nsita itatu baali balimukulapila bibalo ni kumupupa Yawe Leza wabo.
NEH 9:4 Yeshua, ni Kadimieli, ni Bani, ni Sebania, ni Buni, ni Serebia, ni Bani unge pamo ni Kenani, baimeene mu nkendo ya Balawi balimukupepa Yawe Leza wabo basamwine.
NEH 9:5 Pa kyamba, baba Balawi, Yeshua, ni Kadimieli, ni Bani, ni Hesbunia, ni Serebia, ni Hodia, ni Sebania pamo ni Petahia baalandile nangue, “Imane mumutasie Yawe Leza wenu wa muyayaya ni muyayaya.” “Liina lyakue lilumbue, liina likindeeme kukila mapaalo onse ni bulumba bonse.”
NEH 9:6 Ezra waalandile, “We Yawe, wewe bunke bobe uli Yawe, Waalengele myulu, ni byonse bilimo, Kyalo pamo ni byonse bilimo, Myenzi pamo ni byonse bilimo. Kubalua kintu ukipeele bukose. Ni libumba lya mwiulu lililyakupupa.
NEH 9:7 Wewe uli Yawe, Leza waamusaakwile Abramu, Waamufumiizie mu Uri ya Bakaldayo, Waamwinikile liina lya Abrahamu.
NEH 9:8 Waamwene vi-aali wa kisinka kuli wewe, Waakitile nakue kipingo Waalaile kupeela nvyalo yakue kyalo kya Bakanaani, Kya Bahiti, ni kya Ba-amori, Kya Baperizi, ni kya Bayebusi, ni kya Bagirgasi, Wewe waafikiliizie bulayo bobe pantu wewe uli mulunghami.”
NEH 9:9 “Wewe waamwene bukyuzi bwa babikolue betu lubaali mu Misri, Kabili waunvwile malilo abo lubaali kumbali Lyezi lya Kasi.
NEH 9:10 Wewe waakitile tupapo pali Farao, Pa babiloolo bakue bonse, ni pa bantu bonse ba mu kyalo kyakue, Wewe waali wamanine babikolue betu vibaakitiilue bibiipile na Bamisri. Wewe waikitiile liina lisyaliliile ni lenu kumo.
NEH 9:11 Waakasaniizie lyezi pa menso a bantu bobe, Ni bo baapitile mu lyezi pansi paumine. Balia baali babakonkele waabatibiziizie, Nga libue mu menda engi, waababunziizie.
NEH 9:12 Wewe waalombwele bantu bobe na lipumpu lya lilezi musita wa koba, Na lipumpu lya mulilo musita wa busiku, evi baye basanikiilue mu nzila mu baali baya.
NEH 9:13 Wewe waakookeele pa Lupili lwa Sinai. Wewe waalandile nabo wali mu muulu, Waabapeele bupinguzi bwa nsambu ni mafunde a kiine ni alungheeme, pamo ni mizilo, ni milao iweme.
NEH 9:14 Waabamaniizie Sabata yobe izuuke, Ni kubapeela milao ni mafunde pamo ni mizilo kupitila muli Musa mubombi obe.”
NEH 9:15 “Lubaunvwile nzala waabapeele mukate kufuma mwiulu. Lubaunvwile kyaka, waabapeele menda kufuma mu mwalala. Wewe waabaanine bakapyane kyalo. Kyalo kiwaalaile kubapeela.”
NEH 9:16 Inzi babikolue betu baafiiniizie mitima, Kabili tebaatonene kutwilizia milao yobe.
NEH 9:17 Baakeene kunakila, kabili tebaalangulukile tupapo tuwaakitile pakati kabo, Inzi baafiniizie mitima yabo, Ni mu kwisangula kwabo, baibiikile mukulu wa kubalombola, Evi babwelele mu buzia bwabo. Inzi wewe uli Leza aliwaeleela, Wewe uli ni buwame, ni nkumbu ingi, kabili tewizi kulenga kufiitua, Wewe wizuzi ntono. Ni pakako, tewaabalekeeleele.
NEH 9:18 Ee, musita ubaikitiile musoka wa nghombe wa kusungulula, Baalandile nangue ozu i leza wenu waamifumiizie ku Misri. Lubaakitile bintu bikata bya mufuupula,
NEH 9:19 “Wewe kukonkana ni bwingi bwa nkumbu yobe, tewaabalekeeleele mu kaseeba. Lipumpu lya lilezi telyaalekeele kubalombola musita wa koba, Lipumpu lya mulilo telyaalekeele kubalombola musita wa busiku, evi liye lyabasanikiile ni kubalangilila nzila ya kuyamo.
NEH 9:20 Wewe waabapeele Mweo obe uweme wakubasambilizia, Kabili waabapeele maana a kulia ni menda a kutalalika kyaka kyabo.
NEH 9:21 Ee, pa myaka 40, waali wabateekamaniizie mu kaseeba, Kabili tebaabulilue kantu. Ngubo yabo teyaazabukile, Ni makasa abo teavimbile.
NEH 9:22 “Wewe waabapeele bwanzio pa bukolo ni ntundu ya bantu, Kabili waabapeele byalo byaali byabazyungulukiile. Ba-anziizie kyalo kya Hesihoni kyaali kyateekelue na Sioni, Kabili ba-anziizie kyalo kya Basani kyaali kyateekelue na likolo Ogi.
NEH 9:23 Wewe waavuziizie baana babo nga ntanda ya mwiulu, Ni kubaleeta mu kyalo Kiwaalaile basibo kuti bengile ni kwikalamo.
NEH 9:24 Baana babo baingiile ni kupyana kyalo, ni we wa-anziizie Bakanaani. Wewe waabiikile Bakanaani mu maboko a babo baana. Bantu bobe baakitile mubatoneene, Ku makolo ni ku bantu ba mu kekio kyalo.
NEH 9:25 Baapokele mizi ili ni byubo ni kyalo kili ni muvundo. Baapokele mizi ili ni bunonsi, nghanda izuzimo bintu bingi biweme, Biina bya menda byaali byaimbilue, Ni makaba a mizabibu, ni makaba a mizeituni, pamo ni bimuti bili ni mazabo engi. Ni pakako, baaliile ni kwikuta, Baasambukile ni kwisansamusia mu buwame bobe.”
NEH 9:26 “Anzia kyaali evio tebaakunakiile, Bene baakusangukiile ni kufunghamina mizilo yobe, Baipaile bakabika bobe, Babo baababikwiliile kuti babwelele kuli wewe. Baakitile bibalo bikata.
NEH 9:27 Ni pakako, waabapeene mu maboko a balwani babo baabakyuziizie, Inzi lubaali baema, baakuliliile. Waabonvwile momo mwiulu. Mu bwingi bwa nkumbu yobe waabapeele banombozi Baabafumiizie mu maboko a balwani babo.”
NEH 9:28 “Inzi lubaali basyaikeele bwino, kabili baakuluviizie, Ni we waabalekeleele mu maboko a balwani babo, ni bo baabateekele. Musita ubaakubweleele ni kukulilila, Waabonvwile momo mwiulu Ni kubapususia nghendo ingi pa mulandu wa nkumbu yobe.”
NEH 9:29 “Kabili waabasokele kuti babwelele ku mizilo yobe. Anzia kyaali evio, kabili baakitile kiitoni, ni milao yobe tebaitwiliziizie, Inzi baasangukiile milao yobe, i waalandile nangue Muntu waakanakila ezio milao waakaba ni bukose. Ba-alukile ni kiitoni, ni kufinia mitima yabo, kabili tebaatonene kunakila.
NEH 9:30 Anzia kyaali evio, waabasipikiziizie myaka ingi, Ni kubasoka na Mweo obe kupitila mu bakabika, Inzi tebaakunvwile, Ni pakako waabalekeleele mu maboko a bekala kyalo.
NEH 9:31 Anzia kyaali evio, mu bwingi bwa nkumbu yobe, Tewaabaloviizie, ao kubalekelela, Pantu wewe uli Leza wa buwame ni wa nkumbu.”
NEH 9:32 “Kansi evi we Leza wetu, Leza Mukulu ni wa buvinde, Leza wakutiinia, Leza aliwafikilizia kipingo kya ntono, Izukila lyemo lyaali pali fwefue Pamo ni makolo etu, ni bakulu betu, ni babitambua betu, pamo ni bakabika betu, Ni basiitue, pamo ni bantu bobe bonse, Lyemo litwaemene kutula pa musita wa makolo a ku Asuria mpaka lelo.
NEH 9:33 Inzi wewe uli mulunghami mu milandu yonse yaatukitikiile, Pantu waakitile mu kisinka, anzia kine fwefue twaaluviizie.
NEH 9:34 Makolo etu, ni banombozi betu, ni babitambua betu, ni babikolue betu Tebaanakiile mizilo yobe, Tebaatwiliziizie mizilo pamo ni milao yobe i waapingheene nabo.
NEH 9:35 Anzia baali bali mu bukolo bwabo, Ni mu buwame bobe bukata buwaabapeele, mu kyalo kikata kilimo nfukeezi kiwabapeele, Tebaakubombeele, kabili tebaapilibukile kuti balekele bikitua byabo bibiipile.
NEH 9:36 Mona fwefue lelo tuli bazia. Tuli bazia mu kyalo kiwaapeele babikolue betu, Momo mubaaliile mazabo pamo ni binge bintu biweme.
NEH 9:37 Pa mulandu wa bibalo byetu, Bunonsi bwa keno kyalo bulibwaya ku bamakolo balibatuteeka. Balibatuteeka mubatoneene, ni nama yetu balibaikitila mubatoneene, Tuli mu lyemo likata.”
NEH 9:38 Ni pa mulandu wa bebi bintu byonse, twakita kipingo kya kisinka ni kukilemba. Evi bakulu betu, ni Balawi, pamo ni babitambua betu, basyusyuta ni kusinsikapo kamanino kabo.
NEH 10:1 Bantu baasyusyutilepo ni kusinsikapo kamanino ni baba: Ndabukizi Nehemia mwina Hakalia, ni Zedekia.
NEH 10:2 Seraia, ni Azaria, ni Yeremia,
NEH 10:3 ni Pasuri, ni Amaria, ni Malkia,
NEH 10:4 ni Hatusi, ni Sebania, ni Maluku,
NEH 10:5 ni Harimu, ni Meremoti, ni Obadia,
NEH 10:6 ni Danieli, ni Ginetoni, ni Baruku,
NEH 10:7 ni Mesulamu, ni Abia, ni Miyaminu,
NEH 10:8 ni Maazia, ni Bilgai, ni Semaia.
NEH 10:9 Yeshua mwina Azania, ni Binui wa mu baana bena Henadadi, ni Kadimieli,
NEH 10:10 ni balupua babo ni baba: Sebania, ni Hodia, ni Kelita, ni Pelaia, ni Hanani,
NEH 10:11 ni Mika, ni Rehobu, ni Hasabia,
NEH 10:12 ni Zakuri, ni Serebia, ni Sebania,
NEH 10:13 ni Hodia, ni Bani, ni Beninu.
NEH 10:14 Parosi, ni Pahati-Moabu, ni Elamu, ni Zatu, ni Bani,
NEH 10:15 ni Buni, ni Azgadi, ni Bebai,
NEH 10:16 ni Adonia, ni Bigwai, ni Adini,
NEH 10:17 ni Ateri, ni Hezekia, ni Azuri,
NEH 10:18 ni Hodia, ni Hasumu, ni Bezai,
NEH 10:19 ni Harifu, ni Anatoti, ni Nobai,
NEH 10:20 ni Magipiasi, ni Mesulamu, ni Hesiri,
NEH 10:21 ni Mesezabeli, ni Sadoki, ni Yadua,
NEH 10:22 ni Pelatia, ni Hanani, ni Anaia,
NEH 10:23 ni Hosea, ni Hanania, ni Hasubu,
NEH 10:24 ni Halihesi, ni Pileha, ni Sobeki,
NEH 10:25 ni Rehumu, ni Hasabuna, ni Maseia,
NEH 10:26 ni Ahia, ni Hanani, ni Anani,
NEH 10:27 ni Maluku, ni Harimu, ni Bana.
NEH 10:28 Fwefue bonse, Baizraeli, babitambua ni Balawi, ni bakalinda ba pa mulyango, ni bakemba, ni babombi ba mu Nghanda yakua Leza, pamo ni bonse baali baikekele ku Bazima ba mu byalo pa mulandu wa mafunde akua Leza pamo ni bakazi babo, ni baana babo balalume ni banakazi, ni kubalua muntu waali ni buvinde bwa kunvua,
NEH 10:29 Baba bonse ba-ampeene pamo ni Baizraeli nabo, ni masiiko abo, baikakile pamo mu kitiipu ni kilapo kya kukonka milao ibaapeelue na Leza kupitila muli Musa mubombi wakua Leza, pamo ni kunakila bwino mafunde ni milao ni myano yonse yakua Yawe Mulopue wetu.
NEH 10:30 Kabili twaalapile nangue tekuti tukoofie baana betu ku Bazima bali mu kyalo, ni fwe tekuti tukalekelele baana betu kuupilako.
NEH 10:31 Bazima ba mu kyalo kine baleeta makwebo, ao nghano kuti basisie busiku bwa Sabata, fwefue tetukasitako pa bobo busiku ao sie bunge busiku buzuuke, kubalua mwaka wa kilooba tetukalima makaba, ni mizia yonse yaakeeleelua.
NEH 10:32 Kabili twaikitiile milao ya kupeela kimo kya bitatu bya shekeli mu bubombi bwa mu Nghanda yakua Leza wetu kubalua mwaka.
NEH 10:33 Pa mikate ya kilangililo, ni pa ngelelo ya bunga ya lyonse, ni pa ngelelo ya kuziziiwa ya lyonse ya mu nsiku ya Sabata, ni mu nsikunkulu ya kubaluka kwa mwezi, ni nsikunkulu inge ilekenkeene, ni ya pa bintu bizuuke, ni ya pa ngelelo ya bibalo pa mulandu wakupwanika Baizraeli, ni pa miilo yonse ya mu Nghanda yakua Leza wetu.
NEH 10:34 Fwe babitambua, ni Balawi, pamo ni bantu bonse twakiteya bubale, pa mulandu wa nkuni ya kuleetua mu Nghanda yakua Leza wetu, nga mukibeeleele mu nghanda ya basiitue, kuti iye yaleetua pa musita upalile, kubalua mwaka, evi iziziiwe pa bintamba byakua Yawe Leza wetu nga mukilembeelue mu mizilo.
NEH 10:35 Kabili twaikitiile milao ya kupeela ntomono ya buzombozi bwa mazabo mu Nghanda yakua Yawe ni bwa mazabo onse a misango yonse ya bimuti kubalua mwaka.
NEH 10:36 Kukonkana ni vikilembelue mu mizilo, kubalua libeli mwalalume wa muntu ni wa nama, apalile kutwalua mu Nghanda yakua Leza wetu ku babitambua baakaba babomba mu Nghanda yakua Leza wetu, ni kubalua libeli lyalalume lya kaana kena mbuzi ni kena mukooko.
NEH 10:37 Kabili twaakaba twatwala bunga bwetu bwa buzombozi bwa mambo, ngelelo yetu ya mbezu, ni mazabo a misango yonse ya ku bimuti, ni ya bya kumina, ni ya mafuta ku babitambua mu miputule ya mu Nghanda yakua Leza wetu. Kabili twaakaba twatwala kamo ka pa lyanondo ka mu buzombozi bwetu ku Balawi, pantu Balawi i baali baya kukolonghania kamo ka pa lyanondo mu mizi yetu yonse.
NEH 10:38 Kitambua wa mu luvyalo lwakua Haruni waakaba wali pamo ni Balawi musita ubaakaba baya kukolonghania kamo ka pa lyanondo. Balawi lubalibakolonghania kamo ka pa lyanondo, bapalile bafumia kamo ka pa lyanondo ka pa bebio ni kutwala mu Nghanda yakua Leza wetu mu miputule mu nghanda ya bukonto.
NEH 10:39 Baizraeli ni Balawi bapalile kutwala ngelelo ya nghano, ni ya bya kumina, ni ya mafuta a mizeituni mu miputule mulimwasungua bibombelo bya mu kifuka kizuuke, momo mulimwaikala babitambua, ni bakalinda ba pa mulyango, pamo ni bakemba. Ni fwefue tetukasia Nghanda yakua Leza wetu.
NEH 11:1 Pa kyamba, banombozi ba bantu baikeele mu Yeruzalemu. Bange bonse baateele bubale evi basaakulepo lupua lumo pa elia lyanondo lwa kuti luye lwikale mu Yeruzalemu muzi uzuuke, ni elia inge fundi ilikusyalapo, i ya kuya kwikala mu mizi inge.
NEH 11:2 Bantu baapaalile balia bonse baipeele mu kutona kwabo kuya kwikala mu Yeruzalemu.
NEH 11:3 Baba i bakulu ba biputu bya byalo baali baikeele mu Yeruzalemu, Baizraeli bamo, ni babitambua, ni Balawi, ni babombi ba mu Nghanda yakua Leza, pamo ni bena Solomoni baali baikeele mu Yudea kubalua muntu pa nkendo yakue mu mizi ilekenkeene.
NEH 11:4 Inzi bange ba mu mukowa wakua Yuda ni ba mu mukowa wakua Benyamina baile kwikala mu Yeruzalemu. Ataia mwina Uzia, Uzia mwina Zakaria, Zakaria mwina Amaria, Amaria mwina Sefatia, Sefatia mwina Mahalaleli, Mahalaleli mwina Peresi.
NEH 11:5 Peresi mwina Maseia, Maseia mwina Baruki, Baruki mwina Koli-Hose, Koli-Hose mwina Hazaia, Hazaia mwina Adaia, Adaia mwina Yoyaribu, Yoyaribu mwina Zakaria, Zakaria mwina Musiloni.
NEH 11:6 Baana balalume bena Peresi baali baikeele mu Yeruzalemu, baali babipami 468.
NEH 11:7 Salu mwina Mesulamu, Mesulamu mwina Yoedi, Yoedi mwina Pedaia, Pedaia mwina Kolaia, Kolaia mwina Maseia, Maseia mwina Itieli, Itieli mwina Yesaia.
NEH 11:8 Ni pa kyamba kyakue kwaali, Gabai, ni Salai. Bonse pamo baali balalume 928.
NEH 11:9 Ni Yoeli mwina Sikiri i waali kiloolo wabo, ni Yuda mwina Hesenua i waali kiloolo wa bubili mu muzi.
NEH 11:10 Yedaia, mwina Yoyaribu, ni Yakini.
NEH 11:11 Seraia mwina Hilkia, Hilkia mwina Mesulamu, Mesulamu mwina Sadoki, Sadoki mwina Merayoti, Merayoti mwina Ahitubu mukulu wa mu Nghanda yakua Leza,
NEH 11:12 ni ba mu mukowa wabo baali babombela mu Nghanda yakua Leza baali bali balalume 822: Adaia mwina Yerobohamu, Yerobohamu mwina Pasuri, Pasuri mwina Malkia,
NEH 11:13 ni ba mu mukowa wabo, ni masiiko a basibo, baali 242, ni Amasai mwina Azarieli, Azarieli mwina Azai, Azai mwina Mesilomoti, Mesilomoti mwina Imeri,
NEH 11:14 ni babipami ba mu mukowa wabo bali ni buvinde, bonse pamo baali 128, ni mulombozi wabo waali Zabdieli mwina Hagedolimu.
NEH 11:15 Semaia mwina Hasubu, Hasubu mwina Azirikamu, Azirikamu mwina Hasabia, Hasabia mwina Buni.
NEH 11:16 Sebetai, ni Yozabadi, bakulu ba mu mukowa wa Balawi, i baali bakenteleele miilo ya panze pa Nghanda yakua Leza.
NEH 11:17 Ni Matania mwina Mika, Mika mwina Zabudi, Zabudi mwina Asafu, ozu i waali mulombozi wa nghimbo ya kutasia ni mapepo. Bakubukia i waali wa bubili mu ba kwakue. Abuda mwina Samua, Samua mwina Galali, Galali mwina Yedutuni.
NEH 11:18 Balawi ba mu muzi uzuuke, bonse pamo baali 284.
NEH 11:19 Akubu, Talmoni, ni ba kwabo. Bakalinda ba pa milyango bonse pamo baali balalume 172.
NEH 11:20 Baizraeli bange, ni babitambua, ni Balawi, baali bali mu mizi yonse ya Yudea kubalua muntu mu nkendo yakue.
NEH 11:21 Inzi babombi ba mu Nghanda yakua Leza baali baikeele mu Yeruzalemu ku kapili ka Ofeli balombwelue na Ziha, ni Gisipa.
NEH 11:22 Kabili mwimanizi wa Balawi baali mu Yeruzalemu waali Uzi, mwina Bani, Bani mwina Hasabia, Hasabia mwina Matania, Matania mwina Mika, wa mu mukowa wakua Asafu. Ozu Uzi i waali mulombozi wa bakemba ba mu Nghanda yakua Leza.
NEH 11:23 Paali ni mizilo yaali yabiikilue na likolo ni milao ya kisinka yaali yabiikiilue bakemba, nga mwaali mwabeeleele miilo yabo ya kubalua busiku.
NEH 11:24 Petahia mwana mwalalume mwina Mesezabeli, Mesezabeli mwina Zera, Zera mwina Yuda, i waali wakwasia likolo mu milandu yonse ya bantu.
NEH 11:25 Bantu bamo basyaile kwikala mu Yeruzalemu, baikeele mu mizi ya mumbali, pepi ni makaba abo. Bangepo pa ba mu mukowa wakua Yuda baikeele ku Kiriati-Araba ni mu mizi ya mumbali, ni mu Diboni ni mu mizi ya mumbali, ni mu Yekabuseli ni mu mizi ya mumbali.
NEH 11:26 Bange ni bo baikeele mu Yeshua, ni mu Molada, ni mu Beti-Peleti,
NEH 11:27 ni mu Hazari-Suali, ni mu Beri-Seba pamo ni mu mizi ya mumbali.
NEH 11:28 Bange ni bo baikeele mu Ziklagi, ni mu Mekoma, ni mu mizi ya mumbali.
NEH 11:29 Bange ni bo baikeele mu Eni-Romoni, ni mu Zora, ni mu Yarmuti.
NEH 11:30 Bange ni bo baikeele mu Zanoa, ni mu Adulamu, ni mu mizi yabo ya mumbali, Lakishi ni makaba a mumbali, Azeka ni mizi ya mumbali. I kulanda nangue Bayuda baikeele mu nkendo ili pa bukata bwa Berseba lya ku nkungulua ni mu lulambe lwa Hinomu lya ku kabanga.
NEH 11:31 Ba mu mukowa wakua Benyamina baafumine ku Geba, baikeele ku Mikimasi, ni ku Aya, ni ku Beteli ni mu mizi ya mumbali.
NEH 11:32 Bange baikeele ku Anatoti, ni ku Nobu, ni ku Anania,
NEH 11:33 ni ku Hazori, ni ku Rama, ni ku Gitaimu,
NEH 11:34 ni ku Hadidi, ni ku Zeboimu, ni ku Nebalati,
NEH 11:35 ni ku Lodi ni ku Ono, ni mu lulambe momo mwaali mwaikala bantu bamanine kukita bintu bilekenkeene.
NEH 11:36 Balawi bange bamo ba ku Yudea, baakuukile ni kuya kwikala pamo ni baana bena Benyamina.
NEH 12:1 Babitambua ni Balawi balia baabwelele ni Zerubabeli mwina Shealtieli pamo ni Yoshua ni baba: Seraia, ni Yeremia, ni Ezra,
NEH 12:2 ni Amaria, ni Maluku, ni Hatusi,
NEH 12:3 ni Sekania, ni Rehumu, ni Meremoti,
NEH 12:4 ni Ido-Ginetoni, ni Abia,
NEH 12:5 ni Miyaminu, ni Moadia, ni Bilga,
NEH 12:6 ni Semaia, ni Yoyaribu, ni Yedaia,
NEH 12:7 ni Salu, ni Amoki, ni Hilkia, ni Yedaia. Baba i baali bakulu ba babitambua ni ba mikowa yabo pa musita wakua Yoshua.
NEH 12:8 Yeshua, ni Binui, ni Kadimieli, ni Serebia, ni Yuda, ni Matania waali mulombozi wa nghimbo ya kutasia, wene pamo ni ba mu mukowa wakue.
NEH 12:9 Bakubukia ni Uno, ni ba mu mikowa yabo, baali baimana bakenteene musita wa kulonghana.
NEH 12:10 Yoshua waavyele Yoyakimu, Yoyakimu waavyele Eliasibu, Eliasibu waavyele Yoyada,
NEH 12:11 Yoyada waavyele Yonatana, Yonatana waavyele Yadua.
NEH 12:12 Yoyakimu lu-aali Kitambua Mukulu, babitambua baali bakulu ba mikowa ni baba: Meraia waali wa mu mukowa wakua Seraia, Hanania waali wa mu mukowa wakua Yeremia.
NEH 12:13 Mesulamu waali wa mu mukowa wakua Ezra, Yehohanani waali wa mu lupua lwakua Amaria.
NEH 12:14 Yonatana waali wa mu mukowa wakua Maluki, Yusufu waali wa mu mukowa wakua Sebania.
NEH 12:15 Adina waali wa mu mukowa wakua Harimu, Helkai waali wa mu mukowa wakua Merayoti.
NEH 12:16 Zakaria waali wa mu mukowa wakua Ido, Mesulamu waali wa mu mukowa wakua Ginetoni.
NEH 12:17 Zikiri waali wa mu mukowa wakua Abia, Piltai waali wa mu mukowa wakua Miniaminu ni Moadia.
NEH 12:18 Samua waali wa mu mukowa wakua Bilda, Yehonata waali wa mu mukowa wakua Semaia.
NEH 12:19 Matenai waali wa mu mukowa wakua Yoyaribu, Uzi waali wa mu mukowa wakua Yedaia.
NEH 12:20 Kalai waali wa mu mukowa wakua Salai, Eberi waali wa mu mukowa wakua Amoki.
NEH 12:21 Hasabia waali wa mu mukowa wakua Hilkia, Netaneli waali wa mu mukowa wakua Yedaia.
NEH 12:22 Balawi ba mu elia nsiku yakua Eliasibu meena abo ni aza: Yoyada ni Yehohanani, ni Yadua baalembelue kuba bakulu ba nghanda ya basibo pamo ni babitambua bakulu mpaka mu buteeko bwakua Dario wa ku Persia.
NEH 12:23 Ni Bena Lawi, masiiko a mu nghanda ya basibo, baalembelue mu kitabu kya bintu byaali byakitika, mpaka mu nsiku yakua Yohana mwana mwalalume mwina Eliasibu.
NEH 12:24 Bakulu ba Balawi, Hasabia, ni Serebia ni Yeshua mwina Kadimieli, baali baimana bakenteene ni Balawi nabo, baatantikilue kuti bembe nghimbo ya kulumba ni kusantila kukonkana ni mafunde akua likolo Daudi muntu wakua Leza.
NEH 12:25 Matania, ni Bakubukia, ni Obadia, ni Mesulamu, ni Talmoni, pamo ni Akubu, i baali bakalinda ba pa mulyango, kabili i baali bakalinda ba nghanda ingi ya bukonto lya pa milyango.
NEH 12:26 Babo i baaliko mu nsiku yakua Yoyakimu mwina Yoshua, Yoshua mwina Yozadaki, ni mu nsiku yakua ndabukizi Nehemia, ni yakua kitambua Ezra kasambilizia wa mizilo.
NEH 12:27 Lubaazuukiizie kibumba kya Yeruzalemu baakebele Balawi mu nkendo yabo yonse, kuti beze bakite nsikunkulu ku Yeruzalemu basansamukile ni kutasia koku balimukwimba, balizia binsekelembue, ni binanda ni mazeeze.
NEH 12:28 Bakemba ba mu lupua lwa Balawi baakolongheene kufuma mu byalo bizyungulukiile Yeruzalemu, ni kufuma mu mizi ya ba Netofati,
NEH 12:29 ni kufuma ku Beti-Gilgali, ni kufuma ku makaba a Geba ni Azimaweti, pantu bakemba baali baikuuliile mizi yazyungulukiile Yeruzalemu.
NEH 12:30 Babitambua ni Balawi baisambile, ni kwiswesia kukonkana ni mbeela, kabili baaswesiizie bantu ni milyango pamo ni kibumba.
NEH 12:31 Na-anine banombozi ba Bayuda basele peulu kibumba. Naasaakwile mabumba abili akata a bakemba aali aimba nghimbo ya kutasia kuti akonkemo. Libumba limo lyaile lya ku kulio pa muulu kibumba lyalungi ku mulyango wa kizyalala.
NEH 12:32 Babo bakemba baali baakonkelue na Hosaia, ni nsempu ya bakulu ba Bayuda,
NEH 12:33 ni Azaria, ni Ezra, ni Mesulamu,
NEH 12:34 ni Yuda, ni Benyamina, ni Semaia, ni Yeremia,
NEH 12:35 ni baana bena babitambua baali batweme ntandala i Zakaria mwina Yonatana, ni Yonatana mwina Semaia, Semaia mwina Matani, Matani mwina Mikaia, Mikaia mwina Zakuri, Zakuri mwina Asafu.
NEH 12:36 Bange ba mu mukowa wakue baakonkelepo ni baba: Semaia ni Azareli, ni Malalai, ni Gilalai, ni Maai, ni Netaneli, ni Yuda, ni Anani, baali balizia binanda byakua Daudi muntu wakua Leza, ni Ezra kasambilizia wa Mizilo waali wabatangiliile.
NEH 12:37 Lubaafikile pa mulyango wa kasulo, baaselele mu biselelo bilungheeme ku muzi wakua Daudi, bapita nghanda ya bukolo yakua Daudi, ni kuya ku kyamba lya ku kibumba mpaka ku mulyango wa menda uli ku kabanga.
NEH 12:38 Ni libumba lya bubili lya balia baali baimba nghimbo ya kusantila, baile lya kuso peulu kibumba, nene naakonkelemo nali pamo ni nsempu ya bantu. Twaile kupita lya pa lupungu lwa kikuka, mpaka kolia ku kibumba kikata,
NEH 12:39 ni peulu mulyango wakua Efraimu, ni peulu mulyango wa kale, ni peulu mulyango wa masabi, ni peulu lupungu lwa ba Hananeli, ni lupungu lwa katua kamo, mpaka ku mulyango wa mikooko. Twaapeleeziizie lwendo lwetu ku mulyango wa bakalinda.
NEH 12:40 Ni pakako, mabumba onse abili aali aimba asantila aimeene mu Nghanda yakua Leza pamo ni nene. Nene pamo ni nsempu ya bantu ba pa bakateeka.
NEH 12:41 Babitambua baali balizia ntandala ni baba: Eliakimu Maseia, ni Miniaminu, ni Mikaia, ni Elioyoenai, ni Zakaria, ni Hanania,
NEH 12:42 ni Misea ni Semaia, ni Eleazari, ni Uzi, ni Yehohanani, ni Malkia, ni Elamu, ni Ezeri. Bakemba baimbile basamwine pamo ni Yesiraia mulombozi wabo.
NEH 12:43 Bobo busiku bantu baeleele ngelelo ingi basangaleele pantu Leza waabasansamusiizie na nsansa ikata. Banakazi pamo ni baana ni bo baasangaleele. Nsungu ya nsansa ya mu Yeruzalemu yaunvwikile kule.
NEH 12:44 Pa ozo musita, baasaakwile bantu bakusunga milue, momo mwaali mwasungua bintu bya ngelelo palua Nghanda yakua Leza, buzombozi bwa ntomono, ni kamo ka pa lyanondo, bibaali bakolonghania kufuma mu makaba a mu mizi kuti biye byali bya babitambua pamo ni Balawi kukonkana ni mafunde, pantu Bayuda baawamiinue na babitambua pamo ni Balawi baali babomba.
NEH 12:45 Baafikiliziizie miilo i baali babombela Leza wabo ni ya kuzuukia nga mwaakitiile bakemba ni bakalinda ba pa milyango, nga mubeeleele mafunde akua likolo Daudi ni akua Solomoni mwana wakue.
NEH 12:46 Pantu kale, mu nsiku yakua Daudi ni Asafu, kwaali banombozi ba bakemba, kabili kwaali kwali nghimbo ya kulumba ni kutasia Leza.
NEH 12:47 Kutula pa musita wakua Zerubabeli, ni Nehemia, Baizraeli bonse baafumiizie nsempu ya bupe bwa kubalua busiku pa mulandu wa bakemba ni bakalinda ba pa milyango, kabili Baizraeli baali bafumia ni inge nsempu pa mulandu wa Balawi, Balawi ni bo baali bafumia nsempu ya byabupe pa mulandu wa bantu ba luvyalo lwakua Haruni.
NEH 13:1 Bobo busiku baabelengele kitabu kyakua Musa ni bantu batwiliziizie, mu kitabu baasangile mwalembelue nangue Ba-amoni ni Bamoabu tebapalile kwingila mu kulonghana kwa bantu bakua Leza,
NEH 13:2 pantu tebaabapokeleele Baizraeli ni kubapeelako bilio ni menda, inzi baamulipile Balama kuti abatiipe, anzia kyaali evio, Leza wetu wa-alwile ntiipu yabo kuba mapaalo.
NEH 13:3 Bantu lubaunvwile ezi mizilo, baafumiizie Bazima bonse mu Baizraeli.
NEH 13:4 Ntanzi, kitambua Eliasibu waabiikilue pa mwilo wa kusunga milue ya mu Nghanda yakua Leza wetu. Ozu Eliasibu waali wa mu mukowa wakua Tobia,
NEH 13:5 Kabili waali wamukitiile Tobia muputule ukata ubaali babiikamo kamo ka pa lyanondo ka bunga pa ozo musita, ni bubaani, ni bibombelo bya mu Nghanda yakua Leza, ni kamo ka pa lyanondo ka pa nghano, ni bupe bwa bya kumina, ni bwa mafuta, bintu byaali byafumiiwa na Baizraeli pa mulandu wa Balawi, ni bakemba, ni bakalinda ba pa milyango, pamo ni bupe bwa babitambua.
NEH 13:6 Pa ozo musita onse waali wakitika bebio, ne nsyaali ku Yeruzalemu, pantu mu mwaka wa 32 mu kuteeka kwakua Artasasta likolo wa ku Babeli, naabwelele kuli likolo. Pa kyamba naalombele nsambu kuli likolo
NEH 13:7 ni kubwelela ku Yeruzalemu. Koko i kunainikile bubi bwaakitile Eliasibu bwa kumupeela Tobia muputule mu misolo ya Nghanda yakua Leza.
NEH 13:8 Naafiitilue sana. Ni pakako, naapoozele bintu byonse byakua Tobia panze pa ozo muputule.
NEH 13:9 Pa kyamba naabiikile lifunde lya kuswesia miputule, kabili naabweziizie bibombelo bya mu Nghanda yakua Leza, pamo ni ngelelo ya nghano ni bubaani.
NEH 13:10 Kabili naamwene nangue Balawi tebaali bapeelua kabili nsempu yabo. Ni pakako, Balawi ni bakemba baali babomba, baabutukile kubalua muntu waya ku kulima bukaba bwakue.
NEH 13:11 Nene naasasiliile bakateeka nalanda nangue, “Ale Nghanda yakua Leza yasiiluaki?” Naabakolonghaniizie ni kubabwezia pa miilo yabo.
NEH 13:12 Bayuda bonse baaleetele kamo ka pa lyanondo, ni bupe bwa nghano, ni bya kumina, ni mafuta mu mulue.
NEH 13:13 Bantu banaasaakwile kuba bakalinda ba mulue ni baba: Kitambua Selemia, ni kalemba Sadoki, ni Mulawi Pedaia, Hanani mwina Zakuri, Zakuri mwina Matania i waali nkonkani wabo, pantu baba i baali bamwenue kuba ba kisinka, ni miilo yabo yaali ya u byabupe ku Balawi nabo.
NEH 13:14 We Leza wane nanguluke pa ozu mulandu, kabili tekulaba bikitua byane biweme binaakitiile Nghanda yakua Leza wane ni miilo inaali nabombamo.
NEH 13:15 Mu ezio nsiku naamwene Bayuda bange baali bafina bya kumina busiku bwa Sabata, ni bange baali batwama bitwamo, ni kutwika bapunda nghano, ni divai, ni mizabibu, ni tini, pamo ni misango yonse ya bitwamo bibaali batwala ku Yeruzalemu busiku bwa Sabata. Ni nene naabasokele nangue tebali na nsambu ya kusisia mu bobo busiku.
NEH 13:16 Kabili ni balia baafumine ku Tiro bekeele mu Yeruzalemu baaleetele masabi, ni busulu bwa misango yonse balimukusisia ku Bayuda mu Yeruzalemu busiku bwa Sabata.
NEH 13:17 Nene naasasiliile bakulu ba Bayuda nabaana nangue, “Ale bobu bubi bumulimukukita bwa kutiikaania busiku bwa Sabata ni bwa musangoki?
NEH 13:18 Kubako basiinue tebaakitilepo bintu bya ozu musango pakuti Leza wetu aleete busanzo pali fwefue, ni pa ono muzi? Mone vimutwaliliile kuleeta bwavia pa Baizraeli pa mulandu wakutiikaania busiku bwa Sabata.”
NEH 13:19 Ni musita wa kyungulo lupaali pasyafiita, naalandile kuti milyango ya Yeruzalemu iizalue ntanzi ya kutendeka busiku bwa Sabata, tekuti iizulue mpaka Sabata paikaba kupua. Naabiikile bange ba pa babombi bane mu milyango ni kubaana nangue mu muzi tekuti mwingiziwe makwebo a misango yonse busiku bwa Sabata.
NEH 13:20 Ni pakako, basulu ni balibasita misango yonse ya bintu mu nsiku imo imo baali baaleele panze pa muzi.
NEH 13:21 Naabasokele nangue, “Ale kimulimukulaalila panze pa muzi ni kiki? Kine mukabe kukita kabili evi vyenka, nakaba kumyuma.” Kutula papo tekuli muntu waabwelele kabili busiku bwa Sabata.
NEH 13:22 Naabaanine Balawi beswesie ni kuya kulinda milyango pakuti busiku bwa Sabata buzuukiwe. We Leza wane nangulukeko palua ozu mulandu, kabili ungeleele kukonkana ni bwingi bwa ntono yobe.
NEH 13:23 Mu ezio nsiku naamwene Bayuda baali baupile banakazi ba ku Ashdodi, ni ba ku Amoni, ni ba ku Moabu.
NEH 13:24 Nsempu ya baana baavyelue na baba bantu, baali balanda lulimi lwa Ba-asidodi, ni ndimi ya bange bantu. Inzi tebaamanine kulanda lulimi lwa Kiyuda.
NEH 13:25 Naabasasiliile ni kubatiipa, ni kunakulapo bamo pakati kabo, ni kubavukula misisi yabo, ni kubalapizia mu Liina lyakua Leza nangue, “Tekukoofie baana benu banakazi ku baana babo balalume, ni baana benu balalume tekuti bakoope baana babo banakazi, ni mwe benka tekuti mukakite evio.
NEH 13:26 Eba, te byupo bya ozu musango byaamulengiizie Solomoni likolo wa Baizraeli kuti aluvie? Mu byalo byonse temwaali likolo nga wene, kabili waali watonenue na Leza wakue, ni Leza waamubiikile kuba likolo pa Baizraeli bonse. Anzia kyaali evio, banakazi baeni i baamulengiizie kuti aluvie.
NEH 13:27 Ati emwe, i kulanda nangue mutonene fwefue tukonke mibeele yenu ni kukita bubi bukata bwa ozu musango, bwa kusinakila Leza wetu mu kuupa banakazi Bazima?”
NEH 13:28 Umo wa mu baana bena Yoyada, mwinzikulu wakua Eliasibu Kitambua Mukulu, waali waupile mwana mwanakazi mwina Sanibalati wa mu muzi wa Beti-Horoni. Naamukumbile mu Yeruzalemu.
NEH 13:29 We Leza wane, balangulukeko pantu bakitiikaania bukitambua ni kipingo kya bukitambua ni kya Balawi.
NEH 13:30 Evi n'mbaswesiizie babitambua ni Balawi ku bintu byonse bifumine ku Bazima, ni kubapeela kubalua muntu mwilo wakue u-apalile kukita.
NEH 13:31 Naabaanine kuleeta bupe bwa nkuni, ni buzombozi bwa ntomono pa musita upalile. We Leza wane nanguluke pa bebi byonse ni kunkitila biweme.
EST 1:1 Ahasuero lu-aali likolo, waateekele biputu bya kyalo 127. Waateekele kutendekela ku India mpaka ku Kushi.
EST 1:2 Mu ezio nsiku, likolo Ahasuero waali waikeele mu Susani, muzi ukata wa kyalo.
EST 1:3 Mu mwaka wa butatu mu kuteeka kwakue, waakupile makolo akue onse pamo ni babombi, ni bakulu ba balukale ba ku Persia ni ku Media, ni bakindami pamo ni bandabukizi ba mu biputu bya kyalo kuti abatebete.
EST 1:4 Mu nsiku 180, waali wabalangisia bunonsi bwa mu bukolo bwakue pamo ni bulumba ni mukinzi wakue.
EST 1:5 Ni ezio nsiku luyaapwile, likolo waatebetele bantu bonse baali mu Susani, bakindami ni basikindeeme. Maliila akitile nsiku kilooba mu bukaba bwa ku kipango kyakua likolo.
EST 1:6 Bobo bukaba bwaali bwafwaniiziwe na bipempe bya ngubo ya mukumino wa sue ni wa lyulu, byaali byakakiilue na lozi lwa kitani kiweme kya mukumino wa bulumbi ni bikano bya fweta ku mapumpu a marimari. Paali ni bya kwikalapo bya oro ni bya fweta byaali byateekelue pansi paali pafwaniiziwe na mabue alekenkeene akindeeme.
EST 1:7 Baali babapeela bya kumina mu bipe bilekenkeene bya oro, kabili baali babapeela ni divai ingi ya bukolo kukonkana ni buntu bwakua likolo.
EST 1:8 Likolo waabapeele nsambu ya kumina kubalua muntu mu-aatoneene, kabili wa-anine babombi babapeele kubalua muntu belia bi-atonene kumina.
EST 1:9 Nabeeza Washti ni ye pa ozo musita, waali walimukutebeta banakazi nakue mu nghanda ya bukolo yakua Ahasuero.
EST 1:10 Busiku bwa kilooba, likolo lu-aasansamukile na divai, waakuutile Mehumani, Bizta, Harbona, Bigta, Abagta, Zetari ni Karkasi, babombi kilooba bamasai baali bamubombela ni kubaana nangue,
EST 1:11 “Endo mumuleete nabeeza Washti kuli likolo, wavwele kiteebo kya bukolo, eze amulangisie ku bantu bonse kuwama kwakua nabeeza, pantu waali ni lukebu luweme.”
EST 1:12 Babombi baafikiizie mpunda yakua likolo kuli nabeeza, inzi wene waakeene kuya kuli likolo. Likolo waunvwile kipuki kikata.
EST 1:13 Ni pakako, likolo waakuutile bantu baali bamanine mizilo ni bupinguzi, bantu baali bamanine bintu bipalile kukitika pa milandu ya ozu musango pantu i yaali mibeele yakue.
EST 1:14 Ni meena abo ni aza: Karshena, Shetari, Admata, Tarshishi, Meresi, Marasena ni Memukani. Baba bakulu kilooba ba ku Persia ni ku Media, i baali babiloolo bakua likolo mu bukolo bwakue.
EST 1:15 Likolo waipuziizie nangue, “Kukonkana ni mizilo, tumukite syani nabeeza Washti wakikaana kunakila mwano wakua likolo Ahasuero u-akitwalilua na babombi?”
EST 1:16 Memukani wa-asukile ntanzi yakua likolo ni ntanzi ya babiloolo bakua likolo nangue, “Nabeeza Washti taluviizie sie kuli likolo bunke, inzi waluvia ku bakindami bonse, ni ku bantu bonse bekeele mu biputu bya kyalo bya mu kyalo kyakua likolo Ahasuero.
EST 1:17 Ozu mulandu wakita nabeeza, wakaba kumanika ku banakazi bonse ni bo tebakaba kuya bakindika balume babo pantu baakaba balanda nangue, ‘Nabeeza Washti lu-aakuutilue na likolo waakeene kuya.’
EST 1:18 Ni evi vyenka ba muka bakulu ba ku Persia ni ku Media balia baunvua palua keki kyakita nabeeza, baakaba bakitila evio vyenka masiiko onse akua likolo. Ni mufupula wabo ku balume babo waakaba waleeta mazibo.
EST 1:19 Ni pakako, kine kuti likolo wawaminua, nalomba alembe muzilo usikazilulua ku Persia ni ku Media, ulandile nangue Washti tekuti abwelele kuli likolo Ahasuero, ni nsambu ya bunabeeza ipeelue unge mwanakazi awamiisie kukila wene.
EST 1:20 Ni ozu muzilo paukapundua mu bukolo bwakue bonse, kubalua mwanakazi muka mukindami ni muka asikindeeme waakaba wakindika mulume wakue.”
EST 1:21 Likolo pamo ni babiloolo, baawaamiinue na kako keebo. Kupwako, likolo wakita nga mwaalandiile Memukani.
EST 1:22 Ni pakako, mpapulo yaatwelue mu nkendo yonse ya bukolo bwakue, kubalua kiputu kya kyalo kyaalembeelue mubeeleele nembelo yabo, kubalua bantu baalembeelue mu lulimi lwabo. Lupapulo lwaali lwalandile nangue, “Kubalua mwalalume abe kateeka wa nghanda yakue.” Ozo muzilo waapundiilue kubalua muntu mu lulimi lwakue mwine.
EST 2:1 Pa kyamba, kipuki kyakua likolo Ahasuero lukyaapwile, waamulangulukile Washti, ni kulanguluka mulandu u-aakitile ni bupinguzi bu-aapingwilue.
EST 2:2 Kupwako, babombi bakua likolo balanda nangue, “Likolo akebelue babinundue baweme,
EST 2:3 kabili likolo abiike bandabukizi mu biputu bya kyalo bya mu bukolo bwakue, evi bakolonghanie babinundue bonse baweme ni kubatwala ku Susani, muzi ukata wa kyalo mu nghanda ya banakazi, kuti basungue na Hegai lisai mubombi wakua likolo aliwasunga banakazi, kabili bapeelue ni bintu bya kwifwaniziiziako.
EST 2:4 Ni kinundue alikumuwamina likolo i alikwaluka nabeeza pa kifuka kyakua Washti.” Kako keebo kaamuwaamiine likolo, ni ye waakitile mubaamwaniine.
EST 2:5 Mu Susani, muzi ukata wa kyalo, mwaali ni Muyuda umo wa mu mukowa wakua Benyamina liina lyakue Mordekai mwina Yairi, Yairi mwina Simei, Simei mwina Kisi,
EST 2:6 Ozo waatwaminiinue mu bakakua bange kufuma ku Yeruzalemu pamo ni Yekonia likolo wa Bayuda, waatwemue na Nebukadneza likolo wa ku Babeli.
EST 2:7 Mordekai i waakuziizie Hadasa, aliwakuutua Esta, mwana mwina mwinzio ye, pantu nghina ni se baali basyafwile. Ni ye waali ni mibeele iweme ni lukebu luweme. Mordekai waamutweme Esta ni kumusunga nga mwana wakue.
EST 2:8 Kupwako, mizilo yakua likolo luyaapundilue, babinundue bengi baatwelue ku Susani, muzi ukata wa kyalo, kuti basungue na Hegai. Esta ni ye waingiziiziwe mu nghanda mwa Likolo asungue na Hegai waali wali mukulu wa nghanda ya banakazi.
EST 2:9 Hegai lu-aawamiinue na Esta, taakokwele kubamba kumupeela mafuta a kwifwaniziiziako ni bilio biwamiisie, kabili waamupeele ni babombi banakazi kilooba baafumine kuli likolo. Esta waakuusiiziiziwe pa inge nkendo iwamiisie mu nghanda ya banakazi pamo ni babombi bakue kilooba bakuti baye bamubombela.
EST 2:10 Inzi Esta taababwilile mutundu ni mukowa wakue pantu Mordekai waamukaaniizie.
EST 2:11 Kubalua busiku, Mordekai waali waienziizia pa musolo wa nghanda ya banakazi kuti amane vili Esta, ni kumana kilikumukitikila.
EST 2:12 Musita wa kwifwanizia babinundue waali wa myezi lyanondo ni ibili. Myezi mutanda yaali ya kwifwanizia na mafuta a manemane, ni myezi mutanda yaali ya kwifwanizia na mafuta a manukato pamo ni ange mafuta alekeneene a kwifwaniziiziako, ntanzi ya kutwalua kinundue umo umo kuli likolo Ahasuero.
EST 2:13 Pa kyamba, kusyali kubalua kinundue aye waya watweme kubalua kantu ka-atona kutwama mu nghanda ya banakazi, evi aye nako ku nghanda yakua likolo.
EST 2:14 Kubalua kinundue waali wapeelue nsambu ya kuya kwingila musita wa kyungulo, ni lukeelekeele kinundue waali wafuma ni kuya ku inge nghanda ya banakazi kuti aye asungue na Sasagazi lisai mubombi wakua likolo, musungi wa bakazi banike bakua likolo. Kinundue taali kabili na nsambu ya kwingila mu nghanda yakua likolo, inga sie kine likolo wamutonanga, mane akuutue.
EST 2:15 Lwaakumeene musita wa kwingila Esta mwina Abihaili mwinzio ye kwa Mordekai, ozo mukazyana Esta waasungilue na Mordekai nga mwana wakue, wene taalombele kange kantu inga sie belia bi-aateaniiziiziwe na Hegai lisai mubombi wakua likolo mukulu wa nghanda ya banakazi. Esta waamwenekele wafwaniine ku bonse baamumwene.
EST 2:16 Evi, Esta waatwelue kuli likolo Ahasuero mu nghanda ya bukolo mwezi wa lyanondo, i mwezi wa Tebeti, mwaka wa kilooba mu buteeko bwakue.
EST 2:17 Likolo waamutoneesie Esta kukila banakazi bonse, ni ye waitabiilue ni kupeelua buwame kukila babinundue bonse. Kupwako, wamuvwika kiteebo kya bukolo ku mutue wakue, wamwalula nabeeza pa kifuka kyakua Washti.
EST 2:18 Likolo waatebetele babiloolo ba mu bukolo bwakue pamo ni babombi bakue bonse, ni azo matebeto aali palwakua Esta. Waabaanine bantu ba mu biputu bya kyalo byonse batuuzie, kabili waabapeele ni bilambu mu aatoneene mu buntu bwakue bwa bulikolo.
EST 2:19 Babinundue lubaakolonghaniiziwe lya bubili, Mordekai waali waikeele pa nghingililo ya nghanda yakua likolo.
EST 2:20 Esta waali tanalande kantu palua mutundu ni mukowa wakue, nga mu-aalailue na Mordekai, pantu Esta waali wamunakiile Mordekai nga vi-aali wamunakila lu-aali wakisungilue.
EST 2:21 Pa ozo musita Mordekai lu-aali waikeele pa nghingililo ya nghanda yakua likolo, babilipo pa bamasai babombi bakua likolo, Bigtana ni Teresi, bakalinda ba pa mulyango, baafiitilue ni kutendeka kumukambila likolo Ahasuero kuti bamwipaye.
EST 2:22 Mordekai lu-aunvwile ozo mulandu, waamubwilileko nabeeza Esta, ni ye waatwele ezio mpunda kuli likolo nga mu-aabwiliilue na Mordekai.
EST 2:23 Lubaatoosiizie ozo mulandu ni kusanga nangue ni kisinka, balia bamasai babili baakulikilue ku kimuti. Keki kyaakitikile, kyaalembelue ntanzi yakua likolo mu kitabu kya bintu byaali byakitika.
EST 3:1 Pa kyamba kya bebi bintu, likolo Ahasuero waamupeele Hamani mwina Hamedata Muagagi, buvinde bwa pa muulu ni kumwalula mukulu wa babombi nakue.
EST 3:2 Babiloolo bonse bakua likolo baali pa musolo wa nghanda yakua likolo, baafwineeme ni kumukindika Hamani, pantu i mwaalandiile likolo, inzi Mordekai taafwineeme ni kumukindika.
EST 3:3 Babiloolo bakua likolo baali pa musolo wa nghanda yakua likolo, baamwipuziizie Mordekai, “Ale we uliwatyonenaki mizilo yakua likolo?”
EST 3:4 Kubalua busiku lubaali bamwana evio tekuba waunvua, baamubwilile Hamani, evi bamone kine mapange akua Mordekai alikutwalilila, pantu waali wabaana nangue wene ni Muyuda.
EST 3:5 Ni kiine Hamani lu-aamwene Mordekai tekuba wafwinama ni kumukindika, waunvwile kipuki kikata.
EST 3:6 Inzi taatonene sie kulovia Mordekai bunke, pantu waali wasyamanine mukowa wakua Mordekai. Ni pakako, Hamani waatonene kulovia Mordekai pamo ni Bayuda bonse baali baikeele mu bukolo bwakua likolo Ahasuero.
EST 3:7 Mu mwezi wa mambo, i mwezi wa Nisani, mwaka wa lyanondo ni ibili mu kuteeka kwakua likolo Ahasuero, kubalua busiku ni kubalua mwezi, baali bateyamo bubale ntanzi yakua Hamani mpaka mu mwezi wa lyanondo ni ibili, i mwezi wa Adari.
EST 3:8 Hamani waamwanine likolo Ahasuero nangue, “Kuli mukowa umo wa bantu basalanghaniine mu mikowa ya mu biputu bya kyalo bya mu bukolo bobe, bali ni mibeele yabo ilekenkeene ni mibeele ya kubalua mukowa, kabili baba bantu balimukukaana kunakila mizilo yakua likolo. Ni pakako, likolo tapalile kubonvwila nkumbu.
EST 3:9 Kine likolo wawaminua, kilembue nangue, ‘Baloviiwe.’ Ni babo baakabalovia naakabapeela talanta ya mutofue nfu lyanondo bakabiike mu kipao kyakua likolo.”
EST 3:10 Likolo i lu-aavuulile kazele ka kusyusyutilako ka ku munue wakue, ni kumupeela Hamani mwina Hamedata Muagagi, mulwani wa Bayuda.
EST 3:11 Kupwako, likolo wamwana Hamani nangue, “Sunga nfolanga yobe, kitila bantu bobe nga mu utoneene we mwine.”
EST 3:12 Pa kyamba kya nsiku lyanondo ni itatu ya mwezi wa mambo, bakalemba bakua likolo baakuutilue na Hamani. Waabanine balembe mpapulo ya kutwala ku ndabukizi ya biputu bya kyalo bya mu bukolo bwakua likolo Ahasuero, ni ku bange bakulu balekenkeene. Kubalua kiputu kya kyalo kyaalembeelue mubeeleele nembelo yabo, ni kubalua bantu baalembeelue mu lulimi lwabo. Kubalua lupapulo lwaasyusyutiluepo kazele kakua likolo Ahasuero.
EST 3:13 Mikenzi yaatwele mpapulo mu biputu bya kyalo byonse bya mu bukolo bwakua likolo Ahasuero, kuti babenoone Bayuda bonse, babepaye ni kubalovia, balumendo ni bakote, baana lukeke pamo ni banakazi pa busiku bumo, ni kubatwamina bunonsi bwabo bonse. Bobo bwaali busiku bwa lyanondo ni butatu mu mwezi wa lyanondo ni ibili, i mwezi wa Adari.
EST 3:14 Twebo twaali mu lwambu lwa mpapulo, twaali twaapalile kupundua kuba mizilo mu kubalua kiputu kya kyalo, evi bantu ba ntundu yonse babwilue kuti baye baiteaniizie pa bobo busiku.
EST 3:15 Mikenzi teyaakokwele kuya nga muya-aniinue na likolo. Mpunda yaatwelue mu Susani, muzi ukata wa kyalo. Likolo Ahasuero pamo ni Hamani baikeele ni kubamba kumina divai. Inzi muzi wa Susani waatoobokele.
EST 4:1 Mordekai lu-aunvwile byonse byaakitikile, waakaatile ngubo yakue, wavwala masaaka ni kwipuupa mito. Waabambile kupita mu muzi wa-angwile walimukulila na kikonko.
EST 4:2 Waile kufika mpaka pa mulyango wa nghanda yakua likolo, pantu muntu avwele maasaka taali waitabiziiziwe kwingila mwa likolo.
EST 4:3 Kubalua kiputu kya kyalo mwaatwelue mpunda ya mizilo yakua likolo, Bayuda baalimo baingiile mu malilo akata ni kuizilika bilio. Bengi pakati kabo baalosiizie ni kulila, baaleele pa masaaka baipuupile mito.
EST 4:4 Babombi banakazi ni balalume, bamasai bakua Esta, lubaile kumubwila Esta palwakua Mordekai, Esta waamunvwiliile nkumbu. Waabapeele ngubo bamutwalile Mordekai evi avuule masaaka, inzi wene waakeene.
EST 4:5 Kupwako, Esta wamukuuta Hataki umo wa pa babombi bamasai bakua likolo waali wamubombela Esta, wamutuma kuli Mordekai aye amwipuzie kine kuli bwaviaki, ni kilengiizie ni kiki.
EST 4:6 Ni Hataki waile kumonana ni Mordekai pa musolo wa muzi pa nghingililo ya nghanda yakua likolo.
EST 4:7 Mordekai waamwanine byonse byaamukitikiile, ni kipendo kya nfolanga yaalaile Hamani ya kubiika mu kipao kyakua likolo kuti Bayuda baloviiwe.
EST 4:8 Kabili waamupeele ni lwambu lwa mpapulo ya mizilo lulembeluepo mpunda ya kulovia Bayuda, ezio yaapundilue ku Susani, muzi ukata wa kyalo, evi aye amulange Esta, ni kumubwila bi ayanga kumona. Kabili amwane Esta aye kuli likolo apaapaatileko bantu bakue.
EST 4:9 Kupwako, Hataki waya kumwana Esta mwa-aninwanga na Mordekai.
EST 4:10 Kabili Esta waatumine Hataki aye amwane Mordekai nangue,
EST 4:11 “Babiloolo bonse bakua likolo ni bantu bonse bekeele mu biputu bya kyalo bamanine nangue kukonkana ni mizilo, kubalua muntu, mwalalume ao mwanakazi waakengila mu musolo wa mukati wa nghanda yakua likolo tekuba wakuutilue, waakeepawa, inga sie olia waakoolwelua kabango ka oro, i waakasyala wakosele. Ni nene wenka nsisyapwile nsiku anondo atatu pasili kukuutuako.”
EST 4:12 Mordekai lu-aabwililue mpunda yakua Esta,
EST 4:13 waabweziizie kapingu kuli Esta wamwana nangue, “Tekulangakana nangue we ulikupusuka pa Bayuda bonse pantu uli mu nghanda mwa likolo.
EST 4:14 Kine wewe teubalandiileko Bayuda pa ono musita, wakaba kuloba pamo ni lupua lwakua so, pantu tekuli amanine nangue pange i kyubeeleele nabeeza pa mulandu wa musita nga ono, inzi Bayuda bene kuti bapusuka mu nzila inge.”
EST 4:15 Hataki lu-aapwile kulanda na Esta, Esta ni ye waamubweziizie kuli Mordekai aye amwane nangue,
EST 4:16 “Endo ukolonghanie Bayuda bonse bali ku Susani ni kubaana bezilike pa mulandu wane. Bezilike nsiku itatu busiku ni koba pasili kulia ni kumina, ni nene pamo ni babombi bane tulikuizilika evelia vyenka. Pa kyamba, mane ngie nghingile kuli likolo anzia kine nsipeelue nsambu, kine kufua, nfue.”
EST 4:17 Kupwako, Mordekai waya kukita nga mwa-aniinue na Esta.
EST 5:1 Pa kyamba kya nsiku itatu ya kuizilika, Esta waavwele ngubo yakue ya bukolo ni kuya kwimana pa musolo wa mukati wa nghanda yakua likolo wakentele lya ku nghanda yakua likolo. Likolo waali waikeele mu kitebe kyakue kya bukolo wakentele lya ku mulyango.
EST 5:2 Likolo lu-aamwene nabeeza Esta waimeene pa musolo, waawamiinue ni kumuolwela kabango ka oro kaali kali mu minue yakue. Kupwako, Esta wapalama ni kukumiako.
EST 5:3 Likolo waamwipuziizie nabeeza, “Ulimukukebaki? Utoneneki? Anzia kine ulikulomba nsempu ya bukolo bwane ndikukupeela.”
EST 5:4 Esta wa-asukile evi, “Kine likolo wawaminua, eze lelo pamo ni Hamani ku matebeto anamuteaniizyanga.”
EST 5:5 Likolo wa-anine babombi bakue nangue, “Endo mumwane Hamani alenge eze evi tukite nga mutoneene Esta. Ni kiine likolo pamo ni Hamani baile ku matebeto ateaniizie Esta.”
EST 5:6 Lubaali balimukumina divai, likolo waamwanine Esta, “Nghane ki-ulimukukeba, ni kyonse ki-ulikulomba, ndikukupeela. Anzia kine ni nsempu ya bukolo bwane ulikupeelua.”
EST 5:7 Esta waalandile evi, “Kandimukukeba ni kantonene kulomba ni kaka,
EST 5:8 ‘Kine ngitabilue na likolo, kabili kine awaminue kun'mpeela kandikulomba, ni kukita muntoneene, nalomba likolo pamo ni Hamani bakabe kwiza ku matebeto anakaba kubatebeta lukeele. Mane nkabe kumwana likolo kandimukukeba.’”
EST 5:9 Bobo busiku Hamani waafumine wawamiinue ni nsansa mu mutima. Inzi Hamani lu-aamwene Mordekai pa mulyango wa nghanda yakua likolo, waamufiitiilue pantu Mordekai taimeene ni kumufwinamina.
EST 5:10 Anzia kyaali evio, Hamani waasipikiziizie. Kupwako, waya ku nghanda yakue, ni kukuuta babibuza bakue pamo ni mukazi wakue Zereshi.
EST 5:11 Hamani waabambile kubetankila palua bulumba bwa bunonsi bwakue, ni bwingi bwa baana bakue, ni byonse bi-aakitiilue na likolo, pamo ni vi-a-alwilue mukulu pa bakindami ni pa babiloolo.
EST 5:12 Kabili Hamani waatwaliliile kulanda nangue, “Nabeeza Esta takikupa muntu unge wa kuya pamo ni likolo ku matebeto a-akiba wateaniizie, inga sie nene, evi ni lukeele nkupilue pamo ni likolo ku matebeto ange.”
EST 5:13 Hamani waalandile evi, “Anzia kili evio, nsizi kuwaminua lundinamona Mordekai Muyuda waikeele pa mulyango wa nghanda yakua likolo.”
EST 5:14 Zereshi mukazi wakue pamo ni babibuza bakue bonse baamwanine Hamani nangue, “Tuma bantu bateanie kimuti kileepele metre 25, ni lukeele lukeelekeele ukabe kumwana likolo nangue Mordekai akulikueko, evi ukaye wawamiinue pamo ni likolo ku matebeto.” Hamani waawamiinue na kako keebo, ni kutuma bantu bateanie kekio kimuti.
EST 6:1 Bobo busiku likolo taaonene tulo, wa-anine mubombi amuleetele kitabu kyaali kyalembeluemo bintu byaali byakitika pa musita wakuteeka kwakue, kuti bamubelengele.
EST 6:2 Lubaabelengelemo, kyaamwenekele nangue Mordekai i waasongeele bamasai, Bigtana ni Teresi, balia babombi babili ba pa mulyango wa nghanda yakua likolo baali bakambila kumwipaya likolo Ahasuero.
EST 6:3 Likolo waipuziizie babombi nangue, “Mordekai waapeelue mukinziki, ao kilambuki pa bebio bi-aakitile?” Babombi bakue ba-asukile nangue, “Tepali ka-akitiilue.”
EST 6:4 Likolo waipuziizie evi, “Papa pa musolo pali ni?” Ozo i musita waali waingila Hamani pa musolo wa nghanda yakua likolo kuti alanzyanie nakue evi bamukulike Mordekai ku kimuti ki-akiteania.
EST 6:5 Babombi bakue baamwasukile nangue, “Pali sie Hamani i emeene pa musolo.” Likolo waalandile evi, “Mwane engile.”
EST 6:6 Kupwako, Hamani waingila. Likolo waamwanine nangue, “Kuli ni muntu undimukukeba kukindika. Ndikumukitilaki?” Hamani waalandile mu mutima mwakue nangue, “Kubako kuli ni unge apalile kukindikua na likolo kukila nene?”
EST 6:7 Hamani wa-asukile evi, “We likolo, ozo muntu u ulimukukeba kukindika,
EST 6:8 aleetelue ngubo ya bukolo yaali yavwaluako na likolo ni farasi waali waseluapo na likolo mwine, ni ozo farasi aye wavwikilue kiteebo kya bukolo ku mutue,
EST 6:9 ni elia ngubo pamo ni olia farasi bipeelue umo akindamiisie pa babombi bakulu bakua likolo, kuti amuvwike olia muntu likolo u alimukukeba kukindika, kabili aseziiwe pa farasi ni kumupisia mu musebo ukata wa mu muzi walimukupunda ku ntanzi yakue nangue, ‘Evi, i vyakukitilua olia muntu likolo u akebele kukindika.’”
EST 6:10 Kupwako, likolo wamwana Hamani, “Ale lenga utwame ngubo pamo ni farasi nga muwalandila, umukitile Mordekai Muyuda ekeele pa mulyango wa nghanda yakua likolo pasili kusiapo ata kamo pa byonse biwalanda.”
EST 6:11 Hamani i lu-aabuulile ngubo pamo ni farasi, wamuvwika Mordekai elia ngubo, wamusezia pa farasi, ni kumupisia mu musebo ukata wa mu muzi walimukupunda ku ntanzi yakue nangue, “Evi i vyakukitilua olia muntu likolo u-atonene kukindika.”
EST 6:12 Kupwako, Mordekai wabwela pa mulyango wa nghanda yakua likolo. Inzi Hamani waile lubilo ku nghanda yakue waivimbiliile ku mutue walimukulila waunvwile bulanda ni busoni bukata.
EST 6:13 Hamani waamulondolweleele Zereshi mukazi wakue pamo ni benakue bonse palua bintu byonse byaamukitikiile. Kupwako, bantu bakue ba maano ni Zereshi mukazi wakue bamwana nangue, “Kine ozu Mordekai uwabamba kufwinamina ni wa mu mukowa wa Bayuda, kisinka we teukikamuvinda, inzi wene waakakulovia.”
EST 6:14 Ni musita u baali bakilanda sie nakue evio, babombi bamasai bakua likolo baiza, ni kulenga kumutwala Hamani ku matebeto ateaniiziwe na Esta.
EST 7:1 Kupwako, likolo ni Hamani baya kulia matebeto pamo ni nabeeza Esta.
EST 7:2 Lubaali balimukumina divai busiku bwa bubili, likolo waamwipuziizie kabili nabeeza Esta nangue, “Kiulimukulomba ni kiki? Nene ndikukupeela, Ni ki-ulimukukeba ni kiki? Nene ndikukupeela. Anzia kine ni nsempu ya bukolo bwane.”
EST 7:3 Nabeeza Esta waalandile nangue, “Kine ngitabilue na likolo, kabili kine awaminue kun'mpeela kandikulomba, nalomba n'mpususiiwe pamo ni bantu bane,
EST 7:4 pantu nene pamo ni bantu bane tusisiiziwe kuti twinoonue, twipawe ni kuloviiwa. Kabenge nangue twakisisiiwa sie kuti tuye twali bazia, balalume ni banakazi, nga nakitalala sie. Pantu bwavia bwetu tebupalile kumwemia likolo.”
EST 7:5 Likolo Ahasuero waamwipuziizie nabeeza Esta nangue, “Ozo muntu aliwakambila kukita evio nani? Alipi?”
EST 7:6 Esta wa-asukile evi, “Muntu alimukutukyuzia, kabili mulwani wetu, i ozu Hamani, muntu akilile kubiipa.” Kupwako, Hamani wamukenta likolo ni nabeeza waunvwile mwezo ukata.
EST 7:7 Likolo waabuukile wafiitilue, wasia matebeto ni kuya mu bukaba bwa mu kipango. Inzi pantu Hamani wainikile nangue likolo wakeba kumwipaya, waasyele wamupaapaata nabeeza Esta amulandileko tekuti bamwipaye.
EST 7:8 Likolo lu-aabweleele ku nghanda ya matebeto, waamusangile Hamani waaponeene pansi walimukwivulunga lya palia paali paikeele Esta watambaleele. Likolo waalandile evi, “Ati emwe, ozu muntu alimukukeba kumubaka nabeeza pa ntanzi yane kono ku kipango?” Pa kyamba kya kako keebo kaalandile likolo, baamuvimbile Hamani pa menso.
EST 7:9 Harbona umo wa pa babombi bamasai bakua likolo waalandile evi, “Mu nghanda mwa Hamani muli ni kimuti kileepele metre 25 ki-akiteania kumukulikako Mordekai waalandile twebo twa kupususia likolo.” Likolo waalandile evi, “Mukulikeko ye mwine.”
EST 7:10 Penka papo bamukulika Hamani ku kimuti ki-akiteaniizia Mordekai. Kupwako, kipuki kyakua likolo kyatontoloka.
EST 8:1 Bobo bwenka busiku, likolo Ahasuero waamupeele nabeeza Esta bintu byonse byakua Hamani mulwani wa Bayuda. Mordekai ni ye waile kuli likolo pantu Esta waamubwilile nangue Mordekai ni muntu wakue.
EST 8:2 Likolo waavuulile kazele ka kusyusyutilako ka ku munue ka-aapokolwele kuli Hamani ni kumupeela Mordekai. Esta ni ye waamubiikile Mordekai kuba mukulu wa bintu byonse byaali byakua Hamani.
EST 8:3 Kabili Esta waapaapaatile kuli likolo, waponeene pa makasa akua likolo walimukulila walanda likolo afumiepo mapange abi akua Hamani Muagagi a kukambila Bayuda.
EST 8:4 Likolo waamuolweleele Esta kabango ka oro. Esta ni ye waabuukile ni kuya kwimana ntanzi yakua likolo ni kulanda nangue,
EST 8:5 “Kine likolo wawaminua, ni ne kine naitabilua, ni keebo kine kamuwamina, kabili kine wan'mona napalile, kulembue muzilo wa kuzilula muzilo waalembelue na Hamani mwina Hamedata Muagagi, muzilo ulandile palua kulovia Bayuda bonse bali mu biputu bya kyalo bya mu kyalo kyakua likolo.
EST 8:6 Kubako kuti navinda kusipikizia kumona busanzo pa bantu bane? Kubako kuti navinda kusipikizia kumona lupua lwane palulimukuloviiwa?”
EST 8:7 Likolo Ahasuero wa-anine nabeeza Esta ni Mordekai Muyuda nangue, “Nene namupeela kale Esta bintu byonse byakua Hamani, ni ye wakulikua kale ku kimuti pantu wakikita mapange abi pa Bayuda.”
EST 8:8 Kansi mwemue benka lembele Bayuda byonse bimutonene mu liina lyakua likolo, musyusyutepo ni kazele ka ku munue kakua likolo, pantu malembo alembelue mu liina lyakua likolo, ni kusyusyutuapo kazele ka ku munue kakua likolo, tekuli wakuvinda kwalulula.
EST 8:9 Pa busiku bwa 23 mu mwezi wa butatu, i mwezi wa Siwani, bakalemba bakua likolo baakuutilue kuli Mordekai kuti balembele Bayuda ni ndabukizi ya biputu bya kyalo 127 kufuma ku India mpaka ku Kushi. Kubalua kiputu kya kyalo kyaalembeelue mubeeleele nembelo yabo, kubalua bantu baalembeelue mu lulimi lwabo. Bayuda ni bo baalembeelue mubeeleele nembelo yabo ni mu lulimi lwabo.
EST 8:10 Mordekai waalembele mu liina lyakua likolo Ahasuero ni kusyusyutapo kazele ka ku munue kakua likolo. Mpapulo yaatwelue mu biputu bya kyalo na baseli ba farasi yaali yaenda lubilo, farasi yaakuziiziwe kuti iye yabombiiwa na likolo.
EST 8:11 Mpapulo yakua likolo yaapeele nsambu Bayuda bali mu mizi yonse kuti baye bakolonghana ni kwikingilila. Baapeelue nsambu ya kwinoona ni kwipaya pamo ni kulovia kubalua mutundu ni kubalua kiputu kya kyalo kine kyabasakukila, bene ni bakazi babo pamo ni baana babo. Kabili baapeelue ni nsambu ya kutwama bintu bya balwani babo.
EST 8:12 Busiku bwaali bwatantikiilue Bayuda bwa kukita evio mu biputu bya kyalo monse na likolo Ahasuero, bwaali busiku bwa lyanondo ni itatu ya mwezi wa lyanondo ni ibili, i mwezi wa Adari.
EST 8:13 Lwambu lwa mpapulo ya mizilo ya kupundua mu biputu bya kyalo yaapundilue ku ntundu yonse, evi Bayuda ni bo baye baiteaniizie kukita kibwelezi ku balwani babo pa bobo busiku.
EST 8:14 Baseli ba farasi yaali yaenda lubilo, farasi yaali yabombiiwa na likolo, baakinkiziiziwe na likolo kuya kutwala mpunda mu Susani, muzi ukata wa kyalo.
EST 8:15 Mordekai waafumine kuli likolo wavwele ngubo ya bukolo ya mukumino wa lyulu ni wa sue, ni kiteebo kikata kya oro ni nkanzu ya kitani kiweme kya mukumino wa bulumbi. Ni Susani, muzi ukata wa kyalo, waabulwile tupundu twa nsansa,
EST 8:16 pantu Bayuda bonse baawamiinue ni kupeelua mukinzi.
EST 8:17 Kubalua kiputu kya kyalo ni kubalua muzi waatweluemo mpapulo ya mizilo yakua likolo, Bayuda baalimo baawaamiinue, baakitile nsikunkulu ni kusangalala. Ntundu ingi yaialwile Bayuda pantu yaali yasyatiina Bayuda.
EST 9:1 Lwaakumeene busiku bwa lyanondo ni itatu ya mwezi wa lyanondo ni ibili, i mwezi wa Adari, busiku bwaali bwateaniiziwe kupundua ni kufikilizia mizilo yakua likolo, bobo busiku balwani ba Bayuda i bubaali baswapiile kwanzia Bayuda. Inzi bintu bya alulukile pantu Bayuda i ba-anziizie balwani babo.
EST 9:2 Bobo bwenka busiku, Bayuda baakolongheene mu mizi yabo ni mu biputu bya byalo byonse bya mu kyalo kyakua likolo Ahasuero kuti basakukile balwani babo baali bakeba kubalovia. Tekwaali muntu waabakaaniizie pantu bonse baatiinine.
EST 9:3 Ndabukizi yonse ya mu biputu bya kyalo pamo ni mikenzi yabo, ni bakwasi bakua likolo, baakwasiizie Bayuda pantu baali bamutiina Mordekai.
EST 9:4 Mordekai wa-alukile mukulu mu nghanda yakua likolo, ni bulumba bwakue bwaakumeene mu byalo byonse, pantu buvinde bwakue bwaali bwakililako sie.
EST 9:5 Ni pakako, Bayuda baumine balwani babo ni kubeepaya na bipanga. Balia baali babasuulile, Bayuda baabakitiile mubatoneene.
EST 9:6 Ni mu Susani, Bayuda baipailemo balalume 500.
EST 9:7 Pershandata, ni Dalfoni, ni Aspata,
EST 9:8 ni Porata, ni Adalia, ni Aridata,
EST 9:9 ni Parmashta, ni Arisai, ni Aridai pamo ni Waizata,
EST 9:10 baana lyanondo bena Hamani mwina Hamedata mulwani wa Bayuda, ni bo baipailue. Inzi tebaatweme bintu bya balwani babo.
EST 9:11 Bobo bwenka busiku likolo waaleeteelue mpendua ya bantu baipailue mu Susani.
EST 9:12 Likolo waamwanine nabeeza Esta nangue, “Bayuda baipaya bantu 500 ni baana lyanondo bena Hamani mono mu Susani. Paliibufi mu binge biputu bya kyalo. Nghane kinge kiwakeba ukitilue. Nghane kiutonene kulomba upeelue.”
EST 9:13 Esta waalandile evi, “Kine likolo awaminue, nalomba Bayuda bali mu Susani bapeelue nsambu ya kuti lukeele bakabe kukita nga vibakita lelo. Balia baana lyanondo bafwile bena Hamani bakabe kukulikua ku bimuti.”
EST 9:14 Likolo waitabiizie kuti kikitue evio vyenka. Mpunda yaatwelue mu Susani, ni balia baana lyanondo bena Hamani baakulikilue.
EST 9:15 Kabili Bayuda baakolongheene busiku bwa lyanondo ni ina ya mwezi wa Adari ni kwipaya bantu 300 mu Susani, inzi tebaatweme bintu bya balwani babo.
EST 9:16 Ni Bayuda bange baali mu binge biputu bya kyalo baakolongheene kuti bekingilile ku balwani babo evi babe ni mutende. Baba ni bo baipaile bantu 75,000, inzi tebaatweme bintu bya balwani babo.
EST 9:17 Bobo bwaali busiku bwa lyanondo ni itatu ya mwezi wa Adari. Inzi busiku bwa lyanondo ni ina mu ozo wenka mwezi, baatuuziizie. Bobo busiku baabukitile kuba busiku bwa nsikunkulu ni bwa nsansa.
EST 9:18 Bayuda ba mu Susani ni bo baakolongheene busiku bwa lyanondo ni itatu, ni busiku bwa lyanondo ni ina. Inzi busiku bwa lyanondo ni isaano ya ozo wenka mwezi, baatuuziizie. Bobo busiku baabukitile kuba busiku bwa nsikunkulu ni bwa nsansa.
EST 9:19 Ni pakako, Bayuda ba mu mizi ni ba mu tutanda, bene baali batuuzia busiku bwa lyanondo ni ina ya mwezi wa Adari. Bobo busiku i bubaakitile kuba busiku bwa nsansa ni bwa kupeelana byabupe.
EST 9:20 Mordekai waalembele bintu byaakitikile, kabili waatumine mpapulo ku Bayuda bonse baali baikeele mu biputu bya kyalo bya mu kyalo kyakua likolo Ahasuero, Bayuda baali baikeele pepi ni baali baikeele kule,
EST 9:21 kubakonkobezia kuti batwalilile kukita nsikunkulu kubalua mwaka pa busiku bwa lyanondo ni ina, ni pa busiku bwa lyanondo ni isaano ya mwezi wa Adari.
EST 9:22 Mu bobo busiku Bayuda i bubaakwatiilemo mutende ntanzi ya balwani babo, kabili i mwezi wa-alwiluemo bulanda bwabo kuba nsansa, ni kwalula malilo abo kuba nsikunkulu. Bwa-alukile busiku bwa kupeelana byabupe ni bya kulia pamo ni kukwasiako bapabi.
EST 9:23 Ni kiine Bayuda baitabiile kukita nga mubaatendekeele, ni muba-aniinue na Mordekai.
EST 9:24 Pantu Hamani mwina Hamedata Muagagi, mulwani wa Bayuda bonse, waali wakambila kubeepaya ni kubalovia, kabili baateele puri, i kuteya bubale, kuti abapue ni kubalovia.
EST 9:25 Inzi likolo lu-aabwililue, waapeene nsambu ya kulemba mpapulo ilandile nangue kukonkana ni mapange abi akua Hamani a kukambila kulovia Bayuda, ezio nkambilo imubwelelele ye mwine, ni baana bakue bakulikue ku bimuti.
EST 9:26 Ni pakako, bobo busiku bwa nsikunkulu baabwinikile Purimu bafumiizie ku liina lya puri. Kyaali pa mulandu wa lupapulo lwaalembele Mordekai, ni pa mulandu wa bintu bibaamwene, ni pa mulandu wa bintu byaabakitikiile.
EST 9:27 Bayuda, ni nvyalo yabo, pamo ni bonse bailundileko, ezio nsiku ibili ya nsikunkulu baisungile ni kwikita kuba mbeela yabo kubalua mwaka pa musita wakue pasili kulekela.
EST 9:28 Ezio nsikunkulu ipalile ikabe yalangulukua lyonse pasili kulekela. Nvyalo yonse, ni mikowa yonse ili mu biputu bya kyalo, ni ili mu mizi, bapalile kuya balanguluka lyonse bobo busiku bwa Purimu.
EST 9:29 Nabeeza Esta mwina Abihaili, pamo ni Mordekai Muyuda, baalembele bakonkobeziizie mu lolu lupapulo lwa bubili palua Purimu.
EST 9:30 Lupapulo lwaalembelue ni kutwalua ku Bayuda bonse mu biputu bya kyalo 127 bya mu bukolo bwakua likolo Ahasuero. Mu lupapulo mwaali twebo twa mutende ni twa kisinka,
EST 9:31 pakuti bakonkobezie ezio nsiku ya Purimu pa musita wakue, nga mwaalandiile Mordekai Muyuda ni nabeeza Esta, kabili ni kubakonkobezia palua kuizilika ni kulila, bene pamo ni nvyalo yabo.
EST 9:32 Mwano wakua Esta waakilile kukonkobezia palua Purimu, ni kulembua mu kitabu kya bintu byaali byakitika.
EST 10:1 Likolo Ahasuero wa-anine bantu bonse ba mu bukolo bwakue basonke misonko, pamo ni ba mu bilila bya mumbali lyezi.
EST 10:2 Bikitua byonse byaakitile Mordekai ni buvinde bwakue bwa maka bu-aapeelue na likolo, tebyaalembelue mu kitabu kya lyasi lya makolo a ku Media ni ku Persia.
EST 10:3 Mordekai Muyuda i waali wa bubili pali likolo Ahasuero, kabili i waali muntu aweme ku Bayuda. Bayuda ba mu mukowa wakue baali bakila kumukindika pantu waali wabakitila biweme ni kulanda nabo palua kwikala bwino.
PRO 1:1 Mapinda akua Solomoni likolo wa Baizraeli, mwana mwina Daudi.
PRO 1:2 Aza mapinda i alialengia muntu kuba ni mulangue pamo ni masambilizio, ni kumana ndubulwilo ya mukati,
PRO 1:3 Pamo ni kumusambilizia bikitua bya mulangue, ni bya bulunghami, ni bya nsambu pamo ni biweme.
PRO 1:4 Kabili i aliapeela babipuba mulangue, ni kupeela balumendo maano ni bukengezi,
PRO 1:5 Evi wa mulangue onvue ni kulundiluapo masambilizio, akile kuya wali ni mulangue pamo ni nsokezi iweme,
PRO 1:6 Pakuti enike mapinda pamo ni bipalo, ni kwinika bulanzi bwa balia bali ni mulangue pamo ni bitandiko byabo.
PRO 1:7 Kumutiina Yawe i ntendeko ya maano, inzi babipuba balibafuupula mulangue ni masambilizio.
PRO 1:8 We mwana wane, unvua masambilizio akua so, kabili tekufuupula mafunde akua noko.
PRO 1:9 Pantu alikuya ali ngala ya buwame ku mutue obe, kabili nga mikufu mu mukosi obe.
PRO 1:10 We mwana wane, kine wabembua na bantu ba bibalo, tekwitabila.
PRO 1:11 Kine balanda nangue, “Iza tuye nobe, tuye tufyaminepo muntu umo asili na mulandu ni kumwipaya,
PRO 1:12 Tuye tubateleke bakosele nga vilivyateleka kilibu, tubateleke balingi nga balia balibakookela mu kiina.
PRO 1:13 Tulikusanga bunonsi bonse bwa mponvu, tulikwizuzia nghanda yetu na bintu bitulikupoka.
PRO 1:14 Ale iza wampane ni fwefue, byonse bitulikupoka tulikukasana.”
PRO 1:15 We mwana wane, tekuba waenda pamo nabo, kaania lukasa lobe tekuti luye lwapita molia mubalibapita.
PRO 1:16 Pantu makasa abo aliakundukila ku bubi, kabili tebezi kukokola kuzuumia mulopa.
PRO 1:17 Pantu bukila bulibwateiwa tooni twamwene, bwa mpuni.
PRO 1:18 Baba bantu balibabenza mulopa wabo bene, balibafyamina bukose bwabo bene.
PRO 1:19 Evi i vili mibeele ya bantu balibatokamua bunonsi bwa bupompo, bupompo bulibwaputukizia bukose bwabo.
PRO 1:20 Mulangue aliwasamuna mu kisaakaanino kya bantu, aliwasamuna lizui lyakue pa kisisiizio.
PRO 1:21 Aliwapunda mu mampetompeto, pa milyango ya kwingililamo mu muzi, aliwalanda.
PRO 1:22 “Mwe basili na maano! Mwaakaba mwatonenetonene sie kusiba na maano? Mwe ba mufuupula! Mwaakaba mwawamiinuewamiinue sie kufuupula? Mwe babipuba! Mwaakaba mwasuulilesuulile sie maano?
PRO 1:23 Pilibuke pa mulandu wa nsokezi yane. Unvue, nene ndikumipongwela Mweo wane, ndikumibwila masambilizio ane.
PRO 1:24 Inzi nakimikuuta, ni mwe mwakaana kwitaba, nakimyolwela kuboko kwane, temwakipoozako maano,
PRO 1:25 Mwakipuulula nsokezi yane yonse, ni kukaana mwano wane,
PRO 1:26 Ni nene wenka naakaseka pa musita wa busanzo bwenu, naakamipunika musita waakeeza maavia,
PRO 1:27 Lubebue palukamifikila nga mwela ukata, ni lwinoono palukamifikila nga mulula, ni pamukafikilua na busanzo ni misa.
PRO 1:28 “Pabakankuuta, nsikaba-asuka. Baakankeba inzi tebakan'mona.
PRO 1:29 Pantu bakisuula maano, kabili pantu tebakisaakula kumutiina Yawe.
PRO 1:30 Bakisuula nsokezi yane, bakifuupula mwano wane.
PRO 1:31 Ni pakako, bakaba kuya balia mazabo a mu bikitua byabo, ni kwikuta nsokezi yabo bene.
PRO 1:32 Pantu misango ibi ya bupuba yaakabeepaya, balia balibatwalilila mu bupuba, bwaakabeenoona.
PRO 1:33 Inzi muntu aliwantwilizia wakaba kuya waikeele mu mutende, kabili wakaba kuya wateekameene pasili kutiina bibiipile.”
PRO 2:1 We mwana wane, kine waitabila twebo twane, ni kusunga bwino mafunde ane mukati mobe,
PRO 2:2 Pamo ni kuteya kutui kobe kuti kutwilizie mulangue, ni kunvwisia mu mutima obe,
PRO 2:3 Kisinka kine wamukuuta mulangue, ni kumana wamuzanzwila lizui,
PRO 2:4 Kabili kine wabakeba nga mutofue, ni kubakebelezia nga bukonto bufiikilue,
PRO 2:5 I paulikumana vya kumutiina Yawe, ni kwinika vya kumumana Leza.
PRO 2:6 Pantu Yawe aliwapeela bantu mulangue, mu kanua kakue mulimwafuma bukengezi ni kumana.
PRO 2:7 Aliwabiikila balunghami bukonto, wene i kisoolelo kya balia balibaenda mu kisinka.
PRO 2:8 Aliwalabukila nghendelo ya bantu balibakita bintu bya nsambu, ni kusunga nzila ya bazuuke bakue.
PRO 2:9 Kine wewe wantwilizia ulikwinika bulunghami ni nsambu pamo ni kisinka. Ulikwinika kubalua nzila iweme.
PRO 2:10 Pantu mulangue alikwingila mu mutima obe, ni maano alikusansamusia bukose bobe.
PRO 2:11 Kwinika kulikukusunga, ni kumana kulikukulabukila.
PRO 2:12 Mulangue alikukupususia mu nzila ya babi, ni ku bantu balibalanda twebo tubi.
PRO 2:13 Bantu balibasia nzila ilungi pakuti bende mu nzila ya nfinzi,
PRO 2:14 Bantu balibawaminua kukita bibiipile, ni kusansamukila mu bupompo bwa bubi,
PRO 2:15 Tusansaila twabo, ni twa mampetompeto, ni nzila yabo teyololokele.
PRO 2:16 Mulangue alikukupususia ku mwanakazi mukambue, ku mwanakazi mweni ali ni twebo twa kubembia.
PRO 2:17 Mwanakazi aliwasia kibuza wa mu bukazyana bwakue, ni kulaba kipingo kyakua Leza wakue.
PRO 2:18 Kisinka nghanda yakue ilungi ku lufu, ni ku bafwile i kulungheeme nzila yakue.
PRO 2:19 Bonse balibaya kuli wene, tepali aliwabwela, ao kubwelela ku nzila ya bukose.
PRO 2:20 Ni pakako upalile kuya waendela mu nzila ya bantu baweme, ni kukonka mibeele ya balunghami.
PRO 2:21 Pantu balunghami baakeekala mu kyalo, ni basili na kabi baakeekalililamo.
PRO 2:22 Inzi babi baakafumiiwa mu kyalo, ni bankitatubi baakanukuluamo.
PRO 3:1 We mwana wane, tekuba walaba masambilizio ane, inzi sunga milao yane mu mutima obe.
PRO 3:2 Pantu yakaba kuvuzia myaka ya bwikazi bobe, ni kukupeela mutende ni buyantanzi.
PRO 3:3 Ntono ni bukisinka tekuti bilekenkane nobe, bikakilile mu mukosi obe, bilembe pa kibao kya mu mutima obe.
PRO 3:4 Ni we ulikwitabilua ni kumonua waweme ku menso akua Leza ni ku menso a bantu.
PRO 3:5 Muketekele Yawe na mutima obe onse, pasili kusintilila pa maano obe we mwine.
PRO 3:6 Mu nzila yobe yonse, mumane wene, ni ye alikuolola nzila yobe.
PRO 3:7 Tekwimona we mwine kuba wali ni mulangue, mutiine Yawe ni kwikeka ku bubi.
PRO 3:8 Kukita evio kulikukuleetela bukose mu mubili, ni maka mu bikuza byobe.
PRO 3:9 Mukindike Yawe na bunonsi bobe, mukindike na ntomono ya mu buzombozi bobe bonse.
PRO 3:10 Ni pakako, milue yobe yaakeezula, ni mitondo yobe yaakeezulamo divai ya lenu.
PRO 3:11 We mwana wane, tekuleebula nsokezi yakua Yawe, kabili tekutoobolua lu-aliwakusasilila.
PRO 3:12 Pantu muntu atonenue na Yawe aliwasokua, nga evelia mwana atonenue na se.
PRO 3:13 Lisyuko ku mwalalume aliwasanga mulangue, ni aliwainika.
PRO 3:14 Pantu mulangue akilile bunonsi bwa mutofue, ni kibwezia kyakue kitanine kukila kibwezia kya oro.
PRO 3:15 Mulangue ni wa mponvu kukila mabue a mutengo, ni byonse biuliwakeba tebivinda kulinghaniwako.
PRO 3:16 Nsiku ingi ili mu kuboko kwakue kwa kulio, ni mu kuboko kwakue kwa kuso i muli bunonsi ni mukinzi.
PRO 3:17 Nzila yakue, i nzila ifwaniine, ni tusansaila twakue tulungi ku mutende.
PRO 3:18 Mulangue i kimuti kya bukose ku balia bamukwatiisie, kabili i lisyuko ku onse atwaliliile kuba nakue.
PRO 3:19 Kupitila mu mulangue, Yawe waabiikile biputa bya kyalo, ni mu kumana waimikile myulu.
PRO 3:20 Mu kumana kwakue, biponga byaakasanikile, ni kulengia malezi kutoonia lume.
PRO 3:21 We mwana wane, tekulekeela mulangue ni maano kufuma pa ntanzi yobe, kwatisia maano aweme pamo ni bukengezi.
PRO 3:22 Ni byo i bilikuya byali bukose bwa mutima obe, ni bifwanizio bya mu mukosi obe.
PRO 3:23 Ni pakako, ulikuya wali ni mutende mu nzila yobe, ni kuulu kobe tekuya kwaipuutala.
PRO 3:24 Musita uwalaala, teuya wali na mwezo. Ulikuona tulo twaweme.
PRO 3:25 Tekuya wali na mwezo wa lwinoono lwa kukutulumukila, anzia kine kusanzua kwa babi kwaiza,
PRO 3:26 Pantu Yawe waya wali maswapi obe, ni ye waya wasungile kuulu kobe tekuti kukwatue mu muteo.
PRO 3:27 Tekukaana kupeela kiweme ku bantu bapalile, lu-ukili ni maka a kukita evio.
PRO 3:28 Tekumwana mwinobe nangue, “Endo, ukeeze lukeele mane nkakupeele” Koku kintu kya kumupeela wakwete.
PRO 3:29 Tekukitila mwinobe mapange abi, olia ekeele waakuketekeele.
PRO 3:30 Tekusongela muntu pasili mulandu, kine takitile kantu ka kukukisia.
PRO 3:31 Tekumwena bunkua muntu aliwakyuzyania, ni pa nzila yakue tekusaakulapo ata imo.
PRO 3:32 Pantu Yawe asuulile muntu aliwakita bibiipile, inzi wene ni kibuza wa balia balibakita biweme.
PRO 3:33 Ntiipu yakua Yawe ili mu nghanda mwa mubi, inzi Yawe aliwapaala nghanda ya mulunghami.
PRO 3:34 Aliwafuupula balia bali ni mufuupula, inzi aliwapeela buwame ku bekeefiizie.
PRO 3:35 Bali ni mulangue balibapyana bulumba, inzi babipuba balibamoniiwa busoni.
PRO 4:1 Mwe baana bane, unvue mafunde akua sinue, kabili twilizie evi mube ni maano.
PRO 4:2 Pantu ndimukumipeela mafunde aweme, tekuti mukasie masambilizio ane.
PRO 4:3 Lunaali mwana mu nghanda yakua tawe, nakili kalala, mwana lyonga wakua yangu.
PRO 4:4 Tawe waali wansambilizia walanda nangue, “Mutima obe uye walanguluka twebo twane, sunga milao yane, ni we ulikuya wali mukose.
PRO 4:5 Ba wali ni mulangue, ba wali ni kyunvwila tekulaba ao kukaana twebo twa mu kanua kane.
PRO 4:6 Tekumusia mulangue, ni ye alikukulabukila, mutone, ni ye alikukusunga.
PRO 4:7 Ntendeko ya mulangue ni ezi: Ba wali ni mulangue. Anzia uzeeziiziapo byonse bi-uli nabio, kya mponvu ba wali ni kyunvwila.
PRO 4:8 Mukindike, ni ye alikukukindika. Kine wamukumbatila alikukukindika.
PRO 4:9 Alikukupeela buwame kuba kitambala ku mutue obe, alikukufwanizia na ngala ya bulumba.”
PRO 4:10 Twilizia we mwana wane, itabila bindimukulanda, ni myaka ya bukose bobe ilikuvula.
PRO 4:11 Nakusambilizia nzila ya mulangue, nakulombola mu tusansaila twa bulunghami.
PRO 4:12 Luuliwaenda, lutanfu lobe telukilinghaniiwa. Kine wakunduka tewipuutala.
PRO 4:13 Kwatisia mafunde, pasili ku-aleka aye, akwatisia, pantu ene i bukose bobe.
PRO 4:14 Tekwingila mu nzila ya babi, tekukonka mibeele ya bantu babi.
PRO 4:15 Leya ezio nzila, kabili tekwendamo, isie uye mu nzila yobe.
PRO 4:16 Pantu tebezi kulaala kine tebanakitenke bubi, ni tulo tetwizi kuoneka kine tebanapuutazie muntu.
PRO 4:17 Pantu bubi i bilio byabo. Nghemo ikata i divai yabo.
PRO 4:18 Nzila ya balunghami ili nga kisue kya ku makia, kilikyailundilako mpaka bwakiililila.
PRO 4:19 Inzi nzila ya babi ili nga nfinzi ikata, ni kilikyabeepuutazia tebakimanine.
PRO 4:20 We mwana wane, pooza maano ku bindimukulanda, teya kutui ku twebo twane.
PRO 4:21 Tekubifumia pa menso obe, bisunge bwino mu mutima obe.
PRO 4:22 Pantu i bukose ku muntu aliwabisyukila. Kabili i kutuuka kwa mubili wakue onse.
PRO 4:23 Sunga mutima obe kukila byonse biuliwasunga, pantu i mulimwafuma byonse bi-uliwakita.
PRO 4:24 Sunga kanua kobe ku twebo twa bukisanguka, ni milomo ya kiitoni ibe kule ni wewe.
PRO 4:25 Menso obe akente ku ntanzi, ni nkopio yobe pasili kukapa.
PRO 4:26 Pooza maano mulimwapita makasa obe, ni nzila yobe yonse iwamiiwe bwino.
PRO 4:27 Tekupilibukila kulio ao kuso, fumia kuulu kobe mu bubi.
PRO 5:1 We mwana wane, unvua mulangue wane, teya kutui ku twebo twa maano.
PRO 5:2 Evi uye wavinda kwinika biweme, ni milomo yobe isunge maano.
PRO 5:3 Pantu milomo ya mwanakazi mukambue, iliyatoonia kapelo, ni bulanzi bwakue buteleele kukila mafuta.
PRO 5:4 Inzi mpeleezio ya bulanzi bwakue ilulile kukila kimuti kiluliisie, ni kunooneka nga kipanga kya mindyakubili.
PRO 5:5 Makasa akue alimukuya akookela ku lufu, ntanfu yakue ilungi kumbo.
PRO 5:6 Kabili tasakameene nzila ya bukose. Nzila yakue ipotonkeene, kabili taimanine.
PRO 5:7 Ni pakako, mwe baana bane ntwilizie, kabili tekufume mu bindimukulanda.
PRO 5:8 Nzila yobe ilekenkane kule ni wene, kabili tekupalamina ku mulyango wa nghanda yakue.
PRO 5:9 Ukeeza kupeela bange mukinzi obe, ni myaka yobe ku balia basili na nkumbu.
PRO 5:10 Baeni bakeeza kwikusiiwa na maka obe, ni miilo yobe ikeeza kuya yali mu nghanda mwa mweni.
PRO 5:11 Ku mpeleezio ya bukose bobe waakaloosia, musita waakeenoonua munofu ni mubili obe.
PRO 5:12 Waakalanda nangue, “Ale naasuuliileki masambilizio? Ale naafuupwiliileki nsokezi?
PRO 5:13 Nsyaanakiile bakasambilizia bane, ni kubatwilizia balia balibanfunda!
PRO 5:14 Naali nasyaumiine kwingila mu bwavia bukata, mu libumba lya bantu bakua Leza.”
PRO 5:15 Mina menda a mu nsupa yobe we mwine, menda aliapita lubilo kufuma mu kiina kyobe we mwine.
PRO 5:16 Ale tusulo tobe twa menda tulikusalanghaninaki mu misebo? Ni twezi twa menda kuya kiyeyeye?
PRO 5:17 Aye ali sie obe we bunke, pasili kupeelako baeni.
PRO 5:18 Kasulo kobe kapaalue, kabili uwaminue na mukazi wa mu bulumendo bobe,
PRO 5:19 Aweme nga nswala, ni kufwanina nga kasia, mabeele akue aye akuwamiine nsiku yonse, kabili uye wawamiinue nsiku yonse mu ntono yakue.
PRO 5:20 Ale ni kiki kilikukulengia we mwana wane kuti uwaminue na muka nghwana? Ale ni kiki kilikukulengia kukumbatila nkulo ya mwanakazi mukambue?
PRO 5:21 Pantu nzila yobe ili ku menso akua Yawe, ni ye aliwatoosia monse muuliwapita.
PRO 5:22 Mubi aliwakwatua na bubi bwakue mwine. Ni ye aliwakakua na nkamba ya bibalo byakue.
PRO 5:23 Aliwafua pa mulandu wakubula masambilizio, ni bupuba bwakue bukata bulibwamulovia.
PRO 6:1 We mwana wane, kine waipeele kulipa mizia ya mwino, kabili kine waalaile palwakua ozo muntu,
PRO 6:2 Kine uteelue na biuliwalanda, kabili kine ukwetue na twebo twa mu kanua kobe.
PRO 6:3 We mwana wane, pakuti wipususie, pantu waibiikile mu maboko a mwino, kita evi: Endo wikeefie ni kumupaapaata mwino.
PRO 6:4 Tekulekeela menso obe kunvua tulo, ni nkopio yobe kuona.
PRO 6:5 Iipususie nga kasia kapusuka mu minue ya mbwela, ao nga koni kapusuka mu minue ya mutei.
PRO 6:6 Endo waya pa lupazi we munanghani, langakana nzila yakue ube ni mulangue.
PRO 6:7 Lupazi teluli na kalombozi, na mukulu-ao na kateeka.
PRO 6:8 Inzi lulilwaibiikila bilio bya pa musita wa likungulu, kabili lulilwaikolonghaniizia bilio pa musita wa buzombozi.
PRO 6:9 We munanghani! Waya waleeleleele sie mpaka musitaki? Ulikubuuka musitaki mu tulo tobe?
PRO 6:10 Uliwalanda nangue, “Ndaalenkepo kaniini, nghonenkepo kaniini, nkunzenkepo kuboko kaniini ni kutuuzia.”
PRO 6:11 Ni evi bupabi bwakaba kukwizila nga kabooko, ni kubulua kwakaba kukukonka nga kipoopoosi ali ni kilwilo.
PRO 6:12 Muntu mubi, muntu wa mpuni, aliwaendooka walimukulanda twebo twa bupompo.
PRO 6:13 Aliwakapia na menso akue ni kusinia na makasa akue, aliwakita tulangi na minue yakue.
PRO 6:14 Mu mutima mwakue muli bupompo, aliwalangakana bubi musita onse, ni kubyala mbezu ya bupusano.
PRO 6:15 Ni pakako, bwavia bwaakamutulumukilila sie, waakatulumukililua ni kutyonua pasili kumona ntuukilo.
PRO 6:16 Kuli bintu mutanda bisuulilue na Yawe, ee, bintu kilooba bilibyamukisia mutima.
PRO 6:17 Menso a kiitoni, lulimi lulilwalanda bufi, ni minue iliyazuumia mulopa usili na kafi,
PRO 6:18 Mutima uliwalangakana malanga abi, ni maulu angukile kubutukila ku bubi,
PRO 6:19 Musininkizi wa bufi aliwalanda bufi, ni olia aliwabyala mbezu ya mbiikizi mu lupua.
PRO 6:20 We mwana wane, konka milao yakua so, kabili tekuti ukabe kulekela masambilizio akua noko.
PRO 6:21 Kakilila milao lyonse mu mutima obe, ivwale mu mukosi obe.
PRO 6:22 Luuliwaenda, milao yaya yakulombwele, lu-uliwalaala yaya ya kusungile. Ni kukulanzia lu-uliwabuuka.
PRO 6:23 Pantu ezi milao i musaniko, aza masambilizio i kisue, ni nsokezi ya masambilizio i nzila ya bukose.
PRO 6:24 I bya kukusunga ku mwanakazi mubi, ni ku lubembo lwa mwanakazi mukambue.
PRO 6:25 Tekutokamua mu mutima obe na kuwama kwakue, kabili tekulekelela akubembe na nkopio ya menso akue.
PRO 6:26 Pantu mwanakazi mukambue kuti waongua na mutengo wa kisoso kya mukate, inzi pa muka nghwana aliwazeeziiziapo bukose bwine bwine.
PRO 6:27 Eba, kubako muntu kuti wabiika mulilo mu nkulo, ni bivwalo byakue pasili kuzia?
PRO 6:28 Ao muntu kuti wanyanta lukasa pa mazekezeke a mulilo, ni makasa akue pasili kuzia?
PRO 6:29 Evi i vili muntu aliwaingila kwa muka nghwana, kubalua muntu aliwamukumia takabula kukandua.
PRO 6:30 Bantu tebezi kumufuupula kabooko kine waibila kwikuta pantu ali ni nzala.
PRO 6:31 Inzi kine wakwatua, alikubweziiziamo nghendo kilooba, ni ye alikufumia bunonsi bonse bwa mu nghanda yakue.
PRO 6:32 Inzi olia aliwakita bukambue na mwanakazi, tali na maano. Olia aliwatona kwinoona mutima wakue mwine, i aliwakita evio.
PRO 6:33 Wene waakaaluka ni bilonda ni busoni, ni kulandilua bibiipile tekukapua.
PRO 6:34 Pantu bunkua bulibwamuleetela mulume kipuki. Ni ye takaba na nkumbu busiku bwa kukita kibwelezi.
PRO 6:35 Takeetabila nfuto ata imo, kabili takeetabila bituulilo anzia kine bikabe byavulile.
PRO 7:1 We mwana wane, sunga twebo twane, labukila milao yane mukati mobe.
PRO 7:2 Konka milao yane ukabe ni bukose, ni kusunga mafunde ane nga kambooli ka mu linso lyobe.
PRO 7:3 Kakila milao ku minue yobe, uilembe pa kibao kya mu mutima obe.
PRO 7:4 Ana mulangue nangue, “Uli nkazyamwine,” ni kumwana kyunvwila nangue, “Uli lupua lwane.”
PRO 7:5 Evi bakusunge ku mwanakazi mukambue, ni ku kuleula ku muka nghwana aliwabembia na twebo twakue.
PRO 7:6 Pantu pa nzota ya mu nghanda yane naakentele mu kisampi.
PRO 7:7 Naamwene pa babipuba, pa balumendo nainikilepo mulumendo asimanine kantu.
PRO 7:8 Mulumendo waali waya mu musebo ukata pepi ni lipeto, walungi ku nghanda kulikwaikala mwanakazi umo.
PRO 7:9 Koba kasyazimiine, musita wa kyungulo, pasyafiita, pa kamuntu uli ni.
PRO 7:10 Kupwako, mwanakazi umo waya kusaakaana nakue, wavwele nga mukende ali ni mutima wa bupompo.
PRO 7:11 Mwanakazi ali ni nsungu ni butaale, makasa akue tekuba azikia mu nghanda yakue.
PRO 7:12 Unge musita aliwasangua mu nzila, ni unge musita mu misolo, ni mu mapeto walimukubenza.
PRO 7:13 Kupwako, wamukumbatila mulumendo ni kumufyompa, ni kumwana pasili busoni.
PRO 7:14 “Ngelelo ya kyabupe kya mutende ndinayo ku nghanda. Lelo nafikilizia kilapo kyane.
PRO 7:15 Ni pakako, i kinafuminanga kuti ngize nsaakaane nobe. Nakukebanga mpaka nakumona.
PRO 7:16 Pa bulita bwane napanzikangapo ngubo, ngubo ya ku Misri ya mazela.
PRO 7:17 Nafuuminizyanga manukato pa bulita bwane, ni bubaani, ni kizime pamo ni mudalasini.
PRO 7:18 Iza twikute ntono mpaka lukeelekeele, tusansamusie mitima yetu na ntono.
PRO 7:19 Pantu mulume wane ku nghanda taliko, aile mu bulendo lwa kule.
PRO 7:20 Wakitwama ni mufuko wa nfolanga, wakaba kubwela sie kwezi wasyalingi.”
PRO 7:21 Na twebo twakue tuweme aliwamubembia, aliwamwanzia na lubembo lwa kanua kakue.
PRO 7:22 Ni penka papo aliwamukonka, nga nghombe ndume alimukuya ku kusinzua, ao nga kisongo kilimukwingila mu muteo.
PRO 7:23 Anzia muvui kine wamutunka ku maini, nga koni kabutukiile pa kakose, tavinda kumana nangue i busanzo bwa bukose bwakue.
PRO 7:24 Ni pakako, we mwana wane ntwilizie, poozako maano ku bindimukukwana.
PRO 7:25 Mutima obe tekuti upooze maano ku nzila yakue, ukeeza kuzeezelela mwaliwapita.
PRO 7:26 Pantu tasyaipaile balalume bengi, balia ba-asyasinzile, ni bengi.
PRO 7:27 Nghanda yakue i nzila ikata ya kumbo, ikookeele ku miputule ya lufu.
PRO 8:1 Eba, mulangue tezi kulila? Kumana ni ye tezi kuzanzula lizui lyakue?
PRO 8:2 Pa kifuka kya pa muulu sana pepi ni nzila, pa masanzyonzila i paimeene.
PRO 8:3 Mumbali mulyango wa kwingililapo mu muzi, pa nghingililo, aliwasamuna,
PRO 8:4 “Mwe bantu, ndinamikuuta, ni lizui lyane ni pa mulandu wa bantu.
PRO 8:5 Mwe basimanine kantu, be ni maano, ni mwe babipuba, be ni mutima wa kumana.
PRO 8:6 Twilizie pantu ndi ni twa kulanda twa mponvu, ndikwizula milomo yane nande twebo tulungi.
PRO 8:7 Kanua kane kalikulanda kisinka, pantu bubi kunvwika mu milomo yane ni kibalo.
PRO 8:8 Twebo tonse twa mu kanua kane ni twa nsambu, tepali kalubile ao kabiipile pa tonse.
PRO 8:9 Tonse tuli sie bwino ku olia amanine, tulungheeme ku balia bali ni maano.
PRO 8:10 Saakula masambilizio ane kukila mutofue, ni kumana kukila oro isambikile.
PRO 8:11 Pantu mulangue i aweme kukila mabue a mutengo, ni bintu byonse bitonekele tebivinda kulinghaniwa nakue.
PRO 8:12 “Nene, ne mulangue, ngikeele pamo ni bukengezi, kwinika ni kumana ndi nabo.
PRO 8:13 Kutiina Yawe, kusuula bubi. Nsuulile kiitoni, ni kwitasia, ni mibeele ibi, pamo ni bulanzi bubi.
PRO 8:14 Nsokezi ni yane pamo ni bukengezi bwa kiine, kumana ni maka ndi nabio.
PRO 8:15 Mubukwasi bwane, makolo aliateeka, ni kupingula mu nsambu.
PRO 8:16 Mubukwasi bwane, bena makolo balibateeka, ni babiloolo balibalombola bwino pa kyalo.
PRO 8:17 Ntonene balia bantonene, ni bonse balibankeba na mute, baliban'mona.
PRO 8:18 Bunonsi ni mukinzi bili kuli nene, bunonsi bulibwalunduluka pamo ni nsambu.
PRO 8:19 Mazabo ane akindeeme kukila oro, ni kibwezia kyane kikilile mutofue usambikile.
PRO 8:20 Ndinaenda mu nzila ya bulunghami, mu tusansaila twa nsambu,
PRO 8:21 Ndinanonsia balia bantonene, ndinaizuzia kipao kyabo.
PRO 8:22 “Yawe waanengele wa mambo mu miilo yakue, ntanzi ya miilo yakue ya kale.
PRO 8:23 Nene kundi kutula ku mambo, kyalo lukyaali tekinabeko.
PRO 8:24 Biponga lubyaali tebinabeko, naali nasyavyelue, tusulo twizwilemo menda lutwaali tetunabeko.
PRO 8:25 Mpili luyaali teinabeko, ntanzi ya tupili naali nasyavyelue.
PRO 8:26 Lu-aali tanalenge kyalo, ao makaba, ni ntendeko ya lufunko lwa mu kyalo.
PRO 8:27 Naali nalipo lu-aali wabiika myulu, lu-aali wabiika mupaka wa lyulu ni menda.
PRO 8:28 Lu-aali wabiika malezi a mu muulu, ni lu-aali walumia tusulo twa menda,
PRO 8:29 Lu-aali wabiika mupaka wa lyezi, evi menda tekuti apule mafunde akue, ni lu-aakitile biputa bya kyalo.
PRO 8:30 Naali pamo nakue nga kituemambo wa miilo. Naali nsansa yakue kubalua busiku. Naali ni nsansa kubalua busiku ku menso akue.
PRO 8:31 Naali nasansamukila kyalo kikeeluemo na bantu, ni nsansa yane yaali yali pamo ni bena bantu.
PRO 8:32 “Ni pakako, ntwilizie mwe baana bane, pantu lisyuko lili na balia balibakonka nzila yane.
PRO 8:33 Unvue masambilizio ane mube ni mulangue, kabili tekukaane.
PRO 8:34 Lisyuko ku olia aliwantwilizia, aliwapempa kubalua busiku ku milyango yane, wapembeele mumbali milyango yane.
PRO 8:35 Pantu olia wansanga, wasanga bukose ni kupokelela buwame kuli Yawe.
PRO 8:36 Inzi olia aliwa-andua kunsanga, aliwakisia mutima wakue mwine, balia bonse bansuulile, batonene lufu.”
PRO 9:1 Mulangue waakuulile nghanda yakue, waabaazile mapumpu akue kilooba.
PRO 9:2 Waipaile nama yakue ni kusanziamo divai yakue, waapanzikile ni meza yakue.
PRO 9:3 Waatumine mubombi wakue mwanakazi, pa kifuka kya pa muulu wa muzi kuti akupe.
PRO 9:4 “Kubalua kipuba eze engile,” ni olia asimanine kantu, aliwamwana nangue,
PRO 9:5 “Iza ulie bilio byane, ni kumina divai inakisanzia.
PRO 9:6 Mwe babipuba, lekele bupuba mube ni bukose. Endele mu nzila ya kumana.”
PRO 9:7 Aliwasoka wa kapuni aliwaileetelela kuleebulua. Ni aliwasasilila mubi aliwaileetelela matuka.
PRO 9:8 Tekusasilila ali ni mufuupula pantu nga alikukukenda, sasilila wa mulangue, ni ye alikukutona.
PRO 9:9 Sambilizia wa mulangue, ni ye alikulunduluka kuba ni mulangue. Sambilizia mulunghami, ni ye alikulunduluka kumana.
PRO 9:10 Kumutiina Yawe, i ntendeko ya mulangue, ni kumumana Muzuuke, i kuba ni maano.
PRO 9:11 Pantu kupitila mu mulangue nsiku yobe ilikuvuziiwa, ni myaka ya bwikazi bobe ilikulundua.
PRO 9:12 Kine uli ni mulangue, mulangue obe we mwine. Kine uli wa kapuni, kwema ni kobe we mwine.
PRO 9:13 Mwanakazi kipuba aliwasaamia, Tamanine kantu, kabili tali na busoni.
PRO 9:14 Aliwaikala mu mulyango wa nghanda yakue, pa kifuka kya pa muulu wa muzi,
PRO 9:15 Walimukukuuta balia balibapita, balibapita mu nzila yakue,
PRO 9:16 “Kubalua kipuba eze engile mono!” Ni olia asimanine kantu aliwamwana nangue,
PRO 9:17 “Menda ebilue aweme, ni mukate uliwaliiwa mu kafiso uliwawaminina.”
PRO 9:18 Inzi kipuba tamanine nangue momo i muli bafwile, ni baeni ba ozo mwanakazi nangue bali pansi kumbo.
PRO 10:1 Aza i mapinda akua Solomoni: Mwana wa mulangue aliwasansamusia se, inzi kipuba, bulanda kuli nghina.
PRO 10:2 Bukonto bulibwanonkelua mu bubi tebuli na kibwezia, inzi bulunghami bulibwapususyania ku lufu.
PRO 10:3 Yawe tezi kulekelela mulunghami kwemiwa na nzala, inzi aliwabatana babi belia bibalibatokamua.
PRO 10:4 Olia aliwabomba na kuboko kunangheene aliwaileetelela bupabi, inzi kuboko kwa olia alumine kulikwaleeta bunonsi.
PRO 10:5 Olia aliwakolonghania musita wa kipua, i mwana ali ni mulangue, inzi olia aliwalaala musita wa kuzombola, i mwana aliwamoniania busoni.
PRO 10:6 Mapaalo ali pa mutue wa mulunghami, inzi bupompo bukupiliile kanua ka mubi.
PRO 10:7 Liina lya mulunghami lililyabombiiwa ku mapaalo, inzi liina lya mubi, lyaakabola.
PRO 10:8 Wa mulangue aliwaitabila nsokezi, inzi kipuba wa bulanzi bwingi waakaloba.
PRO 10:9 Olia aliwaenda mu bulunghami, aliwaenda pasili busanzo, inzi olia aliwamuzeeziizia nzila waakamanika.
PRO 10:10 Olia aliwakapia na linso aliwaleeta bulanda, inzi aliwasokana mu kisinka aliwaleeta mutende.
PRO 10:11 Kanua ka balunghami, i kasulo ka menda a bukose, inzi bupompo buli mu kanua ka mubi.
PRO 10:12 Kukenda kulikwalengia bupusano, inzi ntono iliyavimba pa bubi bonse.
PRO 10:13 Mulangue uliwasangua mu milomo ya muntu aliwainika, inzi nfimbo iliyaumua mu musana wa muntu asili na maano.
PRO 10:14 Wa mulangue aliwabiika bukonto bwa bukengezi, inzi kanua ka kipuba, kalikapalamika lwinoono.
PRO 10:15 Bunonsi bwa munonsi, i muzi wakue ulumine. Inzi lwinoono lwa bapabi i bupabi bwabo.
PRO 10:16 Kilambu kya mulunghami kilikyaleeta bukose, Inzi bunonsi bwa mubi ni kibalo.
PRO 10:17 Olia aliwaunvua lu-aliwasasililua, ali mu nzila ya bukose, Inzi olia aliwakaana nsokezi, aliwazeeza.
PRO 10:18 Olia asuulile mwinakue mu kafiso wa bufi, ni olia aliwa-ambana, kipuba.
PRO 10:19 Mu bwingi bwa twebo, temwapusa bubi, inzi aliwasunga milomo yakue, aliwabombia maano.
PRO 10:20 Lulimi lwa mulunghami luli nga mutofue uwamiisie, mutima wa mubi ni wa mpuni.
PRO 10:21 Milomo ya balunghami iliyaliisia bengi, inzi babipuba balibafua pa mulandu wa kusimana.
PRO 10:22 Mapaalo akua Yawe alianonsyania, pasili kwemenapo.
PRO 10:23 Kipuba kukita bubi, kuli nga musaapo, inzi muntu wa kyunvwila aliwawaminua na mulangue.
PRO 10:24 Kilikyatiina mubi i kilikyamufikila, inzi balunghami balibapeelua kibalibakeba.
PRO 10:25 Kine mulula wapita, babi balibazeeza, inzi mulunghami wene, kiputa kya muyayaya.
PRO 10:26 Nga mpubili mu meno, ni byunsi mu menso, i vili munanghani ku balia balibamutuma.
PRO 10:27 Kutiina Yawe kulikwalunda nsiku ya muntu, inzi myaka ya babi iliyakeefiiwa.
PRO 10:28 Maswapi a balunghami ni nsansa, inzi kuketekela kwa babi kwa mpuni.
PRO 10:29 Nzila yakua Yawe, i lusako lulumine ku mulunghami, inzi ni lwinoono ku bankitatubi.
PRO 10:30 Balunghami tebakaloviiwa, inzi babi tebakeekala mu kyalo.
PRO 10:31 Kanua ka balunghami kalikalanda bya mulangue, inzi lulimi lwa muntu wa kiitoni lwaakaloviiwa.
PRO 10:32 Milomo ya balunghami imanine bilibyaitabiziiwa, inzi kanua ka mubi kalikalanda bibiipile.
PRO 11:1 Kalingo ka bupompo, ni kilubo kuli Yawe, inzi bilemo bilingheene bilibyamuwamina.
PRO 11:2 Lulilwaiza kiitoni, ni busoni i pabulibwaiza, inzi mulangue uliwaleeta kwikeefia.
PRO 11:3 Bulunghami bwa balunghami bulibwabalombola, inzi kiitoni kya bapoti kilikyabalovia.
PRO 11:4 Bunonsi tebuli na kibwezia busiku bwa kukandua, inzi bulunghami buli bwapususyania ku lufu.
PRO 11:5 Bukisinka bwa mulunghami bulibwalundulula nzila yakue, inzi mubi aliwaponena mu bubi bwakue mwine.
PRO 11:6 Bulunghami bwa balunghami bulibwabapususia, inzi balia balibakita bya bupompo balibakwatua mu bupompo bwabo.
PRO 11:7 Mubi lu-aliwafua, maswapi akue aliazeeza, ni byonse bi-aketekeele mu maka akue bilibyapua.
PRO 11:8 Mulunghami aliwapususiiwa mu maavia, inzi mubi aliwaingila mu maavia.
PRO 11:9 Olia asiliwatiina Leza aliwainoona benakue na kanua kakue, inzi mu bukengezi balunghami balibapususiiwa.
PRO 11:10 Balunghami lubalibanonka, muzi uliwawaminua, ni babi lubalibaloba, bantu balibabulula tupundu.
PRO 11:11 Kupitila mu mapaalo a balunghami, muzi uliwalumbua, inzi uliwainoonua kupitila mu tunua twa babipuba.
PRO 11:12 Olia aliwalandila mwinakue twebo twa mufuupula ni kipuba, inzi muntu wa maano aliwatalala.
PRO 11:13 Olia aliwapitaana wa-ambana, aliwafyula tufiso, inzi aketekeelue aliwafiika milandu.
PRO 11:14 Kyalo kisili na mulombozi wa mulangue kilikya-anziiwa, inzi kolia kuli bakasoka bengi, kuli mutende.
PRO 11:15 Olia aliwaipeela kulipa mizia ya mweni, aliwaemenamo, inzi olia asiliwalaya kulipa mizia, ali ni mutende.
PRO 11:16 Mwanakazi wa mukinzi, aliwakindikua lyonse, inzi bapompo balibapokolola bunonsi.
PRO 11:17 Olia ali ni nkumbu, aliwakitila mutima wakue biweme, inzi asasile aliwaemia mubili wakue mwine.
PRO 11:18 Mubi aliwasaziiwa nsazio ya bupompo, inzi olia aliwabyala bulunghami, ali ni kilambu kya kisinka.
PRO 11:19 Olia aliwatwalilila mu bulunghami, ali ni bukose, inzi olia aliwakonkelela bubi, aliwafua.
PRO 11:20 Yawe asuulile balia bali ni mutima wa kiitoni, inzi balia bapwililikile mu nzila yabo balibamuwamina.
PRO 11:21 Kisinka mubi takabula kukandua, inzi balunghami baakapususiiwa.
PRO 11:22 Nga vili kazele ka oro ku moona wa ngulube, i vili ni mwanakazi aweme asili na mulangue.
PRO 11:23 Nkulu ya mulunghami iliyapeleela mu biweme, inzi maswapi a mubi, ni mu kukandua.
PRO 11:24 Muntu aliwapeelapeela, aliwakila kunonka, inzi olia aliwakilikila bisilungheeme, aliwakila kuba mupabi.
PRO 11:25 Muntu wa buntu aliwakitikilua na biweme, ni olia aliwapaana bya kumina ni ye aliwaminiiwa.
PRO 11:26 Olia aliwatanana nghano, bantu balibamutiipa, inzi mapaalo ali pa mutue wakua olia aliwatona kusisia.
PRO 11:27 Olia aliwakebesia kukita biweme, atonekele, inzi olia aliwakeba kukita bubi aliwabusanga.
PRO 11:28 Olia aswapiile bunonsi bwakue, aliwapona, inzi mulunghami aliwalunduluka nga maani abisi.
PRO 11:29 Olia aliwatuuta nghanda yakue, aliwapyana mwela. Ni kipuba alikuba muzia wa muntu wa mulangue.
PRO 11:30 Mazabo a mulunghami, i kimuti kya bukose, ni olia aliwapususia bantu ali ni mulangue.
PRO 11:31 Kine mulunghami aliwasaziiwa pa kyalo, paliibufi mubi pamo ni wa bibalo.
PRO 12:1 Olia atonene masambilizio, atonene bukengezi, inzi olia asuulile kusasililua, ni kipuba.
PRO 12:2 Muntu aweme aliwasanga buwame bwakua Yawe, inzi wa nsokezi ibi aliwapingulua na Yawe.
PRO 12:3 Muntu tavinda kwileetela mutende na kukita bubi, inzi mulunghami takaponiwa na kantu.
PRO 12:4 Mukazi aweme, i ngala ya mulume wakue, inzi olia aliwamoniania busoni, ali nga keesi kalikabunguzia bikuza bya mulume.
PRO 12:5 Malanga a balunghami alungi, inzi nsokezi ya babi, ni bupompo.
PRO 12:6 Twebo twa babi, tuli na mapange a kulovia, inzi kanua ka balunghami kalikabapususia.
PRO 12:7 Babi balibainoonua ni kuloba, inzi nghanda ya balunghami iliyatwalilila.
PRO 12:8 Muntu aliwatasiiwa kukonkana ni mulangue wakue, ni wa malanga abi aliwafuupulua.
PRO 12:9 Muntu aliwafuupulua koku waali ni mubombi, aweme kukila muntu emwene kuba wali wa mponvu inzi tekuba wali na bilio.
PRO 12:10 Mulunghami aliwasakamana bukose bwa nama yakue, inzi nkumbu ya babi, ni kwemia.
PRO 12:11 Mulimi wa mute, ali na bilio bingi, inzi olia aliwakonka milandu ya mpuni, tali na maano.
PRO 12:12 Mubi aliwatokamua bunonsi bwa mubi, inzi mulunghami aliwaimana sinta.
PRO 12:13 Kilubo kya mu kanua, muteo wa muntu mubi, inzi mulunghami aliwafuma mu maavia.
PRO 12:14 Muntu aliwaikusiiwa na buwame bwa mazabo a mu kanua kakue, aliwabweziiziwa bikitua bya minue yakue.
PRO 12:15 Nzila ya kipuba iweme ku menso akue mwine, inzi mulunghami aliwatwilizia nsokezi.
PRO 12:16 Bupuba bwa muntu asili na maano tebwakokola kumanika, inzi muntu akengeele aliwapuulula matuka.
PRO 12:17 Olia aliwalanda kisinka, aliwasininkizia bya kiine, inzi musininkizi wa bufi, aliwalanda bufi.
PRO 12:18 Twebo tubi tulitwakisia nga kipanga, inzi bulanzi bwa mulangue bulibwaleeta bukose.
PRO 12:19 Bukisinka bulibwatwalilila lyonse, inzi bufi ni bwa pa musita uniini sie.
PRO 12:20 Bupompo buli mu mutima wa balia balibalangakana bubi, inzi balia bali ni mapange a mutende, bali ni nsansa.
PRO 12:21 Tekuli busanzo bulibwaponena balunghami, inzi babi balibavuziiziwa maavia.
PRO 12:22 Kanua ka bufi, ni kilubo kuli Yawe, inzi balia balibakita bulunghami, i nsansa yakue.
PRO 12:23 Muntu akengeele, aliwafiika maano akue, inzi babipuba balibamania bupuba bwabo.
PRO 12:24 Kuboko kukinkimeene, i kulikwateeka, inzi bunanghani bulibwaleeta buzia.
PRO 12:25 Kutooboka kwa mutima kulikwapwisia nsansa, inzi keebo kaweme kalikasansamusia.
PRO 12:26 Mulunghami aliwalanga nzila ku mwinakue, inzi nzila ya babi iliyabazeezia.
PRO 12:27 Mukumbi munanghani tezi kusanga mabingo akue, inzi wa mute tezi kubwela tonte.
PRO 12:28 Mu nzila ya bulunghami i muli bukose, ni mu tusansaila twakue temuli lufu.
PRO 13:1 Mwana wa mulangue aliwatwilizia mafunde akua se, inzi wa kapuni, tezi kutwilizia nsokezi.
PRO 13:2 Muntu aliwaikusiiwa na buwame bwa mazabo a mu kanua kakue, inzi mutima wa muntu mubi uliwalia bubi.
PRO 13:3 Olia aliwalabukila kanua kakue, aliwasunga bukose bwakue, inzi olia aliwaizula milomo yakue ali ni bwavia.
PRO 13:4 Mutima wa munanghani uliwatokamua pasili kusanga kantu, inzi mutima wa olia akinkimeene, uliwaikuta.
PRO 13:5 Mulunghami tezi kutona kulanda bufi, inzi muntu mubi aliwakila kuluvia, ni ye aliwamoniiwa busoni.
PRO 13:6 Bulunghami bulibwasunga mulunghami mu nzila yakue, inzi bubi bulibwalovia wa bibalo.
PRO 13:7 Kuli ni olia aliwailanga kuba munonsi, inzi tekuba wali na kantu. Kuli ni olia aliwailanga kuba mupabi, inzi wali ni bunonsi bwingi.
PRO 13:8 Bunonsi bwa muntu i bulibwamulubula, inzi mupabi tali na ka kumupususia.
PRO 13:9 Kisue kya mulunghami kilikyabenghemesia, inzi musaniko wa mubi uliwazima.
PRO 13:10 Kiitoni, kilikyaleeta mazibo, inzi mulangue, uli na balia balibaunvua nsokezi.
PRO 13:11 Bunonsi bwa lubilo lubilo bulibwakeepa, inzi olia aliwanonka bukebuke, aliwavuzia.
PRO 13:12 Maswapi aliakokola, aliakisia mutima, inzi kelia kintu kipembeelue kine kyafika, ni kimuti kya bukose.
PRO 13:13 Olia aliwafuupula mafunde, aliwaileetela lwinoono, inzi olia aliwanakila milao, aliwalambulua.
PRO 13:14 Masambilizio a muntu wa mulangue, i kasulo ka bukose, aliamulengia kuleuka miteo ya lufu.
PRO 13:15 Maano aweme alialengia kutoneka, inzi nzila ya bapompo ya maavia.
PRO 13:16 Kubalua muntu wa maano aliwabomba wakengeele, inzi kipuba aliwasalanghania bupuba bwakue.
PRO 13:17 Mukenzi mubi aliwaponiizia bantu mu maavia, inzi mukenzi wa kisinka, aliwaleeta bukose.
PRO 13:18 Bupabi pamo ni busoni, bili na olia aliwakaana masambilizio, inzi olia aliwakonka nsokezi, aliwakindikua.
PRO 13:19 Kine kelia kintu kitonekele kyakitika, muntu aliwawaminua, inzi babipuba kwikeka ku bubi, kilubo.
PRO 13:20 Enda na ba mulangue, ni we uli kuba ni mulangue, inzi kibuza wa babipuba aliwaema.
PRO 13:21 Bwavia bulibwakonka ba bibalo, inzi mulunghami aliwalambulua buwame.
PRO 13:22 Muntu aweme aliwasia bupyani ku benzikulu, ni bunonsi bwa muntu wa bibalo, bukonto bwa mulunghami.
PRO 13:23 Bukaba bwa mupabi kuti bwafumia buzombozi bwingi, inzi bilibyainoonua pa mulandu wa kubiibikiziiwa.
PRO 13:24 Muntu asiizi kubombia nfimbo, akendele mwana wakue, inzi olia amutonene, aliwamukanda pa musita upalile.
PRO 13:25 Mulunghami ali ni bilio byamukumeene, inzi kavumo ka mubi kalikaemooka na nzala.
PRO 14:1 Mwanakazi wa mulangue aliwakuula nghanda yakue, inzi kipuba aliwatuuta nghanda yakue na minue yakue.
PRO 14:2 Olia aliwaenda mu bulunghami bwakue, aliwatiina Yawe, inzi olia asili mulunghami mu nzila yakue, aliwamufuupula.
PRO 14:3 Mu kanua ka kipuba muli nfimbo ya kiitoni, inzi twebo twa muntu wa mulangue tulitwamusunga.
PRO 14:4 Kine tekuli nghombe, mu mukondo mulimwabula bilio, inzi maka a nghombe alialeeta bilio.
PRO 14:5 Musininkizi wa kisinka tavinda kulanda bufi, inzi musininkizi wa bufi, mupuza wakue ni bufinke sie.
PRO 14:6 Muntu wa kapuni aliwakeba mulangue, ni ye tezi kuusanga, inzi bukengezi bulengele ku muntu aliwainika.
PRO 14:7 Fuma ku menso a kipuba, pantu ku milomo yakue teukonvuako maano.
PRO 14:8 Mulangue wa muntu wa maano, kulangakana nzila yakue, inzi bupuba bwa babipuba, bupomponke sie.
PRO 14:9 Babipuba tebezi kusakamana lubalibabala, inzi balunghami balibatona kweleelua na Leza.
PRO 14:10 Mutima i umanine bulanda bwakue, ni mweni tavinda kwampana nakue mu nsansa yakue.
PRO 14:11 Nghanda ya mubi iliyaloviiwa, inzi katanda ka mulunghami kalikabeelelela.
PRO 14:12 Kuli nzila imwenekele yaweme ku menso a muntu, inzi ku mpeleezio iliyatwala ku lufu.
PRO 14:13 Anzia useka, mutima waya wali ni bulanda. Nsansa luiliyapua, palipaiza bulanda.
PRO 14:14 Olia aliwabwelela pa kyamba mu mutima wakue, aliwawaminua mu nzila yakue mwine, ni mulunghami aliwalambulua na bikitua byakue.
PRO 14:15 Kipuba aliwaitabila kubalua kantu, inzi wa mulangue aliwakenta pa kunyanta.
PRO 14:16 Wa mulangue aliwatiina Yawe ni kwikeka ku bubi, inzi kipuba tezi kwisakamana, kabili aliwakita lubilo lubilo.
PRO 14:17 Olia asiliwakokola kufiitua, aliwakita bya bupuba, ni onse aliwakita bubi aliwasuulua.
PRO 14:18 Babipuba balibapyana bupuba, inzi ba maano balibavwala ngala ya bukengezi.
PRO 14:19 Babi balibafwinama ku ntanzi ya balia balibakita biweme, ni ba bibalo mu milyango ya balunghami.
PRO 14:20 Mupabi aliwasuulua na mupabi nakue, inzi munonsi ali ni babibuza bengi.
PRO 14:21 Olia aliwapunika mwinakue, aliwaluvia, inzi olia aliwaunvwila mupabi nkumbu, asyukile.
PRO 14:22 Eba! Balia balibalangakana bibiipile tebezi kuluvia? inzi ntono ni bukisinka bili na balia balibalangakana biweme.
PRO 14:23 Kubomba na mute kulikwaleeta kibwezia, inzi bulanzi bwa mpuni bulibwaleeta bupabi.
PRO 14:24 Ngala ya ba mulangue, bunonsi bwabo, inzi bupuba bwa babipuba, bupubanke sie.
PRO 14:25 Musininkizi wa kiine aliwapususia mitima ya bantu, inzi olia aliwabeepa, aliwaleeta bupompo.
PRO 14:26 Aliwatiina Yawe ali ni maswapi alumine, ni baana bakue baakaba ni kwa kubutukila.
PRO 14:27 Kutiina Yawe i kasulo ka bukose, kabili i kwikeka ku miteo ya lufu.
PRO 14:28 Bulumba bwakua likolo, bwingi bwa bantu bakue, inzi kukeepa kwa bantu, kwinooneka kwakua kateeka.
PRO 14:29 Olia asiliwalenga kufiitua ali ni maano engi, inzi olia ali ni mutima wa kasonto aliwalumba bupuba.
PRO 14:30 Mutima wa mutende, uliwaleeta bukose bwa mubili, inzi bunkua, bulibwabozia bikuza.
PRO 14:31 Olia aliwakyuzia mupabi, aliwatuka Kabumba wabo, inzi olia aliwaunvwila nkumbu muntu abulilue, aliwakindika Kabumba.
PRO 14:32 Mubi aliwatintilua pansi pa mulandu wa bunkitatubi bwakue, inzi mulunghami ali ni maswapi mu kufua kwakue.
PRO 14:33 Mu mutima wa muntu ali ni mulangue i muli maano, inzi tezi kusangua mu mutima wa babipuba.
PRO 14:34 Bulunghami, bulibwakindamika ntundu, inzi kibalo, kilikyaleeta lutiipu ku bantu bonse.
PRO 14:35 Likolo aliwawaminua na mubombi aliwabomba na mulangue, inzi kikonko kyakue kili pa olia aliwakita bintu bisipalile.
PRO 15:1 Bwasuko bwa bufuuke bulibwafuukia kipuki, inzi twebo twa kusasa tulitwaleeta kipuki.
PRO 15:2 Lulimi lwa muntu wa mulangue lulilwaleeta bukengezi ni bulunghami, inzi kanua ka kipuba kalikasalanghania bupuba.
PRO 15:3 Menso akua Yawe amwene ponse, akentele pa babi ni pa baweme.
PRO 15:4 Lulimi lufuuke, i kimuti kya bukose, inzi kiitoni kili mukati kilikyatoobola mutima.
PRO 15:5 Kipuba aliwafuupula mafunde akua se, inzi olia ali ni maano aliwakonka nsokezi.
PRO 15:6 Mu nghanda mwa mulunghami muli bukonto bwingi, inzi bunonsi bwa babi, bulibwaleeta lwinoono.
PRO 15:7 Milomo ya ba mulangue, iliyasalanghania bukengezi, inzi mutima wa babipuba te evio.
PRO 15:8 Ngelelo ya mubi, kilubo kuli Yawe, inzi mapepo a mulunghami, aliamusansamusia Yawe.
PRO 15:9 Yawe asuulile nzila ya mubi, inzi wene atonene olia aliwakonka bulunghami.
PRO 15:10 Olia aliwasia nzila iweme, aliwakandua, ni asitonene kusokua, aliwafua.
PRO 15:11 Kine lufu ni lwinoono bili ku menso akua Yawe, paliibufi mitima ya bantu.
PRO 15:12 Muntu wa mufuupula, tezi kutona kulungikua, kabili tezi kutona kwipuzia muntu wa maano.
PRO 15:13 Mutima wa nsansa, uliwalangisia lukebu lwa nsansa, inzi bulanda bwa mu mutima, bulibwalengia mweo kutooboka.
PRO 15:14 Mutima wa maano uliwakeba bukengezi, Inzi kanua ka babipuba kalikalia bupuba.
PRO 15:15 Nsiku yonse ya muntu aliwaema, ibiipile, inzi muntu wa nsansa, ali mu maliila lyonse.
PRO 15:16 Kyawama kuba ni bunonsi buniini wali ni katiina kuli Yawe, kukila kuba ni bunonsi bwingi wali ni lyemo.
PRO 15:17 Kyawama kulia saasa palia pali ntono, kukila kulia nghombe anonene palia pali kukendana.
PRO 15:18 Muntu wa kipuki kikata aliwalengia mazibo, inzi olia asiliwalenga kufiitua, aliwapwisia bikanza.
PRO 15:19 Nzila ya munanghani isakiluemo myunga, inzi nzila ya mulunghami iwamiiziwe.
PRO 15:20 Mwana wa mulangue aliwamusansamusia se, inzi kipuba aliwamufuupula nghina.
PRO 15:21 Bupuba i nsansa ya muntu asili na maano, inzi akengeele aliwawamia lwendo lwakue.
PRO 15:22 Kine tekuli nsokezi, butantiko bulibwakilikilua, inzi kine pali nsokezi ingi bulibwalunduluka.
PRO 15:23 Muntu aliwawaminua na bwasuko buweme, ni keebo kalikalandua pa musita upalile, kalikakila kuwama.
PRO 15:24 Nzila ya muntu wa mulangue ilungi mwiulu ku bukose, evi tekuti akookele kumbo.
PRO 15:25 Yawe aliwatuuta nghanda ya olia ali ni kiitoni, inzi aliwabiika mupaka wa musolo wa mwanakazi afwiliilue na mulume.
PRO 15:26 Yawe asuulile malanga a babi, inzi twebo tuweme tulitwamuwamina.
PRO 15:27 Olia aliwatokamua bunonsi, aliwaemia lupua lwakue, inzi olia asitonene bituulilo, waakaba mukose.
PRO 15:28 Mutima wa mulunghami uliwalangakana musango wakwasukilamo, inzi kanua ka kipuba kalikafumia bubi.
PRO 15:29 Yawe ali kule ni babi, inzi aliwaunvua mapepo a mulunghami.
PRO 15:30 Kisue kya menso kilikyasansamusia mutima, ni mpunda iweme iliyainia bikuza.
PRO 15:31 Kutui kulikwatwilizia nsokezi iweme, kulikwaikala pa balia bali ni mulangue.
PRO 15:32 Olia aliwakaana masambilizio, aliwaisuula ye mwine, inzi olia aliwaunvua lu-aliwasasililua, aliwakengela.
PRO 15:33 Kutiina Yawe i masambilizio a mulangue, ni bufuuke, bulibwatangilila mukinzi.
PRO 16:1 Mapange a mu mutima, ni obe we mwine, inzi keebo ka mpeleezio kali na Yawe.
PRO 16:2 Nzila ya muntu, imuwamiine ye mwine, inzi Yawe aliwatoosia mutima.
PRO 16:3 Mubiikile Yawe miilo yobe, ni mapange obe alikufikiliziiwa.
PRO 16:4 Yawe ali ni ki-aakitiile kubalua kantu, nga evelia babi ni bo pa musita wa lwinoono.
PRO 16:5 Yawe asuulile kubalua muntu ali ni mutima wa kiitoni, kisinka mubi takabula kukandua.
PRO 16:6 Kupitila mu ntono ni bukisinka, bubi bulibwaeleelua. Ni mu kutiina Yawe, bantu balibaikeka ku bubi.
PRO 16:7 Nzila ya muntu luiliyamuwamina Yawe, Yawe aliwamupwanika na balwani bakue.
PRO 16:8 Kyawama kuba ni bunonsi buniini wali ni bulunghami, kukila kuba ni bunonsi bwingi wali ni bubi.
PRO 16:9 Mutima wa muntu, uliwalangakana muutoneene, inzi Yawe i aliwalombola ntanfu yakue.
PRO 16:10 Milomo yakua likolo iliyalanda bulanzi bwa kileza, ni kanua kakue tekezi kuluvia mu bupinguzi.
PRO 16:11 Kalingo ni bilemo bya nsambu ni byakua Yawe, mabue ali mu mufuko a kulingilako, ni miilo yakue.
PRO 16:12 Kukita bubi, kilubo ku makolo, pantu kitebe kya bukolo kilikyateekua mu bulunghami.
PRO 16:13 Milomo ya bulunghami, nsansa ya makolo, ni balia bamutonene, balibalanda bilungi.
PRO 16:14 Kipuki kyakua likolo, mukenzi wa lufu, inzi muntu wa mulangue aliwakifuukia.
PRO 16:15 Mu kubenghema kwa lukebu lwakua likolo muli bukose, ni buwame bwakue buli nga malezi a nvula ya mpeleezio.
PRO 16:16 Kyawama kuba ni mulangue kukila oro. Ee, kipalile kusaakula maano kukila mutofue.
PRO 16:17 Nzila ikata ya mulunghami, ni kwikeka ku bubi. Olia akonkele nzila yakue, asungile mutima wakue.
PRO 16:18 Kiitoni kilikyatangilila lwinoono, ni mutima wa kwitantamuna uliwatangilila kupona.
PRO 16:19 Kyawama kuya wafuukile wali mupabi, kukila kupaana bunonsi wali ni kiitoni.
PRO 16:20 Olia aliwasunga mafunde, aliwalunduluka, ni aswapiile Yawe, ali ni lisyuko.
PRO 16:21 Olia ali ni mutima wa mulangue, aliwakuutua wa maano, ni kuwama kwa bulanzi, kulikwalunduluzia kumana.
PRO 16:22 Olia ali ni mulangue, ali ni kasulo ka bukose, inzi babipuba balibakandua mu bupuba bwabo.
PRO 16:23 Mutima wa muntu wa mulangue, uliwasambilizia kanua kakue, kabili uliwalunduluzia maano a lulimi lwakue.
PRO 16:24 Twebo tuweme tuli nga kapelo, ni to tulitwawamia mutima ni kukosia bikuza.
PRO 16:25 Kuli nzila imwenekele yaweme ku menso a muntu, inzi ku mpeleezio iliyatwala ku lufu.
PRO 16:26 Nzala ya mubombi iliyamulengia kubomba, pantu nkulu ya kanua kakue iliyamuleetela mute wa kubomba.
PRO 16:27 Muntu asili na kibwezia aliwaimba kiina kya bubi, ni mumbali milomo yakue muli nga muli mulilo uliwazizyania.
PRO 16:28 Muntu mubi, aliwaleeta mazibo, ni olia wa busongezi, aliwapusania babibuza.
PRO 16:29 Muntu aliwakyuzyania aliwabembia mwinakue, ni kumulombola mu nzila isiweme.
PRO 16:30 Olia aliwakapia na linso, aliwakambila kukita bibiipile, ni olia aliwasumba milomo yakue, aliwalanda bibiipile.
PRO 16:31 Ndale, i ngala ya bulumba, iliyasangua sie mu nzila ya bulunghami.
PRO 16:32 Olia asiliwalenga kufiitua, aweme kukila wa buvinde, ni olia aliwateeka mutima wakue, aweme kukila olia aliwasakukila muzi.
PRO 16:33 Bubale bulibwateelua pa kibeta, inzi bupinguzi bonse bulibwafuma kuli Yawe.
PRO 17:1 Kyawama kulia bilio byume wali ni mutende, kukila nghanda ilimo maliila engi mwali ni mazibo.
PRO 17:2 Mubombi wa maano aliwateeka bwino mwana aliwakita bintu bya busoni, ni ye waakabamo ni nsempu ya bupyani nga wa mu lupua.
PRO 17:3 Mupika, i wakusungulwilamo mutofue, ni kikuka kya mulilo, i kya kwapikamo oro, inzi Yawe aliwatoosia mitima.
PRO 17:4 Nkitatubi aliwatwilizia milomo ya bubi, ni wa bufi aliwatwilizia lulimi lubi.
PRO 17:5 Olia aliwakyuzia mupabi, aliwatuka Kabumba wabo, ni olia aliwasekelela busanzo, takabula kukandua.
PRO 17:6 Ngala ya bakote, benzikulu, ni bulumba bwa baana, ba sibo.
PRO 17:7 Bulanzi buweme tebwawama mu kanua ka kipuba, paliibufi milomo yakua kateeka iliyabeepa.
PRO 17:8 Kituulilo kili nga lyese ku menso akua olia aliwapaana. Konse kualikukibombia kilikumuleetela kibwezia.
PRO 17:9 Olia aliwavimba pa kilubo, aliwakeba ntono, inzi olia aliwabweluluka pa keebo kamonke, aliwasalanghania babibuza.
PRO 17:10 Kusasililua kulikwapokelelua mu mutima wa olia ali ni maano, kukila nfimbo 100 ku kipuba.
PRO 17:11 Muntu mubi aliwakeba sie kwisangula kuli Leza, ni pakako, aliwatuminua mukenzi asasile.
PRO 17:12 Kyawama kusaakaana ni kimbui mukota kipokelue baana, kukila kusaakaana ni kipuba mu bupuba bwakue.
PRO 17:13 Olia aliwabwezia bubi pa biweme, bubi tebukapua mu nghanda yakue.
PRO 17:14 Ntendeko ya mazibo ili nga kulekelela menda apanguke. Kansi lekele bikanza lubisinamifikie ku mazibo.
PRO 17:15 Olia aliwapeela mubi nsambu ni kumutana mulunghami nsambu, bonse babili, kilubo kuli Yawe.
PRO 17:16 Ale nfolanga ibeeleeleki mu minue ya kipuba kuti asite mulangue, ni ye tekuba wali na maano?
PRO 17:17 Kibuza aweme, ni kibuza wa kubalua busiku, inzi wa mu lupua aliwavyalua kuti akwasie musita wa lyemo.
PRO 17:18 Muntu asili na maano aliwalaya ni kwipeela kulipa mizia ya mwinakue.
PRO 17:19 Olia atonene mazibo, atonene bibalo, ni olia aliwaitantamuna, aliwakeba lwinoono.
PRO 17:20 Olia akosele mutima, tezi kumona buwame, ni olia ali ni lulimi lwa kiitoni, aliwaponena mu bwavia.
PRO 17:21 Olia avyele kipuba, bulanda bwakue mwine, se kwa kipuba, tali na nsansa.
PRO 17:22 Mutima wa nsansa, miti iweme, inzi mutima uliwatooboka, uliwaumia bikuza.
PRO 17:23 Muntu mubi aliwapokelela kituulilo mu kafiso pakuti avulunghanie bupinguzi.
PRO 17:24 Maano ali ku ntanzi ya muntu ali ni mulangue, inzi menso a kipuba afikile kupelele kyalo.
PRO 17:25 Mwana kipuba, bulanda kuli se, kabili ni kikonko kuli nghina waamuvyele.
PRO 17:26 Kukanda mulunghami tekuweme, ao kuuma babiloolo tekuweme.
PRO 17:27 Olia aliwasunga twebo twakue, akengeele, ni olia ateekameene mutima, ali ni maano.
PRO 17:28 Mupuba ni ye kine waikala tondolo, alikumonua kuba ni mulangue, lu-aliwamuma kanua kakue, aliwamonua kuba ni maano.
PRO 18:1 Olia aliwaikeka ku benakue aliwakeba kukita mu-atoneene, kabili aliwafiitua lu-aliwasokua.
PRO 18:2 Kipuba tezi kuwaminua na maano, inga sie kukita mutoneene mutima wakue.
PRO 18:3 Mubi lu-aliwaiza, ni mufuupula ni o uliwaiza, ni pa kyamba kya busoni, kuleebulua.
PRO 18:4 Twebo twa mu kanua ka muntu, buziba buzikile, kasulo ka mulangue, menda a kaezi aliaenda.
PRO 18:5 Kukita kitoolela ku mubi tekuweme, ao kumutana nsambu mulunghami musita wa bupinguzi.
PRO 18:6 Milomo ya kipuba iliyafikyania ku bikanza, ni kanua kakue kalikakuuta bipumo.
PRO 18:7 Kanua ka kipuba ni lwinoono lwakue, ni milomo yakue ni muteo wa kukwatuamo ye mwine.
PRO 18:8 Twebo twa musongezi tuli nga bisoso bya bilio biweme, bisoso bilibyakookela munda.
PRO 18:9 Olia anangheene mu miilo, i lupua lwakua nghinooni.
PRO 18:10 Liina lyakua Yawe, kyubo kilumine. Mulunghami kine wabutukilako, alikuya wali ni mutende.
PRO 18:11 Munonsi amwene nangue bunonsi i kyubo kyakue kya maka. Alangakeene nangue i kibumba kimusungile.
PRO 18:12 Kwinooneka kwa muntu kulikwatangililua na kiitoni. Ni kwikeefia kulikwatangililua na mukinzi.
PRO 18:13 Kwasuka lu-usinaunvue, bupuba ni busoni.
PRO 18:14 Mweo wa muntu uliwasipikizia malwele, kubako kuli ni alikuvinda kuteekamania mutima utoobokele?
PRO 18:15 Mutima wa muntu wa maano uliwakeba bukengezi, ni kutui kwa muntu wa mulangue kuli kwakeba maano.
PRO 18:16 Kyabupe kya muntu kilikyamwizwila nzila, ni kumuleeta ku menso a bantu bakulu.
PRO 18:17 Olia aliwaipokolola wa mambo aliwamoneka wali ni nsambu, inga sie kine unge waiza kutoosia twebo twakue.
PRO 18:18 Kuteya bubale kulikwapwisia bikanza, ni kupingula milandu ya bakulu.
PRO 18:19 Muntu aluviiziwe na wa kwakue, aliwafinia mutima kukila muzi uli ni kibumba, ni bikanza bili nga minkolonto ya milyango ya ku kyubo.
PRO 18:20 Kavumo ka muntu kalikaikusiiwa na mazabo a mu kanua kakue, kabili aliwaikuta mazabo a ku milomo yakue.
PRO 18:21 Lufu ni bukose bili mu buvinde bwa lulimi, ni balia babutonene, balibalia mazabo akue.
PRO 18:22 Olia aliwaupa mwanakazi, aliwasanga kintu kiweme. Aliwapokelela buwame kufuma kuli Yawe.
PRO 18:23 Mupabi aliwalanda wapaapaata, inzi munonsi aliwa-asuka wasasile.
PRO 18:24 Olia ali ni babibuza bengi, aliwaileetelela lwinoono, inzi kuli ni kibuza aliwa-ampana na muntu kukila lupua lwakue.
PRO 19:1 Kyawama mupabi aliwaenda mu bulunghami bwakue, kukila kipuba ali ni kiitoni mu bulanzi.
PRO 19:2 Muntu tapalile kubulua maano, ni olia aliwaya lubilo lubilo aliwaipuutala.
PRO 19:3 Muntu aliwailovia mu bupuba bwakue, inzi mutima wakue uliwamufiitilua Yawe.
PRO 19:4 Bunonsi bulibwavuzia bibuza, inzi mupabi aliwakaanua na bapabi nakue.
PRO 19:5 Musininkizi wa bufi, takabula kukandua, ni olia aliwalanda bufi takapusuka.
PRO 19:6 Bengi balibapaapaata ku bakindami, inzi kubalua muntu, kibuza wa muntu aliwapaana.
PRO 19:7 Lupua lonse lwa mupabi lulilwamusuula, paliibufi babibuza bakue, i balibakila sie kuya kule ni kumusia! Mupabi anzia kine wabelambilizia tebamunvua.
PRO 19:8 Olia ali ni mulangue, atonene bukose bwakue, ni olia ali ni kyunvwila, aliwamona buwame.
PRO 19:9 Musininkizi wa bufi takabula kukandua, ni olia aliwalanda bufi aliwazeeza.
PRO 19:10 Bwikazi buweme tebupalile ku kipuba, paliibufi muzia kuteeka bakindami.
PRO 19:11 Wa mulangue tezi kulenga kufiitua. Kweleela kilubo, i bulumba bwakue.
PRO 19:12 Kipuki kyakua likolo kili nga kubuluma kwa nkalamu, inzi ntono yakue ili nga lume ku bikusi.
PRO 19:13 Mwana kipuba, kukeepelua kwakua se, ni bikanza bya mukazi, bili nga matooni asiliapua.
PRO 19:14 Nghanda pamo ni bunonsi, bupyani bulibwafuma ku muvyazi, inzi mukazi wa maano aliwafuma kuli Yawe.
PRO 19:15 Muleele uliwaleeta tulo twingi, ni munanghani aliwaema na nzala.
PRO 19:16 Olia aliwakonka mafunde, aliwasunga bukose bwakue, inzi olia asiliwakonka nzila yakue, waakafua.
PRO 19:17 Olia aliwakwasia mupabi, aliwamukopia Yawe, ni Yawe aliwamulambula pa bikitua byakue biweme.
PRO 19:18 Kanda mwana obe maswapi lu-akiliko, kine teumukwasiizie, wamukwasia kwinooneka.
PRO 19:19 Muntu wa kipuki kikata, apalile kukandua, kine wewe wamukwasia, wakaba kumukwasia ni linge.
PRO 19:20 Twilizia nsokezi ni kupokelela mafunde, evi ku mpeleezio ukabe ni mulangue.
PRO 19:21 Mu mutima wa muntu muli mapange engi, inzi kitonene Yawe i kilikyafikiliziiwa.
PRO 19:22 Kikebekele ku muntu, kuya wali wa kisinka, mupabi aweme kukila wa bufi.
PRO 19:23 Kutiina Yawe kulikwatwala ku bukose, ni olia aliwamutiina, aliwaya waikeele waikusi, ni bubi tebukamupalamina.
PRO 19:24 Munanghani aliwabiika kuboko kwakue mu nsaani, ni kwandua kutwala pa kanua kakue.
PRO 19:25 Uma muntu wa kapuni pakuti babipuba basambilileko maano, kabili sasilila olia amanine, pakuti abe ni bukengezi.
PRO 19:26 Mwana aliwaemia se ni kukumba nghina, aliwaleetelana busoni ni mufuupula.
PRO 19:27 We mwana wane, kine walekela kutwilizia mafunde ulikusangukila twebo twa mulangue.
PRO 19:28 Musininkizi asipalile, aliwafuupula bupinguzi, ui tunua twa babi tulitwazakila bubi.
PRO 19:29 Kukandua kuteaniiziwe pa balia bali ni mufuupula, ni bipumo mu musana wa babipuba.
PRO 20:1 Divai i kapuni, ni kikolani i mazibo, ni muntu onse aliwabembua mu bebi bintu tali na mulangue.
PRO 20:2 Kipuki kyakua likolo, kili nga kubuluma kwa nkalamu, olia aliwamulengia kufiitua, aliwaluvia mutima wakue mwine.
PRO 20:3 Bukindami bwa muntu, kulekela mazibo, inzi kubalua kipuba aliwatona mazibo.
PRO 20:4 Munanghani tezi kutona kulima pa musita wa kulima, ni pakako, musita wa buzombozi waya walombelezia bilio pantu tali na kantu.
PRO 20:5 Malanga a mu mutima wa muntu, buziba buzikile, inzi muntu wa mulangue aliwatapulapo.
PRO 20:6 Kubalua muntu aliwalanda buwame bwakue, ale muntu wa kisinka alikumonua nani?
PRO 20:7 Kine mulunghami waendela mu bulunghami bwakue, baana bakue balibapaalua mu kyamba kyakue.
PRO 20:8 Likolo lu-aliwaikala pa kitebe kya bupinguzi, aliwauluzia bubi bonse na menso akue.
PRO 20:9 Nani alikuvinda kulanda nangue, “Nakiswesia mutima wane, nakisambika ku bibalo byane?”
PRO 20:10 Mabue a tulingo tulekenkeene, ni bilemo bilekenkeene, bebi byonse bibili, bilubo kuli Yawe.
PRO 20:11 Mwana ni ye aliwamanika kupitila mu bikitua byakue, kine biweme, ao kine bilungi.
PRO 20:12 Kutui kulikwaunvua, ni linso lililyamona, byonse bibili bikitilue na Yawe.
PRO 20:13 Tekutonesia tulo, ukeeza kukula wali mupabi, labuka, ni we ulikwikuta bilio.
PRO 20:14 “Temuli kantu, temuli kantu!” Nangue musiti, inzi aliwaitasia wasyaile.
PRO 20:15 Kuli oro ni mabue engi a mutengo, inzi milomo iliyalanda twebo twa maano, libue lya mutengo.
PRO 20:16 Muntu kine walaya kulipila mizia ya muntu asimanikile, apokueko ngubo yakue nga kikwatizi, mumukite kuba kikwatizi pa mulandu wa ozo mweni.
PRO 20:17 Kya kulia kya bupoti, kiweme ku muntu, inzi pa kyamba, kanua kakue kalikaizulamo tubwekese.
PRO 20:18 Kine pali nsokezi mapange aliafikiliziiwa, kine watona kusakukilana, upalile kulangakananke.
PRO 20:19 Olia aliwapitaana wa-ambana, aliwafyula tufiso, kansi tekwampana na kilandelande.
PRO 20:20 Olia aliwatiipa se ao nghina, kisue kya bukose bwakue kyaazimiiwa musita wa nfinzi ikata.
PRO 20:21 Bupyani bulibwalombua ntanzi ya nsita, ku mpeleezio tebukaba na mapaalo.
PRO 20:22 Tekulanda nangue, “Ndikukita kibwelezi!” Muswapile Yawe, akupususie.
PRO 20:23 Mabue a tulingo tulekenkeene, kilubo kuli Yawe, ni bilemo bya bupoti tebifwaniine.
PRO 20:24 Ntanfu ya muntu iliyalombolua na Yawe, ale muntu kuti wamana syani nzila yakue mwine?
PRO 20:25 Kulanda lubilo lubilo nangue keki ni kya kupeela Leza, muteo, pantu kuti waiza kwemenamo.
PRO 20:26 Likolo wa mulangue aliwauluzia babi, aliwabapingula pasili nkumbu.
PRO 20:27 Mweo wa muntu, i musaniko wakua Yawe, i uliwakebelezia mu nkendo yonse ya mukati ka muntu.
PRO 20:28 Ntono ni bukisinka bilibyamusunga likolo, ni bukolo bwakue busimpilue na ntono.
PRO 20:29 Bulumba bwa balumendo, maka abo. Kuwama kwa bakote, mutue wa ndale.
PRO 20:30 Bipumo ni bilonda, ni miti yakupwisia bubi. Nfimbo iliyaswesia mutima mpaka mukati.
PRO 21:1 Mutima wakua likolo uli mu minue yakua Yawe nga vili tunkolonfua twa menda, aliwaulombola konse ku atonene.
PRO 21:2 Kubalua nzila ya muntu, iweme ku menso akue mwine. Inzi Yawe aliwatoosia mitima.
PRO 21:3 Kukita biweme ni bilungi, kulikwamuwamina Yawe kukila ngelelo.
PRO 21:4 Menso a kiitoni ni mutima wa kwitantamuna, kilangililo kya bibalo bya bantu babi.
PRO 21:5 Mapange a muntu wa mute, alialeeta bunonsi bwingi, inzi kubalua muntu aliwakita lubilo lubilo, bupabi bulibwaiza pali wene.
PRO 21:6 Bunonsi bulibwanonkelua mu bufi, byunsi bilibyaya kiyeyeye. Balia balibabukeba, balibakeba lufu.
PRO 21:7 Bupoti bwa babi bulibwabatwala kule, pantu balibakaana kukita bulunghami.
PRO 21:8 Nzila ya muntu emanine nangue ali ni bilubo, ipeteeme, inzi mibeele ya muntu asili na mulandu ili bwino.
PRO 21:9 Kyawama kwikala mu kafuli ka mutenge wa nghanda, kukila kwikala mu nghanda pamo ni mukazi wa mazibo.
PRO 21:10 Muntu mubi, aliwakeba bubi, kabili tezi kunvwila mwinakue nkumbu.
PRO 21:11 Muntu wa kapuni lu-aliwakandua, kipuba aliwa-aluka ni mulangue, ni wa mulangue lu-aliwasambiliziiwa, aliwalunduluka kuba ni maano.
PRO 21:12 Mulunghami amanine bili mu nghanda ya babi, kabili aliwabalovia ni kubenoona.
PRO 21:13 Olia aliwakilika matui tekuti onvue kulila kwa mupabi, ni ye waakalila, inzi takonvwiwa.
PRO 21:14 Bupe bwa mu kafiso bulibwapwisia kikonko, ni kituulilo kya mu kafiso kilikyapwisia kipuki.
PRO 21:15 Bupinguzi bwa nsambu lubulibwakitika, balunghami balibawaminua, inzi bankitatubi balibaswapulukua.
PRO 21:16 Olia aliwaemooka ni kusia nzila ya maano, aliwaisanga walimukutuuzia mu libumba lya bafwile.
PRO 21:17 Olia atonene maliila, aliwa-aluka mupabi. Olia atonene divai ni mafuta takanonka.
PRO 21:18 Mubi i bupusuko bwa mulunghami, ni olia aliwakita bupompo, bupusuko bwa muntu wa kisinka.
PRO 21:19 Kyawama kwikala mu kaseeba, kukila kwikala pamo ni mukazi wa mazibo ni musokozi.
PRO 21:20 Mu bwikazi bwa bantu ba maano muli bukonto bwa mponvu ni mafuta, inzi kipuba aliwalia byonse.
PRO 21:21 Olia aliwakonka bulunghami ni ntono, aliwasanga bukose ni bulunghami pamo ni mukinzi.
PRO 21:22 Muntu wa mulangue aliwakwata muzi wa bantu ba maka ni kutuuta kyubo kya maswapi abo.
PRO 21:23 Olia aliwakilikila kanua kakue ni lulimi lwakue, aliwapususia mutima wakue ku bukyuzi.
PRO 21:24 Muntu wa kiitoni ni aliwaitantamuna, liina lyakue ni “Mupuni.” Kwitantamuna kwakue ni kwa kiitoni.
PRO 21:25 Kutokamua kwa munanghani kulikwamwipaya, pantu maboko akue aliakaana kubomba.
PRO 21:26 Munanghani aliwakeba koba konse, inzi mulunghami aliwapaana sie pasili kutanana.
PRO 21:27 Ngelelo ya mubi, kilubo kikata. Paliibufi kine aliwaelela na malanga abi!
PRO 21:28 Musininkizi wa bufi, aliwazeeza, inzi muntu ali ni matui, aliwalanda twebo tulitwatwalilila.
PRO 21:29 Mubi aliwaumia pa mpala, inzi mulunghami aliwawamia nzila yakue.
PRO 21:30 Tekuli mulangue ao bukengezi ao nsokezi iliyavinda kutwalilila musitoneene Yawe.
PRO 21:31 Farasi ateaniziiziwe mbeela mu busiku bwa bului, inzi Yawe i aliwaleeta bwanzio.
PRO 22:1 Kyawama kuba ni bulumba kukila kuba ni bunonsi bwingi. Ni kwitabilua kuweme kukila kuba ni mutofue pamo ni oro.
PRO 22:2 Kintu kimo kili na munonsi ni mupabi ni keki: Yawe i Kabumba wabo.
PRO 22:3 Mukengezi aliwamona bubi ni kufyama, inzi babipuba balibaya sie ku ntanzi mpaka baikisia.
PRO 22:4 Kunakila ni kumutiina Yawe kulikwaleeta bunonsi, ni mukinzi pamo ni bukose.
PRO 22:5 Myunga ni tukose, bili mu nzila ya bafinine mitima, inzi olia asungile mutima wakue, alikuba wali kule nabio.
PRO 22:6 Sambilizia mwana nzila i apalile kukonka, pantu anzia akakota takafumamo.
PRO 22:7 Mupabi, aliwateekua na munonsi, ni mukopi, mubombi wa olia aliwakopia.
PRO 22:8 Olia aliwabyala bubi, aliwazombola bwavia, ni nfimbo yakue ya kukandilanako ilikutyoka.
PRO 22:9 Muntu wa buntu, aliwapaalua, pantu aliwakasania bapabi bilio byakue.
PRO 22:10 Kumba wa kapuni ni mazibo alikupua. Ee, mazibo ni matuka, bilikupua.
PRO 22:11 Olia atonene buswesi bwa mutima ni aliwalanda bulanzi buweme, likolo alikuba kibuza wakue.
PRO 22:12 Menso akua Yawe alialabukila maano, inzi aliwalovia twebo twa mupoti.
PRO 22:13 Munanghani aliwalanda nangue, “Panze pali ni nkalamu! Ndikwipailua mu kisaakaanino kya bantu.”
PRO 22:14 Kanua ka mwanakazi mukambue, kiina kizikile. Olia asuulilue na Yawe, aliwaponenamo.
PRO 22:15 Bupuba bukakiliilue mu mutima wa mwana, inzi nfimbo ya kumukanda iliyabukumbila kule.
PRO 22:16 Olia aliwabiibikizia mupabi pakuti avuzie bunonsi bwakue, ni aliwapeela munonsi byabupe, bonse babili balibapeleela ku bupabi.
PRO 22:17 Twilizia unvue bulanzi bwa balia bali ni mulangue, ni kupooza maano ku bindimukusambilizia.
PRO 22:18 Pantu kuti kyawama kine wasunga masambilizio mukati mobe, ni ku-apitulukamo kubalua musita.
PRO 22:19 Evi maswapi obe aye ali muli Yawe. Ni wewe wenka, nakusambilizia lelo.
PRO 22:20 Eba, nsikulembeele bulanzi 30, bulanzi bwa nsokezi ni bwa maano,
PRO 22:21 Evi bukusambilizie kuba wa kiine ni wa kulanda kisinka, pakuti ubwezie mpunda ya kiine ku balia bakutumine?
PRO 22:22 Tekupompola mupabi bunonsi bwakue pantu ye ni mupabi, Ni mu kilie tekubiibikizia nsambu muntu abulilue.
PRO 22:23 Pantu Yawe aliwabalandila, ni kubiibikizia bwikazi bwa balia balibababiibikizia.
PRO 22:24 Tekukita bukibuza na olia ali ni kipuki kikata, ao kwenda pamo ni muntu asiliwakokola kufiitua.
PRO 22:25 Ukeeza kusambilila mibeele yakue, ni kulengia kukwatua we mwine mu muteo.
PRO 22:26 Tekuti ube umo wa pa balia balibalaya, ao kwitabila kulipa mizia nghwana.
PRO 22:27 Kine teuli na kinge kya kumulipa, wene kuti watwaminamo bulita bobe.
PRO 22:28 Tekutelulula kalangi ka mipaka ya kale, mipaka yaabiikilue na babikolue bobe.
PRO 22:29 Kubako umwene muntu amanine bwino mwilo wakue? Alikubomba ntanzi ya makolo. Takaba kubombela babiloolo basipalile.
PRO 23:1 Luuliwaikala ku kulia pamo ni kateeka, tekulaba nangue ulimukulia nani.
PRO 23:2 Kine uli nkandakalio, biika mwele pa mukolomino obe.
PRO 23:3 Kabili tekutokamua bilio byakue biweme, pantu kuti bya kubembia.
PRO 23:4 Tekwiemia mu kukeba bunonsi. Tekupozesiako maano.
PRO 23:5 Pantu kuti wa bumona, ni bo bwazeeza pantu kisinka bunonsi bulibwaikitila mapaapi, nga nzwiba aliwapupuka mu muulu.
PRO 23:6 Tekulia bilio bya muntu wa butani, kabili tekutokamua bilio byakue biweme,
PRO 23:7 Pantu mu mutima wakue alimukupenda biulimukulia, alikukwana, “Mina, Lia!” Inzi mu mutima mwali binge.
PRO 23:8 Elia mikusu iwalyanga ulikuiluka, ni ntasio yobe ilikuba ya mpuni.
PRO 23:9 Tekulanda twebo twa maano ku kipuba, pantu alikufuupula mulangue wa twebo tobe.
PRO 23:10 Tekutelulula kalangi ka mipaka ya kale, kabili tekupoka makaba a baana nsiiwa.
PRO 23:11 Pantu Kalubula wabo ali ni maka, wene waakabalandila, ni we waakamoneka wali ni kilubo.
PRO 23:12 Poozako maano mu kukonka masambilizio, ni kuteya matui obe ku kutwilizia twebo twa maano.
PRO 23:13 Tekumulekeela mwana pasili kumuuma, pantu kine wamusepula nfimbo, tafua.
PRO 23:14 Musepule nfimbo ni kupususia bukose bwakue ku lufu.
PRO 23:15 We mwana wane, kine mutima obe uli ni mulangue, kisinka mutima wane ni o ulikuwaminua.
PRO 23:16 Mutima wane ulikuwaminua, milomo yobe luiliyalanda bilungi.
PRO 23:17 Mutima obe tekuti unvwile bantu ba bibalo bunkua, inzi wewe tiina Yawe koba konse.
PRO 23:18 Pantu kisinka kuli ni buwame ku ntanzi, ni maswapi obe teakapua.
PRO 23:19 Unvua we mwana wane, kabili ba ni mulangue, lombola mutima obe mu nzila iweme.
PRO 23:20 Tekuya wali pa libumba lya bakyakolua, ao balia balibalia munani wa nama nga bakazule.
PRO 23:21 Pantu kyakolua ni kazule baakapeleela ku bupabi, ni tulo twaakabavwika bilaka.
PRO 23:22 Mutwilizie so akuvyele, kabili tekumufuupula noko mu bukote bwakue.
PRO 23:23 Sita kiine, inzi tekuti ukisisie. Sita mulangue, ni masambilizio pamo ni maano.
PRO 23:24 Se kwa mwana mulunghami, ali ni nsansa ikata. Olia avyele mwana wa maano, ni ye aliwasansamusiiwa.
PRO 23:25 So ni noko bawaminue, noko akuvyele asangalale.
PRO 23:26 We mwana wane, n'mpeele mutima obe, ni menso obe awaminue na nzila yane.
PRO 23:27 Pantu mukende, ali nga kiina kizikiisie, ni mwanakazi mweni ali nga kiina kyondele.
PRO 23:28 Ee, aliwabenza nga kabooko, ni kulengia balalume bengi kusiba ba kisinka.
PRO 23:29 Nani ali ni maavia? Nani ali ni bulanda? Nani ali ni mazibo? Nani aliwaitendooka? Nani ali ni bilonda bya mpuni? Nani akasikile menso?
PRO 23:30 Ni olia aliwakokola musita uleepele mu bumini, olia aliwakeba kutompatompa bwalua bulekenkeene.
PRO 23:31 Wewe tekutokamua bwalua lubukasikile, anzia kine bulimukufumia tufulo twabenghema, ni kukooka bwino bukebuke.
PRO 23:32 Inzi pa mpeleezio bulibwasuma nga nzoka, ni bwimba bwakue nga bwa ngwezie.
PRO 23:33 Menso obe alikumona byeni, ni mutima obe ulikufumia bintu bisipalile.
PRO 23:34 Ee, ulikuya wali nga muntu aleele pakati buziba, nga muntu aleele ku mulingoti wa bwato.
PRO 23:35 Ulikulanda evi, “Bakinsepa, inzi nsyakikisika. Bakinghuma, inzi nsyakyunvua kantu. Ndikubuuka musitaki kuti ntwalilile kukeba bunge bwalua?”
PRO 24:1 Bantu babi tekubonvwila bunkua, kabili tekutokamua kuba pamo nabo.
PRO 24:2 Pantu mutima wabo uliwalangakana bupoti, ni milomo yabo iliyalanda sie bibiipile.
PRO 24:3 Nghanda iliyakuulua na mulangue, ni kwimikua na maano.
PRO 24:4 Ni mu bukengezi miputule yakue iliyaizuziwamo bintu bya mutengo ukata ni bifwaniine.
PRO 24:5 Muntu wa mulangue, i alumine. Ee, muntu wa maano i aliwavuzia maka.
PRO 24:6 Pantu aliwalua bului na nsokezi ya maano, ni mu bwingi bwa bakasoka, bwanzio bulibwamoneka.
PRO 24:7 Mulangue amukilile kipuba. Kipuba tezi kwasamuna kanua kakue pa mulyango.
PRO 24:8 Olia aliwakambila kukita bubi, bantu balikumukuuta kankobenkania.
PRO 24:9 Malanga akua kipuba ni kibalo, ni muntu wa kapuni ni kilubo ku bantu.
PRO 24:10 Kine wanaka mu nsiku ya lyemo, maka obe akeepele.
PRO 24:11 Pususia balia batwemue kuti baye bepawe, ni balia basyali pepi ni kwipawa, kita maka ubapususie.
PRO 24:12 Kine walanda nangue, “Mona fwefue tetwakyunvua ezi milandu,” Kubako olia aliwatoosia mitima, kuti wamana? Ni olia aliwasunga mutima obe, tavinda kwinika? Ni ye takasazia kubalua muntu kukonkana ni miilo yakue?
PRO 24:13 We mwana wane, lia kapelo pantu kaweme, ni muto wa kapelo pantu usonsele mu kanua kobe.
PRO 24:14 Upalile kumana nangue mulangue uli nga kapelo kuli wewe, kine wausanga, wakaba kuya wali ni nsiku iweme ku ntanzi ni maswapi obe teakaba apua.
PRO 24:15 We muntu mubi, tekubenza bwikazi bwa mulunghami, tekupoka nghanda yakue.
PRO 24:16 Anzia mulunghami apona nghendo kilooba ni kubuuka paakale, inzi babi balibaloviiwa na bubi.
PRO 24:17 Tekuwaminua lulilwapona mulwani obe, ni mutima obe tekuti usangalale lu-aliwaipuutala.
PRO 24:18 Pantu Yawe kine wamona evio alikufiitua, ni ye takaba kubakanda.
PRO 24:19 Tekwema pa mulandu wa bankitatubi, ao kunvwila babi bunkua.
PRO 24:20 Pantu muntu mubi tali na nsiku iweme ku ntanzi. Musaniko wa mubi uliwazima.
PRO 24:21 We mwana wane, tiina Yawe pamo ni likolo, kabili tekwampana na babisanguka.
PRO 24:22 Pantu busanzo bwabo bwakaba kubatulumukilila sie. Ale nani amanine lwinoono lwaakaleetua na Yawe ni likolo?
PRO 24:23 Bobu i bulanzi bwa bantu ba mulangue. Kuba ni kitoolela mu bupinguzi tekuweme.
PRO 24:24 Olia aliwamwana mubi nangue, “Wewe uli ni nsambu,” Bantu balikumutiipa, ni ntundu ilikumusuula.
PRO 24:25 Inzi ku balia balibamutana nsambu, balikuya bali ni nsansa, ni mapaalo aweme alikuya ali pali bene.
PRO 24:26 Bwasuko bwa kisinka buli nga kufyompa pa milomo yakua kibuza.
PRO 24:27 Wamia miilo yobe ya panze, ni kuteania bukaba bobe, mane ukuule nghanda yobe.
PRO 24:28 Tekusininkizia bya bufi ku mwinobe pasili mulandu, ao kubeepa na milomo yobe.
PRO 24:29 Tekulanda nangue, “Ndikumukitila nga vi-akinkitila. Ndikumulipa kukonkana ni vi-akikita.”
PRO 24:30 Nakipita pepi ni bukaba bwa munanghani, ni pepi ni bukaba bwa mizabibu bwa muntu asili na maano,
PRO 24:31 Ni mo mumenene sie myunga, ni bo bukupiliilue sie na lunkoto, ni kibumba kyakue kya mabue, kituutilue.
PRO 24:32 Kupwako, nakenta, ni kulangakana, namona ni kusangapo masambilizio:
PRO 24:33 Kulaala kaniini, ni kuona kaniini, kukunza maboko kaniini ni kutuuzia.
PRO 24:34 Ni evi bupabi bwakaba kukwizila nga kabooko, ni kubulua kwakaba kukukonka nga kipoopoosi ali ni kilwilo.
PRO 25:1 Aza i mapinda ange akua Solomoni, mapinda a-ambwilue na bantu bakua Hezekia likolo wa mu kyalo kya Yudea
PRO 25:2 Kufiika keebo, bulumba bwakua Leza, inzi bulumba bwa makolo, kukebelezia keebo.
PRO 25:3 Nga vili kuleepa kwa lyulu kuya mu muulu, ni kuzika kwa kyalo kuya pansi, ni mutima wa makolo i viusivinda kukebeleziiwa.
PRO 25:4 Fumia biko mu mutofue, ni mutili wa mutofue alikukukitila kipe.
PRO 25:5 Fumia babi ku menso akua likolo, ni kitebe kyakue kya bukolo kilikwimikua mu bulunghami.
PRO 25:6 Tekwitantamuna pa menso akua likolo, ni kukeba kifuka pa bakindami.
PRO 25:7 Pantu kyawama kwanua nangue, “Iza kono ku ntanzi,” kukila kumoniiwa busoni pa bakindami. Kine kuli ni kawamonanga na menso obe,
PRO 25:8 Tekubutukila kuya kusongela ku kilie, ukeeza kwandua kumana bya kukita ku mpeleezio mwinobe pa-akaba kukumonia busoni.
PRO 25:9 Lanzyania ni mwinobe, kabili tekufyulilane tufiso.
PRO 25:10 Evi olia alikunvua tekuti akumonie busoni. Ukeeza kuleebulua mu bwikazi bobe bonse.
PRO 25:11 Keebo kalikalandua pa musita upalile, kali nga nsombo ya oro ili mu kipe kya mutofue.
PRO 25:12 Nga evelia vili lutimbi lwa oro, ni bifwanizio bya oro isambikile, i vili ni olia aliwasoka kutui kulikwanakila.
PRO 25:13 Nga evelia vili kasama ka kibue musita wa kuzombola, i vili ni mukenzi wa kisinka ku olia amutumine. Pantu aliwasansamusia mutima wakua selenzi.
PRO 25:14 Nga evelia vili malezi ni mwela pasili nvula, i vili ni olia aliwaitasia bufi palua kilambu kisipeenue.
PRO 25:15 Mu kusipikizia, kateeka aliwalengiwa kuzumina, ni lulimi luteleele, lulilwatyona kakuza.
PRO 25:16 Kine wasyukila kapelo, tekuliisia, ukeeza kwikuta ni kuluka.
PRO 25:17 Kuulu kobe kuye kwali sie musita umo umo ku nghanda ya mwino, akeeza kunaka nobe ni kukusuula.
PRO 25:18 Muntu aliwasininkizia mwinakue bya bufi, ali nga nondo ni kipanga, ni muvui unoonekele.
PRO 25:19 Kuswapila muntu asiliwakisinka musita wa maavia, kuli nga liino libolele, ni mukonzo uvyukile.
PRO 25:20 Nga evelia vili olia aliwavuula ngubo yakue musita wa kasama, kabili nga siki pa kilonda, i vili ni olia aliwaimba nghimbo ku muntu afinine mutima.
PRO 25:21 Kine mulwani obe onvwile nzala, mupeele bilio, kabili kine onvwile kyaka, mupeele menda a kumina.
PRO 25:22 Mu kukita evi, ulikubiika mazekezeke a mulilo pa mutue wakue, ni Yawe alikukulambula.
PRO 25:23 Nga vili mwela wa ku nkungua uliwaleeta nvula, i vili ni lulimi lulilwalengia muntu kufiitua.
PRO 25:24 Kyawama kwikala mu kafuli ka mutenge wa nghanda, kukila kwikala mu nghanda pamo ni mukazi wa mazibo.
PRO 25:25 Nga evelia vili menda a kasama ku muntu ali ni kyaka, i vili ni mpunda iweme ifumine kule.
PRO 25:26 Mulunghami aliwalekelela mubi, ali nga kasulo ka menda kalikavunduka, kabili nga kiina kya menda kivundwilue.
PRO 25:27 Nga evelia vikisipalile kuliisia kapelo, i vikisipalile ni kwikebela bulumba bobe we mwine.
PRO 25:28 Olia asiliwateeka mutima wakue, ali nga muzi uli ni kibumba kituutikile.
PRO 26:1 Nga evelia vili kibue musita wa likungulu, ni nvula musita wa buzombozi, ni mukinzi i viusipalile ku kipuba.
PRO 26:2 Nga evelia vili munsole mu kuwayawaya kwakue, nga kamimbili mu kupupuka kwakue, i vili ni ntiipu ya mpuni isiizi kukwata muntu.
PRO 26:3 Musepe wa kuuminako farasi, kikobelo kya kulombwelako punda, ni nfimbo ya kuuminako kipuba mu musana.
PRO 26:4 Tekumwasuka kipuba mubeeleele bupuba bwakue, ukeeza kupalana nakue.
PRO 26:5 Mwasuke kipuba mubeeleele bupuba bwakue, akeeza kwaluka wa mulangue ku menso akue mwine.
PRO 26:6 Olia aliwalaizia kipuba kutwala mpunda, aliwaiputula makasa akue, ni kumina bwimba.
PRO 26:7 Nga vilebeele maulu a mulema, i vili ni mapinda mu kanua ka kipuba.
PRO 26:8 Nga vili libue lya mutengo mu topiito, i vili ni muntu aliwakindika kipuba.
PRO 26:9 Nga vili musambo wa myunga mu kuboko kwakua kyakolua, I vili ni mapinda mu kanua ka kipuba.
PRO 26:10 Nga vili muntu aliwalasa mivui ni kukisia bonse, i vili ni muntu aliwapeela miilo kipuba ao mupitanzila.
PRO 26:11 Nga vili kabua kalikabwelela ku malusi akue, i vili ni kipuba aliwabweziapo kukita bya bupuba.
PRO 26:12 Ewe, umwene muntu ali ni mulangue ku menso akue mwine? Kyawama kuswapila kipuba kukila wene.
PRO 26:13 Munanghani aliwalanda nangue, “Mu nzila muli ni nkalamu, nkalamu asasile ali mu musebo ukata.”
PRO 26:14 Nga vilivyazyungulusiiwa mulyango mu bulato bwakue, i vilivyaipilibula munanghani pa bulita bwakue.
PRO 26:15 Munanghani aliwabiika kuboko kwakue mu nsaani, inzi aliwaunvua bunanghani bwa kutwala pa kanua kakue.
PRO 26:16 Munanghani emwene kuba ni mulangue pa menso akue kukila bantu kilooba baliba-asuka ni maano.
PRO 26:17 Olia aliwaingila mu mazibo asili akue, ali nga muntu aliwakwata ku matui a kabua kalimukupita.
PRO 26:18 Nga wa luuba vi-aliwapooza bikooko bya mulilo, ni mivui, bintu bilibyaipaana,
PRO 26:19 i vili ni muntu aliwamubeepa mwinakue, ni kumwana nangue, “Ne nakiba nakusekia sie!”
PRO 26:20 Mulilo uliwazima pantu tepali nkuni, ni pasili musongezi, tepali mazibo.
PRO 26:21 Nga vitulitwazukunsia mazekezeke ao kukwikizia nkuni pa mulilo, i vili ni muntu mubi aliwasomenkezia mazibo.
PRO 26:22 Twebo twa musongezi tuli nga bisoso biweme bya bilio, kabili tulitwakookela munda.
PRO 26:23 Nga vili twebo twa kwiwaminizia ni mutima ubi, i vili ni keeso kakupilueko mutofue.
PRO 26:24 Muntu asuulile bange aliwafyamina mu bulanzi bwakue, inzi aliwateeka bukonto bwa bupoti mu mutima wakue.
PRO 26:25 Lualiwalanda twebo twaweme, tekumuketekela, pantu kuli bilubo kilooba bili mu mutima wakue.
PRO 26:26 Anzia kukenda kwakue kuya kwafiikilue na bupoti, bubi bwakue bulibwamoneka pa menso a bantu.
PRO 26:27 Olia aliwaimba kiina, waakaponenamo ye mwine. Kine wabulunkusia libue, lilikumubwelelela.
PRO 26:28 Lulimi lwa bufi, lusuulile balia bakisiiziwe na lo, ni kanua ka kwiwaminizia, kalikaleeta lwinoono.
PRO 27:1 Tekwitasia pa bya lukeele, pantu teumanine bilikukitika mu busiku bumo.
PRO 27:2 Lekela muntu unge akutasie, tekuba kanua kobe we mwine, mweni, tekuba milomo yobe we mwine.
PRO 27:3 Libue lifinine, ni musenga ulemene, inzi busokozi bwa kipuba bufinine kukila bebi bibili.
PRO 27:4 Kikonko kibiipile, ni kipuki kili nga kibunda. Ale nani aliwavinda kwimana ku ntanzi ya bunkua?
PRO 27:5 Kyawama kusasililua pa menso a bantu, kukila ntono ifiikilue.
PRO 27:6 Kibuza kine wakukisia, muketekele, kukila miifyompo ya mulwani.
PRO 27:7 Muntu ekusi, asuulile kapelo, inzi olia ali ni nzala, bilulile bilibyasonsa.
PRO 27:8 Nga vili koni kalikawayawaya kule ni kinsua kyakue, i vili ni muntu aliwawayawaya kule ni nghanda yakue.
PRO 27:9 Nga vili mafuta a bunu buweme ni bubaani, bilibyawamina mutima, i vili ni makola a bukibuza bwa muntu bulibwafuma mu mapange a mu mutima wakue.
PRO 27:10 Kibuza obe ni kibuza wakua so, tekubalekela, kabili tekuti ukabe kuya mu nghanda mwa lupua lobe busiku bwa lyemo lyobe. Kyawamako mwinobe ali pepi kukila lupua luli kule.
PRO 27:11 We mwana wane, ba ni mulangue usansamusie mutima wane, evi n'mone mwakumwasukila olia aliwansasilila.
PRO 27:12 Mukengezi aliwamona bubi ni kufyama, inzi babipuba balibaya sie ku ntanzi mpaka baikisia.
PRO 27:13 Muntu kine walaya kulipila mizia ya muntu asimanikile, apokueko ngubo yakue nga kikwatizi, apokue kikwatizi pa mulandu wa ozo mweni.
PRO 27:14 Olia aliwapaala kibuza wakue wasamwine lukeelekeele pakili, kyaakamoneka nga kitiipu.
PRO 27:15 Mukazi wa mazibo, ali nga matooni a nvula aliatoonatoona busiku bwa nvula.
PRO 27:16 Aliwakilikila ozo mukazi, aliwakilikila mwela, ao kukwata mafuta na kuboko kwakue kwa kulio.
PRO 27:17 Nga kyela vikilikyanoona kyela nakue, ni muntu i vi-aliwasambiliziiwa na mwinakue.
PRO 27:18 Olia aliwasunga kimuti kya miku aliwaliako mazabo, ni olia aliwasunga selenzi aliwakindikua.
PRO 27:19 Nga lukebu vilulilwapalana na lukebu mu menda, ni muntu i vi-aimanine.
PRO 27:20 Kumbo ni lwinoono tebyaikuta ata kaniini, ni menso a muntu te-ezi kwikuta ata kaniini.
PRO 27:21 Mupika, i wakusungulwilamo mutofue, ni kikuka kya mulilo, i kya kwapikamo oro, inzi muntu aliwaeziiwa pa mulandu wa bulumba bwakue.
PRO 27:22 Anzia ubuula mwinsi ni kumutua kipuba nga nghano, bupuba bwakue tebupua.
PRO 27:23 Kita maka umane mibeele ya bisepe byobe, ni kusunga bwino nghombe yobe.
PRO 27:24 Pantu bukata tebwayayaya, ni ngala ya bukolo teyatwalilila mu nvyalo yonse.
PRO 27:25 Musita uliwasebua lubambua, palipatutuka lunge, ni lubamba kufuma mu mpili lulilwakolonghaniiwa.
PRO 27:26 Mikooko iliyakuleetela masako a kukitamo ngubo yobe, ni mbuzi wakaba kumusisia ni kusitamo makaba.
PRO 27:27 Kabili ulikuya wali ni mabeele engi a mbuzi a kukutuusia pamo ni lupua lobe pamo ni kuliisia babombi bobe banakazi.
PRO 28:1 Babi balibabutuka sie tekuba bakumbilue na muntu, inzi balunghami bapamine nga nkalamu.
PRO 28:2 Pa mulandu wa bukisanguka bwa kyalo, bakateeka balibavula, inzi kateeka wa maano ni akengeele, aliwaleeta mutende.
PRO 28:3 Mulombozi mupabi aliwaemia bapabi, ali nga nvula ya mwela iliyainoona bilio.
PRO 28:4 Balia basilibakonka mizilo, balibatasia bubi, inzi balia balibakonka mafunde, balibakanzana nabo.
PRO 28:5 Bantu babi tebamanine bilungheeme, inzi balia balibamukeba Yawe babimanine.
PRO 28:6 Kyawama mupabi aliwaenda mu nsambu kukila munonsi ali mu nzila ibi.
PRO 28:7 Olia aliwakonka mizilo, mwana wa mulangue, inzi kibuza wa bakazule, aliwamonia se busoni.
PRO 28:8 Olia aliwavuzia bunonsi bwakue mu kukopia nfolanga ya kaloba, aliwakolonghaniizia muntu aliwaunvwila bapabi nkumbu.
PRO 28:9 Olia aliwakilika kutui kwakue tekuti onvue mizilo, ni mapepo akue ni bilubo.
PRO 28:10 Olia aliwalengia balunghami kuzeezelela mu nzila ibi, aliwaponena mu kiina kyakue mwine, inzi balia bapwililikile balibapyana biweme.
PRO 28:11 Munonsi ali ni mulangue pa menso akue mwine, inzi mupabi ali ni maano, aliwamutoosia bwino bwino.
PRO 28:12 Balunghami kine ba-anzia, bulumba bukata. Inzi babi kine i bateeka, bantu balibafyama.
PRO 28:13 Olia aliwafiika bilubo byakue, tezi kulunduluka, Inzi olia aliwalapila ni kulekela, aliwaeleelua.
PRO 28:14 Lisyuko ku muntu aliwatiina Yawe lyonse, inzi olia aliwafinia mutima wakue, aliwaponena mu busanzo.
PRO 28:15 Nga vili nkalamu aliwabuluma, ni kimbui kilikyasakukila, i vili ni kateeka mubi aliwateeka bapabi.
PRO 28:16 Kateeka asili na maano, aliwakila kubabiibikizia, inzi olia asiliwatokamua bunonsi bwa bupompo, aliwaikala nsiku ingi.
PRO 28:17 Olia afiniinue na mulopa wa muntu, aliwaya wali mbutusi mpaka musita wa kufua kwakue. Tekuti kuye kwali muntu wa kumukwasia.
PRO 28:18 Muntu aliwaenda mu bulunghami, aliwapususiiwa. Inzi olia ali ni kiitoni mu nzila yakue, aliwaponena mu kiina.
PRO 28:19 Olia aliwalima bukaba bwakue, ali ni bilio bingi. Inzi olia aliwakonka milandu ya mpuni waya wali ni bupabi bukata.
PRO 28:20 Muntu wa kisinka, ali ni mapaalo engi. Inzi olia aliwakeba kunonka lubilo lubilo, aliwakandua.
PRO 28:21 Kuba ni kitoolela ku bantu, tekuweme. Inzi muntu kuti waluvia pa mulandu wa kisoso kya mukate.
PRO 28:22 Wa butani aliwatona kunonka lubilo lubilo, kabili tamanine nangue kuti wabulua.
PRO 28:23 Olia aliwasasilila mwinakue, aliwatonua pa kyamba kukila olia aliwamulandila twebo twa kuwaminizia.
PRO 28:24 Muntu aliwaiba bunonsi bwakua se ao bwakua nghina ni kulanda nangue, “Te kilubo,” ozo muntu, kibuza wakua nghinooni.
PRO 28:25 Wa butani aliwabuusia mazibo, inzi olia amuswapiile Yawe, alikuba munonsi.
PRO 28:26 Muntu eswapiile ye mwine, kipuba. Inzi olia aliwaendela mu mulangue, aliwapususiiwa.
PRO 28:27 Muntu aliwakwasia bapabi tezi kubulua kantu, inzi olia aliwazibata, ali ni ntiipu ingi.
PRO 28:28 Babi kine bateeka, bantu balibafyama. Inzi kine baloviiwa, balunghami balibavula.
PRO 29:1 Olia aliwasokuasokua sie ni ye wakosia mutima, takakokola kutyoka, kabili takamona kwa kupusukila.
PRO 29:2 Kine balunghami bapaalua, bantu balibasansamuka. Inzi mubi kine i wateeka, bantu balibalwala.
PRO 29:3 Olia atonene mulangue, aliwasansamusia se. Inzi kibuza wa bakende, aliwazeezia bunonsi bwakue.
PRO 29:4 Likolo aliwateeka kyalo kupitila mu nsambu. Inzi olia aliwapeelua bituulilo, aliwainoona kyalo.
PRO 29:5 Olia aliwaiwaminizia ku mwinakue, aliwateyela mwinakue bukila.
PRO 29:6 Mu kilubo kya muntu mubi, muli muteo. Inzi mulunghami aliwaimba ni kusangalala.
PRO 29:7 Mulunghami aliwakenta twebo twa mupabi. Mubi tali na maano a kuti amane.
PRO 29:8 Bantu bali ni kapuni balibazizia muzi. Inzi bantu bali ni mulangue balibapwisia kikonko.
PRO 29:9 Kine wa mulangue wakanzana na kipuba, kipuba kine wafiitua, ao kine waseka, tepali mutende.
PRO 29:10 Balia balibazuumia mulopa, basuulile olia apwililikile, Kabili balibakeba kwipaya balunghami.
PRO 29:11 Kipuba aliwalanda na kipuki kyakue kyonse. Inzi wa mulangue, aliwaleeta mutende ku mpeleezio.
PRO 29:12 Kateeka kine watwilizia bya bufi, babombi bakue bonse, baliba-aluka babi.
PRO 29:13 Kintu kimo kili na mupabi ni aliwabiibikizyania ni keki: Yawe aliwabapeela bukose.
PRO 29:14 Kine likolo aliwapingula mupabi mu kisinka, bukolo bwakue bwaya bwali bwa muyayaya.
PRO 29:15 Nfimbo pamo ni kusasililua, bilibyaleeta mulangue. Inzi mwana aliwalekelelua pasili kukandua aliwamonia nghina busoni.
PRO 29:16 Babi lubalibateeka, bubi bulibwavula. Inzi balunghami balibamona kupona kwabo.
PRO 29:17 Kanda mwanao ni ye alikukuleetela mutende. Ee, alikusansamusia mutima obe.
PRO 29:18 Palia pasili kimonua, bantu balibaya kiyeyeye. Inzi olia aliwakonka mizilo, ali ni nsansa.
PRO 29:19 Mubombi tezi kusokua sie na twebo, pantu anzia amana tapoozako maano.
PRO 29:20 Kubako umumanine olia aliwalanda kilandelande? Kyawama kuketekela kipuba kukila muntu wa ozu musango.
PRO 29:21 Olia aliwasunga mubombi wakue kutula ku bwanike bwakue, pa mpeleezio waakamusangukila.
PRO 29:22 Muntu wa kipuki aliwalengia mazibo. Ni muntu wa kipuki kikata aliwalengia bibalo bingi.
PRO 29:23 Kiitoni kya muntu kilikyamukoosia. Inzi mufuuke aliwakindikua.
PRO 29:24 Olia aliwa-ampana na kabooko, asuulile mutima wakue mwine. Aliwaunvua ntiipu yatiipua, inzi tekuba walanda kantu.
PRO 29:25 Kutiina bantu, muteo wa kukuleetela busanzo. Inzi olia amuswapiile Yawe, ali ni mutende.
PRO 29:26 Bengi balibakeba kutonua na kateeka. Inzi nsambu ya muntu iliyafuma kuli Yawe.
PRO 29:27 Muntu mubi, asuulile balunghami. Ni mulunghami, asuulile babi.
PRO 30:1 Bobu i bulanzi bwa mponvu bwakua Aguri mwina Yake, kuli Itieli ni Ukali. “We Leza wandekeela, we Leza wandekeela, kabili n'mpeleelelue.
PRO 30:2 Kisinka nene ndi kipuba kukila bantu bonse. Kabili nsili na maano a bumuntu.
PRO 30:3 Nsyaasambiliile mulangue, kabili nsimanine twebo twakua Muzuuke.
PRO 30:4 Nani waaselele mwiulu ni kukooka pansi? Nani waakolonghaniizie mwela mu minue yakue? Nani waakakile menda mu ngubo yakue? Nani waimikile mpeleezio yonse ya kyalo? Liina lyakue nani? Liina lyakua mwana wakue nani? Nghane kine umanine!
PRO 30:5 “Kubalua keebo kakua Leza kasininkiziiziwe. Wene i kisoolelo kya balia balibabutukilamo.
PRO 30:6 Tekulundapo pa twebo twakue, akeeza kukusasilila ni we wamoneka kuba wa bufi.
PRO 30:7 “We Yawe nakulomba bintu bibili. Tekuti ukabe kuntana ntanzi ya kufua kwane:
PRO 30:8 Fumia bupunzu ni bufi pali nene. Tekun'mpeela bupabi ao bunonsi, inzi n'mpeeleko bilio byane bya kubalua nsiku.
PRO 30:9 Pantu kine byanvulila ndikwikuta ni kukulaba nalanda nangue, ‘Yawe nani?’ Ao tekuti ngie nali mupabi ni kuya naiba, Ni kuleebuzia Liina lyakua Leza wane.
PRO 30:10 “Tekubeepezia mubombi kuli selenzi, akeeza kukutiipa ni we wamoneka kuba wa kilubo.
PRO 30:11 “Kuli ni luvyalo lulilwatiipa basibo, kabili tebezi kupaala ba nghinabo.
PRO 30:12 Kuli ni luvyalo luswetele ku menso abo bene, inzi telwaasambilue biko byabo.
PRO 30:13 Kuli ni luvyalo lukilile kulendula menso abo! Nkopio yabo ni yo yalendwilue.
PRO 30:14 Kuli ni luvyalo luli ni meno nga kipanga ni lumuma nga myele, pakuti baye balia bapabi ni kubalovia pa kyalo pamo ni balia babuliilue pakati ka bantu.
PRO 30:15 “Mupoti, ali na bakazyana babili balibalila nangue, ‘N'mpeele, N'mpeele.’ “Kuli bintu bitatu bisilibyaikuta ata kaniini. Ee, bina bisilibyalanda nangue, ‘Byavula.’
PRO 30:16 Kilibu, kavumo ka nghumba, ni bulongo busilibwaikuta menda, pamo ni mulilo usiliwalanda nangue, ‘Byavula.’
PRO 30:17 “Linso lya muntu aliwafuupula se, ni kufuupula nghina, lyaakakompua na bizooko bya mu lulambe, ni twina nzwiba twaakalilia.
PRO 30:18 “Kuli bintu bitatu bilibyan'mpezia maano. Ee, bintu bina binsimanine,
PRO 30:19 Lwendo lwa nzwiba mu lweleele, lwendo lwa kizoka pa mwalala, lwendo lwa bwato pa menda, ni lwendo lwa mwalalume ali ni mukazyana.
PRO 30:20 “I vili ni nzila ya mwanakazi mukende. Aliwalia ni kupukusa pa kanua kakue, ni kulanda nangue, ‘Nsiluviizie.’
PRO 30:21 “Pa mulandu wa bintu bitatu, kyalo kilikyatenta, ni pa mulandu wa bintu bina kilikya-andua kusipikizia.
PRO 30:22 Pa mulandu wa muzia lu-aliwa-aluka likolo, ni kipuba kine waikuta bilio.
PRO 30:23 Pa mulandu wa mwanakazi abiipile kine waupua, ni mubombi mwanakazi aliwapokolola kyupo kyakua nghinalenzi.
PRO 30:24 “Kuli bilengua bina bikeepele mu kyalo. Inzi bili ni maano engi.
PRO 30:25 Mpazi, ni bilengua bisili na maka. Anzia evio, iliyaibiikila bilio pa musita wa likungulu.
PRO 30:26 Bibila, ni bilengua bisili na maka. Anzia evio, bilibyaikitila nghanda mu mabue.
PRO 30:27 Nzie, teili na likolo. Anzia evio, iliyabuukila pamo mu mabumba.
PRO 30:28 Lunso, kuti wakwatua na minue. Anzia evio, aliwaikala mu nghanda mwa likolo.
PRO 30:29 “Kuli bilengua bitatu bilibyaenda lwendo lufwaniine. Ee, bina bili ni lwendo luweme.
PRO 30:30 Nkalamu ali ni maka pa nama yonse, asiizi kutiina nama inge yonse.
PRO 30:31 Kazenze kalikaenda kaikenkenta, pamo ni kapwata, ni likolo azyungulukiilue na balukale bakue.
PRO 30:32 “Kine ukitile bya bupuba ni kuya waitantamuna, ao kine ukambiile kukita bibiipile, biika kuboko kobe pa kanua kobe.
PRO 30:33 Pantu kine wafulumia mabeele a nama ulikusanga manteka. Kuuma pa moona kulikwafumia mulopa. Ni kusomenkezia kipuki kulikwaleeta mazibo.”
PRO 31:1 Bulanzi bwakua likolo Lemueli, bu-aasambiliziiziwe na nghina.
PRO 31:2 We mwana wane, twilizia! Twilizia, we mwana wa munda mwane! Twilizia, we mwana wane, we bwasuko bwa mapepo ane.
PRO 31:3 Tekupeela banakazi maka obe, ao nzila yobe ku balia balibavulunghania likolo.
PRO 31:4 We Lemueli, makolo teapalile kumina divai, Makolo teapalile. Ao bakindami kutokamua bikolani.
PRO 31:5 Bakeeza kukolua ni kulaba mizilo, bakeeza kubiibikizia nsambu ya muntu aliwaema.
PRO 31:6 Bwalua bululile, ni ku balia balimukuzeeza. Ni divai, ni ku balia bali ni bulanda bukata mu mutima.
PRO 31:7 Baleke bamine ni kulaba bupabi bwabo, evi tekuti baye balanguluka nghemo yabo ata kaniini.
PRO 31:8 Landilako bakameme bonse, ni kusampulula balia basili na wa kubakwasia.
PRO 31:9 Asamuna kanua kobe upingule mu nsambu. Bapabi pamo ni babuliilue, ubapeele nsambu yabo.
PRO 31:10 Mwanakazi wa mibeele iweme alikumonekela pi? Pantu mutengo wakue ukilile mabue a mutengo.
PRO 31:11 Mutima wakua mulume wakue umuketekeele, ni ye takabula kibwezia.
PRO 31:12 Aliwamukitila biweme tekuba bibiipile, nsiku yonse ya bukose bwakue.
PRO 31:13 Aliwakeba sufu ni kitani, ni kubomba miilo yakue na mutima onse.
PRO 31:14 Wene ali nga bwato bwa makwebo. Aliwaleeta bilio byakue kufuma kule.
PRO 31:15 Aliwabuuka paakili lukeelekeele, aliwapeela bilio ku bantu ba mu nghanda yakue, ni babombi bakue banakazi miilo yabo.
PRO 31:16 Aliwakenta bukaba ni kubusita. Mu bikwatua bya mu minue yakue i mu-aliwabyalila bukaba bwa mizabibu.
PRO 31:17 Aliwabomba miilo yakue na maka, ni kulumia maboko akue.
PRO 31:18 Aliwamona nangue makwebo akue ali ni kibwezia. Musaniko wakue tewizi kuzima musita wa busiku.
PRO 31:19 Aliwasuka nyunzi na minue yakue, ni maboko akue akwatiliile.
PRO 31:20 Aliwaolola maboko akue ku bapabi, ee, aliwaolwela maboko akue ku babuliilue.
PRO 31:21 Tezi kutiina kasama pa mulandu wa bantu ba mu nghanda yakue, pantu bonse ba mu nghanda yakue bavwikilue ngubo ya kasi.
PRO 31:22 Aliwaikitila ngubo ya pa bulita bwakue. Aliwavwala ngubo ya kitani kiweme ni ya mukumino wa bulumbi.
PRO 31:23 Mulume wakue amanikile mu milyango, lu-aliwaikala pakati ka masiiko a kyalo.
PRO 31:24 Aliwakita ngubo ya kitani ni kusisia. Aliwasisia misipi ku basulu.
PRO 31:25 Maka ni mukinzi i ngubo yakue. Aliwasekelela pa mulandu wa musita uliwaiza.
PRO 31:26 Aliwa-asamuna kanua kakue na mulangue, ni mizilo ya buwame ili mu kanua kakue.
PRO 31:27 Aliwakentesia nzila ya bantu ba mu nghanda yakue, kabili tezi kulia bilio bya bunanghani.
PRO 31:28 Baana bakue balibamukuuta lisyuko. Mulume wakue aliwamukuuta evio vyenka, ni kumutasia walanda nangue,
PRO 31:29 “Bakazyana bengi balibakita biweme, inzi wewe ukilile bonse.”
PRO 31:30 Monekelo iliyabeepa, ni kuwama kwa lukebu, ni kwa mpuni. Inzi mwanakazi aliwatiina Yawe i aliwatasiiwa.
PRO 31:31 Mukindike mu byonse bi-aliwakita na maboko akue, ni miilo yakue imuleetela mukinzi ponse.
HOS 1:1 Keebo kakua Yawe kaizile kuli Hosea mwana mwalalume mwina Beri, mu nsiku ya kuteeka kwakua Uzia, ni Yotamu, ni Ahazia, pamo ni Hezekia, makolo a mu Yuda, ni mu nsiku yakua Yeroboamu mwana mwalalume mwina Yoasi, likolo wa mu Izraeli.
HOS 1:2 Yawe lu-aatendekele kulanda na Baizraeli, waamwanine Hosea nangue, “Endo uupe mwanakazi mukende ni kuvyala nakue baana, pantu bantu ba mu keno kyalo ba-aluka ni bubi bwa kukita bukende mu kunfunghamina ne Yawe.”
HOS 1:3 Ni kiine Hosea waile kuupa Gomeri mwana mwanakazi mwina Diblaimu. Gomeri waimitile ni kumuvyalila mwana mwalalume.
HOS 1:4 Kupwako Yawe wamwana Hosea nangue, “Ozu mwana mwinike ‘Yezreeli,’ pantu pasyankabe kukanda nghanda ya bukolo bwakua Yehu pa mulandu wa bungipaani bwa ku Yezreeli, ni ne nakaba kupwisia bukolo bwakua Izraeli.
HOS 1:5 Mu bobo busiku nakaba kutyona buta bwakua Izraeli mu lulambe lwa ku Yezreeli.”
HOS 1:6 Gomeri waimitile paakale ni kuvyala mwana mwanakazi. Kabili Yawe waamwanine Hosea nangue, “Ozu mwana mwinike Lo-Ruhama, pantu nsikikaba kulanga ntono pa nghanda yakua Izraeli evi tekuti nkabeeleele.
HOS 1:7 Inzi nakaba kulanga ntono pa nghanda yakua Yuda. Ne Yawe Leza wabo i wakaba kubapususia pasili kubombia buta ao kipanga, ao bului, pasili kubombia farasi ao baseli ba pa farasi.”
HOS 1:8 Gomeri lu-aamusumwine Lo-Ruhama, waavyele ni unge mwana mwalalume.
HOS 1:9 Kabili Yawe waamwanine Hosea nangue, “Ozu mwana mwinike Lo-Ami, pantu mwe temuli bantu baane, ni ne nsili Leza wenu.”
HOS 1:10 Anzia kili evio, Baizraeli baakaba nga musenga wa mumbali buziba ozo ukilile kuvula ni usili wapendeka. Kolia kuba-aninue nangue, “Temuli bantu bane,” baakakuutua nangue, “Muli bena Leza mukose.”
HOS 1:11 Bayuda ni Baizraeli baakalundana paakale ni kusaakula mulombozi umo, ni bo baakabwelela ku kyalo kyabo, pantu busiku bulibwakuutua Yezreeli bwaakaba busiku bukata.
HOS 2:1 Mu bobo busiku waakakuuta ba kobe nangue Ami, “Bantu bane.” Ni bankaziizo nangue Ruhama, “Batonua bane.”
HOS 2:2 Sasilile nghinenue, musasilile, pantu wene takili mukazi wane, ni nene nsikili mulume wakue. Mwane alekele mibeele ya bukende mu monekelo yakue ni bukende pa bukata bwa mabeele akue.
HOS 2:3 Kine te evio nakaba kumuvuula ngubo yakue, ni kumusia mu-aavyaliilue. Nakaba kumukita nga kaseeba, nakaba kumwalula kuba musili uume, ni kumwipaya na kyaka.
HOS 2:4 Baana bakue nsikabonvwila nkumbu, pantu ni baana ba mu bukende. Nghinabo tali na bukisinka, wakibeemita mu nzila isipalile. Gomeri waalandile evi, “Ndikukonkelela batonua bane, balia baliban'mpeela bilio, ni baliban'mpeela menda. Baliban'mpeela ngubo ya masako a nama ni kitani, ni mafuta a mizeituni, pamo ni bikolani.”
HOS 2:6 Ni pakako, ne Leza nakaba kusaka nzila yakue na myunga, nakaba kumukingilila mukati luuba, evi tekuti akamone pa kupitila.
HOS 2:7 Gomeri waakakonkelela batonua bakue, inzi takabasanga. Waakabakeba, inzi takabamona. Pa kyamba waakalanda nangue, “Ndikubwela sie ku mulume wane wa mambo, pantu naali nali bwino kukila lenu.”
HOS 2:8 Gomeri tainikile nangue nene i waamupeele bintu byonse bi-ali nabio, nghano ni divai ya lenu pamo ni mafuta a mizeituni, nene i waamunonsiizie mutofue ni oro ibaali babombia mu kumubombela leza Baali.
HOS 2:9 Ni pakako, nakaba kupokolola nghano yane musita wa kuzombola, ni divai yane ya lenu pa kyamba kya kutika, nakaba kupokolola ngubo yane ya masako pamo ni kitani kyane, bebio byaali byapalile kukupa mubili wakue.
HOS 2:10 Ni evi, naakamuvuula ni kumusia mu-aavyaliilue ntanzi ya batonua bakue. Tekuli muntu waakamupokolola mu minue yane.
HOS 2:11 Naakapwisia maliila akue onse, nsikunkulu yakue ya kubalua mwaka, ni ya kubaluka kwa kwezi, ni nsiku yakue ya Sabata, nsikunkulu yakue yonse itantikilue.
HOS 2:12 Naakenoona mizabibu yakue ni bimuti byakue bya miku, bebio bi-aliwalanda nangue i nsazio yakue i-aapeelue na batonua bakue. Ni ne naakalengia mizabibu ni bimuti bya miku kuba musitu, ni nama ya mu kisonso yaakalia mazabo abio.
HOS 2:13 Naakamukanda pa mulandu wa ezio nsiku i aafunkiziizie bubaani kuli leza Baali, lu-aifwaniizie na tuzele twa ku minue ni binge bifwanizio bya mutengo, ni kuya kubembia batonua bakue, inzi nene wandabile, koku i kulanda kwakua Yawe.
HOS 2:14 Ni pakako, nakaba kumubembia, nakaba kumulombola mu kaseeba ni kwambaula nakue mubufuuke.
HOS 2:15 Koko, i kunakaba kumubweziizia makaba akue a mizabibu, ni lulambe lwa Akori nakaba kulukita kuba mulyango wa maswapi. Koko i ku-akaba kwimba lwimbo nga vi-aali waimba ku bukazyana bwakue, nga mu bolia busiku bu-aafumine ku Misri.
HOS 2:16 Yawe walanda nangue, “Mu bobo busiku, wewe waakankuuta nangue, ‘Mulume wane.’ Teukikankuuta nangue, ‘leza wane Baali.’
HOS 2:17 Naakafumia meena a baleza baliwakuutua Baali mu milomo yakue, ni meena abo takika-azimbula.
HOS 2:18 Mu ezio nsiku naakakita kipingo pa mulandu wa Baizraeli, ni nama ya mu kisonso ni tooni twa mulweleele, pamo ni bilengua bilibyayibula pansi. Buta, ni kipanga pamo ni bului, naakabifumia mu kyalo, evi bonse bakabe baikeele mu mutende.
HOS 2:19 Naakakusaka we Izraeli kuti ukabe wane muyayaya, naakakusaka mu nsambu ni mu bulunghami, mu ntono ni mu nkumbu.
HOS 2:20 Naakakusaka kuti ukabe wane mu kisinka, ni we waakanghinika nangue nene i Yawe.
HOS 2:21 “Mu bobo busiku naakaasuka,” nangue Yawe, “naakaasuka myulu, myulu ni yo yaakaasuka kyalo, ni kyalo kyaakaasuka mbezu, ni divai ya lenu ni mafuta a mizeituni, ni bebi byonse byaakamwasuka Yezreeli.
HOS 2:23 Naakamulimba Yezreeli mu kyalo. Naakalanga ntono yane ku olia unainikile Lo-Ruhama. Balia banainikile Lo-Ami, naakabaana nangue, ‘Muli bantu bane,’ ni bo baakalanda nangue, ‘Uli Leza wetu.’”
HOS 3:1 Yawe wanghanine nangue, “Endo ubwezyanie paakale na mukazi obe ni kumulanga ntono anzia kine atonenue na unge ni kuya wakita nakue bukende. Mutone nga ne Yawe vintonene Baizraeli, anzia kine balibabwelela ku kupupa bange baleza ni kutona kubeelela mikate isonsele ilimo mizabibu yume.”
HOS 3:2 Ni pakako, naamusitile paakale na shekeli lyanondo ni isaano ya mutofue, ni kilo 195 ya shairi.
HOS 3:3 Pa kyamba naamwanine nangue, “Upalile kwikala ni nene nsiku ingi ni kulekela bukende ao kwampana na mwalalume unge. Ni nene nsikakeba mwanakazi unge.”
HOS 3:4 Evi Baizraeli ni bo i vibaakeekala nsiku ingi pasili kuba na likolo ao mukulu, kabili tebakaba na ngelelo, ao mabue azuuke, ao efodi, ao mikisi.
HOS 3:5 Pa kyamba, Baizraeli baakabwela kumukeba Yawe Leza wabo, ni likolo wa mu luvyalo lwakua Daudi. Mu nsiku ya mpeleezio baakeeza balimukumututumina Yawe, ni kututumina mapaalo.
HOS 4:1 Mwe Baizraeli, unvue keebo kakua Yawe, pantu Yawe alimukumisongela mwe bekeele mu kyalo walimukulanda nangue, “Mu kyalo temuli bukisinka ni ntono, kwinika Leza tekulimo.
HOS 4:2 Muli sie ntiipu, bufi ni bungipaani, bukabooko pamo ni bukende mwaya kyalo, ni bungipaani tekuba bwapua.
HOS 4:3 Ni pakako, kyalo kilimukulilooka, ni bonse bekeelemo baakafua. Nama ya mu kisonso ni tooni twa mu lweleele, pamo ni masabi a mu lyezi byaakafua.
HOS 4:4 “Kubalua muntu tekuti aye wasongela mwinakue, kubalua muntu tekuti aye wamwitendookela mwinakue, pantu bantu bobe bali nga balia balibasongela kitambua.
HOS 4:5 Wewe uliwaipuutala busiku ni koba, bakabika ba bufi balibaipuutala pamo nobe. Ni pakako, nakaba kumulovia noko.
HOS 4:6 Bantu baane bainooneka pa mulandu wa kusimana. “Pa mulandu wa kukaana bukengezi, ni ne ndikumikaana tekuti muye mwali babitambua bane. Pa mulandu wa kukaana mizilo yane ne Leza wenu, ni ne nsipoozako maano ku baana benu.
HOS 4:7 Kukonkana ni vivulile babitambua, i vivulile ni bibalo bibaliban'mbala. Naakaalula bulumba kuba busoni.
HOS 4:8 Balibalia ngelelo ya bibalo iliyaleetua na bantu bane, ni kuwaminua na bubi bwa bantu bane.
HOS 4:9 Ni pakako, vilivyakita babitambua, i vilivyakita ni bantu. Bonse babili naakabakanda kukonkana ni misango yabo, ni kubasazia mubeeleele bikitua byabo.
HOS 4:10 “Anzia bakalia, tebakeekuta, anzia bakakambula, tebakaba na baana, pantu baamufunghamiine Yawe ni kukonkelela baleza bange.”
HOS 4:11 Kukita bukambue, ni kumina divai ya kale pamo ni ya lenu, bebio i bilibyabalengia kusiba na bukengezi.
HOS 4:12 Bantu bane balibalomba nsokezi ku mukisi wa kimuti, ni kuya ba-asukua na kabango ka kimuti. Mutima wa bukambue uliwabazeezia. Tebali na bukisinka kuli Leza wabo.
HOS 4:13 Balibaelela ngelelo peulu lupili, ni ngelelo ya kuziziiwa peulu tupili, mwinsina bimuti bya oaki, ni bya popla pamo ni bya terebenti, momo muli bulelo buweme. Ni pakako, baana benu bakazyana i kibalimukukitila bukambue, ni bamuka baana benu i kibalimukukitila bukende.
HOS 4:14 “Nsikakanda baana benu banakazi lubalibaakita bukambue. Ao bamuka baana benu lubalibakita bukende, pantu balalume bene i balibakita bukambue, ni kwelela ngelelo pamo ni bakambue. Balibaelela pa nkendo ya kupupilapo nga mulandiile mapinda nangue, ‘Bantu basikengeele, balobele.’”
HOS 4:15 “We Izraeli! Anzia kine wakikita bukende, tekumulengia Yuda kuba ni bubi. “Tekuya kupupa ku Gilgali, ao ku Bet-Aveni. Kabili tekuye kukitako mulapo nangue, ‘mu Liina lyakua Yawe mukose.’”
HOS 4:16 Baizraeli, bataale nga nghombe musoka. Kubako Yawe kuti wabasunga syani nga mikooko mu bikusi bibisi?
HOS 4:17 Efraimu wailunda ku mikisi, musie bunke.
HOS 4:18 Banombozi ba Baizraeli lubalibapua bikolani byabo, balibatwalilila mu bukambue bwabo, ni kutonesia mibeele ya busoni.
HOS 4:19 Mulula wakaba kubapyangila kule, ni ngelelo yabo yakaba kubaleetela busoni.
HOS 5:1 “Mwe babitambua unvue! Poozeko maano mwe Baizraeli! Mwe nghanda ya bukolo twilizie! Bobu bupinguzi ni pa mulandu wenu: Mwemue mwaali muteo ku Misipa, bukila buteelue pa lupili lwa Tabori.
HOS 5:2 Babisanguka bakila kwipaana. Nene nakaba kubakanda bonse.
HOS 5:3 N'manine byonse palwakua Efraimu, Izraeli tanfyeme. We Efraimu, watendeka kukita bukambue, Izraeli waitiikania.
HOS 5:4 “Bikitua byabo tebibetabiizie, kubwela kuli Leza wabo. Mupasi wa bukambue uli mu mitima yabo, tebamumanine Yawe.
HOS 5:5 Izraeli wasininkiziiwa na kiitoni kyakue. Baizraeli ni Efraimu baipuutala mu bibalo byabo. Yuda ni ye waipuutala pamo nabo.
HOS 5:6 Lubalibaya ni mikooko yabo pamo ni nghombe, kuya kumukeba Yawe, tebezi kumusanga, pantu abafunghamiine.
HOS 5:7 Tebakili ba kisinka kuli Yawe. Bakivyala baana mu bukambue. Nsikunkulu yabo ya kubaluka kwa kwezi yaakabalovia, pamo ni makaba abo.
HOS 5:8 “Lizie ntandala mu Gibea, lisengo mu Rama. Samune lizui lya bului mu Bet-Aveni, mu kyamba kyobe we mukowa wakua Benyamina.
HOS 5:9 Efraimu waakasiiwa kibolia mu nsiku ya kukandua. Bindimukulanda pa mikowa ya Baizraeli ni bya kisinka.
HOS 5:10 Banombozi ba Bayuda bali nga bantu balibatelulula mabue a mu mipaka pasili nsambu. Naakapongola kikonko kyane pali bene nga kibunda kya menda.
HOS 5:11 Efraimu waemiiwa, wabiibikiziiwa mu bupinguzi, pakafi ka kutona kupupa mikisi.
HOS 5:12 Nene ndi nga nondo kuli Efraimu, ndi nga kintu kibolele ku Bayuda.
HOS 5:13 “Efraimu lu-aamwene bulwele bwakue, ni Yuda bilonda byakue, Efraimu i lu-aile ku Asuria, ni kutuma mikenzi ya kuya kulomba bukwasi kuli likolo mukulu. Inzi tali na buvinde bwa kumikosia, ao kukosia bilonda byenu.
HOS 5:14 Ni pakako, naakaba nga nkalamu kuli Efraimu, nga nkalamu asasile kuli Yuda. Naakabazanghununa tuniini tuniini ni kuya, naakabatwala kule kusikaba wa kubapususia.
HOS 5:15 Pa kyamba, naakabwelela pa kifuka kyane mpaka musita ubaakeetabila bubi bwabo ni kukeba lukebu lwane. Mu maavia abo baakankeba na mute.”
HOS 6:1 “Ize tubwelele kuli Yawe. Wakituzanghununa tuputu tuputu, inzi wakaba kutukosia. Wakitukisia, inzi wakatukakilila bilonda byetu ni kutundapa.
HOS 6:2 Pa kyamba kya nsiku ibili wakaba kututuntumuna. Mu busiku bwa butatu wakaba kutubuusia, pakuti tukabe bakose pa ntanzi yakue.
HOS 6:3 Kansi tumumane Yawe. Tumumane twakoniizie. Kisinka nga vilivyatula koba, i vi-ali wakaba kumoneka. Wakaba kwiza kuli fwefue nga nvula ya muloboko, nga nvula ya mpeleezio iliyatomia pa kyalo.”
HOS 6:4 “We Efraimu! Nkukite syani? We Yuda! Nkukite syani? Ntono yenu ili nga fuube wa lukeelekeele, nga lume lwa kumakia lusililwakokola kuzeeza.
HOS 6:5 Ni pakako, nakimiputulania tuputu tuputu kupitila mu bakabika bane. Nakimipaya na twebo twa mu kanua kane, bupinguzi bwane bwaakasaama nga kisue kya koba.
HOS 6:6 Pantu nene ntonene nkumbu, tekuba ngelelo, ni kunakila Leza kukila ngelelo ya kuzizia.
HOS 6:7 Inzi ku Adamu, bainoonene kipingo, koko, kubasibanga ba kisinka kuli nene.
HOS 6:8 Gileadi i muzi wa bankitatubi, muzi utiikaaniiziwe na mulopa.
HOS 6:9 Nga vili mabumba a bapoti balibafyamina bantu, i vili ni libumba lya babitambua. Balibaipaya bantu mu nzila ya ku Sekemu, ni kukita bintu bibiipile.
HOS 6:10 Nakimona kintu kibi mu Izraeli. Momo mulimukukita Efraimu bukambue. Izraeli waitiikania.”
HOS 6:11 “Ni palwakua wewe Yuda, musita wa kuzombolua uteaniiziwe. Musita unakaba kubwezia bakakua ba pa bantu bane.”
HOS 7:1 “Lyonse lundinakeba kukosia Izraeli, bibalo byakua Efraimu bilibyabiikua paswetele. Bubi bwakua Samaria bulibwafyulua, balibapompolana, bakabooko balibaingililana mu nghanda, babipoopoosi balibasompolana mu misebo.
HOS 7:2 Inzi tebenikile nangue nangulukile bikitua byabo byonse bibi. Bibalo byabo bibazyungulukiile, ni byo bili pa ntanzi yane lyonse.”
HOS 7:3 “Balibamusansamusia likolo na bilubo byabo, ni babiloolo na bufi bwabo.
HOS 7:4 Bonse balibakita bukende, baswelele nga kyapiko kya mikate, kekio kili ni mulilo usikebekele kusonseziiwa na kaapika wa mikate kutula musita wa kukandila bunga mpaka musita wa kututumuka.
HOS 7:5 Mu busiku bwa nsikunkulu yakua likolo wetu, babiloolo balibaleema na bikolani, ni likolo aliwailunda ku bantu bali ni mufuupula.
HOS 7:6 Mitima yabo ili nga kikuka kya mulilo, balibamuwila likolo mu bubi. Kipuki kyabo kilikyafunka kyunsi busiku bonse, ni lukeelekeele kilikyatuutuuka nga libeebe lya mulilo.
HOS 7:7 Baswelele nga kyapiko kya mikate. Balibazakila bakateeka babo. Makolo abo onse aliapona, kabili tepali muntu aliwankuuta.”
HOS 7:8 “Efraimu esanziizie mu ntundu. Efraimu i mukate umaatikile upiile bwala bumo.
HOS 7:9 Baeni bamupwile maka, inzi wene tenikile. Mu misisi yakue muli ni ndale pale pale, inzi wene tamanine.
HOS 7:10 Kiitoni kyakua Izraeli kilikyamusininkizia, anzia evio, tamubweleele Yawe Leza wakue ao kumukeba.”
HOS 7:11 “Efraimu ali sie nga nkunda, tezi kukokola kubeepua, kabili tali na maano. Musita umo aliwakuuta ku Misri, ni unge musita aliwaya ku Asuria.
HOS 7:12 Mu lwendo lwabo nakaba kubateela bukila, nakaba kubakula ni kubaponiizia pansi nga tooni twa mu lweleele. Pankaba kunvua nangue balimukukolonghana pamo, nakaba kubakwata.
HOS 7:13 Lisyamo lyabo, pantu bakinfunghamina! Busanzo buli pali bene, pantu bakinsangukila. Ntonene kubalubula, inzi baliban'mbeepezia.
HOS 7:14 Tebalimukundilila na mitima yabo yonse, inzi balimukuloosia baleele pa malita abo.” Balimukukolonghana pamo balomba baleza babo pa mulandu wa nghano ni pa mulandu wa divai ya lenu. Baba bantu banfunghamiine.
HOS 7:15 Ndinabasambilizia ni kubakoselezia, inzi balibankambila.
HOS 7:16 Tebezi kumubwelela Kabezia Mpungu. Bali nga buta busifimbile. Banombozi babo baakeepawa na kipanga pa mulandu wa twebo twabo twa bukisanguka. Ni pakako, baakafuupulua mu kyalo kya Misri.
HOS 8:1 “Biika ntandala ku kanua kobe! Kipungu kili peulu nghanda yakua Yawe pantu bantu bakityona kipingo kyane ni kusangukila mizilo yane.
HOS 8:2 Izraeli wandilila, ‘We Leza wetu, tukumanine!’
HOS 8:3 Inzi Izraeli wakikaana kiweme. Mulwani wakaba kumukumbizia.
HOS 8:4 Balibabiika makolo pasili kutona kwane, balibasaakula babiloolo tekuba nabapeele nsambu. Balibaikitila mikisi ya mutofue ni ya oro mu kwileetelela lwinoono.
HOS 8:5 Mwe Basamaria, pooze mukisi wenu wa nghombe ndume! Nene n'mbafiitiilue, baakaba batiikeenetiikeene sie mpaka musitaki?
HOS 8:6 Ozu mukisi wa nghombe musoka ufumine ku Izraeli! Ukitilue na muntu amanine ozo mwilo. Ozo mukisi te Leza. Mukisi wa Basamaria wakaba kutyonua tuputu tuputu.
HOS 8:7 “Balibabyala mwela ni kuzombola mulula. Musense usili na musokoti, teuvinda kufumia bunga. Ufumiengeko mbezu, baeni nga baitelekele.
HOS 8:8 Izraeli atelekelue, evi ali pa bukata bwa ntundu nga kintu kya mpuni.
HOS 8:9 Pantu bakisela ku Asuria, nga punda wa mu kisonso aliwaendooka bunke. Efraimu waki-isisia ye mwine ku batonua.
HOS 8:10 Anzia kine bai-isisiizie bo bene pa ntundu, nakaba kubakolonghania pamo. Bakaba kubamba konda na kubiibikiziiwa na likolo wa maka.
HOS 8:11 “Anzia kine Efraimu waakuulile bitale bingi bya ngelelo ya bibalo, bya-alukile bitale bya kukitilapo bibalo.
HOS 8:12 Naabalembeele bintu bingi palua mizilo, inzi baabimwene nga kintu kyeni.
HOS 8:13 Anzia kine balimukungelela ngelelo kuba bupe, kabili anzia kine balimukulia nama, Yawe tabawamiinue. Evi wene wakaba kulanguluka bubi bwabo ni kubakanda pa bibalo byabo. Bakaba kubwelela ku Misri.
HOS 8:14 Izraeli wakimulaba Kabumba wakue, ni kukuula nghanda ingi ya bukolo. Mu mizi ingi Yuda wakikuulamo byubo. Inzi nakaba kutuma mulilo mu mizi yabo, mulilo wakaba kufita byubo byabo.”
HOS 9:1 We Izraeli, tekuwaminua, tekusangalala nga Bazima. Pantu tewakiba wa kisinka kuli Leza obe, utonene kuongua mu bukambue mu nkendo yonse ya kupuulilamo nghano.
HOS 9:2 Kipuulilo kya nghano ni kya kutikilamo divai, tekikabeekusia. Divai ya lenu yaakaba yabakeepeele.
HOS 9:3 Tebakeekala mu kyalo kyakua Yawe, Efraimu waakabwelela ku Misri ni kulia bilio bitiikeene mu Asuria.
HOS 9:4 Tebakamupongwela Yawe bupe bwa divai, ngelelo yabo teikikamuwamina. Ngelelo ya ozo musango kuli bene yaakaba nga mukate wa balia balimukuloosia. Bonse balibalia bebio bilio baakaba batiikeene. Bebi bilio bilikuya byali bya bo bene. Tekuti bitwalue mu Nghanda yakua Yawe.
HOS 9:5 Mwaakakitaki mu busiku bwa nsikunkulu yenu ibiikilue, pa busiku bwa nsikunkulu yakua Yawe?
HOS 9:6 Anzia kine bapusuka mu busanzo, Misri wakaba kubakolonghania, ni Memfisi wakaba kubaziika. Kipao kyabo kya mutofue kyaakamenamo mikunkuli, ni myunga yakaba kukupilila mitanda yabo.
HOS 9:7 Nsiku ya kukandua yapalama, nsiku ya kusaziiwa yakumana. Izraeli amane evio. Pantu bibalo byenu byavulisia ni bulwani bwenu bwatanisia, kabika amwenue kuba kipuba, muntu alombwelue na mweo, kuba wa luuba.
HOS 9:8 Kabika ali ni Leza wane, i musungi pali Efraimu. Anzia kili evio, miteo imupembeele monse mu-aliwapita, bulwani ni bo mu Nghanda yakua Leza wakue.
HOS 9:9 Bakikila kwi-ingizia mu bituulilo nga vikyaali mu nsiku yakua Gibea. Leza waakalanguluka bubi bwabo ni kubakanda pa mulandu wa bibalo byabo.
HOS 9:10 “Lunaamusangile Izraeli, kyaali kyali nga kusanga mizabibu mu kaseeba. Lunaamwene babikolue benu, kyaali kyali nga kumona mazabo a kutendekelapo a ku kimuti kya miku. Inzi lubaafikile ku Baali-Peori baizuukiizie bo bene ku mikisi ya busoni, ni bo baitiikaaniizie nga kintu kibaatonene bo bene.
HOS 9:11 Bulumba bwakua Efraimu bwaakapupuka nga koni, tekuli kuvyala, tekuli liimi, tekuli kwimita.
HOS 9:12 Anzia balela baana, naakabeepaya, tekuli waakasyalapo. Lisyamo lyabo musita unakaba kubafunghamina!
HOS 9:13 Efraimu naamumwene nga Tiro, abyelue pa bulongo bufukile, inzi Efraimu waakatwala baana bakue ku bangipaani.”
HOS 9:14 We Yawe, bapeele, kubako ulikubapeelaki? Bapeele tuvumo twa kupulumuna ni kukama kwa mabeele.
HOS 9:15 “Pa mulandu wa bubi bwabo bonse buli mu Gilgali, momo i munaabasuliile. Pa mulandu wa bikitua byabo bya bibalo, nakaba kubakumba mu nghanda yane. Nsikikaba kubatona, pantu banombozi babo bonse ni babisanguka.
HOS 9:16 Efraimu wakiinoonua, musila wabo wakifumpa, tebakilimukuseekako buzabo. Anzia kine bakaba kuvyala baana, nakaba kwipaya mazabo a mponvu a mavumo abo.”
HOS 9:17 Leza wane waakabakaana pantu tebaali bamunvua. Baakaba baya banukunta mu ntundu.
HOS 10:1 Izraeli waali muzabibu waali wakula bwino, waali waseekako mazabo. Nga vyaali vyavula mazabo akue, i vi-aali wakila kukuula bitale. Nga vyaali vyatwalilila kyalo kyakue, i vi-aali wakila kufwaniizia mabue akue a mpupo.
HOS 10:2 Mutima wabo ni wa bupompo, ni evi bapalile kutwama bubi bwabo. Yawe wakaba kutuuta bitale byabo ni kwinoona mabue abo a mpupo.
HOS 10:3 I lubaakalanda nangue, “Tetuli na likolo pantu tetwakimutiina Yawe. Inzi anzia kine tubenge na likolo, kubako nga waatukitiileki?”
HOS 10:4 Balibalaya bulayo bwingi, balibalapa milapo ya bufi ni kukita bipingo. Ni pakako, busongezi bulibwamena nga bikusi bilibyaleeta bwimba mu bukaba buliminue.
HOS 10:5 Bekazi ba mu Samaria basakameene pa mulandu wa mukisi wa nghombe musoka wa ku Bet-Aveni. Bantu ba mu Samaria baakaulilila ozo mukisi, evio vyenka ni babitambua bakue balibaupupa, balia bakiba bawaminua na bulumba bwa ozo mukisi, pantu ufumiiziwe kwabo ni kutwalua mu buzia.
HOS 10:6 Ozo mukisi waakatwalua ku Asuria kuba kyabupe kuli likolo mukulu. Efraimu wakaba kusebaana, Izraeli wakaba kumona busoni palua mukisi wakue wa kimuti.
HOS 10:7 Likolo wa mu Samaria waakeenoonua, waakakungululua nga kiputu kya kimuti peulu menda.
HOS 10:8 Pa bifuka bibi bya kupupilapo mukisi paakeenoonua, i nkendo iliyabalilapo Izraeli. Myunga ni tumuti twa bukobola byaakamena ni kukupilila pa bitale byabo. Pa kyamba baakaana mpili nangue, “Ize mutukupilile,” ni kwana tupili, “Ize mutuponene!”
HOS 10:9 “We Izraeli, kutula busiku buwaabalile mu Gibea, koko i kumwasyele. Kubako bului tebwaakitikile ku bankitatubi ba mu Gibea?
HOS 10:10 Pa musita unaakatona, naakabakanda. Ntundu yaakabakolonghanina kuti ikabakake pa mulandu wa bibalo byabo bibili.
HOS 10:11 Efraimu i nghombe musoka asambiliziiziwe, musoka atonene kupuula. Ni pakako, nakaba kumukaka mupingo pa mukosi wakue uweme. Nakaba kumulombola Efraimu, Yuda apalile kutipa, ni Yakobo apalile kupuma bisinde.
HOS 10:12 Byale nsambu mwe bene, zombole mazabo a ntono isiliyapua, lime mu nsinde pantu i musita wakumukeba Yawe mpaka pa-akaba kwiza ni kuminookiizia bulunghami.
HOS 10:13 Inzi mwaalimbile bilubo, mwaazombwele bubi, mwaaliile buzabo bwa bupompo, muketekeele sie maka enu mwe bene, ni bwingi bwa balukale benu.
HOS 10:14 Ni pakako, nsungu ya bului yaakaba pa bantu bobe, ni byubo byobe byonse byaakeenoonua nga vyainoonenue Beti-Arbeli na likolo Salmani pa busiku bwa bului, nghina ni baana bakue lubaapoozelue pansi na maka.
HOS 10:15 Evi i vikyaakakitika ni kuli wewe Beteli, pantu bubi bobe ni bukata. Bobo busiku pa bukakia, likolo wakua Izraeli waakaloviiwa.”
HOS 11:1 “Izraeli lu-aali wakili mwanike, naamutonene, ni kufuma ku Misri, naamukuutile mwanane.
HOS 11:2 Inzi nga vibaali bakila kukuutua, i vibaali bakila kuya kule ni nene. Baeleele ngelelo ku ba Baali ni kufunkia bubaani ku mikisi.
HOS 11:3 Nene i waamusambiliziizie Efraimu kwenda, nabakwete ku maboko, inzi tebainikile nangue nene i waabakosiizie.
HOS 11:4 Naabalombwele na nkamba ya nkumbu ya bumuntu, na nkakilo ya ntono, kuli bene naali nga olia aliwatwama mwana pa nkombe, kabili naafwineeme kuti n'mbaliisie.
HOS 11:5 “Kubako tebakabwelela ku Misri ni kuteekua na Asuria pantu baakeene kulapila?
HOS 11:6 Kipanga kyaakabeekia mu mizi yabo. Kyaakazakila minkolonto ya milyango yabo ni kupwisia mapange abo.
HOS 11:7 Bantu bane bekinkiziizie kuti ban'mbutuke. Anzia kine balibankuuta Leza Kabezia Mpungu, ata pakaba syani, nsikavinda kubasezia.
HOS 11:8 “Kuti nakusia syani we Efraimu? Kuti nakulekelela syani we Izraeli? Kuti nakukitila syani bibiipile nga vinaakitiile Adma? Kuti nakukita syani nga Zeboimu? Mutima wane walulukile mukati mwane, nkumbu yane yonse ibuukulukile.
HOS 11:9 Nsikafikilizia kikonko kyane kikata, kabili nsika-alulula malanga ni kumwinoona Efraimu paakale, pantu nene ndi Leza, kabili nsili muntu, ndi Muzuuke pakati kenu. Nsikeeza kukanda mizi yabo.
HOS 11:10 Baakamukonka Yawe. Waakabuluma nga nkalamu. Lu-aliwabuluma, baana bakue balibaiza kufuma ku mboosi balimukututuma.
HOS 11:11 Baakeeza kufuma ku Misri, balimukututuma nga minsole, kufuma ku Asuria, bapupukile nga nkunda. Naakabeekazia mu nghanda yabo ingi,” nangue Yawe.
HOS 11:12 Efraimu anzyungulukiile na bufi, Izraeli na bupompo, inzi Bayuda baatwaliile kuba ba kisinka kuli Leza, Leza Muzuuke wa kisinka.
HOS 12:1 Efraimu aliwailiisia mwela. Aliwakumba mwela wa ku kabanga koba konse ni kuvuzia bufi ni bubi. Aliwaunvwana ni Asuria ni kutuma mafuta a mizeituni ku Misri.
HOS 12:2 Yawe ali ni mulandu ni Yuda. Wakaba kumukanda Yakobo kukonkana ni mibeele yakue ni kumusazia kukonkana ni bikitua byakue.
HOS 12:3 Yakobo lu-aali munda, waamusakatiile mukuluube lya ku kasinghino. Wene lu-aakulile, waalwile na Leza.
HOS 12:4 Waalwile na malaika ni kumwanzia, waalilile ni kulomba buwame. Waamusangile ku Beteli ni kwambaula ni ye koko kwenka.
HOS 12:5 Yawe Leza wa Maka onse, Yawe i liina lyakue!
HOS 12:6 Inzi upalile kubwela kuli Leza obe. Sunga ntono ni bulunghami, ni kupempa Leza obe lyonse.
HOS 12:7 Musulu aliwabombia tulingo twa bupompo, aliwatona kukalana.
HOS 12:8 Efraimu aliwaitantamuna, “Nene ndi munonsi mukata. Nakyaluka munonsi. Mu bunonsi bwane bonse, tebakansangamo na lubiibi ao na kibalo.”
HOS 12:9 “Nene ndi Yawe Leza wenu waamifumiizie ku Misri. Naakamilengia kwikala paakale mu maema, nga mu nsiku ya nsikunkulu yenu yaabiikilue.
HOS 12:10 Naalandile na bakabika, naabapeele bimonua bingi ni kulandila mu bipalo kupitila muli bene.”
HOS 12:11 Kubako Gileadi te mubi? Bantu bakue ni ba mpuni! Eba, balibaeleela nghombe ndume mu Gilgali? Bitale byabo byaakaba nga milui ya mabue mu bukaba buliminue.
HOS 12:12 Yakobo waabutukiile mu kyalo kya Aramu, Izraeli waabombele pakuti apate mukazi, ni pakuti alipe pa mulandu wa mukazi, waasungile mikooko.
HOS 12:13 Yawe waabombiizie kabika pakuti amufumie Izraeli ku Misri, kupitila muli kabika waamusungile.
HOS 12:14 Inzi Efraimu waasonseziizie kipuki kyakua Yawe, Mulopue wakue waakamupenda kuba wa kilubo pa mulandu wa bungipaani bwakue ni kumukanda pa mulandu wa mufuupula wakue.
HOS 13:1 Efraimu lu-aalandile, bantu baatutumine. Waalumbilue mu Izraeli. Inzi waisangile kuba mubi pa mulandu wa kupupa leza Baali, ni ye waafwile.
HOS 13:2 Evi balimukukila kubala. Balimukwikitila mikisi na mutofue wabo mu musango ubamaniinemo bo bene, byonse byaakitilue na bantu bamanine mwilo. Kilandilue palua baba bantu nangue, “Balibafumia bantu kuba ngelelo! Balibakumbatila mukisi wa nghombe musoka!”
HOS 13:3 Ni pakako, baakaba nga fuube wa lukeelekeele, nga lume lusililwakokola kuzeeza, nga makapa aliaululua na mwela pa kipuulilo, nga kyunsi kilikyafumina pa nzota.
HOS 13:4 “Inzi nene ndi Yawe Leza wenu kutula pa musita umwaafumine ku Misri, temupalile kukindika unge Leza inga sie nene, tekuli Mupususi unge inga sie nene.
HOS 13:5 Naakulabukiile mu kaseeba, mu kyalo kya kyaka.
HOS 13:6 Lunaabaliisiizie, baikutile. Lubaikutile, ba-alukile ni kiitoni. I kyaalengele kuti bandabe.
HOS 13:7 Ni pakako, naakaba nali nga nkalamu kuli bene, nga kanfuma, naakababenza mu nzila.
HOS 13:8 Nga kimbui kiibiilue baana bakue, naakabasakukila ni kuzanghununa mitima yabo. Nga nkalamu mukota, naakabazakila. Nama ya mu kisonso yaakabazanghununa tuputu tuputu.
HOS 13:9 “Wainoonua we Izraeli pantu wanfunghamina. Wafunghamina mukwasi obe.
HOS 13:10 Ale likolo obe wakuti akupususie alipi? Bakateeka ba mu mizi yobe yonse bali pi balia bawaanombele nangue, ‘N'mpeele likolo ni babiloolo?’
HOS 13:11 Mu kipuki kyane naakupeele likolo, ni mu kikonko kyane naamufumiiziepo.
HOS 13:12 Bubi bwakua Efraimu busungilue, bibalo byakue bilembelue.
HOS 13:13 Wene misa iliyamwizila nga mwanakazi alimukuvyala mwana, inzi ozo mwana tali na mulangue. Musita kine wakumana, aliwa-anda kufuma munda mwa nghina.”
HOS 13:14 “Naakalubula baba bantu ku maka a kilibu, naakabapususia ku lufu. We lufu, lyemo lyobe lili pi? We kumbo, lwinoono lobe luli pi? “Nsikaba na nkumbu,
HOS 13:15 anzia kine Efraimu akakitikilua na biweme pa ba kwakue, mwela wa ku kabanga kufuma kuli Yawe waakeeza wapuupile kufuma ku kaseeba. Kasulo kakue tekakasula, ni kiina kyakue kya menda kyaakakama. Muluwe wakue waakeenoonua pamo ni bintu byonse bilimo bya mutengo.
HOS 13:16 Bantu ba mu Samaria bapalile kwisanga bali ni mulandu, pantu bakimusangukila Leza wabo. Baakaloviiwa na kipanga. Baana babo baniini baakafuntwilua pansi na maka, banakazi bemisi ba mu Samaria baakatumbulua.”
HOS 14:1 We Izraeli, bwelela kuli Yawe Leza obe. Bibalo byobe byakikuponia!
HOS 14:2 Be mwali ni twebo mubwelele kuli Yawe. Mumwane nangue, “Eleela bibalo byetu byonse ni kutupokelela na buwame, pakuti tufumie buzabo bwetu bwa ku milomo.
HOS 14:3 Asuria tavinda kutupususia, tetukikasela pa farasi wa bului. Tetukikalanda nangue, ‘Baleza betu’ ku bintu bitwaakitile na minue yetu, pantu kuli wewe, mwana nsiwa aliwaunvwilua nkumbu.”
HOS 14:4 “Naakoondapa butaale bwabo ni kubatona na mutima wane onse, pantu nsikibafiitiilue.
HOS 14:5 Naakaba nga lume kuli Izraeli, waakatoota nga buluba. Waakengizia misila pansi nga kimuti kya mumpelempele kya ku Lebanoni.
HOS 14:6 Misambo yakue yaakabazalala. Kuvumba kwakue kwaakaba nga kimuti kya muzeituni, bunu bwakue nga kimuti kya mumpelempele kya ku Lebanoni.
HOS 14:7 Bantu baakeekala mu bulelo bwakue paakale, baakasana nga nghano, baakatoota nga mizabibu. Kumanika kwakua Izraeli kwaakaba nga divai ifumine ku Lebanoni.
HOS 14:8 We Efraimu, kubako ni bwampanoki buli pali nene ni mikisi? Nene ndikukwasuka ni kukulabukila. Nene ndi nga kimuti kibisi kisili kyauma lyonse. Kuseeka kwa mazabo kobe kulikwafuma kuli nene.”
HOS 14:9 Nani ali ni mulangue? Enike totu twebo. Nani ali ni maano? Amane totu twebo. Nzila yakua Yawe ilungheeme, balunghami i balibaendamo, inzi babisanguka balibaipuutalamo.
JOE 1:1 Mpunda ya keebo kakua Yawe yaizile kuli Yoeli mwana mwina Petueli ni ezi.
JOE 1:2 Mwe masiiko unvue kaka keebo, mwe bekazi bonse ba mu kyalo kya Yudea twilizie! Kubako kintu kya ozu musango kyaakitikilepo kale mu nsiku yenu, ao mu nsiku ya babikolue benu?
JOE 1:3 Kaka keebo mukabe kwanako baana benu, baana benu ni bo bakaaneko baana babo, ni babo baana babo bakaaneko nvyalo yaakakonkapo.
JOE 1:4 Belia byaasiilueko na balyambala, byaaliilue na kisepe kya luzie. Byaasiilueko na kisepe kya luzie, byaaliilue na bazingilila. Ni byaasiilueko na bazingilila, byaaliilue na mifwinzi.
JOE 1:5 Mwe bakyakolua, buuke mulile. Mwe bamini ba divai, angule. Angule pa mulandu wa divai ya lenu, pantu mwakipokua ku milomo yenu.
JOE 1:6 Kisepe kya luzie kyakisakukila kyalo kyane, kisepe kya luzie lusililwapendeka, lolo luli ni meeno a nkalamu, ni luli ni lumuma lwa nkalamu mukota.
JOE 1:7 Lwakiinoona mizabibu yane, lwakilovia miku yane, lwakyubulako mamba, lwaki-apooza kule. Lwakisia misambo yaswetele sie pepepe.
JOE 1:8 Lila nga kinundue avwele lisaaka, kinundue onvwile bulanda pa mulandu wa kufwilua na musakua wakue.
JOE 1:9 Bupe bwa misenga ya nghano ni bupe bwa bya kumina, tebukili bwaleetua mu nghanda yakua Yawe. Ni pakako, balia babitambua balibabomba ntanzi yakua Yawe, bali mu malilo.
JOE 1:10 Makaba ainoonua, musili waumina. Tekukili nghano, tekukili divai ya lenu, mafuta a mizeituni akama.
JOE 1:11 Mwe balimi polokelue, mwe balimi ba mizabibu lile. Unvue bulanda pa mulandu wa nghano ni shairi, pantu buzombozi bwa mu makaba enu bwainoonua.
JOE 1:12 Misila ya mizabibu teisyaumine. Bimuti bya miku tebisyafumpile. Bimuti bya komamanga ni bya bunkindu pamo ni bya pome, byonse tebisyaumine. Kisinka nsansa ya bantu teisyapwile.
JOE 1:13 Mwe babitambua, vwale masaaka mulile, mwe balibabombela ku kitale, loosie. Ize mupunge busiku bonse mwavwele masaaka. Mwe balibabombela Leza wane, pantu bupe bwa misenga ya nghano ni bupe bwa bya kumina tebukili bwaleetua mu Nghanda yakua Yawe.
JOE 1:14 Punde palua kuizilika kuzuuke. Kuute libumba lya bazuuke. Kuute masiiko pamo ni bonse bekeele mu kyalo, baye mu Nghanda yakua Yawe Leza wenu, ni kumulilila Yawe.
JOE 1:15 Lisyamo pa bobo busiku! Pantu busiku bwakua Yawe bwapalama, bwakaba kwiza nga lwinoono kufuma kuli wa Maka onse.
JOE 1:16 Twimweneene na menso etu bilio vibisikilibyamoneka, ni mu nghanda yakua Leza vimusikili nsansa ni musangalalo.
JOE 1:17 Mbezu teisyaumine mu bibungulu bya bulongo buume. Mu milue temukili kantu, milue ya bilio yatuutua, pantu temukili kantu.
JOE 1:18 Mone nghombe vi-ilimukulila! Bisepe bilimukwema pantu tebikili na bilio. Bisepe bya mikooko ni byo bilimukwema.
JOE 1:19 We Yawe nakukuuta. Nakukuuta pantu mulilo wazizia bikusi bya mu kisonso. Ni libeebe lyazizia bimuti byonse bya mu makaba.
JOE 1:20 Nama yonse ya mu kisonso ni yo yakulilila, pantu twezi twa menda twakikama. Mulilo wazizia bikusi byonse bya mu kisonso.
JOE 2:1 Lizie ntandala mu Sayuni, Punde pa lupili lwane luzuuke. Bekala kyalo bonse batutume pantu busiku bwakua Yawe bwapalama, pasia bufike.
JOE 2:2 Bwaakaba busiku bwa nfinzi ni bulanda, busiku bwa malezi ni kifutika. Nga vilivyakumana kakula mwaya mpili, i vilimukwiza ni kisepe kya maka kya luzie. Kutula pa kale tepanakitike kintu nga keki, kabili tekikabako ku nvyalo ilimukwiza.
JOE 2:3 Ku ntanzi ya luzie, mulilo ulimukuzizia. Ku kyamba, libeebe lilimukutuutuuka. Ku ntanzi ya luzie, kyalo kili nga bukaba bwa mu Edeni. Ku kyamba kya luzie, kuli nga kaseeba ka kutiinia. Tekuli kyaapusukile pasili kwinoonua na luzie.
JOE 2:4 Nmonekelo ya lolo luzie luli nga farasi. Lwendele lubilo nga baseli ba pa farasi.
JOE 2:5 Ni katuuto nga katuuto ka matyakala a bului, koku lwalimukusontoka peulu lupili lwatuuta nga libebe lilimukuzizia bikusi byume, nga balukale ba maka batanteeme ku bului.
JOE 2:6 Musita ululilwamoneka, ntundu iliyatiina. Kubalua muntu aliwatooboka.
JOE 2:7 Lolu luzie lulilwasakukila nga bantu ba bului. Lulilwasela mu bibumba nga balukale. Lonse lulilwasela mu milongo pasili kusalanghana mu milongo.
JOE 2:8 Lulilwaya pasili kutintana. Kubalua luzie lulilwaya lwalungheeme ku ntanzi. Lulilwapulania lusako pasili kusalanghana mu milongo.
JOE 2:9 Lulilwaya mu muzi lwali lubilo. Lulilwakunduka mu bibumba. Lulilwaingila mu nghanda. Lulilwaingila kupitila mu nzota nga bakabooko.
JOE 2:10 Ntanzi ya luzie, kyalo kiliyakwaka. Myulu iliyasunkeena. Koba ni kwezi bilibya-aluka nfinzi. Ntanda ni yo iliyazima.
JOE 2:11 Yawe wa-ana libumba lya balukale bakue walimukubuluma. Balukale bakue tebezi kupendeka. Kuluma kuli ku balia balukale, balukale banakiile mafunde akue. Busiku bwakua Yawe bwaviizie, bwene busiku bwa kutiinia. Kubako nani alikuvinda kubusipikizia?
JOE 2:12 Yawe walanda evi, “Lapile na mitima yenu yonse mun'mbwelele. Iizilike mulile ni kuloosia.
JOE 2:13 Kaate mitima yenu mu kulanga bulanda, tekuba ngubo yenu.” Mubwelele Yawe Leza wenu wene ali ni buwame pamo ni nkumbu. Wene tezi kulenga kufiitua, ali ni ntono ingi, aliwaeleela lyonse, ni kuya wali lebe mu kukanda.
JOE 2:14 Nani amanine nangue Yawe Leza wenu kuti wa-alulula malanga akue? N'manine nangue Yawe kuti wamipaala na kumipeela buzombozi bwingi, evi ni mwe mumwelele nghano ni bya kumina.
JOE 2:15 Lizie ntandala mu Sayuni, punde kuizilika kuzuuke, kuute libumba lilonghaane.
JOE 2:16 Kolonghanie bantu. Zuukie libumba, kolonghanie bakote, kolonghanie baana, balia bakilibaonka. Syabuinga afume mu muputule wakue, nabuinga ni ye afume mu muputule wakue.
JOE 2:17 Balia babitambua balibabomba ntanzi yakua Yawe, balile pa bukata bwa nghingililo ya Nghanda yakua Leza ni kitale. Balande nangue, “We Yawe eleela bantu bobe. Tekulekelela bupyani bobe kuleebulua na twebo twa kapuni pa ntundu. Ale ni kiki kibalikulandila pa bantu nangue, ‘Leza wabo ali pi?’”
JOE 2:18 Pa kyamba, Yawe waunvwiliile bunkua kyalo kyakue, ni kunvwila nkumbu bantu bakue.
JOE 2:19 Yawe waabaasukile evi, “Unvue, nakaba kumitumina bilio, divai ya lenu pamo ni mafuta a mizeituni, bebio byakaba kumiikusia ni kumiwamina. Nsikikamilekelela kuleebulua na ntundu inge.
JOE 2:20 Nakaba kufumia kisepe kya luzie kifumine ku nkungua ni kukikumbila kule lya ku kaseeba mu musili uume. Luzie lwakaba lwali mu milongo lya ku ntanzi ku kabanga, naakalupooza mu Lyezi lya Mukele, lolia lwaakaba lwali ku kyamba lya ku mboosi naakalupooza mu Lyezi lya Mediterania. Luzie lufwile lwakaba kufumia bunu bubiipile, ni kununka kwa lolo luzie kwaakasalanghana.” Kisinka Yawe wakikita bintu bikata!
JOE 2:21 “We kyalo kya Yudea tekutiina. Waminua usangalale. Kisinka Yawe wakikita bintu bikata!
JOE 2:22 Mwe binama bya mu kisonso tekutiine pantu bikusi bya mu kisonso byavumba paakale. Bimuti byabamba kuseekako mazabo. Bimuti bya miku pamo ni mizabibu byatwamako mazabo engi.
JOE 2:23 “Sansamuke mwe bantu ba mu Sayuni. Sangalale muli Yawe Leza wenu pantu wakimipeela nvula ya muloboko. Wene ni wa kisinka. Aliwaminokiizia nvula ya muvumbi, nvula ya muloboko ni ya kawalala nga viyaali yanoka pa mambo.
JOE 2:24 Nghano yaakeezula pa tubanga twa kupupiiziapo. Ngeso yaakeezulamo divai ya lenu pamo ni mafuta a mizeituni.
JOE 2:25 Ne Yawe naakamibweziizia belia byaalilue na luzie mu myaka yaapitile, byaaliilue na luzie ni balyambala pamo ni mifwinzi, kisepe kyane kikata kinaatumine pakati kenu.”
JOE 2:26 Mwaakaba ni bilio bingi bya kulia ni kwikuta. Mwaakamutasia Yawe Leza wenu, Yawe waamikitiile tupapo. Bantu bane tebakikamoniwa busoni.
JOE 2:27 Papo i pamwaakamana nangue ndi pamo nenu mu Izraeli. Mwaakamana nangue nene ndi Yawe Leza wenu, kabili tekuli unge. Bantu bane tebakikamoniiwa busoni.
JOE 2:28 “Pa kyamba, naakakoosia Mweo wane pa bantu bonse. Baana benu balalume ni banakazi baakabikula. Bakote benu baakaloota bilooto, ni balumendo benu baakamona bimonua.
JOE 2:29 Pa babombi bane balalume ni banakazi ni po mu ezio nsiku naakakoosiiziapo Mweo wane.
JOE 2:30 “Naakalanga tulangi mu myulu ni pa kyalo, mulopa ni mulilo pamo ni mapumpu a kyunsi kitikeeme.
JOE 2:31 Koba kaakaalulua nfinzi, ni kwezi waakakasika nga mulopa, ntanzi ya kwiza kwa bobo busiku bukata bwa kutiinia bwakua Yawe.
JOE 2:32 Inzi kubalua muntu aliwakuuta mu liina lyakua Yawe waakapususiiwa. Pantu peulu Lupili lwa Sayuni ni mu Yeruzalemu, mwaakaba bupusuko nga mwaalandiile Yawe palua balia baapusukile, baakuutilue na Yawe.”
JOE 3:1 “Mu ezio nsiku ni pa ozo musita, musita unaakabwezia bunonsi kuli Yuda ni kuli Yeruzalemu,
JOE 3:2 naakakolonghania mabumba a balukale ba ntundu yonse, naakabakoosiizia mu lulambe lwa Yehoshafati, momo i munaakabapingula. Naakabapingula pa mulandu wa bikitua bibaakitiile bantu bane, Baizraeli, pantu baasalanghaniizie bantu bane mu ntundu inge ni kukasania kyalo kyane.
JOE 3:3 Baateele bubale pa mulandu wa bantu bane. Baasuluziizie balumendo kuti basangemo nfolanga ya kuonga bakambue banakazi. Baasisiizie bakazyana kuti basangemo nfolanga ya kusitamo divai ya kumina.
JOE 3:4 “Ati, mwe bantu ba mu Tiro, ni ba mu Sidona pamo ni kyalo kyonse kya Bafilistini, mulimwankebaki? Mulimukukeba kulandula pa kintu kinakikita? Kine i evio, nene nsikaba kukokola kumibweziizia kilanduzi kukonkana ni vimwakikita.
JOE 3:5 Pantu mwaatweme mutofue ni oro yane, kabili mwaatweme ni kipao kyane kiwamiisie mwaya kutwala mu nghanda ya baleza benu.
JOE 3:6 Mwaasisiizie bantu ba mu Yudea ni ba mu Yeruzalemu ku Bayunani, evi mubatwale kule ni kyalo kyabo.
JOE 3:7 Inzi nakaba kubafumia ku nkendo yonse kumwaile kubasisia, mane nkabe kulandula kuli mwemue pa bintu byonse bimwaakitile.
JOE 3:8 Naakabasisia baana benu balalume ni banakazi ku Bayuda, ni bo bakabasisie ku bantu ba ku Seba, ntundu ikeele kule.” Evi i vyalanda Yawe.
JOE 3:9 “Pundile ntundu mwalanda: Iiteanie kuya ku bului! Kuute balukale! Palamike babipami baye ku kusakukila.
JOE 3:10 Alule nkasu yenu kuba bipanga, ni bikwakua byenu kuba mikuuki. Olia anakile alande nangue, ‘Ndumine!’
JOE 3:11 Mwe ntundu yonse ili koku ni koku, lenge mwize mukolonghane mu lulambe lwa Yehoshafati.” We Yawe, koosia babipami bobe!
JOE 3:12 “Ane ntundu iye, iye ikookele lya ku lulambe lulilwakuutua Yehoshafati, pantu koko i kundikuya kwikala, ni kupingula ntundu yonse ili koku ni koku.
JOE 3:13 Ale twame bikwakua pantu musita wa kuzombola wa kumana. Ize mutike mizabibu pantu mu kitikilo kya mizabibu mwaizula. Nsupa yaizula ni kusempuka pantu bubi bwabo bwatanisia.”
JOE 3:14 We libumba bukata! We libumba bukata mu lulambe lwa bupinguzi! Pantu busiku bwakua Yawe bwapalama mu lulambe lwa bupinguzi.
JOE 3:15 Koba ni kwezi byaakaaluka nfinzi, ni ntanda teikikasanikila.
JOE 3:16 Yawe waakabuluma mu Sayuni ni lizui lya mutukumo lyaakonvwika mu Yeruzalemu, kyalo ni myulu byaakasunkeena, inzi Yawe waakaba kyubo kya bantu bakue, ni kikingililo kya mponvu ku Baizraeli.
JOE 3:17 “I pa mwaakeenika nangue nene Yawe Leza wenu ngikeele mu Sayuni, lupili lwane luzuuke. Yeruzalemu waakaba wazuukile muyayaya, ni baeni tebakikavinda kumwanzia.
JOE 3:18 “Mu bobo busiku mpili yaakatoonia divai ya lenu. Tupili twaakazuumia mabeele. Menda aakaba apita mu tunkolonfua tonse twa mu Yudea. Kasulo ka menda kaakaba kafuma mu Nghanda yakua Yawe ni kuleeta kinwanvi mu lulambe lwa Shitimu.
JOE 3:19 “Inzi mu Misri mwaakaaluka kibolia, mu Edomu mwaakaaluka kaseeba pantu baasanzile Bayuda, ni kwitila mulopa usili na mulandu mu kyalo kyabo.
JOE 3:20 Mu Yudea ni mu Yeruzalemu mwaakeekalua muyayaya. Kubako naakandua kukanda bantu baitilile mulopa wa bantu bane? Abe sie, nsika-andua.
AMO 1:1 Totu i twebo twakua Amosi, umo wa pa basungi ba nama ba ku Tekoa. Twebo tu-aamwene palwakua Izraeli mu myaka ibili ntanzi ya ntensi, Uzia lu-aali likolo wa ku Yudea, ni Yeroboamu mwina Yehoashi lu-aali wali likolo wa Baizraeli.
AMO 1:2 Amosi waalandile nangue, “Yawe wabuluma pa Lupili lwa Sayuni, watukuma mu Yeruzalemu. Bikusi bya kuliiwa na nama tebiliko, bikusi bili peulu lupili lwa Karmeli byauma.”
AMO 1:3 Yawe walanda evi, “Pa mulandu wa bibalo bitatu ao bina bya bantu ba mu Damaski, nsikaba kubalekelela pasili kubakanda, pantu bakitwama bintu bya Bagileadi mu kubombia byela bya busanze.
AMO 1:4 Naakatuma mulilo pa nghanda yakua Hazaeli, ozo waakazizia byubo byakua Ben-Hadadi.
AMO 1:5 Naakatyona mulyango wa Damaski, naakeenoona likolo wa mu Lulambe lwa Aveni, ni olia akwete nkonto ya bukolo mu Beti Edeni. Bantu bonse ba ku Aramu baakaya kuteekua buzia ku kyalo kya Kiri,” koku i kulanda kwakua Yawe.
AMO 1:6 Yawe walanda evi, “Pa mulandu wa bibalo bitatu bya bantu ba mu Gaza ao bina, nsikaba kubalekelela pasili kubakanda. Pantu bakitwama bantu bengi ni kuya kubasisia nga bazia ku Baedomu.
AMO 1:7 Naakatuma mulilo ku bibumba bya muzi wa Gaza, ozo waakazizia byubo byakue.
AMO 1:8 Naakafumiapo makolo a ku Ashdodi ni a ku Ashkeloni. Naakakanda muzi wa Ekroni, ni kwipaya Bafilistini bonse,” koku i kulanda kwakua Yawe Kabezia Mpungu.
AMO 1:9 Yawe walanda evi, “Pa mulandu wa bibalo bitatu bya bantu ba mu Tiro ao bina, nsikaba kubalekelela pasili kubakanda. Pantu bakitwama bantu bengi ni kuya kubasisia nga bazia ku Baedomu. Tebaafikiliizie kipanghano kya bukibuza kibaakitile.
AMO 1:10 Naakatuma mulilo ku bibumba bya muzi wa Tiro, ozo waakazizia byubo byakue.”
AMO 1:11 Yawe walanda evi, “Pa mulandu wa bibalo bitatu bya bantu ba mu Edomu ao bina, nsikaba kubalekelela pasili kubakanda, pantu bakitwama kipanga ni kukumbizia ba kwabo. Bakikaana kumunvwila nkumbu pantu kipuki kyakue kyakiba kyalunduluka musita onse, ni kikonko kyakue pasili kufuukiiwa.
AMO 1:12 Naakatuma mulilo mu muzi wa Temani, ozo waakazizia byubo bya ku Bozra.”
AMO 1:13 Yawe walanda evi, “Ba-amoni bakibala bibalo bitatu ao bina, ni pakako, kisinka nakaba kubakanda. Lubaali basakukila ba Gileadi pakuti belundileko mipaka, baali batumbula mavumo a banakazi baali baimisi.
AMO 1:14 Naakatuma mulilo ku bibumba bya muzi wa Raba, ozo waakazizia byubo byakue mu nsungu ya malilo mu busiku bwa bului, mu mwela ukata mu busiku bwa kinkunsia.
AMO 1:15 Likolo wabo pamo ni babiloolo bakue, baakatwalua mu kyalo kyeni,” koku i kulanda kwakua Yawe.
AMO 2:1 Yawe walanda evi, “Pa mulandu wa bibalo bitatu bya bantu ba mu Moabu ao bina, nsikaba kubalekelela pasili kubakanda, pantu baaziziizie bikuza byakua likolo wa ku Edomu mpaka bya-aluka nga makese.
AMO 2:2 Naakatuma mulilo pa kyalo kya Moabu ozo waakazizia byubo bya mu Kerioti. Moabu waakapona mu nsungu ya bului, balukale pabakaba basamuna, ni ntandala paikaba yalila.
AMO 2:3 Naakeenoona kateeka wa ku Moabu, ni kwipaya babiloolo bakue bonse pamo nakue,” koku i kulanda kwakua Yawe.
AMO 2:4 Yawe walanda evi, “Pa mulandu wa bibalo bitatu bya bantu ba mu Yudea ao bina, nsikaba kubalekelela pasili kubakanda, pantu baakeene kusunga mizilo, ni kukaana kunakila milao yane, pa mulandu wa kukonka baleza ba bufi, baleza baali bapupua na babikolue babo.
AMO 2:5 Naakatuma mulilo mu Yudea, ozo waakazizia byubo bya mu Yeruzalemu.”
AMO 2:6 Yawe walanda nangue pa mulandu wa bibalo bitatu bya Baizraeli ao bina, takaba kubalekelela pasili kubakanda, pantu balibasisia balunghami na mutofue, ni bapabi na mpe imo ya nkwabilo.
AMO 2:7 Balibanyanta pa mitue ya bapabi, nga pa lufunko lwa pa kyalo, ni kukaana kupeela nsambu babiibikiziiziwe. Se ni mwanae mwalalume balibakumana na mwanakazi umo, ni pakako, balibatiikaania Liina lyane lizuuke.
AMO 2:8 Baali balaala mumbali ya kubalua kitale, pa ngubo ipokelue ku bapabi kuti ibe kikwatizi. Baali baminina bikolani mu nghanda ya baleza babo, bikolani bibaali basita na nfolanga ya balia bali ni mizia,
AMO 2:9 Yawe walanda nangue, “Anzia nainoonene Ba-amori, baali baleepele nga bimuti bya mumpelempele, ni kuya balumine nga bimuti bya mwaloni. Nainoonene mazabo abo ku misambo ku muulu, ni kutukuna misila yabo kwinsina.
AMO 2:10 Naamifumiizie mu kyalo kya Misri, ni kumilombola mu kaseeba myaka 40, kuti n'mipeele kyalo kya Ba-amori.”
AMO 2:11 “Kabili pa baana benu naasaakwilepo bamo kuba bakabika, ni pa baana benu balumendo naasakwilepo bamo kuba banaziri. Ati mwe Baizraeli, te i evio?” Koku i kulanda kwakua Yawe.
AMO 2:12 “Inzi mwe mwaalengiizie banaziri kubala mu kumina bikolani, ni kukaania bakabika tekuti babikule.”
AMO 2:13 “Evi ndikumisansa nga tyakala vi-iliyasansa lu-itweme nghano mu masaaka.
AMO 2:14 Olia aliwakundukisia takapusuka, wa maka, maka akue aakapua, ni lukale takeepususia.
AMO 2:15 Kalasa wa buta takeesimpa, aliwakundukisia takazembuluka, ni museli wa farasi takeepususia.
AMO 2:16 Pa bobo busiku anzia kine kukabe bipami biine bya ba balukale, baakabutuka tekuba bavwele kantu,” koku i kulanda kwakua Yawe.
AMO 3:1 Unvue keebo kakilandua na Yawe pa mulandu wenu mwe Baizraeli, mwe lupua lwalingi lunaafumiizie mu Misri:
AMO 3:2 “Mwemue sie i banaasaakwile pa ntundu yonse ya pa kyalo. Ni pakako, naakamikanda pa mulandu wa bibalo byenu.”
AMO 3:3 Ati, kubako bantu babili kuti baenda pamo tekuba baunvwenenke?
AMO 3:4 Ati, kubako nkalamu aliwabuluma mu musitu lu-asinakwate nama? Kubako mwina nkalamu kuti wabuluma mu lisele lu-asinakwate kantu?
AMO 3:5 Ati, kubako kooni kuti kakwatua mu muteo ute-elue pasili kabembo? Ati, kubako muteo kuti wapusa tekuba mwali kya kukwatuamo?
AMO 3:6 Ati, kubako musita uliwaliziiwa ntandala ya bului mu muzi bantu tebezi kutiina? Ati, kubako musita uliwafika busanzo mu muzi, te Yawe aliwabuleeta?
AMO 3:7 Kisinka Yawe Kabezia Mpungu tezi kukita kantu pasili kutubula mapange akue ku babombi bakue bakabika.
AMO 3:8 Nkalamu lu-aliwabuluma, nani asivinda kutiina? Yawe Kabezia Mpungu lu-aliwalanda, nani asivinda kubikula?
AMO 3:9 Ele mukunda mu byubo bya mu Ashdodi, ni mu byubo bya mu Misri nangue, “Kolonghane peulu mpili ya ku Samaria, mone lubebue viluvulilemo, ni kubiibikiziwa mukati mwakue.”
AMO 3:10 Yawe walanda evi, “Bantu ba ku Samaria tebamanine kukita biweme. Bezuziizie bintu mu byubo byabo, bintu bibapokele mu bukabooko ni mu bungipaani.”
AMO 3:11 Ni pakako, evi i vilimukulanda Yawe Kabezia Mpungu nangue, “Basamaria baakazyungulukila kyalo kyenu, baakatuuta byubo byenu ni kupoka nghanda yenu ya kufyamamo.”
AMO 3:12 Yawe walanda evi, “Nga evelia musungi vi-aliwasompola mu kanua ka nkalamu, myendo ibili ao kiputu kya kutui, i vikyaakaba ni ku Baizraeli bekeele mu Samaria, balia baleele pa bulita bwabo, ni ku bantu ba mu Damaski, bantu bekeele mu bitebe byabo bya mutengo.”
AMO 3:13 “Ale twilizie ni kusininkizia palua luvyalo lwakua Yakobo,” koku i kulanda kwakua Mulopue, Yawe Leza wa Maka onse.
AMO 3:14 “Busiku bunakakanda Baizraeli pa mulandu wa bibalo byabo, naakatuuta bitale bya ku Beteli. Tutunfi twa bitale twaakeenoonua ni kuponena pansi.
AMO 3:15 Naakatuuta nghanda ya pa musita wa mainza, ni nghanda ya pa musita wa kipua. Nghanda ifwaniiziwe na meno a nzovu yaakatuutua, ni nghanda yonse ikata yaakeenoonua,” koku i kulanda kwakua Yawe.
AMO 4:1 Twilizie kaka keebo mwe banakazi ba pa lupili lwa Samaria, mwe bali nga nghombe ya ku Basani, mwe balibabiibikizia bapabi, ni mwe balibakita bibiipile ku babulilue, ni kubaana balume benu nangue “tupeele bikolani!”
AMO 4:2 Yawe Kabezia Mpungu waalaile mu buzuuke bwakue nangue, “Kisinka musita ulimukwiza lubakaba kumifumia na ndobaano, ni basyelepo pakati kenu baakaba kulobua na ndobaano nga lisabi.
AMO 4:3 Mwaakafumiziwa lya palia patutikile bibumba, mwakapoozua panze lya ku Harmoni,” koku i kulanda kwakua Yawe.
AMO 4:4 “Endo ku Beteli, muye mubale kibalo, endo ku Gilgali, mulunduluke kubala. Leete ngelelo yenu kubalua lukeelekeele, kamo ka pa lyanondo mu nsiku itatu.
AMO 4:5 Zizie mukate ututumukile nga ngelelo ya kusantila, iitasie palua bupe bumulimwapeela mu kutona kwenu, iitantamune palua bebio byabupe mwe Baizraeli pantu bebi i bimutonene kukita,” koku i kulanda kwakua Yawe Kabezia Mpungu.
AMO 4:6 “Naaleetele kimina kya nzala mu mizi yenu yonse, ni kubulua kwa bilio mu kubalua muzi. Anzia kyaali evio temwambweleele,” koku i kulanda kwakua Yawe.
AMO 4:7 “Ntanzi ya kufikiila kuzombola, nsyaamipeele nvula pa myezi itatu. Naanokiizie nvula mu muzi umo, inzi mu unge muzi nsyaanokiiziemo. Nvula yaanokeele mu bukaba bumo, mu bunge mwaasyele mwaumine pantu nsyanokiiziemo.
AMO 4:8 Bantu baendookele mu mizi ni mizi balimukukeba menda a kumina inzi tebasangilemo a kubakumana. Anzia kyaali evio, temwambweleele,” koku i kulanda kwakua Yawe.
AMO 4:9 “Lingi nainoonene makaba enu ni makaba a mizabibu, naumiizie bimuti na mwela wa lyuza. Luzie lwaaliile bilimbua byonse bya mu makaba enu ni bimuti bya mizeituni. Anzia kyaali evio, temwambweleele,” koku i kulanda kwakua Yawe.
AMO 4:10 “Naatumine kimina pakati kenu, nga vinaakitile ku Bamisri. Naipaile baana benu balumendo na kipanga. Naamipokele farasi yenu. Naizuziizie myona yenu na bunu bwa mibili ibolele mu mitanda yenu. Anzia kyaali evio, temwambweleele,” koku i kulanda kwakua Yawe.
AMO 4:11 “Nainoonene bamo pakati kenu nga evelia vinainoonene Sodoma ni Gomora. Naamisomwene nga kakooko ka-apulua pa mulilo. Anzia kyaali evio, temwambweleele,” koku i kulanda kwakua Yawe.
AMO 4:12 “Ni pakako, evi i vinaakamikitila mwe Baizraeli! Kabili pantu naakamikitila evio mwe Baizraeli, iiteanie kusaakaana ni Leza wenu.”
AMO 4:13 Olia waabumbile mpili ni waalengele mwela, olia aliwafyula malanga akue ku bantu, aliwa-alula lukeelekeele kuba nfinzi ni kwenda pa kyalo pa nkendo ilendukile, Yawe, Leza wa Maka onse, i Liina lyakue.
AMO 5:1 Mwe Baizraeli, twilizie totu twebo twa lwimbo lwa malilo lundimukumimbila.
AMO 5:2 “Kinundue Izraeli aponene, takikabuuka, waasiilue waleele pansi, tekuli wa kumukwasia kubuuka.”
AMO 5:3 Yawe Kabezia Mpungu wa-ana Baizraeli nangue, “Muzi waakatuma balukale 1,000 ku bului, kwaakabwela sie balukale 100. Muzi waakatuma balukale 100 ku bului, kwaakabwela sie balukale lyanondo.”
AMO 5:4 Yawe wabaana Baizraeli nangue, “Nkebe mube ni bukose.
AMO 5:5 Tekunkebe ku Beteli, tekuye ku Gilgali, tekwabuke kuya ku Bersheba. Pantu Gilgali, kisinka waakaya mu buzia. Ni Beteli waaka-alulua kuba mpuni.”
AMO 5:6 Mukebe Yawe mube ni bukose, kine te evio, Yawe waakapyanga bantu ba mu nghanda yakua Yusufu nga mulilo. Ozo mulilo waakazizia Beteli, tekuli muntu waakauzimia.
AMO 5:7 Lisyamo lyenu mwe baliba-alulula nsambu kuba bwimba bululile, ni kupooza nsambu pansi.
AMO 5:8 Olia waakitile Bulimina ni Kipindabusiku pamo ni Orioni, olia aliwa-alulula nfinzi kuba lukeelekeele, ni musita wa koba kuba busiku, olia aliwakuuta menda a lyezi ni ku-etila pa kyalo, Liina lyakue i Yawe.
AMO 5:9 Aliwainoona nghanda lubilo lubilo, ni kutuuta byubo bya mizi.
AMO 5:10 Basuulile olia aliwasasililana mu kilie, baleebwile olia aliwalanda kisinka.
AMO 5:11 Mulimwaabiibikizia bapabi, ni kubeebila buzombozi mu kusonkia musonko. Ni pakako, anzia kine mwaakuulile nghanda ya mabue, temukeekalamo. Anzia kine mwaalimine bukaba bwa mizabibu, temukamina divai ya mizabibu.
AMO 5:12 Pantu n'manine vivulile bilubo byenu ni vitanine bibalo byenu. Mulimwaemia bantu basili na kilubo ni kupoka bituulilo, kabili mulimwatana bapabi nsambu mu kilie.
AMO 5:13 Ni pakako, olia akengeele aliwatalala pa musita nga ozo, pantu musita ubiipile.
AMO 5:14 Kite biweme, tekuba bibiipile, evi mube ni bukose. Ni Yawe Leza wa Maka onse waakaba pamo nenu nga vimulimwalanda nangue pa-ali.
AMO 5:15 Suule bibiipile, tone biweme, biike nsambu mu bilie. Pange Yawe Leza wa Maka onse waakeeleela bantu basyele bakosele ba mu luvyalo lwakua Yusufu.
AMO 5:16 Ni pakako, Mulopue Yawe Leza wa Maka onse walanda evi, “Kwaakaba malilo mu misebo yonse, kuloosia kwa bulanda mu kubalua kisaakaanino kya bantu. Balimi baakakuutua kwiza kulila, ni ba kuloosia bakeeza kuloosia.
AMO 5:17 Mu makaba onse a mizabibu mwaakaba malilo. Pantu naakeeza kupita pakati kenu,” koku i kulanda kwakua Yawe.
AMO 5:18 Lisyamo kuli mwe balibatokamua busiku bwakua Yawe. Mulimwatokaminuaki busiku bwakua Yawe? Bobo busiku bwaakaba nfinzi, tekuba kisue.
AMO 5:19 Kyaakaba nga muntu wabutuka nkalamu, wasaakaana na kimbui, wapanda ku kimbui, waingila mu nghanda yakue, ni kukikilizia kuboko kwakue ku kibumba, wasumua na nzoka.
AMO 5:20 Kubako busiku bwakua Yawe tebukaba nfinzi, pasili kuba kisue? Kubako teikaba nfinzi ikata isili na minghenghe?
AMO 5:21 Yawe walanda nangue, “Nsuulile, ndeebwile nsikunkulu yenu ya mpupo, nsiwamiinue na kulonghana kwenu.
AMO 5:22 Anzia kili evio, mulimwandeetela ngelelo ya kuzizia ni bupe bwa bunga nsikabipokelela. Anzia kine mulimwaleeta bupe bwa mutende, nsikabukentako.
AMO 5:23 Lekele nsungu ya nghimbo yenu, nsikatwilizia nghimbo ya bilimba byenu.
AMO 5:24 Inzi lekele nsambu ipongoke nga mwenzi, bulunghami bube nga kaezi kasili kakama.
AMO 5:25 “Kubako mwe Baizraeli, mwandeeteele ngelelo ni bupe mu kaseeba mu elia myaka 40?
AMO 5:26 Mwakilendula kitale kyakua likolo wenu, Sukoti kateeka leza wenu, ni Kiuni leza wenu wa lutanda, bamwaikitiile mwe bene.
AMO 5:27 Ni pakako, naakamitwala mu kyalo kya buzia, kule kupita ku Damaski,” koku i kulanda kwakua Yawe, ali ni Liina lya Leza wa Maka onse.
AMO 6:1 Lisyamo lyenu mwe bekeele bawamiinue mu Sayuni, mwe beyunvwile mwali ni mutende pa Lupili lwa Samaria, mwe bakindami ba mponvu pa ntundu yonse, mwe baketekeelue na Baizraeli!
AMO 6:2 Endo mwaye mumone muzi wa Kalnehi, muye mumone ni muzi ukata wa Hamati, kabili muye mukookele ni ku Gati, muzi wa Bafilistini. Ati, kubako ezi mizi yaali yawamiisie kukila bukolo bwenu bwa Yuda ni bwa Izraeli? Kubako, kyalo kyabo kyaali kyatanine kukila kyalo kyenu?
AMO 6:3 Mulimwalangakana kusyenia kule busiku bwa masanzo, inzi mwalimukupalamika buteeko bwa kutiinia.
AMO 6:4 Kyaakamibiipila mwe bali balaala pa malita afwaniiziwe na meno a nzovu, ni kuya mwaiyolwela pa bitebe bya mutengo. Mwe balibalia munani wa misoka ya mikooko pamo ni wa misoka ya nghombe itapukile.
AMO 6:5 Mwemue mulimwalizia binanda nga Daudi, mulimwatunga nghimbo ni kulizia bilimba bilekenkeene.
AMO 6:6 Mulimwaminina divai mu nsupa, ni kusuba mafuta a bunu buweme ku mibili yenu. Inzi temulimwaunvua nkumbu pa mulandu wa kwinoonua kwa luvyalo lwakua Yusufu.
AMO 6:7 Ni pakako, mwaakaba mwali mu bantu ba mambo kuya mu buzia. Nsikunkulu yenu pamo ni kuwaminua byaakapua.
AMO 6:8 Yawe Kabezya Mpungu, Yawe Leza mwine wa Maka onse walapa walanda nangue, “Nsuulile kiitoni kyakua Yakobo, nsuulile byubo byakue. Muzi ni kubalua kantu kalimo, naakapeela balwani babo.”
AMO 6:9 Kine mu nghanda imo mwaakasyala bantu lyanondo, ni bo kumo baakafua.
AMO 6:10 Kabili kine muntu wa mu lupua lwa babo bafwile waiza kufumia mibili yabo mu nghanda kuti aye azizie, kine muli muntu wapandanga, wasyele wakosele mu muputule wa nghanda, ozo muntu wa mu lupua lwabo alikumwipuzia nangue, “Ewe, ulimo ni unge muntu akosele?” Kine walanda nangue, “Temuli,” alikumwana evi, “Talala! Fwefue tetupalile kuzimbula Liina lyakua Yawe.”
AMO 6:11 Pantu Yawe wakifumia mwano, wene wakaba kutuuta nghanda ikata bibazu bibazu, ni iniini kutuuta tuniini tuniini.
AMO 6:12 Ati, kubako farasi kuti wakunduka pa myalala? Ati, kubako muntu kuti walima na nghombe pa myalala? Inzi mwemue mwa-alwile nsambu kuba bwimba, ni mazabo a bulunghami kuba bwimba bululile.
AMO 6:13 Mwe balibawaminua kwanziwa kwa muzi wa Lo-debari ni kulanda nangue, “Kubako tetwakikwata muzi wa Karnaimu na maka etu fwe bene?”
AMO 6:14 Pantu Yawe Leza wa Maka onse walanda evi, “Nakaba kulengia ntundu ikabe kumyalukila mwe nghanda yakua Izraeli. Ni yo yakaba kumyemia kutendekela ku Lebo Hamati ku nkungua mpaka ku Lulambe lwa Araba ku mboosi.”
AMO 7:1 Keki i kintu kinaalangisiiziwe na Yawe Kabezia Mpungu. Naamumwene walimukuteania bisepe bya luzie pa kyamba kya kuzombola buzombozi bwakua likolo pa musita waali wamenenapo binge bilimbua.
AMO 7:2 Luzie palwaali lwalimukulia bilimbua byonse bya mu makaba, na-angwile nalanda nangue, “We Yawe Kabezia Mpungu eleela bantu bobe! Kubako Yakobo alikutwalilila syani kuba mukose? Wene akilile kukeepa!”
AMO 7:3 Ni pakako, Yawe wa-alwile malanga akue. Yawe waalandile evi, “Keki tekikaba kukitika.”
AMO 7:4 Kintu kinaalangisiiziwe na Yawe Kabezia Mpungu ni keki: Yawe Kabezia Mpungu waali wakuuta bupinguzi bwa mulilo, ni ozo mulilo waakamiizie lyezi ni kwinoona kyalo.
AMO 7:5 Kabili wa-angwile, “We Yawe Kabezia Mpungu, napaapaata tekukita evio! Kubako Yakobo alikutwalilila syani kuba mukose? Wene akilile kukeepa!”
AMO 7:6 Ni pakako, Yawe wa-alwile malanga akue. Yawe Kabezia Mpungu waalandile evi, “Keki tekikaba kukitika.”
AMO 7:7 Kinaalangisiiziwe na Yawe mu kimonua ni keki: Yawe waali waimeene mumbali kibumba kyaali kyakuulua na kalingo ka kuolwelako, wakwete ni lukamba lwa kalingo ka kuolwelako mu minue yakue.
AMO 7:8 Yawe wangipuziizie nangue, “Ati Amosi, umweneki?” Naamwasukile, “Lukamba lwa kalingo ka kuolwelako.” Kabili Yawe waalandile evi, “Mona ndimukubiika kalingo ka kuolwelako pa bantu bane Baizraeli. Nene nsikikaba kubeeleela.
AMO 7:9 “Nkendo ya mukinzi iliyapupilapo ba mu luvyalo lwakua Izaaki yaakeenoonua, Ni pa bifuka bizuuke bilibyapupilapo Baizraeli paakeenoonua. Naakeepaya ba mu nghanda yakua Yeroboamu.”
AMO 7:10 Kupwako, Amazia kitambua wa ku Beteli watuma mpunda kuli Yeroboamu likolo wa Baizraeli walanda nangue, “Amosi alimukukuleetela bukankobenkania mu Baizraeli. Twebo twakue twakaba kwinoona kyalo.”
AMO 7:11 Pantu evi i vilimukulanda Amosi. “Yeroboamu waakeepawa ku bului. Kisinka Baizraeli baakatwalua mu buzia, kule ni kyalo kyabo.”
AMO 7:12 Pa kyamba Amazia waamwanine Amosi nangue, “Fuma papa we mumoni! Bwelela mu kyalo kya Yudea, uye ubikwile koko ni kupeeluako bilio.
AMO 7:13 Tekutwalilila kubikula mu Beteli pantu papa pazuukile, kabili i nkendo iliyapupilapo likolo.”
AMO 7:14 Amosi waamwasukile Amazia nangue, “Nene nsyaalipo kabika ao mwina kabika, inzi naali musungi wa nama ni ndabukizi wa bimuti bya miku.”
AMO 7:15 Inzi Yawe wanfumiizie ku mwilo wa busungi bwa nama ni kunghana nangue, “Endo ubikwile bantu bane, Baizraeli.”
AMO 7:16 Ale kansi unvua keebo kakua Yawe we aliwalanda nangue, “Tekubikwila Baizraeli, kabili tekusimikila ba mu luvyalo lwakua Izaaki.”
AMO 7:17 “Ni pakako, Yawe walanda evi, ‘Mukazi obe wakaba kwaluka mukambue mu muzi, baana bobe, balalume ni banakazi, bakaba kwipawa ku bului. Bukaba bobe bwakaba kulingua ni kuputulaniiwa. Ni we wakaba kufwila mu kyalo kya Bazima. Baizraeli ni bo kisinka bakaba kuya kuteekua buzia mu kyalo kyeni, kule ni kyalo kyabo.’”
AMO 8:1 Yawe Kabezia Mpungu wanangisiizie kinge kimonua kinaamwenemo kipanda kilimo mazabo apiile.
AMO 8:2 Yawe wangipuziizie evi, “Ati Amosi, umweneki?” Na-asukile nangue, “Kipanda kilimo mazabo apiile.” Yawe i lu-anghanine, “Musita wa kukaana kweleela bantu bane wakumana.”
AMO 8:3 Yawe Kabezia Mpungu walanda evi, “Mu bobo busiku nghimbo mu Nghanda yakua Leza yaakaaluka nghimbo ya malilo. Mibili ingi mu nkendo ingi yaakaba yapoozua sie tondolo!”
AMO 8:4 Unvue mwe balibabiibikizia bantu babuliilue, ni kuluvia bapabi ba mu kyalo.
AMO 8:5 Mwemue mulimwalanda evi, “Kubako kubaluka kwa kwezi kwakaba kupua musitaki pakuti tukabe kusisia mbezu? Sabata ni yo yakaba kupua musitaki pakuti tukabe kusisia nghano?” Mulimwakeefia tulingo, mulimwasezia mutengo, mulimwapompola na kalingo ka bufi,
AMO 8:6 mulimwasita mupabi na mutofue, abuliilue ni ye mulimwamusita na mpe imo ya nkwabilo, mulimwasisia nghano mwabikiliilemo ni busapia.
AMO 8:7 Yawe, bwitanko bwakua Yakobo, wakilapa mu Liina lyakue walanda nangue, “Nsikalaba kubalua kantu kabakita.
AMO 8:8 “Kubako kyalo tekikasunkaana palua ozu mulandu, ni bantu bekeelemo tebakaloosia? Kyalo kyalingi kyaakatungupila nga Mwenzi wa Nile. Kyaakatuulama ni kukooka nga mabimbi a mwenzi wa ku Misri.
AMO 8:9 “Yawe Kabezia Mpungu walanda nangue, “Mu bobo busiku waakalengia busiku kwila koba kali pakati mutue, ni kukupa kyalo na nfinzi koba kaseeme.
AMO 8:10 Naakaalula nsikunkulu ya mpupo yenu kuba ndoosio, ni nghimbo yenu yonse kuba nghimbo ya malilo. Naakamilengia mwe bonse kuvwala masaaka, ni kumitebula kakuuzu ku mitue yenu. Ozo musita naakaukita kuba nga musita wa kuloosia mwana lyonga, ni mpeleezio ya bobo busiku yaakaba yakilile kubiipa.
AMO 8:11 “Yawe Kabezia Mpungu walanda evi, ‘Nsiku ilimukwiza, lunaakatuma nzala pa kyalo. Teikaba nzala ya bilio ao kyaka kya menda, inzi yaakaba nzala ya kunvua keebo kakua Yawe.
AMO 8:12 Bantu baakaba basakaana kufuma ku Lyezi lya Mukele kuya ku Lyezi lya Mediterania, ni kupitaana kufuma ku nkungua kuya ku kabanga, balimukukeba keebo kakua Yawe, inzi tebakakasanga.’
AMO 8:13 Mu bobo busiku, bakazyana baweme ni balumendo ba maka, baakapenzuka na kyaka.
AMO 8:14 Balia balibalapa mu meena a mikisi ya ku Samaria, balia balibalanda nangue, ‘Mu liina lyakua leza mukose wa ku Dani,’ ao nangue, ‘Mu liina lyakua leza mukose wa ku Bersheba,’ baakapona pasili kubuuka.”
AMO 9:1 Naamwene Yawe waimeene mumbali kitale. Waalandile nangue, “Uma ku bisulo, evi mapumpu atente. Biponiizie pa mitue ya bantu bonse. Ni balia baakasyalapo naakabeepaya na kipanga. Tekuli muntu waakabutuka. Tekuli waakapanda.
AMO 9:2 Anzia beimbila nzila ya kuya kumbo, nakaba kubafumiamo na kuboko kwane. Anzia basela mu myulu, nakaba kubakoosiizia pansi.
AMO 9:3 Anzia befiika peulu lupili lwa Karmeli, nakaba kubakeba ni kubakwata. Anzia banfyama kwinsina lyezi, nakaba kwana kizoka kikabe kubasumina koko kwenka.
AMO 9:4 Anzia batwalua ku buzia na balwani babo, nakaba kulengia bakeepailue koko kwenka. “Nakaba kuya nabakenteleele na menso ane, pakuti n'mbakitile bibiipile tekuba biweme.”
AMO 9:5 Mulopue, Yawe wa Maka onse aliwakumia kyalo, ni kyo kilikyasunguluka. Bonse bekeelemo balibaloosia. Kyalo kyalingi kilikyalenduka ni kukooka nga mabimbi a Mwenzi wa Nile. Ni pa kyamba kilikyakooka nga mabimbi a mwenzi wa ku Misri.
AMO 9:6 Ozu Yawe aliwakuula nghanda yakue ya bukolo mu myulu ni aliwaimika biputa byakue pa kyalo, ozu aliwakuuta menda a mu lyezi ni aliwa-etila pa kyalo, Liina lyakue ni Yawe.
AMO 9:7 Yawe waipuzia evi, “Mwe Baizraeli! Kubako nsimipendele nga vin'mpendele bantu ba ku Etyopia?” “Kubako te nene waamifumiizie mu Misri? Te nene waafumiizie Bafilistini ku Kaftori? Te nene waafumiizie Bashamu ku Kiri?
AMO 9:8 “Kisinka menso ane ne Yawe Kabezia Mpungu, akentele pa bukolo bwa bibalo. Nakaba kubwinoona pa kyalo, inzi nsikeenoona nvyalo yonse yakua Yakobo,” koku i kulanda kwakua Yawe.
AMO 9:9 “Pantu naakafumia nsambu ya kuuluzia Baizraeli pa ntundu yonse, naakabauluzia nga nghano iliyauluziiwa mu kipanda. Tekuli lubezu lwa nghano lwaakaponena pansi.
AMO 9:10 Bantu bonse ba bibalo pa bantu bane, baakeepawa na kipanga, balia bonse balibalanda nangue, ‘Tetukasanzua.’
AMO 9:11 “Mu bobo busiku “naakabwezia nghanda iponene yakua Daudi, naakawamia palia penoonekele, naakeemika paakale bituuti byakue, naakakuula paakale nga viyaali pa mambo,
AMO 9:12 evi Baizraeli bakapoke nkendo yaasyeleko mu kyalo kya Edomu, pamo ni ntundu yane yonse,” koku i kulanda kwakua Yawe ozo waakakita bebi bintu.
AMO 9:13 Yawe walanda evi, “Nsiku ilimukwiza, muzombozi lu-aliwaakaba wakitwaliile kuzombola musita wa kulima wasyafikile, ni aliwatika mizabibu lu-aliwaakaba wakitwaliilile kutika musita wa kulimba wasyafikile, mpili yaakatoonia divai ya lenu, ni tupili ni to twaakaipongola.
AMO 9:14 Naakafumia bantu bane, Baizraeli, mu buzia ni kubabwezia. “Baakakuula paakale mizi ituutikile ni kwikalamo. Baakalimba mizabibu ni kuminako divai. Baakalima makaba ni kulia bibaakabyalamo.
AMO 9:15 Naakalimba Izraeli mu kyalo kyakue, kabili tekuli muntu waakamunukula mu kyalo kinaamupeele,” koku i kulanda kwakua Yawe Leza wenu.
OBA 1:1 Kimonua kyakua Obadia. Kaka i keebo kalandile Yawe Kabezia Mpungu palwakua Edomu: Twakyunvua mpunda kufuma kuli Yawe. Mukenzi wakitumua ku ntundu walanda nangue, “Buuke tuye tulue na Edomu!”
OBA 1:2 Yawe wamwana Edomu nangue, “Mona nakaba kukukeefia pa ntundu. Wakaba kukila kuleebulua na bonse.
OBA 1:3 Kiitoni kya mutima obe kikubeepele, we ekeele mu milunda ya mabue, we akitile ni bwikazi bobe peulu, we aliwaiana nangue, ‘Kubako nani alikuvinda kunkoosiizia pansi?’
OBA 1:4 Anzia kine uselele mu muulu nga nzwiba ni kukita busalala bobe pa bukata bwa ntanda, naakakufumiapo ni kukukoosiizia pansi,” koku i kulanda kwakua Yawe.
OBA 1:5 “Bakabooko ao bapoti lubalibakwingilila musita wa busiku, kubako tebezi kwibamo sie belia bibatonene? Bazombozi ba mizabibu lubalibaiza kuzombola, kubako tebalibasiamo mizabibu iniini? Inzi balwani bobe bakeeza kutwama byonse.
OBA 1:6 Mwe nvyalo yakua Esau, bunonsi bwenu bwakipokua, bukonto bwenu bonse bwakiba bwafiikilue bwakifyulua.
OBA 1:7 Bonse bawaali waunvwana nabo, bakaba kukukumba mpaka ku mipaka. Babibuza bobe bakaba kukwalukila ni kukupoka kyalo kyobe. Balia balibalia mukate obe bakaba kukuteyela muteo. Inzi ozo muteo teukaba ku-umona.
OBA 1:8 “Ne Yawe naipuzia evi: Kubako mu bobo busiku, nsikaba kwinoona, bantu ba mulangue ba mu Edomu, ni bakengezi ba mu mpili yakua Esau?
OBA 1:9 We muzi wa Temani, balukale bobe bakaba kutiiniiwa, kubalua muntu ali mu mpili yakua Esau wakaba kusinzua.
OBA 1:10 Wewe Edomu wakimukitila bubi mwalaobe Yakobo, ni pakako, wakaba kumoniiwa busoni ni kwinoonua muyayaya.
OBA 1:11 Pa bobo busiku, wewe Edomu waali waimeene lwa kule wakenteleele baeni lubaali balimukutwama bunonsi bwakua Yakobo, ni bantu ba mu kinge kyalo lubaali baingila mu milyango yakue, ni kukasana bunonsi bwa mu Yeruzalemu na kutea bubale. Wewe waali wali nga bene.
OBA 1:12 Wewe tewaali wapalile kuleebula wa kobe mu nsiku ya lyenda lyakue. Tewaali wapalile kuwaminua pa mulandu wa Bayuda, mu nsiku ya kwinoonua kwabo, ao kukila kwitantamuna musita wa maavia abo.
OBA 1:13 Tewaali wapalile kupita mu milyango ya bantu bane mu nsiku ya busanzo bwabo, ao kusansamukila maavia abo mu nsiku ya busanzo bwabo, ao kupoka bunonsi bwabo mu nsiku ya busanzo bwabo.
OBA 1:14 Tewaali wapalile kwimana mu masanzio nzila kuti wipaye bantu babo babutukile, ao kubapaana ku balwani babo mu nsiku ya lyemo lyabo.
OBA 1:15 “Busiku bwakua Yawe bwapalama, bwa kupingula ntundu yonse. Wewe Edomu waakakitilua nga viwakikitilana. Bikitua byobe biwakikita byaakakubwelelela.
OBA 1:16 Mwe bantu bane! Nga vimwakimina kikombe kya lyemo pa lupili lwane luzuuke, ntundu yonse ni yo i viyaakaba yamina. Yaakaba yaminamina sie ni kulobelela.
OBA 1:17 Inzi pa Lupili lwa Sayuni paakaba bupusuko. Lolo lupili lwaakaba luzuuke. Ni Yakobo waakapyana bupyani bwakue.
OBA 1:18 Nghanda yakua Yakobo yaakaba mulilo, ni nghanda yakua Yusufu yaakaba libeebe lya mulilo. Nghanda yakua Esau yaakaba bikusi byume, bebio byaakaziziiwa ni kwinoonua. Tepakaba muntu waakasyalapo,” koku i kulanda kwane ne Yawe.
OBA 1:19 “Bantu ba kufuma ku kyalo kya ku Negebu baakapoka kyalo kya mpili kyakua Esau, ni bantu ba mwinsina mpili baakakwata kyalo kya Bafilistini. Baakapoka kyalo kya Efraimu ni kya Samaria, Benyamina ni ye waakakwata kyalo kya Gileadi.
OBA 1:20 Libumba lya Baizraeli lyaali lyabutukiile ku Kanaani lyaakabwela ni kupoka kyalo mpaka ku Sarepta. Balia baafumine ku Yeruzalemu ni kubutukila ku Sefaradi, baakakwata muzi wa Negebu.
OBA 1:21 Bapususi baakasela pa Lupili lwa Sayuni, ni kuteeka kyalo kya mpili kyakua Esau. Ni bobo bukolo bwaakaba bwakua Yawe.”
JON 1:1 Busiku bumo Yawe waamwanine Yona mwina Amitai nangue,
JON 1:2 “Lenga uye ku olia muzi ukata wa Ninawe, uye ubaane mpunda yane ya bupinguzi, pantu namona vili bubi bwa bantu ba mu olia muzi.”
JON 1:3 Inzi Yona wene waamubutukile Yawe ni kuya ku Tarsisi. Waakookele mpaka ku Yopa, koko i ku-aasangile bwato bwa kuya ku Tarsisi. Kupwako, walipila lwendo, waingila mu bwato pamo ni balia baali baya ku Tarsisi evi amubutuke Yawe.
JON 1:4 Tepaakokwele, Yawe ni ye waabusiizie mwela ukata pa lyezi. Kyaali kinkunsia kikata mpaka ni bwato bwaali bwasyaumiine kubazuka.
JON 1:5 Babituuta ba menda baunvwile mwezo ni kutendeka kupooza pa menda bintu bibaali nabio mu bwato kumona sie bwato bulengeko, koku kubalua muntu walimukupupa leza wakue. Inzi Yona wene waali waakookeele mukati bwato waleele waonene tulo twine twine.
JON 1:6 Kupwako, kibinda wa bwato wamukonka Yona, wamubuusia ni kumwipuzia nangue, “Ati ewe, uonene sie tulo? Buuka ni we upupe leza obe, pange leza obe kuti watulangulukako tekuti tulobe.”
JON 1:7 Ni pakako, baatendekele kulanzyania pakati kabo nangue, “Emwe, tuteye sie bubale tumone kine nani alengiizie bobu busanzo buli pakati ketu.” Lubaateele bubale, bainikile nangue waali walengiizie ni Yona.
JON 1:8 Babituuta ba menda baamwipuziizie nangue, “Twane, nani walengia bobu busanzo buli pakati ketu? Uli na mwiloki? Kabili ufumine pi? Kyalo kyobe ni kyaloki? Uli mukowaki?”
JON 1:9 Yona waabaasukile evi, “Nene ndi Muebrania, kabili ndinamutiina Yawe Leza wa mwiulu, olia waalengele lyezi ni musili.”
JON 1:10 Lubaapwile kumwipuzia nangue wakitilaki evi, babituuta ba menda baakilile kutiina pantu Yona waabaanine nangue amubutukile Yawe.
JON 1:11 Kupwako, bamwipuzia nangue, “Ale tukukite syani kuti lyezi litontoloke?” Pantu mwela waali wakila sie kutungupila.
JON 1:12 Yona waabaasukile nangue, “Nkwate sie mun'mpooze pa menda ni lyezi lilikutontoloka, pantu n'manine nangue nene i alengiizie bobu busanzo.”
JON 1:13 Inzi babituuta bene baakilile kwoba kuti bafike kunze, ni bo ba-andilue pantu mwela waali wakililako sie kutungupila.
JON 1:14 Ni pakako, baamuliliile Yawe balanda nangue, “Twakupaapaata we Yawe, twakupaapaata tekuti utulovie pa mulandu wa bukose bwakua ozu muntu, kabili tekutupeela mulandu pa mulopa wakua ozu muntu usili na kafi, pantu wewe, we Yawe i watonanga kuti bebi bintu bikitike evi.”
JON 1:15 Kupwako, bamukwata Yona bamupooza pa menda, ni lyezi lyatontoloka.
JON 1:16 Ni pakako, bantu baakilile kumutiina Yawe. Baamweleele Yawe ngelelo ni kulapa bilapo.
JON 1:17 Inzi Yawe waatumine lisabi likata lya kumuteleka Yona, ni Yona waikeele munda mwa lisabi nsiku itatu busiku ni koba.
JON 2:1 Yona lu-aali munda mwa lisabi waatendekele kumulomba Yawe Leza wakue walanda nangue,
JON 2:2 “Pa musita wa maavia ane naamulombele Yawe, ni ye wangasukile. Lunaali mukati kilibu naalombele bukwasi, ni we waunvwile lizui lyane.
JON 2:3 Pantu wan'mpoozele pazikiisie, mukati buziba, naazyungulukiilue na menda engi, mabimbi obe onse pamo ni kusana kwakue byan'mpitile peulu.
JON 2:4 Naalandile nangue, naapozelue kule ni wewe, anzia evio, naakakenta kabili ku Nghanda yobe izuuke.
JON 2:5 Mutima uzyungulukiilue na menda, nkupilue na buziba, mutue wane ukupilue na bikusi bya pa menda.
JON 2:6 Naakookeele kwinsina mpili, kyalo ni minkolonto yakue byankilikiile nsiku ingi, anzia evio, wewe waaseziizie bukose bwane kufuma mu kilibu, we Yawe Leza wane.
JON 2:7 Mutima mukati mwane luwaapenzukile, naamulangulukile Yawe, ni mapepo ane aafikile kuli wewe mu Nghanda yobe izuuke.
JON 2:8 Balia balibapupa mikisi ya mpuni, balibamufunghamina Yawe ni kukaana ntono yakue.
JON 2:9 Inzi nene naakazanzula lizui lya malumbo, naakakwelela ngelelo. Naakafikilizia kilapo kinaalapile. Bupusuko bulibwafuma kuli Yawe.”
JON 2:10 Kupwako, Yawe wa-ana lisabi liye limulukile Yona kunze.
JON 3:1 Kabili Yawe waamwanine Yona nangue,
JON 3:2 “Lenga uye waya ku olia muzi ukata wa Ninawe, uye ubaane mpunda inakikwana.”
JON 3:3 Yona waile ku Ninawe nga mwaalandiile Yawe. Ninawe waali wali muzi ukata wakwendamo nsiku itatu.
JON 3:4 Yona waingiile mu muzi ni kwendamo busiku bumo walimukupunda walanda nangue, “Pa kyamba kya nsiku 40, we Ninawe wakaba kuloviiwa!”
JON 3:5 Kupwako, bantu ba mu Ninawe bamuketekela Leza. Ba-aninue kuizilika bilio ni kuvwala masaaka, kubambila ku mukulu mpaka ku mwanike akeepeesie pakati kabo.
JON 3:6 Likolo wa mu Ninawe lu-aunvwile ezio Mpunda, waabuukile mu kitebe kyakue kya bukolo, wavuula ngubo yakue ya bukolo, wavwala masaaka ni kwikala mu mito.
JON 3:7 Likolo pamo ni masiiko akue a mu muzi wa Ninawe, baafumiizie mwano wakwana nangue, “Kubalua muntu tekuti atompe kantu, bisepe bya nama ni byo, nghombe ni mikooko tekuti bilie ni kumina menda,
JON 3:8 kabili bantu pamo ni nama bavwale masaaka, ni kumulilila Leza na maka, evi kubalua muntu alekele misango yakue ya bikitua bibi.
JON 3:9 Kubako mumanine nangue pange Leza kuti wapilibuka ni kwibwelamo, ni kulekela kikonko kyakue tekuti atulovie?”
JON 3:10 Leza lu-aamwene nangue balekela misango ya bikitua byabo bibi, wa-alulwile malanga akue a kwinoona muzi nga mu-aalandiile.
JON 4:1 Inzi Yona taawaamiinue, waafiitilue.
JON 4:2 Yona waamwanine Yawe nangue, “We Yawe, evi te i vinaalandile lunaali nakili mu kyalo kyane? Ni pakako, i kyaalengele kuti nenge n'mbutukile ku Tarsisi, pantu naamanine nangue wewe uli Leza wa buwame, ezuzi nkumbu, asiliwalenga kufiitua, wa kyonko, aliwaibwelamo mu kukanda bantu babi.
JON 4:3 Ni pakako, we Yawe, nakulomba ungipaye sie, pantu kyawama kuti nfue kukila kuba mukose.”
JON 4:4 Yawe waamwanine evi, “Teuli na nsambu ya kufiitua.”
JON 4:5 Kupwako, Yona wafuma mu muzi waya kwikala lya ku kabanga ka muzi, wakuula mutuule ni kwikala mu bulelo amone kilikukitika pa ozo muzi.
JON 4:6 Yawe Leza waameniizie musila ni ku-ukuzia kuti umuleetele Yona bulelo pa mutue wakue pakuti bumupususie ku bulanda bwakue. Yona waawamiinue sana na ozo musila.
JON 4:7 Inzi lukeele lwakue ku makia, Leza waatumine mufwinzi waafwinziizie musila, ni kuuma wauma.
JON 4:8 Koba lukaaselele, Leza waatumine mwela ubi kufuma ku kabanga. Koba kaamusaamiine Yona pa mutue. Yona lu-aali wasyaumiine kupenzuka, waali wasyapupila sie alenge afue. Waalandile evi, “Kufua kwawama kukila kuba mukose.”
JON 4:9 Leza waamwipuziizie Yona, “Ati, wakita bwino kufiitilua ozu musila?” Wa-asukile nangue, “Nakita bwino kufiitua, kine kufua nfue sie.”
JON 4:10 Yawe waamwanine evi, “Wewe waunvwilanga nkumbu musila u-usimeniizie ni ku-ukuzia, ozo wakimena busiku bumo ni kuuma busiku bumo.
JON 4:11 Eba, ale nene i alikwandua kunvwila nkumbu muzi ukata wa Ninawe ulimo bantu bengi kukila pa 120,000 basili na buvinde bwa kwinika biweme ni bibiipile, kabili mwali ni nama ingi iteekelue?”
