﻿HOSEA.
10.
Izraeli waali muzabibu waali wakula bwino, waali waseekako mazabo. Nga vyaali vyavula mazabo akue, i vi-aali wakila kukuula bitale. Nga vyaali vyatwalilila kyalo kyakue, i vi-aali wakila kufwaniizia mabue akue a mpupo. 
Mutima wabo ni wa bupompo, ni evi bapalile kutwama bubi bwabo. Yawe wakaba kutuuta bitale byabo ni kwinoona mabue abo a mpupo. 
I lubaakalanda nangue, “Tetuli na likolo pantu tetwakimutiina Yawe. Inzi anzia kine tubenge na likolo, kubako nga waatukitiileki?” 
Balibalaya bulayo bwingi, balibalapa milapo ya bufi ni kukita bipingo. Ni pakako, busongezi bulibwamena nga bikusi bilibyaleeta bwimba mu bukaba buliminue. 
Bekazi ba mu Samaria basakameene pa mulandu wa mukisi wa nghombe musoka wa ku Bet-Aveni. Bantu ba mu Samaria baakaulilila ozo mukisi, evio vyenka ni babitambua bakue balibaupupa, balia bakiba bawaminua na bulumba bwa ozo mukisi, pantu ufumiiziwe kwabo ni kutwalua mu buzia. 
Ozo mukisi waakatwalua ku Asuria kuba kyabupe kuli likolo mukulu. Efraimu wakaba kusebaana, Izraeli wakaba kumona busoni palua mukisi wakue wa kimuti. 
Likolo wa mu Samaria waakeenoonua, waakakungululua nga kiputu kya kimuti peulu menda. 
Pa bifuka bibi bya kupupilapo mukisi paakeenoonua, i nkendo iliyabalilapo Izraeli. Myunga ni tumuti twa bukobola byaakamena ni kukupilila pa bitale byabo. Pa kyamba baakaana mpili nangue, “Ize mutukupilile,” ni kwana tupili, “Ize mutuponene!” 
“We Izraeli, kutula busiku buwaabalile mu Gibea, koko i kumwasyele. Kubako bului tebwaakitikile ku bankitatubi ba mu Gibea? 
Pa musita unaakatona, naakabakanda. Ntundu yaakabakolonghanina kuti ikabakake pa mulandu wa bibalo byabo bibili. 
Efraimu i nghombe musoka asambiliziiziwe, musoka atonene kupuula. Ni pakako, nakaba kumukaka mupingo pa mukosi wakue uweme. Nakaba kumulombola Efraimu, Yuda apalile kutipa, ni Yakobo apalile kupuma bisinde. 
Byale nsambu mwe bene, zombole mazabo a ntono isiliyapua, lime mu nsinde pantu i musita wakumukeba Yawe mpaka pa-akaba kwiza ni kuminookiizia bulunghami. 
Inzi mwaalimbile bilubo, mwaazombwele bubi, mwaaliile buzabo bwa bupompo, muketekeele sie maka enu mwe bene, ni bwingi bwa balukale benu. 
Ni pakako, nsungu ya bului yaakaba pa bantu bobe, ni byubo byobe byonse byaakeenoonua nga vyainoonenue Beti-Arbeli na likolo Salmani pa busiku bwa bului, nghina ni baana bakue lubaapoozelue pansi na maka. 
Evi i vikyaakakitika ni kuli wewe Beteli, pantu bubi bobe ni bukata. Bobo busiku pa bukakia, likolo wakua Izraeli waakaloviiwa.” 
