﻿MAPINDA.
24.
Bantu babi tekubonvwila bunkua, kabili tekutokamua kuba pamo nabo. 
Pantu mutima wabo uliwalangakana bupoti, ni milomo yabo iliyalanda sie bibiipile. 
Nghanda iliyakuulua na mulangue, ni kwimikua na maano. 
Ni mu bukengezi miputule yakue iliyaizuziwamo bintu bya mutengo ukata ni bifwaniine. 
Muntu wa mulangue, i alumine. Ee, muntu wa maano i aliwavuzia maka. 
Pantu aliwalua bului na nsokezi ya maano, ni mu bwingi bwa bakasoka, bwanzio bulibwamoneka. 
Mulangue amukilile kipuba. Kipuba tezi kwasamuna kanua kakue pa mulyango. 
Olia aliwakambila kukita bubi, bantu balikumukuuta kankobenkania. 
Malanga akua kipuba ni kibalo, ni muntu wa kapuni ni kilubo ku bantu. 
Kine wanaka mu nsiku ya lyemo, maka obe akeepele. 
Pususia balia batwemue kuti baye bepawe, ni balia basyali pepi ni kwipawa, kita maka ubapususie. 
Kine walanda nangue, “Mona fwefue tetwakyunvua ezi milandu,” Kubako olia aliwatoosia mitima, kuti wamana? Ni olia aliwasunga mutima obe, tavinda kwinika? Ni ye takasazia kubalua muntu kukonkana ni miilo yakue? 
We mwana wane, lia kapelo pantu kaweme, ni muto wa kapelo pantu usonsele mu kanua kobe. 
Upalile kumana nangue mulangue uli nga kapelo kuli wewe, kine wausanga, wakaba kuya wali ni nsiku iweme ku ntanzi ni maswapi obe teakaba apua. 
We muntu mubi, tekubenza bwikazi bwa mulunghami, tekupoka nghanda yakue. 
Anzia mulunghami apona nghendo kilooba ni kubuuka paakale, inzi babi balibaloviiwa na bubi. 
Tekuwaminua lulilwapona mulwani obe, ni mutima obe tekuti usangalale lu-aliwaipuutala. 
Pantu Yawe kine wamona evio alikufiitua, ni ye takaba kubakanda. 
Tekwema pa mulandu wa bankitatubi, ao kunvwila babi bunkua. 
Pantu muntu mubi tali na nsiku iweme ku ntanzi. Musaniko wa mubi uliwazima. 
We mwana wane, tiina Yawe pamo ni likolo, kabili tekwampana na babisanguka. 
Pantu busanzo bwabo bwakaba kubatulumukilila sie. Ale nani amanine lwinoono lwaakaleetua na Yawe ni likolo? 
Bobu i bulanzi bwa bantu ba mulangue. Kuba ni kitoolela mu bupinguzi tekuweme. 
Olia aliwamwana mubi nangue, “Wewe uli ni nsambu,” Bantu balikumutiipa, ni ntundu ilikumusuula. 
Inzi ku balia balibamutana nsambu, balikuya bali ni nsansa, ni mapaalo aweme alikuya ali pali bene. 
Bwasuko bwa kisinka buli nga kufyompa pa milomo yakua kibuza. 
Wamia miilo yobe ya panze, ni kuteania bukaba bobe, mane ukuule nghanda yobe. 
Tekusininkizia bya bufi ku mwinobe pasili mulandu, ao kubeepa na milomo yobe. 
Tekulanda nangue, “Ndikumukitila nga vi-akinkitila. Ndikumulipa kukonkana ni vi-akikita.” 
Nakipita pepi ni bukaba bwa munanghani, ni pepi ni bukaba bwa mizabibu bwa muntu asili na maano, 
Ni mo mumenene sie myunga, ni bo bukupiliilue sie na lunkoto, ni kibumba kyakue kya mabue, kituutilue. 
Kupwako, nakenta, ni kulangakana, namona ni kusangapo masambilizio: 
Kulaala kaniini, ni kuona kaniini, kukunza maboko kaniini ni kutuuzia. 
Ni evi bupabi bwakaba kukwizila nga kabooko, ni kubulua kwakaba kukukonka nga kipoopoosi ali ni kilwilo. 
