GEN 1:1 ꠙꠄꠟꠣꠃ ꠀꠟ꠆ꠟꠣꠄ ꠀꠍꠝꠣꠘ ꠀꠞ ꠖꠥꠘꠤꠀ ꠙꠄꠖꠣ ꠇꠞꠟꠣ।
GEN 1:2 ꠖꠥꠘꠤꠀꠁ ꠘꠤꠞꠣꠇꠣꠞ ꠀꠞ ꠈꠣꠟꠤ ꠀꠍꠤꠟ, ꠉꠁꠘ ꠙꠣꠘꠤꠞ ꠃꠙꠞꠦ ꠙꠥꠞꠣ ꠀꠘ꠆ꠖꠣꠁꠞ ꠀꠍꠤꠟ। ꠀꠟ꠆ꠟꠣꠞ ꠞꠥꠢꠥ ꠄꠞ ꠃꠙꠞꠦ ꠌꠟꠣꠌꠟ ꠇꠞꠔꠣ।
GEN 1:3 ꠛꠣꠖꠦ ꠀꠟ꠆ꠟꠣꠄ ꠚꠞꠝꠣꠁꠟꠣ ꠚꠞ ꠅꠃꠇ, ꠀꠞ ꠚꠞ ꠅꠁꠟ।
GEN 1:4 ꠀꠟ꠆ꠟꠣꠄ ꠖꠦꠈꠟꠣ ꠚꠞ ꠜꠣꠟꠣ। ꠔꠣꠁꠘ ꠀꠘ꠆ꠖꠣꠁꠞ ꠕꠣꠇꠤ ꠚꠞꠞꠦ ꠀꠟꠉꠣ ꠇꠞꠤꠀ
GEN 1:5 ꠄꠞ ꠘꠣꠝ ꠞꠣꠈꠟꠣ ꠖꠤꠘ, ꠀꠞ ꠀꠘ꠆ꠖꠣꠁꠞꠞ ꠘꠣꠝ ꠞꠣꠈꠟꠣ ꠞꠣꠁꠔ। ꠢꠣꠁꠘ꠆ꠎꠣ ꠉꠦꠟ, ꠛꠤꠀꠘꠅ ꠉꠦꠟ, ꠁꠇꠐꠣ ꠅꠁꠟ ꠙꠄꠟꠣ ꠖꠤꠘ।
GEN 1:6 ꠛꠣꠖꠦ ꠀꠟ꠆ꠟꠣꠄ ꠚꠞꠝꠣꠁꠟꠣ, ꠙꠣꠘꠤꠞ ꠝꠣꠎꠦ ꠉꠥꠝ꠆ꠛꠥꠎꠞ ꠟꠣꠈꠣꠘ ꠚꠣꠇ ꠎꠣꠉꠣ ꠅꠃꠇ, ꠀꠞ ꠙꠣꠘꠤ ꠖꠥꠁ ꠜꠣꠉ ꠅꠁꠎꠣꠃꠇ।
GEN 1:7 ꠀꠞ ꠀꠟ꠆ꠟꠣꠄ ꠚꠣꠇ ꠎꠣꠉꠣ ꠙꠄꠖꠣ ꠇꠞꠤꠀ, ꠔꠟꠞ ꠀꠞ ꠃꠙꠞꠞ ꠙꠣꠘꠤ ꠀꠟꠉꠣ ꠇꠞꠟꠣ। ꠀꠞ ꠅꠃꠟꠣ ꠅꠁꠟ।
GEN 1:8 ꠀꠟ꠆ꠟꠣꠄ ꠉꠥꠝ꠆ꠛꠥꠎꠞ ꠟꠣꠈꠣꠘ ꠎꠦ ꠎꠣꠉꠣ ꠛꠣꠘꠣꠁꠟꠣ, ꠔꠣꠞ ꠘꠣꠝ ꠞꠣꠈꠟꠣ ꠀꠍꠝꠣꠘ। ꠢꠣꠁꠘ꠆ꠎꠣ ꠉꠦꠟ, ꠛꠤꠀꠘꠅ ꠉꠦꠟ, ꠁꠇꠐꠣ ꠅꠁꠟ ꠖꠥꠁ ꠘꠝ꠆ꠛꠞ ꠖꠤꠘ।
GEN 1:9 ꠄꠞꠛꠣꠖꠦ ꠀꠟ꠆ꠟꠣꠄ ꠚꠞꠝꠣꠁꠟꠣ, ꠀꠍꠝꠣꠘꠞ ꠔꠟꠞ ꠙꠣꠘꠤ ꠄꠇ ꠎꠣꠉꠣꠔ ꠖꠟꠣ ꠅꠃꠇ, ꠀꠞ ꠢꠥꠇꠘꠣ ꠎꠣꠉꠣ ꠖꠦꠈꠣ ꠎꠣꠃꠇ। ꠀꠞ ꠅꠃꠟꠣ ꠅꠁꠟ।
GEN 1:10 ꠀꠟ꠆ꠟꠣꠄ ꠢꠥꠇꠘꠣ ꠎꠣꠉꠣꠞ ꠘꠣꠝ ꠞꠣꠈꠟꠣ ꠎꠝꠤꠘ ꠀꠞ ꠎꠝꠣꠁꠟ ꠙꠣꠘꠤꠞ ꠘꠣꠝ ꠖꠞꠤꠀ। ꠔꠣꠁꠘ ꠖꠦꠈꠟꠣ ꠁꠔꠣ ꠜꠣꠟꠣ।
GEN 1:11 ꠛꠣꠖꠦ ꠀꠟ꠆ꠟꠣꠄ ꠚꠞꠝꠣꠁꠟꠣ, ꠎꠝꠤꠘꠅ ꠊꠣꠡ ꠚꠟꠃꠇ; ꠀꠞ ꠢꠇꠟ ꠎꠣꠔꠞ ꠛꠤꠌꠀꠟꠣ ꠟꠔꠣ-ꠙꠣꠔꠣ ꠉꠣꠍ-ꠉꠣꠍꠣꠟꠤꠞ ꠎꠘꠝ ꠅꠃꠇ। ꠀꠞ ꠎꠝꠤꠘꠞ ꠃꠙꠞꠦ ꠢꠇꠟ ꠎꠣꠔꠞ ꠚꠟꠞ ꠉꠣꠍꠅ ꠅꠃꠇ, ꠄꠞꠣ ꠘꠤꠎꠞ ꠎꠣꠔꠝꠔ ꠚꠟ ꠗꠞꠛ ꠀꠞ ꠚꠟꠞ ꠝꠣꠎꠦ ꠎꠣꠞꠎꠤꠞ ꠛꠤꠌꠅ ꠕꠣꠇꠛ। ꠀꠞ ꠅꠃꠟꠣ ꠅꠁꠟ।
GEN 1:12 ꠎꠝꠤꠘꠅ ꠊꠣꠡ ꠚꠟꠤꠟ, ꠢꠇꠟ ꠎꠣꠔꠞ ꠛꠤꠌꠀꠟꠣ ꠟꠔꠣ-ꠙꠣꠔꠣ ꠉꠣꠍ-ꠛꠤꠞꠤꠇ ꠎꠘꠝꠤꠟ। ꠎꠝꠤꠘꠞ ꠃꠙꠞꠦ ꠢꠇꠟ ꠎꠣꠔꠞ ꠚꠟꠞ ꠉꠣꠍ ꠅꠁꠟ ꠎꠦꠔꠣꠄ ꠎꠣꠞꠎꠤꠞ ꠎꠣꠔꠝꠔ ꠚꠟ ꠗꠞꠦ, ꠢꠤ ꠚꠟꠞ ꠝꠣꠎꠦ ꠎꠣꠞꠎꠤꠞ ꠛꠤꠌꠅ ꠀꠍꠦ। ꠀꠟ꠆ꠟꠣꠄ ꠖꠦꠈꠟꠣ ꠁꠔꠣ ꠜꠣꠟꠣ।
GEN 1:13 ꠢꠣꠁꠘ꠆ꠎꠣ ꠉꠦꠟ, ꠛꠤꠀꠘꠅ ꠉꠦꠟ, ꠁꠇꠐꠣ ꠅꠁꠟ ꠔꠤꠘ ꠘꠝ꠆ꠛꠞ ꠖꠤꠘ।
GEN 1:14 ꠛꠣꠖꠦ ꠀꠟ꠆ꠟꠣꠄ ꠚꠞꠝꠣꠁꠟꠣ, ꠀꠍꠝꠣꠘꠞ ꠝꠣꠎꠦ ꠅꠃꠟꠣ ꠌꠦꠞꠣꠉ ꠅꠇꠟ ꠅꠃꠇ, ꠎꠣꠞꠣ ꠞꠣꠁꠔ ꠕꠣꠇꠤ ꠖꠤꠘꠞꠦ ꠀꠟꠉꠣ ꠇꠞꠦ। ꠁꠔꠣ ꠀꠟꠉꠣ ꠀꠟꠉꠣ ꠖꠤꠘ, ꠛꠍꠞ ꠀꠞ ꠁꠖ-ꠃꠔꠡꠛꠞ ꠘꠤꠡꠣꠘꠣ ꠅꠁꠛ।
GEN 1:15 ꠀꠍꠝꠣꠘ ꠕꠣꠇꠤ ꠔꠣꠞꠣ ꠖꠥꠘꠤꠀꠁꠞ ꠃꠙꠞꠦ ꠚꠞ ꠖꠤꠛ। ꠅꠃꠟꠣꠃ ꠅꠁꠟ।
GEN 1:16 ꠀꠟ꠆ꠟꠣꠄ ꠖꠥꠁꠐꠣ ꠛꠠ ꠌꠦꠞꠣꠉ ꠛꠣꠘꠣꠁꠟꠣ, ꠄꠞꠝꠣꠎꠦ ꠛꠠꠐꠣꠞꠦ ꠖꠤꠘꠞ ꠃꠙꠞꠦ ꠛꠣꠖꠡꠣꠁ ꠇꠞꠣꠞ ꠟꠣꠉꠤ ꠀꠞ ꠢꠥꠞꠥꠐꠣꠞꠦ ꠞꠣꠁꠔꠞ ꠃꠙꠞꠦ। ꠁꠔꠣ ꠍꠣꠠꠣ ꠔꠣꠁꠘ ꠔꠦꠞꠣ ꠅꠇꠟꠅ ꠙꠄꠖꠣ ꠇꠞꠟꠣ।
GEN 1:17 ꠔꠣꠁꠘ ꠄꠞꠣꠞꠦ ꠀꠍꠝꠣꠘꠞ ꠝꠣꠎꠦ ꠛꠅꠀꠁꠟꠣ ꠎꠣꠔꠦ ꠔꠣꠞꠣ ꠖꠥꠘꠤꠀꠁꠔ ꠚꠞ ꠖꠦꠄ।
GEN 1:18 ꠄꠞꠣ ꠖꠤꠘ ꠀꠞ ꠞꠣꠁꠔꠞ ꠃꠙꠞꠦ ꠛꠣꠖꠡꠣꠁ ꠇꠞꠦ, ꠀꠘ꠆ꠖꠣꠁꠞ ꠕꠣꠇꠤ ꠚꠞꠞꠦ ꠀꠟꠉꠣ ꠇꠞꠦ। ꠀꠟ꠆ꠟꠣꠄ ꠖꠦꠈꠟꠣ ꠁꠔꠣ ꠜꠣꠟꠣ।
GEN 1:19 ꠢꠣꠁꠘ꠆ꠎꠣ ꠉꠦꠟ, ꠛꠤꠀꠘꠅ ꠉꠦꠟ, ꠁꠇꠐꠣ ꠅꠁꠟ ꠌꠣꠁꠞ ꠘꠝ꠆ꠛꠞ ꠖꠤꠘ।
GEN 1:20 ꠛꠣꠖꠦ ꠀꠟ꠆ꠟꠣꠄ ꠚꠞꠝꠣꠁꠟꠣ, ꠙꠣꠘꠤꠞ ꠝꠣꠎꠦ ꠎꠣꠘꠖꠣꠞ ꠅꠇꠟ ꠙꠣꠟꠦ ꠙꠣꠟꠦ ꠜꠞꠤ ꠎꠣꠃꠇ, ꠀꠞ ꠖꠥꠘꠤꠀꠁꠞ ꠃꠙꠞꠦ ꠀꠍꠝꠣꠘꠞ ꠝꠣꠎꠦ ꠙꠣꠈꠤꠘ ꠃꠠꠃꠇ।
GEN 1:21 ꠀꠞ ꠀꠟ꠆ꠟꠣꠄ ꠖꠞꠤꠀꠞ ꠛꠤꠞꠣꠐ ꠎꠣꠘꠖꠣꠞ ꠅꠇꠟ, ꠀꠞ ꠙꠣꠘꠤꠞ ꠝꠣꠎꠦ ꠙꠣꠟ ꠛꠣꠘ꠆ꠖꠤꠀ ꠊꠥꠞꠞꠣ ꠢꠇꠟ ꠎꠣꠔꠞ ꠎꠣꠘꠖꠣꠞ ꠙꠄꠖꠣ ꠇꠞꠟꠣ, ꠀꠞ ꠢꠇꠟ ꠎꠣꠔꠞ ꠙꠣꠈꠤꠅ ꠙꠄꠖꠣ ꠇꠞꠟꠣ। ꠔꠣꠁꠘ ꠖꠦꠈꠟꠣ ꠁꠔꠣ ꠜꠣꠟꠣ।
GEN 1:22 ꠔꠣꠁꠘ ꠔꠣꠞꠣ ꠢꠇꠟꠞꠦ ꠅꠃ ꠟꠣꠈꠣꠘ ꠛꠞꠇꠔ ꠘꠣꠎꠤꠟ ꠇꠞꠟꠣ, ꠔꠥꠝꠞꠣ ꠚꠟꠀꠟꠣ ꠅꠁꠀ ꠛꠣꠠꠅ ꠀꠞ ꠖꠞꠤꠀꠞ ꠙꠣꠘꠤ ꠜꠞꠤ ꠎꠣꠅ, ꠖꠥꠘꠤꠀꠁꠞ ꠝꠣꠎꠦ ꠙꠣꠈꠤ ꠅꠇꠟꠅ ꠛꠣꠠꠃꠇ।
GEN 1:23 ꠢꠣꠁꠘ꠆ꠎꠣ ꠉꠦꠟ, ꠛꠤꠀꠘꠅ ꠉꠦꠟ, ꠁꠇꠐꠣ ꠅꠁꠟ ꠙꠣꠌ ꠘꠝ꠆ꠛꠞ ꠖꠤꠘ।
GEN 1:24 ꠄꠞꠛꠣꠖꠦ ꠀꠟ꠆ꠟꠣꠄ ꠚꠞꠝꠣꠁꠟꠣ, ꠝꠣꠐꠤ ꠕꠣꠇꠤ ꠅꠃꠟꠣ ꠎꠣꠘꠖꠣꠞ ꠅꠃꠇ ꠎꠣꠞꠣꠞ ꠘꠤꠎꠞ ꠎꠣꠔ ꠅꠇꠟꠞꠦ ꠛꠣꠠꠣꠁꠛ, ꠄꠞꠣꠞ ꠝꠣꠎꠦ ꠙꠣꠟꠣ ꠢꠦꠝꠣꠘ, ꠝꠣꠐꠤꠔ ꠌꠟꠞꠣ ꠢꠥꠞꠥ-ꠝꠥꠞꠥ ꠎꠣꠘꠖꠣꠞ ꠀꠞ ꠎꠋꠟꠤ ꠎꠣꠘꠥꠀꠞ ꠅꠇꠟꠅ। ꠅꠃꠟꠣꠃ ꠅꠁꠟ।
GEN 1:25 ꠀꠟ꠆ꠟꠣꠄ ꠖꠥꠘꠤꠀꠁꠞ ꠝꠣꠎꠦ ꠢꠇꠟ ꠎꠣꠔꠞ ꠎꠋꠟꠤ ꠎꠣꠘꠥꠀꠞ, ꠙꠣꠟꠣ ꠢꠦꠝꠣꠘ ꠀꠞ ꠝꠣꠐꠤꠞ ꠝꠣꠎꠦ ꠛꠥꠇꠦ ꠌꠟꠞꠣ ꠎꠣꠘꠖꠣꠞ ꠛꠣꠘꠣꠁꠟꠣ। ꠔꠣꠁꠘ ꠖꠦꠈꠟꠣ ꠁꠔꠣ ꠜꠣꠟꠣ।
GEN 1:26 ꠄꠞꠛꠣꠖꠦ ꠀꠟ꠆ꠟꠣꠄ ꠚꠞꠝꠣꠁꠟꠣ, ꠀꠅ ꠀꠝꠞꠣꠞ ꠍꠥꠞꠔꠦ ꠀꠝꠞꠣꠞ ꠟꠉꠦ ꠝꠤꠟ ꠞꠣꠈꠤꠀ ꠝꠣꠘꠥꠡ ꠛꠣꠘꠣꠁ। ꠔꠣꠞꠣ ꠖꠞꠤꠀꠞ ꠝꠣꠍ, ꠀꠍꠝꠣꠘꠞ ꠙꠣꠈꠤ, ꠎꠣꠘꠥꠀꠞ, ꠝꠣꠐꠤꠞ ꠝꠣꠎꠦ ꠛꠥꠇꠦ ꠌꠟꠞꠣ ꠎꠣꠘꠖꠣꠞ, ꠀꠞ ꠀꠡ꠆ꠔꠣ ꠖꠥꠘꠤꠀꠁꠞ ꠃꠙꠞꠦ ꠛꠣꠖꠡꠣꠁ ꠇꠞꠃꠇ।
GEN 1:27 ꠔꠣꠁꠘ ꠔꠣꠘ ꠘꠤꠎꠞ ꠍꠥꠞꠔꠦ ꠝꠣꠘꠥꠡ ꠙꠄꠖꠣ ꠇꠞꠟꠣ, ꠄꠇ꠆ꠇꠦꠞꠦ ꠘꠤꠎꠞ ꠝꠔ ꠇꠞꠤ ꠙꠄꠖꠣ ꠇꠞꠟꠣ, ꠙꠄꠖꠣ ꠇꠞꠟꠣ ꠛꠦꠐꠣ ꠀꠞ ꠛꠦꠐꠤ।
GEN 1:28 ꠀꠞ ꠔꠣꠞꠣꠞꠦ ꠛꠞꠇꠔ ꠘꠣꠎꠤꠟ ꠇꠞꠤꠀ ꠇꠁꠟꠣ, ꠔꠥꠝꠤꠔꠣꠁꠘ ꠚꠟꠀꠟꠣ ꠅꠁꠀ ꠛꠣꠠꠤꠀ ꠖꠥꠘꠤꠀꠁ ꠜꠞꠤ ꠎꠣꠅ। ꠖꠥꠘꠤꠀꠁꠞꠦ ꠡꠣꠡꠘ ꠇꠞꠅ, ꠀꠞ ꠖꠞꠤꠀꠞ ꠝꠣꠍ, ꠀꠍꠝꠣꠘꠞ ꠙꠣꠈꠤ, ꠝꠣꠐꠤꠞ ꠃꠙꠞꠦ ꠌꠟꠞꠣ ꠢꠇꠟ ꠎꠣꠘꠖꠣꠞꠞ ꠃꠙꠞꠦ ꠛꠣꠖꠡꠣꠁ ꠇꠞꠅ।
GEN 1:29 ꠄꠞꠛꠣꠖꠦ ꠀꠟ꠆ꠟꠣꠄ ꠚꠞꠝꠣꠁꠟꠣ, ꠢꠥꠘꠅ, ꠖꠥꠘꠤꠀꠞ ꠃꠙꠞꠞ ꠢꠇꠟ ꠎꠣꠔꠞ ꠛꠤꠌꠀꠟꠣ ꠉꠣꠍ-ꠛꠤꠞꠤꠇ, ꠀꠞ ꠢꠇꠟ ꠎꠣꠔꠞ ꠚꠟꠞ ꠉꠣꠍ ꠎꠣꠞꠣꠞ ꠘꠤꠎꠞ ꠎꠣꠔꠝꠔ ꠚꠟ ꠗꠞꠦ ꠎꠣꠞ ꠚꠟꠞ ꠝꠣꠎꠦ ꠔꠣꠞꠣꠞ ꠘꠤꠎꠞ ꠛꠤꠌ ꠀꠍꠦ, ꠁꠔꠣ ꠢꠇꠟꠔꠣ ꠀꠝꠤ ꠔꠥꠝꠞꠣꠞ ꠈꠣꠘꠤꠞ ꠟꠣꠉꠤ ꠖꠤꠟꠣꠝ।
GEN 1:30 ꠖꠥꠘꠤꠀꠞ ꠙꠞꠔꠦꠇ ꠎꠣꠘꠥꠀꠞ, ꠀꠍꠝꠣꠘꠞ ꠙꠣꠈꠤꠘ, ꠝꠣꠐꠤꠞ ꠝꠣꠎꠦ ꠛꠥꠇꠦ ꠌꠟꠞꠣ ꠎꠣꠘꠖꠣꠞ, ꠁꠔꠣ ꠢꠇ꠆ꠇꠟ ꠎꠣꠘꠖꠣꠞꠞ ꠈꠣꠘꠤꠞ ꠟꠣꠉꠤ ꠀꠝꠤ ꠢꠇꠟ ꠟꠔꠣ-ꠙꠣꠔꠣ ꠀꠞ ꠊꠣꠡ ꠖꠤꠟꠣꠝ। ꠅꠃꠟꠣꠃ ꠅꠁꠟ।
GEN 1:31 ꠀꠟ꠆ꠟꠣꠄ ꠔꠣꠘ ꠙꠄꠖꠣ ꠇꠞꠣ ꠢꠇꠟꠔꠣ ꠖꠦꠈꠟꠣ, ꠁꠔꠣ ꠢꠇꠟꠔꠣꠃ ꠈꠥꠛ ꠜꠣꠟꠣ ꠅꠁꠍꠦ। ꠢꠣꠁꠘ꠆ꠎꠣ ꠉꠦꠟ, ꠛꠤꠀꠘꠅ ꠉꠦꠟ। ꠁꠇꠐꠣ ꠅꠁꠟ ꠍꠄ ꠘꠝ꠆ꠛꠞ ꠖꠤꠘ।
GEN 2:1 ꠅꠃ ꠟꠣꠈꠣꠘ ꠀꠍꠝꠣꠘ-ꠎꠝꠤꠘ ꠀꠞ ꠄꠞ ꠝꠣꠎꠞ ꠢꠇꠟꠔꠣ ꠙꠄꠖꠣ ꠇꠞꠣ ꠡꠦꠡ ꠅꠁꠟ।
GEN 2:2 ꠀꠟ꠆ꠟꠣꠄ ꠁ ꠢꠇꠟ ꠇꠣꠝ ꠡꠦꠡ ꠇꠞꠤꠀ ꠢꠣꠞꠟꠦ ꠡꠣꠔ ꠘꠝ꠆ꠛꠞ ꠖꠤꠘ ꠀꠞꠣꠝ ꠇꠞꠟꠣ, ꠔꠣꠁꠘ ꠁꠖꠤꠘ ꠀꠞ ꠇꠥꠘ꠆ꠔꠣ ꠙꠄꠖꠣ ꠇꠞꠟꠣ ꠘꠣ।
GEN 2:3 ꠅꠃ ꠡꠣꠔ ꠘꠝ꠆ꠛꠞ ꠖꠤꠘꠞꠦ ꠛꠞꠇꠔ ꠘꠣꠎꠤꠟ ꠇꠞꠤꠀ ꠙꠣꠇ ꠖꠤꠘ ꠇꠞꠟꠣ, ꠔꠣꠘ ꠢꠇꠟꠔꠣ ꠙꠄꠖꠣ ꠇꠞꠣ ꠡꠦꠡ ꠇꠞꠤ ꠔꠣꠁꠘ ꠅꠃ ꠖꠤꠘ ꠎꠤꠞꠣꠁꠟꠣ।
GEN 2:4 ꠅꠃ ꠅꠁꠟ ꠀꠍꠝꠣꠘ ꠀꠞ ꠎꠝꠤꠘ ꠙꠄꠖꠣꠞ ꠛꠄꠀꠘ। ꠝꠣꠛꠥꠖ ꠀꠟ꠆ꠟꠣꠄ ꠎꠦꠛꠟꠣ ꠀꠍꠝꠣꠘ ꠀꠞ ꠎꠝꠤꠘ ꠙꠄꠖꠣ ꠇꠞꠍꠤꠟꠣ,
GEN 2:5 ꠁ ꠡꠝꠄ ꠎꠝꠤꠘꠞ ꠃꠙꠞꠦ ꠇꠥꠘꠥꠎꠣꠔꠞ ꠉꠣꠍ-ꠙꠣꠟꠣ ꠀꠍꠤꠟ ꠘꠣ ꠀꠞ ꠇꠥꠘꠥ ꠟꠔꠣ-ꠙꠣꠔꠣꠅ ꠚꠟꠤꠍꠦ ꠘꠣ, ꠇꠣꠞꠘ ꠔꠣꠁꠘ ꠎꠝꠤꠘꠞ ꠃꠙꠞꠦ ꠝꠦꠊ ꠖꠤꠍꠂꠘ ꠘꠣ, ꠀꠞ ꠎꠝꠤꠘ ꠀꠛꠣꠖ ꠇꠞꠣꠞ ꠝꠣꠘꠥꠡꠅ ꠀꠍꠤꠟ ꠘꠣ।
GEN 2:6 ꠅꠃ ꠡꠝꠄ ꠝꠣꠐꠤꠞ ꠝꠥꠞ ꠕꠣꠇꠤ ꠙꠣꠘꠤ ꠃꠑꠔ ꠀꠞ ꠎꠝꠤꠘ ꠜꠤꠎꠔ।
GEN 2:7 ꠛꠣꠖꠦ ꠝꠣꠛꠥꠖ ꠀꠟ꠆ꠟꠣꠄ ꠚꠦꠇ ꠝꠣꠐꠤ ꠖꠤꠀ ꠝꠣꠘꠥꠡ ꠛꠣꠘꠣꠁꠀ ꠔꠣꠞ ꠘꠣꠇꠞ ꠝꠣꠎꠦ ꠚꠥ ꠖꠤꠀ ꠎꠣꠘ ꠢꠣꠞꠣꠁꠟꠣ। ꠀꠞ ꠅꠃ ꠝꠣꠘꠥꠡ ꠎꠣꠘꠖꠣꠞ ꠅꠁꠟ।
GEN 2:8 ꠝꠣꠛꠥꠖ ꠀꠟ꠆ꠟꠣꠄ ꠙꠥꠛꠦꠖꠤ ꠀꠖꠣꠘ ꠘꠣꠝꠞ ꠎꠣꠉꠣꠔ ꠄꠇ ꠛꠣꠉꠣꠘ ꠇꠞꠍꠤꠟꠣ, ꠢꠘꠅ ꠔꠣꠘꠞ ꠛꠣꠘꠣꠁꠟ ꠅꠃ ꠝꠣꠘꠥꠡꠞꠦ ꠞꠣꠈꠟꠣ।
GEN 2:9 ꠢꠤꠈꠣꠘꠞ ꠝꠣꠐꠤꠔ ꠔꠣꠁꠘ ꠅꠃ ꠟꠣꠈꠣꠘ ꠉꠣꠍ ꠅꠇꠟ ꠚꠟꠣꠁꠍꠟꠣ, ꠎꠦꠔꠣ ꠖꠦꠈꠔꠦ ꠈꠥꠛ ꠡꠥꠘ꠆ꠖꠞ ꠀꠞ ꠚꠟꠅ ꠈꠣꠁꠔꠦ ꠈꠥꠛ ꠝꠎꠣ। ꠀꠞ ꠛꠣꠉꠣꠘꠞ ꠝꠣꠎꠈꠣꠘꠅ ꠔꠣꠁꠘ “ꠎꠤꠘ꠆ꠖꠦꠉꠤ-ꠉꠣꠍ” ꠀꠞ “ꠘꠦꠇꠤ-ꠛꠖꠤꠞ ꠀꠈꠟ ꠖꠦꠅꠞꠣ ꠉꠣꠍ” ꠘꠣꠝꠞ ꠖꠥꠁꠐꠣ ꠉꠣꠍꠅ ꠞꠣꠈꠍꠤꠟꠣ।
GEN 2:10 ꠢꠃ ꠛꠣꠉꠣꠘꠅ ꠙꠣꠘꠤ ꠎꠥꠉꠣꠁꠀ ꠖꠤꠔ ꠄꠇ ꠉꠣꠋ ꠀꠍꠤꠟ, ꠎꠦꠇꠐꠣ ꠀꠖꠣꠘꠞ ꠝꠣꠎꠦꠖꠤ ꠛꠣꠞ ꠅꠁꠀ ꠌꠣꠁꠞ ꠜꠣꠉ ꠅꠁꠉꠦꠍꠤꠟ।
GEN 2:11 ꠙꠄꠟꠣ ꠉꠣꠋꠉꠞ ꠘꠣꠝ ꠀꠍꠤꠟ ꠙꠤꠡꠥꠘ, ꠁꠇꠐꠣ ꠀꠡ꠆ꠔꠣ ꠢꠛꠤꠟꠣ ꠖꠦꠡꠞ ꠜꠤꠔꠞꠦ ꠖꠤꠀ ꠉꠦꠍꠦ। ꠁꠘꠅ ꠡꠥꠘꠣ ꠙꠣꠅꠀ ꠎꠣꠄ,
GEN 2:12 ꠀꠞ ꠅꠃ ꠖꠦꠡꠞ ꠡꠥꠘꠣ ꠈꠥꠛ ꠈꠣꠐꠤ, ꠁꠔꠣ ꠍꠣꠠꠣꠅ ꠢꠤꠘꠅ ꠝꠦꠡꠇꠦ-ꠀꠝ꠆ꠛꠞ ꠀꠞ ꠀꠇꠤꠇ ꠝꠘꠤ ꠙꠣꠅꠀ ꠎꠣꠄ।
GEN 2:13 ꠖꠥꠁ ꠘꠝ꠆ꠛꠞ ꠉꠣꠋꠉꠞ ꠘꠣꠝ ꠎꠤꠢꠥꠘ, ꠁꠇꠐꠣ ꠀꠡ꠆ꠔꠣ ꠇꠥꠡ ꠖꠦꠡꠞ ꠜꠤꠔꠞꠦ ꠖꠤꠀ ꠉꠦꠍꠦ।
GEN 2:14 ꠔꠤꠘ ꠘꠝ꠆ꠛꠞ ꠉꠣꠋꠉꠞ ꠘꠣꠝ ꠖꠎꠟꠣ, ꠁꠇꠐꠣ ꠀꠡꠤꠞꠤꠀ ꠖꠦꠡꠞ ꠙꠥꠛꠦ ꠖꠤꠀ ꠉꠦꠍꠦ। ꠀꠞ ꠌꠣꠁꠞ ꠘꠝ꠆ꠛꠞ ꠉꠣꠋꠉꠞ ꠘꠣꠝ ꠅꠁꠟ ꠚꠥꠞꠣꠔ।
GEN 2:15 ꠛꠣꠖꠦ ꠝꠣꠛꠥꠖ ꠀꠟ꠆ꠟꠣꠄ ꠅꠃ ꠝꠣꠘꠥꠡꠞꠦ ꠀꠖꠣꠘ ꠛꠣꠉꠣꠘꠅ ꠞꠣꠈꠟꠣ, ꠢꠤꠘꠅ ꠈꠦꠔ-ꠈꠣꠝꠣꠞ ꠀꠞ ꠢꠦꠚꠣꠎꠔ ꠇꠞꠣꠞ ꠟꠣꠉꠤ।
GEN 2:16 ꠔꠣꠁꠘ ꠀꠖꠝꠞꠦ ꠢꠥꠇꠥꠝ ꠖꠤꠟꠣ, “ꠔꠥꠝꠤ ꠔꠥꠝꠣꠞ ꠈꠥꠡꠤꠝꠔ ꠁ ꠛꠣꠉꠤꠌꠣꠞ ꠎꠦꠇꠥꠘꠥ ꠉꠣꠍꠞ ꠚꠟ ꠈꠣꠁꠔꠣꠄ ꠙꠣꠞꠛꠣꠄ,
GEN 2:17 ꠈꠣꠟꠤ ꠘꠦꠇꠤ-ꠛꠖꠤꠞ ꠀꠈꠟꠞ ꠉꠣꠍꠞ ꠚꠟ ꠈꠣꠁꠅ ꠘꠣ, ꠎꠦꠖꠤꠘ ꠔꠥꠝꠤ ꠅꠃ ꠉꠣꠍꠞ ꠚꠟ ꠈꠣꠁꠛꠣꠄ ꠁꠖꠤꠘ ꠔꠥꠝꠤ ꠝꠞꠛꠣꠄꠃ ꠝꠞꠛꠣꠄ।”
GEN 2:18 ꠄꠞꠛꠣꠖꠦ ꠝꠣꠛꠥꠖ ꠀꠟ꠆ꠟꠣꠄ ꠇꠁꠟꠣ, “ꠝꠣꠘꠡꠞ ꠟꠣꠉꠤ ꠄꠇꠟꠣ ꠕꠣꠇꠣ ꠜꠣꠟꠣ ꠘꠣꠄ। ꠀꠝꠤ ꠔꠣꠞ ꠟꠣꠈ ꠄꠇꠎꠘ ꠎꠥꠠꠤ ꠛꠣꠘꠣꠁꠝꠥ।”
GEN 2:19 ꠀꠞ ꠝꠣꠛꠥꠖ ꠀꠟ꠆ꠟꠣꠄ ꠖꠥꠘꠤꠀꠁꠞ ꠢꠇꠟ ꠎꠣꠘꠖꠣꠞ ꠀꠞ ꠀꠍꠝꠣꠘꠞ ꠢꠇꠟ ꠙꠣꠈꠤ ꠝꠣꠐꠤꠖꠤ ꠛꠣꠘꠣꠁꠀ ꠅꠃ ꠝꠣꠘꠡꠞ ꠍꠣꠝꠘꠦ ꠀꠘꠟꠣ, ꠖꠦꠈꠟꠣ ꠄꠁꠘ ꠁꠔꠣꠞꠦ ꠇꠤꠔꠣ ꠇꠁꠀ ꠒꠣꠇꠂꠘ, ꠀꠞ ꠔꠣꠁꠘ ꠎꠣꠞꠦ ꠎꠦ ꠘꠣꠝꠦ ꠒꠣꠇꠟꠣ, ꠔꠣꠞ ꠅꠃ ꠘꠣꠝ ꠅꠁꠟ।
GEN 2:20 ꠀꠖꠝꠦ ꠢꠇꠟ ꠙꠣꠟꠣ ꠢꠦꠝꠣꠘ, ꠀꠍꠝꠣꠘꠞ ꠙꠣꠈꠤ ꠀꠞ ꠎꠋꠟꠤ ꠎꠣꠘꠥꠀꠞꠞ ꠘꠣꠝ ꠞꠣꠈꠟꠣ, ꠁꠔꠣꠞ ꠝꠣꠎꠦ ꠔꠣꠘ ꠟꠣꠈ ꠇꠥꠘꠥ ꠎꠥꠠꠤ ꠝꠤꠟꠟ ꠘꠣ।
GEN 2:21 ꠄꠞꠛꠣꠖꠦ ꠔꠣꠁꠘ ꠀꠖꠝꠞ ꠝꠣꠎꠦ ꠛꠦꠢꠥꠡꠤ ꠊꠥꠝ ꠀꠘꠟꠣ। ꠅꠃ ꠊꠥꠝꠞ ꠝꠣꠎꠦ ꠔꠣꠘ ꠙꠣꠁꠘ꠆ꠎꠞꠞ ꠄꠇꠐꠣ ꠀꠒ꠆ꠒꠤ ꠈꠥꠟꠤꠀ ꠘꠤꠀ ꠎꠣꠉꠣꠐꠣ ꠛꠘ꠆ꠖ ꠇꠞꠤ ꠖꠤꠟꠣ,
GEN 2:22 ꠀꠞ ꠅꠃ ꠀꠒ꠆ꠒꠤ ꠖꠤꠀ ꠝꠣꠛꠥꠖ ꠀꠟ꠆ꠟꠣꠄ ꠄꠇ ꠛꠦꠐꠤꠝꠣꠘꠥꠡ ꠛꠣꠘꠣꠁꠀ ꠀꠖꠝꠞ ꠉꠦꠍꠦ ꠀꠘꠟꠣ।
GEN 2:23 ꠔꠣꠘꠦ ꠖꠦꠈꠤꠀ ꠀꠖꠝꠦ ꠇꠁꠟꠣ, “ꠅꠈꠘ ꠅꠁꠍꠦ, ꠔꠣꠁ ꠀꠝꠣꠞ ꠀꠒ꠆ꠒꠤꠞ ꠀꠒ꠆ꠒꠤ, ꠉꠥꠡ꠆ꠔꠞ ꠉꠥꠡ꠆ꠔ। ꠔꠣꠁꠞ ꠘꠣꠝ ꠅꠁꠛ ꠘꠣꠞꠤ, ꠔꠣꠁꠞꠦ ꠘꠞ ꠕꠣꠇꠤ ꠘꠦꠅꠀ।”
GEN 2:24 ꠄꠞꠟꠣꠉꠤ ꠛꠦꠐꠣꠁꠘ꠆ꠔꠦ ꠝꠣ-ꠛꠣꠚꠞꠦ ꠍꠣꠠꠤꠀ ꠛꠃꠞ ꠟꠉꠦ ꠞꠁꠛꠣ, ꠔꠣꠞꠣ ꠖꠥꠁꠅꠎꠘ ꠄꠇ ꠡꠞꠤꠟ ꠅꠁꠛꠣ।
GEN 2:25 ꠀꠖꠝ ꠀꠞ ꠔꠣꠘ ꠛꠤꠛꠤꠞ ꠡꠞꠤꠟ ꠃꠖꠣꠝ ꠕꠣꠇꠔ, ꠁꠔꠣ ꠇꠥꠘꠥ ꠡꠞꠝ ꠀꠍꠤꠟ ꠘꠣ।
GEN 3:1 ꠝꠣꠛꠥꠖ ꠀꠟ꠆ꠟꠣꠞ ꠙꠄꠖꠣ ꠇꠞꠣ ꠎꠝꠤꠘꠞ ꠢꠇꠟ ꠎꠣꠘꠖꠣꠞꠞ ꠝꠣꠎꠦ ꠢꠣꠚ ꠅꠁꠟ ꠢꠇꠟ ꠕꠣꠇꠤ ꠚꠘ꠆ꠖꠤꠛꠣꠎ। ꠅꠃ ꠢꠣꠚꠦ ꠄꠇꠖꠤꠘ ꠢꠤ ꠛꠦꠐꠤ ꠝꠣꠘꠡꠞꠦ ꠇꠁꠟ, “ꠀꠟ꠆ꠟꠣꠄ ꠢꠣꠍꠣꠃ ꠔꠥꠝꠣꠔꠣꠘꠞꠦ ꠇꠁꠍꠂꠘ ꠘꠤ, ꠛꠣꠉꠣꠘꠞ ꠢꠇꠟ ꠉꠣꠍꠞ ꠚꠟ ꠔꠥꠝꠞꠣ ꠈꠣꠁꠔꠣꠄ ꠙꠣꠞꠔꠣꠄ ꠘꠣꠄ?”
GEN 3:2 ꠛꠦꠐꠤꠄ ꠇꠁꠟꠣ, “ꠛꠣꠉꠣꠘꠞ ꠎꠦꠇꠥꠘꠥ ꠉꠣꠍꠞ ꠚꠟ ꠀꠝꠞꠣ ꠈꠣꠁꠔꠣꠝ ꠙꠣꠞꠤ,
GEN 3:3 ꠈꠣꠟꠤ ꠛꠣꠉꠣꠘꠞ ꠝꠣꠎꠈꠣꠘꠅ ꠎꠦ ꠉꠣꠍꠐꠣ ꠀꠍꠦ, ꠀꠟ꠆ꠟꠣꠄ ꠇꠁꠍꠂꠘ, ꠔꠥꠝꠞꠣ ꠄꠞ ꠚꠟ ꠈꠣꠁꠅ ꠘꠣ, ꠍꠁꠅ-ꠅ ꠘꠣ, ꠍꠁꠟꠦꠃ ꠝꠞꠛꠣꠄ।”
GEN 3:4 ꠅꠃ ꠢꠣꠚꠦ ꠔꠣꠘꠞꠦ ꠇꠁꠟ, “ꠘꠣ, ꠇꠥꠘꠥꠝꠘ꠆ꠔꠦꠃ ꠝꠞꠔꠣꠄ ꠘꠣꠄ।
GEN 3:5 ꠀꠟ꠆ꠟꠣꠄ ꠔ ꠎꠣꠘꠂꠘ, ꠎꠦꠖꠤꠘ ꠔꠥꠝꠞꠣ ꠁ ꠉꠣꠍꠞ ꠚꠟ ꠈꠣꠁꠟꠤꠛꠣꠄ ꠁꠖꠤꠘ ꠔꠥꠝꠞꠣꠞ ꠌꠃꠈ ꠈꠥꠟꠤꠎꠤꠛ, ꠀꠞ ꠘꠦꠇꠤ-ꠛꠖꠤꠞ ꠀꠈꠟ ꠙꠣꠁꠀ ꠔꠥꠝꠞꠣ ꠀꠟ꠆ꠟꠣꠞ ꠟꠣꠈꠣꠘ ꠅꠁꠎꠤꠛꠣꠄ।”
GEN 3:6 ꠛꠦꠐꠤꠄ ꠎꠦꠛꠟꠣ ꠛꠥꠎꠟꠣ, ꠅꠃ ꠉꠣꠍꠞ ꠚꠟ ꠈꠣꠁꠔꠦ ꠝꠎꠣ ꠅꠁꠛ, ꠖꠦꠈꠔꠦꠅ ꠡꠥꠘ꠆ꠖꠞ, ꠀꠞ ꠀꠈꠟꠖꠣꠞꠅ ꠅꠁꠎꠤꠝꠥ, ꠅꠃ ꠔꠣꠁꠘ ꠚꠟ ꠙꠣꠠꠤꠀ ꠈꠣꠁꠟꠣ, ꠀꠞ ꠔꠣꠘ ꠎꠣꠝꠣꠁꠞꠦꠅ ꠖꠤꠟꠣ ꠀꠞ ꠎꠣꠝꠣꠁꠄꠅ ꠈꠣꠁꠟꠤꠟꠣ।
GEN 3:7 ꠟꠉꠦ ꠟꠉꠦ ꠔꠣꠞꠣ ꠖꠥꠁꠅ ꠎꠘꠞ ꠌꠃꠈ ꠈꠥꠟꠤꠉꠦꠟ, ꠀꠞ ꠛꠥꠎꠟꠣ ꠔꠣꠁꠘ-ꠔꠣꠁꠘ ꠟꠦꠝꠐꠣ। ꠅꠃ ꠔꠣꠞꠣ ꠒꠥꠝꠥꠞ ꠉꠣꠍꠞ ꠇꠄꠐꠣ ꠙꠣꠔꠣ ꠍꠤꠠꠤꠀ ꠡꠤꠟꠣꠁ ꠇꠞꠤ ꠟꠦꠝꠐꠤ ꠛꠣꠘꠣꠁꠟꠣ।
GEN 3:8 ꠢꠣꠁꠘ꠆ꠎꠣ ꠛꠣꠟꠣ ꠔꠣꠞꠣ ꠝꠣꠛꠥꠖ ꠀꠟ꠆ꠟꠣꠞ ꠀꠅꠀꠎ ꠢꠥꠘꠟꠣ, ꠔꠣꠁꠘ ꠛꠣꠉꠣꠘꠞ ꠝꠣꠎꠦ ꠙꠣꠇꠣꠘꠤꠔ ꠀꠁꠞꠣ। ꠔꠦꠃ ꠀꠖꠝ ꠀꠞ ꠔꠣꠘ ꠛꠃ ꠝꠣꠛꠥꠖ ꠀꠟ꠆ꠟꠣꠞ ꠍꠣꠝꠘꠦ ꠘꠣ ꠙꠠꠣꠞ ꠟꠣꠉꠤ ꠛꠣꠉꠣꠘꠞ ꠉꠣꠍꠞ ꠀꠅꠠꠦ ꠟꠥꠇꠣꠁꠟꠣ।
GEN 3:9 ꠝꠣꠛꠥꠖ ꠀꠟ꠆ꠟꠣꠄ ꠀꠖꠝꠞꠦ ꠒꠣꠇ ꠖꠤꠀ ꠎꠤꠇꠣꠁꠟꠣ, “ꠔꠥꠝꠤ ꠇꠥꠀꠁ?”
GEN 3:10 ꠔꠣꠁꠘ ꠇꠁꠟꠣ, “ꠛꠣꠉꠣꠘꠞ ꠝꠣꠎꠦ ꠀꠝꠤ ꠔꠥꠝꠣꠞ ꠀꠅꠀꠎ ꠢꠥꠘꠍꠤ। ꠀꠝꠤ ꠔ ꠟꠦꠝꠐꠣ, ꠄꠞꠟꠣꠉꠤ ꠒꠞꠣꠁꠀ ꠟꠥꠇꠣꠁ ꠞꠁꠍꠤ।”
GEN 3:11 ꠔꠦꠃ ꠝꠣꠛꠥꠖ ꠀꠟ꠆ꠟꠣꠄ ꠎꠤꠇꠣꠁꠟꠣ, “ꠔꠥꠝꠤ ꠎꠦ ꠟꠦꠝꠐꠣ ꠇꠦ ꠇꠁꠟ? ꠎꠦ ꠉꠣꠍꠞ ꠚꠟ ꠈꠣꠁꠔꠦ ꠔꠥꠝꠣꠞꠦ ꠘꠣ ꠇꠞꠍꠤꠟꠣꠝ, ꠈꠣꠁꠟꠤꠍ ꠘꠣ ꠇꠤꠔꠣ?”
GEN 3:12 ꠀꠖꠝꠦ ꠇꠁꠟꠣ, “ꠎꠦ ꠛꠦꠐꠤꠝꠣꠘꠥꠡ ꠔꠥꠝꠤ ꠀꠝꠣꠞ ꠟꠉꠦ ꠖꠤꠍ, ꠔꠣꠁ ꠅꠃ ꠉꠣꠍꠞ ꠚꠟ ꠀꠝꠣꠞꠦ ꠈꠣꠅꠀꠁꠍꠦ।”
GEN 3:13 ꠅꠃ ꠝꠣꠛꠥꠖ ꠀꠟ꠆ꠟꠣꠄ ꠛꠦꠐꠤꠞꠦ ꠎꠤꠇꠣꠁꠟꠣ, “ꠔꠥꠝꠤ ꠁꠔꠣ ꠇꠤꠔꠣ ꠇꠞꠟꠣꠄ?” ꠔꠣꠁꠘ ꠇꠁꠟꠣ, “ꠢꠣꠚꠦ ꠀꠝꠣꠞꠦ ꠍꠣꠟ꠆ꠟꠣ ꠖꠤꠀ ꠈꠣꠅꠀꠁꠍꠦ।”
GEN 3:14 ꠔꠦꠃ ꠝꠣꠛꠥꠖ ꠀꠟ꠆ꠟꠣꠄ ꠢꠣꠚꠞꠦ ꠇꠁꠟꠣ, “ꠔꠥꠝꠣꠞ ꠁ ꠇꠣꠝꠞ ꠟꠣꠉꠤ ꠢꠇꠟ ꠙꠣꠟꠣ ꠢꠦꠝꠣꠘ ꠀꠞ ꠢꠇꠟ ꠎꠋꠟꠤ ꠎꠣꠘꠥꠀꠞꠞ ꠝꠣꠎꠦ ꠔꠥꠝꠤꠃ ꠟꠣꠘ꠆ꠘꠔꠤ ꠅꠁꠟꠣꠄ। ꠔꠥꠝꠤ ꠎꠤꠘ꠆ꠖꠦꠉꠤꠜꠞ ꠙꠦꠐꠅ ꠜꠞꠖꠤ ꠌꠟꠛꠣꠄ ꠀꠞ ꠗꠥꠟꠣ-ꠛꠣꠟꠥ ꠈꠣꠁꠛꠣꠄ।
GEN 3:15 ꠀꠝꠤ ꠔꠥꠝꠣꠞ ꠀꠞ ꠛꠦꠐꠤꠞ ꠝꠣꠎꠦ, ꠔꠥꠝꠣꠞ ꠛꠋꠡ ꠀꠞ ꠛꠦꠐꠤ ꠝꠣꠘꠡꠞ ꠛꠋꠡꠞ ꠝꠣꠎꠦ ꠖꠥꠡꠝꠘꠤ ꠙꠄꠖꠣ ꠇꠞꠝꠥ। ꠢꠤ ꠛꠋꠡꠦ ꠔꠥꠝꠣꠞ ꠇꠟ꠆ꠟꠣ ꠉꠥꠠꠣ ꠇꠞꠛ, ꠀꠞ ꠔꠥꠝꠤ ꠔꠣꠞ ꠙꠣꠅꠞ ꠝꠥꠞꠣꠔ ꠇꠣꠝꠠꠣꠁꠛꠣꠄ।”
GEN 3:16 ꠀꠞ ꠔꠣꠁꠘ ꠛꠦꠐꠤꠞꠦ ꠇꠁꠟꠣ, “ꠔꠥꠝꠣꠞ ꠢꠥꠞꠥꠔ꠆ꠔꠣ ꠅꠁꠛꠣꠞ ꠡꠝꠄ ꠔꠥꠝꠣꠞ ꠝꠍꠤꠛꠔ ꠈꠥꠛ ꠛꠣꠠꠣꠁ ꠖꠤꠝꠥ, ꠔꠥꠝꠤ ꠈꠥꠛ ꠇꠡ꠆ꠐ ꠇꠞꠤꠀ ꠢꠥꠞꠥꠔ꠆ꠔꠣ ꠙꠄꠖꠣ ꠇꠞꠛꠣꠄ। ꠎꠣꠝꠣꠁꠞ ꠛꠣꠄ ꠔꠥꠝꠣꠞ ꠈꠥꠛ ꠈꠣꠁꠡ ꠕꠣꠇꠛ, ꠀꠞ ꠢꠦ ꠔꠥꠝꠣꠞ ꠃꠙꠞꠦ ꠛꠦꠐꠣꠉꠤꠞꠤ ꠇꠞꠛ।”
GEN 3:17 ꠔꠣꠁꠘ ꠀꠖꠝꠞꠦ ꠇꠁꠟꠣ, “ꠎꠦ ꠉꠣꠍꠞ ꠚꠟ ꠀꠝꠤ ꠢꠣꠞꠣꠝ ꠇꠞꠤꠀ ꠖꠤꠍꠟꠣꠝ, ꠔꠥꠝꠤ ꠔꠥꠝꠣꠞ ꠛꠃꠞ ꠇꠕꠣ ꠢꠥꠘꠤꠀ ꠁꠔꠣ ꠈꠣꠁꠍ, ꠅꠃ ꠇꠣꠞꠘꠦ ꠎꠝꠤꠘꠞꠦ ꠟꠣꠘ꠆ꠘꠔꠤ ꠇꠞꠣ ꠅꠁꠟ। ꠎꠤꠘ꠆ꠖꠦꠉꠤꠜꠞ ꠎꠛꠞ ꠔꠇꠟꠤꠚ ꠇꠞꠤꠀ ꠔꠥꠝꠤ ꠎꠝꠤꠘꠞ ꠚꠡꠟ ꠈꠣꠁꠛꠣꠄ।
GEN 3:18 ꠔꠥꠝꠣꠞ ꠟꠣꠉꠤ ꠝꠣꠐꠤꠞ ꠝꠣꠎꠦ ꠇꠣꠐꠣ-ꠉꠍꠣ ꠀꠞ ꠛꠤꠡꠀꠟꠣ ꠎꠋꠉꠟ ꠎꠘꠝꠣꠁꠛ, ꠀꠞ ꠔꠥꠝꠣꠞ ꠈꠣꠘꠤ ꠅꠁꠛ ꠅꠃ ꠝꠣꠐꠤꠞ ꠚꠄ-ꠚꠡꠟ।
GEN 3:19 ꠎꠦ ꠝꠣꠐꠤ ꠕꠣꠇꠤ ꠔꠥꠝꠣꠞꠦ ꠙꠄꠖꠣ ꠇꠞꠍꠟꠣꠝ, ꠢꠃ ꠝꠣꠐꠤꠔ ꠚꠤꠞꠤꠀ ꠘꠣ ꠎꠣꠅꠀ ꠙꠞ꠆ꠎꠘ꠆ꠔ ꠔꠥꠝꠣꠞ ꠝꠣꠕꠣꠞ ꠊꠣꠝ ꠙꠣꠅꠔ ꠚꠣꠟꠣꠁꠀ ꠈꠣꠘꠤ ꠈꠣꠁꠛꠣꠄ। ꠔꠥꠝꠣꠞ ꠝꠣꠐꠤꠞ ꠡꠞꠤꠟ, ꠝꠣꠐꠤꠔꠃ ꠝꠤꠡꠤꠎꠤꠛ।”
GEN 3:20 ꠀꠖꠝꠦ ꠔꠣꠘ ꠛꠤꠛꠤꠞ ꠘꠣꠝ ꠞꠣꠈꠟꠣ ꠢꠣꠅꠀ [ꠝꠣꠘꠤ, ꠎꠤꠘ꠆ꠖꠦꠉꠤ-ꠖꠦꠅꠞꠣ], ꠇꠣꠞꠘ ꠔꠣꠁꠘ ꠢꠇꠟ ꠎꠤꠘ꠆ꠖꠣ ꠝꠣꠘꠡꠞ ꠝꠣ ꠅꠁꠛꠣ।
GEN 3:21 ꠀꠖꠝ ꠀꠞ ꠔꠣꠘ ꠛꠤꠛꠤꠞ ꠟꠣꠉꠤ ꠝꠣꠛꠥꠖ ꠀꠟ꠆ꠟꠣꠄ ꠎꠣꠘꠥꠀꠞꠞ ꠌꠣꠝꠠꠣꠖꠤ ꠟꠦꠛꠣꠍ ꠛꠣꠘꠣꠁꠀ ꠚꠤꠘ꠆ꠖꠣꠁꠟꠣ।
GEN 3:22 ꠄꠞꠛꠣꠖꠦ ꠝꠣꠛꠥꠖ ꠀꠟ꠆ꠟꠣꠄ ꠇꠁꠟꠣ, “ꠖꠦꠈꠅ, ꠘꠦꠇꠤ-ꠛꠖꠤꠞ ꠀꠈꠟ ꠙꠣꠁꠀ ꠝꠣꠘꠥꠡ ꠀꠝꠞꠣꠞ ꠟꠣꠈꠣꠘ ꠅꠁꠉꠦꠍꠦ, ꠅꠈꠘ ꠢꠦ ꠎꠣꠔꠦ ꠀꠔ ꠛꠣꠠꠣꠁꠀ ꠎꠤꠘ꠆ꠖꠦꠉꠤ-ꠉꠣꠍꠞ ꠚꠟ ꠈꠣꠁꠀ ꠢꠣꠝꠦꠡꠣ ꠎꠤꠘ꠆ꠖꠣ ꠘꠣ ꠞꠄ।”
GEN 3:23 ꠅꠃ ꠇꠕꠣ ꠇꠁꠀ ꠝꠣꠛꠥꠖ ꠀꠟ꠆ꠟꠣꠄ ꠎꠦ ꠝꠣꠐꠤ ꠖꠤꠀ ꠝꠣꠘꠡꠞꠦ ꠙꠄꠖꠣ ꠇꠞꠍꠟꠣ, ꠢꠃ ꠝꠣꠐꠤꠔ ꠈꠦꠔ-ꠈꠣꠝꠣꠞ ꠇꠞꠣꠞ ꠟꠣꠉꠤ ꠔꠣꠞꠦ ꠀꠖꠣꠘ ꠛꠣꠉꠣꠘ ꠕꠣꠇꠤ ꠈꠦꠖꠣꠁ ꠖꠤꠟꠣ।
GEN 3:24 ꠈꠦꠖꠣꠁ ꠖꠤꠀ ꠔꠣꠁꠘ ꠎꠤꠘ꠆ꠖꠦꠉꠤ-ꠉꠣꠍꠞ ꠉꠦꠍꠦ ꠎꠣꠅꠀꠞ ꠙꠕ ꠙꠣꠞꠣ ꠖꠦꠅꠀꠞ ꠟꠣꠉꠤ ꠀꠖꠣꠘ ꠛꠣꠉꠣꠘꠞ ꠙꠥꠛꠦꠖꠤ ꠇꠣꠞꠥꠛꠤ ꠚꠤꠞꠤꠡ꠆ꠔꠣ ꠅꠇꠟ ꠞꠣꠈꠟꠣ ꠀꠞ ꠀꠉꠥꠁꠘꠞ ꠔꠟꠥꠀꠞꠅ ꠊꠥꠞꠣꠘꠤꠔ ꠞꠣꠈꠟꠣ।
GEN 4:1 ꠀꠖꠝꠦ ꠔꠣꠘ ꠛꠤꠛꠤ ꠢꠣꠅꠀꠞ ꠟꠉꠦ ꠝꠤꠟꠣꠞ ꠛꠣꠖꠦ ꠔꠣꠘ ꠙꠦꠐꠅ ꠢꠥꠞꠥꠔ꠆ꠔꠣ ꠀꠁꠟ, ꠀꠞ ꠇꠣꠛꠤꠟ ꠘꠣꠝꠦ ꠔꠣꠘ ꠄꠇ ꠙꠥꠀꠞ ꠎꠘꠝ ꠅꠁꠟ। ꠔꠦꠃ ꠛꠤꠛꠤ ꠢꠣꠅꠀꠄ ꠇꠁꠟꠣ, “ꠝꠣꠛꠥꠖꠞ ꠉꠦꠍ ꠕꠘꠦ ꠀꠝꠤ ꠄꠇ ꠝꠣꠘꠥꠡ ꠇꠛꠥꠟ ꠇꠞꠍꠤ।”
GEN 4:2 ꠢꠤꠞꠛꠣꠞ ꠔꠣꠘ ꠊꠞꠅ ꠇꠣꠛꠤꠟꠞ ꠜꠣꠁ ꠢꠣꠛꠤꠟꠞ ꠎꠘꠝ ꠅꠁꠟ। ꠢꠣꠛꠤꠟꠦ ꠍꠣꠉꠟ-ꠝꠦꠠꠣ ꠞꠣꠈꠔ, ꠀꠞ ꠇꠣꠛꠤꠟꠦ ꠈꠦꠔ ꠇꠞꠔ।
GEN 4:3 ꠛꠣꠖꠦ ꠄꠇꠖꠤꠘ ꠇꠣꠛꠤꠟꠦ ꠝꠣꠛꠥꠖꠞ ꠉꠦꠍꠦ ꠔꠣꠞ ꠈꠦꠔꠞ ꠚꠄ-ꠚꠡꠟ ꠀꠘꠤꠀ ꠟꠤꠟ꠆ꠟꠣ ꠖꠤꠟ
GEN 4:4 ꠀꠞ ꠢꠣꠛꠤꠟꠦꠅ ꠔꠣꠞ ꠙꠣꠟꠞ ꠝꠣꠎꠦ ꠙꠄꠟꠣ ꠎꠘꠝꠤꠍꠦ ꠅꠃꠟꠣ ꠇꠄꠐꠣ ꠍꠣꠉꠟ-ꠝꠦꠠꠣ ꠎꠛ ꠇꠞꠤꠀ ꠌꠞ꠆ꠛꠤꠀꠟꠣ ꠅꠋꠡ ꠟꠤꠟ꠆ꠟꠣ ꠖꠤꠟ। ꠝꠣꠛꠥꠖꠦ ꠢꠣꠛꠤꠟ ꠀꠞ ꠔꠣꠞ ꠟꠤꠟ꠆ꠟꠣ ꠇꠛꠥꠟ ꠇꠞꠟꠣ,
GEN 4:5 ꠇꠣꠛꠤꠟ ꠀꠞ ꠔꠣꠞ ꠟꠤꠟ꠆ꠟꠣ ꠇꠛꠥꠟ ꠇꠞꠟꠣ ꠘꠣ, ꠉꠔꠤꠇꠦ ꠢꠦ ꠈꠥꠛ ꠉꠥꠍꠣ ꠇꠞꠤꠀ ꠝꠥꠈ ꠇꠣꠟꠣ ꠇꠞꠟ।
GEN 4:6 ꠝꠣꠛꠥꠖꠦ ꠇꠣꠛꠤꠟꠞꠦ ꠇꠁꠟꠣ, “ꠔꠥꠝꠤ ꠉꠥꠍꠣ ꠇꠞꠞꠣꠄ ꠇꠦꠘꠦ, ꠀꠞ ꠇꠤꠔꠣꠞ ꠟꠣꠉꠤ ꠔꠥꠝꠤ ꠝꠥꠈ ꠇꠣꠟꠣ ꠇꠞꠍ?
GEN 4:7 ꠔꠥꠝꠤ ꠜꠣꠟꠣ ꠇꠣꠝ ꠇꠞꠟꠦ ꠔꠥꠝꠣꠞ ꠝꠥꠈ ꠚꠞ ꠅꠁꠟ ꠅꠘꠦ? ꠀꠞ ꠘꠣ ꠇꠞꠟꠦ ꠔ ꠉꠥꠘꠣꠄ ꠔꠥꠝꠣꠞꠦ ꠗꠞꠣꠞ ꠟꠣꠉꠤ ꠔꠥꠝꠣꠞ ꠖꠥꠀꠞꠅ ꠃꠛꠣꠁ ꠞꠁꠍꠦ। ꠁꠉꠥꠞ ꠃꠙꠞꠦ ꠔꠥꠝꠤ ꠎꠤꠔꠔꠦ ꠅꠁꠛ।”
GEN 4:8 ꠛꠣꠖꠦ ꠇꠣꠛꠤꠟꠦ ꠔꠣꠞ ꠜꠣꠁ ꠢꠣꠛꠤꠟꠞꠦ ꠒꠣꠇꠤꠀ ꠇꠁꠟ, “ꠀꠅ ꠀꠝꠞꠣ ꠛꠘ꠆ꠖꠅ ꠎꠣꠁ।” ꠀꠞ ꠛꠘ꠆ꠖꠅ ꠉꠤꠀ ꠔꠣꠞ ꠜꠣꠁ ꠢꠣꠛꠤꠟꠞ ꠃꠙꠞꠦ ꠀꠈꠔꠣ ꠢꠣꠝꠟꠣ ꠇꠞꠤꠀ ꠈꠥꠘ ꠇꠞꠟ।
GEN 4:9 ꠢꠦꠡꠦ ꠝꠣꠛꠥꠖꠦ ꠇꠣꠛꠤꠟꠞꠦ ꠎꠤꠇꠣꠁꠟꠣ, “ꠔꠥꠝꠣꠞ ꠜꠣꠁ ꠇꠥꠀꠁ?” ꠇꠣꠛꠤꠟꠦ ꠇꠁꠟ, “ꠀꠝꠤ ꠎꠣꠘꠤ ꠘꠣ, ꠀꠝꠣꠞ ꠜꠣꠁꠞꠦ ꠀꠝꠤ ꠖꠦꠈꠣ-ꠢꠥꠘꠣ ꠇꠞꠤ ꠘꠤ?”
GEN 4:10 ꠔꠦꠃ ꠝꠣꠛꠥꠖꠦ ꠇꠁꠟꠣ, “ꠔꠥꠝꠤ ꠁꠔꠣ ꠇꠤꠔꠣ ꠇꠞꠟꠣꠄ? ꠖꠦꠈꠅ, ꠎꠝꠤꠘ ꠕꠣꠇꠤ ꠔꠥꠝꠣꠞ ꠜꠣꠁꠞ ꠟꠃꠄ ꠀꠝꠣꠞ ꠉꠦꠍꠦ ꠚꠞꠤꠀꠖ ꠇꠞꠦꠞ।
GEN 4:11 ꠎꠝꠤꠘꠦ ꠎꠦꠛꠟꠣ ꠔꠥꠝꠣꠞ ꠇꠣꠞꠘꠦ ꠔꠥꠝꠣꠞ ꠜꠣꠁꠞ ꠟꠃ ꠈꠣꠁꠟ, ꠅꠃ ꠡꠝꠄ ꠔꠥꠝꠤ ꠟꠣꠘ꠆ꠘꠔꠤ ꠅꠁꠀ ꠎꠝꠤꠘ ꠕꠣꠇꠤ ꠈꠦꠖꠣꠁꠟ ꠅꠁꠟꠣꠄ।
GEN 4:12 ꠔꠥꠝꠤ ꠎꠦꠛꠟꠣ ꠎꠝꠤꠘꠅ ꠈꠦꠔ ꠇꠞꠛꠣꠄ, ꠎꠝꠤꠘꠦ ꠀꠞ ꠔꠥꠝꠣꠞꠦ ꠚꠡꠟ ꠖꠤꠔ ꠘꠣꠄ। ꠔꠥꠝꠤ ꠛꠂꠔꠟ ꠅꠁꠀ ꠖꠥꠘꠤꠀꠁ ꠎꠥꠠꠤ ꠊꠥꠞꠛꠣꠄ।”
GEN 4:13 ꠔꠦꠃ ꠇꠣꠛꠤꠟꠦ ꠝꠣꠛꠥꠖꠞꠦ ꠇꠁꠟ, “ꠁ ꠡꠣꠡ꠆ꠔꠤ ꠀꠝꠣꠞ ꠀꠋꠉꠣꠎ ꠅꠁꠔ ꠘꠣꠄ।
GEN 4:14 ꠀꠁꠎ ꠔꠥꠝꠤ ꠀꠝꠣꠞꠦ ꠎꠝꠤꠘ ꠕꠣꠇꠤ ꠈꠦꠖꠣꠁ ꠖꠤꠞꠣꠄ, ꠀꠝꠤ ꠔꠥꠝꠣꠞ ꠍꠣꠝꠘꠦ ꠕꠘꠦ ꠢꠞꠤ ꠎꠣꠁꠝꠥꠉꠤ। ꠀꠞ ꠛꠂꠔꠟ ꠅꠁꠀ ꠎꠦꠛꠟꠣ ꠀꠝꠤ ꠖꠥꠘꠤꠀꠁꠔ ꠊꠥꠞꠝꠥ, ꠅꠃ ꠡꠝꠄ ꠎꠣꠞ ꠍꠣꠝꠘꠦꠃ ꠀꠝꠤ ꠙꠠꠝꠥ, ꠢꠦ-ꠃ ꠀꠝꠣꠞꠦ ꠈꠥꠘ ꠇꠞꠛ।”
GEN 4:15 ꠝꠣꠛꠥꠖꠦ ꠔꠣꠞꠦ ꠇꠁꠟꠣ, “ꠔꠦ ꠔꠥꠝꠣꠞꠦ ꠎꠦ ꠈꠥꠘ ꠇꠞꠛ, ꠔꠣꠞ ꠃꠙꠞꠦ ꠀꠝꠤ ꠡꠣꠔꠉꠥꠘ ꠛꠖꠟꠣ ꠟꠁꠝꠥ।” ꠅꠃ ꠇꠕꠣ ꠇꠁꠀ ꠝꠣꠛꠥꠖꠦ ꠇꠣꠛꠤꠟꠞꠦ ꠄꠇꠐꠣ ꠌꠤꠘ꠆ꠘꠔ ꠖꠤꠟꠣ, ꠎꠣꠔꠦ ꠇꠦꠃ ꠔꠣꠞꠦ ꠀꠔꠅ ꠙꠣꠁꠀꠅ ꠘꠣ ꠝꠣꠞꠦ।
GEN 4:16 ꠄꠞꠛꠣꠖꠦ ꠇꠣꠛꠤꠟ ꠝꠣꠛꠥꠖꠞ ꠍꠣꠝꠘ ꠕꠣꠇꠤ ꠢꠞꠤꠀ ꠀꠖꠣꠘꠞ ꠙꠥꠛꠦꠖꠤ ꠘꠥꠖ [ꠝꠣꠘꠤ, ꠊꠥꠞꠣ-ꠚꠤꠞꠣ] ꠖꠦꠡꠅ ꠉꠦꠟꠉꠤ।
GEN 4:17 ꠀꠞ ꠇꠣꠛꠤꠟ ꠔꠣꠞ ꠛꠃꠞ ꠟꠉꠦ ꠝꠤꠟꠣꠄ ꠔꠣꠁꠞ ꠙꠦꠐꠅ ꠢꠥꠞꠥꠔ꠆ꠔꠣ ꠀꠁꠟ, ꠀꠞ ꠢꠘꠥꠇꠞ ꠎꠘꠝ ꠅꠁꠟ। ꠇꠣꠛꠤꠟꠦ ꠄꠇꠐꠣ ꠐꠣꠃꠘ ꠛꠣꠘꠣꠁꠀ ꠔꠣꠞ ꠙꠥꠀꠞ ꠘꠣꠝꠦ ꠐꠣꠃꠘꠞ ꠘꠣꠝ ꠞꠣꠈꠟ ꠢꠘꠥꠇ।
GEN 4:18 ꠢꠘꠥꠇꠞ ꠙꠥꠀ ꠁꠞꠖ, ꠁꠞꠖꠞ ꠙꠥꠀ ꠝꠢꠥꠀꠁꠄꠟ, ꠝꠢꠥꠀꠁꠄꠟꠞ ꠙꠥꠀ ꠝꠕꠥꠡꠣꠁꠄꠟ, ꠝꠕꠥꠡꠣꠁꠄꠟꠞ ꠙꠥꠀ ꠟꠦꠝꠇ।
GEN 4:19 ꠟꠦꠝꠇꠦ ꠖꠥꠁ ꠛꠤꠀ ꠇꠞꠍꠟꠣ, ꠄꠇ ꠛꠃꠞ ꠘꠣꠝ ꠀꠖꠣ, ꠀꠞꠇ ꠛꠃꠞ ꠘꠣꠝ ꠡꠤꠟ꠆ꠟꠣ।
GEN 4:20 ꠀꠖꠣꠞ ꠊꠞꠅ ꠎꠣꠛꠟꠞ ꠎꠘꠝ ꠅꠁꠟ, ꠎꠣꠞꠣ ꠔꠣꠝ꠆ꠛꠥꠔ ꠕꠣꠇꠦ ꠀꠞ ꠙꠡꠥ ꠙꠣꠟꠦ, ꠅꠃ ꠎꠣꠛꠟ ꠔꠣꠞꠣꠞ ꠝꠥꠟ ꠛꠣꠚ।
GEN 4:21 ꠎꠣꠛꠟꠞ ꠜꠣꠁꠞ ꠘꠣꠝ ꠎꠥꠛꠟ। ꠎꠣꠞꠣ ꠛꠣꠡꠤ ꠀꠞ ꠛꠤꠘ ꠛꠣꠎꠣꠄ, ꠅꠃ ꠎꠥꠛꠟ ꠔꠣꠞꠣꠞ ꠝꠥꠟ ꠛꠣꠚ।
GEN 4:22 ꠡꠤꠟ꠆ꠟꠣꠞ ꠙꠦꠐꠅ ꠔꠥꠛꠟ-ꠇꠣꠛꠤꠟꠞ ꠎꠘꠝ ꠅꠁꠟ। ꠙꠤꠔꠟ ꠀꠞ ꠟꠥꠀꠞ ꠀꠔꠤꠀꠞ ꠛꠣꠘꠣꠘꠤ ꠀꠍꠤꠟ ꠔꠣꠞ ꠇꠣꠝ। ꠔꠣꠞ ꠛꠁꠘꠞ ꠘꠣꠝ ꠘꠣꠁꠄꠝꠣ।
GEN 4:23 ꠄꠇꠖꠤꠘ ꠟꠦꠝꠇꠦ ꠔꠣꠞ ꠖꠥꠁ ꠛꠃꠞꠦ ꠇꠁꠟ, “ꠅ ꠀꠖꠣ ꠀꠞ ꠡꠤꠟ꠆ꠟꠣ, ꠀꠝꠣꠞ ꠇꠕꠣ ꠢꠥꠘ, ꠟꠦꠝꠇꠞ ꠛꠤꠛꠤꠘ, ꠀꠝꠣꠞ ꠇꠕꠣꠄ ꠖꠦꠅ ꠇꠣꠘ। ꠎꠦ ꠛꠦꠐꠣꠄ ꠀꠝꠣꠞꠦ ꠇꠞꠤꠟ ꠎꠈꠝ, ꠎꠦ ꠛꠦꠐꠣꠄ ꠀꠝꠣꠞ ꠉꠣꠔ ꠔꠥꠟꠟ ꠀꠔ, ꠢꠦꠞꠦ ꠀꠝꠤ ꠇꠞꠤꠟꠣꠝ ꠘꠤꠙꠣꠔ।
GEN 4:24 ꠇꠣꠛꠤꠟꠞ ꠈꠥꠘꠞ ꠛꠖꠟꠣ ꠎꠥꠖꠤ ꠡꠣꠔ ꠉꠥꠘ ꠅꠄ, ꠟꠦꠝꠇꠞ ꠛꠖꠟꠣ ꠡꠣꠔꠔ꠆ꠔꠁꠞ ꠉꠥꠘ ꠘꠤꠌ꠆ꠌꠄ।”
GEN 4:25 ꠄꠞꠝꠣꠎꠦ ꠀꠖꠝꠦ ꠢꠤꠞꠛꠣꠞ ꠔꠣꠘ ꠛꠃꠞ ꠟꠉꠦ ꠝꠤꠟꠣꠄ, ꠔꠣꠘ ꠙꠦꠐꠅ ꠀꠞꠇ ꠙꠥꠀ ꠅꠁꠟ, ꠢꠣꠅꠀꠄ ꠔꠣꠞ ꠘꠣꠝ ꠞꠣꠈꠟꠣ ꠡꠤꠡ। ꠔꠣꠁꠘ ꠇꠁꠟꠣ, “ꠇꠣꠛꠤꠟꠦ ꠢꠣꠛꠤꠟꠞꠦ ꠈꠥꠘ ꠇꠞꠍꠦ ꠇꠞꠤ ꠀꠟ꠆ꠟꠣꠄ ꠢꠣꠛꠤꠟꠞ ꠛꠖꠟꠣ ꠀꠝꠣꠞꠦ ꠄꠇ ꠌꠦꠞꠣꠉ ꠎꠥꠉꠣꠁ ꠖꠤꠍꠂꠘ।”
GEN 4:26 ꠛꠣꠖꠦ ꠡꠤꠡꠞꠅ ꠄꠇ ꠙꠥꠀ ꠅꠁꠟ, ꠢꠦ ꠔꠣꠞ ꠘꠣꠝ ꠞꠣꠈꠟ ꠀꠘꠥꠡ, ꠅꠃ ꠡꠝꠄ ꠕꠘꠦ ꠝꠣꠘꠡꠦ ꠝꠣꠛꠥꠖꠞ ꠘꠣꠝ ꠟꠅꠀ ꠡꠥꠞꠥ ꠇꠞꠟꠣ।
GEN 5:1 ꠁꠔꠣ ꠅꠁꠟ ꠀꠖꠝꠞ ꠈꠣꠘ꠆ꠖꠣꠘꠞ ꠇꠟꠝꠛꠘ꠆ꠖꠤ ꠛꠄꠀꠘ। ꠝꠣꠘꠥꠡ ꠙꠄꠖꠣ ꠇꠞꠣꠞ ꠡꠝꠄ ꠀꠟ꠆ꠟꠣꠄ ꠔꠣꠘ ꠘꠤꠎꠞ ꠍꠥꠞꠔꠦ ꠙꠄꠖꠣ ꠇꠞꠟꠣ।
GEN 5:2 ꠙꠄꠖꠣ ꠇꠞꠟꠣ ꠛꠦꠐꠣ ꠀꠞ ꠛꠦꠐꠤ, ꠀꠞ ꠔꠣꠞꠣꠞꠦ ꠝꠣꠛꠥꠖꠦ ꠛꠞꠇꠔ ꠖꠤꠟꠣ, ꠙꠄꠖꠣ ꠇꠞꠤꠀ ꠘꠣꠝ ꠞꠣꠈꠟꠣ ꠀꠖꠝ।
GEN 5:3 ꠀꠖꠝꠞ ꠄꠇ-ꠡ ꠔꠤꠡ ꠛꠞꠍ ꠛꠄꠅꠡꠅ ꠔꠣꠘ ꠟꠉꠦ ꠝꠤꠟ ꠞꠣꠈꠤꠀ ꠔꠣꠘ ꠍꠥꠞꠔꠦ ꠄꠇ ꠙꠥꠀ ꠅꠁꠟ। ꠔꠣꠁꠘ ꠄꠞ ꠘꠣꠝ ꠞꠣꠈꠟꠣ ꠡꠤꠡ।
GEN 5:4 ꠡꠤꠡꠞ ꠎꠘꠝꠞ ꠛꠣꠖꠦ ꠀꠖꠝ ꠀꠞꠅ ꠀꠐ-ꠡ ꠛꠞꠍ ꠛꠣꠌꠟꠣ, ꠄꠞ ꠝꠣꠎꠦ ꠔꠣꠘ ꠀꠞꠅ ꠙꠥꠀ-ꠙꠥꠠꠤꠘ ꠅꠁꠍꠤꠟ।
GEN 5:5 ꠝꠥꠐ ꠘꠄ-ꠡ ꠔꠤꠡ ꠛꠞꠍ ꠎꠤꠘ꠆ꠖꠣ ꠕꠣꠇꠣꠞ ꠛꠣꠖꠦ ꠀꠖꠝ ꠝꠣꠞꠣ ꠉꠦꠟꠣ।
GEN 5:6 ꠡꠤꠡꠞ ꠄꠇ-ꠡ ꠙꠣꠌ ꠛꠞꠍ ꠛꠄꠅꠡꠅ ꠔꠣꠘ ꠙꠥꠀ ꠀꠘꠥꠡꠞ ꠎꠘꠝ ꠅꠁꠟ।
GEN 5:7 ꠀꠘꠥꠡꠞ ꠎꠘꠝꠞ ꠛꠣꠖꠦ ꠡꠤꠡ ꠀꠞꠅ ꠀꠐ-ꠡ ꠡꠣꠔ ꠛꠞꠍ ꠛꠣꠌꠟꠣ। ꠄꠞ ꠝꠣꠎꠦ ꠔꠣꠘ ꠀꠞꠅ ꠙꠥꠀ-ꠙꠥꠠꠤ ꠅꠁꠍꠤꠟ।
GEN 5:8 ꠝꠥꠐ ꠘꠄ-ꠡ ꠛꠣꠞꠅ ꠛꠞꠍ ꠛꠣꠌꠣꠞ ꠛꠣꠖꠦ ꠡꠤꠡ ꠝꠣꠞꠣ ꠉꠦꠟꠣ।
GEN 5:9 ꠀꠘꠥꠡꠞ ꠘꠛ꠆ꠛꠁ ꠛꠞꠍ ꠛꠄꠅꠡꠅ ꠔꠣꠘ ꠙꠥꠀ ꠇꠤꠘꠣꠘꠞ ꠎꠘꠝ ꠅꠁꠟ।
GEN 5:10 ꠇꠤꠘꠣꠘꠞ ꠎꠘꠝꠞ ꠛꠣꠖꠦ ꠀꠘꠥꠡ ꠀꠞꠅ ꠀꠐ-ꠡ ꠙꠘꠞ ꠛꠞꠍ ꠛꠣꠌꠟꠣ। ꠄꠞ ꠝꠣꠎꠦ ꠔꠣꠘ ꠀꠞꠅ ꠙꠥꠀ-ꠙꠥꠠꠤ ꠅꠁꠍꠤꠟ।
GEN 5:11 ꠝꠥꠐ ꠘꠄ-ꠡ ꠙꠣꠌ ꠛꠞꠍ ꠛꠣꠌꠣꠞ ꠛꠣꠖꠦ ꠀꠘꠥꠡ ꠝꠣꠞꠣ ꠉꠦꠟꠣ।
GEN 5:12 ꠇꠤꠘꠣꠘꠞ ꠡꠔ꠆ꠔꠁꠞ ꠛꠞꠍ ꠛꠄꠅꠡꠅ ꠔꠣꠘ ꠙꠥꠀ ꠝꠣꠢꠟꠣꠁꠟꠞ ꠎꠘꠝ ꠅꠁꠟ।
GEN 5:13 ꠝꠣꠢꠟꠣꠁꠟꠞ ꠎꠘꠝꠞ ꠛꠣꠖꠦ ꠇꠤꠘꠣꠘ ꠀꠞꠅ ꠀꠐ-ꠡ ꠌꠣꠟ꠆ꠟꠤꠡ ꠛꠞꠍ ꠛꠣꠌꠟꠣ। ꠄꠞ ꠝꠣꠎꠦ ꠔꠣꠘ ꠀꠞꠅ ꠙꠥꠀ-ꠙꠥꠠꠤ ꠅꠁꠍꠤꠟ।
GEN 5:14 ꠝꠥꠐ ꠘꠄ-ꠡ ꠖꠡ ꠛꠞꠍ ꠛꠣꠌꠣꠞ ꠛꠣꠖꠦ ꠇꠤꠘꠣꠘ ꠝꠣꠞꠣ ꠉꠦꠟꠣ।
GEN 5:15 ꠝꠣꠢꠟꠣꠁꠟꠞ ꠙꠄꠡꠐ꠆ꠐꠤ ꠛꠞꠍ ꠛꠄꠅꠡꠅ ꠔꠣꠘ ꠙꠥꠀ ꠁꠀꠞꠦꠖꠞ ꠎꠘꠝ ꠅꠁꠟ।
GEN 5:16 ꠁꠀꠞꠦꠖꠞ ꠎꠘꠝꠞ ꠛꠣꠖꠦ ꠝꠣꠢꠟꠣꠁꠟ ꠀꠞꠅ ꠀꠐ-ꠡ ꠔꠤꠡ ꠛꠞꠍ ꠛꠣꠌꠟꠣ। ꠄꠞ ꠝꠣꠎꠦ ꠔꠣꠘ ꠀꠞꠅ ꠙꠥꠀ-ꠙꠥꠠꠤ ꠅꠁꠍꠤꠟ।
GEN 5:17 ꠝꠥꠐ ꠀꠐ-ꠡ ꠙꠌꠣꠘꠛ꠆ꠛꠁ ꠛꠞꠍ ꠛꠣꠌꠣꠞ ꠛꠣꠖꠦ ꠝꠣꠢꠟꠣꠁꠟ ꠝꠣꠞꠣ ꠉꠦꠟꠣ।
GEN 5:18 ꠁꠀꠞꠦꠖꠞ ꠄꠇ-ꠡ ꠛꠣꠡꠐ꠆ꠐꠤ ꠛꠞꠍ ꠛꠄꠅꠡꠅ ꠔꠣꠘ ꠙꠥꠀ ꠁꠖ꠆ꠞꠤꠍꠞ ꠎꠘꠝ ꠅꠁꠟ।
GEN 5:19 ꠁꠖ꠆ꠞꠤꠍꠞ ꠎꠘꠝꠞ ꠛꠣꠖꠦ ꠁꠀꠞꠦꠖ ꠀꠞꠅ ꠀꠐ-ꠡ ꠛꠞꠍ ꠛꠣꠌꠟꠣ, ꠄꠞ ꠝꠣꠎꠦ ꠔꠣꠘ ꠀꠞꠅ ꠙꠥꠀ-ꠙꠥꠠꠤ ꠅꠁꠍꠤꠟ।
GEN 5:20 ꠝꠥꠐ ꠘꠄ-ꠡ ꠛꠣꠡꠐ꠆ꠐꠤ ꠛꠞꠍ ꠛꠣꠌꠣꠞ ꠛꠣꠖꠦ ꠁꠀꠞꠦꠖ ꠝꠣꠞꠣ ꠉꠦꠟꠣ।
GEN 5:21 ꠁꠖ꠆ꠞꠤꠍꠞ ꠙꠄꠡꠐ꠆ꠐꠤ ꠛꠞꠍ ꠛꠄꠅꠡꠅ ꠔꠣꠘ ꠙꠥꠀ ꠝꠣꠔꠥꠡꠣꠟꠣꠈꠞ ꠎꠘꠝ ꠅꠁꠟ।
GEN 5:22 ꠝꠣꠔꠥꠡꠣꠟꠣꠈꠞ ꠎꠘꠝꠞ ꠛꠣꠖꠦ ꠔꠤꠘ-ꠡ ꠛꠞꠍ ꠙꠞ꠆ꠎꠘ꠆ꠔ, ꠀꠟ꠆ꠟꠣꠞ ꠟꠉꠦ ꠁꠖ꠆ꠞꠤꠍꠞ ꠈꠣꠍ ꠖꠤꠖꠣꠞ ꠀꠍꠤꠟ। ꠄꠞ ꠝꠣꠎꠦ ꠔꠣꠘ ꠀꠞꠅ ꠙꠥꠀ-ꠙꠥꠠꠤ ꠅꠁꠍꠤꠟ।
GEN 5:23 ꠁꠖ꠆ꠞꠤꠍ ꠝꠥꠐ ꠔꠤꠘ-ꠡ ꠙꠄꠡꠐ꠆ꠐꠤ ꠛꠞꠍ ꠖꠥꠘꠤꠀꠁꠔ ꠀꠍꠟꠣ।
GEN 5:24 ꠄꠞꠛꠣꠖꠦ ꠔꠣꠘꠦ ꠀꠞ ꠖꠦꠈꠣ ꠉꠦꠟ ꠘꠣ। ꠀꠟ꠆ꠟꠣꠞ ꠟꠉꠦ ꠔꠣꠘ ꠈꠣꠍ ꠖꠤꠖꠣꠞ ꠀꠍꠤꠟ ꠉꠔꠤꠇꠦ ꠀꠟ꠆ꠟꠣꠄ ꠔꠣꠘꠞꠦ ꠎꠤꠘ꠆ꠖꠣ ꠢꠣꠟꠔꠦ ꠘꠤꠎꠞ ꠉꠦꠍꠦ ꠘꠤꠟꠣꠉꠤ।
GEN 5:25 ꠝꠣꠔꠥꠡꠣꠟꠣꠈꠞ ꠄꠇ-ꠡ ꠡꠣꠔꠣꠡꠤ ꠛꠞꠍ ꠛꠄꠅꠡꠅ ꠔꠣꠘ ꠙꠥꠀ ꠟꠣꠝꠣꠇꠞ ꠎꠘꠝ ꠅꠁꠟ।
GEN 5:26 ꠟꠣꠝꠣꠇꠞ ꠎꠘꠝꠞ ꠛꠣꠖꠦ ꠝꠣꠔꠥꠡꠣꠟꠣꠈ ꠀꠞꠅ ꠡꠣꠔ-ꠡ ꠛꠤꠞꠣꠡꠤ ꠛꠞꠍ ꠛꠣꠌꠟꠣ। ꠄꠞ ꠝꠣꠎꠦ ꠔꠣꠘ ꠀꠞꠅ ꠙꠥꠀ-ꠙꠥꠠꠤ ꠅꠁꠍꠤꠟ।
GEN 5:27 ꠝꠥꠐ ꠘꠄ-ꠡ ꠃꠘꠥꠡꠔ꠆ꠔꠁꠞ ꠛꠞꠍ ꠛꠣꠌꠣꠞ ꠛꠣꠖꠦ ꠝꠣꠔꠥꠡꠣꠟꠣꠈ ꠝꠣꠞꠣ ꠉꠦꠟꠣ।
GEN 5:28 ꠟꠣꠝꠣꠇꠞ ꠄꠇ-ꠡ ꠛꠤꠞꠣꠡꠤ ꠛꠞꠍ ꠛꠄꠅꠡꠅ ꠔꠣꠘ ꠄꠇ ꠙꠥꠀ ꠅꠁꠟ।
GEN 5:29 ꠔꠣꠁꠘ ꠄꠞ ꠘꠣꠝ ꠞꠣꠈꠟꠣ ꠘꠥꠢ ꠀꠞ ꠇꠁꠟꠣ, “ꠢꠦ ꠀꠝꠞꠣꠞ ꠀꠔꠞ ꠁ ꠖꠥꠈ-ꠝꠍꠤꠛꠔꠞ ꠇꠣꠝ ꠕꠣꠇꠤ, ꠝꠣꠛꠥꠖꠞ ꠟꠣꠘ꠆ꠘꠔꠤ ꠎꠝꠤꠘ ꠕꠣꠇꠤ ꠅꠈꠘ ꠀꠞꠣꠝ ꠖꠤꠛ।”
GEN 5:30 ꠘꠥꠢꠞ ꠎꠘꠝꠞ ꠛꠣꠖꠦ ꠟꠣꠝꠣꠇ ꠀꠞꠅ ꠙꠣꠌ-ꠡ ꠙꠌꠣꠘꠛ꠆ꠛꠁ ꠛꠞꠍ ꠛꠣꠌꠟꠣ, ꠄꠞ ꠝꠣꠎꠦ ꠔꠣꠘ ꠀꠞꠅ ꠙꠥꠀ-ꠙꠥꠠꠤ ꠅꠁꠍꠤꠟ।
GEN 5:31 ꠝꠥꠐ ꠡꠣꠔ-ꠡ ꠡꠣꠔꠔ꠆ꠔꠁꠞ ꠛꠞꠍ ꠛꠣꠌꠣꠞ ꠛꠣꠖꠦ ꠟꠣꠝꠣꠇ ꠝꠣꠞꠣ ꠉꠦꠟꠣ।
GEN 5:32 ꠘꠥꠢꠞ ꠙꠣꠌ-ꠡ ꠛꠞꠍ ꠛꠄꠅꠡꠞ ꠛꠣꠖꠦ ꠔꠣꠘ ꠙꠥꠀꠂꠘ ꠡꠣꠝ, ꠢꠣꠝ ꠀꠞ ꠁꠀꠚꠦꠔꠞ ꠎꠘꠝ ꠅꠁꠟ।
GEN 6:1 ꠖꠥꠘꠤꠀꠞ ꠃꠙꠞꠦ ꠎꠦꠛꠟꠣ ꠝꠣꠘꠥꠡ ꠛꠣꠠꠣ ꠀꠞꠝ꠆ꠛ ꠅꠁꠟ, ꠀꠞ ꠛꠃꠔ ꠙꠥꠠꠤꠘ꠆ꠔꠞꠅ ꠎꠘꠝ ꠅꠁꠟ,
GEN 6:2 ꠔꠦꠃ ꠉꠣꠁꠛꠤ ꠡꠇ꠆ꠔꠤꠀꠟꠣ ꠅꠇꠟꠦ ꠅꠃ ꠙꠥꠠꠤꠘ꠆ꠔꠞꠦ ꠈꠥꠛꠍꠥꠞꠔ ꠖꠦꠈꠤꠀ, ꠎꠦ ꠎꠣꠞꠦ ꠈꠥꠡꠤ ꠔꠣꠁꠞꠦ ꠙꠍꠘ꠆ꠖ ꠇꠞꠤ ꠘꠤꠟꠣ।
GEN 6:3 ꠁꠔꠣ ꠖꠦꠈꠤꠀ ꠝꠣꠛꠥꠖꠦ ꠇꠁꠟꠣ, “ꠀꠝꠣꠞ ꠞꠥꠢꠥ ꠢꠣꠝꠦꠡꠣ ꠝꠣꠘꠡꠞ ꠟꠉꠦ ꠕꠣꠇꠔ ꠘꠣꠄ। ꠝꠣꠘꠥꠡ ꠔ ꠈꠣꠟꠤ ꠉꠥꠡ꠆ꠔꠞ ꠇꠣꠄꠀ, ꠅꠈꠘ ꠕꠣꠇꠤ ꠀꠝꠤ ꠔꠣꠞꠣꠞꠦ ꠄꠇ-ꠡ ꠛꠤꠡ ꠛꠞꠍ ꠢꠣꠄꠀꠔ ꠖꠤꠀꠞ।”
GEN 6:4 ꠅꠃ ꠙꠥꠠꠤꠘ꠆ꠔꠞ ꠟꠉꠦ ꠢꠃ ꠉꠣꠁꠛꠤ ꠡꠇ꠆ꠔꠤꠀꠟꠣ ꠅꠇꠟꠞ ꠝꠤꠟꠣ-ꠝꠤꠡꠣꠞ ꠇꠣꠞꠘꠦ ꠎꠦ ꠀꠅꠟꠣꠖꠞ ꠎꠘꠝ ꠅꠁꠟ, ꠔꠣꠞꠣ ꠀꠍꠟꠣ ꠙꠥꠞꠣꠘꠣ ꠎꠝꠣꠘꠣꠞ ꠙꠄꠟꠥꠀꠘ ꠅꠇꠟ। ꠢꠤ ꠡꠝꠄ ꠛꠣ ꠔꠣꠞ ꠛꠣꠖꠦꠅ ꠖꠥꠘꠤꠀꠁꠔ ꠘꠦꠚꠤꠟꠤ ꠎꠣꠔꠞ ꠝꠣꠘꠥꠡ ꠀꠍꠤꠟ।
GEN 6:5 ꠝꠣꠛꠥꠖꠦ ꠖꠦꠈꠟꠣ, ꠖꠥꠘꠤꠀꠁꠔ ꠝꠣꠘꠡꠞ ꠘꠣꠚꠞꠝꠣꠘꠤ ꠈꠥꠛ ꠛꠣꠠꠤ ꠉꠦꠍꠦ, ꠀꠞ ꠔꠣꠞꠣꠞ ꠖꠤꠟꠞ ꠈꠣꠁꠡ, ꠈꠤꠀꠟ-ꠈꠥꠡꠤ ꠈꠣꠟꠤ ꠈꠣꠞꠣꠙꠤꠞ ꠛꠣꠄ।
GEN 6:6 ꠁꠔꠣ ꠖꠦꠈꠤꠀ ꠝꠣꠛꠥꠖꠦ ꠈꠥꠛ ꠔꠇꠟꠤꠚ ꠙꠣꠁꠟꠣ, ꠔꠣꠁꠘ ꠖꠥꠘꠤꠀꠁꠔ ꠝꠣꠘꠥꠡ ꠙꠄꠖꠣ ꠇꠞꠍꠤꠟꠣ ꠇꠞꠤ ꠈꠥꠛ ꠛꠦꠎꠣꠞ ꠅꠁꠟꠣ।
GEN 6:7 ꠀꠞ ꠇꠁꠟꠣ, “ꠀꠝꠣꠞ ꠙꠄꠖꠣ ꠇꠞꠣ ꠝꠣꠘꠡꠞꠦ, ꠀꠞ ꠔꠣꠞꠣꠞ ꠟꠉꠦ ꠢꠇꠟ ꠎꠣꠔꠞ ꠎꠣꠘꠥꠀꠞ, ꠝꠣꠐꠤꠔ ꠌꠟꠞꠣ ꠢꠥꠞꠥ-ꠝꠥꠞꠥ ꠎꠣꠘꠖꠣꠞ ꠀꠞ ꠀꠍꠝꠣꠘꠞ ꠙꠣꠈꠤꠅ ꠈꠔꠝ ꠇꠞꠤ ꠖꠤꠝꠥ। ꠁꠔꠣꠞꠦ ꠙꠄꠖꠣ ꠇꠞꠤꠀ ꠀꠝꠣꠞ ꠖꠤꠟꠅ ꠖꠥꠈ ꠟꠣꠉꠦꠞ।”
GEN 6:8 ꠅꠁꠟꠦ ꠘꠥꠢꠞ ꠃꠙꠞꠦ ꠝꠣꠛꠥꠖ ꠈꠥꠡꠤ ꠀꠍꠟꠣ।
GEN 6:9 ꠁꠔꠣ ꠅꠁꠟ ꠘꠥꠢꠞ ꠎꠤꠘ꠆ꠖꠦꠉꠤꠞ ꠛꠄꠀꠘ। ꠘꠥꠢ ꠄꠇꠎꠘ ꠇꠣꠝꠤꠟ ꠝꠣꠘꠥꠡ, ꠔꠣꠘ ꠀꠝꠟꠞ ꠝꠣꠘꠡꠞ ꠝꠣꠎꠦ ꠔꠣꠁꠘꠃ ꠀꠍꠟꠣ ꠙꠣꠇ-ꠙꠞꠦꠎꠉꠣꠞ। ꠀꠟ꠆ꠟꠣꠞ ꠟꠉꠦ ꠔꠣꠘꠞ ꠈꠣꠍ ꠖꠤꠖꠣꠞ ꠀꠍꠤꠟ।
GEN 6:10 ꠡꠣꠝ, ꠢꠣꠝ ꠀꠞ ꠁꠀꠚꠦꠔ ꠘꠣꠝꠞ ꠔꠣꠘ ꠔꠤꠘ ꠙꠥꠀ ꠀꠍꠤꠟ।
GEN 6:11 ꠁ ꠡꠝꠄ ꠀꠟ꠆ꠟꠣꠞ ꠌꠈꠥꠔ ꠢꠣꠞꠣ ꠖꠥꠘꠤꠀꠁ ꠉꠥꠘꠣꠄ ꠙꠌꠤ ꠉꠦꠍꠦ ꠀꠞ ꠎꠥꠞ-ꠎꠥꠟꠥꠝꠦ ꠜꠞꠤ ꠉꠦꠍꠦ।
GEN 6:12 ꠀꠟ꠆ꠟꠣꠄ ꠖꠥꠘꠤꠀꠞ ꠛꠣꠄ ꠌꠣꠁꠀ ꠖꠦꠈꠟꠣ, ꠁꠔꠣ ꠉꠥꠘꠣꠄ ꠙꠌꠤ ꠉꠦꠍꠦ। ꠇꠣꠞꠘ ꠖꠥꠘꠤꠀꠞ ꠝꠣꠘꠡꠞ ꠈꠣꠁꠍꠟꠔ ꠛꠦ-ꠙꠕꠦ ꠉꠦꠍꠦꠉꠤ।
GEN 6:13 ꠁꠔꠣ ꠖꠦꠈꠤꠀ ꠀꠟ꠆ꠟꠣꠄ ꠘꠥꠢꠞꠦ ꠇꠁꠟꠣ, “ꠔꠣꠝꠣꠝ ꠝꠣꠘꠥꠡ ꠎꠣꠔꠞꠦ ꠀꠝꠤ ꠈꠔꠝ ꠇꠞꠤꠟꠣꠁꠔꠣꠝ ꠑꠤꠇ ꠇꠞꠍꠤ। ꠝꠣꠘꠡꠞ ꠟꠣꠉꠤ ꠖꠥꠘꠤꠀꠁ ꠎꠥꠞ-ꠎꠥꠟꠥꠝꠦ ꠜꠞꠤ ꠉꠦꠍꠦ। ꠝꠣꠘꠡꠞ ꠟꠉꠦ ꠟꠉꠦ ꠖꠥꠘꠤꠀꠞ ꠢꠇꠟꠔꠣ ꠀꠝꠤ ꠡꠦꠡ ꠇꠞꠤꠟꠤꠔꠣꠝ।
GEN 6:14 ꠔꠥꠝꠤ ꠉꠚꠞꠞ ꠔꠇ꠆ꠔꠣ ꠖꠤꠀ ꠔꠥꠝꠣꠞ ꠟꠣꠉꠤ ꠄꠇꠈꠣꠘ ꠎꠣꠎ ꠛꠣꠘꠣꠅ। ꠄꠞ ꠜꠤꠔꠞꠦ ꠀꠟꠉꠣ ꠀꠟꠉꠣ ꠇꠥꠑꠣ ꠕꠣꠇꠛ। ꠀꠞ ꠎꠣꠎꠞ ꠛꠣꠞꠦ-ꠜꠤꠔꠞꠦ ꠀꠟꠇꠣꠔꠞꠣ ꠟꠣꠉꠣꠁꠅ।
GEN 6:15 ꠎꠣꠎꠈꠣꠘ ꠟꠣꠝ꠆ꠛꠣꠄ ꠔꠤꠘ-ꠡ ꠀꠔ, ꠙꠣꠡꠦ ꠙꠁꠘ꠆ꠌꠣꠡ ꠀꠔ ꠀꠞ ꠈꠣꠠꠣ-ꠃꠛꠤ ꠔꠤꠡ ꠀꠔ ꠛꠣꠘꠣꠁꠅ।
GEN 6:16 ꠀꠞ ꠌꠣꠟꠅ ꠕꠣꠇꠤ ꠄꠇ ꠀꠔ ꠔꠟꠦ ꠌꠣꠁꠞꠅꠛꠣꠄ ꠈꠤꠠꠇꠤ ꠞꠣꠈꠛꠣꠄ, ꠀꠞ ꠖꠥꠀꠞ ꠖꠤꠛꠣꠄ ꠎꠣꠎꠞ ꠄꠇ ꠇꠣꠘ꠆ꠖꠣꠔ। ꠎꠣꠎꠈꠣꠘ ꠔꠤꠔꠣꠟꠣ ꠛꠣꠘꠣꠁꠅ।
GEN 6:17 ꠖꠦꠈꠤꠅ, ꠀꠝꠤ ꠖꠥꠘꠤꠀꠁꠔ ꠅꠟꠣ ꠛꠁꠘ꠆ꠘꠣ ꠖꠤꠝꠥ, ꠀꠍꠝꠣꠘꠞ ꠔꠟꠦ ꠎꠔ ꠎꠣꠘꠖꠣꠞꠦ ꠖꠝ ꠚꠣꠟꠣꠄ ꠢꠇꠟꠔꠣꠃ ꠛꠤꠘꠣꠡ ꠅꠁꠎꠤꠛ। ꠖꠥꠘꠤꠀꠁꠞ ꠢꠇꠟ ꠎꠣꠘꠖꠣꠞꠃ ꠝꠞꠤꠎꠤꠛ।
GEN 6:18 ꠈꠣꠟꠤ ꠔꠥꠝꠣꠞ ꠟꠉꠦ ꠀꠝꠣꠞ ꠅꠀꠖꠣ ꠎꠣꠞꠤ ꠞꠣꠈꠝꠥ। ꠔꠥꠝꠤ ꠉꠤꠀ ꠎꠣꠎꠅ ꠃꠑꠛꠣꠄ, ꠀꠞ ꠔꠥꠝꠣꠞ ꠟꠉꠦ ꠔꠥꠝꠣꠞ ꠙꠥꠀꠂꠘ, ꠔꠥꠝꠣꠞ ꠛꠤꠛꠤ ꠀꠞ ꠔꠥꠝꠣꠞ ꠙꠥꠀꠂꠘ꠆ꠔꠞ ꠛꠃ-ꠅ।
GEN 6:19 ꠀꠞ ꠎꠣꠘ ꠛꠣꠌꠣꠘꠤꠞ ꠟꠣꠉꠤ ꠔꠥꠝꠤ ꠢꠇꠟ ꠎꠣꠔꠞ ꠎꠣꠘꠖꠣꠞꠞ ꠛꠦꠐꠣ-ꠛꠦꠐꠤꠞ ꠎꠥꠠꠣ ꠝꠤꠟꠣꠁꠀ ꠔꠥꠝꠣꠞ ꠟꠉꠦ ꠎꠣꠎꠅ ꠔꠥꠟꠛꠣꠄ।
GEN 6:20 ꠙꠞꠔꠦꠇ ꠎꠣꠔꠞ ꠙꠣꠈꠤ, ꠢꠦꠝꠣꠘ-ꠎꠣꠘꠥꠀꠞ ꠀꠞ ꠝꠣꠐꠤꠞ ꠝꠣꠎꠦ ꠛꠥꠇꠦ ꠌꠟꠞꠣ ꠎꠣꠘꠖꠣꠞꠞꠦ ꠛꠣꠌꠣꠘꠤꠞ ꠟꠣꠉꠤ ꠎꠥꠠꠣ ꠎꠥꠠꠣ ꠇꠞꠤ ꠔꠥꠝꠣꠞ ꠉꠦꠍꠦ ꠀꠘꠛꠣꠄ।
GEN 6:21 ꠀꠞ ꠔꠥꠝꠤ ꠢꠇꠟ ꠎꠣꠔꠞ ꠟꠣꠉꠤ ꠈꠣꠘꠤꠞ ꠎꠤꠘꠤꠡ ꠎꠥꠉꠣꠠ ꠇꠞꠤ ꠞꠣꠈꠛꠣꠄ। ꠁꠔꠣ ꠔꠥꠝꠣꠞ ꠀꠞ ꠔꠣꠞꠣꠞ ꠈꠣꠘꠤ ꠅꠁꠛ।”
GEN 6:22 ꠘꠥꠢꠦ ꠀꠟ꠆ꠟꠣꠞ ꠢꠥꠇꠥꠝ ꠝꠣꠚꠤꠇ ꠢꠇꠟꠔꠣꠃ ꠇꠞꠟꠣ।
GEN 7:1 ꠀꠞ ꠝꠣꠛꠥꠖꠦ ꠘꠥꠢꠞꠦ ꠇꠁꠟꠣ, “ꠔꠥꠝꠤ ꠀꠞ ꠔꠥꠝꠣꠞ ꠙꠞꠤꠛꠣꠞꠞ ꠢꠇꠟ ꠀꠁꠀ ꠎꠣꠎꠅ ꠃꠑꠛꠣꠄ। ꠀꠝꠤ ꠖꠦꠈꠤꠀꠞ ꠁ ꠎꠝꠣꠘꠣꠞ ꠝꠣꠘꠡꠞ ꠝꠣꠎꠦ ꠔꠥꠝꠤꠃ ꠈꠣꠟꠤ ꠖꠤꠘꠖꠣꠞ।
GEN 7:2 ꠔꠥꠝꠤ ꠢꠣꠟꠣꠟ ꠎꠣꠘꠥꠀꠞ ꠅꠇꠟ ꠕꠣꠇꠤ ꠘꠞ-ꠝꠦꠖꠤ ꠝꠤꠟꠣꠁꠀ ꠡꠣꠔ ꠎꠥꠠꠣ ꠇꠞꠤ ꠀꠞ ꠢꠣꠞꠣꠝ ꠎꠣꠘꠥꠀꠞ ꠕꠣꠇꠤ ꠄꠇ ꠎꠥꠠꠣ ꠇꠞꠤ ꠔꠥꠝꠣꠞ ꠟꠉꠦ ꠟꠁꠅ।
GEN 7:3 ꠀꠍꠝꠣꠘꠅ ꠃꠠꠞꠣ ꠙꠣꠈꠤꠞ ꠝꠣꠎ ꠕꠣꠇꠤ ꠘꠞ-ꠝꠦꠖꠤ ꠝꠤꠟꠣꠁꠀ ꠡꠣꠔ ꠎꠥꠠꠣ ꠇꠞꠤ ꠟꠁꠅ। ꠖꠥꠘꠤꠀꠞ ꠝꠣꠎꠦ ꠄꠞꠣꠞ ꠛꠋꠡ ꠛꠣꠌꠣꠘꠤꠞ ꠟꠣꠉꠤ ꠁꠈꠣꠘ ꠇꠞꠤꠅ।
GEN 7:4 ꠀꠝꠤ ꠡꠣꠔ ꠖꠤꠘ ꠛꠣꠖꠦ ꠖꠥꠘꠤꠀꠁꠞ ꠃꠙꠞꠦ ꠌꠣꠟ꠆ꠟꠤꠡ ꠖꠤꠘ ꠌꠣꠟ꠆ꠟꠤꠡ ꠞꠣꠁꠔ ꠄꠇꠟꠣꠉꠣꠞꠦ ꠝꠦꠊ ꠖꠤꠝꠥ, ꠀꠞ ꠢꠇꠟ ꠎꠣꠘꠖꠣꠞꠞꠦ ꠖꠥꠘꠤꠀ ꠕꠣꠇꠤ ꠈꠔꠝ ꠇꠞꠝꠥ।”
GEN 7:5 ꠝꠣꠛꠥꠖꠞ ꠢꠥꠇꠥꠝ ꠝꠣꠚꠤꠇ ꠘꠥꠢꠦ ꠢꠇꠟ ꠇꠣꠝ ꠇꠞꠟꠣ।
GEN 7:6 ꠛꠁꠘ꠆ꠘꠣ ꠡꠥꠞꠥꠞ ꠡꠝꠄ ꠘꠥꠢꠞ ꠛꠄꠅꠡ ꠀꠍꠤꠟ ꠍꠄ-ꠡ ꠛꠞꠍ।
GEN 7:7 ꠛꠁꠘ꠆ꠘꠣ ꠕꠣꠇꠤ ꠛꠣꠌꠣꠞ ꠟꠣꠉꠤ ꠘꠥꠢ, ꠔꠣꠘ ꠛꠤꠛꠤ, ꠔꠣꠘ ꠙꠥꠀꠂꠘ ꠀꠞ ꠙꠥꠀꠂꠘ꠆ꠔꠞ ꠛꠃꠞꠦ ꠟꠁꠀ ꠎꠣꠎꠅ ꠉꠤꠀ ꠃꠑꠟꠣ।
GEN 7:8 ꠀꠟ꠆ꠟꠣꠞ ꠢꠥꠇꠥꠝ ꠝꠣꠚꠤꠇ ꠢꠣꠟꠣꠟ-ꠢꠣꠞꠣꠝ ꠎꠣꠘꠥꠀꠞ, ꠙꠣꠈꠤ, ꠛꠥꠇꠦ ꠌꠟꠞꠣ ꠎꠣꠘꠖꠣꠞꠞ ꠘꠞ-ꠝꠦꠖꠤ ꠝꠤꠟꠤꠀ ꠎꠥꠠꠣ ꠎꠥꠠꠣ ꠅꠁꠀ ꠘꠥꠢꠞ ꠉꠦꠍꠦ ꠀꠁꠀ ꠎꠣꠎꠅ ꠢꠣꠝꠣꠁꠟꠣ।
GEN 7:10 ꠅꠃ ꠡꠣꠔ ꠖꠤꠘ ꠛꠣꠖꠦ ꠖꠥꠘꠤꠀꠁꠔ ꠛꠁꠘ꠆ꠘꠣ ꠅꠁꠟ।
GEN 7:11 ꠘꠥꠢꠞ ꠍꠄ-ꠡ ꠛꠍꠞꠞ ꠡꠝꠄ ꠖꠥꠍꠞꠣ ꠝꠣꠡꠞ ꠡꠔꠞ ꠔꠣꠞꠤꠈ ꠙꠣꠔꠣꠟꠞ ꠢꠇꠟ ꠙꠣꠘꠤ ꠛꠣꠞ ꠅꠁꠔ ꠟꠣꠉꠟ, ꠀꠞ ꠀꠍꠝꠣꠘ ꠎꠦꠘꠥ ꠚꠣꠐꠤ ꠉꠦꠟ।
GEN 7:12 ꠌꠣꠟ꠆ꠟꠤꠡ ꠖꠤꠘ ꠌꠣꠟ꠆ꠟꠤꠡ ꠞꠣꠁꠔ ꠖꠥꠘꠤꠀꠁꠞ ꠃꠙꠞꠦ ꠝꠦꠊ ꠅꠁꠟ।
GEN 7:13 ꠎꠦꠖꠤꠘ ꠝꠦꠊ ꠡꠥꠞꠥ ꠅꠁꠟ, ꠁꠖꠤꠘ ꠘꠥꠢ, ꠔꠣꠘ ꠛꠤꠛꠤ, ꠔꠣꠘ ꠙꠥꠀꠂꠘ ꠡꠣꠝ, ꠢꠣꠝ, ꠁꠀꠚꠦꠔ ꠀꠞ ꠔꠣꠞꠣꠞ ꠛꠃ ꠅꠇꠟꠅ ꠎꠣꠎꠅ ꠀꠁꠀ ꠃꠑꠟꠣ।
GEN 7:14 ꠔꠣꠞꠣꠞ ꠟꠉꠦ ꠎꠥꠠꠣ ꠎꠥꠠꠣ ꠇꠞꠤ ꠢꠇꠟ ꠎꠣꠔꠞ ꠎꠋꠟꠤ ꠎꠣꠘꠥꠀꠞ, ꠙꠣꠟꠣ ꠢꠦꠝꠣꠘ, ꠝꠣꠐꠤꠞ ꠝꠣꠎꠦ ꠛꠥꠇꠦ ꠌꠟꠞꠣ ꠎꠣꠘꠖꠣꠞ, ꠙꠣꠈꠤ ꠀꠞ ꠒꠣꠈꠘꠣ ꠀꠟꠣ ꠢꠇꠟꠔꠣꠅ ꠃꠑꠟꠣ।
GEN 7:15 ꠖꠝ ꠚꠣꠟꠣꠁꠀ ꠛꠣꠌꠦ ꠁꠟꠣ ꠢꠇꠟ ꠎꠣꠔꠞ ꠎꠣꠘꠖꠣꠞ ꠘꠥꠢꠞ ꠉꠦꠍꠦ ꠀꠁꠀ ꠎꠣꠎꠅ ꠃꠑꠍꠤꠟ।
GEN 7:16 ꠀꠟ꠆ꠟꠣꠞ ꠢꠥꠇꠥꠝ ꠝꠣꠚꠤꠇꠃ ꠘꠞ-ꠝꠦꠖꠤꠞ ꠎꠥꠠꠣ ꠝꠤꠟꠤꠀ ꠔꠣꠞꠣ ꠃꠑꠍꠤꠟ। ꠄꠞꠛꠣꠖꠦ ꠝꠣꠛꠥꠖꠦ ꠎꠣꠎꠞ ꠖꠥꠀꠞ ꠛꠘ꠆ꠖ ꠇꠞꠤ ꠖꠤꠟꠣ।
GEN 7:17 ꠌꠣꠟ꠆ꠟꠤꠡ ꠖꠤꠘ ꠗꠞꠤ ꠖꠥꠘꠤꠀꠁꠔ ꠙꠣꠘꠤ ꠛꠣꠠꠔꠦꠃ ꠕꠣꠇꠟ। ꠙꠣꠘꠤ ꠛꠣꠠꠤ ꠎꠣꠅꠀꠄ ꠎꠣꠎꠈꠣꠘ ꠝꠣꠐꠤ ꠕꠣꠇꠤ ꠃꠙꠞꠦ ꠜꠣꠁꠀ ꠃꠑꠟ।
GEN 7:18 ꠛꠣꠖꠦ ꠙꠣꠘꠤ ꠈꠥꠛ ꠛꠣꠠꠟ ꠀꠞ ꠎꠣꠎꠈꠣꠘ ꠙꠣꠘꠤꠞ ꠃꠙꠞꠦ ꠌꠟꠣꠌꠟ ꠇꠞꠟ।
GEN 7:19 ꠀꠞ ꠙꠣꠘꠤ ꠛꠣꠠꠔꠦꠃ ꠕꠣꠇꠟ। ꠄꠞꠟꠣꠉꠤ ꠎꠦꠘꠅ ꠎꠔ ꠛꠠ ꠛꠠ ꠙꠣꠠ ꠀꠍꠤꠟ, ꠢꠇ꠆ꠇꠟꠔꠣ ꠛꠥꠠꠤ ꠉꠦꠟ।
GEN 7:20 ꠢꠇꠟ ꠙꠣꠠ-ꠙꠞꠛꠔ ꠛꠥꠠꠤꠀ ꠙꠣꠘꠤ ꠀꠞꠅ ꠙꠘꠞ ꠀꠔ ꠃꠙꠞꠦ ꠃꠑꠟ।
GEN 7:21 ꠀꠞ ꠖꠥꠘꠤꠀꠁꠔ ꠌꠟꠞꠣ ꠢꠇꠟ ꠎꠣꠘꠖꠣꠞ, ꠝꠣꠘꠤ ꠙꠣꠈꠤ, ꠙꠣꠟꠣ ꠢꠦꠝꠣꠘ, ꠎꠋꠟꠤ ꠎꠣꠘꠥꠀꠞ ꠀꠞ ꠙꠣꠟ ꠛꠣꠘ꠆ꠖꠤꠀ ꠊꠥꠞꠞꠣ ꠢꠇꠟꠔꠣ, ꠝꠣꠘꠡꠞ ꠟꠉꠦ ꠛꠤꠘꠣꠡ ꠅꠁꠉꠦꠟ।
GEN 7:22 ꠝꠣꠐꠤꠞ ꠃꠙꠞꠦ ꠎꠔ ꠞꠇꠝꠞ ꠎꠔ ꠎꠣꠘꠖꠣꠞ ꠖꠝ ꠚꠣꠟꠣꠁꠀ ꠛꠣꠌꠦ ꠁꠔꠣ ꠢꠇꠟꠔꠣꠃ ꠝꠞꠤꠉꠦꠟ।
GEN 7:23 ꠀꠟ꠆ꠟꠣꠄ ꠅꠃ ꠘꠝꠥꠘꠣꠄ ꠎꠝꠤꠘꠞ ꠢꠇꠟ ꠎꠣꠘꠖꠣꠞ ꠖꠥꠘꠤꠀꠁꠞ ꠃꠙꠞ ꠕꠣꠇꠤ ꠚꠥꠍꠤꠟꠣꠁꠟꠣ। ꠄꠔꠦ ꠝꠣꠘꠥꠡ, ꠎꠣꠘꠥꠀꠞ, ꠛꠥꠇꠦ ꠌꠟꠞꠣ ꠎꠣꠘꠖꠣꠞ ꠀꠞ ꠀꠍꠝꠣꠘꠞ ꠙꠣꠈꠤ ꠖꠥꠘꠤꠀꠁ ꠕꠣꠇꠤ ꠍꠣꠚ ꠅꠁꠉꠦꠟ। ꠈꠣꠟꠤ ꠘꠥꠢ ꠀꠞ ꠔꠣꠘ ꠟꠉꠦ ꠎꠣꠞꠣ ꠀꠍꠤꠟ, ꠔꠣꠞꠣꠃ ꠛꠣꠌꠤꠀ ꠞꠁꠟꠣ।
GEN 7:24 ꠖꠥꠘꠤꠀ ꠖꠦꠠ-ꠡ ꠖꠤꠘ ꠙꠣꠘꠤꠔ ꠛꠥꠠꠣꠁꠟ ꠞꠁꠟ।
GEN 8:1 ꠎꠣꠎꠅ ꠘꠥꠢ ꠀꠞ ꠔꠣꠘ ꠟꠉꠦ ꠎꠔ ꠎꠣꠘꠖꠣꠞ ꠀꠞ ꠙꠣꠟꠣ ꠢꠦꠝꠣꠘ ꠀꠍꠤꠟ, ꠀꠟ꠆ꠟꠣꠄ ꠔꠣꠞꠣꠞ ꠇꠕꠣꠅ ꠚꠣꠃꠞꠤꠟꠣ ꠘꠣ। ꠔꠣꠁꠘ ꠖꠥꠘꠤꠀꠁꠔ ꠛꠣꠔꠣꠡ ꠌꠣꠟꠣꠁꠟꠦ ꠙꠣꠘꠤ ꠇꠝꠣ ꠡꠥꠞꠥ ꠅꠁꠟ।
GEN 8:2 ꠝꠣꠐꠤꠞ ꠔꠟ ꠕꠣꠇꠤ ꠙꠣꠘꠤ ꠛꠣꠞꠘꠤ ꠀꠞ ꠀꠍꠝꠣꠘ ꠕꠘꠦ ꠝꠦꠊ ꠙꠠꠣꠞ ꠚꠣꠐꠣ ꠛꠘ꠆ꠖ ꠅꠁꠉꠦꠟ, ꠀꠞ ꠝꠦꠊꠅ ꠖꠝ ꠟꠁꠟ।
GEN 8:3 ꠝꠣꠐꠤꠞ ꠃꠙꠞꠞ ꠙꠣꠘꠤ ꠢꠞꠤ ꠉꠦꠟ, ꠀꠞ ꠖꠦꠠ-ꠡ ꠖꠤꠘ ꠛꠣꠖꠦ ꠖꠦꠈꠣ ꠉꠦꠟ ꠙꠣꠘꠤ ꠛꠃꠔ ꠇꠝꠍꠦ।
GEN 8:4 ꠡꠣꠔ ꠘꠝ꠆ꠛꠞ ꠝꠣꠡꠞ ꠡꠔꠞ ꠔꠣꠞꠤꠈ ꠎꠣꠎꠈꠣꠘ ꠀꠞꠣꠞꠣꠔꠞ ꠙꠣꠠꠤ ꠄꠟꠣꠇꠣꠔ ꠉꠤꠀ ꠀꠐꠇꠤꠟ।
GEN 8:5 ꠄꠞꠛꠣꠖꠦꠅ ꠙꠣꠘꠤ ꠇꠝꠣꠔ ꠕꠣꠇꠟ, ꠀꠞ ꠖꠡ ꠘꠝ꠆ꠛꠞ ꠝꠣꠡꠞ ꠙꠄꠟꠣ ꠖꠤꠘ ꠙꠣꠠ ꠅꠇꠟꠞ ꠝꠣꠕꠣ ꠖꠦꠈꠣ ꠉꠦꠟ।
GEN 8:6 ꠄꠞ ꠌꠣꠟ꠆ꠟꠤꠡ ꠖꠤꠘ ꠛꠣꠖꠦ ꠘꠥꠢꠦ ꠎꠣꠎꠞ ꠈꠤꠠꠇꠤ ꠈꠥꠟꠟꠣ।
GEN 8:7 ꠀꠞ ꠈꠤꠠꠇꠤꠛꠣꠄ ꠄꠇ ꠇꠣꠃꠀ ꠍꠣꠠꠟꠣ। ꠝꠣꠐꠤ ꠕꠣꠇꠤ ꠙꠣꠘꠤ ꠘꠣ ꠢꠥꠇꠣꠘꠤ ꠙꠞ꠆ꠎꠘ꠆ꠔ ꠇꠣꠃꠀꠐꠣ ꠀꠅꠀ-ꠎꠣꠅꠀꠔ ꠞꠁꠟ।
GEN 8:8 ꠝꠣꠐꠤꠞ ꠃꠙꠞ ꠕꠘꠦ ꠙꠣꠘꠤ ꠇꠝꠍꠦ ꠇꠤ ꠘꠣ ꠖꠦꠈꠣꠞ ꠟꠣꠉꠤ ꠘꠥꠢꠦ ꠛꠣꠖꠦ ꠄꠇꠐꠣ ꠙꠣꠞꠅ ꠍꠣꠠꠟꠣ।
GEN 8:9 ꠁ ꠡꠝꠄꠅ ꠀꠡ꠆ꠔꠣ ꠖꠥꠘꠤꠀꠁꠔ ꠙꠣꠘꠤ ꠀꠍꠤꠟ ꠇꠞꠤ ꠙꠣꠅ ꠕꠁꠛꠣꠞ ꠎꠣꠉꠣ ꠘꠣ ꠙꠣꠁꠀ ꠙꠣꠞꠅꠐꠣ ꠢꠤꠞꠛꠣꠞ ꠚꠤꠞꠤꠀ ꠀꠁꠟ। ꠔꠣꠁꠘ ꠀꠔ ꠛꠣꠠꠣꠁꠀ ꠔꠣꠞꠦ ꠜꠤꠔꠞꠦ ꠀꠘꠟꠣ।
GEN 8:10 ꠢꠦꠡꠦ ꠔꠣꠁꠘ ꠀꠞꠅ ꠡꠣꠔ ꠖꠤꠘ ꠛꠣꠞ ꠌꠣꠁꠀ ꠢꠤꠞꠛꠣꠞ ꠔꠣꠞꠦ ꠍꠣꠠꠟꠣ।
GEN 8:11 ꠢꠣꠁꠘ꠆ꠎꠣ ꠛꠣꠟꠣ ꠢꠦ ꠔꠣꠘ ꠉꠦꠍꠦ ꠚꠤꠞꠤꠀ ꠀꠁꠟ, ꠀꠞ ꠔꠣꠞ ꠑꠥꠐꠅ ꠀꠍꠤꠟ ꠎꠄꠔꠥꠘ ꠉꠣꠍꠞ ꠢꠣꠎꠝꠣ ꠙꠣꠔꠣ, ꠔꠣꠁꠘ ꠛꠥꠎꠟꠣ ꠝꠣꠐꠤꠞ ꠃꠙꠞ ꠕꠣꠇꠤ ꠙꠣꠘꠤ ꠇꠝꠤ ꠉꠦꠍꠦ।
GEN 8:12 ꠀꠞꠅ ꠡꠣꠔ ꠖꠤꠘ ꠛꠣꠖꠦ ꠔꠣꠁꠘ ꠢꠤꠞꠛꠣꠞ ꠙꠣꠞꠅꠐꠣ ꠍꠣꠠꠟꠣ, ꠁꠇꠐꠣ ꠀꠞ ꠚꠤꠞꠤꠀ ꠀꠁꠟ ꠘꠣ।
GEN 8:13 ꠘꠥꠢꠞ ꠛꠄꠅꠡ ꠍꠄ-ꠡ ꠄꠇ ꠛꠍꠞꠞ ꠡꠝꠄ ꠙꠄꠟꠣ ꠝꠣꠡꠞ ꠙꠄꠟꠣ ꠖꠤꠘ ꠝꠣꠐꠤꠞ ꠃꠙꠞ ꠕꠣꠇꠤ ꠙꠣꠘꠤ ꠢꠞꠤ ꠉꠦꠟ, ꠀꠞ ꠘꠥꠢꠦ ꠎꠣꠎꠞ ꠌꠣꠟ ꠈꠥꠟꠤꠀ ꠌꠣꠁꠀ ꠖꠦꠈꠟꠣ, ꠝꠣꠐꠤ ꠢꠥꠇꠣꠘꠤ ꠗꠞꠍꠦ।
GEN 8:14 ꠖꠥꠍꠞꠣ ꠝꠣꠡꠞ ꠡꠣꠔꠣꠁꠡ ꠖꠤꠘꠞ ꠖꠤꠘ ꠝꠣꠐꠤ ꠄꠇꠁꠛꠣꠞꠦ ꠢꠥꠇꠣꠁ ꠉꠦꠟ।
GEN 8:15 ꠀꠟ꠆ꠟꠣꠄ ꠔꠣꠘꠞꠦ ꠇꠁꠟꠣ,
GEN 8:16 “ꠔꠥꠝꠤ ꠔꠥꠝꠣꠞ ꠛꠤꠛꠤ, ꠔꠥꠝꠣꠞ ꠙꠥꠀꠂꠘ ꠀꠞ ꠔꠥꠝꠣꠞ ꠙꠥꠀꠂꠘ꠆ꠔꠞ ꠛꠃꠞꠦ ꠟꠁꠀ ꠎꠣꠎ ꠕꠣꠇꠤ ꠛꠣꠞ ꠅꠁꠀ ꠀꠅ।
GEN 8:17 ꠀꠞ ꠔꠥꠝꠣꠞ ꠟꠉꠦ ꠎꠔ ꠎꠣꠔꠞ ꠎꠣꠘꠖꠣꠞ ꠀꠍꠦ - ꠙꠣꠈꠤ, ꠎꠣꠘꠥꠀꠞ ꠀꠞ ꠝꠣꠐꠤꠞ ꠝꠣꠎꠦ ꠛꠥꠇꠦ ꠌꠟꠞꠣ ꠎꠣꠘꠖꠣꠞ - ꠔꠣꠞꠣꠞꠦꠅ ꠛꠣꠞ ꠇꠞꠤ ꠟꠁꠀ ꠀꠅ, ꠎꠦꠘꠥ ꠢꠣꠞꠣ ꠖꠥꠘꠤꠀꠁ ꠎꠥꠠꠤ ꠔꠣꠞꠣ ꠍꠤꠔ꠆ꠞꠤꠀ ꠉꠤꠀ ꠚꠟꠀꠟꠣ ꠅꠁꠀ ꠛꠣꠠꠦ।”
GEN 8:18 ꠔꠦꠃ ꠘꠥꠢꠦ, ꠔꠣꠘ ꠛꠤꠛꠤ, ꠔꠣꠘ ꠙꠥꠀꠂꠘ ꠀꠞ ꠔꠣꠞꠣꠞ ꠛꠃꠞꠦ ꠟꠁꠀ ꠎꠣꠎ ꠕꠣꠇꠤ ꠛꠣꠞ ꠅꠁꠟꠣ।
GEN 8:19 ꠔꠣꠞꠣꠞ ꠟꠉꠦ ꠖꠥꠘꠤꠀꠁꠞ ꠢꠇꠟ ꠎꠣꠘꠥꠀꠞ, ꠝꠣꠐꠤꠔ ꠌꠟꠞꠣ ꠢꠥꠞꠥ-ꠝꠥꠞꠥ ꠎꠣꠘꠖꠣꠞ, ꠀꠞ ꠙꠣꠈꠤ, ꠄꠇ ꠇꠕꠣꠄ ꠖꠥꠘꠤꠀꠁꠔ ꠌꠟꠞꠣ ꠢꠇꠟ ꠎꠣꠘꠖꠣꠞ, ꠎꠣꠞꠎꠤꠞ ꠎꠣꠔꠝꠔ ꠛꠣꠞ ꠅꠁꠟ।
GEN 8:20 ꠛꠣꠖꠦ ꠘꠥꠢꠦ ꠝꠣꠛꠥꠖꠞ ꠘꠣꠝꠦ ꠄꠇꠈꠣꠘ ꠇꠥꠞꠛꠣꠘꠤ ꠈꠣꠘꠣ ꠛꠣꠘꠣꠁꠟꠣ, ꠀꠞ ꠙꠞꠔꠦꠇ ꠎꠣꠔꠞ ꠢꠣꠟꠣꠟ ꠙꠡꠥ-ꠙꠣꠈꠤ ꠕꠣꠇꠤ ꠄꠇ ꠄꠇꠐꠣ ꠟꠁꠀ ꠎꠛ ꠇꠞꠤꠀ, ꠎꠣꠟꠣꠁꠀ ꠇꠥꠞꠛꠣꠘꠤ ꠖꠤꠟꠣ।
GEN 8:21 ꠝꠣꠛꠥꠖ ꠁ ꠇꠥꠞꠛꠣꠘꠤꠞ ꠗꠥꠝꠣꠞ ꠊꠦꠞꠣꠘꠦ ꠈꠥꠡꠤ ꠅꠁꠟꠣ, ꠀꠞ ꠔꠣꠁꠘ ꠇꠁꠟꠣ, “ꠝꠣꠘꠡꠞ ꠟꠣꠉꠤ ꠀꠝꠤ ꠀꠞ ꠇꠥꠘꠥ ꠡꠝꠄꠅ ꠝꠣꠐꠤꠞꠦ ꠟꠣꠘ꠆ꠘꠔ ꠖꠤꠔꠣꠝ ꠘꠣꠄ, ꠎꠥꠖꠤꠅ ꠢꠥꠞꠥꠛꠣꠟꠣ ꠕꠣꠇꠤꠃ ꠝꠣꠘꠡꠞ ꠝꠘꠞ ꠈꠤꠀꠟ ꠈꠣꠞꠣꠙꠤꠞ ꠛꠣꠄ ꠕꠣꠇꠦ। ꠁꠚꠤꠞꠣ ꠎꠦꠟꠣ ꠢꠇꠟ ꠎꠣꠘꠖꠣꠞꠞꠦ ꠝꠣꠞꠍꠤ, ꠁꠟꠣꠈꠣꠘ ꠀꠞ ꠇꠥꠘꠥ ꠖꠤꠘꠃ ꠝꠣꠞꠔꠣꠝ ꠘꠣꠄ।
GEN 8:22 ꠎꠔꠖꠤꠘ ꠁ ꠖꠥꠘꠤꠀꠁ ꠕꠣꠇꠛ, ꠅꠔꠖꠤꠘ ꠘꠤꠅꠝꠝꠔ ꠛꠤꠌ ꠚꠣꠟꠣꠘꠤ ꠀꠞ ꠚꠡꠟ ꠇꠣꠐꠣ, ꠑꠣꠘ꠆ꠒꠣ ꠀꠞ ꠉꠞꠝ, ꠛꠣꠞꠤꠡꠣ ꠀꠞ ꠄꠅꠔ, ꠖꠤꠘ ꠀꠞ ꠞꠣꠁꠔ ꠌꠟꠔꠦꠃ ꠕꠣꠇꠛ।”
GEN 9:1 ꠀꠟ꠆ꠟꠣꠄ ꠘꠥꠢ ꠀꠞ ꠔꠣꠘ ꠙꠥꠀꠂꠘ꠆ꠔꠞꠦ ꠛꠞꠇꠔ ꠖꠤꠀ ꠇꠁꠟꠣ, “ꠔꠥꠝꠤꠔꠣꠁꠘ ꠚꠟꠀꠟꠣ ꠅꠁꠀ ꠛꠣꠠꠤꠀ ꠖꠥꠘꠤꠀꠁ ꠜꠞꠤ ꠎꠣꠅ।
GEN 9:2 ꠖꠥꠘꠤꠀꠁꠞ ꠎꠣꠘꠥꠀꠞ, ꠀꠍꠝꠣꠘꠞ ꠙꠣꠈꠤ, ꠝꠣꠐꠤꠞ ꠝꠣꠎꠦ ꠛꠥꠇꠦ ꠌꠟꠞꠣ ꠎꠣꠘꠖꠣꠞ ꠀꠞ ꠖꠞꠤꠀꠞ ꠝꠣꠍ, ꠢꠇꠟꠦꠃ ꠔꠥꠝꠞꠣꠞꠦ ꠒꠞ-ꠜꠄ ꠇꠞꠤ ꠌꠟꠛ। ꠁꠔꠣꠞꠦ ꠔꠥꠝꠞꠣꠞ ꠀꠔꠅ ꠖꠦꠅꠀ ꠅꠁꠟ।
GEN 9:3 ꠎꠦꠟꠣ ꠔꠥꠝꠞꠣꠞꠦ ꠈꠦꠔꠞ ꠚꠟ-ꠚꠡꠟ ꠀꠞ ꠔꠞꠤ-ꠔꠞꠇꠣꠞꠤ ꠖꠤꠍꠟꠣꠝ, ꠅꠃꠟꠣ ꠅꠈꠘ ꠎꠤꠔꠣ ꠎꠣꠘꠖꠣꠞ ꠢꠇꠟꠞꠦꠅ ꠔꠥꠝꠞꠣꠞ ꠈꠣꠘꠤꠞ ꠟꠣꠉꠤ ꠖꠤꠟꠣꠝ।
GEN 9:4 ꠈꠣꠟꠤ ꠟꠃ ꠡꠢ ꠉꠥꠡ꠆ꠔ ꠔꠥꠝꠞꠣ ꠈꠣꠁꠅ ꠘꠣ, ꠟꠃ ꠅꠁꠟꠉꠤ ꠎꠣꠘ।
GEN 9:5 ꠇꠦꠃ ꠎꠥꠖꠤ ꠝꠣꠘꠡꠞꠦ ꠈꠥꠘ ꠇꠞꠦ ꠔꠦ ꠀꠝꠤ ꠅꠛꠡ꠆ꠡꠃ ꠔꠣꠞ ꠈꠥꠘꠞ ꠛꠖꠟꠣ ꠟꠁꠝꠥ। ꠢꠦ ꠎꠣꠘꠥꠀꠞ ꠅꠃꠇ ꠛꠣ ꠝꠣꠘꠥꠡ ꠅꠃꠇ, ꠝꠣꠘꠡꠞ ꠎꠣꠘ ꠎꠦ ꠘꠦꠄ, ꠔꠣꠞ ꠎꠣꠘꠅ ꠖꠦꠅꠘ ꠟꠣꠉꠛ।
GEN 9:6 ꠝꠣꠘꠡꠞ ꠟꠃ ꠎꠦ ꠛꠣꠞ ꠇꠞꠦ, ꠝꠣꠘꠡꠦꠅ ꠔꠣꠞ ꠟꠃ ꠛꠣꠞ ꠇꠞꠛ, ꠇꠣꠞꠘ ꠀꠟ꠆ꠟꠣꠄ ꠝꠣꠘꠡꠞꠦ ꠘꠤꠎꠞ ꠍꠥꠞꠔꠦ ꠛꠣꠘꠣꠁꠍꠂꠘ।
GEN 9:7 ꠔꠥꠝꠤꠔꠣꠁꠘ ꠛꠦꠡ ꠇꠞꠤ ꠚꠟꠀꠟꠣ ꠅꠁꠀ ꠛꠣꠠꠅ ꠀꠞ ꠖꠥꠘꠤꠀꠁꠔ ꠍꠤꠔ꠆ꠞꠤꠀ ꠎꠣꠅ।”
GEN 9:8 ꠛꠣꠖꠦ ꠀꠟ꠆ꠟꠣꠄ ꠘꠥꠢ ꠀꠞ ꠔꠣꠘ ꠙꠥꠀꠂꠘ꠆ꠔꠞꠦ ꠇꠁꠟꠣ,
GEN 9:9 “ꠢꠥꠘꠅ, ꠀꠝꠤ ꠎꠛꠣꠘ ꠖꠤꠀꠞ, ꠔꠥꠝꠞꠣ ꠀꠞ ꠔꠥꠝꠞꠣꠞ ꠛꠣꠖꠞ ꠢꠇꠟ ꠝꠣꠘꠡꠞꠦ,
GEN 9:10 ꠀꠞ ꠙꠣꠈꠤ, ꠙꠣꠟꠣ ꠢꠦꠝꠣꠘ ꠀꠞ ꠖꠥꠘꠤꠀꠁꠞ ꠎꠔ ꠎꠣꠘꠥꠀꠞ ꠔꠥꠝꠞꠣꠞ ꠟꠉꠦ ꠎꠣꠎ ꠕꠣꠇꠤ ꠛꠣꠞ ꠅꠁꠍꠦ, ꠔꠣꠞꠣꠞꠦꠅ।
GEN 9:11 ꠎꠛꠣꠘꠐꠣ ꠅꠁꠟ, ꠛꠣꠘꠞ ꠙꠣꠘꠤ ꠖꠤꠀ ꠀꠞ ꠇꠥꠘꠥ ꠡꠝꠄꠃ ꠢꠇ꠆ꠇꠟ ꠎꠣꠘꠖꠣꠞꠞꠦ ꠝꠣꠞꠣ ꠅꠁꠔ ꠘꠣꠄ, ꠀꠞ ꠔꠣꠝꠣꠝ ꠖꠥꠘꠤꠀꠁ ꠍꠣꠚ ꠇꠞꠣꠞ ꠟꠣꠉꠤ ꠁꠟꠣ ꠇꠥꠘꠥ ꠛꠣꠘꠅ ꠅꠁꠔ ꠘꠣꠄ।”
GEN 9:12 ꠀꠟ꠆ꠟꠣꠄ ꠀꠞꠅ ꠇꠁꠟꠣ, “ꠎꠦ ꠎꠛꠣꠘ ꠀꠝꠤ ꠔꠥꠝꠞꠣꠞꠦ ꠀꠞ ꠔꠥꠝꠞꠣꠞ ꠟꠉꠞ ꠎꠣꠘꠖꠣꠞ ꠅꠇꠟꠞꠦ ꠖꠤꠟꠣꠝ, ꠁꠇꠐꠣ ꠇꠤꠀꠝꠔ ꠙꠞ꠆ꠎꠘ꠆ꠔ ꠛꠅꠀꠁꠟ ꠞꠁꠛ।
GEN 9:13 ꠀꠞ ꠝꠦꠊꠞ ꠇꠣꠟꠘꠤꠞ ꠝꠣꠎꠦ ꠀꠝꠣꠞ ꠞꠋꠗꠦꠘꠥ ꠖꠤꠟꠣꠝ, ꠁꠇꠐꠣ ꠅꠁꠟ ꠖꠥꠘꠤꠀꠁꠔ ꠀꠝꠣꠞ ꠎꠛꠣꠘꠞ ꠘꠤꠡꠣꠘꠣ।
GEN 9:14 ꠎꠦꠛꠟꠣ ꠀꠝꠤ ꠖꠥꠘꠤꠀꠁꠞ ꠃꠙꠞꠦ ꠇꠣꠟꠘꠤ ꠖꠤꠝꠥ, ꠁ ꠡꠝꠄ ꠅꠃ ꠞꠋꠗꠦꠘꠥ ꠖꠦꠈꠛꠣꠄ।
GEN 9:15 ꠀꠞ ꠅꠃ ꠡꠝꠄꠃ ꠀꠝꠤ ꠔꠥꠝꠞꠣꠞ ꠀꠞ ꠢꠇꠟ ꠎꠣꠘꠖꠣꠞꠞ ꠟꠉꠦ ꠀꠝꠣꠞ ꠎꠛꠣꠘꠞ ꠇꠕꠣ ꠁꠀꠖ ꠇꠞꠝꠥ। ꠀꠞ ꠇꠥꠘꠥ ꠡꠝꠄꠃ ꠛꠁꠘ꠆ꠘꠣ ꠅꠁꠀ ꠢꠇꠟ ꠎꠣꠘꠖꠣꠞꠞꠦ ꠙꠣꠘꠤ ꠖꠤꠀ ꠗꠁꠀ ꠘꠤꠔ ꠘꠣꠄ।
GEN 9:16 ꠇꠣꠟꠘꠤꠞ ꠝꠣꠎꠦ ꠎꠦꠛꠟꠣ ꠢꠤ ꠞꠋꠗꠦꠘꠥ ꠖꠦꠈꠣ ꠎꠣꠁꠛ ꠅꠃ ꠡꠝꠄ ꠀꠝꠤ ꠖꠥꠘꠤꠀꠁꠞ ꠢꠇꠟ ꠎꠣꠘꠖꠣꠞꠞ ꠟꠉꠦ ꠀꠝꠣꠞ ꠁ ꠢꠣꠝꠦꠡꠣꠇꠥꠞ ꠎꠛꠣꠘꠞ ꠇꠕꠣ ꠁꠀꠖ ꠇꠞꠝꠥ।”
GEN 9:17 ꠢꠦꠡꠦ ꠀꠟ꠆ꠟꠣꠄ ꠘꠥꠢꠞꠦ ꠇꠁꠟꠣ, “ꠖꠥꠘꠤꠀꠁꠞ ꠢꠇꠟ ꠎꠣꠘꠖꠣꠞꠞ ꠟꠉꠦ ꠀꠝꠤ ꠎꠦ ꠎꠛꠣꠘ ꠖꠤꠍꠤ, ꠁꠇꠐꠣ ꠅꠁꠟ ꠔꠣꠞ ꠘꠤꠡꠣꠘꠣ।”
GEN 9:18 ꠎꠣꠎ ꠕꠘꠦ ꠘꠥꠢꠞ ꠎꠦ ꠙꠥꠀꠂꠘ ꠛꠣꠞ ꠅꠁꠍꠟꠣ, ꠔꠣꠞꠣꠞ ꠘꠣꠝ ꠅꠁꠟ ꠡꠣꠝ, ꠢꠣꠝ ꠀꠞ ꠁꠀꠚꠦꠔ। ꠅꠃ ꠢꠣꠝ ꠅꠁꠟ ꠇꠦꠘꠣꠘꠞ ꠛꠣꠚ।
GEN 9:19 ꠘꠥꠢꠞ ꠅꠃ ꠔꠤꠘꠅ ꠙꠥꠀꠞ ꠈꠣꠘ꠆ꠖꠣꠘ ꠅꠇꠟ ꠢꠣꠞꠣ ꠖꠥꠘꠤꠀꠁꠔ ꠍꠤꠔ꠆ꠞꠤ ꠉꠦꠟꠣ।
GEN 9:20 ꠘꠥꠢꠦ ꠈꠦꠔ-ꠈꠣꠝꠣꠞ ꠡꠥꠞꠥ ꠇꠞꠤꠀ ꠄꠇ ꠀꠋꠉꠥꠞ-ꠈꠦꠔ ꠇꠞꠟꠣ।
GEN 9:21 ꠀꠞ ꠀꠋꠉꠥꠞꠞ ꠡꠞꠣꠛ ꠈꠣꠁꠀ ꠐꠣꠟ ꠅꠁꠀ ꠔꠣꠝ꠆ꠛꠥꠞ ꠜꠤꠔꠞꠦ ꠃꠖꠣꠝ ꠅꠁꠀ ꠙꠠꠤ ꠞꠁꠟꠣ।
GEN 9:22 ꠇꠦꠘꠣꠘꠞ ꠛꠣꠚ ꠢꠣꠝꠦ ꠀꠁꠀ ꠔꠣꠞ ꠛꠣꠚꠞ ꠅꠃ ꠢꠣꠟ ꠖꠦꠈꠤꠀ ꠛꠣꠞꠦ ꠉꠤꠀ ꠔꠣꠞ ꠖꠥꠁꠅ ꠜꠣꠁꠞ ꠉꠦꠍꠦ ꠇꠁꠟ।
GEN 9:23 ꠅꠁꠟꠦ ꠡꠣꠝ ꠀꠞ ꠁꠀꠚꠦꠔꠦ ꠇꠣꠘ꠆ꠖꠅ ꠇꠞꠤ ꠄꠇꠈꠣꠘ ꠇꠣꠙꠠ ꠟꠁꠀ ꠙꠤꠍꠦ ꠀꠐꠤꠀ ꠛꠣꠚꠞꠦ ꠅꠃ ꠇꠣꠙꠠꠖꠤ ꠉꠥꠞꠤꠀ ꠖꠤꠟꠣ, ꠔꠣꠞꠣꠞ ꠌꠃꠈ ꠃꠟꠐꠣꠛꠣꠄ ꠕꠣꠇꠣꠄ ꠛꠣꠚꠞꠦ ꠛꠦ-ꠀꠛꠞꠥ ꠢꠣꠟꠔꠦ ꠖꠦꠈꠟꠣ ꠘꠣ।
GEN 9:24 ꠘꠤꠡꠣ ꠇꠝꠤ ꠎꠣꠅꠀꠞ ꠛꠣꠖꠦ ꠘꠥꠢꠦ ꠔꠣꠘ ꠙꠥꠀꠞ ꠇꠣꠘ꠆ꠒ ꠢꠥꠘꠤꠀ
GEN 9:25 ꠇꠁꠟꠣ, “ꠇꠦꠘꠣꠘꠞ ꠃꠙꠞꠦ ꠟꠣꠘ꠆ꠘꠔ ꠙꠠꠃꠇ, ꠢꠦ ꠔꠣꠞ ꠜꠣꠁꠀꠁꠘ꠆ꠔꠞ ꠉꠦꠍꠦ ꠉꠥꠟꠣꠝꠞ ꠉꠥꠟꠣꠝ ꠅꠁꠛ।”
GEN 9:26 ꠔꠣꠁꠘ ꠀꠞꠅ ꠇꠁꠟꠣ, “ꠢꠇꠟ ꠔꠣꠞꠤꠚ ꠡꠣꠝꠞ ꠝꠣꠛꠥꠖ ꠀꠟ꠆ꠟꠣꠞ, ꠇꠦꠘꠣꠘ ꠡꠣꠝꠞ ꠉꠥꠟꠣꠝ ꠅꠃꠇ।
GEN 9:27 ꠀꠟ꠆ꠟꠣꠄ ꠁꠀꠚꠦꠔꠞꠦ ꠛꠃꠔꠔꠣ ꠖꠦꠃꠇ꠆ꠇꠣ, ꠢꠦ ꠡꠣꠝꠞ ꠔꠣꠝ꠆ꠛꠥꠔ ꠕꠣꠇꠃꠇ, ꠀꠞ ꠇꠦꠘꠣꠘ ꠔꠣꠞ ꠉꠥꠟꠣꠝ ꠅꠃꠇ।”
GEN 9:28 ꠛꠣꠘꠞ ꠛꠣꠖꠦ ꠘꠥꠢ ꠀꠞꠅ ꠡꠣꠠꠦ ꠔꠤꠘ-ꠡ ꠛꠞꠍ ꠛꠣꠌꠟꠣ।
GEN 9:29 ꠝꠥꠐ ꠡꠣꠠꠦ ꠘꠄ-ꠡ ꠛꠞꠍ ꠛꠄꠅꠡꠅ ꠔꠣꠁꠘ ꠝꠣꠞꠣ ꠉꠦꠟꠣ।
GEN 10:1 ꠘꠥꠢꠞ ꠙꠥꠀꠂꠘ ꠡꠣꠝ, ꠢꠣꠝ, ꠀꠞ ꠁꠀꠚꠦꠔꠞ ꠈꠣꠘ꠆ꠖꠣꠘꠞ ꠛꠄꠀꠘ। ꠛꠣꠘꠞ ꠛꠣꠖꠦ ꠔꠣꠞꠣꠞ ꠙꠥꠀ-ꠙꠥꠠꠤ ꠅꠁꠍꠟꠣ।
GEN 10:2 ꠁꠀꠚꠦꠔꠞ ꠙꠥꠀꠂꠘ꠆ꠔꠞ ꠘꠣꠝ: ꠉꠥꠝꠞ, ꠝꠣꠎꠥꠎ, ꠝꠣꠖꠄ, ꠁꠀꠛꠣꠘ, ꠔꠥꠛꠟ, ꠝꠦꠡꠇ ꠀꠞ ꠔꠤꠞꠡ।
GEN 10:3 ꠉꠥꠝꠞꠞ ꠙꠥꠀꠂꠘ: ꠅꠡ꠆ꠇꠤꠘꠡ, ꠞꠤꠚꠔ ꠀꠞ ꠔꠥꠉꠞ꠆ꠝ।
GEN 10:4 ꠁꠀꠛꠣꠘꠞ ꠙꠥꠀꠂꠘ ꠅꠁꠟꠣ: ꠁꠟꠤꠡꠣꠢ, ꠔꠞ꠆ꠡꠤꠡ, ꠇꠤꠔ꠆ꠔꠤꠝ ꠀꠞ ꠞꠥꠖꠣꠘꠤꠝ।
GEN 10:5 ꠄꠞꠣꠞ ꠛꠋꠡꠞ ꠝꠣꠘꠡꠦ ꠘꠣꠘꠣꠘ ꠎꠣꠔꠞ ꠝꠣꠔ-ꠇꠕꠣ, ꠙꠞꠤꠛꠣꠞ ꠀꠞ ꠎꠣꠔ ꠢꠤꠡꠣꠛꠦ ꠖꠞꠤꠀꠞ ꠙꠣꠞꠞ ꠘꠣꠘꠣꠘ ꠖꠦꠡꠅ ꠍꠤꠔ꠆ꠞꠤ ꠉꠦꠟꠣ।
GEN 10:6 ꠢꠣꠝꠞ ꠙꠥꠀꠂꠘ꠆ꠔꠞ ꠘꠣꠝ: ꠇꠥꠡ, ꠝꠤꠡꠞ, ꠙꠥꠐ ꠀꠞ ꠇꠦꠘꠣꠘ।
GEN 10:7 ꠇꠥꠡꠞ ꠙꠥꠀꠂꠘ: ꠍꠛꠣ, ꠢꠛꠤꠟꠣ, ꠍꠙ꠆ꠔꠣ, ꠞꠄꠝꠣ ꠀꠞ ꠍꠙ꠆ꠔꠇꠣ। ꠞꠄꠝꠣꠞ ꠙꠥꠀꠂꠘ ꠅꠁꠟꠣ: ꠡꠣꠛꠣ ꠀꠞ ꠖꠖꠣꠘ।
GEN 10:8 ꠇꠥꠡꠞ ꠄꠇ ꠙꠥꠀꠞ ꠘꠣꠝ ꠀꠍꠤꠟ ꠘꠝꠞꠥꠖ। ꠅꠃ ꠘꠝꠞꠥꠖ ꠖꠥꠘꠤꠀꠁꠔ ꠙꠄꠟꠥꠀꠘ ꠅꠁꠀ ꠃꠑꠍꠤꠟ।
GEN 10:9 ꠝꠣꠛꠥꠖꠞ ꠉꠦꠍꠦ ꠢꠦ ꠀꠍꠤꠟ ꠙꠄꠟꠥꠀꠘ ꠡꠤꠇꠣꠞꠤ। ꠄꠞꠟꠣꠉꠤ ꠒꠣꠇꠞ ꠇꠕꠣ ꠀꠍꠦ, ꠝꠣꠘꠥꠡꠐꠣ ꠎꠦꠘ ꠝꠣꠛꠥꠖꠞ ꠍꠣꠝꠘꠦ ꠘꠝꠞꠥꠖꠞ ꠟꠣꠈꠣꠘ ꠙꠄꠟꠥꠀꠘ ꠡꠤꠇꠣꠞꠤ।
GEN 10:10 ꠡꠤꠘꠣꠞ ꠖꠦꠡꠞ ꠛꠣꠛꠤꠟ, ꠄꠞꠇ, ꠅꠇ꠆ꠇꠖ ꠀꠞ ꠇꠟꠘꠤ ꠘꠣꠝꠞ ꠐꠣꠃꠘ ꠅꠇꠟ ꠟꠁꠀ ꠢꠦ ꠛꠣꠖꠡꠣꠁ ꠡꠥꠞꠥ ꠇꠞꠟ।
GEN 10:11 ꠅꠘ ꠕꠣꠇꠤ ꠔꠣꠞ ꠞꠣꠁꠎ꠆ꠎ ꠛꠣꠠꠤꠀ ꠀꠡꠤꠞꠤꠀ ꠖꠦꠡ ꠙꠞ꠆ꠎꠘ꠆ꠔ ꠉꠦꠟ। ꠢꠈꠣꠘꠞ ꠘꠤꠘꠜ, ꠞꠢꠛꠔꠙꠥꠞ, ꠇꠦꠟꠢ
GEN 10:12 ꠀꠞ ꠞꠦꠡꠘ ꠘꠣꠝꠞ ꠐꠣꠃꠘ ꠅꠇꠟꠅ ꠔꠣꠞ ꠛꠣꠘꠣꠁꠟ। ꠞꠦꠡꠘ ꠀꠍꠤꠟ ꠘꠤꠘꠜ ꠀꠞ ꠇꠦꠟꠢꠞ ꠝꠣꠎꠈꠣꠘꠅ, ꠁ ꠔꠤꠘꠐꠣꠄ ꠝꠤꠟꠤꠀ ꠄꠇ ꠛꠤꠞꠣꠐ ꠡꠢꠞ ꠅꠁꠟ।
GEN 10:13 ꠝꠤꠡꠞꠞ ꠛꠋꠡ ꠅꠁꠟꠣ ꠅꠃ ꠎꠣꠔ ꠅꠇꠟ: ꠟꠥꠖꠤ, ꠅꠘꠣꠝꠤ, ꠟꠢꠣꠛꠤ, ꠘꠙ꠆ꠔꠥꠢꠤ,
GEN 10:14 ꠙꠕ꠆ꠞꠥꠡꠤ, ꠇꠡꠟꠥꠢꠤ, ꠀꠞ ꠇꠙ꠆ꠔꠥꠞꠤ, ꠅꠃ ꠇꠙ꠆ꠔꠥꠞ ꠖꠤꠙ ꠕꠣꠇꠤ ꠚꠤꠟꠤꠡ꠆ꠔꠤꠘꠤ ꠅꠇꠟ ꠛꠣꠞ ꠅꠁꠀ ꠀꠁꠟꠣ।
GEN 10:15 ꠇꠦꠘꠣꠘꠞ ꠛꠠ ꠙꠥꠀ ꠍꠤꠖꠘ, ꠛꠣꠖꠞ ꠙꠥꠀ ꠢꠤꠐ, ꠢꠤꠐ꠆ꠐꠤ ꠎꠣꠔꠤꠞ ꠝꠥꠟ ꠛꠣꠚ।
GEN 10:16 ꠇꠦꠘꠣꠘ ꠀꠍꠟꠣ ꠎꠤꠛꠥꠎꠤ, ꠀꠝꠥꠞꠤ, ꠉꠤꠞ꠆ꠉꠣꠡꠤ,
GEN 10:17 ꠢꠤꠛ꠆ꠛꠤ, ꠀꠞ꠆ꠇꠤ, ꠍꠤꠘꠤ,
GEN 10:18 ꠀꠞ꠆ꠛꠣꠖꠤ, ꠎꠝꠣꠞꠤ ꠀꠞ ꠢꠣꠝꠣꠔꠤ, ꠅꠃ ꠎꠣꠔꠤ ꠅꠇꠟꠞ ꠝꠥꠟ ꠛꠣꠚ। ꠢꠦꠡꠦ ꠅꠃ ꠇꠦꠘꠣꠘꠤ ꠅꠇꠟ ꠌꠣꠁꠞꠅꠛꠣꠄ ꠍꠤꠔ꠆ꠞꠤ ꠉꠦꠍꠟꠣ।
GEN 10:19 ꠍꠤꠖꠘ ꠐꠣꠃꠘ ꠕꠣꠇꠤ ꠉꠦꠞꠣꠞꠞ ꠝꠥꠈꠣ ꠉꠣꠎꠣ ꠙꠞ꠆ꠎꠘ꠆ꠔ, ꠀꠞ ꠉꠣꠎꠣ ꠕꠣꠇꠤ ꠍꠣꠖꠥꠝ, ꠀꠝꠥꠞꠣ, ꠅꠖꠝꠣ ꠀꠞ ꠍꠛꠂꠁꠝ ꠎꠣꠅꠀꠞ ꠙꠕꠦ ꠟꠣꠡꠣ ꠙꠞ꠆ꠎꠘ꠆ꠔ ꠇꠦꠘꠣꠘꠤ ꠅꠇꠟꠞ ꠞꠣꠎꠔ꠆ꠔ ꠀꠍꠤꠟ।
GEN 10:20 ꠙꠞꠤꠛꠣꠞ, ꠝꠣꠔ-ꠇꠕꠣ, ꠖꠦꠡ ꠀꠞ ꠎꠣꠔ ꠢꠤꠡꠣꠛꠦ ꠄꠞꠣ ꠀꠍꠤꠟ ꠢꠣꠝꠞ ꠈꠣꠘ꠆ꠖꠣꠘ।
GEN 10:21 ꠁꠀꠚꠦꠔꠞ ꠛꠠ ꠜꠣꠁ ꠡꠣꠝꠞꠅ ꠙꠥꠀ-ꠙꠥꠠꠤꠘ ꠅꠁꠍꠟꠣ। ꠡꠣꠝ ꠅꠁꠟꠣ ꠀꠛꠦꠞ ꠀꠞ ꠔꠣꠞ ꠈꠣꠘ꠆ꠖꠣꠘꠞ ꠛꠣꠚ।
GEN 10:22 ꠡꠣꠝꠞ ꠙꠥꠀꠂꠘ꠆ꠔꠞ ꠘꠣꠝ: ꠁꠟꠣꠝ, ꠀꠡꠥꠞ, ꠀꠞ꠆ꠚꠣꠇꠍꠣꠖ, ꠟꠥꠖ ꠀꠞ ꠅꠞꠣꠝ।
GEN 10:23 ꠅꠞꠣꠝꠞ ꠙꠥꠀꠂꠘ: ꠃꠎ, ꠢꠥꠟ, ꠉꠦꠕꠞ ꠀꠞ ꠝꠡ।
GEN 10:24 ꠀꠞ꠆ꠚꠣꠇꠍꠣꠖꠞ ꠙꠥꠀ ꠡꠣꠟꠦꠈ, ꠀꠞ ꠡꠣꠟꠦꠈꠞ ꠙꠥꠀꠞ ꠘꠣꠝ ꠀꠛꠦꠞ।
GEN 10:25 ꠀꠛꠦꠞꠞ ꠖꠥꠁ ꠙꠥꠀ ꠅꠁꠍꠟꠣ, ꠄꠇꠎꠘꠞ ꠘꠣꠝ ꠚꠣꠟꠦꠎ [ꠝꠣꠘꠤ, ꠀꠟꠉꠣ], ꠔꠣꠘ ꠡꠝꠄ ꠖꠥꠘꠤꠀ ꠀꠟꠉ ꠅꠁꠍꠤꠟ ꠇꠞꠤ ꠔꠣꠘ ꠅꠃ ꠘꠣꠝ ꠅꠁꠟ। ꠚꠣꠟꠦꠎꠞ ꠜꠣꠁꠞ ꠘꠣꠝ ꠁꠀꠇꠔꠣꠘ।
GEN 10:26 ꠁꠀꠇꠔꠣꠘꠞ ꠙꠥꠀꠂꠘ ꠅꠁꠟꠣ: ꠅꠟꠝꠥꠖꠖ, ꠡꠦꠟꠚ, ꠢꠣꠎꠞꠣꠝꠣꠅꠔ, ꠎꠦꠞꠢ,
GEN 10:27 ꠢꠖꠥꠞꠣꠝ, ꠃꠎꠣꠟ, ꠖꠤꠇ꠆ꠟꠣ,
GEN 10:28 ꠅꠛꠟ, ꠅꠛꠤꠝꠣꠁꠄꠟ, ꠡꠣꠛꠣ,
GEN 10:29 ꠅꠚꠤꠞ, ꠢꠛꠤꠟꠣ ꠀꠞ ꠎꠥꠛꠛ। ꠄꠞꠣ ꠢꠇꠟ ꠅꠁꠟꠣ ꠁꠀꠇꠔꠣꠘꠞ ꠙꠥꠀꠂꠘ।
GEN 10:30 ꠝꠦꠡꠣ ꠕꠣꠇꠤ ꠙꠥꠛꠦꠖꠤ ꠍꠦꠚꠣꠞꠅ ꠎꠣꠅꠀꠞ ꠙꠕꠅ ꠎꠦ ꠙꠣꠠꠤ ꠎꠣꠉꠣ ꠀꠍꠦ, ꠅꠘꠅ ꠔꠣꠞꠣ ꠕꠣꠇꠔꠣ।
GEN 10:31 ꠙꠞꠤꠛꠣꠞ, ꠝꠣꠔ-ꠇꠕꠣ, ꠖꠦꠡ, ꠀꠞ ꠎꠣꠔ ꠢꠤꠡꠣꠛꠦ ꠄꠞꠣ ꠅꠁꠟꠣ ꠡꠣꠝꠞ ꠈꠣꠘ꠆ꠖꠣꠘ।
GEN 10:32 ꠎꠣꠔ ꠀꠞ ꠛꠋꠡ ꠢꠤꠡꠣꠛꠦ ꠄꠞꠣ ꠅꠁꠟ ꠘꠥꠢꠞ ꠙꠥꠀꠂꠘ꠆ꠔꠞ ꠙꠞꠤꠛꠣꠞ। ꠛꠣꠘꠞ ꠛꠣꠖꠦ ꠄꠞꠣꠞ ꠛꠋꠡ ꠅꠇꠟꠦ ꠘꠣꠘꠣꠘ ꠎꠣꠔ ꠅꠁꠀ ꠀꠡ꠆ꠔꠣ ꠖꠥꠘꠤꠀꠁꠔ ꠍꠤꠔ꠆ꠞꠤ ꠉꠦꠍꠟꠣ।
GEN 11:1 ꠢꠤ ꠎꠝꠣꠘꠣꠔ ꠀꠡ꠆ꠔꠣ ꠖꠥꠘꠤꠀꠁꠔ ꠈꠣꠟꠤ ꠄꠇ ꠜꠣꠡꠣꠄ ꠝꠣꠔꠔꠣ, ꠀꠞ ꠔꠣꠞꠣꠞ ꠛꠥꠟꠤ ꠅꠇꠟꠅ ꠄꠇꠟꠣꠈꠣꠘꠃ ꠀꠍꠤꠟ।
GEN 11:2 ꠔꠣꠞꠣ ꠙꠥꠛꠦꠖꠤ ꠀꠉꠥꠀꠁꠀ ꠎꠣꠁꠔꠦ ꠎꠣꠁꠔꠦ ꠡꠤꠘꠣꠞ ꠖꠦꠡꠞ ꠄꠇ ꠢꠝꠣꠘ ꠎꠣꠉꠣ ꠙꠣꠁꠀ ꠢꠈꠣꠘꠅꠃ ꠛꠡꠔ ꠇꠞꠟꠣ।
GEN 11:3 ꠔꠣꠞꠣ ꠄꠇꠦ-ꠅꠁꠘ꠆ꠘꠞꠦ ꠇꠁꠟ, “ꠀꠅ, ꠀꠝꠞꠣ ꠁꠐ ꠛꠣꠘꠣꠁꠀ ꠀꠉꠥꠁꠘꠖꠤ ꠎꠣꠟꠣꠁ।” ꠇꠁꠀꠃ ꠔꠣꠞꠣ ꠙꠣꠔ꠆ꠔꠞꠞ ꠛꠖꠟꠣ ꠁꠐ ꠀꠞ ꠌꠥꠘ-ꠡꠥꠞꠇꠤꠞ ꠛꠖꠟꠣ ꠔꠣꠞꠔꠦꠟ ꠟꠣꠉꠣꠁꠟ।
GEN 11:4 ꠔꠣꠞꠣ ꠀꠞꠅ ꠇꠁꠟ, “ꠀꠅ, ꠀꠝꠞꠣꠞ ꠘꠤꠎꠞ ꠟꠣꠉꠤ ꠄꠇꠐꠣ ꠡꠢꠞ ꠛꠣꠘꠣꠁ, ꠀꠞ ꠅꠃꠟꠣ ꠄꠇꠐꠣ ꠊꠞꠅ ꠛꠣꠘꠣꠁ, ꠎꠦꠇꠐꠣꠞ ꠝꠤꠘꠣꠞ ꠉꠤꠀ ꠀꠍꠝꠣꠘ ꠟꠣꠉꠣꠟ ꠙꠣꠁꠛ। ꠔꠦꠃ ꠀꠝꠞꠣꠞ ꠘꠣꠝꠅ ꠅꠁꠛ ꠀꠞ ꠀꠝꠞꠣ ꠖꠥꠘꠤꠀꠁꠔ ꠍꠤꠔ꠆ꠞꠤꠔꠣꠝꠅ ꠘꠣꠄ।”
GEN 11:5 ꠝꠣꠘꠡꠦ ꠎꠦ ꠃꠌꠣ ꠊꠞ ꠀꠞ ꠡꠢꠞ ꠛꠣꠘꠣꠁꠞꠣ ꠁꠇꠐꠣ ꠖꠦꠈꠣꠔ ꠝꠣꠛꠥꠖ ꠟꠣꠝꠤ ꠀꠁꠟꠣ।
GEN 11:6 ꠀꠞ ꠇꠁꠟꠣ, “ꠄꠞꠣ ꠄꠇ ꠎꠣꠔꠞ ꠝꠣꠘꠥꠡ, ꠄꠞꠣꠞ ꠝꠣꠔ-ꠇꠕꠣꠅ ꠄꠇ; ꠄꠞꠟꠣꠉꠤ ꠔꠣꠞꠣ ꠅꠃ ꠇꠣꠝꠞ ꠝꠣꠎꠦ ꠀꠔ ꠖꠤꠍꠦ। ꠘꠤꠎꠞ ꠝꠔꠟꠛ ꠢꠣꠍꠤꠟꠞ ꠟꠣꠉꠤ ꠄꠞꠣ ꠀꠞ ꠇꠥꠘꠥ ꠛꠣꠗꠣꠃ ꠝꠣꠘꠔ ꠘꠣꠄ।
GEN 11:7 ꠔꠦ ꠀꠅ, ꠀꠝꠞꠣ ꠟꠣꠝꠤꠀ ꠉꠤꠀ ꠔꠣꠞꠣꠞ ꠛꠥꠟꠤꠞ ꠝꠣꠎꠦ ꠉꠥꠟꠝꠣꠟ ꠟꠣꠉꠣꠁ ꠖꠦꠁ, ꠎꠣꠔꠦ ꠔꠣꠞꠣ ꠄꠇꠎꠘꠦ ꠀꠞꠇ ꠎꠘꠞ ꠝꠣꠔ ꠛꠥꠎꠔ ꠘꠣ ꠙꠣꠞꠦ।”
GEN 11:8 ꠄꠞꠛꠣꠖꠦ ꠝꠣꠛꠥꠖꠦ ꠢꠃ ꠎꠣꠉꠣ ꠕꠣꠇꠤ ꠔꠣꠞꠣꠞꠦ ꠀꠡ꠆ꠔꠣ ꠖꠥꠘꠤꠀꠁꠔ ꠍꠤꠔ꠆ꠞꠣꠁ ꠖꠤꠟꠣ। ꠀꠞ ꠔꠣꠞꠣꠞ ꠢꠃ ꠡꠢꠞ ꠛꠣꠘꠣꠘꠤꠞ ꠇꠣꠝꠅ ꠛꠘ꠆ꠖ ꠅꠁꠉꠦꠟ।
GEN 11:9 ꠅꠃ ꠇꠣꠞꠘꠦ ꠢꠃ ꠎꠣꠉꠣꠞ ꠘꠣꠝ ꠅꠁꠟ ꠛꠣꠛꠤꠟ [ꠝꠣꠘꠤ, ꠉꠥꠟꠝꠣꠟ], ꠢꠈꠣꠘꠅꠃ ꠝꠣꠛꠥꠖꠦ ꠢꠣꠞꠣ ꠖꠥꠘꠤꠀꠁꠞ ꠛꠥꠟꠤꠞ ꠝꠣꠎꠦ ꠉꠥꠟꠝꠣꠟ ꠟꠣꠉꠣꠁ ꠖꠤꠍꠟꠣ। ꠢꠈꠣꠘ ꠕꠣꠇꠤꠃ ꠔꠣꠁꠘ ꠔꠣꠞꠣꠞꠦ ꠀꠡ꠆ꠔꠣ ꠖꠥꠘꠤꠀꠁꠔ ꠍꠤꠔ꠆ꠞꠣꠁꠟꠤꠟꠣ।
GEN 11:10 ꠅꠃ ꠅꠁꠟ ꠡꠣꠝꠞ ꠈꠣꠘ꠆ꠖꠣꠘꠞ ꠛꠄꠀꠘ। ꠛꠣꠘꠞ ꠖꠥꠁ ꠛꠞꠍ ꠛꠣꠖꠦ ꠡꠣꠝꠞ ꠛꠄꠅꠡ ꠎꠦꠛꠟꠣ ꠄꠇ-ꠡ ꠛꠞꠍ, ꠅꠃ ꠡꠝꠄ ꠔꠣꠘ ꠙꠥꠀ ꠀꠞ꠆ꠚꠣꠇꠍꠣꠖꠞ ꠎꠘꠝ ꠅꠁꠟ।
GEN 11:11 ꠀꠞ꠆ꠚꠣꠇꠍꠣꠖꠞ ꠎꠘꠝꠞ ꠛꠣꠖꠦ ꠡꠣꠝ ꠀꠞꠅ ꠙꠣꠌ-ꠡ ꠛꠞꠍ ꠛꠣꠌꠤꠀ ꠀꠍꠟꠣ। ꠄꠞ ꠝꠣꠎꠦ ꠔꠣꠘ ꠀꠞꠅ ꠙꠥꠀ-ꠙꠥꠠꠤꠘ ꠅꠁꠍꠟꠣ।
GEN 11:12 ꠀꠞ꠆ꠚꠣꠇꠍꠣꠖꠞ ꠙꠣꠄꠔꠤꠡ ꠛꠍꠞꠞ ꠡꠝꠄ ꠔꠣꠘ ꠙꠥꠀ ꠡꠣꠟꠦꠈꠞ ꠎꠘꠝ ꠅꠁꠟ।
GEN 11:13 ꠡꠣꠟꠦꠈꠞ ꠎꠘꠝꠞ ꠛꠣꠖꠦ ꠔꠣꠁꠘ ꠀꠞꠅ ꠌꠣꠁꠞ-ꠡ ꠔꠤꠘ ꠛꠞꠍ ꠛꠣꠌꠤꠀ ꠀꠍꠟꠣ। ꠄꠞ ꠝꠣꠎꠦ ꠔꠣꠘ ꠀꠞꠅ ꠙꠥꠀ-ꠙꠥꠠꠤ ꠅꠁꠍꠟꠣ।
GEN 11:14 ꠡꠣꠟꠦꠈꠞ ꠔꠤꠡ ꠛꠞꠍ ꠛꠄꠅꠡꠞ ꠡꠝꠄ ꠔꠣꠘ ꠙꠥꠀ ꠀꠛꠦꠞꠞ ꠎꠘꠝ ꠅꠁꠟ।
GEN 11:15 ꠀꠛꠦꠞꠞ ꠎꠘꠝꠞ ꠛꠣꠖꠦ ꠡꠣꠟꠦꠈ ꠀꠞꠅ ꠌꠣꠁꠞ-ꠡ ꠔꠤꠘ ꠛꠞꠍ ꠛꠣꠌꠤꠀ ꠀꠍꠟꠣ। ꠄꠞ ꠝꠣꠎꠦ ꠔꠣꠘ ꠀꠞꠅ ꠙꠥꠀ-ꠙꠥꠠꠤ ꠅꠁꠍꠟꠣ।
GEN 11:16 ꠀꠛꠦꠞꠞ ꠌꠃꠔꠤꠡ ꠛꠍꠞꠞ ꠡꠝꠄ ꠔꠣꠘ ꠙꠥꠀ ꠚꠣꠟꠦꠎꠞ ꠎꠘꠝ ꠅꠁꠟ।
GEN 11:17 ꠚꠣꠟꠦꠎꠞ ꠎꠘꠝꠞ ꠛꠣꠖꠦ ꠀꠛꠦꠞ ꠀꠞꠅ ꠌꠣꠁꠞ-ꠡ ꠔꠤꠡ ꠛꠞꠍ ꠛꠣꠌꠤꠀ ꠀꠍꠟꠣ। ꠄꠞ ꠝꠣꠎꠦ ꠔꠣꠘ ꠀꠞꠅ ꠙꠥꠀ-ꠙꠥꠠꠤ ꠅꠁꠍꠟꠣ।
GEN 11:18 ꠚꠣꠟꠦꠎꠞ ꠔꠤꠡ ꠛꠞꠍ ꠛꠄꠅꠡꠞ ꠡꠝꠄ ꠔꠣꠘ ꠙꠥꠀ ꠞꠣꠃꠞ ꠎꠘꠝ ꠅꠁꠟ।
GEN 11:19 ꠞꠣꠃꠞ ꠎꠘꠝꠞ ꠛꠣꠖꠦ ꠚꠣꠟꠦꠎ ꠀꠞꠅ ꠖꠥꠁ-ꠡ ꠘꠄ ꠛꠞꠍ ꠛꠣꠌꠤꠀ ꠀꠍꠟꠣ। ꠄꠞ ꠝꠣꠎꠦ ꠔꠣꠘ ꠀꠞꠅ ꠙꠥꠀ-ꠙꠥꠠꠤ ꠅꠁꠍꠟꠣ।
GEN 11:20 ꠞꠣꠃꠞ ꠛꠔ꠆ꠔꠤꠡ ꠛꠍꠞꠞ ꠡꠝꠄ ꠔꠣꠘ ꠙꠥꠀ ꠍꠣꠞꠥꠎꠞ ꠎꠘꠝ ꠅꠁꠟ।
GEN 11:21 ꠍꠣꠞꠥꠎꠞ ꠎꠘꠝꠞ ꠛꠣꠖꠦ ꠞꠣꠃ ꠀꠞꠅ ꠖꠥꠁ-ꠡ ꠡꠣꠔ ꠛꠞꠍ ꠛꠣꠌꠤꠀ ꠀꠍꠟꠣ। ꠄꠞ ꠝꠣꠎꠦ ꠔꠣꠘ ꠀꠞꠅ ꠙꠥꠀ-ꠙꠥꠠꠤ ꠅꠁꠍꠟꠣ।
GEN 11:22 ꠍꠣꠞꠥꠎꠞ ꠔꠤꠡ ꠛꠍꠞꠞ ꠡꠝꠄ ꠔꠣꠘ ꠙꠥꠀ ꠘꠣꠢꠥꠞꠞ ꠎꠘꠝ ꠅꠁꠟ।
GEN 11:23 ꠘꠣꠢꠥꠞꠞ ꠎꠘꠝꠞ ꠛꠣꠖꠦ ꠍꠣꠞꠥꠎ ꠀꠞꠅ ꠖꠥꠁ-ꠡ ꠛꠞꠍ ꠛꠣꠌꠤꠀ ꠀꠍꠟꠣ। ꠄꠞ ꠝꠣꠎꠦ ꠔꠣꠘ ꠀꠞꠅ ꠙꠥꠀ-ꠙꠥꠠꠤ ꠅꠁꠍꠟꠣ।
GEN 11:24 ꠘꠣꠢꠥꠞꠞ ꠃꠘꠔꠤꠡ ꠛꠍꠞꠞ ꠡꠝꠄ ꠔꠣꠘ ꠙꠥꠀ ꠔꠣꠞꠦꠈꠞ ꠎꠘꠝ ꠅꠁꠟ।
GEN 11:25 ꠔꠣꠞꠦꠈꠞ ꠎꠘꠝꠞ ꠛꠣꠖꠦ ꠘꠣꠢꠥꠞ ꠀꠞꠅ ꠄꠇ-ꠡ ꠃꠘ꠆ꠘꠤꠡ ꠛꠞꠍ ꠛꠣꠌꠤꠀ ꠀꠍꠟꠣ। ꠄꠞ ꠝꠣꠎꠦ ꠔꠣꠘ ꠀꠞꠅ ꠙꠥꠀ-ꠙꠥꠠꠤ ꠅꠁꠍꠟꠣ।
GEN 11:26 ꠔꠣꠞꠦꠈꠞ ꠡꠔ꠆ꠔꠁꠞ ꠛꠍꠞꠞ ꠡꠝꠄ ꠔꠣꠘ ꠙꠥꠀꠂꠘ ꠀꠛ꠆ꠞꠣꠝ (ꠔꠣꠘ ꠛꠣꠖꠞ ꠘꠣꠝ ꠁꠛ꠆ꠞꠣꠢꠤꠝ), ꠘꠣꠢꠥꠞ ꠀꠞ ꠢꠣꠞꠘꠞ ꠎꠘꠝ ꠅꠁꠍꠤꠟ।
GEN 11:27 ꠅꠃ ꠅꠁꠟ ꠔꠣꠞꠦꠈꠞ ꠈꠣꠘ꠆ꠖꠣꠘꠞ ꠛꠄꠀꠘ। ꠔꠣꠞꠦꠈꠞ ꠙꠥꠀꠞ ꠘꠣꠝ ꠀꠍꠤꠟ ꠀꠛ꠆ꠞꠣꠝ, ꠘꠣꠢꠥꠞ ꠀꠞ ꠢꠣꠞꠘ। ꠀꠞ ꠢꠣꠞꠘꠞ ꠙꠥꠀꠞ ꠘꠣꠝ ꠟꠥꠔ।
GEN 11:28 ꠢꠣꠞꠘ ꠔꠣꠘ ꠛꠣꠛꠣ ꠎꠤꠘ꠆ꠖꠣ ꠕꠣꠇꠔꠦꠃ, ꠔꠣꠘ ꠎꠘꠝ-ꠝꠣꠐꠤ ꠛꠣꠛꠤꠟ ꠖꠦꠡꠞ ꠃꠞ ꠐꠣꠃꠘꠅ ꠝꠣꠞꠣ ꠉꠦꠍꠟꠣ।
GEN 11:29 ꠀꠛ꠆ꠞꠣꠝ ꠀꠞ ꠘꠣꠢꠥꠞ ꠖꠥꠁꠎꠘꠦ ꠛꠤꠀ ꠇꠞꠍꠟꠣ। ꠀꠛ꠆ꠞꠣꠝꠞ ꠛꠃꠞ ꠘꠣꠝ ꠀꠍꠤꠟ ꠍꠣꠞꠣ। ꠀꠞ ꠘꠣꠢꠥꠞꠞ ꠛꠃꠞ ꠘꠣꠝ ꠝꠤꠟꠇꠣ। ꠝꠤꠟꠇꠣ ꠀꠞ ꠁꠍꠇꠣ ꠀꠍꠟꠣ ꠢꠣꠞꠘꠞ ꠙꠥꠠꠤꠘ।
GEN 11:30 ꠅꠁꠟꠦ ꠍꠣꠞꠣꠞ ꠇꠥꠘꠥ ꠙꠥꠀ-ꠙꠥꠠꠤ ꠀꠍꠤꠟ ꠘꠣ, ꠔꠣꠁꠘ ꠘꠤꠀꠅꠟꠣꠖꠤ ꠀꠍꠟꠣ।
GEN 11:31 ꠔꠣꠞꠦꠈꠦ ꠀꠛ꠆ꠞꠣꠝ, ꠟꠥꠔ ꠀꠞ ꠍꠣꠞꠣꠞꠦ ꠟꠁꠀ ꠇꠦꠘꠣꠘ ꠖꠦꠡꠅ ꠎꠣꠅꠀꠞ ꠟꠣꠉꠤ ꠛꠣꠛꠤꠟ ꠖꠦꠡꠞ ꠃꠞ ꠐꠣꠃꠘ ꠕꠣꠇꠤ ꠞꠅꠀꠘꠣ ꠅꠁꠟꠣ। ꠀꠛ꠆ꠞꠣꠝ ꠅꠁꠟꠣ ꠔꠣꠞꠦꠈꠞ ꠙꠥꠀ, ꠢꠣꠞꠘꠞ ꠙꠥꠀ ꠟꠥꠔ ꠅꠁꠟꠣ ꠔꠣꠞꠦꠈꠞ ꠘꠣꠔꠤ, ꠀꠞ ꠍꠣꠞꠣ ꠅꠁꠟꠣ ꠔꠣꠞꠦꠈꠞ ꠙꠥꠀ ꠀꠛ꠆ꠞꠣꠝꠞ ꠛꠃ। ꠙꠄꠟꠣ ꠔꠣꠞꠣ ꠢꠣꠞꠣꠘ ꠘꠣꠝꠦ ꠄꠇ ꠐꠣꠃꠘꠅ ꠉꠦꠟꠣ ꠀꠞ ꠢꠈꠣꠘꠅ ꠛꠡꠔ ꠇꠞꠟꠣ।
GEN 11:32 ꠔꠣꠞꠦꠈ ꠖꠥꠁ-ꠡ ꠙꠣꠌ ꠛꠞꠍ ꠛꠄꠅꠡꠅ ꠢꠣꠞꠣꠘ ꠐꠣꠃꠘꠅ ꠝꠣꠞꠣ ꠉꠦꠟꠣ।
GEN 12:1 ꠛꠣꠖꠦ ꠝꠣꠛꠥꠖꠦ ꠀꠛ꠆ꠞꠣꠝꠞꠦ ꠚꠞꠝꠣꠁꠟꠣ, “ꠔꠥꠝꠤ ꠔꠥꠝꠣꠞ ꠘꠤꠎꠞ ꠖꠦꠡ, ꠈꠦꠡ-ꠇꠥꠐꠥꠝ, ꠀꠞ ꠛꠣꠛꠣꠁꠔꠤ ꠜꠤꠐꠣ-ꠝꠣꠐꠤ ꠍꠣꠠꠤꠀ ꠀꠝꠤ ꠎꠦ ꠖꠦꠡ ꠖꠦꠈꠣꠁꠝꠥ ꠢꠃ ꠖꠦꠡꠅ ꠎꠣꠅ।
GEN 12:2 ꠔꠥꠝꠣꠞ ꠝꠣꠎ ꠕꠣꠇꠤ ꠀꠝꠤ ꠛꠃꠔ ꠛꠠ ꠄꠇ ꠎꠣꠔꠤ ꠙꠄꠖꠣ ꠇꠞꠝꠥ। ꠔꠥꠝꠣꠞꠦ ꠞꠢꠝ-ꠛꠞꠇꠔ ꠖꠤꠝꠥ। ꠀꠝꠤ ꠔꠥꠝꠣꠞꠦ ꠛꠠ ꠁꠎ꠆ꠎꠔꠤ ꠛꠣꠘꠣꠁꠝꠥ, ꠀꠞ ꠔꠥꠝꠣꠞ ꠃꠍꠤꠟ꠆ꠟꠣꠄ ꠀꠡ꠆ꠔꠣ ꠖꠥꠘꠤꠀꠞ ꠝꠣꠘꠡꠦ ꠞꠢꠝ-ꠛꠞꠇꠔ ꠙꠣꠁꠛꠣ।
GEN 12:3 ꠀꠞ ꠢꠥꠘꠅ, ꠔꠥꠝꠣꠞꠦ ꠎꠣꠞꠣ ꠖꠥꠀ ꠖꠤꠛꠣ, ꠀꠝꠤ ꠀꠟ꠆ꠟꠣꠄ ꠔꠣꠞꠣꠞꠦ ꠞꠢꠝ-ꠛꠞꠇꠔ ꠖꠤꠝꠥ, ꠅꠁꠟꠦ ꠎꠣꠞꠣ ꠔꠥꠝꠣꠞꠦ ꠛꠖ꠆ꠖꠥꠀ ꠖꠤꠛꠣ, ꠀꠝꠤ ꠔꠣꠞꠣꠞꠦ ꠟꠣꠘ꠆ꠘꠔ ꠖꠤꠝꠥ। ꠖꠥꠘꠤꠀꠞ ꠢꠇꠟ ꠎꠣꠔꠤꠄ ꠔꠥꠝꠣꠞ ꠃꠍꠤꠟ꠆ꠟꠣꠄ ꠞꠢꠝ-ꠛꠞꠇꠔ ꠙꠣꠁꠛꠣ।”
GEN 12:4 ꠝꠣꠛꠥꠖꠞ ꠢꠥꠇꠥꠝ ꠝꠔꠃ ꠀꠛ꠆ꠞꠣꠝ ꠛꠣꠞ ꠅꠁꠉꠦꠟꠣ, ꠔꠣꠘ ꠜꠣꠔꠤꠎꠣ ꠟꠥꠔꠅ ꠔꠣꠘ ꠟꠉꠦ ꠉꠦꠟꠣ। ꠢꠣꠞꠣꠘ ꠐꠣꠃꠘ ꠚꠣꠟꠣꠁꠀ ꠎꠣꠅꠀꠞ ꠡꠝꠄ ꠀꠛ꠆ꠞꠣꠝꠞ ꠛꠄꠅꠡ ꠀꠍꠤꠟ ꠙꠌꠔ꠆ꠔꠁꠞ ꠛꠞꠍ।
GEN 12:5 ꠔꠣꠘ ꠛꠤꠛꠤ ꠍꠣꠞꠣ ꠀꠞ ꠜꠣꠔꠤꠎꠣ ꠟꠥꠔꠞꠦ ꠟꠁꠀ ꠔꠣꠁꠘ ꠛꠣꠞ ꠅꠁꠟꠣ। ꠢꠇꠟ ꠝꠣꠟ-ꠍꠣꠝꠣꠘꠣ ꠟꠁꠀ ꠀꠞ ꠎꠦ ꠉꠥꠟꠣꠝ ꠅꠇꠟꠞꠦ ꠔꠣꠁꠘ-ꠔꠣꠁꠘ ꠢꠣꠞꠣꠘ ꠄꠟꠣꠇꠣꠔ ꠙꠣꠁꠍꠟꠣ ꠔꠣꠞꠣꠞꠦ ꠟꠁꠀ ꠇꠦꠘꠣꠘ ꠖꠦꠡꠅ ꠎꠣꠁꠔꠣ ꠇꠞꠤ ꠞꠅꠀꠘꠣ ꠖꠤꠟꠣ। ꠢꠦꠡꠦ ꠢꠘꠅ ꠉꠤꠀ ꠙꠃꠍꠟꠣ।
GEN 12:6 ꠇꠦꠘꠣꠘꠞ ꠝꠣꠎꠦꠖꠤ ꠎꠣꠁꠔꠦ ꠎꠣꠁꠔꠦ ꠀꠛ꠆ꠞꠣꠝ ꠡꠤꠈꠤꠝꠅ ꠀꠁꠀ ꠝꠥꠞꠤꠞ ꠄꠟꠘ ꠉꠣꠍꠞ ꠉꠦꠍꠦ ꠎꠤꠞꠣꠁꠟꠣ। ꠁ ꠡꠝꠄ ꠇꠦꠘꠣꠘꠤ ꠅꠇꠟ ꠢꠃ ꠖꠦꠡꠅ ꠛꠡꠔ ꠇꠞꠔꠣ।
GEN 12:7 ꠝꠣꠛꠥꠖꠦ ꠀꠛ꠆ꠞꠣꠝꠞꠦ ꠖꠞꠡꠘ ꠖꠤꠀ ꠇꠁꠟꠣ, ꠁ ꠖꠦꠡꠈꠣꠘ ꠀꠝꠤ ꠔꠥꠝꠣꠞ ꠅꠀꠞꠤꠡꠞꠦ ꠖꠤꠟꠣꠁꠝꠥ। ꠀꠛ꠆ꠞꠣꠝꠞꠦ ꠎꠦꠁꠘ ꠖꠦꠈꠣ ꠖꠤꠟꠣ, ꠢꠃ ꠝꠣꠛꠥꠖꠞ ꠘꠣꠝꠦ ꠔꠣꠁꠘ ꠢꠘꠅ ꠄꠇ ꠇꠥꠞꠛꠣꠘꠤ ꠈꠣꠘꠣ ꠛꠣꠘꠣꠁꠟꠣ।
GEN 12:8 ꠢꠘ ꠕꠣꠇꠤ ꠔꠣꠁꠘ ꠛꠦꠕꠦꠟ ꠐꠣꠃꠘꠞ ꠙꠥꠛꠦꠖꠤ ꠙꠣꠠꠤ ꠄꠟꠣꠇꠣꠔ ꠀꠉꠥꠀꠁ ꠉꠦꠟꠣ, ꠉꠤꠀ ꠙꠁꠌꠝꠦ ꠛꠦꠕꠦꠟ ꠙꠥꠛꠦ ꠅꠄ ꠐꠣꠃꠘꠞ ꠝꠣꠎꠈꠣꠘꠅ ꠔꠣꠁꠘ ꠔꠣꠝ꠆ꠛꠥ ꠉꠣꠠꠤꠟꠣ। ꠝꠣꠛꠥꠖꠞ ꠘꠣꠝꠦ ꠔꠣꠁꠘ ꠁꠘꠅ ꠄꠇ ꠇꠥꠞꠛꠣꠘꠤ ꠈꠣꠘꠣ ꠛꠣꠘꠣꠁꠟꠣ ꠀꠞ ꠝꠣꠛꠥꠖꠞ ꠘꠣꠝ ꠟꠁꠟꠣ।
GEN 12:9 ꠛꠣꠖꠦ ꠔꠣꠁꠘ ꠢꠤꠘ ꠕꠣꠇꠤ ꠢꠞꠔꠦ ꠢꠞꠔꠦ ꠘꠦꠉꠦꠜ ꠘꠣꠝꠞ ꠖꠃꠇꠘꠞ ꠝꠞꠥꠜꠥꠝꠤꠞ ꠛꠣꠄꠖꠤ ꠉꠦꠟꠣꠉꠤ।
GEN 12:10 ꠁ ꠡꠝꠄ ꠇꠦꠘꠣꠘ ꠖꠦꠡꠅ ꠘꠤꠖꠣꠘ ꠖꠦꠈꠣ ꠖꠤꠟ। ꠁ ꠘꠤꠖꠣꠘ ꠈꠥꠛ ꠇꠑꠤꠘ ꠅꠀꠄ, ꠀꠛ꠆ꠞꠣꠝꠦ ꠝꠥꠍꠣꠚꠤꠞ ꠅꠁꠀ ꠝꠤꠡꠞ ꠖꠦꠡꠅ ꠉꠦꠟꠣꠉꠤ।
GEN 12:11 ꠝꠤꠡꠞꠞ ꠇꠣꠘ꠆ꠖꠣꠔ ꠀꠁꠀ ꠀꠛ꠆ꠞꠣꠝꠦ ꠔꠣꠘ ꠛꠤꠛꠤ ꠍꠣꠞꠣꠞꠦ ꠇꠁꠟꠣ, “ꠢꠥꠘꠅ, ꠀꠝꠤ ꠎꠣꠘꠤ ꠔꠥꠝꠤ ꠈꠥꠛ ꠡꠥꠘ꠆ꠖꠞꠤ।
GEN 12:12 ꠔꠥꠝꠤ ꠎꠦꠛꠟꠣ ꠝꠤꠡꠞꠤ ꠅꠇꠟꠞ ꠌꠃꠈꠅ ꠙꠠꠛꠣꠄ, ꠔꠦꠃ ꠔꠣꠞꠣ ꠛꠥꠎꠛ ꠔꠥꠝꠤ ꠀꠝꠣꠞ ꠛꠃ, ꠀꠞ ꠔꠥꠝꠣꠞꠦ ꠞꠣꠈꠤꠀ ꠀꠝꠣꠞꠦ ꠈꠥꠘ ꠇꠞꠤꠟꠤꠛ।
GEN 12:13 ꠄꠞꠟꠣꠉꠤ ꠇꠁꠅ, ꠔꠥꠝꠤ ꠀꠝꠣꠞ ꠛꠁꠘ। ꠄꠔꠦ ꠔꠥꠝꠣꠞ ꠟꠣꠉꠤ ꠀꠝꠣꠞ ꠜꠣꠟꠣ ꠅꠁꠛ, ꠀꠞ ꠀꠝꠣꠞꠦ ꠛꠣꠌꠣꠁꠀ ꠞꠣꠈꠛ।”
GEN 12:14 ꠀꠛ꠆ꠞꠣꠝ ꠝꠤꠡꠞꠅ ꠀꠁꠀ ꠢꠣꠞꠟꠦ ꠝꠤꠡꠞꠞ ꠝꠣꠘꠡꠦ ꠖꠦꠈꠟꠣ ꠍꠣꠞꠣ ꠈꠥꠛ ꠡꠥꠘ꠆ꠖꠞꠤ।
GEN 12:15 ꠝꠤꠡꠞꠞ ꠛꠣꠖꠡꠣ ꠚꠦꠞꠣꠃꠘꠞ ꠉꠥꠁꠀ ꠅꠇꠟꠦ ꠔꠣꠘꠦ ꠖꠦꠈꠤꠀ ꠚꠦꠞꠣꠃꠘꠞ ꠉꠦꠍꠦ ꠉꠤꠀ ꠔꠣꠘ ꠔꠣꠞꠤꠚ ꠇꠞꠤꠀ ꠛꠃꠔꠔꠣ ꠇꠁꠟꠣ। ꠀꠞ ꠍꠣꠞꠣꠞꠦ ꠞꠣꠎꠛꠣꠠꠤꠞ ꠜꠤꠔꠞꠦ ꠘꠦꠅꠀ ꠅꠁꠟ।
GEN 12:16 ꠍꠣꠞꠣꠞ ꠟꠣꠉꠤ ꠚꠦꠞꠣꠃꠘꠦ ꠀꠛ꠆ꠞꠣꠝꠞꠦ ꠝꠣꠄꠀ ꠇꠞꠔꠣ ꠟꠣꠉꠟꠣ। ꠔꠣꠁꠘ ꠀꠛ꠆ꠞꠣꠝꠞꠦ ꠛꠃꠔ ꠉꠞꠥ-ꠍꠣꠉꠟ, ꠉꠣꠗꠣ-ꠉꠣꠗꠤ, ꠃꠐ, ꠀꠞ ꠛꠣꠘ꠆ꠖꠤ-ꠉꠥꠟꠣꠝ ꠃꠙꠢꠣꠞ ꠖꠤꠟꠣ।
GEN 12:17 ꠅꠁꠟꠦ ꠛꠤꠛꠤ ꠍꠣꠞꠣꠞ ꠟꠣꠉꠤ ꠝꠣꠛꠥꠖꠦ ꠚꠦꠞꠣꠃꠘ ꠀꠞ ꠔꠣꠞ ꠛꠣꠠꠤꠞ ꠢꠇꠟ ꠝꠣꠘꠡꠞ ꠝꠣꠎꠦ ꠛꠦꠡꠦꠛꠣ ꠛꠦꠝꠣꠞ ꠙꠄꠖꠣ ꠇꠞꠟꠣ।
GEN 12:18 ꠔꠦꠃ ꠚꠦꠞꠣꠃꠘꠦ ꠀꠛ꠆ꠞꠣꠝꠞꠦ ꠘꠤꠀ ꠎꠤꠇꠣꠁꠟꠣ, “ꠀꠙꠘꠦ ꠀꠝꠣꠞ ꠟꠉꠦ ꠁꠔꠣ ꠇꠤꠔꠣ ꠇꠞꠟꠣ? ꠔꠣꠘꠞꠦ ꠇꠦꠘꠦ ꠀꠙꠘꠣꠞ ꠛꠃ ꠘꠣ ꠇꠁꠀ
GEN 12:19 ꠛꠁꠘ ꠇꠁꠟꠣ? ꠀꠞ ꠀꠝꠤ ꠔ ꠔꠣꠘꠞꠦ ꠛꠤꠀ ꠇꠞꠣꠞ ꠟꠣꠉꠤ ꠘꠦꠅꠀꠁꠍꠟꠣꠝ। ꠄꠁꠘ ꠔ ꠀꠙꠘꠣꠞ ꠛꠤꠛꠤ, ꠄꠘꠦ ꠟꠁꠀ ꠀꠙꠘꠦ ꠁꠘ ꠕꠣꠇꠤ ꠢꠞꠤ ꠎꠣꠃꠇ꠆ꠇꠣꠉꠤ।”
GEN 12:20 ꠅꠃ ꠇꠕꠣ ꠇꠁꠀ ꠚꠦꠞꠣꠃꠘꠦ ꠔꠣꠘ ꠝꠣꠘꠡꠞꠦ ꠢꠥꠇꠥꠝ ꠇꠞꠟꠣ, ꠀꠞ ꠔꠣꠞꠣ ꠀꠛ꠆ꠞꠣꠝꠞ ꠢꠇꠟ ꠝꠣꠟ-ꠍꠣꠝꠣꠘꠣ ꠡꠢ ꠔꠣꠘꠦ ꠀꠞ ꠔꠣꠘ ꠛꠤꠛꠤꠞꠦ ꠛꠤꠖꠣꠄ ꠇꠞꠤ ꠖꠤꠟꠣ।
GEN 13:1 ꠔꠦꠃ ꠀꠛ꠆ꠞꠣꠝ ꠀꠞ ꠔꠣꠘ ꠛꠤꠛꠤꠄ ꠢꠇꠟꠔꠣ ꠟꠁꠀ ꠝꠤꠡꠞ ꠖꠦꠡ ꠚꠣꠟꠣꠁꠀ ꠘꠦꠉꠦꠜ ꠝꠞꠥꠜꠥꠝꠤꠔ ꠉꠦꠟꠣꠉꠤ, ꠟꠥꠔꠅ ꠔꠣꠘ ꠟꠉꠦ ꠀꠍꠟꠣ।
GEN 13:2 ꠀꠛ꠆ꠞꠣꠝ ꠈꠥꠛ ꠗꠘꠤ ꠀꠍꠟꠣ, ꠔꠣꠘ ꠛꠃꠔ ꠢꠦꠝꠣꠘ-ꠎꠣꠘꠥꠀꠞ ꠀꠞ ꠡꠥꠘꠣ-ꠞꠥꠙꠣ ꠀꠍꠤꠟ।
GEN 13:3 ꠛꠣꠖꠦ ꠔꠣꠁꠘ ꠘꠦꠉꠦꠜ ꠕꠣꠇꠤ ꠢꠞꠔꠦ ꠢꠞꠔꠦ ꠛꠦꠕꠦꠟ ꠙꠞ꠆ꠎꠘ꠆ꠔ ꠉꠦꠟꠣ। ꠉꠤꠀ ꠔꠣꠁꠘ ꠛꠦꠕꠦꠟ ꠀꠞ ꠅꠄ ꠐꠣꠃꠘꠞ ꠝꠣꠎꠈꠣꠘꠅ ꠙꠃꠍꠟꠣ, ꠎꠦ ꠎꠣꠉꠣꠔ ꠔꠣꠁꠘ ꠀꠉꠦ ꠔꠣꠝ꠆ꠛꠥ ꠉꠣꠠꠤꠍꠟꠣ
GEN 13:4 ꠀꠞ ꠙꠄꠟꠣ ꠇꠥꠞꠛꠣꠘꠤ ꠈꠣꠘꠣ ꠛꠣꠘꠣꠁꠍꠟꠣ। ꠅꠘꠅ ꠉꠤꠀ ꠔꠣꠁꠘ ꠢꠤꠞꠛꠣꠞ ꠝꠣꠛꠥꠖꠞ ꠘꠣꠝ ꠟꠁꠟꠣ।
GEN 13:5 ꠀꠛ꠆ꠞꠣꠝꠞ ꠟꠉꠦ ꠝꠥꠍꠣꠚꠤꠞ ꠀꠍꠟꠣ ꠔꠣꠘ ꠜꠣꠔꠤꠎꠣ ꠟꠥꠔ, ꠄꠘꠅ ꠛꠃꠔ ꠉꠞꠥ-ꠍꠣꠉꠟ ꠀꠞ ꠔꠣꠝ꠆ꠛꠥ ꠀꠍꠤꠟ।
GEN 13:6 ꠅꠁꠟꠦ ꠎꠣꠉꠣꠐꠣ ꠁꠟꠣ ꠀꠍꠤꠟ ꠘꠣ ꠎꠦꠘ, ꠖꠥꠁꠅꠎꠘꠞ ꠙꠡꠥꠞ ꠙꠣꠟꠦ ꠄꠇꠟꠉꠦ ꠈꠣꠁꠔꠣ ꠙꠣꠞꠛꠣ। ꠉꠞꠥ-ꠍꠣꠉꠟ ꠀꠞ ꠔꠣꠝ꠆ꠛꠥ ꠅꠔ ꠛꠦꠡꠤ ꠀꠍꠤꠟ ꠎꠦꠘ, ꠁꠔꠣ ꠟꠁꠀ ꠔꠣꠞꠣꠞ ꠕꠣꠇꠣꠞ ꠃꠙꠣꠄ ꠀꠍꠤꠟ ꠘꠣ।
GEN 13:7 ꠄꠞꠟꠣꠉꠤ ꠀꠛ꠆ꠞꠣꠝ ꠀꠞ ꠟꠥꠔꠞ ꠞꠣꠈꠣꠟ ꠅꠇꠟꠦ ꠢꠣꠝꠦꠡꠣ ꠖꠞꠛꠣꠞ-ꠇꠣꠁꠎ꠆ꠎꠣ ꠇꠞꠔꠣ। ꠀꠞ ꠢꠤ ꠡꠝꠄ ꠇꠦꠘꠣꠘꠤ ꠀꠞ ꠚꠣꠞꠤꠎꠤ ꠅꠇꠟꠅ ꠢꠤ ꠖꠦꠡꠅ ꠛꠡꠔ ꠇꠞꠔ।
GEN 13:8 ꠔꠦꠃ ꠀꠛ꠆ꠞꠣꠝꠦ ꠟꠥꠔꠞꠦ ꠇꠁꠟꠣ, “ꠢꠥꠘꠅ, ꠀꠝꠞꠣ ꠔ ꠖꠥꠁꠅꠎꠘꠃ ꠀꠙꠘ। ꠔꠦ ꠔꠥꠝꠣꠞ-ꠀꠝꠣꠞ ꠝꠣꠎꠦ ꠀꠞ ꠔꠥꠝꠣꠞ-ꠀꠝꠣꠞ ꠞꠣꠈꠣꠟꠞ ꠝꠣꠎꠦꠅ ꠖꠞꠛꠣꠞ-ꠇꠣꠁꠎ꠆ꠎꠣ ꠇꠞꠣ ꠑꠤꠇ ꠘꠣꠄ।
GEN 13:9 ꠢꠣꠞꠣ ꠖꠦꠡꠐꠣꠃ ꠔꠥꠝꠣꠞ ꠍꠣꠝꠘꠦ ꠙꠠꠤ ꠞꠁꠍꠦ। ꠔꠦ ꠀꠅ, ꠀꠝꠞꠣ ꠀꠟꠉꠣ ꠅꠁꠎꠣꠁ। ꠔꠥꠝꠤ ꠛꠣꠃꠄ ꠙꠍꠘ꠆ꠖ ꠇꠞꠟꠦ, ꠀꠝꠤ ꠒꠣꠁꠘꠦ, ꠀꠞ ꠔꠥꠝꠤ ꠒꠣꠁꠘꠦ ꠉꠦꠟꠦ, ꠀꠝꠤ ꠛꠣꠃꠄ ꠎꠣꠁꠝꠥ।”
GEN 13:10 ꠟꠥꠔꠦ ꠌꠣꠁꠀ ꠖꠦꠈꠟꠣ, ꠎꠞ꠆ꠖꠣꠘ ꠉꠣꠋꠉꠞ ꠕꠟ ꠎꠣꠉꠣꠞ ꠢꠇꠟꠛꠣꠄ ꠍꠥꠀꠞ ꠉꠣꠃ ꠙꠞ꠆ꠎꠘ꠆ꠔ ꠛꠃꠔ ꠙꠣꠘꠤ ꠀꠍꠦ, ꠝꠣꠛꠥꠖꠞ ꠛꠣꠉꠤꠌꠣ ꠛꠣ ꠝꠤꠡꠞ ꠖꠦꠡꠞ ꠟꠣꠈꠣꠘ ꠁ ꠎꠣꠉꠣꠅ ꠊꠣꠡ-ꠙꠣꠘꠤ ꠀꠟꠣ। ꠅꠃ ꠡꠝꠄꠅ ꠝꠣꠛꠥꠖꠦ ꠍꠣꠖꠥꠝ ꠀꠞ ꠀꠝꠥꠞꠣ ꠐꠣꠃꠘ ꠛꠤꠘꠣꠡ ꠇꠞꠍꠂꠘ ꠘꠣ।
GEN 13:11 ꠄꠞꠟꠣꠉꠤ ꠟꠥꠔꠦ ꠎꠞ꠆ꠖꠣꠘ ꠉꠣꠋꠉꠞ ꠢꠇꠟ ꠕꠟ ꠎꠣꠉꠣ ꠘꠤꠎꠞ ꠟꠣꠉꠤ ꠛꠣꠍꠤꠀ ꠙꠥꠛꠦꠖꠤ ꠢꠞꠤꠀ ꠉꠦꠟꠣꠉꠤ। ꠅꠃꠟꠣ ꠔꠣꠞꠣ ꠀꠟꠉꠣ ꠅꠁꠉꠦꠟꠣ।
GEN 13:12 ꠀꠛ꠆ꠞꠣꠝ ꠇꠦꠘꠣꠘ ꠖꠦꠡꠅ ꠞꠁꠟꠣ, ꠀꠞ ꠟꠥꠔ ꠢꠃ ꠕꠟ ꠎꠝꠤꠘꠞ ꠐꠣꠃꠘ ꠅꠇꠟꠞ ꠇꠣꠍꠣꠔ ꠉꠤꠀ ꠛꠡꠔ ꠇꠞꠟꠣ। ꠔꠣꠁꠘ ꠍꠣꠖꠥꠝ ꠐꠣꠃꠘꠞ ꠇꠤꠘꠣꠞꠅ ꠔꠣꠝ꠆ꠛꠥ ꠉꠣꠠꠤꠟ꠆ꠟꠣ।
GEN 13:13 ꠍꠣꠖꠥꠝꠞ ꠝꠣꠘꠥꠡ ꠅꠇꠟ ꠈꠥꠛ ꠈꠛꠤꠍ ꠀꠍꠤꠟ, ꠝꠣꠛꠥꠖꠞ ꠘꠎꠞꠅ ꠔꠣꠞꠣ ꠛꠦꠕꠣꠄꠀ ꠉꠥꠘꠣꠉꠣꠞ।
GEN 13:14 ꠟꠥꠔ ꠀꠟꠉꠣ ꠅꠀꠞ ꠛꠣꠖꠦ ꠝꠣꠛꠥꠖꠦ ꠀꠛ꠆ꠞꠣꠝꠞꠦ ꠇꠁꠟꠣ, “ꠔꠥꠝꠤ ꠎꠦ ꠎꠣꠉꠣꠔ ꠃꠛꠣꠁꠍ, ꠁꠈꠣꠘ ꠕꠣꠇꠤ ꠃꠔꠞꠦ-ꠖꠃꠇꠘꠦ, ꠙꠥꠛꠦ-ꠙꠁꠌꠝꠦ ꠄꠇꠛꠣꠞ ꠌꠣꠁꠀ ꠖꠦꠈꠅ।
GEN 13:15 ꠎꠦ ꠎꠣꠉꠣ ꠅꠇꠟ ꠔꠥꠝꠤ ꠖꠦꠈꠞꠣꠄ, ꠁꠔꠣ ꠀꠝꠤ ꠔꠥꠝꠣꠞꠦ ꠀꠞ ꠔꠥꠝꠣꠞ ꠅꠀꠞꠤꠡ ꠅꠇꠟꠞꠦ ꠢꠣꠝꠦꠡꠣꠇꠥꠞ ꠟꠣꠉꠤ ꠖꠤꠟꠣꠁꠝꠥ।
GEN 13:16 ꠀꠝꠤ ꠔꠥꠝꠣꠞ ꠅꠀꠞꠤꠡꠞꠦ ꠖꠥꠘꠤꠀꠁꠞ ꠗꠥꠁꠟ-ꠛꠣꠟꠥꠞ ꠟꠣꠈꠣꠘ ꠛꠦꠢꠤꠡꠣꠛ ꠇꠞꠝꠥ। ꠖꠥꠘꠤꠀꠞ ꠗꠥꠁꠟ-ꠛꠣꠟꠥ ꠎꠥꠖꠤ ꠇꠦꠃ ꠉꠘꠤꠀ ꠚꠥꠠꠣꠁꠔ ꠙꠣꠞꠦ, ꠔꠦ ꠔꠥꠝꠣꠞ ꠅꠀꠞꠤꠡꠞꠦꠅ ꠉꠘꠔ ꠙꠣꠞꠛ।
GEN 13:17 ꠃꠑꠅ, ꠀꠡ꠆ꠔꠣ ꠖꠦꠡꠐꠣ ꠔꠥꠝꠤ ꠄꠇꠛꠣꠞ ꠊꠥꠞꠤꠀ ꠀꠅ, ꠅꠃ ꠖꠦꠡꠃ ꠀꠝꠤ ꠔꠥꠝꠣꠞꠦ ꠖꠤꠝꠥ।”
GEN 13:18 ꠔꠦꠃ ꠀꠛ꠆ꠞꠣꠝꠦ ꠔꠣꠘ ꠔꠣꠝ꠆ꠛꠥ ꠔꠥꠟꠤꠀ, ꠢꠦꠛꠞꠘ ꠄꠟꠣꠇꠣꠔ ꠝꠝ꠆ꠞꠤꠞ ꠄꠟꠘ ꠛꠘꠞ ꠇꠣꠘ꠆ꠖꠣꠔ ꠘꠤꠀ ꠉꠣꠠꠤꠟꠣ। ꠢꠈꠣꠘꠅ ꠔꠣꠁꠘ ꠝꠣꠛꠥꠖꠞ ꠟꠣꠉꠤ ꠇꠥꠞꠛꠣꠘꠤ ꠈꠣꠘꠣ ꠛꠣꠘꠣꠁꠟꠣ।
GEN 14:1 ꠛꠣꠛꠤꠟ ꠖꠦꠡꠞ ꠛꠣꠖꠡꠣ ꠅꠝ꠆ꠞꠣꠚꠦꠟ, ꠁꠟ꠆ꠟꠣꠡꠞꠞ ꠛꠣꠖꠡꠣ ꠀꠞꠤꠀꠇ, ꠁꠟꠣꠝꠞ ꠛꠣꠖꠡꠣ ꠇꠖꠞ-ꠟꠣꠃꠝꠞ ꠀꠞ ꠉꠥꠁꠝꠞ ꠛꠣꠖꠡꠣ ꠔꠤꠖꠤꠅꠟ, ꠄꠞꠣ ꠌꠣꠁꠞꠅꠎꠘꠦ ꠄꠇ ꠅꠁꠀ
GEN 14:2 ꠍꠣꠖꠥꠝꠞ ꠛꠣꠖꠡꠣ ꠛꠤꠞꠣ, ꠀꠝꠥꠞꠣꠞ ꠛꠣꠖꠡꠣ ꠛꠤꠞꠡꠣ, ꠅꠖꠝꠣꠞ ꠛꠣꠖꠡꠣ ꠡꠤꠘꠣꠛ, ꠍꠛꠂꠁꠝꠞ ꠛꠣꠖꠡꠣ ꠡꠤꠝꠦꠛꠞ ꠀꠞ ꠛꠤꠟꠣꠞ ꠛꠣ ꠍꠥꠀꠞꠞ ꠛꠣꠖꠡꠣꠞ ꠛꠤꠞꠥꠖ꠆ꠖꠦ ꠎꠥꠖ꠆ꠖ ꠇꠞꠣꠔ ꠉꠦꠟꠣ।
GEN 14:3 ꠅꠃ ꠙꠣꠌꠎꠘ ꠛꠣꠖꠡꠣꠄ ꠔꠣꠞꠣꠞ ꠍꠤꠙꠣꠁ ꠅꠇꠟꠞꠦ ꠄꠇꠈꠣꠘꠅ ꠇꠞꠤꠀ ꠍꠤꠖ꠆ꠖꠤꠝꠞ ꠔꠟ ꠎꠣꠉꠣꠔ ꠟꠁꠀ ꠉꠦꠟꠣ। ꠁ ꠎꠣꠉꠣꠞꠦ ꠟꠥꠘꠣ ꠡꠣꠉꠞ ꠇꠂꠘ।
GEN 14:4 ꠢꠤ ꠛꠣꠖꠡꠣ ꠅꠇꠟꠦ ꠛꠣꠞꠅ ꠛꠞꠍ ꠛꠣꠖꠡꠣ ꠇꠖꠞ-ꠟꠣꠃꠝꠞꠞ ꠉꠥꠟꠣꠝꠤ ꠇꠞꠤꠀ ꠔꠦꠞꠅ ꠛꠍꠞꠞ ꠡꠝꠄ ꠛꠤꠖ꠆ꠞꠥꠢ ꠇꠞꠟꠣ।
GEN 14:5 ꠄꠞ ꠛꠣꠖꠞ ꠛꠞꠍ ꠛꠣꠖꠡꠣ ꠇꠖꠞ-ꠟꠣꠃꠝꠞ ꠀꠞ ꠔꠣꠘ ꠟꠉꠞ ꠛꠣꠖꠡꠣ ꠅꠇꠟꠦ ꠉꠤꠀ ꠅꠡ꠆ꠔꠞꠥꠕ-ꠇꠞ꠆ꠘꠄꠁꠝꠅ ꠞꠚꠣꠄꠁ ꠅꠇꠟꠞꠦ, ꠢꠝꠅ ꠉꠤꠀ ꠎꠥꠎꠤ ꠅꠇꠟꠞꠦ, ꠀꠞ ꠡꠣꠛꠤ-ꠇꠤꠞꠤꠀꠔꠣꠁꠝꠅ ꠉꠤꠀ ꠄꠁꠝꠤ ꠅꠇꠟꠞꠦ ꠀꠞꠣꠁꠟꠣ।
GEN 14:6 ꠛꠣꠖꠦ ꠝꠞꠥꠜꠥꠝꠤꠞ ꠇꠣꠍꠣꠞ ꠄꠟ-ꠚꠣꠞꠘ ꠙꠞ꠆ꠎꠘ꠆ꠔ ꠍꠦꠁꠞ ꠙꠣꠠꠞ ꠢꠥꠞꠤꠅ ꠅꠇꠟꠞꠦꠅ ꠀꠞꠣꠁꠟꠣ।
GEN 14:7 ꠢꠦꠡꠦ ꠅꠃ ꠛꠣꠖꠡꠣ ꠅꠇꠟꠦ ꠊꠥꠞꠤꠀ ꠉꠤꠀ ꠅꠂꠘ-ꠝꠤꠡꠙꠐꠅ ꠛꠣ ꠇꠣꠖꠦꠡ ꠉꠦꠟꠣ। ꠔꠣꠞꠣ ꠀꠝꠣꠟꠦꠇꠤ ꠅꠇꠟꠞ ꠀꠡ꠆ꠔꠣ ꠖꠦꠡ ꠖꠈꠟ ꠇꠞꠟꠣ ꠀꠞ ꠢꠣꠎꠣꠎꠘ-ꠔꠣꠝꠣꠞ ꠐꠣꠃꠘꠅ ꠎꠦ ꠀꠝꠥꠞꠤ ꠅꠇꠟ ꠀꠍꠤꠟ ꠔꠣꠞꠣꠞꠦꠅ ꠖꠈꠟ ꠇꠞꠟꠣ।
GEN 14:8 ꠛꠣꠖꠦ ꠍꠣꠖꠥꠝ, ꠀꠝꠥꠞꠣ, ꠅꠖꠝꠣ, ꠍꠛꠂꠁꠝ ꠀꠞ ꠛꠤꠟꠣ ꠛꠣ ꠍꠥꠀꠞꠞ ꠛꠣꠖꠡꠣ ꠅꠇꠟꠦ
GEN 14:9 ꠁꠟꠣꠝꠞ ꠛꠣꠖꠡꠣ ꠇꠖꠞ-ꠟꠣꠃꠝꠞ, ꠉꠥꠁꠝꠞ ꠛꠣꠖꠡꠣ ꠔꠤꠖꠤꠅꠟ, ꠛꠣꠛꠤꠟꠞ ꠛꠣꠖꠡꠣ ꠅꠝ꠆ꠞꠣꠚꠦꠟ ꠀꠞ ꠁꠟ꠆ꠟꠣꠡꠞꠞ ꠛꠣꠖꠡꠣ ꠀꠞꠤꠀꠇꠞ ꠟꠉꠦ ꠎꠥꠖ꠆ꠖ ꠇꠞꠣꠞ ꠟꠣꠉꠤ ꠍꠤꠖ꠆ꠖꠤꠝ ꠘꠣꠝꠞ ꠔꠟ ꠎꠣꠉꠣꠔ ꠔꠣꠞꠣꠞ ꠍꠤꠙꠣꠁ ꠅꠇꠟ ꠢꠣꠎꠣꠁꠟꠣ। ꠌꠣꠁꠞ ꠛꠣꠖꠡꠣꠞ ꠛꠤꠞꠥꠖ꠆ꠖꠦ ꠙꠣꠌ ꠛꠣꠖꠡꠣꠄ ꠟꠣꠉꠟꠣ।
GEN 14:10 ꠍꠤꠖ꠆ꠖꠤꠝꠞ ꠔꠟ ꠎꠣꠉꠣꠔ ꠔꠣꠞꠔꠦꠟꠞ ꠛꠃꠔ ꠉꠣꠔ-ꠉꠣꠠꠣ ꠀꠍꠤꠟ। ꠍꠣꠖꠥꠝ ꠀꠞ ꠀꠝꠥꠞꠣꠞ ꠛꠣꠖꠡꠣꠁꠘ ꠎꠦꠛꠟꠣ ꠜꠣꠉꠤꠀ ꠎꠣꠁꠞꠣ, ꠁ ꠡꠝꠄ ꠔꠣꠞꠣꠞ ꠟꠉꠞ ꠇꠦꠃ ꠇꠦꠃ ꠅꠃ ꠔꠣꠞꠔꠦꠟꠞ ꠉꠣꠔꠅ ꠙꠠꠤ ꠉꠦꠟꠣ, ꠀꠞ ꠛꠣꠇꠤ ꠅꠇꠟꠦ ꠜꠣꠉꠤꠀ ꠙꠣꠠꠅ ꠉꠦꠟꠣ।
GEN 14:11 ꠔꠦꠃ ꠔꠣꠞꠣꠞ ꠖꠥꠡꠝꠘ ꠅꠇꠟꠦ ꠍꠣꠖꠥꠝ-ꠀꠝꠥꠞꠣꠞ ꠢꠇꠟ ꠗꠘ-ꠍꠣꠝꠣꠘꠣ ꠀꠞ ꠈꠣꠘꠤ-ꠖꠣꠘꠤꠞ ꠢꠇꠟꠔꠣ ꠟꠥꠐꠤꠀ ꠟꠁꠀ ꠉꠦꠟꠉꠤ।
GEN 14:12 ꠀꠞ ꠔꠣꠞꠣ ꠀꠛ꠆ꠞꠣꠝꠞ ꠜꠣꠔꠤꠎꠣ ꠟꠥꠔꠞ ꠢꠇꠟ ꠝꠣꠟ-ꠍꠣꠝꠣꠘꠣ ꠡꠥꠖ꠆ꠖꠣ ꠢꠃ ꠟꠥꠔꠞꠦꠃ ꠗꠞꠤꠀ ꠟꠁꠀ ꠉꠦꠟꠣꠉꠤ, ꠇꠣꠞꠘ ꠄꠁꠘꠦꠃ ꠍꠣꠖꠥꠝ ꠐꠣꠃꠘꠅ ꠞꠁꠔꠣ।
GEN 14:13 ꠔꠦꠃ ꠄꠇꠎꠘꠦ ꠜꠣꠉꠤꠀ ꠀꠁꠀ ꠁꠛꠞꠣꠘꠤ ꠀꠛ꠆ꠞꠣꠝꠞꠦ ꠅꠃ ꠈꠛꠞ ꠖꠤꠟ। ꠀꠛ꠆ꠞꠣꠝ ꠁ ꠡꠝꠄ ꠀꠝꠥꠞꠤ ꠝꠝ꠆ꠞꠤꠞ ꠄꠟꠘ ꠛꠘꠞ ꠇꠣꠍꠣꠔ ꠕꠣꠇꠔꠣ। ꠁ ꠝꠝ꠆ꠞꠤ ꠀꠍꠟꠣ ꠀꠡꠇꠥꠟ ꠀꠞ ꠀꠘꠦꠞꠞ ꠜꠣꠁ, ꠀꠛ꠆ꠞꠣꠝꠞ ꠟꠉꠦ ꠄꠞꠣꠞ ꠎꠥꠖ꠆ꠖꠞ ꠡꠣꠁꠎ꠆ꠎꠞ ꠌꠥꠇ꠆ꠔꠤ ꠀꠍꠤꠟ।
GEN 14:14 ꠔꠣꠘ ꠜꠣꠔꠤꠎꠣꠞꠦ ꠗꠞꠤꠀ ꠟꠁꠀ ꠉꠦꠍꠂꠘꠉꠤ ꠢꠥꠘꠤꠀ ꠀꠛ꠆ꠞꠣꠝꠦ ꠟꠣꠠꠣꠁ ꠎꠣꠘꠞꠣ ꠘꠤꠎꠞ ꠔꠤꠘ-ꠡ ꠀꠑꠣꠞ ꠎꠘ ꠉꠥꠟꠣꠝꠞꠦ ꠟꠁꠀ ꠖꠣꠘ ꠐꠣꠃꠘ ꠙꠞ꠆ꠎꠘ꠆ꠔ ꠖꠥꠡꠝꠘꠞ ꠈꠞꠦ ꠈꠞꠦ ꠉꠦꠟꠣ। ꠅꠃ ꠉꠥꠟꠣꠝ ꠅꠇꠟ ꠔꠣꠘ ꠛꠣꠠꠤꠔꠃ ꠎꠘꠝꠤꠍꠤꠟ।
GEN 14:15 ꠞꠣꠁꠔꠇꠥꠞ ꠛꠣꠟꠣ ꠖꠥꠡꠝꠘ ꠖꠟꠞ ꠟꠣꠉꠣꠟ ꠙꠣꠁꠀ ꠄꠞꠣ ꠢꠣꠝꠟꠣ ꠇꠞꠤꠀ ꠢꠦꠞꠣꠞꠦ ꠀꠞꠣꠁꠟ꠆ꠟꠣ, ꠀꠞ ꠈꠦꠖꠣꠁꠔꠦ ꠈꠦꠖꠣꠁꠔꠦ ꠖꠣꠝꠦꠡ꠆ꠇ ꠐꠣꠃꠘꠞ ꠃꠔꠞꠦ ꠢꠥꠛꠣ ꠙꠞ꠆ꠎꠘ꠆ꠔ ꠉꠦꠟꠣ।
GEN 14:16 ꠟꠥꠐ ꠇꠞꠣ ꠢꠇ꠆ꠇꠟ ꠎꠤꠘꠤꠡ ꠔꠣꠁꠘ ꠚꠤꠞꠣꠁꠀ ꠀꠘꠟꠣ, ꠝꠣꠟ-ꠍꠣꠝꠣꠘꠣ ꠡꠥꠖ꠆ꠖꠣ ꠔꠣꠘ ꠜꠣꠔꠤꠎꠣ ꠟꠥꠔꠞꠦꠅ ꠃꠖ꠆ꠖꠣꠞ ꠇꠞꠟꠣ। ꠄꠞ ꠟꠉꠦ ꠢꠇꠟ ꠛꠦꠐꠤꠘ꠆ꠔꠞꠦ ꠀꠞ ꠢꠇꠟ ꠝꠣꠘꠡꠞꠦꠅ ꠃꠖ꠆ꠖꠣꠞ ꠇꠞꠤ ꠀꠘꠟꠣ।
GEN 14:17 ꠇꠖꠞ-ꠟꠣꠃꠝꠞ ꠀꠞ ꠔꠣꠞ ꠟꠉꠞ ꠛꠣꠖꠡꠣ ꠅꠇꠟꠞꠦ ꠀꠞꠣꠁꠀ ꠀꠛ꠆ꠞꠣꠝ ꠚꠤꠞꠤꠀ ꠀꠅꠀꠞ ꠡꠝꠄ ꠍꠣꠖꠥꠝꠞ ꠛꠣꠖꠡꠣꠄ ꠔꠣꠘ ꠟꠉꠦ ꠖꠦꠈꠣ ꠇꠞꠣꠞ ꠟꠣꠉꠤ ꠡꠣꠛꠤ ꠛꠣ ꠛꠣꠖꠡꠣ ꠘꠣꠝꠞ ꠔꠟ ꠎꠣꠉꠣꠔ ꠛꠣꠞ ꠅꠁꠀ ꠀꠁꠟꠣ।
GEN 14:18 ꠀꠞ ꠡꠣꠟꠦꠝꠞ ꠛꠣꠖꠡꠣ ꠝꠣꠟꠇꠤ-ꠍꠤꠖ꠆ꠖꠤꠇꠦ ꠀꠛ꠆ꠞꠣꠝꠞ ꠟꠣꠉꠤ ꠞꠥꠐꠤ ꠀꠞ ꠀꠋꠉꠥꠞꠞ ꠡꠞꠛꠔ ꠟꠁꠀ ꠀꠁꠟꠣ, ꠔꠣꠁꠘ ꠅꠁꠟꠣ ꠀꠟ꠆ꠟꠣꠔꠣꠟꠣꠞ ꠙꠍꠘ꠆ꠖꠞ ꠁꠝꠣꠝ।
GEN 14:19 ꠔꠣꠁꠘ ꠀꠛ꠆ꠞꠣꠝꠞꠦ ꠖꠥꠀ ꠇꠞꠤꠀ ꠇꠁꠟꠣ, “ꠎꠦꠁꠘ ꠀꠍꠝꠣꠘ ꠀꠞ ꠎꠝꠤꠘ ꠙꠄꠖꠣ ꠇꠞꠍꠂꠘ, ꠢꠃ ꠀꠟ꠆ꠟꠣꠔꠣꠟꠣ ꠀꠛ꠆ꠞꠣꠝꠞꠦ ꠛꠞꠇꠔ ꠖꠣꠘ ꠇꠞꠃꠇ꠆ꠇꠣ।
GEN 14:20 ꠀꠙꠘꠣꠞ ꠖꠥꠡꠝꠘ ꠅꠇꠟꠞꠦ ꠎꠦꠁꠘ ꠀꠙꠘꠣꠞ ꠀꠔꠅ ꠡꠙꠤꠍꠂꠘ, ꠔꠣꠘ ꠘꠣꠝ ꠗꠁꠘ꠆ꠘ ꠅꠃꠇ।” ꠅꠃ ꠀꠛ꠆ꠞꠣꠝꠦ ꠔꠣꠘ ꠢꠇ꠆ꠇꠟꠔꠣꠞ ꠖꠡꠛꠣꠐꠞ ꠄꠇꠛꠣꠐ ꠝꠣꠟꠇꠤ-ꠍꠤꠖ꠆ꠖꠤꠇꠞꠦ ꠖꠤꠟꠣꠁꠟꠣ।
GEN 14:21 ꠀꠞ ꠍꠣꠖꠥꠝꠞ ꠛꠣꠖꠡꠣꠄ ꠀꠛ꠆ꠞꠣꠝꠞꠦ ꠇꠁꠟꠣ, “ꠀꠙꠘꠦ ꠝꠣꠟ-ꠍꠣꠝꠣꠘꠣ ꠢꠇꠟꠔꠣ ꠞꠣꠈꠤ ꠖꠦꠃꠇ꠆ꠇꠣ, ꠈꠣꠟꠤ ꠝꠣꠘꠥꠡ ꠉꠥꠁꠘ ꠀꠝꠣꠞꠦ ꠚꠤꠞꠔ ꠖꠤꠟꠣꠁꠘ।”
GEN 14:22 ꠀꠛ꠆ꠞꠣꠝꠦ ꠍꠣꠖꠥꠝꠞ ꠛꠣꠖꠡꠣꠞꠦ ꠇꠁꠟꠣ, “ꠎꠦꠁꠘ ꠀꠍꠝꠣꠘ-ꠎꠝꠤꠘ ꠙꠄꠖꠣ ꠇꠞꠍꠂꠘ ꠢꠃ ꠝꠣꠛꠥꠖ ꠀꠟ꠆ꠟꠣꠔꠣꠟꠣꠞ ꠘꠣꠝꠦ ꠀꠝꠤ ꠀꠔ ꠔꠥꠟꠤꠀ ꠇꠍꠝ ꠇꠞꠍꠤ,
GEN 14:23 ꠀꠙꠘꠣꠞ ꠇꠥꠘꠥ ꠎꠤꠘꠤꠡꠃ, ꠄꠇꠍꠣ ꠡꠥꠔꠣꠃ ꠛꠣ ꠙꠣꠅꠞ ꠎꠥꠔꠣꠞ ꠄꠇꠍꠣ ꠚꠤꠔꠣꠅ ꠀꠝꠤ ꠘꠤꠔꠣꠝ ꠘꠣꠄ। ꠀꠞꠘꠣꠄ ꠛꠣꠖꠦ ꠀꠙꠘꠦ ꠇꠁꠛꠣ, ꠀꠝꠣꠞ ꠗꠘꠦꠃ ꠀꠛ꠆ꠞꠣꠝ ꠗꠘꠤ ꠅꠁꠍꠦ।
GEN 14:24 ꠀꠝꠣꠞ ꠝꠣꠘꠡꠦ ꠎꠦꠔꠣ ꠈꠣꠁꠟꠤꠍꠂꠘ ꠁꠔꠣ ꠍꠣꠠꠣ ꠀꠝꠤ ꠀꠞ ꠇꠤꠌ꠆ꠍꠥ ꠘꠤꠔꠣꠝ ꠘꠣꠄ। ꠈꠣꠟꠤ ꠀꠘꠦꠞ, ꠀꠡꠇꠥꠟ ꠀꠞ ꠝꠝ꠆ꠞꠤ ꠎꠦꠞꠣ ꠀꠝꠣꠞ ꠟꠉꠦ ꠉꠦꠍꠟꠣ, ꠔꠣꠞꠣꠞ ꠙꠣꠅꠘꠣ ꠛꠣꠐ ꠔꠣꠞꠣ ꠘꠦꠃꠇ꠆ꠇꠣꠉꠤ।”
GEN 15:1 ꠅꠔꠣ ꠊꠐꠘꠣ ꠅꠇꠟꠞ ꠛꠣꠖꠦ ꠅꠢꠤꠞ ꠝꠣꠎꠦ ꠝꠣꠛꠥꠖꠞ ꠇꠣꠟꠣꠝ ꠀꠛ꠆ꠞꠣꠝꠞ ꠉꠦꠍꠦ ꠘꠣꠎꠤꠟ ꠅꠁꠟ। ꠔꠣꠁꠘ ꠇꠁꠟꠣ, “ꠅ ꠀꠛ꠆ꠞꠣꠝ, ꠒꠞꠣꠁꠅ ꠘꠣ, ꠀꠝꠤꠃ ꠔꠥꠝꠣꠞ ꠢꠦꠚꠣꠎꠔꠇꠣꠞꠤ, ꠔꠥꠝꠣꠞ ꠛꠃꠔ ꠛꠠ ꠙꠥꠞꠥꠡ꠆ꠇꠣꠞ।”
GEN 15:2 ꠀꠛ꠆ꠞꠣꠝꠦ ꠇꠁꠟꠣ, “ꠅ ꠝꠣꠛꠥꠖ ꠝꠃꠟꠣ, ꠀꠝꠣꠞꠦ ꠇꠤꠔꠣ ꠖꠤꠔꠣꠄ? ꠀꠝꠤ ꠔ ꠘꠤꠀꠅꠟꠣꠖꠤ। ꠀꠝꠤ ꠝꠞꠣꠞ ꠛꠣꠖꠦ ꠖꠣꠝꠦꠡ꠆ꠇꠞ ꠄꠟꠤꠄꠎꠦꠞ ꠀꠝꠣꠞ ꠡꠝ꠆ꠙꠔ꠆ꠔꠤꠞ ꠝꠣꠟꠤꠇ ꠅꠁꠛ।
GEN 15:3 ꠔꠥꠝꠤ ꠔ ꠀꠝꠣꠞꠦ ꠇꠥꠘꠥ ꠀꠅꠟꠣꠖ ꠖꠤꠟꠣꠄ ꠘꠣ, ꠄꠞꠟꠣꠉꠤ ꠀꠝꠣꠞ ꠛꠣꠠꠤꠞ ꠉꠥꠟꠣꠝ ꠀꠝꠣꠞ ꠅꠀꠞꠤꠡ ꠅꠁꠛ।”
GEN 15:4 ꠅꠃ ꠝꠣꠛꠥꠖꠦ ꠀꠛ꠆ꠞꠣꠝꠞꠦ ꠇꠁꠟꠣ, “ꠘꠣ, ꠢꠦ ꠘꠣꠄ, ꠔꠥꠝꠣꠞ ꠘꠤꠎꠞ ꠛꠃꠞ ꠀꠅꠟꠣꠖꠃ ꠔꠥꠝꠣꠞ ꠅꠀꠞꠤꠡ ꠅꠁꠛ।”
GEN 15:5 ꠝꠣꠛꠥꠖꠦ ꠀꠛ꠆ꠞꠣꠝꠞꠦ ꠛꠣꠞꠦ ꠀꠘꠤꠀ ꠇꠁꠟꠣ, “ꠀꠍꠝꠣꠘꠞ ꠛꠣꠄ ꠌꠣꠅ, ꠀꠞ ꠙꠣꠞꠟꠦ ꠅꠃ ꠔꠦꠞꠣ ꠅꠇꠟ ꠉꠘꠤꠀ ꠚꠥꠠꠣꠅ, ꠔꠥꠝꠣꠞ ꠛꠋꠡꠞ ꠅꠀꠞꠤꠡ ꠅꠃꠟꠣ ꠛꠦꠢꠤꠡꠣꠛ ꠅꠁꠛ।”
GEN 15:6 ꠀꠛ꠆ꠞꠣꠝꠦ ꠝꠣꠛꠥꠖꠞ ꠅꠃ ꠅꠀꠖꠣꠞꠦ ꠄꠇꠤꠘ ꠇꠞꠟꠣ, ꠀꠞ ꠝꠣꠛꠥꠖꠦ ꠢꠃ ꠄꠇꠤꠘꠞꠦ ꠖꠤꠘꠖꠣꠞꠤ ꠇꠣꠝ ꠢꠤꠡꠣꠛꠦ ꠇꠛꠥꠟ ꠇꠞꠟꠣ।
GEN 15:7 ꠀꠞ ꠔꠣꠁꠘ ꠀꠛ꠆ꠞꠣꠝꠞꠦ ꠇꠁꠟꠣ, “ꠀꠝꠤꠃ ꠝꠣꠛꠥꠖ। ꠁ ꠇꠦꠘꠣꠘ ꠖꠦꠡꠞ ꠅꠗꠤꠇꠣꠞꠤ ꠅꠁꠛꠣꠞ ꠟꠣꠉꠤ ꠀꠝꠤ ꠔꠥꠝꠣꠞꠦ ꠛꠣꠛꠤꠟ ꠖꠦꠡꠞ ꠃꠞ ꠐꠣꠃꠘ ꠕꠣꠇꠤ ꠛꠣꠞ ꠇꠞꠤꠀ ꠀꠘꠍꠤ।”
GEN 15:8 ꠅꠃ ꠀꠛ꠆ꠞꠣꠝꠦ ꠇꠁꠟꠣ, “ꠅ ꠝꠣꠛꠥꠖ ꠝꠃꠟꠣ, ꠀꠝꠤ ꠁꠔꠣꠞ ꠝꠣꠟꠤꠇ ꠅꠁꠝꠥ ꠇꠞꠤ ꠇꠤꠟꠣ ꠛꠥꠎꠝꠥ?”
GEN 15:9 ꠔꠣꠁꠘ ꠇꠁꠟꠣ, “ꠔꠥꠝꠤ ꠔꠤꠘ ꠛꠍꠞꠞ ꠄꠇꠐꠣ ꠇꠞꠤ ꠒꠦꠇꠤ, ꠍꠣꠉꠤ, ꠀꠞ ꠝꠦꠠꠣꠞ ꠙꠣꠑꠣ ꠀꠝꠣꠞ ꠍꠣꠝꠘꠦ ꠟꠁꠀ ꠀꠅ, ꠄꠞ ꠟꠉꠦ ꠄꠇꠐꠣ ꠒꠥꠙꠤ ꠙꠣꠈꠤ ꠀꠞ ꠄꠇꠐꠣ ꠙꠣꠞꠅꠞ ꠛꠣꠁꠌ꠆ꠌꠣꠅ ꠀꠘꠤꠅ।”
GEN 15:10 ꠀꠛ꠆ꠞꠣꠝꠦ ꠅꠃꠟꠣ ꠇꠞꠟꠣ। ꠔꠣꠁꠘ ꠁꠔꠣ ꠢꠇꠟꠐꠤ ꠀꠘꠤꠀ ꠖꠥꠁ ꠐꠥꠇꠞꠣ ꠇꠞꠤꠀ ꠃꠟꠐꠣ-ꠃꠟꠐꠤ ꠇꠞꠤ ꠢꠣꠎꠣꠁꠀ ꠞꠣꠈꠟꠣ, ꠈꠣꠟꠤ ꠙꠣꠈꠤ ꠅꠇꠟꠞꠦ ꠐꠥꠇꠞꠣꠁꠟꠣ ꠘꠣ।
GEN 15:11 ꠔꠦꠃ ꠢꠇꠥꠘ ꠀꠁꠀ ꠅꠃ ꠐꠥꠇꠞꠣ ꠅꠇꠟꠞ ꠃꠙꠞꠦ ꠙꠠꠟꠦ, ꠀꠛ꠆ꠞꠣꠝꠦ ꠈꠦꠖꠣꠁꠟꠣ।
GEN 15:12 ꠡꠥꠞꠥꠎ ꠒꠥꠛꠣꠞ ꠡꠝꠄ ꠀꠛ꠆ꠞꠣꠝꠞ ꠄꠇ ꠛꠦꠃꠡꠤ ꠊꠥꠝ ꠀꠁꠟ। ꠊꠥꠝꠞ ꠝꠣꠎꠦ ꠛꠦꠕꠣꠄꠀ ꠒꠞ ꠀꠞ ꠀꠘ꠆ꠖꠣꠁꠞꠦ ꠔꠣꠘꠦ ꠀꠍꠞ ꠇꠞꠟ।
GEN 15:13 ꠅꠃ ꠝꠣꠛꠥꠖꠦ ꠔꠣꠘꠞꠦ ꠇꠁꠟꠣ, “ꠔꠥꠝꠤ ꠘꠤꠌ꠆ꠌꠄ ꠅꠁꠀ ꠎꠣꠘꠤꠅ, ꠔꠥꠝꠣꠞ ꠅꠀꠞꠤꠡ ꠅꠇꠟꠦ ꠅꠃꠟꠣ ꠖꠦꠡꠅ ꠉꠤꠀ ꠞꠁꠛꠣ ꠎꠦꠇꠐꠣ ꠔꠣꠞꠣꠞ ꠘꠤꠎꠞ ꠘꠣꠄ। ꠢꠘꠅ ꠔꠣꠞꠣ ꠈꠥꠛ ꠎꠥꠟꠥꠝ-ꠝꠍꠤꠛꠔꠞ ꠝꠣꠎꠦ ꠞꠁꠀ ꠌꠣꠁꠞ-ꠡ ꠛꠞꠍ ꠙꠞ꠆ꠎꠘ꠆ꠔ ꠉꠥꠟꠣꠝꠤ ꠇꠞꠛꠣ।
GEN 15:14 ꠀꠞ ꠎꠦ ꠎꠣꠔꠤꠄ ꠔꠣꠞꠣꠞꠦ ꠉꠥꠟꠣꠝ ꠛꠣꠘꠣꠁꠛꠣ, ꠀꠝꠤ ꠢꠤ ꠎꠣꠔꠤꠞ ꠛꠤꠌꠣꠞ ꠇꠞꠝꠥ। ꠛꠣꠖꠦ ꠔꠣꠞꠣ ꠛꠃꠔ ꠗꠘ-ꠖꠃꠟꠔ ꠟꠁꠀ ꠢꠘ ꠕꠘꠦ ꠛꠣꠞ ꠅꠁꠀ ꠀꠁꠛꠣ।
GEN 15:15 ꠀꠞ ꠔꠥꠝꠤ ꠡꠣꠘ꠆ꠔꠤꠄ ꠔꠥꠝꠣꠞ ꠛꠣꠚ-ꠖꠣꠖꠣꠞ ꠉꠦꠍꠦ ꠎꠣꠁꠛꠣꠄ। ꠔꠥꠝꠤ ꠙꠥꠞꠣ ꠝꠥꠞꠛ꠆ꠛꠤ ꠛꠄꠅꠡꠅ ꠇꠄꠛꠞꠅ ꠢꠣꠝꠣꠁꠛꠣꠄ।
GEN 15:16 ꠔꠥꠝꠣꠞ ꠌꠣꠁꠞ ꠍꠤꠠꠤ ꠛꠣꠖꠦ ꠄꠞꠣ ꠅꠘꠅ ꠚꠤꠞꠤꠀ ꠀꠁꠛꠣ, ꠇꠣꠞꠘ ꠀꠝꠥꠞꠤ ꠅꠇꠟꠞ ꠉꠥꠘꠣ ꠅꠈꠘꠅ ꠙꠥꠞꠣ ꠅꠁꠍꠦ ꠘꠣ।”
GEN 15:17 ꠡꠥꠞꠥꠎ ꠒꠥꠛꠤꠀ ꠎꠦꠛꠟꠣ ꠀꠘ꠆ꠖꠣꠁꠞ ꠅꠁꠉꠦꠟ ꠅꠃ ꠡꠝꠄ ꠗꠥꠝꠣꠄ ꠜꠞꠣ ꠄꠇ ꠃꠘ꠆ꠖꠣꠟ ꠀꠞ ꠀꠉꠥꠘꠤꠞ ꠝꠥꠡꠣꠟ ꠢꠃ ꠢꠣꠎꠣꠁꠀ ꠞꠣꠈꠣ ꠇꠥꠞꠛꠣꠘꠤꠞ ꠐꠥꠇꠞꠣꠁꠘ꠆ꠔꠞ ꠝꠣꠎꠦꠖꠤ ꠉꠦꠟ।
GEN 15:18 ꠝꠣꠛꠥꠖꠦ ꠢꠃ ꠖꠤꠘꠃ ꠀꠛ꠆ꠞꠣꠝꠞ ꠟꠉꠦ ꠅꠃꠟꠣ ꠅꠀꠖꠣ ꠇꠞꠟꠣ, “ꠝꠤꠡꠞꠞ ꠉꠣꠋ ꠕꠘꠦ ꠛꠠ ꠉꠣꠋ ꠚꠥꠞꠣꠔ ꠙꠞ꠆ꠎꠘ꠆ꠔ ꠀꠡ꠆ꠔꠣ ꠖꠦꠡ ꠀꠝꠤ ꠔꠥꠝꠣꠞ ꠅꠀꠞꠤꠡꠞꠦ ꠖꠤꠟꠣꠝ।
GEN 15:19 ꠁꠇꠐꠣ ꠅꠁꠟ ꠇꠦꠘꠤ, ꠇꠘꠤꠎꠤ, ꠇꠖꠝꠥꠘꠤ,
GEN 15:20 ꠢꠤꠐ꠆ꠐꠤ, ꠚꠣꠞꠤꠎꠤ, ꠞꠚꠣꠄꠁ,
GEN 15:21 ꠀꠝꠥꠞꠤ, ꠇꠦꠘꠣꠘꠤ, ꠉꠤꠞ꠆ꠉꠣꠡꠤ ꠀꠞ ꠎꠤꠛꠥꠎꠤ ꠅꠇꠟꠞ ꠖꠦꠡ।”
GEN 16:1 ꠛꠤꠛꠤ ꠍꠣꠞꠣꠞ ꠙꠦꠐꠅ ꠀꠛ꠆ꠞꠣꠝꠞ ꠇꠥꠘꠥ ꠢꠥꠞꠥꠔ꠆ꠔꠣ ꠅꠁꠍꠂꠘ ꠘꠣ, ꠅꠁꠟꠦ ꠢꠣꠎꠦꠞꠣ ꠘꠣꠝꠦ ꠍꠣꠞꠣꠞ ꠄꠇ ꠝꠤꠡꠞꠤ ꠛꠣꠘ꠆ꠖꠤ ꠛꠦꠐꠤ ꠀꠍꠟꠣ।
GEN 16:2 ꠄꠇꠖꠤꠘ ꠍꠣꠞꠣꠄ ꠀꠛ꠆ꠞꠣꠝꠞꠦ ꠇꠁꠟꠣ, “ꠢꠥꠘꠅ, ꠝꠣꠛꠥꠖꠦ ꠀꠝꠣꠞꠦ ꠘꠤꠀꠅꠟꠣꠖꠤ ꠇꠞꠍꠂꠘ। ꠔꠦ ꠔꠥꠝꠤ ꠀꠝꠣꠞ ꠛꠣꠘ꠆ꠖꠤꠞ ꠇꠣꠍꠣꠔ ꠎꠣꠅ, ꠇꠤꠛꠣ ꠔꠣꠁꠞꠦ ꠖꠤꠀ ꠀꠝꠤ ꠀꠅꠟꠣꠖ ꠙꠣꠁꠟꠤꠔꠣꠝ ꠙꠣꠞꠤ।” ꠅꠃ ꠀꠛ꠆ꠞꠣꠝꠅ ꠍꠣꠞꠣꠞ ꠝꠣꠔꠦ ꠞꠣꠎꠤ ꠅꠁꠟꠣ।
GEN 16:3 ꠇꠦꠘꠣꠘ ꠖꠦꠡꠅ ꠀꠛ꠆ꠞꠣꠝ ꠖꠡ ꠛꠞꠍ ꠞꠅꠀꠞ ꠛꠣꠖꠦ ꠍꠣꠞꠣꠄ ꠔꠣꠘ ꠝꠤꠡꠞꠤ ꠛꠣꠘ꠆ꠖꠤ ꠢꠣꠎꠦꠞꠣꠞꠦ ꠘꠤꠎꠞ ꠎꠣꠝꠣꠁ ꠀꠛ꠆ꠞꠣꠝꠞ ꠟꠉꠦ ꠛꠤꠀ ꠖꠤꠟꠣ।
GEN 16:4 ꠛꠣꠖꠦ ꠀꠛ꠆ꠞꠣꠝ ꠀꠞ ꠢꠣꠎꠦꠞꠣ ꠄꠇꠈꠣꠘꠅ ꠞꠁꠟꠦ ꠔꠣꠁꠞ ꠙꠦꠐꠅ ꠢꠥꠞꠥꠔ꠆ꠔꠣ ꠀꠁꠟ। ꠢꠣꠎꠦꠞꠣꠄ ꠎꠦꠛꠟꠣ ꠛꠥꠎꠟ ꠔꠣꠁꠞ ꠢꠥꠞꠥꠔ꠆ꠔꠣ ꠅꠁꠔꠣ ꠔꠦꠃ ꠔꠣꠁꠞ ꠝꠣꠟꠤꠇ ꠛꠤꠛꠤꠞ ꠛꠣꠄ ꠛꠠꠣꠁ ꠖꠦꠈꠣꠘꠤꠔ ꠟꠣꠉꠟ।
GEN 16:5 ꠅꠃ ꠍꠣꠞꠣꠄ ꠀꠛ꠆ꠞꠣꠝꠞꠦ ꠇꠁꠟꠣ, “ꠀꠝꠣꠞ ꠛꠣꠄ ꠔꠣꠁꠞ ꠛꠦꠀꠖꠛꠤꠞ ꠟꠣꠉꠤ ꠔꠥꠝꠤꠃ ꠖꠣꠄꠁ। ꠀꠝꠣꠞ ꠁ ꠛꠣꠘ꠆ꠖꠤꠞꠦ ꠀꠝꠤꠃ ꠔꠥꠝꠣꠞ ꠛꠤꠍꠘꠣꠔ ꠔꠥꠟꠤꠀ ꠖꠤꠍꠟꠣꠝ, ꠀꠞ ꠅꠈꠘ ꠔꠣꠁꠞ ꠢꠥꠞꠥꠔ꠆ꠔꠣ ꠅꠁꠔꠣ ꠇꠞꠤ ꠀꠝꠣꠞꠦ ꠛꠠꠣꠁ ꠖꠦꠈꠣꠞ। ꠝꠣꠛꠥꠖꠦ ꠔꠥꠝꠣꠞ-ꠀꠝꠣꠞ ꠛꠤꠌꠣꠞ ꠇꠞꠃꠇ꠆ꠇꠣ।”
GEN 16:6 ꠀꠛ꠆ꠞꠣꠝꠦ ꠍꠣꠞꠣꠞꠦ ꠇꠁꠟꠣ, “ꠖꠦꠈꠅ, ꠔꠥꠝꠣꠞ ꠛꠣꠘ꠆ꠖꠤ ꠔ ꠔꠥꠝꠣꠞ ꠀꠔꠅꠃ ꠀꠍꠦ। ꠔꠥꠝꠣꠞ ꠎꠦꠟꠣ ꠜꠣꠟꠣ ꠝꠘꠦ ꠇꠄ ꠅꠟꠣꠃ ꠇꠞꠅ।” ꠅꠃ ꠍꠣꠞꠣꠄ ꠢꠣꠎꠦꠞꠣꠞꠦ ꠅꠃꠟꠣ ꠖꠥꠈ ꠖꠤꠟꠣ, ꠖꠥꠈꠦ ꠔꠣꠁ ꠔꠣꠘ ꠉꠦꠍ ꠕꠣꠇꠤ ꠜꠣꠉꠤꠀ ꠉꠦꠟꠉꠤ।
GEN 16:7 ꠙꠕꠅ ꠝꠞꠥꠜꠥꠝꠤꠞ ꠝꠣꠎꠦ ꠄꠇꠐꠣ ꠙꠣꠘꠤꠞ ꠁꠘ꠆ꠖꠣꠞꠣꠞ ꠇꠣꠍꠣꠔ ꠝꠣꠛꠥꠖꠞ ꠚꠤꠞꠤꠡ꠆ꠔꠣꠄ ꠢꠣꠎꠦꠞꠣꠞꠦ ꠙꠣꠁꠟꠣ। ꠁ ꠁꠘ꠆ꠖꠣꠞꠣ ꠀꠍꠤꠟ ꠡꠥꠞ ꠘꠣꠝꠞ ꠎꠣꠉꠣꠔ ꠎꠣꠅꠀꠞ ꠙꠕꠅ।
GEN 16:8 ꠚꠤꠞꠤꠡ꠆ꠔꠣꠄ ꠇꠁꠟꠣ, “ꠅ ꠍꠣꠞꠣꠞ ꠛꠣꠘ꠆ꠖꠤ ꠢꠣꠎꠦꠞꠣ, ꠔꠥꠝꠤ ꠇꠁ ꠕꠣꠇꠤ ꠀꠁꠞꠣꠄ ꠀꠞ ꠇꠁ ꠎꠣꠁꠔꠣꠄ?” ꠢꠣꠎꠦꠞꠣꠄ ꠇꠁꠟ, “ꠀꠝꠤ ꠀꠝꠣꠞ ꠝꠣꠟꠤꠇ ꠛꠤꠛꠤ ꠍꠣꠞꠣꠞ ꠉꠦꠍ ꠕꠣꠇꠤ ꠜꠣꠉꠤꠀ ꠎꠣꠁꠞꠣꠝꠉꠤ।”
GEN 16:9 ꠔꠦꠃ ꠝꠣꠛꠥꠖꠞ ꠚꠤꠞꠤꠡ꠆ꠔꠣꠄ ꠇꠁꠟꠣ, “ꠔꠥꠝꠣꠞ ꠝꠣꠟꠤꠇ ꠛꠤꠛꠤꠞ ꠉꠦꠍꠦ ꠚꠤꠞꠤꠀ ꠉꠤꠀ ꠇꠟ꠆ꠟꠣ ꠘꠥꠀꠁꠀ ꠢꠤꠞꠛꠣꠞ ꠔꠣꠘ ꠈꠦꠎꠝꠔꠅ ꠟꠣꠉꠅ।”
GEN 16:10 ꠔꠣꠁꠘ ꠀꠞꠅ ꠇꠁꠟꠣ, “ꠀꠝꠤ ꠔꠥꠝꠣꠞ ꠅꠀꠞꠤꠡ ꠅꠃꠟꠣ ꠛꠣꠠꠣꠁ ꠖꠤꠝꠥ, ꠔꠣꠞꠣꠞꠦ ꠉꠘꠤꠀ ꠚꠥꠠꠣꠁꠔ ꠘꠣꠄ।
GEN 16:11 ꠢꠥꠘꠅ, ꠔꠥꠝꠣꠞ ꠙꠦꠐꠅ ꠢꠥꠞꠥꠔ꠆ꠔꠣ ꠀꠍꠦ। ꠔꠥꠝꠣꠞ ꠄꠇ ꠙꠥꠀ ꠅꠁꠛ, ꠔꠣꠞ ꠘꠣꠝ ꠞꠣꠈꠤꠅ ꠁꠍꠝꠣꠁꠟ [ꠝꠣꠘꠤ, ꠀꠟ꠆ꠟꠣꠄ ꠢꠥꠘꠂꠘ], ꠇꠣꠞꠘ ꠝꠣꠛꠥꠖꠦ ꠔꠥꠝꠣꠞ ꠖꠥꠈ ꠢꠥꠘꠍꠂꠘ।
GEN 16:12 ꠀꠞ ꠛꠠ ꠅꠁꠟꠦ ꠢꠦ ꠟꠣꠉꠣꠝ ꠍꠣꠠꠣ ꠊꠥꠠꠣꠞ ꠟꠣꠈꠣꠘ ꠅꠁꠛ। ꠢꠦ ꠢꠇ꠆ꠇꠟꠞ ꠛꠣꠄ ꠀꠔ ꠔꠥꠟꠛ, ꠀꠞ ꠢꠇ꠆ꠇꠟꠦ ꠔꠣꠞ ꠛꠣꠄ ꠀꠔ ꠔꠥꠟꠛꠣ। ꠜꠣꠁꠀꠁꠘ꠆ꠔꠞ ꠟꠉꠦ ꠢꠣꠝꠦꠡꠣ ꠔꠣꠞ ꠟꠣꠉ ꠕꠣꠇꠛ।”
GEN 16:13 ꠀꠞ ꠢꠣꠎꠦꠞꠣꠞ ꠟꠉꠦ ꠝꠣꠛꠥꠖꠦ ꠝꠣꠔꠤꠟꠣ ꠇꠞꠤ, ꠔꠣꠁ ꠔꠣꠘ ꠘꠣꠝ ꠖꠤꠟ “ꠔꠥꠝꠤ ꠖꠦꠈꠣ ꠖꠦꠘꠦꠀꠟꠣ ꠀꠟ꠆ꠟꠣ”; ꠔꠣꠁ ꠇꠁꠟ, “ꠎꠦꠁꠘ ꠀꠝꠣꠞꠦ ꠖꠦꠈꠂꠘ, ꠀꠝꠤ ꠅꠘꠅꠃ ꠔꠣꠘꠞꠦ ꠖꠦꠈꠟꠣꠝ ꠘꠣꠄ ꠘꠤ?”
GEN 16:14 ꠄꠞꠟꠣꠉꠤ ꠇꠣꠖꠦꠡ ꠀꠞ ꠛꠦꠞꠦꠖꠞ ꠝꠣꠎꠞ ꠢꠤ ꠇꠥꠀꠞ ꠘꠣꠝ ꠅꠁꠟ, ꠛꠦꠞ-ꠟꠢꠄ-ꠞꠥꠁ [ꠝꠣꠘꠤ, ꠎꠦꠁꠘ ꠎꠤꠘ꠆ꠖꠣ ꠀꠞ ꠀꠝꠣꠞꠦ ꠖꠦꠈꠞꠣ, ꠔꠣꠘ ꠇꠥꠀ]।
GEN 16:15 ꠛꠣꠖꠦ ꠡꠝꠄ ꠀꠁꠟꠦ ꠢꠣꠎꠦꠞꠣꠞ ꠊꠞꠅ ꠄꠇ ꠙꠥꠀ ꠅꠁꠟ, ꠀꠛ꠆ꠞꠣꠝꠦ ꠅꠃ ꠙꠥꠀꠞ ꠘꠣꠝ ꠞꠣꠈꠟꠣ ꠁꠍꠝꠣꠁꠟ।
GEN 16:16 ꠀꠛ꠆ꠞꠣꠝꠞ ꠛꠄꠅꠡ ꠎꠦꠛꠟꠣ ꠍꠤꠀꠡꠤ ꠛꠍꠞ ꠅꠁꠉꠦꠍꠦ, ꠅꠃ ꠡꠝꠄ ꠢꠣꠎꠦꠞꠣꠞ ꠊꠞꠅ ꠁꠍꠝꠣꠁꠟꠞ ꠎꠘꠝ ꠅꠁꠟ।
GEN 17:1 ꠀꠛ꠆ꠞꠣꠝꠞ ꠘꠤꠞꠣꠘ꠆ꠘꠛ꠆ꠛꠁ ꠛꠞꠍꠞ ꠡꠝꠄ ꠝꠣꠛꠥꠖꠦ ꠢꠤꠞꠛꠣꠞ ꠔꠣꠘꠞꠦ ꠖꠤꠖꠣꠞ ꠖꠤꠀ ꠇꠁꠟꠣ, “ꠀꠝꠤ ꠡꠞ꠆ꠛ-ꠡꠇ꠆ꠔꠤꠝꠣꠘ ꠀꠟ꠆ꠟꠣ। ꠔꠥꠝꠤ ꠀꠝꠣꠞ ꠖꠦꠅꠀ ꠙꠕꠅ ꠕꠣꠇꠤꠀ ꠇꠣꠝꠤꠟ ꠅꠅ।
GEN 17:2 ꠀꠝꠤ ꠔꠥꠝꠣꠞ-ꠀꠝꠣꠞ ꠝꠣꠎꠦ ꠌꠥꠇ꠆ꠔꠤ ꠇꠣꠁꠝ ꠇꠞꠝꠥ ꠀꠞ ꠔꠥꠝꠣꠞ ꠅꠀꠞꠤꠡ ꠈꠥꠛ ꠛꠦꠡꠤ ꠛꠣꠠꠣꠁ ꠖꠤꠝꠥ।”
GEN 17:3 ꠔꠦꠃ ꠀꠛ꠆ꠞꠣꠝ ꠍꠁꠎꠖꠣꠔ ꠙꠠꠟꠣ, ꠀꠞ ꠀꠟ꠆ꠟꠣꠄ ꠔꠣꠘ ꠟꠉꠦ ꠛꠣꠔꠌꠤꠔ ꠇꠞꠤ ꠇꠁꠟꠣ,
GEN 17:4 “ꠔꠥꠝꠣꠞ ꠟꠉꠦ ꠀꠝꠤ ꠅꠀꠖꠣ ꠇꠣꠁꠝ ꠇꠞꠤꠀꠞ, ꠔꠥꠝꠤ ꠛꠃꠔ ꠎꠣꠔꠤꠞ ꠝꠥꠟ ꠛꠣꠚ ꠅꠁꠛꠣꠄ।
GEN 17:5 ꠔꠥꠝꠣꠞꠦ ꠀꠞ ꠀꠛ꠆ꠞꠣꠝ [ꠝꠣꠘꠤ, ꠛꠠ ꠛꠣꠚ] ꠇꠁꠀ ꠒꠣꠇꠣ ꠅꠁꠔ ꠘꠣꠄ, ꠅꠈꠘ ꠕꠣꠇꠤ ꠔꠥꠝꠣꠞ ꠘꠣꠝ ꠅꠁꠟ ꠁꠛ꠆ꠞꠣꠢꠤꠝ [ꠝꠣꠘꠤ, ꠛꠃꠔ ꠎꠣꠔꠤꠞ ꠛꠣꠚ], ꠀꠝꠤ ꠔꠥꠝꠣꠞꠦ ꠛꠃꠔ ꠎꠣꠔꠤꠞ ꠝꠥꠟ ꠛꠣꠚ ꠛꠣꠘꠣꠁꠟꠣꠝ।
GEN 17:6 ꠀꠝꠤ ꠔꠥꠝꠣꠞꠦ ꠛꠃꠔ ꠚꠟꠀꠟꠣ ꠇꠞꠝꠥ, ꠀꠞ ꠔꠥꠝꠣꠞ ꠝꠣꠎ ꠕꠘꠦ ꠛꠃꠔ ꠎꠣꠔꠤ ꠀꠞ ꠛꠣꠖꠡꠣ ꠅꠇꠟ ꠙꠄꠖꠣ ꠇꠞꠝꠥ।
GEN 17:7 ꠀꠝꠤ ꠔꠥꠝꠣꠞ ꠀꠞ ꠔꠥꠝꠣꠞ ꠅꠀꠞꠤꠡꠞ ꠙꠞ ꠅꠀꠞꠤꠡ ꠅꠇꠟꠞ ꠟꠉꠦ ꠎꠦ ꠌꠥꠇ꠆ꠔꠤ ꠇꠣꠁꠝ ꠇꠞꠝꠥ, ꠁꠇꠐꠣ ꠢꠞ-ꠢꠣꠝꠦꠡꠣ ꠛꠅꠀꠁꠟ ꠕꠣꠇꠛ, ꠅꠃ ꠃꠍꠤꠟ꠆ꠟꠣꠄ ꠀꠝꠤ ꠔꠥꠝꠣꠞ ꠀꠞ ꠔꠥꠝꠣꠞ ꠅꠀꠞꠤꠡꠞ ꠙꠞ ꠅꠀꠞꠤꠡ ꠅꠇꠟꠞ ꠀꠟ꠆ꠟꠣ ꠅꠁꠝꠥ।
GEN 17:8 ꠀꠞ ꠎꠦ ꠇꠦꠘꠣꠘ ꠖꠦꠡꠅ ꠔꠥꠝꠤ ꠅꠈꠘ ꠝꠥꠍꠣꠚꠤꠞ ꠅꠁꠀ ꠕꠣꠇꠞꠣꠄ, ꠁ ꠙꠥꠞꠣꠐꠣꠃ ꠀꠝꠤ ꠔꠥꠝꠣꠞꠦ ꠀꠞ ꠔꠥꠝꠣꠞ ꠅꠀꠞꠤꠡ ꠅꠇꠟꠞꠦ ꠢꠞ-ꠢꠣꠝꠦꠡꠣꠇꠥꠞ ꠖꠈꠟꠞ ꠟꠣꠉꠤ ꠖꠤꠝꠥ। ꠀꠝꠤ ꠔꠣꠞꠣꠞ ꠀꠟ꠆ꠟꠣ ꠅꠁꠝꠥ।”
GEN 17:9 ꠀꠟ꠆ꠟꠣꠄ ꠁꠛ꠆ꠞꠣꠢꠤꠝꠞꠦ ꠇꠁꠟꠣ, “ꠔꠥꠝꠤ ꠀꠝꠣꠞ ꠇꠣꠁꠝ ꠇꠞꠣ ꠌꠥꠇ꠆ꠔꠤ ꠝꠣꠘꠤꠅ, ꠔꠥꠝꠤ ꠀꠞ ꠔꠥꠝꠣꠞ ꠅꠀꠞꠤꠡꠞ ꠙꠞ ꠅꠀꠞꠤꠡ ꠅꠇꠟꠦꠅ ꠝꠣꠘꠤꠀ ꠌꠟꠤꠅ।
GEN 17:10 ꠔꠥꠝꠞꠣꠞ ꠟꠉꠦ ꠀꠞ ꠔꠥꠝꠞꠣꠞ ꠅꠀꠞꠤꠡꠞ ꠟꠉꠦ ꠀꠝꠣꠞ ꠅꠃꠟꠣ ꠌꠥꠇ꠆ꠔꠤ ꠇꠣꠁꠝ ꠅꠁꠟ, ꠔꠥꠝꠞꠣꠞ ꠢꠇꠟ ꠛꠦꠐꠣꠁꠘ꠆ꠔꠞ ꠝꠍꠟꠝꠣꠘꠤ ꠇꠣꠝ ꠇꠞꠣꠁꠔꠦ ꠅꠁꠛ।
GEN 17:11 ꠔꠥꠝꠞꠣ ꠢꠇꠟꠦ ꠘꠤꠎꠞ ꠙꠥꠞꠥꠡ ꠅꠋꠉꠞ ꠝꠥꠈꠣꠞ ꠌꠣꠝꠠꠣ ꠇꠣꠐꠛꠣꠄ। ꠅꠇꠐꠣꠃ ꠔꠥꠝꠞꠣꠞ ꠀꠞ ꠀꠝꠣꠞ ꠝꠣꠎꠦ ꠛꠅꠀꠁꠟ ꠇꠞꠣ ꠌꠥꠇ꠆ꠔꠤꠞ ꠘꠤꠡꠣꠘꠣ।
GEN 17:12 ꠅꠀꠞꠤꠡꠞ ꠙꠞ ꠅꠀꠞꠤꠡ ꠗꠞꠤꠀ ꠔꠥꠝꠞꠣꠞ ꠢꠇꠟ ꠙꠥꠀꠂꠘ꠆ꠔꠞꠦ ꠎꠘꠝꠞ ꠀꠐ ꠖꠤꠘꠞ ꠖꠤꠘ ꠝꠍꠟꠝꠣꠘꠤ ꠇꠞꠣꠁꠛꠣꠄ। ꠎꠣꠞꠣ ꠔꠥꠝꠣꠞ ꠅꠀꠞꠤꠡ ꠘꠣꠄ, ꠈꠣꠟꠤ ꠔꠥꠝꠞꠣꠞ ꠛꠣꠠꠤꠔ ꠎꠘꠝꠤꠍꠦ ꠛꠣ ꠔꠥꠝꠞꠣꠞ ꠈꠞꠤꠖꠣ ꠉꠥꠟꠣꠝ, ꠔꠣꠞꠣꠞꠅ ꠝꠍꠟꠝꠣꠘꠤ ꠇꠞꠣꠘꠤ ꠟꠣꠉꠛ।
GEN 17:13 ꠔꠥꠝꠞꠣꠞ ꠊꠞꠅ ꠎꠘꠝꠤꠍꠦ ꠛꠣ ꠈꠞꠤꠖꠣ ꠉꠥꠟꠣꠝ ꠅꠇꠟꠞꠦ ꠘꠤꠌꠄ ꠝꠍꠟꠝꠣꠘꠤ ꠇꠞꠣꠁꠛꠣꠄ। ꠔꠥꠝꠞꠣꠞ ꠡꠞꠤꠟꠅ ꠎꠣꠞꠤ ꠇꠞꠣ ꠀꠝꠣꠞ ꠁ ꠌꠥꠇ꠆ꠔꠤ ꠢꠞ-ꠢꠣꠝꠦꠡꠣꠇꠥꠞ ꠌꠥꠇ꠆ꠔꠤ ꠅꠁꠛ।
GEN 17:14 ꠎꠦ ꠛꠦꠐꠣꠄ ꠙꠥꠞꠥꠡ ꠅꠋꠉꠞ ꠝꠥꠈꠣꠞ ꠌꠣꠝꠠꠣ ꠇꠣꠐꠔ ꠘꠣꠄ, ꠔꠣꠞꠦ ꠔꠣꠞ ꠎꠣꠔꠤꠞ ꠝꠣꠎ ꠕꠣꠇꠤ ꠚꠥꠍꠤꠀ ꠚꠣꠟꠣꠁꠟ ꠅꠁꠛ। ꠢꠦ ꠔ ꠀꠝꠣꠞ ꠌꠥꠇ꠆ꠔꠤꠞ ꠛꠞꠈꠦꠟꠣꠚ ꠇꠞꠍꠦ।”
GEN 17:15 ꠀꠟ꠆ꠟꠣꠄ ꠁꠛ꠆ꠞꠣꠢꠤꠝꠞꠦ ꠇꠁꠟꠣ, “ꠔꠥꠝꠣꠞ ꠛꠤꠛꠤꠞꠦ ꠀꠞ ꠍꠣꠞꠣ ꠇꠁꠀ ꠒꠣꠇꠤꠅ ꠘꠣ। ꠄꠘ ꠘꠣꠝ ꠅꠁꠛ ꠍꠣꠄꠞꠣ [ꠝꠣꠘꠤ, ꠞꠣꠘꠤ]।
GEN 17:16 ꠀꠝꠤ ꠔꠣꠁꠞꠦ ꠛꠞꠇꠔ ꠘꠣꠎꠤꠟ ꠇꠞꠝꠥ, ꠔꠣꠁꠞ ꠊꠞꠅ ꠔꠥꠝꠣꠞ ꠄꠇ ꠙꠥꠀ ꠖꠤꠝꠥ। ꠀꠞ ꠛꠞꠇꠔ ꠘꠣꠎꠤꠟ ꠇꠞꠤꠀ ꠛꠃꠔ ꠎꠣꠔꠤꠞ ꠝꠥꠟ ꠝꠣ ꠛꠣꠘꠣꠁꠝꠥ, ꠀꠞ ꠛꠃꠔ ꠝꠥꠟ꠆ꠟꠥꠇꠞ ꠛꠣꠖꠡꠣ ꠅꠇꠟꠅ ꠙꠄꠖꠣ ꠅꠁꠛꠣ।”
GEN 17:17 ꠅꠃ ꠁꠛ꠆ꠞꠣꠢꠤꠝꠦ ꠝꠣꠐꠤꠔ ꠍꠁꠎꠖꠣꠔ ꠙꠠꠤ ꠀꠡꠤꠀ ꠝꠘꠦ ꠝꠘꠦ ꠇꠁꠟꠣ, “ꠢꠣꠍꠣꠃ ꠄꠇ-ꠡ ꠛꠍꠞꠞ ꠛꠥꠠꠣꠞ ꠢꠥꠞꠥꠔ꠆ꠔꠣ ꠅꠁꠔ ꠘꠤ! ꠔꠣ-ꠅ ꠘꠛ꠆ꠛꠁ ꠛꠍꠞꠞ ꠛꠥꠠꠤ ꠍꠣꠄꠞꠣꠞ ꠙꠦꠐꠅ?”
GEN 17:18 ꠔꠣꠁꠘ ꠀꠟ꠆ꠟꠣꠞꠦ ꠇꠁꠟꠣ, “ꠀꠢ! ꠁꠍꠝꠣꠁꠟꠉꠥ ꠎꠣꠘꠥ ꠔꠥꠝꠣꠞ ꠞꠢꠝꠔꠦ ꠛꠣꠌꠤꠀ ꠕꠣꠇꠦ।”
GEN 17:19 ꠅꠃ ꠀꠟ꠆ꠟꠣꠄ ꠚꠞꠝꠣꠁꠟꠣ, “ꠑꠤꠇ ꠀꠍꠦ। ꠅꠁꠟꠦ ꠔꠥꠝꠣꠞ ꠛꠤꠛꠤ ꠍꠣꠄꠞꠣꠞ ꠙꠦꠐꠅ ꠢꠣꠍꠣꠃ ꠔꠥꠝꠣꠞ ꠙꠥꠀ ꠅꠁꠛ, ꠔꠥꠝꠤ ꠔꠣꠞ ꠘꠣꠝ ꠞꠣꠈꠛꠣꠄ ꠁꠍꠢꠣꠇ [ꠝꠣꠘꠤ, ꠢꠦ ꠀꠡꠦ]। ꠔꠣꠞ ꠟꠉꠦ ꠀꠝꠣꠞ ꠌꠥꠇ꠆ꠔꠤ ꠇꠣꠁꠝ ꠇꠞꠝꠥ, ꠔꠣꠞ ꠅꠀꠞꠤꠡꠞ ꠟꠉꠦ ꠁꠇꠐꠣ ꠀꠝꠣꠞ ꠢꠞ-ꠢꠣꠝꠦꠡꠣꠇꠥꠞ ꠌꠥꠇ꠆ꠔꠤ ꠅꠁꠛ।
GEN 17:20 ꠀꠞ ꠁꠍꠝꠣꠁꠟꠞ ꠟꠣꠉꠤꠅ ꠔꠥꠝꠣꠞ ꠖꠥꠀ ꠢꠥꠘꠍꠤ। ꠢꠥꠘꠅ, ꠀꠝꠤ ꠔꠣꠞꠦꠅ ꠛꠞꠇꠔ ꠘꠣꠎꠤꠟ ꠇꠞꠝꠥ ꠀꠞ ꠔꠣꠞꠦ ꠚꠟꠀꠟꠣ ꠇꠞꠤꠀ ꠛꠃꠔ ꠛꠣꠠꠣꠁ ꠖꠤꠝꠥ। ꠢꠦ ꠛꠣꠞꠅꠎꠘ ꠞꠣꠎꠣꠞ ꠛꠣꠚ ꠅꠁꠛ ꠀꠞ ꠔꠣꠞ ꠝꠣꠎꠦꠖꠤ ꠀꠝꠤ ꠛꠤꠞꠣꠐ ꠎꠣꠔꠤ ꠙꠄꠖꠣ ꠇꠞꠝꠥ।
GEN 17:21 ꠍꠣꠝꠘꠞ ꠛꠞꠍ ꠁ ꠌꠣꠘ꠆ꠖꠅ ꠍꠣꠄꠞꠣꠞ ꠊꠞꠅ ꠔꠥꠝꠣꠞ ꠎꠦ ꠢꠥꠞꠥꠔ꠆ꠔꠣ ꠅꠁꠛ, ꠢꠃ ꠁꠍꠢꠣꠇꠞ ꠟꠉꠦ ꠀꠝꠤ ꠀꠝꠣꠞ ꠌꠥꠇ꠆ꠔꠤ ꠇꠣꠁꠝ ꠇꠞꠝꠥ।”
GEN 17:22 ꠁꠛ꠆ꠞꠣꠢꠤꠝꠞ ꠟꠉꠦ ꠛꠣꠔꠌꠤꠔ ꠡꠦꠡ ꠇꠞꠤꠀ ꠀꠟ꠆ꠟꠣꠄ ꠔꠣꠘ ꠉꠦꠍ ꠕꠣꠇꠤ ꠃꠑꠤꠀ ꠔꠡꠞꠤꠚ ꠘꠤꠟꠣꠉꠤ।
GEN 17:23 ꠀꠟ꠆ꠟꠣꠞ ꠢꠥꠇꠥꠝ ꠝꠔ ꠁꠛ꠆ꠞꠣꠢꠤꠝꠦ ꠢꠃ ꠖꠤꠘꠃ ꠁꠍꠝꠣꠁꠟꠞꠦ ꠝꠍꠟꠝꠣꠘꠤ ꠇꠞꠣꠁꠟꠣ। ꠄꠞ ꠟꠉꠦ ꠈꠞꠤꠖꠣ ꠉꠥꠟꠣꠝ ꠅꠇꠟ ꠀꠞ ꠔꠣꠘ ꠛꠣꠠꠤꠔ ꠎꠘꠝꠤꠍꠦ ꠁꠟꠣ ꠢꠇꠟ ꠉꠥꠟꠣꠝꠞꠦ, ꠛꠣꠠꠤꠞ ꠢꠇ꠆ꠇꠟ ꠛꠦꠐꠣꠁꠘ꠆ꠔꠞꠦ ꠝꠍꠟꠝꠣꠘꠤ ꠇꠞꠣꠁꠟꠣ।
GEN 17:24 ꠁꠛ꠆ꠞꠣꠢꠤꠝꠞ ꠘꠤꠎꠞ ꠝꠍꠟꠝꠣꠘꠤ ꠇꠣꠝ ꠇꠞꠣꠘꠤꠞ ꠡꠝꠄ ꠔꠣꠘ ꠛꠄꠅꠡ ꠀꠍꠤꠟ ꠘꠤꠞꠣꠘ꠆ꠘꠛ꠆ꠛꠁ ꠛꠞꠍ,
GEN 17:25 ꠀꠞ ꠔꠣꠘ ꠙꠥꠀ ꠁꠍꠝꠣꠁꠟꠞ ꠛꠄꠅꠡ ꠔꠦꠞꠅ।
GEN 17:26 ꠄꠇ ꠖꠤꠘꠦꠃ ꠁꠛ꠆ꠞꠣꠢꠤꠝ ꠀꠞ ꠔꠣꠘ ꠙꠥꠀ ꠁꠍꠝꠣꠁꠟꠞ ꠝꠍꠟꠝꠣꠘꠤ ꠇꠞꠣꠁꠟ ꠅꠁꠟ।
GEN 17:27 ꠢꠤ ꠖꠤꠘ ꠛꠣꠠꠤꠞ ꠢꠇꠟ ꠛꠦꠐꠣꠁꠘ꠆ꠔꠞ, ꠎꠣꠞꠣ ꠔꠣꠘ ꠛꠣꠠꠤꠔ ꠎꠘꠝꠤꠍꠤꠟ ꠀꠞ ꠎꠦꠞꠣꠞꠦ ꠛꠤꠖꠦꠡ ꠕꠣꠇꠤ ꠟꠁꠀ ꠀꠘꠍꠂꠘ, ꠁꠔꠣ ꠢꠇꠟꠞꠃ ꠝꠍꠟꠝꠣꠘꠤ ꠇꠣꠝ ꠄꠇꠟꠉꠦ ꠇꠞꠣꠁꠟ ꠅꠁꠟ।
GEN 18:1 ꠛꠣꠖꠦ ꠝꠝ꠆ꠞꠤꠞ ꠄꠟꠘ ꠛꠘꠞ ꠇꠣꠍꠣꠔ ꠝꠣꠛꠥꠖꠦ ꠁꠛ꠆ꠞꠣꠢꠤꠝꠞꠦ ꠖꠦꠈꠣ ꠖꠤꠟꠣ। ꠔꠣꠁꠘ ꠖꠤꠘꠞ ꠉꠞꠝꠞ ꠡꠝꠄ ꠔꠣꠝ꠆ꠛꠥꠞ ꠖꠞꠎꠣꠔ ꠛꠅꠀꠔ ꠀꠍꠟꠣ।
GEN 18:2 ꠅꠃꠟꠣ ꠡꠝꠄ ꠌꠃꠈ ꠔꠥꠟꠤꠀ ꠖꠦꠈꠟꠣ, ꠔꠣꠘ ꠍꠣꠝꠘꠦ ꠔꠤꠘꠎꠘ ꠝꠣꠘꠥꠡ ꠃꠛꠣꠁ ꠞꠁꠍꠂꠘ। ꠖꠦꠈꠤꠀꠃ ꠔꠣꠁꠘ ꠖꠞꠎꠣꠞ ꠉꠦꠍ ꠕꠣꠇꠤ ꠖꠃꠠꠣꠁꠀ ꠉꠤꠀ, ꠝꠣꠐꠤꠔ ꠍꠁꠎꠖꠣ ꠇꠞꠤꠀ ꠔꠣꠞꠣꠞꠦ ꠇꠁꠟꠣ,
GEN 18:3 “ꠅ ꠝꠥꠘꠤꠛ, ꠀꠝꠤ ꠎꠥꠖꠤ ꠀꠙꠘꠣꠞꠣꠞ ꠝꠣꠄꠀꠞ ꠇꠥꠘꠥ ꠝꠣꠘꠥꠡ ꠅꠁ, ꠔꠣꠁꠟꠦ ꠀꠙꠘꠣꠞꠣꠞ ꠁ ꠉꠥꠟꠣꠝꠞꠦ ꠚꠣꠟꠣꠁꠀ ꠎꠣꠁꠘ ꠘꠣ ꠎꠦꠘ।
GEN 18:4 ꠀꠝꠤ ꠕꠥꠠꠣ ꠙꠣꠘꠤ ꠀꠘꠤꠀ ꠖꠤꠀꠞ ꠀꠙꠘꠣꠞꠣ ꠀꠔ-ꠙꠣꠅ ꠗꠁꠀ, ꠅꠃ ꠉꠣꠍ ꠔꠟꠣꠔ ꠎꠤꠞꠣꠃꠇ꠆ꠇꠣ।
GEN 18:5 ꠀꠞ ꠁ ꠉꠥꠟꠣꠝꠞ ꠇꠣꠍꠣꠔ ꠎꠦꠛꠟꠣ ꠀꠁꠍꠂꠘ, ꠔꠦ ꠕꠥꠠꠣ ꠈꠣꠘꠤ ꠀꠘꠤꠀ ꠖꠦꠁ, ꠅꠔꠣ ꠈꠣꠁꠀ ꠎꠣꠘꠅ ꠀꠞꠣꠝ ꠅꠁꠟꠦ ꠀꠙꠘꠣꠞꠣ ꠢꠤꠞꠛꠣꠞ ꠞꠅꠀꠘꠣ ꠖꠤꠛꠣꠘꠦ।” ꠔꠣꠞꠣ ꠇꠁꠟꠣ, “ꠜꠣꠟꠣ, ꠀꠙꠘꠦ ꠎꠦꠛꠟꠣ ꠇꠁꠞꠣ, ꠔꠦ ꠇꠞꠃꠇ꠆ꠇꠣ।”
GEN 18:6 ꠁꠛ꠆ꠞꠣꠢꠤꠝꠦ ꠟꠉꠦ ꠟꠉꠦ ꠜꠤꠔꠞꠦ ꠉꠤꠀ ꠍꠣꠄꠞꠣꠞꠦ ꠇꠁꠟꠣ, “ꠎꠟꠖꠤ ꠇꠞꠤꠀ ꠔꠤꠘ ꠙꠦꠐꠥ ꠜꠣꠟꠣ ꠝꠄꠖꠣ ꠝꠣꠈꠤꠀ ꠙꠤꠑꠣ ꠛꠣꠘꠣꠅ।”
GEN 18:7 ꠔꠣꠁꠘ ꠖꠃꠠꠣꠁꠀ ꠉꠤꠀ ꠉꠞꠥꠞ ꠙꠣꠟ ꠕꠘꠦ ꠈꠥꠛ ꠜꠣꠟꠣ ꠄꠇꠐꠣ ꠇꠍꠝꠣ ꠛꠣꠍꠥꠞ ꠀꠘꠤꠀ ꠔꠣꠘ ꠉꠥꠟꠣꠝꠞꠦ ꠖꠤꠟꠣ। ꠢꠦ-ꠅ ꠎꠟꠖꠤ ꠇꠞꠤ ꠅꠇꠐꠣ ꠞꠣꠘ꠆ꠖꠤꠟ।
GEN 18:8 ꠅꠃ ꠁꠛ꠆ꠞꠣꠢꠤꠝꠦ ꠖꠥꠗ, ꠖꠁ ꠀꠞ ꠉꠥꠡ꠆ꠔ ꠀꠘꠤꠀ ꠔꠣꠞꠣꠞꠦ ꠈꠣꠁꠛꠣꠞ ꠖꠤꠟꠣ, ꠔꠣꠞꠣ ꠈꠣꠅꠀ-ꠖꠣꠅꠀ ꠇꠞꠟꠣ। ꠔꠣꠁꠘ ꠔꠣꠞꠣꠞ ꠇꠣꠘ꠆ꠖꠣꠔ ꠉꠣꠍ ꠔꠟꠣꠔ ꠃꠛꠣꠁꠟꠣ।
GEN 18:9 ꠔꠣꠞꠣ ꠁꠛ꠆ꠞꠣꠢꠤꠝꠞꠦ ꠎꠤꠇꠣꠁꠟꠣ, “ꠀꠙꠘꠣꠞ ꠛꠤꠛꠤ ꠍꠣꠄꠞꠣ ꠇꠁ?” ꠔꠣꠁꠘ ꠇꠁꠟꠣ, “ꠅꠃꠘꠥ, ꠔꠣꠝ꠆ꠛꠥꠞ ꠜꠤꠔꠞꠦ ꠀꠍꠂꠘ।”
GEN 18:10 ꠅꠃ ꠄꠞꠣꠞ ꠝꠣꠎꠦ ꠄꠇꠎꠘꠦ ꠇꠁꠟꠣ, “ꠍꠣꠝꠘꠞ ꠛꠞꠍ ꠁ ꠌꠣꠘ꠆ꠖꠅ ꠀꠝꠤ ꠅꠛꠡ꠆ꠡꠃ ꠀꠙꠘꠣꠞ ꠉꠦꠍꠦ ꠀꠁꠝꠥ। ꠖꠦꠈꠛꠣ, ꠅꠃ ꠡꠝꠄ ꠀꠙꠘꠣꠞ ꠛꠤꠛꠤ ꠍꠣꠄꠞꠣꠞ ꠇꠥꠟꠅ ꠄꠇ ꠙꠥꠀ ꠕꠣꠇꠛ।” ꠍꠣꠄꠞꠣꠄ ꠁꠛ꠆ꠞꠣꠢꠤꠝꠞ ꠈꠞꠦ ꠔꠣꠝ꠆ꠛꠥꠞ ꠖꠞꠎꠣꠔ ꠃꠛꠣꠁꠀ ꠁꠔꠣ ꠢꠥꠘꠟꠣ।
GEN 18:11 ꠁ ꠡꠝꠄ ꠁꠛ꠆ꠞꠣꠢꠤꠝ ꠀꠞ ꠍꠣꠄꠞꠣ ꠛꠥꠠꠣ-ꠎꠁꠚ ꠅꠁꠉꠦꠍꠂꠘ, ꠢꠥꠞꠥꠔ꠆ꠔꠣ ꠅꠀꠞ ꠟꠣꠈꠣꠘ ꠛꠄꠅꠡꠅ ꠍꠣꠄꠞꠣꠞ ꠞꠁꠍꠤꠟ ꠘꠣ।
GEN 18:12 ꠄꠞꠟꠣꠉꠤ ꠍꠣꠄꠞꠣꠄ ꠝꠘꠦ ꠝꠘꠦ ꠀꠡꠤꠀ ꠇꠁꠟꠣ, “ꠀꠝꠣꠞ ꠅꠃꠟꠣ ꠢꠦꠡꠇꠣꠟꠤ ꠛꠄꠅꠡꠅ ꠁꠔꠣ ꠈꠥꠡꠤ ꠀꠞ ꠀꠁꠛ ꠘꠤ? ꠀꠝꠣꠞ ꠝꠣꠟꠤꠇꠅ ꠝꠥꠞꠛ꠆ꠛꠤ ꠅꠁꠉꠦꠍꠂꠘ।”
GEN 18:13 ꠔꠦꠃ ꠝꠣꠛꠥꠖꠦ ꠁꠛ꠆ꠞꠣꠢꠤꠝꠞꠦ ꠇꠁꠟꠣ, “ꠍꠣꠄꠞꠣꠄ ꠇꠤꠔꠣꠞ ꠟꠣꠉꠤ ꠁꠔꠣ ꠇꠁꠀ ꠀꠡꠟ ꠎꠦꠘ, ꠢꠣꠍꠣꠃ ꠀꠝꠣꠞ ꠢꠥꠞꠥꠔ꠆ꠔꠣ ꠅꠁꠛ ꠘꠤ, ꠀꠝꠤ ꠔ ꠛꠥꠠꠤ?
GEN 18:14 ꠝꠣꠛꠥꠖꠦ ꠙꠣꠞꠂꠘ ꠘꠣ ꠁꠟꠣ ꠇꠥꠘ꠆ꠔꠣ ꠀꠍꠦ ꠘꠤ? ꠖꠦꠈꠤꠅ, ꠑꠤꠇ ꠡꠝꠄꠄ ꠀꠝꠤ ꠢꠤꠞꠛꠣꠞ ꠔꠥꠝꠣꠞ ꠉꠦꠍꠦ ꠀꠁꠝꠥ, ꠀꠞ ꠁ ꠡꠝꠄ ꠍꠣꠄꠞꠣꠞ ꠇꠥꠟꠅ ꠙꠥꠀ ꠕꠣꠇꠛ।”
GEN 18:15 ꠍꠣꠄꠞꠣꠄ ꠒꠞꠣꠁꠀ ꠇꠁꠟꠣ, “ꠎꠤ ꠘꠣ, ꠀꠝꠤ ꠔ ꠀꠡꠍꠤ ꠘꠣ।” ꠅꠃ ꠔꠣꠁꠘ ꠇꠁꠟꠣ, “ꠘꠣ ꠞꠦꠉ, ꠔꠥꠝꠤ ꠘꠥ ꠀꠡꠤꠟꠣꠄ।”
GEN 18:16 ꠄꠞꠛꠣꠖꠦ ꠢꠃ ꠔꠤꠘꠎꠘꠦ ꠁꠘ ꠕꠘꠦ ꠃꠑꠤꠀ ꠍꠣꠖꠥꠝꠞ ꠛꠣꠄ ꠌꠣꠁꠟꠣ। ꠁꠛ꠆ꠞꠣꠢꠤꠝꠦ ꠔꠣꠞꠣꠞ ꠟꠉꠦ ꠅꠁꠀ ꠛꠤꠖꠣꠄ ꠖꠦꠅꠀꠔ ꠉꠦꠟꠣ।
GEN 18:17 ꠔꠦꠃ ꠝꠣꠛꠥꠖꠦ ꠇꠁꠟꠣ, “ꠀꠝꠤ ꠎꠦꠔꠣ ꠇꠞꠔꠣꠝ ꠌꠣꠁꠀꠞ, ꠁꠔꠣ ꠇꠥꠘꠥ ꠁꠛ꠆ꠞꠣꠢꠤꠝꠞꠦ ꠟꠥꠇꠣꠁꠔꠣꠝ ꠘꠤ?
GEN 18:18 ꠁꠛ꠆ꠞꠣꠢꠤꠝ ꠕꠣꠇꠤꠀꠃ ꠔ ꠀꠝꠤ ꠄꠇ ꠝꠢꠣꠘ ꠢꠤꠝ꠆ꠝꠔꠀꠟꠣ ꠎꠣꠔꠤ ꠙꠄꠖꠣ ꠇꠞꠝꠥ, ꠖꠥꠘꠤꠀꠁꠞ ꠢꠇꠟ ꠎꠣꠔꠤꠄ ꠅꠘ ꠕꠘꠦ ꠛꠞꠇꠔ ꠇꠣꠝꠣꠁꠛꠣ।
GEN 18:19 ꠄꠞꠟꠣꠉꠤꠃ ꠀꠝꠤ ꠔꠣꠞꠦ ꠈꠣꠔꠤꠞ ꠇꠞꠍꠤ, ꠢꠦ ꠔꠣꠞ ꠅꠀꠞꠤꠡ ꠀꠞ ꠔꠣꠞ ꠘꠤꠎꠞ ꠢꠇꠟꠞꠦ ꠀꠝꠣꠞ ꠝꠞ꠆ꠎꠤ ꠝꠣꠘꠤꠀ ꠢꠇ ꠀꠞ ꠁꠘꠍꠣꠚꠞ ꠇꠣꠝ ꠇꠞꠣꠞ ꠢꠥꠇꠥꠝ ꠖꠦꠄ। ꠔꠣꠞꠣꠅ ꠎꠥꠖꠤ ꠅꠃ ꠟꠣꠈꠣꠘ ꠌꠟꠦ, ꠔꠣꠁꠟꠦ ꠀꠝꠤ ꠝꠣꠛꠥꠖꠦ ꠁꠛ꠆ꠞꠣꠢꠤꠝꠞ ꠛꠦꠙꠣꠞꠦ ꠎꠔꠔꠣ ꠇꠁꠍꠤ, ꠢꠇꠟꠔꠣꠃ ꠙꠥꠞꠣ ꠇꠞꠝꠥ।”
GEN 18:20 ꠛꠣꠖꠦ ꠝꠣꠛꠥꠖꠦ ꠇꠁꠟꠣ, “ꠍꠣꠖꠥꠝ ꠀꠞ ꠀꠝꠥꠞꠣꠞ ꠛꠤꠞꠥꠖ꠆ꠖꠦ ꠈꠥꠛ ꠘꠣꠟꠤꠡ ꠀꠞ ꠚꠞꠤꠀꠖ ꠢꠥꠘꠤꠀꠞ, ꠔꠣꠞꠣꠞ ꠉꠥꠘꠣꠅ ꠈꠥꠛ ꠛꠦꠎꠥꠁꠔꠣ।
GEN 18:21 ꠄꠞꠟꠣꠉꠤ ꠀꠝꠤ ꠔꠟꠦ ꠟꠣꠝꠤꠀ ꠉꠤꠀ ꠖꠦꠈꠤ, ꠀꠝꠤ ꠎꠦꠟꠣ ꠘꠣꠟꠤꠡ ꠢꠥꠘꠤꠀꠞ, ꠁꠔꠣ ꠢꠣꠍꠣꠃ ꠅꠃꠟꠣ ꠈꠣꠞꠣꠙ ꠇꠤ ꠘꠣ। ꠀꠞ ꠘꠣ ꠅꠁꠟꠦꠅ ꠔ ꠖꠦꠈꠝꠥ।”
GEN 18:22 ꠅꠃ ꠢꠤ ꠖꠥꠁꠅꠎꠘꠦ ꠚꠤꠞꠤꠀ ꠍꠣꠖꠥꠝꠞ ꠛꠣꠄ ꠞꠅꠀꠘꠣ ꠖꠤꠟꠣ ꠀꠞ ꠁꠛ꠆ꠞꠣꠢꠤꠝ ꠝꠣꠛꠥꠖꠞ ꠉꠦꠍꠦ ꠃꠛꠣꠁ ꠞꠁꠟꠣ।
GEN 18:23 ꠛꠣꠖꠦ ꠁꠛ꠆ꠞꠣꠢꠤꠝꠦ ꠝꠣꠛꠥꠖꠞ ꠛꠣꠄ ꠀꠉꠥꠀꠁꠀ ꠉꠤꠀ ꠇꠁꠟꠣ, “ꠀꠙꠘꠦ ꠉꠥꠘꠣꠉꠣꠞꠞ ꠟꠉꠦ ꠢꠇ ꠝꠣꠘꠥꠡ ꠅꠇꠟꠞꠦꠅ ꠝꠣꠞꠤꠟꠣꠁꠔꠣ ꠘꠤ?
GEN 18:24 ꠐꠣꠃꠘꠞ ꠝꠣꠎꠦ ꠎꠥꠖꠤ ꠙꠁꠘ꠆ꠌꠣꠡ ꠎꠘ ꠢꠇ ꠝꠣꠘꠥꠡ ꠕꠣꠇꠦ ꠔꠣꠁꠟꠦ ꠢꠃ ꠙꠁꠘ꠆ꠌꠣꠡ ꠎꠘꠞ ꠈꠣꠔꠤꠞꠦ ꠐꠣꠃꠘꠞꠦ ꠝꠦꠢꠦꠞꠛꠣꠘꠤ ꠘꠣ ꠇꠞꠤꠀ ꠛꠤꠘꠣꠡ ꠇꠞꠤꠟꠣꠁꠛꠣ ꠘꠤ?
GEN 18:25 ꠔꠦ ꠀꠙꠘꠣꠞ ꠇꠣꠝ ꠔ ꠅꠃꠟꠣ ꠘꠣꠄ, ꠢꠇ ꠀꠞ ꠉꠥꠘꠣꠉꠣꠞꠞꠦ ꠄꠇꠟꠉꠦ ꠝꠣꠞꠤꠟꠣꠅꠀ, ꠄꠇ ꠢꠝꠣꠘ ꠡꠣꠎꠣ ꠖꠦꠅꠀ, ꠀꠙꠘꠣꠞ ꠟꠣꠉꠤ ꠔ ꠑꠤꠇ ꠘꠣꠄ। ꠎꠦꠁꠘ ꠢꠣꠞꠣ ꠖꠥꠘꠤꠀꠞ ꠛꠤꠌꠣꠞ ꠇꠞꠂꠘ, ꠔꠣꠁꠘ ꠇꠥꠘꠥ ꠢꠇ ꠁꠘꠍꠣꠚ ꠇꠞꠔꠣ ꠘꠣꠄ ꠘꠤ?”
GEN 18:26 ꠝꠣꠛꠥꠖꠦ ꠇꠁꠟꠣ, “ꠎꠥꠖꠤ ꠍꠣꠖꠥꠝ ꠐꠣꠃꠘꠅ ꠙꠁꠘ꠆ꠌꠣꠡ ꠎꠘꠅ ꠢꠇ ꠝꠣꠘꠥꠡ ꠕꠣꠇꠂꠘ, ꠔꠣꠁꠟꠦ ꠔꠣꠞꠣꠞ ꠈꠣꠔꠤꠞꠦ ꠀꠝꠤ ꠀꠡ꠆ꠔꠣ ꠐꠣꠃꠘꠞꠦ ꠞꠦꠢꠣꠁ ꠖꠤꠟꠣꠁꠝꠥ।”
GEN 18:27 ꠁꠛ꠆ꠞꠣꠢꠤꠝꠦ ꠇꠁꠟꠣ, “ꠖꠦꠈꠃꠇ꠆ꠇꠣ, ꠀꠝꠤ ꠔ ꠗꠥꠁꠟ ꠀꠞ ꠍꠣꠟꠤ ꠍꠣꠠꠣ ꠇꠥꠘ꠆ꠔꠣ ꠘꠣꠄ, ꠔꠣ-ꠅ ꠀꠝꠤ ꠡꠣꠅꠡ ꠇꠞꠤꠀ ꠀꠝꠣꠞ ꠝꠣꠟꠤꠇꠞ ꠟꠉꠦ ꠝꠣꠔꠤꠀꠞ।
GEN 18:28 ꠗꠞꠃꠇ꠆ꠇꠣ, ꠎꠥꠖꠤ ꠙꠁꠘ꠆ꠌꠣꠡ ꠎꠘ ꠢꠇ ꠝꠣꠘꠥꠡ ꠘꠣ ꠅꠁꠀ ꠙꠣꠌ ꠎꠘ ꠇꠝ ꠅꠄ, ꠔꠣꠁꠟꠦ ꠇꠤꠔꠣ ꠅꠃ ꠙꠣꠌ ꠎꠘ ꠇꠝꠞ ꠟꠣꠉꠤ ꠀꠙꠘꠦ ꠀꠡ꠆ꠔꠣ ꠐꠣꠃꠘ ꠛꠤꠘꠣꠡ ꠇꠞꠤꠟꠣꠁꠛꠣ ꠘꠤ?” ꠔꠣꠁꠘ ꠇꠁꠟꠣ, “ꠀꠝꠤ ꠎꠥꠖꠤ ꠢꠤꠘꠅ ꠙꠄꠔꠣꠟ꠆ꠟꠤꠡ ꠎꠘꠞꠦ ꠙꠣꠁ, ꠔꠣꠁꠟꠦ ꠁꠇꠐꠣ ꠛꠤꠘꠣꠡ ꠇꠞꠔꠣꠝ ꠘꠣꠄ।”
GEN 18:29 ꠁꠛ꠆ꠞꠣꠢꠤꠝꠦ ꠔꠣꠘꠞꠦ ꠢꠤꠞꠛꠣꠞ ꠇꠁꠟꠣ, “ꠗꠞꠃꠇ꠆ꠇꠣ, ꠎꠥꠖꠤ ꠢꠤꠘꠅ ꠌꠣꠟ꠆ꠟꠤꠡ ꠎꠘ ꠙꠣꠅꠀ ꠎꠣꠄ?” ꠝꠣꠛꠥꠖꠦ ꠇꠁꠟꠣ, “ꠢꠃ ꠌꠣꠟ꠆ꠟꠤꠡ ꠎꠘꠞ ꠈꠣꠔꠤꠞꠦ ꠀꠝꠤ ꠛꠤꠘꠣꠡ ꠇꠞꠔꠣꠝ ꠘꠣꠄ।”
GEN 18:30 ꠁꠛ꠆ꠞꠣꠢꠤꠝꠦ ꠇꠁꠟꠣ, “ꠀꠝꠣꠞ ꠝꠣꠟꠤꠇ ꠎꠣꠘꠥ ꠀꠝꠣꠞ ꠝꠣꠔꠦ ꠘꠣꠞꠣꠎ ꠘꠣ ꠅꠁꠘ। ꠀꠁꠌ꠆ꠍꠣ, ꠎꠥꠖꠤ ꠢꠤꠘꠅ ꠔꠤꠡ ꠎꠘꠞꠦ ꠙꠣꠅꠀ ꠎꠣꠄ?” ꠔꠣꠁꠘ ꠇꠁꠟꠣ, “ꠎꠥꠖꠤ ꠀꠝꠤ ꠔꠤꠡ ꠎꠘꠞꠦꠅ ꠙꠣꠁ, ꠔꠣꠁꠟꠦꠅ ꠀꠝꠤ ꠛꠤꠘꠣꠡ ꠇꠞꠔꠣꠝ ꠘꠣꠄ।”
GEN 18:31 ꠁꠛ꠆ꠞꠣꠢꠤꠝꠦ ꠇꠁꠟꠣ, “ꠀꠝꠤ ꠎꠦꠛꠟꠣ ꠢꠤꠝ꠆ꠝꠔ ꠇꠞꠤꠀ ꠝꠣꠟꠤꠇꠞ ꠟꠉꠦ ꠛꠣꠔꠌꠤꠔ ꠇꠞꠤꠀꠞ ꠔꠦ ꠢꠤꠞꠛꠣꠞ ꠇꠁꠀꠞ, ꠎꠥꠖꠤ ꠢꠤꠘꠅ ꠛꠤꠡ ꠎꠘꠞꠦ ꠙꠣꠅꠀ ꠎꠣꠄ?” ꠝꠣꠛꠥꠖꠦ ꠎꠥꠀꠙ ꠖꠤꠟꠣ, “ꠢꠃ ꠛꠤꠡ ꠎꠘꠞ ꠈꠣꠔꠤꠞꠦꠃ ꠀꠝꠤ ꠁꠇꠐꠣ ꠛꠤꠘꠣꠡ ꠇꠞꠔꠣꠝ ꠘꠣꠄ।”
GEN 18:32 ꠢꠦꠡꠦ ꠁꠛ꠆ꠞꠣꠢꠤꠝꠦ ꠇꠁꠟꠣ, “ꠀꠝꠣꠞ ꠝꠣꠟꠤꠇ ꠎꠣꠘꠥ ꠘꠣꠞꠣꠎ ꠘꠣ ꠅꠁꠘ, ꠀꠝꠤ ꠈꠣꠟꠤ ꠀꠞꠅ ꠄꠇꠛꠣꠞꠔꠣ ꠇꠁꠀꠞ, ꠎꠥꠖꠤ ꠢꠤꠘꠅ ꠖꠡ ꠎꠘ ꠕꠣꠇꠂꠘ?” ꠝꠣꠛꠥꠖꠦ ꠇꠁꠟꠣ, “ꠢꠃ ꠖꠡ ꠎꠘꠞ ꠈꠣꠔꠤꠞꠦꠃ ꠀꠝꠤ ꠁꠇꠐꠣ ꠛꠤꠘꠣꠡ ꠇꠞꠔꠣꠝ ꠘꠣꠄ।”
GEN 18:33 ꠁꠛ꠆ꠞꠣꠢꠤꠝꠞ ꠟꠉꠦ ꠝꠣꠛꠥꠖꠞ ꠛꠣꠔ-ꠍꠅꠀꠟ ꠡꠦꠡ ꠅꠁꠀ ꠢꠣꠞꠟꠦ ꠞꠅꠀꠘꠣ ꠖꠤꠟꠣꠁꠟꠣ, ꠀꠞ ꠁꠛ꠆ꠞꠣꠢꠤꠝꠅ ꠔꠣꠘ ꠛꠣꠠꠤꠔ ꠚꠤꠞꠤꠀ ꠀꠁꠟꠣ।
GEN 19:1 ꠛꠣꠖꠦ ꠢꠣꠁꠘ꠆ꠎꠣ ꠛꠣꠟꠣ ꠢꠃ ꠖꠥꠁꠎꠘ ꠚꠤꠞꠤꠡ꠆ꠔꠣ ꠍꠣꠖꠥꠝ ꠐꠣꠃꠘꠅ ꠉꠦꠟꠣ। ꠁ ꠡꠝꠄ ꠟꠥꠔ ꠐꠣꠃꠘꠞ ꠝꠥꠟ ꠉꠦꠁꠐꠞ ꠉꠦꠍꠦ ꠛꠅꠀꠔ ꠀꠍꠟꠣ, ꠄꠞꠣꠞꠦ ꠖꠦꠈꠤꠀ ꠔꠣꠁꠘ ꠃꠛꠣꠁꠟꠣ ꠀꠞ ꠝꠣꠐꠤꠔ ꠍꠁꠎꠖꠣ ꠇꠞꠤꠀ ꠇꠁꠟꠣ,
GEN 19:2 “ꠅ ꠀꠝꠣꠞ ꠝꠣꠟꠤꠇ ꠅꠇꠟ, ꠀꠝꠤ ꠝꠤꠘꠔꠤ ꠇꠞꠤ ꠇꠁꠀꠞ, ꠖꠄꠀ ꠇꠞꠤ ꠀꠙꠘꠣꠞꠣꠞ ꠅꠃ ꠉꠥꠟꠣꠝꠞ ꠊꠞꠅ ꠔꠡꠞꠤꠚ ꠀꠘꠤꠟꠣꠃꠇ꠆ꠇꠣ ꠀꠞ ꠀꠔ-ꠙꠣꠅ ꠗꠁꠀ ꠞꠣꠁꠔꠈꠣꠘ ꠇꠣꠐꠣꠃꠇ꠆ꠇꠣ। ꠛꠤꠀꠘꠦ ꠢꠤꠞꠛꠣꠞ ꠞꠅꠀꠘꠣ ꠅꠁꠛꠣꠘꠦ।” ꠄꠞꠣ ꠇꠁꠟꠣ, “ꠘꠣ, ꠀꠝꠞꠣ ꠅꠃ ꠐꠣꠃꠘꠞ ꠝꠄꠖꠣꠘꠅ ꠞꠣꠁꠔ ꠇꠣꠐꠣꠁꠝꠥ।”
GEN 19:3 ꠔꠣꠁꠘ ꠎꠦꠛꠟꠣ ꠈꠥꠛ ꠝꠤꠘꠔ-ꠇꠣꠎ꠆ꠎꠤ ꠇꠞꠞꠣ ꠅꠃ ꠡꠝꠄ ꠄꠞꠣ ꠔꠣꠘ ꠛꠣꠠꠤꠔ ꠢꠣꠝꠣꠁꠟꠣ। ꠛꠣꠖꠦ ꠟꠥꠔꠦ ꠞꠥꠐꠤ ꠛꠣꠘꠣꠁꠀ ꠄꠞꠣꠞ ꠟꠣꠉꠤ ꠈꠣꠘꠣ-ꠖꠣꠘꠣ ꠎꠥꠁꠔ ꠇꠞꠟꠣ, ꠀꠞ ꠔꠣꠞꠣ ꠈꠣꠁꠟꠣ।
GEN 19:4 ꠄꠞꠣꠞ ꠢꠥꠔꠤꠛꠣꠞ ꠀꠉꠦꠃ ꠍꠣꠖꠥꠝ ꠐꠣꠃꠘꠞ ꠢꠇ꠆ꠇꠟ ꠎꠥꠀꠘ-ꠛꠥꠠꠣ ꠛꠦꠐꠣꠁꠘ꠆ꠔꠦ ꠀꠁꠀ ꠢꠤ ꠛꠣꠠꠤꠞꠦ ꠛꠦꠞꠤꠟꠣꠁꠟꠣ,
GEN 19:5 ꠀꠞ ꠟꠥꠔꠞꠦ ꠒꠣꠇꠤꠀ ꠇꠁꠟꠣ, “ꠀꠁꠎ ꠞꠣꠁꠔ ꠎꠦ ꠖꠥꠁꠎꠘ ꠝꠣꠘꠥꠡ ꠔꠞ ꠁꠘꠅ ꠀꠁꠍꠦ, ꠔꠣꠞꠣ ꠇꠁ? ꠅꠔꠣꠞꠦ ꠛꠣꠞ ꠇꠞꠤꠀ ꠀꠝꠞꠣꠞ ꠉꠦꠍꠦ ꠀꠘ। ꠀꠝꠞꠣ ꠅꠔꠣꠞ ꠟꠉꠦ ꠝꠃꠎ ꠇꠞꠔꠣꠝ।”
GEN 19:6 ꠅꠃ ꠡꠝꠄ ꠟꠥꠔꠦ ꠖꠞꠎꠣꠞ ꠛꠣꠞꠦ ꠉꠤꠀ ꠔꠣꠘ ꠈꠞꠞ ꠖꠞꠎꠣ ꠛꠘ꠆ꠖ ꠇꠞꠤꠀ ꠔꠣꠞꠣꠞꠦ ꠇꠁꠟꠣ,
GEN 19:7 “ꠜꠣꠁꠀꠁꠘꠞꠦ, ꠀꠝꠤ ꠝꠤꠘꠔ ꠇꠞꠤꠀꠞ, ꠔꠥꠝꠞꠣ ꠁꠟꠣ ꠛꠖ ꠇꠣꠝ ꠇꠞꠤꠅ ꠘꠣ।
GEN 19:8 ꠖꠦꠈꠅ, ꠀꠝꠣꠞ ꠖꠥꠁꠐꠣ ꠡꠔꠤ ꠙꠥꠠꠤ ꠀꠍꠦ। ꠀꠝꠤ ꠛꠣꠞ ꠇꠞꠤꠀ ꠔꠥꠝꠞꠣꠞ ꠉꠦꠍꠦ ꠟꠁꠀ ꠀꠁꠀꠞ, ꠔꠣꠞꠣ ꠇꠥꠘꠥ ꠛꠦꠐꠣꠁꠘ꠆ꠔꠞ ꠉꠦꠍꠦ ꠞꠁꠍꠂꠘ ꠘꠣ, ꠔꠥꠝꠞꠣꠞ ꠎꠦꠔꠣ ꠝꠘꠦ ꠌꠣꠄ ꠇꠞꠅ; ꠔꠣ-ꠅ, ꠁ ꠝꠣꠘꠡꠞ ꠟꠉꠦ ꠔꠥꠝꠞꠣ ꠇꠥꠘ꠆ꠔꠣ ꠇꠞꠤꠅ ꠘꠣ, ꠄꠞꠣ ꠀꠝꠣꠞ ꠊꠞꠅ ꠀꠡꠞꠄ ꠟꠁꠍꠂꠘ।”
GEN 19:9 ꠅꠁꠟꠦ ꠔꠣꠞꠣ ꠇꠁꠟ, “ꠎꠣ, ꠎꠣ, ꠙꠕ ꠕꠣꠇꠤ ꠢꠞ!” ꠔꠣꠞꠣ ꠀꠞꠅ ꠇꠁꠟ, “ꠅꠂ ꠛꠦꠐꠣ, ꠔꠥꠁ ꠄꠇꠟꠣ ꠛꠂꠔꠟ ꠅꠁꠀ ꠀꠁꠍꠍ ꠀꠞ ꠈꠣꠟꠤ ꠀꠝꠞꠣꠞ ꠃꠙꠞꠦ ꠘꠦꠔꠣꠉꠤꠞꠤ ꠇꠞꠞꠦ। ꠅꠈꠘ ꠄꠞꠣꠞ ꠌꠣꠁꠔꠦ ꠔꠞ ꠟꠉꠦ ꠀꠞꠅ ꠛꠦꠡꠤ ꠈꠛꠤꠍꠤ ꠇꠞꠝꠥ।” ꠇꠁꠀꠃ ꠔꠣꠞꠣ ꠟꠥꠔꠞꠦ ꠑꠦꠟꠤꠀ ꠢꠞꠣꠁꠀ ꠖꠞꠎꠣ ꠜꠣꠋꠉꠔ ꠌꠣꠁꠟ।
GEN 19:10 ꠅꠃ ꠡꠝꠄ ꠢꠃ ꠖꠥꠁꠎꠘꠦ ꠀꠔ ꠛꠣꠠꠣꠁꠀ, ꠟꠥꠔꠞꠦ ꠊꠞꠞ ꠜꠤꠔꠞꠦ ꠐꠣꠘꠤꠀ ꠘꠤꠀ ꠖꠞꠎꠣ ꠛꠘ꠆ꠖ ꠇꠞꠤ ꠖꠤꠟꠣ।
GEN 19:11 ꠀꠞ ꠖꠞꠎꠣꠞ ꠛꠣꠞꠦ ꠃꠛꠣꠁꠟ ꠢꠥꠞꠥ-ꠛꠠ ꠢꠇꠟ ꠀꠈꠔꠣꠃ ꠀꠘ꠆ꠖꠣ ꠅꠁꠉꠦꠟ, ꠀꠞ ꠖꠞꠎꠣ ꠔꠥꠇꠣꠁꠔꠦ ꠔꠥꠇꠣꠁꠔꠦ ꠢꠦꠞꠣꠘ ꠅꠁꠉꠦꠟ।
GEN 19:12 ꠛꠣꠖꠦ ꠢꠃ ꠖꠥꠁꠅꠎꠘꠦ ꠟꠥꠔꠞꠦ ꠎꠤꠇꠣꠁꠟꠣ, “ꠁꠘꠅ ꠔꠥꠝꠣꠞ ꠀꠞ ꠇꠦ ꠇꠦ ꠀꠍꠦ? ꠔꠥꠝꠣꠞ ꠙꠥꠀ-ꠙꠥꠠꠤ ꠀꠞ ꠖꠣꠝꠣꠘ꠆ꠖꠞꠦ ꠟꠁꠀ ꠁꠘ ꠕꠘꠦ ꠢꠞꠤꠀ ꠎꠣꠅꠉꠤ।
GEN 19:13 ꠇꠣꠞꠘ ꠀꠝꠞꠣ ꠁ ꠎꠣꠉꠣꠞꠦ ꠍꠣꠞꠈꠣꠞ ꠇꠞꠤꠟꠣꠁꠀꠞ। ꠁꠘꠞ ꠝꠣꠘꠡꠞ ꠛꠤꠞꠥꠖ꠆ꠖꠦ ꠝꠣꠛꠥꠖꠞ ꠉꠦꠍꠦ ꠅꠃꠟꠣ ꠛꠦꠎꠥꠁꠔꠣ ꠘꠣꠟꠤꠡ ꠅꠁꠍꠦ ꠎꠦꠘ, ꠁꠇꠐꠣ ꠛꠤꠘꠣꠡ ꠇꠞꠣꠞ ꠟꠣꠉꠤ ꠔꠣꠁꠘ ꠀꠝꠞꠣꠞꠦ ꠙꠣꠑꠣꠁꠍꠂꠘ।”
GEN 19:14 ꠅꠃ ꠟꠥꠔꠦ ꠛꠣꠞꠦ ꠉꠤꠀ ꠔꠣꠘ ꠖꠣꠝꠣꠘ꠆ꠖ ꠅꠇꠟꠞꠦ ꠇꠁꠟꠣ, “ꠀꠅ, ꠔꠥꠝꠞꠣ ꠁ ꠎꠣꠉꠣ ꠍꠣꠠꠤꠀ ꠛꠣꠞꠅ ꠇꠣꠞꠘ ꠝꠣꠛꠥꠖꠦ ꠁ ꠐꠣꠃꠘꠞꠦ ꠛꠤꠘꠣꠡ ꠇꠞꠣꠞ ꠟꠣꠉꠤ ꠔꠤꠀꠞ ꠅꠁꠞꠁꠍꠂꠘ।” ꠅꠁꠟꠦ ꠔꠣꠞꠣ ꠝꠘꠦ ꠇꠞꠟ, ꠔꠣꠁꠘ ꠁꠔꠣ ꠔꠣꠝꠡꠣ ꠇꠞꠞꠣ।
GEN 19:15 ꠙꠔꠣꠛꠣꠟꠣ ꠢꠃ ꠚꠤꠞꠤꠡ꠆ꠔꠣꠄ ꠟꠥꠔꠞꠦ ꠔꠣꠉꠖꠣ ꠖꠤꠀ ꠇꠁꠟꠣ, “ꠃꠑꠅ, ꠎꠟꠖꠤ ꠇꠞꠤ ꠔꠥꠝꠣꠞ ꠛꠃ ꠀꠞ ꠁ ꠖꠥꠁꠅ ꠙꠥꠠꠤꠞꠦ ꠟꠁꠀ ꠅꠘ ꠕꠘꠦ ꠎꠣꠅꠉꠤ। ꠘꠣꠁꠟꠦ ꠅꠃ ꠉꠎꠛꠞ ꠝꠣꠎꠦ ꠙꠠꠤꠀ ꠛꠤꠘꠣꠡ ꠅꠁꠎꠤꠛꠣꠄ।”
GEN 19:16 ꠟꠥꠔꠦ ꠎꠣꠁ-ꠎꠣꠁꠞꠣꠝ ꠅꠃꠟꠣ ꠇꠞꠞꠣ। ꠅꠁꠟꠦ ꠝꠣꠛꠥꠖꠞ ꠝꠣꠄꠀ ꠔꠣꠘ ꠃꠙꠞꠦ ꠀꠍꠤꠟ ꠇꠞꠤ ꠢꠃ ꠖꠥꠁꠅꠎꠘꠦ, ꠔꠣꠁꠘ ꠀꠞ ꠔꠣꠘ ꠛꠃ ꠀꠞ ꠔꠣꠘ ꠖꠥꠁꠅ ꠙꠥꠠꠤꠘ꠆ꠔꠞ ꠀꠔꠅ ꠗꠞꠤ ꠐꠣꠘꠤꠀ ꠐꠣꠃꠘꠞ ꠛꠣꠞꠦ ꠟꠁꠀ ꠀꠁꠟꠣ।
GEN 19:17 ꠢꠇꠟꠞꠦ ꠛꠣꠞ ꠇꠞꠤꠀ ꠀꠘꠣꠞ ꠛꠣꠖꠦ ꠔꠣꠞꠣ ꠇꠁꠟꠣ, “ꠛꠣꠌꠔꠦ ꠌꠣꠁꠟꠦ ꠜꠣꠉꠅ, ꠈꠞꠦꠖꠤ ꠌꠣꠁꠅ ꠘꠣ, ꠜꠣꠉꠤꠀ ꠙꠣꠠꠅ ꠎꠣꠅ, ꠁ ꠕꠟ ꠎꠣꠉꠣꠞ ꠇꠥꠘꠥꠈꠣꠘꠅ ꠃꠛꠣꠁꠅ ꠘꠣ ꠀꠞꠘꠣꠄ ꠔꠥꠝꠞꠣꠅ ꠝꠞꠛꠣꠄ।”
GEN 19:18 ꠅꠃ ꠟꠥꠔꠦ ꠇꠁꠟꠣ, “ꠅ ꠀꠝꠣꠞ ꠝꠣꠟꠤꠇ ꠅꠇꠟ, ꠁꠟꠣ ꠇꠞꠂꠘ ꠘꠣ ꠎꠦꠘ;
GEN 19:19 ꠖꠦꠈꠃꠇ꠆ꠇꠣ, ꠀꠙꠘꠣꠞ ꠁ ꠉꠥꠟꠣꠝꠞꠦ ꠀꠙꠘꠦ ꠝꠦꠢꠦꠞꠛꠣꠘꠤ ꠇꠞꠍꠂꠘ, ꠀꠞ ꠀꠝꠣꠞ ꠎꠣꠘ ꠛꠣꠌꠣꠁꠛꠣꠞ ꠟꠣꠉꠤ ꠀꠙꠘꠦ ꠀꠝꠣꠞꠦ ꠝꠢꠣ ꠖꠄꠀ ꠖꠦꠈꠣꠁꠍꠂꠘ। ꠅꠁꠟꠦ ꠀꠝꠤ ꠜꠣꠉꠤꠀ ꠙꠣꠠꠅ ꠎꠣꠁꠔꠣꠝ ꠙꠣꠞꠔꠣꠝ ꠘꠣꠄ। ꠢꠄꠔ ꠁ ꠛꠤꠙꠖ ꠀꠁꠀ ꠀꠝꠣꠞꠦ ꠎꠣꠔꠣ ꠝꠣꠞꠤ ꠗꠞꠟꠦ, ꠀꠝꠤꠅ ꠝꠞꠝꠥ।
GEN 19:20 ꠖꠦꠈꠃꠇ꠆ꠇꠣ, ꠜꠣꠉꠤꠀ ꠎꠣꠁꠔꠦ ꠔ ꠅꠃ ꠢꠥꠞꠥ ꠉꠣꠃꠐꠣ ꠇꠣꠍꠣꠔ ꠀꠍꠦ। ꠎꠣꠘ ꠛꠣꠌꠣꠁꠛꠣꠞ ꠟꠣꠉꠤ ꠀꠝꠣꠞꠦ ꠅꠘꠅ ꠙꠣꠑꠣꠁ ꠖꠦꠃꠇ꠆ꠇꠣ। ꠉꠣꠃꠐꠣ ꠢꠥꠞꠥ-ꠝꠥꠞꠥ ꠀꠍꠦ।”
GEN 19:21 ꠔꠣꠁꠘ ꠇꠁꠟꠣ, “ꠑꠤꠇ ꠀꠍꠦ, ꠀꠝꠤ ꠔꠥꠝꠣꠞ ꠁ ꠀꠞꠎꠤ ꠝꠣꠘꠟꠣꠝ। ꠔꠥꠝꠤ ꠎꠦ ꠉꠣꠃꠞ ꠇꠕꠣ ꠇꠁꠟꠣꠄ, ꠁꠐꠣ ꠀꠝꠤ ꠗꠋꠡ ꠇꠞꠔꠣꠝ ꠘꠣꠄ।
GEN 19:22 ꠎꠟꠖꠤ ꠇꠞꠤ ꠢꠤꠘꠅ ꠎꠣꠅ। ꠔꠥꠝꠤ ꠢꠘꠅ ꠘꠣ ꠙꠃꠍꠣꠘꠤ ꠙꠞ꠆ꠎꠘ꠆ꠔ ꠀꠝꠤ ꠇꠥꠘ꠆ꠔꠣ ꠇꠞꠔꠣꠝ ꠙꠣꠞꠤꠀꠞ ꠘꠣ।” ꠟꠥꠔꠞ ꠇꠕꠣꠞ ꠟꠣꠉꠤ ꠢꠃ ꠉꠣꠃꠞ ꠘꠣꠝ ꠅꠁꠟ ꠍꠥꠀꠞ [ꠝꠣꠘꠤ, ꠢꠥꠞꠥ]।
GEN 19:23 ꠟꠥꠔꠦ ꠎꠦꠛꠟꠣ ꠍꠥꠀꠞꠅ ꠉꠤꠀ ꠙꠃꠍꠟꠣ ꠁ ꠡꠝꠄ ꠡꠥꠞꠥꠎ ꠃꠑꠤꠉꠦꠍꠦ।
GEN 19:24 ꠄꠞꠛꠣꠖꠦꠃ ꠝꠣꠛꠥꠖꠦ ꠀꠍꠝꠣꠘ ꠕꠣꠇꠤ ꠍꠣꠖꠥꠝ ꠀꠞ ꠀꠝꠥꠞꠣꠞ ꠃꠙꠞꠦ ꠀꠉꠥꠁꠘ ꠀꠞ ꠉꠘ꠆ꠖꠇꠞ ꠉꠎꠛ ꠍꠣꠠꠤꠟꠣ।
GEN 19:25 ꠔꠣꠁꠘ ꠢꠤ ꠐꠣꠃꠘ ꠅꠇꠟ, ꠢꠇꠟ ꠕꠟ ꠎꠣꠉꠣ, ꠢꠇ꠆ꠇꠟ ꠝꠣꠘꠥꠡ ꠀꠞ ꠢꠤ ꠝꠣꠐꠤꠞ ꠃꠙꠞꠞ ꠢꠇ꠆ꠇꠟꠔꠣ ꠗꠋꠡ ꠇꠞꠤꠟꠣꠁꠟꠣ।
GEN 19:26 ꠄꠞꠝꠣꠎꠦ ꠟꠥꠔꠞ ꠛꠃꠄ ꠈꠞꠦꠖꠤ ꠚꠤꠞꠤꠀ ꠌꠣꠅꠀꠄ, ꠔꠣꠁꠘ ꠄꠇꠐꠣ ꠘꠥꠘꠞ ꠌꠣꠇ꠆ꠇꠣ ꠅꠁꠉꠦꠟꠣ।
GEN 19:27 ꠛꠣꠖꠞ ꠖꠤꠘ ꠁꠛ꠆ꠞꠣꠢꠤꠝꠦ ꠛꠤꠀꠘꠦ ꠃꠑꠤꠀ ꠢꠃ ꠎꠣꠉꠣꠔ ꠉꠦꠟꠣ ꠎꠦꠘꠅ ꠀꠉꠞ ꠖꠤꠘ ꠔꠣꠁꠘ ꠝꠣꠛꠥꠖꠞ ꠉꠦꠍꠦ ꠃꠛꠣꠁꠍꠟꠣ।
GEN 19:28 ꠔꠣꠁꠘ ꠔꠟꠦ ꠍꠣꠖꠥꠝ, ꠀꠝꠥꠞꠣ ꠀꠞ ꠢꠇꠟ ꠕꠟ ꠎꠣꠉꠣꠞ ꠛꠣꠄ ꠌꠣꠁꠀ ꠖꠦꠈꠟꠣ, ꠁꠐ-ꠜꠣꠐ꠆ꠐꠣ ꠕꠣꠇꠤ ꠎꠦꠟꠣ ꠗꠥꠝꠣ ꠛꠣꠞꠅꠄ, ꠅꠃ ꠟꠣꠈꠣꠘ ꠢꠃ ꠄꠟꠣꠇꠣ ꠕꠣꠇꠤ ꠗꠥꠝꠣ ꠃꠠꠦꠞ।
GEN 19:29 ꠀꠞ ꠟꠥꠔꠦ ꠎꠦꠈꠣꠘꠅ ꠛꠡꠔ ꠇꠞꠔꠣ, ꠢꠃ ꠕꠟ ꠎꠣꠉꠣꠞ ꠐꠣꠃꠘ ꠅꠇꠟ ꠗꠋꠡ ꠇꠞꠣꠞ ꠡꠝꠄ, ꠀꠟ꠆ꠟꠣꠄ ꠁꠛ꠆ꠞꠣꠢꠤꠝꠞ ꠇꠕꠣ ꠝꠘꠅ ꠇꠞꠤꠀ ꠟꠥꠔꠞꠦ ꠢꠤꠘꠞ ꠉꠎꠛꠞ ꠝꠣꠎ ꠕꠣꠇꠤ ꠢꠞꠣꠁꠀ ꠀꠘꠟꠣ।
GEN 19:30 ꠍꠥꠀꠞ ꠉꠣꠃꠔ ꠞꠁꠔꠦ ꠒꠞꠣꠁꠟꠣ ꠇꠞꠤ, ꠟꠥꠔꠦ ꠔꠣꠘ ꠖꠥꠁꠅ ꠙꠥꠠꠤꠞꠦ ꠟꠁꠀ ꠢꠤꠘ ꠕꠣꠇꠤ ꠛꠣꠞ ꠅꠁꠀ ꠙꠣꠠꠅ ꠀꠁꠀ, ꠄꠇ ꠉꠣꠔꠞ ꠜꠤꠔꠞꠦ ꠞꠁꠟꠣ।
GEN 19:31 ꠄꠇꠖꠤꠘ ꠔꠣꠘ ꠛꠠ ꠙꠥꠠꠤꠄ ꠢꠥꠞꠥ ꠛꠁꠘꠞꠦ ꠇꠁꠟ, “ꠛꠣꠛꠣ ꠔ ꠝꠥꠞꠛ꠆ꠛꠤ ꠅꠁꠉꠦꠍꠂꠘ। ꠀꠞ ꠎꠉꠔꠞ ꠡꠝꠣꠎꠞ ꠘꠤꠅꠝ ꠝꠔ ꠀꠝꠞꠣꠞꠦ ꠛꠤꠀ ꠇꠞꠣꠞ ꠟꠣꠉꠤ ꠁꠘꠅ ꠇꠥꠘꠥ ꠛꠦꠐꠣꠁꠘꠅ ꠘꠣꠄ।
GEN 19:32 ꠔꠦ ꠀꠄ, ꠀꠝꠞꠣ ꠛꠣꠛꠣꠞꠦ ꠡꠞꠣꠛ ꠈꠣꠅꠀꠁꠀ ꠔꠣꠘ ꠇꠣꠍꠣꠔ ꠞꠁ। ꠔꠦꠃ ꠛꠣꠛꠣꠞꠦꠖꠤ ꠀꠝꠞꠣꠞ ꠛꠋꠡ ꠛꠣꠌꠣꠁꠔꠣꠝ ꠙꠣꠞꠝꠥ।”
GEN 19:33 ꠅꠃ ꠔꠣꠞꠣ ꠖꠥꠁꠅꠎꠘꠦ ꠞꠣꠁꠔꠞ ꠛꠣꠟꠣ ꠔꠣꠘꠞꠦ ꠡꠞꠣꠛ ꠈꠣꠅꠀꠁꠀ ꠐꠣꠟ ꠛꠣꠘꠣꠁꠟ। ꠛꠣꠖꠦ ꠛꠠ ꠛꠁꠘ ꠛꠣꠚꠞ ꠉꠦꠍꠦ ꠢꠥꠔꠤꠔ ꠉꠦꠟ, ꠅꠁꠟꠦ ꠇꠥꠘ ꠡꠝꠄ ꠢꠥꠔꠤꠟ ꠀꠞ ꠇꠥꠘ ꠡꠝꠄ ꠃꠑꠤꠟ, ꠛꠣꠚꠦ ꠇꠥꠘ꠆ꠔꠣꠃ ꠐꠦꠞ ꠙꠣꠁꠟꠣ ꠘꠣ।
GEN 19:34 ꠛꠣꠖꠞ ꠖꠤꠘ ꠛꠠꠉꠥꠄ ꠢꠥꠞꠥꠉꠥꠞꠦ ꠇꠁꠟ, “ꠖꠦꠈ, ꠇꠣꠁꠟ ꠞꠣꠁꠔ ꠀꠝꠤ ꠛꠣꠛꠣꠞ ꠉꠦꠍꠦ ꠢꠥꠔꠤꠍꠟꠣꠝ। ꠀꠄ, ꠀꠁꠎ ꠞꠣꠁꠔꠅ ꠔꠣꠘꠦ ꠅꠃꠟꠣ ꠡꠞꠣꠛ ꠈꠣꠅꠀꠁꠀ ꠐꠣꠟ ꠛꠣꠘꠣꠁ, ꠛꠣꠖꠦ ꠔꠥꠁꠅ ꠉꠤꠀ ꠔꠣꠘ ꠉꠦꠍꠦ ꠢꠥꠔꠤꠍ। ꠔꠦ ꠛꠣꠛꠣꠞꠦꠖꠤ ꠀꠝꠞꠣꠞ ꠛꠋꠡ ꠛꠣꠌꠣꠁꠔꠣꠝ ꠙꠣꠞꠝꠥ।”
GEN 19:35 ꠅꠃ ꠟꠣꠈꠣꠘ ꠔꠣꠞꠣ ꠢꠃ ꠞꠣꠁꠔꠅ ꠔꠣꠞꠣꠞ ꠛꠣꠚꠞꠦ ꠡꠞꠣꠛ ꠈꠣꠅꠀꠁꠀ ꠐꠣꠟ ꠛꠣꠘꠣꠁꠟ, ꠀꠞ ꠢꠥꠞꠥ ꠙꠥꠠꠤ ꠔꠣꠁꠞ ꠛꠣꠚꠞ ꠉꠦꠍꠦ ꠢꠥꠔꠤꠟ। ꠔꠣꠁ ꠇꠥꠘ ꠡꠝꠄ ꠢꠥꠔꠤꠟ ꠀꠞ ꠇꠥꠘ ꠡꠝꠄ ꠃꠑꠤꠟ, ꠁꠔꠣ ꠔꠣꠁꠘ ꠇꠥꠘ꠆ꠔꠣꠃ ꠐꠦꠞ ꠙꠣꠁꠟꠣ ꠘꠣ।
GEN 19:36 ꠅꠃ ꠘꠝꠥꠘꠣꠄ ꠟꠥꠔꠞ ꠖꠥꠁꠅ ꠙꠥꠠꠤꠞ ꠙꠦꠐꠅ ꠛꠣꠚꠞꠦꠖꠤ ꠢꠥꠞꠥꠔ꠆ꠔꠣ ꠀꠁꠟ।
GEN 19:37 ꠛꠣꠖꠦ ꠛꠠ ꠙꠥꠠꠤꠞ ꠊꠞꠅ ꠙꠥꠀ ꠅꠁꠟꠦ, ꠄꠞ ꠘꠣꠝ ꠞꠣꠈꠟ ꠝꠥꠀꠛ [ꠝꠣꠘꠤ, ꠛꠣꠛꠣꠞ ꠉꠦꠍ ꠕꠘꠦ]। ꠅꠃ ꠝꠥꠀꠛꠃ ꠅꠈꠘꠇꠥꠞ ꠝꠥꠀꠛꠤ ꠅꠇꠟꠞ ꠝꠥꠟ ꠛꠣꠚ।
GEN 19:38 ꠀꠞ ꠢꠥꠞꠥ ꠙꠥꠠꠤꠞꠅ ꠄꠇ ꠙꠥꠀ ꠅꠁꠟ, ꠄꠞ ꠘꠣꠝ ꠞꠣꠈꠟ ꠛꠤꠘ-ꠅꠝ꠆ꠝꠤ [ꠝꠣꠘꠤ, ꠀꠝꠣꠞ ꠝꠥꠟ꠆ꠟꠥꠇꠞ ꠙꠥꠀ]। ꠢꠦ ꠅꠈꠘꠇꠥꠞ ꠛꠘꠤ-ꠀꠝ꠆ꠝꠣꠘꠞ ꠝꠥꠟ ꠛꠣꠚ।
GEN 20:1 ꠀꠞ ꠁꠛ꠆ꠞꠣꠢꠤꠝꠦ ꠢꠤꠘ ꠕꠘꠦ ꠘꠦꠉꠦꠜꠞ ꠝꠞꠥꠜꠥꠝꠤꠞ ꠛꠣꠄ ꠉꠤꠀ ꠇꠣꠖꠦꠡ ꠀꠞ ꠡꠥꠞꠞ ꠝꠣꠎꠈꠣꠘꠅ ꠉꠦꠞꠣꠞ ꠖꠦꠡꠅ ꠞꠁꠟꠣ।
GEN 20:2 ꠢꠘꠅ ꠢꠤꠞꠛꠣꠞ ꠔꠣꠘ ꠛꠃ ꠍꠣꠄꠞꠣꠞꠦ ꠘꠤꠎꠞ ꠛꠁꠘ ꠇꠁꠀ ꠙꠞꠤꠌꠄ ꠖꠤꠟꠣ। ꠄꠞꠟꠣꠉꠤ ꠢꠤꠘꠞ ꠛꠣꠖꠡꠣ ꠀꠛꠤꠝꠣꠟꠤꠇꠦ ꠝꠣꠘꠥꠡꠖꠤ ꠍꠣꠄꠞꠣꠞꠦ ꠔꠣꠘ ꠉꠦꠍꠦ ꠘꠤꠟꠣꠉꠤ।
GEN 20:3 ꠀꠞ ꠞꠣꠁꠔ ꠀꠟ꠆ꠟꠣꠄ ꠀꠛꠤꠝꠣꠟꠤꠇꠞꠦ ꠈꠥꠀꠛꠦ ꠇꠁꠟꠣ, “ꠢꠥꠘꠅ, ꠅꠃ ꠎꠦ ꠛꠦꠐꠤꠞꠦ ꠔꠥꠝꠤ ꠟꠁꠀ ꠀꠁꠍ, ꠔꠣꠁꠞ ꠔ ꠎꠣꠝꠣꠁ ꠀꠍꠦ, ꠄꠞꠟꠣꠉꠤ ꠔꠥꠝꠤ ꠅꠈꠘ ꠝꠃꠔꠞ ꠝꠥꠈꠅ।”
GEN 20:4 ꠀꠛꠤꠝꠣꠟꠤꠇ ꠅꠈꠘꠅ ꠍꠣꠄꠞꠣꠞ ꠉꠦꠍꠦ ꠉꠦꠍꠂꠘ ꠘꠣ। ꠄꠞꠟꠣꠉꠤ ꠔꠣꠁꠘ ꠇꠁꠟꠣ, “ꠅ ꠝꠣꠟꠤꠇ, ꠘꠤ-ꠅꠙꠞꠣꠗꠤ ꠎꠣꠔꠤ ꠅꠁꠟꠦꠅ ꠇꠤꠔꠣ ꠀꠙꠘꠦ ꠝꠣꠞꠤꠟꠣꠁꠔꠣ ꠘꠤ?
GEN 20:5 ꠅꠃ ꠝꠣꠘꠥꠡꠐꠣꠄ ꠔ ꠘꠤꠎꠦꠃ ꠇꠁꠍꠦ, ꠄꠁꠘ ꠔꠣꠞ ꠛꠁꠘ। ꠀꠞ ꠅꠃ ꠛꠦꠐꠤꠄꠅ ꠇꠁꠍꠂꠘ ꠘꠣ ꠘꠤ, ꠄꠁꠘ ꠔꠣꠘ ꠜꠣꠁ? ꠀꠝꠤ ꠔ ꠡꠞꠟ ꠝꠘꠦ ꠘꠤ-ꠅꠙꠞꠣꠗꠤ ꠀꠔꠦ ꠁ ꠇꠣꠝ ꠇꠞꠍꠤ।”
GEN 20:6 ꠀꠟ꠆ꠟꠣꠄ ꠈꠥꠀꠛꠦ ꠔꠣꠘꠞꠦ ꠇꠁꠟꠣ, “ꠀꠝꠤꠅ ꠎꠣꠘꠤ, ꠔꠥꠝꠤ ꠡꠞꠟ ꠝꠘꠦ ꠁ ꠇꠣꠝ ꠇꠞꠍ। ꠄꠞꠟꠣꠉꠤ ꠔꠥꠝꠣꠞꠦ ꠉꠥꠘꠣꠞ ꠇꠣꠝ ꠕꠣꠇꠤ ꠀꠝꠤ ꠖꠝ ꠟꠅꠀꠁꠟꠣꠝ। ꠔꠣꠁꠞꠦ ꠍꠁꠔꠦ ꠖꠤꠟꠣꠝ ꠘꠣ।
GEN 20:7 ꠅꠈꠘ ꠔꠥꠝꠤ ꠔꠣꠘ ꠛꠤꠛꠤꠞꠦ ꠔꠣꠘ ꠉꠦꠍꠦ ꠚꠤꠞꠔ ꠖꠤꠟꠣꠅ। ꠔꠣꠁꠘ ꠄꠇꠎꠘ ꠘꠛꠤ। ꠔꠣꠁꠘ ꠔꠥꠝꠣꠞ ꠟꠣꠉꠤ ꠖꠥꠀ ꠇꠞꠛꠣ, ꠔꠦꠃ ꠔꠥꠝꠣꠞ ꠎꠣꠘ ꠛꠣꠌꠛ। ꠀꠞ ꠎꠥꠖꠤ ꠔꠣꠁꠞꠦ ꠚꠤꠞꠔ ꠘꠣ ꠖꠦꠅ, ꠔꠦ ꠎꠣꠘꠤꠟꠤꠅ, ꠔꠥꠝꠤ ꠀꠞ ꠔꠥꠝꠣꠞ ꠢꠇꠟꠃ ꠘꠤꠌꠄ ꠝꠞꠛꠣꠄ।”
GEN 20:8 ꠅꠃ ꠀꠛꠤꠝꠣꠟꠤꠇꠦ ꠚꠎꠞꠦ ꠃꠑꠤꠀ ꠔꠣꠘ ꠘꠤꠎꠞ ꠃꠎꠤꠞ-ꠘꠣꠎꠤꠞ ꠅꠇꠟꠞꠦ ꠁꠔꠣ ꠢꠇꠟꠔꠣ ꠇꠁꠟꠣ, ꠁꠔꠣ ꠢꠥꠘꠤꠀ ꠔꠣꠞꠣ ꠈꠥꠛ ꠛꠦꠡꠤ ꠒꠞꠣꠁꠟꠣ।
GEN 20:9 ꠛꠣꠖꠦ ꠀꠛꠤꠝꠣꠟꠤꠇꠦ ꠁꠛ꠆ꠞꠣꠢꠤꠝꠞꠦ ꠀꠘꠣꠁꠀ ꠇꠁꠟꠣ, “ꠀꠙꠘꠦ ꠀꠝꠞꠣꠞ ꠟꠉꠦ ꠁꠔꠣ ꠇꠥꠘ ꠎꠣꠔꠞ ꠛꠦꠛꠢꠣꠞ ꠇꠞꠟꠣ? ꠀꠝꠤ ꠀꠙꠘꠣꠞ ꠉꠦꠍꠦ ꠇꠤꠔꠣ ꠖꠥꠡ ꠇꠞꠍꠤ ꠎꠦꠘ, ꠀꠙꠘꠦ ꠀꠝꠣꠞꠦ ꠀꠞ ꠀꠝꠣꠞ ꠛꠣꠖꠡꠣꠁꠞꠦ ꠅꠔ ꠛꠠ ꠉꠥꠘꠣꠞ ꠖꠣꠄꠄ ꠚꠣꠟꠣꠁꠟꠣ? ꠀꠙꠘꠦ ꠔ ꠀꠝꠣꠞ ꠟꠉꠦ ꠁꠔꠣ ꠅꠁꠘ꠆ꠘꠣꠄ ꠇꠣꠝ ꠇꠞꠟꠣ।”
GEN 20:10 ꠀꠛꠤꠝꠣꠟꠤꠇꠦ ꠀꠞꠅ ꠇꠁꠟꠣ, “ꠀꠙꠘꠦ ꠇꠤꠔꠣ ꠖꠦꠈꠤꠀ ꠁꠟꠣ ꠇꠣꠝ ꠇꠞꠟꠣ?”
GEN 20:11 ꠁꠛ꠆ꠞꠣꠢꠤꠝꠦ ꠎꠥꠀꠙ ꠖꠤꠟꠣ, “ꠀꠝꠤ ꠝꠘꠦ ꠇꠞꠍꠟꠣꠝ, ꠁ ꠎꠣꠉꠣꠞ ꠝꠣꠘꠡꠞ ꠀꠟ꠆ꠟꠣꠞ ꠛꠣꠄ ꠇꠥꠘꠥ ꠒꠞ-ꠜꠄ ꠘꠣꠄ, ꠄꠞꠟꠣꠉꠤ ꠀꠝꠣꠞ ꠛꠃꠞ ꠟꠣꠟꠌꠦ ꠢꠄꠔ ꠔꠣꠞꠣ ꠀꠝꠣꠞꠦ ꠈꠥꠘ ꠇꠞꠛꠣ।
GEN 20:12 ꠀꠞ ꠔꠣꠁ ꠢꠣꠍꠣꠃ ꠀꠝꠣꠞ ꠛꠁꠘ ꠟꠣꠉꠦ, ꠇꠣꠞꠘ ꠔꠣꠁ ꠀꠝꠣꠞ ꠢꠣꠔꠘ ꠊꠞꠞ ꠛꠁꠘ, ꠀꠞ ꠅꠈꠘ ꠀꠝꠣꠞ ꠛꠃ।
GEN 20:13 ꠀꠟ꠆ꠟꠣꠄ ꠎꠦꠛꠟꠣ ꠀꠝꠣꠞꠦ ꠀꠝꠣꠞ ꠛꠣꠚꠞ ꠛꠣꠠꠤ ꠕꠘꠦ ꠛꠣꠞ ꠇꠞꠤ ꠀꠘꠟꠣ, ꠅꠃ ꠡꠝꠄ ꠀꠝꠤ ꠔꠣꠁꠞꠦ ꠇꠁꠍꠟꠣꠝ, ‘ꠔꠥꠝꠤ ꠀꠝꠣꠞꠦ ꠅꠃ ꠝꠣꠄꠀꠈꠣꠘ ꠇꠞꠤꠅ, ꠀꠝꠞꠣ ꠎꠦꠘꠅꠃ ꠎꠣꠁ ꠘꠣ ꠇꠦꠘꠦ, ꠔꠥꠝꠤ ꠀꠝꠣꠞꠦ ꠔꠥꠝꠣꠞ ꠜꠣꠁ ꠇꠁꠀ ꠙꠞꠤꠌꠄ ꠖꠤꠅ।’ ”
GEN 20:14 ꠛꠣꠖꠦ ꠀꠛꠤꠝꠣꠟꠤꠇꠦ ꠇꠔꠐꠣ ꠝꠦꠠꠣ-ꠉꠞꠥ, ꠛꠣꠘ꠆ꠖꠤ-ꠉꠥꠟꠣꠝ ꠁꠛ꠆ꠞꠣꠢꠤꠝꠞꠦ ꠖꠤꠟꠣ ꠀꠞ ꠔꠣꠘ ꠛꠤꠛꠤ ꠍꠣꠄꠞꠣꠞꠦꠅ ꠚꠤꠞꠔ ꠖꠤꠟꠣꠁꠟꠣ।
GEN 20:15 ꠀꠛꠤꠝꠣꠟꠤꠇꠦ ꠇꠁꠟꠣ, “ꠖꠦꠈꠃꠇ꠆ꠇꠣ, ꠀꠝꠣꠞ ꠀꠡ꠆ꠔꠣ ꠖꠦꠡꠐꠣꠃ ꠀꠙꠘꠣꠞ ꠍꠣꠝꠘꠦ ꠙꠠꠤ ꠞꠁꠍꠦ, ꠔꠦ ꠀꠙꠘꠣꠞ ꠎꠦꠘꠅ ꠙꠍꠘ꠆ꠖ ꠅꠘꠅꠃ ꠞꠃꠇ꠆ꠇꠣ।”
GEN 20:16 ꠔꠣꠁꠘ ꠍꠣꠄꠞꠣꠞꠦ ꠇꠁꠟꠣ, “ꠖꠦꠈꠃꠇ꠆ꠇꠣ, ꠀꠝꠤ ꠀꠙꠘꠣꠞ ꠜꠣꠁꠞꠦ ꠄꠇ ꠀꠎꠣꠞ ꠞꠥꠙꠣꠞ ꠐꠦꠇꠣ ꠖꠤꠟꠣꠝ। ꠀꠞ ꠀꠙꠘꠣꠞ ꠁꠎ꠆ꠎꠔꠞ ꠢꠇꠟ ꠛꠤꠌꠣꠞꠞ ꠚꠄꠍꠣꠟꠣ ꠅꠁꠟ।”
GEN 20:17 ꠛꠣꠖꠦ ꠁꠛ꠆ꠞꠣꠢꠤꠝꠦ ꠀꠟ꠆ꠟꠣꠞ ꠉꠦꠍꠦ ꠖꠥꠀ ꠇꠞꠟꠣ, ꠀꠞ ꠀꠟ꠆ꠟꠣꠄ ꠀꠛꠤꠝꠣꠟꠤꠇ, ꠔꠣꠘ ꠛꠃ ꠀꠞ ꠔꠣꠘ ꠛꠣꠘ꠆ꠖꠤ ꠅꠇꠟꠞꠦ ꠡꠤꠚꠣ ꠇꠞꠟꠣ ꠀꠞ ꠔꠣꠞꠣꠞ ꠢꠥꠞꠥꠔ꠆ꠔꠣꠅ ꠅꠁꠟꠣ।
GEN 20:18 ꠇꠣꠞꠘ ꠁꠛ꠆ꠞꠣꠢꠤꠝꠞ ꠛꠤꠛꠤ ꠍꠣꠄꠞꠣꠞ ꠟꠣꠉꠤ ꠝꠣꠛꠥꠖꠦ ꠀꠛꠤꠝꠣꠟꠤꠇꠞ ꠛꠣꠠꠤꠞ ꠢꠇꠟ ꠛꠦꠐꠤꠘ꠆ꠔꠞ ꠢꠥꠞꠥꠔ꠆ꠔꠣ ꠅꠀ ꠛꠘ꠆ꠖ ꠇꠞꠤ ꠖꠤꠍꠟꠣ।
GEN 21:1 ꠝꠣꠛꠥꠖꠦ ꠔꠣꠘ ꠇꠣꠟꠣꠝ ꠝꠥꠔꠣꠛꠦꠇ ꠛꠤꠛꠤ ꠍꠣꠄꠞꠣꠞꠦ ꠢꠦꠚꠣꠎꠔ ꠇꠞꠟꠣ, ꠔꠣꠁꠘ ꠎꠦꠟꠣ ꠅꠀꠖꠣ ꠇꠞꠍꠟꠣ, ꠅꠟꠣꠃ ꠇꠞꠟꠣ।
GEN 21:2 ꠀꠞ ꠛꠤꠛꠤ ꠍꠣꠄꠞꠣꠞ ꠙꠦꠐꠅ ꠢꠥꠞꠥꠔ꠆ꠔꠣ ꠀꠁꠟ। ꠀꠟ꠆ꠟꠣꠄ ꠎꠦ ꠡꠝꠄꠇꠥꠞ ꠇꠕꠣ ꠇꠁꠍꠟꠣ, ꠢꠃ ꠡꠝꠄꠄꠃ ꠁꠛ꠆ꠞꠣꠢꠤꠝꠞ ꠝꠥꠞꠛ꠆ꠛꠤ ꠛꠄꠅꠡꠅ ꠔꠣꠘ ꠙꠥꠀꠞ ꠎꠘꠝ ꠅꠁꠟ।
GEN 21:3 ꠁꠛ꠆ꠞꠣꠢꠤꠝꠦ ꠍꠣꠄꠞꠣꠞ ꠊꠞꠞ ꠔꠣꠘ ꠅꠃ ꠙꠥꠀꠞ ꠘꠣꠝ ꠞꠣꠈꠟꠣ ꠁꠍꠢꠣꠇ [ꠝꠣꠘꠤ, ꠀꠡꠣ]।
GEN 21:4 ꠀꠟ꠆ꠟꠣꠞ ꠢꠥꠇꠥꠝ ꠝꠔ ꠔꠣꠁꠘ ꠀꠐ ꠖꠤꠘꠞ ꠖꠤꠘ ꠔꠣꠘ ꠙꠥꠀ ꠁꠍꠢꠣꠇꠞ ꠝꠍꠟꠝꠣꠘꠤ ꠇꠣꠝ ꠇꠞꠣꠁꠟꠣ।
GEN 21:5 ꠁꠛ꠆ꠞꠣꠢꠤꠝꠞ ꠄꠇ-ꠡ ꠛꠍꠞꠞ ꠡꠝꠄ ꠔꠣꠘ ꠙꠥꠀ ꠁꠍꠢꠣꠇꠞ ꠎꠘꠝ ꠅꠁꠟ।
GEN 21:6 ꠛꠤꠛꠤ ꠍꠣꠄꠞꠣꠄ ꠇꠁꠟꠣ, “ꠀꠟ꠆ꠟꠣꠄ ꠀꠝꠣꠞ ꠝꠥꠈꠅ ꠀꠡꠤ ꠛꠣꠞ ꠇꠞꠟꠣ, ꠀꠞ ꠁꠔꠣ ꠎꠦ ꠢꠥꠘꠛ, ꠢꠦ-ꠅ ꠀꠝꠣꠞ ꠟꠉꠦ ꠀꠡꠤꠛ।”
GEN 21:7 ꠔꠣꠁꠘ ꠀꠞꠅ ꠇꠁꠟꠣ, “ꠍꠣꠄꠞꠣꠄ ꠙꠥꠀꠂꠘ꠆ꠔꠞꠦ ꠛꠥꠇꠥꠞ ꠖꠥꠗ ꠈꠣꠅꠀꠁꠛ, ꠁꠔꠣ ꠁꠛ꠆ꠞꠣꠢꠤꠝꠞꠦ ꠇꠦ ꠇꠁꠟ ꠅꠘꠦ? ꠀꠞ ꠅꠈꠘ ꠔ ꠅꠃ ꠛꠥꠠꠣ ꠛꠄꠅꠡꠅ, ꠀꠝꠣꠞ ꠙꠦꠐꠅ ꠔꠣꠘ ꠙꠥꠀ ꠙꠄꠖꠣ ꠅꠁꠟ।”
GEN 21:8 ꠁꠍꠢꠣꠇ ꠛꠠ ꠅꠀꠞ ꠛꠣꠖꠦ ꠎꠦꠖꠤꠘ ꠔꠣꠘꠦ ꠝꠣʼꠞ ꠖꠥꠗ ꠍꠣꠠꠣꠁꠟ ꠅꠁꠟ, ꠢꠃꠖꠤꠘ ꠁꠛ꠆ꠞꠣꠢꠤꠝꠦ ꠄꠇ ꠛꠠ ꠝꠦꠎꠛꠣꠘꠤ ꠇꠞꠟꠣ।
GEN 21:9 ꠀꠞ ꠝꠤꠡꠞꠤ ꠢꠣꠎꠦꠞꠣꠞ ꠙꠦꠐꠅ ꠁꠛ꠆ꠞꠣꠢꠤꠝꠞ ꠎꠦ ꠙꠥꠀ ꠅꠁꠍꠤꠟ, ꠍꠣꠄꠞꠣꠄ ꠖꠦꠈꠟꠣ ꠢꠦ ꠔꠣꠝꠡꠣ ꠇꠞꠦꠞ।
GEN 21:10 ꠅꠃ ꠔꠣꠁꠘ ꠁꠛ꠆ꠞꠣꠢꠤꠝꠞꠦ ꠇꠁꠟꠣ, “ꠙꠥꠀ ꠡꠢ ꠁ ꠛꠣꠘ꠆ꠖꠤꠞꠦ ꠛꠣꠞ ꠇꠞꠤ ꠖꠦꠅ, ꠛꠣꠘ꠆ꠖꠤꠞ ꠙꠥꠀ ꠀꠝꠣꠞ ꠁꠍꠢꠣꠇꠞ ꠟꠉꠦ ꠅꠋꠡꠤꠖꠣꠞ ꠅꠁꠔ ꠙꠣꠞꠔ ꠘꠣꠄ।”
GEN 21:11 ꠙꠥꠀꠞ ꠁꠔꠣ ꠢꠥꠘꠤꠀ ꠁꠛ꠆ꠞꠣꠢꠤꠝꠦ ꠝꠘꠅ ꠈꠥꠛ ꠔꠇꠟꠤꠚ ꠙꠣꠁꠟꠣ।
GEN 21:12 ꠅꠃ ꠀꠟ꠆ꠟꠣꠄ ꠔꠣꠘꠞꠦ ꠇꠁꠟꠣ, “ꠔꠥꠝꠣꠞ ꠛꠣꠘ꠆ꠖꠤ ꠀꠞ ꠔꠣꠁꠞ ꠙꠥꠀꠞ ꠟꠣꠉꠤ ꠔꠥꠝꠤ ꠛꠦꠎꠣꠞ ꠅꠁꠅ ꠘꠣ। ꠍꠣꠄꠞꠣꠄ ꠎꠦꠟꠣ ꠔꠥꠝꠣꠞꠦ ꠇꠁꠍꠦ ꠅꠃꠟꠣ ꠇꠞꠅ, ꠇꠣꠞꠘ ꠔꠥꠝꠣꠞ ꠙꠥꠀ ꠁꠍꠢꠣꠇꠞ ꠈꠣꠘ꠆ꠖꠣꠘꠞꠦꠃ ꠔꠥꠝꠣꠞ ꠈꠣꠘ꠆ꠖꠣꠘ ꠇꠁꠀ ꠉꠘꠣ ꠅꠁꠛ।
GEN 21:13 ꠀꠞ ꠁ ꠛꠣꠘ꠆ꠖꠤꠞ ꠔꠞꠚꠣ ꠙꠥꠀ ꠕꠣꠇꠤꠅ ꠀꠝꠤ ꠄꠇꠐꠣ ꠎꠣꠔꠤ ꠔꠂꠀꠞ ꠇꠞꠝꠥ, ꠇꠣꠞꠘ ꠢꠦ-ꠅ ꠔ ꠔꠥꠝꠣꠞ ꠀꠅꠟꠣꠖ।”
GEN 21:14 ꠅꠃ ꠁꠛ꠆ꠞꠣꠢꠤꠝꠦ ꠀꠉꠥꠀꠘ ꠃꠑꠤꠀ ꠇꠤꠍꠥ ꠞꠥꠐꠤ ꠀꠞ ꠙꠣꠘꠤ ꠜꠞꠣ ꠄꠇꠐꠣ ꠌꠣꠝꠠꠣꠞ ꠕꠟꠤ ꠢꠣꠎꠣꠁꠀ ꠢꠣꠎꠦꠞꠣꠞ ꠇꠣꠘ꠆ꠖꠅ ꠔꠥꠟꠤꠀ ꠖꠤꠀ, ꠙꠥꠀꠉꠥꠞꠦ ꠔꠣꠁꠞ ꠀꠔꠅ ꠡꠙꠤꠀ ꠛꠤꠖꠣꠄ ꠇꠞꠟꠣ। ꠢꠤꠘ ꠕꠘꠦ ꠛꠣꠞ ꠅꠁꠀ ꠢꠣꠎꠦꠞꠣꠄ ꠛꠦꠞ-ꠡꠦꠛꠣꠞ ꠝꠞꠥꠜꠥꠝꠤꠞ ꠝꠣꠎꠦ ꠌꠇ꠆ꠇꠞ ꠖꠤꠔꠣ ꠟꠣꠉꠟꠣ।
GEN 21:15 ꠕꠟꠤꠞ ꠙꠣꠘꠤ ꠡꠦꠡ ꠅꠁꠉꠦꠟꠦ ꠔꠣꠁꠘ ꠙꠥꠀꠞꠦ ꠄꠇꠐꠣ ꠎꠋꠟꠣꠞ ꠔꠟꠦ ꠢꠥꠔꠣꠁꠀ ꠕꠁꠟꠣ।
GEN 21:16 ꠀꠞ ꠄꠇ ꠒꠣꠇꠞ ꠙꠞꠤꠝꠣꠘ ꠖꠥꠞꠁ ꠉꠤꠀ ꠔꠣꠁꠘ ꠛꠁꠞꠁꠟꠣ। “ꠙꠥꠀꠞ ꠝꠃꠔ ꠎꠣꠔꠦ ꠀꠝꠣꠞ ꠌꠃꠈꠦ ꠘꠣ ꠖꠦꠈꠤ,” ꠝꠘꠦ ꠝꠘꠦ ꠇꠁꠀ, ꠔꠣꠁꠘ ꠢꠘꠅ ꠛꠁꠀꠃ ꠌꠤꠟ꠆ꠟꠣꠁꠀ ꠇꠣꠘ꠆ꠖꠤꠟꠣ।
GEN 21:17 ꠙꠥꠀꠉꠥꠞ ꠇꠣꠘ꠆ꠖꠘ ꠀꠟ꠆ꠟꠣꠄ ꠢꠥꠘꠟꠣ, ꠀꠞ ꠀꠟ꠆ꠟꠣꠞ ꠚꠤꠞꠤꠡ꠆ꠔꠣꠄ ꠀꠍꠝꠣꠘ ꠕꠘꠦ ꠒꠣꠇꠤꠀ ꠢꠣꠎꠦꠞꠣꠞꠦ ꠇꠁꠟꠣ, “ꠢꠣꠎꠦꠞꠣ, ꠅ ꠢꠣꠎꠦꠞꠣ, ꠔꠥꠝꠣꠞ ꠇꠤꠔꠣ ꠅꠁꠍꠦ? ꠒꠞꠣꠁꠅ ꠘꠣ, ꠙꠥꠀꠉꠥ ꠎꠦꠘꠅ ꠀꠍꠦ, ꠢꠘ ꠕꠣꠇꠤꠃ ꠔꠣꠞ ꠇꠣꠘ꠆ꠖꠘ ꠀꠟ꠆ꠟꠣꠄ ꠢꠥꠘꠍꠂꠘ।
GEN 21:18 ꠔꠥꠝꠤ ꠃꠑꠤꠀ ꠙꠥꠀꠉꠥꠞ ꠀꠔꠅ ꠗꠞꠅ, ꠀꠝꠤ ꠔꠣꠞꠦꠖꠤ ꠄꠇ ꠛꠤꠞꠣꠐ ꠎꠣꠔꠤ ꠙꠄꠖꠣ ꠇꠞꠝꠥ।”
GEN 21:19 ꠅꠃ ꠀꠟ꠆ꠟꠣꠄ ꠢꠣꠎꠦꠞꠣꠞ ꠌꠃꠈ ꠈꠥꠟꠤꠀ ꠖꠤꠟꠣ, ꠀꠞ ꠔꠣꠁꠘ ꠄꠇ ꠇꠥꠀ ꠖꠦꠈꠟꠣ। ꠢꠤ ꠇꠥꠀ ꠕꠘꠦ ꠌꠣꠝꠠꠣꠞ ꠕꠟꠤꠔ ꠙꠣꠘꠤ ꠜꠞꠤ ꠀꠘꠤꠀ ꠙꠥꠀꠞꠦ ꠈꠣꠅꠀꠁꠟꠣ।
GEN 21:20 ꠀꠟ꠆ꠟꠣꠄ ꠢꠃ ꠙꠥꠀꠞꠦ ꠢꠦꠚꠣꠎꠔ ꠇꠞꠟꠣ। ꠢꠦ ꠛꠠ ꠅꠁꠟ, ꠀꠞ ꠝꠞꠥꠜꠥꠝꠤꠔ ꠕꠣꠇꠤꠀ ꠔꠤꠞ-ꠗꠘꠥꠇ ꠌꠣꠟꠣꠘꠤꠞ ꠃꠡ꠆ꠔꠣꠖ ꠅꠁꠟ।
GEN 21:21 ꠢꠦ ꠚꠣꠞꠣꠘ ꠝꠞꠥꠜꠥꠝꠤꠔ ꠕꠣꠇꠔ। ꠔꠣꠞ ꠝꠣʼꠄ ꠝꠤꠡꠞꠞ ꠄꠇ ꠙꠥꠠꠤꠞꠦ ꠀꠘꠤꠀ ꠔꠣꠞꠦ ꠛꠤꠀ ꠇꠞꠣꠁꠟꠣ।
GEN 21:22 ꠢꠃ ꠡꠝꠄ ꠀꠛꠤꠝꠣꠟꠤꠇ ꠀꠞ ꠔꠣꠘ ꠡꠦꠘꠣꠙꠔꠤ ꠚꠤꠈꠥꠟꠦ ꠁꠛ꠆ꠞꠣꠢꠤꠝꠞꠦ ꠇꠁꠟꠣ, “ꠀꠙꠘꠦ ꠎꠦꠔꠣꠃ ꠇꠞꠂꠘ, ꠅꠔꠣꠔꠃ ꠀꠟ꠆ꠟꠣꠄ ꠀꠙꠘꠣꠞ ꠟꠉꠦ ꠕꠣꠇꠂꠘ।
GEN 21:23 ꠄꠞꠟꠣꠉꠤ ꠀꠟ꠆ꠟꠣꠞ ꠘꠣꠝꠦ ꠀꠙꠘꠦ ꠅꠈꠘ ꠅꠘꠅ ꠀꠝꠣꠞ ꠉꠦꠍꠦ ꠇꠍꠝ ꠇꠞꠃꠇ꠆ꠇꠣ, ꠀꠝꠣꠞ ꠛꠣ ꠀꠝꠣꠞ ꠀꠅꠟꠣꠖ ꠅꠇꠟꠞ ꠟꠉꠦ, ꠀꠙꠘꠦ ꠇꠥꠘꠥ ꠛꠦꠁꠝꠣꠘꠤ ꠇꠞꠔꠣ ꠘꠣꠄ। ꠀꠞ ꠀꠝꠤ ꠎꠦꠟꠣ ꠀꠙꠘꠣꠞꠦ ꠖꠄꠀ ꠖꠦꠈꠣꠁꠍꠤ, ꠀꠙꠘꠦꠅ ꠀꠝꠣꠞ ꠟꠉꠦ ꠀꠞ ꠀꠙꠘꠣꠞ ꠝꠥꠍꠣꠚꠤꠞꠤꠞ ꠎꠣꠉꠣ, ꠁ ꠖꠦꠡꠞ ꠟꠉꠦ ꠅꠃꠟꠣ ꠖꠄꠀꠞ ꠘꠎꠞ ꠞꠣꠈꠛꠣ।”
GEN 21:24 ꠁꠛ꠆ꠞꠣꠢꠤꠝꠦ ꠇꠁꠟꠣ, “ꠎꠤꠅꠄ, ꠇꠍꠝ ꠇꠞꠟꠣꠝ।”
GEN 21:25 ꠀꠞ ꠀꠛꠤꠝꠣꠟꠤꠇꠞ ꠉꠥꠟꠣꠝ ꠅꠇꠟꠦ ꠄꠇꠐꠣ ꠙꠣꠘꠤꠞ ꠇꠥꠀ ꠎꠥꠞꠦ ꠘꠤꠍꠤꠟꠉꠤ ꠇꠞꠤ, ꠔꠣꠁꠘ ꠘꠣꠟꠤꠡ ꠖꠤꠟꠣ।
GEN 21:26 ꠀꠛꠤꠝꠣꠟꠤꠇꠦ ꠎꠥꠀꠙ ꠖꠤꠟꠣ, “ꠁꠔꠣ ꠇꠣꠝ ꠇꠦ ꠇꠞꠍꠦ ꠀꠝꠤ ꠔ ꠎꠣꠘꠤ ꠘꠣ। ꠀꠙꠘꠦꠅ ꠀꠝꠣꠞꠦ ꠁꠔꠣ ꠇꠁꠍꠂꠘ ꠘꠣ, ꠀꠁꠎꠃ ꠀꠝꠤ ꠁꠇꠐꠣ ꠢꠥꠘꠟꠣꠝ।”
GEN 21:27 ꠛꠣꠖꠦ ꠁꠛ꠆ꠞꠣꠢꠤꠝꠦ ꠇꠤꠍꠥ ꠝꠦꠠꠣ ꠀꠞ ꠉꠞꠥ ꠀꠘꠤꠀ ꠀꠛꠤꠝꠣꠟꠤꠇꠞꠦ ꠖꠤꠟꠣ ꠀꠞ ꠖꠥꠁꠅꠎꠘꠦ ꠌꠥꠇ꠆ꠔꠤ ꠇꠞꠟꠣ।
GEN 21:28 ꠀꠞ ꠁꠛ꠆ꠞꠣꠢꠤꠝꠦ ꠙꠣꠟ ꠕꠘꠦ ꠡꠣꠔꠉꠥ ꠝꠦꠠꠤ-ꠛꠣꠁꠌ꠆ꠌꠣ ꠀꠟꠉꠣꠁꠟꠣ।
GEN 21:29 ꠀꠛꠤꠝꠣꠟꠤꠇꠦ ꠔꠣꠘꠦ ꠎꠤꠇꠣꠁꠟꠣ, “ꠁ ꠝꠦꠠꠤ-ꠛꠣꠁꠌ꠆ꠌꠣ ꠡꠣꠔꠉꠥ ꠀꠟꠉꠣ ꠇꠞꠣꠞ ꠝꠣꠘꠤ ꠇꠤꠔꠣ?”
GEN 21:30 ꠁꠛ꠆ꠞꠣꠢꠤꠝꠦ ꠇꠁꠟꠣ, “ꠀꠙꠘꠦ ꠅꠉꠥꠁꠘ꠆ꠔꠞꠦ ꠘꠦꠃꠇ꠆ꠇꠣ। ꠁ ꠇꠥꠀꠐꠣ ꠎꠦ ꠀꠝꠤ ꠈꠥꠖꠍꠤ ꠁꠇꠐꠣ ꠅꠁꠟ ꠔꠣꠞ ꠙꠞꠝꠣꠘ।”
GEN 21:31 ꠄꠞꠟꠣꠉꠤ ꠅꠃ ꠎꠣꠉꠣꠞ ꠘꠣꠝ ꠅꠁꠟ ꠛꠦꠞ-ꠡꠦꠛꠣ [ꠝꠣꠘꠤ, ꠇꠍꠝꠞ ꠇꠥꠀ], ꠅꠘꠅꠃ ꠔꠣꠞꠣ ꠖꠥꠁꠅ ꠎꠘꠦ ꠇꠍꠝ ꠇꠞꠍꠟꠣ।
GEN 21:32 ꠔꠣꠞꠣ ꠛꠦꠞ-ꠡꠦꠛꠣꠔ ꠅꠃ ꠌꠥꠇ꠆ꠔꠤ ꠇꠞꠣꠞ ꠛꠣꠖꠦ, ꠀꠛꠤꠝꠣꠟꠤꠇ ꠀꠞ ꠔꠣꠘ ꠡꠦꠘꠣꠙꠔꠤ ꠚꠤꠈꠥꠟ ꠃꠑꠤꠀ ꠚꠤꠟꠤꠡ꠆ꠔꠤꠘꠤ ꠅꠇꠟꠞ ꠖꠦꠡꠅ ꠚꠤꠞꠤꠀ ꠉꠦꠟꠣꠉꠤ।
GEN 21:33 ꠛꠣꠖꠦ ꠁꠛ꠆ꠞꠣꠢꠤꠝꠦ ꠛꠦꠞ-ꠡꠦꠛꠣꠔ ꠄꠇꠐꠣ ꠏꠣꠃ ꠉꠣꠍ ꠞꠥꠁꠟꠣ, ꠀꠞ ꠎꠦ ꠝꠣꠛꠥꠖꠞ ꠡꠥꠞꠥꠅ ꠘꠣꠄ ꠡꠦꠡꠅ ꠘꠣꠄ, ꠔꠣꠘ ꠄꠛꠣꠖꠔ ꠇꠞꠟꠣ।
GEN 21:34 ꠀꠞ ꠁꠛ꠆ꠞꠣꠢꠤꠝꠦ ꠚꠤꠟꠤꠡ꠆ꠔꠤꠘꠤ ꠅꠇꠟꠞ ꠖꠦꠡꠅ ꠛꠃꠔ ꠖꠤꠘ ꠇꠣꠐꠣꠁꠟꠣ।
GEN 22:1 ꠁ ꠊꠐꠘꠣꠞ ꠛꠣꠖꠦ ꠀꠟ꠆ꠟꠣꠄ ꠁꠛ꠆ꠞꠣꠢꠤꠝꠞ ꠄꠇ ꠙꠞꠤꠇ꠆ꠇꠣ ꠟꠁꠟꠣ। ꠀꠟ꠆ꠟꠣꠄ ꠔꠣꠘꠞꠦ ꠒꠣꠇ ꠖꠤꠟꠣ, “ꠁꠛ꠆ꠞꠣꠢꠤꠝ!” ꠔꠣꠁꠘ ꠎꠥꠀꠙ ꠖꠤꠟꠣ, “ꠅꠃꠘꠥ ꠀꠝꠤ।”
GEN 22:2 ꠝꠣꠛꠥꠖꠦ ꠚꠞꠝꠣꠁꠟꠣ, “ꠔꠥꠝꠣꠞ ꠙꠥꠀꠞꠦ, ꠎꠣꠞꠦ ꠔꠥꠝꠤ ꠅꠔ ꠝꠢꠛ꠆ꠛꠔ ꠇꠞꠅ, ꠢꠃ ꠈꠣꠍ ꠝꠣꠄꠀꠞ ꠙꠥꠔ ꠁꠍꠢꠣꠇꠞꠦ ꠟꠁꠀ ꠔꠥꠝꠤ ꠝꠥꠞꠤꠀ ꠄꠟꠣꠇꠣꠔ ꠎꠣꠅ। ꠢꠈꠣꠘꠅ ꠎꠦ ꠙꠣꠠꠞ ꠇꠕꠣ ꠀꠝꠤ ꠔꠥꠝꠣꠞꠦ ꠇꠁꠝꠥ, ꠄꠞ ꠃꠙꠞꠦ ꠔꠣꠞꠦ ꠘꠤꠀ ꠎꠣꠟꠣꠁꠟ ꠇꠥꠞꠛꠣꠘꠤ ꠖꠦꠅ।”
GEN 22:3 ꠔꠦꠃ ꠁꠛ꠆ꠞꠣꠢꠤꠝꠦ ꠚꠎꠞꠦ ꠃꠑꠤꠀ ꠉꠣꠗꠣꠞ ꠙꠤꠑꠤꠔ ꠉꠖ꠆ꠖꠤ ꠟꠣꠉꠣꠁꠀ ꠔꠣꠘ ꠙꠥꠀ ꠁꠍꠢꠣꠇ, ꠖꠥꠁꠎꠘ ꠉꠥꠟꠣꠝ ꠀꠞ ꠎꠣꠟꠣꠁꠟ ꠇꠥꠞꠛꠣꠘꠤꠞ ꠟꠣꠉꠤ ꠟꠣꠇꠠꠤ ꠇꠣꠐꠤꠀ ꠟꠁꠀ, ꠎꠦ ꠎꠣꠉꠣꠞ ꠇꠕꠣ ꠀꠟ꠆ꠟꠣꠄ ꠔꠣꠘꠞꠦ ꠇꠁꠍꠟꠣ, ꠢꠛꠣꠄꠖꠤ ꠞꠅꠀꠘꠣ ꠅꠁꠟꠣ।
GEN 22:4 ꠔꠤꠘ ꠖꠤꠘꠞ ꠖꠤꠘ ꠁꠛ꠆ꠞꠣꠢꠤꠝꠦ ꠌꠃꠈ ꠔꠥꠟꠤꠀ ꠌꠣꠁꠔꠦꠃ ꠖꠥꠞꠁ ꠕꠣꠇꠤ ꠢꠃ ꠎꠣꠉꠣꠈꠣꠘ ꠖꠦꠈꠟꠣ।
GEN 22:5 ꠅꠃ ꠔꠣꠘ ꠉꠥꠟꠣꠝ ꠅꠇꠟꠞꠦ ꠇꠁꠟꠣ, “ꠔꠥꠝꠞꠣ ꠉꠣꠗꠣꠐꠣ ꠟꠁꠀ ꠅꠘꠅ ꠃꠛꠣꠅ, ꠀꠝꠤ ꠀꠞ ꠀꠝꠣꠞ ꠙꠥꠀ ꠢꠘꠅ ꠉꠤꠀ ꠄꠛꠣꠖꠔꠤ ꠡꠦꠡ ꠇꠞꠤꠀ ꠢꠣꠞꠟꠦ ꠔꠥꠝꠞꠣꠞ ꠉꠦꠍꠦ ꠀꠁꠝꠥ।”
GEN 22:6 ꠁꠛ꠆ꠞꠣꠢꠤꠝꠦ ꠎꠣꠟꠣꠁꠟ ꠇꠥꠞꠛꠣꠘꠤꠞ ꠟꠣꠇꠠꠤꠞ ꠀꠐꠣ ꠔꠣꠘ ꠙꠥꠀ ꠁꠍꠢꠣꠇꠞ ꠇꠣꠘ꠆ꠖꠅ ꠔꠥꠟꠤꠀ ꠖꠤꠀ ꠘꠤꠎꠦ ꠀꠉꠥꠁꠘꠞ ꠙꠣꠔꠤꠟ ꠀꠞ ꠍꠥꠞꠤ ꠟꠁꠀ, ꠖꠥꠁꠅ ꠎꠘꠦ ꠍꠣꠝꠘꠞ ꠛꠣꠄ ꠀꠉꠥꠀꠁꠟꠣ।
GEN 22:7 ꠅꠃ ꠁꠍꠢꠣꠇꠦ ꠔꠣꠘ ꠛꠣꠚꠞꠦ ꠇꠁꠟꠣ, “ꠛꠣꠛꠣ।” ꠔꠣꠁꠘ ꠇꠁꠟꠣ, “ꠇꠤꠔꠣꠞꠦ ꠛꠣꠚ ꠇꠅ?” ꠁꠍꠢꠣꠇꠦ ꠇꠁꠟꠣ, “ꠁꠘꠅ ꠔ ꠟꠣꠇꠠꠤ ꠀꠞ ꠀꠉꠥꠁꠘ ꠀꠍꠦ, ꠔꠦ ꠇꠥꠞꠛꠣꠘꠤꠞ ꠝꠦꠠꠣ-ꠛꠣꠁꠌ꠆ꠌꠣ ꠇꠥꠀꠁ?”
GEN 22:8 ꠔꠣꠁꠘ ꠎꠥꠀꠙ ꠖꠤꠟꠣ, “ꠛꠣꠛꠣꠞꠦ, ꠇꠥꠞꠛꠣꠘꠤꠞ ꠟꠣꠉꠤ ꠀꠟ꠆ꠟꠣꠄ ꠘꠤꠎꠦꠃ ꠝꠦꠠꠣ-ꠛꠣꠁꠌ꠆ꠌꠣ ꠎꠥꠉꠣꠁꠛꠣ।” ꠅꠔꠣ ꠝꠣꠔꠔꠦ ꠝꠣꠔꠔꠦ ꠔꠣꠞꠣ ꠀꠉꠥꠀꠁ ꠉꠦꠟꠣ।
GEN 22:9 ꠀꠟ꠆ꠟꠣꠞ ꠙꠍꠘ꠆ꠖꠞ ꠎꠣꠉꠣꠔ ꠙꠃꠍꠤꠀ ꠁꠛ꠆ꠞꠣꠢꠤꠝꠦ ꠇꠥꠞꠛꠣꠘꠤ ꠈꠣꠘꠣ ꠛꠣꠘꠣꠁꠀ, ꠟꠣꠇꠠꠤ ꠢꠣꠎꠣꠁꠟꠣ। ꠛꠣꠖꠦ ꠘꠤꠎꠞ ꠙꠥꠀ ꠁꠍꠢꠣꠇꠞꠦ ꠛꠣꠘ꠆ꠖꠤꠀ ꠅꠃ ꠖꠣꠞꠥꠞ ꠃꠙꠞꠦ ꠢꠥꠔꠣꠁꠟꠣ।
GEN 22:10 ꠀꠞ ꠔꠣꠁꠘ ꠘꠤꠎꠞ ꠙꠥꠀꠞꠦ ꠇꠥꠞꠛꠣꠘꠤꠞ ꠟꠣꠉꠤ ꠍꠥꠞꠤ ꠀꠔꠅ ꠟꠁꠟꠣ।
GEN 22:11 ꠅꠃ ꠝꠣꠛꠥꠖꠞ ꠚꠤꠞꠤꠡ꠆ꠔꠣꠄ ꠀꠍꠝꠣꠘ ꠕꠘꠦ ꠔꠣꠘꠦ ꠒꠣꠇ ꠖꠤꠟꠣ, “ꠁꠛ꠆ꠞꠣꠢꠤꠝ! ꠅ ꠁꠛ꠆ꠞꠣꠢꠤꠝ!” ꠔꠣꠁꠘ ꠇꠁꠟꠣ, “ꠅꠃꠘꠥ ꠀꠝꠤ।”
GEN 22:12 ꠚꠤꠞꠤꠡ꠆ꠔꠣꠄ ꠇꠁꠟꠣ, “ꠙꠥꠀꠉꠥꠞ ꠛꠣꠄ ꠔꠥꠝꠣꠞ ꠀꠔ ꠔꠥꠟꠤꠅ ꠘꠣ, ꠔꠣꠞꠦ ꠀꠞ ꠇꠥꠘ꠆ꠔꠣꠃ ꠇꠞꠤꠅ ꠘꠣ। ꠔꠥꠝꠤ ꠎꠦꠘ ꠀꠟ꠆ꠟꠣꠞꠦ ꠒꠞꠣꠅ ꠁꠔꠣ ꠛꠥꠎꠣ ꠉꠦꠍꠦ, ꠇꠣꠞꠘ ꠀꠝꠣꠞꠦ ꠔꠥꠝꠣꠞ ꠙꠥꠀ, ꠔꠥꠝꠣꠞ ꠈꠣꠍ ꠝꠣꠄꠀꠞ ꠙꠥꠀ ꠖꠣꠘ ꠇꠞꠔꠦꠅ ꠘꠣ-ꠈꠥꠡ ꠅꠁꠍ ꠘꠣ।”
GEN 22:13 ꠁꠛ꠆ꠞꠣꠢꠤꠝꠦ ꠌꠃꠈ ꠔꠥꠟꠤ ꠌꠣꠁꠀ ꠖꠦꠈꠂꠘ, ꠔꠣꠘ ꠈꠞꠦ ꠄꠇꠐꠣ ꠖꠥꠝ꠆ꠛꠣ ꠀꠞ ꠔꠣꠞ ꠢꠤꠋ ꠎꠋꠉꠟꠞ ꠝꠣꠎꠦ ꠀꠐꠇꠤ ꠞꠁꠍꠦ। ꠅꠃ ꠔꠣꠁꠘ ꠉꠤꠀ ꠖꠥꠝ꠆ꠛꠣꠐꠣ ꠀꠘꠤꠀ, ꠘꠤꠎꠞ ꠙꠥꠀꠞ ꠛꠖꠟꠣ ꠎꠣꠟꠣꠁꠟ ꠇꠥꠞꠛꠣꠘꠤ ꠖꠤꠟꠣ।
GEN 22:14 ꠔꠣꠁꠘ ꠢꠤ ꠎꠣꠉꠣꠞ ꠘꠣꠝ ꠞꠣꠈꠟꠣ ꠁꠀꠅꠄꠢ-ꠎꠤꠞꠤꠢ [ꠝꠣꠘꠤ, ꠝꠣꠛꠥꠖꠦ ꠎꠥꠉꠣꠁꠘ]। ꠄꠞꠟꠣꠉꠤ ꠅꠈꠘꠅ ꠝꠣꠘꠡꠦ ꠇꠂꠘ, “ꠝꠣꠛꠥꠖꠞ ꠙꠣꠠꠅ ꠎꠥꠉꠣꠁꠟ ꠅꠁꠛ।”
GEN 22:15 ꠝꠣꠛꠥꠖꠞ ꠚꠤꠞꠤꠡ꠆ꠔꠣꠄ ꠀꠍꠝꠣꠘ ꠕꠘꠦ ꠢꠤꠞꠛꠣꠞ ꠁꠛ꠆ꠞꠣꠢꠤꠝꠞꠦ ꠒꠣꠇꠤꠀ ꠇꠁꠟꠣ,
GEN 22:16 “ꠢꠥꠘꠅ, ꠝꠣꠛꠥꠖꠦ ꠇꠁꠞꠣ, ꠔꠥꠝꠤ ꠅꠃꠟꠣ ꠇꠞꠟꠣꠄ, ꠔꠥꠝꠣꠞ ꠙꠥꠀꠞꠦ, ꠔꠥꠝꠣꠞ ꠈꠣꠍ ꠝꠣꠄꠀꠞ ꠙꠥꠀꠞꠦ ꠖꠣꠘ ꠇꠞꠔꠦꠅ ꠘꠣꠞꠣꠎ ꠅꠁꠟꠣꠄ ꠘꠣ। ꠄꠞꠟꠣꠉꠤ ꠀꠝꠤ ꠝꠣꠛꠥꠖꠦ ꠇꠍꠝ ꠇꠞꠤꠀ ꠇꠁꠀꠞ,
GEN 22:17 ꠀꠝꠤ ꠘꠤꠌꠄ ꠔꠥꠝꠣꠞꠦ ꠛꠞꠇꠔ ꠘꠣꠎꠤꠟ ꠇꠞꠝꠥ, ꠔꠥꠝꠣꠞ ꠛꠋꠡꠞꠦ ꠀꠍꠝꠣꠘꠞ ꠔꠦꠞꠣ ꠀꠞ ꠖꠞꠤꠀꠞ ꠌꠞꠞ ꠛꠣꠟꠥꠞ ꠟꠣꠈꠣꠘ ꠛꠦꠢꠤꠡꠣꠛ ꠇꠞꠝꠥ। ꠔꠥꠝꠣꠞ ꠛꠋꠡꠄ ꠔꠣꠞꠣꠞ ꠖꠥꠡꠝꠘꠞ ꠐꠣꠃꠘ ꠅꠇꠟ ꠖꠈꠟ ꠇꠞꠛꠣ।
GEN 22:18 ꠀꠞ ꠔꠥꠝꠣꠞ ꠛꠋꠡꠞ ꠃꠍꠤꠟ꠆ꠟꠣꠄ ꠖꠥꠘꠤꠀꠞ ꠢꠇꠟ ꠎꠣꠔꠤꠄ ꠛꠞꠇꠔ ꠢꠣꠍꠤꠟ ꠇꠞꠛꠣ। ꠇꠣꠞꠘ ꠔꠥꠝꠤ ꠀꠝꠣꠞ ꠢꠥꠇꠥꠝ ꠝꠣꠘꠍ।”
GEN 22:19 ꠛꠣꠖꠦ ꠁꠛ꠆ꠞꠣꠢꠤꠝꠦ ꠔꠣꠘ ꠉꠥꠟꠣꠝ ꠅꠇꠟꠞ ꠉꠦꠍꠦ ꠚꠤꠞꠤꠀ ꠀꠁꠟꠣ, ꠀꠞ ꠔꠣꠞꠣ ꠄꠇꠟꠉꠦ ꠛꠦꠞ-ꠡꠦꠛꠣ ꠘꠣꠝꠞ ꠎꠣꠉꠣꠔ ꠉꠦꠟꠣ। ꠅꠃ ꠎꠣꠉꠣꠔꠃ ꠔꠣꠁꠘ ꠛꠡꠔꠤ ꠇꠞꠟꠣ।
GEN 22:20 ꠁ ꠊꠐꠘꠣꠞ ꠛꠣꠖꠦ ꠁꠛ꠆ꠞꠣꠢꠤꠝꠦ ꠈꠛꠞ ꠙꠣꠁꠟꠣ, ꠔꠣꠘ ꠜꠣꠁ ꠘꠣꠢꠥꠞꠞ ꠛꠤꠛꠤ ꠝꠤꠟꠇꠣꠞ ꠇꠄꠉꠥ ꠙꠥꠀꠂꠘ ꠅꠁꠍꠂꠘ।
GEN 22:21 ꠄꠞ ꠛꠠ ꠙꠥꠀꠞ ꠘꠣꠝ ꠀꠃꠎ, ꠔꠣꠞ ꠜꠣꠁꠀꠁꠘ꠆ꠔꠞ ꠘꠣꠝ ꠛꠥꠎ, ꠀꠞ ꠅꠞꠣꠝꠞ ꠛꠣꠚ ꠇꠝꠥꠄꠟ,
GEN 22:22 ꠄꠞꠛꠣꠖꠦ ꠇꠦꠍꠖ, ꠢꠡꠅ, ꠙꠤꠟꠖꠡ, ꠎꠤꠖꠟꠚ ꠀꠞ ꠛꠕꠥꠄꠟ। ꠛꠕꠥꠄꠟꠞ ꠙꠥꠠꠤꠞ ꠘꠣꠝ ꠞꠦꠛꠦꠇꠣ।
GEN 22:23 ꠁꠛ꠆ꠞꠣꠢꠤꠝꠞ ꠜꠣꠁ ꠘꠣꠢꠥꠞꠞ ꠛꠤꠛꠤ ꠝꠤꠟꠇꠣꠞ ꠙꠦꠐꠅ ꠕꠣꠇꠤ ꠁ ꠀꠐꠎꠘ ꠙꠥꠀꠞ ꠎꠘꠝ ꠅꠁꠍꠤꠟ।
GEN 22:24 ꠘꠣꠢꠥꠞꠞ ꠄꠇ ꠢꠣꠋꠉꠣꠞ ꠛꠃ ꠀꠍꠤꠟ, ꠔꠣꠁꠞ ꠘꠣꠝ ꠞꠃꠝꠣ। ꠔꠣꠁꠞ ꠙꠦꠐꠅ ꠐꠦꠛꠢ, ꠉꠢꠝ, ꠔꠢꠡ ꠀꠞ ꠝꠣꠈꠣꠞ ꠎꠘꠝ ꠅꠁꠍꠤꠟ।
GEN 23:1 ꠛꠤꠛꠤ ꠍꠣꠄꠞꠣ ꠄꠇ-ꠡ ꠡꠣꠔꠣꠁꠡ ꠛꠞꠍ ꠛꠣꠌꠤꠟꠣ; ꠀꠟ꠆ꠟꠣꠄ ꠔꠣꠘꠦ ꠅꠔꠖꠤꠘꠞ ꠢꠣꠄꠀꠔꠤ ꠖꠤꠍꠟꠣ।
GEN 23:2 ꠛꠣꠖꠦ ꠇꠦꠘꠣꠘ ꠖꠦꠡꠞ ꠇꠤꠞꠤꠅꠔ-ꠅꠞ꠆ꠛ ꠝꠣꠘꠤ ꠢꠦꠛꠞꠘꠅ ꠁꠘ꠆ꠔꠦꠇꠣꠟ ꠇꠞꠟꠣ। ꠀꠞ ꠁꠛ꠆ꠞꠣꠢꠤꠝꠦ ꠔꠣꠘ ꠟꠣꠉꠤ ꠛꠃꠔ ꠇꠣꠘ꠆ꠖꠣ-ꠇꠣꠐꠤ ꠀꠞ ꠀꠢꠣꠎꠣꠞꠤ ꠇꠞꠟꠣ।
GEN 23:3 ꠢꠦꠡꠦ ꠔꠣꠘ ꠝꠥꠞ꠆ꠖꠣ ꠛꠤꠛꠤꠞ ꠉꠦꠍ ꠕꠘꠦ ꠢꠞꠤꠀ ꠉꠤꠀ ꠢꠃ ꠖꠦꠡꠞ ꠢꠤꠐ꠆ꠐꠤ ꠅꠇꠟꠞꠦ ꠇꠁꠟꠣ,
GEN 23:4 “ꠀꠝꠤ ꠔ ꠛꠤꠖꠦꠡꠤ ꠝꠥꠍꠣꠚꠤꠞ ꠅꠁꠀ ꠀꠙꠘꠣꠞꠣꠞ ꠅꠘꠅ ꠞꠁꠀꠞ। ꠝꠦꠢꠦꠞꠛꠣꠘꠤ ꠇꠞꠤ ꠇꠛꠞꠡ꠆ꠕꠣꠘ ꠛꠣꠘꠣꠁꠛꠣꠞ ꠟꠣꠉꠤ ꠀꠝꠣꠞꠦ ꠕꠥꠠꠣ ꠎꠝꠤ ꠖꠦꠃꠇ꠆ꠇꠣ, ꠀꠝꠤ ꠀꠝꠣꠞ ꠍꠣꠝꠘꠦ ꠕꠘꠦ ꠀꠝꠣꠞ ꠝꠥꠞ꠆ꠖꠣꠞꠦ ꠖꠣꠚꠘ ꠇꠞꠤ।”
GEN 23:5 ꠢꠤꠐ꠆ꠐꠤ ꠅꠇꠟꠦ ꠔꠣꠘꠦ ꠇꠁꠟꠣ,
GEN 23:6 “ꠢꠥꠎꠥꠞ, ꠀꠝꠞꠣꠞ ꠇꠕꠣ ꠢꠥꠘꠃꠇ꠆ꠇꠣ। ꠀꠙꠘꠦ ꠔ ꠀꠝꠞꠣꠞ ꠝꠣꠎꠦ ꠀꠟ꠆ꠟꠣꠞ ꠝꠢꠛ꠆ꠛꠔꠞ ꠛꠥꠎꠥꠞ꠆ꠉ। ꠀꠝꠞꠣꠞ ꠉꠥꠞꠥꠡ꠆ꠕꠣꠘꠞ ꠝꠣꠎꠦ ꠎꠦꠘꠅ ꠙꠍꠘ꠆ꠖ ꠅꠄ, ꠅꠘꠅꠃ ꠀꠙꠘꠣꠞ ꠝꠥꠞ꠆ꠖꠣꠞꠦ ꠖꠣꠚꠘ ꠇꠞꠃꠇ꠆ꠇꠣ। ꠔꠣꠘꠞꠦ ꠖꠣꠚꠘ ꠇꠞꠣꠞ ꠟꠣꠉꠤ ꠀꠝꠞꠣꠞ ꠇꠦꠃ-ꠃ ꠘꠤꠎꠞ ꠛꠣꠘꠣꠁꠟ ꠇꠄꠛꠞ ꠍꠣꠠꠔꠦ ꠅꠝꠔ ꠇꠞꠔ ꠘꠣꠄ।”
GEN 23:7 ꠅꠃ ꠁꠛ꠆ꠞꠣꠢꠤꠝꠦ ꠃꠛꠣꠁꠀ ꠢꠤꠘꠞ ꠢꠤꠐ꠆ꠐꠤ ꠅꠇꠟꠞ ꠍꠣꠝꠘꠦ ꠝꠣꠕꠣ ꠘꠥꠀꠁꠀ ꠁꠎ꠆ꠎꠔ ꠇꠞꠤ ꠇꠁꠟꠣ,
GEN 23:8 “ꠀꠝꠣꠞ ꠛꠤꠛꠤꠞꠦ ꠁꠘꠅ ꠖꠣꠚꠘ ꠇꠞꠣꠔ ꠎꠥꠖꠤ ꠀꠙꠘꠣꠞꠣꠞ ꠇꠥꠘꠥ ꠅꠝꠔ ꠘꠣ ꠕꠣꠇꠦ, ꠔꠦ ꠖꠄꠀ ꠇꠞꠤ ꠀꠝꠣꠞ ꠀꠞꠎꠤꠈꠣꠘ ꠢꠥꠘꠃꠇ꠆ꠇꠣ। ꠀꠙꠘꠣꠞꠣ ꠀꠝꠣꠞ ꠅꠁꠀ ꠡꠥꠢꠞꠞ ꠙꠥꠀ ꠁꠚ꠆ꠞꠥꠘꠞꠦ ꠇꠃꠇ꠆ꠇꠣ,
GEN 23:9 ꠔꠣꠘ ꠎꠝꠤꠘꠞ ꠢꠦꠡ ꠝꠣꠕꠣꠔ ꠝꠇꠙꠦꠟꠣ ꠎꠦ ꠉꠥꠢꠣ ꠀꠍꠦ, ꠅꠈꠣꠘꠔꠣ ꠎꠦꠘꠥ ꠇꠛꠞꠡ꠆ꠕꠣꠘ ꠛꠣꠘꠣꠘꠤꠞ ꠟꠣꠉꠤ ꠔꠣꠁꠘ ꠙꠥꠞꠣ ꠖꠣꠝ ꠟꠁꠀ ꠀꠝꠣꠞ ꠉꠦꠍꠦ ꠛꠦꠌꠤꠟꠣꠁꠘ।”
GEN 23:10 ꠀꠞꠅ ꠢꠤꠐ꠆ꠐꠤ ꠅꠇꠟꠞ ꠟꠉꠦ ꠁ ꠡꠝꠄ ꠁꠚ꠆ꠞꠥꠘꠅ ꠢꠘꠅ ꠛꠅꠀꠔ ꠀꠍꠟꠣ। ꠁꠛ꠆ꠞꠣꠢꠤꠝꠞ ꠝꠣꠔꠞ ꠎꠥꠀꠙꠦ ꠢꠃ ꠢꠤꠐ꠆ꠐꠤ ꠅꠇꠟꠞ ꠍꠣꠝꠘꠦ ꠁꠚ꠆ꠞꠥꠘꠦ ꠇꠁꠟꠣ,
GEN 23:11 “ꠘꠣ, ꠘꠣ, ꠀꠙꠘꠦ ꠖꠄꠀ ꠇꠞꠤ ꠀꠝꠣꠞ ꠝꠣꠔꠈꠣꠘ ꠢꠥꠘꠃꠇ꠆ꠇꠣ। ꠀꠝꠤ ꠢꠇꠟꠞ ꠍꠣꠝꠘꠦꠃ ꠁ ꠎꠝꠤ ꠀꠞ ꠉꠥꠢꠣ ꠀꠙꠘꠣꠞꠦ ꠖꠤꠟꠣꠁꠟꠣꠝ, ꠀꠙꠘꠣꠞ ꠝꠥꠞ꠆ꠖꠣꠞꠦ ꠖꠣꠚꠘ ꠇꠞꠤꠟꠣꠁꠘ।”
GEN 23:12 ꠔꠦꠃ ꠁꠛ꠆ꠞꠣꠢꠤꠝꠦ ꠢꠤꠞꠛꠣꠞ ꠢꠤꠘꠞ ꠢꠇꠟꠞ ꠍꠣꠝꠘꠦ ꠝꠣꠕꠣ ꠘꠥꠀꠁꠀ,
GEN 23:13 ꠢꠤ ꠖꠦꠡꠞ ꠢꠇ꠆ꠇꠟꠞꠦ ꠢꠥꠘꠣꠁꠀ ꠁꠚ꠆ꠞꠥꠘꠞꠦ ꠇꠁꠟꠣ, “ꠢꠥꠘꠃꠇ꠆ꠇꠣ, ꠎꠝꠤꠈꠣꠘꠞ ꠖꠣꠝ ꠀꠝꠤ ꠖꠤꠟꠣꠁ। ꠀꠙꠘꠦꠅ ꠎꠝꠤꠈꠣꠘꠞ ꠖꠣꠝ ꠘꠦꠃꠇ꠆ꠇꠣꠉꠤ, ꠛꠣꠖꠦ ꠀꠝꠣꠞ ꠝꠥꠞ꠆ꠖꠣꠞꠦ ꠅꠘꠅ ꠖꠣꠚꠘ ꠇꠞꠝꠥ।”
GEN 23:14 ꠁꠚ꠆ꠞꠥꠘꠦ ꠔꠣꠘꠞꠦ ꠎꠥꠀꠙ ꠖꠤꠟꠣ,
GEN 23:15 “ꠢꠥꠎꠥꠞ, ꠀꠝꠣꠞ ꠇꠕꠣ ꠢꠥꠘꠃꠇ꠆ꠇꠣ, ꠅꠃ ꠎꠝꠤꠈꠣꠘꠞ ꠖꠣꠝ ꠅꠁꠟꠉꠤ ꠌꠣꠁꠞ-ꠡ ꠔꠟꠣ ꠞꠥꠙꠣ, ꠔꠦ ꠀꠙꠘꠣꠞ-ꠀꠝꠣꠞ ꠟꠣꠉꠤ ꠁꠔꠣ ꠇꠥꠘ꠆ꠔꠣꠃ ꠘꠣꠄ। ꠀꠙꠘꠣꠞ ꠝꠥꠞ꠆ꠖꠣꠞꠦ ꠇꠄꠛꠞ ꠖꠤꠟꠣꠃꠇ꠆ꠇꠣ।”
GEN 23:16 ꠅꠃ ꠁꠛ꠆ꠞꠣꠢꠤꠝꠦ ꠁꠚ꠆ꠞꠥꠘꠞ ꠇꠕꠣ ꠝꠣꠘꠤꠀ ꠢꠤꠐ꠆ꠐꠤ ꠅꠇꠟꠞ ꠍꠣꠝꠘꠦ ꠔꠣꠁꠘ, ꠁꠚ꠆ꠞꠥꠘꠞ ꠌꠣꠅꠀ ꠖꠣꠝ ꠝꠣꠚꠤꠇ, ꠙꠣꠁꠇꠣꠞꠤ ꠝꠣꠙꠦ ꠌꠣꠁꠞ-ꠡ ꠔꠟꠣ ꠞꠥꠙꠣ ꠔꠣꠘꠞꠦ ꠝꠣꠙꠤꠀ ꠖꠤꠟꠣ।
GEN 23:17 ꠅꠃ ꠟꠣꠈꠣꠘ ꠝꠝ꠆ꠞꠤ ꠐꠣꠃꠘꠞ ꠉꠦꠍꠦ ꠝꠇꠙꠦꠟꠣꠔ ꠁꠚ꠆ꠞꠥꠘꠞ ꠎꠦ ꠎꠝꠤꠘ ꠀꠍꠤꠟ ꠢꠃ ꠎꠝꠤꠘ ꠀꠞ ꠢꠘꠞ ꠉꠥꠢꠣ ꠀꠞ ꠎꠝꠤꠘꠞ ꠌꠣꠁꠞꠅꠛꠣꠄ ꠎꠔ ꠉꠣꠍ-ꠉꠣꠍꠣꠟꠤ ꠀꠍꠤꠟ,
GEN 23:18 ꠁꠔꠣ ꠢꠇꠟꠔꠣꠃ ꠢꠤꠘꠞ ꠢꠤꠐ꠆ꠐꠤ ꠅꠇꠟ ꠀꠞ ꠐꠣꠃꠘꠞ ꠝꠥꠈꠞ ꠢꠇꠟꠞ ꠍꠣꠝꠘꠦ, ꠁꠛ꠆ꠞꠣꠢꠤꠝꠞ ꠝꠣꠟꠤꠇꠣꠘꠣꠄ ꠀꠁꠟ।
GEN 23:19 ꠛꠣꠖꠦ ꠁꠛ꠆ꠞꠣꠢꠤꠝꠦ ꠇꠦꠘꠣꠘ ꠖꠦꠡꠞ ꠝꠝ꠆ꠞꠤ ꠐꠣꠃꠘ ꠛꠣ ꠢꠦꠛꠞꠘꠞ ꠝꠇꠙꠦꠟꠣꠞ ꠉꠥꠢꠣꠔ ꠔꠣꠘ ꠛꠤꠛꠤ ꠍꠣꠄꠞꠣꠞꠦ ꠖꠣꠚꠘ ꠇꠞꠟꠣ।
GEN 23:20 ꠅꠃ ꠟꠣꠈꠣꠘ ꠝꠇꠙꠦꠟꠣꠞ ꠅꠃ ꠉꠥꠢꠣ ꠡꠢ ꠀꠡ꠆ꠔꠣ ꠎꠝꠤꠘꠈꠣꠘ ꠉꠥꠞꠥꠡ꠆ꠕꠣꠘꠞ ꠟꠣꠉꠤ, ꠢꠤꠐ꠆ꠐꠤ ꠅꠇꠟꠞ ꠀꠔ ꠕꠘꠦ ꠁꠛ꠆ꠞꠣꠢꠤꠝꠞ ꠀꠔꠅ ꠀꠁꠟ।
GEN 24:1 ꠁꠛ꠆ꠞꠣꠢꠤꠝ ꠁ ꠡꠝꠄ ꠈꠥꠛ ꠝꠥꠞꠛ꠆ꠛꠤ ꠀꠞ ꠎꠣꠅꠀꠉꠤꠞ ꠙꠕꠤ ꠅꠁꠉꠦꠍꠂꠘ। ꠝꠣꠛꠥꠖꠦ ꠔꠣꠘꠞꠦ ꠢꠇꠟꠛꠣꠄ ꠕꠘꠦ ꠛꠞꠇꠔ ꠘꠣꠎꠤꠟ ꠇꠞꠍꠟꠣ।
GEN 24:2 ꠀꠞ ꠔꠣꠘ ꠈꠣꠍ ꠉꠥꠟꠣꠝ, ꠛꠣꠠꠤꠞ ꠙꠥꠞꠣꠘ ꠎꠦ ꠉꠥꠟꠣꠝꠞ ꠃꠙꠞꠦ ꠔꠣꠘ ꠢꠇꠟꠔꠣꠞ ꠜꠣꠞ ꠖꠦꠅꠀ ꠀꠍꠤꠟ ꠔꠣꠞꠦ ꠇꠁꠟꠣ, “ꠔꠥꠝꠣꠞ ꠀꠔꠈꠣꠘ ꠀꠝꠣꠞ ꠃꠞꠣꠔꠞ ꠔꠟꠦ ꠢꠣꠞꠣꠅ।
GEN 24:3 ꠀꠝꠤ ꠔꠥꠝꠣꠞꠦ ꠀꠍꠝꠣꠘ-ꠎꠝꠤꠘꠞ ꠝꠣꠟꠤꠇ ꠀꠟ꠆ꠟꠣ ꠝꠣꠛꠥꠖꠞ ꠘꠣꠝꠦ ꠇꠍꠝ ꠇꠞꠣꠁꠀꠞ, ꠀꠝꠤ ꠎꠦ ꠇꠦꠘꠣꠘꠤ ꠅꠇꠟꠞ ꠝꠣꠎꠦ ꠕꠣꠇꠤꠀꠞ, ꠔꠣꠞꠣꠞ ꠇꠥꠘꠥ ꠙꠥꠠꠤꠞꠦ ꠀꠝꠣꠞ ꠙꠥꠀꠞ ꠛꠃ ꠛꠣꠘꠣꠁꠀ ꠔꠥꠝꠤ ꠀꠘꠤꠅ ꠘꠣ।
GEN 24:4 ꠔꠥꠝꠤ ꠀꠝꠣꠞ ꠖꠦꠡꠅ ꠉꠤꠀ, ꠀꠝꠣꠞ ꠙꠥꠀ ꠁꠍꠢꠣꠇꠞ ꠟꠣꠉꠤ ꠀꠝꠣꠞ ꠈꠦꠡ-ꠇꠥꠐꠥꠝꠞ ꠝꠣꠎ ꠕꠣꠇꠤ ꠄꠉꠥ ꠇꠁꠘꠣ ꠌꠣꠁꠀ ꠀꠘꠛꠣꠄ।”
GEN 24:5 ꠅꠃ ꠢꠤ ꠉꠥꠟꠣꠝꠦ ꠔꠣꠘꠞꠦ ꠇꠁꠟꠣ, “ꠎꠥꠖꠤ ꠇꠥꠘꠥ ꠙꠥꠠꠤꠄ ꠀꠝꠣꠞ ꠟꠉꠦ ꠁ ꠖꠦꠡꠅ ꠀꠁꠔꠦ ꠞꠣꠎꠤ ꠘꠣ ꠅꠁꠘ, ꠔꠣꠁꠟꠦ ꠎꠦ ꠖꠦꠡ ꠍꠣꠠꠤꠀ ꠀꠙꠘꠦ ꠀꠁꠍꠂꠘ, ꠀꠙꠘꠣꠞ ꠙꠥꠀꠞꠦ ꠀꠝꠤ ꠢꠘꠅ ꠟꠁꠀ ꠎꠣꠁꠔꠣꠝ ꠘꠤ?”
GEN 24:6 ꠔꠣꠁꠘ ꠇꠁꠟꠣ, “ꠈꠛꠞꠖꠣꠞ! ꠔꠥꠝꠤ ꠀꠝꠣꠞ ꠙꠥꠀꠞꠦ ꠇꠥꠘꠥꠝꠘ꠆ꠔꠦꠃ ꠢꠤꠘꠅ ꠟꠁꠀ ꠎꠣꠁꠅ ꠘꠣ।
GEN 24:7 ꠎꠦ ꠀꠍꠝꠣꠘꠤ ꠀꠟ꠆ꠟꠣ ꠝꠣꠛꠥꠖꠦ ꠀꠝꠣꠞꠦ, ꠀꠝꠣꠞ ꠛꠣꠚꠞ ꠛꠣꠠꠤ ꠀꠞ ꠎꠘꠝ ꠝꠣꠐꠤ ꠕꠘꠦ ꠛꠣꠞ ꠇꠞꠤꠀ ꠀꠘꠍꠂꠘ, ꠔꠣꠁꠘ ꠀꠝꠣꠞ ꠟꠉꠦ ꠛꠣꠔ-ꠍꠅꠀꠟ ꠇꠞꠤ ꠇꠍꠝ ꠇꠞꠤꠀ ꠇꠁꠍꠂꠘ, ꠁ ꠖꠦꠡꠈꠣꠘ ꠔꠣꠁꠘ ꠀꠝꠣꠞ ꠅꠀꠞꠤꠡ ꠅꠇꠟꠞꠦ ꠖꠤꠛꠣ। ꠔꠣꠁꠘ ꠔꠥꠝꠣꠞ ꠀꠉꠦꠃ ꠔꠣꠘ ꠚꠤꠞꠤꠡ꠆ꠔꠣꠞꠦ ꠢꠘꠅ ꠙꠣꠑꠣꠁꠛꠣ, ꠎꠣꠔꠦ ꠀꠝꠣꠞ ꠙꠥꠀꠞ ꠟꠣꠉꠤ ꠔꠥꠝꠤ ꠢꠘ ꠕꠘꠦ ꠄꠉꠥ ꠇꠁꠘꠣ ꠀꠘꠔꠣꠄ ꠙꠣꠞ।
GEN 24:8 ꠎꠥꠖꠤ ꠇꠥꠘꠥ ꠙꠥꠠꠤꠄ ꠔꠥꠝꠣꠞ ꠟꠉꠦ ꠀꠁꠔꠦ ꠞꠣꠎꠤ ꠘꠣ ꠅꠄ, ꠔꠦ ꠀꠝꠣꠞ ꠁ ꠇꠍꠝ ꠕꠣꠇꠤ ꠔꠥꠝꠤ ꠈꠣꠟꠣꠍ; ꠔꠣ-ꠅ ꠀꠝꠣꠞ ꠙꠥꠀꠞꠦ ꠔꠥꠝꠤ ꠇꠥꠘꠥ ꠟꠣꠈꠣꠘꠃ ꠢꠤꠘꠅ ꠟꠁꠀ ꠎꠣꠁꠅ ꠘꠣ।”
GEN 24:9 ꠅꠃ ꠢꠤ ꠉꠥꠟꠣꠝꠦ ꠔꠣꠘ ꠝꠥꠘꠤꠛ ꠁꠛ꠆ꠞꠣꠢꠤꠝꠞ ꠃꠞꠣꠔꠞ ꠔꠟꠦ ꠀꠔ ꠢꠣꠞꠣꠁꠀ ꠅꠃꠟꠣ ꠇꠍꠝ ꠇꠞꠟꠣ।
GEN 24:10 ꠛꠣꠖꠦ ꠢꠃ ꠉꠥꠟꠣꠝꠦ ꠔꠣꠘ ꠝꠥꠘꠤꠛꠞ ꠃꠐꠞ ꠙꠣꠟ ꠕꠣꠇꠤ ꠖꠡꠐꠣ ꠃꠐ ꠟꠁꠟꠣ। ꠀꠞ ꠝꠥꠘꠤꠛꠞ ꠜꠣꠟꠣ ꠜꠣꠟꠣ ꠎꠤꠘꠤꠡ ꠅꠇꠟ ꠟꠁꠀ, ꠅꠞꠣꠝ-ꠘꠢꠞꠄꠁꠝ ꠖꠦꠡꠞ ꠎꠦꠘꠅ ꠘꠣꠢꠥꠞ ꠕꠣꠇꠔꠣ ꠢꠛꠣꠄꠖꠤ ꠞꠅꠀꠘꠣ ꠅꠁꠟꠣ।
GEN 24:11 ꠀꠞ ꠢꠣꠁꠘ꠆ꠎꠣ ꠛꠣꠟꠣ ꠎꠦꠛꠟꠣ ꠛꠦꠐꠤꠘ꠆ꠔꠦ ꠙꠣꠘꠤ ꠀꠘꠣꠔ ꠛꠣꠞ ꠅꠁꠘ, ꠅꠃ ꠡꠝꠄ ꠢꠤ ꠉꠥꠟꠣꠝꠦ ꠐꠣꠃꠘꠞ ꠛꠣꠞꠦ ꠄꠇ ꠇꠥꠀꠞ ꠇꠣꠍꠣꠔ ꠔꠣꠘ ꠃꠐ ꠅꠇꠟꠞꠦ ꠕꠁꠟꠣ।
GEN 24:12 ꠕꠁꠀ ꠅꠃ ꠖꠥꠀ ꠇꠞꠟꠣ, “ꠅ ꠝꠣꠛꠥꠖ, ꠀꠝꠣꠞ ꠝꠥꠘꠤꠛ ꠁꠛ꠆ꠞꠣꠢꠤꠝꠞ ꠀꠟ꠆ꠟꠣ, ꠀꠞꠎ ꠇꠞꠤ, ꠀꠁꠎ ꠀꠝꠣꠞ ꠍꠣꠝꠘꠦ ꠇꠣꠝꠤꠀꠛꠤ ꠎꠣꠁꠞ ꠇꠞꠅ, ꠀꠞ ꠀꠝꠣꠞ ꠝꠥꠘꠤꠛ ꠁꠛ꠆ꠞꠣꠢꠤꠝꠞꠦ ꠝꠦꠢꠦꠞꠛꠣꠘꠤ ꠇꠞꠅ।
GEN 24:13 ꠖꠦꠈꠅ, ꠁ ꠐꠣꠃꠘꠞ ꠙꠥꠠꠤꠘ꠆ꠔꠦ ꠙꠣꠘꠤ ꠘꠦꠅꠀꠔ ꠀꠁꠞꠣ ꠀꠞ ꠀꠝꠤ ꠁꠘꠅ ꠇꠥꠀꠞ ꠇꠣꠍꠣꠔ ꠃꠛꠣꠁ ꠞꠁꠍꠤ।
GEN 24:14 ꠔꠦ ꠅꠃ ꠙꠥꠠꠤꠘ꠆ꠔꠞ ꠝꠣꠎꠦ ꠀꠝꠤ ꠎꠣꠞꠦ ꠇꠁꠝꠥ, ‘ꠀꠙꠘꠣꠞ ꠈꠂꠟꠣ ꠟꠣꠝꠣꠁꠀ ꠀꠝꠣꠞꠦ ꠕꠥꠠꠣ ꠙꠣꠘꠤ ꠈꠣꠅꠀꠃꠇ꠆ꠇꠣ’, ꠄꠞ ꠎꠥꠀꠙꠦ ꠎꠥꠖꠤ ꠢꠃ ꠙꠥꠠꠤꠄ ꠇꠂꠘ, ‘ꠀꠙꠘꠦ ꠙꠣꠘꠤ ꠈꠣꠃꠇ꠆ꠇꠣ ꠀꠞ ꠀꠙꠘꠣꠞ ꠃꠐ ꠅꠇꠟꠞꠦꠅ ꠀꠝꠤ ꠙꠣꠘꠤ ꠈꠣꠅꠀꠁꠝꠥ’ ꠔꠣꠁꠟꠦ ꠅꠃ ꠙꠥꠠꠤꠃ ꠎꠣꠘꠥ ꠔꠥꠝꠣꠞ ꠉꠥꠟꠣꠝ ꠁꠍꠢꠣꠇꠞ ꠟꠣꠉꠤ ꠔꠥꠝꠣꠞ ꠙꠍꠘ꠆ꠖꠞ ꠙꠥꠠꠤ ꠅꠁꠘ। ꠔꠦꠃ ꠀꠝꠤ ꠛꠥꠎꠝꠥ, ꠔꠥꠝꠤ ꠀꠝꠣꠞ ꠝꠥꠘꠤꠛꠞꠦ ꠝꠦꠢꠦꠞꠛꠣꠘꠤ ꠇꠞꠟꠣꠄ।”
GEN 24:15 ꠔꠣꠘ ꠖꠥꠀ ꠡꠦꠡ ꠘꠣ ꠅꠁꠔꠦꠃ ꠛꠕꠥꠄꠟꠞ ꠙꠥꠠꠤ ꠞꠦꠛꠦꠇꠣꠄ ꠇꠣꠈꠅ ꠈꠂꠟꠣ ꠟꠁꠀ ꠐꠣꠃꠘ ꠕꠣꠇꠤ ꠛꠣꠞ ꠅꠁꠀ ꠀꠁꠟꠣ। ꠅꠃ ꠛꠕꠥꠄꠟ ꠅꠁꠟꠣ ꠁꠛ꠆ꠞꠣꠢꠤꠝꠞ ꠜꠣꠁ ꠘꠣꠢꠥꠞꠞ ꠛꠤꠛꠤ ꠝꠤꠟꠇꠣꠞ ꠙꠥꠀ।
GEN 24:16 ꠞꠦꠛꠦꠇꠣ ꠀꠍꠟꠣ ꠈꠥꠛ ꠡꠥꠘ꠆ꠖꠞꠤ, ꠀꠛꠤꠀꠔꠤ, ꠡꠔꠤ ꠘꠣꠞꠤ। ꠔꠣꠁꠘ ꠇꠥꠀ ꠕꠣꠇꠤ ꠈꠂꠟꠣ ꠜꠞꠤꠀ ꠎꠦꠛꠟꠣ ꠃꠑꠤꠀ ꠀꠁꠞꠣ,
GEN 24:17 ꠅꠃ ꠡꠝꠄꠃ ꠁꠛ꠆ꠞꠣꠢꠤꠝꠞ ꠉꠥꠟꠣꠝꠦ ꠖꠃꠠꠣꠁꠀ ꠔꠣꠘ ꠉꠦꠍꠦ ꠉꠤꠀ ꠇꠁꠟꠣ, “ꠖꠄꠀ ꠇꠞꠤ ꠀꠙꠘꠣꠞ ꠈꠂꠟꠣ ꠕꠣꠇꠤ ꠀꠝꠣꠞꠦ ꠕꠥꠠꠣ ꠙꠣꠘꠤ ꠈꠣꠅꠀꠃꠇ꠆ꠇꠣ।”
GEN 24:18 ꠞꠦꠛꠦꠇꠣꠄ ꠇꠁꠟꠣ, “ꠢꠥꠎꠥꠞ, ꠙꠣꠘꠤ ꠈꠣꠃꠇ꠆ꠇꠣ।” ꠅꠃ ꠇꠕꠣ ꠇꠁꠀꠃ ꠔꠣꠁꠘ ꠎꠟꠖꠤ ꠇꠞꠤ ꠈꠂꠟꠣꠐꠣ ꠇꠣꠈꠅ ꠕꠘꠦ ꠀꠔꠅ ꠀꠘꠤꠀ ꠙꠣꠘꠤ ꠈꠣꠁꠔꠦ ꠖꠤꠟꠣ।
GEN 24:19 ꠙꠣꠘꠤ ꠈꠣꠅꠀꠁꠛꠣꠞ ꠛꠣꠖꠦ ꠞꠦꠛꠦꠇꠣꠄ ꠔꠣꠘꠞꠦ ꠇꠁꠟꠣ, “ꠀꠝꠤ ꠀꠙꠘꠣꠞ ꠃꠐ ꠅꠇꠟꠞꠦꠅ ꠔꠣꠞꠣꠞ ꠙꠤꠀꠍ ꠝꠤꠐꠣꠁꠀ ꠙꠣꠘꠤ ꠈꠣꠅꠀꠁꠝꠥ, ꠔꠣꠞꠣ ꠙꠦꠐ ꠜꠞꠤꠀ ꠙꠣꠘꠤ ꠈꠣꠁꠛꠣ।”
GEN 24:20 ꠇꠁꠀꠃ ꠔꠣꠁꠘ ꠎꠟꠖꠤ ꠇꠞꠤ ꠙꠣꠘꠤꠞ ꠉꠣꠝꠟꠣꠔ ꠈꠂꠟꠣꠞ ꠙꠣꠘꠤ ꠓꠣꠟꠤꠀ ꠢꠤꠞꠛꠣꠞ ꠖꠃꠠꠣꠁꠀ ꠇꠥꠀꠞ ꠉꠦꠍꠦ ꠉꠦꠟꠣ। ꠀꠞ ꠢꠇꠟ ꠃꠐꠞꠦ ꠙꠣꠘꠤ ꠔꠥꠟꠤ ꠖꠤꠟꠣ।
GEN 24:21 ꠝꠣꠛꠥꠖꠦ ꠔꠣꠘ ꠁ ꠍꠚꠞ ꠇꠣꠝꠤꠀꠛ ꠇꠞꠍꠂꠘ ꠇꠤ ꠘꠣ ꠁꠐꠣ ꠎꠣꠘꠣꠞ ꠟꠣꠉꠤ ꠢꠤ ꠉꠥꠟꠣꠝꠦ ꠘꠤꠞꠛꠦ ꠞꠦꠛꠦꠇꠣꠞ ꠛꠣꠄ ꠌꠣꠁ ꠞꠁꠟꠣ।
GEN 24:22 ꠃꠐ ꠅꠇꠟꠦ ꠙꠣꠘꠤ ꠈꠣꠁꠀ ꠢꠣꠞꠟꠦ, ꠔꠣꠁꠘ ꠀꠗꠣ ꠔꠟꠣꠞ ꠄꠇꠐꠣ ꠡꠥꠘꠣꠞ ꠘꠣꠇꠞ ꠘꠕ ꠀꠞ ꠖꠥꠁ ꠀꠔꠅ ꠖꠡ ꠔꠟꠣꠞ ꠖꠥꠁꠐꠣ ꠡꠥꠘꠣꠞ ꠛꠣꠟꠣ ꠞꠦꠛꠦꠇꠣꠞꠦ ꠖꠤꠀ ꠎꠤꠇꠣꠁꠟꠣ,
GEN 24:23 “ꠀꠙꠘꠣꠞ ꠛꠣꠛꠣꠞ ꠘꠣꠝ ꠇꠤꠔꠣ? ꠀꠙꠘꠦ ꠇꠃꠇ꠆ꠇꠣ ꠌꠣꠁꠘ, ꠀꠙꠘꠣꠞ ꠛꠣꠚꠞ ꠛꠣꠠꠤꠔ ꠀꠝꠞꠣꠞ ꠞꠣꠁꠔ ꠕꠣꠇꠣꠞ ꠎꠣꠉꠣ ꠅꠁꠛ ꠘꠤ?”
GEN 24:24 ꠞꠦꠛꠦꠇꠣꠄ ꠇꠁꠟꠣ, “ꠀꠝꠣꠞ ꠛꠣꠛꠣꠞ ꠘꠣꠝ ꠛꠕꠥꠄꠟ। ꠖꠣꠖꠣꠞ ꠘꠣꠝ ꠘꠣꠢꠥꠞ ꠀꠞ ꠖꠣꠖꠤꠞ ꠘꠣꠝ ꠝꠤꠟꠇꠣ।
GEN 24:25 ꠔꠦ ꠀꠙꠘꠣꠞ ꠃꠐꠞ ꠈꠣꠘꠤꠞ ꠟꠣꠉꠤ ꠀꠝꠞꠣꠞ ꠛꠣꠠꠤꠔ ꠛꠃꠔ ꠈꠦꠞ-ꠜꠥꠡꠤ ꠀꠍꠦ ꠀꠞ ꠞꠁꠛꠣꠞ ꠎꠣꠉꠣꠅ ꠀꠍꠦ।”
GEN 24:26 ꠅꠃ ꠢꠤ ꠉꠥꠟꠣꠝꠦ ꠝꠣꠛꠥꠖꠞ ꠍꠁꠎꠖꠣ ꠇꠞꠤꠀ ꠇꠁꠟꠣ,
GEN 24:27 “ꠢꠇ꠆ꠇꠟ ꠙ꠆ꠞꠡꠋꠡꠣ ꠝꠣꠛꠥꠖꠞ, ꠎꠦꠁꠘ ꠀꠝꠣꠞ ꠝꠥꠘꠤꠛ ꠁꠛ꠆ꠞꠣꠢꠤꠝꠞ ꠀꠟ꠆ꠟꠣ। ꠔꠣꠁꠘ ꠀꠝꠣꠞ ꠝꠣꠟꠤꠇꠞꠦ ꠔꠣꠘ ꠖꠦꠅꠀ ꠅꠀꠖꠣ ꠞꠣꠈꠔꠦ ꠀꠞ ꠁꠝꠣꠘꠖꠣꠞꠤ ꠖꠦꠈꠣꠁꠔꠦ ꠚꠣꠃꠞꠤꠍꠂꠘ ꠘꠣ। ꠔꠣꠁꠘ ꠀꠝꠣꠞꠦꠅ ꠙꠕ ꠌꠤꠘꠣꠁꠀ ꠀꠝꠣꠞ ꠝꠥꠘꠤꠛꠞ ꠇꠥꠐꠝꠞ ꠛꠣꠠꠤꠔ ꠟꠁꠀ ꠀꠁꠍꠂꠘ।”
GEN 24:28 ꠞꠦꠛꠦꠇꠣꠄ ꠖꠃꠠꠣꠁꠀ ꠉꠤꠀ ꠔꠣꠘ ꠝꠣʼꠞ ꠛꠣꠠꠤꠞ ꠢꠇꠟꠞꠦ ꠁꠔꠣ ꠎꠣꠘꠣꠁꠟꠣ।
GEN 24:29 ꠞꠦꠛꠦꠇꠣꠞ ꠄꠇ ꠜꠣꠁꠞ ꠘꠣꠝ ꠀꠍꠤꠟ ꠟꠣꠛꠘ। ꠅꠃ ꠟꠣꠛꠘꠦ ꠖꠃꠠꠣꠁꠀ ꠇꠥꠀꠞ ꠇꠣꠍꠣꠔ ꠀꠁꠟꠣ ꠄꠘꠞꠦ ꠖꠦꠈꠔꠣ ꠇꠞꠤ।
GEN 24:30 ꠛꠘꠤꠞ ꠀꠔꠞ ꠛꠣꠟꠣ ꠀꠞ ꠘꠣꠇꠞ ꠘꠕ ꠖꠦꠈꠤꠀ, ꠀꠞ ꠢꠤ ꠝꠣꠘꠡꠦ ꠎꠦꠔꠣ ꠇꠁꠍꠦ ꠁꠔꠣ ꠢꠥꠘꠤꠀ, ꠔꠣꠁꠘ ꠀꠁꠀ ꠖꠦꠈꠟꠣ, ꠝꠣꠘꠥꠡꠐꠣ ꠇꠥꠀꠞ ꠇꠣꠘ꠆ꠖꠣꠔ ꠔꠣꠞ ꠃꠐꠞ ꠉꠦꠍꠦ ꠃꠛꠣꠁ ꠞꠁꠍꠦ।
GEN 24:31 ꠟꠣꠛꠘꠦ ꠔꠣꠘꠞꠦ ꠇꠁꠟꠣ, “ꠅ ꠝꠣꠛꠥꠖꠞ ꠞꠢꠝꠔꠞ ꠝꠣꠘꠥꠡ, ꠀꠃꠇ꠆ꠇꠣ। ꠛꠣꠞꠦ ꠃꠛꠣꠁ ꠞꠁꠍꠂꠘ ꠇꠦꠘꠦ? ꠀꠝꠤ ꠀꠙꠘꠣꠞꠣꠞ ꠟꠣꠉꠤ ꠊꠞ, ꠀꠞ ꠃꠐꠞ ꠟꠣꠉꠤ ꠎꠣꠉꠣ ꠎꠥꠁꠔ ꠇꠞꠤꠀ ꠀꠁꠍꠤ।”
GEN 24:32 ꠅꠃ ꠢꠤ ꠉꠥꠟꠣꠝꠦ ꠔꠣꠞꠣꠞ ꠛꠣꠠꠤꠔ ꠉꠤꠀ ꠃꠐ ꠅꠇꠟꠞ ꠉꠣꠁꠐ ꠟꠣꠝꠣꠁꠔꠦꠃ, ꠟꠣꠛꠘꠦ ꠈꠦꠞ ꠀꠞ ꠜꠥꠡꠤ ꠀꠘꠤꠀ ꠖꠤꠟꠣ। ꠔꠣꠘꠦ ꠀꠞ ꠔꠣꠘ ꠟꠉꠞ ꠢꠇꠟꠞꠦ ꠀꠔ-ꠙꠣꠅ ꠗꠅꠀꠞ ꠙꠣꠘꠤꠅ ꠖꠤꠟꠣ।
GEN 24:33 ꠛꠣꠖꠦ ꠔꠣꠘ ꠍꠣꠝꠘꠦ ꠈꠣꠘꠤ ꠖꠦꠅꠀ ꠅꠁꠟ, ꠔꠦꠃ ꠔꠣꠁꠘ ꠇꠁꠟꠣ, “ꠀꠝꠤ ꠇꠤꠔꠣꠞ ꠟꠣꠉꠤ ꠁꠘꠅ ꠀꠁꠍꠤ, ꠁꠔꠣ ꠘꠣ ꠢꠥꠘꠣꠁꠀ ꠈꠣꠘꠤ ꠈꠣꠁꠔꠣꠝ ꠘꠣꠄ।” ꠟꠣꠛꠘꠦ ꠇꠁꠟꠣ, “ꠔꠦ ꠇꠁꠟꠣꠃꠇ꠆ꠇꠣ।”
GEN 24:34 ꠅꠃ ꠔꠣꠁꠘ ꠇꠁꠟꠣ, “ꠀꠝꠤ ꠁꠛ꠆ꠞꠣꠢꠤꠝꠞ ꠉꠥꠟꠣꠝ।
GEN 24:35 ꠀꠝꠣꠞ ꠝꠣꠟꠤꠇꠞꠦ ꠝꠣꠛꠥꠖꠦ ꠛꠃꠔ ꠛꠞꠇꠔ ꠘꠣꠎꠤꠟ ꠇꠞꠍꠂꠘ, ꠀꠁꠎ ꠔꠣꠁꠘ ꠛꠃꠔ ꠗꠘꠤ-ꠝꠣꠘꠤ। ꠝꠣꠛꠥꠖꠦ ꠔꠣꠘꠞꠦ ꠛꠃꠔ ꠉꠞꠥ-ꠝꠦꠠꠣ, ꠃꠐ-ꠉꠣꠗꠣ, ꠡꠥꠘꠣ-ꠞꠥꠙꠣ, ꠀꠞ ꠛꠣꠘ꠆ꠖꠤ-ꠉꠥꠟꠣꠝ ꠖꠤꠍꠂꠘ।
GEN 24:36 ꠔꠣꠘ ꠛꠤꠛꠤ ꠍꠣꠄꠞꠣꠞ ꠝꠥꠞꠛ꠆ꠛꠤ ꠛꠄꠅꠡꠅ ꠝꠥꠘꠤꠛꠞ ꠄꠇꠎꠘ ꠙꠥꠀ ꠅꠁꠍꠂꠘ, ꠀꠞ ꠅꠃ ꠙꠥꠀꠞꠦꠃ ꠔꠣꠁꠘ, ꠔꠣꠘ ꠢꠇꠟꠔꠣ ꠖꠤꠟꠣꠁꠍꠂꠘ।
GEN 24:37 ꠔꠣꠁꠘ ꠀꠝꠣꠞꠦ ꠇꠍꠝ ꠇꠞꠣꠁꠀ ꠇꠁꠍꠂꠘ ꠎꠦꠘ, ꠔꠣꠁꠘ ꠎꠦ ꠖꠦꠡꠅ ꠛꠡꠔ ꠇꠞꠞꠣ, ꠢꠤ ꠇꠦꠘꠣꠘ ꠖꠦꠡꠞ ꠇꠥꠘꠥ ꠙꠥꠠꠤꠞꠦ ꠎꠣꠔꠦ ꠔꠣꠘ ꠙꠥꠀꠞ ꠛꠃ ꠘꠣ ꠛꠣꠘꠣꠁ।
GEN 24:38 ꠄꠞ ꠛꠖꠟꠣ ꠔꠣꠘ ꠛꠣꠚꠞ ꠀꠞ ꠔꠣꠘ ꠈꠣꠘ꠆ꠖꠣꠘꠞ ꠛꠣꠠꠤꠔ ꠉꠤꠀ ꠔꠣꠘ ꠙꠥꠀꠞ ꠟꠣꠉꠤ ꠄꠇꠎꠘ ꠇꠁꠘꠣ ꠌꠣꠁꠀ ꠘꠦꠁ।
GEN 24:39 ꠅꠃ ꠀꠝꠤ ꠀꠝꠣꠞ ꠝꠥꠘꠤꠛꠞꠦ ꠇꠁꠟꠣꠝ, ‘ꠎꠥꠖꠤ ꠇꠥꠘꠥ ꠙꠥꠠꠤ ꠀꠝꠣꠞ ꠟꠉꠦ ꠀꠁꠔꠦ ꠞꠣꠎꠤ ꠘꠣ ꠅꠁꠘ?’
GEN 24:40 ꠔꠣꠁꠘ ꠇꠁꠟꠣ, ‘ꠝꠣꠛꠥꠖ, ꠎꠣꠘꠞꠦ ꠀꠝꠤ ꠈꠦꠎꠝꠔ ꠇꠞꠤ, ꠔꠣꠁꠘꠃ ꠔꠣꠘ ꠚꠤꠞꠤꠡ꠆ꠔꠣꠞꠦ ꠙꠣꠑꠣꠁ ꠖꠤꠛꠣ, ꠎꠣꠔꠦ ꠔꠥꠝꠣꠞ ꠍꠚꠞ ꠇꠣꠝꠤꠀꠛ ꠅꠄ। ꠀꠞ ꠔꠥꠝꠤ ꠀꠝꠣꠞ ꠘꠤꠎꠞ ꠛꠋꠡ ꠀꠞ ꠀꠝꠣꠞ ꠛꠣꠚꠞ ꠈꠣꠘ꠆ꠖꠣꠘ ꠕꠘꠦ, ꠄꠉꠥ ꠙꠥꠠꠤꠞꠦ ꠀꠝꠣꠞ ꠙꠥꠀꠞ ꠟꠣꠉꠤ ꠌꠣꠁꠀ ꠀꠘꠛꠣꠄ।
GEN 24:41 ꠔꠣꠞꠣꠞ ꠢꠤꠘꠅ ꠉꠦꠟꠦ ꠎꠥꠖꠤ ꠔꠣꠞꠣ ꠇꠥꠘꠥ ꠙꠥꠠꠤꠞꠦ ꠘꠣ ꠖꠦꠁꠘ, ꠔꠣꠁꠟꠦ ꠔꠥꠝꠤ ꠀꠝꠣꠞ ꠁ ꠇꠍꠝ ꠕꠣꠇꠤ ꠈꠣꠟꠣꠍ ꠙꠣꠁꠛꠣꠄ।’
GEN 24:42 “ꠅꠃ ꠀꠁꠎ ꠀꠝꠤ ꠇꠥꠀꠞ ꠉꠦꠍꠦ ꠀꠁꠀ ꠖꠥꠀ ꠇꠞꠟꠣꠝ, ‘ꠅ ꠝꠣꠛꠥꠖ, ꠀꠝꠣꠞ ꠝꠥꠘꠤꠛ ꠁꠛ꠆ꠞꠣꠢꠤꠝꠞ ꠀꠟ꠆ꠟꠣ, ꠔꠥꠝꠤ ꠎꠥꠖꠤ ꠀꠝꠣꠞ ꠁ ꠍꠚꠞ ꠇꠣꠝꠤꠀꠛ ꠇꠞꠅ ꠔꠣꠁꠟꠦ,
GEN 24:43 ꠖꠦꠈꠅ, ꠀꠝꠤ ꠅꠃ ꠜꠞꠣ ꠇꠥꠀꠞ ꠉꠦꠍꠦ ꠃꠛꠣꠁ ꠞꠁꠍꠤ, ꠀꠞ ꠇꠥꠘꠥ ꠙꠥꠠꠤꠄ ꠅꠘꠅ ꠙꠣꠘꠤ ꠘꠦꠅꠀꠔ ꠀꠁꠟꠦ ꠀꠝꠤ ꠇꠁꠝꠥ, ꠈꠂꠟꠣ ꠕꠣꠇꠤ ꠀꠝꠣꠞꠦ ꠕꠥꠠꠣ ꠙꠣꠘꠤ ꠈꠣꠅꠀꠅ।
GEN 24:44 ꠀꠞ ꠎꠥꠖꠤ ꠔꠣꠁ ꠇꠄ, ‘ꠔꠥꠝꠤꠅ ꠙꠣꠘꠤ ꠈꠣꠅ ꠀꠞ ꠔꠥꠝꠣꠞ ꠃꠐ ꠅꠇꠟꠞꠦꠅ ꠀꠝꠤ ꠙꠣꠘꠤ ꠔꠥꠟꠤꠀ ꠖꠤꠝꠥ’, ꠔꠣꠁꠟꠦ ꠅꠃ ꠙꠥꠠꠤꠃ ꠎꠣꠘꠥ ꠀꠝꠣꠞ ꠝꠥꠘꠤꠛꠞ ꠙꠥꠀꠞ ꠟꠣꠉꠤ ꠔꠥꠝꠣꠞ ꠙꠍꠘ꠆ꠖ ꠇꠞꠣ ꠙꠥꠠꠤ ꠅꠄ।’
GEN 24:45 “ꠀꠝꠣꠞ ꠖꠥꠀ ꠡꠦꠡ ꠘꠣ ꠅꠁꠔꠦꠃ ꠖꠦꠈꠤ, ꠞꠦꠛꠦꠇꠣꠄ ꠈꠂꠟꠣ ꠇꠣꠈꠅ ꠟꠁꠀ ꠇꠥꠀꠔ ꠀꠁꠞꠣ ꠙꠣꠘꠤ ꠔꠥꠟꠔꠣ। ꠙꠣꠘꠤ ꠔꠥꠟꠣꠞ ꠛꠣꠖꠦ ꠀꠝꠤ ꠇꠁꠟꠣꠝ, ‘ꠖꠄꠀ ꠇꠞꠤꠀ ꠀꠝꠣꠞꠦ ꠕꠥꠠꠣ ꠙꠣꠘꠤ ꠈꠣꠅꠀꠃꠇ꠆ꠇꠣ।’
GEN 24:46 ꠔꠣꠁꠘ ꠎꠟꠖꠤ ꠇꠞꠤ ꠇꠣꠈꠅ ꠕꠘꠦ ꠈꠂꠟꠣ ꠟꠣꠝꠣꠁꠀ ꠀꠝꠣꠞꠦ ꠇꠁꠟꠣ, ‘ꠅꠃ ꠘꠦꠁꠘ, ꠙꠣꠘꠤ ꠈꠣꠁꠘ। ꠀꠝꠤ ꠀꠙꠘꠣꠞ ꠃꠐ ꠅꠇꠟꠞꠦꠅ ꠙꠣꠘꠤ ꠈꠣꠅꠀꠁꠝꠥ।’ ꠔꠦꠃ ꠀꠝꠤ ꠙꠣꠘꠤ ꠈꠣꠁꠟꠣꠝ, ꠀꠞ ꠔꠣꠁꠘ ꠀꠝꠣꠞ ꠃꠐ ꠅꠇꠟꠞꠦꠅ ꠙꠣꠘꠤ ꠈꠣꠅꠀꠁꠟꠣ।
GEN 24:47 ꠛꠣꠖꠦ ꠀꠝꠤ ꠔꠣꠘꠦ ꠎꠤꠇꠣꠁꠟꠣꠝ, ‘ꠀꠙꠘꠦ ꠇꠣꠞ ꠙꠥꠠꠤ?’ ꠔꠣꠁꠘ ꠇꠁꠟꠣ, ‘ꠀꠝꠤ ꠛꠕꠥꠄꠟꠞ ꠙꠥꠠꠤ, ꠀꠝꠣꠞ ꠖꠣꠖꠣꠞ ꠘꠣꠝ ꠘꠣꠢꠥꠞ ꠀꠞ ꠖꠣꠖꠤꠞ ꠘꠣꠝ ꠝꠤꠟꠇꠣ।’ ꠅꠃ ꠀꠝꠤ ꠔꠣꠘ ꠘꠣꠇꠅ ꠘꠕ ꠀꠞ ꠀꠔꠅ ꠛꠣꠟꠣ ꠚꠤꠘ꠆ꠖꠣꠁꠀ ꠖꠤꠟꠣꠝ।
GEN 24:48 ꠛꠣꠖꠦ ꠀꠝꠤ ꠝꠣꠛꠥꠖꠞ ꠍꠁꠎꠖꠣ ꠇꠞꠟꠣꠝ। ꠀꠞ ꠎꠦꠁꠘ ꠀꠝꠣꠞ ꠝꠥꠘꠤꠛ ꠁꠛ꠆ꠞꠣꠢꠤꠝꠞ ꠀꠟ꠆ꠟꠣ, ꠢꠃ ꠝꠣꠛꠥꠖꠞ ꠡꠥꠇꠥꠞ ꠀꠖꠣꠄ ꠇꠞꠟꠣꠝ, ꠔꠣꠁꠘꠃ ꠀꠝꠣꠞꠦ ꠑꠤꠇ ꠙꠕꠦ ꠌꠣꠟꠣꠁꠀ ꠀꠘꠍꠂꠘ ꠎꠣꠔꠦ ꠀꠝꠤ ꠀꠝꠣꠞ ꠝꠥꠘꠤꠛꠞ ꠜꠣꠔꠤꠎꠤꠞꠦ, ꠔꠣꠘ ꠙꠥꠀꠞ ꠟꠣꠉꠤ ꠔꠥꠇꠣꠁꠀ ꠙꠣꠁ।
GEN 24:49 ꠔꠦꠃ ꠅꠈꠘ ꠀꠙꠘꠣꠞꠣ ꠀꠝꠣꠞ ꠝꠥꠘꠤꠛꠞ ꠛꠣꠄ ꠖꠞꠖ ꠀꠞ ꠁꠘꠍꠣꠚ ꠇꠞꠛꠣ ꠘꠤ, ꠇꠃꠇ꠆ꠇꠣ। ꠎꠥꠖꠤ ꠘꠣ ꠇꠞꠂꠘ ꠔꠣ-ꠅ ꠇꠃꠇ꠆ꠇꠣ, ꠎꠣꠔꠦ ꠀꠝꠤ ꠒꠣꠁꠘꠦ-ꠛꠣꠃꠄ ꠎꠣꠁꠔꠣꠝ ꠙꠣꠞꠤ।”
GEN 24:50 ꠅꠃ ꠟꠣꠛꠘ ꠀꠞ ꠛꠕꠥꠄꠟꠦ ꠇꠁꠟꠣ, “ꠊꠐꠘꠣ ꠔ ꠝꠣꠛꠥꠖ ꠕꠣꠇꠤꠃ ꠅꠁꠍꠦ। ꠅꠈꠘ ꠀꠝꠞꠣꠞ ꠜꠣꠟꠣ-ꠛꠥꠞꠣ ꠝꠣꠔꠣꠞ ꠇꠥꠘ꠆ꠔꠣꠃ ꠘꠣꠄ।
GEN 24:51 ꠅꠃ ꠖꠦꠈꠃꠇ꠆ꠇꠣ, ꠞꠦꠛꠦꠇꠣ ꠔ ꠅꠘꠅ ꠀꠍꠦ, ꠔꠦ ꠝꠣꠛꠥꠖꠞ ꠢꠥꠇꠥꠝ ꠝꠔ ꠀꠙꠘꠣꠞ ꠝꠥꠘꠤꠛꠞ ꠙꠥꠀꠞ ꠛꠃ ꠛꠣꠘꠣꠁꠛꠣꠞ ꠟꠣꠉꠤ ꠄꠞꠦ ꠟꠁꠀ ꠎꠣꠁꠔꠣ ꠙꠣꠞꠛꠣ।”
GEN 24:52 ꠁ ꠝꠣꠔ ꠢꠥꠘꠤꠀ ꠁꠛ꠆ꠞꠣꠢꠤꠝꠞ ꠉꠥꠟꠣꠝꠦ ꠝꠣꠛꠥꠖꠞ ꠍꠁꠎꠖꠣ ꠇꠞꠟꠣ।
GEN 24:53 ꠄꠞꠛꠣꠖꠦ ꠔꠣꠁꠘ ꠡꠥꠘꠣ-ꠞꠥꠙꠣꠞ ꠉꠄꠘꠣ-ꠉꠣꠐꠤ ꠀꠞ ꠇꠣꠙꠠ-ꠌꠥꠙꠠ ꠛꠣꠞ ꠇꠞꠤꠀ ꠞꠦꠛꠦꠇꠣꠞꠦ ꠖꠤꠟꠣ, ꠄꠞ ꠟꠉꠦ ꠞꠦꠛꠦꠇꠣꠞ ꠝꠣ-ꠜꠣꠁꠞꠦꠅ ꠛꠃꠔ ꠖꠣꠝꠤ ꠖꠣꠝꠤ ꠃꠙꠢꠣꠞ ꠖꠤꠟꠣ।
GEN 24:54 ꠛꠣꠖꠦ ꠔꠣꠁꠘ ꠀꠞ ꠔꠣꠘ ꠟꠉꠞ ꠢꠇꠟꠦ ꠈꠣꠅꠀ-ꠖꠣꠅꠀ ꠡꠦꠡ ꠇꠞꠤꠀ ꠢꠈꠣꠘꠅꠃ ꠞꠣꠁꠔ ꠇꠣꠐꠣꠁꠟꠣ। ꠛꠤꠀꠘꠦ ꠊꠥꠝ ꠕꠣꠇꠤ ꠃꠑꠤꠀ ꠔꠣꠁꠘ ꠇꠁꠟꠣ, “ꠀꠝꠣꠞ ꠝꠥꠘꠤꠛꠞ ꠉꠦꠍꠦ ꠎꠣꠅꠀꠞ ꠟꠣꠉꠤ ꠀꠝꠣꠞꠦ ꠛꠤꠖꠣꠄ ꠖꠤꠟꠣꠃꠇ꠆ꠇꠣ।”
GEN 24:55 ꠔꠦꠃ ꠞꠦꠛꠦꠇꠣꠞ ꠝꠣ ꠀꠞ ꠜꠣꠁꠄ ꠇꠁꠟꠣ, “ꠙꠥꠠꠤꠉꠥ ꠀꠞꠅ ꠖꠡꠈꠣꠘ ꠖꠤꠘ ꠀꠝꠞꠣꠞ ꠉꠦꠍꠦ ꠕꠣꠇꠃꠇ, ꠛꠣꠖꠦ ꠎꠣꠁꠛꠘꠦ।”
GEN 24:56 ꠅꠃ ꠢꠤ ꠉꠥꠟꠣꠝꠦ ꠔꠣꠞꠣꠞꠦ ꠇꠁꠟꠣ, “ꠝꠣꠛꠥꠖꠦ ꠎꠦꠛꠟꠣ ꠀꠝꠣꠞ ꠁ ꠍꠚꠞ ꠇꠣꠝꠤꠀꠛ ꠇꠞꠍꠂꠘ, ꠔꠣꠁꠟꠦ ꠀꠝꠣꠞꠦ ꠖꠦꠞꠤ ꠘꠣ ꠇꠞꠣꠁꠀ ꠛꠤꠖꠣꠄ ꠖꠤꠟꠣꠃꠇ꠆ꠇꠣ, ꠀꠝꠣꠞ ꠝꠥꠘꠤꠛꠞ ꠉꠦꠍꠦ ꠎꠣꠁꠉꠤ।”
GEN 24:57 ꠄꠞꠣ ꠇꠁꠟꠣ, “ꠀꠝꠞꠣ ꠔꠣꠁꠟꠦ ꠙꠥꠠꠤꠞꠦ ꠍꠣꠝꠘꠦ ꠀꠘꠤꠀ ꠎꠤꠇꠣꠁꠟꠣꠁ।”
GEN 24:58 ꠀꠞ ꠞꠦꠛꠦꠇꠣꠞꠦ ꠒꠣꠇꠤꠀ ꠀꠘꠤꠀ ꠎꠤꠇꠣꠁꠟꠣ, “ꠔꠥꠝꠤ ꠇꠤꠔꠣ ꠔꠣꠘ ꠟꠉꠦ ꠎꠣꠁꠛꠣꠄ ꠘꠤ ꠉ?” ꠔꠣꠁꠘ ꠇꠁꠟꠣ, “ꠀꠁꠌ꠆ꠍꠣ, ꠎꠣꠁꠝꠥꠘꠦ।”
GEN 24:59 ꠅꠃ ꠔꠣꠞꠣ ꠁꠛ꠆ꠞꠣꠢꠤꠝꠞ ꠉꠥꠟꠣꠝ ꠀꠞ ꠔꠣꠘ ꠟꠉꠞ ꠝꠣꠘꠡꠞ ꠟꠉꠦ ꠔꠣꠞꠣꠞ ꠛꠁꠘ ꠀꠞ ꠔꠣꠘ ꠛꠣꠘ꠆ꠖꠤ ꠛꠦꠐꠤꠞꠦ ꠛꠤꠖꠣꠄ ꠖꠤꠟꠣ।
GEN 24:60 ꠀꠞ ꠞꠦꠛꠦꠇꠣꠞꠦ ꠖꠥꠀ ꠇꠞꠤꠀ ꠇꠁꠟꠣ, “ꠛꠁꠘ ꠉ, ꠔꠥꠝꠤ ꠟꠣꠈ ꠟꠣꠈ ꠀꠅꠟꠣꠖꠞ ꠝꠣ ꠅꠅ। ꠔꠥꠝꠣꠞ ꠀꠅꠟꠣꠖꠦ ꠖꠥꠡꠝꠘ ꠅꠇꠟꠞꠦ ꠊꠣꠁꠟ ꠇꠞꠃꠇ।”
GEN 24:61 ꠞꠦꠛꠦꠇꠣ ꠀꠞ ꠔꠣꠘ ꠛꠣꠘ꠆ꠖꠤ ꠅꠇꠟꠦ ꠔꠂꠀꠞ ꠅꠁꠀ ꠃꠐꠞ ꠃꠙꠞꠦ ꠌꠠꠤꠀ, ꠁꠛ꠆ꠞꠣꠢꠤꠝꠞ ꠉꠥꠟꠣꠝꠞ ꠈꠞꠦ ꠅꠁꠀ ꠞꠅꠀꠘꠣ ꠖꠤꠟꠣ। ꠅꠃ ꠟꠣꠈꠣꠘ ꠢꠃ ꠉꠥꠟꠣꠝꠦ ꠞꠦꠛꠦꠇꠣꠞꠦ ꠟꠁꠀ ꠛꠣꠞ ꠅꠁꠟꠣ।
GEN 24:62 ꠁꠍꠢꠣꠇ ꠁ ꠡꠝꠄ ꠘꠦꠉꠦꠜꠅ ꠕꠣꠇꠔꠣ। ꠔꠣꠁꠘ ꠛꠦꠞ-ꠟꠢꠄ-ꠞꠥꠁ ꠘꠣꠝꠞ ꠎꠣꠉꠣ ꠕꠘꠦ ꠚꠤꠞꠔ ꠀꠁꠟꠣ।
GEN 24:63 ꠄꠇꠖꠤꠘ ꠛꠤꠀꠟꠤ ꠛꠣꠟꠣ ꠔꠣꠁꠘ ꠛꠘ꠆ꠖꠦꠖꠤ ꠀꠐꠣꠔ ꠛꠣꠞ ꠅꠁꠟꠣ। ꠀꠈꠔꠣꠃ ꠌꠃꠈ ꠔꠥꠟꠤꠀ ꠌꠣꠁꠀ ꠖꠦꠈꠟꠣ, ꠇꠄꠐꠣ ꠃꠐ ꠀꠁꠞꠣ।
GEN 24:64 ꠞꠦꠛꠦꠇꠣꠄꠅ ꠖꠥꠞꠁ ꠕꠘꠦ ꠁꠍꠢꠣꠇꠞꠦ ꠖꠦꠈꠤꠀꠃ ꠃꠐꠞ ꠃꠙꠞ ꠕꠣꠇꠤ ꠟꠣꠝꠤ ꠉꠦꠟꠣ।
GEN 24:65 ꠀꠞ ꠢꠃ ꠉꠥꠟꠣꠝꠞꠦ ꠎꠤꠇꠣꠁꠟꠣ, “ꠅꠃ ꠎꠦꠁꠘ ꠛꠘ꠆ꠖꠞ ꠝꠣꠎꠦꠖꠤ ꠀꠝꠞꠣꠞ ꠛꠣꠄ ꠀꠁꠞꠣ, ꠄꠁꠘ ꠇꠦ?” ꠉꠥꠟꠣꠝꠦ ꠇꠁꠟꠣ, “ꠄꠁꠘ ꠔ ꠀꠝꠣꠞ ꠝꠥꠘꠤꠛ।” ꠅꠃ ꠞꠦꠛꠦꠇꠣꠄ ꠛꠥꠞꠇꠣꠞ ꠙꠞ꠆ꠖꠣ ꠟꠣꠝꠣꠁ ꠖꠤꠟꠣ।
GEN 24:66 ꠀꠞ ꠢꠤ ꠉꠥꠟꠣꠝꠦ ꠎꠦꠔꠣ ꠎꠦꠔꠣ ꠇꠞꠤꠀ ꠀꠁꠍꠂꠘ, ꠢꠇꠟꠔꠣ ꠁꠍꠢꠣꠇꠞꠦ ꠎꠣꠘꠣꠁꠟꠣ।
GEN 24:67 ꠁꠍꠢꠣꠇꠦ ꠔꠣꠘ ꠝꠣ ꠛꠤꠛꠤ ꠍꠣꠄꠞꠣꠞ ꠔꠣꠝ꠆ꠛꠥꠔ ꠞꠦꠛꠦꠇꠣꠞꠦ ꠟꠁꠀ ꠉꠤꠀ ꠔꠣꠘꠦ ꠛꠤꠀ ꠇꠞꠟꠣ। ꠀꠞ ꠔꠣꠘꠞꠦ ꠝꠣꠄꠀ ꠇꠞꠟꠣ। ꠔꠣꠘ ꠝꠣʼꠞ ꠝꠃꠔꠞ ꠛꠣꠖꠦ, ꠞꠦꠛꠦꠇꠣꠞ ꠝꠣꠄꠀꠄꠃ ꠔꠣꠘ ꠎꠣꠘꠅ ꠡꠣꠘ꠆ꠔꠤ ꠙꠣꠁꠍꠟꠣ।
GEN 25:1 ꠁꠛ꠆ꠞꠣꠢꠤꠝꠦ ꠇꠣꠔꠥꠞꠣ ꠘꠣꠝꠞ ꠀꠞꠅ ꠄꠇꠎꠘ ꠛꠦꠐꠤꠞꠦ ꠛꠤꠀ ꠇꠞꠍꠟꠣ।
GEN 25:2 ꠔꠣꠘ ꠙꠦꠐꠅ ꠎꠤꠝ꠆ꠞꠘ, ꠎꠇꠡꠘ, ꠝꠖꠣꠘ, ꠝꠣꠖꠤꠀꠘ, ꠎꠤꠡꠛꠇ ꠀꠞ ꠡꠥꠢꠣꠞ ꠎꠘꠝ ꠅꠁꠍꠤꠟ।
GEN 25:3 ꠡꠣꠛꠣ ꠀꠞ ꠖꠖꠣꠘ ꠅꠁꠟꠣ ꠎꠇꠡꠘꠞ ꠀꠅꠟꠣꠖ। ꠀꠡꠥꠞꠤ, ꠟꠐꠥꠡꠤ, ꠟꠤꠃꠝ꠆ꠝꠤ ꠅꠇꠟ ꠅꠁꠟꠣ ꠖꠖꠣꠘꠞ ꠀꠅꠟꠣꠖ।
GEN 25:4 ꠝꠣꠖꠤꠀꠘꠞ ꠀꠅꠟꠣꠖ ꠅꠁꠟꠣ ꠅꠂꠚꠣ, ꠄꠚꠞ, ꠢꠘꠥꠇ, ꠅꠛꠤꠖ ꠀꠞ ꠁꠟꠖꠣꠄꠀ। ꠄꠞꠣ ꠢꠇꠟꠃ ꠇꠣꠔꠥꠞꠣꠞ ꠀꠅꠟꠣꠖ।
GEN 25:5 ꠁꠛ꠆ꠞꠣꠢꠤꠝꠦ ꠔꠣꠘ ꠢꠇꠟꠔꠣ ꠁꠍꠢꠣꠇꠞꠦ ꠖꠤꠟꠣꠁꠟꠣ।
GEN 25:6 ꠅꠁꠟꠦ ꠔꠣꠁꠘ ꠎꠤꠘ꠆ꠖꠣ ꠕꠣꠇꠔꠦꠃ, ꠔꠣꠘ ꠢꠦꠡꠞ ꠛꠤꠀꠞ ꠀꠅꠟꠣꠖ ꠅꠇꠟꠞꠦꠅ ꠀꠟꠉꠣ ꠀꠟꠉꠣ ꠖꠣꠘ ꠇꠞꠤꠀ, ꠄꠞꠣꠞꠦ ꠁꠍꠢꠣꠇꠞ ꠟꠉꠦ ꠘꠣ ꠞꠣꠈꠤꠀ ꠙꠥꠛꠦꠖꠤ, ꠙꠥꠛꠞ ꠖꠦꠡꠅ ꠙꠣꠑꠣꠁ ꠖꠤꠟꠣ।
GEN 25:7 ꠁꠛ꠆ꠞꠣꠢꠤꠝ ꠄꠇ-ꠡ ꠙꠌꠔ꠆ꠔꠁꠞ ꠛꠞꠍ ꠛꠣꠌꠤꠟꠣ, ꠀꠟ꠆ꠟꠣꠄ ꠔꠣꠘꠦ ꠅꠔꠖꠤꠘꠞ ꠢꠣꠄꠀꠔꠤ ꠖꠤꠍꠟꠣ।
GEN 25:8 ꠔꠣꠁꠘ ꠝꠥꠞꠛ꠆ꠛꠤ ꠅꠁꠀ ꠙꠥꠞꠣꠙꠥꠞ ꠛꠥꠠꠣ ꠛꠄꠅꠡꠅ ꠁꠘ꠆ꠔꠦꠇꠣꠟ ꠇꠞꠟꠣ, ꠀꠞ ꠔꠣꠘ ꠛꠣꠚ-ꠖꠣꠖꠣꠞ ꠉꠦꠍꠦ ꠉꠤꠀ ꠀꠎꠤꠟꠣ।
GEN 25:9 ꠢꠦꠡꠦ ꠔꠣꠘ ꠙꠥꠀ ꠁꠍꠝꠣꠁꠟ ꠀꠞ ꠁꠍꠢꠣꠇꠦ ꠝꠝ꠆ꠞꠤ ꠐꠣꠃꠘꠞ ꠙꠥꠛꠦꠖꠤ, ꠢꠤꠐ꠆ꠐꠤ ꠡꠥꠢꠞꠞ ꠙꠥꠀ ꠁꠚ꠆ꠞꠥꠘꠞ ꠎꠝꠤꠞ ꠝꠇꠙꠦꠟꠣ-ꠉꠥꠢꠣꠔ, ꠔꠣꠘꠞꠦ ꠖꠣꠚꠘ ꠇꠞꠟꠣ।
GEN 25:10 ꠁ ꠎꠝꠤꠈꠣꠘ ꠔꠣꠁꠘ ꠢꠤꠐ꠆ꠐꠤ ꠅꠇꠟꠞ ꠉꠦꠍ ꠕꠘꠦ ꠟꠁꠍꠟꠣ। ꠅꠘꠅꠃ ꠔꠣꠘ ꠛꠤꠛꠤ ꠍꠣꠄꠞꠣꠞꠦ ꠀꠞ ꠔꠣꠘꠦ ꠖꠣꠚꠘ ꠇꠞꠣ ꠅꠁꠍꠦ।
GEN 25:11 ꠁꠛ꠆ꠞꠣꠢꠤꠝꠞ ꠝꠃꠔꠞ ꠛꠣꠖꠦ ꠀꠟ꠆ꠟꠣꠄ ꠔꠣꠘ ꠙꠥꠀ ꠁꠍꠢꠣꠇꠞꠦ ꠛꠞꠇꠔ ꠘꠣꠎꠤꠟ ꠇꠞꠟꠣ। ꠔꠣꠁꠘ ꠛꠦꠞ-ꠟꠢꠄ-ꠞꠥꠁꠞ ꠉꠦꠍꠦ ꠞꠁꠔꠣ।
GEN 25:12 ꠅꠃ ꠅꠁꠟ ꠁꠍꠝꠣꠁꠟꠞ ꠈꠣꠘ꠆ꠖꠣꠘꠞ ꠛꠄꠀꠘ। ꠛꠤꠛꠤ ꠍꠣꠄꠞꠣꠞ ꠛꠣꠘ꠆ꠖꠤ ꠝꠤꠡꠞꠤ ꠢꠣꠎꠦꠞꠣꠞ ꠙꠦꠐꠅ ꠁꠛ꠆ꠞꠣꠢꠤꠝꠞ ꠙꠥꠀ ꠁꠍꠝꠣꠁꠟꠞ ꠎꠘꠝ ꠅꠁꠍꠤꠟ।
GEN 25:13 ꠅꠃ ꠅꠁꠟ ꠁꠍꠝꠣꠁꠟꠞ ꠀꠅꠟꠣꠖꠞ ꠘꠣꠝ ꠀꠞ ꠉꠥꠡ꠆ꠐꠤꠞ ꠛꠄꠀꠘ। ꠔꠣꠘ ꠛꠠ ꠙꠥꠀꠞ ꠘꠣꠝ ꠘꠣꠛꠣꠃꠔ, ꠛꠣꠖꠦ ꠇꠣꠄꠖꠣꠞ, ꠅꠖꠛꠦꠟ, ꠝꠤꠛꠍꠝ,
GEN 25:14 ꠝꠤꠡꠝꠣ, ꠖꠥꠝꠣ, ꠝꠣꠍꠣ,
GEN 25:15 ꠢꠖꠖ, ꠔꠦꠝꠣ, ꠎꠤꠐꠥꠞ, ꠘꠣꠚꠤꠡ ꠀꠞ ꠇꠦꠖꠝꠣ।
GEN 25:16 ꠁꠍꠝꠣꠁꠟꠞ ꠅꠃ ꠛꠣꠞꠅꠎꠘ ꠙꠥꠀ ꠀꠍꠟꠣ ꠛꠣꠞꠅ ꠉꠥꠡ꠆ꠐꠤꠞ ꠡꠞ꠆ꠖꠣꠞ। ꠔꠣꠞꠣꠞ ꠘꠣꠝꠞ ꠟꠣꠈꠣꠘ ꠢꠤ ꠉꠣꠃ ꠀꠞ ꠔꠣꠝ꠆ꠛꠥ ꠛꠤꠍꠣꠁꠟ ꠎꠣꠉꠣꠞꠅ ꠅꠃ ꠘꠣꠝ ꠅꠁꠍꠤꠟ।
GEN 25:17 ꠁꠍꠝꠣꠁꠟꠞ ꠢꠣꠄꠀꠔ ꠄꠇ-ꠡ ꠡꠣꠠꠔꠤꠡ ꠛꠞꠍ ꠀꠍꠤꠟ, ꠢꠦꠡꠦ ꠔꠣꠁꠘ ꠝꠣꠞꠣ ꠉꠦꠟꠣ ꠀꠞ ꠔꠣꠘ ꠛꠣꠚ-ꠖꠣꠖꠣꠞ ꠉꠦꠍꠦ ꠉꠦꠟꠣꠉꠤ।
GEN 25:18 ꠢꠛꠤꠟꠣ ꠕꠘꠦ ꠀꠡꠤꠞꠤꠀꠞ ꠛꠣꠄ ꠝꠤꠡꠞꠞ ꠍꠣꠝꠘꠞ ꠡꠥꠞ ꠙꠞ꠆ꠎꠘ꠆ꠔ ꠔꠣꠘ ꠀꠅꠟꠣꠖ ꠅꠇꠟ ꠞꠁꠔꠣ। ꠁꠍꠝꠣꠁꠟꠦ ꠔꠣꠘ ꠢꠇꠟ ꠜꠣꠁꠀꠁꠘ꠆ꠔꠞ ꠉꠣꠟꠣꠛꠣꠄ ꠞꠅꠀꠞ ꠎꠣꠉꠣ ꠙꠣꠁꠟꠣ।
GEN 25:19 ꠅꠃ ꠅꠁꠟ ꠁꠛ꠆ꠞꠣꠢꠤꠝꠞ ꠙꠥꠀ ꠁꠍꠢꠣꠇꠞ ꠈꠣꠘ꠆ꠖꠣꠘ-ꠘꠣꠝꠣ। ꠁꠛ꠆ꠞꠣꠢꠤꠝꠞ ꠊꠞꠅ ꠁꠍꠢꠣꠇꠞ ꠎꠘꠝ ꠅꠁꠟ।
GEN 25:20 ꠁꠍꠢꠣꠇꠦ ꠌꠣꠟ꠆ꠟꠤꠡ ꠛꠞꠍ ꠛꠄꠅꠡꠅ ꠔꠣꠘ ꠝꠣꠝꠥꠞ ꠊꠞꠞ ꠛꠁꠘ ꠞꠦꠛꠦꠇꠣꠞꠦ ꠀꠘꠣꠁꠀ ꠛꠤꠀ ꠇꠞꠟꠣ। ꠞꠦꠛꠦꠇꠣ ꠅꠁꠟꠣ ꠙꠖ꠆ꠖꠘ-ꠁꠞꠣꠝ ꠖꠦꠡꠞ ꠅꠞꠣꠝꠤ ꠛꠕꠥꠄꠟꠞ ꠙꠥꠠꠤ, ꠅꠞꠣꠝꠤ ꠟꠣꠛꠘꠞ ꠛꠁꠘ।
GEN 25:21 ꠔꠣꠘ ꠛꠃ ꠘꠤꠀꠅꠟꠣꠖꠤ ꠀꠍꠟꠣ ꠉꠔꠤꠇꠦ, ꠁꠍꠢꠣꠇꠦ ꠝꠣꠛꠥꠖꠞ ꠉꠦꠍꠦ ꠖꠥꠀ ꠇꠞꠟꠣ। ꠝꠣꠛꠥꠖꠦ ꠔꠣꠘ ꠖꠥꠀ ꠇꠛꠥꠟ ꠇꠞꠟꠣ, ꠀꠞ ꠞꠦꠛꠦꠇꠣꠞ ꠙꠦꠐꠅ ꠢꠥꠞꠥꠔ꠆ꠔꠣ ꠀꠁꠟ।
GEN 25:22 ꠛꠣꠖꠦ ꠙꠦꠐꠞ ꠜꠤꠔꠞꠦ ꠢꠥꠞꠥꠔ꠆ꠔꠣꠄ ꠟꠠꠣ-ꠌꠠꠣ ꠇꠞꠣꠔ ꠟꠣꠉꠟꠣ। ꠅꠃ ꠔꠣꠁꠘ ꠇꠁꠟꠣ, “ꠀꠝꠣꠞ ꠙꠦꠐꠅ ꠁꠟꠣ ꠟꠣꠉꠦꠞ ꠇꠦꠘꠦ?” ꠇꠣꠞꠘ ꠎꠣꠘꠣꠞ ꠟꠣꠉꠤ ꠔꠣꠁꠘ ꠝꠣꠛꠥꠖꠞ ꠉꠦꠍꠦ ꠖꠥꠀ ꠇꠞꠟꠣ।
GEN 25:23 ꠝꠣꠛꠥꠖꠦ ꠔꠣꠘꠞꠦ ꠇꠁꠟꠣ, “ꠔꠥꠝꠣꠞ ꠙꠦꠐꠅ ꠖꠥꠁꠐꠣ ꠎꠣꠔꠤ ꠀꠍꠦ, ꠙꠦꠐꠅ ꠕꠘꠦꠃ ꠔꠣꠞꠣ ꠖꠥꠁ ꠛꠋꠡ ꠅꠁꠀ ꠙꠄꠖꠣ ꠅꠁꠛꠣ। ꠄꠇ ꠛꠋꠡ ꠕꠘꠦ ꠀꠞꠇ ꠛꠋꠡ ꠡꠇ꠆ꠔꠤꠀꠟꠣ ꠅꠁꠛ, ꠀꠞ ꠛꠠꠉꠥꠄ ꠢꠥꠞꠥꠉꠥꠞ ꠈꠦꠎꠝꠔ ꠇꠞꠛ।”
GEN 25:24 ꠢꠥꠞꠥꠔ꠆ꠔꠣ ꠙꠄꠖꠣꠞ ꠛꠣꠟꠣ ꠖꠦꠈꠂꠘ, ꠢꠣꠍꠣꠃ ꠔꠣꠘ ꠙꠦꠐꠅ ꠎꠥꠠꠞ ꠙꠥꠀ।
GEN 25:25 ꠙꠄꠟꠣ ꠎꠣꠞ ꠎꠘꠝ ꠅꠁꠟ ꠢꠦ ꠟꠣꠟ ꠞꠋꠉꠞ ꠀꠞ ꠔꠣꠞ ꠡꠞꠤꠟꠅ ꠙꠡꠝꠤ ꠇꠣꠙꠠꠞ ꠟꠣꠈꠣꠘ ꠞꠥꠝꠣꠄ ꠜꠞꠣ। ꠔꠣꠞ ꠘꠣꠝ ꠞꠣꠈꠟꠣ ꠁꠡ [ꠝꠣꠘꠤ, ꠞꠥꠝꠣꠀꠟꠣ]।
GEN 25:26 ꠛꠣꠖꠦ ꠁꠡʼꠞ ꠙꠣꠅꠞ ꠝꠥꠞꠣꠔ ꠗꠞꠤ ꠔꠣꠞ ꠜꠣꠁꠞ ꠎꠘꠝ ꠅꠁꠟ, ꠄꠞ ꠘꠣꠝ ꠞꠣꠈꠟꠣ ꠁꠀꠇꠥꠛ [ꠝꠣꠘꠤ, ꠙꠣꠅꠔ ꠗꠞꠞꠣ]। ꠁꠍꠢꠣꠇꠞ ꠡꠣꠁꠐ ꠛꠞꠍ ꠛꠄꠅꠡꠅ ꠄꠞꠣ ꠎꠥꠠꠦ ꠙꠄꠖꠣ ꠅꠁꠟꠣ।
GEN 25:27 ꠅꠃ ꠙꠥꠀꠂꠘ ꠛꠠ ꠅꠀꠞ ꠛꠣꠖꠦ ꠁꠡ ꠈꠥꠛ ꠜꠣꠟꠣ ꠡꠤꠇꠣꠞꠤ ꠀꠞ ꠝꠞꠥꠜꠥꠝꠤꠔ ꠙꠣꠇꠣꠅꠞꠣ ꠅꠁꠟꠣ, ꠅꠁꠟꠦ ꠁꠀꠇꠥꠛ ꠀꠍꠟꠣ ꠘꠤꠞꠣꠁ-ꠎꠤꠞꠣꠁ, ꠔꠣꠁꠘ ꠔꠣꠝ꠆ꠛꠥꠔ ꠕꠣꠇꠔꠣ।
GEN 25:28 ꠡꠤꠇꠣꠞꠞ ꠉꠥꠡ꠆ꠔ ꠝꠎꠣ ꠟꠣꠉꠔ ꠇꠞꠤ ꠁꠍꠢꠣꠇꠦ ꠁꠡʼꠞꠦ ꠝꠣꠄꠀ ꠇꠞꠔꠣ, ꠀꠞ ꠞꠦꠛꠦꠇꠣꠄ ꠁꠀꠇꠥꠛꠞꠦ ꠝꠣꠄꠀ ꠇꠞꠔꠣ।
GEN 25:29 ꠄꠇꠖꠤꠘ ꠁꠀꠇꠥꠛꠦ ꠒꠣꠁꠟ ꠞꠣꠘ꠆ꠖꠤꠍꠂꠘ, ꠅꠃ ꠡꠝꠄ ꠔꠣꠘ ꠛꠠ ꠜꠣꠁ ꠁꠡ ꠝꠞꠥꠜꠥꠝꠤ ꠕꠣꠇꠤ ꠙꠦꠐꠞ ꠜꠥꠇꠦ ꠈꠥꠛ ꠇꠣꠔꠞ ꠅꠁꠀ ꠀꠁꠟꠣ, ꠀꠁꠀ ꠢꠥꠞꠥ ꠜꠣꠁ ꠁꠀꠇꠥꠛꠞꠦ ꠇꠁꠟꠣ,
GEN 25:30 “ꠜꠣꠁꠞꠦ, ꠀꠝꠣꠞ ꠈꠥꠛ ꠜꠥꠇ ꠟꠣꠉꠍꠦ। ꠔꠦ ꠅꠃ ꠞꠋꠉꠤꠟ, ꠞꠋꠉꠤꠟ ꠅꠔꠣ ꠀꠝꠣꠞꠦ ꠙꠦꠐ ꠜꠞꠤ ꠈꠣꠁꠔꠦ ꠖꠦ।” ꠅꠃ ꠇꠕꠣꠞ ꠟꠣꠉꠤ ꠔꠣꠘ ꠌꠤꠠ ꠟꠣꠉꠟ ꠁꠖꠥꠝ [ꠝꠣꠘꠤ, ꠞꠋꠉꠤꠟ]।
GEN 25:31 ꠁꠀꠇꠥꠛꠦ ꠇꠁꠟꠣ, “ꠔꠣꠁꠟꠦ ꠛꠠ ꠜꠣꠁ ꠅꠀꠞ ꠝꠣꠟꠤꠇꠣꠘꠣ, ꠔꠥꠝꠤ ꠀꠁꠎ ꠀꠝꠣꠞ ꠉꠦꠍꠦ ꠛꠦꠌꠤꠟꠣꠅ।”
GEN 25:32 ꠁꠡꠦ ꠇꠁꠟꠣ, “ꠖꠦꠈꠅ, ꠀꠝꠣꠞ ꠎꠣꠘ ꠛꠣꠞ ꠅꠁꠎꠣꠞ, ꠀꠞ ꠛꠠ ꠜꠣꠁꠞ ꠝꠣꠟꠤꠇꠣꠘꠣꠖꠤ ꠀꠞ ꠇꠤꠔꠣ ꠇꠞꠔꠣꠝ?”
GEN 25:33 ꠁꠀꠇꠥꠛꠦ ꠇꠁꠟꠣ, “ꠀꠉꠦ ꠔꠥꠝꠤ ꠀꠝꠣꠞ ꠉꠦꠍꠦ ꠇꠍꠝ ꠇꠞꠅ।” ꠅꠃ ꠁꠡꠦ ꠇꠍꠝ ꠇꠞꠤꠀ ꠛꠠ ꠜꠣꠁ ꠅꠀꠞ ꠝꠣꠟꠤꠇꠣꠘꠣ ꠁꠀꠇꠥꠛꠞ ꠉꠦꠍꠦ ꠛꠦꠌꠤꠟꠣꠁꠟꠣ।
GEN 25:34 ꠛꠣꠖꠦ ꠁꠀꠇꠥꠛꠦ ꠁꠡʼꠞꠦ ꠒꠣꠁꠟ ꠀꠞ ꠞꠥꠐꠤ ꠈꠣꠁꠔꠦ ꠖꠤꠟꠣ। ꠈꠣꠅꠀ-ꠖꠣꠅꠀ ꠇꠞꠤꠀ ꠔꠣꠁꠘ ꠃꠑꠤꠀ ꠉꠦꠟꠣꠉꠤ। ꠅꠃ ꠟꠣꠈꠣꠘ ꠁꠡꠦ ꠛꠠ ꠙꠥꠀ ꠅꠀꠞ ꠇꠥꠘꠥ ꠖꠣꠝꠃ ꠞꠣꠈꠟꠣ ꠘꠣ।
GEN 26:1 ꠁꠛ꠆ꠞꠣꠢꠤꠝꠞ ꠎꠝꠣꠘꠣꠞ ꠟꠣꠈꠣꠘ ꠁꠚꠤꠞꠣꠅ ꠖꠦꠡꠅ ꠢꠤꠞꠛꠣꠞ ꠄꠇ ꠘꠤꠖꠣꠘ ꠖꠦꠈꠣ ꠖꠤꠟ। ꠔꠦꠃ ꠁꠍꠢꠣꠇ ꠉꠦꠞꠣꠞ ꠐꠣꠃꠘꠅ ꠚꠤꠟꠤꠡ꠆ꠔꠤꠘꠤ ꠅꠇꠟꠞ ꠛꠣꠖꠡꠣ ꠀꠛꠤꠝꠣꠟꠤꠇꠞ ꠉꠦꠍꠦ ꠉꠦꠟꠣꠉꠤ।
GEN 26:2 ꠀꠞ ꠝꠣꠛꠥꠖꠦ ꠁꠍꠢꠣꠇꠞꠦ ꠖꠤꠖꠣꠞ ꠖꠤꠀ ꠇꠁꠟꠣ, “ꠔꠥꠝꠤ ꠝꠤꠡꠞꠅ ꠟꠣꠝꠤꠀ ꠎꠣꠁꠅ ꠘꠣ। ꠀꠝꠤ ꠔꠥꠝꠣꠞꠦ ꠎꠦ ꠖꠦꠡꠞ ꠇꠕꠣ ꠇꠁꠝꠥ, ꠅꠘꠅꠃ ꠕꠣꠇꠤꠅ।
GEN 26:3 ꠅꠃ ꠖꠦꠡꠅ ꠔꠥꠝꠤ ꠝꠥꠍꠣꠚꠤꠞ ꠅꠁꠀ ꠞꠅ। ꠀꠝꠤ ꠔꠥꠝꠣꠞ ꠟꠉꠦ ꠞꠁꠀ, ꠔꠥꠝꠣꠞꠦ ꠛꠞꠇꠔ ꠘꠣꠎꠤꠟ ꠇꠞꠝꠥ। ꠁ ꠖꠦꠡ ꠅꠇꠟ ꠀꠝꠤ ꠔꠥꠝꠣꠞꠦ ꠀꠞ ꠔꠥꠝꠣꠞ ꠅꠀꠞꠤꠡ ꠅꠇꠟꠞꠦ ꠖꠤꠝꠥ। ꠀꠞ ꠔꠥꠝꠣꠞ ꠛꠣꠚ ꠁꠛ꠆ꠞꠣꠢꠤꠝꠞ ꠉꠦꠍꠦ ꠀꠝꠤ ꠎꠦ ꠇꠍꠝ ꠇꠞꠍꠟꠣꠝ, ꠅꠇꠐꠣ ꠙꠥꠞꠣ ꠇꠞꠝꠥ।
GEN 26:4 ꠀꠝꠤ ꠔꠥꠝꠣꠞ ꠅꠀꠞꠤꠡ ꠅꠇꠟꠞꠦ ꠀꠍꠝꠣꠘꠞ ꠔꠦꠞꠣꠞ ꠟꠣꠈꠣꠘ ꠛꠦꠢꠤꠡꠣꠛ ꠇꠞꠝꠥ, ꠅꠃ ꠖꠦꠡ ꠅꠇꠟꠅ ꠔꠣꠞꠣꠞꠦ ꠖꠤꠝꠥ। ꠔꠥꠝꠣꠞ ꠅꠀꠞꠤꠡꠞꠦꠖꠤ, ꠖꠥꠘꠤꠀꠁꠞ ꠢꠇꠟ ꠎꠣꠔꠤꠄ ꠛꠞꠇꠔ ꠙꠣꠁꠛꠣ।
GEN 26:5 ꠁꠛ꠆ꠞꠣꠢꠤꠝꠦ ꠀꠝꠣꠞ ꠝꠣꠔ ꠢꠥꠘꠤꠀ, ꠀꠝꠣꠞ ꠢꠥꠇꠥꠝ, ꠀꠝꠣꠞ ꠀꠁꠘ ꠀꠞ ꠀꠝꠣꠞ ꠡꠞꠤꠅꠔ ꠅꠇꠟ ꠀꠝꠟ ꠇꠞꠍꠦ।”
GEN 26:6 ꠔꠦꠃ ꠁꠍꠢꠣꠇ ꠉꠦꠞꠣꠞ ꠐꠣꠃꠘꠅ ꠞꠁꠟꠣ।
GEN 26:7 ꠀꠞ ꠢꠤꠘꠞ ꠝꠣꠘꠡꠦ ꠔꠣꠘ ꠛꠃꠞ ꠇꠕꠣ ꠎꠤꠇꠣꠁꠟꠦ, ꠔꠣꠁꠘ ꠇꠁꠟꠣ ꠄꠁꠘ ꠀꠝꠣꠞ ꠛꠁꠘ। ꠄꠘꠞꠦ ꠛꠃ ꠇꠁꠔꠦ ꠔꠣꠁꠘ ꠒꠞꠣꠁꠟꠣ, ꠝꠘꠦ ꠇꠞꠟꠣ, ꠞꠦꠛꠦꠇꠣ ꠡꠥꠘ꠆ꠖꠞꠤ ꠇꠞꠤꠀ ꠢꠤꠘꠞ ꠝꠣꠘꠡꠦ ꠞꠦꠛꠦꠇꠣꠞꠦ ꠘꠦꠅꠀꠞ ꠟꠣꠉꠤ ꠔꠣꠘꠞꠦ ꠈꠥꠘ ꠇꠞꠤꠟꠤꠛꠣ।
GEN 26:8 ꠁꠍꠢꠣꠇ ꠛꠃꠔ ꠖꠤꠘ ꠢꠘꠅ ꠞꠅꠀꠞ ꠛꠣꠖꠦ ꠄꠇꠖꠤꠘ ꠚꠤꠟꠤꠡ꠆ꠔꠤꠘꠤ ꠅꠇꠟꠞ ꠛꠣꠖꠡꠣ ꠀꠛꠤꠝꠣꠟꠤꠇꠦ ꠔꠣꠘ ꠈꠤꠠꠇꠤ ꠛꠣꠄꠖꠤ ꠌꠣꠁꠀ ꠖꠦꠈꠟꠣ, ꠁꠍꠢꠣꠇꠦ ꠔꠣꠘ ꠛꠤꠛꠤ ꠞꠦꠛꠦꠇꠣꠞꠦ ꠝꠣꠄꠀ ꠇꠞꠞꠣ।
GEN 26:9 ꠖꠦꠈꠤꠀ ꠔꠣꠁꠘ ꠁꠍꠢꠣꠇꠞꠦ ꠘꠦꠅꠀꠁꠀ ꠇꠁꠟꠣ, “ꠖꠦꠈꠃꠇ꠆ꠇꠣ, ꠞꠦꠛꠦꠇꠣ ꠔ ꠀꠍꠟꠦ ꠀꠙꠘꠣꠞ ꠛꠤꠛꠤ, ꠔꠦ ꠀꠙꠘꠦ ꠇꠦꠘꠦ ꠔꠣꠘꠞꠦ ꠀꠙꠘꠣꠞ ꠛꠁꠘ ꠇꠁꠟꠣ?” ꠁꠍꠢꠣꠇꠦ ꠎꠥꠀꠙ ꠖꠤꠟꠣ, “ꠀꠝꠤ ꠝꠘꠦ ꠇꠞꠍꠟꠣꠝ ꠔꠣꠁꠞ ꠟꠣꠉꠤ ꠀꠝꠣꠞ ꠎꠣꠘ ꠀꠞꠣꠁꠝꠥ।”
GEN 26:10 ꠔꠦꠃ ꠀꠛꠤꠝꠣꠟꠤꠇꠦ ꠇꠁꠟꠣ, “ꠀꠝꠞꠣꠞ ꠟꠉꠦ ꠀꠙꠘꠦ ꠁꠔꠣ ꠇꠤꠔꠣ ꠛꠦꠛꠢꠣꠞ ꠇꠞꠟꠣ? ꠎꠦꠇꠥꠘꠥ ꠝꠣꠘꠡꠦ ꠔ ꠀꠙꠘꠣꠞ ꠛꠤꠛꠤꠞ ꠟꠉꠦ ꠝꠤꠟꠣ-ꠝꠤꠡꠣ ꠇꠞꠔ ꠌꠣꠁꠟ ꠅꠘꠦ ꠀꠞ ꠀꠙꠘꠦ ꠀꠝꠞꠣꠞꠦ ꠖꠥꠡꠤ ꠛꠣꠘꠣꠁꠟꠣ ꠅꠘꠦ।”
GEN 26:11 ꠛꠣꠖꠦ ꠀꠛꠤꠝꠣꠟꠤꠇꠦ ꠢꠇꠟ ꠝꠣꠘꠡꠞꠦ ꠅꠃ ꠢꠥꠇꠥꠝ ꠎꠣꠞꠤ ꠇꠞꠟꠣ, ꠇꠦꠃ ꠎꠥꠖꠤ ꠁꠍꠢꠣꠇ ꠛꠣ ꠔꠣꠘ ꠛꠤꠛꠤꠞ ꠡꠞꠤꠟꠅ ꠀꠔ ꠖꠦꠄ, ꠔꠣꠞꠦ ꠘꠤꠌꠄ ꠎꠣꠘꠦ ꠝꠣꠞꠣ ꠅꠁꠛ।
GEN 26:12 ꠀꠞ ꠁꠍꠢꠣꠇꠦ ꠢꠤ ꠛꠞꠍ ꠈꠦꠔ ꠇꠞꠤꠀ ꠔꠣꠘ ꠎꠝꠤꠘꠅ ꠞꠥꠀ ꠛꠤꠌ ꠕꠣꠇꠤ ꠄꠇ-ꠡ ꠉꠥꠘ ꠛꠦꠡꠤ ꠚꠡꠟ ꠙꠣꠁꠟꠣ, ꠝꠣꠛꠥꠖꠦ ꠔꠣꠘꠞꠦ ꠅꠃꠟꠣ ꠛꠞꠇꠔ ꠘꠣꠎꠤꠟ ꠇꠞꠟꠣ।
GEN 26:13 ꠔꠣꠘ ꠈꠣꠟꠤ ꠛꠣꠠꠔꠦꠃ ꠟꠣꠉꠟ, ꠀꠡ꠆ꠔꠦ ꠀꠡ꠆ꠔꠦ ꠔꠣꠁꠘ ꠈꠥꠛ ꠝꠣꠟꠖꠣꠞ ꠅꠁꠉꠦꠟꠣ।
GEN 26:14 ꠔꠣꠘ ꠉꠞꠥ-ꠍꠣꠉꠟ ꠀꠞ ꠉꠥꠟꠣꠝ-ꠛꠣꠘ꠆ꠖꠤ ꠅꠃꠟꠣ ꠛꠣꠠꠟ ꠎꠦꠘ, ꠁꠔꠣ ꠖꠦꠈꠤꠀ ꠚꠤꠟꠤꠡ꠆ꠔꠤꠘꠤ ꠅꠇꠟꠦ ꠁꠋꠡꠣꠁꠔꠣ ꠟꠣꠉꠟꠣ।
GEN 26:15 ꠀꠞ ꠔꠣꠘ ꠛꠣꠚ ꠁꠛ꠆ꠞꠣꠢꠤꠝꠞ ꠀꠝꠟꠅ, ꠔꠣꠘ ꠉꠥꠟꠣꠝ ꠅꠇꠟꠦ ꠎꠦ ꠇꠥꠀ ꠅꠇꠟ ꠈꠥꠖꠤꠍꠟꠣ, ꠚꠤꠟꠤꠡ꠆ꠔꠤꠘꠤ ꠅꠇꠟꠦ ꠁꠉꠥꠁꠘ ꠝꠣꠐꠤꠖꠤ ꠜꠞꠤꠀ ꠛꠘ꠆ꠖ ꠇꠞꠤꠟꠣꠁꠍꠟꠣ।
GEN 26:16 ꠛꠣꠖꠦ ꠀꠛꠤꠝꠣꠟꠤꠇꠦ ꠁꠍꠢꠣꠇꠞꠦ ꠇꠁꠟꠣ, “ꠀꠙꠘꠦ ꠀꠝꠞꠣꠞ ꠉꠦꠍ ꠕꠘꠦ ꠎꠣꠃꠇ꠆ꠇꠣꠉꠤ, ꠀꠙꠘꠦ ꠔ ꠀꠝꠞꠣ ꠕꠘꠦ ꠛꠦꠡꠤ ꠡꠇ꠆ꠔꠤꠀꠟꠣ ꠅꠁꠉꠦꠍꠂꠘ।”
GEN 26:17 ꠅꠃ ꠁꠍꠢꠣꠇꠦ ꠢꠘ ꠕꠘꠦ ꠢꠞꠤꠀ ꠉꠤꠀ ꠉꠦꠞꠣꠞ ꠝꠞꠣ ꠉꠣꠋꠉꠞ ꠌꠞꠅ ꠔꠣꠝ꠆ꠛꠥ ꠉꠣꠠꠤꠀ ꠞꠁꠟꠣ।
GEN 26:18 ꠀꠞ ꠔꠣꠘ ꠛꠣꠚ ꠁꠛ꠆ꠞꠣꠢꠤꠝꠞ ꠀꠝꠟꠞ ꠈꠥꠖꠣ ꠇꠥꠀꠁꠘ, ꠔꠣꠁꠘ ꠢꠤꠞꠛꠣꠞ ꠈꠥꠖꠤꠟꠣ, ꠇꠣꠞꠘ ꠁꠛ꠆ꠞꠣꠢꠤꠝꠞ ꠝꠃꠔꠞ ꠛꠣꠖꠦ ꠚꠤꠟꠤꠡ꠆ꠔꠤꠘꠤ ꠅꠇꠟꠦ ꠁꠔꠣ ꠜꠞꠤꠟꠣꠁꠍꠟꠣ। ꠀꠞ ꠔꠣꠘ ꠛꠣꠚꠦ ꠅꠃ ꠇꠥꠀꠁꠘ꠆ꠔꠞ ꠎꠦ ꠘꠣꠝ ꠞꠣꠈꠍꠟꠣ, ꠔꠣꠁꠘꠅ ꠅꠃ ꠘꠣꠝ ꠞꠣꠈꠟꠣ।
GEN 26:19 ꠁꠍꠢꠣꠇꠞ ꠉꠥꠟꠣꠝ ꠅꠇꠟꠦ ꠅꠃ ꠉꠣꠋꠉꠞ ꠌꠞꠅ ꠈꠥꠖꠤꠀ ꠙꠣꠘꠤꠞ ꠚꠥꠔꠀꠟꠣ ꠄꠇ ꠇꠥꠀ ꠙꠣꠁꠟꠣ।
GEN 26:20 ꠀꠞ ꠉꠦꠞꠣꠞꠞ ꠞꠣꠈꠣꠟ ꠅꠇꠟꠦ ꠔꠣꠘ ꠞꠣꠈꠣꠟ ꠅꠇꠟꠞ ꠟꠉꠦ ꠖꠞꠛꠣꠞ ꠇꠞꠤꠀ ꠇꠁꠟ, ꠁ ꠙꠣꠘꠤ ꠀꠝꠞꠣꠞ। ꠅꠃ ꠔꠣꠁꠘ ꠁ ꠇꠥꠀꠞ ꠘꠣꠝ ꠞꠣꠈꠟꠣ ꠄꠡꠇ [ꠝꠣꠘꠤ, ꠖꠞꠛꠣꠞ]।
GEN 26:21 ꠛꠣꠖꠦ ꠁꠍꠢꠣꠇꠞ ꠞꠣꠈꠣꠟ ꠅꠇꠟꠦ ꠀꠞꠅ ꠄꠇ ꠇꠥꠀ ꠈꠥꠖꠤꠟꠣ, ꠀꠞ ꠁꠐꠣ ꠟꠁꠀꠅ ꠔꠣꠞꠣ ꠖꠞꠛꠣꠞ ꠇꠞꠟꠣ। ꠅꠃ ꠔꠣꠁꠘ ꠁꠐꠣꠞ ꠘꠣꠝ ꠞꠣꠈꠟꠣ ꠡꠤꠐꠘꠣ [ꠝꠣꠘꠤ, ꠖꠥꠡꠝꠘꠤ]।
GEN 26:22 ꠢꠦꠡꠦ ꠔꠣꠁꠘ ꠢꠘ ꠕꠘꠦ ꠢꠞꠤꠀ ꠉꠤꠀ ꠀꠞꠅ ꠄꠇ ꠇꠥꠀ ꠈꠥꠖꠣꠁꠟꠣ, ꠁꠚꠤꠞꠣ ꠔꠣꠞꠣ ꠀꠞ ꠇꠥꠘꠥ ꠖꠞꠛꠣꠞ ꠇꠞꠟꠣ ꠘꠣ। ꠔꠦꠃ ꠁꠍꠢꠣꠇꠦ ꠅꠃ ꠇꠥꠀꠞ ꠘꠣꠝ ꠞꠣꠈꠟꠣ ꠞꠢꠛꠔ [ꠝꠣꠘꠤ, ꠛꠃꠔ ꠎꠣꠉꠣ]। ꠔꠣꠁꠘ ꠇꠁꠟꠣ, “ꠅꠈꠘ ꠝꠣꠛꠥꠖꠦꠃ ꠀꠝꠞꠣꠞꠦ ꠛꠃꠔ ꠎꠣꠉꠣ ꠖꠤꠟꠣ, ꠀꠝꠞꠣ ꠁ ꠖꠦꠡꠅ ꠀꠞꠅ ꠛꠣꠠꠔꠣꠝ ꠙꠣꠞꠝꠥ।”
GEN 26:23 ꠛꠣꠖꠦ ꠁꠍꠢꠣꠇꠦ ꠢꠘ ꠕꠘꠦ ꠢꠞꠤꠀ ꠛꠦꠞ-ꠡꠦꠛꠣꠔ ꠉꠦꠟꠣꠉꠤ।
GEN 26:24 ꠢꠃ ꠞꠣꠁꠔꠃ ꠝꠣꠛꠥꠖꠦ ꠔꠣꠘꠞꠦ ꠖꠤꠖꠣꠞ ꠖꠤꠀ ꠇꠁꠟꠣ, “ꠀꠝꠤ ꠔꠥꠝꠣꠞ ꠛꠣꠚ ꠁꠛ꠆ꠞꠣꠢꠤꠝꠞ ꠀꠟ꠆ꠟꠣ। ꠔꠥꠝꠤ ꠒꠞꠣꠁꠅ ꠘꠣ, ꠀꠝꠣꠞ ꠉꠥꠟꠣꠝ ꠁꠛ꠆ꠞꠣꠢꠤꠝꠞ ꠈꠣꠔꠤꠞꠦ ꠀꠝꠤ ꠔꠥꠝꠣꠞ ꠟꠉꠦ ꠀꠍꠤ। ꠀꠝꠤ ꠔꠥꠝꠣꠞꠦ ꠛꠞꠇꠔ ꠘꠣꠎꠤꠟ ꠇꠞꠝꠥ ꠀꠞ ꠔꠥꠝꠣꠞ ꠛꠋꠡ ꠛꠣꠠꠣꠁꠝꠥ।”
GEN 26:25 ꠅꠃ ꠁꠍꠢꠣꠇꠦ ꠢꠘꠅ ꠄꠇꠈꠣꠘ ꠇꠥꠞꠛꠣꠘꠤ ꠈꠣꠘꠣ ꠛꠣꠘꠣꠁꠀ ꠝꠣꠛꠥꠖꠞ ꠘꠣꠝ ꠟꠁꠟꠣ। ꠢꠘꠅ ꠔꠣꠁꠘ ꠔꠣꠘ ꠔꠣꠝ꠆ꠛꠥ ꠉꠣꠠꠤꠟꠣ ꠀꠞ ꠔꠣꠘ ꠉꠥꠟꠣꠝ ꠅꠇꠟꠦ ꠄꠇ ꠇꠥꠀ ꠈꠥꠖꠤꠟꠣ।
GEN 26:26 ꠛꠣꠖꠦ ꠀꠛꠤꠝꠣꠟꠤꠇꠦ ꠔꠣꠘ ꠃꠎꠤꠞ ꠅꠢꠥꠎꠔ ꠀꠞ ꠡꠦꠘꠣꠙꠔꠤ ꠚꠤꠈꠥꠟꠞꠦ ꠟꠁꠀ ꠉꠦꠞꠣꠞ ꠕꠣꠇꠤ ꠁꠍꠢꠣꠇꠞ ꠉꠦꠍꠦ ꠀꠁꠟꠣ।
GEN 26:27 ꠁꠍꠢꠣꠇꠦ ꠄꠞꠣꠞꠦ ꠇꠁꠟꠣ, “ꠀꠙꠘꠣꠞꠣ ꠀꠝꠣꠞ ꠉꠦꠍꠦ ꠇꠤꠔꠣꠞ ꠟꠣꠉꠤ ꠀꠁꠟꠣ? ꠀꠙꠘꠣꠞꠣ ꠔ ꠁꠋꠡꠣ ꠇꠞꠤꠀ ꠀꠝꠣꠞꠦ ꠀꠙꠘꠣꠞꠣꠞ ꠉꠦꠍ ꠕꠘꠦ ꠈꠦꠖꠣꠁ ꠖꠤꠟꠣꠁꠍꠂꠘ।”
GEN 26:28 ꠔꠣꠞꠣ ꠇꠁꠟꠣ, “ꠀꠝꠞꠣ ꠅꠈꠘ ꠍꠣꠚ ꠛꠥꠎꠤꠀꠞ ꠎꠦꠘ, ꠝꠣꠛꠥꠖ ꠀꠙꠘꠣꠞ ꠟꠉꠦ ꠀꠍꠂꠘ। ꠄꠞꠟꠣꠉꠤ ꠀꠙꠘꠣꠞ ꠟꠉꠦ ꠀꠝꠞꠣꠞ ꠄꠉꠥ ꠅꠀꠖꠣ ꠅꠁꠎꠣꠃꠇ। ꠀꠃꠇ꠆ꠇꠣ, ꠀꠝꠞꠣ ꠄꠇ ꠌꠥꠇ꠆ꠔꠤ ꠇꠞꠤꠟꠣꠁ।
GEN 26:29 ꠀꠝꠞꠣ ꠎꠦꠟꠣ ꠀꠙꠘꠣꠞꠦ ꠍꠁꠍꠤ ꠘꠣ ꠀꠞ ꠀꠙꠘꠣꠞ ꠜꠣꠟꠣꠁ ꠍꠣꠠꠣ ꠇꠥꠘꠥ ꠈꠦꠔꠤ ꠇꠞꠍꠤ ꠘꠣ, ꠎꠦꠟꠣ ꠀꠙꠘꠣꠞꠦ ꠡꠣꠘ꠆ꠔꠤꠄ ꠛꠤꠖꠣꠄ ꠖꠤꠍꠤ, ꠅꠃꠟꠣ ꠀꠙꠘꠦꠅ ꠀꠝꠞꠣꠞꠦ ꠈꠦꠔꠤ ꠇꠞꠔꠣ ꠘꠣ। ꠀꠙꠘꠦꠃ ꠔ ꠝꠣꠛꠥꠖꠞ ꠛꠞꠇꠔꠞ ꠝꠣꠘꠥꠡ।”
GEN 26:30 ꠛꠣꠖꠦ ꠁꠍꠢꠣꠇꠦ ꠔꠣꠞꠣꠞ ꠟꠣꠉꠤ ꠈꠣꠘꠣ-ꠖꠣꠘꠣ ꠎꠥꠁꠔ ꠇꠞꠟꠦ, ꠔꠣꠞꠣ ꠈꠣꠘꠣ-ꠖꠣꠘꠣ ꠇꠞꠟꠣ।
GEN 26:31 ꠛꠣꠖꠞ ꠖꠤꠘ ꠛꠤꠀꠘꠦ ꠃꠑꠤꠀ ꠔꠣꠞꠣ ꠖꠥꠁꠅꠎꠘꠦ ꠇꠍꠝ ꠇꠞꠟꠣ। ꠀꠞ ꠁꠍꠢꠣꠇꠦ ꠔꠣꠞꠣꠞꠦ ꠛꠤꠖꠣꠄ ꠖꠤꠟꠦ, ꠔꠣꠞꠣ ꠖꠤꠟꠞ ꠝꠣꠎꠦ ꠡꠣꠘ꠆ꠔꠤ ꠙꠣꠁꠀ ꠞꠅꠀꠘꠣ ꠅꠁꠟꠣ।
GEN 26:32 ꠢꠃ ꠖꠤꠘꠃ ꠔꠣꠘ ꠉꠥꠟꠣꠝ ꠅꠇꠟꠦ ꠀꠁꠀ ꠔꠣꠞꠣꠞ ꠈꠥꠖꠣ ꠄꠇ ꠇꠥꠀꠞ ꠈꠛꠞ ꠎꠣꠘꠣꠁꠟꠣ, ꠔꠣꠞꠣ ꠙꠣꠘꠤꠞ ꠟꠣꠉꠣꠟ ꠙꠣꠁꠍꠂꠘ।
GEN 26:33 ꠅꠃ ꠔꠣꠁꠘ ꠄꠞ ꠘꠣꠝ ꠖꠤꠟꠣ ꠡꠦꠛꠣ [ꠝꠣꠘꠤ, ꠇꠍꠝ]। ꠄꠞꠟꠣꠉꠤ ꠀꠁꠎꠅ ꠢꠤꠘꠞ ꠘꠣꠝ ꠛꠦꠞ-ꠡꠦꠛꠣ ꠞꠁꠍꠦ।
GEN 26:34 ꠁꠡꠦ ꠌꠣꠟ꠆ꠟꠤꠡ ꠛꠞꠍ ꠛꠄꠅꠡꠅ ꠢꠤꠐ꠆ꠐꠤ ꠛꠦꠞꠤꠞ ꠙꠥꠠꠤ ꠎꠤꠢꠥꠖꠤꠕ ꠀꠞ ꠢꠤꠐ꠆ꠐꠤ ꠄꠟꠘꠞ ꠙꠥꠠꠤ ꠛꠣꠡꠝꠔꠞꠦ ꠡꠣꠖꠤ ꠇꠞꠟꠣ।
GEN 26:35 ꠁ ꠖꠥꠁꠅ ꠛꠦꠐꠤꠄ ꠁꠍꠢꠣꠇ ꠀꠞ ꠞꠦꠛꠦꠇꠣꠞ ꠎꠣꠘꠞ ꠝꠣꠎꠦ ꠈꠥꠛ ꠖꠥꠈ ꠖꠤꠟꠣ।
GEN 27:1 ꠝꠥꠞꠛ꠆ꠛꠤ ꠛꠄꠅꠡꠅ ꠁꠍꠢꠣꠇꠞ ꠌꠃꠈꠞ ꠎꠥꠔꠤ ꠇꠝꠤ ꠎꠣꠅꠀꠄ ꠔꠣꠁꠘ ꠀꠞ ꠌꠃꠈꠦ ꠖꠦꠈꠔꠣ ꠘꠣ। ꠔꠣꠁꠘ ꠔꠣꠘ ꠛꠠ ꠙꠥꠀ ꠁꠡʼꠞꠦ ꠀꠘꠣꠁꠀ ꠇꠁꠟꠣ, “ꠛꠣꠛꠣꠞꠦ।” ꠁꠡꠦ ꠎꠥꠀꠙ ꠖꠤꠟꠣ, “ꠅꠃꠘꠥ ꠀꠝꠤ।”
GEN 27:2 ꠔꠣꠁꠘ ꠇꠁꠟꠣ, “ꠖꠦꠈꠅ, ꠀꠝꠤ ꠔ ꠛꠥꠠꠣ ꠅꠁꠉꠦꠍꠤ, ꠇꠥꠘꠖꠤꠘ ꠝꠞꠤꠎꠤꠝꠥ ꠇꠁꠔꠣꠝ ꠙꠣꠞꠤꠀꠞ ꠘꠣ।
GEN 27:3 ꠔꠥꠝꠤ ꠄꠉꠥ ꠇꠣꠝ ꠇꠞꠅ; ꠔꠥꠝꠣꠞ ꠀꠔꠤꠀꠞ, ꠔꠤꠞ-ꠗꠘꠥꠇ ꠟꠁꠀ ꠎꠋꠉꠟꠅ ꠡꠤꠇꠣꠞꠅ ꠎꠣꠅ, ꠀꠞ ꠀꠝꠣꠞ ꠟꠣꠉꠤ ꠇꠥꠘ꠆ꠔꠣ ꠡꠤꠇꠣꠞ ꠇꠞꠤꠀ,
GEN 27:4 ꠀꠝꠣꠞ ꠙꠍꠘ꠆ꠖꠞ ꠜꠣꠟꠣ ꠈꠣꠘꠤ ꠔꠂꠀꠞ ꠇꠞꠤ ꠀꠘꠅ, ꠔꠦꠃ ꠝꠞꠣꠞ ꠀꠉꠦ ꠁꠔꠣ ꠈꠣꠁꠀ ꠀꠝꠣꠞ ꠎꠣꠘꠦ ꠔꠥꠝꠣꠞꠦ ꠖꠥꠀ ꠖꠤꠛ।”
GEN 27:5 ꠁꠍꠢꠣꠇꠦ ꠎꠦꠛꠟꠣ ꠔꠣꠘ ꠙꠥꠀ ꠁꠡʼꠞ ꠟꠉꠦ ꠁꠔꠣ ꠝꠣꠔꠤꠞꠣ, ꠁ ꠡꠝꠄ ꠞꠦꠛꠦꠇꠣꠄ ꠁꠔꠣ ꠢꠥꠘꠍꠤꠟꠣ। ꠔꠦꠃ ꠁꠡ ꠎꠦꠛꠟꠣ ꠡꠤꠇꠣꠞꠅ ꠉꠦꠟꠣꠉꠤ,
GEN 27:6 ꠔꠣꠁꠘ ꠀꠁꠀ ꠔꠣꠘ ꠙꠥꠀ ꠁꠀꠇꠥꠛꠞꠦ ꠇꠁꠟꠣ, “ꠢꠥꠘꠅ, ꠀꠝꠤ ꠢꠥꠘꠟꠣꠝ ꠔꠥꠝꠣꠞ ꠛꠣꠚꠦ ꠔꠥꠝꠣꠞ ꠜꠣꠁ ꠁꠡʼꠞꠦ ꠇꠁꠞꠣ,
GEN 27:7 ‘ꠔꠥꠝꠤ ꠀꠝꠣꠞ ꠟꠣꠉꠤ ꠇꠥꠘ꠆ꠔꠣ ꠡꠤꠇꠣꠞ ꠇꠞꠤ ꠜꠣꠟꠣ ꠈꠣꠘꠤ ꠔꠂꠀꠞ ꠇꠞꠅ, ꠔꠦꠃ ꠀꠝꠤ ꠝꠞꠣꠞ ꠀꠉꠦ ꠅꠔꠣ ꠈꠣꠁꠀ, ꠝꠣꠛꠥꠖꠞ ꠍꠣꠝꠘꠦ ꠔꠥꠝꠣꠞꠦ ꠖꠥꠀ ꠖꠤꠝꠥ।’
GEN 27:8 ꠔꠦ ꠞꠦ ꠙꠥꠔ, ꠀꠝꠤ ꠔꠥꠝꠣꠞꠦ ꠅꠈꠘ ꠎꠦꠔꠣ ꠇꠞꠔꠣꠄ ꠇꠁꠝꠥ, ꠔꠥꠝꠤ ꠅꠃꠟꠣ ꠢꠥꠘꠤꠅ।
GEN 27:9 ꠔꠥꠝꠤ ꠉꠤꠀ ꠙꠣꠟ ꠕꠣꠇꠤ ꠖꠥꠁꠐꠣ ꠔꠣꠎꠣ ꠈꠡꠤ ꠀꠘꠅ। ꠀꠝꠤ ꠁꠔꠣꠖꠤ ꠔꠥꠝꠣꠞ ꠛꠣꠚꠞ ꠡꠈꠞ ꠈꠣꠘꠤ, ꠀꠌꠣꠘꠇ ꠝꠎꠣ ꠇꠞꠤ ꠞꠣꠘ꠆ꠖꠤꠀ ꠖꠦꠁ।
GEN 27:10 ꠔꠦꠃ ꠔꠥꠝꠤ ꠅꠔꠣ ꠟꠁꠀ ꠔꠥꠝꠣꠞ ꠛꠣꠚꠞ ꠉꠦꠍꠦ ꠎꠣꠁꠅ, ꠔꠣꠁꠘ ꠁꠔꠣ ꠈꠣꠁꠀ ꠝꠞꠣꠞ ꠀꠉꠦ ꠔꠥꠝꠣꠞꠦ ꠖꠥꠀ ꠇꠞꠛꠣ।”
GEN 27:11 ꠁꠀꠇꠥꠛꠦ ꠔꠣꠘ ꠝꠣʼꠞꠦ ꠇꠁꠟꠣ, “ꠢꠥꠘꠅ, ꠀꠝꠣꠞ ꠜꠣꠁ ꠁꠡʼꠞ ꠡꠞꠤꠟ ꠔ ꠞꠥꠝꠣꠀꠟꠣ, ꠀꠝꠣꠞ ꠡꠞꠤꠟꠅ ꠔ ꠞꠥꠝꠣ ꠘꠣꠄ।
GEN 27:12 ꠎꠥꠖꠤ ꠛꠣꠛꠣꠄ ꠀꠝꠣꠞ ꠡꠞꠤꠟꠅ ꠀꠔꠣꠁꠘ, ꠔꠦ ꠝꠘꠅ ꠇꠞꠛꠣ ꠀꠝꠤ ꠔꠣꠘꠦ ꠗꠥꠇꠣ ꠖꠤꠀꠞ, ꠔꠣꠁꠟꠦ ꠀꠝꠤ ꠖꠥꠀꠞ ꠛꠖꠟꠣ ꠀꠞꠅ ꠟꠣꠘ꠆ꠘꠔ ꠒꠣꠇꠤꠀ ꠀꠘꠝꠥ।”
GEN 27:13 ꠔꠦꠃ ꠔꠣꠘ ꠝꠣʼꠄ ꠇꠁꠟꠣ, “ꠙꠥꠔꠞꠦ, ꠔꠥꠝꠣꠞ ꠁ ꠟꠣꠘ꠆ꠘꠔ ꠀꠝꠣꠞ ꠃꠙꠞꠦꠃ ꠙꠠꠃꠇ। ꠔꠥꠝꠤ ꠈꠣꠟꠤ ꠀꠝꠣꠞ ꠝꠣꠔꠈꠣꠘ ꠢꠥꠘꠅ ꠀꠞ ꠈꠡꠤꠉꠥꠁꠘ ꠀꠘꠤꠀ ꠖꠦꠅ।”
GEN 27:14 ꠅꠃ ꠁꠀꠇꠥꠛꠦ ꠉꠤꠀ ꠈꠡꠤ ꠀꠘꠤꠀ ꠔꠣꠘ ꠝꠣʼꠞꠦ ꠖꠤꠟꠣ। ꠀꠞ ꠔꠣꠘ ꠛꠣꠚꠦ ꠎꠦꠟꠣ ꠡꠈ ꠇꠞꠂꠘ, ꠔꠣꠁꠘ ꠅꠃꠟꠣ ꠝꠎꠣ ꠇꠞꠤ ꠞꠣꠘ꠆ꠖꠤꠟꠣ।
GEN 27:15 ꠛꠣꠖꠦ ꠔꠣꠁꠘ ꠊꠞꠞ ꠝꠣꠎꠦ ꠕꠅꠀ ꠛꠠ ꠙꠥꠀ ꠁꠡʼꠞ ꠜꠣꠟꠣ ꠜꠣꠟꠣ ꠇꠣꠙꠠ-ꠌꠥꠙꠠ ꠀꠘꠤꠀ ꠔꠣꠘ ꠢꠥꠞꠥ ꠙꠥꠀ ꠁꠀꠇꠥꠛꠞꠦ ꠚꠤꠘ꠆ꠖꠣꠁꠟꠣ।
GEN 27:16 ꠁꠀꠇꠥꠛꠞ ꠀꠔꠅ ꠀꠞ ꠉꠟꠣꠔ ꠎꠦ ꠎꠣꠉꠣꠔ ꠞꠥꠝꠣ ꠘꠣꠄ, ꠢꠃ ꠎꠣꠉꠣꠔ ꠅꠃ ꠈꠡꠤꠞ ꠌꠣꠝꠠꠣ ꠟꠣꠉꠣꠁ ꠖꠤꠟꠣ।
GEN 27:17 ꠀꠞ ꠘꠤꠎꠞ ꠞꠣꠘ꠆ꠖꠣ ꠢꠃ ꠝꠎꠣꠞ ꠈꠣꠘꠤ ꠀꠞ ꠞꠥꠐꠤ ꠔꠣꠘ ꠙꠥꠀ ꠁꠀꠇꠥꠛꠞ ꠀꠔꠅ ꠖꠤꠟꠣ।
GEN 27:18 ꠁꠀꠇꠥꠛꠦ ꠔꠣꠘ ꠛꠣꠚꠞ ꠉꠦꠍꠦ ꠉꠤꠀ ꠒꠣꠇ ꠖꠤꠟꠣ, “ꠛꠣꠛꠣ।” ꠁꠍꠢꠣꠇꠦ ꠎꠥꠀꠙ ꠖꠤꠟꠣ, “ꠅꠃꠘꠥ ꠀꠝꠤ, ꠔꠥꠝꠤ ꠇꠦ ꠞꠦ ꠙꠥꠔ?”
GEN 27:19 ꠁꠀꠇꠥꠛꠦ ꠔꠣꠘ ꠛꠣꠚꠞꠦ ꠇꠁꠟꠣ, “ꠀꠝꠤ ꠀꠙꠘꠣꠞ ꠛꠠ ꠙꠥꠀ ꠁꠡ। ꠀꠙꠘꠦ ꠀꠝꠣꠞꠦ ꠎꠦꠟꠣ ꠇꠁꠍꠟꠣ, ꠀꠝꠤ ꠅꠃꠟꠣ ꠇꠞꠍꠤ। ꠖꠄꠀ ꠇꠞꠤ ꠃꠑꠤꠀ ꠛꠃꠇ꠆ꠇꠣ, ꠀꠝꠣꠞ ꠡꠤꠇꠣꠞꠞ ꠉꠥꠡ꠆ꠔ ꠈꠣꠃꠇ꠆ꠇꠣ, ꠈꠣꠁꠀ ꠢꠣꠞꠟꠦ ꠀꠙꠘꠦ ꠀꠝꠣꠞꠦ ꠖꠥꠀ ꠖꠤꠛꠣ।”
GEN 27:20 ꠁꠍꠢꠣꠇꠦ ꠔꠣꠘ ꠙꠥꠀꠞꠦ ꠇꠁꠟꠣ, “ꠛꠣꠛꠣꠞꠦ, ꠔꠥꠝꠤ ꠅꠔ ꠎꠟꠖꠤ ꠡꠤꠇꠣꠞ ꠙꠣꠁꠟꠣꠄ ꠇꠤꠟꠣ?” ꠔꠣꠁꠘ ꠇꠁꠟꠣ, “ꠀꠙꠘꠣꠞ ꠝꠣꠛꠥꠖ ꠀꠟ꠆ꠟꠣꠄ ꠝꠤꠟꠣꠁ ꠖꠤꠍꠂꠘ।”
GEN 27:21 ꠅꠃ ꠁꠍꠢꠣꠇꠦ ꠁꠀꠇꠥꠛꠞꠦ ꠇꠁꠟꠣ, “ꠛꠣꠛꠣ, ꠀꠝꠣꠞ ꠇꠣꠍꠣꠔ ꠀꠅ ꠔꠦꠃ ꠔꠥꠝꠣꠞ ꠉꠔꠞꠅ ꠀꠔ ꠖꠤꠀ ꠛꠥꠎꠝꠥ, ꠔꠥꠝꠤ ꠢꠣꠍꠣꠃ ꠀꠝꠣꠞ ꠙꠥꠀ ꠁꠡ ꠘꠤ।”
GEN 27:22 ꠁꠀꠇꠥꠛ ꠔꠣꠘ ꠛꠣꠚ ꠁꠍꠢꠣꠇꠞ ꠀꠞꠅ ꠇꠣꠍꠣꠔ ꠉꠦꠟꠣ। ꠔꠣꠁꠘ ꠡꠞꠤꠟꠅ ꠀꠔꠣꠁꠀ ꠇꠁꠟꠣ, “ꠉꠟꠣꠞ ꠀꠅꠀꠎꠐꠣ ꠁꠀꠇꠥꠛꠞ, ꠅꠁꠟꠦ ꠀꠔ ꠖꠥꠁꠅꠈꠣꠘ ꠔ ꠁꠡʼꠞ।”
GEN 27:23 ꠁꠀꠇꠥꠛꠞ ꠀꠔ ꠔꠣꠘ ꠜꠣꠁ ꠁꠡʼꠞ ꠝꠔ ꠞꠥꠝꠦ ꠜꠞꠣ ꠀꠍꠤꠟ ꠇꠞꠤ ꠁꠍꠢꠣꠇꠦ ꠔꠣꠘꠞꠦ ꠌꠤꠘꠟꠣ ꠘꠣ। ꠅꠃ ꠔꠣꠁꠘ ꠁꠀꠇꠥꠛꠞꠦ ꠖꠥꠀ ꠖꠤꠟꠣ।
GEN 27:24 ꠔꠣꠁꠘ ꠎꠤꠇꠣꠁꠟꠣ, “ꠔꠥꠝꠤ ꠇꠤꠔꠣ ꠢꠣꠍꠣꠃ ꠀꠝꠣꠞ ꠙꠥꠀ ꠁꠡ ꠘꠤ?” ꠁꠀꠇꠥꠛꠦ ꠇꠁꠟꠣ, “ꠎꠤꠅꠄ ꠛꠣꠛꠣ।”
GEN 27:25 ꠅꠃ ꠁꠍꠢꠣꠇꠦ ꠇꠁꠟꠣ, “ꠙꠥꠀꠞ ꠡꠤꠇꠣꠞꠞ ꠉꠥꠡ꠆ꠔ ꠀꠝꠣꠞ ꠉꠦꠍꠦ ꠀꠘꠅ, ꠁꠔꠣ ꠈꠣꠁꠀ ꠢꠣꠞꠟꠦ ꠀꠝꠣꠞ ꠎꠣꠘꠦ ꠔꠥꠝꠣꠞꠦ ꠖꠥꠀ ꠖꠤꠛ।” ꠁꠀꠇꠥꠛꠦ ꠉꠥꠡ꠆ꠔ ꠟꠁꠀ ꠀꠁꠟꠦ ꠔꠣꠁꠘ ꠈꠣꠁꠟꠣ। ꠛꠣꠖꠦ ꠔꠣꠘꠞꠦ ꠀꠋꠉꠥꠞꠞ ꠡꠞꠛꠔ ꠖꠤꠟꠦ ꠔꠣꠁꠘ ꠄꠅꠔꠣ ꠈꠣꠁꠟꠣ।
GEN 27:26 ꠢꠦꠡꠦ ꠔꠣꠘ ꠛꠣꠚꠦ ꠇꠁꠟꠣ, “ꠅ ꠙꠥꠔ ꠀꠅ, ꠇꠣꠍꠣꠔ ꠀꠁꠀ ꠀꠝꠣꠞꠦ ꠢꠥꠋꠉꠣ ꠖꠦꠅ।”
GEN 27:27 ꠅꠃ ꠁꠀꠇꠥꠛꠦ ꠇꠣꠍꠣꠔ ꠉꠤꠀ ꠢꠥꠋꠉꠣ ꠖꠤꠟꠣ, ꠀꠞ ꠁꠍꠢꠣꠇꠦ ꠔꠣꠘ ꠡꠞꠤꠟꠞ ꠇꠣꠙꠠꠞ ꠊꠦꠞꠣꠘ ꠢꠥꠋꠉꠤꠀ ꠔꠣꠘꠞꠦ ꠖꠥꠀ ꠖꠤꠟꠣ, “ꠖꠦꠈꠅ, ꠀꠝꠣꠞ ꠙꠥꠀꠞ ꠊꠦꠞꠣꠘ ꠔ ꠝꠣꠛꠥꠖꠞ ꠛꠞꠇꠔꠤ ꠈꠦꠔꠞ ꠊꠦꠞꠣꠘꠞ ꠟꠣꠈꠣꠘ।
GEN 27:28 ꠀꠟ꠆ꠟꠣꠄ ꠀꠍꠝꠣꠘꠞ ꠈꠥꠀ ꠕꠘꠦ ꠀꠞ ꠞꠡꠣꠁꠟ ꠎꠝꠤꠘ ꠕꠘꠦ ꠔꠥꠝꠣꠞꠦ ꠖꠦꠃꠇ꠆ꠇꠣ; ꠛꠃꠔ ꠚꠡꠟ ꠀꠞ ꠀꠋꠉꠥꠞꠞ ꠡꠞꠛꠔ ꠔꠥꠝꠣꠞꠦ ꠖꠦꠃꠇ꠆ꠇꠣ।
GEN 27:29 ꠢꠇꠟ ꠝꠣꠘꠥꠡ ꠔꠥꠝꠣꠞ ꠉꠥꠟꠣꠝ ꠅꠃꠇ, ꠢꠇꠟ ꠎꠣꠔꠤꠄ ꠔꠥꠝꠣꠞ ꠉꠦꠍꠦ ꠝꠣꠕꠣ ꠘꠥꠀꠃꠇ। ꠘꠤꠎꠞ ꠎꠣꠔꠞ ꠝꠣꠎꠦ ꠔꠥꠝꠤ ꠛꠠ ꠝꠥꠞꠛ꠆ꠛꠤ ꠅꠅ, ꠔꠥꠝꠣꠞ ꠝꠣʼꠞ ꠙꠦꠐꠞ ꠜꠣꠁꠀꠁꠘ꠆ꠔꠦ ꠔꠥꠝꠣꠞ ꠉꠦꠍꠦ ꠝꠣꠕꠣ ꠘꠥꠀꠃꠇ। ꠎꠦ ꠔꠥꠝꠣꠞꠦ ꠟꠣꠘ꠆ꠘꠔ ꠖꠤꠛ, ꠔꠣꠞ ꠃꠙꠞꠦ ꠟꠣꠘ꠆ꠘꠔ ꠙꠠꠃꠇ। ꠎꠦ ꠔꠥꠝꠣꠞꠦ ꠖꠥꠀ ꠇꠞꠛ, ꠢꠦ ꠞꠢꠝꠔꠤ ꠅꠃꠇ।”
GEN 27:30 ꠁꠍꠢꠣꠇꠦ ꠁꠀꠇꠥꠛꠞꠦ ꠖꠥꠀ ꠇꠞꠣ ꠡꠦꠡ ꠅꠁꠟꠦ, ꠁꠀꠇꠥꠛ ꠔꠣꠘ ꠛꠣꠚ ꠁꠍꠢꠣꠇꠞ ꠍꠣꠝꠘꠦ ꠕꠘꠦ ꠢꠞꠔꠦꠃ, ꠔꠣꠘ ꠜꠣꠁ ꠁꠡꠦ ꠡꠤꠇꠣꠞ ꠟꠁꠀ ꠊꠞꠅ ꠀꠁꠟꠣ।
GEN 27:31 ꠔꠣꠁꠘꠅ ꠜꠣꠟꠣ ꠈꠣꠘꠤ ꠔꠂꠀꠞ ꠇꠞꠤꠀ ꠛꠣꠚꠞ ꠉꠦꠍꠦ ꠟꠁꠀ ꠀꠁꠀ ꠇꠁꠟꠣ, “ꠛꠣꠛꠣ, ꠃꠑꠤꠀ ꠛꠁꠀ ꠀꠙꠘꠣꠞ ꠙꠥꠀꠞ ꠡꠤꠇꠣꠞꠞ ꠉꠥꠡ꠆ꠔ ꠈꠣꠃꠇ꠆ꠇꠣ, ꠈꠣꠁꠀ ꠢꠣꠞꠟꠦ ꠀꠙꠘꠣꠞ ꠎꠣꠘꠦ ꠀꠝꠣꠞꠦ ꠖꠥꠀ ꠖꠤꠛꠣ।”
GEN 27:32 ꠅꠃ ꠔꠣꠘ ꠛꠣꠚꠦ ꠇꠁꠟꠣ, “ꠔꠥꠝꠤ ꠇꠦ?” ꠔꠣꠁꠘ ꠇꠁꠟꠣ, “ꠛꠣꠛꠣ, ꠀꠝꠤ ꠔ ꠀꠙꠘꠣꠞ ꠛꠠ ꠙꠥꠀ ꠁꠡ।”
GEN 27:33 ꠀꠞ ꠁꠍꠢꠣꠇꠞ ꠡꠞꠤꠟꠅ ꠛꠦꠎꠥꠁꠔꠣ ꠇꠣꠙꠣ ꠡꠥꠞꠥ ꠅꠁꠟ। ꠇꠣꠙꠤ ꠇꠣꠙꠤ ꠔꠣꠁꠘ ꠇꠁꠟꠣ, “ꠔꠣꠁꠟꠦ ꠀꠝꠣꠞ ꠉꠦꠍꠦ ꠡꠤꠇꠣꠞꠞ ꠉꠥꠡ꠆ꠔ ꠟꠁꠀ ꠎꠦ ꠀꠁꠍꠤꠟ, ꠁꠉꠥ ꠇꠦ? ꠔꠥꠝꠤ ꠀꠁꠛꠣꠞ ꠀꠉꠦꠃ ꠀꠝꠤ ꠅꠔꠣ ꠈꠣꠁꠀ ꠔꠣꠞꠦ ꠖꠥꠀ ꠖꠤꠍꠤ, ꠀꠞ ꠖꠥꠀꠞ ꠚꠟ ꠢꠦ-ꠃ ꠙꠣꠁꠛ।”
GEN 27:34 ꠛꠣꠚꠞ ꠝꠣꠔ ꠢꠥꠘꠤꠀꠃ ꠁꠡꠦ ꠄꠇꠦꠛꠣꠞꠦ ꠛꠥꠇ ꠜꠣꠋꠉꠤꠀ ꠌꠤꠟ꠆ꠟꠣꠁꠀ ꠔꠣꠘ ꠛꠣꠚꠞꠦ ꠇꠁꠟꠣ, “ꠛꠣꠎꠣꠘ, ꠀꠝꠣꠞꠦ, ꠀꠝꠣꠞꠦꠅ ꠖꠥꠀ ꠇꠞꠅ!”
GEN 27:35 ꠁꠍꠢꠣꠇꠦ ꠇꠁꠟꠣ, “ꠔꠥꠝꠣꠞ ꠜꠣꠁꠄ ꠀꠁꠀ ꠌꠔꠥꠞꠤ ꠇꠞꠤꠀ ꠔꠥꠝꠣꠞ ꠙꠣꠅꠘꠣ ꠖꠥꠀ ꠘꠤꠍꠦꠉꠤ।”
GEN 27:36 ꠁꠡꠦ ꠇꠁꠟꠣ, “ꠔꠣꠞ ꠘꠣꠝ ꠁꠀꠇꠥꠛ [ꠝꠣꠘꠤ, ꠗꠥꠇꠣꠛꠣꠎ] ꠘꠣꠄ ꠘꠤ? ꠢꠣꠍꠣꠃ ꠢꠦ ꠖꠥꠁꠛꠣꠞ ꠀꠝꠣꠞꠦ ꠗꠥꠇꠣ ꠖꠤꠍꠦ। ꠛꠠ ꠙꠥꠀ ꠢꠤꠡꠣꠛꠦ ꠀꠝꠣꠞ ꠝꠣꠟꠤꠇꠣꠘꠣ ꠢꠦ ꠀꠉꠦ ꠌꠥꠞꠤ ꠇꠞꠤ ꠘꠤꠍꠤꠟ, ꠀꠞ ꠖꠦꠈꠃꠇ꠆ꠇꠣ, ꠁꠚꠤꠞꠣ ꠀꠝꠣꠞ ꠖꠥꠀꠅ ꠟꠁꠀ ꠉꠦꠟꠉꠤ।” ꠔꠣꠁꠘ ꠚꠤꠞꠤꠀ ꠇꠁꠟꠣ, “ꠀꠙꠘꠦ ꠀꠝꠣꠞ ꠟꠣꠉꠤ ꠇꠥꠘꠥ ꠖꠥꠀꠃ ꠞꠣꠈꠍꠂꠘ ꠘꠣ ꠘꠤ?”
GEN 27:37 ꠁꠍꠢꠣꠇꠦ ꠎꠥꠀꠙ ꠖꠤꠟꠣ, “ꠢꠥꠘꠅ, ꠀꠝꠤ ꠔꠣꠞꠦ ꠔꠥꠝꠣꠞ ꠘꠦꠔꠣ ꠛꠣꠘꠣꠁꠍꠤ, ꠀꠞ ꠔꠣꠞ ꠉꠥꠡ꠆ꠐꠤꠞꠦ ꠔꠣꠞ ꠉꠥꠟꠣꠝ ꠛꠣꠘꠣꠁꠍꠤ, ꠔꠣꠞꠦ ꠚꠡꠟ ꠀꠞ ꠀꠋꠉꠥꠞꠞ ꠡꠞꠛꠔ ꠖꠤꠀ ꠍꠣꠝꠣꠘꠤ ꠇꠞꠍꠤ; ꠅꠈꠘ ꠔꠥꠝꠣꠞ ꠟꠣꠉꠤ ꠀꠞ ꠇꠤꠔꠣ ꠇꠞꠔꠣꠝꠞꠦ ꠙꠥꠔ?”
GEN 27:38 ꠁꠡꠦ ꠚꠤꠞꠤꠀ ꠔꠣꠘ ꠛꠣꠚꠞꠦ ꠇꠁꠟꠣ, “ꠅ ꠛꠣꠎꠣꠘ, ꠀꠙꠘꠣꠞ ꠉꠦꠍꠦ ꠇꠤꠔꠣ ꠅꠃ ꠄꠇ ꠖꠥꠀꠃ ꠀꠍꠤꠟ ꠘꠤ? ꠛꠣꠎꠣꠘ ꠞꠦꠛꠣ, ꠀꠙꠘꠦ ꠀꠝꠣꠞꠦ, ꠀꠝꠣꠞꠦꠅ ꠖꠥꠀ ꠇꠞꠃꠇ꠆ꠇꠣ!” ꠅꠔꠣ ꠇꠁꠀ ꠔꠣꠁꠘ ꠎꠥꠞꠦ ꠎꠥꠞꠦ ꠌꠤꠟ꠆ꠟꠣꠁꠀ ꠇꠣꠘ꠆ꠖꠣꠔ ꠟꠣꠉꠟꠣ।
GEN 27:39 ꠅꠃ ꠔꠣꠘ ꠛꠣꠚ ꠁꠍꠢꠣꠇꠦ ꠇꠁꠟꠣ, “ꠔꠥꠝꠣꠞ ꠛꠡꠔꠈꠣꠘꠣꠞ ꠝꠣꠐꠤ ꠘꠤꠞꠡ ꠅꠁꠛ, ꠢꠤꠘꠅ ꠀꠍꠝꠣꠘꠞ ꠈꠥꠀꠅ ꠙꠠꠔ ꠘꠣꠄ।
GEN 27:40 ꠔꠟꠥꠀꠞꠃ ꠔꠥꠝꠣꠞ ꠎꠤꠘ꠆ꠖꠦꠉꠤ ꠅꠁꠛ, ꠀꠞ ꠘꠤꠎꠞ ꠜꠣꠁꠞ ꠉꠥꠟꠣꠝ ꠅꠁꠛꠣꠄ; ꠅꠁꠟꠦ ꠎꠦꠛꠟꠣ ꠔꠥꠝꠤ ꠘꠣ-ꠝꠣꠘꠞꠣ ꠅꠁꠎꠤꠛꠣꠄ, ꠅꠃ ꠡꠝꠄ ꠘꠤꠎꠞ ꠉꠞ꠆ꠖꠘꠣ ꠕꠣꠇꠤ ꠔꠣꠞ ꠎꠥꠀꠟ ꠢꠞꠣꠁꠛꠣꠄ।”
GEN 27:41 ꠁꠀꠇꠥꠛꠦ ꠔꠣꠘ ꠛꠣꠚꠞ ꠉꠦꠍ ꠕꠘꠦ ꠖꠥꠀ ꠙꠣꠁꠍꠟꠣ ꠇꠞꠤ ꠁꠡꠦ ꠔꠣꠘꠞꠦ ꠁꠋꠡꠣꠁꠔꠣ ꠟꠣꠉꠟꠣ। ꠁꠡꠦ ꠝꠘꠦ ꠝꠘꠦ ꠇꠁꠟꠣ, “ꠀꠝꠣꠞ ꠛꠣꠚꠞ ꠟꠣꠉꠤ ꠝꠃꠔꠞ ꠇꠣꠘ꠆ꠖꠘꠞ ꠖꠤꠘ ꠀꠁꠌ꠆ꠌꠦ। ꠄꠞꠛꠣꠖꠦꠃ ꠔꠣꠞꠦ ꠈꠥꠘ ꠇꠞꠝꠥ।”
GEN 27:42 ꠞꠦꠛꠦꠇꠣꠄ ꠔꠣꠘ ꠛꠠ ꠙꠥꠀ ꠁꠡʼꠞ ꠁꠔꠣ ꠝꠣꠔꠣ-ꠝꠣꠔꠤ ꠢꠥꠘꠟꠣ, ꠔꠦꠃ ꠢꠥꠞꠥ ꠙꠥꠀ ꠁꠀꠇꠥꠛꠞꠦ ꠀꠘꠣꠁꠀ ꠇꠁꠟꠣ, “ꠢꠥꠘꠅ, ꠔꠥꠝꠣꠞ ꠜꠣꠁ ꠁꠡꠦ ꠔꠥꠝꠣꠞꠦ ꠈꠥꠘ ꠇꠞꠣꠞ ꠘꠤꠅꠔꠦ ꠖꠤꠟꠞꠦ ꠛꠣꠘ꠆ꠖꠤꠟꠣꠁꠍꠦ।
GEN 27:43 ꠀꠝꠣꠞ ꠙꠥꠔ, ꠔꠥꠝꠤ ꠀꠝꠣꠞ ꠝꠣꠔꠈꠣꠘ ꠢꠥꠘꠅ, ꠔꠥꠝꠤ ꠢꠣꠞꠣꠘ ꠐꠣꠃꠘꠅ ꠀꠝꠣꠞ ꠜꠣꠁ ꠟꠣꠛꠘꠞ ꠉꠦꠍꠦ ꠢꠞꠤꠀ ꠎꠣꠅꠉꠤ,
GEN 27:44 ꠀꠞ ꠔꠥꠝꠣꠞ ꠜꠣꠁꠞ ꠉꠥꠍꠣ ꠘꠣ ꠇꠝꠣ ꠙꠞ꠆ꠎꠘ꠆ꠔ ꠔꠣꠘ ꠉꠦꠍꠦ ꠕꠣꠇꠅ।
GEN 27:45 ꠔꠣꠞ ꠉꠥꠍꠣ ꠇꠝꠤꠉꠦꠟꠦ, ꠔꠥꠝꠤ ꠔꠣꠞ ꠟꠉꠦ ꠎꠦꠔꠣ ꠇꠞꠍ ꠁꠔꠣ ꠢꠦ ꠚꠣꠃꠞꠤꠟꠤꠟꠦ, ꠀꠝꠤ ꠈꠛꠞꠤꠀꠖꠤ ꠔꠥꠝꠣꠞꠦ ꠀꠘꠣꠁꠝꠥ। ꠇꠤꠔꠣꠟ꠆ꠟꠣꠉꠤ ꠀꠝꠤ ꠄꠇꠖꠤꠘꠦ ꠔꠥꠝꠞꠣ ꠖꠥꠁꠅꠎꠘꠞꠦ ꠀꠞꠣꠁꠔꠣꠝ?”
GEN 27:46 ꠛꠣꠖꠦ ꠞꠦꠛꠦꠇꠣꠄ ꠁꠍꠢꠣꠇꠞꠦ ꠇꠁꠟꠣ, “ꠅꠃ ꠢꠤꠐ꠆ꠐꠤ ꠙꠥꠠꠤꠘ꠆ꠔꠞ ꠟꠣꠉꠤ ꠀꠝꠣꠞ ꠀꠞ ꠛꠣꠌꠣꠞ ꠡ꠆ꠛꠣꠖ ꠘꠣꠁ। ꠁꠀꠇꠥꠛꠦꠅ ꠎꠥꠖꠤ ꠅꠃ ꠟꠣꠈꠣꠘ, ꠁ ꠖꠦꠡꠞ ꠇꠥꠘꠥ ꠢꠤꠐ꠆ꠐꠤ ꠙꠥꠠꠤꠞꠦ ꠡꠣꠖꠤ ꠇꠞꠤꠟꠣꠄ, ꠔꠣꠁꠟꠦ ꠀꠝꠣꠞ ꠀꠞ ꠛꠣꠌꠤꠀꠃ ꠟꠣꠜ ꠇꠤꠔꠣ?”
GEN 28:1 ꠞꠦꠛꠦꠇꠣꠞ ꠝꠣꠔ ꠢꠥꠘꠤꠀ ꠁꠍꠢꠣꠇꠦ, ꠁꠀꠇꠥꠛꠞꠦ ꠀꠘꠣꠁꠀ ꠖꠥꠀ ꠇꠞꠟꠣ ꠀꠞ ꠅꠃ ꠢꠥꠇꠥꠝ ꠖꠤꠟꠣ, “ꠔꠥꠝꠤ ꠇꠦꠘꠣꠘ ꠖꠦꠡꠞ ꠇꠥꠘꠥ ꠙꠥꠠꠤꠞꠦ ꠛꠤꠀ ꠇꠞꠤꠅ ꠘꠣ।
GEN 28:2 ꠔꠥꠝꠤ ꠙꠖ꠆ꠖꠘ-ꠁꠞꠣꠝ ꠖꠦꠡꠅ ꠔꠥꠝꠣꠞ ꠘꠣꠘꠣ ꠛꠕꠥꠄꠟꠞ ꠛꠣꠠꠤꠔ ꠎꠣꠅꠉꠤ, ꠢꠘꠅ ꠔꠥꠝꠣꠞ ꠝꠣꠝꠥ ꠟꠣꠛꠘꠞ ꠇꠥꠘꠥ ꠙꠥꠠꠤꠞꠦ ꠛꠤꠀ ꠇꠞꠤꠅ।
GEN 28:3 ꠡꠞ꠆ꠛ-ꠡꠇ꠆ꠔꠤꠝꠣꠘ ꠀꠟ꠆ꠟꠣꠄ ꠔꠥꠝꠣꠞꠦ ꠛꠞꠇꠔ ꠘꠣꠎꠤꠟ ꠇꠞꠃꠇ꠆ꠇꠣ ꠀꠞ ꠚꠟꠖꠣꠞ ꠇꠞꠤꠀ ꠛꠃꠔ ꠛꠣꠠꠣꠃꠇ꠆ꠇꠣ, ꠎꠣꠔꠦ ꠇꠞꠤ ꠔꠥꠝꠤ ꠛꠃꠔ ꠉꠥꠡ꠆ꠐꠤꠀꠟꠣ ꠎꠣꠔꠤ ꠅꠅ।
GEN 28:4 ꠎꠦ ꠛꠞꠇꠔ ꠔꠣꠁꠘ ꠁꠛ꠆ꠞꠣꠢꠤꠝꠞꠦ ꠘꠣꠎꠤꠟ ꠇꠞꠍꠟꠣ, ꠢꠃ ꠛꠞꠇꠔ ꠔꠣꠁꠘ ꠔꠥꠝꠣꠞꠦ ꠀꠞ ꠔꠥꠝꠣꠞ ꠛꠋꠡꠞꠦ ꠖꠣꠘ ꠇꠞꠃꠇ꠆ꠇꠣ। ꠀꠞ ꠎꠦ ꠖꠦꠡ ꠀꠟ꠆ꠟꠣꠄ ꠁꠛ꠆ꠞꠣꠢꠤꠝꠞꠦ ꠖꠤꠍꠂꠘ, ꠎꠦꠈꠣꠘꠅ ꠔꠥꠝꠤ ꠅꠈꠘ ꠝꠥꠍꠣꠚꠤꠞ ꠀꠍ, ꠁ ꠖꠦꠡꠈꠣꠘ ꠎꠣꠘꠥ ꠔꠥꠝꠣꠞ ꠅꠄ।”
GEN 28:5 ꠛꠣꠖꠦ ꠁꠍꠢꠣꠇꠦ ꠁꠀꠇꠥꠛꠞꠦ ꠛꠤꠖꠣꠄ ꠖꠤꠟꠣ, ꠀꠞ ꠔꠣꠁꠘ ꠙꠖ꠆ꠖꠘ-ꠁꠞꠣꠝꠅ ꠅꠞꠣꠝꠤ ꠛꠕꠥꠄꠟꠞ ꠙꠥꠀ ꠟꠣꠛꠘꠞ ꠉꠦꠍꠦ ꠞꠅꠀꠘꠣ ꠅꠁꠟꠣ। ꠟꠣꠛꠘ ꠅꠁꠟꠣ ꠞꠦꠛꠦꠇꠣꠞ ꠜꠣꠁ, ꠁꠀꠇꠥꠛ ꠀꠞ ꠁꠡʼꠞ ꠝꠣꠝꠥ।
GEN 28:6 ꠁꠡꠦ ꠎꠦꠛꠟꠣ ꠢꠥꠘꠟꠣ, ꠁꠍꠢꠣꠇꠦ ꠁꠀꠇꠥꠛꠞꠦ ꠖꠥꠀ ꠇꠞꠤꠀ ꠛꠤꠀ ꠇꠞꠣꠘꠤꠞ ꠘꠤꠅꠔꠦ ꠙꠖ꠆ꠖꠘ-ꠁꠞꠣꠝꠅ ꠙꠣꠑꠣꠁꠍꠂꠘ ꠀꠞ ꠇꠦꠘꠣꠘꠤ ꠙꠥꠠꠤꠘ꠆ꠔꠞꠦ ꠛꠤꠀ ꠇꠞꠔꠦ ꠘꠤꠡꠦꠗ ꠇꠞꠍꠂꠘ,
GEN 28:7 ꠀꠞ ꠁꠀꠇꠥꠛꠦ ꠔꠣꠘ ꠝꠣ-ꠛꠣꠚꠞ ꠢꠥꠇꠥꠝꠦ ꠙꠖ꠆ꠖꠘ-ꠁꠞꠣꠝꠅ ꠉꠦꠍꠂꠘꠉꠤ,
GEN 28:8 ꠅꠃ ꠁꠡꠦ ꠛꠥꠎꠟꠣ ꠎꠦꠘ, ꠔꠣꠘ ꠛꠣꠚ ꠁꠍꠢꠣꠇ ꠇꠦꠘꠣꠘꠤ ꠛꠦꠐꠤꠘ꠆ꠔꠞ ꠃꠙꠞꠦ ꠈꠥꠡꠤ ꠘꠣꠄ।
GEN 28:9 ꠄꠞꠟꠣꠉꠤ ꠖꠥꠁ ꠛꠃ ꠕꠣꠇꠟꠦꠅ ꠔꠣꠁꠘ ꠁꠛ꠆ꠞꠣꠢꠤꠝꠞ ꠙꠥꠀ ꠁꠍꠝꠣꠁꠟꠞ ꠉꠦꠍꠦ ꠉꠤꠀ ꠔꠣꠘ ꠙꠥꠠꠤ ꠝꠢꠟꠔꠞꠦ ꠛꠤꠀ ꠇꠞꠟꠣ। ꠝꠢꠟꠔ ꠅꠁꠟꠣ ꠘꠣꠛꠣꠃꠔꠞ ꠛꠁꠘ।
GEN 28:10 ꠀꠞ ꠁꠀꠇꠥꠛꠦ ꠛꠦꠞ-ꠡꠦꠛꠣ ꠍꠣꠠꠤꠀ ꠔꠣꠘ ꠝꠣꠝꠥꠞ ꠛꠣꠠꠤ ꠢꠣꠞꠣꠘ ꠐꠣꠃꠘꠞ ꠛꠣꠄ ꠞꠅꠀꠘꠣ ꠖꠤꠟꠣ।
GEN 28:11 ꠙꠕꠅ ꠄꠇ ꠎꠣꠉꠣꠔ ꠡꠥꠞꠥꠎ ꠒꠥꠛꠤ ꠉꠦꠟꠦ ꠔꠣꠁꠘ ꠢꠘꠅꠃ ꠞꠣꠁꠔ ꠇꠣꠐꠣꠁꠟꠣ। ꠢꠘꠞ ꠙꠣꠔ꠆ꠔꠞꠖꠤ ꠢꠤꠔꠣꠘ ꠖꠤꠀ ꠁꠀꠇꠥꠛꠦ ꠊꠥꠝꠣꠁꠔꠣ ꠇꠞꠤ ꠢꠥꠔꠤꠟꠣ।
GEN 28:12 ꠢꠥꠔꠤꠀ ꠢꠣꠞꠟꠦ ꠈꠥꠀꠛꠦ ꠖꠦꠈꠟꠣ, ꠖꠥꠘꠤꠀꠁꠞ ꠃꠙꠞꠦ ꠄꠇꠈꠣꠘ ꠝꠁ ꠃꠛꠣꠁ ꠞꠁꠍꠦ, ꠁ ꠝꠁꠞ ꠝꠣꠕꠣ ꠀꠍꠝꠣꠘꠅ ꠟꠣꠉꠣꠁꠟ। ꠔꠣꠁꠘ ꠖꠦꠈꠟꠣ ꠀꠟ꠆ꠟꠣꠞ ꠚꠤꠞꠤꠡ꠆ꠔꠣ ꠅꠇꠟꠦ ꠅꠉꠥꠛꠣꠄ ꠃꠑꠣ-ꠘꠣꠝꠣ ꠇꠞꠞꠣ,
GEN 28:13 ꠀꠞ ꠝꠣꠛꠥꠖꠦ ꠄꠞ ꠃꠙꠞꠦ ꠃꠛꠣꠁꠀ ꠇꠁꠞꠣ, “ꠀꠝꠤ ꠝꠣꠛꠥꠖ, ꠔꠥꠝꠣꠞ ꠛꠣꠚ-ꠖꠣꠖꠣꠁꠘ ꠁꠛ꠆ꠞꠣꠢꠤꠝꠞ ꠀꠟ꠆ꠟꠣ ꠀꠞ ꠁꠍꠢꠣꠇꠞ ꠀꠟ꠆ꠟꠣ। ꠔꠥꠝꠤ ꠅꠃ ꠎꠦ ꠎꠝꠤꠘꠅ ꠢꠥꠔꠤꠍ, ꠁꠐꠣ ꠀꠝꠤ ꠔꠥꠝꠣꠞꠦ ꠀꠞ ꠔꠥꠝꠣꠞ ꠅꠀꠞꠤꠡ ꠅꠇꠟꠞꠦ ꠖꠤꠝꠥ।
GEN 28:14 ꠔꠥꠝꠣꠞ ꠅꠀꠞꠤꠡ ꠅꠇꠟ ꠖꠥꠘꠤꠀꠁꠞ ꠗꠥꠁꠟ-ꠛꠣꠟꠥꠞ ꠟꠣꠈꠣꠘ ꠛꠦꠢꠤꠡꠣꠛ ꠅꠁꠛꠣ। ꠀꠞ ꠙꠥꠛꠦ-ꠙꠁꠌꠝꠦ, ꠃꠔꠞꠦ-ꠖꠃꠇꠘꠦ ꠌꠣꠁꠞꠅꠛꠣꠄ ꠝꠦꠟꠤꠎꠤꠛꠣ। ꠔꠥꠝꠤ ꠀꠞ ꠔꠥꠝꠣꠞ ꠛꠋꠡꠞ ꠝꠣꠎꠦꠖꠤ ꠖꠥꠘꠤꠀꠁꠞ ꠢꠇ꠆ꠇꠟ ꠎꠣꠔꠤꠄ ꠛꠞꠇꠔ ꠢꠣꠍꠤꠟ ꠇꠞꠛꠣ।
GEN 28:15 ꠀꠝꠤ ꠔꠥꠝꠣꠞ ꠟꠉꠦ ꠟꠉꠦ ꠀꠍꠤ, ꠔꠥꠝꠤ ꠎꠦꠘꠅꠃ ꠎꠣꠅ ꠘꠣ ꠇꠦꠘꠦ ꠀꠝꠤ ꠔꠥꠝꠣꠞꠦ ꠢꠦꠚꠣꠎꠔ ꠇꠞꠝꠥ ꠀꠞ ꠅꠃ ꠖꠦꠡꠅ ꠢꠤꠞꠛꠣꠞ ꠔꠥꠝꠣꠞꠦ ꠚꠤꠞꠣꠁꠀ ꠀꠘꠝꠥ। ꠀꠝꠤ ꠔꠥꠝꠣꠞꠦ ꠎꠦꠔꠣ ꠎꠦꠔꠣ ꠇꠁꠍꠤ ꠁꠔꠣ ꠢꠣꠍꠤꠟ ꠅꠀꠞ ꠀꠉꠦ, ꠔꠥꠝꠣꠞꠦ ꠍꠣꠠꠔꠣꠝ ꠘꠣꠄ।”
GEN 28:16 ꠛꠣꠖꠦ ꠁꠀꠇꠥꠛꠦ ꠊꠥꠝ ꠕꠣꠇꠤ ꠃꠑꠤꠀ ꠇꠁꠟꠣ, “ꠔꠣꠁꠟꠦ ꠢꠣꠍꠣꠃ ꠝꠣꠛꠥꠖ ꠁꠘꠅ ꠀꠍꠂꠘ, ꠀꠝꠤ ꠔ ꠎꠣꠘꠔꠣꠝ ꠘꠣ।”
GEN 28:17 ꠅꠃ ꠔꠣꠁꠘ ꠒꠞꠣꠁꠀ ꠇꠁꠟꠣ, “ꠇꠤꠎꠣꠔ ꠉꠞꠝ ꠁ ꠎꠣꠉꠣ! ꠁꠈꠣꠘ ꠘꠤꠌ꠆ꠌꠄ ꠀꠟ꠆ꠟꠣꠞ ꠊꠞ, ꠅꠈꠣꠘꠅꠃ ꠛꠦꠢꠦꠡ꠆ꠔꠞ ꠖꠥꠀꠞ।”
GEN 28:18 ꠔꠣꠁꠘ ꠚꠎꠞꠞ ꠡꠝꠄ ꠃꠑꠤꠀ, ꠎꠦ ꠙꠣꠔ꠆ꠔꠞꠐꠣ ꠔꠣꠘ ꠝꠣꠕꠣꠞ ꠔꠟꠦ ꠢꠤꠔꠣꠘ ꠖꠤꠍꠟꠣ, ꠁꠇꠐꠣ ꠈꠥꠐꠤꠞ ꠝꠔ ꠇꠞꠤ ꠉꠣꠠꠤꠀ ꠄꠞ ꠃꠙꠞꠦ ꠔꠦꠟ ꠓꠣꠟꠤꠟꠣ।
GEN 28:19 ꠀꠞ ꠢꠤ ꠎꠣꠉꠣꠞ ꠘꠣꠝ ꠞꠣꠈꠟꠣ ꠛꠦꠕꠦꠟ [ꠝꠣꠘꠤ, ꠛꠣꠄꠔꠥꠟ꠆ꠟꠣ], ꠁꠘꠞ ꠀꠉꠞ ꠘꠣꠝ ꠀꠍꠤꠟ ꠟꠥꠎ।
GEN 28:20 ꠛꠣꠖꠦ ꠁꠀꠇꠥꠛꠦ ꠇꠍꠝ ꠈꠣꠁꠀ ꠇꠁꠟꠣ, “ꠀꠟ꠆ꠟꠣꠄ ꠎꠥꠖꠤ ꠀꠝꠣꠞ ꠁ ꠍꠚꠞꠅ ꠢꠦꠚꠣꠎꠔ ꠇꠞꠂꠘ, ꠔꠣꠁꠘ ꠀꠝꠣꠞ ꠈꠣꠘꠤ-ꠈꠥꠞꠣꠇ, ꠚꠤꠘ꠆ꠖꠣꠞ ꠟꠦꠛꠣꠍ ꠎꠥꠉꠣꠁ ꠖꠦꠁꠘ,
GEN 28:21 ꠀꠝꠤ ꠢꠤꠞꠛꠣꠞ ꠍꠢꠤ-ꠍꠣꠟꠣꠝꠔꠦ ꠛꠣꠚꠞ ꠛꠣꠠꠤꠔ ꠚꠤꠞꠤꠀ ꠀꠁ, ꠔꠦ ꠅꠃ ꠝꠣꠛꠥꠖꠞꠦꠃ ꠀꠝꠣꠞ ꠀꠟ꠆ꠟꠣ ꠝꠣꠘꠝꠥ।
GEN 28:22 ꠀꠞ ꠅꠃ ꠎꠦ ꠙꠣꠔ꠆ꠔꠞ ꠀꠝꠤ ꠈꠥꠐꠤ ꠉꠣꠠꠤꠀ ꠕꠁꠟꠣꠝ, ꠅꠘꠅ ꠛꠣꠄꠔꠥꠟ꠆ꠟꠣ ꠡꠞꠤꠚ ꠅꠁꠛ। ꠀꠞ ꠔꠥꠝꠤ ꠀꠝꠣꠞꠦ ꠎꠔꠔꠣ ꠖꠤꠛꠣꠄ, ꠄꠞ ꠖꠡ ꠛꠣꠐꠞ ꠄꠇ ꠛꠣꠐ ꠀꠝꠤ ꠘꠤꠌ꠆ꠌꠄ ꠔꠥꠝꠣꠞꠦ ꠖꠤꠟꠣꠁꠝꠥ।”
GEN 29:1 ꠛꠣꠖꠦ ꠁꠀꠇꠥꠛꠦ ꠀꠐꠤ ꠀꠐꠤ ꠙꠥꠛꠞ ꠖꠦꠡꠞ ꠝꠣꠘꠡꠞ ꠄꠟꠣꠇꠣꠔ ꠉꠦꠟꠣꠉꠤ।
GEN 29:2 ꠉꠤꠀ ꠢꠘꠞ ꠛꠘ꠆ꠖꠞ ꠝꠣꠎꠦ ꠄꠇ ꠇꠥꠀ ꠖꠦꠈꠟꠣ। ꠢꠃ ꠇꠥꠀꠞ ꠉꠦꠍꠦ ꠔꠤꠘ ꠙꠣꠟ ꠝꠦꠠꠣ ꠢꠥꠔꠤ ꠞꠁꠍꠦ; ꠞꠣꠈꠣꠟ ꠅꠇꠟꠦ ꠅꠘ ꠕꠘꠦ ꠔꠣꠞꠣꠞꠦ ꠙꠣꠘꠤ ꠈꠣꠅꠀꠂꠘ। ꠀꠞ ꠇꠥꠀꠞ ꠝꠥꠈꠅ ꠛꠠ ꠄꠇ ꠙꠣꠔ꠆ꠔꠞ ꠕꠅꠀ ꠅꠁꠍꠦ।
GEN 29:3 ꠢꠇꠟ ꠝꠦꠠꠣꠞ ꠙꠣꠟ ꠎꠦꠛꠟꠣ ꠄꠇꠈꠣꠘꠅ ꠅꠁꠔ, ꠔꠦꠃ ꠞꠣꠈꠣꠟ ꠅꠇꠟꠦ ꠇꠥꠀꠞ ꠝꠥꠈ ꠕꠘꠦ ꠙꠣꠔ꠆ꠔꠞꠉꠥ ꠢꠞꠣꠁ ꠖꠤꠀ ꠝꠦꠠꠣꠁꠘ꠆ꠔꠞꠦ ꠙꠣꠘꠤ ꠈꠣꠅꠀꠁꠔ। ꠛꠣꠖꠦ ꠙꠣꠔ꠆ꠔꠞꠞꠦ ꠢꠤꠞꠛꠣꠞ ꠇꠥꠀꠞ ꠝꠥꠈꠅ ꠕꠁꠔ।
GEN 29:4 ꠁꠀꠇꠥꠛꠦ ꠔꠣꠞꠣꠞꠦ ꠎꠤꠇꠣꠁꠟꠣ, “ꠜꠣꠁ ꠅꠇꠟ, ꠀꠙꠘꠣꠞꠣ ꠇꠥꠘ ꠎꠣꠉꠣꠞ ꠝꠣꠘꠥꠡ?” ꠔꠣꠞꠣ ꠇꠁꠟꠣ, “ꠢꠣꠞꠣꠘ ꠐꠣꠃꠘꠞ।”
GEN 29:5 ꠅꠃ ꠔꠣꠁꠘ ꠇꠁꠟꠣ, “ꠀꠙꠘꠣꠞꠣ ꠘꠣꠢꠥꠞꠞ ꠘꠣꠔꠤ ꠟꠣꠛꠘꠞꠦ ꠌꠤꠘꠂꠘ ꠘꠤ?” ꠔꠣꠞꠣ ꠇꠁꠟꠣ, “ꠎꠤꠅꠄ, ꠌꠤꠘꠤ।”
GEN 29:6 ꠁꠀꠇꠥꠛꠦ ꠎꠤꠇꠣꠁꠟꠣ, “ꠔꠣꠁꠘ ꠜꠣꠟꠣ ꠀꠍꠂꠘ ꠘꠤ?” ꠔꠣꠞꠣ ꠇꠁꠟꠣ, “ꠎꠤꠅꠄ, ꠜꠣꠟꠣ ꠀꠍꠂꠘ। ꠅꠃꠘꠥ ꠔꠣꠘ ꠙꠥꠠꠤ ꠞꠣꠢꠦꠟꠣꠄ ꠝꠦꠠꠣꠞ ꠙꠣꠟ ꠟꠁꠀ ꠀꠁꠞꠣ।”
GEN 29:7 ꠔꠣꠁꠘ ꠇꠁꠟꠣ, “ꠖꠦꠈꠃꠇ꠆ꠇꠣ, ꠅꠈꠘꠅ ꠛꠃꠔ ꠛꠦꠁꠟ ꠀꠍꠦ। ꠔꠦ ꠙꠡꠥ ꠅꠇꠟ ꠄꠇꠈꠣꠘꠅ ꠅꠁꠛꠣꠞ ꠡꠝꠄ ꠔ ꠅꠁꠍꠦ ꠘꠣ। ꠀꠙꠘꠣꠞꠣ ꠝꠦꠠꠣꠁꠘ꠆ꠔꠞꠦ ꠙꠣꠘꠤ ꠈꠣꠅꠀꠁꠀ ꠢꠤꠞꠛꠣꠞ ꠞꠣꠈꠣꠔ ꠟꠁꠀ ꠎꠣꠁꠘꠉꠤ।”
GEN 29:8 ꠔꠣꠞꠣ ꠇꠁꠟꠣ, “ꠘꠣ, ꠀꠝꠞꠣ ꠁꠟꠣ ꠇꠞꠔꠣꠝ ꠙꠣꠞꠤ ꠘꠣ, ꠢꠇ꠆ꠇꠟ ꠙꠣꠟ ꠄꠇꠈꠣꠘꠅ ꠖꠟꠣ ꠅꠁꠟꠦ ꠛꠣꠖꠦ ꠇꠥꠀꠞ ꠝꠥꠈ ꠕꠘꠦ ꠙꠣꠔ꠆ꠔꠞ ꠢꠞꠣꠁꠀ ꠀꠝꠞꠣ ꠝꠦꠠꠣꠁꠘ꠆ꠔꠞꠦ ꠙꠣꠘꠤ ꠈꠣꠅꠀꠁ।”
GEN 29:9 ꠔꠣꠁꠘ ꠅꠈꠘꠅ ꠔꠣꠞꠣꠞ ꠟꠉꠦ ꠝꠣꠔꠅ ꠞꠁꠍꠂꠘ, ꠅꠃ ꠡꠝꠄ ꠞꠣꠢꠦꠟꠣꠄ ꠔꠣꠘ ꠛꠣꠚꠞ ꠝꠦꠠꠣꠞ ꠙꠣꠟ ꠟꠁꠀ ꠅꠘꠅ ꠀꠁꠟꠣ, ꠔꠣꠁꠘ ꠁ ꠙꠣꠟꠞ ꠞꠣꠈꠣꠟꠤꠔ ꠀꠍꠟꠣ।
GEN 29:10 ꠁꠀꠇꠥꠛꠦ ꠔꠣꠘ ꠝꠣꠝꠥ ꠟꠣꠛꠘꠞ ꠙꠥꠠꠤ ꠞꠣꠢꠦꠟꠣꠞꠦ ꠀꠞ ꠔꠣꠘ ꠝꠦꠠꠣꠞ ꠙꠣꠟ ꠖꠦꠈꠤꠀꠃ ꠇꠥꠀꠞ ꠉꠦꠍꠦ ꠉꠤꠀ ꠇꠥꠀꠞ ꠝꠥꠈ ꠕꠘꠦ ꠙꠣꠔ꠆ꠔꠞꠐꠣ ꠢꠞꠣꠁꠀ ꠝꠦꠠꠣꠁꠘ꠆ꠔꠞꠦ ꠙꠣꠘꠤ ꠈꠣꠅꠀꠁꠟꠣ।
GEN 29:11 ꠛꠣꠖꠦ ꠔꠣꠁꠘ ꠞꠣꠢꠦꠟꠣꠞꠦ ꠝꠣꠄꠀ ꠖꠤꠀ ꠎꠥꠞꠦ ꠎꠥꠞꠦ ꠇꠣꠘ꠆ꠖꠤꠔꠣ ꠟꠣꠉꠟꠣ।
GEN 29:12 ꠀꠞ ꠔꠣꠁꠘ ꠞꠣꠢꠦꠟꠣꠞꠦ ꠇꠁꠟꠣ ꠎꠦꠘ, ꠔꠣꠁꠘ ꠟꠣꠛꠘꠞ ꠜꠣꠁꠉꠘꠣ, ꠞꠦꠛꠦꠇꠣꠞ ꠙꠥꠀ। ꠅꠃ ꠞꠣꠢꠦꠟꠣꠄ ꠖꠃꠠꠣꠁꠀ ꠉꠤꠀ ꠔꠣꠘ ꠛꠣꠚꠞꠦ ꠁ ꠈꠛꠞ ꠖꠤꠟꠣ।
GEN 29:13 ꠟꠣꠛꠘꠦ ꠔꠣꠘ ꠜꠣꠁꠉꠘꠣ ꠁꠀꠇꠥꠛꠞ ꠈꠛꠞ ꠢꠥꠘꠤꠀ ꠖꠃꠠꠣꠁꠀ ꠔꠣꠘ ꠟꠉꠦ ꠖꠦꠈꠣ ꠇꠞꠣꠔ ꠀꠁꠟꠣ। ꠔꠣꠘꠞꠦ ꠀꠁꠘ꠆ꠎꠣ ꠇꠞꠤ ꠗꠞꠤꠀ ꠢꠥꠋꠉꠣ ꠖꠤꠀ ꠛꠣꠠꠤꠔ ꠟꠁꠀ ꠉꠦꠟꠣ। ꠉꠤꠀ ꠢꠣꠞꠟꠦ ꠁꠀꠇꠥꠛꠦ ꠟꠣꠛꠘꠞꠦ ꠔꠣꠘ ꠀꠁꠛꠣꠞ ꠢꠇ꠆ꠇꠟꠔꠣ ꠎꠣꠘꠣꠁꠟꠣ।
GEN 29:14 ꠟꠣꠛꠘꠦ ꠇꠁꠟꠣ, “ꠔꠥꠝꠤ ꠔ ꠀꠝꠣꠞꠃ ꠎꠣꠘ ꠀꠞ ꠀꠝꠣꠞꠃ ꠉꠥꠡ꠆ꠔ।” ꠀꠞ ꠁꠀꠇꠥꠛ ꠟꠣꠛꠘꠞ ꠛꠣꠠꠤꠔ ꠄꠇ ꠝꠣꠡ ꠞꠁꠟꠣ।
GEN 29:15 ꠄꠇ ꠝꠣꠡ ꠛꠣꠖꠦ ꠟꠣꠛꠘꠦ ꠁꠀꠇꠥꠛꠞꠦ ꠇꠁꠟꠣ, “ꠔꠥꠝꠤ ꠀꠝꠣꠞ ꠇꠥꠐꠥꠝ ꠅꠁꠟꠣꠄ ꠇꠞꠤ ꠛꠤꠘꠣ ꠛꠦꠔꠘꠦ ꠀꠝꠣꠞ ꠌꠣꠇꠞꠤ ꠇꠞꠔꠣꠄ ꠘꠤ ꠛꠣ? ꠔꠥꠝꠣꠞꠦ ꠇꠤꠔꠣ ꠖꠤꠔꠣꠝ, ꠇꠁꠟꠣꠅ।”
GEN 29:16 ꠟꠣꠛꠘꠞ ꠖꠥꠁꠐꠣ ꠙꠥꠠꠤ ꠀꠍꠤꠟ। ꠛꠠꠉꠥꠞ ꠘꠣꠝ ꠟꠦꠀ ꠀꠞ ꠢꠥꠞꠥꠉꠥꠞ ꠘꠣꠝ ꠞꠣꠢꠦꠟꠣ।
GEN 29:17 ꠟꠦꠀꠞ ꠈꠣꠟꠤ ꠌꠃꠈꠃ ꠡꠥꠘ꠆ꠖꠞ ꠀꠍꠤꠟ, ꠅꠁꠟꠦ ꠞꠣꠢꠦꠟꠣꠞ ꠉꠑꠘ ꠀꠞ ꠌꠦꠢꠣꠞꠣ-ꠍꠥꠞꠔ, ꠢꠇ꠆ꠇꠟꠔꠣ ꠡꠥꠘ꠆ꠖꠞ ꠀꠍꠤꠟ।
GEN 29:18 ꠁꠀꠇꠥꠛꠦ ꠞꠣꠢꠦꠟꠣꠞꠦ ꠙꠍꠘ꠆ꠖ ꠇꠞꠔꠣ ꠇꠞꠤ ꠔꠣꠁꠘ ꠇꠁꠟꠣ, “ꠀꠙꠘꠣꠞ ꠢꠥꠞꠥ ꠙꠥꠠꠤ ꠞꠣꠢꠦꠟꠣꠞ ꠟꠣꠉꠤ ꠀꠝꠤ ꠡꠣꠔ ꠛꠞꠍ ꠀꠙꠘꠣꠞ ꠉꠥꠟꠣꠝꠤ ꠇꠞꠝꠥ।”
GEN 29:19 ꠟꠣꠛꠘꠦ ꠇꠁꠟꠣ, “ꠞꠣꠢꠦꠟꠣꠞꠦ ꠝꠣꠘꠡꠞ ꠀꠔꠅ ꠖꠦꠅꠀꠞ ꠌꠣꠁꠔꠦ ꠔꠥꠝꠣꠞ ꠉꠦꠍꠦ ꠖꠦꠅꠀꠃ ꠜꠣꠟꠣ। ꠔꠥꠝꠤ ꠀꠝꠣꠞ ꠉꠦꠍꠦ ꠞꠅ।”
GEN 29:20 ꠔꠦꠃ ꠁꠀꠇꠥꠛꠦ ꠞꠣꠢꠦꠟꠣꠞ ꠟꠣꠉꠤ ꠡꠣꠔ ꠛꠞꠍ ꠉꠥꠟꠣꠝꠤ ꠇꠞꠟꠣ। ꠞꠣꠢꠦꠟꠣꠞꠦ ꠝꠢꠛ꠆ꠛꠔ ꠇꠞꠔꠣ ꠇꠞꠤ, ꠁꠔꠣ ꠄꠇꠅ ꠛꠞꠍ ꠔꠣꠘ ꠉꠦꠍꠦ ꠄꠇ ꠖꠤꠘꠞ ꠢꠝꠣꠘ ꠝꠘꠅ ꠅꠁꠟ।
GEN 29:21 ꠢꠦꠡꠦ ꠔꠣꠁꠘ ꠟꠣꠛꠘꠞꠦ ꠇꠁꠟꠣ, “ꠀꠝꠣꠞ ꠉꠥꠟꠣꠝꠤꠞ ꠝꠤꠀꠖ ꠙꠥꠞꠤ ꠉꠦꠍꠦ। ꠅꠈꠘ ꠀꠝꠣꠞ ꠛꠃꠞꠦ ꠀꠝꠣꠞ ꠀꠔꠅ ꠡꠝꠎꠣꠁꠀ ꠖꠦꠃꠇ꠆ꠇꠣ, ꠀꠝꠤ ꠔꠣꠁꠞ ꠉꠦꠍꠦ ꠞꠁꠔꠣꠝ ꠌꠣꠁ।”
GEN 29:22 ꠔꠦꠃ ꠟꠣꠛꠘꠦ ꠢꠃ ꠄꠟꠣꠇꠣꠞ ꠢꠇꠟ ꠝꠣꠘꠡꠞꠦ ꠛꠤꠀꠞ ꠖꠣꠅꠔ ꠇꠞꠤꠀ ꠈꠣꠘꠣ-ꠖꠣꠘꠣ ꠈꠣꠅꠀꠁꠟꠣ।
GEN 29:23 ꠢꠦꠡꠦ ꠞꠣꠁꠔ ꠅꠁꠟꠦ ꠔꠣꠁꠘ ꠔꠣꠘ ꠙꠥꠠꠤ ꠟꠦꠀꠞꠦ ꠁꠀꠇꠥꠛꠞ ꠉꠦꠍꠦ ꠖꠤꠟꠣ, ꠀꠞ ꠁꠀꠇꠥꠛꠦ ꠄꠘ ꠟꠉꠦ ꠞꠁꠟꠣ।
GEN 29:24 ꠟꠣꠛꠘꠦ ꠘꠤꠎꠞ ꠛꠣꠘ꠆ꠖꠤ ꠎꠤꠟꠙꠣꠞꠦ, ꠔꠣꠘ ꠙꠥꠠꠤ ꠟꠦꠀꠞ ꠛꠣꠘ꠆ꠖꠤ ꠉꠤꠞꠤꠔ ꠖꠤꠟꠣ।
GEN 29:25 ꠅꠁꠟꠦ ꠛꠤꠀꠘꠦ ꠃꠑꠤꠀ ꠖꠦꠈꠂꠘ, ꠄꠁꠘ ꠔ ꠟꠦꠀ। ꠔꠦꠃ ꠁꠀꠇꠥꠛꠦ ꠟꠣꠛꠘꠞꠦ ꠇꠁꠟꠣ, “ꠀꠙꠘꠦ ꠀꠝꠣꠞ ꠟꠉꠦ ꠁꠔꠣ ꠇꠥꠘ ꠎꠣꠔꠞ ꠇꠣꠝ ꠇꠞꠟꠣ? ꠅꠔ ꠖꠤꠘ ꠀꠝꠤ ꠞꠣꠢꠦꠟꠣꠞ ꠟꠣꠉꠤ ꠀꠙꠘꠣꠞ ꠉꠥꠟꠣꠝꠤ ꠇꠞꠍꠤ ꠘꠣꠄ ꠘꠤ? ꠔꠦ ꠀꠝꠣꠞꠦ ꠗꠥꠇꠣ ꠖꠤꠟꠣ ꠇꠦꠘꠦ?”
GEN 29:26 ꠟꠣꠛꠘꠦ ꠇꠁꠟꠣ, “ꠛꠠ ꠙꠥꠠꠤꠞ ꠀꠉꠦ ꠢꠥꠞꠥ ꠙꠥꠠꠤꠞ ꠛꠤꠀ ꠖꠦꠅꠀ ꠀꠝꠞꠣꠞ ꠖꠦꠡꠞ ꠌꠟ ꠘꠣꠄ।
GEN 29:27 ꠔꠥꠝꠤ ꠛꠤꠀꠞ ꠈꠥꠡꠤ-ꠛꠣꠡꠤꠞ ꠢꠣꠙ꠆ꠔꠣꠐꠣ ꠙꠣꠞ ꠅꠁꠔꠦ ꠖꠦꠅ। ꠔꠦꠃ ꠢꠤ ꠙꠥꠠꠤꠞꠦꠅ ꠔꠥꠝꠣꠞ ꠉꠦꠍꠦ ꠛꠤꠀ ꠖꠤꠝꠥ, ꠅꠁꠟꠦ ꠔꠥꠝꠤ ꠀꠞꠅ ꠡꠣꠔ ꠛꠞꠍ ꠀꠝꠣꠞ ꠉꠥꠟꠣꠝꠤ ꠇꠞꠔꠦ ꠅꠁꠛ।”
GEN 29:28 ꠁꠀꠇꠥꠛꠦ ꠔꠣꠘ ꠇꠕꠣ ꠝꠣꠘꠤꠀ ꠅꠃ ꠈꠥꠡꠤ-ꠛꠣꠡꠤꠞ ꠢꠣꠙ꠆ꠔꠣ ꠙꠣꠞ ꠇꠞꠟꠣ। ꠛꠣꠖꠦ ꠟꠣꠛꠘꠦ ꠔꠣꠘ ꠙꠥꠠꠤ ꠞꠣꠢꠦꠟꠣꠞꠦꠅ ꠁꠀꠇꠥꠛꠞ ꠉꠦꠍꠦ ꠡꠣꠖꠤ ꠖꠤꠟꠣ।
GEN 29:29 ꠀꠞ ꠔꠣꠘ ꠛꠣꠘ꠆ꠖꠤ ꠛꠤꠟꠢꠣꠞꠦ ꠞꠣꠢꠦꠟꠣꠞ ꠛꠣꠘ꠆ꠖꠤ ꠉꠤꠞꠤꠔ ꠖꠤꠟꠣ।
GEN 29:30 ꠁꠀꠇꠥꠛꠦ ꠞꠣꠢꠦꠟꠣꠞ ꠟꠉꠦꠅ ꠞꠁꠟꠣ, ꠔꠣꠁꠘ ꠟꠦꠀꠞ ꠌꠣꠁꠔꠦ ꠞꠣꠢꠦꠟꠣꠞꠦ ꠛꠦꠡꠤ ꠝꠣꠄꠀ ꠇꠞꠔꠣ। ꠛꠣꠖꠦ ꠔꠣꠁꠘ ꠀꠞꠅ ꠡꠣꠔ ꠛꠞꠍ ꠔꠣꠘ ꠝꠣꠝꠥ ꠟꠣꠛꠘꠞ ꠉꠥꠟꠣꠝꠤ ꠇꠞꠟꠣ।
GEN 29:31 ꠅꠁꠟꠦ ꠟꠦꠀꠞꠦ ꠝꠣꠄꠀ ꠘꠣ ꠇꠞꠣꠄ, ꠝꠣꠛꠥꠖꠦ ꠟꠦꠀꠞꠦ ꠢꠥꠞꠥꠔ꠆ꠔꠣ ꠙꠄꠖꠣꠞ ꠈꠦꠝꠔꠣ ꠖꠤꠟꠣ, ꠀꠞ ꠞꠣꠢꠦꠟꠣ ꠘꠤꠀꠅꠟꠣꠖꠤ ꠞꠁꠟꠣ।
GEN 29:32 ꠀꠞ ꠟꠦꠀꠞ ꠊꠞꠅ ꠄꠇ ꠙꠥꠀ ꠅꠁꠟ। ꠔꠣꠁꠘ ꠙꠥꠀꠞ ꠘꠣꠝ ꠞꠣꠈꠟꠣ ꠞꠥꠛꠦꠘ [ꠝꠣꠘꠤ, ꠙꠥꠀꠞꠦ ꠖꠦꠈꠅ]। ꠔꠣꠁꠘ ꠇꠁꠟꠣ, “ꠝꠣꠛꠥꠖꠦ ꠀꠝꠣꠞ ꠖꠥꠈ ꠖꠦꠈꠍꠂꠘ, ꠅꠈꠘ ꠘꠤꠌ꠆ꠌꠄ ꠀꠝꠣꠞ ꠎꠣꠝꠣꠁꠄ ꠀꠝꠣꠞꠦ ꠝꠣꠄꠀ ꠇꠞꠛꠣ।”
GEN 29:33 ꠛꠣꠖꠦ ꠢꠤꠞꠛꠣꠞ ꠔꠣꠘ ꠊꠞꠅ ꠄꠇ ꠙꠥꠀ ꠅꠁꠟ। ꠔꠣꠁꠘ ꠙꠥꠀꠞ ꠘꠣꠝ ꠞꠣꠈꠟꠣ ꠡꠤꠝꠤꠅꠘ [ꠝꠣꠘꠤ, ꠢꠥꠘꠂꠘ], ꠔꠣꠁꠘ ꠇꠁꠟꠣ, “ꠀꠝꠣꠞꠦ ꠄꠟꠣꠝꠤ ꠇꠞꠣꠞ ꠇꠕꠣ ꠝꠣꠛꠥꠖꠦ ꠢꠥꠘꠍꠂꠘ, ꠄꠞꠟꠣꠉꠤ ꠔꠣꠁꠘ ꠀꠝꠣꠞꠦ ꠅꠃ ꠙꠥꠀ ꠖꠤꠍꠂꠘ।”
GEN 29:34 ꠛꠣꠖꠦ ꠢꠤꠞꠛꠣꠞ ꠔꠣꠘ ꠊꠞꠅ ꠄꠇ ꠙꠥꠀ ꠅꠁꠟ। ꠔꠣꠁꠘ ꠇꠁꠟꠣ, “ꠅꠈꠘ ꠀꠝꠣꠞ ꠎꠣꠝꠣꠁꠄ ꠀꠝꠣꠞ ꠟꠉꠦ ꠀꠡꠤꠇ ꠅꠁꠛꠣ, ꠔꠣꠘ ꠔꠤꠘꠐꠣ ꠙꠥꠀ ꠀꠝꠣꠞ ꠙꠦꠐ ꠕꠘꠦ ꠙꠄꠖꠣ ꠅꠁꠟ।” ꠅꠃ ꠄꠞ ꠘꠣꠝ ꠞꠣꠈꠟꠣ ꠟꠦꠛꠤ [ꠝꠣꠘꠤ, ꠀꠡꠤꠇ]।
GEN 29:35 ꠛꠣꠖꠦ ꠢꠤꠞꠛꠣꠞ ꠔꠣꠘ ꠀꠞꠅ ꠄꠇ ꠙꠥꠀ ꠅꠁꠟꠦ ꠔꠣꠁꠘ ꠇꠁꠟꠣ, “ꠁꠚꠤꠞꠣ ꠀꠝꠤ ꠝꠣꠛꠥꠖꠞ ꠔꠣꠞꠤꠚ ꠇꠞꠝꠥ।” ꠀꠞ ꠔꠣꠁꠘ ꠅꠃ ꠙꠥꠀꠞ ꠘꠣꠝ ꠞꠣꠈꠟꠣ ꠄꠢꠥꠖꠣ [ꠝꠣꠘꠤ, ꠔꠣꠞꠤꠚ]। ꠄꠞꠛꠣꠖꠦ ꠔꠣꠘ ꠢꠥꠞꠥꠔ꠆ꠔꠣ ꠅꠀ ꠛꠘ꠆ꠖ ꠅꠁꠉꠦꠟ।
GEN 30:1 ꠞꠣꠢꠦꠟꠣꠄ ꠎꠦꠛꠟꠣ ꠖꠦꠈꠟꠣ, ꠔꠣꠘ ꠊꠞꠅ ꠁꠀꠇꠥꠛꠞ ꠇꠥꠘꠥ ꠀꠅꠟꠣꠖ ꠅꠁꠞꠣ ꠘꠣ, ꠅꠃ ꠡꠝꠄ ꠔꠣꠘ ꠛꠘꠤꠞ ꠛꠣꠄ ꠁꠋꠡꠣ ꠙꠄꠖꠣ ꠅꠁꠟ। ꠔꠣꠁꠘ ꠁꠀꠇꠥꠛꠞꠦ ꠇꠁꠟꠣ, “ꠀꠝꠣꠞꠦ ꠀꠅꠟꠣꠖ ꠖꠦꠅ, ꠘꠣꠁꠟꠦ ꠀꠝꠤ ꠝꠞꠤꠎꠤꠝꠥ!”
GEN 30:2 ꠔꠦꠃ ꠞꠣꠢꠦꠟꠣꠞ ꠟꠉꠦ ꠁꠀꠇꠥꠛꠦ ꠈꠥꠛ ꠉꠥꠍꠣ ꠇꠞꠤꠀ ꠇꠁꠟꠣ, “ꠀꠝꠤ ꠇꠥꠘꠥ ꠀꠟ꠆ꠟꠣ ꠘꠤ? ꠔꠣꠁꠘꠃ ꠔ ꠔꠥꠝꠣꠞ ꠙꠦꠐ ꠛꠘ꠆ꠖ ꠇꠞꠤ ꠖꠤꠍꠂꠘ।”
GEN 30:3 ꠞꠣꠢꠦꠟꠣꠄ ꠇꠁꠟꠣ, “ꠢꠥꠘꠃꠇ꠆ꠇꠣ, ꠀꠝꠣꠞ ꠛꠣꠘ꠆ꠖꠤ ꠛꠤꠟꠢꠣ ꠅꠘꠅ ꠀꠍꠦ, ꠀꠙꠘꠦ ꠔꠣꠁꠞ ꠉꠦꠍꠦ ꠎꠣꠃꠇ꠆ꠇꠣ, ꠔꠣꠁꠞꠦꠖꠤ ꠢꠥꠞꠥꠔ꠆ꠔꠣ ꠙꠣꠁꠀ ꠀꠝꠤꠅ ꠢꠥꠞꠥꠔ꠆ꠔꠣ ꠀꠟꠣ ꠅꠁꠎꠤꠔꠣꠝ ꠙꠣꠞꠤ।”
GEN 30:4 ꠅꠈꠣꠘ ꠇꠁꠀ ꠢꠣꠞꠤ ꠞꠣꠢꠦꠟꠣꠄ ꠔꠣꠘ ꠛꠣꠘ꠆ꠖꠤ ꠛꠤꠟꠢꠣꠞꠦ ꠁꠀꠇꠥꠛꠞ ꠉꠦꠍꠦ ꠢꠣꠋꠉꠣ ꠖꠤꠟꠣ, ꠀꠞ ꠁꠀꠇꠥꠛ ꠔꠣꠁꠞ ꠉꠦꠍꠦ ꠞꠁꠟꠣ।
GEN 30:5 ꠔꠦꠃ ꠛꠤꠟꠢꠣꠞ ꠊꠞꠅ ꠁꠀꠇꠥꠛꠞ ꠄꠇ ꠙꠥꠀ ꠅꠁꠟ।
GEN 30:6 ꠀꠞ ꠞꠣꠢꠦꠟꠣꠄ ꠇꠁꠟꠣ, “ꠀꠟ꠆ꠟꠣꠄ ꠀꠝꠣꠞꠦ ꠁꠘꠍꠣꠚ ꠇꠞꠍꠂꠘ, ꠀꠞ ꠀꠝꠣꠞ ꠀꠢꠣꠎꠣꠞꠤ ꠢꠥꠘꠤꠀ ꠄꠉꠥ ꠙꠥꠀ ꠖꠤꠍꠂꠘ।” ꠔꠣꠁꠘ ꠁ ꠙꠥꠀꠞ ꠘꠣꠝ ꠞꠣꠈꠟꠣ ꠖꠣꠘ [ꠝꠣꠘꠤ, ꠁꠘꠍꠣꠚ]।
GEN 30:7 ꠛꠣꠖꠦ ꠞꠣꠢꠦꠟꠣꠞ ꠛꠣꠘ꠆ꠖꠤ ꠛꠤꠟꠢꠣꠞ ꠊꠞꠅ ꠢꠤꠞꠛꠣꠞ ꠁꠀꠇꠥꠛꠞ ꠖꠥꠍꠞꠣ ꠙꠥꠀ ꠙꠄꠖꠣ ꠅꠁꠟ।
GEN 30:8 ꠀꠞ ꠞꠣꠢꠦꠟꠣꠄ ꠇꠁꠟꠣ, “ꠛꠁꠘꠞ ꠟꠉꠦ ꠝꠢꠣ ꠟꠣꠠꠣꠁꠔ ꠀꠝꠤ ꠎꠤꠔꠍꠤ।” ꠅꠃ ꠔꠣꠁꠘ ꠁ ꠙꠥꠀꠞ ꠘꠣꠝ ꠞꠣꠈꠟꠣ ꠘꠙ꠆ꠔꠣꠟꠤ [ꠝꠣꠘꠤ, ꠟꠣꠠꠣꠁ]।
GEN 30:9 ꠟꠦꠀꠄ ꠎꠦꠛꠟꠣ ꠖꠦꠈꠟꠣ ꠔꠣꠘ ꠊꠞꠅ ꠀꠞ ꠢꠥꠞꠥꠔ꠆ꠔꠣ ꠅꠁꠞꠣ ꠘꠣ, ꠔꠦꠃ ꠔꠣꠁꠘꠅ ꠔꠣꠘ ꠛꠣꠘ꠆ꠖꠤ ꠎꠤꠟꠙꠣꠞꠦ ꠁꠀꠇꠥꠛꠞ ꠉꠦꠍꠦ ꠢꠣꠋꠉꠣ ꠖꠤꠟꠣ।
GEN 30:10 ꠔꠦꠃ ꠟꠦꠀꠞ ꠛꠣꠘ꠆ꠖꠤ ꠎꠤꠟꠙꠣꠞ ꠙꠦꠐꠅ ꠁꠀꠇꠥꠛꠞ ꠄꠇ ꠙꠥꠀ ꠅꠁꠟ।
GEN 30:11 ꠀꠞ ꠟꠦꠀꠄ ꠇꠁꠟꠣ, “ꠀꠝꠣꠞ ꠇꠙꠣꠟ ꠈꠥꠟꠍꠦ!” ꠔꠣꠁꠘ ꠄꠞ ꠘꠣꠝ ꠞꠣꠈꠟꠣ ꠍꠣꠖꠥ [ꠝꠣꠘꠤ, ꠇꠙꠣꠟ]।
GEN 30:12 ꠛꠣꠖꠦ ꠟꠦꠀꠞ ꠛꠣꠘ꠆ꠖꠤ ꠎꠤꠟꠙꠣꠞ ꠊꠞꠅ ꠁꠀꠇꠥꠛꠞ ꠀꠞꠇ ꠙꠥꠀ ꠅꠁꠟ।
GEN 30:13 ꠀꠞ ꠟꠦꠀꠄ ꠇꠁꠟꠣ, “ꠀꠝꠣꠞ ꠇꠔ ꠡꠥꠈ! ꠢꠇꠟ ꠛꠦꠐꠤꠘ꠆ꠔꠦ ꠀꠝꠣꠞꠦ ꠡꠥꠈꠤ ꠇꠁꠛꠣ।” ꠔꠦꠃ ꠔꠣꠁꠘ ꠁ ꠙꠥꠀꠞ ꠘꠣꠝ ꠞꠣꠈꠟꠣ ꠀꠡꠤꠞ [ꠝꠣꠘꠤ, ꠡꠥꠈꠤ]।
GEN 30:14 ꠉꠝ ꠖꠣꠅꠀꠞ ꠡꠝꠄ ꠞꠥꠛꠦꠘꠦ ꠛꠘ꠆ꠖꠅ ꠉꠤꠀ ꠇꠤꠍꠥ ꠗꠥꠔꠞꠣ-ꠉꠥꠐꠣ ꠙꠣꠁꠀ, ꠔꠣꠘ ꠝꠣ ꠟꠦꠀꠞ ꠉꠦꠍꠦ ꠀꠘꠤꠀ ꠖꠤꠟꠣ। ꠀꠞ ꠞꠣꠢꠦꠟꠣꠄ ꠟꠦꠀꠞꠦ ꠇꠁꠟꠣ, “ꠔꠥꠝꠣꠞ ꠙꠥꠀꠞ ꠇꠄꠉꠥ ꠗꠥꠔꠞꠣ-ꠉꠥꠐꠣ ꠀꠝꠣꠞꠦ ꠖꠦꠅꠌꠣꠁꠘ।”
GEN 30:15 ꠟꠦꠀꠄ ꠇꠁꠟꠣ, “ꠔꠥꠝꠤ ꠀꠝꠣꠞ ꠎꠣꠝꠣꠁꠞꠦ ꠖꠈꠟ ꠇꠞꠍ, ꠁꠔꠣꠄ ꠅꠁꠍꠦ ꠘꠣ ꠘꠤ? ꠅꠈꠘ ꠀꠝꠣꠞ ꠙꠥꠀꠞ ꠗꠥꠔꠞꠣ-ꠉꠥꠐꠣꠅ ꠌꠣꠁꠞꠣꠄ ꠘꠤ?” ꠞꠣꠢꠦꠟꠣꠄ ꠇꠁꠟꠣ, “ꠔꠣꠁꠟꠦ ꠔꠥꠝꠣꠞ ꠙꠥꠀꠞ ꠗꠥꠔꠞꠣ-ꠉꠥꠐꠣꠞ ꠛꠖꠟꠣ ꠀꠁꠎ ꠞꠣꠁꠔ ꠔꠣꠁꠘ ꠔꠥꠝꠣꠞ ꠟꠉꠦ ꠞꠁꠛꠣ ꠘꠦ।”
GEN 30:16 ꠢꠣꠁꠘ꠆ꠎꠣ ꠛꠣꠟꠣ ꠁꠀꠇꠥꠛꠦ ꠛꠘ꠆ꠖꠅ ꠕꠘꠦ ꠀꠁꠔꠦꠃ ꠟꠦꠀꠄ ꠛꠣꠞ ꠅꠁꠀ ꠔꠣꠘꠦ ꠇꠁꠟꠣ, “ꠀꠁꠎ ꠀꠝꠣꠞ ꠟꠉꠦ ꠞꠁꠛꠣꠄ, ꠇꠣꠞꠘ ꠀꠝꠣꠞ ꠙꠥꠀꠞ ꠗꠥꠔꠞꠣ-ꠉꠥꠐꠣꠞ ꠛꠖꠟꠣ ꠀꠝꠤ ꠔꠥꠝꠣꠞꠦ ꠀꠅꠟꠣꠔ ꠘꠤꠍꠤ।” ꠅꠃ ꠢꠤ ꠞꠣꠁꠔ ꠔꠣꠁꠘ ꠟꠦꠀꠞ ꠊꠞꠅ ꠢꠥꠔꠤꠟꠣ।
GEN 30:17 ꠀꠟ꠆ꠟꠣꠄ ꠟꠦꠀꠞ ꠖꠥꠀ ꠇꠛꠥꠟ ꠇꠞꠣꠄ, ꠔꠣꠘ ꠊꠞꠅ ꠁꠀꠇꠥꠛꠞ ꠙꠣꠌ ꠘꠝ꠆ꠛꠞ ꠙꠥꠀꠞ ꠎꠘꠝ ꠅꠁꠟ।
GEN 30:18 ꠅꠃ ꠟꠦꠀꠄ ꠇꠁꠟꠣ, “ꠀꠝꠣꠞ ꠎꠣꠝꠣꠁꠞ ꠉꠦꠍꠦ ꠀꠝꠣꠞ ꠛꠣꠘ꠆ꠖꠤꠞꠦ ꠖꠤꠍꠟꠣꠝ ꠇꠞꠤ, ꠀꠟ꠆ꠟꠣꠄ ꠀꠝꠣꠞꠦ ꠄꠞ ꠛꠖꠟꠣ ꠖꠤꠟꠣ।” ꠄꠞꠟꠣꠉꠤ ꠔꠣꠁꠘ ꠁ ꠙꠥꠀꠞ ꠘꠣꠝ ꠞꠣꠈꠟꠣ ꠁꠍꠣꠈꠞ [ꠝꠣꠘꠤ, ꠛꠖꠟꠣ]।
GEN 30:19 ꠛꠣꠖꠦ ꠢꠤꠞꠛꠣꠞ ꠟꠦꠀꠞ ꠊꠞꠅ ꠁꠀꠇꠥꠛꠞ ꠍꠄ ꠘꠝ꠆ꠛꠞ ꠙꠥꠀꠞ ꠎꠘꠝ ꠅꠁꠟ।
GEN 30:20 ꠟꠦꠀꠄ ꠇꠁꠟꠣ, “ꠀꠟ꠆ꠟꠣꠄ ꠀꠝꠣꠞꠦ ꠛꠃꠔ ꠛꠠ ꠄꠇ ꠘꠤꠀꠝꠔ ꠖꠤꠟꠣ। ꠅꠈꠘ ꠀꠝꠣꠞ ꠎꠣꠝꠣꠁꠄ ꠀꠝꠣꠞꠦ ꠖꠣꠝ ꠖꠤꠛꠣ, ꠇꠣꠞꠘ ꠀꠝꠤ ꠔꠣꠘ ꠍꠄꠉꠥ ꠙꠥꠀꠞ ꠎꠘꠝ ꠖꠤꠍꠤ।” ꠔꠣꠁꠘ ꠁ ꠙꠥꠀꠞ ꠘꠣꠝ ꠞꠣꠈꠟꠣ ꠍꠛꠥꠟꠘ [ꠝꠣꠘꠤ, ꠖꠣꠝ]।
GEN 30:21 ꠢꠦꠡꠦ ꠟꠦꠀꠞ ꠄꠇ ꠙꠥꠠꠤ ꠅꠁꠟ, ꠔꠣꠁꠞ ꠘꠣꠝ ꠞꠣꠈꠟꠣ ꠖꠤꠘꠣ।
GEN 30:22 ꠀꠟ꠆ꠟꠣꠄ ꠞꠣꠢꠦꠟꠣꠞ ꠛꠣꠄꠅ ꠈꠤꠀꠟ ꠇꠞꠟꠣ। ꠔꠣꠁꠘ ꠞꠣꠢꠦꠟꠣꠞ ꠖꠥꠀ ꠇꠛꠥꠟ ꠇꠞꠤꠀ, ꠔꠣꠘꠞꠦ ꠢꠥꠞꠥꠔ꠆ꠔꠣ ꠙꠄꠖꠣꠞ ꠔꠣꠇ꠆ꠇꠔ ꠖꠤꠟꠣ।
GEN 30:23 ꠀꠞ ꠞꠣꠢꠦꠟꠣꠞ ꠊꠞꠅ ꠄꠇ ꠙꠥꠀ ꠅꠁꠟꠦ ꠔꠣꠁꠘ ꠇꠁꠟꠣ, “ꠀꠟ꠆ꠟꠣꠄ ꠀꠝꠣꠞ ꠡꠞꠝ ꠢꠞꠣꠁꠍꠂꠘ।”
GEN 30:24 ꠔꠣꠁꠘ ꠁ ꠙꠥꠀꠞ ꠘꠣꠝ ꠞꠣꠈꠟꠣ ꠁꠃꠍꠥꠚ [ꠝꠣꠘꠤ, ꠛꠣꠠꠣꠘꠤ]। ꠔꠣꠁꠘ ꠇꠁꠟꠣ, “ꠝꠣꠛꠥꠖꠦ ꠀꠝꠣꠞꠦ ꠀꠞꠅꠉꠥ ꠙꠥꠀ ꠛꠣꠠꠣꠁ ꠖꠦꠃꠇ꠆ꠇꠣ।”
GEN 30:25 ꠞꠣꠢꠦꠟꠣꠞ ꠊꠞꠅ ꠁꠃꠍꠥꠚ ꠅꠀꠞ ꠛꠣꠖꠦ, ꠁꠀꠇꠥꠛꠦ ꠟꠣꠛꠘꠞꠦ ꠇꠁꠟꠣ, “ꠅꠈꠘ ꠀꠝꠣꠞꠦ ꠛꠤꠖꠣꠄ ꠖꠤꠟꠣꠃꠇ꠆ꠇꠣ, ꠀꠝꠤ ꠘꠤꠎꠞ ꠖꠦꠡꠞ ꠛꠣꠠꠤꠔ ꠎꠣꠁꠉꠤ।
GEN 30:26 ꠀꠙꠘꠦ ꠔ ꠎꠣꠘꠂꠘ, ꠀꠝꠤ ꠇꠤꠟꠣ ꠀꠙꠘꠣꠞ ꠉꠥꠟꠣꠝꠤ ꠇꠞꠍꠤ, ꠀꠝꠤ ꠀꠝꠣꠞ ꠛꠃꠀꠁꠘ ꠀꠞ ꠙꠥꠀ-ꠙꠥꠠꠤꠞ ꠟꠣꠉꠤ ꠀꠙꠘꠣꠞ ꠉꠥꠟꠣꠝꠤ ꠇꠞꠍꠤ। ꠅꠈꠘ ꠔꠣꠞꠣꠞꠦ ꠟꠁꠀ ꠀꠝꠣꠞꠦ ꠎꠣꠁꠔꠦ ꠖꠦꠃꠇ꠆ꠇꠣ।”
GEN 30:27 ꠟꠣꠛꠘꠦ ꠔꠣꠘꠞꠦ ꠇꠁꠟꠣ, “ꠀꠝꠣꠞ ꠟꠣꠉꠤ ꠎꠥꠖꠤ ꠔꠥꠝꠣꠞ ꠝꠣꠄꠀ ꠕꠣꠇꠦ, ꠔꠦ ꠎꠣꠁꠅ ꠘꠣ। ꠀꠝꠤ ꠀꠟꠣꠝꠔꠦ ꠛꠥꠎꠤꠀꠞ ꠎꠦꠘ, ꠔꠥꠝꠣꠞ ꠈꠣꠔꠤꠞꠦ ꠝꠣꠛꠥꠖꠦ ꠀꠝꠣꠞꠦꠅ ꠛꠞꠇꠔ ꠘꠣꠎꠤꠟ ꠇꠞꠍꠂꠘ।
GEN 30:28 ꠔꠥꠝꠣꠞ ꠛꠦꠔꠘ ꠔꠥꠝꠤ ꠘꠤꠎꠦꠃ ꠇꠁꠟꠣꠅ। ꠀꠝꠤ ꠔꠥꠝꠣꠞꠦ ꠅꠟꠣꠃ ꠖꠤꠝꠥ।”
GEN 30:29 ꠅꠃ ꠁꠀꠇꠥꠛꠦ ꠔꠣꠘꠞꠦ ꠇꠁꠟꠣ, “ꠀꠝꠤ ꠇꠤꠟꠣ ꠀꠙꠘꠣꠞ ꠉꠥꠟꠣꠝꠤ ꠇꠞꠍꠤ, ꠀꠞ ꠀꠝꠣꠞ ꠀꠔꠅ ꠀꠙꠘꠣꠞ ꠙꠡꠥꠞ ꠙꠣꠟ ꠇꠤꠟꠣꠈꠣꠘ ꠅꠁꠍꠦ, ꠁꠔꠣ ꠀꠙꠘꠦꠃ ꠎꠣꠘꠂꠘ।
GEN 30:30 ꠀꠝꠤ ꠀꠅꠀꠞ ꠀꠉꠦ ꠀꠙꠘꠦ ꠉꠞꠤꠛ ꠀꠍꠟꠣ। ꠀꠞ ꠅꠈꠘ ꠔ ꠛꠣꠠꠤꠀ ꠛꠃꠔꠔꠣ ꠅꠁꠍꠦ। ꠀꠝꠣꠞ ꠇꠣꠞꠘꠦ ꠝꠣꠛꠥꠖꠦ ꠀꠙꠘꠣꠞꠦ ꠛꠃꠔ ꠛꠞꠇꠔ ꠖꠤꠍꠂꠘ। ꠅꠁꠟꠦ ꠀꠝꠣꠞ ꠘꠤꠎꠞ ꠙꠞꠤꠛꠣꠞꠞ ꠟꠣꠉꠤ ꠇꠥꠘꠖꠤꠘ ꠇꠣꠝꠣꠁ ꠇꠞꠔꠣꠝ?”
GEN 30:31 ꠔꠦꠃ ꠟꠣꠛꠘꠦ ꠇꠁꠟꠣ, “ꠀꠝꠤ ꠔꠥꠝꠣꠞꠦ ꠇꠤꠔꠣ ꠖꠤꠔꠣꠝ?” ꠁꠀꠇꠥꠛꠦ ꠇꠁꠟꠣ, “ꠀꠙꠘꠦ ꠀꠝꠣꠞꠦ ꠇꠥꠘ꠆ꠔꠣꠃ ꠘꠣ ꠖꠤꠀ ꠎꠥꠖꠤ ꠀꠝꠣꠞ ꠄꠉꠥ ꠝꠣꠔ ꠞꠣꠈꠂꠘ, ꠔꠦ ꠀꠝꠤ ꠢꠤꠞꠛꠣꠞ ꠀꠙꠘꠣꠞ ꠙꠡꠥꠞ ꠙꠣꠟꠞ ꠈꠦꠎꠝꠔ ꠇꠞꠝꠥ।
GEN 30:32 ꠀꠝꠤ ꠀꠁꠎ ꠀꠙꠘꠣꠞ ꠙꠡꠥꠞ ꠙꠣꠟꠞ ꠝꠣꠎꠦ ꠉꠤꠀ, ꠚꠥꠐꠣ ꠚꠥꠐꠣ ꠖꠣꠉꠀꠟꠣ ꠀꠞ ꠇꠣꠟꠣ ꠀꠞ ꠍꠤꠔ꠆ꠞꠣ ꠝꠦꠠꠣꠁꠘ ꠀꠞ ꠍꠣꠉꠟꠞ ꠝꠣꠎꠦ ꠍꠤꠔ꠆ꠞꠣ ꠀꠞ ꠚꠥꠐꠣ ꠚꠥꠐꠣ ꠞꠋꠉꠞ ꠢꠇ꠆ꠇꠟꠐꠤ ꠀꠝꠣꠞ ꠛꠦꠔꠘ ꠛꠣꠛꠔ ꠘꠤꠝꠥꠉꠤ।
GEN 30:33 ꠔꠦꠃ ꠀꠙꠘꠦ ꠎꠦꠛꠟꠣꠃ ꠛꠦꠔꠘꠞ ꠇꠣꠞꠘꠦ ꠀꠁꠛꠣ, ꠁ ꠡꠝꠄ ꠖꠦꠈꠛꠣ, ꠀꠝꠣꠞ ꠁꠝꠣꠘꠖꠣꠞꠤꠄ ꠀꠝꠣꠞ ꠟꠣꠉꠤ ꠎꠥꠀꠙ ꠖꠤꠛ। ꠀꠞ ꠚꠥꠐꠣ ꠚꠥꠐꠣ ꠖꠣꠉꠀꠟꠣ ꠀꠞ ꠇꠣꠟꠣ ꠀꠞ ꠍꠤꠔ꠆ꠞꠣ ꠝꠦꠠꠣꠁꠘ ꠀꠞ ꠍꠣꠉꠟꠞ ꠝꠣꠎꠦ ꠍꠤꠔ꠆ꠞꠣ ꠀꠞ ꠚꠥꠐꠣ ꠚꠥꠐꠣ ꠞꠋꠉꠞꠔꠣ ꠍꠣꠠꠣ ꠀꠞ ꠇꠥꠘ꠆ꠔꠣ ꠙꠣꠁꠟꠦ ꠝꠘꠅ ꠇꠞꠛꠣ, ꠀꠝꠤ ꠌꠥꠞꠤ ꠇꠞꠍꠤ।”
GEN 30:34 ꠅꠃ ꠟꠣꠛꠘꠦ ꠇꠁꠟꠣ, “ꠀꠁꠌ꠆ꠍꠣ, ꠔꠥꠝꠣꠞ ꠇꠕꠣꠃ ꠑꠤꠇ ꠕꠣꠇꠃꠇ।”
GEN 30:35 ꠟꠣꠛꠘꠦ ꠢꠃ ꠖꠤꠘꠃ ꠙꠣꠟ ꠕꠣꠇꠤ ꠟꠣꠝ꠆ꠛꠣ ꠖꠣꠉꠀꠟꠣ ꠀꠞ ꠍꠤꠔ꠆ꠞꠣ ꠍꠣꠉꠟ, ꠚꠥꠐꠣ ꠚꠥꠐꠣ ꠖꠣꠉ ꠀꠞ ꠍꠤꠔ꠆ꠞꠣ ꠕꠥꠠꠣ ꠕꠥꠠꠣ ꠗꠟꠣ ꠍꠣꠉꠤꠘ ꠀꠞ ꠇꠣꠟꠣ ꠝꠦꠠꠣ ꠅꠇꠟ ꠀꠟꠉꠣꠁꠀ ꠘꠤꠎꠞ ꠙꠥꠀꠂꠘ꠆ꠔꠞ ꠉꠦꠍꠦ ꠖꠤꠟꠣꠁꠟꠣ।
GEN 30:36 ꠖꠤꠀ ꠔꠣꠁꠘ ꠁꠀꠇꠥꠛꠞ ꠉꠦꠍ ꠕꠣꠇꠤ ꠔꠤꠘ ꠖꠤꠘꠞ ꠙꠕ ꠖꠥꠞꠁ ꠢꠞꠤꠀ ꠉꠦꠟꠣꠉꠤ ꠀꠞ ꠁꠀꠇꠥꠛꠦ ꠟꠣꠛꠘꠞ ꠛꠣꠇꠤ ꠙꠣꠟ ꠅꠇꠟꠞꠦ ꠞꠣꠈꠣꠔ ꠞꠁꠟꠣ।
GEN 30:37 ꠁꠀꠇꠥꠛꠦ ꠟꠤꠛꠘꠤ, ꠟꠣꠃꠎ ꠀꠞ ꠀꠞ꠆ꠝꠥꠘ ꠉꠣꠍꠞ ꠇꠣꠌꠣ ꠒꠣꠟ ꠇꠣꠐꠤꠀ ꠃꠙꠞꠦ ꠕꠣꠇꠤ ꠛꠣꠇꠟ ꠚꠣꠟꠣꠁꠀ ꠒꠣꠟꠞ ꠝꠣꠎꠦ ꠟꠣꠝ꠆ꠛꠣ ꠟꠣꠝ꠆ꠛꠣ ꠗꠟꠣ ꠖꠣꠉ ꠖꠤꠟꠣ।
GEN 30:38 ꠍꠣꠉꠟꠞ ꠙꠣꠟꠦ ꠀꠁꠀ ꠎꠦꠈꠣꠘꠅ ꠙꠣꠘꠤ ꠈꠣꠁꠘ, ꠔꠣꠁꠘ ꠅꠃ ꠛꠣꠇꠟ ꠚꠣꠟꠣꠁꠟ ꠖꠣꠉꠀꠟꠣ ꠒꠣꠟ ꠅꠇꠟ, ꠢꠘꠅ ꠙꠣꠘꠤꠞ ꠉꠣꠝꠟꠣꠞ ꠍꠣꠝꠘꠦ ꠕꠁꠟꠣ। ꠀꠞ ꠙꠣꠘꠤ ꠈꠣꠅꠀꠞ ꠡꠝꠄ ꠄꠞꠣ ꠚꠣꠟ ꠈꠣꠁꠔ।
GEN 30:39 ꠔꠦꠃ ꠅꠃ ꠒꠣꠟꠞ ꠉꠦꠍꠦ ꠀꠁꠀ ꠚꠣꠟ ꠈꠣꠅꠀꠄ ꠔꠣꠞꠣꠞ ꠛꠣꠁꠌ꠆ꠌꠣꠁꠘꠅ ꠍꠤꠔ꠆ꠞꠣ, ꠟꠣꠝ꠆ꠛꠣ ꠖꠣꠉꠀꠟꠣ ꠀꠞ ꠚꠥꠐꠣ ꠚꠥꠐꠣ ꠞꠋꠉꠞ ꠅꠁꠔꠣ।
GEN 30:40 ꠛꠣꠖꠦ ꠔꠣꠁꠘ ꠅꠃ ꠛꠣꠁꠌ꠆ꠌꠣꠁꠘ ꠀꠟꠉꠣꠁꠔꠣ, ꠀꠞ ꠟꠣꠛꠘꠞ ꠒꠥꠞꠣꠀꠟꠣ ꠀꠞ ꠇꠣꠟꠣ ꠝꠦꠠꠣꠁꠘ꠆ꠔꠞ ꠛꠣꠄ ꠝꠦꠠꠤꠘ꠆ꠔꠞ ꠌꠃꠈ ꠞꠣꠈꠣꠁꠔꠣ। ꠅꠃ ꠟꠣꠈꠣꠘ ꠔꠣꠁꠘ, ꠔꠣꠘ ꠘꠤꠎꠞ ꠙꠣꠟꠞꠦ ꠟꠣꠛꠘꠞ ꠙꠣꠟꠞ ꠟꠉꠦ ꠝꠤꠟꠣꠁꠔꠣ ꠘꠣ।
GEN 30:41 ꠀꠞ ꠎꠥꠞꠀꠟꠣ ꠝꠦꠠꠤ-ꠍꠣꠉꠤꠘ꠆ꠔꠦ ꠚꠣꠟ ꠈꠣꠅꠀꠞ ꠡꠝꠄ, ꠔꠣꠁꠘ ꠉꠣꠝꠟꠣꠔ ꠔꠣꠞꠣꠞ ꠌꠃꠈꠞ ꠍꠣꠝꠘꠦ ꠅꠃ ꠒꠣꠟ ꠅꠇꠟ ꠕꠁꠔꠣ,
GEN 30:42 ꠅꠁꠟꠦ ꠇꠝꠎꠥꠞ ꠙꠡꠥꠞ ꠍꠣꠝꠘꠦ ꠁ ꠒꠣꠟꠣꠁꠘ ꠕꠁꠔꠣ ꠘꠣ। ꠔꠦꠃ ꠟꠣꠛꠘꠞ ꠙꠡꠥꠁꠘ ꠅꠁꠔꠣ ꠇꠝꠎꠥꠞ, ꠀꠞ ꠁꠀꠇꠥꠛꠞ ꠙꠡꠥꠁꠘ ꠅꠁꠔꠣ ꠎꠥꠞꠀꠟꠣ।
GEN 30:43 ꠅꠃ ꠟꠣꠈꠣꠘ ꠇꠣꠝ ꠇꠞꠤꠀ ꠔꠣꠁꠘ ꠛꠃꠔ ꠗꠘꠤ ꠅꠁꠟꠣ। ꠔꠣꠘ ꠉꠥꠟꠣꠝ-ꠛꠣꠘ꠆ꠖꠤ, ꠃꠐ-ꠉꠣꠗꠣ ꠀꠞ ꠙꠡꠥꠞ ꠙꠣꠟ ꠛꠃꠔ ꠛꠣꠠꠤꠉꠦꠟ।
GEN 31:1 ꠛꠣꠖꠦ ꠁꠀꠇꠥꠛꠞ ꠇꠣꠘꠅ ꠀꠁꠟ ꠟꠣꠛꠘꠞ ꠙꠥꠀꠂꠘ꠆ꠔꠦ ꠝꠣꠔꠤꠞꠣ ꠎꠦꠘ, “ꠁꠀꠇꠥꠛꠦ ꠀꠝꠞꠣꠞ ꠛꠣꠚꠞ ꠢꠇ꠆ꠇꠟꠔꠣ ꠘꠤꠍꠦꠉꠤ, ꠀꠞ ꠀꠝꠞꠣꠞ ꠛꠣꠚꠞ ꠝꠣꠟ ꠖꠤꠀꠃ ꠢꠦ ꠝꠣꠟꠖꠣꠞ ꠅꠁꠉꠦꠍꠦ।”
GEN 31:2 ꠀꠞ ꠁꠀꠇꠥꠛꠦꠅ ꠈꠤꠀꠟ ꠇꠞꠟꠣ, ꠔꠣꠘꠛꠣꠄꠖꠤ ꠟꠣꠛꠘꠞ ꠀꠉꠞ ꠢꠤ ꠝꠘꠞ ꠜꠣꠛ ꠀꠞ ꠘꠣꠄ।
GEN 31:3 ꠝꠣꠛꠥꠖꠦ ꠁꠀꠇꠥꠛꠞꠦ ꠇꠁꠟꠣ, ꠔꠥꠝꠤ ꠔꠥꠝꠣꠞ ꠛꠣꠚ-ꠖꠣꠖꠣꠞ ꠖꠦꠡꠅ ꠘꠤꠎꠞ ꠝꠣꠘꠡꠞ ꠉꠦꠍꠦ ꠚꠤꠞꠤꠀ ꠎꠣꠅꠉꠤ। ꠀꠝꠤ ꠔꠥꠝꠣꠞ ꠟꠉꠦ ꠕꠣꠇꠝꠥ।
GEN 31:4 ꠅꠃ ꠁꠀꠇꠥꠛꠦ ꠈꠛꠞꠤꠀ ꠙꠣꠑꠣꠁꠀ ꠟꠦꠀ ꠀꠞ ꠞꠣꠢꠦꠟꠣꠞꠦ ꠛꠘ꠆ꠖꠅ ꠔꠣꠘ ꠙꠡꠥꠞ ꠙꠣꠟꠞ ꠉꠦꠍꠦ ꠀꠘꠣꠁꠀ ꠇꠁꠟꠣ,
GEN 31:5 “ꠀꠝꠤ ꠔꠥꠝꠣꠞꠔꠣꠘꠞ ꠛꠣꠚꠞ ꠝꠥꠈ ꠖꠦꠈꠤꠀ ꠛꠥꠎꠤꠀꠞ, ꠔꠣꠘ ꠀꠉꠞ ꠢꠤ ꠝꠘꠞ ꠜꠣꠛ ꠀꠝꠣꠞ ꠛꠣꠄ ꠘꠣꠄ, ꠅꠁꠟꠦ ꠀꠝꠣꠞ ꠛꠣꠚꠞ ꠝꠣꠛꠥꠖ ꠀꠟ꠆ꠟꠣ ꠀꠝꠣꠞ ꠟꠉꠦ ꠟꠉꠦ ꠞꠁꠍꠂꠘ।
GEN 31:6 ꠔꠥꠝꠤꠔꠣꠁꠘ ꠔ ꠎꠣꠘ ꠎꠦꠘ, ꠀꠝꠤ ꠀꠝꠣꠞ ꠢꠇꠟ ꠡꠇ꠆ꠔꠤ ꠖꠤꠀꠃ ꠔꠣꠘ ꠇꠔ ꠉꠥꠟꠣꠝꠤ ꠇꠞꠍꠤ,
GEN 31:7 ꠔꠣ-ꠅ ꠔꠣꠁꠘ ꠀꠝꠣꠞꠦ ꠐꠉꠤꠍꠂꠘ ꠀꠞ ꠖꠡ-ꠖꠡꠛꠣꠞ ꠇꠞꠤꠀ ꠀꠝꠣꠞ ꠛꠦꠔꠘ ꠛꠖꠟꠣꠁꠍꠂꠘ, ꠅꠁꠟꠦ ꠀꠟ꠆ꠟꠣꠄ ꠀꠝꠣꠞ ꠇꠥꠘꠥ ꠈꠦꠔꠤ ꠅꠁꠔꠦ ꠖꠤꠍꠂꠘ ꠘꠣ।
GEN 31:8 ꠔꠣꠁꠘ ꠎꠦꠛꠟꠣ ꠇꠁꠟꠣ, ꠔꠥꠝꠣꠞ ꠛꠦꠔꠘ ꠅꠁꠛ, ꠚꠥꠐꠣ ꠚꠥꠐꠣ ꠞꠋꠉꠞ ꠙꠡꠥ, ꠔꠦꠃ ꠙꠣꠟꠞ ꠢꠇꠟ ꠙꠡꠥꠄ ꠅꠃ ꠟꠣꠈꠣꠘ ꠛꠣꠁꠌ꠆ꠌꠣ ꠖꠤꠟ। ꠢꠤꠞꠛꠣꠞ ꠔꠣꠁꠘ ꠎꠦꠛꠟꠣ ꠇꠁꠟꠣ, ꠔꠥꠝꠣꠞ ꠛꠦꠔꠘ ꠅꠁꠛ ꠒꠥꠞꠣꠀꠟꠣ ꠙꠡꠥ, ꠔꠦꠃ ꠙꠣꠟꠞ ꠢꠇꠟ ꠙꠡꠥꠄ ꠒꠥꠞꠣꠀꠟꠣ ꠛꠣꠁꠌ꠆ꠌꠣ ꠖꠤꠟ।
GEN 31:9 ꠀꠟ꠆ꠟꠣꠄ ꠅꠃ ꠟꠣꠈꠣꠘ ꠇꠞꠤ ꠔꠣꠘ ꠙꠣꠟꠞ ꠙꠡꠥ ꠀꠘꠤꠀ ꠀꠝꠣꠞꠦ ꠖꠤꠍꠂꠘ।
GEN 31:10 “ꠄꠇꠛꠣꠞ ꠙꠡꠥꠁꠘ꠆ꠔꠦ ꠚꠣꠟ ꠈꠣꠅꠀꠞ ꠡꠝꠄ ꠀꠝꠤ ꠈꠥꠀꠛꠦ ꠖꠦꠈꠟꠣꠝ, ꠝꠦꠠꠤ-ꠍꠣꠉꠤꠘ꠆ꠔꠞ ꠃꠙꠞꠦ ꠎꠦ ꠙꠣꠑꠣ ꠅꠇꠟ ꠃꠑꠤꠞꠣ, ꠁꠉꠥꠁꠘ ꠒꠥꠞꠣꠀꠟꠣ, ꠍꠤꠔ꠆ꠞꠣ ꠀꠞ ꠚꠥꠐꠣ ꠚꠥꠐꠣ ꠞꠋꠉꠞ।
GEN 31:11 ꠈꠥꠀꠛꠞ ꠝꠣꠎꠦ ꠀꠟ꠆ꠟꠣꠞ ꠚꠤꠞꠤꠡ꠆ꠔꠣꠄ ꠀꠝꠣꠞꠦ ꠒꠣꠇꠤꠟꠣ, ‘ꠁꠀꠇꠥꠛ!’ ꠀꠝꠤ ꠇꠁꠟꠣꠝ, ‘ꠅꠃꠘꠥ ꠀꠝꠤ।’
GEN 31:12 ꠔꠣꠁꠘ ꠇꠁꠟꠣ, ‘ꠔꠥꠝꠤ ꠌꠃꠈ ꠔꠥꠟꠤꠀ ꠖꠦꠈꠅ, ꠝꠦꠠꠤ-ꠍꠣꠉꠤꠘ꠆ꠔꠞ ꠃꠙꠞꠦ ꠎꠦꠔꠣ ꠙꠣꠑꠣꠁꠘ ꠃꠑꠤꠞꠣ, ꠢꠇ꠆ꠇꠟꠐꠤ ꠒꠥꠞꠣꠀꠟꠣ, ꠍꠤꠔ꠆ꠞꠣ ꠀꠞ ꠚꠥꠐꠣ ꠚꠥꠐꠣ ꠞꠋꠉꠞ। ꠟꠣꠛꠘꠦ ꠔꠥꠝꠣꠞ ꠟꠉꠦ ꠎꠦꠔꠣ ꠎꠦꠔꠣ ꠇꠞꠍꠦ, ꠁꠔꠣ ꠢꠇꠟꠔꠣꠃ ꠀꠝꠤ ꠖꠦꠈꠍꠤ।
GEN 31:13 ꠀꠝꠤ ꠢꠃ ꠛꠦꠕꠦꠟꠞ ꠀꠟ꠆ꠟꠣ, ꠎꠦꠘꠅ ꠔꠥꠝꠤ ꠈꠥꠐꠤꠞ ꠃꠙꠞꠦ ꠔꠦꠟ ꠓꠣꠟꠤꠀ ꠀꠝꠣꠞ ꠘꠣꠝꠦ ꠇꠍꠝ ꠇꠞꠍꠟꠣꠄ। ꠅꠈꠘ ꠌꠟꠅ, ꠁ ꠖꠦꠡ ꠍꠣꠠꠤꠀ ꠔꠥꠝꠣꠞ ꠎꠘꠝ ꠝꠣꠐꠤꠔ ꠚꠤꠞꠔ ꠎꠣꠅ।’ ”
GEN 31:14 ꠅꠃ ꠟꠦꠀ ꠀꠞ ꠞꠣꠢꠦꠟꠣꠄ ꠇꠁꠟꠣ, “ꠛꠣꠛꠣꠞ ꠡꠝ꠆ꠙꠔ꠆ꠔꠤꠞ ꠇꠥꠘꠥ ꠖꠣꠛꠤ ꠀꠞ ꠀꠝꠞꠣꠞ ꠞꠁꠟ ꠘꠤ?
GEN 31:15 ꠔꠣꠁꠘ ꠔ ꠀꠝꠞꠣꠞꠦ ꠛꠦꠉꠣꠘꠣ ꠝꠣꠘꠥꠡ ꠝꠘꠅ ꠇꠞꠤꠀ, ꠀꠝꠞꠣꠞꠦ ꠛꠦꠌꠤꠟꠣꠁꠍꠂꠘ ꠀꠞ ꠀꠝꠞꠣꠞ ꠢꠇ꠆ꠇꠟꠔꠣꠃ ꠈꠣꠁꠟꠤꠍꠂꠘ।
GEN 31:16 ꠄꠞꠟꠣꠉꠤ ꠀꠟ꠆ꠟꠣꠄ ꠀꠝꠞꠣꠞ ꠛꠣꠛꠣꠞ ꠍꠣꠝꠣꠘꠣ ꠕꠘꠦ ꠎꠔꠔꠣ ꠘꠤꠍꠂꠘ, ꠁ ꠢꠇ꠆ꠇꠟꠐꠤꠃ ꠅꠈꠘ ꠀꠝꠞꠣꠞ ꠀꠞ ꠀꠝꠞꠣꠞ ꠀꠅꠟꠣꠖꠞ ꠅꠁꠍꠦ। ꠔꠦ ꠀꠟ꠆ꠟꠣꠄ ꠔꠥꠝꠣꠞꠦ ꠎꠦꠟꠣ ꠢꠥꠇꠥꠝ ꠇꠞꠍꠂꠘ, ꠔꠥꠝꠤꠅ ꠅꠃꠟꠣ ꠇꠞꠅ।”
GEN 31:17 ꠛꠣꠖꠦ ꠁꠀꠇꠥꠛꠦ ꠔꠣꠘ ꠢꠥꠞꠥꠔ꠆ꠔꠣꠁꠘ ꠀꠞ ꠛꠤꠛꠤꠘ꠆ꠔꠞꠦ ꠃꠐꠞ ꠃꠙꠞꠦ ꠔꠥꠟꠤꠀ,
GEN 31:18 ꠙꠖ꠆ꠖꠘ-ꠁꠞꠣꠝꠅ ꠔꠣꠘ ꠇꠣꠝꠣꠁꠟ ꠙꠡꠥ ꠅꠇꠟ ꠀꠞ ꠝꠣꠟ-ꠍꠣꠝꠣꠘꠣ ꠢꠇ꠆ꠇꠟꠔꠣ ꠟꠁꠀ, ꠇꠦꠘꠣꠘ ꠖꠦꠡꠅ ꠔꠣꠘ ꠛꠣꠚ ꠁꠍꠢꠣꠇꠞ ꠉꠦꠍꠦ ꠞꠅꠀꠘꠣ ꠖꠤꠟꠣꠁꠟꠣ।
GEN 31:19 ꠢꠃ ꠡꠝꠄ ꠟꠣꠛꠘꠦ ꠔꠣꠘ ꠝꠦꠠꠣꠁꠘ꠆ꠔꠞ ꠞꠥꠝꠣ ꠇꠣꠐꠣꠞ ꠟꠣꠉꠤ ꠉꠦꠍꠟꠣ, ꠀꠞ ꠅꠃ ꠚꠣꠇꠦ ꠞꠣꠢꠦꠟꠣꠄ ꠔꠣꠘ ꠛꠣꠚꠞ ꠝꠥꠞ꠆ꠔꠤ ꠅꠇꠟ ꠌꠥꠞꠤ ꠇꠞꠤꠟꠤꠟꠣ।
GEN 31:20 ꠁꠀꠇꠥꠛꠦ ꠔꠣꠘ ꠎꠣꠅꠀꠞ ꠇꠕꠣ ꠅꠞꠣꠝꠤ ꠟꠣꠛꠘꠞꠦ ꠘꠣ ꠎꠣꠘꠣꠁꠀ ꠔꠣꠘꠞꠦ ꠐꠉꠤꠟꠣ।
GEN 31:21 ꠀꠞ ꠔꠣꠁꠘ ꠢꠇ꠆ꠇꠟꠔꠣ ꠟꠁꠀ ꠜꠣꠉꠤꠀ, ꠚꠥꠞꠣꠔ ꠉꠣꠋ ꠙꠣꠞ ꠅꠁꠀ ꠉꠤꠟꠤꠅꠖꠞ ꠙꠣꠠꠞ ꠍꠣꠝꠘꠦꠖꠤ ꠎꠣꠅꠀꠔ ꠞꠁꠟꠣ।
GEN 31:22 ꠎꠣꠅꠀꠞ ꠔꠤꠘ ꠖꠤꠘ ꠛꠣꠖꠦ ꠟꠣꠛꠘꠦ ꠢꠥꠘꠟꠣ ꠎꠦꠘ, ꠁꠀꠇꠥꠛ ꠜꠣꠉꠤꠀ ꠉꠦꠍꠂꠘꠉꠤ।
GEN 31:23 ꠅꠃ ꠔꠣꠁꠘ ꠈꠦꠡ-ꠇꠥꠐꠥꠝꠞꠦ ꠟꠁꠀ, ꠁꠀꠇꠥꠛꠞ ꠈꠞꠦ ꠅꠁꠀ ꠡꠣꠔ ꠖꠤꠘꠞ ꠙꠕ ꠉꠤꠀ, ꠉꠤꠟꠤꠅꠖꠞ ꠙꠣꠠꠅ ꠔꠣꠞꠣꠞ ꠟꠣꠉꠣꠟ ꠙꠣꠁꠟꠣ।
GEN 31:24 ꠅꠁꠟꠦ ꠞꠣꠁꠔꠞ ꠛꠣꠟꠣ ꠀꠟ꠆ꠟꠣꠄ ꠈꠥꠀꠛꠦ ꠅꠞꠣꠝꠤ ꠟꠣꠛꠘꠞ ꠉꠦꠍꠦ ꠀꠁꠀ ꠇꠁꠟꠣ, “ꠈꠛꠞꠖꠣꠞ! ꠁꠀꠇꠥꠛꠞꠦ ꠜꠣꠟꠣ-ꠛꠥꠞꠣ ꠇꠥꠘ꠆ꠔꠣꠃ ꠇꠁꠅ ꠘꠣ।”
GEN 31:25 ꠁꠀꠇꠥꠛꠦ ꠙꠣꠠꠞ ꠝꠣꠎꠦ ꠔꠣꠝ꠆ꠛꠥ ꠉꠣꠠꠤꠍꠟꠣ, ꠀꠞ ꠟꠣꠛꠘꠦ ꠉꠤꠀ ꠔꠣꠘꠞꠦ ꠅꠘꠅꠃ ꠟꠣꠉꠣꠟ ꠙꠣꠁꠟꠤꠟꠣ, ꠔꠦꠃ ꠟꠣꠛꠘ ꠀꠞ ꠔꠣꠘ ꠈꠦꠡ-ꠇꠥꠐꠥꠝ ꠅꠇꠟꠦꠅ ꠉꠤꠟꠤꠅꠖꠞ ꠢꠃ ꠙꠣꠠꠞ ꠝꠣꠎꠦ ꠔꠣꠝ꠆ꠛꠥ ꠉꠣꠠꠤꠟꠣ।
GEN 31:26 ꠛꠣꠖꠦ ꠟꠣꠛꠘꠦ ꠁꠀꠇꠥꠛꠞꠦ ꠇꠁꠟꠣ, “ꠔꠥꠝꠤ ꠇꠦꠘꠦ ꠁꠔꠣ ꠇꠞꠟꠣꠄ? ꠀꠝꠣꠞꠦ ꠐꠉꠤꠀ ꠀꠝꠣꠞ ꠙꠥꠠꠤꠘ꠆ꠔꠞꠦ ꠇꠦꠘꠦ ꠎꠥꠖ꠆ꠖꠞ ꠛꠘ꠆ꠖꠤꠞ ꠟꠣꠈꠣꠘ ꠟꠁꠀ ꠀꠁꠟꠣꠄ?
GEN 31:27 ꠇꠦꠘꠦ ꠔꠥꠝꠤ ꠗꠥꠇꠣ ꠖꠤꠀ ꠀꠝꠣꠞꠦ ꠘꠣ ꠎꠣꠘꠣꠁꠀ, ꠟꠥꠇꠣꠁꠀ ꠜꠣꠉꠤꠀ ꠀꠁꠟꠣꠄ? ꠀꠝꠣꠞꠦ ꠎꠣꠘꠣꠁꠟꠦ ꠔ ꠀꠝꠤ ꠈꠥꠡꠤ-ꠛꠣꠡꠤ ꠇꠞꠤꠀ, ꠖꠥꠔꠣꠞꠣ ꠀꠞ ꠝꠘ꠆ꠖꠤꠞꠣ ꠛꠣꠎꠣꠁꠀ ꠉꠣꠘ ꠉꠣꠁꠀ, ꠔꠥꠝꠣꠞꠦ ꠛꠤꠖꠣꠄ ꠖꠤꠟꠣꠝ ꠅꠘꠦ।
GEN 31:28 ꠔꠥꠝꠤ ꠀꠝꠣꠞ ꠙꠥꠠꠤꠘ꠆ꠔꠞꠦ ꠀꠞ ꠘꠣꠔꠤꠘꠡꠣꠞꠦꠅ ꠢꠥꠋꠉꠣ ꠖꠤꠔꠦꠅ ꠖꠤꠟꠣꠄ ꠘꠣ, ꠛꠦꠀꠈꠟꠞ ꠝꠔ ꠇꠣꠝ ꠇꠞꠟꠣꠄ।
GEN 31:29 ꠅꠈꠘ ꠀꠝꠤ ꠔ ꠔꠥꠝꠞꠣꠞ ꠈꠦꠔꠤ ꠇꠞꠔꠣꠝ ꠙꠣꠞꠝꠥ, ꠅꠁꠟꠦ ꠔꠥꠝꠞꠣꠞ ꠛꠣꠚ-ꠖꠣꠖꠣꠞ ꠀꠟ꠆ꠟꠣꠄ ꠉꠔ ꠞꠣꠁꠔ ꠀꠝꠣꠞꠦ ꠇꠁꠍꠂꠘ, ‘ꠈꠛꠞꠖꠣꠞ! ꠁꠀꠇꠥꠛꠞꠦ ꠜꠣꠟꠣ-ꠛꠥꠞꠣ ꠇꠥꠘ꠆ꠔꠣꠃ ꠇꠁꠅ ꠘꠣ।’
GEN 31:30 ꠔꠥꠝꠣꠞ ꠛꠣꠚꠞ ꠛꠣꠠꠤꠔ ꠎꠣꠅꠀꠞ ꠟꠣꠉꠤ ꠝꠘꠦ ꠇꠣꠘ꠆ꠖꠤꠍꠤꠟ ꠇꠞꠤ, ꠔꠥꠝꠤ ꠜꠣꠉꠤꠀ ꠀꠁꠍ ꠝꠣꠘꠟꠣꠝ, ꠔꠦ ꠀꠝꠣꠞ ꠖꠦꠛꠔꠣ ꠅꠇꠟ ꠇꠦꠘꠦ ꠌꠥꠞꠤ ꠇꠞꠟꠣꠄ?”
GEN 31:31 ꠁꠀꠇꠥꠛꠦ ꠎꠥꠀꠙ ꠖꠤꠟꠣ, “ꠀꠝꠤ ꠒꠞꠣꠁꠍꠟꠣꠝ, ꠝꠘꠅ ꠇꠞꠍꠟꠣꠝ, ꠀꠙꠘꠦ ꠎꠥꠞ ꠇꠞꠤꠀ ꠀꠙꠘꠣꠞ ꠙꠥꠠꠤꠘ꠆ꠔꠞꠦ, ꠀꠝꠣꠞ ꠉꠦꠍ ꠕꠘꠦ ꠇꠣꠠꠤꠀ ꠞꠣꠈꠤ ꠖꠤꠛꠣ।
GEN 31:32 ꠔꠦ ꠅꠈꠘ ꠎꠣꠞ ꠉꠦꠍꠦ ꠀꠙꠘꠣꠞ ꠖꠦꠛꠔꠣꠁꠘ ꠙꠣꠁꠛꠣ, ꠔꠣꠞꠦ ꠎꠤꠔꠣ ꠞꠣꠈꠔꠣꠝ ꠘꠣꠄ। ꠀꠝꠞꠣꠞ ꠈꠦꠡ-ꠇꠥꠐꠝꠞ ꠍꠣꠝꠘꠦ ꠢꠇ꠆ꠇꠟꠔꠣ ꠔꠣꠟ꠆ꠟꠣꠡ ꠇꠞꠤꠀ ꠎꠥꠖꠤ ꠀꠙꠘꠣꠞ ꠇꠥꠘ꠆ꠔꠣ ꠙꠣꠁꠘ, ꠔꠣꠁꠟꠦ ꠘꠦꠃꠇ꠆ꠇꠣꠉꠤ।” ꠢꠃ ꠝꠥꠞ꠆ꠔꠤ ꠅꠇꠟ ꠎꠦꠘ ꠞꠣꠢꠦꠟꠣꠄ ꠌꠥꠞꠤ ꠇꠞꠍꠂꠘ, ꠁꠔꠣ ꠔ ꠁꠀꠇꠥꠛꠦ ꠎꠣꠘꠂꠘ ꠘꠣ।
GEN 31:33 ꠅꠃ ꠟꠣꠛꠘꠦ ꠁꠀꠇꠥꠛ, ꠟꠦꠀ ꠀꠞ ꠖꠥꠁꠅ ꠛꠣꠘ꠆ꠖꠤꠞ ꠔꠣꠝ꠆ꠛꠥꠔ ꠢꠣꠝꠣꠁꠀ ꠢꠇꠟꠔꠣ ꠔꠥꠇꠣꠁꠀ ꠇꠥꠘ꠆ꠔꠣ ꠘꠣ ꠙꠣꠁꠀ, ꠢꠦꠡꠦ ꠟꠦꠀꠞ ꠔꠣꠝ꠆ꠛꠥ ꠕꠘꠦ ꠞꠣꠢꠦꠟꠣꠞ ꠔꠣꠝ꠆ꠛꠥꠔ ꠉꠤꠀ ꠢꠣꠝꠣꠁꠟꠣ।
GEN 31:34 ꠞꠣꠢꠦꠟꠣꠄ ꠁ ꠝꠥꠞ꠆ꠔꠤ ꠅꠇꠟ ꠘꠤꠀ ꠃꠐꠞ ꠉꠖ꠆ꠖꠤꠞ ꠜꠤꠔꠞꠦ ꠕꠁꠀ, ꠔꠣꠁꠘ ꠅꠃ ꠉꠖ꠆ꠖꠤꠞ ꠃꠙꠞꠦ ꠛꠁꠟꠣ। ꠟꠣꠛꠘꠦ ꠔꠣꠘ ꠔꠣꠝ꠆ꠛꠥꠞ ꠢꠇꠟꠔꠣ ꠔꠥꠇꠣꠁꠀ ꠢꠘꠅ-ꠅ ꠁꠔꠣ ꠙꠣꠁꠟꠣ ꠘꠣ।
GEN 31:35 ꠀꠞ ꠞꠣꠢꠦꠟꠣꠄ ꠔꠣꠘ ꠛꠣꠚꠞꠦ ꠇꠁꠟꠣ, “ꠛꠣꠎꠣꠘ ꠀꠝꠤ ꠃꠑꠤꠀ ꠃꠛꠣꠁꠔꠣꠝ ꠙꠣꠞꠤꠀꠞ ꠘꠣ ꠇꠞꠤ ꠀꠙꠘꠦ ꠛꠦꠎꠣꠞ ꠅꠁꠘ ꠘꠣ ꠎꠦꠘ, ꠛꠦꠐꠤꠀꠞꠣ ꠛꠦꠝꠣꠞꠞ ꠟꠣꠉꠤ ꠀꠝꠣꠞ ꠡꠞꠤꠟ ꠈꠣꠞꠣꠙ।” ꠅꠃ ꠟꠣꠛꠘꠦ ꠢꠤ ꠝꠥꠞ꠆ꠔꠤ ꠅꠇꠟ ꠀꠞ ꠔꠥꠇꠣꠁꠀ ꠙꠣꠁꠟꠣ ꠘꠣ।
GEN 31:36 ꠢꠦꠡꠦ ꠁꠀꠇꠥꠛꠦ ꠉꠥꠍꠣ ꠅꠁꠀ ꠟꠣꠛꠘꠞꠦ ꠍꠤꠠꠣꠁꠀ ꠇꠁꠟꠣ, “ꠀꠝꠣꠞ ꠅꠙꠞꠣꠗ ꠇꠤꠀꠘꠅ? ꠀꠝꠤ ꠇꠤꠔꠣ ꠖꠥꠡ ꠇꠞꠍꠤ, ꠀꠙꠘꠦ ꠀꠝꠣꠞ ꠈꠞꠦ ꠅꠁꠀ ꠅꠃꠟꠣ ꠈꠦꠖꠣꠘꠤꠔ ꠀꠁꠟꠣ?
GEN 31:37 ꠀꠝꠣꠞ ꠢꠇꠟ ꠝꠣꠟ-ꠍꠣꠝꠣꠘꠣ ꠀꠃꠟꠣꠁꠀ ꠀꠙꠘꠣꠞ ꠊꠞꠞ ꠇꠥꠘ ꠎꠤꠘꠤꠡꠈꠣꠘ ꠙꠣꠁꠟꠣ? ꠙꠣꠁꠟꠦ ꠁꠔꠣ ꠀꠙꠘꠣꠞ-ꠀꠝꠣꠞ ꠈꠦꠡ-ꠇꠥꠐꠝꠞ ꠍꠣꠝꠘꠦ ꠞꠣꠈꠃꠇ꠆ꠇꠣ, ꠔꠣꠞꠣ ꠀꠝꠞꠣꠞ ꠛꠤꠌꠣꠞ ꠇꠞꠛꠣ।
GEN 31:38 ꠀꠝꠤ ꠁ ꠛꠤꠡ ꠛꠞꠍ ꠀꠙꠘꠣꠞ ꠟꠉꠦ ꠀꠍꠟꠣꠝ। ꠄꠞ ꠝꠣꠎꠦ ꠀꠙꠘꠣꠞ ꠇꠥꠘꠥ ꠝꠦꠠꠤ ꠛꠣ ꠍꠣꠉꠤꠞ ꠙꠦꠐꠞ ꠛꠣꠁꠌ꠆ꠌꠣ ꠘꠡ꠆ꠐ ꠅꠁꠍꠦ ꠘꠣ ꠛꠣ ꠀꠙꠘꠣꠞ ꠙꠣꠟꠞ ꠇꠥꠘꠥ ꠝꠦꠠꠣꠅ ꠀꠝꠤ ꠈꠣꠁꠍꠤ ꠘꠣ।
GEN 31:39 ꠀꠞ ꠎꠋꠟꠤ ꠎꠣꠘꠥꠀꠞꠦ ꠝꠣꠞꠣ ꠇꠥꠘꠥ ꠙꠡꠥꠅ ꠀꠙꠘꠣꠞ ꠉꠦꠍꠦ ꠀꠘꠍꠤ ꠘꠣ, ꠁꠔꠣ ꠀꠝꠤ ꠘꠤꠎꠦꠃ ꠙꠥꠞꠤꠀ ꠖꠤꠍꠤ। ꠖꠤꠘꠅ ꠛꠣ ꠞꠣꠁꠔ ꠇꠥꠘꠥ ꠙꠡꠥ ꠌꠥꠞꠤ ꠅꠁꠟꠦ, ꠀꠙꠘꠦ ꠀꠝꠣꠞ ꠉꠦꠍ ꠕꠣꠇꠤ ꠜꠞꠤꠀ ꠟꠁꠍꠂꠘ।
GEN 31:40 ꠀꠝꠤ ꠅꠃꠟꠣ ꠖꠤꠘ ꠇꠣꠐꠣꠁꠍꠤ, ꠖꠤꠘꠅ ꠎꠟꠍꠤ ꠉꠞꠝꠦ ꠀꠞ ꠞꠣꠁꠔꠦ ꠇꠣꠙꠍꠤ ꠡꠤꠔꠦ। ꠀꠝꠣꠞ ꠌꠈꠥꠔ ꠊꠥꠝ ꠀꠁꠔ ꠘꠣ।
GEN 31:41 ꠎꠦ ꠛꠤꠡ ꠛꠞꠍ ꠀꠙꠘꠣꠞ ꠛꠣꠠꠤꠔ ꠞꠁꠍꠤ, ꠄꠞ ꠌꠃꠖ꠆ꠖ ꠛꠞꠍ ꠀꠝꠤ ꠀꠙꠘꠣꠞ ꠖꠥꠁ ꠙꠥꠠꠤꠞ ꠟꠣꠉꠤ ꠉꠥꠟꠣꠝꠤ ꠇꠞꠍꠤ, ꠀꠞ ꠍꠄ ꠛꠞꠍ ꠉꠦꠍꠦ ꠀꠙꠘꠣꠞ ꠙꠡꠥꠞ ꠟꠣꠉꠤ। ꠄꠞ ꠝꠣꠎꠦ ꠀꠙꠘꠦ ꠖꠡ-ꠖꠡꠛꠣꠞ ꠀꠝꠣꠞ ꠛꠦꠔꠘꠅ ꠛꠖꠟꠣꠁꠍꠂꠘ।
GEN 31:42 ꠀꠟ꠆ꠟꠣ ꠙꠣꠇ, ꠎꠣꠘꠞꠦ ꠀꠝꠣꠞ ꠛꠣꠚ ꠁꠍꠢꠣꠇꠦ ꠝꠣꠛꠥꠖ ꠢꠤꠡꠣꠛꠦ ꠒꠞꠣꠁꠔꠣ, ꠎꠦꠁꠘ ꠀꠝꠣꠞ ꠖꠣꠖꠣ ꠁꠛ꠆ꠞꠣꠢꠤꠝꠞꠅ ꠝꠣꠛꠥꠖ, ꠔꠣꠁꠘ ꠎꠥꠖꠤ ꠀꠝꠣꠞ ꠟꠉꠦ ꠘꠣ ꠕꠣꠇꠔꠣ, ꠔꠦ ꠢꠣꠍꠣꠃ ꠅꠈꠘ ꠀꠙꠘꠦ ꠀꠝꠣꠞꠦ ꠈꠣꠟꠤ ꠀꠔꠦ ꠛꠤꠖꠣꠄ ꠖꠤꠟꠣ ꠅꠘꠦ। ꠀꠟ꠆ꠟꠣꠄ ꠀꠝꠣꠞ ꠝꠦꠘꠔ ꠀꠞ ꠖꠥꠈ ꠖꠦꠈꠍꠂꠘ। ꠄꠞꠟꠣꠉꠤꠃ ꠔꠣꠁꠘ ꠇꠣꠁꠟ ꠞꠣꠁꠔ ꠀꠙꠘꠣꠞꠦ ꠗꠝꠇꠣꠁꠍꠂꠘ।”
GEN 31:43 ꠟꠣꠛꠘꠦ ꠁꠀꠇꠥꠛꠞꠦ ꠎꠥꠀꠙ ꠖꠤꠟꠣ, “ꠁ ꠙꠥꠠꠤꠘ ꠀꠝꠣꠞꠃ ꠙꠥꠠꠤꠘ, ꠀꠞ ꠅꠃ ꠢꠥꠞꠥꠔ꠆ꠔꠣꠁꠘ ꠀꠝꠣꠞꠃ ꠘꠣꠔꠤꠘꠡꠣ, ꠀꠞ ꠁ ꠙꠡꠥꠞ ꠙꠣꠟ ꠅꠇꠟꠅ ꠀꠝꠣꠞ। ꠔꠥꠝꠤ ꠅꠘꠅ ꠎꠔꠔꠣ ꠖꠦꠈꠞꠣꠄ, ꠢꠇꠟꠔꠣꠃ ꠀꠝꠣꠞ, ꠔꠣ-ꠅ ꠀꠝꠣꠞ ꠙꠥꠠꠤꠘ꠆ꠔꠞꠦ ꠛꠣ ꠔꠣꠞꠣꠞ ꠢꠥꠞꠥꠔ꠆ꠔꠣꠁꠘ꠆ꠔꠞꠦ ꠀꠝꠤ ꠀꠞ ꠇꠤꠔꠣ ꠇꠞꠝꠥ?
GEN 31:44 ꠀꠅ, ꠀꠝꠞꠣ ꠖꠥꠁꠅꠎꠘꠦ ꠄꠇ ꠌꠥꠇ꠆ꠔꠤ ꠇꠞꠤꠟꠣꠁ। ꠅꠃ ꠌꠥꠇ꠆ꠔꠤꠞ ꠘꠤꠡꠣꠘꠣꠐꠣ ꠔꠥꠝꠣꠞ-ꠀꠝꠣꠞ ꠝꠣꠎꠦ ꠡꠣꠇ꠆ꠇꠤ ꠞꠁꠛ।”
GEN 31:45 ꠅꠃ ꠁꠀꠇꠥꠛꠦ ꠄꠇ ꠙꠣꠔ꠆ꠔꠞ ꠟꠁꠀ ꠈꠥꠐꠤ ꠉꠣꠠꠤꠟꠣ।
GEN 31:46 ꠀꠞ ꠔꠣꠘ ꠈꠦꠡ-ꠇꠥꠐꠥꠝ ꠅꠇꠟꠞꠦ ꠇꠁꠟꠣ, “ꠀꠙꠘꠣꠞꠣꠅ ꠙꠣꠔ꠆ꠔꠞ ꠀꠘꠃꠇ꠆ꠇꠣ।” ꠔꠦꠃ ꠔꠣꠞꠣꠅ ꠙꠣꠔ꠆ꠔꠞ ꠀꠘꠤꠀ ꠄꠇ ꠜꠤꠐꠣ ꠛꠣꠘꠣꠁꠟꠣ, ꠢꠦꠡꠦ ꠅꠃ ꠜꠤꠐꠣꠞ ꠉꠦꠍꠦ ꠈꠣꠘꠤ ꠈꠣꠁꠟꠣ।
GEN 31:47 ꠟꠣꠛꠘꠦ ꠢꠃ ꠜꠤꠐꠣꠞ ꠘꠣꠝ ꠞꠣꠈꠟꠣ ꠎꠤꠉꠞ-ꠡꠣꠢꠖꠥꠔꠣ [ꠝꠣꠘꠤ, ꠡꠣꠇ꠆ꠇꠤ-ꠜꠤꠐꠣ] ꠅꠁꠟꠦ ꠁꠀꠇꠥꠛꠦ ꠄꠞ ꠘꠣꠝ ꠞꠣꠈꠟꠣ ꠉꠟ-ꠄꠖ।
GEN 31:48 ꠟꠣꠛꠘꠦ ꠇꠁꠟꠣ, “ꠅꠃ ꠜꠤꠐꠣ ꠅꠈꠘ ꠕꠘꠦ ꠔꠥꠝꠣꠞ-ꠀꠝꠣꠞ ꠡꠣꠇ꠆ꠇꠤ ꠅꠁꠟ।” ꠄꠞꠟꠣꠉꠤ ꠅꠃ ꠜꠤꠐꠣꠞ ꠘꠣꠝ ꠅꠁꠟ ꠉꠟ-ꠄꠖ,
GEN 31:49 ꠀꠞ ꠅꠃ ꠈꠥꠐꠤꠞ ꠘꠣꠝ ꠅꠁꠟ ꠝꠤꠡꠙꠣ [ꠝꠣꠘꠤ, ꠙꠣꠢꠣꠞꠣꠞ ꠎꠣꠉꠣ]। ꠟꠣꠛꠘꠦ ꠇꠁꠟꠣ, “ꠀꠝꠞꠣ ꠎꠦꠛꠟꠣ ꠢꠞꠤꠀ ꠎꠣꠁꠝꠥꠉꠤ ꠅꠃ ꠡꠝꠄ ꠝꠣꠛꠥꠖꠦꠃ ꠔꠥꠝꠣꠞ-ꠀꠝꠣꠞ ꠙꠣꠢꠣꠞꠣ ꠖꠤꠛꠣ।
GEN 31:50 ꠔꠥꠝꠤ ꠎꠥꠖꠤ ꠀꠝꠣꠞ ꠙꠥꠠꠤꠘ꠆ꠔꠞꠦ ꠖꠥꠈ ꠖꠦꠅ ꠛꠣ ꠀꠝꠣꠞ ꠙꠥꠠꠤꠘ ꠍꠣꠠꠣ ꠀꠞ ꠇꠦꠃꠞꠞꠦ ꠛꠤꠀ ꠇꠞꠅ, ꠔꠣꠁꠟꠦ ꠇꠥꠘꠥ ꠝꠣꠘꠥꠡ ꠀꠝꠞꠣꠞ ꠟꠉꠦ ꠘꠣ ꠞꠁꠟꠦꠅ ꠀꠟ꠆ꠟꠣ ꠀꠝꠞꠣꠞ ꠡꠣꠇ꠆ꠇꠤ ꠞꠁꠟꠣ।”
GEN 31:51 ꠟꠣꠛꠘꠦ ꠁꠀꠇꠥꠛꠞꠦ ꠀꠞꠅ ꠇꠁꠟꠣ, “ꠅꠃ ꠜꠤꠐꠣ ꠛꠣꠄ ꠀꠞ ꠅꠃ ꠈꠥꠐꠤꠞ ꠛꠣꠄ ꠌꠣꠅ, ꠁꠐꠣ ꠔꠥꠝꠣꠞ-ꠀꠝꠣꠞ ꠝꠣꠎꠈꠣꠘꠅ ꠀꠝꠤ ꠉꠣꠠꠟꠣꠝ।
GEN 31:52 ꠁ ꠖꠥꠁꠅꠐꠣ ꠔꠥꠝꠣꠞ-ꠀꠝꠣꠞ ꠡꠣꠇ꠆ꠇꠤ ꠞꠁꠟ। ꠔꠥꠝꠤꠅ ꠁꠋꠡꠣ ꠇꠞꠤ ꠅꠃ ꠜꠤꠐꠣ ꠀꠞ ꠈꠥꠐꠤ ꠒꠤꠋꠉꠣꠁꠀ ꠀꠁꠛꠣꠄ ꠘꠣ ꠀꠞ ꠀꠝꠤꠅ ꠛꠥꠞꠣꠁꠞ ꠘꠤꠅꠔꠦ ꠁꠔꠣ ꠒꠤꠋꠉꠣꠁꠀ ꠎꠣꠁꠔꠣꠝ ꠘꠣꠄ।
GEN 31:53 ꠁꠛ꠆ꠞꠣꠢꠤꠝꠞ ꠀꠟ꠆ꠟꠣ, ꠘꠣꠢꠥꠞꠞ ꠃꠙꠞꠀꠟꠣ ꠀꠞ ꠔꠣꠞꠣꠞ ꠛꠣꠚꠞ ꠃꠙꠞꠀꠟꠣꠄ ꠔꠥꠝꠣꠞ-ꠀꠝꠣꠞ ꠛꠤꠌꠣꠞ ꠇꠞꠛꠣ।” ꠀꠞ ꠁꠀꠇꠥꠛꠦ, ꠔꠣꠘ ꠛꠣꠚ ꠁꠍꠢꠣꠇꠦ ꠎꠣꠘꠞꠦ ꠒꠞꠣꠁꠔꠣ ꠔꠣꠘ ꠘꠣꠝꠦ ꠇꠍꠝ ꠇꠞꠟꠣ।
GEN 31:54 ꠁꠀꠇꠥꠛꠦ ꠢꠃ ꠙꠣꠠꠞ ꠃꠙꠞꠦ ꠇꠥꠞꠛꠣꠘꠤ ꠇꠞꠤꠀ ꠔꠣꠘ ꠈꠦꠡ-ꠇꠥꠐꠥꠝ ꠅꠇꠟꠞꠦ ꠈꠣꠅꠀꠞ ꠖꠣꠅꠀꠔ ꠖꠤꠟꠣ। ꠈꠣꠅꠀ-ꠖꠣꠅꠀ ꠡꠦꠡ ꠇꠞꠤꠀ ꠢꠣꠞꠤ ꠔꠣꠞꠣ ꠢꠃ ꠙꠣꠠꠞ ꠝꠣꠎꠦ ꠞꠣꠁꠔ ꠞꠁꠟꠣ।
GEN 31:55 ꠛꠣꠖꠞ ꠖꠤꠘ ꠚꠎꠞꠦ ꠟꠣꠛꠘꠦ ꠔꠣꠘ ꠙꠥꠠꠤꠘ꠆ꠔꠞꠦ ꠀꠞ ꠘꠣꠔꠤꠘꠡꠣꠞꠦ ꠢꠥꠋꠉꠣ ꠖꠤꠀ ꠖꠥꠀ ꠇꠞꠟꠣ, ꠢꠦꠡꠦ ꠔꠣꠘ ꠛꠣꠠꠤ ꠝꠥꠈꠣ ꠙꠕ ꠖꠤꠟꠣ।
GEN 32:1 ꠁꠀꠇꠥꠛꠅ ꠔꠣꠘ ꠙꠕꠦ ꠞꠅꠀꠘꠣ ꠅꠁꠟꠦ, ꠀꠟ꠆ꠟꠣꠞ ꠚꠤꠞꠤꠡ꠆ꠔꠣ ꠅꠇꠟꠦ ꠔꠣꠘꠞꠦ ꠖꠦꠈꠣ ꠖꠤꠟꠣ।
GEN 32:2 ꠄꠞꠣꠞꠦ ꠖꠦꠈꠤꠀ ꠔꠣꠁꠘ ꠇꠁꠟꠣ, “ꠁꠔꠣ ꠀꠟ꠆ꠟꠣꠞ ꠚꠃꠎ।” ꠀꠞ ꠁ ꠎꠣꠉꠣꠞ ꠘꠣꠝ ꠞꠣꠈꠟꠣ ꠝꠢꠘꠄꠁꠝ [ꠝꠣꠘꠤ, ꠖꠥꠁ ꠚꠃꠎ]।
GEN 32:3 ꠁꠀꠇꠥꠛꠦ ꠔꠣꠘ ꠀꠉꠦ ꠇꠞꠤ ꠍꠦꠁꠞ ꠛꠣ ꠁꠖꠥꠝ ꠖꠦꠡꠅ, ꠔꠣꠘ ꠛꠠ ꠜꠣꠁ ꠁꠡʼꠞ ꠉꠦꠍꠦ ꠇꠄꠎꠘ ꠈꠛꠞꠤꠀ ꠙꠣꠑꠣꠁꠟꠣ।
GEN 32:4 ꠔꠣꠁꠘ ꠄꠞꠣꠞꠦ ꠢꠤꠇꠣꠁ ꠖꠤꠟꠣ, “ꠔꠥꠝꠞꠣ ꠀꠝꠣꠞ ꠝꠥꠘꠤꠛ ꠁꠡʼꠞꠦ ꠇꠁꠅ, ꠔꠣꠘ ꠉꠥꠟꠣꠝ ꠁꠀꠇꠥꠛꠦ ꠇꠁꠍꠦ, ꠀꠝꠤ ꠅꠔꠖꠤꠘ ꠕꠘꠦ ꠀꠝꠞꠣꠞ ꠝꠣꠝꠥ ꠟꠣꠛꠘꠞ ꠉꠦꠍꠦ ꠝꠥꠍꠣꠚꠤꠞꠤꠔ ꠀꠍꠟꠣꠝ।
GEN 32:5 ꠀꠝꠣꠞ ꠉꠞꠥ-ꠉꠣꠗꠣ, ꠍꠣꠉꠟ-ꠝꠦꠠꠣ ꠀꠞ ꠉꠥꠟꠣꠝ-ꠛꠣꠘ꠆ꠖꠤ ꠢꠇꠟꠔꠣꠃ ꠀꠍꠦ। ꠀꠝꠣꠞ ꠝꠥꠘꠤꠛꠞ ꠉꠦꠍꠦ ꠖꠄꠀ ꠙꠣꠅꠀꠞ ꠀꠡꠣꠄ ꠔꠥꠝꠞꠣꠞꠦ ꠙꠣꠑꠣꠁꠟꠣꠝ।”
GEN 32:6 ꠈꠛꠞꠤꠀ ꠅꠇꠟꠦ ꠚꠤꠞꠤꠀ ꠀꠁꠀ ꠁꠀꠇꠥꠛꠞꠦ ꠇꠁꠟꠣ, “ꠀꠝꠞꠣ ꠀꠙꠘꠣꠞ ꠜꠣꠁ ꠁꠡʼꠞ ꠉꠦꠍꠦ ꠉꠦꠍꠟꠣꠝ। ꠔꠣꠁꠘ ꠌꠣꠁꠞ-ꠡ ꠝꠣꠘꠡꠞꠦ ꠟꠁꠀ ꠀꠙꠘꠣꠞ ꠟꠉꠦ ꠝꠥꠟꠣꠇꠣꠔ ꠇꠞꠣꠔ ꠀꠁꠞꠣ।”
GEN 32:7 ꠅꠃ ꠁꠀꠇꠥꠛꠦ ꠒꠞꠣꠁꠀ ꠈꠥꠛ ꠅꠡ꠆ꠕꠤꠞ ꠅꠁꠉꠦꠟꠣ। ꠔꠣꠁꠘ ꠟꠉꠞ ꠢꠇꠟ ꠝꠣꠘꠡꠞꠦ, ꠉꠞꠥ-ꠍꠣꠉꠟ, ꠝꠦꠠꠣ-ꠝꠦꠠꠤ ꠀꠞ ꠃꠐ-ꠉꠣꠗꠣ ꠅꠇꠟꠞꠦ ꠖꠥꠁ ꠖꠟꠦ ꠀꠟꠉꠣꠁꠟꠣ।
GEN 32:8 ꠔꠣꠁꠘ ꠇꠁꠟꠣ, ꠜꠣꠁꠄ ꠀꠁꠀ ꠄꠇ ꠖꠟꠞꠦ ꠢꠣꠝꠟꠣ ꠇꠞꠟꠦꠅ ꠀꠞꠇ ꠖꠟ ꠘꠤꠞꠣꠙꠖꠦ ꠞꠁꠛ।
GEN 32:9 ꠀꠞ ꠁꠀꠇꠥꠛꠦ ꠖꠥꠀ ꠇꠞꠟꠣ, “ꠅ ꠀꠟ꠆ꠟꠣ, ꠀꠝꠣꠞ ꠖꠣꠖꠣ ꠁꠛ꠆ꠞꠣꠢꠤꠝꠞ ꠝꠣꠛꠥꠖ ꠀꠞ ꠀꠝꠣꠞ ꠛꠣꠚ ꠁꠍꠢꠣꠇꠞ ꠝꠣꠛꠥꠖ, ꠔꠥꠝꠤꠃ ꠀꠝꠣꠞꠦ ꠢꠥꠇꠥꠝ ꠇꠞꠍ ꠎꠦꠘ, ‘ꠔꠥꠝꠣꠞ ꠖꠦꠡꠅ ꠔꠥꠝꠣꠞ ꠘꠤꠎꠞ ꠝꠣꠘꠡꠞ ꠉꠦꠍꠦ ꠚꠤꠞꠤꠀ ꠎꠣꠅ, ꠔꠦꠃ ꠀꠝꠤ ꠔꠥꠝꠣꠞꠦ ꠞꠢꠝ ꠇꠞꠝꠥ।’
GEN 32:10 ꠔꠥꠝꠣꠞ ꠁ ꠉꠥꠟꠣꠝꠞ ꠛꠣꠄ ꠎꠦ ꠞꠢꠝ ꠀꠞ ꠁꠝꠣꠘꠖꠣꠞꠤ ꠖꠦꠈꠣꠁꠍ, ꠀꠝꠤ ꠁꠔꠣ ꠇꠥꠘ꠆ꠔꠣꠞꠃ ꠟꠣꠈ ꠘꠣꠄ। ꠀꠝꠤ ꠔ ꠄꠉꠥ ꠟꠣꠑꠤ ꠟꠁꠀ ꠁ ꠎꠞ꠆ꠖꠣꠘ ꠉꠣꠋ ꠙꠣꠞ ꠅꠁꠍꠟꠣꠝ, ꠀꠞ ꠅꠈꠘ ꠖꠥꠁ ꠖꠟ ꠅꠁꠉꠦꠍꠤ।
GEN 32:11 ꠝꠣꠛꠥꠖ, ꠀꠝꠤ ꠀꠞꠎ ꠇꠞꠤꠀꠞ, ꠀꠝꠣꠞ ꠜꠣꠁ ꠁꠡʼꠞ ꠀꠔ ꠕꠘꠦ ꠀꠝꠣꠞꠦ ꠛꠣꠌꠣꠅ। ꠀꠝꠣꠞ ꠒꠞ ꠇꠞꠦꠞ, ꠢꠦ ꠀꠁꠀ ꠛꠃ ꠙꠥꠀ-ꠙꠥꠠꠤꠞ ꠟꠉꠦ ꠀꠝꠣꠞꠦꠅ ꠈꠥꠘ ꠇꠞꠛ।
GEN 32:12 ꠔꠥꠝꠤꠃ ꠔ ꠅꠀꠖꠣ ꠇꠞꠍ, ‘ꠀꠝꠤ ꠅꠛꠡ꠆ꠡꠃ ꠔꠥꠝꠣꠞ ꠜꠣꠟꠣꠁ ꠇꠞꠝꠥ, ꠔꠥꠝꠣꠞ ꠅꠀꠞꠤꠡ ꠅꠇꠟꠞꠦ ꠖꠞꠤꠀꠞ ꠙꠣꠞꠞ ꠛꠣꠟꠥꠞ ꠟꠣꠈꠣꠘ ꠛꠦꠢꠤꠡꠣꠛ ꠇꠞꠝꠥ, ꠎꠦꠟꠣ ꠉꠘꠤꠀ ꠚꠥꠠꠣꠄ ꠘꠣ।’ ”
GEN 32:13 ꠁꠀꠇꠥꠛꠦ ꠁ ꠞꠣꠁꠔ ꠢꠘꠅ ꠞꠁꠟꠣ ꠀꠞ ꠔꠣꠘ ꠎꠔꠔꠣ ꠀꠍꠤꠟ ꠄꠞ ꠝꠣꠎ ꠕꠣꠇꠤ ꠇꠔꠈꠣꠘ ꠟꠁꠀ ꠔꠣꠘ ꠜꠣꠁ ꠁꠡʼꠞ ꠟꠣꠉꠤ ꠄꠇ ꠃꠙꠢꠣꠞ ꠔꠂꠀꠞ ꠇꠞꠟꠣ।
GEN 32:14 ꠁꠔꠣ ꠅꠁꠟ ꠖꠥꠁ-ꠡ ꠍꠣꠉꠤ, ꠇꠥꠠꠤꠐꠣ ꠍꠣꠉꠟ, ꠖꠥꠁ-ꠡ ꠝꠦꠠꠤ, ꠇꠥꠠꠤꠐꠣ ꠝꠦꠠꠣ,
GEN 32:15 ꠔꠤꠡꠉꠥ ꠛꠣꠁꠌ꠆ꠌꠣꠀꠟꠣ ꠖꠥꠗꠞ ꠃꠐ, ꠖꠥꠁ ꠇꠥꠠꠤ ꠉꠣꠁ, ꠖꠡꠉꠥ ꠛꠤꠍꠣꠟ, ꠄꠇ ꠇꠥꠠꠤ ꠉꠣꠗꠤ ꠀꠞ ꠖꠡꠉꠥ ꠉꠣꠗꠣ,
GEN 32:16 ꠛꠣꠖꠦ ꠔꠣꠁꠘ ꠄꠇ ꠄꠇ ꠉꠥꠟꠣꠝꠞ ꠀꠔꠅ ꠄꠇ ꠄꠇ ꠙꠣꠟ ꠡꠝꠎꠣꠁ ꠖꠤꠀ ꠇꠁꠟꠣ, “ꠔꠥꠝꠞꠣ ꠀꠝꠣꠞ ꠀꠉꠦ ꠅꠁꠀ ꠎꠣꠅ ꠀꠞ ꠄꠇ ꠙꠣꠟ ꠕꠣꠇꠤ ꠀꠞꠇ ꠙꠣꠟꠞ ꠝꠣꠎꠦ ꠚꠣꠇ ꠞꠣꠈꠤꠅ।”
GEN 32:17 ꠙꠄꠟꠣ ꠖꠟꠞ ꠉꠥꠟꠣꠝꠞꠦ ꠔꠣꠁꠘ ꠢꠤꠇꠣꠁ ꠖꠤꠟꠣ, “ꠀꠝꠣꠞ ꠜꠣꠁ ꠁꠡʼꠞ ꠟꠉꠦ ꠖꠦꠈꠣ ꠅꠀꠞ ꠛꠣꠖꠦ ꠎꠦꠛꠟꠣ ꠎꠤꠇꠣꠁꠛꠣ, ‘ꠇꠁ ꠎꠣꠁꠔꠣꠄ ꠛꠣ? ꠔꠥꠝꠤ ꠇꠣꠞ ꠝꠣꠘꠥꠡ? ꠔꠥꠝꠣꠞ ꠢꠝꠈꠞ ꠙꠡꠥꠁꠘ ꠇꠣꠞ?’
GEN 32:18 ꠔꠥꠝꠤ ꠎꠥꠀꠙ ꠖꠤꠅ, ‘ꠁꠔꠣ ꠀꠙꠘꠣꠞ ꠉꠥꠟꠣꠝ ꠁꠀꠇꠥꠛꠞ। ꠔꠣꠁꠘ ꠀꠝꠣꠞ ꠝꠥꠘꠤꠛ ꠁꠡʼꠞ ꠟꠣꠉꠤ, ꠁꠔꠣ ꠃꠙꠢꠣꠞ ꠙꠣꠑꠣꠁꠍꠂꠘ। ꠀꠞ ꠔꠣꠁꠘ ꠀꠝꠞꠣꠞ ꠈꠞꠦ ꠅꠁꠀ ꠀꠁꠞꠣ।’ ”
GEN 32:19 ꠅꠃ ꠟꠣꠈꠣꠘ ꠔꠣꠁꠘ ꠖꠥꠁ ꠘꠝ꠆ꠛꠞ, ꠔꠤꠘ ꠘꠝ꠆ꠛꠞ ꠖꠟꠞ ꠉꠥꠟꠣꠝ ꠅꠇꠟꠞꠦꠅ ꠢꠤꠇꠣꠁ ꠖꠤꠟꠣ ꠎꠦꠘ, “ꠁꠡʼꠞ ꠟꠉꠦ ꠖꠦꠈꠣ ꠅꠁꠟꠦ ꠔꠥꠝꠞꠣꠅ ꠅꠃꠟꠣ ꠇꠁꠅ।
GEN 32:20 ꠀꠞ ꠢꠦꠡꠦ ꠇꠁꠅ, ꠀꠙꠘꠣꠞ ꠉꠥꠟꠣꠝ ꠁꠀꠇꠥꠛꠅ ꠀꠝꠞꠣꠞ ꠈꠞꠦ ꠅꠁꠀ ꠀꠁꠞꠣ।” ꠁꠀꠇꠥꠛꠦ ꠝꠘꠅ ꠇꠞꠟꠣ, “ꠀꠉꠦ ꠃꠙꠢꠣꠞ ꠅꠇꠟ ꠙꠣꠑꠣꠁꠀ ꠔꠣꠘꠦ ꠑꠣꠘ꠆ꠒꠣ ꠇꠞꠝꠥ, ꠛꠣꠖꠦ ꠔꠣꠘ ꠟꠉꠦ ꠖꠦꠈꠣ-ꠡꠣꠁꠇ꠆ꠇꠣꠔ ꠇꠞꠝꠥ, ꠔꠦ ꠔꠣꠁꠘ ꠀꠝꠣꠞꠦ ꠝꠣꠄꠀ ꠇꠞꠤꠟꠤꠔꠣ ꠙꠣꠞꠂꠘ।”
GEN 32:21 ꠔꠣꠘ ꠀꠉꠦ ꠅꠁꠀ ꠃꠙꠢꠣꠞ ꠅꠇꠟ ꠉꠦꠟꠉꠤ, ꠅꠁꠟꠦ ꠔꠣꠁꠘ ꠞꠣꠁꠔ ꠔꠣꠘ ꠒꠦꠞꠣꠔ ꠞꠁꠟꠣ।
GEN 32:22 ꠢꠦꠡꠦ ꠞꠣꠁꠔ ꠃꠑꠤꠀ ꠔꠣꠘ ꠖꠥꠁꠅ ꠛꠤꠛꠤꠘ, ꠖꠥꠁꠅ ꠛꠣꠘ꠆ꠖꠤ ꠀꠞ ꠄꠉꠣꠞꠅꠉꠥ ꠙꠥꠀꠞꠦ ꠟꠁꠀ ꠙꠣꠅꠄ ꠀꠐꠤꠀ, ꠎꠣꠛ꠆ꠛꠥꠇ ꠈꠣꠟꠞ ꠢꠙꠣꠞꠅ ꠕꠁꠀ ꠀꠁꠟꠣ।
GEN 32:23 ꠔꠣꠁꠘ ꠄꠞꠣꠞꠦ ꠈꠣꠟ ꠙꠣꠞ ꠇꠞꠣꠁꠀ ꠔꠣꠘ ꠢꠇꠟ ꠝꠣꠟ-ꠍꠣꠝꠣꠘꠣꠅ ꠢꠘꠅ ꠙꠣꠑꠣꠁ ꠖꠤꠟꠣ।
GEN 32:24 ꠀꠞ ꠔꠣꠁꠘ ꠄꠇꠟꠣ ꠅꠘꠅ ꠞꠁꠟꠣ, ꠔꠦꠃ ꠉꠣꠁꠛꠤ ꠄꠇꠎꠘ ꠝꠣꠘꠥꠡ ꠀꠁꠀ ꠔꠣꠘ ꠟꠉꠦ ꠞꠣꠁꠔꠜꠞ ꠇꠥꠡ꠆ꠔꠣ-ꠇꠥꠡ꠆ꠔꠤ ꠇꠞꠟꠣ।
GEN 32:25 ꠅꠁꠟꠦ ꠔꠣꠁꠘ ꠁꠀꠇꠥꠛꠞꠦ ꠇꠣꠛꠥ ꠇꠞꠔꠣ ꠘꠣ ꠙꠣꠞꠣꠄ ꠄꠘ ꠃꠞꠣꠔꠞ ꠎꠥꠠꠣꠔ ꠝꠣꠞꠟꠣ ꠀꠞ ꠁꠀꠇꠥꠛꠞ ꠃꠞꠣꠔꠞ ꠀꠠ ꠎꠣꠉꠣ ꠕꠘꠦ ꠒꠥꠟꠤ ꠉꠦꠟ।
GEN 32:26 ꠢꠦꠡꠦ ꠢꠤ ꠝꠣꠘꠡꠦ ꠇꠁꠟꠣ, “ꠚꠎꠞ ꠅꠁꠎꠣꠞ, ꠅꠈꠘ ꠔꠥꠝꠤ ꠀꠝꠣꠞꠦ ꠍꠣꠠꠤ ꠖꠦꠅ।” ꠁꠀꠇꠥꠛꠦ ꠇꠁꠟꠣ, “ꠀꠙꠘꠦ ꠀꠝꠣꠞꠦ ꠖꠥꠀ ꠘꠣ ꠇꠞꠟꠦ ꠍꠣꠠꠔꠣꠝ ꠘꠣꠄ।”
GEN 32:27 ꠢꠤ ꠝꠣꠘꠡꠦ ꠎꠤꠇꠣꠁꠟꠣ, “ꠔꠥꠝꠣꠞ ꠘꠣꠝ ꠇꠤꠔꠣ?” ꠔꠣꠁꠘ ꠇꠁꠟꠣ, “ꠁꠀꠇꠥꠛ।”
GEN 32:28 ꠅꠃ ꠢꠦꠁꠘ ꠇꠁꠟꠣ, “ꠔꠥꠝꠤ ꠀꠟ꠆ꠟꠣ ꠀꠞ ꠝꠣꠘꠡꠞ ꠟꠉꠦ ꠟꠣꠠꠣꠁ ꠇꠞꠤꠀ ꠎꠤꠔꠍ ꠇꠞꠤ, ꠔꠥꠝꠣꠞ ꠘꠣꠝ ꠀꠞ ꠁꠀꠇꠥꠛ ꠞꠁꠔ ꠘꠣꠄ, ꠔꠥꠝꠣꠞ ꠘꠣꠝ ꠅꠁꠟ ꠁꠍꠞꠣꠁꠟ [ꠝꠣꠘꠤ, ꠀꠟ꠆ꠟꠣꠞ ꠟꠉꠦ ꠇꠥꠡ꠆ꠔꠤ ꠇꠞꠞꠣ]।”
GEN 32:29 ꠁꠀꠇꠥꠛꠦ ꠔꠣꠘꠞꠦ ꠇꠁꠟꠣ, “ꠀꠙꠘꠣꠞ ꠘꠣꠝꠈꠣꠘ ꠇꠤꠔꠣ ꠇꠃꠇ꠆ꠇꠣ।” ꠔꠣꠁꠘ ꠇꠁꠟꠣ, “ꠔꠥꠝꠤ ꠇꠤꠔꠣꠞ ꠟꠣꠉꠤ ꠀꠝꠣꠞ ꠘꠣꠝ ꠎꠤꠇꠣꠁꠞꠣꠄ?” ꠢꠦꠡꠦ ꠔꠣꠁꠘ ꠁꠀꠇꠥꠛꠞꠦ ꠖꠥꠀ ꠇꠞꠟꠣ।
GEN 32:30 ꠅꠃ ꠁꠀꠇꠥꠛꠦ ꠁ ꠎꠣꠉꠣꠞ ꠘꠣꠝ ꠞꠣꠈꠟꠣ ꠙꠘꠥꠄꠟ [ꠝꠣꠘꠤ, ꠀꠟ꠆ꠟꠣꠞ ꠍꠥꠞꠔ]। ꠔꠣꠁꠘ ꠇꠁꠟꠣ, “ꠀꠝꠤ ꠀꠟ꠆ꠟꠣ ꠙꠣꠇꠞꠦ ꠝꠥꠈꠣꠝꠥꠈꠤ ꠖꠦꠈꠤꠀꠅ ꠎꠤꠘ꠆ꠖꠣ ꠞꠁꠍꠤ।”
GEN 32:31 ꠀꠞ ꠁꠀꠇꠥꠛꠦ ꠙꠘꠥꠄꠟ ꠙꠣꠞꠘꠤꠞ ꠛꠣꠖꠦ ꠡꠥꠞꠥꠎ ꠃꠑꠤꠉꠦꠟ। ꠔꠣꠘ ꠃꠞꠣꠔꠞ ꠝꠣꠁꠞꠞ ꠟꠣꠉꠤ ꠟꠦꠋꠠꠣꠁꠔꠣ ꠟꠣꠉꠟꠣ।
GEN 32:32 ꠄꠞꠟꠣꠉꠤ ꠛꠘꠤ ꠁꠍꠞꠣꠁꠟꠦ ꠅꠈꠘꠅ ꠞꠣꠘꠞ ꠎꠥꠠꠣꠞ ꠉꠥꠡ꠆ꠔ ꠈꠣꠁꠘ ꠘꠣ, ꠇꠣꠞꠘ ꠔꠣꠁꠘ ꠃꠞꠣꠔꠞ ꠎꠥꠠꠣꠞ ꠞꠉꠞ ꠝꠣꠎꠦ ꠁꠀꠇꠥꠛꠞꠦ ꠝꠣꠞꠍꠟꠣ।
GEN 33:1 ꠁꠀꠇꠥꠛꠦ ꠌꠣꠁꠀ ꠖꠦꠈꠟꠣ, ꠔꠣꠘ ꠛꠠ ꠜꠣꠁ ꠁꠡꠦ ꠌꠣꠁꠞ-ꠡ ꠝꠣꠘꠥꠡ ꠟꠁꠀ ꠀꠉꠥꠀꠁꠀ ꠀꠁꠞꠣ। ꠅꠃ ꠔꠣꠁꠘ ꠢꠥꠞꠥꠔ꠆ꠔꠣꠁꠘ꠆ꠔꠞꠦ ꠔꠣꠘ ꠛꠤꠛꠤꠘ ꠟꠦꠀ ꠀꠞ ꠞꠣꠢꠦꠟꠣ ꠀꠞ ꠖꠥꠁꠅ ꠛꠣꠘ꠆ꠖꠤꠞ ꠉꠦꠍꠦ ꠛꠣꠐꠤꠀ ꠖꠤꠟꠣꠁꠟꠣ।
GEN 33:2 ꠔꠣꠁꠘ ꠔꠣꠘ ꠛꠣꠘ꠆ꠖꠤꠘ ꠀꠞ ꠔꠣꠞꠣꠞ ꠢꠥꠞꠥꠔ꠆ꠔꠣꠁꠘ꠆ꠔꠞꠦ ꠍꠣꠝꠘꠞ ꠇꠣꠔꠣꠞꠅ ꠞꠣꠈꠟꠣ। ꠛꠣꠖꠦ ꠟꠦꠀ ꠀꠞ ꠔꠣꠘ ꠢꠥꠞꠥꠔ꠆ꠔꠣꠁꠘ꠆ꠔꠞꠦ, ꠢꠇꠟ ꠢꠦꠡꠦ ꠞꠣꠈꠟꠣ ꠞꠣꠢꠦꠟꠣ ꠀꠞ ꠁꠃꠍꠥꠚꠞꠦ।
GEN 33:3 ꠀꠞ ꠘꠤꠎꠦ ꠄꠞꠣꠞ ꠀꠉꠦ ꠉꠤꠀ ꠡꠣꠔꠛꠣꠞ ꠝꠣꠐꠤꠔ ꠍꠁꠎꠖꠣ ꠇꠞꠤꠀ ꠔꠣꠘ ꠜꠣꠁꠞ ꠉꠦꠍꠦ ꠀꠎꠤꠞ ꠅꠁꠟꠣ।
GEN 33:4 ꠔꠦꠃ ꠁꠡꠦ ꠔꠣꠘ ꠉꠦꠍꠦ ꠖꠃꠠꠣꠁꠀ ꠀꠁꠀ ꠀꠁꠘ꠆ꠎꠣ ꠇꠞꠤ ꠉꠟꠣꠔ ꠗꠞꠤꠀ ꠢꠥꠋꠉꠣ ꠖꠤꠟꠣ, ꠀꠞ ꠖꠥꠁꠅꠎꠘꠦ ꠇꠣꠘ꠆ꠖꠤꠔꠣ ꠟꠣꠉꠟꠣ।
GEN 33:5 ꠛꠣꠖꠦ ꠁꠡꠦ ꠝꠥꠈ ꠔꠥꠟꠤꠀ ꠅꠃ ꠛꠦꠐꠤꠘ ꠀꠞ ꠢꠥꠞꠥꠔ꠆ꠔꠣꠁꠘ꠆ꠔꠞꠦ ꠖꠦꠈꠤꠀ ꠎꠤꠇꠣꠁꠟꠣ, “ꠔꠥꠝꠣꠞ ꠟꠉꠦ ꠄꠞꠣ ꠇꠦꠉꠥ?” ꠔꠣꠁꠘ ꠇꠁꠟꠣ, “ꠀꠟ꠆ꠟꠣꠄ ꠔꠣꠘ ꠞꠢꠝꠔꠦ ꠀꠙꠘꠣꠞ ꠉꠥꠟꠣꠝꠞꠦ ꠁ ꠢꠥꠞꠥꠔ꠆ꠔꠣꠁꠘ ꠖꠤꠍꠂꠘ।”
GEN 33:6 ꠔꠦꠃ ꠙꠄꠟꠣ ꠛꠣꠘ꠆ꠖꠤ ꠅꠇꠟꠦ ꠁꠡʼꠞ ꠇꠣꠍꠣꠔ ꠀꠁꠀ ꠔꠣꠞꠣꠞ ꠢꠥꠞꠥꠔ꠆ꠔꠣ ꠟꠁꠀ ꠝꠣꠕꠣ ꠘꠥꠀꠁꠟꠣ,
GEN 33:7 ꠛꠣꠖꠦ ꠟꠦꠀꠄꠅ ꠢꠥꠞꠥꠔ꠆ꠔꠣꠁꠘ꠆ꠔꠞꠦ ꠟꠁꠀ ꠀꠉꠥꠀꠁꠀ ꠝꠣꠕꠣ ꠘꠥꠀꠁꠟꠣ, ꠢꠦꠡꠦ ꠁꠃꠍꠥꠚ ꠀꠞ ꠞꠣꠢꠦꠟꠣꠄ ꠉꠤꠀ ꠝꠣꠕꠣ ꠘꠥꠀꠁꠟꠣ।
GEN 33:8 ꠔꠦꠃ ꠁꠡꠦ ꠇꠁꠟꠣ, “ꠙꠕꠅ ꠎꠦꠔꠣ ꠖꠟꠛꠟ ꠖꠦꠈꠟꠣꠝ, ꠁꠔꠣ ꠇꠤꠅꠞ ꠟꠣꠉꠤ?” ꠔꠣꠁꠘ ꠇꠁꠟꠣ, “ꠀꠝꠣꠞ ꠝꠥꠘꠤꠛꠞ ꠉꠦꠍꠦ ꠖꠄꠀ ꠙꠣꠅꠀꠞ ꠟꠣꠉꠤ।”
GEN 33:9 ꠁꠡꠦ ꠇꠁꠟꠣ, “ꠜꠣꠁꠞꠦ, ꠀꠝꠣꠞ ꠛꠃꠔꠔꠣ ꠀꠍꠦ, ꠔꠥꠝꠣꠞ ꠁꠔꠣ ꠔꠥꠝꠣꠞꠃ ꠕꠣꠇꠃꠇ।”
GEN 33:10 ꠔꠣꠁꠘ ꠇꠁꠟꠣ, “ꠎꠤ ꠘꠣ, ꠀꠝꠤ ꠝꠤꠘꠔ ꠇꠞꠤꠀ ꠇꠁꠀꠞ, ꠎꠥꠖꠤ ꠀꠝꠣꠞ ꠛꠣꠄ ꠀꠙꠘꠣꠞ ꠖꠄꠀ ꠅꠄ, ꠔꠣꠁꠟꠦ ꠀꠝꠣꠞ ꠖꠦꠅꠀ ꠁ ꠖꠣꠘ-ꠖꠇ꠆ꠇꠤꠘꠣ ꠀꠙꠘꠦ ꠘꠦꠃꠇ꠆ꠇꠣ। ꠀꠙꠘꠦ ꠎꠦꠛꠟꠣ ꠀꠝꠣꠞꠦ ꠈꠥꠡꠤ ꠝꠘꠦ ꠇꠛꠥꠟ ꠇꠞꠍꠂꠘ, ꠔꠦ ꠀꠙꠘꠣꠞ ꠝꠥꠈ ꠖꠦꠈꠣ ꠀꠞ ꠀꠟ꠆ꠟꠣꠞ ꠖꠤꠖꠣꠞ ꠙꠣꠅꠀ ꠀꠝꠣꠞ ꠟꠣꠉꠤ ꠢꠝꠣꠘ।
GEN 33:11 ꠀꠟ꠆ꠟꠣꠄ ꠀꠝꠣꠞꠦ ꠞꠢꠝꠔ ꠖꠣꠘ ꠇꠞꠍꠂꠘ, ꠀꠝꠣꠞ ꠛꠃꠔꠔꠣ ꠀꠍꠦ ꠀꠞ ꠅꠃ ꠎꠦꠔꠣ ꠃꠙꠢꠣꠞ ꠀꠙꠘꠣꠞ ꠟꠣꠉꠤ ꠀꠘꠍꠤ, ꠁꠔꠣ ꠀꠙꠘꠦ ꠘꠦꠃꠇ꠆ꠇꠣ।” ꠔꠣꠁꠘ ꠅꠃꠟꠣ ꠝꠤꠘꠔ-ꠇꠣꠎ꠆ꠎꠤ ꠇꠞꠣꠄ, ꠁꠡꠦ ꠁꠔꠣ ꠇꠛꠥꠟ ꠇꠞꠟꠣ।
GEN 33:12 ꠁꠡꠦ ꠇꠁꠟꠣ, “ꠌꠟꠅ, ꠀꠝꠞꠣ ꠞꠅꠀꠘꠣ ꠅꠁ, ꠀꠝꠤ ꠔꠥꠝꠣꠞ ꠟꠉꠦ ꠞꠁꠝꠥ।”
GEN 33:13 ꠁꠀꠇꠥꠛꠦ ꠔꠣꠘꠞꠦ ꠇꠁꠟꠣ, “ꠀꠝꠣꠞ ꠝꠥꠘꠤꠛꠦ ꠔ ꠎꠣꠘꠞꠣ, ꠁ ꠢꠥꠞꠥꠔ꠆ꠔꠣ ꠅꠇꠟꠅ ꠢꠥꠞꠥ ꠀꠞ ꠖꠥꠗꠣꠟ ꠉꠣꠁꠀꠁꠘ-ꠝꠦꠠꠤꠘꠅ ꠟꠉꠦ ꠀꠍꠦ, ꠛꠦꠎꠣꠘ ꠅꠁꠀ ꠁꠔꠣꠞꠦ ꠄꠇꠖꠤꠘꠃ ꠀꠐꠣꠁꠟꠦ, ꠢꠇ꠆ꠇꠟꠐꠤ ꠝꠞꠤꠎꠤꠛꠣ।
GEN 33:14 ꠔꠦ ꠝꠥꠘꠤꠛ, ꠀꠙꠘꠦ ꠀꠝꠣꠞ ꠀꠉꠦ ꠎꠣꠃꠇ꠆ꠇꠣꠉꠤ, ꠙꠡꠥꠞ ꠙꠣꠟ ꠀꠞ ꠢꠥꠞꠥꠔ꠆ꠔꠣ ꠅꠇꠟꠞ ꠌꠟꠣꠞ ꠈꠦꠝꠔꠣ ꠛꠥꠎꠤꠀ ꠀꠝꠤ ꠀꠡ꠆ꠔꠦ ꠀꠡ꠆ꠔꠦ ꠍꠦꠁꠞ ꠄꠟꠣꠇꠣꠔ ꠀꠙꠘꠣꠞ ꠉꠦꠍꠦ ꠀꠁꠞꠣꠝ।”
GEN 33:15 ꠁꠡꠦ ꠇꠁꠟꠣ, “ꠔꠣꠁꠟꠦ ꠀꠝꠣꠞ ꠟꠉꠞ ꠅꠔꠣ ꠇꠄꠎꠘꠞꠦ ꠔꠥꠝꠣꠞ ꠉꠦꠍꠦ ꠕꠁꠀ ꠎꠣꠁꠉꠤ।” ꠔꠣꠁꠘ ꠇꠁꠟꠣ, “ꠁꠔꠣꠞ ꠖꠞꠇꠣꠞ ꠇꠤꠔꠣ? ꠀꠝꠣꠞ ꠝꠥꠘꠤꠛꠞ ꠉꠦꠍꠦ ꠀꠝꠤ ꠎꠦ ꠞꠢꠝ ꠙꠣꠁꠍꠤ, ꠅꠐꠣꠃ ꠔ ꠛꠃꠔꠔꠣ।”
GEN 33:16 ꠀꠞ ꠁꠡ ꠢꠃ ꠖꠤꠘꠃ ꠍꠦꠁꠞꠞ ꠛꠣꠄ ꠞꠅꠀꠘꠣ ꠖꠤꠟꠣꠁꠟꠣ।
GEN 33:17 ꠅꠁꠟꠦ ꠁꠀꠇꠥꠛꠦ ꠡꠥꠇ꠆ꠇꠔꠅ ꠙꠃꠍꠤꠀ ꠘꠤꠎꠞ ꠟꠣꠉꠤ ꠒꠦꠞꠣ ꠛꠣꠘꠣꠁꠀ, ꠙꠡꠥꠞ ꠙꠣꠟꠞ ꠟꠣꠉꠤꠅ ꠇꠄꠈꠣꠘ ꠛꠣꠕꠣꠘ ꠛꠣꠘꠣꠁꠟꠣ, ꠔꠦꠃ ꠁ ꠎꠣꠉꠣꠞ ꠘꠣꠝ ꠅꠁꠟ ꠡꠥꠇ꠆ꠇꠔ [ꠝꠣꠘꠤ, ꠒꠦꠞꠣ ꠅꠇꠟ]।
GEN 33:18 ꠙꠖ꠆ꠖꠘ-ꠁꠞꠣꠝ ꠕꠘꠦ ꠛꠣꠞ ꠅꠁꠀ ꠁꠀꠇꠥꠛꠦ, ꠍꠢꠤ-ꠍꠣꠟꠣꠝꠔꠦ ꠇꠦꠘꠣꠘ ꠖꠦꠡꠞ ꠡꠤꠈꠤꠝ ꠐꠣꠃꠘꠅ ꠀꠁꠀ, ꠐꠣꠃꠘꠞ ꠛꠣꠞꠦ ꠔꠣꠝ꠆ꠛꠥꠁꠘ ꠉꠣꠠꠤꠟꠣ।
GEN 33:19 ꠢꠦꠡꠦ ꠅꠃ ꠔꠣꠝ꠆ꠛꠥꠀꠟꠣ ꠎꠝꠤꠘꠈꠣꠘ ꠔꠣꠁꠘ, ꠡꠤꠈꠤꠝꠞ ꠛꠣꠚ ꠢꠝꠥꠞꠞ ꠙꠥꠀꠂꠘ꠆ꠔꠞ ꠉꠦꠍ ꠕꠘꠦ, ꠞꠥꠙꠣꠞ ꠄꠇ-ꠡ ꠐꠦꠇꠣ ꠖꠤꠀ ꠈꠞꠤꠖ ꠇꠞꠟꠣ।
GEN 33:20 ꠀꠞ ꠢꠘꠅ ꠄꠇꠈꠣꠘ ꠇꠥꠞꠛꠣꠘꠤ ꠈꠣꠘꠣ ꠛꠣꠘꠣꠁꠀ ꠄꠞ ꠘꠣꠝ ꠖꠤꠟꠣ ꠄꠟ-ꠁꠟꠥꠢꠦ-ꠁꠍꠞꠣꠁꠟ [ꠝꠣꠘꠤ, ꠀꠟ꠆ꠟꠣ, ꠁꠍꠞꠣꠁꠟꠞ ꠃꠙꠞꠀꠟꠣ]।
GEN 34:1 ꠟꠦꠀꠞ ꠊꠞꠅ ꠖꠤꠘꠣ ꠘꠣꠝꠦ ꠁꠀꠇꠥꠛꠞ ꠎꠦ ꠙꠥꠠꠤ ꠅꠁꠍꠤꠟ, ꠄꠁꠘ ꠄꠇꠖꠤꠘ ꠢꠘꠞ ꠙꠥꠠꠤꠘ꠆ꠔꠞ ꠟꠉꠦ ꠖꠦꠈꠣ ꠇꠞꠣꠔ ꠉꠦꠟꠣ।
GEN 34:2 ꠀꠞ ꠡꠤꠈꠤꠝ ꠘꠣꠝꠞ ꠄꠇꠎꠘ ꠝꠣꠘꠡꠞ ꠌꠃꠈꠅ ꠙꠠꠟꠣ। ꠁ ꠡꠤꠈꠤꠝ ꠀꠍꠤꠟ ꠢꠤꠛ꠆ꠛꠤ ꠎꠣꠔꠤꠞ ꠡꠞ꠆ꠖꠣꠞ ꠢꠝꠥꠞꠞ ꠙꠥꠀ। ꠡꠤꠈꠤꠝꠦ ꠄꠞꠦ ꠎꠥꠞ ꠇꠞꠤ ꠗꠞꠤꠀ ꠘꠤꠀ ꠈꠛꠤꠍꠤ ꠇꠣꠝ ꠇꠞꠤꠟ꠆ꠟ।
GEN 34:3 ꠖꠤꠘꠣꠞ ꠛꠣꠄ ꠔꠣꠞ ꠖꠤꠟ ꠀꠡꠤꠇ ꠅꠁꠉꠦꠟ। ꠢꠦ ꠄꠞꠦ ꠝꠢꠛ꠆ꠛꠔ ꠇꠞꠤ ꠄꠞ ꠟꠉꠦ ꠝꠤꠑꠣ ꠝꠤꠑꠣ ꠝꠣꠔ ꠝꠣꠔꠤꠟ।
GEN 34:4 ꠛꠣꠖꠦ ꠡꠤꠈꠤꠝꠦ ꠔꠣꠞ ꠛꠣꠚ ꠢꠝꠥꠞꠞꠦ ꠇꠁꠟ, “ꠔꠥꠝꠤ ꠅꠃ ꠇꠁꠘꠣꠞꠦ ꠀꠝꠣꠞ ꠟꠉꠦ ꠛꠤꠀꠞ ꠛꠘ꠆ꠖꠛꠡ꠆ꠔ ꠇꠞꠅ।”
GEN 34:5 ꠁꠀꠇꠥꠛꠦ ꠈꠛꠞ ꠙꠣꠁꠟꠣ, ꠡꠤꠈꠤꠝꠦ ꠔꠣꠘ ꠙꠥꠠꠤꠞꠦ ꠛꠦꠁꠎ꠆ꠎꠔꠤ ꠇꠞꠍꠦ, ꠅꠁꠟꠦ ꠔꠣꠘ ꠙꠥꠀꠂꠘ ꠙꠡꠥꠞ ꠙꠣꠟ ꠟꠁꠀ ꠛꠘ꠆ꠖꠅ ꠕꠣꠇꠣꠄ, ꠔꠣꠁꠘ ꠘꠣ-ꠝꠣꠔꠤꠀ ꠘꠤꠞꠣꠁ ꠞꠁꠟꠣ।
GEN 34:6 ꠡꠤꠈꠤꠝꠞ ꠛꠣꠚ ꠢꠝꠥꠞꠦ ꠁꠀꠇꠥꠛꠞ ꠉꠦꠍꠦ ꠛꠤꠀꠞ ꠝꠣꠔ ꠟꠁꠀ ꠀꠁꠟ,
GEN 34:7 ꠀꠞ ꠁ ꠈꠛꠞ ꠢꠥꠘꠤꠀ ꠁꠀꠇꠥꠛꠞ ꠙꠥꠀꠂꠘꠅ ꠛꠘ꠆ꠖꠅ ꠕꠘꠦ ꠀꠁꠟꠣ। ꠔꠣꠞꠣ ꠛꠦꠕꠣꠄꠀ ꠉꠥꠍꠣ ꠀꠞ ꠉꠞꠝ ꠅꠁꠟꠣ, ꠇꠣꠞꠘ ꠁꠀꠇꠥꠛꠞ ꠙꠥꠠꠤꠞꠦ ꠛꠦꠁꠎ꠆ꠎꠔꠤ ꠇꠞꠣꠄ ꠡꠤꠈꠤꠝꠦ ꠀꠡ꠆ꠔꠣ ꠁꠍꠞꠣꠁꠟꠞ ꠟꠉꠦ ꠛꠦꠁꠎ꠆ꠎꠔꠤ ꠀꠞ ꠘꠣꠎꠣꠁꠎ ꠇꠣꠝ ꠇꠞꠍꠦ।
GEN 34:8 ꠔꠦꠃ ꠢꠝꠥꠞꠦ ꠄꠞꠣꠞꠦ ꠇꠁꠟ, “ꠀꠙꠘꠣꠞꠣꠞ ꠇꠁꠘꠣꠞ ꠟꠣꠉꠤ ꠀꠝꠣꠞ ꠙꠥꠀ ꠀꠡꠤꠇ ꠅꠁꠉꠦꠍꠦ। ꠖꠄꠀ ꠇꠞꠤ, ꠀꠝꠣꠞ ꠙꠥꠀꠞ ꠟꠉꠦ ꠄꠞ ꠡꠣꠖꠤ ꠖꠤꠟꠣꠃꠇ꠆ꠇꠣ।
GEN 34:9 ꠀꠝꠞꠣꠞ ꠟꠉꠦ ꠇꠥꠐꠥꠝꠤꠔꠣ ꠇꠞꠃꠇ꠆ꠇꠣ, ꠀꠝꠞꠣꠞ ꠇꠁꠘꠣꠁꠘ꠆ꠔꠞꠦ ꠀꠙꠘꠣꠞꠣ ꠘꠦꠃꠇ꠆ꠇꠣ ꠀꠞ ꠀꠙꠘꠣꠞꠣꠞꠔꠣ ꠀꠝꠞꠣꠞꠦ ꠖꠦꠃꠇ꠆ꠇꠣ।
GEN 34:10 ꠀꠞ ꠀꠝꠞꠣꠞ ꠟꠉꠦ ꠕꠣꠇꠃꠇ꠆ꠇꠣ, ꠁ ꠀꠡ꠆ꠔꠣ ꠖꠦꠡꠃ ꠔ ꠍꠣꠝꠘꠦ ꠞꠁꠍꠦ, ꠀꠙꠘꠣꠞꠣ ꠅꠘꠅꠃ ꠕꠣꠇꠂꠘ, ꠇꠣꠄ-ꠇꠣꠞꠛꠣꠞ ꠇꠞꠤꠀ, ꠘꠤꠎꠞ ꠝꠣꠟꠤꠇꠣꠘꠣ ꠇꠣꠁꠝ ꠇꠞꠂꠘ।”
GEN 34:11 ꠡꠤꠈꠤꠝꠦ ꠖꠤꠘꠣꠞ ꠛꠣꠚ-ꠜꠣꠁꠞꠦ ꠇꠁꠟꠣ, “ꠀꠝꠣꠞ ꠛꠣꠄ ꠀꠙꠘꠣꠞꠣ ꠖꠄꠀ ꠇꠞꠂꠘ, ꠀꠙꠘꠣꠞꠣ ꠀꠝꠣꠞ ꠉꠦꠍꠦ ꠎꠦꠔꠣ ꠌꠣꠁꠛꠣ, ꠀꠝꠤ ꠅꠔꠣꠃ ꠖꠤꠝꠥ।
GEN 34:12 ꠝꠢꠞꠣꠘꠣ ꠀꠞ ꠝꠣꠟ-ꠍꠣꠝꠣꠘꠣ ꠀꠙꠘꠣꠞꠣ ꠎꠦꠔꠣ ꠖꠣꠛꠤ ꠇꠞꠛꠣ ꠀꠝꠤ ꠖꠤꠝꠥ, ꠎꠦꠇꠥꠘꠥ ꠟꠣꠈꠣꠘꠃ ꠖꠤꠘꠣꠞꠦ ꠀꠝꠣꠞ ꠟꠉꠦ ꠛꠤꠀ ꠖꠦꠃꠇ꠆ꠇꠣ।”
GEN 34:13 ꠡꠤꠈꠤꠝꠦ ꠔꠣꠞꠣꠞ ꠛꠁꠘꠞꠦ ꠛꠦꠁꠎ꠆ꠎꠔꠤ ꠇꠞꠍꠤꠟ ꠇꠞꠤ ꠁꠀꠇꠥꠛꠞ ꠙꠥꠀꠂꠘ꠆ꠔꠦ ꠔꠣꠞꠦ ꠀꠞ ꠔꠣꠞ ꠛꠣꠚ ꠢꠝꠥꠞꠞꠦ ꠜꠣꠘꠣ ꠖꠦꠈꠣꠁꠀ ꠇꠁꠟꠣ,
GEN 34:14 “ꠝꠍꠟꠝꠣꠘꠤ ꠇꠣꠝ ꠘꠣ ꠇꠞꠣꠁꠟ ꠇꠥꠘꠥ ꠖꠣꠝꠣꠘ꠆ꠖꠞ ꠟꠉꠦ ꠀꠝꠞꠣꠞ ꠛꠁꠘꠞꠦ ꠛꠤꠀ ꠖꠤꠟꠦ ꠀꠝꠞꠣꠞ ꠛꠦꠁꠎ꠆ꠎꠔꠤ ꠅꠁꠛ।
GEN 34:15 ꠅꠁꠟꠦ ꠅꠃ ꠇꠣꠝ ꠇꠞꠟꠦ ꠀꠝꠞꠣ ꠞꠣꠎꠤ ꠅꠁꠝꠥ, ꠀꠙꠘꠣꠞꠣ ꠢꠇꠟ ꠛꠦꠐꠣꠁꠘ꠆ꠔꠦ ꠝꠍꠟꠝꠣꠘꠤ ꠇꠞꠣꠁꠀ, ꠀꠝꠞꠣꠞ ꠟꠣꠈꠣꠘ ꠅꠁꠛꠣ।
GEN 34:16 ꠔꠣꠁꠟꠦ ꠀꠝꠞꠣꠞ ꠙꠥꠠꠤꠘ꠆ꠔꠞꠦ ꠀꠙꠘꠣꠞꠣꠞ ꠉꠦꠍꠦ ꠖꠤꠝꠥ ꠀꠞ ꠀꠙꠘꠣꠞꠣꠞ ꠙꠥꠠꠤꠘ꠆ꠔꠞꠦꠅ ꠀꠝꠞꠣ ꠀꠘꠝꠥ, ꠀꠝꠞꠣꠅ ꠀꠙꠘꠣꠞꠣꠞ ꠟꠉꠦ ꠄꠇ ꠎꠣꠔꠤ ꠅꠁꠀ ꠛꠡꠔ ꠇꠞꠝꠥ।
GEN 34:17 ꠅꠁꠟꠦ ꠀꠙꠘꠣꠞꠣ ꠁ ꠝꠍꠟꠝꠣꠘꠤꠞ ꠇꠕꠣ ꠘꠣ ꠝꠣꠘꠟꠦ, ꠀꠝꠞꠣꠞ ꠇꠁꠘꠣꠞꠦ ꠟꠁꠀ ꠎꠣꠁꠝꠥꠉꠤ।”
GEN 34:18 ꠔꠦꠃ ꠔꠣꠞꠣꠞ ꠁ ꠝꠣꠔꠦ ꠢꠝꠥꠞ ꠀꠞ ꠔꠣꠞ ꠙꠥꠀ ꠡꠤꠈꠤꠝ ꠈꠥꠡꠤ ꠅꠁꠟꠣ।
GEN 34:19 ꠅꠃ ꠡꠤꠈꠤꠝ ꠅꠁꠟ ꠉꠥꠡ꠆ꠐꠤꠞ ꠝꠣꠎꠦ ꠢꠇꠟ ꠕꠘꠦ ꠖꠣꠝꠤ ꠝꠣꠘꠥꠡ। ꠢꠦ ꠖꠦꠞꠤ ꠘꠣ ꠇꠞꠤꠀ ꠇꠕꠣ ꠝꠣꠘꠤꠟꠣꠁꠟ, ꠇꠣꠞꠘ ꠁꠀꠇꠥꠛꠞ ꠙꠥꠠꠤꠞ ꠛꠣꠄ ꠢꠦ ꠀꠡꠤꠇ ꠀꠍꠤꠟ।
GEN 34:20 ꠛꠣꠖꠦ ꠐꠣꠃꠘꠞ ꠖꠥꠀꠞꠞ ꠉꠦꠍꠦ ꠀꠁꠀ, ꠢꠝꠥꠞ ꠀꠞ ꠔꠣꠘ ꠙꠥꠀꠄ ꠢꠇ꠆ꠇꠟ ꠝꠣꠘꠡꠞ ꠟꠉꠦ ꠝꠣꠔꠤꠀ ꠇꠁꠟꠣ,
GEN 34:21 “ꠁ ꠝꠣꠘꠥꠡꠉꠥꠁꠘ꠆ꠔꠦ ꠀꠝꠞꠣꠞꠦ ꠇꠥꠘꠥ ꠎꠣꠝꠦꠟꠣ ꠇꠞꠦꠞ ꠘꠣ। ꠀꠝꠞꠣꠞ ꠖꠦꠡꠅ ꠄꠞꠣꠞ ꠕꠣꠇꠣꠞ ꠟꠣꠉꠤ ꠛꠃꠔ ꠎꠣꠉꠣꠅ ꠀꠍꠦ, ꠔꠦ ꠄꠞꠣ ꠅꠘꠅꠃ ꠕꠣꠇꠃꠇ ꠀꠞ ꠇꠣꠄ-ꠇꠣꠞꠛꠣꠞ ꠇꠞꠃꠇ, ꠀꠝꠞꠣ ꠄꠞꠣꠞ ꠙꠥꠠꠤꠘ꠆ꠔꠞꠦ ꠛꠤꠀ ꠇꠞꠤꠀ ꠀꠘꠤ ꠀꠞ ꠀꠝꠞꠣꠞ ꠙꠥꠠꠤꠘ꠆ꠔꠞꠦꠅ ꠔꠣꠞꠣꠞ ꠉꠦꠍꠦ ꠖꠦꠁ।
GEN 34:22 ꠅꠁꠟꠦ ꠀꠝꠞꠣ ꠄꠇꠈꠣꠘ ꠇꠣꠝ ꠇꠞꠟꠦ, ꠔꠣꠞꠣ ꠀꠝꠞꠣꠞ ꠟꠉꠦ ꠄꠇ ꠎꠣꠔꠤ ꠅꠁꠔꠦ ꠞꠣꠎꠤ ꠀꠍꠂꠘ। ꠇꠣꠝꠐꠣ ꠅꠁꠟ, ꠔꠣꠞꠣꠞ ꠟꠣꠈꠣꠘ ꠀꠝꠞꠣꠞꠅ ꠢꠇ꠆ꠇꠟ ꠛꠦꠐꠣꠁꠘ꠆ꠔꠞ ꠝꠍꠟꠝꠣꠘꠤ ꠇꠞꠣꠘꠤ ꠟꠣꠉꠛ।
GEN 34:23 ꠀꠞ ꠔꠣꠞꠣꠞ ꠉꠞꠥ-ꠝꠦꠠꠣ, ꠝꠣꠟ-ꠍꠣꠝꠣꠘꠣ ꠢꠇ꠆ꠇꠟꠔꠣꠃ ꠔ ꠀꠝꠞꠣꠞ ꠅꠁꠛ, ꠔꠣꠞꠣꠞ ꠇꠕꠣꠄ ꠞꠣꠎꠤ ꠅꠁꠟꠦꠃ ꠔꠣꠞꠣ ꠀꠝꠞꠣꠞ ꠟꠉꠦ ꠕꠣꠇꠛꠣ।”
GEN 34:24 ꠅꠃ ꠐꠣꠃꠘꠞ ꠢꠇꠟ ꠛꠦꠐꠣꠁꠘ ꠢꠝꠥꠞ ꠀꠞ ꠔꠣꠘ ꠙꠥꠀ ꠡꠤꠈꠤꠝꠞ ꠝꠣꠔꠦ ꠞꠣꠎꠤ ꠅꠁꠟ, ꠀꠞ ꠔꠣꠞꠣ ꠢꠇꠟꠞ ꠝꠍꠟꠝꠣꠘꠤ ꠇꠣꠝ ꠇꠞꠣꠁꠟ।
GEN 34:25 ꠢꠦꠡꠦ ꠔꠤꠘ ꠖꠤꠘꠞ ꠖꠤꠘ ꠎꠦꠛꠟꠣ ꠢꠇꠟ ꠛꠦꠐꠣꠁꠘ꠆ꠔꠦ ꠝꠍꠟꠝꠣꠘꠤꠞ ꠛꠦꠖꠘꠣꠄ ꠇꠡ꠆ꠐ ꠙꠣꠁꠞꠣ, ꠅꠃ ꠡꠝꠄ ꠖꠤꠘꠣꠞ ꠀꠙꠘ ꠜꠣꠁ ꠁꠀꠇꠥꠛꠞ ꠖꠥꠁ ꠙꠥꠀ ꠡꠤꠝꠤꠅꠘ ꠀꠞ ꠟꠦꠛꠤ, ꠔꠣꠞꠣꠞ ꠔꠟꠥꠀꠞ ꠟꠁꠀ ꠐꠣꠃꠘꠅ ꠢꠣꠝꠣꠁꠀ, ꠄꠞꠣꠞꠦ ꠛꠦ-ꠈꠤꠀꠟꠅ ꠙꠣꠁꠀ ꠢꠇꠟ ꠛꠦꠐꠣꠁꠘ꠆ꠔꠞꠦ ꠝꠣꠞꠤꠟꠤꠟ।
GEN 34:26 ꠔꠣꠞꠣ ꠢꠝꠥꠞ ꠀꠞ ꠔꠣꠘ ꠙꠥꠀ ꠡꠤꠈꠤꠝꠞꠦꠅ ꠔꠟꠥꠀꠞꠖꠤ ꠎꠣꠘꠦ ꠝꠣꠞꠤꠀ ꠡꠤꠈꠤꠝꠞ ꠊꠞ ꠕꠘꠦ ꠖꠤꠘꠣꠞꠦ ꠟꠁꠀ ꠀꠁꠟ।
GEN 34:27 ꠄꠞꠣ ꠔꠣꠞꠣꠞ ꠛꠁꠘꠞꠦ ꠛꠦꠁꠎ꠆ꠎꠔꠤ ꠇꠞꠍꠤꠟ ꠇꠞꠤ, ꠁꠀꠇꠥꠛꠞ ꠢꠇꠟ ꠙꠥꠀꠂꠘ꠆ꠔꠦ ꠝꠞꠣ ꠟꠣꠡꠞ ꠉꠦꠍꠦ ꠀꠁꠀ ꠐꠣꠃꠘꠅ ꠟꠥꠐ-ꠔꠞꠣꠎ ꠇꠞꠟꠣ।
GEN 34:28 ꠀꠞ ꠐꠣꠃꠘꠞ ꠜꠤꠔꠞ-ꠛꠣꠁꠞꠞ ꠉꠞꠥ-ꠉꠣꠗꠣ, ꠍꠣꠉꠟ-ꠝꠦꠠꠣ, ꠀꠞ ꠈꠦꠔꠞ ꠢꠇꠟꠔꠣ ꠟꠥꠐꠤꠀ ꠟꠁꠀ ꠀꠁꠟꠣ।
GEN 34:29 ꠢꠇꠟ ꠝꠣꠟ-ꠍꠣꠝꠣꠘꠣ, ꠙꠥꠀ-ꠙꠥꠠꠤꠘ, ꠛꠦꠐꠤꠘ, ꠀꠞ ꠊꠞꠞ ꠢꠇꠟꠔꠣꠅ ꠟꠥꠐ-ꠙꠣꠐ ꠇꠞꠟꠣ।
GEN 34:30 ꠢꠦꠡꠦ ꠁꠀꠇꠥꠛꠦ ꠡꠤꠝꠤꠅꠘ ꠀꠞ ꠟꠦꠛꠤꠞꠦ ꠇꠁꠟꠣ, “ꠔꠥꠝꠞꠣ ꠁ ꠖꠦꠡꠞ ꠇꠦꠘꠣꠘꠤ ꠀꠞ ꠚꠣꠞꠤꠎꠤ ꠅꠇꠟꠞ ꠉꠦꠍꠦ ꠀꠝꠣꠞꠦ ꠙꠌꠣ-ꠊꠤꠘ꠆ꠘꠣꠞ ꠝꠣꠘꠥꠡ ꠛꠣꠘꠣꠁꠀ ꠝꠍꠤꠛꠔꠅ ꠚꠣꠟꠣꠁꠍ। ꠀꠝꠣꠞ ꠝꠣꠘꠥꠡ ꠇꠝ, ꠅꠈꠘ ꠔꠣꠞꠣ ꠄꠇꠈꠣꠘꠅ ꠅꠁꠀ ꠀꠝꠣꠞꠦ ꠢꠣꠝꠟꠣ ꠇꠞꠟꠦ, ꠀꠝꠤ ꠙꠞꠤꠛꠣꠞꠞ ꠢꠇ꠆ꠇꠟꠞꠦ ꠟꠁꠀ ꠝꠞꠝꠥ।”
GEN 34:31 ꠔꠣꠞꠣ ꠎꠥꠀꠙ ꠖꠤꠟꠣ, “ꠢꠦ ꠀꠝꠞꠣꠞ ꠛꠁꠘꠞꠦ ꠘꠤꠀ ꠈꠣꠘꠇꠤ ꠛꠣꠘꠣꠁꠟꠤꠔ ꠘꠤ?”
GEN 35:1 ꠄꠞꠛꠣꠖꠦ ꠀꠟ꠆ꠟꠣ ꠙꠣꠇꠦ ꠁꠀꠇꠥꠛꠞꠦ ꠇꠁꠟꠣ, “ꠔꠥꠝꠤ ꠢꠤꠞꠛꠣꠞ ꠛꠦꠕꠦꠟꠅ ꠎꠣꠅꠉꠤ। ꠔꠥꠝꠣꠞ ꠜꠣꠁ ꠁꠡʼꠞ ꠉꠦꠍ ꠕꠘꠦ ꠜꠣꠉꠤꠛꠣꠞ ꠛꠣꠟꠣ, ꠎꠦꠁꠘ ꠔꠥꠝꠣꠞꠦ ꠖꠞꠡꠘ ꠖꠤꠍꠟꠣ, ꠢꠃ ꠀꠟ꠆ꠟꠣ ꠙꠣꠇꠞ ꠘꠣꠝꠦ ꠔꠥꠝꠤ ꠢꠘꠅ ꠄꠇꠈꠣꠘ ꠇꠥꠞꠛꠣꠘꠤ ꠈꠣꠘꠣ ꠛꠣꠘꠣꠅ।”
GEN 35:2 ꠔꠦꠃ ꠁꠀꠇꠥꠛꠦ ꠔꠣꠘ ꠀꠙꠘ ꠝꠣꠘꠡꠞꠦ ꠀꠞ ꠟꠉꠞ ꠢꠇꠟꠞꠦ ꠇꠁꠟꠣ, “ꠔꠥꠝꠞꠣꠞ ꠉꠦꠍꠦ ꠖꠦꠛꠔꠣꠞ ꠎꠦꠔꠣ ꠝꠥꠞ꠆ꠔꠤꠘ ꠀꠍꠦ, ꠁꠔꠣ ꠢꠇ꠆ꠇꠟꠐꠤ ꠚꠣꠟꠣꠅ; ꠀꠞ ꠢꠇꠟꠦ ꠙꠣꠇ-ꠍꠣꠚ ꠅꠁꠀ, ꠍꠣꠚ-ꠍꠥꠔꠞꠣ ꠟꠦꠛꠣꠍ ꠚꠤꠘ꠆ꠖꠅ।
GEN 35:3 ꠀꠞ ꠌꠟꠅ, ꠀꠝꠞꠣ ꠛꠦꠕꠦꠟꠅ ꠎꠣꠁꠔꠣꠝꠉꠤ। ꠢꠘꠅ ꠀꠝꠤ ꠀꠟ꠆ꠟꠣꠞ ꠘꠣꠝꠦ ꠄꠇꠈꠣꠘ ꠇꠥꠞꠛꠣꠘꠤ ꠈꠣꠘꠣ ꠛꠣꠘꠣꠁꠝꠥ, ꠎꠦꠁꠘ ꠝꠍꠤꠛꠔꠞ ꠖꠤꠘꠅ ꠀꠝꠣꠞ ꠖꠥꠀ ꠇꠛꠥꠟ ꠇꠞꠍꠟꠣ, ꠀꠞ ꠀꠝꠣꠞ ꠍꠚꠞꠞ ꠟꠉꠤ ꠅꠁꠍꠟꠣ।”
GEN 35:4 ꠔꠦꠃ ꠔꠣꠞꠣꠞ ꠎꠔ ꠟꠣꠈꠣꠘ ꠖꠦꠛꠔꠣꠞ ꠝꠥꠞ꠆ꠔꠤꠘ ꠀꠞ ꠇꠣꠘꠞ ꠎꠦꠅꠞꠣꠔ ꠀꠍꠤꠟ, ꠢꠇꠟꠔꠣ ꠁꠀꠇꠥꠛꠞ ꠀꠔꠅ ꠖꠤꠟꠣꠁꠟꠣ। ꠔꠣꠁꠘ ꠁꠔꠣ ꠘꠤꠀ ꠡꠤꠈꠤꠝ ꠐꠣꠃꠘꠞ ꠇꠣꠘ꠆ꠖꠣꠔ ꠄꠟꠘ ꠉꠣꠍꠞ ꠔꠟꠦ ꠉꠣꠠꠤꠟꠣꠁꠟꠣ।
GEN 35:5 ꠛꠣꠖꠦ ꠔꠣꠞꠣ ꠢꠘ ꠕꠘꠦ ꠞꠅꠀꠘꠣ ꠅꠁꠟꠣ ꠀꠞ ꠀꠟ꠆ꠟꠣꠄ ꠌꠣꠁꠞꠅꠛꠣꠄ ꠢꠇꠟ ꠉꠣꠃ-ꠉꠦꠞꠣꠝꠅ ꠄꠇ ꠒꠞ ꠙꠄꠖꠣ ꠇꠞꠟꠣ, ꠔꠦꠃ ꠢꠤꠘꠞ ꠇꠥꠘꠥ ꠝꠣꠘꠡꠦ ꠁꠀꠇꠥꠛꠞ ꠙꠥꠀꠂꠘ꠆ꠔꠞꠦ ꠈꠦꠖꠣꠘꠤꠔ ꠉꠦꠟ ꠘꠣ।
GEN 35:6 ꠢꠦꠡꠦ ꠁꠀꠇꠥꠛ ꠀꠞ ꠔꠣꠘ ꠟꠉꠞ ꠢꠇꠟꠦ ꠇꠦꠘꠣꠘ ꠖꠦꠡꠞ ꠟꠥꠎ ꠘꠣꠝꠞ ꠎꠣꠉꠣ, ꠝꠣꠘꠤ ꠛꠦꠕꠦꠟꠅ ꠀꠁꠀ ꠙꠃꠍꠟꠣ।
GEN 35:7 ꠅꠘꠅ ꠔꠣꠁꠘ ꠄꠇ ꠇꠥꠞꠛꠣꠘꠤ ꠈꠣꠘꠣ ꠛꠣꠘꠣꠁꠀ, ꠅꠃ ꠎꠣꠉꠣꠞ ꠘꠣꠝ ꠖꠤꠟꠣ ꠄꠟ-ꠛꠦꠕꠦꠟ [ꠝꠣꠘꠤ, ꠛꠦꠕꠦꠟꠞ ꠀꠟ꠆ꠟꠣ], ꠇꠣꠞꠘ ꠜꠣꠁꠞ ꠉꠦꠍ ꠕꠣꠇꠤ ꠜꠣꠉꠤꠛꠣꠞ ꠛꠣꠟꠣ ꠀꠟ꠆ꠟꠣꠄ ꠅꠘꠅꠃ ꠔꠣꠘꠞꠦ ꠖꠤꠖꠣꠞ-ꠖꠞꠡꠘ ꠖꠤꠍꠟꠣ।
GEN 35:8 ꠀꠞ ꠞꠦꠛꠦꠇꠣꠞ ꠖꠣꠁꠝꠣ ꠖꠛꠥꠞꠣ ꠝꠣꠞꠣ ꠉꠦꠟꠣ। ꠔꠣꠘꠦ ꠛꠦꠕꠦꠟꠞ ꠟꠣꠝꠣꠔ ꠄꠇ ꠄꠟꠘ ꠉꠣꠍꠞ ꠔꠟꠦ ꠝꠣꠐꠤ ꠖꠤꠟꠣ, ꠔꠦꠃ ꠁ ꠎꠣꠉꠣꠞ ꠘꠣꠝ ꠅꠁꠟ ꠄꠟꠘ-ꠛꠣꠈꠥꠔ [ꠝꠣꠘꠤ, ꠇꠣꠘ꠆ꠖꠘꠞ ꠉꠣꠍ]।
GEN 35:9 ꠁꠀꠇꠥꠛꠦ ꠙꠖ꠆ꠖꠘ-ꠁꠞꠣꠝ ꠕꠣꠇꠤ ꠀꠅꠀꠞ ꠛꠣꠖꠦ, ꠀꠟ꠆ꠟꠣꠄ ꠢꠤꠞꠛꠣꠞ ꠔꠣꠘꠞꠦ ꠖꠤꠖꠣꠞ ꠖꠤꠀ ꠛꠞꠇꠔ ꠘꠣꠎꠤꠟ ꠇꠞꠟꠣ।
GEN 35:10 ꠀꠟ꠆ꠟꠣꠄ ꠇꠁꠟꠣ, “ꠔꠥꠝꠣꠞ ꠘꠣꠝ ꠔ ꠁꠀꠇꠥꠛ; ꠅꠁꠟꠦ ꠝꠣꠘꠡꠦ ꠔꠥꠝꠣꠞꠦ ꠀꠞ ꠁꠀꠇꠥꠛ ꠇꠁꠀ ꠒꠣꠇꠔꠣ ꠘꠣꠄ, ꠔꠥꠝꠣꠞꠦ ꠁꠍꠞꠣꠁꠟ ꠇꠁꠛꠣ।” ꠔꠦꠃ ꠔꠣꠘ ꠘꠣꠝ ꠅꠁꠟ ꠁꠍꠞꠣꠁꠟ।
GEN 35:11 ꠀꠟ꠆ꠟꠣꠄ ꠔꠣꠘꠞꠦ ꠇꠁꠟꠣ, “ꠀꠝꠤꠃ ꠡꠞ꠆ꠛ-ꠡꠇ꠆ꠔꠤꠝꠣꠘ ꠀꠟ꠆ꠟꠣ। ꠔꠥꠝꠤ ꠚꠟꠀꠟꠣ ꠅꠁꠀ ꠛꠣꠠꠅ। ꠔꠥꠝꠣ ꠕꠘꠦ ꠄꠇ ꠎꠣꠔꠤ ꠙꠄꠖꠣ ꠅꠁꠛ, ꠁꠐꠣ ꠅꠁꠛ ꠛꠃꠔ ꠉꠥꠡ꠆ꠐꠤꠀꠟꠣ ꠎꠣꠔꠤ, ꠀꠞ ꠔꠥꠝꠣꠞ ꠈꠣꠘ꠆ꠖꠣꠘꠅ ꠛꠣꠖꠡꠣ ꠅꠇꠟ ꠙꠄꠖꠣ ꠅꠁꠛꠣ।
GEN 35:12 ꠀꠝꠤ ꠁꠛ꠆ꠞꠣꠢꠤꠝ ꠀꠞ ꠁꠍꠢꠣꠇꠞꠦ ꠎꠦ ꠖꠦꠡ ꠖꠣꠘ ꠇꠞꠍꠤ, ꠢꠃ ꠖꠦꠡ ꠅꠈꠘ ꠔꠥꠝꠣꠞꠦ ꠀꠞ ꠔꠥꠝꠣꠞ ꠛꠣꠖꠞ ꠅꠀꠞꠤꠡꠞꠦ ꠖꠤꠝꠥ।”
GEN 35:13 ꠀꠟ꠆ꠟꠣꠄ ꠢꠘꠅ ꠁꠀꠇꠥꠛꠞ ꠟꠉꠦ ꠛꠣꠔꠌꠤꠔ ꠇꠞꠤꠀ ꠢꠣꠞꠟꠦ ꠀꠍꠝꠣꠘꠅ ꠔꠡꠞꠤꠚ ꠘꠤꠟꠣꠉꠤ।
GEN 35:14 ꠁꠀꠇꠥꠛꠦ ꠢꠃ ꠛꠣꠔꠌꠤꠔꠞ ꠎꠣꠉꠣꠔ ꠙꠣꠔ꠆ꠔꠞꠞ ꠄꠇ ꠈꠥꠐꠤ ꠉꠣꠠꠤꠀ, ꠄꠞ ꠃꠙꠞꠦ ꠔꠣꠁꠘ ꠀꠟ꠆ꠟꠣꠞ ꠘꠣꠝꠦ ꠡꠞꠛꠔ-ꠙꠣꠘꠤꠞ ꠍꠖꠉꠣ ꠓꠣꠟꠤꠟꠣ, ꠢꠦꠡꠦ ꠔꠦꠟꠅ ꠓꠣꠟꠤꠟꠣ।
GEN 35:15 ꠀꠟ꠆ꠟꠣꠄ ꠎꠦꠈꠣꠘꠅ ꠔꠣꠘꠞꠦ ꠖꠤꠖꠣꠞ ꠖꠤꠍꠟꠣ, ꠁꠀꠇꠥꠛꠦ ꠁ ꠎꠣꠉꠣꠞ ꠘꠣꠝ ꠞꠣꠈꠍꠟꠣ ꠛꠦꠕꠦꠟ।
GEN 35:16 ꠛꠣꠖꠦ ꠁꠀꠇꠥꠛ ꠀꠞ ꠔꠣꠘ ꠟꠉꠞ ꠢꠇꠟꠦ ꠛꠦꠕꠦꠟ ꠕꠣꠇꠤ ꠞꠅꠀꠘꠣ ꠇꠞꠤꠀ ꠁꠚ꠆ꠞꠣꠕꠅ ꠙꠃꠍꠣꠞ ꠛꠣꠇ꠆ꠇꠣ ꠀꠉꠦ, ꠞꠣꠢꠦꠟꠣꠞ ꠢꠥꠞꠥꠔ꠆ꠔꠣ ꠅꠀꠞ ꠛꠤꠡꠦ ꠗꠞꠟ, ꠔꠣꠘ ꠈꠥꠛ ꠔꠇꠟꠤꠚ ꠅꠁꠟ।
GEN 35:17 ꠢꠥꠞꠥꠔ꠆ꠔꠣ ꠅꠀꠞ ꠛꠤꠡ ꠀꠞꠅ ꠛꠣꠠꠟ, ꠔꠦꠃ ꠖꠣꠁ ꠛꠦꠐꠤꠄ ꠇꠁꠟ, “ꠒꠞꠣꠁꠅ ꠘꠣ ꠉ, ꠁꠛꠣꠞꠅ ꠔꠥꠝꠣꠞ ꠊꠞꠅ ꠙꠥꠀ ꠅꠁꠛ।”
GEN 35:18 ꠅꠁꠟꠦ ꠞꠣꠢꠦꠟꠣ ꠝꠣꠞꠣ ꠉꠦꠟꠣ। ꠝꠞꠣꠞ ꠡꠝꠄ ꠔꠣꠁꠘ ꠙꠥꠀꠞ ꠘꠣꠝ ꠞꠣꠈꠟꠣ ꠛꠤꠘ-ꠅꠘꠤ [ꠝꠣꠘꠤ, ꠀꠝꠣꠞ ꠔꠇꠟꠤꠚꠞ ꠙꠥꠀ] ꠅꠁꠟꠦ ꠛꠣꠚꠦ ꠔꠣꠞ ꠘꠣꠝ ꠞꠣꠈꠟꠣ ꠛꠤꠘ-ꠁꠀꠝꠤꠘ [ꠝꠣꠘꠤ, ꠀꠝꠣꠞ ꠛꠟꠞ ꠙꠥꠀ]।
GEN 35:19 ꠞꠣꠢꠦꠟꠣꠞ ꠝꠃꠔꠞ ꠛꠣꠖꠦ ꠁꠚ꠆ꠞꠣꠕ, ꠝꠣꠘꠤ ꠛꠦꠕꠦꠟꠢꠣꠝ, ꠎꠣꠅꠀꠞ ꠙꠕꠞ ꠇꠣꠘ꠆ꠖꠣꠔ ꠔꠣꠘꠞꠦ ꠝꠣꠐꠤ ꠖꠦꠅꠀ ꠅꠁꠟ।
GEN 35:20 ꠝꠣꠐꠤ ꠖꠤꠀ ꠢꠣꠞꠟꠦ ꠁꠀꠇꠥꠛꠦ ꠔꠣꠘ ꠇꠄꠛꠞꠞ ꠃꠙꠞꠦ ꠄꠇ ꠙꠣꠔ꠆ꠔꠞꠞ ꠈꠥꠐꠤ ꠉꠣꠠꠟꠣ, ꠁ ꠈꠥꠐꠤ ꠀꠁꠎꠅ ꠅꠘꠅ ꠀꠍꠦ।
GEN 35:21 ꠅꠘ ꠕꠘꠦ ꠁꠍꠞꠣꠁꠟꠦ ꠢꠤꠞꠛꠣꠞ ꠞꠅꠀꠘꠣ ꠖꠤꠟꠣ, ꠀꠞ ꠄꠖꠞ ꠝꠤꠘꠣꠞ ꠚꠣꠟꠣꠁꠀ ꠀꠁꠀ ꠔꠣꠘ ꠔꠣꠝ꠆ꠛꠥ ꠉꠣꠠꠤꠟꠣ।
GEN 35:22 ꠁꠍꠞꠣꠁꠟ ꠎꠦꠛꠟꠣ ꠢꠘꠅ ꠞꠁꠞꠣ, ꠅꠃ ꠚꠣꠇꠅ ꠞꠥꠛꠦꠘꠦ ꠉꠤꠀ ꠔꠣꠞ ꠛꠣꠚꠞ ꠛꠣꠖꠞ ꠛꠤꠀꠞ ꠛꠃ ꠛꠤꠟꠢꠣꠞ ꠟꠉꠦ ꠎꠤꠘꠣ ꠇꠞꠟ ꠀꠞ ꠁꠔꠣ ꠁꠍꠞꠣꠁꠟꠞ ꠇꠣꠘꠅ ꠉꠦꠟ।
GEN 35:23 ꠁꠀꠇꠥꠛꠞ ꠛꠣꠞꠅꠎꠘ ꠙꠥꠀ ꠀꠍꠟꠣ, ꠟꠦꠀꠞ ꠔꠞꠚꠣ ꠔꠣꠘ ꠛꠠ ꠙꠥꠀ ꠞꠥꠛꠦꠘ, ꠛꠣꠖꠦ ꠡꠤꠝꠤꠅꠘ, ꠟꠦꠛꠤ, ꠄꠢꠥꠖꠣ, ꠁꠍꠣꠈꠞ ꠀꠞ ꠍꠛꠥꠟꠘ।
GEN 35:24 ꠞꠣꠢꠦꠟꠣꠞ ꠔꠞꠚꠣ ꠁꠃꠍꠥꠚ ꠀꠞ ꠛꠤꠘ-ꠁꠀꠝꠤꠘ।
GEN 35:25 ꠞꠣꠢꠦꠟꠣꠞ ꠛꠣꠘ꠆ꠖꠤ ꠛꠤꠟꠢꠣꠞ ꠔꠞꠚꠣ, ꠖꠣꠘ ꠀꠞ ꠘꠙ꠆ꠔꠣꠟꠤ।
GEN 35:26 ꠟꠦꠀꠞ ꠛꠣꠘ꠆ꠖꠤ ꠎꠤꠟꠙꠣꠞ ꠔꠞꠚꠣ, ꠍꠣꠖꠥ ꠀꠞ ꠀꠡꠤꠞ। ꠔꠣꠘ ꠅꠃ ꠢꠥꠞꠥꠔ꠆ꠔꠣ ꠅꠇꠟ ꠙꠖ꠆ꠖꠘ-ꠁꠞꠣꠝꠅ ꠅꠁꠍꠟꠣ।
GEN 35:27 ꠢꠦꠡꠦ ꠁꠀꠇꠥꠛ ꠇꠤꠞꠤꠅꠔ-ꠅꠞ꠆ꠛꠞ, ꠝꠣꠘꠤ ꠢꠦꠛꠞꠘꠞ ꠇꠣꠍꠣꠔ ꠝꠝ꠆ꠞꠤ ꠘꠣꠝꠞ ꠎꠣꠉꠣꠔ, ꠔꠣꠘ ꠛꠣꠚ ꠁꠍꠢꠣꠇꠞ ꠉꠦꠍꠦ ꠀꠁꠟꠣ। ꠅꠃ ꠎꠣꠉꠣꠔ ꠁꠛ꠆ꠞꠣꠢꠤꠝ ꠀꠞ ꠁꠍꠢꠣꠇꠦꠅ ꠛꠡꠔ ꠇꠞꠔꠣ।
GEN 35:28 ꠁꠍꠢꠣꠇꠞ ꠛꠄꠅꠡ ꠄꠇ-ꠡ ꠀꠡꠤ ꠛꠞꠍ ꠅꠁꠍꠤꠟ।
GEN 35:29 ꠀꠞ ꠁꠍꠢꠣꠇ ꠙꠥꠞꠣꠙꠥꠞ ꠛꠥꠠꠣ ꠅꠁꠀ, ꠝꠥꠞꠛ꠆ꠛꠤ ꠛꠄꠅꠡꠅ ꠝꠣꠞꠣ ꠉꠤꠀ ꠔꠣꠘ ꠛꠣꠚ-ꠖꠣꠖꠣꠞ ꠉꠦꠍꠦ ꠉꠤꠀ ꠀꠎꠤꠟꠣ। ꠔꠣꠘ ꠙꠥꠀ ꠁꠡ ꠀꠞ ꠁꠀꠇꠥꠛꠦ ꠔꠣꠘꠞꠦ ꠖꠣꠚꠘ ꠇꠞꠟꠣ।
GEN 36:1 ꠅꠃ ꠅꠁꠟ ꠁꠡ ꠛꠣ ꠁꠖꠥꠝꠞ ꠈꠣꠘ꠆ꠖꠣꠘꠞ ꠛꠄꠀꠘ।
GEN 36:2 ꠁꠡꠦ ꠇꠦꠘꠣꠘꠤ ꠖꠥꠁ ꠙꠥꠠꠤꠞꠦ ꠛꠤꠀ ꠇꠞꠍꠟꠣ। ꠄꠞꠣ ꠅꠁꠟꠣ ꠢꠤꠐ꠆ꠐꠤ ꠄꠟꠘꠞ ꠙꠥꠠꠤ ꠀꠖꠣ, ꠀꠞ ꠢꠤꠛ꠆ꠛꠤ ꠎꠤꠛꠤꠅꠘꠞ ꠘꠣꠔꠤꠘ, ꠅꠘꠣꠞ ꠙꠥꠠꠤ ꠅꠢꠟꠤꠛꠣꠝꠣ।
GEN 36:3 ꠄꠞꠣꠞ ꠛꠣꠖꠦꠅ ꠔꠣꠁꠘ ꠁꠍꠝꠣꠁꠟꠞ ꠙꠥꠠꠤ ꠘꠣꠛꠣꠃꠔꠞ ꠛꠁꠘ ꠛꠣꠡꠝꠔꠞꠦ ꠛꠤꠀ ꠇꠞꠍꠟꠣ।
GEN 36:4 ꠀꠖꠣꠞ ꠙꠦꠐꠅ ꠁꠟꠤꠚꠎ ꠀꠞ ꠛꠣꠡꠝꠔꠞ ꠙꠦꠐꠅ ꠞꠥꠄꠟꠞ ꠎꠘꠝ ꠅꠁꠍꠤꠟ,
GEN 36:5 ꠀꠞ ꠅꠢꠟꠤꠛꠣꠝꠣꠞ ꠙꠦꠐꠅ ꠎꠤꠃꠡ, ꠎꠣꠟꠝ ꠀꠞ ꠇꠥꠞꠢꠞ ꠎꠘꠝ ꠅꠁꠍꠤꠟ। ꠁꠡʼꠞ ꠁ ꠙꠥꠀꠂꠘ꠆ꠔꠞ ꠎꠘꠝ ꠅꠁꠍꠤꠟ ꠇꠦꠘꠣꠘ ꠖꠦꠡꠅ।
GEN 36:6 ꠛꠣꠖꠦ ꠁꠡꠦ ꠔꠣꠘ ꠛꠃꠀꠁꠘ, ꠙꠥꠀ-ꠙꠥꠠꠤꠘ, ꠊꠞꠞ ꠢꠇꠟ ꠝꠣꠘꠥꠡ ꠀꠞ ꠙꠡꠥꠞ ꠙꠣꠟꠣꠁꠘ, ꠇꠦꠘꠣꠘ ꠖꠦꠡꠅ ꠇꠣꠝꠣꠁ ꠇꠞꠣ ꠢꠇꠟ ꠗꠘ-ꠖꠃꠟꠔ ꠟꠁꠀ, ꠔꠣꠘ ꠜꠣꠁ ꠁꠀꠇꠥꠛꠞ ꠉꠦꠍ ꠕꠘꠦ ꠢꠞꠤꠀ ꠀꠞꠇ ꠖꠦꠡꠅ ꠉꠦꠟꠣꠉꠤ।
GEN 36:7 ꠁꠡ ꠀꠞ ꠁꠀꠇꠥꠛꠞ ꠙꠡꠥꠞ ꠙꠣꠟ, ꠝꠣꠟ-ꠍꠣꠝꠣꠘꠣ ꠅꠔ ꠛꠦꠡꠤ ꠀꠍꠤꠟ ꠎꠦꠘ, ꠄꠞꠣ ꠄꠇꠈꠣꠘꠅ ꠞꠁꠔꠦ ꠢꠤ ꠖꠦꠡꠞ ꠁ ꠎꠣꠉꠣꠄ ꠀꠞ ꠇꠥꠟꠣꠁꠟ ꠘꠣ।
GEN 36:8 ꠔꠦꠃ ꠁꠡ ꠍꠦꠁꠞꠞ ꠙꠣꠠꠤ ꠄꠟꠣꠇꠣꠔ ꠉꠤꠀ ꠛꠡꠔ ꠇꠞꠟꠣ। ꠄꠁꠘꠃ ꠁꠖꠥꠝ।
GEN 36:9 ꠅꠃ ꠅꠁꠟ ꠍꠦꠁꠞꠞ ꠙꠣꠠꠞ ꠁꠖꠥꠝꠤ ꠅꠇꠟꠞ ꠝꠥꠟ ꠛꠣꠚ ꠁꠡʼꠞ ꠈꠣꠘ꠆ꠖꠣꠘꠞ ꠛꠄꠀꠘ।
GEN 36:10 ꠁꠡʼꠞ ꠙꠥꠀꠂꠘ꠆ꠔꠞ ꠘꠣꠝ ꠅꠁꠟ, ꠁꠟꠤꠚꠎ ꠀꠞ ꠞꠥꠄꠟ। ꠁꠟꠤꠚꠎ ꠀꠖꠣꠞ ꠙꠥꠀ, ꠞꠥꠄꠟ ꠛꠣꠡꠝꠔꠞ ꠙꠥꠀ।
GEN 36:11 ꠁꠟꠤꠚꠎꠞ ꠙꠥꠀꠂꠘ ꠅꠁꠟꠣ, ꠔꠂꠝꠘ, ꠅꠝꠣꠞ, ꠎꠚꠅ, ꠉꠣꠕꠣꠝ ꠀꠞ ꠇꠦꠘꠣꠎ।
GEN 36:12 ꠁꠡʼꠞ ꠙꠥꠀ ꠁꠟꠤꠚꠎꠞ ꠔꠤꠝꠘꠣ ꠘꠣꠝꠞ ꠄꠇ ꠢꠣꠋꠉꠣꠞ ꠛꠃ ꠀꠍꠤꠟ, ꠄꠞ ꠊꠞꠅ ꠀꠝꠣꠟꠦꠇꠞ ꠎꠘꠝ ꠅꠁꠍꠤꠟ। ꠄꠞꠣ ꠢꠇꠟꠦꠃ ꠁꠡʼꠞ ꠛꠃ ꠀꠖꠣꠞ ꠀꠅꠟꠣꠖ।
GEN 36:13 ꠞꠥꠄꠟꠞ ꠙꠥꠀꠂꠘ ꠅꠁꠟꠣ ꠘꠢꠕ, ꠎꠣꠞꠣꠢ, ꠡꠝ꠆ꠝ ꠀꠞ ꠝꠤꠎ꠆ꠎꠣ। ꠄꠞꠣ ꠁꠡʼꠞ ꠛꠃ ꠛꠣꠡꠝꠔꠞ ꠀꠅꠟꠣꠖ।
GEN 36:14 ꠎꠤꠛꠤꠅꠘꠞ ꠘꠣꠔꠤꠘ, ꠅꠘꠣꠞ ꠙꠥꠠꠤ ꠅꠢꠟꠤꠛꠣꠝꠣꠞ ꠔꠞꠚꠣ ꠁꠡʼꠞ ꠙꠥꠀꠂꠘ ꠅꠁꠟꠣ ꠎꠤꠃꠡ, ꠎꠣꠟꠝ ꠀꠞ ꠇꠥꠞꠢ।
GEN 36:15 ꠁꠡʼꠞ ꠀꠅꠟꠣꠖꠞ ꠝꠣꠎꠦ ꠄꠞꠣ ꠀꠍꠟꠣ ꠉꠥꠡ꠆ꠐꠤꠞ ꠘꠦꠔꠣ। ꠁꠡʼꠞ ꠛꠠ ꠙꠥꠀ ꠁꠟꠤꠚꠎꠞ ꠙꠥꠀꠂꠘ ꠅꠁꠟꠣ ꠔꠂꠝꠘ, ꠅꠝꠣꠞ, ꠎꠚꠅ, ꠇꠦꠘꠣꠎ,
GEN 36:16 ꠇꠥꠞꠢ, ꠉꠣꠕꠣꠝ, ꠀꠞ ꠀꠝꠣꠟꠦꠇ। ꠄꠞꠣ ꠅꠁꠟꠣ ꠁꠖꠥꠝ ꠖꠦꠡꠅ, ꠀꠖꠣꠞ ꠙꠥꠀ ꠁꠟꠤꠚꠎꠞ ꠀꠅꠟꠣꠖ।
GEN 36:17 ꠁꠡʼꠞ ꠙꠥꠀ ꠞꠥꠄꠟꠞ ꠙꠥꠀꠂꠘ ꠎꠦꠞꠣ ꠉꠥꠡ꠆ꠐꠤꠞ ꠘꠦꠔꠣ ꠅꠁꠍꠟꠣ, ꠔꠣꠞꠣ ꠅꠁꠟꠣ ꠘꠢꠕ, ꠎꠣꠞꠣꠢ, ꠡꠝ꠆ꠝ ꠀꠞ ꠝꠤꠎ꠆ꠎꠣ। ꠄꠞꠣ ꠅꠁꠟꠣ ꠁꠖꠥꠝ ꠖꠦꠡꠅ ꠁꠡʼꠞ ꠛꠃ ꠛꠣꠡꠝꠔꠞ ꠙꠥꠀ ꠞꠥꠄꠟꠞ ꠀꠅꠟꠣꠖ।
GEN 36:18 ꠁꠡʼꠞ ꠛꠃ ꠅꠢꠟꠤꠛꠣꠝꠣꠞ ꠎꠦ ꠙꠥꠀꠂꠘ ꠉꠥꠡ꠆ꠐꠤꠞ ꠘꠦꠔꠣ ꠅꠁꠍꠟꠣ, ꠔꠣꠞꠣ ꠅꠁꠟꠣ ꠎꠤꠃꠡ, ꠎꠣꠟꠝ ꠀꠞ ꠇꠥꠞꠢ। ꠄꠞꠣ ꠀꠍꠟꠣ ꠅꠘꠣꠞ ꠙꠥꠠꠤ ꠅꠢꠟꠤꠛꠣꠝꠣꠞ ꠀꠅꠟꠣꠖ।
GEN 36:19 ꠄꠞꠣ ꠅꠁꠟꠣ ꠁꠡ ꠛꠣ ꠁꠖꠥꠝꠞ ꠈꠣꠘ꠆ꠖꠣꠘ ꠀꠞ ꠉꠥꠡ꠆ꠐꠤꠞ ꠘꠦꠔꠣ।
GEN 36:20 ꠢꠘꠞ ꠢꠥꠞꠤꠅ ꠍꠦꠁꠞꠞ ꠙꠥꠀꠂꠘ꠆ꠔꠞ ꠘꠣꠝ ꠅꠁꠟ ꠟꠥꠐꠘ, ꠡꠥꠛꠟ, ꠎꠤꠛꠤꠅꠘ, ꠅꠘꠣ,
GEN 36:21 ꠖꠤꠡꠥꠘ, ꠄꠕꠡꠞ ꠀꠞ ꠖꠤꠡꠣꠘ। ꠄꠞꠣ ꠢꠇꠟꠦ ꠁꠖꠥꠝ ꠖꠦꠡꠅ ꠍꠦꠁꠞꠞ ꠙꠥꠀꠂꠘ, ꠢꠥꠞꠤꠅ ꠈꠣꠘ꠆ꠖꠣꠘꠞ ꠘꠦꠔꠣ ꠀꠍꠟꠣ।
GEN 36:22 ꠟꠥꠐꠘꠞ ꠙꠥꠀꠞ ꠘꠣꠝ ꠅꠁꠟ ꠢꠥꠞꠤ ꠀꠞ ꠢꠦꠝꠣꠝ, ꠀꠞ ꠛꠘꠤꠞ ꠘꠣꠝ ꠔꠤꠝꠘꠣ।
GEN 36:23 ꠡꠥꠛꠟꠞ ꠙꠥꠀꠂꠘ꠆ꠔꠞ ꠘꠣꠝ ꠅꠁꠟ ꠅꠟꠛꠘ, ꠝꠣꠘꠢꠕ, ꠁꠛꠣꠟ, ꠡꠚꠅ ꠀꠞ ꠅꠘꠝ।
GEN 36:24 ꠎꠤꠛꠤꠅꠘꠞ ꠙꠥꠀꠂꠘ꠆ꠔꠞ ꠘꠣꠝ ꠅꠁꠟ ꠅꠄꠀ ꠀꠞ ꠅꠘꠣ। ꠅꠃ ꠅꠘꠣꠃ ꠔꠣꠘ ꠛꠣꠛꠣ ꠎꠤꠛꠤꠅꠘꠞ ꠉꠣꠗꠣ ꠞꠣꠈꠣꠔ ꠉꠤꠀ, ꠝꠞꠥꠜꠥꠝꠤꠞ ꠝꠣꠎꠦ ꠉꠞꠝ ꠙꠣꠘꠤꠞ ꠁꠘ꠆ꠖꠣꠞꠣ ꠅꠇꠟ ꠔꠥꠇꠣꠁꠀ ꠙꠣꠁꠟꠣ।
GEN 36:25 ꠅꠘꠣꠞ ꠙꠥꠀꠞ ꠘꠣꠝ ꠖꠤꠡꠥꠘ ꠀꠞ ꠙꠥꠠꠤꠞ ꠘꠣꠝ ꠅꠢꠟꠤꠛꠣꠝꠣ।
GEN 36:26 ꠖꠤꠡꠥꠘꠞ ꠙꠥꠀꠂꠘ꠆ꠔꠞ ꠘꠣꠝ ꠅꠁꠟ ꠢꠤꠝꠖꠘ, ꠁꠡꠛꠘ, ꠎꠤꠔ꠆ꠞꠘ ꠀꠞ ꠇꠦꠞꠣꠘ।
GEN 36:27 ꠄꠕꠡꠞꠞ ꠙꠥꠀꠂꠘ꠆ꠔꠞ ꠘꠣꠝ ꠅꠁꠟ ꠛꠤꠟꠢꠘ, ꠎꠣꠅꠀꠘ ꠀꠞ ꠀꠇꠘ।
GEN 36:28 ꠖꠤꠡꠣꠘꠞ ꠙꠥꠀꠂꠘ꠆ꠔꠞ ꠘꠣꠝ ꠅꠁꠟ ꠀꠃꠎ ꠀꠞ ꠅꠞꠣꠘ।
GEN 36:29 ꠢꠥꠞꠤꠅ ꠅꠇꠟꠞ ꠘꠦꠔꠣ ꠅꠁꠟꠣ ꠟꠥꠐꠘ, ꠡꠥꠛꠟ, ꠎꠤꠛꠤꠅꠘ, ꠅꠘꠣ,
GEN 36:30 ꠖꠤꠡꠥꠘ, ꠄꠕꠡꠞ ꠀꠞ ꠖꠤꠡꠣꠘ। ꠄꠞꠣ ꠅꠁꠟꠣ ꠍꠦꠁꠞ ꠖꠦꠡꠞ ꠢꠥꠞꠤꠅ ꠉꠥꠡ꠆ꠐꠤꠞ ꠘꠦꠔꠣ।
GEN 36:31 ꠛꠘꠤ ꠁꠍꠞꠣꠁꠟꠞ ꠝꠣꠎꠦ ꠛꠣꠖꠡꠣꠁ ꠢꠥꠇꠥꠝꠔ ꠀꠁꠛꠣꠞ ꠀꠉꠦ, ꠁꠖꠥꠝ ꠖꠦꠡꠅ ꠄꠞꠣꠃ ꠞꠣꠎꠣ ꠀꠍꠟꠣ।
GEN 36:32 ꠛꠣꠃꠞꠞ ꠙꠥꠀ ꠛꠦꠟꠣ ꠁꠖꠥꠝꠞ ꠞꠣꠎꠣ ꠅꠁꠟꠣ। ꠔꠣꠘ ꠞꠣꠎꠗꠣꠘꠤꠞ ꠘꠣꠝ ꠀꠍꠤꠟ ꠖꠤꠘꠢꠣꠛꠣ।
GEN 36:33 ꠛꠦꠟꠣ ꠝꠞꠣꠞ ꠛꠣꠖꠦ, ꠔꠣꠘ ꠎꠣꠉꠣꠔ ꠛꠡꠞꠣ ꠐꠣꠃꠘꠞ ꠎꠣꠞꠣꠢꠞ ꠙꠥꠀ ꠎꠥꠛꠛ ꠞꠣꠎꠣ ꠅꠁꠟꠣ।
GEN 36:34 ꠎꠥꠛꠛ ꠝꠞꠣꠞ ꠛꠣꠖꠦ ꠔꠂꠝꠘ ꠖꠦꠡꠞ ꠢꠥꠡꠝ ꠢꠘꠞ ꠞꠣꠎꠣ ꠅꠁꠟꠣ।
GEN 36:35 ꠢꠥꠡꠝ ꠝꠞꠣꠞ ꠛꠣꠖꠦ ꠔꠣꠘ ꠎꠣꠉꠣꠔ ꠛꠖꠖꠞ ꠙꠥꠀ ꠢꠖꠖ ꠞꠣꠎꠣ ꠅꠁꠟꠣ। ꠔꠣꠁꠘ ꠎꠥꠖ꠆ꠖ ꠇꠞꠤ ꠝꠥꠀꠛ ꠖꠦꠡꠞ ꠝꠣꠖꠤꠀꠘꠤ ꠅꠇꠟꠞꠦ ꠀꠞꠣꠁꠟꠣ। ꠔꠣꠘ ꠞꠣꠎꠗꠣꠘꠤꠞ ꠘꠣꠝ ꠅꠁꠟ ꠅꠛꠤꠕ।
GEN 36:36 ꠢꠖꠖ ꠝꠞꠣꠞ ꠛꠣꠖꠦ ꠝꠡ꠆ꠞꠦꠇꠣ ꠐꠣꠃꠘꠞ ꠍꠣꠝꠟꠣ ꠢꠘꠞ ꠞꠣꠎꠣ ꠅꠁꠟꠣ।
GEN 36:37 ꠍꠣꠝꠟꠣ ꠝꠞꠣꠞ ꠛꠣꠖꠦ ꠢꠘꠞ ꠚꠥꠞꠣꠔ ꠉꠣꠋꠉꠞ ꠙꠣꠞꠞ ꠞꠢꠛꠔ ꠐꠣꠃꠘꠞ ꠡꠃꠟ ꠞꠣꠎꠣ ꠅꠁꠟꠣ।
GEN 36:38 ꠡꠃꠟ ꠝꠞꠣꠞ ꠛꠣꠖꠦ ꠔꠣꠘ ꠎꠣꠉꠣꠔ ꠀꠇꠛꠣꠞꠞ ꠙꠥꠀ ꠛꠣꠀꠟ-ꠢꠣꠘꠘ ꠞꠣꠎꠣ ꠅꠁꠟꠣ।
GEN 36:39 ꠀꠇꠛꠣꠞꠞ ꠙꠥꠀ ꠛꠣꠀꠟ-ꠢꠣꠘꠘ ꠝꠞꠣꠞ ꠛꠣꠖꠦ ꠔꠣꠘ ꠎꠣꠉꠣꠔ ꠢꠖꠞ ꠞꠣꠎꠣ ꠅꠁꠟꠣ। ꠔꠣꠘ ꠞꠣꠎꠗꠣꠘꠤꠞ ꠘꠣꠝ ꠀꠍꠤꠟ ꠙꠣꠃ, ꠀꠞ ꠔꠣꠘ ꠛꠃꠞ ꠘꠣꠝ ꠀꠍꠤꠟ ꠝꠢꠦꠐꠣꠛꠦꠟ। ꠄꠁꠘ ꠝꠐꠞꠦꠖꠞ ꠙꠥꠠꠤ ꠀꠞ ꠝꠦꠎꠣꠢꠣꠛꠞ ꠘꠣꠔꠤꠘ।
GEN 36:40 ꠁꠡʼꠞ ꠎꠦꠔꠣ ꠀꠅꠟꠣꠖ ꠅꠇꠟ ꠉꠥꠡ꠆ꠐꠤ ꠀꠞ ꠄꠟꠣꠇꠣꠞ ꠘꠦꠔꠣ ꠀꠍꠟꠣ, ꠔꠣꠞꠣꠞ ꠘꠣꠝ ꠅꠁꠟ, ꠔꠤꠝꠘꠣ, ꠅꠟꠛꠣ ꠀꠞ ꠎꠤꠔꠦꠕ,
GEN 36:41 ꠅꠢꠟꠤꠛꠣꠝꠣ, ꠄꠟꠣ, ꠙꠤꠘꠥꠘ,
GEN 36:42 ꠇꠦꠘꠣꠎ, ꠔꠂꠝꠘ, ꠝꠤꠛꠎꠣꠞ,
GEN 36:43 ꠝꠉꠖꠤꠄꠟ ꠀꠞ ꠅꠞꠣꠝ। ꠄꠞꠣ ꠀꠍꠟꠣ ꠎꠣꠞꠎꠤꠞ ꠖꠦꠡꠞ, ꠎꠣꠞꠎꠤꠞ ꠄꠟꠣꠇꠣꠞ ꠁꠖꠥꠝꠤ ꠘꠦꠔꠣ। ꠁꠖꠥꠝꠤ ꠅꠇꠟꠞ ꠝꠥꠟ ꠛꠣꠚ ꠁꠡʼꠞ ꠛꠄꠀꠘ ꠅꠘꠅꠃ ꠡꠦꠡ।
GEN 37:1 ꠁꠀꠇꠥꠛ ꠇꠦꠘꠣꠘ ꠖꠦꠡꠅꠃ ꠞꠁꠟꠣ, ꠔꠣꠘ ꠛꠣꠚꠅ ꠢꠘꠅ ꠝꠥꠍꠣꠚꠤꠞ ꠅꠁꠀ ꠀꠍꠟꠣ।
GEN 37:2 ꠅꠃ ꠅꠁꠟ ꠁꠀꠇꠥꠛꠞ ꠈꠣꠘ꠆ꠖꠣꠘꠞ ꠛꠄꠀꠘ। ꠁꠃꠍꠥꠚꠦ ꠡꠔꠞ ꠛꠞꠍ ꠛꠄꠅꠡ ꠕꠘꠦ ꠔꠣꠘ ꠜꠣꠁꠀꠁꠘ꠆ꠔꠞ ꠟꠉꠦ ꠝꠦꠠꠣ-ꠍꠣꠉꠟ ꠞꠣꠈꠔꠣ। ꠔꠣꠁꠘ ꠢꠥꠞꠥꠝꠣꠘ ꠕꠘꠦꠃ ꠔꠣꠘ ꠢꠣꠔꠘ ꠝꠣ ꠛꠤꠟꠢꠣ ꠀꠞ ꠎꠤꠟꠙꠣꠞ ꠙꠥꠀꠂꠘ꠆ꠔꠞ ꠟꠉꠦ ꠞꠁꠔꠣ। ꠀꠞ ꠄꠞꠣꠞ ꠢꠇꠟ ꠛꠣꠖ ꠌꠣꠟ-ꠌꠟꠘꠞ ꠈꠛꠞ ꠛꠣꠚꠞꠦ ꠎꠣꠘꠣꠁꠔꠣ।
GEN 37:3 ꠁꠃꠍꠥꠚ, ꠁꠍꠞꠣꠁꠟꠞ ꠛꠥꠠꠣ ꠛꠄꠅꠡꠞ ꠙꠥꠀ ꠉꠔꠤꠇꠦ, ꠔꠣꠁꠘ ꠄꠞꠦ ꠢꠇꠟ ꠕꠘꠦ ꠛꠦꠡꠤ ꠝꠣꠄꠀ ꠇꠞꠔꠣ। ꠔꠣꠁꠘ ꠄꠞꠦ ꠄꠇ ꠈꠣꠘ꠆ꠖꠣꠘꠤ ꠎꠥꠛ꠆ꠛꠣ ꠛꠣꠘꠣꠁ ꠖꠤꠟꠣ।
GEN 37:4 ꠛꠣꠚꠦ ꠁꠃꠍꠥꠚꠞꠦ ꠢꠇꠟ ꠕꠘꠦ ꠛꠦꠡꠤ ꠝꠣꠄꠀ ꠇꠞꠂꠘ ꠖꠦꠈꠤꠀ, ꠜꠣꠁꠀꠁꠘ꠆ꠔꠦ ꠔꠣꠘꠞꠦ ꠊꠤꠘ꠆ꠘꠣꠁꠔꠣ। ꠔꠣꠞꠣ ꠄꠘ ꠟꠉꠦ ꠜꠣꠟꠣ ꠝꠘꠦ ꠝꠣꠔ-ꠇꠕꠣꠅ ꠝꠣꠔꠔꠣ ꠘꠣ।
GEN 37:5 ꠁꠃꠍꠥꠚꠦ ꠄꠇ ꠈꠥꠀꠛ ꠖꠦꠈꠤꠀ ꠔꠣꠘ ꠜꠣꠁꠀꠁꠘ꠆ꠔꠞꠦ ꠢꠥꠘꠣꠁꠟꠣ, ꠔꠦꠃ ꠔꠣꠞꠣ ꠀꠞꠅ ꠛꠦꠡꠤ ꠊꠤꠘ꠆ꠘꠣꠁꠟꠣ।
GEN 37:6 ꠔꠣꠁꠘ ꠇꠁꠟꠣ, “ꠀꠝꠤ ꠈꠥꠀꠛꠦ ꠇꠤꠔꠣ ꠖꠦꠈꠍꠤ ꠢꠥꠘꠅ:
GEN 37:7 ꠀꠝꠤ ꠖꠦꠈꠟꠣꠝ, ꠀꠝꠞꠣ ꠈꠦꠔꠞ ꠝꠣꠎꠦ ꠗꠣꠘꠞ ꠝꠥꠁꠐ ꠛꠣꠘ꠆ꠖꠤꠀꠞ ꠀꠞ ꠀꠝꠣꠞ ꠛꠣꠘ꠆ꠖꠣ ꠝꠥꠁꠐꠈꠣꠘ ꠃꠛꠣꠁꠉꠦꠟ, ꠔꠦꠃ ꠔꠥꠝꠞꠣꠞ ꠝꠥꠁꠐ ꠅꠇꠟꠦ ꠀꠝꠣꠞ ꠝꠥꠁꠐꠞꠦ ꠌꠣꠁꠞꠅꠛꠣꠄ ꠛꠦꠞꠤꠀ ꠍꠁꠎꠖꠣ ꠇꠞꠦꠞ।”
GEN 37:8 ꠅꠃ ꠔꠣꠘ ꠜꠣꠁꠀꠁꠘ꠆ꠔꠦ ꠇꠁꠟꠣ, “ꠔꠥꠁ ꠢꠣꠍꠣꠃ ꠀꠝꠞꠣꠞ ꠞꠣꠎꠣ ꠅꠁꠔꠦ ꠌꠣꠁꠞꠦ ꠘꠤ? ꠔꠥꠁ ꠞꠣꠎꠣ ꠅꠁꠀ ꠀꠝꠞꠣꠞ ꠃꠙꠞꠦ ꠛꠦꠐꠣꠉꠤꠞꠤ ꠇꠞꠔꠦ ꠘꠤ?” ꠔꠦꠃ ꠔꠣꠘ ꠈꠥꠀꠛ ꠀꠞ ꠔꠣꠘ ꠝꠣꠔꠞ ꠟꠣꠉꠤ ꠔꠣꠞꠣ ꠀꠞꠅ ꠛꠦꠡꠤ ꠊꠤꠘ꠆ꠘꠣꠁꠟꠣ।
GEN 37:9 ꠁꠃꠍꠥꠚꠦ ꠢꠤꠞꠛꠣꠞ ꠄꠇ ꠈꠥꠀꠛ ꠖꠦꠈꠤꠀ ꠔꠣꠘ ꠜꠣꠁꠀꠁꠘ꠆ꠔꠞꠦ ꠢꠥꠘꠣꠁꠟꠣ। ꠔꠣꠁꠘ ꠇꠁꠟꠣ, “ꠢꠥꠘꠅ, ꠀꠝꠤ ꠢꠤꠞꠛꠣꠞ ꠈꠥꠀꠛꠦ ꠖꠦꠈꠍꠤ, ꠌꠣꠘ-ꠡꠥꠞꠥꠎ ꠀꠞ ꠄꠉꠣꠞꠅꠐꠣ ꠔꠦꠞꠣꠄ ꠀꠝꠣꠞꠦ ꠍꠁꠎꠖꠣ ꠇꠞꠦꠞ।”
GEN 37:10 ꠔꠣꠁꠘ ꠁ ꠈꠥꠀꠛꠞ ꠇꠕꠣ ꠔꠣꠘ ꠛꠣꠚ ꠀꠞ ꠜꠣꠁꠀꠁꠘ꠆ꠔꠞ ꠉꠦꠍꠦ ꠇꠁꠀ ꠢꠣꠞꠟꠦ, ꠛꠣꠚꠦ ꠔꠣꠘꠞꠦ ꠗꠝꠇꠣꠁꠀ ꠇꠁꠟꠣ, “ꠔꠥꠁꠘ ꠁꠔꠣ ꠇꠥꠘ ꠎꠣꠔꠞ ꠈꠥꠀꠛ ꠖꠦꠈꠟꠦ, ꠞꠦ ꠙꠥꠔ? ꠔꠞ ꠝꠣ-ꠜꠣꠁꠀꠁꠘ ꠀꠞ ꠀꠝꠤꠅ ꠇꠤꠔꠣ ꠢꠣꠍꠣꠃ ꠔꠞꠦ ꠍꠁꠎꠖꠣ ꠇꠞꠔꠣꠝ ꠘꠤ?”
GEN 37:11 ꠀꠞ ꠁꠃꠍꠥꠚꠞꠦ ꠔꠣꠘ ꠜꠣꠁꠀꠁꠘ꠆ꠔꠦ ꠈꠥꠛ ꠁꠋꠡꠣꠁꠔꠣ। ꠅꠁꠟꠦ ꠛꠣꠚꠦ ꠁ ꠈꠥꠀꠛꠞ ꠇꠕꠣ ꠝꠘꠅ ꠞꠣꠈꠟꠣ।
GEN 37:12 ꠀꠞ ꠔꠣꠘ ꠜꠣꠁꠀꠁꠘ꠆ꠔꠦ ꠛꠣꠚꠞ ꠙꠡꠥꠞ ꠙꠣꠟ ꠟꠁꠀ ꠡꠤꠈꠤꠝꠅ ꠞꠣꠈꠣꠔ ꠉꠦꠟꠣ।
GEN 37:13 ꠔꠦꠃ ꠁꠍꠞꠣꠁꠟꠦ ꠁꠃꠍꠥꠚꠞꠦ ꠇꠁꠟꠣ, “ꠔꠞ ꠜꠣꠁꠀꠁꠘ꠆ꠔꠦ ꠙꠡꠥꠞ ꠙꠣꠟ ꠞꠣꠈꠣꠔ ꠡꠤꠈꠤꠝꠅ ꠉꠦꠍꠂꠘ, ꠔꠦ ꠀꠄ, ꠀꠝꠤ ꠔꠞꠦꠅ ꠢꠘꠅ ꠙꠣꠑꠣꠁ।” ꠔꠣꠁꠘ ꠇꠁꠟꠣ, “ꠀꠁꠌ꠆ꠍꠣ, ꠀꠝꠤ ꠎꠣꠁꠝꠥ।”
GEN 37:14 ꠁꠍꠞꠣꠁꠟꠦ ꠔꠣꠘꠦ ꠇꠁꠟꠣ, “ꠔꠥꠁ ꠉꠤꠀ ꠔꠞ ꠜꠣꠁꠀꠁꠘ ꠀꠞ ꠙꠡꠥꠞ ꠙꠣꠟꠞ ꠈꠛꠞ-ꠀꠘ꠆ꠔꠞ ꠢꠥꠘꠤꠀ ꠀꠁꠀ ꠀꠝꠣꠞꠦ ꠇꠁꠍ।” ꠔꠦꠃ ꠔꠣꠁꠘ ꠁꠃꠍꠥꠚꠞꠦ ꠢꠦꠛꠞꠘ ꠕꠘꠦ ꠡꠤꠈꠤꠝꠅ ꠙꠣꠑꠣꠁꠟꠣ। ꠀꠞ ꠁꠃꠍꠥꠚꠅ ꠉꠤꠀ ꠡꠤꠈꠤꠝꠅ ꠀꠎꠤꠞ ꠅꠁꠟꠣ।
GEN 37:15 ꠀꠁꠀ ꠢꠣꠞꠟꠦ ꠔꠣꠘꠞꠦ ꠈꠦꠔꠞ ꠝꠣꠎꠦ ꠊꠥꠞꠣ-ꠚꠤꠞꠣꠔ ꠖꠦꠈꠤꠀ ꠄꠇ ꠛꠦꠐꠣꠄ ꠎꠤꠇꠣꠁꠟꠣ, “ꠔꠥꠝꠤ ꠇꠤꠔꠣ ꠔꠥꠇꠣꠁꠞꠣꠄ ꠛꠣ?”
GEN 37:16 ꠁꠃꠍꠥꠚꠦ ꠇꠁꠟꠣ, “ꠀꠝꠤ ꠀꠝꠣꠞ ꠜꠣꠁꠀꠁꠘ꠆ꠔꠞꠦ ꠔꠥꠇꠣꠁꠀꠞ। ꠀꠙꠘꠦ ꠎꠣꠘꠂꠘ ꠘꠤ, ꠄꠞꠣ ꠙꠡꠥꠞ ꠙꠣꠟ ꠇꠥꠘ ꠎꠣꠉꠣꠔ ꠞꠣꠈꠞꠣ?”
GEN 37:17 ꠢꠤ ꠛꠦꠐꠣꠄ ꠇꠁꠟꠣ, “ꠔꠣꠞꠣ ꠁꠘ ꠕꠘꠦ ꠉꠦꠍꠂꠘꠉꠤ। ꠀꠝꠤ ꠢꠥꠘꠍꠤ ꠔꠣꠞꠣ ꠝꠣꠔꠤꠞꠣ, ꠀꠅ, ꠀꠝꠞꠣ ꠖꠥꠕꠘꠅ ꠎꠣꠁꠉꠤ।” ꠅꠃ ꠁꠃꠍꠥꠚꠦ ꠔꠥꠇꠣꠁ ꠔꠥꠇꠣꠁ ꠖꠥꠕꠘꠅ ꠉꠤꠀ ꠔꠣꠞꠣꠞꠦ ꠙꠣꠁꠟꠣ।
GEN 37:18 ꠜꠣꠁꠀꠁꠘ꠆ꠔꠦ ꠖꠥꠞꠁ ꠕꠘꠦ ꠔꠣꠘꠞꠦ ꠖꠦꠈꠟ, ꠀꠞ ꠔꠣꠞꠣꠞ ꠉꠦꠍꠦ ꠙꠃꠍꠣꠞ ꠀꠉꠦꠃ ꠔꠣꠞꠣ ꠄꠘꠦ ꠈꠥꠘ ꠇꠞꠣꠞ ꠝꠔꠟꠛ ꠇꠞꠟ।
GEN 37:19 ꠔꠣꠞꠣ ꠄꠇꠎꠘꠦ ꠀꠞꠇ ꠎꠘꠞꠦ ꠇꠁꠟ, “ꠅꠃ ꠖꠦꠈꠅ, ꠈꠥꠀꠛ ꠖꠦꠈꠞꠣ ꠍꠣꠛ ꠀꠁꠞꠣ।
GEN 37:20 ꠀꠅ, ꠅꠈꠘꠃ ꠀꠝꠞꠣ ꠄꠘꠦ ꠈꠔꠝ ꠇꠞꠤꠀ ꠅꠃ ꠉꠣꠔꠅ ꠚꠣꠟꠣꠁ ꠖꠦꠁ; ꠛꠣꠖꠦ ꠇꠁꠝꠥ, ꠇꠥꠘꠥ ꠎꠋꠟꠤ ꠎꠣꠘꠥꠀꠞꠦ ꠈꠣꠁꠟꠣꠁꠍꠦ, ꠢꠦꠡꠦ ꠖꠦꠈꠝꠥꠘꠦ, ꠔꠣꠞ ꠈꠥꠀꠛꠞ ꠖꠡꠣ ꠇꠤꠔꠣ ꠅꠄ?”
GEN 37:21 ꠅꠁꠟꠦ ꠞꠥꠛꠦꠘꠦ ꠁꠔꠣ ꠢꠥꠘꠤꠀ ꠔꠣꠞꠣꠞ ꠀꠔ ꠕꠣꠇꠤ ꠄꠘꠞꠦ ꠛꠣꠌꠣꠁꠛꠣꠞ ꠟꠣꠉꠤ ꠇꠁꠟꠣ, “ꠔꠣꠞꠦ ꠎꠣꠘꠦ ꠝꠣꠞꠤꠅ ꠘꠣ।”
GEN 37:22 ꠔꠣꠁꠘ ꠄꠞꠣꠞꠦ ꠙꠞꠣꠝꠤꠡ ꠖꠤꠟꠣ, “ꠈꠥꠘ-ꠈꠣꠞꠣꠙꠤ ꠇꠞꠣꠔ ꠎꠣꠁꠅ ꠘꠣ, ꠘꠤꠎꠞ ꠀꠔꠦ ꠘꠣ ꠝꠣꠞꠤꠀ ꠅꠉꠥꠞꠦ ꠄꠝꠘꠦꠃ ꠉꠣꠔꠞ ꠝꠣꠎꠦ ꠚꠣꠟꠣꠁ ꠖꠦꠅ।” ꠅꠃꠟꠣ ꠔꠣꠁꠘ ꠁꠃꠍꠥꠚꠞꠦ ꠔꠣꠞꠣꠞ ꠀꠔ ꠕꠘꠦ ꠛꠣꠌꠣꠁꠀ, ꠛꠣꠚꠞ ꠀꠔꠅ ꠙꠣꠑꠣꠘꠤꠞ ꠌꠦꠡ꠆ꠐꠣ ꠇꠞꠟꠣ।
GEN 37:23 ꠁꠃꠍꠥꠚ ꠔꠣꠘ ꠜꠣꠁꠀꠁꠘ꠆ꠔꠞ ꠉꠦꠍꠦ ꠀꠁꠔꠦꠃ ꠔꠣꠞꠣ, ꠔꠣꠘ ꠉꠔꠞ ꠕꠘꠦ ꠎꠥꠛ꠆ꠛꠣ ꠈꠥꠟꠤꠟꠣꠁꠟꠣ, ꠢꠃ ꠈꠣꠘ꠆ꠖꠣꠘꠤ ꠎꠥꠛ꠆ꠛꠣꠐꠣ ꠐꠣꠘꠤꠀ ꠈꠥꠟꠤꠟꠤꠟꠣ।
GEN 37:24 ꠀꠞ ꠔꠣꠘꠦ ꠗꠞꠤꠀ ꠉꠣꠔꠞ ꠝꠣꠎꠦ ꠚꠣꠟꠣꠁ ꠖꠤꠟꠣ। ꠁ ꠉꠣꠔ ꠢꠥꠇꠘꠣ ꠀꠍꠤꠟ, ꠇꠥꠘꠥ ꠙꠣꠘꠤ ꠀꠍꠤꠟ ꠘꠣ।
GEN 37:25 ꠢꠦꠡꠦ ꠔꠣꠞꠣ ꠈꠣꠅꠀꠔ ꠛꠁꠀ ꠌꠣꠁꠀ ꠖꠦꠈꠟꠣ, ꠉꠤꠟꠤꠅꠖ ꠕꠣꠇꠤ ꠁꠍꠝꠣꠁꠟꠤ ꠄꠇ ꠛꠦꠙꠣꠞꠤꠞ ꠖꠟ ꠁꠛꠣꠄ ꠀꠞ। ꠄꠞꠣ ꠃꠐꠞ ꠙꠤꠑꠤꠔ ꠇꠞꠤ ꠈꠥꠡꠛꠄ ꠝꠡꠟꠣ, ꠀꠉꠞ, ꠀꠞ ꠝꠦꠡꠇꠦ-ꠀꠝ꠆ꠛꠞ ꠟꠁꠀ ꠝꠤꠡꠞ ꠖꠦꠡꠅ ꠎꠣꠁꠔꠣ।
GEN 37:26 ꠅꠃ ꠄꠢꠥꠖꠣꠄ ꠔꠣꠞ ꠜꠣꠁꠀꠁꠘꠞꠦ ꠇꠁꠟ, “ꠗꠞꠅ, ꠜꠣꠁꠞꠦ ꠈꠥꠘ ꠇꠞꠤꠀ ꠀꠝꠞꠣ ꠟꠥꠇꠣꠁꠟꠤꠟꠣꠝ, ꠔꠦꠃ ꠀꠝꠞꠣꠞ ꠇꠤꠔꠣ ꠟꠣꠜ ꠅꠁꠛ?
GEN 37:27 ꠢꠦ ꠔ ꠀꠝꠞꠣꠞꠃ ꠜꠣꠁ, ꠀꠝꠞꠣꠞ ꠀꠙꠘ ꠟꠃ ꠀꠞ ꠉꠥꠡ꠆ꠔ। ꠔꠦ ꠔꠣꠞ ꠡꠞꠤꠟꠅ ꠀꠔ ꠘꠣ ꠖꠤꠀ ꠀꠅ, ꠁꠍꠝꠣꠁꠟꠤ ꠅꠇꠟꠞ ꠉꠦꠍꠦ ꠔꠣꠞꠦ ꠛꠦꠌꠤꠟꠣꠁ।” ꠅꠃ ꠜꠣꠁꠀꠁꠘꠅ ꠞꠣꠎꠤ ꠅꠁꠉꠦꠟꠣ।
GEN 37:28 ꠢꠃ ꠝꠣꠖꠤꠀꠘꠤ ꠛꠦꠙꠣꠞꠤ ꠅꠇꠟ ꠇꠣꠍꠣꠔ ꠀꠁꠔꠦꠃ, ꠜꠣꠁꠀꠁꠘ꠆ꠔꠦ ꠁꠃꠍꠥꠚꠞꠦ ꠉꠣꠔꠅ ꠕꠘꠦ ꠐꠣꠘꠤꠀ ꠔꠥꠟꠟꠣ ꠀꠞ ꠄꠇ ꠇꠥꠠꠤ ꠞꠥꠙꠣꠞ ꠐꠦꠇꠣꠞ ꠛꠖꠟꠣ, ꠁꠍꠝꠣꠁꠟꠤ ꠅꠇꠟꠞ ꠉꠦꠍꠦ ꠔꠣꠘꠦ ꠛꠦꠌꠤꠟꠣꠁꠟꠣ। ꠄꠞꠣ ꠁꠃꠍꠥꠚꠞꠦ ꠟꠁꠀ ꠝꠤꠡꠞꠅ ꠉꠦꠟꠣꠉꠤ।
GEN 37:29 ꠛꠣꠖꠦ ꠞꠥꠛꠦꠘꠦ ꠢꠃ ꠉꠣꠔꠞ ꠉꠦꠍꠦ ꠀꠁꠀ ꠁꠃꠍꠥꠚꠞꠦ ꠘꠣ ꠖꠦꠈꠤꠀ, ꠔꠣꠘ ꠉꠔꠞꠞ ꠇꠥꠞ꠆ꠔꠣ ꠚꠣꠞꠤꠟ꠆ꠟꠣ।
GEN 37:30 ꠜꠣꠁꠀꠁꠘ꠆ꠔꠞ ꠉꠦꠍꠦ ꠉꠤꠀ ꠇꠁꠟꠣ, “ꠙꠥꠀꠉꠥ ꠔ ꠁꠘꠅ ꠘꠣꠄ। ꠅꠈꠘ ꠀꠝꠤ ꠇꠤꠔꠣ ꠇꠞꠔꠣꠝ?”
GEN 37:31 ꠅꠃ ꠔꠣꠞꠣ ꠄꠇ ꠛꠇꠞꠤ ꠝꠣꠞꠤꠀ, ꠄꠞ ꠟꠃ ꠁꠃꠍꠥꠚꠞ ꠢꠃ ꠎꠥꠛ꠆ꠛꠣꠔ ꠟꠣꠉꠣꠁꠟꠣ।
GEN 37:32 ꠛꠣꠖꠦ ꠝꠣꠘꠥꠡꠖꠤ ꠅꠃ ꠎꠥꠛ꠆ꠛꠣ ꠔꠣꠞꠣꠞ ꠛꠣꠚꠞ ꠉꠦꠍꠦ ꠙꠣꠑꠣꠁꠀ ꠇꠁꠟꠣ, “ꠁꠐꠣ ꠀꠝꠞꠣ ꠙꠕꠅ ꠙꠣꠁꠍꠤ, ꠔꠦ ꠀꠙꠘꠦ ꠜꠣꠟꠣ ꠇꠞꠤꠀ ꠖꠦꠈꠃꠇ꠆ꠇꠣ, ꠁꠐꠣ ꠀꠙꠘꠣꠞ ꠙꠥꠀꠞ ꠎꠥꠛ꠆ꠛꠣ ꠘꠤ?”
GEN 37:33 ꠁꠀꠇꠥꠛꠦ ꠁ ꠎꠥꠛ꠆ꠛꠣ ꠌꠤꠘꠤꠀ ꠇꠁꠟꠣ, “ꠁꠐꠣ ꠔ ꠀꠝꠣꠞ ꠙꠥꠀꠞꠃ। ꠔꠣꠞꠦ ꠇꠥꠘꠥ ꠎꠋꠟꠤ ꠎꠣꠘꠥꠀꠞꠦ ꠈꠣꠁꠟꠤꠍꠦ, ꠔꠣꠞꠦ ꠘꠤꠌꠄ ꠍꠤꠠꠤ-ꠛꠤꠠꠤꠟꠣꠁꠍꠦ।”
GEN 37:34 ꠔꠣꠁꠘ ꠚꠤꠘ꠆ꠘꠞ ꠇꠣꠙꠠ ꠍꠤꠠꠤꠀ, ꠇꠝꠞꠅ ꠍꠟꠣꠞ ꠌꠐ ꠛꠣꠘ꠆ꠖꠤꠀ, ꠙꠥꠀꠞ ꠟꠣꠉꠤ ꠛꠃꠔ ꠖꠤꠘ ꠝꠣꠔ꠆ꠔꠝ ꠇꠞꠟꠣ।
GEN 37:35 ꠔꠣꠘ ꠢꠇꠟ ꠙꠥꠀ-ꠙꠥꠠꠤꠄ ꠔꠣꠘꠦ ꠛꠥꠎꠣꠁꠔꠣ ꠌꠣꠁꠟꠣ, ꠅꠁꠟꠦ ꠇꠥꠘꠥ ꠛꠥꠎꠦꠃ ꠔꠣꠘ ꠛꠥꠇ ꠑꠣꠘ꠆ꠒꠣ ꠅꠁꠟ ꠘꠣ। ꠔꠣꠁꠘ ꠇꠁꠟꠣ, “ꠀꠝꠤ ꠝꠣꠔ꠆ꠔꠝ ꠇꠞꠤ ꠇꠞꠤ ꠀꠝꠣꠞ ꠙꠥꠀꠞ ꠉꠦꠍꠦ ꠇꠄꠛꠞꠅ ꠢꠣꠝꠣꠁꠝꠥ।” ꠙꠥꠀꠞ ꠟꠣꠉꠤ ꠔꠣꠁꠘ ꠅꠃ ꠟꠣꠈꠣꠘ ꠇꠣꠘ꠆ꠖꠣ-ꠇꠣꠐꠤꠔ ꠞꠁꠟꠣ।
GEN 37:36 ꠄꠞ ꠝꠣꠎꠦ ꠝꠣꠖꠤꠀꠘꠤ ꠅꠇꠟꠦ ꠁꠃꠍꠥꠚꠞꠦ ꠝꠤꠡꠞꠅ ꠘꠤꠀ, ꠚꠦꠞꠣꠃꠘꠞ ꠇꠞ꠆ꠝꠌꠣꠞꠤ ꠀꠎꠤꠎꠞ ꠉꠦꠍꠦ ꠛꠦꠌꠤꠟꠣꠁꠟꠣ, ꠁ ꠇꠞ꠆ꠝꠌꠣꠞꠤ ꠀꠍꠟꠣ ꠔꠣꠘ ꠙꠞꠗꠣꠘ ꠉꠣꠒ।
GEN 38:1 ꠄꠢꠥꠖꠣꠄ ꠔꠣꠞ ꠜꠣꠁꠀꠁꠘ꠆ꠔꠞꠦ ꠕꠁꠀ ꠅꠖꠥꠟ꠆ꠟꠝ ꠉꠣꠃꠞ ꠢꠤꠞꠣ ꠘꠣꠝꠞ ꠄꠇ ꠝꠣꠘꠡꠞ ꠟꠉꠦ ꠞꠅꠀꠔ ꠉꠦꠟ।
GEN 38:2 ꠢꠘꠅ ꠞꠁꠀ ꠡꠥꠀ ꠘꠣꠝꠞ ꠄꠇ ꠇꠦꠘꠣꠘꠤ ꠝꠣꠘꠡꠞ ꠙꠥꠠꠤꠞ ꠟꠉꠦ ꠖꠦꠈꠣ ꠅꠁꠟ, ꠖꠦꠈꠤꠀ ꠢꠦ ꠅꠃ ꠙꠥꠠꠤꠞꠦ ꠛꠤꠀ ꠇꠞꠟ।
GEN 38:3 ꠛꠤꠀꠞ ꠛꠣꠖꠦ ꠢꠃ ꠛꠦꠐꠤꠞ ꠊꠞꠅ ꠄꠇ ꠙꠥꠀ ꠅꠁꠟ, ꠄꠢꠥꠖꠣꠄ ꠔꠣꠞ ꠘꠣꠝ ꠞꠣꠈꠟ ꠄꠁꠞ।
GEN 38:4 ꠢꠤꠞꠛꠣꠞ ꠛꠦꠐꠤꠞ ꠊꠞꠅ ꠀꠞꠇ ꠙꠥꠀ ꠅꠁꠟꠦ, ꠝꠣʼꠄ ꠔꠣꠞ ꠘꠣꠝ ꠞꠣꠈꠟ ꠅꠘꠘ।
GEN 38:5 ꠢꠦꠡꠦ ꠅꠃ ꠛꠦꠐꠤꠞ ꠀꠞꠇ ꠙꠥꠀ ꠅꠁꠟꠦ, ꠔꠣꠞ ꠘꠣꠝ ꠞꠣꠈꠟ ꠡꠦꠟꠣ। ꠁ ꠡꠝꠄ ꠔꠣꠞꠣ ꠇꠡꠤꠛ ꠉꠣꠃꠔ ꠞꠁꠔꠣ।
GEN 38:6 ꠀꠞ ꠄꠢꠥꠖꠣꠄ ꠔꠣꠞ ꠛꠠ ꠙꠥꠀ ꠄꠁꠞꠞ ꠟꠉꠦ ꠔꠣꠝꠣꠞ ꠘꠣꠝꠞ ꠄꠇ ꠙꠥꠠꠤꠞꠦ ꠛꠤꠀ ꠖꠤꠟ।
GEN 38:7 ꠅꠁꠟꠦ ꠔꠣꠞ ꠁ ꠙꠥꠀ ꠝꠣꠛꠥꠖꠞ ꠘꠎꠞꠅ ꠈꠥꠛ ꠈꠛꠤꠍ ꠀꠍꠤꠟ ꠉꠔꠤꠇꠦ, ꠝꠣꠛꠥꠖꠦ ꠔꠣꠞꠦ ꠝꠣꠞꠤꠟꠣꠁꠟꠣ।
GEN 38:8 ꠅꠃ ꠄꠢꠥꠖꠣꠄ ꠅꠘꠘꠞꠦ ꠇꠁꠟ, “ꠔꠥꠝꠣꠞ ꠜꠣꠛꠤꠞꠦ ꠛꠤꠀ ꠇꠞꠤꠟꠣꠅ। ꠔꠣꠁꠞ ꠖꠦꠅꠞ ꠅꠀꠄ ꠔꠥꠝꠣꠞ ꠎꠦꠔꠣ ꠇꠞꠣ ꠎꠞꠥꠞ ꠀꠍꠦ, ꠁꠔꠣ ꠀꠖꠣꠄ ꠇꠞꠅ ꠀꠞ ꠘꠤꠎꠞ ꠜꠣꠁꠞ ꠅꠀꠞꠤꠡ ꠙꠄꠖꠣ ꠇꠞꠅ।”
GEN 38:9 ꠅꠘꠘꠦ ꠎꠣꠘꠔ, ꠁ ꠅꠀꠞꠤꠡ ꠔꠣꠞ ꠘꠤꠎꠞ ꠅꠁꠔ ꠘꠣꠄ, ꠀꠞ ꠔꠣꠞ ꠜꠣꠁꠞ ꠅꠀꠞꠤꠡ ꠞꠣꠈꠔꠦ ꠔꠣꠞ ꠈꠤꠀꠟ ꠀꠍꠤꠟ ꠘꠣ ꠉꠔꠤꠇꠦ, ꠔꠣꠁꠞ ꠟꠉꠦ ꠝꠤꠟꠣ-ꠝꠤꠡꠣꠞ ꠡꠝꠄ ꠔꠣꠞ ꠛꠤꠎ ꠛꠣꠁꠞꠦ ꠝꠣꠐꠤꠔ ꠚꠣꠟꠣꠁ ꠖꠤꠔ।
GEN 38:10 ꠝꠣꠛꠥꠖꠦ ꠔꠣꠞ ꠁ ꠇꠣꠝꠦ ꠘꠣꠞꠣꠎ ꠅꠁꠟꠣ, ꠔꠣꠁꠘ ꠄꠁꠞꠞꠦꠅ ꠝꠣꠞꠤꠟꠣꠁꠟꠣ।
GEN 38:11 ꠅꠃ ꠄꠢꠥꠖꠣꠄ ꠔꠣꠞ ꠙꠥꠀꠞ ꠛꠃ ꠔꠣꠝꠣꠞꠞꠦ ꠇꠁꠟ, “ꠀꠝꠣꠞ ꠙꠥꠀ ꠡꠦꠟꠣ ꠎꠔꠖꠤꠘ ꠛꠠ ꠘꠣ ꠅꠄ, ꠅꠔꠖꠤꠘ ꠔꠥꠝꠣꠞ ꠛꠣꠚꠞ ꠛꠣꠠꠤꠔ ꠉꠤꠀ ꠠꠣꠠꠤ ꠅꠁꠀꠃ ꠞꠅ।” ꠄꠢꠥꠖꠣꠄ ꠒꠞꠣꠁꠟ, ꠡꠦꠟꠣꠅ ꠔꠣꠞ ꠜꠣꠁꠀꠁꠘ꠆ꠔꠞ ꠟꠣꠈꠣꠘ ꠝꠞꠤꠎꠤꠛ। ꠀꠞ ꠔꠣꠝꠣꠞ ꠛꠣꠚꠞ ꠛꠣꠠꠤꠔ ꠉꠦꠟꠉꠤ।
GEN 38:12 ꠛꠣꠇ꠆ꠇꠣ ꠇꠄꠖꠤꠘ ꠛꠣꠖꠦ ꠄꠢꠥꠖꠣꠞ ꠛꠃ, ꠡꠥꠀꠞ ꠙꠥꠠꠤ ꠝꠞꠤꠉꠦꠟ, ꠔꠦꠃ ꠇꠣꠘ꠆ꠖꠣ-ꠇꠣꠐꠤ ꠇꠞꠣꠞ ꠛꠣꠖꠦ ꠄꠢꠥꠖꠣꠄ ꠡꠣꠘ꠆ꠔꠤ ꠅꠁꠀ ꠅꠖꠥꠟ꠆ꠟꠝ ꠉꠣꠃꠞ ꠔꠣꠞ ꠖꠥꠡ꠆ꠔ ꠢꠤꠞꠣꠞ ꠟꠉꠦ ꠔꠤꠝꠘꠣ ꠉꠣꠃꠔ, ꠔꠣꠞ ꠝꠦꠠꠣꠞ ꠙꠣꠟꠞ ꠞꠥꠝꠣ ꠇꠣꠐꠞꠣ ꠝꠣꠘꠡꠞ ꠉꠦꠍꠦ ꠞꠅꠀꠘꠣ ꠖꠤꠟ।
GEN 38:13 ꠀꠞ ꠔꠣꠝꠣꠞꠞꠦ ꠉꠤꠀ ꠇꠦꠃ ꠈꠛꠞ ꠖꠤꠟ “ꠔꠥꠝꠣꠞ ꠢꠃꠞꠦ ꠔꠣꠘ ꠝꠦꠠꠣꠞ ꠞꠥꠝꠣ ꠇꠣꠐꠣꠞ ꠟꠣꠉꠤ ꠔꠤꠝꠘꠣꠔ ꠎꠣꠁꠞꠣ।”
GEN 38:14 ꠔꠣꠝꠣꠞꠦ ꠖꠦꠈꠟ, ꠡꠦꠟꠣ ꠛꠠ ꠅꠁꠟꠦꠅ ꠢꠃꠞꠦ ꠡꠦꠟꠣꠞ ꠟꠉꠦ ꠔꠣꠁꠞ ꠛꠤꠀ ꠖꠤꠞꠣ ꠘꠣ, ꠅꠃ ꠔꠣꠁ ꠠꠣꠠꠤꠞ ꠇꠣꠙꠠ ꠛꠖꠟꠣꠁꠀ ꠢꠣꠎꠤ-ꠙꠣꠠꠤ ꠝꠥꠈꠅ ꠊꠥꠝꠐꠣ ꠖꠤꠀ, ꠀꠄꠘꠣꠁꠝꠞ ꠙꠕꠞ ꠝꠥꠈꠅ ꠉꠤꠀ ꠛꠁꠟ। ꠀꠄꠘꠣꠁꠝ ꠀꠍꠤꠟ ꠔꠤꠝꠘꠣꠔ ꠎꠣꠅꠀꠞ ꠙꠕꠅ।
GEN 38:15 ꠀꠞ ꠔꠣꠁ ꠝꠥꠈ ꠟꠥꠇꠣꠁꠀ ꠞꠣꠈꠣꠄ, ꠄꠢꠥꠖꠣꠄ ꠝꠘꠅ ꠇꠞꠟ ꠁꠉꠥ ꠍꠤꠟꠣꠘ ꠛꠦꠐꠤ।
GEN 38:16 ꠔꠦꠃ ꠄꠢꠥꠖꠣꠄ ꠙꠥꠀꠞ ꠛꠃꠞꠦ ꠘꠣ ꠌꠤꠘꠣꠄ, ꠙꠕꠞ ꠗꠣꠞꠅ ꠔꠣꠝꠣꠞꠞ ꠉꠦꠍꠦ ꠉꠤꠀ ꠇꠁꠟ, “ꠀꠅ, ꠔꠥꠝꠣꠞ ꠟꠉꠦ ꠝꠤꠟꠣ-ꠝꠤꠡꠣ ꠇꠞꠤ।” ꠔꠣꠝꠣꠞꠦ ꠇꠁꠟ, “ꠔꠦ ꠀꠝꠣꠞꠦ ꠇꠤꠔꠣ ꠖꠤꠛꠣꠄ?”
GEN 38:17 ꠢꠦ ꠇꠁꠟ, “ꠀꠝꠣꠞ ꠙꠣꠟ ꠕꠘꠦ ꠛꠇꠞꠤ ꠛꠣꠁꠌ꠆ꠌꠣ ꠄꠉꠥ ꠙꠣꠑꠣꠁ ꠖꠤꠝꠥ।” ꠔꠣꠝꠣꠞꠦ ꠇꠁꠟ, “ꠁꠐꠣ ꠙꠣꠑꠣꠘꠤꠞ ꠀꠉꠦ ꠀꠝꠣꠞ ꠉꠦꠍꠦ ꠇꠥꠘ꠆ꠔꠣ ꠎꠤꠝ꠆ꠝꠣ ꠕꠁꠀ ꠎꠣꠃꠇ꠆ꠇꠣ।”
GEN 38:18 ꠄꠢꠥꠖꠣꠄ ꠇꠁꠟ, “ꠇꠤꠔꠣ ꠕꠁꠔꠣꠝ?” ꠔꠣꠁ ꠇꠁꠟ, “ꠀꠙꠘꠣꠞ ꠅꠃ ꠚꠤꠔꠣꠀꠟꠣ ꠡꠤꠟ ꠀꠞ ꠀꠙꠘꠣꠞ ꠀꠔꠞ ꠟꠣꠑꠤ ꠕꠁꠀ ꠎꠣꠃꠇ꠆ꠇꠣ।” ꠔꠦꠃ ꠄꠢꠥꠖꠣꠄ ꠅꠉꠥꠁꠘ ꠎꠤꠝ꠆ꠝꠣ ꠕꠁꠀ ꠔꠣꠁꠞ ꠟꠉꠦ ꠝꠤꠟꠣ-ꠝꠤꠡꠣ ꠇꠞꠟ ꠀꠞ ꠔꠣꠝꠣꠞꠞ ꠙꠦꠐꠅ ꠢꠥꠞꠥꠔ꠆ꠔꠣ ꠀꠁꠟ।
GEN 38:19 ꠛꠣꠖꠦ ꠔꠣꠝꠣꠞ ꠃꠑꠤꠀ ꠉꠦꠟꠉꠤ ꠀꠞ ꠢꠤ ꠇꠣꠙꠠ ꠛꠖꠟꠣꠁꠀ ꠢꠤꠞꠛꠣꠞ ꠠꠣꠠꠤꠞ ꠇꠣꠙꠠ ꠚꠤꠘ꠆ꠖꠤꠟ।
GEN 38:20 ꠢꠦꠡꠦ ꠅꠃ ꠛꠦꠐꠤꠞ ꠉꠦꠍ ꠕꠣꠇꠤ ꠎꠤꠝ꠆ꠝꠣꠞ ꠝꠣꠟ ꠚꠤꠞꠔ ꠘꠤꠛꠣꠞ ꠟꠣꠉꠤ, ꠔꠣꠞ ꠅꠖꠥꠟ꠆ꠟꠝꠞ ꠖꠥꠡ꠆ꠔꠞꠦ ꠖꠤꠀ ꠍꠣꠉꠟꠞ ꠛꠣꠁꠌ꠆ꠌꠣ ꠄꠉꠥ ꠙꠣꠑꠣꠁꠟ। ꠢꠦ ꠀꠁꠀ ꠔꠣꠁꠞꠦ ꠔꠥꠇꠣꠁꠀ ꠙꠣꠁꠟ ꠘꠣ।
GEN 38:21 ꠅꠃ ꠢꠦ ꠢꠘꠞ ꠝꠣꠘꠡꠞꠦ ꠎꠤꠇꠣꠁꠟ, “ꠀꠄꠘꠣꠁꠝꠞ ꠙꠕꠞ ꠗꠣꠞꠅ ꠄꠇ ꠡꠦꠛꠇ ꠛꠦꠐꠤ ꠀꠍꠤꠟ, ꠅꠉꠥ ꠇꠁ?” ꠔꠣꠞꠣ ꠇꠁꠟꠣ, “ꠁꠘꠅ ꠔ ꠁꠟꠣ ꠇꠥꠘꠥ ꠛꠦꠐꠤ ꠘꠣꠄ।”
GEN 38:22 ꠔꠦꠃ ꠢꠦ ꠄꠢꠥꠖꠣꠞ ꠉꠦꠍꠦ ꠉꠤꠀ ꠇꠁꠟ, “ꠀꠝꠤ ꠉꠤꠀ ꠔꠣꠁꠞꠦ ꠔꠥꠇꠣꠁꠀ ꠙꠣꠁꠟꠣꠝ ꠘꠣ। ꠢꠘꠞ ꠝꠣꠘꠡꠦꠅ ꠇꠁꠟꠣ, ꠁꠘꠅ ꠔ ꠁꠟꠣ ꠇꠥꠘꠥ ꠛꠦꠐꠤ ꠀꠁꠍꠦ ꠘꠣ।”
GEN 38:23 ꠄꠢꠥꠖꠣꠄ ꠇꠁꠟ, “ꠔꠦ ꠁꠔꠣ ꠀꠞ ꠔꠣꠁꠞ ꠉꠦꠍꠦꠃ ꠕꠣꠇꠃꠇ। ꠘꠣꠁꠟꠦ ꠀꠝꠞꠣ ꠡꠞꠝꠤꠘ꠆ꠖꠣ ꠅꠁꠝꠥ। ꠍꠣꠉꠟꠞ ꠛꠣꠁꠌ꠆ꠌꠣ ꠔ ꠙꠣꠑꠣꠁꠟꠣꠝ, ꠔꠣ-ꠅ ꠔꠥꠝꠤ ꠄꠞꠦ ꠔꠥꠇꠣꠁꠀ ꠙꠣꠁꠟꠣꠄ ꠘꠣ।”
GEN 38:24 ꠅꠘꠥꠝꠣꠘ ꠔꠤꠘ ꠝꠣꠡ ꠛꠣꠖꠦ ꠄꠢꠥꠖꠣꠄ ꠢꠥꠘꠟ, ꠔꠣꠞ ꠙꠥꠀꠞ ꠛꠃ ꠔꠣꠝꠣꠞꠦ ꠎꠤꠘꠣ ꠇꠞꠍꠦ, ꠄꠞꠟꠣꠉꠤ ꠔꠣꠁꠞ ꠢꠥꠞꠥꠔ꠆ꠔꠣ ꠅꠁꠔꠣ। ꠅꠃ ꠄꠢꠥꠖꠣꠄ ꠇꠁꠟ, “ꠅꠉꠥꠞꠦ ꠛꠣꠞꠦ ꠘꠤꠀ ꠀꠉꠥꠁꠘꠖꠤ ꠎꠣꠟꠣꠁꠟꠣꠅ।”
GEN 38:25 ꠔꠣꠝꠣꠞꠞꠦ ꠎꠦꠛꠟꠣ ꠛꠣꠞꠦ ꠘꠤꠞꠣ, ꠅꠃ ꠡꠝꠄ ꠔꠣꠁꠞ ꠢꠃꠞꠞꠦ ꠈꠛꠞ ꠖꠤꠟ ꠎꠦꠘ, “ꠎꠣꠞ ꠢꠥꠞꠥꠔ꠆ꠔꠣ ꠀꠝꠣꠞ ꠙꠦꠐꠅ ꠀꠍꠦ, ꠅꠃ ꠝꠣꠟ-ꠍꠣꠝꠣꠘꠣ ꠅꠇꠟ ꠔꠣꠞ। ꠔꠦ ꠖꠦꠈꠃꠇ꠆ꠇꠣ, ꠅꠃ ꠚꠤꠔꠣꠀꠟꠣ ꠡꠤꠟ ꠀꠞ ꠟꠣꠑꠤꠉꠥ ꠇꠣꠞ ꠌꠤꠘꠂꠘ ꠘꠤ?”
GEN 38:26 ꠄꠢꠥꠖꠣꠄ ꠁꠔꠣ ꠖꠦꠈꠤꠀ ꠇꠁꠟ, “ꠔꠣꠁ ꠔ ꠀꠝꠣ ꠕꠣꠇꠤ ꠛꠃꠔ ꠛꠠ ꠙꠞꠦꠎꠉꠣꠞ। ꠀꠝꠣꠞ ꠙꠥꠀ ꠡꠦꠟꠣꠞ ꠟꠉꠦ ꠔꠣꠁꠞꠦ ꠛꠤꠀ ꠇꠞꠣꠁꠍꠤ ꠘꠣ।” ꠄꠞꠛꠣꠖꠦ ꠄꠢꠥꠖꠣꠄ ꠀꠞ ꠇꠥꠘꠥꠖꠤꠘꠅ ꠔꠣꠝꠣꠞꠞ ꠉꠦꠍꠦ ꠢꠥꠔꠤꠍꠦ ꠘꠣ।
GEN 38:27 ꠢꠥꠞꠥꠔ꠆ꠔꠣ ꠅꠁꠛꠣꠞ ꠛꠣꠟꠣ ꠖꠦꠈꠂꠘ, ꠔꠣꠝꠣꠞꠞ ꠙꠦꠐꠅ ꠎꠥꠠꠞ ꠢꠥꠞꠥꠔ꠆ꠔꠣ।
GEN 38:28 ꠙꠄꠟꠣ ꠄꠉꠥꠄ ꠔꠣꠞ ꠀꠔ ꠛꠣꠞ ꠇꠞꠟ ꠀꠞ ꠖꠣꠁ ꠛꠦꠐꠤꠄ ꠟꠣꠟ ꠡꠥꠔꠣ ꠄꠇꠍꠣ ꠔꠣꠞ ꠀꠔꠅ ꠛꠣꠘ꠆ꠖꠤꠀ ꠇꠁꠟ, “ꠁꠉꠥ ꠙꠄꠟꠣ ꠙꠄꠖꠣ ꠅꠁꠟ।”
GEN 38:29 ꠅꠁꠟꠦ ꠢꠦ ꠀꠔ ꠐꠣꠘ ꠖꠤꠀ ꠜꠤꠔꠞꠦ ꠘꠤꠟꠉꠤ, ꠔꠦꠃ ꠔꠣꠞ ꠜꠣꠁ ꠙꠄꠟꠣ ꠛꠣꠞ ꠅꠁꠟ ꠀꠞ ꠖꠣꠁ ꠛꠦꠐꠤꠄ ꠇꠁꠟ, “ꠔꠥꠝꠤ ꠇꠤꠟꠣ ꠚꠣꠇ ꠇꠞꠤꠀ ꠛꠣꠞ ꠅꠁꠟꠣꠄ?” ꠄꠞꠟꠣꠉꠤ ꠄꠞ ꠘꠣꠝ ꠅꠁꠟ ꠚꠤꠞꠥꠎ [ꠝꠣꠘꠤ, ꠚꠣꠇ ꠇꠞꠣ]।
GEN 38:30 ꠛꠣꠖꠦ ꠔꠣꠞ ꠜꠣꠁ ꠟꠣꠟ ꠡꠥꠔꠣ ꠀꠔꠅ ꠛꠣꠘ꠆ꠖꠣ ꠟꠁꠀ ꠛꠣꠞ ꠅꠁꠟ, ꠔꠣꠞ ꠘꠣꠝ ꠞꠣꠈꠟꠣ ꠎꠣꠞꠣꠢ।
GEN 39:1 ꠁꠃꠍꠥꠚꠞꠦ ꠝꠤꠡꠞ ꠖꠦꠡꠅ ꠟꠁꠀ ꠎꠣꠅꠀꠞ ꠛꠣꠖꠦ, ꠁꠍꠝꠣꠁꠟꠤ ꠅꠇꠟꠞ ꠉꠦꠍ ꠕꠘꠦ, ꠀꠎꠤꠎ ꠘꠣꠝꠞ ꠚꠦꠞꠣꠃꠘꠞ ꠄꠇꠎꠘ ꠝꠤꠡꠞꠤ ꠇꠞ꠆ꠝꠌꠣꠞꠤꠄ, ꠁꠃꠍꠥꠚꠞꠦ ꠈꠞꠤꠖ ꠇꠞꠟꠣ। ꠀꠎꠤꠎ ꠅꠁꠟꠣ ꠚꠦꠞꠣꠃꠘꠞ ꠙꠞꠗꠣꠘ ꠉꠣꠒ।
GEN 39:2 ꠝꠣꠛꠥꠖꠦ ꠁꠃꠍꠥꠚꠞ ꠟꠉꠤ ꠅꠁꠟꠣ, ꠄꠞꠟꠣꠉꠤ ꠁꠃꠍꠥꠚ ꠢꠇꠟ ꠇꠣꠝꠅ ꠇꠣꠝꠤꠀꠛ ꠅꠁꠟꠣ। ꠔꠣꠁꠘ ꠢꠃ ꠝꠤꠡꠞꠤ ꠝꠥꠘꠤꠛꠞ ꠛꠣꠠꠤꠔ ꠇꠣꠝ ꠇꠞꠔꠣ।
GEN 39:3 ꠝꠣꠛꠥꠖ ꠔꠣꠘ ꠟꠉꠦ ꠟꠉꠦ ꠀꠍꠂꠘ ꠀꠞ ꠢꠇꠟ ꠇꠣꠝꠅ ꠔꠣꠘꠦ ꠇꠣꠝꠤꠀꠛ ꠇꠞꠞꠣ, ꠔꠣꠘ ꠝꠥꠘꠤꠛꠦꠅ ꠁꠔꠣ ꠛꠥꠎꠤꠟꠣꠁꠟꠣ।
GEN 39:4 ꠔꠦꠃ ꠝꠥꠘꠤꠛꠦ ꠁꠃꠍꠥꠚꠞꠦ ꠝꠣꠄꠀ ꠇꠞꠔꠣ ꠟꠣꠉꠟꠣ, ꠔꠣꠘꠦ ꠝꠥꠘꠤꠛꠞ ꠈꠣꠍ ꠈꠦꠎꠝꠔꠉꠣꠞ ꠛꠣꠘꠣꠁꠟꠣ ꠀꠞ ꠔꠣꠘ ꠛꠣꠠꠤꠞ ꠢꠇꠟꠔꠣ ꠖꠦꠈꠣ-ꠢꠥꠘꠣꠞ ꠜꠣꠞꠅ ꠁꠃꠍꠥꠚꠞ ꠉꠦꠍꠦ ꠡꠝꠎꠣꠁ ꠖꠤꠟꠣ।
GEN 39:5 ꠁꠃꠍꠥꠚꠞꠦ ꠔꠣꠘ ꠛꠣꠠꠤꠞ ꠀꠞ ꠢꠇꠟꠔꠣꠞ ꠜꠣꠞ ꠡꠙꠤ ꠖꠦꠅꠀꠞ ꠛꠣꠖꠦ ꠕꠘꠦ, ꠝꠣꠛꠥꠖꠦ ꠁꠃꠍꠥꠚꠞ ꠟꠣꠉꠤꠃ, ꠔꠣꠘ ꠝꠥꠘꠤꠛꠞ ꠢꠇꠟꠔꠣꠞ ꠝꠣꠎꠦ ꠛꠞꠇꠔ ꠘꠣꠎꠤꠟ ꠇꠞꠟꠣ। ꠀꠎꠤꠎꠞ ꠛꠣꠠꠤꠔ ꠀꠞ ꠈꠦꠔ-ꠈꠣꠝꠣꠞ, ꠢꠇꠟ ꠎꠣꠉꠣꠔ ꠝꠣꠛꠥꠖꠦ ꠛꠞꠇꠔ ꠘꠣꠎꠤꠟ ꠇꠞꠟꠣ।
GEN 39:6 ꠁꠔꠣ ꠖꠦꠈꠤꠀ ꠀꠎꠤꠎꠦ ꠔꠣꠘ ꠢꠇꠟꠔꠣꠞ ꠜꠣꠞ ꠁꠃꠍꠥꠚꠞ ꠃꠙꠞꠦ ꠡꠙꠤ ꠖꠤꠟꠣ, ꠔꠣꠘ ꠘꠤꠎꠞ ꠈꠣꠘꠣ-ꠖꠣꠘꠣ ꠍꠣꠠꠣ ꠀꠞ ꠇꠥꠘ꠆ꠔꠣꠞꠃ ꠈꠛꠞ ꠟꠁꠔꠣ ꠘꠣ। ꠁꠃꠍꠥꠚꠞ ꠡꠞꠤꠟꠞ ꠉꠑꠘ ꠀꠞ ꠌꠦꠢꠣꠞꠣꠅ ꠡꠥꠘ꠆ꠖꠞ ꠀꠍꠤꠟ।
GEN 39:7 ꠁꠔꠣ ꠖꠦꠈꠤꠀ ꠔꠣꠘ ꠝꠥꠘꠤꠛꠞ ꠛꠃꠄ ꠔꠣꠘ ꠛꠣꠄ ꠟꠣꠟꠌ ꠇꠞꠟ। ꠔꠣꠁ ꠁꠃꠍꠥꠚꠞꠦ ꠇꠁꠟ, “ꠀꠝꠣꠞ ꠛꠤꠍꠘꠣꠔ ꠀꠅ।”
GEN 39:8 ꠅꠁꠟꠦ ꠁꠃꠍꠥꠚ ꠞꠣꠎꠤ ꠘꠣ ꠅꠁꠀ ꠝꠥꠘꠤꠛꠞ ꠛꠃꠞꠦ ꠇꠁꠟꠣ, “ꠖꠦꠈꠃꠇ꠆ꠇꠣ, ꠁ ꠛꠣꠠꠤꠔ ꠇꠤꠔꠣ ꠇꠤꠔꠣ ꠀꠍꠦ, ꠀꠝꠣꠞ ꠝꠥꠘꠤꠛꠦ ꠇꠥꠘ꠆ꠔꠣꠃ ꠈꠛꠞ ꠟꠂꠘ ꠘꠣ, ꠢꠇꠟꠔꠣꠞ ꠜꠣꠞ ꠀꠝꠣꠞ ꠃꠙꠞꠦ ꠡꠝꠎꠣꠁ ꠖꠤꠍꠂꠘ।
GEN 39:9 ꠁ ꠛꠣꠠꠤꠔ ꠀꠝꠣ ꠕꠘꠦ ꠛꠠ ꠀꠞ ꠇꠦꠃ ꠘꠣꠄ। ꠀꠙꠘꠦ ꠔ ꠔꠣꠘ ꠛꠤꠛꠤ, ꠄꠞꠟꠣꠉꠤ ꠀꠙꠘꠣꠞꠦ ꠍꠣꠠꠣ ꠀꠞ ꠢꠇꠟꠞꠦ ꠔꠣꠁꠘ ꠀꠝꠣꠞ ꠎꠤꠝ꠆ꠝꠣꠄ ꠞꠣꠈꠍꠂꠘ, ꠔꠦ ꠀꠝꠤ ꠇꠤꠟꠣ ꠅꠔ ꠛꠠ ꠄꠇ ꠎꠊꠁꠘ꠆ꠘ ꠇꠣꠝ ꠇꠞꠤꠀ ꠀꠟ꠆ꠟꠣꠞ ꠛꠤꠞꠥꠖ꠆ꠖꠦ ꠉꠥꠘꠣ ꠇꠞꠔꠣꠝ?”
GEN 39:10 ꠔꠣꠁ ꠢꠣꠝꠦꠡꠣ ꠁꠃꠍꠥꠚꠞꠦ ꠅꠃꠟꠣ ꠝꠤꠘꠔ ꠇꠞꠟꠦꠅ ꠁꠃꠍꠥꠚꠦ ꠔꠣꠁꠞ ꠉꠦꠍꠦ ꠢꠥꠔꠔꠦ ꠛꠣ ꠇꠣꠍꠣꠔ ꠞꠁꠔꠦꠅ ꠞꠣꠎꠤ ꠅꠁꠟꠣ ꠘꠣ।
GEN 39:11 ꠢꠦꠡꠦ ꠄꠇꠖꠤꠘ ꠇꠥꠘꠥ ꠄꠇ ꠇꠣꠝꠞ ꠟꠣꠉꠤ ꠁꠃꠍꠥꠚ ꠊꠞꠞ ꠜꠤꠔꠞꠦ ꠢꠣꠝꠣꠁꠟꠣ, ꠅꠃ ꠡꠝꠄ ꠀꠞ ꠇꠦꠃ ꠢꠤꠘꠅ ꠀꠍꠤꠟ ꠘꠣ।
GEN 39:12 ꠔꠦꠃ ꠀꠎꠤꠎꠞ ꠛꠃꠄ ꠁꠃꠍꠥꠚꠞ ꠇꠣꠙꠠꠅ ꠗꠞꠤ ꠇꠁꠟ, “ꠀꠝꠣꠞ ꠛꠤꠍꠘꠣꠔ ꠀꠄ।” ꠅꠁꠟꠦ ꠁꠃꠍꠥꠚꠦ ꠔꠣꠘ ꠇꠣꠙꠠ ꠚꠣꠟꠣꠁꠀ ꠖꠃꠠꠤꠀ ꠉꠦꠟꠣꠉꠤ।
GEN 39:13 ꠁꠃꠍꠥꠚꠦ ꠔꠣꠁꠞ ꠀꠔꠅ ꠇꠣꠙꠠ ꠕꠁꠀ ꠖꠃꠠꠣꠁꠀ ꠉꠦꠟꠣꠉꠤ ꠇꠞꠤ,
GEN 39:14 ꠀꠎꠤꠎꠞ ꠛꠃꠄ ꠊꠞꠞ ꠝꠣꠘꠡꠞꠦ ꠒꠣꠇꠤꠀ ꠇꠁꠟ, “ꠢꠥꠘꠅ, ꠔꠣꠁꠘ ꠀꠝꠞꠣꠞ ꠟꠉꠦ ꠔꠣꠝꠡꠣ ꠇꠞꠣꠞ ꠟꠣꠉꠤ ꠁ ꠁꠛꠞꠣꠘꠤ ꠛꠦꠐꠣꠞꠦ ꠀꠘꠍꠂꠘ। ꠢꠦ ꠀꠝꠣꠞꠦ ꠛꠦꠁꠎ꠆ꠎꠔꠤ ꠇꠞꠣꠞ ꠝꠔꠟꠛꠦ ꠀꠝꠣꠞ ꠛꠤꠍꠘꠣꠔ ꠀꠁꠍꠤꠟ, ꠅꠃ ꠀꠝꠤ ꠌꠤꠟ꠆ꠟꠣꠁꠀ ꠃꠑꠍꠤ।
GEN 39:15 ꠀꠝꠣꠞ ꠌꠤꠟ꠆ꠟꠣꠘꠤ ꠢꠥꠘꠤꠀ ꠢꠦ ꠔꠣꠞ ꠚꠤꠘ꠆ꠘꠞ ꠇꠣꠙꠠ ꠀꠝꠣꠞ ꠉꠦꠍꠦ ꠕꠁꠀ ꠜꠣꠉꠤꠍꠦ।”
GEN 39:16 ꠁꠃꠍꠥꠚꠞ ꠝꠥꠘꠤꠛ ꠛꠣꠠꠤꠔ ꠘꠣ ꠀꠅꠀ ꠙꠞ꠆ꠎꠘ꠆ꠔ, ꠁ ꠇꠣꠙꠠ ꠔꠣꠁ ꠘꠤꠎꠞ ꠉꠦꠍꠦ ꠞꠣꠈꠟ।
GEN 39:17 ꠔꠣꠁꠘ ꠀꠁꠀ ꠢꠣꠞꠟꠦ ꠔꠣꠁ ꠘꠣꠟꠤꠡ ꠖꠤꠟ, “ꠔꠥꠝꠤ ꠎꠦ ꠁꠛꠞꠣꠘꠤ ꠉꠥꠟꠣꠝꠞꠦ ꠀꠝꠞꠣꠞ ꠉꠦꠍꠦ ꠀꠘꠍ, ꠢꠦ ꠀꠝꠣꠞꠦ ꠛꠦꠁꠎ꠆ꠎꠔꠤ ꠇꠞꠣꠞ ꠝꠔꠟꠛꠦ ꠀꠝꠣꠞ ꠊꠞꠅ ꠢꠣꠝꠣꠁꠍꠤꠟ।
GEN 39:18 ꠅꠁꠟꠦ ꠀꠝꠣꠞ ꠢꠣꠃꠇꠣ-ꠢꠣꠃꠇꠤ ꠀꠞ ꠌꠤꠟ꠆ꠟꠣꠘꠤꠄ ꠢꠦ ꠀꠝꠣꠞ ꠉꠦꠍꠦ ꠔꠣꠞ ꠇꠣꠙꠠ ꠚꠣꠟꠣꠁ ꠕꠁꠀ ꠜꠣꠉꠤꠍꠦ।”
GEN 39:19 ꠛꠃꠞ ꠝꠣꠔ ꠢꠥꠘꠤꠀ ꠁꠃꠍꠥꠚꠞ ꠝꠥꠘꠤꠛꠦ ꠉꠥꠍꠣꠄ ꠀꠉꠥꠁꠘ ꠅꠁꠉꠦꠟꠣ। ꠔꠣꠘ ꠛꠃꠄ ꠇꠁꠟ, “ꠔꠥꠝꠣꠞ ꠉꠥꠟꠣꠝꠦ ꠀꠝꠣꠞ ꠟꠉꠦ ꠅꠃ ꠟꠣꠈꠣꠘ ꠇꠣꠝ ꠇꠞꠍꠦ।”
GEN 39:20 ꠔꠦꠃ ꠀꠎꠤꠎꠦ ꠁꠃꠍꠥꠚꠞꠦ ꠘꠤꠀ ꠎꠦꠟ ꠈꠣꠘꠣꠔ ꠢꠣꠞꠣꠁꠟꠣ। ꠝꠤꠡꠞꠞ ꠛꠣꠖꠡꠣꠞ ꠛꠘ꠆ꠖꠤ ꠅꠇꠟꠞꠦ ꠎꠦꠘꠅ ꠞꠣꠈꠂꠘ, ꠔꠣꠘꠦꠅ ꠢꠃ ꠎꠦꠟ ꠈꠣꠘꠣꠔ ꠕꠁꠟꠣ।
GEN 39:21 ꠅꠁꠟꠦ ꠁꠃꠍꠥꠚꠞ ꠃꠙꠞꠦ ꠝꠣꠛꠥꠖꠞ ꠍꠣꠄꠀ ꠀꠍꠤꠟ, ꠔꠣꠁꠘ ꠁꠃꠍꠥꠚꠞꠦ ꠛꠠ ꠎꠦꠟꠣꠞ ꠍꠣꠛꠞ ꠉꠦꠍꠦ ꠝꠣꠄꠀꠞ ꠝꠣꠘꠥꠡ ꠛꠣꠘꠣꠁꠟꠣ।
GEN 39:22 ꠛꠠ ꠎꠦꠟꠣꠞ ꠍꠣꠛꠦ ꠎꠦꠟ ꠈꠣꠘꠣꠞ ꠢꠇꠟ ꠛꠘ꠆ꠖꠤ ꠅꠇꠟꠞ ꠡꠞ꠆ꠖꠣꠞꠤ ꠁꠃꠍꠥꠚꠞ ꠃꠙꠞꠦ ꠍꠣꠠꠤ ꠖꠤꠟꠣ, ꠔꠦꠃ ꠢꠘꠞ ꠢꠇꠟ ꠇꠣꠝ-ꠇꠣꠎ ꠁꠃꠍꠥꠚꠞ ꠢꠥꠇꠥꠝꠦ ꠌꠟꠔ।
GEN 39:23 ꠀꠞ ꠛꠠ ꠎꠦꠟꠣꠞ ꠍꠣꠛꠦ ꠇꠥꠘ꠆ꠔꠣꠃ ꠖꠦꠈꠣ-ꠢꠥꠘꠣ ꠇꠞꠣ ꠟꠣꠉꠔ ꠘꠣ, ꠇꠣꠞꠘ ꠝꠣꠛꠥꠖ ꠁꠃꠍꠥꠚꠞ ꠟꠉꠦ ꠀꠍꠟꠣ, ꠄꠞꠟꠣꠉꠤ ꠁꠃꠍꠥꠚꠦ ꠎꠦꠔꠣꠔ ꠀꠔ ꠖꠤꠔꠣ, ꠝꠣꠛꠥꠖꠦ ꠁꠔꠣ ꠇꠣꠝꠤꠀꠛ ꠇꠞꠔꠣ।
GEN 40:1 ꠁꠔꠣꠞ ꠛꠣꠖꠦ ꠝꠤꠡꠞꠞ ꠛꠣꠖꠡꠣꠞ ꠖꠞꠛꠣꠞꠞ ꠡꠞꠣꠛ ꠛꠤꠟꠣꠁ ꠖꠦꠅꠞꠣ ꠀꠞ ꠞꠥꠐꠤ ꠛꠣꠘꠣꠅꠞꠣ ꠁ ꠖꠥꠁꠅꠎꠘꠦ ꠛꠣꠖꠡꠣꠞ ꠉꠦꠍꠦ ꠇꠍꠥꠞ ꠇꠞꠟꠣ।
GEN 40:2 ꠔꠦꠃ ꠚꠦꠞꠣꠃꠘ ꠔꠣꠞꠣ ꠖꠥꠁꠅꠎꠘꠞ ꠃꠙꠞꠦ ꠉꠥꠍꠣ ꠅꠁꠟꠣ,
GEN 40:3 ꠔꠣꠁꠘ ꠄꠞꠣꠞꠦ ꠛꠘ꠆ꠖꠤ ꠇꠞꠤꠀ ꠔꠣꠘ ꠛꠠ ꠎꠟ꠆ꠟꠣꠖꠞ ꠛꠣꠠꠤꠞ ꠎꠦꠟꠅ ꠢꠣꠞꠣꠁꠟꠣ। ꠅꠃ ꠎꠦꠟꠅ ꠁꠃꠍꠥꠚꠅ ꠀꠍꠟꠣ।
GEN 40:4 ꠛꠠ ꠎꠟ꠆ꠟꠣꠖꠦ ꠁ ꠖꠥꠁꠅ ꠇꠄꠖꠤꠞ ꠜꠣꠞꠅ ꠁꠃꠍꠥꠚꠞ ꠀꠔꠅ ꠖꠤꠟꠣ, ꠀꠞ ꠁꠃꠍꠥꠚꠦ ꠔꠣꠞꠣꠞ ꠈꠦꠎꠝꠔ ꠇꠞꠔꠣ ꠟꠣꠉꠟꠣ। ꠅꠃꠟꠣ ꠄꠞꠣ ꠇꠤꠍꠥꠖꠤꠘ ꠎꠦꠟꠅ ꠞꠁꠟꠣ।
GEN 40:5 ꠛꠣꠖꠦ ꠝꠤꠡꠞꠞ ꠛꠣꠖꠡꠣꠞ ꠢꠃ ꠞꠥꠐꠤ ꠛꠣꠘꠣꠅꠞꠣ ꠀꠞ ꠡꠞꠣꠛ ꠛꠤꠟꠣꠅꠞꠣ ꠖꠥꠁꠅꠎꠘꠦ ꠄꠇ ꠞꠣꠁꠔꠦ ꠖꠥꠈꠣꠘ ꠈꠥꠀꠛ ꠖꠦꠈꠟꠣ, ꠔꠣꠞꠣꠞ ꠈꠥꠀꠛꠞ ꠝꠣꠘꠤꠅ ꠀꠍꠤꠟ ꠖꠥꠁ ꠟꠣꠈꠣꠘ।
GEN 40:6 ꠛꠤꠀꠘꠦ ꠁꠃꠍꠥꠚꠦ ꠔꠣꠞꠣꠞ ꠉꠦꠍꠦ ꠉꠤꠀ ꠖꠦꠈꠟꠣ, ꠔꠣꠞꠣ ꠈꠥꠛ ꠝꠘ-ꠝꠞꠣ ꠅꠁꠞꠁꠍꠂꠘ।
GEN 40:7 ꠁꠃꠍꠥꠚꠦ ꠔꠣꠞꠣꠞꠦ ꠎꠤꠇꠣꠁꠟꠣ, “ꠇꠤꠔꠣ ꠅꠁꠍꠦ, ꠀꠁꠎ ꠅꠔ ꠛꠦꠎꠣꠞ ꠇꠦꠘꠦ?”
GEN 40:8 ꠔꠣꠞꠣ ꠎꠥꠀꠙ ꠖꠤꠟꠣ, “ꠀꠝꠞꠣ ꠔ ꠈꠥꠀꠛ ꠖꠦꠈꠍꠤ, ꠅꠁꠟꠦ ꠄꠞ ꠔꠣꠛꠤꠞ ꠛꠥꠎꠣꠁ ꠖꠦꠅꠞꠣ ꠇꠦꠃ ꠘꠣꠄ।” ꠁꠃꠍꠥꠚꠦ ꠔꠣꠞꠣꠞꠦ ꠇꠁꠟꠣ, “ꠝꠣꠘꠤ ꠛꠥꠎꠣꠘꠤꠞ ꠈꠦꠝꠔꠣ ꠇꠤꠔꠣ ꠀꠟ꠆ꠟꠣꠄ ꠖꠦꠁꠘ ꠘꠣ ꠘꠤ? ꠖꠦꠈꠤ ꠌꠣꠁꠘ, ꠀꠝꠣꠞꠦ ꠢꠥꠘꠣꠃꠇ꠆ꠇꠣ।”
GEN 40:9 ꠅꠃ ꠢꠤ ꠡꠞꠣꠛ ꠛꠤꠟꠣꠅꠞꠣꠄ, ꠔꠣꠘ ꠡ꠆ꠛꠙꠘ ꠁꠃꠍꠥꠚꠞꠦ ꠢꠥꠘꠣꠁꠟꠣ। ꠢꠦ ꠇꠁꠟ, “ꠀꠝꠤ ꠖꠦꠈꠟꠣꠝ, ꠀꠝꠣꠞ ꠍꠣꠝꠘꠦ ꠄꠇ ꠀꠋꠉꠥꠞꠞ ꠉꠣꠍ।
GEN 40:10 ꠉꠣꠍꠞ ꠔꠤꠘꠉꠥ ꠒꠣꠟ ꠀꠍꠦ; ꠢꠃ ꠒꠣꠟꠅ ꠇꠥꠠꠤ ꠛꠣꠞꠘꠤꠞ ꠟꠉꠦ ꠟꠉꠦ ꠚꠥꠟ ꠗꠞꠟ, ꠀꠞ ꠍꠠꠣ ꠍꠠꠣ ꠀꠋꠉꠥꠞ ꠗꠞꠤ ꠙꠣꠇꠤ ꠉꠦꠟ।
GEN 40:11 ꠅꠃ ꠡꠝꠄ ꠚꠦꠞꠣꠃꠘꠞ ꠡꠞꠛꠔꠞ ꠙꠤꠀꠟꠣ ꠀꠝꠣꠞ ꠀꠔꠅ ꠀꠍꠤꠟ। ꠀꠝꠤ ꠢꠃ ꠀꠋꠉꠥꠞ ꠅꠇꠟ ꠌꠤꠙꠤꠀ ꠞꠡ ꠛꠣꠞ ꠇꠞꠤ ꠚꠦꠞꠣꠃꠘꠞ ꠀꠔꠅ ꠖꠤꠟꠣꠝ।”
GEN 40:12 ꠁꠃꠍꠥꠚꠦ ꠔꠣꠞꠦ ꠇꠁꠟꠣ, “ꠀꠙꠘꠣꠞ ꠡ꠆ꠛꠙꠘꠞ ꠝꠣꠘꠤ ꠅꠁꠟ, ꠔꠤꠘ ꠒꠣꠟ ꠝꠣꠘꠤ ꠔꠤꠘ ꠖꠤꠘ।
GEN 40:13 ꠅꠃ ꠔꠤꠘ ꠖꠤꠘꠞ ꠝꠣꠎꠦ ꠚꠦꠞꠣꠃꠘꠦ ꠀꠙꠘꠣꠞꠦ ꠛꠣꠞ ꠇꠞꠤꠀ ꠢꠤꠞꠛꠣꠞ ꠀꠉꠞ ꠇꠣꠝꠅ ꠟꠣꠉꠣꠁꠛꠣ। ꠀꠙꠘꠦ ꠢꠤꠞꠛꠣꠞ ꠀꠉꠞ ꠟꠣꠈꠣꠘ ꠚꠦꠞꠣꠃꠘꠞ ꠀꠔꠅ ꠙꠤꠀꠟꠣ ꠔꠥꠟꠤ ꠖꠤꠛꠣ।
GEN 40:14 ꠅꠁꠟꠦ ꠀꠙꠘꠣꠞꠦ ꠝꠤꠘꠔꠤ ꠇꠞꠤ ꠇꠁꠀꠞ, ꠀꠙꠘꠣꠞ ꠜꠣꠟꠣꠁ ꠅꠀꠞ ꠛꠣꠖꠦ ꠀꠝꠣꠞꠦ ꠝꠘꠅ ꠇꠞꠛꠣ ꠀꠞ ꠖꠄꠀ ꠇꠞꠤ ꠚꠦꠞꠣꠃꠘꠞ ꠉꠦꠍꠦ ꠀꠝꠣꠞ ꠇꠕꠣ ꠇꠁꠀ, ꠁ ꠎꠦꠟꠈꠣꠘꠣ ꠕꠘꠦ ꠀꠝꠣꠞꠦ ꠈꠣꠟꠣꠍ ꠇꠞꠣꠁꠛꠣ।
GEN 40:15 ꠁꠛꠞꠣꠘꠤ ꠅꠇꠟꠞ ꠖꠦꠡ ꠕꠘꠦ ꠀꠝꠣꠞꠦ ꠎꠥꠞ ꠇꠞꠤ ꠗꠞꠤꠀ ꠀꠘꠣ ꠅꠁꠍꠦ। ꠀꠞ ꠅꠘꠅ ꠀꠁꠀꠅ ꠀꠝꠤ ꠎꠦꠟ ꠈꠣꠐꠣꠞ ꠝꠔ ꠄꠝꠘ ꠇꠥꠘ꠆ꠔꠣ ꠇꠞꠍꠤ ꠘꠣ।”
GEN 40:16 ꠛꠣꠖꠦ ꠢꠤ ꠞꠥꠐꠤ ꠛꠣꠘꠣꠅꠞꠣꠄ ꠎꠦꠛꠟꠣ ꠖꠦꠈꠟ ꠎꠦꠘ, ꠡꠞꠣꠛ ꠛꠤꠟꠣꠅꠞꠣꠞ ꠈꠥꠀꠛꠞ ꠝꠣꠘꠤ ꠜꠣꠟꠣ ꠀꠍꠦ, ꠔꠦꠃ ꠢꠦ ꠁꠃꠍꠥꠚꠞꠦ ꠇꠁꠟ, “ꠀꠝꠤꠅ ꠈꠥꠀꠛꠦ ꠖꠦꠈꠍꠤ, ꠖꠦꠈꠟꠣꠝ ꠎꠦꠘ ꠀꠝꠣꠞ ꠝꠣꠕꠣꠔ ꠔꠤꠘ ꠐꠥꠇꠞꠤ ꠝꠄꠖꠣꠞ ꠞꠥꠐꠤ ꠟꠁꠍꠤ।
GEN 40:17 ꠀꠞ ꠃꠙꠞꠞ ꠐꠥꠇꠞꠤꠔ ꠀꠍꠤꠟ, ꠚꠦꠞꠣꠃꠘꠞ ꠟꠣꠉꠤ ꠛꠃꠔ ꠎꠣꠔꠞ ꠙꠤꠑꠣ; ꠔꠦꠃ ꠙꠣꠈꠤ ꠅꠇꠟꠦ ꠀꠁꠀ, ꠀꠝꠣꠞ ꠝꠣꠕꠣꠞ ꠃꠙꠞꠞ ꠐꠥꠇꠞꠤ ꠕꠣꠇꠤ ꠁꠔꠣ ꠈꠣꠁꠟꠤꠞꠣ।”
GEN 40:18 ꠁꠃꠍꠥꠚꠦ ꠎꠥꠀꠙ ꠖꠤꠟꠣ, “ꠁ ꠡ꠆ꠛꠙꠘꠞ ꠔꠣꠛꠤꠞ ꠅꠁꠟ, ꠔꠤꠘ ꠐꠥꠇꠞꠤ ꠝꠣꠘꠤ ꠔꠤꠘ ꠖꠤꠘ।
GEN 40:19 ꠅꠃ ꠔꠤꠘ ꠖꠤꠘꠞ ꠝꠣꠎꠦ, ꠚꠦꠞꠣꠃꠘꠦ ꠀꠙꠘꠣꠞ ꠗꠠ ꠕꠘꠦ ꠇꠟ꠆ꠟꠣ ꠀꠟꠉꠣꠁꠀ, ꠉꠣꠍꠞ ꠝꠣꠎꠦ ꠟꠐꠇꠣꠁꠛꠣ, ꠢꠦꠡꠦ ꠙꠣꠈꠤꠘ꠆ꠔꠦ ꠀꠁꠀ ꠀꠙꠘꠣꠞ ꠗꠠꠞ ꠉꠥꠡ꠆ꠔ ꠈꠣꠁꠛꠣ।”
GEN 40:20 ꠄꠞ ꠔꠤꠘ ꠖꠤꠘꠞ ꠖꠤꠘ ꠚꠦꠞꠣꠃꠘꠞ ꠎꠘꠝ ꠖꠤꠘ ꠀꠍꠤꠟ। ꠚꠦꠞꠣꠃꠘꠦ ꠔꠣꠘ ꠖꠞꠛꠣꠞꠞ ꠢꠇꠟ ꠝꠣꠘꠡꠞ ꠟꠣꠉꠤ, ꠈꠣꠘꠤ ꠔꠤꠀꠞ ꠇꠞꠣꠁꠟꠣ। ꠀꠞ ꠢꠃ ꠞꠥꠐꠤ ꠛꠣꠘꠣꠅꠞꠣ ꠀꠞ ꠡꠞꠣꠛ ꠛꠤꠟꠣꠅꠞꠣ ꠖꠥꠁꠅꠎꠘꠞꠦ ꠀꠘꠣꠁꠀ ꠔꠣꠘ ꠖꠞꠛꠣꠞꠞ ꠍꠣꠝꠘꠦ ꠀꠎꠤꠞ ꠇꠞꠟꠣ।
GEN 40:21 ꠔꠣꠁꠘ ꠡꠞꠣꠛ ꠛꠤꠟꠣꠅꠞꠣꠞꠦ ꠢꠤꠞꠛꠣꠞ ꠔꠣꠘ ꠇꠣꠝꠅ ꠟꠣꠉꠣꠁꠟꠣ, ꠢꠦ ꠚꠦꠞꠣꠃꠘꠞ ꠀꠔꠅ ꠢꠤꠞꠛꠣꠞ ꠙꠤꠀꠟꠣ ꠔꠥꠟꠤꠀ ꠖꠤꠟ।
GEN 40:22 ꠅꠁꠟꠦ ꠞꠥꠐꠤ ꠛꠣꠘꠣꠅꠞꠣꠞꠦ ꠉꠣꠍꠅ ꠟꠐꠇꠣꠁꠟꠣ। ꠁꠃꠍꠥꠚꠦ ꠎꠦꠟꠣ ꠇꠁꠍꠟꠣ, ꠄꠇ꠆ꠇꠦꠞꠦ ꠅꠃꠟꠣ ꠅꠁꠟ।
GEN 40:23 ꠔꠣ-ꠅ ꠁꠃꠍꠥꠚꠞ ꠇꠕꠣ ꠢꠤ ꠡꠞꠣꠛ ꠛꠤꠟꠣꠅꠞꠣꠞ ꠁꠀꠖ ꠞꠁꠟ ꠘꠣ, ꠢꠦ ꠚꠣꠃꠞꠤꠟꠤꠟ।
GEN 41:1 ꠄꠞ ꠙꠥꠞꠣ ꠖꠥꠁ ꠛꠞꠍ ꠛꠣꠖꠦ ꠚꠦꠞꠣꠃꠘꠦ ꠈꠥꠀꠛꠦ ꠖꠦꠈꠟꠣ। ꠔꠣꠁꠘ ꠖꠦꠈꠟꠣ, ꠘꠤꠟ ꠘꠖꠞ ꠉꠦꠍꠦ ꠔꠣꠁꠘ ꠃꠛꠣꠁ ꠞꠁꠍꠂꠘ,
GEN 41:2 ꠀꠞ ꠘꠤꠟ ꠘꠖ ꠕꠘꠦ ꠡꠣꠔꠉꠥ ꠡꠥꠘ꠆ꠖꠞ ꠔꠞꠔꠣꠎꠣ ꠉꠞꠥ ꠃꠑꠤꠀ ꠀꠁꠀ ꠘꠟ ꠛꠘꠞ ꠝꠣꠎꠦ ꠀꠐꠤꠀ ꠈꠣꠁꠞꠣ।
GEN 41:3 ꠄꠞꠛꠣꠖꠦ ꠖꠦꠈꠂꠘ, ꠀꠞꠅ ꠡꠣꠔꠉꠥ ꠢꠣꠟꠣꠇ ꠀꠞ ꠈꠛꠤꠍꠞ ꠟꠣꠈꠣꠘ ꠉꠞꠥ ꠃꠑꠤꠀ ꠀꠁꠀ, ꠘꠤꠟ ꠘꠖꠞ ꠙꠣꠞꠞ ꠢꠃ ꠉꠞꠥꠁꠘ꠆ꠔꠞ ꠇꠣꠍꠣꠔ ꠃꠛꠣꠁꠟ।
GEN 41:4 ꠢꠦꠡꠦ ꠅꠃ ꠢꠣꠟꠣꠇ ꠀꠞ ꠈꠛꠤꠍꠞ ꠟꠣꠈꠣꠘ ꠉꠞꠥꠁꠘ꠆ꠔꠦ ꠢꠃ ꠡꠥꠘ꠆ꠖꠞ ꠀꠞ ꠔꠞꠔꠣꠎꠣ ꠡꠣꠔꠅ ꠉꠞꠥꠞꠦ ꠈꠣꠁꠟꠤꠟ, ꠔꠦꠃ ꠚꠦꠞꠣꠃꠘꠞ ꠊꠥꠝ ꠜꠣꠋꠉꠤ ꠉꠦꠟ।
GEN 41:5 ꠛꠣꠖꠦ ꠔꠣꠁꠘ ꠢꠤꠞꠛꠣꠞ ꠊꠥꠝꠣꠁꠟꠣ ꠀꠞ ꠖꠥꠀꠞꠣ ꠈꠥꠀꠛꠦ ꠖꠦꠈꠟꠣ, ꠄꠇ ꠉꠝꠞ ꠒꠦꠐꠣꠔ ꠡꠣꠔꠉꠥ ꠙꠥꠡ꠆ꠐ ꠀꠞ ꠔꠣꠎꠣ ꠍꠠꠣ ꠛꠣꠞ ꠅꠁꠍꠦ।
GEN 41:6 ꠢꠦꠡꠦ ꠛꠣꠞ ꠅꠁꠟ, ꠙꠥꠛꠣꠟꠤ ꠛꠣꠔꠣꠡꠞ ꠉꠞꠝꠦ ꠢꠥꠇꠘꠣ ꠡꠣꠔꠉꠥ ꠇꠝ ꠙꠥꠡ꠆ꠐ ꠍꠥꠍꠣꠀꠟꠣ ꠍꠠꠣ,
GEN 41:7 ꠀꠞ ꠅꠃ ꠇꠝ ꠙꠥꠡ꠆ꠐ ꠍꠠꠣꠄ ꠢꠃ ꠡꠣꠔꠅ ꠙꠥꠡ꠆ꠐ-ꠔꠣꠎꠣ ꠍꠠꠣꠞꠦ ꠉꠤꠟꠤꠟꠣꠁꠟ। ꠛꠣꠖꠦ ꠚꠦꠞꠣꠃꠘꠞ ꠊꠥꠝ ꠜꠣꠋꠉꠤ ꠉꠦꠟ, ꠔꠣꠁꠘ ꠛꠥꠎꠟꠣ ꠎꠦꠘ ꠁꠔꠣ ꠔ ꠈꠥꠀꠛ।
GEN 41:8 ꠛꠤꠀꠘꠦ ꠔꠣꠘ ꠝꠘ ꠅꠡ꠆ꠕꠤꠞ ꠅꠁꠉꠦꠟ, ꠔꠦꠃ ꠝꠤꠡꠞ ꠖꠦꠡꠞ ꠢꠇꠟ ꠎꠣꠖꠥꠉꠤꠞ ꠀꠞ ꠙꠘ꠆ꠒꠤꠔꠞꠦ ꠈꠛꠞꠤꠀꠖꠤ ꠀꠘꠣꠁꠀ, ꠔꠣꠘ ꠈꠥꠀꠛ ꠔꠣꠞꠣꠞꠦ ꠢꠥꠘꠣꠁꠟꠣ, ꠅꠁꠟꠦ ꠄꠞꠣꠞ ꠇꠦꠃ ꠄꠞ ꠔꠣꠛꠤꠞ ꠇꠁꠔ ꠙꠣꠞꠟ ꠘꠣ।
GEN 41:9 ꠢꠦꠡꠦ ꠚꠦꠞꠣꠃꠘꠞ ꠢꠃ ꠡꠞꠣꠛ ꠛꠤꠟꠣꠅꠞꠣꠄ ꠇꠁꠟ, “ꠢꠥꠎꠥꠞ, ꠀꠁꠎ ꠀꠝꠣꠞ ꠄꠇ ꠖꠥꠡ ꠝꠘꠅ ꠅꠁꠍꠦ।
GEN 41:10 ꠛꠃꠔ ꠖꠤꠘ ꠀꠉꠦ ꠢꠥꠎꠥꠞꠦ ꠘꠤꠎꠞ ꠖꠥꠁ ꠉꠥꠟꠣꠝꠞ ꠃꠙꠞꠦ ꠉꠥꠍꠣ ꠇꠞꠍꠟꠣ, ꠔꠣꠁꠘ ꠀꠝꠣꠞꠦ ꠀꠞ ꠞꠥꠐꠤ ꠛꠣꠘꠣꠅꠞꠣꠞꠦ ꠛꠠ ꠎꠦꠟꠣꠞ ꠍꠣꠛꠞ ꠛꠣꠠꠤꠞ ꠎꠦꠟꠅ ꠕꠁꠍꠟꠣ।
GEN 41:11 ꠀꠞ ꠄꠇ ꠞꠣꠁꠔꠦ ꠀꠝꠞꠣ ꠖꠥꠁꠅꠎꠘꠦ ꠀꠟꠉ ꠀꠟꠉ ꠈꠥꠀꠛ ꠖꠦꠈꠟꠣꠝ, ꠖꠥꠁꠅ ꠈꠥꠀꠛꠞ ꠖꠥꠁ ꠟꠣꠈꠣꠘ ꠔꠣꠛꠤꠞ ꠀꠍꠤꠟ।
GEN 41:12 ꠁ ꠡꠝꠄ ꠎꠦꠟꠣꠞ ꠍꠣꠛꠞ, ꠄꠇ ꠁꠛꠞꠣꠘꠤ ꠎꠥꠀꠘ ꠉꠥꠟꠣꠝꠅ ꠅꠘꠅ ꠀꠍꠤꠟ। ꠔꠣꠞꠦ ꠀꠝꠞꠣꠞ ꠈꠥꠀꠛꠞ ꠇꠕꠣ ꠢꠥꠘꠣꠁꠟꠣꠝ, ꠀꠞ ꠢꠦ ꠀꠝꠞꠣꠞ ꠈꠥꠀꠛꠞ ꠔꠣꠛꠤꠞ ꠇꠁꠀ ꠖꠤꠟ।
GEN 41:13 ꠢꠦ ꠀꠝꠞꠣꠞ ꠈꠥꠀꠛꠞ ꠔꠣꠛꠤꠞ ꠎꠦꠟꠣ ꠇꠁꠍꠤꠟ, ꠄꠇ꠆ꠇꠦꠞꠦ ꠅꠃ ꠟꠣꠈꠣꠘꠃ ꠚꠟꠤꠟ। ꠢꠥꠎꠥꠞꠦ ꠀꠝꠣꠞꠦ ꠢꠤꠞꠛꠣꠞ ꠔꠣꠘ ꠇꠣꠝꠅ ꠟꠣꠉꠣꠁꠟꠣ, ꠅꠁꠟꠦ ꠞꠥꠐꠤ ꠛꠣꠘꠣꠅꠞꠣꠞꠦ ꠉꠣꠍꠅ ꠟꠐꠇꠣꠁꠟꠣ।”
GEN 41:14 ꠅꠃ ꠚꠦꠞꠣꠃꠘꠦ ꠁꠃꠍꠥꠚꠞꠦ ꠀꠘꠣꠞ ꠟꠣꠉꠤ ꠝꠣꠘꠥꠡ ꠙꠣꠑꠣꠁꠟꠣ, ꠔꠣꠞꠣ ꠉꠤꠀ ꠎꠟꠖꠤ ꠇꠞꠤ ꠎꠦꠟꠈꠣꠘꠣ ꠕꠘꠦ ꠔꠣꠘꠞꠦ ꠛꠣꠞ ꠇꠞꠤ ꠀꠘꠟꠣ। ꠁꠃꠍꠥꠚꠦ ꠖꠣꠠꠤ-ꠝꠥꠍ ꠇꠣꠝꠣꠁꠀ, ꠇꠣꠙꠠ ꠛꠖꠟꠣꠁꠀ ꠚꠦꠞꠣꠃꠘꠞ ꠖꠞꠛꠣꠞꠅ ꠀꠎꠤꠞ ꠅꠁꠟꠣ।
GEN 41:15 ꠚꠦꠞꠣꠃꠘꠦ ꠔꠣꠘꠞꠦ ꠇꠁꠟꠣ, “ꠀꠝꠤ ꠄꠇꠈꠣꠘ ꠈꠥꠀꠛ ꠖꠦꠈꠍꠤ, ꠅꠁꠟꠦ ꠄꠞ ꠔꠣꠛꠤꠞ ꠇꠦꠃ ꠇꠁꠔ ꠙꠣꠞꠦꠞ ꠘꠣ। ꠔꠦ ꠀꠝꠤ ꠢꠥꠘꠟꠣꠝ ꠎꠦꠘ ꠔꠥꠝꠣꠞ ꠉꠦꠍꠦ ꠈꠥꠀꠛ ꠢꠥꠘꠣꠁꠟꠦ, ꠔꠥꠝꠤ ꠄꠞ ꠔꠣꠛꠤꠞ ꠇꠁꠔꠣꠄ ꠙꠣꠞ।”
GEN 41:16 ꠁꠃꠍꠥꠚꠦ ꠎꠥꠀꠙ ꠖꠤꠟꠣ, “ꠢꠤ ꠈꠦꠝꠔꠣ ꠔ ꠀꠝꠣꠞ ꠘꠣꠄ, ꠀꠟ꠆ꠟꠣ ꠙꠣꠇꠦ ꠝꠢꠣꠞꠣꠎꠞ ꠖꠤꠟꠞ ꠡꠣꠘ꠆ꠔꠤꠞ ꠎꠥꠀꠙ ꠛꠣꠔꠣꠁꠀ ꠖꠤꠛꠣ ꠘꠦ।”
GEN 41:17 ꠚꠦꠞꠣꠃꠘꠦ ꠁꠃꠍꠥꠚꠞꠦ ꠇꠁꠟꠣ, “ꠈꠥꠀꠛꠦ ꠖꠦꠈꠟꠣꠝ, ꠀꠝꠤ ꠘꠤꠟ ꠘꠖꠞ ꠙꠣꠞꠅ ꠃꠛꠣꠁ ꠞꠁꠍꠤ।
GEN 41:18 ꠀꠞ ꠖꠦꠈꠤ, ꠉꠣꠋꠉꠅ ꠕꠘꠦ ꠡꠣꠔꠉꠥ ꠡꠥꠘ꠆ꠖꠞ, ꠔꠞꠔꠣꠎꠣ ꠉꠞꠥ ꠃꠑꠤꠀ ꠀꠁꠀ ꠘꠟ ꠛꠘꠞ ꠝꠣꠎꠦ ꠀꠐꠤꠀ ꠈꠣꠁꠞꠣ।
GEN 41:19 ꠄꠞꠛꠣꠖꠦ ꠀꠞꠅ ꠡꠣꠔꠉꠥ ꠉꠞꠥ ꠃꠑꠤꠀ ꠀꠁꠟ। ꠁꠔꠣ ꠢꠣꠟꠣꠇ ꠀꠞ ꠈꠛꠤꠍꠞ ꠟꠣꠈꠣꠘ, ꠝꠤꠡꠞ ꠖꠦꠡꠞ ꠇꠥꠘꠥ ꠈꠣꠘꠅ ꠁꠟꠣꠈꠣꠘ ꠛꠦ-ꠍꠥꠞꠔ ꠉꠞꠥ ꠇꠥꠘꠥ ꠖꠤꠘꠅ ꠖꠦꠈꠍꠤ ꠘꠣ।
GEN 41:20 ꠛꠣꠖꠦ ꠅꠃ ꠢꠣꠟꠣꠇ ꠀꠞ ꠛꠦ-ꠍꠥꠞꠔ ꠉꠞꠥꠁꠘ꠆ꠔꠦ, ꠀꠉꠞ ꠢꠤ ꠡꠣꠔꠅ ꠔꠞꠔꠣꠎꠣ ꠉꠞꠥꠞꠦ ꠈꠣꠁꠟꠤꠟ।
GEN 41:21 ꠅꠁꠟꠦ ꠔꠣꠞꠣ ꠁꠔꠣꠞꠦ ꠉꠤꠟꠣꠞ ꠛꠣꠖꠦ, ꠈꠣꠁꠍꠦ ꠇꠞꠤ ꠛꠥꠎꠣꠅ ꠉꠦꠟ ꠘꠣ, ꠇꠣꠞꠘ ꠔꠣꠞꠣ ꠀꠉꠞ ꠟꠣꠈꠣꠘꠃ ꠢꠣꠟꠣꠇ ꠀꠞ ꠛꠦ-ꠍꠥꠞꠔ ꠞꠁꠟ। ꠢꠦꠡꠦ ꠀꠝꠣꠞ ꠊꠥꠝ ꠜꠣꠋꠉꠤ ꠉꠦꠟ।
GEN 41:22 ꠛꠣꠖꠦ ꠀꠝꠤ ꠢꠤꠞꠛꠣꠞ ꠖꠦꠈꠟꠣꠝ, ꠉꠝꠞ ꠄꠇ ꠒꠦꠐꠣꠞ ꠝꠣꠎꠦ ꠡꠣꠔꠉꠥ ꠛꠠ ꠀꠞ ꠙꠥꠡ꠆ꠐ ꠍꠠꠣ ꠛꠣꠞ ꠅꠁꠟ।
GEN 41:23 ꠙꠥꠛꠣꠟꠤ ꠢꠣꠅꠀꠞ ꠉꠞꠝꠦ ꠢꠥꠇꠘꠣ ꠡꠣꠔꠉꠥ ꠇꠝ ꠙꠥꠡ꠆ꠐ ꠍꠥꠍꠣꠀꠟꠣ ꠍꠠꠣꠅ ꠛꠣꠞ ꠅꠁꠟ।
GEN 41:24 ꠀꠞ ꠅꠃ ꠡꠣꠔꠅ ꠍꠠꠣꠄ, ꠢꠃ ꠔꠣꠎꠣ ꠡꠣꠔꠅ ꠍꠠꠣꠞꠦ ꠉꠤꠟꠤꠟꠤꠟ। ꠁ ꠈꠥꠀꠛ ꠀꠝꠤ ꠎꠣꠖꠥꠉꠤꠞ ꠅꠇꠟꠞꠦ ꠢꠥꠘꠣꠁꠍꠟꠣꠝ, ꠅꠁꠟꠦ ꠇꠦꠃ ꠄꠞ ꠝꠣꠘꠤ ꠇꠁꠔ ꠙꠣꠞꠍꠦ ꠘꠣ।”
GEN 41:25 ꠁꠃꠍꠥꠚꠦ ꠚꠦꠞꠣꠃꠘꠞꠦ ꠇꠁꠟꠣ, “ꠢꠥꠎꠥꠞ, ꠁ ꠖꠥꠁꠅ ꠈꠥꠀꠛꠃ ꠀꠖꠔꠦ ꠄꠇ। ꠀꠟ꠆ꠟꠣꠄ ꠎꠦꠔꠣ ꠇꠞꠔꠣ ꠌꠣꠁꠞꠣ, ꠁꠔꠣ ꠀꠙꠘꠣꠞꠦ ꠖꠦꠈꠣꠁꠍꠂꠘ।
GEN 41:26 ꠅꠃ ꠔꠞꠔꠣꠎꠣ ꠡꠣꠔꠅ ꠉꠞꠥꠞ ꠝꠣꠘꠤ ꠡꠣꠔ ꠛꠞꠍ, ꠀꠞ ꠙꠥꠡ꠆ꠐ ꠡꠣꠔꠅ ꠉꠝꠞ ꠍꠠꠣꠞ ꠝꠣꠘꠤꠅ ꠡꠣꠔ ꠛꠞꠍ। ꠖꠥꠁꠅ ꠈꠥꠀꠛꠃ ꠄꠇ।
GEN 41:27 ꠀꠞ ꠢꠦꠡꠦ ꠃꠑꠤꠀ ꠀꠅꠀ ꠡꠣꠔꠅ ꠢꠣꠟꠣꠇ ꠀꠞ ꠛꠦ-ꠍꠥꠞꠔ ꠉꠞꠥ, ꠀꠞ ꠙꠥꠛꠣꠟꠤ ꠢꠣꠅꠀꠞ ꠉꠞꠝꠦ ꠢꠥꠇꠘꠣ ꠡꠣꠔꠅ ꠉꠝꠞ ꠍꠠꠣ, ꠄꠞꠣꠞ ꠝꠣꠘꠤ ꠅꠁꠟ, ꠀꠇꠣꠟꠞ ꠡꠣꠔ ꠛꠞꠍ।
GEN 41:28 ꠔꠦ ꠀꠟ꠆ꠟꠣꠄ ꠎꠦꠔꠣ ꠇꠞꠔꠣ ꠌꠣꠁꠞꠣ, ꠁꠔꠣ ꠝꠢꠣꠞꠣꠎꠞꠦ ꠖꠦꠈꠣꠁꠍꠂꠘ। ꠅꠃ ꠇꠕꠣꠃ ꠀꠝꠤ ꠀꠙꠘꠣꠞꠦ ꠀꠉꠦ ꠇꠁꠍꠤ।
GEN 41:29 ꠢꠥꠘꠃꠇ꠆ꠇꠣ, ꠢꠣꠞꠣ ꠝꠤꠡꠞ ꠖꠦꠡꠅ ꠡꠣꠔ ꠛꠞꠍ ꠈꠥꠛ ꠛꠦꠡꠤ ꠚꠡꠟ ꠚꠟꠤꠛ।
GEN 41:30 ꠄꠞꠛꠣꠖꠦꠃ ꠀꠁꠛ ꠀꠇꠣꠟꠞ ꠡꠣꠔ ꠛꠞꠍ। ꠔꠦꠃ ꠀꠉꠞ ꠢꠤ ꠛꠦꠡꠤ ꠚꠡꠟꠞ ꠇꠕꠣ ꠝꠣꠘꠡꠦ ꠚꠣꠃꠞꠤꠟꠤꠛꠣ, ꠀꠞ ꠀꠇꠣꠟꠦ ꠖꠦꠡꠞꠦ ꠡꠦꠡ ꠇꠞꠤ ꠖꠤꠛ।
GEN 41:31 ꠅꠃ ꠀꠇꠣꠟꠞ ꠖꠞꠥꠘ, ꠀꠉꠞ ꠢꠤ ꠚꠡꠟꠞ ꠇꠕꠣ ꠝꠣꠘꠡꠞ ꠝꠘꠅ ꠞꠁꠔ ꠘꠣꠄ। ꠁ ꠀꠇꠣꠟ ꠅꠁꠛ ꠈꠥꠛ ꠛꠦꠎꠥꠁꠔꠣ ꠝꠍꠤꠛꠔꠞ।
GEN 41:32 ꠁ ꠈꠥꠀꠛ ꠀꠙꠘꠣꠞꠦ ꠖꠥꠁꠛꠣꠞ ꠖꠦꠈꠣꠘꠤꠞ ꠝꠣꠘꠤ ꠅꠁꠟ, ꠀꠟ꠆ꠟꠣꠄ ꠁ ꠖꠡꠣ ꠊꠐꠣꠁꠛꠣ, ꠄꠇ꠆ꠇꠦꠞꠦ ꠑꠤꠇ ꠇꠞꠤꠟꠣꠁꠍꠂꠘ, ꠁꠔꠣ ꠈꠥꠛ ꠎꠟꠖꠤ ꠇꠞꠤꠃ ꠊꠐꠤꠛ।
GEN 41:33 ꠅꠈꠘ ꠢꠥꠎꠥꠞꠦ ꠄꠇꠎꠘ ꠌꠔꠥꠞ-ꠛꠥꠎꠖꠣꠞ ꠙꠘ꠆ꠒꠤꠔ ꠝꠣꠘꠡꠞꠦ ꠔꠥꠇꠣꠁꠀ, ꠄꠘ ꠉꠦꠍꠦ ꠝꠤꠡꠞꠞꠦ ꠡꠙꠤ ꠖꠦꠃꠇ꠆ꠇꠣ।
GEN 41:34 ꠀꠞ ꠀꠙꠘꠦ ꠅꠃꠟꠣ ꠇꠞꠃꠇ꠆ꠇꠣ, ꠖꠦꠡꠅ ꠀꠙꠘꠣꠞ ꠇꠞ꠆ꠝꠌꠣꠞꠤ ꠟꠣꠉꠣꠁꠘ, ꠅꠃ ꠡꠣꠔ ꠛꠍꠞꠦ ꠎꠦꠛꠟꠣ ꠈꠥꠛ ꠛꠦꠡꠤ ꠚꠡꠟ ꠚꠟꠛ, ꠁ ꠡꠝꠄ ꠔꠣꠞꠣ ꠄꠞ ꠙꠣꠌ ꠛꠣꠐꠞ ꠄꠇ ꠛꠣꠐ ꠖꠟꠣ ꠇꠞꠛꠣ।
GEN 41:35 ꠔꠣꠞꠣ ꠅꠃ ꠡꠥꠖꠤꠘꠞ ꠛꠍꠞꠞ ꠗꠣꠘ ꠖꠟꠣ ꠇꠞꠤꠀ ꠢꠥꠎꠥꠞꠞ ꠖꠈꠟꠦ, ꠛꠣꠎꠣꠞꠦ ꠛꠣꠎꠣꠞꠦ ꠉꠥꠖꠣꠝꠅ ꠜꠞꠤꠀ ꠕꠃꠇ ꠀꠞ ꠢꠦꠚꠣꠎꠔ ꠇꠞꠃꠇ।
GEN 41:36 ꠡꠣꠔ ꠛꠞꠍ ꠗꠞꠤ ꠝꠤꠡꠞꠅ ꠎꠦ ꠀꠇꠣꠟ ꠅꠁꠛ, ꠢꠃ ꠀꠇꠣꠟꠞ ꠟꠣꠉꠤ ꠗꠣꠘ ꠎꠝꠣꠁꠀ ꠞꠣꠈꠛꠣ, ꠔꠦꠃ ꠀꠇꠣꠟꠦ ꠖꠦꠡꠞ ꠝꠣꠘꠥꠡ ꠝꠞꠔꠣ ꠘꠣꠄ।”
GEN 41:37 ꠁꠃꠍꠥꠚꠞ ꠁ ꠝꠣꠔ, ꠚꠦꠞꠣꠃꠘ ꠀꠞ ꠔꠣꠘ ꠖꠞꠛꠣꠞꠞ ꠢꠇꠟꠞ ꠉꠦꠍꠦ ꠈꠥꠛ ꠜꠣꠟꠣ ꠝꠘꠅ ꠅꠁꠟ।
GEN 41:38 ꠚꠦꠞꠣꠃꠘꠦ ꠔꠣꠘ ꠃꠎꠤꠞ-ꠘꠣꠎꠤꠞ ꠅꠇꠟꠞꠦ ꠇꠁꠟꠣ, “ꠁ ꠛꠦꠌꠣꠠꠣꠞ ꠟꠣꠈꠣꠘ ꠀꠟ꠆ꠟꠣꠞ ꠞꠥꠢꠀꠟꠣ ꠝꠣꠘꠥꠡ ꠀꠝꠤ ꠇꠥꠀꠁ ꠔꠥꠇꠣꠁꠀ ꠙꠣꠁꠝꠥ?”
GEN 41:39 ꠅꠃ ꠚꠦꠞꠣꠃꠘꠦ ꠁꠃꠍꠥꠚꠞꠦ ꠇꠁꠟꠣ, “ꠀꠟ꠆ꠟꠣꠄ ꠎꠦꠛꠟꠣ ꠔꠥꠝꠣꠞ ꠉꠦꠍꠦ ꠁꠔꠣ ꠢꠇ꠆ꠇꠟꠔꠣ ꠎꠣꠁꠞ ꠇꠞꠍꠂꠘ, ꠔꠦ ꠔꠥꠝꠣꠞ ꠟꠣꠈꠣꠘ ꠛꠥꠎꠖꠣꠞ ꠀꠞ ꠛꠤꠛꠦꠇꠝꠣꠘ ꠔ ꠀꠞ ꠇꠦꠃ ꠘꠣꠄ।
GEN 41:40 ꠅꠈꠘ ꠞꠣꠎꠛꠣꠠꠤꠞ ꠢꠇ꠆ꠇꠟꠔꠣ ꠔꠥꠝꠤꠃ ꠌꠣꠟꠣꠁꠛꠣꠄ। ꠀꠝꠣꠞ ꠢꠇꠟ ꠙ꠆ꠞꠎꠣ ꠔꠥꠝꠣꠞ ꠢꠥꠇꠥꠝꠦ ꠌꠟꠛꠣ। ꠈꠣꠟꠤ ꠛꠣꠖꠡꠣꠞ ꠔꠈ꠆ꠔꠅ, ꠀꠝꠤ ꠔꠥꠝꠣꠞ ꠃꠙꠞꠦ ꠕꠣꠇꠝꠥ।”
GEN 41:41 ꠔꠣꠁꠘ ꠁꠃꠍꠥꠚꠞꠦ ꠇꠁꠟꠣ, “ꠢꠥꠘꠅ, ꠀꠝꠤ ꠀꠡ꠆ꠔꠣ ꠝꠤꠡꠞ ꠖꠦꠡ ꠔꠥꠝꠣꠞ ꠀꠔꠅ ꠡꠙꠤ ꠖꠤꠟꠣꠝ।”
GEN 41:42 ꠀꠞ ꠚꠦꠞꠣꠃꠘꠦ ꠘꠤꠎꠞ ꠀꠋꠉꠥꠁꠟ ꠕꠣꠇꠤ ꠛꠣꠖꠡꠣꠁ ꠡꠤꠟꠞ ꠀꠋꠐꠤ ꠈꠥꠟꠤꠀ ꠁꠃꠍꠥꠚꠞ ꠀꠔꠅ ꠚꠤꠘ꠆ꠖꠣꠁꠟꠣ, ꠔꠣꠘ ꠉꠟꠣꠔ ꠡꠥꠘꠣꠞ ꠢꠣꠞ ꠖꠤꠟꠣ ꠀꠞ ꠖꠣꠝꠤ ꠇꠣꠙꠠꠞ ꠡꠣꠖꠣ ꠟꠦꠛꠣꠍꠅ ꠚꠤꠘ꠆ꠖꠣꠁꠟꠣ।
GEN 41:43 ꠛꠣꠖꠦ ꠔꠣꠁꠘ ꠁꠃꠍꠥꠚꠞꠦ ꠔꠣꠘ ꠞꠣꠁꠎ꠆ꠎꠞ ꠖꠥꠁ ꠘꠝ꠆ꠛꠞ ꠞꠕꠞ ꠝꠣꠎꠦ ꠔꠥꠟꠟꠣ ꠀꠞ ꠁꠃꠍꠥꠚꠞ ꠀꠉꠦ ꠀꠉꠦ ꠄꠟꠣꠘ ꠇꠞꠣ ꠅꠁꠟ, “ꠙꠞꠘꠣꠝ ꠇꠞꠅ! ꠙꠞꠘꠣꠝ ꠇꠞꠅ!” ꠅꠃ ꠟꠣꠈꠣꠘ ꠔꠣꠁꠘ ꠁꠃꠍꠥꠚꠞ ꠃꠙꠞꠦ ꠀꠡ꠆ꠔꠣ ꠝꠤꠡꠞ ꠖꠦꠡꠞ ꠜꠣꠞ ꠡꠝꠎꠣꠁ ꠖꠤꠟꠣ।
GEN 41:44 ꠚꠦꠞꠣꠃꠘꠦ ꠁꠃꠍꠥꠚꠞꠦ ꠇꠁꠟꠣ, “ꠀꠝꠤꠃ ꠚꠦꠞꠣꠃꠘ, ꠝꠤꠡꠞꠞ ꠛꠣꠖꠡꠣ! ꠅꠁꠟꠦ ꠔꠥꠝꠣꠞ ꠢꠥꠇꠥꠝ ꠍꠣꠠꠣ, ꠀꠡ꠆ꠔꠣ ꠝꠤꠡꠞ ꠖꠦꠡꠅ ꠇꠦꠃ ꠞꠥꠝꠣꠅ ꠟꠣꠠꠣꠁꠔ ꠙꠣꠞꠔ ꠘꠣꠄ।”
GEN 41:45 ꠚꠦꠞꠣꠃꠘꠦ ꠁꠃꠍꠥꠚꠞ ꠘꠄꠀ ꠘꠣꠝ ꠞꠣꠈꠟꠣ, ꠡꠣꠚꠘꠕ-ꠙꠣꠘꠦꠢ। ꠔꠣꠁꠘ ꠅꠃꠘ ꠝꠘ꠆ꠖꠤꠞꠞ ꠛꠣꠛꠘ-ꠑꠣꠇꠥꠞ ꠙꠥꠐꠤꠚꠦꠞꠣꠞ ꠙꠥꠠꠤ ꠀꠡꠘꠔꠞꠦ ꠁꠃꠍꠥꠚꠞ ꠟꠉꠦ ꠛꠤꠀ ꠖꠤꠟꠣ ꠀꠞ ꠁꠃꠍꠥꠚꠦ ꠀꠡ꠆ꠔꠣ ꠝꠤꠡꠞ ꠖꠦꠡꠅ ꠊꠥꠞꠣꠊꠥꠞꠤ ꠇꠞꠣꠔ ꠟꠣꠉꠟꠣ।
GEN 41:46 ꠁꠃꠍꠥꠚꠦ ꠔꠤꠡ ꠛꠞꠍ ꠛꠄꠅꠡꠅ, ꠝꠤꠡꠞꠞ ꠛꠣꠖꠡꠣ ꠚꠦꠞꠣꠃꠘꠞ ꠇꠣꠝꠅ ꠟꠣꠉꠟꠣ, ꠔꠣꠁꠘ ꠚꠦꠞꠣꠃꠘꠞ ꠖꠞꠛꠣꠞ ꠕꠘꠦ ꠛꠣꠞ ꠅꠁꠀ ꠖꠦꠡꠞ ꠢꠇꠟ ꠎꠣꠉꠣ ꠍꠚꠞ ꠇꠞꠟꠣ।
GEN 41:47 ꠀꠞ ꠛꠦꠡꠤ ꠚꠡꠟꠞ ꠅꠃ ꠡꠣꠔ ꠛꠍꠞꠦ ꠖꠦꠡꠅ ꠛꠃꠔ ꠚꠡꠟ ꠚꠟꠤꠟ।
GEN 41:48 ꠔꠦꠃ ꠁꠃꠍꠥꠚꠦ ꠁ ꠡꠥꠖꠤꠘꠞ ꠡꠣꠔ ꠛꠍꠞꠦ ꠝꠤꠡꠞꠞ ꠢꠇꠟ ꠗꠣꠘ, ꠛꠣꠎꠣꠞꠞ ꠉꠥꠖꠣꠝ ꠊꠞꠣꠁꠘ꠆ꠔꠅ ꠎꠝꠣ ꠇꠞꠣꠁꠀ ꠕꠁꠟꠣ। ꠔꠣꠁꠘ ꠢꠇ꠆ꠇꠟ ꠛꠣꠎꠣꠞꠞ ꠌꠣꠁꠞꠅ ꠉꠣꠟꠣꠞ ꠗꠣꠘ ꠅꠇꠟ, ꠢꠃ ꠛꠣꠎꠣꠞꠞ ꠉꠥꠖꠣꠝꠅ ꠎꠝꠣꠁꠟꠣ।
GEN 41:49 ꠔꠣꠁꠘ ꠖꠞꠤꠀꠞ ꠛꠣꠟꠥꠞ ꠟꠣꠈꠣꠘ ꠅꠃꠟꠣ ꠛꠦꠢꠤꠡꠣꠛ ꠗꠣꠘ ꠖꠟꠣ ꠇꠞꠟꠣ ꠎꠦꠘ, ꠁꠔꠣ ꠀꠞ ꠝꠣꠙꠤꠀ ꠚꠥꠠꠣꠁꠔꠣ ꠙꠣꠞꠟꠣ ꠘꠣ, ꠔꠦꠃ ꠝꠣꠙꠣ-ꠝꠣꠙꠤ ꠇꠞꠣ ꠛꠣꠖ ꠖꠤꠟꠣꠁꠟꠣ।
GEN 41:50 ꠀꠞ ꠀꠇꠣꠟꠞ ꠀꠉꠦ ꠅꠃꠘ ꠝꠘ꠆ꠖꠤꠞꠞ ꠛꠣꠛꠘ-ꠑꠣꠇꠥꠞ, ꠙꠥꠐꠤꠚꠦꠞꠣꠞ ꠙꠥꠠꠤ ꠀꠡꠘꠔꠞ ꠙꠦꠐꠅ ꠁꠃꠍꠥꠚꠞ ꠖꠥꠁ ꠙꠥꠀ ꠅꠁꠟꠣ।
GEN 41:51 ꠁꠃꠍꠥꠚꠦ ꠔꠣꠘ ꠛꠠ ꠙꠥꠀꠞ ꠘꠣꠝ ꠞꠣꠈꠟꠣ ꠝꠣꠘꠡꠣ [ꠝꠣꠘꠤ, ꠚꠣꠃꠞꠤꠟꠣꠅꠀ]। ꠔꠣꠁꠘ ꠇꠁꠟꠣ, “ꠀꠟ꠆ꠟꠣꠄ ꠀꠝꠣꠞ ꠢꠇꠟ ꠔꠇꠟꠤꠚ ꠀꠞ ꠛꠣꠚꠞ ꠛꠣꠠꠤꠞ ꠢꠇ꠆ꠇꠟꠔꠣ, ꠀꠝꠣꠞ ꠖꠤꠟ ꠕꠘꠦ ꠚꠣꠃꠞꠣꠁꠟꠣ।”
GEN 41:52 ꠛꠣꠖꠦ ꠔꠣꠘ ꠖꠥꠍꠞꠣ ꠙꠥꠀꠞ ꠘꠣꠝ ꠞꠣꠈꠟꠣ ꠀꠚꠞꠣꠁꠝ [ꠝꠣꠘꠤ, ꠚꠟꠖꠣꠞ]। ꠔꠣꠁꠘ ꠇꠁꠟꠣ, “ꠀꠝꠤ ꠎꠦ ꠖꠦꠡꠅ ꠔꠇꠟꠤꠚ ꠙꠣꠁꠍꠤ, ꠢꠃ ꠖꠦꠡꠅꠃ ꠀꠟ꠆ꠟꠣꠄ ꠀꠝꠣꠞꠦ ꠚꠟꠖꠣꠞ ꠛꠣꠘꠣꠁꠟꠣ।”
GEN 41:53 ꠀꠞ ꠝꠤꠡꠞ ꠖꠦꠡꠞ ꠈꠥꠛ ꠛꠦꠡꠤ ꠚꠡꠟꠞ ꠢꠤ ꠡꠣꠔ ꠛꠞꠍ ꠙꠥꠞꠤꠉꠦꠟ।
GEN 41:54 ꠔꠦꠃ ꠁꠃꠍꠥꠚꠦ ꠎꠦꠟꠣ ꠇꠁꠍꠟꠣ, ꠅꠃꠟꠣ ꠀꠇꠣꠟꠞ ꠢꠃ ꠡꠣꠔ ꠛꠞꠍ ꠀꠁꠀ ꠀꠎꠤꠟ। ꠄꠞ ꠟꠉꠦ ꠇꠣꠘ꠆ꠖꠣ-ꠇꠣꠍꠣꠞ ꠢꠇꠟ ꠖꠦꠡꠅ-ꠅ ꠘꠤꠖꠣꠘ ꠖꠦꠈꠣ ꠖꠤꠟ ꠅꠁꠟꠦ ꠝꠤꠡꠞꠞ ꠇꠥꠘꠥ ꠎꠣꠉꠣꠔ ꠈꠣꠘꠤ-ꠈꠥꠞꠣꠇꠤꠞ ꠅꠜꠣꠛ ꠅꠁꠟ ꠘꠣ।
GEN 41:55 ꠢꠦꠡꠦ ꠀꠡ꠆ꠔꠣ ꠝꠤꠡꠞ ꠖꠦꠡꠅ ꠀꠇꠣꠟ ꠖꠦꠈꠣ ꠖꠤꠟꠦ, ꠙ꠆ꠞꠎꠣ ꠅꠇꠟꠦ ꠀꠁꠀ ꠚꠦꠞꠣꠃꠘꠞ ꠉꠦꠍꠦ ꠈꠣꠘꠤ ꠝꠣꠉꠤꠟꠣ, ꠔꠦꠃ ꠚꠦꠞꠣꠃꠘꠦ ꠇꠁꠟꠣ, “ꠔꠥꠝꠞꠣ ꠁꠃꠍꠥꠚꠞ ꠉꠦꠍꠦ ꠎꠣꠅ। ꠄꠁꠘ ꠎꠦꠟꠣ ꠇꠂꠘ, ꠑꠤꠇꠃ ꠅꠃꠟꠣ ꠇꠞꠅ।”
GEN 41:56 ꠁ ꠀꠇꠣꠟ ꠀꠡ꠆ꠔꠣ ꠖꠦꠡ ꠎꠥꠠꠤ ꠖꠦꠈꠣ ꠖꠤꠟ। ꠛꠣꠖꠦ ꠀꠞꠅ ꠛꠦꠎꠥꠁꠔꠣ ꠅꠀꠄ ꠁꠃꠍꠥꠚꠦ ꠢꠇꠟ ꠎꠣꠉꠣꠞ ꠉꠥꠖꠣꠝ ꠊꠞꠣꠁꠘ ꠈꠥꠟꠤꠀ, ꠝꠤꠡꠞꠤ ꠅꠇꠟꠞ ꠉꠦꠍꠦ ꠗꠣꠘ ꠛꠦꠌꠣꠔ ꠟꠣꠉꠟꠣ।
GEN 41:57 ꠀꠡ꠆ꠔꠣ ꠖꠥꠘꠤꠀꠁꠔ ꠘꠤꠖꠣꠘ ꠖꠦꠈꠣ ꠖꠤꠟ ꠀꠞ ꠢꠇꠟ ꠖꠦꠡꠞ ꠝꠣꠘꠡꠦ ꠗꠣꠘ ꠈꠞꠤꠖ ꠇꠞꠣꠞ ꠟꠣꠉꠤ ꠝꠤꠡꠞ ꠖꠦꠡꠅ ꠁꠃꠍꠥꠚꠞ ꠉꠦꠍꠦ ꠀꠁꠟꠣ।
GEN 42:1 ꠁꠀꠇꠥꠛꠦꠅ ꠢꠥꠘꠟꠣ ꠝꠤꠡꠞ ꠖꠦꠡꠅ ꠗꠣꠘ ꠀꠍꠦ, ꠅꠃ ꠔꠣꠘ ꠙꠥꠀꠂꠘ꠆ꠔꠞꠦ ꠇꠁꠟꠣ, “ꠔꠥꠝꠞꠣ ꠄꠉꠥꠄ ꠀꠞꠉꠥꠞ ꠝꠥꠈꠞ ꠛꠣꠄ ꠌꠣꠁ ꠞꠁꠍ ꠇꠦꠘꠦ?
GEN 42:2 ꠢꠥꠘꠅ, ꠀꠝꠤ ꠢꠥꠘꠍꠤ, ꠝꠤꠡꠞ ꠖꠦꠡꠅ ꠗꠣꠘ ꠀꠍꠦ, ꠔꠥꠝꠞꠣ ꠢꠘꠅ ꠉꠤꠀ ꠀꠝꠞꠣꠞ ꠟꠣꠉꠤ ꠇꠤꠍꠥ ꠗꠣꠘ ꠟꠁꠀ ꠀꠘꠅ, ꠔꠦꠃ ꠀꠝꠞꠣ ꠁ ꠝꠞꠘ ꠕꠣꠇꠤꠀ ꠎꠣꠘꠦ ꠛꠣꠌꠝꠥ।”
GEN 42:3 ꠅꠃ ꠁꠃꠍꠥꠚꠞ ꠖꠡꠅ ꠜꠣꠁꠄ ꠗꠣꠘ ꠟꠁꠀ ꠀꠘꠣꠞ ꠟꠣꠉꠤ ꠝꠤꠡꠞꠅ ꠉꠦꠟꠣ।
GEN 42:4 ꠅꠁꠟꠦ ꠁꠀꠇꠥꠛꠦ ꠁꠃꠍꠥꠚꠞ ꠀꠙꠘ ꠝꠣʼꠞ ꠙꠦꠐꠞ ꠜꠣꠁ ꠛꠤꠘ-ꠁꠀꠝꠤꠘꠞꠦ ꠔꠣꠞꠣꠞ ꠟꠉꠦ ꠎꠣꠁꠔꠦ ꠖꠤꠟꠣ ꠘꠣ, ꠔꠣꠁꠘ ꠇꠁꠟꠣ, ꠄꠞ ꠇꠥꠘꠥ ꠛꠤꠙꠖ ꠅꠁꠎꠤꠔ ꠙꠣꠞꠦ।
GEN 42:5 ꠗꠣꠘ ꠈꠞꠤꠖꠞ ꠟꠣꠉꠤ ꠇꠦꠘꠣꠘ ꠖꠦꠡ ꠕꠣꠇꠤ ꠎꠦꠞꠣ ꠝꠤꠡꠞꠅ ꠉꠦꠟ, ꠁꠍꠞꠣꠁꠟꠞ ꠙꠥꠀꠂꠘꠅ ꠔꠣꠞꠣꠞ ꠖꠟꠞ ꠟꠉꠅ ꠅꠁꠀ ꠉꠦꠟꠣ, ꠇꠣꠞꠘ ꠇꠦꠘꠣꠘ ꠖꠦꠡꠅ-ꠅ ꠀꠇꠣꠟ ꠀꠍꠤꠟ।
GEN 42:6 ꠁ ꠡꠝꠄ ꠁꠃꠍꠥꠚꠃ ꠀꠍꠟꠣ ꠝꠤꠡꠞ ꠖꠦꠡꠞ ꠢꠇ꠆ꠇꠟꠔꠣꠞ ꠝꠣꠟꠤꠇ। ꠖꠦꠡꠞ ꠢꠇꠟ ꠝꠣꠘꠡꠞ ꠉꠦꠍꠦ ꠔꠣꠁꠘꠃ ꠗꠣꠘ ꠛꠦꠌꠔꠣ। ꠔꠦꠃ ꠁꠃꠍꠥꠚꠞ ꠜꠣꠁꠀꠁꠘꠅ ꠔꠣꠘ ꠉꠦꠍꠦ ꠉꠤꠀ, ꠔꠣꠞꠣ ꠝꠣꠕꠣꠞꠦ ꠝꠣꠐꠤꠔ ꠟꠣꠉꠣꠁꠀ ꠔꠣꠘꠞꠦ ꠁꠎ꠆ꠎꠔ ꠇꠞꠟꠣ।
GEN 42:7 ꠁꠃꠍꠥꠚꠦ ꠔꠣꠘ ꠜꠣꠁꠀꠁꠘ꠆ꠔꠞꠦ ꠖꠦꠈꠤꠀꠃ ꠌꠤꠘꠤꠟꠤꠟꠣ, ꠅꠁꠟꠦ ꠘꠣ ꠌꠤꠘꠣꠞ ꠜꠣꠘ ꠇꠞꠤꠀ, ꠔꠣꠁꠘ ꠈꠥꠛ ꠇꠠꠣ ꠉꠟꠣꠄ ꠔꠣꠞꠣꠞꠦ ꠎꠤꠇꠣꠁꠟꠣ, “ꠔꠥꠝꠞꠣ ꠇꠥꠀꠁ ꠕꠣꠇꠤ ꠀꠁꠍ?” ꠔꠣꠞꠣ ꠇꠁꠟꠣ, “ꠀꠝꠞꠣ ꠇꠦꠘꠣꠘ ꠖꠦꠡ ꠕꠘꠦ ꠀꠁꠍꠤ, ꠗꠣꠘ ꠘꠤꠛꠣꠞ ꠟꠣꠉꠤ।”
GEN 42:8 ꠁꠃꠍꠥꠚꠦ ꠔꠣꠘ ꠜꠣꠁꠀꠁꠘꠞꠦ ꠢꠣꠍꠣꠞꠞ ꠌꠤꠘꠟꠦꠅ, ꠜꠣꠁꠀꠁꠘ꠆ꠔꠦ ꠔꠣꠘꠞꠦ ꠌꠤꠘꠟꠣ ꠘꠣ।
GEN 42:9 ꠔꠣꠁꠘ ꠄꠞꠣꠞꠦ ꠟꠁꠀ ꠈꠥꠀꠛꠦ ꠎꠦꠔꠣ ꠖꠦꠈꠍꠟꠣ, ꠢꠃ ꠇꠕꠣ ꠔꠣꠘ ꠝꠘꠅ ꠅꠁꠟ। ꠅꠃ ꠔꠣꠁꠘ ꠄꠞꠣꠞꠦ ꠇꠁꠟꠣ, “ꠔꠥꠝꠞꠣ ꠔ ꠉꠥꠁꠀ! ꠀꠝꠞꠣꠞ ꠖꠦꠡꠞ ꠚꠣꠇ-ꠚꠥꠇꠞ ꠅꠔꠣ ꠖꠦꠈꠣꠔ ꠀꠁꠍ।”
GEN 42:10 ꠔꠣꠞꠣ ꠇꠁꠟꠣ, “ꠎꠤ ꠘꠣ ꠢꠥꠎꠥꠞ, ꠀꠙꠘꠣꠞ ꠁ ꠉꠥꠟꠣꠝ ꠅꠇꠟꠦ ꠈꠣꠟꠤ ꠗꠣꠘ ꠟꠅꠀꠔ ꠀꠁꠍꠤ।
GEN 42:11 ꠀꠝꠞꠣ ꠔ ꠢꠇꠟ ꠄꠇ ꠛꠣꠚꠞ ꠀꠅꠟꠣꠖ ꠀꠞ ꠍꠣꠁꠌ꠆ꠌꠣ ꠝꠣꠘꠥꠡ; ꠀꠙꠘꠣꠞ ꠁ ꠉꠥꠟꠣꠝ ꠅꠇꠟ ꠇꠥꠘꠥ ꠉꠥꠁꠀ ꠘꠣꠄ।”
GEN 42:12 ꠁꠃꠍꠥꠚꠦ ꠢꠤꠞꠛꠣꠞ ꠔꠣꠞꠣꠞꠦ ꠇꠁꠟꠣ, “ꠘꠣ, ꠘꠣ, ꠔꠥꠝꠞꠣ ꠀꠝꠣꠞ ꠖꠦꠡꠞ ꠚꠣꠇ-ꠚꠥꠇꠞ ꠖꠦꠈꠣꠔ ꠀꠁꠍ।”
GEN 42:13 ꠔꠣꠞꠣ ꠇꠁꠟꠣ, “ꠀꠙꠘꠣꠞ ꠉꠥꠟꠣꠝ ꠅꠇꠟ, ꠢꠇꠟꠦ ꠝꠤꠟꠤꠀ ꠛꠣꠞꠅ ꠜꠣꠁ। ꠀꠝꠞꠣ ꠇꠦꠘꠣꠘ ꠖꠦꠡꠞ ꠄꠇ ꠛꠣꠚꠞ ꠀꠅꠟꠣꠖ। ꠀꠝꠞꠣꠞ ꠢꠥꠞꠥ ꠜꠣꠁ ꠅꠈꠘ ꠛꠣꠛꠣꠞ ꠉꠦꠍꠦ ꠞꠁꠍꠦ, ꠀꠞ ꠀꠞꠇ ꠜꠣꠁ ꠘꠣꠄ।”
GEN 42:14 ꠁꠃꠍꠥꠚꠦ ꠔꠣꠞꠣꠞꠦ ꠇꠁꠟꠣ, “ꠘꠣ, ꠘꠣ, ꠀꠝꠤ ꠑꠤꠇꠃ ꠇꠁꠍꠤ, ꠔꠥꠝꠞꠣ ꠉꠥꠁꠀꠃ!
GEN 42:15 ꠔꠦ ꠔꠥꠝꠞꠣꠞ ꠙꠞꠤꠇ꠆ꠇꠣ ꠅꠟꠣꠃ ꠅꠁꠎꠣꠃꠇ: ꠀꠝꠤ ꠚꠦꠞꠣꠃꠘꠞ ꠎꠣꠘꠞ ꠇꠍꠝ ꠇꠞꠤ ꠇꠁꠀꠞ, ꠔꠥꠝꠞꠣꠞ ꠢꠥꠞꠥ ꠜꠣꠁ ꠅꠘꠅ ꠘꠣ ꠀꠁꠟꠦ, ꠔꠥꠝꠞꠣꠅ ꠁꠘ ꠕꠘꠦ ꠍꠣꠠꠣ ꠙꠣꠁꠔꠣꠄ ꠘꠣꠄ।
GEN 42:16 ꠔꠥꠝꠞꠣꠞ ꠄꠇꠎꠘꠞꠦ ꠙꠣꠑꠣꠁꠀ, ꠔꠥꠝꠞꠣꠞ ꠢꠃ ꠜꠣꠁꠞꠦ ꠀꠘꠣꠅ ꠀꠞ ꠛꠣꠇꠤ ꠢꠇꠟꠦ ꠛꠘ꠆ꠖꠤ ꠞꠅ। ꠅꠃ ꠙꠞꠤꠇ꠆ꠇꠣꠄ ꠔꠥꠝꠞꠣꠞ ꠝꠣꠔꠞ ꠢꠣꠍꠣ-ꠝꠤꠍꠣ ꠛꠥꠎꠝꠥ। ꠔꠣꠞꠦ ꠘꠣ ꠀꠘꠟꠦ, ꠀꠝꠤ ꠚꠦꠞꠣꠃꠘꠞ ꠎꠣꠘꠞ ꠇꠍꠝ ꠇꠞꠤ ꠇꠁꠀꠞ, ꠔꠥꠝꠞꠣ ꠘꠤꠌꠄ ꠉꠥꠁꠀ!”
GEN 42:17 ꠀꠞ ꠁꠃꠍꠥꠚꠦ ꠔꠤꠘ ꠖꠤꠘ ꠔꠣꠞꠣꠞꠦ ꠀꠎꠔ ꠈꠣꠘꠣꠔ ꠛꠘ꠆ꠖꠤ ꠇꠞꠤ ꠕꠁꠟꠣ।
GEN 42:18 ꠢꠦꠡꠦ ꠔꠤꠘ ꠖꠤꠘꠞ ꠖꠤꠘ, ꠁꠃꠍꠥꠚꠦ ꠔꠣꠞꠣꠞꠦ ꠇꠁꠟꠣ, “ꠢꠥꠘꠅ, ꠀꠝꠤ ꠔ ꠀꠟ꠆ꠟꠣꠞꠦ ꠒꠞꠣꠁ, ꠔꠥꠝꠞꠣ ꠛꠣꠌꠔꠦ ꠌꠣꠁꠟꠦ, ꠀꠝꠤ ꠎꠦꠟꠣ ꠇꠁ, ꠅꠃꠟꠣ ꠇꠞꠅ।
GEN 42:19 ꠔꠥꠝꠞꠣ ꠢꠣꠍꠣꠞꠞ ꠍꠣꠁꠌ꠆ꠌꠣ ꠝꠣꠘꠥꠡ ꠅꠁꠟꠦ, ꠔꠥꠝꠞꠣꠞ ꠄꠇ ꠜꠣꠁ ꠀꠎꠔꠅ ꠕꠣꠇꠃꠇ ꠀꠞ ꠛꠣꠇꠤ ꠢꠇꠟꠦ ꠔꠥꠝꠞꠣꠞ ꠀꠇꠣꠟꠤ ꠙꠞꠤꠛꠣꠞꠞ ꠟꠣꠉꠤ ꠗꠣꠘ ꠟꠁꠀ ꠎꠣꠅꠉꠤ।
GEN 42:20 ꠔꠥꠝꠞꠣꠞ ꠝꠣꠔ ꠢꠣꠍꠣ ꠇꠤ ꠘꠣ ꠁꠐꠣ ꠛꠥꠎꠣꠞ ꠟꠣꠉꠤ, ꠔꠥꠝꠞꠣꠞ ꠢꠥꠞꠥ ꠜꠣꠁꠞꠦ ꠀꠝꠣꠞ ꠉꠦꠍꠦ ꠟꠁꠀ ꠀꠁꠅ। ꠔꠦꠃ ꠔꠥꠝꠞꠣ ꠝꠞꠔꠣꠄ ꠘꠣꠄ।” ꠅꠃ ꠔꠣꠞꠣꠅ ꠞꠣꠎꠤ ꠅꠁꠟꠣ।
GEN 42:21 ꠛꠣꠖꠦ ꠔꠣꠞꠣ ꠝꠣꠔꠣ-ꠝꠣꠔꠤ ꠇꠞꠟꠣ, “ꠢꠣꠍꠣꠃ ꠔ, ꠀꠝꠞꠣꠞ ꠢꠤ ꠜꠣꠁꠞ ꠟꠉꠦ ꠎꠦꠔꠣ ꠇꠞꠍꠤ ꠁꠔꠣ ꠅꠁꠘ꠆ꠘꠣꠄ। ꠢꠦ ꠀꠝꠞꠣꠞ ꠉꠦꠍꠦ ꠇꠣꠎ-ꠝꠤꠘꠔꠤ ꠇꠞꠟꠦꠅ, ꠀꠝꠞꠣ ꠔꠣꠞ ꠝꠣꠔꠅ ꠇꠣꠘ ꠖꠤꠍꠤ ꠘꠣ। ꠄꠞꠟꠣꠉꠤ ꠀꠝꠞꠣꠞ ꠃꠙꠞꠦ ꠁ ꠝꠍꠤꠛꠔ ꠀꠁꠍꠦ।”
GEN 42:22 ꠔꠦꠃ ꠞꠥꠛꠦꠘꠦ ꠔꠣꠞꠣꠞꠦ ꠇꠁꠟꠣ, “ꠀꠝꠤ ꠔ ꠔꠥꠝꠞꠣꠞꠦ ꠇꠁꠍꠟꠣꠝ, ꠔꠣꠞ ꠃꠙꠞꠦ ꠇꠥꠘꠥ ꠎꠥꠟꠥꠝ ꠇꠞꠤꠅ ꠘꠣ, ꠔꠥꠝꠞꠣ ꠢꠥꠘꠟꠣꠄ ꠘꠣ। ꠖꠦꠈꠅ, ꠅꠈꠘ ꠔꠣꠞ ꠟꠃꠞ ꠢꠤꠡꠣꠛ-ꠘꠤꠇꠣꠡ ꠖꠤꠔꠦ ꠅꠞ।”
GEN 42:23 ꠅꠁꠟꠦ ꠁꠃꠍꠥꠚꠦ ꠎꠦꠘ ꠔꠣꠞꠣꠞ ꠝꠣꠔ ꠛꠥꠎꠞꠣ, ꠁꠔꠣ ꠔꠣꠞꠣ ꠎꠣꠘꠟ ꠘꠣ। ꠇꠣꠞꠘ ꠔꠣꠁꠘ ꠝꠣꠔ ꠛꠥꠎꠣꠅꠞꠣ ꠄꠇꠎꠘꠞꠦ ꠝꠣꠎꠦ ꠞꠣꠈꠤꠀ, ꠔꠣꠞꠣꠞ ꠟꠉꠦ ꠝꠣꠔꠔꠣ।
GEN 42:24 ꠔꠦꠃ ꠁꠃꠍꠥꠚꠦ ꠔꠣꠞꠣꠞ ꠉꠦꠍ ꠕꠘꠦ ꠢꠞꠤꠀ ꠉꠤꠀ ꠇꠣꠘ꠆ꠖꠤꠔꠣ ꠟꠣꠉꠟꠣ। ꠛꠣꠖꠦ ꠢꠤꠞꠛꠣꠞ ꠀꠁꠀ ꠔꠣꠞꠣꠞ ꠟꠉꠦ ꠝꠣꠔꠤꠟꠣ ꠀꠞ ꠔꠣꠁꠘ ꠡꠤꠝꠤꠅꠘꠞꠦ ꠗꠞꠤꠀ ꠔꠣꠞꠣꠞ ꠍꠣꠝꠘꠦꠃ ꠛꠣꠘ꠆ꠖꠣꠁꠟ꠆ꠟꠣ।
GEN 42:25 ꠛꠣꠖꠦ ꠁꠃꠍꠥꠚꠦ ꠔꠣꠞꠣꠞ ꠛꠡ꠆ꠔꠣꠞ ꠝꠣꠎꠦ ꠗꠣꠘ ꠜꠞꠣꠁꠀ, ꠎꠣꠞꠎꠤꠞ ꠐꠦꠇꠣ ꠔꠣꠞ ꠛꠡ꠆ꠔꠣꠔ ꠚꠤꠞꠣꠁ ꠖꠤꠀ, ꠄꠞꠣꠞ ꠙꠕꠞ ꠈꠣꠘꠤꠞ ꠝꠍꠣ ꠖꠦꠅꠀꠞ ꠟꠣꠉꠤ ꠢꠥꠇꠥꠝ ꠖꠤꠟꠣ। ꠀꠞ ꠅꠃꠟꠣ ꠇꠞꠣ ꠅꠁꠟ।
GEN 42:26 ꠢꠦꠡꠦ ꠔꠣꠞꠣ ꠎꠣꠞꠎꠤꠞ ꠉꠣꠗꠣꠞ ꠙꠤꠑꠤꠔ ꠗꠣꠘꠞ ꠉꠣꠁꠐ ꠛꠣꠘ꠆ꠖꠤꠀ ꠞꠅꠀꠘꠣ ꠅꠁꠟꠣ।
GEN 42:27 ꠙꠕꠅ ꠎꠤꠞꠣꠘꠤꠞ ꠎꠣꠉꠣꠔ ꠉꠤꠀ ꠎꠦꠛꠟꠣ ꠄꠇꠎꠘꠦ ꠉꠣꠗꠣꠞꠦ ꠈꠣꠅꠀꠘꠤꠞ ꠟꠣꠉꠤ ꠛꠡ꠆ꠔꠣ ꠈꠥꠟꠟ, ꠀꠞ ꠖꠦꠈꠟ, ꠛꠡ꠆ꠔꠣꠞ ꠝꠥꠈꠅ ꠔꠣꠞ ꠐꠦꠇꠣꠞ ꠈꠥꠔꠤ।
GEN 42:28 ꠅꠃ ꠢꠦ ꠔꠣꠞ ꠜꠣꠁꠀꠁꠘꠞꠦ ꠇꠁꠟ, “ꠖꠦꠈꠅ, ꠖꠦꠈꠅ, ꠀꠝꠣꠞ ꠐꠦꠇꠣ ꠀꠝꠣꠞ ꠛꠡ꠆ꠔꠣꠔ ꠚꠤꠞꠔ ꠖꠦꠅꠀ ꠅꠁꠍꠦ।” ꠖꠦꠈꠤꠀꠃ ꠔꠣꠞꠣꠞ ꠎꠣꠘ ꠃꠠꠤ ꠉꠦꠟ ꠀꠞ ꠒꠞꠣꠁꠀ ꠇꠣꠙꠔꠦ ꠇꠣꠙꠔꠦ ꠇꠁꠟ, “ꠀꠟ꠆ꠟꠣꠄ ꠀꠝꠞꠣꠞꠦ ꠁꠔꠣ ꠇꠤꠔꠣ ꠇꠞꠟꠣ?”
GEN 42:29 ꠛꠣꠖꠦ ꠇꠦꠘꠣꠘ ꠖꠦꠡꠅ ꠉꠤꠀ ꠔꠣꠞꠣꠞ ꠛꠣꠚ ꠁꠀꠇꠥꠛꠞ ꠉꠦꠍꠦ ꠀꠎꠤꠞ ꠅꠁꠀ, ꠁꠔꠣ ꠢꠇꠟꠔꠣ ꠢꠥꠘꠣꠁꠀ ꠇꠁꠟꠣ,
GEN 42:30 “ꠢꠤ ꠖꠦꠡꠞ ꠝꠣꠟꠤꠇꠦ, ꠀꠝꠞꠣꠞꠦ ꠈꠥꠛ ꠇꠠꠣ ꠉꠟꠣꠄ ꠇꠁꠍꠂꠘ, ꠀꠝꠞꠣ ꠉꠥꠁꠀ ꠅꠁꠀ ꠢꠤ ꠖꠦꠡꠅ ꠉꠦꠍꠤ।
GEN 42:31 ꠀꠝꠞꠣ ꠇꠁꠍꠤ, ꠀꠝꠞꠣ ꠢꠇ ꠝꠣꠘꠥꠡ, ꠇꠥꠘꠥ ꠉꠥꠁꠀ ꠘꠣꠄ।
GEN 42:32 ꠀꠝꠞꠣ ꠛꠣꠞꠅꠎꠘ ꠜꠣꠁ, ꠄꠇ ꠛꠣꠚꠞ ꠛꠣꠞꠅ ꠙꠥꠀ, ꠅꠁꠟꠦ ꠀꠝꠞꠣꠞ ꠄꠇꠎꠘ ꠘꠣꠄ ꠀꠞ ꠢꠇꠟ ꠕꠘꠦ ꠢꠥꠞꠥ ꠜꠣꠁ ꠅꠈꠘ ꠇꠦꠘꠣꠘ ꠖꠦꠡꠅ ꠛꠣꠛꠣꠞ ꠉꠦꠍꠦ ꠞꠁꠍꠦ।
GEN 42:33 ꠅꠃ ꠢꠤ ꠝꠣꠘꠡꠦ, ꠎꠦꠁꠘ ꠢꠤ ꠖꠦꠡꠞ ꠝꠣꠟꠤꠇ, ꠔꠣꠁꠘ ꠀꠝꠞꠣꠞꠦ ꠇꠁꠟꠣ, ‘ꠀꠝꠤ ꠅꠃꠟꠣ ꠛꠥꠎꠝꠥ ꠎꠦꠘ, ꠔꠥꠝꠞꠣ ꠢꠇ ꠝꠣꠘꠥꠡ। ꠔꠥꠝꠞꠣꠞ ꠄꠇ ꠜꠣꠁꠞꠦ ꠀꠝꠣꠞ ꠉꠦꠍꠦ ꠕꠁꠀ, ꠔꠥꠝꠞꠣꠞ ꠀꠇꠣꠟꠤ ꠙꠞꠤꠛꠣꠞꠞ ꠟꠣꠉꠤ ꠗꠣꠘ ꠟꠁꠀ ꠎꠣꠅ।
GEN 42:34 ꠀꠞ ꠔꠥꠝꠞꠣꠞ ꠢꠥꠞꠥ ꠜꠣꠁꠞꠦ ꠀꠝꠣꠞ ꠉꠦꠍꠦ ꠟꠁꠀ ꠀꠁꠅ। ꠔꠦꠃ ꠀꠝꠤ ꠛꠥꠎꠝꠥ, ꠔꠥꠝꠞꠣ ꠢꠇ ꠝꠣꠘꠥꠡ, ꠇꠥꠘꠥ ꠉꠥꠁꠀ ꠘꠣꠄ। ꠛꠣꠖꠦ ꠀꠝꠤ ꠔꠥꠝꠞꠣꠞ ꠜꠣꠁꠞꠦ ꠚꠤꠞꠣꠁ ꠖꠤꠝꠥ ꠀꠞ ꠔꠥꠝꠞꠣ ꠁ ꠖꠦꠡꠅ ꠇꠣꠄ-ꠇꠣꠞꠛꠣꠞ ꠇꠞꠔꠣꠄ ꠙꠣꠞꠛꠣꠄ।’ ”
GEN 42:35 ꠛꠣꠖꠦ ꠔꠣꠞꠣ ꠛꠡ꠆ꠔꠣ ꠕꠘꠦ ꠗꠣꠘ ꠓꠣꠟꠔꠦꠃ ꠖꠦꠈꠂꠘ, ꠔꠣꠞꠣꠞ ꠢꠇꠟꠞ ꠐꠦꠇꠣꠞ ꠈꠥꠔꠤ ꠛꠡ꠆ꠔꠣꠞ ꠝꠣꠎꠦ ꠞꠁꠍꠦ। ꠁꠔꠣ ꠖꠦꠈꠤꠀ ꠔꠣꠞꠣꠞ ꠛꠣꠚꠦ ꠀꠞ ꠔꠣꠞꠣꠅ ꠒꠞꠣꠁꠉꠦꠟꠣ।
GEN 42:36 ꠔꠦꠃ ꠛꠣꠚꠦ ꠔꠣꠞꠣꠞꠦ ꠇꠁꠟꠣ, “ꠔꠥꠝꠞꠣ ꠀꠝꠣꠞꠦ ꠀꠅꠟꠣꠖ ꠍꠣꠠꠣ ꠛꠣꠘꠣꠁꠍ। ꠁꠃꠍꠥꠚ ꠘꠣꠄ, ꠡꠤꠝꠤꠅꠘꠅ ꠘꠣꠄ ꠀꠞ ꠅꠈꠘ ꠔꠥꠝꠞꠣ ꠢꠤꠞꠛꠣꠞ ꠛꠤꠘ-ꠁꠀꠝꠤꠘꠞꠦꠅ ꠘꠤꠔꠣꠄ ꠌꠣꠁꠞꠣꠄ। ꠁꠔꠣ ꠢꠇꠟꠔꠣꠃ ꠀꠝꠣꠞ ꠎꠥꠟꠥꠝ।”
GEN 42:37 ꠞꠥꠛꠦꠘꠦ ꠔꠣꠘ ꠛꠣꠚꠞꠦ ꠇꠁꠟꠣ, “ꠀꠝꠤ ꠛꠤꠘ-ꠁꠀꠝꠤꠘꠞꠦ ꠔꠥꠝꠣꠞ ꠉꠦꠍꠦ ꠚꠤꠞꠣꠁꠀ ꠀꠘꠔꠦ ꠘꠣ ꠙꠣꠞꠟꠦ, ꠔꠥꠝꠤ ꠀꠝꠣꠞ ꠖꠥꠁꠅ ꠙꠥꠀꠞꠦ ꠈꠥꠘ ꠇꠞꠤꠟꠤꠅ। ꠔꠣꠞꠦ ꠔꠥꠝꠤ ꠀꠝꠣꠞ ꠀꠔꠅ ꠍꠣꠠꠤ ꠖꠦꠅ, ꠀꠝꠤ ꠔꠣꠞꠦ ꠔꠥꠝꠣꠞ ꠉꠦꠍꠦ ꠚꠤꠞꠣꠁꠀ ꠀꠘꠝꠥ।”
GEN 42:38 ꠁꠀꠇꠥꠛꠦ ꠇꠁꠟꠣ, “ꠘꠣ, ꠀꠝꠣꠞ ꠁ ꠙꠥꠀ ꠔꠥꠝꠞꠣꠞ ꠟꠉꠦ ꠖꠤꠔꠣꠝ ꠘꠣꠄ। ꠔꠣꠞ ꠜꠣꠁ ꠝꠞꠤꠉꠦꠍꠦ, ꠀꠞ ꠅꠈꠘ ꠢꠦ ꠄꠇꠟꠣ ꠎꠤꠔꠣ ꠀꠍꠦ। ꠔꠥꠝꠞꠣꠞ ꠎꠣꠅꠀꠞ ꠙꠕꠅ ꠎꠥꠖꠤ ꠔꠣꠞ ꠇꠥꠘꠥ ꠛꠤꠙꠖ ꠅꠄ, ꠔꠦ ꠅꠃ ꠙꠣꠇꠘꠣ ꠌꠥꠟꠦ ꠛꠃꠔ ꠖꠥꠈ ꠖꠤꠀ ꠔꠥꠝꠞꠣ ꠀꠝꠣꠞꠦ ꠇꠄꠛꠞꠅ ꠢꠣꠞꠣꠁꠛꠣꠄ।”
GEN 43:1 ꠇꠦꠘꠣꠘ ꠖꠦꠡꠞ ꠀꠇꠣꠟꠞ ꠖꠡꠣ ꠀꠞꠅ ꠛꠦꠢꠣꠟ ꠅꠁꠟ।
GEN 43:2 ꠀꠞ ꠝꠤꠡꠞ ꠖꠦꠡ ꠕꠘꠦ ꠎꠦꠔꠣ ꠗꠣꠘ ꠘꠤꠍꠟꠣ, ꠁꠔꠣ ꠚꠥꠠꠣꠁ ꠉꠦꠟꠦ ꠁꠍꠞꠣꠁꠟꠦ ꠇꠁꠟꠣ, “ꠔꠥꠝꠞꠣ ꠢꠤꠞꠛꠣꠞ ꠉꠤꠀ ꠀꠝꠞꠣꠞ ꠟꠣꠉꠤ ꠀꠞꠅ ꠇꠤꠍꠥ ꠈꠣꠘꠤ-ꠈꠥꠞꠣꠇꠤ ꠟꠁꠀ ꠀꠘꠅꠉꠤ।”
GEN 43:3 ꠔꠦꠃ ꠄꠢꠥꠖꠣꠄ ꠔꠣꠘꠞꠦ ꠇꠁꠟ, “ꠢꠃ ꠝꠣꠘꠡꠦ ꠀꠝꠞꠣꠞꠦ ꠈꠥꠛ ꠇꠠꠣ ꠜꠣꠡꠣꠄ ꠇꠁꠀ ꠖꠤꠍꠂꠘ, ‘ꠔꠥꠝꠞꠣꠞ ꠜꠣꠁ ꠔꠥꠝꠞꠣꠞ ꠟꠉꠦ ꠘꠣ ꠀꠁꠟꠦ ꠔꠥꠝꠞꠣ ꠀꠞ ꠀꠝꠣꠞ ꠍꠣꠝꠘꠦ ꠀꠁꠅ ꠘꠣ।’
GEN 43:4 ꠅꠈꠘ ꠔꠥꠝꠤ ꠀꠝꠞꠣꠞ ꠜꠣꠁꠞꠦ ꠀꠝꠞꠣꠞ ꠟꠉꠦ ꠇꠞꠤ ꠖꠦꠅ, ꠔꠦꠃ ꠀꠝꠞꠣ ꠉꠤꠀ ꠔꠥꠝꠣꠞ ꠟꠣꠉꠤ ꠈꠣꠘꠤ ꠟꠁꠀ ꠀꠁꠝꠥ।
GEN 43:5 ꠀꠞ ꠔꠣꠞꠦ ꠟꠉꠦ ꠘꠣ ꠖꠤꠟꠦ ꠀꠝꠞꠣꠅ ꠎꠣꠁꠔꠣꠝ ꠘꠣꠄ। ꠢꠤ ꠝꠣꠘꠡꠦ ꠀꠝꠞꠣꠞꠦ ꠇꠁꠀ ꠖꠤꠍꠂꠘ, ‘ꠔꠥꠝꠞꠣꠞ ꠜꠣꠁꠞꠦ ꠟꠉꠦ ꠘꠣ ꠀꠘꠟꠦ, ꠔꠥꠝꠞꠣ ꠀꠞ ꠀꠝꠣꠞ ꠍꠣꠝꠘꠦ ꠀꠁꠅ ꠘꠣ।’ ”
GEN 43:6 ꠁꠍꠞꠣꠁꠟꠦ ꠇꠁꠟꠣ, “ꠔꠥꠝꠞꠣ ꠇꠦꠘꠦ ꠀꠝꠣꠞ ꠟꠉꠦ ꠅꠃꠟꠣ ꠚꠣꠔꠞꠣꠝꠤ ꠇꠞꠟꠣꠄ? ꠔꠥꠝꠞꠣꠞ ꠀꠞꠇ ꠜꠣꠁ ꠀꠍꠦ, ꠁꠔꠣ ꠔꠣꠘꠞꠦ ꠇꠦꠘꠦ ꠇꠁꠟꠣꠄ?”
GEN 43:7 ꠔꠣꠞꠣ ꠇꠁꠟꠣ, “ꠢꠤ ꠝꠣꠘꠡꠦ ꠀꠝꠞꠣꠞ ꠀꠞ ꠀꠝꠞꠣꠞ ꠙꠞꠤꠛꠣꠞꠞ ꠀꠉꠣ-ꠉꠥꠠꠤ ꠢꠇ꠆ꠇꠟꠔꠣ ꠎꠤꠇꠣꠁꠍꠂꠘ, ‘ꠔꠥꠝꠞꠣꠞ ꠛꠣꠚ ꠇꠤꠔꠣ ꠅꠈꠘꠅ ꠎꠤꠘ꠆ꠖꠣ ꠀꠍꠂꠘ ꠘꠤ? ꠔꠥꠝꠞꠣꠞ ꠀꠞ ꠇꠥꠘꠥ ꠜꠣꠁ ꠀꠍꠂꠘ ꠘꠤ?’ ꠀꠝꠞꠣ ꠈꠣꠟꠤ ꠔꠣꠘ ꠍꠅꠀꠟꠞ ꠎꠥꠀꠙ ꠖꠤꠍꠟꠣꠝ, ꠀꠝꠞꠣ ꠇꠥꠘꠥ ꠎꠣꠘꠔꠣꠝ ꠘꠤ, ꠔꠣꠁꠘ ꠇꠁꠛꠣ ꠔꠥꠝꠞꠣꠞ ꠜꠣꠁꠞꠦꠅ ꠟꠁꠀ ꠀꠁꠅ?”
GEN 43:8 ꠄꠢꠥꠖꠣꠄ ꠔꠣꠘ ꠛꠣꠚꠞꠦ ꠇꠁꠟꠣ, “ꠔꠣꠞꠦ ꠀꠝꠣꠞ ꠟꠉꠦ ꠇꠞꠤ ꠖꠤꠟꠣꠅ, ꠀꠝꠞꠣ ꠎꠟꠖꠤ ꠎꠟꠖꠤ ꠞꠅꠀꠘꠣ ꠅꠁꠎꠣꠁ, ꠔꠦꠃ ꠔꠥꠝꠤ, ꠀꠝꠞꠣ ꠀꠞ ꠀꠝꠞꠣꠞ ꠢꠥꠞꠥꠔ꠆ꠔꠣꠁꠘ ꠢꠇ꠆ꠇꠟꠃ ꠎꠣꠘꠦ ꠛꠣꠌꠝꠥ, ꠇꠦꠃ ꠝꠞꠔꠣꠝ ꠘꠣꠄ।
GEN 43:9 ꠀꠝꠤ ꠘꠤꠎꠦꠃ ꠔꠣꠞ ꠟꠣꠉꠤ ꠎꠣꠝꠤꠘ ꠞꠁꠟꠣꠝ, ꠔꠣꠞꠦ ꠀꠝꠣꠞ ꠉꠦꠍ ꠕꠘꠦ ꠡꠝꠎꠤꠀ ꠘꠤꠅ। ꠀꠝꠤ ꠔꠣꠞꠦ ꠔꠥꠝꠣꠞ ꠉꠦꠍꠦ ꠚꠤꠞꠣꠁꠀ ꠘꠣ ꠀꠘꠟꠦ, ꠔꠥꠝꠣꠞ ꠉꠦꠍꠦ ꠀꠎꠤꠞ ꠘꠣ ꠇꠞꠟꠦ, ꠢꠣꠞꠣ ꠎꠤꠘ꠆ꠖꠦꠉꠤ ꠜꠞꠣ ꠀꠝꠤ ꠔꠥꠝꠣꠞ ꠉꠦꠍꠦ ꠖꠣꠄꠁ ꠞꠁꠝꠥ।
GEN 43:10 ꠀꠞ ꠅꠔ ꠖꠦꠞꠤ ꠘꠣ ꠇꠞꠟꠦ, ꠀꠝꠞꠣ ꠅꠔꠖꠤꠘꠦ ꠖꠥꠁꠛꠣꠞ ꠊꠥꠞꠤꠀ ꠀꠁꠔꠣꠝ ꠙꠣꠞꠟꠣꠝ ꠅꠘꠦ।”
GEN 43:11 ꠅꠃ ꠔꠣꠞꠣꠞ ꠛꠣꠚ ꠁꠍꠞꠣꠁꠟꠦ ꠇꠁꠟꠣ, “ꠅꠃꠟꠣ ꠅꠁꠟꠦ ꠄꠇ ꠇꠣꠝ ꠇꠞꠅ, ꠔꠥꠝꠞꠣ ꠎꠣꠞꠎꠤꠞ ꠛꠦꠉꠞ ꠝꠣꠎꠦ ꠅꠘꠞ ꠜꠣꠟꠣ ꠜꠣꠟꠣ ꠝꠣꠟ, ꠀꠉꠞ, ꠝꠃ, ꠈꠥꠡꠛꠄ ꠝꠡꠟꠣ, ꠝꠦꠡꠇꠦ-ꠀꠝ꠆ꠛꠞ, ꠙꠦꠡ꠆ꠔꠣ ꠀꠞ ꠛꠣꠖꠣꠝ ꠜꠞꠤꠀ ꠢꠃ ꠝꠣꠘꠡꠞ ꠟꠣꠉꠤ ꠍꠣꠟꠣꠝꠤ ꠟꠁꠀ ꠎꠣꠅ।
GEN 43:12 ꠀꠞ ꠔꠥꠝꠞꠣꠞ ꠟꠉꠦ ꠇꠞꠤ ꠀꠉꠞ ꠒꠣꠛꠥꠟ ꠐꠦꠇꠣ ꠘꠦꠅ, ꠛꠡ꠆ꠔꠣꠞ ꠝꠥꠈꠅ ꠎꠦ ꠐꠦꠇꠣ ꠚꠤꠞꠔ ꠀꠁꠍꠦ, ꠔꠣ-ꠅ ꠢꠤꠞꠛꠣꠞ ꠟꠁꠀ ꠎꠣꠅ, ꠇꠤ ꠎꠣꠘꠤ ꠇꠥꠘꠥ ꠜꠥꠟ ꠅꠁꠉꠦꠍꠤꠟ।
GEN 43:13 ꠔꠥꠝꠞꠣꠞ ꠁ ꠜꠣꠁꠞꠦ ꠟꠉꠦ ꠟꠁꠀ, ꠎꠟꠖꠤ ꠇꠞꠤ ꠢꠃ ꠝꠣꠘꠡꠞ ꠉꠦꠍꠦ ꠎꠣꠅ।
GEN 43:14 ꠡꠞ꠆ꠛ-ꠡꠇ꠆ꠔꠤꠝꠣꠘ ꠀꠟ꠆ꠟꠣꠄ ꠔꠥꠝꠞꠣꠞ ꠟꠣꠉꠤ ꠢꠃ ꠝꠣꠘꠡꠞ ꠖꠤꠟꠅ ꠝꠦꠢꠦꠞꠛꠣꠘꠤ ꠙꠄꠖꠣ ꠇꠞꠃꠇ꠆ꠇꠣ, ꠎꠣꠔꠦ ꠔꠣꠁꠘ ꠔꠥꠝꠞꠣꠞ ꠢꠃ ꠜꠣꠁ ꠀꠞ ꠛꠤꠘ-ꠁꠀꠝꠤꠘꠞꠦ ꠔꠥꠝꠞꠣꠞ ꠀꠔꠅ ꠚꠤꠞꠔ ꠖꠦꠁꠘ। ꠀꠞ ꠀꠝꠣꠞ ꠙꠥꠀ ꠈꠥꠀꠘꠤ ꠉꠦꠟꠦ, ꠘꠣ ꠅꠄ ꠉꠦꠟꠃ।”
GEN 43:15 ꠔꠦꠃ ꠔꠣꠞꠣ ꠢꠃ ꠍꠣꠟꠣꠝꠤ, ꠒꠣꠛꠥꠟ ꠐꠦꠇꠣ ꠀꠞ ꠛꠤꠘ-ꠁꠀꠝꠤꠘꠞꠦ ꠟꠁꠀ ꠞꠅꠀꠘꠣ ꠅꠁꠀ, ꠝꠤꠡꠞ ꠖꠦꠡꠅ ꠙꠃꠍꠤꠀ ꠁꠃꠍꠥꠚꠞ ꠍꠣꠝꠘꠦ ꠀꠎꠤꠞ ꠅꠁꠟꠣ।
GEN 43:16 ꠔꠣꠞꠣꠞ ꠟꠉꠦ ꠛꠤꠘ-ꠁꠀꠝꠤꠘꠞꠦ ꠖꠦꠈꠤꠀ ꠁꠃꠍꠥꠚꠦ ꠔꠣꠘ ꠛꠣꠠꠤꠞ ꠈꠣꠖꠤꠝꠞꠦ ꠇꠁꠟꠣ, “ꠅꠃ ꠝꠣꠘꠥꠡ ꠅꠇꠟꠞꠦ ꠛꠣꠠꠤꠞ ꠜꠤꠔꠞꠦ ꠘꠦꠅ ꠀꠞ ꠈꠡꠤ ꠎꠛ ꠇꠞꠤꠀ ꠉꠥꠡ꠆ꠔ ꠞꠣꠘ꠆ꠖꠅ। ꠔꠣꠞꠣ ꠝꠣꠗꠣꠘꠦ ꠀꠝꠣꠞ ꠟꠉꠦ ꠈꠣꠁꠛꠣ।”
GEN 43:17 ꠁꠃꠍꠥꠚꠦ ꠎꠦꠟꠣ ꠇꠁꠟꠣ, ꠈꠣꠖꠤꠝꠦꠅ ꠑꠤꠇ ꠅꠃꠟꠣ ꠇꠞꠟ, ꠢꠦ ꠄꠞꠣꠞꠦ ꠛꠣꠠꠤꠞ ꠜꠤꠔꠞꠦ ꠟꠁꠀ ꠉꠦꠟ।
GEN 43:18 ꠀꠞ ꠢꠦ ꠄꠞꠣꠞꠦ ꠁꠃꠍꠥꠚꠞ ꠛꠣꠠꠤꠞ ꠜꠤꠔꠞꠦ ꠘꠦꠅꠀꠄ, ꠔꠣꠞꠣ ꠒꠞꠣꠁꠀ ꠝꠣꠔꠣ-ꠝꠣꠔꠤ ꠇꠞꠟꠣ, “ꠀꠉꠞ ꠚꠤꠞꠣ ꠎꠦ ꠐꠦꠇꠣ ꠀꠝꠞꠣꠞ ꠛꠡ꠆ꠔꠣꠔ ꠇꠞꠤ ꠚꠤꠞꠔ ꠉꠦꠍꠤꠟ, ꠅꠔꠣꠞ ꠟꠣꠉꠤꠃ ꠀꠝꠞꠣꠞꠦ ꠅꠘꠅ ꠘꠤꠞꠣ, ꠅꠈꠘ ꠀꠝꠞꠣꠞ ꠖꠥꠡ ꠖꠦꠈꠣꠁꠀ ꠝꠣꠁꠞ-ꠗꠁꠞ ꠇꠞꠤꠀ ꠀꠝꠞꠣꠞꠦ ꠉꠥꠟꠣꠝ ꠛꠣꠘꠣꠁꠛꠣ, ꠀꠞ ꠉꠣꠗꠣ ꠅꠇꠟꠅ ꠇꠣꠠꠤꠀ ꠘꠤꠛꠣ।”
GEN 43:19 ꠔꠦꠃ ꠁꠃꠍꠥꠚꠞ ꠛꠣꠠꠤꠞ ꠖꠞꠎꠣꠞ ꠍꠣꠝꠘꠦ ꠀꠁꠀ ꠔꠣꠞꠣ ꠛꠣꠠꠤꠞ ꠈꠣꠖꠤꠝꠞꠦ ꠇꠁꠟꠣ,
GEN 43:20 “ꠢꠥꠎꠥꠞ, ꠀꠝꠞꠣ ꠄꠞ ꠀꠉꠦꠅ ꠗꠣꠘ ꠟꠅꠀꠔ ꠀꠁꠍꠟꠣꠝ,
GEN 43:21 ꠢꠦꠡꠦ ꠚꠤꠞꠔ ꠎꠣꠅꠀꠞ ꠛꠣꠟꠣ, ꠖꠝ ꠟꠁꠛꠣꠞ ꠎꠣꠉꠣꠔ ꠙꠃꠍꠤꠀ, ꠛꠡ꠆ꠔꠣ ꠈꠥꠟꠔꠦꠃ ꠖꠦꠈꠤ, ꠀꠝꠞꠣꠞ ꠙꠥꠞꠣ ꠐꠦꠇꠣ-ꠙꠄꠡꠣ ꠎꠣꠞꠎꠤꠞ ꠛꠡ꠆ꠔꠣꠞ ꠝꠥꠈꠅ ꠞꠁꠍꠦ, ꠅꠈꠘ ꠅꠃ ꠐꠦꠇꠣ ꠚꠤꠞꠔ ꠀꠘꠍꠤ।
GEN 43:22 ꠀꠞ ꠗꠣꠘ ꠘꠦꠅꠀꠞ ꠟꠣꠉꠤ ꠀꠞꠅ ꠐꠦꠇꠣ ꠀꠘꠍꠤ, ꠅꠁꠟꠦ ꠢꠤ ꠐꠦꠇꠣ ꠀꠝꠞꠣꠞ ꠛꠡ꠆ꠔꠣꠞ ꠜꠤꠔꠞꠦ ꠇꠦ ꠕꠁꠍꠤꠟ ꠎꠣꠘꠤ ꠘꠣ।”
GEN 43:23 ꠅꠃ ꠈꠣꠖꠤꠝꠦ ꠇꠁꠟ, “ꠔꠥꠝꠞꠣꠞ ꠜꠣꠟꠣꠁ ꠅꠃꠇ, ꠒꠞꠣꠁꠅ ꠘꠣ। ꠔꠥꠝꠞꠣꠞ ꠀꠞ ꠔꠥꠝꠞꠣꠞ ꠛꠣꠚꠞ ꠀꠟ꠆ꠟꠣꠄ, ꠁ ꠉꠣꠁꠛꠤ ꠗꠘ ꠔꠥꠝꠞꠣꠞ ꠛꠡ꠆ꠔꠣꠞ ꠝꠣꠎꠦ ꠖꠤꠍꠂꠘ। ꠔꠥꠝꠞꠣꠞ ꠐꠦꠇꠣ ꠀꠝꠤ ꠙꠣꠁꠍꠤ।” ꠛꠣꠖꠦ ꠢꠦ ꠡꠤꠝꠤꠅꠘꠞꠦ ꠛꠣꠞ ꠇꠞꠤꠀ ꠔꠣꠞꠣꠞ ꠉꠦꠍꠦ ꠟꠁꠀ ꠀꠁꠟ।
GEN 43:24 ꠢꠦ ꠢꠇꠟꠞꠦ ꠁꠃꠍꠥꠚꠞ ꠛꠣꠠꠤꠞ ꠜꠤꠔꠞꠦ ꠘꠤꠀ ꠙꠣꠘꠤ ꠖꠤꠟ ꠔꠣꠞꠣ ꠙꠣꠅ ꠗꠥꠁꠟꠣ ꠀꠞ ꠢꠦ ꠔꠣꠞꠣꠞ ꠉꠣꠗꠣ ꠅꠇꠟꠞꠦꠅ ꠈꠣꠘꠤ ꠖꠤꠟ।
GEN 43:25 ꠁꠃꠍꠥꠚ ꠝꠣꠗꠣꠘꠦ ꠀꠁꠛꠣ ꠉꠔꠤꠇꠦ, ꠄꠞꠣ ꠔꠣꠞꠣꠞ ꠍꠣꠟꠣꠝꠤ ꠅꠇꠟ ꠎꠥꠁꠔ ꠇꠞꠟꠣ। ꠔꠣꠞꠣ ꠢꠥꠘꠍꠟꠣ ꠎꠦꠘ, ꠔꠣꠘ ꠟꠉꠦꠃ ꠔꠣꠞꠣꠞ ꠈꠣꠘꠣ-ꠖꠣꠘꠣ ꠅꠁꠛ।
GEN 43:26 ꠛꠣꠖꠦ ꠁꠃꠍꠥꠚ ꠛꠣꠠꠤꠔ ꠀꠁꠟꠦ, ꠔꠣꠞꠣꠞ ꠢꠃ ꠍꠣꠟꠣꠝꠤ ꠅꠇꠟ ꠊꠞꠞ ꠜꠤꠔꠞꠦ ꠘꠤꠀ ꠔꠣꠘꠞꠦ ꠖꠤꠟꠣ, ꠖꠤꠀ ꠢꠣꠞꠟꠦ ꠔꠣꠘꠞꠦ ꠍꠁꠎꠖꠣ ꠇꠞꠟꠣ।
GEN 43:27 ꠔꠣꠞꠣꠞ ꠜꠣꠟꠣ-ꠛꠥꠞꠣ ꠈꠛꠞ ꠢꠥꠘꠤꠀ ꠔꠣꠁꠘ ꠎꠤꠇꠣꠁꠟꠣ, “ꠔꠥꠝꠞꠣꠞ ꠎꠦ ꠝꠥꠞꠛ꠆ꠛꠤ ꠛꠣꠚꠞ ꠇꠕꠣ ꠇꠁꠍꠟꠣꠄ, ꠔꠣꠁꠘ ꠜꠣꠟꠣ ꠀꠍꠂꠘ ꠘꠤ? ꠔꠣꠁꠘ ꠎꠤꠘ꠆ꠖꠣ ꠀꠍꠂꠘ ꠘꠤ?”
GEN 43:28 ꠔꠣꠞꠣ ꠎꠥꠀꠙ ꠖꠤꠟꠣ, “ꠎꠤꠅꠄ, ꠀꠙꠘꠣꠞ ꠉꠥꠟꠣꠝ ꠀꠝꠞꠣꠞ ꠛꠣꠛꠣ ꠅꠈꠘꠅ ꠎꠤꠘ꠆ꠖꠣ ꠀꠍꠂꠘ ꠀꠞ ꠜꠣꠟꠣ ꠀꠍꠂꠘ।” ꠢꠦꠡꠦ ꠔꠣꠞꠣ ꠝꠣꠕꠣ ꠘꠥꠀꠁꠀ ꠔꠣꠘꠞꠦ ꠁꠎ꠆ꠎꠔ ꠇꠞꠟꠣ।
GEN 43:29 ꠁꠃꠍꠥꠚꠦ ꠌꠃꠈ ꠔꠥꠟꠤꠀ ꠔꠣꠘ ꠘꠤꠎꠞ ꠜꠣꠁ ꠛꠤꠘ-ꠁꠀꠝꠤꠘꠞꠦ ꠖꠦꠈꠤꠀ ꠇꠁꠟꠣ, “ꠅꠃꠘꠤ ꠔꠥꠝꠞꠣꠞ ꠢꠃ ꠢꠥꠞꠥ ꠜꠣꠁ, ꠎꠣꠞ ꠇꠕꠣ ꠀꠉꠦ ꠇꠁꠍꠟꠣꠄ?” ꠔꠣꠁꠘ ꠛꠤꠘ-ꠁꠀꠝꠤꠘꠞꠦ ꠇꠁꠟꠣ, “ꠀꠟ꠆ꠟꠣꠄ ꠔꠥꠝꠣꠞꠦ ꠞꠢꠝ ꠇꠞꠃꠇ꠆ꠇꠣ।”
GEN 43:30 ꠜꠣꠁꠞꠦ ꠖꠦꠈꠤꠀ ꠁꠃꠍꠥꠚꠞ ꠖꠤꠟ ꠇꠣꠘ꠆ꠖꠤꠔ ꠟꠣꠉꠟ। ꠔꠣꠁꠘ ꠎꠟꠖꠤ ꠇꠞꠤ ꠛꠣꠞ ꠅꠁꠀ, ꠘꠤꠎꠞ ꠇꠥꠑꠣꠔ ꠉꠤꠀ ꠇꠣꠘ꠆ꠖꠤꠟꠣ।
GEN 43:31 ꠛꠣꠖꠦ ꠌꠃꠈ-ꠝꠥꠈ ꠗꠁꠀ ꠛꠣꠞ ꠅꠁꠀ ꠀꠁꠟꠣ ꠀꠞ ꠘꠤꠎꠞꠦ ꠡꠣꠝꠟꠣꠁꠀ ꠈꠣꠘꠤ ꠛꠤꠟꠣꠁꠛꠣꠞ ꠢꠥꠇꠥꠝ ꠖꠤꠟꠣ।
GEN 43:32 ꠅꠃ ꠁꠃꠍꠥꠚꠞꠦ, ꠔꠣꠘ ꠜꠣꠁꠀꠁꠘꠞꠦ ꠀꠞ ꠔꠣꠘ ꠟꠉꠦ ꠈꠣꠘꠦꠀꠟꠣ ꠝꠤꠡꠞꠤ ꠅꠇꠟꠞꠦ ꠀꠟꠉ ꠀꠟꠉ ꠎꠣꠉꠣꠔ ꠈꠣꠘꠤ ꠖꠤꠟꠣ। ꠇꠣꠞꠘ ꠝꠤꠡꠞꠤꠘ꠆ꠔꠦ ꠁꠛꠞꠣꠘꠤ ꠅꠇꠟꠞ ꠟꠉꠦ ꠛꠁꠀ ꠈꠣꠘꠣ-ꠖꠣꠘꠣ ꠇꠞꠔ ꠘꠣ, ꠁꠔꠣ ꠔꠣꠞꠣ ꠊꠤꠘ ꠇꠞꠂꠘ।
GEN 43:33 ꠔꠣꠞꠣ ꠁꠃꠍꠥꠚꠞ ꠍꠣꠝꠘꠦ ꠔꠣꠘ ꠜꠣꠁꠀꠁꠘꠞꠦ ꠛꠠꠞꠦ ꠛꠠꠞ ꠎꠣꠉꠣꠔ, ꠢꠥꠞꠥꠞꠦ ꠢꠥꠞꠥꠞ ꠎꠣꠉꠣꠔ ꠛꠅꠀꠁꠟꠣ, ꠔꠦꠃ ꠔꠣꠞꠣ ꠔꠣꠁꠎ꠆ꠎꠥꠛ ꠅꠁꠀ ꠄꠇꠎꠘꠦ ꠀꠞꠇ ꠎꠘꠞ ꠛꠣꠄ ꠌꠣꠁ ꠞꠁꠟꠣ।
GEN 43:34 ꠀꠞ ꠁꠃꠍꠥꠚꠦ ꠘꠤꠎꠞ ꠕꠣꠟꠞ ꠈꠣꠘꠤ ꠕꠘꠦ ꠔꠣꠘ ꠜꠣꠁꠀꠁꠘꠞꠦ ꠖꠦꠅꠀꠁꠟꠣ, ꠅꠁꠟꠦ ꠛꠤꠘ-ꠁꠀꠝꠤꠘꠞꠦ ꠢꠇꠟ ꠕꠘꠦ ꠙꠣꠌ ꠉꠥꠘ ꠛꠦꠡꠤ ꠖꠦꠅꠀ ꠅꠁꠟ। ꠈꠣꠁꠀ ꠢꠣꠞꠟꠦ ꠔꠣꠞꠣ ꠈꠥꠡꠤ ꠅꠁꠀ ꠃꠑꠟꠣ।
GEN 44:1 ꠛꠣꠖꠦ ꠁꠃꠍꠥꠚꠦ ꠔꠣꠘ ꠛꠣꠠꠤꠞ ꠈꠣꠖꠤꠝꠞꠦ ꠅꠃ ꠟꠣꠈꠣꠘ ꠢꠥꠇꠥꠝ ꠖꠤꠟꠣ, “ꠁ ꠝꠣꠘꠥꠡ ꠅꠇꠟꠞ ꠛꠡ꠆ꠔꠣꠔ ꠎꠔ ꠗꠣꠘ ꠎꠣꠉꠣ ꠅꠄ, ꠜꠞꠤꠀ ꠖꠤꠟꠣꠅ ꠀꠞ ꠎꠣꠞꠎꠤꠞ ꠐꠦꠇꠣ ꠔꠣꠞ ꠛꠡ꠆ꠔꠣꠞ ꠝꠥꠈꠅ ꠕꠁꠅ।
GEN 44:2 ꠅꠁꠟꠦ ꠅꠃ ꠢꠥꠞꠥ ꠎꠘꠞ ꠛꠡ꠆ꠔꠣꠞ ꠝꠥꠈꠅ ꠔꠣꠞ ꠐꠦꠇꠣꠞ ꠟꠉꠦ ꠀꠝꠣꠞ ꠞꠥꠙꠣꠞ ꠛꠣꠐꠤꠅ ꠕꠁꠅ।” ꠁꠃꠍꠥꠚꠦ ꠔꠣꠞꠦ ꠎꠦꠟꠣ ꠇꠁꠟꠣ, ꠢꠦ ꠅꠃꠟꠣ ꠇꠞꠟ।
GEN 44:3 ꠛꠣꠖꠞ ꠖꠤꠘ ꠛꠤꠀꠘꠦꠃ ꠔꠣꠞꠣ ꠉꠣꠗꠣ ꠟꠁꠀ ꠛꠤꠖꠣꠄ ꠅꠁꠟꠣ।
GEN 44:4 ꠔꠣꠞꠣ ꠐꠣꠃꠘ ꠕꠣꠇꠤ ꠕꠥꠠꠣ ꠖꠥꠞꠁ ꠎꠣꠁꠔꠦꠃ ꠁꠃꠍꠥꠚꠦ ꠔꠣꠘ ꠛꠣꠠꠤꠞ ꠈꠣꠖꠤꠝꠞꠦ ꠇꠁꠟꠣ, “ꠎꠟꠖꠤ ꠇꠞꠤ ꠄꠞꠣꠞ ꠈꠞꠦ ꠖꠃꠠꠣꠁꠀ ꠉꠤꠀ, ꠄꠞꠣꠞ ꠟꠣꠉꠣꠟ ꠙꠣꠁꠀ ꠢꠣꠞꠟꠦ ꠇꠁꠛꠣꠄ, ꠔꠥꠝꠞꠣ ꠃꠙꠇꠣꠞꠞ ꠛꠖꠟꠣ ꠇꠦꠘꠦ ꠈꠦꠔꠤ ꠇꠞꠟꠣꠄ? ꠀꠝꠣꠞ ꠝꠥꠘꠤꠛꠞ ꠞꠥꠙꠣꠞ ꠛꠣꠐꠤ ꠇꠦꠘꠦ ꠌꠥꠞꠤ ꠇꠞꠟꠣꠄ?
GEN 44:5 ꠅꠃ ꠛꠣꠐꠤꠔ ꠇꠞꠤꠀ ꠔ ꠔꠣꠁꠘ ꠡꠞꠛꠔ-ꠙꠣꠘꠤ ꠈꠣꠁꠘ ꠀꠞ ꠔꠖꠛꠤꠞꠞ ꠇꠣꠝꠅ ꠇꠞꠂꠘ। ꠔꠥꠝꠞꠣ ꠁꠔꠣ ꠈꠥꠛ ꠅꠁꠘ꠆ꠘꠣꠄ ꠇꠞꠍ।”
GEN 44:6 ꠢꠤ ꠈꠣꠖꠤꠝꠦ ꠔꠣꠞꠣꠞ ꠈꠞꠦꠖꠤ ꠉꠤꠀ ꠟꠣꠉꠣꠟ ꠙꠣꠁꠀ ꠅꠃ ꠟꠣꠈꠣꠘ ꠇꠁꠟ।
GEN 44:7 ꠅꠁꠟꠦ ꠔꠣꠞꠣ ꠇꠁꠟꠣ, “ꠢꠥꠎꠥꠞ ꠁꠟꠣ ꠝꠣꠔ ꠇꠦꠘꠦ ꠝꠣꠔꠤꠞꠣ? ꠀꠙꠘꠣꠞ ꠉꠥꠟꠣꠝ ꠅꠇꠟꠦ ꠇꠥꠘꠥ ꠟꠣꠈꠣꠘꠃ ꠁꠔꠣ ꠇꠣꠝ ꠇꠞꠔ ꠘꠣꠄ।
GEN 44:8 ꠖꠦꠈꠃꠇ꠆ꠇꠣ, ꠀꠉꠞꠛꠣꠞ ꠀꠝꠞꠣꠞ ꠛꠡ꠆ꠔꠣꠞ ꠝꠥꠈꠅ ꠎꠦ ꠐꠦꠇꠣ ꠙꠣꠁꠍꠟꠣꠝ, ꠁꠔꠣ ꠀꠝꠞꠣ ꠇꠦꠘꠣꠘ ꠖꠦꠡ ꠕꠘꠦ ꠢꠤꠞꠛꠣꠞ ꠀꠙꠘꠣꠞ ꠉꠦꠍꠦ ꠚꠤꠞꠔ ꠀꠘꠍꠤ, ꠔꠦ ꠀꠝꠞꠣ ꠇꠥꠘꠥ ꠀꠙꠘꠣꠞ ꠝꠥꠘꠤꠛꠞ ꠛꠣꠠꠤ ꠕꠘꠦ ꠡꠥꠘꠣ-ꠞꠥꠙꠣ ꠌꠥꠞꠤ ꠇꠞꠝꠥ ꠘꠤ?
GEN 44:9 ꠀꠙꠘꠣꠞ ꠁ ꠉꠥꠟꠣꠝ ꠅꠇꠟꠞ ꠝꠣꠎꠦ ꠎꠣꠞ ꠉꠦꠍꠦ ꠅꠃ ꠛꠣꠐꠤ ꠙꠣꠁꠛꠣ, ꠔꠣꠞꠦ ꠝꠣꠞꠤꠟꠣꠁꠛꠣ ꠀꠞ ꠀꠝꠞꠣꠅ ꠢꠥꠎꠥꠞꠞ ꠉꠥꠟꠣꠝ ꠅꠁꠎꠤꠝꠥ।”
GEN 44:10 ꠔꠦꠃ ꠈꠣꠖꠤꠝꠦ ꠇꠁꠟ, “ꠜꠣꠟꠣ ꠇꠕꠣ, ꠔꠦ ꠔꠥꠝꠞꠣ ꠎꠦꠟꠣ ꠇꠁꠟꠣꠄ, ꠅꠃꠟꠣꠃ ꠅꠃꠇ। ꠎꠣꠞ ꠉꠦꠍꠦ ꠅꠃ ꠛꠣꠐꠤ ꠝꠤꠟꠛ, ꠈꠣꠟꠤ ꠔꠣꠞꠦ ꠀꠝꠣꠞ ꠉꠥꠟꠣꠝ ꠛꠣꠘꠣꠁꠝꠥ ꠀꠞ ꠛꠣꠇꠤ ꠢꠇꠟ ꠈꠣꠟꠣꠍ ꠙꠣꠁꠛꠣꠄ।”
GEN 44:11 ꠅꠃ ꠔꠣꠞꠣ ꠎꠟꠖꠤ ꠇꠞꠤ ꠢꠇꠟꠞ ꠛꠡ꠆ꠔꠣ ꠝꠣꠐꠤꠔ ꠟꠣꠝꠣꠁꠀ ꠈꠥꠟꠟ।
GEN 44:12 ꠀꠞ ꠈꠣꠖꠤꠝꠦ ꠛꠠ ꠜꠣꠁ ꠕꠘꠦ ꠢꠥꠞꠥ ꠜꠣꠁ ꠔꠞꠤ ꠢꠇꠟꠞ ꠛꠡ꠆ꠔꠣ ꠔꠥꠇꠣꠁꠟꠦꠅ ꠢꠦꠡꠦ ꠛꠤꠘ-ꠁꠀꠝꠤꠘꠞ ꠛꠡ꠆ꠔꠣꠔ ꠢꠤ ꠛꠣꠐꠤ ꠝꠤꠟꠟ।
GEN 44:13 ꠔꠦꠃ ꠔꠣꠞꠣ ꠎꠣꠞꠎꠤꠞ ꠚꠤꠘ꠆ꠘꠞ ꠇꠣꠙꠠ ꠚꠣꠠꠤꠟ꠆ꠟꠣ, ꠛꠣꠖꠦ ꠢꠤꠞꠛꠣꠞ ꠉꠣꠗꠣꠞ ꠙꠤꠑꠤꠔ ꠉꠣꠁꠐ ꠛꠣꠘ꠆ꠖꠤꠀ ꠐꠣꠃꠘꠅ ꠀꠁꠟ।
GEN 44:14 ꠔꠦꠃ ꠄꠢꠥꠖꠣ ꠀꠞ ꠔꠣꠞ ꠜꠣꠁꠀꠁꠘ ꠁꠃꠍꠥꠚꠞ ꠛꠣꠠꠤꠔ ꠉꠦꠟꠣ, ꠁ ꠡꠝꠄ ꠔꠣꠁꠘ ꠢꠘꠅ ꠀꠍꠟꠣ। ꠔꠣꠞꠣ ꠔꠣꠘ ꠍꠣꠝꠘꠦ ꠉꠤꠀ ꠝꠣꠐꠤꠔ ꠙꠠꠟꠣ।
GEN 44:15 ꠁꠃꠍꠥꠚꠦ ꠔꠣꠞꠣꠞꠦ ꠇꠁꠟꠣ, “ꠔꠥꠝꠞꠣ ꠁꠔꠣ ꠇꠤꠔꠣ ꠇꠞꠟꠣꠄ? ꠀꠝꠤ ꠎꠦꠘ ꠢꠇꠟꠔꠣ ꠉꠘꠔꠣꠝ ꠙꠣꠞꠤ, ꠁꠔꠣ ꠔꠥꠝꠞꠣ ꠎꠣꠘ ꠘꠣ ꠘꠤ?”
GEN 44:16 ꠄꠢꠥꠖꠣꠄ ꠇꠁꠟ, “ꠢꠥꠎꠥꠞꠞ ꠉꠦꠍꠦ ꠀꠝꠞꠣ ꠇꠤꠔꠣ ꠇꠁꠝꠥ? ꠇꠤꠔꠣ ꠎꠥꠀꠙ ꠖꠤꠝꠥ? ꠀꠞ ꠇꠤꠟꠣ ꠀꠝꠞꠣꠞꠦ ꠛꠦ-ꠇꠍꠥꠞ ꠇꠁꠔꠣꠝ? ꠀꠟ꠆ꠟꠣꠄꠃ ꠔꠣꠘ ꠉꠥꠟꠣꠝ ꠅꠇꠟꠞ ꠖꠥꠡ ꠖꠦꠈꠣꠁ ꠖꠤꠍꠂꠘ, ꠔꠦ ꠎꠣꠞ ꠉꠦꠍꠦ ꠁ ꠛꠣꠐꠤ ꠝꠤꠟꠍꠦ, ꠢꠦ ꠀꠞ ꠀꠝꠞꠣ ꠢꠇꠟꠦꠃ ꠢꠥꠎꠥꠞꠞ ꠉꠥꠟꠣꠝ ꠅꠁꠟꠣꠝ।”
GEN 44:17 ꠅꠁꠟꠦ ꠁꠃꠍꠥꠚꠦ ꠇꠁꠟꠣ, “ꠘꠣ, ꠘꠣ, ꠀꠝꠤ ꠁ ꠇꠣꠝ ꠇꠥꠘꠥ ꠟꠣꠈꠣꠘꠃ ꠇꠞꠔꠣꠝ ꠘꠣꠄ। ꠎꠣꠞ ꠉꠦꠍꠦ ꠅꠃ ꠛꠣꠐꠤ ꠝꠤꠟꠍꠦ, ꠢꠦ-ꠃ ꠀꠝꠣꠞ ꠉꠥꠟꠣꠝ ꠅꠁꠛ, ꠛꠣꠇꠤ ꠡꠛ ꠍꠢꠤ-ꠍꠣꠟꠣꠝꠔꠦ ꠔꠥꠝꠞꠣꠞ ꠛꠣꠚꠞ ꠉꠦꠍꠦ ꠎꠣꠅꠉꠤ।”
GEN 44:18 ꠔꠦꠃ ꠄꠢꠥꠖꠣꠄ ꠁꠃꠍꠥꠚꠞ ꠇꠣꠍꠣꠔ ꠉꠤꠀ ꠇꠁꠟ, “ꠢꠥꠎꠥꠞ ꠀꠙꠘꠦ ꠔ ꠚꠦꠞꠣꠃꠘꠞ ꠢꠝꠣꠘ, ꠔꠦ ꠖꠄꠀ ꠇꠞꠤ ꠀꠙꠘꠣꠞ ꠉꠥꠟꠣꠝꠞꠦ ꠄꠇꠈꠣꠘ ꠝꠣꠔ ꠝꠣꠔꠣꠞ ꠡꠥꠎꠥꠉ ꠖꠦꠃꠇ꠆ꠇꠣ। ꠀꠙꠘꠣꠞ ꠉꠥꠟꠣꠝꠞ ꠃꠙꠞꠦ ꠉꠥꠍꠣ ꠅꠁꠘ ꠘꠣ ꠎꠦꠘ।
GEN 44:19 ꠢꠥꠎꠥꠞꠦ ꠀꠉꠦ ꠁ ꠉꠥꠟꠣꠝ ꠅꠇꠟꠞꠦ ꠎꠤꠇꠣꠁꠍꠟꠣ, ꠔꠥꠝꠞꠣꠞ ꠛꠣꠚ ꠛꠣ ꠇꠥꠘꠥ ꠜꠣꠁ ꠀꠍꠂꠘ ꠘꠤ।
GEN 44:20 ꠀꠝꠞꠣ ꠎꠥꠀꠙ ꠖꠤꠍꠟꠣꠝ, ꠀꠝꠞꠣꠞ ꠝꠥꠞꠛ꠆ꠛꠤ ꠛꠣꠛꠣ ꠎꠤꠘ꠆ꠖꠣ ꠀꠍꠂꠘ, ꠀꠞ ꠔꠣꠘ ꠢꠦꠡꠇꠣꠟꠤ ꠛꠄꠅꠡꠞ ꠄꠉꠥ ꠙꠥꠀ ꠀꠍꠦ। ꠔꠣꠞ ꠜꠣꠁ ꠝꠞꠤꠉꠦꠍꠦ, ꠀꠞ ꠢꠦ ꠄꠇ ꠝꠣʼꠞ ꠄꠇ ꠙꠥꠔ ꠉꠔꠤꠇꠦ ꠛꠣꠛꠣꠄ ꠔꠣꠞꠦ ꠈꠥꠛ ꠝꠣꠄꠀ ꠇꠞꠂꠘ।
GEN 44:21 ꠛꠣꠖꠦ ꠀꠙꠘꠣꠞ ꠁ ꠉꠥꠟꠣꠝ ꠅꠇꠟꠞꠦ ꠇꠁꠍꠟꠣ, ꠔꠣꠞꠦ ꠀꠝꠣꠞ ꠉꠦꠍꠦ ꠟꠁꠀ ꠀꠁꠅ, ꠀꠝꠤ ꠔꠣꠞꠦ ꠘꠤꠎꠞ ꠌꠃꠈꠦ ꠖꠦꠈꠝꠥ।
GEN 44:22 ꠢꠤ ꠡꠝꠄ ꠀꠝꠞꠣ ꠢꠥꠎꠥꠞꠞꠦ ꠇꠁꠍꠟꠣꠝ, ꠛꠣꠛꠣꠞꠦ ꠕꠁꠀ ꠢꠦ ꠀꠁꠔ ꠙꠣꠞꠔ ꠘꠣꠄ ꠀꠞ ꠕꠁꠀ ꠀꠁꠟꠦꠅ ꠛꠣꠛꠣ ꠝꠣꠞꠣ ꠎꠣꠁꠛꠣ।
GEN 44:23 ꠅꠁꠟꠦ ꠀꠙꠘꠦ ꠁ ꠉꠥꠟꠣꠝ ꠅꠇꠟꠞꠦ ꠇꠁꠍꠟꠣ, ꠔꠥꠝꠞꠣꠞ ꠢꠥꠞꠥ ꠜꠣꠁꠞꠦ ꠟꠉꠦ ꠘꠣ ꠀꠘꠟꠦ, ꠔꠥꠝꠞꠣ ꠀꠞ ꠀꠝꠣꠞ ꠍꠣꠝꠘꠦ ꠀꠁꠅ ꠘꠣ।
GEN 44:24 ꠄꠞꠟꠣꠉꠤ ꠀꠝꠞꠣ ꠚꠤꠞꠤꠀ ꠉꠤꠀ ꠀꠙꠘꠣꠞ ꠉꠥꠟꠣꠝ, ꠀꠝꠞꠣꠞ ꠛꠣꠛꠣꠞꠦ ꠢꠥꠎꠥꠞꠞ ꠢꠇꠟ ꠇꠕꠣ ꠢꠥꠘꠣꠁꠍꠟꠣꠝ।
GEN 44:25 ꠛꠣꠖꠦ ꠛꠣꠛꠣꠄ ꠇꠁꠟꠣ, ꠔꠥꠝꠞꠣ ꠢꠤꠞꠛꠣꠞ ꠉꠤꠀ ꠀꠝꠞꠣꠞ ꠟꠣꠉꠤ ꠀꠞꠅ ꠕꠥꠠꠣ ꠗꠣꠘ ꠟꠁꠀ ꠀꠘꠅꠉꠤ।
GEN 44:26 ꠔꠦꠃ ꠀꠝꠞꠣ ꠇꠁꠟꠣꠝ, ꠀꠝꠞꠣꠞ ꠢꠥꠞꠥ ꠜꠣꠁꠞꠦ ꠟꠉꠦ ꠖꠤꠟꠦ ꠀꠝꠞꠣ ꠎꠣꠁꠝꠥ, ꠀꠞꠘꠣꠄ ꠀꠝꠞꠣ ꠉꠤꠀ ꠢꠤ ꠝꠣꠘꠡꠞ ꠍꠣꠝꠘꠦ ꠝꠥꠈ ꠖꠦꠈꠣꠁꠔꠣꠝ ꠘꠣꠄ।
GEN 44:27 ꠅꠃ ꠀꠙꠘꠣꠞ ꠉꠥꠟꠣꠝ, ꠀꠝꠞꠣꠞ ꠛꠣꠛꠣꠄ ꠇꠁꠟꠣ, ꠔꠥꠝꠞꠣ ꠔ ꠎꠣꠘ, ꠀꠝꠣꠞ ꠁ ꠛꠤꠛꠤꠞ ꠔꠞꠚꠣ ꠖꠥꠉꠥ ꠙꠥꠀ ꠀꠍꠤꠟ।
GEN 44:28 ꠄꠞꠣꠞ ꠄꠇꠎꠘ ꠀꠝꠣꠞ ꠌꠈꠥꠞ ꠍꠣꠝꠘ ꠕꠣꠇꠤ ꠛꠣꠞ ꠅꠁꠀ ꠉꠦꠟ, ꠀꠞ ꠔ ꠇꠥꠘꠥꠖꠤꠘ ꠔꠣꠞꠦ ꠖꠦꠈꠟꠣꠝ ꠘꠣ, ꠀꠝꠤ ꠛꠥꠎꠟꠣꠝ ꠎꠦꠘ, ꠘꠤꠌꠄ ꠇꠥꠘꠥ ꠎꠣꠘꠥꠀꠞꠦ ꠔꠣꠞꠦ ꠍꠤꠠꠤ-ꠛꠤꠠꠤꠟꠣꠁꠍꠦ।
GEN 44:29 ꠅꠈꠘ ꠔꠥꠝꠞꠣ ꠄꠞꠦꠅ ꠀꠝꠣꠞ ꠉꠦꠍ ꠕꠘꠦ ꠘꠤꠟꠦꠉꠤ ꠀꠞ ꠄꠞ ꠇꠥꠘꠥ ꠈꠦꠔꠤ ꠅꠁꠟꠦ, ꠔꠣꠞ ꠖꠥꠈꠦ ꠔꠥꠝꠞꠣ ꠀꠝꠣꠞꠦ ꠅꠃ ꠙꠣꠇꠘꠣ ꠌꠥꠟꠦ ꠇꠄꠛꠞꠅ ꠢꠣꠞꠣꠁꠛꠣꠄ।
GEN 44:30 ꠄꠞꠟꠣꠉꠤ ꠅꠈꠘ ꠎꠥꠖꠤ ꠀꠙꠘꠣꠞ ꠉꠥꠟꠣꠝ, ꠀꠝꠣꠞ ꠛꠣꠛꠣꠞ ꠉꠦꠍꠦ ꠀꠝꠤ ꠎꠣꠁ ꠀꠞ ꠔꠣꠘ ꠁ ꠙꠥꠀꠞꠦ ꠟꠉꠦ ꠘꠣ ꠖꠦꠈꠂꠘ, ꠔꠦ ꠄꠞ ꠎꠣꠘꠞ ꠟꠉꠦ ꠔꠣꠘ ꠎꠣꠘ ꠄꠇꠈꠣꠘꠅ ꠛꠣꠘ꠆ꠖꠣ ꠉꠔꠤꠇꠦ,
GEN 44:31 ꠔꠣꠞꠦ ꠘꠣ ꠖꠦꠈꠟꠦ, ꠔꠣꠁꠘ ꠘꠤꠌꠄ ꠝꠣꠞꠣ ꠎꠣꠁꠛꠣ। ꠀꠙꠘꠣꠞ ꠉꠥꠟꠣꠝ, ꠀꠝꠞꠣꠞ ꠝꠥꠞꠛ꠆ꠛꠤ ꠛꠣꠚ ꠛꠃꠔ ꠖꠥꠈꠦ ꠙꠣꠇꠘꠣ ꠌꠥꠟ ꠟꠁꠀ ꠇꠄꠛꠞꠅ ꠢꠣꠝꠣꠁꠛꠣ।
GEN 44:32 ꠀꠞ ꠀꠙꠘꠣꠞ ꠉꠥꠟꠣꠝ ꠀꠝꠤ, ꠀꠝꠣꠞ ꠛꠣꠛꠣꠞ ꠉꠦꠍꠦ ꠔꠣꠞ ꠟꠣꠉꠤ ꠎꠣꠝꠤꠘ ꠅꠁꠀ ꠇꠁꠍꠤ ꠎꠦꠘ, ꠔꠣꠞꠦ ꠚꠤꠞꠣꠁꠀ ꠀꠘꠔꠦ ꠘꠣ ꠙꠣꠞꠟꠦ, ꠢꠣꠞꠣ ꠎꠤꠘ꠆ꠖꠦꠉꠤ ꠜꠞꠣ ꠀꠝꠤ ꠔꠥꠝꠣꠞ ꠉꠦꠍꠦ ꠖꠣꠛꠤꠔ ꠞꠁꠝꠥ।
GEN 44:33 ꠔꠦ ꠢꠥꠎꠥꠞ ꠀꠝꠤ ꠝꠤꠘꠔꠤ ꠇꠞꠤꠀꠞ, ꠔꠣꠞ ꠛꠖꠟꠣ ꠀꠝꠤ ꠀꠙꠘꠣꠞ ꠉꠥꠟꠣꠝꠤ ꠇꠞꠝꠥ ꠀꠞ ꠔꠣꠞꠦ ꠀꠙꠘꠦ ꠄꠞꠣꠞ ꠟꠉꠦ ꠎꠣꠁꠛꠣꠞ ꠖꠤꠟꠣꠃꠇ꠆ꠇꠣ।
GEN 44:34 ꠄꠞꠦ ꠟꠉꠦ ꠘꠣ ꠘꠤꠀ ꠀꠝꠤ ꠇꠤꠟꠣ ꠛꠣꠛꠣꠞ ꠉꠦꠍꠦ ꠎꠣꠁꠝꠥ? ꠘꠣꠁꠟꠦ ꠛꠣꠛꠣꠞ ꠎꠣꠘꠞ ꠡꠞ꠆ꠛꠘꠣꠡ ꠀꠝꠣꠞ ꠘꠤꠎꠞ ꠌꠃꠈꠦ ꠖꠦꠈꠘ ꠟꠣꠉꠛ।”
GEN 45:1 ꠁꠃꠍꠥꠚꠦ ꠔꠣꠘ ꠇꠞ꠆ꠝꠌꠣꠞꠤ ꠅꠇꠟꠞ ꠍꠣꠝꠘꠦ ꠘꠤꠎꠞꠦ ꠀꠞ ꠑꠤꠇ ꠞꠣꠈꠔꠣ ꠙꠣꠞꠟꠣ ꠘꠣ, ꠔꠣꠁꠘ ꠌꠤꠟ꠆ꠟꠣꠁꠀ ꠇꠁꠟꠣ, “ꠀꠝꠣꠞ ꠉꠦꠍ ꠕꠘꠦ ꠢꠇ꠆ꠇꠟ ꠢꠞꠤ ꠎꠣꠅ!” ꠔꠦꠃ ꠜꠣꠁꠀꠁꠘ꠆ꠔꠞ ꠉꠦꠍꠦ ꠘꠤꠎꠞ ꠙꠞꠤꠌꠄ ꠖꠦꠅꠀꠞ ꠡꠝꠄ ꠔꠣꠘ ꠍꠣꠝꠘꠦ ꠀꠞ ꠇꠦꠃ ꠞꠁꠟ ꠘꠣ।
GEN 45:2 ꠔꠣꠁꠘ ꠌꠤꠟ꠆ꠟꠣꠁꠀ ꠇꠣꠘ꠆ꠖꠘ ꠡꠥꠞꠥ ꠇꠞꠟꠣ, ꠔꠦꠃ ꠝꠤꠡꠞꠤ ꠅꠇꠟꠦ ꠁꠔꠣ ꠢꠥꠘꠟꠣ ꠀꠞ ꠚꠦꠞꠣꠃꠘꠞ ꠛꠣꠠꠤꠞ ꠝꠣꠘꠡꠦꠅ ꠁ ꠈꠛꠞ ꠙꠣꠁꠟꠣ।
GEN 45:3 ꠁꠃꠍꠥꠚꠦ ꠔꠣꠘ ꠜꠣꠁꠀꠁꠘ꠆ꠔꠞꠦ ꠇꠁꠟꠣ, “ꠀꠝꠤ ꠁꠃꠍꠥꠚ; ꠀꠝꠣꠞ ꠛꠣꠛꠣ ꠅꠈꠘꠅ ꠎꠤꠘ꠆ꠖꠣ ꠀꠍꠂꠘ ꠘꠤ?” ꠅꠃ ꠔꠣꠘ ꠜꠣꠁꠀꠁꠘ꠆ꠔꠦ ꠒꠞꠣꠁꠀ ꠎꠛꠣꠘ ꠛꠘ꠆ꠖ ꠅꠁꠉꠦꠟ, ꠝꠣꠔꠔꠣ ꠙꠣꠞꠟꠣ ꠘꠣ।
GEN 45:4 ꠔꠦꠃ ꠁꠃꠍꠥꠚꠦ ꠔꠣꠘ ꠜꠣꠁꠀꠁꠘꠞꠦ ꠇꠁꠟꠣ, “ꠔꠥꠝꠞꠣ ꠀꠝꠣꠞ ꠇꠣꠍꠣꠔ ꠀꠅ।” ꠔꠣꠞꠣ ꠇꠣꠍꠣꠔ ꠀꠁꠟꠦ ꠔꠣꠁꠘ ꠇꠁꠟꠣ, “ꠀꠝꠤ ꠔꠥꠝꠞꠣꠞ ꠢꠃ ꠜꠣꠁ ꠁꠃꠍꠥꠚ, ꠝꠤꠡꠞꠅ ꠎꠣꠅꠞꠣ ꠛꠦꠙꠣꠞꠤ ꠅꠇꠟꠞ ꠉꠦꠍꠦ, ꠔꠥꠝꠞꠣ ꠎꠣꠞꠦ ꠛꠦꠌꠤꠟꠣꠁꠍꠟꠣꠄ।
GEN 45:5 ꠅꠁꠟꠦ ꠔꠥꠝꠞꠣ ꠀꠝꠣꠞꠦ ꠛꠦꠌꠤꠍꠟꠣꠄ ꠇꠞꠤ ꠅꠈꠘ ꠛꠦꠎꠣꠞ ꠅꠁꠅ ꠘꠣ, ꠛꠣ ꠘꠤꠎꠞ ꠃꠙꠞꠦ ꠘꠣꠞꠣꠎ ꠅꠁꠅ ꠘꠣ। ꠝꠣꠘꠡꠞ ꠎꠣꠘꠞ ꠢꠦꠚꠣꠎꠔꠞ ꠟꠣꠉꠤ, ꠀꠟ꠆ꠟꠣꠄꠃ ꠔꠥꠝꠞꠣꠞ ꠀꠉꠦ ꠀꠝꠣꠞꠦ ꠅꠘꠅ ꠙꠣꠑꠣꠁꠍꠂꠘ।
GEN 45:6 ꠀꠇꠣꠟ ꠌꠟꠦꠞ ꠅꠃ ꠖꠥꠁ ꠛꠞꠍ ꠗꠞꠤ, ꠔꠦ ꠀꠞꠅ ꠙꠣꠌ ꠛꠞꠍ ꠇꠥꠘꠥ ꠈꠦꠔ-ꠈꠣꠝꠣꠞ ꠛꠣ ꠚꠡꠟ ꠚꠟꠔ ꠘꠣꠄ।
GEN 45:7 ꠖꠥꠘꠤꠀꠁꠔ ꠔꠥꠝꠞꠣꠞ ꠀꠅꠟꠣꠖ ꠅꠇꠟꠞꠦ ꠛꠣꠌꠣꠁꠀ ꠞꠣꠈꠣꠞ ꠟꠣꠉꠤ ꠀꠟ꠆ꠟꠣꠄꠃ ꠔꠣꠘ ꠇꠥꠖꠞꠔꠦ ꠔꠥꠝꠞꠣꠞ ꠀꠉꠦ ꠀꠝꠣꠞꠦ ꠙꠣꠑꠣꠁꠍꠂꠘ।
GEN 45:8 ꠔꠦꠃ ꠛꠥꠎꠣ ꠎꠣꠄ ꠎꠦꠘ, ꠔꠥꠝꠞꠣ ꠀꠝꠣꠞꠦ ꠁꠘꠅ ꠙꠣꠑꠣꠁꠍ ꠘꠣ, ꠀꠟ꠆ꠟꠣꠄꠃ ꠙꠣꠑꠣꠁꠍꠂꠘ। ꠔꠣꠁꠘ ꠀꠝꠣꠞꠦ ꠚꠦꠞꠣꠃꠘꠞ ꠛꠣꠚꠞ ꠢꠝꠣꠘꠤ ꠇꠞꠤꠀ ꠔꠣꠘ ꠙꠞꠤꠛꠣꠞꠞ ꠌꠣꠟꠇꠖꠣꠞ ꠛꠣꠘꠣꠁꠍꠂꠘ, ꠀꠞ ꠢꠣꠞꠣ ꠝꠤꠡꠞ ꠖꠦꠡ ꠡꠣꠡꠘꠞ ꠄꠈꠔꠤꠀꠞ ꠖꠤꠍꠂꠘ।
GEN 45:9 ꠅꠈꠘ ꠔꠥꠝꠞꠣ ꠎꠟꠖꠤ ꠇꠞꠤ ꠛꠣꠛꠣꠞ ꠉꠦꠍꠦ ꠉꠤꠀ ꠇꠅ, ꠔꠣꠘ ꠙꠥꠀ ꠁꠃꠍꠥꠚꠦ ꠇꠁꠍꠦ, ꠀꠟ꠆ꠟꠣꠄ ꠀꠝꠣꠞꠦ ꠢꠣꠞꠣ ꠝꠤꠡꠞ ꠖꠦꠡꠞ ꠌꠣꠟꠇꠖꠣꠞ ꠛꠣꠘꠣꠁꠍꠂꠘ, ꠔꠦ ꠔꠥꠝꠤ ꠀꠞ ꠖꠦꠞꠤ ꠘꠣ ꠇꠞꠤꠀ ꠀꠝꠣꠞ ꠉꠦꠍꠦ ꠀꠁꠅ।
GEN 45:10 ꠔꠥꠝꠤ, ꠔꠥꠝꠣꠞ ꠙꠥꠀ-ꠙꠥꠠꠤꠘ, ꠘꠣꠔꠤ-ꠙꠥꠔꠤ, ꠉꠞꠥ-ꠝꠦꠠꠣꠞ ꠙꠣꠟ ꠀꠞ ꠔꠥꠝꠣꠞ ꠎꠔꠔꠣ ꠀꠍꠦ, ꠢꠇ꠆ꠇꠟꠔꠣ ꠟꠁꠀ ꠀꠝꠣꠞ ꠉꠦꠍꠦ ꠉꠥꠡꠘ ꠄꠟꠣꠇꠣꠔ ꠞꠁꠛꠣꠄ।
GEN 45:11 ꠢꠘꠅ ꠀꠝꠤ ꠔꠥꠝꠣꠞꠦ ꠖꠦꠈꠣ-ꠢꠥꠘꠣ ꠇꠞꠝꠥ, ꠀꠇꠣꠟ ꠔ ꠀꠞꠅ ꠙꠣꠌ ꠛꠞꠍ ꠞꠁꠛ, ꠀꠞꠘꠣꠄ ꠔꠥꠝꠤꠔꠣꠁꠘ ꠢꠇꠟꠦ ꠁ ꠀꠇꠣꠟꠦ ꠛꠦꠢꠣꠟꠔ ꠅꠁꠎꠤꠔꠣꠄ ꠙꠣꠞ।
GEN 45:12 ꠀꠝꠣꠞ ꠀꠙꠘ ꠜꠣꠁ ꠛꠤꠘ-ꠁꠀꠝꠤꠘꠦ ꠀꠞ ꠔꠥꠝꠞꠣ ꠢꠇꠟꠦ ꠘꠤꠎꠞ ꠌꠃꠈꠦ ꠖꠦꠈꠞꠣꠄ ꠎꠦꠘ, ꠀꠝꠤ ꠘꠤꠎꠞ ꠝꠥꠈꠦ ꠔꠥꠝꠞꠣꠞ ꠟꠉꠦ ꠝꠣꠔꠞꠣꠝ।
GEN 45:13 ꠝꠤꠡꠞ ꠖꠦꠡꠅ ꠀꠝꠣꠞ ꠎꠦꠔꠣ ꠖꠣꠙꠐ, ꠝꠣꠘ-ꠁꠎ꠆ꠎꠔ ꠖꠦꠈꠞꠣꠄ, ꠔꠥꠝꠞꠣ ꠀꠝꠣꠞ ꠛꠣꠛꠣꠞꠦ ꠁꠔꠣ ꠇꠁꠛꠣꠄ, ꠀꠞ ꠔꠣꠘꠞꠦ ꠎꠟꠖꠤ ꠇꠞꠤ ꠅꠈꠣꠘꠅ ꠟꠁꠀ ꠀꠁꠛꠣꠄ।”
GEN 45:14 ꠢꠦꠡꠦ ꠁꠃꠍꠥꠚꠦ ꠔꠣꠘ ꠜꠣꠁ ꠛꠤꠘ-ꠁꠀꠝꠤꠘꠞ ꠉꠟꠣꠔ ꠀꠁꠘ꠆ꠎꠣ ꠇꠞꠤ ꠗꠞꠤꠀ ꠇꠣꠘ꠆ꠖꠘ ꠡꠥꠞꠥ ꠇꠞꠟꠣ ꠀꠞ ꠛꠤꠘ-ꠁꠀꠝꠤꠘꠦꠅ ꠉꠟꠣꠔ ꠗꠞꠤ ꠇꠣꠘ꠆ꠖꠣ-ꠇꠣꠐꠤ ꠇꠞꠟꠣ।
GEN 45:15 ꠛꠣꠖꠦ ꠁꠃꠍꠥꠚꠦ ꠔꠣꠘ ꠢꠇꠟ ꠜꠣꠁꠀꠁꠘꠞꠦ ꠢꠥꠋꠉꠣ ꠖꠤꠟꠣ ꠀꠞ ꠔꠣꠞꠣꠞ ꠉꠟꠣꠔ ꠗꠞꠤꠅ ꠇꠣꠘ꠆ꠖꠤꠟꠣ। ꠔꠦꠃ ꠜꠣꠁꠀꠁꠘ꠆ꠔꠦꠅ ꠔꠣꠘ ꠟꠉꠦ ꠝꠣꠔ-ꠇꠕꠣ ꠝꠣꠔꠟꠣ।
GEN 45:16 ꠁꠃꠍꠥꠚꠞ ꠜꠣꠁꠀꠁꠘ ꠀꠅꠀꠞ ꠈꠛꠞ ꠚꠦꠞꠣꠃꠘꠞ ꠛꠣꠠꠤꠔ ꠙꠃꠍꠤꠟꠦ, ꠚꠦꠞꠣꠃꠘ ꠀꠞ ꠔꠣꠘ ꠇꠞ꠆ꠝꠌꠣꠞꠤ ꠅꠇꠟ ꠈꠥꠡꠤ ꠅꠁꠟꠣ।
GEN 45:17 ꠚꠦꠞꠣꠃꠘꠦ ꠁꠃꠍꠥꠚꠞꠦ ꠇꠁꠟꠣ, “ꠔꠥꠝꠣꠞ ꠜꠣꠁꠀꠁꠘꠞꠦ ꠇꠅ ꠎꠦꠘ, ꠔꠥꠝꠞꠣ ꠉꠣꠗꠣꠞ ꠙꠤꠑꠤꠔ ꠗꠣꠘꠞ ꠛꠡ꠆ꠔꠣ ꠛꠣꠘ꠆ꠖꠤꠀ ꠇꠦꠘꠣꠘ ꠖꠦꠡꠅ ꠉꠤꠀ,
GEN 45:18 ꠛꠣꠛꠣꠞꠦ ꠀꠞ ꠔꠥꠝꠞꠣꠞ ꠙꠞꠤꠛꠣꠞꠞ ꠢꠇ꠆ꠇꠟꠞꠦ ꠟꠁꠀ ꠀꠝꠣꠞ ꠉꠦꠍꠦ ꠀꠁꠅ। ꠀꠝꠤ ꠔꠥꠝꠞꠣꠞꠦ ꠝꠤꠡꠞꠞ ꠜꠣꠟꠣ ꠜꠣꠟꠣ ꠌꠤꠎ ꠅꠇꠟ ꠖꠤꠝꠥ ꠀꠞ ꠔꠥꠝꠞꠣ ꠖꠦꠡꠞ ꠢꠇꠟ ꠕꠘꠦ ꠜꠣꠟꠣ ꠎꠣꠉꠣꠅ ꠙꠣꠁꠛꠣꠄ।
GEN 45:19 ꠀꠞ ꠔꠥꠝꠞꠣꠞꠦ ꠀꠝꠤ ꠢꠥꠇꠥꠝ ꠖꠤꠀꠞ, ꠔꠥꠝꠞꠣ ꠎꠣꠞꠎꠤꠞ ꠛꠃ, ꠙꠥꠀ-ꠙꠥꠠꠤꠘ꠆ꠔꠞ ꠟꠣꠉꠤ ꠝꠤꠡꠞ ꠖꠦꠡ ꠕꠣꠇꠤ ꠉꠣꠠꠤ ꠟꠁꠀ ꠉꠤꠀ, ꠔꠣꠞꠣꠞꠦ ꠀꠞ ꠛꠣꠛꠣꠞꠦ ꠟꠁꠀ ꠀꠁꠅ।
GEN 45:20 ꠀꠞ ꠢꠘꠅ ꠔꠥꠝꠞꠣꠞ ꠝꠣꠟ-ꠍꠣꠝꠣꠘꠣꠞ ꠟꠣꠉꠤ ꠝꠣꠄꠀ ꠖꠦꠈꠣꠁꠅ ꠘꠣ, ꠢꠣꠞꠣ ꠝꠤꠡꠞ ꠖꠦꠡꠞ ꠜꠣꠟꠣ ꠜꠣꠟꠣ ꠌꠤꠎ ꠅꠇꠟ ꠔ ꠔꠥꠝꠞꠣꠞꠃ।”
GEN 45:21 ꠁꠍꠞꠣꠁꠟꠞ ꠙꠥꠀꠂꠘ꠆ꠔꠦ ꠅꠃꠟꠣꠃ ꠇꠞꠟꠣ। ꠚꠦꠞꠣꠃꠘꠞ ꠢꠥꠇꠥꠝꠦ ꠁꠃꠍꠥꠚꠦ ꠔꠣꠞꠣꠞ ꠟꠣꠉꠤ ꠉꠣꠠꠤ ꠀꠞ ꠙꠕꠞ ꠈꠣꠘꠤꠞ ꠝꠍꠣ ꠖꠤꠟꠣ।
GEN 45:22 ꠔꠣꠁꠘ ꠄꠞꠣ ꠢꠇ꠆ꠇꠟꠞꠦ ꠄꠇ ꠡꠦꠐ ꠇꠞꠤꠀ ꠇꠣꠙꠠ ꠖꠤꠟꠣ, ꠅꠁꠟꠦ ꠛꠤꠘ-ꠁꠀꠝꠤꠘꠞꠦ ꠖꠤꠟꠣ ꠙꠣꠌ ꠡꠦꠐ ꠇꠣꠙꠠ ꠀꠞ ꠔꠤꠘ-ꠡ ꠞꠥꠙꠣꠞ ꠐꠦꠇꠣ।
GEN 45:23 ꠔꠣꠁꠘ ꠔꠣꠘ ꠛꠣꠚꠞ ꠟꠣꠉꠤ ꠖꠡꠉꠥ ꠉꠣꠗꠣꠞ ꠙꠤꠑꠤꠔ ꠇꠞꠤ ꠝꠤꠡꠞꠞ ꠜꠣꠟꠣ ꠜꠣꠟꠣ ꠌꠤꠎ ꠅꠇꠟ, ꠀꠞ ꠖꠡꠉꠥ ꠉꠣꠗꠤꠞ ꠙꠤꠑꠤꠔ ꠇꠞꠤ ꠈꠣꠘꠤꠞ ꠟꠣꠉꠤ ꠞꠥꠐꠤ ꠀꠞ ꠗꠣꠘ ꠛꠥꠏꠣꠁ ꠇꠞꠤ ꠙꠣꠑꠣꠁꠟꠣ।
GEN 45:24 ꠅꠃ ꠟꠣꠈꠣꠘ ꠔꠣꠘ ꠜꠣꠁꠀꠁꠘ꠆ꠔꠞꠦ ꠛꠤꠖꠣꠄ ꠖꠤꠟꠣ, ꠛꠤꠖꠣꠄ ꠛꠣꠟꠣ ꠔꠣꠁꠘ ꠄꠞꠣꠞꠦ ꠇꠁꠟꠣ, “ꠔꠥꠝꠞꠣ ꠙꠕꠅ ꠟꠣꠉꠣ-ꠟꠣꠉꠤ ꠇꠞꠤꠅ ꠘꠣ।”
GEN 45:25 ꠛꠣꠖꠦ ꠔꠣꠞꠣ ꠝꠤꠡꠞ ꠕꠘꠦ ꠇꠦꠘꠣꠘ ꠖꠦꠡꠅ, ꠔꠣꠞꠣꠞ ꠛꠣꠚ ꠁꠀꠇꠥꠛꠞ ꠉꠦꠍꠦ ꠉꠤꠀ ꠇꠁꠟꠣ,
GEN 45:26 “ꠁꠃꠍꠥꠚ ꠅꠈꠘꠅ ꠎꠤꠘ꠆ꠖꠣ ꠀꠍꠦ। ꠢꠦ ꠔ ꠅꠈꠘ ꠀꠡ꠆ꠔꠣ ꠝꠤꠡꠞ ꠖꠦꠡꠞ ꠅꠞ꠆ꠔꠣꠇꠞ꠆ꠔꠣ।” ꠅꠁꠟꠦ ꠁꠔꠣ ꠢꠥꠘꠤꠀ ꠁꠀꠇꠥꠛꠞ ꠢꠥꠡ ꠃꠠꠤ ꠉꠦꠟ, ꠔꠣꠘ ꠛꠤꠡ꠆ꠛꠣꠡꠃ ꠅꠁꠟ ꠘꠣ।
GEN 45:27 ꠛꠣꠖꠦ ꠁꠃꠍꠥꠚꠦ ꠔꠣꠞꠣꠞꠦ ꠎꠦꠔꠣ ꠇꠁꠀ ꠖꠤꠍꠟꠣ ꠁꠔꠣ ꠢꠥꠘꠤꠀ, ꠀꠞ ꠔꠣꠘꠦ ꠘꠦꠅꠀꠞ ꠟꠣꠉꠤ ꠁꠃꠍꠥꠚꠞ ꠙꠣꠑꠣꠁꠟ ꠉꠣꠠꠤꠘ ꠖꠦꠈꠤꠀ, ꠔꠣꠞꠣꠞ ꠛꠣꠚ ꠁꠀꠇꠥꠛꠞ ꠢꠥꠡ ꠑꠤꠇ ꠅꠁꠟ।
GEN 45:28 ꠁꠍꠞꠣꠁꠟꠦ ꠇꠁꠟꠣ, “ꠀꠝꠣꠞ ꠙꠥꠀ ꠁꠃꠍꠥꠚ ꠎꠦꠘ ꠅꠈꠘꠅ ꠎꠤꠔꠣ ꠀꠍꠦ, ꠅꠐꠣꠃ ꠔ ꠛꠃꠔ, ꠝꠞꠣꠞ ꠀꠉꠦ ꠀꠝꠤ ꠉꠤꠀ ꠔꠣꠞꠦ ꠖꠦꠈꠣꠃ ꠟꠣꠉꠛ।”
GEN 46:1 ꠁꠍꠞꠣꠁꠟꠦ ꠔꠣꠘ ꠢꠇ꠆ꠇꠟꠔꠣ ꠟꠁꠀ ꠛꠣꠞ ꠅꠁꠉꠦꠟꠣ। ꠀꠞ ꠛꠦꠞ-ꠡꠦꠛꠣꠔ ꠀꠁꠀ ꠔꠣꠘ ꠛꠣꠚ ꠁꠍꠢꠣꠇꠞ ꠀꠟ꠆ꠟꠣꠞ ꠘꠣꠝꠦ ꠇꠥꠞꠛꠣꠘꠤ ꠇꠞꠟꠣ।
GEN 46:2 ꠛꠣꠖꠦ ꠞꠣꠁꠔꠞ ꠛꠣꠟꠣ ꠀꠟ꠆ꠟꠣꠄ ꠁꠍꠞꠣꠁꠟꠞꠦ ꠖꠤꠖꠣꠞ ꠖꠤꠀ ꠇꠁꠟꠣ, “ꠅ ꠁꠀꠇꠥꠛ, ꠁꠀꠇꠥꠛ!” ꠔꠣꠁꠘ ꠎꠥꠀꠙ ꠖꠤꠟꠣ, “ꠅꠃꠘꠥ ꠀꠝꠤ।”
GEN 46:3 ꠀꠟ꠆ꠟꠣꠄ ꠚꠞꠝꠣꠁꠟꠣ, “ꠀꠝꠤ ꠀꠟ꠆ꠟꠣ, ꠔꠥꠝꠣꠞ ꠛꠣꠚꠞ ꠝꠣꠛꠥꠖ। ꠔꠥꠝꠤ ꠝꠤꠡꠞꠅ ꠎꠣꠁꠔꠦ ꠒꠞꠣꠁꠅ ꠘꠣ, ꠢꠘꠅ ꠀꠝꠤ ꠔꠥꠝꠣꠞ ꠄꠇ ꠛꠤꠞꠣꠐ ꠎꠣꠔꠤ ꠙꠄꠖꠣ ꠇꠞꠝꠥ।
GEN 46:4 ꠀꠝꠤ ꠔꠥꠝꠣꠞ ꠟꠉꠦ ꠟꠉꠦ ꠝꠤꠡꠞꠅ ꠎꠣꠁꠝꠥ, ꠀꠞ ꠀꠝꠤꠃ ꠔꠥꠝꠣꠞꠦ ꠢꠤꠞꠛꠣꠞ ꠚꠤꠞꠣꠁꠀ ꠀꠘꠝꠥ ꠀꠞ ꠔꠥꠝꠣꠞ ꠙꠥꠀ ꠁꠃꠍꠥꠚꠦ ꠔꠥꠝꠣꠞ ꠌꠃꠈ ꠝꠥꠎꠣꠁꠀ ꠖꠤꠛ।”
GEN 46:5 ꠛꠣꠖꠦ ꠁꠀꠇꠥꠛꠦ ꠛꠦꠞ-ꠡꠦꠛꠣ ꠕꠣꠇꠤ ꠞꠅꠀꠘꠣ ꠅꠁꠟꠣ। ꠚꠦꠞꠣꠃꠘꠦ ꠔꠣꠞꠣꠞꠦ ꠘꠦꠅꠀꠞ ꠟꠣꠉꠤ ꠎꠦꠔꠣ ꠉꠣꠠꠤꠘ ꠖꠤꠍꠟꠣ, ꠁꠍꠞꠣꠁꠟꠞ ꠙꠥꠀꠂꠘ꠆ꠔꠦ ꠅꠔꠣꠔ ꠇꠞꠤ ꠔꠣꠞꠣꠞ ꠛꠣꠚꠞꠦ ꠀꠞ ꠔꠣꠞꠣꠞ ꠛꠃ, ꠙꠥꠀ-ꠙꠥꠠꠤꠘꠞꠦ ꠟꠁꠀ ꠉꠦꠟꠣ।
GEN 46:6 ꠢꠦꠡꠦ ꠁꠀꠇꠥꠛ, ꠔꠣꠘ ꠙꠥꠀꠂꠘ ꠀꠞ ꠔꠣꠘ ꠙꠥꠞꠣ ꠉꠥꠡ꠆ꠐꠤ, ꠙꠡꠥꠞ ꠙꠣꠟ ꠅꠇꠟ ꠀꠞ ꠇꠦꠘꠣꠘ ꠖꠦꠡꠅ ꠇꠣꠝꠣꠁ ꠇꠞꠣ ꠢꠇ꠆ꠇꠟ ꠗꠘ-ꠖꠃꠟꠔ ꠟꠁꠀ ꠝꠤꠡꠞꠅ ꠙꠃꠍꠟꠣ।
GEN 46:7 ꠅꠃ ꠟꠣꠈꠣꠘ ꠁꠀꠇꠥꠛꠦ ꠔꠣꠘ ꠙꠥꠀ-ꠙꠥꠠꠤꠘ, ꠘꠣꠔꠤ-ꠘꠣꠔꠤꠘ, ꠙꠥꠞꠣ ꠉꠥꠡ꠆ꠐꠤꠞ ꠢꠇ꠆ꠇꠟꠞꠦ ꠟꠁꠀ ꠝꠤꠡꠞꠅ ꠙꠣꠞ ꠅꠁꠉꠦꠟꠣ।
GEN 46:8 ꠛꠘꠤ ꠁꠍꠞꠣꠁꠟ, ꠝꠣꠘꠤ ꠁꠀꠇꠥꠛ ꠀꠞ ꠔꠣꠘ ꠀꠅꠟꠣꠖ ꠅꠇꠟ ꠎꠦꠞꠣ ꠝꠤꠡꠞꠅ ꠉꠦꠍꠟꠣ, ꠔꠣꠞꠣꠞ ꠈꠣꠘ꠆ꠖꠣꠘ-ꠘꠣꠝꠣ ꠅꠁꠟ: ꠁꠀꠇꠥꠛꠞ ꠛꠠ ꠙꠥꠀ ꠞꠥꠛꠦꠘ;
GEN 46:9 ꠀꠞ ꠞꠥꠛꠦꠘꠞ ꠙꠥꠀꠂꠘ: ꠢꠘꠥꠇ, ꠚꠣꠟꠥ, ꠢꠣꠍꠤꠞ ꠀꠞ ꠇꠞ꠆ꠝꠤ।
GEN 46:10 ꠡꠤꠝꠤꠅꠘꠞ ꠙꠥꠀꠂꠘ: ꠎꠤꠝꠥꠄꠟ, ꠎꠣꠝꠤꠘ, ꠅꠢꠖ, ꠎꠣꠈꠤꠘ, ꠡꠥꠢꠞ, ꠀꠞ ꠇꠦꠘꠣꠘꠤ ꠛꠃꠞ ꠔꠞꠚꠣ ꠡꠃꠟ।
GEN 46:11 ꠟꠦꠛꠤꠞ ꠙꠥꠀꠂꠘ: ꠎꠣꠞꠍꠥꠘ, ꠇꠣꠢꠣꠔ ꠀꠞ ꠝꠣꠞꠣꠞꠤ।
GEN 46:12 ꠄꠢꠥꠖꠣꠞ ꠙꠥꠀꠂꠘ: ꠄꠁꠞ, ꠅꠘꠘ, ꠡꠦꠟꠣ, ꠚꠤꠞꠥꠎ ꠀꠞ ꠎꠣꠞꠣꠢ। ꠅꠁꠟꠦ ꠅꠘꠘ ꠀꠞ ꠄꠁꠞ ꠇꠦꠘꠣꠘ ꠖꠦꠡꠅꠃ ꠝꠞꠤ ꠉꠦꠍꠟꠣ। ꠚꠤꠞꠥꠎꠞ ꠙꠥꠀꠂꠘ: ꠢꠣꠍꠤꠞ ꠀꠞ ꠢꠣꠝꠥꠟ।
GEN 46:13 ꠁꠍꠣꠈꠞꠞ ꠙꠥꠀꠂꠘ: ꠔꠟꠣ, ꠚꠅꠀ, ꠎꠣꠡꠥꠛ ꠀꠞ ꠡꠤꠝꠞꠘ।
GEN 46:14 ꠍꠛꠥꠟꠘꠞ ꠙꠥꠀꠂꠘ: ꠍꠦꠞꠦꠖ, ꠄꠟꠘ ꠀꠞ ꠎꠢꠟꠦꠟ।
GEN 46:15 ꠔꠣꠞꠣ ꠅꠁꠟꠣ ꠟꠦꠀꠞ ꠢꠥꠞꠥꠔ꠆ꠔꠣꠁꠘ, ꠙꠖ꠆ꠖꠘ-ꠁꠞꠣꠝꠅ ꠟꠦꠀꠞ ꠔꠞꠚꠣ ꠁꠀꠇꠥꠛꠞ ꠁ ꠢꠥꠞꠥꠔ꠆ꠔꠣꠁꠘ ꠀꠞ ꠔꠣꠘ ꠙꠥꠠꠤ ꠖꠤꠘꠣꠞ ꠎꠘꠝ ꠅꠁꠍꠤꠟ, ꠄꠞꠣ ꠢꠇ꠆ꠇꠟꠔꠣꠄ ꠔꠦꠔ꠆ꠞꠤꠡ ꠎꠘ।
GEN 46:16 ꠍꠣꠖꠥꠞ ꠙꠥꠀꠂꠘ ꠅꠁꠟꠣ: ꠍꠤꠚꠘ, ꠢꠉꠤ, ꠡꠥꠘꠤ, ꠁꠡꠛꠥꠘ, ꠄꠁꠞꠤ, ꠅꠞꠥꠖꠤ ꠀꠞ ꠅꠞꠦꠟꠤ।
GEN 46:17 ꠀꠡꠤꠞꠞ ꠙꠥꠀꠂꠘ: ꠁꠝꠘꠣ, ꠎꠤꠍꠛꠣ, ꠎꠤꠍꠛꠤ, ꠛꠞꠤꠀ ꠀꠞ ꠔꠣꠞꠣꠞ ꠛꠁꠘ ꠍꠦꠞꠣ। ꠛꠞꠤꠀꠞ ꠙꠥꠀꠂꠘ: ꠢꠦꠛꠞ ꠀꠞ ꠝꠟꠇꠤꠄꠟ।
GEN 46:18 ꠔꠣꠞꠣ ꠅꠁꠟꠣ ꠎꠤꠟꠙꠣꠞ ꠢꠥꠞꠥꠔ꠆ꠔꠣꠁꠘ, ꠟꠣꠛꠘꠦ ꠔꠣꠘ ꠙꠥꠠꠤ ꠟꠦꠀꠞ ꠟꠉꠦ ꠅꠃ ꠛꠣꠘ꠆ꠖꠤ ꠎꠤꠟꠙꠣꠞꠦ ꠖꠤꠍꠟꠣ, ꠄꠞꠣ ꠢꠇꠟꠃ ꠔꠣꠁꠞ ꠔꠞꠚꠣ ꠁꠀꠇꠥꠛꠞ ꠢꠥꠞꠥꠔ꠆ꠔꠣꠁꠘ, ꠅꠃ ꠡꠥꠟ꠆ꠟ ꠎꠘ।
GEN 46:19 ꠁꠀꠇꠥꠛꠞ ꠛꠤꠛꠤ ꠞꠣꠢꠦꠟꠣꠞ ꠙꠥꠀꠂꠘ ꠅꠁꠟꠣ: ꠁꠃꠍꠥꠚ ꠀꠞ ꠛꠤꠘ-ꠁꠀꠝꠤꠘ।
GEN 46:20 ꠁꠃꠍꠥꠚꠞ ꠙꠥꠀꠂꠘ ꠝꠣꠘꠡꠣ ꠀꠞ ꠀꠚꠞꠣꠁꠝ ꠝꠤꠡꠞ ꠖꠦꠡꠅ ꠎꠘꠝꠤꠍꠟꠣ। ꠄꠞꠣꠞ ꠝꠣ ꠅꠁꠟꠣ ꠅꠃꠘ ꠝꠘ꠆ꠖꠤꠞꠞ ꠛꠣꠛꠘ-ꠑꠣꠇꠥꠞ, ꠙꠥꠐꠤꠚꠦꠞꠣꠞ ꠙꠥꠠꠤ ꠀꠡꠘꠔ।
GEN 46:21 ꠛꠤꠘ-ꠁꠀꠝꠤꠘꠞ ꠙꠥꠀꠂꠘ: ꠛꠦꠟꠣ, ꠛꠦꠈꠞ, ꠅꠡꠛꠦꠟ, ꠉꠦꠞꠣ, ꠘꠣꠝꠣꠘ, ꠄꠢꠤ, ꠞꠥꠡ, ꠝꠥꠙ꠆ꠙꠤꠝ, ꠢꠥꠙ꠆ꠙꠤꠝ ꠀꠞ ꠅꠞ꠆ꠖ।
GEN 46:22 ꠔꠣꠞꠣ ꠅꠁꠟꠣ ꠞꠣꠢꠦꠟꠣꠞ ꠔꠞꠚꠣ ꠁꠀꠇꠥꠛꠞ ꠢꠥꠞꠥꠔ꠆ꠔꠣꠁꠘ, ꠅꠃ ꠌꠃꠖ꠆ꠖ ꠎꠘ।
GEN 46:23 ꠖꠣꠘꠞ ꠙꠥꠀ: ꠢꠥꠡꠤꠝ।
GEN 46:24 ꠘꠙ꠆ꠔꠣꠟꠤꠞ ꠙꠥꠀꠂꠘ: ꠎꠢꠡꠤꠄꠟ, ꠉꠥꠘꠤ, ꠁꠎꠦꠞ ꠀꠞ ꠡꠤꠟ꠆ꠟꠦꠝ।
GEN 46:25 ꠔꠣꠞꠣ ꠅꠁꠟꠣ ꠛꠤꠟꠢꠣꠞ ꠢꠥꠞꠥꠔ꠆ꠔꠣꠁꠘ, ꠟꠣꠛꠘꠦ ꠔꠣꠘ ꠙꠥꠠꠤ ꠞꠣꠢꠦꠟꠣꠞ ꠟꠉꠦ ꠅꠃ ꠛꠣꠘ꠆ꠖꠤ ꠛꠤꠟꠢꠣꠞꠦ ꠖꠤꠍꠟꠣ। ꠄꠞꠣ ꠢꠇꠟꠃ ꠔꠣꠁꠞ ꠔꠞꠚꠣ ꠁꠀꠇꠥꠛꠞ ꠢꠥꠞꠥꠔ꠆ꠔꠣꠁꠘ, ꠅꠃ ꠡꠣꠔ ꠎꠘ।
GEN 46:26 ꠁꠀꠇꠥꠛꠞ ꠘꠣꠘꠣꠘ ꠔꠞꠚꠣꠞ ꠎꠘꠝꠞ ꠎꠣꠞꠣ ꠝꠤꠡꠞꠅ ꠀꠁꠟꠣ, ꠔꠣꠘ ꠙꠥꠀꠂꠘ꠆ꠔꠞ ꠛꠃ ꠛꠣꠖ ꠖꠤꠀ ꠄꠞꠣ ꠢꠇꠟꠦ ꠝꠤꠟꠤꠀ ꠍꠄꠡꠐ꠆ꠐꠤ ꠎꠘ ꠀꠍꠟꠣ।
GEN 46:27 ꠝꠤꠡꠞ ꠖꠦꠡꠅ ꠁꠃꠍꠥꠚꠞ ꠖꠥꠁꠎꠘ ꠙꠥꠀ ꠎꠘꠝꠤꠍꠟꠣ। ꠄꠞꠣ ꠡꠢ ꠁꠀꠇꠥꠛꠞ ꠙꠞꠤꠛꠣꠞꠞ ꠎꠣꠞꠣ ꠝꠤꠡꠞꠅ ꠀꠁꠟꠣ, ꠔꠣꠞꠣ ꠝꠥꠐ ꠡꠔ꠆ꠔꠁꠞ ꠎꠘ।
GEN 46:28 ꠄꠞ ꠀꠉꠦ ꠁꠀꠇꠥꠛꠦ ꠄꠢꠥꠖꠣꠞꠦ ꠁꠃꠍꠥꠚꠞ ꠉꠦꠍꠦ ꠙꠣꠑꠣꠁꠟꠣ, ꠉꠥꠡꠘꠅ ꠎꠣꠅꠀꠞ ꠙꠕ ꠌꠤꠘꠣꠞ ꠟꠣꠉꠤ, ꠔꠦꠃ ꠔꠣꠞꠣ ꠢꠇ꠆ꠇꠟ ꠅꠘꠅ ꠉꠤꠀ ꠙꠃꠍꠟꠣ।
GEN 46:29 ꠀꠞ ꠁꠃꠍꠥꠚꠦꠅ ꠊꠥꠠꠣꠞ ꠉꠣꠠꠤ ꠢꠣꠎꠣꠁꠀ ꠔꠣꠘ ꠛꠣꠚ ꠁꠍꠞꠣꠁꠟꠞ ꠟꠉꠦ ꠉꠥꠡꠘꠅ ꠖꠦꠈꠣ ꠇꠞꠣꠔ ꠉꠦꠟꠣ, ꠀꠞ ꠔꠣꠘꠞꠦ ꠖꠦꠈꠤꠀꠃ ꠀꠁꠘ꠆ꠎꠣ ꠇꠞꠤ ꠉꠟꠣꠔ ꠗꠞꠤꠀ ꠛꠃꠔ ꠡꠝꠄ ꠇꠣꠘ꠆ꠖꠤꠟꠣ।
GEN 46:30 ꠔꠦꠃ ꠁꠍꠞꠣꠁꠟꠦ ꠁꠃꠍꠥꠚꠞꠦ ꠇꠁꠟꠣ, “ꠔꠥꠝꠤ ꠎꠦꠘ ꠎꠤꠘ꠆ꠖꠣ ꠀꠍ ꠞꠦ ꠙꠥꠔ, ꠁꠐꠣ ꠘꠤꠎꠞ ꠌꠃꠈꠦ ꠖꠦꠈꠟꠣꠝ। ꠅꠈꠘ ꠡꠣꠘ꠆ꠔꠤꠄꠃ ꠝꠞꠔꠣꠝ ꠙꠣꠞꠝꠥ।”
GEN 46:31 ꠅꠃ ꠁꠃꠍꠥꠚꠦ ꠔꠣꠘ ꠜꠣꠁꠀꠁꠘ꠆ꠔꠞꠦ ꠀꠞ ꠔꠣꠘ ꠛꠣꠚꠞ ꠟꠉꠞ ꠢꠇꠟꠞꠦ ꠇꠁꠟꠣ, “ꠀꠝꠤ ꠉꠤꠀ ꠚꠦꠞꠣꠃꠘꠞꠦ ꠎꠣꠘꠣꠁꠝꠥ, ꠀꠝꠣꠞ ꠜꠣꠁꠀꠁꠘ ꠀꠞ ꠀꠝꠣꠞ ꠛꠣꠚꠞ ꠛꠣꠠꠤꠞ ꠢꠇꠟ, ꠇꠦꠘꠣꠘ ꠖꠦꠡ ꠕꠘꠦ ꠀꠝꠣꠞ ꠉꠦꠍꠦ ꠀꠁꠌ꠆ꠍꠂꠘ।
GEN 46:32 ꠔꠣꠞꠣꠞ ꠇꠣꠝ ꠅꠁꠟ ꠙꠡꠥ ꠙꠣꠟꠣ। ꠔꠣꠞꠣ ꠔ ꠍꠣꠉꠟ-ꠝꠦꠠꠣ ꠙꠣꠟꠂꠘ, ꠀꠞ ꠔꠣꠞꠣꠞ ꠙꠡꠥꠞ ꠙꠣꠟ ꠅꠇꠟ ꠀꠞ ꠢꠇ꠆ꠇꠟ ꠝꠣꠟ-ꠍꠣꠝꠣꠘꠣ ꠟꠁꠀ ꠀꠁꠌ꠆ꠍꠂꠘ।
GEN 46:33 ꠚꠦꠞꠣꠃꠘꠦ ꠎꠦꠛꠟꠣ ꠔꠥꠝꠞꠣꠞꠦ ꠎꠤꠇꠣꠁꠛꠣ, ꠀꠙꠘꠣꠞꠣ ꠇꠤꠔꠣ ꠇꠣꠝ ꠇꠞꠂꠘ?
GEN 46:34 ꠅꠃ ꠡꠝꠄ ꠔꠥꠝꠞꠣ ꠇꠁꠅ, ꠀꠙꠘꠣꠞ ꠁ ꠉꠥꠟꠣꠝ ꠅꠇꠟꠦ ꠀꠞ ꠔꠣꠞꠣꠞ ꠛꠣꠚ-ꠖꠣꠖꠣ ꠅꠇꠟꠦꠅ ꠢꠥꠞꠥꠝꠣꠘ ꠕꠘꠦꠃ ꠙꠡꠥ ꠙꠣꠟꠤꠀ ꠛꠣꠌꠂꠘ। ꠔꠦꠃ ꠔꠥꠝꠞꠣ ꠉꠥꠡꠘꠅ ꠞꠁꠔꠣꠄ ꠙꠣꠞꠛꠣꠄ। ꠇꠣꠞꠘ ꠙꠡꠥ ꠙꠣꠟꠞꠣ ꠝꠣꠘꠡꠞꠦ ꠝꠤꠡꠞꠤ ꠅꠇꠟꠦ ꠊꠤꠘ ꠇꠞꠂꠘ।”
GEN 47:1 ꠁꠃꠍꠥꠚꠦ ꠚꠦꠞꠣꠃꠘꠞ ꠉꠦꠍꠦ ꠉꠤꠀ ꠇꠁꠟꠣ, “ꠀꠝꠣꠞ ꠛꠣꠛꠣ ꠀꠞ ꠜꠣꠁꠀꠁꠘ꠆ꠔꠦ, ꠔꠣꠞꠣꠞ ꠉꠞꠥ-ꠍꠣꠉꠟ ꠀꠞ ꠔꠣꠞꠣꠞ ꠢꠇ꠆ꠇꠟꠔꠣ ꠟꠁꠀ, ꠇꠦꠘꠣꠘ ꠖꠦꠡ ꠍꠣꠠꠤꠀ ꠀꠁꠍꠂꠘ। ꠔꠣꠞꠣ ꠀꠁꠀ ꠉꠥꠡꠘꠅ ꠙꠃꠍꠤ ꠉꠦꠍꠂꠘ।”
GEN 47:2 ꠜꠣꠁꠀꠁꠘ꠆ꠔꠞ ꠝꠣꠎꠦ ꠙꠣꠌ ꠎꠘꠞꠦ ꠘꠤꠀ ꠔꠣꠁꠘ ꠚꠦꠞꠣꠃꠘꠞ ꠍꠣꠝꠘꠦ ꠀꠎꠤꠞ ꠇꠞꠟꠣ।
GEN 47:3 ꠚꠦꠞꠣꠃꠘꠦ ꠔꠣꠞꠣꠞꠦ ꠎꠤꠇꠣꠁꠟꠣ, “ꠔꠥꠝꠞꠣ ꠇꠤꠔꠣ ꠇꠣꠝ ꠇꠞꠅ?” ꠔꠣꠞꠣ ꠇꠁꠟꠣ, “ꠀꠙꠘꠣꠞ ꠁ ꠉꠥꠟꠣꠝ ꠅꠇꠟꠦ ꠛꠣꠚ-ꠖꠣꠖꠣꠞ ꠀꠝꠟ ꠕꠣꠇꠤꠃ ꠙꠡꠥ ꠙꠣꠟꠤ।”
GEN 47:4 ꠔꠣꠞꠣ ꠢꠤꠞꠛꠣꠞ ꠇꠁꠟꠣ, “ꠀꠝꠞꠣ ꠁ ꠖꠦꠡꠅ ꠝꠥꠍꠣꠚꠤꠞ ꠅꠁꠀ ꠕꠣꠇꠣꠞ ꠟꠣꠉꠤ ꠀꠁꠍꠤ। ꠇꠦꠘꠣꠘ ꠖꠦꠡꠅ ꠅꠈꠘ ꠛꠦꠎꠥꠁꠔꠣ ꠘꠤꠖꠣꠘ ꠌꠟꠦꠞ ꠇꠞꠤ, ꠢꠤꠘꠅ ꠀꠝꠞꠣꠞ ꠙꠡꠥꠞ ꠙꠣꠟꠞ ꠈꠥꠞꠣꠇꠤ ꠘꠣꠄ। ꠄꠞꠟꠣꠉꠤ ꠖꠄꠀ ꠇꠞꠤ ꠀꠙꠘꠣꠞ ꠁ ꠉꠥꠟꠣꠝ ꠅꠇꠟꠞꠦ, ꠉꠥꠡꠘꠅ ꠞꠁꠛꠣꠞ ꠡꠥꠎꠥꠉ ꠖꠦꠃꠇ꠆ꠇꠣ।”
GEN 47:5 ꠚꠦꠞꠣꠃꠘꠦ ꠁꠃꠍꠥꠚꠞꠦ ꠇꠁꠟꠣ, “ꠔꠥꠝꠣꠞ ꠛꠣꠚ-ꠜꠣꠁꠀꠁꠘ ꠔꠥꠝꠣꠞ ꠉꠦꠍꠦ ꠀꠁꠍꠂꠘ;
GEN 47:6 ꠀꠡ꠆ꠔꠣ ꠝꠤꠡꠞ ꠖꠦꠡꠃ ꠔ ꠔꠥꠝꠣꠞ ꠍꠣꠝꠘꠦ ꠙꠠꠤ ꠞꠁꠍꠦ। ꠖꠦꠡꠞ ꠢꠇꠟ ꠕꠣꠇꠤ ꠜꠣꠟꠣ ꠎꠣꠉꠣꠔ ꠔꠣꠞꠣꠞꠦ ꠞꠁꠔꠦ ꠖꠦꠅ, ꠔꠣꠞꠣ ꠉꠥꠡꠘꠅꠃ ꠕꠣꠇꠃꠇ ꠀꠞ ꠄꠞꠣꠞ ꠝꠣꠎꠦ ꠎꠁꠉ꠆ꠉ ꠝꠣꠘꠥꠡ ꠙꠣꠁꠟꠦ, ꠔꠣꠞꠣꠞꠦ ꠀꠝꠣꠞ ꠙꠡꠥꠞ ꠙꠣꠟꠞ ꠌꠣꠟꠇꠖꠣꠞ ꠛꠣꠘꠣꠁꠟꠣꠅ।”
GEN 47:7 ꠛꠣꠖꠦ ꠁꠃꠍꠥꠚꠦ ꠔꠣꠘ ꠛꠣꠚ ꠁꠀꠇꠥꠛꠞꠦ ꠚꠦꠞꠣꠃꠘꠞ ꠍꠣꠝꠘꠦ ꠀꠘꠣꠁꠟꠣ ꠀꠞ ꠁꠀꠇꠥꠛꠦ ꠚꠦꠞꠣꠃꠘꠞꠦ ꠖꠥꠀ ꠖꠤꠟꠣ।
GEN 47:8 ꠚꠦꠞꠣꠃꠘꠦ ꠁꠀꠇꠥꠛꠞꠦ ꠎꠤꠇꠣꠁꠟꠣ, “ꠀꠙꠘꠣꠞ ꠛꠄꠅꠡ ꠇꠔ ꠅꠁꠍꠦ?”
GEN 47:9 ꠁꠀꠇꠥꠛꠦ ꠇꠁꠟꠣ, “ꠖꠥꠘꠤꠀꠁꠔ ꠀꠝꠣꠞ ꠝꠥꠍꠣꠚꠤꠞꠤꠞ ꠀꠄꠃ ꠄꠇ-ꠡ ꠔꠤꠡ ꠛꠞꠍ ꠅꠁꠍꠦ, ꠁꠔꠣ ꠔ ꠛꠦꠡꠤ ꠘꠣꠄ, ꠀꠞ ꠈꠥꠛ ꠔꠇꠟꠤꠚꠦꠃ ꠁ ꠖꠤꠘ ꠇꠣꠐꠍꠦ; ꠀꠝꠣꠞ ꠛꠣꠚ-ꠖꠣꠖꠣꠞ ꠝꠥꠍꠣꠚꠤꠞꠤꠞ ꠀꠄꠃꠞ ꠢꠝꠣꠘ ꠅꠈꠘꠅ ꠅꠁꠍꠦ ꠘꠣ।”
GEN 47:10 ꠢꠦꠡꠦ ꠁꠀꠇꠥꠛꠦ ꠚꠦꠞꠣꠃꠘꠞꠦ ꠖꠥꠀ ꠇꠞꠤꠀ ꠛꠤꠖꠣꠄ ꠟꠁꠟꠣ।
GEN 47:11 ꠔꠦꠃ ꠁꠃꠍꠥꠚꠦ ꠚꠦꠞꠣꠃꠘꠞ ꠢꠥꠇꠥꠝ ꠝꠔ, ꠔꠣꠘ ꠛꠣꠚ-ꠜꠣꠁꠀꠁꠘꠞꠦ ꠝꠤꠡꠞ ꠖꠦꠡꠞ ꠢꠇꠟ ꠕꠣꠇꠤ ꠜꠣꠟꠣ ꠎꠣꠉꠣ, ꠞꠣꠝꠣꠡꠦꠡ ꠄꠟꠣꠇꠣꠔ ꠞꠁꠔꠣ ꠖꠤꠟꠣ।
GEN 47:12 ꠁꠃꠍꠥꠚꠦ ꠔꠣꠘ ꠛꠣꠚ-ꠜꠣꠁꠀꠁꠘ ꠀꠞ ꠔꠣꠞꠣꠞ ꠙꠞꠤꠛꠣꠞꠞꠦ ꠎꠣꠞꠎꠤꠞ ꠖꠞꠇꠣꠞꠤ, ꠈꠣꠘꠤ-ꠈꠥꠞꠣꠇꠤ ꠢꠇꠟꠔꠣ ꠎꠥꠉꠣꠁ ꠖꠤꠟꠣ।
GEN 47:13 ꠛꠣꠖꠦ ꠀꠇꠣꠟ ꠀꠞꠅ ꠛꠦꠕꠣꠄꠀ ꠅꠁꠟ, ꠖꠦꠡꠞ ꠇꠥꠘꠥ ꠎꠣꠉꠣꠔ ꠈꠣꠘꠤꠞ ꠇꠥꠘ꠆ꠔꠣ ꠀꠍꠤꠟ ꠘꠣ। ꠔꠦꠃ ꠝꠤꠡꠞ ꠀꠞ ꠇꠦꠘꠣꠘ ꠖꠦꠡ ꠄꠇ꠆ꠇꠦꠛꠣꠞꠦ ꠇꠣꠢꠤꠟ ꠅꠁꠉꠦꠟ।
GEN 47:14 ꠝꠤꠡꠞ ꠀꠞ ꠇꠦꠘꠣꠘ ꠖꠦꠡꠞ ꠝꠣꠘꠡꠞ ꠎꠔ ꠐꠦꠇꠣ-ꠙꠄꠡꠣ ꠡꠥꠘꠣ-ꠞꠥꠙꠣ ꠀꠍꠤꠟ, ꠁꠔꠣꠖꠤ ꠔꠣꠞꠣ ꠗꠣꠘ ꠈꠞꠤꠖ ꠇꠞꠣꠄ, ꠁꠃꠍꠥꠚꠦ ꠅꠔꠣ ꠖꠟꠣ ꠇꠞꠤꠀ ꠚꠦꠞꠣꠃꠘꠞ ꠜꠣꠘ꠆ꠒꠣꠞꠅ ꠎꠝꠣꠁꠟꠣ।
GEN 47:15 ꠝꠤꠡꠞ ꠀꠞ ꠇꠦꠘꠣꠘ ꠖꠦꠡꠞ ꠢꠇꠟ ꠡꠥꠘꠣ-ꠞꠥꠙꠣ ꠎꠦꠛꠟꠣ ꠚꠥꠠꠣꠁ ꠉꠦꠟ, ꠔꠦꠃ ꠝꠤꠡꠞꠤ ꠅꠇꠟꠦ ꠀꠁꠀ ꠁꠃꠍꠥꠚꠞꠦ ꠇꠁꠟꠣ, “ꠀꠝꠞꠣꠞꠦ ꠈꠣꠘꠤꠞ ꠇꠥꠘ꠆ꠔꠣ ꠖꠦꠃꠇ꠆ꠇꠣ। ꠀꠝꠞꠣꠞ ꠡꠥꠘꠣ-ꠞꠥꠙꠣ ꠚꠥꠠꠣꠁ ꠉꠦꠍꠦ ꠇꠞꠤ ꠀꠙꠘꠣꠞ ꠌꠃꠈꠞ ꠍꠣꠝꠘꠦ ꠝꠞꠤꠎꠤꠔꠣꠝ ꠘꠤ?”
GEN 47:16 ꠁꠃꠍꠥꠚꠦ ꠇꠁꠟꠣ, “ꠔꠣꠁꠟꠦ ꠔꠥꠝꠞꠣꠞ ꠙꠡꠥ ꠅꠇꠟ ꠀꠘꠤꠀ ꠖꠦꠅ, ꠡꠥꠘꠣ-ꠞꠥꠙꠣ ꠚꠥꠠꠣꠁ ꠉꠦꠟꠦꠅ ꠙꠡꠥ ꠅꠇꠟꠞ ꠛꠖꠟꠣ ꠀꠝꠤ ꠔꠥꠝꠞꠣꠞꠦ ꠈꠣꠘꠤ-ꠈꠥꠞꠣꠇꠤ ꠖꠤꠝꠥ।”
GEN 47:17 ꠔꠦꠃ ꠔꠣꠞꠣ ꠎꠣꠞꠎꠤꠞ ꠉꠞꠥ-ꠍꠣꠉꠟ, ꠊꠥꠠꠣ-ꠝꠦꠠꠣ, ꠉꠣꠗꠣ-ꠉꠣꠗꠤ ꠁꠃꠍꠥꠚꠞ ꠉꠦꠍꠦ ꠀꠘꠟꠣ ꠀꠞ ꠁꠃꠍꠥꠚꠦ ꠄꠞ ꠛꠖꠟꠣ ꠔꠣꠞꠣꠞꠦ ꠗꠣꠘ ꠖꠤꠟꠣ। ꠅꠃ ꠟꠣꠈꠣꠘ ꠔꠣꠞꠣꠞ ꠢꠇ꠆ꠇꠟ ꠙꠡꠥꠞ ꠛꠖꠟꠣ, ꠢꠤ ꠛꠍꠞꠞ ꠈꠥꠞꠣꠇꠤ ꠌꠣꠟꠣꠁꠟꠣ।
GEN 47:18 ꠀꠞ ꠢꠤ ꠛꠞꠍ ꠉꠦꠟ, ꠄꠞ ꠛꠣꠖꠞ ꠛꠞꠍ ꠝꠣꠘꠡꠦ ꠀꠁꠀ ꠁꠃꠍꠥꠚꠞꠦ ꠇꠁꠟꠣ, “ꠢꠥꠎꠥꠞꠞ ꠉꠦꠍꠦ ꠀꠝꠞꠣ ꠇꠥꠘ꠆ꠔꠣꠃ ꠟꠥꠇꠣꠁꠀꠞ ꠘꠣ, ꠀꠝꠞꠣꠞ ꠢꠇꠟ ꠡꠥꠘꠣ-ꠞꠥꠙꠣ ꠡꠦꠡ ꠅꠁꠉꠦꠍꠦ ꠀꠞ ꠙꠡꠥ ꠅꠇꠟꠅ ꠀꠙꠘꠣꠞꠦ ꠖꠤꠟꠣꠁꠍꠤ। ꠅꠈꠘ ꠀꠝꠞꠣꠞ ꠀꠞ ꠇꠥꠘ꠆ꠔꠣꠃ ꠞꠁꠍꠦ ꠘꠣ, ꠈꠣꠟꠤ ꠅꠃ ꠡꠞꠤꠟ ꠀꠞ ꠎꠣꠉꠣ-ꠎꠝꠤꠘ ꠍꠣꠠꠣ।
GEN 47:19 ꠄꠞꠟꠣꠉꠤ ꠀꠙꠘꠣꠞ ꠌꠃꠈꠞ ꠍꠣꠝꠘꠦ ꠎꠝꠤ-ꠎꠝꠣ ꠡꠢ ꠀꠝꠞꠣ ꠇꠤꠟꠣ ꠝꠞꠤꠎꠤꠔꠣꠝ? ꠔꠦ ꠀꠙꠘꠦ ꠀꠝꠞꠣꠞꠦꠅ ꠀꠞ ꠀꠝꠞꠣꠞ ꠢꠇꠟ ꠎꠝꠤ-ꠎꠝꠣꠅ ꠟꠁꠟꠣꠃꠇ꠆ꠇꠣ, ꠀꠝꠞꠣ ꠚꠦꠞꠣꠃꠘꠞ ꠉꠥꠟꠣꠝꠤ ꠇꠞꠝꠥ, ꠔꠣ-ꠅ ꠀꠝꠞꠣꠞꠦ ꠈꠣꠘꠤ ꠖꠦꠃꠇ꠆ꠇꠣ ꠀꠞ ꠛꠤꠌ ꠖꠦꠃꠇ꠆ꠇꠣ, ꠔꠦꠃ ꠀꠝꠞꠣꠅ ꠝꠞꠣ ꠕꠘꠦ ꠛꠣꠌꠝꠥ ꠀꠞ ꠎꠝꠤꠘ ꠈꠣꠘꠣꠁꠘꠅ ꠛꠞꠛꠣꠖ ꠅꠁꠔ ꠘꠣꠄ।”
GEN 47:20 ꠅꠃ ꠁꠃꠍꠥꠚꠦ ꠝꠤꠡꠞ ꠖꠦꠡꠞ ꠢꠇ꠆ꠇꠟ ꠎꠝꠤꠘ ꠚꠦꠞꠣꠃꠘꠞ ꠘꠣꠝꠦ ꠟꠁꠟꠤꠟꠣ, ꠇꠣꠞꠘ ꠁ ꠀꠇꠣꠟ ꠅꠃꠟꠣ ꠛꠦꠎꠥꠁꠔꠣ ꠅꠁꠍꠤꠟ ꠎꠦꠘ, ꠝꠤꠡꠞꠞ ꠢꠇꠟꠦꠃ ꠔꠣꠞꠣꠞ ꠎꠣꠉꠣ-ꠎꠝꠤꠘ ꠛꠦꠌꠤꠟꠣꠁꠟꠣ। ꠔꠦꠃ ꠖꠦꠡꠞ ꠢꠇꠟ ꠎꠝꠤꠘ ꠚꠦꠞꠣꠃꠘꠞ ꠀꠔꠅ ꠀꠁꠟ꠆ꠟ।
GEN 47:21 ꠀꠞ ꠁꠃꠍꠥꠚꠦ ꠝꠤꠡꠞ ꠖꠦꠡꠞ ꠄꠇ ꠝꠣꠕꠣ ꠕꠣꠇꠤ ꠀꠞꠇ ꠝꠣꠕꠣꠞ ꠢꠇꠟ ꠝꠣꠘꠡꠞꠦ ꠐꠣꠃꠘꠅ ꠙꠣꠞ ꠇꠞꠤꠟꠤꠟꠣ।
GEN 47:22 ꠈꠣꠟꠤ ꠛꠣꠛꠘ ꠅꠇꠟꠞ ꠎꠣꠉꠣ-ꠎꠝꠤꠘ ꠔꠣꠁꠘ ꠟꠁꠟꠣ ꠘꠣ, ꠇꠣꠞꠘ ꠄꠞꠣꠞꠦ ꠚꠦꠞꠣꠃꠘꠦ ꠛꠦꠔꠘ ꠖꠤꠔꠣ, ꠀꠞ ꠅꠔꠣ ꠖꠤꠀꠃ ꠔꠣꠞꠣ ꠌꠟꠔꠣ।
GEN 47:23 ꠢꠦꠡꠦ ꠁꠃꠍꠥꠚꠦ ꠝꠣꠘꠡꠞꠦ ꠇꠁꠟꠣ, “ꠢꠥꠘꠅ, ꠚꠦꠞꠣꠃꠘꠞ ꠘꠣꠝꠦ ꠀꠝꠤ ꠔꠥꠝꠞꠣꠞꠦ ꠀꠞ ꠔꠥꠝꠞꠣꠞ ꠢꠇꠟ ꠎꠣꠉꠣ-ꠎꠝꠤꠘꠅ ꠟꠁꠟꠤꠟꠣꠝ। ꠅꠈꠘ ꠔꠥꠝꠞꠣ ꠅꠃ ꠛꠤꠌ ꠅꠇꠟ ꠘꠦꠅ ꠀꠞ ꠎꠝꠤꠘꠅ ꠛꠣꠁꠘ ꠇꠞꠅ।
GEN 47:24 ꠔꠦꠃ ꠎꠝꠤꠘꠅ ꠎꠦꠔꠣ ꠚꠡꠟ ꠚꠟꠤꠛ, ꠄꠞ ꠙꠣꠌ ꠛꠣꠐꠞ ꠄꠇ ꠛꠣꠐ ꠚꠦꠞꠣꠃꠘꠞꠦ ꠖꠤꠅ ꠀꠞ ꠛꠣꠇꠤ ꠌꠣꠁꠞ ꠛꠣꠐ, ꠎꠝꠤꠘꠞ ꠛꠤꠌ, ꠔꠥꠝꠞꠣ ꠀꠞ ꠔꠥꠝꠞꠣꠞ ꠙꠞꠤꠛꠣꠞ ꠀꠞ ꠢꠥꠞꠥꠔ꠆ꠔꠣꠁꠘ꠆ꠔꠞ ꠈꠣꠘꠤꠞ ꠟꠣꠉꠤ ꠘꠤꠅꠉꠤ।”
GEN 47:25 ꠔꠦꠃ ꠝꠣꠘꠡꠦ ꠇꠁꠟꠣ, “ꠀꠙꠘꠦ ꠀꠝꠞꠣꠞ ꠎꠣꠘ ꠛꠣꠌꠣꠁꠟꠣ। ꠢꠥꠎꠥꠞꠦ ꠀꠝꠞꠣꠞꠦ ꠖꠄꠀ ꠇꠞꠟꠦ, ꠀꠝꠞꠣ ꠚꠦꠞꠣꠃꠘꠞ ꠉꠥꠟꠣꠝꠤ ꠇꠞꠝꠥ।”
GEN 47:26 ꠛꠣꠖꠦ ꠁꠃꠍꠥꠚꠦ ꠝꠤꠡꠞ ꠖꠦꠡꠞ ꠎꠣꠉꠣ-ꠎꠝꠤꠘꠞ ꠟꠣꠉꠤ ꠅꠃ ꠀꠁꠘ ꠎꠣꠞꠤ ꠇꠞꠟꠣ, ꠢꠇꠟ ꠚꠡꠟꠞ ꠙꠣꠌ ꠛꠣꠐꠞ ꠄꠇ ꠛꠣꠐ ꠚꠦꠞꠣꠃꠘꠦ ꠙꠣꠁꠛꠣ, ꠈꠣꠟꠤ ꠛꠣꠛꠘ ꠅꠇꠟꠞ ꠎꠝꠤꠘ ꠛꠣꠖꠦ। ꠅꠃ ꠀꠁꠘ ꠅꠈꠘꠅ ꠌꠟꠦꠞ।
GEN 47:27 ꠛꠘꠤ ꠁꠍꠞꠣꠁꠟꠦ ꠝꠤꠡꠞ ꠖꠦꠡꠞ ꠉꠥꠡꠘꠅ ꠛꠡꠔ ꠇꠞꠟꠣ। ꠔꠣꠞꠣ ꠢꠘꠞ ꠖꠈꠟꠖꠣꠞꠤ ꠙꠣꠁꠀ, ꠈꠥꠛ ꠚꠟꠀꠟꠣ ꠅꠁꠟꠣ ꠀꠞ ꠔꠣꠞꠣꠞ ꠛꠃꠔ ꠀꠅꠟꠣꠖ ꠅꠁꠟꠣ।
GEN 47:28 ꠝꠤꠡꠞ ꠖꠦꠡꠅ ꠀꠁꠀ ꠁꠀꠇꠥꠛ ꠡꠔꠞ ꠛꠞꠍ ꠎꠤꠘ꠆ꠖꠣ ꠞꠁꠟꠣ। ꠔꠦꠃ ꠔꠣꠁꠘ ꠢꠇꠟꠔꠣꠄ ꠄꠇ-ꠡ ꠡꠣꠔꠌꠣꠟ꠆ꠟꠤꠡ ꠛꠞꠍ ꠛꠣꠌꠤꠟꠣ।
GEN 47:29 ꠁꠍꠞꠣꠁꠟꠞ ꠝꠃꠔꠞ ꠖꠤꠘ ꠇꠣꠍꠣꠁꠀ ꠀꠁꠟꠦ ꠔꠣꠘ ꠙꠥꠀ ꠁꠃꠍꠥꠚꠞꠦ ꠈꠛꠞ ꠖꠤ ꠀꠘꠣꠁꠀ ꠇꠁꠟꠣ, “ꠀꠝꠣꠞ ꠛꠣꠄ ꠔꠥꠝꠣꠞ ꠝꠦꠢꠦꠞꠛꠣꠘꠤ ꠅꠁꠟꠦ ꠄꠇꠈꠣꠘ ꠅꠍꠤꠅꠔ ꠇꠞꠣꠁꠔꠣꠝ, ꠔꠥꠝꠤ ꠀꠝꠣꠞ ꠃꠞꠣꠔꠞ ꠔꠟꠦ ꠔꠥꠝꠣꠞ ꠀꠔꠈꠣꠘ ꠢꠣꠞꠣꠅ, ꠔꠥꠝꠤ ꠀꠝꠣꠞ ꠛꠣꠄ ꠖꠄꠀ ꠀꠞ ꠢꠣꠟꠣꠟꠤ ꠖꠦꠈꠣꠁꠅ, ꠀꠝꠣꠞꠦ ꠝꠤꠡꠞꠅ ꠖꠣꠚꠘ ꠇꠞꠤꠅ ꠘꠣ।
GEN 47:30 ꠀꠝꠤ ꠎꠦꠛꠟꠣ ꠀꠝꠣꠞ ꠛꠣꠚ-ꠖꠣꠖꠣꠞ ꠉꠦꠍꠦ ꠎꠣꠁꠝꠥꠉꠤ, ꠅꠃ ꠡꠝꠄ ꠔꠥꠝꠤ ꠀꠝꠣꠞꠦ ꠝꠤꠡꠞ ꠖꠦꠡ ꠕꠣꠇꠤ ꠘꠤꠀ, ꠀꠝꠣꠞ ꠛꠣꠚ-ꠖꠣꠖꠣꠞ ꠇꠛꠞꠡ꠆ꠕꠣꠘꠅ ꠖꠣꠚꠘ ꠇꠞꠤꠅ।” ꠁꠃꠍꠥꠚꠦ ꠇꠁꠟꠣ, “ꠀꠙꠘꠦ ꠎꠦꠟꠣ ꠇꠁꠟꠣ, ꠅꠃꠟꠣꠃ ꠇꠞꠝꠥ।”
GEN 47:31 ꠔꠦꠃ ꠁꠀꠇꠥꠛꠦ ꠇꠁꠟꠣ, “ꠔꠦ ꠔꠥꠝꠤ ꠀꠝꠣꠞ ꠉꠦꠍꠦ ꠇꠍꠝ ꠇꠞꠅ।” ꠁꠃꠍꠥꠚꠦ ꠇꠍꠝ ꠇꠞꠟꠣ। ꠅꠃ ꠁꠍꠞꠣꠁꠟꠦ ꠔꠣꠘ ꠛꠤꠍꠘꠣꠞ ꠢꠤꠔꠣꠘ ꠛꠣꠄ ꠇꠣꠁꠔ ꠅꠁꠟꠣ।
GEN 48:1 ꠄꠞꠛꠣꠖꠦ ꠁꠃꠍꠥꠚꠦ ꠈꠛꠞ ꠙꠣꠁꠟꠣ, ꠔꠣꠘ ꠛꠣꠚ ꠛꠦꠝꠣꠞ, ꠅꠃ ꠔꠣꠘ ꠖꠥꠁꠅ ꠙꠥꠀ ꠝꠣꠘꠡꠣ ꠀꠞ ꠀꠚꠞꠣꠁꠝꠞꠦ ꠟꠁꠀ ꠛꠣꠚꠞꠦ ꠖꠦꠈꠣꠔ ꠀꠁꠟꠣ।
GEN 48:2 ꠁꠀꠇꠥꠛꠦ ꠎꠦꠛꠟꠣ ꠢꠥꠘꠟꠣ, ꠔꠣꠘ ꠙꠥꠀ ꠁꠃꠍꠥꠚ ꠀꠁꠍꠂꠘ, ꠅꠃ ꠔꠣꠁꠘ ꠡꠞꠤꠟꠞ ꠢꠇꠟ ꠛꠟ ꠈꠣꠐꠣꠁꠀ, ꠃꠑꠤꠀ ꠛꠤꠍꠘꠣꠔ ꠛꠁꠟꠣ।
GEN 48:3 ꠀꠞ ꠔꠣꠁꠘ ꠁꠃꠍꠥꠚꠞꠦ ꠇꠁꠟꠣ, “ꠡꠞ꠆ꠛ-ꠡꠇ꠆ꠔꠤꠝꠣꠘ ꠀꠟ꠆ꠟꠣꠄ ꠇꠦꠘꠣꠘ ꠖꠦꠡꠞ ꠟꠥꠎ ꠐꠣꠃꠘꠅ, ꠀꠝꠣꠞꠦ ꠖꠤꠖꠣꠞ ꠖꠤꠀ ꠛꠞꠇꠔ ꠖꠣꠘ ꠇꠞꠤꠀ ꠇꠁꠍꠟꠣ,
GEN 48:4 ‘ꠢꠥꠘꠅ, ꠀꠝꠤ ꠔꠥꠝꠣꠞꠦ ꠚꠟꠖꠣꠞ ꠇꠞꠝꠥ ꠀꠞ ꠛꠃꠔ ꠀꠅꠟꠣꠖ ꠖꠤꠝꠥ, ꠔꠥꠝꠣ ꠕꠘꠦ ꠛꠃꠔ ꠉꠥꠡ꠆ꠐꠤꠀꠟꠣ ꠄꠇ ꠎꠣꠔꠤ ꠙꠄꠖꠣ ꠇꠞꠝꠥ ꠀꠞ ꠔꠥꠝꠣꠞ ꠅꠀꠞꠤꠡ ꠅꠇꠟꠞꠦ, ꠢꠣꠝꠦꠡꠣꠇꠥꠞ ꠟꠣꠉꠤ ꠁ ꠖꠦꠡꠞ ꠝꠣꠟꠤꠇꠣꠘꠣ ꠖꠤꠝꠥ।’
GEN 48:5 ꠀꠝꠤ ꠔꠥꠝꠣꠞ ꠉꠦꠍꠦ ꠝꠤꠡꠞꠅ ꠀꠁꠛꠣꠞ ꠀꠉꠦ, ꠔꠥꠝꠣꠞ ꠎꠦ ꠖꠥꠁꠅ ꠙꠥꠀ ꠝꠤꠡꠞꠅ ꠎꠘꠝꠤꠍꠂꠘ, ꠔꠣꠞꠣ ꠀꠝꠣꠞꠃ। ꠞꠥꠛꠦꠘ ꠀꠞ ꠡꠤꠝꠤꠅꠘ ꠎꠦꠟꠣ ꠀꠝꠣꠞ, ꠅꠃꠟꠣ ꠝꠣꠘꠡꠣ ꠀꠞ ꠀꠚꠞꠣꠁꠝꠅ ꠀꠝꠣꠞ ꠅꠁꠛꠣ।
GEN 48:6 ꠅꠁꠟꠦ ꠄꠞꠣꠞ ꠛꠣꠖꠦ ꠔꠥꠝꠣꠞ ꠎꠦꠔꠣ ꠢꠥꠞꠥꠔ꠆ꠔꠣ ꠅꠁꠍꠂꠘ, ꠔꠣꠞꠣ ꠔꠥꠝꠣꠞꠃ ꠞꠁꠛꠣ, ꠀꠞ ꠔꠣꠞꠣꠞ ꠜꠣꠁꠞ ꠘꠣꠝꠦꠃ ꠄꠞꠣꠞ ꠝꠣꠟꠤꠇꠣꠘꠣ ꠇꠣꠁꠝ ꠅꠁꠛ।
GEN 48:7 ꠀꠞ ꠙꠖ꠆ꠖꠘ ꠕꠣꠇꠤ ꠀꠝꠞꠣ ꠀꠅꠀꠞ ꠡꠝꠄ, ꠇꠦꠘꠣꠘ ꠖꠦꠡꠞ ꠁꠚ꠆ꠞꠣꠕ ꠕꠣꠇꠤ ꠕꠥꠠꠣ ꠖꠥꠞꠁ ꠕꠣꠇꠔꠦꠃ, ꠞꠣꠢꠦꠟꠣ ꠝꠣꠞꠣ ꠉꠦꠟꠣ। ꠔꠦꠃ ꠀꠝꠤ ꠢꠘꠞ ꠁꠚ꠆ꠞꠣꠕꠅ, ꠛꠦꠕꠦꠟꠢꠣꠝꠞ ꠙꠕꠞ ꠗꠣꠞꠅ ꠔꠣꠘꠞꠦ ꠖꠣꠚꠘ ꠇꠞꠟꠣꠝ।”
GEN 48:8 ꠛꠣꠖꠦ ꠁꠃꠍꠥꠚꠞ ꠙꠥꠀꠂꠘ꠆ꠔꠞ ꠛꠣꠄ ꠌꠣꠁꠀ ꠁꠍꠞꠣꠁꠟꠦ ꠎꠤꠇꠣꠁꠟꠣ, “ꠄꠞꠣ ꠇꠦ?”
GEN 48:9 ꠁꠃꠍꠥꠚꠦ ꠔꠣꠘꠞꠦ ꠇꠁꠟꠣ, “ꠄꠞꠣ ꠀꠝꠣꠞ ꠙꠥꠀꠂꠘ, ꠀꠟ꠆ꠟꠣꠄ ꠅꠃ ꠖꠦꠡꠅꠃ ꠄꠞꠣꠞꠦ ꠖꠤꠍꠂꠘ।” ꠔꠣꠁꠘ ꠇꠁꠟꠣ, “ꠄꠞꠣꠞꠦ ꠀꠝꠣꠞ ꠇꠣꠍꠣꠔ ꠀꠘꠅ। ꠀꠝꠤ ꠔꠣꠞꠣꠞꠦ ꠖꠥꠀ ꠇꠞꠔꠣꠝ।”
GEN 48:10 ꠝꠥꠞꠛ꠆ꠛꠤ ꠛꠄꠅꠡꠅ ꠌꠃꠈꠞ ꠎꠥꠔꠤ ꠇꠝꠤ ꠎꠣꠅꠀꠄ ꠁꠍꠞꠣꠁꠟꠦ ꠜꠣꠟꠣ ꠇꠞꠤ ꠖꠦꠈꠔꠣ ꠘꠣ। ꠔꠦꠃ ꠄꠞꠣ ꠇꠣꠍꠣꠔ ꠀꠁꠟꠦ, ꠁꠍꠞꠣꠁꠟꠦ ꠔꠣꠞꠣꠞꠦ ꠀꠁꠘ꠆ꠎꠣ ꠇꠞꠤ ꠗꠞꠤꠀ ꠢꠥꠋꠉꠣ ꠖꠤꠟꠣ।
GEN 48:11 ꠔꠣꠁꠘ ꠁꠃꠍꠥꠚꠞꠦ ꠇꠁꠟꠣ, “ꠛꠣꠛꠣꠞꠦ, ꠀꠝꠤ ꠝꠘꠅ ꠇꠞꠍꠟꠣꠝ ꠔꠥꠝꠣꠞ ꠝꠥꠈ ꠀꠞ ꠇꠥꠘꠥ ꠖꠤꠘ ꠖꠦꠈꠔꠣꠝ ꠘꠣꠄ, ꠅꠁꠟꠦ ꠀꠟ꠆ꠟꠣꠄ ꠔꠥꠝꠣꠞ ꠀꠅꠟꠣꠖ ꠅꠇꠟꠞꠦꠅ ꠖꠦꠈꠣꠁꠟꠤꠟꠣ।”
GEN 48:12 ꠔꠦꠃ ꠁꠃꠍꠥꠚꠦ ꠔꠣꠘ ꠛꠣꠚꠞ ꠉꠦꠍ ꠕꠘꠦ, ꠙꠥꠀꠂꠘ꠆ꠔꠞꠦ ꠢꠞꠣꠁꠀ ꠝꠣꠐꠤꠔ ꠍꠁꠎꠖꠣ ꠇꠞꠟꠣ।
GEN 48:13 ꠀꠞ ꠁꠃꠍꠥꠚꠦ ꠔꠣꠘ ꠖꠥꠁꠅ ꠙꠥꠀꠞꠦ ꠟꠁꠀ, ꠒꠣꠁꠘ ꠀꠔ ꠖꠤꠀ ꠀꠚꠞꠣꠁꠝꠞꠦ ꠗꠞꠤꠀ ꠁꠍꠞꠣꠁꠟꠞ ꠛꠣꠃ ꠉꠣꠟꠣꠔ, ꠀꠞ ꠛꠣꠃ ꠀꠔ ꠖꠤꠀ ꠝꠣꠘꠡꠣꠞꠦ ꠗꠞꠤꠀ ꠁꠍꠞꠣꠁꠟꠞ ꠒꠣꠁꠘ ꠉꠣꠟꠣꠔ ꠀꠘꠤꠀ ꠀꠎꠤꠞ ꠇꠞꠟꠣ।
GEN 48:14 ꠅꠁꠟꠦ ꠁꠍꠞꠣꠁꠟꠞ ꠘꠤꠎꠞ ꠀꠈꠟꠦ, ꠔꠣꠘ ꠀꠔ ꠀꠠꠣ-ꠀꠠꠤ ꠇꠞꠤꠀ, ꠒꠣꠁꠘꠞ ꠀꠔ ꠢꠥꠞꠥ ꠙꠥꠀ ꠀꠚꠞꠣꠁꠝꠞ ꠝꠣꠕꠣꠔ ꠀꠞ ꠁꠃꠍꠥꠚꠞ ꠛꠠ ꠙꠥꠀ ꠝꠣꠘꠡꠣꠞ ꠝꠣꠕꠣꠔ ꠕꠁꠟꠣ ꠔꠣꠘ ꠛꠣꠃ ꠀꠔ।
GEN 48:15 ꠛꠣꠖꠦ ꠔꠣꠁꠘ ꠁꠃꠍꠥꠚꠞꠦ ꠖꠥꠀ ꠇꠞꠤꠀ ꠇꠁꠟꠣ, “ꠢꠃ ꠀꠟ꠆ꠟꠣ, ꠎꠣꠘ ꠝꠞ꠆ꠎꠤꠄ ꠀꠝꠣꠞ ꠛꠣꠚ-ꠖꠣꠖꠣ, ꠁꠛ꠆ꠞꠣꠢꠤꠝ ꠀꠞ ꠁꠍꠢꠣꠇꠦ ꠌꠟꠔꠣ, ꠢꠃ ꠀꠟ꠆ꠟꠣ, ꠎꠦꠁꠘ ꠙꠄꠟꠣ ꠕꠣꠇꠤ ꠀꠁꠎ ꠙꠞ꠆ꠎꠘ꠆ꠔ ꠀꠝꠣꠞꠦ ꠙꠣꠟꠤꠀ ꠀꠁꠞꠣ,
GEN 48:16 ꠢꠃ ꠚꠤꠞꠤꠡ꠆ꠔꠣ, ꠎꠦꠁꠘ ꠀꠝꠣꠞꠦ ꠢꠇꠟ ꠝꠍꠤꠛꠔ ꠕꠣꠇꠤ ꠛꠣꠌꠣꠁꠍꠂꠘ, ꠔꠣꠁꠘꠃ ꠅꠃ ꠖꠥꠁꠅ ꠙꠥꠀꠞꠦ ꠛꠞꠇꠔ ꠘꠣꠎꠤꠟ ꠇꠞꠃꠇ꠆ꠇꠣ। ꠄꠞꠣꠞꠦ ꠖꠤꠀꠃ ꠁꠛ꠆ꠞꠣꠢꠤꠝ ꠀꠞ ꠁꠍꠢꠣꠇ ꠀꠞ ꠀꠝꠣꠞ ꠘꠣꠝ ꠎꠤꠘ꠆ꠖꠣ ꠕꠣꠇꠃꠇ। ꠖꠥꠘꠤꠀꠁꠞ ꠝꠣꠎꠦ ꠔꠣꠞꠣꠞ ꠛꠃꠔ ꠉꠥꠡ꠆ꠐꠤ ꠅꠃꠇ।”
GEN 48:17 ꠛꠣꠚꠦ ꠔꠣꠘ ꠒꠣꠁꠘ ꠀꠔ ꠀꠚꠞꠣꠁꠝꠞ ꠝꠣꠕꠣꠔ ꠞꠣꠈꠟꠣ ꠇꠞꠤ ꠁꠃꠍꠥꠚ ꠛꠦꠎꠣꠞ ꠅꠁꠉꠦꠟꠣ। ꠀꠞ ꠀꠚꠞꠣꠁꠝꠞ ꠝꠣꠕꠣ ꠕꠣꠇꠤ ꠢꠞꠣꠁꠀ, ꠝꠣꠘꠡꠣꠞ ꠝꠣꠕꠣꠔ ꠖꠦꠅꠀꠞ ꠟꠣꠉꠤ, ꠔꠣꠘ ꠛꠣꠚꠞ ꠀꠔ ꠃꠌꠣ ꠇꠞꠟꠣ।
GEN 48:18 ꠔꠣꠁꠘ ꠀꠔꠅ ꠗꠞꠤꠀ ꠇꠁꠟꠣ, “ꠛꠣꠛꠣ, ꠁ ꠟꠣꠈꠣꠘ ꠘꠣꠄ। ꠅꠃꠘꠥ ꠀꠝꠣꠞ ꠛꠠ ꠙꠥꠀ, ꠔꠦ ꠀꠙꠘꠣꠞ ꠒꠣꠁꠘ ꠀꠔ ꠔꠣꠞ ꠝꠣꠕꠣꠔ ꠞꠣꠈꠃꠇ꠆ꠇꠣ।”
GEN 48:19 ꠅꠁꠟꠦ ꠔꠣꠘ ꠛꠣꠚꠦ ꠘꠣ-ꠈꠥꠡ ꠅꠁꠀ ꠇꠁꠟꠣ, “ꠛꠣꠛꠣꠞꠦ, ꠀꠝꠤ ꠁꠔꠣ ꠎꠣꠘꠤ, ꠀꠝꠤ ꠁꠔꠣ ꠎꠣꠘꠤꠞꠦ ꠙꠥꠔ। ꠔꠣꠞꠅ ꠄꠇ ꠎꠣꠔꠤ ꠅꠁꠛ ꠀꠞ ꠝꠢꠣꠘ ꠅꠁꠛ, ꠅꠁꠟꠦ ꠔꠣꠞ ꠢꠥꠞꠥ ꠜꠣꠁ ꠔꠣꠞ ꠌꠣꠁꠔꠦꠅ ꠝꠢꠣꠘ ꠅꠁꠛ, ꠀꠞ ꠔꠣꠞ ꠀꠅꠟꠣꠖꠞ ꠛꠃꠔ ꠉꠥꠡ꠆ꠐꠤ ꠅꠁꠛ।”
GEN 48:20 ꠁꠍꠞꠣꠁꠟꠦ ꠄꠞꠛꠣꠖꠦ ꠅꠃ ꠖꠥꠁꠅ ꠘꠣꠔꠤꠞꠦ ꠖꠥꠀ ꠇꠞꠤꠀ ꠇꠁꠟꠣ, “ꠛꠘꠤ ꠁꠍꠞꠣꠁꠟꠦ ꠇꠥꠘꠥ ꠝꠣꠘꠡꠞꠦ ꠖꠥꠀ ꠇꠞꠟꠦ ꠅꠃꠟꠣ ꠇꠁꠛꠣ, ꠀꠟ꠆ꠟꠣꠄ ꠔꠥꠝꠣꠞꠦ ꠀꠚꠞꠣꠁꠝ ꠀꠞ ꠝꠣꠘꠡꠣꠞ ꠟꠣꠈꠣꠘ ꠇꠞꠃꠇ꠆ꠇꠣ।” ꠅꠃꠟꠣ ꠔꠣꠁꠘ ꠝꠣꠘꠡꠣꠞ ꠌꠣꠁꠔꠦ ꠀꠚꠞꠣꠁꠝꠞꠦ ꠛꠠ ꠛꠣꠘꠣꠁꠟꠣ।
GEN 48:21 ꠢꠦꠡꠦ ꠢꠎꠞꠔ ꠁꠍꠞꠣꠁꠟꠦ ꠁꠃꠍꠥꠚꠞꠦ ꠇꠁꠟꠣ, “ꠖꠦꠈꠅ, ꠀꠝꠣꠞ ꠝꠞꠘꠞ ꠅꠇ꠆ꠔ ꠀꠁꠌ꠆ꠌꠦ। ꠀꠟ꠆ꠟꠣ ꠔꠥꠝꠞꠣꠞ ꠟꠉꠦ ꠞꠁꠛꠣ, ꠀꠞ ꠔꠥꠝꠞꠣꠞꠦ ꠢꠤꠞꠛꠣꠞ ꠔꠥꠝꠞꠣꠞ ꠛꠣꠚ-ꠖꠣꠖꠣꠞ ꠖꠦꠡꠅ ꠘꠤꠌ꠆ꠌꠄ ꠚꠤꠞꠣꠁꠀ ꠘꠤꠛꠣ।
GEN 48:22 ꠔꠥꠝꠣꠞ ꠜꠣꠁꠀꠁꠘ꠆ꠔꠞ ꠌꠣꠁꠔꠦ ꠔꠥꠝꠣꠞꠦ ꠄꠇ ꠛꠣꠐ ꠛꠦꠡꠤ ꠖꠤꠟꠣꠝ। ꠅꠃ ꠛꠣꠐ ꠔ ꠡꠤꠈꠤꠝ ꠄꠟꠣꠇꠣ, ꠁꠔꠣ ꠀꠝꠣꠞ ꠔꠟꠥꠀꠞ-ꠗꠘꠥꠇ ꠖꠤꠀ ꠀꠝꠥꠞꠤ ꠅꠇꠟꠞ ꠉꠦꠍ ꠕꠣꠇꠤ ꠀꠘꠍꠟꠣꠝ।”
GEN 49:1 ꠛꠣꠖꠦ ꠁꠀꠇꠥꠛꠦ ꠔꠣꠘ ꠙꠥꠀꠂꠘ꠆ꠔꠞꠦ ꠀꠘꠣꠁꠀ ꠇꠁꠟꠣ, “ꠔꠥꠝꠞꠣ ꠢꠇ꠆ꠇꠟ ꠄꠇꠈꠣꠘꠅ ꠅꠅ। ꠜꠛꠤꠡꠔꠦ ꠔꠥꠝꠞꠣꠞ ꠎꠤꠘ꠆ꠖꠦꠉꠤ ꠇꠤꠟꠣ ꠎꠣꠁꠛ, ꠁꠔꠣ ꠀꠝꠤ ꠔꠥꠝꠞꠣꠞꠦ ꠇꠁꠞꠣꠝ।
GEN 49:2 ꠁꠀꠇꠥꠛꠞ ꠙꠥꠀꠂꠘ, ꠔꠥꠝꠞꠣ ꠄꠇꠈꠣꠘꠅ ꠀꠅ; ꠔꠥꠝꠞꠣꠞ ꠛꠣꠚ ꠁꠍꠞꠣꠁꠟꠞ ꠛꠥꠟꠤ ꠢꠥꠘꠅ।
GEN 49:3 ꠞꠥꠛꠦꠘ ꠔꠥꠝꠤ ꠀꠝꠣꠞ ꠛꠠ ꠙꠥꠀ, ꠔꠥꠝꠤ ꠀꠝꠣꠞ ꠛꠟ, ꠀꠝꠣꠞ ꠎꠥꠀꠘꠇꠤꠞ ꠙꠄꠟꠣ ꠚꠟ; ꠔꠥꠝꠤ ꠢꠇꠟ ꠕꠣꠇꠤ ꠔꠦꠎꠤ ꠀꠞ ꠢꠤꠝ꠆ꠝꠔꠤ।
GEN 49:4 ꠔꠥꠝꠤ ꠃꠔꠞꠣꠁꠟ ꠉꠞꠝ ꠙꠣꠘꠤꠞ ꠟꠣꠈꠣꠘ, ꠔꠥꠝꠣꠞ ꠛꠠꠣꠁ ꠞꠁꠔ ꠘꠣꠄ; ꠔꠥꠝꠤ ꠀꠙꠘ ꠛꠣꠚꠞ ꠛꠤꠍꠘꠣꠔ ꠉꠦꠍ, ꠢꠣꠔꠘ ꠝꠣʼꠞ ꠟꠉꠦ ꠘꠣꠙꠣꠇꠤ ꠇꠣꠝ ꠇꠞꠍ।
GEN 49:5 ꠡꠤꠝꠤꠅꠘ ꠀꠞ ꠟꠦꠛꠤ ꠖꠥꠁ ꠜꠣꠁ; ꠔꠣꠞꠣꠞ ꠔꠟꠥꠀꠞ ꠎꠣꠟꠤꠝꠞ ꠀꠔꠤꠀꠞ।
GEN 49:6 ꠅ ꠀꠝꠣꠞ ꠎꠣꠘ, ꠔꠣꠞꠣꠞ ꠝꠎꠟꠤꠍꠅ ꠢꠣꠝꠣꠁꠅ ꠘꠣ; ꠅ ꠀꠝꠣꠞ ꠡꠣꠘ, ꠔꠣꠞꠣꠞ ꠡꠝꠣꠎꠅ ꠎꠣꠁꠅ ꠘꠣ। ꠔꠣꠞꠣ ꠉꠥꠍꠣ ꠇꠞꠤ ꠈꠥꠘ ꠇꠞꠟ; ꠀꠠꠥꠀꠝꠤ ꠇꠞꠤ ꠛꠤꠍꠣꠟꠞ ꠞꠉ ꠇꠣꠐꠟ।
GEN 49:7 ꠔꠣꠞꠣꠞ ꠉꠥꠍꠣ ꠔ ꠟꠣꠘ꠆ꠘꠔꠤ, ꠁꠔꠣ ꠛꠠ ꠛꠦꠎꠥꠁꠔꠣ; ꠟꠣꠘ꠆ꠘꠔꠤ ꠔꠣꠞꠣꠞ ꠎꠥꠟꠥꠝ, ꠁꠔꠣ ꠔ ꠙꠣꠡꠣꠘ। ꠀꠝꠤ ꠔꠣꠞꠣꠞꠦ ꠁꠀꠇꠥꠛꠞ ꠝꠣꠎꠦ ꠛꠣꠐꠤꠝꠥ; ꠛꠘꠤ ꠁꠍꠞꠣꠁꠟꠞ ꠝꠣꠎꠦ ꠍꠤꠔ꠆ꠞꠣꠁ ꠖꠤꠝꠥ।
GEN 49:8 ꠄꠢꠥꠖꠣ, ꠔꠥꠝꠣꠞ ꠜꠣꠁꠀꠁꠘ꠆ꠔꠦ ꠔꠥꠝꠣꠞ ꠔꠣꠞꠤꠚ ꠇꠞꠛꠣ; ꠔꠥꠝꠤ ꠖꠥꠡꠝꠘꠞ ꠉꠞ꠆ꠖꠘꠣꠔ ꠗꠞꠛꠣꠄ; ꠔꠥꠝꠣꠞ ꠛꠣꠚꠞ ꠅꠀꠞꠤꠡ ꠅꠇꠟꠦ, ꠔꠥꠝꠣꠞ ꠉꠦꠍꠦ ꠝꠣꠕꠣ ꠘꠥꠀꠁꠛꠣ।
GEN 49:9 ꠔꠥꠝꠤ ꠔ ꠡꠤꠋꠢꠞ ꠛꠣꠁꠌ꠆ꠌꠣ ꠄꠢꠥꠖꠣ। ꠔꠥꠝꠤ ꠡꠤꠇꠣꠞꠞ ꠉꠥꠡ꠆ꠔ ꠈꠣꠁꠀ ꠢꠞꠤꠀ ꠀꠁꠟꠣꠄ; ꠢꠦ ꠡꠤꠋꠢꠞ ꠟꠣꠈꠣꠘ ꠟꠦꠐꠤꠀ ꠢꠥꠔꠤꠀ ꠉꠠꠤꠀꠁꠟ; ꠡꠤꠋꠢꠤꠞꠦ ꠇꠦꠉꠥꠄ ꠊꠥꠝ ꠜꠣꠋꠉꠣꠁꠔ?
GEN 49:10 ꠄꠢꠥꠖꠣꠞ ꠀꠔ ꠕꠘꠦ ꠔ ꠞꠣꠎ-ꠟꠣꠑꠤ ꠢꠞꠔ ꠘꠣꠄ; ꠔꠣꠞ ꠖꠥꠁꠅ ꠙꠣꠅꠞ ꠝꠣꠎ ꠕꠘꠦ ꠛꠤꠌꠣꠞꠞ ꠉꠖꠣ ꠎꠣꠁꠔ ꠘꠣꠄ; ꠎꠔꠖꠤꠘ ꠡꠤꠟꠅ ꠘꠣ ꠀꠁꠛꠣ, ꠀꠞ ꠢꠇꠟ ꠎꠣꠔꠤ ꠔꠣꠘ ꠢꠥꠇꠥꠝꠦ ꠌꠟꠛꠣ।
GEN 49:11 ꠢꠦ ꠀꠋꠉꠥꠞ ꠉꠣꠍꠅ ꠛꠣꠘꠛ ꠔꠣꠞ ꠉꠣꠗꠣ; ꠀꠋꠉꠥꠞꠞ ꠡꠥꠘ꠆ꠖꠞ ꠒꠣꠟꠅ ꠛꠣꠘꠛ ꠉꠣꠗꠣꠞ ꠛꠣꠁꠌ꠆ꠌꠣ; ꠟꠣꠟ ꠀꠋꠉꠥꠞꠞ ꠞꠡꠖꠤ ꠗꠥꠁꠛ ꠔꠣꠞ ꠎꠥꠛ꠆ꠛꠣ, ꠀꠋꠉꠥꠞꠞ ꠟꠃꠖꠤ ꠇꠞꠛ ꠟꠦꠛꠣꠍ ꠍꠚꠣ।
GEN 49:12 ꠔꠣꠞ ꠌꠃꠈ ꠀꠋꠉꠥꠞꠞ ꠞꠡꠦ ꠟꠣꠟ ꠐꠇꠐꠇꠣ, ꠀꠞ ꠔꠣꠞ ꠖꠣꠔ ꠖꠥꠗꠞ ꠟꠣꠈꠣꠘ ꠗꠟꠣ।
GEN 49:13 ꠍꠛꠥꠟꠘ ꠖꠞꠤꠀꠞ ꠙꠣꠞꠅ ꠛꠡꠔ ꠇꠞꠤꠛ, ꠢꠦ ꠎꠣꠎ ꠜꠤꠠꠣꠘꠤꠞ ꠊꠣꠐ ꠅꠁꠛ, ꠍꠤꠖꠘ ꠙꠞ꠆ꠎꠘ꠆ꠔ ꠔꠣꠞ ꠡꠤꠝꠣꠘꠣ ꠅꠁꠛ।
GEN 49:14 ꠁꠍꠣꠈꠞ ꠄꠉꠥ ꠛꠟꠀꠟꠣ ꠉꠣꠗꠣ, ꠢꠦ ꠈꠥꠅꠠꠞ ꠜꠤꠔꠞꠦ ꠢꠥꠔꠦ।
GEN 49:15 ꠢꠦ ꠖꠦꠈꠟ ꠎꠤꠞꠣꠘꠤꠞ ꠎꠣꠉꠣꠈꠣꠘ ꠜꠣꠟꠣ, ꠖꠦꠡꠈꠣꠘ ꠡꠥꠘ꠆ꠖꠞ; ꠔꠦꠃ ꠉꠣꠁꠐ ꠛꠁꠛꠣꠞ ꠟꠣꠉꠤ ꠇꠣꠘ꠆ꠖ ꠟꠣꠝꠣꠁꠟ, ꠀꠞ ꠎꠥꠞꠞ ꠉꠥꠟꠣꠝ ꠅꠁꠟ।
GEN 49:16 ꠖꠣꠘꠦ ꠔꠣꠞ ꠘꠤꠎꠞ ꠙ꠆ꠞꠎꠣ ꠅꠇꠟꠞ ꠛꠤꠌꠣꠞ ꠇꠞꠛ, ꠁꠍꠞꠣꠁꠟꠞ ꠄꠇ ꠉꠥꠡ꠆ꠐꠤꠞ ꠟꠣꠈꠣꠘ।
GEN 49:17 ꠢꠦ ꠅꠁꠛ ꠡꠠꠇꠞ ꠗꠣꠞꠞ ꠢꠣꠚ, ꠙꠕꠞ ꠛꠤꠡꠀꠟꠣ ꠀꠟꠖ; ꠎꠦꠉꠤꠄ ꠊꠥꠠꠣꠞ ꠙꠣꠅꠔ ꠇꠣꠝꠠ ꠝꠣꠞꠦ, ꠊꠥꠠ-ꠍꠅꠀꠞ ꠈꠞꠦꠖꠤ ꠃꠟꠐꠤꠀ ꠙꠠꠦ।
GEN 49:18 ꠅ ꠝꠣꠛꠥꠖ, ꠀꠝꠤ ꠔꠥꠝꠣꠞ ꠘꠣꠎꠣꠔꠞ ꠝꠥꠈꠣ ꠌꠣꠁ ꠞꠁꠍꠤ।
GEN 49:19 ꠍꠣꠖꠥꠞꠦ ꠟꠥꠐꠞꠣ ꠖꠟꠦ ꠢꠣꠝꠟꠣ ꠇꠞꠛ, ꠛꠣꠖꠦ ꠢꠦ-ꠅ ꠔꠣꠞꠣꠞ ꠈꠞꠦꠖꠤ ꠟꠥꠐꠤꠛ।
GEN 49:20 ꠀꠡꠤꠞꠞ ꠈꠥꠛ ꠜꠣꠟꠣ ꠚꠡꠟ ꠚꠟꠤꠛ, ꠢꠦ ꠛꠣꠖꠡꠣꠞ ꠎꠥꠇꠣ ꠈꠣꠘꠤ ꠎꠥꠉꠣꠁꠛ।
GEN 49:21 ꠘꠙ꠆ꠔꠣꠟꠤ ꠅꠁꠟ ꠍꠣꠠꠣ ꠢꠞꠤꠘꠤ, ꠔꠣꠞ ꠝꠥꠈꠅ ꠀꠍꠦ ꠝꠤꠑꠣ ꠝꠤꠑꠣ ꠝꠣꠔ।
GEN 49:22 ꠁꠃꠍꠥꠚ ꠚꠟꠀꠟꠣ ꠉꠣꠍꠞ ꠒꠣꠟ, ꠁꠘ꠆ꠖꠣꠞꠣꠞ ꠗꠣꠞꠞ ꠚꠟꠀꠟꠣ ꠉꠣꠍꠞ ꠒꠣꠟ; ꠔꠣꠞ ꠒꠣꠟꠣꠁꠘ ꠛꠦꠠ ꠙꠣꠞ ꠅꠁꠎꠣꠄ।
GEN 49:23 ꠔꠤꠞ-ꠗꠘꠥꠇ ꠀꠟꠣꠁꠘ꠆ꠔꠦ ꠔꠣꠞꠦ ꠛꠦꠎꠥꠁꠔꠣ ꠔꠇꠟꠤꠚ ꠖꠤꠍꠟꠣ, ꠔꠤꠞ ꠝꠣꠞꠤꠀ ꠔꠣꠞꠦ ꠛꠦꠇꠣꠄꠖꠣꠔ ꠚꠣꠟꠣꠁꠍꠟꠣ;
GEN 49:24 ꠅꠁꠟꠦ ꠔꠣꠞ ꠗꠘꠥꠇ ꠝꠎꠛꠥꠔ ꠞꠁꠟ, ꠔꠣꠞ ꠀꠔꠞ ꠢꠘꠣꠔ ꠛꠟ ꠞꠁꠟ; ꠁꠀꠇꠥꠛꠞ ꠢꠃ ꠝꠢꠣꠘ ꠡꠇ꠆ꠔꠤꠀꠟꠣꠞ ꠀꠔ ꠖꠤꠀ, ꠎꠦꠁꠘ ꠁꠍꠞꠣꠁꠟꠞ ꠀꠡꠞꠄ ꠐꠤꠟ꠆ꠟꠣ, ꠔꠣꠘꠞꠦ ꠖꠤꠀ।
GEN 49:25 ꠔꠥꠝꠣꠞ ꠛꠣꠚꠞ ꠢꠃ ꠀꠟ꠆ꠟꠣꠞꠦ ꠖꠤꠀ, ꠎꠦꠁꠘ ꠔꠥꠝꠣꠞꠦ ꠡꠣꠁꠎ꠆ꠎ ꠇꠞꠛꠣ; ꠢꠃ ꠡꠞ꠆ꠛ-ꠡꠇ꠆ꠔꠤꠝꠣꠘꠞꠦ ꠖꠤꠀ, ꠎꠦꠁꠘ ꠔꠥꠝꠣꠞꠦ ꠛꠞꠇꠔ ꠘꠣꠎꠤꠟ ꠇꠞꠛꠣ; ꠃꠙꠞꠦ ꠕꠅꠀ ꠀꠍꠝꠣꠘ ꠕꠣꠇꠤ ꠟꠣꠝꠞꠣ ꠛꠞꠇꠔꠦ, ꠔꠟꠦ ꠛꠤꠍꠣꠁꠟ ꠙꠣꠘꠤ ꠕꠣꠇꠤ ꠛꠣꠞ ꠅꠀ ꠏꠞꠘꠣꠞ ꠛꠞꠇꠔꠦ, ꠛꠥꠇꠥꠞ ꠖꠥꠗ ꠀꠞ ꠙꠦꠐ ꠕꠣꠇꠤ ꠛꠣꠞ ꠅꠀ ꠛꠞꠇꠔꠦ।
GEN 49:26 ꠀꠝꠣꠞ ꠛꠣꠚ-ꠖꠣꠖꠣꠞ ꠖꠥꠀ ꠕꠣꠇꠤ, ꠔꠥꠝꠣꠞ ꠛꠣꠚꠞ ꠖꠦꠅꠀ ꠖꠥꠀ ꠛꠃꠔ ꠜꠣꠟꠣ ꠅꠃꠇ; ꠁꠔꠣ ꠢꠣꠝꠦꠡꠣꠇꠥꠞ ꠈꠣꠠꠣ ꠢꠣꠎꠣꠁꠟ ꠙꠣꠠ-ꠙꠞꠛꠔ ꠕꠣꠇꠤ ꠟꠣꠝꠃꠇ। ꠢꠃ ꠖꠥꠀ ꠁꠃꠍꠥꠚꠞ ꠝꠣꠕꠣꠔ ꠙꠠꠃꠇ; ꠜꠣꠁꠀꠁꠘ ꠕꠣꠇꠤ ꠀꠟꠉꠞ ꠝꠣꠕꠣꠞ ꠔꠣꠟꠥꠔ ꠙꠠꠃꠇ।
GEN 49:27 ꠛꠤꠘ-ꠁꠀꠝꠤꠘ ꠅꠁꠟ ꠛꠠ-ꠛꠣꠊꠞ ꠟꠣꠈꠣꠘ, ꠢꠦ ꠛꠤꠀꠘꠦ ꠈꠣꠄ ꠡꠤꠇꠣꠞꠞ ꠉꠥꠡ꠆ꠔ, ꠀꠞ ꠢꠣꠁꠘ꠆ꠎꠣꠄ ꠛꠤꠟꠣꠄ ꠟꠥꠐꠞ ꠝꠣꠟ।”
GEN 49:28 ꠄꠞꠣ ꠅꠁꠟꠣ ꠁꠍꠞꠣꠁꠟꠞ ꠛꠣꠞꠅ ꠉꠥꠡ꠆ꠐꠤ, ꠔꠣꠞꠣꠞ ꠛꠣꠚꠦ ꠔꠣꠞꠣꠞ ꠟꠣꠉꠤ ꠖꠥꠀꠞ ꠡꠝꠄ ꠅꠃꠟꠣ ꠇꠁꠟꠣ। ꠔꠣꠁꠘ ꠄꠞꠣ ꠢꠇ꠆ꠇꠟꠞꠦ ꠎꠣꠞꠎꠤꠞ ꠙꠣꠅꠘꠣ ꠖꠥꠀ ꠖꠤꠟꠣ।
GEN 49:29 ꠛꠣꠖꠦ ꠁꠀꠇꠥꠛꠦ ꠔꠣꠘ ꠙꠥꠀꠂꠘ꠆ꠔꠞꠦ ꠅꠍꠤꠅꠔ ꠇꠞꠣꠁꠟꠣ ꠎꠦꠘ, “ꠀꠝꠣꠞ ꠔ ꠛꠣꠚ-ꠖꠣꠖꠣꠞ ꠉꠦꠍꠦ ꠎꠣꠅꠀꠞ ꠡꠝꠄ ꠅꠁꠉꠦꠍꠦ, ꠔꠦ ꠢꠤꠐ꠆ꠐꠤ ꠁꠚ꠆ꠞꠥꠘꠞ ꠎꠝꠤꠘꠞ ꠉꠥꠢꠣꠔ, ꠀꠝꠣꠞ ꠛꠣꠚ-ꠖꠣꠖꠣꠞ ꠇꠣꠘ꠆ꠖꠣꠔ ꠀꠝꠣꠞꠦ ꠖꠣꠚꠘ ꠇꠞꠤꠅ।
GEN 49:30 ꠁ ꠉꠥꠢꠣ ꠇꠦꠘꠣꠘ ꠖꠦꠡꠞ, ꠝꠝ꠆ꠞꠤꠞ ꠗꠣꠞꠅ ꠝꠇꠙꠦꠟꠣꠞ ꠎꠝꠤꠔ। ꠁꠛ꠆ꠞꠣꠢꠤꠝꠦ ꠢꠤꠐ꠆ꠐꠤ ꠁꠚ꠆ꠞꠥꠘꠞ ꠉꠦꠍ ꠕꠘꠦ ꠅꠃ ꠎꠝꠤꠘ ꠟꠁꠍꠟꠣ ꠇꠛꠞꠡ꠆ꠕꠣꠘ ꠛꠣꠘꠣꠘꠤꠞ ꠟꠣꠉꠤ।
GEN 49:31 ꠅꠘꠅꠃ ꠁꠛ꠆ꠞꠣꠢꠤꠝ ꠀꠞ ꠔꠣꠘ ꠛꠤꠛꠤ ꠍꠣꠄꠞꠣꠞꠦ ꠖꠣꠚꠘ ꠇꠞꠣ ꠅꠁꠍꠦ, ꠁꠍꠢꠣꠇ ꠀꠞ ꠔꠣꠘ ꠛꠤꠛꠤ ꠞꠦꠛꠦꠇꠣꠞꠦꠅ ꠅꠘꠅ ꠖꠣꠚꠘ ꠇꠞꠣ ꠅꠁꠍꠦ, ꠀꠞ ꠀꠝꠤ ꠟꠦꠀꠞꠦꠅ ꠅꠘꠅ ꠖꠣꠚꠘ ꠇꠞꠍꠤ।
GEN 49:32 ꠁ ꠎꠝꠤꠘ ꠀꠞ ꠄꠞ ꠝꠣꠎꠞ ꠉꠥꠢꠣ ꠢꠤꠐ꠆ꠐꠤ ꠅꠇꠟꠞ ꠉꠦꠍ ꠕꠘꠦ ꠟꠁꠍꠟꠣ।”
GEN 49:33 ꠁꠀꠇꠥꠛꠦ ꠔꠣꠘ ꠙꠥꠀꠂꠘ꠆ꠔꠞꠦ ꠅꠍꠤꠅꠔ ꠇꠞꠣ ꠡꠦꠡ ꠅꠁꠟꠦ, ꠛꠤꠍꠘꠣꠞ ꠃꠙꠞꠦ ꠔꠣꠘ ꠖꠥꠁꠅ ꠙꠣꠅ ꠄꠇꠈꠣꠘꠅ ꠇꠞꠟꠣ ꠀꠞ ꠀꠈꠦꠞꠤ ꠖꠝ ꠍꠣꠠꠤꠀ ꠔꠣꠘ ꠛꠣꠚ-ꠖꠣꠖꠣꠞ ꠉꠦꠍꠦ ꠉꠦꠟꠣꠉꠤ।
GEN 50:1 ꠁꠃꠍꠥꠚꠦ ꠔꠣꠘ ꠛꠣꠚꠞ ꠝꠥꠈꠞ ꠃꠙꠞꠦ ꠝꠥꠈ ꠟꠣꠉꠣꠁꠀ ꠇꠣꠘ꠆ꠖꠤꠔꠣ ꠟꠣꠉꠟꠣ ꠀꠞ ꠔꠣꠘꠞꠦ ꠢꠥꠋꠉꠣ ꠖꠤꠟꠣ।
GEN 50:2 ꠛꠣꠖꠦ ꠔꠣꠁꠘ ꠘꠤꠎꠞ ꠅꠗꠤꠘꠞ ꠢꠦꠇꠤꠝ ꠅꠇꠟꠞꠦ ꠢꠥꠇꠥꠝ ꠖꠤꠟꠣ, ꠔꠣꠞꠣ ꠔꠣꠘ ꠛꠣꠚꠞ ꠟꠣꠡꠞꠦ ꠝꠝꠤ ꠛꠣꠘꠣꠁꠛꠣꠞ ꠟꠣꠉꠤ। ꠔꠦꠃ ꠔꠣꠞꠣ ꠔꠣꠘ ꠉꠔꠞꠅ ꠝꠝꠤꠞ ꠝꠡꠟꠣ ꠟꠣꠉꠣꠁꠟꠣ।
GEN 50:3 ꠔꠣꠞꠣ ꠁ ꠇꠣꠝꠅ ꠌꠣꠟ꠆ꠟꠤꠡ ꠖꠤꠘ ꠟꠣꠉꠣꠁꠟꠣ, ꠅꠃ ꠇꠣꠝꠅ ꠔ ꠌꠣꠟ꠆ꠟꠤꠡ ꠖꠤꠘꠃ ꠟꠣꠉꠦ। ꠀꠞ ꠝꠤꠡꠞꠤ ꠅꠇꠟꠦ ꠔꠣꠘ ꠟꠣꠉꠤ ꠡꠔ꠆ꠔꠁꠞ ꠖꠤꠘ ꠜꠞꠤꠀ ꠀꠢꠣꠎꠣꠞꠤ ꠇꠞꠟꠣ।
GEN 50:4 ꠅꠃ ꠀꠢꠣꠎꠣꠞꠤꠞ ꠖꠤꠘꠞ ꠛꠣꠖꠦ, ꠁꠃꠍꠥꠚꠦ ꠚꠦꠞꠣꠃꠘꠞ ꠛꠣꠠꠤꠞ ꠝꠣꠘꠡꠞꠦ ꠇꠁꠟꠣ, “ꠀꠙꠘꠣꠞꠣ ꠎꠥꠖꠤ ꠀꠝꠣꠞꠦ ꠖꠄꠀ ꠇꠞꠂꠘ, ꠔꠦ ꠚꠦꠞꠣꠃꠘꠞꠦ ꠀꠝꠣꠞ ꠅꠃ ꠇꠕꠣꠈꠣꠘ ꠎꠣꠘꠣꠃꠇ꠆ꠇꠣ ꠎꠦꠘ।
GEN 50:5 ꠛꠣꠛꠣꠄ ꠀꠝꠣꠞꠦ ꠇꠍꠝ ꠇꠞꠣꠁꠀ ꠇꠁꠍꠟꠣ, ‘ꠢꠥꠘꠅ, ꠀꠝꠤ ꠔ ꠝꠞꠤꠎꠤꠝꠥ, ꠔꠦ ꠇꠦꠘꠣꠘ ꠖꠦꠡꠅ ꠀꠝꠣꠞ ꠟꠣꠉꠤ ꠎꠥꠁꠔ ꠇꠞꠣ ꠇꠄꠛꠞꠅ ꠀꠝꠣꠞꠦ ꠖꠣꠚꠘ ꠇꠞꠤꠅ।’ ꠔꠦꠃ ꠅꠈꠘ ꠔꠣꠘꠞꠦ ꠖꠣꠚꠘꠞ ꠟꠣꠉꠤ, ꠖꠄꠀ ꠇꠞꠤ ꠀꠝꠣꠞꠦ ꠎꠣꠁꠔꠦ ꠖꠦꠃꠇ꠆ꠇꠣ, ꠛꠣꠛꠣꠞꠦ ꠇꠄꠛꠞ ꠖꠤꠀꠃ ꠀꠝꠤ ꠢꠤꠞꠛꠣꠞ ꠀꠁꠝꠥ।”
GEN 50:6 ꠚꠦꠞꠣꠃꠘꠦ ꠎꠥꠀꠙ ꠖꠤꠟꠣ, “ꠔꠣꠁꠘ ꠔꠥꠝꠣꠞꠦ ꠎꠦꠟꠣ ꠇꠍꠝ ꠇꠞꠣꠁꠍꠂꠘ, ꠔꠥꠝꠤ ꠉꠤꠀ ꠅꠃꠟꠣꠃ ꠇꠞꠅ।”
GEN 50:7 ꠔꠦꠃ ꠁꠃꠍꠥꠚꠦ ꠔꠣꠘ ꠛꠣꠚꠞꠦ ꠖꠣꠚꠘꠞ ꠟꠣꠉꠤ ꠞꠅꠀꠘꠣ ꠖꠤꠟꠣ; ꠀꠞ ꠚꠦꠞꠣꠃꠘꠞ ꠢꠇꠟ ꠉꠥꠟꠣꠝꠦ, ꠔꠣꠘ ꠖꠞꠛꠣꠞꠞ ꠝꠥꠞꠛ꠆ꠛꠤ ꠅꠇꠟꠦ ꠀꠞ ꠝꠤꠡꠞꠞ ꠝꠄ-ꠝꠥꠞꠛ꠆ꠛꠤ ꠅꠇꠟꠦ,
GEN 50:8 ꠁꠃꠍꠥꠚꠞ ꠘꠤꠎꠞ ꠙꠞꠤꠛꠣꠞ, ꠔꠣꠘ ꠜꠣꠁꠀꠁꠘ ꠀꠞ ꠔꠣꠘ ꠛꠣꠚꠞ ꠙꠞꠤꠛꠣꠞꠞ ꠢꠇꠟꠦ ꠞꠅꠀꠘꠣ ꠖꠤꠟꠣ। ꠉꠥꠡꠘꠅ ꠈꠣꠟꠤ ꠔꠣꠞꠣꠞ ꠢꠥꠞꠥꠔ꠆ꠔꠣꠁꠘ ꠀꠞ ꠉꠞꠥ-ꠝꠦꠠꠣꠞ ꠙꠣꠟꠣꠁꠘ ꠕꠁꠀ ꠉꠦꠟꠣ।
GEN 50:9 ꠔꠣꠞꠣ ꠛꠃꠔ ꠊꠥꠠꠣꠞ ꠉꠣꠠꠤ ꠀꠞ ꠊꠥꠠ-ꠍꠅꠀꠞ ꠅꠇꠟ ꠟꠁꠀ ꠄꠇ ꠛꠤꠞꠣꠐ ꠖꠟ ꠢꠣꠎꠤꠀ ꠞꠅꠀꠘꠣ ꠖꠤꠟꠣ।
GEN 50:10 ꠀꠞ ꠎꠞ꠆ꠖꠣꠘ ꠉꠣꠋꠉꠞ ꠢꠙꠣꠞꠅ ꠀꠐꠣꠖꠞ ꠗꠣꠘ ꠝꠣꠠꠣꠞ ꠎꠣꠉꠣꠔ ꠉꠤꠀ, ꠔꠣꠞꠣ ꠢꠇꠟꠦ ꠡꠣꠔꠖꠤꠘ ꠗꠞꠤ ꠁꠃꠍꠥꠚꠞ ꠛꠣꠚꠞ ꠟꠣꠉꠤ ꠈꠥꠛ ꠀꠢꠣꠎꠣꠞꠤ ꠀꠞ ꠛꠤꠟꠣꠙ ꠇꠞꠟꠣ।
GEN 50:11 ꠀꠐꠣꠖꠞ ꠗꠣꠘ ꠝꠣꠠꠣꠞ ꠎꠣꠉꠣꠔ ꠔꠣꠞꠣꠞꠦ ꠁꠟꠣ ꠀꠢꠣꠎꠣꠞꠤ ꠇꠞꠣꠔ ꠖꠦꠈꠤꠀ, ꠢꠤ ꠖꠦꠡꠞ ꠛꠣꠡꠤꠘ꠆ꠖꠣ ꠇꠦꠘꠣꠘꠤ ꠅꠇꠟꠦ ꠇꠁꠟꠣ, ꠝꠤꠡꠞꠤ ꠅꠇꠟꠞ ꠟꠣꠉꠤ ꠁꠐꠣ ꠈꠥꠛ ꠛꠦꠎꠥꠁꠔꠣ ꠀꠢꠣꠎꠣꠞꠤ; ꠄꠞꠟꠣꠉꠤ ꠎꠞ꠆ꠖꠣꠘ ꠉꠣꠋꠉꠞ ꠙꠣꠞꠞ ꠅꠃ ꠎꠣꠉꠣꠞ ꠘꠣꠝ ꠅꠁꠉꠦꠟ, ꠀꠛꠦꠟ-ꠝꠤꠡꠞꠄꠁꠝ [ꠝꠣꠘꠤ, ꠝꠤꠡꠞꠤ ꠅꠇꠟꠞ ꠀꠢꠣꠎꠣꠞꠤ]।
GEN 50:12 ꠁꠍꠞꠣꠁꠟꠦ ꠔꠣꠘ ꠙꠥꠀꠂꠘ꠆ꠔꠞꠦ ꠎꠦꠟꠣ ꠅꠍꠤꠅꠔ ꠇꠞꠍꠟꠣ, ꠔꠣꠞꠣ ꠔꠣꠘꠞꠦ ꠅꠟꠣꠃ ꠇꠞꠟꠣ।
GEN 50:13 ꠔꠣꠞꠣ ꠔꠣꠘ ꠟꠣꠡ ꠇꠦꠘꠣꠘ ꠖꠦꠡꠅ ꠟꠁꠀ ꠉꠦꠟꠣ, ꠀꠞ ꠝꠝ꠆ꠞꠤꠞ ꠉꠦꠍꠦ ꠝꠇꠙꠦꠟꠣꠞ ꠎꠝꠤꠘꠞ, ꠉꠥꠢꠣꠞ ꠝꠣꠎꠦ ꠔꠣꠘꠞꠦ ꠖꠣꠚꠘ ꠇꠞꠟꠣ। ꠁꠐꠣ ꠇꠛꠞꠡ꠆ꠕꠣꠘ ꠛꠣꠘꠣꠘꠤꠞ ꠟꠣꠉꠤ ꠁꠛ꠆ꠞꠣꠢꠤꠝꠦ, ꠢꠤꠐ꠆ꠐꠤ ꠁꠚ꠆ꠞꠥꠘꠞ ꠉꠦꠍ ꠕꠣꠇꠤ ꠟꠁꠍꠟꠣ।
GEN 50:14 ꠛꠣꠚꠞꠦ ꠖꠣꠚꠘ ꠇꠞꠣꠞ ꠛꠣꠖꠦ ꠁꠃꠍꠥꠚ, ꠔꠣꠘ ꠜꠣꠁꠀꠁꠘ ꠀꠞ ꠎꠔ ꠝꠣꠘꠥꠡ ꠔꠣꠘ ꠛꠣꠚꠞꠦ ꠖꠣꠚꠘ ꠇꠞꠣꠔ ꠟꠉꠦ ꠉꠦꠍꠟꠣ, ꠔꠣꠞꠣ ꠢꠇꠟꠦ ꠝꠤꠡꠞꠅ ꠚꠤꠞꠤꠀ ꠀꠁꠟꠣ।
GEN 50:15 ꠛꠣꠚ ꠝꠞꠤꠉꠦꠍꠂꠘ ꠖꠦꠈꠤꠀ ꠁꠃꠍꠥꠚꠞ ꠜꠣꠁꠀꠁꠘ꠆ꠔꠦ ꠝꠣꠔꠣ-ꠝꠣꠔꠤ ꠇꠞꠟꠣ, ꠁꠃꠍꠥꠚꠦ ꠇꠤꠛꠣ ꠀꠝꠞꠣꠞꠦ ꠊꠤꠘ꠆ꠘꠣꠁꠛ ꠀꠞ ꠀꠝꠞꠣ ꠔꠣꠞ ꠎꠦꠔꠣ ꠈꠦꠔꠤ ꠇꠞꠍꠤ, ꠅꠈꠘ ꠁꠔꠣ ꠢꠇ꠆ꠇꠟꠔꠣꠞ ꠛꠖꠟꠣ ꠟꠁꠛ।
GEN 50:16 ꠔꠦꠃ ꠔꠣꠞꠣ ꠁꠃꠍꠥꠚꠞ ꠉꠦꠍꠦ ꠈꠛꠞꠤꠀ ꠙꠣꠑꠣꠁꠀ ꠇꠁꠟꠣ, “ꠔꠥꠝꠣꠞ ꠛꠣꠚꠦ ꠝꠞꠣꠞ ꠀꠉꠦ ꠁ ꠅꠍꠤꠅꠔ ꠇꠞꠍꠟꠣ ꠎꠦꠘ,
GEN 50:17 ꠔꠥꠝꠞꠣ ꠁꠃꠍꠥꠚꠞꠦ ꠅꠃ ꠇꠕꠣꠈꠣꠘ ꠇꠁꠅ, ꠔꠥꠝꠣꠞ ꠜꠣꠁꠀꠁꠘ꠆ꠔꠦ ꠔꠥꠝꠣꠞ ꠎꠦꠔꠣ ꠈꠦꠔꠤ ꠇꠞꠍꠂꠘ, ꠖꠄꠀ ꠇꠞꠤ ꠔꠥꠝꠤ ꠔꠣꠞꠣꠞ ꠢꠤ ꠅꠁꠘ꠆ꠘꠣꠄ ꠀꠞ ꠉꠥꠘꠣ ꠝꠣꠚ ꠇꠞꠤ ꠖꠤꠅ। ꠄꠞꠟꠣꠉꠤ ꠀꠝꠞꠣ ꠝꠤꠘꠔ ꠇꠞꠤꠀꠞ, ꠔꠥꠝꠣꠞ ꠛꠣꠚꠞ ꠀꠟ꠆ꠟꠣꠞ ꠅꠃ ꠉꠥꠟꠣꠝ ꠅꠇꠟꠞꠦ ꠝꠣꠚ ꠇꠞꠤ ꠖꠤꠟꠣꠅ।” ꠔꠣꠞꠣꠞ ꠝꠣꠔ ꠢꠥꠘꠤꠀ ꠁꠃꠍꠥꠚꠞ ꠇꠣꠘ꠆ꠖꠘ ꠀꠁꠟ꠆ꠟ।
GEN 50:18 ꠛꠣꠖꠦ ꠔꠣꠘ ꠜꠣꠁꠀꠁꠘ꠆ꠔꠦ ꠔꠣꠘ ꠍꠣꠝꠘꠦ ꠀꠁꠀ ꠝꠣꠐꠤꠔ ꠙꠠꠤꠀ ꠇꠁꠟꠣ, “ꠢꠥꠘꠅ, ꠀꠝꠞꠣ ꠔ ꠔꠥꠝꠣꠞ ꠉꠥꠟꠣꠝ।”
GEN 50:19 ꠅꠁꠟꠦ ꠁꠃꠍꠥꠚꠦ ꠔꠣꠞꠣꠞꠦ ꠇꠁꠟꠣ, “ꠔꠥꠝꠞꠣ ꠒꠞꠣꠁꠅ ꠘꠣ। ꠀꠝꠤ ꠇꠥꠘꠥ ꠀꠟ꠆ꠟꠣꠞ ꠈꠟꠤꠚꠣ ꠘꠤ?
GEN 50:20 ꠔꠥꠝꠞꠣ ꠔ ꠀꠝꠣꠞ ꠈꠦꠔꠤ ꠇꠞꠔꠣꠄ ꠌꠣꠁꠍꠟꠣꠄ, ꠅꠁꠟꠦ ꠀꠟ꠆ꠟꠣꠄ ꠁꠔꠣꠞꠦ ꠜꠣꠟꠣꠁ ꠛꠣꠘꠣꠁꠟ꠆ꠟꠣ, ꠎꠦꠟꠣ ꠀꠁꠎ ꠖꠦꠈꠞꠣꠄ, ꠔꠦ ꠔꠣꠘ ꠈꠤꠀꠟ ꠀꠍꠤꠟ ꠅꠃ ꠟꠣꠈꠣꠘ ꠇꠞꠤ ꠛꠃꠔ ꠝꠣꠘꠡꠞ ꠎꠣꠘ ꠛꠣꠌꠣꠁꠔꠣ।
GEN 50:21 ꠔꠥꠝꠞꠣ ꠅꠈꠘ ꠒꠞꠣꠁꠅ ꠘꠣ। ꠀꠝꠤ ꠔꠥꠝꠞꠣꠞꠦ ꠀꠞ ꠔꠥꠝꠞꠣꠞ ꠙꠥꠀ-ꠙꠥꠠꠤꠘ꠆ꠔꠞꠦ ꠖꠦꠈꠣ-ꠢꠥꠘꠣ ꠇꠞꠝꠥ।” ꠔꠣꠁꠘ ꠅꠃ ꠟꠣꠈꠣꠘ ꠇꠞꠤ ꠔꠣꠞꠣꠞꠦ ꠛꠥꠎ ꠖꠤꠟꠣ ꠀꠞ ꠈꠥꠡ ꠖꠤꠟꠦ ꠝꠣꠔ-ꠇꠕꠣ ꠝꠣꠔꠤꠟꠣ।
GEN 50:22 ꠛꠣꠖꠦ ꠁꠃꠍꠥꠚ ꠀꠞ ꠔꠣꠘ ꠛꠣꠚꠞ ꠀꠅꠟꠣꠖ ꠅꠇꠟꠦ ꠝꠤꠡꠞꠅ ꠛꠡꠔ ꠇꠞꠣꠔ ꠞꠁꠟꠣ। ꠁꠃꠍꠥꠚ ꠄꠇ-ꠡ ꠖꠡ ꠛꠞꠍ ꠎꠤꠘ꠆ꠖꠣ ꠀꠍꠟꠣ।
GEN 50:23 ꠔꠣꠁꠘ ꠀꠚꠞꠣꠁꠝꠞ ꠘꠣꠔꠤꠘꠡꠣ ꠙꠞ꠆ꠎꠘ꠆ꠔ ꠖꠦꠈꠟꠣ ꠀꠞ ꠝꠣꠘꠡꠣꠞ ꠙꠥꠀ ꠝꠣꠈꠤꠞꠞ ꠢꠥꠞꠥꠔ꠆ꠔꠣꠁꠘꠅ ꠁꠃꠍꠥꠚꠞ ꠀꠔꠅ ꠙꠄꠖꠣ ꠅꠁꠟꠣ।
GEN 50:24 ꠛꠣꠖꠦ ꠁꠃꠍꠥꠚꠦ ꠔꠣꠘ ꠜꠣꠁꠀꠁꠘ꠆ꠔꠞꠦ ꠇꠁꠟꠣ, “ꠀꠝꠣꠞ ꠔ ꠝꠃꠔꠞ ꠅꠇ꠆ꠔ ꠀꠁꠌ꠆ꠌꠦ, ꠘꠤꠌꠄ ꠀꠟ꠆ꠟꠣꠄ ꠔꠥꠝꠞꠣꠞ ꠛꠣꠄ ꠘꠎꠞ ꠞꠣꠈꠛꠣ। ꠔꠣꠁꠘ ꠁꠛ꠆ꠞꠣꠢꠤꠝ, ꠁꠍꠢꠣꠇ ꠀꠞ ꠁꠀꠇꠥꠛꠞ ꠉꠦꠍꠦ ꠎꠦ ꠖꠦꠡ ꠖꠤꠔꠣ ꠇꠞꠤ ꠇꠍꠝ ꠇꠞꠍꠂꠘ, ꠔꠥꠝꠞꠣꠞꠦ ꠅꠘ ꠕꠣꠇꠤ ꠢꠃ ꠖꠦꠡꠅ ꠟꠁꠀ ꠎꠣꠁꠛꠣ।”
GEN 50:25 ꠀꠞ ꠁꠃꠍꠥꠚꠦ ꠛꠘꠤ ꠁꠍꠞꠣꠁꠟꠞꠦ ꠅꠃ ꠅꠍꠤꠅꠔ ꠇꠞꠣꠁꠟꠣ, “ꠘꠤꠌꠄ ꠀꠟ꠆ꠟꠣꠄ ꠇꠥꠘꠥꠖꠤꠘ ꠔꠥꠝꠞꠣꠞ ꠛꠣꠄ ꠘꠎꠞ ꠇꠞꠛꠣ। ꠔꠦ ꠅꠘ ꠕꠣꠇꠤ ꠎꠣꠅꠀꠞ ꠛꠣꠟꠣ ꠔꠥꠝꠞꠣ ꠀꠝꠣꠞ ꠀꠒ꠆ꠒꠤ ꠅꠇꠟ ꠔꠥꠟꠤꠀ ꠟꠁꠀ ꠎꠣꠁꠅ।”
GEN 50:26 ꠢꠦꠡꠦ ꠄꠇ-ꠡ ꠖꠡ ꠛꠞꠍ ꠛꠄꠅꠡꠅ ꠁꠃꠍꠥꠚ ꠝꠣꠞꠣ ꠉꠦꠟꠣ। ꠔꠦꠃ ꠝꠣꠘꠡꠦ ꠔꠣꠘ ꠟꠣꠡꠞꠦ ꠈꠥꠡꠛꠥ-ꠝꠡꠟꠣꠖꠤ ꠝꠣꠈꠤꠀ ꠝꠝꠤ ꠛꠣꠘꠣꠁꠀ ꠝꠤꠡꠞ ꠖꠦꠡꠅ ꠄꠇ ꠇꠣꠚꠘꠞ ꠛꠣꠇ꠆ꠡꠞ ꠜꠤꠔꠞꠦ ꠕꠁꠟꠣ॥
EXO 1:1 ꠀꠟ꠆ꠟꠣꠄ ꠢꠎꠞꠔ ꠁꠀꠇꠥꠛꠞ ꠘꠄꠀ ꠘꠣꠝ ꠖꠤꠍꠟꠣ ꠁꠍꠞꠣꠁꠟ, ꠄꠞꠟꠣꠉꠤ ꠔꠣꠘ ꠛꠋꠡꠞ ꠘꠣꠝ ꠅꠁꠟ ꠛꠘꠤ ꠁꠍꠞꠣꠁꠟ। ꠁꠀꠇꠥꠛꠦ ꠔꠣꠘ ꠛꠤꠛꠤꠘ-ꠛꠣꠁꠌ꠆ꠌꠣꠁꠘ ꠀꠞ ꠙꠞꠤꠛꠣꠞꠞ ꠢꠇꠟꠞꠦ ꠟꠁꠀ ꠝꠤꠡꠞ ꠖꠦꠡꠅ ꠉꠦꠟꠣꠉꠤ। ꠅꠃ ꠡꠝꠄ ꠔꠣꠘ ꠟꠉꠦ ꠅꠁꠀ ꠎꠦꠞꠣ ꠉꠦꠟꠣ, ꠄꠞꠣꠞ ꠘꠣꠝ ꠅꠁꠟ,
EXO 1:2 ꠞꠥꠛꠦꠘ, ꠡꠤꠝꠤꠅꠘ, ꠟꠦꠛꠤ, ꠄꠢꠥꠖꠣ,
EXO 1:3 ꠁꠍꠣꠈꠞ, ꠍꠛꠥꠟꠘ, ꠛꠤꠘ-ꠁꠀꠝꠤꠘ,
EXO 1:4 ꠖꠣꠘ, ꠘꠙ꠆ꠔꠣꠟꠤ, ꠍꠣꠖꠥ ꠀꠞ ꠀꠡꠤꠞ।
EXO 1:5 ꠁꠀꠇꠥꠛꠞ ꠛꠋꠡꠞ ꠢꠇ꠆ꠇꠟꠔꠣꠄ ꠝꠤꠟꠤꠀ ꠡꠔ꠆ꠔꠁꠞ ꠎꠘ ꠀꠍꠟꠣ। ꠀꠞ ꠁꠃꠍꠥꠚ ꠀꠉ ꠕꠣꠇꠤꠃ ꠝꠤꠡꠞꠅ ꠕꠣꠇꠔꠣ।
EXO 1:6 ꠛꠣꠖꠦ ꠁꠃꠍꠥꠚ, ꠔꠣꠘ ꠜꠣꠁꠀꠁꠘ, ꠀꠞ ꠢꠤ ꠀꠝꠟꠞ ꠢꠇꠟ ꠝꠣꠞꠣ ꠉꠦꠟꠣ।
EXO 1:7 ꠅꠁꠟꠦ ꠔꠣꠞꠣꠞ ꠛꠣꠖꠞ ꠛꠋꠡꠗꠞ ꠛꠣꠠꠤꠀ ꠈꠥꠛ ꠛꠟꠀꠟꠣ ꠅꠁꠟꠣ। ꠄꠞꠣ ꠌꠣꠁꠞꠅꠛꠣꠄ ꠍꠤꠔ꠆ꠞꠤꠀ ꠀꠡ꠆ꠔꠣ ꠝꠤꠡꠞ ꠖꠦꠡ ꠜꠞꠤꠉꠦꠟꠣ।
EXO 1:8 ꠄꠞꠝꠣꠎꠦ ꠝꠤꠡꠞꠅ ꠄꠇꠎꠘ ꠘꠄꠀ ꠛꠣꠖꠡꠣ ꠅꠁꠟꠣ, ꠄꠁꠘ ꠁꠃꠍꠥꠚꠞꠦ ꠌꠤꠘꠂꠘ ꠘꠣ।
EXO 1:9 ꠄꠁꠘ ꠘꠤꠎꠞ ꠙ꠆ꠞꠎꠣ ꠅꠇꠟꠞꠦ ꠇꠁꠟꠣ, “ꠌꠣꠁꠀ ꠖꠦꠈꠅ, ꠛꠘꠤ ꠁꠍꠞꠣꠁꠟ ꠀꠝꠞꠣ ꠕꠣꠇꠤ ꠛꠦꠡꠤꠅ ꠀꠞ ꠛꠟꠀꠟꠣꠅ।
EXO 1:10 ꠔꠦ ꠀꠅ, ꠀꠝꠞꠣ ꠄꠇ ꠚꠘ꠆ꠖꠤ ꠇꠞꠤ, ꠁꠔꠣ ꠎꠦꠘꠥ ꠀꠞ ꠘꠣ ꠛꠣꠠꠂꠘ। ꠀꠞꠘꠣꠄ ꠔꠣꠞꠣ ꠛꠣꠠꠤꠀ ꠢꠦꠡꠦ ꠎꠥꠖ꠆ꠖꠞ ꠇꠣꠟꠅ ꠀꠝꠞꠣꠞ ꠖꠥꠡꠝꠘꠞ ꠟꠉꠦ ꠝꠤꠟꠤꠀ ꠀꠝꠞꠣꠞ ꠛꠤꠞꠥꠖ꠆ꠖꠦ ꠎꠥꠖ꠆ꠖ ꠇꠞꠛ, ꠛꠣꠖꠦ ꠀꠝꠞꠣꠞ ꠖꠦꠡ ꠕꠣꠇꠤ ꠎꠣꠁꠛꠉꠤ।”
EXO 1:11 ꠔꠦꠃ ꠔꠣꠞꠣ ꠡꠞ꠆ꠖꠣꠞ ꠟꠣꠉꠣꠁꠟꠣ ꠄꠞꠣꠞꠦ ꠝꠣꠞꠤꠀ-ꠗꠞꠤꠀ ꠎꠥꠞ-ꠎꠥꠟꠥꠝ ꠇꠞꠤꠀ ꠇꠣꠝ ꠇꠞꠣꠘꠤꠞ ꠟꠣꠉꠤ। ꠄꠞꠣ ꠚꠦꠞꠣꠃꠘꠞ ꠚꠡꠟ ꠞꠣꠈꠣꠞ ꠟꠣꠉꠤ ꠙꠤꠕꠥꠝ ꠀꠞ ꠞꠣꠝꠣꠡꠦꠡ ꠘꠣꠝꠞ ꠖꠥꠁꠐꠣ ꠐꠣꠃꠘꠅ ꠛꠣꠘꠣꠁꠟꠣ।
EXO 1:12 ꠅꠁꠟꠦ ꠄꠞꠣꠞ ꠃꠙꠞꠦ ꠎꠔ ꠛꠦꠡꠤ ꠎꠥꠞ-ꠎꠥꠟꠥꠝ ꠇꠞꠣ ꠅꠁꠟ, ꠄꠞꠣꠅ ꠅꠔ ꠛꠦꠡꠤ ꠛꠣꠠꠤꠟꠣ ꠀꠞ ꠍꠤꠔ꠆ꠞꠤꠟꠣ। ꠄꠞꠟꠣꠉꠤ ꠝꠤꠡꠞꠤ ꠅꠇꠟꠦ ꠛꠘꠤ ꠁꠍꠞꠣꠁꠟꠞꠦ ꠈꠥꠛ ꠒꠞꠣꠁꠉꠦꠟꠣ।
EXO 1:13 ꠒꠞꠣꠁꠀ ꠄꠞꠣꠞꠦꠖꠤ ꠀꠞꠅ ꠇꠑꠤꠘ ꠇꠣꠝ ꠇꠞꠣꠁꠟꠣ।
EXO 1:14 ꠝꠣꠐꠤ ꠇꠣꠝ, ꠁꠐꠞ ꠇꠣꠝ ꠀꠞ ꠈꠦꠔꠞ ꠝꠣꠎꠦ ꠇꠡ꠆ꠐꠞ ꠇꠣꠝ ꠇꠞꠣꠁꠀ ꠄꠞꠣꠞ ꠎꠣꠘꠞꠦ ꠔꠤꠔ꠆ꠔꠣ ꠛꠣꠘꠣꠁꠟꠤꠟ। ꠀꠞ ꠔꠣꠞꠣ ꠎꠥꠞ-ꠎꠥꠟꠥꠝ ꠇꠞꠤꠀ ꠘꠤꠡ꠆ꠑꠥꠞ-ꠙꠣꠡꠣꠘꠞ ꠟꠣꠈꠣꠘ ꠇꠣꠝ ꠇꠞꠣꠁꠔ।
EXO 1:15 ꠛꠣꠖꠦ ꠝꠤꠡꠞꠞ ꠛꠣꠖꠡꠣꠄ ꠡꠤꠚ꠆ꠞꠣ ꠀꠞ ꠚꠥꠀ ꠘꠣꠝꠞ ꠖꠥꠁꠎꠘ ꠁꠛꠞꠣꠘꠤ ꠖꠣꠁ ꠛꠦꠐꠤꠞꠦ ꠢꠥꠇꠥꠝ ꠖꠤꠟꠣ,
EXO 1:16 “ꠔꠥꠝꠞꠣ ꠁꠛꠞꠣꠘꠤ ꠛꠦꠐꠤꠘ꠆ꠔꠞ ꠖꠣꠁ ꠉꠤꠞꠤꠔ ꠉꠤꠀ, ꠁꠔꠣꠞ ꠙꠥꠀꠂꠘ ꠙꠄꠖꠣ ꠅꠁꠟꠦꠃ ꠝꠣꠞꠤꠟꠣꠁꠅ, ꠈꠣꠟꠤ ꠙꠥꠠꠤꠘ꠆ꠔꠞꠦ ꠎꠤꠔꠣ ꠞꠣꠈꠤꠅ।”
EXO 1:17 ꠅꠁꠟꠦ ꠢꠤ ꠖꠣꠁ ꠛꠦꠐꠤꠘ꠆ꠔꠦ ꠀꠟ꠆ꠟꠣꠞꠦ ꠒꠞꠣꠁꠔꠣ ꠉꠔꠤꠇꠦ, ꠝꠤꠡꠞꠤ ꠛꠣꠖꠡꠣꠞ ꠢꠥꠇꠥꠝ ꠘꠣ ꠝꠣꠘꠤꠀ ꠙꠥꠀꠂꠘ꠆ꠔꠞꠦꠅ ꠎꠤꠔꠣ ꠞꠣꠈꠔꠣ।
EXO 1:18 ꠔꠦꠃ ꠛꠣꠖꠡꠣꠄ ꠄꠞꠣꠞꠦ ꠘꠤꠀ ꠎꠤꠇꠣꠁꠟꠣ, “ꠁꠔꠣ ꠇꠣꠝ ꠇꠦꠘꠦ ꠇꠞꠟꠣꠄ? ꠙꠥꠀꠂꠘ꠆ꠔꠞꠦ ꠇꠦꠘꠦ ꠎꠤꠔꠣ ꠞꠣꠈꠟꠣꠄ?”
EXO 1:19 ꠔꠣꠞꠣ ꠎꠥꠀꠙ ꠖꠤꠟꠣ, “ꠁꠛꠞꠣꠘꠤ ꠛꠦꠐꠤꠘ ꠝꠤꠡꠞꠤ ꠛꠦꠐꠤꠘ꠆ꠔꠞ ꠟꠣꠈꠣꠘ ꠘꠣꠄ, ꠔꠣꠞꠣ ꠛꠃꠔ ꠛꠟꠀꠟꠣ। ꠖꠣꠁꠛꠦꠐꠤ ꠔꠣꠞꠣꠞ ꠇꠣꠍꠣꠔ ꠎꠣꠁꠛꠣꠞ ꠀꠉꠦꠃ ꠔꠣꠞꠣꠞ ꠢꠥꠞꠥꠔ꠆ꠔꠣ ꠙꠄꠖꠣ ꠅꠁꠎꠣꠄ।”
EXO 1:20 ꠅꠃ ꠖꠥꠁꠅ ꠛꠦꠐꠤꠄ ꠀꠟ꠆ꠟꠣꠞꠦ ꠒꠞꠣꠁꠔꠣ ꠇꠞꠤ, ꠀꠟ꠆ꠟꠣꠄ ꠞꠢꠝꠔ ꠇꠞꠤꠀ ꠔꠣꠞꠣꠞꠦꠅ ꠀꠅꠟꠣꠖ ꠖꠤꠟꠣ। ꠀꠞ ꠛꠘꠤ ꠁꠍꠞꠣꠁꠟꠅ ꠀꠞꠅ ꠛꠦꠡꠤ ꠇꠞꠤ ꠛꠣꠠꠤꠀ ꠈꠥꠛ ꠡꠇ꠆ꠔꠤꠝꠣꠘ ꠅꠁꠟꠣ।
EXO 1:22 ꠁꠔꠣ ꠖꠦꠈꠤꠀ ꠚꠦꠞꠣꠃꠘꠦ ꠘꠤꠎꠞ ꠙ꠆ꠞꠎꠣ ꠅꠇꠟꠞꠦ ꠢꠥꠇꠥꠝ ꠖꠤꠟꠣ, “ꠁꠛꠞꠣꠘꠤ ꠅꠇꠟꠞ ꠇꠥꠘꠥ ꠙꠥꠀꠂꠘ ꠅꠁꠟꠦꠃ ꠔꠥꠝꠞꠣ ꠘꠤꠟ ꠘꠖꠅ ꠚꠣꠟꠣꠁ ꠖꠤꠅ, ꠈꠣꠟꠤ ꠙꠥꠠꠤꠘ꠆ꠔꠞꠦ ꠎꠤꠔꠣ ꠞꠣꠈꠤꠅ।”
EXO 2:1 ꠄꠞꠝꠣꠎꠦ ꠟꠦꠛꠤ ꠈꠣꠘ꠆ꠖꠣꠘꠞ ꠄꠇꠎꠘ ꠝꠣꠘꠡꠦ, ꠔꠣꠘ ꠘꠤꠎꠞ ꠈꠣꠘ꠆ꠖꠣꠘꠞ ꠄꠇ ꠇꠁꠘꠣꠞꠦ ꠡꠣꠖꠤ ꠇꠞꠟꠣ।
EXO 2:2 ꠅꠃ ꠇꠁꠘꠣꠞ ꠊꠞꠅ ꠄꠇ ꠙꠥꠀꠞ ꠎꠘꠝ ꠅꠁꠟ। ꠙꠥꠀꠉꠥ ꠖꠦꠈꠔꠦ ꠈꠥꠛ ꠡꠥꠘ꠆ꠖꠞ ꠅꠀꠄ, ꠔꠤꠘ ꠝꠣꠡ ꠗꠞꠤ ꠟꠥꠇꠣꠁ ꠞꠣꠈꠟꠣ।
EXO 2:3 ꠢꠦꠡꠦ ꠀꠞ ꠟꠥꠇꠣꠁꠔꠣ ꠘꠣ ꠙꠣꠞꠤꠀ, ꠔꠣꠁꠘ ꠘꠟ-ꠈꠣꠉꠠꠣꠞ ꠄꠇ ꠐꠥꠇꠞꠤ ꠟꠁꠟꠣ। ꠅꠃ ꠐꠥꠇꠞꠤꠔ ꠝꠣꠐꠤꠀ ꠔꠦꠟ ꠀꠞ ꠀꠟꠇꠣꠔꠞꠣ ꠟꠦꠙꠤꠀ ꠅꠉꠥꠞ ꠜꠤꠔꠞꠦ ꠢꠥꠞꠥꠔ꠆ꠔꠣꠞꠦ ꠢꠣꠞꠣꠁꠀ, ꠉꠣꠋꠉꠞ ꠌꠞꠞ ꠘꠟ ꠛꠘꠞ ꠝꠣꠎꠦ ꠕꠁꠀ ꠀꠁꠟꠣ।
EXO 2:4 ꠀꠞ ꠄꠞ ꠇꠤꠔꠣ ꠖꠡꠣ ꠅꠄ ꠖꠦꠈꠣꠞ ꠟꠣꠉꠤ, ꠔꠣꠞ ꠛꠁꠘ ꠖꠥꠞꠁ ꠃꠛꠣꠁꠟ।
EXO 2:5 ꠕꠥꠠꠣ ꠛꠣꠖꠦ ꠚꠦꠞꠣꠃꠘꠞ ꠙꠥꠠꠤ ꠉꠣꠋꠉꠅ ꠘꠣꠅꠀꠔ ꠀꠁꠟꠣ। ꠉꠣꠋꠉꠞ ꠙꠣꠞꠅ ꠔꠣꠘ ꠛꠣꠘ꠆ꠖꠤ ꠅꠇꠟ ꠊꠥꠞꠣꠊꠥꠞꠤꠔ ꠀꠍꠤꠟ। ꠔꠣꠁꠘ ꠌꠞꠞ ꠘꠟ-ꠈꠣꠉꠠꠣꠞ ꠝꠣꠎꠦ ꠅꠃ ꠐꠥꠇꠞꠤ ꠖꠦꠈꠤꠀ, ꠔꠣꠘ ꠛꠣꠘ꠆ꠖꠤꠞꠦ ꠇꠁꠟꠣ, “ꠅꠃ ꠐꠥꠇꠞꠤꠉꠥ ꠀꠘ।”
EXO 2:6 ꠐꠥꠇꠞꠤꠞ ꠒꠣꠟꠣ ꠈꠥꠟꠤꠀ ꠖꠦꠈꠟꠣ, ꠄꠞ ꠜꠤꠔꠞꠦ ꠄꠇ ꠙꠥꠀꠄ ꠇꠣꠘ꠆ꠖꠦꠞ। ꠖꠦꠈꠤꠀ ꠔꠣꠘ ꠝꠣꠄꠀ ꠟꠣꠉꠤꠉꠦꠟ। ꠔꠣꠁꠘ ꠇꠁꠟꠣ, “ꠁꠡ, ꠁꠉꠥ ꠔ ꠇꠥꠘꠥ ꠁꠛꠞꠣꠘꠤꠞ ꠙꠥꠀ।”
EXO 2:7 ꠅꠃ ꠡꠝꠄ ꠙꠥꠀꠞ ꠛꠁꠘ ꠀꠁꠀ ꠚꠦꠞꠣꠃꠘꠞ ꠙꠥꠠꠤꠞꠦ ꠎꠤꠇꠣꠁꠟ, “ꠞꠣꠘꠤ ꠝꠣ, ꠁ ꠢꠥꠞꠥꠔ꠆ꠔꠣꠞꠦ ꠖꠥꠗ ꠈꠣꠅꠀꠘꠤꠞ ꠟꠣꠉꠤ ꠇꠥꠘꠥ ꠁꠛꠞꠣꠘꠤ ꠛꠦꠐꠤꠞꠦ ꠙꠣꠁꠟꠦ ꠀꠙꠘꠣꠞ ꠉꠦꠍꠦ ꠀꠘꠔꠣꠝ ꠘꠤ?”
EXO 2:8 ꠚꠦꠞꠣꠃꠘꠞ ꠙꠥꠠꠤꠄ ꠇꠁꠟꠣ, “ꠎꠣ ꠀꠘꠉꠤ।” ꠔꠦꠃ ꠙꠥꠠꠤꠄ ꠉꠤꠀ ꠙꠥꠀꠞ ꠝꠣʼꠞꠦ ꠟꠁꠀ ꠀꠁꠟ।
EXO 2:9 ꠚꠦꠞꠣꠃꠘꠞ ꠙꠥꠠꠤꠄ ꠔꠣꠘꠞꠦ ꠇꠁꠟꠣ, “ꠅꠉ, ꠀꠝꠤ ꠔꠥꠝꠣꠞ ꠛꠦꠔꠘ ꠖꠤꠝꠥꠘꠦ, ꠔꠥꠝꠤ ꠀꠝꠣꠞ ꠅꠁꠀ ꠅꠃ ꠙꠥꠀꠉꠥꠞꠦ ꠛꠥꠇꠥꠞ ꠖꠥꠗ ꠈꠣꠅꠀꠅ।” ꠅꠃ ꠢꠤ ꠛꠦꠐꠤꠄ ꠘꠤꠀ ꠢꠥꠞꠥꠔ꠆ꠔꠣꠞꠦ ꠖꠥꠗ ꠈꠣꠅꠀꠁꠀ ꠙꠣꠟꠤꠟꠣ।
EXO 2:10 ꠙꠥꠀꠉꠥ ꠇꠤꠍꠥ ꠛꠠ ꠅꠀꠞ ꠛꠣꠖꠦ ꠔꠣꠁꠘ ꠘꠤꠀ ꠚꠦꠞꠣꠃꠘꠞ ꠙꠥꠠꠤꠞ ꠉꠦꠍꠦ ꠖꠤꠟꠣꠁꠟꠣ। ꠚꠦꠞꠣꠃꠘꠞ ꠙꠥꠠꠤꠄ ꠄꠘꠞꠦ ꠘꠤꠎꠞ ꠙꠥꠀ ꠛꠣꠘꠣꠁꠀ ꠙꠣꠟꠤꠟꠣ। ꠔꠣꠁꠘ ꠇꠁꠟꠣ, “ꠀꠝꠤ ꠔꠣꠞꠦ ꠙꠣꠘꠤ ꠕꠣꠇꠤ ꠐꠣꠘꠤꠀ ꠔꠥꠟꠍꠤ।” ꠄꠞꠟꠣꠉꠤ ꠔꠣꠞ ꠘꠣꠝ ꠞꠣꠈꠟꠣ ꠝꠥꠍꠣ [ꠝꠣꠘꠤ, ꠐꠣꠘꠤꠀ ꠔꠥꠟꠣ]।
EXO 2:11 ꠢꠦꠡꠦ ꠝꠥꠍꠣ ꠛꠠ ꠅꠁꠉꠦꠟꠦ ꠄꠇꠖꠤꠘ ꠔꠣꠘ ꠘꠤꠎꠞ ꠎꠣꠔꠤꠞ ꠜꠣꠁꠀꠁꠘ꠆ꠔꠞ ꠉꠦꠍꠦ ꠉꠤꠀ ꠖꠦꠈꠟꠣ, ꠔꠣꠞꠣ ꠈꠥꠛ ꠇꠡ꠆ꠐꠞ ꠇꠣꠝ ꠇꠞꠞꠣ। ꠄꠞꠝꠣꠎꠦ ꠖꠦꠈꠟꠣ, ꠔꠣꠘ ꠘꠤꠎꠞ ꠁꠛꠞꠣꠘꠤ ꠎꠣꠔꠤꠞ ꠄꠇ ꠛꠦꠐꠣꠞꠦ, ꠄꠇ ꠝꠤꠡꠞꠤꠄ ꠝꠣꠁꠞ-ꠗꠁꠞ ꠇꠞꠦꠞ।
EXO 2:12 ꠖꠦꠈꠤꠀ ꠌꠣꠁꠞꠅꠛꠣꠄ ꠌꠣꠁꠀ ꠀꠞ ꠇꠥꠘꠥ ꠝꠣꠘꠥꠡ ꠘꠣ ꠖꠦꠈꠣꠄ, ꠔꠣꠁꠘ ꠢꠃ ꠝꠤꠡꠞꠤꠞꠦ ꠈꠥꠘ ꠇꠞꠤꠀ ꠛꠣꠟꠥꠞ ꠔꠟꠦ ꠉꠣꠠꠤꠟ꠆ꠟꠣ।
EXO 2:13 ꠛꠣꠖꠞ ꠖꠤꠘꠅ ꠔꠣꠁꠘ ꠢꠤꠞꠛꠣꠞ ꠛꠣꠞꠦ ꠉꠦꠟꠣ। ꠉꠤꠀ ꠖꠦꠈꠟꠣ, ꠖꠥꠁꠎꠘ ꠁꠛꠞꠣꠘꠤꠄ ꠘꠤꠎꠦ ꠘꠤꠎꠦ ꠝꠣꠞꠣ-ꠝꠣꠞꠤ ꠇꠞꠦꠞ। ꠅꠃ ꠔꠣꠁꠘ ꠖꠥꠡꠤ ꠎꠘꠞꠦ ꠇꠁꠟꠣ, “ꠅꠛꠣ, ꠔꠥꠝꠣꠞ ꠜꠣꠁꠞꠦ ꠇꠦꠘꠦ ꠝꠣꠞꠞꠣꠄ?”
EXO 2:14 ꠢꠦ ꠇꠁꠟ, “ꠔꠥꠝꠣꠞꠦ ꠇꠦꠉꠤꠄ ꠀꠝꠞꠣꠞ ꠢꠣꠇꠤꠝ ꠛꠣꠘꠣꠁꠀ ꠛꠤꠌꠣꠞ ꠇꠞꠣꠔ ꠙꠣꠑꠣꠁꠟ? ꠇꠣꠁꠟ ꠎꠦꠟꠣ ꠢꠃ ꠝꠤꠡꠞꠤꠞꠦ ꠈꠥꠘ ꠇꠞꠍ, ꠅꠃꠟꠣ ꠀꠝꠣꠞꠦꠅ ꠈꠥꠘ ꠇꠞꠤꠟꠔꠣꠄ ꠌꠣꠁꠞꠣꠄ ꠘꠤ?” ꠅꠃ ꠝꠥꠍꠣꠄ ꠒꠞꠣꠁꠉꠦꠟꠣ। ꠔꠣꠁꠘ ꠛꠥꠎꠟꠣ ꠁꠔꠣ ꠔ ꠎꠣꠘꠣ-ꠎꠣꠘꠤ ꠅꠁꠉꠦꠍꠦ।
EXO 2:15 ꠀꠞ ꠚꠦꠞꠣꠃꠘꠦꠅ ꠁꠔꠣ ꠢꠥꠘꠤꠀ ꠝꠥꠍꠣꠞꠦ ꠝꠣꠞꠤꠟꠔꠣ ꠌꠣꠁꠟꠣ। ꠅꠃ ꠡꠝꠄ ꠝꠥꠍꠣ ꠚꠦꠞꠣꠃꠘꠞ ꠉꠦꠍ ꠕꠣꠇꠤ ꠜꠣꠉꠤ ꠉꠦꠟꠣ। ꠜꠣꠉꠤꠀ ꠝꠣꠖꠤꠀꠘ ꠖꠦꠡꠅ ꠛꠡꠔ ꠇꠞꠣꠞ ꠟꠣꠉꠤ ꠀꠁꠟꠣ। ꠀꠁꠀ ꠢꠘꠞ ꠄꠇ ꠇꠥꠀꠞ ꠇꠣꠍꠣꠔ ꠛꠁꠟꠣ।
EXO 2:16 ꠝꠣꠖꠤꠀꠘ ꠖꠦꠡꠅ ꠡꠥꠀꠁꠛ ꠘꠣꠝꠞ ꠄꠇ ꠁꠝꠣꠝ ꠍꠣꠛ ꠀꠍꠟꠣ। ꠔꠣꠘ ꠡꠣꠔꠎꠘ ꠙꠥꠠꠤꠘ ꠀꠍꠂꠘ। ꠅꠃ ꠙꠥꠠꠤꠘ꠆ꠔꠦ ꠇꠥꠀꠞ ꠙꠣꠞꠅ ꠀꠁꠀ, ꠔꠣꠞꠣꠞ ꠛꠣꠚꠞ ꠍꠣꠉꠟ-ꠝꠦꠠꠣꠞꠦ ꠙꠣꠘꠤ ꠈꠣꠅꠀꠘꠤꠞ ꠟꠣꠉꠤ ꠉꠣꠝꠟꠣ ꠜꠞꠣꠔ ꠟꠣꠉꠟꠣ।
EXO 2:17 ꠅꠃ ꠡꠝꠄ ꠅꠁꠘ꠆ꠘ ꠞꠣꠈꠣꠟ ꠅꠇꠟꠦ ꠔꠣꠞꠣꠞꠦ ꠈꠦꠖꠣꠁꠀ ꠖꠤꠟꠣꠁꠟ। ꠅꠁꠟꠦ ꠝꠥꠍꠣ ꠃꠛꠣꠁꠀ ꠔꠣꠞꠣꠞꠦ ꠡꠣꠁꠎ꠆ꠎ ꠇꠞꠟꠣ, ꠀꠞ ꠔꠣꠞꠣꠞ ꠙꠣꠟꠞꠦ ꠙꠣꠘꠤ ꠈꠣꠅꠀꠁꠟꠣ।
EXO 2:18 ꠔꠣꠞꠣ ꠔꠣꠞꠣꠞ ꠛꠣꠚꠞ ꠗꠣꠞꠅ ꠉꠤꠀ ꠢꠣꠞꠟꠦ ꠔꠣꠁꠘ ꠎꠤꠇꠣꠁꠟꠣ, “ꠔꠥꠝꠞꠣ ꠀꠁꠎ ꠅꠔ ꠎꠟꠖꠤ ꠇꠦꠝꠘꠦ ꠀꠁꠟꠣꠄ?”
EXO 2:19 ꠔꠣꠞꠣ ꠇꠁꠟꠣ, “ꠄꠇ ꠝꠤꠡꠞꠤ ꠛꠦꠐꠣꠄ ꠀꠝꠞꠣꠞꠦ ꠞꠣꠈꠣꠟ ꠅꠇꠟꠞ ꠀꠔ ꠕꠣꠇꠤ ꠛꠣꠌꠣꠁꠍꠂꠘ। ꠄꠁꠘ ꠀꠝꠞꠣꠞ ꠍꠣꠉꠟ-ꠝꠦꠠꠣꠞꠦ ꠙꠣꠘꠤ ꠔꠥꠟꠤꠀ ꠈꠣꠅꠀꠁꠍꠂꠘ।”
EXO 2:20 ꠔꠦꠃ ꠔꠣꠁꠘ ꠎꠤꠇꠣꠁꠟꠣ, “ꠁ ꠝꠣꠘꠥꠡꠉꠥ ꠇꠥꠀꠁ? ꠔꠥꠝꠞꠣ ꠔꠣꠞꠦ ꠕꠁꠀ ꠀꠁꠟ꠆ꠟꠣꠄ ꠇꠦꠘꠦ? ꠄꠞꠦ ꠒꠣꠇꠤꠀ ꠀꠘꠤꠀ ꠈꠣꠘꠣ ꠈꠣꠅꠀꠅ।”
EXO 2:21 ꠄꠞꠛꠣꠖꠦ ꠝꠥꠍꠣꠄ ꠅꠃ ꠁꠝꠣꠝꠞ ꠛꠣꠠꠤꠔ ꠞꠁꠔꠦ ꠞꠣꠎꠤ ꠅꠁꠟꠣ। ꠁꠝꠣꠝ ꠍꠣꠛꠦ ꠔꠣꠘ ꠙꠥꠠꠤ ꠍꠚꠥꠞꠣꠞꠦ ꠝꠥꠍꠣꠞ ꠟꠉꠦ ꠡꠣꠖꠤ ꠖꠤꠟꠣ।
EXO 2:22 ꠛꠣꠖꠦ ꠍꠚꠥꠞꠣꠞ ꠊꠞꠅ ꠄꠇ ꠙꠥꠀ ꠅꠁꠟꠦ ꠝꠥꠍꠣꠄ ꠇꠁꠟꠣ, “ꠀꠝꠤ ꠔ ꠛꠂꠔꠟ ꠛꠘꠤꠀ ꠛꠤꠖꠦꠡꠅ ꠞꠁꠞꠣꠝ।” ꠄꠞꠟꠣꠉꠤ ꠅꠃ ꠙꠥꠀꠞ ꠘꠣꠝ ꠞꠣꠈꠟꠣ ꠎꠣꠞꠍꠥꠝ [ꠝꠣꠘꠤ, ꠛꠂꠔꠟ]।
EXO 2:23 ꠛꠃꠔ ꠖꠤꠘ ꠛꠣꠖꠦ ꠝꠤꠡꠞꠞ ꠛꠣꠖꠡꠣ ꠝꠞꠤꠉꠦꠟꠣ। ꠛꠘꠤ ꠁꠍꠞꠣꠁꠟꠦ ꠉꠥꠟꠣꠝꠤꠞ ꠟꠣꠉꠤ ꠇꠣꠔꠞ ꠅꠁꠀ ꠇꠣꠘ꠆ꠖꠣ-ꠇꠣꠐꠤ ꠇꠞꠟ। ꠔꠣꠞꠣꠞ ꠇꠣꠘ꠆ꠖꠘ ꠀꠟ꠆ꠟꠣꠞ ꠉꠦꠍꠦ ꠇꠛꠥꠟ ꠅꠁꠉꠦꠟ।
EXO 2:24 ꠀꠟ꠆ꠟꠣꠄ ꠔꠣꠞꠣꠞ ꠚꠞꠤꠀꠖ ꠢꠥꠘꠟꠣ। ꠔꠣꠁꠘ ꠁꠛ꠆ꠞꠣꠢꠤꠝ, ꠁꠍꠢꠣꠇ ꠀꠞ ꠁꠀꠇꠥꠛꠞ ꠟꠉꠦ ꠔꠣꠘ ꠅꠀꠖꠣꠞ ꠇꠕꠣ ꠁꠀꠖ ꠇꠞꠟꠣ।
EXO 2:25 ꠀꠞ ꠛꠘꠤ ꠁꠍꠞꠣꠁꠟꠞ ꠛꠣꠄ ꠝꠥꠈ ꠚꠤꠞꠣꠁꠟꠣ, ꠖꠄꠀꠞ ꠘꠎꠞꠦ ꠔꠣꠞꠣꠞ ꠛꠣꠄ ꠌꠣꠁꠟꠣ।
EXO 3:1 ꠅꠃ ꠡꠝꠄ ꠝꠥꠍꠣꠄ ꠔꠣꠘ ꠢꠃꠞ ꠝꠣꠖꠤꠀꠘ ꠎꠣꠔꠤꠞ ꠁꠝꠣꠝ ꠍꠣꠛ ꠢꠎꠞꠔ ꠡꠥꠀꠁꠛꠞ ꠍꠣꠉꠟ-ꠝꠦꠠꠣ ꠞꠣꠈꠔꠣ। ꠄꠇꠖꠤꠘ ꠔꠣꠘ ꠍꠣꠉꠟꠞ ꠙꠣꠟ ꠟꠁꠀ ꠝꠞꠥꠜꠥꠝꠤꠞ ꠢꠦꠡ ꠉꠣꠟꠣꠔ ꠀꠟ꠆ꠟꠣꠞ ꠢꠃ ꠔꠥꠞ ꠙꠣꠠꠞ ꠇꠣꠍꠣꠔ ꠉꠦꠟꠣ।
EXO 3:2 ꠢꠘꠅ ꠄꠇ ꠎꠋꠟꠣꠞ ꠝꠣꠎꠦ ꠝꠣꠛꠥꠖꠞ ꠚꠤꠞꠤꠡ꠆ꠔꠣꠄ ꠀꠉꠥꠘꠤꠞ ꠟꠣꠈꠣꠘ ꠘꠥꠞꠞ ꠝꠣꠎ ꠕꠣꠇꠤ ꠔꠣꠘꠞꠦ ꠖꠦꠈꠣ ꠖꠤꠟꠣ। ꠝꠥꠍꠣꠄ ꠖꠦꠈꠟꠣ, ꠎꠋꠟꠣꠞ ꠝꠣꠎꠦ ꠀꠉꠥꠁꠘ ꠎꠟꠦꠞ ꠅꠁꠟꠦ ꠎꠋꠟꠣ ꠎꠟꠦꠞ ꠘꠣ।
EXO 3:3 ꠅꠃ ꠔꠣꠁꠘ ꠔꠣꠁꠎ꠆ꠎꠥꠛ ꠅꠁꠀ ꠇꠁꠟꠣ, “ꠎꠋꠟꠣ ꠎꠦ ꠎꠟꠦꠞ ꠘꠣ, ꠄꠞ ꠇꠣꠞꠘ ꠇꠤꠔꠣ? ꠔꠦ ꠀꠞꠅ ꠇꠣꠍꠣꠔ ꠉꠤꠀ ꠖꠦꠈꠤ ꠌꠣꠁꠘ।”
EXO 3:4 ꠀꠟ꠆ꠟꠣꠄ ꠎꠦꠛꠟꠣ ꠖꠦꠈꠟꠣ ꠄꠁꠘ ꠖꠦꠈꠣꠞ ꠟꠣꠉꠤ ꠇꠣꠍꠣꠔ ꠎꠣꠁꠞꠣꠉꠤ, ꠅꠃ ꠡꠝꠄ ꠔꠣꠁꠘ ꠎꠋꠟꠣꠞ ꠝꠣꠎ ꠕꠣꠇꠤ ꠒꠣꠇꠤꠀ ꠇꠁꠟꠣ, “ꠝꠥꠍꠣ, ꠅ ꠝꠥꠍꠣ!” ꠝꠥꠍꠣꠄ ꠇꠁꠟꠣ, “ꠅꠃꠘꠥ ꠀꠝꠤ।”
EXO 3:5 ꠀꠟ꠆ꠟꠣꠄ ꠇꠁꠟꠣ, “ꠀꠞ ꠍꠣꠝꠘꠦ ꠀꠉꠥꠀꠁꠅ ꠘꠣ। ꠔꠥꠝꠣꠞ ꠙꠣꠅ ꠕꠣꠇꠤ ꠎꠥꠔꠣ ꠈꠥꠟꠤꠟꠣꠅ। ꠎꠣꠘ ꠘꠤ, ꠔꠥꠝꠤ ꠅꠈꠘ ꠎꠦ ꠎꠣꠉꠣꠔ ꠃꠛꠣꠁꠍ ꠁꠈꠣꠘ ꠙꠣꠇ ꠎꠣꠉꠣ।
EXO 3:6 ꠢꠥꠘꠅ, ꠀꠝꠤ ꠀꠟ꠆ꠟꠣꠃ ꠔꠥꠝꠣꠞ ꠛꠣꠚꠞ ꠝꠣꠛꠥꠖ, ꠁꠛ꠆ꠞꠣꠢꠤꠝꠞ ꠝꠣꠛꠥꠖ, ꠁꠍꠢꠣꠇꠞ ꠝꠣꠛꠥꠖ ꠀꠞ ꠁꠀꠇꠥꠛꠞ ꠝꠣꠛꠥꠖ।” ꠁꠈꠣꠘ ꠢꠥꠘꠤꠀꠃ ꠝꠥꠍꠣꠄ ꠔꠣꠘ ꠝꠥꠈ ꠟꠥꠇꠣꠁꠟ꠆ꠟꠣ। ꠀꠟ꠆ꠟꠣꠞ ꠛꠣꠄ ꠌꠣꠁꠔꠦ ꠔꠣꠘ ꠖꠤꠟꠅ ꠒꠞ ꠢꠣꠝꠣꠁꠉꠦꠟ।
EXO 3:7 ꠝꠣꠛꠥꠖꠦ ꠇꠁꠟꠣ, “ꠀꠝꠤ ꠝꠤꠡꠞ ꠖꠦꠡꠅ ꠀꠝꠣꠞ ꠛꠘ꠆ꠖꠣ ꠅꠇꠟꠞ ꠖꠥꠈ-ꠝꠍꠤꠛꠔ ꠖꠦꠈꠤꠀꠞ। ꠝꠤꠡꠞꠤ ꠡꠞ꠆ꠖꠣꠞ ꠅꠇꠟꠞ ꠎꠥꠟꠥꠝꠞ ꠟꠣꠉꠤ ꠔꠣꠞꠣꠞ ꠇꠣꠘ꠆ꠖꠘ ꠢꠥꠘꠤꠀꠞ। ꠔꠣꠞꠣꠞ ꠖꠥꠈ-ꠇꠡ꠆ꠐ ꠢꠇꠟꠔꠣ ꠀꠝꠤ ꠖꠦꠈꠍꠤ।
EXO 3:8 ꠖꠦꠈꠤꠀ ꠝꠤꠡꠞꠤ ꠅꠇꠟꠞ ꠀꠔ ꠕꠣꠇꠤ ꠔꠣꠞꠣꠞꠦ ꠛꠣꠌꠣꠁꠔꠣꠝ ꠇꠞꠤ ꠀꠝꠤ ꠘꠤꠎꠦ ꠟꠣꠝꠤꠀ ꠀꠁꠍꠤ। ꠔꠦ ꠀꠝꠤ ꠔꠣꠞꠣꠞꠦ ꠝꠤꠡꠞ ꠕꠣꠇꠤ ꠢꠞꠣꠁꠀ ꠘꠤꠝꠥꠉꠤ। ꠘꠤꠀ ꠞꠡꠣꠁꠟ ꠎꠝꠤꠞ ꠛꠃꠔ ꠛꠠ ꠡꠥꠘ꠆ꠖꠞ ꠄꠇ ꠖꠦꠡ ꠖꠤꠝꠥ। ꠁꠈꠣꠘ ꠖꠥꠗ ꠀꠞ ꠝꠃꠞ ꠜꠣꠘ꠆ꠒꠣꠞ ꠀꠟꠣ ꠖꠦꠡ। ꠅꠃ ꠖꠦꠡ ꠅꠁꠟ ꠅꠈꠘꠇꠥꠞ ꠇꠦꠘꠣꠘꠤ, ꠢꠤꠐ꠆ꠐꠤ, ꠀꠝꠥꠞꠤ, ꠚꠣꠞꠤꠎꠤ, ꠢꠤꠛ꠆ꠛꠤ ꠀꠞ ꠎꠤꠛꠥꠎꠤ ꠅꠇꠟꠞ ꠖꠦꠡ।
EXO 3:9 ꠛꠘꠤ ꠁꠍꠞꠣꠁꠟꠞ ꠚꠞꠤꠀꠖ ꠀꠝꠣꠞ ꠖꠞꠛꠣꠞꠅ ꠀꠁꠍꠦ, ꠝꠤꠡꠞꠤ ꠅꠇꠟꠦ ꠔꠣꠞꠣꠞꠦ ꠎꠦꠟꠣ ꠍꠣꠔꠣꠁꠞꠣ, ꠁꠔꠣ ꠀꠝꠤ ꠖꠦꠈꠤꠀꠞ।
EXO 3:10 ꠄꠞꠟꠣꠉꠤ ꠀꠝꠤ ꠔꠥꠝꠣꠞꠦ ꠚꠦꠞꠣꠃꠘꠞ ꠉꠦꠍꠦ ꠙꠣꠑꠣꠁꠀꠞ। ꠔꠥꠝꠤ ꠎꠣꠅ, ꠉꠤꠀ ꠀꠝꠣꠞ ꠛꠘ꠆ꠖꠣ ꠛꠘꠤ ꠁꠍꠞꠣꠁꠟꠞꠦ ꠝꠤꠡꠞ ꠕꠣꠇꠤ ꠛꠣꠞ ꠇꠞꠤꠀ ꠀꠘꠅ।”
EXO 3:11 ꠝꠥꠍꠣꠄ ꠎꠥꠀꠙ ꠖꠤꠟꠣ, “ꠀꠝꠤ ꠀꠞꠇ ꠎꠘ ꠇꠦ, ꠎꠦꠁꠘ ꠚꠦꠞꠣꠃꠘꠞ ꠍꠣꠝꠘꠦ ꠉꠤꠀ ꠝꠤꠡꠞ ꠖꠦꠡ ꠕꠣꠇꠤ ꠔꠣꠞꠣꠞꠦ ꠢꠞꠣꠁꠔꠣꠝ ꠙꠣꠞꠝꠥ?”
EXO 3:12 ꠀꠟ꠆ꠟꠣꠄ ꠇꠁꠟꠣ, “ꠀꠝꠤ ꠔ ꠔꠥꠝꠣꠞ ꠟꠉꠦ ꠟꠉꠦ ꠞꠁꠝꠥ। ꠔꠥꠝꠤ ꠝꠤꠡꠞ ꠕꠣꠇꠤ ꠝꠣꠘꠡꠞꠦ ꠢꠞꠣꠁꠀ ꠀꠘꠤꠀ, ꠔꠣꠞꠣꠞꠦ ꠟꠁꠀ ꠅꠃ ꠙꠣꠠꠅ ꠀꠝꠣꠞ ꠄꠛꠣꠖꠔ ꠇꠞꠛꠣꠄ। ꠔꠦꠃ ꠛꠥꠎꠛꠣꠄ ꠀꠝꠤꠃ ꠔꠥꠝꠣꠞꠦ ꠙꠣꠑꠣꠁꠍꠤ।”
EXO 3:13 ꠝꠥꠍꠣꠄ ꠀꠞꠎ ꠇꠞꠟꠣ, “ꠖꠦꠈꠃꠇ꠆ꠇꠣ, ꠀꠝꠤ ꠎꠦꠛꠟꠣ ꠛꠘꠤ ꠁꠍꠞꠣꠁꠟꠞꠦ ꠉꠤꠀ ꠇꠁꠝꠥ, ꠔꠥꠝꠞꠣꠞ ꠛꠣꠚ-ꠖꠣꠖꠣꠞ ꠝꠣꠛꠥꠖꠦ ꠀꠝꠣꠞꠦ ꠙꠣꠑꠣꠁꠍꠂꠘ, ꠅꠃ ꠡꠝꠄ ꠔꠣꠞꠣ ꠎꠥꠖꠤ ꠎꠤꠇꠣꠁꠘ ꠔꠣꠘ ꠘꠣꠝ ꠇꠤꠔꠣ, ꠔꠦ ꠔꠣꠞꠣꠞꠦ ꠇꠤꠔꠣ ꠎꠥꠀꠙ ꠖꠤꠔꠣꠝ?”
EXO 3:14 ꠀꠟ꠆ꠟꠣꠄ ꠇꠁꠟꠣ, “ꠀꠝꠤ ꠎꠦꠁꠘ ꠀꠍꠤ, ꠀꠍꠤꠃ। ꠛꠘꠤ ꠁꠍꠞꠣꠁꠟꠞꠦ ꠅꠃꠟꠣ ꠇꠁꠅ, ꠎꠦꠘ ꠘꠣꠝ ‘ꠀꠝꠤ ꠀꠍꠤ’ ꠔꠣꠁꠘ ꠀꠝꠣꠞꠦ ꠔꠥꠝꠞꠣꠞ ꠉꠦꠍꠦ ꠙꠣꠑꠣꠁꠍꠂꠘ।”
EXO 3:15 ꠔꠣꠁꠘ ꠀꠞꠅ ꠇꠁꠟꠣ, “ꠔꠥꠝꠤ ꠉꠤꠀ ꠔꠣꠞꠣꠞꠦ ꠇꠁꠅ, ‘ꠢꠃ ꠀꠟ꠆ꠟꠣ ꠎꠦꠁꠘ ꠢꠞ-ꠢꠣꠝꠦꠡꠣ ꠀꠍꠂꠘ, ꠄꠁꠘ ꠔꠥꠝꠞꠣꠞ ꠛꠣꠚ-ꠖꠣꠖꠣꠞ ꠝꠣꠛꠥꠖ, ꠁꠛ꠆ꠞꠣꠢꠤꠝꠞ ꠝꠣꠛꠥꠖ, ꠁꠍꠢꠣꠇꠞ ꠝꠣꠛꠥꠖ ꠀꠞ ꠁꠀꠇꠥꠛꠞ ꠝꠣꠛꠥꠖ, ꠄꠁꠘꠃ ꠀꠝꠣꠞꠦ ꠔꠥꠝꠞꠣꠞ ꠉꠦꠍꠦ ꠙꠣꠑꠣꠁꠍꠂꠘ।’ “ꠀꠝꠣꠞ ꠢꠞ-ꠢꠣꠝꠦꠡꠣꠇꠥꠞ ꠘꠣꠝ ‘ꠀꠝꠤ ꠎꠦꠁꠘ ꠀꠍꠤ’। ꠎꠥꠉꠦ ꠎꠥꠉꠦ, ꠙꠥꠞꠥꠡꠦ ꠙꠥꠞꠥꠡꠦ ꠅꠃ ꠘꠣꠝ ꠇꠣꠁꠝ ꠞꠁꠛ।
EXO 3:16 ꠔꠥꠝꠤ ꠎꠣꠅ, ꠉꠤꠀ ꠛꠘꠤ ꠁꠍꠞꠣꠁꠟꠞ ꠝꠥꠞꠛ꠆ꠛꠤ ꠅꠇꠟꠞꠦ ꠄꠇꠈꠣꠘꠅ ꠖꠟꠣ ꠇꠞꠤꠀ ꠇꠅ, ꠢꠃ ꠀꠟ꠆ꠟꠣ, ꠎꠦꠁꠘ ꠔꠥꠝꠞꠣꠞ ꠛꠣꠚ-ꠖꠣꠖꠣꠞ ꠝꠣꠛꠥꠖ, ꠁꠛ꠆ꠞꠣꠢꠤꠝ, ꠁꠍꠢꠣꠇ ꠀꠞ ꠁꠀꠇꠥꠛꠞ ꠝꠣꠛꠥꠖ, ꠔꠣꠁꠘ ꠀꠝꠣꠞꠦ ꠖꠤꠖꠣꠞ ꠖꠤꠀ ꠇꠁꠍꠂꠘ, ꠔꠣꠁꠘ ꠔꠥꠝꠞꠣꠞ ꠛꠣꠄ ꠈꠤꠀꠟ ꠇꠞꠍꠂꠘ, ꠔꠥꠝꠞꠣꠞ ꠃꠙꠞꠞ ꠎꠥꠟꠥꠝ-ꠝꠍꠤꠛꠔ ꠖꠦꠈꠍꠂꠘ, ꠝꠤꠡꠞ ꠖꠦꠡꠅ ꠔꠥꠝꠞꠣꠞ ꠛꠣꠄ ꠎꠦꠔꠣ ꠇꠞꠣ ꠅꠞ ꠄꠅꠔꠣ ꠔꠣꠁꠘ ꠈꠤꠀꠟ ꠇꠞꠍꠂꠘ।
EXO 3:17 ꠅꠈꠘ ꠔꠣꠁꠘ ꠇꠁꠞꠣ, ꠝꠤꠡꠞꠞ ꠉꠥꠟꠣꠝꠤ ꠕꠣꠇꠤ ꠔꠥꠝꠞꠣꠞꠦ ꠛꠣꠌꠣꠁꠀ ꠇꠦꠘꠣꠘꠤ, ꠢꠤꠐ꠆ꠐꠤ, ꠀꠝꠥꠞꠤ, ꠚꠣꠞꠤꠎꠤ, ꠢꠤꠛ꠆ꠛꠤ ꠀꠞ ꠎꠤꠛꠥꠎꠤ ꠅꠇꠟꠞ ꠖꠥꠗ ꠀꠞ ꠝꠃꠞ ꠜꠣꠘ꠆ꠒꠣꠞ ꠀꠟꠣ ꠖꠦꠡꠅ ꠔꠣꠁꠘ ꠔꠥꠝꠞꠣꠞꠦ ꠘꠤꠛꠣꠉꠤ।”
EXO 3:18 ꠀꠟ꠆ꠟꠣꠄ ꠀꠞꠅ ꠇꠁꠟꠣ, “ꠛꠘꠤ ꠁꠍꠞꠣꠁꠟꠞ ꠝꠥꠞꠛ꠆ꠛꠤ ꠅꠇꠟꠦ ꠔꠥꠝꠣꠞ ꠇꠕꠣ ꠢꠥꠘꠛꠣ, ꠔꠥꠝꠤ ꠔꠣꠞꠣꠞꠦ ꠟꠉꠦ ꠟꠁꠀ ꠝꠤꠡꠞꠞ ꠛꠣꠖꠡꠣꠞ ꠉꠦꠍꠦ ꠎꠣꠁꠅ। ꠉꠤꠀ ꠇꠁꠅ, ‘ꠀꠟ꠆ꠟꠣ ꠎꠦꠁꠘ ꠁꠛꠞꠣꠘꠤ ꠅꠇꠟꠞ ꠝꠣꠛꠥꠖ, ꠔꠣꠁꠘ ꠀꠝꠣꠞꠦ ꠖꠞꠡꠘ ꠖꠤꠍꠂꠘ। ꠄꠞꠟꠣꠉꠤ ꠀꠝꠞꠣ ꠔꠣꠘ ꠘꠣꠝꠦ ꠄꠇꠈꠣꠘ ꠇꠥꠞꠛꠣꠘꠤ ꠇꠞꠔꠣꠝ ꠌꠣꠁꠀꠞ, ꠀꠝꠞꠣ ꠝꠞꠥꠜꠥꠝꠤꠞ ꠛꠣꠄ ꠔꠤꠘ ꠖꠤꠘꠞ ꠙꠕ ꠉꠤꠀ ꠇꠥꠞꠛꠣꠘꠤ ꠖꠤꠝꠥ, ꠔꠦ ꠀꠝꠞꠣꠞꠦ ꠎꠣꠅꠀꠞ ꠅꠘꠥꠝꠔꠤ ꠖꠦꠃꠇ꠆ꠇꠣ।’
EXO 3:19 ꠅꠁꠟꠦ ꠀꠝꠤ ꠎꠣꠘꠤ ꠝꠤꠡꠞꠞ ꠛꠣꠖꠡꠣꠄ ꠔꠥꠝꠞꠣꠞꠦ ꠎꠣꠁꠔꠦ ꠖꠤꠔ ꠘꠣꠄ, ꠎꠥꠞ-ꠎꠛꠞꠖꠡ꠆ꠔꠤ ꠇꠞꠟꠦꠅ ꠖꠤꠔ ꠘꠣꠄ।
EXO 3:20 ꠔꠦꠃ ꠀꠝꠤ ꠀꠝꠣꠞ ꠇꠥꠖꠞꠔꠤ ꠀꠔ ꠟꠣꠉꠣꠁꠝꠥ ꠀꠞ ꠅꠃꠟꠣ ꠀꠌꠣꠘꠇ ꠉꠎꠛ ꠘꠣꠎꠤꠟ ꠇꠞꠝꠥ, ꠎꠣꠔꠦ ꠢꠦ ꠔꠥꠝꠞꠣꠞꠦ ꠎꠣꠁꠔꠦ ꠖꠦꠄ।
EXO 3:21 ꠀꠞ ꠀꠝꠤ ꠝꠤꠡꠞꠤ ꠅꠇꠟꠞ ꠖꠤꠟꠞ ꠝꠣꠎꠦ ꠛꠘꠤ ꠁꠍꠞꠣꠁꠟꠞ ꠛꠣꠄ ꠄꠝꠘ ꠄꠇ ꠖꠄꠀꠞ ꠜꠣꠛ ꠙꠄꠖꠣ ꠇꠞꠣꠁꠝꠥ, ꠄꠞꠣ ꠎꠣꠘꠥ ꠝꠤꠡꠞ ꠕꠣꠇꠤ ꠈꠣꠟꠤ ꠀꠔꠦ ꠘꠣ ꠎꠣꠁꠘ।
EXO 3:22 ꠢꠇꠟ ꠁꠍꠞꠣꠁꠟꠤ ꠛꠦꠐꠤꠘ꠆ꠔꠦ ꠔꠣꠞꠣꠞ ꠀꠞꠤ-ꠚꠞꠤ ꠛꠣ ꠎꠦꠞꠣꠞ ꠛꠣꠠꠤꠔ ꠔꠣꠞꠣ ꠞꠂꠘ, ꠅꠃꠟꠣ ꠝꠤꠡꠞꠤ ꠛꠦꠐꠤꠘ꠆ꠔꠞ ꠉꠦꠍ ꠕꠣꠇꠤ ꠔꠣꠞꠣꠞ ꠡꠥꠘꠣ-ꠞꠥꠙꠣꠞ ꠉꠄꠘꠣ-ꠉꠣꠐꠤ ꠀꠞ ꠜꠣꠟꠣ ꠇꠣꠙꠠ-ꠌꠥꠙꠠ ꠈꠥꠎꠤꠀ ꠘꠤꠅ। ꠅꠔꠣ ꠖꠤꠀ ꠔꠥꠝꠞꠣꠞ ꠙꠥꠀ-ꠙꠥꠠꠤꠘꠞꠦꠅ ꠢꠣꠎꠣꠁꠅ, ꠅꠃ ꠘꠝꠥꠘꠣꠄ ꠔꠥꠝꠞꠣ ꠝꠤꠡꠞꠤꠘ꠆ꠔꠞ ꠗꠘ-ꠍꠣꠝꠣꠘꠣ ꠖꠈꠟ ꠇꠞꠛꠣꠄ।”
EXO 4:1 ꠝꠥꠍꠣꠄ ꠎꠥꠀꠙ ꠖꠤꠟꠣ, “ꠅ ꠝꠣꠛꠥꠖ, ꠔꠣꠞꠣ ꠎꠥꠖꠤ ꠀꠝꠣꠞꠦ ꠄꠇꠤꠘ ꠘꠣ ꠇꠞꠂꠘ, ꠀꠝꠣꠞ ꠝꠣꠔ ꠘꠣ ꠢꠥꠘꠂꠘ ꠛꠣ ꠔꠣꠞꠣ ꠎꠥꠖꠤ ꠇꠂꠘ, ꠝꠣꠛꠥꠖꠦ ꠔꠥꠝꠣꠞꠦ ꠖꠞꠡꠘ ꠖꠤꠍꠂꠘ ꠘꠣ, ꠔꠦ ꠀꠝꠤ ꠇꠤꠔꠣ ꠇꠞꠔꠣꠝ?”
EXO 4:2 ꠔꠦꠃ ꠀꠟ꠆ꠟꠣꠄ ꠔꠣꠘꠦ ꠎꠤꠇꠣꠁꠟꠣ, “ꠔꠥꠝꠣꠞ ꠀꠔꠅ ꠁꠉꠥ ꠇꠤꠔꠣ?” ꠔꠣꠁꠘ ꠇꠁꠟꠣ, “ꠄꠉꠥ ꠟꠣꠑꠤ।”
EXO 4:3 ꠀꠟ꠆ꠟꠣꠄ ꠇꠁꠟꠣ, “ꠅꠇꠐꠣ ꠝꠣꠐꠤꠔ ꠚꠣꠟꠣꠅ।” ꠝꠥꠍꠣꠄ ꠟꠣꠑꠤꠞꠦ ꠝꠣꠐꠤꠔ ꠚꠣꠟꠣꠁꠔꠦꠃ ꠁꠐꠣ ꠢꠣꠚ ꠅꠁꠉꠦꠟ। ꠢꠣꠚ ꠖꠦꠈꠤꠀꠃ ꠔꠣꠁꠘ ꠚꠣꠟꠖꠤ ꠢꠞꠤ ꠉꠦꠟꠣ।
EXO 4:4 ꠀꠟ꠆ꠟꠣꠄ ꠔꠣꠘꠦ ꠢꠥꠇꠥꠝ ꠇꠞꠟꠣ, “ꠀꠔ ꠛꠣꠠꠣꠁꠀ ꠅꠉꠥꠞ ꠟꠦꠘ꠆ꠎꠅ ꠗꠞꠅ।” ꠀꠞ ꠔꠣꠁꠘ ꠗꠞꠣꠞ ꠟꠉꠦ ꠟꠉꠦ ꠅꠉꠥ ꠢꠤꠞꠛꠣꠞ ꠟꠣꠑꠤ ꠅꠁꠉꠦꠟ।
EXO 4:5 ꠛꠣꠖꠦ ꠀꠟ꠆ꠟꠣꠄ ꠇꠁꠟꠣ, “ꠔꠥꠝꠤꠅ ꠅꠃꠟꠣ ꠇꠞꠤꠅ, ꠔꠦꠃ ꠔꠣꠞꠣ ꠢꠣꠍꠣꠃ ꠄꠇꠤꠘ ꠇꠞꠛꠣ ꠔꠣꠞꠣꠞ ꠛꠣꠚ-ꠖꠣꠖꠣꠁꠘ꠆ꠔꠞ ꠝꠣꠛꠥꠖ, ꠁꠛ꠆ꠞꠣꠢꠤꠝꠞ ꠝꠣꠛꠥꠖ, ꠁꠍꠢꠣꠇꠞ ꠝꠣꠛꠥꠖ ꠀꠞ ꠁꠀꠇꠥꠛꠞ ꠝꠣꠛꠥꠖꠦ ꠔꠥꠝꠣꠞꠦ ꠖꠞꠡꠘ ꠖꠤꠍꠂꠘ।”
EXO 4:6 ꠀꠟ꠆ꠟꠣꠄ ꠀꠞꠅ ꠇꠁꠟꠣ, “ꠔꠥꠝꠣꠞ ꠀꠔ ꠔꠥꠝꠣꠞ ꠌꠣꠖ꠆ꠖꠞꠞ ꠔꠟꠦ ꠢꠣꠞꠣꠅ।” ꠔꠣꠁꠘ ꠀꠔ ꠢꠣꠞꠣꠁꠟꠣ, ꠀꠞ ꠛꠣꠞ ꠇꠞꠣꠞ ꠛꠣꠖꠦꠃ ꠔꠣꠘ ꠀꠔ ꠇꠥꠡ꠆ꠑ-ꠗꠟꠛꠦꠖꠣ ꠛꠦꠝꠣꠞꠦ ꠖꠥꠗꠞ ꠟꠣꠈꠣꠘ ꠗꠟꠣ ꠅꠁꠉꠦꠟ।
EXO 4:7 ꠀꠟ꠆ꠟꠣꠄ ꠇꠁꠟꠣ, “ꠔꠥꠝꠣꠞ ꠀꠔ ꠢꠤꠞꠛꠣꠞ ꠢꠘꠅ ꠢꠣꠞꠣꠅ।” ꠔꠣꠁꠘ ꠢꠣꠞꠣꠁꠟꠣ ꠀꠞ ꠌꠣꠖ꠆ꠖꠞꠞ ꠔꠟ ꠕꠣꠇꠤ ꠛꠣꠞ ꠇꠞꠤꠀ ꠖꠦꠈꠂꠘ, ꠀꠉꠞ ꠟꠣꠈꠣꠘ ꠜꠣꠟꠣ ꠅꠁꠉꠦꠍꠦ।
EXO 4:8 ꠀꠟ꠆ꠟꠣꠄ ꠇꠁꠟꠣ, “ꠔꠣꠞꠣ ꠎꠥꠖꠤ ꠔꠥꠝꠣꠞꠦ ꠄꠇꠤꠘ ꠘꠣ ꠇꠞꠂꠘ, ꠔꠦ ꠔꠥꠝꠣꠞ ꠟꠣꠑꠤꠞꠦ ꠢꠣꠚ ꠅꠀ ꠖꠦꠈꠟꠦ ꠄꠇꠤꠘ ꠇꠞꠛꠣ, ꠀꠞ ꠄꠅꠐꠣꠄ ꠄꠇꠤꠘ ꠘꠣ ꠇꠞꠟꠦ ꠔꠥꠝꠣꠞ ꠀꠔꠞ ꠛꠦꠝꠣꠞꠞ ꠇꠦꠞꠣꠝꠔꠤ ꠖꠦꠈꠟꠦ ꠔꠣꠞꠣ ꠄꠇꠤꠘ ꠇꠞꠛꠣ।
EXO 4:9 ꠀꠞ ꠎꠥꠖꠤ ꠁ ꠖꠥꠁꠅ ꠇꠦꠞꠣꠝꠔꠤꠄꠅ ꠄꠇꠤꠘ ꠘꠣ ꠇꠞꠂꠘ, ꠔꠥꠝꠣꠞ ꠇꠕꠣ ꠘꠣ ꠝꠣꠘꠂꠘ, ꠔꠦ ꠔꠥꠝꠤ ꠘꠤꠟ ꠘꠖ ꠕꠣꠇꠤ ꠕꠥꠠꠣ ꠙꠣꠘꠤ ꠀꠘꠤꠀ ꠢꠥꠇꠘꠣ ꠝꠣꠐꠤꠔ ꠚꠣꠟꠣꠁꠅ, ꠖꠦꠈꠛꠣꠄ ꠝꠣꠐꠤꠔ ꠙꠠꠤꠀꠃ ꠁ ꠙꠣꠘꠤ ꠟꠃ ꠅꠁꠎꠤꠛ।”
EXO 4:10 ꠅꠃ ꠝꠥꠍꠣꠄ ꠝꠣꠛꠥꠖꠞꠦ ꠇꠁꠟꠣ, “ꠅ ꠝꠣꠟꠤꠇ, ꠀꠝꠤ ꠔ ꠜꠣꠟꠣ ꠇꠞꠤ ꠝꠣꠔ-ꠇꠕꠣꠃ ꠝꠣꠔꠔꠣꠝ ꠙꠣꠞꠤ ꠘꠣ, ꠀꠉꠦꠅ ꠙꠣꠞꠔꠣꠝ ꠘꠣ ꠀꠞ ꠀꠙꠘꠦ ꠁ ꠉꠥꠟꠣꠝꠞ ꠟꠉꠦ ꠛꠣꠔꠌꠤꠔ ꠇꠞꠣꠞ ꠛꠣꠖꠦꠅ ꠙꠣꠞꠤ ꠘꠣ, ꠀꠝꠣꠞ ꠔ ꠎꠤꠚꠞꠣ ꠛꠣꠠꠥꠀ।”
EXO 4:11 ꠀꠟ꠆ꠟꠣꠄ ꠇꠁꠟꠣ, “ꠝꠣꠘꠡꠞ ꠝꠥꠈ ꠇꠦ ꠛꠣꠘꠣꠁꠍꠦ, ꠀꠝꠤ ꠘꠣꠄ ꠘꠤ? ꠇꠦ ꠝꠣꠘꠡꠞꠦ ꠛꠥꠛꠣ, ꠈꠣꠟꠥꠀ ꠛꠣ ꠀꠘ꠆ꠖꠣ ꠛꠣꠘꠣꠁꠘ? ꠌꠃꠈꠦ ꠖꠦꠈꠣꠞ ꠟꠣꠉꠤ ꠌꠈꠥꠞ ꠙꠣꠅꠀꠞ ꠇꠦ ꠖꠦꠁꠘ? ꠁꠔꠣ ꠔ ꠀꠝꠤ ꠀꠟ꠆ꠟꠣꠄꠃ ꠖꠦꠁ ꠘꠣ ꠘꠤ?
EXO 4:12 ꠔꠦ ꠔꠥꠝꠤ ꠎꠣꠅ, ꠉꠤꠀ ꠇꠤꠔꠣ ꠝꠣꠔꠤꠔꠣꠄ ꠀꠝꠤ ꠢꠤꠇꠣꠁꠀ ꠖꠤꠝꠥ। ꠔꠥꠝꠣꠞ ꠝꠥꠈꠞ ꠎꠛꠣꠘꠞꠦ ꠀꠝꠤ ꠡꠣꠁꠎ꠆ꠎ ꠇꠞꠝꠥ।”
EXO 4:13 ꠔꠣꠁꠘ ꠇꠁꠟꠣ, “ꠅ ꠝꠣꠟꠤꠇ, ꠀꠝꠤ ꠝꠤꠘꠔ ꠇꠞꠤꠀꠞ, ꠅꠁꠘ꠆ꠘ ꠇꠦꠃꠞꠞꠦ ꠙꠣꠑꠣꠁ ꠖꠦꠃꠇ꠆ꠇꠣ।”
EXO 4:14 ꠅꠃ ꠝꠥꠍꠣꠞ ꠃꠙꠞꠦ ꠝꠣꠛꠥꠖꠞ ꠉꠥꠍꠣ ꠃꠑꠟ। ꠔꠣꠁꠘ ꠇꠁꠟꠣ, “ꠔꠥꠝꠣꠞ ꠜꠣꠁ ꠢꠣꠞꠥꠘ ꠛꠤꠘ ꠟꠦꠛꠤ ꠀꠍꠦ ꠘꠣ ꠘꠤ? ꠀꠝꠤ ꠎꠣꠘꠤ, ꠢꠦ ꠜꠣꠟꠣ ꠛꠇ꠆ꠔꠤꠔꠣ ꠖꠤꠔ ꠙꠣꠞꠦ। ꠢꠦ ꠅꠈꠘ ꠔꠥꠝꠣꠞ ꠟꠉꠦ ꠖꠦꠈꠣ ꠇꠞꠣꠔ ꠀꠞ, ꠔꠥꠝꠣꠞꠦ ꠖꠦꠈꠤꠀ ꠢꠦ ꠈꠥꠛ ꠈꠥꠡꠤ ꠅꠁꠛ।
EXO 4:15 ꠔꠥꠝꠤ ꠢꠤꠇꠣꠁꠀ ꠖꠤꠅ ꠀꠞ ꠇꠁꠅ ꠢꠦ ꠇꠤꠔꠣ ꠝꠣꠔꠤꠔ। ꠀꠝꠤ ꠔꠥꠝꠞꠣ ꠖꠥꠁꠅꠎꠘꠞ ꠝꠥꠈꠞ ꠎꠛꠣꠘꠞꠦ ꠡꠣꠁꠎ꠆ꠎ ꠇꠞꠝꠥ। ꠀꠞ ꠢꠘꠅ ꠉꠤꠀ ꠇꠤꠔꠣ ꠇꠞꠔꠣꠄ ꠀꠝꠤ ꠢꠤꠇꠣꠁꠀ ꠖꠤꠝꠥ।
EXO 4:16 ꠔꠥꠝꠣꠞ ꠜꠣꠁ ꠢꠣꠞꠥꠘꠞ ꠝꠥꠈ ꠅꠁꠛ ꠔꠥꠝꠣꠞ ꠝꠥꠈ, ꠢꠦ ꠔꠥꠝꠣꠞ ꠅꠁꠀ ꠝꠣꠘꠡꠞ ꠟꠉꠦ ꠝꠣꠔꠤꠛ। ꠙꠦꠉꠣꠝ꠆ꠛꠞ ꠅꠇꠟꠦ ꠎꠦꠟꠣ ꠀꠟ꠆ꠟꠣꠞ ꠇꠣꠟꠣꠝ ꠇꠂꠘ, ꠢꠣꠞꠥꠘꠦ ꠅꠃꠟꠣ ꠔꠥꠝꠣꠞ ꠛꠥꠟꠤ ꠇꠁꠛ।
EXO 4:17 ꠅꠃ ꠟꠣꠑꠤ ꠔꠥꠝꠣꠞ ꠀꠔꠅ ꠞꠣꠈꠤꠅ, ꠁꠐꠣ ꠖꠤꠀ ꠢꠃ ꠇꠦꠞꠣꠝꠔꠤ-ꠝꠥꠎꠦꠎꠣ ꠅꠇꠟ ꠎꠣꠁꠞ ꠇꠞꠛꠣꠄ।”
EXO 4:18 ꠝꠣꠖꠤꠀꠘ ꠖꠦꠡꠅ ꠕꠣꠇꠔꠦꠃ ꠝꠣꠛꠥꠖꠦ ꠝꠥꠍꠣꠞꠦ ꠢꠥꠇꠥꠝ ꠇꠞꠍꠟꠣ, “ꠔꠥꠝꠤ ꠝꠤꠡꠞꠅ ꠎꠣꠅꠉꠤ, ꠇꠣꠞꠘ ꠝꠤꠡꠞꠞ ꠎꠦꠔꠣ ꠝꠣꠘꠡꠦ ꠔꠥꠝꠣꠞꠦ ꠈꠥꠘ ꠇꠞꠔꠣ ꠌꠣꠁꠍꠟꠣ, ꠁꠔꠣ ꠅꠈꠘ ꠝꠞꠤ ꠉꠦꠍꠂꠘ।” ꠔꠦꠃ ꠝꠥꠍꠣꠄ ꠔꠣꠘ ꠢꠃꠞ ꠡꠥꠀꠁꠛꠞ ꠇꠣꠍꠣꠔ ꠉꠤꠀ ꠇꠁꠟꠣ, “ꠀꠝꠤ ꠀꠝꠣꠞ ꠎꠘꠝ ꠝꠣꠐꠤ ꠝꠤꠡꠞ ꠖꠦꠡꠅ ꠎꠣꠁꠔꠣꠝ ꠌꠣꠁꠞꠣꠝ, ꠀꠝꠣꠞ ꠈꠦꠡ-ꠇꠥꠐꠥꠝ ꠅꠇꠟ ꠎꠤꠔꠣ ꠀꠍꠂꠘ ꠇꠤ ꠘꠣ, ꠔꠣꠞꠣꠞ ꠢꠣꠟ-ꠢꠇꠤꠇꠔ ꠖꠦꠈꠣꠔ ꠎꠣꠁꠔꠣꠝ, ꠔꠦ ꠀꠝꠣꠞꠦ ꠎꠣꠅꠀꠞ ꠅꠘꠥꠝꠔꠤ ꠖꠦꠃꠇ꠆ꠇꠣ।” ꠢꠃꠞꠦ ꠇꠁꠟꠣ, “ꠀꠁꠌ꠆ꠍꠣ, ꠍꠢꠤ-ꠍꠣꠟꠣꠝꠔꠦ ꠎꠣꠅ।”
EXO 4:20 ꠅꠃ ꠝꠥꠍꠣꠄ ꠔꠣꠘ ꠛꠤꠛꠤ ꠀꠞ ꠙꠥꠀꠂꠘ꠆ꠔꠞꠦ ꠉꠣꠗꠣꠞ ꠃꠙꠞꠦ ꠌꠠꠣꠁꠀ ꠝꠤꠡꠞꠞ ꠙꠕꠦ ꠞꠅꠀꠘꠣ ꠅꠁꠟꠣ। ꠔꠣꠘ ꠀꠔꠅ ꠀꠟ꠆ꠟꠣꠁ ꠇꠦꠞꠣꠝꠔꠤꠞ ꠢꠃ ꠟꠣꠑꠤ ꠞꠣꠈꠟꠣ।
EXO 4:21 ꠀꠟ꠆ꠟꠣꠄ ꠝꠥꠍꠣꠞꠦ ꠢꠥꠇꠥꠝ ꠖꠤꠟꠣ, “ꠔꠥꠝꠤ ꠝꠤꠡꠞꠅ ꠉꠤꠀ ꠢꠣꠞꠟꠦ ꠀꠝꠣꠞ ꠖꠦꠅꠀ ꠇꠦꠞꠣꠝꠔꠤ ꠅꠇꠟ ꠚꠦꠞꠣꠃꠘꠞ ꠍꠣꠝꠘꠦ ꠖꠦꠈꠣꠁꠅ, ꠅꠁꠟꠦ ꠀꠝꠤ ꠔꠣꠞ ꠖꠤꠟꠞꠦ ꠙꠣꠡꠣꠘ ꠛꠣꠘꠣꠁꠟꠤꠝꠥ, ꠢꠦ ꠝꠣꠘꠡꠞꠦ ꠍꠣꠠꠔ ꠘꠣꠄ।
EXO 4:22 ꠔꠥꠝꠤ ꠚꠦꠞꠣꠃꠘꠞꠦ ꠇꠁꠅ, ꠝꠣꠛꠥꠖꠦ ꠘꠤꠎꠦ ꠇꠁꠍꠂꠘ, ‘ꠛꠘꠤ ꠁꠍꠞꠣꠁꠟ ꠔ ꠀꠝꠣꠞ ꠙꠄꠟꠣ ꠙꠥꠔꠞ ꠟꠣꠈꠣꠘ।
EXO 4:23 ꠀꠝꠤ ꠘꠤꠎꠦ ꠔꠥꠝꠣꠞꠦ ꠢꠥꠇꠥꠝ ꠇꠞꠍꠟꠣꠝ, ꠀꠝꠣꠞ ꠄꠛꠣꠖꠔꠅ ꠎꠣꠁꠔꠣ ꠇꠞꠤ ꠔꠥꠝꠤ ꠀꠝꠣꠞ ꠙꠥꠔꠞꠦ ꠍꠣꠠꠤ ꠖꠤꠔꠣꠄ, ꠅꠁꠟꠦ ꠔꠥꠝꠤ ꠝꠣꠘꠍ ꠘꠣ। ꠄꠞꠖꠣꠄ ꠀꠝꠤꠅ ꠔꠥꠝꠣꠞ ꠙꠄꠟꠣ ꠙꠥꠔꠞꠦ ꠝꠣꠞꠤꠟꠤꠝꠥ।’ ”
EXO 4:24 ꠛꠣꠖꠦ ꠝꠤꠡꠞꠅ ꠎꠣꠅꠀꠞ ꠙꠕꠅ ꠞꠣꠁꠔ ꠇꠣꠐꠣꠁꠛꠣꠞ ꠎꠣꠉꠣꠔ ꠀꠁꠟꠦ ꠝꠣꠛꠥꠖꠦ ꠝꠥꠍꠣꠞꠦ ꠝꠣꠞꠤꠟꠤꠔꠣ ꠇꠞꠤ ꠝꠥꠈꠣꠝꠥꠈꠤ ꠅꠁꠟꠣ।
EXO 4:25 ꠅꠁꠟꠦ ꠔꠣꠘ ꠛꠤꠛꠤ ꠍꠚꠥꠞꠣꠄ ꠄꠇꠈꠣꠘ ꠗꠣꠞꠣꠁꠟ ꠙꠣꠔ꠆ꠔꠞ ꠟꠁꠀ ꠔꠣꠘ ꠙꠥꠀꠞ ꠝꠍꠟꠝꠣꠘꠤ ꠇꠞꠣꠁꠟ꠆ꠟꠣ ꠀꠞ ꠅꠇꠐꠣ ꠔꠣꠘ ꠎꠣꠝꠣꠁ ꠝꠥꠍꠣꠞ ꠙꠣꠅꠞ ꠝꠣꠎꠦ ꠍꠥꠀꠁꠀ ꠇꠁꠟꠣ, “ꠟꠃꠞ ꠛꠖꠟꠣ ꠀꠝꠤ ꠔꠥꠝꠣꠞꠦ ꠎꠣꠝꠣꠁ ꠢꠤꠡꠣꠛꠦ ꠙꠣꠁꠍꠤ।”
EXO 4:26 ꠔꠦꠃ ꠝꠥꠍꠣꠞꠦ ꠝꠣꠛꠥꠖꠦ ꠍꠣꠠꠤꠖꠤꠟꠣ। ꠝꠍꠟꠝꠣꠘꠤ ꠇꠣꠝꠞ ꠛꠦꠙꠣꠞꠦ ꠍꠚꠥꠞꠣꠄ ꠔ ꠅꠃ ꠇꠕꠣꠃ ꠇꠁꠍꠟꠣ।
EXO 4:27 ꠄꠞꠝꠣꠎꠦ ꠝꠣꠛꠥꠖꠦ ꠢꠣꠞꠥꠘꠞꠦ ꠇꠁꠟꠣ, “ꠔꠥꠝꠤ ꠝꠞꠥꠜꠥꠝꠤꠔ ꠉꠤꠀ ꠝꠥꠍꠣꠞ ꠟꠉꠦ ꠖꠦꠈꠣ ꠇꠞꠅ।” ꠅꠃ ꠔꠣꠁꠘ ꠉꠦꠟꠣ ꠀꠞ ꠀꠟ꠆ꠟꠣꠞ ꠙꠣꠠ ꠔꠥꠞꠞ ꠉꠦꠍꠦ ꠀꠁꠀ ꠝꠥꠍꠣꠞꠦ ꠙꠣꠁꠀ ꠌꠥꠝꠣ ꠖꠤꠟꠣ।
EXO 4:28 ꠀꠞ ꠝꠣꠛꠥꠖꠦ ꠎꠦꠔꠣ ꠎꠦꠔꠣ ꠇꠁꠛꠣꠞ ꠟꠣꠉꠤ ꠝꠥꠍꠣꠞꠦ ꠢꠥꠇꠥꠝ ꠖꠤꠍꠟꠣ, ꠝꠥꠍꠣꠄ ꠁꠔꠣ ꠢꠇ꠆ꠇꠟꠔꠣ ꠢꠣꠞꠥꠘꠞꠦ ꠎꠣꠘꠣꠁꠟꠣ। ꠝꠣꠛꠥꠖꠦ ꠎꠔ ꠟꠣꠈꠣꠘ ꠇꠦꠞꠣꠝꠔꠤ-ꠝꠥꠎꠦꠎꠣ ꠖꠦꠈꠣꠘꠤꠞ ꠢꠥꠇꠥꠝ ꠖꠤꠍꠂꠘ, ꠁꠔꠣ ꠢꠇꠟꠔꠣꠃ ꠔꠣꠁꠘ ꠢꠣꠞꠥꠘꠞꠦ ꠛꠥꠎꠣꠁꠟꠣ।
EXO 4:29 ꠛꠣꠖꠦ ꠝꠥꠍꠣ ꠀꠞ ꠢꠣꠞꠥꠘ ꠝꠤꠡꠞ ꠖꠦꠡꠅ ꠉꠤꠀ ꠛꠘꠤ ꠁꠍꠞꠣꠁꠟꠞ ꠢꠇꠟ ꠝꠥꠞꠛ꠆ꠛꠤꠞꠦ ꠖꠟꠣ ꠇꠞꠟꠣ।
EXO 4:30 ꠝꠣꠛꠥꠖꠦ ꠝꠥꠍꠣꠞꠦ ꠎꠔꠔꠣ ꠇꠁꠍꠟꠣ, ꠢꠣꠞꠥꠘꠦ ꠁꠔꠣ ꠢꠇꠟꠔꠣ ꠔꠣꠞꠣꠞꠦ ꠎꠣꠘꠣꠁꠟꠣ, ꠀꠞ ꠢꠃ ꠇꠦꠞꠣꠝꠔꠤ ꠅꠇꠟꠅ ꠝꠣꠘꠡꠞ ꠍꠣꠝꠘꠦ ꠖꠦꠈꠣꠁꠟꠣ।
EXO 4:31 ꠄꠞꠟꠣꠉꠤ ꠝꠣꠘꠡꠦ ꠁꠔꠣ ꠄꠇꠤꠘ ꠇꠞꠟꠣ। ꠔꠣꠞꠣ ꠎꠦꠛꠟꠣ ꠢꠥꠘꠟꠣ, ꠝꠣꠛꠥꠖꠦ ꠔꠣꠞꠣꠞ ꠛꠣꠄ ꠈꠤꠀꠟ ꠇꠞꠍꠂꠘ, ꠔꠣꠞꠣꠞ ꠃꠙꠞꠞ ꠎꠥꠟꠥꠝ-ꠝꠍꠤꠛꠔ ꠖꠦꠈꠍꠂꠘ, ꠅꠃ ꠔꠣꠞꠣ ꠔꠣꠘꠞꠦ ꠍꠁꠎꠖꠣ ꠇꠞꠟꠣ।
EXO 5:1 ꠝꠥꠍꠣ ꠀꠞ ꠢꠣꠞꠥꠘꠦ ꠉꠤꠀ ꠚꠦꠞꠣꠃꠘꠞꠦ ꠇꠁꠟꠣ, “ꠝꠣꠛꠥꠖ, ꠎꠦꠁꠘ ꠛꠘꠤ ꠁꠍꠞꠣꠁꠟꠞ ꠀꠟ꠆ꠟꠣ, ꠔꠣꠁꠘ ꠘꠤꠎꠦ ꠇꠁꠍꠂꠘ, ꠀꠝꠣꠞ ꠛꠘ꠆ꠖꠣ ꠅꠇꠟꠞꠦ ꠔꠥꠝꠤ ꠍꠣꠠꠤ ꠖꠦꠅ, ꠀꠝꠣꠞ ꠘꠣꠝꠦ ꠢꠎ ꠇꠞꠣꠞ ꠟꠣꠉꠤ, ꠔꠣꠞꠣ ꠝꠞꠥꠜꠥꠝꠤꠔ ꠢꠤꠎꠞꠔ ꠇꠞꠔꠦ ꠅꠁꠛ, ꠔꠥꠝꠤ ꠔꠣꠞꠣꠞꠦ ꠍꠣꠠꠅ।”
EXO 5:2 ꠚꠦꠞꠣꠃꠘꠦ ꠎꠥꠀꠙ ꠖꠤꠟ, “ꠁ ꠝꠣꠛꠥꠖ ꠀꠞꠇ ꠎꠘ ꠇꠦ, ꠎꠦꠘ ꠢꠥꠇꠥꠝ ꠝꠣꠘꠤꠀ ꠀꠝꠤ ꠛꠘꠤ ꠁꠍꠞꠣꠁꠟꠞꠦ ꠍꠣꠠꠤ ꠖꠤꠔꠣꠝ? ꠁꠟꠣ ꠇꠥꠘꠥ ꠝꠣꠛꠥꠖꠞꠦ ꠀꠝꠤ ꠌꠤꠘꠤ ꠘꠣ, ꠀꠞ ꠛꠘꠤ ꠁꠍꠞꠣꠁꠟꠞꠦꠅ ꠀꠝꠤ ꠍꠣꠠꠔꠣꠝ ꠘꠣꠄ।”
EXO 5:3 ꠔꠣꠞꠣ ꠇꠁꠟꠣ, “ꠁꠛꠞꠣꠘꠤ ꠅꠇꠟꠞ ꠀꠟ꠆ꠟꠣꠄ ꠀꠝꠞꠣꠞꠦ ꠖꠞꠡꠘ ꠖꠤꠍꠂꠘ। ꠄꠞꠟꠣꠉꠤ ꠀꠝꠞꠣ ꠝꠤꠘꠔ ꠇꠞꠤꠀꠞ ꠀꠝꠞꠣꠞꠦ ꠝꠞꠥꠜꠥꠝꠤꠞ ꠛꠣꠄ ꠔꠤꠘ ꠖꠤꠘꠞ ꠙꠕ ꠉꠤꠀ, ꠀꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠘꠣꠝꠦ ꠇꠥꠞꠛꠣꠘꠤ ꠇꠞꠔꠦ ꠖꠦꠃꠇ꠆ꠇꠣ, ꠀꠞꠘꠣꠄ ꠔꠣꠁꠘ ꠀꠝꠞꠣꠞꠦ ꠉꠎꠛꠤ ꠛꠦꠝꠣꠞ ꠖꠤꠀ ꠛꠣ ꠎꠥꠖ꠆ꠖꠞ ꠝꠣꠎꠦ ꠚꠣꠟꠣꠁꠀ ꠝꠣꠞꠤꠟꠣꠁꠛꠣ।”
EXO 5:4 ꠝꠤꠡꠞꠞ ꠛꠣꠖꠡꠣꠄ ꠎꠥꠀꠙ ꠖꠤꠟꠣ, “ꠅ ꠝꠥꠍꠣ ꠀꠞ ꠢꠣꠞꠥꠘ, ꠔꠥꠝꠞꠣ ꠝꠣꠘꠡꠞꠦ ꠇꠦꠘꠦ ꠇꠣꠝꠅ ꠕꠣꠇꠤ ꠚꠤꠞꠣꠁꠞꠣꠄ? ꠎꠣꠅ, ꠔꠥꠝꠞꠣꠅ ꠉꠤꠀ ꠇꠣꠝꠅ ꠟꠣꠉꠅ।
EXO 5:5 ꠖꠦꠈꠞꠣꠄ ꠘꠤ, ꠖꠦꠡꠅ ꠔꠥꠝꠞꠣꠞ ꠝꠣꠘꠥꠡ ꠛꠃꠔ ꠛꠣꠠꠤꠉꠦꠍꠂꠘ, ꠀꠞ ꠔꠥꠝꠞꠣꠞ ꠟꠣꠁ ꠙꠣꠁꠀ ꠁꠔꠣꠄ ꠇꠥꠘꠥ ꠇꠣꠝ ꠇꠞꠞꠣ ꠘꠣ।”
EXO 5:6 ꠅꠃ ꠚꠦꠞꠣꠃꠘꠦ ꠢꠃ ꠖꠤꠘꠃ ꠝꠤꠡꠞꠤ ꠎꠣꠟꠤꠝ ꠡꠞ꠆ꠖꠣꠞ ꠀꠞ ꠁꠛꠞꠣꠘꠤ ꠍꠥꠛꠦꠖꠣꠞ ꠅꠇꠟꠞꠦ ꠢꠥꠇꠥꠝ ꠇꠞꠟꠣ,
EXO 5:7 “ꠁꠐ ꠛꠣꠘꠣꠁꠛꠣꠞ ꠟꠣꠉꠤ ꠔꠥꠝꠞꠣ ꠝꠣꠘꠡꠞꠦ ꠀꠉꠞ ꠟꠣꠈꠣꠘ ꠈꠦꠞ-ꠘꠦꠞꠣ ꠀꠘꠤꠀ ꠖꠤꠅ ꠘꠣ, ꠔꠣꠞꠣ ꠉꠤꠀ ꠁꠔꠣ ꠎꠥꠉꠣꠠ ꠇꠞꠃꠇ।
EXO 5:8 ꠅꠁꠟꠦ ꠀꠉꠦ ꠔꠣꠞꠣ ꠎꠔꠈꠣꠘ ꠁꠐ ꠛꠣꠘꠣꠁꠔ ꠅꠈꠘꠅ ꠅꠔꠈꠣꠘ ꠛꠣꠘꠣꠁꠔꠦ ꠅꠁꠛ, ꠄꠇꠈꠣꠘꠅ ꠇꠝ ꠅꠁꠔ ꠘꠣꠄ। ꠁꠔꠣ ꠀꠟꠡꠤꠀ ꠅꠁꠉꠦꠍꠂꠘ ꠇꠞꠤ, ꠅꠘꠅ ꠀꠁꠀ ꠔꠣꠞꠣꠞ ꠀꠟ꠆ꠟꠣꠞ ꠘꠣꠝꠞ ꠇꠥꠞꠛꠣꠘꠤ ꠇꠞꠔꠣ ꠇꠁꠀ ꠌꠤꠟ꠆ꠟꠣꠁꠞꠣ।
EXO 5:9 ꠔꠥꠝꠞꠣ ꠔꠣꠞꠣꠞꠦ ꠀꠞꠅ ꠇꠡ꠆ꠐꠞ ꠇꠣꠝꠅ ꠟꠣꠉꠣꠅ, ꠔꠦꠃ ꠁꠔꠣꠄ ꠇꠥꠘꠥ ꠟꠣꠈꠣꠘ ꠛꠣꠎꠦ ꠝꠣꠔ ꠘꠣ ꠢꠥꠘꠤꠀ ꠇꠣꠝꠞ ꠝꠣꠎꠦ ꠝꠘ ꠖꠤꠛꠣ।”
EXO 5:10 ꠅꠃ ꠢꠤ ꠡꠞ꠆ꠖꠣꠞ ꠀꠞ ꠍꠥꠛꠦꠖꠣꠞ ꠅꠇꠟ ꠛꠣꠞ ꠅꠁ ꠉꠤꠀ ꠝꠣꠘꠡꠞꠦ ꠇꠁꠟꠣ, “ꠚꠦꠞꠣꠃꠘꠦ ꠇꠁꠍꠂꠘ, ꠅꠈꠘ ꠕꠣꠇꠤ ꠔꠣꠁꠘ ꠀꠞ ꠁꠐ ꠛꠣꠘꠣꠘꠤꠞ ꠈꠦꠞ ꠎꠥꠉꠣꠁ ꠖꠤꠔꠣ ꠘꠣꠄ।
EXO 5:11 ꠔꠥꠝꠞꠣ ꠎꠦꠘ ꠕꠣꠇꠤ ꠙꠣꠞ ꠈꠦꠞ-ꠘꠦꠞꠣ ꠎꠥꠉꠣꠁꠅ, ꠅꠁꠟꠦ ꠔꠥꠝꠞꠣꠞ ꠇꠣꠝ ꠇꠥꠘ꠆ꠔꠣꠃ ꠇꠝꠣꠁꠟ ꠅꠁꠔ ꠘꠣꠄ।”
EXO 5:12 ꠅꠃ ꠝꠣꠘꠡꠦ ꠈꠦꠞ-ꠘꠦꠞꠣ ꠔꠥꠇꠣꠁꠛꠣꠞ ꠟꠣꠉꠤ ꠢꠣꠞꠣ ꠝꠤꠡꠞ ꠖꠦꠡꠅ ꠍꠤꠔ꠆ꠞꠤ ꠉꠦꠟꠣ।
EXO 5:13 ꠀꠞ ꠡꠞ꠆ꠖꠣꠞ ꠅꠇꠟꠦ ꠛꠣꠞꠦ ꠛꠣꠞꠦ ꠔꠣꠉꠖꠣ ꠖꠤꠀ ꠇꠁꠟ, “ꠀꠉꠦ ꠈꠦꠞ ꠎꠥꠉꠣꠁꠀ ꠖꠦꠅꠀꠞ ꠛꠣꠟꠣ ꠔꠥꠝꠞꠣ ꠙꠞꠔꠦꠇ ꠖꠤꠘ ꠎꠔꠈꠣꠘ ꠁꠐ ꠛꠣꠘꠣꠁꠔꠣꠄ, ꠅꠈꠘꠅ ꠅꠔꠈꠣꠘ ꠛꠣꠘꠣꠅ।”
EXO 5:14 ꠚꠦꠞꠣꠃꠘꠞ ꠎꠣꠟꠤꠝ ꠡꠞ꠆ꠖꠣꠞ ꠅꠇꠟꠦ ꠛꠘꠤ ꠁꠍꠞꠣꠁꠟꠞ ꠃꠙꠞꠦ ꠎꠦ ꠍꠥꠛꠦꠖꠣꠞ ꠟꠣꠉꠣꠁꠍꠤꠟ, ꠢꠃ ꠡꠞ꠆ꠖꠣꠞ ꠅꠇꠟ ꠀꠁꠀ ꠍꠥꠛꠦꠖꠣꠞ ꠅꠇꠟꠞꠦ ꠝꠣꠁꠞ-ꠗꠁꠞ ꠇꠞꠤꠀ ꠎꠤꠇꠣꠁꠟ, “ꠔꠥꠝꠞꠣ ꠀꠉꠦ ꠎꠔꠈꠣꠘ ꠁꠐ ꠖꠤꠔꠣꠄ, ꠅꠈꠘ ꠅꠔꠈꠣꠘ ꠖꠦꠅ ꠘꠣ ꠇꠦꠘꠦ?”
EXO 5:15 ꠅꠃ ꠛꠘꠤ ꠁꠍꠞꠣꠁꠟꠞ ꠍꠥꠛꠦꠖꠣꠞ ꠅꠇꠟꠦ ꠀꠁꠀ ꠚꠦꠞꠣꠃꠘꠞ ꠉꠦꠍꠦ ꠘꠣꠟꠤꠡ ꠖꠤꠟꠣ, “ꠀꠙꠘꠣꠞ ꠁ ꠉꠥꠟꠣꠝ ꠅꠇꠟꠞ ꠟꠉꠦ ꠁꠟꠣ ꠛꠦꠛꠢꠣꠞ ꠇꠦꠘꠦ ꠇꠞꠞꠣ?
EXO 5:16 ꠡꠞ꠆ꠖꠣꠞ ꠅꠇꠟꠦ ꠀꠝꠞꠣꠞꠦ ꠈꠦꠞ-ꠘꠦꠞꠣ ꠎꠥꠉꠣꠁ ꠖꠦꠁꠘ ꠘꠣ, ꠔꠣ-ꠅ ꠁꠐ ꠛꠣꠘꠣꠁꠛꠣꠞ ꠢꠥꠇꠥꠝ ꠖꠦꠁꠘ ꠀꠞ ꠀꠙꠘꠣꠞ ꠁ ꠉꠥꠟꠣꠝ ꠅꠇꠟꠞꠦ ꠝꠣꠁꠞ-ꠗꠁꠞ ꠇꠞꠂꠘ, ꠅꠁꠟꠦ ꠖꠥꠡ ꠔ ꠀꠙꠘꠣꠞ ꠘꠤꠎꠞ ꠡꠞ꠆ꠖꠣꠞꠞ।”
EXO 5:17 ꠚꠦꠞꠣꠃꠘꠦ ꠎꠥꠀꠙ ꠖꠤꠟ, “ꠔꠥꠝꠞꠣ ꠀꠟꠡꠤꠀ, ꠇꠥꠠꠤꠀ, ꠄꠞꠟꠣꠉꠤ ꠇꠁꠞꠣꠄ ꠝꠣꠛꠥꠖꠞ ꠘꠣꠝꠦ ꠇꠥꠞꠛꠣꠘꠤ ꠇꠞꠣꠔ ꠎꠣꠁꠔꠣꠝ।
EXO 5:18 ꠎꠣꠅ, ꠇꠣꠝ ꠇꠞꠅ ꠉꠤꠀ। ꠔꠥꠝꠞꠣꠞꠦ ꠈꠦꠞ ꠖꠦꠅꠀ ꠎꠣꠁꠔ ꠘꠣꠄ, ꠔꠣ-ꠅ ꠙꠞꠔꠦꠇ ꠖꠤꠘ ꠎꠔꠈꠣꠘ ꠁꠐ ꠛꠣꠘꠣꠁꠛꠣꠞ ꠇꠕꠣ ꠀꠍꠤꠟ, ꠅꠔꠈꠣꠘꠃ ꠛꠣꠘꠣꠁꠔꠦ ꠅꠁꠛ।”
EXO 5:19 ꠅꠃ ꠛꠘꠤ ꠁꠍꠞꠣꠁꠟꠞ ꠍꠥꠛꠦꠖꠣꠞ ꠅꠇꠟꠦ ꠛꠥꠎꠟꠣ, ꠔꠣꠞꠣ ꠛꠤꠙꠖꠞ ꠝꠣꠎꠦ ꠙꠠꠍꠂꠘ, ꠇꠣꠞꠘ ꠔꠣꠞꠣꠞꠦ ꠢꠥꠇꠥꠝ ꠇꠞꠣ ꠅꠁꠍꠦ, ꠀꠉꠦ ꠎꠔꠈꠣꠘ ꠁꠐ ꠛꠣꠘꠣꠘꠤ ꠟꠣꠉꠔ, ꠅꠈꠘꠅ ꠅꠔꠈꠣꠘ ꠁꠐ ꠛꠣꠘꠣꠁꠔꠦ ꠅꠁꠛ, ꠇꠝ ꠅꠁꠔ ꠘꠣꠄ।
EXO 5:20 ꠔꠣꠞꠣ ꠚꠦꠞꠣꠃꠘꠞ ꠉꠦꠍ ꠕꠣꠇꠤ ꠎꠣꠅꠀꠞ ꠙꠕꠅ ꠝꠥꠍꠣ ꠀꠞ ꠢꠣꠞꠥꠘꠞ ꠟꠉꠦ ꠖꠦꠈꠣ ꠅꠁꠟ, ꠄꠞꠣ ꠃꠛꠣꠁꠀ ꠛꠣꠞ ꠌꠣꠅꠀꠔ ꠀꠍꠟꠣ।
EXO 5:21 ꠍꠥꠛꠦꠖꠣꠞ ꠅꠇꠟꠦ ꠇꠁꠟꠣ, “ꠝꠣꠛꠥꠖꠦ ꠀꠙꠘꠣꠞꠣꠞ ꠙꠣꠅꠘꠣ ꠡꠣꠎꠣ ꠖꠤꠛꠣ, ꠀꠙꠘꠣꠞꠣ ꠚꠦꠞꠣꠃꠘ ꠀꠞ ꠔꠣꠞ ꠃꠎꠤꠞ-ꠘꠣꠎꠤꠞꠞ ꠉꠦꠍꠦ ꠀꠝꠞꠣꠞꠦ ꠙꠌꠣ-ꠉꠣꠘ꠆ꠖꠣ ꠛꠣꠘꠣꠁꠀ, ꠀꠝꠞꠣꠞꠦ ꠈꠥꠘ ꠇꠞꠣꠞ ꠟꠣꠉꠤ ꠔꠟꠥꠀꠞ ꠘꠤꠀ ꠔꠣꠞꠣꠞ ꠀꠔꠅ ꠖꠤꠍꠂꠘ।”
EXO 5:22 ꠅꠃ ꠝꠥꠍꠣꠄ ꠢꠤꠞꠛꠣꠞ ꠉꠤꠀ ꠝꠣꠛꠥꠖꠞ ꠉꠦꠍꠦ ꠚꠞꠤꠀꠖ ꠇꠞꠟꠣ, “ꠅ ꠖꠤꠘ ꠖꠥꠘꠤꠀꠞ ꠝꠣꠟꠤꠇ, ꠔꠥꠝꠤ ꠇꠦꠘꠦ ꠔꠥꠝꠣꠞ ꠛꠘ꠆ꠖꠣꠞꠦ ꠝꠍꠤꠛꠔꠅ ꠚꠣꠟꠣꠁꠟꠣꠄ? ꠀꠞ ꠀꠝꠣꠞꠦ ꠇꠤꠔꠣꠟ꠆ꠟꠣꠉꠤ ꠙꠣꠑꠣꠁꠟꠣꠄ?
EXO 5:23 ꠚꠦꠞꠣꠃꠘꠞ ꠉꠦꠍꠦ ꠔꠥꠝꠣꠞ ꠇꠕꠣ ꠢꠥꠘꠣꠘꠤꠞ ꠛꠣꠖ ꠕꠣꠇꠤꠃ ꠔꠥꠝꠣꠞ ꠛꠘ꠆ꠖꠣ ꠅꠇꠟꠞ ꠃꠙꠞꠦ ꠎꠥꠟꠥꠝ ꠔ ꠀꠞꠅ ꠛꠣꠠꠤꠍꠦ। ꠅꠁꠟꠦ ꠔꠥꠝꠤ ꠔ ꠇꠥꠘ꠆ꠔꠣꠃ ꠇꠞꠟꠣꠄ ꠘꠣ।”
EXO 6:1 ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ, “ꠚꠦꠞꠣꠃꠘꠞ ꠇꠤꠔꠣ ꠖꠡꠣ ꠅꠄ ꠔꠥꠝꠤ ꠖꠦꠈꠤꠅ, ꠀꠝꠣꠞ ꠀꠔꠞ ꠎꠥꠞ ꠖꠦꠈꠟꠦꠃ ꠢꠦ ꠝꠣꠘꠡꠞꠦ ꠍꠣꠠꠤ ꠖꠤꠛ। ꠎꠥꠞꠀꠟꠣ ꠀꠔꠞ ꠇꠥꠖꠞꠔ ꠖꠦꠈꠟꠦꠃ ꠢꠦ ꠔꠣꠞ ꠖꠦꠡ ꠕꠣꠇꠤ ꠄꠞꠣꠞꠦ ꠈꠦꠖꠣꠁ ꠖꠤꠛ।”
EXO 6:2 ꠀꠟ꠆ꠟꠣꠄ ꠝꠥꠍꠣꠞ ꠟꠉꠦ ꠛꠣꠔꠌꠤꠔ ꠇꠞꠤ ꠇꠁꠟꠣ, “ꠀꠝꠣꠞ ꠘꠣꠝꠃ ‘ꠀꠟ꠆ꠟꠣ ꠎꠦꠁꠘ ꠀꠍꠂꠘ’।
EXO 6:3 ꠀꠝꠤ ꠁꠛ꠆ꠞꠣꠢꠤꠝ, ꠁꠍꠢꠣꠇ ꠀꠞ ꠁꠀꠇꠥꠛꠞ ꠉꠦꠍꠦ ꠡꠞ꠆ꠛ-ꠡꠇ꠆ꠔꠤꠝꠣꠘ ꠀꠟ꠆ꠟꠣ ꠘꠣꠝꠦ ꠖꠤꠖꠣꠞ ꠖꠤꠔꠣꠝ, ‘ꠀꠟ꠆ꠟꠣ ꠎꠦꠁꠘ ꠀꠍꠂꠘ’ ꠘꠣꠝꠦ ꠔꠣꠞꠣꠞꠦ ꠖꠤꠖꠣꠞ ꠖꠤꠔꠣꠝ ꠘꠣ।
EXO 6:4 ꠀꠝꠤ ꠔꠣꠞꠣꠞ ꠟꠉꠦ ꠅꠃ ꠅꠀꠖꠣ ꠇꠞꠍꠟꠣꠝ, ꠀꠝꠤ ꠔꠥꠝꠞꠣꠞꠦ ꠇꠦꠘꠣꠘ ꠖꠦꠡ ꠖꠤꠝꠥ, ꠎꠦ ꠖꠦꠡꠅ ꠔꠥꠝꠞꠣ ꠝꠥꠍꠣꠚꠤꠞ ꠅꠁꠀ ꠞꠅ, ꠅꠃ ꠖꠦꠡꠃ ꠀꠝꠤ ꠔꠥꠝꠞꠣꠞꠦ ꠖꠤꠝꠥ।
EXO 6:5 ꠈꠣꠍ ꠇꠞꠤ ꠝꠤꠡꠞꠤ ꠅꠇꠟꠦ ꠛꠘꠤ ꠁꠍꠞꠣꠁꠟꠞꠦ ꠉꠥꠟꠣꠝꠤ ꠇꠞꠣꠘꠤꠞ ꠟꠣꠉꠤ ꠄꠞꠣꠞ ꠇꠣꠘ꠆ꠖꠘ ꠢꠥꠘꠤꠀ, ꠀꠝꠣꠞ ꠢꠃ ꠅꠀꠖꠣ ꠅꠈꠘ ꠁꠀꠖ ꠇꠞꠟꠣꠝ।
EXO 6:6 ꠄꠞꠟꠣꠉꠤ ꠔꠥꠝꠤ ꠉꠤꠀ ꠛꠘꠤ ꠁꠍꠞꠣꠁꠟꠞꠦ ꠇꠅ, ꠝꠣꠛꠥꠖꠦ ꠇꠁꠍꠂꠘ, ꠀꠝꠤ ꠝꠣꠛꠥꠖ, ꠀꠝꠤ ꠔꠥꠝꠞꠣꠞꠦ ꠝꠤꠡꠞꠤ ꠅꠇꠟꠞ ꠔꠟ ꠕꠣꠇꠤ ꠛꠣꠞ ꠇꠞꠤꠀ ꠀꠘꠝꠥ, ꠔꠣꠞꠣꠞ ꠉꠥꠟꠣꠝꠤ ꠕꠣꠇꠤ ꠀꠎꠣꠖ ꠇꠞꠝꠥ। ꠔꠣꠞꠣꠞꠦ ꠖꠦꠈꠣꠞ ꠝꠔ ꠡꠣꠎꠣ ꠖꠤꠀ, ꠀꠝꠣꠞ ꠇꠥꠖꠞꠔꠤ ꠀꠔꠖꠤ ꠔꠥꠝꠞꠣꠞꠦ ꠈꠣꠟꠣꠍ ꠇꠞꠝꠥ।
EXO 6:7 ꠢꠦꠡꠦ ꠔꠥꠝꠞꠣꠞꠦ ꠀꠝꠣꠞ ꠘꠤꠎꠞ ꠛꠘ꠆ꠖꠣ ꠛꠣꠘꠣꠁꠝꠥ, ꠀꠝꠤ ꠘꠤꠎꠦ ꠔꠥꠝꠞꠣꠞ ꠀꠟ꠆ꠟꠣ ꠅꠁꠝꠥ। ꠔꠦꠃ ꠔꠥꠝꠞꠣ ꠛꠥꠎꠛꠣꠄ, ꠀꠝꠤ ꠀꠟ꠆ꠟꠣꠃ ꠔꠥꠝꠞꠣꠞ ꠝꠣꠛꠥꠖ, ꠀꠞ ꠝꠤꠡꠞꠤ ꠅꠇꠟꠞ ꠜꠣꠞꠞ ꠔꠟ ꠕꠣꠇꠤ ꠀꠝꠤꠃ ꠔꠥꠝꠞꠣꠞꠦ ꠛꠣꠌꠣꠁꠍꠤ।
EXO 6:8 ꠀꠝꠤ ꠁꠛ꠆ꠞꠣꠢꠤꠝ, ꠁꠍꠢꠣꠇ, ꠁꠀꠇꠥꠛꠞ ꠟꠉꠦ ꠎꠦ ꠖꠦꠡꠞ ꠇꠕꠣ ꠅꠀꠖꠣ ꠇꠞꠍꠤ, ꠢꠃ ꠖꠦꠡꠅ ꠔꠥꠝꠞꠣꠞꠦ ꠟꠁꠀ ꠎꠣꠁꠝꠥ, ꠔꠥꠝꠞꠣ ꠢꠃ ꠖꠦꠡꠞ ꠝꠣꠟꠤꠇ ꠅꠁꠛꠣꠄ। ꠀꠝꠤꠃ ꠝꠣꠛꠥꠖ।”
EXO 6:9 ꠝꠥꠍꠣꠄ ꠉꠤꠀ ꠁꠔꠣ ꠢꠇꠟꠔꠣ ꠔꠣꠞꠣꠞꠦ ꠎꠣꠘꠣꠁꠟꠣ, ꠅꠁꠟꠦ ꠢꠤ ꠛꠦꠕꠣꠄꠀ ꠎꠥꠟꠥꠝ-ꠔꠇꠟꠤꠚ ꠀꠞ ꠉꠥꠟꠣꠝꠤ ꠇꠞꠔꠦ ꠇꠞꠔꠦ ꠝꠘ-ꠝꠞꠣ ꠅꠁꠎꠣꠅꠀꠄ, ꠔꠣꠞꠣ ꠀꠞ ꠝꠥꠍꠣꠞ ꠝꠣꠔꠦ ꠇꠣꠘ ꠖꠤꠟꠣ ꠘꠣ।
EXO 6:10 ꠅꠃ ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ,
EXO 6:11 “ꠔꠥꠝꠤ ꠉꠤꠀ ꠝꠤꠡꠞꠞ ꠛꠣꠖꠡꠣ ꠚꠦꠞꠣꠃꠘꠞꠦ ꠇꠅ, ꠢꠦ ꠎꠣꠘꠥ ꠔꠣꠞ ꠖꠦꠡ ꠕꠣꠇꠤ ꠄꠞꠣꠞꠦ ꠎꠣꠁꠔꠦ ꠖꠦꠄ।”
EXO 6:12 ꠝꠥꠍꠣꠄ ꠎꠥꠀꠙ ꠖꠤꠟꠣ, “ꠛꠘꠤ ꠁꠍꠞꠣꠁꠟꠦꠃ ꠎꠦꠛꠟꠣ ꠀꠝꠣꠞ ꠝꠣꠔ ꠢꠥꠘꠦꠞ ꠘꠣ, ꠔꠦ ꠚꠦꠞꠣꠃꠘꠦ ꠇꠤꠟꠣ ꠢꠥꠘꠛ? ꠀꠞ ꠀꠝꠣꠞ ꠔ ꠝꠣꠔꠔꠦ ꠝꠥꠈꠅ ꠟꠣꠉꠤꠎꠣꠄ।”
EXO 6:13 ꠔꠦꠃ ꠝꠣꠛꠥꠖꠦ ꠝꠥꠍꠣ ꠀꠞ ꠢꠣꠞꠥꠘꠞꠦ ꠇꠁꠟꠣ, “ꠔꠥꠝꠞꠣ ꠛꠘꠤ ꠁꠍꠞꠣꠁꠟ ꠀꠞ ꠝꠤꠡꠞꠞ ꠞꠣꠎꠣ ꠚꠦꠞꠣꠃꠘꠞꠦ ꠇꠅ, ꠝꠣꠛꠥꠖꠦ ꠀꠝꠞꠣꠞꠦ ꠢꠥꠇꠥꠝ ꠖꠤꠍꠂꠘ, ꠛꠘꠤ ꠁꠍꠞꠣꠁꠟꠞꠦ ꠝꠤꠡꠞ ꠕꠣꠇꠤ ꠛꠣꠞ ꠇꠞꠤ ꠘꠦꠅꠀꠞ ꠟꠣꠉꠤ।”
EXO 6:14 ꠛꠘꠤ ꠁꠍꠞꠣꠁꠟ ꠎꠣꠔꠤꠞ ꠝꠥꠟ ꠝꠥꠞꠛ꠆ꠛꠤ ꠅꠁꠟꠣ ꠢꠎꠞꠔ ꠁꠀꠇꠥꠛ, ꠀꠟ꠆ꠟꠣꠄ ꠅꠃ ꠁꠀꠇꠥꠛꠞ ꠘꠄꠀ ꠘꠣꠝ ꠖꠤꠍꠟꠣ ꠁꠍꠞꠣꠁꠟ। ꠔꠣꠘ ꠙꠥꠀꠂꠘ ꠅꠁꠟꠣ ꠞꠥꠛꠦꠘ, ꠡꠤꠝꠤꠅꠘ, ꠟꠦꠛꠤ ꠡꠢ ꠝꠥꠐ ꠛꠣꠞꠅꠎꠘ। ꠝꠥꠍꠣ ꠀꠞ ꠢꠣꠞꠥꠘ ꠅꠁꠟꠣ ꠅꠃ ꠢꠎꠞꠔ ꠟꠦꠛꠤꠞ ꠛꠋꠡꠗꠞ। ꠁꠍꠞꠣꠁꠟꠞ ꠛꠠ ꠙꠥꠀ ꠞꠥꠛꠦꠘꠞ ꠙꠥꠀꠂꠘ ꠅꠁꠟꠣ ꠢꠘꠥꠇ, ꠚꠣꠟꠥ, ꠢꠣꠍꠤꠞ ꠀꠞ ꠇꠞ꠆ꠝꠤ, ꠄꠞꠣ ꠔ ꠞꠥꠛꠦꠘ ꠈꠣꠘ꠆ꠖꠣꠘꠞ ꠘꠣꠘꠣꠘ ꠉꠥꠡ꠆ꠐꠤꠞ ꠝꠥꠟ ꠝꠥꠞꠛ꠆ꠛꠤ।
EXO 6:15 ꠡꠤꠝꠤꠅꠘꠞ ꠙꠥꠀꠂꠘ ꠅꠁꠟꠣ ꠎꠤꠝꠥꠄꠟ, ꠎꠣꠝꠤꠘ, ꠅꠢꠖ, ꠎꠣꠈꠤꠘ, ꠡꠥꠢꠞ ꠀꠞ ꠔꠣꠞ ꠇꠦꠘꠣꠘꠤ ꠛꠃꠞ ꠔꠞꠚꠣ ꠙꠥꠀ ꠡꠃꠟ, ꠄꠞꠣ ꠡꠤꠝꠤꠅꠘ ꠈꠣꠘ꠆ꠖꠣꠘꠞ ꠘꠣꠘꠣꠘ ꠉꠥꠡ꠆ꠐꠤꠞ ꠝꠥꠟ ꠝꠥꠞꠛ꠆ꠛꠤ।
EXO 6:16 ꠈꠣꠘ꠆ꠖꠣꠘ ꠔꠣꠟꠤꠇꠣ ꠢꠤꠡꠣꠛꠦ ꠢꠎꠞꠔ ꠟꠦꠛꠤꠞ ꠙꠥꠀꠂꠘ ꠅꠁꠟꠣ ꠎꠣꠞꠍꠥꠘ, ꠇꠣꠢꠣꠔ ꠀꠞ ꠝꠣꠞꠣꠞꠤ। ꠟꠦꠛꠤ ꠄꠇ-ꠡ ꠡꠣꠠꠔꠤꠡ ꠛꠞꠍ ꠛꠣꠌꠤꠍꠟꠣ।
EXO 6:17 ꠎꠣꠞꠎꠤꠞ ꠉꠥꠡ꠆ꠐꠤꠞ ꠙꠞꠗꠣꠘ ꠢꠤꠡꠣꠛꠦ ꠎꠣꠞꠍꠥꠘꠞ ꠙꠥꠀꠂꠘ ꠅꠁꠟꠣ ꠟꠤꠛꠘꠤ ꠀꠞ ꠡꠤꠝꠦꠁ।
EXO 6:18 ꠇꠣꠢꠣꠔꠞ ꠙꠥꠀꠂꠘ ꠅꠁꠟꠣ ꠁꠝꠞꠣꠘ, ꠁꠎꠢꠣꠞ, ꠢꠦꠛꠞꠘ ꠀꠞ ꠃꠎ꠆ꠎꠟ। ꠇꠣꠢꠣꠔ ꠄꠇ-ꠡ ꠔꠦꠔ꠆ꠞꠤꠡ ꠛꠞꠍ ꠛꠣꠌꠤꠍꠟꠣ।
EXO 6:19 ꠝꠣꠞꠣꠞꠤꠞ ꠙꠥꠀꠂꠘ ꠅꠁꠟꠣ, ꠝꠢꠟꠤ ꠀꠞ ꠝꠥꠡꠤ। ꠄꠞꠣꠃ ꠅꠁꠟꠣ ꠟꠦꠛꠤ ꠈꠣꠘ꠆ꠖꠣꠘꠞ ꠘꠣꠘꠣꠘ ꠉꠥꠡ꠆ꠐꠤꠞ ꠝꠥꠟ ꠝꠥꠞꠛ꠆ꠛꠤ।
EXO 6:20 ꠁꠝꠞꠣꠘꠞ ꠙꠥꠀꠂꠘ ꠅꠁꠟꠣ ꠝꠥꠍꠣ ꠀꠞ ꠢꠣꠞꠥꠘ। ꠁꠝꠞꠣꠘꠦ ꠔꠣꠘ ꠚꠥꠚꠥ ꠁꠃꠈꠣꠛꠦꠎꠞꠦ ꠛꠤꠀ ꠇꠞꠍꠟꠣ, ꠔꠣꠘ ꠙꠦꠐꠅ ꠄꠞꠣꠞ ꠎꠘꠝ ꠅꠁꠍꠤꠟ। ꠁꠝꠞꠣꠘ ꠄꠇ-ꠡ ꠡꠣꠠꠔꠤꠡ ꠛꠞꠍ ꠛꠣꠌꠤꠍꠟꠣ।
EXO 6:21 ꠁꠎꠢꠣꠞꠞ ꠙꠥꠀꠂꠘ ꠅꠁꠟꠣ ꠇꠥꠞꠣꠢ, ꠘꠦꠚꠉ, ꠎꠤꠈꠞꠤ।
EXO 6:22 ꠃꠎ꠆ꠎꠟꠞ ꠙꠥꠀꠂꠘ ꠝꠤꠡꠣꠄꠄꠟ, ꠄꠟꠎꠣꠚꠘ ꠀꠞ ꠎꠤꠔꠞꠤ।
EXO 6:23 ꠀꠞ ꠢꠣꠞꠥꠘꠦ ꠀꠝꠤꠘꠣꠖꠣꠛꠞ ꠙꠥꠠꠤ ꠘꠣꠢꠤꠡꠞ ꠛꠁꠘ ꠁꠟꠤꠡꠦꠛꠣꠞꠦ ꠛꠤꠀ ꠇꠞꠣꠄ, ꠔꠣꠘ ꠢꠥꠞꠥꠔ꠆ꠔꠣ ꠅꠁꠟꠣ ꠘꠣꠖꠣꠛ, ꠀꠛꠤꠢꠥ, ꠀꠟꠤ-ꠀꠎꠞ ꠀꠞ ꠁꠍꠣꠝꠣꠞ।
EXO 6:24 ꠇꠥꠞꠣꠢꠞ ꠙꠥꠀꠂꠘ ꠅꠁꠟꠣ ꠅꠡꠤꠞ, ꠁꠟꠇꠣꠘꠣ, ꠅꠛꠤꠀꠡꠚ। ꠄꠞꠣ ꠇꠥꠞꠣꠢꠤ ꠅꠇꠟꠞ ꠘꠣꠘꠣꠘ ꠉꠥꠡ꠆ꠐꠤꠞ ꠝꠥꠟ ꠝꠥꠞꠛ꠆ꠛꠤ।
EXO 6:25 ꠀꠟꠤ-ꠀꠎꠞꠞ ꠙꠥꠀ ꠅꠁꠟꠣ ꠙꠤꠘꠢꠡ। ꠢꠣꠞꠥꠘꠞ ꠙꠥꠀ ꠀꠟꠤ-ꠀꠎꠞꠦ ꠙꠥꠐꠤꠄꠟꠞ ꠙꠥꠠꠤꠞꠦ ꠛꠤꠀ ꠇꠞꠣꠄ ꠔꠣꠁꠞ ꠙꠦꠐꠅ ꠙꠤꠘꠢꠡꠞ ꠎꠘꠝ ꠅꠁꠍꠤꠟ। ꠄꠞꠣ ꠅꠁꠟꠣ ꠟꠦꠛꠤ ꠈꠣꠘ꠆ꠖꠣꠘꠞ ꠘꠣꠘꠣꠘ ꠉꠥꠡ꠆ꠐꠤꠞ ꠝꠥꠟ ꠝꠥꠞꠛ꠆ꠛꠤ।
EXO 6:26 ꠅꠃ ꠢꠣꠞꠥꠘ ꠀꠞ ꠝꠥꠍꠣꠞꠦ ꠝꠣꠛꠥꠖꠦ ꠢꠥꠇꠥꠝ ꠇꠞꠍꠟꠣ, ꠔꠥꠝꠞꠣ ꠛꠘꠤ ꠁꠍꠞꠣꠁꠟꠞꠦ ꠍꠤꠙꠣꠁ ꠖꠟꠞ ꠟꠣꠈꠣꠘ ꠢꠣꠎꠤꠀ ꠝꠤꠡꠞ ꠕꠣꠇꠤ ꠛꠣꠞ ꠇꠞꠅ।
EXO 6:27 ꠝꠥꠍꠣ ꠀꠞ ꠢꠣꠞꠥꠘꠦꠃ ꠛꠘꠤ ꠁꠍꠞꠣꠁꠟꠞꠦ ꠝꠤꠡꠞ ꠕꠣꠇꠤ ꠛꠣꠞ ꠇꠞꠤ ꠀꠘꠣꠞ ꠇꠕꠣ ꠝꠤꠡꠞꠞ ꠛꠣꠖꠡꠣ ꠚꠦꠞꠣꠃꠘꠞ ꠟꠉꠦ ꠝꠣꠔꠤꠍꠟꠣ।
EXO 6:28 ꠝꠣꠛꠥꠖꠦ ꠝꠥꠍꠣꠞ ꠟꠉꠦ ꠎꠦꠖꠤꠘ ꠝꠤꠡꠞ ꠖꠦꠡꠅ ꠛꠣꠔꠌꠤꠔ ꠇꠞꠟꠣ,
EXO 6:29 ꠢꠃ ꠖꠤꠘ ꠔꠣꠁꠘ ꠇꠁꠟꠣ, “ꠀꠝꠤ ꠝꠣꠛꠥꠖ। ꠔꠦ ꠔꠥꠝꠣꠞꠦ ꠅꠈꠘ ꠎꠦꠔꠣ ꠎꠦꠔꠣ ꠇꠁꠝꠥ, ꠁꠔꠣ ꠢꠇꠟꠔꠣ ꠔꠥꠝꠤ ꠝꠤꠡꠞꠞ ꠛꠣꠖꠡꠣ ꠚꠦꠞꠣꠃꠘꠞꠦ ꠇꠁꠅ।”
EXO 6:30 ꠝꠥꠍꠣꠄ ꠝꠣꠛꠥꠖꠞ ꠖꠞꠛꠣꠞꠅ ꠀꠞꠎ ꠇꠞꠟꠣ, “ꠖꠦꠈꠃꠇ꠆ꠇꠣ, ꠀꠝꠣꠞ ꠔ ꠝꠣꠔꠔꠦ ꠝꠥꠈꠅ ꠟꠣꠉꠤꠎꠣꠄ, ꠚꠦꠞꠣꠃꠘꠦ ꠇꠥꠘꠥ ꠀꠝꠣꠞ ꠝꠣꠔ ꠢꠥꠘꠛ ꠘꠤ?”
EXO 7:1 ꠅꠃ ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ “ꠢꠥꠘꠅ, ꠀꠝꠤ ꠚꠦꠞꠣꠃꠘꠞ ꠉꠦꠍꠦ ꠔꠥꠝꠣꠞꠦ ꠀꠟ꠆ꠟꠣꠞ ꠟꠣꠈꠣꠘ ꠛꠣꠘꠣꠁꠝꠥ। ꠀꠞ ꠔꠥꠝꠣꠞ ꠜꠣꠁ ꠢꠣꠞꠥꠘꠞꠦ ꠛꠣꠘꠣꠁꠝꠥ ꠔꠥꠝꠣꠞ ꠘꠛꠤ।
EXO 7:2 ꠀꠝꠤ ꠔꠥꠝꠣꠞꠦ ꠎꠦꠟꠣ ꠢꠥꠇꠥꠝ ꠇꠞꠝꠥ, ꠔꠥꠝꠤ ꠅꠃꠟꠣ ꠢꠣꠞꠥꠘꠞꠦ ꠇꠁꠛꠣꠄ, ꠀꠞ ꠢꠣꠞꠥꠘꠦ ꠅꠔꠣ ꠚꠦꠞꠣꠃꠘꠞꠦ ꠇꠁꠛ; ꠎꠣꠔꠦ ꠢꠦ ꠛꠘꠤ ꠁꠍꠞꠣꠁꠟꠞꠦ ꠔꠣꠞ ꠖꠦꠡ ꠕꠣꠇꠤ ꠍꠣꠠꠤ ꠖꠦꠄ।
EXO 7:3 ꠅꠁꠟꠦ ꠀꠝꠤ ꠚꠦꠞꠣꠃꠘꠞ ꠖꠤꠟꠞꠦ ꠙꠣꠡꠣꠘ ꠇꠞꠤꠟꠤꠝꠥ। ꠝꠤꠡꠞ ꠖꠦꠡꠅ ꠀꠝꠤ ꠛꠃꠔ ꠇꠦꠞꠣꠝꠔꠤ ꠀꠞ ꠇꠥꠖꠞꠔꠤ ꠟꠤꠟꠣ-ꠈꠦꠟꠣ ꠖꠦꠈꠣꠁꠝꠥ।
EXO 7:4 ꠔꠣꠞ ꠛꠣꠖꠦꠅ ꠚꠦꠞꠣꠃꠘꠦ ꠔꠥꠝꠞꠣꠞ ꠝꠣꠔꠞ ꠖꠣꠝ ꠖꠤꠔ ꠘꠣꠄ। ꠔꠦꠃ ꠀꠝꠤ ꠝꠤꠡꠞꠞ ꠃꠙꠞꠦ ꠀꠝꠣꠞ ꠀꠔ ꠟꠣꠉꠣꠁꠀ, ꠖꠦꠈꠣꠞ ꠝꠔ ꠡꠣꠎꠣ ꠖꠤꠀ ꠝꠤꠡꠞ ꠖꠦꠡ ꠕꠣꠇꠤ ꠀꠝꠣꠞ ꠘꠤꠎꠞ ꠛꠘ꠆ꠖꠣ ꠛꠘꠤ ꠁꠍꠞꠣꠁꠟꠞꠦ ꠍꠤꠙꠣꠁꠞ ꠟꠣꠈꠣꠘ ꠖꠟꠦ ꠖꠟꠦ ꠛꠣꠞ ꠇꠞꠝꠥ।
EXO 7:5 ꠝꠤꠡꠞꠞ ꠝꠣꠎꠦ ꠀꠝꠣꠞ ꠘꠤꠎꠞ ꠀꠔ ꠟꠣꠉꠣꠁꠝꠥ, ꠝꠤꠡꠞꠤ ꠅꠇꠟꠞ ꠝꠣꠎ ꠕꠣꠇꠤ ꠛꠘꠤ ꠁꠍꠞꠣꠁꠟꠞꠦ ꠛꠣꠞ ꠇꠞꠤꠀ ꠀꠘꠝꠥ, ꠅꠃꠖꠤꠘ ꠔꠣꠞꠣ ꠛꠥꠎꠛꠣ ꠀꠝꠤꠃ ꠝꠣꠛꠥꠖ।”
EXO 7:6 ꠛꠣꠖꠦ ꠝꠥꠍꠣ ꠀꠞ ꠢꠣꠞꠥꠘꠦ ꠅꠃꠟꠣ ꠇꠞꠟꠣ, ꠝꠣꠛꠥꠖꠞ ꠢꠥꠇꠥꠝ ꠝꠣꠚꠤꠇ ꠇꠣꠝ ꠇꠞꠟꠣ।
EXO 7:7 ꠚꠦꠞꠣꠃꠘꠞ ꠟꠉꠦ ꠝꠣꠔ-ꠇꠕꠣꠞ ꠡꠝꠄ ꠝꠥꠍꠣꠞ ꠛꠄꠅꠡ ꠀꠍꠤꠟ ꠀꠡꠤ, ꠀꠞ ꠢꠣꠞꠥꠘꠞ ꠔꠤꠞꠣꠡꠤ ꠛꠞꠍ।
EXO 7:8 ꠅꠃ ꠡꠝꠄ ꠝꠣꠛꠥꠖꠦ ꠝꠥꠍꠣ ꠀꠞ ꠢꠣꠞꠥꠘꠞꠦ ꠇꠁꠟꠣ,
EXO 7:9 “ꠚꠦꠞꠣꠃꠘꠦ ꠎꠦꠛꠟꠣ ꠇꠁꠛ, ꠔꠥꠝꠞꠣꠞ ꠘꠤꠎꠞ ꠇꠥꠘꠥ ꠇꠦꠞꠣꠝꠔꠤ ꠇꠣꠝ ꠖꠦꠈꠣꠅ, ꠔꠦꠃ ꠔꠥꠝꠤ ꠢꠣꠞꠥꠘꠞꠦ ꠇꠁꠅ, ꠔꠣꠞ ꠟꠣꠑꠤ ꠘꠤꠀ ꠚꠦꠞꠣꠃꠘꠞ ꠍꠣꠝꠘꠦ ꠚꠣꠟꠣꠁꠔ, ꠚꠣꠟꠣꠘꠤꠞ ꠟꠉꠦ ꠟꠉꠦꠃ ꠁꠐꠣ ꠢꠣꠚ ꠅꠁꠎꠤꠛ।”
EXO 7:10 ꠛꠣꠖꠦ ꠝꠥꠍꠣ ꠀꠞ ꠢꠣꠞꠥꠘ ꠚꠦꠞꠣꠃꠘꠞ ꠉꠦꠍꠦ ꠉꠦꠟꠣ, ꠉꠤꠀ ꠝꠣꠛꠥꠖꠞ ꠢꠥꠇꠥꠝ ꠝꠣꠚꠤꠇ ꠇꠣꠝ ꠇꠞꠟꠣ। ꠢꠣꠞꠥꠘꠦ ꠚꠦꠞꠣꠃꠘ ꠀꠞ ꠔꠣꠞ ꠃꠎꠤꠞ-ꠘꠣꠎꠤꠞꠞ ꠍꠣꠝꠘꠦ ꠢꠃ ꠟꠣꠑꠤ ꠚꠣꠟꠣꠘꠤꠞ ꠟꠉꠦ ꠟꠉꠦꠃ ꠁꠐꠣ ꠢꠣꠚ ꠅꠁꠉꠦꠟ।
EXO 7:11 ꠅꠃ ꠚꠦꠞꠣꠃꠘꠦꠅ ꠔꠣꠞ ꠉꠥꠘꠤꠘ ꠀꠞ ꠎꠣꠖꠥꠉꠤꠞ ꠅꠇꠟꠞꠦ ꠀꠘꠣꠁꠟ, ꠔꠣꠞꠣꠅ ꠔꠣꠞꠣꠞ ꠎꠣꠖꠥ-ꠝꠘꠔ꠆ꠞ ꠖꠤꠀ ꠅꠃꠟꠣ ꠖꠦꠈꠣꠁꠟꠣ।
EXO 7:12 ꠔꠣꠞꠣ ꠢꠇꠟꠦꠃ ꠎꠣꠞꠎꠤꠞ ꠟꠣꠑꠤ ꠍꠣꠠꠟ, ꠀꠞ ꠄꠅꠔꠣ ꠢꠣꠚ ꠅꠁꠉꠦꠟ, ꠅꠁꠟꠦ ꠢꠣꠞꠥꠘꠞ ꠟꠣꠑꠤꠄ ꠔꠣꠞꠣꠞ ꠢꠇ꠆ꠇꠟ ꠟꠣꠑꠤꠞꠦ ꠉꠤꠟꠤꠟꠤꠟ।
EXO 7:13 ꠁꠔꠣ ꠖꠦꠈꠤꠀꠅ ꠚꠦꠞꠣꠃꠘꠞ ꠖꠤꠟ ꠙꠣꠡꠣꠘ ꠞꠁꠟ, ꠢꠦ ꠄꠞꠣꠞ ꠝꠣꠔꠦ ꠇꠣꠘ ꠖꠤꠟ ꠘꠣ, ꠎꠦꠟꠣ ꠝꠣꠛꠥꠖꠦ ꠀꠉꠦ ꠇꠁꠍꠟꠣ।
EXO 7:14 ꠛꠣꠖꠦ ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ, “ꠚꠦꠞꠣꠃꠘꠞ ꠖꠤꠟ ꠔ ꠙꠣꠡꠣꠘ, ꠢꠦ ꠝꠣꠘꠡꠞꠦ ꠍꠣꠠꠔꠦ ꠞꠣꠎꠤ ꠘꠣꠄ।
EXO 7:15 ꠔꠦ ꠔꠥꠝꠤ ꠛꠤꠀꠘꠤ ꠛꠣꠟꠣ ꠚꠦꠞꠣꠃꠘꠞ ꠉꠦꠍꠦ ꠎꠣꠁꠅ, ꠉꠦꠟꠦ ꠖꠦꠈꠛꠣꠄ ꠢꠦ ꠙꠣꠘꠤꠞ ꠉꠦꠍꠦ ꠎꠣꠁꠛ, ꠔꠥꠝꠤ ꠔꠣꠞ ꠟꠉꠦ ꠖꠦꠈꠣ ꠇꠞꠣꠞ ꠟꠣꠉꠤ ꠘꠤꠟ ꠘꠖꠞ ꠙꠣꠞꠅ ꠃꠛꠣꠁꠅ। ꠔꠥꠝꠣꠞ ꠎꠦ ꠟꠣꠑꠤ ꠢꠣꠚ ꠅꠁꠍꠤꠟ, ꠅꠃ ꠟꠣꠑꠤ ꠀꠔꠅ ꠇꠞꠤ ꠘꠤꠅ।
EXO 7:16 ꠘꠤꠀ ꠔꠣꠞꠦ ꠇꠁꠅ, ‘ꠝꠣꠛꠥꠖ, ꠎꠦꠁꠘ ꠁꠛꠞꠣꠘꠤ ꠅꠇꠟꠞ ꠀꠟ꠆ꠟꠣ, ꠔꠣꠁꠘ ꠘꠤꠎꠦ ꠀꠝꠣꠞꠦ ꠙꠣꠑꠣꠁꠍꠂꠘ ꠀꠙꠘꠣꠞꠦ ꠅꠈꠣꠘ ꠇꠁꠔꠣꠝ, ꠔꠥꠝꠤ ꠀꠝꠣꠞ ꠛꠘ꠆ꠖꠣ ꠅꠇꠟꠞꠦ ꠍꠣꠠꠤ ꠖꠦꠅ, ꠔꠣꠞꠣ ꠀꠝꠣꠞ ꠛꠘ꠆ꠖꠦꠉꠤ ꠇꠞꠣꠞ ꠟꠣꠉꠤ ꠝꠞꠥꠜꠥꠝꠤꠔ ꠢꠤꠎꠞꠔ ꠇꠞꠃꠇ, ꠔꠣ-ꠅ ꠅꠈꠘꠅ ꠔꠥꠝꠤ ꠢꠥꠘꠞꠣꠄ ꠘꠣ।
EXO 7:17 ꠄꠞꠟꠣꠉꠤ ꠅꠈꠘ ꠔꠥꠝꠤ ꠛꠥꠎꠛꠣꠄ, ꠀꠝꠤꠃ ꠝꠣꠛꠥꠖ।’ ꠅꠈꠣꠘ ꠇꠁꠀ ꠢꠣꠞꠤ ꠔꠥꠝꠤ ꠇꠁꠅ, ‘ꠖꠦꠈꠃꠇ꠆ꠇꠣ, ꠀꠝꠤ ꠘꠤꠎꠞ ꠀꠔꠞ ꠟꠣꠑꠤ ꠖꠤꠀ ꠅꠃ ꠘꠤꠟ ꠘꠖꠞ ꠙꠣꠘꠤꠔ ꠛꠣꠠꠤ ꠝꠣꠞꠝꠥ, ꠀꠞ ꠢꠇ꠆ꠇꠟ ꠙꠣꠘꠤ ꠟꠃ ꠅꠁꠎꠤꠛ।
EXO 7:18 ꠢꠇ꠆ꠇꠟ ꠝꠣꠍ ꠝꠞꠤꠎꠤꠛ ꠀꠞ ꠙꠌꠣ ꠉꠘ꠆ꠖ ꠛꠣꠞ ꠅꠁꠛ, ꠔꠦꠃ ꠝꠤꠡꠞꠤ ꠅꠇꠟꠦ ꠅꠃ ꠘꠤꠟ ꠘꠖꠞ ꠙꠣꠘꠤ ꠈꠣꠁꠔꠣ ꠙꠣꠞꠔꠣ ꠘꠣꠄ।’ ”
EXO 7:19 ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ, “ꠢꠣꠞꠥꠘꠞꠦ ꠅꠃ ꠇꠕꠣ ꠇꠅ, ꠔꠥꠝꠤ ꠘꠤꠎꠞ ꠟꠣꠑꠤ ꠟꠁꠀ ꠝꠤꠡꠞꠤ ꠅꠇꠟꠞ ꠢꠇ꠆ꠇꠟ ꠙꠣꠘꠤꠞ ꠃꠙꠞꠦ, ꠖꠦꠡꠞ ꠉꠣꠋ-ꠘꠣꠟꠣ, ꠈꠣꠟ-ꠛꠤꠟ, ꠀꠅꠞ-ꠛꠣꠅꠞ ꠌꠣꠁꠞꠅꠛꠣꠄ ꠔꠥꠝꠣꠞ ꠀꠔ ꠛꠣꠠꠣꠅ, ꠔꠦꠃ ꠁꠔꠣꠞ ꠢꠇ꠆ꠇꠟ ꠙꠣꠘꠤ ꠟꠃ ꠅꠁꠎꠤꠛ। ꠙꠣꠔ꠆ꠔꠞ ꠈꠥꠖꠤꠀ ꠛꠣꠘꠣꠁꠟ ꠛꠣ ꠟꠣꠇꠠꠤꠞ ꠙꠣꠔꠤꠟ-ꠇꠟꠡꠞ ꠝꠣꠎꠦ ꠕꠅꠀ ꠙꠣꠘꠤꠅ ꠟꠃ ꠅꠁꠎꠤꠛ।”
EXO 7:20 ꠅꠃ ꠝꠥꠍꠣ ꠀꠞ ꠢꠣꠞꠥꠘꠦ ꠝꠣꠛꠥꠖꠞ ꠢꠥꠇꠥꠝ ꠝꠣꠚꠤꠇ ꠅꠃꠟꠣ ꠇꠞꠟꠣ, ꠔꠣꠁꠘ ꠟꠣꠑꠤ ꠃꠌꠣ ꠇꠞꠤ ꠚꠦꠞꠣꠃꠘ ꠀꠞ ꠔꠣꠞ ꠃꠎꠤꠞ-ꠘꠣꠎꠤꠞꠞ ꠍꠣꠝꠘꠦ ꠘꠤꠟ ꠘꠖꠞ ꠙꠣꠘꠤꠔ ꠛꠣꠠꠤ ꠝꠣꠞꠟꠣ, ꠔꠦꠃ ꠢꠇꠟ ꠙꠣꠘꠤ ꠟꠃ ꠅꠁꠉꠦꠟ।
EXO 7:21 ꠘꠤꠟ ꠘꠖꠞ ꠢꠇꠟ ꠝꠣꠍ ꠝꠞꠤꠉꠦꠟ, ꠢꠇꠟ ꠙꠣꠘꠤꠔ ꠙꠌꠣ ꠉꠘ꠆ꠖ ꠛꠣꠞ ꠅꠁꠟ, ꠝꠤꠡꠞꠤ ꠅꠇꠟꠦ ꠙꠣꠘꠤ ꠀꠞ ꠈꠣꠁꠔꠣ ꠙꠣꠞꠟꠣ ꠘꠣ, ꠝꠤꠡꠞ ꠖꠦꠡꠞ ꠢꠇꠟ ꠙꠣꠘꠤ ꠟꠃ ꠅꠁꠉꠦꠟ।
EXO 7:22 ꠝꠤꠡꠞꠤ ꠎꠣꠖꠥꠉꠤꠞ ꠅꠇꠟꠦꠅ ꠔꠣꠞꠣꠞ ꠎꠣꠖꠥ-ꠝꠘꠔ꠆ꠞ ꠍꠣꠠꠤꠀ ꠅꠃꠟꠣ ꠇꠞꠟ, ꠄꠔꠦ ꠚꠦꠞꠣꠃꠘꠞ ꠖꠤꠟ ꠙꠣꠡꠣꠘ ꠞꠁꠟ। ꠢꠦ ꠄꠞꠣꠞ ꠝꠣꠔꠅ ꠇꠣꠘ ꠖꠤꠟ ꠘꠣ, ꠎꠦꠟꠣ ꠝꠣꠛꠥꠖꠦ ꠀꠉꠦ ꠇꠁꠍꠟꠣ।
EXO 7:23 ꠛꠣꠖꠦ ꠚꠦꠞꠣꠃꠘꠦ ꠝꠥꠍꠣ ꠀꠞ ꠢꠣꠞꠥꠘꠞꠦ ꠙꠤꠍ ꠖꠤꠀ ꠔꠣꠞ ꠞꠣꠎꠛꠣꠠꠤꠔ ꠉꠦꠟꠉꠤ, ꠁꠔꠣ ꠇꠥꠘ꠆ꠔꠣꠔꠃ ꠇꠣꠘ ꠖꠤꠟ ꠘꠣ।
EXO 7:24 ꠅꠁꠟꠦ ꠇꠥꠘꠥ ꠝꠤꠡꠞꠤꠄ ꠉꠣꠋꠉꠞ ꠙꠣꠘꠤ ꠈꠣꠁꠔꠦ ꠘꠣ ꠙꠣꠞꠣꠄ, ꠙꠣꠘꠤ ꠈꠣꠅꠀꠞ ꠟꠣꠉꠤ ꠉꠣꠋꠉꠞ ꠙꠣꠞꠞ ꠌꠣꠁꠞꠅꠛꠣꠄ ꠔꠣꠞꠣ ꠉꠣꠔ ꠈꠥꠖꠤꠟꠣ।
EXO 7:25 ꠘꠤꠟ ꠘꠖꠞ ꠙꠣꠘꠤꠔ ꠝꠣꠛꠥꠖꠞ ꠉꠎꠛ ꠘꠣꠎꠤꠟ ꠅꠀꠞ ꠛꠣꠖꠦ ꠡꠣꠔ ꠖꠤꠘ ꠉꠥꠎꠞꠤ ꠉꠦꠟ।
EXO 8:1 ꠅꠃ ꠡꠣꠔ ꠖꠤꠘ ꠛꠣꠖꠦ ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ, “ꠔꠥꠝꠤ ꠚꠦꠞꠣꠃꠘꠞ ꠉꠦꠍꠦ ꠎꠣꠅ, ꠉꠤꠀ ꠔꠣꠞꠦ ꠇꠅ, ꠝꠣꠛꠥꠖꠦ ꠘꠤꠎꠦ ꠇꠁꠞꠣ, ꠀꠝꠣꠞ ꠈꠦꠎꠝꠔ ꠇꠞꠣꠞ ꠟꠣꠉꠤ ꠀꠝꠣꠞ ꠛꠘ꠆ꠖꠣ ꠅꠇꠟꠞꠦ ꠍꠣꠠꠤ ꠖꠦꠅ।
EXO 8:2 ꠔꠣꠞꠣꠞꠦ ꠘꠣ ꠍꠣꠠꠤꠀ ꠇꠥꠘꠥ ꠛꠣꠗꠣ ꠖꠤꠟꠦ, ꠀꠝꠤ ꠛꠦꠋ ꠖꠤꠀ ꠔꠥꠝꠣꠞ ꠀꠡ꠆ꠔꠣ ꠖꠦꠡꠅ ꠉꠎꠛ ꠓꠣꠟꠝꠥ।
EXO 8:3 ꠀꠡ꠆ꠔꠣ ꠘꠤꠟ ꠘꠖ ꠛꠦꠋꠉꠦ ꠜꠞꠤꠎꠤꠛꠣ, ꠀꠞ ꠁꠔꠣ ꠀꠁꠀ ꠔꠥꠝꠣꠞ ꠞꠣꠎꠛꠣꠠꠤꠔ, ꠢꠥꠔꠤꠛꠣꠞ ꠊꠞꠅ, ꠔꠥꠝꠣꠞ ꠛꠤꠍꠘꠣꠔ ꠃꠑꠤꠛꠣ। ꠀꠞ ꠔꠥꠝꠣꠞ ꠃꠎꠤꠞ-ꠘꠣꠎꠤꠞꠞ ꠊꠞꠅ, ꠔꠥꠝꠣꠞ ꠙ꠆ꠞꠎꠣ ꠅꠇꠟꠞ ꠊꠞꠅ, ꠔꠥꠝꠣꠞ ꠃꠘ꠆ꠖꠣꠟ ꠀꠞ ꠙꠤꠑꠣ ꠛꠣꠘꠣꠁꠛꠣꠞ ꠉꠣꠝꠟꠣꠔꠅ ꠀꠁꠀ ꠢꠣꠝꠣꠁꠛꠣ।
EXO 8:4 ꠔꠥꠝꠣꠞ, ꠀꠞ ꠔꠥꠝꠣꠞ ꠃꠎꠤꠞ-ꠘꠣꠎꠤꠞꠞ, ꠀꠞ ꠙ꠆ꠞꠎꠣ ꠅꠇꠟꠞ ꠉꠔꠞꠅ ꠛꠦꠋ ꠃꠑꠤꠛꠣ।”
EXO 8:5 ꠛꠣꠖꠦ ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ, “ꠢꠣꠞꠥꠘꠞꠦ ꠇꠅ, ꠔꠥꠝꠤ ꠘꠤꠟ ꠘꠖ ꠀꠞ ꠈꠣꠟ-ꠛꠤꠟꠞ ꠃꠙꠞꠦ ꠢꠃ ꠟꠣꠑꠤ ꠀꠟꠣ ꠀꠔ ꠛꠣꠠꠣꠁꠀ ꠀꠡ꠆ꠔꠣ ꠝꠤꠡꠞꠅ ꠛꠦꠋ ꠀꠘꠣꠅ।”
EXO 8:6 ꠅꠃ ꠢꠣꠞꠥꠘꠦ ꠝꠤꠡꠞꠞ ꠢꠇꠟ ꠙꠣꠘꠤꠞ ꠃꠙꠞꠦ ꠔꠣꠘ ꠀꠔ ꠛꠣꠠꠣꠁꠟꠣ, ꠔꠦꠃ ꠛꠦꠋꠉꠣꠁꠘ꠆ꠔꠦ ꠀꠁꠀ ꠝꠤꠡꠞ ꠖꠦꠡ ꠜꠞꠤꠀ ꠎꠣꠝ ꠅꠁꠉꠦꠟꠣ, ꠇꠥꠘꠥ ꠎꠣꠉꠣ ꠈꠣꠟꠤ ꠞꠁꠟ ꠘꠣ।
EXO 8:7 ꠅꠁꠟꠦ ꠎꠣꠖꠥꠉꠤꠞ ꠅꠇꠟꠦꠅ ꠔꠣꠞꠣꠞ ꠎꠣꠖꠥ-ꠝꠘꠔ꠆ꠞ ꠖꠤꠀ ꠝꠤꠡꠞꠅ ꠅꠃꠟꠣ ꠛꠦꠋ ꠀꠘꠟ।
EXO 8:8 ꠛꠣꠖꠦ ꠚꠦꠞꠣꠃꠘꠦ ꠝꠥꠍꠣ ꠀꠞ ꠢꠣꠞꠥꠘꠞꠦ ꠀꠘꠣꠁꠀ ꠇꠁꠟꠣ, “ꠝꠣꠛꠥꠖꠞ ꠉꠦꠍꠦ ꠀꠞꠎ ꠇꠞꠅ, ꠔꠣꠁꠘ ꠀꠝꠣꠞ ꠉꠦꠍ ꠕꠣꠇꠤ ꠀꠞ ꠀꠝꠣꠞ ꠙ꠆ꠞꠎꠣ ꠅꠇꠟꠞ ꠉꠦꠍ ꠕꠣꠇꠤ ꠁ ꠛꠦꠋ ꠅꠇꠟ ꠢꠞꠣꠁꠀ ꠘꠦꠃꠇ꠆ꠇꠣ, ꠔꠣꠁꠟꠦ ꠀꠝꠤ ꠝꠣꠘꠡꠞꠦ ꠍꠣꠠꠤ ꠖꠤꠝꠥ, ꠎꠣꠔꠦ ꠔꠣꠞꠣ ꠉꠤꠀ ꠝꠣꠛꠥꠖꠞ ꠘꠣꠝꠦ ꠇꠥꠞꠛꠣꠘꠤ ꠇꠞꠔ ꠙꠣꠞꠦ।”
EXO 8:9 ꠅꠃꠉꠤ ꠝꠥꠍꠣꠄ ꠚꠦꠞꠣꠃꠘꠞꠦ ꠇꠁꠟꠣ, “ꠀꠙꠘꠦ ꠀꠝꠣꠞꠦ ꠑꠤꠇ ꠇꠞꠤ ꠇꠃꠇ꠆ꠇꠣ, ꠀꠝꠤ ꠇꠥꠘ ꠡꠝꠄꠇꠥꠞ ꠟꠣꠉꠤ ꠝꠤꠘꠔꠤ ꠇꠞꠔꠣꠝ, ꠇꠥꠘ ꠡꠝꠄ ꠀꠙꠘꠣꠞ ꠊꠞ, ꠀꠙꠘꠣꠞ ꠃꠎꠤꠞ-ꠘꠣꠎꠤꠞ ꠀꠞ ꠙ꠆ꠞꠎꠣ ꠅꠇꠟꠞ ꠊꠞ ꠕꠣꠇꠤ ꠛꠦꠋ ꠅꠇꠟ ꠢꠞꠤꠀ ꠎꠣꠁꠔꠣꠉꠤ, ꠉꠤꠀ ꠈꠣꠟꠤ ꠉꠣꠋꠉꠅ ꠞꠁꠔꠣ?”
EXO 8:10 ꠔꠣꠁꠘ ꠇꠁꠟꠣ “ꠇꠣꠁꠟꠇꠥꠞ ꠟꠣꠉꠤ।” ꠅꠃ ꠝꠥꠍꠣꠄ ꠇꠁꠟꠣ, “ꠀꠙꠘꠣꠞ ꠎꠛꠣꠘ ꠝꠔꠃ ꠅꠃꠇ, ꠎꠣꠔꠦ ꠀꠙꠘꠦ ꠛꠥꠎꠔꠣ ꠙꠣꠞꠂꠘ, ꠀꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠢꠝꠣꠘꠤ ꠀꠞ ꠇꠦꠃ ꠘꠣꠁ।
EXO 8:11 ꠛꠦꠋꠉꠣꠁꠘ꠆ꠔꠦ ꠀꠙꠘꠣꠞ ꠉꠦꠍ ꠕꠣꠇꠤ, ꠀꠙꠘꠣꠞ ꠊꠞ-ꠛꠣꠠꠤ ꠕꠣꠇꠤ, ꠀꠙꠘꠣꠞ ꠃꠎꠤꠞ-ꠘꠣꠎꠤꠞ ꠀꠞ ꠙ꠆ꠞꠎꠣ ꠅꠇꠟꠞ ꠊꠞ ꠕꠣꠇꠤ ꠢꠞꠤꠀ ꠉꠤꠀ ꠈꠣꠟꠤ ꠘꠤꠟ ꠘꠖꠅ ꠞꠁꠛꠣ।”
EXO 8:12 ꠝꠥꠍꠣ ꠀꠞ ꠢꠣꠞꠥꠘ ꠚꠦꠞꠣꠃꠘꠞ ꠉꠦꠍ ꠕꠣꠇꠤ ꠛꠣꠞꠦ ꠉꠦꠟꠣ, ꠉꠤꠀ ꠝꠥꠍꠣꠄ ꠝꠣꠛꠥꠖꠞ ꠉꠦꠍꠦ ꠚꠞꠤꠀꠖ ꠇꠞꠟꠣ, ꠚꠦꠞꠣꠃꠘꠞ ꠃꠙꠞ ꠕꠣꠇꠤ ꠛꠦꠋꠉꠞ ꠉꠎꠛ ꠢꠞꠣꠘꠤꠞ ꠟꠣꠉꠤ।
EXO 8:13 ꠝꠣꠛꠥꠖꠦ ꠝꠥꠍꠣꠞ ꠀꠞꠎꠤ ꠇꠛꠥꠟ ꠇꠞꠣꠄ, ꠔꠣꠞꠣꠞ ꠛꠣꠠꠤ-ꠊꠞ, ꠃꠑꠣꠘ ꠀꠞ ꠛꠘ꠆ꠖꠞ ꠢꠇꠟ ꠛꠦꠋ ꠝꠞꠤꠉꠦꠟ।
EXO 8:14 ꠀꠞ ꠝꠣꠘꠡꠦ ꠁꠔꠣꠞꠦ ꠎꠣꠉꠣꠄ ꠎꠣꠉꠣꠄ ꠖꠟꠣ ꠇꠞꠟꠦ, ꠙꠌꠤꠀ ꠖꠦꠡꠅ ꠉꠘ꠆ꠖ ꠛꠣꠞ ꠅꠁꠟ।
EXO 8:15 ꠅꠁꠟꠦ ꠚꠦꠞꠣꠃꠘꠦ ꠎꠦꠛꠟꠣ ꠖꠦꠈꠟ, ꠉꠎꠛ ꠔ ꠢꠞꠤꠉꠦꠍꠦ, ꠅꠃ ꠢꠦ ꠔꠣꠞ ꠖꠤꠟ ꠙꠣꠡꠣꠘ ꠇꠞꠤꠟ꠆ꠟ। ꠄꠞꠣꠞ ꠝꠣꠔꠅ ꠀꠞ ꠇꠣꠘ ꠖꠤꠟ ꠘꠣ, ꠎꠦꠟꠣ ꠝꠣꠛꠥꠖꠦ ꠀꠉꠦ ꠇꠁꠍꠟꠣ।
EXO 8:16 ꠛꠣꠖꠦ ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ, “ꠔꠥꠝꠤ ꠢꠣꠞꠥꠘꠞꠦ ꠇꠅ, ꠔꠥꠝꠤ ꠔꠥꠝꠣꠞ ꠟꠣꠑꠤ ꠛꠣꠠꠣꠁꠀ ꠝꠣꠐꠤꠞ ꠗꠥꠟꠤꠔ ꠛꠣꠠꠤ ꠝꠣꠞꠅ, ꠔꠦꠃ ꠁ ꠗꠥꠁꠟ ꠝꠡꠣ ꠅꠁꠀ ꠀꠡ꠆ꠔꠣ ꠝꠤꠡꠞ ꠖꠦꠡ ꠜꠞꠤꠎꠤꠛ।”
EXO 8:17 ꠔꠣꠞꠣ ꠅꠃꠟꠣ ꠇꠞꠟꠣ, ꠢꠣꠞꠥꠘꠦ ꠔꠣꠘ ꠟꠣꠑꠤ ꠀꠟꠣ ꠀꠔ ꠛꠣꠠꠣꠁꠀ ꠝꠣꠐꠤꠞ ꠗꠥꠟꠤꠔ ꠛꠣꠠꠤ ꠝꠣꠞꠟꠣ, ꠔꠦꠃ ꠝꠣꠐꠤꠞ ꠢꠇ꠆ꠇꠟ ꠗꠥꠁꠟ ꠝꠡꠣ ꠅꠁꠉꠦꠟ। ꠅꠃ ꠝꠡꠣꠄ ꠝꠣꠘꠥꠡ, ꠎꠣꠘꠥꠀꠞ ꠀꠞ ꠝꠤꠡꠞꠞ ꠢꠇ꠆ꠇꠟꠛꠣꠄ ꠜꠞꠤꠉꠦꠟ।
EXO 8:18 ꠀꠞ ꠎꠣꠖꠥꠉꠤꠞ ꠅꠇꠟꠦꠅ ꠔꠣꠞꠣꠞ ꠎꠣꠖꠥ-ꠝꠘꠔ꠆ꠞ ꠖꠤꠀ ꠅꠃꠟꠣ ꠝꠡꠣ ꠛꠣꠘꠣꠁꠔ ꠌꠣꠁꠟ, ꠅꠁꠟꠦ ꠙꠣꠞꠟ ꠘꠣ। ꠝꠣꠘꠥꠡ ꠀꠞ ꠎꠣꠘꠥꠀꠞꠞ ꠝꠣꠎꠦ ꠝꠡꠣ ꠞꠁꠟ।
EXO 8:19 ꠔꠦꠃ ꠎꠣꠖꠥꠉꠤꠞ ꠅꠇꠟꠦ ꠚꠦꠞꠣꠃꠘꠞꠦ ꠇꠁꠟꠣ, “ꠁꠔꠣ ꠔ ꠀꠟ꠆ꠟꠣꠞ ꠇꠥꠖꠞꠔ।” ꠔꠣ-ꠅ ꠚꠦꠞꠣꠃꠘꠞ ꠖꠤꠟ ꠙꠣꠡꠣꠘ ꠞꠁꠟ, ꠢꠦ ꠄꠞꠣꠞ ꠝꠣꠔꠦ ꠇꠣꠘ ꠖꠤꠟ ꠘꠣ, ꠎꠦꠟꠣ ꠝꠣꠛꠥꠖꠦ ꠀꠉꠦ ꠇꠁꠍꠟꠣ।
EXO 8:20 ꠛꠣꠖꠦ ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ, “ꠔꠥꠝꠤ ꠚꠎꠞꠦ ꠃꠑꠤꠀ ꠚꠦꠞꠣꠃꠘꠞ ꠉꠦꠍꠦ ꠀꠎꠤꠞ ꠅꠅ, ꠉꠦꠟꠦ ꠖꠦꠈꠛꠣꠄ ꠢꠦ ꠙꠣꠘꠤꠞ ꠉꠦꠍꠦ ꠀꠁꠛ। ꠔꠥꠝꠤ ꠔꠣꠞꠦ ꠅꠃꠟꠣ ꠇꠁꠅ, ꠝꠣꠛꠥꠖꠦ ꠘꠤꠎꠦ ꠇꠁꠞꠣ, ꠀꠝꠣꠞ ꠈꠦꠎꠝꠔ ꠇꠞꠣꠞ ꠟꠣꠉꠤ ꠔꠥꠝꠤ ꠀꠝꠣꠞ ꠛꠘ꠆ꠖꠣ ꠅꠇꠟꠞꠦ ꠍꠣꠠꠤ ꠖꠦꠅ।
EXO 8:21 ꠎꠥꠖꠤ ꠘꠣ ꠍꠣꠠꠅ ꠔꠣꠁꠟꠦ ꠀꠝꠤ ꠔꠥꠝꠣꠞ, ꠔꠥꠝꠣꠞ ꠃꠎꠤꠞ-ꠘꠣꠎꠤꠞ, ꠔꠥꠝꠣꠞ ꠙ꠆ꠞꠎꠣ ꠅꠇꠟꠞ ꠃꠙꠞꠦ, ꠀꠞ ꠔꠥꠝꠣꠞ ꠊꠞꠣꠁꠘ꠆ꠔꠞ ꠝꠣꠎꠦ ꠇꠣꠝꠠꠣꠅꠞꠣ ꠒꠣꠡ-ꠝꠣꠍꠤꠞ ꠙꠣꠟ ꠙꠣꠑꠣꠁꠝꠥ, ꠁꠔꠣ ꠙꠣꠟꠦ ꠙꠣꠟꠦ ꠀꠁꠀ ꠝꠤꠡꠞꠤ ꠅꠇꠟꠞ ꠊꠞꠅ ꠀꠞ ꠔꠣꠞꠣꠞ ꠛꠡꠔ-ꠜꠤꠐꠣ ꠡꠢ ꠢꠇꠟ ꠎꠣꠉꠣꠔ ꠎꠣꠝ ꠅꠁꠎꠤꠛꠣ।
EXO 8:22 ꠅꠁꠟꠦ ꠀꠝꠤ ꠀꠝꠣꠞ ꠛꠘ꠆ꠖꠣ ꠅꠇꠟꠞ ꠛꠡꠔ ꠈꠣꠘꠣ ꠉꠥꠡꠘ ꠄꠟꠣꠇꠣꠞꠦ ꠁꠔꠣ ꠕꠣꠇꠤ ꠛꠣꠌꠣꠁꠝꠥ, ꠁꠘꠅ ꠒꠣꠡ-ꠝꠣꠍꠤꠞ ꠙꠣꠟ ꠀꠁꠔꠣ ꠘꠣꠄ। ꠔꠦꠃ ꠔꠥꠝꠤ ꠛꠥꠎꠔꠣꠄ ꠙꠣꠞꠛꠣꠄ, ꠀꠝꠤ ꠀꠟ꠆ꠟꠣ ꠁ ꠖꠦꠡꠅ ꠀꠍꠤ।
EXO 8:23 ꠀꠝꠤ ꠔ ꠀꠝꠣꠞ ꠛꠘ꠆ꠖꠣ ꠀꠞ ꠔꠥꠝꠣꠞ ꠙ꠆ꠞꠎꠣꠞ ꠝꠣꠎꠦ ꠔꠚꠣꠔ-ꠙꠣꠞ꠆ꠕꠇ꠆ꠇ ꠇꠞꠝꠥ, ꠇꠣꠁꠟ ꠁ ꠘꠝꠥꠘꠣ ꠖꠦꠈꠛꠣꠄ।”
EXO 8:24 ꠀꠞ ꠝꠣꠛꠥꠖꠦ ꠅꠃꠟꠣ ꠇꠞꠟꠣ, ꠚꠦꠞꠣꠃꠘ ꠀꠞ ꠔꠣꠞ ꠃꠎꠤꠞ-ꠘꠣꠎꠤꠞꠞ ꠊꠞꠅ ꠇꠣꠝꠠꠣꠅꠞꠣ ꠒꠣꠡ-ꠝꠣꠍꠤꠞ ꠙꠣꠟ ꠀꠁꠟ, ꠀꠡ꠆ꠔꠣ ꠝꠤꠡꠞ ꠖꠦꠡꠞ ꠢꠇ꠆ꠇꠟꠛꠣꠄ ꠒꠣꠡ-ꠝꠣꠍꠤꠞ ꠟꠣꠉꠤ ꠡꠞ꠆ꠛꠘꠣꠡ ꠅꠁꠉꠦꠟ।
EXO 8:25 ꠔꠦꠃ ꠚꠦꠞꠣꠃꠘꠦ ꠝꠥꠍꠣ ꠀꠞ ꠢꠣꠞꠥꠘꠞꠦ ꠒꠣꠇꠣꠁꠀ ꠇꠁꠟꠣ, “ꠔꠥꠝꠞꠣ ꠎꠣꠅ, ꠖꠦꠡꠞ ꠜꠤꠔꠞꠦ ꠔꠥꠝꠞꠣꠞ ꠀꠟ꠆ꠟꠣꠞ ꠘꠣꠝꠦ ꠇꠥꠞꠛꠣꠘꠤ ꠇꠞꠅꠉꠤ।”
EXO 8:26 ꠝꠥꠍꠣꠄ ꠇꠁꠟꠣ, “ꠁꠟꠣ ꠇꠞꠣ ꠑꠤꠇ ꠘꠣꠄ, ꠇꠣꠞꠘ ꠀꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠘꠣꠝꠦ ꠝꠤꠡꠞꠤ ꠅꠇꠟꠞ ꠊꠤꠘ꠆ꠘꠣ ꠇꠞꠣ ꠇꠥꠞꠛꠣꠘꠤ ꠇꠞꠔꠦ ꠅꠁꠛ। ꠀꠞ ꠖꠦꠈꠃꠇ꠆ꠇꠣ, ꠝꠤꠡꠞꠤ ꠅꠇꠟꠞ ꠍꠣꠝꠘꠦ ꠔꠣꠞꠣꠞ ꠊꠤꠘ꠆ꠘꠣ ꠇꠞꠣ ꠇꠥꠞꠛꠣꠘꠤ ꠇꠞꠟꠦ ꠔꠣꠞꠣ ꠔ ꠀꠝꠞꠣꠞꠦ ꠙꠣꠔ꠆ꠔꠞꠖꠤ ꠁꠐꠣꠁꠀ ꠝꠣꠞꠤꠟꠤꠛꠣ।
EXO 8:27 ꠔꠦ ꠀꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠎꠦꠟꠣ ꠢꠥꠇꠥꠝ ꠇꠞꠛꠣ, ꠀꠝꠞꠣ ꠝꠞꠥꠜꠥꠝꠤꠞ ꠛꠣꠄ ꠔꠤꠘ ꠖꠤꠘꠞ ꠙꠕ ꠢꠞꠤꠀ ꠉꠤꠀ, ꠔꠣꠘ ꠘꠣꠝꠦ ꠅꠃꠟꠣ ꠇꠥꠞꠛꠣꠘꠤ ꠇꠞꠝꠥ।”
EXO 8:28 ꠚꠦꠞꠣꠃꠘꠦ ꠇꠁꠟꠣ, “ꠀꠝꠤ ꠔꠥꠝꠞꠣꠞꠦ ꠍꠣꠠꠤ ꠖꠤꠀꠞ, ꠔꠥꠝꠞꠣ ꠝꠞꠥꠜꠥꠝꠤꠔ ꠉꠤꠀ ꠔꠥꠝꠞꠣꠞ ꠀꠟ꠆ꠟꠣꠞ ꠇꠥꠞꠛꠣꠘꠤ ꠇꠞꠅ। ꠅꠁꠟꠦ ꠛꠦꠡꠤ ꠖꠥꠞꠁ ꠎꠣꠁꠅ ꠘꠣ, ꠔꠥꠝꠞꠣ ꠀꠝꠣꠞ ꠟꠣꠉꠤꠅ ꠝꠤꠘꠔ ꠇꠞꠤꠅ।”
EXO 8:29 ꠅꠃ ꠝꠥꠍꠣꠄ ꠇꠁꠟꠣ, “ꠖꠦꠈꠃꠇ꠆ꠇꠣ, ꠀꠝꠤ ꠀꠙꠘꠣꠞ ꠉꠦꠍ ꠕꠣꠇꠤ ꠢꠞꠤꠀ ꠉꠤꠀ ꠝꠣꠛꠥꠖꠞ ꠉꠦꠍꠦ ꠝꠤꠘꠔꠤ ꠇꠞꠝꠥ, ꠔꠦꠃ ꠇꠣꠁꠟ ꠀꠙꠘꠣꠞ ꠉꠦꠍ ꠕꠣꠇꠤ, ꠀꠙꠘꠣꠞ ꠃꠎꠤꠞ-ꠘꠣꠎꠤꠞ ꠀꠞ ꠀꠙꠘꠣꠞ ꠙ꠆ꠞꠎꠣ ꠅꠇꠟꠞ ꠉꠦꠍ ꠕꠣꠇꠤ ꠒꠣꠡ-ꠝꠣꠍꠤꠞ ꠙꠣꠟ ꠢꠞꠤꠎꠤꠛꠣ। ꠅꠁꠟꠦ ꠝꠣꠘꠡꠦ ꠝꠣꠛꠥꠖꠞ ꠇꠥꠞꠛꠣꠘꠤ ꠇꠞꠣꠔ ꠎꠣꠁꠔꠦ ꠀꠙꠘꠦ ꠀꠞ ꠇꠥꠘꠥ ꠜꠣꠅꠔꠣꠛꠣꠎꠤ ꠇꠞꠂꠘ ꠘꠣ ꠎꠣꠘꠥ।”
EXO 8:30 ꠛꠣꠖꠦ ꠝꠥꠍꠣꠄ ꠚꠦꠞꠣꠃꠘꠞ ꠉꠦꠍ ꠕꠣꠇꠤ ꠉꠤꠀ ꠝꠣꠛꠥꠖꠞ ꠉꠦꠍꠦ ꠝꠤꠘꠔꠤ ꠇꠞꠟꠣ।
EXO 8:31 ꠀꠞ ꠝꠣꠛꠥꠖꠦ ꠝꠥꠍꠣꠞ ꠀꠞꠎꠤ ꠝꠣꠚꠤꠇ ꠇꠣꠝ ꠇꠞꠟꠣ। ꠚꠦꠞꠣꠃꠘ, ꠔꠣꠞ ꠃꠎꠤꠞ-ꠘꠣꠎꠤꠞ ꠀꠞ ꠔꠣꠞ ꠙ꠆ꠞꠎꠣ ꠅꠇꠟꠞ ꠉꠦꠍ ꠕꠣꠇꠤ ꠢꠇ꠆ꠇꠟ ꠒꠣꠡ-ꠝꠣꠍꠤ ꠢꠞꠤꠉꠦꠟꠣ, ꠄꠉꠥꠅ ꠞꠁꠟ ꠘꠣ।
EXO 8:32 ꠅꠁꠟꠦ ꠢꠤꠞꠛꠣꠞ ꠚꠦꠞꠣꠃꠘꠦ ꠔꠣꠞ ꠖꠤꠟ ꠙꠣꠡꠣꠘ ꠇꠞꠤꠟ꠆ꠟ, ꠝꠣꠘꠡꠞꠦ ꠍꠣꠠꠟ ꠘꠣ।
EXO 9:1 ꠛꠣꠖꠦ ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ, “ꠔꠥꠝꠤ ꠚꠦꠞꠣꠃꠘꠞ ꠇꠣꠍꠣꠔ ꠉꠤꠀ ꠔꠣꠞꠦ ꠇꠅ, ꠝꠣꠛꠥꠖ, ꠎꠦꠁꠘ ꠁꠛꠞꠣꠘꠤ ꠅꠇꠟꠞ ꠀꠟ꠆ꠟꠣ, ꠔꠣꠁꠘ ꠘꠤꠎꠦ ꠇꠁꠞꠣ, ꠀꠝꠣꠞ ꠄꠛꠣꠖꠔ ꠇꠞꠣꠞ ꠟꠣꠉꠤ ꠀꠝꠣꠞ ꠛꠘ꠆ꠖꠣ ꠅꠇꠟꠞꠦ ꠍꠣꠠꠤ ꠖꠦꠅ।
EXO 9:2 ꠔꠣꠞꠣꠞꠦ ꠍꠣꠠꠔꠦ ꠞꠣꠎꠤ ꠘꠣ ꠅꠁꠀ ꠅꠈꠘꠅ ꠛꠣꠗꠣ ꠖꠤꠟꠦ,
EXO 9:3 ꠢꠥꠘꠤꠀ ꠞꠣꠈꠅ, ꠛꠘ꠆ꠖꠞ ꠝꠣꠎꠦ ꠔꠥꠝꠣꠞ ꠙꠡꠥꠁꠘ꠆ꠔꠞ ꠃꠙꠞꠦ, ꠊꠥꠠꠣꠁꠘ꠆ꠔꠞ, ꠉꠣꠗꠣꠁꠘ꠆ꠔꠞ, ꠃꠐ, ꠀꠞ ꠉꠞꠥ-ꠍꠣꠉꠟ, ꠝꠦꠠꠣꠁꠘ꠆ꠔꠞ ꠃꠙꠞꠦꠅ ꠀꠝꠤ ꠝꠣꠛꠥꠖꠦ ꠀꠔ ꠖꠤꠝꠥ, ꠛꠦꠕꠣꠄꠀ ꠛꠦꠝꠣꠞꠞ ꠝꠞꠇꠤ ꠍꠣꠠꠤꠝꠥ।
EXO 9:4 ꠅꠁꠟꠦ ꠀꠝꠤ ꠝꠣꠛꠥꠖꠦ ꠝꠤꠡꠞꠞ ꠀꠞ ꠛꠘꠤ ꠁꠍꠞꠣꠁꠟꠞ ꠙꠡꠥꠞ ꠝꠣꠎꠦ ꠔꠚꠣꠔ ꠇꠞꠝꠥ; ꠛꠘꠤ ꠁꠍꠞꠣꠁꠟꠞ ꠇꠥꠘꠥ ꠙꠡꠥ ꠝꠞꠔꠣ ꠘꠣꠄ।”
EXO 9:5 ꠀꠞ ꠝꠣꠛꠥꠖꠦ ꠡꠝꠄꠅ ꠑꠤꠇ ꠇꠞꠤꠀ ꠖꠤꠟꠣꠁꠟꠣ, ꠍꠣꠝꠘꠞ ꠇꠣꠁꠟ ꠔꠣꠁꠘ ꠖꠦꠡꠅ ꠁ ꠇꠣꠝ ꠇꠞꠛꠣ।
EXO 9:6 ꠢꠣꠍꠣꠃ ꠛꠣꠖꠞ ꠖꠤꠘ ꠝꠣꠛꠥꠖꠦ ꠅꠃꠟꠣꠃ ꠇꠞꠟꠣ, ꠔꠦꠃ ꠝꠤꠡꠞꠞ ꠢꠇ꠆ꠇꠟ ꠙꠡꠥ ꠝꠞꠤꠉꠦꠟꠣ, ꠅꠁꠟꠦ ꠛꠘꠤ ꠁꠍꠞꠣꠁꠟꠞ ꠄꠉꠥ ꠙꠡꠥꠅ ꠝꠞꠟꠣ ꠘꠣ।
EXO 9:7 ꠚꠦꠞꠣꠃꠘꠦ ꠝꠣꠘꠥꠡꠖꠤ ꠈꠛꠞ ꠟꠁꠀ ꠖꠦꠈꠟ, ꠛꠘꠤ ꠁꠍꠞꠣꠁꠟꠞ ꠄꠉꠥ ꠙꠡꠥꠅ ꠝꠞꠍꠂꠘ ꠘꠣ; ꠔꠣ-ꠅ ꠔꠣꠞ ꠖꠤꠟ ꠙꠣꠡꠣꠘ ꠞꠁꠟ, ꠢꠦ ꠝꠣꠘꠡꠞꠦ ꠍꠣꠠꠟ ꠘꠣ।
EXO 9:8 ꠅꠃ ꠝꠣꠛꠥꠖꠦ ꠝꠥꠍꠣ ꠀꠞ ꠢꠣꠞꠥꠘꠞꠦ ꠇꠁꠟꠣ, “ꠔꠥꠝꠞꠣ ꠖꠥꠁꠅꠎꠘꠦ ꠝꠥꠁꠐ ꠜꠞꠤꠀ ꠃꠘ꠆ꠖꠣꠟꠞ ꠍꠣꠟꠤ ꠀꠘꠅ, ꠀꠘꠤꠀ ꠝꠥꠍꠣꠄ ꠅꠃ ꠍꠣꠟꠤꠞꠦ ꠚꠦꠞꠣꠃꠘꠞ ꠍꠣꠝꠘꠦ ꠃꠙꠞꠦꠖꠤ ꠍꠤꠐꠣꠁ ꠖꠦꠅ।
EXO 9:9 ꠖꠦꠈꠛꠣꠄꠘꠦ, ꠁꠔꠣ ꠢꠣꠞꠣ ꠝꠤꠡꠞ ꠖꠦꠡꠞ ꠝꠣꠎꠦ ꠙꠣꠔꠟꠣ ꠗꠥꠁꠟ ꠅꠁꠀ ꠢꠇꠟ ꠎꠣꠉꠣꠞ ꠝꠣꠘꠥꠡ ꠀꠞ ꠙꠡꠥꠁꠘ꠆ꠔꠞ ꠉꠔꠞꠅ ꠉꠎꠛꠤ ꠛꠤꠡ-ꠚꠥꠞꠤ ꠅꠁꠛ।”
EXO 9:10 ꠔꠦꠃ ꠔꠣꠞꠣ ꠃꠘ꠆ꠖꠣꠟꠞ ꠍꠣꠟꠤ ꠀꠘꠤꠀ ꠚꠦꠞꠣꠃꠘꠞ ꠍꠣꠝꠘꠦ ꠃꠛꠣꠁꠀ, ꠝꠥꠍꠣꠄ ꠃꠙꠞꠦꠖꠤ ꠍꠤꠐꠣꠁ ꠖꠤꠟꠣ, ꠄꠔꠦ ꠝꠣꠘꠡꠞ ꠀꠞ ꠙꠡꠥꠁꠘ꠆ꠔꠞ ꠉꠔꠞꠅ ꠛꠤꠡ-ꠚꠥꠞꠤ ꠚꠥꠐꠤꠟ।
EXO 9:11 ꠀꠞ ꠅꠃ ꠚꠥꠞꠤꠞ ꠟꠣꠉꠤ ꠎꠣꠖꠥꠉꠤꠞ ꠅꠇꠟꠦ ꠝꠥꠍꠣꠞ ꠍꠣꠝꠘꠦ ꠃꠛꠣꠁꠔꠣ ꠙꠣꠞꠟꠣ ꠘꠣ, ꠢꠇꠟ ꠝꠤꠡꠞꠤ ꠀꠞ ꠎꠣꠖꠥꠉꠤꠞ ꠅꠇꠟꠞ ꠉꠔꠞꠅ-ꠅ ꠛꠤꠡ-ꠚꠥꠞꠤ ꠅꠁꠟ।
EXO 9:12 ꠅꠁꠟꠦ ꠝꠣꠛꠥꠖꠦ ꠚꠦꠞꠣꠃꠘꠞ ꠖꠤꠟ ꠙꠣꠡꠣꠘ ꠇꠞꠤꠟ꠆ꠟꠣ। ꠢꠦ ꠄꠞꠣꠞ ꠝꠣꠔꠦ ꠇꠣꠘ ꠖꠤꠟ ꠘꠣ, ꠎꠦꠟꠣ ꠝꠣꠛꠥꠖꠦ ꠀꠉꠦ ꠇꠁꠍꠟꠣ।
EXO 9:13 ꠛꠣꠖꠦ ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ, “ꠔꠥꠝꠤ ꠛꠤꠀꠘꠦ ꠃꠑꠤꠀ ꠚꠦꠞꠣꠃꠘꠞ ꠍꠣꠝꠘꠦ ꠃꠛꠣꠁꠀ ꠅꠃꠟꠣ ꠇꠁꠅ, ꠝꠣꠛꠥꠖ, ꠎꠦꠁꠘ ꠁꠛꠞꠣꠘꠤ ꠅꠇꠟꠞ ꠀꠟ꠆ꠟꠣ, ꠔꠣꠁꠘ ꠘꠤꠎꠦ ꠇꠁꠞꠣ, ꠀꠝꠣꠞ ꠄꠛꠣꠖꠔ ꠇꠞꠣꠞ ꠟꠣꠉꠤ ꠀꠝꠣꠞ ꠛꠘ꠆ꠖꠣ ꠅꠇꠟꠞꠦ ꠍꠣꠠꠤ ꠖꠦꠅ।
EXO 9:14 ꠘꠣꠁꠟꠦ ꠁꠚꠤꠞꠣ ꠀꠝꠤ ꠔꠥꠝꠣꠞ, ꠔꠥꠝꠣꠞ ꠃꠎꠤꠞ-ꠘꠣꠎꠤꠞ ꠀꠞ ꠔꠥꠝꠣꠞ ꠙ꠆ꠞꠎꠣ ꠅꠇꠟꠞ ꠝꠣꠎꠦ ꠀꠝꠣꠞ ꠢꠇ꠆ꠇꠟ ꠎꠣꠔꠞ ꠉꠎꠛ ꠍꠣꠠꠤꠝꠥ। ꠔꠦꠃ ꠔꠥꠝꠤ ꠛꠥꠎꠛꠣꠄ, ꠢꠣꠞꠣ ꠖꠥꠘꠤꠀꠁꠔ ꠀꠝꠣꠞ ꠢꠝꠣꠘꠤ ꠇꠦꠃ ꠘꠣꠁ।
EXO 9:15 ꠄꠞ ꠀꠉꠦꠃ ꠀꠝꠤ ꠀꠝꠣꠞ ꠀꠔ ꠛꠣꠠꠣꠁꠀ ꠛꠦꠕꠣꠄꠀ ꠝꠞꠇꠤ ꠖꠤꠀ ꠔꠥꠝꠣꠞꠦ ꠀꠞ ꠔꠥꠝꠣꠞ ꠙ꠆ꠞꠎꠣ ꠅꠇꠟꠞꠦ ꠝꠣꠞꠔꠣꠝ ꠙꠣꠞꠟꠣꠝ ꠅꠘꠦ, ꠔꠥꠝꠤ ꠖꠥꠘꠤꠀꠁ ꠕꠣꠇꠤ ꠛꠤꠘꠣꠡ ꠅꠁꠉꠦꠟꠣꠄ ꠅꠘꠦ।
EXO 9:16 ꠀꠍꠟꠦ ꠄꠞꠟꠣꠉꠤꠃ ꠀꠝꠤ ꠔꠥꠝꠣꠞꠦ ꠖꠥꠘꠤꠀꠁꠔ ꠅꠔꠖꠤꠘ ꠛꠣꠌꠣꠁꠍꠤ, ꠎꠣꠔꠦ ꠔꠥꠝꠣꠞꠦ ꠀꠝꠣꠞ ꠟꠤꠟꠣ-ꠈꠦꠟꠣ ꠖꠦꠈꠣꠁ, ꠀꠞ ꠢꠣꠞꠣ ꠖꠥꠘꠤꠀꠁꠔ ꠀꠝꠣꠞ ꠘꠣꠝ ꠎꠣꠁꠞ ꠅꠄ।
EXO 9:17 ꠔꠥꠝꠤ ꠅꠈꠘꠅ ꠀꠝꠣꠞ ꠛꠘ꠆ꠖꠣ ꠅꠇꠟꠞꠦ ꠍꠣꠠꠞꠣꠄ ꠘꠣ, ꠔꠥꠝꠣꠞ ꠛꠦꠐꠣꠉꠤꠞꠤ ꠖꠦꠈꠣꠁꠞꠣꠄ,
EXO 9:18 ꠔꠦ ꠖꠦꠈꠤꠅ, ꠇꠣꠁꠟ ꠁ ꠡꠝꠄꠄ ꠀꠝꠤ ꠅꠃ ꠟꠣꠈꠣꠘ ꠢꠤꠟ-ꠔꠥꠚꠣꠘ ꠀꠞ ꠝꠦꠊ ꠖꠤꠝꠥ, ꠎꠦꠔꠣ ꠝꠤꠡꠞꠞ ꠎꠘꠝ ꠕꠣꠇꠤ ꠀꠁꠎ ꠙꠞ꠆ꠎꠘ꠆ꠔ ꠇꠥꠘꠥꠖꠤꠘ ꠅꠁꠍꠦ ꠘꠣ।
EXO 9:19 ꠄꠞꠟꠣꠉꠤ ꠛꠘ꠆ꠖꠞ ꠝꠣꠎꠦ ꠔꠥꠝꠣꠞ ꠙꠡꠥꠁꠘ ꠀꠞ ꠎꠔꠔꠣ ꠀꠍꠦ, ꠁꠔꠣꠞꠦ ꠀꠘꠤꠀ ꠊꠞꠅ ꠢꠣꠞꠣꠅ; ꠝꠣꠘꠥꠡ ꠛꠣ ꠙꠡꠥꠁꠘ ꠎꠦꠔꠣ ꠊꠞꠅ ꠢꠣꠝꠣꠁꠔꠣ ꠘꠣꠄ, ꠁꠔꠣꠞ ꠃꠙꠞꠦ ꠢꠤꠟ ꠙꠠꠤꠀ ꠢꠇ꠆ꠇꠟꠐꠤ ꠝꠞꠛꠣ।”
EXO 9:20 ꠔꠦꠃ ꠚꠦꠞꠣꠃꠘꠞ ꠃꠎꠤꠞ-ꠘꠣꠎꠤꠞꠞ ꠝꠣꠎꠦ ꠎꠦꠞꠣ ꠝꠣꠛꠥꠖꠞ ꠎꠛꠣꠘꠦ ꠒꠞꠣꠁꠟꠣ, ꠔꠣꠞꠣ ꠎꠟꠖꠤ ꠇꠞꠤ ꠘꠤꠎꠞ ꠉꠥꠟꠣꠝ ꠀꠞ ꠙꠡꠥꠁꠘ꠆ꠔꠞꠦ ꠊꠞꠞ ꠜꠤꠔꠞꠦ ꠀꠘꠣꠁꠟꠣ।
EXO 9:21 ꠅꠁꠟꠦ ꠝꠣꠛꠥꠖꠞ ꠎꠛꠣꠘꠞꠦ ꠎꠦꠔꠣꠄ ꠖꠣꠝ ꠖꠤꠟ ꠘꠣ, ꠔꠣꠞꠣꠞ ꠉꠥꠟꠣꠝ ꠀꠞ ꠙꠡꠥꠁꠘ꠆ꠔꠞꠦ ꠛꠘ꠆ꠖꠞ ꠝꠣꠎꠦ ꠕꠁꠟ।
EXO 9:22 ꠛꠣꠖꠦ ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ, “ꠔꠥꠝꠤ ꠀꠍꠝꠣꠘꠞ ꠛꠣꠄ ꠘꠤꠎꠞ ꠀꠔ ꠛꠣꠠꠣꠅ, ꠔꠦꠃ ꠝꠤꠡꠞꠞ ꠢꠇ꠆ꠇꠟ ꠎꠣꠉꠣꠔ ꠢꠤꠟ-ꠔꠥꠚꠣꠘ ꠅꠁꠛ, ꠝꠤꠡꠞꠞ ꠝꠣꠘꠥꠡ, ꠙꠡꠥ ꠀꠞ ꠈꠦꠔꠞ ꠢꠇꠟ ꠉꠣꠍ-ꠉꠣꠍꠣꠟꠤꠞ ꠃꠙꠞꠦ ꠁꠔꠣ ꠙꠠꠛ।”
EXO 9:23 ꠅꠃ ꠝꠥꠍꠣꠄ ꠔꠣꠘ ꠀꠔꠞ ꠟꠣꠑꠤ ꠃꠙꠞꠦꠖꠤ ꠔꠥꠟꠟꠣ, ꠝꠣꠛꠥꠖꠦ ꠝꠤꠡꠞ ꠖꠦꠡꠞ ꠃꠙꠞꠦ ꠝꠦꠊꠞ ꠒꠣꠇ-ꠎꠤꠟꠇꠣꠘꠤꠞ ꠟꠉꠦ ꠢꠤꠟ-ꠔꠥꠚꠣꠘ ꠖꠦꠅꠀꠁꠟꠣ; ꠀꠞ ꠀꠍꠝꠣꠘꠤ ꠑꠣꠐꠣ ꠎꠝꠤꠘꠅ ꠙꠠꠟ।
EXO 9:24 ꠅꠃ ꠢꠤꠟꠞ ꠟꠉꠦ ꠝꠦꠊꠞ ꠎꠤꠟꠇꠣꠘꠤ ꠀꠞ ꠑꠣꠐꠣꠅ ꠀꠍꠤꠟ। ꠁ ꠟꠣꠈꠣꠘ ꠉꠎꠛꠤ ꠢꠤꠟ-ꠔꠥꠚꠣꠘ ꠝꠤꠡꠞ ꠖꠦꠡꠞ ꠎꠘꠝ ꠕꠣꠇꠤ ꠇꠥꠘꠥꠖꠤꠘꠅ ꠅꠁꠍꠦ ꠘꠣ।
EXO 9:25 ꠢꠣꠞꠣ ꠝꠤꠡꠞ ꠖꠦꠡꠞ ꠛꠘ꠆ꠖꠞ ꠝꠣꠎꠞ ꠢꠇ꠆ꠇꠟ ꠝꠣꠘꠥꠡ ꠀꠞ ꠙꠡꠥꠁꠘ꠆ꠔꠞ ꠃꠙꠞꠦꠅ ꠈꠥꠛ ꠎꠥꠞꠦ ꠎꠥꠞꠦ ꠢꠤꠟ ꠙꠠꠟ, ꠀꠞ ꠈꠦꠔꠞ ꠢꠇꠟ ꠚꠡꠟ ꠘꠡ꠆ꠐ ꠅꠁꠉꠦꠟ ꠀꠞ ꠢꠇꠟ ꠉꠣꠍ-ꠉꠣꠍꠣꠟꠤꠅ ꠜꠣꠋꠉꠤ ꠉꠦꠟ।
EXO 9:26 ꠈꠣꠟꠤ ꠛꠘꠤ ꠁꠍꠞꠣꠁꠟꠞ ꠛꠡꠔ ꠈꠣꠘꠣ ꠉꠥꠡꠘ ꠄꠟꠣꠇꠣꠔ ꠢꠤꠟ-ꠔꠥꠚꠣꠘ ꠅꠁꠟ ꠘꠣ।
EXO 9:27 ꠛꠣꠖꠦ ꠚꠦꠞꠣꠃꠘꠦ ꠝꠣꠘꠥꠡ ꠙꠣꠑꠣꠁꠀ ꠝꠥꠍꠣ ꠀꠞ ꠢꠣꠞꠥꠘꠞꠦ ꠀꠘꠣꠁꠀ ꠇꠁꠟ, “ꠁꠚꠤꠞꠣ ꠀꠝꠤ ꠅꠙꠞꠣꠗ ꠇꠞꠍꠤ। ꠝꠣꠛꠥꠖ ꠔ ꠙꠣꠇ-ꠙꠛꠤꠔ꠆ꠞ, ꠅꠁꠟꠦ ꠀꠝꠤ ꠀꠞ ꠀꠝꠣꠞ ꠙ꠆ꠞꠎꠣ ꠅꠇꠟ ꠅꠙꠞꠣꠗꠤ।
EXO 9:28 ꠔꠦ ꠉꠎꠛꠤ ꠝꠦꠊꠞ ꠒꠣꠇ ꠀꠞ ꠢꠤꠟ-ꠔꠥꠚꠣꠘ ꠔ ꠛꠃꠔ ꠅꠁꠍꠦ, ꠀꠞ ꠎꠣꠞꠔꠣꠝ ꠙꠣꠞꠤꠀꠞ ꠘꠣ। ꠄꠞꠟꠣꠉꠤ ꠀꠝꠤ ꠅꠈꠘ ꠔꠥꠝꠞꠣꠞꠦ ꠍꠣꠠꠤ ꠖꠤꠝꠥ, ꠀꠞ ꠀꠐꠇꠣꠁꠔꠣꠝ ꠘꠣꠄ। ꠔꠥꠝꠞꠣ ꠀꠝꠣꠞ ꠟꠣꠉꠤ ꠝꠣꠛꠥꠖꠞ ꠉꠦꠍꠦ ꠝꠤꠘꠔ ꠇꠞꠅ।”
EXO 9:29 ꠝꠥꠍꠣꠄ ꠔꠣꠞꠦ ꠇꠁꠟꠣ, “ꠀꠝꠤ ꠐꠣꠃꠘꠞ ꠛꠣꠁꠞꠦ ꠉꠤꠀꠃ ꠝꠣꠛꠥꠖꠞ ꠉꠦꠍꠦ ꠀꠔ ꠔꠥꠟꠝꠥ, ꠔꠦꠃ ꠝꠦꠊꠞ ꠒꠣꠇ, ꠢꠤꠟ-ꠔꠥꠚꠣꠘ ꠛꠘ꠆ꠖ ꠅꠁꠎꠤꠛ, ꠎꠣꠔꠦ ꠀꠙꠘꠦ ꠛꠥꠎꠔꠣ ꠙꠣꠞꠂꠘ ꠁ ꠖꠥꠘꠤꠀꠁ ꠔ ꠝꠣꠛꠥꠖꠞ।
EXO 9:30 ꠅꠁꠟꠦ ꠀꠝꠤ ꠔ ꠎꠣꠘꠤ, ꠀꠙꠘꠦ ꠛꠣ ꠀꠙꠘꠣꠞ ꠃꠎꠤꠞ-ꠘꠣꠎꠤꠞ ꠅꠇꠟꠦ ꠅꠈꠘꠅ ꠀꠟ꠆ꠟꠣ ꠝꠣꠛꠥꠖꠞꠦ ꠒꠞꠣꠁꠞꠣ ꠘꠣ।”
EXO 9:31 ꠁ ꠡꠝꠄ ꠈꠦꠔꠞ ꠢꠇꠟ ꠘꠣꠟꠤꠀ ꠉꠣꠍ ꠀꠞ ꠛꠣꠞ꠆ꠟꠤ ꠚꠡꠟ ꠘꠡ꠆ꠐ ꠅꠁꠉꠦꠟ, ꠇꠣꠞꠘ ꠘꠣꠟꠤꠀ ꠉꠣꠍꠞ ꠚꠥꠟ ꠀꠞ ꠛꠣꠞ꠆ꠟꠤꠞ ꠍꠠꠣ ꠛꠣꠞ ꠅꠁꠉꠦꠍꠤꠟ।
EXO 9:32 ꠅꠁꠟꠦ ꠇꠥꠘꠥꠎꠣꠔꠞ ꠉꠝꠞ ꠉꠣꠍ ꠛꠠ ꠘꠣ ꠅꠀꠄ ꠁꠔꠣꠞ ꠈꠦꠔꠤ ꠅꠁꠟ ꠘꠣ।
EXO 9:33 ꠔꠦꠃ ꠝꠥꠍꠣꠄ ꠚꠦꠞꠣꠃꠘꠞ ꠍꠣꠝꠘꠦ ꠕꠣꠇꠤ ꠐꠣꠃꠘꠞ ꠛꠣꠞꠦ ꠉꠤꠀ ꠝꠣꠛꠥꠖꠞ ꠉꠦꠍꠦ ꠀꠔ ꠔꠥꠟꠟꠣ, ꠟꠉꠦ ꠟꠉꠦ ꠝꠦꠊꠞ ꠒꠣꠇ, ꠢꠤꠟ-ꠔꠥꠚꠣꠘ ꠛꠘ꠆ꠖ ꠅꠁꠟ, ꠝꠦꠊꠞ ꠎꠠꠤꠅ ꠛꠘ꠆ꠖ ꠅꠁꠉꠦꠟ।
EXO 9:34 ꠅꠁꠟꠦ ꠚꠦꠞꠣꠃꠘ ꠀꠞ ꠔꠣꠞ ꠃꠎꠤꠞ-ꠘꠣꠎꠤꠞ ꠅꠇꠟꠦ ꠝꠦꠊ, ꠝꠦꠊꠞ ꠒꠣꠇ ꠀꠞ ꠢꠤꠟ ꠙꠠꠣ ꠛꠘ꠆ꠖ ꠅꠁꠉꠦꠍꠦ ꠖꠦꠈꠤꠀ ꠔꠣꠞꠣꠞ ꠖꠤꠟ ꠙꠣꠡꠣꠘ ꠇꠞꠤꠟ꠆ꠟꠣ। ꠚꠦꠞꠣꠃꠘꠦ ꠢꠤꠞꠛꠣꠞ ꠉꠥꠘꠣ ꠇꠞꠟ।
EXO 9:35 ꠔꠣꠞ ꠖꠤꠟ ꠙꠣꠡꠣꠘ ꠅꠁꠎꠣꠅꠀꠄ, ꠢꠦ ꠛꠘꠤ ꠁꠍꠞꠣꠁꠟꠞꠦ ꠍꠣꠠꠟ ꠘꠣ, ꠝꠣꠛꠥꠖꠦ ꠀꠉꠦ ꠎꠦꠟꠣ ꠝꠥꠍꠣꠞꠦ ꠇꠁꠍꠟꠣ।
EXO 10:1 ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ, “ꠔꠥꠝꠤ ꠚꠦꠞꠣꠃꠘꠞ ꠉꠦꠍꠦ ꠎꠣꠅ; ꠀꠝꠤ ꠔ ꠔꠣꠞ ꠀꠞ ꠔꠣꠞ ꠃꠎꠤꠞ-ꠘꠣꠎꠤꠞꠞ ꠖꠤꠟꠞꠦ ꠙꠣꠡꠣꠘ ꠇꠞꠤꠟꠤꠍꠤ, ꠎꠣꠔꠦ ꠔꠣꠞꠣꠞ ꠍꠣꠝꠘꠦ ꠀꠝꠤ ꠀꠝꠣꠞ ꠇꠥꠖꠞꠔꠤ ꠟꠤꠟꠣ-ꠈꠦꠟꠣ ꠖꠦꠈꠣꠁꠔꠣꠝ ꠙꠣꠞꠤ।
EXO 10:2 ꠀꠝꠤ ꠝꠤꠡꠞꠤ ꠅꠇꠟꠞ ꠃꠙꠞꠦ ꠎꠦꠔꠣ ꠎꠦꠔꠣ ꠇꠑꠤꠘ ꠉꠎꠛ ꠖꠤꠍꠤ, ꠔꠣꠞꠣꠞ ꠝꠣꠎꠦ ꠇꠥꠖꠞꠔꠤ ꠎꠦꠔꠣ ꠟꠤꠟꠣ-ꠈꠦꠟꠣ ꠎꠣꠁꠞ ꠇꠞꠍꠤ, ꠔꠥꠝꠤ ꠁꠔꠣ ꠔꠥꠝꠣꠞ ꠀꠅꠟꠣꠖ ꠀꠞ ꠘꠣꠔꠤ-ꠙꠥꠔꠤꠞ ꠉꠦꠍꠦ ꠉꠚ ꠇꠞꠔꠣꠄ ꠙꠣꠞ, ꠀꠞ ꠀꠝꠤꠃ ꠎꠦꠘ ꠝꠣꠛꠥꠖ ꠁꠐꠣ ꠛꠥꠎꠔꠣꠄ ꠙꠣꠞ।”
EXO 10:3 ꠔꠦꠃ ꠝꠥꠍꠣ ꠀꠞ ꠢꠣꠞꠥꠘꠦ ꠚꠦꠞꠣꠃꠘꠞ ꠉꠦꠍꠦ ꠉꠤꠀ ꠇꠁꠟꠣ, “ꠀꠟ꠆ꠟꠣ, ꠎꠦꠁꠘ ꠁꠛꠞꠣꠘꠤ ꠅꠇꠟꠞ ꠝꠣꠛꠥꠖ, ꠔꠣꠁꠘ ꠘꠤꠎꠦ ꠇꠁꠞꠣ, ꠔꠥꠝꠤ ꠀꠝꠣꠞ ꠍꠣꠝꠘꠦ ꠝꠣꠕꠣ ꠘꠥꠀꠁꠔꠦ ꠀꠞ ꠇꠔꠖꠤꠘ ꠢꠞꠣꠁꠟ ꠞꠁꠔꠣꠄ? ꠢꠥꠘꠅ, ꠔꠥꠝꠤ ꠀꠝꠣꠞ ꠛꠘ꠆ꠖꠣ ꠅꠇꠟꠞꠦ ꠀꠝꠣꠞ ꠄꠛꠣꠖꠔ ꠇꠞꠣꠞ ꠟꠣꠉꠤ ꠍꠣꠠꠤ ꠖꠦꠅ।
EXO 10:4 ꠔꠣꠞꠣꠞꠦ ꠍꠣꠠꠔꠦ ꠞꠣꠎꠤ ꠘꠣ ꠅꠁꠟꠦ ꠖꠦꠈꠤꠅ, ꠀꠝꠤ ꠇꠣꠁꠟ ꠔꠥꠝꠣꠞ ꠡꠤꠝꠣꠘꠣꠔ ꠙꠋꠉꠙꠣꠟ ꠅꠇꠟ ꠍꠣꠠꠤꠝꠥ।
EXO 10:5 ꠁꠔꠣꠄ ꠀꠁꠀ ꠔꠥꠝꠣꠞ ꠀꠡ꠆ꠔꠣ ꠎꠝꠤꠘꠞꠦ ꠅꠃꠟꠣ ꠛꠦꠞꠤꠟꠤꠛꠣ, ꠇꠥꠘꠥ ꠝꠣꠘꠡꠦ ꠝꠣꠐꠤ ꠖꠦꠈꠔ ꠙꠣꠞꠔ ꠘꠣꠄ। ꠢꠤꠟ-ꠔꠥꠚꠣꠘ ꠕꠣꠇꠤ ꠎꠔꠔꠣ ꠛꠣꠌꠤꠉꠦꠍꠦ, ꠈꠦꠔꠞ ꠝꠣꠎꠦ ꠎꠔ ꠉꠣꠍ-ꠉꠣꠍꠣꠟꠤ ꠞꠁꠍꠦ, ꠁꠔꠣ ꠢꠇ꠆ꠇꠟꠔꠣ ꠔꠣꠞꠣ ꠈꠣꠁꠟꠤꠛꠣ।
EXO 10:6 ꠔꠥꠝꠣꠞ ꠘꠤꠎꠞ ꠊꠞ-ꠛꠣꠠꠤ, ꠔꠥꠝꠣꠞ ꠃꠎꠤꠞ-ꠘꠣꠎꠤꠞꠞ ꠊꠞꠣꠁꠘ, ꠀꠞ ꠢꠇ꠆ꠇꠟ ꠝꠤꠡꠞꠤ ꠅꠇꠟꠞ ꠊꠞꠣꠁꠘ ꠜꠞꠤꠀ ꠎꠣꠝ ꠅꠁꠎꠤꠛꠣ। ꠔꠥꠝꠣꠞ ꠝꠄ-ꠝꠥꠞꠛ꠆ꠛꠤ ꠀꠞ ꠔꠣꠞꠣꠞ ꠛꠣꠚ-ꠖꠣꠖꠣ ꠅꠇꠟꠦꠅ ꠖꠥꠘꠤꠀꠁꠔ ꠔꠣꠞꠣꠞ ꠎꠘꠝ ꠕꠣꠇꠤ ꠀꠁꠎ ꠙꠞ꠆ꠎꠘ꠆ꠔ ꠇꠥꠘꠥꠖꠤꠘ ꠅꠃꠟꠣ ꠖꠦꠈꠍꠂꠘ ꠘꠣ।” ꠅꠈꠣꠘ ꠇꠁꠀꠃ ꠔꠣꠁꠘ ꠝꠥꠈ ꠚꠤꠞꠣꠁꠀ ꠚꠦꠞꠣꠃꠘꠞ ꠉꠦꠍ ꠕꠣꠇꠤ ꠛꠣꠞꠦ ꠉꠦꠟꠣꠉꠤ।
EXO 10:7 ꠚꠦꠞꠣꠃꠘꠞ ꠃꠎꠤꠞ-ꠘꠣꠎꠤꠞꠦ ꠔꠣꠞꠦ ꠇꠁꠟꠣ, “ꠁ ꠛꠦꠐꠣꠄ ꠀꠞ ꠇꠔꠖꠤꠘ ꠀꠝꠞꠣꠞꠦ ꠍꠣꠔꠣꠁꠔ? ꠅꠔꠣꠞ ꠝꠣꠛꠥꠖ ꠀꠟ꠆ꠟꠣꠞ ꠄꠛꠣꠖꠔꠞ ꠟꠣꠉꠤ ꠅꠔꠣꠞꠦ ꠍꠣꠠꠤ ꠖꠦꠃꠇ꠆ꠇꠣ। ꠀꠙꠘꠦ ꠅꠈꠘꠅ ꠇꠥꠘ꠆ꠔꠣ ꠛꠥꠎꠞꠣ ꠘꠣ ꠘꠤ, ꠀꠡ꠆ꠔꠣ ꠝꠤꠡꠞ ꠖꠦꠡꠘꠥ ꠍꠣꠞꠈꠣꠞ ꠅꠁꠎꠣꠞ?”
EXO 10:8 ꠅꠃ ꠚꠦꠞꠣꠃꠘꠦ ꠝꠥꠍꠣ ꠀꠞ ꠢꠣꠞꠥꠘꠞꠦ ꠢꠤꠞꠛꠣꠞ ꠀꠘꠣꠁꠟ, ꠀꠘꠣꠁꠀ ꠇꠁꠟ, “ꠔꠥꠝꠞꠣ ꠎꠣꠅꠉꠤ, ꠉꠤꠀ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠄꠛꠣꠖꠔ ꠇꠞꠅ। ꠅꠁꠟꠦ ꠇꠦ ꠇꠦ ꠎꠣꠁꠔꠣꠄ ꠌꠣꠁꠞꠣꠄ?”
EXO 10:9 ꠝꠥꠍꠣꠄ ꠇꠁꠟꠣ, “ꠀꠝꠞꠣ ꠔ ꠝꠣꠛꠥꠖꠞ ꠘꠣꠝꠦ ꠢꠎꠅ ꠎꠣꠁꠞꠣꠝ। ꠔꠦ ꠀꠝꠞꠣꠞ ꠢꠥꠞꠥꠔ꠆ꠔꠣꠁꠘ, ꠝꠥꠞꠛ꠆ꠛꠤ, ꠙꠥꠀ-ꠙꠥꠠꠤꠘ ꠀꠞ ꠉꠞꠥ-ꠍꠣꠉꠟ ꠟꠁꠀ ꠎꠣꠁꠝꠥ।”
EXO 10:10 ꠚꠦꠞꠣꠃꠘꠦ ꠇꠁꠟ, “ꠀꠁꠌ꠆ꠍꠣ, ꠀꠝꠤ ꠎꠥꠖꠤ ꠢꠣꠍꠣꠃ ꠔꠥꠝꠞꠣꠞꠦ ꠢꠥꠞꠥꠔ꠆ꠔꠣ-ꠝꠥꠞꠥꠔ꠆ꠔꠣ ꠖꠤꠀ ꠍꠣꠠꠤ ꠖꠦꠁ, ꠔꠦ ꠔꠥꠝꠞꠣꠞ ꠅꠃ ꠝꠣꠛꠥꠖꠅ ꠎꠣꠘꠥ ꠔꠥꠝꠞꠣꠞ ꠟꠉꠦ ꠅꠁꠀ ꠎꠣꠄꠉꠤ। ꠈꠛꠞꠖꠣꠞ! ꠔꠥꠝꠞꠣꠞ ꠝꠔꠟꠛ ꠔ ꠜꠣꠟꠣ ꠘꠣꠄ।
EXO 10:11 ꠘꠣ, ꠁꠟꠣ ꠔ ꠅꠁꠔ ꠘꠣꠄ, ꠔꠥꠝꠞꠣꠞ ꠢꠇ꠆ꠇꠟꠔꠣ ꠘꠤꠔꠦ ꠖꠤꠔꠣꠝ ꠘꠣꠄ। ꠔꠥꠝꠞꠣ ꠎꠦꠛꠟꠣ ꠎꠣꠁꠔꠣꠄꠃ ꠌꠣꠁꠞꠣꠄ, ꠔꠦ ꠈꠣꠟꠤ ꠛꠦꠐꠣꠁꠘ ꠎꠣꠅꠉꠤ।” ꠅꠈꠣꠘ ꠇꠁꠀ ꠢꠣꠞꠤ ꠚꠦꠞꠣꠃꠘꠦ ꠔꠣꠞ ꠍꠣꠝꠘꠦ ꠕꠣꠇꠤ ꠝꠥꠍꠣ ꠀꠞ ꠢꠣꠞꠥꠘꠞꠦ ꠈꠦꠖꠣꠁ ꠖꠤꠟ।
EXO 10:12 ꠔꠦꠃ ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ, “ꠔꠥꠝꠤ ꠝꠤꠡꠞ ꠖꠦꠡꠞ ꠃꠙꠞꠦ ꠙꠋꠉꠙꠣꠟꠞ ꠟꠣꠉꠤ ꠀꠔ ꠔꠥꠟꠅ, ꠙꠋꠉꠙꠣꠟꠦ ꠀꠁꠀ ꠝꠤꠡꠞꠞ ꠎꠝꠤꠘꠞ ꠢꠇꠟ ꠉꠣꠍ-ꠉꠣꠍꠣꠟꠤ ꠈꠣꠁꠟꠤꠛ। ꠢꠤꠟ-ꠔꠥꠚꠣꠘ ꠕꠣꠇꠤ ꠎꠔꠔꠣ ꠛꠣꠌꠤꠍꠦ, ꠁꠔꠣ ꠢꠇ꠆ꠇꠟꠔꠣ ꠈꠣꠁꠟꠤꠛ।”
EXO 10:13 ꠝꠥꠍꠣꠄ ꠝꠤꠡꠞꠞ ꠃꠙꠞꠦ ꠔꠣꠘ ꠟꠣꠑꠤ ꠝꠦꠟꠤꠀ ꠗꠞꠟꠣ, ꠀꠞ ꠝꠣꠛꠥꠖꠦ ꠢꠣꠞꠣ ꠖꠤꠘ ꠢꠣꠞꠣ ꠞꠣꠁꠔ ꠖꠦꠡꠞ ꠝꠣꠎꠦ ꠙꠥꠛꠣꠟꠤ ꠢꠣꠅꠀ ꠍꠣꠠꠟꠣ, ꠅꠃ ꠙꠥꠛꠣꠟꠤ ꠢꠣꠅꠀꠄ ꠛꠤꠀꠘꠦ ꠙꠋꠉꠙꠣꠟ ꠟꠁꠀ ꠀꠎꠤꠟ।
EXO 10:14 ꠢꠣꠞꠣ ꠝꠤꠡꠞ ꠖꠦꠡꠞ ꠃꠙꠞꠦ ꠙꠋꠉꠙꠣꠟꠦ ꠎꠣꠝ ꠅꠁꠉꠦꠟꠣ। ꠝꠤꠡꠞꠞ ꠢꠇꠟ ꠎꠣꠉꠣꠔ ꠙꠋꠉꠙꠣꠟꠦ ꠉꠤꠍꠉꠤꠍ ꠇꠞꠟꠣ, ꠈꠥꠛ ꠛꠦꠡꠤ ꠙꠋꠉꠙꠣꠟ ꠀꠁꠟꠣ, ꠅꠔ ꠙꠋꠉꠙꠣꠟ ꠄꠞ ꠀꠉꠦꠅ ꠇꠥꠘꠥꠖꠤꠘ ꠅꠁꠍꠂꠘ ꠘꠣ ꠀꠞ ꠛꠣꠖꠦꠅ ꠇꠥꠘꠥꠖꠤꠘ ꠅꠁꠔꠣ ꠘꠣꠄ।
EXO 10:15 ꠔꠣꠞꠣ ꠀꠡ꠆ꠔꠣ ꠎꠝꠤꠘꠞ ꠃꠙꠞ ꠉꠥꠞꠤꠟꠤꠟꠣ, ꠖꠦꠡ ꠀꠘ꠆ꠖꠣꠁꠞ ꠅꠁꠉꠦꠟ, ꠀꠞ ꠎꠝꠤꠘꠞ ꠎꠔ ꠈꠦꠔ, ꠉꠣꠍ-ꠉꠣꠍꠣꠟꠤ ꠢꠤꠟ-ꠔꠥꠚꠣꠘ ꠕꠣꠇꠤ ꠛꠣꠌꠤꠉꠦꠍꠤꠟ, ꠁꠔꠣ ꠢꠇ꠆ꠇꠟꠔꠣ ꠈꠣꠁꠟꠤꠟꠣ। ꠀꠡ꠆ꠔꠣ ꠝꠤꠡꠞꠞ ꠇꠥꠘꠥ ꠉꠣꠍ-ꠉꠣꠍꠣꠟꠤ ꠛꠣ ꠈꠦꠔꠞ ꠚꠡꠟ ꠇꠥꠘ꠆ꠔꠣꠃ ꠞꠁꠟ ꠘꠣ।
EXO 10:16 ꠚꠦꠞꠣꠃꠘꠦ ꠎꠟꠖꠤ ꠇꠞꠤ ꠝꠥꠍꠣ ꠀꠞ ꠢꠣꠞꠥꠘꠞꠦ ꠀꠘꠣꠁꠀ ꠇꠁꠟ, “ꠀꠝꠤ ꠔ ꠔꠥꠝꠞꠣ ꠀꠞ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠉꠦꠍꠦ ꠉꠥꠘꠣꠉꠣꠞ ꠅꠁꠉꠦꠍꠤ।
EXO 10:17 ꠔꠦ ꠝꠤꠘꠔ ꠇꠞꠤꠀꠞ, ꠈꠣꠟꠤ ꠄꠇꠈꠣꠘ ꠛꠣꠞ ꠀꠝꠣꠞ ꠉꠥꠘꠣ ꠝꠣꠚ ꠇꠞꠤ ꠖꠦꠅ। ꠀꠝꠣꠞ ꠉꠦꠍ ꠕꠣꠇꠤ ꠁ ꠝꠞꠘ ꠀꠙꠖꠞꠦ ꠢꠞꠣꠁ ꠘꠦꠅꠀꠞ ꠟꠣꠉꠤ, ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞꠦ ꠝꠤꠘꠔ ꠇꠞꠅ।”
EXO 10:18 ꠅꠃ ꠝꠥꠍꠣꠄ ꠚꠦꠞꠣꠃꠘꠞ ꠉꠦꠍ ꠕꠣꠇꠤ ꠢꠞꠤꠀ ꠉꠤꠀ ꠝꠣꠛꠥꠖꠞ ꠉꠦꠍꠦ ꠝꠤꠘꠔ ꠇꠞꠟꠣ;
EXO 10:19 ꠀꠞ ꠝꠣꠛꠥꠖꠦ ꠈꠥꠛ ꠎꠥꠞꠦ ꠙꠌ꠆ꠌꠤꠝꠣ ꠢꠣꠅꠀ ꠍꠣꠠꠟꠣ, ꠁꠔꠣꠄ ꠙꠋꠉꠙꠣꠟ ꠅꠇꠟꠞꠦ ꠈꠦꠖꠣꠁꠀ ꠍꠣꠚ ꠇꠞꠤꠀ ꠘꠤꠟ ꠖꠞꠤꠀꠔ ꠚꠣꠟꠣꠁꠟ, ꠝꠤꠡꠞꠞ ꠇꠥꠘꠥ ꠎꠣꠉꠣꠔ ꠄꠉꠥ ꠙꠥꠇꠅ ꠞꠁꠟ ꠘꠣ।
EXO 10:20 ꠅꠁꠟꠦ ꠝꠣꠛꠥꠖꠦ ꠚꠦꠞꠣꠃꠘꠞ ꠖꠤꠟ ꠙꠣꠡꠣꠘ ꠇꠞꠤꠟ꠆ꠟꠣ, ꠢꠦ ꠛꠘꠤ ꠁꠍꠞꠣꠁꠟꠞꠦ ꠍꠣꠠꠟ ꠘꠣ।
EXO 10:21 ꠛꠣꠖꠦ ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ, “ꠔꠥꠝꠤ ꠀꠍꠝꠣꠘ ꠝꠥꠈꠣ ꠔꠥꠝꠣꠞ ꠀꠔ ꠛꠣꠠꠣꠅ; ꠔꠦꠃ ꠢꠣꠞꠣ ꠖꠦꠡꠅ ꠅꠔ ꠊꠘ ꠀꠘ꠆ꠖꠣꠁꠞ ꠅꠁꠛ, ꠁ ꠀꠘ꠆ꠖꠣꠁꠞ ꠀꠔ ꠖꠤꠀ ꠍꠥꠀ ꠎꠣꠁꠛ।”
EXO 10:22 ꠝꠥꠍꠣꠄ ꠀꠍꠝꠣꠘ ꠝꠥꠈꠣ ꠀꠔ ꠛꠣꠠꠣꠁꠟꠦ ꠔꠤꠘ ꠖꠤꠘ ꠙꠞ꠆ꠎꠘ꠆ꠔ ꠢꠣꠞꠣ ꠝꠤꠡꠞ ꠖꠦꠡ ꠈꠥꠛ ꠊꠘ ꠀꠘ꠆ꠖꠣꠁꠞ ꠅꠁꠟ।
EXO 10:23 ꠔꠤꠘ ꠖꠤꠘ ꠇꠦꠃ ꠇꠦꠃꠞꠞ ꠝꠥꠈꠅ ꠖꠦꠈꠔ ꠙꠣꠞꠟ ꠘꠣ, ꠇꠦꠃ ꠎꠣꠉꠣ ꠕꠣꠇꠤ ꠟꠠꠔ ꠙꠣꠞꠟ ꠘꠣ। ꠅꠁꠟꠦ ꠛꠘꠤ ꠁꠍꠞꠣꠁꠟꠞ ꠢꠇꠟ ꠊꠞꠅ ꠇꠥꠘꠥ ꠞꠥꠡꠘꠤꠞ ꠅꠜꠣꠛ ꠀꠍꠤꠟ ꠘꠣ।
EXO 10:24 ꠚꠦꠞꠣꠃꠘꠦ ꠝꠥꠍꠣꠞꠦ ꠀꠘꠣꠁꠀ ꠇꠁꠟ, “ꠎꠣꠅ, ꠔꠥꠝꠞꠣ ꠉꠤꠀ ꠔꠥꠝꠞꠣꠞ ꠝꠣꠛꠥꠖꠞ ꠄꠛꠣꠖꠔ ꠇꠞꠅ, ꠔꠥꠝꠞꠣꠞ ꠢꠥꠞꠥꠔ꠆ꠔꠣꠁꠘꠞꠦꠅ ꠘꠦꠅꠉꠤ, ꠈꠣꠟꠤ ꠔꠥꠝꠞꠣꠞ ꠉꠞꠥ-ꠍꠣꠉꠟꠞ ꠙꠣꠟ ꠕꠣꠇꠃꠇ।”
EXO 10:25 ꠝꠥꠍꠣꠄ ꠇꠁꠟꠣ, “ꠀꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠘꠣꠝꠦ ꠖꠤꠛꠣꠞ ꠟꠣꠉꠤ, ꠙꠡꠥ ꠇꠥꠞꠛꠣꠘꠤ ꠀꠞ ꠎꠣꠟꠣꠁꠟ ꠇꠥꠞꠛꠣꠘꠤꠞ ꠙꠡꠥꠁꠘ ꠀꠝꠞꠣꠞ ꠟꠉꠦ ꠘꠤꠔꠦ ꠅꠁꠛ।
EXO 10:26 ꠀꠝꠞꠣꠞ ꠟꠉꠦ ꠅꠁꠀ ꠀꠝꠞꠣꠞ ꠙꠡꠥꠁꠘꠅ ꠎꠣꠁꠛꠣ, ꠙꠡꠥꠞ ꠄꠇꠈꠣꠘ ꠈꠥꠞꠣꠅ ꠕꠁꠀ ꠎꠣꠁꠔꠣꠝ ꠘꠣꠄ। ꠀꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠄꠛꠣꠖꠔꠞ ꠟꠣꠉꠤ ꠅꠘ ꠕꠣꠇꠤ ꠇꠥꠞꠛꠣꠘꠤ ꠇꠞꠣ ꠟꠣꠉꠛ, ꠀꠞ ꠇꠤꠔꠣ ꠇꠤꠔꠣ ꠇꠥꠞꠛꠣꠘꠤ ꠇꠞꠔꠣꠝ, ꠁꠔꠣ ꠀꠝꠞꠣ ꠢꠘꠅ ꠘꠣ ꠉꠦꠟꠦ ꠇꠁꠔꠣꠝ ꠙꠣꠞꠔꠣꠝ ꠘꠣꠄ।”
EXO 10:27 ꠅꠁꠟꠦ ꠝꠣꠛꠥꠖꠦ ꠚꠦꠞꠣꠃꠘꠞ ꠖꠤꠟ ꠙꠣꠡꠣꠘ ꠇꠞꠤꠟ꠆ꠟꠣ, ꠢꠦ ꠄꠞꠣꠞꠦ ꠍꠣꠠꠔꠦ ꠞꠣꠎꠤ ꠅꠁꠟ ꠘꠣ।
EXO 10:28 ꠚꠦꠞꠣꠃꠘꠦ ꠇꠁꠟ, “ꠀꠝꠣꠞ ꠍꠣꠝꠘꠦ ꠕꠣꠇꠤ ꠜꠣꠉꠅ। ꠈꠛꠞꠖꠣꠞ! ꠀꠝꠣꠞ ꠝꠥꠈꠞ ꠍꠣꠝꠘꠦ ꠀꠞ ꠇꠥꠘꠥꠖꠤꠘ ꠀꠁꠅ ꠘꠣ। ꠀꠝꠣꠞ ꠍꠣꠝꠘꠦ ꠎꠦꠖꠤꠘ ꠀꠁꠛꠣꠄ, ꠢꠤꠖꠤꠘ ꠎꠣꠘ ꠈꠥꠀꠁꠛꠣꠄ।”
EXO 10:29 ꠝꠥꠍꠣꠄ ꠇꠁꠟꠣ, “ꠜꠣꠟꠣꠞꠦ ꠜꠣꠟꠣ! ꠀꠝꠤ ꠡꠈ ꠇꠞꠤꠀ ꠇꠥꠘꠥꠖꠤꠘꠃ ꠀꠙꠘꠣꠞ ꠝꠥꠈ ꠖꠦꠈꠣꠔ ꠀꠁꠔꠣꠝ ꠘꠣꠄ।”
EXO 11:1 ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ, “ꠀꠝꠤ ꠚꠦꠞꠣꠃꠘ ꠀꠞ ꠝꠤꠡꠞ ꠖꠦꠡꠞ ꠃꠙꠞꠦ ꠀꠞ ꠝꠣꠔ꠆ꠞ ꠄꠇꠐꠣ ꠉꠎꠛ ꠍꠣꠠꠝꠥ, ꠄꠞꠛꠣꠖꠦ ꠢꠦ ꠔꠥꠝꠞꠣꠞꠦ ꠅꠘꠕꠘꠦ ꠍꠣꠠꠤꠖꠤꠛ, ꠍꠣꠠꠣꠞ ꠛꠣꠟꠣ ꠢꠦ ꠔꠥꠝꠞꠣꠞꠦ ꠄꠇ꠆ꠇꠦꠛꠣꠞꠦ ꠈꠦꠖꠣꠁ ꠖꠤꠛ।
EXO 11:2 ꠔꠥꠝꠤ ꠛꠘꠤ ꠁꠍꠞꠣꠁꠟꠞꠦ ꠢꠤꠇꠣꠁ ꠖꠦꠅ, ꠢꠇ꠆ꠇꠟ ꠛꠦꠐꠣꠁꠘ-ꠛꠦꠐꠤꠘ꠆ꠔꠦ ꠔꠣꠞꠣꠞ ꠝꠤꠡꠞꠤ ꠀꠞꠤ-ꠚꠞꠤꠞ ꠉꠦꠍ ꠕꠣꠇꠤ ꠡꠥꠘꠣ-ꠞꠥꠙꠣꠞ ꠉꠄꠘꠣ-ꠉꠣꠐꠤ ꠈꠥꠎꠤꠀ ꠘꠦꠃꠇ।”
EXO 11:3 ꠅꠃ ꠢꠣꠟꠔꠅ ꠝꠤꠡꠞꠤ ꠅꠇꠟꠞ ꠘꠎꠞꠅ ꠝꠣꠄꠀ ꠙꠣꠁꠔꠦ ꠝꠣꠛꠥꠖꠦ ꠡꠣꠁꠎ꠆ꠎ ꠇꠞꠟꠣ। ꠄꠞꠝꠣꠎꠦ ꠝꠤꠡꠞ ꠖꠦꠡꠅ ꠚꠦꠞꠣꠃꠘꠞ ꠃꠎꠤꠞ-ꠘꠣꠎꠤꠞ ꠀꠞ ꠙ꠆ꠞꠎꠣ ꠅꠇꠟꠞ ꠉꠦꠍꠦ ꠢꠎꠞꠔ ꠝꠥꠍꠣ ꠈꠥꠛ ꠁꠎ꠆ꠎꠔꠤ ꠛꠘꠤꠉꠦꠟꠣ।
EXO 11:4 ꠝꠥꠍꠣꠄ ꠚꠦꠞꠣꠃꠘꠞꠦ ꠇꠁꠟꠣ, “ꠝꠣꠛꠥꠖꠦ ꠘꠤꠎꠦ ꠇꠁꠞꠣ, ꠀꠝꠤ ꠀꠗꠣ ꠞꠣꠁꠔꠇꠥꠞ ꠛꠣꠟꠣ ꠝꠤꠡꠞ ꠖꠦꠡꠞ ꠝꠣꠎꠖꠤ ꠎꠣꠁꠝꠥ।
EXO 11:5 ꠄꠔꠦ ꠉꠖꠤꠔ ꠛꠅꠀ ꠚꠦꠞꠣꠃꠘꠞ ꠛꠠ ꠙꠥꠀ ꠕꠣꠇꠤ ꠛꠣꠞꠣ-ꠜꠣꠘꠞꠣ ꠛꠣꠘ꠆ꠖꠤꠞ ꠙꠥꠀ ꠙꠞ꠆ꠎꠘ꠆ꠔ, ꠝꠤꠡꠞ ꠖꠦꠡꠞ ꠝꠣꠎꠦ ꠞꠅꠞꠣ ꠢꠇ꠆ꠇꠟ ꠙꠞꠤꠛꠣꠞꠞ ꠛꠠ ꠙꠥꠀꠂꠘ ꠝꠞꠤꠎꠤꠛꠣ। ꠄꠞꠟꠉꠦ ꠢꠇꠟ ꠙꠡꠥꠁꠘ꠆ꠔꠞ ꠙꠄꠟꠣ ꠝꠦꠖꠣ ꠛꠣꠁꠌ꠆ꠌꠣꠅ ꠝꠞꠤꠎꠤꠛꠣ।
EXO 11:6 ꠁ ꠟꠣꠈꠣꠘ ꠖꠡꠣ ꠝꠤꠡꠞ ꠖꠦꠡꠅ ꠇꠥꠘꠥꠖꠤꠘ ꠅꠁꠍꠦꠅ ꠘꠣ ꠀꠞ ꠅꠁꠔ-ꠅ ꠘꠣꠄ, ꠀꠡ꠆ꠔꠣ ꠝꠤꠡꠞ ꠖꠦꠡꠅ ꠅꠃ ꠟꠣꠈꠣꠘ ꠇꠣꠘ꠆ꠖꠘ ꠇꠣꠘ꠆ꠖꠤꠛꠣ।
EXO 11:7 ꠅꠁꠟꠦ ꠛꠘꠤ ꠁꠍꠞꠣꠁꠟꠞ ꠇꠥꠘꠥ ꠝꠣꠘꠥꠡ ꠛꠣ ꠙꠡꠥꠞ ꠛꠣꠄ ꠄꠉꠥ ꠇꠥꠔ꠆ꠔꠣꠄꠅ ꠃꠢ ꠇꠞꠔ ꠘꠣꠄ, ꠎꠣꠔꠦ ꠀꠙꠘꠣꠞꠣ ꠛꠥꠎꠔꠣ ꠙꠣꠞꠂꠘ ꠀꠝꠤ ꠝꠣꠛꠥꠖꠦ ꠝꠤꠡꠞꠤ ꠀꠞ ꠛꠘꠤ ꠁꠍꠞꠣꠁꠟꠞ ꠝꠣꠎꠦ ꠔꠚꠣꠔ ꠇꠞꠤ।”
EXO 11:8 ꠢꠦꠡꠦ ꠝꠥꠍꠣꠄ ꠚꠦꠞꠣꠃꠘꠞꠦ ꠇꠁꠟꠣ, “ꠅꠃ ꠡꠝꠄ ꠀꠙꠘꠣꠞ ꠢꠇ꠆ꠇꠟ ꠃꠎꠤꠞ-ꠘꠣꠎꠤꠞꠦ ꠀꠁꠀ ꠀꠝꠣꠞ ꠙꠣꠅꠔ ꠙꠠꠤꠀ ꠇꠁꠛꠣ, ꠀꠙꠘꠦ ꠀꠙꠘꠣꠞ ꠢꠇꠟ ꠝꠣꠘꠡꠞꠦ ꠟꠁꠀ ꠛꠤꠖꠣꠄ ꠘꠦꠁꠘꠉꠤ, ꠄꠞꠛꠣꠖꠦ ꠀꠝꠤ ꠛꠣꠞ ꠅꠁꠝꠥ।” ꠅꠈꠣꠘ ꠇꠁꠀ ꠔꠣꠁꠘ ꠉꠥꠍꠣꠄ ꠀꠉꠥꠁꠘ ꠅꠁꠀ ꠚꠦꠞꠣꠃꠘꠞ ꠉꠦꠍ ꠕꠣꠇꠤ ꠢꠞꠤꠀ ꠉꠦꠟꠣ।
EXO 11:9 ꠝꠣꠛꠥꠖꠦ ꠝꠥꠍꠣꠞꠦ ꠇꠁꠍꠟꠣ, “ꠚꠦꠞꠣꠃꠘꠦ ꠔꠥꠝꠣꠞ ꠇꠕꠣ ꠝꠣꠘꠔ ꠘꠣꠄ, ꠎꠣꠔꠦ ꠝꠤꠡꠞ ꠖꠦꠡꠅ ꠀꠝꠣꠞ ꠇꠦꠞꠣꠝꠔꠤꠞ ꠙꠞꠤꠝꠣꠘ ꠀꠞꠅ ꠛꠣꠠꠦ।”
EXO 11:10 ꠄꠞꠟꠣꠉꠤ ꠝꠥꠍꠣ ꠀꠞ ꠢꠣꠞꠥꠘꠦ ꠚꠦꠞꠣꠃꠘꠞ ꠍꠣꠝꠘꠦ ꠅꠃ ꠇꠦꠞꠣꠝꠔꠤ ꠅꠇꠟ ꠖꠦꠈꠣꠁꠟꠣ। ꠅꠁꠟꠦ ꠝꠣꠛꠥꠖꠦ ꠚꠦꠞꠣꠃꠘꠞ ꠖꠤꠟꠞꠦ ꠙꠣꠡꠣꠘ ꠇꠞꠤꠟ꠆ꠟꠣ, ꠢꠦ ꠘꠤꠎꠞ ꠖꠦꠡ ꠕꠣꠇꠤ ꠛꠘꠤ ꠁꠍꠞꠣꠁꠟꠞꠦ ꠍꠣꠠꠟ ꠘꠣ।
EXO 12:1 ꠛꠣꠖꠦ ꠅꠃ ꠝꠤꠡꠞ ꠖꠦꠡꠞ ꠜꠤꠔꠞꠦ ꠝꠣꠛꠥꠖꠦ ꠝꠥꠍꠣ ꠀꠞ ꠢꠣꠞꠥꠘꠞꠦ ꠇꠁꠟꠣ,
EXO 12:2 “ꠁ ꠌꠣꠘ꠆ꠖꠈꠣꠘ ꠛꠍꠞꠞ ꠙꠄꠟꠣ ꠌꠣꠘ꠆ꠖ ꠅꠁꠛ, ꠔꠥꠝꠞꠣ ꠁ ꠌꠣꠘ꠆ꠖꠞꠦ ꠛꠍꠞꠞ ꠙꠄꠟꠣ ꠌꠣꠘ꠆ꠖ ꠉꠘꠤꠅ।
EXO 12:3 ꠔꠥꠝꠤꠔꠣꠁꠘ ꠔꠣꠝꠣꠝ ꠛꠘꠤ ꠁꠍꠞꠣꠁꠟꠞꠦ ꠖꠟꠣ ꠇꠞꠤ ꠎꠣꠘꠣꠁ ꠖꠦꠅ, ꠅꠃ ꠌꠣꠘ꠆ꠖꠞ ꠖꠡ ꠔꠣꠞꠤꠈꠅ ꠔꠥꠝꠞꠣꠞ ꠢꠇꠟ ꠙꠞꠤꠛꠣꠞꠞ ꠝꠥꠞꠛ꠆ꠛꠤꠄ, ꠎꠣꠞꠎꠤꠞ ꠙꠞꠤꠛꠣꠞꠞ ꠟꠣꠉꠤ ꠄꠉꠥ ꠇꠞꠤ ꠝꠦꠠꠣ ꠛꠣ ꠍꠣꠉꠟꠞ ꠛꠣꠁꠌ꠆ꠌꠣ ꠘꠤꠛꠣꠄ।
EXO 12:4 ꠅꠁꠟꠦ ꠇꠥꠘꠥ ꠙꠞꠤꠛꠣꠞꠅ ꠄꠞ ꠉꠥꠡ꠆ꠔ ꠈꠣꠅꠀꠞ ꠝꠣꠘꠥꠡ ꠇꠝ ꠅꠁꠟꠦ, ꠟꠣꠉꠣ ꠊꠞꠞ ꠝꠣꠘꠡꠞ ꠟꠉꠦ ꠝꠤꠟꠤꠀ, ꠖꠥꠁꠅ ꠙꠞꠤꠛꠣꠞꠦ ꠎꠔꠈꠣꠘ ꠈꠣꠁꠔꠣ ꠙꠣꠞꠂꠘ, ꠢꠃ ꠅꠘꠥꠝꠣꠘꠦ ꠝꠦꠠꠣ ꠛꠣ ꠍꠣꠉꠟꠞ ꠛꠣꠁꠌ꠆ꠌꠣ ꠘꠤꠛꠣꠄ।
EXO 12:5 ꠁ ꠛꠣꠁꠌ꠆ꠌꠣ ꠅꠁꠛ ꠘꠤꠈꠥꠔ, ꠄꠇ ꠛꠞꠍ ꠛꠄꠅꠡꠞ ꠙꠣꠑꠣ ꠛꠣꠁꠌ꠆ꠌꠣ ꠅꠁꠔꠦ ꠅꠁꠛ; ꠔꠥꠝꠞꠣ ꠝꠦꠠꠣ ꠛꠣ ꠍꠣꠉꠟꠞ ꠛꠣꠁꠌ꠆ꠌꠣ ꠘꠤꠔꠣꠄ ꠙꠣꠞꠛꠣꠄ।
EXO 12:6 ꠀꠞ ꠅꠃ ꠌꠣꠘ꠆ꠖꠞ ꠌꠃꠖ꠆ꠖ ꠔꠣꠞꠤꠈ ꠙꠞ꠆ꠎꠘ꠆ꠔ ꠁꠐꠣꠞ ꠎꠔꠘ ꠇꠞꠛꠣꠄ, ꠛꠣꠖꠦ ꠔꠣꠝꠣꠝ ꠛꠘꠤ ꠁꠍꠞꠣꠁꠟ ꠄꠇꠟꠉꠦ ꠝꠤꠟꠤꠀ, ꠔꠣꠞꠣ ꠢꠣꠁꠘ꠆ꠎꠣ ꠛꠣꠟꠣ ꠎꠣꠞꠎꠤꠞ ꠙꠞꠤꠛꠣꠞꠦ ꠅꠃ ꠛꠣꠁꠌ꠆ꠌꠣꠁꠘ ꠎꠛ ꠇꠞꠛꠣ।
EXO 12:7 ꠎꠛ ꠇꠞꠣꠞ ꠛꠣꠖꠦ ꠔꠣꠞꠣ ꠄꠞ ꠇꠤꠍꠥ ꠟꠃ ꠘꠤꠀ ꠎꠔ ꠊꠞꠅ ꠄꠞ ꠉꠥꠡ꠆ꠔ ꠈꠣꠁꠛꠣ, ꠅꠔ ꠊꠞꠞ ꠖꠥꠀꠞꠞ ꠌꠃꠇꠣꠑꠞ ꠖꠥꠁꠅ ꠉꠣꠟꠣꠔ ꠀꠞ ꠃꠙꠞꠞ ꠌꠃꠇꠣꠑꠅ ꠅꠃ ꠟꠃ ꠟꠣꠉꠣꠁꠛꠣ।
EXO 12:8 ꠢꠃ ꠞꠣꠁꠔꠃ ꠔꠣꠞꠣ ꠁ ꠉꠥꠡ꠆ꠔ ꠀꠉꠥꠁꠘꠖꠤ ꠍꠦꠇꠤꠀ ꠈꠣꠝꠤꠞ ꠍꠣꠠꠣ ꠞꠥꠐꠤ ꠀꠞ ꠔꠤꠔ꠆ꠔꠣ ꠢꠣꠉꠞ ꠟꠉꠦ ꠝꠤꠟꠣꠁꠀ ꠈꠣꠁꠛꠣ।
EXO 12:9 ꠁ ꠉꠥꠡ꠆ꠔ ꠔꠥꠝꠞꠣ ꠇꠣꠌꠣ, ꠛꠣ ꠙꠣꠘꠤꠖꠤ ꠞꠣꠘ꠆ꠖꠤꠀ ꠈꠣꠁꠅ ꠘꠣ। ꠈꠣꠟꠤ ꠀꠉꠥꠁꠘꠖꠤ ꠍꠦꠇꠤꠀ ꠈꠣꠁꠅ, ꠄꠞ ꠑꠦꠋ, ꠇꠟ꠆ꠟꠣ ꠡꠥꠖ꠆ꠖꠣ ꠜꠤꠔꠞꠞ ꠢꠇ꠆ꠇꠟꠔꠣ ꠄꠇꠈꠣꠘꠅ ꠍꠦꠇꠤꠅ, ꠛꠣꠖꠦ ꠈꠣꠁꠅ।
EXO 12:10 ꠞꠣꠁꠔ ꠙꠥꠀꠘꠤꠞ ꠀꠉꠦ ꠈꠣꠘꠤ ꠡꠦꠡ ꠇꠞꠤꠅ, ꠛꠤꠀꠘ ꠙꠞ꠆ꠎꠘ꠆ꠔ ꠇꠥꠘ꠆ꠔꠣꠃ ꠛꠣꠇꠤ ꠕꠁꠅ ꠘꠣ। ꠎꠥꠖꠤ ꠇꠥꠘ꠆ꠔꠣ ꠛꠣꠇꠤ ꠞꠁꠎꠣꠄ, ꠔꠦ ꠀꠉꠥꠁꠘꠖꠤ ꠎꠣꠟꠣꠁꠟꠤꠅ।
EXO 12:11 ꠁ ꠈꠣꠘꠤ ꠈꠣꠅꠀꠞ ꠛꠣꠟꠣ ꠔꠥꠝꠞꠣꠞ ꠇꠝꠞꠞ ꠇꠣꠙꠠ ꠝꠎꠛꠥꠔ ꠇꠞꠤ ꠚꠤꠘ꠆ꠖꠤꠅ, ꠙꠣꠅꠔ ꠎꠥꠔꠣ ꠟꠣꠉꠣꠁꠅ, ꠀꠔꠞ ꠟꠣꠑꠤ ꠟꠁꠅ। ꠎꠟꠖꠤ ꠇꠞꠤ ꠈꠣꠘꠤ ꠈꠣꠁꠅ। ꠁꠐꠣ ꠅꠁꠟ ꠝꠣꠛꠥꠖꠞ ꠘꠣꠝꠞ ꠀꠎꠣꠖꠤ ꠁꠖ।
EXO 12:12 ꠢꠃ ꠞꠣꠁꠔꠃ ꠀꠝꠤ ꠝꠤꠡꠞ ꠖꠦꠡꠞ ꠝꠣꠎꠖꠤ ꠎꠣꠁꠝꠥ, ꠖꠦꠡꠞ ꠢꠇ꠆ꠇꠟ ꠝꠣꠘꠡꠞ ꠛꠠ ꠙꠥꠀꠞꠦ ꠀꠞ ꠙꠡꠥꠞ ꠙꠄꠟꠣ ꠝꠦꠖꠣ ꠛꠣꠁꠌ꠆ꠌꠣꠞꠦꠅ ꠝꠣꠞꠤꠟꠤꠝꠥ। ꠝꠤꠡꠞꠞ ꠢꠇꠟ ꠖꠦꠛ-ꠖꠦꠛꠤꠞ ꠛꠤꠌꠣꠞ ꠇꠞꠤꠀ ꠡꠣꠎꠣ ꠖꠤꠝꠥ; ꠀꠝꠤꠃ ꠝꠣꠛꠥꠖ।
EXO 12:13 ꠅꠁꠟꠦ ꠔꠥꠝꠞꠣꠞ ꠖꠥꠀꠞꠞ ꠌꠃꠇꠣꠑꠅ ꠟꠦꠙꠣ ꠟꠃ ꠖꠦꠈꠟꠦ ꠀꠝꠤ ꠛꠥꠎꠝꠥ ꠁ ꠊꠞꠅ ꠔꠥꠝꠞꠣ ꠞꠅ। ꠄꠞꠟꠣꠉꠤ ꠀꠝꠤ ꠝꠤꠡꠞ ꠖꠦꠡꠅ ꠉꠎꠛ ꠓꠣꠟꠤꠛꠣꠞ ꠡꠝꠄ, ꠟꠃ ꠟꠦꠙꠣ ꠅꠃ ꠊꠞ ꠛꠣꠖ ꠖꠤꠀ ꠍꠣꠝꠘꠦꠖꠤ ꠎꠣꠁꠝꠥ। ꠝꠃꠔꠞ ꠉꠎꠛ ꠕꠘꠦ ꠔꠥꠝꠞꠣ ꠞꠦꠢꠣꠁ ꠙꠣꠁꠛꠣꠄ।
EXO 12:14 ꠅꠃ ꠖꠤꠘꠞꠦ ꠔꠥꠝꠞꠣ ꠁꠀꠖ ꠞꠣꠈꠤꠅ ꠀꠞ ꠀꠝꠤ ꠝꠣꠛꠥꠖꠞ ꠘꠣꠝꠦ ꠁꠖꠞ ꠖꠤꠘ ꠝꠣꠘꠤꠅ। ꠁ ꠁꠖꠞꠦ ꠔꠥꠝꠞꠣ ꠀꠝꠣꠞ ꠢꠥꠇꠥꠝ ꠝꠘꠅ ꠇꠞꠤꠀ ꠢꠞ-ꠢꠣꠝꠦꠡꠣ ꠅꠀꠞꠤꠡꠞ ꠙꠞ ꠅꠀꠞꠤꠡ ꠗꠞꠤ ꠝꠣꠘꠤꠀ ꠎꠣꠁꠅ।”
EXO 12:15 ꠝꠣꠛꠥꠖꠦ ꠇꠁꠟꠣ, “ꠔꠥꠝꠞꠣ ꠡꠣꠔ ꠖꠤꠘ ꠙꠞ꠆ꠎꠘ꠆ꠔ ꠈꠣꠝꠤꠞ ꠍꠣꠠꠣ ꠞꠥꠐꠤ ꠈꠣꠁꠛꠣꠄ। ꠙꠄꠟꠣ ꠖꠤꠘꠃ ꠎꠣꠞꠎꠤꠞ ꠊꠞ ꠕꠣꠇꠤ ꠢꠇꠟ ꠈꠣꠝꠤꠞ ꠚꠣꠟꠣꠁ ꠖꠤꠛꠣꠄ। ꠁ ꠡꠣꠔꠅ ꠖꠤꠘꠞ ꠝꠣꠎꠦ ꠎꠦꠉꠥꠄ ꠈꠣꠝꠤꠞ ꠀꠟꠣ ꠘꠣꠘ ꠞꠥꠐꠤ ꠈꠣꠁꠛ, ꠔꠣꠞꠦ ꠛꠘꠤ ꠁꠍꠞꠣꠁꠟ ꠕꠘꠦ ꠚꠥꠍꠤꠀ ꠚꠣꠟꠣꠁꠟ ꠅꠁꠛ।
EXO 12:16 ꠙꠄꠟꠣ ꠖꠤꠘ ꠀꠞ ꠡꠣꠔ ꠘꠝ꠆ꠛꠞ ꠖꠤꠘ ꠔꠥꠝꠞꠣ ꠙꠛꠤꠔ꠆ꠞ ꠝꠤꠟꠘ-ꠝꠣꠢꠚꠤꠟ ꠀꠖꠣꠄ ꠇꠞꠛꠣꠄ, ꠁ ꠖꠥꠁ ꠖꠤꠘ ꠈꠣꠟꠤ ꠎꠞꠥꠞꠤ ꠈꠣꠅꠀ-ꠖꠣꠅꠀ ꠍꠣꠠꠣ ꠖꠥꠍꠞꠣ ꠇꠥꠘꠥ ꠇꠣꠝ-ꠇꠣꠎ ꠇꠞꠛꠣꠄ ꠘꠣ।
EXO 12:17 ꠅꠃ ꠟꠣꠈꠣꠘ ꠔꠥꠝꠞꠣ ꠈꠣꠝꠤꠞ ꠍꠣꠠꠣ ꠞꠥꠐꠤꠞ ꠁ ꠁꠖ ꠀꠖꠣꠄ ꠇꠞꠤꠅ, ꠀꠝꠣꠞ ꠢꠥꠇꠥꠝ ꠝꠘꠅ ꠇꠞꠤꠀ ꠅꠀꠞꠤꠡꠞ ꠙꠞ ꠅꠀꠞꠤꠡ ꠗꠞꠤ ꠢꠞ-ꠢꠣꠝꠦꠡꠣ ꠁ ꠁꠖ ꠀꠖꠣꠄ ꠇꠞꠤꠅ। ꠅꠃ ꠖꠤꠘꠃ ꠀꠝꠤ ꠔꠥꠝꠞꠣꠞꠦ ꠍꠤꠙꠣꠁ ꠖꠟꠞ ꠟꠣꠈꠣꠘ ꠇꠞꠤ ꠝꠤꠡꠞ ꠖꠦꠡ ꠕꠣꠇꠤ ꠛꠣꠞ ꠇꠞꠤ ꠀꠘꠝꠥ।
EXO 12:18 ꠔꠥꠝꠞꠣ ꠙꠄꠟꠣ ꠌꠣꠘ꠆ꠖꠞ ꠌꠃꠖ꠆ꠖ ꠔꠣꠞꠤꠈꠞ ꠢꠣꠁꠘ꠆ꠎꠣ ꠕꠣꠇꠤ ꠡꠥꠞꠥ ꠇꠞꠤꠀ, ꠄꠇꠥꠁꠡ ꠔꠣꠞꠤꠈꠞ ꠢꠣꠁꠘ꠆ꠎꠣ ꠙꠞ꠆ꠎꠘ꠆ꠔ ꠈꠣꠝꠤꠞ ꠍꠣꠠꠣ ꠞꠥꠐꠤ ꠈꠣꠁꠅ।
EXO 12:19 ꠅꠃ ꠡꠣꠔ ꠖꠤꠘ ꠎꠣꠔꠦ ꠔꠥꠝꠞꠣꠞ ꠊꠞꠅ ꠈꠣꠝꠤꠞꠞ ꠇꠥꠘꠥ ꠘꠣꠝ-ꠘꠤꠡꠣꠘꠣ ꠘꠣ ꠕꠣꠇꠦ, ꠅꠃ ꠡꠝꠄ ꠇꠦꠃ ꠎꠥꠖꠤ ꠈꠣꠝꠤꠞ ꠀꠟꠣ ꠈꠣꠘꠤ ꠈꠣꠄ, ꠔꠦ ꠢꠦ ꠔꠥꠝꠞꠣꠞ ꠘꠤꠎꠞ ꠎꠣꠔꠤꠞ ꠅꠃꠇ ꠛꠣ ꠜꠤꠘ ꠎꠣꠔꠤꠞ ꠅꠃꠇ, ꠔꠣꠞꠦ ꠛꠘꠤ ꠁꠍꠞꠣꠁꠟꠞ ꠡꠝꠣꠎ ꠕꠣꠇꠤ ꠚꠥꠍꠤꠀ ꠚꠣꠟꠣꠁꠟ ꠅꠁꠛ।
EXO 12:20 ꠁ ꠡꠣꠔ ꠖꠤꠘ ꠔꠥꠝꠞꠣ ꠎꠦꠘꠅꠃ ꠞꠅ ꠘꠣ ꠇꠦꠘꠦ ꠈꠣꠝꠤꠞ ꠀꠟꠣ ꠇꠥꠘ꠆ꠔꠣꠃ ꠈꠣꠁꠅ ꠘꠣ; ꠈꠣꠟꠤ ꠈꠣꠝꠤꠞ ꠍꠣꠠꠣ ꠞꠥꠐꠤ ꠈꠣꠁꠅ।”
EXO 12:21 ꠝꠥꠍꠣꠄ ꠛꠘꠤ ꠁꠍꠞꠣꠁꠟꠞ ꠢꠇꠟ ꠝꠄ-ꠝꠥꠞꠛ꠆ꠛꠤꠞꠦ ꠖꠟꠣ ꠇꠞꠤꠀ ꠇꠁꠟꠣ, “ꠀꠙꠘꠣꠞꠣ ꠎꠣꠃꠇ꠆ꠇꠣ, ꠉꠤꠀ ꠎꠣꠞꠎꠤꠞ ꠙꠞꠤꠛꠣꠞꠞ ꠟꠣꠉꠤ ꠀꠎꠣꠖꠤ ꠁꠖꠞ ꠝꠦꠠꠣ-ꠛꠣꠁꠌ꠆ꠌꠣ ꠀꠘꠤꠀ ꠎꠛ ꠇꠞꠃꠇ꠆ꠇꠣ।
EXO 12:22 ꠀꠞ ‘ꠄꠍꠥꠛ’ ꠉꠣꠍꠞ ꠄꠇ ꠀꠐꠤ ꠒꠦꠐꠣ ꠟꠁꠀ, ꠙꠣꠔꠤꠟꠅ ꠕꠅꠀ ꠟꠃꠔ ꠛꠥꠠꠣꠁꠀ ꠖꠥꠀꠞꠞ ꠌꠃꠇꠣꠑꠞ ꠖꠥꠁꠅ ꠉꠣꠟꠣꠔ ꠀꠞ ꠃꠙꠞꠦ ꠟꠣꠉꠣꠁꠅ। ꠡꠣꠛꠗꠣꠘ! ꠡꠥꠞꠥꠎ ꠃꠑꠣꠞ ꠀꠉꠦ ꠇꠦꠃ ꠊꠞꠞ ꠛꠣꠞꠦ ꠛꠣꠞ ꠅꠁꠅ ꠘꠣ।
EXO 12:23 ꠝꠤꠡꠞꠤ ꠅꠇꠟꠞꠦ ꠝꠣꠞꠣꠞ ꠟꠣꠉꠤ ꠝꠣꠛꠥꠖꠦ ꠎꠦꠛꠟꠣ ꠝꠤꠡꠞ ꠖꠦꠡꠞ ꠝꠣꠎꠖꠤ ꠔꠡꠞꠤꠚ ꠘꠤꠛꠣ, ꠅꠃ ꠡꠝꠄ ꠔꠥꠝꠞꠣꠞ ꠌꠃꠇꠣꠑꠞ ꠃꠙꠞꠦ ꠀꠞ ꠖꠥꠁꠅ ꠉꠣꠟꠣꠔ ꠟꠃ ꠖꠦꠈꠟꠦ, ꠔꠣꠁꠘ ꠁ ꠊꠞ ꠛꠣꠖ ꠖꠤꠀ ꠍꠣꠝꠘꠦꠖꠤ ꠀꠉꠥꠀꠁꠛꠣ। ꠀꠎꠞꠣꠁꠟ ꠚꠤꠞꠤꠡ꠆ꠔꠣꠞꠦ ꠔꠥꠝꠞꠣꠞ ꠊꠞꠅ ꠢꠣꠝꠣꠁꠀ ꠝꠣꠞꠔꠦ ꠖꠤꠔꠣ ꠘꠣꠄ।
EXO 12:24 “ꠀꠝꠣꠞ ꠛꠣꠔꠣꠁꠟ ꠢꠥꠇꠥꠝ ꠝꠘꠅ ꠇꠞꠤꠀ ꠔꠥꠝꠞꠣ ꠀꠞ ꠔꠥꠝꠞꠣꠞ ꠀꠅꠟꠣꠖ ꠅꠇꠟꠦ ꠁ ꠁꠖꠞꠦ ꠀꠖꠣꠄ ꠇꠞꠤꠅ।
EXO 12:25 ꠀꠝꠤ ꠀꠝꠣꠞ ꠘꠤꠎꠞ ꠅꠀꠖꠣ ꠝꠣꠚꠤꠇ ꠔꠥꠝꠞꠣꠞꠦ ꠎꠦ ꠖꠦꠡ ꠖꠤꠝꠥ, ꠢꠃ ꠖꠦꠡꠅ ꠉꠤꠀ ꠢꠣꠞꠟꠦꠅ ꠔꠥꠝꠞꠣ ꠁ ꠁꠖ ꠀꠖꠣꠄ ꠇꠞꠤꠅ।
EXO 12:26 ꠔꠥꠝꠞꠣꠞ ꠢꠥꠞꠥꠔ꠆ꠔꠣꠁꠘ꠆ꠔꠦ ꠎꠦꠛꠟꠣ ꠔꠥꠝꠞꠣꠞꠦ ꠎꠤꠇꠣꠁꠛꠣ, ꠁ ꠁꠖꠞ ꠇꠣꠞꠘ ꠇꠤꠔꠣ? ꠁꠐꠣ ꠇꠤꠟꠣ ꠀꠁꠍꠦ?
EXO 12:27 ꠔꠦ ꠔꠥꠝꠞꠣ ꠎꠥꠀꠙ ꠖꠤꠅ, ꠁꠐꠣ ꠝꠣꠛꠥꠖꠞ ꠘꠣꠝꠦ ꠀꠎꠣꠖꠤ ꠁꠖꠞ ꠇꠥꠞꠛꠣꠘꠤ। ꠝꠤꠡꠞꠤ ꠅꠇꠟꠞꠦ ꠝꠣꠞꠛꠣꠞ ꠛꠣꠟꠣ ꠔꠣꠁꠘ ꠝꠤꠡꠞ ꠖꠦꠡꠅ ꠛꠘꠤ ꠁꠍꠞꠣꠁꠟꠞ ꠊꠞ ꠛꠣꠖ ꠖꠤꠀ ꠍꠣꠝꠘꠦꠖꠤ ꠀꠉꠥꠀꠁ ꠉꠤꠀ, ꠀꠝꠞꠣꠞꠦ ꠀꠎꠣꠖ ꠇꠞꠍꠟꠣ।” ꠁꠈꠣꠘ ꠢꠥꠘꠤꠀ ꠢꠇꠟ ꠝꠣꠘꠡꠦ ꠝꠣꠛꠥꠖꠞꠦ ꠍꠁꠎꠖꠣ ꠇꠞꠟꠣ।
EXO 12:28 ꠝꠥꠍꠣ ꠀꠞ ꠢꠣꠞꠥꠘꠞꠦ ꠝꠣꠛꠥꠖꠦ ꠎꠦꠟꠣ ꠛꠣꠔꠣꠁ ꠖꠤꠍꠟꠣ, ꠢꠇꠟ ꠛꠘꠤ ꠁꠍꠞꠣꠁꠟ ꠔꠣꠞꠣꠞ ꠊꠞꠅ ꠉꠤꠀ ꠅꠃ ꠟꠣꠈꠣꠘ ꠇꠣꠝ ꠇꠞꠟꠣ।
EXO 12:29 ꠢꠦꠡꠦ ꠝꠣꠎ ꠞꠣꠁꠔꠦ ꠅꠃ ꠟꠣꠈꠣꠘ ꠊꠐꠟ, ꠝꠣꠛꠥꠖꠦ ꠉꠖꠤꠔ ꠛꠅꠀ ꠚꠦꠞꠣꠃꠘꠞ ꠙꠥꠀ ꠕꠘꠦ ꠎꠦꠟ ꠈꠣꠘꠣꠞ ꠛꠘ꠆ꠖꠤꠞ ꠙꠥꠀ ꠙꠞ꠆ꠎꠘ꠆ꠔ ꠢꠇ꠆ꠇꠟꠞꠦ ꠝꠣꠞꠤꠟꠤꠟꠣ। ꠝꠤꠡꠞ ꠖꠦꠡꠞ ꠢꠇ꠆ꠇꠟ ꠙꠞꠤꠛꠣꠞꠞ ꠛꠠ ꠙꠥꠀꠂꠘ ꠀꠞ ꠙꠡꠥꠁꠘ꠆ꠔꠞ ꠙꠄꠟꠣ ꠝꠦꠖꠣ ꠛꠣꠁꠌ꠆ꠌꠣꠞꠦꠅ ꠔꠣꠁꠘ ꠝꠣꠞꠤꠟꠤꠟꠣ।
EXO 12:30 ꠔꠦꠃ ꠚꠦꠞꠣꠃꠘ ꠀꠞ ꠔꠣꠞ ꠃꠎꠤꠞ-ꠘꠣꠎꠤꠞ ꠅꠇꠟ, ꠝꠤꠡꠞꠞ ꠢꠇꠟ ꠝꠣꠘꠥꠡ ꠢꠎꠣꠉ ꠅꠁꠀ ꠃꠑꠟꠣ, ꠀꠡ꠆ꠔꠣ ꠝꠤꠡꠞ ꠖꠦꠡꠅ ꠛꠦꠕꠣꠄꠀ ꠇꠣꠘ꠆ꠖꠘꠞ ꠞꠥꠁꠟ ꠙꠠꠟ; ꠇꠣꠞꠘ ꠅꠟꠣ ꠇꠥꠘꠥ ꠊꠞ ꠞꠁꠍꠤꠟ ꠘꠣ, ꠎꠦ ꠊꠞꠅ ꠇꠦꠃ ꠘꠣ ꠇꠦꠃ ꠝꠞꠍꠦ ꠘꠣ।
EXO 12:31 ꠢꠃ ꠞꠣꠁꠔꠃ ꠚꠦꠞꠣꠃꠘꠦ ꠝꠥꠍꠣ ꠀꠞ ꠢꠣꠞꠥꠘꠞꠦ ꠀꠘꠣꠁꠀ ꠇꠁꠟ, “ꠔꠥꠝꠞꠣ ꠎꠟꠖꠤ ꠎꠣꠅ, ꠛꠘꠤ ꠁꠍꠞꠣꠁꠟꠞꠦ ꠟꠁꠀ ꠀꠝꠣꠞ ꠙ꠆ꠞꠎꠣꠞ ꠉꠦꠍ ꠕꠘꠦ ꠢꠞꠅ। ꠔꠥꠝꠞꠣ ꠎꠦꠟꠣ ꠇꠁꠍ, ꠅꠃꠟꠣ ꠉꠤꠀ ꠝꠣꠛꠥꠖꠞ ꠄꠛꠣꠖꠔ ꠇꠞꠅ।
EXO 12:32 ꠔꠥꠝꠞꠣꠞ ꠎꠛꠣꠘ ꠝꠔꠃ ꠔꠥꠝꠞꠣꠞ ꠉꠞꠥ-ꠝꠦꠠꠣꠞ ꠙꠣꠟ ꠅꠇꠟꠞꠦꠅ ꠘꠦꠅꠉꠤ। ꠔꠥꠝꠞꠣ ꠀꠝꠣꠞꠦꠅ ꠘꠦꠇ ꠖꠥꠀ ꠖꠦꠅ।”
EXO 12:33 ꠝꠤꠡꠞꠤ ꠅꠇꠟꠦ ꠈꠥꠛ ꠒꠞꠣꠁꠟꠣ, ꠔꠣꠞꠣ ꠝꠘꠅ ꠇꠞꠟꠣ ꠔꠣꠞꠣꠅ ꠝꠞꠤꠎꠤꠛꠣ। ꠄꠞꠟꠣꠉꠤ ꠔꠣꠞꠣ ꠔꠣꠉꠖꠣ ꠖꠤꠔꠣ ꠟꠣꠉꠟꠣ, ꠛꠘꠤ ꠁꠍꠞꠣꠁꠟ ꠎꠟꠖꠤ ꠇꠞꠤ ꠛꠤꠖꠣꠄ ꠅꠁꠔꠣ।
EXO 12:34 ꠛꠘꠤ ꠁꠍꠞꠣꠁꠟꠦ ꠔꠣꠞꠣꠞ ꠝꠄꠖꠣꠞ ꠈꠣꠁꠞ ꠝꠣꠎꠦ ꠈꠣꠝꠤꠞ ꠙꠥꠞꠣꠁꠛꠣꠞ ꠀꠉꠦꠃ, ꠈꠣꠁ ꠡꠢ ꠉꠣꠝꠟꠣꠁꠘ ꠇꠣꠙꠠꠖꠤ ꠉꠣꠁꠐ ꠛꠣꠘ꠆ꠖꠤꠀ ꠇꠣꠘ꠆ꠖꠅ ꠟꠁꠟꠣ।
EXO 12:35 ꠢꠇꠟ ꠛꠘꠤ ꠁꠍꠞꠣꠁꠟꠦ ꠝꠥꠍꠣꠞ ꠙꠞꠣꠝꠤꠡ ꠝꠔ, ꠝꠤꠡꠞꠤ ꠅꠇꠟꠞ ꠡꠥꠘꠣ-ꠞꠥꠙꠣꠞ ꠉꠄꠘꠣ-ꠉꠣꠐꠤ ꠀꠞ ꠇꠣꠙꠠ-ꠌꠥꠙꠠ ꠈꠥꠎꠤꠀ ꠘꠤꠟꠣ।
EXO 12:36 ꠝꠣꠛꠥꠖꠦ ꠀꠉ ꠕꠘꠦꠃ ꠝꠤꠡꠞꠤ ꠅꠇꠟꠞ ꠖꠤꠟꠞ ꠝꠣꠎꠦ ꠄꠇ ꠖꠄꠀ-ꠝꠣꠄꠀ ꠙꠄꠖꠣ ꠇꠞꠍꠟꠣ, ꠎꠣꠔꠦ ꠛꠘꠤ ꠁꠍꠞꠣꠁꠟꠦ ꠎꠦꠔꠣ ꠈꠥꠎꠤꠛꠣ, ꠅꠔꠣꠃ ꠎꠣꠘꠥ ꠔꠣꠞꠣꠞꠦ ꠖꠦꠁꠘ। ꠅꠃ ꠟꠣꠈꠣꠘ ꠇꠞꠤ ꠔꠣꠞꠣ ꠝꠤꠡꠞꠤ ꠅꠇꠟꠞ ꠛꠃꠔ ꠗꠘ-ꠖꠃꠟꠔꠅ ꠇꠛꠎꠣ ꠇꠞꠟꠣ।
EXO 12:37 ꠅꠔꠣ ꠘꠤꠀ ꠛꠘꠤ ꠁꠍꠞꠣꠁꠟ ꠞꠣꠝꠣꠡꠦꠡ ꠄꠟꠣꠇꠣ ꠕꠣꠇꠤ ꠡꠥꠇ꠆ꠇꠔꠞ ꠝꠥꠈꠣ ꠞꠅꠀꠘꠣ ꠅꠁꠟꠣ। ꠔꠣꠞꠣꠞ ꠝꠣꠎꠦ ꠅꠘꠥꠝꠣꠘ ꠍꠄ ꠟꠣꠈ ꠡꠛꠟ ꠛꠦꠐꠣꠁꠘ ꠀꠐꠤꠀ ꠉꠦꠟꠣ। ꠄꠞꠣꠞ ꠟꠉꠦ ꠛꠦꠐꠤꠘ ꠀꠞ ꠢꠥꠞꠥꠔ꠆ꠔꠣꠁꠘꠅ ꠀꠍꠟꠣ।
EXO 12:38 ꠛꠘꠤ ꠁꠍꠞꠣꠁꠟ ꠛꠣꠖꠦꠅ ꠔꠣꠞꠣꠞ ꠟꠉꠦ ꠞꠅꠞꠣ ꠀꠞꠅ ꠛꠃꠔ ꠝꠣꠘꠥꠡ, ꠉꠞꠥ-ꠝꠦꠠꠣꠞ ꠙꠣꠟ ꠢꠇꠟꠔꠣ ꠝꠤꠟꠤꠀ ꠛꠃꠔ ꠛꠠ ꠖꠟ ꠛꠣꠘ꠆ꠖꠤꠀ ꠞꠅꠀꠘꠣ ꠖꠤꠟꠣ।
EXO 12:39 ꠛꠣꠖꠦ ꠔꠣꠞꠣ ꠝꠤꠡꠞ ꠕꠣꠇꠤ ꠀꠘꠣ ꠢꠃ ꠝꠄꠖꠣꠞ ꠈꠣꠁ ꠖꠤꠀ ꠈꠣꠝꠤꠞ ꠍꠣꠠꠣ ꠞꠥꠐꠤ ꠛꠣꠘꠣꠁꠟꠣ। ꠝꠤꠡꠞ ꠕꠣꠇꠤ ꠔꠣꠞꠣꠞꠦ ꠎꠟꠖꠤ ꠇꠞꠤ ꠛꠤꠖꠣꠄ ꠖꠦꠅꠀꠄ ꠁ ꠈꠣꠁꠔ ꠈꠣꠝꠤꠞ ꠝꠣꠈꠣꠁꠛꠣꠞ ꠡꠝꠄꠃ ꠙꠣꠁꠍꠟꠣ ꠘꠣ, ꠀꠞ ꠙꠕꠞ ꠟꠣꠉꠤ ꠇꠥꠘꠥ ꠝꠍꠣꠅ ꠘꠤꠔꠣ ꠙꠣꠞꠍꠟꠣ ꠘꠣ।
EXO 12:40 ꠛꠘꠤ ꠁꠍꠞꠣꠁꠟ ꠝꠤꠡꠞꠅ ꠢꠇ꠆ꠇꠟꠔꠣꠄ ꠌꠣꠁꠞ-ꠡ ꠔꠤꠡ ꠛꠞꠍ ꠛꠡꠔ ꠇꠞꠍꠟꠣ।
EXO 12:41 ꠑꠤꠇ ꠅꠃ ꠌꠣꠁꠞ-ꠡ ꠔꠤꠡ ꠛꠞꠍ ꠙꠥꠞꠣ ꠅꠁꠛꠣꠞ ꠖꠤꠘꠅ ꠝꠣꠛꠥꠖꠞ ꠢꠇ꠆ꠇꠟ ꠛꠘ꠆ꠖꠣ, ꠍꠤꠙꠣꠁ ꠖꠟꠞ ꠟꠣꠈꠣꠘ ꠢꠣꠎꠤꠀ ꠝꠤꠡꠞ ꠖꠦꠡ ꠕꠣꠇꠤ ꠛꠣꠞ ꠅꠁꠟꠣ।
EXO 12:42 ꠅꠃ ꠞꠣꠁꠔ ꠝꠣꠛꠥꠖꠦ ꠀꠙꠘ ꠇꠥꠖꠞꠔꠤ ꠍꠣꠄꠀꠄ ꠙꠣꠢꠣꠞꠣ ꠖꠤꠀ ꠔꠣꠞꠣꠞꠦ ꠝꠤꠡꠞ ꠖꠦꠡ ꠕꠣꠇꠤ ꠛꠣꠞ ꠇꠞꠤꠀ ꠀꠘꠣꠄ, ꠁ ꠞꠣꠁꠔꠈꠣꠘ ꠄꠛꠣꠖꠔꠤꠞ ꠞꠣꠁꠔ। ꠢꠇ꠆ꠇꠟ ꠛꠘꠤ ꠁꠍꠞꠣꠁꠟꠞ ꠟꠣꠉꠤ ꠅꠀꠞꠤꠡꠞ ꠙꠞ ꠅꠀꠞꠤꠡ ꠗꠞꠤ, ꠝꠣꠛꠥꠖꠞ ꠘꠣꠝꠦ ꠃꠎꠣꠉꠞꠤ ꠇꠞꠣꠞ ꠄꠇ ꠈꠣꠍ ꠞꠣꠁꠔ।
EXO 12:43 ꠝꠣꠛꠥꠖꠦ ꠝꠥꠍꠣ ꠀꠞ ꠢꠣꠞꠥꠘꠞꠦ ꠇꠁꠟꠣ, “ꠀꠎꠣꠖꠤ ꠁꠖꠞ ꠇꠥꠞꠛꠣꠘꠤꠞ ꠘꠤꠅꠝ-ꠇꠣꠘꠥꠘ ꠀꠝꠤ ꠔꠥꠝꠞꠣꠞꠦ ꠢꠤꠇꠣꠁ ꠖꠤꠀꠞ। ꠢꠥꠘꠅ, ꠅꠁꠘ꠆ꠘ ꠇꠥꠘꠥ ꠎꠣꠔꠤꠞ ꠝꠣꠘꠡꠞꠦ ꠄꠞ ꠉꠥꠡ꠆ꠔ ꠈꠣꠁꠔꠦ ꠖꠤꠛꠣꠄ ꠘꠣ।
EXO 12:44 ꠅꠁꠟꠦ ꠈꠞꠤꠖꠣ ꠉꠥꠟꠣꠝꠦ ꠝꠍꠟꠝꠣꠘꠤ ꠇꠞꠣꠘꠤꠞ ꠛꠣꠖꠦ ꠁꠔꠣ ꠈꠣꠁꠔ ꠙꠣꠞꠛ।
EXO 12:45 ꠅꠁꠘ꠆ꠘ ꠎꠦꠇꠥꠘꠥ ꠎꠣꠔꠤꠞ ꠝꠥꠍꠣꠚꠤꠞ ꠛꠣ ꠛꠦꠔꠘꠖꠣꠞꠤ ꠇꠣꠝꠟꠣꠞꠦꠅ ꠁꠔꠣ ꠈꠣꠅꠀꠁꠅ ꠘꠣ।
EXO 12:46 ꠔꠥꠝꠞꠣ ꠎꠣꠞ ꠛꠣꠠꠤꠔ ꠙꠡꠥ ꠎꠛ ꠇꠞꠛꠣꠄ ꠢꠃ ꠛꠣꠠꠤꠔꠃ ꠄꠞ ꠉꠥꠡ꠆ꠔ ꠈꠣꠁꠔꠦ ꠅꠁꠛ; ꠛꠣꠠꠤꠞ ꠛꠣꠞꠦ ꠇꠥꠘ꠆ꠔꠣꠃ ꠘꠤꠛꠣꠄ ꠘꠣ, ꠙꠡꠥꠞ ꠇꠥꠘꠥ ꠀꠒ꠆ꠒꠤ ꠜꠣꠋꠉꠤꠛꠣꠄ ꠘꠣ।
EXO 12:47 ꠔꠣꠝꠣꠝ ꠛꠘꠤ ꠁꠍꠞꠣꠁꠟꠦ ꠅꠃ ꠁꠖ ꠀꠖꠣꠄ ꠇꠞꠛꠣꠄ।
EXO 12:48 ꠔꠥꠝꠞꠣꠞ ꠟꠉꠦ ꠞꠅꠞꠣ ꠇꠥꠘꠥ ꠀꠛꠣꠖꠤꠄ ꠎꠥꠖꠤ ꠝꠣꠛꠥꠖꠞ ꠘꠣꠝꠞ ꠁ ꠁꠖ ꠝꠣꠘꠔ ꠌꠣꠄ, ꠔꠦ ꠙꠄꠟꠣ ꠔꠣꠞ ꠙꠞꠤꠛꠣꠞꠞ ꠢꠇꠟ ꠛꠦꠐꠣꠁꠘ꠆ꠔꠞ ꠝꠍꠟꠝꠣꠘꠤ ꠇꠞꠣꠘꠤ ꠟꠣꠉꠛ। ꠛꠣꠖꠦ ꠢꠦ ꠛꠘꠤ ꠁꠍꠞꠣꠁꠟꠞ ꠟꠣꠈꠣꠘ ꠁꠖ ꠀꠖꠣꠄ ꠇꠞꠔ ꠙꠣꠞꠛ। ꠅꠁꠟꠦ ꠝꠍꠟꠝꠣꠘꠤ ꠇꠞꠣꠘꠤ ꠍꠣꠠꠣ ꠇꠦꠃ ꠁ ꠉꠥꠡ꠆ꠔ ꠈꠣꠁꠔ ꠙꠣꠞꠔ ꠘꠣꠄ।
EXO 12:49 ꠛꠘꠤ ꠁꠍꠞꠣꠁꠟꠞ ꠟꠣꠉꠤ ꠀꠞ ꠀꠛꠣꠖꠤꠞ ꠟꠣꠉꠤꠅ ꠄꠇ ꠢꠝꠣꠘ ꠀꠁꠘ ꠎꠣꠞꠤ ꠅꠁꠟ।”
EXO 12:50 ꠝꠣꠛꠥꠖꠦ ꠝꠥꠍꠣ ꠀꠞ ꠢꠣꠞꠥꠘꠞꠦ ꠎꠦꠟꠣ ꠢꠥꠇꠥꠝ ꠖꠤꠍꠟꠣ, ꠛꠘꠤ ꠁꠍꠞꠣꠁꠟꠦ ꠢꠣꠍꠣꠞꠞ ꠅꠃꠟꠣꠃ ꠀꠝꠟ ꠇꠞꠟꠣ।
EXO 12:51 ꠝꠣꠛꠥꠖꠦ ꠢꠃ ꠖꠤꠘꠃ ꠍꠤꠙꠣꠁ ꠖꠟꠞ ꠟꠣꠈꠣꠘ ꠇꠞꠤ, ꠛꠘꠤ ꠁꠍꠞꠣꠁꠟ ꠅꠇꠟꠞꠦ ꠝꠤꠡꠞ ꠖꠦꠡ ꠕꠣꠇꠤ ꠛꠣꠞ ꠇꠞꠤ ꠀꠘꠟꠣ।
EXO 13:1 ꠝꠣꠛꠥꠖꠦ ꠝꠥꠍꠣꠞꠦ ꠢꠥꠇꠥꠝ ꠖꠤꠟꠣ,
EXO 13:2 “ꠔꠥꠝꠤ ꠛꠘꠤ ꠁꠍꠞꠣꠁꠟꠞ ꠢꠇ꠆ꠇꠟ ꠙꠞꠤꠛꠣꠞꠞ ꠛꠠ ꠙꠥꠀꠂꠘꠞꠦ ꠀꠝꠣꠞ ꠘꠣꠝꠦ ꠀꠟꠉ ꠇꠞꠤꠀ ꠡꠙꠤꠀ ꠖꠦꠅ। ꠁꠔꠣ ꠇꠥꠘꠥ ꠝꠣꠘꠡꠞ ꠙꠥꠀ ꠅꠃꠇ ꠛꠣ ꠙꠡꠥꠞ ꠛꠣꠁꠌ꠆ꠌꠣ ꠅꠃꠇ। ꠢꠇꠟꠔꠣꠞ ꠛꠠ ꠙꠥꠀꠂꠘ ꠈꠣꠟꠤ ꠀꠝꠣꠞꠃ।”
EXO 13:3 ꠔꠦꠃ ꠝꠥꠍꠣꠄ ꠝꠣꠘꠡꠞꠦ ꠇꠁꠟꠣ, “ꠁ ꠖꠤꠘ ꠈꠣꠘꠞꠦ ꠔꠥꠝꠞꠣ ꠁꠀꠖ ꠞꠣꠈꠤꠅ, ꠅꠃ ꠖꠤꠘꠃ ꠔꠥꠝꠞꠣ ꠝꠤꠡꠞꠞ ꠉꠥꠟꠣꠝꠤ ꠕꠣꠇꠤ ꠀꠎꠣꠖ ꠅꠁꠍ। ꠝꠣꠛꠥꠖꠦ ꠔꠣꠘ ꠇꠥꠖꠞꠔꠤ ꠀꠔ ꠖꠤꠀ ꠔꠥꠝꠞꠣꠞꠦ ꠢꠘ ꠕꠣꠇꠤ ꠛꠣꠞ ꠇꠞꠍꠂꠘ। ꠁ ꠖꠤꠘ ꠇꠥꠘꠥꠎꠣꠔꠞ ꠈꠣꠝꠤꠞ ꠀꠟꠣ ꠈꠣꠘꠣ ꠈꠣꠁꠅ ꠘꠣ।
EXO 13:4 ꠀꠛꠤꠛ ꠌꠣꠘ꠆ꠖꠞ ꠅꠃ ꠔꠣꠞꠤꠈꠅ ꠔꠥꠝꠞꠣ ꠛꠣꠞ ꠅꠁꠟꠣꠄ।
EXO 13:5 ꠝꠣꠛꠥꠖꠦ ꠔꠥꠝꠞꠣꠞ ꠛꠣꠚ-ꠖꠣꠖꠣꠞ ꠉꠦꠍꠦ ꠅꠀꠖꠣ ꠇꠞꠍꠂꠘ, ꠇꠦꠘꠣꠘꠤ, ꠢꠤꠐ꠆ꠐꠤ, ꠀꠝꠥꠞꠤ, ꠢꠤꠛ꠆ꠛꠤ ꠀꠞ ꠎꠤꠛꠥꠎꠤ ꠅꠇꠟꠞ ꠖꠦꠡꠅ ꠔꠥꠝꠞꠣꠞꠦ ꠘꠤꠛꠣꠉꠤ। ꠁ ꠖꠦꠡ ꠖꠥꠗ ꠀꠞ ꠝꠃꠞ ꠜꠣꠘ꠆ꠒꠣꠞ ꠀꠟꠣ ꠖꠦꠡ। ꠔꠦ ꠢꠘꠅ ꠉꠤꠀ ꠢꠣꠞꠟꠦꠅ ꠔꠥꠝꠞꠣ ꠙꠞꠔꠦꠇ ꠛꠍꠞ ꠀꠛꠤꠛ ꠌꠣꠘ꠆ꠖꠞ ꠅꠃ ꠁꠖ ꠀꠖꠣꠄ ꠇꠞꠤꠅ।
EXO 13:6 “ꠔꠥꠝꠞꠣ ꠡꠣꠔ ꠖꠤꠘ ꠙꠞ꠆ꠎꠘ꠆ꠔ ꠈꠣꠝꠤꠞ ꠍꠣꠠꠣ ꠞꠥꠐꠤ ꠈꠣꠁꠅ, ꠛꠣꠖꠦ ꠡꠣꠔ ꠘꠝ꠆ꠛꠞ ꠖꠤꠘꠅ ꠝꠣꠛꠥꠖꠞ ꠘꠣꠝꠦ ꠁꠖ ꠀꠖꠣꠄ ꠇꠞꠤꠅ।
EXO 13:7 ꠁ ꠡꠣꠔꠅ ꠖꠤꠘ ꠈꠣꠝꠤꠞ ꠍꠣꠠꠣ ꠞꠥꠐꠤ ꠈꠣꠅꠀ ꠟꠣꠉꠛ, ꠔꠥꠝꠞꠣꠞ ꠉꠦꠍꠦ ꠈꠣꠝꠤꠞ ꠀꠟꠣ ꠇꠥꠘꠥꠎꠣꠔꠞ ꠈꠣꠘꠣ ꠎꠣꠔꠦ ꠘꠣ ꠖꠦꠈꠤ, ꠔꠥꠝꠞꠣꠞ ꠀꠡ꠆ꠔꠣ ꠖꠦꠡꠞ ꠜꠤꠔꠞꠦꠅ ꠎꠣꠘꠥ ꠇꠥꠘꠥ ꠈꠣꠝꠤꠞ ꠘꠣ ꠝꠤꠟꠦ।
EXO 13:8 ꠁ ꠖꠤꠘ ꠔꠥꠝꠞꠣ ꠢꠇꠟꠦ ꠎꠣꠞꠎꠤꠞ ꠙꠥꠀꠂꠘ꠆ꠔꠞꠦ ꠇꠁꠅ, ‘ꠀꠝꠞꠣ ꠎꠦꠛꠟꠣ ꠝꠤꠡꠞ ꠕꠣꠇꠤ ꠛꠣꠞ ꠅꠁꠀ ꠀꠁꠍꠟꠣꠝ, ꠅꠃ ꠡꠝꠄ ꠝꠣꠛꠥꠖꠦ ꠀꠝꠞꠣꠞꠦ ꠎꠦꠟꠣ ꠞꠢꠝ ꠇꠞꠍꠟꠣ, ꠅꠔꠣꠞꠦ ꠝꠘꠅ ꠞꠣꠈꠣꠞ ꠟꠣꠉꠤ ꠀꠝꠤꠅ ꠅꠈꠘ ꠅꠟꠣ ꠇꠞꠞꠣꠝ।’
EXO 13:9 ꠅꠃ ꠟꠣꠈꠣꠘ ꠔꠥꠝꠞꠣ ꠎꠣꠞꠎꠤꠞ ꠀꠅꠟꠣꠖ ꠅꠇꠟꠞꠦ ꠝꠣꠛꠥꠖꠞ ꠢꠥꠇꠥꠝ ꠔꠣꠟꠤꠝ ꠖꠤꠅ, ꠎꠣꠔꠦ ꠔꠥꠝꠞꠣꠞ ꠝꠘꠅ ꠞꠄ, ꠝꠣꠛꠥꠖꠦ ꠔꠣꠘ ꠇꠥꠖꠞꠔꠤ ꠀꠔ ꠖꠤꠀ ꠔꠥꠝꠞꠣꠞꠦ ꠝꠤꠡꠞ ꠖꠦꠡ ꠕꠣꠇꠤ ꠛꠣꠞ ꠇꠞꠤ ꠀꠘꠍꠂꠘ। ꠔꠥꠝꠞꠣꠞ ꠀꠔꠞ ꠛꠣ ꠇꠙꠣꠟꠞ ꠔꠣꠛꠤꠎ-ꠇꠛꠎꠞ ꠟꠣꠈꠣꠘ, ꠅꠃ ꠔꠣꠟꠤꠝꠞꠦꠅ ꠢꠣꠝꠦꠡꠣ ꠌꠈꠥꠞ ꠍꠣꠝꠘꠦ ꠞꠣꠈꠤꠅ।
EXO 13:10 ꠄꠞꠟꠣꠉꠤ ꠙꠞꠔꠦꠇ ꠛꠞꠍ ꠅꠃ ꠅꠇ꠆ꠔ ꠀꠁꠟꠦꠃ ꠔꠥꠝꠞꠣ ꠁ ꠘꠤꠅꠝ ꠀꠖꠣꠄ ꠇꠞꠤꠅ।
EXO 13:11 “ꠝꠣꠛꠥꠖꠦ ꠔꠥꠝꠞꠣꠞ ꠉꠦꠍꠦ ꠀꠞ ꠔꠥꠝꠞꠣꠞ ꠛꠣꠚ-ꠖꠣꠖꠣꠁꠘ꠆ꠔꠞ ꠉꠦꠍꠦ ꠎꠦꠟꠣ ꠅꠀꠖꠣ ꠇꠞꠍꠂꠘ, ꠅꠃ ꠅꠀꠖꠣ ꠝꠣꠚꠤꠇ ꠔꠣꠁꠘ ꠔꠥꠝꠞꠣꠞꠦ ꠇꠦꠘꠣꠘꠤ ꠅꠇꠟꠞ ꠖꠦꠡ ꠖꠣꠘ ꠇꠞꠍꠂꠘ। ꠔꠦ ꠝꠣꠛꠥꠖꠦ ꠢꠘꠅ ꠘꠤꠀ ꠢꠣꠞꠟꠦ,
EXO 13:12 ꠔꠥꠝꠞꠣ ꠎꠣꠞꠎꠤꠞ ꠛꠠ ꠙꠥꠀꠞꠦ ꠝꠣꠛꠥꠖꠞ ꠘꠣꠝꠦ ꠡꠙꠤꠀ ꠖꠤꠟꠣꠁꠅ; ꠄꠞꠟꠉꠦ ꠔꠥꠝꠞꠣꠞ ꠢꠇꠟ ꠙꠡꠥꠁꠘ꠆ꠔꠞ ꠙꠄꠟꠣ ꠝꠦꠖꠣ ꠛꠣꠁꠌ꠆ꠌꠣꠞꠦꠅ ꠝꠣꠛꠥꠖꠞ ꠘꠣꠝꠦ ꠖꠤꠟꠣꠁꠅ, ꠁꠔꠣ ꠔ ꠝꠣꠛꠥꠖꠞꠃ।
EXO 13:13 ꠅꠁꠟꠦ ꠢꠇꠟ ꠉꠣꠗꠤꠘ꠆ꠔꠞ ꠙꠄꠟꠣ ꠝꠦꠖꠣ ꠛꠣꠁꠌ꠆ꠌꠣꠞ ꠛꠖꠟꠣ, ꠔꠥꠝꠞꠣ ꠄꠉꠥ ꠝꠦꠠꠣ-ꠛꠣꠁꠌ꠆ꠌꠣ ꠖꠤꠀ ꠈꠣꠟꠣꠍ ꠇꠞꠣꠁꠅ। ꠈꠣꠟꠣꠍ ꠘꠣ ꠇꠞꠣꠁꠟꠦ ꠉꠣꠗꠣ ꠛꠣꠁꠌ꠆ꠌꠣꠞ ꠉꠞ꠆ꠖꠘꠣ ꠜꠣꠋꠉꠤ ꠖꠤꠅ। ꠝꠘꠅ ꠞꠣꠈꠤꠅ, ꠔꠥꠝꠞꠣꠞ ꠢꠇ꠆ꠇꠟ ꠙꠞꠤꠛꠣꠞꠞ ꠛꠠ ꠙꠥꠀꠂꠘꠞꠦ ꠈꠣꠟꠣꠍ ꠇꠞꠣꠘꠤ ꠟꠣꠉꠛ।
EXO 13:14 “ꠔꠥꠝꠞꠣꠞ ꠙꠥꠀꠂꠘ꠆ꠔꠦ ꠎꠦꠛꠟꠣ ꠎꠤꠇꠣꠁꠛꠣ, ꠁꠔꠣ ꠇꠤꠔꠣꠞ ꠟꠣꠉꠤ ꠇꠞꠣ ꠟꠣꠉꠦ? ꠔꠥꠝꠞꠣ ꠎꠥꠀꠙ ꠖꠤꠅ, ‘ꠝꠣꠛꠥꠖꠦ ꠔꠣꠘ ꠇꠥꠖꠞꠔꠤ ꠀꠔ ꠖꠤꠀ ꠀꠝꠞꠣꠞꠦ ꠝꠤꠡꠞꠞ ꠉꠥꠟꠣꠝꠤ ꠕꠣꠇꠤ ꠀꠎꠣꠖ ꠇꠞꠤ ꠀꠘꠍꠂꠘ।
EXO 13:15 ꠚꠦꠞꠣꠃꠘꠦ ꠘꠣ-ꠢꠥꠝꠣꠞꠤ ꠇꠞꠤꠀ ꠎꠦꠛꠟꠣ ꠀꠝꠞꠣꠞꠦ ꠀꠁꠔꠦ ꠖꠤꠟ ꠘꠣ, ꠅꠃ ꠡꠝꠄ ꠝꠣꠛꠥꠖꠦ ꠝꠤꠡꠞ ꠖꠦꠡꠞ ꠢꠇꠟ ꠙꠞꠤꠛꠣꠞꠞ ꠛꠠ ꠙꠥꠀꠂꠘ꠆ꠔꠞꠦ, ꠝꠣꠘꠡꠞ ꠙꠥꠀꠂꠘ ꠀꠞ ꠙꠡꠥꠁꠘ꠆ꠔꠞ ꠙꠄꠟꠣ ꠝꠦꠖꠣ ꠛꠣꠁꠌ꠆ꠌꠣꠁꠘꠞꠦ ꠝꠣꠞꠤꠟ꠆ꠟꠣ। ꠅꠃ ꠇꠣꠞꠘꠦ ꠀꠝꠞꠣꠞ ꠛꠠ ꠙꠥꠀꠂꠘꠞꠦ ꠝꠣꠛꠥꠖꠞ ꠉꠦꠍ ꠕꠣꠇꠤ ꠈꠣꠟꠣꠍ ꠇꠞꠣꠁ, ꠀꠞ ꠙꠡꠥꠞ ꠙꠄꠟꠣ ꠝꠦꠖꠣ ꠛꠣꠁꠌ꠆ꠌꠣꠞꠦ ꠇꠥꠞꠛꠣꠘꠤ ꠖꠦꠁ।
EXO 13:16 ꠁꠐꠣ ꠅꠝꠘ ꠄꠇ ꠁꠀꠖꠉꠣꠞꠤꠞ ꠁꠖ, ꠀꠔ ꠛꠣ ꠇꠙꠣꠟꠅ ꠛꠣꠘ꠆ꠖꠣ ꠔꠣꠛꠤꠎ-ꠇꠛꠎꠞ ꠟꠣꠈꠣꠘ ꠎꠣꠘꠥ ꠢꠣꠝꠦꠡꠣ ꠌꠈꠥꠞ ꠍꠣꠝꠘꠦ ꠞꠄ, ꠀꠞ ꠝꠣꠛꠥꠖꠦ ꠔꠣꠘ ꠇꠥꠖꠞꠔꠤ ꠀꠔ ꠖꠤꠀ ꠀꠝꠞꠣꠞꠦ ꠝꠤꠡꠞ ꠕꠣꠇꠤ ꠛꠣꠞ ꠇꠞꠤ ꠀꠘꠍꠂꠘ, ꠅꠈꠣꠘ ꠝꠘꠅ ꠞꠄ।’ ”
EXO 13:17 ꠚꠦꠞꠣꠃꠘꠦ ꠛꠘꠤ ꠁꠍꠞꠣꠁꠟꠞꠦ ꠍꠣꠠꠣꠞ ꠛꠣꠖꠦ, ꠚꠤꠟꠤꠡ꠆ꠔꠤꠘꠤ ꠅꠇꠟꠞ ꠖꠦꠡꠞ ꠝꠣꠎꠖꠤ ꠡꠤꠗꠣ ꠙꠕ ꠕꠣꠇꠟꠦꠅ ꠀꠟ꠆ꠟꠣꠄ ꠔꠣꠞꠣꠞꠦ ꠢꠤ ꠙꠕꠦꠖꠤ ꠘꠤꠟꠣ ꠘꠣ। ꠀꠟ꠆ꠟꠣꠄ ꠇꠁꠟꠣ, ꠢꠦꠡꠦ ꠎꠥꠖꠤ ꠇꠥꠘꠥ ꠎꠥꠖ꠆ꠖꠞ ꠝꠥꠇꠣꠛꠤꠟꠣ ꠇꠞꠣ ꠟꠣꠉꠦ, ꠔꠦ ꠝꠣꠘꠡꠦ ꠎꠥꠖ꠆ꠖꠞ ꠒꠞꠦ ꠢꠤꠞꠛꠣꠞ ꠝꠤꠡꠞꠅ ꠚꠤꠞꠤꠎꠤꠔ ꠙꠣꠞꠦ।
EXO 13:18 ꠄꠞꠟꠣꠉꠤ ꠔꠣꠁꠘ ꠝꠣꠘꠡꠞꠦ ꠘꠤꠟ ꠖꠞꠤꠀꠞ ꠙꠣꠞꠦꠖꠤ ꠝꠞꠥꠜꠥꠝꠤ ꠛꠣꠄ ꠘꠦꠅꠀꠁꠟꠣ; ꠔꠣꠝꠣꠝ ꠛꠘꠤ ꠁꠍꠞꠣꠁꠟꠦ ꠍꠤꠙꠣꠁ ꠖꠟꠞ ꠟꠣꠈꠣꠘ ꠢꠣꠎꠤ-ꠙꠣꠠꠤ ꠝꠤꠡꠞ ꠖꠦꠡ ꠕꠣꠇꠤ ꠞꠅꠀꠘꠣ ꠅꠁꠟꠣ।
EXO 13:19 ꠎꠣꠅꠀꠞ ꠛꠣꠟꠣ ꠝꠥꠍꠣ ꠘꠛꠤꠄ ꠢꠎꠞꠔ ꠁꠃꠍꠥꠚꠞ ꠇꠄꠛꠞ ꠕꠣꠇꠤ ꠔꠣꠘ ꠀꠒ꠆ꠒꠤ-ꠉꠥꠒ꠆ꠒꠤ ꠟꠉꠦ ꠇꠞꠤ ꠘꠤꠟꠣ। ꠁꠃꠍꠥꠚꠦ ꠛꠘꠤ ꠁꠍꠞꠣꠁꠟꠞꠦ ꠝꠎꠛꠥꠔ ꠇꠞꠤ ꠇꠍꠝ ꠇꠞꠣꠁ ꠇꠁꠍꠟꠣ, “ꠀꠟ꠆ꠟꠣꠄ ꠘꠤꠌꠄ ꠔꠥꠝꠞꠣꠞꠦ ꠢꠦꠚꠣꠎꠔ ꠇꠞꠛꠣ, ꠔꠦ ꠔꠥꠝꠞꠣ ꠎꠣꠅꠀꠞ ꠛꠣꠟꠣ ꠀꠝꠣꠞ ꠀꠒ꠆ꠒꠤꠉꠥꠁꠘ ꠔꠥꠟꠤꠀ ꠟꠉꠦ ꠇꠞꠤ ꠘꠤꠅꠉꠤ।”
EXO 13:20 ꠛꠣꠖꠦ ꠔꠣꠞꠣ ꠡꠥꠇ꠆ꠇꠔ ꠉꠣꠅ ꠕꠣꠇꠤ ꠞꠅꠀꠘꠣ ꠅꠁꠀ ꠝꠞꠥꠜꠥꠝꠤꠞ ꠇꠤꠘꠣꠞꠅ ꠄꠕꠝ ꠘꠣꠝꠞ ꠎꠣꠉꠣꠔ ꠀꠁꠀ ꠔꠣꠝ꠆ꠛꠥ ꠉꠣꠠꠤꠟꠣ।
EXO 13:21 ꠀꠞ ꠝꠣꠛꠥꠖꠦ ꠔꠣꠞꠣꠞꠦ ꠙꠕ ꠌꠤꠘꠣꠘꠤꠞ ꠟꠣꠉꠤ ꠖꠤꠘꠞ ꠛꠣꠟꠣ ꠝꠦꠊꠞ ꠈꠥꠐꠤꠞ ꠍꠥꠞꠔꠦ ꠞꠁꠔꠣ, ꠀꠞ ꠞꠣꠁꠔꠞ ꠛꠣꠟꠣꠄ ꠚꠞ ꠖꠦꠈꠣꠘꠤꠞ ꠟꠣꠉꠤ ꠀꠉꠥꠘꠤꠞ ꠈꠥꠐꠤꠞ ꠍꠥꠞꠔꠦ ꠔꠣꠞꠣꠞ ꠀꠉꠦ ꠀꠉꠦ ꠎꠣꠁꠔꠣ, ꠄꠞꠟꠣꠉꠤ ꠔꠣꠞꠣ ꠞꠣꠁꠔ-ꠖꠤꠘ ꠢꠝꠣꠘꠦ ꠌꠟꠔꠣ ꠙꠣꠞꠔꠣ।
EXO 13:22 ꠝꠣꠘꠡꠞ ꠍꠣꠝꠘꠦ ꠢꠣꠝꠦꠡꠣ ꠖꠤꠘꠞ ꠛꠣꠟꠣ ꠝꠦꠊꠞ ꠈꠥꠐꠤ ꠀꠞ ꠞꠣꠁꠔꠞ ꠛꠣꠟꠣ ꠀꠉꠥꠘꠤꠞ ꠈꠥꠐꠤ ꠞꠁꠔ।
EXO 14:1 ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ,
EXO 14:2 “ꠔꠥꠝꠤ ꠛꠘꠤ ꠁꠍꠞꠣꠁꠟꠞꠦ ꠇꠅ, ꠔꠣꠞꠣ ꠊꠥꠞꠤꠀ ꠀꠁꠀ ꠚꠣꠝꠣ-ꠢꠤꠞꠥꠔ ꠘꠣꠝꠞ ꠎꠣꠉꠣꠞ ꠇꠣꠘ꠆ꠖꠣꠔ ꠝꠤꠉꠖꠥꠟ ꠀꠞ ꠖꠞꠤꠀꠞ ꠝꠣꠎꠣꠝꠣꠎꠤ, ꠛꠣꠀꠟ-ꠎꠣꠚꠘ ꠄꠟꠣꠇꠣꠞ ꠍꠣꠝꠘꠦ ꠖꠞꠤꠀꠞ ꠌꠞꠞ ꠝꠣꠎꠦ ꠔꠣꠝ꠆ꠛꠥ ꠉꠣꠠꠤꠔꠣ।
EXO 14:3 ꠁꠔꠣ ꠖꠦꠈꠟꠦ ꠚꠦꠞꠣꠃꠘꠦ ꠝꠘꠅ ꠇꠞꠛ, ꠛꠘꠤ ꠁꠍꠞꠣꠁꠟꠦ ꠇꠥꠘꠥꠛꠣꠄ ꠙꠕ ꠘꠣ ꠙꠣꠁꠀ ꠊꠥꠞꠣꠊꠥꠞꠤ ꠇꠞꠔꠦ ꠇꠞꠔꠦ ꠝꠞꠥꠜꠥꠝꠤꠔ ꠀꠐꠇꠤ ꠉꠦꠍꠂꠘ।
EXO 14:4 ꠀꠝꠤ ꠚꠦꠞꠣꠃꠘꠞ ꠖꠤꠟꠞꠦ ꠙꠣꠡꠣꠘ ꠛꠣꠘꠣꠁꠝꠥ, ꠢꠦ ꠔꠥꠝꠞꠣꠞ ꠈꠞꠦ ꠈꠞꠦ ꠈꠦꠖꠣꠘꠤꠔ ꠀꠁꠛ। ꠔꠦꠃ ꠚꠦꠞꠣꠃꠘ ꠀꠞ ꠔꠣꠞ ꠍꠤꠙꠣꠁ ꠅꠇꠟꠞꠦꠖꠤ ꠀꠝꠣꠞ ꠘꠣꠝ ꠃꠎꠤꠟꠣ ꠅꠁꠛ; ꠁꠔꠣ ꠖꠦꠈꠤꠀ ꠝꠤꠡꠞꠤ ꠅꠇꠟꠦꠅ ꠛꠥꠎꠤꠟꠤꠛꠣ, ꠀꠝꠤꠃ ꠝꠣꠛꠥꠖ।” ꠝꠣꠛꠥꠖꠞ ꠢꠥꠇꠥꠝ ꠝꠣꠚꠤꠇ ꠛꠘꠤ ꠁꠍꠞꠣꠁꠟꠦ ꠅꠃꠟꠣ ꠇꠞꠟꠣ।
EXO 14:5 ꠢꠣꠍꠣꠃ ꠝꠤꠡꠞꠞ ꠛꠣꠖꠡꠣ ꠚꠦꠞꠣꠃꠘꠦ ꠎꠦꠛꠟꠣ ꠈꠛꠞ ꠙꠣꠁꠟ, ꠛꠘꠤ ꠁꠍꠞꠣꠁꠟ ꠅꠇꠟ ꠜꠣꠉꠤ ꠉꠦꠍꠂꠘ, ꠢꠥꠘꠤꠀꠃ ꠚꠦꠞꠣꠃꠘ ꠀꠞ ꠔꠣꠞ ꠃꠎꠤꠞ-ꠘꠣꠎꠤꠞꠞ ꠖꠤꠟ ꠚꠤꠞꠤꠉꠦꠟ। ꠔꠣꠞꠣ ꠇꠁꠟꠣ, “ꠢꠣꠄ, ꠢꠣꠄ! ꠀꠝꠞꠣ ꠁꠔꠣ ꠇꠤꠔꠣ ꠇꠞꠍꠤ? ꠁꠔꠣꠞꠦ ꠀꠝꠞꠣꠞ ꠉꠥꠟꠣꠝꠤ ꠕꠣꠇꠤ ꠇꠦꠘꠦ ꠍꠣꠠꠟꠣꠝ?”
EXO 14:6 ꠅꠈꠣꠘ ꠇꠁꠀꠃ ꠚꠦꠞꠣꠃꠘꠦ ꠔꠣꠞ ꠎꠥꠖ꠆ꠖꠞ ꠊꠥꠠꠣꠞ ꠉꠣꠠꠤ ꠢꠣꠎꠣꠘꠤꠞ ꠢꠥꠇꠥꠝ ꠖꠤꠀ, ꠔꠣꠞ ꠍꠤꠙꠣꠁ ꠅꠇꠟꠞꠦ ꠎꠥꠁꠔ ꠇꠞꠣꠁꠟ।
EXO 14:7 ꠢꠦ ꠔꠣꠞ ꠈꠣꠍ ꠡꠇ꠆ꠔꠤꠝꠣꠘ ꠍꠄꠡ ꠊꠥꠠꠣꠞ ꠉꠣꠠꠤ, ꠝꠤꠡꠞꠞ ꠡꠛ ꠊꠥꠠꠣꠞ ꠉꠣꠠꠤꠘ ꠀꠞ ꠄꠞꠣꠞ ꠌꠣꠟꠇꠖꠣꠞ ꠍꠤꠙꠣꠁꠞꠦꠅ ꠟꠉꠦ ꠟꠁꠟ।
EXO 14:8 ꠝꠣꠛꠥꠖꠦ ꠝꠤꠡꠞꠞ ꠛꠣꠖꠡꠣ ꠚꠦꠞꠣꠃꠘꠞ ꠖꠤꠟꠞꠦ ꠙꠣꠡꠣꠘ ꠇꠞꠤꠟ꠆ꠟꠣ, ꠢꠦ ꠛꠘꠤ ꠁꠍꠞꠣꠁꠟꠞ ꠈꠞꠦ ꠈꠞꠦ ꠈꠦꠖꠣꠘꠤꠔ ꠀꠁꠟ। ꠄꠞꠣ ꠎꠦꠛꠟꠣ ꠢꠤꠝ꠆ꠝꠔ ꠇꠞꠤ ꠀꠐꠤꠀ ꠎꠣꠁꠞꠣ, ꠅꠃ ꠡꠝꠄ ꠢꠦ ꠄꠞꠣꠞꠦ ꠗꠞꠣꠔ ꠀꠁꠟ।
EXO 14:9 ꠢꠦ ꠝꠤꠡꠞ ꠖꠦꠡꠞ ꠢꠇꠟ ꠊꠥꠠ-ꠍꠅꠀꠞ ꠍꠤꠙꠣꠁ, ꠊꠥꠠꠣꠞ ꠉꠣꠠꠤꠀꠟꠣ ꠍꠤꠙꠣꠁ ꠡꠢ ꠀꠡ꠆ꠔꠣ ꠀꠞ꠆ꠝꠤ ꠖꠟ ꠟꠁꠀ ꠄꠞꠣꠞꠦ ꠗꠞꠣꠞ ꠟꠣꠉꠤ ꠄꠞꠣꠞ ꠇꠣꠘ꠆ꠖꠣꠔ ꠀꠁꠟ꠆ꠟ। ꠅꠃ ꠡꠝꠄ ꠛꠘꠤ ꠁꠍꠞꠣꠁꠟ ꠅꠇꠟ ꠖꠞꠤꠀꠞ ꠙꠣꠞꠅ ꠛꠣꠀꠟ-ꠎꠣꠚꠘꠞ ꠍꠣꠝꠘꠦ ꠚꠣꠝꠣ-ꠢꠤꠞꠥꠔꠞ ꠇꠣꠘ꠆ꠖꠣꠔ ꠀꠍꠟꠣ।
EXO 14:10 ꠔꠣꠞꠣ ꠇꠣꠘ꠆ꠖꠣꠔ ꠀꠁꠔꠦꠃ ꠛꠘꠤ ꠁꠍꠞꠣꠁꠟꠦ ꠌꠣꠁꠀ ꠖꠦꠈꠟꠣ, ꠔꠣꠞꠣꠞ ꠈꠞꠦ ꠅꠁꠀ ꠝꠤꠡꠞꠤ ꠍꠤꠙꠣꠁ ꠀꠁꠞꠣ; ꠖꠦꠈꠤꠀꠃ ꠎꠣꠘꠞ ꠒꠞꠦ ꠝꠣꠛꠥꠖꠞ ꠖꠞꠛꠣꠞꠅ ꠇꠣꠘ꠆ꠖꠘ ꠟꠣꠉꠣꠁꠟꠣ।
EXO 14:11 ꠔꠣꠞꠣ ꠝꠥꠍꠣꠞꠦ ꠇꠁꠟꠣ, “ꠝꠤꠡꠞꠅ ꠇꠄꠛꠞ ꠖꠤꠛꠣꠞ ꠎꠣꠉꠣ ꠘꠣꠁ ꠖꠦꠈꠤꠀ, ꠀꠝꠞꠣꠞꠦ ꠝꠣꠞꠔꠣꠄ ꠇꠞꠤ ꠅꠃ ꠝꠞꠥꠜꠥꠝꠤꠔ ꠟꠁꠀ ꠀꠁꠍ ꠘꠤ? ꠔꠥꠝꠤ ꠁꠔꠣ ꠇꠤꠔꠣ ꠇꠞꠟꠣꠄ? ꠇꠦꠘꠦ ꠀꠝꠞꠣꠞꠦ ꠝꠤꠡꠞ ꠕꠣꠇꠤ ꠛꠣꠞ ꠇꠞꠟꠣꠄ?
EXO 14:12 ꠝꠤꠡꠞꠞ ꠜꠤꠔꠞꠦ ꠀꠝꠞꠣ ꠔꠥꠝꠣꠞꠦ ꠇꠁꠍꠤ ꠘꠣ ꠘꠤ, ꠀꠝꠞꠣꠞꠦ ꠅꠘꠅ ꠞꠁꠔꠦ ꠖꠦꠅ, ꠀꠝꠞꠣ ꠝꠤꠡꠞꠤꠘ꠆ꠔꠞ ꠉꠥꠟꠣꠝꠤ ꠇꠞꠤ? ꠁ ꠝꠞꠥꠜꠥꠝꠤꠔ ꠝꠞꠣꠞ ꠌꠣꠁꠔꠦ ꠝꠤꠡꠞꠤꠘ꠆ꠔꠞ ꠉꠥꠟꠣꠝꠤ ꠇꠞꠣꠃ ꠔ ꠀꠝꠞꠣꠞ ꠟꠣꠉꠤ ꠜꠣꠟꠣ ꠀꠍꠤꠟ।”
EXO 14:13 ꠝꠥꠍꠣꠄ ꠔꠣꠞꠣꠞꠦ ꠇꠁꠟꠣ, “ꠔꠥꠝꠞꠣ ꠒꠞꠣꠁꠅ ꠘꠣ। ꠢꠇꠟꠦ ꠘꠤꠞꠣꠁ ꠅꠁꠀ ꠖꠦꠈꠅ, ꠝꠣꠛꠥꠖꠦ ꠀꠁꠎ ꠇꠤꠟꠣ ꠛꠣꠌꠣꠁꠘ। ꠅꠃ ꠎꠦꠔꠣ ꠝꠤꠡꠞꠤꠘ꠆ꠔꠞꠦ ꠅꠈꠘ ꠖꠦꠈꠞꠣꠄ, ꠁꠔꠣꠞꠦ ꠀꠞ ꠇꠥꠘꠥꠖꠤꠘꠃ ꠖꠦꠈꠔꠣꠄ ꠘꠣꠄ।
EXO 14:14 ꠔꠥꠝꠞꠣ ꠅꠈꠘ ꠡꠣꠘ꠆ꠔꠤ ꠅꠅ, ꠖꠦꠈꠅ, ꠝꠣꠛꠥꠖꠦꠃ ꠔꠥꠝꠞꠣꠞ ꠙꠇ꠆ꠇ ꠅꠁꠀ ꠎꠥꠖ꠆ꠖ ꠇꠞꠛꠣ।”
EXO 14:15 ꠛꠣꠖꠦ ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ, “ꠔꠥꠝꠤ ꠇꠦꠘꠦ ꠀꠝꠣꠞ ꠉꠦꠍꠦ ꠇꠣꠘ꠆ꠖꠤꠞꠣꠄ? ꠛꠘꠤ ꠁꠍꠞꠣꠁꠟꠞꠦ ꠇꠅ ꠘꠣ, ꠍꠣꠝꠘꠦꠖꠤ ꠀꠉꠥꠀꠁꠔꠣ।
EXO 14:16 ꠀꠞ ꠔꠥꠝꠣꠞ ꠀꠔꠞ ꠟꠣꠑꠤꠞꠦ ꠛꠣꠠꠣꠁꠀ ꠖꠞꠤꠀꠞ ꠃꠙꠞꠦ ꠃꠌꠣ ꠇꠞꠤ ꠗꠞꠅ, ꠖꠞꠤꠀꠞꠦ ꠖꠥꠁ ꠜꠣꠉ ꠇꠞꠤꠟꠣꠅ। ꠔꠦꠃ ꠔꠣꠝꠣꠝ ꠛꠘꠤ ꠁꠍꠞꠣꠁꠟ ꠢꠥꠇꠘꠣ ꠛꠣꠄ ꠀꠐꠤꠀ ꠖꠞꠤꠀ ꠙꠣꠞ ꠅꠁꠛꠣ।
EXO 14:17 ꠈꠤꠀꠟ ꠞꠣꠈꠤꠅ, ꠀꠝꠤ ꠝꠤꠡꠞꠤ ꠅꠇꠟꠞ ꠖꠤꠟ ꠅꠟꠣ ꠙꠣꠡꠣꠘ ꠛꠣꠘꠣꠁꠝꠥ, ꠔꠣꠞꠣ ꠄꠞꠣꠞꠦ ꠗꠞꠣꠞ ꠘꠤꠅꠔꠦ ꠖꠞꠤꠀꠔ ꠢꠣꠝꠣꠁꠛꠣ। ꠄꠞꠛꠣꠖꠦ ꠚꠦꠞꠣꠃꠘ, ꠔꠣꠞ ꠍꠤꠙꠣꠁ, ꠔꠣꠞ ꠊꠥꠠꠣꠞ ꠉꠣꠠꠤꠘ, ꠔꠣꠞ ꠊꠥꠠ-ꠍꠅꠀꠞ ꠅꠇꠟꠞ ꠝꠣꠎꠖꠤ ꠀꠝꠣꠞ ꠎꠣꠟꠣꠟ-ꠡꠣꠘ ꠎꠣꠁꠞ ꠅꠁꠛ।
EXO 14:18 ꠚꠦꠞꠣꠃꠘꠞ ꠢꠣꠟ-ꠢꠇꠤꠇꠔ ꠖꠦꠈꠤꠀ ꠛꠣꠇꠤ ꠝꠤꠡꠞꠤ ꠅꠇꠟꠦꠅ ꠛꠥꠎꠤꠟꠤꠛꠣ, ꠀꠝꠤꠃ ꠝꠣꠛꠥꠖ।”
EXO 14:19 ꠄꠞꠝꠣꠎꠦ ꠀꠟ꠆ꠟꠣꠞ ꠎꠦ ꠚꠤꠞꠤꠡ꠆ꠔꠣ ꠛꠘꠤ ꠁꠍꠞꠣꠁꠟꠞ ꠀꠉꠦ ꠅꠁꠀ ꠎꠣꠅꠀꠔ ꠀꠍꠟꠣ, ꠄꠁꠘ ꠎꠣꠉꠣ ꠛꠖꠟꠣꠁꠀ ꠛꠘꠤ ꠁꠍꠞꠣꠁꠟꠞ ꠈꠞꠦ ꠉꠦꠟꠣꠉꠤ। ꠄꠘ ꠟꠉꠦ ꠅꠁꠀ ꠇꠥꠖꠞꠔꠤ ꠢꠃ ꠝꠦꠊꠞ ꠈꠥꠐꠤꠅ ꠍꠣꠝꠘꠦ ꠕꠣꠇꠤ ꠢꠞꠤꠀ ꠈꠞꠦ ꠀꠁꠟ꠆ꠟ।
EXO 14:20 ꠈꠞꠦ ꠀꠁꠀ ꠝꠤꠡꠞꠤ ꠀꠞ ꠛꠘꠤ ꠁꠍꠞꠣꠁꠟꠤ ꠖꠥꠁꠅ ꠖꠟꠞ ꠝꠣꠎꠈꠣꠘꠅ ꠃꠛꠣꠁꠟ। ꠄꠞꠟꠣꠉꠤ ꠅꠃ ꠝꠦꠊꠞ ꠈꠥꠐꠤꠞ ꠀꠘ꠆ꠖꠣꠁꠞꠦ ꠝꠤꠡꠞꠤ ꠅꠇꠟ ꠀꠘ꠆ꠖꠣꠞꠤꠔ ꠙꠠꠤꠉꠦꠟꠣ, ꠔꠣꠞꠣ ꠞꠣꠁꠔꠞ ꠛꠣꠟꠣ ꠛꠘꠤ ꠁꠍꠞꠣꠁꠟꠞ ꠇꠣꠘ꠆ꠖꠣ ꠟꠁꠔꠣ ꠙꠣꠞꠟꠣ ꠘꠣ। ꠅꠁꠟꠦ ꠛꠘꠤ ꠁꠍꠞꠣꠁꠟꠞ ꠍꠣꠝꠘꠦ ꠞꠣꠁꠔꠞ ꠛꠣꠟꠣꠅ ꠝꠦꠊꠞ ꠈꠥꠐꠤꠞ ꠚꠞꠡꠣ ꠞꠁꠟ।
EXO 14:21 ꠛꠣꠖꠦ ꠝꠥꠍꠣꠄ ꠖꠞꠤꠀꠞ ꠃꠙꠞꠦ ꠔꠣꠘ ꠀꠔ ꠛꠣꠠꠣꠁꠟꠣ, ꠀꠞ ꠝꠣꠛꠥꠖꠦ ꠢꠣꠞꠣ ꠞꠣꠁꠔ ꠈꠥꠛ ꠎꠥꠞꠦ ꠙꠥꠛꠣꠟꠤ ꠢꠣꠅꠀ ꠖꠤꠀ ꠖꠞꠤꠀꠞ ꠙꠣꠘꠤ ꠢꠞꠣꠁꠀ ꠖꠥꠁ ꠛꠣꠐ ꠇꠞꠤꠟ꠆ꠟꠣ, ꠖꠞꠤꠀ ꠢꠥꠇꠣꠁꠀ ꠝꠣꠎꠦꠖꠤ ꠢꠥꠇꠘꠣ ꠙꠕ ꠛꠣꠞ ꠅꠁꠟ।
EXO 14:22 ꠛꠘꠤ ꠁꠍꠞꠣꠁꠟ ꠅꠇꠟꠦ ꠢꠥꠇꠘꠣ ꠙꠣꠅꠄ ꠖꠞꠤꠀꠞ ꠝꠣꠎꠖꠤ ꠞꠅꠀꠘꠣ ꠖꠤꠟꠣ, ꠖꠞꠤꠀꠞ ꠙꠣꠘꠤ ꠔꠣꠞꠣꠞ ꠒꠣꠁꠘꠦ-ꠛꠣꠃꠄ ꠅꠀꠟꠞ ꠟꠣꠈꠣꠘ ꠃꠛꠣꠁ ꠞꠁꠟ।
EXO 14:23 ꠁꠔꠣ ꠖꠦꠈꠤꠀ ꠝꠤꠡꠞꠤ ꠅꠇꠟꠦ ꠔꠣꠞꠣꠞꠦ ꠈꠦꠖꠣꠁꠀ ꠖꠞꠤꠀꠞ ꠢꠃ ꠢꠥꠇꠘꠣ ꠙꠕꠦꠖꠤ ꠉꠦꠟꠣ। ꠚꠦꠞꠣꠃꠘꠞ ꠢꠇ꠆ꠇꠟ ꠊꠥꠠꠣꠞ ꠉꠣꠠꠤ, ꠊꠥꠠꠣ, ꠀꠞ ꠊꠥꠠ-ꠍꠅꠀꠞ ꠅꠇꠟ ꠈꠦꠖꠣꠁ ꠈꠦꠖꠣꠁ ꠖꠞꠤꠀꠞ ꠢꠃ ꠙꠕꠅ ꠉꠤꠀ ꠢꠣꠝꠣꠁꠟꠣ।
EXO 14:24 ꠀꠞ ꠙꠔꠣꠛꠣꠟꠣ ꠝꠣꠛꠥꠖꠦ ꠢꠃ ꠇꠥꠖꠞꠔꠤ ꠀꠉꠥꠁꠘ ꠀꠞ ꠝꠦꠊꠞ ꠈꠥꠐꠤ ꠕꠣꠇꠤ ꠝꠤꠡꠞꠤ ꠍꠤꠙꠣꠁꠞ ꠛꠣꠄ ꠟꠣꠘ꠆ꠘꠔꠤ ꠘꠎꠞꠦ ꠌꠣꠁꠟꠣ, ꠔꠦꠃ ꠔꠣꠞꠣ ꠛꠦꠖꠤꠡꠣ ꠟꠣꠉꠤꠉꠦꠟꠣ।
EXO 14:25 ꠔꠣꠁꠘ ꠄꠞꠣꠞ ꠊꠥꠠꠣꠞ ꠉꠣꠠꠤꠞ ꠌꠣꠇ꠆ꠇꠣ ꠘꠡ꠆ꠐ ꠇꠞꠤ ꠖꠤꠟꠣ, ꠄꠞꠟꠣꠉꠤ ꠔꠣꠞꠣꠞ ꠈꠥꠛ ꠇꠡ꠆ꠐ ꠇꠞꠤꠀꠅ ꠉꠣꠠꠤ ꠌꠣꠟꠣꠘꠤꠔ ꠞꠁꠟ; ꠄꠞꠝꠣꠎꠦ ꠔꠣꠞꠣ ꠄꠇꠦ-ꠅꠁꠘ꠆ꠘꠞꠦ ꠇꠁꠟ, “ꠅꠁꠍꠦ, ꠀꠞ ꠛꠣꠖ ꠖꠦꠅ, ꠀꠝꠞꠣ ꠛꠘꠤ ꠁꠍꠞꠣꠁꠟꠞ ꠈꠞ ꠕꠘꠦ ꠢꠞꠤ ꠎꠣꠁ। ꠝꠣꠛꠥꠖꠦ ꠘꠤꠎꠦ ꠔꠣꠞꠣꠞ ꠙꠇ꠆ꠇ ꠅꠁꠀ ꠀꠝꠞꠣꠞ ꠟꠉꠦ ꠎꠥꠖ꠆ꠖ ꠇꠞꠞꠣ।”
EXO 14:26 ꠅꠃ ꠡꠝꠄ ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ, “ꠔꠥꠝꠤ ꠖꠞꠤꠀꠞ ꠃꠙꠞꠦ ꠢꠤꠞꠛꠣꠞ ꠀꠔ ꠛꠣꠠꠣꠅ। ꠔꠥꠝꠣꠞ ꠀꠔ ꠛꠣꠠꠣꠁꠟꠦ ꠙꠣꠘꠤ ꠢꠤꠞꠛꠣꠞ ꠝꠤꠡꠞꠤꠘ꠆ꠔꠞ ꠃꠙꠞꠦ, ꠔꠣꠞꠣꠞ ꠊꠥꠠꠣꠞ ꠉꠣꠠꠤ ꠀꠞ ꠊꠥꠠ-ꠍꠅꠀꠞꠞ ꠃꠙꠞꠦ ꠀꠁꠛ꠆ꠛ।”
EXO 14:27 ꠝꠥꠍꠣꠄ ꠖꠞꠤꠀꠞ ꠃꠙꠞꠦ ꠀꠔ ꠛꠣꠠꠣꠁꠟꠣ, ꠀꠞ ꠛꠤꠀꠘ ꠅꠀꠞ ꠀꠉꠦꠃ ꠖꠞꠤꠀꠞ ꠙꠣꠘꠤ ꠢꠤꠞꠛꠣꠞ ꠢꠝꠣꠘ ꠅꠁꠉꠦꠟ; ꠝꠤꠡꠞꠤꠘ꠆ꠔꠦ ꠒꠣꠁꠘꠦ-ꠛꠣꠃꠄ ꠖꠃꠠꠣ-ꠖꠃꠠꠤ ꠟꠣꠉꠣꠁꠟꠣ, ꠅꠁꠟꠦ ꠝꠣꠛꠥꠖꠦ ꠔꠣꠞꠣꠞꠦ ꠖꠞꠤꠀꠞ ꠙꠣꠘꠤꠖꠤ ꠜꠣꠅꠀꠁ ꠖꠤꠟꠣ।
EXO 14:28 ꠙꠣꠘꠤ ꠢꠤꠞꠛꠣꠞ ꠎꠣꠉꠣꠔ ꠀꠁꠟ꠆ꠟ, ꠔꠣꠞꠣꠞ ꠊꠥꠠꠣꠞ ꠉꠣꠠꠤꠘ, ꠍꠤꠙꠣꠁꠘ, ꠀꠞ ꠊꠥꠠ-ꠍꠅꠀꠞ ꠅꠇꠟ, ꠝꠣꠘꠤ ꠛꠘꠤ ꠁꠍꠞꠣꠁꠟꠞ ꠈꠞꠦ ꠅꠁꠀ ꠈꠦꠖꠣꠘꠤꠔ ꠀꠅꠞꠣ ꠢꠇ꠆ꠇꠟꠔꠣ ꠙꠣꠘꠤꠄ ꠛꠥꠠꠤꠉꠦꠟ, ꠄꠉꠥꠅ ꠎꠤꠔꠣ ꠞꠁꠟꠣ ꠘꠣ।
EXO 14:29 ꠅꠁꠟꠦ ꠛꠘꠤ ꠁꠍꠞꠣꠁꠟ ꠅꠇꠟꠦ ꠢꠥꠇꠘꠣ ꠙꠕꠦ ꠖꠞꠤꠀꠞ ꠝꠣꠎꠖꠤ ꠉꠦꠟꠣ, ꠔꠣꠞꠣꠞ ꠒꠣꠁꠘꠦ-ꠛꠣꠃꠄ ꠙꠣꠘꠤ ꠅꠀꠟꠞ ꠟꠣꠈꠣꠘ ꠃꠛꠣꠁ ꠞꠁꠟ।
EXO 14:30 ꠅꠃ ꠘꠝꠥꠘꠣꠄ ꠝꠣꠛꠥꠖꠦ ꠢꠤ ꠖꠤꠘ ꠝꠤꠡꠞꠤ ꠅꠇꠟꠞ ꠀꠔ ꠕꠣꠇꠤ ꠛꠘꠤ ꠁꠍꠞꠣꠁꠟꠞꠦ ꠛꠣꠌꠣꠁꠟꠣ, ꠔꠣꠞꠣ ꠘꠤꠎꠞ ꠌꠃꠈꠦ ꠖꠦꠈꠟꠣ, ꠝꠤꠡꠞꠤꠘ꠆ꠔꠞ ꠝꠞꠣ ꠟꠣꠡ ꠖꠞꠤꠀꠞ ꠌꠞꠅ ꠙꠠꠤꠀ ꠞꠁꠍꠦ।
EXO 14:31 ꠝꠤꠡꠞꠤꠘ꠆ꠔꠞ ꠃꠙꠞꠦ ꠝꠣꠛꠥꠖꠞ ꠇꠥꠖꠞꠔꠤ ꠟꠤꠟꠣ-ꠈꠦꠟꠣ ꠖꠦꠈꠤꠀ, ꠛꠘꠤ ꠁꠍꠞꠣꠁꠟꠦꠅ ꠝꠣꠛꠥꠖꠞꠦ ꠒꠞꠣꠁꠉꠦꠟꠣ। ꠔꠣꠞꠣ ꠝꠣꠛꠥꠖꠞ ꠃꠙꠞꠦ ꠀꠞ ꠔꠣꠘ ꠉꠥꠟꠣꠝ ꠢꠎꠞꠔ ꠝꠥꠍꠣꠞ ꠃꠙꠞꠦ ꠙꠥꠞꠣꠙꠥꠞ ꠁꠝꠣꠘ ꠀꠘꠟꠣ।
EXO 15:1 ꠀꠟ꠆ꠟꠣꠞ ꠇꠥꠖꠞꠔꠦ ꠘꠤꠟ ꠖꠞꠤꠀ ꠙꠣꠞ ꠅꠁꠀ ꠀꠁꠀ ꠢꠣꠞꠟꠦ, ꠢꠎꠞꠔ ꠝꠥꠍꠣ ꠀꠞ ꠔꠣꠝꠣꠝ ꠛꠘꠤ ꠁꠍꠞꠣꠁꠟꠦ ꠝꠣꠛꠥꠖꠞ ꠘꠣꠝꠦ ꠅꠃ ꠡꠥꠇꠥꠞꠣꠘꠣ ꠉꠎꠟ ꠉꠣꠁꠟꠣ: “ꠀꠝꠤ ꠝꠣꠛꠥꠖꠞ ꠘꠣꠝꠦ ꠉꠎꠟ ꠉꠣꠁ, ꠢꠇꠟꠞ ꠍꠣꠝꠘꠦ ꠔꠣꠘ ꠇꠥꠖꠞꠔꠤ ꠝꠢꠤꠝꠣ ꠛꠣꠠꠤꠍꠦ, ꠊꠥꠠ-ꠍꠅꠀꠞ ꠡꠥꠖ꠆ꠖꠣ ꠊꠥꠠꠣꠁꠘꠞꠦ ꠔꠣꠁꠘꠃ ꠖꠞꠤꠀꠞ ꠙꠣꠘꠤꠔ ꠚꠣꠟꠣꠁꠍꠂꠘ।
EXO 15:2 ꠀꠟ꠆ꠟꠣꠃ ꠔ ꠀꠝꠣꠞ ꠛꠟ, ꠔꠣꠁꠘꠃ ꠀꠝꠣꠞ ꠉꠎꠟ, ꠀꠝꠣꠞꠦ ꠛꠣꠌꠣꠘꠤꠞ ꠇꠟ-ꠇꠛꠎꠣ ꠔꠣꠘ ꠀꠔꠅ ꠀꠍꠦ। ꠅꠃ ꠀꠟ꠆ꠟꠣꠃ ꠀꠝꠣꠞ ꠝꠣꠛꠥꠖ, ꠀꠝꠣꠞ ꠛꠣꠚ-ꠖꠣꠖꠣꠞ ꠝꠣꠛꠥꠖ, ꠀꠝꠤ ꠔꠣꠘ ꠢꠣꠝꠖ ꠉꠣꠁꠝꠥ, ꠔꠣꠘ ꠟꠤꠟꠣ-ꠈꠦꠟꠣꠞ ꠛꠄꠀꠘ ꠇꠞꠝꠥ।
EXO 15:3 ꠝꠣꠛꠥꠖ ꠅꠁꠟꠣ ꠙꠄꠟꠥꠀꠘ ꠍꠤꠙꠣꠁ, ꠔꠣꠘ ꠘꠣꠝꠃ ꠝꠣꠛꠥꠖ।
EXO 15:4 ꠚꠦꠞꠣꠃꠘꠞ ꠊꠥꠠꠣꠞ ꠉꠣꠠꠤꠞꠦ ꠀꠞ ꠍꠤꠙꠣꠁꠞꠦ ꠔꠣꠁꠘ ꠙꠣꠘꠤꠔ ꠚꠣꠟꠣꠁꠟꠣ, ꠔꠣꠞ ꠘꠣꠝꠇꠞꠣ ꠍꠥꠛꠦꠖꠣꠞ ꠅꠇꠟ ꠘꠤꠟ ꠖꠞꠤꠀꠔ ꠛꠥꠠꠤꠀ ꠝꠞꠟꠣ।
EXO 15:5 ꠉꠁꠘ ꠙꠣꠘꠤꠄ ꠔꠣꠞꠣꠞꠦ ꠉꠤꠟꠤꠟ꠆ꠟ, ꠀꠞ ꠜꠣꠞꠤ ꠙꠣꠔ꠆ꠔꠞꠞ ꠟꠣꠈꠣꠘ ꠔꠣꠞꠣ ꠖꠞꠤꠀꠞ ꠔꠟꠦ ꠉꠦꠟꠣꠉꠤ।
EXO 15:6 ꠅ ꠝꠣꠛꠥꠖ, ꠔꠥꠝꠣꠞ ꠒꠣꠁꠘ ꠀꠔꠈꠣꠘ ꠇꠥꠖꠞꠔꠤ ꠟꠤꠟꠣꠄ ꠜꠞꠣ, ꠔꠥꠝꠣꠞ ꠀꠔꠦ ꠘꠤꠌ꠆ꠌꠄ ꠖꠥꠡꠝꠘꠞꠦ ꠌꠥꠞꠝꠣꠞ ꠇꠞꠍꠦ।
EXO 15:7 ꠔꠥꠝꠣꠞ ꠛꠤꠞꠥꠖ꠆ꠖꠦ ꠎꠦꠔꠣꠄ ꠟꠣꠉꠍꠤꠟꠣ, ꠇꠥꠖꠞꠔꠤ ꠛꠟꠦ ꠔꠣꠞꠣꠞꠦ ꠉꠁꠘ ꠉꠣꠔꠅ ꠚꠣꠟꠣꠁꠟꠣꠄ। ꠔꠥꠝꠣꠞ ꠙꠣꠑꠣꠁꠟ ꠉꠎꠛꠤ ꠀꠉꠥꠁꠘꠦ, ꠢꠥꠇꠘꠣ ꠈꠦꠞ-ꠘꠦꠞꠣꠞ ꠟꠣꠈꠣꠘ ꠔꠣꠞꠣꠞꠦ ꠎꠣꠟꠣꠁꠟꠤꠟ।
EXO 15:8 ꠔꠥꠝꠣꠞ ꠘꠣꠇꠞ ꠖꠝꠦ ꠢꠇꠟ ꠙꠣꠘꠤ ꠖꠟꠣ ꠅꠁꠉꠦꠟ, ꠙꠣꠘꠤꠞ ꠚꠥꠔ ꠅꠇꠟ ꠎꠣꠉꠣꠔ ꠃꠛꠣꠁ ꠞꠁꠟ, ꠖꠞꠤꠀꠞ ꠉꠁꠘ ꠙꠣꠘꠤ ꠌꠣꠇ꠆ꠇꠣ ꠛꠘꠤꠉꠦꠟ।
EXO 15:9 ꠖꠥꠡꠝꠘꠦ ꠇꠁꠍꠤꠟ, ‘ꠀꠝꠤ ꠁꠔꠣꠞꠦ ꠈꠦꠖꠣꠁꠀ ꠘꠤꠝꠥ, ꠖꠃꠠꠣꠁꠀ ꠘꠤꠀ ꠗꠞꠝꠥ, ꠔꠣꠞꠣꠞ ꠢꠇꠟꠔꠣ ꠇꠣꠠꠤꠀ ꠀꠘꠤꠀ ꠛꠣꠐꠤꠝꠥ। ꠔꠣꠞꠣꠞ ꠝꠣꠟꠖꠤ ꠀꠝꠤ ꠝꠣꠟꠖꠣꠞ ꠅꠁꠝꠥ, ꠁꠔꠣꠖꠤ ꠀꠝꠣꠞ ꠝꠘꠞ ꠈꠣꠁꠡ ꠙꠥꠞꠣꠁꠝꠥ। ꠀꠝꠣꠞ ꠔꠟꠥꠀꠞꠖꠤ ꠝꠣꠞꠤꠀ ꠔꠣꠞꠣꠞ ꠘꠣꠝ ꠝꠤꠐꠣꠁꠟꠤꠝꠥ।’
EXO 15:10 ꠅꠁꠟꠦ ꠔꠥꠝꠤ ꠚꠥ ꠖꠤꠀ ꠛꠣꠔꠣꠡ ꠖꠤꠟꠣꠄ, ꠀꠞ ꠖꠞꠤꠀꠄ ꠔꠣꠞꠣꠞꠦ ꠉꠥꠞꠤꠟꠤꠟ, ꠔꠣꠞꠣ ꠡꠤꠡꠣꠞ ꠟꠣꠈꠣꠘ ꠉꠁꠘ ꠙꠣꠘꠤꠔ ꠔꠟꠣꠁꠉꠦꠟ।
EXO 15:11 ꠅ ꠝꠣꠛꠥꠖ, ꠇꠥꠘ ꠖꠦꠛ-ꠖꠦꠛꠤ ꠔꠥꠝꠣꠞ ꠢꠝꠣꠘ? ꠇꠦ ꠔꠥꠝꠣꠞ ꠟꠣꠈꠣꠘ ꠅꠔ ꠙꠛꠤꠔ꠆ꠞ ꠝꠢꠣꠘ, ꠀꠞ ꠔꠥꠝꠣꠞ ꠝꠔ ꠜꠄꠅꠋꠇꠞ ꠇꠥꠖꠞꠔꠤ ꠝꠢꠤꠝꠣ ꠇꠣꠞ ꠀꠍꠦ?
EXO 15:12 ꠔꠥꠝꠣꠞ ꠛꠟꠀꠟꠣ ꠒꠣꠁꠘ ꠀꠔꠈꠣꠘ ꠛꠣꠠꠣꠁꠟꠣꠄ, ꠀꠞ ꠖꠥꠘꠤꠀꠄ ꠔꠣꠞꠣꠞꠦ ꠉꠤꠟꠤꠟꠤꠟ।
EXO 15:13 ꠔꠥꠝꠣꠞ ꠈꠣꠍ ꠝꠣꠄꠀꠄ ꠎꠦꠞꠣꠞꠦ ꠛꠣꠌꠣꠁꠍ, ꠔꠣꠞꠣꠞꠦ ꠔ ꠔꠥꠝꠤꠃ ꠌꠣꠟꠣꠁꠞꠣꠄ, ꠔꠥꠝꠣꠞ ꠀꠙꠘ ꠇꠥꠖꠞꠔꠤ ꠛꠟꠦ ꠔꠥꠝꠣꠞ ꠙꠛꠤꠔ꠆ꠞ ꠛꠡꠔ ꠈꠣꠘꠣꠔ ꠘꠤꠞꠣꠄ।
EXO 15:14 ꠁꠔꠣ ꠢꠥꠘꠤꠀ ꠢꠇ꠆ꠇꠟ ꠎꠣꠔꠤꠄ ꠇꠣꠙꠤꠞꠣ, ꠚꠤꠟꠤꠡ꠆ꠔꠤꠘꠤ ꠛꠦ-ꠖꠤꠘ ꠅꠇꠟꠞ ꠝꠘ ꠍꠐꠚꠐ ꠇꠞꠦꠞ।
EXO 15:15 ꠁꠖꠥꠝꠞ ꠡꠞ꠆ꠖꠣꠞ ꠅꠇꠟ ꠒꠞꠣꠁꠀ ꠛꠦꠖꠤꠡꠣ ꠟꠣꠉꠤꠉꠦꠟꠣ, ꠝꠥꠀꠛꠞ ꠘꠦꠔꠣ ꠅꠇꠟꠦ ꠕꠞ-ꠕꠞꠣꠁꠀ ꠇꠣꠙꠤꠟꠣ, ꠇꠦꠘꠣꠘꠤ ꠅꠇꠟ ꠒꠞꠣꠁꠀ ꠢꠞꠤꠉꠦꠟꠣ।
EXO 15:16 ꠔꠣꠞꠣꠞ ꠜꠤꠔꠞꠦ ꠒꠞ-ꠈꠚ ꠀꠁꠀ ꠢꠣꠝꠣꠁꠍꠦ, ꠔꠥꠝꠣꠞ ꠀꠔꠞ ꠑꠦꠟꠣꠄ ꠙꠣꠔ꠆ꠔꠞꠞ ꠟꠣꠈꠣꠘ ꠘꠤꠞꠣꠁ ꠅꠁꠉꠦꠍꠦ। ꠅ ꠝꠣꠛꠥꠖ, ꠔꠥꠝꠣꠞ ꠙ꠆ꠞꠎꠣ ꠅꠇꠟ, ꠔꠥꠝꠣꠞ ꠈꠞꠤꠖꠣ ꠉꠥꠟꠣꠝ ꠅꠇꠟ, ꠙꠥꠞꠣꠙꠥꠞ ꠙꠣꠞ ꠘꠣ ꠅꠀ ꠙꠞ꠆ꠎꠘ꠆ꠔ ꠔꠥꠝꠤ ꠅꠃꠟꠣ ꠞꠣꠈꠍ।
EXO 15:17 ꠔꠥꠝꠤ ꠄꠞꠣꠞꠦ ꠘꠤꠀ ꠉꠣꠍꠞ ꠌꠦꠞꠣꠞ ꠟꠣꠈꠣꠘ, ꠔꠥꠝꠣꠞ ꠘꠤꠎꠞ ꠙꠣꠠꠅ ꠞꠥꠁꠛꠣꠄ। ꠅ ꠝꠣꠛꠥꠖ, ꠢꠈꠣꠘꠃ ꠔꠥꠝꠣꠞ ꠛꠡꠔ ꠈꠣꠘꠣ, ꠔꠥꠝꠣꠞ ꠀꠙꠘ ꠀꠔꠞ ꠉꠠꠣ ꠢꠦꠞꠦꠝ ꠡꠞꠤꠚ।
EXO 15:18 ꠅ ꠝꠣꠛꠥꠖ, ꠎꠥꠉ ꠎꠥꠉ ꠗꠞꠤ ꠔꠥꠝꠤꠃ ꠈꠣꠟꠤ ꠛꠣꠖꠡꠣꠁ ꠇꠞꠛꠣꠄ।”
EXO 15:19 ꠚꠦꠞꠣꠃꠘꠞ ꠊꠥꠠꠣꠁꠘ, ꠔꠣꠞ ꠊꠥꠠꠣꠞ ꠉꠣꠠꠤꠘ ꠀꠞ ꠊꠥꠠ-ꠍꠅꠀꠞ ꠅꠇꠟ ꠎꠦꠛꠟꠣ ꠖꠞꠤꠀꠞ ꠝꠣꠎꠦ ꠢꠣꠝꠣꠁꠉꠦꠟ, ꠝꠣꠛꠥꠖꠦ ꠔꠣꠞꠣꠞ ꠃꠙꠞꠦ ꠖꠞꠤꠀꠞ ꠙꠣꠘꠤ ꠚꠤꠞꠣꠁ ꠀꠘꠟꠣ, ꠅꠁꠟꠦ ꠛꠘꠤ ꠁꠍꠞꠣꠁꠟ ꠢꠇꠟ ꠔ ꠢꠥꠇꠘꠣ ꠙꠕꠦ ꠖꠞꠤꠀꠞ ꠝꠣꠎꠦꠖꠤ ꠀꠉꠦ ꠀꠐꠤꠀ ꠉꠦꠍꠟꠣꠉꠤ।
EXO 15:20 ꠢꠣꠞꠥꠘꠞ ꠛꠁꠘ ꠢꠎꠞꠔ ꠝꠞꠤꠅꠝꠅ ꠘꠛꠤ ꠀꠍꠟꠣ, ꠔꠣꠁꠘ ꠒꠥꠉꠤ ꠀꠔꠅ ꠟꠁꠀ ꠛꠣꠎꠣꠁꠟꠣ, ꠀꠞ ꠛꠣꠇꠤ ꠢꠇꠟ ꠛꠦꠐꠤꠘ꠆ꠔꠦꠅ ꠔꠣꠘ ꠈꠞꠦꠖꠤ ꠒꠥꠉꠤ ꠟꠁꠀ ꠘꠣꠌꠤ ꠘꠣꠌꠤ ꠛꠣꠞ ꠅꠁ ꠀꠁꠟꠣ।
EXO 15:21 ꠀꠞ ꠝꠞꠤꠅꠝꠦꠅ ꠝꠣꠘꠡꠞ ꠍꠣꠝꠘꠦ ꠅꠃꠟꠣ ꠉꠣꠁꠟꠣ: “ꠔꠥꠝꠞꠣ ꠝꠣꠛꠥꠖꠞ ꠘꠣꠝꠦ ꠉꠎꠟ ꠉꠣꠅ, ꠢꠇꠟꠞ ꠍꠣꠝꠘꠦ ꠔꠣꠘ ꠇꠥꠖꠞꠔꠤ ꠝꠢꠤꠝꠣ ꠛꠣꠠꠤꠍꠦ, ꠊꠥꠠ-ꠍꠅꠀꠞ ꠡꠥꠖ꠆ꠖꠣ ꠊꠥꠠꠣꠁꠘꠞꠦ ꠔꠣꠁꠘꠃ ꠖꠞꠤꠀꠞ ꠙꠣꠘꠤꠔ ꠚꠣꠟꠣꠁꠍꠂꠘ।”
EXO 15:22 ꠝꠥꠍꠣꠄ ꠛꠘꠤ ꠁꠍꠞꠣꠁꠟꠞꠦ ꠘꠤꠟ ꠖꠞꠤꠀ ꠕꠣꠇꠤ ꠍꠣꠝꠘꠦꠖꠤ ꠟꠁꠀ ꠞꠅꠀꠘꠣ ꠅꠁꠟꠣ, ꠀꠞ ꠡꠥꠞ ꠘꠣꠝꠞ ꠝꠞꠥꠜꠥꠝꠤꠔ ꠉꠦꠟꠣ। ꠔꠣꠞꠣꠞ ꠎꠣꠅꠀꠞ ꠙꠕꠅ ꠔꠤꠘ ꠖꠤꠘ ꠗꠞꠤ ꠇꠥꠘꠥ ꠙꠣꠘꠤ ꠙꠣꠁꠟꠣ ꠘꠣ।
EXO 15:23 ꠛꠣꠖꠦ ꠔꠣꠞꠣ ꠝꠣꠞꠥꠀ ꠘꠣꠝꠞ ꠄꠇ ꠎꠣꠉꠣꠔ ꠀꠁꠟꠣ, ꠅꠁꠟꠦ ꠢꠤꠘꠞ ꠙꠣꠘꠤꠅ ꠈꠣꠁꠔꠣ ꠙꠣꠞꠟꠣ ꠘꠣ, ꠢꠤꠘꠞ ꠙꠣꠘꠤ ꠈꠥꠛ ꠔꠤꠔ꠆ꠔꠣ। ꠄꠞꠟꠣꠉꠤ ꠅꠃ ꠎꠣꠉꠣꠞ ꠘꠣꠝ ꠟꠣꠉꠟ ꠝꠣꠞꠥꠀ [ꠝꠣꠘꠤ, ꠔꠤꠔ꠆ꠔꠣ]।
EXO 15:24 ꠀꠞ ꠝꠣꠘꠡꠦ ꠝꠥꠍꠣꠞ ꠛꠤꠞꠥꠖ꠆ꠖꠦ ꠇꠣꠘꠣ-ꠇꠣꠘꠤ ꠇꠞꠤ ꠇꠁꠟꠣ, “ꠀꠝꠞꠣ ꠅꠈꠘ ꠙꠣꠘꠤ ꠈꠣꠁꠔꠣꠝ ꠇꠤꠟꠣ?”
EXO 15:25 ꠝꠥꠍꠣꠄ ꠝꠣꠛꠥꠖꠞ ꠉꠦꠍꠦ ꠚꠞꠤꠀꠖ ꠇꠞꠟꠣ, ꠝꠣꠛꠥꠖꠦ ꠔꠣꠘꠞꠦ ꠄꠉꠥ ꠉꠣꠍ ꠖꠦꠈꠣꠁ ꠖꠤꠟꠣ, ꠔꠣꠁꠘ ꠢꠃ ꠉꠣꠍꠞꠦ ꠘꠤꠀ ꠙꠣꠘꠤꠔ ꠚꠣꠟꠣꠁꠟꠣ, ꠀꠞ ꠙꠣꠘꠤ ꠝꠤꠑꠣ ꠅꠁꠉꠦꠟ। ꠝꠣꠛꠥꠖꠦ ꠢꠃ ꠎꠣꠉꠣꠔ ꠛꠘꠤ ꠁꠍꠞꠣꠁꠟꠞ ꠙꠞꠤꠇ꠆ꠇꠣ ꠟꠁꠟꠣ, ꠀꠞ ꠔꠣꠞꠣꠞ ꠟꠣꠉꠤ ꠘꠤꠅꠝ-ꠇꠣꠘꠥꠘ ꠛꠣꠔꠣꠁ ꠖꠤꠟꠣ।
EXO 15:26 ꠔꠣꠁꠘ ꠇꠁꠟꠣ, “ꠔꠥꠝꠞꠣ ꠎꠥꠖꠤ ꠈꠤꠀꠟ ꠇꠞꠤꠀ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠇꠣꠟꠣꠝ ꠢꠥꠘꠅ ꠀꠞ ꠅꠃ ꠟꠣꠈꠣꠘ ꠀꠝꠟ ꠇꠞꠅ, ꠀꠝꠤ ꠎꠦꠔꠣ ꠙꠍꠘ꠆ꠖ ꠇꠞꠤ ꠅꠔꠣ ꠇꠞꠅ, ꠀꠝꠣꠞ ꠢꠥꠇꠥꠝ ꠝꠣꠘꠅ, ꠔꠦ ꠀꠝꠤ ꠝꠣꠛꠥꠖꠦ ꠝꠤꠡꠞꠤ ꠅꠇꠟꠞꠦ ꠎꠦꠔꠣ ꠛꠦꠝꠣꠞ-ꠀꠎꠣꠞ ꠖꠤꠍꠤ, ꠁꠔꠣ ꠇꠥꠘꠥ ꠛꠦꠝꠣꠞ ꠔꠥꠝꠞꠣꠞ ꠃꠙꠞꠦ ꠖꠤꠔꠣꠝ ꠘꠣꠄ; ꠎꠣꠘ ꠔ, ꠀꠝꠤ ꠝꠣꠛꠥꠖ ꠔꠥꠝꠞꠣꠞ ꠡꠤꠚꠣ ꠇꠞꠘꠦꠀꠟꠣ।”
EXO 15:27 ꠢꠦꠡꠦ ꠔꠣꠞꠣ ꠄꠟꠤꠝꠅ ꠉꠤꠀ ꠙꠃꠍꠟꠣ, ꠢꠤꠘꠅ ꠛꠣꠞꠅꠉꠥ ꠙꠣꠘꠤꠞ ꠁꠘ꠆ꠖꠣꠞꠣ ꠀꠞ ꠡꠔ꠆ꠔꠁꠞꠉꠥ ꠈꠦꠎꠥꠞ ꠉꠣꠍ ꠀꠍꠤꠟ। ꠔꠣꠞꠣ ꠅꠃ ꠙꠣꠘꠤꠞ ꠇꠣꠘ꠆ꠖꠣꠔ ꠔꠣꠝ꠆ꠛꠥ ꠉꠣꠠꠤꠟꠣ।
EXO 16:1 ꠛꠣꠖꠦ ꠔꠣꠝꠣꠝ ꠛꠘꠤ ꠁꠍꠞꠣꠁꠟꠦ ꠄꠟꠤꠝ ꠕꠣꠇꠤ ꠞꠅꠀꠘꠣ ꠖꠤꠟꠣꠁꠟꠣ। ꠝꠤꠡꠞ ꠖꠦꠡ ꠕꠣꠇꠤ ꠛꠣꠞꠘꠤꠞ ꠛꠣꠖꠞ ꠌꠣꠘ꠆ꠖꠞ ꠙꠘꠞ ꠔꠣꠞꠤꠈꠅ ꠔꠣꠞꠣ ꠍꠤꠘ ꠘꠣꠝꠞ ꠝꠞꠥꠜꠥꠝꠤꠔ ꠀꠁꠀ ꠀꠎꠤꠟꠣ। ꠍꠤꠘ ꠅꠁꠟ ꠔꠥꠞ ꠙꠣꠠ ꠀꠞ ꠄꠟꠤꠝꠞ ꠝꠣꠎꠈꠣꠘꠅ।
EXO 16:2 ꠅꠃ ꠡꠝꠄ ꠔꠣꠝꠣꠝ ꠛꠘꠤ ꠁꠍꠞꠣꠁꠟꠦ ꠝꠥꠍꠣ ꠀꠞ ꠢꠣꠞꠥꠘꠞ ꠛꠤꠞꠥꠖ꠆ꠖꠦ ꠇꠣꠘꠣ-ꠇꠣꠘꠤ ꠟꠣꠉꠣꠁꠟꠣ।
EXO 16:3 ꠄꠞꠣ ꠖꠥꠁꠅꠎꠘꠞ ꠛꠤꠞꠥꠖ꠆ꠖꠦ ꠛꠘꠤ ꠁꠍꠞꠣꠁꠟꠦ ꠇꠁꠟꠣ, “ꠢꠣꠄꠞꠦ ꠢꠣꠄ, ꠁꠔꠣꠞ ꠇꠕꠣꠄ ꠀꠝꠞꠣ ꠇꠦꠘꠦ ꠀꠁꠟꠣꠝ, ꠝꠣꠛꠥꠖꠦ ꠇꠦꠘꠦ ꠘꠤꠎꠞ ꠀꠔꠦ ꠀꠝꠞꠣꠞꠦ ꠝꠤꠡꠞ ꠖꠦꠡꠅ ꠝꠣꠞꠟꠣ ꠘꠣ? ꠢꠤ ꠡꠝꠄ ꠀꠝꠞꠣ ꠉꠥꠡ꠆ꠔꠞ ꠒꠦꠉꠞ ꠇꠣꠘ꠆ꠖꠣꠔ ꠛꠁꠔꠣꠝ, ꠙꠦꠐ ꠜꠞꠤꠀ ꠉꠥꠡ꠆ꠔ-ꠞꠥꠐꠤ ꠈꠣꠁꠔꠣꠝ, ꠅꠁꠟꠦ ꠁꠔꠣꠄ ꠀꠝꠞꠣꠞꠦ ꠃꠙꠣꠡꠦ ꠀꠞ ꠙꠦꠐꠞ ꠜꠥꠇꠦ ꠝꠣꠞꠔꠣ ꠇꠞꠤ ꠅꠘꠅ ꠀꠘꠍꠂꠘ।”
EXO 16:4 ꠁꠈꠣꠘ ꠢꠥꠘꠤꠀ ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ, “ꠀꠝꠤ ꠔꠣꠞꠣꠞꠦ ꠙꠞꠤꠇ꠆ꠇꠣ ꠇꠞꠤꠀ ꠖꠦꠈꠝꠥ, ꠔꠣꠞꠣ ꠀꠝꠣꠞ ꠘꠤꠅꠝ-ꠇꠣꠘꠥꠘ ꠝꠣꠘꠂꠘ ꠇꠤ ꠘꠣ। ꠀꠝꠤ ꠔꠥꠝꠞꠣꠞ ꠈꠣꠘꠤ ꠝꠦꠊꠞ ꠎꠠꠤꠞ ꠟꠣꠈꠣꠘ ꠀꠍꠝꠣꠘ ꠕꠣꠇꠤ ꠎꠝꠤꠘꠅ ꠍꠣꠠꠤꠝꠥ। ꠝꠣꠘꠡꠦ ꠛꠣꠁꠞꠦ ꠀꠁꠀ ꠢꠣꠙ꠆ꠔꠣꠞ ꠙꠞꠔꠦꠇ ꠖꠤꠘꠞ ꠈꠣꠘꠤ ꠙꠞꠔꠤ ꠖꠤꠘ ꠔꠥꠟꠤꠀ ꠘꠤꠛꠣ।
EXO 16:5 ꠈꠣꠟꠤ ꠢꠣꠙ꠆ꠔꠣꠞ ꠍꠄ ꠘꠝ꠆ꠛꠞ ꠖꠤꠘꠅ ꠔꠣꠞꠣ ꠎꠦꠔꠣ ꠔꠥꠟꠤꠀ ꠀꠘꠛꠣ, ꠁꠔꠣ ꠔꠂꠀꠞ ꠇꠞꠣꠞ ꠛꠣꠖꠦ ꠅꠁꠘ꠆ꠘ ꠖꠤꠘꠞ ꠈꠣꠘꠤ ꠕꠣꠇꠤ ꠒꠣꠛꠥꠟ ꠅꠁꠎꠤꠛ।”
EXO 16:6 ꠛꠣꠖꠦ ꠝꠥꠍꠣ ꠀꠞ ꠢꠣꠞꠥꠘꠦ ꠢꠇ꠆ꠇꠟ ꠛꠘꠤ ꠁꠍꠞꠣꠁꠟꠞꠦ ꠇꠁꠟꠣ, “ꠝꠣꠛꠥꠖꠞ ꠛꠤꠞꠥꠖ꠆ꠖꠦ ꠔꠥꠝꠞꠣ ꠎꠦꠛꠟꠣ ꠇꠣꠘꠣ-ꠇꠣꠘꠤ ꠟꠣꠉꠣꠁꠍ, ꠔꠦ ꠀꠁꠎ ꠢꠣꠁꠘ꠆ꠎꠣ ꠛꠣꠟꠣꠃ ꠛꠥꠎꠛꠣꠄ, ꠅꠃ ꠝꠣꠛꠥꠖꠦꠃ ꠔꠥꠝꠞꠣꠞꠦ ꠝꠤꠡꠞ ꠕꠣꠇꠤ ꠛꠣꠞ ꠇꠞꠤ ꠀꠘꠍꠂꠘ।
EXO 16:7 ꠛꠤꠀꠘ ꠅꠁꠟꠦꠃ ꠔꠥꠝꠞꠣ ꠝꠣꠛꠥꠖꠞ ꠇꠥꠖꠞꠔꠤ ꠘꠥꠞ ꠖꠦꠈꠛꠣꠄ, ꠔꠣꠁꠘ ꠔ ꠢꠥꠘꠍꠂꠘ, ꠔꠥꠝꠞꠣ ꠇꠤꠔꠣ ꠇꠣꠘꠣ-ꠇꠣꠘꠤ ꠇꠞꠍ। ꠔꠦ ꠀꠝꠞꠣ ꠀꠞ ꠇꠤꠔꠣ ꠎꠦꠘ, ꠔꠥꠝꠞꠣ ꠀꠝꠞꠣꠞ ꠛꠤꠞꠥꠖ꠆ꠖꠦ ꠅꠔꠔꠣ ꠝꠣꠔꠤꠞꠣꠄ?”
EXO 16:8 ꠝꠥꠍꠣꠄ ꠔꠣꠞꠣꠞꠦ ꠇꠁꠟꠣ, “ꠝꠣꠛꠥꠖꠦ ꠢꠣꠁꠘ꠆ꠎꠣ ꠛꠣꠟꠣ ꠔꠥꠝꠞꠣꠞꠦ ꠉꠥꠡ꠆ꠔ ꠖꠤꠛꠣ, ꠀꠞ ꠛꠤꠀꠘꠦ ꠙꠦꠐ ꠜꠞꠣ ꠞꠥꠐꠤꠅ ꠖꠤꠛꠣ। ꠝꠣꠛꠥꠖꠞ ꠛꠤꠞꠥꠖ꠆ꠖꠦ ꠔꠥꠝꠞꠣ ꠎꠦꠔꠣ ꠇꠣꠘꠣ-ꠇꠣꠘꠤ ꠇꠞꠍ, ꠁꠔꠣ ꠔꠣꠁꠘ ꠢꠥꠘꠍꠂꠘ। ꠀꠍꠟꠦ ꠀꠝꠞꠣ ꠖꠥꠁꠎꠘ ꠇꠤꠔꠣ ꠎꠦꠘ, ꠔꠥꠝꠞꠣ ꠀꠝꠞꠣꠞ ꠛꠤꠞꠥꠖ꠆ꠖꠦ ꠅꠔꠔꠣ ꠝꠣꠔꠤꠞꠣꠄ? ꠁ ꠝꠣꠔ ꠔ ꠀꠝꠞꠣꠞ ꠛꠤꠞꠥꠖ꠆ꠖꠦ ꠘꠣꠄ, ꠔꠥꠝꠞꠣ ꠝꠣꠛꠥꠖꠞ ꠛꠤꠞꠥꠖ꠆ꠖꠦꠃ ꠝꠣꠔꠤꠞꠣꠄ।”
EXO 16:9 ꠄꠞꠛꠣꠖꠦ ꠝꠥꠍꠣꠄ ꠢꠣꠞꠥꠘꠞꠦ ꠇꠁꠟꠣ, “ꠔꠥꠝꠤ ꠢꠇ꠆ꠇꠟ ꠛꠘꠤ ꠁꠍꠞꠣꠁꠟꠞꠦ ꠎꠣꠘꠣꠁ ꠖꠦꠅ, ꠔꠥꠝꠞꠣ ꠝꠣꠛꠥꠖꠞ ꠛꠤꠞꠥꠖ꠆ꠖꠦ ꠎꠦꠔꠣ ꠝꠣꠔꠤꠍ, ꠁꠔꠣ ꠔꠣꠁꠘ ꠢꠥꠘꠍꠂꠘ। ꠅꠈꠘ ꠔꠥꠝꠞꠣ ꠀꠁꠀ ꠝꠣꠛꠥꠖꠞ ꠍꠣꠝꠘꠦ ꠀꠎꠤꠞ ꠅꠅ।”
EXO 16:10 ꠔꠦꠃ ꠢꠣꠞꠥꠘꠦ ꠔꠣꠞꠣꠞꠦ ꠅꠃ ꠡꠋꠛꠣꠖ ꠎꠣꠘꠣꠁꠞꠣ, ꠅꠃ ꠡꠝꠄ ꠝꠞꠥꠜꠥꠝꠤꠞ ꠛꠣꠄ ꠔꠣꠞꠣꠞ ꠌꠃꠈ ꠙꠠꠔꠦꠃ ꠖꠦꠈꠂꠘ, ꠝꠦꠊꠞ ꠇꠣꠟꠘꠤꠞ ꠝꠣꠎꠦ ꠝꠣꠛꠥꠖꠞ ꠇꠥꠖꠞꠔꠤ ꠘꠥꠞ ꠎꠣꠁꠞ ꠅꠁꠍꠦ।
EXO 16:11 ꠄꠞꠝꠣꠎꠦ ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ,
EXO 16:12 “ꠀꠝꠤ ꠛꠘꠤ ꠁꠍꠞꠣꠁꠟꠞ ꠢꠇ꠆ꠇꠟ ꠝꠣꠔ-ꠇꠕꠣ ꠢꠥꠘꠍꠤ। ꠅꠈꠘ ꠔꠥꠝꠤ ꠎꠣꠘꠣꠁ ꠖꠦꠅ, ꠔꠣꠞꠣ ꠙꠞꠔꠦꠇ ꠖꠤꠘ ꠢꠣꠁꠘ꠆ꠎꠣ ꠛꠣꠟꠣ ꠈꠣꠁꠛꠣ ꠉꠥꠡ꠆ꠔ ꠀꠞ ꠛꠤꠀꠘꠦ ꠈꠣꠁꠛꠣ ꠙꠦꠐ ꠜꠞꠣ ꠞꠥꠐꠤ। ꠔꠦꠃ ꠔꠣꠞꠣ ꠛꠥꠎꠛꠣ, ꠀꠝꠤ ꠀꠟ꠆ꠟꠣꠃ ꠔꠣꠞꠣꠞ ꠝꠣꠛꠥꠖ।”
EXO 16:13 ꠢꠣꠍꠣꠃ ꠢꠣꠁꠘ꠆ꠎꠣ ꠛꠣꠟꠣ ꠇꠥꠄꠟ ꠙꠣꠈꠤꠞ ꠙꠣꠟ ꠀꠁꠀ ꠔꠣꠞꠣꠞ ꠀꠡ꠆ꠔꠣ ꠇꠦꠝ꠆ꠙꠅ ꠎꠣꠝ ꠅꠁꠉꠦꠟ, ꠛꠣꠖꠞ ꠖꠤꠘ ꠛꠤꠀꠘꠦ ꠈꠥꠀ ꠙꠠꠤꠀ ꠇꠦꠝ꠆ꠙꠞ ꠌꠣꠁꠞꠅꠛꠣꠄ ꠜꠤꠎꠤꠉꠦꠟ।
EXO 16:14 ꠛꠦꠁꠟ ꠅꠀꠞ ꠛꠣꠖꠦ ꠅꠃ ꠈꠥꠀ ꠢꠥꠇꠣꠁꠟꠦ ꠖꠦꠈꠣ ꠉꠦꠟ, ꠡꠣꠉꠥꠞ ꠖꠣꠘꠣꠞ ꠟꠣꠈꠣꠘ ꠄꠇꠎꠣꠔꠞ ꠙꠣꠔꠟꠣ ꠎꠤꠘꠤꠡ ꠝꠣꠐꠤꠞ ꠃꠙꠞꠦ ꠙꠠꠤ ꠞꠁꠍꠦ।
EXO 16:15 ꠁꠔꠣ ꠖꠦꠈꠤꠀ ꠛꠘꠤ ꠁꠍꠞꠣꠁꠟꠦ ꠄꠇꠦ-ꠅꠁꠘ꠆ꠘꠦ ꠎꠤꠇꠣꠁꠟꠣ, “ꠅꠛꠣ, ꠁꠔꠣ ꠇꠤꠔꠣ? ꠁꠔꠣ ꠇꠤꠔꠣ ꠙꠠꠍꠦ, ꠀꠝꠞꠣ ꠇꠦꠃ ꠔ ꠌꠤꠘꠞꠣꠝ ꠘꠣ।” ꠔꠦꠃ ꠝꠥꠍꠣꠄ ꠇꠁꠟꠣ, “ꠁꠔꠣ ꠔ ꠛꠦꠢꠦꠡ꠆ꠔꠤ ꠈꠣꠘꠤ, ꠔꠥꠝꠞꠣ ꠈꠣꠁꠔꠣꠄ ꠇꠞꠤ ꠝꠣꠛꠥꠖꠦ ꠖꠣꠘ ꠇꠞꠍꠂꠘ।
EXO 16:16 ꠅꠃ ꠈꠣꠘꠤꠞ ꠇꠕꠣꠃ ꠝꠣꠛꠥꠖꠦ ꠢꠥꠇꠥꠝ ꠖꠤꠍꠂꠘ, ꠙꠞꠔꠦꠇ ꠎꠘꠦ ꠎꠣꠞꠎꠤꠞ ꠙꠞꠤꠛꠣꠞꠞ ꠟꠣꠉꠤ ꠈꠣꠘꠤ ꠔꠥꠇꠣꠁꠀ ꠘꠦꠅ। ꠊꠞꠞ ꠢꠇꠟꠞ ꠟꠣꠉꠤ ꠎꠘ-ꠙꠤꠍꠦ ꠄꠇ ꠙꠦꠐꠥ ꠇꠞꠤ ꠔꠥꠇꠣꠁꠅ।”
EXO 16:17 ꠔꠦꠃ ꠔꠣꠞꠣ ꠅꠃꠟꠣ ꠇꠞꠟꠣ, ꠝꠣꠘꠥꠡ ꠅꠘꠥꠝꠣꠘꠦ ꠇꠦꠃ ꠛꠦꠡ ꠇꠞꠤ ꠘꠤꠟꠣ, ꠇꠦꠃ ꠇꠝ ꠘꠤꠟꠣ।
EXO 16:18 ꠛꠣꠖꠦ ꠙꠦꠐꠥꠖꠤ ꠝꠣꠙꠤꠀ ꠖꠦꠈꠟꠣ, ꠎꠦꠁꠘ ꠛꠦꠡꠤ ꠔꠥꠇꠣꠁꠍꠟꠣ, ꠔꠣꠘꠅ ꠛꠦꠡꠤ ꠅꠁꠍꠦ ꠘꠣ, ꠀꠞ ꠎꠦꠁꠘ ꠕꠥꠠꠣ ꠔꠥꠇꠣꠁꠍꠟꠣ, ꠔꠣꠘꠅ ꠇꠝ ꠅꠁꠍꠦ ꠘꠣ; ꠢꠇꠟꠦꠃ ꠎꠣꠞꠎꠤꠞ ꠙꠞꠤꠛꠣꠞꠞ ꠈꠣꠘꠤꠞ ꠅꠘꠥꠝꠣꠘꠦ ꠔꠥꠇꠣꠁꠍꠂꠘ।
EXO 16:19 ꠝꠥꠍꠣꠄ ꠔꠣꠞꠣꠞꠦ ꠇꠁꠟꠣ, “ꠔꠥꠝꠞꠣ ꠇꠣꠁꠟ ꠛꠤꠀꠘꠇꠥꠞ ꠈꠣꠘꠤꠞ ꠟꠣꠉꠤ ꠁꠔꠣ ꠝꠥꠐꠦꠃ ꠎꠝꠣꠁ ꠕꠁꠅ ꠘꠣ।”
EXO 16:20 ꠔꠣ-ꠅ ꠇꠦꠃ ꠇꠦꠃ ꠝꠥꠍꠣꠞ ꠇꠕꠣ ꠘꠣ ꠝꠣꠘꠤꠀ ꠛꠣꠖꠞ ꠖꠤꠘꠞ ꠟꠣꠉꠤꠅ ꠕꠥꠠꠣ ꠕꠁꠟ। ꠄꠞꠟꠣꠉꠤ ꠁꠔꠣ ꠙꠌꠤꠀ ꠇꠤꠠꠣ-ꠙꠥꠇ ꠎꠘꠝꠤꠀ ꠉꠘ꠆ꠖ ꠛꠣꠞ ꠅꠁꠟ; ꠁꠔꠣ ꠖꠦꠈꠤꠀ ꠝꠥꠍꠣ ꠔꠣꠞꠣꠞ ꠃꠙꠞꠦ ꠈꠥꠛ ꠉꠥꠍꠣ ꠅꠁꠟꠣ।
EXO 16:21 ꠅꠟꠣ ꠙꠞꠔꠦꠇ ꠖꠤꠘ ꠚꠎꠞꠦ ꠔꠣꠞꠣ ꠎꠣꠞꠎꠤꠞ ꠈꠣꠘꠤꠞ ꠅꠘꠥꠝꠣꠘꠦ ꠔꠥꠇꠣꠁꠔ, ꠅꠁꠟꠦ ꠞꠂꠖ ꠉꠞꠝ ꠅꠁꠟꠦꠃ ꠁꠔꠣ ꠉꠟꠤꠎꠤꠔ।
EXO 16:22 ꠛꠣꠖꠦ ꠍꠄ ꠘꠝ꠆ꠛꠞ ꠖꠤꠘꠅ ꠔꠣꠞꠣꠞ ꠈꠣꠘꠤꠞ ꠟꠣꠉꠤ ꠒꠣꠛꠥꠟ ꠈꠣꠘꠤ, ꠝꠣꠘꠤ ꠖꠥꠁ ꠙꠦꠐꠥ ꠇꠞꠤ ꠔꠥꠇꠣꠁꠟ, ꠀꠞ ꠉꠥꠡ꠆ꠐꠤꠞ ꠝꠥꠞꠛ꠆ꠛꠤ ꠅꠇꠟꠦ ꠀꠁꠀ ꠝꠥꠍꠣꠞꠦ ꠎꠣꠘꠣꠁꠟꠣ।
EXO 16:23 ꠝꠥꠍꠣꠄ ꠔꠣꠞꠣꠞꠦ ꠇꠁꠟꠣ, “ꠁꠔꠣ ꠑꠤꠇ ꠀꠍꠦ, ꠝꠣꠛꠥꠖꠦꠃ ꠅꠃꠟꠣ ꠢꠥꠇꠥꠝ ꠖꠤꠍꠂꠘ; ꠇꠣꠁꠟ ꠔ ꠢꠣꠙ꠆ꠔꠣꠞ ꠡꠦꠡ ꠖꠤꠘ, ꠎꠥꠝ꠆ꠝꠣꠛꠣꠞ; ꠝꠣꠛꠥꠖꠞ ꠙꠣꠇ-ꠙꠛꠤꠔ꠆ꠞ ꠖꠤꠘ। ꠔꠦ ꠔꠥꠝꠞꠣꠞ ꠎꠦꠔꠣ ꠞꠣꠘ꠆ꠖꠣꠞ ꠖꠞꠇꠣꠞ ꠀꠍꠦ ꠁꠔꠣ ꠀꠁꠎ ꠞꠣꠘ꠆ꠖꠤꠟꠣꠅ, ꠀꠞ ꠛꠤꠞꠣꠘ ꠇꠞꠣꠞ ꠎꠞꠥꠞ ꠅꠁꠟꠦ ꠛꠤꠞꠣꠘ ꠇꠞꠅ, ꠛꠣꠇꠤ ꠢꠇꠟꠔꠣ ꠛꠣꠖꠞ ꠖꠤꠘ ꠛꠤꠀꠘꠇꠥꠞ ꠟꠣꠉꠤ ꠕꠁ ꠖꠦꠅ।”
EXO 16:24 ꠅꠃ ꠝꠥꠍꠣꠞ ꠢꠥꠇꠥꠝ ꠝꠣꠚꠤꠇ ꠔꠣꠞꠣ ꠛꠣꠖꠞ ꠖꠤꠘ ꠙꠞ꠆ꠎꠘ꠆ꠔ ꠁꠔꠣ ꠊꠞꠅ ꠕꠁꠟ, ꠁꠔꠣꠞ ꠝꠣꠎꠦ ꠇꠥꠘꠥ ꠉꠘ꠆ꠖꠅ ꠛꠣꠞ ꠅꠁꠟ ꠘꠣ, ꠇꠤꠠꠣꠄꠅ ꠗꠞꠟ ꠘꠣ।
EXO 16:25 ꠛꠣꠖꠦ ꠝꠥꠍꠣꠄ ꠔꠣꠞꠣꠞꠦ ꠇꠁꠟꠣ, “ꠀꠁꠎ ꠔꠥꠝꠞꠣ ꠁꠔꠣ ꠈꠣꠅ, ꠇꠣꠞꠘ ꠀꠁꠎ ꠝꠣꠛꠥꠖꠞ ꠙꠣꠇ-ꠙꠛꠤꠔ꠆ꠞ ꠖꠤꠘ, ꠎꠥꠝ꠆ꠝꠣꠛꠣꠞ। ꠀꠁꠎ ꠔꠥꠝꠞꠣ ꠛꠘ꠆ꠖꠞ ꠝꠣꠎꠦ ꠁ ꠈꠣꠘꠤ ꠙꠣꠁꠔꠣꠄ ꠘꠣꠄ।
EXO 16:26 ꠔꠥꠝꠞꠣ ꠢꠣꠙ꠆ꠔꠣꠔ ꠍꠄ ꠖꠤꠘ ꠁ ꠈꠣꠘꠤ ꠔꠥꠇꠣꠁꠅ, ꠅꠁꠟꠦ ꠡꠣꠔ ꠘꠝ꠆ꠛꠞ ꠖꠤꠘ ꠔ ꠎꠥꠝ꠆ꠝꠣꠛꠣꠞ, ꠁ ꠖꠤꠘ ꠁꠔꠣ ꠙꠣꠁꠔꠣꠄ ꠘꠣꠄ।”
EXO 16:27 ꠔꠣ-ꠅ ꠇꠥꠘꠥ ꠇꠥꠘꠥ ꠎꠘꠦ ꠡꠣꠔ ꠘꠝ꠆ꠛꠞ ꠖꠤꠘꠅ ꠅꠃ ꠈꠣꠘꠤ ꠔꠥꠇꠣꠁꠛꠣꠞ ꠟꠣꠉꠤ ꠛꠣꠞꠦ ꠉꠦꠟ, ꠉꠤꠀ ꠇꠥꠘ꠆ꠔꠣ ꠙꠣꠁꠟ ꠘꠣ।
EXO 16:28 ꠔꠦꠃ ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ, “ꠔꠥꠝꠞꠣ ꠀꠞ ꠇꠔꠖꠤꠘ ꠀꠝꠣꠞ ꠢꠥꠇꠥꠝ ꠀꠞ ꠘꠤꠅꠝ-ꠇꠣꠘꠥꠘ ꠜꠣꠋꠉꠤꠔꠣꠄ?
EXO 16:29 ꠢꠥꠘꠅ, ꠔꠥꠝꠞꠣꠞ ꠎꠤꠞꠣꠘꠤꠞ ꠟꠣꠉꠤ ꠁ ꠎꠥꠝ꠆ꠝꠣꠛꠣꠞ ꠔ ꠝꠣꠛꠥꠖꠦꠃ ꠔꠥꠝꠞꠣꠞꠦ ꠖꠤꠍꠂꠘ, ꠄꠞꠟꠣꠉꠤ ꠔꠣꠁꠘ ꠢꠣꠙ꠆ꠔꠣꠞ ꠍꠄ ꠘꠝ꠆ꠛꠞ ꠖꠤꠘꠅ ꠔꠥꠝꠞꠣꠞꠦ ꠖꠥꠁ ꠖꠤꠘꠞ ꠈꠣꠘꠤ ꠖꠦꠁꠘ; ꠅꠈꠘ ꠕꠣꠇꠤ ꠅꠃ ꠡꠣꠔ ꠘꠝ꠆ꠛꠞ ꠖꠤꠘ, ꠝꠣꠘꠤ ꠎꠥꠝ꠆ꠝꠣꠛꠣꠞꠦ ꠔꠥꠝꠞꠣ ꠢꠇꠟꠦ ꠎꠣꠞꠎꠤꠞ ꠊꠞꠅ ꠞꠁꠀ ꠎꠤꠞꠣꠁꠅ, ꠇꠦꠃ ꠊꠞꠞ ꠛꠣꠞꠦ ꠎꠣꠁꠅ ꠘꠣ।”
EXO 16:30 ꠄꠞꠛꠣꠖ ꠕꠣꠇꠤ ꠢꠣꠙ꠆ꠔꠣꠞ ꠡꠣꠔ ꠘꠝ꠆ꠛꠞ ꠖꠤꠘꠅ ꠝꠣꠘꠡꠦ ꠎꠤꠞꠣꠁꠔ।
EXO 16:31 ꠛꠘꠤ ꠁꠍꠞꠣꠁꠟꠦ ꠁ ꠈꠣꠘꠤꠞ ꠘꠣꠝ ꠕꠁꠟ, ꠝꠣꠘ꠆ꠘꠣ; ꠁꠔꠣ ꠖꠦꠈꠔꠦ ꠗꠟꠣ ꠒꠥꠟꠣ ꠛꠤꠌꠤꠞ ꠟꠣꠈꠣꠘ, ꠀꠞ ꠈꠣꠁꠔꠦ ꠝꠃ ꠝꠣꠈꠣꠁꠟ ꠙꠤꠑꠣꠞ ꠟꠣꠈꠣꠘ ꠝꠎꠣ।
EXO 16:32 ꠛꠣꠖꠦ ꠝꠥꠍꠣꠄ ꠔꠣꠞꠣꠞꠦ ꠇꠁꠟꠣ, “ꠝꠣꠛꠥꠖꠦ ꠅꠃ ꠢꠥꠇꠥꠝ ꠖꠤꠍꠂꠘ, ꠔꠥꠝꠞꠣ ꠄꠇ ꠙꠦꠐꠥ ꠙꠞꠤꠝꠣꠘ ꠝꠣꠘ꠆ꠘꠣ ꠔꠥꠟꠤꠀ ꠔꠥꠝꠞꠣꠞ ꠛꠣꠖꠞ ꠛꠋꠡꠗꠞ ꠅꠇꠟꠞ ꠟꠣꠉꠤ ꠎꠝꠣ ꠇꠞꠤ ꠕꠅ, ꠔꠦꠃ ꠔꠣꠞꠣꠅ ꠖꠦꠈꠛꠣ, ꠝꠤꠡꠞ ꠖꠦꠡ ꠕꠣꠇꠤ ꠔꠥꠝꠞꠣꠞꠦ ꠛꠣꠞ ꠇꠞꠤ ꠘꠦꠅꠀꠞ ꠇꠣꠟꠅ ꠝꠞꠥꠜꠥꠝꠤꠞ ꠝꠣꠎꠦ ꠔꠣꠁꠘ ꠇꠤꠔꠣ ꠈꠣꠅꠀꠁꠍꠂꠘ।”
EXO 16:33 ꠝꠥꠍꠣꠄ ꠢꠣꠞꠥꠘꠞꠦ ꠇꠁꠟꠣ, “ꠔꠥꠝꠤ ꠄꠉꠥ ꠛꠂꠀꠝꠞ ꠝꠣꠎꠦ ꠄꠇ ꠙꠦꠐꠥ ꠙꠞꠤꠝꠣꠘ ꠝꠣꠘ꠆ꠘꠣ ꠔꠥꠟꠤꠀ ꠝꠣꠛꠥꠖꠞ ꠍꠣꠝꠘꠦ ꠕꠅ, ꠁꠔꠣ ꠔꠥꠝꠞꠣꠞ ꠅꠀꠞꠤꠡꠞ ꠙꠞ ꠅꠀꠞꠤꠡ ꠗꠞꠤ ꠎꠝꠣ ꠞꠁꠛ।”
EXO 16:34 ꠝꠣꠛꠥꠖꠦ ꠝꠥꠍꠣꠞꠦ ꠎꠦꠟꠣ ꠢꠥꠇꠥꠝ ꠇꠞꠍꠟꠣ, ꠅꠃ ꠟꠣꠈꠣꠘ ꠢꠣꠞꠥꠘꠦ ꠅꠃ ꠝꠣꠘ꠆ꠘꠣ ꠛꠂꠀꠝꠅ ꠜꠞꠟꠣ। ꠛꠣꠖꠦ ꠔꠣꠁꠘ ꠙꠛꠤꠔ꠆ꠞ ꠡꠘ꠆ꠖꠥꠇꠞ ꠜꠤꠔꠞꠦ ꠡꠣꠢꠣꠖꠔ ꠙꠣꠔ꠆ꠔꠞꠞ ꠍꠣꠝꠘꠦ ꠕꠁꠟꠣ।
EXO 16:35 ꠛꠘꠤ ꠁꠍꠞꠣꠁꠟꠦ ꠌꠣꠟ꠆ꠟꠤꠡ ꠛꠞꠍ ꠗꠞꠤ ꠁ ꠝꠣꠘ꠆ꠘꠣ ꠈꠣꠁꠟ, ꠔꠣꠞꠣ ꠎꠔꠖꠤꠘ ꠙꠞ꠆ꠎꠘ꠆ꠔ ꠝꠣꠘꠥꠡ ꠛꠡꠔ ꠇꠞꠣꠞ ꠎꠣꠉꠣ, ꠝꠣꠘꠤ ꠇꠦꠘꠣꠘ ꠖꠦꠡꠞ ꠡꠤꠝꠣꠘꠣꠔ ꠀꠁꠀ ꠘꠣ ꠙꠃꠍꠤꠟ, ꠅꠔꠖꠤꠘ ꠅꠃ ꠈꠣꠘꠤꠃ ꠈꠣꠁꠟꠣ।
EXO 16:36 ꠄꠇ ꠙꠦꠐꠥ ꠅꠁꠟꠉꠤ, ꠄꠇ ꠚꠥꠞꠣꠞꠞ ꠖꠡ ꠛꠣꠐꠞ ꠄꠇ ꠛꠣꠐ।
EXO 17:1 ꠛꠣꠖꠦ ꠝꠣꠛꠥꠖꠞ ꠢꠥꠇꠥꠝꠦ ꠔꠣꠝꠣꠝ ꠛꠘꠤ ꠁꠍꠞꠣꠁꠟ ꠍꠤꠘ ꠝꠞꠥꠜꠥꠝꠤ ꠕꠣꠇꠤ ꠞꠅꠀꠘꠣ ꠖꠤꠀ, ꠄꠇ ꠎꠣꠉꠣ ꠕꠣꠇꠤ ꠀꠞꠇ ꠎꠣꠉꠣꠔ ꠉꠤꠀ ꠉꠤꠀ ꠢꠦꠡꠦ ꠞꠚꠤꠖꠤꠝꠅ ꠀꠁꠀ ꠔꠣꠝ꠆ꠛꠥ ꠉꠣꠠꠤꠟꠣ, ꠅꠁꠟꠦ ꠢꠤꠘꠅ ꠝꠣꠘꠡꠞ ꠈꠣꠅꠀꠞ ꠙꠣꠘꠤ ꠀꠍꠤꠟ ꠘꠣ।
EXO 17:2 ꠄꠞꠟꠣꠉꠤ ꠝꠣꠘꠡꠦ ꠝꠥꠍꠣꠞ ꠟꠉꠦ ꠇꠣꠁꠎ꠆ꠎꠣ ꠇꠞꠤ ꠇꠁꠟꠣ, “ꠀꠝꠞꠣꠞꠦ ꠈꠣꠅꠀꠞ ꠙꠣꠘꠤ ꠖꠦꠃꠇ꠆ꠇꠣ।” ꠝꠥꠍꠣꠄ ꠔꠣꠞꠣꠞꠦ ꠇꠁꠟꠣ, “ꠔꠥꠝꠞꠣ ꠇꠦꠘꠦ ꠀꠝꠣꠞ ꠟꠉꠦ ꠇꠣꠁꠎ꠆ꠎꠣ ꠇꠞꠞꠣꠄ? ꠇꠦꠘꠦ ꠝꠣꠛꠥꠖꠞꠦ ꠙꠞꠤꠇ꠆ꠇꠣ ꠇꠞꠞꠣꠄ?”
EXO 17:3 ꠝꠣꠘꠡꠦ ꠙꠣꠘꠤꠞ ꠙꠤꠀꠍꠦ ꠇꠣꠢꠤꠟ ꠅꠁꠀ ꠝꠥꠍꠣꠞ ꠛꠤꠞꠥꠖ꠆ꠖꠦ ꠉꠣꠟꠤ-ꠉꠣꠟꠣꠎ ꠇꠞꠤ ꠇꠁꠟꠣ, “ꠔꠥꠝꠤ ꠀꠝꠞꠣꠞꠦ ꠝꠣꠞꠔꠣꠄ ꠇꠞꠤ ꠝꠤꠡꠞ ꠖꠦꠡ ꠕꠣꠇꠤ ꠀꠘꠍ ꠘꠤ? ꠀꠝꠞꠣꠞꠦ, ꠀꠝꠞꠣꠞ ꠢꠥꠞꠥꠔ꠆ꠔꠣꠁꠘ꠆ꠔꠞꠦ, ꠀꠝꠞꠣꠞ ꠙꠡꠥꠞ ꠙꠣꠟꠞꠦ ꠀꠘꠣ-ꠙꠣꠘꠤꠄ ꠝꠣꠞꠔꠣꠄ ꠇꠞꠤ ꠅꠘꠅ ꠀꠘꠍ ꠘꠤ?”
EXO 17:4 ꠔꠦꠃ ꠝꠥꠍꠣꠄ ꠝꠣꠛꠥꠖꠞ ꠉꠦꠍꠦ ꠚꠞꠤꠀꠖ ꠇꠞꠤ ꠇꠁꠟꠣ, “ꠀꠝꠤ ꠁ ꠝꠣꠘꠡꠞꠦ ꠇꠤꠔꠣ ꠇꠞꠔꠣꠝ? ꠀꠞ ꠕꠥꠠꠣ ꠖꠦꠞꠤ ꠅꠁꠟꠦꠃ ꠔ ꠔꠣꠞꠣ ꠙꠣꠔ꠆ꠔꠞꠖꠤ ꠁꠐꠣꠁꠀ ꠀꠝꠣꠞꠦ ꠝꠣꠞꠤꠟꠤꠛꠣ।”
EXO 17:5 ꠝꠣꠛꠥꠖꠦ ꠎꠥꠀꠙ ꠖꠤꠟꠣ, “ꠔꠥꠝꠤ ꠎꠦ ꠟꠣꠑꠤꠖꠤ ꠘꠤꠟ ꠘꠖꠅ ꠛꠣꠠꠤ ꠝꠣꠞꠍꠟꠣꠄ, ꠢꠃ ꠟꠣꠑꠤ ꠀꠔꠅ ꠟꠅ, ꠀꠞ ꠛꠘꠤ ꠁꠍꠞꠣꠁꠟꠞ ꠇꠄꠎꠘ ꠝꠥꠞꠛ꠆ꠛꠤꠞꠦ ꠟꠉꠦ ꠟꠁꠀ ꠝꠣꠘꠡꠞ ꠀꠉꠦ ꠀꠉꠦ ꠎꠣꠅ।
EXO 17:6 ꠉꠤꠀ ꠢꠣꠞꠟꠦ ꠀꠝꠤ ꠔꠥꠞ ꠙꠣꠠꠞ ꠇꠣꠘ꠆ꠖꠣꠔ ꠄꠇ ꠙꠣꠔ꠆ꠔꠞꠞ ꠃꠙꠞꠦ ꠀꠎꠤꠞ ꠅꠁꠝꠥ, ꠔꠥꠝꠤ ꠅꠃ ꠙꠣꠔ꠆ꠔꠞꠅ ꠛꠣꠠꠤ ꠝꠣꠞꠟꠦ ꠅꠉꠥ ꠕꠣꠇꠤ ꠙꠣꠘꠤ ꠛꠣꠞ ꠅꠁꠛ, ꠔꠦꠃ ꠝꠣꠘꠡꠦ ꠈꠣꠁꠔꠣ ꠙꠣꠞꠛꠣ।” ꠢꠣꠍꠣꠃ ꠝꠥꠍꠣꠄ ꠁꠍꠞꠣꠁꠟꠞ ꠝꠥꠞꠛ꠆ꠛꠤ ꠅꠇꠟꠞ ꠍꠣꠝꠘꠦ ꠅꠃꠟꠣ ꠇꠞꠟꠣ।
EXO 17:7 ꠅꠃ ꠞꠚꠤꠖꠤꠝꠅ ꠀꠁꠀ ꠝꠣꠘꠡꠦ ꠇꠣꠁꠎ꠆ꠎꠣ ꠇꠞꠤ ꠇꠁꠍꠟꠣ, “ꠝꠣꠛꠥꠖ ꠇꠤꠔꠣ ꠀꠝꠞꠣꠞ ꠟꠉꠦ ꠀꠍꠂꠘ ꠘꠤ, ꠘꠣ ꠢꠞꠤ ꠉꠦꠍꠂꠘ?” ꠅꠃꠟꠣ ꠇꠁꠀ ꠔꠣꠞꠣ ꠝꠣꠛꠥꠖꠞꠦ ꠙꠞꠤꠇ꠆ꠇꠣ ꠇꠞꠍꠟꠣ ꠇꠞꠤ, ꠁ ꠎꠣꠉꠣꠞ ꠘꠣꠝ ꠅꠁꠟ ꠝꠣꠍꠣ [ꠝꠣꠘꠤ, ꠙꠞꠤꠇ꠆ꠇꠣ] ꠀꠞ ꠝꠦꠞꠤꠛꠣ [ꠝꠣꠘꠤ, ꠇꠣꠁꠎ꠆ꠎꠣ]।
EXO 17:8 ꠅꠃ ꠡꠝꠄ ꠛꠘꠤ ꠁꠍꠞꠣꠁꠟꠞ ꠟꠉꠦ ꠎꠥꠖ꠆ꠖ ꠇꠞꠣꠞ ꠟꠣꠉꠤ ꠀꠝꠣꠟꠦꠇꠤ ꠍꠤꠙꠣꠁ ꠅꠇꠟ ꠞꠚꠤꠖꠤꠝꠅ ꠀꠁꠟꠣ।
EXO 17:9 ꠔꠦꠃ ꠝꠥꠍꠣꠄ ꠔꠣꠘ ꠈꠣꠖꠤꠝ ꠢꠎꠞꠔ ꠁꠃꠍꠣꠞꠦ ꠇꠁꠟꠣ, “ꠔꠥꠝꠤ ꠀꠝꠞꠣꠞ ꠝꠣꠘꠥꠡ ꠕꠣꠇꠤ ꠟꠣꠠꠣꠁ ꠇꠞꠞꠣ ꠎꠘ ꠛꠣꠍꠤꠀ ꠘꠤꠀ, ꠀꠝꠣꠟꠦꠇꠤ ꠅꠇꠟꠞ ꠟꠉꠦ ꠎꠥꠖ꠆ꠖ ꠇꠞꠣꠔ ꠎꠣꠅ। ꠀꠝꠤꠅ ꠇꠣꠁꠟ ꠀꠟ꠆ꠟꠣꠁ ꠇꠥꠖꠞꠔꠤ ꠟꠣꠑꠤ ꠀꠔꠅ ꠟꠁꠀ ꠙꠣꠠꠞ ꠃꠙꠞꠦ ꠃꠛꠣꠁꠝꠥ।”
EXO 17:10 ꠁꠃꠍꠣꠄꠅ ꠝꠥꠍꠣꠞ ꠢꠥꠇꠥꠝ ꠝꠣꠚꠤꠇ ꠇꠣꠝ ꠇꠞꠟꠣ। ꠀꠝꠣꠟꠦꠇꠤ ꠅꠇꠟꠞ ꠟꠉꠦ ꠎꠥꠖ꠆ꠖ ꠇꠞꠟꠣ, ꠝꠥꠍꠣ, ꠢꠣꠞꠥꠘ, ꠀꠞ ꠢꠥꠞ, ꠅꠃ ꠔꠤꠘꠅ ꠎꠘ ꠉꠤꠀ ꠙꠣꠠꠞ ꠐꠤꠟ꠆ꠟꠣꠞ ꠃꠙꠞꠦ ꠃꠑꠟꠣ।
EXO 17:11 ꠛꠣꠖꠦ ꠖꠦꠈꠣ ꠉꠦꠟ, ꠝꠥꠍꠣꠄ ꠎꠔ ꠡꠝꠄ ꠀꠔ ꠃꠌꠣ ꠇꠞꠤ ꠞꠣꠈꠂꠘ, ꠅꠔ ꠡꠝꠄ ꠛꠘꠤ ꠁꠍꠞꠣꠁꠟꠞ ꠖꠟ ꠎꠤꠔꠂꠘ, ꠅꠁꠟꠦ ꠝꠥꠍꠣꠄ ꠀꠔ ꠟꠣꠝꠣꠁꠟꠦꠃ ꠀꠝꠣꠟꠦꠇꠤ ꠖꠟ ꠎꠤꠔꠂꠘ।
EXO 17:12 ꠀꠡ꠆ꠔꠦ ꠀꠡ꠆ꠔꠦ ꠝꠥꠍꠣꠞ ꠀꠔ ꠜꠣꠞ ꠅꠀ ꠗꠞꠟ। ꠅꠃ ꠔꠣꠞꠣ ꠄꠇꠈꠣꠘ ꠙꠣꠔ꠆ꠔꠞ ꠀꠘꠤꠀ ꠝꠥꠍꠣꠞꠦ ꠛꠁꠛꠣꠞ ꠛꠦꠛꠡ꠆ꠔꠣ ꠖꠤꠟꠣ। ꠅꠃ ꠙꠣꠔ꠆ꠔꠞꠞ ꠃꠙꠞꠦ ꠝꠥꠍꠣ ꠛꠁꠟꠣ, ꠢꠣꠞꠥꠘ ꠀꠞ ꠢꠥꠞ ꠖꠥꠁꠅꠎꠘꠦ ꠝꠥꠍꠣꠞ ꠖꠥꠁ ꠉꠣꠟꠣꠔ ꠃꠛꠣꠁꠀ ꠔꠣꠘ ꠀꠔ ꠃꠌꠣ ꠇꠞꠤ ꠗꠞꠟꠣ। ꠔꠦꠃ ꠡꠥꠞꠥꠎ ꠒꠥꠛꠣꠞ ꠀꠉ ꠙꠞ꠆ꠎꠘ꠆ꠔ ꠔꠣꠘ ꠀꠔ ꠃꠌꠣ ꠞꠁꠟ।
EXO 17:13 ꠄꠞꠟꠣꠉꠤ ꠀꠝꠣꠟꠦꠇꠤ ꠍꠤꠙꠣꠁꠞ ꠟꠉꠦ ꠎꠥꠖ꠆ꠖ ꠇꠞꠤꠀ ꠁꠃꠍꠣ ꠎꠤꠔꠤꠉꠦꠟꠣ।
EXO 17:14 ꠛꠣꠖꠦ ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ, “ꠁꠔꠣ ꠁꠀꠖ ꠞꠣꠈꠣꠞ ꠟꠣꠉꠤ ꠔꠥꠝꠤ ꠄꠇꠈꠣꠘ ꠇꠤꠔꠣꠛꠞ ꠝꠣꠎꠦ ꠟꠦꠈꠤꠀ ꠕꠅ ꠀꠞ ꠁꠃꠍꠣꠞꠦꠅ ꠎꠣꠘꠣꠅ। ꠝꠘꠅ ꠞꠣꠈꠤꠅ, ꠀꠝꠤ ꠖꠥꠘꠤꠀꠞ ꠛꠥꠇ ꠕꠣꠇꠤ ꠀꠝꠣꠟꠦꠇꠤ ꠅꠇꠟꠞ ꠘꠣꠝ ꠝꠤꠐꠣꠁꠟꠤꠝꠥ।”
EXO 17:15 ꠝꠥꠍꠣꠄ ꠄꠇꠈꠣꠘ ꠇꠥꠞꠛꠣꠘꠤ ꠈꠣꠘꠣ ꠛꠣꠘꠣꠁꠀ ꠄꠞ ꠘꠣꠝ ꠕꠁꠟꠣ, ꠝꠣꠛꠥꠖꠃ ꠀꠝꠣꠞ ꠎꠥꠖ꠆ꠖꠞ ꠏꠣꠘ꠆ꠒꠣ।
EXO 17:16 ꠔꠣꠁꠘ ꠇꠁꠟꠣ, “ꠝꠣꠛꠥꠖꠞ ꠎꠥꠖ꠆ꠖꠞ ꠏꠣꠘ꠆ꠒꠣ ꠀꠝꠞꠣ ꠀꠔꠅ ꠟꠁ, ꠔꠦꠃ ꠝꠣꠛꠥꠖꠦꠅ ꠅꠀꠞꠤꠡꠞ ꠙꠞ ꠅꠀꠞꠤꠡ ꠗꠞꠤ ꠀꠝꠣꠟꠦꠇꠤ ꠅꠇꠟꠞ ꠟꠉꠦ ꠎꠥꠖ꠆ꠖ ꠇꠞꠛꠣ।”
EXO 18:1 ꠀꠟ꠆ꠟꠣꠄ ꠢꠎꠞꠔ ꠝꠥꠍꠣꠞꠦ ꠀꠞ ꠔꠣꠘ ꠛꠘ꠆ꠖꠣ ꠛꠘꠤ ꠁꠍꠞꠣꠁꠟꠞꠦ ꠎꠔ ꠟꠣꠈꠣꠘ ꠞꠢꠝ ꠇꠞꠍꠂꠘ, ꠁꠔꠣ ꠢꠇꠟꠔꠣ ꠝꠥꠍꠣꠞ ꠢꠃꠞ ꠝꠣꠖꠤꠀꠘ ꠖꠦꠡꠞ ꠁꠝꠣꠝ ꠡꠥꠀꠁꠛꠞ ꠇꠣꠘꠅ ꠉꠦꠟ। ꠝꠣꠛꠥꠖꠦ ꠛꠘꠤ ꠁꠍꠞꠣꠁꠟꠞꠦ ꠝꠤꠡꠞ ꠖꠦꠡ ꠕꠣꠇꠤ ꠇꠤꠟꠣ ꠛꠣꠞ ꠇꠞꠤ ꠀꠘꠍꠂꠘ, ꠄꠅꠔꠣ ꠔꠣꠁꠘ ꠢꠥꠘꠟꠣ।
EXO 18:2 ꠝꠥꠍꠣꠄ ꠀꠉꠦ ꠔꠣꠘ ꠛꠤꠛꠤ ꠍꠚꠥꠞꠣꠞꠦ ꠢꠃꠞ ꠛꠣꠠꠤꠔ ꠙꠣꠑꠣꠁ ꠖꠤꠍꠟꠣ, ꠄꠞꠟꠣꠉꠤ ꠔꠣꠘ ꠢꠃꠞꠦ ꠝꠥꠍꠣꠞ ꠛꠤꠛꠤꠞꠦ ꠀꠞ ꠖꠥꠁꠅ ꠙꠥꠀꠞꠦ ꠘꠤꠎꠞ ꠉꠦꠍꠦ ꠞꠣꠈꠟꠣ।
EXO 18:3 ꠁ ꠖꠥꠁꠅ ꠙꠥꠀꠞ ꠝꠣꠎꠞ ꠄꠇꠎꠘꠞ ꠘꠣꠝ ꠀꠍꠤꠟ ꠎꠣꠞꠍꠥꠝ [ꠝꠣꠘꠤ, ꠛꠂꠔꠟ]। ꠝꠥꠍꠣꠄ ꠇꠁꠟꠣ, “ꠀꠝꠤ ꠜꠤꠘ ꠖꠦꠡꠅ ꠛꠂꠔꠟꠞ ꠟꠣꠈꠣꠘ ꠞꠁꠞꠣꠝ।”
EXO 18:4 ꠀꠞ ꠖꠥꠍꠞꠣ ꠎꠘꠞ ꠘꠣꠝ ꠀꠍꠤꠟ ꠄꠟꠤꠄꠎꠦꠞ [ꠝꠣꠘꠤ, ꠀꠟ꠆ꠟꠣ ꠡꠢꠣꠄ]। ꠔꠣꠁꠘ ꠇꠁꠟꠣ, “ꠀꠝꠣꠞ ꠛꠣꠚꠞ ꠀꠟ꠆ꠟꠣ ꠀꠝꠣꠞ ꠡꠢꠣꠄ ꠅꠁꠀ ꠀꠝꠣꠞꠦ ꠚꠦꠞꠣꠃꠘꠞ ꠔꠟꠥꠀꠞ ꠕꠣꠇꠤ ꠢꠦꠚꠣꠎꠔ ꠇꠞꠍꠂꠘ।”
EXO 18:5 ꠝꠥꠍꠣꠞ ꠢꠃꠞ ꠡꠥꠀꠁꠛꠦ ꠝꠥꠍꠣꠞ ꠛꠤꠛꠤ ꠀꠞ ꠔꠣꠘ ꠖꠥꠁꠅ ꠙꠥꠀꠞꠦ ꠟꠁꠀ ꠝꠥꠍꠣꠞ ꠉꠦꠍꠦ ꠀꠁꠟꠣ। ꠅꠃ ꠡꠝꠄ ꠛꠘꠤ ꠁꠍꠞꠣꠁꠟ ꠀꠞ ꠝꠥꠍꠣꠞ ꠔꠣꠝ꠆ꠛꠥ ꠀꠍꠤꠟ ꠀꠟ꠆ꠟꠣꠞ ꠙꠣꠠ ꠔꠥꠞꠞ ꠇꠣꠘ꠆ꠖꠣꠔ।
EXO 18:6 ꠔꠣꠘ ꠢꠃꠞ ꠅꠘꠅ ꠀꠁꠀ ꠝꠥꠍꠣꠞꠦ ꠈꠛꠞ ꠖꠤꠟꠣ, “ꠀꠝꠤ ꠔꠥꠝꠣꠞ ꠢꠃꠞ ꠡꠥꠀꠁꠛ। ꠔꠦ ꠀꠝꠤ ꠔꠥꠝꠣꠞ ꠛꠤꠛꠤ ꠀꠞ ꠖꠥꠁꠅ ꠙꠥꠀꠞꠦ ꠟꠁꠀ ꠅꠘꠅ ꠀꠁꠍꠤ।”
EXO 18:7 ꠈꠛꠞ ꠙꠣꠁꠀ ꠝꠥꠍꠣꠄ ꠔꠣꠘ ꠢꠃꠞꠞ ꠟꠉꠦ ꠖꠦꠈꠣ ꠇꠞꠣꠔ ꠛꠣꠞ ꠅꠁꠟꠣ। ꠔꠣꠁꠘ ꠝꠣꠐꠤꠔ ꠍꠁꠎꠖꠣ ꠇꠞꠤꠀ ꠔꠣꠘ ꠢꠃꠞꠞꠦ ꠍꠣꠟꠣꠝ ꠇꠞꠟꠣ ꠀꠞ ꠝꠣꠄꠀꠞ ꠢꠥꠋꠉꠣ ꠖꠤꠟꠣ। ꠛꠣꠖꠦ ꠖꠥꠁꠅꠎꠘꠦ ꠜꠣꠟꠣ-ꠛꠥꠞꠣ ꠎꠤꠇꠣꠁꠀ ꠢꠣꠞꠤ ꠔꠣꠝ꠆ꠛꠥꠞ ꠜꠤꠔꠞꠦ ꠢꠣꠝꠣꠁꠟꠣ।
EXO 18:8 ꠝꠣꠛꠥꠖꠦ ꠛꠘꠤ ꠁꠍꠞꠣꠁꠟꠞ ꠙꠇ꠆ꠇ ꠟꠁꠀ ꠚꠦꠞꠣꠃꠘ ꠀꠞ ꠝꠤꠡꠞꠤ ꠅꠇꠟꠞ ꠟꠉꠦ ꠎꠦꠔꠣ ꠎꠦꠔꠣ ꠇꠞꠍꠂꠘ, ꠁꠔꠣ ꠢꠇ꠆ꠇꠟꠔꠣ ꠔꠣꠘ ꠢꠃꠞꠞꠦ ꠢꠥꠘꠣꠁꠟꠣ। ꠝꠤꠡꠞ ꠕꠣꠇꠤ ꠎꠣꠅꠀꠞ ꠛꠣꠟꠣ ꠔꠣꠞꠣꠞ ꠇꠔ ꠇꠡ꠆ꠐ ꠅꠁꠍꠤꠟ ꠀꠞ ꠀꠟ꠆ꠟꠣꠄ ꠇꠤꠟꠣ ꠔꠣꠞꠣꠞꠦ ꠛꠣꠌꠣꠁꠍꠂꠘ ꠄꠅꠔꠣꠅ ꠔꠣꠘꠞꠦ ꠎꠣꠘꠣꠁꠟꠣ।
EXO 18:9 ꠀꠞ ꠝꠣꠛꠥꠖꠦ ꠝꠤꠡꠞꠤ ꠅꠇꠟꠞ ꠀꠔ ꠕꠣꠇꠤ ꠛꠘꠤ ꠁꠍꠞꠣꠁꠟꠞꠦ ꠀꠎꠣꠖ ꠇꠞꠤꠀ ꠔꠣꠞꠣꠞꠦ ꠎꠔ ꠟꠣꠈꠣꠘ ꠀꠍꠣꠘ ꠇꠞꠍꠂꠘ, ꠁꠔꠣ ꠢꠥꠘꠤꠀ ꠔꠣꠘ ꠢꠃꠞ ꠈꠥꠛ ꠈꠥꠡꠤ ꠅꠁꠟꠣ।
EXO 18:10 ꠔꠣꠁꠘ ꠇꠁꠟꠣ, “ꠢꠇꠟ ꠔꠣꠞꠤꠚ ꠝꠣꠛꠥꠖꠞ, ꠎꠦꠁꠘ ꠚꠦꠞꠣꠃꠘ ꠀꠞ ꠝꠤꠡꠞꠤ ꠅꠇꠟꠞ ꠀꠔ ꠕꠣꠇꠤ ꠔꠥꠝꠞꠣꠞꠦ ꠀꠎꠣꠖ ꠇꠞꠍꠂꠘ।
EXO 18:11 ꠅꠈꠘ ꠀꠝꠤ ꠘꠤꠎꠦꠅ ꠛꠥꠎꠤꠀꠞ, ꠢꠇꠟ ꠖꠦꠛꠔꠣꠞ ꠌꠣꠁꠔꠦ ꠀꠟ꠆ꠟꠣꠃ ꠝꠢꠣꠘ। ꠇꠣꠞꠘ ꠝꠤꠡꠞꠤꠘ꠆ꠔꠦ ꠎꠦꠔꠣ ꠛꠦꠙꠣꠞ ꠟꠁꠀ ꠔꠥꠝꠞꠣꠞ ꠛꠤꠞꠥꠖ꠆ꠖꠦ ꠛꠣꠢꠣꠖꠥꠞꠤ ꠇꠞꠔꠣ, ꠁꠔꠣꠞ ꠇꠛꠎꠣ ꠕꠣꠇꠤ ꠔꠣꠁꠘꠃ ꠔꠥꠝꠞꠣꠞꠦ ꠛꠣꠌꠣꠁꠍꠂꠘ।”
EXO 18:12 ꠛꠣꠖꠦ ꠝꠥꠍꠣꠞ ꠢꠃꠞ ꠡꠥꠀꠁꠛꠦ ꠀꠟ꠆ꠟꠣꠞ ꠘꠣꠝꠦ ꠎꠣꠟꠣꠁꠟ ꠇꠥꠞꠛꠣꠘꠤ ꠀꠞ ꠢꠇꠟ ꠎꠣꠔꠞ ꠇꠥꠞꠛꠣꠘꠤ ꠎꠥꠁꠔ ꠇꠞꠤ ꠟꠁꠀ ꠀꠁꠟꠣ। ꠢꠦꠡꠦ ꠢꠣꠞꠥꠘ ꠀꠞ ꠛꠘꠤ ꠁꠍꠞꠣꠁꠟꠞ ꠝꠥꠞꠛ꠆ꠛꠤ ꠅꠇꠟ ꠀꠁꠀ, ꠝꠥꠍꠣꠞ ꠢꠃꠞꠞ ꠟꠉꠦ ꠛꠁꠀ ꠀꠟ꠆ꠟꠣꠞ ꠍꠣꠝꠘꠦ ꠈꠣꠘꠣ-ꠙꠤꠘꠣ ꠈꠣꠁꠟꠣ।
EXO 18:13 ꠛꠣꠖꠞ ꠖꠤꠘ ꠝꠥꠍꠣꠄ ꠝꠣꠘꠡꠞ ꠛꠤꠌꠣꠞ-ꠡꠣꠟꠤꠡ ꠇꠞꠣꠔ ꠛꠁꠟꠣ। ꠛꠤꠌꠣꠞꠞ ꠟꠣꠉꠤ ꠝꠣꠘꠥꠡ ꠀꠁꠀ ꠛꠤꠀꠘ ꠕꠣꠇꠤ ꠢꠣꠁꠘ꠆ꠎꠣ ꠙꠞ꠆ꠎꠘ꠆ꠔ ꠢꠣꠞꠣꠖꠤꠘ ꠔꠣꠘ ꠍꠣꠝꠘꠦ ꠃꠛꠣꠁ ꠞꠁꠟꠣ।
EXO 18:14 ꠝꠥꠍꠣꠄ ꠅꠟꠣ ꠇꠞꠞꠣ ꠖꠦꠈꠤꠀ ꠔꠣꠘ ꠢꠃꠞꠦ ꠇꠁꠟꠣ, “ꠔꠥꠝꠤ ꠝꠣꠘꠡꠞꠦ ꠟꠁꠀ ꠁꠔꠣ ꠇꠤꠔꠣ ꠇꠞꠞꠣꠄ? ꠇꠤꠔꠣꠞ ꠟꠣꠉꠤ ꠔꠥꠝꠤ ꠄꠇꠟꠣ ꠅꠘꠅ ꠛꠤꠌꠣꠞꠅ ꠛꠁꠍ, ꠀꠞ ꠛꠤꠀꠘ ꠕꠣꠇꠤ ꠢꠣꠁꠘ꠆ꠎꠣ ꠙꠞ꠆ꠎꠘ꠆ꠔ ꠢꠇꠟ ꠝꠣꠘꠥꠡ ꠔꠥꠝꠣꠞ ꠉꠦꠍꠦ ꠃꠛꠣꠁ ꠞꠁꠍꠦ?”
EXO 18:15 ꠝꠥꠍꠣꠄ ꠎꠥꠀꠙ ꠖꠤꠟꠣ, “ꠛꠤꠌꠣꠞꠞ ꠛꠦꠙꠣꠞꠦ ꠀꠟ꠆ꠟꠣꠞ ꠚꠄꠍꠣꠟꠣ ꠢꠥꠘꠣꠞ ꠟꠣꠉꠤ ꠝꠣꠘꠥꠡ ꠀꠝꠣꠞ ꠉꠦꠍꠦ ꠀꠁꠘ।
EXO 18:16 ꠔꠣꠞꠣ ꠇꠥꠘꠥ ꠇꠣꠁꠎ꠆ꠎꠣ-ꠚꠍꠣꠖ ꠇꠞꠟꠦ ꠀꠝꠣꠞ ꠇꠣꠍꠣꠔ ꠀꠁꠘ, ꠀꠁꠟꠦ ꠀꠝꠤ ꠖꠥꠁꠅ ꠖꠟꠞ ꠛꠤꠌꠣꠞ ꠇꠞꠤ, ꠀꠞ ꠀꠟ꠆ꠟꠣꠞ ꠢꠥꠇꠥꠝ-ꠀꠢꠇꠣꠝ ꠔꠣꠞꠣꠞꠦ ꠛꠣꠔꠣꠁ।”
EXO 18:17 ꠔꠦꠃ ꠝꠥꠍꠣꠞ ꠢꠃꠞꠦ ꠇꠁꠟꠣ, “ꠔꠥꠝꠤ ꠎꠦꠟꠣꠈꠣꠘ ꠁꠔꠣ ꠇꠞꠞꠣꠄ, ꠁꠔꠣ ꠔ ꠜꠣꠟꠣ ꠘꠣꠄ।
EXO 18:18 ꠁꠟꠣ ꠇꠞꠟꠦ ꠔꠥꠝꠤ ꠀꠞ ꠔꠥꠝꠣꠞ ꠢꠇꠟ ꠝꠣꠘꠥꠡꠅ ꠇꠣꠢꠤꠟ ꠅꠁꠎꠤꠛꠣꠄ। ꠁ ꠇꠣꠝ ꠔꠥꠝꠣꠞ ꠔꠣꠇ꠆ꠇꠔ ꠕꠣꠇꠤ ꠛꠦꠡꠤ, ꠔꠥꠝꠤ ꠄꠇꠟꠣ ꠁꠔꠣ ꠇꠥꠟꠣꠁꠔꠣꠄ ꠙꠣꠞꠔꠣꠄ ꠘꠣꠄ।
EXO 18:19 ꠔꠦ ꠀꠝꠤ ꠔꠥꠝꠣꠞꠦ ꠇꠁꠀꠞ, ꠔꠥꠝꠤ ꠀꠝꠣꠞ ꠙꠞꠣꠝꠤꠡ ꠢꠥꠘꠅ, ꠄꠔꠦ ꠀꠟ꠆ꠟꠣꠅ ꠔꠥꠝꠣꠞ ꠟꠉꠦ ꠞꠁꠛꠣ। ꠔꠥꠝꠤ ꠝꠣꠘꠡꠞ ꠛꠤꠌꠣꠞ-ꠀꠌꠣꠞ ꠚꠄꠍꠣꠟꠣ ꠇꠞꠣꠞ ꠘꠤꠅꠔꠦ, ꠔꠣꠞꠣꠞ ꠁꠝꠣꠝ ꠢꠤꠡꠣꠛꠦ ꠢꠇꠟ ꠛꠦꠙꠣꠞ ꠀꠟ꠆ꠟꠣꠞ ꠍꠣꠝꠘꠦ ꠀꠎꠤꠞ ꠇꠞꠤꠅ।
EXO 18:20 ꠀꠞ ꠝꠣꠘꠡꠞꠦꠅ ꠀꠟ꠆ꠟꠣꠞ ꠢꠥꠇꠥꠝ-ꠀꠢꠇꠣꠝ ꠔꠣꠟꠤꠝ ꠖꠤꠅ। ꠔꠣꠞꠣ ꠇꠤꠟꠣ ꠌꠟꠔꠣ, ꠇꠤꠔꠣ ꠇꠞꠔꠣ ꠘꠣ ꠇꠞꠔꠣ, ꠅꠔꠣ ꠔꠣꠞꠣꠞꠦ ꠛꠥꠎꠣꠁꠅ।
EXO 18:21 ꠀꠞ ꠔꠥꠝꠤ ꠄꠞꠣꠞ ꠝꠣꠎ ꠕꠣꠇꠤ ꠛꠣꠍꠤꠀ ꠅꠃꠟꠣ ꠎꠁꠉ꠆ꠉ ꠝꠣꠘꠥꠡ ꠛꠣꠞ ꠇꠞꠅ, ꠎꠦꠞꠣ ꠀꠟ꠆ꠟꠣꠞꠦ ꠒꠞꠣꠁꠘ, ꠢꠇ ꠙꠕꠦ ꠌꠟꠂꠘ, ꠀꠞ ꠊꠥꠡ ꠈꠣꠅꠀꠞꠦ ꠊꠤꠘ ꠇꠞꠂꠘ। ꠄꠞꠣꠞꠦ ꠔꠥꠝꠤ ꠝꠣꠘꠡꠞ ꠛꠤꠌꠣꠞ-ꠀꠌꠣꠞꠞ ꠖꠣꠄꠁꠔ꠆ꠔ ꠖꠦꠅ। ꠄꠞꠣ ꠇꠥꠘꠥ ꠎꠘꠞꠦ ꠀꠎꠣꠞ ꠎꠘꠞ ꠃꠙꠞꠦ, ꠇꠦꠃꠞꠞꠦ ꠡ ꠎꠘ, ꠇꠦꠃꠞꠞꠦ ꠙꠁꠘ꠆ꠌꠣꠡ ꠎꠘ, ꠀꠞ ꠇꠦꠃꠞꠞꠦ ꠖꠡ ꠎꠘꠞ ꠃꠙꠞꠦ ꠛꠤꠌꠣꠞ-ꠀꠌꠣꠞꠞ ꠜꠣꠞ ꠖꠦꠅ।
EXO 18:22 ꠄꠞꠣꠃ ꠢꠣꠝꠦꠡꠣ ꠝꠣꠘꠡꠞ ꠛꠤꠌꠣꠞ-ꠁꠘꠍꠣꠚ ꠇꠞꠛꠣ। ꠢꠥꠞꠥ-ꠝꠥꠞꠥ ꠢꠇꠟ ꠛꠤꠌꠣꠞ ꠔꠣꠞꠣ ꠇꠞꠛꠣ, ꠈꠣꠟꠤ ꠛꠠ ꠛꠠ ꠛꠤꠌꠣꠞ ꠔꠥꠝꠣꠞ ꠉꠦꠍꠦ ꠀꠘꠛꠣ। ꠔꠦꠃ ꠔꠥꠝꠣꠞ ꠜꠣꠞ ꠇꠤꠍꠥ ꠇꠝꠛ, ꠔꠣꠞꠣꠅ ꠔꠥꠝꠣꠞ ꠟꠉꠦ ꠇꠤꠍꠥ ꠜꠣꠞ ꠛꠃꠇ꠆ꠇꠣ।
EXO 18:23 ꠀꠟ꠆ꠟꠣꠞ ꠢꠥꠇꠥꠝ ꠙꠣꠁꠀ ꠔꠥꠝꠤ ꠎꠥꠖꠤ ꠅꠃꠟꠣ ꠇꠞ, ꠔꠦ ꠔꠥꠝꠤ ꠇꠥꠟꠣꠁꠔꠣꠄ ꠙꠣꠞꠛꠣꠄ, ꠀꠞ ꠝꠣꠘꠡꠦꠅ ꠀꠞꠣꠝꠦ ꠎꠣꠞꠎꠤꠞ ꠎꠣꠉꠣꠔ ꠎꠣꠁꠔꠣ ꠙꠣꠞꠛꠣ।”
EXO 18:24 ꠝꠥꠍꠣꠄ ꠔꠣꠘ ꠢꠃꠞꠞ ꠙꠞꠣꠝꠤꠡ ꠝꠣꠘꠟꠣ, ꠔꠣꠁꠘ ꠎꠦꠟꠣ ꠇꠁꠟꠣ ꠝꠥꠍꠣꠄ ꠅꠃꠟꠣ ꠇꠞꠟꠣ।
EXO 18:25 ꠝꠥꠍꠣꠄ ꠔꠣꠝꠣꠝ ꠛꠘꠤ ꠁꠍꠞꠣꠁꠟ ꠕꠣꠇꠤ ꠛꠣꠍꠤꠀ ꠃꠙꠎꠥꠇ꠆ꠔ ꠝꠣꠘꠥꠡ ꠔꠥꠇꠣꠁꠀ, ꠔꠣꠞꠣ ꠇꠦꠃꠞꠞꠦ ꠀꠎꠣꠞ ꠎꠘ, ꠇꠦꠃꠞꠞꠦ ꠡ ꠎꠘ, ꠇꠦꠃꠞꠞꠦ ꠙꠁꠘ꠆ꠌꠣꠡ ꠀꠞ ꠇꠦꠃꠞꠞꠦ ꠖꠡ ꠎꠘꠞ ꠃꠙꠞꠦ ꠘꠦꠔꠣ ꠛꠣꠘꠣꠁꠟꠣ।
EXO 18:26 ꠄꠞꠣ ꠢꠣꠝꠦꠡꠣ ꠝꠣꠘꠡꠞ ꠛꠤꠌꠣꠞ-ꠀꠌꠣꠞ ꠇꠞꠔꠣ। ꠈꠣꠟꠤ ꠛꠠ ꠛꠠ ꠊꠐꠘꠣ ꠅꠇꠟ ꠝꠥꠍꠣꠞ ꠇꠣꠍꠣꠔ ꠀꠘꠔꠣ, ꠀꠞ ꠢꠥꠞꠥ ꠢꠥꠞꠥ ꠢꠇꠟꠔꠣ ꠔꠣꠞꠣ ꠝꠤꠐꠣꠁꠔꠣ।
EXO 18:27 ꠢꠦꠡꠦ ꠝꠥꠍꠣꠄ ꠔꠣꠘ ꠢꠃꠞꠞꠦ ꠛꠤꠖꠣꠄ ꠖꠤꠟꠦ, ꠔꠣꠁꠘ ꠘꠤꠎꠞ ꠖꠦꠡꠅ ꠔꠡꠞꠤꠚ ꠘꠤꠟꠣꠉꠤ।
EXO 19:1 ꠝꠤꠡꠞ ꠖꠦꠡ ꠕꠣꠇꠤ ꠛꠘꠤ ꠁꠍꠞꠣꠁꠟ ꠅꠇꠟ ꠛꠣꠞꠘꠤꠞ ꠛꠣꠖꠦ, ꠔꠤꠘ ꠘꠝ꠆ꠛꠞ ꠌꠣꠘ꠆ꠖꠞ ꠙꠄꠟꠣ ꠖꠤꠘꠃ ꠔꠣꠞꠣ ꠞꠚꠤꠖꠤꠝ ꠅꠁꠀ ꠍꠤꠘꠣꠁ ꠝꠞꠥꠜꠥꠝꠤꠔ ꠙꠃꠍꠤꠟꠣ। ꠅꠘꠅ ꠀꠁꠀ ꠔꠣꠞꠣ ꠝꠞꠥꠜꠥꠝꠤꠞ ꠔꠥꠞ ꠙꠣꠠꠞ ꠍꠣꠝꠘꠦ ꠔꠣꠝ꠆ꠛꠥ ꠉꠣꠠꠤꠟꠣ।
EXO 19:3 ꠄꠞꠝꠣꠎꠦ ꠢꠎꠞꠔ ꠝꠥꠍꠣ ꠔꠥꠞ ꠙꠣꠠꠞ ꠃꠙꠞꠦ ꠀꠟ꠆ꠟꠣꠞ ꠖꠞꠛꠣꠞꠅ ꠉꠦꠟꠣ। ꠝꠣꠛꠥꠖꠦ ꠙꠣꠠꠞ ꠃꠙꠞꠦ ꠕꠣꠇꠤ ꠔꠣꠘꠞꠦ ꠒꠣꠇꠤꠀ ꠇꠁꠟꠣ, “ꠅ ꠝꠥꠍꠣ, ꠔꠥꠝꠤ ꠁꠀꠇꠥꠛꠞ ꠀꠅꠟꠣꠖ ꠅꠇꠟꠞꠦ ꠇꠅ, ꠛꠘꠤ ꠁꠍꠞꠣꠁꠟꠞꠦ ꠎꠣꠘꠣꠁ ꠖꠦꠅ,
EXO 19:4 ꠀꠝꠤ ꠝꠣꠛꠥꠖꠦ ꠝꠤꠡꠞꠤ ꠅꠇꠟꠞ ꠖꠡꠣ ꠇꠤꠔꠣ ꠊꠐꠣꠁꠍꠤ, ꠁꠔꠣ ꠔ ꠔꠥꠝꠞꠣꠞ ꠘꠤꠎꠞ ꠌꠃꠈꠦ ꠖꠦꠈꠍ। ꠌꠤꠟꠦ ꠎꠦꠟꠣ ꠔꠣꠞ ꠛꠣꠁꠌ꠆ꠌꠣꠞꠦ ꠒꠣꠈꠘꠣꠖꠤ ꠛꠁꠀ ꠘꠦꠄ, ꠀꠝꠤꠅ ꠅꠃ ꠘꠝꠥꠘꠣꠄ ꠔꠥꠝꠞꠣꠞꠦ ꠀꠝꠣꠞ ꠉꠦꠍꠦ ꠛꠁꠀ ꠀꠘꠍꠤ।
EXO 19:5 ꠅꠈꠘ ꠔꠥꠝꠞꠣ ꠎꠥꠖꠤ ꠀꠝꠣꠞ ꠔꠣꠝꠣꠝ ꠢꠥꠇꠥꠝ-ꠀꠢꠇꠣꠝ ꠝꠣꠘꠅ, ꠀꠞ ꠀꠝꠣꠞ ꠟꠉꠞ ꠅꠀꠖꠣ ꠀꠖꠣꠄ ꠇꠞꠅ, ꠔꠦ ꠖꠥꠘꠤꠀꠞ ꠢꠇ꠆ꠇꠟ ꠎꠣꠔꠤꠞ ꠝꠣꠎ ꠕꠣꠇꠤ ꠔꠥꠝꠞꠣꠃ ꠅꠁꠛꠣꠄ ꠀꠝꠣꠞ ꠈꠣꠍ ꠡꠝ꠆ꠙꠖ। ꠝꠘꠅ ꠞꠣꠈꠤꠅ, ꠢꠣꠞꠣ ꠖꠥꠘꠤꠀꠞ ꠢꠇꠟꠔꠣꠃ ꠀꠝꠣꠞ ꠄꠈꠔꠤꠀꠞꠅ।
EXO 19:6 ꠔꠥꠝꠞꠣꠞꠦ ꠖꠤꠀꠃ ꠇꠣꠁꠝ ꠅꠁꠛ ꠀꠝꠣꠞ ꠁꠝꠣꠝ ꠅꠇꠟꠞ ꠛꠣꠖꠡꠣꠁ, ꠔꠥꠝꠞꠣꠃ ꠅꠁꠛꠣꠄ ꠀꠝꠣꠞ ꠙꠛꠤꠔ꠆ꠞ ꠎꠣꠔꠤ। ꠔꠦ ꠀꠝꠣꠞ ꠅꠃ ꠛꠥꠟꠤ ꠈꠣꠘꠣꠁꠘ ꠔꠥꠝꠤ ꠛꠘꠤ ꠁꠍꠞꠣꠁꠟꠞꠦ ꠎꠣꠘꠣꠅ।”
EXO 19:7 ꠅꠃ ꠝꠥꠍꠣꠄ ꠀꠁꠀ ꠛꠘꠤ ꠁꠍꠞꠣꠁꠟꠞ ꠝꠥꠞꠛ꠆ꠛꠤ ꠅꠇꠟꠞꠦ ꠖꠟꠣ ꠇꠞꠣꠁꠟꠣ। ꠖꠟꠣ ꠇꠞꠣꠁꠀ ꠇꠁꠟꠣ, ꠝꠣꠛꠥꠖꠦ ꠔꠣꠘꠞꠦ ꠇꠤꠔꠣ ꠇꠤꠔꠣ ꠢꠥꠇꠥꠝ ꠖꠤꠍꠂꠘ।
EXO 19:8 ꠔꠦꠃ ꠢꠇꠟ ꠝꠣꠘꠡꠦ ꠄꠇꠟꠉꠦ ꠇꠁꠟꠣ, “ꠝꠣꠛꠥꠖꠦ ꠎꠦꠟꠣ ꠛꠣꠔꠣꠁꠍꠂꠘ, ꠀꠝꠞꠣ ꠅꠟꠣ ꠢꠇ꠆ꠇꠟꠔꠣ ꠇꠞꠝꠥ।” ꠝꠣꠘꠡꠦ ꠎꠦꠝꠘꠦ ꠎꠥꠀꠙ ꠖꠤꠟꠣ, ꠝꠥꠍꠣꠄ ꠉꠤꠀ ꠝꠣꠛꠥꠖꠞ ꠖꠞꠛꠣꠞꠅ ꠅꠟꠣ ꠎꠣꠘꠣꠁꠟꠣ।
EXO 19:9 ꠀꠞ ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ, “ꠀꠝꠤ ꠎꠦꠛꠟꠣ ꠔꠥꠝꠣꠞ ꠟꠉꠦ ꠛꠣꠔꠌꠤꠔ ꠇꠞꠝꠥ, ꠅꠃ ꠛꠣꠔꠌꠤꠔ ꠎꠣꠔꠦ ꠝꠣꠘꠡꠦ ꠘꠤꠎꠞ ꠇꠣꠘꠦ ꠢꠥꠘꠔ ꠙꠣꠞꠦ, ꠄꠞꠟꠣꠉꠤ ꠀꠝꠤ ꠊꠘ ꠄꠇ ꠝꠦꠊꠞ ꠇꠣꠟꠘꠤꠞ ꠝꠣꠎꠦ ꠞꠁꠀ ꠛꠣꠔꠌꠤꠔ ꠇꠞꠝꠥ। ꠔꠦꠃ ꠝꠣꠘꠡꠦ ꠁꠔꠣ ꠢꠥꠘꠛꠣ, ꠀꠞ ꠔꠥꠝꠣꠞ ꠃꠙꠞꠦ ꠢꠞ-ꠢꠣꠝꠦꠡꠣ ꠙꠥꠞꠣꠙꠥꠞ ꠄꠇꠤꠘ ꠞꠣꠈꠛꠣ।” ꠛꠣꠖꠦ ꠝꠥꠍꠣ ꠉꠤꠀ ꠔꠣꠞꠣꠞꠅ ꠢꠇꠟ ꠇꠕꠣ ꠝꠣꠛꠥꠖꠞꠦ ꠎꠣꠘꠣꠁꠟꠣ।
EXO 19:10 ꠁꠈꠣꠘ ꠢꠥꠘꠤꠀ ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ, “ꠔꠥꠝꠤ ꠀꠁꠎ ꠀꠞ ꠇꠣꠁꠟ ꠖꠥꠁꠅ ꠖꠤꠘ ꠝꠣꠘꠡꠞ ꠇꠣꠍꠣꠔ ꠉꠤꠀ ꠔꠣꠞꠣꠞꠦ ꠙꠣꠇ-ꠍꠣꠚ ꠇꠞꠅ। ꠔꠣꠞꠣ ꠎꠣꠞꠎꠤꠞ ꠇꠣꠙꠠ-ꠌꠥꠙꠠ ꠗꠁꠀ ꠖꠦꠃꠇ।
EXO 19:11 ꠔꠣꠞꠣ ꠙꠞꠡꠥ ꠖꠤꠘꠞ ꠟꠣꠉꠤ ꠔꠂꠀꠞ ꠅꠃꠇ, ꠅꠃ ꠖꠤꠘ ꠀꠝꠤ ꠝꠣꠛꠥꠖ ꠔꠥꠞ ꠙꠣꠠꠞ ꠃꠙꠞꠦ ꠟꠣꠝꠤꠀ ꠀꠁꠀ ꠔꠣꠞꠣ ꠢꠇꠟꠞꠦ ꠖꠤꠖꠣꠞ ꠖꠤꠝꠥ।
EXO 19:12 ꠔꠦ ꠔꠥꠝꠤ ꠙꠣꠠꠞ ꠌꠣꠁꠞꠅꠛꠣꠄ ꠄꠇꠐꠣ ꠡꠤꠝꠣꠘꠣ ꠑꠤꠇ ꠇꠞꠤꠀ ꠖꠤꠟꠣꠅ। ꠖꠤꠀ ꠔꠣꠞꠣꠞꠦ ꠢꠥꠡꠤꠀꠞ ꠇꠞꠤ ꠇꠅ, ꠔꠣꠞꠣ ꠎꠣꠘꠥ ꠁ ꠙꠣꠠꠅ ꠘꠣ ꠃꠑꠦ ꠀꠞ ꠙꠣꠠꠞ ꠡꠤꠝꠣꠘꠣꠔ ꠘꠣ ꠍꠄ। ꠇꠦꠃ ꠎꠥꠖꠤ ꠁ ꠙꠣꠠꠅ ꠍꠄ, ꠔꠦ ꠔꠣꠞ ꠡꠣꠎꠣ ꠅꠁꠟ ꠝꠃꠔ।
EXO 19:13 ꠝꠣꠞꠣꠞ ꠛꠣꠟꠣ ꠔꠣꠞ ꠉꠔꠞꠅ ꠀꠔ ꠘꠣ ꠖꠤꠀ, ꠔꠣꠞꠦ ꠙꠣꠔ꠆ꠔꠞ ꠛꠣ ꠔꠤꠞ ꠝꠣꠞꠤꠀ ꠝꠣꠞꠛꠣꠄ। ꠢꠦ ꠝꠣꠘꠥꠡ ꠅꠃꠇ ꠛꠣ ꠎꠣꠘꠥꠀꠞ ꠅꠃꠇ ꠔꠣꠞꠦ ꠝꠣꠞꠤꠟꠤꠛꠣꠄ। ꠈꠣꠟꠤ ꠄꠇꠟꠉꠦ ꠛꠃꠔ ꠡꠝꠄ ꠡꠤꠋꠉꠣ ꠛꠣꠎꠣꠘꠤꠞ ꠀꠅꠀꠎ ꠢꠥꠘꠟꠦ, ꠔꠣꠞꠣ ꠅꠃ ꠙꠣꠠꠞ ꠇꠣꠘ꠆ꠖꠣꠔ ꠀꠁꠔꠣ ꠙꠣꠞꠛꠣ।”
EXO 19:14 ꠔꠦꠃ ꠝꠥꠍꠣꠄ ꠙꠣꠠꠅ ꠕꠣꠇꠤ ꠟꠣꠝꠤꠀ ꠀꠁꠀ ꠝꠣꠘꠡꠞꠦ ꠙꠣꠇ-ꠍꠣꠚ ꠇꠞꠟꠣ, ꠝꠣꠘꠡꠦ ꠔꠣꠞꠣꠞ ꠇꠣꠙꠠ-ꠌꠥꠙꠠ ꠗꠁꠀ ꠖꠤꠟ।
EXO 19:15 ꠝꠥꠍꠣꠄ ꠔꠣꠞꠣꠞꠦ ꠇꠁꠟꠣ, “ꠔꠥꠝꠞꠣ ꠙꠞꠡꠥ ꠖꠤꠘꠞ ꠟꠣꠉꠤ ꠎꠥꠁꠔ ꠅꠅ, ꠄꠞꠝꠣꠎꠦ ꠇꠦꠃ ꠛꠤꠛꠤꠞ ꠟꠉꠦ ꠝꠤꠟꠣ-ꠝꠤꠡꠣ ꠇꠞꠤꠅ ꠘꠣ।”
EXO 19:16 ꠢꠣꠍꠣꠃ ꠢꠃ ꠙꠞꠡꠥ ꠖꠤꠘ ꠀꠁꠟꠦ ꠛꠤꠀꠘꠇꠥ ꠛꠣꠟꠣ ꠙꠣꠠꠞ ꠃꠙꠞꠦ ꠊꠘ ꠝꠦꠊꠞ ꠇꠣꠟꠘꠤ ꠖꠦꠈꠣ ꠉꠦꠟ, ꠈꠥꠛ ꠛꠦꠡꠤ ꠝꠦꠊꠞ ꠒꠣꠇ-ꠎꠤꠟꠇꠣꠘꠤ ꠡꠥꠞꠥ ꠅꠁꠟ। ꠎꠥꠞꠦ ꠎꠥꠞꠦ ꠡꠤꠋꠉꠣꠞ ꠀꠅꠀꠎ ꠢꠥꠘꠣ ꠉꠦꠟ, ꠔꠦꠃ ꠛꠘꠤ ꠁꠍꠞꠣꠁꠟꠞ ꠇꠦꠝ꠆ꠙꠞ ꠜꠤꠔꠞꠞ ꠢꠇꠟ ꠝꠣꠘꠥꠡ ꠒꠞꠣꠁꠀ ꠇꠣꠙꠣ ꠗꠞꠟꠣ।
EXO 19:17 ꠅꠃ ꠡꠝꠄ ꠝꠥꠍꠣꠄ ꠝꠣꠘꠡꠞꠦ ꠀꠟ꠆ꠟꠣꠞ ꠍꠣꠝꠘꠦ ꠘꠦꠅꠀꠞ ꠟꠣꠉꠤ ꠇꠦꠝ꠆ꠙ ꠕꠣꠇꠤ ꠛꠣꠞ ꠇꠞꠟꠣ। ꠔꠣꠞꠣ ꠢꠇꠟ ꠉꠤꠀ ꠙꠣꠠꠞ ꠟꠣꠝꠣꠔ ꠃꠛꠣꠁꠟꠣ।
EXO 19:18 ꠀꠞ ꠀꠡ꠆ꠔꠣ ꠔꠥꠞ ꠙꠣꠠ ꠗꠥꠝꠣꠄ ꠜꠞꠤꠉꠦꠟ, ꠝꠣꠛꠥꠖ ꠝꠃꠟꠣꠄ ꠀꠉꠥꠘꠤꠞ ꠟꠣꠈꠣꠘ ꠘꠥꠞꠞ ꠍꠥꠞꠔꠦ ꠙꠣꠠꠞ ꠃꠙꠞꠦ ꠔꠡꠞꠤꠚ ꠀꠘꠟꠣ। ꠁꠐ-ꠜꠣꠐ꠆ꠐꠣꠞ ꠗꠥꠝꠣꠞ ꠟꠣꠈꠣꠘ ꠗꠥꠝꠣ ꠃꠠꠣ ꠡꠥꠞꠥ ꠅꠁꠟ ꠀꠞ ꠀꠡ꠆ꠔꠣ ꠙꠣꠠ ꠎꠥꠠꠤ ꠛꠦꠎꠥꠁꠔꠣ ꠇꠣꠙ ꠡꠥꠞꠥ ꠅꠁꠟ।
EXO 19:19 ꠡꠤꠋꠉꠣꠞ ꠀꠅꠀꠎ ꠀꠞꠅ ꠎꠥꠞꠦ ꠎꠥꠞꠦ ꠛꠣꠎꠤꠟ। ꠅꠃ ꠡꠝꠄ ꠝꠥꠍꠣꠄ ꠀꠟ꠆ꠟꠣꠞ ꠟꠉꠦ ꠝꠣꠔꠤꠟꠣ, ꠀꠞ ꠀꠟ꠆ꠟꠣꠄꠅ ꠘꠤꠎꠞ ꠀꠅꠀꠎꠖꠤ ꠝꠥꠍꠣꠞ ꠝꠣꠔꠞ ꠎꠥꠀꠙ ꠖꠤꠟꠣ।
EXO 19:20 ꠝꠣꠛꠥꠖ ꠘꠤꠎꠦ ꠔꠥꠞ ꠙꠣꠠꠞ ꠝꠣꠕꠣꠔ ꠟꠣꠝꠤꠀ ꠀꠁꠀ ꠝꠥꠍꠣꠞꠦ ꠒꠣꠇꠤꠟꠣ, ꠔꠦꠃ ꠝꠥꠍꠣ ꠃꠑꠤꠀ ꠙꠣꠠꠞ ꠃꠙꠞꠦ ꠉꠦꠟꠣ।
EXO 19:21 ꠉꠤꠀ ꠢꠣꠞꠟꠦ ꠝꠣꠛꠥꠖꠦ ꠔꠣꠘꠞꠦ ꠇꠁꠟꠣ, “ꠔꠥꠝꠤ ꠟꠣꠝꠣꠔ ꠎꠣꠅ, ꠉꠤꠀ ꠝꠣꠘꠡꠞꠦ ꠇꠠꠣ ꠇꠞꠤ ꠇꠁꠀ ꠀꠅ, ꠀꠞꠘꠣꠄ ꠀꠝꠣꠞꠦ ꠖꠦꠈꠣꠞ ꠟꠣꠉꠤ ꠔꠣꠞꠣ ꠡꠤꠝꠣꠘꠣ ꠙꠣꠞ ꠅꠁꠀ ꠃꠙꠞꠦ ꠀꠁꠛ꠆ꠛꠣ। ꠀꠁꠟꠦ ꠛꠃꠔ ꠝꠣꠘꠥꠡ ꠝꠣꠞꠣ ꠎꠣꠁꠛꠣ।
EXO 19:22 ꠀꠞ ꠎꠦ ꠁꠝꠣꠝ ꠅꠇꠟ ꠢꠣꠝꠦꠡꠣ ꠀꠝꠣꠞ ꠍꠣꠝꠘꠦ ꠀꠎꠤꠞ ꠅꠁꠘ, ꠀꠍꠟꠦ ꠔꠣꠞꠣꠞ ꠇꠣꠝꠃ ꠀꠝꠣꠞ ꠍꠣꠝꠘꠦ ꠀꠎꠤꠞ ꠅꠀ, ꠔꠣꠞꠣꠅ ꠘꠤꠎꠦ ꠘꠤꠎꠞꠦ ꠙꠣꠇ-ꠍꠣꠚ ꠇꠞꠛꠣ। ꠀꠞꠘꠣꠄ ꠀꠝꠤ ꠔꠣꠞꠣꠞ ꠃꠙꠞꠦꠅ ꠉꠎꠛ ꠓꠣꠟꠤꠝꠥ।”
EXO 19:23 ꠝꠥꠍꠣꠄ ꠝꠣꠛꠥꠖꠞꠦ ꠎꠥꠀꠙ ꠖꠤꠟꠣ, “ꠔꠣꠞꠣ ꠔ ꠄꠝꠘꠦꠃ ꠔꠥꠞ ꠙꠣꠠꠅ ꠀꠁꠔꠣ ꠘꠣꠄ, ꠀꠙꠘꠦ ꠀꠉꠦꠃ ꠀꠝꠞꠣꠞꠦ ꠇꠠꠣ ꠢꠥꠡꠤꠀꠞꠤ ꠖꠤꠍꠂꠘ। ꠀꠝꠞꠣꠅ ꠙꠣꠠꠞ ꠌꠣꠁꠞꠅꠛꠣꠄ ꠖꠣꠉ ꠖꠤꠀ ꠀꠙꠘꠣꠞ ꠟꠣꠉꠤ ꠙꠣꠇ ꠡꠤꠝꠣꠘꠣ ꠀꠟꠉꠣꠁꠍꠤ।”
EXO 19:24 ꠅꠁꠟꠦ ꠝꠣꠛꠥꠖꠦ ꠔꠣꠘꠞꠦ ꠇꠁꠟꠣ, “ꠘꠣ, ꠔꠥꠝꠤ ꠟꠣꠝꠣꠔ ꠎꠣꠅ। ꠛꠣꠖꠦ ꠔꠥꠝꠤ ꠀꠞ ꠢꠣꠞꠥꠘ ꠖꠥꠁꠅꠎꠘꠦ ꠝꠤꠟꠤꠀ ꠃꠙꠞꠦ ꠀꠁꠅ। ꠈꠤꠀꠟ ꠞꠣꠈꠤꠅ, ꠇꠥꠘꠥ ꠁꠝꠣꠝ ꠛꠣ ꠖꠥꠍꠞꠣ ꠇꠥꠘꠥ ꠝꠣꠘꠥꠡ ꠎꠣꠔꠦ ꠡꠤꠝꠣꠘꠣ ꠍꠣꠠꠤꠀ ꠀꠝꠣꠞ ꠇꠣꠍꠣꠔ ꠘꠣ ꠀꠁꠘ, ꠀꠁꠟꠦ ꠀꠝꠤ ꠔꠣꠞꠣꠞ ꠃꠙꠞꠦ ꠟꠣꠘ꠆ꠘꠔꠤ ꠉꠎꠛ ꠓꠣꠟꠝꠥ।”
EXO 19:25 ꠁꠈꠣꠘ ꠢꠥꠘꠤꠀ ꠝꠥꠍꠣ ꠟꠣꠝꠣꠔ ꠉꠦꠟꠣ, ꠉꠤꠀ ꠝꠣꠘꠡꠞꠦ ꠢꠇꠟꠔꠣ ꠎꠣꠘꠣꠁꠟꠣ।
EXO 20:1 ꠛꠣꠖꠦ ꠝꠣꠛꠥꠖꠦ ꠚꠞꠝꠣꠁꠟꠣ,
EXO 20:2 “ꠅ ꠛꠘꠤ ꠁꠍꠞꠣꠁꠟ ꠅꠇꠟ, ꠀꠝꠤ ꠀꠟ꠆ꠟꠣꠃ ꠔꠥꠝꠞꠣꠞ ꠝꠣꠛꠥꠖ। ꠝꠤꠡꠞ ꠖꠦꠡꠞ ꠉꠥꠟꠣꠝꠤ ꠕꠣꠇꠤ ꠀꠝꠤꠃ ꠔꠥꠝꠞꠣꠞꠦ ꠈꠣꠟꠣꠍ ꠇꠞꠤ ꠀꠘꠍꠤ।
EXO 20:3 “ꠀꠝꠣꠞ ꠛꠖꠟꠣ ꠔꠥꠝꠞꠣ ꠖꠥꠍꠞꠣ ꠇꠥꠘꠥ ꠖꠦꠛꠔꠣ ꠝꠣꠘꠤꠅ ꠘꠣ।
EXO 20:4 “ꠙꠥꠎꠣ ꠇꠞꠣꠞ ꠈꠤꠀꠟꠦ ꠔꠥꠝꠞꠣ ꠇꠥꠘꠥ ꠝꠥꠞ꠆ꠔꠤ ꠛꠣꠘꠣꠁꠅ ꠘꠣ, ꠀꠍꠝꠣꠘ, ꠎꠝꠤꠘ ꠛꠣ ꠙꠣꠘꠤꠞ ꠔꠟꠦ ꠎꠔꠔꠣ ꠀꠍꠦ, ꠁꠔꠣ ꠇꠥꠘꠥꠔꠣꠞ ꠍꠥꠞꠔꠦ ꠝꠥꠞ꠆ꠔꠤ ꠛꠣꠘꠣꠁꠅ ꠘꠣ।
EXO 20:5 ꠔꠥꠝꠞꠣ ꠁꠔꠣꠞ ꠙꠥꠎꠣ ꠇꠞꠤꠅ ꠘꠣ, ꠁꠔꠣꠞ ꠡꠦꠛꠣ-ꠎꠔꠘ ꠇꠞꠤꠅ ꠘꠣ। ꠝꠘꠅ ꠞꠣꠈꠤꠅ, ꠀꠝꠤ ꠀꠟ꠆ꠟꠣ ꠔ ꠟꠣ-ꠡꠞꠤꠇ ꠝꠣꠛꠥꠖ, ꠇꠥꠘꠥ ꠡꠞꠤꠇ ꠡꠁꠎ꠆ꠎ ꠇꠞꠤ ꠘꠣ। ꠢꠥꠘꠅ, ꠀꠝꠣꠞꠦ ꠎꠦꠞꠣ ꠝꠣꠘꠦ ꠘꠣ, ꠀꠝꠤ ꠔꠣꠞꠣꠞ ꠉꠥꠘꠣꠞ ꠡꠣꠎꠣ ꠖꠦꠁ, ꠔꠣꠞꠣꠞ ꠔꠤꠘ-ꠌꠣꠁꠞ ꠍꠤꠠꠤ ꠙꠞ꠆ꠎꠘ꠆ꠔ ꠡꠣꠎꠣ ꠖꠦꠁ।
EXO 20:6 ꠅꠁꠟꠦ ꠎꠦꠞꠣ ꠀꠝꠣꠞ ꠀꠡꠤꠇ ꠛꠘꠤꠀ ꠀꠝꠣꠞ ꠢꠥꠇꠥꠝ-ꠀꠢꠇꠣꠝ ꠀꠝꠟ ꠇꠞꠦ, ꠀꠝꠤ ꠔꠣꠞꠣꠞ ꠀꠎꠣꠞ ꠀꠎꠣꠞ ꠅꠀꠞꠤꠡ ꠙꠞ꠆ꠎꠘ꠆ꠔ ꠀꠝꠣꠞ ꠅꠛꠤꠞꠣꠝ ꠝꠣꠄꠀ-ꠝꠢꠛ꠆ꠛꠔ ꠖꠦꠈꠣꠁꠝꠥ।
EXO 20:7 “ꠛꠦꠇꠣꠝꠣ ꠇꠥꠘꠥ ꠇꠣꠞꠘꠦ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠘꠣꠝ ꠝꠥꠈꠅ ꠟꠁꠅ ꠘꠣ। ꠇꠦꠃ ꠎꠥꠖꠤ ꠈꠣꠝꠈꠣ ꠝꠣꠛꠥꠖꠞ ꠘꠣꠝ ꠟꠄ, ꠔꠦ ꠇꠥꠘꠥꠝꠘ꠆ꠔꠦꠃ ꠀꠝꠣꠞ ꠡꠣꠎꠣ ꠕꠣꠇꠤ ꠞꠦꠢꠣꠁ ꠙꠣꠁꠔ ꠘꠣꠄ।
EXO 20:8 “ꠁꠀꠖ ꠇꠞꠤꠀ ꠎꠥꠝ꠆ꠝꠣꠛꠣꠞꠞꠦ ꠙꠛꠤꠔ꠆ꠞ ꠖꠤꠘ ꠝꠣꠘꠤꠅ।
EXO 20:9 ꠢꠣꠙ꠆ꠔꠣꠞ ꠍꠄꠖꠤꠘ ꠔꠥꠝꠞꠣ ꠇꠣꠝ-ꠇꠣꠎ ꠇꠞꠤꠅ, ꠔꠥꠝꠞꠣꠞ ꠖꠞꠇꠣꠞꠤ ꠢꠇꠟ ꠇꠣꠝ ꠡꠣꠞꠤꠅ।
EXO 20:10 ꠅꠁꠟꠦ ꠡꠣꠔ ꠘꠝ꠆ꠛꠞ ꠖꠤꠘ ꠅꠁꠟ ꠎꠥꠝ꠆ꠝꠣꠛꠣꠞ, ꠔꠥꠝꠣꠞ ꠝꠣꠛꠥꠖ ꠀꠟ꠆ꠟꠣꠞ ꠘꠣꠝꠦ ꠎꠤꠞꠣꠁꠛꠣꠞ ꠖꠤꠘ। ꠁ ꠖꠤꠘ ꠔꠥꠝꠤ, ꠔꠥꠝꠣꠞ ꠙꠥꠀ-ꠙꠥꠠꠤꠘ, ꠔꠥꠝꠣꠞ ꠉꠥꠟꠣꠝ-ꠛꠣꠘ꠆ꠖꠤꠘ, ꠔꠥꠝꠣꠞ ꠙꠡꠥꠞ ꠙꠣꠟ, ꠔꠥꠝꠣꠞ ꠉꠣꠃꠔ ꠛꠣ ꠐꠣꠃꠘꠅ ꠞꠅꠞꠣ ꠝꠥꠍꠣꠚꠤꠞ ꠛꠣ ꠜꠤꠘ-ꠖꠦꠡꠤ, ꠇꠦꠃ ꠇꠥꠘꠥꠎꠣꠔꠞ ꠇꠣꠝ-ꠇꠣꠎ ꠇꠞꠤꠅ ꠘꠣ।
EXO 20:11 ꠎꠣꠘ ꠔ, ꠝꠣꠛꠥꠖꠦ ꠍꠄꠖꠤꠘꠦ ꠀꠍꠝꠣꠘ-ꠎꠝꠤꠘ, ꠖꠞꠤꠀ ꠀꠞ ꠄꠞꠣꠞ ꠝꠣꠎꠞ ꠢꠇꠟꠔꠣ ꠙꠄꠖꠣ ꠇꠞꠍꠂꠘ, ꠛꠣꠖꠦ ꠡꠣꠔ ꠘꠝ꠆ꠛꠞ ꠖꠤꠘ ꠎꠤꠞꠣꠁꠍꠂꠘ, ꠇꠥꠘꠥ ꠇꠣꠝ ꠇꠞꠍꠂꠘ ꠘꠣ। ꠅꠃ ꠖꠤꠘꠞꠦ ꠝꠣꠛꠥꠖꠦ ꠞꠢꠝꠔ ꠖꠤꠀ ꠙꠣꠇ ꠖꠤꠘ ꠇꠞꠍꠂꠘ।
EXO 20:12 “ꠔꠥꠝꠞꠣꠞ ꠝꠣ-ꠛꠣꠚꠞꠦ ꠁꠎ꠆ꠎꠔ ꠇꠞꠤꠅ। ꠔꠦꠃ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠎꠦ ꠖꠦꠡ ꠖꠤꠛꠣ, ꠢꠃ ꠖꠦꠡꠅ ꠔꠥꠝꠞꠣꠞ ꠢꠣꠄꠀꠔꠤ ꠛꠣꠠꠤꠛ।
EXO 20:13 “ꠈꠥꠘ ꠇꠞꠤꠅ ꠘꠣ।
EXO 20:14 “ꠎꠤꠘꠣ ꠇꠞꠤꠅ ꠘꠣ।
EXO 20:15 “ꠌꠥꠞꠤ ꠇꠞꠤꠅ ꠘꠣ।
EXO 20:16 “ꠇꠦꠃꠞꠞ ꠛꠤꠞꠥꠖ꠆ꠖꠦ ꠝꠤꠍꠣ ꠡꠣꠇ꠆ꠇꠤ ꠖꠤꠅ ꠘꠣ।
EXO 20:17 “ꠙꠞꠞ ꠊꠞ-ꠖꠥꠀꠞꠞ ꠛꠣꠄ ꠟꠣꠟꠌ ꠇꠞꠤꠅ ꠘꠣ, ꠔꠣꠞ ꠛꠃ, ꠉꠥꠟꠣꠝ-ꠛꠣꠘ꠆ꠖꠤ, ꠉꠞꠥ-ꠉꠣꠗꠣ, ꠛꠣ ꠇꠥꠘꠥ ꠇꠤꠌ꠆ꠍꠥꠞ ꠛꠣꠄ ꠟꠣꠟꠌ ꠇꠞꠤꠅ ꠘꠣ।”
EXO 20:18 ꠛꠘꠤ ꠁꠍꠞꠣꠁꠟꠦ ꠎꠦꠛꠟꠣ ꠙꠣꠠ ꠕꠣꠇꠤ ꠝꠦꠊꠞ ꠒꠣꠇ, ꠎꠤꠟꠇꠣꠘꠤ, ꠡꠤꠋꠉꠣꠞ ꠀꠅꠀꠎ, ꠀꠞ ꠗꠥꠝꠣ ꠛꠣꠞꠘꠤꠔ ꠖꠦꠈꠟꠣ, ꠖꠦꠈꠤꠀ ꠔꠣꠞꠣ ꠖꠥꠞꠁ ꠕꠣꠇꠤꠃ ꠒꠞꠣꠁꠀ ꠇꠣꠙꠣ ꠗꠞꠟꠣ।
EXO 20:19 ꠔꠣꠞꠣ ꠝꠥꠍꠣꠞꠦ ꠇꠁꠟꠣ, “ꠀꠙꠘꠦꠃ ꠀꠝꠞꠣꠞ ꠟꠉꠦ ꠝꠣꠔꠃꠇ꠆ꠇꠣ, ꠀꠝꠞꠣ ꠢꠥꠘꠝꠥ; ꠅꠁꠟꠦ ꠀꠟ꠆ꠟꠣꠄ ꠀꠝꠞꠣꠞ ꠟꠉꠦ ꠛꠣꠔꠌꠤꠔ ꠇꠞꠟꠦ ꠔ ꠀꠝꠞꠣ ꠝꠞꠤꠎꠤꠝꠥ।”
EXO 20:20 ꠝꠥꠍꠣꠄ ꠔꠣꠞꠣꠞꠦ ꠇꠁꠟꠣ, “ꠔꠥꠝꠞꠣ ꠒꠞꠣꠁꠅ ꠘꠣ। ꠀꠟ꠆ꠟꠣꠄ ꠔꠥꠝꠞꠣꠞꠦ ꠙꠞꠤꠇ꠆ꠇꠣꠔ ꠚꠣꠟꠣꠁꠍꠂꠘ, ꠎꠣꠔꠦ ꠔꠥꠝꠞꠣꠞ ꠎꠣꠘꠅ ꠀꠟ꠆ꠟꠣꠞ ꠒꠞ ꠢꠣꠝꠣꠄ, ꠒꠞꠣꠁꠀ ꠔꠥꠝꠞꠣ ꠉꠥꠘꠣ ꠕꠣꠇꠤ ꠛꠣꠌꠤꠀ ꠞꠅ। ꠄꠞꠟꠣꠉꠤꠃ ꠔꠣꠁꠘ ꠘꠤꠎꠦ ꠖꠤꠖꠣꠞ ꠖꠤꠍꠂꠘ।”
EXO 20:21 ꠢꠇꠟ ꠝꠣꠘꠥꠡ ꠖꠥꠞꠁ ꠃꠛꠣꠁ ꠞꠁꠟꠣ, ꠀꠞ ꠝꠥꠍꠣ ꠀꠟ꠆ꠟꠣꠞ ꠢꠣꠎꠤꠞꠣꠞ ꠢꠃ ꠝꠦꠊꠞ ꠇꠣꠟꠘꠤꠞ ꠀꠘ꠆ꠖꠣꠞꠤꠞ ꠉꠦꠍꠦ ꠉꠦꠟꠣ।
EXO 20:22 ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ, “ꠔꠥꠝꠤ ꠛꠘꠤ ꠁꠍꠞꠣꠁꠟꠞꠦ ꠇꠅ, ꠔꠥꠝꠞꠣ ꠘꠤꠎꠦꠃ ꠔ ꠖꠦꠈꠟꠣꠄ, ꠀꠝꠤ ꠝꠣꠛꠥꠖꠦ ꠀꠍꠝꠣꠘ ꠕꠣꠇꠤ ꠔꠥꠝꠞꠣꠞ ꠟꠉꠦ ꠛꠣꠔꠌꠤꠔ ꠇꠞꠟꠣꠝ।
EXO 20:23 ꠄꠞꠟꠣꠉꠤ ꠄꠛꠣꠖꠔ ꠇꠞꠣꠞ ꠘꠤꠅꠔꠦ, ꠀꠝꠣꠞ ꠛꠖꠟꠣ ꠖꠥꠍꠞꠣ ꠇꠥꠘꠥꠎꠣꠔ ꠖꠦꠛꠔꠣ ꠛꠣꠘꠣꠁꠅ ꠘꠣ। ꠔꠥꠝꠞꠣ ꠡꠥꠘꠣ ꠛꠣ ꠞꠥꠙꠣꠖꠤꠅ ꠘꠤꠎꠞ ꠇꠥꠘꠥ ꠖꠦꠛ-ꠖꠦꠛꠤ ꠛꠣꠘꠣꠁꠅ ꠘꠣ।
EXO 20:24 “ꠀꠝꠣꠞ ꠟꠣꠉꠤ ꠈꠣꠟꠤ ꠝꠣꠐꠤ ꠖꠤꠀ ꠇꠥꠞꠛꠣꠘꠤ ꠈꠣꠘꠣ ꠛꠣꠘꠣꠁꠅ। ꠄꠞ ꠃꠙꠞꠦ ꠔꠥꠝꠞꠣꠞ ꠎꠣꠟꠣꠁꠟ ꠇꠥꠞꠛꠣꠘꠤ ꠀꠞ ꠍꠣꠟꠣꠝꠔꠤ ꠇꠥꠞꠛꠣꠘꠤꠞ ꠉꠞꠥ-ꠍꠣꠉꠟ ꠀꠘꠤꠀ ꠇꠥꠞꠛꠣꠘꠤ ꠖꠤꠅ। ꠎꠦꠔꠣ ꠎꠣꠉꠣꠁꠘ꠆ꠔꠅ ꠀꠝꠤ ꠀꠝꠣꠞ ꠘꠣꠝ ꠁꠀꠖ ꠇꠞꠣꠁ ꠖꠤꠝꠥ, ꠢꠃ ꠎꠣꠉꠣꠁꠘ꠆ꠔꠅ ꠀꠝꠤ ꠘꠤꠎꠦ ꠀꠎꠤꠞ ꠅꠁꠀ ꠔꠥꠝꠞꠣꠞꠦ ꠖꠥꠀ ꠖꠤꠝꠥ।
EXO 20:25 ꠔꠥꠝꠞꠣ ꠀꠝꠣꠞ ꠟꠣꠉꠤ ꠙꠣꠔ꠆ꠔꠞꠖꠤ ꠇꠥꠘꠥ ꠇꠥꠞꠛꠣꠘꠤ ꠈꠣꠘꠣ ꠛꠣꠘꠣꠘꠤꠔ ꠟꠣꠉꠟꠦ, ꠢꠤ ꠙꠣꠔ꠆ꠔꠞꠉꠥꠁꠘ ꠇꠣꠐꠤꠅ ꠘꠣ। ꠄꠞ ꠃꠙꠞꠦ ꠀꠔꠤꠀꠞ ꠌꠣꠟꠣꠁꠟꠦ ꠔꠥꠝꠞꠣ ꠁꠔꠣꠞꠦ ꠘꠣꠙꠣꠇ ꠛꠣꠘꠣꠁꠟꠤꠛꠣꠄ।
EXO 20:26 ꠀꠝꠣꠞ ꠇꠥꠞꠛꠣꠘꠤ ꠈꠣꠘꠣ ꠅꠃꠟꠣ ꠇꠞꠤ ꠛꠣꠘꠣꠁꠅ, ꠎꠣꠔꠦ ꠄꠞ ꠃꠙꠞꠦ ꠃꠑꠔꠦ ꠇꠥꠘꠥ ꠝꠁ ꠛꠣ ꠍꠤꠠꠤ ꠘꠣ ꠟꠣꠉꠦ, ꠝꠁ ꠛꠣ ꠍꠤꠠꠤ ꠛꠣꠄ ꠃꠑꠣꠔ ꠉꠦꠟꠦ ꠇꠤꠛꠣ ꠔꠥꠝꠞꠣꠞ ꠡꠞꠝ ꠖꠦꠈꠣ ꠎꠣꠁꠛ।”
EXO 21:1 ꠝꠣꠛꠥꠖꠦ ꠝꠥꠍꠣꠞꠦ ꠀꠞꠅ ꠇꠁꠟꠣ, “ꠔꠥꠝꠤ ꠛꠘꠤ ꠁꠍꠞꠣꠁꠟꠞꠦ ꠀꠝꠣꠞ ꠅꠃ ꠘꠤꠅꠝ-ꠇꠣꠘꠥꠘ ꠅꠇꠟ ꠎꠣꠘꠣꠅ।
EXO 21:2 “ꠔꠥꠝꠞꠣ ꠎꠥꠖꠤ ꠇꠥꠘꠥ ꠁꠛꠞꠣꠘꠤ ꠛꠦꠐꠣꠞꠦ ꠈꠞꠤꠖ ꠇꠞꠤꠀ ꠉꠥꠟꠣꠝ ꠛꠣꠘꠣꠅ, ꠔꠦ ꠅꠃ ꠉꠥꠟꠣꠝꠦ ꠍꠄ ꠛꠍꠞ ꠔꠥꠝꠞꠣꠞ ꠉꠥꠟꠣꠝꠤ ꠇꠞꠛ, ꠛꠣꠖꠦ ꠡꠣꠔ ꠛꠍꠞꠞ ꠛꠣꠟꠣ ꠔꠣꠞ ꠉꠦꠍ ꠕꠣꠇꠤ ꠇꠥꠘ꠆ꠔꠣ ꠘꠣ ꠘꠤꠀ, ꠔꠣꠞꠦ ꠄꠝꠘꠦꠃ ꠀꠎꠣꠖ ꠇꠞꠤ ꠖꠤꠛꠣꠄ।
EXO 21:3 ꠢꠦ ꠎꠥꠖꠤ ꠄꠇꠟꠣ ꠔꠥꠝꠞꠣꠞ ꠉꠦꠍꠦ ꠀꠄ ꠔꠦ ꠄꠇꠟꠣꠃ ꠎꠣꠁꠛ; ꠀꠞ ꠎꠥꠖꠤ ꠛꠃꠞꠦ ꠟꠉꠦ ꠟꠁꠀ ꠀꠄ, ꠔꠦ ꠛꠃ ꠟꠁꠀ ꠎꠣꠁꠛ।
EXO 21:4 ꠅꠁꠟꠦ ꠔꠣꠞ ꠝꠥꠘꠤꠛꠦ ꠎꠥꠖꠤ ꠔꠣꠞꠦ ꠛꠤꠀ ꠇꠞꠣꠁ ꠕꠣꠇꠦ, ꠀꠞ ꠔꠣꠞ ꠇꠥꠘꠥ ꠢꠥꠞꠥꠔ꠆ꠔꠣ-ꠝꠥꠞꠥꠔ꠆ꠔꠣ ꠅꠁꠘ, ꠔꠣꠁꠟꠦ ꠁ ꠛꠦꠐꠤ ꠀꠞ ꠢꠥꠞꠥꠔ꠆ꠔꠣꠁꠘ ꠝꠥꠘꠤꠛꠞ ꠉꠦꠍꠦꠃ ꠞꠁꠛꠣ; ꠢꠦ ꠈꠣꠟꠤ ꠄꠇꠟꠣ ꠀꠎꠣꠖ ꠅꠁꠛ।
EXO 21:5 ꠀꠞ ꠢꠤ ꠉꠥꠟꠣꠝꠦ ꠎꠥꠖꠤ ꠍꠣꠚ ꠇꠞꠤ ꠇꠄ ꠎꠦꠘ, ꠢꠦ ꠔꠣꠞ ꠝꠥꠘꠤꠛ ꠀꠞ ꠔꠣꠞ ꠛꠃ-ꠛꠣꠁꠌ꠆ꠌꠣꠞ ꠝꠣꠄꠀꠄ, ꠄꠞꠣꠞꠦ ꠍꠣꠠꠤꠀ ꠎꠣꠁꠔ ꠘꠣꠄ,
EXO 21:6 ꠔꠦ ꠁ ꠝꠣꠟꠤꠇꠦ ꠔꠣꠞꠦ ꠟꠁꠀ ꠀꠟ꠆ꠟꠣꠞ ꠖꠞꠛꠣꠞꠅ ꠀꠎꠤꠞ ꠅꠁꠛ। ꠔꠣꠞꠦ ꠖꠥꠀꠞꠞ ꠇꠙꠣꠐ ꠛꠣ ꠌꠃꠇꠣꠑꠞ ꠟꠉꠦ ꠃꠛꠣ ꠇꠞꠤꠀ ꠝꠥꠘꠤꠛꠦ ꠡꠤꠇ ꠖꠤꠀ ꠔꠣꠞ ꠇꠣꠘꠅ ꠚꠥꠠ ꠇꠞꠛ। ꠔꠦꠃ ꠢꠦ ꠢꠣꠞꠣ ꠎꠤꠘ꠆ꠖꠦꠉꠤꠜꠞ ꠝꠥꠘꠤꠛꠞ ꠉꠥꠟꠣꠝꠤꠔ ꠞꠁꠛ।
EXO 21:7 “ꠇꠥꠘꠥ ꠝꠣꠘꠡꠦ ꠎꠥꠖꠤ ꠛꠣꠘ꠆ꠖꠤꠉꠤꠞꠤꠔ ꠖꠤꠛꠣꠞ ꠟꠣꠉꠤ ꠔꠣꠞ ꠘꠤꠎꠞ ꠙꠥꠠꠤꠞꠦ ꠛꠦꠌꠤꠟꠣꠄ, ꠔꠦ ꠉꠥꠟꠣꠝ ꠅꠇꠟ ꠎꠦꠟꠣ ꠍꠄ ꠛꠍꠞ ꠛꠣꠖꠦ ꠝꠥꠘꠤꠛꠞ ꠛꠣꠠꠤ ꠕꠣꠇꠤ ꠄꠝꠘꠦꠃ ꠀꠎꠣꠖ ꠅꠁꠎꠣꠁꠘ, ꠅꠃ ꠙꠥꠠꠤ ꠔ ꠁꠟꠣ ꠀꠎꠣꠖ ꠅꠁꠔ ꠘꠣꠄ।
EXO 21:8 ꠔꠣꠁꠞ ꠝꠥꠘꠤꠛ ꠎꠥꠖꠤ ꠔꠣꠁꠞ ꠃꠙꠞꠦ ꠈꠥꠡꠤ ꠘꠣ ꠅꠁꠘ, ꠔꠦ ꠐꠦꠇꠣ-ꠙꠄꠡꠣꠞ ꠛꠖꠟꠣ ꠔꠣꠁꠞꠦ ꠀꠎꠣꠖ ꠇꠞꠤ ꠖꠤꠔꠦ ꠅꠁꠛ। ꠔꠣꠁꠞꠦ ꠖꠥꠍꠞꠣ ꠇꠥꠘꠥ ꠎꠣꠔꠤꠞ ꠝꠣꠘꠡꠞ ꠉꠦꠍꠦ ꠛꠦꠌꠤꠛꠣꠞ ꠄꠈꠔꠤꠀꠞ ꠘꠣꠁ, ꠇꠣꠞꠘ ꠝꠥꠘꠤꠛꠦ ꠔ ꠔꠣꠘ ꠘꠤꠎꠞ ꠖꠣꠄꠁꠔ꠆ꠔ ꠀꠖꠣꠄ ꠇꠞꠍꠂꠘ ꠘꠣ।
EXO 21:9 ꠅꠁꠟꠦ ꠝꠥꠘꠤꠛꠦ ꠎꠥꠖꠤ ꠔꠣꠘ ꠘꠤꠎꠞ ꠙꠥꠀꠞ ꠟꠣꠉꠤ ꠔꠣꠁꠞꠦ ꠙꠍꠘ꠆ꠖ ꠇꠞꠤꠀ ꠘꠦꠁꠘ, ꠔꠦ ꠔꠣꠁꠞꠦ ꠀꠙꠘ ꠙꠥꠠꠤꠞ ꠟꠣꠈꠣꠘ ꠢꠇꠟ ꠈꠦꠝꠔꠣ ꠖꠤꠔꠦ ꠅꠁꠛ।
EXO 21:10 ꠝꠥꠘꠤꠛꠦ ꠎꠥꠖꠤ ꠅꠃ ꠛꠣꠘ꠆ꠖꠤꠞꠦ ꠛꠤꠀ ꠇꠞꠣꠞ ꠛꠣꠖꠦ, ꠖꠥꠍꠞꠣ ꠇꠥꠘꠥ ꠇꠁꠘꠣꠞꠦ ꠛꠤꠀ ꠇꠞꠦ, ꠔꠣ-ꠅ ꠁ ꠛꠣꠘ꠆ꠖꠤꠞ ꠈꠥꠞꠣꠇꠤ, ꠇꠣꠙꠠ-ꠌꠥꠙꠠ ꠀꠞ ꠡꠞꠤꠟꠞ ꠙꠣꠅꠘꠣ ꠢꠇ ꠔꠣꠁꠞꠦ ꠖꠦꠅꠀ ꠟꠣꠉꠛ।
EXO 21:11 ꠢꠦ ꠎꠥꠖꠤ ꠅꠃ ꠔꠤꠘꠅ ꠢꠇ ꠙꠥꠞꠣꠙꠥꠞ ꠀꠖꠣꠄ ꠘꠣ ꠇꠞꠦ, ꠔꠦ ꠁ ꠙꠥꠠꠤꠞꠦ ꠄꠇꠖꠝ ꠛꠤꠘꠣ ꠙꠄꠡꠣꠄ ꠀꠎꠣꠖ ꠇꠞꠤ ꠖꠤꠔꠦ ꠅꠁꠛ।
EXO 21:12 “ꠝꠣꠁꠞ ꠈꠣꠁꠀ ꠎꠥꠖꠤ ꠇꠥꠘꠥ ꠝꠣꠘꠥꠡ ꠝꠞꠤꠎꠣꠄ, ꠔꠦ ꠎꠦꠉꠤꠄ ꠔꠣꠞꠦ ꠝꠣꠞꠍꠦ, ꠔꠣꠞꠦꠅ ꠎꠣꠘꠦ ꠝꠣꠞꠣ ꠅꠁꠛ।
EXO 21:13 ꠅꠁꠟꠦ ꠢꠦ ꠘꠤꠎꠦ ꠎꠥꠖꠤ ꠈꠥꠘ ꠘꠣ ꠇꠞꠣꠞ ꠘꠤꠅꠔꠦ ꠝꠣꠞꠦ, ꠀꠈꠔꠣ ꠇꠥꠘꠥ ꠇꠣꠞꠘꠦ ꠊꠐꠤꠎꠣꠄ ꠛꠣ ꠀꠝꠤ ꠀꠟ꠆ꠟꠣꠞ ꠝꠞ꠆ꠎꠤꠄ ꠁꠔꠣ ꠅꠄ, ꠔꠦ ꠅꠃ ꠈꠥꠘꠤ ꠎꠘ ꠉꠤꠀ ꠅꠟꠣ ꠇꠥꠘꠥ ꠎꠣꠉꠣꠔ ꠜꠣꠉꠤꠔ ꠙꠣꠞꠛ, ꠎꠦ ꠎꠣꠉꠣꠞ ꠇꠕꠣ ꠀꠝꠤ ꠔꠥꠝꠞꠣꠞꠦ ꠇꠁꠝꠥ।
EXO 21:14 ꠀꠞ ꠇꠦꠃ ꠎꠥꠖꠤ ꠎꠣꠘꠤꠀ-ꠢꠥꠘꠤꠀ ꠁꠌ꠆ꠍꠣ ꠇꠞꠤ ꠇꠦꠃꠞꠞꠦ ꠈꠥꠘ ꠇꠞꠤꠀ, ꠛꠣꠖꠦ ꠀꠁꠀ ꠀꠝꠣꠞ ꠇꠥꠞꠛꠣꠘꠤ ꠈꠣꠘꠣꠞ ꠉꠦꠍꠦꠅ ꠀꠡꠞꠄ ꠟꠄ, ꠔꠣ-ꠅ ꠢꠘ ꠕꠣꠇꠤ ꠗꠞꠤꠀ ꠘꠤꠀ ꠔꠣꠞꠦ ꠎꠣꠘꠦ ꠝꠣꠞꠣ ꠅꠁꠛ।
EXO 21:15 “ꠎꠦ ꠝꠣꠘꠡꠦ ꠔꠣꠞ ꠀꠙꠘ ꠝꠣ ꠛꠣ ꠛꠣꠚꠞ ꠃꠙꠞꠦ ꠀꠔ ꠔꠥꠟꠦ, ꠔꠣꠞꠦ ꠘꠤꠌꠄ ꠎꠣꠘꠦ ꠝꠣꠞꠣ ꠅꠁꠛ।
EXO 21:16 “ꠇꠦꠃ ꠎꠥꠖꠤ ꠇꠥꠘꠥ ꠝꠣꠘꠡꠞꠦ ꠌꠥꠞꠤ ꠇꠞꠤꠀ ꠀꠘꠤꠀ ꠛꠦꠌꠤꠟꠣꠄ, ꠛꠣ ꠅꠃ ꠝꠣꠘꠡꠞꠦ ꠔꠣꠞ ꠉꠦꠍꠦ ꠙꠣꠅꠀ ꠎꠣꠄ, ꠔꠦ ꠔꠣꠞꠦ ꠘꠤꠌ꠆ꠌꠄ ꠎꠣꠘꠦ ꠝꠣꠞꠣ ꠅꠁꠛ।
EXO 21:17 “ꠎꠦ ꠝꠣꠘꠡꠦ ꠀꠙꠘ ꠝꠣ ꠛꠣ ꠛꠣꠚꠞꠦ ꠉꠣꠟꠤ-ꠉꠣꠟꠣꠎ ꠇꠞꠦ, ꠔꠣꠞꠦꠅ ꠘꠤꠌ꠆ꠌꠄ ꠎꠣꠘꠦ ꠝꠣꠞꠣ ꠅꠁꠛ।
EXO 21:18 “ꠇꠥꠘꠥ ꠝꠣꠘꠡꠦ ꠇꠣꠁꠎ꠆ꠎꠣꠔ ꠟꠣꠉꠤꠀ ꠎꠥꠖꠤ ꠟꠉꠞ ꠎꠘꠞꠦ ꠑꠥꠡꠤ ꠛꠣ ꠙꠣꠔ꠆ꠔꠞꠖꠤ ꠝꠣꠞꠦ, ꠁ ꠝꠣꠁꠞ ꠈꠣꠁꠀ ꠅꠃ ꠎꠘ ꠘꠣ ꠝꠞꠟꠦꠅ ꠛꠤꠍꠘꠣꠔ ꠢꠥꠔꠤꠀ ꠙꠠꠘꠅ ꠕꠣꠇꠦ,
EXO 21:19 ꠢꠦꠡꠦ ꠃꠑꠤꠀ ꠟꠣꠑꠤ ꠜꠞ ꠖꠤꠀ ꠌꠟꠣ-ꠚꠤꠞꠣ ꠇꠞꠣꠞ ꠎꠞꠥꠞ ꠅꠄ, ꠔꠦ ꠎꠦꠉꠤꠄ ꠔꠣꠞꠦ ꠝꠣꠞꠍꠦ ꠔꠣꠞꠦ ꠎꠣꠘꠦ ꠝꠣꠞꠤꠅ ꠘꠣ। ꠈꠣꠟꠤ ꠢꠃ ꠎꠘꠞ ꠇꠣꠝ-ꠇꠣꠎꠞ ꠈꠦꠔꠤ ꠀꠞ ꠔꠣꠞ ꠡꠥꠟ꠆ꠟꠀꠘꠣ ꠖꠣꠅꠀꠁ ꠈꠞꠌ ꠖꠤꠔꠦ ꠅꠁꠛ।
EXO 21:20 “ꠇꠦꠃ ꠎꠥꠖꠤ ꠔꠣꠞ ꠈꠞꠤꠖꠣ ꠉꠥꠟꠣꠝ-ꠛꠣꠘ꠆ꠖꠤꠞꠦ ꠟꠣꠑꠤ ꠖꠤꠀ ꠝꠣꠞꠦ ꠀꠞ ꠝꠣꠁꠞ ꠈꠣꠁꠀ ꠅꠉꠥ ꠝꠞꠤꠎꠣꠄ, ꠔꠦ ꠄꠞꠦ ꠡꠣꠎꠣ ꠖꠤꠔꠦ ꠅꠁꠛ।
EXO 21:21 ꠅꠁꠟꠦ ꠝꠣꠁꠞ ꠈꠣꠅꠀꠞ ꠖꠥꠁ-ꠄꠇꠖꠤꠘ ꠛꠣꠖꠦ ꠎꠥꠖꠤ ꠛꠣꠌꠤꠀ ꠞꠄ, ꠔꠦ ꠇꠥꠘꠥ ꠡꠣꠎꠣ ꠖꠦꠅꠀ ꠟꠣꠉꠔ ꠘꠣꠄ, ꠇꠣꠞꠘ ꠅꠃ ꠉꠥꠟꠣꠝ ꠔ ꠔꠣꠞ ꠘꠤꠎꠞ ꠍꠣꠝꠣꠘꠣ ꠀꠍꠤꠟ।
EXO 21:22 “ꠝꠣꠞꠣ-ꠝꠣꠞꠤ ꠇꠞꠣꠔ ꠟꠣꠉꠤꠀ ꠎꠥꠖꠤ ꠀꠈꠔꠣ ꠇꠦꠃ ꠇꠥꠘꠥ ꠛꠦꠐꠤꠞꠦ ꠝꠣꠞꠦ ꠀꠞ ꠔꠣꠁꠞ ꠙꠦꠐꠞ ꠛꠣꠁꠌ꠆ꠌꠣ ꠘꠡ꠆ꠐ ꠅꠁꠎꠣꠄ, ꠅꠁꠟꠦ ꠀꠞ ꠇꠥꠘꠥ ꠈꠦꠔꠤ ꠘꠣ ꠅꠄ, ꠔꠦ ꠅꠃ ꠛꠦꠐꠤꠞ ꠎꠣꠝꠣꠁꠞ ꠖꠣꠛꠤ ꠀꠞ ꠛꠤꠌꠣꠞꠤ-ꠡꠣꠟꠤꠡꠞ ꠛꠤꠛꠦꠌꠘꠣ ꠝꠣꠚꠤꠇ ꠄꠞꠦ ꠈꠦꠔꠤ-ꠙꠥꠞꠘ ꠖꠤꠔꠦ ꠅꠁꠛ।
EXO 21:23 ꠅꠁꠟꠦ ꠎꠥꠖꠤ ꠔꠣꠁꠞ ꠀꠞꠅ ꠇꠥꠘꠥ ꠈꠦꠔꠤ ꠅꠄ, ꠔꠣꠁꠟꠦ ꠄꠞꠦ ꠅꠃ ꠟꠣꠈꠣꠘ ꠡꠣꠎꠣ ꠖꠤꠛꠣꠄ:
EXO 21:24 ꠎꠣꠘꠞ ꠛꠖꠟꠣ ꠎꠣꠘ, ꠌꠃꠈꠞ ꠛꠖꠟꠣ ꠌꠃꠈ, ꠖꠣꠔꠞ ꠛꠖꠟꠣ ꠖꠣꠔ, ꠀꠔꠞ ꠛꠖꠟꠣ ꠀꠔ, ꠙꠣꠅꠞ ꠛꠖꠟꠣ ꠙꠣꠅ,
EXO 21:25 ꠎꠣꠟꠣꠘꠤꠞ ꠛꠖꠟꠣ ꠎꠣꠟꠣꠘꠤ, ꠎꠈꠝꠞ ꠛꠖꠟꠣ ꠎꠈꠝ, ꠖꠣꠉꠞ ꠛꠖꠟꠣ ꠖꠣꠉ ꠖꠤꠔꠦ ꠅꠁꠛ।
EXO 21:26 “ꠇꠦꠃ ꠎꠥꠖꠤ ꠔꠣꠞ ꠈꠞꠤꠖꠣ ꠉꠥꠟꠣꠝ ꠛꠣ ꠛꠣꠘ꠆ꠖꠤꠞ ꠇꠥꠘꠥ ꠌꠈꠥꠔ ꠝꠣꠞꠣꠄ ꠌꠃꠈ ꠘꠡ꠆ꠐ ꠅꠁꠎꠣꠄ, ꠔꠦ ꠅꠃ ꠌꠃꠈꠞ ꠛꠖꠟꠣ ꠢꠦ ꠁ ꠉꠥꠟꠣꠝꠞꠦ ꠀꠎꠣꠖ ꠇꠞꠤ ꠖꠤꠔꠦ ꠅꠁꠛ।
EXO 21:27 ꠎꠥꠖꠤ ꠝꠣꠞꠤꠀ ꠄꠞ ꠖꠣꠔ ꠚꠣꠟꠣꠁ ꠖꠦꠄ, ꠔꠣ-ꠅ ꠄꠞꠦ ꠀꠎꠣꠖ ꠇꠞꠤ ꠖꠦꠅꠀ ꠟꠣꠉꠛ।
EXO 21:28 “ꠇꠥꠘꠥ ꠉꠞꠥꠄ ꠉꠥꠔꠣꠁꠀ ꠎꠥꠖꠤ ꠇꠥꠘꠥ ꠛꠦꠐꠣ ꠛꠣ ꠛꠦꠐꠤꠞꠦ ꠝꠣꠞꠤꠟꠣꠄ, ꠔꠦ ꠉꠞꠥꠞ ꠝꠣꠟꠤꠇꠞꠦ ꠇꠥꠘꠥ ꠡꠣꠎꠣ ꠖꠦꠅꠀ ꠟꠣꠉꠔ ꠘꠣꠄ। ꠈꠣꠟꠤ ꠢꠤ ꠉꠞꠥꠞꠦ ꠙꠣꠔ꠆ꠔꠞꠖꠤ ꠁꠐꠣꠁꠀ ꠝꠣꠞꠤꠟꠤꠔꠦ ꠅꠁꠛ, ꠁ ꠉꠞꠥꠞ ꠉꠥꠡ꠆ꠔ ꠇꠦꠃ ꠈꠣꠁꠔ ꠙꠣꠞꠔ ꠘꠣꠄ।
EXO 21:29 ꠅꠁꠟꠦ ꠁ ꠉꠞꠥꠞ ꠎꠥꠖꠤ ꠢꠣꠝꠦꠡꠣ ꠅꠃꠟꠣ ꠉꠥꠔꠣꠘꠤꠞ ꠈꠣꠁꠌ꠆ꠍꠔ ꠕꠣꠇꠦ, ꠀꠞ ꠢꠤ ꠝꠣꠟꠤꠇꠞꠦ ꠢꠥꠡꠤꠀꠞ ꠇꠞꠣꠞ ꠛꠣꠖꠦꠅ ꠢꠦ ꠁꠐꠣꠞꠦ ꠀꠐꠇꠣꠄ ꠘꠣ, ꠄꠞꠝꠣꠎꠦ ꠁ ꠉꠞꠥꠄ ꠇꠥꠘꠥ ꠛꠦꠐꠣ ꠛꠣ ꠛꠦꠐꠤꠞꠦ ꠝꠣꠞꠤꠟꠣꠄ, ꠔꠦ ꠁ ꠉꠞꠥꠞꠦ ꠙꠣꠔ꠆ꠔꠞ ꠝꠣꠞꠤꠀ ꠝꠣꠞꠤꠟꠤꠔꠦ ꠅꠁꠛ, ꠀꠞ ꠔꠣꠞ ꠝꠣꠟꠤꠇꠞꠦꠅ ꠝꠣꠞꠤꠟꠤꠔꠦ ꠅꠁꠛ।
EXO 21:30 ꠎꠥꠖꠤ ꠁ ꠝꠣꠟꠤꠇꠞ ꠉꠦꠍꠦ ꠇꠥꠘꠥ ꠈꠦꠔꠤ-ꠙꠥꠞꠘ ꠌꠣꠅꠀ ꠅꠄ, ꠔꠣꠁꠟꠦ ꠢꠦ ꠅꠃ ꠎꠞꠤꠝꠣꠘꠣ ꠖꠤꠀ ꠘꠤꠎꠞ ꠎꠣꠘ ꠛꠣꠌꠣꠁꠔ ꠙꠣꠞꠛ।
EXO 21:31 ꠁ ꠉꠞꠥꠄ ꠎꠥꠖꠤ ꠇꠥꠘꠥ ꠢꠥꠞꠥꠔ꠆ꠔꠣꠞꠦ ꠉꠥꠔꠣꠁꠀ ꠝꠣꠞꠤꠟꠣꠄ, ꠔꠣꠁꠟꠦ ꠄꠞꠟꠣꠉꠤꠅ ꠅꠃ ꠢꠝꠣꠘ ꠘꠤꠅꠝ ꠅꠁꠛ।
EXO 21:32 ꠇꠥꠘꠥ ꠉꠞꠥꠄ ꠎꠥꠖꠤ ꠇꠦꠃꠞꠞ ꠉꠥꠟꠣꠝ ꠛꠣ ꠛꠣꠘ꠆ꠖꠤꠞꠦ ꠉꠥꠔꠣꠁꠀ ꠝꠣꠞꠤꠟꠣꠄ, ꠔꠣꠁꠟꠦ ꠉꠞꠥꠞ ꠝꠣꠟꠤꠇꠦ ꠢꠤ ꠉꠥꠟꠣꠝꠞ ꠝꠣꠟꠤꠇꠞꠦ ꠔꠤꠡ ꠔꠟꠣ ꠙꠞꠤꠝꠣꠘ ꠞꠥꠙꠣ ꠖꠤꠔꠦ ꠅꠁꠛ ꠀꠞ ꠢꠤ ꠉꠞꠥꠞꠦꠅ ꠙꠣꠔ꠆ꠔꠞ ꠝꠣꠞꠤ ꠝꠣꠞꠤꠟꠤꠔꠦ ꠅꠁꠛ।
EXO 21:33 “ꠇꠦꠃ ꠎꠥꠖꠤ ꠇꠥꠘꠥ ꠉꠣꠔꠞ ꠝꠥꠈ ꠈꠥꠟꠤꠀ ꠕꠄ ꠛꠣ ꠉꠣꠔ ꠈꠥꠖꠤꠀ ꠁꠉꠥꠞ ꠝꠥꠈ ꠉꠥꠞꠤꠀ ꠘꠣ ꠕꠄ, ꠀꠞ ꠁ ꠉꠣꠔꠞ ꠜꠤꠔꠞꠦ ꠇꠥꠘꠥ ꠉꠞꠥ ꠛꠣ ꠉꠣꠗꠣ ꠙꠠꠤꠎꠣꠄ,
EXO 21:34 ꠔꠣꠁꠟꠦ ꠉꠣꠔꠞ ꠝꠣꠟꠤꠇꠦ ꠙꠡꠥꠞ ꠝꠣꠟꠤꠇꠞꠦ ꠈꠦꠔꠤ-ꠙꠥꠞꠘ ꠖꠤꠔꠦ ꠅꠁꠛ। ꠅꠁꠟꠦ ꠁ ꠝꠞꠣ ꠙꠡꠥ ꠙꠣꠁꠛ ꠉꠣꠔꠞ ꠝꠣꠟꠤꠇꠦ।
EXO 21:35 “ꠇꠦꠃꠞꠞ ꠉꠞꠥꠄ ꠎꠥꠖꠤ ꠀꠞꠇ ꠎꠘꠞ ꠉꠞꠥꠞꠦ ꠉꠥꠔꠣꠁꠀ ꠝꠣꠞꠤꠟꠣꠄ, ꠔꠦ ꠢꠃ ꠎꠤꠔꠣ ꠉꠞꠥꠞꠦ ꠛꠦꠌꠤꠀ, ꠄꠞ ꠖꠣꠝ ꠀꠞ ꠝꠞꠣ ꠉꠞꠥꠞ ꠖꠣꠝꠅ ꠄꠞꠣ ꠖꠥꠁꠅꠎꠘꠦ ꠢꠝꠣꠘ ꠢꠝꠣꠘ ꠇꠞꠤ ꠛꠣꠐꠤꠀ ꠘꠤꠛꠣ।
EXO 21:36 ꠅꠁꠟꠦ ꠀꠉ ꠕꠣꠇꠤ ꠎꠥꠖꠤ ꠎꠣꠘꠣ-ꠢꠥꠘꠣ ꠕꠣꠇꠦ ꠎꠦꠘ, ꠁ ꠉꠞꠥꠄ ꠅꠟꠣ ꠉꠥꠔꠣꠄ, ꠀꠞ ꠔꠣꠞ ꠝꠣꠟꠤꠇꠦ ꠔꠣꠞꠦ ꠘꠣ ꠀꠐꠇꠣꠄ, ꠔꠦ ꠉꠞꠥꠞ ꠛꠖꠟꠣ ꠉꠞꠥ ꠖꠤꠔꠦ ꠅꠁꠛ, ꠛꠖꠟꠣ ꠖꠦꠅꠞꠣ ꠎꠘꠦ ꠅꠃ ꠝꠞꠣ ꠉꠞꠥꠐꠣ ꠙꠣꠁꠛ।
EXO 22:1 “ꠇꠦꠃ ꠇꠥꠘꠥ ꠝꠣꠘꠡꠞ ꠉꠞꠥ ꠛꠣ ꠝꠦꠠꠣ-ꠍꠣꠉꠟ ꠌꠥꠞꠤ ꠇꠞꠤꠀ ꠀꠘꠤꠀ ꠎꠥꠖꠤ ꠛꠦꠌꠤꠟꠣꠄ ꠛꠣ ꠎꠛ ꠇꠞꠤꠟꠣꠄ, ꠔꠦ ꠄꠇ ꠉꠞꠥꠞ ꠛꠖꠟꠣ ꠙꠣꠌꠉꠥ, ꠄꠇ ꠝꠦꠠꠣ ꠛꠣ ꠍꠣꠉꠟꠞ ꠛꠖꠟꠣ ꠌꠣꠁꠞꠉꠥ ꠚꠤꠞꠔ ꠖꠤꠔꠦ ꠅꠁꠛ।
EXO 22:2 ꠌꠥꠞꠦ ꠔꠣꠞ ꠌꠥꠞꠤꠞ ꠝꠣꠟꠞ ꠈꠦꠔꠤ-ꠙꠥꠞꠘ ꠖꠤꠔꠦ ꠅꠁꠛ, ꠅꠁꠟꠦ ꠔꠣꠞ ꠎꠥꠖꠤ ꠈꠦꠔꠤ-ꠙꠥꠞꠘ ꠖꠤꠛꠣꠞ ꠇꠥꠘꠥ ꠔꠣꠇ꠆ꠇꠔ ꠘꠣ ꠕꠣꠇꠦ, ꠔꠦ ꠔꠣꠞꠦ ꠛꠦꠌꠤꠀ ꠄꠞ ꠈꠦꠔꠤ-ꠙꠥꠞꠘ ꠀꠖꠣꠄ ꠇꠞꠔꠦ ꠅꠁꠛ। ꠌꠥꠞꠤ ꠇꠞꠣ ꠉꠞꠥ-ꠉꠣꠗꠣ ꠛꠣ ꠝꠦꠠꠣ-ꠍꠣꠉꠟ ꠎꠥꠖꠤ ꠌꠥꠞꠞ ꠉꠦꠍꠦ ꠎꠤꠔꠣ ꠙꠣꠅꠀ ꠎꠣꠄ, ꠔꠣꠁꠟꠦ ꠢꠦ ꠁꠔꠣ ꠄꠉꠥꠞ ꠛꠖꠟꠣ ꠖꠥꠉꠥ ꠚꠤꠞꠔ ꠖꠤꠔꠦ ꠅꠁꠛ। “ꠇꠥꠘꠥ ꠌꠥꠞꠦ ꠎꠥꠖꠤ ꠌꠥꠞꠤꠔ ꠉꠤꠀ ꠊꠞꠅ ꠢꠣꠝꠣꠁꠛꠣꠞ ꠛꠣꠟꠣ ꠗꠞꠣ ꠈꠣꠁꠟꠣꠄ ꠀꠞ ꠎꠈꠝ ꠅꠁꠀ ꠝꠞꠤꠎꠣꠄ, ꠔꠣꠁꠟꠦ ꠔꠣꠞꠦ ꠝꠣꠞꠣꠞ ꠟꠣꠉꠤ ꠝꠣꠞꠞꠣ ꠎꠘ ꠖꠣꠄꠁ ꠅꠁꠔ ꠘꠣꠄ। ꠅꠁꠟꠦ ꠡꠥꠞꠥꠎ ꠃꠑꠣꠞ ꠛꠣꠖꠦ ꠎꠥꠖꠤ ꠖꠤꠘꠞ ꠛꠣꠟꠣ ꠁꠟꠣ ꠅꠄ, ꠔꠦ ꠁ ꠈꠥꠘꠞ ꠟꠣꠉꠤ ꠢꠦ ꠖꠣꠄꠁ ꠅꠁꠛ।
EXO 22:5 “ꠇꠦꠃ ꠎꠥꠖꠤ ꠔꠣꠞ ꠉꠞꠥ-ꠍꠣꠉꠟ ꠘꠤꠎꠞ ꠛꠣꠉꠣꠘꠅ ꠛꠣ ꠈꠦꠔꠞ ꠝꠣꠎꠦ ꠞꠣꠈꠣꠔ ꠉꠤꠀ ꠍꠣꠠꠤ ꠖꠦꠄ, ꠀꠞ ꠁꠔꠣꠄ ꠉꠤꠀ ꠝꠣꠘꠡꠞ ꠈꠦꠔꠞ ꠚꠡꠟ ꠈꠣꠁꠟꠣꠄ, ꠔꠦ ꠔꠣꠞ ꠘꠤꠎꠞ ꠈꠦꠔꠞ ꠢꠇꠟ ꠕꠣꠇꠤ ꠜꠣꠟꠣ ꠅꠋꠡ ꠛꠖꠟꠣ ꠖꠤꠀ ꠈꠦꠔꠤ-ꠙꠥꠞꠘ ꠖꠤꠔꠦ ꠅꠁꠛ।
EXO 22:6 “ꠇꠥꠘꠥ ꠎꠣꠉꠣ ꠕꠣꠇꠤ ꠀꠉꠥꠁꠘ ꠟꠣꠉꠤꠀ ꠎꠥꠖꠤ ꠎꠥꠙ-ꠎꠋꠉꠟ ꠎꠟꠦ, ꠀꠞ ꠛꠣꠖꠦ ꠅꠃ ꠀꠉꠥꠁꠘ ꠉꠤꠀ ꠇꠦꠃꠞꠞ ꠈꠦꠔꠞ ꠝꠣꠎꠦ ꠛꠣꠘ꠆ꠖꠣ ꠝꠥꠁꠐ, ꠐꠦꠇꠤ ꠛꠣ ꠀꠡ꠆ꠔꠣ ꠈꠦꠔ ꠎꠟꠤ ꠎꠣꠄ, ꠔꠦ ꠀꠉꠥꠁꠘ ꠎꠦꠉꠤꠄ ꠎꠣꠟꠣꠁꠍꠤꠟ, ꠢꠦ ꠁꠔꠣꠞ ꠈꠦꠔꠤ-ꠙꠥꠞꠘ ꠖꠤꠛ।
EXO 22:7 “ꠇꠦꠃ ꠎꠥꠖꠤ ꠀꠞꠇ ꠎꠘꠞ ꠉꠦꠍꠦ ꠝꠣꠟ-ꠍꠣꠝꠣꠘꠣ ꠛꠣ ꠐꠦꠇꠣ-ꠙꠄꠡꠣ ꠀꠝꠣꠘꠔ ꠕꠄ, ꠀꠞ ꠀꠝꠣꠘꠔ-ꠖꠣꠞꠞ ꠊꠞ ꠕꠣꠇꠤ ꠁꠔꠣ ꠌꠥꠞꠤ ꠅꠁꠎꠣꠄ, ꠔꠦ ꠅꠃ ꠌꠥꠞ ꠗꠞꠣ ꠙꠠꠟꠦ, ꠌꠥꠞꠦ ꠄꠞ ꠒꠣꠛꠥꠟ ꠚꠤꠞꠔ ꠖꠤꠛ।
EXO 22:8 ꠅꠁꠟꠦ ꠌꠥꠞ ꠗꠞꠣ ꠘꠣ ꠙꠠꠟꠦ, ꠢꠤ ꠊꠞꠞ ꠝꠣꠟꠤꠇꠦ ꠘꠤꠎꠦꠃ ꠁꠔꠣ ꠟꠥꠇꠣꠁꠍꠦ ꠘꠤ, ꠅꠈꠣꠘ ꠎꠣꠘꠣꠞ ꠟꠣꠉꠤ ꠔꠣꠞꠦ ꠀꠟ꠆ꠟꠣꠞ ꠖꠞꠛꠣꠞꠅ ꠀꠎꠤꠞ ꠇꠞꠛꠣꠄ।
EXO 22:9 “ꠀꠞꠇ ꠎꠘꠞ ꠖꠈꠟꠅ ꠀꠍꠦ, ꠅꠃꠟꠣ ꠇꠥꠘꠥ ꠉꠞꠥ-ꠉꠣꠗꠣ, ꠝꠦꠠꠣ-ꠍꠣꠉꠟ, ꠚꠤꠘ꠆ꠘꠞ ꠇꠣꠙꠠ ꠛꠣ ꠎꠦꠇꠥꠘꠥ ꠀꠞꠣꠁꠟ ꠍꠣꠝꠣꠘꠣ ꠖꠦꠈꠤꠀ ꠇꠦꠃ ꠎꠥꠖꠤ ꠝꠘꠅ ꠇꠞꠦ ꠁꠐꠣ ꠔꠣꠞ ꠝꠣꠟ, ꠔꠣꠁꠟꠦ ꠁꠐꠣꠞ ꠡꠣꠟꠤꠡꠤꠞ ꠟꠣꠉꠤ ꠔꠣꠞꠣ ꠖꠥꠁꠅꠎꠘ ꠉꠤꠀ ꠀꠟ꠆ꠟꠣꠞ ꠖꠞꠛꠣꠞꠅ ꠀꠎꠤꠞ ꠅꠁꠛ। ꠀꠟ꠆ꠟꠣꠄ ꠎꠣꠞꠦ ꠖꠥꠡꠤ ꠡꠣꠁꠛꠡ꠆ꠔ ꠇꠞꠛꠣ, ꠢꠦ ꠔꠣꠞ ꠛꠤꠞꠥꠗꠤ ꠎꠘꠞꠦ ꠄꠞ ꠒꠣꠛꠥꠟ ꠚꠤꠞꠔ ꠖꠤꠛ।
EXO 22:10 “ꠇꠦꠃ ꠎꠥꠖꠤ ꠔꠣꠞ ꠉꠞꠥ-ꠉꠣꠗꠣ, ꠍꠣꠉꠟ-ꠝꠦꠠꠣ ꠛꠣ ꠅꠁꠘ꠆ꠘ ꠇꠥꠘꠥ ꠙꠡꠥꠞꠦ ꠇꠥꠘꠥ ꠉꠤꠞꠡ꠆ꠔꠞ ꠉꠦꠍꠦ ꠞꠣꠈꠣꠔ ꠖꠦꠄ, ꠀꠞ ꠅꠉꠥ ꠝꠞꠤꠎꠣꠄ, ꠎꠈꠝ ꠅꠁꠎꠣꠄ ꠛꠣ ꠀꠞꠣꠁꠎꠣꠄ, ꠅꠁꠟꠦ ꠄꠞ ꠇꠥꠘꠥ ꠡꠣꠇ꠆ꠇꠤ ꠘꠣ ꠝꠤꠟꠦ,
EXO 22:11 ꠔꠦ ꠅꠃ ꠉꠤꠞꠡ꠆ꠔꠦ ꠘꠤꠎꠦꠃ ꠎꠦꠘ ꠁꠔꠣ ꠇꠞꠍꠦ ꠘꠣ, ꠁꠐꠣ ꠢꠦ ꠝꠣꠛꠥꠖꠞ ꠍꠣꠝꠘꠦ ꠉꠤꠀ ꠇꠍꠝ ꠇꠞꠤꠀ ꠝꠤꠐ-ꠝꠣꠐ ꠇꠞꠛ। ꠁ ꠙꠡꠥꠞ ꠝꠣꠟꠤꠇꠦꠅ ꠁꠈꠣꠘ ꠝꠣꠘꠔꠦ ꠅꠁꠛ, ꠔꠣꠁꠘ ꠇꠥꠘꠥ ꠈꠦꠔꠤ-ꠙꠥꠞꠘ ꠙꠣꠁꠔꠣ ꠘꠣꠄ।
EXO 22:12 ꠅꠁꠟꠦ ꠁ ꠉꠤꠞꠡ꠆ꠔꠞ ꠉꠦꠍ ꠕꠣꠇꠤ ꠎꠥꠖꠤ ꠁꠐꠣ ꠌꠥꠞꠤ ꠅꠁꠎꠣꠄ, ꠔꠦ ꠝꠣꠟꠤꠇꠦ ꠈꠦꠔꠤ-ꠙꠥꠞꠘ ꠙꠣꠁꠛ।
EXO 22:13 ꠎꠥꠖꠤ ꠇꠥꠘꠥ ꠎꠋꠟꠤ ꠎꠣꠘꠥꠀꠞꠦ ꠗꠞꠤꠀ ꠁꠉꠥꠞꠦ ꠝꠣꠞꠤꠟꠣꠄ, ꠔꠣꠁꠟꠦ ꠄꠞ ꠙꠞꠝꠣꠘꠞ ꠟꠣꠉꠤ ꠅꠉꠥꠞ ꠚꠣꠞꠣ-ꠍꠤꠠꠣ ꠐꠥꠇꠞꠣꠁꠘ ꠀꠘꠤꠀ ꠖꠦꠈꠣꠘꠤ ꠟꠣꠉꠛ। ꠔꠦꠃ ꠄꠞ ꠇꠥꠘꠥ ꠈꠦꠔꠤ-ꠙꠥꠞꠘ ꠟꠣꠉꠔ ꠘꠣꠄ।
EXO 22:14 “ꠇꠦꠃꠞꠞ ꠉꠦꠍ ꠕꠣꠇꠤ ꠈꠥꠎꠤꠀ ꠀꠘꠣ ꠇꠥꠘꠥ ꠙꠡꠥ ꠎꠥꠖꠤ ꠝꠣꠟꠤꠇꠞ ꠀꠚꠞꠈꠦ ꠎꠈꠝ ꠅꠄ ꠛꠣ ꠝꠞꠤꠎꠣꠄ, ꠔꠦ ꠎꠦꠁꠘ ꠈꠥꠎꠤꠀ ꠀꠘꠍꠂꠘ, ꠄꠁꠘ ꠄꠞ ꠈꠦꠔꠤ-ꠙꠥꠞꠘ ꠖꠤꠛꠣ।
EXO 22:15 ꠅꠁꠟꠦ ꠝꠣꠟꠤꠇꠞ ꠍꠣꠝꠘꠦꠃ ꠎꠥꠖꠤ ꠅꠃꠟꠣ ꠅꠄ, ꠔꠦ ꠈꠦꠔꠤ-ꠙꠥꠞꠘ ꠟꠣꠉꠔ ꠘꠣꠄ। ꠁ ꠙꠡꠥ ꠎꠥꠖꠤ ꠐꠦꠇꠣ ꠖꠤꠀ ꠜꠣꠠꠣ ꠇꠞꠤ ꠀꠘꠣ ꠅꠄ, ꠔꠦ ꠅꠃ ꠜꠣꠠꠣꠞ ꠐꠦꠇꠣꠃ ꠅꠁꠛ ꠄꠞ ꠈꠦꠔꠤ-ꠙꠥꠞꠘ।
EXO 22:16 “ꠛꠤꠀꠞ ꠀꠈꠔ ꠅꠁꠍꠦ ꠘꠣ, ꠅꠃꠟꠣ ꠇꠥꠘꠥ ꠡꠔꠤ ꠙꠥꠠꠤꠞꠦ ꠇꠦꠃ ꠎꠥꠖꠤ ꠝꠤꠍꠣ ꠝꠣꠔꠤꠀ ꠀꠘꠤꠀ ꠔꠣꠁꠞ ꠟꠉꠦ ꠎꠤꠘꠣ ꠇꠞꠤꠟꠣꠄ, ꠔꠣꠁꠟꠦ ꠢꠃ ꠛꠦꠐꠣꠄ ꠙꠥꠠꠤꠞ ꠛꠣꠚꠞꠦ ꠎꠞꠤꠝꠣꠘꠣ ꠖꠤꠀ ꠅꠃ ꠙꠥꠠꠤꠞꠦ ꠛꠤꠀ ꠇꠞꠔꠦ ꠅꠁꠛ।
EXO 22:17 ꠅꠁꠟꠦ ꠙꠥꠠꠤꠞ ꠛꠣꠚꠦ ꠎꠥꠖꠤ ꠔꠣꠞ ꠙꠥꠠꠤꠞꠦ ꠁ ꠙꠥꠀꠞ ꠉꠦꠍꠦ ꠛꠤꠀ ꠖꠤꠔꠦ ꠇꠥꠘꠥꠝꠘ꠆ꠔꠦꠃ ꠞꠣꠎꠤ ꠘꠣ ꠅꠄ, ꠔꠣ-ꠅ ꠁ ꠎꠞꠤꠝꠣꠘꠣ ꠖꠤꠔꠦ ꠅꠁꠛ।
EXO 22:18 “ꠇꠥꠘꠥ ꠎꠣꠖꠥꠉꠤꠞ ꠛꠦꠐꠤꠞꠦ ꠔꠥꠝꠤ ꠎꠤꠔꠣ ꠞꠣꠈꠤꠅ ꠘꠣ।
EXO 22:19 “ꠇꠥꠘꠥ ꠙꠡꠥꠞ ꠟꠉꠦ ꠇꠦꠃ ꠎꠤꠘꠣ ꠇꠞꠟꠦ, ꠔꠣꠞꠦ ꠘꠤꠌꠄ ꠎꠣꠘꠦ ꠝꠣꠞꠣ ꠅꠁꠛ।
EXO 22:20 “ꠈꠣꠟꠤ ꠝꠣꠛꠥꠖ ꠍꠣꠠꠣ ꠖꠥꠍꠞꠣ ꠇꠥꠘ꠆ꠔꠣꠞ ꠘꠣꠝꠦ ꠎꠥꠖꠤ ꠇꠦꠃ ꠇꠥꠘꠥ ꠛꠟꠤ-ꠙꠡꠣꠖ ꠖꠦꠄ, ꠔꠦ ꠔꠣꠞꠦꠅ ꠡꠦꠡ ꠇꠞꠤꠟꠔꠦ ꠅꠁꠛ।
EXO 22:21 “ꠇꠥꠘꠥ ꠜꠤꠘ-ꠖꠦꠡꠤ ꠝꠣꠘꠡꠞ ꠟꠉꠦ ꠛꠣꠖ ꠛꠦꠛꠢꠣꠞ ꠇꠞꠤꠅ ꠘꠣ, ꠔꠣꠞꠦ ꠎꠥꠟꠥꠝ ꠇꠞꠤꠅ ꠘꠣ। ꠝꠘꠅ ꠞꠣꠈꠤꠅ, ꠔꠥꠝꠞꠣꠅ ꠄꠇ ꠡꠝꠄ ꠝꠤꠡꠞ ꠖꠦꠡꠅ ꠝꠥꠍꠣꠚꠤꠞ ꠀꠍꠟꠣꠄ।
EXO 22:22 “ꠇꠥꠘꠥ ꠠꠣꠠꠤ ꠛꠦꠐꠤꠞꠦ ꠛꠣ ꠇꠥꠘꠥ ꠄꠔꠤꠝ ꠢꠥꠞꠥꠔ꠆ꠔꠣꠞꠦ ꠖꠥꠈ ꠖꠤꠅ ꠘꠣ।
EXO 22:23 ꠔꠣꠞꠣꠞꠦ ꠖꠥꠈ ꠖꠤꠟꠦ ꠔꠣꠞꠣ ꠎꠥꠖꠤ ꠇꠣꠘ꠆ꠖꠦ, ꠔꠦ ꠁ ꠇꠣꠘ꠆ꠖꠘ ꠘꠤꠌꠄ ꠀꠝꠤ ꠇꠛꠥꠟ ꠇꠞꠝꠥ।
EXO 22:24 ꠄꠔꠦ ꠀꠝꠣꠞ ꠉꠥꠍꠣ ꠅꠁꠛ ꠀꠉꠥꠁꠘ ꠛꠞꠣꠛꠞ। ꠔꠥꠝꠞꠣ ꠎꠥꠖ꠆ꠖꠔ ꠙꠠꠤꠀ ꠝꠞꠛꠣꠄ, ꠔꠥꠝꠞꠣꠞ ꠛꠃꠅ ꠠꠣꠠꠤ ꠅꠁꠛ, ꠔꠥꠝꠞꠣꠞ ꠢꠥꠞꠥꠔ꠆ꠔꠣꠁꠘꠅ ꠅꠃꠟꠣ ꠄꠔꠤꠝ ꠅꠁꠛꠣ।
EXO 22:25 “ꠔꠥꠝꠞꠣ ꠎꠥꠖꠤ ꠀꠝꠣꠞ ꠇꠥꠘꠥ ꠅꠜꠣꠛꠤ ꠛꠘ꠆ꠖꠣꠞꠦ ꠇꠞꠎ ꠖꠦꠅ, ꠔꠣꠁꠟꠦ ꠡꠥꠖꠈꠥꠞꠞ ꠟꠣꠈꠣꠘ ꠔꠣꠞ ꠉꠦꠍ ꠕꠣꠇꠤ ꠡꠥꠖ ꠘꠤꠅ ꠘꠣ।
EXO 22:26 ꠇꠦꠃꠞꠞ ꠉꠔꠞꠞ ꠌꠣꠖ꠆ꠖꠞ ꠛꠘ꠆ꠖꠇ ꠞꠣꠈꠟꠦ, ꠡꠥꠞꠥꠎ ꠒꠥꠛꠣꠞ ꠀꠉꠦꠃ ꠔꠣꠞ ꠌꠣꠖ꠆ꠖꠞ ꠚꠤꠞꠔ ꠖꠤꠟꠣꠁꠅ।
EXO 22:27 ꠇꠣꠞꠘ ꠃꠠꠤꠛꠣꠞ ꠟꠣꠉꠤ ꠅꠐꠣꠃ ꠔꠣꠞ ꠄꠇꠝꠣꠔ꠆ꠞ ꠡꠝ꠆ꠛꠟ। ꠁꠈꠣꠘ ꠘꠤꠟꠦꠉꠤ ꠢꠦ ꠇꠤꠔꠣ ꠃꠠꠤꠀ ꠢꠥꠔꠤꠛ? ꠢꠥꠘꠅ, ꠢꠦ ꠎꠥꠖꠤ ꠀꠝꠣꠞ ꠉꠦꠍꠦ ꠇꠣꠘ꠆ꠖꠦ, ꠔꠦ ꠀꠝꠤ ꠔ ꠞꠢꠝꠣꠘꠥꠞ ꠞꠢꠤꠝ, ꠀꠝꠤ ꠔꠣꠞ ꠇꠣꠘ꠆ꠖꠘ ꠢꠥꠘꠝꠥꠃ।
EXO 22:28 “ꠔꠥꠝꠤ ꠀꠟ꠆ꠟꠣꠞ ꠛꠤꠞꠥꠖ꠆ꠖꠦ ꠝꠣꠔꠤꠅ ꠘꠣ, ꠔꠥꠝꠣꠞ ꠇꠥꠘꠥ ꠛꠤꠌꠣꠞꠇ-ꠡꠣꠟꠤꠡꠞꠦꠅ ꠛꠖ꠆ꠖꠥꠀ ꠖꠤꠅ ꠘꠣ।
EXO 22:29 “ꠔꠥꠝꠞꠣꠞ ꠈꠦꠔꠞ ꠚꠡꠟ ꠛꠣ ꠀꠋꠉꠥꠞꠞ ꠡꠞꠛꠔꠞ ꠎꠦ ꠛꠣꠐ ꠀꠝꠣꠞꠦ ꠖꠤꠛꠣꠞ ꠇꠕꠣ, ꠀꠝꠣꠞ ꠁ ꠛꠣꠐ ꠖꠤꠔꠦ ꠖꠦꠞꠤ ꠇꠞꠤꠅ ꠘꠣ। ꠔꠥꠝꠞꠣ ꠢꠇꠟꠞ ꠛꠠ ꠙꠥꠀꠂꠘ ꠀꠝꠣꠞꠦ ꠖꠤꠟꠣꠁꠛꠣꠄ।
EXO 22:30 ꠔꠥꠝꠞꠣꠞ ꠉꠞꠥ-ꠛꠣꠍꠥꠞ ꠀꠞ ꠍꠣꠉꠟ-ꠝꠦꠠꠣꠞ ꠟꠣꠉꠤꠅ ꠅꠃ ꠄꠇ ꠡꠝꠣꠘ ꠢꠥꠇꠥꠝ। ꠁꠔꠣꠞ ꠢꠇꠟ ꠛꠠ ꠝꠦꠖꠣ ꠛꠣꠁꠌ꠆ꠌꠣꠁꠘ ꠡꠣꠔꠖꠤꠘ ꠙꠞ꠆ꠎꠘ꠆ꠔ ꠔꠣꠞꠣꠞ ꠝꠣʼꠞ ꠉꠦꠍꠦ ꠞꠁꠛꠣ, ꠀꠐ ꠖꠤꠘꠞ ꠖꠤꠘ ꠀꠝꠣꠞꠦ ꠖꠤꠟꠣꠁꠛꠣꠄ।
EXO 22:31 “ꠔꠥꠝꠞꠣꠃ ꠅꠁꠛꠣꠄ ꠀꠝꠣꠞ ꠙꠣꠇ-ꠙꠛꠤꠔ꠆ꠞ ꠛꠘ꠆ꠖꠣ। ꠎꠋꠟꠤ ꠎꠣꠘꠥꠀꠞꠦ ꠝꠣꠞꠤꠀ ꠚꠣꠟꠣꠁꠍꠦ, ꠁꠟꠣ ꠇꠥꠘꠥ ꠎꠣꠘꠖꠣꠞꠞ ꠉꠥꠡ꠆ꠔ ꠔꠥꠝꠞꠣ ꠈꠣꠁꠅ ꠘꠣ; ꠁꠔꠣ ꠇꠥꠇꠥꠞꠞꠦ ꠈꠣꠅꠀꠁꠅ।
EXO 23:1 “ꠔꠥꠝꠞꠣ ꠝꠤꠍꠣ ꠇꠥꠘꠥ ꠛꠖꠘꠣꠝ ꠛꠣꠞ ꠇꠞꠤꠅ ꠘꠣ। ꠙꠇ꠆ꠇꠙꠣꠔꠤ ꠇꠞꠤ ꠝꠤꠍꠣ ꠡꠣꠇ꠆ꠇꠤ ꠖꠤꠀ ꠇꠥꠘꠥ ꠈꠛꠤꠍ ꠝꠣꠘꠡꠞꠦ ꠡꠣꠁꠎ꠆ꠎ ꠇꠞꠤꠅ ꠘꠣ।
EXO 23:2 ꠡꠝꠣꠎꠞ ꠖꠡꠎꠘꠦ ꠅꠁꠘ꠆ꠘꠣꠄ ꠇꠞꠦꠞ ꠖꠦꠈꠤꠀ ꠔꠥꠝꠤꠅ ꠅꠃꠟꠣ ꠇꠞꠤꠅ ꠘꠣ। ꠇꠥꠘꠥ ꠝꠣꠝꠟꠣ-ꠝꠇꠖ꠆ꠖꠝꠣꠞ ꠡꠣꠇ꠆ꠇꠤ ꠖꠦꠅꠀꠔ ꠉꠤꠀ, ꠡꠇ꠆ꠔꠤꠀꠟꠣ ꠖꠟꠞ ꠙꠇ꠆ꠇ ꠟꠁꠀ ꠅꠁꠘ꠆ꠘꠣꠄ ꠇꠣꠝ ꠇꠞꠤꠅ ꠘꠣ।
EXO 23:3 ꠀꠞ ꠇꠥꠘꠥ ꠉꠞꠤꠛꠞ ꠛꠤꠌꠣꠞꠅ ꠉꠤꠀ, ꠢꠦ ꠉꠞꠤꠛ ꠉꠔꠤꠇꠦꠃ ꠔꠣꠞ ꠙꠇ꠆ꠇ ꠟꠁꠅ ꠘꠣ।
EXO 23:4 “ꠔꠥꠝꠣꠞ ꠖꠥꠡꠝꠘꠞ ꠇꠥꠘꠥ ꠉꠞꠥ-ꠉꠣꠗꠣꠞꠦ ꠛꠦ-ꠙꠕꠦ ꠎꠣꠅꠀꠔ ꠖꠦꠈꠟꠦ, ꠁꠐꠣ ꠚꠤꠞꠣꠁꠀ ꠀꠘꠤꠀ ꠔꠣꠞ ꠉꠦꠍꠦ ꠖꠤꠅ।
EXO 23:5 ꠔꠥꠝꠣꠞꠦ ꠁꠋꠡꠣ ꠇꠞꠦ ꠁꠟꠣ ꠇꠥꠘꠥ ꠝꠣꠘꠡꠞ ꠉꠣꠗꠣꠞꠦ ꠜꠣꠞꠞ ꠔꠟꠦ ꠙꠠꠤꠉꠦꠍꠦ ꠖꠦꠈꠟꠦ, ꠔꠣꠞꠦ ꠁꠟꠣ ꠚꠣꠟꠣꠁꠀ ꠎꠣꠁꠅ ꠘꠣ। ꠅꠃ ꠉꠣꠗꠣꠞꠦ ꠔꠥꠟꠣꠔ ꠔꠥꠝꠤ ꠅꠛꠡ꠆ꠡꠁ ꠡꠣꠁꠎ꠆ꠎ ꠇꠞꠛꠣꠄ।
EXO 23:6 “ꠇꠥꠘꠥ ꠉꠞꠤꠛꠞ ꠝꠣꠝꠟꠣ-ꠝꠇꠖ꠆ꠖꠝꠣꠔ ꠅꠁꠘ꠆ꠘꠣꠄ ꠡꠣꠟꠤꠡꠤ ꠇꠞꠤꠅ ꠘꠣ।
EXO 23:7 ꠢꠣꠎꠣꠁꠟ ꠝꠤꠍꠣ ꠝꠣꠝꠟꠣ ꠕꠣꠇꠤ ꠢꠞꠤꠀ ꠞꠁꠅ। ꠇꠥꠘꠥ ꠛꠦ-ꠇꠍꠥꠞ ꠛꠣ ꠘꠤ-ꠅꠙꠞꠣꠗꠤ ꠝꠣꠘꠡꠞꠦ ꠝꠃꠔꠞ ꠡꠣꠎꠣ ꠖꠤꠅ ꠘꠣ। ꠎꠦꠉꠤꠄ ꠁꠟꠣ ꠅꠁꠘ꠆ꠘꠣꠄ ꠇꠞꠛ, ꠔꠣꠞꠦ ꠀꠝꠤ ꠍꠣꠠꠔꠣꠝ ꠘꠣꠄ।
EXO 23:8 ꠊꠥꠡ ꠈꠣꠁꠅ ꠘꠣ, ꠇꠣꠞꠘ ꠊꠥꠡꠦ ꠌꠃꠈ ꠀꠟꠣ ꠝꠣꠘꠡꠞꠦꠅ ꠀꠘ꠆ꠖꠣ ꠇꠞꠤꠟꠣꠄ। ꠊꠥꠡꠦ ꠜꠣꠟꠣ ꠝꠣꠘꠡꠞ ꠝꠣꠔꠞ ꠝꠣꠎꠦꠅ ꠙꠦꠌ ꠟꠣꠉꠣꠁ ꠖꠦꠄ।
EXO 23:9 “ꠇꠥꠘꠥ ꠜꠤꠘ-ꠖꠦꠡꠤ ꠝꠣꠘꠡꠞ ꠃꠙꠞꠦ ꠎꠥꠟꠥꠝ ꠇꠞꠤꠅ ꠘꠣ। ꠝꠥꠍꠣꠚꠤꠞꠞ ꠢꠣꠟ-ꠢꠇꠤꠇꠔ ꠔ ꠔꠥꠝꠞꠣ ꠎꠣꠘ, ꠇꠣꠞꠘ ꠔꠥꠝꠞꠣꠅ ꠝꠤꠡꠞ ꠖꠦꠡꠅ ꠝꠥꠍꠣꠚꠤꠞ ꠀꠍꠟꠣꠄ।
EXO 23:10 “ꠔꠥꠝꠞꠣ ꠄꠇꠟꠣꠉꠣꠞꠦ ꠍꠄ ꠛꠞꠍ ꠎꠝꠤꠘꠅ ꠈꠦꠔ ꠇꠞꠤꠅ ꠀꠞ ꠚꠡꠟ ꠇꠣꠐꠤꠅ,
EXO 23:11 ꠛꠣꠖꠦ ꠡꠣꠔ ꠘꠝ꠆ꠛꠞ ꠛꠞꠍꠅ ꠎꠝꠤꠘꠅ ꠇꠥꠘꠥ ꠈꠦꠔ ꠘꠣ ꠇꠞꠤꠀ ꠙꠔꠤꠔ ꠞꠣꠈꠤꠅ, ꠎꠝꠤꠘꠞꠦ ꠀꠞꠣꠝ ꠖꠤꠅ। ꠄꠔꠦ ꠎꠝꠤꠘꠅ ꠄꠝꠘꠦꠃ ꠎꠦꠔꠣ ꠚꠟꠤꠛ, ꠅꠔꠣ ꠔꠥꠝꠞꠣꠞ ꠉꠞꠤꠛ ꠅꠇꠟꠦ ꠈꠣꠁꠀ ꠛꠣꠌꠤꠛꠣ। ꠔꠣꠞꠣ ꠘꠦꠅꠀꠞ ꠛꠣꠖꠦ ꠎꠦꠔꠣ ꠙꠠꠤ ꠞꠁꠛ, ꠁꠔꠣ ꠎꠋꠟꠤ ꠙꠡꠥ-ꠙꠣꠈꠤꠘ꠆ꠔꠦ ꠈꠣꠁꠛꠣ। ꠔꠥꠝꠞꠣꠞ ꠀꠋꠉꠥꠞꠞ ꠛꠣꠉꠣꠘ ꠛꠣ ꠎꠄꠔꠥꠘ ꠛꠣꠉꠣꠘꠞ ꠟꠣꠉꠤꠅ ꠅꠃ ꠢꠥꠇꠥꠝ ꠝꠣꠘꠤꠅ।
EXO 23:12 “ꠔꠥꠝꠞꠣ ꠢꠣꠙ꠆ꠔꠣꠔ ꠍꠄ ꠖꠤꠘ ꠇꠣꠝ ꠇꠞꠤꠅ, ꠅꠁꠟꠦ ꠡꠣꠔ ꠘꠝ꠆ꠛꠞ ꠖꠤꠘ ꠔ ꠎꠥꠝ꠆ꠝꠣꠛꠣꠞ, ꠁꠖꠤꠘ ꠇꠥꠘ꠆ꠔꠣ ꠇꠞꠤꠅ ꠘꠣ। ꠔꠦꠃ ꠔꠥꠝꠞꠣꠞ ꠉꠞꠥ-ꠉꠣꠗꠣꠄ ꠎꠤꠞꠣꠁꠛꠣ, ꠀꠞ ꠔꠥꠝꠞꠣꠞ ꠛꠣꠠꠤꠔ ꠎꠘꠝꠤꠍꠦ ꠁ ꠉꠥꠟꠣꠝ ꠀꠞ ꠝꠥꠍꠣꠚꠤꠞ ꠅꠇꠟꠞ ꠎꠣꠘꠦꠅ ꠀꠞꠣꠝ ꠙꠣꠁꠛ।
EXO 23:13 “ꠀꠝꠤ ꠔꠥꠝꠞꠣꠞꠦ ꠎꠦꠔꠣ ꠢꠥꠇꠥꠝ ꠖꠤꠟꠣꠝ, ꠁꠔꠣ ꠈꠥꠛ ꠢꠥꠡꠤꠀꠞ ꠅꠁꠀ ꠀꠝꠟ ꠇꠞꠤꠅ। ꠇꠥꠘꠥ ꠖꠦꠛꠔꠣꠞ ꠘꠣꠝ ꠝꠥꠈꠅ ꠟꠁꠅ ꠘꠣ, ꠁꠔꠣꠞ ꠘꠣꠝ ꠎꠣꠘꠥ ꠔꠥꠝꠞꠣꠞ ꠝꠥꠈꠅ ꠘꠣ ꠢꠥꠘꠣ ꠎꠣꠄ।
EXO 23:14 “ꠔꠥꠝꠞꠣ ꠙꠞꠔꠦꠇ ꠛꠞꠍ ꠔꠤꠘꠛꠣꠞ ꠀꠝꠣꠞ ꠘꠣꠝꠦ ꠁꠖ ꠀꠖꠣꠄ ꠇꠞꠤꠅ।
EXO 23:15 ꠙꠄꠟꠣ, ꠈꠣꠝꠤꠞ ꠍꠣꠠꠣ ꠞꠥꠐꠤꠞ ꠁꠖ ꠀꠖꠣꠄ ꠇꠞꠤꠅ। ꠀꠝꠤ ꠎꠦꠟꠣ ꠢꠥꠇꠥꠝ ꠇꠞꠍꠤ, ꠄꠇ꠆ꠇꠦꠞꠦ ꠅꠃ ꠟꠣꠈꠣꠘ ꠀꠛꠤꠛ ꠌꠣꠘ꠆ꠖꠞ ꠡꠣꠔꠖꠤꠘ ꠈꠣꠝꠤꠞ ꠍꠣꠠꠣ ꠞꠥꠐꠤ ꠈꠣꠁꠅ, ꠇꠣꠞꠘ ꠅꠃ ꠌꠣꠘ꠆ꠖꠅ ꠔꠥꠝꠞꠣ ꠝꠤꠡꠞ ꠕꠣꠇꠤ ꠛꠣꠞ ꠅꠁꠀ ꠀꠁꠍꠟꠣꠄ। ꠁꠖꠞ ꠡꠝꠄ ꠟꠤꠟ꠆ꠟꠣ-ꠍꠖꠉꠣ ꠍꠣꠠꠣ ꠔꠥꠝꠞꠣꠞ ꠇꠦꠃ ꠎꠣꠘꠥ ꠈꠣꠟꠤ ꠀꠔꠦ ꠀꠝꠣꠞ ꠉꠦꠍꠦ ꠘꠣ ꠀꠄ।
EXO 23:16 ꠖꠥꠍꠞꠣ, ꠔꠥꠝꠞꠣ ꠚꠡꠟ ꠖꠣꠅꠀꠞ ꠁꠖ ꠝꠣꠘꠤꠅ। ꠈꠦꠔꠞ ꠝꠣꠎꠦ ꠔꠥꠝꠞꠣ ꠎꠦꠔꠣ ꠞꠥꠁꠍ, ꠁꠔꠣ ꠖꠣꠅꠀꠞ ꠛꠣꠖꠦ ꠙꠄꠟꠣ ꠚꠡꠟ ꠖꠤꠀꠃ ꠁꠖ ꠇꠞꠤꠅ। ꠔꠤꠍꠞꠣ ꠁꠖ, ꠛꠍꠞꠞ ꠢꠦꠡ ꠌꠣꠘ꠆ꠖꠅ ꠛꠣꠉꠣꠘꠞ ꠙꠣꠇꠘꠣ ꠚꠟ ꠛꠣꠠꠤꠔ ꠀꠘꠣꠞ ꠛꠣꠖꠦ ꠒꠦꠞꠣ-ꠊꠞꠞ ꠁꠖ ꠇꠞꠤꠅ।
EXO 23:17 ꠅꠃ ꠔꠤꠘꠅ ꠁꠖꠞ ꠡꠝꠄ, ꠛꠍꠞꠅ ꠔꠤꠘꠛꠣꠞ ꠔꠥꠝꠞꠣꠞ ꠢꠇꠟ ꠛꠦꠐꠣꠁꠘ ꠀꠁꠀ ꠢꠎ ꠇꠞꠣꠞ ꠘꠤꠅꠔꠦ ꠀꠝꠤ ꠀꠟ꠆ꠟꠣ ꠝꠣꠟꠤꠇꠞ ꠍꠣꠝꠘꠦ ꠀꠎꠤꠞ ꠅꠁꠅ।
EXO 23:18 “ꠔꠥꠝꠞꠣ ꠎꠦꠛꠟꠣ ꠀꠝꠣꠞ ꠘꠣꠝꠦ ꠙꠡꠥ ꠇꠥꠞꠛꠣꠘꠤ ꠖꠦꠅ, ꠅꠃ ꠡꠝꠄ ꠈꠣꠝꠤꠞ ꠀꠟꠣ ꠇꠥꠘꠥꠎꠣꠔ ꠞꠥꠐꠤ ꠁꠔꠣꠞ ꠟꠉꠦ ꠙꠥꠞꠣꠁꠀ ꠟꠤꠟ꠆ꠟꠣ ꠖꠤꠅ ꠘꠣ। ꠁꠖꠞ ꠡꠝꠄ ꠀꠝꠣꠞ ꠘꠣꠝꠦ ꠎꠦꠔꠣ ꠙꠡꠥ ꠇꠥꠞꠛꠣꠘꠤ ꠖꠤꠛꠣꠄ, ꠁꠔꠣꠞ ꠌꠞ꠆ꠛꠤꠀꠟꠣ ꠐꠥꠇꠞꠣꠁꠘ ꠛꠤꠀꠘ ꠙꠞ꠆ꠎꠘ꠆ꠔ ꠞꠣꠈꠤꠅ ꠘꠣ।
EXO 23:19 ꠔꠥꠝꠞꠣꠞ ꠈꠦꠔꠞ ꠢꠇꠟ ꠕꠣꠇꠤ ꠜꠣꠟꠣ ꠚꠡꠟ, ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠊꠞꠅ ꠀꠘꠤꠅ। “ꠀꠞ ꠢꠥꠘꠅ, ꠇꠥꠘꠥ ꠍꠣꠉꠟꠞ ꠛꠣꠁꠌ꠆ꠌꠣꠞ ꠉꠥꠡ꠆ꠔ ꠔꠣꠞ ꠝꠣʼꠞ ꠖꠥꠗ ꠖꠤꠀ ꠞꠣꠘ꠆ꠖꠤꠅ ꠘꠣ।
EXO 23:20 “ꠀꠝꠤ ꠔꠥꠝꠞꠣꠞ ꠟꠣꠉꠤ ꠎꠦ ꠎꠣꠉꠣ ꠎꠥꠁꠔ ꠇꠞꠤ ꠞꠣꠈꠍꠤ, ꠢꠘꠅ ꠔꠥꠝꠞꠣꠞꠦ ꠢꠦꠚꠣꠎꠔꠦ ꠙꠃꠍꠣꠘꠤꠞ ꠟꠣꠉꠤ, ꠀꠝꠤ ꠔꠥꠝꠞꠣꠞ ꠀꠉꠦ ꠀꠉꠦ ꠄꠇꠎꠘ ꠚꠤꠞꠤꠡ꠆ꠔꠣ ꠙꠣꠑꠣꠁꠝꠥ।
EXO 23:21 ꠔꠥꠝꠞꠣ ꠄꠘ ꠇꠕꠣ ꠝꠘ ꠖꠤꠀ ꠢꠥꠘꠤꠅ ꠀꠞ ꠝꠣꠘꠤꠅ, ꠄꠘ ꠟꠉꠦ ꠔ ꠀꠝꠤꠅ ꠀꠍꠤ। ꠢꠥꠡꠤꠀꠞ ꠞꠁꠅ, ꠄꠘ ꠛꠤꠞꠥꠖ꠆ꠖꠦ ꠎꠣꠁꠅ ꠘꠣ। ꠀꠞꠘꠣꠄ ꠄꠁꠘ ꠔꠥꠝꠞꠣꠞ ꠅꠙꠞꠣꠗ ꠝꠣꠚ ꠇꠞꠔꠣ ꠘꠣꠄ।
EXO 23:22 ꠅꠁꠟꠦ ꠔꠥꠝꠞꠣ ꠎꠥꠖꠤ ꠄꠘ ꠢꠥꠇꠥꠝ ꠝꠣꠘꠅ, ꠀꠞ ꠀꠝꠤ ꠎꠦꠟꠣ ꠇꠁꠍꠤ ꠅꠃꠟꠣ ꠌꠟꠅ, ꠔꠣꠁꠟꠦ ꠔꠥꠝꠞꠣꠞ ꠖꠥꠡꠝꠘꠞ ꠟꠉꠦ ꠀꠝꠤ ꠖꠥꠡꠝꠘꠤ ꠇꠞꠝꠥ, ꠎꠦꠞꠣ ꠔꠥꠝꠞꠣꠞ ꠛꠤꠞꠥꠖ꠆ꠖꠦ ꠟꠣꠉꠛ, ꠀꠝꠤ ꠔꠣꠞꠣꠞ ꠛꠤꠞꠥꠖ꠆ꠖꠦ ꠟꠣꠉꠝꠥ।
EXO 23:23 ꠀꠝꠥꠞꠤ, ꠢꠤꠐ꠆ꠐꠤ, ꠚꠣꠞꠤꠎꠤ, ꠇꠦꠘꠣꠘꠤ, ꠢꠤꠛ꠆ꠛꠤ ꠀꠞ ꠎꠤꠛꠥꠎꠤ ꠅꠇꠟꠞ ꠖꠦꠡꠅ ꠀꠝꠣꠞ ꠚꠤꠞꠤꠡ꠆ꠔꠣꠄ ꠔꠥꠝꠞꠣꠞꠦ ꠘꠤꠀ ꠢꠣꠞꠣꠁꠛꠣ। ꠀꠝꠤ ꠔꠣꠞꠣ ꠢꠇꠟꠐꠤꠞꠦ ꠛꠤꠘꠣꠡ ꠇꠞꠤꠟꠤꠝꠥ।
EXO 23:24 ꠔꠥꠝꠞꠣ ꠔꠣꠞꠣꠞ ꠖꠦꠛꠔꠣꠞꠦ ꠙꠥꠎꠣ ꠇꠞꠤꠅ ꠘꠣ, ꠈꠦꠎꠝꠔꠅ ꠇꠞꠤꠅ ꠘꠣ, ꠀꠞ ꠢꠤꠘꠞ ꠝꠣꠘꠡꠦ ꠎꠦꠔꠣ ꠇꠞꠂꠘ ꠔꠥꠝꠞꠣ ꠁꠔꠣ ꠇꠞꠤꠅ ꠘꠣ। ꠔꠥꠝꠞꠣ ꠔꠣꠞꠣꠞ ꠖꠦꠛ-ꠖꠦꠛꠤꠞ ꠝꠥꠞ꠆ꠔꠤꠘ ꠀꠞ ꠔꠣꠞꠣꠞ ꠙꠥꠎꠣꠞ ꠝꠘ꠆ꠒꠙ ꠅꠇꠟ ꠜꠣꠋꠉꠤꠀ ꠌꠥꠞꠝꠣꠞ ꠇꠞꠤꠟꠤꠅ।
EXO 23:25 ꠔꠥꠝꠞꠣ ꠈꠣꠟꠤ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣ, ꠝꠣꠘꠤ ꠀꠝꠣꠞ ꠄꠛꠣꠖꠔ ꠇꠞꠤꠅ। ꠔꠦꠃ ꠔꠥꠝꠞꠣꠞ ꠞꠤꠎꠦꠇꠞ ꠝꠣꠎꠦ ꠞꠢꠝꠔ ꠖꠤꠝꠥ, ꠀꠞ ꠔꠥꠝꠞꠣꠞ ꠢꠇ꠆ꠇꠟ ꠛꠦꠝꠣꠞ-ꠀꠎꠣꠞ ꠖꠥꠞ ꠇꠞꠝꠥ।
EXO 23:26 ꠔꠥꠝꠞꠣꠞ ꠖꠦꠡꠞ ꠇꠥꠘꠥ ꠛꠦꠐꠤꠞ ꠙꠦꠐꠞ ꠢꠥꠞꠥꠔ꠆ꠔꠣ ꠘꠡ꠆ꠐ ꠅꠁꠔ ꠘꠣꠄ, ꠇꠦꠃ ꠀꠐꠈꠥꠞꠣ ꠞꠁꠔ ꠘꠣꠄ। ꠀꠝꠤ ꠔꠥꠝꠞꠣꠞꠦ ꠙꠥꠞꠣꠙꠥꠞ ꠢꠣꠄꠀꠔꠤ ꠙꠞ꠆ꠎꠘ꠆ꠔ ꠛꠣꠌꠣꠁꠀ ꠞꠣꠈꠝꠥ।
EXO 23:27 ꠔꠥꠝꠞꠣ ꠎꠔ ꠎꠣꠔꠤꠞ ꠇꠣꠍꠣꠔ ꠎꠣꠁꠛꠣꠄ, ꠔꠣꠞꠣꠞ ꠖꠤꠟꠞ ꠝꠣꠎꠦ ꠀꠉ ꠕꠣꠇꠤ ꠀꠝꠣꠞ ꠒꠞ-ꠈꠚ ꠙꠄꠖꠣ ꠇꠞꠝꠥ, ꠔꠣꠞꠣꠞꠦ ꠛꠦꠖꠤꠡꠣ ꠛꠣꠘꠣꠁꠟꠤꠝꠥ। ꠔꠥꠝꠞꠣꠞ ꠢꠇ꠆ꠇꠟ ꠖꠥꠡꠝꠘ ꠈꠞꠦꠖꠤ ꠜꠣꠉꠤꠛꠣ।
EXO 23:28 ꠢꠤꠛ꠆ꠛꠤ, ꠇꠦꠘꠣꠘꠤ ꠀꠞ ꠢꠤꠐ꠆ꠐꠤ ꠅꠇꠟꠞꠦ ꠔꠥꠝꠞꠣꠞ ꠍꠣꠝꠘꠣ ꠕꠣꠇꠤ ꠈꠦꠖꠣꠁꠛꠣꠞ ꠟꠣꠉꠤ, ꠀꠝꠤ ꠔꠥꠝꠞꠣꠞ ꠀꠉꠦ ꠇꠞꠤ ꠜꠤꠋꠉꠥꠟꠞ ꠙꠣꠟ ꠙꠣꠑꠣꠁꠝꠥ।
EXO 23:29 ꠅꠁꠟꠦ ꠀꠝꠤ ꠔꠣꠞꠣ ꠢꠇ꠆ꠇꠟꠞꠦ ꠄꠇꠁ ꠛꠍꠞꠞ ꠜꠤꠔꠞꠦ ꠈꠦꠖꠣꠁꠔꠣꠝ ꠘꠣꠄ, ꠀꠞꠘꠣꠄ ꠀꠡ꠆ꠔꠣ ꠖꠦꠡ ꠙꠔꠤꠔ ꠞꠁꠀ ꠎꠋꠟꠤ ꠎꠣꠘꠥꠀꠞꠦ ꠜꠞꠤꠎꠤꠛꠣ, ꠛꠣꠖꠦ ꠁꠔꠣꠄ ꠔꠥꠝꠞꠣꠞꠦ ꠍꠣꠔꠣꠁꠛꠣ।
EXO 23:30 ꠀꠝꠤ ꠀꠡ꠆ꠔꠦ ꠀꠡ꠆ꠔꠦ ꠔꠣꠞꠣꠞꠦ ꠈꠦꠖꠣꠁꠝꠥ, ꠀꠞ ꠔꠥꠝꠞꠣꠞ ꠝꠣꠘꠥꠡ ꠛꠣꠠꠤꠀ ꠀꠡ꠆ꠔꠣ ꠖꠦꠡ ꠀꠛꠣꠖ ꠇꠞꠛꠣꠄ।
EXO 23:31 ꠀꠝꠤ ꠘꠤꠟ ꠖꠞꠤꠀ ꠕꠣꠇꠤ ꠚꠤꠟꠤꠡ꠆ꠔꠤꠘꠤ ꠖꠦꠡꠞ ꠡꠣꠉꠞ, ꠝꠣꠘꠤ ꠜꠥꠝꠗꠤꠅ ꠡꠣꠉꠞ ꠙꠞ꠆ꠎꠘ꠆ꠔ, ꠀꠞ ꠖꠃꠇꠘꠞ ꠝꠞꠥꠜꠥꠝꠤ ꠕꠣꠇꠤ ꠚꠥꠞꠣꠔ ꠉꠣꠋ ꠙꠞ꠆ꠎꠘ꠆ꠔ ꠔꠥꠝꠞꠣꠞ ꠖꠦꠡꠞ ꠡꠤꠝꠣꠘꠣ ꠉꠣꠠꠝꠥ। ꠁ ꠖꠦꠡꠅ ꠎꠦꠞꠣ ꠛꠡꠔ ꠇꠞꠦꠞ ꠔꠣꠞꠣꠞꠦ ꠔꠥꠝꠞꠣꠞ ꠀꠔꠅ ꠡꠙꠤꠝꠥ, ꠀꠞ ꠔꠥꠝꠞꠣ ꠔꠣꠞꠣꠞꠦ ꠁ ꠖꠦꠡ ꠕꠣꠇꠤ ꠈꠦꠖꠣꠁ ꠖꠤꠛꠣꠄ।
EXO 23:32 ꠔꠣꠞꠣꠞ ꠟꠉꠦ ꠛꠣ ꠔꠣꠞꠣꠞ ꠖꠦꠛꠔꠣ ꠅꠇꠟꠞ ꠟꠉꠦ ꠔꠥꠝꠞꠣ ꠇꠥꠘꠥ ꠌꠥꠇ꠆ꠔꠤ ꠇꠞꠤꠅ ꠘꠣ।
EXO 23:33 ꠔꠥꠝꠞꠣꠞ ꠖꠦꠡꠞ ꠜꠤꠔꠞꠦ ꠔꠣꠞꠣꠞꠦ ꠞꠁꠛꠣꠞ ꠖꠤꠅ ꠘꠣ। ꠀꠞꠘꠣꠄ ꠔꠣꠞꠣ ꠔꠥꠝꠞꠣꠞꠦ ꠀꠝꠣꠞ ꠉꠦꠍ ꠕꠣꠇꠤ ꠢꠞꠣꠁꠀ ꠉꠥꠘꠣꠞ ꠙꠕꠦ ꠐꠣꠘꠤꠀ ꠘꠤꠛꠉꠤ। ꠔꠥꠝꠞꠣ ꠎꠥꠖꠤ ꠔꠣꠞꠣꠞ ꠖꠦꠛ-ꠖꠦꠛꠤꠞ ꠙꠥꠎꠣ ꠇꠞꠅ, ꠔꠣꠁꠟꠦ ꠘꠤꠌ꠆ꠌꠤꠔ ꠔꠥꠝꠞꠣꠅ ꠔꠣꠞꠣꠞ ꠚꠣꠘ꠆ꠖꠅ ꠢꠣꠝꠣꠁꠛꠣꠄ।”
EXO 24:1 ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ, “ꠔꠥꠝꠤ ꠀꠞ ꠢꠣꠞꠥꠘ, ꠢꠣꠞꠥꠘꠞ ꠙꠥꠀꠂꠘ ꠘꠣꠖꠣꠛ ꠀꠞ ꠀꠛꠤꠢꠥ, ꠀꠞ ꠛꠘꠤ ꠁꠍꠞꠣꠁꠟꠞ ꠡꠔ꠆ꠔꠁꠞ ꠎꠘ ꠝꠥꠞꠛ꠆ꠛꠤ ꠘꠦꠔꠣ ꠀꠝꠣꠞ ꠉꠦꠍꠦ ꠃꠑꠤꠀ ꠀꠅ। ꠀꠁꠛꠣꠞ ꠛꠣꠟꠣ ꠔꠥꠝꠞꠣ ꠖꠥꠞꠁ ꠕꠣꠇꠤ ꠀꠝꠣꠞꠦ ꠍꠁꠎꠖꠣ ꠇꠞꠤꠅ।
EXO 24:2 ꠅꠁꠟꠦ ꠈꠣꠟꠤ ꠔꠥꠝꠤ ꠄꠇꠟꠣ ꠀꠝꠣꠞ ꠇꠣꠍꠣꠔ ꠃꠙꠞꠦ ꠀꠁꠛꠣꠄ, ꠀꠞ ꠇꠦꠃ ꠘꠣꠄ। ꠄꠞꠣꠞ ꠟꠉꠦ ꠀꠞ ꠇꠥꠘꠥ ꠛꠘꠤ ꠁꠍꠞꠣꠁꠟ ꠎꠣꠘꠥ ꠘꠣ ꠃꠑꠦ।”
EXO 24:3 ꠝꠥꠍꠣꠄ ꠝꠣꠘꠡꠞ ꠉꠦꠍꠦ ꠀꠁꠀ ꠝꠣꠛꠥꠖꠞ ꠢꠇ꠆ꠇꠟ ꠇꠣꠟꠣꠝ ꠀꠞ ꠀꠁꠘ-ꠇꠣꠘꠥꠘ ꠢꠥꠘꠣꠁꠟꠣ, ꠁꠔꠣ ꠢꠥꠘꠤꠀ ꠢꠇꠟ ꠝꠣꠘꠡꠦ ꠄꠇꠟꠉꠦ ꠇꠁꠟꠣ, “ꠝꠣꠛꠥꠖꠦ ꠎꠔꠔꠣ ꠛꠣꠔꠣꠁꠍꠂꠘ ꠁꠔꠣ ꠢꠇ꠆ꠇꠟꠔꠣ ꠀꠝꠞꠣ ꠝꠣꠘꠝꠥ।”
EXO 24:4 ꠝꠣꠛꠥꠖꠞ ꠛꠣꠔꠣꠁꠟ ꠢꠇꠟ ꠇꠣꠟꠣꠝ ꠝꠥꠍꠣꠄ ꠟꠦꠈꠤꠀ ꠕꠁꠟꠣ। ꠛꠣꠖꠞ ꠖꠤꠘ ꠚꠎꠞꠦ ꠃꠑꠤꠀ ꠙꠣꠠꠞ ꠟꠣꠝꠣꠔ ꠄꠇꠈꠣꠘ ꠇꠥꠞꠛꠣꠘꠤ ꠈꠣꠘꠣ ꠛꠣꠘꠣꠁꠟꠣ, ꠀꠞ ꠛꠘꠤ ꠁꠍꠞꠣꠁꠟꠞ ꠛꠣꠞꠅ ꠉꠥꠡ꠆ꠐꠤꠞꠦ ꠁꠀꠖ ꠞꠣꠈꠣꠞ ꠟꠣꠉꠤ ꠛꠣꠞꠅꠉꠥ ꠈꠥꠐꠣ ꠛꠣꠘꠣꠁꠟꠣ।
EXO 24:5 ꠛꠣꠖꠦ ꠔꠣꠁꠘ ꠛꠘꠤ ꠁꠍꠞꠣꠁꠟꠞ ꠎꠥꠀꠘ ꠅꠇꠟꠞꠦ ꠙꠣꠑꠣꠁꠟꠣ ꠀꠞ ꠔꠣꠞꠣ ꠝꠣꠛꠥꠖꠞ ꠘꠣꠝꠦ ꠛꠃꠔ ꠎꠣꠟꠣꠁꠟ ꠇꠥꠞꠛꠣꠘꠤ ꠖꠤꠟꠣ, ꠀꠞ ꠛꠃꠔ ꠛꠤꠍꠣꠟ ꠎꠛ ꠇꠞꠤꠀ ꠍꠣꠟꠣꠝꠔꠤ ꠇꠥꠞꠛꠣꠘꠤꠅ ꠖꠤꠟꠣ।
EXO 24:6 ꠝꠥꠍꠣꠄ ꠇꠥꠞꠛꠣꠘꠤꠞ ꠟꠃꠞ ꠅꠞ꠆ꠗꠦꠇ ꠘꠤꠀ ꠇꠄꠐꠣ ꠛꠣꠐꠤꠔ ꠕꠁꠟꠣ, ꠀꠞ ꠛꠣꠇꠤ ꠅꠞ꠆ꠗꠦꠇ ꠘꠤꠀ ꠇꠥꠞꠛꠣꠘꠤ ꠈꠣꠘꠣꠞ ꠃꠙꠞꠦ ꠍꠤꠐꠣꠁ ꠖꠤꠟꠣ।
EXO 24:7 ꠛꠣꠖꠦ ꠔꠣꠁꠘ ꠀꠟ꠆ꠟꠣꠞ ꠟꠉꠦ ꠝꠤꠟꠘꠞ ꠃꠍꠤꠟ꠆ꠟꠣꠞ ꠘꠤꠅꠝ-ꠇꠣꠘꠥꠘ ꠟꠦꠈꠣ ꠇꠤꠔꠣꠛꠈꠣꠘ ꠔꠤꠟꠣꠅꠔ ꠇꠞꠤ ꠝꠣꠘꠡꠞꠦ ꠢꠥꠘꠣꠁꠟꠣ। ꠁꠔꠣ ꠢꠥꠘꠤꠀ ꠝꠣꠘꠡꠦ ꠎꠥꠀꠙ ꠖꠤꠟꠣ, “ꠀꠝꠞꠣ ꠝꠣꠛꠥꠖꠞ ꠢꠇꠟ ꠢꠥꠇꠥꠝ ꠢꠥꠘꠝꠥ, ꠔꠣꠁꠘ ꠎꠔꠔꠣ ꠇꠁꠍꠂꠘ ꠢꠇꠟꠔꠣ ꠝꠣꠘꠝꠥ।”
EXO 24:8 ꠅꠈꠣꠘ ꠢꠥꠘꠤꠀ ꠝꠥꠍꠣꠄ ꠟꠃ ꠟꠁꠀ ꠝꠣꠘꠡꠞ ꠃꠙꠞꠦ ꠍꠤꠐꠣꠁꠀ ꠇꠁꠟꠣ, “ꠁ ꠟꠃ ꠅꠁꠟ ꠀꠟ꠆ꠟꠣꠁ ꠝꠤꠟꠘꠞ ꠢꠃ ꠃꠍꠤꠟ꠆ꠟꠣꠞ ꠟꠃ, ꠎꠦ ꠃꠍꠤꠟ꠆ꠟꠣ ꠝꠣꠛꠥꠖꠦ ꠔꠣꠘ ꠢꠇꠟ ꠡꠞ꠆ꠔ ꠝꠣꠚꠤꠇ ꠔꠥꠝꠞꠣꠞ ꠟꠉꠦ ꠛꠅꠀꠁꠟ ꠇꠞꠍꠂꠘ।”
EXO 24:9 ꠔꠦꠃ ꠝꠥꠍꠣ, ꠢꠣꠞꠥꠘ, ꠘꠣꠖꠣꠛ, ꠀꠛꠤꠢꠥ ꠀꠞ ꠛꠘꠤ ꠁꠍꠞꠣꠁꠟꠞ ꠡꠔ꠆ꠔꠁꠞ ꠎꠘ ꠝꠥꠞꠛ꠆ꠛꠤ ꠘꠦꠔꠣ ꠙꠣꠠꠞ ꠃꠙꠞꠦ ꠃꠑꠟꠣ।
EXO 24:10 ꠔꠣꠞꠣ ꠘꠤꠎꠞ ꠌꠃꠈꠦ ꠛꠘꠤ ꠁꠍꠞꠣꠁꠟꠞ ꠀꠟ꠆ꠟꠣ ꠙꠣꠇꠞ ꠖꠤꠖꠣꠞ ꠖꠦꠈꠟꠣ। ꠔꠣꠞꠣ ꠖꠦꠈꠟꠣ, ꠀꠟ꠆ꠟꠣꠞ ꠙꠣꠅ ꠝꠥꠛꠣꠞꠇꠞ ꠔꠟꠦ ꠀꠍꠦ, ꠌꠇꠌꠇꠣ ꠟꠤꠟ ꠝꠘꠤ ꠙꠣꠔ꠆ꠔꠞꠞ ꠔꠂꠀꠞꠤ ꠍꠣꠔꠞ ꠟꠣꠈꠣꠘ, ꠀꠍꠝꠣꠘꠞ ꠘꠝꠥꠘꠣꠄ ꠍꠣꠚ।
EXO 24:11 ꠛꠘꠤ ꠁꠍꠞꠣꠁꠟꠞ ꠝꠥꠞꠛ꠆ꠛꠤ ꠅꠇꠟꠦ ꠀꠟ꠆ꠟꠣꠞꠦ ꠖꠦꠈꠟꠦꠅ ꠔꠣꠁꠘ ꠄꠞꠣꠞꠦ ꠝꠣꠞꠣꠞ ꠟꠣꠉꠤ ꠀꠔ ꠔꠥꠟꠟꠣ ꠘꠣ। ꠔꠣꠞꠣ ꠔꠣꠘ ꠖꠤꠖꠣꠞ ꠙꠣꠁꠟꠣ ꠀꠞ ꠈꠣꠅꠀ-ꠖꠣꠅꠀ ꠇꠞꠟꠣ।
EXO 24:12 ꠛꠣꠖꠦ ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ, “ꠔꠥꠝꠤ ꠅꠃ ꠙꠣꠠꠞ ꠃꠙꠞꠦ ꠀꠝꠣꠞ ꠇꠣꠘ꠆ꠖꠣꠔ ꠀꠅ, ꠀꠁꠀ ꠇꠄꠖꠤꠘ ꠞꠅ। ꠝꠣꠘꠡꠞꠦ ꠔꠣꠟꠤꠝ ꠖꠤꠛꠣꠞ ꠟꠣꠉꠤ ꠀꠝꠣꠞ ꠎꠦ ꠢꠥꠇꠥꠝ-ꠀꠢꠇꠣꠝ ꠙꠣꠔ꠆ꠔꠞꠞ ꠃꠙꠞꠦ ꠟꠦꠈꠍꠤ, ꠅꠔꠣ ꠀꠝꠤ ꠔꠥꠝꠣꠞꠦ ꠖꠤꠝꠥ।”
EXO 24:13 ꠔꠦꠃ ꠝꠥꠍꠣꠄ ꠔꠣꠘ ꠈꠣꠖꠤꠝ ꠁꠃꠍꠣꠞꠦ ꠟꠉꠦ ꠟꠁꠀ ꠙꠣꠠꠅ ꠃꠑꠟꠣ, ꠀꠞ ꠝꠥꠍꠣ ꠀꠟ꠆ꠟꠣꠞ ꠙꠣꠠꠅ ꠉꠦꠟꠣ।
EXO 24:14 ꠔꠣꠁꠘ ꠝꠥꠞꠛ꠆ꠛꠤ ꠅꠇꠟꠞꠦ ꠇꠁꠀ ꠉꠦꠟꠣ, “ꠀꠝꠞꠣ ꠚꠤꠞꠔ ꠀꠁꠛꠣꠞ ꠀꠉ ꠙꠞ꠆ꠎꠘ꠆ꠔ ꠀꠙꠘꠣꠞꠣ ꠀꠝꠞꠣꠞ ꠟꠣꠉꠤ ꠅꠘꠅ ꠛꠣꠞ ꠌꠣꠁꠛꠣ। ꠢꠣꠞꠥꠘ ꠀꠞ ꠢꠥꠞ ꠀꠙꠘꠣꠞꠣꠞ ꠇꠣꠍꠣꠔ ꠀꠍꠂꠘ, ꠇꠥꠘꠥ ꠇꠣꠁꠎ꠆ꠎꠣ-ꠚꠍꠣꠖ ꠟꠣꠉꠟꠦ ꠄꠞꠣꠞ ꠉꠦꠍꠦ ꠎꠣꠁꠛꠣ।”
EXO 24:15 ꠝꠥꠍꠣ ꠙꠣꠠꠅ ꠃꠑꠔꠦꠃ ꠀꠡ꠆ꠔꠣ ꠙꠣꠠ ꠝꠦꠊꠞ ꠇꠣꠟꠘꠤꠄ ꠉꠥꠞꠤꠉꠦꠟ,
EXO 24:16 ꠀꠞ ꠔꠥꠞ ꠙꠣꠠꠞ ꠃꠙꠞꠦ ꠝꠣꠛꠥꠖꠞ ꠘꠥꠞꠞ ꠔꠎꠟ꠆ꠟꠤ ꠎꠣꠁꠞ ꠅꠁꠟ। ꠍꠄ ꠖꠤꠘ ꠀꠡ꠆ꠔꠣ ꠙꠣꠠ ꠇꠣꠟꠘꠤꠄ ꠉꠥꠞꠣ ꠞꠁꠟ। ꠡꠣꠔ ꠘꠝ꠆ꠛꠞ ꠖꠤꠘ ꠅꠃ ꠇꠣꠟꠘꠤ ꠕꠣꠇꠤ ꠝꠣꠛꠥꠖꠦ ꠝꠥꠍꠣꠞꠦ ꠒꠣꠇꠤꠟꠣ।
EXO 24:17 ꠛꠘꠤ ꠁꠍꠞꠣꠁꠟꠦ ꠝꠣꠛꠥꠖꠞ ꠘꠥꠞꠞ ꠔꠎꠟ꠆ꠟꠤ ꠖꠦꠈꠟꠣ, ꠔꠣꠞꠣ ꠖꠦꠈꠟꠣ ꠙꠣꠠꠞ ꠃꠙꠞꠦ ꠀꠉꠥꠘꠤꠞ ꠟꠣꠈꠣꠘ ꠎꠟꠦꠞ।
EXO 24:18 ꠙꠣꠠ ꠛꠣꠁꠀ ꠃꠑꠤ ꠃꠑꠤ ꠝꠥꠍꠣ ꠢꠃ ꠇꠣꠟꠘꠤꠞ ꠜꠤꠔꠞꠦ ꠢꠣꠝꠣꠁ ꠉꠦꠟꠣ। ꠔꠣꠁꠘ ꠌꠣꠟ꠆ꠟꠤꠡ ꠖꠤꠘ ꠌꠣꠟ꠆ꠟꠤꠡ ꠞꠣꠁꠔ ꠢꠃ ꠙꠣꠠꠅ ꠞꠁꠟꠣ।
EXO 25:1 ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ,
EXO 25:2 “ꠔꠥꠝꠤ ꠛꠘꠤ ꠁꠍꠞꠣꠁꠟꠞꠦ ꠇꠅ, ꠔꠣꠞꠣ ꠀꠝꠣꠞ ꠉꠦꠍꠦ ꠖꠣꠘ-ꠈꠄꠞꠣꠔ ꠟꠁꠀ ꠀꠎꠤꠞ ꠅꠃꠇ। ꠔꠣꠞꠣꠞ ꠘꠤꠎꠞ ꠈꠥꠡꠤꠄ ꠎꠦꠔꠣ ꠖꠣꠘ ꠇꠞꠛꠣ, ꠅꠔꠣ ꠔꠥꠝꠤ ꠡꠝꠎꠤꠀ ꠞꠣꠈꠤꠅ।
EXO 25:3 ꠔꠣꠞꠣꠞ ꠉꠦꠍ ꠕꠣꠇꠤ ꠅꠃ ꠟꠣꠈꠣꠘ ꠝꠣꠟ ꠡꠝꠎꠤꠅ: ꠡꠥꠘꠣ, ꠞꠥꠙꠣ, ꠙꠤꠔꠟ;
EXO 25:4 ꠟꠤꠟꠥꠀ, ꠛꠣꠁꠋꠉꠘꠤ, ꠟꠣꠟ ꠞꠋꠉꠞ ꠡꠥꠔꠣ; ꠖꠣꠝꠤ ꠡꠥꠔꠤ ꠇꠣꠙꠠ ꠀꠞ ꠍꠣꠉꠟꠞ ꠞꠥꠝꠣ;
EXO 25:5 ꠟꠣꠟ ꠞꠋ ꠟꠣꠉꠣꠁꠟ ꠝꠦꠠꠣꠞ ꠌꠣꠝꠠꠣ, ꠖꠞꠤꠀ ꠚꠥʼ ꠝꠣꠍꠞ ꠌꠣꠝꠠꠣ; ꠛꠣꠛꠟꠣ ꠟꠣꠇꠠꠤ;
EXO 25:6 ꠌꠦꠞꠣꠉ ꠅꠇꠟ ꠎꠣꠟꠣꠘꠤꠞ ꠟꠣꠉꠤ ꠎꠄꠔꠥꠘꠞ ꠔꠦꠟ; ꠈꠦꠟꠣꠚꠔꠤ ꠡꠝꠎꠤꠛꠣꠞ ꠔꠦꠟꠞ ꠝꠡꠟꠣ ꠀꠞ ꠀꠉꠞ-ꠈꠥꠡꠛꠄ ꠛꠣꠘꠣꠘꠤꠞ ꠝꠡꠟꠣ;
EXO 25:7 ꠁꠝꠣꠝꠞ ꠟꠦꠛꠣꠍꠞ ꠄꠚꠞꠘ ꠀꠞ ꠛꠥꠇꠥꠞ ꠃꠙꠞꠞ ꠕꠟꠤꠔ ꠟꠣꠉꠣꠘꠤꠞ ꠀꠇꠤꠇ ꠝꠘꠤ ꠀꠞ ꠛꠣꠇꠤ ꠢꠇꠟ ꠎꠣꠔꠞ ꠖꠣꠝꠤ ꠙꠣꠔ꠆ꠔꠞ।
EXO 25:8 “ꠀꠝꠣꠞ ꠞꠅꠀꠞ ꠟꠣꠉꠤ ꠔꠥꠝꠤ ꠛꠘꠤ ꠁꠍꠞꠣꠁꠟ ꠅꠇꠟꠞꠦꠖꠤ ꠙꠣꠇ-ꠙꠛꠤꠔ꠆ꠞ ꠄꠇꠈꠣꠘ ꠎꠣꠉꠣ ꠔꠂꠀꠞ ꠇꠞꠣꠁꠛꠣꠄ। ꠔꠦꠃ ꠀꠝꠤ ꠔꠣꠞꠣꠞ ꠟꠉꠦ ꠛꠡꠔ ꠇꠞꠝꠥ।
EXO 25:9 ꠀꠝꠣꠞ ꠞꠅꠀꠞ ꠊꠞ ꠀꠞ ꠝꠣꠟ-ꠍꠣꠝꠣꠘꠣꠞ ꠛꠦꠙꠣꠞꠦ ꠀꠝꠤ ꠔꠥꠝꠣꠞꠦ ꠎꠦꠟꠣ ꠘꠝꠥꠘꠣ ꠖꠦꠈꠣꠁꠝꠥ, ꠄꠇ꠆ꠇꠦꠞꠦ ꠅꠃ ꠟꠣꠈꠣꠘ ꠇꠞꠤ ꠢꠇꠟꠔꠣ ꠔꠤꠀꠞ ꠇꠞꠣꠁꠅ।
EXO 25:10 “ꠔꠣꠞꠣ ꠛꠣꠛꠟꠣ ꠟꠣꠇꠠꠤ ꠖꠤꠀ ꠄꠉꠥ ꠡꠘ꠆ꠖꠥꠇ ꠛꠣꠘꠣꠁꠛꠣ। ꠁꠐꠣ ꠟꠣꠝ꠆ꠛꠣꠄ ꠀꠠꠣꠁ ꠀꠔ, ꠖꠦꠠ ꠀꠔ ꠙꠣꠡ ꠀꠞ ꠖꠦꠠ ꠀꠔ ꠃꠌꠣ।
EXO 25:11 ꠄꠞ ꠛꠣꠞꠦ-ꠜꠤꠔꠞꠦ ꠈꠣꠐꠤ ꠡꠥꠘꠣꠖꠤ ꠟꠦꠙꠤꠀ ꠖꠤꠅ, ꠀꠞ ꠌꠣꠁꠞꠅ ꠇꠤꠘꠣꠞꠅ ꠡꠥꠘꠣꠞ ꠘꠇꠡꠣ ꠟꠣꠉꠣꠁꠅ।
EXO 25:12 ꠀꠉꠥꠁꠘꠖꠤ ꠡꠥꠘꠣ ꠉꠟꠣꠁꠀ ꠌꠣꠁꠞꠐꠣ ꠇꠠꠣ ꠄꠞ ꠌꠣꠁꠞꠅ ꠇꠥꠘꠣꠔ ꠟꠣꠉꠣꠁꠅ, ꠅꠉꠣꠟꠣꠔ ꠖꠥꠁꠐꠣ ꠀꠞ ꠢꠉꠣꠟꠣꠔ ꠖꠥꠁꠐꠣ ꠟꠣꠉꠣꠁꠅ।
EXO 25:13 ꠛꠣꠛꠟꠣ ꠟꠣꠇꠠꠤꠖꠤ ꠖꠥꠉꠥ ꠛꠦꠘ꠆ꠖꠣ ꠛꠣꠘꠣꠁꠀ ꠡꠥꠘꠣꠖꠤ ꠟꠦꠙꠤꠀ ꠖꠤꠔꠦ ꠅꠁꠛ।
EXO 25:14 ꠡꠘ꠆ꠖꠥꠇꠞꠦ ꠛꠁꠀ ꠘꠦꠅꠀꠞ ꠟꠣꠉꠤ ꠖꠥꠁꠅ ꠉꠣꠟꠣꠞ ꠇꠠꠣꠞ ꠝꠣꠎꠦꠖꠤ, ꠅꠃ ꠖꠥꠁꠅ ꠛꠦꠘ꠆ꠖꠣ ꠢꠣꠞꠣꠘꠤ ꠟꠣꠉꠛ।
EXO 25:15 ꠛꠦꠘ꠆ꠖꠣ ꠖꠥꠁꠅꠐꠣ ꠡꠘ꠆ꠖꠥꠇꠞ ꠇꠠꠣꠞ ꠜꠤꠔꠞꠦ ꠢꠣꠞꠣꠁꠟ ꠞꠁꠛ, ꠁꠉꠥꠁꠘ ꠈꠥꠟꠤꠅ ꠘꠣ।
EXO 25:16 ꠀꠝꠤ ꠀꠝꠣꠞ ꠢꠥꠇꠥꠝ-ꠀꠢꠇꠣꠝ ꠟꠦꠈꠣ ꠎꠦ ꠙꠛꠤꠔ꠆ꠞ ꠡꠣꠢꠣꠖꠔ ꠙꠣꠔ꠆ꠔꠞ ꠔꠥꠝꠣꠞꠦ ꠖꠤꠝꠥ, ꠔꠥꠝꠤ ꠁꠐꠣ ꠅꠃ ꠡꠘ꠆ꠖꠥꠇꠞ ꠜꠤꠔꠞꠦ ꠕꠁꠅ।
EXO 25:17 “ꠈꠣꠐꠤ ꠡꠥꠘꠣꠖꠤ ꠡꠘ꠆ꠖꠥꠇꠞ ꠄꠇꠈꠣꠘ ꠓꠣꠇꠘꠣ ꠛꠣꠘꠣꠁꠅ, ꠅꠈꠣꠘꠞ ꠃꠙꠞꠦ ꠉꠥꠘꠣꠞ ꠇꠚꠞꠣ ꠀꠖꠣꠄ ꠇꠞꠣ ꠅꠁꠛ। ꠁ ꠓꠣꠇꠘꠣ ꠟꠣꠝ꠆ꠛꠣꠄ ꠀꠠꠣꠁ ꠀꠔ ꠀꠞ ꠙꠣꠡꠦ ꠖꠦꠠ ꠀꠔ ꠅꠁꠛ।
EXO 25:18 ꠔꠥꠝꠤ ꠢꠃ ꠓꠣꠇꠘꠣꠞ ꠇꠤꠘꠣꠞꠅ ꠡꠥꠘꠣ ꠙꠤꠐꠣꠁꠀ ꠖꠥꠉꠥ ꠇꠣꠞꠥꠛꠤ ꠛꠣꠘꠣꠁꠅ। ꠅꠃ ꠇꠣꠞꠥꠛꠤ ꠖꠦꠈꠔꠦ ꠖꠥꠟꠖꠥꠟ ꠊꠥꠠꠣꠞ ꠟꠣꠈꠣꠘ ꠒꠣꠈꠘꠣ ꠀꠟꠣ। ꠛꠣꠘꠣꠁꠀ ꠡꠘ꠆ꠖꠥꠇꠞ ꠖꠥꠁ ꠉꠣꠟꠣꠔ ꠟꠣꠉꠣꠁꠅ, ꠅꠉꠣꠟꠣꠔ ꠄꠇꠐꠣ, ꠀꠞ ꠢꠉꠣꠟꠣꠔ ꠄꠇꠐꠣ। ꠖꠥꠁꠅ ꠇꠣꠞꠥꠛꠤ ꠓꠣꠇꠘꠣꠞ ꠟꠉꠦ ꠅꠃ ꠟꠣꠈꠣꠘ ꠇꠞꠤ ꠡꠥꠘꠣꠖꠤ ꠛꠣꠘꠣꠘꠤ ꠟꠣꠉꠛ, ꠎꠦꠐꠣ ꠀꠡ꠆ꠔꠣꠐꠣꠄ ꠈꠣꠟꠤ ꠄꠇ ꠌꠤꠎ ꠅꠄ।
EXO 25:20 ꠄꠞ ꠒꠣꠈꠘꠣ ꠖꠥꠁꠅꠈꠣꠘ ꠃꠙꠞꠦꠖꠤ ꠝꠦꠟꠣꠁꠟ ꠞꠁꠛ, ꠀꠞ ꠄꠞ ꠍꠣꠄꠀꠞ ꠔꠟꠦ ꠕꠣꠇꠛ ꠡꠘ꠆ꠖꠥꠇꠞ ꠓꠣꠇꠘꠣ। ꠖꠥꠁꠅ ꠇꠣꠞꠥꠛꠤ ꠝꠥꠈꠣꠝꠥꠈꠤ ꠃꠛꠣ ꠕꠣꠇꠛ, ꠀꠞ ꠔꠣꠞꠣꠞ ꠌꠃꠈ ꠞꠁꠛ ꠓꠣꠇꠘꠣꠞ ꠛꠣꠄ।
EXO 25:21 ꠁ ꠓꠣꠇꠘꠣꠞꠦ ꠡꠘ꠆ꠖꠥꠇꠞ ꠃꠙꠞꠦ ꠟꠣꠉꠣꠁꠅ, ꠀꠞ ꠀꠝꠣꠞ ꠢꠥꠇꠥꠝ-ꠀꠢꠇꠣꠝ ꠟꠦꠈꠣ ꠎꠦ ꠡꠣꠢꠣꠖꠔ ꠙꠣꠔ꠆ꠔꠞ ꠔꠥꠝꠣꠞꠦ ꠖꠤꠝꠥ, ꠅꠃ ꠙꠣꠔ꠆ꠔꠞ ꠔꠥꠝꠤ ꠡꠘ꠆ꠖꠥꠇꠞ ꠜꠤꠔꠞꠦ ꠕꠁꠅ।
EXO 25:22 ꠁ ꠡꠣꠢꠣꠖꠔ ꠡꠘ꠆ꠖꠥꠇꠞ ꠓꠣꠇꠘꠣꠞ ꠃꠙꠞꠦ ꠖꠥꠁꠅ ꠇꠣꠞꠥꠛꠤꠞ ꠝꠣꠎꠈꠣꠘꠅ, ꠀꠝꠤ ꠔꠥꠝꠣꠞꠦ ꠖꠤꠖꠣꠞ ꠖꠤꠝꠥ। ꠅꠃ ꠖꠤꠖꠣꠞꠞ ꠡꠝꠄ ꠛꠘꠤ ꠁꠍꠞꠣꠁꠟꠞ ꠟꠣꠉꠤ ꠀꠝꠣꠞ ꠢꠇꠟ ꠀꠁꠘ-ꠇꠣꠘꠥꠘ ꠎꠣꠘꠣꠁꠝꠥ।
EXO 25:23 “ꠛꠣꠛꠟꠣ ꠟꠣꠇꠠꠤ ꠖꠤꠀ ꠖꠥꠁ ꠀꠔ ꠟꠣꠝ꠆ꠛꠣ, ꠄꠇ ꠀꠔ ꠙꠣꠡ ꠀꠞ ꠖꠦꠠ ꠀꠔ ꠃꠌꠣ ꠇꠞꠤ ꠄꠇꠈꠣꠘ ꠐꠦꠛꠥꠟ ꠛꠣꠘꠣꠁꠅ।
EXO 25:24 ꠅꠈꠣꠘꠞꠦ ꠈꠣꠐꠤ ꠡꠥꠘꠣꠖꠤ ꠟꠦꠙꠤꠀ ꠌꠣꠁꠞꠅ ꠇꠤꠘꠣꠞꠅ ꠘꠇꠡꠣ ꠟꠣꠉꠣꠁꠅ।
EXO 25:25 ꠐꠦꠛꠥꠟꠞ ꠌꠣꠁꠞꠅ ꠇꠤꠘꠣꠞꠅ ꠌꠣꠁꠞ ꠀꠋꠉꠥꠟ ꠃꠌꠣ ꠇꠞꠤ ꠄꠇ ꠢꠣꠎ ꠖꠤꠛꠣꠄ, ꠢꠣꠎꠞ ꠝꠣꠎꠦ ꠡꠥꠘꠣꠖꠤ ꠘꠇꠡꠣ ꠇꠞꠛꠣꠄ।
EXO 25:26 ꠐꠦꠛꠥꠟꠞ ꠌꠣꠁꠞꠅ ꠇꠥꠘꠣꠔ ꠌꠣꠁꠞꠅ ꠙꠣꠄꠀꠞ ꠃꠙꠞꠦ ꠡꠥꠘꠣꠞ ꠌꠣꠁꠞꠐꠣ ꠇꠠꠣ ꠟꠣꠉꠣꠁꠛꠣꠄ।
EXO 25:27 ꠁ ꠌꠣꠁꠞꠅ ꠇꠠꠣꠁꠘ ꠐꠦꠛꠥꠟꠞ ꠇꠥꠘꠣꠞ ꠢꠃ ꠃꠌꠣ ꠢꠣꠎꠞ ꠔꠟꠦ ꠟꠣꠉꠣꠁꠅ, ꠎꠣꠔꠦ ꠐꠦꠛꠥꠟ ꠛꠁꠀ ꠘꠦꠅꠀꠞ ꠛꠣꠟꠣ ꠇꠠꠣꠞ ꠜꠤꠔꠞꠦ ꠛꠦꠘ꠆ꠖꠣ ꠢꠣꠞꠣꠁꠟ ꠎꠣꠄ।
EXO 25:28 ꠛꠦꠘ꠆ꠖꠣ ꠖꠥꠁꠅꠐꠣ ꠛꠣꠛꠟꠣ ꠟꠣꠇꠠꠤꠖꠤ ꠛꠣꠘꠣꠁꠀ ꠡꠥꠘꠣꠖꠤ ꠟꠦꠙꠤꠛꠣꠄ, ꠅꠃ ꠛꠦꠘ꠆ꠖꠣꠖꠤ ꠐꠦꠛꠥꠟ ꠛꠁꠀ ꠘꠤꠛꠣꠄ।
EXO 25:29 ꠐꠦꠛꠥꠟꠞ ꠃꠙꠞꠞ ꠕꠣꠟ-ꠛꠣꠡꠘ, ꠀꠟ꠆ꠟꠣꠞ ꠘꠣꠝꠦ ꠓꠣꠟꠤꠀ ꠖꠤꠛꠣꠞ ꠡꠞꠛꠔ-ꠙꠣꠘꠤꠞ ꠍꠖꠉꠣꠞ ꠎꠉ ꠀꠞ ꠝꠉ, ꠢꠇꠟꠔꠣ ꠈꠣꠐꠤ ꠡꠥꠘꠣꠖꠤ ꠛꠣꠘꠣꠘꠤ ꠟꠣꠉꠛ।
EXO 25:30 ꠅꠃ ꠐꠦꠛꠥꠟꠞ ꠃꠙꠞꠦ ꠀꠝꠣꠞ ꠍꠣꠝꠘꠦ ꠢꠣꠝꠦꠡꠣ ꠙꠛꠤꠔ꠆ꠞ ꠞꠥꠐꠤ ꠞꠣꠈꠛꠣꠄ, ꠁ ꠞꠥꠐꠤ ꠎꠣꠘꠥ ꠡꠛ ꠡꠝꠄ ꠕꠅꠀ ꠅꠄ।”
EXO 25:31 ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ, “ꠔꠥꠝꠤ ꠈꠣꠐꠤ ꠡꠥꠘꠣꠖꠤ ꠄꠇꠈꠣꠘ ꠌꠦꠞꠣꠉ ꠖꠣꠘꠤ ꠛꠣꠘꠣꠁꠛꠣꠄ, ꠌꠦꠞꠣꠉ ꠖꠣꠘꠤꠞ ꠔꠟꠣ ꠀꠞ ꠒꠣꠘ꠆ꠒꠤ ꠈꠣꠐꠤ ꠡꠥꠘꠣ ꠙꠤꠐꠣꠁꠀ ꠉꠠꠣꠁꠛꠣꠄ। ꠅꠃ ꠒꠣꠘ꠆ꠒꠤ, ꠚꠥꠟꠞ ꠟꠣꠈꠣꠘ ꠙꠤꠀꠟꠣ, ꠇꠥꠠꠤ ꠀꠞ ꠙꠣꠙꠠꠤ ꠅꠇꠟ, ꠌꠦꠞꠣꠉ ꠖꠣꠘꠤꠞ ꠢꠇꠟꠔꠣꠄ ꠄꠇꠟꠉꠦ ꠄꠇ ꠙꠤꠍ ꠅꠁꠛ।
EXO 25:32 ꠌꠦꠞꠣꠉ ꠖꠣꠘꠤꠞ ꠒꠣꠘ꠆ꠒꠤꠞ ꠖꠥꠁ ꠉꠣꠟꠣꠔ ꠔꠤꠘꠐꠣ ꠇꠞꠤ ꠝꠥꠐ ꠍꠄꠐꠣ ꠒꠣꠟ ꠕꠣꠇꠛ।
EXO 25:33 ꠙꠞꠔꠦꠇ ꠒꠣꠟꠞ ꠝꠣꠎꠦ ꠎꠛꠣ ꠚꠥꠟꠞ ꠟꠣꠈꠣꠘ ꠔꠤꠘꠉꠥ ꠇꠞꠤ ꠙꠤꠀꠟꠣ ꠕꠣꠇꠛ। ꠌꠦꠞꠣꠉ ꠖꠣꠘꠤꠞ ꠍꠄꠅ ꠒꠣꠟꠅ ꠄꠇꠟꠣꠈꠣꠘ ꠇꠣꠝ ꠇꠞꠣ ꠅꠁꠛ।
EXO 25:34 ꠌꠦꠞꠣꠉ ꠖꠣꠘꠤꠞ ꠝꠥꠟ ꠒꠣꠘ꠆ꠒꠤꠞ ꠝꠣꠎꠦꠅ ꠎꠛꠣ ꠚꠥꠟꠞ ꠟꠣꠈꠣꠘ ꠌꠣꠁꠞꠐꠣ ꠙꠤꠀꠟꠣ ꠕꠣꠇꠛ।
EXO 25:35 ꠅꠃ ꠝꠥꠟ ꠒꠣꠘ꠆ꠒꠤ ꠕꠣꠇꠤ ꠛꠣꠞꠅꠁꠟ ꠍꠄꠐꠣ ꠒꠣꠟꠞ ꠝꠣꠎꠦ, ꠙꠄꠟꠣ ꠖꠥꠁꠅ ꠒꠣꠟꠞ ꠎꠥꠠꠣꠔ ꠄꠉꠥ ꠇꠥꠠꠤ, ꠖꠥꠍꠞꠣ ꠖꠥꠁꠅ ꠒꠣꠟꠞ ꠎꠥꠠꠣꠔ ꠀꠞꠇ ꠇꠥꠠꠤ, ꠀꠞ ꠢꠦꠡꠞ ꠖꠥꠁꠅ ꠒꠣꠟꠞ ꠎꠥꠠꠣꠔꠅ ꠇꠥꠠꠤ ꠖꠤꠅ।
EXO 25:36 ꠇꠥꠠꠤ ꠀꠞ ꠒꠣꠟ ꠢꠇꠟꠔꠣ ꠌꠦꠞꠣꠉ ꠖꠣꠘꠤ ꠕꠣꠇꠤ ꠛꠣꠞ ꠅꠁꠛ, ꠢꠇꠟꠔꠣ ꠝꠤꠟꠤꠀ ꠄꠇ ꠌꠤꠎ ꠅꠁꠛ। ꠀꠡ꠆ꠔꠣꠐꠣꠃ ꠈꠣꠐꠤ ꠡꠥꠘꠣ ꠙꠤꠐꠣꠁꠀ ꠛꠣꠘꠣꠘꠤ ꠟꠣꠉꠛ।
EXO 25:37 ꠄꠞꠛꠣꠖꠦ ꠡꠣꠔꠐꠣ ꠌꠦꠞꠣꠉ ꠛꠣꠘꠣꠁꠀ ꠅꠃ ꠌꠦꠞꠣꠉ ꠖꠣꠘꠤꠞ ꠃꠙꠞꠦ ꠅꠃ ꠟꠣꠈꠣꠘ ꠇꠞꠤ ꠟꠣꠉꠣꠘꠤ ꠟꠣꠉꠛ, ꠎꠣꠔꠦ ꠌꠦꠞꠣꠉ ꠅꠇꠟ ꠎꠣꠟꠣꠘꠤꠞ ꠛꠣꠖꠦ ꠌꠦꠞꠣꠉ ꠖꠣꠘꠤꠞ ꠍꠣꠝꠘꠣ ꠚꠞ ꠅꠄ।
EXO 25:38 ꠌꠦꠞꠣꠉꠞ ꠚꠤꠔꠣ ꠍꠣꠚ ꠇꠞꠣꠞ ꠌꠤꠝꠐꠣ ꠀꠞ ꠎꠣꠟꠣꠁꠟ ꠚꠤꠔꠣꠞ ꠍꠣꠟꠤ ꠕꠅꠀꠞ ꠟꠣꠉꠤ ꠇꠄꠉꠥ ꠛꠣꠐꠤ, ꠈꠣꠐꠤ ꠡꠥꠘꠣꠖꠤ ꠛꠣꠘꠣꠘꠤ ꠟꠣꠉꠛ।
EXO 25:39 ꠌꠦꠞꠣꠉ ꠖꠣꠘꠤꠞ ꠢꠇꠟꠔꠣ ꠛꠣꠘꠣꠘꠤꠞ ꠟꠣꠉꠤ ꠄꠇ ꠝꠘ ꠈꠣꠐꠤ ꠡꠥꠘꠣ ꠟꠣꠉꠛ।
EXO 25:40 “ꠢꠥꠘꠅ, ꠅꠃ ꠙꠣꠠꠞ ꠃꠙꠞꠦ ꠔꠥꠝꠣꠞꠦ ꠎꠦꠟꠣ ꠘꠇꠡꠣ ꠖꠦꠈꠣꠁꠟ ꠅꠁꠟ, ꠄꠇ꠆ꠇꠦꠞꠦ ꠅꠃ ꠟꠣꠈꠣꠘ ꠇꠞꠤ ꠢꠇꠟꠔꠣ ꠛꠣꠘꠣꠁꠅ।”
EXO 26:1 ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ, “ꠔꠥꠝꠤ ꠖꠡ ꠐꠥꠇꠞꠣ ꠙꠦꠌꠣꠁꠟ ꠡꠥꠔꠣꠞ ꠖꠣꠝꠤ ꠡꠥꠔꠤ ꠇꠣꠙꠠꠖꠤ ꠀꠝꠣꠞ ꠊꠞꠞ ꠙꠞ꠆ꠖꠣꠁꠘ ꠛꠣꠘꠣꠁꠅ। ꠀꠞ ꠟꠤꠟꠥꠀ, ꠛꠣꠁꠋꠉꠘꠤ, ꠟꠣꠟ ꠡꠥꠔꠣꠖꠤ ꠜꠣꠟꠣ ꠃꠡ꠆ꠔꠣꠖꠞꠦꠖꠤ ꠄꠞ ꠝꠣꠎꠦ ꠇꠣꠞꠥꠛꠤ ꠅꠇꠟꠞ ꠍꠛꠤ ꠛꠣꠁꠘ ꠇꠞꠣꠁꠅ।
EXO 26:2 ꠢꠇꠟ ꠐꠥꠇꠞꠣꠁꠘ ꠄꠇ ꠝꠣꠙꠞ ꠅꠁꠛ, ꠟꠣꠝ꠆ꠛꠣꠄ ꠀꠐꠣꠁꠡ ꠀꠔ ꠀꠞ ꠚꠣꠠꠦ ꠌꠣꠁꠞ ꠀꠔ।
EXO 26:3 ꠁ ꠐꠥꠇꠞꠣꠁꠘ꠆ꠔꠞ ꠙꠣꠌꠈꠣꠘ ꠙꠣꠌꠈꠣꠘ ꠇꠞꠤ ꠄꠇꠈꠣꠘꠅ ꠎꠥꠠꠣ ꠖꠤꠀ, ꠖꠥꠈꠣꠘ ꠛꠠ ꠉꠤꠟꠣꠚ ꠛꠣꠘꠣꠁꠔꠦ ꠅꠁꠛ।
EXO 26:4 ꠛꠠ ꠉꠤꠟꠣꠚꠞ ꠙꠄꠟꠣ ꠐꠥꠇꠞꠣꠞ ꠙꠣꠡꠞ ꠄꠇ ꠇꠤꠘꠣꠞꠅ ꠟꠤꠟꠥꠀ ꠡꠥꠔꠣꠖꠤ ꠢꠥꠇꠞ ꠚꠥꠠ ꠛꠣꠘꠣꠁꠔꠦ ꠅꠁꠛ। ꠖꠥꠍꠞꠣ ꠐꠥꠇꠞꠣꠔꠅ ꠅꠃꠟꠣ ꠇꠞꠔꠦ ꠅꠁꠛ।
EXO 26:5 ꠙꠄꠟꠣ ꠉꠤꠟꠣꠚꠞ ꠇꠤꠘꠣꠞꠅ ꠙꠁꠘ꠆ꠌꠣꠡꠉꠥ ꠢꠥꠇꠞ ꠚꠥꠠ ꠀꠞ ꠖꠥꠍꠞꠣ ꠉꠤꠟꠣꠚꠅ ꠅꠃꠟꠣ ꠙꠁꠘ꠆ꠌꠣꠡꠉꠥ ꠚꠥꠠ ꠖꠤꠔꠦ ꠅꠁꠛ। ꠖꠥꠁꠅ ꠛꠠ ꠉꠤꠟꠣꠚꠞ ꠢꠥꠇꠞ ꠚꠥꠠ ꠄꠉꠥ ꠀꠞꠦꠉꠥꠞ ꠃꠟꠐꠣꠝꠥꠈꠣ ꠕꠣꠇꠛ।
EXO 26:6 ꠛꠣꠖꠦ ꠡꠥꠘꠣꠖꠤ ꠙꠁꠘ꠆ꠌꠣꠡꠉꠥ ꠢꠥꠇ ꠛꠣꠘꠣꠁꠀ ꠢꠃ ꠚꠥꠠꠞ ꠝꠣꠎꠦꠖꠤ ꠢꠣꠞꠣꠁꠀ, ꠛꠠ ꠖꠥꠁꠅ ꠉꠤꠟꠣꠚꠞꠦ ꠀꠐꠇꠣꠁ ꠖꠤꠅ। ꠔꠦꠃ ꠁ ꠖꠥꠁꠅ ꠐꠥꠇꠞꠣꠖꠤ ꠄꠇꠈꠣꠘ ꠊꠞ ꠔꠤꠀꠞ ꠅꠁꠛ।
EXO 26:7 “ꠀꠝꠣꠞ ꠊꠞꠞ ꠃꠙꠞ ꠉꠥꠞꠣꠞ ꠟꠣꠉꠤ ꠍꠣꠉꠟꠞ ꠞꠥꠝꠣ ꠖꠤꠀ ꠉꠤꠟꠣꠚꠞ ꠟꠣꠈꠣꠘ ꠄꠉꠣꠞꠅꠈꠣꠘ ꠐꠥꠇꠞꠣ ꠛꠣꠘꠣꠘꠤ ꠟꠣꠉꠛ।
EXO 26:8 ꠢꠇꠟ ꠐꠥꠇꠞꠣꠁꠘ ꠄꠇ ꠝꠣꠙꠞ ꠅꠁꠛ, ꠔꠤꠡ ꠀꠔ ꠟꠣꠝ꠆ꠛꠣ ꠀꠞ ꠌꠣꠁꠞ ꠀꠔ ꠚꠣꠠ।
EXO 26:9 ꠅꠘ ꠕꠣꠇꠤ ꠙꠣꠌ ꠐꠥꠇꠞꠣ ꠄꠇꠟꠉꠦ ꠎꠥꠠꠣ ꠖꠤꠀ ꠛꠠ ꠄꠇ ꠉꠤꠟꠣꠚ ꠛꠣꠘꠣꠁꠔꠦ ꠅꠁꠛ। ꠀꠞ ꠛꠣꠇꠤ ꠍꠄ ꠐꠥꠇꠞꠣ ꠎꠥꠠꠣ ꠖꠤꠀ, ꠛꠠ ꠀꠞꠇ ꠉꠤꠟꠣꠚ ꠛꠣꠘꠣꠁꠀ ꠢꠣꠞꠟꠦ, ꠅꠃ ꠖꠥꠍꠞꠣ ꠉꠤꠟꠣꠚꠞ ꠎꠦ ꠐꠥꠇꠞꠣ ꠛꠣꠠꠔꠤ ꠞꠁꠛ, ꠅꠈꠣꠘꠞꠦ ꠔꠣꠝ꠆ꠛꠥꠞ ꠍꠣꠝꠘꠞ ꠛꠣꠄ ꠖꠥꠁ ꠜꠣꠁꠘ꠆ꠎ ꠇꠞꠤ ꠖꠤꠔꠦ ꠅꠁꠛ।
EXO 26:10 ꠙꠄꠟꠣ ꠛꠠ ꠉꠤꠟꠣꠚꠞ ꠙꠣꠡꠞ ꠄꠇ ꠇꠤꠘꠣꠞꠅ ꠙꠁꠘ꠆ꠌꠣꠡꠉꠥ ꠢꠥꠇꠞ ꠚꠥꠠ ꠛꠣꠘꠣꠁꠔꠦ ꠅꠁꠛ, ꠀꠞ ꠖꠥꠍꠞꠣ ꠉꠤꠟꠣꠚꠅ-ꠅ ꠅꠃꠟꠣ ꠅꠁꠛ।
EXO 26:11 ꠛꠣꠖꠦ ꠙꠤꠔꠟ ꠖꠤꠀ ꠙꠁꠘ꠆ꠌꠣꠡꠉꠥ ꠢꠥꠇ ꠛꠣꠘꠣꠁꠀ ꠢꠃ ꠢꠥꠇꠞ ꠚꠥꠠꠞ ꠝꠣꠎꠦ ꠢꠣꠞꠣꠁꠀ, ꠅꠃ ꠛꠠ ꠖꠥꠁꠅ ꠉꠤꠟꠣꠚ ꠄꠇꠈꠣꠘꠅ ꠎꠥꠠꠣ ꠖꠤꠔꠦ ꠅꠁꠛ। ꠔꠦꠃ ꠁ ꠖꠥꠁꠅ ꠉꠤꠟꠣꠚ ꠝꠤꠟꠤꠀ ꠄꠇꠈꠣꠘ ꠍꠣꠘꠤ ꠅꠁꠛ।
EXO 26:12 ꠍꠣꠉꠟꠞ ꠞꠥꠝꠣꠞ ꠛꠠ ꠉꠤꠟꠣꠚꠞ ꠎꠦ ꠀꠗꠣ ꠐꠥꠇꠞꠣ ꠛꠣꠠꠔꠤ ꠅꠁꠛ, ꠁꠈꠣꠘ ꠈꠞꠦꠖꠤ ꠟꠐꠇꠣꠁꠟ ꠞꠁꠛ।
EXO 26:13 ꠁ ꠉꠤꠟꠣꠚ ꠈꠣꠘ ꠔꠟꠞ ꠇꠣꠙꠠ ꠕꠣꠇꠤ ꠄꠇ ꠀꠔ ꠛꠠ ꠅꠀꠄ ꠁꠈꠣꠘ ꠖꠥꠁꠅ ꠉꠣꠟꠣꠛꠣꠄ ꠟꠐꠇꠣꠁꠟ ꠞꠁꠀ ꠢꠣꠞꠣ ꠊꠞꠞꠦ ꠉꠥꠞꠤꠟꠤꠛ।
EXO 26:14 ꠄꠞ ꠃꠙꠞ ꠉꠥꠞꠣꠞ ꠟꠣꠉꠤ ꠟꠣꠟ ꠞꠋ ꠇꠞꠣ ꠝꠦꠠꠣꠞ ꠌꠣꠝꠠꠣꠖꠤ ꠀꠞꠅꠈꠣꠘ ꠉꠤꠟꠣꠚ ꠛꠣꠘꠣꠁꠀ ꠉꠥꠞꠤ ꠖꠤꠔꠦ ꠅꠁꠛ। ꠛꠣꠖꠦ ꠄꠞ ꠃꠙꠞꠦ ꠖꠞꠤꠀꠞ ꠚꠥʼ ꠝꠣꠍꠞ ꠌꠣꠝꠠꠣꠖꠤ ꠍꠣꠘꠤ ꠔꠂꠀꠞ ꠇꠞꠤ ꠉꠥꠞꠤ ꠖꠤꠔꠦ ꠅꠁꠛ।”
EXO 26:15 ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ, “ꠀꠝꠣꠞ ꠊꠞꠞ ꠟꠣꠉꠤ ꠛꠣꠛꠟꠣ ꠟꠣꠇꠠꠤꠖꠤ ꠇʼꠈꠣꠘ ꠚ꠆ꠞꠦꠁꠝ ꠛꠣꠘꠣꠘꠤ ꠟꠣꠉꠛ।
EXO 26:16 ꠙꠞꠔꠦꠇ ꠚ꠆ꠞꠦꠁꠝ ꠛꠣꠘꠣꠁꠛꠣꠄ ꠖꠡ ꠀꠔ ꠟꠣꠝ꠆ꠛꠣ ꠀꠞ ꠖꠦꠠ ꠀꠔ ꠚꠣꠠ।
EXO 26:17 ꠅꠃ ꠚ꠆ꠞꠦꠁꠝꠅ ꠖꠥꠉꠥ ꠇꠞꠤ ꠙꠣꠄꠀ ꠕꠣꠇꠛ। ꠢꠇꠟ ꠚ꠆ꠞꠦꠁꠝ ꠄꠇꠟꠣꠈꠣꠘ ꠛꠣꠘꠣꠁꠔꠦ ꠅꠁꠛ।
EXO 26:18 ꠖꠇ꠆ꠇꠤꠘ ꠉꠣꠟꠣꠞ ꠟꠣꠉꠤ ꠛꠤꠡꠈꠣꠘ ꠚ꠆ꠞꠦꠁꠝ ꠛꠣꠘꠣꠘꠤ ꠟꠣꠉꠛ।
EXO 26:19 ꠁ ꠚ꠆ꠞꠦꠁꠝꠞ ꠙꠣꠄꠀꠞ ꠔꠟꠦ ꠖꠦꠅꠀꠞ ꠟꠣꠉꠤ ꠌꠣꠟ꠆ꠟꠤꠡꠉꠥ ꠞꠥꠙꠣꠞ ꠌꠥꠘ꠆ꠉꠤ ꠛꠣꠘꠣꠘꠤ ꠟꠣꠉꠛ, ꠙꠞꠔꠦꠇ ꠚ꠆ꠞꠦꠁꠝꠞ ꠖꠥꠁ ꠙꠣꠄꠀꠞ ꠟꠣꠉꠤ ꠖꠥꠉꠥ ꠌꠥꠘ꠆ꠉꠤ ꠟꠣꠉꠛ।
EXO 26:20 ꠀꠝꠣꠞ ꠊꠞꠞ ꠃꠔ꠆ꠔꠞ ꠉꠣꠟꠣꠞ ꠟꠣꠉꠤꠀꠅ ꠛꠤꠡꠈꠣꠘ ꠚ꠆ꠞꠦꠁꠝ ꠟꠣꠉꠛ,
EXO 26:21 ꠀꠞ ꠙꠞꠔꠦꠇ ꠚ꠆ꠞꠦꠁꠝꠞ ꠙꠣꠄꠀꠞ ꠔꠟꠞ ꠟꠣꠉꠤ ꠖꠥꠉꠥ ꠇꠞꠤ ꠌꠣꠟ꠆ꠟꠤꠡꠉꠥ ꠞꠥꠙꠣꠞ ꠌꠥꠘ꠆ꠉꠤ ꠛꠣꠘꠣꠘꠤ ꠟꠣꠉꠛ।
EXO 26:22 ꠙꠁꠌꠝꠞ ꠉꠣꠟꠣꠞ ꠟꠣꠉꠤ, ꠝꠣꠘꠤ ꠈꠞ ꠉꠣꠟꠣꠞ ꠟꠣꠉꠤ ꠍꠄꠈꠣꠘ ꠚ꠆ꠞꠦꠁꠝ,
EXO 26:23 ꠀꠞ ꠈꠞꠞ ꠖꠥꠁꠅ ꠇꠥꠘꠣꠞ ꠟꠣꠉꠤ ꠀꠞꠅ ꠖꠥꠈꠣꠘ ꠚ꠆ꠞꠦꠁꠝ ꠟꠣꠉꠛ।
EXO 26:24 ꠁ ꠖꠥꠁ ꠚ꠆ꠞꠦꠁꠝꠞꠦ ꠖꠥꠁ ꠇꠥꠘꠣꠞ ꠖꠥꠁꠅ ꠚ꠆ꠞꠦꠁꠝꠞ ꠟꠉꠦ ꠔꠟꠦ-ꠃꠙꠞꠦ ꠄꠇꠈꠣꠘꠅ ꠎꠥꠠꠣ ꠖꠤꠔꠦ ꠅꠁꠛ। ꠙꠞꠔꠦꠇ ꠇꠥꠘꠣꠞ ꠖꠥꠁ ꠚ꠆ꠞꠦꠁꠝ ꠗꠣꠞꠞ ꠚ꠆ꠞꠦꠁꠝꠞ ꠟꠉꠦ ꠛꠣꠔ꠆ꠔꠤ ꠝꠣꠞꠤꠀ ꠄꠇꠟꠉꠦ ꠎꠥꠠꠣ ꠖꠤꠔꠦ ꠅꠁꠛ। ꠖꠥꠁꠅ ꠇꠥꠘꠣ ꠄꠇꠟꠣꠈꠣꠘ ꠅꠁꠛ।
EXO 26:25 ꠔꠦꠃ ꠈꠞꠦꠖꠤ ꠀꠐꠈꠣꠘ ꠚ꠆ꠞꠦꠁꠝ ꠅꠁꠛ, ꠀꠞ ꠙꠞꠔꠦꠇ ꠚ꠆ꠞꠦꠁꠝꠞ ꠔꠟꠦ ꠖꠦꠅꠀꠞ ꠟꠣꠉꠤ ꠖꠥꠉꠥ ꠇꠞꠤ ꠡꠥꠟꠉꠥ ꠞꠥꠙꠣꠞ ꠌꠥꠘ꠆ꠉꠤ ꠟꠣꠉꠛ।
EXO 26:26 “ꠔꠥꠝꠤ ꠚ꠆ꠞꠦꠁꠝꠞꠦ ꠎꠥꠠꠣ ꠖꠤꠛꠣꠞ ꠟꠣꠉꠤ ꠛꠣꠛꠟꠣ ꠟꠣꠇꠠꠤꠖꠤ ꠇꠄꠉꠥ ꠟꠣꠝ꠆ꠛꠣ ꠛꠣꠔ꠆ꠔꠤ ꠛꠣꠘꠣꠁꠅ।
EXO 26:27 ꠄꠞ ꠝꠣꠎꠦ ꠙꠣꠌꠉꠥ ꠛꠣꠔ꠆ꠔꠤ ꠊꠞꠞ ꠄꠇ ꠉꠣꠟꠣꠞ ꠟꠣꠉꠤ, ꠀꠞ ꠛꠣꠇꠤ ꠙꠣꠌꠉꠥ ꠀꠞꠇ ꠉꠣꠟꠣꠞ ꠟꠣꠉꠤ, ꠀꠞ ꠙꠣꠌꠉꠥ ꠟꠣꠉꠛ ꠈꠞ ꠉꠣꠟꠣ, ꠝꠣꠘꠤ ꠙꠌꠤꠝ ꠉꠣꠟꠣꠞ ꠚ꠆ꠞꠦꠁꠝꠞ ꠟꠣꠉꠤ।
EXO 26:28 ꠚ꠆ꠞꠦꠁꠝꠞ ꠝꠣꠎꠈꠣꠘꠅ ꠟꠣꠉꠣꠁꠟ ꠅꠃ ꠛꠣꠔ꠆ꠔꠤꠖꠤ ꠢꠇꠟ ꠚ꠆ꠞꠦꠁꠝꠞ ꠄꠇ ꠝꠣꠕꠣ ꠕꠣꠇꠤ ꠀꠞꠇ ꠝꠣꠕꠣ ꠙꠞ꠆ꠎꠘ꠆ꠔ ꠀꠐꠇꠣꠁꠛꠣꠄ।
EXO 26:29 ꠚ꠆ꠞꠦꠁꠝ ꠈꠣꠘꠣꠁꠘ ꠡꠥꠘꠣꠖꠤ ꠟꠦꠙꠔꠦ ꠅꠁꠛ, ꠀꠞ ꠛꠣꠔ꠆ꠔꠤ ꠢꠣꠞꠣꠘꠤꠞ ꠟꠣꠉꠤ ꠡꠥꠘꠣꠞ ꠇꠠꠣ ꠛꠣꠘꠣꠁꠀ ꠚ꠆ꠞꠦꠁꠝꠅ ꠟꠣꠉꠣꠁꠔꠦ ꠅꠁꠛ। ꠁ ꠛꠣꠔ꠆ꠔꠤ ꠅꠇꠟꠅ ꠡꠥꠘꠣꠖꠤ ꠟꠦꠙꠔꠦ ꠅꠁꠛ।
EXO 26:30 ꠀꠝꠣꠞ ꠊꠞꠞ ꠎꠦ ꠘꠇꠡꠣ ꠔꠥꠝꠣꠞꠦ ꠅꠃ ꠔꠥꠞ ꠙꠣꠠꠞ ꠃꠙꠞꠦ ꠖꠦꠈꠣꠁꠟꠣꠝ, ꠔꠥꠝꠤ ꠄꠇ꠆ꠇꠦꠞꠦ ꠅꠃ ꠟꠣꠈꠣꠘ ꠇꠞꠤ ꠁꠐꠣ ꠔꠂꠀꠞ ꠇꠞꠣꠁꠅ।”
EXO 26:31 ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ, “ꠔꠥꠝꠤ ꠟꠤꠟꠥꠀ, ꠟꠣꠟ, ꠛꠣꠁꠋꠉꠘꠤ ꠡꠥꠔꠣ ꠀꠞ ꠙꠦꠌꠣꠁꠟ ꠖꠣꠝꠤ ꠡꠥꠔꠤ ꠇꠣꠙꠠꠖꠤ ꠄꠇꠈꠣꠘ ꠙꠞ꠆ꠖꠣ ꠛꠣꠘꠣꠁꠅ। ꠜꠣꠟꠣ ꠇꠥꠘꠥ ꠃꠡ꠆ꠔꠣꠖꠞꠦꠖꠤ ꠄꠞ ꠃꠙꠞꠦ ꠇꠣꠞꠥꠛꠤ ꠅꠇꠟꠞ ꠍꠛꠤ ꠛꠣꠁꠘ ꠇꠞꠣꠁꠅ।
EXO 26:32 ꠁ ꠙꠞ꠆ꠖꠣꠈꠣꠘ ꠛꠣꠛꠟꠣ ꠟꠣꠇꠠꠤꠖꠤ ꠌꠣꠁꠞꠐꠣ ꠈꠥꠐꠤꠞ ꠟꠉꠦ ꠟꠣꠉꠣꠁꠀ ꠡꠥꠘꠣꠞ ꠇꠠꠣꠖꠤ ꠟꠐꠇꠣꠁ ꠖꠤꠛꠣꠄ, ꠈꠥꠐꠤꠞ ꠝꠣꠕꠣꠔ ꠡꠥꠘꠣꠞ ꠇꠠꠣ ꠟꠣꠉꠣꠁꠛꠣꠄ। ꠀꠞ ꠈꠥꠐꠤꠉꠥꠁꠘ ꠡꠥꠘꠣꠖꠤ ꠟꠦꠙꠣꠁꠛꠣꠄ, ꠈꠥꠐꠤꠞ ꠔꠟꠣꠔ ꠞꠥꠙꠣꠞ ꠌꠥꠘ꠆ꠉꠤ ꠟꠣꠉꠣꠁꠛꠣꠄ।
EXO 26:33 ꠙꠞ꠆ꠖꠣꠞ ꠃꠙꠞꠞ ꠡꠥꠔꠤ ꠇꠣꠙꠠꠅ ꠟꠣꠉꠣꠁꠟ ꠢꠥꠇꠞ ꠟꠉꠦ ꠙꠞ꠆ꠖꠣꠈꠣꠘ ꠟꠐꠇꠣꠁꠟ ꠞꠁꠛ। ꠁ ꠙꠞ꠆ꠖꠣꠞ ꠈꠞꠦ ꠡꠣꠢꠣꠖꠔ ꠡꠘ꠆ꠖꠥꠇ ꠕꠁꠛꠣꠄ। ꠙꠞ꠆ꠖꠣꠖꠤ ꠀꠝꠣꠞ ꠊꠞꠞ ꠢꠦꠞꠦꠝ ꠡꠞꠤꠚ, ꠝꠣꠘꠤ ꠈꠣꠍ ꠙꠣꠇ ꠎꠣꠉꠣ ꠀꠞ ꠙꠣꠇ ꠎꠣꠉꠣꠞ ꠝꠣꠎꠈꠣꠘꠅ ꠛꠦꠠꠣ ꠖꠤꠅ।
EXO 26:34 ꠅꠃ ꠢꠦꠞꠦꠝ ꠡꠞꠤꠚꠞ ꠜꠤꠔꠞꠦ ꠡꠣꠢꠣꠖꠔ ꠡꠘ꠆ꠖꠥꠇꠞ ꠃꠙꠞꠦ ꠄꠞ ꠓꠣꠇꠘꠣ ꠟꠣꠉꠣꠁꠅ।
EXO 26:35 ꠁ ꠙꠞ꠆ꠖꠣꠞ ꠛꠣꠞꠦ ꠢꠦꠞꠦꠝ ꠡꠞꠤꠚꠞ ꠃꠔ꠆ꠔꠞ ꠉꠣꠟꠣꠔ ꠙꠛꠤꠔ꠆ꠞ ꠞꠥꠐꠤ ꠞꠣꠈꠣꠞ ꠐꠦꠛꠥꠟꠈꠣꠘ ꠕꠁꠅ, ꠀꠞ ꠄꠞ ꠃꠟꠐꠣꠝꠥꠈꠣ ꠖꠇ꠆ꠇꠤꠘ ꠉꠣꠟꠣꠔ ꠕꠁꠅ ꠌꠦꠞꠣꠉ ꠖꠣꠘꠤ।
EXO 26:36 “ꠀꠝꠣꠞ ꠊꠞꠞ ꠖꠥꠀꠞꠞ ꠟꠣꠉꠤ ꠄꠇꠈꠣꠘ ꠙꠞ꠆ꠖꠣ ꠛꠣꠘꠣꠁꠅ, ꠁꠈꠣꠘ ꠖꠣꠝꠤ ꠡꠥꠔꠤ ꠇꠣꠙꠠꠖꠤ ꠛꠣꠘꠣꠁꠀ ꠢꠣꠞꠤ, ꠟꠤꠟꠥꠀ, ꠛꠣꠁꠋꠉꠘꠤ, ꠟꠣꠟ ꠞꠋꠉꠞ ꠡꠥꠔꠣꠖꠤ ꠘꠇꠡꠣ ꠇꠞꠤꠅ।
EXO 26:37 ꠁ ꠙꠞ꠆ꠖꠣꠞ ꠟꠣꠉꠤ ꠡꠥꠘꠣꠞ ꠇꠠꠣ ꠀꠞ ꠛꠣꠛꠟꠣ ꠟꠣꠇꠠꠤꠞ ꠙꠣꠌꠐꠣ ꠈꠥꠐꠤ ꠛꠣꠘꠣꠁꠅ। ꠈꠥꠐꠤꠉꠥꠁꠘ ꠡꠥꠘꠣꠖꠤ ꠟꠦꠙꠣꠁꠅ, ꠈꠥꠐꠤꠞ ꠔꠟꠣꠔ ꠙꠤꠔꠟꠞ ꠙꠣꠌꠉꠥ ꠌꠥꠘ꠆ꠉꠤ ꠟꠣꠉꠣꠁꠅ।”
EXO 27:1 ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ, “ꠔꠥꠝꠤ ꠛꠣꠛꠟꠣ ꠟꠣꠇꠠꠤꠖꠤ ꠙꠣꠌ ꠀꠔ ꠟꠣꠝ꠆ꠛꠣ, ꠙꠣꠌ ꠀꠔ ꠙꠣꠡ ꠀꠞ ꠔꠤꠘ ꠀꠔ ꠃꠛꠤ ꠖꠤꠀ ꠌꠣꠁꠞꠇꠥꠘꠤ ꠇꠞꠤ ꠄꠇꠈꠣꠘ ꠇꠥꠞꠛꠣꠘꠤ ꠈꠣꠘꠣ ꠔꠂꠀꠞ ꠇꠞꠣꠁꠅ।
EXO 27:2 ꠄꠞ ꠌꠣꠁꠞꠅ ꠇꠥꠘꠣꠞ ꠃꠙꠞꠦ ꠟꠣꠇꠠꠤꠖꠤ ꠌꠣꠁꠞꠐꠣ ꠢꠤꠋ ꠖꠤꠅ। ꠅꠃ ꠢꠤꠋ ꠇꠥꠘꠣꠞ ꠟꠣꠇꠠꠤ ꠈꠥꠖꠤꠀ ꠛꠣꠘꠣꠘꠤ ꠟꠣꠉꠛ, ꠁ ꠀꠡ꠆ꠔꠣꠈꠣꠘ ꠄꠇ ꠌꠤꠎ ꠅꠁꠛ। ꠛꠣꠖꠦ ꠙꠥꠞꠣ ꠇꠥꠞꠛꠣꠘꠤ ꠈꠣꠘꠣ ꠙꠤꠔꠟꠖꠤ ꠟꠦꠙꠣꠁꠅ।
EXO 27:3 ꠇꠥꠞꠛꠣꠘꠤ ꠈꠣꠘꠣꠞ ꠍꠣꠟꠤ ꠔꠥꠟꠣꠞ ꠛꠠ ꠌꠣꠝꠌ ꠀꠞ ꠉꠣꠝꠟꠣ, ꠟꠃ ꠕꠅꠀꠞ ꠛꠣꠐꠤ, ꠉꠥꠡ꠆ꠔ ꠔꠥꠟꠣꠞ ꠛꠠ ꠇꠣꠐꠣ-ꠍꠤꠚ, ꠀꠋꠞꠣ ꠕꠅꠀꠞ ꠙꠣꠔꠤꠟ, ꠢꠇꠟꠔꠣ ꠙꠤꠔꠟꠖꠤ ꠛꠣꠘꠣꠁꠅ।
EXO 27:4 ꠙꠤꠔꠟꠖꠤ ꠄꠇꠈꠣꠘ ꠎꠣꠟꠤ ꠛꠣꠘꠣꠁꠛꠣꠄ। ꠄꠞ ꠌꠣꠁꠞ ꠇꠥꠘꠣꠔ ꠌꠣꠁꠞꠐꠣ ꠙꠤꠔꠟꠞ ꠇꠠꠣ ꠟꠣꠉꠣꠁꠅ।
EXO 27:5 ꠇꠥꠞꠛꠣꠘꠤ ꠈꠣꠘꠣꠞ ꠔꠟꠣ ꠕꠣꠇꠤ ꠃꠙꠞꠞ ꠝꠣꠎꠣꠝꠣꠎꠤ ꠎꠣꠉꠣꠞ ꠔꠣꠠꠤꠀꠞ ꠔꠟꠦ ꠅꠃ ꠎꠣꠟꠤ ꠛꠅꠀꠁꠅ।
EXO 27:6 ꠇꠥꠞꠛꠣꠘꠤ ꠈꠣꠘꠣ ꠛꠁꠀ ꠘꠤꠛꠣꠞ ꠟꠣꠉꠤ ꠛꠣꠛꠟꠣ ꠟꠣꠇꠠꠤꠖꠤ ꠖꠥꠉꠥ ꠛꠦꠘ꠆ꠖꠣ ꠛꠣꠘꠣꠁꠅ, ꠛꠣꠘꠣꠁꠀ ꠖꠥꠁꠅꠉꠥ ꠙꠤꠔꠟꠖꠤ ꠟꠦꠙꠤꠅ।
EXO 27:7 ꠁ ꠛꠦꠘ꠆ꠖꠣꠁꠘ ꠇꠠꠣꠞ ꠜꠤꠔꠞꠦꠖꠤ ꠢꠣꠞꠣꠘꠤ ꠟꠣꠉꠛ। ꠔꠦꠃ ꠇꠥꠞꠛꠣꠘꠤ ꠈꠣꠘꠣ ꠛꠁꠀ ꠘꠦꠅꠀꠞ ꠛꠣꠟꠣ ꠖꠥꠁꠅ ꠛꠦꠘ꠆ꠖꠣꠁꠘ ꠇꠥꠞꠛꠣꠘꠤ ꠈꠣꠘꠣꠞ ꠖꠥꠁ ꠉꠣꠟꠣꠛꠣꠄ ꠕꠣꠇꠛ।
EXO 27:8 ꠇꠥꠞꠛꠣꠘꠤ ꠈꠣꠘꠣ ꠔꠇ꠆ꠔꠣꠖꠤ ꠛꠣꠘꠣꠁꠀ ꠄꠞ ꠜꠤꠔꠞꠦ ꠚꠣꠇ ꠞꠣꠈꠤꠅ। ꠀꠝꠤ ꠅꠃ ꠙꠣꠠꠞ ꠃꠙꠞꠦ ꠔꠥꠝꠣꠞꠦ ꠎꠦꠟꠣ ꠘꠇꠡꠣ ꠖꠦꠈꠣꠁꠟꠣꠝ, ꠄꠇ꠆ꠇꠦꠞꠦ ꠅꠟꠣꠈꠣꠘ ꠇꠞꠤ ꠛꠣꠘꠣꠘꠤ ꠟꠅꠀꠁꠅ।
EXO 27:9 “ꠀꠝꠣꠞ ꠊꠞꠞ ꠌꠣꠁꠞꠅꠛꠣꠄ ꠃꠑꠣꠘ ꠕꠣꠇꠛ। ꠄꠞ ꠖꠇ꠆ꠇꠤꠘ ꠉꠣꠟꠣꠛꠣꠄ ꠄꠇ-ꠡ ꠀꠔ ꠞꠣꠈꠤꠅ, ꠁ ꠝꠥꠈꠣ ꠖꠤꠛꠣꠄ ꠖꠣꠝꠤ ꠡꠥꠔꠤ ꠇꠣꠙꠠꠞ ꠙꠞ꠆ꠖꠣ।
EXO 27:10 ꠁ ꠙꠞ꠆ꠖꠣ ꠐꠣꠘꠣꠘꠤꠞ ꠟꠣꠉꠤ ꠛꠤꠡꠉꠥ ꠈꠥꠐꠤ ꠖꠤꠛꠣꠄ। ꠈꠥꠐꠤꠞ ꠔꠟꠣꠔ ꠖꠤꠛꠣꠄ ꠄꠇꠐꠣ ꠇꠞꠤ ꠙꠤꠔꠟꠞ ꠌꠥꠘ꠆ꠉꠤ, ꠙꠞ꠆ꠖꠣ ꠐꠣꠘꠣꠘꠤꠞ ꠟꠣꠉꠤ ꠞꠥꠙꠣꠞ ꠇꠠꠣ ꠀꠞ ꠛꠣꠘ꠆ꠖꠤꠛꠣꠞ ꠔꠣꠞ ꠟꠣꠉꠣꠁꠛꠣꠄ।
EXO 27:11 ꠃꠔ꠆ꠔꠞ ꠉꠣꠟꠣꠛꠣꠄ ꠄꠇ-ꠡ ꠀꠔ ꠃꠑꠣꠘ ꠞꠣꠈꠛꠣꠄ। ꠢꠘꠅ-ꠅ ꠙꠞ꠆ꠖꠣ ꠖꠤꠅ, ꠛꠤꠡꠉꠥ ꠈꠥꠐꠤ, ꠛꠤꠡꠉꠥ ꠙꠤꠔꠟꠞ ꠌꠥꠘ꠆ꠉꠤ, ꠈꠥꠐꠤꠞ ꠟꠉꠦ ꠟꠣꠉꠣꠁꠅ ꠞꠥꠙꠣꠞ ꠇꠠꠣ ꠀꠞ ꠔꠣꠞ।
EXO 27:12 ꠙꠁꠌꠝꠦ ꠙꠁꠘ꠆ꠌꠣꠡ ꠀꠔ ꠃꠑꠣꠘ ꠞꠣꠈꠤꠅ, ꠢꠘꠅ-ꠅ ꠇꠄꠈꠣꠘ ꠙꠞ꠆ꠖꠣ, ꠖꠡꠉꠥ ꠈꠥꠐꠤ, ꠙꠞꠔꠦꠇ ꠈꠥꠐꠤꠞ ꠔꠟꠣꠔ ꠄꠇꠐꠣ ꠇꠞꠤ ꠌꠥꠘ꠆ꠉꠤ ꠖꠤꠅ।
EXO 27:13 ꠙꠥꠛꠦꠖꠤꠅ ꠙꠁꠘ꠆ꠌꠣꠡ ꠀꠔ ꠃꠑꠣꠘ ꠞꠣꠈꠤꠅ;
EXO 27:14 ꠉꠦꠁꠐꠞ ꠄꠇ ꠉꠣꠟꠣꠔ ꠙꠘꠞ ꠀꠔ ꠟꠣꠝ꠆ꠛꠣ ꠙꠞ꠆ꠖꠣ, ꠔꠤꠘꠐꠣ ꠈꠥꠐꠤ ꠀꠞ ꠔꠤꠘꠐꠣ ꠌꠥꠘ꠆ꠉꠤ ꠟꠣꠉꠣꠁꠛꠣꠄ,
EXO 27:15 ꠅꠟꠣ ꠖꠥꠍꠞꠣ ꠉꠣꠟꠣꠔꠅ ꠙꠘꠞ ꠀꠔ ꠙꠞ꠆ꠖꠣ, ꠔꠤꠘꠐꠣ ꠈꠥꠐꠤ ꠀꠞ ꠔꠤꠘꠐꠣ ꠌꠥꠘ꠆ꠉꠤ ꠖꠤꠅ।
EXO 27:16 ꠃꠑꠣꠘꠞ ꠉꠦꠁꠐꠞ ꠟꠣꠉꠤ ꠌꠣꠁꠞꠐꠣ ꠈꠥꠐꠤ, ꠌꠣꠁꠞꠐꠣ ꠌꠥꠘ꠆ꠉꠤ ꠀꠞ ꠛꠤꠡ ꠀꠔ ꠟꠣꠝ꠆ꠛꠣ ꠄꠇꠈꠣꠘ ꠙꠞ꠆ꠖꠣ। ꠙꠞ꠆ꠖꠣꠈꠣꠘ ꠖꠣꠝꠤ ꠡꠥꠔꠤ ꠇꠣꠙꠠꠖꠤ ꠛꠣꠘꠣꠁꠀ ꠟꠤꠟꠥꠀ, ꠛꠣꠁꠋꠉꠘꠤ, ꠟꠣꠟ ꠡꠥꠔꠣꠖꠤ ꠘꠇꠡꠣ ꠇꠞꠣꠁꠅ।
EXO 27:17 ꠃꠑꠣꠘꠞ ꠌꠣꠁꠞꠅ ꠉꠣꠟꠣꠞ ꠢꠇ꠆ꠇꠟ ꠈꠥꠐꠤꠞꠦ ꠛꠣꠘ꠆ꠖꠤꠛꠣꠞ ꠔꠣꠞ ꠀꠞ ꠇꠠꠣ ꠅꠁꠛ ꠞꠥꠙꠣꠞ, ꠄꠞ ꠔꠟꠦ ꠙꠤꠔꠟꠞ ꠌꠥꠘ꠆ꠉꠤ ꠕꠣꠇꠛ।
EXO 27:18 ꠃꠑꠣꠘꠈꠣꠘ ꠟꠣꠝ꠆ꠛꠣꠄ ꠄꠇ-ꠡ ꠀꠔ ꠀꠞ ꠙꠣꠡꠦ ꠙꠁꠘ꠆ꠌꠣꠡ ꠀꠔ ꠅꠁꠛ। ꠄꠞ ꠌꠣꠁꠞꠅꠛꠣꠄ ꠙꠣꠌ ꠀꠔ ꠃꠛꠤ ꠙꠞ꠆ꠖꠣ ꠖꠤꠅ, ꠙꠞ꠆ꠖꠣ ꠅꠁꠛ ꠖꠣꠝꠤ ꠡꠥꠔꠤ ꠇꠣꠙꠠꠞ, ꠀꠞ ꠈꠥꠐꠤꠘ꠆ꠔꠞ ꠔꠟꠦ ꠖꠤꠅ ꠙꠤꠔꠟꠞ ꠌꠥꠘ꠆ꠉꠤ।
EXO 27:19 ꠀꠝꠣꠞ ꠊꠞꠞ ꠇꠣꠝꠞ ꠢꠇꠟ ꠌꠤꠎ ꠙꠤꠔꠟꠖꠤ ꠛꠣꠘꠣꠁꠛꠣꠄ, ꠝꠥꠟ ꠔꠣꠝ꠆ꠛꠥ ꠀꠞ ꠃꠑꠣꠘꠞ ꠛꠦꠠꠣꠞ ꠐꠣꠘꠣꠞ ꠞꠡꠤꠞ ꠔꠟꠞ ꠙꠦꠞꠦꠉ ꠅꠇꠟ ꠙꠤꠔꠟꠞ ꠅꠁꠛ।
EXO 27:20 “ꠔꠥꠝꠤ ꠛꠘꠤ ꠁꠍꠞꠣꠁꠟ ꠅꠇꠟꠞꠦ ꠢꠥꠇꠥꠝ ꠖꠤꠅ, ꠔꠣꠞꠣ ꠎꠄꠔꠥꠘ ꠍꠦꠌꠤꠀ ꠔꠦꠟ ꠛꠣꠘꠣꠁꠀ ꠔꠥꠝꠣꠞ ꠉꠦꠍꠦ ꠀꠘꠔ, ꠎꠣꠔꠦ ꠌꠦꠞꠣꠉ ꠅꠇꠟ ꠢꠣꠝꠦꠡꠣ ꠎꠣꠟꠣꠁꠟ ꠞꠄ।
EXO 27:21 ꠝꠤꠟꠘ-ꠔꠣꠝ꠆ꠛꠥꠞ ꠡꠣꠢꠣꠖꠔ ꠡꠘ꠆ꠖꠥꠇꠞ ꠍꠣꠝꠘꠦ ꠎꠦ ꠙꠞ꠆ꠖꠣꠈꠣꠘ ꠕꠣꠇꠛ, ꠅꠃ ꠙꠞ꠆ꠖꠣꠞ ꠛꠣꠞꠦ ꠢꠣꠞꠥꠘ ꠀꠞ ꠔꠣꠞ ꠙꠥꠀꠂꠘ꠆ꠔꠦ ꠢꠣꠁꠘ꠆ꠎꠣ ꠕꠣꠇꠤ ꠚꠎꠞ ꠙꠞ꠆ꠎꠘ꠆ꠔ, ꠝꠣꠛꠥꠖꠞ ꠍꠣꠝꠘꠦ ꠌꠦꠞꠣꠉ ꠉꠥꠁꠘ ꠖꠦꠈꠣ-ꠢꠥꠘꠣ ꠇꠞꠛꠣ। ꠀꠝꠣꠞ ꠅꠃ ꠢꠥꠇꠥꠝ ꠎꠣꠘꠥ ꠛꠘꠤ ꠁꠍꠞꠣꠁꠟꠦ ꠅꠀꠞꠤꠡꠞ ꠙꠞ ꠅꠀꠞꠤꠡ ꠗꠞꠤ ꠢꠞ-ꠢꠣꠝꠦꠡꠣ ꠀꠝꠟ ꠇꠞꠦ।”
EXO 28:1 ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ, “ꠅ ꠝꠥꠍꠣ, ꠛꠘꠤ ꠁꠍꠞꠣꠁꠟꠞ ꠝꠣꠎꠦ ꠁꠝꠣꠝꠔꠤ ꠇꠞꠣꠞ ꠟꠣꠉꠤ ꠔꠥꠝꠣꠞ ꠜꠣꠁ ꠢꠣꠞꠥꠘ, ꠔꠣꠞ ꠙꠥꠀ ꠘꠣꠖꠣꠛ, ꠀꠛꠤꠢꠥ, ꠀꠟꠤ-ꠀꠎꠞ ꠀꠞ ꠁꠍꠣꠝꠣꠞꠞꠦ ꠔꠥꠝꠣꠞ ꠍꠣꠝꠘꠦ ꠀꠘꠣꠅ।
EXO 28:2 “ꠔꠥꠝꠣꠞ ꠜꠣꠁ ꠢꠣꠞꠥꠘꠞ ꠁꠎ꠆ꠎꠔ ꠀꠞ ꠡꠥꠘ꠆ꠖꠞ ꠛꠣꠠꠣꠘꠤꠞ ꠟꠣꠉꠤ ꠙꠛꠤꠔ꠆ꠞ ꠟꠦꠛꠣꠍ ꠔꠂꠀꠞ ꠇꠞꠣꠅ।
EXO 28:3 ꠀꠝꠤ ꠙꠣꠇ ꠞꠥꠢꠥ ꠖꠤꠀ ꠎꠦꠔꠣ ꠃꠡ꠆ꠔꠣꠖ ꠅꠇꠟꠞꠦ ꠇꠣꠞꠤꠉꠞꠤ ꠇꠣꠝꠞ ꠀꠈꠟ-ꠢꠦꠇꠝꠔ ꠖꠤꠍꠤ, ꠔꠥꠝꠤ ꠢꠃ ꠇꠣꠞꠤꠉꠞ ꠅꠇꠟꠞꠦ ꠢꠥꠇꠥꠝ ꠖꠦꠅ, ꠔꠣꠞꠣ ꠢꠣꠞꠥꠘꠞ ꠟꠣꠉꠤ ꠅꠃꠟꠣ ꠙꠛꠤꠔ꠆ꠞ ꠟꠦꠛꠣꠍ ꠛꠣꠘꠣꠃꠇ꠆ꠇꠣ, ꠎꠦ ꠟꠦꠛꠣꠍ ꠈꠣꠟꠤ ꠀꠝꠣꠞ ꠁꠝꠣꠝꠔꠤꠞ ꠇꠣꠝꠅ ꠟꠣꠉꠦ।
EXO 28:4 ꠁ ꠟꠦꠛꠣꠍꠞ ꠝꠣꠎꠦ ꠛꠥꠇꠥꠞ ꠃꠙꠞꠞ ꠕꠟꠤ, ꠄꠚꠞꠘ, ꠀꠟꠈꠦꠟ꠆ꠟꠣ, ꠌꠦꠉꠞ ꠇꠣꠙꠠꠞ ꠙꠣꠁꠘ꠆ꠎꠣꠛꠤ, ꠙꠣꠃꠉꠠꠤ ꠀꠞ ꠇꠝꠞꠞ ꠛꠘ꠆ꠖꠘꠤ ꠛꠣꠘꠣꠁꠅ। ꠔꠥꠝꠣꠞ ꠜꠣꠁ ꠢꠣꠞꠥꠘ ꠀꠞ ꠔꠣꠞ ꠙꠥꠀꠂꠘ꠆ꠔꠦ ꠎꠣꠔꠦ ꠀꠝꠣꠞ ꠁꠝꠣꠝꠔꠤ ꠇꠣꠝ ꠇꠞꠔꠣ ꠙꠣꠞꠂꠘ, ꠄꠞꠟꠣꠉꠤ ꠔꠣꠞꠣꠞ ꠙꠣꠇ-ꠙꠛꠤꠔ꠆ꠞ ꠟꠦꠛꠣꠍ ꠛꠣꠘꠣꠁꠅ।
EXO 28:5 ꠟꠦꠛꠣꠍ ꠛꠣꠘꠣꠁꠔꠦ ꠔꠣꠞꠣ ꠟꠤꠟꠥꠀ, ꠛꠣꠁꠋꠉꠘꠤ, ꠟꠣꠟ ꠡꠥꠔꠣ, ꠀꠞ ꠖꠣꠝꠤ ꠡꠥꠔꠤ ꠇꠣꠙꠠ, ꠄꠞ ꠟꠉꠦ ꠡꠥꠘꠣꠅ ꠟꠣꠉꠣꠁꠛꠣ।
EXO 28:6 “ꠙꠞꠗꠣꠘ ꠁꠝꠣꠝꠞ ꠄꠚꠞꠘ ꠛꠣꠘꠣꠁꠛꠣꠄ ꠟꠤꠟꠥꠀ, ꠛꠣꠁꠋꠉꠘꠤ, ꠟꠣꠟ ꠡꠥꠔꠣ, ꠖꠣꠝꠤ ꠡꠥꠔꠤ ꠇꠣꠙꠠ, ꠀꠞ ꠡꠥꠘꠣꠖꠤ। ꠁꠔꠣ ꠜꠣꠟꠣ ꠇꠥꠘꠥ ꠃꠡ꠆ꠔꠣꠖꠞꠦꠖꠤ ꠛꠣꠘꠣꠁꠅ।
EXO 28:7 ꠄꠚꠞꠘꠞ ꠇꠣꠘ꠆ꠖꠞ ꠖꠥꠁ ꠉꠣꠟꠣ ꠎꠥꠠꠣ ꠖꠤꠛꠣꠞ ꠟꠣꠉꠤ ꠖꠥꠈꠣꠘ ꠙꠐ꠆ꠐꠤ ꠛꠣꠘꠣꠁꠀ, ꠄꠚꠞꠘꠞ ꠃꠙꠞꠞ ꠇꠥꠘꠣꠔ ꠟꠣꠉꠣꠁꠅ।
EXO 28:8 ꠄꠚꠞꠘꠞ ꠟꠉꠦ ꠎꠥꠠꠣ ꠟꠣꠉꠣꠁꠟ ꠙꠦꠐꠞ ꠃꠙꠞꠞ ꠛꠦꠟꠐ ꠈꠣꠘꠅ ꠄꠚꠞꠘꠞ ꠟꠣꠈꠣꠘ ꠟꠤꠟꠥꠀ, ꠛꠣꠁꠋꠉꠘꠤ, ꠟꠣꠟ ꠡꠥꠔꠣ, ꠖꠣꠝꠤ ꠡꠥꠔꠤ ꠇꠣꠙꠠ, ꠀꠞ ꠡꠥꠘꠣꠖꠤ ꠛꠣꠘꠣꠁꠅ।
EXO 28:9 “ꠔꠥꠝꠤ ꠖꠥꠁꠐꠣ ꠀꠇꠤꠇ ꠙꠣꠔ꠆ꠔꠞ ꠀꠘꠤꠀ ꠄꠞ ꠃꠙꠞꠦ ꠁꠍꠞꠣꠁꠟ, ꠝꠣꠘꠤ ꠁꠀꠇꠥꠛꠞ ꠙꠥꠀꠂꠘ꠆ꠔꠞ ꠘꠣꠝ ꠈꠥꠖꠣꠁꠀ ꠟꠦꠈꠣꠁꠅ।
EXO 28:10 ꠙꠄꠟꠣ ꠙꠣꠔ꠆ꠔꠞꠞ ꠃꠙꠞꠦ, ꠔꠣꠞꠣꠞ ꠎꠘꠝꠞ ꠢꠤꠡꠣꠛꠦ ꠛꠠ ꠕꠣꠇꠤ ꠢꠥꠞꠥ ꠝꠥꠈꠣ ꠍꠄ ꠎꠘꠞ ꠘꠣꠝ, ꠀꠞ ꠖꠥꠍꠞꠣ ꠙꠣꠔ꠆ꠔꠞꠞ ꠃꠙꠞꠦꠅ ꠛꠣꠇꠤ ꠍꠄ ꠎꠘꠞ ꠘꠣꠝ ꠈꠥꠖꠣꠁꠀ ꠟꠦꠈꠣꠁꠅ।
EXO 28:11 ꠢꠥꠘꠣꠞ ꠅꠇꠟꠦ ꠖꠣꠝꠤ ꠙꠣꠔ꠆ꠔꠞꠞ ꠃꠙꠞꠦ ꠈꠥꠖꠤꠀ ꠎꠦꠟꠣ ꠡꠤꠟ ꠛꠣꠘꠣꠁꠘ, ꠄꠇ꠆ꠇꠦꠞꠦ ꠅꠃ ꠟꠣꠈꠣꠘ ꠇꠞꠤ ꠖꠥꠉꠥ ꠙꠣꠔ꠆ꠔꠞꠞ ꠃꠙꠞꠦ ꠁꠍꠞꠣꠁꠟꠞ ꠙꠥꠀꠂꠘ꠆ꠔꠞ ꠘꠣꠝ ꠈꠥꠖꠣꠁꠅ।
EXO 28:12 ꠙꠣꠔ꠆ꠔꠞ ꠖꠥꠁꠅꠉꠥ ꠡꠥꠘꠣꠞ ꠎꠣꠎꠁꠞꠞ ꠝꠣꠎꠦ ꠟꠣꠉꠣꠁꠀ ꠄꠚꠞꠘꠞ ꠇꠣꠘ꠆ꠖꠞ ꠙꠐ꠆ꠐꠤꠞ ꠟꠉꠦ ꠟꠣꠉꠣꠁꠅ। ꠁꠍꠞꠣꠁꠟꠞ ꠙꠥꠀꠂꠘ꠆ꠔꠞ ꠛꠣꠄ ꠝꠣꠛꠥꠖꠞ ꠘꠎꠞ ꠞꠣꠈꠣꠞ ꠟꠣꠉꠤ, ꠁ ꠙꠣꠔ꠆ꠔꠞ ꠢꠣꠞꠥꠘꠦ ꠝꠣꠛꠥꠖꠞ ꠍꠣꠝꠘꠦ ꠔꠣꠞ ꠇꠣꠘ꠆ꠖꠞ ꠝꠣꠎꠦ ꠟꠣꠉꠣꠁꠛ।
EXO 28:13 ꠖꠥꠁꠅ ꠎꠣꠎꠁꠞꠞ ꠟꠉꠦ ꠡꠥꠘꠣꠖꠤ ꠛꠣꠘꠣꠁꠟ ꠖꠥꠇꠍꠣ ꠌꠦꠁꠘ ꠟꠣꠉꠣꠁꠅ। ꠅꠃ ꠖꠥꠁꠅ ꠌꠦꠁꠘ ꠈꠣꠐꠤ ꠡꠥꠘꠣꠖꠤ ꠞꠡꠤꠞ ꠘꠝꠥꠘꠣꠄ ꠙꠦꠌꠣꠁꠀ ꠛꠣꠘꠣꠁꠅ।
EXO 28:15 “ꠀꠝꠣꠞ ꠞꠣꠄ-ꠚꠄꠍꠣꠟꠣ ꠎꠣꠘꠣꠞ ꠟꠣꠉꠤ ꠛꠥꠇꠥꠞ ꠃꠙꠞꠞ ꠕꠟꠤ ꠛꠣꠘꠣꠁꠅ। ꠜꠣꠟꠣ ꠃꠡ꠆ꠔꠣꠖ ꠇꠥꠘꠥ ꠖꠞ꠆ꠎꠤꠞꠦꠖꠤ ꠛꠣꠘꠣꠁꠅ। ꠄꠚꠞꠘꠞ ꠇꠣꠝꠞ ꠟꠣꠈꠣꠘ ꠁꠐꠣꠅ ꠟꠤꠟꠥꠀ, ꠛꠣꠁꠋꠉꠘꠤ, ꠟꠣꠟ ꠡꠥꠔꠣ, ꠖꠣꠝꠤ ꠡꠥꠔꠤ ꠇꠣꠙꠠ, ꠀꠞ ꠡꠥꠘꠣꠖꠤ ꠛꠣꠘꠣꠁꠅ।
EXO 28:16 ꠁꠐꠣ ꠅꠁꠛ ꠟꠣꠝ꠆ꠛꠣꠄ ꠀꠗꠣ ꠀꠔ, ꠙꠣꠡꠦ ꠀꠗꠣ ꠀꠔ, ꠌꠣꠁꠞ ꠇꠥꠘꠣ ꠀꠟꠣ ꠖꠥꠁ ꠜꠣꠁꠘ꠆ꠎ ꠇꠞꠣ ꠄꠇꠈꠣꠘ ꠇꠣꠙꠠ।
EXO 28:17 ꠄꠞ ꠃꠙꠞꠦ ꠢꠣꠁꠞ ꠗꠞꠣꠁꠀ ꠌꠣꠁꠞ ꠢꠣꠁꠞ ꠙꠣꠔ꠆ꠔꠞ ꠟꠣꠉꠣꠁꠛꠣꠄ। ꠙꠄꠟꠣ ꠢꠣꠞꠤꠔ ꠁꠀꠇꠥꠔ, ꠙꠤꠔ, ꠀꠞ ꠙꠣꠘ꠆ꠘꠣ ꠝꠘꠤ।
EXO 28:18 ꠖꠥꠍꠞꠣ ꠢꠣꠞꠤꠔ ꠟꠣꠟꠝꠘꠤ, ꠟꠤꠟ ꠝꠘꠤ ꠀꠞ ꠢꠤꠞꠣ;
EXO 28:19 ꠔꠤꠘ ꠘꠝ꠆ꠛꠞ ꠢꠣꠞꠤꠔ ꠚꠤꠞꠥꠎ, ꠉꠥꠝꠦꠖ ꠀꠞ ꠙꠖ꠆ꠖꠞꠣꠉ ꠝꠘꠤ।
EXO 28:20 ꠌꠣꠁꠞ ꠘꠝ꠆ꠛꠞ ꠢꠣꠁꠞꠅ ꠙꠥꠈꠞꠣꠎ, ꠛꠂꠖꠥꠞ꠆ꠎ ꠀꠞ ꠡꠥꠞꠥꠎ ꠝꠘꠤ। ꠁ ꠙꠣꠔ꠆ꠔꠞ ꠅꠇꠟ ꠡꠥꠘꠣꠞ ꠎꠣꠎꠁꠞꠖꠤ ꠟꠣꠉꠣꠁꠅ।
EXO 28:21 ꠁꠍꠞꠣꠁꠟꠞ ꠛꠣꠞꠅ ꠙꠥꠀꠞ ꠟꠣꠉꠤ ꠛꠣꠞꠅꠐꠣ ꠙꠣꠔ꠆ꠔꠞ ꠟꠣꠉꠛ। ꠁꠔꠣ ꠄꠇꠅ ꠙꠣꠔ꠆ꠔꠞꠅ ꠄꠇ ꠄꠇ ꠙꠥꠀꠞ ꠘꠣꠝ ꠈꠥꠖꠤꠀ ꠟꠦꠈꠣꠁꠅ, ꠎꠦꠟꠣ ꠈꠥꠖꠤꠀ ꠡꠤꠟ ꠛꠣꠘꠣꠁꠟ ꠅꠄ।
EXO 28:22 “ꠛꠥꠇꠥꠞ ꠃꠙꠞꠞ ꠕꠟꠤꠞ ꠟꠣꠉꠤ ꠈꠣꠐꠤ ꠡꠥꠘꠣꠖꠤ ꠞꠡꠤꠞ ꠟꠣꠈꠣꠘ ꠙꠦꠌꠣꠁꠀ ꠖꠥꠇꠍꠣ ꠌꠦꠁꠘ ꠛꠣꠘꠣꠁꠅ।
EXO 28:23 ꠡꠥꠘꠣꠞ ꠖꠥꠁꠐꠣ ꠇꠠꠣ ꠛꠣꠘꠣꠁꠀ ꠛꠥꠇꠥꠞ ꠅꠃ ꠕꠟꠤꠞ ꠃꠙꠞꠞ ꠇꠥꠘꠣꠔ ꠟꠣꠉꠣꠁꠅ।
EXO 28:24 ꠀꠞ ꠌꠦꠁꠘ ꠖꠥꠁꠅꠉꠦꠍꠣ ꠖꠥꠁꠅ ꠇꠠꠣꠞ ꠟꠉꠦ ꠀꠐꠇꠣꠁꠅ।
EXO 28:25 ꠖꠥꠁꠅ ꠇꠣꠘ꠆ꠖꠞ ꠄꠚꠞꠘꠞ ꠍꠣꠝꠘꠞ ꠚꠤꠔꠣꠔ ꠡꠥꠘꠣꠞ ꠎꠣꠎꠁꠞꠞ ꠟꠉꠦ ꠌꠦꠁꠘꠞ ꠄꠇ ꠝꠣꠕꠣ ꠛꠣꠘ꠆ꠖꠤꠅ।
EXO 28:26 ꠀꠞꠅ ꠖꠥꠁꠐꠣ ꠡꠥꠘꠣꠞ ꠇꠠꠣ ꠛꠣꠘꠣꠁꠀ ꠛꠥꠇꠥꠞ ꠃꠙꠞꠞ ꠕꠟꠤꠞ ꠖꠥꠁ ꠇꠥꠘꠣꠔ ꠟꠣꠉꠣꠁꠅ। ꠁ ꠖꠥꠁꠅꠐꠣ ꠄꠚꠞꠘꠞ ꠟꠉꠦ ꠛꠥꠇꠥꠞ ꠕꠟꠤꠞ ꠔꠟꠦ ꠞꠁꠛ।
EXO 28:27 ꠛꠣꠖꠦ ꠀꠞꠅ ꠖꠥꠁꠐꠣ ꠡꠥꠘꠣꠞ ꠇꠠꠣ ꠛꠣꠘꠣꠁꠀ, ꠄꠚꠞꠘꠞ ꠇꠣꠘ꠆ꠖꠞ ꠙꠐ꠆ꠐꠤꠞ ꠡꠁ ꠔꠟꠦꠖꠤ, ꠙꠦꠐꠞ ꠃꠙꠞꠞ ꠛꠦꠟꠐꠞ ꠃꠙꠞꠞ ꠡꠤꠟꠣꠁꠞ ꠇꠣꠍꠣꠔ ꠟꠣꠉꠣꠁꠅ।
EXO 28:28 ꠛꠣꠖꠦ ꠛꠥꠇꠥꠞ ꠃꠙꠞꠞ ꠕꠟꠤꠞ ꠔꠟꠞ ꠇꠠꠣꠞ ꠟꠉꠦ ꠙꠦꠐꠞ ꠃꠙꠞꠞ ꠘꠇꠡꠣ ꠇꠞꠣ ꠛꠦꠟꠐꠞ ꠇꠠꠣ ꠟꠤꠟꠥꠀ ꠡꠥꠔꠣꠖꠤ ꠛꠣꠘ꠆ꠖꠤꠅ। ꠔꠦꠃ ꠅꠃ ꠕꠟꠤ ꠄꠚꠞꠘꠞ ꠃꠙꠞꠦ ꠕꠣꠇꠤ ꠢꠞꠔ ꠘꠣꠄ।
EXO 28:29 “ꠙꠣꠇ ꠎꠣꠉꠣꠔ ꠢꠣꠝꠣꠁꠛꠣꠞ ꠛꠣꠟꠣ ꠢꠣꠞꠥꠘꠦ ꠀꠝꠣꠞ ꠞꠣꠄ-ꠚꠄꠍꠣꠟꠣ ꠢꠥꠘꠣꠞ ꠟꠣꠉꠤ, ꠛꠥꠇꠥꠞ ꠃꠙꠞꠞ ꠕꠟꠤꠞ ꠃꠙꠞꠦ ꠟꠦꠈꠣ ꠁꠍꠞꠣꠁꠟꠞ ꠛꠣꠞꠅ ꠙꠥꠀꠞ ꠘꠣꠝ ꠟꠣꠉꠣꠁꠔꠦ ꠅꠁꠛ, ꠁ ꠕꠟꠤꠐꠣꠄ ꠔꠣꠞꠣꠞꠦ ꠢꠞ-ꠢꠣꠝꠦꠡꠣ ꠝꠣꠛꠥꠖꠞ ꠍꠣꠝꠘꠦ ꠞꠣꠈꠛ।
EXO 28:30 ꠀꠝꠣꠞ ꠞꠣꠄ-ꠚꠄꠍꠣꠟꠣꠞ ꠅꠃ ꠕꠟꠤꠞ ꠜꠤꠔꠞꠦ ꠃꠞꠤꠝ ꠀꠞ ꠔꠥꠝ꠆ꠝꠤꠝ ꠘꠣꠝꠞ ꠙꠛꠤꠔ꠆ꠞ ꠙꠣꠔ꠆ꠔꠞꠉꠥꠁꠘ ꠞꠣꠈꠤꠅ। ꠢꠣꠞꠥꠘ ꠎꠦꠛꠟꠣ ꠝꠣꠛꠥꠖꠞ ꠍꠣꠝꠘꠦ ꠀꠎꠤꠞ ꠅꠁꠛ, ꠅꠃ ꠡꠝꠄ ꠁꠔꠣ ꠔꠣꠞ ꠛꠥꠇꠥꠞ ꠃꠙꠞꠦ ꠞꠁꠛ। ꠢꠣꠞꠥꠘꠦ ꠛꠘꠤ ꠁꠍꠞꠣꠁꠟꠞ ꠟꠣꠉꠤ ꠀꠝꠣꠞ ꠞꠣꠄ-ꠚꠄꠍꠣꠟꠣ ꠎꠣꠘꠣꠞ ꠃꠙꠣꠄ ꠢꠤꠡꠣꠛꠦ ꠢꠞ-ꠢꠣꠝꠦꠡꠣ ꠔꠣꠞ ꠛꠥꠇꠥꠞ ꠃꠙꠞꠦ ꠝꠣꠛꠥꠖꠞ ꠖꠦꠅꠀ ꠅꠃ ꠌꠤꠎ ꠞꠣꠈꠛ।”
EXO 28:31 ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ, “ꠄꠚꠞꠘꠞ ꠔꠟꠦ ꠟꠣꠝ꠆ꠛꠣ ꠎꠦ ꠀꠟꠈꠦꠟ꠆ꠟꠣ ꠞꠁꠛ, ꠁꠇꠐꠣ ꠙꠥꠞꠣꠐꠣꠃ ꠟꠤꠟꠥꠀ ꠞꠋꠉꠞ ꠡꠥꠔꠣꠖꠤ ꠛꠣꠘꠣꠁꠅ।
EXO 28:32 ꠝꠣꠕꠣ ꠢꠣꠞꠣꠁꠛꠣꠞ ꠟꠣꠉꠤ ꠄꠞ ꠝꠣꠎꠈꠣꠘꠅ ꠚꠣꠇ ꠞꠣꠈꠤꠅ। ꠁ ꠚꠣꠇ ꠎꠣꠉꠣ ꠎꠣꠔꠦ ꠘꠣ ꠍꠤꠠꠦ, ꠄꠞꠟꠣꠉꠤ ꠄꠞ ꠌꠣꠁꠞꠅ ꠉꠣꠟꠣ ꠝꠎꠛꠥꠔ ꠇꠞꠤ ꠛꠣꠁꠘ ꠇꠞꠔꠦ ꠅꠁꠛ।
EXO 28:33 ꠟꠤꠟꠥꠀ, ꠛꠣꠁꠋꠉꠘꠤ, ꠟꠣꠟ ꠞꠋꠉꠞ ꠡꠥꠔꠣꠖꠤ ꠀꠘꠥꠀꠞ ꠚꠟꠞ ꠟꠣꠈꠣꠘ ꠛꠣꠘꠣꠁꠀ, ꠅꠃ ꠀꠟꠈꠦꠟ꠆ꠟꠣꠞ ꠔꠟꠞ ꠝꠥꠠꠤꠞ ꠌꠣꠁꠞꠅꠛꠣꠄ ꠟꠣꠉꠣꠁꠅ। ꠀꠞ ꠁꠔꠣꠞ ꠝꠣꠎꠦ ꠝꠣꠎꠦ ꠖꠤꠅ ꠡꠥꠘꠣꠞ ꠊꠥꠋꠉꠥꠞ।
EXO 28:34 ꠁ ꠝꠥꠠꠤꠔ ꠖꠤꠛꠣꠄ ꠄꠉꠥ ꠇꠞꠤ ꠀꠘꠥꠀꠞ ꠀꠞ ꠄꠉꠥ ꠊꠥꠋꠉꠥꠞ।
EXO 28:35 ꠁꠝꠣꠝꠔꠤ ꠇꠞꠣꠞ ꠛꠣꠟꠣ ꠢꠣꠞꠥꠘꠦ ꠁ ꠟꠦꠛꠣꠍ ꠚꠤꠘ꠆ꠖꠤꠛ। ꠢꠦ ꠎꠦꠛꠟꠣ ꠙꠣꠇ ꠎꠣꠉꠣꠔ ꠝꠣꠛꠥꠖꠞ ꠍꠣꠝꠘꠦ ꠀꠎꠤꠞ ꠅꠁꠛ, ꠀꠞ ꠢꠘ ꠕꠣꠇꠤ ꠛꠣꠞꠦ ꠛꠣꠞ ꠅꠁꠛ, ꠅꠃ ꠡꠝꠄ ꠅꠃ ꠊꠥꠋꠉꠥꠞ ꠅꠇꠟꠞ ꠀꠅꠀꠎ ꠢꠥꠘꠣ ꠎꠣꠁꠛ, ꠔꠦꠃ ꠢꠦ ꠝꠞꠔ ꠘꠣꠄ।
EXO 28:36 “ꠈꠣꠐꠤ ꠡꠥꠘꠣꠖꠤ ꠄꠇꠈꠣꠘ ꠙꠣꠔ ꠛꠣꠘꠣꠁꠀ ꠄꠞ ꠃꠙꠞꠦ ꠡꠤꠟꠞ ꠟꠣꠈꠣꠘ ꠈꠥꠖꠤꠀ ꠅꠃ ꠀꠄꠀꠔ ꠟꠦꠈꠣꠁꠅ, ‘ꠝꠣꠛꠥꠖꠞ ꠘꠣꠝꠦ ꠙꠣꠇ-ꠙꠛꠤꠔ꠆ꠞ।’
EXO 28:37 ꠁ ꠙꠣꠔꠈꠣꠘ ꠙꠣꠃꠉꠠꠤꠞ ꠍꠣꠝꠘꠞ ꠉꠣꠟꠣꠔ ꠟꠣꠉꠣꠁꠀ ꠟꠤꠟꠥꠀ ꠡꠥꠔꠣꠖꠤ ꠛꠣꠘ꠆ꠖꠤꠅ।
EXO 28:38 ꠁꠐꠣ ꠢꠣꠞꠥꠘꠞ ꠇꠙꠣꠟꠞ ꠃꠙꠞꠦ ꠞꠁꠛ। ꠎꠔ ꠙꠣꠇ-ꠙꠛꠤꠔ꠆ꠞ ꠝꠣꠟ ꠛꠘꠤ ꠁꠍꠞꠣꠁꠟꠦ ꠖꠣꠘ-ꠈꠄꠞꠣꠔ ꠟꠁꠀ ꠀꠁꠛꠣ, ꠁꠔꠣꠞ ꠢꠇꠟ ꠘꠝꠥꠘꠣꠞ ꠖꠥꠡ-ꠔꠤꠞꠥꠐꠤꠞ ꠜꠣꠞ ꠢꠣꠞꠥꠘꠦ ꠛꠁꠛ। ꠝꠣꠛꠥꠖꠦ ꠎꠣꠔꠦ ꠔꠣꠞꠣꠞꠦ ꠇꠛꠥꠟ ꠇꠞꠂꠘ, ꠄꠞꠟꠣꠉꠤ ꠢꠣꠞꠥꠘꠦ ꠇꠙꠣꠟꠞ ꠃꠙꠞꠦ ꠁ ꠡꠥꠘꠣꠞ ꠙꠣꠔꠈꠣꠘ ꠢꠣꠝꠦꠡꠣ ꠟꠣꠉꠣꠁꠀ ꠞꠣꠈꠛ।
EXO 28:39 ꠁꠝꠣꠝꠞ ꠙꠣꠁꠘ꠆ꠎꠣꠛꠤ ꠀꠞ ꠙꠣꠃꠉꠠꠤ ꠔꠂꠀꠞ ꠇꠞꠣꠁꠅ ꠌꠦꠉꠞ ꠖꠣꠝꠤ ꠡꠥꠔꠤ ꠇꠣꠙꠠꠖꠤ। ꠇꠝꠞꠞ ꠛꠘ꠆ꠖꠘꠤ ꠈꠣꠘ ꠡꠥꠁ-ꠡꠥꠔꠣꠖꠤ ꠘꠇꠡꠣ ꠇꠞꠤ ꠛꠣꠘꠣꠁꠅ।
EXO 28:40 “ꠢꠣꠞꠥꠘꠞ ꠙꠥꠀꠂꠘ꠆ꠔꠞ ꠁꠎ꠆ꠎꠔ ꠀꠞ ꠡꠥꠘ꠆ꠖꠞꠞ ꠟꠣꠉꠤ ꠙꠣꠁꠘ꠆ꠎꠣꠛꠤ, ꠔꠇꠤ ꠀꠞ ꠇꠝꠞꠞ ꠛꠘ꠆ꠖꠘꠤ ꠔꠂꠀꠞ ꠇꠞꠣꠁꠅ।
EXO 28:41 ꠔꠥꠝꠤ ꠔꠥꠝꠣꠞ ꠜꠣꠁ ꠢꠣꠞꠥꠘ ꠀꠞ ꠔꠣꠞ ꠙꠥꠀꠂꠘ꠆ꠔꠞꠦ ꠁ ꠇꠣꠙꠠ ꠚꠤꠘ꠆ꠖꠣꠁꠅ। ꠔꠣꠞꠣꠞ ꠝꠣꠕꠣꠔ ꠙꠛꠤꠔ꠆ꠞ ꠔꠦꠟ ꠓꠣꠟꠤꠀ ꠈꠦꠟꠣꠚꠔꠤ ꠡꠝꠎꠣꠁꠀ ꠁꠝꠣꠝꠔꠤ ꠇꠣꠝꠅ ꠟꠣꠉꠣꠁꠅ। ꠔꠥꠝꠤ ꠔꠣꠞꠣꠞꠦ ꠙꠣꠇ-ꠙꠛꠤꠔ꠆ꠞ ꠇꠞꠤꠅ, ꠎꠣꠔꠦ ꠔꠣꠞꠣ ꠀꠝꠣꠞ ꠁꠝꠣꠝ ꠅꠁꠔꠣ ꠙꠣꠞꠂꠘ।
EXO 28:42 ꠇꠝꠞ ꠕꠣꠇꠤ ꠃꠞꠣꠔ ꠙꠞ꠆ꠎꠘ꠆ꠔ ꠡꠞꠝꠞ ꠎꠣꠉꠣ ꠉꠥꠞꠣꠞ ꠟꠣꠉꠤ ꠡꠥꠔꠤ ꠇꠣꠙꠠꠖꠤ ꠢꠣꠚ-ꠙꠦꠘ꠆ꠐꠞ ꠟꠣꠈꠣꠘ ꠎꠣꠋꠉꠤꠀ ꠛꠣꠘꠣꠁꠅ।
EXO 28:43 ꠢꠣꠞꠥꠘ ꠀꠞ ꠔꠣꠞ ꠙꠥꠀꠂꠘ ꠎꠦꠛꠟꠣ ꠝꠤꠟꠘ-ꠔꠣꠝ꠆ꠛꠥꠔ ꠢꠣꠝꠣꠁꠛꠣ, ꠛꠣ ꠇꠥꠞꠛꠣꠘꠤ ꠈꠣꠘꠣꠞ ꠉꠦꠍꠦ ꠙꠣꠇ ꠎꠣꠉꠣꠔ ꠢꠣꠝꠣꠁꠀ ꠁꠝꠣꠝꠔꠤꠞ ꠇꠣꠝꠅ ꠟꠣꠉꠛꠣ, ꠅꠃ ꠡꠝꠄ ꠔꠣꠞꠣ ꠅꠃ ꠎꠣꠋꠉꠤꠀ ꠚꠤꠘꠛꠣ। ꠔꠦꠃ ꠔꠣꠞꠣ ꠘꠤ-ꠅꠙꠞꠣꠗꠤ ꠞꠁꠛꠣ, ꠝꠞꠔꠣ ꠘꠣꠄ। ꠢꠣꠞꠥꠘ ꠀꠞ ꠔꠣꠞ ꠅꠀꠞꠤꠡꠞ ꠍꠤꠟꠍꠤꠟꠣꠞ ꠟꠣꠉꠤ ꠁ ꠀꠁꠘ ꠢꠞ-ꠢꠣꠝꠦꠡꠣ ꠌꠣꠟꠥ ꠞꠁꠛ।”
EXO 29:1 ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ, “ꠔꠥꠝꠤ ꠁꠝꠣꠝ ꠅꠇꠟꠞꠦ ꠅꠃ ꠟꠣꠈꠣꠘ ꠙꠣꠇ-ꠍꠣꠚ ꠇꠞꠤꠅ, ꠎꠣꠔꠦ ꠁꠝꠣꠝ ꠛꠘꠤꠀ ꠔꠣꠞꠣ ꠀꠝꠣꠞ ꠄꠛꠣꠖꠔ ꠇꠣꠝ ꠌꠣꠟꠣꠁꠔꠣ ꠙꠣꠞꠂꠘ। ꠔꠥꠝꠤ ꠘꠤꠈꠥꠔ ꠄꠉꠥ ꠛꠤꠍꠣꠟ ꠀꠞ ꠖꠥꠉꠥ ꠝꠦꠠꠣꠞ ꠙꠣꠑꠣ ꠀꠘꠣꠁꠅ।
EXO 29:2 ꠄꠞꠟꠉꠦ ꠝꠄꠖꠣꠖꠤ ꠞꠥꠐꠤ, ꠔꠦꠟꠖꠤ ꠜꠣꠎꠣ ꠙꠤꠑꠣ, ꠀꠞ ꠔꠦꠟ ꠝꠣꠈꠣꠁꠟ ꠌꠣꠙꠣꠐꠤ ꠛꠣꠘꠣꠁꠅ। ꠁꠔꠣ ꠇꠥꠘ꠆ꠔꠣꠔꠃ ꠈꠣꠝꠤꠞ ꠝꠤꠡꠣꠁꠅ ꠘꠣ।
EXO 29:3 ꠅꠔꠣ ꠛꠣꠘꠣꠁꠀ ꠄꠇ ꠐꠥꠇꠞꠤꠔ ꠟꠁꠅ, ꠄꠞꠟꠉꠦ ꠢꠃ ꠛꠤꠍꠣꠟ ꠀꠞ ꠖꠥꠁꠅ ꠝꠦꠠꠣꠞ ꠙꠣꠑꠣ ꠟꠁꠀ ꠀꠝꠣꠞ ꠍꠣꠝꠘꠦ ꠀꠁꠅ।
EXO 29:4 ꠛꠣꠖꠦ ꠢꠣꠞꠥꠘ ꠀꠞ ꠔꠣꠞ ꠙꠥꠀꠂꠘ꠆ꠔꠞꠦ ꠝꠤꠟꠘ-ꠔꠣꠝ꠆ꠛꠥꠞ ꠖꠥꠀꠞꠞ ꠇꠣꠍꠣꠔ ꠀꠘꠤꠀ, ꠙꠣꠘꠤꠖꠤ ꠘꠣꠅꠀꠁ ꠖꠤꠅ।
EXO 29:5 ꠀꠞ ꠢꠃ ꠙꠛꠤꠔ꠆ꠞ ꠟꠦꠛꠣꠍ ꠅꠇꠟ ꠀꠘꠤꠀ ꠢꠣꠞꠥꠘꠞꠦ ꠚꠤꠘ꠆ꠖꠣꠁꠅ। ꠙꠣꠁꠘ꠆ꠎꠣꠛꠤ, ꠀꠟꠈꠦꠟ꠆ꠟꠣ, ꠄꠚꠞꠘ ꠀꠞ ꠛꠥꠇꠥꠞ ꠃꠙꠞꠞ ꠕꠟꠤ ꠢꠇꠟꠔꠣ ꠚꠤꠘ꠆ꠖꠣꠁꠅ। ꠄꠚꠞꠘꠞ ꠟꠉꠦ ꠃꠡ꠆ꠔꠣꠖꠤ ꠀꠔꠞ ꠛꠣꠘꠣꠁꠟ ꠢꠃ ꠙꠦꠐꠞ ꠃꠙꠞꠞ ꠛꠦꠟꠐ ꠈꠣꠘꠅ ꠛꠣꠘ꠆ꠖꠤꠀ ꠖꠤꠅ।
EXO 29:6 ꠔꠣꠞ ꠝꠣꠕꠣꠔ ꠙꠣꠃꠉꠠꠤ ꠚꠤꠘ꠆ꠖꠣꠁꠅ ꠀꠞ ꠡꠥꠘꠣꠞ ꠙꠣꠔꠖꠤ ꠛꠣꠘꠣꠁꠟ ꠙꠛꠤꠔ꠆ꠞ ꠔꠣꠎ ꠈꠣꠘꠅ ꠟꠣꠉꠣꠁꠅ।
EXO 29:7 ꠛꠣꠖꠦ ꠈꠦꠟꠣꠚꠔꠤꠞ ꠔꠦꠟ ꠔꠣꠞ ꠝꠣꠕꠣꠔ ꠓꠣꠟꠤꠀ ꠔꠣꠞꠦ ꠈꠦꠟꠣꠚꠔꠤ ꠖꠤꠅ।
EXO 29:8 ꠔꠣꠞ ꠙꠥꠀꠂꠘ꠆ꠔꠞꠦꠅ ꠀꠘꠤꠀ ꠙꠣꠁꠘ꠆ꠎꠣꠛꠤ ꠚꠤꠘ꠆ꠖꠣꠁꠅ।
EXO 29:9 ꠢꠣꠞꠥꠘ ꠀꠞ ꠔꠣꠞ ꠙꠥꠀꠂꠘ꠆ꠔꠞꠦ ꠇꠝꠞꠞ ꠛꠘ꠆ꠖꠘꠤ ꠛꠣꠘ꠆ꠖꠤꠀ ꠖꠤꠅ। ꠙꠥꠀꠂꠘ꠆ꠔꠞ ꠝꠣꠕꠣꠔ ꠖꠤꠅ ꠔꠇꠤ। ꠅꠃ ꠟꠣꠈꠣꠘ ꠢꠣꠞꠥꠘ ꠀꠞ ꠔꠣꠞ ꠙꠥꠀꠂꠘ꠆ꠔꠞꠦ ꠁꠝꠣꠝꠞ ꠙꠖꠅ ꠛꠅꠀꠁꠟ ꠇꠞꠤꠅ, ꠎꠣꠔꠦ ꠌꠤꠞꠇꠣꠟꠤꠘ ꠘꠤꠅꠝ ꠢꠤꠡꠣꠛꠦ ꠁꠝꠣꠝꠔꠤꠞ ꠙꠖ ꠈꠣꠟꠤ ꠔꠣꠞꠣꠞ ꠛꠋꠡꠔ ꠕꠣꠇꠦ।
EXO 29:10 “ꠛꠣꠖꠦ ꠢꠃ ꠛꠤꠍꠣꠟꠞꠦ ꠔꠥꠝꠤ ꠝꠤꠟꠘ-ꠔꠣꠝ꠆ꠛꠥꠞ ꠍꠣꠝꠘꠦ ꠀꠘꠤꠅ, ꠢꠣꠞꠥꠘ ꠀꠞ ꠔꠣꠞ ꠙꠥꠀꠂꠘ꠆ꠔꠦ ꠅꠉꠥꠞ ꠇꠟ꠆ꠟꠣ ꠀꠔꠣꠁꠀ ꠖꠤꠛꠣ।
EXO 29:11 ꠀꠔꠣꠘꠤꠞ ꠛꠣꠖꠦ ꠅꠃ ꠛꠤꠍꠣꠟꠞꠦ ꠝꠤꠟꠘ-ꠔꠣꠝ꠆ꠛꠥꠞ ꠖꠥꠀꠞꠞ ꠇꠣꠍꠣꠔ ꠘꠤꠀ ꠝꠣꠛꠥꠖꠞ ꠍꠣꠝꠘꠦ ꠎꠛ ꠇꠞꠤꠅ।
EXO 29:12 ꠎꠛ ꠇꠞꠤꠀ ꠢꠣꠞꠟꠦ ꠕꠥꠠꠣ ꠟꠃ ꠔꠥꠝꠣꠞ ꠀꠋꠉꠥꠟꠤꠔ ꠟꠣꠉꠣꠁꠀ ꠇꠥꠞꠛꠣꠘꠤ ꠈꠣꠘꠣꠞ ꠢꠤꠋꠉꠞ ꠝꠣꠎꠦ ꠟꠣꠉꠣꠁꠅ, ꠀꠞ ꠛꠣꠇꠤ ꠟꠃ ꠇꠥꠞꠛꠣꠘꠤ ꠈꠣꠘꠣꠞ ꠔꠟꠦ ꠓꠣꠟꠤ ꠖꠤꠅ।
EXO 29:13 ꠛꠤꠍꠣꠟꠞ ꠙꠦꠐꠞ ꠜꠤꠔꠞꠞ ꠀꠔ-ꠜꠠꠞ ꠌꠞ꠆ꠛꠤ, ꠇꠁꠟꠎꠣꠞ ꠟꠉꠞ ꠝꠣꠐꠤꠀ, ꠖꠥꠁꠅ ꠇꠤꠒꠘꠤ ꠀꠞ ꠄꠞ ꠌꠞ꠆ꠛꠤ, ꠇꠥꠞꠛꠣꠘꠤ ꠈꠣꠘꠣꠞ ꠃꠙꠞꠦ ꠘꠤꠀ ꠎꠣꠟꠣꠁꠟꠤꠅ।
EXO 29:14 ꠄꠞ ꠉꠥꠡ꠆ꠔ, ꠈꠣꠟ, ꠀꠔ-ꠜꠠ ꠉꠥꠚꠞ ꠡꠥꠖ꠆ꠖꠣ ꠛꠘꠤ ꠁꠍꠞꠣꠁꠟꠞ ꠇꠦꠝ꠆ꠙꠞ ꠛꠣꠞꠦ ꠘꠤꠀ ꠎꠣꠟꠣꠁꠟꠤꠅ, ꠁꠔꠣ ꠔ ꠉꠥꠘꠣꠞ ꠇꠚꠞꠣꠞ ꠇꠥꠞꠛꠣꠘꠤ।
EXO 29:15 “ꠛꠣꠖꠦ ꠢꠃ ꠖꠥꠁꠅ ꠝꠦꠠꠣ ꠕꠣꠇꠤ ꠄꠉꠥ ꠝꠦꠠꠣ ꠀꠘꠤꠅ, ꠀꠘꠟꠦ ꠢꠣꠞꠥꠘꠦ ꠀꠞ ꠔꠣꠞ ꠙꠥꠀꠂꠘ꠆ꠔꠦ ꠅꠉꠥꠞ ꠇꠟ꠆ꠟꠣ ꠀꠔꠣꠁꠀ ꠖꠤꠛꠣ।
EXO 29:16 ꠀꠞ ꠅꠃ ꠝꠦꠠꠣꠞꠦ ꠎꠛ ꠇꠞꠤꠀ ꠄꠞ ꠟꠃ ꠘꠤꠀ ꠇꠥꠞꠛꠣꠘꠤ ꠈꠣꠘꠣꠞ ꠌꠣꠁꠞꠅ ꠉꠣꠟꠣꠔ ꠍꠤꠐꠣꠁ ꠖꠤꠅ।
EXO 29:17 ꠝꠦꠠꠣꠞꠦ ꠇꠣꠐꠤꠀ ꠐꠥꠇꠞꠣꠁꠀ ꠔꠣꠞ ꠑꠦꠋ ꠀꠞ ꠙꠦꠐꠞ ꠜꠤꠔꠞꠞ ꠢꠇꠟꠔꠣ ꠗꠁꠀ, ꠇꠟ꠆ꠟꠣ ꠀꠞ ꠛꠣꠇꠤ ꠐꠥꠇꠞꠣꠁꠘ꠆ꠔꠞ ꠟꠉꠦ ꠕꠁꠅ।
EXO 29:18 ꠢꠦꠡꠦ ꠁ ꠀꠡ꠆ꠔꠣꠉꠥ ꠇꠥꠞꠛꠣꠘꠤ ꠈꠣꠘꠣꠞ ꠃꠙꠞꠦ ꠘꠤꠀ ꠎꠣꠟꠣꠁꠟꠤꠅ। ꠁꠔꠣ ꠅꠁꠟ ꠝꠣꠛꠥꠖꠞ ꠘꠣꠝꠦ ꠎꠣꠟꠣꠁꠟ ꠇꠥꠞꠛꠣꠘꠤ, ꠝꠣꠛꠥꠖꠞ ꠘꠤꠅꠔꠦ ꠀꠉꠥꠘꠤꠔ ꠖꠦꠅꠀ ꠊꠦꠞꠣꠘ ꠀꠟꠣ ꠍꠖꠉꠣ।
EXO 29:19 “ꠛꠣꠖꠦ ꠖꠥꠍꠞꠣ ꠝꠦꠠꠣꠞꠦꠅ ꠀꠘꠤꠀ ꠢꠣꠞꠥꠘꠦ ꠀꠞ ꠔꠣꠞ ꠙꠥꠀꠂꠘ꠆ꠔꠦ ꠇꠟ꠆ꠟꠣ ꠀꠔꠣꠁ ꠖꠤꠛꠣ।
EXO 29:20 ꠀꠔꠣꠘꠤꠞ ꠛꠣꠖꠦ ꠅꠉꠥꠞꠦ ꠎꠛ ꠇꠞꠤꠀ ꠄꠞ ꠕꠥꠠꠣ ꠟꠃ ꠘꠤꠀ ꠢꠣꠞꠥꠘ ꠀꠞ ꠔꠣꠞ ꠙꠥꠀꠂꠘ꠆ꠔꠞ ꠒꠣꠁꠘ ꠇꠣꠘꠞ ꠟꠔꠤꠔ, ꠒꠣꠁꠘ ꠀꠔꠞ ꠀꠞ ꠒꠣꠁꠘ ꠙꠣꠅꠞ ꠛꠥꠠꠤ ꠀꠋꠉꠥꠟꠞ ꠝꠣꠎꠦ ꠟꠣꠉꠣꠁꠅ। ꠀꠞ ꠛꠣꠇꠤ ꠟꠃ ꠘꠤꠀ ꠇꠥꠞꠛꠣꠘꠤ ꠈꠣꠘꠣꠞ ꠌꠣꠁꠞꠅ ꠉꠣꠟꠣꠛꠣꠄ ꠍꠤꠐꠣꠁ ꠖꠤꠅ।
EXO 29:21 ꠛꠣꠖꠦ ꠈꠦꠟꠣꠚꠔꠤꠞ ꠔꠦꠟ ꠀꠞ ꠇꠥꠞꠛꠣꠘꠤ ꠈꠣꠘꠣ ꠕꠣꠇꠤ ꠕꠥꠠꠣ ꠟꠃ ꠟꠁꠀ, ꠢꠣꠞꠥꠘ ꠀꠞ ꠔꠣꠞ ꠙꠥꠀꠂꠘ꠆ꠔꠞ ꠉꠔꠞꠅ ꠀꠞ ꠟꠦꠛꠣꠍꠞ ꠃꠙꠞꠦ ꠍꠤꠐꠣꠁ ꠖꠤꠅ। ꠔꠦꠃ ꠟꠦꠛꠣꠍ ꠡꠥꠖ꠆ꠖꠣ ꠢꠣꠞꠥꠘ ꠀꠞ ꠔꠣꠞ ꠙꠥꠀꠂꠘ ꠙꠣꠇ-ꠍꠣꠚ ꠅꠁꠛꠣ।
EXO 29:22 ꠔꠥꠝꠤ ꠅꠃ ꠝꠦꠠꠣꠞ ꠌꠞ꠆ꠛꠤ, ꠌꠞ꠆ꠛꠤ ꠀꠟꠣ ꠟꠦꠋꠉꠥꠠ, ꠙꠦꠐꠞ ꠜꠤꠔꠞꠞ ꠢꠇꠟꠔꠣꠞ ꠃꠙꠞꠞ ꠌꠞ꠆ꠛꠤ, ꠇꠁꠟꠎꠣꠞ ꠟꠉꠞ ꠝꠣꠐꠤꠀ, ꠖꠥꠁꠅ ꠇꠤꠒꠘꠤ, ꠄꠞ ꠌꠞ꠆ꠛꠤ, ꠀꠞ ꠒꠣꠁꠘꠞ ꠞꠣꠘ ꠘꠤꠅ, ꠁꠐꠣ ꠅꠁꠟ ꠁꠝꠣꠝꠔꠤ ꠇꠣꠝꠅ ꠛꠅꠀꠁꠟꠞ ꠟꠣꠉꠤ ꠛꠈꠡꠤꠀ ꠖꠤꠛꠣꠞ ꠝꠦꠠꠣ।
EXO 29:23 ꠛꠣꠖꠦ ꠝꠣꠛꠥꠖꠞ ꠘꠎꠞꠅ ꠕꠅꠀ ꠈꠣꠝꠤꠞ ꠍꠣꠠꠣ ꠞꠥꠐꠤꠞ ꠐꠥꠇꠞꠤ ꠕꠣꠇꠤ ꠄꠇꠈꠣꠘ ꠞꠥꠐꠤ, ꠔꠦꠟꠖꠤ ꠜꠣꠎꠣ ꠄꠇꠈꠣꠘ ꠙꠤꠑꠣ ꠀꠞ ꠔꠦꠟ ꠝꠣꠈꠣꠁꠟ ꠌꠣꠙꠣꠐꠤ ꠄꠇꠈꠣꠘ ꠟꠁꠅ।
EXO 29:24 ꠟꠁꠀ ꠁꠔꠣ ꠢꠇꠟꠔꠣ ꠢꠣꠞꠥꠘ ꠀꠞ ꠔꠣꠞ ꠙꠥꠀꠂꠘ꠆ꠔꠞ ꠀꠔꠅ ꠖꠤꠀ, ꠝꠣꠛꠥꠖꠞ ꠍꠣꠝꠘꠦ ꠞꠣꠈꠣꠞ ꠘꠤꠅꠔꠦ ꠖꠥꠟꠘꠣ ꠇꠥꠞꠛꠣꠘꠤ ꠢꠤꠡꠣꠛꠦ ꠖꠥꠟꠣꠁꠛꠣꠄ।
EXO 29:25 ꠀꠞ ꠅꠔꠣ ꠔꠣꠞꠣꠞ ꠀꠔ ꠕꠣꠇꠤ ꠘꠤꠀ, ꠝꠣꠛꠥꠖꠞ ꠍꠣꠝꠘꠦ ꠇꠥꠞꠛꠣꠘꠤ ꠈꠣꠘꠣꠞ ꠃꠙꠞꠦ, ꠢꠃ ꠎꠣꠟꠣꠁꠟ ꠇꠥꠞꠛꠣꠘꠤꠞ ꠃꠙꠞꠦ ꠎꠣꠟꠣꠁꠟꠤꠛꠣꠄ। ꠁꠐꠣ ꠅꠁꠟ ꠝꠣꠛꠥꠖꠞ ꠘꠣꠝꠦ ꠀꠉꠥꠘꠤꠔ ꠖꠦꠅꠀ ꠍꠖꠉꠣ। ꠁꠔꠣꠞ ꠗꠥꠝꠣꠞ ꠊꠦꠞꠣꠘꠦ ꠝꠣꠛꠥꠖ ꠈꠥꠡꠤ ꠅꠁꠘ।”
EXO 29:26 ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ, “ꠔꠥꠝꠤ ꠢꠣꠞꠥꠘꠞꠦ ꠁꠝꠣꠝꠔꠤꠞ ꠇꠣꠝꠅ ꠛꠅꠀꠁꠟ ꠇꠞꠣꠞ ꠟꠣꠉꠤ, ꠈꠦꠟꠣꠚꠔꠤ ꠡꠝꠎꠤꠛꠣꠞ ꠝꠦꠠꠣꠞ ꠍꠤꠘꠣꠞ ꠐꠥꠇꠞꠣ ꠟꠁꠀ ꠝꠣꠛꠥꠖꠞ ꠍꠣꠝꠘꠦ ꠖꠥꠟꠘꠣ ꠇꠥꠞꠛꠣꠘꠤ ꠢꠤꠡꠣꠛꠦ ꠖꠥꠟꠣꠁꠛꠣꠄ। ꠁꠐꠣ ꠅꠁꠟ ꠔꠥꠝꠣꠞ ꠛꠣꠐ।
EXO 29:27 ꠢꠣꠞꠥꠘ ꠀꠞ ꠔꠣꠞ ꠙꠥꠀꠂꠘ꠆ꠔꠞꠦ ꠁꠝꠣꠝꠔꠤꠞ ꠇꠣꠝꠅ ꠛꠅꠀꠁꠟꠞ ꠟꠣꠉꠤ ꠖꠥꠟꠣꠁꠟ ꠅꠃ ꠍꠤꠘꠣ ꠀꠞ ꠞꠣꠘ ꠔꠥꠝꠤ ꠙꠣꠇ-ꠙꠛꠤꠔ꠆ꠞ ꠇꠞꠤꠅ।
EXO 29:28 ꠅꠃ ꠟꠣꠈꠣꠘ ꠛꠘꠤ ꠁꠍꠞꠣꠁꠟꠞ ꠖꠦꠅꠀ ꠅꠃ ꠇꠥꠞꠛꠣꠘꠤꠞ ꠐꠥꠇꠞꠣꠁꠘ ꠢꠞ-ꠢꠣꠝꠦꠡꠣ ꠢꠣꠞꠥꠘ ꠀꠞ ꠔꠣꠞ ꠙꠥꠀꠂꠘ꠆ꠔꠦ ꠙꠣꠁꠛꠣ। ꠁꠔꠣ ꠅꠁꠛ ꠝꠣꠛꠥꠖꠞ ꠘꠣꠝꠦ ꠛꠘꠤ ꠁꠍꠞꠣꠁꠟꠞ ꠖꠦꠅꠀ ꠍꠣꠟꠣꠝꠔꠤ ꠇꠥꠞꠛꠣꠘꠤꠞ ꠄꠇꠐꠣ ꠅꠋꠡ।
EXO 29:29 “ꠢꠣꠞꠥꠘꠞ ꠛꠦꠛꠢꠣꠞ ꠇꠞꠣ ꠙꠛꠤꠔ꠆ꠞ ꠟꠦꠛꠣꠍ ꠅꠇꠟ ꠔꠣꠞ ꠅꠀꠞꠤꠡ ꠅꠇꠟꠦ ꠙꠣꠁꠛꠣ। ꠅꠃ ꠟꠦꠛꠣꠍ ꠚꠤꠘ꠆ꠖꠤꠀ ꠔꠣꠞꠣ ꠈꠦꠟꠣꠚꠔꠤ ꠙꠣꠁꠛꠣ ꠀꠞ ꠁꠝꠣꠝꠔꠤꠞ ꠇꠣꠝꠅ ꠛꠅꠀꠁꠟ ꠅꠁꠛꠣ।
EXO 29:30 ꠢꠣꠞꠥꠘꠞ ꠛꠣꠖꠦ ꠔꠣꠞ ꠎꠦ ꠙꠥꠀ ꠁꠝꠣꠝ ꠅꠁꠀ ꠝꠤꠟꠘ-ꠔꠣꠝ꠆ꠛꠥꠞ ꠙꠣꠇ ꠎꠣꠉꠣꠔ ꠇꠣꠝ ꠇꠞꠛ, ꠢꠦ ꠡꠣꠔꠖꠤꠘ ꠙꠞ꠆ꠎꠘ꠆ꠔ ꠁ ꠟꠦꠛꠣꠍ ꠔꠣꠞ ꠉꠔꠞꠅ ꠞꠣꠈꠛ।
EXO 29:31 “ꠈꠦꠟꠣꠚꠔꠤ ꠡꠝꠎꠤꠛꠣꠞ ꠝꠦꠠꠣꠞ ꠅꠃ ꠉꠥꠡ꠆ꠔ ꠈꠣꠘꠣꠁꠘ ꠘꠤꠀ ꠇꠥꠘꠥ ꠙꠛꠤꠔ꠆ꠞ ꠎꠣꠉꠣꠔ ꠞꠣꠘ꠆ꠖꠤꠛꠣꠄ।
EXO 29:32 ꠢꠣꠞꠥꠘ ꠀꠞ ꠔꠣꠞ ꠙꠥꠀꠂꠘ꠆ꠔꠦ ꠝꠤꠟꠘ-ꠔꠣꠝ꠆ꠛꠥꠞ ꠖꠥꠀꠞꠞ ꠇꠣꠍꠣꠔ ꠛꠁꠀ, ꠐꠥꠇꠞꠤꠔ ꠕꠅꠀ ꠢꠃ ꠞꠥꠐꠤꠞ ꠟꠉꠦ ꠅꠃ ꠉꠥꠡ꠆ꠔ ꠈꠣꠁꠛꠣ।
EXO 29:33 ꠁꠝꠣꠝꠞ ꠇꠣꠝꠅ ꠛꠅꠀꠁꠟ ꠇꠞꠣꠞ ꠟꠣꠉꠤ, ꠔꠣꠞꠣꠞꠦ ꠙꠣꠇ-ꠍꠣꠚ ꠇꠞꠣꠞ ꠟꠣꠉꠤ, ꠈꠣꠘꠤꠞ ꠎꠦꠔꠣ ꠌꠤꠎ ꠅꠇꠟ ꠉꠥꠘꠣꠞ ꠝꠣꠚꠤꠞ ꠟꠣꠉꠤ ꠇꠥꠞꠛꠣꠘꠤ ꠖꠦꠅꠀ ꠅꠁꠛ, ꠁꠔꠣ ꠈꠣꠟꠤ ꠢꠣꠞꠥꠘ ꠀꠞ ꠔꠣꠞ ꠙꠥꠀꠂꠘ꠆ꠔꠦ ꠈꠣꠁꠛꠣ। ꠀꠞ ꠇꠦꠃ ꠁꠔꠣ ꠈꠣꠁꠔ ꠙꠣꠞꠔ ꠘꠣꠄ, ꠇꠣꠞꠘ ꠁꠔꠣ ꠅꠁꠟ ꠙꠣꠇ-ꠙꠛꠤꠔ꠆ꠞ ꠈꠣꠘꠣ।
EXO 29:34 ꠅꠃ ꠛꠅꠀꠁꠟ ꠇꠞꠣꠞ ꠇꠥꠞꠛꠣꠘꠤꠞ ꠝꠦꠠꠣꠞ ꠇꠥꠘꠥ ꠉꠥꠡ꠆ꠔ ꠛꠣ ꠞꠥꠐꠤ ꠎꠥꠖꠤ ꠛꠤꠀꠘ ꠙꠞ꠆ꠎꠘ꠆ꠔ ꠞꠁꠎꠣꠄ, ꠔꠦ ꠁꠔꠣ ꠎꠣꠟꠣꠁꠟꠤꠔꠦ ꠅꠁꠛ, ꠇꠦꠃ ꠈꠣꠁꠔ ꠙꠣꠞꠔ ꠘꠣꠄ, ꠁꠔꠣ ꠔ ꠙꠣꠇ-ꠙꠛꠤꠔ꠆ꠞ।
EXO 29:35 “ꠢꠣꠞꠥꠘ ꠀꠞ ꠔꠣꠞ ꠙꠥꠀꠂꠘ꠆ꠔꠞ ꠟꠣꠉꠤ, ꠀꠝꠤ ꠔꠥꠝꠣꠞꠦ ꠎꠔꠔꠣ ꠇꠞꠣꠞ ꠢꠥꠇꠥꠝ ꠖꠤꠍꠤ, ꠔꠥꠝꠤ ꠅꠃꠟꠣ ꠇꠞꠤꠅ। ꠛꠅꠀꠁꠟ ꠇꠞꠣꠞ ꠅꠃ ꠇꠣꠝ ꠔꠥꠝꠤ ꠡꠣꠔꠖꠤꠘ ꠜꠞꠣ ꠇꠞꠤꠅ।
EXO 29:36 ꠉꠥꠘꠣꠞ ꠇꠚꠞꠣ ꠢꠤꠡꠣꠛꠦ ꠔꠥꠝꠤ ꠙꠞꠔꠦꠇ ꠖꠤꠘ ꠄꠉꠥ ꠇꠞꠤ ꠛꠤꠍꠣꠟ ꠇꠥꠞꠛꠣꠘꠤ ꠖꠤꠛꠣꠄ। ꠀꠞ ꠇꠥꠞꠛꠣꠘꠤ ꠈꠣꠘꠣꠞꠦ ꠙꠣꠇ-ꠙꠛꠤꠔ꠆ꠞ ꠇꠞꠣꠞ ꠟꠣꠉꠤꠅ ꠅꠃ ꠟꠣꠈꠣꠘ ꠇꠥꠞꠛꠣꠘꠤ ꠖꠤꠅ, ꠀꠞ ꠙꠣꠇ-ꠍꠣꠚ ꠅꠀꠞ ꠟꠣꠉꠤ ꠙꠛꠤꠔ꠆ꠞ ꠔꠦꠟ ꠓꠣꠟꠤꠅ।
EXO 29:37 ꠇꠥꠞꠛꠣꠘꠤ ꠈꠣꠘꠣꠞꠦ ꠙꠣꠇ-ꠙꠛꠤꠔ꠆ꠞ ꠇꠞꠣꠞ ꠟꠣꠉꠤ ꠡꠣꠔꠖꠤꠘ ꠜꠞꠣ ꠇꠥꠞꠛꠣꠘꠤ ꠖꠤꠀ, ꠉꠥꠘꠣ ꠝꠣꠚꠤꠞ ꠇꠚꠞꠣ ꠀꠖꠣꠄ ꠇꠞꠤꠀ ꠙꠣꠇ-ꠙꠛꠤꠔ꠆ꠞ ꠇꠞꠤꠅ। ꠔꠦꠃ ꠁ ꠇꠥꠞꠛꠣꠘꠤ ꠈꠣꠘꠣ ꠄꠇ ꠝꠢꠣ-ꠙꠛꠤꠔ꠆ꠞ ꠎꠣꠉꠣ ꠅꠁꠛ। ꠎꠦꠇꠥꠘꠥ ꠎꠤꠘꠤꠡ ꠁ ꠇꠥꠞꠛꠣꠘꠤ ꠈꠣꠘꠣꠔ ꠍꠥꠀꠁꠟꠦ, ꠁꠔꠣ ꠙꠣꠇ-ꠙꠛꠤꠔ꠆ꠞ ꠅꠁꠎꠤꠛ।
EXO 29:38 “ꠄꠞ ꠛꠣꠖ ꠕꠣꠇꠤ ꠙꠞꠔꠦꠇ ꠖꠤꠘ ꠁ ꠇꠥꠞꠛꠣꠘꠤ ꠈꠣꠘꠣꠞ ꠃꠙꠞꠦ, ꠄꠇ ꠛꠞꠍ ꠛꠄꠅꠡꠞ ꠖꠥꠉꠥ ꠝꠦꠠꠣ-ꠛꠣꠁꠌ꠆ꠌꠣ ꠇꠥꠞꠛꠣꠘꠤ ꠖꠤꠛꠣꠄ,
EXO 29:39 ꠄꠉꠥ ꠛꠤꠀꠘꠦ ꠀꠞ ꠄꠉꠥ ꠢꠣꠁꠘ꠆ꠎꠣ ꠛꠣꠟꠣ।
EXO 29:40 ꠙꠄꠟꠣ ꠝꠦꠠꠣ-ꠛꠣꠁꠌ꠆ꠌꠣꠞ ꠟꠉꠦ ꠖꠥꠁ ꠡꠦꠞ ꠝꠄꠖꠣ ꠀꠞ ꠄꠇ ꠡꠦꠞ ꠎꠄꠔꠥꠘꠞ ꠙꠤꠡꠣ ꠔꠦꠟ ꠝꠤꠡꠣꠁꠔꠦ ꠅꠁꠛ। ꠀꠞ ꠡꠞꠛꠔ-ꠙꠣꠘꠤꠞ ꠍꠖꠉꠣꠞ ꠟꠣꠉꠤ ꠀꠋꠉꠥꠞꠞ ꠄꠇ ꠡꠦꠞ ꠡꠞꠛꠔꠅ ꠀꠟ꠆ꠟꠣꠞ ꠘꠣꠝꠦ ꠖꠤꠛꠣꠄ।
EXO 29:41 ꠢꠣꠁꠘ꠆ꠎꠣ ꠛꠣꠟꠣ ꠎꠦ ꠝꠦꠠꠣ ꠇꠥꠞꠛꠣꠘꠤ ꠖꠤꠛꠣꠄ, ꠄꠞꠟꠉꠦꠅ ꠛꠤꠀꠘꠇꠥꠞ ꠟꠣꠈꠣꠘ ꠗꠣꠘ-ꠉꠝꠞ ꠍꠖꠉꠣ ꠀꠞ ꠡꠞꠛꠔ-ꠙꠣꠘꠤꠞ ꠍꠖꠉꠣꠞ ꠢꠇꠟꠔꠣ ꠖꠤꠔꠦ ꠅꠁꠛ। ꠁꠔꠣ ꠅꠁꠟ ꠝꠣꠛꠥꠖꠞ ꠘꠤꠅꠔꠦ ꠀꠉꠥꠘꠤꠔ ꠖꠦꠅꠀ ꠊꠦꠞꠣꠘ ꠀꠟꠣ ꠇꠥꠞꠛꠣꠘꠤ।
EXO 29:42 “ꠅꠀꠞꠤꠡꠞ ꠙꠞ ꠅꠀꠞꠤꠡ ꠗꠞꠤ ꠝꠤꠟꠘ-ꠔꠣꠝ꠆ꠛꠥꠞ ꠖꠥꠀꠞꠞ ꠉꠦꠍꠦ, ꠝꠣꠘꠤ ꠀꠝꠣꠞ ꠍꠣꠝꠘꠦ ꠙꠞꠔꠦꠇ ꠖꠤꠘ ꠁ ꠎꠣꠟꠣꠁꠟ ꠇꠥꠞꠛꠣꠘꠤ ꠖꠤꠔꠦ ꠅꠁꠛ। ꠢꠘꠅ ꠀꠝꠤ ꠔꠥꠝꠞꠣꠞꠦ ꠖꠤꠖꠣꠞ ꠖꠤꠝꠥ, ꠔꠥꠝꠣꠞ ꠟꠉꠦ ꠛꠣꠔꠌꠤꠔ ꠇꠞꠝꠥ।
EXO 29:43 ꠛꠘꠤ ꠁꠍꠞꠣꠁꠟꠞ ꠉꠦꠍꠦ ꠀꠝꠤ ꠢꠘꠅ ꠖꠤꠖꠣꠞ ꠖꠤꠝꠥ, ꠀꠞ ꠀꠝꠣꠞ ꠇꠥꠖꠞꠔꠦ ꠅꠃ ꠎꠣꠉꠣ ꠙꠣꠇ-ꠙꠛꠤꠔ꠆ꠞ ꠅꠁꠛ।
EXO 29:44 ꠀꠝꠤ ꠝꠤꠟꠘ-ꠔꠣꠝ꠆ꠛꠥ ꠀꠞ ꠇꠥꠞꠛꠣꠘꠤ ꠈꠣꠘꠣ ꠙꠛꠤꠔ꠆ꠞ ꠇꠞꠝꠥ। ꠀꠝꠣꠞ ꠁꠝꠣꠝꠔꠤꠞ ꠟꠣꠉꠤ ꠢꠣꠞꠥꠘ ꠀꠞ ꠔꠣꠞ ꠙꠥꠀꠂꠘ꠆ꠔꠞꠦꠅ ꠀꠝꠤ ꠙꠛꠤꠔ꠆ꠞ ꠇꠞꠝꠥ।
EXO 29:45 ꠀꠝꠤ ꠛꠘꠤ ꠁꠍꠞꠣꠁꠟꠞ ꠝꠣꠛꠥꠖ ꠅꠁꠀ ꠔꠣꠞꠣꠞ ꠝꠣꠎꠦ ꠛꠡꠔ ꠇꠞꠝꠥ।
EXO 29:46 ꠔꠦꠃ ꠔꠣꠞꠣ ꠎꠣꠘꠛꠣ, ꠀꠝꠤ ꠀꠟ꠆ꠟꠣꠃ ꠔꠣꠞꠣꠞ ꠝꠣꠛꠥꠖ। ꠀꠝꠤ ꠔꠣꠞꠣꠞ ꠟꠉꠦ ꠛꠡꠔ ꠇꠞꠣꠞ ꠟꠣꠉꠤꠃ ꠔ ꠔꠣꠞꠣꠞꠦ ꠝꠤꠡꠞ ꠖꠦꠡ ꠕꠣꠇꠤ ꠛꠣꠞ ꠇꠞꠤꠀ ꠀꠘꠍꠤ। ꠀꠝꠤ ꠀꠟ꠆ꠟꠣꠃ ꠔꠣꠞꠣꠞ ꠝꠣꠛꠥꠖ।”
EXO 30:1 ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ, “ꠀꠉꠞ-ꠈꠥꠡꠛꠄ ꠎꠣꠟꠣꠁꠛꠣꠞ ꠟꠣꠉꠤ ꠔꠥꠝꠤ ꠛꠣꠛꠟꠣ ꠟꠣꠇꠠꠤꠖꠤ ꠄꠇꠈꠣꠘ ꠐꠦꠛꠥꠟ ꠛꠣꠘꠣꠁꠅ।
EXO 30:2 ꠁꠉꠥ ꠅꠁꠛ ꠌꠣꠁꠞꠇꠥꠘꠣ ꠀꠟꠣ, ꠄꠇ ꠀꠔ ꠟꠣꠝ꠆ꠛꠣ, ꠄꠇ ꠀꠔ ꠙꠣꠡ, ꠖꠥꠁ ꠀꠔ ꠃꠛꠤ। ꠀꠡ꠆ꠔꠣ ꠈꠣꠘꠃ ꠢꠤꠋ ꠡꠥꠖ꠆ꠖꠣ ꠄꠇꠈꠣꠘꠅ ꠟꠣꠉꠣꠁꠟ ꠞꠁꠛ।
EXO 30:3 ꠄꠞ ꠃꠙꠞꠞ ꠍꠣꠘꠤ, ꠍꠣꠘꠤꠞ ꠌꠣꠁꠞꠅ ꠇꠤꠘꠣꠞꠣ ꠀꠞ ꠢꠤꠋ, ꠢꠇꠟꠔꠣ ꠈꠣꠐꠤ ꠡꠥꠘꠣꠖꠤ ꠟꠦꠙꠤꠛꠣꠄ। ꠌꠣꠁꠞꠅ ꠇꠤꠘꠣꠞꠅ ꠡꠥꠘꠣꠞ ꠘꠇꠡꠣ ꠇꠞꠣꠁꠛꠣꠄ।
EXO 30:4 ꠄꠞ ꠖꠥꠁ ꠇꠤꠘꠣꠞꠞ ꠘꠇꠡꠣꠞ ꠔꠟꠦ ꠖꠥꠉꠥ ꠇꠞꠤ ꠡꠥꠘꠣꠞ ꠇꠠꠣ ꠟꠣꠉꠣꠁꠅ। ꠁ ꠇꠠꠣꠞ ꠜꠤꠔꠞꠦ ꠛꠦꠘ꠆ꠖꠣ ꠢꠣꠞꠣꠁꠀ ꠅꠉꠥ ꠛꠁꠀ ꠘꠦꠅꠀ ꠅꠁꠛ।
EXO 30:5 ꠁ ꠛꠦꠘ꠆ꠖꠣ ꠉꠥꠁꠘ ꠛꠣꠛꠟꠣ ꠟꠣꠇꠠꠤꠖꠤ ꠛꠣꠘꠣꠁꠀ ꠡꠥꠘꠣꠖꠤ ꠟꠦꠙꠣꠁꠅ।
EXO 30:6 ꠡꠣꠢꠣꠖꠔ ꠡꠘ꠆ꠖꠥꠇꠞ ꠓꠣꠇꠘꠣꠞ ꠇꠣꠍꠣꠔ ꠎꠦ ꠙꠞ꠆ꠖꠣꠈꠣꠘ ꠀꠍꠦ, ꠅꠃ ꠐꠦꠛꠥꠟ ꠄꠞ ꠍꠣꠝꠘꠦ ꠞꠣꠈꠤꠅ। ꠅꠃ ꠎꠣꠉꠣꠔ ꠀꠝꠤ ꠔꠥꠝꠣꠞꠦ ꠖꠤꠖꠣꠞ ꠖꠤꠝꠥ।
EXO 30:7 “ꠙꠞꠔꠦꠇ ꠖꠤꠘ ꠛꠤꠀꠘꠦ ꠌꠦꠞꠣꠉ ꠉꠥꠁꠘ ꠎꠥꠁꠔ-ꠎꠣꠁꠔ ꠇꠞꠣꠞ ꠛꠣꠟꠣ, ꠢꠣꠞꠥꠘꠦ ꠅꠃ ꠐꠦꠛꠥꠟꠞ ꠃꠙꠞꠦ ꠈꠥꠡꠛꠄ ꠀꠟꠣ ꠀꠉꠞ ꠎꠣꠟꠣꠁꠛ।
EXO 30:8 ꠢꠣꠁꠘ꠆ꠎꠣ ꠛꠣꠟꠣ ꠌꠦꠞꠣꠉ ꠎꠣꠟꠣꠘꠤꠞ ꠡꠝꠄ, ꠢꠦ ꠢꠤꠞꠛꠣꠞ ꠀꠉꠞ-ꠈꠥꠡꠛꠄ ꠎꠣꠟꠣꠁꠛ। ꠔꠥꠝꠞꠣꠞ ꠅꠀꠞꠤꠡꠞ ꠙꠞ ꠅꠀꠞꠤꠡ ꠗꠞꠤ ꠝꠣꠛꠥꠖꠞ ꠍꠣꠝꠘꠦ ꠢꠞ-ꠢꠣꠝꠦꠡꠣ ꠅꠃ ꠀꠉꠞ-ꠈꠥꠡꠛꠄ ꠎꠟꠛ।
EXO 30:9 ꠁ ꠀꠉꠞ-ꠈꠥꠡꠛꠄ ꠎꠣꠟꠣꠘꠤꠞ ꠐꠦꠛꠥꠟꠞ ꠃꠙꠞꠦ ꠖꠥꠍꠞꠣ ꠇꠥꠘꠥꠎꠣꠔꠞ ꠈꠥꠡꠛꠄ ꠎꠣꠟꠣꠁꠅ ꠘꠣ। ꠇꠥꠘꠥ ꠎꠣꠟꠣꠁꠟ ꠇꠥꠞꠛꠣꠘꠤ, ꠗꠣꠘ-ꠉꠝꠞ ꠍꠖꠉꠣ, ꠛꠣ ꠡꠞꠛꠔ-ꠙꠣꠘꠤꠞ ꠍꠖꠉꠣ ꠖꠤꠅ ꠘꠣ।
EXO 30:10 ꠉꠥꠘꠣꠞ ꠝꠣꠚꠤꠞ ꠇꠚꠞꠣ ꠢꠤꠡꠣꠛꠦ, ꠢꠣꠞꠥꠘꠦ ꠛꠍꠞꠅ ꠄꠇꠛꠣꠞ ꠉꠥꠘꠣꠞ ꠇꠚꠞꠣꠞ ꠇꠥꠞꠛꠣꠘꠤꠞ ꠟꠃ, ꠐꠦꠛꠥꠟꠞ ꠢꠤꠋ ꠅꠇꠟꠞ ꠃꠙꠞꠦ ꠟꠣꠉꠣꠁꠔꠦ ꠅꠁꠛ। ꠔꠦꠃ ꠁꠈꠣꠘ ꠝꠣꠛꠥꠖꠞ ꠘꠣꠝꠦ ꠝꠢꠣ-ꠙꠛꠤꠔ꠆ꠞ ꠅꠁꠛ। ꠅꠀꠞꠤꠡꠞ ꠙꠞ ꠅꠀꠞꠤꠡ ꠗꠞꠤ ꠙꠞꠗꠣꠘ ꠁꠝꠣꠝꠦ ꠛꠍꠞꠅ ꠄꠇꠛꠣꠞ ꠅꠃ ꠟꠣꠈꠣꠘ ꠇꠞꠔꠦ ꠅꠁꠛ।”
EXO 30:11 ꠛꠣꠖꠦ ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ,
EXO 30:12 “ꠔꠥꠝꠤ ꠎꠦꠛꠟꠣ ꠛꠘꠤ ꠁꠍꠞꠣꠁꠟꠞ ꠝꠣꠘꠡꠞ ꠙꠞꠤꠝꠣꠘ ꠉꠘꠛꠣꠄ, ꠅꠃ ꠡꠝꠄ ꠔꠣꠞꠣ ꠢꠇꠟꠦꠃ ꠎꠣꠞꠎꠤꠞ ꠎꠣꠘꠞ ꠛꠖꠟꠣ ꠞꠥꠙꠣ ꠖꠤꠔꠦ ꠅꠁꠛ, ꠎꠣꠔꠦ ꠁ ꠉꠘꠣꠞ ꠟꠣꠉꠤ ꠔꠣꠞꠣꠞ ꠃꠙꠞꠦ ꠇꠥꠘꠥ ꠉꠎꠛ ꠘꠣ ꠀꠄ।
EXO 30:13 ꠔꠣꠞꠣꠞꠦ ꠉꠘꠣꠞ ꠛꠣꠟꠣ ꠅꠃꠟꠣ ꠛꠖꠟꠣ ꠟꠁꠅ, ꠉꠘꠣ ꠅꠁꠍꠦ ꠖꠟꠅ ꠎꠦꠞꠣ ꠢꠣꠝꠣꠁꠛꠣ, ꠄꠞꠣ ꠄꠛꠣꠖꠔ ꠈꠣꠘꠣꠞ ꠝꠣꠙꠦ ꠀꠗꠣ ꠔꠟꠣ ꠞꠥꠙꠣ ꠖꠤꠛꠣ। ꠙꠞꠔꠦꠇ ꠛꠤꠡ ꠞꠔꠤꠄ ꠄꠇ ꠔꠟꠣ ꠉꠘꠤꠅ। ꠁ ꠞꠥꠙꠣ ꠅꠁꠛ ꠝꠣꠛꠥꠖꠞ।
EXO 30:14 ꠛꠤꠡ ꠛꠞꠍ ꠛꠣ ꠄꠞ ꠛꠦꠡꠤ ꠛꠄꠅꠡꠞ ꠎꠦꠇꠥꠘꠥ ꠎꠘ ꠉꠘꠣ ꠡꠦꠡ ꠅꠀ ꠖꠟꠅ ꠢꠣꠝꠣꠁꠟꠦ, ꠄꠘ ꠎꠣꠘꠞ ꠛꠖꠟꠣ ꠝꠣꠛꠥꠖꠞꠦ ꠅꠃ ꠞꠥꠙꠣ ꠖꠤꠛꠣ।
EXO 30:15 ꠎꠣꠘꠞ ꠛꠖꠟꠣ ꠖꠦꠅꠀꠞ ꠡꠝꠄ ꠗꠘꠤ ꠅꠇꠟꠦ ꠅꠃ ꠀꠗꠣ ꠔꠟꠣꠞ ꠛꠦꠡꠤ ꠖꠤꠔꠣ ꠙꠣꠞꠔꠣ ꠘꠣꠄ, ꠀꠞ ꠉꠞꠤꠛꠦꠅ ꠇꠝ ꠖꠤꠟꠦ ꠅꠁꠔ ꠘꠣꠄ।
EXO 30:16 ꠔꠥꠝꠤ ꠛꠘꠤ ꠁꠍꠞꠣꠁꠟꠞ ꠉꠦꠍ ꠕꠣꠇꠤ ꠎꠣꠘꠞ ꠛꠖꠟꠣ ꠅꠃ ꠞꠥꠙꠣ ꠘꠤꠀ, ꠀꠝꠣꠞ ꠊꠞꠞ ꠇꠣꠝꠅ ꠟꠣꠉꠣꠁꠅ। ꠔꠥꠝꠞꠣꠞ ꠎꠣꠘꠞ ꠛꠖꠟꠣ ꠁ ꠞꠥꠙꠣꠄ, ꠛꠘꠤ ꠁꠍꠞꠣꠁꠟ ꠅꠇꠟꠞꠦ ꠝꠣꠛꠥꠖꠞ ꠖꠞꠛꠣꠞꠅ ꠁꠀꠖ ꠇꠞꠣꠁ ꠖꠤꠛ।”
EXO 30:17 ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ,
EXO 30:18 “ꠅꠎꠥ ꠇꠞꠣꠞ ꠟꠣꠉꠤ ꠔꠥꠝꠤ ꠙꠤꠔꠟꠞ ꠄꠇꠐꠣ ꠉꠣꠝꠟꠣ, ꠀꠞ ꠉꠣꠝꠟꠣ ꠕꠅꠀꠞ ꠟꠣꠉꠤ ꠙꠤꠔꠟꠞ ꠄꠇꠈꠣꠘ ꠌꠇꠤ-ꠈꠣꠐ ꠛꠣꠘꠣꠁꠅ। ꠝꠤꠟꠘ-ꠔꠣꠝ꠆ꠛꠥ ꠀꠞ ꠇꠥꠞꠛꠣꠘꠤ ꠈꠣꠘꠣꠞ ꠝꠣꠎꠈꠣꠘꠅ ꠙꠣꠘꠤ ꠜꠞꠤꠀ ꠅꠉꠥ ꠕꠁꠅ।
EXO 30:19 ꠁ ꠙꠣꠘꠤꠖꠤ ꠢꠣꠞꠥꠘ ꠀꠞ ꠔꠣꠞ ꠙꠥꠀꠂꠘ꠆ꠔꠦ ꠅꠎꠥ ꠇꠞꠛꠣ।
EXO 30:20 ꠔꠣꠞꠣ ꠎꠣꠔꠦ ꠘꠣ ꠝꠞꠂꠘ, ꠄꠞꠟꠣꠉꠤ ꠙꠞꠔꠦꠇꠛꠣꠞ ꠝꠤꠟꠘ-ꠔꠣꠝ꠆ꠛꠥꠔ ꠢꠣꠝꠣꠁꠛꠣꠞ ꠛꠣꠟꠣ ꠅꠃ ꠙꠣꠘꠤꠖꠤ ꠅꠎꠥ ꠇꠞꠔꠦ ꠅꠁꠛ। ꠁꠝꠣꠝ ꠢꠤꠡꠣꠛꠦ ꠝꠣꠛꠥꠖꠞ ꠘꠣꠝꠦ ꠀꠉꠥꠘꠤꠔ ꠖꠦꠅꠀ ꠎꠦꠇꠥꠘꠥ ꠇꠥꠞꠛꠣꠘꠤ ꠀꠖꠣꠄ ꠇꠞꠣꠞ ꠡꠝꠄꠅ ꠅꠎꠥ ꠇꠞꠔꠦ ꠅꠁꠛ।
EXO 30:21 ꠔꠣꠞꠣ ꠎꠣꠘꠦ ꠛꠣꠌꠤꠀ ꠞꠅꠀꠞ ꠟꠣꠉꠤ ꠅꠃ ꠅꠎꠥ ꠇꠞꠛꠣ। ꠁ ꠢꠥꠇꠥꠝ ꠔꠣꠞꠣꠞ ꠟꠣꠉꠤ ꠢꠞ-ꠢꠣꠝꠦꠡꠣ ꠌꠣꠟꠥ ꠞꠁꠛ, ꠅꠀꠞꠤꠡꠞ ꠙꠞ ꠅꠀꠞꠤꠡ ꠗꠞꠤ ꠛꠅꠀꠁꠟ ꠞꠁꠛ।”
EXO 30:22 ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ,
EXO 30:23 “ꠔꠥꠝꠣꠞ ꠘꠤꠎꠞ ꠉꠦꠍꠦ ꠈꠥꠡꠛꠄꠖꠣꠞ ꠜꠣꠟꠣ ꠜꠣꠟꠣ ꠝꠡꠟꠣ ꠅꠇꠟ ꠖꠟꠣ ꠇꠞꠅ। ꠔꠥꠝꠤ ꠙꠣꠌ-ꠡ ꠔꠟꠣ ꠝꠥꠞꠣ ꠘꠣꠝꠞ ꠀꠔꠞ, ꠀꠠꠣꠁ-ꠡ ꠔꠟꠣ ꠈꠥꠡꠛꠄ ꠀꠟꠣ ꠒꠣꠁꠟꠌꠤꠘꠤ, ꠀꠞ ꠀꠠꠣꠁ-ꠡ ꠔꠟꠣ ꠛꠍ,
EXO 30:24 ꠡꠣꠗꠣꠞꠘ ꠒꠣꠁꠟꠌꠤꠘꠤ ꠙꠣꠌ-ꠡ ꠔꠟꠣ, ꠀꠞ ꠎꠄꠔꠥꠘꠞ ꠔꠦꠟ ꠌꠣꠁꠞ ꠡꠦꠞ ꠖꠟꠣ ꠇꠞꠤꠅ। ꠁ ꠝꠣꠙ ꠅꠁꠟ ꠄꠛꠣꠖꠔ ꠈꠣꠘꠣꠞ ꠝꠣꠙꠦ।
EXO 30:25 ꠅꠃ ꠝꠡꠟꠣ ꠅꠇꠟ ꠖꠤꠀ ꠀꠉꠞ-ꠈꠥꠡꠛꠄ ꠝꠡꠟꠣ ꠛꠣꠘꠣꠘꠤꠞ ꠇꠣꠞꠤꠉꠞꠞ ꠘꠤꠅꠝꠦ ꠔꠥꠝꠤ ꠈꠦꠟꠣꠚꠔꠤ ꠡꠝꠎꠤꠛꠣꠞ ꠔꠦꠟ ꠛꠣꠘꠣꠁꠅ, ꠁ ꠔꠦꠟ ꠔ ꠙꠛꠤꠔ꠆ꠞ।
EXO 30:26 ꠅꠃ ꠔꠦꠟ ꠖꠤꠀ ꠔꠥꠝꠤ ꠝꠤꠟꠘ-ꠔꠣꠝ꠆ꠛꠥ, ꠡꠣꠢꠣꠖꠔ ꠡꠘ꠆ꠖꠥꠇ,
EXO 30:27 ꠐꠦꠛꠥꠟ, ꠐꠦꠛꠥꠟꠞ ꠃꠙꠞꠞ ꠢꠇꠟ ꠍꠣꠝꠣꠘꠣ, ꠌꠦꠞꠣꠉ ꠖꠣꠘꠤꠞ ꠢꠇꠟꠔꠣ, ꠀꠞ ꠀꠉꠞ-ꠈꠥꠡꠛꠄ ꠎꠣꠟꠣꠘꠤꠞ ꠐꠦꠛꠥꠟ,
EXO 30:28 ꠇꠥꠞꠛꠣꠘꠤ ꠈꠣꠘꠣ ꠀꠞ ꠄꠞ ꠝꠣꠎꠞ ꠢꠇꠟ ꠍꠣꠝꠣꠘꠣ, ꠅꠎꠥꠞ ꠉꠣꠝꠟꠣ ꠀꠞ ꠄꠞ ꠔꠟꠞ ꠌꠇꠤ-ꠈꠣꠐ ꠢꠇꠟꠔꠣꠞꠦ ꠚꠥꠍꠤꠀ ꠙꠣꠇ-ꠙꠛꠤꠔ꠆ꠞ ꠇꠞꠤꠅ।
EXO 30:29 ꠔꠦꠃ ꠁ ꠢꠇꠟꠔꠣ ꠝꠢꠣ-ꠙꠛꠤꠔ꠆ꠞ ꠍꠣꠝꠣꠘꠣ ꠅꠁꠛ। ꠁꠔꠣ ꠍꠣꠝꠣꠘꠣ ꠇꠦꠃ ꠍꠁꠟꠦ, ꠢꠦ-ꠅ ꠝꠢꠣ-ꠙꠛꠤꠔ꠆ꠞ ꠅꠁꠎꠤꠛ।
EXO 30:30 “ꠔꠥꠝꠤ ꠢꠣꠞꠥꠘꠞꠦ ꠀꠞ ꠔꠣꠞ ꠙꠥꠀꠂꠘꠞꠦ ꠀꠝꠣꠞ ꠁꠝꠣꠝꠔꠤꠞ ꠇꠣꠝꠞ ꠟꠣꠉꠤ ꠈꠦꠟꠣꠚꠔꠤꠞ ꠔꠦꠟ ꠖꠤꠀ ꠙꠣꠇ-ꠙꠛꠤꠔ꠆ꠞ ꠇꠞꠤꠅ।
EXO 30:31 ꠀꠞ ꠛꠘꠤ ꠁꠍꠞꠣꠁꠟꠞꠦ ꠎꠣꠘꠣꠁ ꠖꠤꠅ, ꠅꠀꠞꠤꠡꠞ ꠙꠞ ꠅꠀꠞꠤꠡ ꠗꠞꠤ ꠁꠐꠣꠃ ꠅꠁꠛ ꠀꠝꠣꠞ ꠈꠦꠟꠣꠚꠔꠤ ꠡꠝꠎꠤꠛꠣꠞ ꠙꠛꠤꠔ꠆ꠞ ꠔꠦꠟ।
EXO 30:32 ꠁ ꠔꠦꠟ ꠝꠣꠘꠡꠞ ꠉꠔꠞꠅ ꠖꠦꠅꠀ ꠎꠣꠁꠔ ꠘꠣꠄ। ꠁ ꠘꠤꠅꠝꠦ ꠔꠣꠞꠣ ꠎꠣꠔꠦ ꠀꠞ ꠇꠥꠘꠥ ꠔꠦꠟ ꠘꠣ ꠛꠣꠘꠣꠄ। ꠁ ꠔꠦꠟ ꠔ ꠙꠛꠤꠔ꠆ꠞ। ꠔꠥꠝꠞꠣ ꠁꠐꠣꠞꠦ ꠙꠣꠇ-ꠙꠛꠤꠔ꠆ꠞ ꠝꠘꠅ ꠇꠞꠤꠀ ꠁꠎ꠆ꠎꠔ ꠇꠞꠔꠦ ꠅꠁꠛ।
EXO 30:33 ꠇꠦꠃ ꠎꠥꠖꠤ ꠁ ꠟꠣꠈꠣꠘ ꠔꠦꠟ ꠔꠂꠀꠞ ꠇꠞꠦ, ꠛꠣ ꠁꠝꠣꠝ ꠍꠣꠛ ꠍꠣꠠꠣ ꠀꠞ ꠇꠦꠃ ꠁ ꠔꠦꠟ ꠉꠔꠞꠅ ꠝꠣꠈꠦ, ꠔꠦ ꠔꠣꠞꠦ ꠘꠤꠎꠞ ꠎꠣꠔꠤ ꠕꠣꠇꠤ ꠚꠥꠍꠤꠟꠤꠛꠣꠄ।”
EXO 30:34 ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ, “ꠔꠥꠝꠤ ꠘꠤꠎꠞ ꠉꠦꠍꠦ ꠇꠤꠍꠥ ꠈꠥꠡꠛꠄ ꠀꠟꠣ ꠝꠡꠟꠣ: ꠉꠥꠉꠉꠥꠟꠥ, ꠘꠈꠤ, ꠇꠥꠘ꠆ꠖꠥꠞꠥ ꠀꠞ ꠈꠣꠐꠤ ꠟꠥꠛꠣꠘ ꠖꠟꠣ ꠇꠞꠤꠅ। ꠖꠟꠣ ꠇꠞꠤꠀ ꠅꠔꠣ ꠢꠝꠣꠘ ꠢꠝꠣꠘ ꠇꠞꠤ ꠝꠤꠡꠣꠁꠅ।
EXO 30:35 ꠀꠞ ꠎꠦꠞꠣ ꠀꠉꠞ-ꠈꠥꠡꠛꠄ ꠛꠣꠘꠣꠁꠘ, ꠔꠣꠞꠣꠞꠦꠖꠤ ꠅꠃ ꠇꠣꠝ ꠇꠞꠣꠁꠅ। ꠁꠔꠣꠞ ꠟꠉꠦ ꠘꠥꠘ ꠝꠤꠡꠣꠁꠅ, ꠁꠔꠣ ꠅꠁꠛ ꠘꠤꠞꠜꠦꠎꠣꠟ ꠈꠣꠐꠤ ꠙꠣꠇ-ꠙꠛꠤꠔ꠆ꠞ ꠀꠉꠞ।
EXO 30:36 ꠅꠃ ꠀꠉꠞꠞ ꠕꠥꠠꠣ ꠉꠥꠠꠣ ꠘꠤꠀ ꠝꠤꠟꠘ-ꠔꠣꠝ꠆ꠛꠥꠞ ꠡꠣꠢꠣꠖꠔ ꠡꠘ꠆ꠖꠥꠇꠞ ꠍꠣꠝꠘꠦ ꠕꠁꠅ। ꠢꠘꠅ ꠀꠝꠤ ꠔꠥꠝꠣꠞꠦ ꠖꠤꠖꠣꠞ ꠖꠤꠝꠥ। ꠔꠥꠝꠞꠣ ꠁ ꠀꠉꠞꠞꠦ ꠝꠢꠣ-ꠙꠛꠤꠔ꠆ꠞ ꠍꠣꠝꠣꠘꠣ ꠝꠘꠅ ꠇꠞꠤꠅ।
EXO 30:37 ꠅꠃ ꠝꠡꠟꠣ ꠖꠤꠀ ꠁ ꠘꠤꠅꠝꠦ ꠇꠦꠃ ꠎꠣꠔꠦ ꠔꠣꠞ ꠘꠤꠎꠞ ꠟꠣꠉꠤ ꠇꠥꠘꠥ ꠀꠉꠞ-ꠈꠥꠡꠛꠄ ꠘꠣ ꠛꠣꠘꠣꠄ। ꠁꠔꠣ ꠔ ꠝꠣꠛꠥꠖꠞ ꠘꠣꠝꠦ ꠙꠣꠇ-ꠙꠛꠤꠔ꠆ꠞ ꠌꠤꠎ, ꠁꠈꠣꠘ ꠈꠤꠀꠟ ꠞꠣꠈꠤꠅ।
EXO 30:38 ꠈꠥꠡꠛꠄꠖꠣꠞ ꠌꠤꠎ ꠝꠘꠅ ꠇꠞꠤꠀ ꠇꠦꠃ ꠎꠥꠖꠤ ꠁꠔꠣ ꠔꠂꠀꠞ ꠇꠞꠤꠟꠣꠄ, ꠔꠦ ꠔꠣꠞꠦ ꠁ ꠎꠣꠔꠤ ꠕꠣꠇꠤ ꠚꠥꠍꠤꠟꠤꠛꠣꠄ।”
EXO 31:1 ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ,
EXO 31:2 “ꠢꠥꠘꠅ, ꠀꠝꠤ ꠄꠢꠥꠖꠣ ꠉꠥꠡ꠆ꠐꠤꠞ ꠢꠥꠞꠞ ꠘꠣꠔꠤ, ꠃꠞꠤꠞ ꠙꠥꠀ ꠛꠣꠔꠍꠦꠟꠟꠞꠦ ꠙꠍꠘ꠆ꠖ ꠇꠞꠍꠤ।
EXO 31:3 ꠀꠝꠤ ꠔꠣꠞꠦ ꠀꠟ꠆ꠟꠣꠁ ꠞꠥꠢꠥ ꠖꠤꠀ ꠇꠣꠝꠤꠟ ꠇꠞꠍꠤ। ꠢꠇꠟ ꠟꠣꠈꠣꠘ ꠇꠣꠞꠤꠉꠞꠤ ꠇꠣꠝꠞ ꠀꠈꠟ-ꠛꠥꠖ꠆ꠖꠤ, ꠛꠤꠖ꠆ꠖꠣꠄ ꠃꠡ꠆ꠔꠣꠖꠤ ꠇꠣꠝꠞ ꠈꠦꠝꠔꠣ ꠖꠤꠍꠤ।
EXO 31:4 ꠄꠞꠟꠣꠉꠤ ꠢꠦ ꠡꠥꠘꠣ, ꠞꠥꠙꠣ, ꠙꠤꠔꠟꠞ ꠃꠙꠞꠦ ꠡꠥꠘ꠆ꠖꠞ ꠡꠥꠘ꠆ꠖꠞ ꠘꠇꠡꠣ ꠛꠣꠘꠣꠁꠔ ꠙꠣꠞꠛ।
EXO 31:5 ꠖꠣꠝꠤ ꠖꠣꠝꠤ ꠙꠣꠔ꠆ꠔꠞ ꠇꠣꠐꠤꠀ ꠝꠘꠤ-ꠝꠥꠇ꠆ꠔꠣ ꠟꠣꠉꠣꠘꠤ, ꠟꠣꠇꠠꠤꠞ ꠃꠙꠞꠦ ꠘꠇꠡꠣꠞ ꠇꠣꠝ ꠀꠞ ꠢꠇꠟ ꠎꠣꠔꠞ ꠀꠔꠞ ꠇꠣꠝ ꠇꠞꠔ ꠙꠣꠞꠛ।
EXO 31:6 ꠔꠣꠞ ꠎꠥꠉꠣꠟꠤ ꠢꠤꠡꠣꠛꠦ ꠀꠝꠤ ꠖꠣꠘ ꠉꠥꠡ꠆ꠐꠤꠞ ꠅꠢꠤꠍꠣꠝꠣꠇꠞ ꠙꠥꠀ ꠀꠢꠟꠤꠀꠛꠞꠦ ꠙꠍꠘ꠆ꠖ ꠇꠞꠍꠤ। ꠎꠦ ꠃꠡ꠆ꠔꠣꠖ ꠅꠇꠟꠦ ꠁ ꠇꠣꠝ ꠇꠞꠔꠣ ꠙꠣꠞꠛꠣ, ꠀꠝꠤ ꠔꠣꠞꠣꠞꠦ ꠇꠣꠝꠞ ꠀꠈꠟ ꠖꠤꠍꠤ, ꠎꠣꠔꠦ ꠔꠥꠝꠣꠞꠦ ꠛꠣꠔꠣꠁꠟ ꠀꠝꠣꠞ ꠢꠥꠇꠥꠝ ꠝꠣꠚꠤꠇ, ꠁꠔꠣ ꠢꠇꠟꠔꠣ ꠔꠣꠞꠣ ꠛꠣꠘꠣꠁꠔꠣ ꠙꠣꠞꠂꠘ।
EXO 31:7 ꠔꠣꠞꠣ ꠛꠣꠘꠣꠁꠛꠣ, ꠝꠤꠟꠘ-ꠔꠣꠝ꠆ꠛꠥ, ꠡꠣꠢꠣꠖꠔ ꠡꠘ꠆ꠖꠥꠇ, ꠄꠞ ꠃꠙꠞꠞ ꠓꠣꠇꠘꠣ, ꠔꠣꠝ꠆ꠛꠥꠞ ꠢꠇꠟ ꠝꠣꠟ-ꠍꠣꠝꠣꠘꠣ,
EXO 31:8 ꠐꠦꠛꠥꠟ, ꠐꠦꠛꠥꠟꠞ ꠟꠉꠞ ꠌꠤꠎ ꠅꠇꠟ, ꠈꠣꠐꠤ ꠡꠥꠘꠣꠞ ꠌꠦꠞꠣꠉ ꠖꠣꠘꠤ, ꠌꠦꠞꠣꠉ ꠖꠣꠘꠤꠞ ꠟꠉꠞ ꠢꠇꠟꠔꠣ ꠀꠞ ꠀꠉꠞ-ꠈꠥꠡꠛꠄ ꠎꠣꠟꠣꠘꠤꠞ ꠐꠦꠛꠥꠟ,
EXO 31:9 ꠇꠥꠞꠛꠣꠘꠤ ꠈꠣꠘꠣ ꠀꠞ ꠄꠞ ꠢꠇꠟ ꠝꠣꠟ-ꠍꠣꠝꠣꠘꠣ, ꠢꠣꠘ꠆ꠒꠤ-ꠛꠣꠡꠘ, ꠅꠎꠥꠞ ꠙꠣꠘꠤꠞ ꠉꠣꠝꠟꠣ ꠀꠞ ꠄꠞ ꠌꠇꠤ-ꠈꠣꠐ,
EXO 31:10 ꠁꠝꠣꠝꠔꠤ ꠇꠣꠝꠞ ꠟꠣꠉꠤ ꠢꠣꠞꠥꠘꠞ ꠁꠝꠣꠝꠔꠤꠞ ꠟꠦꠛꠣꠍ ꠀꠞ ꠔꠣꠞ ꠙꠥꠀꠂꠘ꠆ꠔꠞ ꠟꠦꠛꠣꠍ,
EXO 31:11 ꠈꠦꠟꠣꠚꠔꠤꠞ ꠔꠦꠟ, ꠙꠣꠇ ꠎꠣꠉꠣꠞ ꠟꠣꠉꠤ ꠈꠥꠡꠛꠄ ꠀꠟꠣ ꠀꠉꠞ। ꠀꠝꠤ ꠔꠥꠝꠣꠞꠦ ꠎꠦꠟꠣ ꠢꠥꠇꠥꠝ ꠖꠤꠍꠤ, ꠄꠇ꠆ꠇꠦꠞꠦ ꠅꠃ ꠟꠣꠈꠣꠘ ꠔꠣꠞꠣ ꠛꠣꠘꠣꠁꠛꠣ।”
EXO 31:12 ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ,
EXO 31:13 “ꠔꠥꠝꠤ ꠘꠤꠎꠦ ꠛꠘꠤ ꠁꠍꠞꠣꠁꠟꠞꠦ ꠇꠅ, ꠔꠥꠝꠞꠣ ꠀꠝꠣꠞ ꠖꠦꠅꠀ ꠙꠞꠔꠦꠇ ꠎꠥꠝ꠆ꠝꠣꠛꠣꠞ ꠝꠣꠘꠤꠅ। ꠁ ꠎꠥꠝ꠆ꠝꠣꠛꠣꠞ ꠅꠀꠞꠤꠡꠞ ꠙꠞ ꠅꠀꠞꠤꠡ ꠗꠞꠤ ꠔꠥꠝꠞꠣ ꠀꠞ ꠀꠝꠣꠞ ꠝꠣꠎꠦ ꠄꠇ ꠘꠤꠡꠣꠘꠣ ꠅꠁꠛ, ꠎꠣꠔꠦ ꠔꠥꠝꠞꠣ ꠛꠥꠎꠛꠣꠄ, ꠀꠝꠤꠃ ꠝꠣꠛꠥꠖ, ꠀꠞ ꠀꠝꠤ ꠔꠥꠝꠞꠣꠞꠦ ꠀꠝꠣꠞ ꠙꠛꠤꠔ꠆ꠞ ꠛꠘ꠆ꠖꠣ ꠅꠀꠞ ꠟꠣꠉꠤ ꠀꠟꠣꠖꠣ ꠇꠞꠍꠤ।
EXO 31:14 “ꠔꠥꠝꠞꠣ ꠎꠥꠝ꠆ꠝꠣꠛꠣꠞ ꠝꠣꠘꠤꠅ, ꠅꠃ ꠖꠤꠘꠞꠦ ꠔꠥꠝꠞꠣꠞ ꠟꠣꠉꠤ ꠙꠣꠇ ꠖꠤꠘ ꠇꠞꠣ ꠅꠁꠍꠦ। ꠇꠦꠃ ꠎꠥꠖꠤ ꠁ ꠖꠤꠘ ꠘꠣ ꠝꠣꠘꠦ, ꠔꠦ ꠔꠣꠞꠦ ꠝꠣꠞꠤꠟꠤꠔꠦ ꠅꠁꠛ। ꠎꠦ ꠝꠣꠘꠡꠦ ꠁꠖꠤꠘ ꠇꠥꠘꠥꠎꠣꠔ ꠇꠣꠝ ꠇꠞꠛ, ꠔꠣꠞꠦ ꠔꠣꠞ ꠎꠣꠔꠤꠞ ꠝꠣꠎ ꠕꠣꠇꠤ ꠚꠥꠍꠤꠟꠤꠛꠣꠄ।
EXO 31:15 ꠔꠥꠝꠞꠣ ꠢꠣꠙ꠆ꠔꠣꠞ ꠍꠄꠖꠤꠘ ꠇꠣꠝ ꠇꠞꠤꠅ, ꠅꠁꠟꠦ ꠡꠣꠔ ꠘꠝ꠆ꠛꠞ ꠖꠤꠘ ꠝꠣꠛꠥꠖꠞ ꠘꠣꠝꠦ ꠀꠞꠣꠝꠞ ꠖꠤꠘ, ꠎꠥꠝ꠆ꠝꠣꠛꠣꠞ। ꠡꠥꠇ꠆ꠞꠛꠣꠞ ꠡꠥꠞꠥꠎ ꠒꠥꠛꠣ ꠕꠣꠇꠤ ꠡꠘꠤꠛꠣꠞ ꠡꠥꠞꠥꠎ ꠒꠥꠛꠣꠞ ꠀꠉ ꠙꠞ꠆ꠎꠘ꠆ꠔ ꠎꠥꠝ꠆ꠝꠣꠛꠣꠞ। ꠁ ꠖꠤꠘ ꠎꠦ ꠝꠣꠘꠡꠦ ꠇꠣꠝ ꠇꠞꠛ, ꠔꠣꠞꠦ ꠝꠣꠞꠤꠟꠤꠛꠣꠄ।
EXO 31:16 ꠛꠘꠤ ꠁꠍꠞꠣꠁꠟ ꠅꠇꠟꠦ ꠀꠝꠣꠞ ꠖꠦꠅꠀ ꠌꠤꠞꠇꠣꠟꠤꠘ ꠘꠤꠅꠝ ꠢꠤꠡꠣꠛꠦ, ꠅꠀꠞꠤꠡꠞ ꠙꠞ ꠅꠀꠞꠤꠡ ꠗꠞꠤ ꠢꠞ-ꠢꠣꠝꠦꠡꠣ ꠁ ꠎꠥꠝ꠆ꠝꠣꠛꠣꠞ ꠝꠣꠘꠔꠦ ꠅꠁꠛ।
EXO 31:17 ꠁ ꠎꠥꠝ꠆ꠝꠣꠛꠣꠞ ꠔ ꠛꠘꠤ ꠁꠍꠞꠣꠁꠟ ꠀꠞ ꠀꠝꠣꠞ ꠝꠣꠎꠦ ꠢꠣꠝꠦꠡꠣꠇꠥꠞ ꠟꠣꠉꠤ ꠌꠤꠞꠇꠣꠟꠤꠘ ꠄꠇ ꠘꠤꠡꠣꠘꠣ। ꠇꠣꠞꠘ ꠍꠄꠖꠤꠘꠦ ꠝꠣꠛꠥꠖꠦ ꠀꠍꠝꠣꠘ-ꠎꠝꠤꠘ ꠢꠇꠟꠔꠣ ꠙꠄꠖꠣ ꠇꠞꠟꠣ, ꠅꠁꠟꠦ ꠡꠣꠔ ꠘꠝ꠆ꠛꠞ ꠖꠤꠘ ꠇꠥꠘꠥ ꠇꠣꠝ ꠘꠣ ꠇꠞꠤꠀ ꠎꠤꠞꠣꠁꠟꠣ।”
EXO 31:18 ꠝꠣꠛꠥꠖꠦ ꠔꠥꠞ ꠙꠣꠠꠞ ꠃꠙꠞꠦ ꠢꠎꠞꠔ ꠝꠥꠍꠣꠞ ꠟꠉꠦ ꠅꠃ ꠛꠣꠔꠌꠤꠔ ꠡꠦꠡ ꠇꠞꠤꠀ ꠢꠣꠞꠟꠦ, ꠝꠥꠍꠣꠞ ꠀꠔꠅ ꠖꠥꠁ ꠐꠥꠇꠞꠣ ꠡꠣꠢꠣꠖꠔ ꠙꠣꠔ꠆ꠔꠞ ꠖꠤꠟꠣ। ꠅꠃ ꠙꠣꠔ꠆ꠔꠞꠞ ꠝꠣꠎꠦ ꠀꠟ꠆ꠟꠣ ꠙꠣꠇꠦ ꠔꠣꠘ ꠘꠤꠎꠞ ꠀꠔꠦ ꠔꠣꠘ ꠢꠥꠇꠥꠝ-ꠀꠢꠇꠣꠝ ꠟꠦꠈꠍꠂꠘ।
EXO 32:1 ꠝꠥꠍꠣ ꠘꠛꠤ ꠙꠣꠠ ꠕꠣꠇꠤ ꠟꠣꠝꠤꠀ ꠀꠁꠔꠦ ꠖꠦꠞꠤ ꠅꠞ ꠖꠦꠈꠤꠀ, ꠝꠣꠘꠡꠦ ꠀꠁꠀ ꠢꠣꠞꠥꠘꠞ ꠌꠣꠁꠞꠅꠛꠣꠄ ꠖꠟꠣ ꠅꠁꠀ ꠇꠁꠟꠣ, “ꠀꠝꠞꠣꠞꠦ ꠙꠕ ꠌꠤꠘꠣꠁꠀ ꠘꠦꠅꠀꠞ ꠟꠣꠉꠤ, ꠀꠙꠘꠦ ꠀꠝꠞꠣꠞꠦ ꠖꠦꠛꠔꠣ ꠛꠣꠘꠣꠁ ꠖꠦꠃꠇ꠆ꠇꠣ। ꠇꠣꠞꠘ, ꠎꠦ ꠝꠥꠍꠣꠄ ꠀꠝꠞꠣꠞꠦ ꠝꠤꠡꠞ ꠕꠣꠇꠤ ꠛꠣꠞ ꠇꠞꠤ ꠀꠘꠍꠦ, ꠔꠣꠞ ꠇꠤꠔꠣ ꠊꠐꠍꠦ ꠀꠝꠞꠣ ꠔ ꠎꠣꠘꠤ ꠘꠣ।”
EXO 32:2 ꠁꠈꠣꠘ ꠢꠥꠘꠤꠀ ꠢꠣꠞꠥꠘꠦ ꠔꠣꠞꠣꠞꠦ ꠇꠁꠟꠣ, “ꠔꠥꠝꠞꠣ ꠎꠣꠞꠎꠤꠞ ꠛꠃ ꠀꠞ ꠙꠥꠀ-ꠙꠥꠠꠤꠘ꠆ꠔꠞ ꠇꠣꠘꠅ ꠕꠣꠇꠤ ꠡꠥꠘꠣꠞ ꠉꠄꠘꠣ ꠈꠥꠟꠤꠀ ꠀꠝꠣꠞ ꠉꠦꠍꠦ ꠀꠘꠅ।”
EXO 32:3 ꠔꠦꠃ ꠢꠇꠟꠦ ꠔꠣꠞꠣꠞ ꠇꠣꠘꠞ ꠉꠄꠘꠣ ꠈꠥꠟꠤꠀ ꠢꠣꠞꠥꠘꠞ ꠉꠦꠍꠦ ꠀꠘꠤꠀ ꠖꠤꠟ।
EXO 32:4 ꠝꠣꠘꠡꠦ ꠎꠦꠔꠣ ꠡꠥꠘꠣ ꠀꠘꠤꠀ ꠖꠤꠟꠣ, ꠢꠣꠞꠥꠘꠦ ꠅꠔꠣ ꠘꠤꠀ ꠀꠉꠥꠁꠘꠖꠤ ꠉꠟꠣꠁꠀ, ꠢꠥꠘꠣꠞꠞ ꠀꠔꠤꠀꠞꠖꠤ ꠄꠇ ꠛꠣꠍꠥꠞꠞ ꠝꠥꠞ꠆ꠔꠤ ꠛꠣꠘꠣꠁꠟꠣ। ꠅꠉꠥ ꠖꠦꠈꠤꠀ ꠛꠘꠤ ꠁꠍꠞꠣꠁꠟꠦ ꠇꠁꠟꠣ, “ꠜꠣꠁ ꠅꠇꠟ, ꠅꠃ ꠄꠁꠘꠃ ꠔꠥꠝꠞꠣꠞ ꠖꠦꠛꠔꠣ, ꠎꠦꠁꠘ ꠔꠥꠝꠞꠣꠞꠦ ꠝꠤꠡꠞ ꠖꠦꠡ ꠕꠣꠇꠤ ꠛꠣꠞ ꠇꠞꠤ ꠀꠘꠍꠂꠘ।”
EXO 32:5 ꠁ ꠢꠣꠟꠔ ꠖꠦꠈꠤꠀ ꠢꠣꠞꠥꠘꠦ ꠢꠃ ꠛꠣꠍꠥꠞꠞ ꠍꠣꠝꠘꠦ ꠄꠇ ꠛꠟꠤ ꠈꠣꠘꠣ ꠛꠣꠘꠣꠁꠀ ꠎꠣꠘꠣꠁ ꠖꠤꠟꠣ, “ꠍꠣꠝꠘꠞ ꠇꠣꠁꠟ ꠝꠣꠛꠥꠖꠞ ꠘꠣꠝꠦ ꠈꠥꠡꠤ-ꠛꠣꠡꠤ ꠇꠞꠣ ꠅꠁꠛ।”
EXO 32:6 ꠔꠦꠃ ꠛꠣꠖꠞ ꠖꠤꠘ ꠈꠥꠛ ꠍꠛꠞꠦ ꠃꠑꠤꠀ ꠝꠣꠘꠡꠦ ꠖꠦꠛꠔꠣꠞ ꠍꠣꠝꠘꠦ ꠀꠁꠀ ꠝꠋꠉꠟ ꠛꠟꠤ ꠀꠞ ꠙꠡꠥ ꠎꠣꠟꠣꠁꠀ ꠛꠟꠤ ꠖꠤꠟꠣ। ꠛꠣꠖꠦ ꠔꠣꠞꠣ ꠈꠣꠅꠀ-ꠖꠣꠅꠀ ꠇꠞꠤꠀ ꠢꠣꠞꠤ, ꠢꠂ-ꠢꠥꠟ꠆ꠟꠣ ꠇꠞꠤ ꠘꠣꠌ-ꠉꠣꠘ, ꠚꠥꠞ꠆ꠔꠤ-ꠀꠝꠥꠖ ꠇꠞꠣꠔ ꠟꠣꠉꠟꠣ।
EXO 32:7 ꠅꠃ ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ, “ꠔꠥꠝꠤ ꠙꠣꠠꠞ ꠟꠣꠝꠣꠔ ꠎꠣꠅ। ꠔꠥꠝꠣꠞ ꠅꠃ ꠎꠦꠔꠣ ꠝꠣꠘꠡꠞꠦ ꠝꠤꠡꠞ ꠖꠦꠡ ꠕꠣꠇꠤ ꠛꠣꠞ ꠇꠞꠤ ꠀꠘꠍ, ꠁꠔꠣ ꠔ ꠘꠣꠚꠞꠝꠣꠘ ꠛꠘꠤꠉꠦꠍꠦ।
EXO 32:8 ꠀꠝꠤ ꠔꠣꠞꠣꠞꠦ ꠎꠦꠟꠣ ꠌꠟꠣꠞ ꠢꠥꠇꠥꠝ ꠖꠤꠍꠟꠣꠝ, ꠔꠣꠞꠣ ꠁꠔꠣ ꠛꠣꠖ ꠖꠤꠀ ꠘꠤꠎꠞ ꠟꠣꠉꠤ ꠄꠇ ꠛꠣꠍꠥꠞꠞ ꠝꠥꠞ꠆ꠔꠤ ꠛꠣꠘꠣꠁꠀ, ꠝꠣꠐꠤꠔ ꠙꠠꠤꠀ ꠅꠉꠥꠞꠦ ꠙꠞꠘꠣꠝ ꠇꠞꠦꠞ। ꠅꠉꠥꠞ ꠘꠣꠝꠦ ꠔꠣꠞꠣ ꠙꠡꠥ ꠛꠟꠤ ꠖꠦꠞ ꠀꠞ ꠇꠞ, ꠜꠣꠁ ꠅꠇꠟ, ꠅꠃ ꠄꠁꠘꠃ ꠔꠥꠝꠞꠣꠞ ꠖꠦꠛꠔꠣ, ꠎꠦꠁꠘ ꠔꠥꠝꠞꠣꠞꠦ ꠝꠤꠡꠞ ꠖꠦꠡ ꠕꠣꠇꠤ ꠛꠣꠞ ꠇꠞꠤ ꠀꠘꠍꠂꠘ।”
EXO 32:9 ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ, “ꠀꠝꠤ ꠁꠔꠣ ꠝꠣꠘꠡꠞꠦ ꠌꠤꠘꠤ, ꠁꠔꠣ ꠔ ꠉꠣꠠꠔꠦꠠꠣ-ꠄꠇꠉꠥꠁꠀ ꠎꠣꠔ।
EXO 32:10 ꠅꠈꠘ ꠔꠥꠝꠤ ꠀꠝꠣꠞꠦ ꠛꠣꠗꠣ ꠖꠤꠅ ꠘꠣ, ꠁꠔꠣꠞ ꠃꠙꠞꠦ ꠀꠝꠣꠞ ꠉꠥꠍꠣ ꠀꠉꠥꠁꠘꠞ ꠟꠣꠈꠣꠘ ꠖꠣꠃ ꠖꠣꠃ ꠇꠞꠤ ꠎꠟꠦꠞ, ꠀꠝꠤ ꠁꠔꠣꠞꠦ ꠍꠣꠞꠈꠣꠞ ꠇꠞꠤꠟꠤꠝꠥ। ꠛꠣꠖꠦ ꠀꠝꠤ ꠔꠥꠝꠣꠞ ꠝꠣꠎ ꠕꠣꠇꠤ ꠄꠇ ꠝꠢꠣ ꠎꠣꠔꠤ ꠙꠄꠖꠣ ꠇꠞꠝꠥ।”
EXO 32:11 ꠔꠦꠃ ꠝꠥꠍꠣꠄ ꠔꠣꠘ ꠝꠣꠛꠥꠖ ꠀꠟ꠆ꠟꠣꠞꠦ ꠝꠤꠘꠔ-ꠇꠣꠎ꠆ꠎꠤ ꠇꠞꠤꠀ ꠇꠁꠟꠣ, “ꠅ ꠝꠣꠛꠥꠖ, ꠔꠥꠝꠤ ꠔꠥꠝꠣꠞ ꠇꠥꠖꠞꠔꠤ ꠀꠔ ꠖꠤꠀ ꠔꠥꠝꠣꠞ ꠝꠢꠣ ꠇꠥꠖꠞꠔꠤ ꠛꠟꠦ ꠎꠦꠔꠣꠞꠦ ꠝꠤꠡꠞ ꠕꠣꠇꠤ ꠛꠣꠞ ꠇꠞꠤ ꠀꠘꠍ, ꠔꠣꠞꠣꠞ ꠃꠙꠞꠦ ꠔꠥꠝꠤ ꠇꠦꠘꠦ ꠅꠔ ꠉꠥꠍꠣ ꠅꠁꠟꠣꠄ?
EXO 32:12 ꠝꠤꠡꠞꠤ ꠅꠇꠟꠦ ꠇꠦꠘꠦ ꠁꠈꠣꠘ ꠝꠣꠔꠣꠞ ꠡꠥꠎꠥꠉ ꠙꠣꠁꠔꠣ, ꠙꠣꠠꠤꠀ ꠄꠟꠣꠇꠣꠔ ꠀꠘꠤꠀ ꠔꠣꠞꠣꠞꠦ ꠈꠔꠝ ꠇꠞꠤꠀ, ꠖꠥꠘꠤꠀ ꠕꠣꠇꠤ ꠔꠣꠞꠣꠞ ꠘꠣꠝ ꠝꠤꠐꠣꠁꠟꠤꠛꠣꠞ ꠟꠣꠉꠤ ꠔꠥꠝꠤ ꠔꠣꠞꠣꠞꠦ ꠝꠤꠡꠞ ꠕꠣꠇꠤ ꠛꠣꠞ ꠇꠞꠤꠀ ꠀꠘꠍ? ꠝꠣꠛꠥꠖ ꠉ, ꠔꠥꠝꠣꠞ ꠁ ꠛꠦꠕꠣꠄꠀ ꠉꠥꠍꠣꠈꠣꠘ ꠔꠥꠝꠤ ꠕꠣꠝꠣꠁꠟꠣꠅ। ꠝꠦꠢꠦꠞꠛꠣꠘꠤ ꠇꠞꠤ, ꠔꠥꠝꠣꠞ ꠛꠘ꠆ꠖꠣ ꠅꠇꠟꠞ ꠃꠙꠞꠦ ꠁ ꠉꠎꠛꠈꠣꠘ ꠀꠘꠤꠅ ꠘꠣ।
EXO 32:13 ꠔꠥꠝꠣꠞ ꠀꠙꠘ ꠉꠥꠟꠣꠝ ꠁꠛ꠆ꠞꠣꠢꠤꠝ, ꠁꠍꠢꠣꠇ ꠀꠞ ꠁꠀꠇꠥꠛꠞ ꠇꠕꠣ ꠁꠀꠖ ꠇꠞꠅ। ꠔꠥꠝꠤ ꠘꠤꠎꠞ ꠘꠣꠝꠦ ꠇꠍꠝ ꠈꠣꠁꠀ ꠔꠣꠞꠣꠞꠦ ꠇꠁꠍꠟꠣꠄ, ꠔꠣꠞꠣꠞ ꠅꠀꠞꠤꠡ ꠅꠇꠟꠞꠦ ꠔꠥꠝꠤ ꠀꠍꠝꠣꠘꠞ ꠔꠦꠞꠣꠞ ꠟꠣꠈꠣꠘ ꠛꠣꠠꠣꠁꠛꠣꠄ, ꠀꠞ ꠔꠥꠝꠣꠞ ꠅꠀꠖꠣ ꠇꠞꠣ ꠅꠃ ꠀꠡ꠆ꠔꠣ ꠖꠦꠡꠞ ꠝꠣꠟꠤꠇꠣꠘꠣꠅ ꠔꠣꠞꠣꠞꠦ ꠖꠤꠛꠣꠄ, ꠀꠞ ꠔꠣꠞꠣ ꠢꠞ-ꠢꠣꠝꠦꠡꠣꠇꠥꠞ ꠟꠣꠉꠤ ꠄꠞ ꠖꠈꠟ ꠙꠣꠁꠛꠣ।”
EXO 32:14 ꠁꠈꠣꠘ ꠢꠥꠘꠤꠀ ꠝꠣꠛꠥꠖꠞ ꠝꠦꠢꠦꠞꠛꠣꠘꠤ ꠅꠁꠟ। ꠔꠣꠁꠘ ꠔꠣꠘ ꠛꠘ꠆ꠖꠣ ꠅꠇꠟꠞ ꠃꠙꠞꠦ ꠎꠦ ꠉꠎꠛ ꠓꠣꠟꠤꠔꠣ ꠌꠣꠁꠍꠟꠣ, ꠁꠔꠣ ꠛꠣꠖ ꠖꠤꠟꠣꠁꠟꠣ।
EXO 32:15 ꠄꠞꠛꠣꠖꠦ ꠝꠥꠍꠣꠄ ꠀꠟ꠆ꠟꠣꠞ ꠖꠦꠅꠀ ꠖꠥꠁꠅꠈꠣꠘ ꠡꠣꠢꠣꠖꠔ ꠙꠣꠔ꠆ꠔꠞ ꠟꠁꠀ ꠟꠣꠝꠣꠔ ꠀꠁꠟꠣ। ꠁ ꠙꠣꠔ꠆ꠔꠞꠞ ꠃꠟꠐꠣ-ꠜꠣꠐꠤꠅꠟ ꠖꠥꠁꠅ ꠉꠣꠟꠣꠔ ꠟꠦꠈꠣ ꠀꠍꠤꠟ।
EXO 32:16 ꠁ ꠖꠥꠁꠅ ꠙꠣꠔ꠆ꠔꠞ ꠅꠁꠟ ꠀꠟ꠆ꠟꠣ ꠙꠣꠇꠞ ꠘꠤꠎꠞ ꠀꠔꠞ ꠇꠣꠝ, ꠀꠞ ꠁ ꠙꠣꠔ꠆ꠔꠞꠞ ꠃꠙꠞꠦ ꠈꠥꠖꠤꠀ ꠟꠦꠈꠣ ꠈꠣꠘꠅ ꠔꠣꠘ ꠘꠤꠎꠞ ꠀꠔꠞ ꠟꠦꠈꠣ।
EXO 32:17 ꠝꠥꠍꠣꠞ ꠈꠣꠖꠤꠝ ꠁꠃꠍꠣꠄ ꠝꠣꠘꠡꠞ ꠁꠔꠣ ꠢꠂ-ꠢꠥꠟ꠆ꠟꠣ ꠢꠥꠘꠤꠀ ꠝꠥꠍꠣꠞꠦ ꠇꠁꠟꠣ, “ꠍꠣꠛ, ꠀꠝꠞꠣꠞ ꠇꠦꠝ꠆ꠙꠞ ꠝꠣꠎꠦ ꠎꠥꠖ꠆ꠖꠞ ꠀꠅꠀꠎ ꠢꠥꠘꠣ ꠎꠣꠞ।”
EXO 32:18 ꠝꠥꠍꠣꠄ ꠇꠁꠟꠣ, “ꠁꠔꠣ ꠔ ꠇꠥꠘꠥ ꠎꠥꠖ꠆ꠖꠞ ꠀꠞꠣ-ꠎꠤꠔꠣꠞ ꠀꠅꠀꠎ ꠘꠣꠄ। ꠀꠝꠤ ꠎꠦꠔꠣ ꠢꠥꠘꠤꠀꠞ, ꠁꠔꠣ ꠔ ꠉꠣꠘꠞ ꠀꠅꠀꠎꠞ ꠟꠣꠈꠣꠘ ꠟꠣꠉꠦꠞ।”
EXO 32:19 ꠛꠣꠖꠦ ꠝꠥꠍꠣꠄ ꠇꠦꠝ꠆ꠙꠞ ꠇꠣꠍꠣꠔ ꠀꠁꠀ ꠝꠣꠘꠡꠞ ꠘꠣꠌꠣ-ꠘꠣꠌꠤ ꠀꠞ ꠛꠣꠍꠥꠞꠞ ꠝꠥꠞ꠆ꠔꠤ ꠖꠦꠈꠟꠣ। ꠖꠦꠈꠤꠀꠃ ꠔꠣꠁꠘ ꠉꠥꠍꠣꠄ ꠀꠉꠥꠁꠘ ꠅꠁꠀ, ꠀꠔꠞ ꠙꠣꠔ꠆ꠔꠞ ꠖꠥꠁꠅꠈꠣꠘ ꠁꠐꠣ ꠝꠣꠞꠤ ꠚꠣꠟꠣꠁ ꠖꠤꠟꠣ। ꠔꠦꠃ ꠙꠣꠔ꠆ꠔꠞ ꠖꠥꠁꠅꠈꠣꠘ ꠙꠣꠠꠞ ꠔꠟꠦ ꠙꠠꠤꠀ ꠌꠥꠞꠝꠣꠞ ꠅꠁꠉꠦꠟ।
EXO 32:20 ꠀꠞ ꠝꠥꠍꠣꠄ ꠔꠣꠞꠣꠞ ꠛꠣꠘꠣꠁꠟ ꠛꠣꠍꠥꠞꠞ ꠝꠥꠞ꠆ꠔꠤ ꠘꠤꠀ ꠀꠉꠥꠘꠤꠔ ꠚꠣꠟꠣꠁꠀ ꠎꠣꠟꠣꠁꠟꠤꠟꠣ। ꠛꠣꠖꠦ ꠅꠉꠥꠞꠦ ꠙꠤꠡꠤꠀ ꠉꠥꠠꠣ ꠛꠣꠘꠣꠁꠀ ꠙꠣꠘꠤꠔ ꠝꠤꠡꠣꠁꠀ, ꠛꠘꠤ ꠁꠍꠞꠣꠁꠟ ꠅꠇꠟꠞꠦ ꠈꠣꠅꠀꠁ ꠖꠤꠟꠣ।
EXO 32:21 ꠔꠣꠁꠘ ꠢꠣꠞꠥꠘꠞꠦ ꠇꠁꠟꠣ, “ꠁꠔꠣ ꠝꠣꠘꠡꠦ ꠔꠥꠝꠣꠞꠦ ꠇꠤꠔꠣ ꠇꠞꠍꠤꠟ, ꠔꠥꠝꠤ ꠇꠦꠘꠦ ꠔꠣꠞꠣꠞꠦꠖꠤ ꠡꠤꠞꠤꠇꠤ ꠇꠣꠝ ꠇꠞꠣꠁꠟꠣꠄ?”
EXO 32:22 ꠢꠣꠞꠥꠘꠦ ꠎꠥꠀꠙ ꠖꠤꠟꠣ, “ꠝꠣꠟꠤꠇ, ꠀꠙꠘꠦ ꠉꠥꠍꠣ ꠇꠞꠂꠘ ꠘꠣ ꠎꠣꠘꠥ, ꠀꠙꠘꠦ ꠔ ꠎꠣꠘꠂꠘꠃ, ꠁꠔꠣ ꠝꠣꠘꠥꠡ ꠈꠣꠟꠤ ꠈꠣꠞꠣꠙ ꠇꠣꠝꠞ ꠀꠡꠤꠇ।
EXO 32:23 ꠔꠣꠞꠣ ꠀꠁꠀ ꠀꠝꠣꠞꠦ ꠇꠁꠟꠣ, ꠀꠝꠞꠣꠞꠦ ꠙꠕ ꠌꠤꠘꠣꠁꠀ ꠟꠁꠀ ꠎꠣꠅꠀꠞ ꠟꠣꠉꠤ ꠖꠦꠛꠔꠣ ꠛꠣꠘꠣꠁ ꠖꠦꠃꠇ꠆ꠇꠣ, ꠇꠣꠞꠘ ꠎꠦ ꠝꠥꠍꠣꠄ ꠀꠝꠞꠣꠞꠦ ꠝꠤꠡꠞ ꠕꠣꠇꠤ ꠛꠣꠞ ꠇꠞꠤ ꠀꠘꠍꠂꠘ, ꠄꠘ ꠇꠤꠔꠣ ꠅꠁꠍꠦ, ꠀꠝꠞꠣ ꠔ ꠎꠣꠘꠤꠀꠞ ꠘꠣ।
EXO 32:24 ꠁꠈꠣꠘ ꠢꠥꠘꠤꠀ ꠀꠝꠤ ꠔꠣꠞꠣꠞꠦ ꠇꠁꠟꠣꠝ, ꠔꠥꠝꠞꠣꠞ ꠉꠦꠍꠦ ꠎꠦꠔꠣ ꠡꠥꠘꠣ-ꠖꠣꠘꠣ ꠀꠍꠦ, ꠅꠔꠣ ꠈꠥꠟꠤꠀ ꠀꠝꠣꠞ ꠉꠦꠍꠦ ꠀꠘꠅ। ꠔꠣꠞꠣ ꠀꠘꠤꠀ ꠀꠝꠣꠞ ꠀꠔꠅ ꠖꠤꠟꠣ, ꠀꠞ ꠀꠝꠤ ꠅꠈꠘꠣꠁꠘ ꠁꠐꠣ ꠝꠣꠞꠤ ꠀꠉꠥꠘꠤꠔ ꠚꠣꠟꠣꠁꠟꠣꠝ, ꠔꠦꠃ ꠅꠃ ꠛꠣꠍꠥꠞ ꠅꠉꠥ ꠛꠣꠞ ꠅꠁꠀ ꠀꠁꠟ।”
EXO 32:25 ꠝꠥꠍꠣꠄ ꠖꠦꠈꠟꠣ, ꠁ ꠝꠣꠘꠥꠡ ꠉꠥꠁꠘ ꠛꠦꠙꠞꠥꠀ ꠅꠁꠉꠦꠍꠂꠘ। ꠔꠣꠁꠘ ꠛꠥꠎꠟꠣ, ꠢꠣꠞꠥꠘꠦ ꠔꠣꠞꠣꠞꠦ ꠛꠦꠙꠞꠥꠀ ꠅꠀꠞ ꠡꠥꠎꠥꠉ ꠖꠤꠍꠂꠘ। ꠄꠞꠟꠣꠉꠤ ꠖꠥꠡꠝꠘ ꠅꠇꠟꠦ ꠀꠡꠤꠛꠣꠞ ꠡꠥꠎꠥꠉ ꠙꠣꠁꠍꠂꠘ।
EXO 32:26 ꠅꠃ ꠝꠥꠍꠣꠄ ꠇꠦꠝ꠆ꠙꠞ ꠉꠦꠁꠐꠞ ꠉꠦꠍꠦ ꠃꠛꠣꠁꠀ ꠇꠁꠟꠣ, “ꠔꠥꠝꠞꠣ ꠎꠔ ꠎꠘ ꠝꠣꠛꠥꠖꠞ ꠙꠇ꠆ꠇꠦ ꠀꠍ, ꠢꠇꠟ ꠀꠝꠣꠞ ꠇꠣꠍꠣꠔ ꠀꠅ।” ꠔꠦꠃ ꠟꠦꠛꠤ ꠉꠥꠡ꠆ꠐꠤꠞ ꠢꠇꠟ ꠝꠣꠘꠥꠡ ꠔꠣꠘ ꠉꠦꠍꠦ ꠀꠁꠟ।
EXO 32:27 ꠀꠁꠀ ꠢꠣꠞꠟꠦ ꠝꠥꠍꠣꠄ ꠔꠣꠞꠣꠞꠦ ꠇꠁꠟꠣ, “ꠝꠣꠛꠥꠖ, ꠎꠦꠁꠘ ꠛꠘꠤ ꠁꠍꠞꠣꠁꠟꠞ ꠀꠟ꠆ꠟꠣ, ꠔꠣꠁꠘ ꠘꠤꠎꠦ ꠢꠥꠇꠥꠝ ꠇꠞꠍꠂꠘ, ꠔꠥꠝꠞꠣ ꠢꠇꠟꠦ ꠎꠣꠞꠎꠤꠞ ꠇꠝꠞꠅ ꠔꠟꠥꠀꠞ ꠛꠣꠘ꠆ꠖꠅ, ꠀꠞ ꠇꠦꠝ꠆ꠙꠞ ꠜꠤꠔꠞꠦ ꠎꠣꠞꠦ ꠍꠣꠝꠘꠦ ꠙꠣꠅ ꠎꠣꠘꠦ ꠝꠣꠞꠅ। ꠀꠡ꠆ꠔꠣ ꠇꠦꠝ꠆ꠙꠞ ꠜꠤꠔꠞꠦ ꠜꠣꠁ-ꠛꠘ꠆ꠖꠥ, ꠀꠞꠤ-ꠚꠞꠤ ꠎꠣꠞꠦ ꠙꠣꠅ ꠝꠣꠞꠅ।”
EXO 32:28 ꠔꠦꠃ ꠟꠦꠛꠤ ꠉꠥꠡ꠆ꠐꠤꠞ ꠝꠣꠘꠡꠦ ꠝꠥꠍꠣꠞ ꠢꠥꠇꠥꠝ ꠝꠣꠚꠤꠇ ꠇꠣꠝ ꠇꠞꠟꠣ। ꠢꠤ ꠖꠤꠘ ꠅꠘꠥꠝꠣꠘ ꠔꠤꠘ ꠀꠎꠣꠞ ꠝꠣꠘꠥꠡ ꠝꠣꠞꠣ ꠉꠦꠟꠣ।
EXO 32:29 ꠛꠣꠖꠦ ꠝꠥꠍꠣꠄ ꠇꠁꠟꠣ, “ꠔꠥꠝꠞꠣ ꠀꠁꠎ ꠝꠣꠛꠥꠖꠞ ꠘꠣꠝꠦ ꠎꠣꠞꠎꠤꠞ ꠙꠥꠀ ꠀꠞ ꠜꠣꠁ-ꠛꠤꠞꠣꠖꠞꠞ ꠃꠙꠞꠦ ꠀꠔ ꠔꠥꠟꠔꠦ ꠈꠞꠦꠖꠤ ꠉꠦꠍ ꠘꠣ, ꠝꠣꠛꠥꠖꠞ ꠇꠣꠝꠞ ꠟꠣꠉꠤ ꠔꠥꠝꠞꠣ ꠀꠟꠣꠖꠣ ꠅꠁꠍ, ꠄꠞꠟꠣꠉꠤ ꠝꠣꠛꠥꠖꠦ ꠔꠥꠝꠞꠣꠞꠦ ꠞꠢꠝꠔ ꠖꠤꠍꠂꠘ।”
EXO 32:30 ꠛꠣꠖꠞ ꠖꠤꠘ ꠝꠥꠍꠣꠄ ꠝꠣꠘꠡꠞꠦ ꠇꠁꠟꠣ, “ꠔꠥꠝꠞꠣ ꠔ ꠛꠦꠎꠥꠁꠔꠣ ꠉꠥꠘꠣ ꠇꠞꠍ। ꠔꠦ ꠀꠝꠤ ꠅꠈꠘ ꠢꠤꠞꠛꠣꠞ ꠔꠥꠞ ꠙꠣꠠꠅ ꠝꠣꠛꠥꠖꠞ ꠖꠞꠛꠣꠞꠅ ꠎꠣꠁꠞꠣꠝ, ꠙꠣꠞꠟꠦ ꠔꠥꠝꠞꠣꠞ ꠉꠥꠘꠣ ꠝꠣꠚꠤꠞ ꠇꠚꠞꠣꠞ ꠇꠥꠘꠥ ꠙꠕ ꠛꠣꠞ ꠇꠞꠝꠥ।”
EXO 32:31 ꠝꠥꠍꠣꠄ ꠝꠣꠛꠥꠖꠞ ꠖꠞꠛꠣꠞꠅ ꠉꠤꠀ ꠀꠞꠎ ꠇꠞꠟꠣ, “ꠅ ꠝꠣꠛꠥꠖ, ꠁ ꠝꠣꠘꠥꠡ ꠉꠥꠁꠘ꠆ꠔꠦ ꠛꠦꠎꠥꠁꠔꠣ ꠉꠥꠘꠣ ꠇꠞꠤꠟꠤꠍꠦ। ꠔꠣꠞꠣ ꠘꠤꠎꠞ ꠟꠣꠉꠤ ꠡꠥꠘꠣꠞ ꠝꠥꠞ꠆ꠔꠤ ꠛꠣꠘꠣꠁꠍꠦ।
EXO 32:32 ꠔꠦ ꠔꠥꠝꠤ ꠝꠦꠢꠦꠞꠛꠣꠘꠤ ꠇꠞꠤꠀ ꠔꠣꠞꠣꠞ ꠉꠥꠘꠣꠞꠦ ꠅꠈꠘ ꠝꠣꠚ ꠇꠞꠤ ꠖꠤꠟꠣꠅ, ꠀꠞ ꠎꠥꠖꠤ ꠝꠣꠚ ꠘꠣ ꠇꠞꠅ, ꠔꠣꠁꠟꠦ ꠔꠥꠝꠣꠞ ꠟꠦꠈꠣ ꠈꠣꠔꠣ ꠕꠣꠇꠤ ꠀꠝꠣꠞ ꠘꠣꠝꠈꠣꠘꠅ ꠇꠣꠐꠤꠟꠣꠅ।”
EXO 32:33 ꠝꠣꠛꠥꠖꠦ ꠎꠥꠀꠙ ꠖꠤꠟꠣ, “ꠢꠥꠘꠅ, ꠀꠝꠣꠞ ꠛꠤꠞꠥꠖ꠆ꠖꠦ ꠎꠦꠞꠣ ꠉꠥꠘꠣ ꠇꠞꠍꠦ, ꠀꠝꠤ ꠈꠣꠟꠤ ꠔꠣꠞꠣꠞ ꠘꠣꠝꠞꠦꠃ ꠀꠝꠣꠞ ꠈꠣꠔꠣ ꠕꠣꠇꠤ ꠚꠥꠍꠤꠟꠤꠝꠥ।
EXO 32:34 ꠔꠦ ꠔꠥꠝꠤ ꠅꠈꠘ ꠎꠣꠅꠉꠤ, ꠀꠞ ꠀꠝꠤ ꠎꠦ ꠖꠦꠡꠞ ꠇꠕꠣ ꠇꠁꠍꠤ, ꠔꠥꠝꠤ ꠔꠣꠞꠣꠞꠦ ꠟꠁꠀ ꠢꠃ ꠖꠦꠡꠅ ꠞꠅꠀꠘꠣ ꠖꠤꠟꠣꠅ। ꠀꠝꠣꠞ ꠚꠤꠞꠤꠡ꠆ꠔꠣꠄ ꠔꠥꠝꠞꠣꠞꠦ ꠙꠕ ꠖꠦꠈꠣꠁꠀ ꠘꠤꠛꠣ। ꠛꠣꠖꠦ ꠎꠦꠛꠟꠣ ꠡꠣꠎꠣ ꠖꠦꠅꠀꠞ ꠡꠝꠄ ꠀꠁꠛ, ꠅꠃ ꠡꠝꠄ ꠀꠝꠤ ꠔꠣꠞꠣꠞ ꠉꠥꠘꠣꠞ ꠡꠣꠎꠣ ꠖꠤꠝꠥ।”
EXO 32:35 ꠢꠣꠞꠥꠘꠞ ꠀꠔꠦ ꠛꠣꠘꠣꠁꠟ ꠢꠃ ꠛꠣꠍꠥꠞꠞ ꠝꠥꠞ꠆ꠔꠤꠞ ꠟꠣꠉꠤ ꠝꠣꠘꠡꠦ ꠎꠦꠔꠣ ꠇꠞꠍꠤꠟꠣ, ꠅꠔꠣꠞ ꠟꠣꠉꠤ ꠝꠣꠛꠥꠖꠦ ꠔꠣꠞꠣꠞ ꠃꠙꠞꠦ ꠉꠎꠛ ꠘꠣꠎꠤꠟ ꠇꠞꠟꠣ।
EXO 33:1 ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ, “ꠎꠣꠅ, ꠔꠥꠝꠤ ꠅꠃ ꠎꠦꠞꠣꠞꠦ ꠝꠤꠡꠞ ꠕꠣꠇꠤ ꠀꠘꠍ, ꠄꠞꠣꠞꠦ ꠟꠁꠀ ꠅꠈꠘꠃ ꠁ ꠎꠣꠉꠣ ꠍꠣꠠꠤꠀ ꠎꠣꠅꠉꠤ। ꠀꠝꠣꠞ ꠅꠀꠖꠣ ꠇꠞꠣ ꠢꠃ ꠖꠦꠡꠅ ꠎꠣꠅ। ꠀꠝꠤ ꠁꠛ꠆ꠞꠣꠢꠤꠝ, ꠁꠍꠢꠣꠇ ꠀꠞ ꠁꠀꠇꠥꠛꠞ ꠉꠦꠍꠦ ꠅꠀꠖꠣ ꠇꠞꠍꠟꠣꠝ, ꠔꠣꠞꠣꠞ ꠅꠀꠞꠤꠡ ꠅꠇꠟꠞꠦ ꠅꠃ ꠖꠦꠡ ꠅꠇꠟ ꠖꠤꠝꠥ, ꠔꠦ ꠔꠥꠝꠤ ꠔꠣꠞꠣꠞꠦ ꠟꠁꠀ ꠢꠘꠅ ꠎꠣꠅꠉꠤ।
EXO 33:2 ꠀꠝꠤ ꠔꠥꠝꠞꠣꠞ ꠀꠉꠦ ꠇꠞꠤ ꠄꠇꠎꠘ ꠚꠤꠞꠤꠡ꠆ꠔꠣ ꠙꠣꠑꠣꠁꠝꠥ। ꠄꠁꠘ ꠉꠤꠀ ꠢꠘꠞ ꠇꠦꠘꠣꠘꠤ, ꠀꠝꠥꠞꠤ, ꠢꠤꠐ꠆ꠐꠤ, ꠚꠣꠞꠤꠎꠤ, ꠢꠤꠛ꠆ꠛꠤ ꠀꠞ ꠎꠤꠛꠥꠎꠤ ꠅꠇꠟꠞꠦ ꠈꠦꠖꠣꠁ ꠖꠤꠛꠣ।
EXO 33:3 ꠁꠔꠣ ꠔ ꠖꠥꠗ ꠀꠞ ꠝꠃꠞ ꠜꠣꠘ꠆ꠒꠣꠞ ꠀꠟꠣ ꠖꠦꠡ। ꠅꠁꠟꠦ ꠀꠝꠤ ꠔꠥꠝꠞꠣꠞ ꠟꠉꠦ ꠅꠁꠀ ꠎꠣꠁꠔꠣꠝ ꠘꠣꠄ, ꠇꠣꠞꠘ ꠔꠥꠝꠞꠣ ꠈꠥꠛ ꠉꠣꠠꠔꠦꠠꠣ-ꠄꠇꠉꠥꠁꠀ ꠎꠣꠔ, ꠇꠤꠎꠣꠘꠥ ꠀꠝꠤ ꠙꠕꠞ ꠝꠣꠎꠦꠃ ꠔꠥꠝꠞꠣꠞꠦ ꠘꠤꠙꠣꠔ ꠇꠞꠤꠟꠣꠁ।”
EXO 33:4 ꠁ ꠛꠤꠙꠖꠞ ꠇꠕꠣ ꠢꠥꠘꠤꠀ ꠝꠣꠘꠡꠦ ꠇꠣꠘ꠆ꠖꠣ-ꠇꠣꠐꠤ ꠟꠣꠉꠣꠁꠟꠣ। ꠔꠣꠞꠣ ꠇꠦꠃ ꠇꠥꠘꠥꠎꠣꠔ ꠉꠄꠘꠣ-ꠉꠣꠐꠤ ꠚꠤꠘꠟꠣ ꠘꠣ।
EXO 33:5 ꠇꠣꠞꠘ ꠝꠣꠛꠥꠖꠦ ꠝꠥꠍꠣꠞꠦ ꠇꠁꠍꠟꠣ, “ꠔꠥꠝꠤ ꠛꠘꠤ ꠁꠍꠞꠣꠁꠟ ꠅꠇꠟꠞꠦ ꠇꠅ, ꠔꠥꠝꠞꠣ ꠅꠁꠟꠣꠄ ꠉꠣꠠꠔꠦꠠꠣ-ꠄꠇꠉꠥꠁꠀ ꠎꠣꠔ। ꠀꠝꠤ ꠄꠇ ꠙꠟꠇꠞ ꠟꠣꠉꠤ ꠉꠦꠟꠦꠅ ꠔꠥꠝꠞꠣꠞꠦ ꠘꠤꠙꠣꠔ ꠇꠞꠤꠟꠤꠝꠥ। ꠔꠥꠝꠞꠣꠞ ꠉꠔꠞꠅ ꠕꠣꠇꠤ ꠢꠇꠟ ꠉꠄꠘꠣ-ꠉꠣꠐꠤ ꠈꠥꠟꠤꠟꠣꠅ, ꠔꠦꠃ ꠀꠝꠤ ꠛꠥꠎꠝꠥ, ꠔꠥꠝꠞꠣꠞ ꠟꠣꠉꠤ ꠇꠤꠔꠣ ꠇꠞꠔꠣꠝ।”
EXO 33:6 ꠔꠦꠃ ꠛꠘꠤ ꠁꠍꠞꠣꠁꠟꠦ ꠔꠥꠞ ꠙꠣꠠꠅꠃ ꠔꠣꠞꠣꠞ ꠉꠄꠘꠣ-ꠉꠣꠐꠤ ꠢꠇꠟꠔꠣ ꠈꠥꠟꠤꠟꠤꠟꠣ, ꠁꠔꠣ ꠀꠞ ꠚꠤꠘꠟꠣ ꠘꠣ।
EXO 33:7 ꠢꠎꠞꠔ ꠝꠥꠍꠣꠞ ꠄꠇ ꠔꠣꠝ꠆ꠛꠥ ꠀꠍꠤꠟ, ꠔꠣꠁꠘ ꠛꠘꠤ ꠁꠍꠞꠣꠁꠟꠞ ꠇꠦꠝ꠆ꠙꠞ ꠛꠣꠞꠦ ꠖꠥꠞꠁ ꠘꠤꠀ ꠅꠃ ꠔꠣꠝ꠆ꠛꠥ ꠙꠣꠔꠤꠔꠣ, ꠁ ꠔꠣꠝ꠆ꠛꠥꠞꠦ ꠔꠣꠁꠘ ꠈꠣꠘꠦꠇꠣ-ꠔꠣꠝ꠆ꠛꠥ ꠇꠁꠀ ꠒꠣꠇꠤꠔꠣ। ꠝꠣꠛꠥꠖꠞ ꠉꠦꠍ ꠕꠣꠇꠤ ꠇꠦꠃ ꠇꠥꠘ꠆ꠔꠣ ꠎꠣꠘꠔꠦ ꠌꠣꠁꠟꠦ ꠔꠣꠞꠣ ꠅꠃ ꠈꠣꠘꠦꠇꠣꠞ ꠉꠦꠍꠦ ꠎꠣꠁꠔꠣ।
EXO 33:8 ꠝꠥꠍꠣ ꠎꠦꠛꠟꠣ ꠢꠤ ꠈꠣꠘꠦꠇꠣ ꠡꠞꠤꠚꠅ ꠞꠅꠀꠘꠣ ꠖꠤꠔꠣ, ꠅꠃ ꠡꠝꠄ ꠢꠇ꠆ꠇꠟ ꠝꠣꠘꠥꠡ ꠎꠣꠞꠎꠤꠞ ꠔꠣꠝ꠆ꠛꠥꠞ ꠖꠥꠀꠞꠅ ꠃꠛꠣꠁꠔꠣ ꠀꠞ ꠝꠥꠍꠣ ꠈꠣꠘꠦꠇꠣꠔ ꠘꠣ ꠢꠣꠝꠣꠘꠤ ꠙꠞ꠆ꠎꠘ꠆ꠔ ꠢꠇꠟꠦ ꠔꠣꠘ ꠛꠣꠄ ꠌꠣꠁ ꠞꠁꠔ।
EXO 33:9 ꠔꠣꠁꠘ ꠢꠤ ꠈꠣꠘꠦꠇꠣ ꠡꠞꠤꠚꠅ ꠢꠣꠝꠣꠘꠤꠞ ꠛꠣꠖꠦꠃ ꠀꠟ꠆ꠟꠣꠁ ꠝꠦꠊꠞ ꠈꠥꠐꠤ ꠈꠣꠘꠦꠇꠣꠞ ꠖꠥꠀꠞꠞ ꠝꠥꠈꠅ ꠟꠣꠝꠤꠀ ꠀꠁꠔ, ꠀꠞ ꠝꠣꠛꠥꠖꠦ ꠎꠔꠛꠁꠟ ꠝꠥꠍꠣꠞ ꠟꠉꠦ ꠛꠣꠔꠌꠤꠔ ꠇꠞꠔꠣ, ꠅꠔꠛꠁꠟ ꠁ ꠈꠥꠐꠤ ꠅꠘꠅ ꠞꠁꠔ।
EXO 33:10 ꠝꠣꠘꠡꠦ ꠎꠦꠛꠟꠣꠃ ꠁ ꠝꠦꠊꠞ ꠈꠥꠐꠤꠞꠦ ꠈꠣꠘꠦꠇꠣꠞ ꠖꠥꠀꠞꠞ ꠉꠦꠍꠦ ꠖꠦꠈꠔ, ꠅꠃ ꠡꠝꠄ ꠔꠣꠞꠣ ꠎꠣꠞꠎꠤꠞ ꠖꠥꠀꠞꠞ ꠉꠦꠍ ꠕꠣꠇꠤ ꠝꠣꠛꠥꠖꠞꠦ ꠍꠁꠎꠖꠣ ꠇꠞꠔ।
EXO 33:11 ꠇꠥꠘꠥ ꠝꠣꠘꠡꠦ ꠔꠣꠞ ꠖꠥꠡ꠆ꠔꠞ ꠟꠉꠦ ꠝꠥꠈꠣꠝꠥꠈꠤ ꠛꠁꠀ ꠎꠦꠟꠣ ꠛꠣꠔꠌꠤꠔ ꠇꠞꠦ, ꠝꠣꠛꠥꠖꠦꠅ ꠝꠥꠍꠣꠞ ꠟꠉꠦ ꠅꠃꠟꠣ ꠝꠥꠈꠣꠝꠥꠈꠤ ꠛꠣꠔꠌꠤꠔ ꠇꠞꠔꠣ। ꠛꠣꠖꠦ ꠝꠥꠍꠣ ꠇꠦꠝ꠆ꠙꠅ ꠚꠤꠞꠤꠀ ꠀꠁꠔꠣ, ꠅꠁꠟꠦ ꠔꠣꠘ ꠈꠣꠖꠤꠝ ꠘꠥꠘꠞ ꠙꠥꠀ ꠁꠃꠍꠣ ꠘꠣꠝꠞ ꠁ ꠎꠥꠀꠘ, ꠈꠣꠘꠦꠇꠣ ꠡꠞꠤꠚ ꠕꠣꠇꠤ ꠛꠣꠞ ꠅꠁꠔꠣ ꠘꠣ।
EXO 33:12 ꠝꠥꠍꠣꠄ ꠝꠣꠛꠥꠖꠞ ꠖꠞꠛꠣꠞꠅ ꠀꠞꠎ ꠇꠞꠟꠣ, “ꠝꠣꠛꠥꠖ, ꠔꠥꠝꠤ ꠔ ꠇꠁꠞꠣꠄ ꠀꠝꠤ ꠅꠔꠣ ꠝꠣꠘꠡꠞꠦ ꠟꠁꠀ ꠎꠣꠁꠔꠣꠝꠉꠤ, ꠅꠁꠟꠦ ꠀꠝꠣꠞ ꠟꠉꠦ ꠀꠞ ꠇꠣꠞꠦ ꠖꠤꠞꠣꠄ, ꠁꠈꠣꠘ ꠔ ꠀꠝꠣꠞꠦ ꠎꠣꠘꠣꠁꠟꠣꠄ ꠘꠣ। ꠔꠥꠝꠤ ꠈꠣꠟꠤ ꠇꠁꠟꠣꠄ, ꠔꠥꠝꠤ ꠀꠝꠣꠞꠦ ꠔꠥꠝꠣꠞ ꠘꠤꠎꠞ ꠎꠘ ꠝꠘꠅ ꠇꠞꠅ ꠀꠞ ꠀꠝꠣꠞꠦ ꠔꠥꠝꠣꠞ ꠈꠣꠍ ꠝꠣꠄꠀꠞ ꠘꠎꠞꠅ ꠞꠣꠈꠍ।
EXO 33:13 ꠔꠦ ꠢꠣꠍꠣꠃ ꠎꠥꠖꠤ ꠀꠝꠤ ꠔꠥꠝꠣꠞ ꠝꠣꠄꠀꠞ ꠘꠎꠞꠅ ꠕꠣꠇꠤ, ꠔꠣꠁꠟꠦ ꠔꠥꠝꠤ ꠇꠥꠘ ꠈꠤꠀꠟꠦ ꠇꠤꠔꠣ ꠇꠞꠅ, ꠅꠔꠣ ꠀꠝꠣꠞꠦ ꠎꠣꠘꠣꠅ, ꠎꠣꠔꠦ ꠀꠝꠤ ꠔꠥꠝꠣꠞꠦ ꠙꠥꠞꠣꠙꠥꠞ ꠌꠤꠘꠤ ꠀꠞ ꠔꠥꠝꠣꠞ ꠞꠢꠝꠔꠞ ꠝꠣꠎꠦ ꠞꠁ। ꠔꠥꠝꠤ ꠔ ꠎꠣꠘꠃ, ꠁ ꠁꠍꠞꠣꠁꠟ ꠎꠣꠔꠤ ꠔꠥꠝꠣꠞꠃ ꠙ꠆ꠞꠎꠣ।”
EXO 33:14 ꠝꠣꠛꠥꠖꠦ ꠎꠥꠀꠙ ꠖꠤꠟꠣ, “ꠢꠥꠘꠅ, ꠀꠝꠤ ꠘꠤꠎꠦꠃ ꠔꠥꠝꠣꠞ ꠟꠉꠦ ꠅꠁꠀ ꠎꠣꠁꠝꠥ ꠀꠞ ꠔꠥꠝꠣꠞꠦ ꠀꠞꠣꠝ ꠖꠤꠝꠥ।”
EXO 33:15 ꠅꠃ ꠔꠣꠁꠘ ꠇꠁꠟꠣ, “ꠔꠥꠝꠤ ꠎꠥꠖꠤ ꠀꠝꠞꠣꠞ ꠟꠉꠦ ꠘꠣ ꠎꠣꠅ, ꠔꠦ ꠀꠝꠞꠣꠞꠦ ꠁꠘ ꠕꠣꠇꠤ ꠛꠤꠖꠣꠄ ꠖꠤꠅ ꠘꠣ।
EXO 33:16 ꠔꠥꠝꠤ ꠘꠣ ꠉꠦꠟꠦ ꠝꠣꠘꠡꠦ ꠇꠤꠟꠣ ꠛꠥꠎꠛꠣ, ꠀꠝꠣꠞ ꠃꠙꠞꠦ ꠀꠞ ꠔꠥꠝꠣꠞ ꠁ ꠛꠘ꠆ꠖꠣ ꠅꠇꠟꠞ ꠃꠙꠞꠦ ꠔꠥꠝꠣꠞ ꠞꠢꠝꠔ ꠀꠍꠦ? ꠀꠝꠞꠣꠃ ꠎꠦꠘ ꠖꠥꠘꠤꠀꠞ ꠢꠇꠟ ꠎꠣꠔꠤ ꠕꠣꠇꠤ ꠀꠟꠣꠖꠣ, ꠁꠈꠣꠘ ꠇꠤꠟꠣ ꠛꠥꠎꠛꠣ?”
EXO 33:17 ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ, “ꠑꠤꠇ ꠀꠍꠦ, ꠔꠥꠝꠤ ꠎꠦꠟꠣ ꠇꠁꠟꠣꠄ, ꠀꠝꠤ ꠅꠟꠣ ꠇꠞꠝꠥ। ꠔꠥꠝꠤ ꠔ ꠀꠝꠣꠞ ꠝꠣꠄꠀꠞ ꠘꠎꠞꠅ ꠀꠍ, ꠔꠥꠝꠣꠞꠦ ꠀꠝꠣꠞ ꠘꠤꠎꠞ ꠀꠙꠘ ꠝꠘꠅ ꠇꠞꠤ।”
EXO 33:18 ꠔꠦꠃ ꠝꠥꠍꠣꠄ ꠀꠞꠎ ꠇꠞꠟꠣ, “ꠔꠦ ꠔꠥꠝꠣꠞ ꠡꠣꠘ-ꠔꠎꠟ꠆ꠟꠤ ꠀꠝꠣꠞꠦ ꠖꠦꠈꠣꠅꠘꠣ।”
EXO 33:19 ꠝꠣꠛꠥꠖꠦ ꠇꠁꠟꠣ, “ꠀꠝꠤ ꠎꠣꠞꠦ ꠈꠥꠡꠤ ꠖꠄꠀ ꠇꠞꠝꠥ, ꠀꠞ ꠎꠣꠞꠦ ꠈꠥꠡꠤ ꠞꠢꠝ ꠇꠞꠝꠥ। ꠢꠥꠘꠅ, ꠔꠥꠝꠣꠞ ꠍꠣꠝꠘꠦꠖꠤ ꠀꠝꠤ ꠀꠝꠣꠞ ꠢꠇ꠆ꠇꠟ ꠘꠦꠇ ꠍꠥꠞꠔ ꠎꠣꠁꠞ ꠇꠞꠝꠥ। ‘ꠝꠣꠛꠥꠖ, ꠎꠦꠁꠘ ꠀꠍꠂꠘ’ ꠔꠥꠝꠣꠞ ꠍꠣꠝꠘꠦ ꠀꠝꠤ ꠀꠝꠣꠞ ꠅꠃ ꠘꠣꠝ ꠄꠟꠣꠘ ꠇꠞꠝꠥ।
EXO 33:20 ꠅꠁꠟꠦ ꠀꠝꠣꠞ ꠝꠥꠈ ꠖꠦꠈꠣꠞ ꠔꠣꠇ꠆ꠇꠔ ꠔꠥꠝꠣꠞ ꠅꠁꠔ ꠘꠣꠄ। ꠇꠣꠞꠘ ꠀꠝꠣꠞꠦ ꠖꠦꠈꠤꠟ꠆ꠟꠦ ꠇꠥꠘꠥ ꠀꠖꠝ ꠎꠣꠔ ꠛꠣꠌꠦ ꠘꠣ।
EXO 33:21 ꠔꠦ ꠢꠥꠘꠅ, ꠔꠥꠝꠤ ꠀꠝꠣꠞ ꠇꠣꠍꠣꠞ ꠅꠃ ꠎꠣꠉꠣ ꠛꠣꠄ ꠌꠣꠅ, ꠖꠦꠈꠞꠣꠄ ꠘꠤ, ꠙꠣꠔ꠆ꠔꠞꠞ ꠄꠇ ꠕꠣꠇ ꠀꠍꠦ, ꠅꠃ ꠕꠣꠇꠞ ꠃꠙꠞꠦ ꠔꠥꠝꠤ ꠃꠛꠣꠅ।
EXO 33:22 ꠔꠦꠃ ꠔꠥꠝꠣꠞ ꠍꠣꠝꠘꠦ ꠖꠤꠀ ꠀꠝꠣꠞ ꠡꠣꠘ-ꠔꠎꠟ꠆ꠟꠤ ꠎꠣꠅꠀꠞ ꠛꠣꠟꠣ, ꠀꠝꠤ ꠔꠥꠝꠣꠞꠦ ꠅꠃ ꠙꠣꠔ꠆ꠔꠞꠞ ꠚꠣꠐꠣꠞ ꠜꠤꠔꠞꠦ ꠢꠣꠞꠣꠁꠝꠥ। ꠀꠝꠤ ꠘꠣ ꠎꠣꠅꠀ ꠙꠞ꠆ꠎꠘ꠆ꠔ, ꠀꠝꠣꠞ ꠀꠔ ꠖꠤꠀ ꠔꠥꠝꠣꠞꠦ ꠉꠥꠞꠤꠀ ꠞꠣꠈꠝꠥ।
EXO 33:23 ꠛꠣꠖꠦ ꠀꠝꠣꠞ ꠀꠔ ꠢꠞꠣꠁꠟꠦ, ꠔꠥꠝꠤ ꠀꠝꠣꠞ ꠈꠞ ꠉꠣꠟꠣ ꠖꠦꠈꠔꠣꠄ ꠙꠣꠞꠛꠣꠄ, ꠅꠁꠟꠦ ꠇꠦꠃ ꠀꠝꠣꠞ ꠝꠥꠈꠞ ꠖꠤꠖꠣꠞ ꠙꠣꠁꠔ ꠘꠣꠄ।”
EXO 34:1 ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ, “ꠀꠉꠞ ꠙꠣꠔ꠆ꠔꠞꠞ ꠟꠣꠈꠣꠘ ꠔꠥꠝꠤ ꠘꠄꠀ ꠖꠥꠈꠣꠘ ꠙꠣꠔ꠆ꠔꠞ ꠔꠤꠀꠞ ꠇꠞꠅ। ꠔꠥꠝꠤ ꠎꠦ ꠖꠥꠈꠣꠘ ꠜꠣꠋꠉꠤꠍꠟꠣꠄ, ꠢꠤ ꠙꠣꠔ꠆ꠔꠞꠞ ꠝꠣꠎꠦ ꠎꠦ ꠢꠥꠇꠥꠝ ꠟꠦꠈꠣ ꠀꠍꠤꠟ, ꠅꠃ ꠢꠥꠇꠥꠝ ꠅꠇꠟ ꠀꠝꠤ ꠢꠤꠞꠛꠣꠞ ꠁ ꠖꠥꠁꠅ ꠙꠣꠔ꠆ꠔꠞꠅ ꠟꠦꠈꠤꠀ ꠖꠤꠝꠥ।
EXO 34:2 ꠚꠎꠞ ꠛꠣꠖꠦꠃ ꠔꠥꠝꠤ ꠔꠤꠀꠞ ꠅꠁꠀ ꠔꠥꠞ ꠙꠣꠠꠞ ꠃꠙꠞꠦ ꠃꠑꠤꠅ। ꠃꠑꠤꠀ ꠙꠣꠠꠞ ꠝꠣꠕꠣꠔ ꠀꠝꠣꠞ ꠍꠣꠝꠘꠦ ꠀꠎꠤꠞ ꠅꠁꠅ।
EXO 34:3 ꠔꠥꠝꠣꠞ ꠟꠉꠦ ꠇꠥꠘꠥ ꠝꠣꠘꠡꠞꠦ ꠀꠘꠤꠅ ꠘꠣ, ꠁ ꠙꠣꠠꠞ ꠇꠥꠘꠥꠈꠣꠘꠅ ꠎꠣꠔꠦ ꠇꠥꠘꠥ ꠝꠣꠘꠥꠡ ꠘꠣ ꠀꠄ। ꠙꠣꠠꠞ ꠇꠣꠘ꠆ꠖꠣꠔ ꠇꠥꠘꠥ ꠉꠞꠥ-ꠍꠣꠉꠟ ꠛꠣ ꠝꠦꠠꠣ-ꠝꠦꠠꠤꠞꠦ ꠞꠣꠈꠔꠦ ꠖꠤꠅ ꠘꠣ।”
EXO 34:4 ꠔꠦꠃ ꠝꠥꠍꠣꠄ ꠀꠉꠞ ꠙꠣꠔ꠆ꠔꠞꠞ ꠟꠣꠈꠣꠘ ꠖꠥꠈꠣꠘ ꠙꠣꠔ꠆ꠔꠞ ꠛꠣꠘꠣꠁꠟꠣ, ꠀꠞ ꠝꠣꠛꠥꠖꠞ ꠢꠥꠇꠥꠝ ꠝꠣꠚꠤꠇ ꠚꠎꠞꠦ ꠃꠑꠤꠀ ꠙꠣꠔ꠆ꠔꠞ ꠖꠥꠁꠅꠈꠣꠘ ꠀꠔꠅ ꠟꠁꠀ ꠔꠥꠞ ꠙꠣꠠꠞ ꠃꠙꠞꠦ ꠃꠑꠤꠟꠣ।
EXO 34:5 ꠀꠞ ꠝꠣꠛꠥꠖꠅ ꠝꠦꠊꠞ ꠇꠣꠟꠘꠤꠞ ꠝꠣꠎꠦ ꠟꠣꠝꠤꠀ ꠀꠁꠟꠣ। ꠔꠣꠁꠘ ꠢꠎꠞꠔ ꠝꠥꠍꠣꠞ ꠗꠣꠞꠅ ꠃꠛꠣꠁꠀ ꠔꠣꠘ “ꠝꠣꠛꠥꠖ, ꠎꠦꠁꠘ ꠀꠍꠂꠘ” ꠘꠣꠝ ꠄꠟꠣꠘ ꠇꠞꠟꠣ।
EXO 34:6 ꠔꠣꠁꠘ ꠝꠥꠍꠣꠞ ꠍꠣꠝꠘꠣ ꠖꠤꠀ ꠔꠡꠞꠤꠚ ꠘꠤꠟꠣ, ꠀꠞ ꠅꠃ ꠇꠣꠟꠣꠝ ꠄꠟꠣꠘ ꠇꠞꠤ ꠇꠞꠤ ꠉꠦꠟꠣ, “ꠝꠣꠛꠥꠖ, ꠎꠦꠁꠘ ꠀꠍꠂꠘ, ꠞꠢꠝꠣꠘ ꠀꠞ ꠞꠢꠤꠝ ꠀꠟ꠆ꠟꠣ, ꠔꠣꠁꠘ ꠉꠥꠍꠣ ꠇꠞꠂꠘ ꠗꠤꠞ ꠉꠔꠤꠄ, ꠔꠣꠘ ꠅꠛꠤꠞꠣꠝ ꠝꠣꠄꠀ-ꠝꠢꠛ꠆ꠛꠔ ꠀꠞ ꠢꠇ-ꠢꠣꠟꠣꠟꠤꠞ ꠇꠥꠘꠥ ꠡꠤꠝꠣ ꠘꠣꠁ।
EXO 34:7 ꠔꠣꠁꠘ ꠀꠎꠣꠞ ꠀꠎꠣꠞ ꠅꠀꠞꠤꠡ ꠙꠞ꠆ꠎꠘ꠆ꠔ ꠅꠛꠤꠞꠣꠝ ꠝꠣꠄꠀ-ꠝꠢꠛ꠆ꠛꠔ ꠇꠞꠂꠘ, ꠝꠣꠘꠡꠞ ꠅꠁꠘ꠆ꠘꠣꠄ-ꠅꠙꠞꠣꠗ, ꠘꠣꠚꠞꠝꠣꠘꠤ ꠀꠞ ꠉꠥꠘꠣꠞ ꠝꠣꠚꠤ ꠖꠦꠁꠘ, ꠅꠁꠟꠦ ꠖꠥꠡꠤ ꠎꠘꠞꠦ ꠡꠣꠎꠣꠅ ꠖꠦꠁꠘ। ꠛꠣꠚ-ꠖꠣꠖꠣꠞ ꠘꠣꠚꠞꠝꠣꠘꠤꠞ ꠡꠣꠎꠣ, ꠔꠣꠞꠣꠞ ꠘꠣꠔꠤ-ꠙꠥꠔꠤ ꠙꠞ꠆ꠎꠘ꠆ꠔ ꠛꠞ꠆ꠔꠣꠁꠘ।”
EXO 34:8 ꠁꠈꠣꠘ ꠢꠥꠘꠤꠀꠃ ꠝꠥꠍꠣ ꠘꠛꠤ ꠟꠉꠦ ꠟꠉꠦ ꠍꠁꠎꠖꠣꠔ ꠙꠠꠤꠀ ꠇꠁꠟꠣ,
EXO 34:9 “ꠅ ꠝꠣꠟꠤꠇ, ꠀꠝꠤ ꠎꠥꠖꠤ ꠔꠥꠝꠣꠞ ꠖꠞꠛꠣꠞꠅ ꠞꠢꠝꠔ ꠙꠣꠁ, ꠔꠦ ꠝꠦꠢꠦꠞꠛꠣꠘꠤ ꠇꠞꠤ ꠔꠥꠝꠤꠅ ꠀꠝꠞꠣꠞ ꠟꠉ ꠈꠣꠘꠅ ꠌꠟꠅ। ꠅꠃ ꠎꠣꠔꠤ ꠎꠥꠖꠤꠅ ꠈꠥꠛ ꠉꠣꠠꠔꠦꠠꠣ-ꠄꠇꠉꠥꠁꠀ ꠎꠣꠔ, ꠔꠣ-ꠅ ꠔꠥꠝꠤ ꠀꠝꠞꠣꠞ ꠉꠥꠘꠣ ꠀꠞ ꠇꠍꠥꠞꠤꠞꠦ ꠝꠣꠚ ꠇꠞꠤꠀ ꠖꠤꠟꠣꠅ। ꠀꠝꠞꠣꠞꠦ ꠔꠥꠝꠣꠞ ꠀꠙꠘ ꠙ꠆ꠞꠎꠣ ꠢꠤꠡꠣꠛꠦ ꠇꠛꠥꠟ ꠇꠞꠤꠟꠣꠅ।”
EXO 34:10 ꠝꠣꠛꠥꠖꠦ ꠇꠁꠟꠣ, “ꠢꠥꠘꠅ, ꠀꠝꠤ ꠄꠇ ꠃꠍꠤꠟ꠆ꠟꠣ ꠛꠅꠀꠁꠟ ꠇꠞꠤꠀꠞ, ꠀꠝꠤ ꠔꠥꠝꠣꠞ ꠢꠇꠟ ꠝꠣꠘꠡꠞ ꠍꠣꠝꠘꠦ ꠅꠃ ꠟꠣꠈꠣꠘ ꠇꠦꠞꠣꠝꠔꠤ ꠇꠣꠝ ꠖꠦꠈꠣꠁꠝꠥ, ꠎꠦꠔꠣ ꠀꠡ꠆ꠔꠣ ꠖꠥꠘꠤꠀꠞ ꠇꠥꠘꠥ ꠎꠣꠔꠤꠞ ꠍꠣꠝꠘꠦ ꠇꠥꠘꠥꠖꠤꠘꠅ ꠇꠞꠣ ꠅꠁꠍꠦ ꠘꠣ। ꠔꠥꠝꠤ ꠅꠃ ꠎꠦꠔꠣ ꠝꠣꠘꠡꠞ ꠟꠉꠦ ꠛꠡꠔ ꠇꠞꠞꠣꠄ, ꠔꠣꠞꠣ ꠖꠦꠈꠛꠣ, ꠀꠝꠤ ꠝꠣꠛꠥꠖꠦ ꠔꠥꠝꠞꠣꠞ ꠟꠣꠉꠤ ꠇꠤꠔꠣ ꠇꠞꠤꠀꠞ, ꠁꠔꠣ ꠖꠦꠈꠤꠀ ꠔꠣꠞꠣꠞ ꠎꠣꠘꠅ ꠒꠞ ꠢꠣꠝꠣꠁꠛ।
EXO 34:11 ꠀꠝꠤ ꠀꠁꠎ ꠔꠥꠝꠞꠣꠞꠦ ꠎꠦꠔꠣ ꠢꠥꠇꠥꠝ ꠖꠤꠝꠥ, ꠁꠔꠣ ꠈꠤꠀꠟ ꠇꠞꠤ ꠀꠝꠟ ꠇꠞꠅ। ꠀꠝꠤ ꠀꠝꠥꠞꠤ, ꠇꠦꠘꠣꠘꠤ, ꠢꠤꠐ꠆ꠐꠤ, ꠚꠣꠞꠤꠎꠤ, ꠢꠤꠛ꠆ꠛꠤ ꠀꠞ ꠎꠤꠛꠥꠎꠤ ꠅꠇꠟꠞꠦ ꠔꠥꠝꠞꠣꠞ ꠍꠣꠝꠘꠣ ꠕꠣꠇꠤ ꠈꠦꠖꠣꠁ ꠖꠤꠝꠥ।
EXO 34:12 ꠅꠁꠟꠦ ꠈꠛꠞꠖꠣꠞ! ꠔꠥꠝꠞꠣ ꠎꠦ ꠖꠦꠡꠅ ꠎꠣꠁꠞꠣꠄ, ꠁ ꠖꠦꠡꠞ ꠝꠣꠘꠡꠞ ꠟꠉꠦ ꠇꠥꠘꠥꠎꠣꠔ ꠌꠥꠇ꠆ꠔꠤ ꠇꠞꠤꠅ ꠘꠣ, ꠀꠞꠘꠣꠄ ꠚꠣꠘ꠆ꠖꠅ ꠢꠣꠝꠣꠁꠛꠣꠄ।
EXO 34:13 ꠔꠥꠝꠞꠣ ꠔꠣꠞꠣꠞ ꠙꠥꠎꠣ-ꠝꠘ꠆ꠒꠙ ꠜꠣꠋꠉꠤꠀ ꠐꠥꠇꠞꠣ ꠐꠥꠇꠞꠣ ꠇꠞꠛꠣꠄ, ꠔꠣꠞꠣꠞ ꠛꠟꠤ ꠈꠣꠘꠣꠁꠘ ꠜꠣꠋꠉꠤꠟꠤꠛꠣꠄ, ꠀꠞ ꠔꠣꠞꠣꠞ ꠀꠡꠦꠞꠣ-ꠖꠦꠛꠤꠞ ꠘꠤꠡꠣꠘꠣ ꠈꠥꠐꠤ ꠅꠇꠟ ꠇꠣꠐꠤꠀ ꠚꠣꠟꠣꠁꠛꠣꠄ।
EXO 34:14 ꠔꠥꠝꠞꠣ ꠇꠥꠘꠥ ꠖꠦꠛ-ꠖꠦꠛꠤꠞ ꠙꠥꠎꠣ ꠇꠞꠤꠅ ꠘꠣ। ꠀꠝꠤ ꠀꠟ꠆ꠟꠣ ꠔ ꠟꠣ-ꠡꠞꠤꠇ ꠝꠣꠛꠥꠖ, ꠇꠥꠘꠥ ꠡꠞꠤꠇ ꠡꠁꠎ꠆ꠎ ꠇꠞꠤ ꠘꠣ, ꠀꠝꠣꠞ ꠙꠣꠅꠘꠣ ꠄꠛꠣꠖꠔ ꠀꠝꠤ ꠌꠣꠁꠃ ꠌꠣꠁ।
EXO 34:15 “ꠢꠃ ꠖꠦꠡꠞ ꠝꠣꠘꠡꠞ ꠟꠉꠦ ꠇꠥꠘꠥꠎꠣꠔ ꠌꠥꠇ꠆ꠔꠤ ꠇꠞꠤꠅ ꠘꠣ, ꠀꠞꠘꠣꠄ ꠔꠣꠞꠣ ꠎꠦꠛꠟꠣ ꠡꠤꠞꠤꠇꠤ ꠇꠣꠝꠞ ꠘꠤꠅꠔꠦ, ꠔꠣꠞꠣꠞ ꠖꠦꠛ-ꠖꠦꠛꠤꠞ ꠍꠣꠝꠘꠦ ꠘꠤꠎꠞꠦ ꠡꠙꠤꠀ ꠖꠤꠛꠣ, ꠖꠦꠛꠔꠣꠞ ꠘꠣꠝꠦ ꠛꠟꠤ ꠖꠤꠛꠣ, ꠅꠃ ꠡꠝꠄ ꠔꠣꠞꠣ ꠔꠥꠝꠞꠣꠞꠦꠅ ꠖꠣꠅꠔ ꠖꠤꠛꠣ ꠀꠞ ꠔꠥꠝꠞꠣ ꠉꠤꠀ ꠔꠣꠞꠣꠞ ꠅꠃ ꠛꠟꠤꠞ ꠉꠥꠡ꠆ꠔ ꠈꠣꠁꠛꠣꠄ।
EXO 34:16 ꠔꠥꠝꠞꠣꠞ ꠙꠥꠀꠂꠘ꠆ꠔꠞ ꠟꠉꠦ ꠔꠣꠞꠣꠞ ꠙꠥꠠꠤꠘ꠆ꠔꠞ ꠛꠤꠀ-ꠡꠣꠖꠤ ꠖꠤꠛꠣꠄ, ꠀꠞ ꠅꠃ ꠙꠥꠠꠤꠘ꠆ꠔꠦ ꠔꠣꠞꠣꠞ ꠖꠦꠛꠔꠣꠞ ꠉꠦꠍꠦ ꠉꠤꠀ ꠡꠤꠞꠤꠇꠤ ꠇꠣꠝ ꠇꠞꠛꠣ, ꠔꠣꠞꠣꠞ ꠟꠉꠦ ꠔꠥꠝꠞꠣꠞ ꠙꠥꠀꠂꠘ꠆ꠔꠞꠦꠅ ꠐꠣꠘꠛꠣ।
EXO 34:17 “ꠔꠥꠝꠞꠣ ꠘꠤꠎꠞ ꠟꠣꠉꠤ ꠇꠥꠘꠥꠎꠣꠔꠞ ꠝꠥꠞ꠆ꠔꠤ ꠛꠣꠘꠣꠁꠅ ꠘꠣ।
EXO 34:18 “ꠔꠥꠝꠞꠣ ꠈꠣꠝꠤꠞ ꠍꠣꠠꠣ ꠞꠥꠐꠤꠞ ꠁꠖ ꠀꠖꠣꠄ ꠇꠞꠤꠅ। ꠡꠣꠔ ꠖꠤꠘ ꠈꠣꠝꠤꠞ ꠍꠣꠠꠣ ꠞꠥꠐꠤ ꠈꠣꠁꠅ। ꠀꠛꠤꠛ ꠌꠣꠘ꠆ꠖꠞ ꠑꠤꠇ ꠇꠞꠣ ꠔꠣꠞꠤꠈꠅ ꠔꠥꠝꠞꠣꠞꠦ ꠎꠦꠟꠣ ꠢꠥꠇꠥꠝ ꠖꠦꠅꠀ ꠅꠁꠍꠦ, ꠅꠃ ꠟꠣꠈꠣꠘ ꠁꠖ ꠀꠖꠣꠄ ꠇꠞꠤꠅ। ꠝꠘꠅ ꠞꠣꠈꠤꠅ, ꠅꠃ ꠌꠣꠘ꠆ꠖꠅ ꠔꠥꠝꠞꠣ ꠝꠤꠡꠞ ꠕꠣꠇꠤ ꠛꠣꠞ ꠅꠁꠀ ꠀꠁꠍꠟꠣꠄ।
EXO 34:19 “ꠔꠥꠝꠞꠣꠞ ꠙꠦꠐꠞ ꠙꠄꠖꠣ ꠢꠇꠟ ꠙꠄꠟꠣ ꠙꠥꠀ ꠀꠝꠣꠞ ꠅꠁꠛ। ꠄꠞꠟꠉꠦ ꠔꠥꠝꠞꠣꠞ ꠉꠞꠥ-ꠍꠣꠉꠟ ꠛꠣ ꠙꠡꠥꠞ ꠙꠄꠟꠣ ꠝꠦꠖꠣ ꠛꠣꠁꠌ꠆ꠌꠣꠅ ꠀꠝꠣꠞ ꠅꠁꠛ।
EXO 34:20 ꠈꠣꠟꠤ ꠉꠣꠗꠤꠘ꠆ꠔꠞ ꠙꠄꠟꠣ ꠝꠦꠖꠣ ꠛꠣꠁꠌ꠆ꠌꠣꠞ ꠛꠖꠟꠣ, ꠀꠝꠣꠞꠦ ꠄꠉꠥ ꠝꠦꠠꠣ-ꠛꠣꠁꠌ꠆ꠌꠣ ꠛꠖꠟꠣ ꠖꠤꠀ ꠅꠉꠥꠞꠦ ꠈꠣꠟꠣꠍ ꠇꠞꠤꠀ ꠘꠤꠅ। ꠈꠣꠟꠣꠍ ꠘꠣ ꠇꠞꠣꠁꠟꠦ ꠅꠉꠥꠞ ꠉꠞ꠆ꠖꠘꠣ ꠜꠣꠋꠉꠤꠟꠤꠅ। ꠔꠥꠝꠞꠣꠞ ꠢꠇ꠆ꠇꠟ ꠛꠠ ꠙꠥꠀꠂꠘꠞꠦ ꠅꠟꠣ ꠈꠣꠟꠣꠍ ꠇꠞꠣꠁ ꠘꠤꠅ। “ꠢꠥꠘꠅ, ꠁꠖꠞ ꠡꠝꠄ ꠇꠦꠃ ꠈꠣꠟꠤ ꠀꠔꠦ ꠀꠝꠣꠞ ꠇꠣꠍꠣꠔ ꠀꠁꠅ ꠘꠣ।
EXO 34:21 “ꠢꠣꠙ꠆ꠔꠣꠞ ꠍꠄꠖꠤꠘ ꠔꠥꠝꠞꠣ ꠇꠣꠝ ꠇꠞꠤꠅ, ꠅꠁꠟꠦ ꠡꠣꠔ ꠘꠝ꠆ꠛꠞ ꠖꠤꠘ ꠎꠤꠞꠣꠁꠅ। ꠈꠦꠔ ꠇꠞꠣ ꠀꠞ ꠚꠡꠟ ꠖꠣꠅꠀꠞ ꠛꠣꠟꠣꠅ ꠎꠤꠞꠣꠁꠅ।
EXO 34:22 “ꠅꠃ ꠔꠤꠘꠅ ꠁꠖ ꠔꠥꠝꠞꠣ ꠝꠣꠘꠤꠅ, ꠙꠘ꠆ꠌꠣꠁꠡꠣ ꠁꠖ, ꠈꠦꠔꠞ ꠙꠄꠟꠣ ꠖꠣꠅꠀ ꠉꠝ ꠖꠤꠀ ꠘꠄꠀ ꠚꠡꠟꠞ ꠁꠖ, ꠀꠞ ꠛꠍꠞꠞ ꠢꠦꠡ ꠝꠣꠡꠅ ꠛꠣꠉꠣꠘꠞ ꠙꠣꠇꠘꠣ ꠚꠟ ꠛꠣꠠꠤꠔ ꠀꠘꠤꠀ ꠒꠦꠞꠣ-ꠊꠞꠞ ꠁꠖ ꠀꠖꠣꠄ ꠇꠞꠤꠅ।
EXO 34:23 ꠛꠍꠞꠅ ꠔꠤꠘꠛꠣꠞ ꠔꠥꠝꠞꠣꠞ ꠢꠇꠟ ꠛꠦꠐꠣꠁꠘ ꠀꠁꠀ ꠢꠎ ꠇꠞꠣꠞ ꠘꠤꠅꠔꠦ ꠀꠝꠣꠞ ꠉꠦꠍꠦ ꠀꠎꠤꠞ ꠅꠁꠅ। ꠝꠘꠅ ꠞꠣꠈꠤꠅ, ꠀꠝꠤꠃ ꠝꠣꠛꠥꠖ, ꠛꠘꠤ ꠁꠍꠞꠣꠁꠟꠞ ꠀꠟ꠆ꠟꠣ।
EXO 34:24 ꠀꠝꠤ ꠢꠃ ꠖꠦꠡꠞ ꠢꠇꠟ ꠎꠣꠔꠤꠞꠦ ꠔꠥꠝꠞꠣꠞ ꠍꠣꠝꠘ ꠕꠣꠇꠤ ꠈꠦꠖꠣꠁ ꠖꠤꠝꠥ। ꠔꠥꠝꠞꠣꠞ ꠖꠦꠡꠞ ꠡꠤꠝꠣꠘꠣ ꠛꠣꠠꠣꠁꠀ ꠛꠠ ꠇꠞꠝꠥ। ꠔꠥꠝꠞꠣ ꠛꠍꠞꠅ ꠔꠤꠘꠛꠣꠞ ꠘꠤꠎꠞ ꠝꠣꠛꠥꠖ ꠀꠟ꠆ꠟꠣꠞ ꠍꠣꠝꠘꠦ ꠀꠎꠤꠞ ꠅꠁꠅ, ꠔꠦꠃ ꠔꠥꠝꠞꠣꠞ ꠎꠣꠉꠣ-ꠎꠝꠤꠘꠞ ꠛꠣꠄ ꠇꠦꠃ ꠟꠣꠟꠌ ꠇꠞꠔ ꠘꠣꠄ।
EXO 34:25 “ꠀꠝꠣꠞ ꠘꠣꠝꠞ ꠇꠥꠞꠛꠣꠘꠤꠞ ꠙꠡꠥꠞ ꠟꠉꠦ ꠔꠥꠝꠞꠣ ꠈꠣꠝꠤꠞ ꠀꠟꠣ ꠇꠥꠘ꠆ꠔꠣ ꠟꠤꠟ꠆ꠟꠣ-ꠇꠥꠞꠛꠣꠘꠤ ꠖꠤꠅ ꠘꠣ। ꠀꠎꠣꠖꠤ ꠁꠖꠞ ꠇꠥꠞꠛꠣꠘꠤꠞ ꠇꠥꠘꠥꠎꠣꠔ ꠈꠣꠘꠤ ꠛꠤꠀꠘ ꠙꠞ꠆ꠎꠘ꠆ꠔ ꠞꠣꠈꠤꠅ ꠘꠣ।
EXO 34:26 “ꠔꠥꠝꠞꠣꠞ ꠈꠦꠔꠞ ꠖꠣꠅꠀ ꠙꠄꠟꠣ ꠚꠡꠟꠞ ꠢꠇꠟ ꠕꠣꠇꠤ ꠜꠣꠟꠣ ꠅꠋꠡ ꠀꠟ꠆ꠟꠣ ꠝꠣꠛꠥꠖꠞ ꠊꠞꠅ ꠟꠁꠀ ꠀꠁꠅ। “ꠀꠞ ꠢꠥꠘꠅ, ꠍꠣꠉꠟꠞ ꠛꠣꠁꠌ꠆ꠌꠣꠞ ꠉꠥꠡ꠆ꠔ ꠔꠣꠞ ꠝꠣʼꠞ ꠖꠥꠗꠖꠤ ꠞꠣꠘ꠆ꠖꠤꠅ ꠘꠣ।”
EXO 34:27 ꠛꠣꠖꠦ ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ, “ꠔꠥꠝꠤ ꠁ ꠇꠣꠟꠣꠝ ꠅꠇꠟ ꠟꠦꠈꠤꠀ ꠕꠅ। ꠀꠝꠤ ꠅꠃ ꠇꠣꠟꠣꠝ ꠝꠣꠚꠤꠇ ꠔꠥꠝꠣꠞ ꠟꠉꠦ ꠀꠞ ꠛꠘꠤ ꠁꠍꠞꠣꠁꠟꠞ ꠟꠉꠦ ꠀꠝꠣꠞ ꠝꠤꠟꠘꠞ ꠃꠍꠤꠟ꠆ꠟꠣ ꠛꠅꠀꠁꠟ ꠇꠞꠟꠣꠝ।”
EXO 34:28 ꠅꠃ ꠡꠝꠄ ꠝꠥꠍꠣ ꠘꠛꠤ ꠌꠣꠟ꠆ꠟꠤꠡ ꠖꠤꠘ ꠌꠣꠟ꠆ꠟꠤꠡ ꠞꠣꠁꠔ ꠝꠣꠛꠥꠖꠞ ꠗꠣꠞꠅ ꠙꠣꠠꠞ ꠃꠙꠞꠦ ꠞꠁꠟꠣ। ꠔꠣꠁꠘ ꠇꠥꠘꠥꠎꠣꠔ ꠖꠣꠘꠣ-ꠙꠣꠘꠤ ꠈꠣꠁꠟꠣ ꠘꠣ। ꠝꠣꠛꠥꠖꠦ ꠢꠃ ꠖꠥꠁꠅ ꠙꠣꠔ꠆ꠔꠞꠞ ꠃꠙꠞꠦ ꠔꠣꠘ ꠟꠉꠦ ꠝꠤꠟꠘꠞ ꠃꠍꠤꠟ꠆ꠟꠣꠞ ꠅꠃ ꠀꠄꠀꠔ ꠅꠇꠟ, ꠝꠣꠘꠤ ꠡꠞꠤꠅꠔꠞ ꠖꠡꠐꠣ ꠢꠥꠇꠥꠝ-ꠀꠢꠇꠣꠝ ꠟꠦꠈꠤꠀ ꠖꠤꠟꠣ।
EXO 34:29 ꠔꠦꠃ ꠝꠥꠍꠣꠄ ꠡꠣꠢꠣꠖꠔ ꠙꠣꠔ꠆ꠔꠞ ꠖꠥꠁꠅꠈꠣꠘ ꠀꠔꠅ ꠟꠁꠀ ꠔꠥꠞ ꠙꠣꠠ ꠕꠣꠇꠤ ꠟꠣꠝꠤꠀ ꠀꠁꠟꠣ। ꠝꠣꠛꠥꠖꠞ ꠟꠉꠦ ꠛꠣꠔꠌꠤꠔ ꠇꠞꠣꠄ ꠝꠥꠍꠣꠞ ꠝꠥꠈꠞ ꠍꠥꠞꠔ ꠘꠥꠞꠣꠘꠤ ꠅꠁꠉꠦꠟ, ꠅꠁꠟꠦ ꠝꠥꠍꠣꠄ ꠁꠈꠣꠘ ꠐꠦꠞ ꠙꠣꠁꠟꠣ ꠘꠣ।
EXO 34:30 ꠅꠃ ꠡꠝꠄ ꠢꠣꠞꠥꠘ ꠀꠞ ꠢꠇꠟ ꠛꠘꠤ ꠁꠍꠞꠣꠁꠟꠦ ꠝꠥꠍꠣꠞ ꠘꠥꠞꠣꠘꠤ ꠍꠥꠞꠔ ꠖꠦꠈꠟꠣ, ꠖꠦꠈꠤꠀ ꠔꠣꠞꠣ ꠇꠣꠍꠣꠔ ꠀꠁꠔꠦ ꠒꠞꠣꠁꠉꠦꠟꠣ।
EXO 34:31 ꠅꠁꠟꠦ ꠝꠥꠍꠣꠄ ꠔꠣꠞꠣꠞꠦ ꠒꠣꠇ ꠖꠤꠟꠣ, ꠔꠦꠃ ꠢꠣꠞꠥꠘ ꠀꠞ ꠛꠘꠤ ꠁꠍꠞꠣꠁꠟꠞ ꠝꠥꠞꠛ꠆ꠛꠤ ꠅꠇꠟ ꠔꠣꠘ ꠉꠦꠍꠦ ꠀꠁꠟꠣ, ꠀꠞ ꠝꠥꠍꠣꠄ ꠔꠣꠞꠣꠞ ꠟꠉꠦ ꠝꠣꠔ-ꠇꠕꠣ ꠝꠣꠔꠤꠟꠣ।
EXO 34:32 ꠛꠣꠖꠦ ꠢꠇꠟ ꠛꠘꠤ ꠁꠍꠞꠣꠁꠟ ꠔꠣꠘ ꠇꠣꠍꠣꠔ ꠀꠁꠟꠣ। ꠀꠁꠀ ꠢꠣꠞꠟꠦ ꠔꠣꠁꠘ ꠔꠥꠞ ꠙꠣꠠꠞ ꠃꠙꠞꠦ ꠝꠣꠛꠥꠖꠞ ꠖꠦꠅꠀ ꠢꠇꠟ ꠢꠥꠇꠥꠝ-ꠀꠢꠇꠣꠝ ꠔꠣꠞꠣꠞꠦ ꠎꠣꠘꠣꠁꠟꠣ।
EXO 34:33 ꠔꠣꠞꠣꠞ ꠟꠉꠦ ꠝꠣꠔ-ꠇꠕꠣ ꠡꠦꠡ ꠅꠁꠉꠦꠟꠦ ꠝꠥꠍꠣꠄ ꠔꠣꠘ ꠘꠥꠞꠣꠘꠤ ꠌꠦꠢꠣꠞꠣ ꠟꠥꠇꠣꠘꠤꠞ ꠟꠣꠉꠤ ꠝꠥꠈꠅ ꠙꠞ꠆ꠖꠣ ꠟꠣꠉꠣꠁ ꠖꠤꠟꠣ।
EXO 34:34 ꠅꠁꠟꠦ ꠝꠥꠍꠣꠄ ꠎꠦꠛꠟꠣ ꠝꠣꠛꠥꠖꠞ ꠟꠉꠦ ꠛꠣꠔꠌꠤꠔꠞ ꠟꠣꠉꠤ ꠈꠣꠘꠦꠇꠣꠞ ꠜꠤꠔꠞꠦ ꠔꠣꠘ ꠍꠣꠝꠘꠦ ꠎꠣꠁꠔꠣ, ꠅꠃ ꠡꠝꠄ ꠁ ꠙꠞ꠆ꠖꠣ ꠈꠥꠟꠤꠟꠤꠔꠣ। ꠛꠣꠖꠦ ꠛꠣꠞꠦ ꠀꠁꠀ ꠙꠞ꠆ꠖꠣ ꠟꠣꠉꠣꠁꠔꠣ, ꠀꠞ ꠀꠟ꠆ꠟꠣꠞ ꠖꠦꠅꠀ ꠢꠥꠇꠥꠝ ꠅꠇꠟ ꠛꠘꠤ ꠁꠍꠞꠣꠁꠟꠞꠦ ꠎꠣꠘꠣꠁꠔꠣ।
EXO 34:35 ꠢꠇꠟ ꠝꠣꠘꠡꠦ ꠖꠦꠈꠔꠣ ꠝꠥꠍꠣꠞ ꠝꠥꠈ ꠘꠥꠞꠣꠘꠤ ꠅꠁꠉꠦꠍꠦ। ꠝꠥꠍꠣꠄ ꠔꠣꠘ ꠝꠥꠈ ꠉꠥꠞꠤꠟꠤꠔꠣ ꠀꠞ ꠝꠣꠛꠥꠖꠞ ꠍꠣꠝꠘꠦ ꠎꠣꠅꠀꠞ ꠀꠉ ꠙꠞ꠆ꠎꠘ꠆ꠔ ꠔꠣꠘ ꠝꠥꠈ ꠉꠥꠞꠣ ꠞꠁꠔ।
EXO 35:1 ꠝꠥꠍꠣ ꠘꠛꠤꠄ ꠛꠘꠤ ꠁꠍꠞꠣꠁꠟꠞ ꠢꠇꠟ ꠉꠥꠡ꠆ꠐꠤꠞꠦ ꠖꠟꠣ ꠇꠞꠤꠀ ꠇꠁꠟꠣ, “ꠝꠣꠛꠥꠖꠦ ꠢꠥꠇꠥꠝ ꠖꠤꠍꠂꠘ, ꠔꠣꠘ ꠅꠃ ꠢꠥꠇꠥꠝ-ꠀꠢꠇꠣꠝ ꠀꠝꠟ ꠇꠞꠣꠞ ꠟꠣꠉꠤ।
EXO 35:2 ꠔꠥꠝꠞꠣ ꠢꠣꠙ꠆ꠔꠣꠞ ꠍꠄꠖꠤꠘ ꠇꠣꠝ ꠇꠞꠤꠅ, ꠅꠁꠟꠦ ꠡꠣꠔ ꠘꠝ꠆ꠛꠞ ꠖꠤꠘ ꠝꠣꠛꠥꠖꠞ ꠘꠣꠝꠦ ꠙꠣꠇ-ꠙꠛꠤꠔ꠆ꠞ ꠖꠤꠘ, ꠀꠞꠣꠝꠞ ꠖꠤꠘ, ꠎꠥꠝ꠆ꠝꠣꠛꠣꠞ। ꠁ ꠖꠤꠘ ꠎꠦ ꠝꠣꠘꠡꠦ ꠇꠣꠝ ꠇꠞꠛ, ꠔꠣꠞꠦ ꠝꠣꠞꠤꠟꠤꠛꠣꠄ।
EXO 35:3 ꠎꠥꠝ꠆ꠝꠣꠛꠣꠞꠦ ꠔꠥꠝꠞꠣꠞ ꠇꠦꠃꠞꠞ ꠊꠞꠅ ꠀꠉꠥꠁꠘ ꠎꠣꠟꠣꠁꠅ ꠘꠣ।”
EXO 35:4 ꠢꠎꠞꠔ ꠝꠥꠍꠣꠄ ꠛꠘꠤ ꠁꠍꠞꠣꠁꠟꠞꠦ ꠇꠁꠟꠣ, “ꠝꠣꠛꠥꠖꠦ ꠢꠥꠇꠥꠝ ꠖꠤꠍꠂꠘ,
EXO 35:5 ꠔꠥꠝꠞꠣ ꠎꠣꠞꠎꠤꠞ ꠖꠤꠟꠞ ꠈꠥꠡꠤ ꠝꠣꠚꠤꠇ ꠝꠣꠛꠥꠖꠞ ꠘꠣꠝꠦ ꠟꠤꠟ꠆ꠟꠣ ꠟꠁꠀ ꠀꠅ। ꠀꠘꠣꠞ ꠡꠝꠄ ꠅꠃꠟꠣ ꠌꠤꠎ ꠅꠇꠟ ꠟꠤꠟ꠆ꠟꠣ ꠀꠘꠤꠅ: ꠡꠥꠘꠣ, ꠞꠥꠙꠣ, ꠙꠤꠔꠟ;
EXO 35:6 ꠟꠤꠟꠥꠀ, ꠛꠣꠁꠋꠉꠘꠤ, ꠟꠣꠟ ꠞꠋꠉꠞ ꠡꠥꠔꠣ; ꠖꠣꠝꠤ ꠡꠥꠔꠤ ꠇꠣꠙꠠ ꠀꠞ ꠍꠣꠉꠟꠞ ꠞꠥꠝꠣ;
EXO 35:7 ꠟꠣꠟ ꠞꠋ ꠟꠣꠉꠣꠁꠟ ꠝꠦꠠꠣꠞ ꠌꠣꠝꠠꠣ, ꠚꠥʼꠞ ꠌꠣꠝꠠꠣ; ꠛꠣꠛꠟꠣ ꠟꠣꠇꠠꠤ;
EXO 35:8 ꠌꠦꠞꠣꠉ ꠎꠣꠟꠣꠘꠤꠞ ꠟꠣꠉꠤ ꠎꠄꠔꠥꠘꠞ ꠔꠦꠟ; ꠈꠦꠟꠣꠚꠔꠤ ꠡꠝꠎꠤꠛꠣꠞ ꠔꠦꠟꠞ ꠝꠡꠟꠣ ꠀꠞ ꠀꠉꠞ-ꠈꠥꠡꠛꠄ ꠛꠣꠘꠣꠘꠤꠞ ꠝꠡꠟꠣ;
EXO 35:9 ꠁꠝꠣꠝꠞ ꠄꠚꠞꠘ ꠀꠞ ꠛꠥꠇꠥꠞ ꠃꠙꠞꠞ ꠕꠟꠤꠔ ꠟꠣꠉꠣꠘꠤꠞ ꠟꠣꠉꠤ ꠀꠇꠤꠇ ꠝꠘꠤ ꠀꠞ ꠢꠇꠟ ꠘꠝꠥꠘꠣꠞ ꠖꠣꠝꠤ ꠙꠣꠔ꠆ꠔꠞ।
EXO 35:10 “ꠔꠥꠝꠞꠣꠞ ꠝꠣꠎꠦ ꠎꠣꠞꠣ ꠜꠣꠟꠣ ꠃꠡ꠆ꠔꠣꠖ ꠇꠣꠞꠤꠉꠞ, ꠔꠣꠞꠣ ꠀꠁꠀ ꠅꠃ ꠢꠇꠟꠔꠣ ꠛꠣꠘꠣꠁꠛꠣ, ꠎꠦꠟꠣ ꠝꠣꠛꠥꠖꠦ ꠢꠥꠇꠥꠝ ꠖꠤꠍꠂꠘ:
EXO 35:11 ꠀꠟ꠆ꠟꠣꠞ ꠊꠞ, ꠊꠞꠞ ꠌꠣꠟ, ꠢꠥꠇ, ꠚ꠆ꠞꠦꠁꠝ, ꠛꠣꠔ꠆ꠔꠤ, ꠈꠥꠐꠤ, ꠈꠥꠐꠤꠞ ꠔꠟꠞ ꠌꠥꠘ꠆ꠉꠤ;
EXO 35:12 ꠡꠣꠢꠣꠖꠔ ꠡꠘ꠆ꠖꠥꠇ, ꠡꠘ꠆ꠖꠥꠇꠞ ꠓꠣꠇꠘꠣ, ꠡꠘ꠆ꠖꠥꠇ ꠛꠁꠀ ꠘꠦꠅꠀꠞ ꠛꠦꠘ꠆ꠖꠣ; ꠡꠘ꠆ꠖꠥꠇꠞꠦ ꠀꠉꠟꠣ ꠖꠤꠛꠣꠞ ꠙꠞ꠆ꠖꠣ;
EXO 35:13 ꠛꠦꠘ꠆ꠖꠣ ꠡꠥꠖ꠆ꠖꠣ ꠐꠦꠛꠥꠟ, ꠐꠦꠛꠥꠟꠞ ꠃꠙꠞꠞ ꠢꠇꠟ ꠌꠤꠎ, ꠝꠣꠛꠥꠖꠞ ꠘꠣꠝꠞ ꠙꠛꠤꠔ꠆ꠞ ꠞꠥꠐꠤ;
EXO 35:14 ꠚꠞ ꠖꠤꠛꠣꠞ ꠟꠣꠉꠤ ꠌꠦꠞꠣꠉ ꠖꠣꠘꠤ, ꠄꠞ ꠟꠉꠞ ꠢꠇꠟ ꠌꠤꠎ ꠀꠞ ꠌꠦꠞꠣꠉ ꠅꠇꠟ, ꠌꠦꠞꠣꠉ ꠎꠣꠟꠣꠘꠤꠞ ꠔꠦꠟ;
EXO 35:15 ꠀꠉꠞ-ꠈꠥꠡꠛꠄ ꠎꠣꠟꠣꠘꠤꠞ ꠐꠦꠛꠥꠟ, ꠁꠈꠣꠘ ꠛꠁꠀ ꠘꠦꠅꠀꠞ ꠛꠦꠘ꠆ꠖꠣ; ꠈꠦꠟꠣꠚꠔꠤꠞ ꠔꠦꠟ, ꠈꠥꠡꠛꠄ ꠀꠟꠣ ꠀꠉꠞ, ꠀꠟ꠆ꠟꠣꠞ ꠊꠞꠞ ꠖꠥꠀꠞꠞ ꠙꠞ꠆ꠖꠣ;
EXO 35:16 ꠎꠣꠟꠣꠁꠟ ꠇꠥꠞꠛꠣꠘꠤ ꠖꠤꠛꠣꠞ ꠇꠥꠞꠛꠣꠘꠤ ꠈꠣꠘꠣ; ꠄꠞ ꠙꠤꠔꠟꠞ ꠎꠣꠟꠤ ꠀꠞ ꠛꠁꠀ ꠘꠦꠅꠀꠞ ꠛꠦꠘ꠆ꠖꠣ; ꠇꠥꠞꠛꠣꠘꠤ ꠈꠣꠘꠣꠞ ꠢꠇ꠆ꠇꠟ ꠝꠣꠟ-ꠍꠣꠝꠣꠘꠣ; ꠅꠎꠥꠞ ꠉꠣꠝꠟꠣ ꠀꠞ ꠉꠣꠝꠟꠣ ꠕꠅꠀꠞ ꠌꠇꠤ-ꠈꠣꠐ;
EXO 35:17 ꠃꠑꠣꠘꠞ ꠙꠞ꠆ꠖꠣꠁꠘ, ꠈꠥꠐꠤꠘ ꠀꠞ ꠈꠥꠐꠤꠞ ꠔꠟꠞ ꠌꠥꠘ꠆ꠉꠤ; ꠃꠑꠣꠘꠅ ꠢꠣꠝꠣꠘꠤꠞ ꠉꠦꠁꠐꠞ ꠙꠞ꠆ꠖꠣ;
EXO 35:18 ꠊꠞꠞ ꠙꠦꠞꠦꠉ ꠀꠞ ꠖꠠꠤ, ꠃꠑꠣꠘꠞ ꠙꠦꠞꠦꠉ ꠀꠞ ꠖꠠꠤ;
EXO 35:19 ꠙꠣꠇ ꠎꠣꠉꠣꠔ ꠁꠝꠣꠝꠔꠤ ꠇꠣꠝꠞ ꠟꠣꠉꠤ, ꠁꠝꠣꠝ ꠢꠣꠞꠥꠘꠞ ꠙꠛꠤꠔ꠆ꠞ ꠟꠦꠛꠣꠍ, ꠀꠞ ꠔꠣꠘ ꠙꠥꠀꠂꠘ꠆ꠔꠞꠅ ꠁꠝꠣꠝꠔꠤꠞ ꠟꠦꠛꠣꠍ।”
EXO 35:20 ꠝꠥꠍꠣ ꠘꠛꠤꠞ ꠛꠄꠀꠘ ꠛꠣꠖꠦ ꠛꠘꠤ ꠁꠍꠞꠣꠁꠟꠞ ꠢꠇꠟ ꠉꠥꠡ꠆ꠐꠤ ꠛꠤꠖꠣꠄ ꠅꠁꠉꠦꠟꠣ।
EXO 35:21 ꠉꠤꠀ ꠔꠣꠞꠣꠞ ꠖꠤꠟꠞ ꠄꠡꠇꠤ ꠝꠣꠚꠤꠇ ꠎꠣꠞꠎꠤꠞ ꠁꠌ꠆ꠍꠣꠄ ꠀꠟ꠆ꠟꠣꠞ ꠝꠤꠟꠘ-ꠔꠣꠝ꠆ꠛꠥ ꠛꠣꠘꠣꠘꠤꠞ ꠟꠣꠉꠤ, ꠁꠝꠣꠝ ꠢꠣꠞꠥꠘꠞ ꠙꠣꠇ-ꠙꠛꠤꠔ꠆ꠞ ꠟꠦꠛꠣꠍꠞ ꠟꠣꠉꠤ ꠀꠞ ꠄꠛꠣꠖꠔ ꠇꠣꠝꠞ ꠟꠣꠉꠤ ꠢꠇꠟ ꠘꠝꠥꠘꠣꠞ ꠝꠣꠟ-ꠍꠣꠝꠣꠘꠣ ꠟꠁꠀ ꠀꠁꠟꠣ। ꠀꠟ꠆ꠟꠣꠞ ꠘꠣꠝꠦ ꠟꠤꠟ꠆ꠟꠣ ꠖꠤꠛꠣꠞ ꠟꠣꠉꠤ ꠅꠔꠣ ꠟꠁꠀ ꠔꠣꠞꠣ ꠀꠎꠤꠞ ꠅꠁꠟꠣ।
EXO 35:22 ꠛꠦꠐꠣꠁꠘ ꠛꠣ ꠛꠦꠐꠤꠘ꠆ꠔꠞ ꠝꠣꠎꠦ ꠎꠣꠞꠣꠞ ꠝꠘꠦ ꠌꠣꠁꠟ, ꠔꠣꠞꠣ ꠁꠔꠣ ꠖꠤꠟꠣ। ꠔꠣꠞꠣ ꠎꠣꠞꠎꠤꠞ ꠇꠣꠙꠠꠞ ꠙꠤꠋ, ꠇꠣꠘꠞ ꠁꠀꠞꠤꠋ, ꠀꠋꠐꠤ, ꠉꠟꠣꠞ ꠢꠣꠞ, ꠀꠞ ꠢꠇꠟ ꠎꠣꠔꠞ ꠡꠥꠘꠣꠞ ꠉꠄꠘꠣ ꠀꠘꠤꠀ ꠝꠣꠛꠥꠖꠞ ꠘꠣꠝꠦ ꠖꠥꠟꠘꠣ ꠇꠥꠞꠛꠣꠘꠤ ꠢꠤꠡꠣꠛꠦ ꠖꠤꠟꠣ।
EXO 35:23 ꠀꠞ ꠎꠦꠞꠣꠞ ꠉꠦꠍꠦ ꠟꠤꠟꠥꠀ ꠡꠥꠔꠣ, ꠛꠣꠁꠋꠉꠘꠤ, ꠟꠣꠟ ꠡꠥꠔꠣ, ꠖꠣꠝꠤ ꠡꠥꠔꠤ ꠇꠣꠙꠠ, ꠍꠣꠉꠟꠞ ꠞꠥꠝꠣ, ꠟꠣꠟ ꠞꠋ ꠇꠞꠣ ꠝꠦꠠꠣꠞ ꠌꠣꠝꠠꠣ, ꠚꠥʼꠞ ꠌꠣꠝꠠꠣ ꠀꠍꠤꠟ, ꠔꠣꠞꠣ ꠁꠔꠣ ꠢꠇꠟꠔꠣ ꠟꠁꠀ ꠀꠁꠟꠣ।
EXO 35:24 ꠎꠦꠞꠣꠞ ꠉꠦꠍꠦ ꠞꠥꠙꠣ ꠀꠞ ꠙꠤꠔꠟ ꠀꠍꠤꠟ, ꠔꠣꠞꠣꠅ ꠁꠔꠣ ꠀꠘꠤꠀ ꠝꠣꠛꠥꠖꠞ ꠘꠣꠝꠦ ꠟꠤꠟ꠆ꠟꠣ ꠖꠤꠟꠣ। ꠀꠟ꠆ꠟꠣꠞ ꠊꠞꠞ ꠇꠣꠝꠅ ꠟꠣꠉꠣꠘꠤꠞ ꠎꠥꠇꠣ ꠛꠣꠛꠟꠣ ꠟꠣꠇꠠꠤ ꠎꠦꠞꠣꠞ ꠉꠦꠍꠦ ꠀꠍꠤꠟ, ꠔꠣꠞꠣꠅ ꠁꠔꠣ ꠟꠁꠀ ꠀꠁꠟꠣ।
EXO 35:25 ꠎꠦꠔꠣ ꠛꠦꠐꠤꠘ꠆ꠔꠦ ꠡꠥꠔꠣ ꠛꠣꠘꠣꠘꠤꠔ ꠃꠡ꠆ꠔꠣꠖ, ꠔꠣꠞꠣ ꠘꠤꠎꠞ ꠀꠔꠦ ꠟꠤꠟꠥꠀ, ꠛꠣꠁꠋꠉꠘꠤ, ꠟꠣꠟ ꠞꠋꠉꠞ ꠡꠥꠔꠣ, ꠀꠞ ꠖꠣꠝꠤ ꠡꠥꠔꠤ ꠇꠣꠙꠠ ꠛꠣꠘꠣꠁꠀ ꠀꠘꠟꠣ।
EXO 35:26 ꠀꠞ ꠡꠥꠔꠣ ꠛꠣꠘꠣꠅꠞꠣ ꠎꠦꠔꠣ ꠛꠦꠐꠤꠘ꠆ꠔꠞ ꠖꠤꠟꠞ ꠝꠣꠎꠦ ꠄꠡꠇꠤ ꠙꠄꠖꠣ ꠅꠁꠟ, ꠔꠣꠞꠣ ꠍꠣꠉꠟꠞ ꠞꠥꠝꠣ ꠖꠤꠀ ꠡꠥꠔꠣ ꠛꠣꠘꠣꠁꠟꠣ।
EXO 35:27 ꠝꠥꠞꠛ꠆ꠛꠤ ꠅꠇꠟꠦ ꠄꠚꠞꠘ ꠀꠞ ꠛꠥꠇꠥꠞ ꠃꠙꠞꠞ ꠕꠟꠤꠔ ꠟꠣꠉꠣꠘꠤꠞ ꠟꠣꠉꠤ, ꠀꠇꠤꠇ ꠝꠘꠤ ꠀꠞ ꠖꠣꠝꠤ ꠖꠣꠝꠤ ꠙꠣꠔ꠆ꠔꠞ ꠟꠁꠀ ꠀꠁꠟꠣ।
EXO 35:28 ꠌꠦꠞꠣꠉ ꠎꠣꠟꠣꠘꠤꠞ ꠔꠦꠟ, ꠈꠦꠟꠣꠚꠔꠤ ꠡꠝꠎꠤꠛꠣꠞ ꠔꠦꠟ, ꠀꠉꠞ-ꠈꠥꠡꠛꠄ ꠛꠣꠘꠣꠘꠤꠞ ꠝꠡꠟꠣ ꠀꠞ ꠎꠄꠔꠥꠘꠞ ꠔꠦꠟꠅ ꠀꠘꠟꠣ।
EXO 35:29 ꠝꠣꠛꠥꠖꠦ ꠝꠥꠍꠣꠞ ꠝꠣꠎꠖꠤ ꠎꠦꠔꠣ ꠎꠦꠔꠣ ꠇꠞꠣꠞ ꠢꠥꠇꠥꠝ ꠖꠤꠍꠟꠣ, ꠁꠔꠣ ꠙꠥꠞꠣ ꠇꠞꠣꠞ ꠟꠣꠉꠤ ꠛꠘꠤ ꠁꠍꠞꠣꠁꠟꠞ ꠢꠇꠟ ꠛꠦꠐꠣꠁꠘ-ꠛꠦꠐꠤꠘ꠆ꠔꠦ, ꠎꠣꠞꠎꠤꠞ ꠈꠥꠡꠤ ꠝꠣꠚꠤꠇ ꠟꠤꠟ꠆ꠟꠣ ꠟꠁꠀ ꠀꠎꠤꠞ ꠅꠁꠟ।
EXO 35:30 ꠛꠣꠖꠦ ꠝꠥꠍꠣꠄ ꠢꠇꠟ ꠛꠘꠤ ꠁꠍꠞꠣꠁꠟꠞꠦ ꠇꠁꠟꠣ, “ꠝꠣꠛꠥꠖꠦ ꠄꠢꠥꠖꠣ ꠉꠥꠡ꠆ꠐꠤꠞ ꠢꠥꠞꠞ ꠘꠣꠔꠤ, ꠃꠞꠤꠞ ꠙꠥꠀ ꠛꠣꠔꠍꠦꠟꠟꠞꠦ ꠙꠍꠘ꠆ꠖ ꠇꠞꠍꠂꠘ।
EXO 35:31 ꠔꠣꠁꠘ ꠄꠞꠦ ꠘꠤꠎꠞ ꠞꠥꠢꠥ ꠝꠥꠛꠣꠞꠇ ꠖꠤꠀ ꠇꠣꠝꠤꠟ ꠛꠣꠘꠣꠁꠀ, ꠢꠇꠟ ꠟꠣꠈꠣꠘ ꠇꠣꠞꠤꠉꠞꠤ ꠇꠣꠝꠞ ꠀꠈꠟ-ꠛꠥꠖ꠆ꠖꠤ, ꠛꠤꠖ꠆ꠖꠣꠄ ꠃꠡ꠆ꠔꠣꠖꠤ ꠇꠣꠝꠞ ꠈꠦꠝꠔꠣ ꠖꠤꠍꠂꠘ।
EXO 35:32 ꠄꠞꠟꠣꠉꠤ ꠄꠁꠘ ꠇꠣꠞꠤꠉꠞꠤ ꠇꠣꠝ ꠇꠞꠣꠞ ꠛꠣꠟꠣ ꠘꠤꠎꠞ ꠀꠈꠟ ꠈꠣꠐꠣꠁꠀ ꠡꠥꠘꠣ, ꠞꠥꠙꠣ, ꠙꠤꠔꠟꠞ ꠃꠙꠞꠦ ꠡꠥꠘ꠆ꠖꠞ ꠡꠥꠘ꠆ꠖꠞ ꠘꠇꠡꠣ ꠛꠣꠘꠣꠁꠔꠣ ꠙꠣꠞꠛꠣ।
EXO 35:33 ꠖꠣꠝꠤ ꠖꠣꠝꠤ ꠙꠣꠔ꠆ꠔꠞ ꠇꠣꠐꠣ, ꠟꠣꠇꠠꠤꠞ ꠃꠙꠞꠦ ꠘꠇꠡꠣ, ꠀꠞ ꠢꠇꠟ ꠘꠝꠥꠘꠣꠞ ꠀꠔꠞ ꠇꠣꠝ ꠇꠞꠔꠣ ꠙꠣꠞꠛꠣ।
EXO 35:34 ꠀꠞ ꠅꠁꠘ꠆ꠘ ꠝꠣꠘꠡꠞꠦꠅ ꠁꠔꠣ ꠇꠣꠝ ꠢꠤꠇꠣꠘꠤꠞ ꠟꠣꠉꠤ ꠛꠣꠔꠍꠦꠟꠟ ꠀꠞ ꠖꠣꠘ ꠉꠥꠡ꠆ꠐꠤꠞ ꠅꠢꠤꠍꠣꠝꠣꠇꠞ ꠙꠥꠀ ꠀꠢꠟꠤꠀꠛꠞ ꠖꠤꠟꠅ ꠝꠣꠛꠥꠖꠦ ꠀꠈꠟ ꠖꠤꠍꠂꠘ।
EXO 35:35 ꠔꠣꠁꠘ ꠄꠞꠣꠞꠦ ꠘꠣꠘꠣꠘ ꠎꠣꠔꠞ ꠘꠇꠡꠣꠞ ꠇꠣꠝ, ꠟꠤꠟꠥꠀ, ꠛꠣꠁꠋꠉꠘꠤ, ꠟꠣꠟ ꠡꠥꠔꠣꠖꠤ ꠇꠣꠙꠠ ꠛꠣꠁꠘ ꠇꠞꠣ, ꠘꠇꠡꠣ ꠇꠞꠣ, ꠡꠤꠟꠣꠁ ꠇꠞꠣ, ꠀꠞ ꠖꠣꠝꠤ ꠡꠥꠔꠤ ꠇꠣꠙꠠ ꠡꠤꠟꠣꠁ ꠇꠞꠣꠞꠅ ꠀꠈꠟ ꠖꠤꠍꠂꠘ। ꠔꠣꠞꠣ ꠢꠇꠟ ꠘꠝꠥꠘꠣꠞ ꠀꠔꠞ ꠇꠣꠝ ꠇꠞꠔꠣ ꠙꠣꠞꠛꠣ, ꠀꠞ ꠘꠤꠎꠞ ꠝꠘ ꠕꠣꠇꠤ ꠘꠣꠘꠣꠘ ꠘꠝꠥꠘꠣꠞ ꠘꠇꠡꠣ ꠛꠣꠘꠣꠁꠔꠣ ꠙꠣꠞꠛꠣ।”
EXO 36:1 ꠝꠥꠍꠣ ꠘꠛꠤꠄ ꠄꠅꠈꠣꠘ ꠇꠁꠟꠣ, “ꠝꠣꠛꠥꠖꠦ ꠛꠣꠔꠍꠦꠟꠟ, ꠀꠢꠟꠤꠀꠛ ꠀꠞ ꠅꠁꠘ꠆ꠘ ꠇꠣꠞꠤꠉꠞ ꠅꠇꠟꠞꠦ ꠀꠈꠟ-ꠛꠥꠖ꠆ꠖꠤ ꠖꠣꠘ ꠇꠞꠟꠣ, ꠎꠣꠔꠦ ꠔꠣꠞꠣ ꠙꠛꠤꠔ꠆ꠞ ꠄꠛꠣꠖꠔ ꠈꠣꠘꠣꠞ ꠢꠇꠟ ꠇꠣꠝ-ꠇꠣꠎ ꠇꠞꠔꠣ ꠙꠣꠞꠂꠘ। ꠝꠣꠛꠥꠖꠦ ꠎꠦꠟꠣ ꠢꠥꠇꠥꠝ ꠇꠞꠍꠂꠘ, ꠅꠃ ꠟꠣꠈꠣꠘ ꠔꠣꠞꠣ ꠎꠣꠘꠥ ꠄꠛꠣꠖꠔ ꠈꠣꠘꠣꠞ ꠢꠇꠟꠔꠣ ꠛꠣꠘꠣꠁꠘ ꠀꠞ ꠢꠣꠎꠣꠁꠘ।”
EXO 36:2 ꠅꠃ ꠇꠣꠝ ꠇꠞꠣꠘꠤꠞ ꠟꠣꠉꠤ ꠝꠥꠍꠣꠄ ꠛꠣꠔꠍꠦꠟꠟ ꠀꠞ ꠀꠢꠟꠤꠀꠛꠞꠦ ꠀꠘꠣꠁꠟꠣ। ꠝꠣꠛꠥꠖꠦ ꠎꠦꠔꠣ ꠃꠡ꠆ꠔꠣꠖ ꠇꠣꠞꠤꠉꠞ ꠅꠇꠟꠞꠦ ꠀꠈꠟ-ꠢꠦꠇꠝꠔ ꠖꠤꠍꠂꠘ, ꠀꠞ ꠁ ꠇꠣꠝ ꠇꠞꠣꠞ ꠟꠣꠉꠤ ꠎꠦꠞꠣꠞ ꠖꠤꠟꠅ ꠈꠣꠁꠡ ꠙꠄꠖꠣ ꠅꠁꠍꠦ, ꠝꠥꠍꠣꠄ ꠔꠣꠞꠣꠞꠦꠅ ꠀꠘꠣꠁꠟꠣ।
EXO 36:3 ꠔꠣꠞꠣ ꠀꠁꠀ ꠙꠛꠤꠔ꠆ꠞ ꠄꠛꠣꠖꠔ ꠈꠣꠘꠣ ꠛꠣꠘꠣꠘꠤꠞ ꠟꠣꠉꠤ, ꠛꠘꠤ ꠁꠍꠞꠣꠁꠟꠞ ꠖꠦꠅꠀ ꠟꠤꠟ꠆ꠟꠣꠞ ꠢꠇꠟ ꠝꠣꠟ-ꠍꠣꠝꠣꠘꠣ ꠝꠥꠍꠣꠞ ꠉꠦꠍ ꠕꠣꠇꠤ ꠡꠝꠎꠤꠀ ꠘꠤꠟꠣ। ꠝꠣꠘꠡꠦ ꠈꠥꠡꠤ ꠅꠁꠀ ꠘꠤꠎꠞ ꠁꠌ꠆ꠍꠣꠄ ꠙꠞꠔꠦꠇ ꠖꠤꠘ ꠛꠤꠀꠘꠦ ꠀꠞꠅ ꠌꠤꠎ ꠅꠇꠟ ꠀꠘꠤꠀ ꠅꠘꠅ ꠟꠤꠟ꠆ꠟꠣ ꠖꠤꠔꠣ।
EXO 36:4 ꠎꠦ ꠃꠡ꠆ꠔꠣꠖ ꠇꠣꠞꠤꠉꠞ ꠅꠇꠟ ꠄꠛꠣꠖꠔ ꠈꠣꠘꠣꠞ ꠇꠣꠝꠅ ꠀꠍꠟꠣ, ꠔꠣꠞꠣ ꠁꠔꠣ ꠖꠦꠈꠤꠀ, ꠘꠤꠎꠞ ꠇꠣꠝ ꠕꠁꠀ ꠀꠁꠀ ꠝꠥꠍꠣꠞꠦ ꠇꠁꠟꠣ,
EXO 36:5 “ꠝꠣꠛꠥꠖꠦ ꠎꠦꠔꠣ ꠎꠦꠔꠣ ꠛꠣꠘꠣꠘꠤꠞ ꠢꠥꠇꠥꠝ ꠖꠤꠍꠂꠘ, ꠁꠔꠣ ꠛꠣꠘꠣꠘꠤꠞ ꠟꠣꠉꠤ ꠝꠣꠘꠡꠦ ꠖꠞꠇꠣꠞ ꠕꠣꠇꠤ ꠀꠞꠅ ꠛꠦꠡꠤ ꠝꠣꠟ-ꠍꠣꠝꠣꠘꠣ ꠟꠁꠀ ꠀꠁꠞꠣ।”
EXO 36:6 ꠔꠦꠃ ꠝꠥꠍꠣꠞ ꠢꠥꠇꠥꠝꠦ ꠝꠣꠘꠡꠦ ꠢꠇꠟ ꠛꠘꠤ ꠁꠍꠞꠣꠁꠟꠞꠦ ꠎꠣꠘꠣꠁ ꠖꠤꠟꠣ, ꠄꠛꠣꠖꠔ ꠈꠣꠘꠣ ꠛꠣꠘꠣꠘꠤꠞ ꠟꠣꠉꠤ, ꠇꠦꠃ ꠎꠣꠘꠥ ꠀꠞ ꠇꠥꠘꠥ ꠝꠣꠟ-ꠍꠣꠝꠣꠘꠣ ꠟꠤꠟ꠆ꠟꠣ ꠘꠣ ꠖꠦꠁꠘ। ꠅꠃꠉꠤ ꠝꠣꠘꠡꠦ ꠟꠤꠟ꠆ꠟꠣ ꠖꠦꠅꠀ ꠛꠘ꠆ꠖ ꠇꠞꠟꠣ।
EXO 36:7 ꠇꠣꠞꠘ ꠄꠛꠣꠖꠔ ꠈꠣꠘꠣꠞ ꠇꠣꠝꠞ ꠟꠣꠉꠤ ꠖꠞꠇꠣꠞ ꠕꠣꠇꠤ ꠀꠞꠅ ꠛꠦꠡꠤ ꠌꠤꠎ ꠎꠥꠉꠣꠠ ꠅꠁꠉꠦꠍꠤꠟ।
EXO 36:8 ꠛꠣꠖꠦ ꠇꠣꠝ ꠇꠞꠞꠣ ꠃꠡ꠆ꠔꠣꠖ ꠅꠇꠟꠦ ꠙꠦꠌꠣꠁꠟ ꠡꠥꠔꠣꠞ ꠖꠣꠝꠤ ꠡꠥꠔꠤ ꠇꠣꠙꠠ, ꠟꠤꠟꠥꠀ, ꠛꠣꠁꠋꠉꠘꠤ, ꠀꠞ ꠟꠣꠟ ꠡꠥꠔꠣꠖꠤ ꠛꠣꠘꠣꠁꠟ ꠖꠡ ꠐꠥꠇꠞꠣ ꠇꠣꠙꠠ ꠖꠤꠀ ꠀꠟ꠆ꠟꠣꠞ ꠊꠞꠞ ꠙꠞ꠆ꠖꠣ ꠛꠣꠘꠣꠁꠟꠣ। ꠀꠞ ꠃꠡ꠆ꠔꠣꠖ ꠅꠇꠟꠦ ꠄꠞ ꠃꠙꠞꠦ ꠇꠣꠞꠥꠛꠤ ꠅꠇꠟꠞ ꠘꠇꠡꠣ ꠛꠣꠁꠘ ꠇꠞꠟꠣ।
EXO 36:9 ꠙꠞꠔꠦꠇ ꠐꠥꠇꠞꠣꠁꠘ ꠄꠇ ꠝꠣꠙꠞ ꠀꠍꠤꠟ, ꠟꠣꠝ꠆ꠛꠣꠄ ꠀꠐꠣꠁꠡ ꠀꠔ ꠀꠞ ꠙꠣꠡꠦ ꠌꠣꠁꠞ ꠀꠔ।
EXO 36:10 ꠛꠣꠖꠦ ꠙꠣꠌꠈꠣꠘ ꠙꠣꠌꠈꠣꠘ ꠇꠞꠤ ꠄꠇꠈꠣꠘꠅ ꠎꠥꠠꠣ ꠖꠤꠀ ꠛꠠ ꠇꠞꠤ ꠖꠥꠈꠣꠘ ꠉꠤꠟꠣꠚ ꠛꠣꠘꠣꠁꠟꠣ।
EXO 36:11 ꠀꠞ ꠖꠥꠁꠅ ꠉꠤꠟꠣꠚꠞ ꠙꠣꠡꠞ ꠄꠇ ꠇꠤꠘꠣꠞꠅ, ꠟꠤꠟꠥꠀ ꠡꠥꠔꠣꠖꠤ ꠢꠥꠇꠞ ꠚꠥꠠ ꠖꠦꠅꠀ ꠅꠁꠟ।
EXO 36:12 ꠅꠃꠟꠣ ꠙꠄꠟꠣ ꠉꠤꠟꠣꠚꠞ ꠇꠤꠘꠣꠞꠅ ꠙꠁꠘ꠆ꠌꠣꠡꠉꠥ ꠢꠥꠇꠞ ꠚꠥꠠ ꠀꠞ ꠖꠥꠍꠞꠣ ꠉꠤꠟꠣꠚꠞ ꠇꠤꠘꠣꠞꠅ ꠙꠁꠘ꠆ꠌꠣꠡꠉꠥ ꠢꠥꠇꠞ ꠚꠥꠠ ꠟꠣꠉꠣꠁꠟ ꠅꠁꠟ। ꠁ ꠖꠥꠁꠅ ꠢꠥꠇꠞ ꠚꠥꠠ ꠄꠉꠥ ꠀꠞꠦꠉꠥꠞ ꠃꠟꠐꠣꠝꠥꠈꠣ ꠇꠞꠣ ꠅꠁꠟ।
EXO 36:13 ꠛꠣꠖꠦ ꠡꠥꠘꠣꠖꠤ ꠙꠁꠘ꠆ꠌꠣꠡꠉꠥ ꠢꠥꠇ ꠛꠣꠘꠣꠁꠀ ꠢꠃ ꠢꠥꠇꠞ ꠚꠥꠠꠞ ꠝꠣꠎꠦꠖꠤ ꠢꠣꠞꠣꠁꠀ, ꠛꠠ ꠖꠥꠁꠅ ꠉꠤꠟꠣꠚꠞꠦ ꠎꠥꠠꠣ ꠖꠦꠅꠀ ꠅꠁꠟ। ꠔꠦꠃ ꠄꠇꠈꠣꠘ ꠊꠞ ꠔꠤꠀꠞ ꠅꠁꠟ।
EXO 36:14 ꠀꠟ꠆ꠟꠣꠞ ꠊꠞꠞ ꠌꠣꠟꠞ ꠟꠣꠉꠤ ꠍꠣꠉꠟꠞ ꠞꠥꠝꠣ ꠖꠤꠀ ꠉꠤꠟꠣꠚꠞ ꠟꠣꠈꠣꠘ ꠄꠉꠣꠞꠅꠈꠣꠘ ꠐꠥꠇꠞꠣ ꠛꠣꠘꠣꠁꠟ ꠅꠁꠟ।
EXO 36:15 ꠁꠔꠣ ꠙꠞꠔꠦꠇ ꠈꠣꠘ ꠄꠇꠁ ꠝꠣꠙꠞ ꠀꠍꠤꠟ, ꠔꠤꠡ ꠀꠔ ꠟꠣꠝ꠆ꠛꠣ ꠀꠞ ꠌꠣꠁꠞ ꠀꠔ ꠙꠣꠡ।
EXO 36:16 ꠅꠘ ꠕꠣꠇꠤ ꠙꠣꠌ ꠐꠥꠇꠞꠣ ꠄꠇꠟꠉꠦ ꠎꠥꠠꠣ ꠖꠤꠀ ꠛꠠ ꠄꠇ ꠉꠤꠟꠣꠚ ꠛꠣꠘꠣꠁꠟꠣ। ꠀꠞ ꠛꠣꠇꠤ ꠍꠄ ꠐꠥꠇꠞꠣ ꠎꠥꠠꠣ ꠖꠤꠀ, ꠀꠞꠅꠈꠣꠘ ꠛꠠ ꠉꠤꠟꠣꠚ ꠛꠣꠘꠣꠁꠟꠣ।
EXO 36:17 ꠙꠄꠟꠣ ꠛꠠ ꠉꠤꠟꠣꠚꠞ ꠙꠣꠡꠞ ꠄꠇ ꠇꠤꠘꠣꠞꠅ ꠙꠁꠘ꠆ꠌꠣꠡꠉꠥ ꠢꠥꠇꠞ ꠚꠥꠠ ꠟꠣꠉꠣꠁꠟꠣ, ꠀꠞ ꠖꠥꠍꠞꠣ ꠉꠤꠟꠣꠚꠅ-ꠅ ꠅꠃꠟꠣ ꠟꠣꠉꠣꠁꠟꠣ।
EXO 36:18 ꠛꠣꠖꠦ ꠙꠤꠔꠟ ꠖꠤꠀ ꠙꠁꠘ꠆ꠌꠣꠡꠉꠥ ꠢꠥꠇ ꠛꠣꠘꠣꠁꠀ ꠢꠃ ꠢꠥꠇꠞ ꠚꠥꠠꠞ ꠝꠣꠎꠦꠖꠤ ꠢꠣꠞꠣꠁꠀ, ꠅꠃ ꠛꠠ ꠖꠥꠁꠅ ꠉꠤꠟꠣꠚ ꠄꠇꠈꠣꠘꠅ ꠎꠥꠠꠣ ꠖꠤꠟꠣ। ꠔꠦꠃ ꠁ ꠖꠥꠁꠅ ꠉꠤꠟꠣꠚ ꠝꠤꠟꠤꠀ ꠄꠇꠈꠣꠘ ꠍꠣꠘꠤ ꠅꠁꠟ।
EXO 36:19 ꠟꠣꠟ ꠞꠋ ꠇꠞꠣ ꠝꠦꠠꠣꠞ ꠌꠣꠝꠠꠣꠖꠤ ꠄꠞ ꠃꠙꠞꠞ ꠍꠣꠘꠤ ꠛꠣꠘꠣꠁꠟ ꠅꠁꠟ, ꠛꠣꠖꠦ ꠚꠥʼꠞ ꠌꠣꠝꠠꠣꠖꠤ ꠀꠞꠅꠈꠣꠘ ꠍꠣꠘꠤ ꠔꠂꠀꠞ ꠇꠞꠤꠀ ꠄꠞ ꠃꠙꠞꠦ ꠉꠥꠞꠤ ꠖꠦꠅꠀ ꠅꠁꠟ।
EXO 36:20 ꠛꠣꠖꠦ ꠛꠣꠛꠟꠣ ꠟꠣꠇꠠꠤꠖꠤ ꠇꠄꠈꠣꠘ ꠚ꠆ꠞꠦꠁꠝ ꠛꠣꠘꠣꠁꠟ ꠅꠁꠟ।
EXO 36:21 ꠙꠞꠔꠦꠇ ꠚ꠆ꠞꠦꠁꠝ ꠀꠍꠤꠟ ꠟꠣꠝ꠆ꠛꠣꠄ ꠖꠡ ꠀꠔ ꠀꠞ ꠚꠣꠠꠦ ꠖꠦꠠ ꠀꠔ।
EXO 36:22 ꠙꠞꠔꠦꠇ ꠚ꠆ꠞꠦꠁꠝꠅ ꠖꠥꠉꠥ ꠇꠞꠤ ꠙꠣꠄꠀ ꠟꠣꠉꠣꠁꠀ ꠊꠞꠞ ꠢꠇꠟ ꠚ꠆ꠞꠦꠁꠝ ꠄꠇꠟꠣꠈꠣꠘ ꠛꠣꠘꠣꠁꠟꠣ।
EXO 36:23 ꠅꠃ ꠊꠞꠞ ꠖꠇ꠆ꠇꠤꠘ ꠉꠣꠟꠣꠞ ꠟꠣꠉꠤ ꠛꠤꠡꠈꠣꠘ ꠚ꠆ꠞꠦꠁꠝ ꠎꠥꠁꠔ ꠇꠞꠟꠣ।
EXO 36:24 ꠁ ꠛꠤꠡꠅ ꠚ꠆ꠞꠦꠁꠝꠞ ꠙꠣꠄꠀꠞ ꠔꠟꠦ ꠌꠣꠟ꠆ꠟꠤꠡꠉꠥ ꠞꠥꠙꠣꠞ ꠌꠥꠘ꠆ꠉꠤ ꠟꠣꠉꠣꠁꠟꠣ। ꠙꠞꠔꠦꠇ ꠚ꠆ꠞꠦꠁꠝꠞ ꠖꠥꠁ ꠙꠣꠄꠀꠞ ꠔꠟꠦ ꠖꠥꠉꠥ ꠌꠥꠘ꠆ꠉꠤ ꠟꠣꠉꠣꠁꠟ ꠅꠁꠟ।
EXO 36:25 ꠀꠟ꠆ꠟꠣꠞ ꠊꠞꠞ ꠃꠔ꠆ꠔꠞ ꠉꠣꠟꠣꠞ ꠟꠣꠉꠤꠀꠅ ꠛꠤꠡꠈꠣꠘ ꠚ꠆ꠞꠦꠁꠝ ꠎꠥꠁꠔ ꠇꠞꠟꠣ।
EXO 36:26 ꠁ ꠙꠞꠔꠦꠇ ꠚ꠆ꠞꠦꠁꠝꠞ ꠙꠣꠄꠀꠞ ꠔꠟꠦ ꠌꠣꠟ꠆ꠟꠤꠡꠉꠥ ꠞꠥꠙꠣꠞ ꠌꠥꠘ꠆ꠉꠤ ꠟꠣꠉꠣꠁꠟꠣ। ꠄꠇꠅ ꠚ꠆ꠞꠦꠁꠝꠞ ꠔꠟꠦ ꠖꠥꠉꠥ ꠇꠞꠤ ꠌꠥꠘ꠆ꠉꠤ ꠟꠣꠉꠣꠁꠟ ꠅꠁꠟ।
EXO 36:27 ꠀꠞ ꠙꠌꠤꠝ ꠉꠣꠟꠣꠞ ꠟꠣꠉꠤ, ꠝꠣꠘꠤ ꠈꠞ ꠉꠣꠟꠣꠞ ꠟꠣꠉꠤ ꠍꠄꠈꠣꠘ ꠚ꠆ꠞꠦꠁꠝ ꠛꠣꠘꠣꠁꠟꠣ।
EXO 36:28 ꠀꠞ ꠈꠞꠞ ꠖꠥꠁꠅ ꠇꠥꠘꠣꠔ ꠖꠥꠈꠣꠘ ꠚ꠆ꠞꠦꠁꠝ ꠟꠣꠉꠣꠁꠟꠣ।
EXO 36:29 ꠁ ꠖꠥꠁꠅ ꠇꠥꠘꠣꠞ ꠚ꠆ꠞꠦꠁꠝꠞꠦ ꠇꠣꠍꠣꠞ ꠚ꠆ꠞꠦꠁꠝꠞ ꠟꠉꠦ ꠔꠟꠦ-ꠃꠙꠞꠦ ꠎꠥꠠꠣ ꠖꠦꠅꠀ ꠅꠁꠟ। ꠙꠞꠔꠦꠇ ꠇꠥꠘꠣꠞ ꠖꠥꠁꠅ ꠚ꠆ꠞꠦꠁꠝꠞꠦ ꠗꠣꠞꠞ ꠚ꠆ꠞꠦꠁꠝꠞ ꠟꠉꠦ ꠛꠣꠔ꠆ꠔꠤ ꠝꠣꠞꠤꠀ ꠎꠥꠠꠣ ꠖꠦꠅꠀ ꠅꠁꠟ।
EXO 36:30 ꠔꠦꠃ ꠀꠐꠈꠣꠘ ꠚ꠆ꠞꠦꠁꠝ ꠀꠞ ꠡꠥꠟꠉꠥ ꠞꠥꠙꠣꠞ ꠌꠥꠘ꠆ꠉꠤ ꠟꠣꠉꠟ, ꠄꠇꠅ ꠚ꠆ꠞꠦꠁꠝꠞ ꠔꠟꠦ ꠖꠥꠁꠐꠣ ꠇꠞꠤ ꠌꠥꠘ꠆ꠉꠤ ꠖꠤꠟꠣ।
EXO 36:31 ꠛꠣꠖꠦ ꠚ꠆ꠞꠦꠁꠝꠞꠦ ꠎꠥꠠꠣ ꠖꠤꠛꠣꠞ ꠟꠣꠉꠤ ꠛꠣꠛꠟꠣ ꠟꠣꠇꠠꠤꠖꠤ ꠇꠄꠉꠥ ꠟꠣꠝ꠆ꠛꠣ ꠛꠣꠔ꠆ꠔꠤ ꠛꠣꠘꠣꠁꠟꠣ।
EXO 36:32 ꠊꠞꠞ ꠄꠇ ꠉꠣꠟꠣꠞ ꠟꠣꠉꠤ ꠙꠣꠌꠉꠥ ꠛꠣꠔ꠆ꠔꠤ, ꠀꠞꠇ ꠉꠣꠟꠣꠞ ꠟꠣꠉꠤ ꠀꠞꠅ ꠙꠣꠌꠉꠥ, ꠀꠞ ꠙꠣꠌꠉꠥ ꠛꠣꠔ꠆ꠔꠤ ꠈꠞ ꠉꠣꠟꠣ, ꠝꠣꠘꠤ ꠙꠌꠤꠝ ꠉꠣꠟꠣꠞ ꠟꠣꠉꠤ ꠛꠣꠘꠣꠁꠟꠣ।
EXO 36:33 ꠚ꠆ꠞꠦꠁꠝꠞ ꠝꠣꠎꠈꠣꠘꠅ ꠟꠣꠉꠣꠁꠟ ꠅꠃ ꠛꠣꠔ꠆ꠔꠤꠖꠤ ꠢꠇꠟ ꠚ꠆ꠞꠦꠁꠝꠞ ꠄꠇ ꠝꠣꠕꠣ ꠕꠣꠇꠤ ꠀꠞꠇ ꠝꠣꠕꠣ ꠀꠐꠇꠣꠁ ꠖꠤꠟꠣ।
EXO 36:34 ꠛꠣꠖꠦ ꠁ ꠚ꠆ꠞꠦꠁꠝ ꠈꠣꠘꠣꠁꠘ ꠡꠥꠘꠣꠖꠤ ꠟꠦꠙꠤꠟꠣ। ꠀꠞ ꠛꠣꠔ꠆ꠔꠤ ꠟꠣꠉꠣꠘꠤꠞ ꠟꠣꠉꠤ ꠡꠥꠘꠣꠞ ꠇꠠꠣ ꠟꠣꠉꠣꠁꠀ, ꠛꠣꠔ꠆ꠔꠤꠞꠦꠅ ꠡꠥꠘꠣꠖꠤ ꠟꠦꠙꠤꠟꠣ।
EXO 36:35 ꠅꠃ ꠃꠡ꠆ꠔꠣꠖ ꠇꠣꠞꠤꠉꠞ ꠅꠇꠟꠦ ꠖꠣꠝꠤ ꠡꠥꠔꠤ ꠇꠣꠙꠠꠖꠤ ꠄꠇꠈꠣꠘ ꠙꠞ꠆ꠖꠣ ꠛꠣꠘꠣꠁꠟꠣ। ꠙꠞ꠆ꠖꠣꠞ ꠃꠙꠞꠦ ꠟꠤꠟꠥꠀ, ꠛꠣꠁꠋꠉꠘꠤ, ꠟꠣꠟ ꠡꠥꠔꠣ ꠖꠤꠀ ꠇꠣꠞꠥꠛꠤ ꠅꠇꠟꠞ ꠍꠛꠤ ꠛꠣꠁꠘ ꠇꠞꠟꠣ।
EXO 36:36 ꠁ ꠙꠞ꠆ꠖꠣ ꠐꠣꠘꠣꠘꠤꠞ ꠟꠣꠉꠤ ꠛꠣꠛꠟꠣ ꠟꠣꠇꠠꠤꠖꠤ ꠌꠣꠁꠞꠐꠣ ꠈꠥꠐꠤ ꠛꠣꠘꠣꠁꠟꠣ, ꠛꠣꠘꠣꠁꠀ ꠅꠃ ꠈꠥꠐꠤꠘ꠆ꠔꠞꠦꠅ ꠡꠥꠘꠣꠖꠤ ꠟꠦꠙꠤꠟꠣ, ꠈꠥꠐꠤꠘ꠆ꠔꠞ ꠝꠣꠕꠣꠔ ꠡꠥꠘꠣꠞ ꠇꠠꠣ ꠟꠣꠉꠣꠁꠟꠣ। ꠈꠥꠐꠤꠞ ꠔꠟꠞ ꠟꠣꠉꠤ ꠞꠥꠙꠣꠞ ꠌꠣꠁꠞꠐꠣ ꠌꠥꠘ꠆ꠉꠤ ꠛꠣꠘꠣꠁꠟ ꠅꠁꠟ।
EXO 36:37 ꠔꠣꠝ꠆ꠛꠥꠞ ꠖꠥꠀꠞꠞ ꠟꠣꠉꠤ ꠟꠤꠟꠥꠀ, ꠛꠣꠁꠋꠉꠘꠤ, ꠟꠣꠟ ꠡꠥꠔꠣ ꠀꠞ ꠖꠣꠝꠤ ꠡꠥꠔꠤ ꠇꠣꠙꠠꠖꠤ ꠘꠇꠡꠣ ꠇꠞꠤ ꠄꠇꠈꠣꠘ ꠙꠞ꠆ꠖꠣ ꠛꠣꠘꠣꠁꠟꠣ।
EXO 36:38 ꠁ ꠙꠞ꠆ꠖꠣꠞ ꠟꠣꠉꠤ ꠙꠣꠌꠐꠣ ꠇꠠꠣ ꠀꠞ ꠙꠣꠌꠐꠣ ꠈꠥꠐꠤ ꠛꠣꠘꠣꠁꠟ ꠅꠁꠟ। ꠈꠥꠐꠤꠞ ꠝꠣꠕꠣ ꠀꠞ ꠔꠟ ꠡꠥꠘꠣꠖꠤ ꠟꠦꠙꠣ ꠅꠁꠟ, ꠈꠥꠐꠤꠞ ꠔꠟꠞ ꠟꠣꠉꠤ ꠙꠤꠔꠟꠞ ꠙꠣꠌꠉꠥ ꠌꠥꠘ꠆ꠉꠤ ꠛꠣꠘꠣꠁꠟꠣ।
EXO 37:1 ꠛꠣꠔꠍꠦꠟꠟꠦ ꠛꠣꠛꠟꠣ ꠟꠣꠇꠠꠤꠖꠤ ꠙꠛꠤꠔ꠆ꠞ ꠡꠣꠢꠣꠖꠔ ꠡꠘ꠆ꠖꠥꠇ ꠛꠣꠘꠣꠁꠟꠣ। ꠁꠐꠣ ꠀꠠꠣꠁ ꠀꠔ ꠟꠣꠝ꠆ꠛꠣ, ꠖꠦꠠ ꠀꠔ ꠙꠣꠡ ꠀꠞ ꠖꠦꠠ ꠀꠔ ꠃꠌꠣ।
EXO 37:2 ꠄꠞ ꠛꠣꠞꠦ-ꠜꠤꠔꠞꠦ ꠈꠣꠐꠤ ꠡꠥꠘꠣꠖꠤ ꠟꠦꠙꠤꠟꠣ, ꠄꠞ ꠌꠣꠁꠞꠅ ꠇꠤꠘꠣꠞꠅ ꠡꠥꠘꠣꠞ ꠘꠇꠡꠣ ꠟꠣꠉꠣꠁꠟꠣ।
EXO 37:3 ꠀꠉꠥꠁꠘꠖꠤ ꠡꠥꠘꠣ ꠉꠟꠣꠁꠀ ꠌꠣꠁꠞꠐꠣ ꠡꠥꠘꠣꠞ ꠇꠠꠣ ꠄꠞ ꠌꠣꠁꠞꠅ ꠇꠥꠘꠣꠔ ꠟꠣꠉꠣꠁꠟꠣ, ꠅꠉꠣꠟꠣꠔ ꠖꠥꠁꠐꠣ ꠀꠞ ꠢꠉꠣꠟꠣꠔ ꠖꠥꠁꠐꠣ ꠟꠣꠉꠣꠁꠟꠣ।
EXO 37:4 ꠛꠣꠛꠟꠣ ꠟꠣꠇꠠꠤꠖꠤ ꠖꠥꠉꠥ ꠛꠦꠘ꠆ꠖꠣ ꠛꠣꠘꠣꠁꠀ ꠡꠥꠘꠣꠖꠤ ꠟꠦꠙꠤꠟꠣ।
EXO 37:5 ꠡꠘ꠆ꠖꠥꠇ ꠛꠁꠀ ꠘꠦꠅꠀꠞ ꠟꠣꠉꠤ ꠁ ꠖꠥꠁꠅ ꠛꠦꠘ꠆ꠖꠣ, ꠡꠘ꠆ꠖꠥꠇꠞ ꠖꠥꠁ ꠉꠣꠟꠣꠞ ꠇꠠꠣꠞ ꠜꠤꠔꠞꠦꠖꠤ ꠢꠣꠞꠣꠁꠟꠣ।
EXO 37:6 ꠛꠣꠖꠦ ꠈꠣꠐꠤ ꠡꠥꠘꠣꠖꠤ ꠡꠘ꠆ꠖꠥꠇꠞ ꠄꠇꠈꠣꠘ ꠓꠣꠇꠘꠣ ꠛꠣꠘꠣꠁꠟꠣ, ꠅꠈꠣꠘꠞ ꠃꠙꠞꠦ ꠉꠥꠘꠣꠞ ꠇꠚꠞꠣ ꠀꠖꠣꠄ ꠇꠞꠣꠞ ꠟꠣꠉꠤ। ꠁ ꠓꠣꠇꠘꠣ ꠟꠣꠝ꠆ꠛꠣꠄ ꠀꠠꠣꠁ ꠀꠔ, ꠀꠞ ꠙꠣꠡꠦ ꠖꠦꠠ ꠀꠔ।
EXO 37:7 ꠡꠥꠘꠣ ꠙꠤꠐꠣꠁꠀ ꠓꠣꠇꠘꠣꠞ ꠖꠥꠁꠅ ꠉꠣꠟꠣꠔ ꠖꠥꠁꠐꠣ ꠇꠣꠞꠥꠛꠤ ꠛꠣꠘꠣꠁꠟꠣ।
EXO 37:8 ꠖꠥꠁꠅ ꠇꠣꠞꠥꠛꠤ ꠡꠘ꠆ꠖꠥꠇꠞ ꠓꠣꠇꠘꠣꠞ ꠖꠥꠁ ꠇꠤꠘꠣꠞꠅ ꠞꠁꠟ। ꠁ ꠖꠥꠁꠅ ꠇꠣꠞꠥꠛꠤ ꠓꠣꠇꠘꠣꠞ ꠟꠉꠦ ꠄꠇꠈꠣꠘꠅ ꠇꠞꠤ ꠛꠣꠘꠣꠁꠟ ꠅꠁꠟ, ꠁ ꠀꠡ꠆ꠔꠣꠐꠣ ꠈꠣꠟꠤ ꠄꠇ ꠌꠤꠎ ꠅꠁꠟ।
EXO 37:9 ꠇꠣꠞꠥꠛꠤ ꠖꠦꠈꠔꠦ ꠖꠥꠟꠖꠥꠟ ꠊꠥꠠꠣꠞ ꠟꠣꠈꠣꠘ ꠒꠣꠈꠘꠣ ꠀꠟꠣ, ꠄꠞ ꠖꠥꠁꠅ ꠒꠣꠈꠘꠣ ꠃꠙꠞꠦꠖꠤ ꠝꠦꠟꠤꠀ ꠖꠦꠅꠀꠄ, ꠅꠃ ꠒꠣꠈꠘꠣꠞ ꠍꠣꠄꠀꠞ ꠔꠟꠦ ꠡꠘ꠆ꠖꠥꠇꠞ ꠓꠣꠇꠘꠣ ꠢꠣꠝꠣꠁꠉꠦꠟ। ꠁꠐꠣ ꠝꠥꠈꠣꠝꠥꠈꠤ ꠃꠛꠣ ꠞꠁꠟ। ꠀꠞ ꠔꠣꠞꠣꠞ ꠌꠃꠈ ꠞꠁꠟ ꠡꠘ꠆ꠖꠥꠇꠞ ꠓꠣꠇꠘꠣꠞ ꠛꠣꠄ।
EXO 37:10 ꠛꠣꠔꠍꠦꠟꠟꠦ ꠛꠣꠖꠦ ꠛꠣꠛꠟꠣ ꠟꠣꠇꠠꠤꠖꠤ ꠖꠥꠁ ꠀꠔ ꠟꠣꠝ꠆ꠛꠣ, ꠄꠇ ꠀꠔ ꠙꠣꠡ ꠀꠞ ꠖꠦꠠ ꠀꠔ ꠃꠌꠣ ꠇꠞꠤ ꠄꠇꠈꠣꠘ ꠐꠦꠛꠥꠟ ꠛꠣꠘꠣꠁꠟꠣ।
EXO 37:11 ꠛꠣꠘꠣꠁꠀ ꠢꠣꠞꠟꠦ ꠈꠣꠐꠤ ꠡꠥꠘꠣꠖꠤ ꠟꠦꠙꠤꠀ ꠄꠞ ꠌꠣꠁꠞꠅ ꠇꠤꠘꠣꠞꠅ ꠘꠇꠡꠣ ꠟꠣꠉꠣꠁꠟꠣ।
EXO 37:12 ꠀꠞ ꠄꠞ ꠍꠣꠘꠤꠞ ꠌꠣꠁꠞꠅ ꠇꠤꠘꠣꠞꠅ ꠌꠣꠁꠞ ꠀꠋꠉꠥꠟ ꠃꠌꠣ ꠇꠞꠤ ꠄꠇ ꠢꠣꠎ ꠖꠤꠟꠣ, ꠢꠣꠎꠞ ꠝꠣꠎꠦ ꠡꠥꠘꠣꠖꠤ ꠘꠇꠡꠣ ꠟꠣꠉꠣꠁꠟꠣ।
EXO 37:13 ꠐꠦꠛꠥꠟꠞ ꠌꠣꠁꠞꠅ ꠇꠥꠘꠣꠞ ꠙꠣꠄꠀꠞ ꠃꠙꠞꠦ ꠡꠥꠘꠣꠞ ꠌꠣꠁꠞꠐꠣ ꠇꠠꠣ ꠟꠣꠉꠣꠁꠟꠣ।
EXO 37:14 ꠁ ꠌꠣꠁꠞꠅ ꠇꠠꠣꠁꠘ ꠐꠦꠛꠥꠟꠞ ꠇꠥꠘꠣꠞ ꠢꠃ ꠃꠌꠣ ꠢꠣꠎꠞ ꠔꠟꠦ ꠟꠣꠉꠣꠘꠤ ꠅꠁꠟ, ꠎꠣꠔꠦ ꠐꠦꠛꠥꠟ ꠛꠁꠀ ꠘꠦꠅꠀꠞ ꠛꠣꠟꠣ ꠇꠠꠣꠞ ꠜꠤꠔꠞꠦ ꠛꠦꠘ꠆ꠖꠣ ꠢꠣꠞꠣꠁꠟ ꠎꠣꠄ।
EXO 37:15 ꠐꠦꠛꠥꠟꠞꠦ ꠛꠁꠀ ꠘꠦꠅꠀꠞ ꠟꠣꠉꠤ ꠛꠣꠛꠟꠣ ꠟꠣꠇꠠꠤꠖꠤ ꠖꠥꠉꠥ ꠛꠦꠘ꠆ꠖꠣ ꠛꠣꠘꠣꠁꠀ ꠡꠥꠘꠣꠖꠤ ꠟꠦꠙꠤꠟꠣ।
EXO 37:16 ꠐꠦꠛꠥꠟꠞ ꠃꠙꠞꠞ ꠕꠣꠟ-ꠛꠣꠡꠘ, ꠀꠟ꠆ꠟꠣꠞ ꠘꠣꠝꠦ ꠡꠞꠛꠔ-ꠙꠣꠘꠤꠞ ꠍꠖꠉꠣꠞ ꠎꠉ ꠀꠞ ꠝꠉ, ꠢꠇꠟꠔꠣ ꠈꠣꠐꠤ ꠡꠥꠘꠣꠖꠤ ꠉꠠꠣꠁꠟꠣ।
EXO 37:17 ꠛꠣꠖꠦ ꠈꠣꠐꠤ ꠡꠥꠘꠣꠖꠤ ꠄꠇꠈꠣꠘ ꠌꠦꠞꠣꠉ ꠖꠣꠘꠤ ꠔꠤꠀꠞ ꠇꠞꠟꠣ। ꠌꠦꠞꠣꠉ ꠖꠣꠘꠤꠞ ꠔꠟꠣ ꠀꠞ ꠃꠙꠞꠞ ꠒꠣꠘ꠆ꠒꠤ ꠈꠣꠐꠤ ꠡꠥꠘꠣ ꠙꠤꠐꠣꠁꠀ ꠉꠠꠣꠁꠟꠣ। ꠄꠞ ꠒꠣꠘ꠆ꠒꠤ, ꠚꠥꠟꠞ ꠟꠣꠈꠣꠘ ꠙꠤꠀꠟꠣ, ꠇꠥꠠꠤ ꠀꠞ ꠙꠣꠙꠠꠤ ꠅꠇꠟ ꠌꠦꠞꠣꠉ ꠖꠣꠘꠤꠞ ꠟꠉꠦ ꠄꠇꠈꠣꠘꠅ ꠇꠞꠤ ꠛꠣꠘꠣꠁꠟꠣ।
EXO 37:18 ꠌꠦꠞꠣꠉ ꠖꠣꠘꠤꠞ ꠒꠣꠘ꠆ꠒꠤꠞ ꠖꠥꠁ ꠉꠣꠟꠣꠔ ꠔꠤꠘꠐꠣ ꠇꠞꠤ ꠝꠥꠐ ꠍꠄꠐꠣ ꠒꠣꠟ ꠖꠦꠅꠀ ꠅꠁꠟ।
EXO 37:19 ꠙꠞꠔꠦꠇ ꠒꠣꠟꠞ ꠝꠣꠎꠦ ꠎꠛꠣ ꠚꠥꠟꠞ ꠟꠣꠈꠣꠘ ꠔꠤꠘꠉꠥ ꠇꠞꠤ ꠙꠤꠀꠟꠣ ꠔꠤꠀꠞ ꠇꠞꠣ ꠅꠁꠟ। ꠌꠦꠞꠣꠉ ꠖꠣꠘꠤꠞ ꠍꠄꠅ ꠒꠣꠟꠅ ꠄꠇꠟꠣꠈꠣꠘ ꠇꠣꠝ ꠇꠞꠣ ꠅꠁꠟ।
EXO 37:20 ꠌꠦꠞꠣꠉ ꠖꠣꠘꠤꠞ ꠝꠥꠟ ꠒꠣꠘ꠆ꠒꠤꠞ ꠝꠣꠎꠦꠅ ꠎꠛꠣ ꠚꠥꠟꠞ ꠟꠣꠈꠣꠘ ꠌꠣꠁꠞꠐꠣ ꠙꠤꠀꠟꠣ ꠖꠦꠅꠀ ꠅꠁꠟ।
EXO 37:21 ꠅꠃ ꠝꠥꠟ ꠒꠣꠘ꠆ꠒꠤ ꠕꠣꠇꠤ ꠛꠣꠞꠅꠁꠟ ꠍꠄꠐꠣ ꠒꠣꠟꠞ ꠝꠣꠎꠦ, ꠙꠄꠟꠣ ꠖꠥꠁꠅ ꠒꠣꠟꠞ ꠎꠥꠠꠣꠔ ꠄꠉꠥ ꠇꠞꠤ ꠇꠥꠠꠤ, ꠖꠥꠍꠞꠣ ꠖꠥꠁꠅ ꠒꠣꠟꠞ ꠎꠥꠠꠣꠔ ꠀꠞꠇ ꠇꠥꠠꠤ, ꠀꠞ ꠢꠦꠡꠞ ꠖꠥꠁꠅ ꠒꠣꠟꠞ ꠎꠥꠠꠣꠔꠅ ꠇꠥꠠꠤ ꠟꠣꠉꠣꠁꠟ ꠅꠁꠟ।
EXO 37:22 ꠇꠥꠠꠤ ꠀꠞ ꠒꠣꠟ ꠢꠇꠟꠔꠣ ꠌꠦꠞꠣꠉ ꠖꠣꠘꠤ ꠕꠣꠇꠤ ꠛꠣꠞ ꠅꠁꠟ, ꠢꠇꠟꠔꠣ ꠝꠤꠟꠤꠀ ꠄꠇ ꠌꠤꠎ ꠅꠁꠟ। ꠀꠡ꠆ꠔꠣꠐꠣꠃ ꠈꠣꠐꠤ ꠡꠥꠘꠣ ꠙꠤꠐꠣꠁꠀ ꠛꠣꠘꠣꠘꠤ ꠅꠁꠟ।
EXO 37:23 ꠈꠣꠐꠤ ꠡꠥꠘꠣꠖꠤ ꠡꠣꠔꠐꠣ ꠌꠦꠞꠣꠉ, ꠌꠦꠞꠣꠉꠞ ꠚꠤꠔꠣ ꠍꠣꠚ ꠇꠞꠣꠞ ꠌꠤꠝꠐꠣ, ꠎꠣꠟꠣꠁꠟ ꠚꠤꠔꠣꠞ ꠍꠣꠟꠤ ꠕꠅꠀꠞ ꠟꠣꠉꠤ ꠇꠄꠉꠥ ꠛꠣꠐꠤ ꠛꠣꠘꠣꠁꠟ ꠅꠁꠟ।
EXO 37:24 ꠄꠇ ꠝꠘ ꠈꠣꠐꠤ ꠡꠥꠘꠣꠖꠤ ꠁ ꠌꠦꠞꠣꠉ ꠖꠣꠘꠤ, ꠀꠞ ꠟꠉꠞ ꠢꠇꠟꠔꠣ ꠔꠤꠀꠞ ꠇꠞꠣ ꠅꠁꠟ।
EXO 37:25 ꠛꠣꠖꠦ ꠛꠣꠛꠟꠣ ꠟꠣꠇꠠꠤꠖꠤ ꠌꠣꠁꠞ ꠇꠥꠘꠣ ꠀꠟꠣ ꠀꠉꠞ-ꠈꠥꠡꠛꠄ ꠎꠣꠟꠣꠘꠤꠞ ꠐꠦꠛꠥꠟ ꠛꠣꠘꠣꠁꠟ ꠅꠁꠟ। ꠄꠇ ꠀꠔ ꠟꠣꠝ꠆ꠛꠣ, ꠄꠇ ꠀꠔ ꠙꠣꠡ, ꠀꠞ ꠖꠥꠁ ꠀꠔ ꠃꠛꠤ ꠖꠤꠀ ꠁ ꠐꠦꠛꠥꠟ ꠛꠣꠘꠣꠁꠟꠣ। ꠄꠞ ꠌꠣꠁꠞꠅ ꠇꠥꠘꠣꠞ ꠌꠣꠁꠞꠅ ꠢꠤꠋꠅ ꠄꠇꠈꠣꠘꠅ ꠇꠞꠤ ꠛꠣꠘꠣꠁꠟꠣ।
EXO 37:26 ꠍꠣꠘꠤ, ꠍꠣꠘꠤꠞ ꠌꠣꠁꠞꠅ ꠇꠤꠘꠣꠞ ꠀꠞ ꠢꠤꠋ, ꠢꠇꠟꠔꠣ ꠈꠣꠐꠤ ꠡꠥꠘꠣꠖꠤ ꠟꠦꠙꠤꠀ ꠌꠣꠁꠞꠅ ꠇꠤꠘꠣꠞꠅ ꠡꠥꠘꠣꠞ ꠘꠇꠡꠣ ꠟꠣꠉꠣꠁꠟꠣ।
EXO 37:27 ꠄꠞ ꠖꠥꠁ ꠇꠤꠘꠣꠞꠞ ꠘꠇꠡꠣꠞ ꠔꠟꠦ ꠖꠥꠉꠥ ꠇꠞꠤ ꠡꠥꠘꠣꠞ ꠇꠠꠣ ꠟꠣꠉꠣꠁꠟ ꠅꠁꠟ, ꠎꠣꠔꠦ ꠄꠞ ꠜꠤꠔꠞꠦ ꠛꠦꠘ꠆ꠖꠣ ꠢꠣꠞꠣꠁꠀ ꠛꠁꠀ ꠘꠦꠅꠀ ꠎꠣꠄ।
EXO 37:28 ꠛꠣꠛꠟꠣ ꠟꠣꠇꠠꠤꠖꠤ ꠛꠁꠀ ꠘꠦꠅꠀꠞ ꠛꠦꠘ꠆ꠖꠣ ꠛꠣꠘꠣꠁꠟꠣ, ꠁꠐꠣꠞꠦꠅ ꠡꠥꠘꠣꠖꠤ ꠟꠦꠙꠤꠟꠣ।
EXO 37:29 ꠛꠣꠖꠦ ꠈꠥꠡꠛꠄ ꠀꠟꠣ ꠝꠡꠟꠣ ꠛꠣꠘꠣꠘꠤꠞ ꠇꠣꠞꠤꠉꠞꠞ ꠘꠤꠅꠝꠦ ꠈꠦꠟꠣꠚꠔꠤ ꠡꠝꠎꠤꠛꠣꠞ ꠙꠛꠤꠔ꠆ꠞ ꠔꠦꠟ ꠀꠞ ꠈꠥꠡꠛꠄ ꠀꠟꠣ ꠈꠣꠐꠤ ꠀꠉꠞ ꠔꠤꠀꠞ ꠇꠞꠟꠣ।
EXO 38:1 ꠎꠣꠟꠣꠁꠟ ꠇꠥꠞꠛꠣꠘꠤꠞ ꠟꠣꠉꠤ ꠛꠣꠛꠟꠣ ꠟꠣꠇꠠꠤꠖꠤ ꠙꠣꠌ ꠀꠔ ꠟꠣꠝ꠆ꠛꠣ, ꠙꠣꠌ ꠀꠔ ꠙꠣꠡ ꠀꠞ ꠔꠤꠘ ꠀꠔ ꠃꠛꠤ ꠖꠤꠀ ꠌꠣꠁꠞꠇꠥꠘꠤ ꠇꠞꠤ ꠄꠇꠈꠣꠘ ꠇꠥꠞꠛꠣꠘꠤ ꠈꠣꠘꠣ ꠛꠣꠘꠣꠁꠟꠣ।
EXO 38:2 ꠄꠞ ꠌꠣꠁꠞꠅ ꠇꠥꠘꠣꠞ ꠃꠙꠞꠦ ꠟꠣꠇꠠꠤꠖꠤ ꠌꠣꠁꠞꠐꠣ ꠢꠤꠋ ꠖꠤꠟꠣ। ꠅꠃ ꠢꠤꠋ ꠛꠣꠘꠣꠁꠟꠣ ꠍꠣꠘꠤꠞ ꠃꠙꠞꠞ ꠇꠥꠘꠣꠞ ꠟꠣꠇꠠꠤ ꠈꠥꠖꠤꠀ, ꠄꠞꠟꠣꠉꠤ ꠁ ꠀꠡ꠆ꠔꠣꠈꠣꠘ ꠄꠇ ꠌꠤꠎ ꠅꠁꠟ। ꠛꠣꠖꠦ ꠙꠥꠞꠣ ꠇꠥꠞꠛꠣꠘꠤ ꠈꠣꠘꠣ ꠙꠤꠔꠟꠖꠤ ꠟꠦꠙꠣꠁꠟꠣ।
EXO 38:3 ꠇꠥꠞꠛꠣꠘꠤ ꠈꠣꠘꠣꠞ ꠍꠣꠟꠤ ꠔꠥꠟꠣꠞ ꠛꠠ ꠌꠣꠝꠌ ꠀꠞ ꠍꠣꠟꠤ ꠕꠅꠀꠞ ꠉꠣꠝꠟꠣ, ꠟꠃ ꠕꠅꠀꠞ ꠛꠣꠐꠤ, ꠉꠥꠡ꠆ꠔ ꠔꠥꠟꠣꠞ ꠛꠠ ꠇꠣꠐꠣ-ꠍꠤꠚ, ꠀꠋꠞꠣ ꠕꠅꠀꠞ ꠙꠣꠔꠤꠟ, ꠢꠇꠟꠔꠣ ꠙꠤꠔꠟꠖꠤ ꠛꠣꠘꠣꠁꠟꠣ।
EXO 38:4 ꠇꠥꠞꠛꠣꠘꠤ ꠈꠣꠘꠣꠞ ꠟꠣꠉꠤ ꠙꠤꠔꠟꠖꠤ ꠄꠇꠈꠣꠘ ꠎꠣꠟꠤ ꠛꠣꠘꠣꠁꠟꠣ, ꠛꠣꠘꠣꠁꠀ ꠁ ꠎꠣꠟꠤꠞꠦ ꠇꠥꠞꠛꠣꠘꠤ ꠈꠣꠘꠣꠞ ꠜꠤꠔꠞꠞ ꠝꠣꠎꠈꠣꠘꠞ ꠌꠣꠁꠞꠅ ꠉꠣꠟꠣꠞ ꠔꠣꠠꠤꠀꠞ ꠔꠟꠦ ꠟꠣꠉꠣꠁꠟꠣ।
EXO 38:5 ꠀꠞ ꠛꠦꠘ꠆ꠖꠣ ꠢꠣꠞꠣꠘꠤꠞ ꠟꠣꠉꠤ ꠎꠣꠟꠤꠞ ꠌꠣꠁꠞꠅ ꠇꠥꠘꠣꠔ ꠌꠣꠁꠞꠐꠣ ꠇꠠꠣ ꠟꠣꠉꠣꠁꠟꠣ।
EXO 38:6 ꠛꠁꠀ ꠘꠦꠅꠀꠞ ꠛꠦꠘ꠆ꠖꠣ ꠛꠣꠘꠣꠁꠟꠣ ꠛꠣꠛꠟꠣ ꠟꠣꠇꠠꠤꠖꠤ, ꠛꠣꠘꠣꠁꠀ ꠖꠥꠁꠅꠉꠥ ꠙꠤꠔꠟꠖꠤ ꠟꠦꠙꠣꠁꠟꠣ।
EXO 38:7 ꠀꠞ ꠇꠥꠞꠛꠣꠘꠤ ꠈꠣꠘꠣꠞꠦ ꠛꠁꠛꠣꠞ ꠟꠣꠉꠤ ꠄꠞ ꠇꠥꠘꠣꠞ ꠇꠠꠣꠞ ꠜꠤꠔꠞꠦ ꠅꠃ ꠛꠦꠘ꠆ꠖꠣ ꠢꠣꠞꠣꠁꠟꠣ। ꠇꠥꠞꠛꠣꠘꠤ ꠈꠣꠘꠣ ꠛꠣꠘꠣꠁꠟꠣ ꠔꠇ꠆ꠔꠣꠖꠤ, ꠀꠞ ꠄꠞ ꠜꠤꠔꠞꠦ ꠚꠣꠇ ꠞꠣꠈꠟꠣ।
EXO 38:8 ꠅꠎꠥꠞ ꠙꠣꠘꠤ ꠕꠅꠀꠞ ꠟꠣꠉꠤ ꠙꠤꠔꠟꠞ ꠄꠇ ꠉꠣꠝꠟꠣ ꠛꠣꠘꠣꠁꠟꠣ। ꠄꠛꠣꠖꠔꠤ ꠇꠣꠝꠞ ꠟꠣꠉꠤ ꠎꠦꠔꠣ ꠛꠦꠐꠤꠘ ꠝꠤꠟꠘ-ꠔꠣꠝ꠆ꠛꠥꠞ ꠖꠥꠀꠞꠞ ꠇꠣꠍꠣꠔ ꠀꠁꠔꠣ, ꠔꠣꠞꠣꠞ ꠙꠤꠔꠟꠞ ꠀꠄꠘꠣꠖꠤ ꠁ ꠉꠣꠝꠟꠣ ꠀꠞ ꠄꠞ ꠌꠇꠤ-ꠈꠣꠐ ꠔꠂꠀꠞ ꠇꠞꠣ ꠅꠁꠟ।
EXO 38:9 ꠛꠣꠔꠍꠦꠟꠟꠦ ꠀꠟ꠆ꠟꠣꠞ ꠊꠞꠞ ꠌꠣꠁꠞꠅ ꠉꠣꠟꠣꠛꠣꠄ ꠃꠑꠣꠘꠞ ꠎꠣꠉꠣ ꠞꠣꠈꠟꠣ। ꠃꠑꠣꠘꠞ ꠖꠇ꠆ꠇꠤꠘ ꠉꠣꠟꠣꠞ ꠄꠇ-ꠡ ꠀꠔ ꠎꠣꠉꠣꠞ ꠟꠣꠉꠤ ꠖꠣꠝꠤ ꠡꠥꠔꠤ ꠇꠣꠙꠠꠖꠤ ꠙꠞ꠆ꠖꠣ ꠛꠣꠘꠣꠁꠟꠣ।
EXO 38:10 ꠁ ꠙꠞ꠆ꠖꠣ ꠐꠣꠘꠣꠘꠤꠞ ꠟꠣꠉꠤ ꠛꠤꠡꠉꠥ ꠈꠥꠐꠤ ꠛꠣꠘꠣꠁꠟꠣ। ꠈꠥꠐꠤꠞ ꠔꠟꠣꠔ ꠖꠤꠛꠣꠞ ꠟꠣꠉꠤ ꠙꠤꠔꠟꠞ ꠛꠤꠡꠉꠥ ꠌꠥꠘ꠆ꠉꠤ ꠛꠣꠘꠣꠁꠟꠣ, ꠀꠞ ꠙꠞ꠆ꠖꠣ ꠐꠣꠘꠣꠘꠤꠞ ꠟꠣꠉꠤ ꠞꠥꠙꠣꠞ ꠇꠠꠣ ꠀꠞ ꠛꠣꠘ꠆ꠖꠤꠛꠣꠞ ꠔꠣꠞ ꠛꠣꠘꠣꠁꠟꠣ।
EXO 38:11 ꠃꠑꠣꠘꠞ ꠃꠔ꠆ꠔꠞ ꠉꠣꠟꠣꠞ ꠄꠇ-ꠡ ꠀꠔ ꠎꠣꠉꠣꠞ ꠟꠣꠉꠤ ꠛꠤꠡꠉꠥ ꠈꠥꠐꠤ, ꠈꠥꠐꠤꠞ ꠔꠟꠦ ꠖꠤꠛꠣꠞ ꠟꠣꠉꠤ ꠙꠤꠔꠟꠞ ꠛꠤꠡꠉꠥ ꠌꠥꠘ꠆ꠉꠤ, ꠀꠞ ꠙꠞ꠆ꠖꠣ ꠐꠣꠘꠣꠘꠤꠞ ꠟꠣꠉꠤ ꠞꠥꠙꠣꠞ ꠇꠠꠣ ꠀꠞ ꠛꠣꠘ꠆ꠖꠤꠛꠣꠞ ꠔꠣꠞ ꠛꠣꠘꠣꠁꠟꠣ।
EXO 38:12 ꠙꠌꠤꠝ ꠉꠣꠟꠣꠞ ꠙꠁꠘ꠆ꠌꠣꠡ ꠀꠔ ꠃꠑꠣꠘꠞ ꠟꠣꠉꠤ ꠙꠞ꠆ꠖꠣ, ꠖꠡꠉꠥ ꠈꠥꠐꠤ, ꠖꠡꠉꠥ ꠌꠥꠘ꠆ꠉꠤ, ꠙꠞ꠆ꠖꠣ ꠐꠣꠘꠣꠘꠤꠞ ꠟꠣꠉꠤ ꠞꠥꠙꠣꠞ ꠇꠠꠣ ꠀꠞ ꠛꠣꠘ꠆ꠖꠤꠛꠣꠞ ꠔꠣꠞ ꠛꠣꠘꠣꠁꠟꠣ।
EXO 38:13 ꠙꠥꠛ ꠉꠣꠟꠣꠞ ꠃꠑꠣꠘꠅ ꠙꠁꠘ꠆ꠌꠣꠡ ꠀꠔ ꠀꠍꠤꠟ।
EXO 38:14 ꠃꠑꠣꠘꠞ ꠉꠦꠁꠐꠞ ꠄꠇ ꠉꠣꠟꠣꠞ ꠟꠣꠉꠤ ꠙꠘꠞ ꠀꠔ ꠟꠣꠝ꠆ꠛꠣ ꠙꠞ꠆ꠖꠣ, ꠔꠤꠘꠐꠣ ꠈꠥꠐꠤ, ꠈꠥꠐꠤꠞ ꠔꠟꠞ ꠔꠤꠘꠉꠥ ꠌꠥꠘ꠆ꠉꠤ,
EXO 38:15 ꠀꠞ ꠖꠥꠍꠞꠣ ꠉꠣꠟꠣꠔꠅ ꠅꠃ ꠟꠣꠈꠣꠘ ꠇꠞꠤ ꠔꠤꠘꠐꠣ ꠈꠥꠐꠤ, ꠔꠤꠘꠐꠣ ꠌꠥꠘ꠆ꠉꠤ ꠀꠞ ꠙꠘꠞ ꠀꠔ ꠙꠞ꠆ꠖꠣ ꠛꠣꠘꠣꠁꠟ ꠅꠁꠟ।
EXO 38:16 ꠃꠑꠣꠘꠞ ꠌꠣꠁꠞꠅ ꠉꠣꠟꠣꠞ ꠢꠇ꠆ꠇꠟ ꠙꠞ꠆ꠖꠣꠁꠘ ꠖꠣꠝꠤ ꠡꠥꠔꠤ ꠇꠣꠙꠠꠖꠤ ꠛꠣꠘꠣꠁꠟ ꠅꠁꠟ।
EXO 38:17 ꠈꠥꠐꠤꠞ ꠔꠟꠞ ꠢꠇ꠆ꠇꠟ ꠌꠥꠘ꠆ꠉꠤ ꠙꠤꠔꠟꠞ, ꠙꠞ꠆ꠖꠣ ꠐꠣꠘꠣꠘꠤꠞ ꠇꠠꠣ ꠀꠞ ꠛꠣꠘ꠆ꠖꠤꠛꠣꠞ ꠔꠣꠞ ꠅꠁꠟ ꠞꠥꠙꠣꠞ, ꠈꠥꠐꠤꠞ ꠝꠣꠕꠣꠅ ꠞꠥꠙꠣꠖꠤ ꠙꠦꠌꠣꠁꠟ ꠅꠁꠟ। ꠃꠑꠣꠘꠞ ꠌꠣꠁꠞꠅ ꠉꠣꠟꠣꠞ ꠢꠇ꠆ꠇꠟ ꠈꠥꠐꠤꠔ ꠞꠥꠙꠣꠞ ꠔꠣꠞꠖꠤ ꠛꠣꠘ꠆ꠖꠣ ꠅꠁꠟ।
EXO 38:18 ꠃꠑꠣꠘꠞ ꠉꠦꠁꠐꠞ ꠟꠣꠉꠤ ꠖꠣꠝꠤ ꠡꠥꠔꠤ ꠇꠣꠙꠠꠖꠤ ꠄꠇꠈꠣꠘ ꠙꠞ꠆ꠖꠣ ꠛꠣꠘꠣꠁꠟ ꠅꠁꠟ। ꠛꠣꠖꠦ ꠟꠤꠟꠥꠀ, ꠛꠣꠁꠋꠉꠘꠤ, ꠟꠣꠟ ꠡꠥꠔꠣꠖꠤ ꠘꠇꠡꠣ ꠇꠞꠣ ꠅꠁꠟ। ꠙꠞ꠆ꠖꠣ ꠈꠣꠘ ꠛꠤꠡ ꠀꠔ ꠟꠣꠝ꠆ꠛꠣ, ꠀꠞ ꠃꠑꠣꠘꠞ ꠛꠣꠇꠤ ꠙꠞ꠆ꠖꠣꠞ ꠟꠣꠈꠣꠘ ꠁꠐꠣꠅ ꠙꠣꠌ ꠀꠔ ꠃꠌꠣ ꠖꠦꠅꠀ ꠅꠁꠟ।
EXO 38:19 ꠄꠞ ꠌꠣꠁꠞꠅ ꠈꠥꠐꠤ ꠀꠞ ꠌꠥꠘ꠆ꠉꠤ ꠙꠤꠔꠟꠞ, ꠈꠥꠐꠤꠞ ꠇꠠꠣ ꠀꠞ ꠛꠣꠘ꠆ꠖꠣꠞ ꠔꠣꠞ ꠞꠥꠙꠣꠞ, ꠈꠥꠐꠤꠞ ꠝꠣꠕꠣꠅ ꠞꠥꠙꠣꠖꠤ ꠙꠦꠌꠣꠁ ꠖꠦꠅꠀ ꠅꠁꠟ।
EXO 38:20 ꠀꠟ꠆ꠟꠣꠞ ꠊꠞ ꠀꠞ ꠃꠑꠣꠘꠞ ꠌꠣꠁꠞꠅ ꠉꠣꠟꠣꠞ ꠈꠥꠐꠤꠞ ꠙꠦꠞꠦꠉ ꠅꠇꠟ ꠙꠤꠔꠟꠖꠤ ꠛꠣꠘꠣꠁꠟ।
EXO 38:21 ꠀꠟ꠆ꠟꠣꠞ ꠊꠞ ꠝꠣꠘꠤ ꠅꠃ ꠡꠣꠢꠣꠖꠔ ꠔꠣꠝ꠆ꠛꠥ ꠛꠣꠘꠣꠁꠔꠦ ꠎꠦꠔꠣ ꠝꠣꠟ-ꠍꠣꠝꠣꠘꠣ ꠟꠣꠉꠍꠤꠟ, ꠁꠝꠣꠝ ꠢꠣꠞꠥꠘꠞ ꠙꠥꠀ ꠁꠍꠣꠝꠣꠞꠞ ꠎꠤꠝ꠆ꠝꠣꠄ ꠟꠦꠛꠤ ꠈꠣꠘ꠆ꠖꠣꠘꠞ ꠝꠣꠘꠡꠦ ꠁꠔꠣꠞ ꠢꠤꠡꠣꠛ ꠞꠣꠈꠟꠣ। ꠝꠥꠍꠣ ꠘꠛꠤꠄ ꠅꠃ ꠢꠤꠡꠣꠛ ꠞꠣꠈꠣꠞ ꠢꠥꠇꠥꠝ ꠖꠤꠍꠟꠣ।
EXO 38:22 ꠝꠣꠛꠥꠖꠦ ꠝꠥꠍꠣꠞꠦ ꠎꠦꠟꠣꠈꠣꠘ ꠢꠥꠇꠥꠝ ꠖꠤꠍꠟꠣ, ꠁ ꠢꠥꠇꠥꠝ ꠝꠣꠚꠤꠇ ꠄꠢꠥꠖꠣ ꠉꠥꠡ꠆ꠐꠤꠞ ꠃꠞꠤꠞ ꠙꠥꠀ ꠛꠣꠔꠍꠦꠟꠟꠦ ꠁꠔꠣ ꠢꠇ꠆ꠇꠟꠔꠣ ꠛꠣꠘꠣꠁꠟꠣ, ꠔꠣꠁꠘ ꠀꠍꠟꠣ ꠢꠥꠞꠞ ꠘꠣꠔꠤ।
EXO 38:23 ꠖꠣꠘ ꠉꠥꠡ꠆ꠐꠤꠞ ꠅꠢꠤꠍꠣꠝꠣꠇꠞ ꠙꠥꠀ ꠀꠢꠟꠤꠀꠛꠦ ꠛꠣꠔꠍꠦꠟꠟꠞꠦ ꠡꠣꠁꠎ꠆ꠎ ꠇꠞꠟꠣ। ꠢꠇꠟ ꠎꠣꠔꠞ ꠀꠔꠞ ꠇꠣꠝ ꠀꠞ ꠘꠇꠡꠣ ꠛꠣꠘꠣꠘꠤꠞ ꠇꠣꠝꠅ ꠔꠣꠁꠘ ꠃꠡ꠆ꠔꠣꠖ ꠀꠍꠟꠣ। ꠖꠣꠝꠤ ꠡꠥꠔꠤ ꠇꠣꠙꠠꠞ ꠝꠣꠎꠦ ꠟꠤꠟꠥꠀ, ꠛꠣꠁꠋꠉꠘꠤ, ꠟꠣꠟ ꠡꠥꠔꠣꠖꠤ ꠘꠇꠡꠣ ꠇꠞꠣꠞ ꠇꠣꠝꠅ-ꠅ ꠔꠣꠁꠘ ꠃꠡ꠆ꠔꠣꠖ ꠀꠍꠟꠣ।
EXO 38:24 ꠖꠥꠟꠘꠣ ꠇꠥꠞꠛꠣꠘꠤ ꠕꠣꠇꠤ ꠙꠣꠅꠀ ꠃꠘꠔꠤꠡ ꠝꠘ ꠡꠣꠔ-ꠡ ꠔꠤꠡ ꠔꠟꠣ ꠡꠥꠘꠣ ꠅꠃ ꠄꠛꠣꠖꠔ ꠈꠣꠘꠣ ꠛꠣꠘꠣꠁꠔꠦ ꠟꠣꠉꠍꠦ। ꠁ ꠝꠣꠙ ꠅꠁꠟ ꠄꠛꠣꠖꠔ ꠈꠣꠘꠣꠞ ꠔꠟꠣꠞ ꠝꠣꠙꠦ।
EXO 38:25 ꠛꠘꠤ ꠁꠍꠞꠣꠁꠟꠞ ꠝꠣꠘꠥꠡ ꠉꠘꠤꠛꠣꠞ ꠛꠣꠟꠣ ꠎꠦꠞꠣꠞꠦ ꠉꠘꠣ ꠅꠁꠍꠤꠟ, ꠔꠣꠞꠣꠞ ꠉꠦꠍ ꠕꠣꠇꠤ ꠄꠇ-ꠡ ꠝꠘ ꠄꠇ ꠀꠎꠣꠞ ꠡꠣꠔ-ꠡ ꠙꠌꠔ꠆ꠔꠁꠞ ꠔꠟꠣ ꠞꠥꠙꠣ ꠙꠣꠅꠀ ꠉꠦꠍꠤꠟ, ꠁ ꠝꠣꠙ ꠅꠁꠟ ꠄꠛꠣꠖꠔ ꠈꠣꠘꠣꠞ ꠝꠣꠙꠦ।
EXO 38:26 ꠉꠘꠣ ꠅꠁꠍꠦ ꠅꠃꠟꠣ ꠝꠣꠘꠥꠡ, ꠝꠣꠘꠤ ꠛꠤꠡ ꠛꠞꠍ ꠛꠣ ꠄꠞ ꠌꠣꠁꠔꠦ ꠛꠦꠡꠤ ꠛꠄꠅꠡ ꠀꠟꠣ, ꠢꠃ ꠍꠄ ꠟꠣꠈ ꠔꠤꠘ ꠀꠎꠣꠞ ꠡꠣꠠꠦ ꠙꠣꠌ-ꠡ ꠝꠣꠘꠡꠦ ꠄꠛꠣꠖꠔ ꠈꠣꠘꠣꠞ ꠝꠣꠙꠦ ꠝꠣꠕꠣ ꠙꠤꠍꠥ ꠀꠗꠣ ꠔꠟꠣ ꠇꠞꠤ ꠞꠥꠙꠣ ꠖꠤꠍꠤꠟ।
EXO 38:27 ꠁ ꠞꠥꠙꠣ ꠕꠣꠇꠤ ꠄꠇ-ꠡ ꠝꠘ ꠞꠥꠙꠣ ꠖꠤꠀ ꠄꠛꠣꠖꠔ ꠈꠣꠘꠣ ꠀꠞ ꠙꠞ꠆ꠖꠣꠞ ꠈꠥꠐꠤꠞ ꠔꠟꠞ ꠌꠥꠘ꠆ꠉꠤ ꠛꠣꠘꠣꠁꠟ ꠅꠁꠍꠤꠟ। ꠄꠇ ꠄꠇ ꠌꠥꠘ꠆ꠉꠤꠔ ꠄꠇ ꠝꠘ ꠞꠥꠙꠣ ꠖꠤꠀ ꠝꠥꠐ ꠄꠇ-ꠡꠉꠥ ꠌꠥꠘ꠆ꠉꠤ ꠛꠣꠘꠣꠁꠟ ꠅꠁꠍꠦ।
EXO 38:28 ꠀꠞ ꠛꠣꠇꠤ ꠄꠇ ꠀꠎꠣꠞ ꠡꠣꠔ-ꠡ ꠙꠌꠔ꠆ꠔꠁꠞ ꠔꠟꠣ ꠞꠥꠙꠣ ꠈꠥꠐꠤꠞ ꠇꠠꠣ, ꠈꠥꠐꠤꠞ ꠝꠣꠕꠣ ꠙꠦꠌꠣꠘꠤ, ꠀꠞ ꠛꠣꠘ꠆ꠖꠤꠛꠣꠞ ꠔꠣꠞ ꠛꠣꠘꠣꠘꠤꠔ ꠟꠣꠉꠍꠦ।
EXO 38:29 ꠖꠥꠟꠘꠣ ꠇꠥꠞꠛꠣꠘꠤ ꠕꠣꠇꠤ ꠟꠤꠟ꠆ꠟꠣꠞ ꠙꠤꠔꠟ ꠖꠟꠣ ꠅꠁꠍꠤꠟ ꠡꠔ꠆ꠔꠁꠞ ꠝꠘ ꠖꠥꠁ ꠀꠎꠣꠞ ꠌꠣꠁꠞ-ꠡ ꠔꠟꠣ।
EXO 38:30 ꠁꠔꠣ ꠖꠤꠀ ꠝꠤꠟꠘ-ꠔꠣꠝ꠆ꠛꠥꠞ ꠖꠥꠀꠞꠞ ꠌꠥꠘ꠆ꠉꠤ, ꠙꠤꠔꠟꠞ ꠇꠥꠞꠛꠣꠘꠤ ꠈꠣꠘꠣ, ꠄꠞ ꠙꠤꠔꠟꠞ ꠎꠣꠟꠤ ꠀꠞ ꠇꠥꠞꠛꠣꠘꠤ ꠈꠣꠘꠣꠞ ꠢꠇ꠆ꠇꠟ ꠌꠤꠎ ꠛꠣꠘꠣꠁꠟ ꠅꠁꠍꠦ,
EXO 38:31 ꠃꠑꠣꠘꠞ ꠌꠣꠁꠞꠅ ꠉꠣꠟꠣꠞ ꠌꠥꠘ꠆ꠉꠤ, ꠉꠦꠁꠐꠞ ꠌꠥꠘ꠆ꠉꠤ, ꠔꠣꠝ꠆ꠛꠥ ꠀꠞ ꠃꠑꠣꠘꠞ ꠌꠣꠁꠞꠅ ꠉꠣꠟꠣꠞ ꠈꠥꠐꠤꠞ ꠙꠦꠞꠦꠉ ꠛꠣꠘꠣꠁꠟ ꠅꠁꠍꠦ।
EXO 39:1 ꠀꠟ꠆ꠟꠣꠞ ꠊꠞꠞ ꠙꠣꠇ ꠎꠣꠉꠣꠔ ꠁꠝꠣꠝꠔꠤ ꠇꠣꠝꠞ ꠡꠝꠄ ꠚꠤꠘ꠆ꠖꠣꠞ ꠟꠣꠉꠤ, ꠔꠣꠞꠣ ꠟꠣꠟ, ꠛꠣꠁꠋꠉꠘꠤ ꠀꠞ ꠟꠤꠟꠥꠀ ꠡꠥꠔꠣꠖꠤ ꠡꠥꠘ꠆ꠖꠞ ꠇꠞꠤ ꠟꠦꠛꠣꠍ ꠛꠣꠘꠣꠁꠟꠣ। ꠝꠣꠛꠥꠖꠦ ꠝꠥꠍꠣꠞꠦ ꠎꠦꠟꠣ ꠢꠥꠇꠥꠝ ꠖꠤꠍꠟꠣ, ꠄꠇ꠆ꠇꠦꠞꠦ ꠅꠃ ꠟꠣꠈꠣꠘ ꠇꠞꠤ ꠁꠝꠣꠝ ꠢꠣꠞꠥꠘꠞ ꠟꠣꠉꠤ ꠙꠛꠤꠔ꠆ꠞ ꠟꠦꠛꠣꠍ ꠛꠣꠘꠣꠁꠟꠣ।
EXO 39:2 ꠅꠃ ꠃꠡ꠆ꠔꠣꠖ ꠇꠣꠞꠤꠉꠞ ꠅꠇꠟꠦ ꠟꠤꠟꠥꠀ, ꠛꠣꠁꠋꠉꠘꠤ, ꠟꠣꠟ ꠡꠥꠔꠣ, ꠖꠣꠝꠤ ꠡꠥꠔꠤ ꠇꠣꠙꠠ ꠀꠞ ꠡꠥꠘꠣꠖꠤ ꠙꠞꠗꠣꠘ ꠁꠝꠣꠝꠞ ꠄꠚꠞꠘ ꠛꠣꠘꠣꠁꠟꠣ।
EXO 39:3 ꠡꠥꠘꠣ ꠙꠤꠐꠣꠁꠀ ꠙꠣꠔ ꠛꠣꠘꠣꠁꠀ, ꠡꠥꠔꠣꠞ ꠟꠣꠈꠣꠘ ꠡꠥꠘꠣꠞ ꠔꠣꠞ ꠔꠤꠀꠞ ꠇꠞꠟꠣ। ꠛꠣꠖꠦ ꠟꠤꠟꠥꠀ, ꠛꠣꠁꠋꠉꠘꠤ, ꠟꠣꠟ ꠡꠥꠔꠣ, ꠖꠣꠝꠤ ꠡꠥꠔꠤ ꠇꠣꠙꠠ ꠀꠞ ꠡꠥꠘꠣꠞ ꠔꠣꠞ ꠄꠇꠟꠉꠦ ꠝꠤꠟꠣꠁꠀ ꠇꠣꠙꠠ ꠛꠣꠘꠣꠁꠟꠣ।
EXO 39:4 ꠄꠚꠞꠘꠞ ꠇꠣꠘ꠆ꠖꠞ ꠉꠣꠟꠣ ꠎꠥꠠꠣ ꠖꠤꠛꠣꠞ ꠟꠣꠉꠤ ꠖꠥꠈꠣꠘ ꠙꠐ꠆ꠐꠤ ꠛꠣꠘꠣꠁꠀ, ꠄꠚꠞꠘꠞ ꠃꠙꠞꠞ ꠇꠥꠘꠣꠔ ꠟꠣꠉꠣꠁꠟꠣ।
EXO 39:5 ꠄꠚꠞꠘꠞ ꠟꠉꠦ ꠎꠥꠠꠣ ꠟꠣꠉꠣꠁꠟ ꠙꠦꠐꠞ ꠃꠙꠞꠞ ꠛꠦꠟꠐ ꠈꠣꠘꠅ ꠄꠚꠞꠘꠞ ꠡꠥꠔꠣꠖꠤ ꠛꠣꠘꠣꠁꠟꠣ। ꠔꠣꠞꠣ ꠟꠤꠟꠥꠀ, ꠛꠣꠁꠋꠉꠘꠤ, ꠟꠣꠟ ꠡꠥꠔꠣ, ꠖꠣꠝꠤ ꠡꠥꠔꠤ ꠇꠣꠙꠠ ꠀꠞ ꠡꠥꠘꠣꠞ ꠔꠣꠞ ꠖꠤꠀ ꠑꠤꠇ ꠄꠚꠞꠘꠞ ꠘꠝꠥꠘꠣꠄ ꠛꠣꠘꠣꠁꠟꠣ। ꠝꠣꠛꠥꠖꠦ ꠝꠥꠍꠣꠞꠦ ꠎꠦꠟꠣ ꠢꠥꠇꠥꠝ ꠖꠤꠍꠟꠣ, ꠄꠇ꠆ꠇꠦꠞꠦ ꠅꠃ ꠟꠣꠈꠣꠘ ꠇꠞꠤ ꠢꠇ꠆ꠇꠟꠔꠣ ꠛꠣꠘꠣꠁꠟ ꠅꠁꠟ।
EXO 39:6 ꠛꠣꠖꠦ ꠔꠣꠞꠣ ꠖꠥꠁꠐꠣ ꠀꠇꠤꠇ ꠙꠣꠔ꠆ꠔꠞ ꠇꠣꠐꠤꠀ, ꠄꠞ ꠃꠙꠞꠦ ꠡꠥꠘꠣꠞ ꠎꠣꠎꠁꠞ ꠛꠅꠀꠁꠟꠣ। ꠢꠥꠘꠣꠞ ꠅꠇꠟꠦ ꠖꠣꠝꠤ ꠙꠣꠔ꠆ꠔꠞ ꠈꠥꠖꠤꠀ ꠎꠦꠟꠣ ꠡꠤꠟ ꠛꠣꠘꠣꠁꠘ, ꠅꠃꠟꠣ ꠙꠣꠔ꠆ꠔꠞ ꠈꠥꠖꠤꠀ ꠁꠍꠞꠣꠁꠟꠞ ꠙꠥꠀꠂꠘ꠆ꠔꠞ ꠘꠣꠝ ꠟꠦꠈꠟꠣ।
EXO 39:7 ꠀꠞ ꠅꠃ ꠖꠥꠁꠅ ꠙꠣꠔ꠆ꠔꠞ ꠡꠥꠘꠣꠞ ꠎꠣꠎꠁꠞꠞ ꠝꠣꠎꠦ ꠟꠣꠉꠣꠁꠀ, ꠄꠚꠞꠘꠞ ꠇꠣꠘ꠆ꠖꠞ ꠚꠤꠔꠣꠞ ꠟꠉꠦ ꠛꠣꠘ꠆ꠖꠤꠟꠣ। ꠁꠍꠞꠣꠁꠟꠞ ꠙꠥꠀꠂꠘ꠆ꠔꠞ ꠛꠣꠄ ꠝꠣꠛꠥꠖꠞ ꠘꠎꠞ ꠞꠣꠈꠣꠞ ꠟꠣꠉꠤ ꠁꠟꠣ ꠇꠞꠟꠣ। ꠝꠣꠛꠥꠖꠦ ꠝꠥꠍꠣꠞꠦ ꠎꠦꠟꠣ ꠢꠥꠇꠥꠝ ꠖꠤꠍꠟꠣ, ꠅꠃꠟꠣ ꠢꠇꠟꠔꠣ ꠇꠞꠣ ꠅꠁꠟ।
EXO 39:8 ꠛꠣꠖꠦ ꠄꠚꠞꠘꠞ ꠟꠣꠈꠣꠘ ꠜꠣꠟꠣ ꠃꠡ꠆ꠔꠣꠖ ꠖꠞ꠆ꠎꠤꠞꠦꠖꠤ ꠟꠤꠟꠥꠀ, ꠛꠣꠁꠋꠉꠘꠤ, ꠟꠣꠟ ꠡꠥꠔꠣ, ꠖꠣꠝꠤ ꠡꠥꠔꠤ ꠇꠣꠙꠠ ꠀꠞ ꠡꠥꠘꠣꠖꠤ ꠛꠥꠇꠥꠞ ꠃꠙꠞꠞ ꠕꠟꠤ ꠛꠣꠘꠣꠁꠟ ꠅꠁꠟ।
EXO 39:9 ꠁꠐꠣ ꠅꠁꠟ ꠟꠣꠝ꠆ꠛꠣꠄ ꠀꠗꠣ ꠀꠔ, ꠙꠣꠡꠦ ꠀꠗꠣ ꠀꠔ, ꠌꠣꠁꠞꠇꠥꠘꠤ ꠖꠥꠁ ꠜꠣꠁꠘ꠆ꠎ ꠇꠞꠣ ꠇꠣꠙꠠ।
EXO 39:10 ꠄꠞ ꠃꠙꠞꠦ ꠔꠣꠞꠣ ꠌꠣꠁꠞ ꠢꠣꠁꠞ ꠇꠞꠤ ꠖꠣꠝꠤ ꠙꠣꠔ꠆ꠔꠞ ꠟꠣꠉꠣꠁꠟꠣ। ꠙꠄꠟꠣ ꠢꠣꠞꠤꠔ ꠁꠀꠇꠥꠔ, ꠙꠤꠔ ꠀꠞ ꠙꠣꠘ꠆ꠘꠣ ꠝꠘꠤ;
EXO 39:11 ꠖꠥꠍꠞꠣ ꠢꠣꠞꠤꠔ ꠟꠣꠟꠝꠘꠤ, ꠟꠤꠟ ꠝꠘꠤ ꠀꠞ ꠢꠤꠞꠣ;
EXO 39:12 ꠔꠤꠘ ꠘꠝ꠆ꠛꠞ ꠢꠣꠞꠤꠔ ꠚꠤꠞꠥꠎ, ꠉꠥꠝꠦꠖ ꠀꠞ ꠙꠖ꠆ꠖꠞꠣꠉ ꠝꠘꠤ;
EXO 39:13 ꠌꠣꠁꠞ ꠘꠝ꠆ꠛꠞ ꠢꠣꠞꠤꠔ ꠙꠥꠈꠞꠣꠎ, ꠛꠂꠖꠥꠞ꠆ꠎ ꠀꠞ ꠡꠥꠞꠥꠎ ꠝꠘꠤ। ꠁ ꠙꠣꠔ꠆ꠔꠞ ꠅꠇꠟ ꠡꠥꠘꠣꠞ ꠎꠣꠎꠁꠞꠞ ꠃꠙꠞꠦ ꠟꠣꠉꠣꠁꠟ ꠅꠁꠟ।
EXO 39:14 ꠁꠍꠞꠣꠁꠟꠞ ꠛꠣꠞꠅ ꠙꠥꠀꠞ ꠟꠣꠉꠤ ꠛꠣꠞꠅꠐꠣ ꠙꠣꠔ꠆ꠔꠞ ꠟꠣꠉꠣꠁꠟꠣ। ꠁꠔꠣ ꠄꠇꠅ ꠙꠣꠔ꠆ꠔꠞꠅ ꠄꠇ ꠄꠇ ꠙꠥꠀꠞ ꠘꠣꠝ ꠈꠥꠖꠤꠀ ꠟꠦꠈꠣ ꠅꠁꠟ, ꠎꠦꠟꠣ ꠈꠥꠖꠤꠀ ꠡꠤꠟ ꠛꠣꠘꠣꠁꠟ ꠅꠄ।
EXO 39:15 ꠛꠥꠇꠥꠞ ꠃꠙꠞꠞ ꠕꠟꠤꠞ ꠟꠣꠉꠤ ꠈꠣꠐꠤ ꠡꠥꠘꠣꠖꠤ ꠞꠡꠤꠞ ꠟꠣꠈꠣꠘ ꠙꠦꠌꠣꠁꠀ ꠖꠥꠇꠍꠣ ꠌꠦꠁꠘ ꠛꠣꠘꠣꠁꠟꠣ।
EXO 39:16 ꠀꠞ ꠡꠥꠘꠣꠞ ꠖꠥꠈꠣꠘ ꠎꠣꠎꠁꠞ ꠀꠞ ꠖꠥꠁꠐꠣ ꠇꠠꠣ ꠛꠣꠘꠣꠁꠀ, ꠛꠥꠇꠥꠞ ꠅꠃ ꠕꠟꠤꠞ ꠃꠙꠞꠞ ꠖꠥꠁ ꠇꠥꠘꠣꠔ ꠟꠣꠉꠣꠁꠟꠣ।
EXO 39:17 ꠀꠞ ꠌꠦꠁꠘ ꠖꠥꠁꠅꠉꠦꠍꠣ ꠖꠥꠁꠅ ꠇꠠꠣꠞ ꠟꠉꠦ ꠀꠐꠇꠣꠁꠟꠣ।
EXO 39:18 ꠖꠥꠁꠅ ꠇꠣꠘ꠆ꠖꠞ ꠄꠚꠞꠘꠞ ꠍꠣꠝꠘꠞ ꠚꠤꠔꠣꠔ ꠡꠥꠘꠣꠞ ꠎꠣꠎꠁꠞꠞ ꠟꠉꠦ ꠌꠦꠁꠘꠞ ꠄꠇ ꠝꠣꠕꠣ ꠛꠣꠘ꠆ꠖꠤꠟꠣ।
EXO 39:19 ꠀꠞꠅ ꠖꠥꠁꠐꠣ ꠡꠥꠘꠣꠞ ꠇꠠꠣ ꠛꠣꠘꠣꠁꠀ ꠛꠥꠇꠥꠞ ꠃꠙꠞꠞ ꠕꠟꠤꠞ ꠖꠥꠁ ꠇꠥꠘꠣꠔ ꠟꠣꠉꠣꠁꠟꠣ। ꠁ ꠖꠥꠁꠅꠐꠣ ꠄꠚꠞꠘꠞ ꠟꠉꠦ ꠛꠥꠇꠥꠞ ꠕꠟꠤꠞ ꠔꠟꠦ ꠞꠁꠟ।
EXO 39:20 ꠛꠣꠖꠦ ꠀꠞꠅ ꠖꠥꠁꠐꠣ ꠡꠥꠘꠣꠞ ꠇꠠꠣ ꠛꠣꠘꠣꠁꠀ, ꠄꠚꠞꠘꠞ ꠇꠣꠘ꠆ꠖꠞ ꠙꠐ꠆ꠐꠤꠞ ꠡꠁ ꠔꠟꠦꠖꠤ, ꠙꠦꠐꠞ ꠃꠙꠞꠞ ꠛꠦꠟꠐꠞ ꠃꠙꠞꠞ ꠡꠤꠟꠣꠁꠞ ꠇꠣꠍꠣꠔ ꠟꠣꠉꠣꠁ ꠖꠤꠟꠣ।
EXO 39:21 ꠀꠞ ꠛꠥꠇꠥꠞ ꠃꠙꠞꠞ ꠕꠟꠤꠞ ꠔꠟꠞ ꠇꠠꠣꠞ ꠟꠉꠦ ꠙꠦꠐꠞ ꠃꠙꠞꠞ ꠘꠇꠡꠣ ꠇꠞꠣ ꠛꠦꠟꠐꠞ ꠇꠠꠣ ꠛꠣꠘ꠆ꠖꠤꠟꠣ, ꠀꠞ ꠅꠃ ꠕꠟꠤꠄ ꠟꠠꠣ-ꠌꠠꠣ ꠘꠣ ꠇꠞꠣꠞ ꠟꠣꠉꠤ ꠔꠟꠞ ꠇꠠꠣꠞ ꠟꠉꠦ ꠟꠤꠟꠥꠀ ꠡꠥꠔꠣꠖꠤ ꠛꠣꠘ꠆ꠖꠤ ꠖꠤꠟꠣ, ꠎꠦꠟꠣ ꠝꠣꠛꠥꠖꠦ ꠝꠥꠍꠣꠞꠦ ꠢꠥꠇꠥꠝ ꠇꠞꠍꠟꠣ।
EXO 39:22 ꠛꠣꠖꠦ ꠔꠣꠞꠣ ꠄꠚꠞꠘꠞ ꠔꠟꠞ ꠀꠟꠈꠦꠟ꠆ꠟꠣ ꠟꠤꠟꠥꠀ ꠞꠋꠉꠞ ꠡꠥꠔꠣꠖꠤ ꠛꠣꠁꠘ ꠇꠞꠟꠣ,
EXO 39:23 ꠀꠞ ꠝꠣꠕꠣ ꠢꠣꠞꠣꠁꠛꠣꠞ ꠛꠣꠟꠣ ꠉꠟꠣꠞ ꠚꠣꠇ ꠍꠤꠠꠔ ꠘꠣ ꠇꠞꠤ ꠄꠞ ꠌꠣꠁꠞꠅ ꠉꠣꠟꠣ ꠙꠐ꠆ꠐꠤ ꠖꠤꠀ ꠖꠠ ꠇꠞꠤ ꠛꠣꠁꠘ ꠇꠞꠟꠣ, ꠉꠟꠣꠞ ꠅꠃ ꠚꠣꠇ ꠞꠣꠈꠟꠣ ꠝꠣꠎ ꠛꠞꠣꠛꠞ।
EXO 39:24 ꠟꠤꠟꠥꠀ, ꠛꠣꠁꠋꠉꠘꠤ, ꠟꠣꠟ ꠞꠋꠉꠞ ꠙꠦꠌꠣꠁꠟ ꠡꠥꠔꠣꠖꠤ ꠀꠘꠥꠀꠞ ꠚꠟꠞ ꠟꠣꠈꠣꠘ ꠛꠣꠘꠣꠁꠟꠣ। ꠛꠣꠘꠣꠁꠀ ꠅꠉꠥꠁꠘꠞꠦ ꠀꠟꠈꠦꠟ꠆ꠟꠣꠞ ꠔꠟꠞ ꠝꠥꠠꠤꠞ ꠌꠣꠁꠞꠅꠛꠣꠄ ꠟꠣꠉꠣꠁꠟꠣ।
EXO 39:25 ꠛꠣꠖꠦ ꠈꠣꠐꠤ ꠡꠥꠘꠣꠞ ꠊꠥꠋꠉꠥꠞ ꠛꠣꠘꠣꠁꠀ ꠅꠃ ꠀꠘꠥꠀꠞꠞ ꠚꠣꠇꠦ ꠚꠣꠇꠦ ꠟꠣꠉꠣꠁꠟꠣ,
EXO 39:26 ꠀꠡ꠆ꠔꠣ ꠔꠟꠞ ꠝꠥꠠꠤꠔ ꠄꠉꠥ ꠇꠞꠤ ꠀꠘꠥꠀꠞ ꠀꠞ ꠄꠉꠥ ꠇꠞꠤ ꠊꠥꠋꠉꠥꠞ ꠟꠣꠉꠣꠁꠟ ꠅꠁꠟ। ꠄꠛꠣꠖꠔꠤ ꠇꠣꠝꠞ ꠛꠣꠟꠣ ꠁꠝꠣꠝ ꠍꠣꠛꠦ ꠅꠃ ꠀꠟꠈꠦꠟ꠆ꠟꠣ ꠚꠤꠘ꠆ꠖꠤꠔꠣ। ꠝꠣꠛꠥꠖꠦ ꠝꠥꠍꠣꠞꠦ ꠎꠦꠟꠣ ꠢꠥꠇꠥꠝ ꠖꠤꠍꠟꠣ, ꠄꠇ꠆ꠇꠦꠞꠦ ꠅꠃꠟꠣ ꠇꠞꠣ ꠅꠁꠟ।
EXO 39:27 ꠛꠣꠖꠦ ꠔꠣꠞꠣ ꠢꠣꠞꠥꠘ ꠀꠞ ꠔꠣꠘ ꠙꠥꠀꠂꠘ꠆ꠔꠞ ꠟꠣꠉꠤ ꠖꠣꠝꠤ ꠡꠥꠔꠤ ꠡꠥꠔꠣꠖꠤ ꠙꠣꠁꠘ꠆ꠎꠣꠛꠤ ꠛꠣꠘꠣꠁꠟꠣ।
EXO 39:28 ꠝꠣꠕꠣꠞ ꠙꠣꠃꠉꠠꠤ ꠀꠞ ꠔꠇꠤꠉꠥꠁꠘꠅ ꠖꠣꠝꠤ ꠡꠥꠔꠤ ꠇꠣꠙꠠꠖꠤ ꠛꠣꠘꠣꠁꠟꠣ, ꠀꠞ ꠢꠣꠚ-ꠙꠦꠘ꠆ꠐꠞ ꠟꠣꠈꠣꠘ ꠎꠣꠋꠉꠤꠀꠅ ꠛꠣꠘꠣꠁꠟꠣ ꠅꠃ ꠇꠣꠙꠠꠖꠤ।
EXO 39:29 ꠇꠝꠞꠞ ꠄꠇꠈꠣꠘ ꠛꠘ꠆ꠖꠘꠤ ꠛꠣꠘꠣꠁꠟꠣ, ꠖꠣꠝꠤ ꠡꠥꠔꠤ ꠇꠣꠙꠠ, ꠟꠤꠟꠥꠀ, ꠛꠣꠁꠋꠉꠘꠤ ꠀꠞ ꠟꠣꠟ ꠡꠥꠔꠣꠖꠤ ꠘꠇꠡꠣ ꠇꠞꠤ ꠛꠣꠘꠣꠁꠟꠣ। ꠝꠣꠛꠥꠖꠦ ꠝꠥꠍꠣꠞꠦ ꠎꠦꠟꠣ ꠢꠥꠇꠥꠝ ꠖꠤꠍꠟꠣ, ꠄꠇ꠆ꠇꠦꠞꠦ ꠅꠃꠟꠣ ꠇꠞꠣ ꠅꠁꠟ।
EXO 39:30 ꠀꠞ ꠙꠣꠃꠉꠠꠤꠞ ꠍꠣꠝꠘꠦ ꠟꠣꠉꠣꠘꠤꠞ ꠟꠣꠉꠤ, ꠈꠣꠐꠤ ꠡꠥꠘꠣꠞ ꠙꠣꠔꠖꠤ ꠄꠇꠈꠣꠘ ꠙꠛꠤꠔ꠆ꠞ ꠔꠣꠎ ꠔꠤꠀꠞ ꠇꠞꠟꠣ। ꠡꠤꠟꠞ ꠃꠙꠞꠦ ꠎꠦꠟꠣ ꠈꠥꠖꠤꠀ ꠟꠦꠈꠣ ꠅꠄ, ꠅꠃ ꠙꠣꠔꠞ ꠃꠙꠞꠦ ꠅꠟꠣ ꠈꠥꠖꠤꠀ ꠟꠦꠈꠟꠣ, “ꠝꠣꠛꠥꠖꠞ ꠘꠣꠝꠦ ꠙꠛꠤꠔ꠆ꠞ।”
EXO 39:31 ꠝꠣꠛꠥꠖꠦ ꠝꠥꠍꠣꠞꠦ ꠎꠦꠟꠣ ꠢꠥꠇꠥꠝ ꠖꠤꠍꠟꠣ, ꠅꠃ ꠢꠥꠇꠥꠝ ꠝꠣꠚꠤꠇꠃ ꠁ ꠙꠣꠔꠞꠦ ꠟꠤꠟꠥꠀ ꠡꠥꠔꠣꠖꠤ ꠙꠣꠃꠉꠠꠤꠞ ꠍꠣꠝꠘꠦ ꠛꠣꠘ꠆ꠖꠤ ꠖꠤꠟꠣ।
EXO 39:32 ꠅꠃ ꠟꠣꠈꠣꠘ ꠝꠤꠟꠘ-ꠔꠣꠝ꠆ꠛꠥ ꠡꠢ ꠀꠟ꠆ꠟꠣꠞ ꠊꠞꠞ ꠢꠇ꠆ꠇꠟ ꠇꠣꠝ-ꠇꠣꠎ ꠡꠦꠡ ꠅꠁꠟ। ꠝꠣꠛꠥꠖꠦ ꠝꠥꠍꠣꠞꠦ ꠎꠦꠟꠣ ꠢꠥꠇꠥꠝ ꠖꠤꠍꠟꠣ, ꠛꠘꠤ ꠁꠍꠞꠣꠁꠟꠦ ꠄꠇ꠆ꠇꠦꠞꠦ ꠅꠃ ꠟꠣꠈꠣꠘ ꠢꠇꠟꠔꠣ ꠇꠞꠟꠣ।
EXO 39:33 ꠛꠣꠖꠦ ꠔꠣꠞꠣ ꠀꠟ꠆ꠟꠣꠞ ꠊꠞꠞ ꠟꠣꠉꠤ ꠛꠣꠘꠣꠁꠟ ꠢꠇ꠆ꠇꠟꠔꠣ ꠝꠥꠍꠣꠞ ꠇꠣꠍꠣꠔ ꠟꠁꠀ ꠀꠁꠟꠣ। ꠔꠣꠞꠣ ꠀꠘꠟꠣ: ꠝꠤꠟꠘ-ꠔꠣꠝ꠆ꠛꠥ, ꠔꠣꠝ꠆ꠛꠥꠞ ꠢꠇꠟ ꠝꠣꠟ-ꠍꠣꠝꠣꠘꠣ, ꠢꠥꠇ, ꠚ꠆ꠞꠦꠁꠝ, ꠛꠣꠔ꠆ꠔꠤ, ꠈꠥꠐꠤ, ꠈꠥꠐꠤꠞ ꠔꠟꠞ ꠌꠥꠘ꠆ꠉꠤ;
EXO 39:34 ꠟꠣꠟ ꠞꠋ ꠇꠞꠣ ꠝꠦꠠꠣꠞ ꠌꠣꠝꠠꠣꠞ ꠍꠣꠘꠤ, ꠚꠥʼꠞ ꠌꠣꠝꠠꠣꠞ ꠍꠣꠘꠤ, ꠢꠦꠞꠦꠝ ꠡꠞꠤꠚꠞ ꠛꠦꠠꠣꠞ ꠙꠞ꠆ꠖꠣ;
EXO 39:35 ꠡꠣꠢꠣꠖꠔ ꠡꠘ꠆ꠖꠥꠇ, ꠡꠘ꠆ꠖꠥꠇ ꠛꠁꠀ ꠘꠦꠅꠀꠞ ꠛꠦꠘ꠆ꠖꠣ, ꠡꠘ꠆ꠖꠥꠇꠞ ꠓꠣꠇꠘꠣ;
EXO 39:36 ꠐꠦꠛꠥꠟ, ꠐꠦꠛꠥꠟꠞ ꠢꠇꠟ ꠌꠤꠎ, ꠝꠣꠛꠥꠖꠞ ꠘꠣꠝꠞ ꠙꠛꠤꠔ꠆ꠞ ꠞꠥꠐꠤ;
EXO 39:37 ꠈꠣꠐꠤ ꠡꠥꠘꠣꠞ ꠌꠦꠞꠣꠉ ꠖꠣꠘꠤ, ꠄꠞ ꠟꠉꠞ ꠢꠇꠟ ꠌꠤꠎ, ꠎꠣꠟꠣꠘꠤꠞ ꠔꠦꠟ;
EXO 39:38 ꠡꠥꠘꠣꠞ ꠀꠉꠞ-ꠈꠥꠡꠛꠄ ꠎꠣꠟꠣꠘꠤꠞ ꠐꠦꠛꠥꠟ, ꠈꠦꠟꠣꠚꠔꠤꠞ ꠔꠦꠟ, ꠈꠥꠡꠛꠄ ꠀꠟꠣ ꠀꠉꠞ, ꠀꠟ꠆ꠟꠣꠞ ꠊꠞꠞ ꠖꠥꠀꠞꠞ ꠙꠞ꠆ꠖꠣ;
EXO 39:39 ꠙꠤꠔꠟꠞ ꠇꠥꠞꠛꠣꠘꠤ ꠈꠣꠘꠣ, ꠙꠤꠔꠟꠞ ꠎꠣꠟꠤ, ꠇꠥꠞꠛꠣꠘꠤ ꠈꠣꠘꠣ ꠛꠁꠀ ꠘꠦꠅꠀꠞ ꠛꠦꠘ꠆ꠖꠣ, ꠇꠥꠞꠛꠣꠘꠤ ꠈꠣꠘꠣꠞ ꠢꠇ꠆ꠇꠟ ꠝꠣꠟ-ꠍꠣꠝꠣꠘꠣ, ꠅꠎꠥꠞ ꠉꠣꠝꠟꠣ ꠀꠞ ꠄꠞ ꠔꠟꠞ ꠌꠇꠤ-ꠈꠣꠐ;
EXO 39:40 ꠃꠑꠣꠘꠞ ꠙꠞ꠆ꠖꠣꠁꠘ, ꠈꠥꠐꠤꠘ, ꠈꠥꠐꠤꠞ ꠔꠟꠞ ꠌꠥꠘ꠆ꠉꠤ, ꠃꠑꠣꠘꠅ ꠢꠣꠝꠣꠘꠤꠞ ꠉꠦꠁꠐꠞ ꠙꠞ꠆ꠖꠣ, ꠃꠑꠣꠘꠞ ꠙꠦꠞꠦꠉ ꠀꠞ ꠖꠠꠤ; ꠄꠇ ꠇꠕꠣꠄ, ꠝꠤꠟꠘ-ꠔꠣꠝ꠆ꠛꠥ ꠡꠢ ꠀꠟ꠆ꠟꠣꠞ ꠊꠞꠞ ꠢꠇ꠆ꠇꠟ ꠝꠣꠟ-ꠍꠣꠝꠣꠘꠣ;
EXO 39:41 ꠀꠞ ꠙꠣꠇ ꠎꠣꠉꠣꠔ ꠁꠝꠣꠝꠔꠤ ꠇꠣꠝꠞ ꠟꠣꠉꠤ ꠁꠝꠣꠝ ꠢꠣꠞꠥꠘꠞ ꠙꠛꠤꠔ꠆ꠞ ꠟꠦꠛꠣꠍ, ꠀꠞ ꠔꠣꠘ ꠙꠥꠀꠂꠘ꠆ꠔꠞꠅ ꠁꠝꠣꠝꠔꠤꠞ ꠟꠦꠛꠣꠍ।
EXO 39:42 ꠝꠣꠛꠥꠖꠦ ꠝꠥꠍꠣꠞꠦ ꠎꠦꠟꠣ ꠢꠥꠇꠥꠝ ꠖꠤꠍꠟꠣ, ꠅꠃ ꠟꠣꠈꠣꠘ ꠛꠘꠤ ꠁꠍꠞꠣꠁꠟ ꠅꠇꠟꠦ ꠢꠇꠟ ꠇꠣꠝ ꠇꠞꠟꠣ।
EXO 39:43 ꠢꠦꠡꠦ ꠝꠥꠍꠣꠄ ꠁꠔꠣ ꠢꠇꠟꠔꠣ ꠖꠦꠈꠤꠀ ꠛꠥꠎꠟꠣ, ꠝꠣꠛꠥꠖꠦ ꠎꠦꠟꠣ ꠢꠥꠇꠥꠝ ꠖꠤꠍꠟꠣ, ꠅꠃ ꠟꠣꠈꠣꠘꠃ ꠇꠞꠣ ꠅꠁꠍꠦ। ꠄꠞꠟꠣꠉꠤ ꠔꠣꠁꠘ ꠢꠇꠟ ꠛꠘꠤ ꠁꠍꠞꠣꠁꠟꠞꠦ ꠖꠥꠀ ꠖꠤꠟꠣ।
EXO 40:1 ꠝꠣꠛꠥꠖꠦ ꠝꠥꠍꠣ ꠘꠛꠤꠞꠦ ꠇꠁꠟꠣ,
EXO 40:2 “ꠔꠥꠝꠤ ꠛꠍꠞꠞ ꠙꠄꠟꠣ ꠌꠣꠘ꠆ꠖꠞ ꠙꠄꠟꠣ ꠔꠣꠞꠤꠈꠅ ꠝꠤꠟꠘ-ꠔꠣꠝ꠆ꠛꠥ ꠡꠢ ꠀꠝꠣꠞ ꠊꠞꠞꠦ ꠈꠣꠠꠣ ꠇꠞꠤꠅ।
EXO 40:3 ꠊꠞꠞ ꠜꠤꠔꠞꠦ ꠡꠣꠢꠣꠖꠔ ꠡꠘ꠆ꠖꠥꠇꠞꠦ ꠢꠣꠞꠣꠁꠀ, ꠝꠣꠎꠦ ꠙꠞ꠆ꠖꠣ ꠐꠣꠘꠣꠁꠀ ꠡꠘ꠆ꠖꠥꠇꠞꠦ ꠀꠅꠠꠦ ꠕꠁꠅ।
EXO 40:4 ꠐꠦꠛꠥꠟꠞꠦꠅ ꠜꠤꠔꠞꠦ ꠢꠣꠞꠣꠁꠀ, ꠄꠞ ꠃꠙꠞꠞ ꠌꠤꠎ ꠅꠇꠟ ꠢꠣꠎꠣꠁꠅ। ꠛꠣꠖꠦ ꠌꠦꠞꠣꠉ ꠖꠣꠘꠤ ꠜꠤꠔꠞꠦ ꠀꠘꠤꠀ ꠔꠣꠞ ꠌꠦꠞꠣꠉ ꠅꠇꠟ ꠎꠣꠟꠣꠁ ꠖꠤꠅ।
EXO 40:5 ꠡꠥꠘꠣꠖꠤ ꠛꠣꠘꠣꠁꠟ ꠀꠉꠞ-ꠈꠥꠡꠛꠄ ꠎꠣꠟꠣꠘꠤꠞ ꠐꠦꠛꠥꠟ ꠡꠣꠢꠣꠖꠔ ꠡꠘ꠆ꠖꠥꠇꠞ ꠍꠣꠝꠘꠦ ꠕꠁꠅ, ꠕꠁꠀ ꠀꠝꠣꠞ ꠊꠞꠞ ꠖꠥꠀꠞꠞ ꠙꠞ꠆ꠖꠣ ꠟꠣꠉꠣꠁꠅ।
EXO 40:6 ꠀꠝꠣꠞ ꠊꠞꠞ ꠝꠤꠟꠘ-ꠔꠣꠝ꠆ꠛꠥꠞ ꠖꠥꠀꠞꠞ ꠍꠣꠝꠘꠦ ꠎꠣꠟꠣꠁꠟ ꠇꠥꠞꠛꠣꠘꠤ ꠈꠣꠘꠣ ꠕꠁꠅ।
EXO 40:7 ꠇꠥꠞꠛꠣꠘꠤ ꠈꠣꠘꠣ ꠀꠞ ꠝꠤꠟꠘ-ꠔꠣꠝ꠆ꠛꠥꠞ ꠝꠣꠎꠈꠣꠘꠅ ꠅꠎꠥꠞ ꠉꠣꠝꠟꠣ ꠙꠣꠘꠤꠖꠤ ꠜꠞꠤꠀ ꠕꠁꠅ।
EXO 40:8 ꠛꠣꠖꠦ ꠃꠑꠣꠘꠞ ꠌꠣꠁꠞꠅ ꠉꠣꠟꠣꠛꠣꠄ ꠙꠞ꠆ꠖꠣ ꠐꠣꠘꠣꠁꠅ, ꠀꠞ ꠃꠑꠣꠘꠞ ꠉꠦꠁꠐꠅ-ꠅ ꠙꠞ꠆ꠖꠣ ꠟꠣꠉꠣꠁꠅ।
EXO 40:9 “ꠛꠣꠖꠦ ꠔꠥꠝꠤ ꠈꠦꠟꠣꠚꠔꠤꠞ ꠔꠦꠟ ꠖꠤꠀ ꠀꠝꠣꠞ ꠊꠞ ꠀꠞ ꠀꠝꠣꠞ ꠊꠞꠞ ꠢꠇꠟ ꠝꠣꠟ-ꠍꠣꠝꠣꠘꠣꠞꠦ ꠙꠛꠤꠔ꠆ꠞ ꠇꠞꠤꠅ। ꠔꠦꠃ ꠁꠔꠣ ꠢꠇꠟꠔꠣ ꠝꠢꠣ ꠙꠣꠇ-ꠙꠛꠤꠔ꠆ꠞ ꠅꠁꠛ।
EXO 40:10 ꠀꠞ ꠎꠣꠟꠣꠁꠟ ꠇꠥꠞꠛꠣꠘꠤ ꠈꠣꠘꠣꠞ ꠃꠙꠞꠦꠅ ꠈꠦꠟꠣꠚꠔꠤꠞ ꠔꠦꠟ ꠖꠤꠀ ꠙꠛꠤꠔ꠆ꠞ ꠇꠞꠤꠅ। ꠇꠥꠞꠛꠣꠘꠤ ꠈꠣꠘꠣꠞ ꠢꠇꠟ ꠝꠣꠟ-ꠍꠣꠝꠣꠘꠣꠞꠦꠅ ꠙꠛꠤꠔ꠆ꠞ ꠇꠞꠤꠅ। ꠔꠦꠃ ꠁ ꠇꠥꠞꠛꠣꠘꠤ ꠈꠣꠘꠣ ꠝꠢꠣ-ꠙꠛꠤꠔ꠆ꠞ ꠌꠤꠎ ꠅꠁꠛ।
EXO 40:11 ꠅꠎꠥꠞ ꠙꠣꠘꠤꠞ ꠉꠣꠝꠟꠣ ꠀꠞ ꠄꠞ ꠔꠟꠞ ꠌꠇꠤ-ꠈꠣꠐꠞꠦꠅ ꠈꠦꠟꠣꠚꠔꠤꠞ ꠔꠦꠟ ꠖꠤꠀ ꠙꠛꠤꠔ꠆ꠞ ꠇꠞꠤꠅ।
EXO 40:12 “ꠛꠣꠖꠦ ꠢꠣꠞꠥꠘ ꠀꠞ ꠔꠣꠞ ꠙꠥꠀꠂꠘꠞꠦ ꠝꠤꠟꠘ-ꠔꠣꠝ꠆ꠛꠥꠞ ꠖꠥꠀꠞꠞ ꠍꠣꠝꠘꠦ ꠀꠘꠤꠀ ꠙꠣꠘꠤꠖꠤ ꠘꠣꠅꠀꠁ ꠖꠤꠅ।
EXO 40:13 ꠘꠣꠅꠀꠘꠤꠞ ꠛꠣꠖꠦ ꠢꠣꠞꠥꠘꠞꠦ ꠙꠣꠇ-ꠙꠛꠤꠔ꠆ꠞ ꠟꠦꠛꠣꠍ ꠅꠇꠟ ꠚꠤꠘ꠆ꠖꠣꠁꠅ, ꠀꠞ ꠀꠝꠣꠞ ꠁꠝꠣꠝ ꠅꠀꠞ ꠟꠣꠉꠤ ꠔꠣꠞꠦ ꠙꠛꠤꠔ꠆ꠞ ꠔꠦꠟ ꠟꠣꠉꠣꠁꠀ ꠈꠦꠟꠣꠚꠔꠤ ꠖꠤꠀ ꠙꠛꠤꠔ꠆ꠞ ꠇꠞꠤꠅ।
EXO 40:14 ꠔꠣꠞ ꠙꠥꠀꠂꠘ꠆ꠔꠞꠦ ꠀꠘꠤꠀ ꠁꠝꠣꠝꠔꠤꠞ ꠙꠣꠁꠘ꠆ꠎꠣꠛꠤ ꠚꠤꠘ꠆ꠖꠣꠁꠅ।
EXO 40:15 ꠔꠣꠞꠣꠞ ꠛꠣꠚꠞꠦ ꠎꠦꠟꠣ ꠙꠛꠤꠔ꠆ꠞ ꠔꠦꠟꠖꠤ ꠁꠝꠣꠝꠔꠤ ꠇꠣꠝꠞ ꠈꠦꠟꠣꠚꠔꠤ ꠖꠤꠍ, ꠔꠣꠞꠣꠞꠦꠅ ꠅꠃꠟꠣ ꠈꠦꠟꠣꠚꠔꠤ ꠖꠤꠅ, ꠎꠣꠔꠦ ꠔꠣꠞꠣꠅ ꠀꠝꠣꠞ ꠁꠝꠣꠝꠔꠤ ꠇꠣꠝ ꠇꠞꠔꠣ ꠙꠣꠞꠂꠘ। ꠁ ꠈꠦꠟꠣꠚꠔꠤꠞ ꠝꠣꠎꠖꠤ ꠁꠝꠣꠝꠔꠤꠞ ꠎꠦ ꠘꠤꠅꠝ ꠌꠣꠟꠥ ꠅꠁꠛ, ꠁꠔꠣ ꠅꠀꠞꠤꠡꠞ ꠙꠞ ꠅꠀꠞꠤꠡ ꠗꠞꠤ ꠌꠣꠟꠥ ꠞꠁꠛ।”
EXO 40:16 ꠝꠣꠛꠥꠖꠞ ꠢꠥꠇꠥꠝ ꠝꠣꠚꠤꠇ ꠝꠥꠍꠣꠄ ꠁꠔꠣ ꠢꠇꠟꠔꠣ ꠇꠞꠟꠣ।
EXO 40:17 ꠖꠥꠍꠞꠣ ꠛꠍꠞꠞ ꠙꠄꠟꠣ ꠌꠣꠘ꠆ꠖꠞ ꠙꠄꠟꠣ ꠔꠣꠞꠤꠈꠅ ꠀꠟ꠆ꠟꠣꠞ ꠊꠞ ꠈꠣꠠꠣ ꠇꠞꠣ ꠅꠁꠟ।
EXO 40:18 ꠝꠥꠍꠣꠄ ꠁ ꠊꠞ ꠈꠣꠠꠣ ꠇꠞꠟꠣ, ꠙꠄꠟꠣ ꠄꠞ ꠈꠥꠐꠤꠞ ꠔꠟꠞ ꠌꠥꠘ꠆ꠉꠤ ꠛꠅꠀꠁꠟꠣ, ꠈꠥꠐꠤꠘ ꠃꠛꠣ ꠇꠞꠟꠣ, ꠛꠦꠠꠣꠞ ꠚ꠆ꠞꠦꠁꠝ ꠟꠣꠉꠣꠁꠟꠣ, ꠚ꠆ꠞꠦꠁꠝꠞ ꠜꠤꠔꠞꠦꠖꠤ ꠛꠣꠔ꠆ꠔꠤ ꠖꠤꠟꠣ।
EXO 40:19 ꠝꠣꠛꠥꠖꠞ ꠢꠥꠇꠥꠝ ꠝꠣꠚꠤꠇ ꠔꠣꠁꠘ ꠍꠣꠉꠟꠞ ꠞꠥꠝꠣ ꠖꠤꠀ ꠊꠞꠞ ꠙꠄꠟꠣ ꠍꠣꠘꠤ ꠖꠤꠟꠣ, ꠄꠞ ꠃꠙꠞꠦ ꠖꠤꠟꠣ ꠀꠞꠅ ꠖꠥꠁꠐꠣ ꠍꠣꠘꠤ।
EXO 40:20 ꠛꠣꠖꠦ ꠢꠃ ꠖꠥꠁꠅꠈꠣꠘ ꠙꠛꠤꠔ꠆ꠞ ꠡꠣꠢꠣꠖꠔ ꠙꠣꠔ꠆ꠔꠞ ꠀꠘꠤꠀ ꠡꠘ꠆ꠖꠥꠇꠞ ꠜꠤꠔꠞꠦ ꠢꠣꠞꠣꠁꠟꠣ। ꠡꠘ꠆ꠖꠥꠇ ꠛꠁꠀ ꠘꠦꠅꠀꠞ ꠛꠦꠘ꠆ꠖꠣ ꠟꠣꠉꠣꠁꠟꠣ, ꠡꠘ꠆ꠖꠥꠇꠞ ꠃꠙꠞꠞ ꠓꠣꠇꠘꠣꠅ ꠟꠣꠉꠣꠁꠟꠣ।
EXO 40:21 ꠀꠞ ꠡꠘ꠆ꠖꠥꠇꠞꠦ ꠘꠤꠀ ꠀꠟ꠆ꠟꠣꠞ ꠊꠞꠞ ꠜꠤꠔꠞꠦ ꠢꠣꠞꠣꠁꠟꠣ। ꠢꠣꠞꠣꠁꠀ ꠙꠞ꠆ꠖꠣ ꠐꠣꠘꠣꠁꠀ ꠡꠘ꠆ꠖꠥꠇꠞꠦ ꠀꠅꠠꠦ ꠞꠣꠈꠟꠣ, ꠎꠦꠟꠣ ꠝꠣꠛꠥꠖꠦ ꠝꠥꠍꠣꠞꠦ ꠢꠥꠇꠥꠝ ꠖꠤꠍꠟꠣ।
EXO 40:22 ꠡꠘ꠆ꠖꠥꠇꠞ ꠅꠃ ꠙꠞ꠆ꠖꠣꠞ ꠛꠣꠞꠦ ꠃꠔ꠆ꠔꠞ ꠉꠣꠟꠣꠛꠣꠄ, ꠝꠤꠟꠘ-ꠔꠣꠝ꠆ꠛꠥꠞ ꠝꠣꠎꠦ ꠙꠛꠤꠔ꠆ꠞ ꠞꠥꠐꠤꠞ ꠐꠦꠛꠥꠟ ꠞꠣꠈꠟꠣ।
EXO 40:23 ꠐꠦꠛꠥꠟꠞ ꠃꠙꠞꠦ ꠝꠣꠛꠥꠖꠞ ꠘꠣꠝꠞ ꠙꠛꠤꠔ꠆ꠞ ꠞꠥꠐꠤ ꠢꠣꠎꠣꠁꠀ ꠕꠁꠟꠣ, ꠎꠦꠟꠣ ꠝꠣꠛꠥꠖꠦ ꠝꠥꠍꠣꠞꠦ ꠢꠥꠇꠥꠝ ꠖꠤꠍꠟꠣ।
EXO 40:24 ꠐꠦꠛꠥꠟꠞ ꠍꠣꠝꠘꠦ ꠔꠣꠝ꠆ꠛꠥꠞ ꠖꠇ꠆ꠇꠤꠘ ꠉꠣꠟꠣꠔ ꠌꠦꠞꠣꠉ ꠖꠣꠘꠤ ꠕꠁꠟꠣ।
EXO 40:25 ꠛꠣꠖꠦ ꠝꠣꠛꠥꠖꠞ ꠍꠣꠝꠘꠦ ꠌꠦꠞꠣꠉ ꠉꠥꠁꠘ ꠎꠣꠟꠣꠁꠟꠣ, ꠎꠦꠟꠣ ꠝꠣꠛꠥꠖꠦ ꠝꠥꠍꠣꠞꠦ ꠢꠥꠇꠥꠝ ꠖꠤꠍꠟꠣ।
EXO 40:26 ꠝꠤꠟꠘ-ꠔꠣꠝ꠆ꠛꠥꠞ ꠝꠣꠎꠈꠣꠘꠞ ꠙꠞ꠆ꠖꠣꠞ ꠍꠣꠝꠘꠦ ꠡꠥꠘꠣꠖꠤ ꠛꠣꠘꠣꠁꠟ ꠀꠉꠞ-ꠈꠥꠡꠛꠄ ꠎꠣꠟꠣꠘꠤꠞ ꠐꠦꠛꠥꠟ ꠕꠁꠟꠣ।
EXO 40:27 ꠅꠈꠣꠘꠞ ꠃꠙꠞꠦ ꠈꠥꠡꠛꠄ ꠀꠟꠣ ꠀꠉꠞ ꠎꠣꠟꠣꠁꠟꠣ, ꠎꠦꠟꠣ ꠝꠣꠛꠥꠖꠦ ꠝꠥꠍꠣꠞꠦ ꠢꠥꠇꠥꠝ ꠖꠤꠍꠟꠣ।
EXO 40:28 ꠛꠣꠖꠦ ꠝꠥꠍꠣꠄ ꠖꠥꠀꠞꠞ ꠙꠞ꠆ꠖꠣ ꠐꠣꠘꠣꠁꠟꠣ।
EXO 40:29 ꠔꠣꠁꠘ ꠀꠟ꠆ꠟꠣꠞ ꠊꠞꠞ ꠝꠤꠟꠘ-ꠔꠣꠝ꠆ꠛꠥꠞ ꠖꠥꠀꠞꠞ ꠇꠣꠘ꠆ꠖꠣꠔ ꠎꠣꠟꠣꠁꠟ ꠇꠥꠞꠛꠣꠘꠤ ꠈꠣꠘꠣ ꠕꠁꠟꠣ। ꠕꠁꠀ ꠄꠞ ꠃꠙꠞꠦ ꠎꠣꠟꠣꠁꠟ ꠙꠡꠥ ꠇꠥꠞꠛꠣꠘꠤ ꠀꠞ ꠗꠣꠘ-ꠉꠝꠞ ꠍꠖꠉꠣ ꠖꠤꠟꠣ, ꠎꠦꠟꠣ ꠝꠣꠛꠥꠖꠦ ꠝꠥꠍꠣꠞꠦ ꠢꠥꠇꠥꠝ ꠖꠤꠍꠟꠣ।
EXO 40:30 ꠛꠣꠖꠦ ꠝꠤꠟꠘ-ꠔꠣꠝ꠆ꠛꠥ ꠀꠞ ꠇꠥꠞꠛꠣꠘꠤ ꠈꠣꠘꠣꠞ ꠝꠣꠎꠈꠣꠘꠅ ꠅꠎꠥꠞ ꠉꠣꠝꠟꠣ ꠕꠁꠟꠣ, ꠕꠁꠀ ꠅꠎꠥꠞ ꠙꠣꠘꠤ ꠜꠞꠤꠀ ꠖꠤꠟꠣ।
EXO 40:31 ꠅꠃ ꠙꠣꠘꠤ ꠖꠤꠀ ꠝꠥꠍꠣ, ꠢꠣꠞꠥꠘ ꠀꠞ ꠢꠣꠞꠥꠘꠞ ꠙꠥꠀꠂꠘ꠆ꠔꠦ ꠅꠎꠥ ꠇꠞꠔꠣ।
EXO 40:32 ꠝꠣꠛꠥꠖꠞ ꠢꠥꠇꠥꠝ ꠝꠣꠚꠤꠇ ꠔꠣꠞꠣ ꠝꠤꠟꠘ-ꠔꠣꠝ꠆ꠛꠥꠔ ꠢꠣꠝꠣꠘꠤꠞ ꠀꠉꠦ, ꠛꠣ ꠇꠥꠞꠛꠣꠘꠤ ꠈꠣꠘꠣꠞ ꠇꠣꠘ꠆ꠖꠣꠔ ꠎꠣꠅꠀꠞ ꠀꠉꠦ ꠅꠎꠥ ꠇꠞꠔꠣ।
EXO 40:33 ꠛꠣꠖꠦ ꠝꠥꠍꠣꠄ ꠀꠟ꠆ꠟꠣꠞ ꠊꠞ ꠀꠞ ꠇꠥꠞꠛꠣꠘꠤ ꠈꠣꠘꠣꠞ ꠌꠣꠁꠞꠅꠛꠣꠄ ꠙꠞ꠆ꠖꠣ ꠐꠣꠘꠣꠁꠀ ꠃꠑꠣꠘ ꠛꠣꠘꠣꠁꠟꠣ। ꠃꠑꠣꠘꠞ ꠉꠦꠁꠐꠞ ꠙꠞ꠆ꠖꠣ ꠟꠣꠉꠣꠁꠟꠣ। ꠅꠃ ꠟꠣꠈꠣꠘ ꠝꠥꠍꠣꠄ ꠔꠣꠘ ꠢꠇꠟ ꠇꠣꠝ ꠡꠦꠡ ꠇꠞꠟꠣ।
EXO 40:34 ꠇꠣꠝ ꠡꠦꠡ ꠇꠞꠤꠀ ꠢꠣꠞꠟꠦ, ꠉꠣꠁꠛꠤ ꠝꠦꠊꠞ ꠈꠥꠐꠤ ꠀꠁꠀ ꠅꠃ ꠝꠤꠟꠘ-ꠔꠣꠝ꠆ꠛꠥꠞꠦ ꠉꠥꠞꠤꠟꠤꠟ, ꠝꠣꠛꠥꠖꠞ ꠝꠢꠤꠝꠣ ꠀꠞ ꠇꠥꠖꠞꠔꠦ ꠀꠡ꠆ꠔꠣ ꠊꠞ ꠜꠞꠤꠉꠦꠟ।
EXO 40:35 ꠄꠞꠟꠣꠉꠤ ꠝꠥꠍꠣ ꠀꠞ ꠝꠤꠟꠘ-ꠔꠣꠝ꠆ꠛꠥꠔ ꠢꠣꠝꠣꠁꠔꠣ ꠙꠣꠞꠟꠣ ꠘꠣ, ꠇꠣꠞꠘ ꠄꠞ ꠃꠙꠞꠦ ꠢꠃ ꠝꠦꠊꠞ ꠈꠥꠐꠤ ꠀꠍꠤꠟ, ꠀꠞ ꠝꠣꠛꠥꠖꠞ ꠇꠥꠖꠞꠔꠤ ꠝꠢꠤꠝꠣꠄ ꠀꠡ꠆ꠔꠣ ꠊꠞ ꠜꠞꠤ ꠉꠦꠍꠤꠟ।
EXO 40:36 ꠛꠘꠤ ꠁꠍꠞꠣꠁꠟꠞ ꠅꠃ ꠀꠡ꠆ꠔꠣ ꠍꠚꠞꠞ ꠝꠣꠎꠦ, ꠀꠟ꠆ꠟꠣꠞ ꠊꠞꠞ ꠃꠙꠞꠦ ꠕꠣꠇꠤ ꠝꠦꠊꠞ ꠈꠥꠐꠤ ꠢꠞꠤꠀ ꠢꠣꠞꠟꠦ ꠔꠣꠞꠣ ꠀꠐꠤꠀ ꠞꠅꠀꠘꠣ ꠖꠤꠔꠣ।
EXO 40:37 ꠅꠁꠟꠦ ꠝꠦꠊꠞ ꠈꠥꠐꠤ ꠃꠙꠞꠦ ꠕꠣꠇꠤ ꠘꠣ ꠢꠞꠣ ꠙꠞ꠆ꠎꠘ꠆ꠔ ꠔꠣꠞꠣ ꠛꠣꠞ ꠅꠁꠔꠣ ꠘꠣ, ꠅꠃ ꠈꠥꠐꠤ ꠢꠞꠣꠞ ꠟꠣꠉꠤ ꠛꠣꠞ ꠌꠣꠁꠔꠣ।
EXO 40:38 ꠇꠣꠞꠘ ꠛꠘꠤ ꠁꠍꠞꠣꠁꠟꠞ ꠅꠃ ꠀꠡ꠆ꠔꠣ ꠍꠚꠞꠞ ꠝꠣꠎꠦꠃ, ꠖꠤꠘꠞ ꠛꠣꠟꠣ ꠔꠣꠞꠣꠞ ꠌꠈꠥꠞ ꠍꠣꠝꠘꠦ ꠀꠟ꠆ꠟꠣꠞ ꠊꠞꠞ ꠃꠙꠞꠦ ꠝꠦꠊꠞ ꠈꠥꠐꠤ ꠞꠁꠔ, ꠀꠞ ꠞꠣꠁꠔꠞ ꠛꠣꠟꠣ ꠞꠁꠔ ꠀꠉꠥꠁꠘꠞ ꠈꠥꠐꠤ॥
LEV 1:1 ꠅꠃ ꠙꠛꠤꠔ꠆ꠞ ꠇꠣꠛꠣ ꠊꠞ ꠝꠣꠘꠤ ꠝꠤꠟꠘ-ꠔꠣꠝ꠆ꠛꠥ ꠛꠣꠘꠣꠘꠤꠞ ꠛꠣꠖꠦ, ꠝꠣꠛꠥꠖꠦ ꠝꠥꠍꠣ ꠘꠛꠤꠞꠦ ꠅꠘꠅ ꠀꠘꠣꠁꠀ ꠇꠁꠟꠣ,
LEV 1:2 “ꠔꠥꠝꠤ ꠢꠇꠟ ꠛꠘꠤ ꠁꠍꠞꠣꠁꠟꠞꠦ ꠎꠣꠘꠣꠁ ꠖꠦꠅ, ꠇꠦꠃ ꠎꠥꠖꠤ ꠇꠥꠞꠛꠣꠘꠤ ꠢꠤꠡꠣꠛꠦ ꠝꠣꠛꠥꠖꠞ ꠖꠞꠛꠣꠞꠅ ꠇꠥꠘꠥ ꠙꠡꠥ ꠖꠤꠔ ꠌꠣꠄ, ꠔꠦ ꠉꠞꠥ ꠛꠣ ꠍꠣꠉꠟ-ꠝꠦꠠꠣꠞ ꠙꠣꠟ ꠕꠣꠇꠤ ꠙꠡꠥ ꠀꠘꠤꠀ ꠇꠥꠞꠛꠣꠘꠤ ꠖꠤꠟꠣꠃꠇ।
LEV 1:3 “ꠇꠥꠞꠛꠣꠘꠤ ꠖꠦꠅꠞꠣꠄ ꠎꠥꠖꠤ ꠉꠞꠥꠞ ꠙꠣꠟ ꠕꠣꠇꠤ ꠎꠣꠟꠣꠁꠟ ꠇꠥꠞꠛꠣꠘꠤ ꠀꠖꠣꠄ ꠇꠞꠔ ꠌꠣꠄ, ꠔꠦ ꠙꠥꠞꠣꠙꠥꠞ ꠘꠤꠈꠥꠔ ꠄꠉꠥ ꠛꠤꠍꠣꠟ ꠀꠘꠔꠦ ꠅꠁꠛ। ꠀꠘꠤꠀ ꠝꠣꠛꠥꠖꠞꠦ ꠈꠥꠡꠤ ꠇꠞꠣꠞ ꠘꠤꠅꠔꠦ ꠅꠃ ꠛꠤꠍꠣꠟꠞꠦ ꠝꠤꠟꠘ-ꠔꠣꠝ꠆ꠛꠥꠞ ꠖꠥꠀꠞꠞ ꠉꠦꠍꠦ ꠟꠁꠀ ꠀꠁꠛ।
LEV 1:4 ꠀꠁꠀ ꠎꠣꠟꠣꠁꠟ ꠇꠥꠞꠛꠣꠘꠤꠞ ꠘꠤꠅꠔꠦ ꠀꠘꠣ ꠅꠃ ꠛꠤꠍꠣꠟꠞ ꠇꠟ꠆ꠟꠣꠞ ꠃꠙꠞꠦ ꠀꠔ ꠕꠁꠛ, ꠔꠦꠃ ꠔꠣꠞ ꠉꠥꠘꠣꠞ ꠇꠚꠞꠣ ꠢꠤꠡꠣꠛꠦ ꠁꠐꠣꠞꠦ ꠇꠛꠥꠟ ꠇꠞꠣ ꠅꠁꠛ।
LEV 1:5 ꠛꠣꠖꠦ ꠝꠣꠛꠥꠖꠞ ꠍꠣꠝꠘꠦ ꠅꠃ ꠛꠤꠍꠣꠟꠞꠦ ꠢꠦ ꠎꠛ ꠇꠞꠛ। ꠀꠞ ꠁꠝꠣꠝ ꠢꠣꠞꠥꠘꠞ ꠎꠦ ꠙꠥꠀꠂꠘ꠆ꠔꠦ ꠁꠝꠣꠝꠔꠤ ꠇꠞꠂꠘ, ꠔꠣꠞꠣ ꠅꠃ ꠛꠤꠍꠣꠟꠞ ꠟꠃ ꠘꠤꠀ ꠝꠤꠟꠘ-ꠔꠣꠝ꠆ꠛꠥꠞ ꠖꠥꠀꠞꠞ ꠍꠣꠝꠘꠞ ꠇꠥꠞꠛꠣꠘꠤ ꠈꠣꠘꠣꠞ ꠌꠣꠁꠞꠅ ꠉꠣꠟꠣꠔ ꠍꠤꠐꠣꠁ ꠖꠤꠛꠣ।
LEV 1:6 ꠛꠣꠖꠦ ꠇꠥꠞꠛꠣꠘꠤ ꠖꠦꠅꠞꠣꠄ ꠅꠃ ꠛꠤꠍꠣꠟꠞ ꠈꠣꠟ ꠈꠣꠟꠤꠀ ꠢꠣꠞꠤ, ꠅꠉꠥꠞ ꠉꠥꠡ꠆ꠔ ꠐꠥꠇꠞꠣ ꠐꠥꠇꠞꠣ ꠇꠞꠛꠣ।
LEV 1:7 ꠀꠞ ꠁꠝꠣꠝ ꠢꠣꠞꠥꠘꠞ ꠙꠥꠀꠂꠘ꠆ꠔꠦ ꠇꠥꠞꠛꠣꠘꠤ ꠈꠣꠘꠣꠞ ꠃꠙꠞꠦ ꠎꠣꠟꠣꠁꠟ ꠀꠋꠞꠣ ꠕꠁꠛꠣ, ꠄꠞ ꠃꠙꠞꠦ ꠖꠣꠞꠥ ꠢꠣꠎꠣꠁꠛꠣ।
LEV 1:8 ꠢꠣꠎꠣꠁꠀ ꠅꠃ ꠖꠣꠞꠥꠞ ꠃꠙꠞꠦ ꠛꠤꠍꠣꠟꠞ ꠇꠟ꠆ꠟꠣ, ꠌꠞ꠆ꠛꠤ, ꠉꠥꠡ꠆ꠔꠞ ꠐꠥꠇꠞꠣꠁꠘ ꠕꠁꠛꠣ।
LEV 1:9 ꠇꠥꠞꠛꠣꠘꠤ ꠖꠦꠅꠞꠣꠄ ꠉꠞꠥꠞ ꠑꠦꠋ ꠀꠞ ꠙꠦꠐꠞ ꠜꠤꠔꠞꠞ ꠢꠇ꠆ꠇꠟꠔꠣ ꠙꠣꠘꠤ ꠖꠤꠀ ꠗꠁꠀ ꠍꠣꠚ ꠇꠞꠤꠀ ꠖꠤꠛꠣ, ꠀꠞ ꠁꠝꠣꠝꠦ ꠅꠔꠣ ꠘꠤꠀ ꠀꠡ꠆ꠔꠣ ꠛꠤꠍꠣꠟꠞ ꠢꠇ꠆ꠇꠟꠔꠣ ꠇꠥꠞꠛꠣꠘꠤ ꠈꠣꠘꠣꠞ ꠃꠙꠞꠦ ꠎꠣꠟꠣꠁꠟꠤꠛꠣ। ꠁꠐꠣꠞ ꠘꠣꠝ ꠅꠁꠟ ꠎꠣꠟꠣꠁꠟ ꠇꠥꠞꠛꠣꠘꠤ, ꠝꠣꠛꠥꠖꠞ ꠘꠣꠝꠦ ꠀꠉꠥꠘꠤꠔ ꠖꠦꠅꠀ ꠇꠥꠞꠛꠣꠘꠤ, ꠅꠃ ꠗꠥꠝꠣꠞ ꠊꠦꠞꠣꠘꠦ ꠔꠣꠁꠘ ꠈꠥꠡꠤ ꠅꠁꠘ।
LEV 1:10 “ꠀꠞ ꠇꠥꠘꠥ ꠝꠣꠘꠡꠦ ꠎꠥꠖꠤ ꠍꠣꠉꠟ-ꠝꠦꠠꠣꠞ ꠙꠣꠟ ꠕꠣꠇꠤ ꠎꠣꠟꠣꠁꠟ ꠇꠥꠞꠛꠣꠘꠤ ꠀꠖꠣꠄ ꠇꠞꠣꠞ ꠈꠤꠀꠟꠤ ꠅꠄ, ꠔꠦ ꠁꠇꠐꠣ ꠙꠥꠞꠣꠙꠥꠞ ꠘꠤꠈꠥꠔ ꠄꠉꠥ ꠙꠣꠑꠣ ꠅꠁꠔꠦ ꠅꠁꠛ।
LEV 1:11 ꠇꠥꠞꠛꠣꠘꠤ ꠖꠦꠅꠞꠣꠄ ꠁꠇꠐꠣꠞꠦ ꠇꠥꠞꠛꠣꠘꠤ ꠈꠣꠘꠣꠞ ꠃꠔ꠆ꠔꠞ ꠉꠣꠟꠣꠔ ꠘꠤꠀ ꠝꠣꠛꠥꠖꠞ ꠍꠣꠝꠘꠦ ꠎꠛ ꠇꠞꠤꠀ ꠢꠣꠞꠟꠦ, ꠁꠝꠣꠝ ꠢꠣꠞꠥꠘꠞ ꠎꠦ ꠙꠥꠀꠂꠘ꠆ꠔꠦ ꠁꠝꠣꠝꠔꠤ ꠇꠞꠂꠘ, ꠔꠣꠞꠣ ꠅꠉꠥꠞ ꠟꠃ ꠘꠤꠀ ꠇꠥꠞꠛꠣꠘꠤ ꠈꠣꠘꠣꠞ ꠌꠣꠁꠞꠅ ꠉꠣꠟꠣꠔ ꠍꠤꠐꠣꠁ ꠖꠤꠛꠣ।
LEV 1:12 ꠛꠣꠖꠦ ꠇꠥꠞꠛꠣꠘꠤ ꠖꠦꠅꠞꠣꠄ ꠁꠐꠣꠞ ꠉꠥꠡ꠆ꠔ ꠐꠥꠇꠞꠣ ꠐꠥꠇꠞꠣ ꠇꠞꠤ ꠇꠣꠐꠤꠀ ꠖꠤꠟꠦ, ꠁꠝꠣꠝ ꠍꠣꠛꠦ ꠅꠉꠥꠞ ꠌꠞ꠆ꠛꠤ, ꠇꠟ꠆ꠟꠣ ꠀꠞ ꠉꠥꠡ꠆ꠔꠞ ꠐꠥꠇꠞꠣꠁꠘ ꠘꠤꠀ ꠇꠥꠞꠛꠣꠘꠤ ꠈꠣꠘꠣꠞ ꠎꠣꠟꠣꠁꠟ ꠀꠋꠞꠣꠞ ꠃꠙꠞꠞ ꠖꠣꠞꠥꠞ ꠃꠙꠞꠦ ꠢꠣꠎꠣꠁꠛꠣ।
LEV 1:13 ꠇꠥꠞꠛꠣꠘꠤ ꠖꠦꠅꠞꠣꠄ ꠁꠐꠣꠞ ꠑꠦꠋ, ꠙꠦꠐꠞ ꠜꠤꠔꠞꠞ ꠢꠇ꠆ꠇꠟꠔꠣ ꠙꠣꠘꠤ ꠖꠤꠀ ꠗꠁꠀ ꠍꠣꠚ ꠇꠞꠤꠀ ꠖꠤꠛꠣ, ꠀꠞ ꠁꠝꠣꠝ ꠍꠣꠛꠦ ꠁꠔꠣ ꠢꠇ꠆ꠇꠟꠔꠣ ꠡꠝꠦꠔ ꠀꠡ꠆ꠔꠣ ꠙꠡꠥꠞꠦ ꠇꠥꠞꠛꠣꠘꠤ ꠈꠣꠘꠣꠞ ꠃꠙꠞꠦ ꠎꠣꠟꠣꠁꠟꠤꠛꠣ। ꠁꠐꠣ ꠅꠁꠟ ꠎꠣꠟꠣꠁꠟ ꠇꠥꠞꠛꠣꠘꠤ, ꠝꠣꠛꠥꠖꠞ ꠘꠣꠝꠦ ꠀꠉꠥꠘꠤꠔ ꠖꠦꠅꠀ ꠊꠦꠞꠣꠘ ꠀꠟꠣ ꠇꠥꠞꠛꠣꠘꠤ, ꠅꠃ ꠗꠥꠝꠣꠞ ꠊꠦꠞꠣꠘꠦ ꠔꠣꠁꠘ ꠈꠥꠡꠤ ꠅꠁꠘ।
LEV 1:14 “ꠀꠞ ꠇꠥꠘꠥ ꠙꠣꠈꠤ ꠖꠤꠀ ꠎꠥꠖꠤ ꠝꠣꠛꠥꠖꠞ ꠘꠣꠝꠞ ꠅꠃ ꠎꠣꠟꠣꠁꠟ ꠇꠥꠞꠛꠣꠘꠤ ꠀꠖꠣꠄ ꠇꠞꠣꠞ ꠈꠤꠀꠟ ꠅꠄ, ꠔꠦ ꠇꠥꠞꠛꠣꠘꠤ ꠖꠦꠅꠞꠣꠄ ꠒꠥꠙꠤ ꠙꠣꠈꠤ ꠛꠣ ꠙꠣꠞꠅ ꠟꠁꠀ ꠀꠁꠛ।
LEV 1:15 ꠀꠁꠟꠦ, ꠁꠝꠣꠝꠦ ꠇꠥꠞꠛꠣꠘꠤ ꠈꠣꠘꠣꠞ ꠗꠣꠞꠅ ꠉꠤꠀ ꠅꠃ ꠙꠣꠈꠤꠞ ꠇꠟ꠆ꠟꠣ ꠝꠥꠞꠣ ꠝꠣꠞꠤꠀ ꠍꠤꠠꠤꠀ ꠀꠟꠉꠣꠁꠀ ꠢꠣꠞꠤ ꠇꠥꠞꠛꠣꠘꠤ ꠈꠣꠘꠣꠞ ꠃꠙꠞꠦ ꠅꠃ ꠇꠟ꠆ꠟꠣꠞꠦ ꠎꠣꠟꠣꠁꠟꠤꠛꠣ, ꠀꠞ ꠅꠉꠥꠞ ꠟꠃ ꠘꠤꠀ ꠇꠥꠞꠛꠣꠘꠤ ꠈꠣꠘꠣꠞ ꠄꠇ ꠉꠣꠟꠣꠔ ꠍꠤꠐꠣꠁ ꠖꠤꠛꠣ।
LEV 1:16 ꠁꠝꠣꠝꠦ ꠙꠣꠈꠤꠞ ꠜꠤꠔꠞꠞ ꠉꠤꠟꠣ-ꠕꠟꠤ ꠀꠞ ꠚꠁꠞ ꠘꠤꠀ ꠇꠥꠞꠛꠣꠘꠤ ꠈꠣꠘꠣꠞ ꠙꠥꠛ ꠉꠣꠟꠣꠞ ꠍꠣꠟꠤꠞ ꠐꠦꠇꠤꠞ ꠝꠣꠎꠦ ꠚꠣꠟꠣꠁ ꠖꠤꠛꠣ।
LEV 1:17 ꠀꠞ ꠅꠉꠥꠞ ꠒꠣꠈꠘꠣꠔ ꠗꠞꠤꠀ ꠅꠟꠣ ꠛꠣꠐꠦ ꠍꠤꠠꠤꠛꠣ, ꠎꠣꠔꠦ ꠁꠐꠣꠞ ꠖꠥꠁ ꠐꠥꠇꠞꠣ ꠙꠥꠞꠣꠙꠥꠞ ꠀꠟꠉ ꠘꠣ ꠅꠄ। ꠛꠣꠖꠦ ꠁꠝꠣꠝ ꠍꠣꠛꠦ ꠁꠐꠣ ꠘꠤꠀ ꠇꠥꠞꠛꠣꠘꠤ ꠈꠣꠘꠣꠞ ꠎꠣꠟꠣꠁꠟ ꠀꠋꠞꠣꠞ ꠃꠙꠞꠞ ꠖꠣꠞꠥꠞ ꠃꠙꠞꠦ ꠕꠁꠀ ꠎꠣꠟꠣꠁꠟꠤꠛꠣ। ꠁꠐꠣꠅ ꠅꠁꠟ ꠎꠣꠟꠣꠁꠟ ꠇꠥꠞꠛꠣꠘꠤ, ꠝꠣꠛꠥꠖꠞ ꠘꠣꠝꠦ ꠀꠉꠥꠘꠤꠔ ꠖꠦꠅꠀ ꠊꠦꠞꠣꠘ ꠀꠟꠣ ꠇꠥꠞꠛꠣꠘꠤ, ꠅꠃ ꠗꠥꠝꠣꠞ ꠊꠦꠞꠣꠘꠦ ꠔꠣꠁꠘ ꠈꠥꠡꠤ ꠅꠁꠘ।
LEV 2:1 “ꠇꠥꠘꠥ ꠝꠣꠘꠡꠦ ꠎꠥꠖꠤ ꠗꠣꠘ-ꠉꠝ ꠖꠤꠀ ꠝꠣꠛꠥꠖꠞ ꠘꠣꠝꠦ ꠟꠤꠟ꠆ꠟꠣ-ꠍꠖꠉꠣ ꠖꠤꠔ ꠌꠣꠄ, ꠔꠦ ꠘꠤꠞꠦꠇ ꠝꠄꠖꠣ ꠖꠤꠀ ꠀꠖꠣꠄ ꠇꠞꠛ। ꠅꠃ ꠝꠄꠖꠣꠞ ꠃꠙꠞꠦ ꠢꠦ ꠎꠄꠔꠥꠘꠞ ꠔꠦꠟ ꠀꠞ ꠟꠥꠛꠣꠘ-ꠀꠉꠞꠞ ꠗꠥꠘꠣ ꠖꠤꠛ।
LEV 2:2 ꠖꠤꠀ ꠁꠝꠣꠝ ꠢꠣꠞꠥꠘꠞ ꠎꠦ ꠙꠥꠀꠂꠘ꠆ꠔꠦ ꠁꠝꠣꠝꠔꠤ ꠇꠞꠂꠘ ꠔꠣꠞꠣꠞ ꠉꠦꠍꠦ ꠅꠔꠣ ꠟꠁꠀ ꠀꠁꠛ। ꠁꠝꠣꠝꠦ ꠅꠔꠣ ꠕꠣꠇꠤ ꠔꠦꠟ ꠝꠤꠡꠣꠁꠟ ꠄꠇ ꠝꠥꠁꠐ ꠝꠄꠖꠣ ꠀꠞ ꠢꠇꠟ ꠀꠉꠞ ꠟꠁꠀ, ꠔꠣꠞ ꠀꠘꠣ ꠢꠇ꠆ꠇꠟꠔꠣꠞ ꠛꠖꠟꠣ ꠘꠤꠡꠣꠘꠣ ꠢꠤꠡꠣꠛꠦ ꠅꠃ ꠅꠋꠡꠞꠦ ꠇꠥꠞꠛꠣꠘꠤ ꠈꠣꠘꠣꠞ ꠃꠙꠞꠦ ꠎꠣꠟꠣꠁꠟꠤꠛꠣ। ꠁꠔꠣ ꠅꠁꠟ ꠝꠣꠛꠥꠖꠞ ꠘꠣꠝꠦ ꠀꠉꠥꠘꠤꠔ ꠖꠦꠅꠀ ꠇꠥꠞꠛꠣꠘꠤ, ꠁꠔꠣꠞ ꠗꠥꠝꠣꠞ ꠊꠦꠞꠣꠘꠦ ꠔꠣꠁꠘ ꠈꠥꠡꠤ ꠅꠁꠘ।
LEV 2:3 ꠎꠣꠟꠣꠘꠤꠞ ꠛꠣꠖꠦ ꠎꠔꠈꠣꠘ ꠛꠣꠇꠤ ꠞꠁꠛ, ꠁꠔꠣ ꠁꠝꠣꠝ ꠢꠣꠞꠥꠘ ꠀꠞ ꠔꠣꠘ ꠙꠥꠀꠂꠘ꠆ꠔꠦ ꠙꠣꠁꠛꠣ। ꠝꠣꠛꠥꠖꠞ ꠘꠣꠝꠞ ꠀꠉꠥꠘꠤꠔ ꠖꠦꠅꠀ ꠇꠥꠞꠛꠣꠘꠤꠞ ꠅꠋꠡ ꠅꠀꠄ, ꠛꠣꠌꠤ ꠎꠣꠅꠀ ꠅꠃ ꠝꠄꠖꠣ ꠔ ꠈꠣꠍ ꠙꠛꠤꠔ꠆ꠞ ꠎꠤꠘꠤꠡ।
LEV 2:4 “ꠀꠞ ꠇꠦꠃ ꠎꠥꠖꠤ ꠔꠥꠘ꠆ꠖꠥꠞꠤ ꠃꠘ꠆ꠖꠣꠟꠅ ꠢꠦꠖꠤꠀ ꠀꠘꠣ ꠇꠥꠘꠥ ꠗꠣꠘ-ꠉꠝꠞ ꠍꠖꠉꠣ ꠀꠖꠣꠄ ꠇꠞꠔ ꠌꠣꠄ, ꠔꠦ ꠔꠦꠟ ꠝꠤꠡꠣꠁꠟ ꠘꠤꠞꠦꠇ ꠝꠄꠖꠣ ꠖꠤꠀ ꠈꠣꠝꠤꠞ ꠍꠣꠠꠣ ꠞꠥꠐꠤ ꠛꠣ ꠛꠣꠘꠣꠁꠟ ꠞꠥꠐꠤꠔ ꠔꠦꠟ ꠝꠣꠈꠣꠁꠀ ꠟꠁꠀ ꠀꠁꠛ।
LEV 2:5 ꠀꠞ ꠅꠃ ꠍꠖꠉꠣꠞ ꠞꠥꠐꠤ ꠎꠥꠖꠤ ꠔꠣꠅꠀꠔ ꠢꠦꠖꠤꠀ ꠀꠘꠣ ꠅꠄ, ꠔꠦ ꠁꠔꠣ ꠔꠦꠟ ꠝꠤꠡꠣꠁꠟ ꠈꠣꠝꠤꠞ ꠍꠣꠠꠣ ꠘꠤꠞꠦꠇ ꠝꠄꠖꠣ ꠖꠤꠀ ꠛꠣꠘꠣꠁꠀ ꠀꠘꠔꠦ ꠅꠁꠛ।
LEV 2:6 ꠀꠘꠤꠀ ꠁꠔꠣ ꠐꠥꠇꠞꠣ ꠐꠥꠇꠞꠣ ꠇꠞꠤꠀ ꠄꠞ ꠃꠙꠞꠦ ꠔꠦꠟ ꠓꠣꠟꠤꠀ ꠖꠤꠔꠦ ꠅꠁꠛ, ꠁꠔꠣꠅ ꠗꠣꠘ-ꠉꠝꠞ ꠄꠇ ꠘꠝꠥꠘꠣꠞ ꠍꠖꠉꠣ।
LEV 2:7 ꠀꠞ ꠅꠃ ꠍꠖꠉꠣꠞ ꠞꠥꠐꠤ ꠎꠥꠖꠤ ꠟꠥꠀꠠꠤꠞ ꠝꠣꠎꠦ ꠜꠣꠎꠤꠀ ꠀꠘꠣ ꠅꠄ, ꠔꠦ ꠁꠔꠣꠅ ꠔꠦꠟ ꠀꠞ ꠘꠤꠞꠦꠇ ꠝꠄꠖꠣ ꠖꠤꠀ ꠛꠣꠘꠣꠁꠀ ꠀꠘꠛꠣꠄ।
LEV 2:8 ꠅꠟꠣ ꠎꠦꠇꠥꠘꠥ ꠘꠝꠥꠘꠣꠄ ꠛꠣꠘꠣꠁꠟ ꠗꠣꠘ-ꠉꠝꠞ ꠍꠖꠉꠣꠞꠦ ꠝꠣꠛꠥꠖꠞ ꠘꠣꠝꠦ ꠀꠘꠤꠀ ꠁꠝꠣꠝꠞ ꠀꠔꠅ ꠡꠝꠎꠣꠁ ꠖꠤꠛꠣꠄ, ꠁꠝꠣꠝꠦ ꠁꠔꠣ ꠇꠥꠞꠛꠣꠘꠤ ꠈꠣꠘꠣꠞ ꠉꠦꠍꠦ ꠘꠤꠛꠣ।
LEV 2:9 ꠘꠤꠀ ꠔꠣꠞ ꠀꠘꠣ ꠅꠃ ꠢꠇ꠆ꠇꠟꠔꠣꠞ ꠛꠖꠟꠣ ꠘꠤꠡꠣꠘꠣ ꠢꠤꠡꠣꠛꠦ, ꠁꠝꠣꠝꠦ ꠅꠈꠣꠘ ꠕꠣꠇꠤ ꠇꠤꠍꠥ ꠅꠋꠡ ꠀꠟꠉꠣꠁꠀ ꠇꠥꠞꠛꠣꠘꠤ ꠈꠣꠘꠣꠞ ꠃꠙꠞꠦ ꠎꠣꠟꠣꠁꠟꠤꠛꠣ। ꠁꠔꠣ ꠅꠁꠟ ꠀꠉꠥꠘꠤꠔ ꠖꠦꠅꠀ ꠇꠥꠞꠛꠣꠘꠤ, ꠄꠞ ꠗꠥꠝꠣꠞ ꠊꠦꠞꠣꠘꠦ ꠝꠣꠛꠥꠖ ꠈꠥꠡꠤ ꠅꠁꠘ।
LEV 2:10 ꠅꠃ ꠅꠋꠡ ꠎꠣꠟꠣꠁꠀ ꠢꠣꠞꠟꠦ ꠛꠣꠖ-ꠛꠣꠇꠤ ꠎꠦꠔꠣ ꠞꠁꠛ, ꠁꠔꠣ ꠢꠇꠟꠔꠣ ꠁꠝꠣꠝ ꠢꠣꠞꠥꠘ ꠀꠞ ꠔꠣꠘ ꠙꠥꠀꠂꠘ꠆ꠔꠦ ꠙꠣꠁꠛꠣ। ꠝꠣꠛꠥꠖꠞ ꠘꠣꠝꠦ ꠀꠉꠥꠘꠤꠔ ꠖꠦꠅꠀ ꠇꠥꠞꠛꠣꠘꠤꠞ ꠅꠋꠡ ꠅꠀꠄ, ꠛꠣꠌꠤ ꠎꠣꠅꠀ ꠅꠃ ꠍꠖꠉꠣꠞ ꠞꠥꠐꠤ ꠔ ꠈꠣꠍ ꠙꠛꠤꠔ꠆ꠞ ꠎꠤꠘꠤꠡ।
LEV 2:11 “ꠀꠞ ꠢꠥꠘꠅ, ꠝꠣꠛꠥꠖꠞ ꠘꠣꠝꠦ ꠗꠣꠘ-ꠉꠝꠞ ꠍꠖꠉꠣꠞ ꠘꠤꠅꠔꠦ ꠎꠔꠔꠣ ꠀꠘꠣ ꠅꠁꠛ, ꠁꠔꠣ ꠢꠇꠟꠔꠣꠃ ꠎꠣꠘꠥ ꠈꠣꠝꠤꠞ ꠍꠣꠠꠣ ꠔꠤꠀꠞ ꠇꠞꠣ ꠅꠄ। ꠢꠥꠡꠤꠀꠞ ꠞꠁꠅ, ꠔꠥꠝꠞꠣ ꠝꠣꠛꠥꠖꠞ ꠘꠣꠝꠞ ꠀꠉꠥꠘꠤꠔ ꠖꠦꠅꠀ ꠟꠤꠟ꠆ꠟꠣ-ꠍꠖꠉꠣꠞ ꠝꠣꠟꠞ ꠟꠉꠦ ꠇꠥꠘꠥ ꠈꠣꠝꠤꠞ ꠛꠣ ꠝꠃ ꠎꠣꠟꠣꠁꠅ ꠘꠣ।
LEV 2:12 ꠔꠣ-ꠅ ꠈꠦꠔꠞ ꠙꠄꠟꠣ ꠚꠄ-ꠚꠡꠟꠞ ꠍꠖꠉꠣꠞ ꠟꠉꠦ ꠔꠥꠝꠞꠣ ꠝꠃ ꠛꠣ ꠈꠣꠝꠤꠞ ꠝꠣꠛꠥꠖꠞ ꠘꠣꠝꠦ ꠖꠤꠔꠣꠄ ꠙꠣꠞꠛꠣꠄ, ꠅꠁꠟꠦ ꠗꠥꠝꠣꠞ ꠊꠦꠞꠣꠘ ꠀꠟꠣ ꠍꠖꠉꠣꠞ ꠘꠤꠅꠔꠦ ꠈꠣꠝꠤꠞ ꠛꠣ ꠝꠃ ꠇꠥꠞꠛꠣꠘꠤ ꠈꠣꠘꠣꠔ ꠎꠣꠟꠣꠁꠟ ꠎꠣꠁꠔ ꠘꠣꠄ।
LEV 2:13 ꠈꠤꠀꠟ ꠞꠣꠈꠤꠅ, ꠔꠥꠝꠞꠣ ꠗꠣꠘ-ꠉꠝꠞ ꠍꠖꠉꠣꠞ ꠘꠤꠅꠔꠦ ꠎꠔꠔꠣ ꠛꠣꠘꠣꠁꠀ ꠀꠘꠛꠣꠄ, ꠁꠔꠣ ꠢꠇ꠆ꠇꠟꠔꠣꠞ ꠝꠣꠎꠦ ꠘꠥꠘ ꠝꠤꠡꠣꠁꠛꠣꠄ। ꠛꠘꠤ ꠁꠍꠞꠣꠁꠟꠞ ꠀꠟ꠆ꠟꠣꠞ ꠅꠀꠖꠣ-ꠌꠥꠇ꠆ꠔꠤꠞꠦ ꠝꠘꠅ ꠞꠣꠈꠤꠀ, ꠔꠥꠝꠞꠣ ꠢꠇꠟ ꠘꠝꠥꠘꠣꠞ ꠗꠣꠘ-ꠉꠝꠞ ꠍꠖꠉꠣꠔ ꠘꠥꠘ ꠖꠤꠔꠦ ꠚꠣꠃꠞꠤꠅ ꠘꠣ। ꠔꠥꠝꠞꠣꠞ ꠢꠇ꠆ꠇꠟ ꠇꠥꠞꠛꠣꠘꠤꠞ ꠝꠣꠎꠦ ꠘꠥꠘ ꠖꠤꠅ।
LEV 2:14 “ꠔꠥꠝꠞꠣꠞ ꠈꠦꠔꠞ ꠙꠄꠟꠣ ꠖꠣꠅꠀ ꠗꠣꠘ-ꠉꠝꠞ ꠇꠥꠘꠥ ꠚꠡꠟ ꠎꠥꠖꠤ ꠝꠣꠛꠥꠖꠞ ꠘꠣꠝꠦ ꠟꠤꠟ꠆ꠟꠣ-ꠍꠖꠉꠣ ꠢꠤꠡꠣꠛꠦ ꠟꠁꠀ ꠀꠅ, ꠔꠦ ꠁꠔꠣ ꠝꠣꠠꠣ ꠖꠦꠅꠀ ꠇꠣꠌꠣ ꠘꠄꠀ ꠗꠣꠘ-ꠉꠝ ꠛꠣ ꠀꠡ꠆ꠔꠣ ꠍꠠꠣꠞꠦ ꠀꠉꠥꠁꠘꠖꠤ ꠢꠦꠖꠤꠀ ꠀꠘꠛꠣꠄ।
LEV 2:15 ꠁꠔꠣꠞ ꠃꠙꠞꠦ ꠔꠦꠟ ꠀꠞ ꠟꠥꠛꠣꠘ-ꠀꠉꠞ ꠖꠤꠛꠣꠄ, ꠁꠔꠣ ꠅꠁꠟ ꠄꠇ ꠘꠝꠥꠘꠣꠞ ꠗꠣꠘ-ꠉꠝꠞ ꠍꠖꠉꠣ।
LEV 2:16 ꠅꠃ ꠍꠖꠉꠣ ꠟꠁꠀ ꠀꠁꠟꠦ, ꠁꠝꠣꠝ ꠍꠣꠛꠦ ꠘꠤꠡꠣꠘꠣ ꠢꠤꠡꠣꠛꠦ ꠅꠃ ꠎꠘꠞ ꠀꠘꠣ ꠗꠣꠘ-ꠉꠝꠞ ꠍꠖꠉꠣꠞ ꠇꠤꠍꠥ ꠅꠋꠡ, ꠇꠤꠍꠥ ꠔꠦꠟ ꠀꠞ ꠢꠇꠟ ꠀꠉꠞ ꠘꠤꠀ ꠇꠥꠞꠛꠣꠘꠤ ꠈꠣꠘꠣꠔ ꠎꠣꠟꠣꠁꠟꠤꠛꠣ, ꠁꠔꠣ ꠅꠁꠟ ꠝꠣꠛꠥꠖꠞ ꠘꠣꠝꠦ ꠀꠉꠥꠘꠤꠔ ꠖꠦꠅꠀ ꠇꠥꠞꠛꠣꠘꠤ।
LEV 3:1 “ꠇꠥꠘꠥ ꠝꠣꠘꠡꠦ ꠎꠥꠖꠤ ꠝꠣꠛꠥꠖꠞ ꠘꠣꠝꠦ ꠘꠤꠎꠞ ꠈꠥꠡꠤꠄ ꠍꠣꠟꠣꠝꠔꠤ ꠇꠥꠞꠛꠣꠘꠤ ꠀꠖꠣꠄ ꠇꠞꠣꠞ ꠘꠤꠅꠔꠦ ꠇꠥꠘꠥ ꠉꠣꠁ ꠛꠣ ꠛꠤꠍꠣꠟꠞꠦ ꠇꠥꠞꠛꠣꠘꠤ ꠖꠤꠔ ꠌꠣꠄ, ꠔꠦ ꠁ ꠉꠞꠥ ꠙꠥꠞꠣꠙꠥꠞ ꠘꠤꠈꠥꠔ ꠅꠁꠔꠦ ꠅꠁꠛ।
LEV 3:2 ꠇꠥꠞꠛꠣꠘꠤ ꠖꠦꠅꠞꠣꠄ ꠅꠃ ꠙꠡꠥꠞ ꠇꠟ꠆ꠟꠣ ꠀꠔꠣꠁꠀ ꠖꠤꠀ, ꠝꠤꠟꠘ-ꠔꠣꠝ꠆ꠛꠥꠞ ꠖꠥꠀꠞꠞ ꠍꠣꠝꠘꠦ ꠁꠐꠣꠞꠦ ꠎꠛ ꠇꠞꠛ। ꠛꠣꠖꠦ ꠁꠝꠣꠝ ꠢꠣꠞꠥꠘꠞ ꠙꠥꠀꠂꠘ꠆ꠔꠞ ꠝꠣꠎꠞ ꠁꠝꠣꠝ ꠅꠇꠟꠦ ꠅꠉꠥꠞ ꠟꠃ ꠘꠤꠀ ꠇꠥꠞꠛꠣꠘꠤ ꠈꠣꠘꠣꠞ ꠌꠣꠁꠞꠅ ꠉꠣꠟꠣꠔ ꠍꠤꠐꠣꠁ ꠖꠤꠛꠣ।
LEV 3:3 ꠀꠞ ꠇꠥꠞꠛꠣꠘꠤ ꠖꠦꠅꠞꠣꠄ ꠝꠣꠛꠥꠖꠞ ꠘꠣꠝꠦ ꠀꠘꠣ ꠍꠣꠟꠣꠝꠔꠤ ꠇꠥꠞꠛꠣꠘꠤꠞ ꠙꠡꠥꠞ ꠅꠃ ꠅꠋꠡ ꠅꠇꠟ ꠖꠤꠛꠣ। ꠅꠉꠥꠞ ꠙꠦꠐꠞ ꠜꠤꠔꠞꠞ ꠢꠇ꠆ꠇꠟꠔꠣꠞ ꠃꠙꠞꠞ ꠌꠞ꠆ꠛꠤ,
LEV 3:4 ꠖꠥꠁꠅ ꠇꠤꠒꠘꠤ ꠀꠞ ꠅꠔꠣꠞ ꠌꠞ꠆ꠛꠤ, ꠇꠁꠟꠎꠣꠞ ꠟꠉꠞ ꠝꠣꠐꠤꠀ, ꠅꠃ ꠢꠇꠟꠔꠣ ꠀꠘꠤꠀ ꠁꠝꠣꠝꠞ ꠉꠦꠍꠦ ꠖꠤꠛꠣ।
LEV 3:5 ꠛꠣꠖꠦ ꠢꠣꠞꠥꠘꠞ ꠙꠥꠀꠂꠘ꠆ꠔꠦ ꠇꠥꠞꠛꠣꠘꠤ ꠈꠣꠘꠣꠞ ꠃꠙꠞꠦ ꠢꠣꠎꠣꠁꠟ ꠖꠣꠞꠥ ꠀꠞ ꠇꠥꠞꠛꠣꠘꠤꠞ ꠙꠡꠥꠞ ꠃꠙꠞꠦ ꠁꠔꠣ ꠢꠇꠟꠔꠣ ꠞꠣꠈꠤꠀ ꠄꠇꠟꠉꠦ ꠎꠣꠟꠣꠁꠟꠤꠛꠣ। ꠁꠔꠣ ꠔ ꠄꠇ ꠘꠝꠥꠘꠣꠞ ꠀꠉꠥꠘꠤꠔ ꠖꠦꠅꠀ ꠇꠥꠞꠛꠣꠘꠤ, ꠁꠔꠣꠞ ꠗꠥꠝꠣꠞ ꠊꠦꠞꠣꠘꠦ ꠝꠣꠛꠥꠖ ꠈꠥꠡꠤ ꠅꠁꠘ।
LEV 3:6 “ꠇꠥꠘꠥ ꠝꠣꠘꠡꠦ ꠎꠥꠖꠤ ꠝꠣꠛꠥꠖꠞ ꠘꠣꠝꠦ ꠍꠣꠟꠣꠝꠔꠤ ꠇꠥꠞꠛꠣꠘꠤ ꠀꠖꠣꠄ ꠇꠞꠣꠞ ꠟꠣꠉꠤ ꠍꠣꠉꠟ-ꠝꠦꠠꠣꠞ ꠙꠣꠟ ꠕꠣꠇꠤ ꠇꠥꠘꠥ ꠙꠡꠥꠞꠦ ꠇꠥꠞꠛꠣꠘꠤ ꠖꠤꠛꠣꠞ ꠘꠤꠅꠔ ꠇꠞꠦ, ꠔꠦ ꠁ ꠙꠡꠥ ꠝꠦꠖꠣ ꠛꠣ ꠝꠦꠖꠤ ꠅꠁꠟꠦꠅ ꠌꠟꠛ, ꠅꠁꠟꠦ ꠁꠐꠣ ꠙꠥꠞꠣꠙꠥꠞ ꠘꠤꠈꠥꠔ ꠅꠁꠔꠦ ꠅꠁꠛ।
LEV 3:7 ꠇꠥꠞꠛꠣꠘꠤ ꠖꠤꠛꠣꠞ ꠘꠤꠅꠔꠦ ꠎꠥꠖꠤ ꠝꠦꠠꠣ ꠀꠘꠦ, ꠔꠦ ꠝꠣꠛꠥꠖꠞ ꠍꠣꠝꠘꠦ ꠁꠐꠣ ꠀꠎꠤꠞ ꠇꠞꠛꠣ।
LEV 3:8 ꠇꠥꠞꠛꠣꠘꠤ ꠖꠦꠅꠞꠣꠄ ꠅꠃ ꠝꠦꠠꠣꠞ ꠇꠟ꠆ꠟꠣ ꠀꠔꠣꠁ ꠖꠤꠀ, ꠝꠤꠟꠘ-ꠔꠣꠝ꠆ꠛꠥꠞ ꠖꠥꠀꠞꠞ ꠍꠣꠝꠘꠦ ꠁꠐꠣꠞꠦ ꠎꠛ ꠇꠞꠛ। ꠛꠣꠖꠦ ꠁꠝꠣꠝ ꠢꠣꠞꠥꠘꠞ ꠙꠥꠀꠂꠘ꠆ꠔꠞ ꠝꠣꠎꠞ ꠁꠝꠣꠝ ꠅꠇꠟꠦ ꠅꠉꠥꠞ ꠟꠃ ꠘꠤꠀ ꠇꠥꠞꠛꠣꠘꠤ ꠈꠣꠘꠣꠞ ꠌꠣꠁꠞꠅ ꠉꠣꠟꠣꠔ ꠍꠤꠐꠣꠁ ꠖꠤꠛꠣ।
LEV 3:9 ꠇꠥꠞꠛꠣꠘꠤ ꠖꠦꠅꠞꠣꠄ ꠝꠣꠛꠥꠖꠞ ꠘꠣꠝꠦ ꠀꠉꠥꠘꠤꠔ ꠖꠦꠅꠀ ꠇꠥꠞꠛꠣꠘꠤ ꠢꠤꠡꠣꠛꠦ ꠀꠘꠣ, ꠅꠃ ꠍꠣꠟꠣꠝꠔꠤ ꠇꠥꠞꠛꠣꠘꠤꠞ ꠝꠦꠠꠣꠞ ꠢꠇꠟ ꠌꠞ꠆ꠛꠤ ꠁꠝꠣꠝꠞ ꠉꠦꠍꠦ ꠖꠤꠛꠣ। ꠔꠣꠁꠘ ꠌꠞ꠆ꠛꠤ ꠀꠟꠣ ꠟꠦꠋꠉꠥꠠ, ꠙꠦꠐꠞ ꠜꠤꠔꠞꠞ ꠢꠇꠟꠔꠣꠞ ꠃꠙꠞꠞ ꠌꠞ꠆ꠛꠤ, ꠁꠔꠣꠞ ꠟꠉꠦ ꠟꠣꠉꠣꠁꠟ ꠌꠞ꠆ꠛꠤ,
LEV 3:10 ꠖꠥꠁꠅ ꠇꠤꠒꠘꠤ ꠀꠞ ꠅꠔꠣꠞ ꠢꠇꠟ ꠌꠞ꠆ꠛꠤ, ꠇꠁꠟꠎꠣꠞ ꠟꠉꠞ ꠝꠣꠐꠤꠀ, ꠅꠔꠣ ꠢꠇꠟꠔꠣ ꠀꠘꠤꠀ ꠁꠝꠣꠝ ꠍꠣꠛꠞ ꠉꠦꠍꠦ ꠖꠤꠛꠣ।
LEV 3:11 ꠁꠝꠣꠝꠦ ꠁꠔꠣ ꠘꠤꠀ ꠇꠥꠞꠛꠣꠘꠤ ꠈꠣꠘꠣꠞ ꠀꠉꠥꠘꠤꠞ ꠃꠙꠞꠦ ꠎꠣꠟꠣꠁꠟꠤꠛꠣ, ꠁꠔꠣ ꠅꠁꠟ ꠝꠣꠛꠥꠖꠞ ꠘꠣꠝꠦ ꠀꠉꠥꠘꠤꠔ ꠖꠦꠅꠀ ꠇꠥꠞꠛꠣꠘꠤꠞ ꠈꠣꠘꠤ।
LEV 3:12 “ꠀꠞ ꠇꠥꠞꠛꠣꠘꠤ ꠖꠤꠛꠣꠞ ꠘꠤꠅꠔꠦ ꠢꠦ ꠎꠥꠖꠤ ꠍꠣꠉꠟ ꠀꠘꠦ, ꠔꠦ ꠢꠦ ꠁꠐꠣꠞꠦ ꠝꠣꠛꠥꠖꠞ ꠍꠣꠝꠘꠦ ꠀꠎꠤꠞ ꠇꠞꠛ।
LEV 3:13 ꠢꠦ ꠅꠉꠥꠞ ꠇꠟ꠆ꠟꠣ ꠀꠔꠣꠁ ꠖꠤꠀ, ꠝꠤꠟꠘ-ꠔꠣꠝ꠆ꠛꠥꠞ ꠖꠥꠀꠞꠞ ꠍꠣꠝꠘꠦ ꠁꠐꠣꠞꠦ ꠎꠛ ꠇꠞꠛ, ꠛꠣꠖꠦ ꠢꠣꠞꠥꠘꠞ ꠙꠥꠀꠂꠘ꠆ꠔꠦ ꠅꠉꠥꠞ ꠟꠃ ꠘꠤꠀ ꠇꠥꠞꠛꠣꠘꠤ ꠈꠣꠘꠣꠞ ꠌꠣꠁꠞꠅ ꠉꠣꠟꠣꠔ ꠍꠤꠐꠣꠁ ꠖꠤꠛꠣ।
LEV 3:14 ꠇꠥꠞꠛꠣꠘꠤ ꠖꠦꠅꠞꠣꠄ ꠙꠡꠥꠞ ꠅꠃ ꠅꠋꠡ ꠅꠇꠟ ꠘꠤꠀ, ꠝꠣꠛꠥꠖꠞ ꠘꠣꠝꠦ ꠀꠉꠥꠘꠤꠔ ꠖꠦꠅꠀ ꠇꠥꠞꠛꠣꠘꠤ ꠢꠤꠡꠣꠛꠦ ꠁꠝꠣꠝꠞ ꠉꠦꠍꠦ ꠖꠤꠛ। ꠢꠦ ꠙꠡꠥꠞ ꠙꠦꠐꠞ ꠜꠤꠔꠞꠞ ꠢꠇꠟꠔꠣꠞ ꠃꠙꠞꠞ ꠌꠞ꠆ꠛꠤ, ꠁꠔꠣꠞ ꠟꠉꠦ ꠟꠣꠉꠣꠁꠟ ꠌꠞ꠆ꠛꠤ,
LEV 3:15 ꠖꠥꠁꠅ ꠇꠤꠒꠘꠤ ꠀꠞ ꠅꠔꠣꠞ ꠃꠙꠞꠞ ꠌꠞ꠆ꠛꠤ, ꠇꠁꠟꠎꠣꠞ ꠟꠉꠞ ꠝꠣꠐꠤꠀ, ꠅꠔꠣ ꠢꠇꠟꠔꠣ ꠀꠘꠤꠀ ꠁꠝꠣꠝꠞ ꠉꠦꠍꠦ ꠖꠤꠛ।
LEV 3:16 ꠁꠝꠣꠝꠦ ꠁꠔꠣ ꠢꠇꠟꠔꠣ ꠘꠤꠀ ꠇꠥꠞꠛꠣꠘꠤ ꠈꠣꠘꠣꠞ ꠃꠙꠞꠦ ꠎꠣꠟꠣꠁꠟꠤꠛꠣ, ꠁꠔꠣ ꠔ ꠀꠉꠥꠘꠤꠔ ꠖꠦꠅꠀ ꠇꠥꠞꠛꠣꠘꠤꠞ ꠈꠣꠘꠤ, ꠁꠔꠣꠞ ꠗꠥꠝꠣꠞ ꠊꠦꠞꠣꠘꠦ ꠝꠣꠛꠥꠖ ꠈꠥꠡꠤ ꠅꠁꠘ। “ꠝꠘꠅ ꠞꠣꠈꠤꠅ, ꠇꠥꠞꠛꠣꠘꠤꠞ ꠙꠡꠥꠞ ꠢꠇ꠆ꠇꠟ ꠌꠞ꠆ꠛꠤ ꠅꠁꠟ ꠝꠣꠛꠥꠖꠞ।
LEV 3:17 ꠔꠥꠝꠞꠣ ꠛꠋꠡꠞ ꠙꠞ ꠛꠋꠡ ꠗꠞꠤꠀ ꠅꠃ ꠘꠤꠅꠝ ꠝꠣꠘꠤꠅ, ꠎꠦꠇꠥꠘꠥ ꠎꠣꠉꠣꠔ ꠛꠡꠔ ꠇꠞꠅ ꠘꠣ ꠇꠦꠘꠦ ꠇꠥꠘꠥꠖꠤꠘ ꠌꠞ꠆ꠛꠤ ꠛꠣ ꠟꠃ ꠈꠣꠁꠅ ꠘꠣ, ꠁꠔꠣ ꠢꠣꠞꠣꠝ।”
LEV 4:1 ꠛꠣꠖꠦ ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ,
LEV 4:2 “ꠔꠥꠝꠤ ꠛꠘꠤ ꠁꠍꠞꠣꠁꠟꠞꠦ ꠇꠅ, ꠘꠣ ꠎꠣꠘꠣꠞ ꠇꠣꠞꠘꠦ ꠇꠦꠃ ꠎꠥꠖꠤ ꠜꠥꠟ ꠇꠞꠤꠀ ꠀꠟ꠆ꠟꠣꠞ ꠘꠤꠡꠦꠗ ꠇꠞꠣ ꠇꠥꠘꠥ ꠉꠥꠘꠣꠞ ꠇꠣꠝ ꠇꠞꠤꠟꠣꠄ, ꠔꠦ ꠔꠣꠁꠘ ꠅꠃ ꠘꠝꠥꠘꠣꠄ ꠉꠥꠘꠣꠞ ꠇꠚꠞꠣꠞ ꠇꠥꠞꠛꠣꠘꠤ ꠀꠖꠣꠄ ꠇꠞꠛꠣ।
LEV 4:3 “ꠄꠁꠘ ꠈꠦꠟꠣꠚꠔꠤ ꠙꠣꠅꠀ ꠙꠞꠗꠣꠘ ꠁꠝꠣꠝ ꠍꠣꠛ ꠅꠁꠟꠦ, ꠔꠣꠘ ꠉꠥꠘꠣꠞ ꠖꠣꠄ-ꠜꠣꠞ ꠢꠇꠟ ꠝꠣꠘꠡꠞ ꠃꠙꠞꠦ ꠛꠞ꠆ꠔꠦ, ꠄꠞꠟꠣꠉꠤ ꠔꠣꠁꠘ ꠘꠤꠈꠥꠔ ꠄꠉꠥ ꠛꠤꠍꠣꠟ ꠀꠘꠤꠀ ꠝꠣꠛꠥꠖꠞ ꠖꠞꠛꠣꠞꠅ ꠔꠣꠘ ꠉꠥꠘꠣꠞ ꠇꠚꠞꠣꠞ ꠇꠥꠞꠛꠣꠘꠤ ꠖꠤꠛꠣ।
LEV 4:4 ꠅꠃ ꠛꠤꠍꠣꠟ ꠟꠁꠀ ꠔꠣꠁꠘ ꠝꠤꠟꠘ-ꠔꠣꠝ꠆ꠛꠥꠞ ꠖꠥꠀꠞꠞ ꠉꠦꠍꠦ ꠝꠣꠛꠥꠖꠞ ꠍꠣꠝꠘꠦ ꠀꠁꠛꠣ, ꠀꠁꠀ ꠅꠉꠥꠞ ꠇꠟ꠆ꠟꠣ ꠀꠔꠣꠁ ꠖꠤꠀ, ꠝꠣꠛꠥꠖꠞ ꠍꠣꠝꠘꠦ ꠎꠛ ꠇꠞꠛꠣ।
LEV 4:5 ꠇꠞꠤꠀ ꠅꠃ ꠛꠤꠍꠣꠟꠞ ꠕꠥꠠꠣ ꠟꠃ ꠘꠤꠀ ꠝꠤꠟꠘ-ꠔꠣꠝ꠆ꠛꠥꠞ ꠜꠤꠔꠞꠦ ꠎꠣꠁꠛꠣ।
LEV 4:6 ꠉꠤꠀ ꠟꠃꠞ ꠝꠣꠎꠦ ꠘꠤꠎꠞ ꠀꠋꠉꠥꠟ ꠍꠥꠛꠣꠁꠀ ꠟꠃ ꠟꠣꠉꠣꠁꠀ ꠢꠦꠞꠦꠝ ꠡꠞꠤꠚꠞ ꠙꠞ꠆ꠖꠣꠞ ꠛꠣꠄ ꠝꠣꠛꠥꠖꠞ ꠍꠣꠝꠘꠦ ꠡꠣꠔ ꠛꠣꠞ ꠍꠤꠐꠣꠁ ꠖꠤꠛꠣ।
LEV 4:7 ꠛꠣꠖꠦ ꠀꠞꠅ ꠕꠥꠠꠣ ꠟꠃ ꠟꠁꠀ ꠝꠤꠟꠘ-ꠔꠣꠝ꠆ꠛꠥꠞ ꠝꠣꠎꠦ ꠝꠣꠛꠥꠖꠞ ꠍꠣꠝꠘꠦ ꠀꠉꠞ-ꠈꠥꠡꠛꠄ ꠎꠣꠟꠣꠘꠤꠞ ꠐꠦꠛꠥꠟꠞ ꠌꠣꠁꠞꠅ ꠇꠥꠘꠣꠞ ꠢꠤꠋ ꠅꠇꠟꠞ ꠝꠣꠎꠦ ꠟꠣꠉꠣꠁꠛꠣ। ꠀꠞ ꠛꠣꠖ-ꠛꠣꠇꠤ ꠟꠃ ꠘꠤꠀ ꠝꠤꠟꠘ-ꠔꠣꠝ꠆ꠛꠥꠞ ꠖꠥꠀꠞꠞ ꠍꠣꠝꠘꠞ ꠎꠣꠟꠣꠁꠟ ꠇꠥꠞꠛꠣꠘꠤ ꠈꠣꠘꠣꠞ ꠔꠟꠦ ꠓꠣꠟꠤ ꠖꠤꠛꠣ।
LEV 4:8 ꠛꠣꠖꠦ ꠉꠥꠘꠣꠞ ꠇꠚꠞꠣꠞ ꠟꠣꠉꠤ ꠖꠦꠅꠀ ꠇꠥꠞꠛꠣꠘꠤꠞ ꠅꠃ ꠛꠤꠍꠣꠟꠞ ꠢꠇꠟ ꠌꠞ꠆ꠛꠤ ꠛꠣꠞ ꠇꠞꠛꠣ, ꠙꠦꠐꠞ ꠜꠤꠔꠞꠞ ꠢꠇ꠆ꠇꠟꠔꠣꠞ ꠃꠙꠞꠞ ꠌꠞ꠆ꠛꠤ, ꠁꠔꠣꠞ ꠟꠉꠦ ꠟꠣꠉꠣꠁꠟ ꠢꠇꠟ ꠌꠞ꠆ꠛꠤ,
LEV 4:9 ꠖꠥꠁꠅ ꠇꠤꠒꠘꠤ ꠀꠞ ꠅꠔꠣꠞ ꠃꠙꠞꠞ ꠌꠞ꠆ꠛꠤ, ꠀꠞ ꠇꠁꠟꠎꠣꠞ ꠟꠉꠞ ꠝꠣꠐꠤꠀ।
LEV 4:10 ꠍꠣꠟꠣꠝꠔꠤ ꠇꠥꠞꠛꠣꠘꠤꠞ ꠉꠞꠥꠞ ꠌꠞ꠆ꠛꠤꠞ ꠟꠣꠈꠣꠘ, ꠅꠃ ꠇꠥꠞꠛꠣꠘꠤꠞ ꠛꠤꠍꠣꠟꠞ ꠢꠇꠟ ꠌꠞ꠆ꠛꠤꠞꠦꠅ ꠅꠟꠣ ꠛꠣꠞ ꠇꠞꠛꠣ। ꠛꠣꠖꠦ ꠁꠝꠣꠝꠦ ꠅꠃ ꠌꠞ꠆ꠛꠤ ꠘꠤꠀ ꠎꠣꠟꠣꠁꠟ ꠇꠥꠞꠛꠣꠘꠤ ꠈꠣꠘꠣꠔ ꠎꠣꠟꠣꠁꠟꠤꠛꠣ।
LEV 4:11 ꠅꠁꠟꠦ ꠅꠃ ꠛꠤꠍꠣꠟꠞ ꠇꠟ꠆ꠟꠣ, ꠈꠣꠟ, ꠉꠥꠡ꠆ꠔ, ꠑꠦꠋ, ꠀꠔ-ꠜꠠ, ꠉꠥꠚꠞ,
LEV 4:12 ꠢꠇꠟꠔꠣ ꠘꠤꠀ ꠛꠘꠤ ꠁꠍꠞꠣꠁꠟꠞ ꠇꠦꠝ꠆ꠙꠞ ꠛꠣꠞꠦ ꠎꠦꠈꠣꠘꠅ ꠇꠥꠞꠛꠣꠘꠤꠞ ꠍꠣꠟꠤꠞ ꠐꠦꠇꠤ ꠕꠂꠘ, ꠢꠃ ꠙꠣꠇ-ꠍꠣꠚ ꠎꠣꠉꠣꠞ ꠍꠣꠟꠤꠞ ꠐꠦꠇꠤꠞ ꠃꠙꠞꠦ ꠅꠔꠣ ꠕꠁꠀ ꠢꠣꠞꠤ, ꠟꠣꠇꠠꠤꠞ ꠀꠉꠥꠁꠘꠖꠤ ꠎꠣꠟꠣꠁꠟꠤꠛꠣ।
LEV 4:13 “ꠀꠞ ꠀꠡ꠆ꠔꠣ ꠛꠘꠤ ꠁꠍꠞꠣꠁꠟ ꠡꠝꠣꠎ ꠘꠣ ꠎꠣꠘꠣꠞ ꠇꠣꠞꠘꠦ ꠎꠥꠖꠤ ꠜꠥꠟ ꠇꠞꠤꠀ ꠇꠥꠘꠥ ꠉꠥꠘꠣꠞ ꠇꠣꠝ ꠇꠞꠤꠟꠣꠄ, ꠀꠟ꠆ꠟꠣꠞ ꠘꠤꠡꠦꠗ ꠇꠞꠣ ꠇꠥꠘꠥ ꠇꠣꠝ ꠇꠞꠤꠀ ꠖꠥꠡꠤ ꠛꠘꠤꠎꠣꠄ, ꠔꠦ ꠘꠣ ꠎꠣꠘꠤꠀ ꠇꠞꠟꠦꠅ ꠔꠣꠞꠣ ꠢꠇꠟꠃ ꠉꠥꠘꠣꠉꠣꠞ।
LEV 4:14 ꠛꠣꠖꠦ ꠎꠦꠛꠟꠣ ꠔꠣꠞꠣ ꠎꠣꠘꠛꠣ, ꠎꠣꠘꠤꠀ ꠢꠣꠞꠤ ꠅꠃ ꠉꠥꠘꠣꠞ ꠇꠚꠞꠣꠞ ꠟꠣꠉꠤ ꠢꠇꠟꠞ ꠔꠞꠚ ꠕꠣꠇꠤ ꠄꠉꠥ ꠛꠤꠍꠣꠟ ꠇꠥꠞꠛꠣꠘꠤ ꠖꠤꠛꠣ, ꠅꠃ ꠛꠤꠍꠣꠟ ꠟꠁꠀ ꠔꠣꠞꠣ ꠝꠤꠟꠘ-ꠔꠣꠝ꠆ꠛꠥꠞ ꠍꠣꠝꠘꠦ ꠀꠎꠤꠞ ꠅꠁꠛꠣ।
LEV 4:15 ꠅꠁꠀ ꠛꠘꠤ ꠁꠍꠞꠣꠁꠟꠞ ꠝꠥꠞꠛ꠆ꠛꠤ ꠅꠇꠟꠦ ꠅꠃ ꠛꠤꠍꠣꠟꠞ ꠇꠟ꠆ꠟꠣ ꠀꠔꠣꠁ ꠖꠤꠛꠣ, ꠀꠞ ꠁꠝꠣꠝꠦ ꠝꠣꠛꠥꠖꠞ ꠍꠣꠝꠘꠦ ꠅꠇꠐꠣ ꠎꠛ ꠇꠞꠛꠣ।
LEV 4:16 ꠎꠛꠞ ꠛꠣꠖꠦ ꠈꠦꠟꠣꠚꠔꠤ ꠙꠣꠅꠀ ꠁꠝꠣꠝ ꠍꠣꠛꠦ ꠛꠤꠍꠣꠟꠞ ꠕꠥꠠꠣ ꠟꠃ ꠟꠁꠀ ꠝꠤꠟꠘ-ꠔꠣꠝ꠆ꠛꠥꠞ ꠜꠤꠔꠞꠦ ꠢꠣꠝꠣꠁꠛꠣ।
LEV 4:17 ꠢꠣꠝꠣꠁꠀ ꠅꠃ ꠟꠃꠞ ꠝꠣꠎꠦ ꠔꠣꠘ ꠀꠔꠞ ꠀꠋꠉꠥꠁꠟ ꠍꠥꠛꠣꠁꠀ, ꠕꠥꠠꠣ ꠟꠃ ꠢꠦꠞꠦꠝ ꠡꠞꠤꠚꠞ ꠙꠞ꠆ꠖꠣꠞ ꠛꠣꠄ ꠡꠣꠔ ꠛꠣꠞ ꠝꠣꠛꠥꠖꠞ ꠍꠣꠝꠘꠦ ꠍꠤꠐꠣꠁꠛꠣ।
LEV 4:18 ꠛꠣꠖꠦ ꠀꠞꠅ ꠕꠥꠠꠣ ꠟꠃ ꠟꠁꠀ ꠝꠣꠛꠥꠖꠞ ꠍꠣꠝꠘꠦ ꠕꠅꠀ, ꠝꠤꠟꠘ-ꠔꠣꠝ꠆ꠛꠥꠞ ꠜꠤꠔꠞꠞ ꠀꠉꠞ-ꠈꠥꠡꠛꠄ ꠎꠣꠟꠣꠘꠤꠞ ꠐꠦꠛꠥꠟꠞ ꠢꠤꠋ ꠅꠇꠟꠅ ꠟꠣꠉꠣꠁꠛꠣ। ꠛꠣꠖ-ꠛꠣꠇꠤ ꠟꠃ ꠚꠥꠐꠣꠁꠘ ꠝꠤꠟꠘ-ꠔꠣꠝ꠆ꠛꠥꠞ ꠖꠥꠀꠞꠞ ꠍꠣꠝꠘꠞ ꠎꠣꠟꠣꠁꠟ ꠇꠥꠞꠛꠣꠘꠤ ꠈꠣꠘꠣꠞ ꠔꠟꠦ ꠓꠣꠟꠤ ꠖꠤꠛꠣ।
LEV 4:19 ꠀꠞ ꠛꠤꠍꠣꠟꠞ ꠢꠇꠟ ꠌꠞ꠆ꠛꠤ ꠛꠣꠞ ꠇꠞꠤꠀ ꠇꠥꠞꠛꠣꠘꠤ ꠈꠣꠘꠣꠔ ꠎꠣꠟꠣꠁꠟꠤꠛꠣ।
LEV 4:20 ꠙꠞꠗꠣꠘ ꠁꠝꠣꠝꠞ ꠉꠥꠘꠣꠞ ꠇꠚꠞꠣꠞ ꠟꠣꠉꠤ ꠛꠤꠍꠣꠟꠞꠦ ꠎꠦꠟꠣ ꠇꠥꠞꠛꠣꠘꠤ ꠖꠦꠅꠀ ꠅꠄ, ꠁꠝꠣꠝꠦ ꠅꠃ ꠛꠤꠍꠣꠟꠞꠦꠅ ꠅꠟꠣ ꠇꠥꠞꠛꠣꠘꠤ ꠇꠞꠛꠣ। ꠔꠣꠁꠘ ꠅꠃ ꠡꠝꠣꠎꠞ ꠉꠥꠘꠣꠞ ꠇꠚꠞꠣꠞ ꠇꠥꠞꠛꠣꠘꠤ ꠀꠖꠣꠄ ꠇꠞꠟꠦ, ꠔꠣꠞꠣꠞ ꠉꠥꠘꠣꠞ ꠝꠣꠚꠤ ꠝꠤꠟꠛ।
LEV 4:21 ꠁꠝꠣꠝ ꠍꠣꠛꠦ ꠛꠤꠍꠣꠟꠞ ꠛꠣꠖ-ꠛꠣꠇꠤ ꠢꠇꠟꠔꠣ ꠟꠁꠀ ꠇꠦꠝ꠆ꠙꠞ ꠛꠣꠞꠦ ꠎꠣꠁꠛꠣ। ꠉꠤꠀ ꠔꠣꠘ ꠘꠤꠎꠞ ꠉꠥꠘꠣꠞ ꠇꠚꠞꠣꠞ ꠢꠃ ꠛꠤꠍꠣꠟꠞ ꠟꠣꠈꠣꠘ ꠅꠃ ꠛꠤꠍꠣꠟꠞ ꠢꠇꠟꠔꠣꠅ ꠇꠦꠝ꠆ꠙꠞ ꠛꠣꠞꠦ ꠅꠟꠣ ꠎꠣꠟꠣꠁꠟꠤꠛꠣ। ꠁꠔꠣ ꠅꠁꠟ ꠀꠡ꠆ꠔꠣ ꠡꠝꠣꠎꠞ ꠉꠥꠘꠣꠞ ꠇꠚꠞꠣꠞ ꠇꠥꠞꠛꠣꠘꠤ।
LEV 4:22 “ꠀꠞ ꠛꠘꠤ ꠁꠍꠞꠣꠁꠟꠞ ꠇꠥꠘꠥ ꠡꠞ꠆ꠖꠣꠞꠦ ꠘꠣ ꠎꠣꠘꠣꠞ ꠇꠣꠞꠘꠦ ꠎꠥꠖꠤ ꠜꠥꠟ ꠇꠞꠤꠀ ꠅꠟꠣ ꠉꠥꠘꠣ ꠇꠞꠤꠟꠣꠁꠘ, ꠔꠦ ꠀꠟ꠆ꠟꠣꠞ ꠘꠤꠡꠦꠗ ꠇꠞꠣ ꠇꠣꠝ ꠇꠞꠣꠄ ꠔꠣꠁꠘ ꠔ ꠖꠥꠡꠤ।
LEV 4:23 ꠔꠣꠁꠘ ꠎꠦꠛꠟꠣ ꠅꠃ ꠉꠥꠘꠣꠞ ꠛꠦꠙꠣꠞꠦ ꠎꠣꠘꠤꠟꠤꠛꠣ, ꠎꠣꠘꠣꠞ ꠛꠣꠖꠦ ꠇꠚꠞꠣꠞ ꠇꠥꠞꠛꠣꠘꠤ ꠖꠤꠛꠣꠞ ꠟꠣꠉꠤ ꠘꠤꠈꠥꠔ ꠄꠉꠥ ꠙꠣꠑꠣ ꠍꠣꠉꠟ ꠟꠁꠀ ꠀꠁꠛꠣ।
LEV 4:24 ꠀꠁꠀ ꠅꠃ ꠙꠣꠑꠣꠞ ꠇꠟ꠆ꠟꠣꠞ ꠃꠙꠞꠦ ꠀꠔꠣꠁ ꠖꠤꠀ, ꠎꠣꠟꠣꠁꠟ ꠇꠥꠞꠛꠣꠘꠤꠞ ꠙꠡꠥ ꠎꠛ ꠇꠞꠣꠞ ꠎꠣꠉꠣꠔ ꠘꠤꠀ ꠅꠉꠥꠞꠦ ꠝꠣꠛꠥꠖꠞ ꠍꠣꠝꠘꠦ ꠎꠛ ꠇꠞꠛꠣ। ꠁꠔꠣ ꠔ ꠔꠣꠘ ꠉꠥꠘꠣꠞ ꠇꠚꠞꠣꠞ ꠇꠥꠞꠛꠣꠘꠤ।
LEV 4:25 ꠛꠣꠖꠦ ꠁꠝꠣꠝ ꠍꠣꠛꠦ ꠅꠃ ꠙꠡꠥꠞ ꠕꠥꠠꠣ ꠟꠃ ꠔꠣꠘ ꠀꠔꠞ ꠀꠋꠉꠥꠟꠤꠔ ꠇꠞꠤ ꠟꠁꠀ, ꠎꠣꠟꠣꠁꠟ ꠇꠥꠞꠛꠣꠘꠤ ꠈꠣꠘꠣꠞ ꠢꠤꠋ ꠅꠇꠟꠞ ꠃꠙꠞꠦ ꠟꠣꠉꠣꠁꠛꠣ। ꠛꠣꠖ-ꠛꠣꠇꠤ ꠟꠃ ꠘꠤꠀ ꠔꠣꠁꠘ ꠇꠥꠞꠛꠣꠘꠤ ꠈꠣꠘꠣꠞ ꠔꠟꠦ ꠓꠣꠟꠤ ꠖꠤꠛꠣ।
LEV 4:26 ꠀꠞ ꠍꠣꠟꠣꠝꠔꠤ ꠇꠥꠞꠛꠣꠘꠤꠞ ꠙꠡꠥꠞ ꠌꠞ꠆ꠛꠤꠞ ꠟꠣꠈꠣꠘ ꠅꠉꠥꠞ ꠢꠇꠟ ꠌꠞ꠆ꠛꠤꠞꠦ ꠇꠥꠞꠛꠣꠘꠤ ꠈꠣꠘꠣꠞ ꠃꠙꠞꠦ ꠎꠣꠟꠣꠁꠟꠤꠛꠣ। ꠅꠃ ꠟꠣꠈꠣꠘ ꠁꠝꠣꠝꠦ ꠢꠃ ꠡꠞ꠆ꠖꠣꠞꠞ ꠉꠥꠘꠣꠞ ꠝꠣꠚꠤꠞ ꠟꠣꠉꠤ ꠇꠚꠞꠣ ꠀꠖꠣꠄ ꠇꠞꠟꠦ, ꠔꠣꠁꠘ ꠝꠣꠚꠤ ꠙꠣꠁꠛꠣ।
LEV 4:27 “ꠀꠞ ꠛꠘꠤ ꠁꠍꠞꠣꠁꠟꠞ ꠇꠥꠘꠥ ꠡꠣꠗꠣꠞꠘ ꠎꠘꠦ ꠘꠣ ꠎꠣꠘꠣꠞ ꠇꠣꠞꠘꠦ ꠎꠥꠖꠤ ꠜꠥꠟ ꠇꠞꠤꠀ ꠇꠥꠘꠥ ꠉꠥꠘꠣꠞ ꠇꠣꠝ ꠇꠞꠤꠟꠣꠄ, ꠝꠣꠛꠥꠖꠞ ꠘꠤꠡꠦꠗ ꠇꠞꠣ ꠇꠥꠘꠥ ꠇꠣꠝ ꠇꠞꠤꠀ ꠖꠥꠡꠤ ꠛꠘꠤꠎꠣꠄ,
LEV 4:28 ꠔꠦ ꠢꠦ ꠎꠦꠛꠟꠣ ꠔꠣꠞ ꠉꠥꠘꠣꠞ ꠛꠦꠙꠣꠞꠦ ꠎꠣꠘꠤꠟꠤꠛ, ꠎꠣꠘꠤꠀ ꠅꠃ ꠉꠥꠘꠣꠞ ꠇꠚꠞꠣꠞ ꠟꠣꠉꠤ ꠢꠦ ꠘꠤꠈꠥꠔ ꠄꠉꠥ ꠍꠣꠉꠤ ꠟꠁꠀ ꠀꠁꠛ।
LEV 4:29 ꠀꠁꠀ ꠅꠃ ꠍꠣꠉꠤꠞ ꠇꠟ꠆ꠟꠣꠞ ꠃꠙꠞꠦ ꠀꠔꠣꠁ ꠖꠤꠀ, ꠎꠣꠟꠣꠁꠟ ꠇꠥꠞꠛꠣꠘꠤꠞ ꠎꠛꠞ ꠎꠣꠉꠣꠔ ꠘꠤꠀ ꠅꠉꠥꠞꠦ ꠎꠛ ꠇꠞꠛ।
LEV 4:30 ꠛꠣꠖꠦ ꠁꠝꠣꠝ ꠍꠣꠛꠦ ꠔꠣꠘ ꠀꠔꠞ ꠀꠋꠉꠥꠟꠤꠔ ꠇꠞꠤ ꠅꠉꠥꠞ ꠕꠥꠠꠣ ꠟꠃ ꠟꠣꠉꠣꠁꠀ, ꠇꠥꠞꠛꠣꠘꠤ ꠈꠣꠘꠣꠞ ꠢꠤꠋ ꠅꠇꠟꠞ ꠃꠙꠞꠦ ꠟꠣꠉꠣꠁꠛꠣ। ꠛꠣꠖ-ꠛꠣꠇꠤ ꠟꠃ ꠔꠣꠁꠘ ꠇꠥꠞꠛꠣꠘꠤ ꠈꠣꠘꠣꠞ ꠔꠟꠦ ꠓꠣꠟꠤ ꠖꠤꠛꠣ।
LEV 4:31 ꠀꠞ ꠍꠣꠟꠣꠝꠔꠤ ꠇꠥꠞꠛꠣꠘꠤꠞ ꠝꠦꠠꠣꠞ ꠌꠞ꠆ꠛꠤꠞ ꠟꠣꠈꠣꠘ ꠅꠉꠥꠞ ꠢꠇꠟ ꠌꠞ꠆ꠛꠤ ꠛꠣꠞ ꠇꠞꠤꠀ ꠇꠥꠞꠛꠣꠘꠤ ꠈꠣꠘꠣꠞ ꠃꠙꠞꠦ ꠎꠣꠟꠣꠁꠟꠤꠛꠣ। ꠁꠔꠣꠞ ꠗꠥꠝꠣꠞ ꠊꠦꠞꠣꠘꠦ ꠝꠣꠛꠥꠖ ꠈꠥꠡꠤ ꠅꠁꠘ। ꠅꠃ ꠘꠝꠥꠘꠣꠄ ꠁꠝꠣꠝꠦ ꠢꠃ ꠎꠘꠞ ꠉꠥꠘꠣꠞ ꠇꠚꠞꠣ ꠀꠖꠣꠄ ꠇꠞꠟꠦ, ꠔꠣꠞ ꠝꠣꠚꠤ ꠝꠤꠟꠛ।
LEV 4:32 “ꠉꠥꠘꠣꠞ ꠇꠚꠞꠣꠞ ꠇꠥꠞꠛꠣꠘꠤꠞ ꠘꠤꠅꠔꠦ ꠇꠦꠃ ꠎꠥꠖꠤ ꠇꠥꠘꠥ ꠝꠦꠠꠣ ꠀꠘꠦ, ꠔꠦ ꠁꠐꠣ ꠘꠤꠈꠥꠔ ꠝꠦꠠꠤ-ꠛꠣꠁꠌ꠆ꠌꠣ ꠅꠁꠔꠦ ꠅꠁꠛ।
LEV 4:33 ꠢꠦ ꠅꠉꠥꠞ ꠇꠟ꠆ꠟꠣꠞ ꠃꠙꠞꠦ ꠀꠔꠣꠁ ꠖꠤꠀ, ꠎꠣꠟꠣꠁꠟ ꠇꠥꠞꠛꠣꠘꠤꠞ ꠙꠡꠥꠞ ꠎꠛꠞ ꠎꠣꠉꠣꠔ ꠘꠤꠀ, ꠉꠥꠘꠣꠞ ꠇꠚꠞꠣꠞ ꠇꠥꠞꠛꠣꠘꠤꠞ ꠘꠤꠅꠔꠦ ꠅꠉꠥꠞꠦ ꠎꠛ ꠇꠞꠛ।
LEV 4:34 ꠛꠣꠖꠦ ꠁꠝꠣꠝ ꠍꠣꠛꠦ ꠔꠣꠘ ꠀꠔꠞ ꠀꠋꠉꠥꠟꠤꠔ ꠇꠞꠤ ꠅꠃ ꠝꠦꠠꠤꠞ ꠕꠥꠠꠣ ꠟꠃ ꠟꠁꠀ, ꠇꠥꠞꠛꠣꠘꠤ ꠈꠣꠘꠣꠞ ꠢꠤꠋ ꠅꠇꠟꠞ ꠃꠙꠞꠦ ꠟꠣꠉꠣꠁꠛꠣ। ꠛꠣꠖ-ꠛꠣꠇꠤ ꠟꠃ ꠔꠣꠁꠘ ꠇꠥꠞꠛꠣꠘꠤ ꠈꠣꠘꠣꠞ ꠔꠟꠦ ꠓꠣꠟꠤ ꠖꠤꠛꠣ।
LEV 4:35 ꠀꠞ ꠍꠣꠟꠣꠝꠔꠤ ꠇꠥꠞꠛꠣꠘꠤꠞ ꠝꠦꠠꠣꠞ ꠌꠞ꠆ꠛꠤ ꠎꠦꠟꠣ ꠛꠣꠞ ꠇꠞꠂꠘ, ꠅꠉꠥꠞ ꠢꠇꠟ ꠌꠞ꠆ꠛꠤꠞꠦꠅ ꠅꠟꠣ ꠛꠣꠞ ꠇꠞꠛꠣ। ꠛꠣꠞ ꠇꠞꠤꠀ ꠇꠥꠞꠛꠣꠘꠤ ꠈꠣꠘꠣꠔ ꠇꠥꠞꠛꠣꠘꠤ ꠖꠦꠅꠀ ꠢꠇꠟꠔꠣꠞ ꠃꠙꠞꠦ ꠕꠁꠀ ꠅꠃ ꠌꠞ꠆ꠛꠤꠞꠦꠅ ꠎꠣꠟꠣꠁꠟꠤꠛꠣ, ꠅꠃ ꠘꠝꠥꠘꠣꠄ ꠁꠝꠣꠝꠦ ꠢꠃ ꠎꠘꠞ ꠉꠥꠘꠣꠞ ꠇꠚꠞꠣ ꠀꠖꠣꠄ ꠇꠞꠤꠀ ꠢꠣꠞꠟꠦ, ꠢꠦ ꠝꠣꠚꠤ ꠙꠣꠁꠛ।
LEV 5:1 “ꠇꠥꠘꠥ ꠝꠣꠘꠡꠦ ꠎꠥꠖꠤ ꠘꠤꠎꠞ ꠌꠃꠈꠦ ꠖꠦꠈꠣ ꠛꠣ ꠇꠣꠘꠦ ꠢꠥꠘꠣ ꠇꠥꠘꠥ ꠊꠐꠘꠣ ꠎꠣꠘꠦ, ꠀꠞ ꠛꠤꠌꠣꠞꠞ ꠇꠣꠟꠅ ꠀꠖꠣꠟꠔꠅ ꠡꠣꠇ꠆ꠇꠤꠞ ꠡꠥꠎꠥꠉ ꠙꠣꠁꠀꠅ ꠡꠣꠇ꠆ꠇꠤ ꠘꠣ ꠖꠦꠄ, ꠔꠦ ꠁꠔꠣꠞ ꠟꠣꠉꠤ ꠢꠦ ꠉꠥꠘꠣ ꠇꠞꠦ, ꠔꠣꠞ ꠁ ꠅꠙꠞꠣꠗꠞ ꠡꠣꠎꠣ ꠢꠦ ꠛꠁꠛ।
LEV 5:2 “ꠇꠦꠃ ꠎꠥꠖꠤ ꠘꠣ ꠎꠣꠘꠤꠀ ꠇꠥꠘꠥ ꠘꠣꠙꠣꠇ ꠎꠤꠘꠤꠡ ꠍꠁꠟꠣꠄ, ꠔꠦ ꠢꠦ ꠘꠣꠙꠣꠇ ꠀꠞ ꠖꠥꠡꠤ ꠛꠘꠛ। ꠁꠔꠣ ꠇꠥꠘꠥꠎꠣꠔꠞ ꠎꠋꠟꠤ ꠢꠣꠞꠣꠝ ꠝꠞꠣ ꠙꠡꠥ, ꠊꠞꠅ ꠙꠣꠟꠣ ꠇꠥꠘꠥ ꠝꠞꠣ ꠎꠣꠘꠖꠣꠞ ꠛꠣ ꠝꠣꠐꠤꠞ ꠝꠣꠎꠦ ꠛꠥꠇꠦ ꠌꠟꠞꠣ ꠎꠦꠇꠥꠘꠥ ꠝꠞꠣ ꠎꠣꠘꠖꠣꠞꠞꠦ ꠘꠣ ꠎꠣꠘꠤꠀ ꠍꠁꠟꠦꠅ ꠖꠥꠡꠤ-ꠘꠣꠙꠣꠇ ꠛꠘꠛ।
LEV 5:3 “ꠝꠣꠘꠡꠞ ꠡꠞꠤꠟꠞꠦ ꠎꠦꠔꠣꠄ ꠘꠣꠙꠣꠇ ꠇꠞꠤꠟꠣꠄ, ꠡꠞꠤꠟ ꠕꠣꠇꠤ ꠛꠣꠞꠅꠁꠟ ꠅꠃ ꠟꠣꠈꠣꠘ ꠇꠥꠘꠥꠔꠣ ꠇꠦꠃ ꠎꠥꠖꠤ ꠘꠣ ꠎꠣꠘꠤꠀ ꠍꠁꠟꠣꠄ, ꠔꠦ ꠁꠔꠣ ꠎꠣꠘꠣꠞ ꠛꠣꠖꠦ ꠢꠦ ꠖꠥꠡꠤ ꠅꠁꠛ।
LEV 5:4 “ꠀꠈꠟ-ꠛꠤꠛꠦꠇ ꠘꠣ ꠈꠣꠐꠣꠁꠀ ꠀꠈꠔꠣ ꠎꠥꠖꠤ ꠇꠦꠃ ꠇꠥꠘꠥ ꠇꠍꠝ ꠇꠞꠤꠟꠣꠄ, ꠜꠣꠟꠣ ꠛꠣ ꠛꠥꠞꠣ ꠇꠥꠘ꠆ꠔꠣ ꠇꠞꠝꠥ ꠇꠁꠀ ꠝꠘꠞ ꠛꠦ-ꠈꠤꠀꠟꠦ ꠇꠦꠃ ꠇꠥꠘꠥ ꠇꠍꠝ ꠈꠣꠁꠟꠦꠅ, ꠢꠦ ꠎꠦꠛꠟꠣ ꠁꠈꠣꠘ ꠛꠥꠎꠤꠟꠤꠛ ꠅꠃ ꠡꠝꠄ ꠢꠦ ꠖꠥꠡꠤ ꠛꠘꠛ।
LEV 5:5 “ꠅꠃ ꠟꠣꠈꠣꠘ ꠎꠦꠇꠥꠘꠥ ꠅꠙꠞꠣꠗ ꠇꠞꠤꠀ ꠇꠦꠃ ꠖꠥꠡꠤ ꠛꠘꠤꠉꠦꠟꠦ, ꠢꠦ ꠘꠤꠎꠞ ꠉꠥꠘꠣꠞꠦ ꠡ꠆ꠛꠤꠇꠣꠞ ꠇꠞꠔꠦ ꠅꠁꠛ।
LEV 5:6 ꠀꠞ ꠅꠃ ꠉꠥꠘꠣꠞ ꠎꠞꠤꠝꠣꠘꠣ ꠢꠤꠡꠣꠛꠦ ꠢꠦ ꠝꠣꠛꠥꠖꠞ ꠘꠣꠝꠦ, ꠉꠥꠘꠣꠞ ꠇꠚꠞꠣꠞ ꠇꠥꠞꠛꠣꠘꠤꠞ ꠘꠤꠅꠔꠦ ꠄꠇꠐꠣ ꠝꠦꠠꠤ ꠛꠣ ꠍꠣꠉꠤ ꠀꠘꠛ, ꠀꠞ ꠁꠝꠣꠝꠦ ꠔꠣꠞ ꠉꠥꠘꠣꠞ ꠇꠚꠞꠣ ꠀꠖꠣꠄ ꠇꠞꠛꠣ।
LEV 5:7 “ꠀꠞ ꠢꠦ ꠎꠥꠖꠤ ꠝꠦꠠꠤ ꠛꠣ ꠍꠣꠉꠤ ꠀꠘꠔꠦ ꠅꠙꠣꠞꠉ ꠅꠄ, ꠔꠦ ꠅꠃ ꠉꠥꠘꠣꠞ ꠎꠞꠤꠝꠣꠘꠣ ꠛꠣꠛꠔ ꠖꠥꠁꠐꠣ ꠒꠥꠙꠤ ꠙꠣꠈꠤ ꠛꠣ ꠙꠣꠞꠅ ꠀꠘꠤꠀ ꠝꠣꠛꠥꠖꠞ ꠘꠣꠝꠦ ꠖꠤꠔꠦ ꠅꠁꠛ। ꠁꠔꠣꠞ ꠝꠣꠎꠞ ꠄꠉꠥ ꠅꠁꠛ ꠉꠥꠘꠣꠞ ꠇꠚꠞꠣꠞ ꠇꠥꠞꠛꠣꠘꠤ, ꠀꠞ ꠖꠥꠍꠞꠣꠐꠣ ꠎꠣꠟꠣꠁꠟ ꠇꠥꠞꠛꠣꠘꠤ।
LEV 5:8 ꠀꠞ ꠢꠦ ꠁꠔꠣ ꠀꠘꠤꠀ ꠁꠝꠣꠝꠞ ꠀꠔꠅ ꠖꠤꠛ, ꠁꠝꠣꠝꠦ ꠉꠥꠘꠣꠞ ꠇꠚꠞꠣꠞ ꠇꠥꠞꠛꠣꠘꠤ ꠢꠤꠡꠣꠛꠦ ꠙꠄꠟꠣ ꠄꠉꠥ ꠙꠣꠈꠤꠞꠦ ꠇꠥꠞꠛꠣꠘꠤ ꠖꠤꠛꠣ। ꠔꠣꠁꠘ ꠅꠉꠥꠞ ꠇꠟ꠆ꠟꠣ ꠝꠥꠞꠣꠁꠀ ꠝꠣꠞꠛꠣ, ꠅꠁꠟꠦ ꠇꠟ꠆ꠟꠣ ꠀꠟꠉꠣꠁꠔꠣ ꠘꠣꠄ।
LEV 5:9 ꠛꠣꠖꠦ ꠅꠉꠥꠞ ꠕꠥꠠꠣ ꠟꠃ ꠘꠤꠀ ꠇꠥꠞꠛꠣꠘꠤ ꠈꠣꠘꠣꠞ ꠌꠣꠁꠞꠅ ꠉꠣꠟꠣꠔ ꠍꠤꠐꠣꠁ ꠖꠤꠛꠣ, ꠀꠞ ꠛꠣꠖ-ꠛꠣꠇꠤ ꠟꠃ ꠇꠥꠞꠛꠣꠘꠤ ꠈꠣꠘꠣꠞ ꠔꠟꠦ ꠓꠣꠟꠤ ꠖꠤꠛꠣ। ꠁꠔꠣ ꠅꠁꠟ ꠉꠥꠘꠣꠞ ꠇꠚꠞꠣꠞ ꠟꠣꠉꠤ ꠇꠥꠞꠛꠣꠘꠤ।
LEV 5:10 ꠀꠞ ꠖꠥꠍꠞꠣ ꠙꠣꠈꠤꠐꠣꠞꠦ ꠁꠝꠣꠝ ꠍꠣꠛꠦ ꠘꠤꠅꠝ ꠝꠣꠚꠤꠇ ꠎꠣꠟꠣꠁꠟ ꠇꠥꠞꠛꠣꠘꠤ ꠖꠤꠛꠣ। ꠖꠤꠀ, ꠔꠣꠞ ꠉꠥꠘꠣꠞ ꠇꠚꠞꠣ ꠀꠖꠣꠄ ꠇꠞꠛꠣ, ꠔꠦꠃ ꠢꠦ ꠝꠣꠚꠤ ꠙꠣꠁꠛ।
LEV 5:11 “ꠀꠞ ꠎꠥꠖꠤ ꠅꠃ ꠉꠥꠘꠣꠞ ꠇꠚꠞꠣꠞ ꠟꠣꠉꠤ ꠖꠥꠁꠐꠣ ꠒꠥꠙꠤ ꠙꠣꠈꠤ ꠛꠣ ꠙꠣꠞꠅ ꠀꠘꠔ ꠘꠣ ꠙꠣꠞꠦ, ꠔꠦ ꠢꠦ ꠖꠥꠁ ꠡꠦꠞ ꠝꠄꠖꠣ ꠀꠘꠔꠦ ꠅꠁꠛ। ꠁꠔꠣ ꠉꠥꠘꠣꠞ ꠇꠚꠞꠣꠞ ꠇꠥꠞꠛꠣꠘꠤ ꠅꠀꠄ ꠁꠔꠣꠞ ꠃꠙꠞꠦ ꠇꠥꠘꠥ ꠔꠦꠟ ꠛꠣ ꠟꠥꠛꠣꠘ-ꠀꠉꠞ ꠖꠤꠅ ꠘꠣ।
LEV 5:12 ꠅꠃ ꠝꠄꠖꠣ ꠟꠁꠀ ꠢꠦ ꠁꠝꠣꠝꠞ ꠉꠦꠍꠦ ꠎꠣꠁꠛ, ꠉꠦꠟꠦ ꠅꠃ ꠀꠡ꠆ꠔꠣ ꠇꠥꠞꠛꠣꠘꠤꠞ ꠛꠖꠟꠣ ꠘꠤꠡꠣꠘꠣ ꠢꠤꠡꠣꠛꠦ ꠄꠇ ꠝꠥꠁꠐ ꠝꠄꠖꠣ ꠁꠝꠣꠝ ꠍꠣꠛꠦ ꠇꠥꠞꠛꠣꠘꠤ ꠈꠣꠘꠣꠞ ꠃꠙꠞꠦ ꠝꠣꠛꠥꠖꠞ ꠘꠣꠝꠦ ꠎꠣꠟꠣꠁꠟꠤꠛꠣ। ꠁꠔꠣ ꠅꠁꠟ ꠝꠣꠛꠥꠖꠞ ꠘꠣꠝꠦ ꠉꠥꠘꠣꠞ ꠇꠚꠞꠣꠞ ꠇꠥꠞꠛꠣꠘꠤ।
LEV 5:13 ꠢꠦ ꠎꠦ ꠅꠙꠞꠣꠗ ꠇꠞꠍꠦ, ꠅꠔꠣꠞ ꠝꠣꠚꠤꠞ ꠟꠣꠉꠤ ꠁꠝꠣꠝꠦ ꠅꠟꠣ ꠇꠚꠞꠣ ꠀꠖꠣꠄ ꠇꠞꠛꠣ, ꠔꠦꠃ ꠔꠣꠞ ꠉꠥꠘꠣꠞ ꠝꠣꠚꠤ ꠙꠣꠁꠛ। ꠀꠞ ꠇꠥꠞꠛꠣꠘꠤ ꠖꠦꠅꠀꠞ ꠛꠣꠖꠦ ꠁ ꠝꠄꠖꠣꠞ ꠎꠔꠈꠣꠘ ꠞꠁꠛ, ꠗꠣꠘ-ꠉꠝꠞ ꠍꠖꠉꠣꠞ ꠟꠣꠈꠣꠘ ꠁꠔꠣ ꠢꠇꠟꠔꠣ ꠁꠝꠣꠝꠦ ꠙꠣꠁꠛꠣ।”
LEV 5:14 ꠛꠣꠖꠦ ꠝꠣꠛꠥꠖꠦ ꠝꠥꠍꠣ ꠘꠛꠤꠞꠦ ꠇꠁꠟꠣ,
LEV 5:15 “ꠇꠦꠃ ꠎꠥꠖꠤ ꠘꠣ ꠎꠣꠘꠤꠀ ꠝꠣꠛꠥꠖꠞ ꠙꠣꠇ-ꠙꠛꠤꠔ꠆ꠞ ꠇꠥꠘꠥ ꠝꠣꠟ-ꠍꠣꠝꠣꠘꠣꠞ ꠛꠦꠙꠣꠞꠦ ꠄꠝꠘꠦꠃ ꠇꠥꠘꠥ ꠖꠥꠡ-ꠇꠍꠥꠞꠤ ꠇꠞꠤꠟꠣꠄ, ꠔꠦ ꠅꠃ ꠉꠥꠘꠣꠞ ꠎꠞꠤꠝꠣꠘꠣ ꠢꠤꠡꠣꠛꠦ ꠄꠛꠣꠖꠔ ꠈꠣꠘꠣꠞ ꠝꠣꠙꠦ ꠎꠔ ꠔꠟꠣ ꠞꠥꠙꠣꠖꠤ ꠝꠦꠠꠣꠞ ꠖꠣꠝ ꠑꠤꠇ ꠇꠞꠣ ꠅꠄ, ꠔꠦ ꠢꠦ ꠔꠣꠞ ꠘꠤꠎꠞ ꠙꠣꠟ ꠕꠣꠇꠤ ꠅꠃ ꠙꠞꠤꠝꠣꠘ ꠖꠣꠝꠞ ꠛꠣ ꠢꠝꠣꠘ ꠖꠣꠝꠖꠤ ꠇꠤꠘꠤꠀ ꠘꠤꠈꠥꠔ ꠄꠉꠥ ꠝꠦꠠꠣꠞ ꠙꠣꠑꠣ ꠝꠣꠛꠥꠖꠞ ꠘꠣꠝꠦ ꠇꠥꠞꠛꠣꠘꠤ ꠖꠤꠔꠦ ꠅꠁꠛ। ꠁꠔꠣ ꠔ ꠖꠥꠡ-ꠇꠍꠥꠞꠤꠞ ꠇꠚꠞꠣꠞ ꠇꠥꠞꠛꠣꠘꠤ।
LEV 5:16 ꠀꠞ ꠢꠦ ꠅꠃ ꠙꠣꠇ-ꠙꠛꠤꠔ꠆ꠞ ꠝꠣꠟ-ꠍꠣꠝꠣꠘꠣꠞ ꠛꠦꠙꠣꠞꠦ ꠎꠦ ꠖꠥꠡ-ꠇꠍꠥꠞꠤ ꠇꠞꠍꠦ, ꠁꠔꠣꠞ ꠈꠦꠔꠤ-ꠙꠥꠞꠘꠅ ꠖꠤꠔꠦ ꠅꠁꠛ। ꠢꠦ ꠅꠃ ꠝꠦꠠꠣꠞ ꠖꠣꠝꠞ ꠟꠉꠦ ꠀꠞꠅ ꠙꠣꠌ ꠛꠣꠐꠞ ꠄꠇ ꠛꠣꠐ ꠙꠞꠤꠝꠣꠘ ꠘꠉꠖ ꠐꠦꠇꠣ ꠁꠝꠣꠝ ꠍꠣꠛꠞ ꠀꠔꠅ ꠖꠤꠛ। ꠛꠣꠖꠦ ꠁꠝꠣꠝꠦ ꠔꠣꠞ ꠇꠍꠥꠞꠤ ꠝꠣꠚꠤꠞ ꠘꠤꠅꠔꠦ ꠅꠃ ꠝꠦꠠꠣꠞꠦ ꠘꠤꠀ ꠖꠥꠡ-ꠇꠍꠥꠞꠤꠞ ꠇꠚꠞꠣꠞ ꠇꠥꠞꠛꠣꠘꠤ ꠀꠖꠣꠄ ꠇꠞꠤꠀ ꠢꠣꠞꠟꠦ, ꠢꠦ ꠝꠣꠚꠤ ꠙꠣꠁꠛ।
LEV 5:17 “ꠀꠞ ꠇꠥꠘꠥ ꠝꠣꠘꠡꠦ ꠎꠥꠖꠤ ꠜꠥꠟ ꠇꠞꠤꠀ ꠘꠣ ꠎꠣꠘꠤꠀ ꠀꠟ꠆ꠟꠣꠞ ꠘꠤꠡꠦꠗ ꠇꠞꠣ ꠇꠥꠘꠥ ꠖꠥꠡ-ꠇꠍꠥꠞꠤꠞ ꠇꠣꠝ ꠇꠞꠤꠟꠣꠄ, ꠔꠦ ꠁꠔꠣꠞ ꠟꠣꠉꠤ ꠢꠦ ꠖꠥꠡꠤ। ꠁ ꠉꠥꠘꠣꠞ ꠟꠣꠉꠤ ꠔꠣꠞꠦ ꠖꠣꠄꠁ ꠇꠞꠣ ꠅꠁꠛ।
LEV 5:18 ꠢꠦ ꠔꠣꠞ ꠅꠃ ꠖꠥꠡ-ꠇꠍꠥꠞꠤꠞ ꠇꠚꠞꠣ ꠢꠤꠡꠣꠛꠦ, ꠄꠉꠥ ꠘꠤꠈꠥꠔ ꠝꠦꠠꠣꠞ ꠙꠣꠑꠣ ꠛꠣ ꠄꠞ ꠖꠣꠝ ꠀꠘꠤꠀ ꠁꠝꠣꠝ ꠍꠣꠛꠞ ꠉꠦꠍꠦ ꠖꠤꠛ। ꠢꠦ ꠘꠣ ꠎꠣꠘꠤꠀ ꠎꠦ ꠖꠥꠡ-ꠇꠍꠥꠞꠤ ꠇꠞꠤꠟꠤꠍꠦ, ꠁꠝꠣꠝ ꠍꠣꠛꠦ ꠅꠔꠣꠞ ꠇꠚꠞꠣ ꠀꠖꠣꠄ ꠇꠞꠛꠣ, ꠔꠦꠃ ꠔꠣꠞ ꠝꠣꠚꠤ ꠝꠤꠟꠛ।
LEV 5:19 ꠁꠔꠣ ꠔ ꠖꠥꠡ-ꠇꠍꠥꠞꠤꠞ ꠇꠚꠞꠣꠞ ꠇꠥꠞꠛꠣꠘꠤ, ꠢꠦ ꠝꠣꠛꠥꠖꠞ ꠖꠞꠛꠣꠞꠅ ꠖꠥꠡ ꠇꠞꠍꠦ।”
LEV 6:1 ꠝꠣꠛꠥꠖꠦ ꠝꠥꠍꠣ ꠘꠛꠤꠞꠦ ꠀꠞꠅ ꠇꠁꠟꠣ,
LEV 6:2 “ꠢꠥꠘꠅ, ꠇꠥꠘꠥ ꠝꠣꠘꠡꠦ ꠎꠦꠛꠟꠣ ꠔꠣꠞ ꠀꠞꠤ-ꠚꠞꠤꠞ ꠟꠉꠦ ꠢꠣꠞꠣꠝꠤ ꠇꠞꠤꠀ ꠝꠣꠛꠥꠖꠞ ꠖꠞꠛꠣꠞꠅ ꠉꠥꠘꠣ ꠇꠞꠦ, ꠔꠣꠞ ꠉꠦꠍꠦ ꠕꠅꠀ ꠀꠝꠣꠘꠔ ꠛꠣ ꠛꠘ꠆ꠗꠇꠤ ꠎꠤꠘꠤꠡꠞ ꠈꠤꠀꠘꠔ ꠇꠞꠦ, ꠛꠣ ꠌꠥꠞꠤ ꠇꠞꠤ ꠇꠥꠘꠥ ꠝꠣꠟ ꠘꠦꠄ ꠛꠣ ꠐꠉꠣ-ꠐꠉꠤ ꠇꠞꠦ, ꠍꠟ-ꠌꠔꠥꠞꠤ ꠇꠞꠤꠀ ꠛꠦꠁꠝꠣꠘꠤ ꠝꠣꠔꠦ,
LEV 6:3 ꠔꠥꠛꠣꠁꠀ ꠙꠣꠅꠀ ꠝꠣꠟꠞ ꠛꠦꠙꠣꠞꠦ ꠛꠦꠁꠝꠣꠘꠤ ꠝꠣꠔꠦ ꠛꠣ ꠅꠔꠣ ꠢꠇ꠆ꠇꠟꠔꠣꠞ ꠛꠦꠙꠣꠞꠦ ꠇꠥꠘꠥ ꠝꠤꠍꠣ ꠇꠍꠝ ꠈꠣꠄ, ꠛꠣ ꠅꠃ ꠟꠣꠈꠣꠘ ꠀꠞꠅ ꠇꠥꠘꠥ ꠉꠥꠘꠣ ꠇꠞꠦ,
LEV 6:4 ꠔꠦ ꠅꠃ ꠘꠝꠥꠘꠣꠞ ꠉꠥꠘꠣ ꠇꠞꠤꠀ ꠅꠙꠞꠣꠗꠤ ꠛꠘꠣꠄ, ꠢꠦ ꠎꠦꠔꠣ ꠝꠣꠟ ꠀꠔ꠆ꠔꠡꠣꠔ ꠇꠞꠍꠦ, ꠛꠣ ꠍꠟ-ꠌꠔꠥꠞꠤ ꠇꠞꠤꠀ ꠘꠤꠍꠦ, ꠛꠣ ꠀꠝꠣꠘꠔꠞ ꠈꠤꠀꠘꠔ ꠇꠞꠍꠦ, ꠔꠥꠛꠣꠁ ꠙꠣꠅꠀ ꠝꠣꠟ ꠟꠥꠇꠣꠁꠍꠦ,
LEV 6:5 ꠛꠣ ꠎꠦꠇꠥꠘꠥ ꠝꠣꠟꠞ ꠛꠦꠙꠣꠞꠦ ꠝꠤꠍꠣ ꠇꠍꠝ ꠈꠣꠁꠍꠦ, ꠁꠔꠣ ꠢꠇꠟꠔꠣ ꠢꠦ ꠚꠤꠞꠔ ꠖꠤꠛ, ꠄꠞꠟꠉꠦ ꠎꠞꠤꠝꠣꠘꠣ ꠢꠤꠡꠣꠛꠦ ꠀꠞꠅ ꠙꠣꠌ ꠛꠣꠐꠞ ꠄꠇ ꠛꠣꠐ ꠛꠦꠡꠤ ꠖꠤꠛ। ꠢꠦ ꠎꠦꠖꠤꠘ ꠔꠣꠞ ꠖꠥꠡ ꠡ꠆ꠛꠤꠇꠣꠞ ꠇꠞꠛ, ꠅꠃ ꠖꠤꠘ ꠝꠣꠟꠞ ꠝꠣꠟꠤꠇꠞꠦ ꠁꠔꠣ ꠚꠤꠞꠣꠁ ꠖꠤꠛ।
LEV 6:6 ꠀꠞ ꠘꠤꠎꠞ ꠖꠥꠡ-ꠇꠍꠥꠞꠤ ꠝꠣꠚꠤꠞ ꠘꠤꠅꠔꠦ ꠢꠦ ꠝꠣꠛꠥꠖꠞ ꠖꠞꠛꠣꠞꠅ ꠇꠥꠞꠛꠣꠘꠤ ꠟꠁꠀ ꠀꠎꠤꠞ ꠅꠁꠛ, ꠁꠝꠣꠝ ꠍꠣꠛꠞ ꠑꠤꠇ ꠇꠞꠣ ꠖꠣꠝꠞ ꠄꠉꠥ ꠘꠤꠈꠥꠔ ꠝꠦꠠꠣꠞ ꠙꠣꠑꠣ ꠟꠁꠀ ꠀꠁꠛ।
LEV 6:7 ꠁꠝꠣꠝꠦ ꠝꠣꠛꠥꠖꠞ ꠖꠞꠛꠣꠞꠅ ꠔꠣꠞ ꠉꠥꠘꠣꠞ ꠇꠚꠞꠣ ꠀꠖꠣꠄ ꠇꠞꠛꠣ। ꠢꠦ ꠅꠔꠣꠞ ꠝꠣꠎꠞ ꠎꠦꠇꠥꠘꠥ ꠉꠥꠘꠣ ꠇꠞꠟꠦ, ꠅꠃ ꠘꠝꠥꠘꠣꠄ ꠔꠣꠞ ꠉꠥꠘꠣꠞ ꠝꠣꠚꠤ ꠙꠣꠁꠛ।”
LEV 6:8 ꠛꠣꠖꠦ ꠝꠣꠛꠥꠖꠦ ꠝꠥꠍꠣ ꠘꠛꠤꠞꠦ ꠇꠁꠟꠣ,
LEV 6:9 “ꠔꠥꠝꠤ ꠢꠣꠞꠥꠘ ꠀꠞ ꠔꠣꠞ ꠙꠥꠀꠂꠘ꠆ꠔꠞꠦ ꠢꠤꠇꠣꠁ ꠖꠦꠅ, ꠎꠣꠟꠣꠁꠟ ꠇꠥꠞꠛꠣꠘꠤ ꠀꠖꠣꠄ ꠇꠞꠣꠞ ꠝꠥꠍꠟꠣ ꠅꠁꠟ, ꠇꠥꠞꠛꠣꠘꠤꠞ ꠙꠡꠥ ꠚꠎꠞ ꠙꠞ꠆ꠎꠘ꠆ꠔ ꠢꠣꠞꠣ ꠞꠣꠁꠔ ꠇꠥꠞꠛꠣꠘꠤ ꠈꠣꠘꠣꠞ ꠀꠉꠥꠘꠤꠞ ꠃꠙꠞꠦ ꠞꠁꠛ, ꠀꠞ ꠀꠉꠥꠁꠘꠅ ꠎꠣꠟꠣꠁꠟ ꠞꠁꠛ।
LEV 6:10 ꠛꠤꠀꠘꠤ ꠛꠣꠟꠣ ꠁꠝꠣꠝ ꠍꠣꠛꠦ ꠡꠥꠔꠤ ꠇꠣꠙꠠꠖꠤ ꠛꠣꠘꠣꠁꠟ ꠢꠣꠚ-ꠙꠦꠘ꠆ꠐꠞ ꠟꠣꠈꠣꠘ ꠘꠤꠎꠞ ꠎꠣꠋꠉꠤꠀꠈꠣꠘ ꠀꠞ ꠔꠣꠘ ꠁꠝꠣꠝꠔꠤꠞ ꠛꠣꠇꠤ ꠢꠇꠟ ꠡꠥꠔꠤꠞ ꠟꠦꠛꠣꠍ ꠚꠤꠘ꠆ꠖꠤꠛꠣ। ꠚꠤꠘ꠆ꠖꠤꠀ ꠇꠥꠞꠛꠣꠘꠤꠞ ꠙꠡꠥ ꠎꠣꠟꠣꠘꠤꠞ ꠍꠣꠟꠤ ꠔꠥꠟꠤꠀ ꠘꠤꠀ ꠇꠥꠞꠛꠣꠘꠤ ꠈꠣꠘꠣꠞ ꠇꠣꠘ꠆ꠖꠣꠔ ꠕꠁꠛꠣ।
LEV 6:11 ꠛꠣꠖꠦ ꠔꠣꠁꠘ ꠅꠃ ꠟꠦꠛꠣꠍ ꠛꠖꠟꠣꠁꠀ, ꠖꠥꠍꠞꠣ ꠟꠦꠛꠣꠍ ꠚꠤꠘ꠆ꠖꠤꠀ, ꠅꠃ ꠍꠣꠟꠤꠞꠦ ꠇꠦꠝ꠆ꠙꠞ ꠛꠣꠞꠦ ꠇꠥꠘꠥ ꠙꠣꠇ-ꠍꠣꠚ ꠎꠣꠉꠣꠔ ꠘꠤꠀ ꠚꠣꠟꠣꠁꠛꠣ।
LEV 6:12 ꠅꠁꠟꠦ ꠇꠥꠞꠛꠣꠘꠤ ꠈꠣꠘꠣꠔ ꠀꠉꠥꠁꠘ ꠎꠣꠟꠣꠁꠟ ꠞꠁꠛ, ꠁꠔꠣ ꠘꠤꠜꠔ ꠘꠣ। ꠙꠞꠔꠦꠇ ꠖꠤꠘ ꠛꠤꠀꠘꠦ ꠁꠝꠣꠝꠦ ꠅꠃ ꠀꠉꠥꠘꠤꠞ ꠃꠙꠞꠦ ꠎꠣꠟꠣꠘꠤꠞ ꠖꠣꠞꠥ ꠖꠤꠛꠣ, ꠖꠤꠀ ꠖꠣꠞꠥꠞ ꠃꠙꠞꠦ ꠎꠣꠟꠣꠁꠟ ꠇꠥꠞꠛꠣꠘꠤꠞ ꠙꠡꠥꠞꠦ ꠢꠣꠎꠣꠁꠛꠣ, ꠢꠣꠎꠣꠁꠀ ꠄꠞ ꠃꠙꠞꠦ ꠍꠣꠟꠣꠝꠔꠤ ꠇꠥꠞꠛꠣꠘꠤꠞ ꠌꠞ꠆ꠛꠤꠞꠦ ꠎꠣꠟꠣꠁꠛꠣ।
LEV 6:13 ꠢꠥꠡꠤꠀꠞ ꠞꠁꠅ, ꠇꠥꠞꠛꠣꠘꠤ ꠈꠣꠘꠣꠞ ꠀꠉꠥꠁꠘ ꠢꠣꠝꠦꠡꠣ ꠎꠟꠣꠔ ꠞꠁꠛ, ꠁꠔꠣ ꠇꠥꠘꠥ ꠡꠝꠄꠃ ꠘꠤꠜꠔ ꠘꠣ।
LEV 6:14 “ꠗꠣꠘ-ꠉꠝ ꠍꠖꠉꠣꠞ ꠘꠤꠅꠝ ꠅꠁꠟ, ꠢꠣꠞꠥꠘꠞ ꠙꠥꠀꠂꠘ ꠕꠣꠇꠤ ꠄꠇꠎꠘ ꠁꠝꠣꠝꠦ ꠅꠃ ꠍꠖꠉꠣꠞ ꠝꠄꠖꠣ ꠀꠞ ꠖꠞꠇꠣꠞꠤ ꠢꠇ꠆ꠇꠟꠔꠣ ꠟꠁꠀ ꠇꠥꠞꠛꠣꠘꠤ ꠈꠣꠘꠣꠞ ꠉꠦꠍꠦ ꠝꠣꠛꠥꠖꠞ ꠍꠣꠝꠘꠦ ꠀꠎꠤꠞ ꠅꠁꠛꠣ।
LEV 6:15 ꠀꠞ ꠁꠝꠣꠝꠦ ꠅꠈꠣꠘ ꠕꠣꠇꠤ ꠄꠇ ꠝꠥꠁꠐ ꠝꠄꠖꠣ, ꠇꠤꠍꠥ ꠔꠦꠟ ꠀꠞ ꠍꠖꠉꠣꠞ ꠢꠇꠟ ꠟꠥꠛꠣꠘ-ꠀꠉꠞ ꠘꠤꠀ ꠀꠡ꠆ꠔꠣ ꠍꠖꠉꠣꠞ ꠘꠤꠡꠣꠘꠣ ꠢꠤꠡꠣꠛꠦ ꠅꠃ ꠅꠋꠡꠞꠦ ꠇꠥꠞꠛꠣꠘꠤ ꠈꠣꠘꠣꠞ ꠃꠙꠞꠦ ꠎꠣꠟꠣꠁꠛꠣ। ꠁꠔꠣꠞ ꠗꠥꠝꠣꠞ ꠊꠦꠞꠣꠘꠦ ꠔ ꠝꠣꠛꠥꠖ ꠈꠥꠡꠤ ꠅꠁꠘ।
LEV 6:16 ꠍꠖꠉꠣꠞ ꠝꠣꠟꠞ ꠛꠣꠖ-ꠛꠣꠇꠤ ꠅꠋꠡ ꠁꠝꠣꠝ ꠢꠣꠞꠥꠘ ꠀꠞ ꠔꠣꠞ ꠙꠥꠀꠂꠘ꠆ꠔꠦ ꠈꠣꠁꠛꠣ। ꠔꠣꠞꠣ ꠁꠔꠣꠞ ꠝꠣꠎꠦ ꠇꠥꠘꠥ ꠈꠣꠝꠤꠞ ꠘꠣ ꠝꠤꠡꠣꠁꠀ ꠞꠥꠐꠤ ꠛꠣꠘꠣꠁꠛꠣ, ꠛꠣꠘꠣꠁꠀ ꠝꠤꠟꠘ-ꠔꠣꠝ꠆ꠛꠥꠞ ꠃꠑꠣꠘꠅ ꠇꠥꠘꠥ ꠙꠣꠇ ꠎꠣꠉꠣꠔ ꠛꠁꠀ ꠈꠣꠁꠛꠣ।
LEV 6:17 ꠝꠘꠅ ꠞꠣꠈꠤꠅ, ꠇꠥꠘꠥ ꠈꠣꠝꠤꠞ ꠙꠥꠞꠣꠁꠀ ꠁꠔꠣꠞꠦ ꠍꠦꠇꠤꠅ ꠘꠣ। ꠀꠝꠣꠞ ꠘꠣꠝꠦ ꠖꠦꠅꠀ ꠎꠣꠟꠣꠁꠟ ꠇꠥꠞꠛꠣꠘꠤꠞ ꠅꠃ ꠅꠋꠡ ꠀꠝꠤ ꠔꠣꠞꠣꠞꠦ ꠖꠤꠟꠣꠝ। ꠉꠥꠘꠣꠞ ꠇꠚꠞꠣꠞ ꠇꠥꠞꠛꠣꠘꠤ, ꠀꠞ ꠖꠥꠡ-ꠇꠍꠥꠞꠤꠞ ꠇꠚꠞꠣꠞ ꠇꠥꠞꠛꠣꠘꠤꠞ ꠟꠣꠈꠣꠘ ꠗꠣꠘ-ꠉꠝꠞ ꠍꠖꠉꠣꠞ ꠅꠃ ꠅꠋꠡꠅ ꠅꠁꠟ ꠈꠣꠍ ꠙꠛꠤꠔ꠆ꠞ।
LEV 6:18 ꠈꠣꠟꠤ ꠁꠝꠣꠝ ꠢꠣꠞꠥꠘꠞ ꠛꠋꠡꠞ ꠢꠇꠟ ꠛꠦꠐꠣ ꠝꠣꠘꠡꠦ ꠁꠔꠣ ꠈꠣꠁꠔꠣ ꠙꠣꠞꠛꠣ, ꠝꠣꠛꠥꠖꠞ ꠘꠣꠝꠞ ꠎꠣꠟꠣꠁꠟ ꠇꠥꠞꠛꠣꠘꠤꠞ ꠅꠃ ꠅꠋꠡ ꠔ ꠅꠀꠞꠤꠡꠞ ꠙꠞ ꠅꠀꠞꠤꠡ ꠗꠞꠤ ꠔꠣꠞꠣꠃ ꠙꠣꠁꠛꠣ। ꠈꠥꠛ ꠈꠤꠀꠟ ꠞꠣꠈꠤꠅ, ꠎꠦꠍꠣꠔꠣꠄ ꠁꠔꠣꠞ ꠟꠉꠦ ꠟꠣꠉꠛ, ꠅꠔꠣꠅ ꠙꠣꠇ-ꠙꠛꠤꠔ꠆ꠞ ꠛꠘꠤꠎꠤꠛ, ꠝꠣꠘꠤ ꠁꠝꠣꠝ ꠅꠇꠟꠞ ꠛꠣꠁꠞꠣ ꠝꠣꠘꠡꠞ ꠟꠣꠉꠤ ꠢꠣꠞꠣꠝ।”
LEV 6:19 ꠝꠣꠛꠥꠖꠦ ꠝꠥꠍꠣ ꠘꠛꠤꠞꠦ ꠀꠞꠅ ꠇꠁꠟꠣ,
LEV 6:20 “ꠢꠣꠞꠥꠘꠦ ꠎꠦꠖꠤꠘ ꠁꠝꠣꠝꠔꠤꠞ ꠈꠦꠟꠣꠚꠔꠤ ꠡꠝꠎꠤꠀ ꠇꠣꠝꠅ ꠛꠅꠀꠁꠟ ꠅꠁꠛꠣ, ꠅꠃ ꠖꠤꠘ ꠢꠣꠞꠥꠘ ꠀꠞ ꠔꠣꠞ ꠙꠥꠀꠂꠘ꠆ꠔꠦ ꠗꠣꠘ-ꠉꠝꠞ ꠍꠖꠉꠣꠞ ꠘꠤꠅꠝ ꠝꠣꠚꠤꠇ ꠖꠥꠁ ꠡꠦꠞ ꠝꠄꠖꠣ ꠝꠣꠛꠥꠖꠞ ꠖꠞꠛꠣꠞꠅ ꠀꠘꠛꠣ। ꠁꠔꠣꠞ ꠅꠞ꠆ꠗꠦꠇ ꠛꠤꠀꠘꠦ ꠀꠞ ꠅꠞ꠆ꠗꠦꠇ ꠢꠣꠁꠘ꠆ꠎꠣ ꠛꠣꠟꠣ ꠖꠤꠛꠣ।
LEV 6:21 ꠔꠣꠞꠣ ꠔꠦꠟ ꠖꠤꠀ ꠈꠣꠁ ꠛꠣꠘꠣꠁꠀ ꠔꠣꠅꠀꠔ ꠍꠦꠇꠤꠀ ꠢꠣꠞꠟꠦ ꠁꠔꠣ ꠐꠥꠇꠞꠣ ꠐꠥꠇꠞꠣ ꠇꠞꠤꠀ ꠝꠣꠛꠥꠖꠞ ꠍꠣꠝꠘꠦ ꠗꠣꠘ-ꠉꠝꠞ ꠍꠖꠉꠣ ꠢꠤꠡꠣꠛꠦ ꠀꠎꠤꠞ ꠇꠞꠛꠣ, ꠁꠔꠣꠞ ꠗꠥꠝꠣꠞ ꠊꠦꠞꠣꠘꠦ ꠝꠣꠛꠥꠖ ꠈꠥꠡꠤ ꠅꠁꠘ।
LEV 6:22 ꠢꠣꠞꠥꠘꠞ ꠛꠣꠖꠦ ꠔꠣꠞ ꠎꠦ ꠙꠥꠀꠞꠦ ꠙꠞꠗꠣꠘ ꠁꠝꠣꠝ ꠢꠤꠡꠣꠛꠦ ꠈꠦꠟꠣꠚꠔꠤ ꠖꠦꠅꠀ ꠅꠁꠛ, ꠢꠦ-ꠅ ꠅꠃꠟꠣ ꠍꠖꠉꠣ ꠀꠖꠣꠄ ꠇꠞꠛ। ꠁꠔꠣ ꠔ ꠝꠣꠛꠥꠖꠞ ꠢꠞ-ꠢꠣꠝꠦꠡꠣꠇꠥꠞ ꠙꠣꠅꠘꠣ, ꠅꠃ ꠍꠖꠉꠣꠞ ꠙꠥꠞꠣ ꠅꠋꠡ ꠎꠣꠟꠣꠁꠟꠤꠔꠦ ꠅꠁꠛ।
LEV 6:23 ꠁꠝꠣꠝ ꠅꠇꠟꠞ ꠘꠤꠎꠞ ꠖꠦꠅꠀ ꠗꠣꠘ-ꠉꠝꠞ ꠍꠖꠉꠣꠞ ꠢꠇ꠆ꠇꠟꠔꠣ ꠎꠣꠟꠣꠁꠟꠤꠔꠦ ꠅꠁꠛ, ꠁꠔꠣ ꠈꠣꠅꠀꠞ ꠇꠥꠘꠥ ꠢꠥꠇꠥꠝ ꠘꠣꠄ।”
LEV 6:24 ꠛꠣꠖꠦ ꠝꠣꠛꠥꠖꠦ ꠝꠥꠍꠣ ꠘꠛꠤꠞꠦ ꠇꠁꠟꠣ,
LEV 6:25 “ꠔꠥꠝꠤ ꠢꠣꠞꠥꠘ ꠀꠞ ꠔꠣꠞ ꠙꠥꠀꠂꠘ꠆ꠔꠞꠦ ꠉꠥꠘꠣꠞ ꠇꠚꠞꠣꠞ ꠇꠥꠞꠛꠣꠘꠤꠞ ꠘꠤꠅꠝ ꠢꠤꠇꠣꠅ। ꠎꠣꠟꠣꠁꠟ ꠇꠥꠞꠛꠣꠘꠤꠞ ꠙꠡꠥꠞꠦ ꠎꠦ ꠎꠣꠉꠣꠔ ꠎꠛ ꠇꠞꠂꠘ, ꠉꠥꠘꠣꠞ ꠇꠚꠞꠣꠞ ꠇꠥꠞꠛꠣꠘꠤꠞ ꠙꠡꠥꠞꠦꠅ ꠅꠘꠅ ꠎꠛ ꠇꠞꠛꠣ। ꠁ ꠇꠥꠞꠛꠣꠘꠤꠞ ꠉꠥꠡ꠆ꠔ ꠔ ꠈꠣꠍ ꠙꠛꠤꠔ꠆ꠞ।
LEV 6:26 ꠎꠦ ꠁꠝꠣꠝꠦ ꠅꠃ ꠇꠥꠞꠛꠣꠘꠤ ꠀꠖꠣꠄ ꠇꠞꠛꠣ, ꠄꠁꠘ ꠅꠃ ꠉꠥꠡ꠆ꠔ ꠈꠣꠁꠛꠣ। ꠝꠤꠟꠘ-ꠔꠣꠝ꠆ꠛꠥꠞ ꠃꠑꠣꠘꠅ ꠙꠛꠤꠔ꠆ꠞ ꠎꠣꠉꠣꠔ ꠅꠃ ꠉꠥꠡ꠆ꠔ ꠈꠣꠁꠔꠦ ꠅꠁꠛ।
LEV 6:27 ꠎꠦꠔꠣ ꠎꠤꠘꠤꠡꠦ ꠅꠃ ꠉꠥꠡ꠆ꠔꠞꠦ ꠍꠁꠛ, ꠁꠔꠣ ꠙꠣꠇ-ꠙꠛꠤꠔ꠆ꠞ ꠅꠁꠎꠤꠛ। ꠇꠥꠘꠥ ꠇꠣꠙꠠꠞ ꠝꠣꠎꠦ ꠎꠥꠖꠤ ꠄꠞ ꠟꠃꠞ ꠍꠤꠐꠣ ꠟꠣꠉꠦ, ꠔꠦ ꠙꠣꠇ-ꠙꠛꠤꠔ꠆ꠞ ꠇꠥꠘꠥ ꠎꠣꠉꠣꠔ ꠁꠔꠣ ꠗꠁꠔꠦ ꠅꠁꠛ।
LEV 6:28 ꠀꠞ ꠝꠣꠐꠤꠞ ꠎꠦ ꠙꠣꠔꠤꠟꠅ ꠅꠃ ꠉꠥꠡ꠆ꠔ ꠞꠣꠘ꠆ꠖꠣ ꠅꠁꠛ, ꠁꠔꠣ ꠛꠣꠖꠦ ꠜꠣꠋꠉꠤꠟꠤꠛꠣꠄ। ꠅꠁꠟꠦ ꠙꠤꠔꠟꠞ ꠙꠣꠔꠤꠟꠅ ꠞꠣꠘ꠆ꠖꠤꠟꠦ ꠁꠐꠣ ꠝꠣꠘ꠆ꠎꠤꠀ ꠙꠣꠘꠤꠖꠤ ꠗꠁꠀ ꠙꠣꠇ-ꠍꠣꠚ ꠇꠞꠛꠣꠄ।
LEV 6:29 ꠁꠝꠣꠝ ꠛꠋꠡꠞ ꠎꠦꠇꠥꠘꠥ ꠛꠦꠐꠣꠁꠘ꠆ꠔꠦ ꠅꠃ ꠇꠥꠞꠛꠣꠘꠤꠞ ꠉꠥꠡ꠆ꠔ ꠈꠣꠁꠔꠣ ꠙꠣꠞꠛꠣ, ꠁꠔꠣ ꠔ ꠈꠣꠍ ꠙꠛꠤꠔ꠆ꠞ ꠉꠥꠡ꠆ꠔ।
LEV 6:30 ꠅꠁꠟꠦ ꠉꠥꠘꠣꠞ ꠇꠚꠞꠣꠞ ꠇꠥꠞꠛꠣꠘꠤꠞ ꠙꠡꠥꠞ ꠟꠃ ꠎꠥꠖꠤ ꠝꠤꠟꠘ-ꠔꠣꠝ꠆ꠛꠥꠞ ꠜꠤꠔꠞꠦ ꠘꠦꠅꠀ ꠅꠁꠎꠣꠄ, ꠔꠦ ꠁ ꠇꠥꠞꠛꠣꠘꠤꠞ ꠉꠥꠡ꠆ꠔ ꠈꠣꠅꠀ ꠘꠤꠡꠦꠗ, ꠁꠔꠣ ꠎꠣꠟꠣꠁꠟꠤꠔꠦ ꠅꠁꠛ।
LEV 7:1 “ꠖꠥꠡ-ꠇꠍꠥꠞꠤꠞ ꠇꠚꠞꠣꠞ ꠇꠥꠞꠛꠣꠘꠤꠞ ꠝꠥꠍꠟꠣ ꠅꠁꠟ, ꠁ ꠇꠥꠞꠛꠣꠘꠤꠞ ꠉꠥꠡ꠆ꠔ ꠔ ꠈꠣꠍ ꠙꠛꠤꠔ꠆ꠞ।
LEV 7:2 ꠎꠣꠟꠣꠁꠟ ꠇꠥꠞꠛꠣꠘꠤꠞ ꠙꠡꠥꠞꠦ ꠎꠦ ꠎꠣꠉꠣꠔ ꠎꠛ ꠇꠞꠣ ꠅꠄ, ꠅꠃ ꠇꠥꠞꠛꠣꠘꠤꠞ ꠙꠡꠥꠞꠦꠅ ꠅꠘꠅ ꠎꠛ ꠇꠞꠔꠦ ꠅꠁꠛ। ꠁꠔꠣꠞ ꠟꠃ ꠇꠥꠞꠛꠣꠘꠤ ꠈꠣꠘꠣꠞ ꠌꠣꠁꠞꠅ ꠉꠣꠟꠣꠛꠣꠄ ꠍꠤꠐꠣꠁ ꠖꠤꠔꠦ ꠅꠁꠛ।
LEV 7:3 ꠀꠞ ꠁꠔꠣꠞ ꠢꠇꠟ ꠌꠞ꠆ꠛꠤꠞꠦ ꠟꠁꠛ, ꠝꠣꠘꠤ ꠌꠞ꠆ꠛꠤ ꠀꠟꠣ ꠟꠦꠋꠉꠥꠠ, ꠙꠦꠐꠞ ꠜꠤꠔꠞꠞ ꠢꠇꠟꠔꠣꠞ ꠃꠙꠞꠞ ꠌꠞ꠆ꠛꠤ,
LEV 7:4 ꠄꠞ ꠟꠉꠦ ꠖꠥꠁꠅ ꠇꠤꠒꠘꠤ ꠀꠞ ꠅꠔꠣꠞ ꠃꠙꠞꠞ ꠌꠞ꠆ꠛꠤ, ꠀꠞ ꠇꠁꠟꠎꠣꠞ ꠟꠉꠞ ꠝꠣꠐꠤꠀ, ꠁ ꠢꠇꠟꠔꠣ ꠀꠟꠉꠣꠁꠛꠣ।
LEV 7:5 ꠀꠟꠉꠣꠁꠀ ꠁꠝꠣꠝꠦ ꠅꠃ ꠢꠇꠟꠔꠣ ꠘꠤꠀ ꠝꠣꠛꠥꠖꠞ ꠘꠣꠝꠦ ꠀꠉꠥꠘꠤꠔ ꠖꠦꠅꠀ ꠇꠥꠞꠛꠣꠘꠤ ꠢꠤꠡꠣꠛꠦ ꠇꠥꠞꠛꠣꠘꠤ ꠈꠣꠘꠣꠞ ꠃꠙꠞꠦ ꠎꠣꠟꠣꠁꠟꠤꠛꠣ, ꠁꠔꠣ ꠅꠁꠟ ꠖꠥꠡ-ꠇꠍꠥꠞꠤꠞ ꠇꠚꠞꠣꠞ ꠇꠥꠞꠛꠣꠘꠤ।
LEV 7:6 ꠇꠥꠞꠛꠣꠘꠤꠞ ꠉꠥꠡ꠆ꠔ ꠁꠝꠣꠝ ꠙꠞꠤꠛꠣꠞꠞ ꠎꠦꠇꠥꠘꠥ ꠛꠦꠐꠣ ꠝꠣꠘꠡꠦ ꠈꠣꠁꠔꠣ ꠙꠣꠞꠛꠣ। ꠁꠔꠣ ꠔ ꠈꠣꠍ ꠙꠛꠤꠔ꠆ꠞ ꠎꠤꠘꠤꠡ, ꠄꠞꠟꠣꠉꠤ ꠔꠣꠞꠣ ꠎꠦꠇꠥꠘꠥ ꠙꠣꠇ ꠎꠣꠉꠣꠔ ꠛꠁꠀ ꠈꠣꠁꠔꠦ ꠅꠁꠛ।
LEV 7:7 “ꠉꠥꠘꠣꠞ ꠇꠚꠞꠣꠞ ꠇꠥꠞꠛꠣꠘꠤ ꠀꠞ ꠖꠥꠡ-ꠇꠍꠥꠞꠤꠞ ꠇꠚꠞꠣꠞ ꠇꠥꠞꠛꠣꠘꠤꠞ ꠘꠤꠅꠝ-ꠇꠣꠘꠥꠘ ꠔ ꠄꠇꠁ ꠘꠝꠥꠘꠣꠞ। ꠎꠦ ꠁꠝꠣꠝ ꠍꠣꠛꠦ ꠅꠃ ꠇꠚꠞꠣꠞ ꠇꠥꠞꠛꠣꠘꠤꠞꠦ ꠀꠖꠣꠄ ꠇꠞꠛꠣ, ꠄꠁꠘ ꠅꠃ ꠉꠥꠡ꠆ꠔ ꠙꠣꠁꠛꠣ।
LEV 7:8 ꠀꠞ ꠎꠦ ꠁꠝꠣꠝꠦ ꠎꠣꠟꠣꠁꠟ ꠇꠥꠞꠛꠣꠘꠤ ꠀꠖꠣꠄ ꠇꠞꠛꠣ, ꠄꠁꠘ ꠅꠃ ꠇꠥꠞꠛꠣꠘꠤꠞ ꠙꠡꠥꠞ ꠌꠣꠝꠠꠣꠅ ꠘꠤꠔꠣ ꠙꠣꠞꠛꠣ।
LEV 7:9 ꠟꠥꠀꠠꠤꠔ, ꠔꠣꠅꠀꠔ ꠛꠣ ꠔꠥꠘ꠆ꠖꠥꠞꠤ ꠃꠘ꠆ꠖꠣꠟꠅ ꠢꠦꠖꠤꠀ ꠀꠘꠣ ꠗꠣꠘ-ꠉꠝꠞ ꠍꠖꠉꠣꠞ ꠞꠥꠐꠤ ꠈꠣꠟꠤ ꠢꠃ ꠁꠝꠣꠝꠦ ꠙꠣꠁꠛꠣ, ꠎꠦꠁꠘ ꠁ ꠍꠖꠉꠣ ꠀꠖꠣꠄ ꠇꠞꠍꠂꠘ।
LEV 7:10 ꠅꠁꠟꠦ ꠗꠣꠘ-ꠉꠝꠞ ꠛꠣꠖ-ꠛꠣꠇꠤ ꠢꠇꠟ ꠍꠖꠉꠣ, ꠁꠔꠣ ꠔꠦꠟ ꠝꠣꠈꠣꠁꠟ ꠛꠣ ꠢꠥꠇꠘꠣ ꠎꠦꠇꠥꠘꠥ ꠟꠣꠈꠣꠘ ꠅꠃꠇ, ꠁꠝꠣꠝ ꠢꠣꠞꠥꠘꠞ ꠢꠇꠟ ꠙꠥꠀꠂꠘ꠆ꠔꠦ ꠁꠔꠣꠞ ꠢꠝꠣꠘ ꠛꠣꠐ ꠙꠣꠁꠛꠣ।
LEV 7:11 “ꠝꠣꠛꠥꠖꠞ ꠘꠣꠝꠦ ꠖꠦꠅꠀ ꠍꠣꠟꠣꠝꠔꠤ ꠇꠥꠞꠛꠣꠘꠤꠞ ꠘꠤꠅꠝ ꠅꠁꠟ,
LEV 7:12 ꠇꠥꠘꠥ ꠝꠣꠘꠡꠦ ꠎꠥꠖꠤ ꠝꠣꠛꠥꠖꠞ ꠡꠥꠇꠞꠤꠀ ꠀꠖꠣꠄ ꠇꠞꠣꠞ ꠈꠤꠀꠟꠦ ꠍꠣꠟꠣꠝꠔꠤ ꠇꠥꠞꠛꠣꠘꠤ ꠖꠦꠄ, ꠔꠦ ꠅꠃ ꠇꠥꠞꠛꠣꠘꠤꠞ ꠙꠡꠥꠞ ꠟꠉꠦ ꠔꠦꠟ ꠝꠤꠡꠣꠁꠟ ꠘꠤꠞꠦꠇ ꠝꠄꠖꠣ ꠖꠤꠀ ꠈꠣꠝꠤꠞ ꠍꠣꠠꠣ ꠞꠥꠐꠤ ꠛꠣ ꠛꠣꠘꠣꠁꠟ ꠞꠥꠐꠤꠔ ꠔꠦꠟ ꠝꠣꠈꠣꠁꠀ ꠟꠁꠀ ꠀꠁꠛ, ꠛꠣ ꠔꠦꠟ ꠝꠤꠡꠣꠁꠟ ꠈꠣꠝꠤꠞ ꠍꠣꠠꠣ ꠘꠤꠞꠦꠇ ꠝꠄꠖꠣꠞ ꠙꠤꠑꠣ ꠛꠣꠘꠣꠁꠀ ꠀꠘꠔꠦ ꠅꠁꠛ।
LEV 7:13 ꠡꠥꠇꠞꠤꠀ ꠀꠖꠣꠄ ꠇꠞꠣꠞ ꠈꠤꠀꠟꠦ ꠍꠣꠟꠣꠝꠔꠤ ꠇꠥꠞꠛꠣꠘꠤꠞ ꠎꠤꠘꠤꠡꠞ ꠟꠉꠦ ꠈꠣꠝꠤꠞ ꠀꠟꠣ ꠕꠥꠠꠣ ꠞꠥꠐꠤꠅ ꠀꠘꠛ।
LEV 7:14 ꠝꠣꠛꠥꠖꠞ ꠘꠣꠝꠦ ꠖꠦꠅꠀꠞ ꠟꠣꠉꠤ ꠢꠦ ꠅꠃ ꠙꠞꠔꠦꠇ ꠎꠤꠘꠤꠡ ꠕꠣꠇꠤ ꠄꠇꠐꠣ ꠄꠇꠐꠣ ꠇꠞꠤ ꠀꠘꠛ। ꠎꠦ ꠁꠝꠣꠝꠦ ꠍꠣꠟꠣꠝꠔꠤ ꠇꠥꠞꠛꠣꠘꠤꠞ ꠙꠡꠥꠞ ꠟꠃ ꠍꠤꠐꠣꠁꠛꠣ, ꠄꠁꠘ ꠁꠔꠣ ꠙꠣꠁꠛꠣ।
LEV 7:15 ꠡꠥꠇꠥꠞꠣꠘꠣ ꠀꠖꠣꠄ ꠇꠞꠣꠞ ꠘꠤꠅꠔꠦ ꠖꠦꠅꠀ ꠅꠃ ꠇꠥꠞꠛꠣꠘꠤꠞ ꠉꠥꠡ꠆ꠔ ꠅꠃ ꠖꠤꠘꠃ ꠈꠣꠁꠟꠤꠔꠦ ꠅꠁꠛ। ꠁꠔꠣ ꠛꠣꠖꠞ ꠖꠤꠘ ꠛꠤꠀꠘꠇꠥꠞ ꠟꠣꠉꠤ ꠕꠅꠀ ꠎꠣꠁꠔ ꠘꠣꠄ।
LEV 7:16 “ꠅꠃ ꠍꠣꠟꠣꠝꠔꠤ ꠇꠥꠞꠛꠣꠘꠤ ꠎꠥꠖꠤ ꠇꠥꠘꠥ ꠝꠣꠘ꠆ꠘꠔ ꠀꠖꠣꠄ ꠇꠞꠣꠞ ꠘꠤꠅꠔꠦ ꠖꠦꠅ, ꠛꠣ ꠄꠝꠘꠦ ꠈꠥꠡꠤ ꠅꠁꠀ ꠇꠥꠞꠛꠣꠘꠤ ꠖꠦꠅ, ꠔꠦ ꠁꠔꠣꠞ ꠉꠥꠡ꠆ꠔ ꠅꠃ ꠖꠤꠘꠃ ꠈꠣꠁꠅ, ꠀꠞ ꠇꠤꠍꠥ ꠛꠣꠇꠤ ꠞꠁꠟꠦ ꠛꠣꠖꠞ ꠖꠤꠘꠅ ꠈꠣꠁꠔꠣꠄ ꠙꠣꠞꠛꠣꠄ।
LEV 7:17 ꠅꠁꠟꠦ ꠖꠥꠁ ꠖꠤꠘ ꠛꠣꠖꠦ ꠁ ꠉꠥꠡ꠆ꠔ ꠞꠁꠟꠦ, ꠁꠔꠣ ꠎꠣꠟꠣꠁꠟꠤꠔꠦ ꠅꠁꠛ।
LEV 7:18 ꠔꠤꠘ ꠘꠝ꠆ꠛꠞ ꠖꠤꠘ ꠁ ꠉꠥꠡ꠆ꠔ ꠈꠣꠁꠟꠦ ꠇꠥꠞꠛꠣꠘꠤ ꠇꠛꠥꠟ ꠅꠁꠔ ꠘꠣꠄ। ꠇꠥꠞꠛꠣꠘꠤ ꠖꠦꠅꠞꠣꠞ ꠀꠝꠟ-ꠘꠣꠝꠣꠔ ꠁꠔꠣ ꠃꠐꠔ ꠘꠣꠄ, ꠅꠃ ꠉꠥꠡ꠆ꠔ ꠔ ꠘꠣꠙꠣꠇ ꠅꠁꠉꠦꠍꠦ, ꠇꠥꠘꠥ ꠝꠣꠘꠡꠦ ꠁꠔꠣ ꠈꠣꠁꠟꠦ ꠔꠣꠞꠦ ꠘꠣꠚꠞꠝꠣꠘ ꠢꠤꠡꠣꠛꠦ ꠉꠘꠣ ꠅꠁꠛ।
LEV 7:19 “ꠍꠣꠟꠣꠝꠔꠤ ꠇꠥꠞꠛꠣꠘꠤꠞ ꠉꠥꠡ꠆ꠔꠞ ꠝꠣꠎꠦ ꠘꠣꠙꠣꠇ ꠇꠥꠘꠥ ꠎꠤꠘꠤꠡ ꠟꠣꠉꠤꠉꠦꠟꠦ, ꠁ ꠉꠥꠡ꠆ꠔꠞ ꠁ ꠅꠋꠡ ꠀꠞ ꠈꠣꠅꠀ ꠎꠣꠁꠔ ꠘꠣꠄ, ꠁꠔꠣ ꠎꠣꠟꠣꠁꠟꠤꠛꠣ। ꠅꠁꠟꠦ ꠛꠣꠇꠤ ꠉꠥꠡ꠆ꠔ ꠈꠣꠅꠀ ꠎꠣꠁꠛ, ꠙꠣꠇ-ꠍꠣꠚ ꠢꠣꠟꠔꠦ ꠎꠦ ꠇꠥꠘꠥ ꠎꠘꠦ ꠁꠔꠣ ꠈꠣꠁꠔꠣ ꠙꠣꠞꠛꠣ।
LEV 7:20 ꠀꠞ ꠘꠣꠙꠣꠇ ꠢꠣꠟꠔꠦ ꠇꠥꠘꠥ ꠝꠣꠘꠡꠦ ꠎꠥꠖꠤ ꠝꠣꠛꠥꠖꠞ ꠘꠣꠝꠦ ꠖꠦꠅꠀ ꠅꠃ ꠍꠣꠟꠣꠝꠔꠤ ꠇꠥꠞꠛꠣꠘꠤꠞ ꠉꠥꠡ꠆ꠔ ꠈꠣꠁꠟꠣꠄ, ꠔꠦ ꠡꠝꠣꠎ ꠕꠣꠇꠤ ꠔꠣꠞ ꠘꠣꠝ ꠝꠤꠐꠣꠁꠟꠤꠔꠦ ꠅꠁꠛ।
LEV 7:21 ꠇꠥꠘꠥ ꠝꠣꠘꠡꠦ ꠎꠥꠖꠤ ꠙꠡꠥꠞ ꠛꠣ ꠝꠣꠘꠡꠞ ꠇꠥꠘꠥ ꠘꠣꠙꠣꠇ ꠎꠤꠘꠤꠡ ꠍꠁꠀ ꠢꠣꠞꠤ ꠛꠣ ꠖꠥꠍꠞꠣ ꠘꠣꠙꠣꠇ ꠇꠥꠘ꠆ꠔꠣ ꠍꠁꠀ ꠢꠣꠞꠤ ꠝꠣꠛꠥꠖꠞ ꠘꠣꠝꠦ ꠖꠦꠅꠀ ꠍꠣꠟꠣꠝꠔꠤ ꠇꠥꠞꠛꠣꠘꠤꠞ ꠉꠥꠡ꠆ꠔ ꠈꠣꠁꠟꠣꠄ, ꠔꠦ ꠔꠣꠞ ꠘꠣꠝꠅ ꠡꠝꠣꠎ ꠕꠣꠇꠤ ꠝꠤꠐꠣꠁꠟꠤꠔꠦ ꠅꠁꠛ।”
LEV 7:22 ꠀꠞ ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ,
LEV 7:23 “ꠔꠥꠝꠤ ꠛꠘꠤ ꠁꠍꠞꠣꠁꠟꠞꠦ ꠎꠣꠘꠣꠁ ꠖꠦꠅ, ꠔꠥꠝꠞꠣ ꠉꠞꠥ-ꠍꠣꠉꠟ ꠛꠣ ꠝꠦꠠꠣꠞ ꠇꠥꠘꠥꠎꠣꠔ ꠌꠞ꠆ꠛꠤ ꠈꠣꠁꠅ ꠘꠣ।
LEV 7:24 ꠇꠥꠘꠥ ꠝꠞꠣ ꠙꠡꠥꠞ ꠛꠣ ꠎꠋꠟꠤ ꠎꠣꠘꠥꠀꠞꠦ ꠝꠣꠞꠣ ꠙꠡꠥꠞ ꠌꠞ꠆ꠛꠤꠞꠦ ꠔꠥꠝꠞꠣ ꠅꠁꠘ꠆ꠘ ꠇꠥꠘꠥ ꠇꠣꠝꠅ ꠟꠣꠉꠣꠁꠔꠣꠄ ꠙꠣꠞꠛꠣꠄ, ꠅꠁꠟꠦ ꠈꠣꠁꠔꠣꠄ ꠙꠣꠞꠔꠣꠄ ꠘꠣꠄ।
LEV 7:25 ꠎꠔ ꠘꠝꠥꠘꠣꠞ ꠙꠡꠥ ꠖꠤꠀ ꠝꠣꠛꠥꠖꠞ ꠘꠣꠝꠦ ꠀꠉꠥꠘꠤꠔ ꠖꠦꠅꠀ ꠇꠥꠞꠛꠣꠘꠤ ꠀꠖꠣꠄ ꠇꠞꠣ ꠅꠄ, ꠁꠔꠣ ꠎꠣꠔꠞ ꠙꠡꠥꠞ ꠌꠞ꠆ꠛꠤ ꠎꠦꠉꠥꠄ ꠈꠣꠁꠛ, ꠔꠣꠞ ꠘꠣꠝꠞꠦ ꠡꠝꠣꠎ ꠕꠣꠇꠤ ꠝꠤꠐꠣꠁꠟꠤꠛꠣꠄ।
LEV 7:26 ꠔꠥꠝꠞꠣ ꠎꠦꠇꠥꠘꠥ ꠎꠣꠉꠣꠔ ꠛꠡꠔ ꠇꠞꠅ ꠘꠣ ꠇꠦꠘꠦ, ꠇꠥꠘꠥꠎꠣꠔ ꠙꠡꠥ ꠛꠣ ꠙꠣꠈꠤꠞ ꠟꠃ ꠈꠣꠅꠀ ꠎꠣꠁꠎ ꠘꠣꠄ।
LEV 7:27 ꠇꠥꠘꠥ ꠝꠣꠘꠡꠦ ꠎꠥꠖꠤ ꠟꠃ ꠈꠣꠄ, ꠔꠦ ꠡꠝꠣꠎ ꠕꠣꠇꠤ ꠔꠣꠞ ꠘꠣꠝ ꠝꠤꠐꠣꠁꠟꠤꠔꠦ ꠅꠁꠛ।”
LEV 7:28 ꠛꠣꠖꠦ ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ,
LEV 7:29 “ꠔꠥꠝꠤ ꠛꠘꠤ ꠁꠍꠞꠣꠁꠟꠞꠦ ꠎꠣꠘꠣꠁ ꠖꠦꠅ, ꠎꠦꠇꠥꠘꠥ ꠝꠣꠘꠡꠦ ꠇꠥꠘꠥ ꠙꠡꠥ ꠖꠤꠀ ꠍꠣꠟꠣꠝꠔꠤ ꠇꠥꠞꠛꠣꠘꠤ ꠀꠖꠣꠄ ꠇꠞꠟꠦ, ꠇꠥꠞꠛꠣꠘꠤꠞ ꠉꠥꠡ꠆ꠔꠞ ꠄꠇꠐꠣ ꠅꠋꠡ ꠝꠣꠛꠥꠖꠞ ꠖꠞꠛꠣꠞꠅ ꠖꠤꠔꠦ ꠅꠁꠛ।
LEV 7:30 ꠝꠣꠛꠥꠖꠞ ꠘꠣꠝꠦ ꠀꠉꠥꠘꠤꠔ ꠖꠦꠅꠀ ꠇꠥꠞꠛꠣꠘꠤꠞ ꠅꠃ ꠅꠋꠡ, ꠝꠣꠘꠤ ꠍꠤꠘꠣ ꠀꠞ ꠍꠤꠘꠣꠞ ꠃꠙꠞꠞ ꠌꠞ꠆ꠛꠤ ꠢꠦ ꠘꠤꠎꠞ ꠀꠔꠦ ꠀꠘꠤꠀ ꠁꠝꠣꠝ ꠍꠣꠛꠞꠦ ꠖꠤꠛ। ꠁꠝꠣꠝꠦ ꠁꠔꠣꠞꠦ ꠃꠌꠣ ꠇꠞꠤꠀ ꠝꠣꠛꠥꠖꠞ ꠍꠣꠝꠘꠦ ꠖꠥꠟꠣꠁꠛꠣ।
LEV 7:31 ꠛꠣꠖꠦ ꠔꠣꠁꠘ ꠌꠞ꠆ꠛꠤꠞꠦ ꠇꠥꠞꠛꠣꠘꠤ ꠈꠣꠘꠣꠞ ꠃꠙꠞꠦ ꠎꠣꠟꠣꠁꠟꠤꠛꠣ, ꠅꠁꠟꠦ ꠅꠃ ꠍꠤꠘꠣꠞ ꠉꠥꠡ꠆ꠔ ꠁꠝꠣꠝ ꠢꠣꠞꠥꠘ ꠀꠞ ꠔꠣꠘ ꠙꠥꠀꠂꠘ꠆ꠔꠦ ꠙꠣꠁꠛꠣ।
LEV 7:32 ꠍꠣꠟꠣꠝꠔꠤ ꠇꠥꠞꠛꠣꠘꠤꠞ ꠙꠡꠥꠞ ꠒꠣꠁꠘꠞ ꠞꠣꠘꠞ ꠉꠥꠡ꠆ꠔ ꠁꠝꠣꠝ ꠍꠣꠛꠞꠦ ꠖꠤꠟꠣꠁꠛꠣꠄ।
LEV 7:33 ꠁꠝꠣꠝ ꠢꠣꠞꠥꠘꠞ ꠛꠋꠡꠞ ꠎꠦ ꠇꠦꠃ ꠍꠣꠟꠣꠝꠔꠤ ꠇꠥꠞꠛꠣꠘꠤꠞ ꠙꠡꠥꠞ ꠟꠃ ꠀꠞ ꠌꠞ꠆ꠛꠤꠞꠦ ꠇꠥꠞꠛꠣꠘꠤ ꠖꠤꠛꠣ, ꠔꠣꠘ ꠙꠣꠅꠘꠣ ꠢꠤꠡꠣꠛꠦ ꠅꠃ ꠞꠣꠘꠞ ꠉꠥꠡ꠆ꠔ ꠘꠤꠛꠣ।
LEV 7:34 ꠛꠘꠤ ꠁꠍꠞꠣꠁꠟꠞ ꠖꠦꠅꠀ ꠢꠇꠟ ꠍꠣꠟꠣꠝꠔꠤ ꠇꠥꠞꠛꠣꠘꠤꠞ ꠉꠥꠡ꠆ꠔ ꠕꠣꠇꠤ ꠖꠥꠟꠘꠣ ꠇꠥꠞꠛꠣꠘꠤꠞ ꠍꠤꠘꠣ ꠀꠞ ꠒꠣꠁꠘꠞ ꠞꠣꠘꠞ ꠉꠥꠡ꠆ꠔ ꠀꠝꠤ ꠁꠝꠣꠝ ꠢꠣꠞꠥꠘ ꠀꠞ ꠔꠣꠞ ꠙꠥꠀꠂꠘ꠆ꠔꠞꠦ ꠖꠤꠟꠣꠝ। ꠛꠘꠤ ꠁꠍꠞꠣꠁꠟꠞ ꠖꠦꠅꠀ ꠇꠥꠞꠛꠣꠘꠤꠞ ꠁ ꠅꠋꠡ ꠅꠁꠟ ꠔꠣꠞꠣꠞ ꠢꠣꠝꠦꠡꠣꠇꠥꠞ ꠙꠣꠅꠘꠣ ꠢꠇ।”
LEV 7:35 ꠢꠣꠞꠥꠘ ꠀꠞ ꠔꠣꠞ ꠙꠥꠀꠂꠘ꠆ꠔꠞꠦ ꠎꠦꠖꠤꠘ ꠕꠣꠇꠤ ꠁꠝꠣꠝꠔꠤꠞ ꠇꠣꠝꠅ ꠛꠅꠀꠁꠟ ꠇꠞꠣ ꠅꠁꠍꠤꠟ, ꠢꠃ ꠖꠤꠘ ꠕꠣꠇꠤ ꠝꠣꠛꠥꠖꠞ ꠘꠣꠝꠦ ꠀꠉꠥꠘꠤꠔ ꠖꠦꠅꠀ ꠢꠇꠟ ꠘꠝꠥꠘꠣꠞ ꠇꠥꠞꠛꠣꠘꠤꠞ ꠅꠃ ꠅꠋꠡꠞꠦ ꠔꠣꠞꠣꠞ ꠙꠣꠅꠘꠣ ꠢꠇ ꠢꠤꠡꠣꠛꠦ ꠗꠞꠣ ꠅꠁꠍꠦ।
LEV 7:36 ꠔꠣꠞꠣꠞꠦ ꠎꠦꠖꠤꠘ ꠈꠦꠟꠣꠚꠔꠤ ꠡꠝꠎꠣꠁꠀ ꠛꠅꠀꠁꠟ ꠇꠞꠣ ꠅꠁꠍꠦ, ꠢꠃ ꠖꠤꠘ ꠝꠣꠛꠥꠖꠦ ꠛꠘꠤ ꠁꠍꠞꠣꠁꠟꠞꠦ ꠢꠥꠇꠥꠝ ꠖꠤꠍꠟꠣ, ꠇꠥꠞꠛꠣꠘꠤꠞ ꠉꠥꠡ꠆ꠔꠞ ꠅꠃ ꠅꠋꠡ ꠢꠞ-ꠢꠣꠝꠦꠡꠣ ꠄꠞꠣꠞꠦ ꠖꠤꠛꠣꠞ ꠟꠣꠉꠤ।
LEV 7:37 ꠁꠔꠣ ꠅꠁꠟ ꠎꠣꠟꠣꠁꠟ ꠇꠥꠞꠛꠣꠘꠤ, ꠗꠣꠘ-ꠉꠝꠞ ꠍꠖꠉꠣ, ꠉꠥꠘꠣꠞ ꠇꠚꠞꠣꠞ ꠇꠥꠞꠛꠣꠘꠤ, ꠖꠥꠡ-ꠇꠍꠥꠞꠤꠞ ꠇꠚꠞꠣꠞ ꠇꠥꠞꠛꠣꠘꠤ, ꠁꠝꠣꠝꠔꠤ ꠡꠝꠎꠤꠛꠣꠞ ꠍꠖꠉꠣ, ꠀꠞ ꠍꠣꠟꠣꠝꠔꠤ ꠇꠥꠞꠛꠣꠘꠤꠞ ꠘꠤꠅꠝ।
LEV 7:38 ꠍꠤꠘꠣꠁ ꠝꠞꠥꠜꠥꠝꠤꠔ ꠝꠣꠛꠥꠖꠦ ꠎꠦꠖꠤꠘ ꠛꠘꠤ ꠁꠍꠞꠣꠁꠟꠞꠦ ꠢꠥꠇꠥꠝ ꠖꠤꠍꠟꠣ ꠔꠣꠘ ꠘꠣꠝꠦ ꠇꠥꠞꠛꠣꠘꠤꠞ ꠎꠤꠘꠤꠡ ꠀꠘꠣꠞ ꠟꠣꠉꠤ, ꠢꠃ ꠖꠤꠘ ꠔꠣꠁꠘ ꠔꠥꠞ ꠙꠣꠠꠞ ꠃꠙꠞꠦ ꠝꠥꠍꠣ ꠘꠛꠤꠞꠦ ꠅꠃ ꠢꠇ꠆ꠇꠟ ꠘꠤꠅꠝ-ꠇꠣꠘꠥꠘ ꠎꠣꠘꠣꠁꠍꠟꠣ।
LEV 8:1 ꠛꠣꠖꠦ ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ,
LEV 8:2 “ꠔꠥꠝꠤ ꠢꠣꠞꠥꠘ ꠀꠞ ꠔꠣꠞ ꠙꠥꠀꠂꠘ꠆ꠔꠞꠦ ꠟꠁꠀ ꠀꠝꠣꠞ ꠉꠦꠍꠦ ꠀꠎꠤꠞ ꠅꠅ। ꠄꠞ ꠟꠉꠦ ꠔꠣꠞꠣꠞ ꠁꠝꠣꠝꠔꠤꠞ ꠟꠦꠛꠣꠍ, ꠈꠦꠟꠣꠚꠔꠤ ꠡꠝꠎꠤꠛꠣꠞ ꠔꠦꠟ, ꠉꠥꠘꠣꠞ ꠇꠚꠞꠣꠞ ꠇꠥꠞꠛꠣꠘꠤꠞ ꠛꠤꠍꠣꠟ, ꠖꠥꠉꠥ ꠝꠦꠠꠣꠞ ꠙꠣꠑꠣ ꠀꠞ ꠈꠣꠝꠤꠞ ꠍꠣꠠꠣ ꠞꠥꠐꠤꠞ ꠐꠥꠇꠞꠤꠅ ꠀꠘꠤꠅ।
LEV 8:3 ꠀꠞ ꠔꠥꠝꠤ ꠔꠣꠝꠣꠝ ꠛꠘꠤ ꠁꠍꠞꠣꠁꠟꠞꠦ ꠝꠤꠟꠘ-ꠔꠣꠝ꠆ꠛꠥꠞ ꠖꠥꠀꠞꠞ ꠇꠣꠘ꠆ꠖꠣꠔ ꠖꠟꠣ ꠇꠞꠅ।”
LEV 8:4 ꠔꠦꠃ ꠝꠣꠛꠥꠖꠞ ꠢꠥꠇꠥꠝ ꠝꠣꠚꠤꠇ ꠝꠥꠍꠣ ꠘꠛꠤꠄ ꠢꠇꠟꠔꠣ ꠇꠞꠟꠣ, ꠢꠇꠟ ꠛꠘꠤ ꠁꠍꠞꠣꠁꠟ ꠝꠤꠟꠘ-ꠔꠣꠝ꠆ꠛꠥꠞ ꠖꠥꠀꠞꠞ ꠇꠣꠘ꠆ꠖꠣꠔ ꠖꠟꠣ ꠅꠁꠟꠣ।
LEV 8:5 ꠅꠃ ꠡꠝꠄ ꠝꠥꠍꠣꠄ ꠄꠞꠣꠞꠦ ꠇꠁꠟꠣ, “ꠝꠣꠛꠥꠖꠦ ꠢꠥꠇꠥꠝ ꠖꠤꠍꠂꠘ ꠁꠔꠣ ꠇꠞꠣꠞ ꠟꠣꠉꠤ।”
LEV 8:6 ꠅꠈꠣꠘ ꠇꠁꠀ ꠔꠣꠁꠘ ꠁꠝꠣꠝ ꠢꠣꠞꠥꠘ ꠀꠞ ꠔꠣꠘ ꠙꠥꠀꠂꠘ꠆ꠔꠞꠦ ꠍꠣꠝꠘꠦ ꠀꠘꠤꠀ ꠙꠣꠘꠤ ꠖꠤꠀ ꠘꠣꠅꠀꠁꠟꠣ।
LEV 8:7 ꠛꠣꠖꠦ ꠔꠣꠁꠘ ꠢꠣꠞꠥꠘꠞꠦ ꠁꠝꠣꠝꠔꠤ ꠟꠦꠛꠣꠍꠞ ꠙꠣꠁꠘ꠆ꠎꠣꠛꠤ ꠚꠤꠘ꠆ꠖꠣꠁꠀ ꠢꠣꠞꠤ ꠇꠝꠞꠞ ꠛꠘ꠆ꠖꠘꠤ ꠛꠣꠘ꠆ꠖꠤꠀ ꠖꠤꠟꠣ। ꠔꠣꠁꠘ ꠀꠟꠈꠦꠟ꠆ꠟꠣ ꠀꠞ ꠄꠚꠞꠘ ꠚꠤꠘ꠆ꠖꠣꠁꠀ ꠙꠦꠐꠞ ꠃꠙꠞꠞ ꠘꠇꠡꠣ ꠇꠞꠣ ꠇꠣꠙꠠꠞꠦ ꠚꠤꠔꠣꠖꠤ ꠛꠣꠘ꠆ꠖꠤ ꠖꠤꠟꠣ।
LEV 8:8 ꠛꠣꠖꠦ ꠛꠥꠇꠥꠞ ꠃꠙꠞꠞ ꠕꠟꠤ ꠚꠤꠘ꠆ꠖꠣꠁꠀ ꠄꠞ ꠜꠤꠔꠞꠦ ꠙꠛꠤꠔ꠆ꠞ ꠃꠞꠤꠝ ꠀꠞ ꠔꠥꠝ꠆ꠝꠤꠝ ꠢꠣꠞꠣꠁꠟꠣ।
LEV 8:9 ꠄꠞꠛꠣꠖꠦ ꠢꠣꠞꠥꠘꠞ ꠝꠣꠕꠣꠔ ꠙꠣꠃꠉꠠꠤ ꠚꠤꠘ꠆ꠖꠣꠁꠀ ꠢꠃ ꠙꠛꠤꠔ꠆ꠞ ꠔꠣꠎ, ꠝꠣꠘꠤ ꠡꠥꠘꠣꠞ ꠙꠣꠔꠈꠣꠘ ꠙꠣꠃꠉꠠꠤꠞ ꠍꠣꠝꠘꠣꠛꠣꠄ ꠟꠣꠉꠣꠁꠟꠣ। ꠝꠥꠍꠣꠄ ꠁ ꠢꠇꠟꠔꠣ ꠇꠞꠟꠣ ꠝꠣꠛꠥꠖꠞ ꠢꠥꠇꠥꠝ ꠝꠣꠚꠤꠇ।
LEV 8:10 ꠛꠣꠖꠦ ꠔꠣꠁꠘ ꠝꠤꠟꠘ-ꠔꠣꠝ꠆ꠛꠥ ꠀꠞ ꠄꠞ ꠜꠤꠔꠞꠞ ꠢꠇꠟ ꠝꠣꠟ-ꠍꠣꠝꠣꠘꠣꠞꠦ ꠈꠦꠟꠣꠚꠔꠤꠞ ꠔꠦꠟ ꠖꠤꠀ ꠙꠛꠤꠔ꠆ꠞ ꠇꠞꠟꠣ।
LEV 8:11 ꠅꠃ ꠔꠦꠟ ꠕꠣꠇꠤ ꠕꠥꠠꠣ ꠔꠦꠟ ꠘꠤꠀ ꠔꠣꠁꠘ ꠇꠥꠞꠛꠣꠘꠤ ꠈꠣꠘꠣꠞ ꠃꠙꠞꠦ ꠡꠣꠔ ꠛꠣꠞ ꠍꠤꠐꠣꠁꠟꠣ। ꠇꠥꠞꠛꠣꠘꠤ ꠈꠣꠘꠣ ꠀꠞ ꠄꠞ ꠟꠉꠞ ꠢꠇꠟ ꠝꠣꠟ-ꠍꠣꠝꠣꠘꠣ, ꠢꠣꠘ꠆ꠒꠤ-ꠛꠣꠡꠘ, ꠀꠞ ꠅꠎꠥꠞ ꠙꠣꠘꠤꠞ ꠉꠣꠝꠟꠣ ꠀꠞ ꠄꠞ ꠔꠟꠞ ꠌꠇꠤ-ꠈꠣꠐꠞꠦ, ꠔꠦꠟ ꠖꠤꠀ ꠙꠣꠇ-ꠙꠛꠤꠔ꠆ꠞ ꠇꠞꠟꠣ।
LEV 8:12 ꠀꠞꠅ ꠕꠥꠠꠣ ꠔꠦꠟ ꠘꠤꠀ ꠁꠝꠣꠝ ꠢꠣꠞꠥꠘꠞ ꠝꠣꠕꠣꠞ ꠝꠣꠎꠦ ꠓꠣꠟꠤꠀ ꠔꠣꠘꠞꠦ ꠙꠣꠇ-ꠙꠛꠤꠔ꠆ꠞ ꠛꠘꠣꠞ ꠟꠣꠉꠤ ꠈꠦꠟꠣꠚꠔꠤ ꠖꠤꠟꠣ।
LEV 8:13 ꠀꠞ ꠢꠣꠞꠥꠘꠞ ꠙꠥꠀꠂꠘ꠆ꠔꠞꠦ ꠍꠣꠝꠘꠦ ꠀꠘꠤꠀ ꠔꠣꠞꠣꠞ ꠉꠔꠞꠅ ꠙꠣꠁꠘ꠆ꠎꠣꠛꠤ ꠚꠤꠘ꠆ꠖꠣꠁꠟꠣ, ꠇꠝꠞꠞ ꠛꠘ꠆ꠖꠘꠤ ꠛꠣꠘ꠆ꠖꠤꠀ ꠢꠣꠞꠤ ꠝꠣꠕꠣꠞ ꠔꠇꠤ ꠚꠤꠘ꠆ꠖꠣꠁꠟꠣ। ꠁꠔꠣ ꠢꠇꠟꠔꠣ ꠇꠞꠟꠣ ꠔꠣꠁꠘ ꠝꠣꠛꠥꠖꠞ ꠢꠥꠇꠥꠝ ꠝꠣꠚꠤꠇ।
LEV 8:14 ꠄꠞꠛꠣꠖꠦ ꠔꠣꠁꠘ ꠉꠥꠘꠣꠞ ꠇꠚꠞꠣꠞ ꠇꠥꠞꠛꠣꠘꠤꠞ ꠛꠤꠍꠣꠟ ꠀꠘꠟꠣ, ꠀꠘꠟꠦ ꠢꠣꠞꠥꠘ ꠀꠞ ꠔꠣꠘ ꠙꠥꠀꠂꠘ꠆ꠔꠦ ꠛꠤꠍꠣꠟꠞ ꠇꠟ꠆ꠟꠣ ꠀꠔꠣꠁ ꠖꠤꠟꠣ।
LEV 8:15 ꠔꠦꠃ ꠝꠥꠍꠣꠄ ꠅꠃ ꠛꠤꠍꠣꠟꠞꠦ ꠎꠛ ꠇꠞꠤꠀ ꠅꠉꠥꠞ ꠇꠤꠍꠥ ꠟꠃ ꠘꠤꠀ, ꠇꠥꠞꠛꠣꠘꠤ ꠈꠣꠘꠣꠞꠦ ꠙꠣꠇ-ꠍꠣꠚ ꠇꠞꠣꠞ ꠈꠤꠀꠟꠦ ꠅꠈꠣꠘꠞ ꠢꠤꠋ ꠅꠇꠟꠞ ꠝꠣꠎꠦ ꠀꠔꠞ ꠀꠋꠉꠥꠁꠟꠖꠤ ꠟꠃ ꠝꠣꠈꠣꠁꠟꠣ। ꠛꠣꠇꠤ ꠟꠃ ꠔꠣꠁꠘ ꠇꠥꠞꠛꠣꠘꠤ ꠈꠣꠘꠣꠞ ꠔꠟꠦ ꠓꠣꠟꠤ ꠖꠤꠟꠣ। ꠅꠃ ꠘꠝꠥꠘꠣꠄ ꠔꠣꠁꠘ ꠉꠥꠘꠣꠞ ꠇꠚꠞꠣꠞ ꠇꠥꠞꠛꠣꠘꠤꠞ ꠟꠃ ꠖꠤꠀ ꠇꠥꠞꠛꠣꠘꠤ ꠈꠣꠘꠣꠞꠦ ꠙꠣꠇ-ꠍꠣꠚ ꠇꠞꠟꠣ।
LEV 8:16 ꠛꠣꠖꠦ ꠔꠣꠁꠘ ꠛꠤꠍꠣꠟꠞ ꠙꠦꠐꠞ ꠜꠤꠔꠞꠞ ꠢꠇꠟ ꠌꠞ꠆ꠛꠤ, ꠇꠁꠟꠎꠣꠞ ꠟꠉꠞ ꠝꠣꠐꠤꠀ, ꠌꠞ꠆ꠛꠤ ꠡꠝꠦꠔ ꠖꠥꠁꠅ ꠇꠤꠒꠘꠤ ꠘꠤꠀ ꠇꠥꠞꠛꠣꠘꠤ ꠈꠣꠘꠣꠞ ꠃꠙꠞꠦ ꠎꠣꠟꠣꠁꠟꠤꠟꠣ।
LEV 8:17 ꠅꠁꠟꠦ ꠛꠤꠍꠣꠟꠞ ꠈꠣꠟ, ꠉꠥꠡ꠆ꠔ, ꠉꠥꠚꠞ ꠘꠤꠀ ꠔꠣꠁꠘ ꠇꠦꠝ꠆ꠙꠞ ꠛꠣꠞꠦ ꠎꠣꠟꠣꠁꠟꠣ। ꠝꠥꠍꠣꠄ ꠁꠔꠣ ꠢꠇꠟꠔꠣ ꠇꠞꠟꠣ ꠝꠣꠛꠥꠖꠞ ꠢꠥꠇꠥꠝ ꠝꠣꠚꠤꠇ।
LEV 8:18 ꠛꠣꠖꠦ ꠔꠣꠁꠘ ꠎꠣꠟꠣꠁꠟ ꠇꠥꠞꠛꠣꠘꠤꠞ ꠝꠦꠠꠣꠞ ꠙꠣꠑꠣꠞꠦ ꠀꠘꠟꠣ। ꠀꠘꠟꠦ ꠢꠣꠞꠥꠘ ꠀꠞ ꠔꠣꠘ ꠙꠥꠀꠂꠘ꠆ꠔꠦ ꠅꠉꠥꠞ ꠇꠟ꠆ꠟꠣ ꠀꠔꠣꠁ ꠖꠤꠟꠣ।
LEV 8:19 ꠀꠞ ꠝꠥꠍꠣꠄ ꠅꠃ ꠝꠦꠠꠣꠞꠦ ꠎꠛ ꠇꠞꠤꠀ ꠇꠥꠞꠛꠣꠘꠤ ꠈꠣꠘꠣꠞ ꠌꠣꠁꠞꠅ ꠉꠣꠟꠣꠔ ꠟꠃ ꠍꠤꠐꠣꠁ ꠖꠤꠟꠣ।
LEV 8:20 ꠔꠣꠁꠘ ꠝꠦꠠꠣꠞꠦ ꠐꠥꠇꠞꠣꠁꠀ ꠅꠉꠥꠞ ꠇꠟ꠆ꠟꠣ, ꠉꠥꠡ꠆ꠔꠞ ꠐꠥꠇꠞꠣ ꠀꠞ ꠌꠞ꠆ꠛꠤꠞꠦ ꠎꠣꠟꠣꠁꠟꠣ।
LEV 8:21 ꠀꠞ ꠅꠃ ꠝꠦꠠꠣꠞ ꠙꠦꠐꠞ ꠜꠤꠔꠞꠞ ꠢꠇꠟꠔꠣ, ꠔꠣꠞ ꠌꠣꠁꠞꠅ ꠑꠦꠋ ꠙꠣꠘꠤ ꠖꠤꠀ ꠗꠁꠀ ꠢꠣꠞꠤ, ꠀꠡ꠆ꠔꠣ ꠝꠦꠠꠣꠞꠦ ꠎꠣꠟꠣꠁꠟ ꠇꠥꠞꠛꠣꠘꠤ ꠢꠤꠡꠣꠛꠦ ꠇꠥꠞꠛꠣꠘꠤ ꠈꠣꠘꠣꠞ ꠃꠙꠞꠦ ꠎꠣꠟꠣꠁꠟꠤꠟꠣ। ꠁꠔꠣ ꠔ ꠝꠣꠛꠥꠖꠞ ꠘꠣꠝꠦ ꠀꠉꠥꠘꠤꠔ ꠖꠦꠅꠀ ꠎꠣꠟꠣꠁꠟ ꠇꠥꠞꠛꠣꠘꠤ, ꠁꠔꠣꠞ ꠗꠥꠝꠣꠞ ꠊꠦꠞꠣꠘꠦ ꠔꠣꠁꠘ ꠈꠥꠡꠤ ꠅꠁꠘ। ꠝꠥꠍꠣꠄ ꠁꠔꠣ ꠢꠇꠟꠔꠣ ꠇꠞꠟꠣ ꠝꠣꠛꠥꠖꠞ ꠢꠥꠇꠥꠝ ꠝꠣꠚꠤꠇ।
LEV 8:22 ꠛꠣꠖꠦ ꠔꠣꠁꠘ ꠁꠝꠣꠝꠔꠤ ꠇꠣꠝꠅ ꠛꠅꠀꠁꠟꠞ ꠘꠤꠅꠔꠦ, ꠖꠥꠍꠞꠣ ꠝꠦꠠꠣꠞꠦ ꠀꠘꠤꠀ ꠢꠣꠞꠟꠦ ꠢꠣꠞꠥꠘ ꠀꠞ ꠔꠣꠘ ꠙꠥꠀꠂꠘ꠆ꠔꠦ ꠝꠦꠠꠣꠞ ꠇꠟ꠆ꠟꠣ ꠀꠔꠣꠁ ꠖꠤꠟꠣ।
LEV 8:23 ꠝꠥꠍꠣꠄ ꠅꠃ ꠝꠦꠠꠣꠞꠦ ꠎꠛ ꠇꠞꠤꠀ, ꠅꠉꠥꠞ ꠕꠥꠠꠣ ꠟꠃ ꠘꠤꠀ ꠢꠣꠞꠥꠘꠞ ꠒꠣꠁꠘ ꠇꠣꠘꠞ ꠟꠔꠤꠔ, ꠒꠣꠁꠘ ꠀꠔꠞ ꠀꠞ ꠒꠣꠁꠘ ꠙꠣꠅꠞ ꠛꠥꠠꠤ ꠀꠋꠉꠥꠟꠤꠔ ꠟꠣꠉꠣꠁꠟꠣ।
LEV 8:24 ꠀꠞ ꠢꠣꠞꠥꠘꠞ ꠙꠥꠀꠂꠘ꠆ꠔꠞꠦꠅ ꠍꠣꠝꠘꠦ ꠀꠘꠤꠀ, ꠔꠣꠞꠣꠞ ꠒꠣꠁꠘ ꠇꠣꠘꠞ ꠟꠔꠤꠔ, ꠀꠞ ꠒꠣꠁꠘ ꠀꠔ, ꠒꠣꠁꠘ ꠙꠣꠅꠞ ꠛꠥꠠꠤ ꠀꠋꠉꠥꠟꠤꠔ ꠕꠥꠠꠣ ꠟꠃ ꠟꠣꠉꠣꠁ ꠖꠤꠟꠣ। ꠀꠞꠅ ꠕꠥꠠꠣ ꠟꠃ ꠘꠤꠀ ꠇꠥꠞꠛꠣꠘꠤ ꠈꠣꠘꠣꠞ ꠌꠣꠁꠞꠅ ꠉꠣꠟꠣꠔ ꠍꠤꠐꠣꠁ ꠖꠤꠟꠣ।
LEV 8:25 ꠔꠣꠁꠘ ꠝꠦꠠꠣꠞ ꠌꠞ꠆ꠛꠤ, ꠌꠞ꠆ꠛꠤ ꠀꠟꠣ ꠟꠦꠋꠉꠥꠠ, ꠇꠁꠟꠎꠣꠞ ꠟꠉꠞ ꠝꠣꠐꠤꠀ, ꠌꠞ꠆ꠛꠤ ꠡꠝꠦꠔ ꠖꠥꠁꠅ ꠇꠤꠒꠘꠤ, ꠀꠞ ꠒꠣꠁꠘꠞ ꠞꠣꠘ ꠘꠤꠟꠣ।
LEV 8:26 ꠀꠞ ꠝꠣꠛꠥꠖꠞ ꠍꠣꠝꠘꠦ ꠕꠅꠀ ꠈꠣꠝꠤꠞ ꠍꠣꠠꠣ ꠞꠥꠐꠤꠞ ꠐꠥꠇꠞꠤ ꠕꠣꠇꠤ ꠄꠇꠈꠣꠘ ꠞꠥꠐꠤ, ꠀꠞ ꠔꠦꠟꠖꠤ ꠜꠣꠎꠣ ꠄꠇꠈꠣꠘ ꠙꠤꠑꠣ, ꠀꠞ ꠔꠦꠟ ꠝꠣꠈꠣꠁꠟ ꠄꠇꠈꠣꠘ ꠞꠥꠐꠤ ꠘꠤꠀ ꠢꠃ ꠌꠞ꠆ꠛꠤ ꠀꠞ ꠞꠣꠘꠞ ꠃꠙꠞꠦ ꠕꠁꠟꠣ।
LEV 8:27 ꠕꠁꠀ ꠁꠔꠣ ꠢꠇꠟꠔꠣ ꠢꠣꠞꠥꠘ ꠀꠞ ꠔꠣꠘ ꠙꠥꠀꠂꠘ꠆ꠔꠞ ꠀꠔꠅ ꠖꠤꠀ ꠖꠥꠟꠘꠣ ꠇꠥꠞꠛꠣꠘꠤ ꠢꠤꠡꠣꠛꠦ ꠝꠣꠛꠥꠖꠞ ꠍꠣꠝꠘꠦ ꠖꠥꠟꠣꠁꠟꠣ।
LEV 8:28 ꠛꠣꠖꠦ ꠔꠣꠁꠘ ꠁꠔꠣ ꠔꠣꠞꠣꠞ ꠀꠔ ꠕꠣꠇꠤ ꠘꠤꠀ ꠢꠣꠞꠤ ꠇꠥꠞꠛꠣꠘꠤ ꠈꠣꠘꠣꠞ ꠙꠡꠥꠞ ꠃꠙꠞꠦ ꠕꠁꠀ ꠎꠣꠟꠣꠁꠟꠤꠟꠣ। ꠁꠔꠣ ꠔ ꠈꠦꠟꠣꠚꠔꠤ ꠡꠝꠎꠤꠛꠣꠞ ꠇꠥꠞꠛꠣꠘꠤ, ꠝꠣꠛꠥꠖꠞ ꠘꠣꠝꠦ ꠀꠉꠥꠘꠤꠔ ꠖꠦꠅꠀ ꠇꠥꠞꠛꠣꠘꠤ, ꠁꠔꠣꠞ ꠗꠥꠝꠣꠞ ꠊꠦꠞꠣꠘꠦ ꠔꠣꠁꠘ ꠈꠥꠡꠤ ꠅꠁꠘ।
LEV 8:29 ꠛꠣꠖꠦ ꠔꠣꠁꠘ ꠘꠤꠎꠞ ꠙꠣꠅꠘꠣ ꠅꠋꠡ, ꠝꠣꠘꠤ ꠈꠦꠟꠣꠚꠔꠤ ꠡꠝꠎꠤꠛꠣꠞ ꠇꠥꠞꠛꠣꠘꠤꠞ ꠝꠦꠠꠣꠞ ꠍꠤꠘꠣ ꠘꠤꠀ ꠖꠥꠟꠘꠣ ꠇꠥꠞꠛꠣꠘꠤ ꠢꠤꠡꠣꠛꠦ ꠝꠣꠛꠥꠖꠞ ꠍꠣꠝꠘꠦ ꠖꠥꠟꠣꠁꠟꠣ। ꠔꠣꠁꠘ ꠁꠔꠣ ꠢꠇꠟꠔꠣ ꠇꠞꠟꠣ ꠝꠣꠛꠥꠖꠞ ꠢꠥꠇꠥꠝ ꠝꠣꠚꠤꠇ।
LEV 8:30 ꠛꠣꠖꠦ ꠝꠥꠍꠣꠄ ꠈꠦꠟꠣꠚꠔꠤ ꠡꠝꠎꠤꠛꠣꠞ ꠕꠥꠠꠣ ꠙꠛꠤꠔ꠆ꠞ ꠔꠦꠟ ꠘꠤꠟꠣ, ꠀꠞ ꠇꠥꠞꠛꠣꠘꠤ ꠈꠣꠘꠣ ꠕꠣꠇꠤ ꠕꠥꠠꠣ ꠟꠃ ꠀꠘꠤꠀ ꠢꠣꠞꠥꠘ ꠀꠞ ꠔꠣꠘ ꠙꠥꠀꠂꠘ꠆ꠔꠞ ꠃꠙꠞꠦ ꠀꠞ ꠔꠣꠞꠣꠞ ꠟꠦꠛꠣꠍꠞ ꠃꠙꠞꠦ ꠍꠤꠐꠣꠁ ꠖꠤꠟꠣ। ꠅꠃ ꠘꠝꠥꠘꠣꠄ ꠢꠣꠞꠥꠘ ꠀꠞ ꠔꠣꠘ ꠙꠥꠀꠂꠘ꠆ꠔꠞꠦ, ꠀꠞ ꠔꠣꠞꠣꠞ ꠟꠦꠛꠣꠍꠞꠦꠅ ꠙꠣꠇ-ꠙꠛꠤꠔ꠆ꠞ ꠇꠞꠣ ꠅꠁꠟ।
LEV 8:31 ꠛꠣꠖꠦ ꠝꠥꠍꠣꠄ ꠢꠣꠞꠥꠘ ꠀꠞ ꠄꠘ ꠙꠥꠀꠂꠘ꠆ꠔꠞꠦ ꠇꠁꠟꠣ, “ꠔꠥꠝꠞꠣ ꠝꠤꠟꠘ-ꠔꠣꠝ꠆ꠛꠥꠞ ꠖꠥꠀꠞꠞ ꠍꠣꠝꠘꠦ ꠅꠃ ꠉꠥꠡ꠆ꠔ ꠞꠣꠘ꠆ꠖꠅ, ꠞꠣꠘ꠆ꠖꠤꠀ ꠢꠘꠅ ꠛꠁꠀ ꠈꠦꠟꠣꠚꠔꠤ ꠡꠝꠎꠤꠛꠣꠞ ꠐꠥꠇꠞꠤꠞ ꠞꠥꠐꠤ ꠖꠤꠀ ꠅꠔꠣ ꠈꠣꠅ। ꠀꠝꠣꠞꠦ ꠔ ꠀꠉꠦ ꠅꠃ ꠇꠕꠣ ꠎꠣꠘꠣꠁꠟ ꠅꠁꠍꠦ, ꠁꠔꠣ ꠈꠣꠟꠤ ꠔꠥꠝꠤ ꠀꠞ ꠔꠥꠝꠣꠞ ꠙꠥꠀꠂꠘ꠆ꠔꠦ ꠈꠣꠁꠛꠣꠄ।
LEV 8:32 ꠈꠣꠘꠤꠞ ꠛꠣꠖꠦ ꠎꠦꠔꠣ ꠉꠥꠡ꠆ꠔ ꠀꠞ ꠞꠥꠐꠤ ꠛꠣꠇꠤ ꠞꠁꠛ, ꠁꠔꠣꠞꠦ ꠀꠉꠥꠁꠘꠖꠤ ꠎꠣꠟꠣꠁꠟꠤꠅ।
LEV 8:33 ꠔꠥꠝꠞꠣꠞꠦ ꠈꠦꠟꠣꠚꠔꠤ ꠡꠝꠎꠤꠛꠣꠞ ꠅꠃ ꠝꠣꠢꠚꠤꠟ ꠡꠣꠔ ꠖꠤꠘ ꠗꠞꠤ ꠌꠟꠛ। ꠁ ꠡꠣꠔ ꠖꠤꠘ ꠔꠥꠝꠞꠣ ꠝꠤꠟꠘ-ꠔꠣꠝ꠆ꠛꠥꠞ ꠖꠥꠀꠞꠞ ꠇꠣꠘ꠆ꠖꠣ ꠕꠣꠇꠤ ꠢꠞꠤꠅ ꠘꠣ।
LEV 8:34 ꠀꠁꠎ ꠎꠦꠔꠣ ꠇꠞꠟꠣꠝ, ꠁꠔꠣ ꠔ ꠔꠥꠝꠞꠣꠞ ꠉꠥꠘꠣꠞ ꠇꠚꠞꠣ ꠢꠤꠡꠣꠛꠦ ꠝꠣꠛꠥꠖꠞ ꠢꠥꠇꠥꠝ ꠝꠣꠚꠤꠇ ꠇꠞꠟꠣꠝ।
LEV 8:35 ꠔꠦ ꠔꠥꠝꠞꠣ ꠎꠣꠘꠦ ꠛꠣꠌꠤꠀ ꠞꠅꠀꠞ ꠟꠣꠉꠤ ꠀꠁꠎ ꠕꠣꠇꠤ ꠡꠣꠔ ꠖꠤꠘ ꠙꠞ꠆ꠎꠘ꠆ꠔ ꠅꠃ ꠝꠤꠟꠘ-ꠔꠣꠝ꠆ꠛꠥꠞ ꠖꠥꠀꠞꠞ ꠇꠣꠘ꠆ꠖꠣꠔ ꠞꠁꠅ। ꠖꠤꠘ-ꠞꠣꠁꠔ ꠅꠘꠅ ꠞꠁꠀ ꠝꠣꠛꠥꠖꠞ ꠢꠥꠇꠥꠝ ꠝꠣꠚꠤꠇ ꠇꠣꠝ ꠇꠞꠤꠅ। ꠔꠥꠝꠞꠣ ꠅꠟꠣ ꠇꠞꠣꠞ ꠟꠣꠉꠤ ꠔ ꠀꠝꠤ ꠢꠥꠇꠥꠝ ꠙꠣꠁꠍꠤ।”
LEV 8:36 ꠝꠥꠍꠣ ꠘꠛꠤꠞ ꠝꠣꠎꠖꠤ ꠝꠣꠛꠥꠖꠦ ꠎꠔꠔꠣ ꠇꠞꠣꠞ ꠢꠥꠇꠥꠝ ꠖꠤꠍꠟꠣ, ꠢꠣꠞꠥꠘ ꠀꠞ ꠔꠣꠘ ꠙꠥꠀꠂꠘ꠆ꠔꠦ ꠁꠔꠣ ꠢꠇꠟꠔꠣ ꠇꠞꠟꠣ।
LEV 9:1 ꠈꠦꠟꠣꠚꠔꠤ ꠡꠝꠎꠤꠛꠣꠞ ꠝꠣꠢꠚꠤꠟꠞ ꠀꠐ ꠖꠤꠘꠞ ꠖꠤꠘ ꠝꠥꠍꠣ ꠘꠛꠤꠄ ꠁꠝꠣꠝ ꠢꠣꠞꠥꠘꠞꠦ, ꠔꠣꠘ ꠙꠥꠀꠂꠘ꠆ꠔꠞꠦ ꠀꠞ ꠛꠘꠤ ꠁꠍꠞꠣꠁꠟꠞ ꠝꠥꠞꠛ꠆ꠛꠤ ꠅꠇꠟꠞꠦꠅ ꠀꠘꠣꠁꠟꠣ।
LEV 9:2 ꠀꠘꠣꠁꠀ ꠢꠣꠞꠥꠘꠞꠦ ꠇꠁꠟꠣ, “ꠔꠥꠝꠣꠞ ꠉꠥꠘꠣꠞ ꠇꠚꠞꠣꠞ ꠇꠥꠞꠛꠣꠘꠤꠞ ꠟꠣꠉꠤ ꠔꠥꠝꠤ ꠄꠉꠥ ꠛꠤꠍꠣꠟ ꠀꠘꠅ, ꠀꠞ ꠎꠣꠟꠣꠁꠟ ꠇꠥꠞꠛꠣꠘꠤꠞ ꠟꠣꠉꠤ ꠄꠉꠥ ꠝꠦꠠꠣꠞ ꠙꠣꠑꠣ ꠟꠁꠀ ꠝꠣꠛꠥꠖꠞ ꠖꠞꠛꠣꠞꠅ ꠀꠎꠤꠞ ꠅꠅ। ꠇꠥꠞꠛꠣꠘꠤꠞ ꠙꠡꠥ ꠉꠥꠁꠘ ꠙꠥꠞꠣꠙꠥꠞ ꠘꠤꠈꠥꠔ ꠅꠁꠔ।
LEV 9:3 ꠀꠞ ꠔꠥꠝꠤ ꠛꠘꠤ ꠁꠍꠞꠣꠁꠟꠞꠦ ꠇꠅ, ꠔꠣꠞꠣ ꠎꠣꠘꠥ ꠝꠣꠛꠥꠖꠞ ꠘꠣꠝꠞ ꠇꠥꠞꠛꠣꠘꠤ ꠟꠁꠀ ꠀꠎꠤꠞ ꠅꠄ। ꠔꠣꠞꠣ ꠉꠥꠘꠣꠞ ꠇꠚꠞꠣꠞ ꠟꠣꠉꠤ ꠄꠉꠥ ꠍꠣꠉꠟ, ꠀꠞ ꠎꠣꠟꠣꠁꠟ ꠇꠥꠞꠛꠣꠘꠤꠞ ꠟꠣꠉꠤ ꠄꠇ ꠛꠍꠞ ꠛꠄꠅꠡꠤ ꠘꠤꠈꠥꠔ ꠄꠉꠥ ꠉꠞꠥ-ꠛꠣꠍꠥꠞ, ꠀꠞ ꠄꠉꠥ ꠝꠦꠠꠣ-ꠛꠣꠁꠌ꠆ꠌꠣ ꠀꠘꠦ,
LEV 9:4 ꠀꠞ ꠍꠣꠟꠣꠝꠔꠤ ꠇꠥꠞꠛꠣꠘꠤꠞ ꠟꠣꠉꠤ ꠄꠉꠥ ꠛꠤꠍꠣꠟ ꠀꠞ ꠄꠉꠥ ꠝꠦꠠꠣꠞ ꠙꠣꠑꠣ ꠟꠁꠀ ꠀꠎꠤꠞ ꠅꠄ। ꠁꠔꠣꠞ ꠟꠉꠦ ꠔꠣꠞꠣ ꠔꠦꠟ ꠝꠣꠈꠣꠁꠟ ꠗꠣꠘ-ꠉꠝꠞ ꠍꠖꠉꠣꠅ ꠀꠘꠛꠣ। ꠝꠣꠛꠥꠖꠦ ꠔꠣꠞꠣꠞꠦ ꠀꠁꠎ ꠖꠤꠖꠣꠞ ꠖꠤꠛꠣ, ꠄꠞꠟꠣꠉꠤ ꠔꠣꠞꠣ ꠅꠔꠣ ꠟꠁꠀ ꠀꠎꠤꠞ ꠅꠃꠇ꠆ꠇꠣ।”
LEV 9:5 ꠝꠥꠍꠣ ꠘꠛꠤꠞ ꠢꠥꠇꠥꠝ ꠝꠣꠚꠤꠇ ꠔꠣꠞꠣ ꠢꠇ꠆ꠇꠟꠔꠣ ꠟꠁꠀ ꠝꠤꠟꠘ-ꠔꠣꠝ꠆ꠛꠥꠞ ꠍꠣꠝꠘꠦ ꠀꠁꠟꠣ। ꠢꠇꠟ ꠛꠘꠤ ꠁꠍꠞꠣꠁꠟ ꠝꠣꠛꠥꠖꠞ ꠍꠣꠝꠘꠦ ꠀꠁꠀ ꠃꠛꠣꠁꠟꠣ।
LEV 9:6 ꠅꠃ ꠡꠝꠄ ꠝꠥꠍꠣꠄ ꠔꠣꠞꠣꠞꠦ ꠇꠁꠟꠣ, “ꠝꠣꠛꠥꠖꠦ ꠔꠥꠝꠞꠣꠞꠦ ꠁꠔꠣ ꠇꠞꠣꠞ ꠟꠣꠉꠤ ꠢꠥꠇꠥꠝ ꠖꠤꠍꠂꠘ, ꠁꠔꠣ ꠀꠖꠣꠄ ꠇꠞꠟꠦ ꠔꠥꠝꠞꠣꠞ ꠍꠣꠝꠘꠦ ꠔꠣꠘ ꠇꠥꠖꠞꠔꠤ ꠘꠥꠞ ꠎꠣꠁꠞ ꠅꠁꠛ।”
LEV 9:7 ꠛꠣꠖꠦ ꠔꠣꠁꠘ ꠁꠝꠣꠝ ꠢꠣꠞꠥꠘꠞꠦ ꠇꠁꠟꠣ, “ꠔꠥꠝꠤ ꠉꠤꠀ ꠇꠥꠞꠛꠣꠘꠤ ꠈꠣꠘꠣꠞ ꠇꠣꠘ꠆ꠖꠣꠔ ꠎꠣꠅ, ꠉꠤꠀ ꠔꠥꠝꠣꠞ ꠘꠤꠎꠞ ꠀꠞ ꠝꠣꠘꠡꠞ ꠉꠥꠘꠣꠞ ꠇꠚꠞꠣꠞ ꠟꠣꠉꠤ, ꠎꠣꠟꠣꠁꠟ ꠇꠥꠞꠛꠣꠘꠤ ꠀꠞ ꠉꠥꠘꠣꠞ ꠇꠚꠞꠣꠞ ꠇꠥꠞꠛꠣꠘꠤ ꠀꠖꠣꠄ ꠇꠞꠅ। ꠀꠞ ꠝꠣꠘꠡꠞ ꠀꠘꠣ ꠇꠥꠞꠛꠣꠘꠤꠅ ꠀꠖꠣꠄ ꠇꠞꠅ, ꠝꠣꠛꠥꠖꠦ ꠀꠝꠣꠞꠦ ꠅꠟꠣ ꠢꠥꠇꠥꠝ ꠖꠤꠍꠂꠘ।”
LEV 9:8 ꠔꠦꠃ ꠁꠝꠣꠝ ꠢꠣꠞꠥꠘ ꠇꠥꠞꠛꠣꠘꠤ ꠈꠣꠘꠣꠞ ꠇꠣꠘ꠆ꠖꠣꠔ ꠉꠤꠀ, ꠔꠣꠘ ꠘꠤꠎꠞ ꠉꠥꠘꠣꠞ ꠇꠚꠞꠣꠞ ꠇꠥꠞꠛꠣꠘꠤꠞ ꠛꠣꠍꠥꠞ ꠎꠛ ꠇꠞꠟꠣ।
LEV 9:9 ꠎꠛꠞ ꠛꠣꠖꠦ ꠔꠣꠘ ꠙꠥꠀꠂꠘ꠆ꠔꠦ ꠅꠉꠥꠞ ꠟꠃ ꠟꠁꠀ ꠔꠣꠘ ꠗꠣꠞꠅ ꠉꠦꠟꠣ। ꠔꠣꠁꠘ ꠅꠃ ꠟꠃꠞ ꠝꠣꠎꠦ ꠀꠋꠉꠥꠟ ꠒꠥꠛꠣꠁꠀ ꠕꠥꠠꠣ ꠟꠃ ꠘꠤꠀ ꠇꠥꠞꠛꠣꠘꠤ ꠈꠣꠘꠣꠞ ꠢꠤꠋ ꠅꠇꠟꠅ ꠝꠣꠈꠣꠁꠟꠣ, ꠀꠞ ꠛꠣꠇꠤ ꠟꠃ ꠇꠥꠞꠛꠣꠘꠤ ꠈꠣꠘꠣꠞ ꠔꠟꠦ ꠓꠣꠟꠤꠟꠣ।
LEV 9:10 ꠝꠣꠛꠥꠖꠦ ꠝꠥꠍꠣꠞꠦ ꠎꠦꠟꠣ ꠢꠥꠇꠥꠝ ꠖꠤꠍꠟꠣ, ꠁꠝꠣꠝ ꠢꠣꠞꠥꠘꠦ ꠑꠤꠇ ꠅꠃ ꠟꠣꠈꠣꠘ ꠉꠥꠘꠣꠞ ꠇꠚꠞꠣꠞ ꠇꠥꠞꠛꠣꠘꠤꠞ ꠛꠣꠍꠥꠞꠞ ꠌꠞ꠆ꠛꠤ, ꠖꠥꠁꠅ ꠇꠤꠒꠘꠤ ꠀꠞ ꠇꠁꠟꠎꠣꠞ ꠟꠉꠞ ꠝꠣꠐꠤꠀꠞꠦ ꠇꠥꠞꠛꠣꠘꠤ ꠈꠣꠘꠣꠞ ꠃꠙꠞꠦ ꠘꠤꠀ ꠎꠣꠟꠣꠁꠟꠤꠟꠣ।
LEV 9:11 ꠇꠥꠞꠛꠣꠘꠤꠞ ꠉꠥꠡ꠆ꠔ ꠀꠞ ꠌꠣꠝꠠꠣ ꠘꠤꠀ ꠔꠣꠁꠘ ꠇꠦꠝ꠆ꠙꠞ ꠛꠣꠞꠦ ꠎꠣꠟꠣꠁꠟꠣ।
LEV 9:12 ꠛꠣꠖꠦ ꠁꠝꠣꠝ ꠢꠣꠞꠥꠘꠦ ꠎꠣꠟꠣꠁꠟ ꠇꠥꠞꠛꠣꠘꠤꠞ ꠝꠦꠠꠣꠞꠦ ꠎꠛ ꠇꠞꠟꠣ। ꠔꠣꠘ ꠙꠥꠀꠂꠘ꠆ꠔꠦ ꠅꠉꠥꠞ ꠟꠃ ꠘꠤꠀ ꠔꠣꠘ ꠀꠔꠅ ꠖꠤꠟꠣ, ꠔꠣꠁꠘ ꠅꠃ ꠟꠃꠞꠦ ꠇꠥꠞꠛꠣꠘꠤ ꠈꠣꠘꠣꠞ ꠌꠣꠁꠞꠅ ꠉꠣꠟꠣꠔ ꠍꠤꠐꠣꠁꠟꠣ।
LEV 9:13 ꠔꠣꠞꠣ ꠎꠣꠟꠣꠁꠟ ꠇꠥꠞꠛꠣꠘꠤꠞ ꠝꠦꠠꠣꠞ ꠇꠟ꠆ꠟꠣ ꠀꠞ ꠉꠥꠡ꠆ꠔꠞ ꠐꠥꠇꠞꠣꠁꠘ ꠄꠇ ꠄꠇ ꠇꠞꠤ ꠢꠣꠞꠥꠘꠞ ꠀꠔꠅ ꠖꠤꠟꠣ, ꠔꠣꠁꠘ ꠁꠔꠣ ꠇꠥꠞꠛꠣꠘꠤ ꠈꠣꠘꠣꠞ ꠃꠙꠞꠦ ꠎꠣꠟꠣꠁꠟꠤꠟꠣ।
LEV 9:14 ꠝꠦꠠꠣꠞ ꠑꠦꠋ ꠀꠞ ꠙꠦꠐꠞ ꠜꠤꠔꠞꠞ ꠢꠇꠟꠔꠣ ꠙꠣꠘꠤ ꠖꠤꠀ ꠗꠁꠀ ꠍꠣꠚ ꠇꠞꠤꠀ, ꠎꠣꠟꠣꠁꠟ ꠇꠥꠞꠛꠣꠘꠤ ꠙꠡꠥꠞ ꠟꠉꠦ ꠁꠔꠣ ꠢꠇ꠆ꠇꠟꠔꠣꠅ ꠇꠥꠞꠛꠣꠘꠤ ꠈꠣꠘꠣꠞ ꠃꠙꠞꠦ ꠎꠣꠟꠣꠁꠟꠤꠟꠣ।
LEV 9:15 ꠛꠣꠖꠦ ꠔꠣꠁꠘ ꠡꠝꠣꠎꠞ ꠝꠣꠘꠡꠞ ꠟꠣꠉꠤ ꠇꠥꠞꠛꠣꠘꠤꠞ ꠙꠡꠥ ꠅꠇꠟ ꠀꠘꠣꠁꠟꠣ। ꠔꠣꠁꠘ ꠝꠣꠘꠡꠞ ꠉꠥꠘꠣꠞ ꠇꠚꠞꠣꠞ ꠇꠥꠞꠛꠣꠘꠤꠞ ꠍꠣꠉꠟ ꠎꠛ ꠇꠞꠟꠣ, ꠀꠞ ꠀꠉꠞ ꠟꠣꠈꠣꠘ ꠇꠥꠞꠛꠣꠘꠤ ꠀꠖꠣꠄ ꠇꠞꠟꠣ।
LEV 9:16 ꠄꠞꠛꠣꠖꠦ ꠔꠣꠁꠘ ꠔꠣꠞꠣꠞ ꠎꠣꠟꠣꠁꠟ ꠇꠥꠞꠛꠣꠘꠤꠞ ꠙꠡꠥꠞꠦꠅ ꠝꠣꠛꠥꠖꠞ ꠢꠥꠇꠥꠝ ꠝꠣꠚꠤꠇ ꠇꠥꠞꠛꠣꠘꠤ ꠖꠤꠟꠣ।
LEV 9:17 ꠀꠞ ꠗꠣꠘ-ꠉꠝꠞ ꠍꠖꠉꠣꠞ ꠟꠣꠉꠤ ꠀꠘꠣ ꠍꠣꠝꠣꠘꠣ ꠕꠣꠇꠤ ꠄꠇ ꠝꠥꠁꠐ ꠘꠤꠀ ꠢꠣꠞꠤ ꠇꠥꠞꠛꠣꠘꠤ ꠈꠣꠘꠣꠞ ꠃꠙꠞꠦ ꠎꠣꠟꠣꠁꠟꠣ। ꠁꠔꠣ ꠍꠣꠠꠣꠅ ꠔꠣꠁꠘ ꠛꠤꠀꠘꠤ ꠛꠣꠟꠣꠞ ꠢꠣꠝꠦꠡꠣꠇꠥꠞ ꠎꠣꠟꠣꠁꠟ ꠇꠥꠞꠛꠣꠘꠤ ꠀꠖꠣꠄ ꠇꠞꠟꠣ।
LEV 9:18 ꠔꠣꠁꠘ ꠝꠣꠘꠡꠞ ꠍꠣꠟꠣꠝꠔꠤ ꠇꠥꠞꠛꠣꠘꠤꠞ ꠅꠃ ꠉꠞꠥ ꠀꠞ ꠝꠦꠠꠣꠞꠦ ꠎꠛ ꠇꠞꠟꠣ। ꠎꠛꠞ ꠛꠣꠖꠦ ꠔꠣꠘ ꠙꠥꠀꠂꠘ꠆ꠔꠦ ꠅꠉꠥꠞ ꠟꠃ ꠀꠘꠤꠀ ꠔꠣꠘ ꠀꠔꠅ ꠖꠤꠟꠣ, ꠟꠃ ꠘꠤꠀ ꠔꠣꠁꠘ ꠇꠥꠞꠛꠣꠘꠤ ꠈꠣꠘꠣꠞ ꠌꠣꠁꠞꠅ ꠉꠣꠟꠣꠔ ꠍꠤꠐꠣꠁ ꠖꠤꠟꠣ।
LEV 9:19 ꠀꠞ ꠁꠝꠣꠝ ꠢꠣꠞꠥꠘꠞꠦ ꠢꠃ ꠉꠞꠥ ꠀꠞ ꠝꠦꠠꠣꠞ ꠟꠉꠦ ꠟꠣꠉꠣꠁꠟ ꠢꠇꠟ ꠌꠞ꠆ꠛꠤ, ꠝꠣꠘꠤ ꠌꠞ꠆ꠛꠤ ꠀꠟꠣ ꠟꠦꠋꠉꠥꠠ, ꠙꠦꠐꠞ ꠜꠤꠔꠞꠞ ꠢꠇꠟꠔꠣꠞ ꠃꠙꠞꠞ ꠌꠞ꠆ꠛꠤ, ꠖꠥꠁꠅ ꠇꠤꠒꠘꠤ ꠀꠞ ꠅꠔꠣꠞ ꠃꠙꠞꠞ ꠌꠞ꠆ꠛꠤ, ꠇꠁꠟꠎꠣꠞ ꠟꠉꠞ ꠝꠣꠐꠤꠀꠅ ꠀꠘꠤꠀ ꠖꠤꠟꠣ।
LEV 9:20 ꠔꠣꠞꠣ ꠅꠃ ꠢꠇꠟ ꠌꠞ꠆ꠛꠤꠞꠦ ꠢꠃ ꠙꠡꠥꠞ ꠍꠤꠘꠣꠞ ꠃꠙꠞꠦ ꠕꠁꠟꠣ। ꠀꠞ ꠁꠝꠣꠝ ꠢꠣꠞꠥꠘꠦ ꠅꠃ ꠌꠞ꠆ꠛꠤ ꠘꠤꠀ ꠇꠥꠞꠛꠣꠘꠤ ꠈꠣꠘꠣꠞ ꠃꠙꠞꠦ ꠎꠣꠟꠣꠁꠟꠣ।
LEV 9:21 ꠝꠥꠍꠣ ꠘꠛꠤꠞ ꠢꠥꠇꠥꠝ ꠝꠣꠚꠤꠇ ꠢꠣꠞꠥꠘꠦ ꠛꠣꠖꠦ ꠇꠥꠞꠛꠣꠘꠤꠞ ꠙꠡꠥꠞ ꠍꠤꠘꠣ ꠀꠞ ꠒꠣꠁꠘꠞ ꠞꠣꠘ ꠘꠤꠀ ꠝꠣꠛꠥꠖꠞ ꠍꠣꠝꠘꠦ ꠖꠥꠟꠘꠣ ꠇꠥꠞꠛꠣꠘꠤ ꠢꠤꠡꠣꠛꠦ ꠖꠥꠟꠣꠁꠟꠣ।
LEV 9:22 ꠛꠣꠖꠦ ꠁꠝꠣꠝ ꠢꠣꠞꠥꠘꠦ ꠝꠣꠘꠡꠞ ꠛꠣꠄꠖꠤ ꠔꠣꠘ ꠀꠔ ꠛꠣꠠꠣꠁꠀ ꠔꠣꠞꠣꠞꠦ ꠖꠥꠀ ꠖꠤꠟꠣ। ꠔꠣꠁꠘ ꠉꠥꠘꠣꠞ ꠇꠚꠞꠣꠞ ꠇꠥꠞꠛꠣꠘꠤ, ꠎꠣꠟꠣꠁꠟ ꠇꠥꠞꠛꠣꠘꠤ ꠀꠞ ꠍꠣꠟꠣꠝꠔꠤ ꠇꠥꠞꠛꠣꠘꠤ ꠀꠖꠣꠄ ꠇꠞꠤꠀ ꠢꠣꠞꠟꠦ, ꠇꠥꠞꠛꠣꠘꠤ ꠈꠣꠘꠣ ꠕꠣꠇꠤ ꠟꠣꠝꠤꠀ ꠀꠁꠟꠣ।
LEV 9:23 ꠄꠞꠛꠣꠖꠦ ꠝꠥꠍꠣ ꠘꠛꠤ ꠀꠞ ꠁꠝꠣꠝ ꠢꠣꠞꠥꠘ ꠉꠤꠀ ꠝꠤꠟꠘ-ꠔꠣꠝ꠆ꠛꠥꠞ ꠜꠤꠔꠞꠦ ꠢꠣꠝꠣꠁꠟꠣ, ꠛꠣꠖꠦ ꠢꠘ ꠕꠣꠇꠤ ꠛꠣꠞ ꠅꠁꠀ ꠀꠁꠀ ꠢꠇꠟ ꠝꠣꠘꠡꠞꠦ ꠖꠥꠀ ꠖꠤꠟꠣ। ꠅꠃ ꠡꠝꠄ ꠢꠇꠟ ꠝꠣꠘꠡꠞ ꠍꠣꠝꠘꠦ ꠝꠣꠛꠥꠖꠦ ꠔꠣꠘ ꠇꠥꠖꠞꠔꠤ ꠘꠥꠞ ꠎꠣꠁꠞ ꠇꠞꠟꠣ।
LEV 9:24 ꠝꠣꠛꠥꠖꠞ ꠉꠦꠍ ꠕꠣꠇꠤ ꠇꠥꠖꠞꠔꠤ ꠀꠉꠥꠁꠘ ꠀꠁꠀ, ꠇꠥꠞꠛꠣꠘꠤ ꠈꠣꠘꠣꠞ ꠃꠙꠞꠞ ꠎꠣꠟꠣꠁꠟ ꠇꠥꠞꠛꠣꠘꠤꠞ ꠙꠡꠥ ꠀꠞ ꠢꠇ꠆ꠇꠟ ꠌꠞ꠆ꠛꠤꠞꠦ ꠎꠣꠟꠣꠁꠀ ꠍꠣꠟꠤ ꠇꠞꠤꠟꠤꠟ। ꠁꠔꠣ ꠖꠦꠈꠤꠀ ꠢꠇꠟ ꠝꠣꠘꠥꠡ ꠈꠥꠡꠤꠄ ꠍꠥꠛꠢꠣꠘ ꠀꠟ꠆ꠟꠣ ꠇꠁꠀ ꠌꠤꠇ ꠖꠤꠀ ꠍꠁꠎꠖꠣꠔ ꠙꠠꠟꠣ।
LEV 10:1 ꠛꠣꠖꠦ ꠅꠟꠣ ꠅꠁꠟ, ꠁꠝꠣꠝ ꠢꠣꠞꠥꠘꠞ ꠙꠥꠀ ꠘꠣꠖꠣꠛ ꠀꠞ ꠀꠛꠤꠢꠥꠄ ꠔꠣꠞꠣꠞ ꠎꠣꠞꠎꠤꠞ ꠀꠉꠞ-ꠈꠥꠡꠛꠄ ꠖꠣꠘꠤꠔ ꠀꠉꠥꠁꠘ ꠎꠣꠟꠣꠁꠟꠣ, ꠀꠞ ꠅꠃ ꠀꠉꠥꠘꠤꠞ ꠃꠙꠞꠦ ꠀꠉꠞ-ꠈꠥꠡꠛꠄ ꠖꠤꠟꠣ। ꠔꠣꠞꠣ ꠝꠣꠛꠥꠖꠞ ꠢꠥꠇꠥꠝꠞ ꠃꠟꠐꠣ ꠉꠤꠀ ꠖꠥꠍꠞꠣ ꠀꠉꠥꠁꠘ ꠖꠤꠀ ꠝꠣꠛꠥꠖꠞ ꠘꠣꠝꠦ ꠀꠉꠞ-ꠈꠥꠡꠛꠄ ꠎꠣꠟꠣꠁꠟꠣ।
LEV 10:2 ꠅꠔꠣꠞ ꠟꠣꠉꠤ ꠝꠣꠛꠥꠖꠞ ꠉꠦꠍ ꠕꠣꠇꠤ ꠀꠉꠥꠁꠘ ꠟꠣꠝꠤꠀ ꠀꠁꠀ ꠔꠣꠞꠣꠞꠦ ꠎꠣꠟꠣꠁꠟꠤꠟ, ꠔꠣꠞꠣ ꠝꠣꠛꠥꠖꠞ ꠍꠣꠝꠘꠦ ꠝꠞꠤꠉꠦꠟꠣ।
LEV 10:3 ꠔꠦꠃ ꠝꠥꠍꠣꠄ ꠢꠣꠞꠥꠘꠞꠦ ꠇꠁꠟꠣ, “ꠝꠣꠛꠥꠖꠦ ꠔ ꠀꠉꠦꠃ ꠎꠣꠘꠣꠁ ꠖꠤꠍꠟꠣ, ꠀꠝꠣꠞ ꠍꠣꠝꠘꠦ ꠎꠦꠞꠣ ꠀꠎꠤꠞ ꠅꠄ, ꠔꠣꠞꠣ ꠀꠝꠣꠞꠦ ꠙꠣꠇ-ꠙꠛꠤꠔ꠆ꠞ ꠇꠁꠀ ꠝꠣꠘꠛ, ꠢꠇꠟ ꠝꠣꠘꠡꠞ ꠍꠣꠝꠘꠦ ꠀꠝꠣꠞ ꠉꠃꠞꠛ-ꠝꠢꠤꠝꠣ ꠎꠣꠁꠞ ꠇꠞꠛ।” ꠁꠈꠣꠘ ꠢꠥꠘꠤꠀ ꠢꠣꠞꠥꠘ ꠌꠥꠙꠌꠣꠙ ꠞꠁꠟꠣ।
LEV 10:4 ꠛꠣꠖꠦ ꠝꠥꠍꠣꠄ ꠢꠣꠞꠥꠘꠞ ꠌꠣꠌꠣ ꠃꠎ꠆ꠎꠟꠞ ꠙꠥꠀꠂꠘ ꠝꠤꠡꠣꠄꠄꠟ ꠀꠞ ꠄꠟꠎꠣꠚꠘꠞꠦ ꠈꠛꠞ ꠖꠤꠀ ꠀꠘꠣꠁꠟꠣ, ꠀꠘꠣꠁꠀ ꠇꠁꠟꠣ, “ꠔꠥꠝꠞꠣ ꠢꠦꠞꠦꠝ ꠡꠞꠤꠚꠞ ꠍꠣꠝꠘ ꠕꠣꠇꠤ ꠔꠥꠝꠞꠣꠞ ꠖꠥꠁꠅ ꠜꠣꠔꠤꠎꠣꠞ ꠟꠣꠡꠞꠦ ꠛꠣꠞ ꠇꠞꠤꠀ ꠇꠦꠝ꠆ꠙꠞ ꠛꠣꠞꠦ ꠘꠦꠅ।”
LEV 10:5 ꠔꠣꠘ ꠢꠥꠇꠥꠝ ꠙꠣꠁꠀ ꠔꠣꠞꠣ ꠉꠤꠀ ꠘꠣꠖꠣꠛ ꠀꠞ ꠀꠛꠤꠢꠥꠞ ꠟꠣꠡꠞꠦ ꠁꠝꠣꠝꠔꠤ ꠙꠣꠁꠘ꠆ꠎꠣꠛꠤꠞ ꠇꠣꠙꠠꠅ ꠗꠞꠤ ꠐꠣꠘꠤꠀ ꠇꠦꠝ꠆ꠙꠞ ꠛꠣꠞꠦ ꠘꠤꠟꠣ।
LEV 10:6 ꠛꠣꠖꠦ ꠁꠝꠣꠝ ꠢꠣꠞꠥꠘ ꠀꠞ ꠔꠣꠘ ꠙꠥꠀꠂꠘ ꠀꠟꠤ-ꠀꠎꠞ ꠀꠞ ꠁꠍꠣꠝꠣꠞꠞꠦ ꠝꠥꠍꠣꠄ ꠇꠁꠟꠣ, “ꠔꠣꠞꠣꠞ ꠝꠃꠔꠞ ꠖꠥꠈꠦ ꠔꠥꠝꠞꠣ ꠘꠤꠎꠞ ꠌꠥꠟꠞꠦ ꠀꠃꠟꠣ-ꠎꠣꠃꠟꠣ ꠇꠞꠤꠅ ꠘꠣ, ꠀꠞ ꠚꠤꠘ꠆ꠘꠞ ꠇꠣꠙꠠ-ꠌꠥꠙꠠ ꠚꠣꠞꠤꠅ ꠘꠣ। ꠁꠔꠣ ꠇꠞꠟꠦ ꠔꠥꠝꠞꠣꠅ ꠝꠞꠛꠣꠄ, ꠀꠞ ꠀꠡ꠆ꠔꠣ ꠡꠝꠣꠎꠞ ꠃꠙꠞꠦ ꠝꠣꠛꠥꠖꠞ ꠉꠎꠛꠤ ꠉꠥꠍꠣ ꠟꠣꠝꠛ। ꠅꠁꠟꠦ ꠝꠣꠛꠥꠖꠦ ꠎꠦꠞꠣꠞꠦ ꠀꠉꠥꠁꠘꠖꠤ ꠎꠣꠟꠣꠁ ꠝꠣꠞꠍꠂꠘ, ꠔꠣꠞꠣꠞ ꠖꠥꠈꠦ ꠔꠥꠝꠞꠣꠞ ꠇꠥꠐꠥꠝ-ꠈꠦꠡ ꠝꠣꠘꠤ ꠛꠣꠖ-ꠛꠣꠇꠤ ꠛꠘꠤ ꠁꠍꠞꠣꠁꠟꠦ ꠝꠣꠔ꠆ꠔꠝ-ꠀꠢꠣꠎꠣꠞꠤ ꠇꠞꠔꠣ ꠙꠣꠞꠛꠣ।
LEV 10:7 ꠔꠥꠝꠞꠣꠞ ꠉꠔꠞꠅ ꠔ ꠝꠣꠛꠥꠖꠞ ꠘꠣꠝꠞ ꠈꠦꠟꠣꠚꠔꠤ ꠡꠝꠎꠤꠛꠣꠞ ꠙꠛꠤꠔ꠆ꠞ ꠔꠦꠟ ꠖꠦꠅꠀ ꠅꠁꠍꠦ, ꠄꠞꠟꠣꠉꠤ ꠔꠥꠝꠞꠣ ꠝꠤꠟꠘ-ꠔꠣꠝ꠆ꠛꠥꠞ ꠖꠥꠀꠞꠞ ꠛꠣꠞꠦ ꠎꠣꠁꠅ ꠘꠣ, ꠉꠦꠟꠦꠃ ꠝꠞꠛꠣꠄ।” ꠔꠣꠞꠣꠅ ꠝꠥꠍꠣꠞ ꠇꠕꠣ ꠝꠣꠘꠟꠣ।
LEV 10:8 ꠄꠞꠛꠣꠖꠦ ꠝꠣꠛꠥꠖꠦ ꠁꠝꠣꠝ ꠢꠣꠞꠥꠘꠞꠦ ꠇꠁꠟꠣ,
LEV 10:9 “ꠔꠥꠝꠤ ꠀꠞ ꠔꠥꠝꠣꠞ ꠙꠥꠀꠂꠘ꠆ꠔꠦ ꠀꠋꠉꠥꠞꠞ ꠡꠞꠛꠔ ꠛꠣ ꠡꠞꠣꠛ ꠈꠣꠁꠀ ꠝꠤꠟꠘ-ꠔꠣꠝ꠆ꠛꠥꠞ ꠜꠤꠔꠞꠦ ꠢꠣꠝꠣꠁꠅ ꠘꠣ, ꠢꠣꠝꠣꠁꠟꠦꠃ ꠝꠞꠛꠣꠄ। ꠁ ꠢꠥꠇꠥꠝ ꠅꠀꠞꠤꠡꠞ ꠙꠞ ꠅꠀꠞꠤꠡ ꠗꠞꠤ ꠢꠞ-ꠢꠣꠝꠦꠡꠣ ꠝꠣꠘꠤꠅ।
LEV 10:10 ꠇꠥꠘꠐꠣ ꠢꠣꠞꠣꠝ ꠀꠞ ꠇꠥꠘꠐꠣ ꠢꠣꠟꠣꠟ, ꠇꠥꠘꠐꠣ ꠙꠣꠇ ꠀꠞ ꠇꠥꠘꠐꠣ ꠘꠣꠙꠣꠇ, ꠁꠔꠣ ꠛꠥꠎꠤꠀ-ꠢꠥꠘꠤꠀ ꠌꠟꠤꠅ।
LEV 10:11 ꠀꠞ ꠀꠝꠤ ꠝꠣꠛꠥꠖꠦ ꠝꠥꠍꠣꠞ ꠝꠣꠞꠚꠔꠦ ꠛꠘꠤ ꠁꠍꠞꠣꠁꠟꠞꠦ ꠎꠔ ꠢꠥꠇꠥꠝ-ꠀꠢꠇꠣꠝ ꠛꠣꠔꠣꠁꠍꠤ, ꠁꠔꠣ ꠔꠣꠞꠣꠞꠦ ꠔꠣꠟꠤꠝ ꠖꠤꠅ।”
LEV 10:12 ꠛꠣꠖꠦ ꠢꠣꠞꠥꠘ ꠀꠞ ꠔꠣꠘ ꠛꠣꠇꠤ ꠖꠥꠁꠅ ꠙꠥꠀ ꠀꠟꠤ-ꠀꠎꠞ ꠀꠞ ꠁꠍꠣꠝꠣꠞꠞꠦ ꠝꠥꠍꠣꠄ ꠇꠁꠟꠣ, “ꠝꠣꠛꠥꠖꠞ ꠘꠣꠝꠦ ꠀꠉꠥꠘꠤꠔ ꠖꠦꠅꠀ ꠇꠥꠞꠛꠣꠘꠤꠞ ꠟꠉꠞ ꠗꠣꠘ-ꠉꠝꠞ ꠍꠖꠉꠣꠞ ꠎꠦ ꠅꠋꠡ ꠛꠣꠇꠤ ꠞꠁꠍꠦ, ꠅꠔꠣ ꠖꠤꠀ ꠈꠣꠝꠤꠞ ꠍꠣꠠꠣ ꠞꠥꠐꠤ ꠛꠣꠘꠣꠁꠀ ꠇꠥꠞꠛꠣꠘꠤ ꠈꠣꠘꠣꠞ ꠇꠣꠘ꠆ꠖꠣꠔ ꠘꠤꠀ ꠔꠥꠝꠞꠣ ꠈꠣꠁꠅ। ꠁꠔꠣ ꠔ ꠈꠣꠍ ꠙꠛꠤꠔ꠆ꠞ ꠎꠤꠘꠤꠡ।
LEV 10:13 ꠔꠥꠝꠞꠣ ꠙꠛꠤꠔ꠆ꠞ ꠇꠣꠛꠣ ꠊꠞꠞ ꠡꠤꠝꠣꠘꠣꠞ ꠜꠤꠔꠞꠦ ꠅꠔꠣ ꠈꠣꠁꠅ। ꠝꠣꠛꠥꠖꠞ ꠘꠣꠝꠦ ꠀꠉꠥꠘꠤꠔ ꠖꠦꠅꠀ ꠇꠥꠞꠛꠣꠘꠤꠞ ꠅꠃ ꠅꠋꠡ ꠔ ꠔꠥꠝꠣꠞ ꠀꠞ ꠔꠥꠝꠣꠞ ꠙꠥꠀꠂꠘ꠆ꠔꠞ ꠙꠣꠅꠘꠣ। ꠝꠣꠛꠥꠖꠦ ꠀꠝꠣꠞꠦ ꠅꠟꠣ ꠢꠥꠇꠥꠝ ꠖꠤꠍꠂꠘ।
LEV 10:14 ꠅꠁꠟꠦ ꠝꠣꠛꠥꠖꠞ ꠘꠣꠝꠦ ꠖꠥꠟꠘꠣ ꠇꠥꠞꠛꠣꠘꠤꠞ ꠍꠤꠘꠣ ꠀꠞ ꠞꠣꠘꠞ ꠉꠥꠡ꠆ꠔ ꠔꠥꠝꠞꠣ ꠀꠞ ꠔꠥꠝꠞꠣꠞ ꠙꠥꠀ-ꠙꠥꠠꠤꠘ꠆ꠔꠦꠅ ꠈꠣꠁꠔꠣꠄ ꠙꠣꠞꠛꠣꠄ। ꠎꠦꠇꠥꠘꠥ ꠙꠣꠇ-ꠍꠣꠚ ꠎꠣꠉꠣꠔ ꠛꠁꠀ ꠔꠥꠝꠞꠣ ꠁꠔꠣ ꠈꠣꠁꠅ। ꠛꠘꠤ ꠁꠍꠞꠣꠁꠟꠞ ꠢꠇꠟ ꠍꠣꠟꠣꠝꠔꠤ ꠇꠥꠞꠛꠣꠘꠤꠞ ꠉꠥꠡ꠆ꠔꠞ ꠅꠃ ꠅꠋꠡ ꠔꠥꠝꠞꠣꠞꠦ ꠀꠞ ꠔꠥꠝꠞꠣꠞ ꠙꠥꠀ-ꠙꠥꠠꠤꠘ꠆ꠔꠞꠦ ꠖꠦꠅꠀ ꠅꠁꠍꠦ।
LEV 10:15 ꠅꠃ ꠇꠥꠞꠛꠣꠘꠤꠞ ꠙꠡꠥꠞ ꠌꠞ꠆ꠛꠤ ꠎꠦꠛꠟꠣ ꠀꠘꠣ ꠅꠁꠛ, ꠅꠃ ꠡꠝꠄ ꠖꠥꠟꠘꠣ ꠇꠥꠞꠛꠣꠘꠤꠞ ꠟꠣꠉꠤ ꠍꠤꠘꠣ ꠀꠞ ꠞꠣꠘꠞ ꠉꠥꠡ꠆ꠔꠅ ꠀꠘꠣ ꠟꠣꠉꠛ। ꠝꠣꠛꠥꠖꠞ ꠢꠥꠇꠥꠝ ꠝꠣꠚꠤꠇ ꠅꠃ ꠞꠣꠘ ꠀꠞ ꠍꠤꠘꠣꠞ ꠉꠥꠡ꠆ꠔ ꠔꠥꠝꠤ ꠀꠞ ꠔꠥꠝꠣꠞ ꠙꠥꠀ-ꠙꠥꠠꠤꠘ꠆ꠔꠞ ꠌꠤꠞꠇꠣꠟꠤꠘ ꠙꠣꠅꠘꠣ।”
LEV 10:16 ꠛꠣꠖꠦ ꠝꠥꠍꠣꠄ ꠈꠥꠛ ꠈꠤꠀꠟꠤ ꠅꠁꠀ ꠔꠣꠟ꠆ꠟꠣꠡꠤ ꠇꠞꠤꠀ ꠎꠣꠘꠟꠣ, ꠎꠦ ꠍꠣꠉꠟ ꠖꠤꠀ ꠉꠥꠘꠣꠞ ꠇꠚꠞꠣꠞ ꠇꠥꠞꠛꠣꠘꠤ ꠀꠖꠣꠄ ꠇꠞꠣ ꠅꠁꠍꠤꠟ, ꠅꠉꠥꠞ ꠢꠇꠟ ꠉꠥꠡ꠆ꠔ ꠔꠣꠞꠣ ꠎꠣꠟꠣꠁꠟꠤꠍꠦ। ꠄꠞꠟꠣꠉꠤ ꠝꠥꠍꠣꠄ ꠢꠣꠞꠥꠘꠞ ꠛꠣꠇꠤ ꠖꠥꠁꠅ ꠙꠥꠀ ꠀꠟꠤ-ꠀꠎꠞ ꠀꠞ ꠁꠍꠣꠝꠣꠞꠞ ꠃꠙꠞꠦ ꠉꠥꠍꠣ ꠇꠞꠤꠀ ꠇꠁꠟꠣ,
LEV 10:17 “ꠉꠥꠘꠣꠞ ꠇꠚꠞꠣꠞ ꠇꠥꠞꠛꠣꠘꠤꠞ ꠉꠥꠡ꠆ꠔ ꠔꠥꠝꠞꠣ ꠇꠣꠛꠣ ꠊꠞꠞ ꠡꠤꠝꠣꠘꠣꠔ ꠈꠣꠁꠟꠣꠄ ꠘꠣ ꠇꠦꠘꠦ? ꠁꠔꠣ ꠔ ꠈꠣꠍ ꠙꠛꠤꠔ꠆ꠞ ꠎꠤꠘꠤꠡ। ꠝꠣꠛꠥꠖꠞ ꠍꠣꠝꠘꠦ ꠛꠘꠤ ꠁꠍꠞꠣꠁꠟꠞ ꠉꠥꠘꠣꠞ ꠇꠚꠞꠣ ꠀꠖꠣꠄ ꠇꠞꠤꠀ, ꠔꠣꠞꠣꠞ ꠖꠥꠡ-ꠇꠍꠥꠞꠤ ꠝꠣꠚꠤꠞ ꠟꠣꠉꠤ ꠁꠔꠣ ꠔ ꠔꠥꠝꠞꠣꠞꠦ ꠖꠦꠅꠀ ꠅꠁꠍꠤꠟ।
LEV 10:18 ꠇꠥꠞꠛꠣꠘꠤꠞ ꠍꠣꠉꠟꠞ ꠟꠃ ꠎꠦꠛꠟꠣ ꠢꠦꠞꠦꠝ ꠡꠞꠤꠚꠞ ꠜꠤꠔꠞꠦ ꠘꠦꠅꠀ ꠅꠁꠍꠦ ꠘꠣ, ꠔꠦ ꠀꠝꠣꠞ ꠢꠥꠇꠥꠝ ꠝꠣꠚꠤꠇ ꠁꠔꠣꠞ ꠉꠥꠡ꠆ꠔ ꠔ ꠔꠥꠝꠞꠣ ꠇꠣꠛꠣ ꠊꠞꠞ ꠡꠤꠝꠣꠘꠣꠞ ꠜꠤꠔꠞꠦ ꠈꠣꠅꠀ ꠎꠞꠥꠞ ꠀꠍꠤꠟ।”
LEV 10:19 ꠢꠣꠞꠥꠘꠦ ꠎꠥꠀꠙ ꠖꠤꠟꠣ, “ꠀꠁꠎ ꠝꠣꠛꠥꠖꠞ ꠍꠣꠝꠘꠦ ꠔꠣꠞꠣꠞ ꠉꠥꠘꠣꠞ ꠇꠚꠞꠣꠞ ꠇꠥꠞꠛꠣꠘꠤ ꠀꠞ ꠎꠣꠟꠣꠁꠟ ꠇꠥꠞꠛꠣꠘꠤ ꠀꠖꠣꠄ ꠇꠞꠣꠞ ꠛꠣꠖꠦ ꠀꠝꠣꠞ ꠃꠙꠞꠦꠖꠤ ꠅꠔꠔꠣ ꠊꠐꠤꠟ। ꠔꠦ ꠀꠁꠎꠇꠥꠞ ꠖꠤꠘꠅ ꠀꠝꠤ ꠅꠃ ꠇꠥꠞꠛꠣꠘꠤꠞ ꠉꠥꠡ꠆ꠔ ꠈꠣꠁꠟꠦ ꠝꠣꠛꠥꠖ ꠇꠥꠘꠥ ꠈꠥꠡꠤ ꠅꠁꠛꠣ ꠘꠤ?”
LEV 10:20 ꠁ ꠎꠥꠀꠙ ꠢꠥꠘꠤꠀ ꠝꠥꠍꠣ ꠘꠛꠤ ꠈꠥꠡꠤ ꠅꠁꠟꠣ।
LEV 11:1 ꠝꠣꠛꠥꠖꠦ ꠝꠥꠍꠣ ꠀꠞ ꠢꠣꠞꠥꠘꠞꠦ ꠇꠁꠟꠣ,
LEV 11:2 “ꠔꠥꠝꠞꠣ ꠛꠘꠤ ꠁꠍꠞꠣꠁꠟꠞꠦ ꠎꠣꠘꠣꠁ ꠖꠦꠅ, ꠝꠣꠐꠤꠞ ꠃꠙꠞꠞ ꠙꠡꠥꠞ ꠝꠣꠎꠦ ꠎꠦꠔꠣ ꠙꠡꠥ ꠔꠥꠝꠞꠣꠞ ꠟꠣꠉꠤ ꠢꠣꠟꠣꠟ, ꠅꠔꠣ ꠅꠁꠟ:
LEV 11:3 “ꠎꠦꠔꠣ ꠙꠡꠥꠞ ꠙꠣꠅꠞ ꠈꠥꠞꠣ ꠙꠥꠞꠣꠙꠥꠞ ꠌꠤꠞꠣ, ꠀꠞ ꠈꠣꠘꠤꠞꠦ ꠙꠣꠎꠣꠄ, ꠁꠔꠣꠞ ꠉꠥꠡ꠆ꠔ ꠔꠥꠝꠞꠣꠞ ꠟꠣꠉꠤ ꠢꠣꠟꠣꠟ।
LEV 11:4 ꠔꠣ-ꠅ ꠄꠞ ꠝꠣꠎꠞ ꠇꠥꠘꠥ ꠇꠥꠘꠥ ꠙꠡꠥꠄ ꠈꠣꠟꠤ ꠈꠣꠘꠤꠞꠦ ꠙꠣꠎꠣꠄ, ꠀꠞ ꠇꠥꠘꠥ ꠇꠥꠘꠥ ꠙꠡꠥꠞ ꠈꠣꠟꠤ ꠈꠥꠞꠣ ꠌꠤꠞꠣ, ꠁꠔꠣ ꠔ ꠔꠥꠝꠞꠣꠞ ꠟꠣꠉꠤ ꠢꠣꠞꠣꠝ। ꠃꠐꠦ ꠈꠣꠘꠤꠞꠦ ꠙꠣꠎꠣꠁꠟꠦꠅ ꠔꠣꠞ ꠈꠥꠞꠣ ꠌꠤꠞꠣ ꠘꠣꠄ, ꠄꠞꠟꠣꠉꠤ ꠃꠐ ꠢꠣꠞꠣꠝ।
LEV 11:5 ꠡꠣꠚꠘ-ꠃꠘ꠆ꠖꠥꠞꠦ ꠈꠣꠘꠤꠞꠦ ꠙꠣꠎꠣꠁꠟꠦꠅ, ꠁꠔꠣꠞ ꠈꠥꠞꠣ ꠌꠤꠞꠣ ꠘꠣꠄ, ꠅꠔꠣꠞ ꠟꠣꠉꠤ ꠁꠔꠣꠅ ꠢꠣꠞꠣꠝ।
LEV 11:6 ꠈꠞꠉꠥꠡꠦꠅ ꠈꠣꠘꠤꠞꠦ ꠙꠣꠎꠣꠄ, ꠅꠁꠟꠦ ꠁꠔꠣꠞ ꠈꠥꠞꠣ ꠌꠤꠞꠣ ꠘꠣꠄ, ꠅꠔꠣꠞ ꠟꠣꠉꠤ ꠢꠣꠞꠣꠝ।
LEV 11:7 ꠡꠥꠅꠞꠞ ꠈꠥꠞꠣ ꠙꠥꠞꠣꠙꠥꠞ ꠌꠤꠞꠣ, ꠅꠁꠟꠦ ꠁꠔꠣꠄ ꠈꠣꠘꠤꠞꠦ ꠙꠣꠎꠣꠄ ꠘꠣ, ꠄꠞꠟꠣꠉꠤ ꠁꠔꠣ ꠔꠥꠝꠞꠣꠞ ꠟꠣꠉꠤ ꠢꠣꠞꠣꠝ।
LEV 11:8 ꠁꠔꠣꠞ ꠉꠥꠡ꠆ꠔ ꠔꠥꠝꠞꠣꠞ ꠟꠣꠉꠤ ꠢꠣꠞꠣꠝ, ꠁꠔꠣꠞ ꠝꠞꠣ ꠟꠣꠡꠞꠦꠅ ꠍꠁꠅ ꠘꠣ। ꠁꠔꠣ ꠔꠥꠝꠞꠣꠞ ꠟꠣꠉꠤ ꠘꠣꠙꠣꠇ।
LEV 11:9 “ꠙꠣꠘꠤꠞ ꠝꠣꠎꠦ ꠎꠦꠔꠣ ꠎꠣꠘꠖꠣꠞꠦ ꠛꠡꠔ ꠇꠞꠂꠘ, ꠁꠔꠣꠞ ꠝꠣꠎꠦ ꠎꠦꠔꠣꠞ ꠚꠁꠞ ꠀꠞ ꠒꠣꠈꠘꠣ ꠀꠍꠦ, ꠁꠔꠣ ꠔꠥꠝꠞꠣꠞ ꠟꠣꠉꠤ ꠢꠣꠟꠣꠟ।
LEV 11:10 ꠅꠁꠟꠦ ꠎꠦꠔꠣꠞ ꠚꠁꠞ ꠀꠞ ꠒꠣꠈꠘꠣ ꠘꠣꠁ, ꠁꠔꠣ ꠔꠥꠝꠞꠣꠞ ꠟꠣꠉꠤ ꠘꠣꠎꠣꠁꠎ। ꠁꠔꠣ ꠙꠣꠘꠤꠞ ꠝꠣꠎꠦ ꠙꠣꠟ ꠛꠣꠘ꠆ꠖꠤꠀ ꠊꠥꠞꠞꠣ ꠎꠣꠘꠖꠣꠞ ꠅꠃꠇ ꠛꠣ ꠀꠞꠅ ꠇꠥꠘꠥ ꠎꠣꠘꠖꠣꠞ ꠅꠃꠇ, ꠁꠔꠣꠞꠦ ꠔꠥꠝꠞꠣ ꠊꠤꠘ꠆ꠘꠣꠁꠅ।
LEV 11:11 ꠘꠣꠎꠣꠁꠎ ꠅꠀꠄ ꠁꠔꠣꠞꠦ ꠢꠣꠞꠣꠝ ꠝꠘꠅ ꠇꠞꠤꠅ, ꠁꠔꠣ ꠔꠥꠝꠞꠣ ꠈꠣꠁꠅ ꠘꠣ। ꠁꠔꠣꠞ ꠝꠞꠣ ꠟꠣꠡꠞꠦꠅ ꠔꠥꠝꠞꠣ ꠊꠤꠘ꠆ꠘꠣꠁꠅ।
LEV 11:12 ꠙꠣꠘꠤꠞ ꠝꠣꠎꠦ ꠛꠡꠔ ꠇꠞꠦ, ꠅꠁꠟꠦ ꠇꠥꠘꠥ ꠚꠁꠞ ꠛꠣ ꠒꠣꠈꠘꠣ ꠘꠣꠁ, ꠁꠟꠣꠈꠣꠘ ꠢꠇꠟ ꠎꠣꠘꠖꠣꠞꠞꠦ ꠔꠥꠝꠞꠣ ꠊꠤꠘ꠆ꠘꠣꠁꠅ।
LEV 11:13 “ꠀꠞ ꠙꠣꠈꠤ ꠅꠇꠟꠞ ꠝꠣꠎꠞ ꠅꠃ ꠟꠣꠈꠣꠘ ꠙꠣꠈꠤꠞꠦ ꠔꠥꠝꠞꠣ ꠊꠤꠘ꠆ꠘꠣꠁꠅ, ꠁꠔꠣ ꠔꠥꠝꠞꠣ ꠈꠣꠁꠅ ꠘꠣ। ꠅꠔꠣ ꠅꠁꠟꠣ, ꠛꠠ ꠌꠤꠟ, ꠢꠇꠥꠘ, ꠢꠣꠚ-ꠈꠣꠃꠞꠤ,
LEV 11:14 ꠢꠇꠟ ꠎꠣꠔꠞ ꠌꠤꠟ, ꠢꠇꠟ ꠎꠣꠔ ꠇꠣꠃꠀ,
LEV 11:15 ꠃꠐ ꠙꠣꠈꠤ,
LEV 11:16 ꠘꠤꠝ ꠙꠣꠈꠤ, ꠉꠣꠋꠌꠤꠟ, ꠢꠇꠟ ꠘꠝꠥꠘꠣꠞ ꠛꠣꠎ ꠙꠣꠈꠤ,
LEV 11:17 ꠢꠇꠟ ꠎꠣꠔ ꠙꠦꠌꠣ, ꠢꠇꠟ ꠎꠣꠔꠞ ꠇꠥꠠꠣ, ꠍꠟꠣ-ꠇꠣꠇ, ꠛꠟꠥꠀ ꠙꠣꠈꠤ,
LEV 11:18 ꠙꠣꠘꠤ-ꠈꠣꠃꠞꠤ,
LEV 11:19 ꠢꠇꠟ ꠎꠣꠔꠞ ꠎꠣꠐꠤꠀ, ꠢꠇꠟ ꠎꠣꠔꠞ ꠛꠉꠟꠣ, ꠝꠘ-ꠌꠥꠞꠣ ꠙꠣꠈꠤ ꠀꠞ ꠛꠣꠖꠥꠞ, ꠁꠔꠣ ꠔꠥꠝꠞꠣꠞ ꠟꠣꠉꠤ ꠢꠣꠞꠣꠝ।
LEV 11:20 “ꠙꠥꠇ-ꠚꠞꠤꠋ ꠅꠇꠟꠞ ꠝꠣꠎꠦ ꠅꠃ ꠟꠣꠈꠣꠘ ꠙꠥꠇ-ꠚꠞꠤꠋ ꠔꠥꠝꠞꠣꠞ ꠟꠣꠉꠤ ꠘꠣꠎꠣꠁꠎ, ꠎꠦꠔꠣꠄ ꠙꠣꠅꠖꠤ ꠀꠐꠦ ꠀꠞ ꠃꠠꠣꠟ ꠖꠦꠄ, ꠁꠔꠣꠞꠦ ꠔꠥꠝꠞꠣ ꠊꠤꠘ꠆ꠘꠣꠁꠅ।
LEV 11:21 ꠅꠁꠟꠦ ꠁꠔꠣꠞ ꠝꠣꠎꠞ ꠎꠦꠔꠣꠞ ꠀꠐꠥ ꠀꠍꠦ, ꠀꠞ ꠝꠣꠐꠤꠞ ꠃꠙꠞꠦ ꠚꠣꠟꠣꠁ ꠚꠣꠟꠣꠁ ꠌꠟꠦ, ꠁꠔꠣꠞ ꠝꠣꠎꠞ ꠇꠥꠘꠥ ꠇꠥꠘꠥꠐꠣ ꠔꠥꠝꠞꠣꠞ ꠟꠣꠉꠤ ꠢꠣꠟꠣꠟ।
LEV 11:22 ꠁꠔꠣ ꠅꠁꠟ, ꠢꠇꠟ ꠎꠣꠔꠞ ꠙꠋꠉꠙꠣꠟ, ꠛꠣꠊꠣ-ꠚꠞꠤꠋ, ꠊꠣꠡ-ꠚꠞꠤꠋ।
LEV 11:23 ꠅꠁꠟꠦ ꠁꠔꠣ ꠍꠣꠠꠣ ꠛꠣꠖ-ꠛꠣꠇꠤ ꠎꠔ ꠙꠥꠇ-ꠚꠞꠤꠋꠄ ꠌꠣꠁꠞ ꠙꠣꠅꠄ ꠀꠐꠦ ꠀꠞ ꠃꠠꠤꠔ ꠙꠣꠞꠦ, ꠁꠔꠣ ꠢꠇꠟꠔꠣ ꠔꠥꠝꠞꠣ ꠊꠤꠘ꠆ꠘꠣꠁꠅ।
LEV 11:24 “ꠔꠥꠝꠞꠣ ꠅꠃ ꠟꠣꠈꠣꠘ ꠇꠣꠝ ꠇꠞꠟꠦ ꠘꠣꠙꠣꠇ ꠅꠁꠎꠤꠛꠣꠄ; ꠇꠥꠘꠥ ꠝꠣꠘꠡꠦ ꠎꠥꠖꠤ ꠅꠃ ꠢꠣꠞꠣꠝ ꠙꠡꠥ, ꠙꠣꠈꠤ, ꠝꠣꠍ, ꠙꠥꠇ-ꠚꠞꠤꠋ ꠅꠔꠣꠞ ꠝꠞꠣ ꠟꠣꠡ ꠍꠁꠟꠣꠄ, ꠔꠦ ꠢꠦ ꠢꠣꠁꠘ꠆ꠎꠣ ꠙꠞ꠆ꠎꠘ꠆ꠔ ꠘꠣꠙꠣꠇ ꠞꠁꠛ।
LEV 11:25 ꠀꠞ ꠇꠦꠃ ꠎꠥꠖꠤ ꠅꠔꠣ ꠢꠣꠞꠣꠝ ꠎꠤꠘꠤꠡꠞ ꠟꠣꠡꠞ ꠇꠥꠘꠥ ꠅꠋꠡꠞꠦ ꠀꠔꠖꠤ ꠗꠞꠤꠀ ꠛꠁꠀ ꠘꠦꠄ, ꠔꠦ ꠢꠦ ꠔꠣꠞ ꠇꠣꠙꠠ-ꠌꠥꠙꠠ ꠗꠁꠀ ꠖꠤꠔꠦ ꠅꠁꠛ, ꠀꠞ ꠢꠣꠁꠘ꠆ꠎꠣ ꠙꠞ꠆ꠎꠘ꠆ꠔ ꠘꠣꠙꠣꠇ ꠞꠁꠛ।
LEV 11:26 “ꠀꠞ ꠎꠦꠔꠣ ꠙꠡꠥꠞ ꠙꠣꠅꠞ ꠈꠥꠞꠣ ꠙꠥꠞꠣꠙꠥꠞ ꠌꠤꠞꠣ ꠘꠣꠄ, ꠛꠣ ꠎꠦ ꠙꠡꠥꠄ ꠈꠣꠘꠤꠞꠦ ꠙꠣꠎꠣꠄ ꠘꠣ, ꠁꠔꠣ ꠔ ꠔꠥꠝꠞꠣꠞ ꠟꠣꠉꠤ ꠢꠣꠞꠣꠝ। ꠅꠃ ꠢꠣꠞꠣꠝ ꠙꠡꠥꠞꠦ ꠎꠦ ꠎꠘꠦ ꠍꠁꠛ, ꠢꠦ ꠘꠣꠙꠣꠇ ꠛꠘꠤꠎꠤꠛ।
LEV 11:27 ꠌꠣꠁꠞ ꠙꠣꠅꠄ ꠀꠐꠞꠣ ꠎꠣꠘꠥꠀꠞ ꠅꠇꠟꠞ ꠝꠣꠎꠦ, ꠎꠦ ꠙꠡꠥꠄ ꠙꠣꠅꠞ ꠔꠣꠟꠥꠔ ꠜꠞ ꠖꠤꠀ ꠀꠐꠦ, ꠁꠔꠣꠅ ꠔꠥꠝꠞꠣꠞ ꠟꠣꠉꠤ ꠢꠣꠞꠣꠝ। ꠇꠦꠃ ꠎꠥꠖꠤ ꠁꠔꠣꠞ ꠝꠞꠣ ꠟꠣꠡ ꠍꠁꠟꠣꠄ, ꠔꠦ ꠢꠣꠁꠘ꠆ꠎꠣ ꠙꠞ꠆ꠎꠘ꠆ꠔ ꠘꠣꠙꠣꠇ ꠞꠁꠛ।
LEV 11:28 ꠀꠞ ꠇꠥꠘꠥ ꠝꠣꠘꠡꠦ ꠎꠥꠖꠤ ꠁꠔꠣꠞ ꠟꠣꠡ ꠀꠔꠖꠤ ꠗꠞꠤꠀ ꠛꠁꠀ ꠘꠦꠄ, ꠔꠦ ꠔꠣꠞ ꠇꠣꠙꠠ-ꠌꠥꠙꠠ ꠗꠁꠀ ꠖꠤꠔꠦ ꠅꠁꠛ, ꠀꠞ ꠢꠣꠁꠘ꠆ꠎꠣ ꠙꠞ꠆ꠎꠘ꠆ꠔ ꠢꠦ ꠘꠣꠙꠣꠇ ꠞꠁꠛ। ꠁꠔꠣ ꠎꠣꠘꠥꠀꠞ ꠅꠇꠟ ꠔ ꠔꠥꠝꠞꠣꠞ ꠟꠣꠉꠤ ꠢꠣꠞꠣꠝ।
LEV 11:29 “ꠀꠞ ꠝꠣꠐꠤꠔ ꠌꠟꠞꠣ ꠢꠥꠞꠥ-ꠝꠥꠞꠥ ꠎꠣꠘꠖꠣꠞꠞ ꠝꠣꠎꠦ ꠘꠦꠃꠟ, ꠃꠘ꠆ꠖꠥꠞ, ꠢꠇꠟ ꠎꠣꠔꠞ ꠉꠤꠞꠉꠤꠐꠤ,
LEV 11:30 ꠐꠤꠇꠐꠤꠇꠤ, ꠉꠥꠁꠟ-ꠢꠣꠚ, ꠝꠁ-ꠢꠣꠚ, ꠀꠁꠘ꠆ꠎꠣꠁꠟ ꠀꠞ ꠇꠣꠇꠟꠣꠡ, ꠔꠥꠝꠞꠣꠞ ꠟꠣꠉꠤ ꠢꠣꠞꠣꠝ।
LEV 11:31 ꠝꠣꠐꠤꠔ ꠌꠟꠞꠣ ꠢꠥꠞꠥ-ꠝꠥꠞꠥ ꠎꠣꠘꠖꠣꠞꠞ ꠝꠣꠎꠞ ꠅꠃ ꠎꠣꠔꠞ ꠎꠣꠘꠖꠣꠞ ꠔ ꠔꠥꠝꠞꠣꠞ ꠟꠣꠉꠤ ꠘꠣꠎꠣꠁꠎ। ꠁꠔꠣꠞ ꠝꠞꠣ ꠟꠣꠡ ꠇꠦꠃ ꠍꠁꠟꠦ, ꠢꠦ ꠢꠣꠁꠘ꠆ꠎꠣ ꠙꠞ꠆ꠎꠘ꠆ꠔ ꠘꠣꠙꠣꠇ ꠞꠁꠛ।
LEV 11:32 ꠅꠔꠣꠞ ꠝꠣꠎꠞ ꠎꠦꠇꠥꠘꠥ ꠄꠉꠥꠞ ꠝꠞꠣ ꠟꠣꠡ ꠎꠥꠖꠤ ꠅꠁꠘ꠆ꠘ ꠎꠤꠘꠤꠡꠞ ꠃꠙꠞꠦ ꠙꠠꠦ, ꠎꠦꠟꠣꠘ ꠟꠣꠇꠠꠤ, ꠇꠣꠙꠠ-ꠌꠥꠙꠠ, ꠌꠣꠝꠠꠣ ꠛꠣ ꠍꠟꠣꠞ ꠌꠐ ꠖꠤꠀ ꠛꠣꠘꠣꠁꠟ ꠎꠦꠇꠥꠘꠥ ꠝꠣꠟꠞ ꠃꠙꠞꠦ ꠙꠠꠟꠦꠃ ꠁꠔꠣ ꠘꠣꠙꠣꠇ ꠅꠁꠎꠤꠛ। ꠘꠣꠙꠣꠇ ꠝꠣꠟꠞꠦ ꠙꠣꠘꠤꠔ ꠜꠤꠎꠣꠁꠀ ꠕꠁꠛꠣꠄ। ꠢꠣꠁꠘ꠆ꠎꠣ ꠙꠞ꠆ꠎꠘ꠆ꠔ ꠁꠔꠣ ꠘꠣꠙꠣꠇ ꠞꠁꠛ, ꠛꠣꠖꠦ ꠙꠣꠇ-ꠍꠣꠚ ꠅꠁꠛ।
LEV 11:33 ꠀꠞ ꠅꠃ ꠘꠣꠙꠣꠇ ꠎꠣꠘꠖꠣꠞꠞ ꠇꠥꠘꠥꠐꠣꠞ ꠝꠞꠣ ꠟꠣꠡ ꠎꠥꠖꠤ ꠇꠥꠘꠥ ꠝꠣꠐꠤꠞ ꠛꠣꠡꠘꠞ ꠝꠣꠎꠦ ꠙꠠꠦ, ꠔꠦ ꠁꠉꠥꠞ ꠜꠤꠔꠞꠞ ꠢꠇꠟꠔꠣ ꠘꠣꠙꠣꠇ ꠅꠁꠎꠤꠛ, ꠁ ꠛꠣꠡꠘꠞꠦꠅ ꠜꠣꠋꠉꠤꠟꠤꠛꠣꠄ।
LEV 11:34 ꠅꠃ ꠛꠣꠡꠘꠞ ꠙꠣꠘꠤ ꠛꠣ ꠞꠡ ꠎꠥꠖꠤ ꠇꠥꠘꠥ ꠈꠣꠘꠤꠞ ꠎꠤꠘꠤꠡꠞ ꠃꠙꠞꠦ ꠙꠠꠦ, ꠔꠦ ꠁ ꠈꠣꠘꠤ ꠘꠣꠙꠣꠇ ꠅꠁꠎꠤꠛ। ꠁꠇꠐꠣꠞ ꠝꠣꠎꠦ ꠎꠥꠖꠤ ꠙꠣꠘꠤ ꠎꠣꠔꠤꠅ ꠇꠥꠘꠥꠔꠣ ꠕꠅꠀ ꠕꠣꠇꠦ, ꠔꠦ ꠁꠔꠣꠅ ꠘꠣꠙꠣꠇ ꠅꠁꠎꠤꠛ।
LEV 11:35 ꠀꠞ ꠅꠔꠣꠞ ꠝꠞꠣ ꠟꠣꠡ ꠎꠥꠖꠤ ꠇꠥꠘꠥ ꠎꠤꠘꠤꠡꠞ ꠃꠙꠞꠦ ꠙꠠꠦ, ꠔꠦ ꠁꠔꠣ ꠘꠣꠙꠣꠇ ꠅꠁꠎꠤꠛ। ꠁꠔꠣ ꠇꠥꠘꠥ ꠃꠘ꠆ꠖꠣꠟꠅ ꠙꠠꠟꠦ, ꠁ ꠃꠘ꠆ꠖꠣꠟ ꠜꠣꠋꠉꠤꠟꠤꠛꠣꠄ। ꠁ ꠃꠘ꠆ꠖꠣꠟ ꠔ ꠔꠥꠝꠞꠣꠞ ꠟꠣꠉꠤ ꠘꠣꠙꠣꠇ, ꠁꠔꠣꠞꠦ ꠘꠣꠙꠣꠇ ꠉꠁꠘ꠆ꠘ ꠇꠞꠤꠅ।
LEV 11:36 ꠅꠁꠟꠦ ꠁꠔꠣ ꠎꠥꠖꠤ ꠇꠥꠘꠥ ꠇꠥꠀꠞ ꠜꠤꠔꠞꠦ ꠛꠣ ꠁꠘ꠆ꠖꠣꠞꠣꠞ ꠝꠣꠎꠦ ꠙꠠꠦ, ꠔꠦ ꠁ ꠇꠥꠀ ꠛꠣ ꠁꠘ꠆ꠖꠣꠞꠣ ꠘꠣꠙꠣꠇ ꠅꠁꠔ ꠘꠣꠄ। ꠈꠣꠟꠤ ꠁꠔꠣꠞ ꠝꠞꠣ ꠟꠣꠡ ꠎꠦ ꠎꠘꠦ ꠍꠁꠛ, ꠢꠦ ꠘꠣꠙꠣꠇ ꠅꠁꠎꠤꠛ।
LEV 11:37 ꠎꠝꠤꠘꠅ ꠛꠣꠁꠘ ꠖꠤꠛꠣꠞ ꠘꠤꠅꠔꠦ ꠕꠅꠀ ꠇꠥꠘꠥꠎꠣꠔꠞ ꠛꠤꠌꠞ ꠃꠙꠞꠦ ꠎꠥꠖꠤ ꠅꠔꠣꠞ ꠟꠣꠡ ꠙꠠꠦ, ꠔꠦ ꠁꠔꠣ ꠘꠣꠙꠣꠇ ꠅꠁꠔ ꠘꠣꠄ।
LEV 11:38 ꠅꠁꠟꠦ ꠇꠥꠘꠥ ꠛꠤꠌꠞ ꠃꠙꠞꠦ ꠙꠣꠘꠤ ꠖꠤꠀ ꠜꠤꠎꠣꠘꠤꠞ ꠛꠣꠖꠦ ꠎꠥꠖꠤ ꠁꠔꠣ ꠙꠠꠦ, ꠔꠦ ꠁ ꠛꠤꠌ ꠔꠥꠝꠞꠣꠞ ꠟꠣꠉꠤ ꠘꠣꠙꠣꠇ।
LEV 11:39 “ꠔꠥꠝꠞꠣꠞ ꠢꠣꠟꠣꠟ ꠇꠥꠘꠥ ꠙꠡꠥ ꠝꠞꠤꠉꠦꠟꠦ, ꠁꠉꠥꠞ ꠟꠣꠡ ꠎꠦ ꠎꠘꠦ ꠍꠁꠛ, ꠢꠦ ꠢꠣꠁꠘ꠆ꠎꠣ ꠙꠞ꠆ꠎꠘ꠆ꠔ ꠘꠣꠙꠣꠇ ꠞꠁꠛ।
LEV 11:40 ꠇꠦꠃ ꠎꠥꠖꠤ ꠅꠃ ꠝꠞꠣ ꠙꠡꠥꠞ ꠉꠥꠡ꠆ꠔ ꠈꠣꠄ, ꠔꠦ ꠢꠦ ꠔꠣꠞ ꠇꠣꠙꠠ-ꠌꠥꠙꠠ ꠗꠁꠀ ꠖꠤꠔꠦ ꠅꠁꠛ, ꠀꠞ ꠢꠦ ꠢꠣꠁꠘ꠆ꠎꠣ ꠙꠞ꠆ꠎꠘ꠆ꠔ ꠘꠣꠙꠣꠇ ꠞꠁꠛ। ꠀꠞ ꠇꠦꠃ ꠎꠥꠖꠤ ꠅꠃ ꠙꠡꠥꠞ ꠟꠣꠡꠞꠦ ꠀꠔ ꠖꠤꠀ ꠔꠥꠟꠦ, ꠔꠦ ꠢꠦ ꠔꠣꠞ ꠇꠣꠙꠠ-ꠌꠥꠙꠠ ꠗꠁꠀ ꠖꠤꠔꠦ ꠅꠁꠛ, ꠢꠦ-ꠅ ꠢꠣꠁꠘ꠆ꠎꠣ ꠙꠞ꠆ꠎꠘ꠆ꠔ ꠘꠣꠙꠣꠇ ꠞꠁꠛ।
LEV 11:41 “ꠢꠥꠘꠅ, ꠝꠣꠐꠤꠞ ꠝꠣꠎꠦ ꠌꠟꠞꠣ ꠢꠇꠟ ꠎꠣꠔꠞ ꠢꠥꠞꠥ-ꠝꠥꠞꠥ ꠎꠣꠘꠖꠣꠞ ꠈꠣꠅꠀ ꠔꠥꠝꠞꠣꠞ ꠟꠣꠉꠤ ꠢꠣꠞꠣꠝ, ꠁꠔꠣꠞꠦ ꠔꠥꠝꠞꠣ ꠊꠤꠘ꠆ꠘꠣꠁꠅ।
LEV 11:42 ꠁꠔꠣ ꠛꠥꠇꠦ ꠌꠟꠞꠣ ꠎꠣꠘꠖꠣꠞ ꠅꠃꠇ, ꠛꠣ ꠌꠣꠁꠞ ꠙꠣꠅꠄ ꠀꠐꠞꠣ ꠎꠣꠘꠖꠣꠞ ꠛꠣ ꠛꠃꠔ ꠙꠣꠅꠄ ꠌꠟꠞꠣ ꠅꠃꠇ, ꠢꠇꠟ ꠘꠝꠥꠘꠣꠞ ꠝꠣꠐꠤꠔ ꠌꠟꠞꠣ ꠢꠥꠞꠥ-ꠝꠥꠞꠥ ꠎꠣꠘꠖꠣꠞ ꠔꠥꠝꠞꠣ ꠈꠣꠁꠅ ꠘꠣ, ꠁꠔꠣꠞꠦ ꠊꠤꠘ꠆ꠘꠣꠁꠅ।
LEV 11:43 ꠔꠥꠝꠞꠣ ꠁꠔꠣ ꠇꠥꠘꠥꠔꠣꠞ ꠟꠣꠉꠤ ꠘꠤꠎꠞꠦ ꠊꠤꠘ꠆ꠘꠣꠞ ꠎꠘ ꠛꠣꠘꠣꠁꠅ ꠘꠣ, ꠛꠣ ꠅꠔꠣꠄꠅ ꠎꠣꠘꠥ ꠔꠥꠝꠞꠣꠞꠦ ꠘꠣꠙꠣꠇ ꠘꠣ ꠛꠣꠘꠣꠄ।
LEV 11:44 ꠝꠘꠅ ꠞꠣꠈꠤꠅ, ꠀꠝꠤ ꠀꠟ꠆ꠟꠣꠃ ꠔꠥꠝꠞꠣꠞ ꠝꠣꠛꠥꠖ। ꠀꠝꠣꠞ ꠘꠤꠅꠔꠦ ꠔꠥꠝꠞꠣ ꠘꠤꠎꠞꠦ ꠙꠣꠇ-ꠙꠛꠤꠔ꠆ꠞ ꠞꠣꠈꠤꠅ। ꠎꠣꠘ ꠔ, ꠀꠝꠤ ꠘꠤꠎꠦꠅ ꠙꠛꠤꠔ꠆ꠞ। ꠄꠞꠟꠣꠉꠤ ꠝꠣꠐꠤꠔ ꠌꠟꠞꠣ ꠇꠥꠘꠥ ꠢꠥꠞꠥ-ꠝꠥꠞꠥ ꠎꠣꠘꠖꠣꠞꠞ ꠟꠣꠉꠤ ꠔꠥꠝꠞꠣ ꠘꠤꠎꠞꠦ ꠘꠣꠙꠣꠇ ꠛꠣꠘꠣꠁꠅ ꠘꠣ।
LEV 11:45 ꠀꠝꠤ ꠔ ꠀꠟ꠆ꠟꠣ, ꠀꠝꠤ ꠔꠥꠝꠞꠣꠞ ꠝꠣꠛꠥꠖ ꠅꠀꠞ ꠈꠤꠀꠟꠦ, ꠝꠤꠡꠞ ꠖꠦꠡ ꠕꠣꠇꠤ ꠔꠥꠝꠞꠣꠞꠦ ꠛꠣꠞ ꠇꠞꠤ ꠀꠘꠍꠤ। ꠀꠝꠤ ꠘꠤꠎꠦ ꠙꠛꠤꠔ꠆ꠞ, ꠄꠞꠟꠣꠉꠤ ꠔꠥꠝꠞꠣꠅ ꠙꠛꠤꠔ꠆ꠞ ꠞꠁꠅ।
LEV 11:46 “ꠔꠦ ꠙꠡꠥ, ꠙꠣꠈꠤ, ꠙꠣꠘꠤꠔ ꠛꠡꠔ ꠇꠞꠞꠣ ꠎꠣꠘꠖꠣꠞ, ꠀꠞ ꠝꠣꠐꠤꠞ ꠝꠣꠎꠦ ꠌꠟꠞꠣ ꠢꠇꠟ ꠘꠝꠥꠘꠣꠞ ꠢꠥꠞꠥ-ꠝꠥꠞꠥ ꠎꠣꠘꠖꠣꠞꠞ ꠛꠦꠙꠣꠞꠦ ꠔꠥꠝꠞꠣ ꠀꠝꠣꠞ ꠢꠥꠇꠥꠝ-ꠀꠢꠇꠣꠝ ꠝꠣꠘꠤꠅ।
LEV 11:47 ꠇꠥꠘꠐꠣ ꠔꠥꠝꠞꠣꠞ ꠟꠣꠉꠤ ꠎꠣꠁꠎ ꠀꠞ ꠇꠥꠘꠐꠣ ꠘꠣꠎꠣꠁꠎ, ꠇꠥꠘ ꠙꠡꠥꠞ ꠉꠥꠡ꠆ꠔ ꠢꠣꠟꠣꠟ ꠀꠞ ꠇꠥꠘꠐꠣ ꠢꠣꠞꠣꠝ, ꠁꠔꠣ ꠔꠥꠝꠞꠣ ꠛꠥꠎꠤꠀ-ꠢꠥꠘꠤꠀ ꠌꠟꠤꠅ।”
LEV 12:1 ꠄꠞꠛꠣꠖꠦ ꠝꠣꠛꠥꠖꠦ ꠝꠥꠍꠣ ꠘꠛꠤꠞꠦ ꠇꠁꠟꠣ,
LEV 12:2 “ꠔꠥꠝꠤ ꠛꠘꠤ ꠁꠍꠞꠣꠁꠟꠞꠦ ꠎꠣꠘꠣꠁ ꠖꠦꠅ, ꠇꠥꠘꠥ ꠛꠦꠐꠤꠞ ꠊꠞꠅ ꠎꠥꠖꠤ ꠇꠥꠘꠥ ꠙꠥꠀꠞ ꠎꠘꠝ ꠅꠄ, ꠔꠦ ꠛꠦꠐꠤꠀꠞꠣ ꠛꠦꠝꠣꠞꠞ ꠡꠝꠄꠇꠥꠞ ꠟꠣꠈꠣꠘ ꠁ ꠛꠦꠐꠤ ꠘꠣꠙꠣꠇ ꠞꠁꠛ। ꠔꠣꠁꠞ ꠅꠃ ꠘꠣꠙꠣꠇꠤ ꠢꠣꠟꠔ ꠡꠣꠔ ꠖꠤꠘ ꠞꠁꠛ।
LEV 12:3 ꠛꠣꠖꠦ ꠀꠐ ꠖꠤꠘꠞ ꠖꠤꠘ ꠙꠥꠀꠞꠦ ꠝꠍꠟꠝꠣꠘꠤ ꠇꠣꠝ ꠇꠞꠣꠁꠔꠦ ꠅꠁꠛ।
LEV 12:4 ꠀꠞ ꠅꠃ ꠛꠦꠐꠤꠞ ꠢꠥꠞꠥꠔ꠆ꠔꠣ ꠎꠘꠝꠞ ꠟꠃ ꠎꠣꠅꠀꠞ ꠇꠣꠞꠘꠦ ꠔꠦꠔ꠆ꠞꠤꠡ ꠖꠤꠘ ꠙꠞ꠆ꠎꠘ꠆ꠔ ꠘꠣꠙꠣꠇ ꠞꠁꠛ। ꠅꠃ ꠝꠤꠀꠖ ꠘꠣ ꠙꠥꠞꠣ ꠙꠞ꠆ꠎꠘ꠆ꠔ ꠔꠣꠁ ꠇꠥꠘꠥ ꠙꠛꠤꠔ꠆ꠞ ꠎꠤꠘꠤꠡꠅ ꠗꠞꠣ-ꠍꠀ ꠎꠣꠁꠎ ꠘꠣꠄ। ꠀꠞ ꠙꠛꠤꠔ꠆ꠞ ꠇꠣꠛꠣ ꠊꠞꠞ ꠡꠤꠝꠣꠘꠣꠔ ꠎꠣꠁꠛꠣꠞ ꠢꠥꠇꠥꠝ ꠘꠣꠄ।
LEV 12:5 ꠅꠁꠟꠦ ꠁ ꠛꠦꠐꠤꠞ ꠊꠞꠅ ꠎꠥꠖꠤ ꠙꠥꠠꠤꠞ ꠎꠘꠝ ꠅꠄ, ꠔꠦ ꠛꠦꠐꠤꠀꠞꠣ ꠝꠣꠡꠤꠇ ꠛꠦꠝꠣꠞꠞ ꠟꠣꠈꠣꠘ ꠔꠣꠁ ꠘꠣꠙꠣꠇ ꠞꠁꠛ, ꠔꠣ-ꠅ ꠁ ꠘꠣꠙꠣꠇꠤ ꠢꠣꠟꠔ ꠙꠥꠞꠣ ꠖꠥꠁ ꠢꠣꠙ꠆ꠔꠣ ꠌꠟꠛ। ꠛꠣꠖꠦ ꠅꠃ ꠛꠦꠝꠣꠞ ꠕꠣꠇꠤ ꠙꠣꠇ-ꠙꠣꠇꠤꠎꠣ ꠅꠀꠞ ꠟꠣꠉꠤ ꠀꠞꠅ ꠍꠄꠡꠐ꠆ꠐꠤ ꠖꠤꠘ ꠛꠣꠞ ꠌꠣꠁꠛ।
LEV 12:6 “ꠙꠥꠀ ꠛꠣ ꠙꠥꠠꠤꠞ ꠎꠘꠝꠞ ꠛꠣꠖꠦ ꠙꠣꠇ-ꠙꠣꠇꠤꠎꠣ ꠅꠀꠞ ꠡꠝꠄ ꠀꠁꠟꠦ, ꠛꠦꠐꠤꠄ ꠇꠥꠞꠛꠣꠘꠤ ꠀꠖꠣꠄ ꠇꠞꠣꠞ ꠘꠤꠅꠔꠦ ꠝꠤꠟꠘ-ꠔꠣꠝ꠆ꠛꠥꠞ ꠖꠥꠀꠞꠞ ꠇꠣꠘ꠆ꠖꠣꠔ ꠁꠝꠣꠝ ꠍꠣꠛꠞ ꠉꠦꠍꠦ ꠎꠣꠁꠛ। ꠎꠣꠁꠔꠦ ꠎꠣꠟꠣꠁꠟ ꠇꠥꠞꠛꠣꠘꠤꠞ ꠟꠣꠉꠤ ꠄꠇ ꠛꠍꠞ ꠛꠄꠅꠡꠤ ꠄꠉꠥ ꠝꠦꠠꠣ, ꠀꠞ ꠉꠥꠘꠣꠞ ꠇꠚꠞꠣꠞ ꠇꠥꠞꠛꠣꠘꠤꠞ ꠟꠣꠉꠤ ꠄꠉꠥ ꠙꠣꠞꠅ ꠛꠣ ꠒꠥꠙꠤ ꠙꠣꠈꠤ ꠟꠉꠦ ꠘꠤꠛ।
LEV 12:7 ꠔꠦꠃ ꠁꠝꠣꠝ ꠍꠣꠛꠦ ꠝꠣꠛꠥꠖꠞ ꠍꠣꠝꠘꠦ ꠅꠃ ꠇꠚꠞꠣ ꠀꠖꠣꠄ ꠇꠞꠤꠀ ꠟꠃ ꠎꠣꠅꠀ ꠛꠦꠝꠣꠞ ꠕꠣꠇꠤ ꠛꠦꠐꠤꠞꠦ ꠙꠣꠇ-ꠙꠣꠇꠤꠎꠣ ꠇꠞꠛꠣ। ꠛꠦꠐꠤꠘ꠆ꠔꠞ ꠊꠞꠅ ꠙꠥꠀ ꠛꠣ ꠙꠥꠠꠤꠞ ꠎꠘꠝꠞ ꠛꠣꠖꠦ ꠙꠣꠇ-ꠙꠣꠇꠤꠎꠣ ꠅꠀꠞ ꠟꠣꠉꠤ ꠅꠃ ꠘꠤꠅꠝ ꠎꠣꠞꠤ ꠞꠁꠟ।
LEV 12:8 ꠀꠞ ꠇꠥꠞꠛꠣꠘꠤꠞ ꠟꠣꠉꠤ ꠝꠦꠠꠣ ꠀꠘꠣꠞ ꠔꠚꠤꠇ ꠎꠥꠖꠤ ꠘꠣ ꠕꠣꠇꠦ, ꠔꠦ ꠖꠥꠉꠥ ꠙꠣꠞꠅ ꠛꠣ ꠒꠥꠙꠤ ꠙꠣꠈꠤ ꠀꠘꠛ। ꠄꠞ ꠝꠣꠎꠞ ꠄꠉꠥ ꠅꠁꠛ ꠎꠣꠟꠣꠁꠟ ꠇꠥꠞꠛꠣꠘꠤ, ꠀꠞ ꠖꠥꠍꠞꠣꠐꠣ ꠉꠥꠘꠣꠞ ꠇꠚꠞꠣꠞ ꠇꠥꠞꠛꠣꠘꠤ। ꠅꠃ ꠘꠝꠥꠘꠣꠄ ꠁꠝꠣꠝ ꠍꠣꠛꠦ ꠇꠥꠞꠛꠣꠘꠤ ꠀꠖꠣꠄ ꠇꠞꠤꠀ ꠔꠣꠁꠞꠦ ꠘꠣꠙꠣꠇꠤ ꠕꠣꠇꠤ ꠛꠣꠌꠣꠁꠛꠣ, ꠔꠦꠃ ꠁ ꠛꠦꠐꠤ ꠙꠣꠇ-ꠙꠣꠇꠤꠎꠣ ꠛꠘꠛ।
LEV 13:1 ꠛꠣꠖꠦ ꠝꠣꠛꠥꠖꠦ ꠝꠥꠍꠣ ꠀꠞ ꠢꠣꠞꠥꠘꠞꠦ ꠇꠁꠟꠣ,
LEV 13:2 “ꠇꠥꠘꠥ ꠝꠣꠘꠡꠞ ꠉꠔꠞꠞ ꠌꠣꠝꠠꠣꠞ ꠇꠥꠘꠥ ꠎꠣꠉꠣ ꠎꠥꠖꠤ ꠀꠈꠔꠣ ꠚꠥꠟꠤ ꠎꠣꠄ, ꠛꠣ ꠇꠥꠘꠥ ꠇꠥꠟꠡ ꠃꠑꠦ ꠛꠣ ꠇꠥꠘꠥꠎꠣꠔ ꠖꠣꠉ ꠖꠦꠈꠣ ꠎꠣꠄ, ꠀꠞ ꠝꠘꠅ ꠡꠘ꠆ꠖꠄ ꠅꠄ ꠎꠦꠘ, ꠁꠔꠣ ꠛꠣꠖꠦ ꠙꠌꠣ-ꠇꠥꠡ꠆ꠑ ꠛꠦꠝꠣꠞ ꠅꠁꠔ ꠙꠣꠞꠦ, ꠔꠦ ꠁꠝꠣꠝ ꠢꠣꠞꠥꠘ ꠛꠣ ꠔꠣꠘ ꠙꠥꠀꠂꠘ꠆ꠔꠞ ꠝꠣꠎꠞ ꠇꠥꠘꠥ ꠁꠝꠣꠝꠞ ꠉꠦꠍꠦ ꠔꠣꠞꠦ ꠟꠁꠀ ꠎꠣꠁꠛꠣꠄ।
LEV 13:3 ꠁꠝꠣꠝ ꠍꠣꠛꠦ ꠔꠣꠞ ꠌꠣꠝꠠꠣꠞ ꠅꠃ ꠎꠣꠉꠣ ꠖꠦꠈꠛꠣ, ꠢꠤ ꠎꠣꠉꠣꠞ ꠞꠥꠝꠣ ꠎꠥꠖꠤ ꠗꠟꠣ ꠅꠁꠎꠣꠄ, ꠀꠞ ꠛꠥꠎꠣ ꠎꠣꠄ ꠁ ꠛꠦꠝꠣꠞ ꠌꠣꠝꠠꠣꠞ ꠔꠟꠞ ꠉꠥꠡ꠆ꠔꠞ ꠝꠣꠎꠦ ꠟꠣꠉꠤꠉꠦꠍꠦ, ꠔꠦ ꠛꠥꠎꠛꠣꠄ, ꠁꠔꠣ ꠘꠣꠙꠣꠇ ꠙꠌꠣ-ꠇꠥꠡ꠆ꠑ ꠛꠦꠝꠣꠞ। ꠁꠟꠣ ꠛꠦꠝꠣꠞꠤ ꠖꠦꠈꠟꠦ ꠁꠝꠣꠝꠦ ꠔꠣꠞꠦ ꠘꠣꠙꠣꠇ ꠇꠁꠀ ꠄꠟꠣꠘ ꠇꠞꠛꠣ।
LEV 13:4 ꠅꠁꠟꠦ ꠔꠣꠞ ꠌꠣꠝꠠꠣꠞ ꠝꠣꠎꠦ ꠅꠃ ꠖꠣꠉ ꠎꠥꠖꠤ ꠈꠣꠟꠤ ꠗꠟꠣ ꠅꠄ, ꠀꠞ ꠁꠔꠣ ꠌꠣꠝꠠꠣꠞ ꠔꠟꠞ ꠉꠥꠡ꠆ꠔꠞ ꠝꠣꠎꠦ ꠘꠣ ꠟꠣꠉꠦ, ꠅꠘꠞ ꠞꠥꠝꠣ ꠗꠟꠣ ꠘꠣ ꠅꠄ, ꠔꠦ ꠁꠝꠣꠝ ꠍꠣꠛꠦ ꠅꠃ ꠎꠘꠞꠦ ꠡꠣꠔ ꠖꠤꠘ ꠗꠞꠤ ꠢꠇꠟ ꠝꠣꠘꠡꠞ ꠉꠦꠍ ꠕꠣꠇꠤ ꠢꠞꠣꠁ ꠞꠣꠈꠛꠣ।
LEV 13:5 ꠛꠣꠖꠦ ꠡꠣꠔ ꠖꠤꠘꠞ ꠖꠤꠘ ꠔꠣꠞꠦ ꠢꠤꠞꠛꠣꠞ ꠖꠦꠈꠛꠣ। ꠎꠥꠖꠤ ꠖꠦꠈꠣ ꠎꠣꠄ, ꠅꠃ ꠛꠦꠝꠣꠞ ꠌꠣꠝꠠꠣꠞ ꠔꠟꠦꠖꠤ ꠘꠣ ꠉꠤꠀ ꠎꠦꠟꠣ ꠀꠍꠤꠟ ꠅꠟꠣ ꠞꠁꠍꠦ, ꠔꠦ ꠁꠝꠣꠝꠦ ꠔꠣꠞꠦ ꠀꠞꠅ ꠡꠣꠔ ꠖꠤꠘ ꠀꠟꠉꠣ ꠞꠣꠈꠛꠣ।
LEV 13:6 ꠀꠞ ꠢꠤꠞꠛꠣꠞ ꠡꠣꠔ ꠖꠤꠘꠞ ꠖꠤꠘ ꠔꠣꠞꠦ ꠖꠦꠈꠛꠣ, ꠄꠞꠝꠣꠎꠦ ꠎꠥꠖꠤ ꠔꠣꠞ ꠛꠦꠝꠣꠞ ꠘꠣ ꠛꠣꠠꠤꠀ ꠢꠥꠇꠣꠁꠀ ꠇꠝꠤ ꠎꠣꠄ, ꠔꠦ ꠛꠥꠎꠛꠣ, ꠁꠔꠣ ꠈꠣꠟꠤ ꠇꠥꠟꠡ ꠃꠑꠍꠦ। ꠁꠝꠣꠝꠦ ꠔꠣꠞꠦ ꠙꠣꠇ-ꠍꠣꠚ ꠇꠁꠀ ꠄꠟꠣꠘ ꠇꠞꠛꠣ। ꠢꠦ ꠔꠣꠞ ꠇꠣꠙꠠ-ꠌꠥꠙꠠ ꠗꠁꠀ ꠢꠣꠞꠤ ꠙꠣꠇ-ꠍꠣꠚ ꠛꠘꠛ।
LEV 13:7 ꠅꠁꠟꠦ ꠁꠝꠣꠝꠦ ꠔꠣꠞꠦ ꠙꠣꠇ-ꠍꠣꠚ ꠇꠁꠀ ꠄꠟꠣꠘ ꠇꠞꠣꠞ ꠛꠣꠖꠦ ꠎꠥꠖꠤ ꠔꠣꠞ ꠉꠔꠞꠞ ꠇꠥꠟꠡ ꠀꠞꠅ ꠛꠣꠠꠤ ꠎꠣꠄ, ꠔꠦ ꠔꠣꠞꠦ ꠢꠤꠞꠛꠣꠞ ꠁꠝꠣꠝꠞ ꠉꠦꠍꠦ ꠖꠦꠈꠣꠁꠛꠣꠄ।
LEV 13:8 ꠁꠝꠣꠝꠦ ꠢꠤꠞꠛꠣꠞ ꠖꠦꠈꠛꠣ, ꠎꠥꠖꠤ ꠅꠃ ꠛꠦꠝꠣꠞ ꠌꠣꠝꠠꠣꠞ ꠃꠙꠞꠦ ꠀꠞꠅ ꠛꠣꠠꠤ ꠎꠣꠄ, ꠔꠦ ꠛꠥꠎꠣ ꠎꠣꠁꠛ, ꠁꠔꠣ ꠘꠣꠙꠣꠇ ꠙꠌꠣ-ꠇꠥꠡ꠆ꠑ ꠛꠦꠝꠣꠞ, ꠔꠣꠁꠘ ꠄꠞꠦ ꠘꠣꠙꠣꠇ ꠇꠁꠀ ꠄꠟꠣꠘ ꠇꠞꠛꠣ।
LEV 13:9 “ꠇꠥꠘꠥ ꠝꠣꠘꠡꠞ ꠌꠣꠝꠠꠣꠔ ꠙꠌꠣ-ꠇꠥꠡ꠆ꠑ ꠛꠦꠝꠣꠞꠞ ꠟꠣꠈꠣꠘ ꠖꠦꠈꠣ ꠉꠦꠟꠦ ꠔꠣꠞꠦ ꠘꠤꠀ ꠁꠝꠣꠝ ꠍꠣꠛꠞ ꠉꠦꠍꠦ ꠖꠦꠈꠣꠁꠛꠣꠄ।
LEV 13:10 ꠁꠝꠣꠝꠦ ꠖꠦꠈꠛꠣ, ꠔꠣꠞ ꠉꠔꠞꠅ ꠇꠥꠘꠥ ꠎꠣꠉꠣꠞ ꠌꠣꠝꠠꠣꠞ ꠃꠙꠞꠦ ꠎꠥꠖꠤ ꠗꠟꠣ ꠅꠁꠀ ꠚꠥꠟꠤ ꠎꠣꠄ, ꠀꠞ ꠢꠘꠞ ꠞꠥꠝꠣ ꠗꠟꠣ ꠅꠁꠎꠣꠄ, ꠅꠃ ꠚꠥꠟꠣ ꠎꠣꠉꠣꠔ ꠇꠣꠌꠣ ꠊꠣ ꠕꠣꠇꠦ,
LEV 13:11 ꠔꠦ ꠔ ꠁꠐꠣ ꠄꠇꠐꠣ ꠙꠥꠞꠣꠘꠣ ꠙꠌꠣ-ꠇꠥꠡ꠆ꠑ ꠛꠦꠝꠣꠞ। ꠁꠝꠣꠝꠦ ꠔꠣꠞꠦ ꠘꠣꠙꠣꠇ ꠇꠁꠀ ꠄꠟꠣꠘ ꠇꠞꠛꠣ। ꠔꠣꠞꠦ ꠙꠞꠤꠇ꠆ꠇꠣꠞ ꠟꠣꠉꠤ ꠡꠝꠣꠎꠞ ꠝꠣꠘꠡꠞ ꠉꠦꠍ ꠕꠣꠇꠤ ꠇꠥꠘꠥ ꠝꠤꠀꠖꠦ ꠖꠥꠞꠁ ꠞꠣꠈꠣꠞ ꠎꠞꠥꠞ ꠘꠣꠄ, ꠢꠦ ꠔ ꠄꠝꠘꠦꠃ ꠘꠣꠙꠣꠇ ꠢꠣꠟꠔꠦ ꠀꠍꠦ।
LEV 13:12 “ꠅꠁꠟꠦ ꠁ ꠛꠦꠝꠣꠞ ꠎꠥꠖꠤ ꠀꠡ꠆ꠔꠣ ꠡꠞꠤꠟꠅ ꠅꠁꠎꠣꠄ, ꠀꠞ ꠁꠝꠣꠝꠦ ꠡꠞꠤꠟꠞ ꠎꠔ ꠎꠣꠉꠣ ꠖꠦꠈꠔꠣ ꠙꠣꠞꠂꠘ, ꠅꠔꠣ ꠖꠦꠈꠤꠀ ꠎꠥꠖꠤ ꠔꠣꠘ ꠝꠘꠅ ꠅꠄ, ꠁ ꠛꠦꠝꠣꠞ ꠝꠣꠕꠣ ꠕꠣꠇꠤ ꠙꠣꠅ ꠙꠞ꠆ꠎꠘ꠆ꠔ ꠀꠍꠦ,
LEV 13:13 ꠔꠦ ꠔꠣꠞꠦ ꠀꠞꠅ ꠜꠣꠟꠣꠝꠘ꠆ꠔꠦ ꠖꠦꠈꠛꠣ, ꠀꠞ ꠖꠦꠈꠤꠀ ꠎꠥꠖꠤ ꠛꠥꠎꠣ ꠎꠣꠄ, ꠁ ꠛꠦꠝꠣꠞꠦ ꠔꠣꠞ ꠀꠡ꠆ꠔꠣ ꠉꠔꠞ ꠗꠟꠣ ꠅꠁꠉꠦꠍꠦ, ꠔꠦ ꠔꠣꠞꠦ ꠙꠣꠇ-ꠍꠣꠚ ꠇꠁꠀ ꠄꠟꠣꠘ ꠇꠞꠛꠣ। ꠔꠣꠞ ꠀꠡ꠆ꠔꠣ ꠉꠔꠞ ꠗꠟꠣ ꠅꠀꠄ ꠢꠦ ꠘꠣꠙꠣꠇ ꠘꠣꠄ।
LEV 13:14 ꠅꠁꠟꠦ ꠄꠞꠛꠣꠖꠦ ꠎꠥꠖꠤ ꠇꠥꠘꠥ ꠇꠣꠌꠣ ꠊꠣ ꠖꠦꠈꠣ ꠖꠦꠄ, ꠔꠦ ꠢꠦ ꠘꠣꠙꠣꠇ।
LEV 13:15 ꠁꠝꠣꠝꠦ ꠅꠃ ꠊꠣ ꠖꠦꠈꠤꠀ ꠔꠣꠞꠦ ꠘꠣꠙꠣꠇ ꠇꠁꠀ ꠄꠟꠣꠘ ꠇꠞꠛꠣ। ꠅꠃ ꠊꠣ ꠔ ꠘꠣꠙꠣꠇ, ꠔꠣꠞ ꠘꠣꠙꠣꠇ ꠙꠌꠣ-ꠇꠥꠡ꠆ꠑ ꠛꠦꠝꠣꠞ ꠅꠁꠍꠦ।
LEV 13:16 ꠛꠣꠖꠦ ꠅꠃ ꠇꠣꠌꠣ ꠊꠣ ꠢꠥꠇꠣꠁꠀ ꠎꠥꠖꠤ ꠗꠟꠣ ꠅꠁꠎꠣꠄ, ꠔꠦ ꠔꠣꠞꠦ ꠢꠤꠞꠛꠣꠞ ꠁꠝꠣꠝꠞ ꠉꠦꠍꠦ ꠘꠤꠛꠣ।
LEV 13:17 ꠁꠝꠣꠝꠦ ꠔꠣꠞꠦ ꠢꠤꠞꠛꠣꠞ ꠖꠦꠈꠛꠣ, ꠔꠣꠞ ꠀꠡ꠆ꠔꠣ ꠉꠔꠞꠞ ꠛꠦꠝꠣꠞ ꠎꠥꠖꠤ ꠙꠥꠞꠣꠙꠥꠞ ꠗꠟꠣ ꠅꠁꠎꠣꠄ, ꠔꠦ ꠁꠝꠣꠝꠦ ꠔꠣꠞꠦ ꠙꠣꠇ-ꠍꠣꠚ ꠇꠁꠀ ꠄꠟꠣꠘ ꠇꠞꠛꠣ, ꠢꠦ ꠀꠍꠟꠦꠃ ꠙꠣꠇ-ꠍꠣꠚ।
LEV 13:18 “ꠇꠥꠘꠥ ꠝꠣꠘꠡꠞ ꠉꠔꠞꠅ ꠎꠥꠖꠤ ꠛꠞꠘ ꠅꠁꠀ ꠁꠐꠣ ꠜꠣꠟꠣ ꠅꠁꠎꠣꠄ,
LEV 13:19 ꠀꠞ ꠅꠃ ꠎꠣꠉꠣ ꠛꠣꠖꠦ ꠗꠟꠣ ꠅꠁꠀ ꠚꠥꠟꠤ ꠎꠣꠄ, ꠛꠣ ꠟꠣꠟꠐꠤ-ꠗꠟꠣ ꠖꠣꠉ ꠅꠄ, ꠔꠦ ꠔꠣꠞꠦ ꠁꠝꠣꠝꠞ ꠉꠦꠍꠦ ꠘꠤꠛꠣ।
LEV 13:20 ꠁꠝꠣꠝꠦ ꠔꠣꠞꠦ ꠖꠦꠈꠛꠣ, ꠢꠤ ꠛꠦꠝꠣꠞ ꠎꠥꠖꠤ ꠌꠣꠝꠠꠣꠞ ꠔꠟꠦ ꠉꠤꠀ ꠉꠥꠡ꠆ꠔꠞ ꠝꠣꠎꠦ ꠟꠣꠉꠤꠎꠣꠄ, ꠞꠥꠝꠣ ꠗꠟꠣ ꠅꠁꠎꠣꠄ, ꠔꠦ ꠁꠐꠣ ꠔ ꠛꠞꠘꠞ ꠎꠣꠉꠣꠔ ꠎꠘꠝ ꠟꠅꠀ ꠙꠌꠣ-ꠇꠥꠡ꠆ꠑ ꠛꠦꠝꠣꠞ, ꠁꠝꠣꠝꠦ ꠔꠣꠞꠦ ꠘꠣꠙꠣꠇ ꠇꠁꠀ ꠄꠟꠣꠘ ꠇꠞꠛꠣ।
LEV 13:21 ꠅꠁꠟꠦ ꠁꠝꠣꠝꠦ ꠇꠥꠘꠥ ꠗꠟꠣ ꠞꠥꠝꠣ ꠘꠣ ꠖꠦꠈꠟꠦ, ꠀꠞ ꠅꠃ ꠊꠣ ꠎꠥꠖꠤ ꠌꠣꠝꠠꠣꠞ ꠔꠟꠦ ꠘꠣ ꠉꠤꠀ ꠢꠥꠇꠣꠁꠎꠤꠛꠣꠞ ꠟꠣꠈꠣꠘ ꠅꠄ, ꠔꠦ ꠁꠝꠣꠝꠦ ꠔꠣꠞꠦ ꠡꠣꠔ ꠖꠤꠘ ꠙꠞ꠆ꠎꠘ꠆ꠔ ꠡꠝꠣꠎ ꠕꠣꠇꠤ ꠀꠟꠉ ꠞꠣꠈꠛꠣ।
LEV 13:22 ꠛꠣꠖꠦ ꠎꠥꠖꠤ ꠖꠦꠈꠣ ꠎꠣꠄ, ꠁꠔꠣ ꠌꠣꠝꠠꠣꠞ ꠃꠙꠞꠦ ꠍꠤꠔ꠆ꠞꠤ ꠎꠣꠞ, ꠔꠦ ꠁꠝꠣꠝꠦ ꠔꠣꠞꠦ ꠘꠣꠙꠣꠇ ꠇꠁꠀ ꠄꠟꠣꠘ ꠇꠞꠛꠣ, ꠁꠔꠣ ꠄꠇꠟꠣꠈꠣꠘ ꠙꠌꠣ-ꠇꠥꠡ꠆ꠑ ꠛꠦꠝꠣꠞ।
LEV 13:23 ꠅꠁꠟꠦ ꠇꠥꠘꠥ ꠟꠣꠈꠣꠘ ꠇꠝ-ꠛꠦꠡꠤ ꠘꠣ ꠅꠁꠟꠦ, ꠘꠣ ꠍꠤꠔ꠆ꠞꠤꠟꠦ ꠛꠥꠎꠣ ꠎꠣꠁꠛ ꠁꠔꠣ ꠈꠣꠟꠤ ꠛꠞꠘꠞ ꠖꠣꠉ, ꠁꠝꠣꠝꠦ ꠔꠣꠞꠦ ꠙꠣꠇ-ꠍꠣꠚ ꠇꠁꠀ ꠄꠟꠣꠘ ꠇꠞꠛꠣ।
LEV 13:24 “ꠇꠥꠘꠥ ꠝꠣꠘꠡꠞ ꠉꠔꠞꠞ ꠇꠥꠘꠥ ꠅꠋꠡ ꠎꠥꠖꠤ ꠀꠉꠥꠁꠘꠦ ꠎꠟꠤ ꠎꠣꠄ, ꠀꠞ ꠅꠃ ꠎꠟꠣꠞ ꠎꠣꠉꠣꠔ ꠇꠣꠌꠣ ꠊꠣꠞ ꠝꠣꠎꠦ ꠟꠣꠟꠐꠤ ꠛꠣ ꠗꠟꠣ ꠖꠣꠉ ꠖꠦꠈꠣ ꠖꠦꠄ,
LEV 13:25 ꠔꠦ ꠁꠝꠣꠝꠦ ꠔꠣꠞꠦ ꠙꠞꠤꠇ꠆ꠇꠣ ꠇꠞꠤ ꠖꠦꠈꠛꠣ। ꠀꠞ ꠎꠥꠖꠤ ꠖꠦꠈꠣ ꠎꠣꠄ, ꠞꠥꠝꠣ ꠗꠟꠣ ꠅꠁꠉꠦꠍꠦ, ꠅꠃ ꠊꠣ ꠌꠣꠝꠠꠣꠞ ꠔꠟꠦ ꠉꠤꠀ ꠉꠥꠡ꠆ꠔꠞ ꠝꠣꠎꠦ ꠟꠣꠉꠤꠉꠦꠍꠦ, ꠔꠦ ꠁꠐꠣ ꠔ ꠎꠣꠟꠣꠁꠟ ꠎꠣꠉꠣꠔ ꠎꠘꠝ ꠟꠅꠀ ꠙꠌꠣ-ꠇꠥꠡ꠆ꠑ ꠛꠦꠝꠣꠞ ꠅꠁꠀ ꠛꠣꠞ ꠅꠁꠍꠦ। ꠁꠔꠣ ꠔ ꠘꠣꠙꠣꠇ ꠙꠌꠣ-ꠇꠥꠡ꠆ꠑ ꠛꠦꠝꠣꠞ, ꠄꠞꠟꠣꠉꠤ ꠁꠝꠣꠝꠦ ꠔꠣꠞꠦ ꠘꠣꠙꠣꠇ ꠇꠁꠀ ꠄꠟꠣꠘ ꠇꠞꠛꠣ।
LEV 13:26 ꠅꠁꠟꠦ ꠁꠝꠣꠝꠦ ꠙꠞꠤꠇ꠆ꠇꠣ ꠇꠞꠤꠀ ꠎꠥꠖꠤ ꠖꠦꠈꠂꠘ, ꠁ ꠎꠣꠉꠣꠞ ꠞꠥꠝꠣ ꠗꠟꠣ ꠅꠁꠍꠦ ꠘꠣ, ꠀꠞ ꠊꠣ ꠍꠤꠔ꠆ꠞꠤꠀ ꠉꠤꠀ ꠉꠥꠡ꠆ꠔꠞ ꠝꠣꠎꠦ ꠘꠣ ꠟꠣꠉꠤꠀ ꠝꠤꠟꠤ ꠎꠣꠞ, ꠔꠦ ꠁꠝꠣꠝꠦ ꠔꠣꠞꠦ ꠡꠣꠔ ꠖꠤꠘ ꠙꠞ꠆ꠎꠘ꠆ꠔ ꠡꠝꠣꠎ ꠕꠣꠇꠤ ꠀꠟꠉ ꠞꠣꠈꠛꠣ।
LEV 13:27 ꠛꠣꠖꠦ ꠁꠝꠣꠝꠦ ꠡꠣꠔ ꠖꠤꠘꠞ ꠖꠤꠘ ꠔꠣꠞꠦ ꠢꠤꠞꠛꠣꠞ ꠖꠦꠈꠛꠣ, ꠎꠥꠖꠤ ꠖꠦꠈꠂꠘ, ꠅꠃ ꠛꠦꠝꠣꠞ ꠛꠣꠠꠤ ꠎꠣꠞ, ꠔꠦ ꠁꠝꠣꠝꠦ ꠔꠣꠞꠦ ꠘꠣꠙꠣꠇ ꠇꠁꠀ ꠄꠟꠣꠘ ꠇꠞꠛꠣ। ꠁꠔꠣ ꠄꠇꠟꠣꠈꠣꠘ ꠘꠣꠙꠣꠇ ꠙꠌꠣ-ꠇꠥꠡ꠆ꠑ ꠛꠦꠝꠣꠞ।
LEV 13:28 ꠅꠁꠟꠦ ꠁ ꠎꠣꠉꠣ ꠎꠥꠖꠤ ꠇꠥꠘꠥ ꠇꠝ-ꠛꠦꠡ ꠘꠣ ꠅꠁꠀ ꠎꠦꠟꠣ ꠀꠍꠤꠟ ꠅꠟꠣ ꠕꠣꠇꠦ, ꠀꠞ ꠌꠣꠝꠠꠣꠞ ꠝꠣꠎꠦ ꠘꠣ ꠍꠤꠔ꠆ꠞꠤꠀ ꠝꠤꠟꠤ ꠎꠣꠅꠀꠔ ꠞꠄ, ꠔꠦ ꠁꠔꠣ ꠀꠉꠥꠁꠘꠦ ꠎꠟꠣꠞ ꠚꠥꠟꠣ ꠇꠁꠀ ꠗꠞꠣ ꠅꠁꠛ। ꠁꠔꠣ ꠔ ꠄꠇꠟꠣꠈꠣꠘ ꠎꠟꠣꠞ ꠖꠣꠉ, ꠀꠞ ꠁꠝꠣꠝꠦ ꠔꠣꠞꠦ ꠙꠣꠇ-ꠍꠣꠚ ꠇꠁꠀ ꠄꠟꠣꠘ ꠇꠞꠛꠣ।
LEV 13:29 “ꠀꠞ ꠇꠥꠘꠥ ꠛꠦꠐꠣ ꠛꠣ ꠛꠦꠐꠤꠞ ꠝꠣꠕꠣ ꠛꠣ ꠖꠣꠠꠤ-ꠝꠥꠍꠞ ꠝꠣꠎꠦ ꠎꠥꠖꠤ ꠇꠥꠘꠥ ꠊꠣꠞ ꠀꠟꠣꠝꠔ ꠖꠦꠈꠣ ꠖꠦꠄ,
LEV 13:30 ꠔꠦ ꠁꠝꠣꠝ ꠍꠣꠛꠦ ꠔꠣꠞꠦ ꠙꠞꠤꠇ꠆ꠇꠣ ꠇꠞꠤ ꠖꠦꠈꠛꠣ। ꠔꠣꠁꠘ ꠎꠥꠖꠤ ꠖꠦꠈꠂꠘ, ꠛꠦꠝꠣꠞꠤ ꠎꠣꠉꠣꠞ ꠌꠥꠟ ꠛꠣ ꠞꠥꠝ ꠅꠟꠖꠤꠀ ꠅꠁꠀ ꠌꠤꠇꠘ ꠅꠁꠉꠦꠍꠦ, ꠀꠞ ꠊꠣ ꠌꠣꠝꠠꠣꠞ ꠔꠟꠦ ꠉꠤꠀ ꠉꠥꠡ꠆ꠔꠞ ꠝꠣꠎꠦ ꠟꠣꠉꠤꠉꠦꠍꠦ, ꠔꠦ ꠁꠐꠣ ꠔ ꠄꠇꠟꠣꠈꠣꠘ ꠖꠣꠃꠖ-ꠈꠣꠃꠎꠟꠤꠞ ꠝꠥꠈ, ꠁꠔꠣ ꠖꠣꠠꠤ-ꠝꠥꠍ ꠛꠣ ꠝꠣꠕꠣꠞ ꠌꠣꠝꠠꠣꠔ ꠙꠌꠣ-ꠇꠥꠡ꠆ꠑ ꠛꠦꠝꠣꠞ ꠛꠣꠞ ꠅꠁꠍꠦ। ꠄꠞꠟꠣꠉꠤ ꠁꠝꠣꠝꠦ ꠔꠣꠞꠦ ꠘꠣꠙꠣꠇ ꠇꠁꠀ ꠄꠟꠣꠘ ꠇꠞꠛꠣ।
LEV 13:31 ꠅꠁꠟꠦ ꠁꠝꠣꠝꠦ ꠎꠥꠖꠤ ꠛꠦꠝꠣꠞ ꠙꠞꠤꠇ꠆ꠇꠣ ꠇꠞꠤꠀ ꠖꠦꠈꠂꠘ, ꠁ ꠊꠣ ꠌꠣꠝꠠꠣꠞ ꠔꠟꠦ ꠉꠦꠍꠦ ꠘꠣ, ꠀꠞ ꠅꠘꠞ ꠌꠥꠟ ꠛꠣ ꠞꠥꠝ ꠔ ꠇꠣꠟꠣ ꠘꠣꠄ, ꠔꠦ ꠅꠃ ꠛꠦꠝꠣꠞꠤꠞꠦ ꠡꠣꠔ ꠖꠤꠘ ꠙꠞ꠆ꠎꠘ꠆ꠔ ꠡꠝꠣꠎ ꠕꠣꠇꠤ ꠀꠟꠉ ꠞꠣꠈꠛꠣ।
LEV 13:32 ꠛꠣꠖꠦ ꠡꠣꠔ ꠖꠤꠘꠞ ꠖꠤꠘ ꠁꠝꠣꠝꠦ ꠢꠤꠞꠛꠣꠞ ꠙꠞꠤꠇ꠆ꠇꠣ ꠇꠞꠤ ꠎꠥꠖꠤ ꠖꠦꠈꠂꠘ, ꠁ ꠖꠣꠃꠖ-ꠈꠣꠃꠎꠟꠤ ꠛꠦꠝꠣꠞ ꠛꠣꠠꠍꠦ ꠘꠣ, ꠛꠣ ꠌꠥꠟ-ꠞꠥꠝꠅ ꠅꠟꠖꠤꠀ ꠅꠁꠍꠦ ꠘꠣ, ꠀꠞ ꠅꠘꠞ ꠊꠣ ꠌꠣꠝꠠꠣꠞ ꠔꠟꠞ ꠉꠥꠡ꠆ꠔꠞ ꠝꠣꠎꠦ ꠟꠣꠉꠍꠦ ꠘꠣ,
LEV 13:33 ꠔꠦ ꠅꠃ ꠖꠣꠃꠖ-ꠈꠣꠃꠎꠟꠤꠞ ꠎꠣꠉꠣ ꠛꠣꠖ ꠖꠤꠀ, ꠔꠣꠞ ꠡꠞꠤꠟꠞ ꠛꠣꠖ-ꠛꠣꠇꠤ ꠌꠥꠟ ꠛꠣ ꠖꠣꠠꠤ-ꠝꠥꠍ ꠇꠣꠝꠣꠁꠟꠤꠔꠦ ꠅꠁꠛ। ꠛꠣꠖꠦ ꠁꠝꠣꠝꠦ ꠔꠣꠞꠦ ꠀꠞꠅ ꠡꠣꠔ ꠖꠤꠘ ꠡꠝꠣꠎ ꠕꠣꠇꠤ ꠀꠟꠉ ꠞꠣꠈꠛꠣ।
LEV 13:34 ꠀꠞ ꠡꠣꠔ ꠖꠤꠘꠞ ꠖꠤꠘ ꠁꠝꠣꠝꠦ ꠢꠤꠞꠛꠣꠞ ꠙꠞꠤꠇ꠆ꠇꠣ ꠇꠞꠤꠀ ꠎꠥꠖꠤ ꠖꠦꠈꠂꠘ, ꠁ ꠖꠣꠃꠖ-ꠈꠣꠃꠎꠟꠤ ꠌꠣꠝꠠꠣꠞ ꠃꠙꠞꠦ ꠍꠤꠔ꠆ꠞꠤꠍꠦ ꠘꠣ, ꠛꠣ ꠌꠣꠝꠠꠣꠞ ꠔꠟꠦꠖꠤ ꠉꠥꠡ꠆ꠔꠞ ꠝꠣꠎꠦꠅ ꠟꠣꠉꠍꠦ ꠘꠣ, ꠔꠦ ꠁꠝꠣꠝꠦ ꠔꠣꠞꠦ ꠙꠣꠇ-ꠍꠣꠚ ꠇꠁꠀ ꠄꠟꠣꠘ ꠇꠞꠛꠣ। ꠀꠞ ꠢꠦ ꠇꠣꠙꠠ-ꠌꠥꠙꠠ ꠗꠁꠀ ꠢꠣꠞꠤ ꠙꠣꠇ-ꠙꠣꠇꠤꠎꠣ ꠛꠘꠛ।
LEV 13:35 ꠔꠣ-ꠅ ꠁꠝꠣꠝꠦ ꠔꠣꠞꠦ ꠙꠣꠇ-ꠍꠣꠚ ꠇꠁꠀ ꠄꠟꠣꠘ ꠇꠞꠣꠞ ꠛꠣꠖꠦꠅ ꠎꠥꠖꠤ ꠁ ꠖꠣꠃꠖ-ꠈꠣꠃꠎꠟꠤ ꠌꠣꠝꠠꠣꠞ ꠃꠙꠞꠦ ꠍꠤꠔ꠆ꠞꠤ ꠎꠣꠄ,
LEV 13:36 ꠔꠦ ꠁꠝꠣꠝꠦ ꠔꠣꠞꠦ ꠢꠤꠞꠛꠣꠞ ꠖꠦꠈꠛꠣ। ꠔꠣꠁꠘ ꠎꠥꠖꠤ ꠖꠦꠈꠂꠘ, ꠁ ꠖꠣꠃꠖ-ꠈꠣꠃꠎꠟꠤ ꠍꠤꠔ꠆ꠞꠤ ꠉꠦꠍꠦ, ꠔꠦ ꠌꠥꠟ ꠛꠣ ꠞꠥꠝ ꠅꠟꠖꠤꠀ ꠅꠁꠍꠦ ꠇꠤ ꠘꠣ ꠁꠔꠣ ꠀꠞ ꠙꠞꠤꠇ꠆ꠇꠣ ꠇꠞꠣꠞ ꠎꠞꠥꠞ ꠘꠣꠄ, ꠢꠦ ꠔ ꠄꠝꠘꠦꠃ ꠘꠣꠙꠣꠇ।
LEV 13:37 ꠅꠁꠟꠦ ꠁꠝꠣꠝꠦ ꠎꠥꠖꠤ ꠝꠘꠅ ꠇꠞꠂꠘ, ꠁꠔꠣ ꠎꠦꠟꠣ ꠀꠍꠤꠟ ꠅꠟꠣꠃ ꠞꠁꠍꠦ, ꠀꠞ ꠁ ꠎꠣꠉꠣꠔ ꠇꠣꠟꠣ ꠞꠥꠝꠣ ꠃꠑꠦꠞ, ꠔꠦ ꠛꠥꠎꠛꠣ, ꠁꠔꠣ ꠜꠣꠟꠣ ꠅꠁꠉꠦꠍꠦ। ꠢꠦ ꠔ ꠙꠣꠇ-ꠙꠣꠇꠤꠎꠣ ꠀꠍꠦ। ꠁꠝꠣꠝꠦ ꠔꠣꠞꠦ ꠙꠣꠇ-ꠍꠣꠚ ꠇꠁꠀ ꠄꠟꠣꠘ ꠇꠞꠛꠣ।
LEV 13:38 “ꠇꠥꠘꠥ ꠛꠦꠐꠣ ꠛꠣ ꠛꠦꠐꠤꠞ ꠌꠣꠝꠠꠣꠞ ꠝꠣꠎꠦ ꠎꠥꠖꠤ ꠗꠟꠣ ꠌꠇꠌꠇꠣ ꠖꠣꠉ ꠖꠦꠈꠣ ꠎꠣꠄ,
LEV 13:39 ꠔꠦ ꠁꠝꠣꠝꠦ ꠔꠣꠞꠦ ꠙꠞꠤꠇ꠆ꠇꠣ ꠇꠞꠤ ꠖꠦꠈꠛꠣ। ꠔꠣꠁꠘ ꠎꠥꠖꠤ ꠖꠦꠈꠂꠘ, ꠔꠣꠞ ꠖꠣꠉ ꠗꠟꠣ ꠚꠣꠁꠘꠡꠣ ꠅꠁꠉꠦꠍꠦ, ꠔꠦ ꠁꠐꠣ ꠔ ꠈꠣꠟꠤ ꠗꠟ-ꠚꠤꠡ꠆ꠔꠤ ꠅꠁꠍꠦ। ꠁꠔꠣꠄ ꠇꠥꠘꠥ ꠈꠦꠔꠤ ꠅꠁꠔ ꠘꠣꠄ, ꠢꠦ ꠔ ꠙꠣꠇ-ꠍꠣꠚ ꠀꠍꠦ।
LEV 13:40 “ꠀꠞ ꠇꠥꠘꠥ ꠝꠣꠘꠡꠞ ꠎꠥꠖꠤ ꠝꠣꠕꠣꠞ ꠌꠥꠟ ꠙꠠꠤꠀ ꠐꠣꠇ ꠅꠁꠎꠣꠄ, ꠔꠦ ꠢꠦ ꠘꠣꠙꠣꠇ ꠅꠁꠔ ꠘꠣꠄ।
LEV 13:41 ꠔꠣꠞ ꠝꠣꠕꠣꠞ ꠍꠣꠝꠘꠞ ꠉꠣꠟꠣꠞ ꠌꠥꠟ ꠙꠠꠤꠀ ꠎꠥꠖꠤ ꠇꠙꠣꠟꠞ ꠛꠣꠄ ꠐꠣꠇ ꠙꠠꠤ ꠎꠣꠄ, ꠔꠦ ꠢꠦ-ꠅ ꠘꠣꠙꠣꠇ ꠅꠁꠔ ꠘꠣꠄ।
LEV 13:42 ꠅꠁꠟꠦ ꠁ ꠐꠣꠇ ꠙꠠꠣ ꠝꠣꠕꠣ ꠛꠣ ꠇꠙꠣꠟꠞ ꠝꠣꠎꠦ ꠎꠥꠖꠤ ꠟꠣꠟꠐꠤ ꠖꠣꠉ ꠖꠦꠈꠣ ꠖꠦꠄ, ꠔꠦ ꠛꠥꠎꠛꠣꠄ, ꠔꠣꠞ ꠝꠣꠕꠣ ꠛꠣ ꠇꠙꠣꠟꠅ ꠙꠌꠣ-ꠇꠥꠡ꠆ꠑ ꠛꠦꠝꠣꠞ ꠛꠣꠞ ꠅꠁꠍꠦ।
LEV 13:43 ꠀꠞ ꠁꠝꠣꠝ ꠍꠣꠛꠦ ꠔꠣꠞꠦ ꠙꠞꠤꠇ꠆ꠇꠣ ꠇꠞꠤꠀ ꠎꠥꠖꠤ ꠖꠦꠈꠂꠘ, ꠔꠣꠞ ꠇꠙꠣꠟꠅ ꠛꠣ ꠝꠣꠕꠣꠔ ꠘꠣꠙꠣꠇ ꠙꠌꠣ-ꠇꠥꠡ꠆ꠑ ꠛꠦꠝꠣꠞꠤꠞ ꠟꠣꠈꠣꠘ ꠢꠃ ꠖꠣꠉ ꠔ ꠚꠥꠟꠤ ꠉꠦꠍꠦ,
LEV 13:44 ꠔꠦ ꠛꠥꠎꠣ ꠎꠣꠁꠛ, ꠔꠣꠞ ꠘꠣꠙꠣꠇ ꠙꠌꠣ-ꠇꠥꠡ꠆ꠑ ꠛꠦꠝꠣꠞ ꠅꠁꠍꠦ, ꠢꠦ ꠔ ꠘꠣꠙꠣꠇ। ꠔꠣꠞ ꠝꠣꠕꠣꠞ ꠅꠃ ꠛꠦꠝꠣꠞꠞ ꠟꠣꠉꠤ ꠁꠝꠣꠝꠦ ꠔꠣꠞꠦ ꠘꠣꠙꠣꠇ ꠇꠁꠀ ꠄꠟꠣꠘ ꠇꠞꠛꠣ।
LEV 13:45 “ꠀꠞ ꠅꠃ ꠟꠣꠈꠣꠘ ꠙꠌꠣ-ꠇꠥꠡ꠆ꠑ ꠛꠦꠝꠣꠞ ꠎꠦ ꠝꠣꠘꠡꠞ ꠅꠁꠛ, ꠢꠦ ꠚꠣꠞꠣ-ꠌꠤꠞꠣ ꠇꠣꠙꠠ ꠚꠤꠘ꠆ꠖꠤꠔꠦ ꠅꠁꠛ। ꠔꠣꠞ ꠝꠣꠕꠣꠞ ꠌꠥꠟ ꠀꠃꠟꠣ-ꠎꠣꠃꠟꠣ ꠞꠁꠛ। ꠔꠣꠞ ꠝꠥꠈꠞꠦ ꠢꠤꠎꠣꠛꠞ ꠟꠣꠈꠣꠘ ꠇꠣꠙꠠꠖꠤ ꠉꠥꠞꠤꠀ ꠌꠤꠟ꠆ꠟꠣꠁ ꠌꠤꠟ꠆ꠟꠣꠁ ꠇꠁꠛ, ꠘꠣꠙꠣꠇ, ꠘꠣꠙꠣꠇ।
LEV 13:46 ꠁ ꠛꠦꠝꠣꠞ ꠔꠣꠞ ꠉꠔꠞꠅ ꠎꠔꠖꠤꠘ ꠞꠁꠛ, ꠅꠔꠖꠤꠘ ꠢꠦ ꠘꠣꠙꠣꠇ ꠢꠣꠟꠔꠦ ꠞꠁꠛ। ꠢꠦ ꠛꠘꠤ ꠁꠍꠞꠣꠁꠟꠞ ꠇꠦꠝ꠆ꠙꠞ ꠛꠣꠞꠦ ꠄꠇꠟꠣ ꠄꠇꠟꠣ ꠞꠁꠛ।
LEV 13:47 “ꠇꠥꠘꠥ ꠇꠣꠙꠠꠞ ꠝꠣꠎꠦ ꠎꠥꠖꠤ ꠍꠣꠛꠣ ꠍꠣꠛꠣ ꠖꠣꠉ ꠟꠣꠉꠦ, ꠃꠟꠞ ꠇꠣꠙꠠ ꠛꠣ ꠡꠥꠔꠤ ꠇꠣꠙꠠꠞ ꠝꠣꠎꠦ ꠎꠥꠖꠤ ꠚꠦꠃꠇꠘꠤ ꠙꠠꠣꠞ ꠀꠟꠣꠝꠔ ꠝꠤꠟꠦ,
LEV 13:48 ꠁꠔꠣ ꠃꠟꠞ ꠇꠣꠙꠠ ꠛꠣ ꠡꠥꠔꠤ ꠇꠣꠙꠠ ꠛꠣꠘꠣꠘꠤꠞ ꠐꠣꠘꠣ ꠛꠣ ꠔꠣꠔꠞ ꠝꠣꠎꠦ ꠅꠃꠇ, ꠛꠣ ꠌꠣꠝꠠꠣ ꠀꠞ ꠌꠣꠝꠠꠣꠖꠤ ꠛꠣꠘꠣꠁꠟ ꠎꠦꠇꠥꠘꠥ ꠎꠤꠘꠤꠡꠞ ꠝꠣꠎꠦ ꠎꠥꠖꠤ ꠚꠦꠃꠇꠘꠤꠞ ꠖꠣꠉ ꠝꠤꠟꠦ,
LEV 13:49 ꠀꠞ ꠚꠤꠘ꠆ꠘꠞ ꠇꠣꠙꠠꠞ ꠐꠣꠘꠣ ꠛꠣ ꠔꠣꠔꠞ ꠝꠣꠎꠦ, ꠌꠣꠝꠠꠣꠞ ꠇꠥꠘꠥ ꠎꠤꠘꠤꠡꠅ ꠎꠥꠖꠤ ꠟꠣꠟꠐꠤ ꠛꠣ ꠇꠌꠥꠀ ꠇꠥꠘꠥꠎꠣꠔ ꠖꠣꠉ ꠝꠤꠟꠦ, ꠔꠦ ꠁꠔꠣ ꠅꠁꠟ ꠚꠦꠃꠇꠘꠤꠞ ꠀꠟꠣꠝꠔ। ꠁꠟꠣ ꠅꠁꠟꠦ ꠁꠝꠣꠝ ꠍꠣꠛꠞ ꠉꠦꠍꠦ ꠖꠦꠈꠣꠘꠤ ꠟꠣꠉꠛ।
LEV 13:50 ꠁꠝꠣꠝ ꠍꠣꠛꠦ ꠁꠔꠣ ꠜꠣꠟꠣꠝꠘ꠆ꠔꠦ ꠙꠞꠤꠇ꠆ꠇꠣ ꠇꠞꠤ ꠖꠦꠈꠤꠀ, ꠅꠃ ꠎꠤꠘꠤꠡꠞꠦ ꠡꠣꠔ ꠖꠤꠘ ꠢꠇꠟꠔꠣ ꠕꠣꠇꠤ ꠢꠞꠣꠁꠀ ꠞꠣꠈꠛꠣ।
LEV 13:51 ꠛꠣꠖꠦ ꠡꠣꠔ ꠖꠤꠘꠞ ꠖꠤꠘ ꠁꠝꠣꠝꠦ ꠢꠤꠞꠛꠣꠞ ꠖꠦꠈꠛꠣ। ꠔꠣꠁꠘ ꠎꠥꠖꠤ ꠖꠦꠈꠂꠘ, ꠅꠃ ꠇꠣꠙꠠꠞ ꠐꠣꠘꠣꠔ ꠛꠣ ꠔꠣꠔꠅ, ꠛꠣ ꠌꠣꠝꠠꠣꠞ ꠎꠤꠘꠤꠡꠅ ꠟꠣꠟꠐꠤ ꠛꠣ ꠇꠌꠥꠀ ꠖꠣꠉ ꠛꠣꠠꠤꠍꠦ, ꠔꠦ ꠢꠃ ꠚꠦꠃꠇꠘꠤ ꠛꠦꠝꠣꠞ ꠛꠠ ꠝꠣꠞꠣꠔ꠆ꠔꠇ, ꠅꠃ ꠎꠤꠘꠤꠡ ꠔ ꠘꠣꠙꠣꠇ।
LEV 13:52 ꠄꠞꠟꠣꠉꠤ ꠁ ꠇꠣꠙꠠ, ꠛꠣ ꠌꠣꠝꠠꠣꠞ ꠅꠃ ꠎꠤꠘꠤꠡ, ꠉꠣꠝꠍꠣ ꠛꠣ ꠃꠠꠘꠣ ꠎꠦꠔꠣꠞ ꠝꠣꠎꠦ ꠁꠟꠣ ꠚꠦꠃꠇꠘꠤꠞ ꠖꠣꠉ ꠝꠤꠟꠛ, ꠁꠔꠣ ꠢꠣꠍꠞꠤꠛ ꠇꠞꠤ ꠢꠇꠟꠔꠣ ꠎꠣꠟꠣꠁꠟꠤꠔꠦ ꠅꠁꠛ।
LEV 13:53 “ꠅꠁꠟꠦ ꠁꠝꠣꠝꠦ ꠎꠥꠖꠤ ꠖꠦꠈꠂꠘ, ꠁ ꠇꠣꠙꠠ ꠛꠣ ꠌꠣꠝꠠꠣꠞ ꠎꠤꠘꠤꠡꠞ ꠖꠣꠉ ꠘꠣ ꠍꠤꠔ꠆ꠞꠤꠀ ꠄꠇꠁ ꠎꠣꠉꠣꠔ ꠞꠁꠍꠦ,
LEV 13:54 ꠔꠦ ꠔꠣꠁꠘ ꠁꠔꠣꠞꠦ ꠙꠣꠘꠤꠖꠤ ꠗꠁꠀ ꠖꠤꠛꠣꠞ ꠢꠥꠇꠥꠝ ꠖꠤꠛꠣ। ꠗꠁꠀ ꠢꠣꠞꠤ ꠅꠃ ꠎꠤꠘꠤꠡꠞꠦ ꠡꠣꠔ ꠖꠤꠘ ꠖꠥꠍꠞꠣ ꠢꠇꠟꠔꠣ ꠕꠣꠇꠤ ꠢꠞꠣꠁ ꠞꠣꠈꠛꠣ।
LEV 13:55 ꠛꠣꠖꠦ ꠁꠝꠣꠝꠦ ꠢꠤꠞꠛꠣꠞ ꠖꠦꠈꠛꠣ। ꠔꠣꠁꠘ ꠎꠥꠖꠤ ꠖꠦꠈꠂꠘ, ꠁ ꠚꠦꠃꠇꠘꠤꠞ ꠖꠣꠉ ꠇꠥꠘꠥꠛꠣꠄ ꠘꠣ ꠍꠤꠔ꠆ꠞꠤꠟꠦꠅ ꠀꠉꠞ ꠟꠣꠈꠣꠘ ꠞꠋ ꠞꠁꠍꠦ, ꠔꠦ ꠁꠔꠣ ꠘꠣꠙꠣꠇ। ꠁꠉꠥꠞ ꠃꠟꠐꠣ-ꠜꠣꠐꠤꠅꠟ ꠎꠦꠇꠥꠘꠥ ꠉꠣꠟꠣꠛꠣꠄ ꠁ ꠖꠣꠉ ꠞꠃꠇ, ꠁꠉꠥꠞꠦ ꠀꠉꠥꠁꠘꠖꠤ ꠎꠣꠟꠣꠁꠟꠤꠔꠦ ꠅꠁꠛ।
LEV 13:56 ꠅꠁꠟꠦ ꠁꠔꠣ ꠗꠁꠀ ꠖꠦꠅꠀꠞ ꠛꠣꠖꠦ ꠎꠥꠖꠤ ꠁꠝꠣꠝꠦ ꠖꠦꠈꠂꠘ, ꠁ ꠎꠣꠉꠣꠞ ꠞꠋ ꠚꠣꠁꠘꠡꠣ ꠅꠁꠉꠦꠍꠦ, ꠔꠦ ꠅꠃ ꠎꠣꠉꠣ ꠍꠤꠠꠤꠀ ꠚꠣꠟꠣꠁ ꠖꠤꠛꠣꠄ।
LEV 13:57 ꠀꠞ ꠗꠅꠀꠞ ꠛꠣꠖꠦꠅ ꠎꠥꠖꠤ ꠅꠃ ꠎꠤꠘꠤꠡꠅ ꠢꠤꠞꠛꠣꠞ ꠚꠦꠃꠇꠘꠤꠞ ꠖꠣꠉ ꠖꠦꠈꠣ ꠎꠣꠄ, ꠔꠦ ꠛꠥꠎꠛꠣꠄ, ꠁꠔꠣ ꠍꠤꠔ꠆ꠞꠤ ꠎꠣꠅꠀ ꠛꠦꠝꠣꠞ, ꠄꠞꠟꠣꠉꠤ ꠁ ꠎꠤꠘꠤꠡꠞꠦ ꠀꠉꠥꠁꠘꠖꠤ ꠎꠣꠟꠣꠁꠟꠤꠛꠣꠄ।
LEV 13:58 ꠀꠞ ꠅꠃ ꠎꠤꠘꠤꠡ ꠗꠅꠀꠞ ꠛꠣꠖꠦ ꠎꠥꠖꠤ ꠖꠦꠈꠂꠘ, ꠅꠃ ꠖꠣꠉ ꠝꠤꠟꠣꠁꠉꠦꠍꠦ, ꠔꠦ ꠁꠔꠣ ꠢꠤꠞꠛꠣꠞ ꠗꠁꠀ ꠢꠣꠞꠟꠦ ꠙꠣꠇ-ꠍꠣꠚ ꠛꠥꠎꠛꠣꠄ।
LEV 13:59 “ꠅꠃ ꠘꠤꠅꠝ-ꠇꠣꠘꠥꠘ ꠝꠣꠘꠤꠀ ꠃꠟꠞ ꠇꠣꠙꠠ, ꠡꠥꠔꠤ ꠇꠣꠙꠠ ꠛꠣ ꠌꠣꠝꠠꠣꠞ ꠇꠥꠘꠥ ꠎꠤꠘꠤꠡꠅ ꠚꠦꠃꠇꠘꠤꠞ ꠖꠣꠉ ꠟꠣꠉꠟꠦ, ꠙꠣꠇ ꠛꠣ ꠘꠣꠙꠣꠇ ꠇꠁꠀ ꠄꠟꠣꠘ ꠇꠞꠛꠣꠄ।”
LEV 14:1 ꠛꠣꠖꠦ ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ,
LEV 14:2 “ꠙꠌꠣ-ꠇꠥꠡ꠆ꠑ ꠛꠦꠝꠣꠞꠤꠞꠦ ꠙꠣꠇ-ꠍꠣꠚ ꠇꠞꠣꠞ ꠖꠤꠘ ꠅꠃ ꠘꠤꠅꠝ ꠝꠣꠘꠤꠅ। ꠁꠝꠣꠝ ꠍꠣꠛꠦ ꠔꠣꠞꠦ ꠖꠦꠈꠣꠞ ꠟꠣꠉꠤ,
LEV 14:3 ꠇꠦꠝ꠆ꠙꠞ ꠛꠣꠞꠦ ꠉꠤꠀ ꠙꠞꠤꠇ꠆ꠇꠣ ꠇꠞꠤꠀ ꠖꠦꠈꠛꠣ। ꠔꠣꠁꠘ ꠎꠥꠖꠤ ꠖꠦꠈꠂꠘ ꠢꠦ ꠢꠣꠍꠣꠃ ꠜꠣꠟꠣ ꠅꠁꠉꠦꠍꠦ,
LEV 14:4 ꠔꠦ ꠁꠝꠣꠝꠦ ꠢꠥꠇꠥꠝ ꠖꠤꠛꠣ, ꠙꠣꠇ-ꠍꠣꠚ ꠅꠀ ꠎꠘꠞ ꠘꠤꠅꠔꠦ ꠎꠤꠔꠣ ꠖꠥꠁꠐꠣ ꠢꠣꠟꠣꠟ ꠙꠣꠈꠤ, ꠖꠦꠛꠖꠣꠞꠥ ꠉꠣꠍꠞ ꠇꠤꠍꠥ ꠟꠣꠇꠠꠤ, ꠄꠍꠥꠛ ꠉꠣꠍꠞ ꠒꠦꠐꠣ ꠀꠞ ꠟꠣꠟ ꠡꠥꠔꠣ ꠟꠁꠀ ꠀꠁꠔꠣ।
LEV 14:5 ꠛꠣꠖꠦ ꠁꠝꠣꠝꠦ ꠢꠥꠇꠥꠝ ꠖꠤꠛꠣ, ꠚꠥꠔꠞ ꠙꠣꠘꠤ ꠕꠣꠇꠤ ꠙꠣꠘꠤ ꠀꠘꠤꠀ ꠝꠣꠐꠤꠞ ꠉꠣꠝꠟꠣꠔ ꠕꠅꠀ ꠙꠣꠘꠤꠞ ꠃꠙꠞꠦ, ꠢꠃ ꠖꠥꠁꠅ ꠙꠣꠈꠤꠞ ꠝꠣꠎꠞ ꠄꠇꠐꠣꠞꠦ ꠎꠛ ꠇꠞꠣꠞ ꠟꠣꠉꠤ।
LEV 14:6 ꠎꠛꠞ ꠛꠣꠖꠦ ꠁꠝꠣꠝꠦ ꠛꠣꠇꠤ ꠢꠃ ꠎꠤꠔꠣ ꠙꠣꠈꠤꠞꠦ, ꠖꠦꠛꠖꠣꠞꠥ ꠉꠣꠍꠞ ꠟꠣꠇꠠꠤꠞꠦ, ꠟꠣꠟ ꠡꠥꠔꠣꠞꠦ ꠀꠞ ꠄꠍꠥꠛ ꠉꠣꠍꠞ ꠒꠦꠐꠣꠞꠦ, ꠚꠥꠔꠞ ꠙꠣꠘꠤꠞ ꠉꠣꠝꠟꠣꠞ ꠃꠙꠞꠦ ꠎꠛ ꠇꠞꠣ ꠢꠃ ꠙꠣꠈꠤꠞ ꠟꠃꠞ ꠝꠣꠎꠦ ꠍꠥꠛꠣꠁꠛꠣ।
LEV 14:7 ꠀꠞ ꠅꠃ ꠎꠦ ꠛꠦꠝꠣꠞꠤꠞꠦ ꠙꠣꠇ-ꠍꠣꠚ ꠇꠞꠣ ꠅꠁꠔ, ꠁꠝꠣꠝꠦ ꠔꠣꠞ ꠃꠙꠞꠦ ꠢꠃ ꠟꠃ ꠡꠣꠔ ꠛꠣꠞ ꠍꠤꠐꠣꠁꠀ ꠢꠣꠞꠤ, ꠔꠣꠞꠦ ꠙꠣꠇ-ꠍꠣꠚ ꠇꠁꠀ ꠄꠟꠣꠘ ꠇꠞꠛꠣ। ꠛꠣꠖꠦ ꠁꠝꠣꠝꠦ ꠢꠃ ꠎꠤꠔꠣ ꠙꠣꠈꠤꠞꠦ ꠈꠥꠟꠣ ꠎꠣꠉꠣꠔ ꠍꠣꠠꠤ ꠖꠤꠛꠣ।
LEV 14:8 ꠀꠞ ꠙꠣꠇ-ꠍꠣꠚ ꠛꠘꠞꠣ ꠅꠃ ꠛꠦꠝꠣꠞꠤꠄ ꠔꠣꠞ ꠇꠣꠙꠠ-ꠌꠥꠙꠠ ꠗꠁꠛ, ꠔꠣꠞ ꠉꠔꠞꠞ ꠀꠞ ꠝꠣꠕꠣꠞ ꠢꠇꠟ ꠌꠥꠟ-ꠞꠥꠝ ꠇꠣꠝꠣꠁꠀ ꠢꠣꠞꠤ ꠙꠣꠘꠤ ꠖꠤꠀ ꠘꠣꠁꠔꠦ ꠅꠁꠛ, ꠔꠦꠃ ꠢꠦ ꠙꠣꠇ-ꠍꠣꠚ ꠛꠘꠛ। ꠄꠞꠛꠣꠖꠦ ꠢꠦ ꠀꠁꠀ ꠛꠘꠤ ꠁꠍꠞꠣꠁꠟꠞ ꠇꠦꠝ꠆ꠙꠞ ꠜꠤꠔꠞꠦ ꠢꠣꠝꠣꠁꠔ ꠙꠣꠞꠛ, ꠅꠁꠟꠦ ꠔꠣꠞ ꠘꠤꠎꠞ ꠔꠣꠝ꠆ꠛꠥꠞ ꠛꠣꠞꠦ ꠡꠣꠔ ꠖꠤꠘ ꠞꠁꠔꠦ ꠅꠁꠛ।
LEV 14:9 ꠛꠣꠖꠦ ꠡꠣꠔ ꠖꠤꠘꠞ ꠖꠤꠘ ꠢꠤꠞꠛꠣꠞ ꠔꠣꠞ ꠡꠞꠤꠟꠞ ꠢꠇꠟ ꠌꠥꠟ, ꠝꠣꠘꠤ ꠝꠣꠕꠣꠞ ꠌꠥꠟ, ꠖꠣꠠꠤ-ꠝꠥꠍ, ꠌꠈꠥꠞ ꠜꠥꠞꠤ ꠀꠞ ꠉꠔꠞꠞ ꠢꠇꠟ ꠞꠥꠝꠣ ꠇꠣꠝꠣꠁꠔꠦ ꠅꠁꠛ। ꠛꠣꠖꠦ ꠔꠣꠞ ꠇꠣꠙꠠ-ꠌꠥꠙꠠ ꠗꠁꠀ ꠘꠣꠁꠀ ꠢꠣꠞꠟꠦ ꠢꠦ ꠙꠥꠞꠣꠙꠥꠞ ꠙꠣꠇ-ꠍꠣꠚ ꠅꠁꠛ।
LEV 14:10 “ꠛꠣꠖꠞ ꠖꠤꠘ ꠢꠦ ꠙꠥꠞꠣꠙꠥꠞ ꠘꠤꠈꠥꠔ ꠖꠥꠁꠐꠣ ꠝꠦꠠꠣ-ꠛꠣꠁꠌ꠆ꠌꠣ ꠀꠞ ꠄꠇ ꠛꠍꠞꠞ ꠄꠉꠥ ꠝꠦꠠꠤ ꠟꠁꠀ ꠀꠁꠛ। ꠀꠞ ꠄꠞ ꠟꠉꠞ ꠗꠣꠘ-ꠉꠝꠞ ꠍꠖꠉꠣꠞ ꠘꠤꠅꠔꠦ ꠢꠦ ꠍꠄ ꠡꠦꠞ ꠔꠦꠟ ꠝꠣꠈꠣꠁꠟ ꠝꠄꠖꠣ ꠀꠞ ꠄꠇ ꠙꠣꠅꠀ ꠔꠦꠟ ꠀꠘꠛ।
LEV 14:11 ꠀꠘꠤꠀ ꠢꠣꠞꠟꠦ ꠔꠣꠞ ꠙꠣꠇ-ꠍꠣꠚꠞ ꠟꠣꠉꠤ ꠎꠦ ꠁꠝꠣꠝ ꠍꠣꠛꠦ ꠇꠣꠝ ꠇꠞꠞꠣ, ꠄꠁꠘ ꠅꠃ ꠎꠘꠞꠦ ꠀꠞ ꠇꠥꠞꠛꠣꠘꠤꠞ ꠝꠣꠟ-ꠍꠣꠝꠣꠘꠣꠞꠦ ꠝꠤꠟꠘ-ꠔꠣꠝ꠆ꠛꠥꠞ ꠖꠥꠀꠞꠞ ꠉꠦꠍꠦ ꠝꠣꠛꠥꠖꠞ ꠍꠣꠝꠘꠦ ꠀꠎꠤꠞ ꠇꠞꠛꠣ।
LEV 14:12 “ꠁꠝꠣꠝ ꠍꠣꠛꠦ ꠢꠃ ꠖꠥꠁꠅ ꠝꠦꠠꠣ-ꠛꠣꠁꠌ꠆ꠌꠣ ꠕꠣꠇꠤ ꠄꠉꠥ ꠝꠦꠠꠣ ꠀꠞ ꠢꠃ ꠔꠦꠟ ꠘꠤꠀ ꠖꠥꠡ-ꠇꠍꠥꠞꠤꠞ ꠇꠚꠞꠣꠞ ꠇꠥꠞꠛꠣꠘꠤ ꠀꠖꠣꠄ ꠇꠞꠛꠣ, ꠇꠞꠤꠀ ꠖꠥꠟꠘꠣ ꠇꠥꠞꠛꠣꠘꠤ ꠢꠤꠡꠣꠛꠦ ꠝꠣꠛꠥꠖꠞ ꠍꠣꠝꠘꠦ ꠁꠔꠣ ꠖꠥꠟꠣꠁꠛꠣ।
LEV 14:13 ꠛꠣꠖꠦ ꠙꠛꠤꠔ꠆ꠞ ꠇꠣꠛꠣ ꠊꠞꠞ ꠡꠤꠝꠣꠘꠣꠞ ꠎꠦ ꠎꠣꠉꠣꠔ ꠉꠥꠘꠣꠞ ꠇꠚꠞꠣꠞ ꠇꠥꠞꠛꠣꠘꠤ ꠀꠞ ꠎꠣꠟꠣꠁꠟ ꠇꠥꠞꠛꠣꠘꠤꠞ ꠙꠡꠥ ꠎꠛ ꠇꠞꠣ ꠅꠄ, ꠢꠃ ꠎꠣꠉꠣꠔ ꠅꠃ ꠙꠡꠥꠞꠦꠅ ꠎꠛ ꠇꠞꠛꠣ। ꠉꠥꠘꠣꠞ ꠇꠚꠞꠣꠞ ꠇꠥꠞꠛꠣꠘꠤꠞ ꠟꠣꠈꠣꠘ ꠖꠥꠡ-ꠇꠍꠥꠞꠤꠞ ꠇꠚꠞꠣꠞ ꠇꠥꠞꠛꠣꠘꠤꠞ ꠉꠥꠡ꠆ꠔꠅ ꠁꠝꠣꠝ ꠍꠣꠛꠦ ꠙꠣꠁꠛꠣ, ꠁꠔꠣ ꠔ ꠈꠣꠍ ꠙꠛꠤꠔ꠆ꠞ ꠉꠥꠡ꠆ꠔ।
LEV 14:14 ꠎꠦ ꠎꠘꠞꠦ ꠙꠣꠇ-ꠍꠣꠚ ꠇꠞꠣ ꠅꠁꠛ, ꠁꠝꠣꠝ ꠍꠣꠛꠦ ꠖꠥꠡ-ꠇꠍꠥꠞꠤꠞ ꠇꠚꠞꠣꠞ ꠇꠥꠞꠛꠣꠘꠤꠞ ꠇꠤꠍꠥ ꠟꠃ ꠘꠤꠀ ꠔꠣꠞ ꠒꠣꠁꠘ ꠇꠣꠘꠞ ꠟꠔꠤꠔ, ꠒꠣꠁꠘ ꠀꠔꠞ ꠀꠞ ꠒꠣꠁꠘ ꠙꠣꠅꠞ ꠛꠥꠠꠤ ꠀꠋꠉꠥꠟꠤꠔ ꠟꠣꠉꠣꠁꠛꠣ।
LEV 14:15 ꠛꠣꠖꠦ ꠁꠝꠣꠝꠦ ꠢꠃ ꠔꠦꠟ ꠕꠣꠇꠤ ꠇꠤꠍꠥ ꠔꠦꠟ ꠔꠣꠘ ꠛꠣꠃ ꠀꠔꠞ ꠔꠣꠟꠥꠞ ꠝꠣꠎꠦ ꠓꠣꠟꠤꠛꠣ।
LEV 14:16 ꠀꠞ ꠒꠣꠁꠘ ꠀꠔꠞ ꠀꠋꠉꠥꠁꠟ ꠖꠤꠀ, ꠛꠣꠃ ꠀꠔ ꠕꠣꠇꠤ ꠔꠦꠟ ꠔꠥꠟꠤꠀ ꠝꠣꠛꠥꠖꠞ ꠘꠣꠝꠦ ꠡꠣꠔ ꠛꠣꠞ ꠍꠤꠐꠣꠁꠛꠣ।
LEV 14:17 ꠛꠣꠖꠦ ꠀꠔꠞ ꠔꠣꠟꠥꠞ ꠛꠣꠖ-ꠛꠣꠇꠤ ꠔꠦꠟ ꠕꠣꠇꠤ ꠇꠤꠍꠥ ꠔꠦꠟ ꠘꠤꠀ ꠁꠝꠣꠝꠦ ꠢꠃ ꠎꠘꠞ ꠒꠣꠁꠘ ꠇꠣꠘꠞ ꠟꠔꠤꠔ, ꠒꠣꠁꠘ ꠀꠔꠞ ꠀꠞ ꠒꠣꠁꠘ ꠙꠣꠅꠞ ꠛꠥꠠꠤ ꠀꠋꠉꠥꠟꠤꠔ ꠖꠥꠡ-ꠇꠍꠥꠞꠤꠞ ꠇꠚꠞꠣꠞ ꠇꠥꠞꠛꠣꠘꠤꠞ ꠟꠃꠞ ꠃꠙꠞꠦ ꠟꠣꠉꠣꠁꠛꠣ।
LEV 14:18 ꠀꠞ ꠀꠔꠞ ꠔꠣꠟꠥꠞ ꠛꠣꠇꠤ ꠔꠦꠟ ꠔꠣꠁꠘ ꠢꠃ ꠙꠣꠇ-ꠍꠣꠚ ꠅꠀ ꠎꠘꠞ ꠝꠣꠕꠣꠔ ꠟꠣꠉꠣꠁꠛꠣ। “ꠀꠞ ꠅꠃ ꠘꠝꠥꠘꠣꠄ ꠔꠣꠞ ꠇꠚꠞꠣ ꠀꠖꠣꠄ ꠇꠞꠛꠣ,
LEV 14:19 ꠎꠦ ꠎꠘꠞꠦ ꠙꠣꠇ-ꠍꠣꠚ ꠇꠞꠣ ꠅꠁꠛ, ꠔꠣꠞ ꠀꠘꠣ ꠉꠥꠘꠣꠞ ꠇꠚꠞꠣꠞ ꠇꠥꠞꠛꠣꠘꠤꠞ ꠙꠡꠥꠞꠦ ꠁꠝꠣꠝ ꠍꠣꠛꠦ ꠎꠛ ꠇꠞꠛꠣ। ꠛꠣꠖꠦ ꠎꠣꠟꠣꠁꠟ ꠇꠥꠞꠛꠣꠘꠤꠞ ꠙꠡꠥꠅ ꠎꠛ ꠇꠞꠤꠀ,
LEV 14:20 ꠗꠣꠘ-ꠉꠝꠞ ꠍꠖꠉꠣꠞ ꠎꠤꠘꠤꠡꠞ ꠟꠉꠦ ꠝꠤꠟꠣꠁꠀ, ꠁꠝꠣꠝ ꠍꠣꠛꠦ ꠇꠥꠞꠛꠣꠘꠤ ꠈꠣꠘꠣꠞ ꠃꠙꠞꠦ ꠁꠔꠣ ꠖꠤꠛꠣ। ꠅꠃ ꠘꠝꠥꠘꠣꠄ ꠔꠣꠞ ꠇꠚꠞꠣ ꠀꠖꠣꠄ ꠇꠞꠤꠀ ꠔꠣꠞ ꠘꠣꠙꠣꠇꠤ ꠢꠞꠣꠁꠛꠣ।
LEV 14:21 “ꠅꠁꠟꠦ ꠅꠃ ꠎꠘ ꠎꠥꠖꠤ ꠉꠞꠤꠛ ꠅꠄ, ꠁꠔꠣ ꠢꠇꠟꠔꠣ ꠀꠘꠣꠞ ꠔꠚꠤꠇ ꠔꠣꠞ ꠘꠣ ꠕꠣꠇꠦ, ꠔꠦ ꠖꠥꠡ-ꠇꠍꠥꠞꠤꠞ ꠇꠚꠞꠣꠞ ꠇꠥꠞꠛꠣꠘꠤꠞ ꠟꠣꠉꠤ ꠈꠣꠟꠤ ꠄꠉꠥ ꠝꠦꠠꠣ-ꠛꠣꠁꠌ꠆ꠌꠣ ꠀꠘꠔꠦ ꠅꠁꠛ, ꠀꠘꠟꠦ ꠁꠝꠣꠝꠦ ꠔꠣꠞ ꠇꠚꠞꠣ ꠀꠖꠣꠄ ꠇꠞꠣꠞ ꠟꠣꠉꠤ ꠅꠇꠐꠣꠞꠦ ꠇꠥꠞꠛꠣꠘꠤ ꠖꠤꠀ ꠖꠥꠟꠣꠁꠛꠣ। ꠀꠞ ꠄꠞ ꠟꠉꠞ ꠗꠣꠘ-ꠉꠝꠞ ꠍꠖꠉꠣ ꠢꠤꠡꠣꠛꠦ ꠔꠣꠞ ꠀꠘꠣ ꠔꠦꠟ ꠝꠣꠈꠣꠁꠟ ꠖꠥꠁ ꠡꠦꠞ ꠝꠄꠖꠣ, ꠄꠇ ꠙꠣꠅꠀ ꠔꠦꠟ
LEV 14:22 ꠀꠞ ꠔꠣꠞ ꠖꠥꠁꠐꠣ ꠒꠥꠙꠤ ꠙꠣꠈꠤ ꠛꠣ ꠙꠣꠞꠅ ꠀꠘꠔꠦ ꠅꠁꠛ, ꠎꠦꠟꠣ ꠔꠣꠞ ꠔꠣꠇ꠆ꠇꠔꠦ ꠇꠥꠟꠣꠄ। ꠖꠥꠁꠅ ꠙꠣꠈꠤꠞ ꠝꠣꠎꠞ ꠄꠇꠐꠣ ꠉꠥꠘꠣꠞ ꠇꠚꠞꠣꠞ ꠇꠥꠞꠛꠣꠘꠤꠞ ꠟꠣꠉꠤ, ꠀꠞ ꠄꠇꠐꠣ ꠎꠣꠟꠣꠁꠟ ꠇꠥꠞꠛꠣꠘꠤꠞ ꠟꠣꠉꠤ।
LEV 14:23 ꠛꠣꠖꠦ ꠀꠐ ꠖꠤꠘꠞ ꠖꠤꠘ ꠙꠣꠇ-ꠍꠣꠚ ꠅꠀꠞ ꠘꠤꠅꠔꠦ ꠢꠦ ꠁꠔꠣ ꠢꠇꠟꠔꠣ ꠀꠘꠤꠀ ꠝꠤꠟꠘ-ꠔꠣꠝ꠆ꠛꠥꠞ ꠖꠥꠀꠞꠞ ꠗꠣꠞꠅ ꠝꠣꠛꠥꠖꠞ ꠍꠣꠝꠘꠦ ꠁꠝꠣꠝꠞ ꠉꠦꠍꠦ ꠡꠝꠎꠣꠁꠔꠦ ꠅꠁꠛ।
LEV 14:24 ꠁꠝꠣꠝꠦ ꠖꠥꠡ-ꠇꠍꠥꠞꠤꠞ ꠇꠚꠞꠣꠞ ꠇꠥꠞꠛꠣꠘꠤꠞ ꠝꠦꠠꠣ ꠀꠞ ꠅꠃ ꠔꠦꠟ ꠘꠤꠀ ꠝꠣꠛꠥꠖꠞ ꠍꠣꠝꠘꠦ ꠖꠥꠟꠘꠣ ꠇꠥꠞꠛꠣꠘꠤ ꠢꠤꠡꠣꠛꠦ ꠖꠥꠟꠣꠁꠛꠣ।
LEV 14:25 ꠛꠣꠖꠦ ꠁꠝꠣꠝꠦ ꠝꠦꠠꠣꠞꠦ ꠎꠛ ꠇꠞꠤꠀ ꠅꠉꠥꠞ ꠇꠤꠍꠥ ꠟꠃ ꠘꠤꠀ ꠢꠃ ꠎꠘꠞ ꠒꠣꠁꠘ ꠇꠣꠘꠞ ꠟꠔꠤꠔ, ꠒꠣꠁꠘ ꠀꠔꠞ ꠀꠞ ꠒꠣꠁꠘ ꠙꠣꠅꠞ ꠛꠥꠠꠤ ꠀꠋꠉꠥꠟꠤꠔ ꠟꠣꠉꠣꠁꠛꠣ।
LEV 14:26 ꠛꠣꠖꠦ ꠢꠃ ꠔꠦꠟ ꠕꠣꠇꠤ ꠇꠤꠍꠥ ꠔꠦꠟ ꠔꠣꠘ ꠛꠣꠃ ꠀꠔꠞ ꠔꠣꠟꠥꠞ ꠝꠣꠎꠦ ꠓꠣꠟꠤꠛꠣ।
LEV 14:27 ꠀꠞ ꠒꠣꠁꠘ ꠀꠔꠞ ꠀꠋꠉꠥꠁꠟ ꠖꠤꠀ ꠁꠝꠣꠝꠦ ꠛꠣꠃ ꠀꠔꠞ ꠇꠤꠍꠥ ꠔꠦꠟ ꠔꠥꠟꠤꠀ ꠝꠣꠛꠥꠖꠞ ꠍꠣꠝꠘꠦ ꠡꠣꠔ ꠛꠣꠞ ꠍꠤꠐꠣꠁꠛꠣ।
LEV 14:28 ꠄꠞꠟꠉꠦ ꠔꠣꠞ ꠒꠣꠁꠘ ꠇꠣꠘꠞ ꠟꠔꠤꠔ, ꠒꠣꠁꠘ ꠀꠔꠞ ꠀꠞ ꠒꠣꠁꠘ ꠙꠣꠅꠞ ꠛꠥꠠꠤ ꠀꠋꠉꠥꠟꠤꠞ ꠎꠦ ꠎꠣꠉꠣꠔ ꠖꠥꠡ-ꠇꠍꠥꠞꠤꠞ ꠇꠚꠞꠣꠞ ꠇꠥꠞꠛꠣꠘꠤꠞ ꠟꠃ ꠟꠣꠉꠣꠁꠟ ꠅꠁꠍꠦ, ꠢꠃ ꠎꠣꠉꠣꠞ ꠃꠙꠞꠦ ꠅꠃ ꠔꠦꠟꠅ ꠟꠣꠉꠣꠁꠛꠣ।
LEV 14:29 ꠝꠣꠛꠥꠖꠞ ꠍꠣꠝꠘꠦ ꠢꠃ ꠙꠣꠇ-ꠍꠣꠚ ꠅꠀ ꠎꠘꠞ ꠇꠚꠞꠣꠞ ꠘꠤꠅꠔꠦ ꠁꠝꠣꠝꠞ ꠀꠔꠞ ꠛꠣꠇꠤ ꠔꠦꠟ ꠔꠣꠞ ꠝꠣꠕꠣꠔ ꠓꠣꠟꠤ ꠖꠤꠛꠣ।
LEV 14:30 ꠛꠣꠖꠦ ꠢꠃ ꠎꠘꠞ ꠔꠣꠇ꠆ꠇꠔ ꠝꠣꠚꠤꠇ ꠀꠘꠣ ꠒꠥꠙꠤ ꠛꠣ ꠙꠣꠞꠅ ꠎꠥꠠꠣ ꠘꠤꠀ,
LEV 14:31 ꠁꠝꠣꠝꠦ ꠄꠉꠥꠞꠦ ꠉꠥꠘꠣꠞ ꠇꠚꠞꠣꠞ ꠇꠥꠞꠛꠣꠘꠤ ꠢꠤꠡꠣꠛꠦ, ꠀꠞ ꠖꠥꠍꠞꠣꠐꠣꠞꠦ ꠎꠣꠟꠣꠁꠟ ꠇꠥꠞꠛꠣꠘꠤ ꠢꠤꠡꠣꠛꠦ ꠇꠥꠞꠛꠣꠘꠤ ꠖꠤꠛꠣ। ꠟꠉꠦ ꠗꠣꠘ-ꠉꠝꠞ ꠍꠖꠉꠣꠞꠦꠅ ꠖꠤꠛꠣ। ꠁꠝꠣꠝꠦ ꠅꠃ ꠘꠝꠥꠘꠣꠄ ꠝꠣꠛꠥꠖꠞ ꠍꠣꠝꠘꠦ ꠔꠣꠞ ꠇꠚꠞꠣ ꠀꠖꠣꠄ ꠇꠞꠛꠣ।
LEV 14:32 ꠙꠌꠣ-ꠇꠥꠡ꠆ꠑ ꠛꠦꠝꠣꠞꠤ ꠙꠣꠇ-ꠍꠣꠚ ꠅꠀꠞ ꠟꠣꠉꠤ ꠎꠦꠟꠣꠈꠣꠘ ꠇꠥꠞꠛꠣꠘꠤ ꠀꠖꠣꠄ ꠇꠞꠣꠞ ꠇꠕꠣ, ꠁꠔꠣ ꠀꠖꠣꠄ ꠇꠞꠣꠞ ꠔꠣꠇ꠆ꠇꠔ ꠎꠦꠞꠣꠞ ꠘꠣꠁ, ꠔꠣꠞꠣꠞ ꠟꠣꠉꠤ ꠅꠃ ꠘꠤꠅꠝ ꠖꠦꠅꠀ ꠅꠁꠍꠦ।”
LEV 14:33 ꠛꠣꠖꠦ ꠝꠣꠛꠥꠖꠦ ꠝꠥꠍꠣ ꠀꠞ ꠢꠣꠞꠥꠘꠞꠦ ꠇꠁꠟꠣ,
LEV 14:34 “ꠀꠝꠤ ꠎꠦ ꠖꠦꠡꠈꠣꠘꠞꠦ ꠔꠥꠝꠞꠣꠞ ꠝꠣꠟꠤꠇꠣꠘꠣꠄ ꠖꠤꠝꠥ, ꠅꠃ ꠇꠦꠘꠣꠘ ꠖꠦꠡꠅ ꠢꠣꠝꠣꠘꠤꠞ ꠛꠣꠖꠦ, ꠀꠝꠤ ꠎꠥꠖꠤ ꠢꠘꠞ ꠇꠥꠘꠥ ꠊꠞꠞ ꠝꠣꠎꠦ ꠘꠣꠙꠣꠇ-ꠚꠦꠃꠇꠘꠤ ꠛꠦꠝꠣꠞ ꠙꠣꠑꠣꠁ,
LEV 14:35 ꠔꠦ ꠊꠞꠞ ꠝꠣꠟꠤꠇꠦ ꠉꠤꠀ ꠁꠝꠣꠝ ꠍꠣꠛꠞꠦ ꠇꠁꠛꠣ, ꠀꠝꠣꠞ ꠊꠞꠅ ꠘꠣꠙꠣꠇ-ꠚꠦꠃꠇꠘꠤꠞ ꠟꠣꠈꠣꠘ ꠇꠤꠔꠣ ꠎꠣꠘꠥ ꠖꠦꠈꠤꠀꠞ।
LEV 14:36 ꠔꠦꠃ ꠁꠝꠣꠝꠦ ꠁ ꠚꠦꠃꠇꠘꠤ ꠙꠞꠤꠇ꠆ꠇꠣ ꠇꠞꠤꠀ ꠖꠦꠈꠣꠔ ꠀꠁꠀ, ꠊꠞꠞ ꠢꠇꠟ ꠝꠣꠟ-ꠍꠣꠝꠣꠘꠣꠞꠦ ꠎꠣꠔꠦ ꠘꠣꠙꠣꠇ ꠇꠁꠀ ꠄꠟꠣꠘ ꠇꠞꠣ ꠘꠣ ꠟꠣꠉꠦ, ꠅꠃ ꠘꠤꠅꠔꠦ ꠔꠣꠁꠘ ꠝꠣꠟꠤꠇꠞꠦ ꠢꠥꠇꠥꠝ ꠖꠤꠛꠣ, ꠀꠝꠤ ꠊꠞꠅ ꠢꠣꠝꠣꠘꠤꠞ ꠀꠉꠦ ꠔꠥꠝꠣꠞ ꠊꠞꠞ ꠢꠇꠟ ꠝꠣꠟ-ꠍꠣꠝꠣꠘꠣ ꠛꠣꠞꠦ ꠛꠣꠞ ꠇꠞꠤꠟꠣꠅ। ꠢꠇꠟꠔꠣ ꠛꠣꠞ ꠇꠞꠤꠀ ꠢꠣꠞꠟꠦ ꠔꠣꠁꠘ ꠊꠞꠅ ꠢꠣꠝꠣꠁꠀ ꠙꠞꠤꠇ꠆ꠇꠣ ꠇꠞꠛꠣ।
LEV 14:37 ꠔꠣꠁꠘ ꠎꠥꠖꠤ ꠖꠦꠈꠂꠘ, ꠊꠞꠞ ꠅꠀꠟꠞ ꠇꠥꠘꠥ ꠚꠦꠃꠇꠘꠤꠞ ꠖꠣꠉ ꠉꠤꠀ ꠜꠤꠔꠞꠦꠖꠤ ꠢꠣꠝꠣꠁꠍꠦ, ꠀꠞ ꠅꠃ ꠖꠣꠉꠞ ꠞꠋ ꠇꠌꠥꠀ ꠛꠣ ꠟꠣꠟꠐꠤ,
LEV 14:38 ꠔꠦ ꠔꠣꠁꠘ ꠁ ꠊꠞ ꠕꠣꠇꠤ ꠛꠣꠞ ꠅꠁ ꠀꠁꠀ, ꠊꠞꠞ ꠖꠥꠀꠞ ꠡꠣꠔ ꠖꠤꠘ ꠛꠘ꠆ꠖ ꠇꠞꠤ ꠕꠁꠛꠣ।
LEV 14:39 ꠅꠃ ꠡꠣꠔ ꠖꠤꠘ ꠛꠣꠖꠦ ꠢꠤꠞꠛꠣꠞ ꠙꠞꠤꠇ꠆ꠇꠣ ꠇꠞꠤ ꠖꠦꠈꠛꠣ, ꠎꠥꠖꠤ ꠖꠦꠈꠣ ꠎꠣꠄ, ꠁ ꠖꠣꠉ ꠅꠀꠟꠞ ꠝꠣꠎꠦ ꠀꠞꠅ ꠍꠤꠔ꠆ꠞꠤꠍꠦ,
LEV 14:40 ꠔꠦ ꠔꠣꠁꠘ ꠢꠥꠇꠥꠝ ꠖꠤꠛꠣ, ꠅꠃ ꠅꠀꠟꠞ ꠖꠣꠉ ꠀꠟꠣ ꠙꠣꠔ꠆ꠔꠞ ꠛꠣ ꠁꠐ ꠈꠥꠟꠤꠀ ꠢꠣꠞꠤ, ꠉꠣꠃ ꠛꠣ ꠐꠣꠃꠘꠞ ꠛꠣꠞꠦ ꠘꠤꠀ ꠘꠣꠙꠣꠇ ꠇꠥꠘꠥ ꠎꠣꠉꠣꠔ ꠚꠣꠟꠣꠁ ꠖꠤꠔꠣ।
LEV 14:41 ꠛꠣꠖꠦ ꠀꠡ꠆ꠔꠣ ꠊꠞꠞ ꠜꠤꠔꠞꠞ ꠢꠇꠟ ꠅꠀꠟ ꠌꠣꠍꠤꠀ ꠀꠡ꠆ꠔꠞ ꠔꠥꠟꠤꠀ ꠢꠣꠞꠤ, ꠅꠔꠣ ꠘꠤꠀ ꠐꠣꠃꠘꠞ ꠛꠣꠞꠦ ꠘꠣꠙꠣꠇ ꠇꠥꠘꠥ ꠎꠣꠉꠣꠔ ꠚꠣꠟꠣꠁꠔꠣ।
LEV 14:42 ꠀꠞ ꠅꠀꠟꠞ ꠎꠦ ꠎꠣꠉꠣ ꠕꠣꠇꠤ ꠙꠣꠔ꠆ꠔꠞ ꠛꠣ ꠁꠐ ꠈꠥꠟꠣ ꠅꠁꠍꠦ, ꠢꠘꠅ ꠘꠄꠀ ꠙꠣꠔ꠆ꠔꠞ ꠟꠣꠉꠣꠁꠛꠣ, ꠟꠣꠉꠣꠁꠀ ꠀꠡ꠆ꠔꠣ ꠊꠞ ꠢꠤꠞꠛꠣꠞ ꠘꠄꠀ ꠀꠡ꠆ꠔꠞ ꠇꠞꠔꠣ।
LEV 14:43 “ꠅꠀꠟꠞ ꠙꠣꠔ꠆ꠔꠞ ꠈꠥꠟꠤꠀ ꠚꠣꠟꠣꠁꠀ ꠌꠣꠍꠤꠀ ꠀꠡ꠆ꠔꠞ ꠔꠥꠟꠣꠞ ꠛꠣꠖꠦ, ꠘꠄꠀ ꠀꠡ꠆ꠔꠞ ꠟꠣꠉꠣꠁꠀ ꠢꠣꠞꠟꠦꠅ ꠎꠥꠖꠤ ꠅꠀꠟꠅ ꠢꠤꠞꠛꠣꠞ ꠅꠟꠣ ꠖꠣꠉ ꠖꠦꠈꠣ ꠎꠣꠄ,
LEV 14:44 ꠔꠦ ꠁꠝꠣꠝꠦ ꠢꠤꠞꠛꠣꠞ ꠉꠤꠀ ꠁꠔꠣ ꠙꠞꠤꠇ꠆ꠇꠣ ꠇꠞꠤ ꠖꠦꠈꠛꠣ। ꠔꠣꠁꠘ ꠎꠥꠖꠤ ꠖꠦꠈꠂꠘ, ꠅꠀꠟꠞ ꠝꠣꠎꠞ ꠖꠣꠉ ꠍꠤꠔ꠆ꠞꠤꠀ ꠀꠞꠅ ꠛꠣꠠꠍꠦ, ꠔꠦ ꠛꠥꠎꠛꠣ, ꠅꠃ ꠊꠞꠅ ꠘꠣꠙꠣꠇ-ꠚꠦꠃꠇꠘꠤ ꠛꠦꠝꠣꠞ ꠀꠍꠦ, ꠄꠞꠟꠣꠉꠤ ꠁ ꠊꠞ ꠈꠣꠘ ꠘꠣꠙꠣꠇ।
LEV 14:45 ꠘꠣꠙꠣꠇ ꠅꠃ ꠊꠞꠞ ꠢꠇꠟ ꠙꠣꠔ꠆ꠔꠞ ꠛꠣ ꠁꠐ, ꠢꠇꠟ ꠀꠡ꠆ꠔꠞ, ꠊꠞꠞ ꠟꠣꠇꠠꠤ, ꠢꠇ꠆ꠇꠟꠔꠣ ꠜꠣꠋꠉꠤꠀ ꠐꠣꠃꠘꠞ ꠛꠣꠞꠦ ꠇꠥꠘꠥ ꠘꠣꠙꠣꠇ ꠎꠣꠉꠣꠔ ꠘꠤꠀ ꠚꠣꠟꠣꠁꠔꠦ ꠅꠁꠛ।
LEV 14:46 “ꠀꠞ ꠢꠃ ꠡꠣꠔ ꠖꠤꠘ ꠛꠘ꠆ꠖ ꠞꠣꠈꠣꠞ ꠇꠣꠟꠅ ꠎꠥꠖꠤ ꠇꠥꠘꠥ ꠝꠣꠘꠥꠡ ꠉꠤꠀ ꠁ ꠊꠞꠅ ꠢꠣꠝꠣꠄ, ꠔꠦ ꠢꠦ ꠅꠃ ꠖꠤꠘ ꠢꠣꠁꠘ꠆ꠎꠣ ꠙꠞ꠆ꠎꠘ꠆ꠔ ꠘꠣꠙꠣꠇ ꠢꠣꠟꠔꠦ ꠞꠁꠛ।
LEV 14:47 ꠀꠞ ꠇꠦꠃ ꠎꠥꠖꠤ ꠅꠃ ꠊꠞꠅ ꠈꠣꠘꠣ-ꠙꠤꠘꠣ ꠈꠣꠄ ꠛꠣ ꠊꠥꠝꠣꠄ, ꠔꠦ ꠔꠣꠞ ꠚꠤꠘ꠆ꠘꠞ ꠇꠣꠙꠠ-ꠌꠥꠙꠠ ꠗꠁꠀ ꠖꠤꠔꠦ ꠅꠁꠛ।
LEV 14:48 “ꠅꠁꠟꠦ ꠁ ꠊꠞ ꠀꠡ꠆ꠔꠞ ꠇꠞꠣꠞ ꠛꠣꠖꠦ ꠁꠝꠣꠝꠦ ꠙꠞꠤꠇ꠆ꠇꠣ ꠇꠞꠤꠀ ꠎꠥꠖꠤ ꠖꠦꠈꠂꠘ, ꠅꠀꠟꠞ ꠖꠣꠉ ꠀꠞ ꠖꠦꠈꠣ ꠎꠣꠞ ꠘꠣ, ꠔꠦ ꠁꠝꠣꠝꠦ ꠁ ꠊꠞꠞꠦ ꠙꠣꠇ-ꠍꠣꠚ ꠇꠁꠀ ꠄꠟꠣꠘ ꠇꠞꠛꠣ। ꠁ ꠊꠞꠅ ꠔ ꠘꠣꠙꠣꠇ-ꠚꠦꠃꠇꠘꠤ ꠛꠦꠝꠣꠞꠞ ꠇꠥꠘꠥ ꠀꠟꠣꠝꠔ ꠅꠈꠘ ꠘꠣꠁ।
LEV 14:49 ꠀꠞ ꠊꠞꠞꠦ ꠙꠣꠇ-ꠍꠣꠚ ꠇꠞꠣꠞ ꠟꠣꠉꠤ ꠁꠝꠣꠝ ꠍꠣꠛꠦ ꠖꠥꠁꠐꠣ ꠙꠣꠈꠤ, ꠖꠦꠛꠖꠣꠞꠥ ꠉꠣꠍꠞ ꠇꠤꠍꠥ ꠟꠣꠇꠠꠤ, ꠄꠍꠥꠛ ꠉꠣꠍꠞ ꠒꠦꠐꠣ, ꠀꠞ ꠟꠣꠟ ꠞꠋꠉꠞ ꠡꠥꠔꠣ ꠟꠁꠀ ꠅꠘꠅ ꠀꠁꠛꠣ।
LEV 14:50 ꠀꠁꠀ ꠚꠥꠔꠞ ꠙꠣꠘꠤ ꠕꠣꠇꠤ ꠀꠘꠣ ꠝꠣꠐꠤꠞ ꠉꠣꠝꠟꠣꠔ ꠕꠅꠀ ꠅꠃ ꠙꠣꠘꠤꠞ ꠃꠙꠞꠦ ꠄꠇꠐꠣ ꠙꠣꠈꠤꠞꠦ ꠎꠛ ꠇꠞꠛꠣ।
LEV 14:51 ꠀꠞ ꠖꠥꠍꠞꠣ ꠎꠤꠔꠣ ꠙꠣꠈꠤꠞꠦ, ꠖꠦꠛꠖꠣꠞꠥ ꠉꠣꠍꠞ ꠟꠣꠇꠠꠤꠞꠦ, ꠟꠣꠟ ꠡꠥꠔꠣ ꠀꠞ ꠄꠍꠥꠛ ꠉꠣꠍꠞ ꠒꠦꠐꠣꠞꠦ, ꠚꠥꠔꠞ ꠙꠣꠘꠤꠞ ꠉꠣꠝꠟꠣꠞ ꠃꠙꠞꠦ ꠎꠛ ꠇꠞꠣ ꠢꠃ ꠙꠣꠈꠤꠞ ꠟꠃꠞ ꠝꠣꠎꠦ ꠁꠝꠣꠝ ꠍꠣꠛꠦ ꠍꠥꠛꠣꠁꠛꠣ, ꠍꠥꠛꠣꠁꠀ ꠢꠣꠞꠤ ꠅꠃ ꠊꠞꠞ ꠝꠣꠎꠦ ꠡꠣꠔ ꠛꠣꠞ ꠍꠤꠐꠣꠁꠛꠣ।
LEV 14:52 ꠙꠣꠈꠤꠞ ꠟꠃ, ꠚꠥꠔꠞ ꠙꠣꠘꠤ, ꠎꠤꠔꠣ ꠙꠣꠈꠤ, ꠖꠦꠛꠖꠣꠞꠥ ꠉꠣꠍꠞ ꠟꠣꠇꠠꠤ, ꠄꠍꠥꠛ ꠉꠣꠍꠞ ꠒꠦꠐꠣ ꠀꠞ ꠟꠣꠟ ꠡꠥꠔꠣ ꠖꠤꠀ ꠅꠃ ꠊꠞꠞꠦ ꠙꠣꠇ-ꠍꠣꠚ ꠇꠞꠣ ꠅꠁꠛ।
LEV 14:53 ꠄꠞꠛꠣꠖꠦ ꠅꠃ ꠎꠤꠔꠣ ꠙꠣꠈꠤꠞꠦ ꠘꠤꠀ ꠉꠣꠃ ꠛꠣ ꠐꠣꠃꠘꠞ ꠛꠣꠞꠦ ꠈꠥꠟꠣ ꠎꠣꠉꠣꠔ ꠍꠣꠠꠤ ꠖꠤꠛꠣ। ꠅꠃ ꠘꠝꠥꠘꠣꠄ ꠢꠃ ꠊꠞꠞ ꠘꠣꠙꠣꠇꠤ ꠢꠞꠣꠁꠀ ꠢꠣꠞꠟꠦ, ꠁꠈꠣꠘ ꠙꠣꠇ-ꠍꠣꠚ ꠅꠁꠛ।”
LEV 14:54 ꠔꠦ ꠢꠇꠟ ꠟꠣꠈꠣꠘ ꠙꠌꠣ-ꠇꠥꠡ꠆ꠑ ꠛꠦꠝꠣꠞ, ꠖꠣꠃꠖ-ꠈꠣꠃꠎꠟꠤ,
LEV 14:55 ꠇꠣꠙꠠ ꠛꠣ ꠊꠞꠞ ꠅꠀꠟꠞ ꠚꠦꠃꠇꠘꠤꠞ ꠖꠣꠉ,
LEV 14:56 ꠉꠔꠞꠞ ꠌꠣꠝꠠꠣꠔ ꠇꠥꠟꠡ ꠃꠑꠣ, ꠛꠞꠘ ꠛꠣ ꠇꠥꠘꠥ ꠎꠣꠔꠞ ꠖꠣꠉꠞ ꠛꠦꠙꠣꠞꠦ ꠅꠃ ꠟꠣꠈꠣꠘ ꠢꠥꠇꠥꠝ ꠎꠣꠘꠣꠁꠟ ꠅꠁꠟ।
LEV 14:57 ꠁꠔꠣ ꠛꠦꠝꠣꠞꠦ ꠇꠥꠘ ꠡꠝꠄ ꠙꠣꠇ, ꠀꠞ ꠇꠥꠘ ꠡꠝꠄ ꠘꠣꠙꠣꠇ, ꠅꠈꠣꠘ ꠎꠣꠘꠣꠘꠤꠞ ꠟꠣꠉꠤ ꠅꠃ ꠘꠤꠅꠝ-ꠇꠣꠘꠥꠘ ꠖꠦꠅꠀ ꠅꠁꠟ।
LEV 15:1 ꠝꠣꠛꠥꠖꠦ ꠝꠥꠍꠣ ꠀꠞ ꠢꠣꠞꠥꠘꠞꠦ ꠇꠁꠟꠣ,
LEV 15:2 “ꠔꠥꠝꠞꠣ ꠛꠘꠤ ꠁꠍꠞꠣꠁꠟꠞꠦ ꠎꠣꠘꠣꠅ, ꠇꠥꠘꠥ ꠛꠦꠐꠣ ꠝꠣꠘꠡꠞ ꠙꠦꠡꠣꠛꠞ ꠞꠣꠡ꠆ꠔꠣꠄ ꠎꠥꠖꠤ ꠢꠣꠝꠦꠡꠣ ꠗꠣꠔꠥ ꠛꠣꠞ ꠅꠄ, ꠔꠦ ꠔꠣꠞ ꠡꠞꠤꠟ ꠘꠣꠙꠣꠇ।
LEV 15:3 ꠔꠣꠞ ꠡꠞꠤꠟ ꠕꠣꠇꠤ ꠗꠣꠔꠥ ꠛꠣꠞꠘꠤꠔ ꠞꠁꠟꠦ ꠛꠣ ꠡꠞꠤꠟꠅ ꠀꠐꠇꠤ ꠞꠁꠟꠦꠅ ꠢꠦ ꠘꠣꠙꠣꠇ।
LEV 15:4 ꠅꠟꠣ ꠘꠣꠙꠣꠇ ꠢꠣꠟꠔꠦ ꠢꠦ ꠎꠦ ꠛꠤꠍꠘꠣꠔ ꠢꠥꠔꠤꠛ, ꠛꠣ ꠎꠦ ꠎꠣꠉꠣꠔ ꠛꠁꠛ, ꠢꠃ ꠛꠤꠍꠘꠣ ꠀꠞ ꠢꠃ ꠎꠣꠉꠣꠅ ꠘꠣꠙꠣꠇ ꠅꠁꠎꠤꠛ।
LEV 15:5 ꠅꠃ ꠗꠣꠔꠥ ꠎꠣꠅꠞꠣ ꠘꠣꠙꠣꠇ ꠛꠦꠐꠣꠞ ꠛꠤꠍꠘꠣ ꠎꠦ ꠎꠘꠦ ꠍꠁꠛ, ꠢꠦ ꠘꠤꠎꠞ ꠇꠣꠙꠠ-ꠌꠥꠙꠠ ꠗꠁꠀ ꠖꠤꠀ ꠙꠣꠘꠤꠖꠤ ꠘꠣꠁꠛ, ꠔꠣ-ꠅ ꠢꠣꠁꠘ꠆ꠎꠣ ꠙꠞ꠆ꠎꠘ꠆ꠔ ꠢꠦ ꠘꠣꠙꠣꠇ ꠢꠣꠟꠔꠦ ꠞꠁꠛ।
LEV 15:6 ꠅꠟꠣꠈꠣꠘ ꠢꠃ ꠛꠦꠐꠣꠞ ꠛꠅꠀꠞ ꠎꠣꠉꠣꠔ ꠎꠦ ꠎꠘ ꠛꠁꠛ, ꠢꠦ-ꠅ ꠔꠣꠞ ꠇꠣꠙꠠ-ꠌꠥꠙꠠ ꠗꠁꠀ ꠖꠤꠀ ꠙꠣꠘꠤꠖꠤ ꠘꠣꠁꠛ, ꠔꠣ-ꠅ ꠢꠣꠁꠘ꠆ꠎꠣ ꠙꠞ꠆ꠎꠘ꠆ꠔ ꠢꠦ ꠘꠣꠙꠣꠇ ꠢꠣꠟꠔꠦ ꠞꠁꠛ।
LEV 15:7 ꠀꠞ ꠁ ꠗꠣꠔꠥ ꠎꠣꠅꠞꠣ ꠛꠦꠐꠣꠞꠦ ꠎꠦ ꠎꠘꠦ ꠍꠁꠛ ꠢꠦ-ꠅ ꠔꠣꠞ ꠇꠣꠙꠠ-ꠌꠥꠙꠠ ꠗꠁꠀ ꠖꠤꠀ ꠙꠣꠘꠤꠖꠤ ꠘꠣꠁꠛ, ꠔꠣ-ꠅ ꠢꠣꠁꠘ꠆ꠎꠣ ꠙꠞ꠆ꠎꠘ꠆ꠔ ꠢꠦ ꠘꠣꠙꠣꠇ ꠢꠣꠟꠔꠦ ꠞꠁꠛ।
LEV 15:8 ꠢꠃ ꠗꠣꠔꠥ ꠎꠣꠅꠞꠣ ꠛꠦꠐꠣꠄ ꠎꠥꠖꠤ ꠇꠥꠘꠥ ꠙꠣꠇ-ꠍꠣꠚ ꠝꠣꠘꠡꠞ ꠉꠔꠞꠅ ꠍꠦꠚ ꠚꠣꠟꠣꠄ, ꠔꠦ ꠅꠃ ꠎꠘꠦꠅ ꠔꠣꠞ ꠇꠣꠙꠠ-ꠌꠥꠙꠠ ꠗꠁꠀ ꠖꠤꠀ ꠙꠣꠘꠤꠖꠤ ꠘꠣꠁꠛ, ꠔꠣ-ꠅ ꠢꠣꠁꠘ꠆ꠎꠣ ꠙꠞ꠆ꠎꠘ꠆ꠔ ꠢꠦ ꠘꠣꠙꠣꠇ ꠢꠣꠟꠔꠦ ꠞꠁꠛ।
LEV 15:9 ꠅꠃ ꠗꠣꠔꠥ ꠎꠣꠅꠞꠣ ꠛꠦꠐꠣꠄ ꠇꠥꠘꠥ ꠎꠣꠉꠣꠔ ꠎꠣꠁꠛꠣꠞ ꠇꠣꠟꠅ ꠉꠣꠠꠤ-ꠊꠥꠠꠣ ꠇꠥꠘꠥꠔꠣꠞ ꠍꠤꠐꠅ ꠛꠁꠀ ꠉꠦꠟꠦ, ꠁ ꠍꠤꠐ ꠘꠣꠙꠣꠇ ꠅꠁꠎꠤꠛ।
LEV 15:10 ꠅꠃ ꠍꠤꠐ ꠇꠥꠘꠥ ꠝꠣꠘꠡꠦ ꠍꠁꠟꠦ ꠢꠦ ꠢꠣꠁꠘ꠆ꠎꠣ ꠙꠞ꠆ꠎꠘ꠆ꠔ ꠘꠣꠙꠣꠇ ꠢꠣꠟꠔꠦ ꠞꠁꠛ। ꠅꠃ ꠍꠤꠐ ꠎꠦ ꠎꠘꠦ ꠔꠥꠟꠛ, ꠢꠦ ꠔꠣꠞ ꠇꠣꠙꠠ-ꠌꠥꠙꠠ ꠗꠁꠀ ꠖꠤꠀ ꠙꠣꠘꠤꠖꠤ ꠘꠣꠁꠛ, ꠔꠣ-ꠅ ꠢꠣꠁꠘ꠆ꠎꠣ ꠙꠞ꠆ꠎꠘ꠆ꠔ ꠢꠦ ꠘꠣꠙꠣꠇ ꠢꠣꠟꠔꠦ ꠞꠁꠛ।
LEV 15:11 ꠅꠃ ꠗꠣꠔꠥ ꠎꠣꠅꠞꠣ ꠛꠦꠐꠣꠄ ꠙꠣꠘꠤꠖꠤ ꠀꠔ ꠘꠣ ꠗꠁꠀ ꠎꠥꠖꠤ ꠇꠥꠘꠥ ꠝꠣꠘꠡꠞꠦ ꠍꠁꠟꠣꠄ, ꠔꠦ ꠎꠣꠞꠦ ꠍꠁꠛ, ꠢꠦ ꠔꠣꠞ ꠇꠣꠙꠠ-ꠌꠥꠙꠠ ꠗꠁꠀ ꠖꠤꠀ ꠙꠣꠘꠤꠖꠤ ꠘꠣꠁꠛ, ꠔꠣ-ꠅ ꠢꠣꠁꠘ꠆ꠎꠣ ꠙꠞ꠆ꠎꠘ꠆ꠔ ꠢꠦ ꠘꠣꠙꠣꠇ ꠢꠣꠟꠔꠦ ꠞꠁꠛ।
LEV 15:12 ꠀꠞ ꠗꠣꠔꠥ ꠎꠣꠅꠞꠣ ꠛꠦꠐꠣꠄ ꠎꠥꠖꠤ ꠇꠥꠘꠥ ꠝꠣꠐꠤꠞ ꠛꠣꠡꠘ ꠍꠁꠟꠣꠄ, ꠔꠦ ꠁꠔꠣ ꠜꠣꠋꠉꠤꠟꠤꠔꠦ ꠅꠁꠛ, ꠀꠞ ꠟꠣꠇꠠꠤꠖꠤ ꠛꠣꠘꠣꠁꠟ ꠇꠥꠘꠥ ꠎꠤꠘꠤꠡ ꠍꠁꠟꠦ, ꠁꠔꠣ ꠙꠣꠘꠤꠖꠤ ꠗꠁꠔꠦ ꠅꠁꠛ।
LEV 15:13 “ꠢꠃ ꠗꠣꠔꠥ ꠎꠣꠅꠞꠣ ꠛꠦꠝꠣꠞꠤ ꠛꠦꠐꠣꠞ ꠛꠦꠝꠣꠞ ꠎꠦ ꠖꠤꠘ ꠇꠝꠤꠎꠤꠛ, ꠅꠃ ꠖꠤꠘ ꠕꠣꠇꠤ ꠉꠘꠤꠀ ꠡꠣꠔ ꠖꠤꠘꠞ ꠖꠤꠘ ꠢꠦ ꠔꠣꠞ ꠇꠣꠙꠠ-ꠌꠥꠙꠠ ꠗꠁꠀ ꠖꠤꠀ ꠚꠥꠔꠞ ꠙꠣꠘꠤꠔ ꠘꠣꠁꠀ ꠢꠣꠞꠤ ꠙꠣꠇ-ꠍꠣꠚ ꠅꠁꠛ।
LEV 15:14 ꠛꠣꠖꠦ ꠀꠐ ꠖꠤꠘꠞ ꠖꠤꠘ ꠢꠦ ꠖꠥꠁꠐꠣ ꠒꠥꠙꠤ ꠙꠣꠈꠤ ꠛꠣ ꠖꠥꠉꠥ ꠙꠣꠞꠅ ꠟꠁꠀ ꠝꠣꠛꠥꠖꠞ ꠍꠣꠝꠘꠦ ꠝꠤꠟꠘ-ꠔꠣꠝ꠆ꠛꠥꠞ ꠖꠥꠀꠞꠞ ꠉꠦꠍꠦ ꠀꠎꠤꠞ ꠅꠁꠀ, ꠁꠝꠣꠝ ꠍꠣꠛꠞ ꠀꠔꠅ ꠖꠤꠔꠦ ꠅꠁꠛ।
LEV 15:15 ꠁꠝꠣꠝꠦ ꠢꠃ ꠖꠥꠁꠐꠣꠞ ꠄꠉꠥꠞꠦ ꠖꠤꠀ ꠉꠥꠘꠣꠞ ꠇꠚꠞꠣꠞ ꠇꠥꠞꠛꠣꠘꠤ, ꠀꠞ ꠖꠥꠍꠞꠣꠐꠣ ꠖꠤꠀ ꠎꠣꠟꠣꠁꠟ ꠇꠥꠞꠛꠣꠘꠤ ꠀꠖꠣꠄ ꠇꠞꠛꠣ। ꠗꠣꠔꠥ ꠎꠣꠅꠞꠣ ꠛꠦꠐꠣꠞ ꠘꠣꠙꠣꠇꠤ ꠢꠞꠣꠘꠤꠞ ꠘꠤꠅꠔꠦ, ꠁꠝꠣꠝ ꠍꠣꠛꠦ ꠝꠣꠛꠥꠖꠞ ꠍꠣꠝꠘꠦ ꠅꠃ ꠘꠝꠥꠘꠣꠄ ꠔꠣꠞ ꠇꠚꠞꠣ ꠀꠖꠣꠄ ꠇꠞꠛꠣ।
LEV 15:16 “ꠇꠥꠘꠥ ꠛꠦꠐꠣ ꠝꠣꠘꠡꠞ ꠎꠃꠛꠘꠞ ꠙꠣꠘꠤ ꠛꠣꠞ ꠅꠁꠉꠦꠟꠦ ꠢꠦ ꠔꠣꠞ ꠀꠡ꠆ꠔꠣ ꠡꠞꠤꠟꠞꠦ ꠙꠣꠘꠤꠖꠤ ꠗꠁꠔꠦ ꠅꠁꠛ, ꠀꠞ ꠢꠣꠁꠘ꠆ꠎꠣ ꠙꠞ꠆ꠎꠘ꠆ꠔ ꠢꠦ ꠘꠣꠙꠣꠇ ꠢꠣꠟꠔꠦ ꠞꠁꠛ।
LEV 15:17 ꠅꠃ ꠎꠃꠛꠘꠞ ꠙꠣꠘꠤ ꠇꠥꠘꠥ ꠇꠣꠙꠠ ꠛꠣ ꠌꠣꠝꠠꠣꠞ ꠎꠤꠘꠤꠡꠅ ꠟꠣꠉꠤꠉꠦꠟꠦ, ꠁꠔꠣ ꠙꠣꠘꠤꠖꠤ ꠗꠁꠔꠦ ꠅꠁꠛ, ꠀꠞ ꠢꠣꠁꠘ꠆ꠎꠣ ꠙꠞ꠆ꠎꠘ꠆ꠔ ꠁꠔꠣ ꠘꠣꠙꠣꠇ ꠢꠣꠟꠔꠦ ꠞꠁꠛ।
LEV 15:18 ꠇꠥꠘꠥ ꠛꠦꠐꠣꠄ ꠔꠣꠞ ꠛꠃꠞ ꠟꠉꠦ ꠝꠤꠟꠣ-ꠝꠤꠡꠣꠞ ꠇꠣꠟꠅ ꠎꠃꠛꠘꠞ ꠙꠣꠘꠤ ꠛꠣꠞ ꠅꠁꠟꠦ, ꠔꠣꠞꠣ ꠖꠥꠁꠅꠎꠘꠦ ꠙꠣꠘꠤꠖꠤ ꠘꠣꠁꠔꠦ ꠅꠁꠛ, ꠖꠥꠁꠅꠎꠘ ꠢꠣꠁꠘ꠆ꠎꠣ ꠙꠞ꠆ꠎꠘ꠆ꠔ ꠘꠣꠙꠣꠇ ꠢꠣꠟꠔꠦ ꠞꠁꠛ।
LEV 15:19 “ꠇꠥꠘꠥ ꠛꠦꠐꠤꠞ ꠝꠣꠡꠤꠇ ꠛꠦꠝꠣꠞꠞ ꠟꠃ ꠎꠣꠅꠀꠞ ꠡꠝꠄ ꠔꠣꠁ ꠡꠣꠔ ꠖꠤꠘ ꠘꠣꠙꠣꠇ ꠢꠣꠟꠔꠦ ꠞꠁꠛ। ꠅꠃ ꠡꠝꠄ ꠁ ꠛꠦꠐꠤꠞꠦ ꠎꠦ ꠎꠘꠦ ꠍꠁꠛ, ꠢꠦ ꠢꠣꠁꠘ꠆ꠎꠣ ꠙꠞ꠆ꠎꠘ꠆ꠔ ꠘꠣꠙꠣꠇ ꠢꠣꠟꠔꠦ ꠞꠁꠛ।
LEV 15:20 ꠅꠃ ꠛꠦꠐꠤꠀꠞꠣ ꠛꠦꠝꠣꠞꠞ ꠡꠝꠄ ꠔꠣꠁ ꠎꠦꠔꠣꠞ ꠃꠙꠞꠦ ꠛꠁꠛ ꠛꠣ ꠢꠥꠔꠤꠛ, ꠁꠔꠣ ꠢꠇꠟꠔꠣ ꠘꠣꠙꠣꠇ ꠅꠁꠎꠤꠛ।
LEV 15:21 ꠔꠣꠁꠞ ꠛꠤꠍꠘꠣ ꠎꠦ ꠎꠘꠦ ꠍꠁꠛ, ꠢꠦ-ꠅ ꠔꠣꠞ ꠇꠣꠙꠠ-ꠌꠥꠙꠠ ꠗꠁꠀ ꠖꠤꠀ ꠙꠣꠘꠤꠖꠤ ꠘꠣꠁꠛ, ꠔꠣ-ꠅ ꠢꠣꠁꠘ꠆ꠎꠣ ꠙꠞ꠆ꠎꠘ꠆ꠔ ꠢꠦ ꠘꠣꠙꠣꠇ ꠢꠣꠟꠔꠦ ꠞꠁꠛ।
LEV 15:22 ꠅꠃ ꠛꠦꠝꠣꠞꠤ ꠛꠦꠐꠤ ꠎꠦꠔꠣꠞ ꠃꠙꠞꠦ ꠛꠁꠍꠦ, ꠁꠔꠣ ꠎꠥꠖꠤ ꠇꠦꠃ ꠍꠁꠟꠣꠄ, ꠔꠦ ꠢꠦ-ꠅ ꠔꠣꠞ ꠇꠣꠙꠠ-ꠌꠥꠙꠠ ꠗꠁꠀ ꠖꠤꠀ ꠙꠣꠘꠤꠖꠤ ꠘꠣꠁꠛ, ꠔꠣ-ꠅ ꠢꠣꠁꠘ꠆ꠎꠣ ꠙꠞ꠆ꠎꠘ꠆ꠔ ꠢꠦ ꠘꠣꠙꠣꠇ ꠢꠣꠟꠔꠦ ꠞꠁꠛ।
LEV 15:23 ꠔꠣꠁꠞ ꠛꠤꠍꠘꠣ ꠛꠣ ꠌꠦꠀꠞꠅ ꠇꠦꠃ ꠍꠁꠟꠦ, ꠛꠣ ꠁꠔꠣꠞ ꠃꠙꠞꠦ ꠕꠅꠀ ꠇꠥꠘ꠆ꠔꠣ ꠍꠁꠟꠦꠅ, ꠢꠦ ꠢꠣꠁꠘ꠆ꠎꠣ ꠙꠞ꠆ꠎꠘ꠆ꠔ ꠘꠣꠙꠣꠇ ꠢꠣꠟꠔꠦ ꠞꠁꠛ।
LEV 15:24 ꠛꠦꠐꠤꠀꠞꠣ ꠛꠦꠝꠣꠞꠤ ꠛꠦꠐꠤꠞ ꠟꠉꠦ ꠇꠥꠘꠥ ꠛꠦꠐꠣ ꠝꠣꠘꠥꠡ ꠎꠥꠖꠤ ꠢꠥꠔꠦ, ꠀꠞ ꠔꠣꠁꠞ ꠝꠣꠡꠤꠇꠞ ꠟꠃ ꠔꠣꠞ ꠡꠞꠤꠟꠅ ꠟꠣꠉꠦ, ꠔꠦ ꠅꠃ ꠛꠦꠐꠣꠅ ꠡꠣꠔ ꠖꠤꠘ ꠘꠣꠙꠣꠇ ꠢꠣꠟꠔꠦ ꠞꠁꠛ। ꠅꠃ ꠡꠣꠔ ꠖꠤꠘꠞ ꠝꠣꠎꠦ ꠢꠦ ꠎꠦ ꠛꠤꠍꠘꠣꠔ ꠢꠥꠔꠤꠛ, ꠁꠔꠣꠅ ꠘꠣꠙꠣꠇ ꠅꠁꠎꠤꠛ।
LEV 15:25 “ꠇꠥꠘꠥ ꠛꠦꠐꠤ ꠝꠣꠘꠡꠞ ꠎꠥꠖꠤ ꠛꠃꠔ ꠖꠤꠘ ꠗꠞꠤ ꠟꠃ ꠎꠣꠅꠀꠔ ꠞꠄ, ꠝꠣꠡꠤꠇ ꠛꠦꠝꠣꠞꠞ ꠡꠣꠔ ꠖꠤꠘ ꠙꠣꠞꠘꠤꠞ ꠛꠣꠖꠦꠅ ꠎꠥꠖꠤ ꠟꠃ ꠎꠣꠅꠀꠔ ꠞꠄ, ꠔꠦ ꠎꠔꠖꠤꠘ ꠙꠞ꠆ꠎꠘ꠆ꠔ ꠁꠟꠣ ꠟꠃ ꠎꠣꠁꠛ, ꠅꠔꠖꠤꠘ ꠔꠣꠁ ꠘꠣꠙꠣꠇ ꠞꠁꠛ।
LEV 15:26 ꠛꠦꠐꠤꠀꠞꠣ ꠝꠣꠡꠤꠇ ꠛꠦꠝꠣꠞꠞ ꠟꠣꠈꠣꠘ ꠅꠃ ꠟꠃ ꠎꠣꠁꠛꠣꠞ ꠡꠝꠄ ꠔꠣꠁ ꠎꠦꠔꠣꠔ ꠢꠥꠔꠤꠛ ꠛꠣ ꠛꠁꠛ, ꠁꠔꠣ ꠘꠣꠙꠣꠇ ꠅꠁꠎꠤꠛ।
LEV 15:27 ꠁ ꠛꠤꠍꠘꠣ ꠛꠣ ꠌꠦꠀꠞ ꠎꠦ ꠎꠘꠦ ꠍꠁꠛ, ꠢꠦ-ꠅ ꠘꠣꠙꠣꠇ ꠅꠁꠎꠤꠛ। ꠢꠦ ꠔꠣꠞ ꠇꠣꠙꠠ-ꠌꠥꠙꠠ ꠗꠁꠀ ꠖꠤꠀ ꠙꠣꠘꠤꠖꠤ ꠘꠣꠁꠛ, ꠔꠣ-ꠅ ꠢꠣꠁꠘ꠆ꠎꠣ ꠙꠞ꠆ꠎꠘ꠆ꠔ ꠢꠦ ꠘꠣꠙꠣꠇ ꠢꠣꠟꠔꠦ ꠞꠁꠛ।
LEV 15:28 ꠅꠃ ꠛꠦꠐꠤꠞ ꠟꠃ ꠎꠣꠅꠀ ꠛꠘ꠆ꠖ ꠅꠀꠞ ꠛꠣꠖꠦꠅ, ꠔꠣꠁ ꠉꠘꠤꠀ ꠀꠞꠅ ꠡꠣꠔ ꠖꠤꠘ ꠛꠣꠞ ꠌꠣꠁꠔꠦ ꠅꠁꠛ, ꠄꠞꠛꠣꠖꠦ ꠔꠣꠁ ꠙꠣꠇ-ꠍꠣꠚ ꠅꠁꠛ।
LEV 15:29 ꠀꠞ ꠀꠐ ꠖꠤꠘꠞ ꠖꠤꠘ ꠔꠣꠁ ꠖꠥꠁꠐꠣ ꠒꠥꠙꠤ ꠙꠣꠈꠤ ꠛꠣ ꠙꠣꠞꠅ ꠟꠁꠀ ꠝꠤꠟꠘ-ꠔꠣꠝ꠆ꠛꠥꠞ ꠖꠥꠀꠞꠞ ꠉꠦꠍꠦ ꠁꠝꠣꠝ ꠍꠣꠛꠞ ꠗꠣꠞꠅ ꠎꠣꠁꠛ।
LEV 15:30 ꠁꠝꠣꠝꠦ ꠢꠃ ꠖꠥꠁꠅ ꠙꠣꠈꠤꠞ ꠝꠣꠎꠞ ꠄꠉꠥꠖꠤ ꠉꠥꠘꠣꠞ ꠇꠚꠞꠣꠞ ꠇꠥꠞꠛꠣꠘꠤ, ꠀꠞ ꠖꠥꠍꠞꠣꠐꠣ ꠖꠤꠀ ꠎꠣꠟꠣꠁꠟ ꠇꠥꠞꠛꠣꠘꠤ ꠀꠖꠣꠄ ꠇꠞꠛꠣ। ꠅꠃ ꠘꠝꠥꠘꠣꠄ ꠁꠝꠣꠝꠦ ꠔꠣꠁꠞ ꠟꠃ ꠎꠣꠁꠛꠣꠞ ꠘꠣꠙꠣꠇꠤ ꠢꠞꠣꠘꠤꠞ ꠇꠚꠞꠣ ꠝꠣꠛꠥꠖꠞ ꠍꠣꠝꠘꠦ ꠀꠖꠣꠄ ꠇꠞꠛꠣ।
LEV 15:31 “ꠅ ꠝꠥꠍꠣ ꠀꠞ ꠢꠣꠞꠥꠘ, ꠅꠃ ꠘꠝꠥꠘꠣꠄ ꠔꠥꠝꠞꠣ ꠛꠘꠤ ꠁꠍꠞꠣꠁꠟ ꠡꠝꠣꠎꠞꠦ ꠢꠇꠟ ꠘꠝꠥꠘꠣꠞ ꠘꠣꠙꠣꠇꠤ ꠕꠣꠇꠤ ꠛꠣꠌꠣꠁꠅ, ꠀꠞꠘꠣꠄ ꠔꠣꠞꠣꠞ ꠝꠣꠎꠦ ꠞꠅꠀ ꠀꠝꠣꠞ ꠙꠛꠤꠔ꠆ꠞ ꠛꠡꠔ ꠈꠣꠘꠣꠞꠦ ꠎꠥꠖꠤ ꠔꠣꠞꠣ ꠘꠣꠙꠣꠇ ꠛꠣꠘꠣꠁꠘ, ꠔꠦ ꠅꠃ ꠘꠣꠙꠣꠇꠤꠞ ꠖꠣꠄ ꠔ ꠔꠣꠞꠣꠞ ꠝꠞꠘ ꠅꠁꠛ।”
LEV 15:32 ꠔꠦ ꠛꠦꠐꠣꠁꠘ꠆ꠔꠞ ꠗꠣꠔꠥ ꠎꠣꠅꠀ ꠛꠦꠝꠣꠞ, ꠎꠃꠛꠘꠞ ꠙꠣꠘꠤ ꠛꠣꠞꠘꠤ, ꠛꠦꠐꠤꠘ꠆ꠔꠞ ꠝꠣꠡꠤꠇ ꠛꠦꠝꠣꠞ, ꠛꠦꠐꠣ ꠛꠣ ꠛꠦꠐꠤꠘ꠆ꠔꠞ ꠎꠦꠇꠥꠘꠥ ꠟꠣꠈꠣꠘ ꠗꠣꠔꠥ ꠎꠣꠅꠀ, ꠘꠣꠙꠣꠇ ꠛꠃꠞ ꠟꠉꠦ ꠝꠤꠟꠣ-ꠝꠤꠡꠣ ꠇꠞꠣ, ꠁꠔꠣ ꠎꠦꠇꠥꠘꠥ ꠎꠘꠞ ꠟꠣꠉꠤ ꠅꠃ ꠘꠤꠅꠝ ꠎꠣꠞꠤ ꠅꠁꠟ।
LEV 16:1 ꠁꠝꠣꠝ ꠢꠣꠞꠥꠘꠞ ꠛꠠ ꠖꠥꠁ ꠙꠥꠀꠄ ꠘꠣꠚꠞꠝꠣꠘꠤ ꠇꠞꠤꠀ ꠝꠣꠛꠥꠖꠞ ꠍꠣꠝꠘꠦ ꠙꠠꠤꠀ ꠝꠣꠞꠣ ꠉꠦꠟ ꠇꠞꠤ, ꠝꠣꠛꠥꠖꠦ ꠝꠥꠍꠣ ꠘꠛꠤꠞ ꠟꠉꠦ ꠛꠣꠔꠌꠤꠔ ꠇꠞꠟꠣ।
LEV 16:2 ꠝꠣꠛꠥꠖꠦ ꠇꠁꠟꠣ, “ꠔꠥꠝꠣꠞ ꠜꠣꠁ ꠢꠣꠞꠥꠘꠞꠦ ꠇꠅ, ꠢꠦ ꠎꠣꠘꠥ ꠎꠦꠛꠟꠣ ꠝꠘꠦ ꠌꠣꠄ ꠄꠛꠟꠣ ꠡꠣꠢꠣꠖꠔ ꠡꠘ꠆ꠖꠥꠇꠞ ꠓꠣꠇꠘꠣꠞ ꠉꠦꠍꠦ ꠎꠣꠅꠀꠞ ꠟꠣꠉꠤ ꠢꠦꠞꠦꠝ ꠡꠞꠤꠚꠞ ꠙꠞ꠆ꠖꠣꠞ ꠜꠤꠔꠞꠦ ꠘꠣ ꠢꠣꠝꠣꠄ, ꠀꠞꠘꠣꠄ ꠢꠦ ꠝꠞꠛꠃ। ꠎꠣꠘ ꠔ, ꠅꠃ ꠓꠣꠇꠘꠣꠞ ꠃꠙꠞꠞ ꠗꠥꠝꠣꠞ ꠀꠘ꠆ꠖꠣꠁꠞꠞ ꠝꠣꠎꠦ ꠀꠝꠤ ꠘꠤꠎꠦ ꠀꠎꠤꠞ ꠅꠁ।
LEV 16:3 “ꠁꠘꠅ ꠢꠣꠝꠣꠘꠤꠞ ꠀꠉꠦ ꠢꠦ ꠎꠣꠘꠥ ꠉꠥꠘꠣꠞ ꠇꠚꠞꠣꠞ ꠇꠥꠞꠛꠣꠘꠤꠞ ꠟꠣꠉꠤ ꠄꠉꠥ ꠛꠤꠍꠣꠟ ꠀꠞ ꠎꠣꠟꠣꠁꠟ ꠇꠥꠞꠛꠣꠘꠤꠞ ꠟꠣꠉꠤ ꠄꠉꠥ ꠝꠦꠠꠣꠞ ꠙꠣꠑꠣ ꠟꠁꠀ ꠁꠘꠅ ꠀꠁꠀ ꠢꠣꠝꠣꠄ।
LEV 16:4 ꠡꠣꠖꠣ ꠡꠥꠔꠤ ꠇꠣꠙꠠꠖꠤ ꠛꠣꠘꠣꠁꠟ ꠙꠛꠤꠔ꠆ꠞ ꠀꠟꠈꠦꠟ꠆ꠟꠣ ꠀꠞ ꠢꠣꠚ-ꠙꠦꠘ꠆ꠐꠞ ꠟꠣꠈꠣꠘ ꠎꠣꠋꠉꠤꠀ ꠚꠤꠘ꠆ꠖꠤꠀ ꠜꠤꠔꠞꠦ ꠢꠣꠝꠣꠁꠛ। ꠔꠣꠞ ꠇꠝꠞꠅ ꠛꠣꠘ꠆ꠖꠣꠞ ꠡꠥꠔꠤ ꠇꠣꠙꠠꠞ ꠛꠘ꠆ꠖꠘꠤ ꠛꠣꠘ꠆ꠖꠤꠛ ꠀꠞ ꠝꠣꠕꠣꠔ ꠡꠥꠔꠤ ꠇꠣꠙꠠꠞ ꠙꠣꠃꠉꠠꠤ ꠟꠣꠉꠣꠁꠛ। ꠁꠔꠣ ꠔ ꠙꠣꠇ-ꠙꠛꠤꠔ꠆ꠞ ꠟꠦꠛꠣꠍ, ꠁꠔꠣ ꠟꠦꠛꠣꠍ ꠚꠤꠘ꠆ꠖꠤꠛꠣꠞ ꠀꠉꠦ ꠙꠣꠘꠤꠖꠤ ꠘꠣꠁꠔꠦ ꠅꠁꠛ।
LEV 16:5 ꠉꠥꠘꠣꠞ ꠇꠚꠞꠣꠞ ꠇꠥꠞꠛꠣꠘꠤꠞ ꠟꠣꠉꠤ ꠢꠦ ꠛꠘꠤ ꠁꠍꠞꠣꠁꠟꠞ ꠉꠦꠍ ꠕꠣꠇꠤ ꠖꠥꠁꠐꠣ ꠙꠣꠑꠣ ꠍꠣꠉꠟ ꠀꠞ ꠎꠣꠟꠣꠁꠟ ꠇꠥꠞꠛꠣꠘꠤꠞ ꠟꠣꠉꠤ ꠄꠉꠥ ꠝꠦꠠꠣꠞ ꠙꠣꠑꠣ ꠘꠤꠛ।
LEV 16:6 ꠁꠝꠣꠝ ꠢꠣꠞꠥꠘꠦ ꠔꠣꠞ ꠘꠤꠎꠞ ꠀꠞ ꠔꠣꠞ ꠀꠅꠟꠣꠖ ꠅꠇꠟꠞ ꠉꠥꠘꠣꠞ ꠝꠣꠚꠤꠞ ꠟꠣꠉꠤ, ꠉꠥꠘꠣꠞ ꠇꠚꠞꠣꠞ ꠛꠤꠍꠣꠟꠞꠦ ꠇꠥꠞꠛꠣꠘꠤ ꠖꠤꠛ।
LEV 16:7 ꠛꠣꠖꠦ ꠢꠃ ꠍꠣꠉꠟ ꠖꠥꠁꠅꠐꠣ ꠝꠤꠟꠘ-ꠔꠣꠝ꠆ꠛꠥꠞ ꠖꠥꠀꠞꠞ ꠉꠦꠍꠦ ꠝꠣꠛꠥꠖꠞ ꠍꠣꠝꠘꠦ ꠀꠘꠛ।
LEV 16:8 ꠀꠘꠤꠀ ꠢꠦ ꠟꠐꠣꠞꠤ ꠝꠣꠞꠤꠀ ꠖꠦꠈꠛ, ꠇꠥꠘ ꠍꠣꠉꠟ ꠝꠣꠛꠥꠖꠞ ꠟꠣꠉꠤ ꠀꠞ ꠇꠥꠘꠐꠣ ꠀꠎꠣꠎꠤꠟꠞ ꠟꠣꠉꠤ।
LEV 16:9 ꠟꠐꠣꠞꠤꠔ ꠝꠣꠛꠥꠖꠞ ꠘꠣꠝꠦ ꠎꠦ ꠍꠣꠉꠟ ꠃꠑꠛ, ꠢꠣꠞꠥꠘꠦ ꠅꠉꠥꠖꠤ ꠉꠥꠘꠣꠞ ꠇꠚꠞꠣꠞ ꠇꠥꠞꠛꠣꠘꠤ ꠀꠖꠣꠄ ꠇꠞꠛ।
LEV 16:10 ꠀꠞ ꠀꠎꠣꠎꠤꠟꠞ ꠘꠣꠝꠦ ꠎꠦ ꠍꠣꠉꠟ ꠃꠑꠛ, ꠅꠉꠥꠞꠦ ꠎꠤꠔꠣ ꠢꠣꠟꠔꠦ ꠝꠣꠛꠥꠖꠞ ꠍꠣꠝꠘꠦ ꠕꠁꠛ, ꠎꠣꠔꠦ ꠛꠣꠖꠦ ꠅꠉꠥꠞꠦ ꠝꠞꠥꠜꠥꠝꠤꠔ ꠘꠤꠀ ꠀꠎꠣꠎꠤꠟꠞ ꠘꠣꠝꠦ ꠀꠃꠞꠤ ꠍꠣꠠꠤ ꠖꠦꠅꠀ ꠅꠄ। ꠅꠃ ꠘꠝꠥꠘꠣꠄ ꠉꠥꠘꠣꠞ ꠇꠚꠞꠣ ꠀꠖꠣꠄ ꠇꠞꠤꠅ।
LEV 16:11 “ꠁꠝꠣꠝ ꠢꠣꠞꠥꠘꠦ ꠔꠣꠞ ꠘꠤꠎꠞ ꠀꠞ ꠔꠣꠞ ꠀꠅꠟꠣꠖ ꠅꠇꠟꠞ ꠉꠥꠘꠣꠞ ꠇꠚꠞꠣꠞ ꠟꠣꠉꠤ, ꠔꠣꠞ ꠘꠤꠎꠞ ꠀꠘꠣ ꠢꠃ ꠛꠤꠍꠣꠟꠞꠦ ꠎꠛ ꠇꠞꠛ।
LEV 16:12 ꠝꠣꠛꠥꠖꠞ ꠍꠣꠝꠘꠦ ꠀꠉꠞ-ꠈꠥꠡꠛꠄ ꠎꠣꠟꠣꠘꠤꠞ ꠎꠦ ꠐꠦꠛꠥꠟ ꠀꠍꠦ ꠅꠃ ꠐꠦꠛꠥꠟ ꠕꠣꠇꠤ ꠇꠤꠍꠥ ꠎꠣꠟꠣꠁꠟ ꠀꠋꠞꠣ ꠟꠁꠀ ꠢꠦ ꠀꠉꠞ ꠖꠣꠘꠤꠞ ꠝꠣꠎꠦ ꠜꠞꠛ, ꠀꠞ ꠖꠥꠁ ꠝꠥꠁꠐ ꠀꠉꠞ-ꠈꠥꠡꠛꠄꠞ ꠉꠥꠠꠣꠅ ꠟꠁꠛ, ꠛꠣꠖꠦ ꠙꠞ꠆ꠖꠣꠞ ꠜꠤꠔꠞꠦ ꠢꠦꠞꠦꠝ ꠡꠞꠤꠚꠅ ꠢꠣꠝꠣꠁꠛ।
LEV 16:13 ꠢꠣꠝꠣꠁꠀ ꠅꠃ ꠀꠋꠞꠣꠞ ꠃꠙꠞꠦ ꠀꠉꠞ-ꠈꠥꠡꠛꠄ ꠖꠤꠀ ꠝꠣꠛꠥꠖꠞ ꠍꠣꠝꠘꠦ ꠎꠣꠟꠣꠁꠛ, ꠔꠦꠃ ꠅꠔꠣꠞ ꠗꠥꠝꠣꠄ ꠡꠣꠢꠣꠖꠔ ꠡꠘ꠆ꠖꠥꠇꠞ ꠓꠣꠇꠘꠣꠞ ꠃꠙꠞꠞ ꠉꠣꠟꠣ ꠀꠘ꠆ꠖꠣꠁꠞꠦ ꠉꠥꠞꠤꠎꠤꠛ, ꠎꠣꠔꠦ ꠢꠦ ꠝꠣꠛꠥꠖꠞ ꠍꠣꠝꠘꠦ ꠘꠣ ꠝꠞꠂꠘ।
LEV 16:14 ꠛꠣꠖꠦ ꠢꠦ ꠇꠥꠞꠛꠣꠘꠤꠞ ꠢꠃ ꠛꠤꠍꠣꠟꠞ ꠕꠥꠠꠣ ꠟꠃ ꠘꠤꠀ ꠀꠔꠞ ꠀꠋꠉꠥꠁꠟ ꠖꠤꠀ ꠅꠃ ꠓꠣꠇꠘꠣꠞ ꠍꠣꠝꠘꠞ ꠉꠣꠟꠣꠛꠣꠄ ꠍꠤꠐꠣꠁ ꠖꠤꠛ। ꠄꠞꠛꠣꠖꠦ ꠀꠋꠉꠥꠟꠤꠞ ꠝꠣꠎꠦ ꠀꠞꠅ ꠕꠥꠠꠣ ꠟꠃ ꠟꠣꠉꠣꠁꠀ ꠓꠣꠇꠘꠣꠞ ꠍꠣꠝꠘꠞ ꠛꠣꠄ ꠡꠣꠔ ꠛꠣꠞ ꠍꠤꠐꠣꠁꠀ ꠖꠤꠛ।
LEV 16:15 “ꠀꠞ ꠢꠦ ꠝꠣꠘꠡꠞ ꠉꠥꠘꠣꠞ ꠇꠚꠞꠣꠞ ꠘꠤꠅꠔꠦ ꠀꠘꠣ ꠍꠣꠉꠟꠐꠣꠞꠦ ꠎꠛ ꠇꠞꠛ, ꠇꠞꠤꠀ ꠅꠉꠥꠞ ꠟꠃ ꠘꠤꠀ ꠙꠞ꠆ꠖꠣꠞ ꠜꠤꠔꠞꠦ ꠢꠦꠞꠦꠝ ꠡꠞꠤꠚꠅ ꠉꠤꠀ, ꠛꠤꠍꠣꠟꠞ ꠟꠃꠖꠤ ꠎꠦꠟꠣ ꠇꠞꠣ ꠅꠁꠍꠤꠟ, ꠅꠉꠥꠞ ꠟꠃꠖꠤꠅ ꠅꠟꠣ ꠇꠞꠔꠦ ꠅꠁꠛ। ꠡꠘ꠆ꠖꠥꠇꠞ ꠓꠣꠇꠘꠣꠞ ꠃꠙꠞꠦ ꠀꠞ ꠍꠣꠝꠘꠦ ꠅꠃ ꠟꠃ ꠍꠤꠐꠣꠁꠔꠦ ꠅꠁꠛ।
LEV 16:16 ꠛꠘꠤ ꠁꠍꠞꠣꠁꠟꠞ ꠉꠥꠘꠣ, ꠘꠣꠙꠣꠇꠤ, ꠀꠞ ꠘꠣꠚꠞꠝꠣꠘꠤꠄ ꠢꠦꠞꠦꠝ ꠡꠞꠤꠚꠞꠦꠅ ꠘꠣꠙꠣꠇ ꠇꠞꠤꠟꠣꠄ, ꠄꠞꠟꠣꠉꠤ ꠔꠣꠞꠣꠞ ꠝꠣꠎꠦ ꠎꠦ ꠝꠤꠟꠘ-ꠔꠣꠝ꠆ꠛꠥ ꠀꠍꠦ, ꠅꠈꠣꠘꠞ ꠘꠣꠙꠣꠇꠤ ꠢꠞꠣꠘꠤꠞ ꠘꠤꠅꠔꠦ ꠁꠝꠣꠝ ꠢꠣꠞꠥꠘꠦ ꠅꠃ ꠘꠝꠥꠘꠣꠄ ꠉꠥꠘꠣꠞ ꠇꠚꠞꠣ ꠀꠖꠣꠄ ꠇꠞꠛꠣ।
LEV 16:17 ꠢꠦꠞꠦꠝ ꠡꠞꠤꠚꠞ ꠜꠤꠔꠞꠦ ꠢꠣꠝꠣꠁꠀ ꠢꠣꠞꠤ ꠢꠣꠞꠥꠘꠦ ꠔꠣꠘ ꠘꠤꠎꠞ, ꠔꠣꠘ ꠀꠅꠟꠣꠖ ꠅꠇꠟꠞ ꠀꠞ ꠀꠡ꠆ꠔꠣ ꠡꠝꠣꠎꠞ ꠉꠥꠘꠣꠞ ꠇꠚꠞꠣꠞ ꠢꠇꠟ ꠇꠣꠝ ꠡꠦꠡ ꠇꠞꠤꠀ ꠎꠔꠛꠤꠟ ꠘꠣ ꠛꠣꠞ ꠅꠁꠀ ꠀꠁꠘ, ꠅꠔꠛꠤꠟ ꠖꠥꠍꠞꠣ ꠇꠥꠘꠥ ꠝꠣꠘꠥꠡ ꠝꠤꠟꠘ-ꠔꠣꠝ꠆ꠛꠥꠞ ꠜꠤꠔꠞꠦ ꠢꠣꠝꠣꠘꠤ ꠘꠤꠡꠦꠗ।
LEV 16:18 ꠢꠦꠞꠦꠝ ꠡꠞꠤꠚ ꠕꠣꠇꠤ ꠛꠣꠞ ꠅꠁꠀ ꠢꠣꠞꠥꠘꠦ ꠝꠣꠛꠥꠖꠞ ꠍꠣꠝꠘꠦ ꠎꠦ ꠀꠉꠞ-ꠈꠥꠡꠛꠄ ꠎꠣꠟꠣꠘꠤꠞ ꠐꠦꠛꠥꠟ ꠀꠍꠦ ꠅꠃ ꠐꠦꠛꠥꠟꠞ ꠇꠣꠘ꠆ꠖꠣꠔ ꠎꠣꠁꠛꠣ, ꠎꠣꠁꠀ ꠐꠦꠛꠥꠟꠞ ꠟꠣꠉꠤꠅ ꠇꠚꠞꠣ ꠀꠖꠣꠄ ꠇꠞꠛꠣ। ꠢꠃ ꠛꠤꠍꠣꠟ ꠀꠞ ꠍꠣꠉꠟꠞ ꠕꠥꠠꠣ ꠟꠃ ꠘꠤꠀ ꠔꠣꠁꠘ ꠅꠃ ꠐꠦꠛꠥꠟꠞ ꠢꠤꠋꠉꠞ ꠝꠣꠎꠦ ꠟꠣꠉꠣꠁꠛꠣ।
LEV 16:19 ꠛꠘꠤ ꠁꠍꠞꠣꠁꠟꠞ ꠉꠥꠘꠣꠞ ꠇꠣꠞꠘꠦ ꠐꠦꠛꠥꠟꠞ ꠝꠣꠎꠦ ꠎꠦ ꠘꠣꠙꠣꠇꠤ ꠟꠣꠉꠣꠁꠟ ꠅꠁꠍꠦ, ꠢꠃ ꠘꠣꠙꠣꠇꠤ ꠢꠞꠣꠁꠀ ꠅꠃ ꠐꠦꠛꠥꠟꠞꠦ ꠙꠛꠤꠔ꠆ꠞ ꠇꠞꠣꠞ ꠟꠣꠉꠤ ꠢꠣꠞꠥꠘꠦ ꠔꠣꠞ ꠀꠔꠞ ꠀꠋꠉꠥꠁꠟ ꠖꠤꠀ ꠅꠃ ꠐꠦꠛꠥꠟꠞ ꠃꠙꠞꠦ ꠡꠣꠔ ꠛꠣꠞ ꠟꠃ ꠍꠤꠐꠣꠁꠛ।
LEV 16:20 “ꠢꠦꠞꠦꠝ ꠡꠞꠤꠚ, ꠝꠤꠟꠘ-ꠔꠣꠝ꠆ꠛꠥ, ꠀꠞ ꠇꠥꠞꠛꠣꠘꠤ ꠈꠣꠘꠣꠞ ꠘꠣꠙꠣꠇꠤ ꠢꠞꠣꠘꠤꠞ ꠇꠚꠞꠣꠞ ꠇꠣꠝ ꠡꠦꠡ ꠇꠞꠤꠀ ꠢꠣꠞꠟꠦ ꠢꠣꠞꠥꠘꠦ ꠀꠎꠣꠎꠤꠟꠞ ꠘꠣꠝꠦ ꠖꠦꠅꠀꠞ ꠟꠣꠉꠤ ꠢꠃ ꠎꠤꠔꠣ ꠍꠣꠉꠟꠞꠦ ꠟꠁꠀ ꠀꠁꠛꠣ।
LEV 16:21 ꠀꠁꠀ ꠅꠃ ꠍꠣꠉꠟꠞ ꠇꠟ꠆ꠟꠣꠞ ꠃꠙꠞꠦ ꠔꠣꠞ ꠖꠥꠁꠅ ꠀꠔ ꠕꠁꠀ, ꠛꠘꠤ ꠁꠍꠞꠣꠁꠟꠞ ꠢꠇꠟ ꠉꠥꠘꠣ-ꠘꠣꠚꠞꠝꠣꠘꠤ ꠀꠞ ꠛꠖ ꠇꠣꠝꠞ ꠇꠕꠣ ꠡ꠆ꠛꠤꠇꠣꠞ ꠇꠞꠤꠀ ꠍꠣꠉꠟꠞ ꠇꠟ꠆ꠟꠣꠞ ꠃꠙꠞꠦ ꠅꠔꠣ ꠛꠞ꠆ꠔꠣꠁ ꠖꠤꠛ। ꠛꠣꠖꠦ ꠀꠉ ꠕꠣꠇꠤ ꠎꠥꠁꠔ ꠅꠀ ꠄꠇ ꠛꠦꠐꠣꠞꠦ ꠖꠤꠀ ꠅꠃ ꠍꠣꠉꠟꠞꠦ ꠢꠦ ꠝꠞꠥꠜꠥꠝꠤꠔ ꠙꠣꠑꠣꠁ ꠖꠤꠛ।
LEV 16:22 ꠢꠃ ꠛꠦꠐꠣꠄ ꠘꠤꠀ ꠅꠉꠥꠞꠦ ꠝꠞꠥꠜꠥꠝꠤꠔ ꠍꠣꠠꠤꠀ ꠀꠁꠛ। ꠔꠣꠞꠣꠞ ꠢꠇꠟ ꠘꠣꠚꠞꠝꠣꠘꠤꠞꠦ ꠅꠃ ꠍꠣꠉꠟꠦ ꠟꠁꠀ ꠘꠤꠞꠣꠁ ꠘꠤꠞ꠆ꠎꠘ ꠝꠞꠥꠜꠥꠝꠤꠔ ꠀꠎꠤꠛꠘ ꠊꠥꠞꠤꠛ।
LEV 16:23 “ꠀꠞ ꠢꠦꠞꠦꠝ ꠡꠞꠤꠚꠅ ꠢꠣꠝꠣꠁꠛꠣꠞ ꠇꠣꠟꠅ ꠢꠣꠞꠥꠘꠦ ꠡꠣꠖꠣ ꠡꠥꠔꠤ ꠇꠣꠙꠠꠞ ꠎꠔ ꠟꠦꠛꠣꠍ ꠚꠤꠘ꠆ꠖꠤꠍꠟꠣ, ꠔꠣꠁꠘ ꠝꠤꠟꠘ-ꠔꠣꠝ꠆ꠛꠥꠔ ꠚꠤꠞꠤꠀ ꠀꠁꠀ ꠁꠔꠣ ꠈꠥꠟꠤꠀ ꠕꠁ ꠖꠤꠛꠣ।
LEV 16:24 ꠈꠥꠟꠤꠀ ꠔꠣꠁꠘ ꠇꠣꠛꠣ ꠊꠞꠞ ꠡꠤꠝꠣꠘꠣꠞ ꠜꠤꠔꠞꠦ ꠙꠣꠘꠤꠖꠤ ꠘꠣꠁꠀ ꠔꠣꠘ ꠘꠤꠎꠞ ꠟꠦꠛꠣꠍ ꠚꠤꠘ꠆ꠖꠤꠛꠣ। ꠛꠣꠖꠦ ꠔꠣꠁꠘ ꠛꠣꠞꠦ ꠀꠁꠀ ꠔꠣꠘ ꠘꠤꠎꠞ ꠀꠞ ꠝꠣꠘꠡꠞ ꠟꠣꠉꠤ ꠄꠉꠥ ꠇꠞꠤ ꠎꠣꠟꠣꠁꠟ ꠇꠥꠞꠛꠣꠘꠤ ꠀꠖꠣꠄ ꠇꠞꠤꠀ, ꠔꠣꠘ ꠘꠤꠎꠞ ꠀꠞ ꠝꠣꠘꠡꠞ ꠉꠥꠘꠣꠞ ꠇꠚꠞꠣꠅ ꠀꠖꠣꠄ ꠇꠞꠛꠣ।
LEV 16:25 ꠉꠥꠘꠣꠞ ꠇꠚꠞꠣꠞ ꠇꠥꠞꠛꠣꠘꠤꠞ ꠌꠞ꠆ꠛꠤꠞꠦ ꠔꠣꠁꠘ ꠇꠥꠞꠛꠣꠘꠤ ꠈꠣꠘꠣꠞ ꠃꠙꠞꠦ ꠎꠣꠟꠣꠁꠟꠤꠛꠣ।
LEV 16:26 ꠎꠦ ꠛꠦꠐꠣꠄ ꠀꠎꠣꠎꠤꠟꠞ ꠘꠣꠝꠞ ꠍꠣꠉꠟꠞꠦ ꠝꠞꠥꠜꠥꠝꠤꠔ ꠍꠣꠠꠤꠀ ꠀꠁꠛ, ꠢꠦ-ꠅ ꠔꠣꠞ ꠇꠣꠙꠠ-ꠌꠥꠙꠠ ꠗꠁꠀ ꠢꠣꠞꠤ ꠙꠣꠘꠤ ꠖꠤꠀ ꠘꠣꠁꠀ ꠛꠣꠖꠦ ꠇꠦꠝ꠆ꠙꠞ ꠜꠤꠔꠞꠦ ꠢꠣꠝꠣꠁꠔ ꠙꠣꠞꠛ।
LEV 16:27 ꠉꠥꠘꠣ ꠝꠣꠚꠤꠞ ꠟꠣꠉꠤ ꠇꠥꠞꠛꠣꠘꠤꠞ ꠎꠦ ꠛꠤꠍꠣꠟ ꠀꠞ ꠉꠥꠘꠣꠞ ꠇꠚꠞꠣꠞ ꠇꠥꠞꠛꠣꠘꠤꠞ ꠎꠦ ꠍꠣꠉꠟꠞ ꠟꠃꠞꠦ ꠢꠦꠞꠦꠝ ꠡꠞꠤꠚꠅ ꠘꠤꠛꠣꠞ ꠢꠥꠇꠥꠝ ꠖꠦꠅꠀ ꠅꠁꠍꠦ, ꠅꠔꠣꠞ ꠢꠇꠟ ꠉꠥꠡ꠆ꠔ, ꠈꠣꠟ, ꠉꠥꠚꠞ ꠀꠞ ꠢꠇꠟꠔꠣꠞꠦ ꠇꠦꠝ꠆ꠙꠞ ꠛꠣꠞꠦ ꠘꠤꠀ ꠄꠇꠎꠘꠦ ꠎꠣꠟꠣꠁꠟꠤꠅ।
LEV 16:28 ꠎꠦ ꠎꠘꠦ ꠁꠔꠣ ꠢꠇꠟꠔꠣ ꠛꠣꠞꠦ ꠘꠤꠀ ꠎꠣꠟꠣꠁꠛ, ꠢꠦ-ꠅ ꠔꠣꠞ ꠇꠣꠙꠠ-ꠌꠥꠙꠠ ꠗꠁꠀ, ꠙꠣꠘꠤꠖꠤ ꠘꠣꠁꠀ ꠢꠣꠞꠤ ꠛꠣꠖꠦ ꠀꠁꠀ ꠇꠦꠝ꠆ꠙꠞ ꠜꠤꠔꠞꠦ ꠢꠣꠝꠣꠁꠔ ꠙꠣꠞꠛ।
LEV 16:29 “ꠄꠞꠛꠣꠖꠦ ꠀꠝꠤ ꠎꠦꠔꠣ ꠇꠁꠞꠣꠝ, ꠁꠔꠣ ꠅꠁꠟ ꠔꠥꠝꠞꠣꠞ ꠟꠣꠉꠤ ꠢꠞ-ꠢꠣꠝꠦꠡꠣꠇꠥꠞ ꠘꠤꠅꠝ। ꠙꠞꠔꠦꠇ ꠛꠍꠞꠞ ꠡꠣꠔ ꠘꠝ꠆ꠛꠞ ꠌꠣꠘ꠆ꠖꠞ ꠖꠡ ꠘꠝ꠆ꠛꠞ ꠖꠤꠘ, ꠔꠥꠝꠞꠣꠞ ꠙꠞꠔꠦꠇ ꠎꠘꠦ ꠢꠇꠟ ꠎꠣꠔꠞ ꠇꠣꠝ-ꠇꠣꠎ ꠀꠞ ꠞꠥꠎꠤ-ꠞꠥꠎꠉꠣꠞ ꠛꠣꠖ ꠖꠤꠀ, ꠘꠔ ꠅꠁꠀ ꠖꠤꠟ ꠡꠙꠤꠀ ꠖꠤꠛꠣꠄ। ꠛꠘꠤ ꠁꠍꠞꠣꠁꠟ ꠛꠣ ꠔꠥꠝꠞꠣꠞ ꠟꠉꠦ ꠛꠡꠔ ꠇꠞꠞꠣ ꠜꠤꠘ-ꠖꠦꠡꠤ ꠢꠇꠟ ꠎꠘꠦ ꠁꠔꠣ ꠝꠣꠘꠔꠦ ꠅꠁꠛ।
LEV 16:30 ꠇꠣꠞꠘ ꠅꠃꠖꠤꠘ ꠔꠥꠝꠞꠣꠞ ꠉꠥꠘꠣ ꠝꠣꠚꠤꠞ ꠟꠣꠉꠤ ꠉꠥꠘꠣꠞ ꠇꠚꠞꠣ ꠀꠖꠣꠄ ꠇꠞꠣ ꠅꠁꠛ, ꠔꠦꠃ ꠔꠥꠝꠞꠣ ꠝꠣꠛꠥꠖꠞ ꠍꠣꠝꠘꠦ ꠢꠇꠟ ꠘꠝꠥꠘꠣꠞ ꠉꠥꠘꠣ ꠕꠣꠇꠤ ꠙꠣꠇ-ꠍꠣꠚ ꠅꠁꠛꠣꠄ।
LEV 16:31 ꠅꠃꠖꠤꠘ ꠔꠥꠝꠞꠣ ꠢꠇꠟ ꠘꠝꠥꠘꠣꠞ ꠇꠣꠝ-ꠇꠣꠎ ꠛꠣꠖ ꠖꠤꠀ ꠀꠞꠣꠝ ꠇꠞꠛꠣꠄ, ꠙꠞꠔꠦꠇꠦ ꠘꠔ ꠅꠁꠀ ꠎꠣꠞꠎꠤꠞ ꠖꠤꠟ ꠡꠙꠤꠀ ꠖꠤꠛꠣꠄ। ꠁꠐꠣ ꠅꠁꠟ ꠔꠥꠝꠞꠣꠞ ꠟꠣꠉꠤ ꠌꠤꠞꠇꠣꠟꠤꠘ ꠘꠤꠅꠝ।
LEV 16:32 ꠎꠦꠇꠥꠘꠥ ꠁꠝꠣꠝꠞꠦ ꠎꠦꠛꠟꠣ ꠙꠞꠗꠣꠘ ꠁꠝꠣꠝ ꠢꠤꠡꠣꠛꠦ ꠔꠣꠞ ꠛꠣꠚꠞ ꠎꠣꠉꠣꠔ ꠈꠦꠟꠣꠚꠔꠤ ꠡꠝꠎꠣꠁꠀ ꠛꠅꠀꠁꠟ ꠇꠞꠣ ꠅꠁꠛ, ꠢꠦ-ꠅ ꠅꠟꠣ ꠡꠣꠖꠣ ꠡꠥꠔꠤ ꠇꠣꠙꠠꠞ ꠙꠛꠤꠔ꠆ꠞ ꠟꠦꠛꠣꠍ ꠚꠤꠘ꠆ꠖꠤꠀ ꠅꠃ ꠘꠝꠥꠘꠣꠄ ꠉꠥꠘꠣꠞ ꠇꠚꠞꠣ ꠀꠖꠣꠄ ꠇꠞꠛ।
LEV 16:33 ꠢꠦꠞꠦꠝ ꠡꠞꠤꠚ, ꠙꠛꠤꠔ꠆ꠞ ꠇꠣꠛꠣ ꠊꠞ, ꠇꠥꠞꠛꠣꠘꠤ ꠈꠣꠘꠣ, ꠛꠣꠇꠤ ꠁꠝꠣꠝ ꠅꠇꠟ, ꠀꠞ ꠀꠡ꠆ꠔꠣ ꠛꠘꠤ ꠁꠍꠞꠣꠁꠟ ꠡꠝꠣꠎꠞꠦ ꠙꠣꠇ-ꠍꠣꠚ ꠇꠞꠣꠞ ꠟꠣꠉꠤ ꠇꠚꠞꠣ ꠀꠖꠣꠄ ꠇꠞꠛ।
LEV 16:34 ꠁꠐꠣ ꠅꠁꠟ ꠔꠥꠝꠞꠣꠞ ꠟꠣꠉꠤ ꠢꠞ-ꠢꠣꠝꠦꠡꠣꠇꠥꠞ ꠘꠤꠅꠝ। ꠙꠞꠔꠦꠇ ꠛꠍꠞ ꠄꠇꠛꠣꠞ ꠢꠇꠟ ꠛꠘꠤ ꠁꠍꠞꠣꠁꠟꠞ ꠉꠥꠘꠣꠞ ꠇꠚꠞꠣ ꠅꠟꠣ ꠀꠖꠣꠄ ꠇꠞꠔꠦ ꠅꠁꠛ।” ꠔꠦꠃ ꠝꠣꠛꠥꠖꠦ ꠝꠥꠍꠣꠞꠦ ꠎꠦꠟꠣ ꠢꠥꠇꠥꠝ ꠖꠤꠍꠟꠣ, ꠑꠤꠇ ꠅꠃ ꠟꠣꠈꠣꠘ ꠢꠇꠟꠔꠣ ꠇꠞꠣ ꠅꠁꠟ।
LEV 17:1 ꠛꠣꠖꠦ ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ,
LEV 17:2 “ꠀꠝꠣꠞ ꠅꠃ ꠢꠥꠇꠥꠝ ꠈꠣꠘ ꠔꠥꠝꠤ ꠁꠝꠣꠝ ꠢꠣꠞꠥꠘꠞꠦ, ꠔꠣꠞ ꠙꠥꠀꠂꠘ꠆ꠔꠞꠦ ꠀꠞ ꠔꠣꠝꠣꠝ ꠛꠘꠤ ꠁꠍꠞꠣꠁꠟꠞꠦ ꠎꠣꠘꠣꠁ ꠖꠦꠅ। ꠔꠣꠞꠣꠞꠦ ꠇꠅ,
LEV 17:3 ꠛꠘꠤ ꠁꠍꠞꠣꠁꠟꠞ ꠇꠦꠃ ꠎꠥꠖꠤ ꠇꠥꠘꠥ ꠉꠞꠥ, ꠍꠣꠉꠟ ꠛꠣ ꠝꠦꠠꠣꠞꠦ ꠔꠣꠞꠣꠞ ꠛꠡꠔ ꠔꠣꠝ꠆ꠛꠥ ꠄꠟꠣꠇꠣꠔ ꠛꠣ ꠇꠦꠝ꠆ꠙꠞ ꠛꠣꠞꠦ ꠎꠦ ꠇꠥꠘꠥ ꠎꠣꠉꠣꠔ ꠇꠥꠞꠛꠣꠘꠤ ꠘꠤꠅꠔꠦ ꠎꠛ ꠇꠞꠤꠟꠣꠄ,
LEV 17:4 ꠅꠃ ꠙꠡꠥꠞꠦ ꠢꠦ ꠝꠣꠛꠥꠖꠞ ꠇꠣꠛꠣ ꠊꠞꠞ ꠍꠣꠝꠘꠦ, ꠝꠣꠘꠤ ꠝꠤꠟꠘ-ꠔꠣꠝ꠆ꠛꠥꠞ ꠖꠥꠀꠞꠞ ꠉꠦꠍꠦ ꠝꠣꠛꠥꠖꠞ ꠘꠣꠝꠦ ꠇꠥꠞꠛꠣꠘꠤꠞ ꠘꠤꠅꠔꠦ ꠎꠛ ꠘꠣ ꠇꠞꠦ, ꠔꠦ ꠢꠦ ꠅꠃ ꠙꠡꠥꠞ ꠈꠥꠘꠞ ꠖꠣꠄꠁ ꠅꠁꠛ, ꠄꠞꠟꠣꠉꠤ ꠡꠝꠣꠎ ꠕꠣꠇꠤ ꠔꠣꠞ ꠘꠣꠝ ꠝꠤꠐꠣꠁꠟꠤꠛꠣꠄ।
LEV 17:5 ꠛꠘꠤ ꠁꠍꠞꠣꠁꠟꠦ ꠅꠈꠘ ꠉꠣꠃ-ꠉꠦꠞꠣꠝꠞ ꠈꠥꠟꠣ ꠎꠣꠉꠣꠔ ꠎꠦꠔꠣ ꠙꠡꠥ ꠇꠥꠞꠛꠣꠘꠤ ꠖꠦꠁꠘ, ꠅꠃ ꠙꠡꠥ ꠎꠣꠘꠥ ꠔꠣꠞꠣ ꠝꠣꠛꠥꠖꠞ ꠍꠣꠝꠘꠦ ꠝꠤꠟꠘ-ꠔꠣꠝ꠆ꠛꠥꠞ ꠖꠥꠀꠞꠞ ꠉꠦꠍꠦ ꠀꠘꠦ। ꠀꠘꠤꠀ ꠁꠝꠣꠝ ꠍꠣꠛꠞ ꠀꠔꠅ ꠡꠝꠎꠣꠁꠀ ꠍꠣꠟꠣꠝꠔꠤ ꠇꠥꠞꠛꠣꠘꠤ ꠢꠤꠡꠣꠛꠦ ꠁꠔꠣ ꠝꠣꠛꠥꠖꠞ ꠘꠣꠝꠦ ꠖꠤꠟꠣꠄ।
LEV 17:6 ꠁꠝꠣꠝ ꠍꠣꠛꠦ ꠙꠡꠥ ꠎꠛ ꠇꠞꠤꠀ, ꠝꠤꠟꠘ-ꠔꠣꠝ꠆ꠛꠥꠞ ꠖꠥꠀꠞꠞ ꠉꠦꠍꠦ ꠝꠣꠛꠥꠖꠞ ꠎꠦ ꠇꠥꠞꠛꠣꠘꠤ ꠈꠣꠘꠣ ꠀꠍꠦ, ꠢꠘꠅ ꠅꠉꠥꠞ ꠟꠃ ꠍꠤꠐꠣꠁ ꠖꠤꠛꠣ, ꠀꠞ ꠙꠡꠥꠞ ꠌꠞ꠆ꠛꠤꠞꠦ ꠔꠣꠁꠘ ꠊꠦꠞꠣꠘ ꠀꠟꠣ ꠇꠥꠞꠛꠣꠘꠤ ꠢꠤꠡꠣꠛꠦ ꠎꠣꠟꠣꠁꠟꠤꠛꠣ, ꠅꠃ ꠗꠥꠝꠣꠞ ꠊꠦꠞꠣꠘꠦ ꠝꠣꠛꠥꠖ ꠈꠥꠡꠤ ꠅꠁꠘ।
LEV 17:7 ꠈꠛꠞꠖꠣꠞ! ꠔꠣꠞꠣ ꠎꠣꠘꠥ ꠝꠣꠛꠥꠖꠞ ꠟꠉꠦ ꠛꠦꠁꠝꠣꠘꠤ ꠇꠞꠤꠀ ꠍꠣꠉꠟꠞꠥꠙꠤ ꠖꠦꠅ-ꠜꠥꠔꠞ ꠘꠣꠝꠦ ꠀꠁꠎ ꠕꠣꠇꠤ ꠀꠞ ꠇꠥꠘꠥ ꠙꠡꠥ ꠛꠟꠤ ꠘꠣ ꠖꠦꠄ। ꠅꠃ ꠢꠥꠇꠥꠝ ꠀꠝꠤ ꠔꠣꠞꠣꠞ ꠅꠀꠞꠤꠡꠞ ꠙꠞ ꠅꠀꠞꠤꠡ ꠗꠞꠤ ꠌꠤꠞꠇꠣꠟꠞ ꠟꠣꠉꠤ ꠎꠣꠞꠤ ꠇꠞꠟꠣꠝ।
LEV 17:8 “ꠀꠞ ꠔꠥꠝꠤ ꠔꠣꠞꠣꠞꠦ ꠎꠣꠘꠣꠁ ꠖꠦꠅ, ꠛꠘꠤ ꠁꠍꠞꠣꠁꠟꠞ ꠇꠥꠘꠥ ꠎꠘ ꠛꠣ ꠔꠣꠞꠣꠞ ꠝꠣꠎꠦ ꠛꠡꠔ ꠇꠞꠞꠣ ꠇꠥꠘꠥ ꠜꠤꠘ-ꠖꠦꠡꠤꠄ ꠎꠥꠖꠤ ꠎꠣꠟꠣꠁꠟ ꠇꠥꠞꠛꠣꠘꠤ ꠛꠣ ꠎꠦꠇꠥꠘꠥ ꠇꠥꠞꠛꠣꠘꠤ ꠀꠖꠣꠄ ꠇꠞꠦ,
LEV 17:9 ꠀꠞ ꠇꠥꠞꠛꠣꠘꠤꠞ ꠅꠃ ꠙꠡꠥꠞꠦ ꠝꠣꠛꠥꠖꠞ ꠘꠣꠝꠦ ꠡꠙꠤꠛꠣꠞ ꠟꠣꠉꠤ ꠀꠝꠣꠞ ꠝꠤꠟꠘ-ꠔꠣꠝ꠆ꠛꠥꠞ ꠖꠥꠀꠞꠞ ꠉꠦꠍꠦ ꠘꠣ ꠀꠘꠦ, ꠔꠦ ꠁ ꠎꠣꠔꠤꠞ ꠝꠣꠎ ꠕꠣꠇꠤ ꠔꠣꠞ ꠘꠣꠝ ꠝꠤꠐꠣꠁꠟꠤꠔ।
LEV 17:10 “ꠔꠥꠝꠤ ꠀꠞꠅ ꠎꠣꠘꠣꠁ ꠖꠦꠅ, ꠇꠥꠘꠥ ꠛꠘꠤ ꠁꠍꠞꠣꠁꠟ ꠛꠣ ꠔꠣꠞꠣꠞ ꠝꠣꠎꠦ ꠛꠡꠔ ꠇꠞꠞꠣ ꠇꠥꠘꠥ ꠜꠤꠘ-ꠖꠦꠡꠤꠄ ꠎꠥꠖꠤ ꠇꠥꠘꠥꠎꠣꠔ ꠟꠃ ꠈꠣꠄ, ꠔꠦ ꠀꠝꠤ ꠝꠣꠛꠥꠖꠦ ꠔꠣꠞ ꠈꠦꠔꠤ ꠇꠞꠣꠔ ꠟꠣꠉꠤꠎꠤꠝꠥ, ꠡꠝꠣꠎ ꠕꠣꠇꠤ ꠔꠣꠞ ꠘꠣꠝ ꠝꠤꠐꠣꠁꠟꠤꠝꠥ।
LEV 17:11 ꠟꠃꠞ ꠝꠣꠎꠦꠃ ꠔ ꠢꠇꠟ ꠎꠣꠘꠖꠣꠞꠞ ꠎꠣꠘ ꠕꠣꠇꠦ। ꠄꠞꠟꠣꠉꠤ ꠔꠥꠝꠞꠣꠞ ꠎꠣꠘꠞ ꠛꠖꠟꠣ ꠇꠥꠞꠛꠣꠘꠤꠞ ꠟꠃꠞꠦ ꠇꠥꠞꠛꠣꠘꠤ ꠈꠣꠘꠣꠔ ꠍꠤꠐꠣꠁꠀ ꠀꠝꠤ ꠔꠥꠝꠞꠣꠞ ꠉꠥꠘꠣꠞ ꠇꠚꠞꠣꠞ ꠡꠥꠎꠥꠉ ꠖꠤꠍꠤ। ꠟꠃꠞ ꠝꠣꠎꠦ ꠎꠣꠘ ꠀꠍꠦ ꠇꠞꠤꠃ ꠟꠃꠞ ꠛꠖꠟꠣ ꠉꠥꠘꠣꠞ ꠇꠚꠞꠣ ꠀꠖꠣꠄ ꠅꠄ।
LEV 17:12 ꠄꠞꠟꠣꠉꠤ ꠀꠝꠤ ꠛꠘꠤ ꠁꠍꠞꠣꠁꠟꠞꠦ ꠇꠁꠀꠞ, ꠔꠥꠝꠞꠣ ꠀꠞ ꠔꠥꠝꠞꠣꠞ ꠟꠉꠦ ꠛꠡꠔ ꠇꠞꠞꠣ ꠇꠥꠘꠥ ꠜꠤꠘ-ꠖꠦꠡꠤꠄꠅ ꠎꠣꠘꠥ ꠟꠃ ꠘꠣ ꠈꠣꠄ।
LEV 17:13 ꠛꠘꠤ ꠁꠍꠞꠣꠁꠟꠞ ꠎꠦꠇꠥꠘꠥ ꠎꠘꠦ ꠛꠣ ꠔꠥꠝꠞꠣꠞ ꠟꠉꠦ ꠛꠡꠔ ꠇꠞꠞꠣ ꠇꠥꠘꠥ ꠜꠤꠘ-ꠖꠦꠡꠤ ꠝꠣꠘꠡꠦ ꠎꠥꠖꠤ, ꠡꠤꠇꠣꠞꠅ ꠉꠤꠀ ꠢꠣꠟꠣꠟ ꠇꠥꠘꠥ ꠙꠡꠥ ꠛꠣ ꠙꠣꠈꠤ ꠡꠤꠇꠣꠞ ꠇꠞꠤꠀ ꠀꠘꠦ, ꠔꠦ ꠅꠉꠥꠞ ꠟꠃ ꠛꠣꠞ ꠇꠞꠤꠀ ꠝꠣꠐꠤꠔ ꠉꠣꠠꠤꠟꠤꠛꠣꠄ।
LEV 17:14 ꠎꠣꠘ ꠔ, ꠎꠤꠘ꠆ꠖꠣ ꠢꠇꠟ ꠎꠣꠘꠖꠣꠞꠞ ꠟꠃꠞ ꠝꠣꠎꠦꠃ ꠔꠣꠞ ꠎꠣꠘ ꠕꠣꠇꠦ। ꠄꠞꠟꠣꠉꠤ ꠀꠝꠤ ꠛꠘꠤ ꠁꠍꠞꠣꠁꠟꠞꠦ ꠇꠁꠀꠞ, ꠔꠣꠞꠣ ꠎꠣꠘꠥ ꠇꠥꠘꠥ ꠎꠣꠘꠖꠣꠞꠞ ꠟꠃ ꠘꠣ ꠈꠣꠄ, ꠟꠃ ꠅꠁꠟ ꠢꠇꠟ ꠎꠣꠘꠖꠣꠞꠞ ꠎꠣꠘ। ꠎꠦ ꠎꠘꠦ ꠅꠃ ꠟꠃ ꠈꠣꠁꠛ, ꠔꠣꠞ ꠘꠣꠝ ꠝꠤꠐꠣꠁꠟꠤꠛꠣꠄ।
LEV 17:15 “ꠀꠞ ꠇꠥꠘꠥ ꠝꠣꠘꠡꠦ ꠎꠥꠖꠤ ꠝꠞꠣ ꠙꠡꠥꠞ ꠛꠣ ꠎꠋꠟꠤ ꠎꠣꠘꠥꠀꠞꠦ ꠝꠣꠞꠣ ꠇꠥꠘꠥ ꠙꠡꠥꠞ ꠉꠥꠡ꠆ꠔ ꠈꠣꠁꠟꠣꠄ, ꠔꠦ ꠢꠦ ꠛꠘꠤ ꠁꠍꠞꠣꠁꠟ ꠅꠃꠇ, ꠛꠣ ꠔꠣꠞꠣꠞ ꠟꠉꠦ ꠛꠡꠔ ꠇꠞꠞꠣ ꠜꠤꠘ-ꠖꠦꠡꠤ ꠅꠃꠇ, ꠢꠦ ꠔꠣꠞ ꠇꠣꠙꠠ-ꠌꠥꠙꠠ ꠗꠁꠀ ꠖꠤꠀ ꠙꠣꠘꠤꠖꠤ ꠘꠣꠁꠔꠦ ꠅꠁꠛ। ꠔꠣ-ꠅ ꠢꠣꠁꠘ꠆ꠎꠣ ꠙꠞ꠆ꠎꠘ꠆ꠔ ꠢꠦ ꠘꠣꠙꠣꠇ ꠢꠣꠟꠔꠦ ꠞꠁꠛ, ꠄꠞꠛꠣꠖꠦ ꠢꠦ ꠙꠣꠇ-ꠍꠣꠚ ꠛꠘꠛ।
LEV 17:16 ꠅꠁꠟꠦ ꠢꠦ ꠎꠥꠖꠤ ꠇꠣꠙꠠ-ꠌꠥꠙꠠ ꠗꠁꠀ ꠘꠣ ꠖꠦꠄ ꠀꠞ ꠙꠣꠘꠤꠖꠤ ꠘꠣ ꠘꠣꠄ, ꠔꠦ ꠁ ꠇꠍꠥꠞꠤꠞ ꠟꠣꠉꠤ ꠢꠦ ꠖꠣꠄꠁ ꠞꠁꠛ।”
LEV 18:1 ꠀꠞ ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ,
LEV 18:2 “ꠔꠥꠝꠤ ꠛꠘꠤ ꠁꠍꠞꠣꠁꠟꠞꠦ ꠇꠅ, ꠀꠝꠤ ꠀꠟ꠆ꠟꠣꠃ ꠔꠥꠝꠞꠣꠞ ꠝꠣꠛꠥꠖ।
LEV 18:3 ꠄꠞꠟꠣꠉꠤ ꠔꠥꠝꠞꠣ ꠀꠉꠦ ꠎꠦ ꠝꠤꠡꠞ ꠖꠦꠡꠅ ꠛꠡꠔ ꠇꠞꠔꠣꠄ, ꠢꠤꠘꠞ ꠝꠣꠘꠡꠦ ꠎꠦꠔꠣ ꠇꠞꠦ ꠔꠥꠝꠞꠣ ꠁꠔꠣ ꠇꠞꠤꠅ ꠘꠣ। ꠀꠞ ꠀꠝꠤ ꠔꠥꠝꠞꠣꠞꠦ ꠎꠦ ꠇꠦꠘꠣꠘ ꠖꠦꠡꠅ ꠘꠤꠞꠣꠝ, ꠢꠃ ꠖꠦꠡꠅ ꠉꠤꠀ ꠢꠣꠞꠟꠦ, ꠢꠘꠞ ꠝꠣꠘꠡꠦ ꠎꠦꠔꠣ ꠇꠞꠦ ꠁꠔꠣꠅ ꠔꠥꠝꠞꠣ ꠇꠞꠤꠅ ꠘꠣ। ꠔꠣꠞꠣ ꠎꠦꠟꠣ ꠌꠟꠦ, ꠔꠥꠝꠞꠣ ꠁꠟꠣ ꠌꠟꠤꠅ ꠘꠣ।
LEV 18:4 ꠛꠞꠋ ꠀꠝꠣꠞ ꠖꠦꠅꠀ ꠡꠞꠤꠅꠔ ꠝꠣꠚꠤꠇ ꠔꠥꠝꠞꠣꠞ ꠎꠤꠘ꠆ꠖꠦꠉꠤ ꠇꠣꠐꠣꠁꠛꠣꠄ। ꠈꠥꠛ ꠈꠤꠀꠟ ꠇꠞꠤꠀ ꠀꠝꠣꠞ ꠖꠦꠅꠀ ꠢꠥꠇꠥꠝ-ꠀꠢꠇꠣꠝ ꠀꠝꠟ ꠇꠞꠛꠣꠄ। ꠝꠘꠅ ꠞꠣꠈꠤꠅ, ꠀꠝꠤ ꠀꠟ꠆ꠟꠣꠃ ꠔꠥꠝꠞꠣꠞ ꠝꠣꠛꠥꠖ।
LEV 18:5 ꠀꠝꠣꠞ ꠛꠣꠔꠣꠁꠟ ꠘꠤꠅꠝ-ꠇꠣꠘꠥꠘ ꠀꠞ ꠡꠞꠤꠅꠔꠞ ꠢꠥꠇꠥꠝ-ꠀꠢꠇꠣꠝ ꠔꠥꠝꠞꠣ ꠀꠝꠟ ꠇꠞꠛꠣꠄ, ꠎꠦ ꠎꠘꠦ ꠁꠔꠣ ꠀꠝꠟ ꠇꠞꠦ ꠢꠦ ꠄꠞ ꠃꠍꠤꠟ꠆ꠟꠣꠄ ꠔꠣꠞ ꠎꠣꠘ ꠛꠣꠌꠣꠁꠛ। ꠀꠝꠤꠃ ꠔ ꠝꠣꠛꠥꠖ।
LEV 18:6 “ꠀꠙꠘ ꠟꠃꠞ ꠈꠦꠡ-ꠇꠥꠐꠥꠝꠞ ꠟꠉꠦ ꠡꠞꠤꠟꠤ ꠝꠤꠟꠣ-ꠝꠤꠡꠣ ꠛꠣ ꠛꠦꠁꠎ꠆ꠎꠔꠤ ꠇꠣꠝ ꠇꠞꠤꠅ ꠘꠣ। ꠀꠝꠤꠃ ꠔ ꠝꠣꠛꠥꠖ।
LEV 18:7 ꠔꠥꠝꠞꠣꠞ ꠝꠣꠎꠞ ꠇꠦꠃ ꠎꠣꠘꠥ ꠘꠤꠎꠞ ꠝꠣʼꠞ ꠟꠉꠦ ꠡꠞꠤꠟꠤ ꠝꠤꠟꠣ-ꠝꠤꠡꠣ ꠇꠞꠤꠀ ꠔꠣꠞ ꠛꠣꠚꠞ ꠝꠣꠘ-ꠁꠎ꠆ꠎꠔ ꠘꠣ ꠟꠥꠐꠦ। ꠄꠁꠘ ꠔ ꠔꠣꠞ ꠝꠣ, ꠄꠘ ꠟꠉꠦ ꠝꠤꠟꠣ-ꠝꠤꠡꠣ ꠇꠞꠣ ꠢꠣꠞꠣꠝ।
LEV 18:8 ꠢꠣꠔꠘ ꠝꠣʼꠞ ꠟꠉꠦꠅ ꠝꠤꠟꠣ-ꠝꠤꠡꠣ ꠇꠞꠣ ꠢꠣꠞꠣꠝ, ꠀꠞꠘꠣꠄ ꠛꠣꠚꠞ ꠛꠦꠁꠎ꠆ꠎꠔꠤ ꠅꠁꠛ।
LEV 18:9 ꠘꠤꠎꠞ ꠛꠁꠘ ꠛꠣ ꠢꠣꠔꠘ ꠛꠁꠘꠞ ꠟꠉꠦ ꠝꠤꠟꠣ-ꠝꠤꠡꠣ ꠇꠞꠣꠅ ꠢꠣꠞꠣꠝ, ꠀꠙꠘ ꠛꠣꠚꠞ ꠔꠞꠚꠣ ꠛꠁꠘ ꠛꠣ ꠝꠣʼꠞ ꠔꠞꠚꠣ ꠛꠁꠘ ꠅꠁꠟꠦꠅ ꠢꠣꠞꠣꠝ। ꠔꠣꠞꠣ ꠄꠇ ꠛꠣꠠꠤꠔ ꠎꠘꠝ ꠅꠃꠇ ꠛꠣ ꠀꠟꠣꠖꠣ ꠛꠣꠠꠤꠔ ꠎꠘꠝ ꠅꠁꠟꠦꠅ ꠢꠣꠞꠣꠝ।
LEV 18:10 ꠙꠥꠀ ꠛꠣ ꠙꠥꠠꠤꠞ ꠊꠞꠞ ꠘꠣꠔꠤꠘꠞ ꠟꠉꠦ ꠡꠞꠤꠟꠤ ꠝꠤꠟꠣ-ꠝꠤꠡꠣ ꠇꠞꠣ ꠢꠣꠞꠣꠝ, ꠁꠔꠣꠄ ꠔ ꠘꠤꠎꠞ ꠛꠦꠁꠎ꠆ꠎꠔꠤ ꠅꠄ।
LEV 18:11 ꠢꠣꠔꠘ ꠝꠣʼꠞ ꠊꠞꠞ ꠛꠁꠘꠞ ꠟꠉꠦ ꠡꠞꠤꠟꠤ ꠝꠤꠟꠣ-ꠝꠤꠡꠣ ꠇꠞꠣ ꠢꠣꠞꠣꠝ, ꠔꠣꠁ ꠔ ꠛꠁꠘ।
LEV 18:12 ꠀꠙꠘ ꠚꠥꠚꠥꠞ ꠟꠉꠦ ꠡꠞꠤꠟꠤ ꠝꠤꠟꠣ-ꠝꠤꠡꠣ ꠇꠞꠣ ꠢꠣꠞꠣꠝ, ꠄꠁꠘ ꠔ ꠛꠣꠚꠞ ꠟꠃꠞ ꠇꠥꠐꠥꠝ।
LEV 18:13 ꠀꠙꠘ ꠝꠁꠞ ꠟꠉꠦ ꠡꠞꠤꠟꠤ ꠝꠤꠟꠣ-ꠝꠤꠡꠣ ꠇꠞꠣ ꠢꠣꠞꠣꠝ, ꠄꠁꠘ ꠔ ꠝꠣʼꠞ ꠟꠃꠞ ꠇꠥꠐꠥꠝ।
LEV 18:14 ꠀꠙꠘ ꠌꠣꠌꠣꠞ ꠝꠣꠘ-ꠁꠎ꠆ꠎꠔ ꠟꠥꠐꠤꠀ ꠔꠣꠘ ꠛꠃꠞ ꠟꠉꠦ ꠡꠞꠤꠟꠤ ꠝꠤꠟꠣ-ꠝꠤꠡꠣ ꠇꠞꠣ ꠢꠣꠞꠣꠝ, ꠄꠁꠘ ꠔ ꠌꠣꠌꠤ।
LEV 18:15 ꠀꠙꠘ ꠙꠥꠀꠞ ꠛꠃꠞ ꠟꠉꠦ ꠡꠞꠤꠟꠤ ꠝꠤꠟꠣ-ꠝꠤꠡꠣ ꠇꠞꠣ ꠢꠣꠞꠣꠝ, ꠔꠣꠁ ꠔ ꠘꠤꠎꠞ ꠛꠃꠝꠣ।
LEV 18:16 ꠜꠣꠁꠞ ꠛꠃꠞ ꠟꠉꠦ ꠡꠞꠤꠟꠤ ꠝꠤꠟꠣ-ꠝꠤꠡꠣ ꠇꠞꠣ ꠢꠣꠞꠣꠝ, ꠀꠞꠘꠣꠄ ꠜꠣꠁꠞ ꠛꠦꠁꠎ꠆ꠎꠔꠤ ꠅꠁꠛ।
LEV 18:17 ꠇꠥꠘꠥ ꠛꠦꠐꠤ ꠝꠣꠘꠡꠞ ꠟꠉꠦ ꠡꠞꠤꠟꠤ ꠝꠤꠟꠣ-ꠝꠤꠡꠣꠞ ꠛꠣꠖꠦ ꠔꠣꠁꠞ ꠙꠥꠠꠤꠞ ꠟꠉꠦ, ꠔꠣꠁꠞ ꠙꠥꠀ ꠛꠣ ꠙꠥꠠꠤꠞ ꠊꠞꠞ ꠘꠣꠔꠤꠘꠞ ꠟꠉꠦ ꠡꠞꠤꠟꠤ ꠝꠤꠟꠣ-ꠝꠤꠡꠣ ꠇꠞꠣ ꠢꠣꠞꠣꠝ, ꠄꠞꠣ ꠔ ꠔꠣꠁꠞ ꠟꠃꠞ ꠇꠥꠐꠥꠝ, ꠁꠔꠣ ꠛꠠ ꠈꠛꠤꠍꠤ ꠇꠣꠝ।
LEV 18:18 ꠀꠞ ꠛꠃ ꠎꠤꠔꠣ ꠕꠣꠇꠣ ꠢꠣꠟꠔꠦ ꠢꠣꠟꠤ ꠛꠣ ꠎꠦꠑꠣꠟꠤꠞꠦ ꠛꠤꠀ ꠇꠞꠤꠀ ꠢꠔꠤꠀꠟꠣ ꠇꠞꠣꠅ ꠢꠣꠞꠣꠝ।
LEV 18:19 “ꠢꠣꠄꠄꠎ ꠛꠣ ꠛꠦꠐꠤꠀꠞꠣ ꠝꠣꠡꠤꠇ ꠛꠦꠝꠣꠞ ꠕꠣꠇꠣ ꠢꠣꠟꠔꠦ ꠇꠥꠘꠥ ꠛꠦꠐꠤꠘ꠆ꠔꠞ ꠟꠉꠦ ꠝꠤꠟꠣ-ꠝꠤꠡꠣ ꠇꠞꠣ ꠢꠣꠞꠣꠝ।
LEV 18:20 ꠖꠥꠍꠞꠣ ꠇꠥꠘꠥ ꠛꠦꠐꠣꠞ ꠛꠃꠞ ꠟꠉꠦ ꠡꠞꠤꠟꠤ ꠝꠤꠟꠣ-ꠝꠤꠡꠣ ꠇꠞꠤꠀ, ꠘꠤꠎꠞꠦ ꠘꠣꠙꠣꠇ ꠛꠣꠘꠣꠁꠅ ꠘꠣ।
LEV 18:21 “ꠔꠥꠝꠞꠣꠞ ꠝꠣꠎꠞ ꠇꠦꠃ ꠘꠤꠎꠞ ꠙꠥꠀ ꠛꠣ ꠙꠥꠠꠤꠞꠦ ꠀꠉꠥꠁꠘꠖꠤ ꠎꠣꠟꠣꠁꠀ, ꠝꠥꠟꠇ ꠖꠦꠛꠔꠣꠞ ꠘꠣꠝꠦ ꠛꠟꠤ ꠖꠤꠀ, ꠀꠙꠘ ꠀꠟ꠆ꠟꠣꠞ ꠙꠛꠤꠔ꠆ꠞ ꠘꠣꠝꠞꠦ ꠅꠡꠝ꠆ꠝꠣꠘ ꠇꠞꠤꠅ ꠘꠣ। ꠀꠝꠤꠃ ꠔ ꠝꠣꠛꠥꠖ।
LEV 18:22 “ꠛꠦꠐꠤꠘ꠆ꠔꠞ ꠟꠉꠦ ꠎꠦꠟꠣ ꠡꠞꠤꠟꠤ ꠝꠤꠟꠣ-ꠝꠤꠡꠣ ꠇꠞꠂꠘ, ꠛꠦꠐꠣꠁꠘ꠆ꠔꠦ-ꠛꠦꠐꠣꠁꠘ꠆ꠔꠦ ꠅꠟꠣ ꠈꠛꠤꠍꠤ ꠙꠥꠋꠉꠣꠝꠤ ꠇꠞꠣ ꠢꠣꠞꠣꠝ।
LEV 18:23 ꠇꠥꠘꠥ ꠙꠡꠥꠞ ꠟꠉꠦ ꠈꠛꠤꠍꠤ ꠝꠤꠟꠣ-ꠝꠤꠡꠣ ꠇꠞꠤꠀ, ꠇꠥꠘꠥ ꠛꠦꠐꠣꠁꠘ ꠘꠣꠙꠣꠇ ꠛꠘꠤꠅ ꠘꠣ। ꠇꠥꠘꠥ ꠙꠡꠥꠞ ꠟꠉꠦ ꠇꠥꠘꠥ ꠛꠦꠐꠤꠘ꠆ꠔꠦꠅ ꠈꠛꠤꠍꠤ ꠝꠤꠟꠣ-ꠝꠤꠡꠣ ꠇꠞꠤꠅ ꠘꠣ। ꠁꠟꠣꠈꠣꠘ ꠈꠛꠤꠍꠤ ꠝꠤꠟꠣ-ꠝꠤꠡꠣ ꠔ ꠎꠉꠔꠞ ꠘꠤꠅꠝꠞ ꠃꠟꠐꠣ।
LEV 18:24 “ꠅꠃ ꠟꠣꠈꠣꠘ ꠇꠥꠘꠥ ꠈꠛꠤꠍꠤ ꠛꠦꠁꠎ꠆ꠎꠔꠤ ꠇꠣꠝ ꠇꠞꠤꠀ, ꠔꠥꠝꠞꠣꠞ ꠝꠣꠎꠞ ꠇꠦꠃ ꠎꠣꠘꠥ ꠘꠤꠎꠞꠦ ꠘꠣꠙꠣꠇ ꠘꠣ ꠛꠣꠘꠣꠄ। ꠝꠘꠅ ꠞꠣꠈꠤꠅ, ꠔꠥꠝꠞꠣꠞ ꠍꠣꠝꠘꠦ ꠕꠣꠇꠤ ꠎꠔ ꠎꠣꠔꠤ ꠅꠇꠟꠞꠦ ꠀꠝꠤ ꠈꠦꠖꠣꠁ ꠖꠤꠞꠣꠝ, ꠔꠣꠞꠣ ꠔ ꠅꠔꠣ ꠈꠛꠤꠍꠤ ꠇꠞꠤꠀ ꠘꠤꠎꠞꠦ ꠘꠣꠙꠣꠇ ꠇꠞꠍꠤꠟ।
LEV 18:25 ꠅꠔꠣꠞ ꠟꠣꠉꠤ ꠔꠣꠞꠣꠞ ꠖꠦꠡꠞ ꠝꠣꠐꠤ ꠘꠣꠙꠣꠇ ꠛꠘꠤꠉꠦꠍꠦ, ꠔꠣꠞꠣꠞ ꠘꠣꠚꠞꠝꠣꠘꠤꠞ ꠇꠣꠞꠘꠦ ꠀꠝꠤ ꠅꠃ ꠖꠦꠡꠞꠦ ꠡꠣꠎꠣ ꠖꠤꠞꠣꠝ, ꠅꠃ ꠖꠦꠡꠞ ꠝꠣꠐꠤꠄ ꠔꠣꠞ ꠙ꠆ꠞꠎꠣ ꠅꠇꠟꠞꠦ ꠛꠝꠤ ꠇꠞꠤ ꠚꠣꠟꠣꠁ ꠖꠦꠞ।
LEV 18:26 ꠅꠁꠟꠦ ꠔꠥꠝꠞꠣ ꠈꠣꠟꠤ ꠀꠝꠣꠞ ꠖꠦꠅꠀ ꠡꠞꠤꠅꠔ ꠀꠞ ꠢꠥꠇꠥꠝ-ꠀꠢꠇꠣꠝ ꠝꠣꠘꠤꠀ ꠌꠟꠤꠅ। ꠔꠥꠝꠞꠣꠞ ꠘꠤꠎꠞ ꠎꠣꠔꠤꠞ ꠛꠣ ꠔꠥꠝꠞꠣꠞ ꠝꠣꠎꠦ ꠛꠡꠔ ꠇꠞꠞꠣ ꠜꠤꠘ-ꠖꠦꠡꠤ ꠇꠦꠃ ꠎꠣꠘꠥ ꠅꠟꠣ ꠈꠛꠤꠍꠤ ꠛꠦꠁꠎ꠆ꠎꠔꠤꠞ ꠇꠥꠘꠥꠎꠣꠔ ꠇꠣꠝ ꠘꠣ ꠇꠞꠦ।
LEV 18:27 ꠀꠉꠦ ꠕꠣꠇꠤ ꠎꠦꠔꠣ ꠎꠣꠔꠤ ꠅꠇꠟ ꠢꠃ ꠖꠦꠡꠅ ꠛꠡꠔ ꠇꠞꠦꠞ, ꠔꠣꠞꠣ ꠅꠃ ꠘꠝꠥꠘꠣꠞ ꠈꠛꠤꠍꠤ ꠛꠦꠁꠎ꠆ꠎꠔꠤ ꠇꠣꠝ ꠅꠇꠟ ꠇꠞꠣꠄ ꠢꠘꠞ ꠝꠣꠐꠤꠞꠦ ꠘꠣꠙꠣꠇ ꠛꠣꠘꠣꠁꠟꠤꠍꠦ।
LEV 18:28 ꠅꠈꠘ ꠔꠥꠝꠞꠣꠅ ꠢꠘꠅ ꠉꠤꠀ ꠎꠥꠖꠤ ꠢꠔꠣꠞ ꠟꠣꠈꠣꠘ ꠘꠣꠙꠣꠇꠤ ꠇꠣꠝ ꠇꠞꠅ, ꠔꠦ ꠔꠣꠞꠣꠞ ꠟꠣꠈꠣꠘ ꠔꠥꠝꠞꠣꠞꠦꠅ ꠢꠃ ꠖꠦꠡꠞ ꠝꠣꠐꠤꠄ ꠛꠝꠤ ꠇꠞꠤ ꠚꠣꠟꠣꠁꠛ।
LEV 18:29 “ꠁꠟꠣ ꠈꠛꠤꠍꠤ ꠇꠥꠘꠥ ꠇꠣꠝ ꠇꠦꠃ ꠇꠞꠟꠦ, ꠔꠥꠝꠞꠣꠞ ꠡꠝꠣꠎ ꠕꠣꠇꠤ ꠔꠣꠞ ꠘꠣꠝ ꠝꠤꠐꠣꠁꠟꠤꠛꠣꠄ।
LEV 18:30 ꠀꠝꠣꠞ ꠢꠥꠇꠥꠝ-ꠀꠢꠇꠣꠝ ꠔꠥꠝꠞꠣ ꠝꠣꠘꠤꠅ, ꠔꠥꠝꠞꠣ ꠢꠃ ꠖꠦꠡꠅ ꠉꠤꠀ ꠢꠣꠞꠤ ꠢꠘꠞ ꠙꠥꠞꠣꠘꠣ ꠛꠣꠡꠤꠘ꠆ꠖꠣ ꠅꠇꠟꠞ ꠌꠣꠟ-ꠌꠟꠘꠦ ꠌꠟꠤꠅ ꠘꠣ। ꠔꠣꠞꠣꠞ ꠈꠛꠤꠍꠤ ꠞꠤꠔꠤ-ꠞꠦꠅꠀꠎ ꠝꠣꠘꠤꠀ ꠔꠥꠝꠞꠣ ꠘꠣꠙꠣꠇ ꠅꠁꠅ ꠘꠣ। ꠝꠘꠅ ꠞꠣꠈꠤꠅ, ꠀꠝꠤ ꠀꠟ꠆ꠟꠣꠃ ꠔꠥꠝꠞꠣꠞ ꠝꠣꠛꠥꠖ।”
LEV 19:1 ꠝꠣꠛꠥꠖꠦ ꠝꠥꠍꠣ ꠘꠛꠤꠞꠦ ꠀꠞꠅ ꠇꠁꠟꠣ,
LEV 19:2 “ꠔꠥꠝꠤ ꠢꠇꠟ ꠛꠘꠤ ꠁꠍꠞꠣꠁꠟꠞꠦ ꠇꠅ, ꠀꠝꠤ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣ ꠔ ꠙꠣꠇ-ꠙꠛꠤꠔ꠆ꠞ, ꠄꠞꠟꠣꠉꠤ ꠔꠥꠝꠞꠣꠅ ꠙꠣꠇ-ꠙꠛꠤꠔ꠆ꠞ ꠅꠅ।
LEV 19:3 ꠔꠥꠝꠞꠣ ꠙꠞꠔꠦꠇꠦ ꠎꠣꠞꠎꠤꠞ ꠝꠣ-ꠛꠣꠚꠞꠦ ꠔꠣꠎꠤꠝ ꠇꠞꠤꠅ, ꠀꠞ ꠀꠝꠣꠞ ꠖꠦꠅꠀ ꠢꠇꠟ ꠎꠥꠝ꠆ꠝꠣꠛꠣꠞ ꠝꠣꠘꠤꠅ। ꠀꠝꠤ ꠀꠟ꠆ꠟꠣꠃ ꠔꠥꠝꠞꠣꠞ ꠝꠣꠛꠥꠖ।
LEV 19:4 ꠔꠥꠝꠞꠣ ꠇꠥꠘꠥꠎꠣꠔꠞ ꠖꠦꠛ-ꠖꠦꠛꠤꠞ ꠙꠥꠎꠣ ꠇꠞꠤꠅ ꠘꠣ, ꠙꠥꠎꠣ ꠇꠞꠣꠞ ꠘꠤꠅꠔꠦ ꠚꠞ꠆ꠝꠣꠔ ꠓꠣꠟꠤꠀ ꠡꠥꠘꠣ-ꠞꠥꠙꠣ, ꠙꠤꠔꠟ-ꠔꠣꠝꠣꠖꠤ ꠇꠥꠘꠥ ꠖꠦꠛ-ꠖꠦꠛꠤꠞ ꠝꠥꠞ꠆ꠔꠤꠅ ꠛꠣꠘꠣꠁꠅ ꠘꠣ। ꠝꠘꠅ ꠞꠣꠈꠤꠅ, ꠀꠝꠤ ꠀꠟ꠆ꠟꠣꠃ ꠔꠥꠝꠞꠣꠞ ꠝꠣꠛꠥꠖ।
LEV 19:5 “ꠔꠥꠝꠞꠣ ꠎꠦꠛꠟꠣ ꠘꠤꠎꠞ ꠈꠥꠡꠤꠄ ꠝꠣꠛꠥꠖꠞ ꠘꠣꠝꠦ ꠇꠥꠘꠥ ꠍꠣꠟꠣꠝꠔꠤ ꠇꠥꠞꠛꠣꠘꠤ ꠖꠦꠅ, ꠅꠃ ꠡꠝꠄ ꠅꠟꠣ ꠜꠣꠛ ꠟꠁꠀ ꠖꠤꠅ, ꠎꠣꠔꠦ ꠝꠣꠛꠥꠖꠞ ꠖꠞꠛꠣꠞꠅ ꠁꠔꠣ ꠇꠛꠥꠟ ꠅꠄ।
LEV 19:6 ꠀꠞ ꠁꠔꠣꠞ ꠢꠇꠟ ꠉꠥꠡ꠆ꠔ ꠇꠥꠞꠛꠣꠘꠤꠞ ꠖꠤꠘ ꠛꠣ ꠛꠣꠖꠞ ꠖꠤꠘ ꠈꠣꠁꠟꠤꠔꠦ ꠅꠁꠛ। ꠔꠤꠘ ꠖꠤꠘꠞ ꠖꠤꠘ ꠇꠥꠘꠥ ꠉꠥꠡ꠆ꠔ ꠛꠣꠇꠤ ꠞꠁꠟꠦ, ꠁꠔꠣ ꠀꠉꠥꠁꠘꠖꠤ ꠎꠣꠟꠣꠁꠟꠤꠅ।
LEV 19:7 ꠔꠤꠘ ꠖꠤꠘꠞ ꠖꠤꠘ ꠔ ꠁ ꠉꠥꠡ꠆ꠔ ꠘꠣꠙꠣꠇ ꠛꠘꠤꠎꠣꠄ, ꠁꠔꠣ ꠈꠣꠁꠟꠦ ꠔꠥꠝꠞꠣꠞ ꠇꠥꠞꠛꠣꠘꠤ ꠇꠛꠥꠟ ꠅꠁꠔ ꠘꠣꠄ।
LEV 19:8 ꠁ ꠉꠥꠡ꠆ꠔ ꠇꠦꠃ ꠈꠣꠁꠟꠦ ꠢꠦ ꠘꠣꠚꠞꠝꠣꠘꠤꠞ ꠖꠣꠠꠅ ꠙꠠꠛ, ꠢꠦ ꠔ ꠝꠣꠛꠥꠖꠞ ꠘꠣꠝꠞ ꠙꠣꠇ-ꠙꠛꠤꠔ꠆ꠞ ꠎꠤꠘꠤꠡꠞꠦ ꠘꠣꠙꠣꠇ ꠛꠣꠘꠣꠁꠍꠦ। ꠔꠦ ꠔꠥꠝꠞꠣꠞ ꠡꠝꠣꠎ ꠕꠣꠇꠤ ꠔꠣꠞ ꠘꠣꠝ ꠝꠤꠐꠣꠁꠟꠤꠛꠣꠄ।
LEV 19:9 “ꠈꠦꠔꠞ ꠚꠡꠟ ꠇꠣꠐꠣꠞ ꠡꠝꠄ ꠔꠥꠝꠞꠣ ꠎꠝꠤꠘꠞ ꠀꠁꠟꠞ ꠇꠣꠘ꠆ꠖꠣꠞ ꠚꠡꠟ ꠍꠣꠚ ꠇꠞꠤꠀ ꠇꠣꠐꠤꠅ ꠘꠣ, ꠀꠞ ꠇꠣꠐꠣꠞ ꠛꠣꠖꠦ ꠎꠝꠤꠘꠅ ꠚꠣꠟꠣꠁꠟ ꠚꠡꠟ ꠟꠥꠞꠤꠀ ꠘꠤꠅ ꠘꠣ।
LEV 19:10 ꠀꠋꠉꠥꠞ ꠈꠦꠔꠞ ꠀꠋꠉꠥꠞ ꠙꠣꠠꠤꠛꠣꠞ ꠇꠣꠟꠅ, ꠔꠟꠦ ꠚꠣꠟꠣꠁꠟ ꠀꠋꠉꠥꠞ ꠔꠥꠛꠣꠁꠀ ꠔꠥꠟꠤꠅ ꠘꠣ, ꠀꠞ ꠢꠇꠟ ꠀꠋꠉꠥꠞ ꠍꠣꠚ ꠇꠞꠤ ꠙꠣꠠꠤꠀ ꠘꠤꠅ ꠘꠣ। ꠡꠝꠣꠎꠞ ꠉꠞꠤꠛ-ꠖꠥꠈꠤ ꠀꠞ ꠛꠤꠖꠦꠡꠤ ꠝꠥꠍꠣꠚꠤꠞꠞ ꠟꠣꠉꠤ ꠁꠔꠣ ꠇꠤꠍꠥ ꠕꠁꠀ ꠎꠣꠁꠅ। ꠀꠝꠤ ꠀꠟ꠆ꠟꠣꠃ ꠔ ꠔꠥꠝꠞꠣꠞ ꠝꠣꠛꠥꠖ।
LEV 19:11 “ꠌꠥꠞꠤ ꠇꠞꠤꠅ ꠘꠣ, ꠝꠤꠍꠣ ꠝꠣꠔꠤꠅ ꠘꠣ, ꠀꠞ ꠄꠇꠦ-ꠅꠁꠘ꠆ꠘꠦ ꠐꠉꠣ-ꠐꠉꠤ ꠇꠞꠤꠅ ꠘꠣ।
LEV 19:12 ꠔꠥꠝꠞꠣ ꠀꠝꠣꠞ ꠘꠣꠝ ꠟꠁꠀ ꠝꠤꠍꠣ ꠇꠍꠝ ꠈꠣꠁꠅ ꠘꠣ, ꠁꠟꠣ ꠇꠞꠟꠦ ꠔꠥꠝꠞꠣꠞ ꠀꠟ꠆ꠟꠣꠞ ꠘꠣꠝꠞꠦ ꠅꠙꠛꠤꠔ꠆ꠞ ꠇꠞꠣ ꠅꠄ। ꠀꠝꠤꠃ ꠔ ꠝꠣꠛꠥꠖ।
LEV 19:13 “ꠇꠥꠘꠥ ꠀꠞꠤ-ꠚꠞꠤꠞ ꠃꠙꠞꠦ ꠎꠥꠞ-ꠎꠥꠟꠥꠝ ꠇꠞꠤꠅ ꠘꠣ, ꠔꠣꠞꠣꠞ ꠇꠥꠘꠥ ꠎꠤꠘꠤꠡ ꠇꠣꠠꠤꠀ ꠘꠤꠅ ꠘꠣ। ꠞꠥꠎꠤ ꠇꠣꠝꠟꠣꠞ ꠛꠦꠔꠘ ꠅꠃ ꠖꠤꠘꠞ ꠝꠣꠎꠦꠃ ꠀꠖꠣꠄ ꠇꠞꠤꠅ, ꠛꠣꠖꠞ ꠖꠤꠘ ꠙꠞ꠆ꠎꠘ꠆ꠔ ꠔꠣꠞ ꠛꠦꠔꠘ ꠀꠐꠇꠣꠁ ꠕꠁꠅ ꠘꠣ।
LEV 19:14 ꠇꠥꠘꠥ ꠈꠣꠟꠥꠀꠞꠦ ꠛꠖ꠆ꠖꠥꠀ ꠖꠤꠅ ꠘꠣ, ꠇꠣꠘꠣ ꠛꠣ ꠀꠘ꠆ꠖꠣꠄ ꠃꠡ꠆ꠐꠣ ꠈꠣꠁꠛꠣꠞ ꠟꠣꠉꠤ ꠔꠣꠞ ꠙꠕꠞ ꠝꠣꠎꠦ ꠇꠥꠘ꠆ꠔꠣ ꠕꠁꠅ ꠘꠣ। ꠔꠥꠝꠞꠣ ꠘꠤꠎꠞ ꠝꠣꠛꠥꠖ ꠀꠟ꠆ꠟꠣꠞꠦ ꠁꠎ꠆ꠎꠔ-ꠔꠣꠎꠤꠝ ꠇꠞꠤꠅ, ꠀꠝꠤꠃ ꠔ ꠝꠣꠛꠥꠖ।
LEV 19:15 “ꠘꠣ-ꠢꠇ ꠛꠤꠌꠣꠞ ꠇꠞꠤꠅ ꠘꠣ, ꠛꠤꠌꠣꠞꠞ ꠝꠣꠎꠦ ꠉꠞꠤꠛ-ꠗꠘꠤ, ꠛꠣ ꠢꠥꠞꠥ-ꠛꠠꠞ ꠙꠇ꠆ꠇꠙꠣꠔꠤ ꠅꠁꠅ ꠘꠣ, ꠢꠇꠟꠞ ꠟꠣꠉꠤ ꠢꠇ ꠛꠤꠌꠣꠞ ꠇꠞꠤꠅ।
LEV 19:16 ꠝꠣꠘꠡꠞ ꠛꠖꠘꠣꠝ ꠉꠣꠁꠀ ꠉꠣꠁꠀ ꠊꠥꠞꠤꠅ ꠘꠣ, ꠇꠥꠘꠥ ꠝꠣꠘꠡꠞ ꠎꠣꠘꠞ ꠈꠦꠔꠤ ꠅꠄ, ꠁꠟꠣ ꠇꠥꠘꠥ ꠇꠣꠝ ꠇꠞꠤꠅ ꠘꠣ। ꠀꠝꠤꠃ ꠔ ꠝꠣꠛꠥꠖ।
LEV 19:17 “ꠀꠙꠘ ꠀꠞꠤ-ꠚꠞꠤꠞ ꠛꠣꠄ ꠁꠋꠡꠣ-ꠖꠥꠡꠝꠘꠤꠞ ꠜꠣꠛ ꠝꠘꠞ ꠝꠣꠎꠦ ꠉꠣꠕꠤꠀ ꠞꠣꠈꠤꠅ ꠘꠣ। ꠔꠣꠞ ꠅꠙꠞꠣꠗ ꠔꠣꠞꠦ ꠛꠥꠎꠣꠁ ꠖꠤꠅ, ꠔꠦꠃ ꠔꠣꠞ ꠉꠥꠘꠣꠞ ꠜꠣꠞ ꠔꠥꠝꠣꠞ ꠃꠙꠞꠦ ꠀꠁꠔ ꠘꠣꠄ।
LEV 19:18 ꠘꠤꠎꠞ ꠎꠣꠔꠤꠞ ꠝꠣꠘꠡꠞ ꠛꠖꠟꠣ ꠟꠁꠅ ꠘꠣ, ꠔꠣꠞꠣꠞ ꠛꠣꠄ ꠎꠤꠖ-ꠁꠋꠡꠣꠞ ꠜꠣꠛ ꠝꠘꠞ ꠝꠣꠎꠦ ꠉꠣꠕꠤꠀ ꠞꠣꠈꠤꠅ ꠘꠣ। ꠀꠞꠤ-ꠚꠞꠤꠞꠦ ꠔꠥꠝꠣꠞ ꠘꠤꠎꠞ ꠟꠣꠈꠣꠘ ꠝꠣꠄꠀ ꠇꠞꠤꠅ। ꠀꠝꠤꠃ ꠔ ꠝꠣꠛꠥꠖ।
LEV 19:19 “ꠔꠥꠝꠞꠣ ꠀꠝꠣꠞ ꠘꠤꠅꠝ-ꠇꠣꠘꠥꠘ ꠝꠣꠘꠤꠀ ꠌꠟꠤꠅ। ꠄꠇ ꠎꠣꠔꠞ ꠙꠡꠥꠞ ꠟꠉꠦ ꠀꠞꠇ ꠎꠣꠔꠞ ꠙꠡꠥꠞꠦ ꠚꠣꠟ ꠈꠣꠛꠣꠁꠅ ꠘꠣ। ꠄꠇ ꠎꠝꠤꠘꠅ ꠖꠥꠁ ꠎꠣꠔꠞ ꠛꠤꠌ ꠈꠦꠔ ꠇꠞꠤꠅ ꠘꠣ, ꠀꠞ ꠖꠥꠁ ꠎꠣꠔꠞ ꠡꠥꠔꠣꠖꠤ ꠛꠣꠘꠣꠁꠟ ꠇꠣꠙꠠ ꠚꠤꠘ꠆ꠖꠤꠅ ꠘꠣ।
LEV 19:20 “ꠇꠥꠘꠥ ꠛꠣꠘ꠆ꠖꠤ ꠛꠦꠐꠤꠞ ꠛꠤꠀ ꠑꠤꠇ ꠇꠞꠣ ꠅꠁꠍꠦ, ꠅꠁꠟꠦ ꠔꠣꠁꠞ ꠝꠢꠞꠣꠘꠣꠞ ꠐꠦꠇꠣ ꠖꠦꠅꠀ ꠅꠁꠍꠦ ꠘꠣ, ꠛꠣ ꠝꠣꠟꠤꠇꠦ ꠎꠦꠉꠥꠞꠦ ꠀꠎꠣꠖ ꠇꠞꠤꠀ ꠖꠤꠍꠂꠘ ꠘꠣ, ꠁꠟꠣ ꠇꠥꠘꠥ ꠛꠣꠘ꠆ꠖꠤꠞ ꠟꠉꠦ ꠇꠦꠃ ꠡꠞꠤꠟꠤ ꠝꠤꠟꠣ-ꠝꠤꠡꠣ ꠇꠞꠟꠦ, ꠔꠦ ꠢꠦ ꠈꠦꠔꠤ-ꠙꠥꠞꠘ ꠖꠤꠔꠦ ꠅꠁꠛ। ꠁ ꠖꠥꠁꠅ ꠎꠘꠞꠦ ꠎꠣꠘꠦ ꠝꠣꠞꠤꠅ ꠘꠣ, ꠇꠣꠞꠘ ꠅꠃ ꠛꠣꠘ꠆ꠖꠤ ꠙꠥꠠꠤ ꠔ ꠀꠎꠣꠖ ꠅꠁꠍꠦ ꠘꠣ।
LEV 19:21 ꠅꠁꠟꠦ ꠅꠃ ꠛꠦꠐꠣꠄ ꠔꠣꠞ ꠖꠥꠡ-ꠇꠍꠥꠞꠤꠞ ꠇꠚꠞꠣꠞ ꠇꠥꠞꠛꠣꠘꠤꠞ ꠟꠣꠉꠤ, ꠝꠣꠛꠥꠖꠞ ꠘꠣꠝꠦ ꠘꠤꠈꠥꠔ ꠄꠉꠥ ꠝꠦꠠꠣ ꠟꠁꠀ ꠝꠤꠟꠘ-ꠔꠣꠝ꠆ꠛꠥꠞ ꠖꠥꠀꠞꠞ ꠍꠣꠝꠘꠦ ꠀꠎꠤꠞ ꠅꠁꠛ।
LEV 19:22 ꠖꠥꠡ-ꠇꠍꠥꠞꠤꠞ ꠇꠚꠞꠣꠞ ꠇꠥꠞꠛꠣꠘꠤꠞ ꠟꠣꠉꠤ ꠀꠘꠣ ꠢꠃ ꠙꠡꠥꠞꠦ ꠇꠥꠞꠛꠣꠘꠤ ꠖꠤꠀ, ꠁꠝꠣꠝ ꠍꠣꠛꠦ ꠝꠣꠛꠥꠖꠞ ꠍꠣꠝꠘꠦ ꠔꠣꠞ ꠉꠥꠘꠣꠞ ꠇꠚꠞꠣ ꠀꠖꠣꠄ ꠇꠞꠣꠞ ꠛꠣꠖꠦ, ꠢꠦ ꠅꠃ ꠉꠥꠘꠣꠞ ꠝꠣꠚꠤ ꠙꠣꠁꠛ।
LEV 19:23 “ꠔꠥꠝꠞꠣ ꠘꠤꠎꠞ ꠖꠦꠡꠅ ꠉꠤꠀ ꠢꠣꠞꠤ ꠇꠥꠘꠥ ꠚꠟꠞ ꠉꠣꠍ ꠟꠣꠉꠣꠁꠟꠦ, ꠔꠤꠘ ꠛꠍꠞ ꠙꠞ꠆ꠎꠘ꠆ꠔ ꠁ ꠉꠣꠍꠞ ꠚꠟ ꠔꠥꠝꠞꠣꠞ ꠟꠣꠉꠤ ꠢꠣꠞꠣꠝ। ꠅꠃ ꠔꠤꠘ ꠛꠍꠞꠞ ꠝꠣꠎꠦ ꠁ ꠉꠣꠍꠞ ꠚꠟ ꠈꠣꠅꠀ ꠘꠣꠎꠣꠁꠎ।
LEV 19:24 ꠌꠣꠁꠞ ꠘꠝ꠆ꠛꠞ ꠛꠍꠞꠅ ꠁ ꠉꠣꠍꠞ ꠢꠇꠟ ꠚꠟ ꠝꠣꠛꠥꠖꠞ ꠡꠥꠇꠥꠞ-ꠉꠥꠎꠣꠞꠤꠞ ꠘꠤꠅꠔꠦ ꠔꠣꠘ ꠘꠣꠝꠦ ꠖꠤꠟꠣꠁꠛꠣꠄ।
LEV 19:25 ꠙꠣꠌ ꠘꠝ꠆ꠛꠞ ꠛꠍꠞ ꠕꠣꠇꠤ ꠅꠃ ꠉꠣꠍꠞ ꠚꠟ ꠔꠥꠝꠞꠣꠞ ꠟꠣꠉꠤ ꠢꠣꠟꠣꠟ। ꠁꠔꠣ ꠝꠣꠘꠟꠦ ꠔꠥꠝꠞꠣꠞ ꠉꠣꠍꠅ ꠛꠃꠔ ꠚꠟ ꠀꠁꠛ। ꠝꠘꠅ ꠞꠣꠈꠤꠅ, ꠀꠝꠤ ꠀꠟ꠆ꠟꠣꠃ ꠔꠥꠝꠞꠣꠞ ꠝꠣꠛꠥꠖ।
LEV 19:26 “ꠔꠥꠝꠞꠣ ꠟꠃ ꠡꠝꠦꠔ ꠇꠥꠘꠥ ꠉꠥꠡ꠆ꠔ ꠈꠣꠁꠅ ꠘꠣ। ꠇꠥꠘꠥ ꠎꠣꠔꠞ ꠎꠣꠖꠥ-ꠝꠘꠔ꠆ꠞ ꠛꠣ ꠉꠘꠣ-ꠛꠣꠍꠣ ꠢꠤꠇꠤꠅ ꠘꠣ, ꠀꠞ ꠛꠦꠛꠢꠣꠞꠅ ꠇꠞꠤꠅ ꠘꠣ।
LEV 19:27 ꠝꠣꠕꠣꠞ ꠖꠥꠁꠅ ꠉꠣꠟꠣꠞ ꠌꠥꠟ ꠍꠣꠐꠣ, ꠛꠣ ꠖꠣꠠꠤꠞ ꠀꠉꠣ ꠇꠣꠐꠤꠅ ꠘꠣ।
LEV 19:28 ꠝꠥꠞ꠆ꠖꠣꠞ ꠟꠣꠉꠤ ꠀꠢꠣꠎꠣꠞꠤ ꠇꠞꠣꠔ ꠉꠤꠀ ꠘꠤꠎꠞ ꠡꠞꠤꠟꠅ ꠎꠈꠝ ꠇꠞꠤꠅ ꠘꠣ। ꠉꠔꠞꠞ ꠝꠣꠎꠦ ꠇꠥꠘꠥꠎꠣꠔ ꠌꠣꠙ-ꠍꠛꠤ ꠀꠇꠤꠅ ꠘꠣ। ꠀꠝꠤꠃ ꠔ ꠝꠣꠛꠥꠖ।
LEV 19:29 “ꠐꠦꠇꠣ ꠞꠥꠎꠤꠞ ꠘꠤꠅꠔꠦ ꠘꠤꠎꠞ ꠙꠥꠠꠤꠞꠦ ꠍꠤꠟꠣꠘꠤ-ꠛꠖꠝꠣꠁꠡꠤꠔ ꠟꠣꠉꠣꠁꠅ ꠘꠣ। ꠀꠞꠘꠣꠄ ꠀꠡ꠆ꠔꠣ ꠖꠦꠡ ꠎꠤꠘꠣꠄ ꠜꠞꠤꠎꠤꠛ, ꠙꠥꠞꠣ ꠖꠦꠡꠅ ꠈꠛꠤꠍꠤ ꠛꠣꠠꠤꠛ।
LEV 19:30 ꠀꠝꠣꠞ ꠖꠦꠅꠀ ꠎꠥꠝ꠆ꠝꠣꠛꠣꠞꠦ ꠎꠤꠞꠣꠁꠅ, ꠀꠞ ꠀꠝꠣꠞ ꠇꠣꠛꠣ ꠊꠞꠞꠦ ꠁꠎ꠆ꠎꠔ ꠇꠞꠤꠅ। ꠀꠝꠤꠃ ꠔ ꠝꠣꠛꠥꠖ।
LEV 19:31 “ꠎꠤꠘ꠆ꠘꠣꠔ ꠛꠣ ꠙꠦꠞꠔ ꠡꠣꠗꠇ, ꠉꠘꠇ ꠛꠣ ꠎꠣꠖꠥ-ꠐꠥꠘꠣ ꠇꠞꠞꠣꠞ ꠉꠦꠍꠦ ꠎꠣꠁꠅ ꠘꠣ, ꠁꠔꠣꠞ ꠟꠉꠦ ꠝꠤꠡꠤꠅ ꠘꠣ। ꠀꠞꠘꠣꠄ ꠁꠔꠣꠄ ꠔꠥꠝꠞꠣꠞꠦ ꠘꠣꠙꠣꠇ ꠛꠣꠘꠣꠁꠟꠤꠛꠣ। ꠝꠘꠅ ꠞꠣꠈꠤꠅ, ꠀꠝꠤ ꠀꠟ꠆ꠟꠣꠃ ꠔꠥꠝꠞꠣꠞ ꠝꠣꠛꠥꠖ।
LEV 19:32 “ꠝꠥꠞꠛ꠆ꠛꠤ ꠝꠣꠘꠥꠡ ꠗꠣꠞꠅ ꠀꠁꠟꠦ ꠔꠥꠝꠞꠣ ꠃꠛꠣꠁꠀ ꠁꠎ꠆ꠎꠔ ꠖꠤꠅ। ꠔꠥꠝꠞꠣ ꠘꠤꠎꠞ ꠀꠟ꠆ꠟꠣꠞ ꠒꠞ-ꠈꠚꠦ ꠞꠁꠅ। ꠀꠝꠤꠃ ꠔ ꠝꠣꠛꠥꠖ।
LEV 19:33 “ꠔꠥꠝꠞꠣꠞ ꠖꠦꠡꠅ ꠔꠥꠝꠞꠣꠞ ꠟꠉꠦ ꠛꠡꠔ ꠇꠞꠞꠣ ꠜꠤꠘ-ꠖꠦꠡꠤ ꠝꠣꠘꠡꠞ ꠃꠙꠞꠦ ꠎꠥꠟꠥꠝ ꠇꠞꠤꠅ ꠘꠣ।
LEV 19:34 ꠘꠤꠎꠞ ꠎꠣꠔꠤꠞ ꠟꠉꠦ ꠎꠦꠟꠣ ꠛꠦꠛꠢꠣꠞ ꠇꠞꠅ, ꠔꠣꠞꠣꠞ ꠟꠉꠦꠅ ꠅꠟꠣ ꠛꠦꠛꠢꠣꠞ ꠇꠞꠤꠅ, ꠔꠣꠞꠣꠞꠦ ꠘꠤꠎꠞ ꠟꠣꠈꠣꠘ ꠝꠣꠄꠀ ꠇꠞꠤꠅ। ꠝꠘꠅ ꠞꠣꠈꠤꠅ, ꠔꠥꠝꠞꠣꠅ ꠝꠤꠡꠞ ꠖꠦꠡꠅ ꠜꠤꠘ-ꠖꠦꠡꠤ ꠢꠣꠟꠔꠦ ꠀꠍꠟꠣꠄ, ꠀꠞ ꠀꠝꠤ ꠀꠟ꠆ꠟꠣꠃ ꠔꠥꠝꠞꠣꠞ ꠝꠣꠛꠥꠖ।
LEV 19:35 “ꠔꠥꠝꠞꠣ ꠇꠥꠘꠥꠎꠣꠔ ꠝꠣꠙ-ꠎꠥꠇꠅ ꠀꠞ ꠙꠣꠟ꠆ꠟꠣꠞ ꠃꠎꠘꠅ ꠛꠦ-ꠁꠘꠍꠣꠚꠤ ꠇꠞꠤꠅ ꠘꠣ।
LEV 19:36 ꠔꠥꠝꠞꠣꠞ ꠙꠣꠟ꠆ꠟꠣ-ꠙꠣꠔ꠆ꠔꠞ, ꠢꠦꠞ-ꠚꠥꠞꠣ, ꠘꠟ-ꠖꠠꠤ, ꠝꠣꠙꠞ ꠢꠇꠟꠔꠣ ꠎꠣꠘꠥ ꠑꠤꠇ-ꠑꠣꠇ ꠕꠣꠇꠦ। ꠀꠝꠤ ꠀꠟ꠆ꠟꠣꠃ ꠔꠥꠝꠞꠣꠞ ꠝꠣꠛꠥꠖ, ꠀꠞ ꠝꠤꠡꠞ ꠖꠦꠡ ꠕꠣꠇꠤ ꠀꠝꠤꠃ ꠔꠥꠝꠞꠣꠞꠦ ꠛꠣꠞ ꠇꠞꠤ ꠀꠘꠍꠤ।
LEV 19:37 ꠀꠝꠣꠞ ꠛꠣꠔꠣꠁꠟ ꠢꠇꠟ ꠘꠤꠅꠝ-ꠇꠣꠘꠥꠘ ꠀꠞ ꠙꠥꠞꠣꠙꠥꠞ ꠡꠞꠤꠅꠔ ꠔꠥꠝꠞꠣ ꠝꠣꠘꠤꠀ ꠌꠟꠤꠅ। ꠀꠝꠤꠃ ꠔ ꠝꠣꠛꠥꠖ।”
LEV 20:1 ꠛꠣꠖꠦ ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ,
LEV 20:2 “ꠔꠥꠝꠤ ꠛꠘꠤ ꠁꠍꠞꠣꠁꠟꠞꠦ ꠎꠣꠘꠣꠁ ꠖꠦꠅ, ꠔꠥꠝꠞꠣꠞ ꠝꠣꠎꠞ ꠇꠥꠘꠥ ꠝꠣꠘꠡꠦ ꠛꠣ ꠔꠥꠝꠞꠣꠞ ꠟꠉꠦ ꠛꠡꠔ ꠇꠞꠞꠣ ꠜꠤꠘ-ꠖꠦꠡꠤ ꠇꠥꠘꠥ ꠝꠣꠘꠡꠦ ꠎꠥꠖꠤ ꠔꠣꠞ ꠙꠥꠀ ꠛꠣ ꠙꠥꠠꠤꠞꠦ ꠝꠥꠟꠇ ꠖꠦꠛꠔꠣꠞ ꠘꠣꠝꠦ ꠛꠟꠤ ꠖꠦꠄ, ꠔꠦ ꠅꠉꠥꠞꠦ ꠎꠣꠘꠦ ꠝꠣꠞꠤꠟꠤꠛꠣꠄ, ꠖꠦꠡꠞ ꠝꠣꠘꠡꠦ ꠝꠤꠟꠤꠀ ꠙꠣꠔ꠆ꠔꠞꠖꠤ ꠁꠐꠣꠁꠀ ꠔꠣꠞꠦ ꠝꠣꠞꠛꠣꠄ।
LEV 20:3 ꠢꠦ ꠘꠤꠎꠞ ꠙꠥꠀ ꠛꠣ ꠙꠥꠠꠤꠞꠦ ꠀꠉꠥꠁꠘꠖꠤ ꠎꠣꠟꠣꠁꠀ ꠝꠥꠟꠇ ꠖꠦꠛꠔꠣꠞ ꠘꠣꠝꠦ ꠛꠟꠤ ꠖꠤꠀ, ꠀꠝꠣꠞ ꠇꠣꠛꠣ ꠊꠞꠞꠦ ꠘꠣꠙꠣꠇ ꠛꠣꠘꠣꠁꠍꠦ ꠀꠞ ꠀꠝꠣꠞ ꠙꠣꠇ-ꠙꠛꠤꠔ꠆ꠞ ꠘꠣꠝꠞꠦ ꠅꠡꠝ꠆ꠝꠣꠘ ꠇꠞꠍꠦ। ꠄꠞꠟꠣꠉꠤ ꠀꠝꠤ ꠔꠣꠞ ꠈꠦꠔꠤ ꠇꠞꠣꠔ ꠟꠣꠉꠝꠥ, ꠁ ꠎꠣꠔꠤꠞ ꠝꠣꠎ ꠕꠣꠇꠤ ꠔꠣꠞ ꠘꠣꠝ ꠝꠤꠐꠣꠁꠟꠤꠝꠥ।
LEV 20:4 ꠅꠃ ꠖꠦꠛꠔꠣꠞ ꠘꠣꠝꠦ ꠔꠣꠞ ꠙꠥꠀ ꠛꠣ ꠙꠥꠠꠤꠞꠦ ꠛꠟꠤ ꠖꠦꠅꠀꠞ ꠡꠝꠄ, ꠁ ꠖꠦꠡꠞ ꠝꠣꠘꠡꠦ ꠎꠥꠖꠤ ꠖꠦꠈꠤꠀꠅ ꠘꠣ-ꠖꠦꠈꠣꠞ ꠜꠣꠘ ꠇꠞꠂꠘ, ꠀꠞ ꠁ ꠛꠟꠤ ꠖꠦꠅꠞꠣꠞꠦ ꠎꠣꠘꠦ ꠘꠣ ꠝꠣꠞꠂꠘ,
LEV 20:5 ꠔꠦ ꠀꠝꠤ ꠘꠤꠎꠦ ꠅꠃ ꠘꠣꠚꠞꠝꠣꠘ ꠀꠞ ꠔꠣꠞ ꠙꠞꠤꠛꠣꠞꠞ ꠈꠦꠔꠤ ꠇꠞꠣꠔ ꠟꠣꠉꠤꠎꠤꠝꠥ। ꠀꠝꠤ ꠅꠉꠥꠞ ꠘꠣꠝ ꠀꠞ ꠅꠉꠥꠞ ꠟꠣꠈꠣꠘ ꠀꠞꠅ ꠎꠦꠉꠥꠁꠘ꠆ꠔꠦ ꠁꠟꠣ ꠘꠣꠚꠞꠝꠣꠘꠤ ꠇꠞꠛ, ꠅꠔꠣ ꠢꠇ꠆ꠇꠟꠐꠤꠞ ꠘꠣꠝ ꠛꠘꠤ ꠁꠍꠞꠣꠁꠟ ꠡꠝꠣꠎ ꠕꠣꠇꠤ ꠝꠤꠐꠣꠁꠟꠤꠝꠥ। ꠄꠞꠣ ꠔ ꠀꠝꠣꠞ ꠟꠉꠦ ꠛꠦꠁꠝꠣꠘꠤ ꠇꠞꠤꠀ ꠢꠃ ꠝꠥꠟꠇ ꠖꠦꠛꠔꠣꠞ ꠀꠔꠅ ꠘꠤꠎꠞꠦ ꠡꠙꠤ ꠖꠤꠍꠦ।
LEV 20:6 “ꠇꠥꠘꠥ ꠝꠣꠘꠡꠦ ꠎꠥꠖꠤ ꠀꠝꠣꠞ ꠟꠉꠦ ꠛꠦꠁꠝꠣꠘꠤ ꠇꠞꠤꠀ, ꠎꠤꠘ-ꠜꠥꠔ ꠡꠣꠗꠇ ꠛꠣ ꠉꠘꠇꠞ ꠟꠉꠦ ꠝꠤꠡꠤꠀ ꠘꠤꠎꠞꠦ ꠡꠙꠤ ꠖꠤꠟꠣꠄ, ꠔꠦ ꠔꠣꠞꠅ ꠈꠦꠔꠤ ꠇꠞꠣꠔ ꠟꠣꠉꠤꠎꠤꠝꠥ ꠀꠞ ꠁ ꠎꠣꠔꠤꠞ ꠝꠣꠎ ꠕꠣꠇꠤ ꠔꠣꠞ ꠘꠣꠝ ꠝꠤꠐꠣꠁꠟꠤꠝꠥ।
LEV 20:7 “ꠔꠥꠝꠞꠣ ꠀꠝꠣꠞ ꠟꠣꠉꠤ ꠘꠤꠎꠞꠦ ꠀꠟꠣꠖꠣ ꠇꠞꠅ ꠀꠞ ꠙꠣꠇ-ꠙꠛꠤꠔ꠆ꠞ ꠅꠅ। ꠝꠘꠅ ꠞꠣꠈꠤꠅ, ꠀꠝꠤ ꠀꠟ꠆ꠟꠣꠃ ꠔꠥꠝꠞꠣꠞ ꠝꠣꠛꠥꠖ।
LEV 20:8 ꠀꠝꠣꠞ ꠘꠤꠅꠝ-ꠇꠣꠘꠥꠘ ꠙꠥꠞꠣꠙꠥꠞ ꠀꠝꠟ ꠇꠞꠤꠅ। ꠀꠝꠤꠃ ꠔ ꠝꠣꠛꠥꠖ, ꠀꠝꠤꠃ ꠔꠥꠝꠞꠣꠞꠦ ꠙꠣꠇ-ꠙꠛꠤꠔ꠆ꠞ ꠇꠞꠤ।
LEV 20:9 “ꠎꠦ ꠝꠣꠘꠡꠦ ꠀꠙꠘ ꠝꠣ-ꠛꠣꠚꠞꠦ ꠉꠣꠟꠤ-ꠉꠣꠟꠣꠎ ꠇꠞꠤꠀ ꠛꠦꠁꠎ꠆ꠎꠔ ꠇꠞꠦ, ꠔꠣꠞꠦꠅ ꠎꠣꠘꠦ ꠝꠣꠞꠛꠣꠄ। ꠅꠃ ꠘꠣꠚꠞꠝꠣꠘꠤꠞ ꠖꠣꠄ ꠔꠣꠞ ꠝꠃꠔꠞ ꠟꠣꠉꠤ ꠢꠦ ꠘꠤꠎꠦꠃ ꠖꠣꠄꠁ।
LEV 20:10 “ꠇꠥꠘꠥ ꠝꠣꠘꠡꠦ ꠎꠥꠖꠤ ꠀꠞꠤ-ꠚꠞꠤꠞ ꠇꠥꠘꠥ ꠎꠘꠞ ꠛꠃꠞ ꠟꠉꠦ ꠎꠤꠘꠣ ꠇꠞꠦ, ꠔꠦ ꠅꠃ ꠛꠦꠐꠣ-ꠛꠦꠐꠤ ꠖꠥꠁꠅ ꠎꠘꠞꠦ ꠎꠣꠘꠦ ꠝꠣꠞꠤꠟꠤꠛꠣꠄ।
LEV 20:11 ꠎꠦ ꠝꠣꠘꠡꠦ ꠔꠣꠞ ꠢꠣꠔꠘ ꠝꠣʼꠞ ꠟꠉꠦ ꠎꠤꠘꠣ ꠇꠞꠦ, ꠢꠦ ꠔꠣꠞ ꠛꠣꠚꠞꠦ ꠛꠦꠁꠎ꠆ꠎꠔ ꠇꠞꠦ। ꠄꠞꠟꠣꠉꠤ ꠔꠣꠞꠦ ꠀꠞ ꠢꠣꠔꠘ ꠝꠣʼꠞꠦ ꠎꠣꠘꠦ ꠝꠣꠞꠛꠣꠄ। ꠔꠣꠞꠣꠞ ꠝꠃꠔꠞ ꠟꠣꠉꠤ ꠔ ꠔꠣꠞꠣꠃ ꠖꠣꠄꠁ।
LEV 20:12 “ꠇꠥꠘꠥ ꠝꠣꠘꠡꠦ ꠎꠥꠖꠤ ꠀꠙꠘ ꠙꠥꠀꠞ ꠛꠃꠞ ꠟꠉꠦ ꠎꠤꠘꠣ ꠇꠞꠦ, ꠔꠦ ꠔꠣꠞꠣ ꠖꠥꠁꠅ ꠎꠘꠞꠦ ꠎꠣꠘꠦ ꠝꠣꠞꠛꠣꠄ। ꠔꠣꠞꠣ ꠝꠣꠘꠛ ꠡꠝꠣꠎꠞ ꠃꠟꠐꠣ ꠌꠟꠣꠄ, ꠔꠣꠞꠣꠞ ꠝꠃꠔꠞ ꠟꠣꠉꠤ ꠘꠤꠎꠦꠃ ꠖꠣꠄꠁ।
LEV 20:13 ꠇꠥꠘꠥ ꠛꠦꠐꠣꠄ ꠎꠥꠖꠤ ꠀꠞꠇ ꠛꠦꠐꠣꠞ ꠟꠉꠦ ꠎꠤꠘꠣ-ꠙꠥꠋꠉꠣꠝꠤ ꠇꠞꠦ, ꠔꠦ ꠔꠣꠞꠣ ꠖꠥꠁꠅ ꠎꠘꠦꠃ ꠛꠠ ꠈꠛꠤꠍꠤ ꠇꠞꠍꠦ, ꠄꠞꠟꠣꠉꠤ ꠖꠥꠁꠅ ꠎꠘꠞꠦ ꠎꠣꠘꠦ ꠝꠣꠞꠤꠟꠤꠛꠣꠄ, ꠔꠣꠞꠣꠞ ꠝꠃꠔꠞ ꠟꠣꠉꠤ ꠔꠣꠞꠣꠃ ꠖꠣꠄꠁ।
LEV 20:14 “ꠇꠥꠘꠥ ꠛꠦꠐꠣꠄ ꠎꠥꠖꠤ ꠇꠥꠘꠥ ꠙꠥꠠꠤꠞꠦ ꠀꠞ ꠔꠣꠁꠞ ꠝꠣʼꠞꠦꠅ ꠢꠣꠋꠉꠣ ꠇꠞꠦ, ꠔꠦ ꠅꠃ ꠛꠦꠐꠣ ꠀꠞ ꠝꠣ-ꠙꠥꠠꠤ ꠔꠤꠘꠅ ꠎꠘꠞꠦ ꠀꠉꠥꠁꠘꠖꠤ ꠎꠣꠟꠣꠁꠀ ꠝꠣꠞꠤꠟꠤꠛꠣꠄ, ꠎꠣꠔꠦ ꠁꠟꠣ ꠘꠣꠚꠞꠝꠣꠘꠤ ꠇꠣꠝ ꠔꠥꠝꠞꠣꠞ ꠝꠣꠎꠦ ꠘꠣ ꠊꠐꠦ।
LEV 20:15 ꠇꠥꠘꠥ ꠙꠡꠥꠞ ꠟꠉꠦ ꠇꠥꠘꠥ ꠝꠣꠘꠡꠦ ꠎꠤꠘꠣ ꠇꠞꠟꠦ, ꠢꠃ ꠝꠣꠘꠥꠡ ꠀꠞ ꠙꠡꠥ ꠖꠥꠁꠅꠉꠥꠞꠦ ꠎꠣꠘꠦ ꠝꠣꠞꠛꠣꠄ।
LEV 20:16 ꠇꠥꠘꠥ ꠛꠦꠐꠤꠄ ꠎꠥꠖꠤ ꠇꠥꠘꠥ ꠙꠡꠥꠞ ꠟꠉꠦ ꠎꠤꠘꠣ ꠇꠞꠣꠔ ꠎꠣꠄ, ꠔꠦ ꠢꠃ ꠛꠦꠐꠤ ꠀꠞ ꠙꠡꠥꠞꠦꠅ ꠎꠣꠘꠦ ꠝꠣꠞꠛꠣꠄ। ꠔꠣꠞꠣꠞ ꠝꠃꠔꠞ ꠟꠣꠉꠤ ꠔꠣꠞꠣꠃ ꠖꠣꠄꠁ।
LEV 20:17 “ꠇꠥꠘꠥ ꠛꠦꠐꠣꠄ ꠎꠥꠖꠤ ꠔꠣꠞ ꠀꠙꠘ ꠛꠁꠘ, ꠢꠣꠔꠘ ꠝꠣ ꠛꠣ ꠢꠣꠔꠘ ꠛꠣꠚꠞ ꠊꠞꠞ ꠛꠁꠘꠞ ꠟꠉꠦ ꠡꠞꠤꠟꠤ ꠝꠤꠟꠣ-ꠝꠤꠡꠣ ꠇꠞꠦ, ꠁꠔꠣ ꠔ ꠡꠞꠝꠞ ꠇꠣꠝ। ꠔꠣꠞꠣꠞꠦ ꠡꠝꠣꠎ ꠕꠣꠇꠤ ꠢꠞꠣꠁꠟꠤꠛꠣꠄ, ꠀꠞ ꠢꠦ ꠡꠣꠎꠣ ꠙꠣꠁꠛ।
LEV 20:18 ꠇꠥꠘꠥ ꠛꠦꠐꠤ ꠝꠣꠘꠡꠞ ꠝꠣꠡꠤꠇ ꠛꠦꠝꠣꠞꠞ ꠡꠝꠄ ꠔꠣꠁꠞ ꠟꠉꠦ ꠎꠦ ꠛꠦꠐꠣꠄ ꠡꠞꠤꠟꠤ ꠝꠤꠟꠣ-ꠝꠤꠡꠣ ꠇꠞꠦ, ꠁ ꠛꠦꠐꠤꠄ ꠔ ꠔꠣꠁꠞ ꠝꠣꠡꠤꠇ ꠇꠣꠟꠞ ꠁꠎ꠆ꠎꠔ ꠖꠦꠄ ꠘꠣ, ꠀꠞ ꠁ ꠛꠦꠐꠣꠄꠅ ꠔꠣꠁꠞ ꠝꠣꠡꠤꠇꠞꠦ ꠖꠣꠝ ꠖꠦꠄ ꠘꠣ। ꠄꠞꠟꠣꠉꠤ ꠛꠘꠤ ꠁꠍꠞꠣꠁꠟ ꠡꠝꠣꠎ ꠕꠣꠇꠤ ꠁ ꠖꠥꠁꠅꠉꠥꠞ ꠘꠣꠝ ꠝꠤꠐꠣꠁꠟꠤꠛꠣꠄ।
LEV 20:19 ꠇꠥꠘꠥ ꠛꠦꠐꠣꠄ ꠎꠣꠘꠥ ꠔꠣꠞ ꠈꠣꠟꠣ ꠛꠣ ꠚꠥꠚꠥꠞ ꠟꠉꠦ ꠎꠤꠘꠣ ꠘꠣ ꠇꠞꠦ, ꠀꠞꠘꠣꠄ ꠀꠙꠘ ꠟꠃꠞ ꠇꠥꠐꠥꠝꠞꠦ ꠛꠦꠁꠎ꠆ꠎꠔꠤ ꠇꠞꠣꠄ ꠔꠣꠞꠣ ꠖꠥꠁꠅ ꠎꠘꠦ ꠡꠣꠎꠣ ꠙꠣꠁꠛ।
LEV 20:20 ꠇꠦꠃ ꠎꠥꠖꠤ ꠔꠣꠞ ꠌꠣꠌꠤ ꠛꠣ ꠝꠣꠝꠤꠞ ꠟꠉꠦ ꠎꠤꠘꠣ ꠇꠞꠦ, ꠔꠦ ꠔꠣꠞꠣ ꠖꠥꠁꠅ ꠎꠘꠦ ꠡꠣꠎꠣ ꠙꠣꠁꠛ, ꠘꠤꠀꠅꠟꠣꠖꠤ ꠢꠣꠟꠔꠦ ꠔꠣꠞꠣꠞ ꠝꠞꠘ ꠅꠁꠛ, ꠢꠦ ꠔ ꠔꠣꠞ ꠌꠣꠌꠣ ꠛꠣ ꠝꠣꠝꠣꠞꠦ ꠛꠦꠁꠎ꠆ꠎꠔ ꠇꠞꠍꠦ।
LEV 20:21 ꠜꠣꠁ ꠎꠤꠘ꠆ꠖꠣ ꠕꠣꠇꠔꠦ ꠎꠥꠖꠤ ꠀꠞꠇ ꠜꠣꠁꠄ ꠔꠣꠞ ꠜꠣꠛꠤꠞꠦ ꠢꠣꠋꠉꠣ ꠇꠞꠦ, ꠔꠦ ꠔꠣꠞ ꠜꠣꠁꠞꠦ ꠛꠦꠁꠎ꠆ꠎꠔ ꠇꠞꠣꠄ, ꠁꠐꠣ ꠛꠠ ꠘꠣꠚꠞꠝꠣꠘꠤ। ꠔꠣꠞꠣ ꠇꠥꠘꠥ ꠀꠅꠟꠣꠖ ꠙꠣꠁꠔꠣ ꠘꠣꠄ।
LEV 20:22 “ꠔꠥꠝꠞꠣ ꠛꠡꠔ ꠇꠞꠣꠞ ꠟꠣꠉꠤ ꠀꠝꠤ ꠔꠥꠝꠞꠣꠞꠦ ꠎꠦ ꠖꠦꠡꠅ ꠘꠤꠀꠞ, ꠢꠃ ꠖꠦꠡꠞ ꠝꠣꠐꠤꠄ ꠎꠣꠘꠥ ꠔꠥꠝꠞꠣꠞꠦ ꠛꠝꠤ ꠇꠞꠤꠀ ꠘꠣ ꠚꠣꠟꠣꠄ। ꠄꠞꠟꠣꠉꠤ ꠔꠥꠝꠞꠣ ꠀꠝꠣꠞ ꠛꠣꠔꠣꠁꠟ ꠢꠇꠟ ꠡꠞꠤꠅꠔ ꠀꠞ ꠘꠤꠅꠝ-ꠇꠣꠘꠥꠘ ꠅꠇꠟ ꠀꠝꠟ ꠇꠞꠤꠅ।
LEV 20:23 ꠔꠥꠝꠞꠣꠞ ꠍꠣꠝꠘꠦ ꠕꠣꠇꠤ ꠀꠝꠤ ꠎꠦꠔꠣ ꠎꠣꠔꠤ ꠅꠇꠟꠞꠦ ꠈꠦꠖꠣꠁ ꠖꠤꠞꠣꠝ, ꠁꠔꠣꠞ ꠌꠣꠟ-ꠌꠟꠘꠦ ꠔꠥꠝꠞꠣ ꠌꠟꠤꠅ ꠘꠣ। ꠔꠣꠞꠣꠞ ꠢꠃ ꠌꠣꠟ-ꠌꠟꠘꠞ ꠟꠣꠉꠤꠃ ꠀꠝꠤ ꠔꠣꠞꠣꠞꠦ ꠟꠣꠘ꠆ꠘꠔ ꠖꠤꠍꠤ,
LEV 20:24 ꠄꠞꠟꠣꠉꠤꠃ ꠀꠝꠤ ꠔꠥꠝꠞꠣꠞꠦ ꠅꠀꠖꠣ ꠖꠤꠍꠟꠣꠝ ꠔꠣꠞꠣꠞ ꠖꠦꠡꠞꠦ ꠀꠝꠤ ꠔꠥꠝꠞꠣꠞ ꠖꠈꠟꠦ ꠖꠤꠝꠥ, ꠔꠣꠞꠣꠞ ꠢꠃ ꠖꠥꠗ ꠀꠞ ꠝꠃꠞ ꠜꠣꠘ꠆ꠒꠣꠞ ꠀꠟꠣ ꠖꠦꠡ ꠀꠝꠤ ꠔꠥꠝꠞꠣꠞꠦ ꠖꠣꠘ ꠇꠞꠝꠥ। ꠀꠝꠤ ꠀꠟ꠆ꠟꠣꠃ ꠔꠥꠝꠞꠣꠞ ꠝꠣꠛꠥꠖ, ꠎꠉꠔꠞ ꠢꠇꠟ ꠎꠣꠔꠤ ꠕꠣꠇꠤ ꠀꠝꠤꠃ ꠔꠥꠝꠞꠣꠞꠦ ꠀꠟꠣꠖꠣ ꠇꠞꠍꠤ।
LEV 20:25 ꠄꠞꠟꠣꠉꠤ ꠔꠥꠝꠞꠣ ꠢꠣꠟꠣꠟ ꠀꠞ ꠢꠣꠞꠣꠝ ꠙꠡꠥꠁꠘ꠆ꠔꠞ ꠝꠣꠎꠦ ꠔꠚꠣꠔ ꠞꠣꠈꠤꠅ, ꠢꠣꠟꠣꠟ ꠀꠞ ꠢꠣꠞꠣꠝ ꠙꠣꠈꠤꠘ꠆ꠔꠞ ꠝꠣꠎꠦ ꠔꠚꠣꠔ ꠞꠣꠈꠤꠅ। ꠙꠡꠥ-ꠙꠣꠈꠤ ꠀꠞ ꠝꠣꠐꠤꠞ ꠃꠙꠞꠦ ꠌꠟꠞꠣ ꠢꠥꠞꠥ ꠢꠥꠞꠥ ꠎꠣꠘꠖꠣꠞꠞ ꠝꠣꠎꠦ ꠎꠦꠔꠣꠞꠦ ꠀꠝꠤ ꠢꠣꠞꠣꠝ ꠇꠁꠍꠤ, ꠅꠔꠣ ꠖꠤꠀ ꠔꠥꠝꠞꠣ ꠘꠤꠎꠞ ꠡꠞꠤꠟꠞꠦ ꠘꠣꠙꠣꠇ ꠛꠣꠘꠣꠁꠀ ꠟꠣꠘ꠆ꠘꠔꠤ ꠛꠘꠤꠅ ꠘꠣ।
LEV 20:26 ꠀꠝꠤ ꠝꠣꠛꠥꠖ ꠔ ꠙꠣꠇ-ꠙꠛꠤꠔ꠆ꠞ, ꠄꠞꠟꠣꠉꠤ ꠔꠥꠝꠞꠣꠅ ꠙꠛꠤꠔ꠆ꠞ ꠅꠁꠔꠦ ꠅꠁꠛ। ꠀꠝꠣꠞ ꠀꠙꠘ ꠙ꠆ꠞꠎꠣ ꠅꠀꠞ ꠟꠣꠉꠤ ꠀꠝꠤꠃ ꠔꠥꠝꠞꠣꠞꠦ ꠎꠉꠔꠞ ꠢꠇꠟ ꠎꠣꠔꠤ ꠕꠣꠇꠤ ꠛꠣꠍꠤꠀ ꠀꠟꠉ ꠇꠞꠍꠤ।
LEV 20:27 “ꠎꠦꠔꠣ ꠛꠦꠐꠣ ꠛꠣ ꠛꠦꠐꠤꠘ꠆ꠔꠦ ꠎꠤꠘ-ꠜꠥꠔ ꠡꠣꠗꠘ, ꠉꠘꠇ ꠛꠣ ꠎꠣꠖꠥ-ꠐꠥꠘꠣꠞ ꠇꠣꠝ ꠇꠞꠦ, ꠁꠔꠣꠞꠦ ꠎꠣꠘꠦ ꠝꠣꠞꠤꠟꠤꠛꠣꠄ। ꠙꠣꠔ꠆ꠔꠞꠖꠤ ꠁꠐꠣꠁꠀ ꠎꠣꠘꠦ ꠝꠣꠞꠤꠟꠤꠛꠣꠄ, ꠔꠣꠞꠣꠞ ꠝꠃꠔꠞ ꠟꠣꠉꠤ ꠔꠣꠞꠣꠃ ꠖꠣꠄꠁ।”
LEV 21:1 ꠄꠞꠛꠣꠖꠦ ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ, “ꠔꠥꠝꠤ ꠢꠣꠞꠥꠘꠞ ꠛꠋꠡꠞ ꠁꠝꠣꠝ ꠅꠇꠟꠞꠦ ꠇꠁꠅ, ꠔꠣꠞꠣꠞ ꠇꠥꠘꠥ ꠇꠥꠐꠥꠝ-ꠈꠦꠡꠞ ꠝꠃꠔꠞ ꠇꠣꠞꠘꠦ ꠝꠣꠔ꠆ꠔꠝ ꠇꠞꠤꠀ ꠔꠣꠞꠣ ꠎꠣꠘꠥ ꠘꠤꠎꠞꠦ ꠘꠣꠙꠣꠇ ꠘꠣ ꠛꠣꠘꠣꠄ।
LEV 21:2 ꠈꠣꠟꠤ ꠔꠣꠞꠣꠞ ꠘꠤꠎꠞ ꠝꠣ-ꠛꠣꠚ, ꠙꠥꠀ-ꠙꠥꠠꠤ ꠛꠣ ꠀꠙꠘ ꠜꠣꠁ ꠝꠣꠞꠣ ꠉꠦꠟꠦ ꠔꠣꠞꠣ ꠘꠤꠎꠞꠦ ꠘꠣꠙꠣꠇ ꠛꠣꠘꠣꠘꠤ ꠎꠣꠁꠎ ꠀꠍꠦ।
LEV 21:3 ꠀꠞ ꠜꠣꠁꠞ ꠊꠞꠅ ꠞꠅꠞꠣ ꠀꠛꠤꠀꠔꠤ ꠇꠥꠘꠥ ꠛꠁꠘ ꠝꠣꠞꠣ ꠉꠦꠟꠦ ꠔꠣꠁꠞꠦ ꠖꠣꠚꠘ-ꠇꠣꠚꠘꠞ ꠟꠣꠉꠤ ꠔꠣꠁꠞ ꠜꠣꠁ ꠘꠣꠙꠣꠇ ꠛꠘꠣ ꠎꠣꠁꠎ।
LEV 21:4 ꠅꠁꠟꠦ ꠢꠃꠞ ꠛꠣꠠꠤꠞ ꠇꠥꠘꠥ ꠇꠥꠐꠥꠝ-ꠈꠦꠡꠞ ꠝꠃꠔꠞ ꠖꠣꠄ ꠇꠥꠘꠥ ꠁꠝꠣꠝ ꠍꠣꠛꠦ ꠘꠤꠎꠞ ꠙꠛꠤꠔ꠆ꠞ ꠢꠣꠟꠔ ꠕꠣꠇꠤ ꠘꠣꠙꠣꠇ ꠛꠘꠣ ꠎꠣꠁꠎ ꠘꠣꠄ।
LEV 21:5 “ꠁꠝꠣꠝ ꠍꠣꠛ ꠅꠇꠟꠞ ꠝꠣꠕꠣꠞ ꠌꠥꠟ ꠇꠣꠝꠣꠘꠤ, ꠖꠣꠠꠤꠞ ꠀꠉꠣ ꠍꠣꠐꠣ, ꠛꠣ ꠘꠤꠎꠞ ꠡꠞꠤꠟꠅ ꠇꠥꠘꠥꠎꠣꠔ ꠇꠣꠐꠣ-ꠌꠤꠞꠣ ꠇꠞꠣ ꠎꠣꠁꠎ ꠘꠣꠄ।
LEV 21:6 ꠔꠣꠞꠣ ꠎꠣꠘꠥ ꠀꠙꠘ ꠀꠟ꠆ꠟꠣꠞ ꠙꠛꠤꠔ꠆ꠞ ꠘꠣꠝꠞꠦ ꠅꠡꠝ꠆ꠝꠣꠘ ꠘꠣ ꠇꠞꠂꠘ, ꠀꠞ ꠙꠣꠇ-ꠙꠣꠇꠤꠎꠣ ꠞꠁꠀ ꠎꠤꠘ꠆ꠖꠦꠉꠤ ꠇꠣꠐꠣꠁꠘ। ꠅꠈꠣꠘ ꠝꠘꠅ ꠞꠣꠈꠂꠘ ꠎꠦꠘ, ꠅꠃ ꠁꠝꠣꠝ ꠅꠇꠟꠦꠃ ꠝꠣꠛꠥꠖꠞ ꠘꠣꠝꠦ ꠀꠉꠥꠘꠤꠔ ꠖꠦꠅꠀ ꠍꠖꠉꠣ ꠀꠞ ꠇꠥꠞꠛꠣꠘꠤ ꠅꠇꠟ ꠀꠖꠣꠄ ꠇꠞꠂꠘ, ꠀꠞ ꠇꠥꠞꠛꠣꠘꠤꠞ ꠝꠣꠟ ꠔ ꠘꠤꠎꠞ ꠀꠟ꠆ꠟꠣꠞ ꠖꠞꠛꠣꠞꠞ ꠞꠤꠎꠦꠇ।
LEV 21:7 ꠁꠝꠣꠝ ꠅꠇꠟꠦ ꠇꠥꠘꠥ ꠛꠖꠝꠣꠁꠡ, ꠍꠤꠟꠣꠘ ꠛꠣ ꠔꠣꠟꠣꠇ ꠙꠣꠅꠀ ꠇꠥꠘꠥ ꠛꠦꠐꠤꠞꠦ ꠛꠤꠀ ꠇꠞꠣ ꠎꠣꠁꠎ ꠘꠣꠄ। ꠇꠣꠞꠘ ꠔꠣꠞꠣꠞ ꠀꠙꠘ ꠀꠟ꠆ꠟꠣꠞ ꠘꠣꠝꠦ ꠔꠣꠞꠣ ꠙꠛꠤꠔ꠆ꠞ।
LEV 21:8 ꠅ ꠛꠘꠤ ꠁꠍꠞꠣꠁꠟ, ꠔꠥꠝꠞꠣ ꠁꠝꠣꠝ ꠍꠣꠛ ꠅꠇꠟꠞꠦ ꠢꠣꠝꠦꠡꠣ ꠙꠛꠤꠔ꠆ꠞ ꠢꠤꠡꠣꠛꠦ ꠝꠣꠘꠤꠅ, ꠔꠣꠞꠣꠃ ꠔ ꠔꠥꠝꠞꠣꠞ ꠀꠟ꠆ꠟꠣꠞ ꠖꠞꠛꠣꠞꠅ ꠇꠥꠞꠛꠣꠘꠤꠞ ꠈꠣꠘꠤ ꠡꠙꠤꠀ ꠖꠦꠁꠘ। ꠄꠞꠟꠣꠉꠤꠃ ꠔꠣꠞꠣꠞꠦ ꠙꠛꠤꠔ꠆ꠞ ꠇꠁꠀ ꠝꠣꠘꠤꠅ, ꠝꠘꠅ ꠞꠣꠈꠤꠅ, ꠀꠝꠤꠃ ꠔꠥꠝꠞꠣꠞꠦ ꠙꠛꠤꠔ꠆ꠞ ꠛꠣꠘꠣꠁꠍꠤ, ꠀꠞ ꠀꠝꠤ ꠘꠤꠎꠦ ꠔ ꠙꠣꠇ-ꠙꠛꠤꠔ꠆ꠞ।
LEV 21:9 ꠇꠥꠘꠥ ꠁꠝꠣꠝꠞ ꠙꠥꠠꠤ ꠎꠥꠖꠤ ꠍꠤꠟꠣꠘꠤ-ꠛꠖꠝꠣꠁꠡꠤꠞ ꠙꠕꠦ ꠉꠤꠀ ꠘꠣꠙꠣꠇ ꠛꠘꠤꠎꠣꠄ, ꠔꠦ ꠔꠣꠁꠞ ꠛꠣꠚꠞꠦꠅ ꠔꠣꠁ ꠛꠦꠁꠎ꠆ꠎꠔ ꠇꠞꠤꠟꠣꠄ। ꠄꠞꠟꠣꠉꠤ ꠔꠣꠁꠞꠦ ꠀꠉꠥꠁꠘꠖꠤ ꠎꠣꠟꠣꠁꠀ ꠝꠣꠞꠤꠟꠤꠛꠣꠄ।
LEV 21:10 “ꠀꠞ ꠁꠝꠣꠝ ꠙꠞꠤꠛꠣꠞꠞ ꠜꠣꠁꠀꠁꠘ꠆ꠔꠞ ꠝꠣꠎꠦ ꠢꠇꠟ ꠛꠠ ꠎꠦꠁꠘ, ꠄꠁꠘꠃ ꠔ ꠙꠞꠗꠣꠘ ꠁꠝꠣꠝ, ꠄꠘ ꠝꠣꠕꠣꠔ ꠈꠦꠟꠣꠚꠔꠤ ꠡꠝꠎꠤꠛꠣꠞ ꠔꠦꠟ ꠓꠣꠟꠣ ꠅꠁꠍꠦ, ꠈꠦꠟꠣꠚꠔꠤ ꠡꠝꠎꠤꠀ ꠔꠣꠁꠘ ꠙꠞꠗꠣꠘ ꠁꠝꠣꠝꠞ ꠙꠛꠤꠔ꠆ꠞ ꠟꠦꠛꠣꠍ ꠚꠤꠘ꠆ꠖꠤꠛꠣꠞ ꠖꠣꠄꠁꠔ꠆ꠔ ꠙꠣꠁꠍꠂꠘ। ꠄꠞꠟꠣꠉꠤ ꠇꠥꠘꠥ ꠝꠥꠞ꠆ꠖꠣꠞ ꠟꠣꠉꠤꠀ ꠇꠣꠘ꠆ꠖꠘ-ꠀꠢꠣꠎꠣꠞꠤꠞ ꠘꠤꠅꠔꠦ ꠔꠣꠘ ꠝꠣꠕꠣꠞ ꠙꠣꠃꠉꠠꠤ ꠈꠥꠟꠤꠀ ꠌꠥꠟ ꠀꠃꠟꠣ-ꠎꠣꠃꠟꠣ ꠇꠞꠣ, ꠛꠣ ꠔꠣꠘ ꠚꠤꠘ꠆ꠘꠞ ꠟꠦꠛꠣꠍ ꠍꠤꠠꠣꠅ ꠎꠣꠁꠎ ꠘꠣꠄ।
LEV 21:11 ꠄꠁꠘ ꠇꠥꠘꠥ ꠝꠞꠣ ꠟꠣꠡꠞ ꠇꠣꠘ꠆ꠖꠣꠔ ꠎꠣꠅꠀ ꠎꠣꠁꠎ ꠘꠣꠄ। ꠘꠤꠎꠞ ꠝꠣ-ꠛꠣꠚ ꠝꠣꠞꠣ ꠉꠦꠟꠦꠅ ꠄꠁꠘ ꠘꠤꠎꠞꠦ ꠘꠣꠙꠣꠇ ꠛꠣꠘꠣꠘꠤ ꠎꠣꠁꠎ ꠘꠣꠄ।
LEV 21:12 ꠎꠦꠇꠥꠘꠥ ꠝꠥꠞ꠆ꠖꠣꠞ ꠟꠣꠉꠤ ꠔꠣꠁꠘ ꠀꠟ꠆ꠟꠣꠞ ꠙꠛꠤꠔ꠆ꠞ ꠇꠣꠛꠣ ꠊꠞ ꠍꠣꠠꠤꠀ ꠇꠥꠘꠥꠈꠣꠘꠅ ꠉꠤꠀ ꠀꠟ꠆ꠟꠣꠞ ꠅꠃ ꠊꠞꠞꠦ ꠘꠣꠙꠣꠇ ꠛꠣꠘꠣꠘꠤ ꠔꠣꠘ ꠟꠣꠉꠤ ꠢꠣꠞꠣꠝ। ꠝꠘꠅ ꠞꠣꠈꠤꠅ, ꠔꠣꠘ ꠀꠙꠘ ꠀꠟ꠆ꠟꠣꠞ ꠘꠣꠝꠞ ꠈꠦꠟꠣꠚꠔꠤ ꠡꠝꠎꠤꠛꠣꠞ ꠔꠦꠟ ꠓꠣꠟꠤꠀ ꠔꠣꠘꠞꠦ ꠙꠛꠤꠔ꠆ꠞ ꠛꠣꠘꠣꠁꠟ ꠅꠁꠍꠦ। ꠀꠝꠤꠃ ꠔ ꠝꠣꠛꠥꠖ।
LEV 21:13 “ꠇꠥꠘꠥ ꠀꠛꠤꠀꠔꠤ ꠡꠔꠤ ꠇꠁꠘꠣꠞꠦ ꠡꠣꠖꠤ ꠇꠞꠣ ꠔꠣꠘ ꠟꠣꠉꠤ ꠎꠣꠁꠎ ꠀꠍꠦ।
LEV 21:14 ꠅꠁꠟꠦ ꠇꠥꠘꠥ ꠠꠣꠠꠤ ꠛꠦꠐꠤ, ꠛꠖꠝꠣꠁꠡ-ꠍꠤꠟꠣꠘ ꠛꠦꠐꠤ ꠛꠣ ꠔꠣꠟꠣꠇ ꠙꠣꠅꠀ ꠇꠥꠘꠥ ꠛꠦꠐꠤꠞꠦ ꠁꠝꠣꠝ ꠍꠣꠛꠦ ꠡꠣꠖꠤ ꠇꠞꠣ ꠎꠣꠁꠎ ꠘꠣꠄ। ꠈꠣꠟꠤ ꠘꠤꠎꠞ ꠉꠥꠡ꠆ꠐꠤꠞ ꠇꠥꠘꠥ ꠀꠛꠤꠀꠔꠤ ꠡꠔꠤ ꠇꠁꠘꠣꠞꠦ ꠡꠣꠖꠤ ꠇꠞꠣ ꠔꠣꠘ ꠟꠣꠉꠤ ꠎꠣꠁꠎ।
LEV 21:15 ꠀꠞꠘꠣꠄ ꠔꠣꠘ ꠇꠣꠞꠘꠦ ꠔꠣꠘ ꠘꠤꠎꠞ ꠈꠣꠘ꠆ꠖꠣꠘꠞ ꠝꠣꠎꠦ ꠔꠣꠘ ꠀꠅꠟꠣꠖ ꠅꠇꠟ ꠙꠛꠤꠔ꠆ꠞ ꠢꠣꠟꠔ ꠕꠣꠇꠤ ꠘꠣꠙꠣꠇ ꠛꠘꠛ। ꠀꠝꠤꠃ ꠔ ꠝꠣꠛꠥꠖ, ꠀꠝꠤꠃ ꠔꠣꠘꠞꠦ ꠙꠣꠇ-ꠙꠛꠤꠔ꠆ꠞ ꠛꠣꠘꠣꠁꠍꠤ।”
LEV 21:16 ꠄꠞꠛꠣꠖꠦ ꠝꠣꠛꠥꠖꠦ ꠝꠥꠍꠣꠞꠦ ꠀꠞꠅ ꠇꠁꠟꠣ,
LEV 21:17 “ꠔꠥꠝꠤ ꠁꠝꠣꠝ ꠢꠣꠞꠥꠘꠞꠦ ꠎꠣꠘꠣꠁ ꠖꠦꠅ, ꠔꠣꠘ ꠈꠣꠘ꠆ꠖꠣꠘꠞ ꠝꠣꠎꠞ ꠡꠞꠤꠟꠞ ꠈꠥꠔ ꠀꠟꠣ ꠇꠥꠘꠥ ꠎꠘꠦꠃ ꠀꠟ꠆ꠟꠣꠞ ꠘꠣꠝꠦ ꠇꠥꠞꠛꠣꠘꠤ ꠀꠖꠣꠄ ꠇꠞꠣꠞ ꠘꠤꠅꠔꠦ, ꠇꠥꠞꠛꠣꠘꠤ ꠈꠣꠘꠣꠞ ꠇꠣꠘ꠆ꠖꠣꠔ ꠎꠣꠅꠀ ꠘꠤꠡꠦꠗ।
LEV 21:18 ꠎꠦ ꠎꠘꠞ ꠡꠞꠤꠟꠅ ꠈꠥꠔ ꠀꠍꠦ, ꠝꠣꠘꠤ ꠀꠘ꠆ꠖꠣ, ꠟꠦꠋꠠꠣ, ꠘꠣꠇ-ꠇꠣꠐꠣ, ꠀꠔ-ꠙꠣꠅ ꠘꠤꠅꠝꠞ ꠛꠦꠡꠤ ꠟꠣꠝ꠆ꠛꠣ-ꠛꠣꠐ꠆ꠐꠤ ꠛꠣ ꠀꠋꠉꠥꠁꠟ ꠇꠝ-ꠛꠦꠡꠤ,
LEV 21:19 ꠀꠔ ꠛꠣ ꠙꠣꠅ ꠜꠣꠋꠉꠣ,
LEV 21:20 ꠙꠤꠑ ꠉꠥꠎꠣ, ꠛꠣꠐ꠆ꠐꠤ ꠜꠦꠋꠉꠣꠁ ꠝꠣꠘꠥꠡ, ꠌꠃꠈꠞ ꠛꠦꠝꠣꠞꠤ, ꠖꠣꠃꠖ-ꠈꠣꠃꠎꠟꠤ, ꠙꠌꠣ-ꠊꠣ ꠛꠦꠝꠣꠞꠤ ꠛꠣ ꠅꠘ꠆ꠒꠇꠥꠡ ꠘꠡ꠆ꠐ, ꠁꠟꠣ ꠈꠥꠔ ꠀꠟꠣ ꠇꠥꠘꠥ ꠝꠣꠘꠥꠡ ꠇꠥꠞꠛꠣꠘꠤ ꠈꠣꠘꠣꠞ ꠇꠣꠘ꠆ꠖꠣꠔ ꠎꠣꠅꠀ ꠎꠣꠁꠎ ꠘꠣꠄ।
LEV 21:21 ꠁꠝꠣꠝ ꠢꠣꠞꠥꠘꠞ ꠛꠋꠡꠞ ꠡꠞꠤꠟꠞ ꠈꠥꠔ ꠀꠟꠣ ꠇꠥꠘꠥ ꠎꠘꠦ ꠝꠣꠛꠥꠖꠞ ꠘꠣꠝꠦ ꠀꠉꠥꠘꠤꠔ ꠖꠦꠅꠀ ꠇꠥꠞꠛꠣꠘꠤ ꠀꠖꠣꠄ ꠇꠞꠣ ꠘꠤꠡꠦꠗ। ꠔꠣꠞ ꠉꠔꠞꠅ ꠈꠥꠔ ꠕꠣꠇꠣꠄ ꠢꠦ ꠇꠥꠞꠛꠣꠘꠤ ꠈꠣꠘꠣꠞ ꠇꠣꠘ꠆ꠖꠣꠔ ꠉꠤꠀ ꠀꠝꠣꠞ ꠘꠣꠝꠞ ꠈꠣꠘꠤꠞꠦ ꠇꠥꠞꠛꠣꠘꠤ ꠖꠦꠅꠀ ꠎꠣꠁꠎ ꠘꠣꠄ।
LEV 21:22 ꠅꠁꠟꠦ ꠅꠃ ꠇꠥꠞꠛꠣꠘꠤꠞ ꠈꠣꠘꠤ ꠈꠣꠅꠀ ꠔꠣꠞ ꠟꠣꠉꠤ ꠎꠣꠁꠎ, ꠁꠔꠣ ꠙꠛꠤꠔ꠆ꠞ ꠛꠣ ꠈꠣꠍ-ꠙꠛꠤꠔ꠆ꠞ ꠅꠁꠟꠦꠅ ꠎꠣꠁꠎ ꠀꠍꠦ।
LEV 21:23 ꠔꠣꠞ ꠡꠞꠤꠟꠅ ꠈꠥꠔ ꠕꠣꠇꠣꠄ ꠢꠦ ꠇꠣꠛꠣ ꠊꠞꠞ ꠢꠦꠞꠦꠝ ꠡꠞꠤꠚꠞ ꠙꠞ꠆ꠖꠣꠞ ꠇꠣꠘ꠆ꠖꠣꠔ ꠛꠣ ꠇꠥꠞꠛꠣꠘꠤ ꠈꠣꠘꠣꠞ ꠇꠣꠘ꠆ꠖꠣꠔ ꠎꠣꠅꠀ ꠘꠤꠡꠦꠗ, ꠢꠦ ꠎꠣꠘꠥ ꠀꠝꠣꠞ ꠙꠣꠇ-ꠙꠛꠤꠔ꠆ꠞ ꠎꠣꠉꠣ ꠅꠇꠟꠞꠦ ꠘꠣꠙꠣꠇ ꠘꠣ ꠛꠣꠘꠣꠄ। ꠝꠘꠅ ꠞꠣꠈꠤꠅ, ꠀꠝꠤꠃ ꠝꠣꠛꠥꠖ, ꠀꠞ ꠀꠝꠤꠃ ꠅꠃ ꠎꠣꠉꠣꠁꠘ꠆ꠔꠞꠦ ꠙꠛꠤꠔ꠆ꠞ ꠇꠞꠤ।”
LEV 21:24 ꠛꠣꠖꠦ ꠝꠥꠍꠣꠄ ꠉꠤꠀ ꠁꠔꠣ ꠢꠇꠟꠔꠣ ꠁꠝꠣꠝ ꠢꠣꠞꠥꠘ, ꠔꠣꠘ ꠙꠥꠀꠂꠘ ꠀꠞ ꠢꠇꠟ ꠛꠘꠤ ꠁꠍꠞꠣꠁꠟꠞꠦ ꠎꠣꠘꠣꠁꠟꠣ।
LEV 22:1 ꠄꠞꠛꠣꠖꠦ ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ,
LEV 22:2 “ꠔꠥꠝꠤ ꠁꠝꠣꠝ ꠢꠣꠞꠥꠘ ꠀꠞ ꠔꠣꠞ ꠙꠥꠀꠂꠘ꠆ꠔꠞꠦ ꠇꠅ, ꠛꠘꠤ ꠁꠍꠞꠣꠁꠟꠦ ꠀꠝꠣꠞ ꠘꠣꠝꠦ ꠟꠤꠟ꠆ꠟꠣ ꠀꠞ ꠇꠥꠞꠛꠣꠘꠤ ꠖꠤꠛꠣꠞ ꠘꠤꠅꠔꠦ ꠎꠔꠔꠣ ꠀꠘꠂꠘ, ꠁꠔꠣ ꠔ ꠙꠛꠤꠔ꠆ꠞ। ꠄꠞꠟꠣꠉꠤ ꠅꠔꠣ ꠢꠇ꠆ꠇꠟꠔꠣꠞꠦ ꠁꠝꠣꠝ ꠅꠇꠟꠦ ꠁꠎ꠆ꠎꠔ-ꠔꠣꠎꠤꠝ ꠇꠞꠣ ꠎꠞꠥꠞ। ꠁ ꠛꠦꠙꠣꠞꠦ ꠔꠣꠞꠣ ꠎꠣꠘꠥ ꠀꠝꠣꠞ ꠙꠣꠇ-ꠙꠛꠤꠔ꠆ꠞ ꠘꠣꠝꠞꠦ ꠅꠡꠝ꠆ꠝꠣꠘ ꠘꠣ ꠇꠞꠦ। ꠀꠝꠤꠃ ꠔ ꠝꠣꠛꠥꠖ।
LEV 22:3 “ꠔꠥꠝꠤ ꠔꠣꠞꠣꠞꠦ ꠎꠣꠘꠣꠁ ꠖꠦꠅ, ꠔꠣꠞꠣꠞ ꠀꠅꠟꠣꠖꠞ ꠝꠣꠎꠞ ꠇꠦꠃ ꠎꠥꠖꠤ ꠘꠣꠙꠣꠇ ꠢꠣꠟꠔꠦ ꠝꠣꠛꠥꠖꠞ ꠘꠣꠝꠦ ꠖꠦꠅꠀ ꠇꠥꠞꠛꠣꠘꠤꠞ ꠇꠥꠘꠥ ꠎꠤꠘꠤꠡꠞ ꠇꠣꠘ꠆ꠖꠣꠔ ꠎꠣꠄ, ꠔꠦ ꠔꠣꠞꠦ ꠀꠝꠣꠞ ꠍꠣꠝꠘ ꠕꠣꠇꠤ ꠢꠞꠣꠁꠟꠤꠛꠣꠄ। ꠀꠝꠤꠃ ꠔ ꠝꠣꠛꠥꠖ।
LEV 22:4 ꠢꠣꠞꠥꠘꠞ ꠀꠅꠟꠣꠖ ꠅꠇꠟꠞ ꠝꠣꠎꠦ ꠇꠦꠃ ꠎꠥꠖꠤ ꠙꠌꠣ-ꠇꠥꠡ꠆ꠑ ꠛꠦꠝꠣꠞꠤ ꠛꠣ ꠗꠣꠔꠥ ꠎꠣꠅꠀ ꠛꠦꠝꠣꠞꠤ ꠅꠄ, ꠔꠦ ꠙꠣꠇ-ꠍꠣꠚ ꠘꠣ ꠅꠀ ꠙꠞ꠆ꠎꠘ꠆ꠔ ꠢꠦ ꠇꠥꠞꠛꠣꠘꠤꠞ ꠇꠥꠘꠥꠔꠣ ꠈꠣꠅꠀ ꠘꠣꠎꠣꠁꠎ। ꠀꠞ ꠝꠞꠣ ꠟꠣꠡꠞꠦ ꠛꠣ ꠅꠃ ꠟꠣꠡꠞ ꠟꠣꠉꠤ ꠎꠦꠔꠣ ꠇꠣꠝꠅ ꠟꠣꠉꠣꠁꠟ ꠅꠁꠍꠦ ꠁꠔꠣ ꠇꠥꠘꠥꠔꠣ ꠍꠁꠀ ꠎꠥꠖꠤ ꠇꠦꠃ ꠘꠣꠙꠣꠇ ꠛꠘꠦ, ꠛꠣ ꠇꠦꠃꠞꠞ ꠎꠃꠛꠘꠞ ꠙꠣꠘꠤ ꠛꠣꠞ ꠅꠄ,
LEV 22:5 ꠀꠞ ꠎꠦ ꠎꠘ ꠇꠥꠘꠥꠎꠣꠔ ꠝꠣꠐꠤꠔ ꠌꠟꠞꠣ ꠢꠥꠞꠥ-ꠝꠥꠞꠥ ꠘꠣꠙꠣꠇ ꠎꠣꠘꠖꠣꠞ ꠛꠣ ꠎꠦꠇꠥꠘꠥ ꠇꠣꠞꠘꠦ ꠘꠣꠙꠣꠇ ꠅꠀ ꠇꠥꠘꠥ ꠝꠣꠘꠡꠞꠦ ꠍꠁꠀ ꠢꠦ ꠘꠤꠎꠞꠦ ꠘꠣꠙꠣꠇ ꠛꠣꠘꠣꠄ,
LEV 22:6 ꠔꠦ ꠢꠣꠁꠘ꠆ꠎꠣ ꠙꠞ꠆ꠎꠘ꠆ꠔ ꠢꠦ ꠘꠣꠙꠣꠇ ꠢꠣꠟꠔꠦꠃ ꠞꠁꠛ, ꠀꠞ ꠙꠣꠘꠤꠖꠤ ꠘꠣꠁꠀ ꠢꠣꠞꠤ ꠙꠣꠇ-ꠍꠣꠚ ꠘꠣ ꠅꠀ ꠙꠞ꠆ꠎꠘ꠆ꠔ ꠇꠥꠞꠛꠣꠘꠤꠞ ꠇꠥꠘꠥ ꠙꠛꠤꠔ꠆ꠞ ꠎꠤꠘꠤꠡ ꠈꠣꠅꠀ ꠔꠣꠞ ꠟꠣꠉꠤ ꠢꠣꠞꠣꠝ।
LEV 22:7 ꠛꠣꠖꠦ ꠡꠥꠞꠥꠎ ꠒꠥꠛꠤꠀ ꠢꠣꠞꠟꠦ ꠢꠦ ꠎꠦꠛꠟꠣ ꠙꠣꠇ-ꠍꠣꠚ ꠅꠁꠛ, ꠅꠃ ꠡꠝꠄ ꠢꠦ ꠁꠔꠣ ꠈꠣꠁꠔ ꠙꠣꠞꠛ। ꠁꠔꠣ ꠔ ꠔꠣꠞꠃ ꠈꠣꠘꠤ।
LEV 22:8 ꠁꠝꠣꠝꠦ ꠇꠥꠘꠥ ꠝꠞꠣ ꠙꠡꠥ ꠛꠣ ꠎꠋꠟꠤ ꠎꠣꠘꠥꠀꠞꠞ ꠕꠣꠛꠣꠄ ꠝꠣꠞꠣ ꠇꠥꠘꠥ ꠙꠡꠥꠞ ꠉꠥꠡ꠆ꠔ ꠈꠣꠁꠀ ꠘꠤꠎꠞꠦ ꠘꠣꠙꠣꠇ ꠛꠣꠘꠣꠁꠅ ꠘꠣ। ꠀꠝꠤꠃ ꠔ ꠝꠣꠛꠥꠖ।
LEV 22:9 “ꠁꠝꠣꠝ ꠅꠇꠟꠞ ꠛꠦꠙꠣꠞꠦ ꠀꠝꠤ ꠎꠦꠔꠣ ꠀꠁꠘ-ꠇꠣꠘꠥꠘ ꠖꠤꠍꠤ, ꠁꠔꠣ ꠔꠣꠞꠣ ꠝꠣꠘꠤꠀ ꠌꠟꠃꠇ। ꠀꠞꠘꠣꠄ ꠖꠥꠡꠤ ꠛꠘꠛꠣꠄ ꠀꠞ ꠘꠣꠙꠣꠇꠤꠞ ꠖꠞꠥꠘ ꠔꠣꠞꠣꠞ ꠝꠞꠘ ꠅꠁꠛ। ꠝꠘꠅ ꠞꠣꠈꠤꠅ, ꠀꠝꠤ ꠝꠣꠛꠥꠖꠦꠃ ꠔꠣꠞꠣꠞꠦ ꠙꠛꠤꠔ꠆ꠞ ꠇꠞꠤ।
LEV 22:10 “ꠁꠝꠣꠝ ꠙꠞꠤꠛꠣꠞꠞ ꠝꠣꠘꠥꠡ ꠍꠣꠠꠣ ꠖꠥꠍꠞꠣ ꠇꠥꠘꠥ ꠎꠘꠦ ꠇꠥꠞꠛꠣꠘꠤꠞ ꠙꠛꠤꠔ꠆ꠞ ꠎꠤꠘꠤꠡ ꠈꠣꠅꠀ ꠘꠤꠡꠦꠗ। ꠁꠝꠣꠝꠞ ꠇꠥꠘꠥ ꠝꠦꠝꠣꠘ ꠛꠣ ꠇꠣꠝꠟꠣꠄꠅ ꠁꠔꠣ ꠈꠣꠅꠀ ꠢꠣꠞꠣꠝ।
LEV 22:11 ꠅꠁꠟꠦ ꠁꠝꠣꠝꠞ ꠈꠞꠤꠖꠣ ꠉꠥꠟꠣꠝꠦ ꠛꠣ ꠔꠣꠘ ꠛꠣꠠꠤꠔ ꠎꠘꠝꠤꠍꠦ ꠁꠟꠣꠈꠣꠘ ꠉꠥꠟꠣꠝꠦ ꠁꠔꠣ ꠈꠣꠅꠀ ꠎꠣꠁꠎ।
LEV 22:12 ꠁꠝꠣꠝꠞ ꠙꠥꠠꠤ ꠎꠥꠖꠤ ꠀꠞꠇ ꠁꠝꠣꠝ ꠍꠣꠠꠣ ꠛꠣꠁꠞꠣ ꠇꠥꠘꠥ ꠖꠣꠝꠣꠘ꠆ꠖꠞ ꠟꠉꠦ ꠛꠤꠀ-ꠡꠣꠖꠤ ꠅꠄ, ꠔꠦ ꠔꠣꠁꠅ ꠇꠥꠞꠛꠣꠘꠤꠞ ꠅꠃ ꠙꠛꠤꠔ꠆ꠞ ꠎꠤꠘꠤꠡ ꠈꠣꠅꠀ ꠢꠣꠞꠣꠝ।
LEV 22:13 ꠅꠁꠟꠦ ꠁꠝꠣꠝꠞ ꠇꠥꠘꠥ ꠠꠣꠠꠤ ꠙꠥꠠꠤ ꠛꠣ ꠔꠣꠟꠣꠇ ꠙꠣꠅꠀ ꠘꠤꠀꠅꠟꠣꠖꠤ ꠇꠥꠘꠥ ꠙꠥꠠꠤ ꠎꠥꠖꠤ ꠛꠣꠚꠞ ꠛꠣꠠꠤꠔ ꠞꠁꠛꠣꠞ ꠟꠣꠉꠤ ꠢꠤꠞꠛꠣꠞ ꠀꠁꠅꠄ, ꠔꠦ ꠔꠣꠁ ꠔ ꠛꠣꠚꠞ ꠈꠣꠘꠤꠞ ꠅꠋꠡ ꠙꠣꠁꠛ। “ꠁꠝꠣꠝ ꠙꠞꠤꠛꠣꠞꠞ ꠛꠣꠁꠞꠣ ꠇꠥꠘꠥ ꠎꠘꠦ ꠇꠥꠞꠛꠣꠘꠤꠞ ꠙꠛꠤꠔ꠆ꠞ ꠇꠥꠘꠥ ꠈꠣꠘꠤ ꠈꠣꠅꠀ ꠎꠣꠁꠎ ꠘꠣꠄ।
LEV 22:14 ꠇꠦꠃ ꠎꠥꠖꠤ ꠜꠥꠟ ꠇꠞꠤꠀ ꠁꠔꠣ ꠈꠣꠁꠟꠣꠄ, ꠔꠦ ꠁ ꠎꠘꠦ ꠁꠝꠣꠝꠞ ꠉꠦꠍꠦ ꠈꠦꠔꠤ-ꠙꠥꠞꠘ ꠖꠤꠔꠦ ꠅꠁꠛ। ꠅꠃ ꠈꠣꠘꠤꠞ ꠖꠣꠝꠞ ꠟꠉꠦ ꠀꠞꠅ ꠙꠣꠌ ꠛꠣꠐꠞ ꠄꠇ ꠛꠣꠐ ꠖꠣꠝ ꠛꠦꠡꠤ ꠖꠤꠔꠦ ꠅꠁꠛ।
LEV 22:15 ꠛꠘꠤ ꠁꠍꠞꠣꠁꠟꠦ ꠝꠣꠛꠥꠖꠞ ꠘꠣꠝꠦ ꠔꠣꠞꠣꠞ ꠎꠦ ꠎꠤꠘꠤꠡ ꠙꠛꠤꠔ꠆ꠞ ꠇꠥꠞꠛꠣꠘꠤ ꠢꠤꠡꠣꠛꠦ ꠖꠣꠘ ꠇꠞꠂꠘ, ꠁꠝꠣꠝ ꠅꠇꠟꠦ ꠎꠣꠘꠥ ꠁꠔꠣꠞꠦ ꠅꠙꠛꠤꠔ꠆ꠞ ꠘꠣ ꠛꠣꠘꠣꠁꠘ।
LEV 22:16 ꠔꠣꠞꠣ ꠛꠣꠁꠞꠣ ꠝꠣꠘꠡꠞꠦ ꠁꠔꠣ ꠈꠣꠁꠔꠦ ꠖꠤꠀ ꠝꠣꠘꠡꠞꠦ ꠖꠥꠡꠤ ꠛꠣꠘꠣꠁꠀ ꠈꠦꠔꠤ-ꠙꠥꠞꠘꠞ ꠖꠣꠠꠅ ꠎꠣꠘꠥ ꠘꠣ ꠚꠣꠟꠣꠁꠘ। ꠝꠘꠅ ꠞꠣꠈꠤꠅ, ꠀꠝꠤ ꠝꠣꠛꠥꠖꠦꠁ ꠔꠣꠞꠣꠞꠦ ꠙꠛꠤꠔ꠆ꠞ ꠇꠞꠤ।”
LEV 22:17 ꠛꠣꠖꠦ ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ,
LEV 22:18 “ꠔꠥꠝꠤ ꠉꠤꠀ ꠁꠝꠣꠝ ꠢꠣꠞꠥꠘ, ꠔꠣꠞ ꠙꠥꠀꠂꠘ ꠀꠞ ꠢꠇꠟ ꠛꠘꠤ ꠁꠍꠞꠣꠁꠟꠞꠦ ꠇꠅ, ꠔꠥꠝꠞꠣꠞ ꠇꠥꠘꠥ ꠝꠣꠘꠡꠦ ꠛꠣ ꠔꠥꠝꠞꠣꠞ ꠟꠉꠦ ꠛꠡꠔ ꠇꠞꠞꠣ ꠜꠤꠘ-ꠖꠦꠡꠤ ꠇꠥꠘꠥ ꠎꠘꠦ ꠎꠥꠖꠤ ꠝꠣꠘ꠆ꠘꠔ ꠀꠖꠣꠄ ꠇꠞꠣꠞ ꠟꠣꠉꠤ ꠛꠣ ꠘꠤꠎꠞ ꠈꠥꠡꠤꠄ ꠘꠚꠟ ꠇꠥꠞꠛꠣꠘꠤ ꠢꠤꠡꠣꠛꠦ ꠝꠣꠛꠥꠖꠞ ꠘꠣꠝꠦ ꠎꠣꠟꠣꠁꠟ ꠇꠥꠞꠛꠣꠘꠤ ꠖꠤꠛꠣꠞ ꠘꠤꠅꠔꠦ ꠇꠥꠘꠥꠔꠣ ꠟꠁꠀ ꠀꠄ,
LEV 22:19 ꠔꠦ ꠁꠇꠐꠣ ꠅꠁꠔꠦ ꠅꠁꠛ ꠄꠉꠥ ꠘꠤꠈꠥꠔ ꠛꠤꠍꠣꠟ, ꠝꠦꠠꠣ ꠛꠣ ꠍꠣꠉꠟꠞ ꠙꠣꠑꠣ। ꠁꠟꠣ ꠘꠣ ꠅꠁꠟꠦ ꠔ ꠝꠣꠛꠥꠖꠦ ꠇꠛꠥꠟ ꠇꠞꠔꠣ ꠘꠣꠄ।
LEV 22:20 ꠈꠥꠔ ꠀꠟꠣ ꠇꠥꠘꠥ ꠙꠡꠥꠖꠤ ꠎꠣꠘꠥ ꠇꠥꠞꠛꠣꠘꠤ ꠀꠖꠣꠄ ꠘꠣ ꠇꠞꠦ, ꠇꠞꠟꠦꠅ ꠔꠣꠞ ꠇꠥꠘꠥ ꠚꠣꠄꠖꠣ ꠅꠁꠔ ꠘꠣꠄ।
LEV 22:21 ꠇꠥꠘꠥ ꠝꠣꠘ꠆ꠘꠔ ꠀꠖꠣꠄ ꠇꠞꠣꠞ ꠟꠣꠉꠤ ꠛꠣ ꠘꠤꠎꠞ ꠈꠥꠡꠤꠄ ꠘꠚꠟ ꠇꠥꠞꠛꠣꠘꠤ ꠢꠤꠡꠣꠛꠦ ꠇꠦꠃ ꠎꠥꠖꠤ ꠝꠣꠛꠥꠖꠞ ꠘꠣꠝꠦ ꠍꠣꠟꠣꠝꠔꠤ ꠇꠥꠞꠛꠣꠘꠤ ꠖꠤꠔ ꠌꠣꠄ, ꠔꠦ ꠁꠔꠣꠞ ꠟꠣꠉꠤ ꠄꠉꠥ ꠘꠤꠈꠥꠔ ꠉꠞꠥ, ꠝꠦꠠꠣ ꠛꠣ ꠍꠣꠉꠟ ꠀꠘꠔꠦ ꠅꠁꠛ। ꠉꠔꠞꠅ ꠈꠥꠔ ꠀꠟꠣ ꠇꠥꠘꠥ ꠙꠡꠥꠖꠤ ꠇꠥꠞꠛꠣꠘꠤ ꠖꠤꠟꠦ ꠁꠔꠣ ꠇꠛꠥꠟ ꠅꠁꠔ ꠘꠣꠄ।
LEV 22:22 ꠇꠥꠘꠥ ꠝꠣꠘꠡꠦ ꠎꠣꠘꠥ ꠇꠥꠞꠛꠣꠘꠤꠞ ꠘꠤꠅꠔꠦ ꠀꠘ꠆ꠖꠣ, ꠟꠦꠋꠠꠣ, ꠇꠣꠐꠣ-ꠌꠤꠞꠣ, ꠇꠥꠘꠥ ꠅꠋꠉ ꠇꠣꠐꠣ, ꠙꠥꠎꠀꠟꠣ ꠊꠣ, ꠛꠣ ꠖꠣꠃꠖ-ꠈꠣꠃꠎꠟꠤ ꠇꠥꠘꠥ ꠙꠡꠥꠞꠦ ꠝꠣꠛꠥꠖꠞ ꠖꠞꠛꠣꠞꠅ ꠘꠣ ꠀꠘꠦ, ꠎꠣꠟꠣꠁꠟ ꠇꠥꠞꠛꠣꠘꠤꠞ ꠟꠣꠉꠤ ꠅꠟꠣ ꠈꠥꠔ ꠀꠟꠣ ꠇꠥꠘꠥ ꠙꠡꠥꠞꠦ ꠇꠥꠞꠛꠣꠘꠤ ꠈꠣꠘꠣꠞ ꠃꠙꠞꠦ ꠔꠥꠟꠤꠅ ꠘꠣ।
LEV 22:23 ꠔꠣ-ꠅ ꠙꠡꠥꠞ ꠇꠥꠘꠥ ꠅꠋꠉ ꠘꠤꠅꠝꠞ ꠛꠦꠡꠤ ꠟꠣꠝ꠆ꠛꠣ ꠛꠣ ꠛꠣꠐ꠆ꠐꠤ ꠕꠣꠇꠟꠦ, ꠅꠟꠣꠈꠣꠘ ꠙꠡꠥꠞꠦ ꠘꠤꠎꠞ ꠈꠥꠡꠤꠄ ꠘꠚꠟ ꠇꠥꠞꠛꠣꠘꠤ ꠢꠤꠡꠣꠛꠦ ꠖꠤꠔꠣ ꠙꠣꠞꠛꠣ, ꠅꠁꠟꠦ ꠇꠥꠘꠥ ꠝꠣꠘ꠆ꠘꠔ ꠙꠥꠞꠘꠞ ꠟꠣꠉꠤ ꠁꠟꠣꠈꠣꠘ ꠇꠥꠞꠛꠣꠘꠤ ꠇꠛꠥꠟ ꠅꠁꠔ ꠘꠣꠄ।
LEV 22:24 ꠇꠥꠘꠥ ꠙꠡꠥꠞ ꠅꠘ꠆ꠒꠇꠥꠡ ꠎꠥꠖꠤ ꠕꠦꠔꠟꠣ, ꠍꠦꠌꠣ, ꠇꠣꠐꠣ-ꠌꠤꠞꠣ ꠕꠣꠇꠦ, ꠔꠦ ꠁꠔꠣꠞꠦ ꠔꠥꠝꠞꠣ ꠝꠣꠛꠥꠖꠞ ꠘꠣꠝꠦ ꠇꠥꠞꠛꠣꠘꠤ ꠖꠤꠅ ꠘꠣ, ꠘꠤꠎꠞ ꠖꠦꠡꠅ ꠉꠤꠀ ꠁꠟꠣ ꠇꠞꠤꠅ ꠘꠣ।
LEV 22:25 ꠜꠤꠘ ꠎꠣꠔꠤꠞ ꠇꠥꠘꠥ ꠝꠣꠘꠡꠞ ꠉꠦꠍ ꠕꠣꠇꠤ ꠅꠟꠣꠈꠣꠘ ꠙꠡꠥ ꠀꠘꠤꠀ ꠔꠥꠝꠞꠣꠞ ꠀꠟ꠆ꠟꠣꠞ ꠘꠣꠝꠦ ꠇꠥꠞꠛꠣꠘꠤ ꠖꠤꠅ ꠘꠣ। ꠁꠔꠣꠞ ꠉꠔꠞꠅ ꠈꠥꠔ ꠕꠣꠇꠣꠄ ꠁꠔꠣꠖꠤ ꠇꠥꠞꠛꠣꠘꠤ ꠖꠤꠟꠦ ꠔꠥꠝꠞꠣꠞ ꠇꠥꠘꠥ ꠚꠣꠄꠖꠣ ꠅꠁꠔ ꠘꠣꠄ।”
LEV 22:26 ꠛꠣꠖꠦ ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ,
LEV 22:27 “ꠎꠘꠝꠞ ꠛꠣꠖ ꠕꠣꠇꠤ ꠡꠣꠔ ꠖꠤꠘ ꠙꠞ꠆ꠎꠘ꠆ꠔ ꠉꠞꠥ ꠛꠣ ꠍꠣꠉꠟ ꠛꠣ ꠝꠦꠠꠣ-ꠛꠣꠁꠌ꠆ꠌꠣꠞꠦ ꠔꠣꠞ ꠝꠣʼꠞ ꠟꠉꠦ ꠞꠁꠔꠦ ꠖꠤꠛꠣꠄ। ꠀꠐ ꠘꠝ꠆ꠛꠞ ꠖꠤꠘ ꠕꠣꠇꠤ ꠁꠔꠣꠞꠦ ꠝꠣꠛꠥꠖꠞ ꠘꠣꠝꠦ ꠀꠉꠥꠘꠤꠔ ꠖꠦꠅꠀ ꠇꠥꠞꠛꠣꠘꠤ ꠢꠤꠡꠣꠛꠦ ꠖꠦꠅꠀ ꠎꠣꠁꠛ।
LEV 22:28 ꠔꠣ-ꠅ ꠉꠣꠁ ꠀꠞ ꠔꠣꠁꠞ ꠛꠣꠍꠥꠞꠞꠦ, ꠝꠦꠠꠤ ꠛꠣ ꠍꠣꠉꠤ ꠀꠞ ꠔꠣꠁꠞ ꠛꠣꠁꠌ꠆ꠌꠣꠞꠦ, ꠄꠇꠁ ꠖꠤꠘꠦ ꠎꠛ ꠇꠞꠣ ꠢꠣꠞꠣꠝ।
LEV 22:29 ꠔꠥꠝꠞꠣ ꠝꠣꠛꠥꠖꠞ ꠘꠣꠝꠦ ꠇꠥꠘꠥ ꠡꠥꠇꠥꠞꠣꠘꠣ ꠇꠥꠞꠛꠣꠘꠤ ꠖꠤꠔꠦ ꠌꠣꠁꠟꠦ, ꠁꠔꠣ ꠅꠃ ꠘꠝꠥꠘꠣꠄ ꠀꠖꠣꠄ ꠇꠞꠤꠅ ꠎꠦꠟꠣ ꠔꠣꠁꠘ ꠈꠥꠡꠤ ꠅꠁꠘ।
LEV 22:30 ꠇꠥꠞꠛꠣꠘꠤꠞ ꠉꠥꠡ꠆ꠔ ꠇꠥꠞꠛꠣꠘꠤꠞ ꠖꠤꠘꠞ ꠝꠣꠎꠦ ꠈꠣꠁꠟꠤꠔꠦ ꠅꠁꠛ, ꠁꠔꠣ ꠛꠣꠖꠞ ꠖꠤꠘ ꠛꠤꠀꠘ ꠙꠞ꠆ꠎꠘ꠆ꠔ ꠕꠅꠀ ꠢꠣꠞꠣꠝ। ꠀꠝꠤꠃ ꠔ ꠝꠣꠛꠥꠖ।
LEV 22:31 “ꠔꠥꠝꠞꠣ ꠀꠝꠣꠞ ꠢꠥꠇꠥꠝ ꠝꠣꠘꠤꠅ ꠀꠞ ꠅꠃ ꠟꠣꠈꠣꠘ ꠌꠟꠤꠅ। ꠀꠝꠤꠃ ꠔ ꠝꠣꠛꠥꠖ।
LEV 22:32 ꠔꠥꠝꠞꠣ ꠀꠝꠣꠞ ꠙꠣꠇ-ꠙꠛꠤꠔ꠆ꠞ ꠘꠣꠝꠞꠦ ꠅꠡꠝ꠆ꠝꠣꠘ ꠇꠞꠤꠅ ꠘꠣ, ꠎꠣꠔꠦ ꠛꠘꠤ ꠁꠍꠞꠣꠁꠟꠞ ꠝꠣꠎꠦ ꠀꠝꠤ ꠙꠣꠇ-ꠙꠛꠤꠔ꠆ꠞ ꠢꠤꠡꠣꠛꠦ ꠉꠁꠘ꠆ꠘ ꠅꠁ। ꠀꠝꠤ ꠀꠟ꠆ꠟꠣꠄ ꠔꠥꠝꠞꠣꠞꠦ ꠙꠣꠇ-ꠙꠛꠤꠔ꠆ꠞ ꠛꠣꠘꠣꠁ।
LEV 22:33 ꠀꠝꠤ ꠔꠥꠝꠞꠣꠞ ꠝꠣꠛꠥꠖ ꠅꠀꠞ ꠘꠤꠅꠔꠦ ꠔꠥꠝꠞꠣꠞꠦ ꠝꠤꠡꠞ ꠖꠦꠡ ꠕꠣꠇꠤ ꠛꠣꠞ ꠇꠞꠤ ꠀꠘꠍꠤ। ꠀꠝꠤꠃ ꠔ ꠝꠣꠛꠥꠖ।”
LEV 23:1 ꠛꠣꠖꠦ ꠝꠣꠛꠥꠖꠦ ꠝꠥꠍꠣ ꠘꠛꠤꠞꠦ ꠇꠁꠟꠣ,
LEV 23:2 “ꠔꠥꠝꠤ ꠛꠘꠤ ꠁꠍꠞꠣꠁꠟꠞꠦ ꠎꠣꠘꠣꠁ ꠖꠦꠅ, ꠀꠝꠤ ꠝꠣꠛꠥꠖꠦ ꠔꠥꠝꠞꠣꠞ ꠟꠣꠉꠤ ꠅꠃ ꠁꠖ ꠅꠇꠟ ꠑꠤꠇ ꠇꠞꠟꠣꠝ, ꠔꠥꠝꠞꠣ ꠁꠔꠣꠞꠦ ꠙꠛꠤꠔ꠆ꠞ ꠝꠤꠟꠘ-ꠝꠣꠢꠚꠤꠟꠞ ꠖꠤꠘ ꠢꠤꠡꠣꠛꠦ ꠝꠣꠘꠛꠣꠄ।
LEV 23:3 “ꠢꠣꠙ꠆ꠔꠣꠔ ꠍꠄ ꠖꠤꠘ ꠔꠥꠝꠞꠣ ꠇꠣꠝ-ꠇꠣꠎ ꠇꠞꠤꠅ, ꠀꠞ ꠡꠣꠔ ꠘꠝ꠆ꠛꠞ ꠖꠤꠘ ꠅꠁꠟ ꠎꠤꠞꠣꠁꠛꠣꠞ ꠖꠤꠘ, ꠙꠛꠤꠔ꠆ꠞ ꠝꠤꠟꠘ-ꠝꠣꠢꠚꠤꠟꠞ ꠎꠥꠝ꠆ꠝꠣꠛꠣꠞ। ꠁ ꠖꠤꠘ ꠔꠥꠝꠞꠣ ꠇꠥꠘꠥ ꠇꠣꠝ-ꠇꠣꠎ ꠇꠞꠤꠅ ꠘꠣ, ꠔꠥꠝꠞꠣ ꠎꠦꠇꠥꠘꠥ ꠎꠣꠉꠣꠔ ꠛꠡꠔ ꠇꠞꠅ, ꠁ ꠖꠤꠘ ꠈꠣꠘ ꠔꠥꠝꠞꠣꠞ ꠝꠣꠛꠥꠖꠞ ꠘꠣꠝꠦ ꠙꠛꠤꠔ꠆ꠞ ꠎꠥꠝ꠆ꠝꠣꠛꠣꠞ ꠢꠤꠡꠣꠛꠦ ꠝꠣꠘꠤꠅ।
LEV 23:4 “ꠔꠥꠝꠞꠣꠞ ꠟꠣꠉꠤ ꠀꠝꠣꠞ ꠑꠤꠇ ꠇꠞꠣ ꠎꠔ ꠁꠖ ꠀꠍꠦ, ꠝꠣꠘꠤ ꠙꠛꠤꠔ꠆ꠞ ꠝꠤꠟꠘ-ꠝꠣꠢꠚꠤꠟꠞ ꠖꠤꠘ ꠢꠤꠡꠣꠛꠦ ꠎꠦꠔꠣ ꠝꠣꠘꠔꠣꠄ, ꠁꠔꠣ ꠀꠝꠤ ꠇꠁꠞꠣꠝ। ꠁꠔꠣ ꠅꠁꠟ:
LEV 23:5 “ꠛꠍꠞꠞ ꠙꠄꠟꠣ ꠌꠣꠘ꠆ꠖꠞ ꠌꠃꠖ꠆ꠖ ꠔꠣꠞꠤꠈꠞ ꠢꠣꠁꠘ꠆ꠎꠣ ꠕꠣꠇꠤ ꠝꠣꠛꠥꠖꠞ ꠘꠣꠝꠦ ꠀꠎꠣꠖꠤ ꠁꠖ ꠀꠞꠝ꠆ꠛ ꠅꠁꠛ,
LEV 23:6 ꠀꠞ ꠅꠃ ꠌꠣꠘ꠆ꠖꠞ ꠙꠘꠞ ꠔꠣꠞꠤꠈꠅ ꠝꠣꠛꠥꠖꠞ ꠘꠣꠝꠦ ꠈꠣꠝꠤꠞ ꠍꠣꠠꠣ ꠞꠥꠐꠤꠞ ꠁꠖ ꠀꠞꠝ꠆ꠛ ꠅꠁꠛ। ꠙꠥꠞꠣ ꠡꠣꠔ ꠖꠤꠘ ꠔꠥꠝꠞꠣ ꠈꠣꠝꠤꠞ ꠍꠣꠠꠣ ꠞꠥꠐꠤ ꠈꠣꠁꠛꠣꠄ।
LEV 23:7 ꠅꠃ ꠡꠣꠔ ꠖꠤꠘꠞ ꠙꠄꠟꠣ ꠖꠤꠘ ꠔꠥꠝꠞꠣꠞ ꠙꠛꠤꠔ꠆ꠞ ꠝꠤꠟꠘ-ꠝꠣꠢꠚꠤꠟ ꠅꠁꠛ, ꠅꠃ ꠖꠤꠘ ꠖꠥꠘꠤꠀꠛꠤ ꠘꠤꠅꠔꠦ ꠇꠥꠘꠥꠎꠣꠔ ꠇꠣꠝ-ꠇꠣꠎ ꠇꠞꠣ ꠔꠥꠝꠞꠣꠞ ꠟꠣꠉꠤ ꠢꠣꠞꠣꠝ।
LEV 23:8 ꠅꠃ ꠡꠣꠔ ꠖꠤꠘꠞ ꠙꠞꠔꠦꠇ ꠖꠤꠘ ꠔꠥꠝꠞꠣ ꠝꠣꠛꠥꠖꠞ ꠘꠣꠝꠦ ꠀꠉꠥꠘꠤꠔ ꠖꠦꠅꠀ ꠇꠥꠞꠛꠣꠘꠤ ꠖꠤꠛꠣꠄ। ꠛꠣꠖꠦ ꠡꠣꠔ ꠘꠝ꠆ꠛꠞ ꠖꠤꠘ ꠔꠥꠝꠞꠣꠞ ꠙꠛꠤꠔ꠆ꠞ ꠝꠤꠟꠘ-ꠝꠣꠢꠚꠤꠟ ꠅꠁꠛ, ꠅꠃ ꠖꠤꠘ ꠔꠥꠝꠞꠣ ꠖꠥꠘꠤꠀꠛꠤ ꠘꠤꠅꠔꠦ ꠇꠥꠘꠥ ꠇꠣꠝ-ꠇꠣꠎ ꠇꠞꠣ ꠢꠣꠞꠣꠝ।”
LEV 23:9 ꠝꠣꠛꠥꠖꠦ ꠝꠥꠍꠣ ꠘꠛꠤꠞꠦ ꠀꠞꠅ ꠇꠁꠟꠣ,
LEV 23:10 “ꠔꠥꠝꠤ ꠛꠘꠤ ꠁꠍꠞꠣꠁꠟꠞꠦ ꠎꠣꠘꠣꠁ ꠖꠦꠅ, ꠀꠝꠤ ꠝꠣꠛꠥꠖꠦ ꠔꠥꠝꠞꠣꠞꠦ ꠎꠦ ꠖꠦꠡ ꠅꠇꠟꠞ ꠝꠣꠟꠤꠇꠣꠘꠣ ꠖꠤꠞꠣꠝ, ꠢꠘꠅ ꠉꠤꠀ ꠢꠣꠞꠟꠦ ꠔꠥꠝꠞꠣ ꠎꠔꠛꠣꠞ ꠎꠝꠤꠘꠞ ꠚꠡꠟ ꠖꠣꠁꠛꠣꠄ, ꠅꠔꠛꠣꠞ ꠈꠦꠔꠞ ꠙꠄꠟꠣ ꠇꠣꠐꠣ ꠄꠇꠈꠣꠘ ꠝꠥꠁꠐ ꠟꠁꠀ ꠁꠝꠣꠝ ꠍꠣꠛꠞ ꠉꠦꠍꠦ ꠎꠣꠁꠅ।
LEV 23:11 ꠉꠦꠟꠦ ꠁꠝꠣꠝꠦ ꠅꠃ ꠝꠥꠁꠐ ꠘꠤꠀ ꠝꠣꠛꠥꠖꠞ ꠍꠣꠝꠘꠦ ꠖꠥꠟꠣꠁꠛꠣ। ꠎꠥꠝ꠆ꠝꠣꠛꠣꠞꠞ ꠛꠣꠖꠞ ꠖꠤꠘ ꠔꠣꠁꠘ ꠁꠈꠣꠘ ꠖꠥꠟꠣꠁꠛꠣ, ꠔꠦꠃ ꠝꠣꠛꠥꠖ ꠔꠥꠝꠞꠣꠞ ꠃꠙꠞꠦ ꠈꠥꠡꠤ ꠅꠁꠛꠣ।
LEV 23:12 ꠁꠝꠣꠝ ꠍꠣꠛꠦ ꠎꠦꠖꠤꠘ ꠅꠃ ꠝꠥꠁꠐ ꠖꠥꠟꠣꠁꠛꠣ, ꠅꠃ ꠖꠤꠘ ꠔꠥꠝꠞꠣ ꠝꠣꠛꠥꠖꠞ ꠘꠣꠝꠦ ꠄꠇ ꠛꠍꠞ ꠛꠄꠅꠡꠤ ꠄꠉꠥ ꠘꠤꠈꠥꠔ ꠝꠦꠠꠣ-ꠛꠣꠁꠌ꠆ꠌꠣꠞꠦ ꠎꠣꠟꠣꠁꠟ ꠇꠥꠞꠛꠣꠘꠤ ꠢꠤꠡꠣꠛꠦ ꠖꠤꠛꠣꠄ।
LEV 23:13 ꠄꠞꠟꠉꠦ ꠗꠣꠘ-ꠉꠝꠞ ꠍꠖꠉꠣꠞ ꠟꠣꠉꠤ ꠔꠦꠟ ꠝꠣꠈꠣꠁꠟ ꠌꠣꠁꠞ ꠡꠦꠞ ꠝꠄꠖꠣ ꠖꠤꠛꠣꠄ। ꠁꠔꠣ ꠔ ꠝꠣꠛꠥꠖꠞ ꠘꠣꠝꠞ ꠀꠉꠥꠘꠤꠔ ꠖꠦꠅꠀ ꠍꠖꠉꠣ, ꠁꠔꠣꠞ ꠗꠥꠝꠣꠞ ꠊꠦꠞꠣꠘꠦ ꠔꠣꠁꠘ ꠈꠥꠡꠤ ꠅꠁꠘ। ꠀꠞ ꠄꠞ ꠟꠉꠞ ꠡꠞꠛꠔ-ꠙꠣꠘꠤꠞ ꠍꠖꠉꠣꠞ ꠘꠤꠅꠔꠦ ꠀꠋꠉꠥꠞꠞ ꠄꠇ ꠡꠦꠞ ꠡꠞꠛꠔꠅ ꠖꠤꠛꠣꠄ।
LEV 23:14 ꠔꠥꠝꠞꠣꠞ ꠈꠦꠔꠞ ꠚꠡꠟ ꠖꠣꠁꠀ ꠢꠣꠞꠤ, ꠔꠥꠝꠞꠣꠞ ꠀꠟ꠆ꠟꠣꠞ ꠘꠣꠝꠞ ꠅꠃ ꠍꠖꠉꠣ ꠀꠖꠣꠄ ꠇꠞꠣꠞ ꠀꠉ ꠙꠞ꠆ꠎꠘ꠆ꠔ ꠘꠄꠀ ꠚꠡꠟ ꠔꠥꠝꠞꠣ ꠈꠣꠁꠅ ꠘꠣ। ꠁꠔꠣꠖꠤ ꠞꠥꠐꠤ ꠛꠣꠘꠣꠁꠀ ꠛꠣ ꠀꠉꠥꠘꠤꠔ ꠜꠣꠎꠤꠀ ꠈꠣꠅꠀꠅ ꠘꠤꠡꠦꠗ। ꠔꠥꠝꠞꠣ ꠎꠦꠘꠅꠃ ꠞꠅ ꠘꠣ ꠇꠦꠘꠦ, ꠅꠀꠞꠤꠡꠞ ꠙꠞ ꠅꠀꠞꠤꠡ ꠗꠞꠤ ꠌꠤꠞꠇꠣꠟ ꠅꠃ ꠘꠤꠅꠝ ꠝꠣꠘꠤꠅ।
LEV 23:15 “ꠀꠞ ꠅꠃ ꠎꠥꠝ꠆ꠝꠣꠛꠣꠞꠞ ꠛꠣꠖꠞ ꠖꠤꠘ, ꠝꠣꠘꠤ ꠎꠦꠖꠤꠘ ꠖꠥꠟꠘꠣ ꠇꠥꠞꠛꠣꠘꠤ ꠟꠣꠉꠤ ꠚꠡꠟꠞ ꠝꠥꠁꠐ ꠟꠁꠀ ꠀꠁꠛꠣꠄ, ꠅꠃ ꠖꠤꠘ ꠕꠣꠇꠤ ꠡꠣꠔ ꠢꠣꠙ꠆ꠔꠣꠄ ꠡꠣꠔ ꠎꠥꠝ꠆ꠝꠣꠛꠣꠞ ꠉꠘꠤꠛꠣꠄ।
LEV 23:16 ꠅꠃ ꠡꠣꠔ ꠎꠥꠝ꠆ꠝꠣꠞ ꠛꠣꠖꠞ ꠖꠤꠘ, ꠝꠣꠘꠤ ꠙꠁꠘ꠆ꠌꠣꠡ ꠖꠤꠘꠞ ꠖꠤꠘ ꠔꠥꠝꠞꠣ ꠝꠣꠛꠥꠖꠞ ꠘꠣꠝꠦ ꠘꠄꠀ ꠚꠡꠟꠞ ꠍꠖꠉꠣ ꠀꠖꠣꠄ ꠇꠞꠛꠣꠄ।
LEV 23:17 ꠔꠥꠝꠞꠣ ꠘꠤꠎꠞ ꠛꠣꠠꠤ ꠕꠣꠇꠤ ꠝꠣꠛꠥꠖꠞ ꠘꠣꠝꠦ ꠖꠥꠟꠘꠣ ꠇꠥꠞꠛꠣꠘꠤ ꠖꠤꠛꠣꠞ ꠘꠤꠅꠔꠦ ꠈꠦꠔꠞ ꠙꠄꠟꠣ ꠚꠡꠟ ꠕꠣꠇꠤ ꠇꠤꠍꠥ ꠚꠡꠟ ꠀꠘꠤꠅ। ꠔꠥꠝꠞꠣ ꠌꠣꠁꠞ ꠡꠦꠞ ꠝꠄꠖꠣꠖꠤ ꠛꠣꠘꠣꠁꠟ ꠈꠣꠝꠤꠞ ꠙꠥꠞꠣꠁꠟ ꠖꠥꠈꠣꠘ ꠘꠣꠘ ꠞꠥꠐꠤ ꠀꠘꠤꠅ।
LEV 23:18 ꠅꠃ ꠞꠥꠐꠤꠞ ꠟꠉꠦ ꠄꠇ ꠛꠍꠞ ꠛꠄꠅꠡꠤ ꠡꠣꠔꠐꠣ ꠘꠤꠈꠥꠔ ꠝꠦꠠꠣ-ꠛꠣꠁꠌ꠆ꠌꠣ, ꠄꠇꠐꠣ ꠛꠤꠍꠣꠟ, ꠝꠦꠠꠣꠞ ꠖꠥꠁꠐꠣ ꠙꠣꠑꠣ ꠀꠘꠤꠅ। ꠅꠃ ꠙꠡꠥ ꠅꠇꠟ ꠖꠤꠀ ꠝꠣꠛꠥꠖꠞ ꠘꠣꠝꠦ ꠄꠇꠈꠣꠘ ꠎꠣꠟꠣꠁꠟ ꠇꠥꠞꠛꠣꠘꠤ ꠀꠖꠣꠄ ꠇꠞꠛꠣꠄ, ꠅꠔꠣꠞ ꠟꠉꠦ ꠘꠤꠅꠝ ꠝꠣꠚꠤꠇ ꠗꠣꠘ-ꠉꠝꠞ ꠍꠖꠉꠣ ꠀꠞ ꠡꠞꠛꠔ-ꠙꠣꠘꠤꠞ ꠍꠖꠉꠣꠅ ꠖꠤꠛꠣꠄ। ꠁꠔꠣ ꠔ ꠀꠉꠥꠘꠤꠔ ꠖꠦꠅꠀ ꠄꠇ ꠘꠝꠥꠘꠣꠞ ꠇꠥꠞꠛꠣꠘꠤ, ꠁꠔꠣꠞ ꠗꠥꠝꠣꠞ ꠊꠦꠞꠣꠘꠦ ꠝꠣꠛꠥꠖ ꠈꠥꠡꠤ ꠅꠁꠘ।
LEV 23:19 ꠛꠣꠖꠦ ꠔꠥꠝꠞꠣ ꠉꠥꠘꠣꠞ ꠇꠚꠞꠣꠞ ꠇꠥꠞꠛꠣꠘꠤ ꠢꠤꠡꠣꠛꠦ ꠄꠉꠥ ꠙꠣꠑꠣ ꠍꠣꠉꠟ, ꠀꠞ ꠍꠣꠟꠣꠝꠔꠤ ꠇꠥꠞꠛꠣꠘꠤꠞ ꠟꠣꠉꠤ ꠄꠇ ꠛꠍꠞ ꠛꠄꠅꠡꠤ ꠖꠥꠉꠥ ꠝꠦꠠꠣ-ꠛꠣꠁꠌ꠆ꠌꠣ ꠇꠥꠞꠛꠣꠘꠤ ꠖꠤꠛꠣꠄ।
LEV 23:20 ꠁꠝꠣꠝ ꠍꠣꠛꠦ ꠖꠥꠟꠘꠣ ꠇꠥꠞꠛꠣꠘꠤ ꠢꠤꠡꠣꠛꠦ ꠝꠣꠛꠥꠖꠞ ꠍꠣꠝꠘꠦ ꠅꠃ ꠖꠥꠁꠅ ꠝꠦꠠꠣ-ꠛꠣꠁꠌ꠆ꠌꠣ ꠀꠞ ꠈꠦꠔꠞ ꠙꠄꠟꠣ ꠚꠡꠟꠖꠤ ꠛꠣꠘꠣꠁꠟ ꠞꠥꠐꠤ ꠘꠤꠀ ꠖꠥꠟꠣꠁꠛꠣ। ꠁꠔꠣ ꠔ ꠝꠣꠛꠥꠖꠞ ꠘꠣꠝꠞ ꠇꠥꠞꠛꠣꠘꠤꠞ ꠙꠣꠇ-ꠙꠛꠤꠔ꠆ꠞ ꠍꠣꠝꠣꠘꠣ, ꠁꠔꠣ ꠁꠝꠣꠝ ꠍꠣꠛꠞ ꠙꠣꠅꠘꠣ।
LEV 23:21 ꠈꠦꠔꠞ ꠚꠡꠟ ꠖꠣꠅꠀꠞ ꠅꠃ ꠁꠖꠞ ꠖꠤꠘ ꠔꠥꠝꠞꠣ ꠄꠇꠐꠣ ꠙꠛꠤꠔ꠆ꠞ ꠝꠤꠟꠘ-ꠝꠣꠢꠚꠤꠟ ꠇꠞꠤꠅ। ꠅꠃ ꠖꠤꠘ ꠖꠥꠘꠤꠀꠛꠤ ꠘꠤꠅꠔꠦ ꠇꠥꠘꠥ ꠇꠣꠝ-ꠇꠣꠎ ꠇꠞꠤꠅ ꠘꠣ। ꠔꠥꠝꠞꠣ ꠎꠦꠘꠅꠃ ꠞꠅ ꠘꠣ ꠇꠦꠘꠦ, ꠅꠀꠞꠤꠡꠞ ꠙꠞ ꠅꠀꠞꠤꠡ ꠗꠞꠤ ꠢꠞ-ꠢꠣꠝꠦꠡꠣ ꠁꠔꠣ ꠀꠝꠟ ꠇꠞꠤꠅ।
LEV 23:22 “ꠔꠥꠝꠞꠣ ꠎꠦꠛꠟꠣ ꠈꠦꠔꠞ ꠚꠡꠟ ꠖꠣꠁꠛꠣꠄ, ꠅꠃ ꠡꠝꠄ ꠔꠥꠝꠞꠣ ꠎꠝꠤꠘꠞ ꠀꠁꠟꠞ ꠇꠣꠘ꠆ꠖꠣꠞ ꠚꠡꠟ ꠍꠣꠚ ꠇꠞꠤꠀ ꠇꠣꠐꠤꠅ ꠘꠣ, ꠀꠞ ꠖꠣꠅꠀꠞ ꠛꠣꠖꠦ ꠅꠃ ꠎꠝꠤꠘꠅ ꠚꠣꠟꠣꠁꠟ ꠚꠡꠟ ꠟꠥꠞꠤꠅ ꠘꠣ। ꠉꠞꠤꠛ-ꠖꠥꠈꠤ ꠀꠞ ꠛꠤꠖꠦꠡꠤ ꠝꠥꠍꠣꠚꠤꠞꠞ ꠟꠣꠉꠤ ꠁꠔꠣ ꠕꠁꠅ। ꠝꠘꠅ ꠞꠣꠈꠤꠅ, ꠀꠝꠤ ꠀꠟ꠆ꠟꠣꠃ ꠔꠥꠝꠞꠣꠞ ꠝꠣꠛꠥꠖ।”
LEV 23:23 ꠛꠣꠖꠦ ꠝꠣꠛꠥꠖꠦ ꠝꠥꠍꠣ ꠘꠛꠤꠞꠦ ꠇꠁꠟꠣ,
LEV 23:24 “ꠔꠥꠝꠤ ꠛꠘꠤ ꠁꠍꠞꠣꠁꠟꠞꠦ ꠎꠣꠘꠣꠁ ꠖꠦꠅ, ꠛꠍꠞꠞ ꠡꠣꠔ ꠘꠝ꠆ꠛꠞ ꠌꠣꠘ꠆ꠖꠞ ꠙꠄꠟꠣ ꠖꠤꠘꠞꠦ ꠔꠥꠝꠞꠣ ꠙꠥꠞꠣꠙꠥꠞ ꠎꠤꠞꠣꠘꠤꠞ ꠖꠤꠘ ꠢꠤꠡꠣꠛꠦ ꠝꠣꠘꠤꠅ। ꠅꠃ ꠖꠤꠘ ꠔꠥꠝꠞꠣ ꠡꠤꠋꠉꠣ ꠛꠣꠎꠣꠁꠅ ꠀꠞ ꠢꠇꠟꠦ ꠝꠤꠟꠤꠀ ꠁꠖꠞ ꠙꠛꠤꠔ꠆ꠞ ꠝꠤꠟꠘ-ꠝꠣꠢꠚꠤꠟ ꠇꠞꠤꠅ।
LEV 23:25 ꠅꠃ ꠖꠤꠘ ꠔꠥꠝꠞꠣ ꠖꠥꠘꠤꠀꠛꠤ ꠘꠤꠅꠔꠦ ꠇꠥꠘꠥ ꠇꠣꠝ-ꠇꠣꠎ ꠇꠞꠤꠅ ꠘꠣ, ꠈꠣꠟꠤ ꠝꠣꠛꠥꠖꠞ ꠘꠣꠝꠦ ꠀꠉꠥꠘꠤꠔ ꠖꠦꠅꠀ ꠍꠖꠉꠣ ꠀꠖꠣꠄ ꠇꠞꠤꠅ।”
LEV 23:26 ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ,
LEV 23:27 “ꠅꠃ ꠡꠣꠔ ꠘꠝ꠆ꠛꠞ ꠌꠣꠘ꠆ꠖꠞ ꠖꠡ ꠘꠝ꠆ꠛꠞ ꠖꠤꠘ ꠅꠁꠟ ꠇꠚꠞꠣꠞ ꠁꠖꠞ ꠖꠤꠘ। ꠁ ꠖꠤꠘ ꠔꠥꠝꠞꠣ ꠄꠇꠐꠣ ꠙꠛꠤꠔ꠆ꠞ ꠝꠤꠟꠘ-ꠝꠣꠢꠚꠤꠟ ꠇꠞꠤꠅ। ꠙꠞꠔꠦꠇ ꠎꠘꠦ ꠘꠔ ꠅꠁꠀ ꠎꠣꠞꠎꠤꠞ ꠖꠤꠟ ꠡꠙꠤꠀ ꠖꠤꠀ ꠝꠣꠛꠥꠖꠞ ꠘꠣꠝꠦ ꠀꠉꠥꠘꠤꠔ ꠖꠦꠅꠀ ꠍꠖꠉꠣ ꠀꠖꠣꠄ ꠇꠞꠤꠅ।
LEV 23:28 ꠁꠔꠣ ꠅꠁꠟ ꠇꠚꠞꠣꠞ ꠁꠖ, ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠍꠣꠝꠘꠦ ꠔꠥꠝꠞꠣꠞ ꠉꠥꠘꠣꠞ ꠇꠚꠞꠣ ꠀꠖꠣꠄ ꠇꠞꠣ ꠅꠁꠛ, ꠀꠡ꠆ꠔꠣ ꠁ ꠖꠤꠘꠅ ꠇꠥꠘꠥꠎꠣꠔ ꠇꠣꠝ-ꠇꠣꠎ ꠇꠞꠣ ꠢꠣꠞꠣꠝ।
LEV 23:29 ꠎꠦ ꠝꠣꠘꠡꠦ ꠢꠃ ꠖꠤꠘ ꠘꠔ ꠅꠁꠀ ꠘꠤꠎꠞ ꠖꠤꠟ ꠡꠙꠤꠀ ꠘꠣ ꠖꠦꠄ, ꠔꠣꠞ ꠘꠣꠝ ꠁ ꠎꠣꠔꠤꠞ ꠝꠣꠎ ꠕꠣꠇꠤ ꠝꠤꠐꠣꠁꠟꠤꠛꠣꠄ।
LEV 23:30 ꠀꠞ ꠢꠃ ꠖꠤꠘ ꠎꠥꠖꠤ ꠇꠦꠃ ꠇꠥꠘꠥ ꠇꠣꠝ-ꠇꠣꠎ ꠇꠞꠦ, ꠔꠦ ꠔꠣꠞ ꠘꠣꠝ ꠀꠝꠤ ꠁ ꠎꠣꠔꠤꠞ ꠝꠣꠎ ꠕꠣꠇꠤ ꠡꠦꠡ ꠇꠞꠤꠟꠤꠝꠥ।
LEV 23:31 ꠅꠃ ꠖꠤꠘ ꠔꠥꠝꠞꠣ ꠇꠥꠘꠥꠎꠣꠔ ꠇꠣꠝ-ꠇꠣꠎ ꠇꠞꠤꠅ ꠘꠣ। ꠔꠥꠝꠞꠣ ꠎꠦꠘꠅꠃ ꠞꠅ ꠘꠣ ꠇꠦꠘꠦ, ꠅꠀꠞꠤꠡꠞ ꠙꠞ ꠅꠀꠞꠤꠡ ꠗꠞꠤ ꠢꠞ-ꠢꠣꠝꠦꠡꠣ ꠅꠃ ꠘꠤꠅꠝ ꠝꠣꠘꠤꠅ।
LEV 23:32 ꠅꠃ ꠖꠤꠘ ꠅꠁꠛ ꠔꠥꠝꠞꠣꠞ ꠟꠣꠉꠤ ꠙꠛꠤꠔ꠆ꠞ ꠎꠥꠝ꠆ꠝꠣꠞ ꠖꠤꠘ, ꠄꠞꠟꠣꠉꠤ ꠘꠔ ꠅꠁꠀ ꠖꠤꠟ ꠡꠙꠤꠀ ꠖꠤꠅ। ꠅꠃ ꠌꠣꠘ꠆ꠖꠞ ꠘꠄ ꠘꠝ꠆ꠛꠞ ꠖꠤꠘꠞ ꠢꠣꠁꠘ꠆ꠎꠣ ꠕꠣꠇꠤ ꠛꠣꠖꠞ ꠖꠤꠘ ꠢꠣꠁꠘ꠆ꠎꠣ ꠙꠞ꠆ꠎꠘ꠆ꠔ ꠙꠛꠤꠔ꠆ꠞ ꠅꠃ ꠎꠥꠝ꠆ꠝꠣꠞ ꠖꠤꠘ ꠝꠣꠘꠤꠅ।”
LEV 23:33 ꠄꠞꠛꠣꠖꠦ ꠝꠣꠛꠥꠖꠦ ꠝꠥꠍꠣ ꠘꠛꠤꠞꠦ ꠇꠁꠟꠣ,
LEV 23:34 “ꠔꠥꠝꠤ ꠛꠘꠤ ꠁꠍꠞꠣꠁꠟꠞꠦ ꠇꠅ, ꠅꠃ ꠡꠣꠔ ꠘꠝ꠆ꠛꠞ ꠌꠣꠘ꠆ꠖꠞ ꠙꠘꠞ ꠔꠣꠞꠤꠈ ꠕꠣꠇꠤ ꠝꠣꠛꠥꠖꠞ ꠘꠣꠝꠦ ꠒꠦꠞꠣ-ꠊꠞꠞ ꠁꠖ ꠀꠞꠝ꠆ꠛ ꠅꠁꠀ, ꠡꠣꠔ ꠖꠤꠘ ꠙꠞ꠆ꠎꠘ꠆ꠔ ꠁꠖ ꠌꠟꠛ।
LEV 23:35 ꠅꠃ ꠡꠣꠔ ꠖꠤꠘꠞ ꠙꠄꠟꠣ ꠖꠤꠘ ꠔꠥꠝꠞꠣꠞ ꠙꠛꠤꠔ꠆ꠞ ꠝꠤꠟꠘ-ꠝꠣꠢꠚꠤꠟ ꠅꠁꠛ। ꠁ ꠖꠤꠘ ꠔꠥꠝꠞꠣ ꠖꠥꠘꠤꠀꠛꠤ ꠘꠤꠅꠔꠦ ꠇꠥꠘꠥ ꠇꠣꠝ-ꠇꠣꠎ ꠇꠞꠤꠅ ꠘꠣ।
LEV 23:36 ꠅꠃ ꠁꠖꠞ ꠡꠣꠔꠅ ꠖꠤꠘ ꠔꠥꠝꠞꠣ ꠝꠣꠛꠥꠖꠞ ꠘꠣꠝꠦ ꠀꠉꠥꠘꠤꠔ ꠖꠦꠅꠀ ꠇꠥꠞꠛꠣꠘꠤ ꠀꠖꠣꠄ ꠇꠞꠛꠣꠄ। ꠛꠣꠖꠦ ꠀꠐ ꠘꠝ꠆ꠛꠞ ꠖꠤꠘꠅ ꠔꠥꠝꠞꠣ ꠢꠤꠞꠛꠣꠞ ꠙꠛꠤꠔ꠆ꠞ ꠝꠤꠟꠘ-ꠝꠣꠢꠚꠤꠟ ꠇꠞꠛꠣꠄ ꠀꠞ ꠝꠣꠛꠥꠖꠞ ꠘꠣꠝꠦ ꠀꠉꠥꠘꠤꠔ ꠖꠦꠅꠀ ꠇꠥꠞꠛꠣꠘꠤ ꠖꠤꠛꠣꠄ। ꠁꠐꠣ ꠅꠁꠟ ꠡꠦꠡ ꠖꠤꠘꠞ ꠀꠈꠦꠞꠤ ꠝꠣꠢꠚꠤꠟ, ꠅꠃ ꠖꠤꠘꠅ ꠔꠥꠝꠞꠣ ꠖꠥꠘꠤꠀꠛꠤ ꠘꠤꠅꠔꠦ ꠇꠥꠘꠥ ꠇꠣꠝ-ꠇꠣꠎ ꠇꠞꠤꠅ ꠘꠣ।
LEV 23:37 “ꠀꠡ꠆ꠔꠣ ꠛꠍꠞꠞ ꠝꠣꠎꠦ ꠎꠔ ꠟꠣꠈꠣꠘ ꠁꠖ ꠀꠍꠦ, ꠅꠔꠣ ꠢꠇ꠆ꠇꠟ ꠎꠣꠔꠞ ꠁꠖ ꠅꠇꠟ ꠔ ꠝꠣꠛꠥꠖꠦꠃ ꠗꠣꠁꠞ꠆ꠎ ꠇꠞꠤ ꠖꠤꠍꠂꠘ। ꠄꠞꠟꠣꠉꠤ ꠁꠖꠞ ꠅꠃ ꠖꠤꠘ ꠅꠇꠟꠞꠦ ꠔꠥꠝꠞꠣ ꠙꠛꠤꠔ꠆ꠞ ꠝꠤꠟꠘ-ꠝꠣꠢꠚꠤꠟꠞ ꠖꠤꠘ ꠢꠤꠡꠣꠛꠦ ꠝꠣꠘꠤꠅ, ꠄꠞ ꠙꠞꠔꠦꠇ ꠖꠤꠘ ꠎꠦꠔꠣ ꠎꠦꠔꠣ ꠇꠞꠣ ꠎꠞꠥꠞ, ꠁꠔꠣ ꠀꠖꠣꠄ ꠇꠞꠤꠅ। ꠝꠣꠘꠤ, ꠎꠣꠟꠣꠁꠟ ꠇꠥꠞꠛꠣꠘꠤ, ꠗꠣꠘ-ꠉꠝꠞ ꠍꠖꠉꠣ, ꠘꠤꠎꠞ ꠈꠥꠡꠤꠄ ꠍꠣꠟꠣꠝꠔꠤ ꠇꠥꠞꠛꠣꠘꠤ, ꠀꠞ ꠄꠞ ꠟꠉꠞ ꠡꠞꠛꠔ-ꠙꠣꠘꠤꠞ ꠍꠖꠉꠣ। ꠅꠃ ꠇꠥꠞꠛꠣꠘꠤ ꠅꠇꠟ ꠀꠟ꠆ꠟꠣꠞ ꠗꠣꠁꠞ꠆ꠎ ꠇꠞꠣ ꠖꠤꠘꠅ ꠔꠥꠝꠞꠣ ꠀꠖꠣꠄ ꠇꠞꠤꠅ।
LEV 23:38 ꠅꠁꠟꠦ ꠈꠤꠀꠟ ꠞꠣꠈꠤꠅ, ꠔꠥꠝꠞꠣꠞꠦ ꠛꠣꠔꠣꠁꠟ ꠅꠔꠣ ꠢꠇ꠆ꠇꠟ ꠟꠣꠈꠣꠘ ꠁꠖ ꠅꠇꠟꠞ ꠇꠥꠞꠛꠣꠘꠤ ꠀꠞ ꠟꠤꠟ꠆ꠟꠣ-ꠍꠖꠉꠣꠞꠦ ꠀꠖꠣꠄ ꠇꠞꠤꠀ, ꠝꠣꠛꠥꠖꠞ ꠘꠣꠝꠦ ꠎꠥꠝ꠆ꠝꠣꠛꠣꠞꠞ ꠇꠥꠞꠛꠣꠘꠤ, ꠢꠇꠟ ꠘꠝꠥꠘꠣꠞ ꠟꠤꠟ꠆ꠟꠣ-ꠍꠖꠉꠣ, ꠝꠣꠘ꠆ꠘꠔ ꠀꠞ ꠘꠤꠎꠞ ꠈꠥꠡꠤꠄ ꠖꠦꠅꠀ ꠍꠣꠟꠣꠝꠔꠤ ꠇꠥꠞꠛꠣꠘꠤꠞꠦꠅ ꠀꠖꠣꠄ ꠇꠞꠤꠅ। ꠢꠔꠣ ꠁꠖ ꠅꠇꠟꠞ ꠇꠥꠞꠛꠣꠘꠤꠞ ꠟꠉꠦ ꠁꠔꠣꠞꠦ ꠝꠤꠟꠣꠁꠅ ꠘꠣ, ꠀꠟꠣꠖꠣ ꠞꠣꠈꠤꠅ।
LEV 23:39 “ꠀꠞ ꠡꠣꠔ ꠘꠝ꠆ꠛꠞ ꠌꠣꠘ꠆ꠖꠞ ꠙꠘꠞ ꠔꠣꠞꠤꠈꠅ, ꠈꠦꠔꠞ ꠢꠇꠟ ꠚꠟ-ꠚꠡꠟ ꠔꠥꠟꠣꠞ ꠛꠣꠖꠦ, ꠔꠥꠝꠞꠣ ꠝꠣꠛꠥꠖꠞ ꠘꠣꠝꠦ ꠡꠣꠔ ꠖꠤꠘ ꠗꠞꠤꠀ ꠒꠦꠞꠣ-ꠊꠞꠞ ꠅꠃ ꠁꠖ ꠀꠖꠣꠄ ꠇꠞꠤꠅ। ꠅꠃ ꠡꠣꠔ ꠖꠤꠘꠞ ꠙꠄꠟꠣ ꠖꠤꠘ ꠀꠞ ꠡꠦꠡꠞ ꠀꠐ ꠘꠝ꠆ꠛꠞ ꠖꠤꠘ ꠅꠁꠟ ꠔꠥꠝꠞꠣꠞ ꠙꠥꠞꠣꠙꠥꠞ ꠎꠤꠞꠣꠁꠛꠣꠞ ꠖꠤꠘ।
LEV 23:40 ꠄꠞ ꠙꠄꠟꠣ ꠖꠤꠘ ꠔꠥꠝꠞꠣ ꠔꠞꠔꠣꠎꠣ ꠉꠣꠍꠞ ꠒꠣꠟ ꠙꠣꠟꠣ, ꠝꠣꠘꠤ ꠈꠦꠎꠥꠞ ꠙꠣꠔꠣ, ꠢꠇꠟ ꠘꠝꠥꠘꠣꠞ ꠙꠣꠔꠣ-ꠛꠣꠢꠣꠞ ꠉꠣꠍꠞ ꠒꠣꠟ ꠙꠣꠟꠣ, ꠀꠞ ꠉꠣꠋꠉꠞ ꠙꠣꠞꠞ ꠁꠎꠟ ꠉꠣꠍꠞ ꠒꠣꠟ ꠟꠁꠀ ꠀꠎꠤꠞ ꠅꠁꠅ। ꠅꠁꠀ ꠅꠃ ꠡꠣꠔꠅ ꠖꠤꠘ ꠔꠥꠝꠞꠣ ꠘꠤꠎꠞ ꠝꠣꠛꠥꠖ ꠀꠟ꠆ꠟꠣꠞ ꠍꠣꠝꠘꠦ ꠈꠥꠡꠤ-ꠛꠣꠡꠤ ꠇꠞꠤꠅ।
LEV 23:41 ꠙꠞꠔꠦꠇ ꠛꠍꠞꠞ ꠡꠣꠔ ꠘꠝ꠆ꠛꠞ ꠌꠣꠘ꠆ꠖꠞ ꠡꠣꠔ ꠖꠤꠘ ꠔꠥꠝꠞꠣ ꠝꠣꠛꠥꠖꠞ ꠘꠣꠝꠦ ꠁ ꠁꠖ ꠀꠖꠣꠄ ꠇꠞꠤꠅ। ꠅꠀꠞꠤꠡꠞ ꠙꠞ ꠅꠀꠞꠤꠡ ꠗꠞꠤ ꠢꠞ-ꠢꠣꠝꠦꠡꠣ ꠁꠔꠣ ꠝꠣꠘꠤꠅ।
LEV 23:42 ꠙꠥꠞꠣ ꠡꠣꠔ ꠖꠤꠘ ꠔꠥꠝꠞꠣ ꠢꠇꠟ ꠉꠤꠀ ꠒꠦꠞꠣ-ꠊꠞꠅ ꠞꠁꠅ, ꠛꠘꠤ ꠁꠍꠞꠣꠁꠟꠞ ꠢꠇꠟ ꠝꠣꠘꠥꠡ ꠅꠃ ꠡꠝꠄ ꠒꠦꠞꠣ-ꠊꠞꠅ ꠕꠣꠇꠤꠅ।
LEV 23:43 ꠔꠦꠃ ꠅꠔꠣ ꠖꠦꠈꠤꠀ ꠢꠣꠞꠤ ꠔꠥꠝꠞꠣꠞ ꠀꠅꠟꠣꠖ ꠅꠇꠟꠦꠅ ꠛꠥꠎꠛꠣ, ꠛꠘꠤ ꠁꠍꠞꠣꠁꠟꠞꠦ ꠝꠤꠡꠞ ꠖꠦꠡ ꠕꠣꠇꠤ ꠛꠣꠞ ꠇꠞꠤ ꠀꠘꠤꠀ ꠢꠣꠞꠟꠦ ꠀꠝꠤ ꠝꠞꠥꠜꠥꠝꠤꠞ ꠝꠣꠎꠦ ꠔꠣꠞꠣꠞꠦ ꠅꠟꠣ ꠒꠦꠞꠣ-ꠊꠞꠅ ꠛꠡꠔ ꠇꠞꠣꠁꠍꠟꠣꠝ। ꠝꠘꠅ ꠞꠣꠈꠤꠅ, ꠀꠝꠤ ꠀꠟ꠆ꠟꠣꠃ ꠔꠥꠝꠞꠣꠞ ꠝꠣꠛꠥꠖ।”
LEV 23:44 ꠄꠞꠛꠣꠖꠦ ꠝꠥꠍꠣ ꠘꠛꠤ ꠉꠤꠀ ꠝꠣꠛꠥꠖꠞ ꠛꠣꠔꠣꠁꠟ ꠅꠃ ꠢꠇꠟ ꠁꠖꠞ ꠇꠕꠣ ꠛꠘꠤ ꠁꠍꠞꠣꠁꠟꠞꠦ ꠎꠣꠘꠣꠁꠟꠣ।
LEV 24:1 ꠛꠣꠖꠦ ꠝꠣꠛꠥꠖꠦ ꠝꠥꠍꠣ ꠘꠛꠤꠞꠦ ꠇꠁꠟꠣ,
LEV 24:2 “ꠔꠥꠝꠤ ꠛꠘꠤ ꠁꠍꠞꠣꠁꠟꠞꠦ ꠢꠥꠇꠥꠝ ꠖꠦꠅ, ꠌꠦꠞꠣꠉ ꠖꠣꠘꠤꠞ ꠌꠦꠞꠣꠉ ꠅꠇꠟ ꠢꠣꠝꠦꠡꠣ ꠎꠣꠟꠣꠁꠀ ꠞꠣꠈꠣꠞ ꠘꠤꠅꠔꠦ, ꠔꠣꠞꠣ ꠎꠄꠔꠥꠘ ꠍꠦꠌꠤꠀ ꠈꠣꠐꠤ ꠔꠦꠟ ꠛꠣꠘꠣꠁꠀ ꠔꠥꠝꠣꠞ ꠉꠦꠍꠦ ꠟꠁꠀ ꠀꠁꠔ।
LEV 24:3 ꠀꠞ ꠇꠣꠛꠣ ꠊꠞꠞ ꠜꠤꠔꠞꠦ ꠡꠣꠢꠣꠖꠔ ꠡꠘ꠆ꠖꠥꠇꠞ ꠙꠞ꠆ꠖꠣꠞ ꠛꠣꠞꠦ, ꠁꠝꠣꠝ ꠢꠣꠞꠥꠘꠦ ꠢꠣꠁꠘ꠆ꠎꠣ ꠕꠣꠇꠤ ꠚꠎꠞ ꠙꠞ꠆ꠎꠘ꠆ꠔ ꠌꠦꠞꠣꠉ ꠖꠣꠘꠤꠞ ꠌꠦꠞꠣꠉ ꠅꠇꠟ ꠎꠣꠟꠣꠁ ꠞꠣꠈꠛꠣ। ꠅꠀꠞꠤꠡꠞ ꠙꠞ ꠅꠀꠞꠤꠡ ꠗꠞꠤ ꠢꠞ-ꠢꠣꠝꠦꠡꠣ ꠁꠔꠣ ꠎꠣꠞꠤ ꠞꠁꠛ।
LEV 24:4 ꠝꠣꠛꠥꠖꠞ ꠍꠣꠝꠘꠦ ꠕꠅꠀ ꠅꠃ ꠈꠣꠐꠤ ꠡꠥꠘꠣꠞ ꠌꠦꠞꠣꠉ ꠖꠣꠘꠤꠞ ꠌꠦꠞꠣꠉ ꠅꠇꠟꠞꠦ ꠔꠣꠁꠘ ꠢꠣꠝꠦꠡꠣ ꠎꠣꠄ-ꠎꠔꠘ ꠇꠞꠛꠣ।
LEV 24:5 “ꠀꠞ ꠢꠥꠘꠅ, ꠝꠄꠖꠣ ꠖꠤꠀ ꠛꠣꠞꠅ ꠈꠣꠘ ꠞꠥꠐꠤ ꠛꠣꠘꠣꠁꠅ, ꠙꠞꠔꠦꠇ ꠞꠥꠐꠤ ꠅꠁꠛ ꠖꠥꠁ ꠡꠦꠞ ꠝꠄꠖꠣꠞ।
LEV 24:6 ꠛꠣꠘꠣꠁꠀ ꠅꠃ ꠞꠥꠐꠤꠞꠦ ꠝꠣꠛꠥꠖꠞ ꠍꠣꠝꠘꠞ ꠈꠣꠐꠤ ꠡꠥꠘꠣꠞ ꠐꠦꠛꠥꠟꠞ ꠃꠙꠞꠦ ꠍꠄꠈꠣꠘ ꠍꠄꠈꠣꠘ ꠇꠞꠤ ꠖꠥꠁ ꠟꠣꠁꠘꠦ ꠢꠣꠎꠣꠁ ꠕꠁꠅ।
LEV 24:7 ꠙꠞꠔꠦꠇ ꠟꠣꠁꠘꠞ ꠞꠥꠐꠤꠞ ꠗꠣꠞꠅ ꠈꠣꠐꠤ ꠟꠥꠛꠣꠘ-ꠀꠉꠞ ꠕꠁꠅ। ꠕꠁꠀ ꠘꠤꠡꠣꠘꠣ ꠢꠤꠡꠣꠛꠦ ꠞꠥꠐꠤꠞ ꠛꠖꠟꠣ ꠅꠃ ꠀꠉꠞꠖꠤ ꠝꠣꠛꠥꠖꠞ ꠘꠣꠝꠦ ꠀꠉꠥꠘꠤꠔ ꠖꠦꠅꠀ ꠇꠥꠞꠛꠣꠘꠤ ꠀꠖꠣꠄ ꠇꠞꠤꠅ।
LEV 24:8 ꠙꠞꠔꠦꠇ ꠎꠥꠝ꠆ꠝꠣꠛꠣꠞꠦ ꠛꠘꠤ ꠁꠍꠞꠣꠁꠟꠞ ꠙꠇ꠆ꠇ ꠕꠣꠇꠤ ꠙꠛꠤꠔ꠆ꠞ ꠅꠃ ꠞꠥꠐꠤꠞꠦ ꠁꠝꠣꠝ ꠍꠣꠛꠦ ꠝꠣꠛꠥꠖꠞ ꠘꠎꠞꠞ ꠍꠣꠝꠘꠦ ꠢꠣꠎꠣꠁꠀ ꠕꠁꠛꠣ। ꠔꠣꠞꠣꠞ ꠅꠃ ꠞꠥꠐꠤ ꠖꠦꠅꠀ ꠔ ꠢꠞ-ꠢꠣꠝꠦꠡꠣ ꠌꠤꠞꠇꠣꠟ ꠎꠣꠞꠤ ꠞꠁꠛ।
LEV 24:9 ꠛꠣꠖꠦ ꠁꠝꠣꠝ ꠢꠣꠞꠥꠘ ꠀꠞ ꠔꠣꠘ ꠛꠋꠡꠗꠞꠦ ꠙꠛꠤꠔ꠆ꠞ ꠇꠣꠛꠣ ꠊꠞꠞ ꠡꠤꠝꠣꠘꠣꠞ ꠜꠤꠔꠞꠦ ꠅꠃ ꠞꠥꠐꠤ ꠈꠣꠁꠛꠣ, ꠁꠔꠣ ꠅꠁꠟ ꠝꠣꠛꠥꠖꠞ ꠘꠣꠝꠦ ꠀꠉꠥꠘꠤꠔ ꠖꠦꠅꠀ ꠇꠥꠞꠛꠣꠘꠤꠞ ꠎꠤꠘꠤꠡꠞ ꠝꠣꠎꠦ ꠄꠇ ꠈꠣꠍ ꠙꠛꠤꠔ꠆ꠞ ꠎꠤꠘꠤꠡ। ꠁꠔꠣ ꠔ ꠁꠝꠣꠝ ꠅꠇꠟꠞ ꠙꠣꠅꠘꠣ, ꠅꠃ ꠘꠤꠅꠝ ꠢꠞ-ꠢꠣꠝꠦꠡꠣ ꠎꠣꠞꠤ ꠞꠁꠛ।”
LEV 24:10 ꠛꠘꠤ ꠁꠍꠞꠣꠁꠟꠞ ꠝꠣꠎꠦ ꠅꠟꠣ ꠄꠇ ꠛꠦꠐꠣ ꠀꠍꠤꠟ, ꠎꠦꠉꠥꠞ ꠛꠣꠚ ꠅꠁꠟ ꠝꠤꠡꠞꠤ ꠀꠞ ꠝꠣ ꠛꠘꠤ ꠁꠍꠞꠣꠁꠟ ꠎꠣꠔꠤꠞ। ꠁ ꠛꠦꠐꠣꠄ ꠀꠞ ꠛꠘꠤ ꠁꠍꠞꠣꠁꠟꠞ ꠀꠞꠇ ꠛꠦꠐꠣꠄ ꠇꠦꠝ꠆ꠙꠞ ꠜꠤꠔꠞꠦ ꠝꠣꠞꠣ-ꠝꠣꠞꠤ ꠟꠣꠉꠟ।
LEV 24:11 ꠅꠃ ꠡꠝꠄ ꠛꠘꠤ ꠁꠍꠞꠣꠁꠟꠤ ꠛꠦꠐꠤꠞ ꠙꠥꠀꠄ ꠝꠣꠛꠥꠖꠞ ꠘꠣꠝꠦ ꠇꠥꠚꠥꠞꠤ ꠝꠣꠔ ꠝꠣꠔꠤꠀ ꠟꠣꠘ꠆ꠘꠔ ꠖꠤꠟ। ꠁꠔꠣ ꠢꠥꠘꠤꠀ ꠝꠣꠘꠡꠦ ꠔꠣꠞꠦ ꠝꠥꠍꠣ ꠘꠛꠤꠞ ꠉꠦꠍꠦ ꠟꠁꠀ ꠉꠦꠟꠣ। ꠅꠃ ꠛꠦꠐꠣꠞ ꠝꠣʼꠞ ꠘꠣꠝ ꠡꠣꠟꠥꠝꠤ, ꠔꠣꠁ ꠀꠍꠤꠟ ꠖꠣꠘ ꠈꠣꠘ꠆ꠖꠣꠘꠞ ꠖꠤꠛꠞꠤꠞ ꠙꠥꠠꠤ।
LEV 24:12 ꠀꠞ ꠝꠣꠘꠡꠦ ꠅꠃ ꠛꠦꠙꠣꠞꠦ ꠝꠣꠛꠥꠖꠞ ꠝꠞ꠆ꠎꠤ ꠢꠥꠘꠣꠞ ꠟꠣꠉꠤ ꠅꠃ ꠛꠦꠐꠣꠞꠦ ꠀꠐꠇꠣꠁꠀ ꠕꠁꠟꠣ।
LEV 24:13 ꠛꠣꠖꠦ ꠝꠣꠛꠥꠖꠦ ꠝꠥꠍꠣ ꠘꠛꠤꠞꠦ ꠇꠁꠟꠣ,
LEV 24:14 “ꠀꠝꠣꠞ ꠘꠣꠝꠦ ꠟꠣꠘ꠆ꠘꠔ ꠖꠦꠅꠞꠣ ꠅꠃ ꠛꠦꠐꠣꠞꠦ ꠟꠁꠀ ꠇꠦꠝ꠆ꠙꠞ ꠛꠣꠞꠦ ꠎꠣꠅ। ꠉꠦꠟꠦ ꠎꠦꠔꠣ ꠝꠣꠘꠡꠦ ꠅꠃ ꠇꠥꠚꠥꠞꠤ ꠝꠣꠔ ꠢꠥꠘꠍꠦ, ꠔꠣꠞꠣ ꠢꠇꠟꠦ ꠅꠉꠥꠞ ꠝꠣꠕꠣ ꠀꠔꠣꠁ ꠖꠦꠃꠇ, ꠛꠣꠖꠦ ꠡꠝꠣꠎꠞ ꠢꠇꠟ ꠝꠣꠘꠡꠦ ꠙꠣꠔ꠆ꠔꠞ ꠝꠣꠞꠤꠀ ꠔꠣꠞꠦ ꠎꠣꠘꠦ ꠝꠣꠞꠃꠇ।
LEV 24:15 ꠀꠞ ꠔꠥꠝꠤ ꠛꠘꠤ ꠁꠍꠞꠣꠁꠟꠞꠦ ꠎꠣꠘꠣꠁ ꠖꠦꠅ, ꠎꠦ ꠝꠣꠘꠡꠦ ꠀꠟ꠆ꠟꠣꠞꠦ ꠟꠣꠘ꠆ꠘꠔ ꠖꠦꠄ, ꠔꠣꠞ ꠘꠣꠚꠞꠝꠣꠘꠤꠞ ꠟꠣꠉꠤ ꠢꠦ ꠘꠤꠎꠦꠃ ꠖꠣꠄꠁ।
LEV 24:16 ꠀꠞ ꠎꠦ ꠝꠣꠘꠡꠦ ꠝꠣꠛꠥꠖꠞ ꠘꠣꠝꠦ ꠇꠥꠚꠥꠞꠤ ꠝꠣꠔ ꠝꠣꠔꠤꠛ, ꠔꠣꠞꠦ ꠎꠣꠘꠦ ꠝꠣꠞꠤꠟꠤꠛꠣꠄ। ꠛꠘꠤ ꠁꠍꠞꠣꠁꠟꠞ ꠡꠝꠣꠎꠦ ꠔꠣꠞꠦ ꠙꠣꠔ꠆ꠔꠞ ꠝꠣꠞꠤꠀ ꠎꠣꠘꠦ ꠝꠣꠞꠛꠣ। ꠢꠦ ꠛꠘꠤ ꠁꠍꠞꠣꠁꠟꠤ ꠅꠃꠇ ꠛꠣ ꠔꠣꠞꠣꠞ ꠟꠉꠦ ꠛꠡꠔ ꠇꠞꠞꠣ ꠜꠤꠘ ꠎꠣꠔꠤꠞ ꠝꠣꠘꠥꠡ ꠅꠃꠇ, ꠀꠟ꠆ꠟꠣꠞ ꠘꠣꠝꠦ ꠎꠦꠉꠤꠄ ꠇꠥꠚꠥꠞꠤ ꠝꠣꠔ ꠝꠣꠔꠤꠛ, ꠔꠣꠞꠦ ꠘꠤꠌ꠆ꠌꠤꠔ ꠎꠣꠘꠦ ꠝꠣꠞꠛꠣꠄ।
LEV 24:17 “ꠇꠥꠘꠥ ꠝꠣꠘꠡꠦ ꠎꠥꠖꠤ ꠖꠥꠍꠞꠣ ꠝꠣꠘꠡꠞꠦ ꠈꠥꠘ ꠇꠞꠤꠟꠣꠄ, ꠔꠦ ꠔꠥꠝꠞꠣ ꠔꠣꠞꠦꠅ ꠈꠥꠘ ꠇꠞꠛꠣꠄ।
LEV 24:18 ꠇꠥꠘꠥ ꠝꠣꠘꠡꠦ ꠎꠥꠖꠤ ꠖꠥꠍꠞꠣ ꠝꠣꠘꠡꠞ ꠇꠥꠘꠥ ꠙꠡꠥꠞꠦ ꠝꠣꠞꠤꠟꠣꠄ, ꠔꠦ ꠅꠉꠥꠞ ꠛꠖꠟꠣ ꠢꠦ ꠀꠞꠇ ꠙꠡꠥꠞ ꠖꠣꠝ ꠖꠤꠀ ꠈꠦꠔꠤ-ꠙꠥꠞꠘ ꠖꠤꠛ। ꠎꠣꠘꠞ ꠛꠖꠟꠣ ꠎꠣꠘ।
LEV 24:19 ꠇꠦꠃ ꠎꠥꠖꠤ ꠀꠞꠇ ꠎꠘꠞꠦ ꠝꠣꠞꠦ, ꠀꠞ ꠅꠃ ꠝꠣꠁꠞꠞ ꠟꠣꠉꠤ ꠡꠞꠤꠟꠞ ꠇꠥꠘꠥ ꠅꠋꠉꠞ ꠈꠦꠔꠤ ꠅꠄ, ꠔꠦ ꠢꠦ ꠎꠦꠟꠣ ꠈꠦꠔꠤ ꠇꠞꠍꠦ, ꠔꠣꠞ ꠅꠋꠉꠞꠦꠅ ꠅꠟꠣ ꠈꠦꠔꠤ ꠇꠞꠛꠣꠄ।
LEV 24:20 ꠀꠒ꠆ꠒꠤ ꠜꠣꠋꠉꠣꠞ ꠛꠖꠟꠣ ꠀꠒ꠆ꠒꠤ ꠜꠣꠋꠉꠤꠛꠣꠄ, ꠌꠃꠈꠞ ꠛꠖꠟꠣ ꠌꠃꠈ, ꠖꠣꠔꠞ ꠛꠖꠟꠣ ꠖꠣꠔ। ꠢꠃ ꠎꠘꠞ ꠎꠦ ꠅꠋꠉꠞꠦ ꠢꠦ ꠈꠦꠔꠤ ꠇꠞꠍꠦ, ꠔꠣꠞꠅ ꠅꠟꠣ ꠈꠦꠔꠤ ꠇꠞꠛꠣꠄ।
LEV 24:21 ꠇꠥꠘꠥ ꠙꠡꠥꠞꠦ ꠎꠣꠘꠦ ꠝꠣꠞꠟꠦ ꠄꠞ ꠈꠦꠔꠤ-ꠙꠥꠞꠘ ꠖꠤꠔꠦ ꠅꠁꠛ, ꠅꠁꠟꠦ ꠇꠥꠘꠥ ꠝꠣꠘꠥꠡꠞꠦ ꠈꠥꠘ ꠇꠞꠟꠦ ꠔꠣꠞꠦꠃ ꠎꠣꠘꠦ ꠝꠣꠞꠤꠟꠤꠛꠣꠄ।
LEV 24:22 ꠛꠘꠤ ꠁꠍꠞꠣꠁꠟ ꠛꠣ ꠔꠥꠝꠞꠣꠞ ꠟꠉꠦ ꠛꠡꠔ ꠇꠞꠞꠣ ꠜꠤꠘ ꠎꠣꠔꠤꠞ ꠝꠣꠘꠡꠞ ꠟꠣꠉꠤ ꠅꠃ ꠄꠇꠁ ꠀꠁꠘ ꠎꠣꠞꠤ ꠞꠁꠛ। ꠝꠘꠅ ꠞꠣꠈꠤꠅ, ꠀꠝꠤ ꠀꠟ꠆ꠟꠣꠃ ꠔꠥꠝꠞꠣꠞ ꠝꠣꠛꠥꠖ।”
LEV 24:23 ꠛꠣꠖꠦ ꠝꠥꠍꠣ ꠘꠛꠤꠄ ꠛꠘꠤ ꠁꠍꠞꠣꠁꠟꠞꠦ ꠁꠔꠣ ꠢꠇꠟꠔꠣ ꠎꠣꠘꠣꠁꠟꠣ। ꠔꠦꠃ ꠎꠦ ꠛꠦꠐꠣꠄ ꠢꠃ ꠇꠥꠚꠥꠞꠤ ꠝꠣꠔꠤꠍꠤꠟ, ꠝꠣꠘꠡꠦ ꠅꠉꠥꠞꠦ ꠇꠦꠝ꠆ꠙꠞ ꠛꠣꠞꠦ ꠘꠤꠀ ꠙꠣꠔ꠆ꠔꠞ ꠝꠣꠞꠤꠀ ꠎꠣꠘꠦ ꠝꠣꠞꠤꠟꠤꠟꠣ। ꠝꠣꠛꠥꠖꠦ ꠝꠥꠍꠣꠞꠦ ꠎꠦꠟꠣ ꠢꠥꠇꠥꠝ ꠖꠤꠍꠟꠣ, ꠛꠘꠤ ꠁꠍꠞꠣꠁꠟꠦ ꠑꠤꠇ ꠅꠟꠣꠃ ꠇꠞꠟꠣ।
LEV 25:1 ꠀꠞ ꠝꠣꠛꠥꠖꠦ ꠔꠥꠞ ꠙꠣꠠꠞ ꠃꠙꠞꠦ ꠝꠥꠍꠣ ꠘꠛꠤꠞꠦ ꠇꠁꠟꠣ,
LEV 25:2 “ꠔꠥꠝꠤ ꠛꠘꠤ ꠁꠍꠞꠣꠁꠟꠞꠦ ꠎꠣꠘꠣꠁ ꠖꠦꠅ, ꠀꠝꠤ ꠎꠦ ꠖꠦꠡꠈꠣꠘ ꠔꠥꠝꠞꠣꠞꠦ ꠖꠤꠀꠞ, ꠢꠃ ꠖꠦꠡꠅ ꠉꠤꠀ ꠢꠣꠞꠟꠦ ꠔꠥꠝꠞꠣ ꠈꠤꠀꠟ ꠞꠣꠈꠤꠅ, ꠢꠘꠞ ꠎꠝꠤ-ꠝꠣꠐꠤꠄ ꠎꠣꠘꠥ ꠝꠣꠛꠥꠖꠞ ꠘꠣꠝꠦ ꠀꠞꠣꠝ ꠇꠞꠣꠞ ꠡꠝꠄ ꠙꠣꠄ।
LEV 25:3 ꠔꠥꠝꠞꠣ ꠍꠄ ꠛꠍꠞ ꠎꠝꠤꠘꠅ ꠈꠦꠔ-ꠈꠣꠝꠣꠞ ꠇꠞꠤꠅ, ꠀꠋꠉꠥꠞ ꠉꠣꠍꠞ ꠒꠣꠟ ꠙꠣꠟꠣ ꠍꠣꠐꠤꠀ ꠚꠄ-ꠚꠡꠟ ꠛꠣꠠꠤꠔ ꠀꠘꠤꠅ।
LEV 25:4 ꠅꠁꠟꠦ ꠡꠣꠔ ꠘꠝ꠆ꠛꠞ ꠛꠍꠞ ꠎꠝꠤ-ꠎꠝꠣꠞꠦ ꠎꠤꠞꠣꠘꠤꠞ ꠡꠥꠎꠥꠉ ꠖꠤꠅ। ꠁꠐꠣ ꠅꠁꠟ ꠝꠣꠛꠥꠖꠞ ꠘꠤꠅꠔꠦ ꠀꠞꠣꠝꠞ ꠛꠍꠞ। ꠅꠃ ꠛꠍꠞ ꠔꠥꠝꠞꠣ ꠎꠝꠤꠘꠅ ꠈꠦꠔ ꠇꠞꠤꠅ ꠘꠣ, ꠀꠋꠉꠥꠞ ꠉꠣꠍꠞ ꠒꠣꠟ ꠙꠣꠟꠣ ꠍꠣꠐꠤꠅ ꠘꠣ।
LEV 25:5 ꠀꠞ ꠎꠝꠤꠘꠞ ꠝꠣꠎꠦ ꠄꠝꠘꠦꠃ ꠎꠦꠔꠣ ꠚꠟꠤꠛ, ꠁꠔꠣ ꠘꠤꠀ ꠔꠥꠝꠞꠣꠞ ꠃꠉꠣꠞꠅ ꠕꠁꠅ ꠘꠣ। ꠛꠤꠘꠣ ꠎꠔꠘꠦ ꠀꠋꠉꠥꠞ ꠉꠣꠍꠅ ꠎꠦꠔꠣ ꠚꠟ ꠗꠞꠛ, ꠁꠔꠣ ꠙꠣꠠꠤꠀ ꠘꠤꠀ ꠎꠝꠣꠁꠅ ꠘꠣ। ꠢꠇꠟ ꠎꠝꠤ-ꠎꠝꠣꠞꠦ ꠙꠥꠞꠣ ꠄꠇ ꠛꠍꠞ ꠎꠤꠞꠣꠘꠤꠞ ꠡꠝꠄ ꠖꠤꠅ।
LEV 25:6 ꠎꠤꠞꠣꠘꠤꠞ ꠛꠍꠞ ꠎꠝꠤꠘꠅ ꠄꠝꠘꠦ ꠎꠦꠔꠣ ꠚꠟꠤꠛ, ꠁꠔꠣ ꠔ ꠔꠥꠝꠞꠣ ꠘꠤꠎꠞ, ꠔꠥꠝꠞꠣꠞ ꠉꠥꠟꠣꠝ-ꠛꠣꠘ꠆ꠖꠤꠞ, ꠔꠥꠝꠞꠣꠞ ꠖꠦꠡꠞ ꠜꠤꠘ-ꠖꠦꠡꠤ ꠝꠥꠍꠣꠚꠤꠞ, ꠔꠥꠝꠞꠣꠞ ꠡꠝꠣꠎꠞ ꠝꠦꠘꠔꠤ ꠇꠣꠝꠟꠣ, ꠢꠇꠟ ꠎꠣꠔꠞ ꠝꠣꠘꠡꠞ,
LEV 25:7 ꠔꠥꠝꠞꠣꠞ ꠙꠣꠟꠣ ꠢꠦꠝꠣꠘ, ꠀꠞ ꠖꠦꠡꠞ ꠎꠋꠟꠤ ꠎꠣꠘꠥꠀꠞꠞ ꠈꠣꠘꠤ-ꠈꠥꠞꠣꠇ ꠅꠁꠛ। ꠅꠃ ꠛꠍꠞ ꠎꠝꠤꠘꠅ ꠄꠝꠘꠦ ꠎꠦꠔꠣ ꠚꠟꠤꠛ, ꠁꠔꠣ ꠔꠥꠝꠞꠣ ꠢꠇꠟꠦ ꠈꠣꠁꠅ।
LEV 25:8 “ꠀꠞ ꠢꠥꠘꠅ, ꠡꠣꠔ ꠛꠍꠞ ꠇꠞꠤ ꠇꠞꠤ ꠡꠣꠔꠈꠣꠘ ꠎꠤꠞꠣꠘꠤꠞ ꠛꠍꠞꠞꠦ ꠔꠥꠝꠞꠣ ꠉꠘꠤꠅ, ꠉꠘꠤꠟꠦ ꠡꠣꠔꠛꠣꠞ ꠡꠣꠔ ꠛꠍꠞꠦ ꠃꠘꠥꠙꠁꠘ꠆ꠌꠣꠡ ꠛꠍꠞ ꠅꠁꠛ।
LEV 25:9 ꠄꠞ ꠛꠣꠖꠞ ꠛꠍꠞ, ꠝꠣꠘꠤ ꠙꠁꠘ꠆ꠌꠣꠡ ꠘꠝ꠆ꠛꠞ ꠛꠍꠞ, ꠅꠃ ꠛꠍꠞꠞ ꠡꠣꠔ ꠘꠝ꠆ꠛꠞ ꠌꠣꠘ꠆ꠖꠞ ꠖꠡ ꠘꠝ꠆ꠛꠞ ꠖꠤꠘ, ꠁꠔꠣ ꠔ ꠉꠥꠘꠣꠞ ꠇꠚꠞꠣ ꠀꠖꠣꠄ ꠇꠞꠣꠞ ꠖꠤꠘ, ꠢꠃ ꠖꠤꠘ ꠔꠥꠝꠞꠣ ꠀꠡ꠆ꠔꠣ ꠖꠦꠡꠞ ꠢꠇꠟ ꠎꠣꠉꠣꠔ ꠡꠤꠋꠉꠣ ꠛꠣꠎꠣꠁꠅ।
LEV 25:10 ꠅꠃ ꠙꠁꠘ꠆ꠌꠣꠡ ꠘꠝ꠆ꠛꠞ ꠛꠍꠞꠞꠦ ꠔꠥꠝꠞꠣ ꠙꠣꠇ-ꠙꠛꠤꠔ꠆ꠞ ꠝꠣꠘꠤꠅ, ꠖꠦꠡꠞ ꠢꠇꠟ ꠝꠣꠘꠡꠞꠦ ꠀꠎꠣꠖꠤꠞ ꠇꠕꠣ ꠎꠣꠘꠣꠁꠅ। ꠁ ꠛꠍꠞ ꠅꠁꠟ ꠔꠥꠝꠞꠣꠞ ꠎꠝꠤ-ꠝꠤꠞꠣꠡ ꠚꠤꠞꠔ ꠙꠣꠅꠀꠞ ꠛꠍꠞ। ꠅꠃ ꠛꠍꠞ ꠔꠥꠝꠞꠣ ꠎꠣꠞꠎꠤꠞ ꠙꠞꠤꠛꠣꠞ ꠀꠞ ꠈꠣꠘ꠆ꠖꠣꠘꠞ ꠎꠝꠤ-ꠎꠝꠣꠞ ꠖꠈꠟꠖꠣꠞꠤ ꠚꠤꠞꠔ ꠙꠣꠁꠛꠣꠄ।
LEV 25:11 ꠙꠞꠔꠦꠇ ꠙꠁꠘ꠆ꠌꠣꠡ ꠘꠝ꠆ꠛꠞ ꠛꠍꠞ ꠅꠁꠛ, ꠔꠥꠝꠞꠣꠞ ꠖꠈꠟꠖꠣꠞꠤ ꠚꠤꠞꠔ ꠙꠣꠅꠀꠞ ꠛꠍꠞ। ꠅꠃ ꠛꠍꠞ ꠔꠥꠝꠞꠣ ꠎꠝꠤꠘꠅ ꠇꠥꠘꠥ ꠛꠤꠌꠤ ꠛꠣꠁꠘ ꠇꠞꠤꠅ ꠘꠣ, ꠎꠝꠤꠘꠅ ꠄꠝꠘꠦꠃ ꠎꠦꠔꠣ ꠎꠘꠝꠤꠛ ꠁꠔꠣ ꠔꠥꠝꠞꠣ ꠘꠤꠅ ꠘꠣ। ꠀꠞ ꠛꠤꠘꠣ ꠎꠔꠘꠦ ꠀꠋꠉꠥꠞ ꠉꠣꠍꠅ ꠎꠦꠔꠣ ꠚꠟ ꠗꠞꠛ, ꠁꠔꠣꠅ ꠔꠥꠝꠞꠣ ꠊꠞꠅ ꠀꠘꠤꠅ ꠘꠣ।
LEV 25:12 ꠅꠃ ꠛꠍꠞ ꠅꠁꠟ ꠚꠤꠞꠔ ꠙꠣꠁꠛꠣꠞ ꠛꠍꠞ। ꠔꠥꠝꠞꠣ ꠅꠃ ꠛꠍꠞꠞꠦ ꠙꠣꠇ-ꠙꠛꠤꠔ꠆ꠞ ꠢꠤꠡꠣꠛꠦ ꠝꠣꠘꠤꠅ। ꠎꠝꠤꠘꠅ ꠎꠦꠔꠣ ꠚꠡꠟ ꠙꠣꠁꠛꠣꠄ, ꠅꠔꠣꠃ ꠔꠥꠝꠞꠣ ꠈꠣꠁꠅ।
LEV 25:13 “ꠚꠤꠞꠔ ꠙꠣꠅꠀꠞ ꠛꠍꠞꠅ ꠔꠥꠝꠞꠣ ꠙꠞꠔꠦꠇꠦ ꠎꠣꠞꠎꠤꠞ ꠙꠞꠤꠛꠣꠞꠞ ꠎꠝꠤ-ꠝꠤꠞꠣꠡꠅ ꠚꠤꠞꠤꠀ ꠎꠣꠁꠅ।
LEV 25:14 ꠘꠤꠎꠞ ꠎꠝꠤ-ꠎꠝꠣ ꠈꠞꠤꠖ-ꠛꠤꠇꠤꠞ ꠡꠝꠄ ꠔꠥꠝꠞꠣ ꠀꠙꠘ ꠛꠣ ꠙꠞ ꠇꠦꠃꠞꠞ ꠃꠙꠞꠦ ꠎꠥꠞ-ꠎꠛꠞꠖꠡ꠆ꠔꠤ ꠇꠞꠤꠅ ꠘꠣ।
LEV 25:15 ꠎꠝꠤ ꠈꠞꠤꠖ ꠇꠞꠣꠞ ꠡꠝꠄ ꠈꠞꠤꠖ-ꠛꠤꠇꠤ ꠇꠞꠞꠣ ꠖꠥꠁꠅ ꠎꠘꠦ ꠈꠤꠀꠟ ꠞꠣꠈꠛꠣꠄ, ꠚꠤꠞꠔ ꠀꠅꠀꠞ ꠢꠃ ꠙꠁꠘ꠆ꠌꠣꠡ ꠛꠍꠞ ꠛꠣꠖꠦ ꠇꠔꠖꠤꠘ ꠉꠦꠍꠦꠉꠤ, ꠀꠞ ꠍꠣꠝꠘꠞ ꠙꠁꠘ꠆ꠌꠣꠡ ꠛꠍꠞ ꠙꠥꠞꠔꠦ ꠇꠔꠖꠤꠘ ꠛꠣꠇꠤ ꠀꠍꠦ, ꠅꠈꠣꠘ ꠢꠤꠡꠣꠛ ꠇꠞꠤꠀ ꠎꠝꠤꠘꠞ ꠖꠞꠖꠣꠝ ꠑꠤꠇ ꠇꠞꠛꠣꠄ।
LEV 25:16 ꠎꠥꠖꠤ ꠛꠦꠡꠤ ꠛꠍꠞ ꠚꠡꠟ ꠙꠣꠅꠀꠞ ꠡꠝꠄ ꠕꠣꠇꠦ ꠔꠦ ꠖꠣꠝꠅ ꠛꠦꠡꠤ ꠅꠁꠛ, ꠀꠞ ꠇꠝ ꠅꠁꠟꠦ ꠖꠣꠝꠅ ꠇꠝꠛ। ꠀꠍꠟꠦ ꠚꠡꠟ ꠙꠣꠅꠀꠞ ꠛꠍꠞꠞ ꠃꠙꠞꠦꠃ ꠈꠞꠤꠖ-ꠛꠤꠇꠤꠞ ꠖꠣꠝ ꠑꠤꠇ ꠅꠁꠛ।
LEV 25:17 ꠔꠥꠝꠞꠣ ꠘꠤꠎꠞ ꠡꠝꠣꠎꠞ ꠇꠦꠃꠞꠞ ꠃꠙꠞꠦ ꠎꠥꠞ-ꠎꠥꠟꠥꠝ ꠇꠞꠤꠅ ꠘꠣ। ꠙꠞꠔꠦꠇ ꠎꠘꠃ ꠀꠟ꠆ꠟꠣꠞ ꠒꠞ-ꠈꠚꠦ ꠌꠟꠤꠅ। ꠝꠘꠅ ꠞꠣꠈꠤꠅ, ꠀꠝꠤ ꠀꠟ꠆ꠟꠣꠃ ꠔꠥꠝꠞꠣꠞ ꠝꠣꠛꠥꠖ।
LEV 25:18 “ꠔꠥꠝꠞꠣ ꠀꠝꠣꠞ ꠛꠣꠔꠣꠁꠟ ꠡꠞꠤꠅꠔ ꠀꠞ ꠢꠇꠟ ꠢꠥꠇꠥꠝ-ꠀꠢꠇꠣꠝ ꠢꠣꠝꠦꠡꠣ ꠝꠣꠘꠤꠅ। ꠔꠦꠃ ꠔꠥꠝꠞꠣꠞ ꠖꠦꠡ ꠅꠁꠛ ꠘꠤꠞꠣꠙꠖ ꠛꠡꠔ ꠈꠣꠘꠣ।
LEV 25:19 ꠀꠞ ꠔꠥꠝꠞꠣꠞ ꠈꠦꠔꠞ ꠎꠝꠤꠘ ꠕꠣꠇꠤ ꠡꠥꠟ꠆ꠟꠀꠘꠣ ꠚꠡꠟ ꠙꠣꠁꠛꠣꠄ, ꠙꠣꠁꠀ ꠙꠦꠐ ꠜꠞꠤ ꠈꠣꠁꠀ ꠖꠣꠁꠀ ꠢꠘꠅ ꠘꠤꠞꠣꠙꠖꠦ ꠛꠡꠔ ꠇꠞꠛꠣꠄ।
LEV 25:20 ꠔꠥꠝꠞꠣ ꠝꠘꠦ ꠝꠘꠦ ꠇꠁꠔꠣꠄ ꠙꠣꠞ, ꠡꠣꠔ ꠘꠝ꠆ꠛꠞ ꠛꠍꠞꠅ ꠎꠥꠖꠤ ꠇꠥꠘꠥ ꠈꠦꠔ ꠘꠣ ꠇꠞꠤ ꠀꠞ ꠚꠡꠟ ꠘꠣ ꠇꠣꠐꠤ, ꠔꠦ ꠀꠝꠞꠣ ꠈꠣꠁꠝꠥ ꠇꠤꠔꠣ?
LEV 25:21 ꠄꠞ ꠎꠥꠀꠙ ꠅꠁꠟ, ꠍꠄ ꠘꠝ꠆ꠛꠞ ꠛꠍꠞꠅ ꠀꠝꠤ ꠔꠥꠝꠞꠣꠞ ꠎꠝꠤꠘꠅ ꠅꠟꠣ ꠞꠢꠝ-ꠛꠞꠇꠔ ꠖꠤꠝꠥ, ꠎꠝꠤꠘꠅ ꠔꠤꠘ ꠛꠍꠞꠞ ꠢꠝꠣꠘ ꠚꠡꠟ ꠙꠣꠁꠀ ꠈꠣꠁꠀ-ꠚꠤꠘ꠆ꠖꠤꠀ ꠛꠣꠌꠛꠣꠄ।
LEV 25:22 ꠄꠞꠟꠣꠉꠤ ꠀꠐ ꠘꠝ꠆ꠛꠞ ꠛꠍꠞꠅ ꠈꠦꠔ ꠇꠞꠣꠞ ꠛꠤꠌ ꠛꠣꠁꠘ ꠖꠦꠅꠀꠞ ꠡꠝꠄꠅ ꠅꠃ ꠙꠥꠞꠣꠘꠣ ꠚꠡꠟ ꠈꠣꠁꠛꠣꠄ, ꠀꠞ ꠘꠄ ꠘꠝ꠆ꠛꠞ ꠛꠍꠞꠞ ꠚꠡꠟ ꠖꠣꠁꠛꠣꠞ ꠀꠉ ꠙꠞ꠆ꠎꠘ꠆ꠔ ꠅꠃ ꠚꠡꠟꠦꠃ ꠔꠥꠝꠞꠣꠞ ꠈꠣꠘꠤ-ꠈꠥꠞꠣꠇꠤ ꠌꠟꠛ।
LEV 25:23 “ꠝꠘꠅ ꠞꠣꠈꠤꠅ, ꠌꠤꠞꠇꠣꠟꠞ ꠟꠣꠉꠤ ꠇꠦꠃꠞꠞ ꠎꠝꠤ-ꠎꠝꠣ ꠈꠞꠤꠖ-ꠛꠤꠇꠤ ꠌꠟꠔ ꠘꠣꠄ। ꠀꠍꠟꠦ ꠢꠇꠟ ꠎꠝꠤꠘꠞ ꠝꠣꠟꠤꠇ ꠔ ꠀꠝꠤ ꠀꠟ꠆ꠟꠣ, ꠔꠥꠝꠞꠣ ꠀꠝꠣꠞ ꠍꠣꠝꠘꠦ ꠢꠘꠅ ꠈꠣꠟꠤ ꠜꠤꠘ-ꠖꠦꠡꠤ ꠝꠥꠍꠣꠚꠤꠞ।
LEV 25:24 ꠔꠥꠝꠞꠣ ꠙꠞꠔꠦꠇ ꠎꠘꠞ ꠈꠞꠤꠖꠣ ꠎꠝꠤ-ꠝꠤꠞꠣꠡ ꠛꠤꠇꠤꠖꠣꠞꠞꠦ ꠢꠤꠞꠛꠣꠞ ꠚꠤꠞꠔ ꠘꠤꠛꠣꠞ ꠡꠥꠎꠥꠉ ꠖꠤꠅ।
LEV 25:25 ꠔꠥꠝꠞꠣꠞ ꠎꠣꠔꠤꠞ ꠇꠥꠘꠥ ꠜꠣꠁ ꠅꠜꠣꠛꠅ ꠙꠠꠤꠀ ꠎꠥꠖꠤ ꠔꠣꠞ ꠙꠞꠤꠛꠣꠞꠞ ꠎꠝꠤꠘꠞ ꠇꠤꠍꠥ ꠅꠋꠡ ꠛꠦꠌꠤꠟꠣꠄ, ꠔꠦ ꠔꠣꠞ ꠢꠇꠟ ꠕꠣꠇꠤ ꠀꠙꠘ ꠎꠘꠦ ꠀꠁꠀ ꠅꠃ ꠛꠦꠌꠣ ꠎꠝꠤ ꠍꠣꠠꠣꠁꠀ ꠘꠤꠔꠦ ꠅꠁꠛ।
LEV 25:26 ꠇꠦꠃꠞꠞ ꠎꠥꠖꠤ ꠍꠣꠠꠣꠁꠀ ꠘꠤꠛꠣꠞ ꠝꠣꠘꠥꠡ ꠘꠣ ꠕꠣꠇꠦ, ꠔꠦ ꠢꠦ ꠘꠤꠎꠦ ꠗꠘ-ꠍꠣꠝꠣꠘꠣ ꠎꠝꠣꠁꠀ ꠢꠣꠞꠤ ꠘꠤꠎꠦꠃ ꠎꠥꠖꠤ ꠍꠣꠠꠣꠁꠀ ꠘꠤꠔ ꠌꠣꠄ,
LEV 25:27 ꠔꠦ ꠔꠣꠞ ꠛꠤꠇꠤꠞ ꠛꠍꠞ ꠕꠣꠇꠤ ꠍꠣꠠꠣꠘꠤ ꠙꠞ꠆ꠎꠘ꠆ꠔ ꠡꠝꠄ ꠢꠤꠡꠣꠛ ꠇꠞꠤꠀ, ꠝꠣꠟꠤꠇꠞ ꠙꠣꠅꠘꠣ ꠐꠦꠇꠣ ꠖꠤꠀ ꠔꠣꠞ ꠎꠝꠤ ꠚꠤꠞꠔ ꠘꠤꠛ।
LEV 25:28 ꠅꠁꠟꠦ ꠎꠝꠤ ꠚꠤꠞꠔ ꠘꠤꠛꠣꠞ ꠍꠣꠝꠣꠘꠣ ꠢꠦ ꠎꠝꠣꠁꠔꠦ ꠘꠣ ꠙꠣꠞꠟꠦ, ꠔꠣꠞ ꠛꠦꠌꠣ ꠎꠝꠤꠘ ꠚꠤꠞꠔ ꠙꠣꠅꠀꠞ ꠢꠃ ꠙꠁꠘ꠆ꠌꠣꠡ ꠛꠍꠞ ꠙꠥꠞꠣꠞ ꠀꠉ ꠙꠞ꠆ꠎꠘ꠆ꠔ ꠈꠞꠤꠖꠖꠣꠞꠦ ꠈꠣꠁꠛꠣ, ꠀꠞ ꠙꠁꠘ꠆ꠌꠣꠡ ꠛꠍꠞꠞ ꠇꠣꠟꠅ ꠔꠣꠞꠦ ꠚꠤꠞꠔ ꠖꠤꠛꠣ, ꠢꠦ ꠔꠣꠞ ꠎꠝꠤꠘ ꠄꠝꠘꠦꠃ ꠛꠤꠘꠣ ꠙꠄꠡꠣꠄ ꠚꠤꠞꠔ ꠙꠣꠁꠛ।
LEV 25:29 “ꠀꠞ ꠛꠣꠃꠘ꠆ꠒꠞꠤ ꠇꠞꠣ ꠘꠤꠞꠣꠙꠖ ꠐꠣꠃꠘꠞ ꠇꠥꠘꠥ ꠛꠣꠡꠣ-ꠛꠣꠠꠤ ꠎꠥꠖꠤ ꠇꠦꠃ ꠛꠦꠌꠤꠟꠣꠄ, ꠔꠦ ꠛꠦꠌꠣꠞ ꠛꠣꠖꠦ ꠙꠥꠞꠣ ꠄꠇ ꠛꠍꠞꠞ ꠝꠣꠎꠦ ꠢꠦ ꠅꠃ ꠛꠣꠠꠤ ꠚꠤꠞꠔ ꠘꠤꠔ ꠙꠣꠞꠛ। ꠙꠥꠞꠣ ꠄꠇ ꠛꠍꠞꠞ ꠝꠣꠎꠦ ꠢꠦ ꠚꠤꠞꠔ ꠘꠤꠛꠣꠞ ꠡꠥꠎꠥꠉ ꠙꠣꠁꠛ।
LEV 25:30 ꠄꠇ ꠛꠍꠞꠞ ꠝꠣꠎꠦ ꠁꠐꠣ ꠚꠤꠞꠔ ꠘꠣ ꠘꠤꠟꠦ, ꠌꠤꠞꠇꠣꠟꠞ ꠟꠣꠉꠤ ꠅꠃ ꠛꠣꠠꠤ ꠈꠞꠤꠖꠖꠣꠞ ꠀꠞ ꠔꠣꠞ ꠅꠀꠞꠤꠡꠞ ꠅꠁꠛ। ꠚꠤꠞꠔ ꠙꠣꠅꠀꠞ ꠛꠍꠞꠅ ꠁꠐꠣ ꠚꠤꠞꠔ ꠙꠣꠁꠔ ꠘꠣꠄ।
LEV 25:31 ꠅꠁꠟꠦ ꠎꠦꠔꠣ ꠉꠣꠃ-ꠉꠦꠞꠣꠝꠅ ꠇꠥꠘꠥ ꠛꠣꠃꠘ꠆ꠒꠞꠤ ꠘꠣꠄ, ꠅꠃ ꠎꠣꠉꠣꠞ ꠛꠣꠠꠤ-ꠊꠞꠞꠦ ꠈꠦꠔꠞ ꠎꠝꠤꠘꠞ ꠟꠣꠈꠣꠘ ꠝꠘꠅ ꠇꠞꠛꠣꠄ। ꠁꠔꠣ ꠍꠣꠠꠣꠁꠀ ꠀꠘꠣ ꠎꠣꠁꠛ, ꠀꠞ ꠚꠤꠞꠔ ꠙꠣꠅꠀꠞ ꠛꠍꠞꠅ ꠚꠤꠞꠔ ꠖꠤꠔꠦ ꠅꠁꠛꠃ।
LEV 25:32 “ꠈꠣꠟꠤ ꠟꠦꠛꠤ ꠈꠣꠘ꠆ꠖꠣꠘꠞ ꠐꠣꠃꠘꠞ ꠛꠣꠠꠤ-ꠊꠞ ꠅꠇꠟ ꠢꠣꠝꠦꠡꠣ ꠚꠤꠞꠔ ꠀꠘꠣ ꠎꠣꠁꠛ।
LEV 25:33 ꠔꠣꠞꠣꠞ ꠐꠣꠃꠘꠞ ꠇꠥꠘꠥ ꠛꠣꠠꠤ-ꠊꠞ ꠛꠦꠌꠤꠟꠦ, ꠚꠤꠞꠔ ꠙꠣꠅꠀꠞ ꠛꠍꠞꠅ ꠁꠐꠣ ꠚꠤꠞꠔ ꠙꠣꠁꠛꠣ। ꠔꠥꠝꠞꠣꠞ ꠔ ꠎꠣꠘꠣ ꠀꠍꠦ, ꠈꠣꠟꠤ ꠐꠣꠃꠘꠞ ꠛꠣꠠꠤ-ꠊꠞꠃ ꠅꠁꠟ ꠟꠦꠛꠤ ꠈꠣꠘ꠆ꠖꠣꠘꠞ ꠡꠝ꠆ꠙꠔ꠆ꠔꠤ, ꠛꠘꠤ ꠁꠍꠞꠣꠁꠟꠞ ꠝꠣꠎꠦ ꠔꠣꠞꠣ ꠅꠃ ꠡꠝ꠆ꠙꠔ꠆ꠔꠤꠃ ꠙꠣꠁꠍꠦ।
LEV 25:34 ꠅꠁꠟꠦ ꠔꠣꠞꠣꠞ ꠐꠣꠃꠘꠞ ꠗꠣꠞꠅ ꠙꠡꠥ ꠞꠣꠈꠣꠞ ꠛꠘ꠆ꠖꠞ ꠎꠣꠉꠣ ꠔꠣꠞꠣ ꠈꠞꠤꠖ-ꠛꠤꠇꠤ ꠇꠞꠔꠣ ꠙꠣꠞꠔꠣ ꠘꠣꠄ, ꠁꠔꠣ ꠔ ꠔꠣꠞꠣꠞ ꠌꠤꠞꠇꠣꠟꠤꠘ ꠡꠝ꠆ꠙꠔ꠆ꠔꠤ।
LEV 25:35 “ꠔꠥꠝꠞꠣꠞ ꠘꠤꠎꠞ ꠡꠝꠣꠎꠞ ꠇꠥꠘꠥ ꠜꠣꠁ ꠎꠥꠖꠤ ꠉꠞꠤꠛꠤ ꠢꠣꠟꠔꠞ ꠟꠣꠉꠤ ꠔꠣꠞ ꠘꠤꠎꠞ ꠈꠣꠅꠀ-ꠚꠤꠘ꠆ꠖꠣ ꠎꠥꠉꠣꠁꠔ ꠘꠣ ꠙꠣꠞꠦ, ꠔꠦ ꠜꠤꠘ-ꠖꠦꠡꠤ ꠝꠥꠍꠣꠚꠤꠞꠞ ꠟꠣꠈꠣꠘ ꠔꠣꠞꠦꠅ ꠡꠣꠁꠎ꠆ꠎ ꠇꠞꠤꠅ, ꠎꠣꠔꠦ ꠢꠦ ꠔꠥꠝꠞꠣꠞ ꠟꠉꠦ ꠛꠡꠔ ꠇꠞꠔ ꠙꠣꠞꠦ।
LEV 25:36 ꠔꠥꠝꠞꠣ ꠔꠣꠞ ꠉꠦꠍ ꠕꠣꠇꠤ ꠇꠥꠘꠥ ꠘꠝꠥꠘꠣꠞ ꠡꠥꠖ ꠈꠣꠁꠅ ꠘꠣ। ꠛꠞꠋ ꠢꠦ ꠎꠣꠔꠦ ꠢꠣꠝꠦꠡꠣ ꠔꠥꠝꠞꠣꠞ ꠉꠦꠍꠦ ꠞꠁꠛꠣꠞ ꠡꠥꠎꠥꠉ ꠙꠣꠄ, ꠅꠃ ꠘꠤꠅꠔꠦ ꠔꠥꠝꠞꠣ ꠘꠤꠎꠞ ꠝꠣꠛꠥꠖ ꠀꠟ꠆ꠟꠣꠞ ꠒꠞ-ꠈꠚ ꠜꠤꠔꠞꠦ ꠞꠣꠈꠤꠅ।
LEV 25:37 ꠔꠥꠝꠞꠣ ꠡꠥꠖ ꠈꠣꠁꠛꠣꠞ ꠘꠤꠅꠔꠦ ꠔꠣꠞꠦ ꠐꠦꠇꠣ-ꠙꠄꠡꠣ ꠇꠞ꠆ꠎ ꠖꠤꠅ ꠘꠣ। ꠔꠣꠞ ꠉꠦꠍꠦ ꠈꠣꠘꠤ-ꠈꠥꠞꠣꠇꠤꠞ ꠝꠣꠟ ꠛꠦꠌꠟꠦ ꠁꠔꠣꠞ ꠟꠣꠜ ꠟꠁꠅ ꠘꠣ।
LEV 25:38 ꠝꠘꠅ ꠞꠣꠈꠤꠅ, ꠀꠝꠤ ꠀꠟ꠆ꠟꠣꠃ ꠔꠥꠝꠞꠣꠞ ꠝꠣꠛꠥꠖ। ꠀꠡ꠆ꠔꠣ ꠇꠦꠘꠣꠘ ꠖꠦꠡ ꠖꠣꠘ ꠇꠞꠣꠞ ꠈꠤꠀꠟꠦ, ꠀꠞ ꠔꠥꠝꠞꠣꠞ ꠀꠙꠘ ꠝꠣꠛꠥꠖ ꠅꠀꠞ ꠈꠤꠀꠟꠦ, ꠀꠝꠤꠃ ꠔꠥꠝꠞꠣꠞꠦ ꠝꠤꠡꠞ ꠖꠦꠡ ꠕꠣꠇꠤ ꠛꠣꠞ ꠇꠞꠤ ꠀꠘꠍꠤ।
LEV 25:39 “ꠛꠘꠤ ꠁꠍꠞꠣꠁꠟꠤ ꠡꠝꠣꠎꠞ ꠇꠥꠘꠥ ꠜꠣꠁ ꠎꠥꠖꠤ ꠉꠞꠤꠛꠤ ꠢꠣꠟꠔꠅ ꠙꠠꠤꠀ ꠘꠤꠎꠦ ꠘꠤꠎꠦ ꠔꠥꠝꠞꠣꠞ ꠇꠦꠃꠞꠞ ꠉꠦꠍꠦ ꠛꠤꠇꠤ ꠈꠣꠁꠟꠣꠄ, ꠔꠦ ꠔꠣꠞꠦ ꠈꠞꠤꠖꠣ ꠉꠥꠟꠣꠝꠞ ꠟꠣꠈꠣꠘ ꠈꠣꠐꠣꠁꠅ ꠘꠣ।
LEV 25:40 ꠔꠥꠝꠞꠣꠞ ꠝꠥꠍꠣꠚꠤꠞ ꠀꠞ ꠞꠥꠎꠤ ꠇꠣꠝꠟꠣꠞ ꠟꠉꠦ ꠎꠦꠟꠣ ꠛꠦꠛꠢꠣꠞ ꠇꠞꠅ, ꠔꠣꠞ ꠟꠉꠦꠅ ꠅꠟꠣ ꠇꠞꠤꠅ। ꠢꠦ ꠢꠃ ꠚꠤꠞꠔ ꠙꠣꠅꠀꠞ ꠛꠍꠞ ꠙꠞ꠆ꠎꠘ꠆ꠔ ꠔꠥꠝꠣꠞ ꠇꠣꠝ-ꠇꠣꠎ ꠇꠞꠛ।
LEV 25:41 ꠛꠣꠖꠦ ꠔꠣꠞꠦ ꠀꠞ ꠔꠣꠞ ꠙꠥꠀ-ꠙꠥꠠꠤꠞꠦ ꠀꠎꠣꠖ ꠇꠞꠤ ꠖꠤꠅ। ꠔꠦꠃ ꠢꠦ ꠔꠣꠞ ꠘꠤꠎꠞ ꠈꠣꠘ꠆ꠖꠣꠘꠞ ꠝꠄ-ꠝꠥꠞꠛ꠆ꠛꠤꠞ ꠎꠝꠤꠘꠅ ꠚꠤꠞꠔ ꠎꠣꠁꠛ।
LEV 25:42 ꠢꠥꠘꠅ, ꠛꠘꠤ ꠁꠍꠞꠣꠁꠟ ꠔ ꠈꠣꠟꠤ ꠀꠝꠣꠞ ꠉꠥꠟꠣꠝ। ꠀꠝꠤ ꠔꠣꠞꠣꠞꠦ ꠝꠤꠡꠞ ꠖꠦꠡ ꠕꠣꠇꠤ ꠀꠎꠣꠖ ꠇꠞꠤ ꠀꠘꠍꠤ, ꠄꠞꠟꠣꠉꠤ ꠖꠥꠍꠞꠣ ꠇꠦꠃꠞꠞ ꠉꠥꠟꠣꠝꠤꠞ ꠟꠣꠉꠤ ꠔꠣꠞꠣꠞꠦ ꠛꠦꠌꠣꠞ ꠄꠈꠔꠤꠀꠞ ꠘꠣꠁ।
LEV 25:43 ꠔꠥꠝꠞꠣ ꠘꠤꠎꠞ ꠝꠣꠛꠥꠖꠞ ꠒꠞ-ꠈꠚꠦ ꠌꠟꠤꠅ, ꠄꠇꠦ-ꠅꠁꠘ꠆ꠘꠦ ꠙꠣꠡꠣꠘ-ꠘꠤꠡ꠆ꠐꠥꠞ ꠛꠦꠛꠢꠣꠞ ꠇꠞꠤꠅ ꠘꠣ।
LEV 25:44 “ꠔꠥꠝꠞꠣꠞ ꠀꠞꠤ-ꠚꠞꠤ ꠎꠔ ꠎꠣꠔꠤ ꠀꠍꠂꠘ, ꠅꠔꠣꠞ ꠝꠣꠎ ꠕꠣꠇꠤ ꠔꠥꠝꠞꠣꠞ ꠉꠥꠟꠣꠝ-ꠛꠣꠘ꠆ꠖꠤ ꠘꠤꠔꠣꠄ ꠙꠣꠞꠛꠣꠄ।
LEV 25:45 ꠔꠥꠝꠞꠣꠞ ꠝꠣꠎꠦ ꠛꠡꠔ ꠇꠞꠞꠣ ꠜꠤꠘ ꠎꠣꠔꠤꠞ ꠝꠣꠘꠥꠡ ꠕꠣꠇꠤ, ꠀꠞ ꠔꠣꠞꠣꠞ ꠎꠦꠔꠣ ꠀꠅꠟꠣꠖ ꠔꠥꠝꠞꠣꠞ ꠖꠦꠡꠅ ꠎꠘꠝꠤꠍꠂꠘ, ꠅꠔꠣꠞ ꠝꠣꠎ ꠕꠣꠇꠤꠅ ꠔꠥꠝꠞꠣ ꠘꠤꠎꠞ ꠟꠣꠉꠤ ꠉꠥꠟꠣꠝ-ꠛꠣꠘ꠆ꠖꠤ ꠘꠤꠔꠣꠄ ꠙꠣꠞꠛꠣꠄ।
LEV 25:46 ꠅꠃ ꠟꠣꠈꠣꠘ ꠉꠥꠟꠣꠝ-ꠛꠣꠘ꠆ꠖꠤꠞꠦ ꠘꠤꠎꠞ ꠍꠣꠝꠣꠘꠣ ꠢꠤꠡꠣꠛꠦ ꠔꠥꠝꠞꠣꠞ ꠙꠥꠀ-ꠙꠥꠠꠤꠘꠞꠦꠅ ꠖꠤꠀ ꠎꠣꠁꠔꠣꠄ ꠙꠣꠞꠛꠣꠄ। ꠁꠔꠣꠞꠦ ꠢꠣꠞꠣ ꠎꠤꠘ꠆ꠖꠦꠉꠤ ꠔꠥꠝꠞꠣꠞ ꠉꠥꠟꠣꠝꠤ ꠇꠞꠣꠁꠔꠣꠄ ꠙꠣꠞꠛꠣꠄ, ꠅꠁꠟꠦ ꠔꠥꠝꠞꠣꠞ ꠘꠤꠎꠞ ꠎꠣꠔꠤ ꠛꠘꠤ ꠁꠍꠞꠣꠁꠟꠞ ꠃꠙꠞꠦ ꠙꠣꠡꠣꠘ ꠝꠣꠟꠤꠇꠣꠘꠣ ꠈꠣꠐꠣꠁꠅ ꠘꠣ।
LEV 25:47 “ꠔꠥꠝꠞꠣꠞ ꠝꠣꠎꠦ ꠛꠡꠔ ꠇꠞꠞꠣ ꠜꠤꠘ-ꠖꠦꠡꠤ ꠇꠥꠘꠥ ꠝꠣꠘꠥꠡ ꠎꠥꠖꠤ ꠗꠘꠤ ꠛꠘꠤꠎꠣꠄ, ꠀꠞ ꠔꠥꠝꠞꠣꠞ ꠇꠥꠘꠥ ꠜꠣꠁ ꠎꠥꠖꠤ ꠅꠜꠣꠛꠅ ꠙꠠꠤꠀ ꠔꠣꠞ ꠉꠦꠍꠦ ꠛꠣ ꠔꠣꠞ ꠇꠥꠘꠥ ꠀꠅꠟꠣꠖꠞ ꠉꠦꠍꠦ ꠘꠤꠎꠞꠦ ꠛꠦꠌꠤꠟꠣꠄ,
LEV 25:48 ꠔꠦ ꠢꠦ ꠘꠤꠎꠞꠦ ꠀꠎꠣꠖ ꠇꠞꠣꠞ ꠡꠥꠎꠥꠉ ꠙꠣꠁꠛ। ꠔꠣꠞ ꠘꠤꠎꠞ ꠇꠥꠘꠥ ꠜꠣꠁꠄ ꠔꠣꠞꠦ ꠀꠎꠣꠖ ꠇꠞꠔ ꠙꠣꠞꠛ।
LEV 25:49 ꠔꠣꠞ ꠌꠣꠌꠣ ꠛꠣ ꠌꠣꠌꠣꠞ ꠊꠞꠞ ꠜꠣꠁꠄ, ꠛꠣ ꠔꠣꠞ ꠈꠣꠘ꠆ꠖꠣꠘꠞ ꠀꠙꠘ ꠎꠦꠇꠥꠘꠥ ꠎꠘꠦ ꠔꠣꠞꠦ ꠀꠎꠣꠖ ꠇꠞꠣꠁꠔꠣ ꠙꠣꠞꠛꠣ। ꠘꠤꠎꠞ ꠢꠣꠟꠔ ꠛꠖꠟꠣꠁꠟꠤꠔꠦ ꠙꠣꠞꠟꠦ, ꠢꠦ ꠘꠤꠎꠞꠦ ꠘꠤꠎꠦ ꠀꠎꠣꠖ ꠇꠞꠔ ꠙꠣꠞꠛ।
LEV 25:50 ꠎꠦ ꠛꠍꠞ ꠘꠤꠎꠞꠦ ꠛꠦꠌꠤꠍꠤꠟ ꠅꠃ ꠛꠍꠞ ꠕꠣꠇꠤ ꠢꠤꠡꠣꠛ ꠇꠞꠤꠀ ꠚꠤꠞꠔ ꠀꠅꠀꠞ ꠛꠍꠞ ꠙꠞ꠆ꠎꠘ꠆ꠔ ꠎꠔ ꠛꠍꠞ ꠛꠣꠇꠤ ꠕꠣꠇꠦ ꠅꠃ ꠡꠝꠄꠇꠥꠞ ꠇꠣꠝꠞ ꠛꠦꠔꠘꠞ ꠢꠤꠡꠣꠛ-ꠘꠤꠇꠣꠡ ꠝꠣꠚꠤꠇ ꠔꠣꠞ ꠀꠎꠣꠖꠤꠞ ꠖꠣꠝ ꠑꠤꠇ ꠇꠞꠣ ꠅꠁꠛ।
LEV 25:51 ꠚꠤꠞꠔ ꠙꠣꠅꠀꠞ ꠛꠍꠞ ꠎꠥꠖꠤ ꠛꠦꠡꠤ ꠖꠥꠞꠁ ꠅꠄ, ꠔꠦ ꠎꠦ ꠖꠣꠝꠦ ꠢꠦ ꠘꠤꠎꠞꠦ ꠛꠦꠌꠤꠍꠤꠟ, ꠅꠃ ꠖꠣꠝꠞ ꠛꠠ ꠄꠇ ꠅꠋꠡ ꠔꠣꠞ ꠀꠎꠣꠖꠤꠞ ꠛꠖꠟꠣ ꠢꠤꠡꠣꠛꠦ ꠖꠤꠔꠦ ꠅꠁꠛ।
LEV 25:52 ꠀꠞ ꠚꠤꠞꠔ ꠙꠣꠅꠀꠞ ꠛꠍꠞ ꠀꠁꠔꠦ ꠎꠥꠖꠤ ꠇꠝ ꠡꠝꠄ ꠛꠣꠇꠤ ꠞꠄ, ꠔꠦ ꠅꠃ ꠡꠝꠄ ꠢꠤꠡꠣꠛꠦ ꠐꠦꠇꠣ ꠖꠤꠀ ꠢꠦ ꠘꠤꠎꠞꠦ ꠀꠎꠣꠖ ꠇꠞꠔ ꠙꠣꠞꠛ।
LEV 25:53 ꠔꠣꠞꠦ ꠛꠍꠞ ꠌꠥꠇ꠆ꠔꠤ ꠇꠣꠝꠟꠣꠞ ꠟꠣꠈꠣꠘ ꠖꠦꠈꠤꠅ, ꠀꠞ ꠈꠤꠀꠟ ꠞꠣꠈꠤꠅ, ꠝꠣꠟꠤꠇꠦ ꠎꠣꠘꠥ ꠔꠣꠞ ꠟꠉꠦ ꠙꠣꠡꠣꠘ ꠛꠦꠛꠢꠣꠞ ꠘꠣ ꠇꠞꠦ।
LEV 25:54 ꠅꠟꠣ ꠇꠥꠘꠥ ꠟꠣꠈꠣꠘ ꠃꠙꠣꠄꠄ ꠎꠥꠖꠤ ꠢꠦ ꠀꠎꠣꠖ ꠅꠁꠔ ꠘꠣ ꠙꠣꠞꠦ, ꠔꠦ ꠔꠣꠞꠦ ꠀꠞ ꠔꠣꠞ ꠙꠥꠀ-ꠙꠥꠠꠤꠞꠦ ꠚꠤꠞꠔ ꠙꠣꠅꠀ ꠛꠍꠞꠞ ꠡꠝꠄ ꠄꠝꠘꠦꠃ ꠀꠎꠣꠖ ꠇꠞꠤ ꠖꠤꠟꠣꠁꠔꠦ ꠅꠁꠛ।
LEV 25:55 ꠝꠘꠅ ꠞꠣꠈꠤꠅ, ꠛꠘꠤ ꠁꠍꠞꠣꠁꠟ ꠔ ꠈꠣꠟꠤ ꠀꠝꠣꠞ ꠉꠥꠟꠣꠝ। ꠀꠝꠤ ꠔꠣꠞꠣꠞꠦ ꠝꠤꠡꠞ ꠖꠦꠡ ꠕꠣꠇꠤ ꠀꠎꠣꠖ ꠇꠞꠤ ꠀꠘꠍꠤ, ꠔꠣꠞꠣ ꠈꠣꠟꠤ ꠀꠝꠣꠞ। ꠀꠝꠤ ꠀꠟ꠆ꠟꠣꠃ ꠔꠥꠝꠞꠣꠞ ꠝꠣꠛꠥꠖ।
LEV 26:1 “ꠔꠥꠝꠞꠣ ꠇꠥꠘꠥ ꠘꠝꠥꠘꠣꠞ ꠖꠦꠛ-ꠖꠦꠛꠤꠞ ꠝꠥꠞ꠆ꠔꠤ ꠛꠣꠘꠣꠁꠅ ꠘꠣ। ꠟꠣꠇꠠꠤꠖꠤ ꠛꠣꠘꠣꠁꠟ ꠝꠥꠞ꠆ꠔꠤ, ꠛꠣ ꠇꠥꠘꠥꠎꠣꠔ ꠙꠣꠔ꠆ꠔꠞꠞꠦ ꠖꠦꠛꠔꠣ ꠢꠤꠡꠣꠛꠦ ꠛꠅꠀꠁꠟ ꠇꠞꠤꠅ ꠘꠣ। ꠙꠥꠎꠣꠞ ꠘꠤꠅꠔꠦ ꠙꠣꠔ꠆ꠔꠞ ꠈꠥꠖꠤꠀ ꠛꠣꠘꠣꠁꠟ ꠇꠥꠘꠥꠎꠣꠔ ꠝꠥꠞ꠆ꠔꠤ ꠔꠥꠝꠞꠣꠞ ꠖꠦꠡꠞ ꠝꠣꠎꠦ ꠞꠣꠈꠤꠅ ꠘꠣ। ꠝꠘꠅ ꠞꠣꠈꠤꠅ, ꠀꠝꠤ ꠀꠟ꠆ꠟꠣꠃ ꠔꠥꠝꠞꠣꠞ ꠝꠣꠛꠥꠖ।
LEV 26:2 ꠀꠝꠣꠞ ꠖꠦꠅꠀ ꠙꠞꠔꠦꠇ ꠎꠥꠝ꠆ꠝꠣꠛꠣꠞ ꠔꠥꠝꠞꠣ ꠝꠣꠘꠤꠅ, ꠀꠝꠣꠞ ꠙꠛꠤꠔ꠆ꠞ ꠇꠣꠛꠣ ꠊꠞꠞꠦ ꠔꠥꠝꠞꠣ ꠁꠎ꠆ꠎꠔ ꠇꠞꠤꠅ। ꠀꠝꠤꠃ ꠔ ꠝꠣꠛꠥꠖ।
LEV 26:3 “ꠔꠥꠝꠞꠣ ꠎꠥꠖꠤ ꠀꠝꠣꠞ ꠢꠇꠟ ꠢꠥꠇꠥꠝ-ꠀꠢꠇꠣꠝ ꠀꠞ ꠘꠤꠅꠝ-ꠇꠣꠘꠥꠘ ꠝꠣꠘꠤꠀ ꠀꠝꠟ ꠇꠞꠅ,
LEV 26:4 ꠔꠦ ꠀꠝꠤ ꠔꠥꠝꠞꠣꠞꠦ ꠑꠤꠇꠝꠔ ꠝꠦꠊ-ꠙꠣꠘꠤ ꠖꠤꠝꠥ। ꠔꠦꠃ ꠔꠥꠝꠞꠣꠞ ꠎꠝꠤꠘꠅ ꠚꠄ-ꠚꠡꠟ ꠚꠟꠤꠛ ꠀꠞ ꠉꠣꠍ-ꠉꠣꠍꠣꠟꠤꠄꠅ ꠚꠟ-ꠝꠥꠟ ꠖꠤꠛ।
LEV 26:5 ꠔꠥꠝꠞꠣꠞ ꠈꠦꠔꠞ ꠚꠄ-ꠚꠡꠟ ꠅꠔ ꠛꠦꠡꠤ ꠅꠁꠛ ꠎꠦꠘ, ꠀꠋꠉꠥꠞ ꠔꠥꠟꠣꠞ ꠡꠝꠄ ꠀꠎꠤꠟꠦꠅ, ꠔꠥꠝꠞꠣꠞ ꠚꠡꠟ ꠝꠣꠠꠣ ꠖꠦꠅꠀꠔ ꠞꠁꠛꠣꠄ। ꠀꠞ ꠎꠝꠤꠘꠞ ꠝꠣꠎꠦ ꠘꠄꠀ ꠛꠤꠌ ꠛꠣꠁꠘ ꠖꠦꠅꠀꠞ ꠡꠝꠄ ꠀꠎꠤꠟꠦꠅ, ꠅꠃ ꠡꠝꠄ ꠙꠞ꠆ꠎꠘ꠆ꠔ ꠀꠋꠉꠥꠞ ꠔꠥꠟꠣꠔ ꠞꠁꠛꠣꠄ। ꠔꠥꠝꠞꠣ ꠙꠦꠐ ꠜꠞꠤꠀ ꠈꠣꠘꠣ-ꠙꠤꠘꠣ ꠈꠣꠁꠛꠣꠄ, ꠀꠞ ꠘꠤꠞꠣꠙꠖꠦ ꠘꠤꠎꠞ ꠛꠣꠠꠤꠔ ꠛꠡꠔ ꠇꠞꠛꠣꠄ।
LEV 26:6 “ꠀꠝꠤ ꠔꠥꠝꠞꠣꠞ ꠖꠦꠡꠅ ꠡꠣꠘ꠆ꠔꠤ ꠖꠤꠝꠥ, ꠔꠥꠝꠞꠣ ꠡꠣꠘ꠆ꠔꠤꠄ ꠊꠥꠝꠣꠁꠛꠣꠄ, ꠇꠦꠃ ꠀꠁꠀ ꠔꠥꠝꠞꠣꠞꠦ ꠇꠥꠘꠥ ꠒꠞ-ꠈꠚ ꠖꠦꠈꠣꠁꠔ ꠘꠣꠄ। ꠔꠥꠝꠞꠣꠞ ꠖꠦꠡ ꠕꠣꠇꠤ ꠢꠇꠟ ꠎꠣꠔꠞ ꠢꠤꠋꠡ꠆ꠞ ꠎꠣꠘꠥꠀꠞꠞꠦ ꠀꠝꠤ ꠈꠦꠖꠣꠁ ꠖꠤꠝꠥ, ꠀꠞ ꠇꠥꠘꠥ ꠍꠤꠙꠣꠁ ꠖꠟꠦꠅ ꠔꠥꠝꠞꠣꠞ ꠖꠦꠡꠅ ꠢꠣꠝꠟꠣ ꠇꠞꠣꠔ ꠀꠁꠔ ꠘꠣꠄ।
LEV 26:7 ꠔꠥꠝꠞꠣꠞ ꠖꠥꠡꠝꠘ ꠅꠇꠟꠞꠦ ꠈꠦꠖꠣꠁꠀ ꠘꠤꠛꠣꠄ, ꠔꠥꠝꠞꠣꠞ ꠌꠈꠥꠞ ꠍꠣꠝꠘꠦ ꠔꠣꠞꠣꠞ ꠝꠞꠘ ꠅꠁꠛ।
LEV 26:8 ꠔꠥꠝꠞꠣꠞ ꠈꠣꠟꠤ ꠙꠣꠌ ꠎꠘ ꠍꠤꠙꠣꠁꠄ ꠄꠇ-ꠡ ꠖꠥꠡꠝꠘꠞꠦ, ꠀꠞ ꠄꠇ-ꠡ ꠍꠤꠙꠣꠁꠄ ꠖꠡ ꠀꠎꠣꠞ ꠎꠘꠞꠦ ꠈꠦꠖꠣꠁꠀ ꠘꠤꠛꠣꠄ, ꠔꠥꠝꠞꠣꠞ ꠖꠥꠡꠝꠘ ꠔꠥꠝꠞꠣꠞ ꠌꠈꠥꠞ ꠍꠣꠝꠘꠦ ꠔꠟꠥꠀꠞꠞ ꠔꠟꠦ ꠝꠞꠛ।
LEV 26:9 ꠀꠝꠤ ꠔꠥꠝꠞꠣꠞ ꠛꠣꠄ ꠖꠄꠀꠞ ꠘꠎꠞꠦ ꠌꠣꠁꠝꠥ, ꠔꠥꠝꠞꠣꠞ ꠀꠅꠟꠣꠖ ꠛꠣꠠꠣꠁꠀ ꠔꠥꠝꠞꠣꠞ ꠈꠣꠘ꠆ꠖꠣꠘ ꠛꠠ ꠇꠞꠝꠥ, ꠀꠞ ꠔꠥꠝꠞꠣꠞ ꠟꠉꠦ ꠀꠝꠣꠞ ꠅꠀꠖꠣ-ꠌꠥꠇ꠆ꠔꠤ ꠛꠅꠀꠁꠟ ꠞꠣꠈꠝꠥ।
LEV 26:10 ꠘꠄꠀ ꠛꠍꠞꠞ ꠚꠡꠟ ꠔꠥꠟꠣꠞ ꠟꠣꠉꠤ ꠃꠉꠣꠞ ꠈꠣꠟꠤ ꠇꠞꠣꠞ ꠀꠉ ꠙꠞ꠆ꠎꠘ꠆ꠔ, ꠀꠉꠞ ꠛꠍꠞꠞ ꠚꠡꠟꠖꠤ ꠔꠥꠝꠞꠣꠞ ꠈꠣꠘꠣ-ꠙꠤꠘꠣ ꠌꠟꠛ।
LEV 26:11 ꠔꠥꠝꠞꠣꠞ ꠛꠣꠄ ꠕꠣꠇꠤ ꠀꠝꠣꠞ ꠝꠥꠈ ꠚꠤꠞꠣꠁꠔꠣꠝ ꠘꠣꠄ, ꠔꠥꠝꠞꠣꠞ ꠝꠣꠎꠦꠃ ꠞꠁꠛ ꠀꠝꠣꠞ ꠛꠡꠔ ꠊꠞ।
LEV 26:12 ꠀꠝꠤ ꠔꠥꠝꠞꠣꠞ ꠟꠉꠦ ꠌꠟꠣ-ꠚꠤꠞꠣ ꠇꠞꠝꠥ, ꠀꠝꠤ ꠅꠁꠝꠥ ꠔꠥꠝꠞꠣꠞ ꠝꠣꠛꠥꠖ, ꠔꠥꠝꠞꠣ ꠅꠁꠛꠣꠄ ꠀꠝꠣꠞ ꠈꠣꠍ ꠙ꠆ꠞꠎꠣ।
LEV 26:13 ꠈꠤꠀꠟ ꠞꠣꠈꠤꠅ, ꠀꠝꠤ ꠀꠟ꠆ꠟꠣꠃ ꠔꠥꠝꠞꠣꠞ ꠝꠣꠛꠥꠖ। ꠝꠤꠡꠞ ꠖꠦꠡ ꠕꠣꠇꠤ ꠀꠝꠤꠃ ꠔꠥꠝꠞꠣꠞꠦ ꠀꠎꠣꠖ ꠇꠞꠤ ꠀꠘꠍꠤ, ꠎꠣꠔꠦ ꠔꠥꠝꠞꠣ ꠝꠤꠡꠞꠤ ꠅꠇꠟꠞ ꠉꠥꠟꠣꠝꠤ ꠇꠞꠣ ꠘꠣ ꠟꠣꠉꠦ। ꠔꠥꠝꠞꠣꠞ ꠉꠞ꠆ꠖꠘꠣ ꠕꠣꠇꠤ ꠎꠥꠀꠟ ꠜꠣꠋꠉꠤꠀ ꠚꠣꠟꠣꠁꠀ, ꠝꠣꠕꠣ ꠃꠌꠣ ꠇꠞꠤ ꠀꠐꠤꠛꠣꠞ ꠢꠣꠟꠔꠅ ꠀꠝꠤꠃ ꠔꠥꠝꠞꠣꠞꠦ ꠀꠘꠍꠤ।
LEV 26:14 “ꠅꠁꠟꠦ ꠔꠥꠝꠞꠣ ꠎꠥꠖꠤ ꠀꠝꠣꠞ ꠇꠕꠣ ꠘꠣ ꠢꠥꠘꠅ, ꠀꠝꠣꠞ ꠅꠃ ꠢꠥꠇꠥꠝ-ꠀꠢꠇꠣꠝ ꠘꠣ ꠝꠣꠘꠅ,
LEV 26:15 ꠀꠝꠣꠞ ꠛꠣꠔꠣꠁꠟ ꠀꠁꠘ-ꠇꠣꠘꠥꠘꠞꠦ ꠘꠣꠙꠍꠘ꠆ꠖ ꠇꠞꠅ, ꠀꠝꠣꠞ ꠖꠦꠅꠀ ꠡꠞꠤꠅꠔꠞꠦ ꠄꠟꠣꠝꠤ ꠇꠞꠅ, ꠀꠞ ꠀꠝꠣꠞ ꠢꠥꠇꠥꠝ ꠘꠣ ꠝꠣꠘꠤꠀ, ꠀꠝꠣꠞ ꠅꠀꠖꠣ-ꠌꠥꠇ꠆ꠔꠤꠞ ꠃꠟꠐꠣ ꠌꠟꠅ,
LEV 26:16 ꠔꠦ ꠀꠝꠤ ꠔꠥꠝꠞꠣꠞ ꠃꠙꠞꠦ ꠅꠟꠣ ꠈꠣꠠꠣ ꠝꠍꠤꠛꠔ ꠖꠤꠝꠥ, ꠔꠥꠝꠞꠣꠞ ꠡꠞꠤꠟ ꠇ꠆ꠇꠄ ꠅꠀꠞ ꠛꠦꠝꠣꠞ ꠖꠤꠝꠥ, ꠉꠎꠛꠤ ꠎꠇ꠆ꠇꠣ ꠛꠦꠝꠣꠞ ꠀꠞ ꠛꠦꠎꠥꠁꠔꠣ ꠔꠣꠙ ꠅꠁꠛ, ꠅꠔꠣ ꠛꠦꠝꠣꠞꠦ ꠔꠥꠝꠞꠣꠞ ꠌꠈꠥꠞ ꠙꠣꠅꠀꠞ ꠇ꠆ꠇꠄ ꠅꠁꠛ, ꠡꠞꠤꠟꠞ ꠇꠝꠎꠥꠞꠤ ꠀꠁꠛ। ꠔꠥꠝꠞꠣ ꠎꠝꠤꠘꠅ ꠈꠦꠔ ꠇꠞꠟꠦꠅ ꠚꠣꠄꠖꠣ ꠅꠁꠔ ꠘꠣꠄ, ꠔꠥꠝꠞꠣꠞ ꠚꠡꠟ ꠖꠥꠡꠝꠘꠦ ꠈꠣꠁꠛ।
LEV 26:17 ꠀꠝꠤ ꠔꠥꠝꠞꠣꠞ ꠈꠦꠔꠤ ꠇꠞꠣꠔ ꠟꠣꠉꠤꠎꠤꠝꠥ, ꠀꠞ ꠔꠥꠝꠞꠣ ꠘꠤꠎꠞ ꠖꠥꠡꠝꠘꠞ ꠉꠦꠍꠦ ꠀꠞꠤꠛꠣꠄ। ꠔꠥꠝꠞꠣꠞꠦ ꠎꠦꠔꠣꠄ ꠁꠋꠡꠣ ꠇꠞꠂꠘ, ꠅꠔꠣꠄ ꠔꠥꠝꠞꠣꠞꠦ ꠡꠣꠡꠘ ꠇꠞꠛꠣ, ꠀꠞ ꠇꠦꠃ ꠔꠥꠝꠞꠣꠞꠦ ꠘꠣ ꠈꠦꠖꠣꠁꠟꠦꠅ, ꠔꠥꠝꠞꠣ ꠎꠣꠘꠞ ꠒꠞꠦ ꠄꠝꠘꠦꠃ ꠜꠣꠉꠤꠛꠣꠄ।
LEV 26:18 “ꠄꠞꠛꠣꠖꠦꠅ ꠎꠥꠖꠤ ꠔꠥꠝꠞꠣ ꠀꠝꠣꠞ ꠇꠕꠣ ꠘꠣ ꠢꠥꠘꠅ, ꠔꠦ ꠀꠝꠤ ꠔꠥꠝꠞꠣꠞ ꠉꠥꠘꠣꠞ ꠡꠣꠔ ꠉꠥꠘ ꠛꠦꠡꠤ ꠡꠣꠎꠣ ꠖꠤꠝꠥ।
LEV 26:19 ꠀꠝꠤ ꠔꠥꠝꠞꠣꠞ ꠛꠟ-ꠡꠇ꠆ꠔꠤꠞ ꠛꠦꠐꠣꠉꠤꠞꠤ ꠜꠣꠋꠉꠤꠀ ꠌꠥꠞꠝꠣꠞ ꠇꠞꠤꠟꠤꠝꠥ। ꠔꠥꠝꠞꠣꠞ ꠝꠣꠕꠣꠞ ꠃꠙꠞꠞ ꠀꠍꠝꠣꠘꠞꠦ ꠟꠥꠀꠞ ꠟꠣꠈꠣꠘ, ꠀꠞ ꠙꠣꠅꠞ ꠔꠟꠞ ꠝꠣꠐꠤꠞꠦ ꠔꠣꠝꠣꠞ ꠟꠣꠈꠣꠘ ꠡꠇ꠆ꠔ ꠇꠞꠝꠥ।
LEV 26:20 ꠔꠦꠃ ꠔꠥꠝꠞꠣ ꠅꠔ ꠝꠦꠘꠔ ꠇꠞꠤꠀꠅ ꠇꠥꠘꠥ ꠚꠟ ꠙꠣꠁꠔꠣꠄ ꠘꠣꠄ। ꠈꠦꠔꠞ ꠎꠝꠤꠘꠅ ꠚꠡꠟ ꠗꠞꠔ ꠘꠣꠄ, ꠉꠣꠍ-ꠉꠣꠍꠣꠟꠤꠔ ꠚꠟ ꠝꠤꠟꠔ ꠘꠣꠄ।
LEV 26:21 “ꠔꠥꠝꠞꠣꠞ ꠖꠤꠟꠞ ꠝꠣꠎꠦ ꠎꠥꠖꠤ ꠀꠝꠣꠞ ꠟꠣꠉꠤ ꠇꠥꠘꠥꠎꠣꠔꠞ ꠖꠥꠡꠝꠘꠤ ꠕꠣꠇꠦ, ꠀꠝꠣꠞ ꠛꠣꠔꠣꠁꠟ ꠢꠥꠇꠥꠝ ꠎꠥꠖꠤ ꠔꠥꠝꠞꠣꠞ ꠇꠣꠘꠅ ꠘꠣ ꠢꠣꠝꠣꠄ, ꠔꠦ ꠀꠝꠤ ꠔꠥꠝꠞꠣꠞ ꠘꠣꠚꠞꠝꠣꠘꠤꠞ ꠟꠣꠉꠤ ꠡꠣꠔ ꠉꠥꠘ ꠛꠦꠡꠤ ꠡꠣꠎꠣ ꠖꠤꠝꠥ।
LEV 26:22 ꠔꠥꠝꠞꠣꠞ ꠝꠣꠎꠦ ꠀꠝꠤ ꠢꠤꠋꠡ꠆ꠞ ꠎꠣꠘꠥꠀꠞ ꠙꠣꠑꠣꠁꠝꠥ, ꠁꠔꠣꠄ ꠔꠥꠝꠞꠣꠞ ꠙꠥꠀ-ꠙꠥꠠꠤꠘ꠆ꠔꠞꠦ ꠈꠣꠁꠛꠣ, ꠔꠥꠝꠞꠣꠞ ꠙꠡꠥꠞ ꠙꠣꠟꠞꠦ ꠛꠤꠘꠣꠡ ꠇꠞꠛꠣ, ꠀꠞ ꠔꠥꠝꠞꠣꠞ ꠝꠣꠘꠡꠞ ꠙꠞꠤꠝꠣꠘꠅ ꠇꠝꠣꠁꠟꠤꠛꠣ, ꠖꠦꠡꠞ ꠙꠕ-ꠊꠣꠐ ꠈꠣꠟꠤ ꠙꠠꠤ ꠞꠁꠛ।
LEV 26:23 “ꠅꠃ ꠢꠇꠟ ꠊꠐꠘꠣ ꠊꠐꠣꠞ ꠛꠣꠖꠦꠅ ꠔꠥꠝꠞꠣ ꠎꠥꠖꠤ ꠀꠝꠣꠞ ꠀꠁꠘ-ꠇꠣꠘꠥꠘꠞ ꠃꠟꠐꠣ ꠌꠟꠅ,
LEV 26:24 ꠔꠦ ꠀꠝꠤ ꠘꠤꠎꠦ ꠔꠥꠝꠞꠣꠞ ꠖꠥꠡꠝꠘ ꠛꠘꠤꠀ, ꠔꠥꠝꠞꠣꠞ ꠉꠥꠘꠣꠞ ꠡꠣꠔ ꠉꠥꠘ ꠛꠦꠡꠤ ꠡꠣꠎꠣ ꠖꠤꠝꠥ।
LEV 26:25 ꠀꠝꠣꠞ ꠅꠀꠖꠣ-ꠌꠥꠇ꠆ꠔꠤꠞꠦ ꠘꠣ ꠝꠣꠘꠣꠄ ꠀꠝꠤ ꠔꠥꠝꠞꠣꠞ ꠃꠙꠞꠦ ꠟꠣꠠꠣꠁ-ꠎꠥꠖ꠆ꠖ ꠀꠘꠣꠁꠝꠥ। ꠖꠥꠡꠝꠘꠞꠦ ꠖꠦꠈꠤꠀ ꠔꠥꠝꠞꠣ ꠎꠦꠛꠟꠣ ꠐꠣꠃꠘꠅ ꠉꠤꠀ ꠢꠣꠝꠣꠁꠛꠣꠄ, ꠢꠘꠅ ꠀꠝꠤ ꠔꠥꠝꠞꠣꠞ ꠃꠙꠞꠦ ꠉꠎꠛꠤ ꠝꠞꠇꠤ ꠍꠣꠠꠤꠝꠥ, ꠔꠦꠃ ꠔꠥꠝꠞꠣ ꠖꠥꠡꠝꠘꠞ ꠀꠔꠅ ꠗꠞꠣ ꠙꠠꠛꠣꠄ।
LEV 26:26 ꠀꠝꠤ ꠔꠥꠝꠞꠣꠞ ꠈꠣꠘꠤ-ꠈꠥꠞꠣꠇꠤꠞ ꠝꠣꠎꠦ ꠅꠜꠣꠛ ꠊꠐꠣꠁꠝꠥ, ꠔꠦꠃ ꠖꠡ ꠎꠘ ꠛꠦꠐꠤꠄ ꠞꠣꠘ꠆ꠖꠤꠔꠦ ꠄꠇ ꠌꠥꠟꠣꠞ ꠛꠦꠡꠤ ꠟꠣꠉꠔ ꠘꠣꠄ। ꠈꠣꠘꠤꠔ ꠛꠁꠀ ꠔꠥꠝꠞꠣ ꠞꠥꠐꠤ ꠝꠣꠙꠤ ꠝꠣꠙꠤ ꠈꠣꠁꠛꠣꠄ, ꠙꠦꠐ ꠜꠞꠣ ꠈꠣꠘꠤ ꠎꠥꠐꠔ ꠘꠣꠄ।
LEV 26:27 “ꠁꠔꠣ ꠢꠇꠟꠔꠣꠞ ꠛꠣꠖꠦꠅ ꠎꠥꠖꠤ ꠀꠝꠣꠞ ꠇꠕꠣ ꠘꠣ ꠢꠥꠘꠤꠀ ꠀꠝꠣꠞ ꠃꠟꠐꠣ ꠌꠟꠅ,
LEV 26:28 ꠔꠦ ꠀꠝꠤ ꠉꠥꠍꠣꠄ ꠀꠉꠥꠁꠘ ꠅꠁꠀ ꠀꠝꠤꠅ ꠔꠥꠝꠞꠣꠞ ꠃꠟꠐꠣ ꠌꠟꠝꠥ, ꠀꠞ ꠔꠥꠝꠞꠣꠞ ꠉꠥꠘꠣꠞ ꠡꠣꠔ ꠉꠥꠘ ꠡꠣꠎꠣ ꠖꠤꠝꠥ।
LEV 26:29 ꠙꠦꠐꠞ ꠜꠥꠇꠦ ꠅꠃ ꠡꠝꠄ ꠔꠥꠝꠞꠣ ꠘꠤꠎꠞ ꠙꠥꠀ-ꠙꠥꠠꠤꠘ꠆ꠔꠞꠦ ꠌꠤꠛꠣꠁꠀ ꠈꠣꠁꠛꠣꠄ।
LEV 26:30 ꠀꠝꠤ ꠔꠥꠝꠞꠣꠞ ꠙꠥꠎꠣꠞ ꠢꠇꠟ ꠝꠣꠘ꠆ꠒꠛ ꠀꠞ ꠗꠥꠙ-ꠗꠥꠘꠣ ꠎꠣꠟꠣꠘꠤꠞ ꠎꠣꠉꠣꠞꠦꠅ ꠛꠤꠘꠣꠡ ꠇꠞꠝꠥ, ꠔꠥꠝꠞꠣꠞ ꠖꠦꠛ-ꠖꠦꠛꠤꠞ ꠝꠥꠞ꠆ꠔꠤꠞ ꠃꠙꠞꠦ ꠀꠝꠤ ꠔꠥꠝꠞꠣꠞ ꠟꠣꠡꠞ ꠐꠦꠇꠤ ꠕꠁꠝꠥ, ꠀꠝꠤ ꠔꠥꠝꠞꠣꠞ ꠛꠣꠄ ꠈꠥꠛ ꠊꠤꠘ꠆ꠘꠣꠞ ꠘꠎꠞꠦ ꠌꠣꠁꠝꠥ।
LEV 26:31 ꠀꠝꠤ ꠔꠥꠝꠞꠣꠞ ꠉꠣꠃ ꠀꠞ ꠐꠣꠃꠘ ꠅꠇꠟ, ꠀꠞ ꠢꠇꠟ ꠝꠍꠤꠖ-ꠝꠘ꠆ꠖꠤꠞ ꠛꠤꠘꠣꠡ ꠇꠞꠤꠟꠤꠝꠥ। ꠔꠥꠝꠞꠣꠞ ꠍꠖꠉꠣ-ꠇꠥꠞꠛꠣꠘꠤꠞ ꠗꠥꠝꠣꠞ ꠊꠦꠞꠣꠘ ꠀꠝꠤ ꠀꠞ ꠇꠛꠥꠟ ꠇꠞꠔꠣꠝ ꠘꠣꠄ।
LEV 26:32 ꠀꠝꠤ ꠔꠥꠝꠞꠣꠞ ꠖꠦꠡꠞ ꠃꠙꠞꠦ ꠅꠟꠣ ꠉꠎꠛ ꠖꠤꠝꠥ, ꠎꠦꠔꠣ ꠖꠦꠈꠤꠀ ꠔꠥꠝꠞꠣꠞ ꠖꠥꠡꠝꠘ ꠅꠇꠟꠦꠅ ꠒꠞꠣꠁꠀ ꠇꠣꠙꠤꠛꠣ।
LEV 26:33 ꠘꠣꠘꠣꠘ ꠎꠣꠔꠤꠞ ꠝꠣꠎꠦ ꠀꠝꠤ ꠔꠥꠝꠞꠣꠞꠦ ꠍꠤꠔ꠆ꠞꠣꠁ ꠖꠤꠝꠥ, ꠔꠟꠥꠀꠞ ꠀꠔꠅ ꠟꠁꠀ ꠀꠝꠤ ꠔꠥꠝꠞꠣꠞꠦ ꠈꠦꠖꠣꠁꠝꠥ। ꠔꠥꠝꠞꠣꠞ ꠖꠦꠡ ꠛꠤꠘꠣꠡ ꠅꠁꠛ, ꠔꠥꠝꠞꠣꠞ ꠐꠣꠃꠘ ꠀꠞ ꠉꠣꠃ-ꠉꠦꠞꠣꠝ ꠈꠣꠟꠤ ꠙꠠꠤ ꠞꠁꠛ।
LEV 26:34 “ꠔꠥꠝꠞꠣ ꠖꠥꠡꠝꠘꠞ ꠖꠦꠡꠅ ꠕꠣꠇꠣꠞ ꠡꠝꠄ, ꠔꠥꠝꠞꠣꠞ ꠘꠤꠎꠞ ꠖꠦꠡꠞ ꠎꠝꠤꠘꠦ ꠔꠣꠞ ꠙꠣꠅꠘꠣ ꠎꠤꠞꠣꠘꠤꠞ ꠛꠍꠞ ꠎꠤꠞꠣꠁꠛ। ꠅꠃ ꠡꠝꠄ ꠖꠦꠡꠞ ꠝꠣꠐꠤꠄ ꠔꠣꠞ ꠙꠣꠅꠘꠣ ꠀꠞꠣꠝ ꠙꠣꠁꠛ।
LEV 26:35 ꠔꠥꠝꠞꠣ ꠘꠤꠎꠦ ꠕꠣꠇꠣꠞ ꠡꠝꠄ ꠎꠦꠛꠟꠣ ꠅꠃ ꠎꠝꠤꠘ ꠅꠇꠟꠦ ꠎꠤꠞꠣꠘꠤꠞ ꠛꠍꠞ ꠙꠣꠁꠍꠤꠟ ꠘꠣ, ꠅꠈꠘ ꠖꠦꠡ ꠛꠤꠘꠣꠡꠞ ꠡꠝꠄ ꠁꠔꠣꠄ ꠢꠃ ꠙꠣꠅꠘꠣ ꠎꠤꠞꠣꠘꠤ ꠎꠤꠞꠣꠁꠛ।
LEV 26:36 ꠔꠥꠝꠞꠣꠞ ꠝꠣꠎꠞ ꠎꠦꠞꠣ ꠉꠤꠀ ꠖꠥꠡꠝꠘꠞ ꠖꠦꠡꠅ ꠛꠣꠌꠤꠀ ꠞꠁꠛꠣ, ꠔꠣꠞꠣꠞ ꠜꠤꠔꠞꠦ ꠀꠝꠤ ꠅꠃ ꠟꠣꠈꠣꠘ ꠒꠞ-ꠈꠚ ꠢꠣꠞꠣꠁ ꠖꠤꠝꠥ, ꠟꠣꠠꠣꠁꠞ ꠇꠣꠟꠅ ꠝꠣꠘꠡꠦ ꠎꠦꠟꠣ ꠖꠥꠡꠝꠘꠞ ꠀꠔ ꠕꠣꠇꠤ ꠛꠣꠌꠣꠞ ꠟꠣꠉꠤ ꠖꠃꠠꠤꠀ ꠜꠣꠉꠦ, ꠅꠃꠟꠣ ꠄꠉꠥ ꠙꠣꠔꠣ ꠙꠠꠣꠞ ꠀꠅꠀꠎ ꠢꠥꠘꠟꠦꠃ ꠔꠣꠞꠣ ꠖꠃꠠꠤꠀ ꠜꠣꠉꠤꠛꠣ।
LEV 26:37 ꠔꠟꠥꠀꠞꠞ ꠔꠟ ꠕꠣꠇꠤ ꠛꠣꠌꠣꠞ ꠟꠣꠉꠤ ꠝꠣꠘꠡꠦ ꠎꠦꠟꠣ ꠎꠣꠘ ꠟꠁꠀ ꠖꠃꠠꠣꠄ, ꠇꠦꠃ ꠔꠥꠝꠞꠣꠞꠦ ꠘꠣ ꠖꠃꠠꠣꠁꠟꠦꠅ ꠔꠥꠝꠞꠣ ꠘꠤꠎꠦ ꠘꠤꠎꠦ ꠖꠃꠠꠣꠁꠀ ꠅꠟꠣ ꠄꠇꠦ-ꠅꠁꠘ꠆ꠘꠞ ꠃꠙꠞꠦ ꠙꠠꠛꠣꠄ। ꠖꠥꠡꠝꠘꠞ ꠍꠣꠝꠘꠦ ꠔꠥꠝꠞꠣ ꠃꠛꠣꠁꠔꠣꠄ ꠙꠣꠞꠔꠣꠄ ꠘꠣꠄ।
LEV 26:38 ꠔꠥꠝꠞꠣ ꠘꠣꠘꠣꠘ ꠎꠣꠔꠤꠞ ꠝꠣꠘꠡꠞ ꠝꠣꠎꠦ ꠍꠤꠔ꠆ꠞꠤꠀ ꠝꠞꠛꠣꠄ, ꠀꠞ ꠖꠥꠡꠝꠘꠞ ꠖꠦꠡꠦ ꠔꠥꠝꠞꠣꠞꠦ ꠉꠤꠟꠤꠀ ꠈꠣꠁꠛ।
LEV 26:39 ꠄꠞꠛꠣꠖꠦꠅ ꠎꠥꠖꠤ ꠔꠥꠝꠞꠣꠞ ꠝꠣꠎꠞ ꠇꠦꠃ ꠢꠘꠅ ꠛꠣꠌꠤꠀ ꠞꠄ, ꠔꠦ ꠔꠣꠞꠣꠅ ꠘꠤꠎꠞ ꠀꠞ ꠔꠣꠞꠣꠞ ꠝꠄ-ꠝꠥꠞꠛ꠆ꠛꠤꠞ ꠘꠣꠚꠞꠝꠣꠘꠤꠞ ꠟꠣꠉꠤ ꠇ꠆ꠇꠄ ꠅꠀꠔ ꠞꠁꠛꠣ।
LEV 26:40 “ꠔꠣꠞꠣ ꠅꠈꠣꠘ ꠡ꠆ꠛꠤꠇꠣꠞ ꠇꠞꠣ ꠟꠣꠉꠛ ꠎꠦꠘ, ꠔꠣꠞꠣ ꠀꠞ ꠔꠣꠞꠣꠞ ꠝꠄ-ꠝꠥꠞꠛ꠆ꠛꠤꠄ ꠀꠝꠣꠞ ꠟꠉꠦ ꠛꠦꠁꠝꠣꠘꠤ ꠇꠞꠍꠦ, ꠀꠝꠣꠞ ꠢꠥꠇꠥꠝꠞ ꠛꠤꠞꠥꠗꠤꠔꠣ ꠇꠞꠤꠀ ꠉꠥꠘꠣ ꠇꠞꠍꠦ,
LEV 26:41 ꠄꠞꠟꠣꠉꠤ ꠀꠝꠤꠅ ꠔꠣꠞꠣꠞ ꠟꠉꠦ ꠖꠥꠡꠝꠘꠞ ꠟꠣꠈꠣꠘ ꠛꠦꠛꠢꠣꠞ ꠇꠞꠍꠤ, ꠔꠣꠞꠣꠞꠦ ꠜꠤꠐꠣ-ꠝꠣꠐꠤ ꠍꠣꠠꠣꠁꠀ ꠖꠥꠡꠝꠘꠞ ꠖꠦꠡꠅ ꠀꠘꠣꠁꠍꠤ। ꠅꠔꠣ ꠡ꠆ꠛꠤꠇꠣꠞ ꠇꠞꠤꠀ ꠔꠣꠞꠣ ꠎꠥꠖꠤ ꠇꠣꠔꠞ ꠅꠁꠀ ꠘꠞꠝ ꠖꠤꠟꠦ ꠔꠃꠛꠣ ꠇꠞꠤꠀ ꠉꠥꠘꠣꠞ ꠡꠣꠎꠣ ꠛꠁꠔꠦ ꠞꠣꠎꠤ ꠅꠄ,
LEV 26:42 ꠔꠦ ꠀꠝꠤ ꠁꠀꠇꠥꠛꠞ ꠟꠉꠦ ꠇꠣꠁꠝ ꠇꠞꠣ ꠀꠝꠣꠞ ꠅꠀꠖꠣ-ꠌꠥꠇ꠆ꠔꠤꠞ ꠇꠕꠣ ꠁꠀꠖ ꠇꠞꠝꠥ, ꠁꠍꠢꠣꠇꠞ ꠟꠉꠦ ꠇꠞꠣ ꠅꠀꠖꠣ-ꠌꠥꠇ꠆ꠔꠤꠞ ꠇꠕꠣꠞꠦꠅ ꠝꠘꠅ ꠇꠞꠝꠥ, ꠀꠞ ꠁꠛ꠆ꠞꠣꠢꠤꠝꠞ ꠟꠉꠦ ꠇꠞꠣ ꠀꠝꠣꠞ ꠅꠀꠖꠣ-ꠌꠥꠇ꠆ꠔꠤꠞꠦ ꠁꠀꠖ ꠇꠞꠝꠥ, ꠔꠣꠞꠣꠞꠦ ꠖꠦꠅꠀ ꠖꠦꠡꠞ ꠇꠕꠣꠅ ꠈꠤꠀꠟ ꠇꠞꠝꠥ।
LEV 26:43 “ꠔꠣꠞꠣ ꠖꠦꠡ ꠍꠣꠠꠤꠀ ꠎꠣꠅꠀꠞ ꠛꠣꠖꠦ ꠔꠣꠞꠣꠞ ꠛꠤꠘꠣꠡ ꠅꠀ ꠖꠦꠡ ꠈꠣꠟꠤ ꠙꠠꠤ ꠞꠁꠛ, ꠎꠝꠤꠘꠞ ꠙꠣꠅꠘꠣ ꠎꠤꠞꠣꠘꠤꠞ ꠛꠍꠞ ꠅꠇꠟꠅ ꠎꠤꠞꠣꠁꠛꠃ ꠎꠤꠞꠣꠁꠛ। ꠀꠝꠣꠞ ꠢꠥꠇꠥꠝꠞ ꠛꠤꠞꠥꠗꠤꠔꠣ ꠇꠞꠤꠀ ꠘꠣꠚꠞꠝꠣꠘꠤ ꠇꠞꠣꠄ, ꠀꠝꠣꠞ ꠀꠁꠘꠞ ꠃꠟꠐꠣ ꠌꠟꠣꠄ ꠔꠣꠞꠣ ꠅꠟꠣ ꠡꠣꠎꠣ ꠙꠣꠁꠛꠣ।
LEV 26:44 ꠅꠁꠟꠦ ꠖꠥꠡꠝꠘꠞ ꠖꠦꠡꠅ ꠕꠣꠇꠣꠞ ꠇꠣꠟꠅ ꠀꠝꠤ ꠔꠣꠞꠣꠞꠦ ꠅꠟꠣ ꠇꠥꠘꠥ ꠊꠤꠘ꠆ꠘꠣ ꠛꠣ ꠄꠟꠣꠝꠤꠞ ꠌꠃꠈꠦ ꠖꠦꠈꠔꠣꠝ ꠘꠣꠄ, ꠔꠣꠞꠣꠞꠦ ꠄꠇ꠆ꠇꠦꠞꠦ ꠛꠤꠘꠣꠡ ꠅꠁꠔꠦ ꠖꠤꠔꠣꠝ ꠘꠣꠄ, ꠎꠣꠔꠦ ꠔꠣꠞꠣꠞ ꠟꠉꠦ ꠇꠞꠣ ꠀꠝꠣꠞ ꠅꠀꠖꠣ-ꠌꠥꠇ꠆ꠔꠤ ꠜꠋꠉ ꠘꠣ ꠅꠄ। ꠝꠘꠅ ꠞꠣꠈꠤꠅ, ꠀꠝꠤ ꠀꠟ꠆ꠟꠣꠃ ꠔꠣꠞꠣꠞ ꠝꠣꠛꠥꠖ।
LEV 26:45 ꠔꠣꠞꠣꠞ ꠟꠣꠉꠤ ꠀꠝꠤ ꠔꠣꠞꠣꠞ ꠝꠄ-ꠝꠥꠞꠛ꠆ꠛꠤꠞ ꠟꠉꠞ ꠅꠀꠖꠣ-ꠌꠥꠇ꠆ꠔꠤꠞꠦ ꠁꠀꠖ ꠇꠞꠝꠥ। ꠅꠃ ꠝꠄ-ꠝꠥꠞꠛ꠆ꠛꠤ ꠅꠇꠟꠞ ꠝꠣꠛꠥꠖ ꠅꠀꠞ ꠘꠤꠅꠔꠦ ꠢꠇꠟ ꠎꠣꠔꠤꠞ ꠍꠣꠝꠘ ꠖꠤꠀ ꠀꠝꠤ ꠔꠣꠞꠣꠞꠦ ꠝꠤꠡꠞ ꠖꠦꠡ ꠕꠣꠇꠤ ꠛꠣꠞ ꠇꠞꠤꠀ ꠀꠘꠍꠤ। ꠀꠝꠤꠃ ꠔ ꠝꠣꠛꠥꠖ।”
LEV 26:46 ꠁꠔꠣ ꠅꠁꠟ ꠢꠃ ꠡꠞꠤꠅꠔ, ꠢꠥꠇꠥꠝ-ꠀꠢꠇꠣꠝ, ꠀꠞ ꠘꠤꠅꠝ-ꠇꠣꠘꠥꠘ, ꠎꠦꠔꠣ ꠔꠥꠞ ꠙꠣꠠꠞ ꠃꠙꠞꠦ ꠝꠣꠛꠥꠖꠦ ꠝꠥꠍꠣ ꠘꠛꠤꠞ ꠝꠣꠞꠚꠔꠦ ꠛꠘꠤ ꠁꠍꠞꠣꠁꠟꠞ ꠟꠣꠉꠤ ꠛꠅꠀꠁꠟ ꠇꠞꠍꠂꠘ।
LEV 27:1 ꠛꠣꠖꠦ ꠝꠣꠛꠥꠖꠦ ꠝꠥꠍꠣ ꠘꠛꠤꠞꠦ ꠇꠁꠟꠣ,
LEV 27:2 “ꠔꠥꠝꠤ ꠔꠣꠝꠣꠝ ꠛꠘꠤ ꠁꠍꠞꠣꠁꠟꠞꠦ ꠎꠣꠘꠣꠁ ꠖꠦꠅ, ꠇꠦꠃ ꠎꠥꠖꠤ ꠇꠥꠘꠥ ꠝꠣꠘꠡꠞꠦ ꠀꠟ꠆ꠟꠣꠞ ꠘꠣꠝꠦ ꠖꠦꠅꠀꠞ ꠝꠣꠘ꠆ꠘꠔ ꠇꠞꠦ, ꠔꠦ ꠅꠃ ꠎꠘꠞ ꠛꠖꠟꠣ ꠅꠟꠣꠈꠣꠘ ꠢꠣꠖꠤꠀ ꠖꠤꠔꠦ ꠅꠁꠛ:
LEV 27:3 ꠛꠤꠡ ꠕꠣꠇꠤ ꠡꠣꠁꠐ ꠛꠍꠞ ꠛꠄꠅꠡꠤ ꠛꠦꠐꠣꠁꠘ꠆ꠔꠞ ꠟꠣꠉꠤ, ꠄꠛꠣꠖꠔ ꠈꠣꠘꠣꠞ ꠝꠣꠙꠦ ꠙꠁꠘ꠆ꠌꠣꠡ ꠔꠟꠣ ꠞꠥꠙꠣ ꠢꠣꠖꠤꠀ ꠖꠤꠔꠦ ꠅꠁꠛ,
LEV 27:4 ꠅꠃ ꠛꠄꠅꠡꠤ ꠛꠦꠐꠤꠘ꠆ꠔꠞ ꠟꠣꠉꠤ ꠔꠤꠡ ꠔꠟꠣ।
LEV 27:5 ꠙꠣꠌ ꠛꠍꠞ ꠕꠣꠇꠤ ꠛꠤꠡ ꠛꠍꠞ ꠛꠄꠅꠡꠤ ꠙꠥꠀꠂꠘ꠆ꠔꠞ ꠟꠣꠉꠤ ꠛꠤꠡ ꠔꠟꠣ ꠞꠥꠙꠣ, ꠅꠃ ꠛꠄꠅꠡꠤ ꠙꠥꠠꠤꠘ꠆ꠔꠞ ꠟꠣꠉꠤ ꠖꠡ ꠔꠟꠣ।
LEV 27:6 ꠄꠇꠝꠣꠡ ꠕꠣꠇꠤ ꠙꠣꠌ ꠛꠍꠞ ꠛꠄꠅꠡꠤ ꠙꠥꠀꠂꠘ꠆ꠔꠞ ꠟꠣꠉꠤ ꠙꠣꠌ ꠔꠟꠣ ꠞꠥꠙꠣ, ꠅꠃ ꠛꠄꠅꠡꠤ ꠙꠥꠠꠤꠘ꠆ꠔꠞ ꠟꠣꠉꠤ ꠔꠤꠘ ꠔꠟꠣ ꠞꠥꠙꠣ।
LEV 27:7 ꠡꠣꠁꠐ ꠛꠍꠞ ꠛꠣ ꠄꠞ ꠛꠦꠡꠤ ꠛꠄꠅꠡꠤ ꠛꠦꠐꠣꠁꠘ꠆ꠔꠞ ꠟꠣꠉꠤ ꠙꠘꠞ ꠔꠟꠣ, ꠅꠃ ꠛꠄꠅꠡꠤ ꠛꠦꠐꠤꠘ꠆ꠔꠞ ꠟꠣꠉꠤ ꠖꠡ ꠔꠟꠣ ꠞꠥꠙꠣ ꠖꠤꠔꠦ ꠅꠁꠛ।
LEV 27:8 “ꠅꠁꠟꠦ ꠅꠃ ꠝꠣꠘ꠆ꠘꠔ ꠇꠞꠞꠣ ꠎꠘ ꠎꠥꠖꠤ ꠉꠞꠤꠛ ꠝꠣꠘꠥꠡ ꠅꠄ, ꠔꠣꠞ ꠝꠣꠘ꠆ꠘꠔꠞ ꠢꠣꠖꠤꠀ ꠖꠤꠛꠣꠞ ꠔꠣꠇ꠆ꠇꠔ ꠘꠣ ꠕꠣꠇꠦ, ꠔꠦ ꠔꠣꠞꠦ ꠟꠁꠀ ꠁꠝꠣꠝ ꠍꠣꠛꠞ ꠉꠦꠍꠦ ꠎꠣꠁꠛꠣꠄ, ꠉꠦꠟꠦ ꠁꠝꠣꠝ ꠍꠣꠛꠦ ꠔꠣꠞ ꠢꠣꠟꠔ ꠛꠥꠎꠤꠀ ꠢꠣꠖꠤꠀ ꠑꠤꠇ ꠇꠞꠛꠣ।
LEV 27:9 “ꠎꠥꠖꠤ ꠇꠛꠥꠟ ꠅꠀꠞ ꠎꠥꠇꠣ ꠇꠥꠘꠥ ꠙꠡꠥꠞꠦ ꠝꠣꠛꠥꠖꠞ ꠘꠣꠝꠦ ꠝꠣꠘ꠆ꠘꠔ ꠇꠞꠣ ꠅꠄ, ꠔꠦ ꠅꠃ ꠙꠡꠥꠞꠦ ꠝꠣꠛꠥꠖꠞ ꠍꠣꠝꠣꠘꠣ ꠢꠤꠡꠣꠛꠦ ꠙꠛꠤꠔ꠆ꠞ ꠇꠁꠀ ꠉꠁꠘ꠆ꠘ ꠇꠞꠤꠅ।
LEV 27:10 ꠅꠃ ꠙꠡꠥꠞ ꠛꠖꠟꠣ ꠖꠥꠍꠞꠣ ꠇꠥꠘꠥ ꠙꠡꠥ ꠖꠤꠟꠦ ꠇꠛꠥꠟ ꠅꠁꠔ ꠘꠣꠄ। ꠁꠐꠣ ꠜꠣꠟꠣ ꠅꠁꠟꠦ ꠄꠞ ꠛꠖꠟꠣ ꠛꠣꠖ ꠙꠡꠥ, ꠛꠣ ꠛꠣꠖ ꠅꠁꠟꠦ ꠄꠞ ꠛꠖꠟꠣ ꠜꠣꠟꠣ ꠇꠥꠘꠥ ꠙꠡꠥ ꠖꠤꠟꠦꠅ ꠇꠛꠥꠟ ꠅꠁꠔ ꠘꠣꠄ। ꠢꠦ ꠎꠥꠖꠤ ꠄꠇꠐꠣꠞ ꠛꠖꠟꠣ ꠀꠞꠇꠐꠣ ꠙꠡꠥꠞꠦ ꠖꠤꠟꠣꠄ, ꠔꠦ ꠅꠃ ꠖꠥꠁꠅꠐꠣꠞꠦ ꠙꠛꠤꠔ꠆ꠞ ꠢꠤꠡꠣꠛꠦ ꠉꠁꠘ꠆ꠘ ꠇꠞꠤꠅ।
LEV 27:11 ꠅꠁꠟꠦ ꠝꠣꠛꠥꠖꠞ ꠘꠣꠝꠦ ꠇꠛꠥꠟ ꠅꠀꠞ ꠎꠥꠇꠣ ꠘꠣꠄ, ꠁꠟꠣ ꠇꠥꠘꠥ ꠘꠣꠙꠣꠇ ꠎꠣꠔꠞ ꠙꠡꠥꠞꠦ ꠇꠦꠃ ꠎꠥꠖꠤ ꠝꠣꠘ꠆ꠘꠔ ꠢꠤꠡꠣꠛꠦ ꠝꠣꠘꠤꠟꠣꠄ, ꠔꠦ ꠅꠇꠐꠣꠞꠦ ꠟꠁꠀ ꠁꠝꠣꠝ ꠍꠣꠛꠞ ꠉꠦꠍꠦ ꠎꠣꠁꠅ,
LEV 27:12 ꠉꠦꠟꠦ ꠔꠣꠁꠘ ꠅꠇꠐꠣꠞ ꠢꠣꠟ-ꠢꠇꠤꠇꠔ ꠛꠥꠎꠤꠀ ꠢꠣꠞꠤ ꠎꠦ ꠖꠣꠝ ꠑꠤꠇ ꠇꠞꠛꠣ, ꠅꠃ ꠖꠣꠝꠃ ꠅꠁꠛ ꠁꠐꠣꠞ ꠡꠑꠤꠇ ꠖꠣꠝ।
LEV 27:13 ꠝꠣꠘ꠆ꠘꠔ ꠇꠞꠞꠣꠄ ꠁꠐꠣꠞꠦ ꠈꠣꠟꠣꠍ ꠇꠞꠣꠞ ꠈꠤꠀꠟ ꠅꠁꠟꠦ, ꠅꠃ ꠖꠣꠝꠞ ꠟꠉꠦ ꠀꠞꠅ ꠙꠣꠌ ꠛꠣꠐꠞ ꠄꠇ ꠛꠣꠐ ꠖꠣꠝ ꠛꠦꠡꠤ ꠖꠤꠔꠦ ꠅꠁꠛ।
LEV 27:14 “ꠇꠦꠃ ꠎꠥꠖꠤ ꠔꠣꠞ ꠇꠥꠘꠥ ꠛꠣꠠꠤ-ꠊꠞꠞꠦ ꠝꠣꠛꠥꠖꠞ ꠘꠣꠝꠦ ꠙꠣꠇ-ꠙꠛꠤꠔ꠆ꠞ ꠍꠣꠝꠣꠘꠣ ꠢꠤꠡꠣꠛꠦ ꠝꠣꠘ꠆ꠘꠔ ꠇꠞꠤꠟꠣꠄ, ꠔꠦ ꠁꠝꠣꠝ ꠍꠣꠛꠦ ꠅꠃ ꠛꠣꠠꠤꠞ ꠢꠣꠟ-ꠢꠇꠤꠇꠔ ꠛꠥꠎꠤꠀ ꠎꠦ ꠖꠣꠝ ꠑꠤꠇ ꠇꠞꠛꠣ, ꠁꠐꠣꠃ ꠅꠁꠛ ꠄꠞ ꠡꠑꠤꠇ ꠖꠣꠝ।
LEV 27:15 ꠅꠈꠘ ꠅꠃ ꠛꠣꠠꠤꠞꠦ ꠢꠦ ꠈꠣꠟꠣꠍ ꠇꠞꠤꠀ ꠘꠤꠔ ꠌꠣꠁꠟꠦ, ꠅꠃ ꠖꠣꠝꠞ ꠟꠉꠦ ꠀꠞꠅ ꠙꠣꠌ ꠛꠣꠐꠞ ꠄꠇ ꠛꠣꠐ ꠛꠦꠡꠤ ꠖꠤꠔꠦ ꠅꠁꠛ। ꠔꠦꠃ ꠛꠣꠠꠤ ꠈꠣꠘ ꠔꠣꠞ ꠅꠁꠛ।
LEV 27:16 “ꠇꠥꠘꠥ ꠝꠣꠘꠡꠦ ꠎꠥꠖꠤ ꠔꠣꠞ ꠘꠤꠎꠞ ꠎꠝꠤ-ꠝꠤꠞꠣꠡꠞ ꠇꠥꠘꠥ ꠄꠇ ꠅꠋꠡꠞꠦ ꠝꠣꠛꠥꠖꠞ ꠘꠣꠝꠦ ꠝꠣꠘ꠆ꠘꠔ ꠇꠞꠤꠀ ꠙꠣꠇ-ꠙꠛꠤꠔ꠆ꠞ ꠇꠁꠀ ꠀꠟꠉ ꠇꠞꠤꠟꠣꠄ, ꠔꠦ ꠅꠃ ꠎꠝꠤꠘꠅ ꠎꠦ ꠙꠞꠤꠝꠣꠘꠦ ꠈꠦꠔ ꠅꠄ, ꠅꠃ ꠚꠡꠟꠞ ꠙꠞꠤꠝꠣꠘ ꠛꠥꠎꠤꠀ ꠄꠞ ꠖꠣꠝ ꠑꠤꠇ ꠇꠞꠔꠦ ꠅꠁꠛ। ꠙꠞꠔꠦꠇ ꠙꠣꠌ ꠝꠘ ꠛꠣꠞ꠆ꠟꠤ ꠛꠤꠌꠞ ꠖꠣꠝ ꠢꠤꠡꠣꠛꠦ ꠀꠗꠣ ꠡꠦꠞ ꠞꠥꠙꠣ ꠗꠞꠛꠣꠄ।
LEV 27:17 ꠀꠞ ꠎꠝꠤ-ꠝꠤꠞꠣꠡ ꠚꠤꠞꠔ ꠙꠣꠅꠀꠞ ꠛꠍꠞ ꠎꠥꠖꠤ ꠢꠦ ꠔꠣꠞ ꠎꠝꠤꠘꠞꠦ ꠙꠣꠇ-ꠙꠛꠤꠔ꠆ꠞ ꠇꠁꠀ ꠝꠣꠘ꠆ꠘꠔ ꠇꠞꠦ, ꠔꠦ ꠅꠃ ꠘꠤꠅꠝ ꠝꠣꠚꠤꠇ ꠁꠝꠣꠝ ꠍꠣꠛꠦ ꠎꠦ ꠖꠣꠝ ꠑꠤꠇ ꠇꠞꠛꠣ, ꠁꠐꠣꠃ ꠅꠁꠛ ꠄꠞ ꠡꠑꠤꠇ ꠖꠣꠝ।
LEV 27:18 ꠅꠁꠟꠦ ꠚꠤꠞꠔ ꠙꠣꠅꠀꠞ ꠛꠍꠞꠞ ꠛꠣꠖꠦ ꠎꠥꠖꠤ ꠢꠦ ꠔꠣꠞ ꠝꠣꠘ꠆ꠘꠔ ꠇꠞꠦ, ꠔꠦ ꠛꠣꠖꠞ ꠚꠤꠞꠔ ꠙꠣꠅꠀꠞ ꠛꠍꠞ ꠙꠞ꠆ꠎꠘ꠆ꠔ ꠢꠤꠡꠣꠛ ꠇꠞꠤꠀ ꠎꠔ ꠛꠍꠞ ꠅꠄ, ꠅꠔ ꠛꠍꠞꠞ ꠚꠡꠟꠞ ꠢꠤꠡꠣꠛꠦ ꠁꠝꠣꠝ ꠍꠣꠛꠦ ꠄꠞ ꠖꠣꠝ ꠑꠤꠇ ꠇꠞꠛꠣ, ꠛꠍꠞ ꠢꠤꠡꠣꠛꠦ ꠎꠝꠤꠘꠞ ꠖꠣꠝ ꠇꠝꠛ।
LEV 27:19 ꠀꠞ ꠝꠣꠘ꠆ꠘꠔ ꠇꠞꠞꠣ ꠎꠘꠦ ꠎꠥꠖꠤ ꠔꠣꠞ ꠎꠝꠤꠘꠞꠦ ꠈꠣꠟꠣꠍ ꠇꠞꠤꠀ ꠘꠤꠔ ꠌꠣꠄ, ꠔꠦ ꠑꠤꠇ ꠇꠞꠣ ꠅꠃ ꠖꠣꠝꠞ ꠟꠉꠦ ꠀꠞꠅ ꠙꠣꠌ ꠛꠣꠐꠞ ꠄꠇ ꠛꠣꠐ ꠛꠦꠡꠤ ꠖꠤꠔꠦ ꠅꠁꠛ, ꠔꠦꠃ ꠎꠝꠤ ꠈꠣꠘ ꠔꠣꠞ ꠅꠁꠛ।
LEV 27:20 ꠅꠁꠟꠦ ꠢꠦ ꠎꠥꠖꠤ ꠈꠣꠟꠣꠍ ꠇꠞꠤ ꠘꠣ ꠘꠦꠄ, ꠛꠣ ꠖꠥꠍꠞꠣ ꠎꠘꠞ ꠉꠦꠍꠦ ꠛꠦꠌꠤꠟꠣꠄ, ꠔꠦ ꠅꠃ ꠎꠝꠤꠘ ꠈꠣꠘ ꠀꠞ ꠈꠣꠟꠣꠍ ꠇꠞꠤꠀ ꠘꠤꠛꠣꠞ ꠙꠕ ꠘꠣꠁ।
LEV 27:21 ꠎꠝꠤ-ꠝꠤꠞꠣꠡ ꠚꠤꠞꠔ ꠙꠣꠁꠛꠣꠞ ꠛꠍꠞ ꠎꠦꠛꠟꠣ ꠎꠝꠤ ꠈꠣꠘ ꠄꠝꠘꠦꠃ ꠈꠣꠟꠣꠍ ꠅꠁꠎꠤꠛ, ꠅꠃ ꠡꠝꠄ ꠁ ꠎꠝꠤ ꠈꠣꠘ ꠝꠣꠛꠥꠖꠞ ꠘꠣꠝꠦ ꠌꠤꠞꠇꠣꠟꠤꠘ ꠍꠣꠚ-ꠇꠛꠣꠟꠣ ꠎꠝꠤꠘꠞ ꠟꠣꠈꠣꠘ ꠙꠣꠇ-ꠙꠛꠤꠔ꠆ꠞ ꠍꠣꠝꠣꠘꠣ ꠢꠤꠡꠣꠛꠦ ꠉꠁꠘ꠆ꠘ ꠅꠁꠛ। ꠁꠈꠣꠘ ꠅꠁꠎꠤꠛ ꠁꠝꠣꠝ ꠍꠣꠛꠞ ꠎꠝꠤ।
LEV 27:22 ꠘꠤꠎꠞ ꠛꠣꠚꠣꠁꠔꠤ ꠎꠝꠤ ꠘꠣꠄ ꠁꠟꠣ ꠇꠥꠘꠥ ꠈꠞꠤꠖꠣ ꠎꠝꠤꠘꠞꠦ ꠇꠦꠃ ꠎꠥꠖꠤ ꠝꠣꠘ꠆ꠘꠔ ꠝꠣꠘꠤꠀ ꠙꠣꠇ-ꠙꠛꠤꠔ꠆ꠞ ꠢꠤꠡꠣꠛꠦ ꠉꠁꠘ꠆ꠘ ꠇꠞꠣꠄ,
LEV 27:23 ꠔꠦ ꠁꠝꠣꠝ ꠍꠣꠛꠦ ꠚꠤꠞꠔ ꠙꠣꠅꠀꠞ ꠛꠍꠞ ꠙꠞ꠆ꠎꠘ꠆ꠔ ꠢꠤꠡꠣꠛ ꠇꠞꠤꠀ ꠁꠈꠣꠘꠞ ꠖꠣꠝ ꠑꠤꠇ ꠇꠞꠛꠣ, ꠀꠞ ꠢꠃ ꠖꠤꠘꠃ ꠅꠃ ꠎꠝꠤꠘꠞ ꠖꠣꠝꠞꠦ ꠢꠦ ꠝꠣꠛꠥꠖꠞ ꠘꠣꠝꠦ ꠙꠣꠇ-ꠙꠛꠤꠔ꠆ꠞ ꠍꠣꠝꠣꠘꠣ ꠢꠤꠡꠣꠛꠦ ꠖꠤꠟꠣꠁꠔꠦ ꠅꠁꠛ।
LEV 27:24 ꠀꠞ ꠎꠝꠤ ꠈꠣꠘ ꠢꠦ ꠎꠣꠞ ꠉꠦꠍ ꠕꠣꠇꠤ ꠟꠁꠍꠤꠟ, ꠎꠝꠤ-ꠝꠤꠞꠣꠡ ꠚꠤꠞꠔ ꠙꠣꠁꠛꠣꠞ ꠛꠍꠞ ꠁꠈꠣꠘ ꠢꠤꠞꠛꠣꠞ ꠢꠃ ꠝꠥꠟ ꠝꠣꠟꠤꠇꠞ ꠀꠔꠅ ꠎꠣꠁꠛ।
LEV 27:25 ꠢꠇꠟ ꠎꠤꠘꠤꠡꠞ ꠖꠣꠝ ꠑꠤꠇ ꠇꠞꠤꠅ, ꠄꠛꠣꠖꠔ ꠈꠣꠘꠣꠞ ꠝꠣꠙꠦ। ꠙꠞꠔꠦꠇ ꠛꠤꠡ ꠞꠔꠤꠄ ꠄꠇ ꠔꠟꠣ ꠉꠘꠤꠅ।
LEV 27:26 “ꠇꠥꠘꠥ ꠙꠡꠥꠞ ꠙꠄꠟꠣ ꠝꠦꠖꠣ ꠛꠣꠁꠌ꠆ꠌꠣꠞꠦ ꠇꠦꠃ ꠝꠣꠛꠥꠖꠞ ꠘꠣꠝꠦ ꠟꠤꠟ꠆ꠟꠣ ꠖꠤꠛꠣꠞ ꠟꠣꠉꠤ ꠝꠣꠘ꠆ꠘꠔ ꠇꠞꠔ ꠙꠣꠞꠔ ꠘꠣꠄ, ꠁꠐꠣ ꠔ ꠄꠝꠘꠦꠃ ꠝꠣꠛꠥꠖꠞ। ꠁꠔꠣ ꠉꠞꠥ-ꠍꠣꠉꠟ, ꠝꠦꠠꠣ ꠎꠦꠔꠣꠞ ꠛꠣꠁꠌ꠆ꠌꠣꠃ ꠅꠃꠇ, ꠁꠐꠣ ꠝꠣꠛꠥꠖꠞ।
LEV 27:27 ꠎꠥꠖꠤ ꠁꠐꠣ ꠇꠥꠘꠥ ꠢꠣꠞꠣꠝ ꠙꠡꠥꠞ ꠙꠄꠟꠣ ꠝꠦꠖꠣ ꠛꠣꠁꠌ꠆ꠌꠣ ꠅꠄ, ꠔꠦ ꠁꠝꠣꠝ ꠍꠣꠛꠞ ꠑꠤꠇ ꠇꠞꠣ ꠖꠣꠝꠞ ꠟꠉꠦ ꠀꠞꠅ ꠙꠣꠌ ꠛꠣꠐꠞ ꠄꠇ ꠛꠣꠐ ꠛꠦꠡꠤ ꠖꠤꠀ ꠁꠐꠣꠞꠦ ꠈꠣꠟꠣꠍ ꠇꠞꠤ ꠘꠤꠔ ꠙꠣꠞꠛ। ꠀꠞ ꠢꠦ ꠎꠥꠖꠤ ꠈꠣꠟꠣꠍ ꠇꠞꠤ ꠘꠣ ꠘꠦꠄ, ꠔꠦ ꠅꠃ ꠖꠣꠝꠦ ꠁꠐꠣꠞꠦ ꠛꠦꠌꠤꠟꠤꠔꠦ ꠅꠁꠛ।
LEV 27:28 “ꠅꠁꠟꠦ ꠇꠥꠘꠥ ꠝꠣꠘꠡꠦ ꠎꠥꠖꠤ ꠔꠣꠞ ꠘꠤꠎꠞ ꠇꠥꠘꠥ ꠍꠣꠝꠣꠘꠣ ꠝꠣꠛꠥꠖꠞ ꠘꠣꠝꠦ ꠌꠤꠞꠇꠣꠟꠤꠘ ꠍꠣꠚ-ꠇꠛꠣꠟꠣ ꠖꠟꠤꠟꠞ ꠟꠣꠈꠣꠘ ꠝꠣꠘ꠆ꠘꠔ ꠇꠞꠤꠟꠣꠄ, ꠔꠦ ꠅꠃ ꠝꠣꠘ꠆ꠘꠔ ꠇꠞꠣ ꠍꠣꠝꠣꠘꠣ ꠀꠞ ꠈꠣꠟꠣꠍ ꠇꠞꠤꠀ ꠚꠤꠞꠔ ꠘꠤꠔ ꠙꠣꠞꠔ ꠘꠣꠄ, ꠛꠣ ꠛꠦꠌꠔ-ꠅ ꠙꠣꠞꠔ ꠘꠣꠄ। ꠁꠔꠣ ꠎꠝꠤ-ꠎꠝꠣ ꠅꠃꠇ, ꠛꠣ ꠇꠥꠘꠥ ꠝꠣꠘꠥꠡ, ꠛꠣ ꠙꠡꠥ ꠅꠁꠟꠦꠅ, ꠁꠔꠣ ꠌꠤꠞꠇꠣꠟꠞ ꠟꠣꠉꠤ ꠝꠣꠛꠥꠖꠞ ꠘꠣꠝꠦ ꠈꠣꠍ ꠙꠛꠤꠔ꠆ꠞ ꠍꠣꠝꠣꠘꠣ ꠢꠤꠡꠣꠛꠦ ꠉꠁꠘ꠆ꠘ ꠅꠁꠛ।
LEV 27:29 ꠇꠥꠘꠥ ꠝꠣꠘꠡꠞꠦ ꠝꠣꠛꠥꠖꠞ ꠘꠣꠝꠦ ꠌꠤꠞꠇꠣꠟꠞ ꠟꠣꠉꠤ ꠅꠟꠣ ꠝꠣꠘ꠆ꠘꠔ ꠇꠞꠤꠀ ꠖꠤꠟꠣꠁꠟꠦ, ꠔꠣꠞꠦ ꠀꠞ ꠈꠣꠟꠣꠍ ꠇꠞꠤ ꠘꠦꠅꠀ ꠎꠣꠁꠔ ꠘꠣꠄ, ꠔꠣꠞꠦ ꠎꠣꠘꠦ ꠝꠣꠞꠤꠟꠤꠔꠦ ꠅꠁꠛ।
LEV 27:30 “ꠎꠝꠤꠘꠅ ꠕꠣꠇꠤ ꠎꠦꠔꠣ ꠚꠟ-ꠚꠡꠟ ꠝꠤꠟꠦ, ꠁꠔꠣꠞ ꠖꠡ ꠛꠣꠐꠞ ꠄꠇ ꠛꠣꠐ ꠔ ꠝꠣꠛꠥꠖꠞ। ꠁꠔꠣ ꠈꠦꠔꠞ ꠚꠡꠟ ꠅꠃꠇ ꠛꠣ ꠉꠣꠍꠞ ꠚꠟ ꠅꠃꠇ, ꠢꠇꠟꠔꠣꠃ ꠝꠣꠛꠥꠖꠞ ꠘꠣꠝꠦ ꠙꠣꠇ-ꠙꠛꠤꠔ꠆ꠞ।
LEV 27:31 ꠇꠦꠃ ꠎꠥꠖꠤ ꠔꠣꠞ ꠅꠃ ꠖꠡ ꠛꠣꠐꠞ ꠄꠇ ꠛꠣꠐ ꠈꠣꠟꠣꠍ ꠇꠞꠤꠀ ꠘꠤꠔ ꠌꠣꠄ, ꠔꠦ ꠄꠞ ꠟꠉꠦ ꠀꠞꠅ ꠙꠣꠌ ꠛꠣꠐꠞ ꠄꠇ ꠛꠣꠐ ꠛꠦꠡꠤ ꠖꠤꠔꠦ ꠅꠁꠛ।
LEV 27:32 ꠙꠞꠔꠦꠇ ꠙꠡꠥꠞ ꠙꠣꠟꠞ ꠖꠡ ꠛꠣꠐꠞ ꠄꠇ ꠛꠣꠐ ꠝꠣꠛꠥꠖꠞ, ꠝꠣꠘꠤ ꠙꠣꠟꠦ ꠙꠡꠥ ꠉꠘꠣꠞ ꠡꠝꠄ ꠙꠞꠔꠦꠇ ꠖꠡ ꠘꠝ꠆ꠛꠞ ꠙꠡꠥ ꠅꠉꠥ ꠝꠣꠛꠥꠖꠞ ꠘꠣꠝꠦ ꠙꠣꠇ-ꠙꠛꠤꠔ꠆ꠞ।
LEV 27:33 ꠅꠃ ꠖꠡ ꠘꠝ꠆ꠛꠞ ꠙꠡꠥ ꠅꠉꠥꠁꠘ ꠛꠣꠖ ꠛꠣ ꠜꠣꠟꠣ ꠁꠔꠣ ꠖꠦꠈꠣꠞ ꠇꠥꠘꠥ ꠎꠞꠥꠞ ꠘꠣꠄ, ꠛꠣ ꠁꠐꠣ ꠛꠖꠟꠣꠁꠀ ꠖꠤꠛꠣꠞ ꠡꠥꠎꠥꠉ ꠘꠣꠁ। ꠇꠦꠃ ꠎꠥꠖꠤ ꠁꠐꠣꠞ ꠛꠖꠟꠣ ꠖꠦꠄ, ꠔꠦ ꠅꠃ ꠖꠡ ꠘꠝ꠆ꠛꠞ ꠙꠡꠥ ꠀꠞ ꠛꠖꠟꠣ ꠙꠡꠥ ꠖꠥꠁꠅꠐꠣꠃ ꠝꠣꠛꠥꠖꠞ ꠘꠣꠝꠦ ꠙꠣꠇ-ꠙꠛꠤꠔ꠆ꠞ ꠅꠁꠎꠤꠛ, ꠁꠔꠣ ꠀꠞ ꠈꠣꠟꠣꠍ ꠇꠞꠤ ꠘꠦꠅꠀ ꠎꠣꠁꠔ ꠘꠣꠄ।”
LEV 27:34 ꠝꠣꠛꠥꠖꠦ ꠔꠥꠞ ꠙꠣꠠꠞ ꠃꠙꠞꠦ ꠝꠥꠍꠣ ꠘꠛꠤꠞ ꠉꠦꠍꠦ, ꠛꠘꠤ ꠁꠍꠞꠣꠁꠟꠞ ꠟꠣꠉꠤ ꠅꠃ ꠢꠥꠇꠥꠝ-ꠀꠢꠇꠣꠝ ꠅꠇꠟ ꠖꠣꠘ ꠇꠞꠍꠤꠟꠣ॥
NUM 1:1 ꠛꠘꠤ ꠁꠍꠞꠣꠁꠟ ꠎꠣꠔꠤ ꠝꠤꠡꠞ ꠖꠦꠡ ꠕꠣꠇꠤ ꠛꠣꠞ ꠅꠁꠀ ꠀꠅꠀꠞ ꠖꠥꠁ ꠘꠝ꠆ꠛꠞ ꠛꠍꠞꠞ ꠡꠝꠄ, ꠖꠥꠁ ꠘꠝ꠆ꠛꠞ ꠌꠣꠘ꠆ꠖꠞ ꠙꠄꠟꠣ ꠖꠤꠘ, ꠝꠣꠛꠥꠖꠦ ꠍꠤꠘꠣꠁ ꠝꠞꠥꠜꠥꠝꠤꠔ ꠝꠤꠟꠘ-ꠔꠣꠝ꠆ꠛꠥꠞ ꠜꠤꠔꠞꠦ ꠢꠎꠞꠔ ꠝꠥꠍꠣꠞ ꠟꠉꠦ ꠛꠣꠔꠌꠤꠔ ꠇꠞꠟꠣ। ꠔꠣꠁꠘ ꠝꠥꠍꠣꠞꠦ ꠇꠁꠟꠣ,
NUM 1:2 “ꠅꠈꠘ ꠔꠣꠝꠣꠝ ꠛꠘꠤ ꠁꠍꠞꠣꠁꠟꠞ ꠉꠥꠡ꠆ꠐꠤ ꠀꠞ ꠙꠞꠤꠛꠣꠞ ꠝꠣꠚꠤꠇ ꠄꠇ ꠄꠇ ꠇꠞꠤ ꠢꠇꠟ ꠛꠦꠐꠣꠁꠘ꠆ꠔꠞ ꠘꠣꠝ ꠟꠦꠈꠅ।
NUM 1:3 ꠔꠥꠝꠤ ꠀꠞ ꠔꠥꠝꠣꠞ ꠜꠣꠁ ꠢꠣꠞꠥꠘꠦ ꠛꠤꠡ ꠛꠍꠞ ꠛꠣ ꠄꠞ ꠛꠦꠡꠤ ꠛꠄꠅꠡꠤ, ꠝꠣꠘꠤ ꠎꠥꠖ꠆ꠖꠔ ꠎꠣꠅꠀꠞ ꠎꠥꠇꠣ ꠚꠃꠎꠤ ꠖꠟ ꠝꠣꠚꠤꠇ ꠔꠣꠞꠣꠞꠦ ꠉꠘꠅ।
NUM 1:4 ꠙꠞꠔꠦꠇ ꠈꠣꠘ꠆ꠖꠣꠘꠞ ꠄꠇꠎꠘꠦ ꠔꠥꠝꠞꠣꠞꠦ ꠡꠣꠁꠎ꠆ꠎ ꠇꠞꠛꠣ, ꠄꠞꠣ ꠅꠁꠛꠣ ꠘꠤꠎꠞ ꠉꠥꠡ꠆ꠐꠤꠞ ꠙꠞꠗꠣꠘ ꠝꠥꠞꠛ꠆ꠛꠤ।
NUM 1:5 ꠎꠣꠞꠣ ꠡꠣꠁꠎ꠆ꠎ ꠇꠞꠛꠣ, ꠄꠞꠣꠞ ꠘꠣꠝ ꠅꠁꠟ, ꠞꠥꠛꠦꠘ ꠈꠣꠘ꠆ꠖꠣꠘꠞ ꠡꠣꠖꠤꠃꠞꠞ ꠙꠥꠀ ꠀꠟꠤꠍꠥꠞ,
NUM 1:6 ꠡꠤꠝꠤꠅꠘ ꠈꠣꠘ꠆ꠖꠣꠘꠞ ꠡꠥꠞꠡꠣꠖꠣꠄꠅꠞ ꠙꠥꠀ ꠡꠣꠟꠥꠝꠤꠟ,
NUM 1:7 ꠄꠢꠥꠖꠣ ꠈꠣꠘ꠆ꠖꠣꠘꠞ ꠀꠝꠤꠘꠣꠖꠣꠛꠞ ꠙꠥꠀ ꠘꠣꠢꠤꠡ,
NUM 1:8 ꠁꠍꠣꠈꠞ ꠈꠣꠘ꠆ꠖꠣꠘꠞ ꠍꠥꠉꠣꠞꠞ ꠙꠥꠀ ꠘꠕꠘꠦꠟ,
NUM 1:9 ꠍꠛꠥꠟꠘ ꠈꠣꠘ꠆ꠖꠣꠘꠞ ꠢꠦꠟꠘꠞ ꠙꠥꠀ ꠁꠟꠤꠀꠛ,
NUM 1:10 ꠁꠃꠍꠥꠚꠞ ꠙꠥꠀꠂꠘ꠆ꠔꠞ ꠝꠣꠎ ꠕꠣꠇꠤ: ꠀꠚꠞꠣꠁꠝ ꠈꠣꠘ꠆ꠖꠣꠘꠞ ꠀꠝꠤꠢꠥꠖꠞ ꠙꠥꠀ ꠀꠟꠤꠡꠣꠝꠣ, ꠝꠣꠘꠡꠣ ꠈꠣꠘ꠆ꠖꠣꠘꠞ ꠚꠣꠔꠡꠥꠞꠞ ꠙꠥꠀ ꠉꠝꠟꠤꠄꠟ,
NUM 1:11 ꠛꠤꠘ-ꠁꠀꠝꠤꠘ ꠈꠣꠘ꠆ꠖꠣꠘꠞ ꠎꠤꠖꠣꠃꠘꠤꠞ ꠙꠥꠀ ꠀꠛꠤꠖꠣꠘ,
NUM 1:12 ꠖꠣꠘ ꠈꠣꠘ꠆ꠖꠣꠘꠞ ꠀꠝꠤꠡꠣꠖꠣꠞ ꠙꠥꠀ ꠀꠈꠤꠀꠎꠣꠞ,
NUM 1:13 ꠀꠡꠤꠞ ꠈꠣꠘ꠆ꠖꠣꠘꠞ ꠃꠇꠞꠣꠘꠞ ꠙꠥꠀ ꠚꠎꠤꠄꠟ,
NUM 1:14 ꠍꠣꠖꠥ ꠈꠣꠘ꠆ꠖꠣꠘꠞ ꠖꠥꠄꠟꠞ ꠙꠥꠀ ꠁꠟꠤꠀꠍꠚ,
NUM 1:15 ꠘꠙ꠆ꠔꠣꠟꠤ ꠈꠣꠘ꠆ꠖꠣꠘꠞ ꠁꠘꠣꠘꠞ ꠙꠥꠀ ꠀꠢꠤꠞ।”
NUM 1:16 ꠛꠘꠤ ꠁꠍꠞꠣꠁꠟꠞ ꠝꠣꠎ ꠕꠣꠇꠤ ꠅꠃ ꠛꠣꠞꠅ ꠎꠘꠞꠦ ꠙꠍꠘ꠆ꠖ ꠇꠞꠤ ꠘꠦꠅꠀ ꠅꠁꠟ। ꠄꠞꠣ ꠅꠁꠟꠣ ꠔꠣꠞꠣꠞ ꠛꠣꠚ-ꠖꠣꠖꠣꠁꠘ꠆ꠔꠞ ꠙꠞꠤꠛꠣꠞꠞ ꠙꠞꠗꠣꠘ, ꠛꠘꠤ ꠁꠍꠞꠣꠁꠟꠞ ꠚꠃꠎꠤ ꠖꠟꠞ ꠡꠞ꠆ꠖꠣꠞ।
NUM 1:17 ꠝꠣꠛꠥꠖꠦ ꠎꠦꠞꠣꠞ ꠘꠣꠝ ꠇꠁꠍꠟꠣ, ꠝꠥꠍꠣ ꠀꠞ ꠢꠣꠞꠥꠘꠦ ꠅꠃ ꠡꠞ꠆ꠖꠣꠞ ꠅꠇꠟꠞꠦ ꠈꠛꠞꠖꠤ ꠀꠘꠣꠁꠟꠣ,
NUM 1:18 ꠀꠞ ꠅꠃ ꠛꠍꠞꠞ ꠖꠥꠍꠞꠣ ꠌꠣꠘ꠆ꠖꠞ ꠙꠄꠟꠣ ꠖꠤꠘ ꠢꠇꠟ ꠛꠘꠤ ꠁꠍꠞꠣꠁꠟꠞꠦ ꠄꠇꠈꠣꠘꠅ ꠖꠟꠣ ꠇꠞꠟꠣ। ꠔꠣꠞꠣ ꠎꠣꠞꠎꠤꠞ ꠉꠥꠡ꠆ꠐꠤ ꠀꠞ ꠙꠞꠤꠛꠣꠞ ꠝꠣꠚꠤꠇ ꠔꠣꠞꠣꠞ ꠘꠣꠝ ꠟꠦꠈꠣꠁꠟ। ꠛꠤꠡ ꠛꠍꠞ ꠛꠣ ꠄꠞ ꠛꠦꠡꠤ ꠛꠄꠅꠡꠞ ꠛꠦꠐꠣꠁꠘ꠆ꠔꠞ ꠘꠣꠝ ꠄꠇ ꠄꠇ ꠇꠞꠤ ꠟꠦꠈꠣ ꠅꠁꠟ।
NUM 1:19 ꠝꠣꠛꠥꠖꠞ ꠢꠥꠇꠥꠝ ꠝꠣꠚꠤꠇ ꠍꠤꠘꠣꠁ ꠝꠞꠥꠜꠥꠝꠤꠔ ꠝꠥꠍꠣꠄ ꠄꠞꠣꠞꠦ ꠉꠘꠤꠟꠣ।
NUM 1:20 ꠁꠀꠇꠥꠛ ꠃꠞꠚꠦ ꠁꠍꠞꠣꠁꠟꠞ ꠛꠠ ꠙꠥꠀꠞ ꠘꠣꠝ ꠞꠥꠛꠦꠘ, ꠅꠃ ꠈꠣꠘ꠆ꠖꠣꠘ ꠕꠣꠇꠤ ꠎꠦꠞꠣꠞ ꠛꠄꠅꠡ ꠛꠤꠡ ꠛꠍꠞ ꠛꠣ ꠄꠞ ꠛꠦꠡꠤ, ꠝꠣꠘꠤ ꠎꠣꠞꠣ ꠎꠥꠖ꠆ꠖꠔ ꠎꠣꠅꠀꠞ ꠎꠥꠇꠣ ꠀꠍꠤꠟ, ꠉꠥꠡ꠆ꠐꠤ ꠀꠞ ꠙꠞꠤꠛꠣꠞꠞ ꠙꠞꠤꠌꠄ ꠝꠣꠚꠤꠇ ꠄꠞꠣꠞ ꠘꠣꠝ ꠄꠇ ꠄꠇ ꠇꠞꠤ ꠟꠦꠈꠣ ꠅꠁꠟ।
NUM 1:21 ꠞꠥꠛꠦꠘ ꠈꠣꠘ꠆ꠖꠣꠘ ꠕꠣꠇꠤ ꠙꠣꠅꠀ ꠉꠦꠟ ꠍꠄꠌꠣꠟ꠆ꠟꠤꠡ ꠀꠎꠣꠞ ꠙꠣꠌ-ꠡ ꠎꠘ।
NUM 1:22 ꠡꠤꠝꠤꠅꠘ ꠈꠣꠘ꠆ꠖꠣꠘꠞ ꠝꠣꠎꠦ ꠎꠦꠞꠣꠞ ꠛꠄꠅꠡ ꠛꠤꠡ ꠛꠍꠞ ꠛꠣ ꠄꠞ ꠛꠦꠡꠤ, ꠝꠣꠘꠤ ꠎꠣꠞꠣ ꠎꠥꠖ꠆ꠖꠔ ꠎꠣꠅꠀꠞ ꠎꠥꠇꠣ ꠀꠍꠤꠟ, ꠉꠥꠡ꠆ꠐꠤ ꠀꠞ ꠙꠞꠤꠛꠣꠞꠞ ꠙꠞꠤꠌꠄ ꠝꠣꠚꠤꠇ ꠄꠞꠣꠞ ꠘꠣꠝ ꠄꠇ ꠄꠇ ꠇꠞꠤ ꠟꠦꠈꠣ ꠅꠁꠟ।
NUM 1:23 ꠡꠤꠝꠤꠅꠘ ꠈꠣꠘ꠆ꠖꠣꠘ ꠕꠣꠇꠤ ꠙꠣꠅꠀ ꠉꠦꠟ ꠃꠘꠥꠡꠣꠁꠐ ꠀꠎꠣꠞ ꠔꠤꠘ-ꠡ ꠎꠘ।
NUM 1:24 ꠍꠣꠖꠥ ꠈꠣꠘ꠆ꠖꠣꠘꠞ ꠝꠣꠎꠦ ꠎꠦꠞꠣꠞ ꠛꠄꠅꠡ ꠛꠤꠡ ꠛꠍꠞ ꠛꠣ ꠄꠞ ꠛꠦꠡꠤ, ꠝꠣꠘꠤ ꠎꠣꠞꠣ ꠎꠥꠖ꠆ꠖꠔ ꠎꠣꠅꠀꠞ ꠎꠥꠇꠣ ꠀꠍꠤꠟ, ꠉꠥꠡ꠆ꠐꠤ ꠀꠞ ꠙꠞꠤꠛꠣꠞꠞ ꠙꠞꠤꠌꠄ ꠝꠣꠚꠤꠇ ꠄꠞꠣꠞ ꠘꠣꠝ ꠄꠇ ꠄꠇ ꠇꠞꠤ ꠟꠦꠈꠣ ꠅꠁꠟ।
NUM 1:25 ꠍꠣꠖꠥ ꠈꠣꠘ꠆ꠖꠣꠘ ꠕꠣꠇꠤ ꠙꠣꠅꠀ ꠉꠦꠟ ꠙꠄꠔꠣꠟ꠆ꠟꠤꠡ ꠀꠎꠣꠞ ꠍꠄ-ꠡ ꠙꠁꠘ꠆ꠌꠣꠡ ꠎꠘ।
NUM 1:26 ꠄꠢꠥꠖꠣ ꠈꠣꠘ꠆ꠖꠣꠘꠞ ꠝꠣꠎꠦ ꠎꠦꠞꠣꠞ ꠛꠄꠅꠡ ꠛꠤꠡ ꠛꠍꠞ ꠛꠣ ꠄꠞ ꠛꠦꠡꠤ, ꠝꠣꠘꠤ ꠎꠣꠞꠣ ꠎꠥꠖ꠆ꠖꠔ ꠎꠣꠅꠀꠞ ꠎꠥꠇꠣ ꠀꠍꠤꠟ, ꠉꠥꠡ꠆ꠐꠤ ꠀꠞ ꠙꠞꠤꠛꠣꠞꠞ ꠙꠞꠤꠌꠄ ꠝꠣꠚꠤꠇ ꠄꠞꠣꠞ ꠘꠣꠝ ꠄꠇ ꠄꠇ ꠇꠞꠤ ꠟꠦꠈꠣ ꠅꠁꠟ।
NUM 1:27 ꠄꠢꠥꠖꠣ ꠈꠣꠘ꠆ꠖꠣꠘ ꠕꠣꠇꠤ ꠙꠣꠅꠀ ꠉꠦꠟ ꠌꠃꠀꠔ꠆ꠔꠁꠞ ꠀꠎꠣꠞ ꠍꠄ-ꠡ ꠎꠘ।
NUM 1:28 ꠁꠍꠣꠈꠞ ꠈꠣꠘ꠆ꠖꠣꠘꠞ ꠝꠣꠎꠦ ꠎꠦꠞꠣꠞ ꠛꠄꠅꠡ ꠛꠤꠡ ꠛꠍꠞ ꠛꠣ ꠄꠞ ꠛꠦꠡꠤ, ꠝꠣꠘꠤ ꠎꠣꠞꠣ ꠎꠥꠖ꠆ꠖꠔ ꠎꠣꠅꠀꠞ ꠎꠥꠇꠣ ꠀꠍꠤꠟ, ꠉꠥꠡ꠆ꠐꠤ ꠀꠞ ꠙꠞꠤꠛꠣꠞꠞ ꠙꠞꠤꠌꠄ ꠝꠣꠚꠤꠇ ꠄꠞꠣꠞ ꠘꠣꠝ ꠄꠇ ꠄꠇ ꠇꠞꠤ ꠟꠦꠈꠣ ꠅꠁꠟ।
NUM 1:29 ꠁꠍꠣꠈꠞ ꠈꠣꠘ꠆ꠖꠣꠘ ꠕꠣꠇꠤ ꠙꠣꠅꠀ ꠉꠦꠟ ꠌꠃꠀꠘ꠆ꠘ ꠀꠎꠣꠞ ꠌꠣꠁꠞ-ꠡ ꠎꠘ।
NUM 1:30 ꠍꠛꠥꠟꠘ ꠈꠣꠘ꠆ꠖꠣꠘꠞ ꠝꠣꠎꠦ ꠎꠦꠞꠣꠞ ꠛꠄꠅꠡ ꠛꠤꠡ ꠛꠍꠞ ꠛꠣ ꠄꠞ ꠛꠦꠡꠤ, ꠝꠣꠘꠤ ꠎꠣꠞꠣ ꠎꠥꠖ꠆ꠖꠔ ꠎꠣꠅꠀꠞ ꠎꠥꠇꠣ ꠀꠍꠤꠟ, ꠉꠥꠡ꠆ꠐꠤ ꠀꠞ ꠙꠞꠤꠛꠣꠞꠞ ꠙꠞꠤꠌꠄ ꠝꠣꠚꠤꠇ ꠄꠞꠣꠞ ꠘꠣꠝ ꠄꠇ ꠄꠇ ꠇꠞꠤ ꠟꠦꠈꠣ ꠅꠁꠟ।
NUM 1:31 ꠍꠛꠥꠟꠘ ꠈꠣꠘ꠆ꠖꠣꠘ ꠕꠣꠇꠤ ꠙꠣꠅꠀ ꠉꠦꠟ ꠡꠣꠔꠣꠘ꠆ꠘ ꠀꠎꠣꠞ ꠌꠣꠁꠞ-ꠡ ꠎꠘ।
NUM 1:32 ꠁꠃꠍꠥꠚꠞ ꠙꠥꠀ ꠀꠚꠞꠣꠁꠝ ꠈꠣꠘ꠆ꠖꠣꠘꠞ ꠝꠣꠎꠦ ꠎꠦꠞꠣꠞ ꠛꠄꠅꠡ ꠛꠤꠡ ꠛꠍꠞ ꠛꠣ ꠄꠞ ꠛꠦꠡꠤ, ꠝꠣꠘꠤ ꠎꠣꠞꠣ ꠎꠥꠖ꠆ꠖꠔ ꠎꠣꠅꠀꠞ ꠎꠥꠇꠣ ꠀꠍꠤꠟ, ꠉꠥꠡ꠆ꠐꠤ ꠀꠞ ꠙꠞꠤꠛꠣꠞꠞ ꠙꠞꠤꠌꠄ ꠝꠣꠚꠤꠇ ꠄꠞꠣꠞ ꠘꠣꠝ ꠄꠇ ꠄꠇ ꠇꠞꠤ ꠟꠦꠈꠣ ꠅꠁꠟ।
NUM 1:33 ꠀꠚꠞꠣꠁꠝ ꠈꠣꠘ꠆ꠖꠣꠘ ꠕꠣꠇꠤ ꠙꠣꠅꠀ ꠉꠦꠟ ꠌꠣꠟ꠆ꠟꠤꠡ ꠀꠎꠣꠞ ꠙꠣꠌ-ꠡ ꠎꠘ।
NUM 1:34 ꠀꠞ ꠔꠣꠘ ꠜꠣꠁ ꠝꠣꠘꠡꠣ ꠈꠣꠘ꠆ꠖꠣꠘꠞ ꠝꠣꠎꠦ ꠎꠦꠞꠣꠞ ꠛꠄꠅꠡ ꠛꠤꠡ ꠛꠍꠞ ꠛꠣ ꠄꠞ ꠛꠦꠡꠤ, ꠝꠣꠘꠤ ꠎꠣꠞꠣ ꠎꠥꠖ꠆ꠖꠔ ꠎꠣꠅꠀꠞ ꠎꠥꠇꠣ ꠀꠍꠤꠟ, ꠉꠥꠡ꠆ꠐꠤ ꠀꠞ ꠙꠞꠤꠛꠣꠞꠞ ꠙꠞꠤꠌꠄ ꠝꠣꠚꠤꠇ ꠄꠞꠣꠞ ꠘꠣꠝ ꠄꠇ ꠄꠇ ꠇꠞꠤ ꠟꠦꠈꠣ ꠅꠁꠟ।
NUM 1:35 ꠝꠣꠘꠡꠣ ꠈꠣꠘ꠆ꠖꠣꠘ ꠕꠣꠇꠤ ꠙꠣꠅꠀ ꠉꠦꠟ ꠛꠔ꠆ꠔꠤꠡ ꠀꠎꠣꠞ ꠖꠥꠁ-ꠡ ꠎꠘ।
NUM 1:36 ꠛꠤꠘ-ꠁꠀꠝꠤꠘ ꠈꠣꠘ꠆ꠖꠣꠘꠞ ꠝꠣꠎꠦ ꠎꠦꠞꠣꠞ ꠛꠄꠅꠡ ꠛꠤꠡ ꠛꠍꠞ ꠛꠣ ꠄꠞ ꠛꠦꠡꠤ, ꠝꠣꠘꠤ ꠎꠣꠞꠣ ꠎꠥꠖ꠆ꠖꠔ ꠎꠣꠅꠀꠞ ꠎꠥꠇꠣ ꠀꠍꠤꠟ, ꠉꠥꠡ꠆ꠐꠤ ꠀꠞ ꠙꠞꠤꠛꠣꠞꠞ ꠙꠞꠤꠌꠄ ꠝꠣꠚꠤꠇ ꠄꠞꠣꠞ ꠘꠣꠝ ꠄꠇ ꠄꠇ ꠇꠞꠤ ꠟꠦꠈꠣ ꠅꠁꠟ।
NUM 1:37 ꠛꠤꠘ-ꠁꠀꠝꠤꠘ ꠈꠣꠘ꠆ꠖꠣꠘ ꠕꠣꠇꠤ ꠙꠣꠅꠀ ꠉꠦꠟ ꠙꠣꠄꠔꠤꠡ ꠀꠎꠣꠞ ꠌꠣꠁꠞ-ꠡ ꠎꠘ।
NUM 1:38 ꠖꠣꠘ ꠈꠣꠘ꠆ꠖꠣꠘꠞ ꠝꠣꠎꠦ ꠎꠦꠞꠣꠞ ꠛꠄꠅꠡ ꠛꠤꠡ ꠛꠍꠞ ꠛꠣ ꠄꠞ ꠛꠦꠡꠤ, ꠝꠣꠘꠤ ꠎꠣꠞꠣ ꠎꠥꠖ꠆ꠖꠔ ꠎꠣꠅꠀꠞ ꠎꠥꠇꠣ ꠀꠍꠤꠟ, ꠉꠥꠡ꠆ꠐꠤ ꠀꠞ ꠙꠞꠤꠛꠣꠞꠞ ꠙꠞꠤꠌꠄ ꠝꠣꠚꠤꠇ ꠄꠞꠣꠞ ꠘꠣꠝ ꠄꠇ ꠄꠇ ꠇꠞꠤ ꠟꠦꠈꠣ ꠅꠁꠟ।
NUM 1:39 ꠖꠣꠘ ꠈꠣꠘ꠆ꠖꠣꠘ ꠕꠣꠇꠤ ꠙꠣꠅꠀ ꠉꠦꠟ ꠛꠣꠡꠐ꠆ꠐꠤ ꠀꠎꠣꠞ ꠡꠣꠔ-ꠡ ꠎꠘ।
NUM 1:40 ꠀꠡꠤꠞ ꠈꠣꠘ꠆ꠖꠣꠘꠞ ꠝꠣꠎꠦ ꠎꠦꠞꠣꠞ ꠛꠄꠅꠡ ꠛꠤꠡ ꠛꠍꠞ ꠛꠣ ꠄꠞ ꠛꠦꠡꠤ, ꠝꠣꠘꠤ ꠎꠣꠞꠣ ꠎꠥꠖ꠆ꠖꠔ ꠎꠣꠅꠀꠞ ꠎꠥꠇꠣ ꠀꠍꠤꠟ, ꠉꠥꠡ꠆ꠐꠤ ꠀꠞ ꠙꠞꠤꠛꠣꠞꠞ ꠙꠞꠤꠌꠄ ꠝꠣꠚꠤꠇ ꠄꠞꠣꠞ ꠘꠣꠝ ꠄꠇ ꠄꠇ ꠇꠞꠤ ꠟꠦꠈꠣ ꠅꠁꠟ।
NUM 1:41 ꠀꠡꠤꠞ ꠈꠣꠘ꠆ꠖꠣꠘ ꠕꠣꠇꠤ ꠙꠣꠅꠀ ꠉꠦꠟ ꠄꠇꠌꠣꠟ꠆ꠟꠤꠡ ꠀꠎꠣꠞ ꠙꠣꠌ-ꠡ ꠎꠘ।
NUM 1:42 ꠘꠙ꠆ꠔꠣꠟꠤ ꠈꠣꠘ꠆ꠖꠣꠘꠞ ꠝꠣꠎꠦ ꠎꠦꠞꠣꠞ ꠛꠄꠅꠡ ꠛꠤꠡ ꠛꠍꠞ ꠛꠣ ꠄꠞ ꠛꠦꠡꠤ, ꠝꠣꠘꠤ ꠎꠣꠞꠣ ꠎꠥꠖ꠆ꠖꠔ ꠎꠣꠅꠀꠞ ꠎꠥꠇꠣ ꠀꠍꠤꠟ, ꠉꠥꠡ꠆ꠐꠤ ꠀꠞ ꠙꠞꠤꠛꠣꠞꠞ ꠙꠞꠤꠌꠄ ꠝꠣꠚꠤꠇ ꠄꠞꠣꠞ ꠘꠣꠝ ꠄꠇ ꠄꠇ ꠇꠞꠤ ꠟꠦꠈꠣ ꠅꠁꠟ।
NUM 1:43 ꠘꠙ꠆ꠔꠣꠟꠤ ꠈꠣꠘ꠆ꠖꠣꠘ ꠕꠣꠇꠤ ꠙꠣꠅꠀ ꠉꠦꠟ ꠔꠦꠙ꠆ꠙꠣꠘ꠆ꠘ ꠀꠎꠣꠞ ꠌꠣꠁꠞ-ꠡ ꠎꠘ।
NUM 1:44 ꠢꠎꠞꠔ ꠝꠥꠍꠣ, ꠢꠣꠞꠥꠘ ꠀꠞ ꠛꠘꠤ ꠁꠍꠞꠣꠁꠟꠞ ꠛꠣꠞꠅ ꠎꠘ ꠝꠥꠞꠛ꠆ꠛꠤ ꠘꠦꠔꠣꠄ ꠅꠃ ꠝꠣꠘꠡꠞꠦ ꠉꠘꠤꠟꠣ। ꠅꠃ ꠛꠣꠞꠅ ꠎꠘ ꠘꠦꠔꠣ ꠀꠍꠟꠣ ꠛꠣꠞꠅ ꠈꠣꠘ꠆ꠖꠣꠘꠞ ꠡꠞ꠆ꠖꠣꠞ।
NUM 1:45 ꠀꠡ꠆ꠔꠣ ꠛꠘꠤ ꠁꠍꠞꠣꠁꠟꠞ ꠝꠣꠎꠦ ꠎꠦꠞꠣꠞ ꠛꠄꠅꠡ ꠛꠤꠡ ꠛꠍꠞ ꠛꠣ ꠔꠣꠞ ꠛꠦꠡꠤ, ꠝꠣꠘꠤ ꠎꠥꠖ꠆ꠖꠔ ꠎꠣꠅꠀꠞ ꠎꠥꠇꠣ ꠛꠄꠅꠡ, ꠎꠣꠞꠎꠤꠞ ꠉꠥꠡ꠆ꠐꠤ ꠝꠣꠚꠤꠇ ꠔꠣꠞꠣꠞꠦ ꠉꠘꠣ ꠅꠁꠟ।
NUM 1:46 ꠉꠘꠤꠀ ꠢꠇ꠆ꠇꠟꠔꠣꠄ ꠍꠄ ꠟꠣꠈ ꠔꠤꠘ ꠀꠎꠣꠞ ꠙꠣꠌ-ꠡ ꠙꠁꠘ꠆ꠌꠣꠡ ꠎꠘ ꠙꠣꠅꠀ ꠉꠦꠟ।
NUM 1:47 ꠅꠁꠟꠦ ꠟꠦꠛꠤ ꠈꠣꠘ꠆ꠖꠣꠘꠞꠦ, ꠝꠣꠘꠤ ꠁꠝꠣꠝ ꠛꠋꠡꠞꠦ ꠄꠞꠣꠞ ꠟꠉꠦ ꠉꠘꠣ ꠅꠁꠟ ꠘꠣ।
NUM 1:48 ꠝꠣꠛꠥꠖꠦ ꠀꠉꠦꠃ ꠝꠥꠍꠣꠞꠦ ꠇꠁꠍꠟꠣ,
NUM 1:49 “ꠔꠥꠝꠤ ꠟꠦꠛꠤ ꠈꠣꠘ꠆ꠖꠣꠘꠞꠦ ꠉꠘꠛꠣꠄ ꠘꠣ, ꠉꠘꠣꠞ ꠡꠝꠄ ꠛꠘꠤ ꠁꠍꠞꠣꠁꠟꠞ ꠅꠁꠘ꠆ꠘ ꠝꠣꠘꠡꠞ ꠟꠉꠦ ꠄꠞꠣꠞꠦ ꠢꠤꠡꠣꠛ ꠇꠞꠤꠅ ꠘꠣ।
NUM 1:50 ꠔꠥꠝꠤ ꠔꠣꠞꠣꠞꠦ ꠡꠣꠢꠣꠖꠔ ꠔꠣꠝ꠆ꠛꠥ, ꠝꠣꠘꠤ ꠀꠝꠣꠞ ꠊꠞꠞ ꠡꠣꠎ-ꠡꠞꠘ꠆ꠎꠣꠝ ꠀꠞ ꠢꠇꠟꠔꠣꠞ ꠖꠦꠈꠣ-ꠢꠥꠘꠣꠞ ꠜꠣꠞ ꠖꠤꠛꠣꠄ। ꠔꠣꠞꠣꠞ ꠇꠣꠝ ꠅꠁꠛ, ꠀꠝꠣꠞ ꠊꠞ ꠀꠞ ꠄꠞ ꠢꠇꠟ ꠡꠣꠎ-ꠡꠞꠘ꠆ꠎꠣꠝ ꠛꠁꠀ ꠘꠦꠅꠀ। ꠔꠣꠞꠣ ꠄꠞ ꠌꠣꠁꠞꠅ ꠉꠣꠟꠣꠛꠣꠄ ꠎꠣꠞꠎꠤꠞ ꠔꠣꠝ꠆ꠛꠥ ꠐꠣꠋꠉꠣꠁꠀ ꠞꠁꠛꠣ ꠀꠞ ꠀꠝꠣꠞ ꠊꠞꠞ ꠖꠦꠈꠣ-ꠢꠥꠘꠣ ꠇꠞꠛꠣ।
NUM 1:51 ꠀꠝꠣꠞ ꠊꠞꠞꠦ ꠄꠇ ꠎꠣꠉꠣ ꠕꠣꠇꠤ ꠀꠞꠇ ꠎꠣꠉꠣꠔ ꠘꠤꠔꠦ ꠅꠁꠟꠦ, ꠟꠦꠛꠤ ꠈꠣꠘ꠆ꠖꠣꠘꠞ ꠝꠣꠘꠡꠦ ꠁꠈꠣꠘ ꠈꠥꠟꠛꠣ, ꠛꠣꠖꠦ ꠀꠞꠇ ꠎꠣꠉꠣꠔ ꠉꠤꠀ ꠄꠇ ꠄꠇ ꠇꠞꠤ ꠎꠥꠠꠣ ꠟꠣꠉꠣꠁꠀ ꠢꠤꠞꠛꠣꠞ ꠛꠣꠘꠣꠁꠛꠣ। ꠈꠣꠟꠤ ꠟꠦꠛꠤ ꠈꠣꠘ꠆ꠖꠣꠘ ꠍꠣꠠꠣ ꠅꠁꠘ꠆ꠘ ꠇꠦꠃ ꠁꠔꠣꠞ ꠇꠣꠘ꠆ꠖꠣꠔ ꠉꠦꠟꠦ ꠔꠣꠞꠦ ꠎꠣꠘꠦ ꠝꠣꠞꠣ ꠅꠁꠛ।
NUM 1:52 ꠛꠣꠖ-ꠛꠣꠇꠤ ꠛꠘꠤ ꠁꠍꠞꠣꠁꠟꠦ ꠔꠣꠞꠣꠞ ꠚꠃꠎꠤ ꠖꠟ ꠝꠣꠚꠤꠇ ꠎꠣꠞꠎꠤꠞ ꠔꠣꠝ꠆ꠛꠥ ꠐꠣꠋꠉꠣꠁꠛꠣ। ꠙꠞꠔꠦꠇꠦ ꠎꠣꠞꠎꠤꠞ ꠖꠟꠞ ꠡꠤꠝꠣꠘꠣꠞ ꠝꠣꠎꠦ, ꠖꠟꠞ ꠘꠤꠡꠣꠘꠣ ꠟꠣꠉꠣꠁꠟ ꠙꠔꠣꠇꠣꠞ ꠔꠟꠦ ꠞꠁꠔꠦ ꠅꠁꠛ।
NUM 1:53 ꠛꠘꠤ ꠁꠍꠞꠣꠁꠟꠞ ꠃꠙꠞꠦ ꠎꠣꠔꠦ ꠝꠣꠛꠥꠖꠞ ꠉꠎꠛ ꠘꠣ ꠟꠣꠝꠦ, ꠄꠞꠟꠣꠉꠤ ꠟꠦꠛꠤ ꠈꠣꠘ꠆ꠖꠣꠘꠞ ꠝꠣꠘꠡꠦ ꠀꠝꠣꠞ ꠡꠣꠢꠣꠖꠔ ꠔꠣꠝ꠆ꠛꠥꠞ ꠙꠣꠞꠣꠖꠣꠞꠤ ꠇꠞꠣꠞ ꠟꠣꠉꠤ ꠀꠝꠣꠞ ꠊꠞꠞ ꠌꠣꠁꠞꠅ ꠉꠣꠟꠣꠛꠣꠄ ꠔꠣꠞꠣꠞ ꠔꠣꠝ꠆ꠛꠥ ꠐꠣꠋꠉꠣꠁꠀ ꠞꠁꠛꠣ।”
NUM 1:54 ꠝꠣꠛꠥꠖꠦ ꠝꠥꠍꠣ ꠘꠛꠤꠞꠦ ꠎꠦꠟꠣ ꠢꠥꠇꠥꠝ ꠖꠤꠍꠟꠣ, ꠛꠘꠤ ꠁꠍꠞꠣꠁꠟꠦ ꠑꠤꠇ ꠅꠟꠣꠃ ꠇꠞꠟꠣ।
NUM 2:1 ꠛꠣꠖꠦ ꠝꠣꠛꠥꠖꠦ ꠝꠥꠍꠣ ꠀꠞ ꠢꠣꠞꠥꠘꠞꠦ ꠇꠁꠟꠣ,
NUM 2:2 “ꠝꠤꠟꠘ-ꠔꠣꠝ꠆ꠛꠥꠞ ꠌꠣꠁꠞꠅ ꠉꠣꠟꠣꠛꠣꠄ ꠕꠥꠠꠣ ꠈꠣꠟꠤ ꠎꠣꠉꠣ ꠕꠁꠀ ꠛꠘꠤ ꠁꠍꠞꠣꠁꠟꠦ ꠔꠣꠞꠣꠞ ꠔꠣꠝ꠆ꠛꠥ ꠐꠣꠘꠣꠁꠛꠣ। ꠙꠞꠔꠦꠇꠦ ꠎꠣꠞꠎꠤꠞ ꠚꠃꠎꠤ ꠖꠟꠞ ꠡꠤꠝꠣꠘꠣꠔ ꠎꠣꠞꠎꠤꠞ ꠉꠥꠡ꠆ꠐꠤꠞ ꠙꠔꠣꠇꠣꠞ ꠗꠣꠞꠅ ꠞꠁꠛꠣ।
NUM 2:3 “ꠝꠤꠟꠘ-ꠔꠣꠝ꠆ꠛꠥꠞ ꠙꠥꠛꠦꠖꠤ, ꠡꠥꠞꠥꠎ ꠃꠑꠣꠞ ꠝꠥꠈꠣ, ꠄꠢꠥꠖꠣꠞ ꠙꠔꠣꠇꠣꠞ ꠔꠤꠘꠅ ꠈꠣꠘ꠆ꠖꠣꠘꠞ ꠚꠃꠎꠤ ꠖꠟꠦ ꠔꠣꠞꠣꠞ ꠔꠣꠝ꠆ꠛꠥ ꠐꠣꠘꠣꠁꠛꠣ। ꠄꠢꠥꠖꠣ ꠈꠣꠘ꠆ꠖꠣꠘꠞ ꠡꠞ꠆ꠖꠣꠞ ꠅꠁꠟꠣ ꠀꠝꠤꠘꠣꠖꠣꠛꠞ ꠙꠥꠀ ꠘꠣꠢꠤꠡ,
NUM 2:4 ꠅꠃ ꠈꠣꠘ꠆ꠖꠣꠘꠅ ꠍꠤꠙꠣꠁꠞ ꠎꠥꠇꠣ ꠝꠣꠘꠥꠡ ꠅꠁꠟꠣ, ꠌꠃꠀꠔ꠆ꠔꠁꠞ ꠀꠎꠣꠞ ꠍꠄ-ꠡ ꠎꠘ।
NUM 2:5 ꠄꠞꠣꠞ ꠄꠇ ꠉꠣꠟꠣꠔ ꠁꠍꠣꠈꠞ ꠈꠣꠘ꠆ꠖꠣꠘ ꠞꠁꠛꠣ, ꠅꠃ ꠈꠣꠘ꠆ꠖꠣꠘꠞ ꠡꠞ꠆ꠖꠣꠞ ꠅꠁꠟꠣ ꠍꠥꠉꠣꠞꠞ ꠙꠥꠀ ꠘꠕꠘꠦꠟ,
NUM 2:6 ꠔꠣꠞ ꠈꠣꠘ꠆ꠖꠣꠘꠅ ꠍꠤꠙꠣꠁꠞ ꠎꠥꠇꠣ ꠝꠣꠘꠥꠡ ꠅꠁꠟꠣ, ꠌꠃꠀꠘ꠆ꠘ ꠀꠎꠣꠞ ꠌꠣꠁꠞ-ꠡ ꠎꠘ।
NUM 2:7 ꠖꠥꠍꠞꠣ ꠉꠣꠟꠣꠔ ꠔꠣꠝ꠆ꠛꠥ ꠉꠣꠠꠤꠛꠣ ꠍꠛꠥꠟꠘ ꠈꠣꠘ꠆ꠖꠣꠘꠦ, ꠅꠃ ꠈꠣꠘ꠆ꠖꠣꠘꠞ ꠡꠞ꠆ꠖꠣꠞ ꠅꠁꠟꠣ ꠢꠦꠟꠘꠞ ꠙꠥꠀ ꠁꠟꠤꠀꠛ,
NUM 2:8 ꠔꠣꠞ ꠈꠣꠘ꠆ꠖꠣꠘꠅ ꠍꠤꠙꠣꠁꠞ ꠎꠥꠇꠣ ꠝꠣꠘꠥꠡ ꠅꠁꠟꠣ, ꠡꠣꠔꠣꠘ꠆ꠘ ꠀꠎꠣꠞ ꠌꠣꠁꠞ-ꠡ ꠎꠘ।
NUM 2:9 ꠄꠢꠥꠖꠣꠞ ꠙꠔꠣꠇꠣꠞ ꠅꠃ ꠔꠤꠘꠅ ꠈꠣꠘ꠆ꠖꠣꠘꠞ ꠉꠘꠣ ꠍꠤꠙꠣꠁꠞ ꠎꠥꠇꠣ ꠝꠥꠐ ꠝꠣꠘꠥꠡ ꠅꠁꠟꠣ, ꠄꠇ ꠟꠣꠈ ꠍꠤꠀꠡꠤ ꠀꠎꠣꠞ ꠌꠣꠁꠞ-ꠡ। ꠍꠚꠞꠞ ꠡꠝꠄ ꠔꠣꠞꠣꠞ ꠇꠣꠚꠦꠟꠣ ꠢꠇꠟꠞ ꠀꠉꠦ ꠞꠅꠀꠘꠣ ꠖꠤꠛꠣ।
NUM 2:10 “ꠝꠤꠟꠘ-ꠔꠣꠝ꠆ꠛꠥꠞ ꠖꠇ꠆ꠇꠤꠘ ꠉꠣꠟꠣꠔ ꠔꠣꠝ꠆ꠛꠥ ꠉꠣꠠꠤꠛꠣ, ꠞꠥꠛꠦꠘꠞ ꠙꠔꠣꠇꠣꠞ ꠔꠤꠘꠅ ꠈꠣꠘ꠆ꠖꠣꠘꠞ ꠚꠃꠎꠤ ꠖꠟꠦ। ꠞꠥꠛꠦꠘ ꠈꠣꠘ꠆ꠖꠣꠘꠞ ꠡꠞ꠆ꠖꠣꠞ ꠅꠁꠟꠣ ꠡꠣꠖꠤꠃꠞꠞ ꠙꠥꠀ ꠀꠟꠤꠍꠥꠞ,
NUM 2:11 ꠔꠣꠞ ꠈꠣꠘ꠆ꠖꠣꠘꠅ ꠍꠤꠙꠣꠁꠞ ꠎꠥꠇꠣ ꠝꠣꠘꠥꠡ ꠅꠁꠟꠣ, ꠍꠄꠌꠣꠟ꠆ꠟꠤꠡ ꠀꠎꠣꠞ ꠙꠣꠌ-ꠡ ꠎꠘ।
NUM 2:12 ꠄꠞꠣꠞ ꠄꠇ ꠉꠣꠟꠣꠔ ꠡꠤꠝꠤꠅꠘ ꠈꠣꠘ꠆ꠖꠣꠘ ꠞꠁꠛꠣ, ꠅꠃ ꠈꠣꠘ꠆ꠖꠣꠘꠞ ꠡꠥꠞꠡꠣꠖꠣꠄꠅꠞ ꠙꠥꠀ ꠡꠣꠟꠥꠝꠤꠟ ꠅꠁꠟꠣ ꠔꠣꠞꠣꠞ ꠡꠞ꠆ꠖꠣꠞ,
NUM 2:13 ꠔꠣꠞ ꠈꠣꠘ꠆ꠖꠣꠘꠅ ꠍꠤꠙꠣꠁꠞ ꠎꠥꠇꠣ ꠝꠣꠘꠥꠡ ꠅꠁꠟꠣ, ꠃꠘꠥꠡꠣꠁꠐ ꠀꠎꠣꠞ ꠔꠤꠘ-ꠡ ꠎꠘ।
NUM 2:14 ꠖꠥꠍꠞꠣ ꠉꠣꠟꠣꠔ ꠔꠣꠝ꠆ꠛꠥ ꠉꠣꠠꠤꠛꠣ ꠍꠣꠖꠥ ꠈꠣꠘ꠆ꠖꠣꠘꠦ, ꠅꠃ ꠈꠣꠘ꠆ꠖꠣꠘꠞ ꠡꠞ꠆ꠖꠣꠞ ꠅꠁꠟꠣ ꠖꠥꠄꠟꠞ ꠙꠥꠀ ꠁꠟꠤꠀꠍꠚ,
NUM 2:15 ꠔꠣꠞ ꠈꠣꠘ꠆ꠖꠣꠘꠅ ꠍꠤꠙꠣꠁꠞ ꠎꠥꠇꠣ ꠝꠣꠘꠥꠡ ꠅꠁꠟꠣ, ꠙꠣꠌ꠆ꠌꠣꠟ꠆ꠟꠤꠡ ꠀꠎꠣꠞ ꠍꠄ-ꠡ ꠙꠁꠘ꠆ꠌꠣꠡ ꠎꠘ।
NUM 2:16 ꠞꠥꠛꠦꠘꠞ ꠙꠔꠣꠇꠣꠞ ꠅꠃ ꠔꠤꠘꠅ ꠈꠣꠘ꠆ꠖꠣꠘꠅ ꠉꠘꠣ ꠍꠤꠙꠣꠁꠞ ꠎꠥꠇꠣ ꠝꠥꠐ ꠝꠣꠘꠥꠡ ꠅꠁꠟꠣ, ꠄꠇ ꠟꠣꠈ ꠄꠇꠣꠘ꠆ꠘ ꠀꠎꠣꠞ ꠌꠣꠁꠞ-ꠡ ꠙꠁꠘ꠆ꠌꠣꠡ ꠎꠘ। ꠍꠚꠞꠞ ꠡꠝꠄ ꠔꠣꠞꠣ ꠖꠥꠍꠞꠣ ꠇꠣꠚꠦꠟꠣꠔ ꠞꠅꠀꠘꠣ ꠖꠤꠛꠣ।
NUM 2:17 “ꠛꠣꠖꠦ ꠟꠦꠛꠤ ꠈꠣꠘ꠆ꠖꠣꠘꠞ ꠝꠣꠘꠡꠦ ꠝꠤꠟꠘ-ꠔꠣꠝ꠆ꠛꠥꠞꠦ ꠟꠁꠀ ꠞꠅꠀꠘꠣ ꠖꠤꠛꠣ, ꠢꠇꠟꠞ ꠝꠣꠎꠈꠣꠘꠅ ꠄꠞꠣ ꠞꠁꠛꠣ। ꠎꠣꠞꠎꠤꠞ ꠔꠣꠝ꠆ꠛꠥ ꠐꠣꠘꠣꠘꠤꠞ ꠍꠤꠞꠤꠀꠟ ꠝꠣꠚꠤꠇ ꠟꠣꠁꠘ ꠗꠞꠤꠀ ꠞꠅꠀꠘꠣ ꠅꠁꠛꠣ। ꠚꠃꠎꠤ ꠖꠟꠞ ꠎꠣꠞꠎꠤꠞ ꠙꠔꠣꠇꠣꠞ ꠝꠣꠘꠥꠡ ꠘꠤꠎꠞ ꠖꠟꠞ ꠟꠉꠦ ꠞꠁꠛꠣ।
NUM 2:18 “ꠝꠤꠟꠘ-ꠔꠣꠝ꠆ꠛꠥꠞ ꠙꠁꠌꠝꠞ ꠉꠣꠟꠣꠔ ꠔꠣꠝ꠆ꠛꠥ ꠉꠣꠠꠤꠛꠣ, ꠀꠚꠞꠣꠁꠝ ꠙꠔꠣꠇꠣꠞ ꠔꠤꠘꠅ ꠚꠃꠎꠤ ꠖꠟꠞ ꠝꠣꠘꠡꠦ। ꠀꠚꠞꠣꠁꠝ ꠈꠣꠘ꠆ꠖꠣꠘꠞ ꠡꠞ꠆ꠖꠣꠞ ꠅꠁꠟꠣ ꠀꠝꠤꠢꠥꠖꠞ ꠙꠥꠀ ꠀꠟꠤꠡꠣꠝꠣ,
NUM 2:19 ꠅꠃ ꠈꠣꠘ꠆ꠖꠣꠘꠅ ꠍꠤꠙꠣꠁꠞ ꠎꠥꠇꠣ ꠝꠣꠘꠥꠡ ꠅꠁꠟꠣ, ꠌꠣꠟ꠆ꠟꠤꠡ ꠀꠎꠣꠞ ꠙꠣꠌ-ꠡ ꠎꠘ।
NUM 2:20 ꠄꠞꠣꠞ ꠄꠇ ꠉꠣꠟꠣꠔ ꠝꠣꠘꠡꠣ ꠈꠣꠘ꠆ꠖꠣꠘꠦ ꠔꠣꠝ꠆ꠛꠥ ꠉꠣꠠꠤꠛꠣ, ꠚꠣꠔꠡꠥꠞꠞ ꠙꠥꠀ ꠉꠝꠟꠤꠄꠟ ꠅꠁꠟꠣ ꠔꠣꠞꠣꠞ ꠡꠞ꠆ꠖꠣꠞ,
NUM 2:21 ꠅꠃ ꠈꠣꠘ꠆ꠖꠣꠘꠅ ꠍꠤꠙꠣꠁꠞ ꠎꠥꠇꠣ ꠝꠣꠘꠥꠡ ꠅꠁꠟꠣ, ꠛꠔ꠆ꠔꠤꠡ ꠀꠎꠣꠞ ꠖꠥꠁ-ꠡ ꠎꠘ।
NUM 2:22 ꠀꠞ ꠖꠥꠍꠞꠣ ꠉꠣꠟꠣꠔ ꠞꠁꠛꠣ ꠛꠤꠘ-ꠁꠀꠝꠤꠘ ꠈꠣꠘ꠆ꠖꠣꠘ, ꠄꠞꠣꠞ ꠡꠞ꠆ꠖꠣꠞ ꠅꠁꠟꠣ ꠎꠤꠖꠣꠃꠘꠤꠞ ꠙꠥꠀ ꠀꠛꠤꠖꠣꠘ,
NUM 2:23 ꠔꠣꠞ ꠈꠣꠘ꠆ꠖꠣꠘꠅ ꠍꠤꠙꠣꠁꠞ ꠎꠥꠇꠣ ꠝꠣꠘꠥꠡ ꠅꠁꠟꠣ, ꠙꠣꠄꠔꠤꠡ ꠀꠎꠣꠞ ꠌꠣꠁꠞ-ꠡ ꠎꠘ।
NUM 2:24 ꠀꠚꠞꠣꠁꠝꠞ ꠙꠔꠣꠇꠣꠞ ꠅꠃ ꠔꠤꠘꠅ ꠈꠣꠘ꠆ꠖꠣꠘꠞ ꠉꠘꠣ ꠍꠤꠙꠣꠁꠞ ꠎꠥꠇꠣ ꠝꠥꠐ ꠝꠣꠘꠥꠡ ꠅꠁꠟꠣ, ꠄꠇ ꠟꠣꠈ ꠀꠐ ꠀꠎꠣꠞ ꠄꠇ-ꠡ ꠎꠘ। ꠔꠣꠞꠣ ꠔꠤꠘ ꠘꠝ꠆ꠛꠞ ꠇꠣꠚꠦꠟꠣꠔ ꠞꠅꠀꠘꠣ ꠖꠤꠛꠣ।
NUM 2:25 “ꠝꠤꠟꠘ-ꠔꠣꠝ꠆ꠛꠥꠞ ꠃꠔ꠆ꠔꠞ ꠉꠣꠟꠣꠔ ꠔꠣꠝ꠆ꠛꠥ ꠉꠣꠠꠤꠛꠣ ꠖꠣꠘ ꠙꠔꠣꠇꠣꠞ ꠔꠤꠘꠅ ꠈꠣꠘ꠆ꠖꠣꠘꠞ ꠚꠃꠎꠤ ꠖꠟꠞ ꠝꠣꠘꠡꠦ, ꠔꠣꠞꠣꠞ ꠡꠞ꠆ꠖꠣꠞ ꠅꠁꠟꠣ ꠀꠝꠤꠡꠣꠖꠣꠞ ꠙꠥꠀ ꠀꠈꠤꠀꠎꠣꠞ,
NUM 2:26 ꠅꠃ ꠈꠣꠘ꠆ꠖꠣꠘꠅ ꠍꠤꠙꠣꠁꠞ ꠎꠥꠇꠣ ꠝꠣꠘꠥꠡ ꠅꠁꠟꠣ, ꠛꠣꠡꠐ꠆ꠐꠤ ꠀꠎꠣꠞ ꠡꠣꠔ-ꠡ ꠎꠘ।
NUM 2:27 ꠄꠞꠣꠞ ꠄꠇ ꠉꠣꠟꠣꠔ ꠀꠡꠤꠞ ꠈꠣꠘ꠆ꠖꠣꠘꠦ ꠔꠣꠝ꠆ꠛꠥ ꠉꠣꠠꠤꠛꠣ, ꠅꠃ ꠈꠣꠘ꠆ꠖꠣꠘꠞ ꠡꠞ꠆ꠖꠣꠞ ꠅꠁꠟꠣ, ꠃꠇꠞꠣꠘꠞ ꠙꠥꠀ ꠚꠎꠤꠄꠟ।
NUM 2:28 ꠔꠣꠞ ꠈꠣꠘ꠆ꠖꠣꠘꠅ ꠍꠤꠙꠣꠁꠞ ꠎꠥꠇꠣ ꠝꠣꠘꠥꠡ ꠅꠁꠟꠣ, ꠄꠇꠌꠣꠟ꠆ꠟꠤꠡ ꠀꠎꠣꠞ ꠙꠣꠌ-ꠡ ꠎꠘ।
NUM 2:29 ꠀꠞ ꠖꠥꠍꠞꠣ ꠉꠣꠟꠣꠔ ꠞꠁꠛꠣ ꠘꠙ꠆ꠔꠣꠟꠤ ꠈꠣꠘ꠆ꠖꠣꠘ, ꠅꠃ ꠈꠣꠘ꠆ꠖꠣꠘꠞ ꠡꠞ꠆ꠖꠣꠞ ꠅꠁꠟꠣ, ꠁꠘꠣꠘꠞ ꠙꠥꠀ ꠀꠢꠤꠞ।
NUM 2:30 ꠔꠣꠞ ꠈꠣꠘ꠆ꠖꠣꠘꠅ ꠍꠤꠙꠣꠁꠞ ꠎꠥꠇꠣ ꠝꠣꠘꠥꠡ ꠅꠁꠟꠣ, ꠔꠦꠙ꠆ꠙꠣꠘ꠆ꠘ ꠀꠎꠣꠞ ꠌꠣꠁꠞ-ꠡ ꠎꠘ।
NUM 2:31 ꠖꠣꠘꠞ ꠙꠔꠣꠇꠣꠞ ꠅꠃ ꠔꠤꠘꠅ ꠈꠣꠘ꠆ꠖꠣꠘꠞ ꠉꠘꠣ ꠍꠤꠙꠣꠁꠞ ꠎꠥꠇꠣ ꠝꠥꠐ ꠝꠣꠘꠥꠡ ꠅꠁꠟꠣ, ꠄꠇ ꠟꠣꠈ ꠡꠣꠔꠣꠘ꠆ꠘ ꠀꠎꠣꠞ ꠍꠄ-ꠡ ꠎꠘ। ꠄꠞꠣ ꠢꠇꠟ ꠢꠦꠡꠞ ꠇꠣꠚꠦꠟꠣꠔ ꠞꠅꠀꠘꠣ ꠖꠤꠛꠣ।”
NUM 2:32 ꠅꠃ ꠘꠝꠥꠘꠣꠄ ꠢꠇꠟ ꠛꠘꠤ ꠁꠍꠞꠣꠁꠟꠞꠦ ꠎꠣꠞꠎꠤꠞ ꠉꠥꠡ꠆ꠐꠤ ꠝꠣꠚꠤꠇ ꠉꠘꠣ ꠅꠁꠟ। ꠉꠘꠤꠀ ꠢꠣꠞꠟꠦ ꠢꠇꠟ ꠚꠃꠎꠤ ꠖꠟꠦ ꠍꠤꠙꠣꠁꠞ ꠎꠥꠇꠣ ꠝꠥꠐ ꠝꠣꠘꠥꠡ ꠅꠁꠟꠣ, ꠍꠄ ꠟꠣꠈ ꠔꠤꠘ ꠀꠎꠣꠞ ꠙꠣꠌ-ꠡ ꠙꠁꠘ꠆ꠌꠣꠡ ꠎꠘ।
NUM 2:33 ꠔꠣ-ꠅ ꠝꠣꠛꠥꠖꠦ ꠝꠥꠍꠣ ꠘꠛꠤꠞꠦ ꠎꠦꠟꠣ ꠢꠥꠇꠥꠝ ꠖꠤꠍꠟꠣ, ꠢꠥꠇꠥꠝ ꠝꠣꠚꠤꠇ ꠛꠘꠤ ꠁꠍꠞꠣꠁꠟꠞꠦ ꠉꠘꠣꠞ ꠡꠝꠄ ꠟꠦꠛꠤ ꠈꠣꠘ꠆ꠖꠣꠘꠞꠦ ꠉꠘꠣꠔ ꠗꠞꠣ ꠅꠁꠟ ꠘꠣ।
NUM 2:34 ꠝꠣꠛꠥꠖꠦ ꠝꠥꠍꠣꠞꠦ ꠎꠦꠟꠣ ꠢꠥꠇꠥꠝ ꠖꠤꠍꠟꠣ, ꠛꠘꠤ ꠁꠍꠞꠣꠁꠟꠦ ꠢꠇꠟ ꠇꠣꠝ-ꠇꠣꠎ ꠇꠞꠔꠣ ꠅꠃ ꠢꠥꠇꠥꠝ ꠝꠣꠚꠤꠇ। ꠔꠣꠞꠣ ꠎꠣꠞꠎꠤꠞ ꠖꠟꠞ ꠎꠣꠉꠣꠔ ꠔꠣꠝ꠆ꠛꠥ ꠐꠣꠘꠣꠁꠔꠣ, ꠀꠞ ꠍꠚꠞꠅ ꠞꠅꠀꠘꠣ ꠅꠁꠔꠣ ꠘꠤꠎꠞ ꠉꠥꠡ꠆ꠐꠤ ꠀꠞ ꠙꠞꠤꠛꠣꠞ ꠝꠣꠚꠤꠇ ꠀꠙꠘ ꠚꠃꠎꠤ ꠖꠟꠞ ꠙꠔꠣꠇꠣꠞ ꠗꠣꠞꠅ ꠞꠁꠀ।
NUM 3:1 ꠔꠥꠞ ꠙꠣꠠꠞ ꠃꠙꠞꠦ ꠝꠣꠛꠥꠖꠦ ꠎꠦꠛꠟꠣ ꠝꠥꠍꠣ ꠘꠛꠤꠞ ꠟꠉꠦ ꠛꠣꠔꠌꠤꠔ ꠇꠞꠍꠟꠣ, ꠢꠃ ꠡꠝꠄ ꠢꠣꠞꠥꠘ ꠀꠞ ꠔꠣꠘ ꠜꠣꠁ ꠝꠥꠍꠣꠞ ꠛꠋꠡ-ꠛꠥꠘꠤꠀꠖ ꠀꠍꠟꠣ ꠅꠃ ꠄꠁꠘꠔꠣꠁꠘ:
NUM 3:2 ꠢꠣꠞꠥꠘꠞ ꠙꠥꠀꠂꠘ ꠅꠁꠟꠣ ꠘꠣꠖꠣꠛ, ꠀꠛꠤꠢꠥ, ꠀꠟꠤ-ꠀꠎꠞ ꠀꠞ ꠁꠍꠣꠝꠣꠞ। ꠄꠞꠣꠞ ꠝꠣꠎꠦ ꠘꠣꠖꠣꠛ ꠀꠍꠟꠣ ꠛꠠ।
NUM 3:3 ꠁꠝꠣꠝꠔꠤ ꠇꠣꠝꠞ ꠟꠣꠉꠤ ꠢꠣꠞꠥꠘꠞ ꠅꠃ ꠌꠣꠁꠞꠅ ꠙꠥꠀꠂꠘꠞꠦ ꠈꠦꠟꠣꠚꠔꠤ ꠖꠤꠀ ꠄꠛꠣꠖꠔꠤ ꠇꠣꠝꠅ ꠛꠅꠀꠁꠟ ꠇꠞꠣ ꠅꠁꠍꠤꠟ।
NUM 3:4 ꠅꠁꠟꠦ ꠍꠤꠘꠣꠁ ꠝꠞꠥꠜꠥꠝꠤꠔ ꠞꠅꠀꠞ ꠇꠣꠟꠅ, ꠘꠣꠖꠣꠛ ꠀꠞ ꠀꠛꠤꠢꠥꠄ ꠝꠣꠛꠥꠖꠞ ꠛꠣꠔꠣꠁꠟ ꠘꠤꠅꠝ ꠜꠣꠋꠉꠤꠀ, ꠖꠥꠍꠞꠣ ꠀꠉꠥꠁꠘꠖꠤ ꠀꠉꠞ-ꠈꠥꠡꠛꠄ ꠎꠣꠟꠣꠘꠤꠞ ꠡꠝꠄ ꠝꠣꠛꠥꠖꠞ ꠍꠣꠝꠘꠦꠃ ꠔꠣꠞꠣꠞ ꠝꠞꠘ ꠅꠁꠉꠦꠟ। ꠔꠣꠞꠣꠞ ꠇꠥꠘꠥ ꠀꠅꠟꠣꠖ ꠘꠣ ꠕꠣꠇꠣꠄ, ꠔꠣꠞꠣꠞ ꠛꠣꠚ ꠢꠣꠞꠥꠘ ꠘꠛꠤꠞ ꠟꠉꠦ ꠞꠁꠀ ꠀꠟꠤ-ꠀꠎꠞ ꠀꠞ ꠁꠍꠣꠝꠣꠞꠦ ꠁꠝꠣꠝꠔꠤ ꠇꠣꠝ ꠇꠞꠟꠣ।
NUM 3:5 ꠛꠣꠖꠦ ꠝꠣꠛꠥꠖꠦ ꠝꠥꠍꠣ ꠘꠛꠤꠞꠦ ꠇꠁꠟꠣ,
NUM 3:6 “ꠔꠥꠝꠤ ꠟꠦꠛꠤ ꠈꠣꠘ꠆ꠖꠣꠘꠞ ꠝꠣꠘꠡꠞꠦ ꠀꠘꠤꠀ ꠁꠝꠣꠝ ꠢꠣꠞꠥꠘꠞ ꠀꠔꠅ ꠡꠝꠎꠣꠅ, ꠔꠣꠞꠣ ꠁꠝꠣꠝꠔꠤ ꠇꠣꠝꠅ ꠔꠣꠘꠞꠦ ꠡꠣꠁꠎ꠆ꠎ ꠇꠞꠛꠣ।
NUM 3:7 ꠔꠣꠞꠣ ꠁꠝꠣꠝ ꠢꠣꠞꠥꠘꠞ ꠎꠤꠝ꠆ꠝꠣꠄ ꠝꠤꠟꠘ-ꠔꠣꠝ꠆ꠛꠥꠞ ꠍꠣꠝꠘꠦ ꠢꠇꠟ ꠛꠘꠤ ꠁꠍꠞꠣꠁꠟꠞ ꠔꠞꠚ ꠕꠣꠇꠤ ꠀꠝꠣꠞ ꠊꠞꠞ ꠈꠣꠖꠤꠝꠖꠣꠞꠤ ꠇꠞꠛꠣ।
NUM 3:8 ꠔꠣꠞꠣꠃ ꠝꠤꠟꠘ-ꠔꠣꠝ꠆ꠛꠥꠞ ꠝꠣꠟ-ꠍꠣꠝꠣꠘꠣ ꠖꠦꠈꠣ-ꠢꠥꠘꠣ ꠀꠞ ꠀꠟ꠆ꠟꠣꠞ ꠊꠞꠞ ꠈꠦꠎꠝꠔ ꠇꠞꠤꠀ ꠛꠘꠤ ꠁꠍꠞꠣꠁꠟꠞ ꠙꠇ꠆ꠇꠦ ꠄꠛꠣꠖꠔ-ꠛꠘ꠆ꠖꠦꠉꠤꠞ ꠖꠣꠄ-ꠖꠣꠄꠁꠔ꠆ꠔ ꠀꠖꠣꠄ ꠇꠞꠛꠣ।
NUM 3:9 ꠟꠦꠛꠤ ꠈꠣꠘ꠆ꠖꠣꠘꠞ ꠈꠣꠖꠤꠝ ꠅꠇꠟꠞꠦ ꠔꠥꠝꠤ ꠢꠣꠞꠥꠘ ꠀꠞ ꠔꠣꠞ ꠙꠥꠀꠂꠘ꠆ꠔꠞ ꠀꠔꠅ ꠡꠝꠎꠣꠁ ꠖꠦꠅ। ꠛꠘꠤ ꠁꠍꠞꠣꠁꠟꠞ ꠝꠣꠎ ꠕꠣꠇꠤ ꠄꠞꠣꠞꠦ ꠁꠝꠣꠝ ꠢꠣꠞꠥꠘꠞ ꠀꠔꠅ ꠡꠙꠤ ꠖꠦꠅꠀ ꠅꠁꠟ।
NUM 3:10 ꠁꠝꠣꠝꠔꠤ ꠇꠣꠝꠞ ꠟꠣꠉꠤ ꠔꠥꠝꠤ ꠢꠣꠞꠥꠘ ꠀꠞ ꠔꠣꠞ ꠛꠋꠡꠞꠦ ꠛꠣꠍꠤꠀ ꠘꠦꠅ। ꠔꠣꠞꠣ ꠍꠣꠠꠣ ꠖꠥꠍꠞꠣ ꠇꠦꠃ ꠁꠝꠣꠝꠔꠤ ꠇꠞꠣꠔ ꠉꠦꠟꠦ ꠅꠉꠥꠞꠦ ꠎꠣꠘꠦ ꠝꠣꠞꠣ ꠅꠁꠛ।”
NUM 3:11 ꠝꠣꠛꠥꠖꠦ ꠝꠥꠍꠣꠞꠦ ꠄꠅꠈꠣꠘ ꠇꠁꠟꠣ,
NUM 3:12 “ꠢꠥꠘꠅ, ꠛꠘꠤ ꠁꠍꠞꠣꠁꠟꠤ ꠛꠦꠐꠤꠘ꠆ꠔꠞ ꠊꠞꠅ ꠎꠘꠝ ꠟꠅꠀ ꠙꠄꠟꠣ ꠙꠥꠀꠞ ꠛꠖꠟꠣ ꠛꠣꠛꠔ, ꠀꠝꠤ ꠟꠦꠛꠤ ꠈꠣꠘ꠆ꠖꠣꠘꠞꠦ ꠙꠍꠘ꠆ꠖ ꠇꠞꠍꠤ। ꠄꠞꠟꠣꠉꠤ ꠟꠦꠛꠤ ꠅꠇꠟ ꠀꠝꠣꠞ।
NUM 3:13 ꠀꠍꠟꠦ ꠢꠇ꠆ꠇꠟ ꠙꠄꠟꠣ ꠙꠥꠀꠂꠘꠃ ꠀꠝꠣꠞ। ꠝꠤꠡꠞꠤ ꠅꠇꠟꠞ ꠢꠇꠟ ꠙꠄꠟꠣ ꠙꠥꠀꠂꠘ꠆ꠔꠞꠦ ꠝꠣꠞꠤꠟꠤꠛꠣꠞ ꠖꠤꠘ, ꠛꠘꠤ ꠁꠍꠞꠣꠁꠟꠞ ꠙꠞꠔꠦꠇ ꠙꠄꠟꠣ ꠙꠥꠀꠞꠦ ꠀꠝꠣꠞ ꠟꠣꠉꠤ ꠙꠛꠤꠔ꠆ꠞ ꠇꠞꠤꠀ ꠞꠣꠈꠍꠤ, ꠁꠔꠣ ꠝꠣꠘꠡꠞ ꠙꠥꠔ ꠅꠃꠇ ꠛꠣ ꠙꠡꠥꠞ ꠛꠣꠁꠌ꠆ꠌꠣ ꠅꠃꠇ। ꠔꠣꠞꠣ ꠔ ꠀꠝꠣꠞ, ꠀꠝꠤꠃ ꠝꠣꠛꠥꠖ।”
NUM 3:14 ꠍꠤꠘꠣꠁ ꠝꠞꠥꠜꠥꠝꠤꠞ ꠝꠣꠎꠦ ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ,
NUM 3:15 “ꠔꠥꠝꠤ ꠉꠥꠡ꠆ꠐꠤ ꠀꠞ ꠙꠞꠤꠛꠣꠞ ꠝꠣꠚꠤꠇ ꠟꠦꠛꠤ ꠅꠇꠟꠞꠦ ꠉꠘꠅ। ꠄꠇ ꠝꠣꠡ ꠛꠣ ꠄꠞ ꠛꠦꠡꠤ ꠛꠄꠅꠡꠞ ꠢꠇꠟ ꠛꠦꠐꠣꠁꠘ꠆ꠔꠞꠦ ꠉꠘꠅ।”
NUM 3:16 ꠝꠣꠛꠥꠖꠞ ꠢꠥꠇꠥꠝ ꠝꠣꠚꠤꠇ ꠔꠣꠁꠘ ꠟꠦꠛꠤ ꠈꠣꠘ꠆ꠖꠣꠘꠞꠦ ꠉꠘꠤꠟꠣ।
NUM 3:17 ꠉꠘꠣꠞ ꠇꠣꠟꠅ ꠙꠣꠁꠟꠣ, ꠟꠦꠛꠤꠞ ꠙꠥꠀꠂꠘ ꠎꠣꠞꠍꠥꠘ, ꠇꠣꠢꠣꠔ ꠀꠞ ꠝꠣꠞꠣꠞꠤ।
NUM 3:18 ꠎꠣꠞꠍꠥꠘꠞ ꠙꠥꠀꠂꠘ ꠟꠤꠛꠘꠤ ꠀꠞ ꠡꠤꠝꠦꠁ ꠀꠍꠟꠣ ꠖꠥꠁ ꠉꠥꠡ꠆ꠐꠤꠞ ꠝꠥꠞꠛ꠆ꠛꠤ ꠘꠦꠔꠣ।
NUM 3:19 ꠇꠣꠢꠣꠔꠞ ꠙꠥꠀꠂꠘ ꠁꠝꠞꠣꠘ, ꠁꠎꠢꠣꠞ, ꠢꠦꠛꠞꠘ ꠀꠞ ꠃꠎ꠆ꠎꠟ ꠅꠁꠟꠣ ꠌꠣꠁꠞ ꠜꠣꠁ।
NUM 3:20 ꠝꠣꠞꠣꠞꠤꠞ ꠙꠥꠀꠂꠘ ꠝꠢꠟꠤ ꠀꠞ ꠝꠥꠡꠤ ꠅꠁꠟꠣ ꠖꠥꠁ ꠜꠣꠁ। ꠄꠞꠣ ꠅꠁꠟꠣ ꠛꠋꠡ ꠀꠞ ꠙꠞꠤꠛꠣꠞ ꠢꠤꠡꠣꠛꠦ ꠟꠦꠛꠤ ꠈꠣꠘ꠆ꠖꠣꠘꠞ ꠘꠣꠘꠣꠘ ꠉꠥꠡ꠆ꠐꠤ।
NUM 3:21 ꠎꠣꠞꠍꠥꠘ ꠀꠍꠟꠣ ꠟꠤꠛꠘꠤꠀ ꠀꠞ ꠡꠤꠝꠦꠁꠀ ꠉꠥꠡ꠆ꠐꠤꠞ ꠝꠥꠟ ꠝꠥꠞꠛ꠆ꠛꠤ।
NUM 3:22 ꠄꠞꠣꠞ ꠝꠣꠎꠦ ꠄꠇ ꠝꠣꠡ ꠀꠞ ꠄꠇ ꠝꠣꠡꠞ ꠛꠦꠡꠤ ꠛꠄꠅꠡꠞ ꠢꠇꠟ ꠙꠥꠀꠂꠘ꠆ꠔꠞꠦ ꠉꠘꠤꠀ ꠡꠣꠠꠦ ꠡꠣꠔ ꠀꠎꠣꠞ ꠙꠣꠅꠀ ꠉꠦꠟ।
NUM 3:23 ꠙꠌ꠆ꠌꠤꠝ ꠉꠣꠟꠣꠛꠣꠄ ꠀꠟ꠆ꠟꠣꠞ ꠊꠞꠞ ꠈꠞꠦꠖꠤ ꠎꠣꠞꠍꠥꠘꠤ ꠅꠇꠟꠞ ꠔꠣꠝ꠆ꠛꠥ ꠐꠣꠋꠉꠣꠘꠤ ꠅꠁꠔ।
NUM 3:24 ꠎꠣꠞꠍꠥꠘ ꠉꠥꠡ꠆ꠐꠤꠞ ꠙꠞꠗꠣꠘ ꠀꠍꠟꠣ ꠟꠣꠄꠄꠟꠞ ꠙꠥꠀ ꠁꠟꠤꠀꠍꠚ।
NUM 3:25 ꠝꠤꠟꠘ-ꠔꠣꠝ꠆ꠛꠥꠞ ꠛꠦꠙꠣꠞꠦ ꠎꠣꠞꠍꠥꠘꠤ ꠅꠇꠟꠞ ꠃꠙꠞꠦ, ꠎꠦꠔꠣ ꠇꠣꠙꠠꠣꠁꠘ ꠖꠤꠀ ꠀꠟ꠆ꠟꠣꠞ ꠊꠞ ꠛꠣꠘꠣꠘꠤ ꠅꠁꠍꠦ ꠈꠣꠟꠤ ꠅꠔꠣ ꠇꠣꠙꠠ ꠅꠇꠟ, ꠛꠣꠞꠣ ꠛꠣꠎꠥꠞ ꠉꠤꠟꠣꠚ ꠀꠞ ꠍꠣꠘꠤ ꠅꠇꠟ ꠀꠞ ꠅꠃ ꠊꠞꠞ ꠜꠤꠔꠞꠦ ꠢꠣꠝꠣꠁꠛꠣꠞ ꠙꠞ꠆ꠖꠣ ꠖꠦꠈꠣ-ꠢꠥꠘꠣ ꠇꠞꠣꠞ ꠖꠣꠄꠁꠔ꠆ꠔ ꠀꠍꠤꠟ।
NUM 3:26 ꠀꠞ ꠀꠟ꠆ꠟꠣꠞ ꠊꠞ ꠀꠞ ꠇꠥꠞꠛꠣꠘꠤ ꠈꠣꠘꠣꠞ ꠌꠣꠁꠞꠅꠛꠣꠄ ꠎꠦ ꠃꠑꠣꠘ ꠀꠍꠦ ꠅꠉꠥꠞ ꠙꠞ꠆ꠖꠣꠁꠘ, ꠀꠞ ꠃꠑꠣꠘꠅ ꠢꠣꠝꠣꠘꠤꠞ ꠟꠣꠉꠤ ꠎꠦ ꠉꠦꠁꠐ ꠀꠍꠦ ꠅꠃ ꠉꠦꠁꠐꠞ ꠙꠞ꠆ꠖꠣ, ꠀꠞ ꠡꠛ ꠞꠡꠤ ꠅꠇꠟꠞꠃ ꠖꠦꠈꠣ-ꠢꠥꠘꠣ ꠇꠞꠣ, ꠀꠞ ꠅꠔꠣ ꠢꠇꠟ ꠇꠣꠝ-ꠇꠣꠎ ꠇꠞꠣ, ꠅꠃ ꠢꠇ꠆ꠇꠟꠔꠣꠃ ꠔꠣꠘꠔꠣꠘꠞ ꠖꠣꠄꠁꠔ꠆ꠔ ꠀꠍꠤꠟ।
NUM 3:27 ꠇꠣꠢꠣꠔ ꠀꠍꠟꠣ ꠁꠝꠞꠣꠘ, ꠁꠎꠢꠣꠞ, ꠢꠦꠛꠞꠘ ꠀꠞ ꠃꠎ꠆ꠎꠟ, ꠅꠃ ꠌꠣꠁꠞ ꠉꠥꠡ꠆ꠐꠤꠞ ꠝꠥꠟ ꠝꠥꠞꠛ꠆ꠛꠤ।
NUM 3:28 ꠅꠃ ꠉꠥꠡ꠆ꠐꠤꠘ꠆ꠔꠞ ꠝꠣꠎꠦ ꠄꠇ ꠝꠣꠡ ꠛꠣ ꠔꠣꠞ ꠛꠦꠡꠤ ꠛꠄꠅꠡꠞ ꠢꠇꠟ ꠙꠥꠀꠂꠘ꠆ꠔꠞꠦ ꠉꠘꠤꠀ ꠀꠐ ꠀꠎꠣꠞ ꠍꠄ-ꠡ ꠎꠘ ꠙꠣꠅꠀ ꠉꠦꠟ। ꠄꠞꠣꠞ ꠖꠣꠄꠁꠔ꠆ꠔ ꠀꠍꠤꠟ ꠙꠛꠤꠔ꠆ꠞ ꠄꠛꠣꠖꠔ ꠈꠣꠘꠣꠞ ꠖꠦꠈꠣ-ꠢꠥꠘꠣ ꠇꠞꠣ।
NUM 3:29 ꠀꠟ꠆ꠟꠣꠞ ꠊꠞꠞ ꠖꠇ꠆ꠇꠤꠘ ꠉꠣꠟꠣꠛꠣꠄ ꠇꠣꠢꠣꠔꠤ ꠅꠇꠟꠞ ꠔꠣꠝ꠆ꠛꠥ ꠐꠣꠋꠉꠣꠘꠤ ꠅꠁꠔ।
NUM 3:30 ꠇꠣꠢꠣꠔꠤ ꠉꠥꠡ꠆ꠐꠤꠞ ꠙꠞꠗꠣꠘ ꠀꠍꠟꠣ ꠃꠎ꠆ꠎꠟꠞ ꠙꠥꠀ ꠁꠟꠤꠎꠣꠚꠘ।
NUM 3:31 ꠅꠃ ꠇꠣꠢꠣꠔꠤ ꠉꠥꠡ꠆ꠐꠤꠞ ꠖꠣꠄꠁꠔ꠆ꠔ ꠀꠍꠤꠟ ꠡꠣꠢꠣꠖꠔ ꠡꠘ꠆ꠖꠥꠇ, ꠐꠦꠛꠥꠟ, ꠌꠦꠞꠣꠉ ꠖꠣꠘꠤ, ꠇꠥꠞꠛꠣꠘꠤ ꠈꠣꠘꠣ, ꠀꠉꠞ-ꠈꠥꠡꠛꠄ ꠎꠣꠟꠣꠘꠤꠞ ꠐꠦꠛꠥꠟ, ꠙꠛꠤꠔ꠆ꠞ ꠄꠛꠣꠖꠔ ꠈꠣꠘꠣꠞ ꠄꠛꠣꠖꠔꠤꠞ ꠢꠇꠟ ꠎꠤꠘꠤꠡ ꠀꠞ ꠢꠦꠞꠦꠝ ꠡꠞꠤꠚꠞ ꠙꠞ꠆ꠖꠣꠞ ꠖꠦꠈꠣ-ꠢꠥꠘꠣ ꠇꠞꠣ, ꠟꠉꠦ ꠛꠣꠖ-ꠛꠣꠇꠤ ꠇꠣꠝ ꠇꠞꠣ।
NUM 3:32 ꠟꠦꠛꠤ ꠈꠣꠘ꠆ꠖꠣꠘꠞ ꠘꠣꠘꠣꠘ ꠉꠥꠡ꠆ꠐꠤꠞ ꠝꠥꠞꠛ꠆ꠛꠤ ꠅꠇꠟꠞ ꠙꠞꠗꠣꠘ ꠀꠍꠟꠣ ꠁꠝꠣꠝ ꠢꠣꠞꠥꠘꠞ ꠙꠥꠀ ꠀꠟꠤ-ꠀꠎꠞ। ꠄꠞꠟꠉꠦ ꠙꠛꠤꠔ꠆ꠞ ꠄꠛꠣꠖꠔ ꠈꠣꠘꠣꠞ ꠖꠦꠈꠣ-ꠢꠥꠘꠣꠞ ꠖꠣꠄꠁꠔ꠆ꠔ ꠎꠦꠞꠣꠞꠦ ꠖꠦꠅꠀ ꠅꠁꠍꠤꠟ, ꠄꠞꠣꠞꠦ ꠘꠎꠞꠖꠣꠞꠤ ꠇꠞꠣꠞ ꠟꠣꠉꠤ ꠔꠣꠘꠞꠦ ꠛꠅꠀꠁꠟ ꠇꠞꠣ ꠅꠁꠍꠤꠟ।
NUM 3:33 ꠝꠣꠞꠣꠞꠤ ꠀꠍꠟꠣ ꠝꠢꠟꠤ ꠀꠞ ꠝꠥꠡꠤꠞ ꠅꠃ ꠖꠥꠁ ꠉꠥꠡ꠆ꠐꠤꠞ ꠝꠥꠟ ꠝꠥꠞꠛ꠆ꠛꠤ।
NUM 3:34 ꠅꠃ ꠉꠥꠡ꠆ꠐꠤꠘ꠆ꠔꠞ ꠝꠣꠎꠦ ꠄꠇ ꠝꠣꠡ ꠛꠣ ꠔꠣꠞ ꠛꠦꠡꠤ ꠛꠄꠅꠡꠞ ꠢꠇꠟ ꠙꠥꠀꠂꠘ꠆ꠔꠞꠦ ꠉꠘꠤꠀ ꠍꠄ ꠀꠎꠣꠞ ꠖꠥꠁ-ꠡ ꠙꠣꠅꠀ ꠉꠦꠟ।
NUM 3:35 ꠝꠣꠞꠣꠞꠤꠀ ꠉꠥꠡ꠆ꠐꠤꠞ ꠙꠞꠗꠣꠘ ꠀꠍꠟꠣ ꠀꠛꠤꠄꠟꠞ ꠙꠥꠀ ꠍꠥꠞꠤꠄꠟ। ꠀꠟ꠆ꠟꠣꠞ ꠊꠞꠞ ꠃꠔꠞꠦꠖꠤ ꠔꠣꠞꠣꠞ ꠔꠣꠝ꠆ꠛꠥ ꠐꠣꠋꠉꠣꠘꠤ ꠅꠁꠔ।
NUM 3:36 ꠄꠞꠣꠞ ꠖꠣꠄꠁꠔ꠆ꠔ ꠀꠍꠤꠟ ꠀꠟ꠆ꠟꠣꠞ ꠊꠞꠞ ꠚ꠆ꠞꠦꠁꠝ, ꠚ꠆ꠞꠦꠁꠝꠞ ꠛꠣꠔ꠆ꠔꠤ, ꠈꠥꠐꠤ, ꠌꠥꠘ꠆ꠉꠤ ꠀꠞ ꠄꠞ ꠢꠇꠟ ꠌꠤꠎ,
NUM 3:37 ꠃꠑꠣꠘꠞ ꠛꠦꠠꠣꠞ ꠌꠣꠁꠞꠅ ꠉꠣꠟꠣꠞ ꠈꠥꠐꠤ, ꠌꠥꠘ꠆ꠉꠤ, ꠛꠦꠠꠣ ꠐꠣꠘꠣꠘꠤꠞ ꠞꠡꠤ ꠀꠞ ꠙꠦꠞꠦꠉꠞ ꠖꠦꠈꠣ-ꠢꠥꠘꠣ ꠀꠞ ꠄꠞ ꠟꠉꠞ ꠢꠇꠟ ꠇꠣꠝ-ꠇꠣꠎ ꠇꠞꠣ।
NUM 3:38 ꠝꠤꠟꠘ-ꠔꠣꠝ꠆ꠛꠥꠞ ꠍꠣꠝꠘꠦꠖꠤ ꠝꠣꠘꠤ ꠀꠟ꠆ꠟꠣꠞ ꠊꠞꠞ ꠙꠥꠛꠦꠖꠤ ꠢꠎꠞꠔ ꠝꠥꠍꠣ, ꠢꠣꠞꠥꠘ ꠀꠞ ꠔꠣꠘ ꠙꠥꠀꠂꠘ꠆ꠔꠞ ꠔꠣꠝ꠆ꠛꠥ ꠅꠇꠟ ꠐꠣꠋꠉꠣꠘꠤ ꠅꠁꠔ। ꠄꠞꠣꠞ ꠖꠣꠄꠁꠔ꠆ꠔ ꠀꠍꠤꠟ ꠛꠘꠤ ꠁꠍꠞꠣꠁꠟꠞ ꠔꠞꠚ ꠕꠣꠇꠤ ꠙꠛꠤꠔ꠆ꠞ ꠄꠛꠣꠖꠔ ꠈꠣꠘꠣꠔ ꠢꠇꠟ ꠄꠛꠣꠖꠔꠤ ꠇꠣꠝ ꠀꠖꠣꠄ ꠇꠞꠣ। ꠄꠞꠣ ꠍꠣꠠꠣ ꠀꠞ ꠇꠦꠃ ꠄꠛꠣꠖꠔ ꠈꠣꠘꠣꠞ ꠇꠣꠘ꠆ꠖꠣꠔ ꠉꠦꠟꠦ ꠔꠣꠞꠦ ꠝꠣꠞꠤꠟꠣꠅꠀ ꠅꠁꠔ।
NUM 3:39 ꠝꠣꠛꠥꠖꠞ ꠢꠥꠇꠥꠝ ꠝꠣꠚꠤꠇ ꠝꠥꠍꠣ ꠀꠞ ꠢꠣꠞꠥꠘꠦ, ꠟꠦꠛꠤ ꠈꠣꠘ꠆ꠖꠣꠘꠞ ꠄꠇ ꠝꠣꠡ ꠛꠣ ꠔꠣꠞ ꠛꠦꠡꠤ ꠛꠄꠅꠡꠞ ꠢꠇꠟ ꠙꠥꠀꠂꠘ꠆ꠔꠞꠦ ꠉꠥꠡ꠆ꠐꠤ ꠝꠣꠚꠤꠇ ꠉꠘꠤꠟꠣ, ꠉꠘꠤꠀ ꠛꠣꠁꠡ ꠀꠎꠣꠞ ꠎꠘ ꠙꠣꠅꠀ ꠉꠦꠟ।
NUM 3:40 ꠄꠞꠛꠣꠖꠦ ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ, “ꠛꠘꠤ ꠁꠍꠞꠣꠁꠟꠞ ꠢꠇꠟ ꠙꠞꠤꠛꠣꠞꠞ ꠙꠄꠟꠣ ꠙꠥꠀꠂꠘꠞꠦ ꠉꠘꠅ, ꠎꠦꠞꠣꠞ ꠛꠄꠅꠡ ꠄꠇ ꠝꠣꠡ ꠛꠣ ꠄꠞ ꠛꠦꠡꠤ, ꠄꠞꠣꠞꠦ ꠉꠘꠤꠀ ꠄꠞꠣꠞ ꠘꠣꠝ ꠄꠇ ꠈꠣꠔꠣꠔ ꠟꠦꠈꠅ।
NUM 3:41 ꠛꠘꠤ ꠁꠍꠞꠣꠁꠟꠞ ꠢꠇꠟ ꠙꠄꠟꠣ ꠙꠥꠀꠂꠘ꠆ꠔꠞ ꠎꠣꠘꠞ ꠛꠖꠟꠣ ꠟꠦꠛꠤ ꠅꠇꠟꠞꠦ ꠀꠝꠣꠞ ꠇꠁꠀ ꠉꠘꠣ ꠅꠁꠛ। ꠀꠞ ꠔꠣꠞꠣꠞ ꠙꠡꠥꠞ ꠙꠄꠟꠣ ꠛꠣꠁꠌ꠆ꠌꠣꠞ ꠛꠖꠟꠣ ꠟꠦꠛꠤ ꠅꠇꠟꠞ ꠙꠡꠥꠞ ꠙꠄꠟꠣ ꠛꠣꠁꠌ꠆ꠌꠣꠞꠦ ꠀꠝꠣꠞ ꠇꠁꠀ ꠉꠘꠣ ꠅꠁꠛ। ꠀꠝꠤꠃ ꠝꠣꠛꠥꠖ।”
NUM 3:42 ꠝꠣꠛꠥꠖꠞ ꠢꠥꠇꠥꠝ ꠝꠣꠚꠤꠇ ꠝꠥꠍꠣꠄ ꠛꠘꠤ ꠁꠍꠞꠣꠁꠟꠞ ꠢꠇꠟ ꠙꠞꠤꠛꠣꠞꠞ ꠙꠄꠟꠣ ꠙꠥꠀꠂꠘꠞꠦ ꠉꠘꠤꠟꠣ।
NUM 3:43 ꠔꠦꠃ ꠄꠇ ꠝꠣꠡ ꠛꠣ ꠔꠣꠞ ꠛꠦꠡꠤ ꠛꠄꠅꠡꠤ ꠙꠥꠀꠂꠘ꠆ꠔꠞꠦ ꠉꠘꠤꠀ ꠝꠥꠐ ꠛꠣꠁꠡ ꠀꠎꠣꠞ ꠖꠥꠁ-ꠡ ꠔꠦꠀꠔ꠆ꠔꠁꠞ ꠎꠘ ꠙꠣꠅꠀ ꠉꠦꠟ।
NUM 3:44 ꠝꠣꠛꠥꠖꠦ ꠝꠥꠍꠣꠞꠦ ꠀꠞꠅ ꠇꠁꠟꠣ,
NUM 3:45 “ꠛꠘꠤ ꠁꠍꠞꠣꠁꠟꠞ ꠢꠇꠟ ꠙꠄꠟꠣ ꠙꠥꠀꠂꠘ꠆ꠔꠞ ꠛꠖꠟꠣ ꠟꠦꠛꠤ ꠅꠇꠟꠞꠦ, ꠀꠞ ꠔꠣꠞꠣꠞ ꠙꠄꠟꠣ ꠙꠡꠥꠞ ꠛꠣꠁꠌ꠆ꠌꠣꠞ ꠛꠖꠟꠣ ꠟꠦꠛꠤ ꠅꠇꠟꠞ ꠙꠄꠟꠣ ꠙꠡꠥꠞ ꠛꠣꠁꠌ꠆ꠌꠣꠞꠦ ꠀꠝꠣꠞ ꠇꠁꠀ ꠗꠞꠣ ꠅꠁꠛ। ꠟꠦꠛꠤ ꠅꠇꠟ ꠔ ꠀꠝꠣꠞ ꠅꠁꠛꠣ। ꠀꠝꠤꠃ ꠝꠣꠛꠥꠖ।
NUM 3:46 ꠟꠦꠛꠤ ꠈꠣꠘ꠆ꠖꠣꠘꠞ ꠝꠥꠐ ꠙꠞꠤꠝꠣꠘ ꠕꠣꠇꠤ ꠛꠘꠤ ꠁꠍꠞꠣꠁꠟꠞ ꠙꠄꠟꠣ ꠙꠥꠀꠂꠘ꠆ꠔꠞ ꠙꠞꠤꠝꠣꠘ ꠖꠥꠁ-ꠡ ꠔꠦꠀꠔ꠆ꠔꠁꠞ ꠎꠘ ꠛꠦꠡꠤ।
NUM 3:47 ꠅꠃ ꠖꠥꠁ-ꠡ ꠔꠦꠀꠔ꠆ꠔꠁꠞ ꠎꠘꠞꠦ ꠈꠣꠟꠣꠍ ꠇꠞꠣꠞ ꠟꠣꠉꠤ ꠎꠣꠘꠞ ꠛꠖꠟꠣ ꠢꠤꠡꠣꠛꠦ, ꠙꠞꠔꠦꠇ ꠎꠘꠞ ꠟꠣꠉꠤ ꠄꠛꠣꠖꠔ ꠈꠣꠘꠣꠞ ꠝꠣꠙꠦ ꠙꠣꠌ ꠔꠟꠣ ꠞꠥꠙꠣ ꠀꠖꠣꠄ ꠇꠞꠤꠅ।
NUM 3:48 ꠀꠖꠣꠄ ꠇꠞꠣ ꠅꠃ ꠞꠥꠙꠣ ꠘꠤꠀ ꠔꠥꠝꠤ ꠁꠝꠣꠝ ꠢꠣꠞꠥꠘ ꠀꠞ ꠔꠣꠞ ꠙꠥꠀꠂꠘ꠆ꠔꠞꠦ ꠖꠤꠟꠣꠁꠅ।”
NUM 3:49 ꠔꠦꠃ ꠟꠦꠛꠤ ꠈꠣꠘ꠆ꠖꠣꠘꠞ ꠛꠖꠟꠣ ꠛꠘꠤ ꠁꠍꠞꠣꠁꠟꠞꠦ ꠈꠣꠟꠣꠍ ꠇꠞꠤꠀ ꠘꠤꠛꠣꠞ ꠛꠣꠖꠦ, ꠔꠣꠞꠣꠞ ꠎꠔ ꠎꠘ ꠛꠣꠇꠤ ꠞꠁꠟꠣ, ꠄꠞꠣꠞ ꠎꠣꠘꠞ ꠛꠖꠟꠣ ꠢꠤꠡꠣꠛꠦ ꠝꠥꠍꠣ ꠘꠛꠤꠄ ꠞꠥꠙꠣ ꠀꠖꠣꠄ ꠇꠞꠟꠣ।
NUM 3:50 ꠔꠣꠁꠘ ꠛꠘꠤ ꠁꠍꠞꠣꠁꠟꠞ ꠙꠄꠟꠣ ꠙꠥꠀꠂꠘ꠆ꠔꠞ ꠉꠦꠍ ꠕꠣꠇꠤ ꠄꠛꠣꠖꠔ ꠈꠣꠘꠣꠞ ꠝꠣꠙꠦ ꠄꠇ ꠀꠎꠣꠞ ꠔꠤꠘ-ꠡ ꠙꠄꠡꠐ꠆ꠐꠤ ꠔꠟꠣ ꠞꠥꠙꠣ ꠀꠖꠣꠄ ꠇꠞꠟꠣ।
NUM 3:51 ꠝꠣꠛꠥꠖꠞ ꠢꠥꠇꠥꠝ ꠝꠣꠚꠤꠇ ꠝꠥꠍꠣꠄ ꠅꠃ ꠞꠥꠙꠣ ꠢꠣꠞꠥꠘ ꠀꠞ ꠔꠣꠘ ꠙꠥꠀꠂꠘ꠆ꠔꠞꠦ ꠖꠤꠟꠣꠁꠟꠣ।
NUM 4:1 ꠝꠣꠛꠥꠖꠦ ꠝꠥꠍꠣ ꠀꠞ ꠢꠣꠞꠥꠘ ꠘꠛꠤꠞꠦ ꠇꠁꠟꠣ,
NUM 4:2 “ꠔꠥꠝꠞꠣ ꠟꠦꠛꠤ ꠈꠣꠘ꠆ꠖꠣꠘꠞ ꠝꠣꠎꠞ ꠇꠣꠢꠣꠔꠤ ꠅꠇꠟ ꠀꠟꠣꠖꠣ ꠇꠞꠤ ꠉꠘꠅ, ꠔꠣꠞꠣꠞ ꠢꠇꠟ ꠙꠞꠤꠛꠣꠞ ꠀꠞ ꠉꠥꠡ꠆ꠐꠤ ꠝꠣꠚꠤꠇ ꠉꠘꠅ।
NUM 4:3 ꠔꠤꠡ ꠕꠣꠇꠤ ꠙꠁꠘ꠆ꠌꠣꠡ ꠛꠍꠞ ꠛꠄꠅꠡꠞ ꠎꠦꠔꠣ ꠛꠦꠐꠣꠁꠘ꠆ꠔꠦ ꠝꠤꠟꠘ-ꠔꠣꠝ꠆ꠛꠥꠞ ꠇꠣꠝ-ꠇꠣꠎ ꠇꠞꠣꠔ ꠀꠁꠛꠣ, ꠈꠣꠟꠤ ꠔꠣꠞꠣꠞꠦ ꠉꠘꠤꠅ।
NUM 4:4 “ꠇꠣꠢꠣꠔꠤ ꠅꠇꠟꠞ ꠇꠣꠝ ꠅꠁꠛ, ꠝꠤꠟꠘ-ꠔꠣꠝ꠆ꠛꠥꠞ ꠈꠣꠍ ꠙꠛꠤꠔ꠆ꠞ ꠌꠤꠎ ꠅꠇꠟꠞ ꠖꠦꠈꠣ-ꠢꠥꠘꠣ ꠇꠞꠣ।
NUM 4:5 ꠛꠘꠤ ꠁꠍꠞꠣꠁꠟ ꠍꠚꠞꠅ ꠛꠣꠞꠘꠤꠞ ꠡꠝꠄ, ꠢꠣꠞꠥꠘ ꠀꠞ ꠔꠣꠞ ꠙꠥꠀꠂꠘ꠆ꠔꠦ ꠀꠝꠣꠞ ꠊꠞꠞ ꠜꠤꠔꠞꠦ ꠢꠣꠝꠣꠁꠀ, ꠢꠦꠞꠦꠝ ꠡꠞꠤꠚꠞ ꠙꠞ꠆ꠖꠣ ꠈꠥꠟꠤꠀ ꠢꠣꠞꠤ, ꠅꠈꠣꠘꠖꠤ ꠡꠣꠢꠣꠖꠔ ꠡꠘ꠆ꠖꠥꠇꠞꠦ ꠉꠥꠞꠤꠀ ꠖꠤꠛꠣ।
NUM 4:6 ꠄꠞ ꠃꠙꠞꠦ ꠖꠞꠤꠀꠞ ꠚꠥʼ ꠝꠣꠍꠞ ꠌꠣꠝꠠꠣꠞ ꠉꠤꠟꠣꠚꠖꠤ ꠉꠥꠞꠤꠛꠣ, ꠛꠣꠖꠦ ꠙꠥꠞꠣꠙꠥꠞ ꠟꠤꠟꠥꠀ ꠞꠋꠉꠞ ꠄꠇꠈꠣꠘ ꠇꠣꠙꠠꠖꠤ ꠉꠥꠞꠤꠀ ꠖꠤꠀ, ꠡꠘ꠆ꠖꠥꠇ ꠛꠁꠀ ꠘꠤꠛꠣꠞ ꠛꠦꠘ꠆ꠖꠣ ꠉꠥꠁꠘ ꠎꠣꠉꠣ ꠝꠔ ꠢꠣꠞꠣꠁꠛꠣ।
NUM 4:7 ꠙꠛꠤꠔ꠆ꠞ ꠞꠥꠐꠤ ꠞꠣꠈꠣꠞ ꠐꠦꠛꠥꠟꠞ ꠃꠙꠞꠦ ꠔꠣꠞꠣ ꠟꠤꠟꠥꠀ ꠞꠋꠉꠞ ꠄꠇꠈꠣꠘ ꠇꠣꠙꠠ ꠛꠤꠍꠣꠁꠀ, ꠅꠈꠣꠘꠞ ꠃꠙꠞꠦ ꠢꠥꠞꠥ-ꠛꠠ ꠢꠇꠟ ꠕꠣꠟ-ꠛꠣꠡꠘ, ꠀꠞ ꠡꠞꠛꠔ-ꠙꠣꠘꠤꠞ ꠍꠖꠉꠣ ꠓꠣꠟꠤꠛꠣꠞ ꠎꠉ-ꠝꠉ ꠕꠁꠛꠣ। ꠙꠛꠤꠔ꠆ꠞ ꠎꠦꠔꠣ ꠞꠥꠐꠤ ꠢꠣꠝꠦꠡꠣ ꠐꠦꠛꠥꠟꠞ ꠃꠙꠞꠦ ꠕꠅꠀ ꠕꠣꠇꠦ, ꠁꠔꠣ ꠐꠦꠛꠥꠟꠞ ꠃꠙꠞꠦꠃ ꠞꠁꠛ।
NUM 4:8 ꠅꠔꠣꠞ ꠃꠙꠞꠦ ꠟꠣꠟ ꠄꠇꠈꠣꠘ ꠇꠣꠙꠠ ꠛꠤꠍꠣꠁꠀ, ꠚꠥʼꠞ ꠌꠣꠝꠠꠣꠖꠤ ꠅꠈꠣꠘꠞꠦ ꠉꠥꠞꠤꠛꠣ, ꠀꠞ ꠐꠦꠛꠥꠟ ꠛꠁꠀ ꠘꠤꠛꠣꠞ ꠛꠦꠘ꠆ꠖꠣ ꠉꠥꠁꠘ ꠎꠣꠉꠣ ꠝꠔ ꠢꠣꠞꠣꠁ ꠖꠤꠛꠣ।
NUM 4:9 ꠛꠣꠖꠦ ꠟꠤꠟꠥꠀ ꠄꠇꠈꠣꠘ ꠇꠣꠙꠠꠖꠤ ꠀꠡ꠆ꠔꠣ ꠌꠦꠞꠣꠉ ꠖꠣꠘꠤ, ꠄꠞ ꠌꠦꠞꠣꠉ ꠅꠇꠟ, ꠌꠦꠞꠣꠉꠞ ꠚꠤꠔꠣ ꠍꠣꠚ ꠇꠞꠣꠞ ꠌꠤꠝꠐꠣ, ꠎꠣꠟꠣꠁꠟ ꠚꠤꠔꠣꠞ ꠍꠣꠟꠤ ꠕꠅꠀꠞ ꠛꠣꠐꠤ ꠀꠞ ꠔꠦꠟꠞ ꠚꠤꠚꠣꠞꠦ ꠉꠥꠞꠤꠀ ꠖꠤꠛꠣ।
NUM 4:10 ꠢꠇꠟ ꠝꠣꠟ-ꠍꠣꠝꠣꠘꠣ ꠡꠝꠦꠔ ꠌꠦꠞꠣꠉ ꠖꠣꠘꠤꠞꠦ ꠚꠥʼꠞ ꠌꠣꠝꠠꠣꠖꠤ ꠛꠦꠞꠣꠁꠀ, ꠛꠁꠀ ꠘꠤꠛꠣꠞ ꠈꠣꠐꠤꠀꠞ ꠃꠙꠞꠦ ꠕꠁꠛꠣ।
NUM 4:11 ꠀꠞ ꠀꠉꠞ-ꠈꠥꠡꠛꠄ ꠎꠣꠟꠣꠘꠤꠞ ꠡꠥꠘꠣꠞ ꠐꠦꠛꠥꠟꠞ ꠃꠙꠞꠦ ꠟꠤꠟꠥꠀ ꠄꠇꠈꠣꠘ ꠇꠣꠙꠠ ꠛꠤꠍꠣꠁꠀ, ꠚꠥʼꠞ ꠌꠣꠝꠠꠣꠖꠤ ꠉꠥꠞꠤꠀ ꠖꠤꠛꠣ, ꠛꠣꠖꠦ ꠅꠃ ꠐꠦꠛꠥꠟ ꠛꠁꠀ ꠘꠦꠅꠀꠞ ꠛꠦꠘ꠆ꠖꠣ ꠉꠥꠁꠘ ꠎꠣꠉꠣ ꠝꠔ ꠢꠣꠞꠣꠁꠛꠣ।
NUM 4:12 ꠄꠛꠣꠖꠔ ꠈꠣꠘꠣꠞ ꠈꠦꠎꠝꠔꠞ ꠢꠇꠟ ꠝꠣꠟ-ꠍꠣꠝꠣꠘꠣ ꠔꠣꠞꠣ ꠟꠤꠟꠥꠀ ꠇꠣꠙꠠꠖꠤ ꠙꠦꠌꠣꠁꠀ, ꠚꠥʼꠞ ꠌꠣꠝꠠꠣꠖꠤ ꠉꠥꠞꠤꠀ ꠢꠣꠞꠤ, ꠅꠔꠣ ꠛꠁꠀ ꠘꠤꠛꠣꠞ ꠈꠣꠐꠤꠀꠞ ꠃꠙꠞꠦ ꠕꠁꠛꠣ।
NUM 4:13 “ꠇꠥꠞꠛꠣꠘꠤ ꠈꠣꠘꠣꠞ ꠜꠤꠔꠞꠞ ꠢꠇꠟ ꠍꠣꠟꠤ ꠚꠣꠟꠣꠁꠀ, ꠛꠣꠁꠋꠉꠘꠤ ꠞꠋꠉꠞ ꠄꠇꠈꠣꠘ ꠉꠤꠟꠣꠚꠖꠤ ꠉꠥꠞꠤꠀ ꠖꠤꠛꠣ।
NUM 4:14 ꠛꠣꠖꠦ ꠇꠥꠞꠛꠣꠘꠤ ꠈꠣꠘꠣꠞ ꠢꠇꠟ ꠝꠣꠟ-ꠍꠣꠝꠣꠘꠣ ꠅꠇꠟ, ꠅꠞ꠆ꠕꠣꠔ ꠀꠋꠞꠣ ꠕꠅꠀꠞ ꠙꠣꠔꠤꠟ, ꠉꠥꠡ꠆ꠔ ꠔꠥꠟꠣꠞ ꠛꠠ ꠇꠣꠐꠣ-ꠍꠤꠚ, ꠍꠣꠟꠤ ꠔꠥꠟꠣꠞ ꠛꠠ ꠌꠣꠝꠌ, ꠟꠃ ꠕꠅꠀꠞ ꠛꠣꠐꠤ, ꠁꠔꠣ ꠢꠇꠟꠔꠣ ꠇꠥꠞꠛꠣꠘꠤ ꠈꠣꠘꠣꠞ ꠃꠙꠞꠦ ꠕꠁꠛꠣ। ꠕꠁꠀ ꠚꠥʼꠞ ꠌꠣꠝꠠꠣꠖꠤ ꠉꠥꠞꠤꠀ ꠖꠤꠀ, ꠄꠞ ꠛꠦꠘ꠆ꠖꠣ ꠉꠥꠁꠘ ꠑꠤꠇ ꠎꠣꠉꠣꠔ ꠢꠣꠞꠣꠁꠛꠣ।
NUM 4:15 ꠢꠣꠞꠥꠘ ꠀꠞ ꠔꠣꠞ ꠙꠥꠀꠂꠘ꠆ꠔꠦ ꠎꠦꠛꠟꠣ ꠅꠃ ꠙꠣꠇ-ꠙꠛꠤꠔ꠆ꠞ ꠎꠤꠘꠤꠡ ꠅꠇꠟ ꠀꠞ ꠄꠛꠣꠖꠔ ꠈꠣꠘꠣꠞ ꠝꠣꠟ-ꠍꠣꠝꠣꠘꠣ ꠢꠇꠟꠔꠣ ꠉꠥꠞꠤꠟꠤꠛꠣ, ꠔꠣꠞꠣ ꠔꠣꠝ꠆ꠛꠥ ꠔꠥꠟꠤꠀ ꠍꠚꠞꠅ ꠛꠣꠞꠘꠤꠞ ꠟꠣꠉꠤ ꠎꠦꠛꠟꠣ ꠔꠤꠀꠞ ꠅꠁꠎꠤꠛꠣ, ꠅꠃ ꠡꠝꠄ ꠅꠔꠣ ꠛꠁꠀ ꠘꠤꠛꠣꠞ ꠟꠣꠉꠤ ꠇꠣꠢꠣꠔꠤ ꠅꠇꠟ ꠀꠁꠛꠣ। ꠅꠁꠟꠦ ꠔꠣꠞꠣ ꠇꠥꠘꠥ ꠙꠣꠇ-ꠙꠛꠤꠔ꠆ꠞ ꠌꠤꠎꠞꠦ ꠀꠔꠖꠤ ꠍꠁꠔꠣ ꠙꠣꠞꠔꠣ ꠘꠣꠄ, ꠍꠁꠟꠦꠃ ꠝꠞꠛꠣ। ꠝꠤꠟꠘ-ꠔꠣꠝ꠆ꠛꠥꠞ ꠅꠃ ꠢꠇ꠆ꠇꠟ ꠎꠤꠘꠤꠡ ꠔꠣꠞꠣ ꠛꠁꠀ ꠘꠤꠛꠣ।
NUM 4:16 “ꠀꠞ ꠁꠝꠣꠝ ꠢꠣꠞꠥꠘꠞ ꠙꠥꠀ ꠀꠟꠤ-ꠀꠎꠞꠞ ꠃꠙꠞꠦ ꠌꠦꠞꠣꠉ ꠖꠣꠘꠤꠞ ꠔꠦꠟ, ꠎꠣꠟꠣꠘꠤꠞ ꠟꠣꠉꠤ ꠀꠉꠞ-ꠈꠥꠡꠛꠄ, ꠙꠞ꠆ꠔꠤꠖꠤꠘꠞ ꠗꠣꠘ-ꠉꠝꠞ ꠍꠖꠉꠣ ꠀꠞ ꠈꠦꠟꠣꠚꠔꠤ ꠡꠝꠎꠤꠛꠣꠞ ꠔꠦꠟꠞ ꠖꠣꠄꠁꠔ꠆ꠔ ꠞꠁꠛ। ꠀꠟ꠆ꠟꠣꠞ ꠊꠞ, ꠊꠞꠞ ꠢꠇꠟ ꠝꠣꠟ-ꠍꠣꠝꠣꠘꠣ, ꠝꠣꠘꠤ ꠄꠛꠣꠖꠔ ꠈꠣꠘꠣ ꠀꠞ ꠔꠣꠞ ꠢꠇꠟ ꠝꠣꠟ-ꠍꠣꠝꠣꠘꠣꠞ ꠔꠖꠣꠞꠇꠤ ꠞꠁꠛ ꠀꠟꠤ-ꠀꠎꠞꠞ ꠃꠙꠞꠦ।”
NUM 4:17 ꠄꠞꠛꠣꠖꠦ ꠝꠣꠛꠥꠖꠦ ꠢꠎꠞꠔ ꠝꠥꠍꠣ ꠀꠞ ꠢꠣꠞꠥꠘꠞꠦ ꠇꠁꠟꠣ,
NUM 4:18 “ꠔꠥꠝꠞꠣ ꠈꠤꠀꠟ ꠞꠣꠈꠤꠅ, ꠟꠦꠛꠤ ꠈꠣꠘ꠆ꠖꠣꠘꠞ ꠝꠣꠎꠦ ꠇꠣꠢꠣꠔꠤ ꠛꠋꠡ ꠕꠣꠇꠤ ꠇꠦꠃ ꠇꠦꠃ ꠎꠣꠔꠦ ꠢꠞ-ꠢꠣꠝꠦꠡꠣ ꠕꠣꠇꠂꠘ।
NUM 4:19 ꠔꠣꠞꠣ ꠎꠣꠘꠥ ꠈꠣꠍ ꠙꠛꠤꠔ꠆ꠞ ꠌꠤꠎ ꠅꠇꠟꠞ ꠇꠣꠍꠣꠔ ꠉꠤꠀ ꠘꠣ ꠝꠞꠦ ꠛꠞꠋ ꠛꠣꠌꠤꠀ ꠞꠄ, ꠅꠔꠣꠞ ꠟꠣꠉꠤ ꠢꠣꠞꠥꠘ ꠀꠞ ꠔꠣꠞ ꠙꠥꠀꠂꠘ꠆ꠔꠦ ꠀꠝꠣꠞ ꠊꠞꠞ ꠜꠤꠔꠞꠦ ꠉꠤꠀ ꠎꠣꠞꠎꠤꠞ ꠇꠣꠝ-ꠇꠣꠎ ꠛꠥꠎꠣꠁ ꠖꠤꠛꠣ। ꠀꠞ ꠇꠦ ꠇꠤꠔꠣ ꠛꠁꠀ ꠘꠤꠔꠣ, ꠅꠔꠣꠅ ꠑꠤꠇ ꠇꠞꠤ ꠖꠤꠛꠣ।
NUM 4:20 ꠅꠁꠟꠦ ꠢꠦꠞꠦꠝ ꠡꠞꠤꠚꠞ ꠜꠤꠔꠞꠞ ꠅꠃ ꠙꠣꠇ-ꠙꠛꠤꠔ꠆ꠞ ꠎꠤꠘꠤꠡ ꠄꠇ ꠙꠟꠇꠞ ꠟꠣꠉꠤꠅ ꠖꠦꠈꠣꠞ ꠘꠤꠅꠔꠦ ꠇꠣꠢꠣꠔꠤ ꠅꠇꠟ ꠜꠤꠔꠞꠦ ꠇꠥꠘꠥ ꠟꠣꠈꠣꠘꠃ ꠢꠣꠝꠣꠁꠔꠣ ꠙꠣꠞꠔꠣ ꠘꠣꠄ, ꠅꠃ ꠘꠤꠅꠔꠦ ꠢꠣꠝꠣꠁꠟꠦꠃ ꠝꠞꠤ ꠎꠣꠁꠛꠣ।”
NUM 4:21 ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ,
NUM 4:22 “ꠔꠥꠝꠤ ꠉꠥꠡ꠆ꠐꠤ ꠀꠞ ꠙꠞꠤꠛꠣꠞ ꠝꠣꠚꠤꠇ ꠎꠣꠞꠍꠥꠘꠤ ꠅꠇꠟꠞꠦ ꠉꠘꠅ।
NUM 4:23 ꠔꠤꠡ ꠕꠣꠇꠤ ꠙꠁꠘ꠆ꠌꠣꠡ ꠛꠍꠞ ꠛꠄꠅꠡꠞ ꠎꠦꠔꠣ ꠎꠣꠞꠍꠥꠘꠤ ꠛꠦꠐꠣꠁꠘ꠆ꠔꠦ ꠝꠤꠟꠘ-ꠔꠣꠝ꠆ꠛꠥꠞ ꠇꠣꠝ ꠇꠞꠔꠣ ꠙꠣꠞꠛꠣ, ꠈꠣꠟꠤ ꠔꠣꠞꠣꠞꠦ ꠉꠘꠤꠅ।
NUM 4:24 “ꠝꠤꠟꠘ-ꠔꠣꠝ꠆ꠛꠥꠞ ꠈꠦꠎꠝꠔ ꠇꠞꠣ ꠀꠞ ꠜꠣꠞ ꠛꠅꠀꠞ ꠡꠝꠄ ꠎꠣꠞꠍꠥꠘꠤ ꠅꠇꠟꠞ ꠇꠣꠝ ꠅꠁꠟ,
NUM 4:25 ꠀꠝꠣꠞ ꠊꠞꠞ ꠢꠇꠟ ꠙꠞ꠆ꠖꠣꠁꠘ, ꠝꠤꠟꠘ-ꠔꠣꠝ꠆ꠛꠥ ꠀꠞ ꠄꠞ ꠉꠤꠟꠣꠚ, ꠔꠣꠞ ꠃꠙꠞꠞ ꠚꠥʼꠞ ꠌꠣꠝꠠꠣꠞ ꠍꠣꠘꠤ, ꠀꠞ ꠝꠤꠟꠘ-ꠔꠣꠝ꠆ꠛꠥꠞ ꠖꠥꠀꠞꠞ ꠙꠞ꠆ꠖꠣ ꠛꠁꠀ ꠘꠦꠅꠀ।
NUM 4:26 ꠄꠞꠟꠉꠦ ꠀꠟ꠆ꠟꠣꠞ ꠊꠞ ꠀꠞ ꠇꠥꠞꠛꠣꠘꠤ ꠈꠣꠘꠣꠞ ꠃꠑꠣꠘꠞ ꠌꠣꠁꠞꠅ ꠉꠣꠟꠣꠞ ꠙꠞ꠆ꠖꠣ ꠀꠞ ꠄꠞ ꠖꠠꠤ ꠅꠇꠟ, ꠃꠑꠣꠘꠅ ꠢꠣꠝꠣꠘꠤꠞ ꠉꠦꠁꠐꠞ ꠙꠞ꠆ꠖꠣ, ꠅꠔꠣꠞ ꠟꠉꠞ ꠖꠞꠇꠣꠞꠤ ꠢꠇꠟ ꠝꠣꠟ ꠔꠣꠞꠣ ꠛꠁꠀ ꠘꠤꠛꠣ, ꠀꠞ ꠅꠃ ꠛꠦꠙꠣꠞꠦ ꠎꠔ ꠇꠣꠝ-ꠇꠣꠎ ꠀꠍꠦ, ꠁꠔꠣ ꠔꠣꠞꠣ ꠇꠞꠛꠣ।
NUM 4:27 ꠜꠣꠞ ꠛꠁꠛꠣꠞ ꠇꠣꠝ ꠅꠃꠇ ꠛꠣ ꠅꠁꠘ꠆ꠘ ꠇꠥꠘꠥ ꠇꠣꠝ ꠅꠃꠇ, ꠢꠇꠟꠔꠣ ꠢꠣꠞꠥꠘ ꠀꠞ ꠔꠣꠞ ꠙꠥꠀꠂꠘ꠆ꠔꠞ ꠢꠥꠇꠥꠝ ꠝꠣꠚꠤꠇ ꠎꠣꠞꠍꠥꠘꠤ ꠅꠇꠟꠦ ꠇꠞꠛꠣ। ꠔꠣꠞꠣ ꠇꠤꠔꠣ ꠇꠤꠔꠣ ꠛꠁꠀ ꠘꠤꠔ, ꠁꠔꠣ ꠔꠥꠝꠞꠣꠃ ꠔꠣꠞꠣꠞꠦ ꠇꠁꠀ ꠖꠤꠛꠣꠄ।
NUM 4:28 ꠅꠔꠣꠃ ꠅꠁꠟ ꠝꠤꠟꠘ-ꠔꠣꠝ꠆ꠛꠥꠞ ꠇꠣꠝꠅ ꠎꠣꠞꠍꠥꠘꠤ ꠅꠇꠟꠞ ꠖꠣꠄ-ꠖꠣꠄꠁꠔ꠆ꠔ। ꠔꠣꠞꠣꠞ ꠇꠣꠝ-ꠇꠣꠎꠞ ꠔꠖꠣꠞꠇꠤ ꠇꠞꠛꠣ ꠁꠝꠣꠝ ꠢꠣꠞꠥꠘꠞ ꠙꠥꠀ ꠁꠍꠣꠝꠣꠞꠦ।
NUM 4:29 “ꠔꠥꠝꠞꠣ ꠉꠥꠡ꠆ꠐꠤ ꠀꠞ ꠙꠞꠤꠛꠣꠞ ꠝꠣꠚꠤꠇ ꠝꠣꠞꠣꠞꠤꠀ ꠅꠇꠟꠞ ꠙꠞꠤꠝꠣꠘ ꠉꠘꠅ।
NUM 4:30 ꠔꠤꠡ ꠕꠣꠇꠤ ꠙꠁꠘ꠆ꠌꠣꠡ ꠛꠍꠞ ꠛꠄꠅꠡꠞ ꠎꠦꠔꠣ ꠝꠣꠞꠣꠞꠤꠀ ꠛꠦꠐꠣꠁꠘ꠆ꠔꠦ ꠝꠤꠟꠘ-ꠔꠣꠝ꠆ꠛꠥꠞ ꠇꠣꠝ ꠇꠞꠔꠣ ꠙꠣꠞꠛꠣ, ꠔꠥꠝꠞꠣ ꠈꠣꠟꠤ ꠔꠣꠞꠣꠞꠦ ꠉꠘꠤꠅ।
NUM 4:31 ꠝꠤꠟꠘ-ꠔꠣꠝ꠆ꠛꠥꠞ ꠝꠣꠎꠦ ꠝꠣꠞꠣꠞꠤꠀ ꠅꠇꠟꠞ ꠖꠣꠄꠁꠔ꠆ꠔ ꠅꠁꠟ, ꠀꠟ꠆ꠟꠣꠞ ꠊꠞꠞ ꠢꠇꠟ ꠚ꠆ꠞꠦꠁꠝ, ꠚ꠆ꠞꠦꠁꠝꠞ ꠛꠣꠔ꠆ꠔꠤ, ꠈꠥꠐꠤ ꠀꠞ ꠈꠥꠐꠤꠞ ꠔꠟꠞ ꠌꠥꠘ꠆ꠉꠤ ꠛꠁꠀ ꠘꠦꠅꠀ।
NUM 4:32 ꠄꠞꠟꠉꠦ ꠌꠣꠁꠞꠅ ꠉꠣꠟꠣꠞ ꠃꠑꠣꠘꠞ ꠢꠇꠟ ꠈꠥꠐꠤ ꠀꠞ ꠌꠥꠘ꠆ꠉꠤ, ꠃꠑꠣꠘꠞ ꠙꠞ꠆ꠖꠣ ꠐꠣꠘꠣꠘꠤꠞ ꠙꠦꠞꠦꠉ ꠀꠞ ꠖꠠꠤ ꠀꠞ ꠅꠔꠣꠞ ꠟꠉꠞ ꠝꠣꠟ-ꠍꠣꠝꠣꠘꠣ ꠎꠦꠔꠣ ꠖꠞꠇꠣꠞꠤ ꠁꠔꠣ ꠢꠇꠟꠔꠣ ꠔꠣꠞꠣ ꠛꠁꠀ ꠘꠤꠛꠣ। ꠔꠣꠞꠣ ꠇꠦ ꠇꠤꠔꠣ ꠛꠁꠀ ꠘꠤꠔ, ꠁꠔꠣ ꠔꠥꠝꠞꠣ ꠇꠁꠀ ꠖꠤꠅ।
NUM 4:33 ꠅꠔꠣꠃ ꠅꠁꠟ ꠝꠤꠟꠘ-ꠔꠣꠝ꠆ꠛꠥꠞ ꠝꠣꠎꠦ ꠝꠣꠞꠣꠞꠤꠀ ꠉꠥꠡ꠆ꠐꠤꠞ ꠖꠣꠄ-ꠖꠣꠄꠁꠔ꠆ꠔ। ꠔꠣꠞꠣꠞ ꠇꠣꠝ-ꠇꠣꠎꠞ ꠔꠖꠣꠞꠇꠤ ꠇꠞꠛꠣ ꠁꠝꠣꠝ ꠢꠣꠞꠥꠘꠞ ꠙꠥꠀ ꠁꠍꠣꠝꠣꠞꠦ।”
NUM 4:34 ꠔꠦꠃ ꠉꠥꠡ꠆ꠐꠤ ꠀꠞ ꠙꠞꠤꠛꠣꠞ ꠝꠣꠚꠤꠇ ꠢꠎꠞꠔ ꠝꠥꠍꠣ, ꠢꠣꠞꠥꠘ ꠀꠞ ꠛꠘꠤ ꠁꠍꠞꠣꠁꠟꠞ ꠡꠞ꠆ꠖꠣꠞ ꠅꠇꠟꠦ ꠇꠣꠢꠣꠔꠤ ꠅꠇꠟꠞꠦ ꠉꠘꠤꠟꠣ।
NUM 4:35 ꠔꠤꠡ ꠕꠣꠇꠤ ꠙꠁꠘ꠆ꠌꠣꠡ ꠛꠍꠞ ꠛꠄꠅꠡꠤ ꠎꠦꠔꠣ ꠛꠦꠐꠣꠁꠘ꠆ꠔꠦ ꠝꠤꠟꠘ-ꠔꠣꠝ꠆ꠛꠥꠞ ꠇꠣꠝ-ꠇꠣꠎ ꠇꠞꠣꠞ ꠇꠕꠣ, ꠈꠣꠟꠤ ꠔꠣꠞꠣꠞꠦ ꠉꠘꠤꠟꠣ।
NUM 4:36 ꠉꠘꠤꠀ ꠔꠣꠞꠣꠞ ꠉꠥꠡ꠆ꠐꠤ ꠝꠣꠚꠤꠇ ꠖꠥꠁ ꠀꠎꠣꠞ ꠡꠣꠔ-ꠡ ꠙꠁꠘ꠆ꠌꠣꠡ ꠎꠘ ꠙꠣꠅꠀ ꠉꠦꠟ।
NUM 4:37 ꠄꠞꠣꠃ ꠀꠍꠟꠣ ꠇꠣꠢꠣꠔꠤ ꠉꠥꠡ꠆ꠐꠤꠞ ꠝꠥꠐ ꠝꠣꠘꠥꠡ, ꠎꠦꠞꠣ ꠝꠤꠟꠘ-ꠔꠣꠝ꠆ꠛꠥꠞ ꠇꠣꠝ-ꠇꠣꠎ ꠇꠞꠔꠣ। ꠝꠥꠍꠣ ꠘꠛꠤꠞ ꠝꠣꠞꠚꠔꠦ ꠝꠣꠛꠥꠖꠞ ꠛꠣꠔꠣꠁꠟ ꠢꠥꠇꠥꠝ ꠝꠣꠚꠤꠇ ꠝꠥꠍꠣ ꠀꠞ ꠢꠣꠞꠥꠘꠦ ꠔꠣꠞꠣꠞꠦ ꠉꠘꠤꠟꠣ।
NUM 4:38 ꠉꠥꠡ꠆ꠐꠤ ꠀꠞ ꠙꠞꠤꠛꠣꠞ ꠝꠣꠚꠤꠇ ꠎꠣꠞꠍꠥꠘꠤ ꠅꠇꠟꠞꠦ ꠉꠘꠣ ꠅꠁꠍꠤꠟ।
NUM 4:39 ꠔꠤꠡ ꠕꠣꠇꠤ ꠙꠁꠘ꠆ꠌꠣꠡ ꠛꠍꠞ ꠛꠄꠅꠡꠞ ꠎꠦꠔꠣ ꠛꠦꠐꠣꠁꠘ꠆ꠔꠦ ꠝꠤꠟꠘ-ꠔꠣꠝ꠆ꠛꠥꠞ ꠇꠣꠝ-ꠇꠣꠎ ꠇꠞꠣꠞ ꠇꠕꠣ,
NUM 4:40 ꠉꠥꠡ꠆ꠐꠤ ꠀꠞ ꠙꠞꠤꠛꠣꠞ ꠝꠣꠚꠤꠇ ꠔꠣꠞꠣꠞꠦ ꠉꠘꠤꠀ ꠢꠣꠞꠤ ꠖꠥꠁ ꠀꠎꠣꠞ ꠍꠄ-ꠡ ꠔꠤꠡ ꠎꠘ ꠙꠣꠅꠀ ꠉꠦꠟ।
NUM 4:41 ꠄꠞꠣꠃ ꠀꠍꠟꠣ ꠎꠣꠞꠍꠥꠘꠤ ꠉꠥꠡ꠆ꠐꠤꠞ ꠝꠥꠐ ꠝꠣꠘꠥꠡ, ꠎꠦꠞꠣ ꠝꠤꠟꠘ-ꠔꠣꠝ꠆ꠛꠥꠞ ꠇꠣꠝ-ꠇꠣꠎ ꠇꠞꠔꠣ। ꠝꠣꠛꠥꠖꠞ ꠢꠥꠇꠥꠝ ꠝꠣꠚꠤꠇ ꠝꠥꠍꠣ ꠀꠞ ꠢꠣꠞꠥꠘꠦ ꠔꠣꠞꠣꠞꠦ ꠉꠘꠤꠟꠣ।
NUM 4:42 ꠉꠥꠡ꠆ꠐꠤ ꠀꠞ ꠙꠞꠤꠛꠣꠞ ꠝꠣꠚꠤꠇ ꠝꠣꠞꠣꠞꠤꠀ ꠅꠇꠟꠞꠦ ꠉꠘꠣ ꠅꠁꠍꠤꠟ।
NUM 4:43 ꠔꠤꠡ ꠕꠣꠇꠤ ꠙꠁꠘ꠆ꠌꠣꠡ ꠛꠍꠞ ꠛꠄꠅꠡꠞ ꠎꠦꠔꠣ ꠛꠦꠐꠣꠁꠘ꠆ꠔꠦ ꠝꠤꠟꠘ-ꠔꠣꠝ꠆ꠛꠥꠞ ꠇꠣꠝ-ꠇꠣꠎ ꠇꠞꠣꠞ ꠇꠕꠣ,
NUM 4:44 ꠉꠥꠡ꠆ꠐꠤ ꠝꠣꠚꠤꠇ ꠔꠣꠞꠣꠞꠦ ꠉꠘꠤꠀ ꠔꠤꠘ ꠀꠎꠣꠞ ꠖꠥꠁ-ꠡ ꠎꠘ ꠙꠣꠅꠀ ꠉꠦꠟ।
NUM 4:45 ꠄꠞꠣꠃ ꠀꠍꠟꠣ ꠝꠣꠞꠣꠞꠤꠀ ꠉꠥꠡ꠆ꠐꠤꠞ ꠝꠥꠐ ꠝꠣꠘꠥꠡ, ꠎꠦꠞꠣ ꠝꠤꠟꠘ-ꠔꠣꠝ꠆ꠛꠥꠞ ꠇꠣꠝ-ꠇꠣꠎ ꠇꠞꠔꠣ। ꠢꠎꠞꠔ ꠝꠥꠍꠣꠞ ꠝꠣꠞꠚꠔꠦ ꠙꠣꠅꠀ ꠝꠣꠛꠥꠖꠞ ꠢꠥꠇꠥꠝ ꠝꠣꠚꠤꠇ ꠝꠥꠍꠣ ꠀꠞ ꠢꠣꠞꠥꠘꠦ ꠔꠣꠞꠣꠞꠦ ꠉꠘꠤꠟꠣ।
NUM 4:46 ꠉꠥꠡ꠆ꠐꠤ ꠀꠞ ꠙꠞꠤꠛꠣꠞ ꠝꠣꠚꠤꠇ ꠢꠎꠞꠔ ꠝꠥꠍꠣ, ꠢꠣꠞꠥꠘ ꠀꠞ ꠛꠘꠤ ꠁꠍꠞꠣꠁꠟꠞ ꠝꠥꠞꠛ꠆ꠛꠤ ꠅꠇꠟꠦ ꠀꠡ꠆ꠔꠣ ꠟꠦꠛꠤ ꠈꠣꠘ꠆ꠖꠣꠘꠞꠦ ꠉꠘꠤꠟꠣ।
NUM 4:47 ꠔꠤꠡ ꠕꠣꠇꠤ ꠙꠁꠘ꠆ꠌꠣꠡ ꠛꠍꠞ ꠛꠄꠅꠡꠤ ꠎꠦꠔꠣ ꠛꠦꠐꠣꠁꠘ꠆ꠔꠦ ꠝꠤꠟꠘ-ꠔꠣꠝ꠆ꠛꠥꠞ ꠈꠦꠎꠝꠔ ꠀꠞ ꠝꠣꠟ-ꠍꠣꠝꠣꠘꠣ ꠛꠁꠀ ꠘꠤꠛꠣꠞ ꠇꠕꠣ,
NUM 4:48 ꠉꠥꠡ꠆ꠐꠤ ꠝꠣꠚꠤꠇ ꠔꠣꠞꠣꠞꠦ ꠉꠘꠤꠀ ꠀꠐ ꠀꠎꠣꠞ ꠙꠣꠌ-ꠡ ꠀꠡꠤ ꠎꠘ ꠙꠣꠅꠀ ꠉꠦꠟ।
NUM 4:49 ꠢꠎꠞꠔ ꠝꠥꠍꠣꠞ ꠝꠣꠞꠚꠔꠦ ꠝꠣꠛꠥꠖꠞ ꠛꠣꠔꠣꠁꠟ ꠢꠥꠇꠥꠝ ꠝꠣꠚꠤꠇ ꠄꠞꠣ ꠙꠞꠔꠦꠇ ꠎꠘꠞ ꠇꠣꠝ-ꠇꠣꠎ ꠀꠞ ꠇꠦ ꠇꠤꠔꠣ ꠛꠁꠀ ꠘꠤꠔꠣ, ꠢꠇꠟꠔꠣ ꠛꠥꠎꠣꠁ ꠖꠦꠅꠀ ꠅꠁꠍꠤꠟ। ꠝꠣꠛꠥꠖꠞ ꠖꠦꠅꠀ ꠢꠥꠇꠥꠝ ꠝꠣꠚꠤꠇ ꠝꠥꠍꠣ ꠘꠛꠤꠄ ꠟꠦꠛꠤ ꠈꠣꠘ꠆ꠖꠣꠘꠞꠦ ꠉꠘꠤꠟꠣ।
NUM 5:1 ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ,
NUM 5:2 “ꠔꠥꠝꠤ ꠛꠘꠤ ꠁꠍꠞꠣꠁꠟꠞꠦ ꠅꠃ ꠢꠥꠇꠥꠝ ꠖꠦꠅ, ꠔꠣꠞꠣ ꠎꠣꠘꠥ ꠇꠦꠝ꠆ꠙ ꠕꠣꠇꠤ ꠢꠇꠟ ꠙꠌꠣ-ꠇꠥꠡ꠆ꠑ ꠛꠦꠝꠣꠞꠤꠞꠦ ꠛꠣꠞ ꠇꠞꠤ ꠖꠦꠄ, ꠀꠞ ꠢꠇꠟ ꠘꠝꠥꠘꠣꠞ ꠗꠣꠔꠥ ꠛꠦꠝꠣꠞꠤ, ꠝꠞꠣ ꠟꠣꠡ ꠍꠁꠀ ꠎꠦꠞꠣ ꠘꠣꠙꠣꠇ ꠅꠁꠍꠦ ꠔꠣꠞꠣꠞꠦꠅ ꠇꠦꠝ꠆ꠙ ꠕꠣꠇꠤ ꠛꠣꠞ ꠇꠞꠤ ꠖꠦꠃꠇ।
NUM 5:3 ꠛꠦꠐꠣ ꠛꠣ ꠛꠦꠐꠤ ꠅꠃꠇ, ꠅꠉꠥꠞꠦ ꠇꠦꠝ꠆ꠙ ꠕꠣꠇꠤ ꠛꠣꠞ ꠇꠞꠤ ꠖꠤꠛꠣꠄ। ꠛꠘꠤ ꠁꠍꠞꠣꠁꠟꠞ ꠇꠦꠝ꠆ꠙ ꠎꠣꠔꠦ ꠄꠞꠣ ꠘꠣꠙꠣꠇ ꠘꠣ ꠛꠣꠘꠣꠄ, ꠅꠃ ꠘꠤꠅꠔꠦ ꠅꠔꠣꠞꠦ ꠛꠣꠞ ꠇꠞꠤ ꠖꠤꠛꠣꠄ, ꠎꠣꠘ ꠔ, ꠡ꠆ꠛꠄꠅꠋ ꠀꠝꠤ ꠛꠘꠤ ꠁꠍꠞꠣꠁꠟꠞ ꠝꠣꠎꠦ ꠛꠡꠔ ꠇꠞꠤ।”
NUM 5:4 ꠔꠦꠃ ꠛꠘꠤ ꠁꠍꠞꠣꠁꠟꠦ ꠅꠟꠣ ꠇꠞꠟꠣ। ꠝꠣꠛꠥꠖꠦ ꠝꠥꠍꠣꠞꠦ ꠎꠦꠟꠣ ꠢꠥꠇꠥꠝ ꠖꠤꠍꠟꠣ, ꠔꠣꠞꠣ ꠑꠤꠇ ꠅꠃꠟꠣꠃ ꠇꠞꠟꠣ। ꠔꠣꠞꠣ ꠘꠣꠙꠣꠇ ꠢꠇꠟ ꠝꠣꠘꠡꠞꠦ ꠇꠦꠝ꠆ꠙ ꠕꠣꠇꠤ ꠛꠣꠞ ꠇꠞꠤ ꠖꠤꠟꠣ।
NUM 5:5 ꠛꠣꠖꠦ ꠝꠣꠛꠥꠖꠦ ꠝꠥꠍꠣ ꠘꠛꠤꠞꠦ ꠇꠁꠟꠣ,
NUM 5:6 “ꠔꠥꠝꠤ ꠛꠘꠤ ꠁꠍꠞꠣꠁꠟꠞꠦ ꠎꠣꠘꠣꠁ ꠖꠦꠅ, ꠇꠥꠘꠥ ꠝꠣꠘꠡꠦ ꠎꠥꠖꠤ ꠝꠣꠛꠥꠖꠞ ꠘꠣꠚꠞꠝꠣꠘꠤ ꠇꠞꠤꠀ ꠖꠥꠍꠞꠣ ꠝꠣꠘꠡꠞ ꠈꠦꠔꠤ ꠇꠞꠦ, ꠔꠦ ꠢꠦ ꠛꠦꠐꠣ ꠛꠣ ꠛꠦꠐꠤ ꠅꠁꠟꠦꠅ ꠘꠤꠌ꠆ꠌꠄ ꠖꠥꠡꠤ।
NUM 5:7 ꠢꠦ ꠔꠣꠞ ꠉꠥꠘꠣꠞ ꠡ꠆ꠛꠤꠇꠣꠞꠥꠇ꠆ꠔꠤ ꠖꠤꠔꠦ ꠅꠁꠛ। ꠀꠞ ꠢꠦ ꠎꠦ ꠝꠣꠘꠡꠞ ꠈꠦꠔꠤ ꠇꠞꠍꠦ, ꠔꠣꠞꠦ ꠡꠥꠟ꠆ꠟꠀꠘꠣ ꠈꠦꠔꠤ-ꠙꠥꠞꠘ ꠖꠤꠔꠦ ꠅꠁꠛ। ꠎꠦ ꠎꠤꠘꠤꠡꠞ ꠈꠦꠔꠤ ꠇꠞꠍꠦ, ꠈꠦꠔꠤ-ꠙꠥꠞꠘ ꠢꠤꠡꠣꠛꠦ ꠅꠃ ꠎꠤꠘꠤꠡꠞ ꠝꠥꠟ ꠖꠣꠝꠞ ꠟꠉꠦ ꠀꠞꠅ ꠙꠣꠌ ꠛꠣꠐꠞ ꠄꠇ ꠛꠣꠐ ꠛꠦꠡꠤ ꠖꠤꠔꠦ ꠅꠁꠛ।
NUM 5:8 ꠈꠦꠔꠤ-ꠙꠥꠞꠘ ꠘꠦꠅꠀꠞ ꠎꠥꠇꠣ ꠝꠣꠘꠥꠡ ꠎꠥꠖꠤ ꠘꠣ ꠞꠂꠘ ꠀꠞ ꠔꠣꠞ ꠇꠥꠘꠥ ꠀꠙꠘ ꠎꠘ ꠘꠣ ꠕꠣꠇꠂꠘ, ꠔꠦ ꠁꠔꠣ ꠝꠣꠛꠥꠖꠞ ꠙꠣꠅꠘꠣ ꠅꠁꠛ। ꠅꠃ ꠈꠦꠔꠤ-ꠙꠥꠞꠘ ꠀꠞ ꠉꠥꠘꠣꠞ ꠇꠚꠞꠣꠞ ꠇꠥꠞꠛꠣꠘꠤꠞ ꠝꠦꠠꠣꠐꠣ ꠁꠝꠣꠝ ꠍꠣꠛꠦ ꠙꠣꠁꠛꠣ।
NUM 5:9 ꠛꠘꠤ ꠁꠍꠞꠣꠁꠟꠦ ꠙꠣꠇ-ꠙꠛꠤꠔ꠆ꠞ ꠎꠔ ꠎꠤꠘꠤꠡ ꠁꠝꠣꠝꠞ ꠉꠦꠍꠦ ꠟꠁꠀ ꠀꠁꠛꠣ, ꠁꠔꠣ ꠢꠇ꠆ꠇꠟꠔꠣꠃ ꠁꠝꠣꠝꠦ ꠙꠣꠁꠛꠣ।
NUM 5:10 ꠙꠞꠔꠦꠇ ꠎꠘꠞ ꠇꠥꠞꠛꠣꠘꠤ ꠖꠦꠅꠀ ꠎꠤꠘꠤꠡ ꠁꠝꠣꠝꠦ ꠙꠣꠁꠛꠣ। ꠁꠝꠣꠝꠞ ꠀꠔꠅ ꠎꠦ ꠎꠤꠘꠤꠡ ꠖꠦꠅꠀ ꠅꠁꠛ, ꠁꠔꠣ ꠁꠝꠣꠝꠞꠃ ꠅꠁꠛ।”
NUM 5:11 ꠛꠣꠖꠦ ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ,
NUM 5:12 “ꠔꠥꠝꠤ ꠛꠘꠤ ꠁꠍꠞꠣꠁꠟꠞꠦ ꠎꠣꠘꠣꠁ ꠖꠦꠅ, ꠇꠦꠃꠞꠞ ꠛꠃ ꠎꠥꠖꠤ ꠇꠥ-ꠙꠕꠦ ꠎꠣꠄꠉꠤ,
NUM 5:13 ꠀꠞ ꠎꠣꠝꠣꠁꠞꠦ ꠟꠥꠇꠣꠁꠀ ꠀꠞꠇ ꠛꠦꠐꠣꠞ ꠟꠉꠦ ꠎꠤꠘꠣ ꠇꠞꠤꠀ ꠅꠡꠔꠤ ꠛꠘꠦ, ꠔꠣꠁꠞ ꠎꠣꠝꠣꠁꠄ ꠁꠈꠣꠘ ꠘꠣ ꠎꠣꠘꠦ ꠛꠣ ꠁꠔꠣꠞ ꠇꠥꠘꠥ ꠡꠣꠇ꠆ꠇꠤꠅ ꠘꠣ ꠕꠣꠇꠦ, ꠔꠣꠁ ꠇꠥꠘꠥ ꠗꠞꠣ ꠘꠣ-ꠅ ꠈꠣꠄ।
NUM 5:14 ꠄꠞꠛꠣꠖꠦꠅ ꠎꠣꠝꠣꠁꠄ ꠛꠃꠞꠦ ꠡꠘ꠆ꠖꠄ ꠇꠞꠤꠟꠣꠄ, ꠔꠣꠞ ꠜꠤꠔꠞꠦ ꠅꠡꠣꠘ꠆ꠔꠤ ꠇꠞꠦꠞ, ꠇꠤꠛꠣ ꠛꠃꠄ ꠇꠥꠘꠥ ꠅꠡꠔꠤ ꠇꠣꠝ ꠘꠣ ꠇꠞꠟꠦꠅ ꠎꠣꠝꠣꠁꠄ ꠈꠣꠟꠤ ꠔꠣꠁꠞꠦ ꠡꠘ꠆ꠖꠄ ꠇꠞꠦ, ꠄꠞꠟꠣꠉꠤ ꠔꠣꠞ ꠝꠘꠞ ꠝꠣꠎꠦ ꠅꠡꠣꠘ꠆ꠔꠤ ꠢꠣꠝꠣꠁꠎꠣꠄ,
NUM 5:15 ꠔꠦ ꠎꠣꠝꠣꠁꠄ ꠔꠣꠞ ꠛꠃꠞꠦ ꠟꠁꠀ ꠁꠝꠣꠝ ꠍꠣꠛꠞ ꠉꠦꠍꠦ ꠎꠣꠁꠔꠦ ꠅꠁꠛ। ꠎꠣꠅꠀꠞ ꠡꠝꠄ ꠔꠣꠞ ꠛꠃꠞ ꠔꠞꠚ ꠕꠣꠇꠤ ꠍꠖꠉꠣ ꠢꠤꠡꠣꠛꠦ ꠖꠥꠁ ꠡꠦꠞ ꠛꠣꠞ꠆ꠟꠤꠞ ꠝꠄꠖꠣ ꠘꠤꠔꠦ ꠅꠁꠛ। ꠅꠃ ꠝꠄꠖꠣ ꠅꠁꠟ ꠡꠘ꠆ꠖꠄꠞ ꠟꠣꠉꠤ ꠍꠖꠉꠣ, ꠝꠣꠛꠥꠖꠞ ꠍꠣꠝꠘꠦ ꠅꠙꠞꠣꠗ ꠎꠣꠁꠞ ꠇꠞꠣꠞ ꠍꠖꠉꠣ, ꠄꠞꠟꠣꠉꠤ ꠁꠔꠣꠞ ꠝꠣꠎꠦ ꠇꠥꠘꠥ ꠔꠦꠟ ꠛꠣ ꠈꠥꠡꠛꠄꠖꠣꠞ ꠟꠥꠛꠣꠘ ꠝꠤꠡꠣꠘꠤ ꠘꠤꠡꠦꠗ।
NUM 5:16 “ꠁꠝꠣꠝꠦ ꠅꠃ ꠛꠦꠐꠣꠞ ꠛꠃꠞꠦ ꠝꠣꠛꠥꠖꠞ ꠍꠣꠝꠘꠦ ꠈꠣꠠꠣ ꠇꠞꠣꠁꠛꠣ।
NUM 5:17 ꠀꠞ ꠝꠣꠐꠤꠞ ꠄꠇ ꠉꠣꠝꠟꠣꠞ ꠝꠣꠎꠦ ꠇꠤꠍꠥ ꠙꠛꠤꠔ꠆ꠞ ꠙꠣꠘꠤ ꠜꠞꠛꠣ, ꠜꠞꠤꠀ ꠀꠟ꠆ꠟꠣꠞ ꠊꠞꠞ ꠜꠤꠔꠞꠞ ꠝꠣꠐꠤꠞ ꠃꠙꠞ ꠕꠣꠇꠤ ꠇꠤꠍꠥ ꠗꠥꠁꠟ ꠔꠥꠟꠤꠀ ꠅꠃ ꠙꠣꠘꠤꠔ ꠍꠣꠠꠤꠛꠣ।
NUM 5:18 ꠛꠦꠐꠤꠞꠦ ꠝꠣꠛꠥꠖꠞ ꠍꠣꠝꠘꠦ ꠃꠛꠣ ꠇꠞꠤꠀ ꠢꠣꠞꠟꠦ ꠔꠣꠁꠘ ꠛꠦꠐꠤꠞ ꠝꠣꠕꠣꠞ ꠌꠥꠟ ꠈꠥꠟꠤꠀ ꠖꠤꠛꠣ, ꠀꠞ ꠛꠦꠐꠤꠞ ꠅꠙꠞꠣꠗꠞ ꠢꠣꠍꠣ-ꠝꠤꠍꠣ ꠎꠣꠁꠞ ꠅꠀꠞ ꠟꠣꠉꠤ ꠀꠘꠣ ꠍꠖꠉꠣꠞ ꠛꠣꠞ꠆ꠟꠤꠞ ꠝꠄꠖꠣꠞꠦ ꠔꠣꠁꠞ ꠀꠔꠅ ꠖꠤꠛꠣ। ꠖꠤꠀ ꠔꠣꠘ ꠘꠤꠎꠞ ꠀꠔꠅ ꠟꠁꠛꠣ ꠢꠃ ꠟꠣꠘ꠆ꠘꠔ ꠒꠣꠇꠤꠀ ꠀꠘꠣꠞ ꠔꠤꠔ꠆ꠔꠣ ꠙꠣꠘꠤ।
NUM 5:19 ꠙꠣꠘꠤ ꠟꠁꠀ ꠁꠝꠣꠝꠦ ꠅꠃ ꠛꠦꠐꠤꠞꠦ ꠇꠍꠝ ꠇꠞꠣꠁꠀ ꠇꠁꠛꠣ, ‘ꠔꠥꠝꠣꠞ ꠛꠤꠀꠞ ꠛꠣꠖꠦ ꠎꠥꠖꠤ ꠇꠥꠘꠥ ꠛꠦꠐꠣꠄ ꠔꠥꠝꠣꠞ ꠟꠉꠦ ꠎꠤꠘꠣ ꠘꠣ ꠇꠞꠦ, ꠛꠣ ꠇꠥ-ꠙꠕꠦ ꠉꠤꠀ ꠔꠥꠝꠤ ꠅꠡꠔꠤ ꠘꠣ ꠅꠅ, ꠔꠦ ꠅꠃ ꠟꠣꠘ꠆ꠘꠔ ꠀꠘꠣꠞ ꠔꠤꠔ꠆ꠔꠣ ꠙꠣꠘꠤꠄ ꠎꠣꠘꠥ ꠔꠥꠝꠣꠞ ꠇꠥꠘꠥ ꠈꠦꠔꠤ ꠘꠣ ꠅꠄ।
NUM 5:20 ꠅꠁꠟꠦ ꠛꠤꠀꠞ ꠛꠣꠖꠦ ꠇꠥ-ꠙꠕꠦ ꠉꠤꠀ ꠖꠥꠍꠞꠣ ꠇꠥꠘꠥ ꠛꠦꠐꠣꠞ ꠟꠉꠦ ꠎꠤꠘꠣ ꠇꠞꠤꠀ ꠎꠥꠖꠤ ꠅꠡꠔꠤ ꠅꠅ,’
NUM 5:21 —ꠅꠈꠣꠘ ꠇꠁꠀ ꠁꠝꠣꠝꠦ ꠅꠃ ꠛꠦꠐꠤꠞꠦ ꠘꠤꠎꠞ ꠃꠙꠞꠦ ꠟꠣꠘ꠆ꠘꠔ ꠒꠣꠇꠤꠀ ꠀꠘꠣꠞ ꠇꠍꠝ ꠇꠞꠣꠁꠀ ꠢꠣꠞꠤ ꠢꠤꠞꠛꠣꠞ ꠇꠁꠛꠣ— ‘ꠔꠦ ꠝꠣꠛꠥꠖꠦ ꠔꠥꠝꠣꠞꠦ ꠅꠃ ꠉꠎꠛ ꠖꠦꠃꠇ꠆ꠇꠣ, ꠔꠥꠝꠣꠞ ꠘꠣꠞꠤ-ꠅꠋꠉ ꠘꠤꠡ꠆ꠔꠦꠎ ꠅꠁꠎꠣꠃꠇ, ꠀꠞ ꠔꠥꠝꠣꠞ ꠙꠦꠐ ꠚꠥꠟꠤꠀ ꠝꠥꠐꠣ ꠅꠁꠎꠣꠃꠇ। ꠔꠦꠃ ꠁꠔꠣ ꠖꠦꠈꠤꠀ ꠔꠥꠝꠣꠞ ꠡꠝꠣꠎꠞ ꠝꠣꠘꠡꠦ ꠎꠦꠇꠥꠘꠥ ꠛꠖ꠆ꠖꠥꠀ ꠀꠞ ꠟꠣꠘ꠆ꠘꠔꠤ ꠇꠍꠝ ꠈꠣꠅꠀꠞ ꠡꠝꠄ ꠔꠥꠝꠣꠞ ꠘꠣꠝ ꠔꠣꠞꠣ ꠁꠀꠖ ꠇꠞꠛ।
NUM 5:22 ꠀꠞ ꠅꠃ ꠟꠣꠘ꠆ꠘꠔ ꠀꠘꠣꠞ ꠙꠣꠘꠤ ꠔꠥꠝꠣꠞ ꠡꠞꠤꠟꠅ ꠢꠣꠝꠣꠁꠀ ꠎꠣꠘꠥ ꠅꠟꠣ ꠇꠣꠝ ꠇꠞꠦ, ꠎꠣꠔꠦ ꠔꠥꠝꠣꠞ ꠙꠦꠐ ꠚꠥꠟꠤꠎꠣꠄ ꠀꠞ ꠔꠥꠝꠣꠞ ꠘꠣꠞꠤ-ꠅꠋꠉ ꠘꠤꠡ꠆ꠔꠦꠎ ꠅꠁꠎꠣꠄ।’ ꠔꠦꠃ ꠛꠦꠐꠤꠄ ꠇꠁꠛ, ‘ꠀꠝꠤꠘ, ꠅꠟꠣꠃ ꠅꠃꠇ।’
NUM 5:23 “ꠁꠝꠣꠝꠦ ꠅꠃ ꠟꠣꠘ꠆ꠘꠔ ꠀꠘꠣ ꠇꠍꠝꠞ ꠇꠕꠣ ꠄꠇ ꠌꠣꠝꠠꠣꠞ ꠃꠙꠞꠦ ꠟꠦꠈꠤꠀ ꠢꠣꠞꠤ, ꠙꠣꠘꠤ ꠓꠣꠟꠤꠀ ꠅꠃ ꠟꠦꠈꠣꠞ ꠇꠣꠟꠤ ꠔꠤꠔ꠆ꠔꠣ ꠙꠣꠘꠤꠔ ꠚꠣꠟꠣꠁꠛꠣ।
NUM 5:24 ꠟꠣꠘ꠆ꠘꠔ ꠀꠘꠣꠞ ꠅꠃ ꠔꠤꠔ꠆ꠔꠣ ꠙꠣꠘꠤ ꠛꠦꠐꠤꠞꠦ ꠈꠣꠅꠀꠘꠤꠞ ꠛꠣꠖꠦ ꠛꠦꠐꠤꠞ ꠙꠦꠐꠅ ꠈꠥꠛ ꠎꠣꠟꠣ-ꠎꠘꠔ꠆ꠞꠘꠣ ꠙꠄꠖꠣ ꠅꠁꠛ।
NUM 5:25 ꠁꠝꠣꠝꠦ ꠙꠄꠟꠣ ꠅꠃ ꠛꠦꠐꠤꠞ ꠀꠔ ꠕꠣꠇꠤ ꠡꠘ꠆ꠖꠄꠞ ꠍꠖꠉꠣꠞ ꠝꠄꠖꠣ ꠘꠤꠀ ꠝꠣꠛꠥꠖꠞ ꠍꠣꠝꠘꠦ ꠖꠥꠟꠣꠁꠀ ꠇꠥꠞꠛꠣꠘꠤ ꠈꠣꠘꠣꠔ ꠟꠁꠀ ꠎꠣꠁꠛꠣ।
NUM 5:26 ꠛꠣꠖꠦ ꠔꠣꠁꠘ ꠙꠥꠞꠣ ꠍꠖꠉꠣꠞ ꠛꠖꠟꠣ ꠅꠃ ꠝꠄꠖꠣ ꠕꠣꠇꠤ ꠘꠤꠡꠣꠘꠣ ꠢꠤꠡꠣꠛꠦ ꠄꠇ ꠝꠥꠁꠐ ꠙꠞꠤꠝꠣꠘ ꠘꠤꠀ ꠇꠥꠞꠛꠣꠘꠤ ꠈꠣꠘꠣꠔ ꠎꠣꠟꠣꠁꠛꠣ, ꠀꠞ ꠢꠃ ꠔꠤꠔ꠆ꠔꠣ ꠙꠣꠘꠤ ꠛꠦꠐꠤꠞꠦ ꠈꠣꠅꠀꠁꠛꠣ।
NUM 5:27 ꠛꠦꠐꠤꠄ ꠎꠥꠖꠤ ꠎꠣꠝꠣꠁꠞ ꠟꠉꠦ ꠛꠦꠁꠝꠣꠘꠤ ꠇꠞꠤꠀ ꠅꠡꠔꠤ ꠅꠁꠀ ꠕꠣꠇꠦ, ꠔꠦ ꠁ ꠙꠣꠘꠤ ꠈꠣꠅꠀꠞ ꠛꠣꠖꠦꠃ ꠔꠣꠁꠞ ꠙꠦꠐꠅ ꠈꠥꠛ ꠎꠣꠟꠣ-ꠎꠘꠔ꠆ꠞꠘꠣ ꠅꠁꠛ। ꠔꠣꠁꠞ ꠙꠦꠐ ꠚꠥꠟꠤꠀ ꠝꠥꠐꠣ ꠅꠁꠛ, ꠀꠞ ꠘꠣꠞꠤ-ꠅꠋꠉ ꠘꠤꠡ꠆ꠔꠦꠎ ꠅꠁꠀ ꠀꠐꠈꠥꠞꠣ ꠛꠘꠤꠎꠤꠛ, ꠝꠣꠘꠡꠦ ꠟꠣꠘ꠆ꠘꠔ ꠖꠤꠛꠣꠞ ꠘꠤꠅꠔꠦ ꠔꠣꠁꠞ ꠘꠣꠝ ꠟꠁꠛꠣ।
NUM 5:28 ꠅꠁꠟꠦ ꠔꠣꠁ ꠎꠥꠖꠤ ꠅꠡꠔꠤ ꠘꠣ ꠅꠁꠀ ꠘꠤ-ꠅꠙꠞꠣꠗꠤ ꠞꠄ, ꠔꠦ ꠔꠣꠁ ꠁ ꠟꠣꠘ꠆ꠘꠔ ꠕꠣꠇꠤ ꠈꠣꠟꠣꠍ ꠙꠣꠁꠛ, ꠀꠞ ꠢꠥꠞꠥꠔ꠆ꠔꠣ ꠎꠘꠝ ꠖꠦꠅꠀꠞ ꠈꠦꠝꠔꠣꠅ ꠎꠣꠞꠤ ꠞꠁꠛ।
NUM 5:29 ꠎꠣꠝꠣꠁ-ꠛꠃꠞ ꠡꠘ꠆ꠖꠄꠞ ꠛꠤꠡꠄꠄ ꠀꠟ꠆ꠟꠣꠞ ꠀꠁꠘ ꠔ ꠅꠟꠣ। ꠇꠥꠘꠥ ꠛꠃ ꠎꠥꠖꠤ ꠎꠣꠝꠣꠁꠞ ꠡꠋꠡꠣꠞꠅ ꠞꠁꠀ ꠇꠥ-ꠙꠕꠦ ꠉꠤꠀ ꠅꠡꠔꠤ ꠛꠘꠦ,
NUM 5:30 ꠛꠣ ꠎꠣꠝꠣꠁꠄ ꠔꠣꠞ ꠛꠃꠞꠦ ꠛꠖꠝꠣꠁꠡꠤꠞ ꠡꠘ꠆ꠖꠄ ꠇꠞꠦ, ꠔꠦ ꠔꠣꠞꠣꠞ ꠟꠣꠉꠤ ꠅꠃ ꠀꠁꠘ। ꠛꠦꠐꠣꠄ ꠔꠣꠞ ꠛꠃꠞꠦ ꠝꠣꠛꠥꠖꠞ ꠍꠣꠝꠘꠦ ꠘꠤꠛ ꠀꠞ ꠁꠝꠣꠝꠦ ꠁꠔꠣ ꠢꠇꠟꠔꠣ ꠛꠦꠐꠤꠞ ꠃꠙꠞꠦ ꠛꠞ꠆ꠔꠣꠁꠛꠣ।
NUM 5:31 ꠔꠦꠃ ꠎꠣꠝꠣꠁꠄ ꠔꠣꠞ ꠘꠣꠟꠤꠡ ꠕꠣꠇꠤ ꠈꠣꠟꠣꠍ ꠙꠣꠁꠛ, ꠀꠞ ꠛꠃ ꠢꠣꠍꠣꠞꠞ ꠅꠙꠞꠣꠗꠤ ꠅꠁꠟꠦ ꠔꠣꠁꠞ ꠡꠣꠎꠣ ꠛꠁꠛ।”
NUM 6:1 ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ,
NUM 6:2 “ꠔꠥꠝꠤ ꠛꠘꠤ ꠁꠍꠞꠣꠁꠟꠞꠦ ꠎꠣꠘꠣꠁ ꠖꠦꠅ, ꠇꠥꠘꠥ ꠛꠦꠐꠣ ꠛꠣ ꠛꠦꠐꠤꠄ ꠎꠥꠖꠤ ꠘꠣꠎꠤꠞꠤꠀ ꠄꠔꠦꠇꠣꠚ ꠇꠞꠔꠣ ꠌꠣꠁꠘ, ꠝꠣꠘꠤ ꠈꠣꠟꠤ ꠝꠣꠛꠥꠖꠞ ꠄꠛꠣꠖꠔ-ꠛꠘ꠆ꠖꠦꠉꠤꠞ ꠟꠣꠉꠤ ꠀꠟꠣꠖꠣ ꠞꠅꠀꠞ ꠝꠣꠘ꠆ꠘꠔ ꠇꠞꠤꠟꠣꠄ,
NUM 6:3 ꠔꠦ ꠀꠋꠉꠥꠞꠞ ꠡꠞꠛꠔ ꠛꠣ ꠎꠦꠇꠥꠘꠥ ꠘꠝꠥꠘꠣꠞ ꠡꠞꠣꠛ ꠈꠣꠅꠀ ꠕꠣꠇꠤ ꠔꠣꠞꠣ ꠘꠤꠌ꠆ꠌꠄ ꠢꠞꠤꠀ ꠕꠣꠇꠔꠦ ꠅꠁꠛ। ꠀꠋꠉꠥꠞꠞ ꠡꠤꠞ꠆ꠇꠣ ꠛꠣ ꠎꠦꠇꠥꠘꠥ ꠘꠝꠥꠘꠣꠞ ꠡꠤꠞ꠆ꠇꠣ ꠈꠣꠅꠀ ꠕꠣꠇꠤꠅ ꠔꠣꠞꠣ ꠛꠣꠌꠤꠀ ꠞꠁꠛ। ꠀꠞ ꠔꠣꠞꠣ ꠔꠣꠎꠣ ꠀꠋꠉꠥꠞ, ꠇꠤꠍꠝꠤꠍ, ꠛꠣ ꠀꠋꠉꠥꠞꠞ ꠞꠡꠅ ꠈꠣꠁꠔ ꠘꠣꠄ।
NUM 6:4 ꠝꠥꠟ ꠇꠕꠣ ꠅꠁꠟ, ꠄꠞꠣ ꠎꠔꠖꠤꠘ ꠘꠣꠎꠤꠞꠤꠀ ꠄꠔꠦꠇꠣꠚꠅ ꠞꠁꠛ, ꠅꠔꠖꠤꠘ ꠀꠋꠉꠥꠞ ꠔ ꠖꠥꠞꠞ ꠇꠕꠣ, ꠀꠋꠉꠥꠞꠞ ꠄꠇꠐꠣ ꠛꠤꠌꠤ ꠛꠣ ꠛꠣꠇꠟꠅ ꠔꠣꠞꠣ ꠇꠥꠘꠥ ꠟꠣꠈꠣꠘꠃ ꠈꠣꠁꠔ ꠙꠣꠞꠔ ꠘꠣꠄ।
NUM 6:5 “ꠀꠞ ꠎꠔꠖꠤꠘꠞ ꠟꠣꠉꠤ ꠘꠣꠎꠤꠞꠤꠀ ꠄꠔꠦꠇꠣꠚꠞ ꠘꠤꠅꠔꠦ ꠘꠤꠎꠞꠦ ꠀꠟꠣꠖꠣ ꠞꠣꠈꠣꠞ ꠝꠣꠘ꠆ꠘꠔ ꠇꠞꠍꠂꠘ, ꠅꠔꠖꠤꠘ ꠔꠣꠞꠣꠞ ꠝꠣꠕꠣꠔ ꠈꠥꠞ-ꠛꠦꠟꠦꠁꠐ ꠟꠣꠉꠣꠘꠤ ꠘꠤꠡꠦꠗ। ꠝꠣꠛꠥꠖꠞ ꠘꠣꠝꠦ ꠀꠟꠣꠖꠣ ꠞꠅꠀꠞ ꠡꠝꠄ ꠄꠞꠣ ꠙꠣꠇ-ꠙꠣꠇꠤꠎꠣ ꠞꠁꠔꠦ ꠅꠁꠛ। ꠝꠣꠕꠣꠞ ꠌꠥꠟ ꠟꠣꠝ꠆ꠛꠣ ꠇꠞꠔꠦ ꠅꠁꠛ।
NUM 6:6 ꠁ ꠡꠝꠄ ꠇꠥꠘꠥ ꠝꠞꠣ ꠟꠣꠡꠞ ꠉꠦꠍꠦ ꠎꠣꠁꠔ ꠙꠣꠞꠔ ꠘꠣꠄ।
NUM 6:7 ꠔꠣꠞꠣꠞ ꠝꠣ-ꠛꠣꠛꠣ, ꠜꠣꠁ-ꠛꠁꠘ ꠇꠦꠃ ꠝꠣꠞꠣ ꠉꠦꠟꠦꠅ ꠘꠤꠎꠞꠦ ꠘꠣꠙꠣꠇ ꠇꠞꠔ ꠙꠣꠞꠔ ꠘꠣꠄ, ꠇꠣꠞꠘ ꠄꠞꠣꠞ ꠝꠣꠕꠣꠞ ꠝꠣꠎꠦ ꠔ ꠀꠟ꠆ꠟꠣꠞ ꠘꠣꠝꠦ ꠀꠟꠣꠖꠣ ꠞꠅꠀꠞ ꠘꠤꠡꠣꠘꠣ ꠌꠥꠟ ꠟꠣꠉꠣꠁꠟ।
NUM 6:8 ꠔꠣꠞꠣꠞ ꠁ ꠀꠟꠣꠖꠣ ꠞꠅꠀꠞ ꠝꠤꠀꠖ ꠘꠣ ꠙꠥꠞꠣ ꠙꠞ꠆ꠎꠘ꠆ꠔ, ꠙꠣꠇ-ꠙꠣꠇꠤꠎꠣ ꠞꠁꠔꠦ ꠅꠁꠛ।
NUM 6:9 “ꠀꠞ ꠀꠈꠔꠣ ꠇꠥꠘꠥ ꠝꠣꠘꠥꠡ ꠎꠥꠖꠤ ꠔꠣꠞ ꠍꠣꠝꠘꠦ ꠝꠞꠤꠎꠣꠄ, ꠔꠦ ꠅꠃ ꠝꠞꠣꠞ ꠖꠣꠄ ꠝꠣꠛꠥꠖꠞ ꠘꠣꠝꠦ ꠞꠣꠈꠣ ꠔꠣꠞ ꠝꠣꠕꠣꠞ ꠌꠥꠟ ꠘꠣꠙꠣꠇ ꠅꠁꠎꠣꠁꠛ, ꠀꠞ ꠢꠤꠞꠛꠣꠞ ꠙꠣꠇ ꠅꠀꠞ ꠟꠣꠉꠤ ꠡꠣꠔ ꠖꠤꠘꠞ ꠖꠤꠘ ꠔꠣꠞ ꠝꠣꠕꠣ ꠇꠣꠝꠣꠁꠟꠤꠔꠦ ꠅꠁꠛ।
NUM 6:10 ꠀꠞ ꠀꠐ ꠖꠤꠘꠞ ꠖꠤꠘ ꠢꠦ ꠖꠥꠁꠐꠣ ꠒꠥꠙꠤ ꠙꠣꠈꠤ ꠛꠣ ꠖꠥꠁꠐꠣ ꠙꠣꠞꠅ ꠟꠁꠀ ꠝꠤꠟꠘ-ꠔꠣꠝ꠆ꠛꠥꠞ ꠖꠥꠀꠞꠅ ꠁꠝꠣꠝꠞ ꠉꠦꠍꠦ ꠎꠣꠁꠛ।
NUM 6:11 ꠝꠞꠣ ꠟꠣꠡꠞ ꠉꠦꠍꠦ ꠉꠤꠀ ꠢꠦ ꠘꠣꠙꠣꠇ ꠅꠀꠄ, ꠅꠈꠘ ꠔꠣꠞ ꠘꠣꠙꠣꠇꠤꠞ ꠉꠥꠘꠣ ꠝꠣꠚꠤꠞ ꠟꠣꠉꠤ ꠁꠝꠣꠝꠦ ꠄꠇꠐꠣ ꠙꠣꠈꠤ ꠖꠤꠀ ꠉꠥꠘꠣꠞ ꠇꠚꠞꠣꠞ ꠇꠥꠞꠛꠣꠘꠤ, ꠀꠞ ꠖꠥꠍꠞꠣ ꠙꠣꠈꠤ ꠖꠤꠀ ꠎꠣꠟꠣꠁꠟ ꠇꠥꠞꠛꠣꠘꠤ ꠀꠖꠣꠄ ꠇꠞꠛꠣ। ꠅꠃ ꠖꠤꠘꠃ ꠝꠣꠛꠥꠖꠞ ꠘꠣꠝꠦ ꠔꠣꠞ ꠝꠣꠕꠣꠞꠦ ꠘꠄꠀ ꠇꠞꠤ ꠙꠣꠇ-ꠙꠣꠇꠤꠎꠣ ꠞꠣꠈꠔꠦ ꠅꠁꠛ।
NUM 6:12 ꠀꠞ ꠀꠉꠞ ꠟꠣꠈꠣꠘ ꠢꠤꠞꠛꠣꠞ ꠝꠣꠛꠥꠖꠞ ꠘꠣꠝꠦ ꠀꠟꠣꠖꠣ ꠞꠅꠀꠞ ꠝꠣꠘ꠆ꠘꠔ ꠇꠞꠣ ꠟꠣꠉꠛ। ꠄꠞꠟꠉꠦ ꠖꠥꠡ-ꠇꠍꠥꠞꠤꠞ ꠇꠚꠞꠣꠞ ꠟꠣꠉꠤ ꠄꠇ ꠛꠍꠞ ꠛꠄꠅꠡꠤ ꠄꠉꠥ ꠝꠦꠠꠣ-ꠛꠣꠁꠌ꠆ꠌꠣ ꠇꠥꠞꠛꠣꠘꠤ ꠖꠤꠛ। ꠔꠣ-ꠅ ꠀꠉꠦ ꠎꠔꠖꠤꠘ ꠢꠦ ꠝꠣꠛꠥꠖꠞ ꠘꠣꠝꠦ ꠀꠟꠣꠖꠣ ꠞꠁꠍꠤꠟ, ꠁꠔꠣ ꠛꠣꠔꠤꠟ ꠅꠁꠎꠤꠛ, ꠇꠣꠞꠘ ꠢꠤ ꠡꠝꠄ ꠢꠦ ꠘꠣꠙꠣꠇ ꠅꠁꠉꠦꠍꠤꠟ।
NUM 6:13 “ꠎꠦꠇꠥꠘꠥ ꠎꠘꠦ ꠝꠣꠛꠥꠖꠞ ꠘꠣꠝꠦ ꠘꠣꠎꠤꠞꠤꠀ ꠄꠔꠦꠇꠣꠚꠞ ꠝꠤꠀꠖ ꠙꠥꠞꠣ ꠇꠞꠤꠀ ꠢꠣꠞꠟꠦ, ꠙꠛꠤꠔ꠆ꠞ ꠝꠤꠟꠘ-ꠔꠣꠝ꠆ꠛꠥꠞ ꠖꠥꠀꠞꠞ ꠇꠣꠘ꠆ꠖꠣꠔ ꠎꠣꠁꠛ।
NUM 6:14 ꠉꠤꠀ ꠝꠣꠛꠥꠖꠞ ꠘꠣꠝꠦ ꠎꠣꠟꠣꠁꠟ ꠇꠥꠞꠛꠣꠘꠤꠞ ꠟꠣꠉꠤ ꠄꠇ ꠛꠍꠞ ꠛꠄꠅꠡꠤ ꠄꠉꠥ ꠘꠤꠈꠥꠔ ꠝꠦꠠꠣ-ꠛꠣꠁꠌ꠆ꠌꠣ, ꠀꠞ ꠉꠥꠘꠣꠞ ꠇꠚꠞꠣꠞ ꠇꠥꠞꠛꠣꠘꠤꠞ ꠟꠣꠉꠤ ꠄꠇ ꠛꠍꠞ ꠛꠄꠅꠡꠤ ꠄꠉꠥ ꠘꠤꠈꠥꠔ ꠝꠦꠠꠤ-ꠛꠣꠁꠌ꠆ꠌꠣ, ꠄꠞꠟꠉꠦ ꠍꠣꠟꠣꠝꠔꠤ ꠇꠥꠞꠛꠣꠘꠤꠞ ꠟꠣꠉꠤ ꠄꠉꠥ ꠘꠤꠈꠥꠔ ꠝꠦꠠꠣ ꠀꠘꠔꠦ ꠅꠁꠛ।
NUM 6:15 ꠅꠔꠣꠞ ꠟꠉꠞ ꠗꠣꠘ-ꠉꠝꠞ ꠍꠖꠉꠣ ꠀꠞ ꠡꠞꠛꠔ-ꠙꠣꠘꠤꠞ ꠍꠖꠉꠣ ꠀꠘꠛ, ꠄꠞꠟꠉꠦ ꠘꠤꠞꠦꠇ ꠉꠥꠠꠤꠖꠤ ꠛꠣꠘꠣꠁꠟ ꠔꠦꠟꠖꠤ ꠜꠣꠎꠣ ꠄꠇ ꠐꠥꠇꠞꠤ ꠙꠤꠑꠣ ꠀꠞ ꠔꠦꠟ ꠝꠣꠈꠣꠁꠟ ꠌꠣꠙꠣꠐꠤ ꠛꠣꠘꠣꠁꠅ। ꠁꠔꠣ ꠇꠥꠘ꠆ꠔꠣꠔꠃ ꠈꠣꠝꠤꠞ ꠝꠤꠡꠣꠁꠅ ꠘꠣ।
NUM 6:16 ꠁꠝꠣꠝꠦ ꠁꠔꠣ ꠢꠇꠟꠔꠣ ꠘꠤꠀ ꠝꠣꠛꠥꠖꠞ ꠍꠣꠝꠘꠦ ꠕꠁꠀ ꠢꠣꠞꠤ, ꠉꠥꠘꠣꠞ ꠇꠚꠞꠣꠞ ꠇꠥꠞꠛꠣꠘꠤ ꠀꠞ ꠎꠣꠟꠣꠁꠟ ꠇꠥꠞꠛꠣꠘꠤꠞ ꠟꠉꠦ ꠖꠤꠛꠣ।
NUM 6:17 ꠀꠞ ꠍꠣꠟꠣꠝꠔꠤ ꠇꠥꠞꠛꠣꠘꠤꠞ ꠝꠦꠠꠣꠞ ꠟꠉꠦꠅ ꠅꠟꠣ ꠈꠣꠝꠤꠞ ꠍꠣꠠꠣ ꠞꠥꠐꠤ ꠖꠤꠛꠣ। ꠄꠞꠟꠉꠞ ꠗꠣꠘ-ꠉꠝꠞ ꠍꠖꠉꠣ ꠀꠞ ꠡꠞꠛꠔ-ꠙꠣꠘꠤꠞ ꠍꠖꠉꠣ ꠀꠖꠣꠄ ꠇꠞꠛꠣ।
NUM 6:18 ꠛꠣꠖꠦ ꠝꠤꠟꠘ-ꠔꠣꠝ꠆ꠛꠥꠞ ꠖꠥꠀꠞꠞ ꠉꠦꠍꠦ ꠘꠣꠎꠤꠞꠤꠀ ꠄꠔꠦꠇꠣꠚ ꠇꠞꠞꠣ ꠎꠘꠞ ꠝꠣꠕꠣꠞ ꠌꠥꠟ ꠇꠣꠝꠣꠁꠀ, ꠅꠃ ꠌꠥꠟ ꠍꠣꠟꠣꠝꠔꠤ ꠇꠥꠞꠛꠣꠘꠤꠞ ꠔꠟꠞ ꠀꠉꠥꠁꠘꠅ ꠚꠣꠟꠣꠁꠛꠣ।
NUM 6:19 ꠀꠞ ꠝꠣꠛꠥꠖꠞ ꠘꠣꠝꠦ ꠞꠣꠈꠣ ꠅꠃ ꠌꠥꠟ ꠇꠣꠝꠣꠘꠤꠞ ꠛꠣꠖꠦ ꠁꠝꠣꠝꠦ ꠇꠥꠞꠛꠣꠘꠤꠞ ꠝꠦꠠꠣꠞ ꠡꠤꠖ꠆ꠖ ꠇꠞꠣ ꠄꠇꠈꠣꠘ ꠉꠞ꠆ꠖꠘꠣ ꠀꠞ ꠐꠥꠇꠞꠤ ꠕꠣꠇꠤ ꠈꠣꠝꠤꠞ ꠍꠣꠠꠣ ꠄꠇꠈꠣꠘ ꠙꠤꠑꠣ ꠀꠞ ꠄꠇꠈꠣꠘ ꠔꠦꠟ ꠝꠣꠈꠣꠁꠟ ꠌꠣꠙꠣꠐꠤ ꠘꠤꠀ ꠘꠣꠎꠤꠞꠤꠀ ꠄꠔꠦꠇꠣꠚ ꠇꠞꠞꠣ ꠎꠘꠞ ꠀꠔꠅ ꠖꠤꠛꠣ।
NUM 6:20 ꠛꠣꠖꠦ ꠁꠝꠣꠝꠦ ꠅꠔꠣ ꠘꠤꠀ ꠝꠣꠛꠥꠖꠞ ꠍꠣꠝꠘꠦ ꠃꠌꠣ ꠇꠞꠤ ꠖꠥꠟꠣꠁꠛꠣ। ꠁꠔꠣ ꠔ ꠙꠣꠇ-ꠙꠛꠤꠔ꠆ꠞ ꠎꠤꠘꠤꠡ, ꠁꠔꠣ ꠢꠇ꠆ꠇꠟꠔꠣ ꠁꠝꠣꠝꠞ ꠙꠣꠅꠘꠣ। ꠖꠥꠟꠣꠁꠀ ꠕꠅꠀ ꠍꠤꠘꠣꠞ ꠅꠃ ꠉꠥꠡ꠆ꠔ ꠀꠞ ꠇꠥꠞꠛꠣꠘꠤꠞ ꠙꠡꠥꠞ ꠞꠣꠘꠅ ꠁꠝꠣꠝꠞ ꠙꠣꠅꠘꠣ। ꠁꠔꠣ ꠢꠇꠟꠔꠣ ꠇꠞꠣꠞ ꠛꠣꠖꠦ ꠘꠣꠎꠤꠞꠤꠀ ꠄꠔꠦꠇꠣꠚ ꠇꠞꠞꠣ ꠅꠃ ꠎꠘꠦ ꠀꠋꠉꠥꠞꠞ ꠡꠞꠛꠔ ꠈꠣꠁꠔꠣ ꠙꠣꠞꠛꠣ।
NUM 6:21 “ꠁꠔꠣ ꠔ ꠘꠣꠎꠤꠞꠤꠀ ꠄꠔꠦꠇꠣꠚ ꠇꠞꠞꠣ ꠎꠘꠞ ꠟꠣꠉꠤ ꠀꠁꠘ। ꠝꠣꠛꠥꠖꠞ ꠘꠣꠝꠦ ꠀꠟꠣꠖꠣ ꠞꠁꠀ ꠘꠣꠎꠤꠞꠤꠀ ꠄꠔꠦꠇꠣꠚꠞ ꠘꠤꠅꠝ ꠝꠣꠚꠤꠇ, ꠅꠔꠣ ꠢꠇꠟꠔꠣ ꠇꠥꠞꠛꠣꠘꠤ ꠖꠤꠔꠦ ꠅꠁꠛ। ꠀꠞ ꠎꠥꠖꠤ ꠔꠣꠞꠣꠞ ꠡꠣꠁꠖ꠆ꠖ ꠝꠣꠚꠤꠇ ꠀꠞꠅ ꠇꠥꠘ꠆ꠔꠣ ꠇꠞꠣꠞ ꠘꠤꠅꠔ ꠇꠞꠦ, ꠔꠦ ꠅꠔꠣꠅ ꠇꠞꠔꠦ ꠅꠁꠛ। ꠝꠣꠛꠥꠖꠞ ꠘꠣꠝꠦ ꠀꠟꠣꠖꠣ ꠞꠅꠀꠞ ꠝꠣꠘ꠆ꠘꠔ ꠝꠣꠚꠤꠇ ꠄꠔꠦꠇꠣꠚꠞ ꠎꠞꠥꠞꠤ ꠢꠇ꠆ꠇꠟꠔꠣ ꠄꠞꠣ ꠀꠖꠣꠄ ꠇꠞꠛ।”
NUM 6:22 ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ,
NUM 6:23 “ꠔꠥꠝꠤ ꠁꠝꠣꠝ ꠢꠣꠞꠥꠘ ꠀꠞ ꠔꠣꠞ ꠙꠥꠀꠂꠘꠞꠦ ꠎꠣꠘꠣꠁ ꠖꠦꠅ, ꠛꠘꠤ ꠁꠍꠞꠣꠁꠟꠞ ꠟꠣꠉꠤ ꠖꠥꠀ ꠇꠞꠣꠞ ꠡꠝꠄ ꠔꠣꠞꠣ ꠎꠣꠘꠥ ꠅꠟꠣ ꠇꠂꠘ,
NUM 6:24 ꠝꠣꠛꠥꠖꠦ ꠖꠦꠃꠇ꠆ꠇꠣ ꠞꠢꠝ-ꠛꠞꠇꠔ, ꠀꠞ ꠇꠞꠃꠇ꠆ꠇꠣ ꠔꠥꠝꠞꠣꠞꠦ ꠢꠦꠚꠣꠎꠔ।
NUM 6:25 ꠔꠣꠘ ꠘꠥꠞꠞ ꠞꠥꠡꠘꠤ ꠔꠥꠝꠞꠣꠞ ꠃꠙꠞꠦ ꠙꠠꠃꠇ, ꠔꠣꠘ ꠝꠦꠢꠦꠞꠛꠣꠘꠤ ꠢꠣꠝꠦꠡꠣ ꠎꠣꠞꠤ ꠞꠃꠇ।
NUM 6:26 ꠝꠣꠛꠥꠖꠦ ꠔꠣꠘ ꠝꠥꠈ ꠈꠣꠘ ꠎꠣꠘꠥ ꠔꠥꠝꠞꠣꠞ ꠛꠣꠄ ꠚꠤꠞꠣꠁꠘ, ꠀꠞ ꠔꠥꠝꠞꠣꠞꠦ ꠡꠣꠄ-ꠡꠣꠘ꠆ꠔꠤ ꠖꠣꠘ ꠇꠞꠂꠘ।
NUM 6:27 ꠅꠃ ꠟꠣꠈꠣꠘ ꠔꠣꠞꠣ ꠛꠘꠤ ꠁꠍꠞꠣꠁꠟꠞ ꠃꠙꠞꠦ ꠀꠝꠣꠞ ꠘꠣꠝ ꠟꠁꠛꠣ, ꠔꠦꠃ ꠀꠝꠤ ꠔꠣꠞꠣꠞꠦ ꠞꠢꠝ-ꠛꠞꠇꠔ ꠖꠤꠝꠥ।”
NUM 7:1 ꠢꠎꠞꠔ ꠝꠥꠍꠣꠄ ꠀꠟ꠆ꠟꠣꠞ ꠊꠞ ꠛꠣꠘꠣꠘꠤꠞ ꠇꠣꠝ ꠡꠦꠡ ꠇꠞꠤꠀ ꠢꠣꠞꠤ, ꠙꠛꠤꠔ꠆ꠞ ꠔꠦꠟ ꠍꠤꠐꠣꠁꠀ ꠊꠞꠞꠦ ꠙꠣꠇ-ꠙꠛꠤꠔ꠆ꠞ ꠇꠞꠟꠣ। ꠀꠞ ꠊꠞꠞ ꠢꠇꠟ ꠝꠣꠟ-ꠍꠣꠝꠣꠘꠣ, ꠇꠥꠞꠛꠣꠘꠤ ꠈꠣꠘꠣ ꠀꠞ ꠄꠞ ꠟꠉꠞ ꠕꠣꠟ-ꠛꠣꠡꠘ ꠢꠇ꠆ꠇꠟꠔꠣ ꠙꠣꠇ-ꠙꠛꠤꠔ꠆ꠞ ꠇꠞꠟꠣ।
NUM 7:2 ꠅꠃ ꠖꠤꠘ ꠛꠘꠤ ꠁꠍꠞꠣꠁꠟꠞ ꠛꠣꠞꠅ ꠈꠣꠘ꠆ꠖꠣꠘꠞ ꠡꠞ꠆ꠖꠣꠞ ꠅꠇꠟ ꠘꠣꠘꠣꠘ ꠎꠣꠔꠞ ꠃꠙꠢꠣꠞ ꠟꠁꠀ ꠀꠁꠟꠣ। ꠄꠞꠣ ꠅꠁꠟꠣ ꠎꠣꠞꠎꠤꠞ ꠉꠥꠡ꠆ꠐꠤꠞ ꠙꠞꠗꠣꠘ ꠝꠣꠘꠥꠡ, ꠔꠣꠞꠣꠞ ꠖꠣꠄꠁꠔ꠆ꠔ ꠀꠍꠤꠟ ꠉꠘꠤꠀ ꠀꠟꠉ ꠇꠞꠣ ꠢꠇꠟ ꠝꠣꠘꠡꠞ ꠖꠦꠈꠣ-ꠢꠥꠘꠣ ꠇꠞꠣ।
NUM 7:3 ꠝꠣꠛꠥꠖꠞ ꠘꠣꠝꠦ ꠔꠣꠞꠣ ꠍꠣꠘꠤ ꠀꠟꠣ ꠍꠄꠈꠣꠘ ꠉꠞꠥꠞ ꠉꠣꠠꠤ, ꠛꠣꠞꠅꠉꠥ ꠉꠞꠥ ꠟꠁꠀ ꠀꠟ꠆ꠟꠣꠞ ꠊꠞꠞ ꠍꠣꠝꠘꠦ ꠀꠁꠟꠣ। ꠙꠞꠔꠦꠇ ꠡꠞ꠆ꠖꠣꠞꠞ ꠔꠞꠚ ꠕꠣꠇꠤ ꠄꠇꠐꠣ ꠇꠞꠤ ꠉꠞꠥ ꠀꠞ ꠖꠥꠁ ꠎꠘꠞ ꠔꠞꠚ ꠕꠣꠇꠤ ꠄꠇꠈꠣꠘ ꠇꠞꠤ ꠉꠞꠥꠞ ꠉꠣꠠꠤ ꠖꠦꠅꠀ ꠅꠁꠟ। ꠔꠣꠞꠣ ꠁꠔꠣ ꠀꠘꠤꠀ ꠀꠟ꠆ꠟꠣꠞ ꠊꠞꠞ ꠍꠣꠝꠘꠦ ꠕꠁꠟꠣ।
NUM 7:4 ꠔꠦꠃ ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ,
NUM 7:5 “ꠔꠥꠝꠤ ꠔꠣꠞꠣꠞ ꠉꠦꠍ ꠕꠣꠇꠤ ꠅꠔꠣ ꠡꠝꠎꠤꠀ ꠞꠣꠈꠅ, ꠎꠣꠔꠦ ꠝꠤꠟꠘ-ꠔꠣꠝ꠆ꠛꠥꠞ ꠇꠣꠝꠅ ꠟꠣꠉꠣꠘꠤ ꠎꠣꠄ। ꠟꠦꠛꠤ ꠈꠣꠘ꠆ꠖꠣꠘꠞ ꠈꠣꠖꠤꠝ ꠅꠇꠟꠞ ꠇꠣꠝ ꠛꠥꠎꠤꠀ ꠔꠣꠞꠣꠞ ꠝꠣꠎꠦ ꠅꠔꠣ ꠛꠣꠐꠤꠀ ꠖꠦꠅ।”
NUM 7:6 ꠄꠞꠟꠣꠉꠤ ꠝꠥꠍꠣꠄ ꠅꠃ ꠉꠣꠠꠤ ꠀꠞ ꠉꠞꠥ ꠅꠉꠥꠁꠘ ꠟꠦꠛꠤ ꠈꠣꠘ꠆ꠖꠣꠘꠞ ꠈꠣꠖꠤꠝ ꠅꠇꠟꠞꠦ ꠛꠣꠐꠤꠀ ꠖꠤꠟꠣ।
NUM 7:7 ꠄꠞꠣꠞ ꠝꠣꠎꠦ ꠟꠦꠛꠤꠞ ꠙꠄꠟꠣ ꠙꠥꠀ ꠎꠣꠞꠍꠥꠘꠞ ꠉꠥꠡ꠆ꠐꠤꠞ ꠇꠣꠝ ꠝꠣꠚꠤꠇ ꠖꠥꠈꠣꠘ ꠉꠞꠥꠞ ꠉꠣꠠꠤ ꠀꠞ ꠌꠣꠁꠞꠉꠥ ꠉꠞꠥ ꠔꠣꠞꠣꠞꠦ ꠖꠤꠟꠣ,
NUM 7:8 ꠀꠞ ꠀꠞꠇ ꠙꠥꠀ ꠝꠣꠞꠣꠞꠤꠞ ꠉꠥꠡ꠆ꠐꠤꠞ ꠇꠣꠝ ꠛꠥꠎꠤꠀ ꠔꠣꠞꠣꠞꠦ ꠖꠤꠟꠣ ꠌꠣꠁꠞ ꠈꠣꠘ ꠉꠣꠠꠤ ꠀꠞ ꠀꠐꠉꠥ ꠉꠞꠥ। ꠁꠝꠣꠝ ꠢꠣꠞꠥꠘꠞ ꠙꠥꠀ ꠁꠍꠣꠝꠣꠞꠦ ꠅꠃ ꠇꠣꠝꠞ ꠔꠖꠣꠞꠇꠤ ꠇꠞꠟꠣ।
NUM 7:9 ꠅꠁꠟꠦ ꠟꠦꠛꠤꠞ ꠙꠥꠀ ꠇꠣꠢꠣꠔꠞ ꠉꠥꠡ꠆ꠐꠤꠞꠦ ꠁꠔꠣ ꠇꠥꠘ꠆ꠔꠣ ꠖꠤꠟꠣ ꠘꠣ, ꠇꠣꠞꠘ ꠘꠤꠅꠝ ꠀꠍꠤꠟ ꠔꠣꠞꠣ ꠈꠣꠟꠤ ꠙꠣꠇ-ꠙꠛꠤꠔ꠆ꠞ ꠌꠤꠎ ꠅꠇꠟ ꠖꠦꠈꠣ-ꠢꠥꠘꠣ ꠇꠞꠣ, ꠀꠞ ꠅꠔꠣꠞꠦ ꠇꠣꠘ꠆ꠖꠅ ꠇꠞꠤ ꠛꠁꠀ ꠘꠦꠅꠀ।
NUM 7:10 ꠇꠥꠞꠛꠣꠘꠤ ꠈꠣꠘꠣꠔ ꠙꠛꠤꠔ꠆ꠞ ꠔꠦꠟ ꠍꠤꠐꠣꠘꠤꠞ ꠡꠝꠄ, ꠁꠈꠣꠘꠞꠦ ꠛꠅꠀꠁꠟ ꠇꠞꠣꠞ ꠘꠤꠅꠔꠦ ꠡꠞ꠆ꠖꠣꠞ ꠅꠇꠟꠦ ꠎꠣꠞꠎꠤꠞ ꠛꠈꠡꠤꠡ ꠟꠁꠀ ꠀꠁꠟꠣ। ꠀꠘꠤꠀ ꠇꠥꠞꠛꠣꠘꠤ ꠈꠣꠘꠣꠞ ꠍꠣꠝꠘꠦ ꠕꠁꠟꠣ।
NUM 7:11 ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ, “ꠙꠞꠔꠦꠇ ꠖꠤꠘ ꠄꠇ ꠄꠇ ꠡꠞ꠆ꠖꠣꠞꠦ ꠇꠥꠞꠛꠣꠘꠤ ꠈꠣꠘꠣꠞꠦ ꠛꠅꠀꠁꠟ ꠇꠞꠣꠞ ꠘꠤꠅꠔꠦ ꠔꠣꠘ ꠛꠈꠡꠤꠡ ꠀꠘꠤꠀ ꠡꠝꠎꠣꠁꠛꠣ।”
NUM 7:12 ꠙꠄꠟꠣ ꠖꠤꠘ ꠄꠢꠥꠖꠣ ꠈꠣꠘ꠆ꠖꠣꠘꠞ ꠡꠞ꠆ꠖꠣꠞ ꠀꠝꠤꠘꠣꠖꠣꠛꠞ ꠙꠥꠀ ꠘꠣꠢꠤꠡꠦ ꠔꠣꠘ ꠛꠈꠡꠤꠡ ꠟꠁꠀ ꠀꠁꠟꠣ।
NUM 7:13 ꠔꠣꠁꠘ ꠗꠣꠘ-ꠉꠝꠞ ꠍꠖꠉꠣꠞ ꠟꠣꠉꠤ ꠄꠛꠣꠖꠔ ꠈꠣꠘꠣꠞ ꠝꠣꠙꠦ ꠄꠇ-ꠡ ꠔꠤꠡ ꠔꠟꠣ ꠃꠎꠘꠞ ꠞꠥꠙꠣꠞ ꠄꠇꠈꠣꠘ ꠕꠣꠟ, ꠀꠞ ꠡꠔ꠆ꠔꠁꠞ ꠔꠟꠣ ꠃꠎꠘꠞ ꠞꠥꠙꠣꠞ ꠄꠇ ꠉꠣꠝꠟꠣ ꠀꠘꠤꠀ ꠖꠤꠟꠣ, ꠅꠃ ꠕꠣꠟ ꠀꠞ ꠉꠣꠝꠟꠣꠔ ꠜꠞꠣ ꠀꠍꠤꠟ ꠗꠣꠘ-ꠉꠝꠞ ꠍꠖꠉꠣꠞ ꠘꠤꠅꠔꠦ ꠔꠦꠟ ꠝꠣꠈꠣꠁꠟ ꠝꠄꠖꠣ।
NUM 7:14 ꠀꠉꠞ-ꠈꠥꠡꠛꠄꠄ ꠜꠞꠣ ꠖꠡ ꠔꠟꠣ ꠃꠎꠘꠞ ꠡꠥꠘꠣꠞ ꠄꠇꠐꠣ ꠛꠣꠐꠤ,
NUM 7:15 ꠎꠣꠟꠣꠁꠟ ꠇꠥꠞꠛꠣꠘꠤꠞ ꠟꠣꠉꠤ ꠄꠇꠐꠣ ꠛꠤꠍꠣꠟ, ꠄꠇꠐꠣ ꠝꠦꠠꠣ, ꠄꠇ ꠛꠍꠞ ꠛꠄꠅꠡꠤ ꠄꠉꠥ ꠝꠦꠠꠣ-ꠛꠣꠁꠌ꠆ꠌꠣ,
NUM 7:16 ꠉꠥꠘꠣꠞ ꠇꠚꠞꠣꠞ ꠇꠥꠞꠛꠣꠘꠤꠞ ꠟꠣꠉꠤ ꠄꠉꠥ ꠍꠣꠉꠟ,
NUM 7:17 ꠍꠣꠟꠣꠝꠔꠤ ꠇꠥꠞꠛꠣꠘꠤꠞ ꠟꠣꠉꠤ ꠖꠥꠉꠥ ꠉꠞꠥ, ꠙꠣꠌꠉꠥ ꠝꠦꠠꠣ, ꠙꠣꠌꠉꠥ ꠍꠣꠉꠟ ꠀꠞ ꠄꠇ ꠛꠍꠞ ꠛꠄꠅꠡꠤ ꠙꠣꠌꠉꠥ ꠝꠦꠠꠣ-ꠛꠣꠁꠌ꠆ꠌꠣ ꠀꠘꠟꠣ। ꠁꠔꠣ ꠅꠁꠟ ꠀꠝꠤꠘꠣꠖꠣꠛꠞ ꠙꠥꠀ ꠘꠣꠢꠤꠡꠞ ꠃꠙꠢꠣꠞ।
NUM 7:18 ꠖꠥꠁ ꠘꠝ꠆ꠛꠞ ꠖꠤꠘ ꠁꠍꠣꠈꠞ ꠈꠣꠘ꠆ꠖꠣꠘꠞ ꠡꠞ꠆ꠖꠣꠞ ꠍꠥꠉꠣꠞꠞ ꠙꠥꠀ ꠘꠕꠘꠦꠟꠦ ꠛꠈꠡꠤꠡ ꠟꠁꠀ ꠀꠁꠟꠣ।
NUM 7:19 ꠔꠣꠁꠘ ꠗꠣꠘ-ꠉꠝꠞ ꠍꠖꠉꠣꠞ ꠟꠣꠉꠤ ꠄꠛꠣꠖꠔ ꠈꠣꠘꠣꠞ ꠝꠣꠙꠦ ꠄꠇ-ꠡ ꠔꠤꠡ ꠔꠟꠣ ꠃꠎꠘꠞ ꠞꠥꠙꠣꠞ ꠄꠇꠈꠣꠘ ꠕꠣꠟ, ꠀꠞ ꠡꠔ꠆ꠔꠁꠞ ꠔꠟꠣ ꠃꠎꠘꠞ ꠞꠥꠙꠣꠞ ꠄꠇ ꠉꠣꠝꠟꠣ ꠀꠘꠤꠀ ꠖꠤꠟꠣ, ꠅꠃ ꠕꠣꠟ ꠀꠞ ꠉꠣꠝꠟꠣꠔ ꠜꠞꠣ ꠀꠍꠤꠟ ꠗꠣꠘ-ꠉꠝꠞ ꠍꠖꠉꠣꠞ ꠘꠤꠅꠔꠦ ꠔꠦꠟ ꠝꠣꠈꠣꠁꠟ ꠝꠄꠖꠣ।
NUM 7:20 ꠀꠉꠞ-ꠈꠥꠡꠛꠄꠄ ꠜꠞꠣ ꠖꠡ ꠔꠟꠣ ꠃꠎꠘꠞ ꠡꠥꠘꠣꠞ ꠄꠇꠐꠣ ꠛꠣꠐꠤ,
NUM 7:21 ꠎꠣꠟꠣꠁꠟ ꠇꠥꠞꠛꠣꠘꠤꠞ ꠟꠣꠉꠤ ꠄꠇꠐꠣ ꠛꠤꠍꠣꠟ, ꠄꠇꠐꠣ ꠝꠦꠠꠣ, ꠄꠇ ꠛꠍꠞ ꠛꠄꠅꠡꠤ ꠄꠉꠥ ꠝꠦꠠꠣ-ꠛꠣꠁꠌ꠆ꠌꠣ,
NUM 7:22 ꠉꠥꠘꠣꠞ ꠇꠚꠞꠣꠞ ꠇꠥꠞꠛꠣꠘꠤꠞ ꠟꠣꠉꠤ ꠄꠉꠥ ꠍꠣꠉꠟ,
NUM 7:23 ꠍꠣꠟꠣꠝꠔꠤ ꠇꠥꠞꠛꠣꠘꠤꠞ ꠟꠣꠉꠤ ꠖꠥꠉꠥ ꠉꠞꠥ, ꠙꠣꠌꠉꠥ ꠝꠦꠠꠣ, ꠙꠣꠌꠉꠥ ꠍꠣꠉꠟ ꠀꠞ ꠄꠇ ꠛꠍꠞ ꠛꠄꠅꠡꠤ ꠙꠣꠌꠉꠥ ꠝꠦꠠꠣ-ꠛꠣꠁꠌ꠆ꠌꠣ ꠀꠘꠟꠣ। ꠅꠔꠣ ꠀꠍꠤꠟ ꠍꠥꠉꠣꠞꠞ ꠙꠥꠀ ꠘꠕꠘꠦꠟꠞ ꠃꠙꠢꠣꠞ।
NUM 7:24 ꠔꠤꠘ ꠘꠝ꠆ꠛꠞ ꠖꠤꠘ ꠍꠛꠥꠟꠘ ꠈꠣꠘ꠆ꠖꠣꠘꠞ ꠡꠞ꠆ꠖꠣꠞ ꠢꠦꠟꠘꠞ ꠙꠥꠀ ꠁꠟꠤꠀꠛꠦ ꠛꠈꠡꠤꠡ ꠟꠁꠀ ꠀꠁꠟꠣ।
NUM 7:25 ꠔꠣꠁꠘ ꠗꠣꠘ-ꠉꠝꠞ ꠍꠖꠉꠣꠞ ꠟꠣꠉꠤ ꠄꠛꠣꠖꠔ ꠈꠣꠘꠣꠞ ꠝꠣꠙꠦ ꠄꠇ-ꠡ ꠔꠤꠡ ꠔꠟꠣ ꠃꠎꠘꠞ ꠞꠥꠙꠣꠞ ꠄꠇꠈꠣꠘ ꠕꠣꠟ, ꠀꠞ ꠡꠔ꠆ꠔꠁꠞ ꠔꠟꠣ ꠃꠎꠘꠞ ꠞꠥꠙꠣꠞ ꠄꠇ ꠉꠣꠝꠟꠣ ꠀꠘꠤꠀ ꠖꠤꠟꠣ, ꠅꠃ ꠕꠣꠟ ꠀꠞ ꠉꠣꠝꠟꠣꠔ ꠜꠞꠣ ꠀꠍꠤꠟ ꠗꠣꠘ-ꠉꠝꠞ ꠍꠖꠉꠣꠞ ꠘꠤꠅꠔꠦ ꠔꠦꠟ ꠝꠣꠈꠣꠁꠟ ꠝꠄꠖꠣ।
NUM 7:26 ꠀꠉꠞ-ꠈꠥꠡꠛꠄꠄ ꠜꠞꠣ ꠖꠡ ꠔꠟꠣ ꠃꠎꠘꠞ ꠡꠥꠘꠣꠞ ꠄꠇꠐꠣ ꠛꠣꠐꠤ,
NUM 7:27 ꠎꠣꠟꠣꠁꠟ ꠇꠥꠞꠛꠣꠘꠤꠞ ꠟꠣꠉꠤ ꠄꠇꠐꠣ ꠛꠤꠍꠣꠟ, ꠄꠇꠐꠣ ꠝꠦꠠꠣ, ꠄꠇ ꠛꠍꠞ ꠛꠄꠅꠡꠤ ꠄꠉꠥ ꠝꠦꠠꠣ-ꠛꠣꠁꠌ꠆ꠌꠣ,
NUM 7:28 ꠉꠥꠘꠣꠞ ꠇꠚꠞꠣꠞ ꠇꠥꠞꠛꠣꠘꠤꠞ ꠟꠣꠉꠤ ꠄꠉꠥ ꠍꠣꠉꠟ,
NUM 7:29 ꠍꠣꠟꠣꠝꠔꠤ ꠇꠥꠞꠛꠣꠘꠤꠞ ꠟꠣꠉꠤ ꠖꠥꠉꠥ ꠉꠞꠥ, ꠙꠣꠌꠉꠥ ꠝꠦꠠꠣ, ꠙꠣꠌꠉꠥ ꠍꠣꠉꠟ ꠀꠞ ꠄꠇ ꠛꠍꠞ ꠛꠄꠅꠡꠤ ꠙꠣꠌꠉꠥ ꠝꠦꠠꠣ-ꠛꠣꠁꠌ꠆ꠌꠣ ꠀꠘꠟꠣ। ꠅꠔꠣ ꠀꠍꠤꠟ ꠢꠦꠟꠘꠞ ꠙꠥꠀ ꠁꠟꠤꠀꠛꠞ ꠃꠙꠢꠣꠞ।
NUM 7:30 ꠌꠣꠁꠞ ꠘꠝ꠆ꠛꠞ ꠖꠤꠘ ꠞꠥꠛꠦꠘ ꠈꠣꠘ꠆ꠖꠣꠘꠞ ꠡꠞ꠆ꠖꠣꠞ ꠡꠣꠖꠤꠃꠞꠞ ꠙꠥꠀ ꠀꠟꠤꠍꠥꠞꠦ ꠛꠈꠡꠤꠡ ꠟꠁꠀ ꠀꠁꠟꠣ।
NUM 7:31 ꠔꠣꠁꠘ ꠗꠣꠘ-ꠉꠝꠞ ꠍꠖꠉꠣꠞ ꠟꠣꠉꠤ ꠄꠛꠣꠖꠔ ꠈꠣꠘꠣꠞ ꠝꠣꠙꠦ ꠄꠇ-ꠡ ꠔꠤꠡ ꠔꠟꠣ ꠃꠎꠘꠞ ꠞꠥꠙꠣꠞ ꠄꠇꠈꠣꠘ ꠕꠣꠟ, ꠀꠞ ꠡꠔ꠆ꠔꠁꠞ ꠔꠟꠣ ꠃꠎꠘꠞ ꠞꠥꠙꠣꠞ ꠄꠇ ꠉꠣꠝꠟꠣ ꠀꠘꠤꠀ ꠖꠤꠟꠣ, ꠅꠃ ꠕꠣꠟ ꠀꠞ ꠉꠣꠝꠟꠣꠔ ꠜꠞꠣ ꠀꠍꠤꠟ ꠗꠣꠘ-ꠉꠝꠞ ꠍꠖꠉꠣꠞ ꠘꠤꠅꠔꠦ ꠔꠦꠟ ꠝꠣꠈꠣꠁꠟ ꠝꠄꠖꠣ।
NUM 7:32 ꠀꠉꠞ-ꠈꠥꠡꠛꠄꠄ ꠜꠞꠣ ꠖꠡ ꠔꠟꠣ ꠃꠎꠘꠞ ꠡꠥꠘꠣꠞ ꠄꠇꠐꠣ ꠛꠣꠐꠤ,
NUM 7:33 ꠎꠣꠟꠣꠁꠟ ꠇꠥꠞꠛꠣꠘꠤꠞ ꠟꠣꠉꠤ ꠄꠇꠐꠣ ꠛꠤꠍꠣꠟ, ꠄꠇꠐꠣ ꠝꠦꠠꠣ, ꠄꠇ ꠛꠍꠞ ꠛꠄꠅꠡꠤ ꠄꠉꠥ ꠝꠦꠠꠣ-ꠛꠣꠁꠌ꠆ꠌꠣ,
NUM 7:34 ꠉꠥꠘꠣꠞ ꠇꠚꠞꠣꠞ ꠇꠥꠞꠛꠣꠘꠤꠞ ꠟꠣꠉꠤ ꠄꠉꠥ ꠍꠣꠉꠟ,
NUM 7:35 ꠍꠣꠟꠣꠝꠔꠤ ꠇꠥꠞꠛꠣꠘꠤꠞ ꠟꠣꠉꠤ ꠖꠥꠉꠥ ꠉꠞꠥ, ꠙꠣꠌꠉꠥ ꠝꠦꠠꠣ, ꠙꠣꠌꠉꠥ ꠍꠣꠉꠟ ꠀꠞ ꠄꠇ ꠛꠍꠞ ꠛꠄꠅꠡꠤ ꠙꠣꠌꠉꠥ ꠝꠦꠠꠣ-ꠛꠣꠁꠌ꠆ꠌꠣ ꠀꠘꠟꠣ। ꠅꠔꠣ ꠀꠍꠤꠟ ꠡꠣꠖꠤꠃꠞꠞ ꠙꠥꠀ ꠀꠟꠤꠍꠥꠞꠞ ꠃꠙꠢꠣꠞ।
NUM 7:36 ꠙꠣꠌ ꠘꠝ꠆ꠛꠞ ꠖꠤꠘ ꠡꠤꠝꠤꠅꠘ ꠈꠣꠘ꠆ꠖꠣꠘꠞ ꠡꠞ꠆ꠖꠣꠞ ꠡꠥꠞꠡꠣꠖꠣꠄꠅꠞ ꠙꠥꠀ ꠡꠣꠟꠥꠝꠤꠟꠦ ꠛꠈꠡꠤꠡ ꠟꠁꠀ ꠀꠁꠟꠣ।
NUM 7:37 ꠔꠣꠁꠘ ꠗꠣꠘ-ꠉꠝꠞ ꠍꠖꠉꠣꠞ ꠟꠣꠉꠤ ꠄꠛꠣꠖꠔ ꠈꠣꠘꠣꠞ ꠝꠣꠙꠦ ꠄꠇ-ꠡ ꠔꠤꠡ ꠔꠟꠣ ꠃꠎꠘꠞ ꠞꠥꠙꠣꠞ ꠄꠇꠈꠣꠘ ꠕꠣꠟ, ꠀꠞ ꠡꠔ꠆ꠔꠁꠞ ꠔꠟꠣ ꠃꠎꠘꠞ ꠞꠥꠙꠣꠞ ꠄꠇ ꠉꠣꠝꠟꠣ ꠀꠘꠤꠀ ꠖꠤꠟꠣ, ꠅꠃ ꠕꠣꠟ ꠀꠞ ꠉꠣꠝꠟꠣꠔ ꠜꠞꠣ ꠀꠍꠤꠟ ꠗꠣꠘ-ꠉꠝꠞ ꠍꠖꠉꠣꠞ ꠘꠤꠅꠔꠦ ꠔꠦꠟ ꠝꠣꠈꠣꠁꠟ ꠝꠄꠖꠣ।
NUM 7:38 ꠀꠉꠞ-ꠈꠥꠡꠛꠄꠄ ꠜꠞꠣ ꠖꠡ ꠔꠟꠣ ꠃꠎꠘꠞ ꠡꠥꠘꠣꠞ ꠄꠇꠐꠣ ꠛꠣꠐꠤ,
NUM 7:39 ꠎꠣꠟꠣꠁꠟ ꠇꠥꠞꠛꠣꠘꠤꠞ ꠟꠣꠉꠤ ꠄꠇꠐꠣ ꠛꠤꠍꠣꠟ, ꠄꠇꠐꠣ ꠝꠦꠠꠣ, ꠄꠇ ꠛꠍꠞ ꠛꠄꠅꠡꠤ ꠄꠉꠥ ꠝꠦꠠꠣ-ꠛꠣꠁꠌ꠆ꠌꠣ,
NUM 7:40 ꠉꠥꠘꠣꠞ ꠇꠚꠞꠣꠞ ꠇꠥꠞꠛꠣꠘꠤꠞ ꠟꠣꠉꠤ ꠄꠉꠥ ꠍꠣꠉꠟ,
NUM 7:41 ꠍꠣꠟꠣꠝꠔꠤ ꠇꠥꠞꠛꠣꠘꠤꠞ ꠟꠣꠉꠤ ꠖꠥꠉꠥ ꠉꠞꠥ, ꠙꠣꠌꠉꠥ ꠝꠦꠠꠣ, ꠙꠣꠌꠉꠥ ꠍꠣꠉꠟ ꠀꠞ ꠄꠇ ꠛꠍꠞ ꠛꠄꠅꠡꠤ ꠙꠣꠌꠉꠥ ꠝꠦꠠꠣ-ꠛꠣꠁꠌ꠆ꠌꠣ ꠀꠘꠟꠣ। ꠅꠔꠣ ꠀꠍꠤꠟ ꠡꠥꠞꠡꠣꠖꠣꠄꠅꠞ ꠙꠥꠀ ꠡꠣꠟꠥꠝꠤꠟꠞ ꠃꠙꠢꠣꠞ।
NUM 7:42 ꠍꠄ ꠘꠝ꠆ꠛꠞ ꠖꠤꠘ ꠍꠣꠖꠥ ꠈꠣꠘ꠆ꠖꠣꠘꠞ ꠡꠞ꠆ꠖꠣꠞ ꠖꠥꠄꠟꠞ ꠙꠥꠀ ꠁꠟꠤꠀꠍꠚꠦ ꠛꠈꠡꠤꠡ ꠟꠁꠀ ꠀꠁꠟꠣ।
NUM 7:43 ꠔꠣꠁꠘ ꠗꠣꠘ-ꠉꠝꠞ ꠍꠖꠉꠣꠞ ꠟꠣꠉꠤ ꠄꠛꠣꠖꠔ ꠈꠣꠘꠣꠞ ꠝꠣꠙꠦ ꠄꠇ-ꠡ ꠔꠤꠡ ꠔꠟꠣ ꠃꠎꠘꠞ ꠞꠥꠙꠣꠞ ꠄꠇꠈꠣꠘ ꠕꠣꠟ, ꠀꠞ ꠡꠔ꠆ꠔꠁꠞ ꠔꠟꠣ ꠃꠎꠘꠞ ꠞꠥꠙꠣꠞ ꠄꠇ ꠉꠣꠝꠟꠣ ꠀꠘꠤꠀ ꠖꠤꠟꠣ, ꠅꠃ ꠕꠣꠟ ꠀꠞ ꠉꠣꠝꠟꠣꠔ ꠜꠞꠣ ꠀꠍꠤꠟ ꠗꠣꠘ-ꠉꠝꠞ ꠍꠖꠉꠣꠞ ꠘꠤꠅꠔꠦ ꠔꠦꠟ ꠝꠣꠈꠣꠁꠟ ꠝꠄꠖꠣ।
NUM 7:44 ꠀꠉꠞ-ꠈꠥꠡꠛꠄꠄ ꠜꠞꠣ ꠖꠡ ꠔꠟꠣ ꠃꠎꠘꠞ ꠡꠥꠘꠣꠞ ꠄꠇꠐꠣ ꠛꠣꠐꠤ,
NUM 7:45 ꠎꠣꠟꠣꠁꠟ ꠇꠥꠞꠛꠣꠘꠤꠞ ꠟꠣꠉꠤ ꠄꠇꠐꠣ ꠛꠤꠍꠣꠟ, ꠄꠇꠐꠣ ꠝꠦꠠꠣ, ꠄꠇ ꠛꠍꠞ ꠛꠄꠅꠡꠤ ꠄꠉꠥ ꠝꠦꠠꠣ-ꠛꠣꠁꠌ꠆ꠌꠣ,
NUM 7:46 ꠉꠥꠘꠣꠞ ꠇꠚꠞꠣꠞ ꠇꠥꠞꠛꠣꠘꠤꠞ ꠟꠣꠉꠤ ꠄꠉꠥ ꠍꠣꠉꠟ,
NUM 7:47 ꠍꠣꠟꠣꠝꠔꠤ ꠇꠥꠞꠛꠣꠘꠤꠞ ꠟꠣꠉꠤ ꠖꠥꠉꠥ ꠉꠞꠥ, ꠙꠣꠌꠉꠥ ꠝꠦꠠꠣ, ꠙꠣꠌꠉꠥ ꠍꠣꠉꠟ ꠀꠞ ꠄꠇ ꠛꠍꠞ ꠛꠄꠅꠡꠤ ꠙꠣꠌꠉꠥ ꠝꠦꠠꠣ-ꠛꠣꠁꠌ꠆ꠌꠣ ꠀꠘꠟꠣ। ꠅꠔꠣ ꠀꠍꠤꠟ ꠖꠥꠄꠟꠞ ꠙꠥꠀ ꠁꠟꠤꠀꠍꠚꠞ ꠃꠙꠢꠣꠞ।
NUM 7:48 ꠡꠣꠔ ꠘꠝ꠆ꠛꠞ ꠖꠤꠘ ꠀꠚꠞꠣꠁꠝ ꠈꠣꠘ꠆ꠖꠣꠘꠞ ꠡꠞ꠆ꠖꠣꠞ ꠀꠝꠤꠢꠥꠖꠞ ꠙꠥꠀ ꠀꠟꠤꠡꠣꠝꠣꠄ ꠛꠈꠡꠤꠡ ꠟꠁꠀ ꠀꠁꠟꠣ।
NUM 7:49 ꠔꠣꠁꠘ ꠗꠣꠘ-ꠉꠝꠞ ꠍꠖꠉꠣꠞ ꠟꠣꠉꠤ ꠄꠛꠣꠖꠔ ꠈꠣꠘꠣꠞ ꠝꠣꠙꠦ ꠄꠇ-ꠡ ꠔꠤꠡ ꠔꠟꠣ ꠃꠎꠘꠞ ꠞꠥꠙꠣꠞ ꠄꠇꠈꠣꠘ ꠕꠣꠟ, ꠀꠞ ꠡꠔ꠆ꠔꠁꠞ ꠔꠟꠣ ꠃꠎꠘꠞ ꠞꠥꠙꠣꠞ ꠄꠇ ꠉꠣꠝꠟꠣ ꠀꠘꠤꠀ ꠖꠤꠟꠣ, ꠅꠃ ꠕꠣꠟ ꠀꠞ ꠉꠣꠝꠟꠣꠔ ꠜꠞꠣ ꠀꠍꠤꠟ ꠗꠣꠘ-ꠉꠝꠞ ꠍꠖꠉꠣꠞ ꠘꠤꠅꠔꠦ ꠔꠦꠟ ꠝꠣꠈꠣꠁꠟ ꠝꠄꠖꠣ।
NUM 7:50 ꠀꠉꠞ-ꠈꠥꠡꠛꠄꠄ ꠜꠞꠣ ꠖꠡ ꠔꠟꠣ ꠃꠎꠘꠞ ꠡꠥꠘꠣꠞ ꠄꠇꠐꠣ ꠛꠣꠐꠤ,
NUM 7:51 ꠎꠣꠟꠣꠁꠟ ꠇꠥꠞꠛꠣꠘꠤꠞ ꠟꠣꠉꠤ ꠄꠇꠐꠣ ꠛꠤꠍꠣꠟ, ꠄꠇꠐꠣ ꠝꠦꠠꠣ, ꠄꠇ ꠛꠍꠞ ꠛꠄꠅꠡꠤ ꠄꠉꠥ ꠝꠦꠠꠣ-ꠛꠣꠁꠌ꠆ꠌꠣ,
NUM 7:52 ꠉꠥꠘꠣꠞ ꠇꠚꠞꠣꠞ ꠇꠥꠞꠛꠣꠘꠤꠞ ꠟꠣꠉꠤ ꠄꠉꠥ ꠍꠣꠉꠟ,
NUM 7:53 ꠍꠣꠟꠣꠝꠔꠤ ꠇꠥꠞꠛꠣꠘꠤꠞ ꠟꠣꠉꠤ ꠖꠥꠉꠥ ꠉꠞꠥ, ꠙꠣꠌꠉꠥ ꠝꠦꠠꠣ, ꠙꠣꠌꠉꠥ ꠍꠣꠉꠟ ꠀꠞ ꠄꠇ ꠛꠍꠞ ꠛꠄꠅꠡꠤ ꠙꠣꠌꠉꠥ ꠝꠦꠠꠣ-ꠛꠣꠁꠌ꠆ꠌꠣ ꠀꠘꠟꠣ। ꠅꠔꠣ ꠀꠍꠤꠟ ꠀꠝꠤꠢꠥꠖꠞ ꠙꠥꠀ ꠀꠟꠤꠡꠣꠝꠣꠞ ꠃꠙꠢꠣꠞ।
NUM 7:54 ꠀꠐ ꠘꠝ꠆ꠛꠞ ꠖꠤꠘ ꠝꠣꠘꠡꠣ ꠈꠣꠘ꠆ꠖꠣꠘꠞ ꠡꠞ꠆ꠖꠣꠞ ꠚꠣꠔꠡꠥꠞꠞ ꠙꠥꠀ ꠉꠝꠟꠤꠄꠟꠦ ꠛꠈꠡꠤꠡ ꠟꠁꠀ ꠀꠁꠟꠣ।
NUM 7:55 ꠔꠣꠁꠘ ꠗꠣꠘ-ꠉꠝꠞ ꠍꠖꠉꠣꠞ ꠟꠣꠉꠤ ꠄꠛꠣꠖꠔ ꠈꠣꠘꠣꠞ ꠝꠣꠙꠦ ꠄꠇ-ꠡ ꠔꠤꠡ ꠔꠟꠣ ꠃꠎꠘꠞ ꠞꠥꠙꠣꠞ ꠄꠇꠈꠣꠘ ꠕꠣꠟ, ꠀꠞ ꠡꠔ꠆ꠔꠁꠞ ꠔꠟꠣ ꠃꠎꠘꠞ ꠞꠥꠙꠣꠞ ꠄꠇ ꠉꠣꠝꠟꠣ ꠀꠘꠤꠀ ꠖꠤꠟꠣ, ꠅꠃ ꠕꠣꠟ ꠀꠞ ꠉꠣꠝꠟꠣꠔ ꠜꠞꠣ ꠀꠍꠤꠟ ꠗꠣꠘ-ꠉꠝꠞ ꠍꠖꠉꠣꠞ ꠘꠤꠅꠔꠦ ꠔꠦꠟ ꠝꠣꠈꠣꠁꠟ ꠝꠄꠖꠣ।
NUM 7:56 ꠀꠉꠞ-ꠈꠥꠡꠛꠄꠄ ꠜꠞꠣ ꠖꠡ ꠔꠟꠣ ꠃꠎꠘꠞ ꠡꠥꠘꠣꠞ ꠄꠇꠐꠣ ꠛꠣꠐꠤ,
NUM 7:57 ꠎꠣꠟꠣꠁꠟ ꠇꠥꠞꠛꠣꠘꠤꠞ ꠟꠣꠉꠤ ꠄꠇꠐꠣ ꠛꠤꠍꠣꠟ, ꠄꠇꠐꠣ ꠝꠦꠠꠣ, ꠄꠇ ꠛꠍꠞ ꠛꠄꠅꠡꠤ ꠄꠉꠥ ꠝꠦꠠꠣ-ꠛꠣꠁꠌ꠆ꠌꠣ,
NUM 7:58 ꠉꠥꠘꠣꠞ ꠇꠚꠞꠣꠞ ꠇꠥꠞꠛꠣꠘꠤꠞ ꠟꠣꠉꠤ ꠄꠉꠥ ꠍꠣꠉꠟ,
NUM 7:59 ꠍꠣꠟꠣꠝꠔꠤ ꠇꠥꠞꠛꠣꠘꠤꠞ ꠟꠣꠉꠤ ꠖꠥꠉꠥ ꠉꠞꠥ, ꠙꠣꠌꠉꠥ ꠝꠦꠠꠣ, ꠙꠣꠌꠉꠥ ꠍꠣꠉꠟ ꠀꠞ ꠄꠇ ꠛꠍꠞ ꠛꠄꠅꠡꠤ ꠙꠣꠌꠉꠥ ꠝꠦꠠꠣ-ꠛꠣꠁꠌ꠆ꠌꠣ ꠀꠘꠟꠣ। ꠅꠔꠣ ꠀꠍꠤꠟ ꠚꠣꠔꠡꠥꠞꠞ ꠙꠥꠀ ꠉꠝꠟꠤꠄꠟꠞ ꠃꠙꠢꠣꠞ।
NUM 7:60 ꠘꠄ ꠘꠝ꠆ꠛꠞ ꠖꠤꠘ ꠛꠤꠘ-ꠁꠀꠝꠤꠘ ꠈꠣꠘ꠆ꠖꠣꠘꠞ ꠡꠞ꠆ꠖꠣꠞ ꠎꠤꠖꠣꠃꠘꠤꠞ ꠙꠥꠀ ꠀꠛꠤꠖꠣꠘꠦ ꠛꠈꠡꠤꠡ ꠟꠁꠀ ꠀꠁꠟꠣ।
NUM 7:61 ꠔꠣꠁꠘ ꠗꠣꠘ-ꠉꠝꠞ ꠍꠖꠉꠣꠞ ꠟꠣꠉꠤ ꠄꠛꠣꠖꠔ ꠈꠣꠘꠣꠞ ꠝꠣꠙꠦ ꠄꠇ-ꠡ ꠔꠤꠡ ꠔꠟꠣ ꠃꠎꠘꠞ ꠞꠥꠙꠣꠞ ꠄꠇꠈꠣꠘ ꠕꠣꠟ, ꠀꠞ ꠡꠔ꠆ꠔꠁꠞ ꠔꠟꠣ ꠃꠎꠘꠞ ꠞꠥꠙꠣꠞ ꠄꠇ ꠉꠣꠝꠟꠣ ꠀꠘꠤꠀ ꠖꠤꠟꠣ, ꠅꠃ ꠕꠣꠟ ꠀꠞ ꠉꠣꠝꠟꠣꠔ ꠜꠞꠣ ꠀꠍꠤꠟ ꠗꠣꠘ-ꠉꠝꠞ ꠍꠖꠉꠣꠞ ꠘꠤꠅꠔꠦ ꠔꠦꠟ ꠝꠣꠈꠣꠁꠟ ꠝꠄꠖꠣ।
NUM 7:62 ꠀꠉꠞ-ꠈꠥꠡꠛꠄꠄ ꠜꠞꠣ ꠖꠡ ꠔꠟꠣ ꠃꠎꠘꠞ ꠡꠥꠘꠣꠞ ꠄꠇꠐꠣ ꠛꠣꠐꠤ,
NUM 7:63 ꠎꠣꠟꠣꠁꠟ ꠇꠥꠞꠛꠣꠘꠤꠞ ꠟꠣꠉꠤ ꠄꠇꠐꠣ ꠛꠤꠍꠣꠟ, ꠄꠇꠐꠣ ꠝꠦꠠꠣ, ꠄꠇ ꠛꠍꠞ ꠛꠄꠅꠡꠤ ꠄꠉꠥ ꠝꠦꠠꠣ-ꠛꠣꠁꠌ꠆ꠌꠣ,
NUM 7:64 ꠉꠥꠘꠣꠞ ꠇꠚꠞꠣꠞ ꠇꠥꠞꠛꠣꠘꠤꠞ ꠟꠣꠉꠤ ꠄꠉꠥ ꠍꠣꠉꠟ,
NUM 7:65 ꠍꠣꠟꠣꠝꠔꠤ ꠇꠥꠞꠛꠣꠘꠤꠞ ꠟꠣꠉꠤ ꠖꠥꠉꠥ ꠉꠞꠥ, ꠙꠣꠌꠉꠥ ꠝꠦꠠꠣ, ꠙꠣꠌꠉꠥ ꠍꠣꠉꠟ ꠀꠞ ꠄꠇ ꠛꠍꠞ ꠛꠄꠅꠡꠤ ꠙꠣꠌꠉꠥ ꠝꠦꠠꠣ-ꠛꠣꠁꠌ꠆ꠌꠣ ꠀꠘꠟꠣ। ꠅꠔꠣ ꠀꠍꠤꠟ ꠎꠤꠖꠣꠃꠘꠤꠞ ꠙꠥꠀ ꠀꠛꠤꠖꠣꠘꠞ ꠃꠙꠢꠣꠞ।
NUM 7:66 ꠖꠡ ꠘꠝ꠆ꠛꠞ ꠖꠤꠘ ꠖꠣꠘ ꠈꠣꠘ꠆ꠖꠣꠘꠞ ꠡꠞ꠆ꠖꠣꠞ ꠀꠝꠤꠡꠣꠖꠣꠞ ꠙꠥꠀ ꠀꠈꠤꠀꠎꠣꠞꠦ ꠛꠈꠡꠤꠡ ꠟꠁꠀ ꠀꠁꠟꠣ।
NUM 7:67 ꠔꠣꠁꠘ ꠗꠣꠘ-ꠉꠝꠞ ꠍꠖꠉꠣꠞ ꠟꠣꠉꠤ ꠄꠛꠣꠖꠔ ꠈꠣꠘꠣꠞ ꠝꠣꠙꠦ ꠄꠇ-ꠡ ꠔꠤꠡ ꠔꠟꠣ ꠃꠎꠘꠞ ꠞꠥꠙꠣꠞ ꠄꠇꠈꠣꠘ ꠕꠣꠟ, ꠀꠞ ꠡꠔ꠆ꠔꠁꠞ ꠔꠟꠣ ꠃꠎꠘꠞ ꠞꠥꠙꠣꠞ ꠄꠇ ꠉꠣꠝꠟꠣ ꠀꠘꠤꠀ ꠖꠤꠟꠣ, ꠅꠃ ꠕꠣꠟ ꠀꠞ ꠉꠣꠝꠟꠣꠔ ꠜꠞꠣ ꠀꠍꠤꠟ ꠗꠣꠘ-ꠉꠝꠞ ꠍꠖꠉꠣꠞ ꠘꠤꠅꠔꠦ ꠔꠦꠟ ꠝꠣꠈꠣꠁꠟ ꠝꠄꠖꠣ।
NUM 7:68 ꠀꠉꠞ-ꠈꠥꠡꠛꠄꠄ ꠜꠞꠣ ꠖꠡ ꠔꠟꠣ ꠃꠎꠘꠞ ꠡꠥꠘꠣꠞ ꠄꠇꠐꠣ ꠛꠣꠐꠤ,
NUM 7:69 ꠎꠣꠟꠣꠁꠟ ꠇꠥꠞꠛꠣꠘꠤꠞ ꠟꠣꠉꠤ ꠄꠇꠐꠣ ꠛꠤꠍꠣꠟ, ꠄꠇꠐꠣ ꠝꠦꠠꠣ, ꠄꠇ ꠛꠍꠞ ꠛꠄꠅꠡꠤ ꠄꠉꠥ ꠝꠦꠠꠣ-ꠛꠣꠁꠌ꠆ꠌꠣ,
NUM 7:70 ꠉꠥꠘꠣꠞ ꠇꠚꠞꠣꠞ ꠇꠥꠞꠛꠣꠘꠤꠞ ꠟꠣꠉꠤ ꠄꠉꠥ ꠍꠣꠉꠟ,
NUM 7:71 ꠍꠣꠟꠣꠝꠔꠤ ꠇꠥꠞꠛꠣꠘꠤꠞ ꠟꠣꠉꠤ ꠖꠥꠉꠥ ꠉꠞꠥ, ꠙꠣꠌꠉꠥ ꠝꠦꠠꠣ, ꠙꠣꠌꠉꠥ ꠍꠣꠉꠟ ꠀꠞ ꠄꠇ ꠛꠍꠞ ꠛꠄꠅꠡꠤ ꠙꠣꠌꠉꠥ ꠝꠦꠠꠣ-ꠛꠣꠁꠌ꠆ꠌꠣ ꠀꠘꠟꠣ। ꠅꠔꠣ ꠀꠍꠤꠟ ꠀꠝꠤꠡꠣꠖꠣꠞ ꠙꠥꠀ ꠀꠈꠤꠀꠎꠣꠞꠞ ꠃꠙꠢꠣꠞ।
NUM 7:72 ꠄꠉꠣꠞꠅ ꠘꠝ꠆ꠛꠞ ꠖꠤꠘ ꠀꠡꠤꠞ ꠈꠣꠘ꠆ꠖꠣꠘꠞ ꠡꠞ꠆ꠖꠣꠞ ꠃꠇꠞꠣꠘꠞ ꠙꠥꠀ ꠚꠎꠤꠄꠟꠦ ꠛꠈꠡꠤꠡ ꠟꠁꠀ ꠀꠁꠟꠣ।
NUM 7:73 ꠔꠣꠁꠘ ꠗꠣꠘ-ꠉꠝꠞ ꠍꠖꠉꠣꠞ ꠟꠣꠉꠤ ꠄꠛꠣꠖꠔ ꠈꠣꠘꠣꠞ ꠝꠣꠙꠦ ꠄꠇ-ꠡ ꠔꠤꠡ ꠔꠟꠣ ꠃꠎꠘꠞ ꠞꠥꠙꠣꠞ ꠄꠇꠈꠣꠘ ꠕꠣꠟ, ꠀꠞ ꠡꠔ꠆ꠔꠁꠞ ꠔꠟꠣ ꠃꠎꠘꠞ ꠞꠥꠙꠣꠞ ꠄꠇ ꠉꠣꠝꠟꠣ ꠀꠘꠤꠀ ꠖꠤꠟꠣ, ꠅꠃ ꠕꠣꠟ ꠀꠞ ꠉꠣꠝꠟꠣꠔ ꠜꠞꠣ ꠀꠍꠤꠟ ꠗꠣꠘ-ꠉꠝꠞ ꠍꠖꠉꠣꠞ ꠘꠤꠅꠔꠦ ꠔꠦꠟ ꠝꠣꠈꠣꠁꠟ ꠝꠄꠖꠣ।
NUM 7:74 ꠀꠉꠞ-ꠈꠥꠡꠛꠄꠄ ꠜꠞꠣ ꠖꠡ ꠔꠟꠣ ꠃꠎꠘꠞ ꠡꠥꠘꠣꠞ ꠄꠇꠐꠣ ꠛꠣꠐꠤ,
NUM 7:75 ꠎꠣꠟꠣꠁꠟ ꠇꠥꠞꠛꠣꠘꠤꠞ ꠟꠣꠉꠤ ꠄꠇꠐꠣ ꠛꠤꠍꠣꠟ, ꠄꠇꠐꠣ ꠝꠦꠠꠣ, ꠄꠇ ꠛꠍꠞ ꠛꠄꠅꠡꠤ ꠄꠉꠥ ꠝꠦꠠꠣ-ꠛꠣꠁꠌ꠆ꠌꠣ,
NUM 7:76 ꠉꠥꠘꠣꠞ ꠇꠚꠞꠣꠞ ꠇꠥꠞꠛꠣꠘꠤꠞ ꠟꠣꠉꠤ ꠄꠉꠥ ꠍꠣꠉꠟ,
NUM 7:77 ꠍꠣꠟꠣꠝꠔꠤ ꠇꠥꠞꠛꠣꠘꠤꠞ ꠟꠣꠉꠤ ꠖꠥꠉꠥ ꠉꠞꠥ, ꠙꠣꠌꠉꠥ ꠝꠦꠠꠣ, ꠙꠣꠌꠉꠥ ꠍꠣꠉꠟ ꠀꠞ ꠄꠇ ꠛꠍꠞ ꠛꠄꠅꠡꠤ ꠙꠣꠌꠉꠥ ꠝꠦꠠꠣ-ꠛꠣꠁꠌ꠆ꠌꠣ ꠀꠘꠟꠣ। ꠅꠔꠣ ꠀꠍꠤꠟ ꠃꠇꠞꠣꠘꠞ ꠙꠥꠀ ꠚꠎꠤꠄꠟꠞ ꠃꠙꠢꠣꠞ।
NUM 7:78 ꠛꠣꠞꠅ ꠘꠝ꠆ꠛꠞ ꠖꠤꠘ ꠘꠙ꠆ꠔꠣꠟꠤ ꠈꠣꠘ꠆ꠖꠣꠘꠞ ꠡꠞ꠆ꠖꠣꠞ ꠁꠘꠣꠘꠞ ꠙꠥꠀ ꠀꠢꠤꠞꠦ ꠛꠈꠡꠤꠡ ꠟꠁꠀ ꠀꠁꠟꠣ।
NUM 7:79 ꠔꠣꠁꠘ ꠗꠣꠘ-ꠉꠝꠞ ꠍꠖꠉꠣꠞ ꠟꠣꠉꠤ ꠄꠛꠣꠖꠔ ꠈꠣꠘꠣꠞ ꠝꠣꠙꠦ ꠄꠇ-ꠡ ꠔꠤꠡ ꠔꠟꠣ ꠃꠎꠘꠞ ꠞꠥꠙꠣꠞ ꠄꠇꠈꠣꠘ ꠕꠣꠟ, ꠀꠞ ꠡꠔ꠆ꠔꠁꠞ ꠔꠟꠣ ꠃꠎꠘꠞ ꠞꠥꠙꠣꠞ ꠄꠇ ꠉꠣꠝꠟꠣ ꠀꠘꠤꠀ ꠖꠤꠟꠣ, ꠅꠃ ꠕꠣꠟ ꠀꠞ ꠉꠣꠝꠟꠣꠔ ꠜꠞꠣ ꠀꠍꠤꠟ ꠗꠣꠘ-ꠉꠝꠞ ꠍꠖꠉꠣꠞ ꠘꠤꠅꠔꠦ ꠔꠦꠟ ꠝꠣꠈꠣꠁꠟ ꠝꠄꠖꠣ।
NUM 7:80 ꠀꠉꠞ-ꠈꠥꠡꠛꠄꠄ ꠜꠞꠣ ꠖꠡ ꠔꠟꠣ ꠃꠎꠘꠞ ꠡꠥꠘꠣꠞ ꠄꠇꠐꠣ ꠛꠣꠐꠤ,
NUM 7:81 ꠎꠣꠟꠣꠁꠟ ꠇꠥꠞꠛꠣꠘꠤꠞ ꠟꠣꠉꠤ ꠄꠇꠐꠣ ꠛꠤꠍꠣꠟ, ꠄꠇꠐꠣ ꠝꠦꠠꠣ, ꠄꠇ ꠛꠍꠞ ꠛꠄꠅꠡꠤ ꠄꠉꠥ ꠝꠦꠠꠣ-ꠛꠣꠁꠌ꠆ꠌꠣ,
NUM 7:82 ꠉꠥꠘꠣꠞ ꠇꠚꠞꠣꠞ ꠇꠥꠞꠛꠣꠘꠤꠞ ꠟꠣꠉꠤ ꠄꠉꠥ ꠍꠣꠉꠟ,
NUM 7:83 ꠍꠣꠟꠣꠝꠔꠤ ꠇꠥꠞꠛꠣꠘꠤꠞ ꠟꠣꠉꠤ ꠖꠥꠉꠥ ꠉꠞꠥ, ꠙꠣꠌꠉꠥ ꠝꠦꠠꠣ, ꠙꠣꠌꠉꠥ ꠍꠣꠉꠟ ꠀꠞ ꠄꠇ ꠛꠍꠞ ꠛꠄꠅꠡꠤ ꠙꠣꠌꠉꠥ ꠝꠦꠠꠣ-ꠛꠣꠁꠌ꠆ꠌꠣ ꠀꠘꠟꠣ। ꠅꠔꠣ ꠀꠍꠤꠟ ꠁꠘꠣꠘꠞ ꠙꠥꠀ ꠀꠢꠤꠞꠞ ꠃꠙꠢꠣꠞ।
NUM 7:84 ꠔꠦ ꠙꠛꠤꠔ꠆ꠞ ꠔꠦꠟ ꠖꠤꠀ ꠇꠥꠞꠛꠣꠘꠤ ꠈꠣꠘꠣꠞꠦ ꠛꠅꠀꠁꠟ ꠇꠞꠣꠞ ꠡꠝꠄ ꠛꠘꠤ ꠁꠍꠞꠣꠁꠟꠞ ꠡꠞ꠆ꠖꠣꠞ ꠅꠇꠟꠦ ꠎꠦꠔꠣ ꠖꠣꠘ ꠇꠞꠍꠟꠣ ꠁꠔꠣ ꠅꠁꠟ, ꠛꠣꠞꠅ ꠈꠣꠘ ꠞꠥꠙꠣꠞ ꠕꠣꠟ, ꠛꠣꠞꠅꠐꠣ ꠞꠥꠙꠣꠞ ꠉꠣꠝꠟꠣ ꠀꠞ ꠛꠣꠞꠅꠐꠣ ꠡꠥꠘꠣꠞ ꠛꠣꠐꠤ।
NUM 7:85 ꠄꠛꠣꠖꠔ ꠈꠣꠘꠣꠞ ꠝꠣꠙꠦ ꠙꠞꠔꠦꠇ ꠞꠥꠙꠣꠞ ꠕꠣꠟꠞ ꠃꠎꠘ ꠀꠍꠤꠟ ꠄꠇ-ꠡ ꠔꠤꠡ ꠔꠟꠣ ꠀꠞ ꠉꠣꠝꠟꠣꠞ ꠃꠎꠘ ꠀꠍꠤꠟ ꠡꠔ꠆ꠔꠁꠞ ꠔꠟꠣ। ꠞꠥꠙꠣꠞ ꠢꠇꠟ ꠕꠣꠟ-ꠛꠣꠡꠘꠞ ꠝꠥꠐ ꠃꠎꠘ ꠀꠍꠤꠟ ꠖꠥꠁ ꠀꠎꠣꠞ ꠌꠣꠁꠞ-ꠡ ꠔꠟꠣ।
NUM 7:86 ꠀꠉꠞ-ꠈꠥꠡꠛꠄꠄ ꠜꠞꠣ ꠙꠞꠔꠦꠇ ꠡꠥꠘꠣꠞ ꠛꠣꠐꠤꠞ ꠃꠎꠘ ꠀꠍꠤꠟ ꠖꠡ ꠔꠟꠣ, ꠡꠥꠘꠣꠞ ꠛꠣꠞꠅꠐꠣ ꠛꠣꠐꠤꠞ ꠝꠥꠐ ꠃꠎꠘ ꠀꠍꠤꠟ ꠄꠇ-ꠡ ꠛꠤꠡ ꠔꠟꠣ।
NUM 7:87 ꠎꠣꠟꠣꠁꠟ ꠇꠥꠞꠛꠣꠘꠤꠞ ꠟꠣꠉꠤ ꠝꠥꠐ ꠛꠣꠞꠅꠉꠥ ꠛꠤꠍꠣꠟ, ꠛꠣꠞꠅꠉꠥ ꠝꠦꠠꠣ ꠀꠞ ꠄꠇ ꠛꠍꠞ ꠛꠄꠅꠡꠤ ꠛꠣꠞꠅꠉꠥ ꠝꠦꠠꠣ-ꠛꠣꠁꠌ꠆ꠌꠣꠅ ꠄꠞꠣ ꠖꠣꠘ ꠇꠞꠍꠟꠣ। ꠀꠞ ꠄꠞꠟꠉꠞ ꠗꠣꠘ-ꠉꠝꠞ ꠍꠖꠉꠣꠞ ꠢꠇꠟ ꠎꠤꠘꠤꠡ। ꠉꠥꠘꠣꠞ ꠇꠚꠞꠣꠞ ꠇꠥꠞꠛꠣꠘꠤꠞ ꠟꠣꠉꠤ ꠝꠥꠐ ꠛꠣꠞꠅꠉꠥ ꠍꠣꠉꠟ ꠖꠦꠅꠀ ꠅꠁꠍꠤꠟ।
NUM 7:88 ꠍꠣꠟꠣꠝꠔꠤ ꠇꠥꠞꠛꠣꠘꠤꠞ ꠟꠣꠉꠤ ꠝꠥꠐ ꠌꠛ꠆ꠛꠤꠡꠉꠥ ꠉꠞꠥ, ꠡꠣꠁꠐꠉꠥ ꠝꠦꠠꠣ, ꠡꠣꠁꠐꠉꠥ ꠍꠣꠉꠟ, ꠄꠇ ꠛꠍꠞ ꠛꠄꠅꠡꠤ ꠡꠣꠁꠐꠉꠥ ꠝꠦꠠꠣ-ꠛꠣꠁꠌ꠆ꠌꠣ। ꠙꠛꠤꠔ꠆ꠞ ꠔꠦꠟ ꠍꠤꠐꠣꠁꠀ ꠢꠣꠞꠤ ꠇꠥꠞꠛꠣꠘꠤ ꠈꠣꠘꠣꠞꠦ ꠛꠅꠀꠁꠟ ꠇꠞꠣꠞ ꠡꠝꠄ ꠃꠙꠢꠣꠞ ꠢꠤꠡꠣꠛꠦ ꠁ ꠢꠇꠟꠔꠣ ꠖꠦꠅꠀ ꠅꠁꠍꠤꠟ।
NUM 7:89 ꠄꠞꠛꠣꠖꠦ ꠝꠥꠍꠣ ꠘꠛꠤꠄ ꠎꠦꠛꠟꠣꠃ ꠝꠣꠛꠥꠖꠞ ꠟꠉꠦ ꠛꠣꠔꠌꠤꠔ ꠇꠞꠣꠞ ꠟꠣꠉꠤ ꠝꠤꠟꠘ-ꠔꠣꠝ꠆ꠛꠥꠔ ꠢꠣꠝꠣꠁꠔꠣ, ꠅꠃ ꠡꠝꠄ ꠡꠣꠢꠣꠖꠔ ꠡꠘ꠆ꠖꠥꠇꠞ ꠓꠣꠇꠘꠣꠞ ꠃꠙꠞꠦ ꠎꠦ ꠖꠥꠁꠅ ꠇꠣꠞꠥꠛꠤ ꠞꠂꠘ, ꠄꠞꠣꠞ ꠝꠣꠎꠈꠣꠘ ꠕꠣꠇꠤ ꠔꠣꠘ ꠛꠥꠟꠤ ꠢꠥꠘꠔꠣ। ꠝꠣꠛꠥꠖꠦ ꠅꠃ ꠘꠝꠥꠘꠣꠄ ꠝꠥꠍꠣ ꠘꠛꠤꠞ ꠟꠉꠦ ꠛꠣꠔꠌꠤꠔ ꠇꠞꠔꠣ।
NUM 8:1 ꠝꠣꠛꠥꠖꠦ ꠝꠥꠍꠣ ꠘꠛꠤꠞꠦ ꠇꠁꠟꠣ,
NUM 8:2 “ꠔꠥꠝꠤ ꠢꠣꠞꠥꠘꠞꠦ ꠇꠅ, ꠀꠝꠣꠞ ꠊꠞꠞ ꠌꠦꠞꠣꠉ ꠖꠣꠘꠤꠞ ꠝꠣꠎꠞ ꠡꠣꠔꠅꠐꠣ ꠌꠦꠞꠣꠉ ꠅꠃ ꠘꠝꠥꠘꠣꠄ ꠟꠣꠉꠣꠁꠔꠣ, ꠎꠣꠔꠦ ꠌꠦꠞꠣꠉꠞ ꠚꠞ ꠌꠦꠞꠣꠉ ꠖꠣꠘꠤꠞ ꠍꠣꠝꠘꠣ ꠛꠣꠄ ꠙꠠꠦ।”
NUM 8:3 ꠢꠣꠞꠥꠘꠦ ꠅꠟꠣꠃ ꠇꠞꠟꠣ। ꠝꠥꠍꠣꠞꠦ ꠛꠣꠔꠣꠁꠟ ꠝꠣꠛꠥꠖꠞ ꠢꠥꠇꠥꠝ ꠝꠣꠚꠤꠇ ꠔꠣꠁꠘ ꠢꠇꠟ ꠌꠦꠞꠣꠉ ꠅꠟꠣꠈꠣꠘ ꠛꠅꠀꠁꠟꠣ, ꠎꠣꠔꠦ ꠌꠦꠞꠣꠉꠞ ꠚꠞ ꠌꠦꠞꠣꠉ ꠖꠣꠘꠤꠞ ꠍꠣꠝꠘꠦꠖꠤ ꠙꠠꠦ।
NUM 8:4 ꠌꠦꠞꠣꠉ ꠖꠣꠘꠤꠞ ꠔꠟ ꠕꠣꠇꠤ ꠀꠉꠣꠞ ꠚꠥꠟ ꠙꠞ꠆ꠎꠘ꠆ꠔ ꠀꠡ꠆ꠔꠣꠐꠣ ꠈꠣꠐꠤ ꠡꠥꠘꠣ ꠙꠤꠐꠣꠁꠀ ꠛꠣꠘꠣꠁꠟ ꠅꠁꠟ। ꠝꠣꠛꠥꠖꠦ ꠝꠥꠍꠣꠞꠦ ꠎꠦꠟꠣ ꠘꠇꠡꠣ ꠖꠦꠈꠣꠁꠍꠟꠣ, ꠑꠤꠇ ꠅꠃ ꠟꠣꠈꠣꠘ ꠌꠦꠞꠣꠉ ꠖꠣꠘꠤ ꠛꠣꠘꠣꠁꠟ ꠅꠁꠟ।
NUM 8:5 ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ,
NUM 8:6 “ꠔꠥꠝꠤ ꠛꠘꠤ ꠁꠍꠞꠣꠁꠟꠞ ꠝꠣꠎ ꠕꠣꠇꠤ, ꠟꠦꠛꠤ ꠈꠣꠘ꠆ꠖꠣꠘꠞꠦ ꠀꠟꠉ ꠇꠞꠤꠀ ꠙꠣꠇ-ꠙꠣꠇꠤꠎꠣ ꠇꠞꠅ।
NUM 8:7 ꠁ ꠙꠣꠇ-ꠙꠣꠇꠤꠎꠣ ꠇꠞꠣꠞ ꠘꠤꠅꠝ ꠅꠁꠟ, ꠙꠄꠟꠣ ꠔꠣꠞꠣꠞ ꠃꠙꠞꠦ ꠙꠣꠇ-ꠙꠛꠤꠔ꠆ꠞ ꠅꠀꠞ ꠙꠣꠘꠤ ꠍꠤꠐꠣꠁꠀ ꠖꠤꠛꠣꠄ, ꠍꠤꠐꠣꠁꠀ ꠔꠣꠞꠣ ꠘꠤꠎꠦ ꠀꠡ꠆ꠔꠣ ꠡꠞꠤꠟꠞ ꠌꠥꠟ ꠇꠣꠝꠣꠁꠀ ꠇꠣꠙꠠ-ꠌꠥꠙꠠ ꠗꠁꠀ ꠙꠣꠇ-ꠍꠣꠚ ꠛꠘꠛꠣ।
NUM 8:8 ꠀꠞ ꠔꠣꠞꠣ ꠇꠥꠞꠛꠣꠘꠤꠞ ꠟꠣꠉꠤ ꠄꠉꠥ ꠛꠤꠍꠣꠟ ꠀꠘꠛꠣ, ꠛꠤꠍꠣꠟꠞ ꠟꠉꠦ ꠗꠣꠘ-ꠉꠝꠞ ꠍꠖꠉꠣꠞ ꠟꠣꠉꠤ ꠔꠦꠟ ꠝꠣꠈꠣꠁꠟ ꠝꠄꠖꠣ, ꠉꠥꠘꠣꠞ ꠇꠚꠞꠣꠞ ꠇꠥꠞꠛꠣꠘꠤꠞ ꠟꠣꠉꠤꠅ ꠀꠞꠇꠐꠣ ꠛꠤꠍꠣꠟ ꠀꠘꠣꠁꠅ।
NUM 8:9 ꠛꠣꠖꠦ ꠔꠥꠝꠤ ꠟꠦꠛꠤ ꠅꠇꠟꠞꠦ ꠟꠁꠀ ꠝꠤꠟꠘ-ꠔꠣꠝ꠆ꠛꠥꠞ ꠍꠣꠝꠘꠦ ꠀꠁꠛꠣꠄ, ꠀꠁꠀ ꠢꠇ꠆ꠇꠟ ꠛꠘꠤ ꠁꠍꠞꠣꠁꠟꠞꠦ ꠢꠘꠅ ꠖꠟꠣ ꠇꠞꠛꠣꠄ।
NUM 8:10 ꠟꠦꠛꠤ ꠅꠇꠟꠞꠦ ꠔꠥꠝꠤ ꠝꠣꠛꠥꠖꠞ ꠖꠞꠛꠣꠞꠅ ꠀꠎꠤꠞ ꠇꠞꠛꠣꠄ ꠀꠞ ꠢꠇꠟ ꠛꠘꠤ ꠁꠍꠞꠣꠁꠟꠦ ꠔꠣꠞꠣꠞꠦ ꠀꠔꠣꠁꠀ ꠡꠙꠤꠀ ꠖꠤꠛꠣ।
NUM 8:11 ꠁꠝꠣꠝ ꠢꠣꠞꠥꠘꠦ ꠢꠇꠟ ꠛꠘꠤ ꠁꠍꠞꠣꠁꠟꠞ ꠙꠇ꠆ꠇ ꠕꠣꠇꠤ, ꠖꠥꠟꠘꠣ ꠇꠥꠞꠛꠣꠘꠤ ꠢꠤꠡꠣꠛꠦ ꠟꠦꠛꠤ ꠅꠇꠟꠞꠦ ꠝꠣꠛꠥꠖꠞ ꠍꠣꠝꠘꠦ ꠛꠈꠡꠤꠀ ꠖꠤꠛꠣ, ꠔꠦꠃ ꠔꠣꠞꠣ ꠝꠣꠛꠥꠖꠞ ꠈꠦꠎꠝꠔꠅ ꠇꠣꠝ-ꠇꠣꠎ ꠇꠞꠔꠣ ꠙꠣꠞꠛꠣ।
NUM 8:12 ꠛꠣꠖꠦ ꠟꠦꠛꠤ ꠅꠇꠟꠦ ꠢꠃ ꠖꠥꠁꠅ ꠛꠤꠍꠣꠟꠞ ꠇꠟ꠆ꠟꠣꠞ ꠃꠙꠞꠦ ꠀꠔꠣꠁ ꠖꠤꠛꠣ, ꠖꠤꠟꠦ ꠔꠥꠝꠤ ꠄꠞ ꠄꠇꠐꠣ ꠖꠤꠀ ꠉꠥꠘꠣꠞ ꠇꠚꠞꠣꠞ ꠇꠥꠞꠛꠣꠘꠤ ꠀꠞ ꠖꠥꠍꠞꠣꠐꠣ ꠖꠤꠀ ꠎꠣꠟꠣꠁꠟ ꠇꠥꠞꠛꠣꠘꠤ ꠀꠖꠣꠄ ꠇꠞꠤꠅ। ꠅꠟꠣꠈꠣꠘ ꠟꠦꠛꠤ ꠅꠇꠟꠞ ꠘꠣꠙꠣꠇꠤꠞ ꠇꠚꠞꠣ ꠀꠖꠣꠄ ꠅꠁꠛ।
NUM 8:13 ꠔꠥꠝꠤ ꠟꠦꠛꠤ ꠅꠇꠟꠞꠦ ꠢꠣꠞꠥꠘ ꠀꠞ ꠔꠣꠞ ꠙꠥꠀꠂꠘ꠆ꠔꠞ ꠍꠣꠝꠘꠦ ꠃꠛꠣ ꠇꠞꠣꠁꠀ, ꠝꠣꠛꠥꠖꠞ ꠘꠣꠝꠦ ꠔꠣꠞꠣꠞꠦ ꠖꠥꠟꠘꠣ ꠇꠥꠞꠛꠣꠘꠤ ꠢꠤꠡꠣꠛꠦ ꠡꠙꠤꠀ ꠖꠤꠛꠣꠄ।
NUM 8:14 ꠅꠃ ꠟꠣꠈꠣꠘ ꠔꠥꠝꠤ ꠅꠁꠘ꠆ꠘ ꠛꠘꠤ ꠁꠍꠞꠣꠁꠟ ꠕꠣꠇꠤ ꠟꠦꠛꠤ ꠈꠣꠘ꠆ꠖꠣꠘꠞꠦ ꠀꠟꠉ ꠇꠞꠛꠣꠄ, ꠔꠦꠃ ꠔꠣꠞꠣ ꠈꠣꠟꠤ ꠀꠝꠣꠞ ꠅꠁꠛꠣ।
NUM 8:15 “ꠟꠦꠛꠤ ꠅꠇꠟꠞꠦ ꠙꠣꠇ-ꠙꠣꠇꠤꠎꠣ ꠇꠞꠤꠀ ꠖꠥꠟꠘꠣ ꠇꠥꠞꠛꠣꠘꠤ ꠢꠤꠡꠣꠛꠦ ꠡꠙꠤꠀ ꠖꠤꠀ ꠢꠣꠞꠟꠦ, ꠔꠣꠞꠣ ꠝꠤꠟꠘ-ꠔꠣꠝ꠆ꠛꠥꠞ ꠈꠦꠎꠝꠔꠅ ꠀꠁꠛꠣ।
NUM 8:16 ꠛꠘꠤ ꠁꠍꠞꠣꠁꠟ ꠕꠣꠇꠤ ꠛꠣꠍꠤꠀ ꠀꠟꠉ ꠇꠞꠣ ꠁ ꠟꠦꠛꠤ ꠈꠣꠘ꠆ꠖꠣꠘ ꠈꠣꠟꠤ ꠀꠝꠣꠞ, ꠀꠞ ꠇꠦꠃꠞꠞ ꠘꠣꠄ। ꠙꠞꠔꠦꠇ ꠁꠍꠞꠣꠁꠟꠤ ꠛꠦꠐꠤꠘ꠆ꠔꠞ ꠙꠄꠟꠣ ꠙꠥꠀꠞ ꠛꠖꠟꠣ ꠀꠝꠤ ꠟꠦꠛꠤ ꠈꠣꠘ꠆ꠖꠣꠘꠞꠦ ꠀꠝꠣꠞ ꠘꠤꠎꠞ ꠛꠣꠘꠣꠁꠍꠤ।
NUM 8:17 ꠛꠘꠤ ꠁꠍꠞꠣꠁꠟꠞ ꠊꠞꠅ ꠎꠘꠝ ꠟꠅꠀ ꠢꠇꠟ ꠙꠄꠟꠣ ꠙꠥꠀꠂꠘ ꠀꠝꠣꠞ। ꠀꠝꠤ ꠝꠤꠡꠞꠤ ꠅꠇꠟꠞ ꠙꠄꠟꠣ ꠙꠥꠀꠂꠘ꠆ꠔꠞꠦ ꠝꠣꠞꠤꠟꠤꠛꠣꠞ ꠇꠣꠟꠅ, ꠛꠘꠤ ꠁꠍꠞꠣꠁꠟꠞ ꠙꠞꠔꠦꠇ ꠙꠄꠟꠣ ꠙꠥꠀꠞꠦ ꠀꠝꠣꠞ ꠟꠣꠉꠤ ꠙꠛꠤꠔ꠆ꠞ ꠇꠞꠤꠀ ꠞꠣꠈꠍꠤ, ꠁꠔꠣ ꠝꠣꠘꠡꠞ ꠙꠥꠔ ꠅꠃꠇ ꠛꠣ ꠙꠡꠥꠞ ꠛꠣꠁꠌ꠆ꠌꠣ ꠅꠃꠇ, ꠁꠔꠣ ꠔ ꠀꠝꠣꠞ।
NUM 8:18 ꠀꠞ ꠅꠈꠘ ꠀꠝꠤ ꠛꠘꠤ ꠁꠍꠞꠣꠁꠟꠞ ꠙꠄꠟꠣ ꠙꠥꠀꠂꠘ꠆ꠔꠞ ꠎꠣꠉꠣꠔ ꠈꠣꠟꠤ ꠟꠦꠛꠤ ꠅꠇꠟꠞꠦ ꠀꠝꠣꠞ ꠘꠤꠎꠞ ꠇꠁꠀ ꠇꠛꠥꠟ ꠇꠞꠍꠤ।
NUM 8:19 ꠅꠃ ꠟꠦꠛꠤ ꠅꠇꠟꠞꠦ ꠀꠝꠤ ꠢꠣꠞꠥꠘ ꠀꠞ ꠔꠣꠞ ꠙꠥꠀꠂꠘ꠆ꠔꠞꠦ ꠡꠝꠎꠣꠁꠍꠤ, ꠎꠣꠔꠦ ꠔꠣꠞꠣ ꠛꠘꠤ ꠁꠍꠞꠣꠁꠟꠞ ꠅꠁꠀ ꠝꠤꠟꠘ-ꠔꠣꠝ꠆ꠛꠥꠞ ꠈꠦꠎꠝꠔ ꠇꠞꠂꠘ, ꠔꠣꠞꠣꠞ ꠉꠥꠘꠣꠞ ꠇꠚꠞꠣꠞ ꠃꠍꠤꠟ꠆ꠟꠣ ꠇꠞꠂꠘ। ꠄꠞꠟꠣꠉꠤ ꠛꠘꠤ ꠁꠍꠞꠣꠁꠟꠞ ꠇꠦꠃ ꠀꠝꠣꠞ ꠊꠞꠞ ꠇꠣꠘ꠆ꠖꠣꠔ ꠀꠁꠟꠦꠅ ꠔꠣꠞ ꠃꠙꠞꠦ ꠇꠥꠘꠥ ꠉꠎꠛ ꠟꠣꠝꠔ ꠘꠣꠄ।”
NUM 8:20 ꠝꠣꠛꠥꠖꠦ ꠟꠦꠛꠤ ꠅꠇꠟꠞ ꠛꠦꠙꠣꠞꠦ ꠝꠥꠍꠣ ꠘꠛꠤꠞꠦ ꠎꠦꠟꠣ ꠢꠥꠇꠥꠝ ꠖꠤꠍꠟꠣ, ꠅꠃ ꠢꠥꠇꠥꠝ ꠝꠣꠚꠤꠇ ꠝꠥꠍꠣ, ꠢꠣꠞꠥꠘ ꠀꠞ ꠢꠇꠟ ꠛꠘꠤ ꠁꠍꠞꠣꠁꠟꠦ ꠅꠟꠣ ꠇꠞꠟꠣ।
NUM 8:21 ꠟꠦꠛꠤ ꠅꠇꠟꠦ ꠘꠤꠎꠞꠦ ꠙꠣꠇ-ꠍꠣꠚ ꠇꠞꠤꠀ ꠢꠣꠞꠤ ꠔꠣꠞꠣꠞ ꠇꠣꠙꠠ-ꠌꠥꠙꠠꠅ ꠕꠁꠟꠣ। ꠛꠣꠖꠦ ꠢꠣꠞꠥꠘꠦ ꠔꠣꠞꠣꠞꠦ ꠝꠣꠛꠥꠖꠞ ꠘꠣꠝꠦ ꠖꠥꠟꠘꠣ ꠇꠥꠞꠛꠣꠘꠤ ꠢꠤꠡꠣꠛꠦ ꠡꠙꠤꠀ ꠖꠤꠟꠣ, ꠀꠞ ꠔꠣꠞꠣꠞꠦ ꠙꠣꠇ-ꠙꠣꠇꠤꠎꠣ ꠇꠞꠣꠞ ꠘꠤꠅꠔꠦ ꠔꠣꠞꠣꠞ ꠉꠥꠘꠣꠞ ꠇꠚꠞꠣꠞ ꠛꠦꠛꠡ꠆ꠔꠣ ꠇꠞꠟꠣ।
NUM 8:22 ꠄꠞꠛꠣꠖꠦ ꠟꠦꠛꠤ ꠅꠇꠟꠅ ꠢꠣꠞꠥꠘ ꠀꠞ ꠔꠣꠘ ꠙꠥꠀꠂꠘ꠆ꠔꠞ ꠎꠤꠝ꠆ꠝꠣꠄ ꠝꠤꠟꠘ-ꠔꠣꠝ꠆ꠛꠥꠞ ꠈꠣꠖꠤꠝꠖꠣꠞꠤꠔ ꠉꠦꠟꠣ। ꠉꠦꠟꠦ ꠝꠣꠛꠥꠖꠦ ꠝꠥꠍꠣꠞꠦ ꠟꠦꠛꠤ ꠅꠇꠟꠞ ꠛꠦꠙꠣꠞꠦ ꠎꠦꠟꠣ ꠢꠥꠇꠥꠝ ꠖꠤꠍꠟꠣ, ꠑꠤꠇ ꠅꠃꠟꠣ ꠇꠞꠣ ꠅꠁꠟ।
NUM 8:23 ꠛꠣꠖꠦ ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ,
NUM 8:24 “ꠟꠦꠛꠤ ꠅꠇꠟꠞ ꠛꠦꠙꠣꠞꠦ ꠅꠃ ꠘꠤꠅꠝ ꠌꠣꠟꠥ ꠅꠁꠛ, ꠔꠣꠞꠣꠞ ꠝꠣꠎꠦ ꠙꠌꠤꠡ ꠛꠍꠞ ꠛꠣ ꠔꠣꠞ ꠛꠦꠡꠤ ꠛꠄꠅꠡꠤ ꠝꠣꠘꠡꠦ ꠝꠤꠟꠘ-ꠔꠣꠝ꠆ꠛꠥꠞ ꠇꠣꠝ-ꠇꠣꠎ ꠇꠞꠛꠣ,
NUM 8:25 ꠅꠁꠟꠦ ꠙꠁꠘ꠆ꠌꠣꠡ ꠛꠍꠞ ꠅꠁꠀ ꠢꠣꠞꠟꠦ ꠔꠣꠞꠣ ꠅꠛꠡꠞ ꠙꠣꠁꠟꠤꠛꠣ, ꠈꠦꠎꠝꠔ ꠇꠣꠝ ꠛꠣꠖ ꠖꠤꠟꠣꠁꠛꠣ।
NUM 8:26 ꠅꠃ ꠡꠝꠄ ꠔꠣꠞꠣ ꠘꠤꠎꠞ ꠀꠔꠦ ꠝꠤꠟꠘ-ꠔꠣꠝ꠆ꠛꠥꠞ ꠇꠥꠘꠥ ꠇꠣꠝ ꠇꠞꠣ ꠘꠤꠡꠦꠗ, ꠅꠁꠟꠦ ꠔꠣꠞꠣꠞ ꠝꠘꠦ ꠌꠣꠁꠟꠦ ꠜꠣꠁꠀꠁꠘ꠆ꠔꠞꠦ ꠝꠤꠟꠘ-ꠔꠣꠝ꠆ꠛꠥꠞ ꠇꠣꠝꠅ ꠡꠣꠄ-ꠡꠣꠁꠎ꠆ꠎ ꠇꠞꠛꠣ। ꠅꠃ ꠘꠤꠅꠝꠦ ꠔꠥꠝꠤ ꠟꠦꠛꠤ ꠅꠇꠟꠞ ꠇꠣꠝ-ꠇꠣꠎ ꠑꠤꠇ ꠇꠞꠤ ꠖꠤꠛꠣꠄ।”
NUM 9:1 ꠛꠘꠤ ꠁꠍꠞꠣꠁꠟ ꠎꠣꠔꠤ ꠝꠤꠡꠞ ꠖꠦꠡ ꠕꠣꠇꠤ ꠛꠣꠞꠘꠤꠞ ꠖꠥꠍꠞꠣ ꠛꠍꠞꠞ ꠙꠄꠟꠣ ꠌꠣꠘ꠆ꠖꠅ, ꠍꠤꠘꠣꠁ ꠝꠞꠥꠜꠥꠝꠤꠔ ꠝꠣꠛꠥꠖꠦ ꠝꠥꠍꠣ ꠘꠛꠤꠞꠦ ꠛꠣꠔꠣꠁꠟꠣ,
NUM 9:2 “ꠛꠘꠤ ꠁꠍꠞꠣꠁꠟꠦ ꠎꠣꠘꠥ ꠑꠤꠇ ꠡꠝꠄꠄ ꠀꠎꠣꠖꠤ ꠁꠖ ꠀꠖꠣꠄ ꠇꠞꠂꠘ।
NUM 9:3 ꠔꠣꠞꠣ ꠅꠃ ꠌꠣꠘ꠆ꠖꠞ ꠌꠃꠖ꠆ꠖ ꠔꠣꠞꠤꠈ ꠢꠣꠁꠘ꠆ꠎꠣ ꠛꠣꠟꠣ ꠀꠝꠣꠞ ꠘꠤꠅꠝ-ꠇꠣꠘꠥꠘ ꠝꠣꠘꠤꠀ ꠁꠖ ꠀꠖꠣꠄ ꠇꠞꠔꠦ ꠅꠁꠛ।”
NUM 9:4 ꠝꠣꠛꠥꠖꠞ ꠢꠥꠇꠥꠝ ꠙꠣꠁꠀ ꠝꠥꠍꠣꠄ ꠛꠘꠤ ꠁꠍꠞꠣꠁꠟꠞꠦ ꠎꠣꠘꠣꠁꠟꠣ ꠀꠎꠣꠖꠤ ꠁꠖ ꠀꠖꠣꠄ ꠇꠞꠣꠞ ꠟꠣꠉꠤ।
NUM 9:5 ꠄꠞꠖꠣꠄ ꠔꠣꠞꠣ ꠙꠄꠟꠣ ꠌꠣꠘ꠆ꠖꠞ ꠌꠃꠖ꠆ꠖ ꠔꠣꠞꠤꠈ ꠢꠣꠁꠘ꠆ꠎꠣ ꠛꠣꠟꠣ ꠍꠤꠘꠣꠁ ꠝꠞꠥꠜꠥꠝꠤꠔ ꠅꠃ ꠁꠖ ꠀꠖꠣꠄ ꠇꠞꠟꠣ। ꠝꠣꠛꠥꠖꠦ ꠝꠥꠍꠣꠞꠦ ꠎꠦꠟꠣꠈꠣꠘ ꠢꠥꠇꠥꠝ ꠖꠤꠍꠟꠣ, ꠔꠣꠞꠣ ꠑꠤꠇ ꠅꠟꠣꠈꠣꠘ ꠢꠇꠟꠔꠣ ꠇꠞꠟꠣ।
NUM 9:6 ꠅꠁꠟꠦ ꠔꠣꠞꠣꠞ ꠝꠣꠎꠦ ꠇꠄꠎꠘꠦ ꠝꠞꠣ ꠟꠣꠡꠞꠦ ꠍꠁꠀ ꠘꠣꠙꠣꠇ ꠅꠀꠄ, ꠅꠃ ꠖꠤꠘ ꠀꠎꠣꠖꠤ ꠁꠖ ꠇꠞꠔ ꠙꠣꠞꠟ ꠘꠣ। ꠄꠞꠟꠣꠉꠤ ꠅꠃ ꠖꠤꠘꠃ ꠔꠣꠞꠣ ꠝꠥꠍꠣ ꠀꠞ ꠢꠣꠞꠥꠘ ꠘꠛꠤꠞ ꠉꠦꠍꠦ ꠉꠤꠀ ꠀꠎꠤꠞ ꠅꠁꠟꠣ।
NUM 9:7 ꠔꠣꠞꠣ ꠝꠥꠍꠣꠞꠦ ꠎꠤꠇꠣꠁꠟꠣ, “ꠝꠞꠣ ꠟꠣꠡ ꠍꠅꠀꠄ ꠀꠝꠞꠣ ꠘꠣꠙꠣꠇ ꠅꠁꠍꠤ, ꠄꠞꠟꠣꠉꠤ ꠛꠘꠤ ꠁꠍꠞꠣꠁꠟꠞ ꠟꠉꠦ ꠑꠤꠇ ꠡꠝꠄ ꠝꠣꠛꠥꠖꠞ ꠘꠣꠝꠦ ꠇꠥꠞꠛꠣꠘꠤ ꠖꠤꠔꠣꠝ ꠙꠣꠞꠔꠣꠝ ꠘꠣ ꠇꠦꠘꠦ?”
NUM 9:8 ꠝꠥꠍꠣꠄ ꠎꠥꠀꠙ ꠖꠤꠟꠣ, “ꠔꠥꠝꠞꠣꠞ ꠛꠦꠙꠣꠞꠦ ꠝꠣꠛꠥꠖꠞ ꠢꠥꠇꠥꠝ ꠘꠣ ꠎꠣꠘꠣ ꠙꠞ꠆ꠎꠘ꠆ꠔ ꠔꠥꠝꠞꠣ ꠛꠣꠞ ꠌꠣꠅ।”
NUM 9:9 ꠅꠃ ꠡꠝꠄ ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ,
NUM 9:10 “ꠔꠥꠝꠤ ꠛꠘꠤ ꠁꠍꠞꠣꠁꠟꠞꠦ ꠇꠅ, ꠔꠣꠞꠣ ꠛꠣ ꠔꠣꠞꠣꠞ ꠛꠋꠡꠞ ꠇꠦꠃ ꠎꠥꠖꠤ ꠝꠞꠣ ꠟꠣꠡꠞꠦ ꠗꠞꠣ-ꠍꠥꠀꠞ ꠇꠣꠞꠘꠦ ꠘꠣꠙꠣꠇ ꠛꠘꠤꠎꠣꠄ, ꠛꠣ ꠝꠥꠍꠣꠚꠤꠞ ꠢꠣꠟꠔꠦ ꠟꠣꠝ꠆ꠛꠣ ꠍꠚꠞꠅ ꠕꠣꠇꠦ, ꠔꠦ ꠔꠣꠞꠣꠅ ꠝꠣꠛꠥꠖꠞ ꠘꠣꠝꠦ ꠀꠎꠣꠖꠤ ꠁꠖ ꠀꠖꠣꠄ ꠇꠞꠔꠣ ꠙꠣꠞꠛꠣ।
NUM 9:11 ꠖꠥꠍꠞꠣ ꠌꠣꠘ꠆ꠖꠞ ꠌꠃꠖ꠆ꠖ ꠔꠣꠞꠤꠈ ꠢꠣꠁꠘ꠆ꠎꠣ ꠛꠣꠟꠣ ꠔꠣꠞꠣ ꠅꠃ ꠁꠖ ꠇꠞꠛꠣ। ꠀꠎꠣꠖꠤ ꠁꠖꠞ ꠉꠥꠡ꠆ꠔꠞ ꠟꠉꠦ ꠈꠣꠝꠤꠞ ꠍꠣꠠꠣ ꠞꠥꠐꠤ ꠀꠞ ꠔꠤꠔ꠆ꠔꠣ ꠢꠣꠉ ꠙꠥꠞꠣꠁꠀ ꠈꠣꠁꠛꠣ।
NUM 9:12 ꠛꠤꠀꠘ ꠙꠞ꠆ꠎꠘ꠆ꠔ ꠇꠥꠘꠥꠎꠣꠔ ꠈꠣꠘꠤ ꠎꠝꠣ ꠞꠣꠈꠣ ꠘꠤꠡꠦꠗ, ꠇꠥꠞꠛꠣꠘꠤꠞ ꠉꠥꠡ꠆ꠔꠞ ꠎꠦꠇꠥꠘꠥ ꠀꠒ꠆ꠒꠤ ꠜꠣꠋꠉꠣ ꠘꠤꠡꠦꠗ। ꠀꠎꠣꠖꠤ ꠁꠖꠞ ꠅꠃ ꠢꠇꠟ ꠘꠤꠅꠝ-ꠇꠣꠘꠥꠘ ꠔꠣꠞꠣ ꠝꠣꠘꠔꠦ ꠅꠁꠛ।
NUM 9:13 ꠅꠁꠟꠦ ꠎꠦꠞꠣ ꠙꠣꠇ-ꠙꠣꠇꠤꠎꠣ ꠢꠣꠟꠔꠦ ꠀꠍꠦ, ꠀꠞ ꠎꠦꠞꠣ ꠍꠚꠞꠞ ꠝꠣꠎꠦ ꠘꠣꠄ, ꠁꠟꠣ ꠇꠥꠘꠥ ꠎꠘꠦ ꠎꠥꠖꠤ ꠀꠎꠣꠖꠤ ꠁꠖꠞ ꠇꠥꠞꠛꠣꠘꠤ ꠘꠣ ꠖꠦꠄ, ꠔꠦ ꠝꠣꠛꠥꠖꠞ ꠑꠤꠇ ꠇꠞꠣ ꠡꠝꠄꠄ ꠇꠥꠞꠛꠣꠘꠤ ꠘꠣ ꠖꠦꠅꠀꠄ, ꠔꠣꠞ ꠎꠣꠔꠤ ꠕꠣꠇꠤ ꠔꠣꠞ ꠘꠣꠝ ꠝꠤꠐꠣꠁꠟꠤꠛꠣꠄ। ꠔꠣꠞ ꠉꠥꠘꠣꠞ ꠡꠣꠎꠣ ꠢꠦ ꠙꠣꠁꠔꠦ ꠅꠁꠛ।
NUM 9:14 “ꠛꠘꠤ ꠁꠍꠞꠣꠁꠟꠞ ꠝꠣꠎꠦ ꠛꠡꠔ ꠇꠞꠞꠣ ꠛꠤꠖꠦꠡꠤ ꠇꠥꠘꠥ ꠝꠣꠘꠡꠦ ꠎꠥꠖꠤ ꠝꠣꠛꠥꠖꠞ ꠘꠣꠝꠦ ꠀꠎꠣꠖꠤ ꠁꠖ ꠀꠖꠣꠄ ꠇꠞꠔ ꠌꠣꠄ, ꠔꠦ ꠇꠞꠔ ꠙꠣꠞꠛ। ꠅꠁꠟꠦ ꠅꠃ ꠁꠖꠞ ꠘꠤꠅꠝ-ꠇꠣꠘꠥꠘ ꠝꠣꠘꠤꠀ ꠀꠖꠣꠄ ꠇꠞꠔꠦ ꠅꠁꠛ। ꠛꠘꠤ ꠁꠍꠞꠣꠁꠟ ꠛꠣ ꠜꠤꠘ-ꠖꠦꠡꠤ ꠢꠇꠟꠦꠃ ꠄꠇꠁ ꠘꠤꠅꠝ ꠝꠣꠘꠔꠦ ꠅꠁꠛ।”
NUM 9:15 ꠀꠟ꠆ꠟꠣꠞ ꠊꠞ ꠡꠣꠢꠣꠖꠔ ꠔꠣꠝ꠆ꠛꠥ ꠎꠦꠖꠤꠘ ꠈꠣꠠꠣ ꠇꠞꠣ ꠅꠁꠟ, ꠅꠃ ꠖꠤꠘ ꠇꠥꠖꠞꠔꠤ ꠝꠦꠊꠞ ꠈꠥꠐꠤ ꠀꠁꠀ ꠀꠡ꠆ꠔꠣ ꠊꠞꠞꠦ ꠉꠥꠞꠤꠟꠤꠟ। ꠢꠣꠁꠘ꠆ꠎꠣ ꠕꠣꠇꠤ ꠛꠤꠀꠘ ꠙꠞ꠆ꠎꠘ꠆ꠔ ꠢꠣꠞꠣ ꠞꠣꠁꠔ ꠁ ꠝꠦꠊꠞ ꠈꠥꠐꠤꠞꠦ ꠘꠥꠞꠞ ꠀꠉꠥꠘꠤꠞ ꠟꠣꠈꠣꠘ ꠖꠦꠈꠣ ꠉꠦꠟ।
NUM 9:16 ꠄꠞꠛꠣꠖ ꠕꠣꠇꠤ ꠅꠟꠣ ꠅꠁꠟ, ꠀꠟ꠆ꠟꠣꠞ ꠊꠞ ꠖꠤꠘꠞ ꠛꠣꠟꠣ ꠢꠣꠝꠦꠡꠣ ꠝꠦꠊꠞ ꠈꠥꠐꠤꠄ ꠉꠥꠞꠣ ꠞꠁꠔ, ꠀꠞ ꠞꠣꠁꠔꠞ ꠛꠣꠟꠣ ꠝꠘꠅ ꠅꠁꠔ ꠁꠔꠣ ꠘꠥꠞꠞ ꠀꠉꠥꠘꠤꠞ ꠈꠥꠐꠤ।
NUM 9:17 ꠀꠞ ꠙꠛꠤꠔ꠆ꠞ ꠔꠣꠝ꠆ꠛꠥꠞ ꠃꠙꠞꠦ ꠕꠣꠇꠤ ꠝꠦꠊꠞ ꠈꠥꠐꠤ ꠎꠦꠛꠟꠣ ꠢꠞꠔ, ꠅꠃ ꠡꠝꠄ ꠛꠘꠤ ꠁꠍꠞꠣꠁꠟ ꠅꠇꠟ ꠍꠚꠞꠅ ꠛꠣꠞ ꠅꠁꠔꠣ, ꠛꠣꠖꠦ ꠎꠦꠘꠅ ꠉꠤꠀ ꠅꠃ ꠈꠥꠐꠤ ꠕꠤꠞ ꠅꠁꠔ, ꠔꠣꠞꠣ ꠅꠈꠣꠘꠅꠃ ꠔꠣꠝ꠆ꠛꠥ ꠅꠇꠟ ꠉꠣꠠꠤꠔꠣ।
NUM 9:18 ꠝꠣꠛꠥꠖꠞ ꠢꠥꠇꠥꠝꠦ ꠔꠣꠞꠣ ꠍꠚꠞꠅ ꠛꠣꠞ ꠅꠁꠔꠣ ꠀꠞ ꠔꠣꠘ ꠢꠥꠇꠥꠝꠦꠃ ꠍꠚꠞ ꠛꠘ꠆ꠖ ꠇꠞꠤꠀ ꠔꠣꠝ꠆ꠛꠥ ꠉꠣꠠꠤꠔꠣ। ꠀꠟ꠆ꠟꠣꠞ ꠊꠞꠞ ꠃꠙꠞꠦ ꠎꠔꠛꠁꠟ ꠝꠦꠊꠞ ꠈꠥꠐꠤ ꠞꠁꠔ, ꠔꠣꠞꠣ ꠅꠔꠛꠁꠟ ꠇꠦꠝ꠆ꠙꠞ ꠜꠤꠔꠞꠦ ꠞꠁꠔꠣ।
NUM 9:19 ꠀꠟ꠆ꠟꠣꠞ ꠊꠞꠞ ꠃꠙꠞꠦ ꠝꠦꠊꠞ ꠈꠥꠐꠤ ꠛꠦꠡꠤ ꠖꠤꠘ ꠞꠁꠟꠦ, ꠝꠣꠛꠥꠖꠞ ꠢꠥꠇꠥꠝ ꠝꠣꠘꠤꠀ ꠔꠣꠞꠣ ꠇꠥꠘꠥ ꠍꠚꠞꠅ ꠛꠣꠞ ꠅꠁꠔꠣ ꠘꠣ।
NUM 9:20 ꠝꠣꠎꠦ ꠝꠣꠎꠦ ꠝꠦꠊꠞ ꠈꠥꠐꠤ ꠀꠟ꠆ꠟꠣꠞ ꠊꠞꠞ ꠃꠙꠞꠦ ꠕꠥꠠꠣ ꠖꠤꠘ ꠞꠁꠔ। ꠛꠘꠤ ꠁꠍꠞꠣꠁꠟ ꠔ ꠝꠣꠛꠥꠖꠞ ꠢꠥꠇꠥꠝꠦ ꠇꠦꠝ꠆ꠙꠅ ꠞꠁꠔꠣ ꠀꠞ ꠔꠣꠘ ꠢꠥꠇꠥꠝꠦꠃ ꠢꠤꠞꠛꠣꠞ ꠍꠚꠞꠅ ꠛꠣꠞ ꠅꠁꠔꠣ।
NUM 9:21 ꠀꠞ ꠝꠣꠎꠦ ꠝꠣꠎꠦ ꠈꠣꠟꠤ ꠢꠣꠁꠘ꠆ꠎꠣ ꠕꠣꠇꠤ ꠛꠤꠀꠘ ꠙꠞ꠆ꠎꠘ꠆ꠔ ꠝꠦꠊꠞ ꠈꠥꠐꠤ ꠞꠁꠔ। ꠛꠤꠀꠘꠦ ꠝꠦꠊꠞ ꠈꠥꠐꠤ ꠢꠞꠤꠉꠦꠟꠦ ꠔꠣꠞꠣ ꠍꠚꠞꠅ ꠛꠣꠞ ꠅꠁꠔꠣ। ꠖꠤꠘꠅ ꠛꠣ ꠞꠣꠁꠔ ꠎꠦꠇꠥꠘꠥ ꠡꠝꠄ ꠝꠦꠊꠞ ꠈꠥꠐꠤ ꠢꠞꠣꠞ ꠟꠉꠦ ꠟꠉꠦꠃ ꠔꠣꠞꠣ ꠍꠚꠞꠅ ꠛꠣꠞ ꠅꠁꠔꠣ।
NUM 9:22 ꠎꠔꠖꠤꠘ ꠝꠦꠊꠞ ꠈꠥꠐꠤ ꠀꠟ꠆ꠟꠣꠞ ꠊꠞꠞ ꠃꠙꠞꠦ ꠞꠁꠔ, ꠅꠔꠖꠤꠘ ꠔꠣꠞꠣ ꠇꠦꠝ꠆ꠙꠅ ꠞꠁꠔꠣ, ꠍꠚꠞꠅ ꠛꠣꠞ ꠅꠁꠔꠣ ꠘꠣ। ꠁꠔꠣ ꠖꠥꠁ ꠖꠤꠘ ꠅꠃꠇ, ꠄꠇ ꠝꠣꠡ ꠛꠣ ꠄꠞ ꠛꠦꠡꠤ ꠅꠁꠟꠦꠅ ꠛꠣꠞ ꠅꠁꠔꠣ ꠘꠣ, ꠈꠣꠟꠤ ꠝꠦꠊꠞ ꠈꠥꠐꠤ ꠢꠞꠣꠞ ꠛꠣꠖꠦ ꠔꠣꠞꠣ ꠍꠚꠞꠅ ꠛꠣꠞ ꠅꠁꠔꠣ।
NUM 9:23 ꠝꠣꠛꠥꠖꠞ ꠢꠥꠇꠥꠝꠦ ꠔꠣꠞꠣ ꠇꠦꠝ꠆ꠙ ꠉꠣꠠꠤꠔꠣ ꠀꠞ ꠔꠣꠘ ꠢꠥꠇꠥꠝꠦꠃ ꠍꠚꠞꠅ ꠞꠅꠀꠘꠣ ꠅꠁꠔꠣ। ꠝꠥꠍꠣ ꠘꠛꠤꠞ ꠝꠣꠞꠚꠔꠦ ꠙꠣꠅꠀ ꠢꠥꠇꠥꠝ ꠝꠣꠚꠤꠇ, ꠔꠣꠞꠣ ꠝꠣꠛꠥꠖꠞ ꠅꠃ ꠘꠤꠅꠝ ꠝꠣꠘꠤꠀ ꠌꠟꠔꠣ।
NUM 10:1 ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ,
NUM 10:2 “ꠔꠥꠝꠤ ꠞꠥꠙꠣꠞ ꠙꠣꠔ ꠙꠤꠐꠣꠁꠀ ꠖꠥꠁꠐꠣ ꠌꠥꠋꠉꠣ ꠛꠣꠘꠣꠅ। ꠛꠘꠤ ꠁꠍꠞꠣꠁꠟꠞꠦ ꠄꠇꠈꠣꠘꠅ ꠖꠟꠣ ꠇꠞꠣꠞ ꠘꠤꠅꠔꠦ ꠒꠣꠇꠤꠛꠣꠞ ꠟꠣꠉꠤ ꠅꠃ ꠌꠥꠋꠉꠣ ꠛꠣꠎꠣꠁꠅ, ꠔꠣꠞꠣꠞ ꠘꠣꠘꠣꠘ ꠖꠟ ꠍꠚꠞꠅ ꠞꠅꠀꠘꠣ ꠅꠀꠞ ꠛꠣꠟꠣꠅ ꠔꠥꠝꠤ ꠅꠉꠥꠁꠘ ꠛꠣꠎꠣꠁꠅ।
NUM 10:3 ꠅꠃ ꠖꠥꠁꠅ ꠌꠥꠋꠉꠣ ꠎꠦꠛꠟꠣ ꠄꠇꠟꠉꠦ ꠛꠣꠎꠣꠘꠤ ꠅꠁꠛ, ꠅꠃ ꠡꠝꠄ ꠢꠇꠟ ꠛꠘꠤ ꠁꠍꠞꠣꠁꠟ ꠔꠥꠝꠣꠞ ꠍꠣꠝꠘꠦ ꠝꠤꠟꠘ-ꠔꠣꠝ꠆ꠛꠥꠞ ꠖꠥꠀꠞꠞ ꠉꠦꠍꠦ ꠀꠁꠀ ꠖꠟꠣ ꠅꠁꠛꠣ।
NUM 10:4 ꠅꠁꠟꠦ ꠄꠇꠐꠣ ꠌꠥꠋꠉꠣ ꠛꠣꠎꠣꠘꠤ ꠅꠁꠟꠦ ꠈꠣꠟꠤ ꠛꠘꠤ ꠁꠍꠞꠣꠁꠟꠞ ꠘꠣꠘꠣꠘ ꠈꠣꠘ꠆ꠖꠣꠘꠞ ꠡꠞ꠆ꠖꠣꠞ ꠅꠇꠟ ꠔꠥꠝꠣꠞ ꠍꠣꠝꠘꠦ ꠀꠁꠀ ꠖꠟꠣ ꠅꠁꠛꠣ।
NUM 10:5 ꠙꠄꠟꠣ ꠛꠣꠞ ꠌꠥꠋꠉꠣ ꠛꠣꠎꠣꠁꠟꠦ ꠝꠤꠟꠘ-ꠔꠣꠝ꠆ꠛꠥꠞ ꠙꠥꠛꠦꠖꠤ ꠎꠦꠞꠣ ꠔꠣꠝ꠆ꠛꠥ ꠐꠣꠋꠉꠣꠁꠍꠦ, ꠔꠣꠞꠣ ꠞꠅꠀꠘꠣ ꠖꠤꠛꠣ।
NUM 10:6 ꠖꠥꠍꠞꠣꠛꠣꠞ ꠛꠣꠎꠣꠁꠟꠦ ꠖꠃꠇꠘꠞ ꠉꠣꠟꠣꠞ ꠖꠟ ꠅꠇꠟ ꠞꠅꠀꠘꠣ ꠖꠤꠛꠣ। ꠁꠇꠐꠣ ꠔ ꠍꠚꠞꠅ ꠞꠅꠀꠘꠣ ꠖꠤꠛꠣꠞ ꠡꠋꠇꠦꠔ।
NUM 10:7 ꠔꠦ ꠢꠇꠟ ꠝꠣꠘꠡꠞꠦ ꠖꠟꠣ ꠇꠞꠣꠞ ꠟꠣꠉꠤ ꠔꠥꠝꠤ ꠖꠥꠁꠅ ꠌꠥꠋꠉꠣ ꠛꠣꠎꠣꠁꠅ, ꠅꠁꠟꠦ ꠄꠞ ꠡꠥꠞ ꠅꠁꠛ ꠀꠟꠣꠖꠣ ꠞꠇꠝꠞ।
NUM 10:8 ꠅꠃ ꠌꠥꠋꠉꠣ ꠛꠣꠎꠣꠁꠛꠣ ꠁꠝꠣꠝ ꠢꠣꠞꠥꠘꠞ ꠛꠋꠡꠞ ꠁꠝꠣꠝ ꠅꠇꠟꠦ। ꠁꠐꠣ ꠔꠥꠝꠞꠣꠞ ꠟꠣꠉꠤ ꠀꠞ ꠔꠥꠝꠞꠣꠞ ꠛꠋꠡꠗꠞꠞ ꠟꠣꠉꠤꠅ ꠌꠤꠞꠇꠣꠟꠤꠘ ꠘꠤꠅꠝ।
NUM 10:9 “ꠘꠤꠎꠞ ꠖꠦꠡꠅ ꠉꠤꠀ ꠢꠣꠞꠟꠦ ꠔꠥꠝꠞꠣ ꠎꠦꠛꠟꠣ ꠇꠥꠘꠥ ꠎꠥꠟꠥꠝꠛꠣꠎ ꠖꠥꠡꠝꠘꠞ ꠟꠉꠦ ꠟꠣꠠꠣꠁꠔ ꠛꠣꠞ ꠅꠁꠛꠣꠄ, ꠅꠃ ꠡꠝꠄ ꠖꠥꠁꠅ ꠌꠥꠋꠉꠣ ꠛꠣꠎꠣꠁꠀ ꠡꠋꠇꠦꠔ ꠖꠤꠛꠣꠄ। ꠔꠦꠃ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠔꠥꠝꠞꠣꠞ ꠛꠣꠄ ꠈꠤꠀꠟ ꠇꠞꠤꠀ ꠖꠥꠡꠝꠘꠞ ꠀꠔ ꠕꠣꠇꠤ ꠔꠥꠝꠞꠣꠞꠦ ꠛꠣꠌꠣꠁꠛꠣ।
NUM 10:10 ꠔꠥꠝꠞꠣꠞ ꠈꠥꠡꠤ-ꠛꠣꠡꠤꠞ ꠅꠘꠥꠡ꠆ꠐꠣꠘꠅ, ꠔꠥꠝꠞꠣꠞ ꠢꠇꠟ ꠁꠖꠅ, ꠌꠣꠘ꠆ꠖꠞ ꠙꠄꠟꠣ ꠖꠤꠘ ꠎꠦꠛꠟꠣ ꠎꠣꠟꠣꠁꠟ ꠇꠥꠞꠛꠣꠘꠤ ꠛꠣ ꠍꠣꠟꠣꠝꠔꠤ ꠇꠥꠞꠛꠣꠘꠤ ꠖꠤꠛꠣꠄ, ꠅꠃ ꠡꠝꠄꠅ ꠌꠥꠋꠉꠣ ꠛꠣꠎꠣꠁꠅ। ꠅꠃ ꠀꠅꠀꠎ ꠢꠥꠘꠟꠦ ꠔꠥꠝꠞꠣꠞ ꠀꠟ꠆ꠟꠣꠄ ꠔꠥꠝꠞꠣꠞ ꠛꠣꠄ ꠌꠃꠈ ꠚꠤꠞꠣꠁꠛꠣ। ꠝꠘꠅ ꠞꠣꠈꠤꠅ, ꠀꠝꠤ ꠀꠟ꠆ꠟꠣꠃ ꠔꠥꠝꠞꠣꠞ ꠝꠣꠛꠥꠖ।”
NUM 10:11 ꠛꠘꠤ ꠁꠍꠞꠣꠁꠟ ꠎꠣꠔꠤ ꠝꠤꠡꠞ ꠕꠣꠇꠤ ꠛꠣꠞꠘꠤꠞ ꠖꠥꠍꠞꠣ ꠛꠍꠞꠞ ꠖꠥꠍꠞꠣ ꠌꠣꠘ꠆ꠖꠞ ꠛꠤꠡ ꠔꠣꠞꠤꠈ ꠡꠣꠢꠣꠖꠔ ꠔꠣꠝ꠆ꠛꠥ ꠝꠣꠘꠤ ꠀꠟ꠆ꠟꠣꠞ ꠊꠞꠞ ꠃꠙꠞꠦ ꠕꠣꠇꠤ ꠇꠥꠖꠞꠔꠤ ꠝꠦꠊꠞ ꠈꠥꠐꠤ ꠢꠞꠤꠉꠦꠟ।
NUM 10:12 ꠅꠃ ꠡꠝꠄ ꠛꠘꠤ ꠁꠍꠞꠣꠁꠟꠦ ꠍꠤꠘꠣꠁ ꠝꠞꠥꠜꠥꠝꠤ ꠕꠣꠇꠤ ꠞꠅꠀꠘꠣ ꠖꠤꠟꠣ। ꠢꠃ ꠝꠦꠊꠞ ꠈꠥꠐꠤ ꠚꠣꠞꠣꠘ ꠝꠞꠥꠜꠥꠝꠤꠔ ꠀꠁꠀ ꠕꠤꠞ ꠘꠣ ꠅꠀ ꠙꠞ꠆ꠎꠘ꠆ꠔ ꠔꠣꠞꠣ ꠌꠟꠣꠔꠃ ꠞꠁꠟꠣ।
NUM 10:13 ꠝꠥꠍꠣ ꠘꠛꠤꠞ ꠝꠣꠎꠖꠤ ꠝꠣꠛꠥꠖꠞ ꠢꠥꠇꠥꠝ ꠙꠣꠁꠀ, ꠔꠣꠞꠣ ꠙꠄꠟꠣ ꠛꠣꠞ ꠅꠃ ꠍꠚꠞꠅ ꠞꠅꠀꠘꠣ ꠅꠁꠟꠣ।
NUM 10:14 ꠙꠄꠟꠣꠃ ꠄꠢꠥꠖꠣꠞ ꠙꠔꠣꠇꠣꠞ ꠔꠤꠘꠅ ꠈꠣꠘ꠆ꠖꠣꠘꠞ ꠘꠣꠘꠣꠘ ꠚꠃꠎꠤ ꠖꠟꠦ ꠞꠅꠀꠘꠣ ꠖꠤꠟꠣ, ꠄꠞꠣꠞ ꠘꠦꠔꠣ ꠀꠍꠟꠣ ꠀꠝꠤꠘꠣꠖꠣꠛꠞ ꠙꠥꠀ ꠘꠣꠢꠤꠡ।
NUM 10:15 ꠄꠞꠣꠞ ꠝꠣꠎꠦ ꠁꠍꠣꠈꠞ ꠈꠣꠘ꠆ꠖꠣꠘꠞ ꠝꠣꠘꠡꠞ ꠖꠣꠄꠁꠔ꠆ꠔ ꠀꠍꠤꠟ ꠍꠥꠉꠣꠞꠞ ꠙꠥꠀ ꠘꠕꠘꠦꠟꠞ ꠃꠙꠞꠦ,
NUM 10:16 ꠀꠞ ꠍꠛꠥꠟꠘ ꠈꠣꠘ꠆ꠖꠣꠘꠞ ꠝꠣꠘꠡꠞ ꠖꠣꠄꠁꠔ꠆ꠔ ꠀꠍꠤꠟ ꠢꠦꠟꠘꠞ ꠙꠥꠀ ꠁꠟꠤꠀꠛꠞ ꠃꠙꠞꠦ।
NUM 10:17 ꠛꠣꠖꠦ ꠀꠟ꠆ꠟꠣꠞ ꠊꠞꠞ ꠢꠇꠟꠔꠣ ꠈꠥꠟꠣ ꠅꠁꠟ, ꠔꠦꠃ ꠎꠣꠞꠍꠥꠘꠤ ꠀꠞ ꠝꠣꠞꠣꠞꠤꠀ ꠅꠇꠟꠦ ꠅꠈꠣꠘꠞ ꠢꠇꠟꠔꠣ ꠛꠁꠀ ꠟꠁꠀ ꠞꠅꠀꠘꠣ ꠖꠤꠟꠣ।
NUM 10:18 ꠄꠞꠣꠞ ꠛꠣꠖꠦ ꠞꠥꠛꠦꠘꠞ ꠙꠔꠣꠇꠣꠞ ꠔꠤꠘꠅ ꠈꠣꠘ꠆ꠖꠣꠘꠞ ꠚꠃꠎꠤ ꠖꠟꠦ ꠞꠅꠀꠘꠣ ꠖꠤꠟꠣ, ꠄꠞꠣꠞ ꠡꠞ꠆ꠖꠣꠞ ꠅꠁꠟꠣ ꠡꠣꠖꠤꠃꠞꠞ ꠙꠥꠀ ꠀꠟꠤꠍꠥꠞ।
NUM 10:19 ꠄꠞꠣꠞ ꠝꠣꠎꠦ ꠡꠤꠝꠤꠅꠘ ꠈꠣꠘ꠆ꠖꠣꠘꠞ ꠖꠣꠄꠁꠔ꠆ꠔ ꠀꠍꠤꠟ ꠡꠥꠞꠡꠣꠖꠣꠄꠅꠞ ꠙꠥꠀ ꠡꠣꠟꠥꠝꠤꠟꠞ ꠃꠙꠞꠦ,
NUM 10:20 ꠀꠞ ꠍꠣꠖꠥ ꠈꠣꠘ꠆ꠖꠣꠘꠞ ꠖꠣꠄꠁꠔ꠆ꠔ ꠀꠍꠤꠟ, ꠖꠥꠄꠟꠞ ꠙꠥꠀ ꠁꠟꠤꠀꠍꠚꠞ ꠃꠙꠞꠦ।
NUM 10:21 ꠄꠞꠣꠞ ꠛꠣꠖꠦ ꠀꠟ꠆ꠟꠣꠞ ꠊꠞꠞ ꠙꠣꠇ-ꠙꠛꠤꠔ꠆ꠞ ꠝꠣꠟ-ꠍꠣꠝꠣꠘꠣ ꠟꠁꠀ ꠇꠣꠢꠣꠔꠤ ꠅꠇꠟꠦ ꠞꠅꠀꠘꠣ ꠖꠤꠟꠣ। ꠇꠣꠢꠣꠔꠤ ꠅꠇꠟ ꠎꠣꠉꠣꠔ ꠉꠤꠀ ꠙꠃꠍꠣꠞ ꠀꠉꠦꠃ ꠀꠟ꠆ꠟꠣꠞ ꠊꠞ ꠈꠣꠠꠣ ꠇꠞꠣꠞ ꠇꠕꠣ ꠀꠍꠤꠟ।
NUM 10:22 ꠄꠞꠛꠣꠖꠦ ꠀꠚꠞꠣꠁꠝ ꠙꠔꠣꠇꠣꠞ ꠔꠤꠘꠅ ꠚꠃꠎꠤ ꠖꠟꠞ ꠝꠣꠘꠡꠦ ꠞꠅꠀꠘꠣ ꠖꠤꠟꠣ, ꠄꠞꠣꠞ ꠡꠞ꠆ꠖꠣꠞ ꠅꠁꠟꠣ ꠀꠝꠤꠢꠥꠖꠞ ꠙꠥꠀ ꠀꠟꠤꠡꠣꠝꠣ।
NUM 10:23 ꠄꠞ ꠝꠣꠎꠦ ꠝꠣꠘꠡꠣ ꠈꠣꠘ꠆ꠖꠣꠘꠞ ꠖꠣꠄꠁꠔ꠆ꠔ ꠀꠍꠤꠟ ꠚꠣꠔꠡꠥꠞꠞ ꠙꠥꠀ ꠉꠝꠟꠤꠄꠟꠞ ꠃꠙꠞꠦ।
NUM 10:24 ꠀꠞ ꠛꠤꠘ-ꠁꠀꠝꠤꠘ ꠈꠣꠘ꠆ꠖꠣꠘꠞ ꠖꠣꠄꠁꠔ꠆ꠔ ꠀꠍꠤꠟ ꠎꠤꠖꠣꠃꠘꠤꠞ ꠙꠥꠀ ꠀꠛꠤꠖꠣꠘꠞ ꠃꠙꠞꠦ।
NUM 10:25 ꠢꠇꠟ ꠢꠦꠡꠦ ꠞꠅꠀꠘꠣ ꠅꠁꠟꠣ ꠖꠣꠘ ꠙꠔꠣꠇꠣꠞ ꠔꠤꠘꠅ ꠈꠣꠘ꠆ꠖꠣꠘꠞ ꠚꠃꠎꠤ ꠖꠟꠞ ꠝꠣꠘꠡꠦ, ꠔꠣꠞꠣꠞ ꠡꠞ꠆ꠖꠣꠞ ꠅꠁꠟꠣ ꠀꠝꠤꠡꠣꠖꠣꠞ ꠙꠥꠀ ꠀꠈꠤꠀꠎꠣꠞ। ꠄꠞꠣꠞ ꠍꠣꠝꠘꠞ ꠢꠇꠟ ꠚꠃꠎꠤ ꠖꠟꠞꠦ ꠙꠣꠞꠣ ꠖꠤꠀ ꠔꠣꠞꠣꠞ ꠈꠞꠦ ꠈꠞꠦ ꠞꠁꠟꠣ।
NUM 10:26 ꠄꠞ ꠝꠣꠎꠦ ꠀꠡꠤꠞ ꠈꠣꠘ꠆ꠖꠣꠘꠞ ꠖꠣꠄꠁꠔ꠆ꠔ ꠀꠍꠤꠟ ꠃꠇꠞꠣꠘꠞ ꠙꠥꠀ ꠚꠎꠤꠄꠟꠞ ꠃꠙꠞꠦ,
NUM 10:27 ꠀꠞ ꠘꠙ꠆ꠔꠣꠟꠤ ꠈꠣꠘ꠆ꠖꠣꠘꠞ ꠖꠣꠄꠁꠔ꠆ꠔ ꠀꠍꠤꠟ ꠁꠘꠣꠘꠞ ꠙꠥꠀ ꠀꠢꠤꠞꠞ ꠃꠙꠞꠦ।
NUM 10:28 ꠅꠃ ꠟꠣꠈꠣꠘ ꠛꠘꠤ ꠁꠍꠞꠣꠁꠟꠞ ꠘꠣꠘꠣꠘ ꠚꠃꠎꠤ ꠖꠟ ꠄꠇꠦ ꠄꠇꠦ ꠞꠅꠀꠘꠣ ꠅꠁꠟꠣ।
NUM 10:29 ꠄꠞꠛꠣꠖꠦ ꠝꠥꠍꠣꠄ ꠝꠣꠖꠤꠀꠘ ꠖꠦꠡꠞ ꠔꠣꠘ ꠢꠃꠞ ꠡꠥꠀꠁꠛ ꠘꠛꠤꠞ ꠙꠥꠀ ꠢꠛꠛꠞꠦ ꠇꠁꠟꠣ, “ꠝꠣꠛꠥꠖꠦ ꠀꠝꠞꠣꠞꠦ ꠎꠦ ꠖꠦꠡ ꠖꠤꠛꠣꠞ ꠅꠀꠖꠣ ꠇꠞꠍꠂꠘ, ꠀꠝꠞꠣ ꠢꠃ ꠖꠦꠡꠅ ꠎꠣꠁꠞꠣꠝꠉꠤ। ꠔꠦ ꠔꠥꠝꠤꠅ ꠀꠝꠞꠣꠞ ꠟꠉꠦ ꠀꠅ। ꠝꠣꠛꠥꠖꠦ ꠔ ꠅꠀꠖꠣ ꠇꠞꠍꠂꠘ, ꠔꠣꠁꠘ ꠛꠘꠤ ꠁꠍꠞꠣꠁꠟꠞꠦ ꠛꠃꠔ ꠝꠦꠢꠦꠞꠛꠣꠘꠤ ꠇꠞꠛꠣ। ꠅꠈꠘ ꠔꠥꠝꠤ ꠀꠝꠞꠣꠞ ꠟꠉꠦ ꠀꠁꠟꠦ ꠀꠝꠞꠣ ꠔꠥꠝꠣꠞꠦ ꠈꠥꠛ ꠝꠣꠄꠀ-ꠖꠄꠀ ꠇꠞꠝꠥ।”
NUM 10:30 ꠢꠛꠛꠦ ꠎꠥꠀꠙ ꠖꠤꠟꠣ, “ꠘꠣ, ꠀꠝꠤ ꠎꠣꠁꠔꠣꠝ ꠘꠣꠄ। ꠀꠝꠤ ꠀꠝꠣꠞ ꠖꠦꠡꠅ ꠘꠤꠎꠞ ꠝꠣꠘꠡꠞ ꠉꠦꠍꠦ ꠚꠤꠞꠤꠀ ꠎꠣꠁꠝꠥꠉꠤ।”
NUM 10:31 ꠅꠁꠟꠦ ꠝꠥꠍꠣꠄ ꠇꠁꠟꠣ, “ꠘꠣ, ꠘꠣ, ꠔꠥꠝꠤ ꠀꠝꠞꠣꠞꠦ ꠚꠣꠟꠣꠁꠀ ꠎꠣꠁꠅ ꠘꠣ। ꠔꠥꠝꠤꠃ ꠀꠝꠞꠣꠞ ꠙꠕ ꠖꠦꠈꠣꠅꠞꠣ ꠎꠘ। ꠝꠞꠥꠜꠥꠝꠤꠞ ꠝꠣꠎꠦ ꠇꠥꠘ ꠎꠣꠉꠣꠔ ꠀꠝꠞꠣꠞ ꠔꠣꠝ꠆ꠛꠥ ꠉꠣꠠꠣ ꠃꠌꠤꠔ, ꠁꠔꠣ ꠔ ꠔꠥꠝꠣꠞ ꠎꠣꠘꠣ ꠀꠍꠦ, ꠄꠞꠟꠣꠉꠤ ꠔꠥꠝꠤꠃ ꠅꠁꠟꠣꠄ ꠀꠝꠞꠣꠞ ꠌꠃꠈ।
NUM 10:32 ꠢꠥꠘꠅ, ꠔꠥꠝꠤ ꠎꠥꠖꠤ ꠀꠝꠞꠣꠞ ꠟꠉꠦ ꠀꠅ, ꠔꠦ ꠝꠣꠛꠥꠖꠦ ꠀꠝꠞꠣꠞꠦ ꠎꠔ ꠝꠦꠢꠦꠞꠛꠣꠘꠤ ꠇꠞꠣꠞ ꠅꠀꠖꠣ ꠇꠞꠍꠂꠘ, ꠔꠥꠝꠣꠞꠦꠅ ꠅꠔꠣꠞ ꠛꠣꠐ ꠖꠤꠝꠥ।”
NUM 10:33 ꠅꠃ ꠟꠣꠈꠣꠘ ꠛꠘꠤ ꠁꠍꠞꠣꠁꠟꠦ ꠝꠣꠛꠥꠖꠞ ꠙꠣꠠ ꠕꠣꠇꠤ ꠞꠅꠀꠘꠣ ꠅꠁꠀ ꠔꠤꠘ ꠖꠤꠘꠞ ꠙꠕ ꠀꠉꠥꠀꠁ ꠉꠦꠟꠣ। ꠀꠞ ꠎꠤꠞꠣꠁꠛꠣꠞ ꠟꠣꠉꠤ ꠄꠇꠈꠣꠘ ꠎꠣꠉꠣ ꠔꠥꠇꠣꠁꠀ ꠛꠣꠞ ꠇꠞꠣꠞ ꠈꠤꠀꠟꠦ, ꠝꠣꠛꠥꠖꠞ ꠢꠃ ꠙꠛꠤꠔ꠆ꠞ ꠡꠣꠢꠣꠖꠔ ꠡꠘ꠆ꠖꠥꠇ ꠔꠤꠘ ꠖꠤꠘ ꠗꠞꠤ ꠔꠣꠞꠣꠞ ꠀꠉꠦ ꠀꠉꠦ ꠉꠦꠟ।
NUM 10:34 ꠇꠦꠝ꠆ꠙ ꠕꠣꠇꠤ ꠞꠅꠀꠘꠣ ꠅꠀꠞ ꠛꠣꠖꠦ, ꠖꠤꠘꠞ ꠛꠦꠟꠣ ꠝꠣꠛꠥꠖꠞ ꠉꠣꠁꠛꠤ ꠝꠦꠊꠞ ꠈꠥꠐꠤ ꠛꠘꠤ ꠁꠍꠞꠣꠁꠟꠞ ꠃꠙꠞꠦ ꠞꠁꠔ।
NUM 10:35 ꠅꠃ ꠡꠣꠢꠣꠖꠔ ꠡꠘ꠆ꠖꠥꠇ ꠞꠅꠀꠘꠣ ꠅꠁꠟꠦꠃ ꠝꠥꠍꠣꠄ ꠇꠁꠔꠣ, “ꠅ ꠝꠣꠛꠥꠖ, ꠌꠟꠃꠇ꠆ꠇꠣ। ꠔꠥꠝꠣꠞ ꠖꠥꠡꠝꠘ ꠅꠇꠟ ꠌꠣꠁꠞꠅꠛꠣꠄ ꠍꠤꠔ꠆ꠞꠤ ꠎꠣꠃꠇ, ꠔꠥꠝꠣꠞꠦ ꠎꠦꠔꠣꠄ ꠁꠋꠡꠣꠁꠘ, ꠁꠔꠣ ꠔꠥꠝꠣꠞ ꠍꠣꠝꠘ ꠕꠣꠇꠤ ꠜꠣꠉꠃꠇ।”
NUM 10:36 ꠀꠞ ꠎꠦꠛꠟꠣ ꠅꠃ ꠡꠘ꠆ꠖꠥꠇ ꠕꠣꠝꠤꠎꠤꠔ, ꠔꠣꠁꠘ ꠇꠁꠔꠣ, “ꠅ ꠝꠣꠛꠥꠖ, ꠟꠣꠈ ꠟꠣꠈ ꠛꠘꠤ ꠁꠍꠞꠣꠁꠟꠞ ꠉꠦꠍꠦ ꠔꠥꠝꠤ ꠚꠤꠞꠤꠀ ꠀꠅ।”
NUM 11:1 ꠛꠘꠤ ꠁꠍꠞꠣꠁꠟꠦ ꠘꠤꠎꠞ ꠖꠥꠈ-ꠇꠡ꠆ꠐꠞ ꠟꠣꠉꠤ ꠛꠦꠎꠣꠞ ꠅꠁꠀ ꠛꠇꠣ-ꠎꠇꠣ ꠇꠞꠟꠣ। ꠄꠞꠟꠣꠉꠤ ꠝꠣꠛꠥꠖꠦ ꠔꠣꠞꠣꠞ ꠁꠔꠣ ꠢꠥꠘꠤꠀ ꠉꠥꠍꠣ ꠅꠁꠉꠦꠟꠣ। ꠔꠣꠁꠘ ꠉꠎꠛꠤ ꠀꠉꠥꠁꠘ ꠙꠣꠑꠣꠁꠟꠣ ꠀꠞ ꠅꠃ ꠀꠉꠥꠁꠘ ꠔꠣꠞꠣꠞ ꠝꠣꠎꠦ ꠎꠟꠤꠟ, ꠄꠔꠦ ꠇꠦꠝ꠆ꠙꠞ ꠇꠤꠘꠣꠞꠣꠞ ꠇꠤꠍꠥ ꠅꠋꠡ ꠀꠉꠥꠁꠘꠦ ꠎꠟꠤꠉꠦꠟ।
NUM 11:2 ꠄꠞꠖꠣꠄ ꠔꠣꠞꠣ ꠝꠥꠍꠣ ꠘꠛꠤꠞ ꠉꠦꠍꠦ ꠉꠤꠀ ꠇꠣꠘ꠆ꠖꠣ-ꠇꠣꠐꠤ ꠟꠣꠉꠣꠁꠟꠣ, ꠔꠦꠃ ꠝꠥꠍꠣꠄ ꠝꠣꠛꠥꠖꠞ ꠖꠞꠛꠣꠞꠅ ꠖꠥꠀ ꠇꠞꠣꠄ ꠀꠉꠥꠁꠘ ꠘꠤꠜꠤ ꠉꠦꠟ।
NUM 11:3 ꠝꠣꠛꠥꠖꠞ ꠀꠉꠥꠁꠘ ꠔꠣꠞꠣꠞ ꠝꠣꠎꠦ ꠎꠟꠍꠤꠟ ꠇꠞꠤ, ꠅꠃ ꠎꠣꠉꠣꠞ ꠘꠣꠝ ꠅꠁꠉꠦꠟ ꠔꠣꠛꠦꠞꠣ।
NUM 11:4 ꠛꠘꠤ ꠁꠍꠞꠣꠁꠟꠞ ꠟꠉꠦ ꠅꠁꠘ꠆ꠘꠣꠁꠘ꠆ꠘ ꠎꠣꠔꠤꠞ ꠎꠦꠔꠣ ꠝꠣꠘꠥꠡ ꠀꠍꠟꠣ, ꠔꠣꠞꠣ ꠖꠥꠍꠞꠣ ꠎꠣꠔꠞ ꠝꠎꠣꠞ ꠇꠥꠘꠥ ꠈꠣꠘꠤꠞ ꠟꠣꠉꠤ ꠙꠣꠉꠟ ꠛꠘꠤꠉꠦꠟꠣ, ꠀꠞ ꠄꠞꠣꠞ ꠖꠦꠈꠣ-ꠖꠦꠈꠤ ꠛꠘꠤ ꠁꠍꠞꠣꠁꠟꠦꠅ ꠢꠤꠞꠛꠣꠞ ꠇꠣꠘ꠆ꠖꠣ-ꠇꠣꠐꠤ ꠇꠞꠤ ꠇꠁꠟꠣ, “ꠁꠡ, ꠀꠝꠞꠣ ꠎꠥꠖꠤ ꠉꠥꠡ꠆ꠔ ꠈꠣꠁꠔꠣꠝ ꠙꠣꠞꠔꠣꠝ!
NUM 11:5 ꠝꠤꠡꠞꠅ ꠕꠣꠇꠔꠦ ꠔ ꠛꠤꠘꠣ ꠙꠄꠡꠣꠄ ꠝꠣꠉꠘꠣ ꠝꠣꠍ ꠈꠣꠁꠔꠣꠝ, ꠢꠘꠅ ꠔꠞꠝꠥꠎ, ꠙꠤꠀꠎ-ꠞꠡꠥꠘ, ꠇꠤꠞꠣ, ꠢꠣꠉ-ꠔꠞꠇꠣꠞꠤ ꠢꠇ꠆ꠇꠟꠔꠣ ꠈꠣꠁꠔꠣꠝ, ꠁꠔꠣ ꠅꠈꠘꠅ ꠝꠘꠅ ꠙꠠꠦꠞ।
NUM 11:6 ꠅꠁꠟꠦ ꠅꠈꠘ ꠀꠝꠞꠣꠞ ꠇꠁꠟꠎꠣ ꠢꠥꠇꠣꠁ ꠉꠦꠍꠦ। ꠁꠘꠅ ꠔ ꠈꠣꠟꠤ ꠝꠣꠘ꠆ꠘꠣ ꠍꠣꠠꠣ ꠈꠣꠅꠀꠞ ꠀꠞ ꠇꠥꠘ꠆ꠔꠣꠃ ꠘꠣꠁ।”
NUM 11:7 ꠅꠃ ꠝꠣꠘ꠆ꠘꠣ ꠖꠦꠈꠔꠦ ꠓꠥꠟꠣ ꠛꠣꠈꠞꠞ ꠟꠣꠈꠣꠘ, ꠄꠞ ꠞꠋ ꠅꠁꠟ ꠇꠤꠍꠝꠤꠍꠞ ꠟꠣꠈꠣꠘ।
NUM 11:8 ꠝꠣꠘꠡꠦ ꠌꠣꠁꠞꠅꠛꠣꠄ ꠕꠣꠇꠤ ꠝꠣꠘ꠆ꠘꠣ ꠔꠥꠇꠣꠁꠀ ꠀꠘꠤꠀ ꠊꠣꠁꠟ-ꠍꠤꠀꠖꠤ ꠇꠥꠐꠤꠀ ꠛꠣ ꠢꠤꠟ-ꠙꠣꠐꠣꠖꠤ ꠍꠦꠌꠤꠀ ꠉꠥꠠꠣ ꠇꠞꠔꠣ। ꠛꠣꠖꠦ ꠁꠔꠣ ꠙꠣꠔꠤꠟꠅ ꠃꠘꠣ ꠖꠤꠀ ꠛꠣ ꠙꠤꠑꠣ ꠛꠣꠘꠣꠁꠀ ꠈꠣꠁꠔꠣ। ꠁꠔꠣ ꠈꠣꠁꠔꠦ ꠔꠦꠟꠖꠤ ꠛꠣꠘꠣꠁꠟ ꠙꠤꠑꠣꠞ ꠟꠣꠈꠣꠘ ꠝꠎꠣ।
NUM 11:9 ꠞꠣꠁꠔꠞ ꠛꠣꠟꠣ ꠛꠘꠤ ꠁꠍꠞꠣꠁꠟꠞ ꠇꠦꠝ꠆ꠙꠞ ꠀꠡꠦ-ꠙꠣꠡꠦ ꠈꠥꠀ ꠙꠠꠔ, ꠅꠃ ꠈꠥꠀꠞ ꠟꠉꠦ ꠅꠁꠀ ꠛꠦꠢꠦꠡ꠆ꠔꠤ ꠈꠣꠘꠤ ꠝꠣꠘ꠆ꠘꠣꠅ ꠙꠠꠔ।
NUM 11:10 ꠝꠥꠍꠣ ꠘꠛꠤꠞ ꠇꠣꠘꠅ ꠀꠁꠟ, ꠙꠞꠔꠦꠇ ꠊꠞꠞ ꠝꠣꠘꠡꠦ ꠎꠣꠞꠎꠤꠞ ꠔꠣꠝ꠆ꠛꠥꠞ ꠖꠥꠀꠞꠞ ꠉꠦꠍꠦ ꠃꠛꠣꠁꠀ ꠇꠣꠘ꠆ꠖꠤꠞꠣ। ꠄꠞꠖꠣꠄ ꠔꠣꠁꠘ ꠈꠥꠛ ꠛꠦꠎꠣꠞ ꠅꠁꠟꠣ, ꠀꠞ ꠝꠣꠛꠥꠖꠅ ꠉꠥꠍꠣꠄ ꠀꠉꠥꠁꠘ ꠅꠁꠉꠦꠟꠣ।
NUM 11:11 ꠔꠦꠃ ꠝꠥꠍꠣꠄ ꠝꠣꠛꠥꠖꠞꠦ ꠇꠁꠟꠣ, “ꠔꠥꠝꠤ ꠇꠦꠘꠦ ꠔꠥꠝꠣꠞ ꠁ ꠉꠥꠟꠣꠝꠞꠦ ꠁꠟꠣ ꠛꠤꠙꠖꠅ ꠚꠣꠟꠣꠁꠟꠣꠄ? ꠀꠝꠤ ꠇꠤꠔꠣ ꠖꠥꠡ ꠇꠞꠟꠣꠝ, ꠎꠦ ꠇꠣꠞꠘꠦ ꠅꠔꠣ ꠝꠣꠘꠡꠞ ꠜꠣꠞ ꠀꠝꠣꠞ ꠇꠣꠘ꠆ꠖꠅ ꠖꠤꠟꠣꠄ?
NUM 11:12 ꠀꠝꠤ ꠇꠥꠘꠥ ꠔꠣꠞꠣꠞꠦ ꠙꠦꠐꠅ ꠟꠁꠍꠤ ꠘꠤ, ꠛꠣ ꠔꠣꠞꠣ ꠀꠝꠣꠞ ꠙꠦꠐ ꠕꠣꠇꠤ ꠎꠘꠝꠤꠍꠦ ꠘꠤ? ꠔꠥꠝꠤ ꠔꠣꠞꠣꠞ ꠛꠣꠚ-ꠖꠣꠖꠣꠁꠘ꠆ꠔꠞ ꠉꠦꠍꠦ ꠎꠦ ꠖꠦꠡ ꠖꠤꠛꠣꠞ ꠅꠀꠖꠣ ꠇꠞꠍꠤꠟꠣꠄ, ꠔꠣꠞꠣꠞꠦ ꠢꠘꠅ ꠘꠤꠛꠣꠞ ꠟꠣꠉꠤ ꠀꠝꠣꠞꠦ ꠇꠦꠘꠦ ꠔꠣꠞꠣꠞ ꠙꠣꠟꠇ-ꠛꠣꠚꠞ ꠟꠣꠈꠣꠘ ꠛꠣꠘꠣꠁꠍ, ꠀꠞ ꠔꠣꠞꠣꠞꠦ ꠇꠥꠟꠅ ꠇꠞꠤ ꠘꠤꠛꠣꠞ ꠇꠕꠣ ꠇꠦꠘꠦ ꠇꠁꠞꠣꠄ?
NUM 11:13 ꠁꠔꠣ ꠝꠣꠘꠡꠞ ꠈꠣꠘꠤꠞ ꠟꠣꠉꠤ ꠀꠝꠤ ꠅꠈꠘ ꠉꠥꠡ꠆ꠔ ꠇꠥꠀꠁ ꠙꠣꠁꠔꠣꠝ? ꠔꠣꠞꠣ ꠀꠝꠣꠞ ꠉꠦꠍꠦ ꠈꠣꠟꠤ ꠉꠥꠡ꠆ꠔ ꠉꠥꠡ꠆ꠔ ꠇꠁꠀ ꠌꠤꠟ꠆ꠟꠣꠁꠞꠣ।
NUM 11:14 ꠔꠣꠞꠣꠞ ꠎꠤꠝ꠆ꠝꠣ ꠘꠦꠅꠀ ꠛꠠ ꠝꠡꠇꠤꠟ, ꠀꠝꠣꠞ ꠄꠇꠣꠞ ꠙꠇ꠆ꠇꠦ ꠁ ꠎꠤꠝ꠆ꠝꠣ ꠘꠦꠅꠀ ꠡꠝ꠆ꠛꠛ ꠘꠣꠄ।
NUM 11:15 ꠔꠥꠝꠤ ꠎꠥꠖꠤ ꠀꠝꠣꠞꠦ ꠁ ꠝꠥꠡꠇꠤꠟꠅ ꠚꠣꠟꠣꠅ, ꠔꠦ ꠔꠥꠝꠣꠞ ꠖꠥꠀꠁ ꠖꠤꠀ ꠇꠁꠀꠞ, ꠅꠈꠘꠃ ꠀꠝꠣꠞꠦ ꠎꠣꠘꠦ ꠝꠣꠞꠤꠟꠣꠅ। ꠀꠞ ꠇꠁꠞꠣꠝ, ꠀꠝꠤ ꠎꠥꠖꠤ ꠔꠥꠝꠣꠞ ꠞꠢꠝꠔꠞ ꠔꠟꠦ ꠕꠣꠇꠤ, ꠔꠦ ꠘꠤꠎꠞ ꠌꠃꠈꠦ ꠘꠤꠎꠞ ꠛꠦꠢꠣꠟ꠆ꠟꠔꠤ ꠖꠡꠣ ꠀꠝꠣꠞꠦ ꠖꠦꠈꠣꠁꠅ ꠘꠣ।”
NUM 11:16 ꠔꠦꠃ ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ, “ꠛꠘꠤ ꠁꠍꠞꠣꠁꠟꠞ ꠝꠣꠎꠦ ꠔꠥꠝꠤ ꠎꠣꠞꠣꠞꠦ ꠝꠥꠞꠛ꠆ꠛꠤ ꠘꠦꠔꠣ ꠀꠞ ꠁꠎ꠆ꠎꠔꠤ ꠢꠤꠡꠣꠛꠦ ꠌꠤꠘꠅ, ꠄꠞꠣꠞ ꠝꠣꠎ ꠕꠣꠇꠤ ꠡꠔ꠆ꠔꠁꠞ ꠎꠘ ꠝꠥꠞꠛ꠆ꠛꠤ ꠘꠦꠔꠣꠞꠦ ꠟꠁꠀ ꠀꠝꠣꠞ ꠉꠦꠍꠦ ꠀꠅ। ꠔꠥꠝꠤ ꠔꠣꠞꠣꠞꠦ ꠇꠅ, ꠔꠣꠞꠣ ꠝꠤꠟꠘ-ꠔꠣꠝ꠆ꠛꠥꠞ ꠉꠦꠍꠦ ꠀꠁꠀ ꠔꠥꠝꠣꠞ ꠟꠉꠦ ꠃꠛꠣꠁꠔꠣ।
NUM 11:17 ꠀꠝꠤ ꠢꠘꠅ ꠟꠣꠝꠤꠀ ꠀꠁꠀ ꠔꠥꠝꠣꠞ ꠟꠉꠦ ꠛꠣꠔꠌꠤꠔ ꠇꠞꠝꠥ। ꠔꠥꠝꠣꠞ ꠝꠣꠎꠦ ꠀꠟ꠆ꠟꠣꠞ ꠎꠦ ꠞꠥꠢꠥ ꠀꠍꠂꠘ, ꠅꠃ ꠞꠥꠢꠥ ꠀꠝꠤ ꠔꠣꠞꠣꠞ ꠃꠙꠞꠦꠅ ꠖꠣꠘ ꠇꠞꠝꠥ। ꠝꠣꠘꠡꠞ ꠎꠤꠝ꠆ꠝꠣꠖꠣꠞꠤ ꠛꠁꠀ ꠘꠤꠔꠦ ꠔꠣꠞꠣꠅ ꠔꠥꠝꠣꠞꠦ ꠡꠣꠁꠎ꠆ꠎ ꠇꠞꠛꠣ। ꠔꠦꠃ ꠔꠥꠝꠣꠞ ꠄꠇꠟꠣ ꠛꠅꠀ ꠟꠣꠉꠔ ꠘꠣꠄ।
NUM 11:18 ꠀꠞ ꠔꠥꠝꠤ ꠅꠔꠣ ꠝꠣꠘꠡꠞꠦ ꠎꠣꠘꠣꠁ ꠖꠦꠅ, ꠔꠣꠞꠣ ꠙꠣꠇ-ꠙꠛꠤꠔ꠆ꠞ ꠅꠁꠀ ꠇꠣꠁꠟꠇꠥꠞ ꠟꠣꠉꠤ ꠎꠥꠁꠔ ꠞꠁꠔꠣ, ꠇꠣꠁꠟꠃ ꠔꠣꠞꠣ ꠈꠣꠘꠤꠞ ꠉꠥꠡ꠆ꠔ ꠙꠣꠁꠛꠣ। ꠔꠣꠞꠣ ꠔ ꠉꠥꠡ꠆ꠔꠞ ꠟꠣꠉꠤ ꠝꠣꠛꠥꠖꠞ ꠖꠞꠛꠣꠞꠅ ꠇꠣꠘ꠆ꠖꠣ-ꠇꠣꠐꠤ ꠇꠞꠤꠀ ꠇꠁꠍꠤꠟ, ꠝꠤꠡꠞꠅ ꠕꠣꠇꠔꠦꠃ ꠔꠣꠞꠣ ꠀꠞꠣꠝꠦ ꠀꠍꠤꠟ। ꠔꠦ ꠇꠣꠁꠟ ꠝꠣꠛꠥꠖꠦ ꠔꠣꠞꠣꠞꠦ ꠉꠥꠡ꠆ꠔ ꠖꠤꠛꠣ ꠀꠞ ꠔꠣꠞꠣ ꠈꠣꠁꠛꠣ।
NUM 11:19 ꠁ ꠉꠥꠡ꠆ꠔ ꠈꠣꠟꠤ ꠄꠇꠖꠤꠘ-ꠖꠥꠁꠖꠤꠘ, ꠙꠣꠌꠖꠤꠘ-ꠖꠡꠖꠤꠘ, ꠛꠣ ꠛꠤꠡꠖꠤꠘ ꠘꠣꠄ,
NUM 11:20 ꠙꠥꠞꠣ ꠄꠇ ꠝꠣꠡ ꠜꠞꠤ ꠈꠣꠁꠛꠣ। ꠈꠣꠁꠔꠦ ꠈꠣꠁꠔꠦ ꠔꠣꠞꠣꠞ ꠘꠣꠇꠦꠖꠤ ꠛꠣꠞ ꠅꠁꠛ, ꠛꠣꠖꠦ ꠀꠞ ꠎꠣꠘꠦ ꠇꠥꠟꠣꠁꠔ ꠘꠣꠄ। ꠀꠝꠤ ꠁꠟꠣ ꠊꠐꠣꠁꠝꠥ, ꠇꠣꠞꠘ ꠔꠥꠝꠞꠣꠞ ꠟꠉꠦ ꠎꠦ ꠝꠣꠛꠥꠖ ꠛꠡꠔ ꠇꠞꠂꠘ, ꠅꠃ ꠝꠣꠛꠥꠖꠞꠦ ꠔꠥꠝꠞꠣ ꠝꠣꠘꠍ ꠘꠣ। ꠔꠣꠘ ꠍꠣꠝꠘꠦ ꠇꠣꠘ꠆ꠖꠣ-ꠇꠣꠐꠤ ꠇꠞꠤꠀ ꠇꠁꠍ, ꠝꠤꠡꠞ ꠕꠣꠇꠤ ꠢꠞꠤꠀ ꠀꠅꠀ ꠛꠥꠟꠦ ꠔꠥꠝꠞꠣꠞ ꠟꠣꠉꠤ ꠑꠤꠇ ꠅꠁꠍꠦ ꠘꠣ।”
NUM 11:21 ꠁꠈꠣꠘ ꠢꠥꠘꠤꠀ ꠝꠥꠍꠣꠄ ꠇꠁꠟꠣ, “ꠈꠣꠟꠤ ꠎꠥꠖ꠆ꠖ ꠇꠞꠣꠞ ꠎꠥꠇꠣꠃ ꠔ ꠍꠄ ꠟꠣꠈ ꠝꠣꠘꠥꠡ ꠀꠝꠣꠞ ꠟꠉꠦ ꠀꠍꠂꠘ, ꠀꠞ ꠔꠥꠝꠤ ꠇꠁꠞꠣꠄ ꠙꠥꠞꠣ ꠄꠇ ꠝꠣꠡ ꠜꠞꠤ ꠔꠣꠞꠣꠞꠦ ꠉꠥꠡ꠆ꠔ ꠈꠣꠛꠣꠁꠛꠣꠄ।
NUM 11:22 ꠔꠦ ꠢꠇ꠆ꠇꠟ ꠉꠞꠥ-ꠝꠦꠠꠣ ꠎꠛ ꠇꠞꠟꠦꠅ ꠔ ꠅꠔ ꠝꠣꠘꠡꠞ ꠚꠥꠁꠔ ꠘꠣꠄ, ꠀꠞ ꠖꠞꠤꠀꠞ ꠢꠇꠟ ꠝꠣꠍ ꠝꠣꠞꠤꠀ ꠀꠘꠤꠟ꠆ꠟꠦꠅ ꠇꠥꠟꠣꠁꠔ ꠘꠣꠄ।”
NUM 11:23 ꠝꠣꠛꠥꠖꠦ ꠎꠥꠀꠙ ꠖꠤꠟꠣ, “ꠅ ꠝꠥꠍꠣ, ꠝꠣꠛꠥꠖꠞ ꠇꠥꠖꠞꠔꠤ ꠛꠟ ꠅꠔ ꠇꠝꠎꠥꠞ ꠘꠤ? ꠔꠦ ꠔꠥꠝꠤ ꠖꠦꠈꠛꠣꠄ, ꠀꠝꠤ ꠔꠥꠝꠣꠞꠦ ꠎꠦꠔꠣ ꠇꠁꠍꠤ, ꠁꠔꠣ ꠢꠣꠍꠣ, ꠘꠣ ꠝꠤꠍꠣ।”
NUM 11:24 ꠔꠦꠃ ꠝꠥꠍꠣ ꠛꠣꠞꠦ ꠉꠦꠟꠣ, ꠉꠤꠀ ꠅꠔꠣ ꠝꠣꠘꠡꠞꠦ ꠝꠣꠛꠥꠖꠞ ꠢꠥꠇꠥꠝ ꠎꠣꠘꠣꠁꠟꠣ। ꠀꠞ ꠛꠘꠤ ꠁꠍꠞꠣꠁꠟꠞ ꠡꠔ꠆ꠔꠁꠞ ꠎꠘ ꠝꠥꠞꠛ꠆ꠛꠤ ꠘꠦꠔꠣꠞꠦ ꠀꠘꠤꠀ ꠝꠤꠟꠘ-ꠔꠣꠝ꠆ꠛꠥꠞ ꠌꠣꠁꠞꠅꠛꠣꠄ ꠈꠣꠠꠣ ꠇꠞꠣꠁꠟꠣ।
NUM 11:25 ꠅꠃ ꠡꠝꠄ ꠉꠣꠁꠛꠤ ꠝꠦꠊꠞ ꠌꠣꠈꠣꠔ ꠅꠁꠀ ꠝꠣꠛꠥꠖ ꠟꠣꠝꠤꠀ ꠀꠁꠟꠣ, ꠀꠁꠀ ꠝꠥꠍꠣ ꠘꠛꠤꠞ ꠟꠉꠦ ꠛꠣꠔꠌꠤꠔ ꠇꠞꠟꠣ। ꠝꠥꠍꠣꠞ ꠃꠙꠞꠦ ꠀꠟ꠆ꠟꠣꠁ ꠎꠦ ꠞꠥꠢꠥ ꠀꠍꠟꠣ, ꠝꠣꠛꠥꠖꠦ ꠅꠃ ꠡꠔ꠆ꠔꠁꠞ ꠎꠘ ꠘꠦꠔꠣꠞ ꠃꠙꠞꠦꠅ ꠅꠃ ꠞꠥꠢꠥꠞ ꠇꠤꠍꠥ ꠅꠋꠡ ꠖꠤꠟꠣ। ꠅꠃ ꠞꠥꠢꠥ ꠔꠣꠞꠣꠞꠦ ꠖꠣꠘ ꠇꠞꠣꠞ ꠛꠣꠖꠦ, ꠔꠣꠞꠣ ꠇꠤꠍꠥ ꠡꠝꠄ ꠍꠥꠚꠤ-ꠖꠞꠛꠦꠡꠞ ꠄꠡꠇꠤ ꠜꠣꠛ ꠖꠦꠈꠣꠁꠟꠣ, ꠅꠁꠟꠦ ꠛꠣꠖꠦ ꠀꠞ ꠁꠟꠣ ꠅꠁꠍꠦ ꠘꠣ।
NUM 11:26 ꠀꠞ ꠅꠃ ꠡꠔ꠆ꠔꠁꠞ ꠎꠘ ꠝꠥꠞꠛ꠆ꠛꠤ ꠘꠦꠔꠣꠞ ꠝꠣꠎꠞ ꠖꠥꠁꠎꠘ ꠝꠥꠞꠛ꠆ꠛꠤ ꠇꠦꠝ꠆ꠙꠞ ꠜꠤꠔꠞꠦ ꠞꠁꠉꠦꠟꠣ, ꠄꠞꠣꠞ ꠘꠣꠝ ꠁꠟꠖꠣꠖ ꠀꠞ ꠝꠤꠖꠣꠖ, ꠔꠣꠞꠣ ꠝꠤꠟꠘ-ꠔꠣꠝ꠆ꠛꠥꠞ ꠉꠦꠍꠦ ꠉꠦꠍꠟꠣ ꠘꠣ। ꠔꠦꠛꠃ ꠀꠟ꠆ꠟꠣꠁ ꠅꠃ ꠞꠥꠢꠥ ꠔꠣꠞꠣꠅ ꠙꠣꠁꠟꠣ, ꠙꠣꠁꠀ ꠔꠣꠞꠣ ꠇꠦꠝ꠆ꠙꠞ ꠜꠤꠔꠞꠦ ꠞꠁꠀ ꠍꠥꠚꠤ-ꠖꠞꠛꠦꠡꠞ ꠄꠡꠇꠤ ꠜꠣꠛ ꠖꠦꠈꠣꠁꠟꠣ।
NUM 11:27 ꠁꠔꠣ ꠖꠦꠈꠤꠀ ꠄꠇ ꠎꠥꠀꠘ ꠛꠦꠐꠣꠄ ꠖꠃꠠꠣꠁꠀ ꠉꠤꠀ ꠝꠥꠍꠣꠞꠦ ꠇꠁꠟꠣ, “ꠢꠥꠎꠥꠞ, ꠢꠥꠘꠍꠂꠘ ꠘꠤ? ꠁꠟꠖꠣꠖ ꠀꠞ ꠝꠤꠖꠣꠖ ꠘꠣꠝꠞ ꠖꠥꠁꠅ ꠝꠥꠞꠛ꠆ꠛꠤꠄ ꠇꠦꠝ꠆ꠙꠞ ꠜꠤꠔꠞꠦ ꠍꠥꠚꠤ-ꠖꠞꠛꠦꠡꠞ ꠄꠡꠇꠤ ꠜꠣꠛ ꠖꠦꠈꠣꠁꠞꠣ।”
NUM 11:28 ꠅꠃ ꠡꠝꠄ ꠘꠥꠘꠞ ꠙꠥꠀ ꠁꠃꠍꠣꠄ ꠝꠥꠍꠣꠞꠦ ꠇꠁꠟꠣ, “ꠅ ꠀꠝꠣꠞ ꠝꠣꠟꠤꠇ, ꠀꠙꠘꠦ ꠄꠞꠣꠞꠦ ꠘꠤꠡꠦꠗ ꠖꠦꠃꠇ꠆ꠇꠣ।” ꠅꠃ ꠁꠃꠍꠣ ꠎꠥꠀꠘꠇꠤꠞ ꠡꠥꠞꠥ ꠕꠣꠇꠤꠃ ꠝꠥꠍꠣ ꠘꠛꠤꠞ ꠈꠣꠍ ꠈꠣꠖꠤꠝ ꠀꠍꠟꠣ।
NUM 11:29 ꠝꠥꠍꠣꠄ ꠄꠘꠞꠦ ꠇꠁꠟꠣ, “ꠀꠝꠣꠞ ꠝꠣꠘ-ꠡꠝ꠆ꠝꠣꠘꠃ ꠔꠥꠝꠣꠞ ꠉꠦꠍꠦ ꠛꠠ ꠅꠁꠉꠦꠟ ꠘꠤ? ꠀꠝꠤ ꠌꠣꠁꠞꠣꠝ, ꠝꠣꠛꠥꠖꠞ ꠢꠇꠟ ꠛꠘ꠆ꠖꠣꠄꠃ ꠍꠥꠚꠤ-ꠖꠞꠛꠦꠡꠤ ꠙꠣꠃꠇ꠆ꠇꠣ, ꠀꠞ ꠝꠣꠛꠥꠖꠦ ꠀꠙꠘ ꠞꠥꠢꠥ ꠔꠣꠞꠣꠞꠦ ꠖꠣꠘ ꠇꠞꠃꠇ꠆ꠇꠣ।”
NUM 11:30 ꠄꠞꠛꠣꠖꠦ ꠝꠥꠍꠣ ꠀꠞ ꠛꠘꠤ ꠁꠍꠞꠣꠁꠟꠞ ꠝꠥꠞꠛ꠆ꠛꠤ ꠘꠦꠔꠣ ꠅꠇꠟ ꠇꠦꠝ꠆ꠙꠅ ꠚꠤꠞꠤꠀ ꠉꠦꠟꠣꠉꠤ।
NUM 11:31 ꠛꠣꠖꠦ ꠝꠣꠛꠥꠖꠞ ꠢꠥꠇꠥꠝꠦ ꠛꠠ ꠄꠇ ꠔꠥꠚꠣꠘ ꠀꠁꠟ। ꠅꠃ ꠔꠥꠚꠣꠘꠦ ꠖꠞꠤꠀꠞ ꠙꠣꠞ ꠕꠣꠇꠤ ꠇꠥꠄꠟ ꠙꠣꠈꠤ ꠑꠦꠟꠤꠀ ꠀꠘꠤꠀ ꠇꠦꠝ꠆ꠙꠞ ꠌꠣꠁꠞꠅ ꠉꠣꠟꠣ ꠜꠞꠣꠁ ꠖꠤꠟ। ꠄꠇꠖꠤꠘꠞ ꠙꠕ ꠙꠞꠤꠝꠣꠘ ꠎꠣꠉꠣ ꠙꠣꠈꠤꠄ ꠜꠞꠤꠉꠦꠟ। ꠙꠣꠈꠤꠞ ꠙꠣꠟ ꠝꠣꠐꠤ ꠕꠣꠇꠤ ꠖꠥꠁ ꠀꠔ ꠃꠌꠣ ꠔꠥꠛ ꠅꠁꠀ, ꠉꠤꠍ ꠟꠣꠉꠤꠀ ꠙꠠꠤ ꠞꠁꠟ।
NUM 11:32 ꠔꠦꠃ ꠢꠃ ꠖꠤꠘ, ꠢꠃ ꠞꠣꠁꠔ, ꠀꠞ ꠛꠣꠖꠞ ꠀꠡ꠆ꠔꠣ ꠖꠤꠘ ꠝꠣꠘꠡꠦ ꠛꠣꠞꠦ ꠉꠤꠀ ꠇꠥꠄꠟ ꠙꠣꠈꠤꠘ ꠔꠥꠛꠣꠁꠀ ꠀꠘꠟꠣ। ꠔꠣꠞꠣ ꠙꠞꠔꠦꠇꠦ ꠇꠝꠙꠇ꠆ꠇꠦ ꠙꠁꠘ꠆ꠌꠣꠡ ꠝꠘ ꠇꠞꠤ ꠙꠣꠈꠤ ꠖꠟꠣ ꠇꠞꠟ। ꠙꠣꠈꠤꠘ ꠖꠟꠣ ꠇꠞꠤꠀ ꠇꠦꠝ꠆ꠙꠞ ꠌꠣꠁꠞꠅꠛꠣꠄ ꠔꠣꠞꠣ ꠛꠅꠀꠁꠀ ꠕꠁꠟꠣ।
NUM 11:33 ꠅꠁꠟꠦ ꠙꠣꠈꠤꠞ ꠉꠥꠡ꠆ꠔ ꠔꠣꠞꠣꠞ ꠝꠥꠈꠅ ꠢꠣꠞꠣꠘꠤꠞ ꠟꠉꠦ ꠟꠉꠦꠃ ꠝꠣꠛꠥꠖ ꠉꠥꠍꠣꠄ ꠀꠉꠥꠁꠘ ꠅꠁꠉꠦꠟꠣ। ꠉꠥꠍꠣ ꠇꠞꠤꠀ ꠔꠣꠁꠘ ꠛꠦꠎꠥꠁꠔꠣ ꠉꠎꠛꠤ ꠛꠦꠝꠣꠞ ꠓꠣꠟꠤꠟꠣ।
NUM 11:34 ꠄꠞꠟꠣꠉꠤ ꠁ ꠎꠣꠉꠣꠞ ꠘꠣꠝ ꠖꠦꠅꠀ ꠅꠁꠟ ꠇꠤꠛꠞꠥꠔ-ꠢꠥꠔꠣꠛꠣ, ꠝꠣꠘꠤ ꠟꠣꠟꠌꠤ ꠅꠇꠟꠞ ꠇꠄꠛꠞ, ꠇꠣꠞꠘ ꠅꠃ ꠟꠣꠟꠌꠤ ꠅꠇꠟꠞꠦ ꠝꠣꠘꠡꠦ ꠅꠘꠅ ꠇꠄꠛꠞ ꠖꠤꠍꠤꠟ।
NUM 11:35 ꠄꠞꠛꠣꠖꠦ ꠔꠣꠞꠣ ꠇꠤꠛꠞꠥꠔ-ꠢꠥꠔꠣꠛꠣ ꠍꠣꠠꠤꠀ ꠉꠦꠟꠣꠉꠤ, ꠉꠤꠀ ꠢꠣꠎꠤꠞꠥꠔ ꠘꠣꠝꠞ ꠎꠣꠉꠣꠔ ꠞꠁꠟꠣ।
NUM 12:1 ꠢꠎꠞꠔ ꠝꠥꠍꠣꠄ ꠁꠕꠤꠅꠙꠤꠀ ꠖꠦꠡꠞ ꠄꠇꠎꠘ ꠛꠦꠐꠤꠞꠦ ꠛꠤꠀ ꠇꠞꠍꠟꠣ। ꠄꠘꠞꠦ ꠛꠤꠀ ꠇꠞꠣꠄ ꠝꠥꠍꠣꠞ ꠛꠁꠘ ꠝꠞꠤꠅꠝ ꠀꠞ ꠜꠣꠁ ꠢꠣꠞꠥꠘꠦ ꠝꠥꠍꠣꠞ ꠛꠤꠞꠥꠖ꠆ꠖꠦ ꠝꠣꠔ-ꠇꠕꠣ ꠝꠣꠔꠤꠟꠣ।
NUM 12:2 ꠔꠣꠞꠣ ꠇꠁꠟꠣ, “ꠝꠣꠛꠥꠖꠦ ꠈꠣꠟꠤ ꠝꠥꠍꠣꠞ ꠝꠣꠞꠚꠔꠦ ꠝꠣꠔꠂꠘ ꠘꠤ? ꠀꠝꠞꠣꠞ ꠃꠍꠤꠟ꠆ꠟꠣꠄꠅ ꠝꠣꠔꠂꠘ ꠘꠣ ꠘꠤ?” ꠁꠈꠣꠘ ꠝꠣꠛꠥꠖꠦ ꠢꠥꠘꠟꠣ।
NUM 12:3 ꠀꠍꠟꠦ ꠝꠥꠍꠣ ꠘꠛꠤ ꠔ ꠀꠍꠟꠣ ꠄꠇꠎꠘ ꠉꠞꠤꠝꠣ ꠍꠣꠠꠣ ꠝꠣꠘꠥꠡ। ꠎꠉꠔꠞ ꠝꠣꠎꠦ ꠁꠟꠣ ꠉꠞꠤꠝꠣ ꠍꠣꠠꠣ ꠀꠞ ꠇꠥꠘꠥ ꠝꠣꠘꠥꠡ ꠀꠍꠤꠟ ꠘꠣ।
NUM 12:4 ꠝꠥꠍꠣꠞ ꠛꠤꠞꠥꠖ꠆ꠖꠦ ꠢꠣꠞꠥꠘ ꠀꠞ ꠝꠞꠤꠅꠝꠞ ꠝꠣꠔ-ꠇꠕꠣ ꠢꠥꠘꠤꠀꠃ ꠝꠣꠛꠥꠖꠦ ꠝꠥꠍꠣ, ꠢꠣꠞꠥꠘ ꠀꠞ ꠝꠞꠤꠅꠝꠞꠦ ꠇꠁꠟꠣ, “ꠔꠥꠝꠞꠣ ꠔꠤꠘꠅꠎꠘ ꠛꠣꠞ ꠅꠁꠀ ꠝꠤꠟꠘ-ꠔꠣꠝ꠆ꠛꠥꠞ ꠉꠦꠍꠦ ꠀꠅ।” ꠔꠦꠃ ꠄꠞꠣ ꠔꠤꠘꠅꠎꠘ ꠅꠘꠅ ꠀꠁꠟꠣ।
NUM 12:5 ꠅꠃ ꠡꠝꠄ ꠝꠣꠛꠥꠖꠦꠅ ꠇꠥꠖꠞꠔꠤ ꠝꠦꠊꠞ ꠌꠣꠈꠣꠔ ꠅꠁꠀ ꠟꠣꠝꠤꠀ ꠀꠁꠟꠣ, ꠀꠁꠀ ꠝꠤꠟꠘ-ꠔꠣꠝ꠆ꠛꠥꠞ ꠖꠥꠀꠞꠞ ꠉꠦꠍ ꠕꠣꠇꠤ ꠢꠣꠞꠥꠘ ꠀꠞ ꠝꠞꠤꠅꠝꠞꠦ ꠒꠣꠇꠤꠟꠣ। ꠔꠣꠞꠣ ꠀꠉꠥꠀꠁꠀ ꠀꠁꠟꠦ
NUM 12:6 ꠝꠣꠛꠥꠖꠦ ꠇꠁꠟꠣ, “ꠔꠥꠝꠞꠣ ꠀꠝꠣꠞ ꠇꠕꠣ ꠢꠥꠘꠅ। ꠔꠥꠝꠞꠣꠞ ꠝꠣꠎꠦ ꠇꠥꠘꠥ ꠙꠤꠞ-ꠖꠞꠛꠦꠡ ꠕꠣꠇꠟꠦ, ꠀꠝꠤ ꠝꠣꠛꠥꠖꠦ ꠖꠞꠡꠘꠞ ꠝꠣꠎꠖꠤ ꠀꠝꠣꠞ ꠘꠤꠎꠞꠦ ꠔꠣꠞ ꠉꠦꠍꠦ ꠎꠣꠁꠞ ꠇꠞꠤ ꠀꠞ ꠈꠥꠀꠛꠦ ꠔꠣꠞ ꠟꠉꠦ ꠛꠣꠔꠌꠤꠔ ꠇꠞꠤ।
NUM 12:7 ꠅꠁꠟꠦ ꠀꠝꠣꠞ ꠉꠥꠟꠣꠝ ꠝꠥꠍꠣꠞ ꠟꠉꠦ ꠁꠟꠣ ꠇꠞꠤ ꠘꠣ। ꠢꠦ ꠀꠝꠣꠞ ꠀꠡ꠆ꠔꠣ ꠡꠋꠡꠣꠞꠞ ꠢꠇꠟ ꠕꠣꠇꠤ ꠛꠤꠡ꠆ꠛꠣꠡꠤ ꠎꠘ।
NUM 12:8 ꠀꠝꠤ ꠔꠣꠞ ꠟꠉꠦ ꠍꠣꠝꠘꠣ-ꠍꠣꠝꠘꠤ ꠅꠁꠀ ꠈꠥꠟꠣ-ꠈꠥꠟꠤ ꠛꠣꠔꠌꠤꠔ ꠇꠞꠤ, ꠇꠥꠘꠥꠔꠣ ꠛꠣꠔꠥꠘꠤ ꠞꠣꠈꠤ ꠘꠣ। ꠀꠝꠤ ꠝꠣꠛꠥꠖꠦ ꠎꠦ ꠍꠥꠞꠔꠦ ꠔꠣꠞꠦ ꠖꠤꠖꠣꠞ ꠖꠦꠁ, ꠢꠦ ꠀꠝꠣꠞꠦ ꠅꠟꠣ ꠖꠦꠈꠦ। ꠄꠞꠛꠣꠖꠦꠅ ꠔꠥꠝꠞꠣ ꠀꠝꠣꠞ ꠉꠥꠟꠣꠝ ꠝꠥꠍꠣꠞ ꠛꠤꠞꠥꠖ꠆ꠖꠦ ꠝꠣꠔꠤꠔꠦ ꠃꠛꠣꠁꠟꠣꠄ ꠘꠣ ꠘꠤ?”
NUM 12:9 ꠄꠞꠟꠣꠉꠤ ꠢꠣꠞꠥꠘ ꠀꠞ ꠝꠞꠤꠅꠝꠞ ꠃꠙꠞꠦ ꠝꠣꠛꠥꠖ ꠉꠥꠍꠣꠄ ꠀꠉꠥꠁꠘ ꠅꠁꠉꠦꠟꠣ, ꠅꠁꠀ ꠔꠣꠁꠘ ꠢꠞꠤꠀ ꠉꠦꠟꠣꠉꠤ।
NUM 12:10 ꠝꠦꠊꠞ ꠌꠣꠈꠣ ꠎꠦꠛꠟꠣ ꠝꠤꠟꠘ-ꠔꠣꠝ꠆ꠛꠥ ꠕꠣꠇꠤ ꠃꠙꠞꠦ ꠃꠑꠤꠉꠦꠟ, ꠅꠃ ꠡꠝꠄ ꠖꠦꠈꠣ ꠉꠦꠟ, ꠝꠞꠤꠅꠝꠞ ꠀꠡ꠆ꠔꠣ ꠉꠔꠞꠅ ꠙꠌꠣ-ꠇꠥꠡ꠆ꠑ ꠛꠦꠝꠣꠞꠦ ꠖꠥꠗꠞ ꠟꠣꠈꠣꠘ ꠗꠟꠣ ꠅꠁꠉꠦꠍꠦ। ꠢꠣꠞꠥꠘꠦ ꠝꠞꠤꠅꠝꠞ ꠛꠣꠄ ꠌꠣꠁꠀ ꠅꠃ ꠢꠣꠟꠔ ꠖꠦꠈꠟꠣ।
NUM 12:11 ꠖꠦꠈꠤꠀ ꠔꠣꠁꠘ ꠝꠥꠍꠣꠞꠦ ꠇꠁꠟꠣ, “ꠅ ꠀꠝꠣꠞ ꠝꠣꠟꠤꠇ, ꠀꠝꠞꠣ ꠘꠣ ꠛꠥꠎꠤꠀ ꠎꠦ ꠉꠥꠘꠣ ꠇꠞꠤꠟꠤꠍꠤ, ꠁ ꠇꠍꠥꠞꠤ ꠈꠣꠘ ꠔꠥꠝꠤ ꠝꠘꠅ ꠞꠣꠈꠤꠅ ꠘꠣ।
NUM 12:12 ꠝꠣʼꠞ ꠙꠦꠐꠅ ꠕꠣꠇꠤ ꠎꠘꠝ ꠅꠀꠞ ꠛꠣꠟꠣ ꠎꠦ ꠢꠥꠞꠥꠔ꠆ꠔꠣꠞ ꠅꠞ꠆ꠗꠦꠇ ꠡꠞꠤꠟ ꠇ꠆ꠇꠄ ꠅꠁꠉꠦꠍꠦ, ꠔꠥꠝꠤ ꠝꠞꠤꠅꠝꠞꠦ ꠁꠟꠣ ꠛꠣꠘꠣꠁꠅ ꠘꠣ।”
NUM 12:13 ꠔꠦꠃ ꠝꠥꠍꠣꠄ ꠇꠣꠘ꠆ꠖꠤꠀ ꠝꠣꠛꠥꠖꠞ ꠖꠞꠛꠣꠞꠅ ꠀꠞꠎ ꠇꠞꠟꠣ, “ꠅ ꠀꠟ꠆ꠟꠣ, ꠔꠥꠝꠤ ꠀꠝꠣꠞ ꠛꠁꠘꠞ ꠛꠦꠝꠣꠞ ꠡꠤꠚꠣ ꠇꠞꠤ ꠖꠦꠅ।”
NUM 12:14 ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ, “ꠔꠣꠁꠞ ꠛꠣꠚꠦ ꠎꠥꠖꠤ ꠔꠣꠁꠞ ꠝꠥꠈꠅ ꠈꠣꠟꠤ ꠍꠦꠚ ꠚꠣꠟꠣꠁꠔꠣ, ꠔꠦ ꠡꠞꠝꠣꠁꠀ ꠔꠣꠁ ꠡꠣꠔ ꠖꠤꠘ ꠊꠞꠞ ꠛꠣꠞꠦ ꠞꠁꠟ ꠅꠘꠦ ꠘꠣ ꠘꠤ? ꠅꠟꠣ ꠡꠣꠔꠖꠤꠘ ꠔꠣꠁꠞꠦ ꠇꠦꠝ꠆ꠙꠞ ꠛꠣꠞꠦ ꠀꠟꠉ ꠞꠣꠈꠅ, ꠛꠣꠖꠦ ꠜꠤꠔꠞꠦ ꠀꠘꠛꠣꠄ ꠘꠦ।”
NUM 12:15 ꠄꠞꠟꠣꠉꠤ ꠝꠞꠤꠅꠝꠞꠦ ꠡꠣꠔ ꠖꠤꠘ ꠇꠦꠝ꠆ꠙꠞ ꠛꠣꠞꠦ ꠢꠞꠣꠁ ꠕꠁꠟꠣ। ꠄꠘꠞꠦ ꠜꠤꠔꠞꠦ ꠀꠘꠣꠞ ꠀꠉ ꠙꠞ꠆ꠎꠘ꠆ꠔ ꠝꠣꠘꠡꠞ ꠍꠚꠞꠅ ꠛꠣꠞꠘꠤ ꠛꠘ꠆ꠖ ꠞꠁꠟ।
NUM 12:16 ꠛꠣꠖꠦ ꠛꠘꠤ ꠁꠍꠞꠣꠁꠟ ꠅꠇꠟ ꠢꠣꠎꠤꠞꠥꠔ ꠍꠣꠠꠤꠀ ꠚꠣꠞꠣꠘ ꠝꠞꠥꠜꠥꠝꠤꠔ ꠉꠤꠀ ꠇꠦꠝ꠆ꠙ ꠉꠣꠠꠤꠟꠣ।
NUM 13:1 ꠄꠞꠛꠣꠖꠦ ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ,
NUM 13:2 “ꠛꠘꠤ ꠁꠍꠞꠣꠁꠟꠞꠦ ꠀꠝꠤ ꠎꠦ ꠇꠦꠘꠣꠘ ꠖꠦꠡ ꠖꠤꠔꠣꠝ ꠌꠣꠁꠞꠣꠝ, ꠅꠃ ꠖꠦꠡꠞ ꠢꠣꠟ-ꠢꠇꠤꠇꠔ ꠖꠦꠈꠤꠀ ꠀꠅꠀꠞ ꠟꠣꠉꠤ ꠔꠥꠝꠤ ꠛꠣꠞꠅ ꠈꠣꠘ꠆ꠖꠣꠘ ꠕꠣꠇꠤ ꠛꠣꠞꠅ ꠎꠘ ꠡꠞ꠆ꠖꠣꠞ ꠙꠣꠑꠣꠅ।”
NUM 13:3 ꠝꠣꠛꠥꠖꠞ ꠢꠥꠇꠥꠝ ꠙꠣꠁꠀ ꠝꠥꠍꠣꠄ ꠅꠟꠣꠃ ꠇꠞꠟꠣ। ꠔꠣꠁꠘ ꠚꠣꠞꠣꠘ ꠝꠞꠥꠜꠥꠝꠤ ꠕꠣꠇꠤ ꠎꠦꠞꠣꠞꠦ ꠙꠣꠑꠣꠁꠟꠣ, ꠄꠞꠣ ꠢꠇꠟꠃ ꠛꠘꠤ ꠁꠍꠞꠣꠁꠟꠞ ꠡꠞ꠆ꠖꠣꠞ।
NUM 13:4 ꠄꠞꠣ ꠅꠁꠟꠣ: ꠞꠥꠛꠦꠘ ꠈꠣꠘ꠆ꠖꠣꠘꠞ ꠎꠣꠇꠥꠞꠞ ꠙꠥꠀ ꠡꠣꠝ꠆ꠝꠥꠀ,
NUM 13:5 ꠡꠤꠝꠤꠅꠘ ꠈꠣꠘ꠆ꠖꠣꠘꠞ ꠈꠥꠞꠤꠞ ꠙꠥꠀ ꠡꠚꠣꠔ,
NUM 13:6 ꠄꠢꠥꠖꠣ ꠈꠣꠘ꠆ꠖꠣꠘꠞ ꠎꠤꠚꠥꠘ꠆ꠘꠤꠞ ꠙꠥꠀ ꠇꠣꠟꠥꠔ,
NUM 13:7 ꠁꠍꠣꠈꠞ ꠈꠣꠘ꠆ꠖꠣꠘꠞ ꠁꠃꠍꠥꠚꠞ ꠙꠥꠀ ꠎꠤꠉꠣꠟ,
NUM 13:8 ꠀꠚꠞꠣꠁꠝ ꠈꠣꠘ꠆ꠖꠣꠘꠞ ꠘꠥꠘꠞ ꠙꠥꠀ ꠢꠥꠍꠤꠀ,
NUM 13:9 ꠛꠤꠘ-ꠁꠀꠝꠤꠘ ꠈꠣꠘ꠆ꠖꠣꠘꠞ ꠞꠚꠥꠞ ꠙꠥꠀ ꠚꠟꠔꠤ,
NUM 13:10 ꠍꠛꠥꠟꠘ ꠈꠣꠘ꠆ꠖꠣꠘꠞ ꠍꠁꠖꠞ ꠙꠥꠀ ꠉꠖ꠆ꠖꠤꠄꠟ,
NUM 13:11 ꠁꠃꠍꠥꠚꠞ ꠙꠥꠀ ꠝꠣꠘꠡꠣ ꠈꠣꠘ꠆ꠖꠣꠘꠞ ꠍꠥꠡꠤꠞ ꠙꠥꠀ ꠉꠣꠖ꠆ꠖꠤ,
NUM 13:12 ꠖꠣꠘ ꠈꠣꠘ꠆ꠖꠣꠘꠞ ꠉꠝꠟ꠆ꠟꠤꠞ ꠙꠥꠀ ꠀꠝ꠆ꠝꠤꠄꠟ,
NUM 13:13 ꠀꠡꠤꠞ ꠈꠣꠘ꠆ꠖꠣꠘꠞ ꠝꠤꠇꠣꠁꠟꠞ ꠙꠥꠀ ꠍꠔꠥꠞ,
NUM 13:14 ꠘꠙ꠆ꠔꠣꠟꠤ ꠈꠣꠘ꠆ꠖꠣꠘꠞ ꠛꠡꠤꠞꠞ ꠙꠥꠀ ꠘꠁꠛ,
NUM 13:15 ꠀꠞ ꠍꠣꠖꠥ ꠈꠣꠘ꠆ꠖꠣꠘꠞ ꠝꠣꠈꠤꠞ ꠙꠥꠀ ꠉꠥꠎꠄꠄꠟ।
NUM 13:16 ꠇꠦꠘꠣꠘ ꠖꠦꠡꠞ ꠢꠣꠟ-ꠢꠇꠤꠇꠔ ꠎꠣꠘꠤꠀ ꠀꠁꠛꠣꠞ ꠟꠣꠉꠤ ꠉꠥꠁꠀ ꠢꠤꠡꠣꠛꠦ ꠝꠥꠍꠣ ꠘꠛꠤꠄ ꠄꠞꠣꠞꠦ ꠙꠣꠑꠣꠁꠟꠣ। ꠔꠣꠁꠘ ꠘꠥꠘꠞ ꠙꠥꠀ ꠢꠥꠍꠤꠀꠞꠦ ꠁꠃꠍꠣ ꠇꠁꠀ ꠒꠣꠇꠤꠔꠣ।
NUM 13:17 ꠇꠦꠘꠣꠘ ꠖꠦꠡꠅ ꠙꠣꠑꠣꠘꠤꠞ ꠛꠣꠟꠣ ꠝꠥꠍꠣꠄ ꠔꠣꠞꠣꠞꠦ ꠇꠁꠟꠣ, “ꠔꠥꠝꠞꠣ ꠘꠦꠉꠦꠜ ꠝꠞꠥꠜꠥꠝꠤꠞ ꠝꠣꠎꠦꠖꠤ ꠉꠤꠀ ꠙꠣꠠꠤꠀ ꠄꠟꠣꠇꠣꠔ ꠢꠣꠝꠣꠁꠛꠣꠄ।
NUM 13:18 ꠢꠣꠝꠣꠁꠀ ꠖꠦꠈꠛꠣꠄ, ꠅꠃ ꠖꠦꠡꠈꠣꠘ ꠇꠤꠟꠣ। ꠁ ꠖꠦꠡꠞ ꠛꠣꠡꠤꠘ꠆ꠖꠣ ꠝꠣꠘꠥꠡ ꠇꠝ ꠘꠣ ꠛꠦꠡꠤ, ꠔꠣꠞꠣ ꠇꠝꠎꠥꠞ ꠘꠣ ꠛꠟꠛꠣꠘ।
NUM 13:19 ꠔꠣꠞꠣꠞ ꠖꠦꠡꠈꠣꠘ ꠜꠣꠟꠣ ꠘꠣ ꠝꠘ꠆ꠖ? ꠖꠦꠡꠞ ꠐꠣꠃꠘ ꠅꠇꠟ ꠃꠌꠣ ꠛꠣꠃꠘ꠆ꠒꠞꠤ ꠅꠀꠟ ꠇꠞꠣ, ꠘꠣ ꠛꠣꠃꠘ꠆ꠒꠞꠤ ꠍꠣꠠꠣ?
NUM 13:20 ꠢꠤꠘꠞ ꠝꠣꠐꠤꠔ ꠞꠡ ꠀꠍꠦ ꠇꠤ ꠘꠣ, ꠉꠣꠍ-ꠙꠣꠟꠣ ꠀꠍꠦ ꠇꠤ ꠘꠣ? ꠀꠞ ꠀꠅꠀꠞ ꠡꠝꠄ ꠖꠦꠈꠤꠅ, ꠙꠣꠞꠟꠦ ꠢꠃ ꠖꠦꠡꠞ ꠇꠥꠘꠥ ꠚꠟ-ꠝꠥꠟ ꠟꠁꠀ ꠀꠁꠅ।” ꠅꠃ ꠡꠝꠄ ꠔ ꠀꠋꠉꠥꠞ ꠙꠣꠇꠣꠞ ꠡꠝꠄ ꠀꠁꠍꠦ।
NUM 13:21 ꠔꠦꠃ ꠔꠣꠞꠣ ꠎꠤꠘ ꠝꠞꠥꠜꠥꠝꠤ ꠕꠣꠇꠤ ꠡꠥꠞꠥ ꠇꠞꠤꠀ ꠢꠣꠝꠣꠔꠞ ꠛꠣꠄ ꠞꠣꠢꠛ ꠙꠞ꠆ꠎꠘ꠆ꠔ ꠉꠤꠀ ꠀꠡ꠆ꠔꠣ ꠖꠦꠡꠞ ꠢꠣꠟ-ꠢꠇꠤꠇꠔ ꠖꠦꠈꠤꠀ ꠀꠁꠟꠣ।
NUM 13:22 ꠎꠣꠅꠀꠞ ꠇꠣꠟꠅ ꠔꠣꠞꠣ ꠘꠦꠉꠦꠜ ꠝꠞꠥꠜꠥꠝꠤ ꠅꠁꠀ ꠢꠦꠛꠞꠘ ꠐꠣꠃꠘꠅ ꠉꠤꠀ ꠀꠎꠤꠟꠣ। ꠁ ꠢꠦꠛꠞꠘ ꠐꠣꠃꠘ ꠛꠣꠘꠣꠁꠟ ꠅꠁꠍꠤꠟ ꠝꠤꠡꠞ ꠖꠦꠡꠞ ꠍꠥꠀꠘ ꠐꠣꠃꠘ ꠛꠣꠘꠣꠘꠤꠞ ꠡꠣꠔ ꠛꠍꠞ ꠀꠉꠦ। ꠢꠤꠘꠅ ꠙꠄꠟꠥꠀꠘ ꠀꠘꠣꠇꠤ ꠈꠣꠘ꠆ꠖꠣꠘꠞ ꠔꠤꠘꠎꠘ ꠝꠣꠘꠥꠡ ꠀꠍꠤꠟ, ꠄꠞꠣꠞ ꠘꠣꠝ ꠅꠁꠟ ꠀꠢꠤꠝꠣꠘ, ꠡꠤꠍꠣꠁ, ꠀꠞ ꠔꠣꠟꠝꠣꠁ।
NUM 13:23 ꠛꠣꠖꠦ ꠅꠃ ꠉꠥꠁꠀ ꠅꠇꠟ ꠀꠡꠇꠥꠟ ꠘꠣꠝꠞ ꠙꠣꠠꠤꠀ ꠈꠣꠟꠞ ꠙꠣꠞꠅ ꠕꠣꠇꠤ ꠄꠇ ꠍꠠꠤ ꠀꠋꠉꠥꠞ ꠡꠥꠖ꠆ꠖꠣ ꠀꠡ꠆ꠔꠣ ꠄꠇ ꠟꠔ ꠇꠣꠐꠤꠀ ꠟꠁꠀ ꠀꠁꠟꠣ। ꠁ ꠀꠋꠉꠥꠞꠞ ꠍꠠꠤ ꠔꠣꠞꠣꠞ ꠖꠥꠁꠎꠘꠦ ꠜꠣꠋ ꠖꠤꠀ ꠛꠁꠀ ꠀꠘꠟꠣ। ꠟꠉꠦ ꠇꠤꠍꠥ ꠀꠘꠥꠀꠞ ꠀꠞ ꠒꠥꠝꠥꠞ ꠚꠟꠅ ꠀꠘꠟꠣ।
NUM 13:24 ꠛꠘꠤ ꠁꠍꠞꠣꠁꠟꠞ ꠡꠞ꠆ꠖꠣꠞ ꠅꠇꠟꠦ ꠢꠘ ꠕꠣꠇꠤ ꠅꠃ ꠀꠋꠉꠥꠞꠞ ꠍꠠꠤ ꠇꠣꠐꠣꠄ ꠅꠃ ꠎꠣꠉꠣꠞ ꠘꠣꠝ ꠅꠁꠉꠦꠟ, ꠀꠡꠇꠥꠟꠞ ꠈꠣꠟ, ꠝꠣꠘꠤ ꠍꠠꠤꠞ ꠈꠣꠟ।
NUM 13:25 ꠀꠡ꠆ꠔꠣ ꠇꠦꠘꠣꠘ ꠖꠦꠡꠞ ꠢꠣꠟ-ꠢꠇꠤꠇꠔ ꠖꠦꠈꠤꠀ ꠢꠣꠞꠤ, ꠌꠣꠟ꠆ꠟꠤꠡ ꠖꠤꠘ ꠛꠣꠖꠦ ꠔꠣꠞꠣ ꠢꠇꠟ ꠚꠤꠞꠤꠀ ꠀꠁꠟꠣ।
NUM 13:26 ꠅꠃ ꠉꠥꠁꠀ ꠅꠇꠟ ꠚꠣꠞꠣꠘ ꠝꠞꠥꠜꠥꠝꠤꠞ ꠇꠣꠖꠦꠡ ꠘꠣꠝꠞ ꠎꠣꠉꠣꠔ ꠚꠤꠞꠤꠀ ꠀꠁꠟꠣ, ꠅꠘꠅ ꠝꠥꠍꠣ ꠘꠛꠤ, ꠁꠝꠣꠝ ꠢꠣꠞꠥꠘ ꠀꠞ ꠛꠘꠤ ꠁꠍꠞꠣꠁꠟ ꠅꠇꠟ ꠀꠍꠟꠣ। ꠄꠞꠣ ꠀꠁꠀ ꠢꠇꠟꠞꠦ ꠢꠘꠞ ꠈꠛꠞ-ꠀꠘ꠆ꠔꠞ ꠎꠣꠘꠣꠁꠟꠣ ꠀꠞ ꠢꠃ ꠖꠦꠡꠞ ꠚꠟ-ꠝꠥꠟ ꠖꠦꠈꠣꠁꠟꠣ।
NUM 13:27 ꠔꠣꠞꠣ ꠝꠥꠍꠣꠞꠦ ꠇꠁꠟꠣ, “ꠀꠙꠘꠦ ꠀꠝꠞꠣꠞꠦ ꠎꠦ ꠖꠦꠡꠅ ꠙꠣꠑꠣꠁꠍꠟꠣ, ꠀꠝꠞꠣ ꠢꠘꠅ ꠉꠤꠀ ꠖꠦꠈꠟꠣꠝ, ꠢꠤ ꠖꠦꠡꠈꠣꠘ ꠢꠣꠍꠣꠃ ꠖꠥꠗ ꠀꠞ ꠝꠃꠞ ꠜꠣꠘ꠆ꠒꠣꠞ ꠀꠟꠣ ꠖꠦꠡ। ꠅꠃ ꠖꠦꠈꠃꠇ꠆ꠇꠣ, ꠢꠃ ꠖꠦꠡꠞ ꠚꠟ।
NUM 13:28 ꠅꠁꠟꠦ ꠢꠤꠘꠞ ꠝꠣꠘꠥꠡ ꠈꠥꠛ ꠙꠄꠟꠥꠀꠘ ꠀꠞ ꠔꠣꠞꠣꠞ ꠐꠣꠃꠘꠅ ꠛꠠ ꠛꠠ ꠀꠞ ꠃꠌꠣ ꠛꠣꠃꠘ꠆ꠒꠞꠤ ꠇꠞꠣ। ꠀꠝꠞꠣ ꠀꠘꠣꠇꠤ ꠙꠄꠟꠥꠀꠘ ꠈꠣꠘ꠆ꠖꠣꠘꠞ ꠝꠣꠘꠡꠞꠦꠅ ꠢꠘꠅ ꠖꠦꠈꠍꠤ।
NUM 13:29 ꠀꠝꠣꠟꠦꠇꠤ ꠅꠇꠟ ꠛꠡꠔ ꠇꠞꠂꠘ ꠘꠦꠉꠦꠜ ꠝꠞꠥꠜꠥꠝꠤꠔ। ꠢꠤꠐ꠆ꠐꠤ, ꠎꠤꠛꠥꠎꠤ ꠀꠞ ꠀꠝꠥꠞꠤ ꠅꠇꠟ ꠙꠣꠠꠤ ꠄꠟꠣꠇꠣꠔ ꠞꠂꠘ। ꠀꠞ ꠇꠦꠘꠣꠘꠤ ꠅꠇꠟꠞ ꠇꠦꠃ ꠇꠦꠃ ꠖꠞꠤꠀꠞ ꠇꠣꠘ꠆ꠖꠣꠔ ꠀꠞ ꠇꠦꠃ ꠇꠦꠃ ꠎꠞ꠆ꠖꠣꠘ ꠉꠣꠋꠉꠞ ꠙꠣꠞꠅ ꠞꠂꠘ।”
NUM 13:30 ꠅꠃ ꠡꠝꠄ ꠝꠥꠍꠣꠞ ꠍꠣꠝꠘꠦ ꠎꠦꠔꠣ ꠝꠣꠘꠥꠡ ꠖꠟꠣ ꠀꠍꠟꠣ, ꠇꠣꠟꠥꠔꠦ ꠄꠞꠣꠞ ꠡꠥꠞꠉꠥꠟ ꠕꠣꠝꠣꠁꠀ ꠇꠁꠟꠣ, “ꠀꠝꠞꠣꠞ ꠟꠣꠉꠤ ꠎꠞꠥꠞ ꠅꠁꠟ ꠢꠘꠅ ꠉꠤꠀ ꠅꠃ ꠖꠦꠡ ꠖꠈꠟ ꠇꠞꠣ, ꠀꠞ ꠁꠔꠣ ꠀꠝꠞꠣ ꠙꠣꠞꠝꠥꠅ।”
NUM 13:31 ꠁꠈꠣꠘ ꠢꠥꠘꠤꠀ ꠔꠣꠘ ꠟꠉꠞ ꠉꠥꠁꠀ ꠅꠇꠟꠦ ꠇꠁꠟꠣ, “ꠘꠣ, ꠘꠣ, ꠁꠔꠣ ꠝꠣꠘꠡꠞ ꠟꠉꠦ ꠟꠣꠠꠣꠁ ꠇꠞꠣ ꠀꠝꠞꠣꠞ ꠟꠣꠉꠤ ꠅꠡꠝ꠆ꠛꠛ, ꠁꠔꠣ ꠀꠝꠞꠣ ꠕꠣꠇꠤ ꠛꠃꠔ ꠛꠟꠀꠟꠣ।”
NUM 13:32 ꠄꠞꠣ ꠢꠃ ꠖꠦꠡꠞ ꠛꠦꠙꠣꠞꠦ ꠝꠘꠉꠠꠣ ꠝꠤꠍꠣ ꠝꠣꠔꠤꠀ ꠇꠁꠟꠣ, “ꠀꠝꠞꠣ ꠎꠦ ꠖꠦꠡ ꠖꠦꠈꠣꠔ ꠉꠦꠍꠟꠣꠝ, ꠁ ꠖꠦꠡꠦ ꠔꠣꠞ ꠙ꠆ꠞꠎꠣ ꠅꠇꠟꠞꠦ ꠉꠤꠟꠤꠀ ꠈꠣꠁꠟꠣꠄ। ꠢꠤꠘꠞ ꠝꠣꠘꠥꠡ ꠈꠥꠛ ꠃꠌꠣ-ꠝꠥꠐꠣ ꠙꠄꠟꠥꠀꠘ।
NUM 13:33 ꠀꠝꠞꠣ ꠢꠤꠘꠅ ꠘꠦꠚꠤꠟꠤ ꠎꠣꠔꠞ ꠝꠣꠘꠡꠞꠦꠅ ꠖꠦꠈꠍꠤ, ꠁꠔꠣ ꠖꠦꠈꠔꠦ ꠖꠂꠔ꠆ꠔ-ꠖꠣꠘꠛꠞ ꠟꠣꠈꠣꠘ। ꠀꠝꠞꠣ ꠔ ꠔꠣꠞꠣꠞ ꠉꠦꠍꠦ ꠔꠥꠌ꠆ꠍ ꠙꠤꠙꠠꠣꠞ ꠟꠣꠈꠣꠘ, ꠔꠣꠞꠣꠅ ꠀꠝꠞꠣꠞꠦ ꠅꠟꠣ ꠙꠤꠙꠠꠣ ꠝꠘꠅ ꠇꠞꠍꠦ।” ꠎꠣꠘ ꠔ, ꠅꠈꠘꠇꠥꠞ ꠀꠘꠣꠇꠤ ꠎꠣꠔꠤ ꠅꠃ ꠘꠦꠚꠤꠟꠤ ꠅꠇꠟꠞ ꠛꠋꠡꠗꠞ।
NUM 14:1 ꠁꠈꠣꠘ ꠢꠥꠘꠤꠀ ꠢꠇꠟ ꠛꠘꠤ ꠁꠍꠞꠣꠁꠟꠦ ꠌꠤꠟ꠆ꠟꠣ-ꠌꠤꠟ꠆ꠟꠤ ꠟꠣꠉꠣꠁꠟ। ꠔꠣꠞꠣ ꠢꠣꠞꠣ ꠞꠣꠁꠔ ꠇꠣꠘ꠆ꠖꠣ-ꠇꠣꠐꠤ ꠇꠞꠟ।
NUM 14:2 ꠢꠎꠞꠔ ꠝꠥꠍꠣ ꠀꠞ ꠢꠣꠞꠥꠘꠞ ꠛꠤꠞꠥꠖ꠆ꠖꠦ ꠛꠃꠔ ꠇꠕꠣꠛꠣꠞ꠆ꠔꠣ ꠝꠣꠔꠤꠟ। ꠔꠣꠞꠣ ꠢꠇꠟꠦ ꠝꠤꠟꠤꠀ ꠝꠥꠍꠣ ꠀꠞ ꠢꠣꠞꠥꠘꠞꠦ ꠇꠁꠟ, “ꠢꠣꠄꠞꠦ ꠢꠣꠄ! ꠀꠝꠞꠣ ꠇꠦꠘꠦ ꠢꠃ ꠝꠤꠡꠞ ꠖꠦꠡꠅ ꠛꠣ ꠝꠞꠥꠜꠥꠝꠤꠔ ꠝꠞꠟꠣꠝ ꠘꠣ? ꠢꠘꠅ ꠝꠞꠣꠃ ꠔ ꠜꠣꠟꠣ ꠀꠍꠤꠟ।
NUM 14:3 ꠝꠣꠛꠥꠖꠦ ꠇꠦꠘꠦ ꠀꠝꠞꠣꠞꠦ ꠎꠥꠖ꠆ꠖꠞ ꠝꠄꠖꠣꠘꠅ ꠝꠣꠞꠣꠞ ꠘꠤꠅꠔꠦ ꠅꠃ ꠖꠦꠡꠅ ꠘꠤꠞꠣ? ꠢꠘꠞ ꠖꠥꠡꠝꠘ ꠅꠇꠟꠦ ꠀꠝꠞꠣꠞ ꠛꠃ-ꠛꠣꠁꠌ꠆ꠌꠣꠁꠘꠞꠦ ꠇꠣꠠꠤꠀ ꠘꠤꠛꠣ। ꠄꠞ ꠕꠣꠇꠤ ꠝꠤꠡꠞꠅ ꠚꠤꠞꠤꠀ ꠎꠣꠅꠀꠃ ꠀꠝꠞꠣꠞ ꠟꠣꠉꠤ ꠜꠣꠟꠣ ꠘꠣꠄ ꠘꠤ?”
NUM 14:4 ꠔꠣꠞꠣ ꠄꠇꠦ-ꠅꠁꠘ꠆ꠘꠦ ꠇꠁꠟ, “ꠀꠅ, ꠀꠝꠞꠣ ꠄꠇꠎꠘ ꠘꠦꠔꠣ ꠛꠣꠘꠣꠁꠀ ꠢꠤꠞꠛꠣꠞ ꠝꠤꠡꠞꠅ ꠚꠤꠞꠤꠀ ꠎꠣꠁꠉꠤ।”
NUM 14:5 ꠁ ꠢꠣꠟꠔ ꠖꠦꠈꠤꠀ ꠝꠥꠍꠣ ꠀꠞ ꠢꠣꠞꠥꠘ ꠀꠡ꠆ꠔꠣ ꠛꠘꠤ ꠁꠍꠞꠣꠁꠟ ꠡꠝꠣꠎꠞ ꠍꠣꠝꠘꠦ ꠝꠣꠐꠤꠔ ꠍꠁꠎꠖꠣꠔ ꠙꠠꠟꠣ।
NUM 14:6 ꠀꠞ ꠎꠦ ꠉꠥꠁꠀ ꠖꠟꠦ ꠅꠃ ꠖꠦꠡꠞ ꠢꠣꠟ-ꠢꠇꠤꠇꠔ ꠖꠦꠈꠤꠀ ꠀꠁꠍꠟꠣ, ꠔꠣꠞꠣꠞ ꠝꠣꠎ ꠕꠣꠇꠤ ꠘꠥꠘꠞ ꠙꠥꠀ ꠁꠃꠍꠣ ꠀꠞ ꠎꠤꠚꠥꠘ꠆ꠘꠤꠞ ꠙꠥꠀ ꠇꠣꠟꠥꠔꠦ ꠝꠘꠞ ꠖꠥꠈꠦ ꠘꠤꠎꠞ ꠉꠔꠞꠞ ꠇꠣꠙꠠ-ꠌꠥꠙꠠ ꠍꠤꠠꠤꠟ꠆ꠟꠣ,
NUM 14:7 ꠍꠤꠠꠤꠀ ꠛꠘꠤ ꠁꠍꠞꠣꠁꠟ ꠡꠝꠣꠎꠞ ꠢꠇ꠆ꠇꠟꠞꠦ ꠇꠁꠟꠣ, “ꠢꠥꠘꠅ, ꠀꠝꠞꠣ ꠎꠦ ꠖꠦꠡ ꠖꠦꠈꠣꠔ ꠉꠦꠍꠟꠣꠝ, ꠁ ꠖꠦꠡꠈꠣꠘ ꠈꠥꠛ ꠡꠥꠘ꠆ꠖꠞ।
NUM 14:8 ꠝꠣꠛꠥꠖ ꠎꠥꠖꠤ ꠀꠝꠞꠣꠞ ꠃꠙꠞꠦ ꠈꠥꠡ ꠀꠞ ꠞꠣꠎꠤ ꠕꠣꠇꠂꠘ, ꠔꠦ ꠀꠝꠞꠣꠞꠦ ꠢꠃ ꠖꠦꠡꠅ ꠘꠤꠀ ꠙꠣꠞ ꠇꠞꠛꠣ, ꠔꠣꠁꠘ ꠖꠥꠗ ꠀꠞ ꠝꠃꠞ ꠜꠣꠘ꠆ꠒꠣꠞ ꠀꠟꠣ ꠅꠃ ꠖꠦꠡꠈꠣꠘ ꠀꠝꠞꠣꠞꠦ ꠖꠣꠘ ꠇꠞꠛꠣ।
NUM 14:9 ꠢꠥꠘꠅ, ꠔꠥꠝꠞꠣ ꠝꠣꠛꠥꠖꠞ ꠝꠞ꠆ꠎꠤꠞ ꠃꠟꠐꠣ ꠇꠣꠝ ꠇꠞꠤꠅ ꠘꠣ। ꠔꠥꠝꠞꠣ ꠢꠤ ꠖꠦꠡꠞ ꠝꠣꠘꠡꠞꠦ ꠒꠞꠣꠁꠅ ꠘꠣ, ꠔꠣꠞꠣꠞꠦ ꠉꠤꠟꠤꠀ ꠈꠣꠁꠔꠦꠅ ꠀꠝꠞꠣꠞ ꠖꠦꠞꠤ ꠅꠁꠔ ꠘꠣꠄ। ꠔꠥꠝꠞꠣ ꠁꠔꠣꠞꠦ ꠒꠞꠣꠁꠅ ꠘꠣ, ꠔꠣꠞꠣꠞ ꠝꠣꠕꠣꠞ ꠃꠙꠞꠞ ꠍꠣꠄꠀ ꠘꠣꠁ, ꠀꠝꠞꠣꠞ ꠟꠉꠦ ꠔ ꠝꠣꠛꠥꠖ ꠀꠍꠂꠘ।”
NUM 14:10 ꠅꠁꠟꠦ ꠔꠣꠞꠣ ꠢꠇꠟꠦꠃ ꠇꠁꠟꠣ ꠁꠃꠍꠣ ꠀꠞ ꠇꠣꠟꠥꠔꠞꠦ ꠙꠣꠔ꠆ꠔꠞ ꠝꠣꠞꠤꠀ ꠝꠣꠞꠤꠟꠔꠣ। ꠅꠃ ꠡꠝꠄ ꠝꠤꠟꠘ-ꠔꠣꠝ꠆ꠛꠥ ꠕꠣꠇꠤ ꠀꠡ꠆ꠔꠣ ꠛꠘꠤ ꠁꠍꠞꠣꠁꠟ ꠡꠝꠣꠎꠞ ꠍꠣꠝꠘꠦ ꠝꠣꠛꠥꠖꠞ ꠇꠥꠖꠞꠔꠤ ꠘꠥꠞ ꠎꠣꠁꠞ ꠅꠁꠟ।
NUM 14:11 ꠝꠣꠛꠥꠖꠦ ꠇꠁꠟꠣ, “ꠅ ꠝꠥꠍꠣ, ꠁꠔꠣꠄ ꠀꠝꠣꠞꠦ ꠀꠞ ꠇꠔꠖꠤꠘ ꠄꠟꠣꠝꠤ ꠇꠞꠛ? ꠔꠣꠞꠣꠞ ꠍꠣꠝꠘꠦ ꠅꠔ ꠇꠦꠞꠣꠝꠔꠤ ꠘꠤꠡꠣꠘꠣ ꠖꠦꠈꠣꠘꠤꠞ ꠛꠣꠖꠦꠅ, ꠔꠣꠞꠣ ꠀꠞ ꠇꠔꠖꠤꠘ ꠀꠝꠣꠞꠦ ꠄꠇꠤꠘ ꠇꠞꠔ ꠘꠣꠄ?
NUM 14:12 ꠔꠦ ꠢꠥꠘꠅ, ꠀꠝꠤ ꠔꠣꠞꠣꠞ ꠃꠙꠞꠦ ꠛꠠ ꠄꠇ ꠉꠎꠛ ꠓꠣꠟꠤꠝꠥ, ꠀꠝꠣꠞ ꠅꠀꠖꠣ ꠇꠞꠣ ꠢꠃ ꠖꠦꠡꠞ ꠝꠣꠟꠤꠇꠣꠘꠣ ꠇꠣꠠꠤꠀ ꠘꠤꠝꠥꠉꠤ। ꠛꠣꠖꠦ ꠀꠝꠤ ꠔꠥꠝꠣꠞ ꠝꠣꠎ ꠕꠣꠇꠤ ꠁꠔꠣ ꠕꠘꠦ ꠀꠞꠅ ꠛꠟꠛꠣꠘ, ꠀꠞꠅ ꠛꠠ ꠘꠄꠀ ꠄꠇ ꠎꠣꠔꠤ ꠙꠄꠖꠣ ꠇꠞꠝꠥ।”
NUM 14:13 ꠁꠈꠣꠘ ꠢꠥꠘꠤꠀ ꠝꠥꠍꠣꠄ ꠇꠁꠟꠣ, “ꠅ ꠝꠣꠛꠥꠖ, ꠔꠥꠝꠤ ꠎꠥꠖꠤ ꠁꠟꠣ ꠇꠞꠅ, ꠔꠦ ꠝꠤꠡꠞꠤ ꠅꠇꠟꠦ ꠁꠔꠣ ꠢꠥꠘꠛꠣ। ꠀꠞ ꠔꠥꠝꠤ ꠔ ꠝꠤꠡꠞ ꠕꠣꠇꠤ ꠁꠔꠣ ꠝꠣꠘꠡꠞꠦ ꠔꠥꠝꠣꠞ ꠘꠤꠎꠞ ꠇꠥꠖꠞꠔꠤꠄ ꠛꠣꠞ ꠇꠞꠤ ꠀꠘꠍ।
NUM 14:14 ꠅꠈꠘ ꠝꠤꠡꠞꠤ ꠅꠇꠟꠦ ꠁ ꠖꠦꠡꠞ ꠝꠣꠘꠡꠞꠦꠅ ꠁꠔꠣ ꠎꠣꠘꠣꠁ ꠖꠤꠛꠣ। ꠔꠦ ꠅ ꠝꠣꠛꠥꠖ, ꠁꠘꠞ ꠝꠣꠘꠡꠦ ꠔ ꠄꠝꠘꠦꠃ ꠎꠣꠘꠤꠟꠤꠍꠂꠘ ꠎꠦꠘ, ꠛꠘꠤ ꠁꠍꠞꠣꠁꠟꠞ ꠟꠉꠦ ꠟꠉꠦ ꠔꠥꠝꠤ ꠀꠍ, ꠔꠥꠝꠣꠞꠦ ꠈꠥꠛ ꠗꠣꠞꠅ ꠕꠣꠇꠤ ꠖꠦꠈꠣ ꠎꠣꠄ। ꠔꠣꠞꠣ ꠢꠥꠘꠍꠂꠘ, ꠔꠥꠝꠣꠞ ꠘꠥꠞꠞ ꠝꠦꠊꠞ ꠍꠣꠄꠀ ꠄꠞꠣꠞ ꠃꠙꠞꠦ ꠀꠍꠦ, ꠔꠥꠝꠤ ꠖꠤꠘꠞ ꠛꠣꠟꠣ ꠝꠦꠊꠞ ꠈꠥꠐꠤ ꠀꠞ ꠞꠣꠁꠔ ꠅꠁꠟꠦ ꠀꠉꠥꠁꠘꠞ ꠈꠥꠐꠤꠞ ꠍꠥꠞꠔꠦ ꠄꠞꠣꠞ ꠀꠉꠦ ꠀꠉꠦ ꠞꠅ।
NUM 14:15 ꠅꠈꠘ ꠔꠥꠝꠤ ꠎꠥꠖꠤ ꠄꠞꠣ ꠢꠇꠟꠞꠦ ꠄꠇꠟꠉꠦ ꠝꠣꠞꠤꠟꠣꠅ, ꠔꠦ ꠎꠔ ꠎꠣꠔꠤꠞ ꠝꠣꠘꠡꠦ ꠔꠥꠝꠣꠞ ꠁꠔꠣ ꠇꠥꠖꠞꠔꠤ ꠇꠣꠝꠞ ꠈꠛꠞ ꠢꠥꠘꠍꠦ, ꠔꠣꠞꠣ ꠇꠁꠛꠣ,
NUM 14:16 ꠝꠣꠛꠥꠖꠦ ꠛꠘꠤ ꠁꠍꠞꠣꠁꠟꠞꠦ ꠎꠦ ꠖꠦꠡ ꠖꠤꠛꠣꠞ ꠅꠀꠖꠣ ꠇꠞꠍꠟꠣ, ꠢꠤ ꠖꠦꠡꠅ ꠟꠁꠀ ꠎꠣꠅꠀꠞ ꠈꠦꠝꠔꠣ ꠔꠣꠘ ꠘꠣꠁ, ꠄꠞꠟꠣꠉꠤ ꠔꠣꠁꠘ ꠄꠞꠣꠞꠦ ꠝꠞꠥꠜꠥꠝꠤꠔ ꠘꠤꠀ ꠝꠣꠞꠤꠟꠤꠍꠂꠘ।
NUM 14:17 “ꠔꠦ, ꠅ ꠖꠤꠘ-ꠖꠥꠘꠤꠀꠞ ꠝꠣꠟꠤꠇ, ꠔꠥꠝꠤ ꠀꠉꠦ ꠎꠦꠟꠣ ꠇꠁꠍꠟꠣꠄ ꠅꠟꠣ ꠇꠥꠖꠞꠔꠤ ꠇꠣꠝ ꠎꠣꠁꠞ ꠇꠞꠅ। ꠔꠥꠝꠤ ꠘꠥ ꠇꠁꠍꠟꠣꠄ,
NUM 14:18 ꠝꠣꠛꠥꠖꠦ ꠉꠥꠍꠣ ꠇꠞꠂꠘ ꠗꠤꠞ ꠉꠔꠤꠄ, ꠔꠣꠘ ꠝꠣꠄꠀ-ꠝꠢꠛ꠆ꠛꠔꠞ ꠇꠥꠘꠥ ꠡꠤꠝꠣ ꠘꠣꠁ, ꠔꠣꠁꠘ ꠝꠣꠘꠡꠞ ꠅꠁꠘ꠆ꠘꠣꠄ ꠀꠞ ꠘꠣꠚꠞꠝꠣꠘꠤꠞ ꠝꠣꠚꠤ ꠖꠦꠁꠘ। ꠅꠁꠟꠦ ꠖꠥꠡꠤ ꠎꠘꠞꠦ ꠡꠣꠎꠣꠅ ꠖꠦꠁꠘ, ꠛꠣꠚ-ꠖꠣꠖꠣꠞ ꠘꠣꠚꠞꠝꠣꠘꠤꠞ ꠡꠣꠎꠣ ꠔꠣꠞ ꠘꠣꠔꠤ-ꠙꠥꠔꠤ ꠙꠞ꠆ꠎꠘ꠆ꠔ ꠛꠞ꠆ꠔꠣꠁꠘ।
NUM 14:19 ꠔꠦ ꠔꠥꠝꠣꠞ ꠖꠥꠀꠁ ꠖꠤꠀ ꠇꠁꠞꠣꠝ, ꠝꠤꠡꠞ ꠖꠦꠡ ꠍꠣꠠꠤꠀ ꠀꠅꠀ ꠕꠣꠇꠤ ꠅꠈꠘ ꠙꠞ꠆ꠎꠘ꠆ꠔ ꠔꠥꠝꠤ ꠄꠞꠣꠞꠦ ꠎꠦꠟꠣ ꠝꠣꠚꠤ ꠖꠤꠞꠣꠄ, ꠔꠥꠝꠣꠞ ꠢꠃ ꠝꠣꠄꠀꠞ ꠈꠣꠔꠤꠞꠦ ꠔꠣꠞꠣꠞ ꠅꠈꠘꠇꠥꠞ ꠉꠥꠘꠣꠞꠦꠅ ꠅꠟꠣ ꠝꠣꠚ ꠇꠞꠤ ꠖꠤꠟꠣꠅ।”
NUM 14:20 ꠔꠦꠃ ꠝꠣꠛꠥꠖꠦ ꠇꠁꠟꠣ, “ꠀꠁꠌ꠆ꠍꠣ, ꠔꠥꠝꠣꠞ ꠇꠕꠣꠄ ꠀꠝꠤ ꠁꠔꠣꠞꠦ ꠝꠣꠚ ꠇꠞꠤ ꠖꠤꠟꠣꠝ।
NUM 14:21 ꠅꠁꠟꠦ ꠀꠝꠤ ꠎꠤꠘ꠆ꠖꠣ ꠀꠍꠤ ꠁꠈꠣꠘ ꠎꠦꠟꠣ ꠢꠣꠍꠣ, ꠀꠡ꠆ꠔꠣ ꠎꠉꠔꠅ ꠀꠝꠣꠞ ꠟꠤꠟꠣ-ꠈꠦꠟꠣꠄ ꠜꠞꠣ ꠁꠐꠣꠅ ꠎꠦꠟꠣ ꠢꠣꠍꠣ, ꠅꠃ ꠟꠣꠈꠣꠘ ꠀꠞꠇ ꠢꠣꠍꠣ ꠅꠁꠟ,
NUM 14:22 ꠁꠔꠣ ꠄꠇꠎꠘꠦꠅ ꠀꠝꠣꠞ ꠅꠀꠖꠣ ꠇꠞꠣ ꠢꠤ ꠖꠦꠡ ꠖꠦꠈꠣꠞ ꠡꠥꠎꠥꠉ ꠅꠁꠔ ꠘꠣꠄ, ꠎꠦ ꠖꠦꠡ ꠖꠤꠔꠣꠝ ꠇꠞꠤ ꠀꠝꠤ ꠔꠣꠞꠣꠞ ꠛꠣꠚ-ꠖꠣꠖꠣꠞ ꠉꠦꠍꠦ ꠅꠀꠖꠣ ꠇꠞꠍꠟꠣꠝ। ꠇꠣꠞꠘ ꠁꠔꠣꠄ ꠀꠝꠣꠞ ꠘꠥꠞꠞ ꠔꠎꠟ꠆ꠟꠤ ꠖꠦꠈꠍꠂꠘ, ꠔꠣꠞꠣ ꠝꠤꠡꠞꠅ ꠕꠣꠇꠔꠦ ꠀꠞ ꠅꠃ ꠝꠞꠥꠜꠥꠝꠤꠔ ꠀꠁꠀꠅ ꠀꠝꠣꠞ ꠇꠥꠖꠞꠔꠤ ꠟꠤꠟꠣ-ꠈꠦꠟꠣ ꠖꠦꠈꠣꠞ ꠛꠣꠖꠦꠅ ꠁꠔꠣꠄ ꠀꠝꠣꠞꠦ ꠝꠣꠘꠍꠂꠘ ꠘꠣ, ꠛꠞꠋ ꠖꠡ-ꠖꠡꠛꠣꠞ ꠔꠣꠞꠣ ꠀꠝꠣꠞꠦ ꠙꠞꠤꠇ꠆ꠇꠣ ꠇꠞꠍꠂꠘ। ꠔꠦ ꠔꠣꠞꠣ ꠎꠔꠎꠘꠦ ꠀꠝꠣꠞꠦ ꠄꠟꠣꠝꠤ ꠇꠞꠍꠦ, ꠁꠔꠣ ꠄꠇꠎꠘꠦꠅ ꠢꠤ ꠖꠦꠡ ꠖꠦꠈꠣꠞ ꠇꠙꠣꠟ ꠅꠁꠔ ꠘꠣꠄ।
NUM 14:24 ꠅꠁꠟꠦ ꠀꠝꠣꠞ ꠛꠘ꠆ꠖꠣ ꠇꠣꠟꠥꠔꠞ ꠖꠤꠟꠞ ꠜꠣꠛ ꠁꠟꠣ ꠘꠣꠄ, ꠢꠦ ꠀꠝꠣꠞ ꠢꠥꠇꠥꠝ ꠙꠥꠞꠣꠙꠥꠞ ꠝꠣꠘꠦ। ꠄꠞꠟꠣꠉꠤ ꠎꠦ ꠖꠦꠡ ꠖꠦꠈꠣꠔ ꠢꠦ ꠉꠦꠍꠤꠟ, ꠀꠝꠤ ꠔꠣꠞꠦ ꠢꠃ ꠖꠦꠡꠅ ꠘꠤꠝꠥ, ꠔꠣꠞ ꠀꠅꠟꠣꠖ ꠅꠇꠟ ꠢꠤ ꠖꠦꠡꠞ ꠝꠣꠟꠤꠇ ꠅꠁꠛꠣ।
NUM 14:25 ꠢꠥꠘꠅ, ꠢꠃ ꠖꠦꠡꠞ ꠙꠣꠠꠤꠀ ꠔꠟ ꠎꠣꠉꠣꠁꠘ꠆ꠔꠅ ꠅꠈꠘ ꠀꠝꠣꠟꠦꠇꠤ ꠀꠞ ꠇꠦꠘꠣꠘꠤ ꠅꠇꠟꠦ ꠛꠡꠔ ꠇꠞꠞꠣ। ꠔꠦ ꠍꠣꠝꠘꠞ ꠇꠣꠁꠟ ꠔꠥꠝꠞꠣ ꠙꠤꠍꠦꠖꠤ ꠉꠤꠀ ꠀꠇꠣꠛꠣ ꠡꠣꠉꠞꠞ ꠙꠣꠞꠦꠖꠤ ꠝꠞꠥꠜꠥꠝꠤꠞ ꠛꠣꠄ ꠞꠅꠀꠘꠣ ꠅꠁꠅ।”
NUM 14:26 ꠛꠣꠖꠦ ꠝꠣꠛꠥꠖꠦ ꠝꠥꠍꠣ ꠀꠞ ꠢꠣꠞꠥꠘꠞꠦ ꠇꠁꠟꠣ,
NUM 14:27 “ꠅꠃ ꠘꠣꠚꠞꠝꠣꠘ ꠎꠣꠔꠤꠄ ꠀꠝꠣꠞ ꠛꠤꠞꠥꠖ꠆ꠖꠦ ꠀꠞ ꠇꠔꠖꠤꠘ ꠛꠦꠞ-ꠛꠦꠞꠤ ꠇꠞꠔ? ꠔꠣꠞꠣ ꠀꠝꠣꠞ ꠛꠤꠞꠥꠖ꠆ꠖꠦ ꠎꠦꠔꠣ ꠝꠣꠔ ꠝꠣꠔꠦꠞ, ꠁꠔꠣ ꠔ ꠀꠝꠤ ꠢꠥꠘꠍꠤ।
NUM 14:28 ꠅꠈꠘ ꠔꠥꠝꠞꠣ ꠉꠤꠀ ꠛꠘꠤ ꠁꠍꠞꠣꠁꠟꠞꠦ ꠇꠅ, ꠀꠝꠤ ꠝꠣꠛꠥꠖꠦ ꠘꠤꠎꠞ ꠎꠤꠘ꠆ꠖꠦꠉꠤꠞ ꠇꠍꠝ ꠈꠣꠁꠀ ꠇꠁꠞꠣꠝ, ꠀꠝꠤ ꠔꠥꠝꠞꠣꠞ ꠝꠥꠈꠞ ꠎꠦꠔꠣ ꠝꠣꠔ-ꠇꠕꠣ ꠢꠥꠘꠍꠤ, ꠀꠝꠤꠅ ꠔꠥꠝꠞꠣꠞ ꠟꠉꠦ ꠑꠤꠇ ꠅꠟꠣꠃ ꠇꠞꠝꠥ।
NUM 14:29 ꠝꠣꠘꠥꠡ ꠉꠘꠤꠛꠣꠞ ꠡꠝꠄ ꠔꠥꠝꠞꠣꠞ ꠛꠤꠡ ꠛꠍꠞ ꠛꠣ ꠔꠣꠞ ꠛꠦꠡꠤ ꠛꠄꠅꠡꠞ ꠎꠦꠔꠣꠞꠦ ꠉꠘꠣ ꠅꠁꠍꠤꠟ, ꠝꠣꠘꠤ ꠎꠦꠔꠣꠄ ꠀꠝꠣꠞ ꠛꠤꠞꠥꠖ꠆ꠖꠦ ꠛꠦꠞ-ꠛꠦꠞꠤ ꠇꠞꠍꠦ, ꠁꠔꠣꠞ ꠟꠣꠡ ꠅꠃ ꠝꠞꠥꠜꠥꠝꠤꠞ ꠝꠣꠎꠦ ꠙꠠꠤ ꠞꠁꠛ।
NUM 14:30 ꠀꠝꠤ ꠔꠥꠝꠞꠣꠞꠦ ꠎꠦ ꠖꠦꠡ ꠖꠤꠔꠣꠝ ꠇꠞꠤ ꠅꠀꠖꠣ ꠇꠞꠍꠟꠣꠝ, ꠈꠣꠟꠤ ꠎꠤꠚꠥꠘ꠆ꠘꠤꠞ ꠙꠥꠀ ꠇꠣꠟꠥꠔ ꠀꠞ ꠘꠥꠘꠞ ꠙꠥꠀ ꠁꠃꠍꠣ ꠍꠣꠠꠣ ꠀꠞ ꠇꠦꠃ ꠉꠤꠀ ꠢꠤ ꠖꠦꠡꠅ ꠢꠣꠝꠣꠘꠤꠞ ꠇꠙꠣꠟ ꠅꠁꠔ ꠘꠣꠄ।
NUM 14:31 ꠀꠞ ꠔꠥꠝꠞꠣꠞ ꠎꠦꠔꠣ ꠢꠥꠞꠥꠔ꠆ꠔꠣꠞꠦ ꠇꠣꠠꠤꠀ ꠘꠦꠅꠀ ꠅꠁꠛ ꠇꠁꠍꠟꠣꠄ, ꠀꠝꠤ ꠅꠃ ꠢꠥꠞꠥꠔ꠆ꠔꠣꠁꠘꠞꠦꠃ ꠢꠃ ꠖꠦꠡꠅ ꠙꠣꠞ ꠇꠞꠝꠥ, ꠔꠣꠞꠣꠃ ꠅꠁꠛꠣ ꠢꠤ ꠖꠦꠡꠞ ꠝꠣꠟꠤꠇ, ꠎꠦ ꠖꠦꠡꠞꠦ ꠔꠥꠝꠞꠣ ꠄꠟꠣꠝꠤ ꠇꠞꠍ।
NUM 14:32 ꠅꠁꠟꠦ ꠔꠥꠝꠞꠣꠞ ꠟꠣꠡ ꠅꠃ ꠝꠞꠥꠜꠥꠝꠤꠔ ꠙꠠꠤ ꠞꠁꠛ।
NUM 14:33 ꠅꠃ ꠝꠞꠥꠜꠥꠝꠤꠞ ꠙꠦꠐꠅ ꠔꠥꠝꠞꠣꠞ ꠄꠇ꠆ꠇꠦꠞꠦ ꠀꠈꠦꠞꠤ ꠎꠘ ꠘꠣ ꠝꠞꠣ ꠙꠞ꠆ꠎꠘ꠆ꠔ, ꠔꠥꠝꠞꠣꠞ ꠛꠦꠁꠝꠣꠘꠤꠞ ꠟꠣꠉꠤ ꠔꠥꠝꠞꠣꠞ ꠀꠅꠟꠣꠖ ꠅꠇꠟꠦ ꠌꠣꠟ꠆ꠟꠤꠡ ꠛꠍꠞ ꠅꠘꠅ ꠉꠞꠥ-ꠍꠣꠉꠟꠞ ꠞꠣꠈꠣꠟꠤ ꠇꠞꠛꠣ।
NUM 14:34 ꠇꠦꠘꠣꠘ ꠖꠦꠡꠞ ꠢꠣꠟ-ꠢꠇꠤꠇꠔ ꠖꠦꠈꠤꠀ ꠀꠁꠔꠦ ꠎꠦ ꠌꠣꠟ꠆ꠟꠤꠡ ꠖꠤꠘ ꠟꠣꠉꠍꠤꠟ, ꠄꠞ ꠄꠇ ꠖꠤꠘꠞ ꠛꠖꠟꠣ ꠄꠇ ꠛꠍꠞ, ꠅꠃꠟꠣ ꠝꠥꠐ ꠌꠣꠟ꠆ꠟꠤꠡ ꠛꠍꠞ ꠔꠥꠝꠞꠣꠞ ꠘꠣꠚꠞꠝꠣꠘꠤꠞ ꠟꠣꠉꠤ ꠇꠡ꠆ꠐ ꠇꠞꠛꠣꠄ। ꠔꠦꠃ ꠛꠥꠎꠛꠣꠄ, ꠀꠝꠤ ꠎꠦꠛꠟꠣ ꠇꠦꠃꠞꠞ ꠛꠤꠞꠥꠗꠤꠔꠣ ꠇꠞꠤ ꠄꠞ ꠖꠡꠣ ꠇꠤꠟꠣ ꠅꠄ।
NUM 14:35 ꠔꠦ ꠀꠝꠤ ꠝꠣꠛꠥꠖꠦ ꠇꠁꠞꠣꠝ, ꠅꠃ ꠘꠣꠚꠞꠝꠣꠘ ꠎꠣꠔꠤꠞ ꠎꠦꠔꠣ ꠝꠣꠘꠡꠦ ꠀꠝꠣꠞ ꠛꠤꠞꠥꠖ꠆ꠖꠦ ꠖꠟ ꠛꠣꠘ꠆ꠖꠤꠍꠦ, ꠁꠔꠣ ꠢꠇ꠆ꠇꠟꠐꠤ ꠅꠃ ꠝꠞꠥꠜꠥꠝꠤꠔ ꠝꠞꠛꠣ।”
NUM 14:36 ꠇꠦꠘꠣꠘ ꠖꠦꠡꠞ ꠢꠣꠟ-ꠢꠇꠤꠇꠔ ꠎꠣꠘꠣꠞ ꠟꠣꠉꠤ ꠝꠥꠍꠣꠄ ꠎꠦ ꠉꠥꠁꠀ ꠖꠟꠞꠦ ꠙꠣꠑꠣꠁꠍꠟꠣ, ꠄꠞꠣꠞ ꠝꠣꠎꠞ ꠎꠦꠉꠥꠁꠘ ꠚꠤꠞꠤꠀ ꠀꠁꠀ ꠛꠦꠁꠝꠣꠘꠤ ꠈꠛꠞ ꠞꠐꠣꠁꠀ, ꠢꠇꠟ ꠛꠘꠤ ꠁꠍꠞꠣꠁꠟꠞꠦ ꠖꠤꠀ ꠝꠥꠍꠣꠞ ꠛꠤꠞꠥꠖ꠆ꠖꠦ ꠛꠇꠣ-ꠎꠇꠣ ꠇꠞꠣꠁꠍꠤꠟ,
NUM 14:37 ꠝꠣꠘꠤ ꠎꠦꠞꠣ ꠢꠃ ꠖꠦꠡꠞ ꠛꠦꠙꠣꠞꠦ ꠀꠎꠦ-ꠛꠣꠎꠦ ꠝꠣꠔ ꠞꠐꠣꠁꠍꠤꠟ, ꠔꠣꠞꠣ ꠢꠇ꠆ꠇꠟꠃ ꠝꠢꠣ ꠉꠎꠛꠤ ꠛꠦꠝꠣꠞꠦ ꠝꠣꠛꠥꠖꠞ ꠍꠣꠝꠘꠦ ꠝꠞꠤꠉꠦꠟꠣ।
NUM 14:38 ꠅꠃ ꠉꠥꠁꠀ ꠖꠟꠞ ꠝꠣꠎ ꠕꠣꠇꠤ ꠈꠣꠟꠤ ꠘꠥꠘꠞ ꠙꠥꠀ ꠁꠃꠍꠣ ꠀꠞ ꠎꠤꠚꠥꠘ꠆ꠘꠤꠞ ꠙꠥꠀ ꠇꠣꠟꠥꠔ ꠛꠣꠌꠤꠀ ꠞꠁꠟꠣ।
NUM 14:39 ꠢꠎꠞꠔ ꠝꠥꠍꠣꠄ ꠝꠣꠛꠥꠖꠞ ꠇꠕꠣ ꠢꠇꠟ ꠛꠘꠤ ꠁꠍꠞꠣꠁꠟꠞꠦ ꠎꠣꠘꠣꠁꠟꠣ। ꠁꠔꠣ ꠢꠥꠘꠤꠀ ꠔꠣꠞꠣ ꠝꠘꠞ ꠖꠥꠈꠦ ꠇꠣꠔꠞ ꠅꠁꠉꠦꠟꠣ।
NUM 14:40 ꠛꠣꠖꠞ ꠖꠤꠘ ꠛꠤꠀꠘꠦ ꠔꠣꠞꠣ ꠢꠃ ꠙꠣꠠꠤ ꠄꠟꠣꠇꠣꠔ ꠎꠣꠅꠀꠞ ꠟꠣꠉꠤ ꠔꠤꠀꠞ ꠅꠁꠀ ꠇꠁꠟ, “ꠅꠃ ꠖꠦꠈꠅ, ꠀꠝꠞꠣ ꠎꠣꠁꠞꠣꠝꠉꠤ। ꠀꠝꠞꠣ ꠔ ꠉꠥꠘꠣ ꠇꠞꠤꠀ ꠢꠣꠞꠍꠤ, ꠔꠦ ꠅꠈꠘ ꠀꠝꠞꠣ ꠝꠣꠛꠥꠖꠞ ꠅꠀꠖꠣ ꠇꠞꠣ ꠖꠦꠡꠅꠃ ꠎꠣꠁꠔꠣꠝꠉꠤ।”
NUM 14:41 ꠅꠁꠟꠦ ꠝꠥꠍꠣꠄ ꠇꠁꠟꠣ, “ꠔꠥꠝꠞꠣ ꠝꠣꠛꠥꠖꠞ ꠢꠥꠇꠥꠝꠞ ꠃꠟꠐꠣ ꠎꠣꠁꠞꠣꠄ ꠇꠦꠘꠦ? ꠔꠥꠝꠞꠣꠞ ꠘꠤꠅꠔ ꠙꠥꠞꠣ ꠅꠁꠔ ꠘꠣꠄ।
NUM 14:42 ꠢꠥꠘꠅ, ꠔꠥꠝꠞꠣ ꠎꠣꠁꠅ ꠘꠣ, ꠇꠣꠞꠘ ꠝꠣꠛꠥꠖ ꠔꠥꠝꠞꠣꠞ ꠟꠉꠦ ꠘꠣꠄ। ꠖꠥꠡꠝꠘ ꠅꠇꠟꠞ ꠉꠦꠍꠦ ꠔꠥꠝꠞꠣ ꠀꠞꠤꠛꠣꠄ।
NUM 14:43 ꠢꠤꠘꠅ ꠉꠤꠀ ꠔꠥꠝꠞꠣ ꠀꠝꠣꠟꠦꠇꠤ ꠀꠞ ꠇꠦꠘꠣꠘꠤ ꠅꠇꠟꠞ ꠝꠥꠈꠣꠝꠥꠈꠤ ꠅꠁꠛꠣꠄ। ꠀꠞ ꠝꠣꠛꠥꠖꠞ ꠟꠉ ꠍꠣꠠꠤꠀ ꠉꠦꠍꠉꠤ ꠇꠞꠤ, ꠔꠣꠁꠘ ꠔꠥꠝꠞꠣꠞ ꠟꠉꠦ ꠞꠁꠔꠣ ꠘꠣꠄ। ꠄꠞꠟꠣꠉꠤ ꠔꠥꠝꠞꠣ ꠎꠥꠖ꠆ꠖꠞ ꠝꠥꠈꠅ ꠝꠞꠛꠣꠄ।”
NUM 14:44 ꠔꠦꠛꠃ ꠔꠣꠞꠣ ꠔꠣꠘ ꠇꠕꠣ ꠃꠟꠐꠣꠁꠀ ꠢꠃ ꠙꠣꠠꠤ ꠄꠟꠣꠇꠣ ꠛꠣꠄ ꠞꠅꠀꠘꠣ ꠖꠤꠟ। ꠅꠁꠟꠦ ꠝꠥꠍꠣ ꠔꠣꠞꠣꠞ ꠟꠉꠦ ꠉꠦꠟꠣ ꠘꠣ ꠀꠞ ꠝꠣꠛꠥꠖꠞ ꠙꠛꠤꠔ꠆ꠞ ꠡꠣꠢꠣꠖꠔ ꠡꠘ꠆ꠖꠥꠇꠅ ꠇꠦꠝ꠆ꠙꠞ ꠜꠤꠔꠞꠦ ꠞꠁꠉꠦꠟ।
NUM 14:45 ꠔꠣꠞꠣꠞꠦ ꠖꠦꠈꠤꠀꠃ ꠢꠃ ꠙꠣꠠꠤꠀ ꠄꠟꠣꠇꠣꠞ ꠀꠝꠣꠟꠦꠇꠤ ꠀꠞ ꠇꠦꠘꠣꠘꠤ ꠅꠇꠟ ꠟꠣꠝꠤꠀ ꠀꠁꠀ ꠢꠣꠝꠟꠣ ꠌꠣꠟꠣꠁꠟ, ꠀꠞ ꠢꠘꠞ ꠢꠞ꠆ꠝꠣ ꠐꠣꠃꠘ ꠙꠞ꠆ꠎꠘ꠆ꠔ ꠈꠦꠖꠣꠁꠀ ꠘꠤꠟ।
NUM 15:1 ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ,
NUM 15:2 “ꠔꠥꠝꠤ ꠛꠘꠤ ꠁꠍꠞꠣꠁꠟꠞꠦ ꠎꠣꠘꠣꠁ ꠖꠦꠅ, ꠀꠝꠤ ꠎꠦ ꠖꠦꠡꠈꠣꠘꠞꠦ ꠔꠥꠝꠞꠣꠞ ꠘꠤꠎꠞ ꠖꠦꠡ ꠢꠤꠡꠣꠛꠦ ꠖꠣꠘ ꠇꠞꠞꠣꠝ, ꠔꠥꠝꠞꠣ ꠎꠦꠛꠟꠣ ꠢꠃ ꠇꠦꠘꠣꠘ ꠖꠦꠡꠅ ꠎꠣꠁꠛꠣꠄ,
NUM 15:3 ꠉꠤꠀ ꠀꠝꠣꠞꠦ ꠈꠥꠡ ꠞꠣꠈꠣꠞ ꠘꠤꠅꠔꠦ ꠀꠉꠥꠘꠤꠔ ꠖꠦꠅꠀ ꠊꠦꠞꠣꠘ ꠀꠟꠣ ꠎꠦꠇꠥꠘꠥ ꠇꠥꠞꠛꠣꠘꠤ ꠢꠤꠡꠣꠛꠦ ꠔꠥꠝꠞꠣꠞ ꠙꠣꠟ ꠕꠣꠇꠤ ꠎꠦꠛꠟꠣ ꠉꠣꠁ-ꠉꠞꠥ ꠛꠣ ꠝꠦꠠꠣ-ꠍꠣꠉꠟ ꠀꠘꠤꠀ ꠀꠝꠣꠞ ꠘꠣꠝꠦ ꠖꠤꠛꠣꠞ ꠘꠤꠅꠔ ꠇꠞꠛꠣꠄ, ꠀꠞ ꠎꠣꠟꠣꠁꠟ ꠇꠥꠞꠛꠣꠘꠤ, ꠇꠥꠘꠥ ꠝꠣꠘ꠆ꠘꠔ ꠙꠥꠞꠘꠞ ꠇꠥꠞꠛꠣꠘꠤ, ꠢꠇꠟ ꠘꠝꠥꠘꠣꠞ ꠘꠚꠟ ꠇꠥꠞꠛꠣꠘꠤ, ꠛꠣ ꠎꠦꠇꠥꠘꠥ ꠁꠖꠞ ꠇꠥꠞꠛꠣꠘꠤ ꠖꠤꠟꠦ,
NUM 15:4 ꠇꠥꠞꠛꠣꠘꠤꠞ ꠙꠞꠔꠦꠇ ꠙꠡꠥꠞ ꠟꠉꠦ ꠗꠣꠘ-ꠉꠝꠞ ꠍꠖꠉꠣꠅ ꠖꠤꠛꠣꠄ। ꠅꠃ ꠍꠖꠉꠣꠞ ꠟꠣꠉꠤ ꠖꠥꠁ ꠡꠦꠞ ꠝꠄꠖꠣꠞꠦ ꠄꠇ ꠡꠦꠞ ꠔꠦꠟꠖꠤ ꠝꠣꠈꠣꠁꠀ ꠈꠣꠁ ꠛꠣꠘꠣꠁꠀ ꠀꠘꠛꠣꠄ।
NUM 15:5 ꠅꠁꠟꠦ ꠇꠥꠞꠛꠣꠘꠤꠞ ꠙꠡꠥꠐꠣ ꠎꠥꠖꠤ ꠝꠦꠠꠣ-ꠛꠣꠁꠌ꠆ꠌꠣ ꠅꠄ, ꠔꠦ ꠁꠐꠣꠞ ꠟꠉꠦ ꠡꠞꠛꠔ-ꠙꠣꠘꠤꠞ ꠍꠖꠉꠣ ꠢꠤꠡꠣꠛꠦ ꠀꠋꠉꠥꠞꠞ ꠄꠇ ꠡꠦꠞ ꠡꠞꠛꠔꠅ ꠖꠤꠛꠣꠄ।
NUM 15:6 ꠀꠞ ꠅꠃ ꠙꠡꠥ ꠎꠥꠖꠤ ꠝꠦꠠꠣ ꠅꠄ, ꠔꠦ ꠔꠣꠞ ꠟꠉꠦ ꠗꠣꠘ-ꠉꠝꠞ ꠍꠖꠉꠣ ꠢꠤꠡꠣꠛꠦ ꠡꠥꠀ ꠡꠦꠞ ꠔꠦꠟꠖꠤ ꠝꠣꠈꠣꠁꠀ ꠌꠣꠁꠞ ꠡꠦꠞ ꠝꠄꠖꠣ ꠖꠤꠛꠣꠄ।
NUM 15:7 ꠡꠞꠛꠔ-ꠙꠣꠘꠤꠞ ꠍꠖꠉꠣꠞ ꠟꠣꠉꠤ ꠟꠣꠉꠛ ꠀꠋꠉꠥꠞꠞ ꠡꠥꠀ ꠡꠦꠞ ꠡꠞꠛꠔ। ꠁꠔꠣ ꠀꠘꠤꠀ ꠀꠝꠣꠞꠦ ꠈꠥꠡ ꠇꠞꠣꠞ ꠊꠦꠞꠣꠘ ꠀꠟꠣ ꠇꠥꠞꠛꠣꠘꠤ ꠢꠤꠡꠣꠛꠦ ꠖꠤꠔꠦ ꠅꠁꠛ।
NUM 15:8 ꠔꠥꠝꠞꠣ ꠎꠥꠖꠤ ꠎꠣꠟꠣꠁꠟ ꠇꠥꠞꠛꠣꠘꠤ, ꠝꠣꠘ꠆ꠘꠔ ꠙꠥꠞꠘꠞ ꠇꠥꠞꠛꠣꠘꠤ ꠛꠣ ꠍꠣꠟꠣꠝꠔꠤ ꠇꠥꠞꠛꠣꠘꠤꠞ ꠟꠣꠉꠤ ꠇꠥꠘꠥ ꠉꠞꠥ ꠟꠁꠀ ꠀꠅ,
NUM 15:9 ꠔꠦ ꠄꠞꠟꠉꠦ ꠗꠣꠘ-ꠉꠝꠞ ꠍꠖꠉꠣ ꠢꠤꠡꠣꠛꠦ ꠍꠄ ꠡꠦꠞ ꠝꠄꠖꠣꠞꠦ ꠖꠥꠁ ꠡꠦꠞ ꠔꠦꠟꠖꠤ ꠝꠣꠈꠣꠁꠀ ꠈꠣꠁ ꠀꠘꠔꠦ ꠅꠁꠛ।
NUM 15:10 ꠀꠞ ꠡꠞꠛꠔ-ꠙꠣꠘꠤꠞ ꠍꠖꠉꠣꠞ ꠟꠣꠉꠤ ꠀꠋꠉꠥꠞꠞ ꠖꠥꠁ ꠡꠦꠞ ꠡꠞꠛꠔꠅ ꠀꠘꠔꠦ ꠅꠁꠛ। “ꠁꠔꠣ ꠅꠁꠟ ꠀꠉꠥꠘꠤꠔ ꠖꠦꠅꠀ ꠇꠥꠞꠛꠣꠘꠤ, ꠁ ꠇꠥꠞꠛꠣꠘꠤꠞ ꠗꠥꠝꠣꠞ ꠊꠦꠞꠣꠘꠦ ꠀꠝꠤ ꠈꠥꠡꠤ ꠅꠁ।
NUM 15:11 ꠇꠥꠞꠛꠣꠘꠤꠞ ꠙꠞꠔꠦꠇ ꠉꠞꠥ, ꠝꠦꠠꠣ, ꠝꠦꠠꠣ-ꠛꠣꠁꠌ꠆ꠌꠣ ꠛꠣ ꠍꠣꠉꠟꠞꠦ ꠅꠃ ꠘꠤꠅꠝꠦ ꠇꠥꠞꠛꠣꠘꠤ ꠖꠤꠛꠣꠄ।
NUM 15:12 ꠔꠥꠝꠞꠣ ꠎꠔ ꠙꠞꠤꠝꠣꠘ ꠙꠡꠥꠃ ꠇꠥꠞꠛꠣꠘꠤ ꠖꠦꠅ ꠘꠣ ꠇꠦꠘꠦ, ꠙꠞꠔꠦꠇ ꠙꠡꠥꠞ ꠟꠉꠦ ꠅꠃ ꠘꠤꠅꠝꠦ ꠍꠖꠉꠣꠅ ꠖꠤꠛꠣꠄ।
NUM 15:13 “ꠢꠥꠘꠅ, ꠀꠝꠤ ꠝꠣꠛꠥꠖꠞꠦ ꠈꠥꠡ ꠇꠞꠣꠞ ꠘꠤꠅꠔꠦ, ꠎꠦꠇꠥꠘꠥ ꠊꠦꠞꠣꠘ ꠀꠟꠣ ꠀꠉꠥꠘꠤꠔ ꠖꠦꠅꠀ ꠇꠥꠞꠛꠣꠘꠤ ꠀꠖꠣꠄ ꠇꠞꠣꠞ ꠡꠝꠄ, ꠙꠞꠔꠦꠇ ꠛꠘꠤ ꠁꠍꠞꠣꠁꠟꠦ ꠅꠃ ꠘꠤꠅꠝꠦ ꠇꠥꠞꠛꠣꠘꠤ ꠖꠤꠛꠣꠄ।
NUM 15:14 ꠅꠁꠘ꠆ꠘ ꠎꠣꠔꠤꠞ ꠇꠥꠘꠥ ꠝꠥꠍꠣꠚꠤꠞ ꠛꠣ ꠔꠥꠝꠞꠣꠞ ꠟꠉꠦ ꠛꠡꠔ ꠇꠞꠞꠣ ꠇꠥꠘꠥ ꠜꠤꠘ-ꠖꠦꠡꠤꠄ ꠎꠥꠖꠤ, ꠀꠝꠣꠞꠦ ꠈꠥꠡ ꠇꠞꠣꠞ ꠘꠤꠅꠔꠦ ꠀꠉꠥꠘꠤꠔ ꠖꠦꠅꠀ ꠊꠦꠞꠣꠘ ꠀꠟꠣ ꠇꠥꠞꠛꠣꠘꠤ ꠖꠤꠔ ꠌꠣꠄ, ꠔꠦ ꠢꠦ-ꠅ ꠔꠥꠝꠞꠣꠞ ꠟꠣꠈꠣꠘ ꠄꠇꠁ ꠘꠤꠅꠝ ꠝꠣꠘꠔꠦ ꠅꠁꠛ।
NUM 15:15 ꠅꠀꠞꠤꠡꠞ ꠙꠞ ꠅꠀꠞꠤꠡ ꠗꠞꠤ ꠅꠃ ꠘꠤꠅꠝ ꠎꠣꠞꠤ ꠞꠁꠛ। ꠔꠥꠝꠞꠣꠞ ꠡꠝꠣꠎꠞ ꠢꠇꠟꠞ ꠟꠣꠉꠤ ꠅꠃ ꠘꠤꠅꠝ ꠌꠣꠟꠥ ꠞꠁꠛ, ꠁꠔꠣ ꠔꠥꠝꠞꠣ ꠅꠅ ꠛꠣ ꠔꠥꠝꠞꠣꠞ ꠟꠉꠦ ꠛꠡꠔ ꠇꠞꠞꠣ ꠜꠤꠘ-ꠖꠦꠡꠤ ꠅꠁꠟꠦꠅ, ꠢꠇꠟꠞ ꠟꠣꠉꠤꠃ ꠅꠀꠞꠤꠡꠞ ꠙꠞ ꠅꠀꠞꠤꠡ ꠗꠞꠤ ꠅꠃ ꠄꠇꠁ ꠘꠤꠅꠝ ꠎꠣꠞꠤ ꠞꠁꠛ। ꠁ ꠛꠦꠙꠣꠞꠦ ꠀꠝꠤ ꠝꠣꠛꠥꠖꠞ ꠉꠦꠍꠦ ꠔꠥꠝꠞꠣ ꠎꠦꠟꠣ, ꠜꠤꠘ-ꠖꠦꠡꠤ ꠅꠇꠟꠅ ꠅꠃꠟꠣ, ꠢꠇꠟ ꠢꠝꠣꠘ।
NUM 15:16 ꠔꠥꠝꠞꠣꠞ ꠟꠣꠉꠤ ꠀꠞ ꠔꠥꠝꠞꠣꠞ ꠝꠣꠎꠦ ꠛꠡꠔ ꠇꠞꠞꠣ ꠜꠤꠘ-ꠖꠦꠡꠤ ꠅꠇꠟꠞ ꠟꠣꠉꠤ ꠄꠇꠟꠣꠈꠣꠘ ꠢꠥꠇꠥꠝ-ꠀꠢꠇꠣꠝ ꠀꠞ ꠄꠇꠁ ꠡꠞꠤꠅꠔ ꠌꠣꠟꠥ ꠞꠁꠛ।”
NUM 15:17 ꠄꠞꠛꠣꠖꠦ ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ,
NUM 15:18 “ꠔꠥꠝꠤ ꠛꠘꠤ ꠁꠍꠞꠣꠁꠟꠞꠦ ꠎꠣꠘꠣꠅ, ꠀꠝꠤ ꠝꠣꠛꠥꠖꠦ ꠔꠥꠝꠞꠣꠞꠦ ꠎꠦ ꠖꠦꠡꠅ ꠘꠤꠀꠞ, ꠢꠘꠅ ꠉꠤꠀ ꠢꠣꠞꠟꠦ,
NUM 15:19 ꠔꠥꠝꠞꠣ ꠎꠦꠛꠟꠣ ꠢꠃ ꠖꠦꠡꠞ ꠚꠄ-ꠚꠡꠟ ꠈꠣꠁꠛꠣꠄ, ꠅꠃ ꠡꠝꠄ ꠔꠥꠝꠞꠣ ꠁꠔꠣꠞ ꠇꠤꠍꠥ ꠅꠋꠡ ꠀꠝꠣꠞ ꠖꠞꠛꠣꠞꠅ ꠍꠖꠉꠣ ꠢꠤꠡꠣꠛꠦ ꠖꠤꠛꠣꠄ।
NUM 15:20 ꠔꠥꠝꠞꠣꠞ ꠈꠦꠔꠞ ꠙꠄꠟꠣ ꠖꠣꠅꠀ ꠚꠡꠟꠞ ꠝꠄꠖꠣ ꠖꠤꠀ ꠄꠇꠈꠣꠘ ꠞꠥꠐꠤ ꠛꠣꠘꠣꠁꠀ ꠀꠝꠣꠞ ꠘꠣꠝꠦ ꠍꠖꠉꠣ ꠖꠤꠛꠣꠄ। ꠉꠤꠞꠡ꠆ꠔ-ꠛꠣꠠꠤꠞ ꠍꠖꠉꠣꠞ ꠟꠣꠈꠣꠘ ꠖꠤꠛꠣꠄ।
NUM 15:21 ꠙꠄꠟꠣ ꠖꠣꠅꠀ ꠚꠡꠟꠞ ꠅꠃ ꠍꠖꠉꠣ, ꠅꠀꠞꠤꠡꠞ ꠙꠞ ꠅꠀꠞꠤꠡ ꠗꠞꠤ ꠟꠤꠟ꠆ꠟꠣ-ꠍꠖꠉꠣ ꠢꠤꠡꠣꠛꠦ ꠔꠥꠝꠞꠣ ꠀꠝꠣꠞ ꠘꠣꠝꠦ ꠖꠤꠛꠣꠄ।
NUM 15:22 “ꠅ ꠝꠥꠍꠣ, ꠔꠥꠝꠤ ꠛꠘꠤ ꠁꠍꠞꠣꠁꠟꠞꠦ ꠇꠅ, ꠀꠝꠤ ꠝꠣꠛꠥꠖꠦ ꠔꠥꠝꠣꠞ ꠝꠣꠎꠖꠤ ꠎꠔ ꠢꠥꠇꠥꠝ-ꠀꠢꠇꠣꠝ ꠖꠤꠍꠤ, ꠔꠣꠞꠣ ꠎꠥꠖꠤ ꠘꠣ ꠎꠣꠘꠤꠀ ꠅꠔꠣ ꠇꠥꠘꠥ ꠄꠇꠐꠣ ꠢꠥꠇꠥꠝ ꠜꠣꠋꠉꠤꠟꠣꠄ,
NUM 15:23 ꠁꠔꠣ ꠢꠇꠟ ꠢꠥꠇꠥꠝ ꠔ ꠖꠦꠅꠀꠞ ꠡꠝꠄ ꠕꠣꠇꠤ ꠅꠀꠞꠤꠡꠞ ꠙꠞ ꠅꠀꠞꠤꠡ ꠗꠞꠤ ꠎꠣꠞꠤ ꠞꠄ,
NUM 15:24 ꠔꠦ ꠁ ꠅꠎꠣꠘꠣ ꠛꠦꠙꠣꠞꠐꠣ ꠎꠣꠘꠣꠞ ꠛꠣꠖꠦꠃ ꠀꠡ꠆ꠔꠣ ꠛꠘꠤ ꠁꠍꠞꠣꠁꠟ ꠡꠝꠣꠎꠦ ꠝꠤꠟꠤꠀ ꠇꠥꠞꠛꠣꠘꠤ ꠖꠤꠔꠦ ꠅꠁꠛ। ꠔꠣꠞꠣ ꠄꠇꠐꠣ ꠛꠤꠍꠣꠟ ꠖꠤꠀ ꠀꠝꠤ ꠝꠣꠛꠥꠖꠞꠦ ꠈꠥꠡ ꠇꠞꠣꠞ ꠘꠤꠅꠔꠦ ꠊꠦꠞꠣꠘ ꠀꠟꠣ ꠎꠣꠟꠣꠁꠟ ꠇꠥꠞꠛꠣꠘꠤ ꠖꠤꠛ, ꠄꠞꠟꠉꠦ ꠘꠤꠅꠝ ꠝꠣꠚꠤꠇ ꠗꠣꠘ-ꠉꠝꠞ ꠍꠖꠉꠣ ꠀꠞ ꠡꠞꠛꠔ-ꠙꠣꠘꠤꠞ ꠍꠖꠉꠣ ꠖꠤꠛ। ꠀꠞ ꠉꠥꠘꠣꠞ ꠇꠚꠞꠣꠞ ꠟꠣꠉꠤ ꠄꠉꠥ ꠍꠣꠉꠟꠅ ꠇꠥꠞꠛꠣꠘꠤ ꠖꠤꠛ।
NUM 15:25 ꠁꠝꠣꠝ ꠍꠣꠛꠦ ꠀꠡ꠆ꠔꠣ ꠛꠘꠤ ꠁꠍꠞꠣꠁꠟ ꠡꠝꠣꠎꠞ ꠅꠃ ꠅꠎꠣꠘꠣ ꠉꠥꠘꠣꠞ ꠇꠚꠞꠣ ꠀꠖꠣꠄ ꠇꠞꠛꠣ, ꠔꠦꠃ ꠔꠣꠞꠣ ꠝꠣꠚꠤ ꠙꠣꠁꠛꠣ। ꠔꠣꠞꠣ ꠔ ꠁꠌ꠆ꠍꠣ ꠇꠞꠤꠀ ꠁ ꠘꠣꠚꠞꠝꠣꠘꠤ ꠇꠞꠍꠦ ꠘꠣ, ꠔꠣꠞꠣꠞ ꠜꠥꠟꠞ ꠟꠣꠉꠤ ꠝꠣꠛꠥꠖꠞ ꠘꠣꠝꠦ ꠀꠉꠥꠘꠤꠔ ꠖꠦꠅꠀ ꠇꠥꠞꠛꠣꠘꠤ ꠀꠞ ꠉꠥꠘꠣꠞ ꠇꠚꠞꠣꠞ ꠇꠥꠞꠛꠣꠘꠤꠅ ꠀꠖꠣꠄ ꠇꠞꠍꠦ।
NUM 15:26 ꠔꠦꠃ ꠀꠡ꠆ꠔꠣ ꠛꠘꠤ ꠁꠍꠞꠣꠁꠟ ꠡꠝꠣꠎ ꠀꠞ ꠔꠣꠞꠣꠞ ꠝꠣꠎꠦ ꠛꠡꠔ ꠇꠞꠞꠣ ꠜꠤꠘ-ꠖꠦꠡꠤ ꠝꠣꠘꠡꠞꠦꠅ ꠝꠣꠚ ꠇꠞꠣ ꠅꠁꠛ, ꠎꠥꠖꠤꠅ ꠔꠣꠞꠣ ꠢꠇꠟꠦꠃ ꠁ ꠜꠥꠟ-ꠇꠍꠥꠞꠤ ꠇꠞꠍꠦ।
NUM 15:27 “ꠅꠁꠟꠦ ꠇꠦꠃ ꠎꠥꠖꠤ ꠈꠣꠟꠤ ꠄꠇꠟꠣ ꠜꠥꠟ ꠇꠞꠤꠀ ꠝꠘꠞ ꠅꠎꠣꠘ꠆ꠔꠦ ꠇꠥꠘꠥ ꠘꠣꠚꠞꠝꠣꠘꠤ ꠇꠞꠤꠟꠣꠄ, ꠔꠦ ꠉꠥꠘꠣꠞ ꠇꠚꠞꠣꠞ ꠇꠥꠞꠛꠣꠘꠤꠞ ꠟꠣꠉꠤ ꠢꠦ ꠄꠇ ꠛꠍꠞ ꠛꠄꠅꠡꠤ ꠄꠇꠐꠣ ꠍꠣꠉꠤ ꠟꠁꠀ ꠀꠎꠤꠞ ꠅꠁꠔꠦ ꠅꠁꠛ।
NUM 15:28 ꠀꠞ ꠎꠦ ꠎꠘꠦ ꠝꠘꠞ ꠅꠎꠣꠘ꠆ꠔꠦ ꠅꠃ ꠉꠥꠘꠣ ꠇꠞꠍꠦ, ꠁꠝꠣꠝ ꠍꠣꠛꠦ ꠝꠣꠛꠥꠖꠞ ꠖꠞꠛꠣꠞꠅ ꠔꠣꠞ ꠉꠥꠘꠣꠞ ꠇꠚꠞꠣꠞ ꠛꠦꠛꠡ꠆ꠔꠣ ꠇꠞꠛꠣ। ꠅꠃ ꠇꠥꠞꠛꠣꠘꠤ ꠇꠛꠥꠟ ꠅꠁꠟꠦ ꠢꠦ ꠝꠣꠚꠤ ꠙꠣꠁꠛ।
NUM 15:29 ꠜꠥꠟ ꠇꠞꠤꠀ ꠝꠘꠞ ꠅꠎꠣꠘ꠆ꠔꠦ ꠎꠦ ꠝꠣꠘꠡꠦ ꠘꠣꠚꠞꠝꠣꠘꠤ ꠇꠞꠤꠟꠣꠄ, ꠅꠃ ꠟꠣꠈꠣꠘ ꠙꠞꠔꠦꠇ ꠝꠣꠘꠡꠞ ꠟꠣꠉꠤ ꠁ ꠘꠤꠅꠝ ꠌꠣꠟꠥ ꠞꠁꠛ, ꠢꠦ ꠛꠘꠤ ꠁꠍꠞꠣꠁꠟ ꠅꠃꠇ, ꠛꠣ ꠜꠤꠘ-ꠖꠦꠡꠤ ꠅꠃꠇ, ꠄꠇꠁ ꠘꠤꠅꠝꠦ ꠌꠟꠛ।
NUM 15:30 “ꠅꠁꠟꠦ ꠛꠘꠤ ꠁꠍꠞꠣꠁꠟ ꠛꠣ ꠔꠣꠞꠣꠞ ꠝꠣꠎꠦ ꠛꠡꠔ ꠇꠞꠞꠣ ꠅꠁꠘ꠆ꠘ ꠇꠥꠘꠥ ꠎꠣꠔꠤꠞ ꠇꠦꠃ ꠎꠥꠖꠤ ꠁꠌ꠆ꠍꠣ ꠇꠞꠤꠀ ꠇꠥꠘꠥ ꠘꠣꠚꠞꠝꠣꠘꠤ ꠇꠞꠦ, ꠔꠦ ꠢꠦ ꠡ꠆ꠛꠄꠅꠋ ꠝꠣꠛꠥꠖꠞꠦ ꠛꠦꠁꠎ꠆ꠎꠔ ꠇꠞꠦ। ꠁꠟꠣ ꠘꠣꠚꠞꠝꠣꠘꠤꠞ ꠟꠣꠉꠤ ꠡꠝꠣꠎ ꠕꠣꠇꠤ ꠅꠉꠥꠞ ꠘꠣꠝ ꠝꠤꠐꠣꠁꠟꠤꠔꠦ ꠅꠁꠛ।
NUM 15:31 ꠝꠣꠛꠥꠖꠞ ꠢꠥꠇꠥꠝꠞꠦ ꠄꠟꠣꠝꠤ ꠇꠞꠣꠄ ꠀꠞ ꠘꠣꠚꠞꠝꠣꠘꠤ ꠇꠞꠣꠄ ꠅꠉꠥꠞ ꠘꠣꠝ ꠝꠤꠐꠣꠁꠟꠤꠔꠦ ꠅꠁꠛ, ꠔꠣꠞ ꠁ ꠉꠥꠘꠣꠞ ꠖꠣꠄ-ꠜꠣꠞ ꠔꠣꠞ ꠃꠙꠞꠦꠃ ꠛꠞ꠆ꠔꠣꠁꠛ।”
NUM 15:32 ꠛꠘꠤ ꠁꠍꠞꠣꠁꠟ ꠝꠞꠥꠜꠥꠝꠤꠔ ꠍꠚꠞꠞ ꠇꠣꠟꠅ ꠄꠇ ꠎꠥꠝ꠆ꠝꠣꠛꠣꠞꠦ ꠄꠇꠎꠘ ꠝꠣꠘꠡꠞꠦ ꠖꠣꠞꠥ ꠔꠥꠛꠣꠘꠤꠔ ꠖꠦꠈꠟꠣ।
NUM 15:33 ꠎꠥꠝ꠆ꠝꠣꠛꠣꠞꠦ ꠖꠣꠞꠥ ꠔꠥꠛꠣꠘꠤꠔ ꠖꠦꠈꠣꠄ ꠅꠃ ꠝꠣꠘꠡꠦ ꠔꠣꠞꠦ ꠗꠞꠤꠀ ꠝꠥꠍꠣ ꠘꠛꠤ, ꠁꠝꠣꠝ ꠢꠣꠞꠥꠘ ꠀꠞ ꠢꠇꠟ ꠛꠘꠤ ꠁꠍꠞꠣꠁꠟꠞ ꠍꠣꠝꠘꠦ ꠟꠁꠀ ꠀꠁꠟꠣ।
NUM 15:34 ꠅꠃ ꠟꠣꠈꠣꠘ ꠝꠣꠘꠡꠞꠦ ꠇꠤꠔꠣ ꠇꠞꠔꠦ ꠅꠁꠛ, ꠁ ꠢꠥꠇꠥꠝ ꠔ ꠀꠟ꠆ꠟꠣꠄ ꠅꠈꠘꠅ ꠎꠣꠘꠣꠁꠍꠂꠘ ꠘꠣ, ꠄꠞꠟꠣꠉꠤ ꠄꠞꠦ ꠔꠣꠞꠣ ꠛꠘ꠆ꠖꠤ ꠇꠞꠤ ꠕꠁꠟ।
NUM 15:35 ꠅꠃ ꠡꠝꠄ ꠝꠣꠛꠥꠖꠦ ꠝꠥꠍꠣꠞꠦ ꠎꠣꠘꠣꠁꠟꠣ, “ꠅꠃ ꠝꠣꠘꠡꠞꠦ ꠎꠣꠘꠦ ꠝꠣꠞꠤꠟꠤꠔꠦ ꠅꠁꠛ। ꠔꠣꠞꠦ ꠇꠦꠝ꠆ꠙꠞ ꠛꠣꠞꠦ ꠘꠤꠀ ꠢꠇꠟ ꠛꠘꠤ ꠁꠍꠞꠣꠁꠟꠦ ꠙꠣꠔ꠆ꠔꠞꠖꠤ ꠁꠐꠣꠁꠀ ꠝꠣꠞꠤꠟꠤꠛꠣꠄ।”
NUM 15:36 ꠔꠦꠃ ꠝꠥꠍꠣꠞ ꠝꠣꠞꠚꠔꠦ ꠙꠣꠅꠀ ꠝꠣꠛꠥꠖꠞ ꠢꠥꠇꠥꠝ ꠝꠣꠚꠤꠇ, ꠛꠘꠤ ꠁꠍꠞꠣꠁꠟꠦ ꠔꠣꠞꠦ ꠇꠦꠝ꠆ꠙꠞ ꠛꠣꠞꠦ ꠘꠤꠀ ꠙꠣꠔ꠆ꠔꠞ ꠝꠣꠞꠤꠀ ꠝꠣꠞꠤꠟ꠆ꠟꠣ।
NUM 15:37 ꠄꠞꠛꠣꠖꠦ ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ,
NUM 15:38 “ꠔꠥꠝꠤ ꠛꠘꠤ ꠁꠍꠞꠣꠁꠟꠞꠦ ꠇꠅ, ꠔꠥꠝꠞꠣ ꠎꠣꠞꠎꠤꠞ ꠟꠦꠛꠣꠍꠞ ꠙꠣꠁꠠꠅ ꠎꠣꠎꠁꠞ ꠟꠣꠉꠣꠅ, ꠀꠞ ꠎꠣꠎꠁꠞꠞ ꠙꠞꠔꠦꠇ ꠉꠤꠐꠞꠦ ꠟꠤꠟꠥꠀ ꠡꠥꠔꠣꠖꠤ ꠙꠦꠌꠣꠁꠀ ꠝꠥꠟ ꠇꠣꠙꠠꠞ ꠟꠉꠦ ꠎꠥꠠꠣ ꠖꠤꠅ। ꠁ ꠢꠥꠇꠥꠝ ꠅꠀꠞꠤꠡꠞ ꠙꠞ ꠅꠀꠞꠤꠡ ꠗꠞꠤ ꠝꠣꠘꠛꠣꠄ।
NUM 15:39 ꠁ ꠎꠣꠎꠁꠞ ꠟꠣꠉꠣꠘꠤꠞ ꠇꠣꠞꠘ ꠅꠁꠟ, ꠅꠔꠣꠞ ꠛꠣꠄ ꠌꠣꠁꠟꠦ ꠔꠥꠝꠞꠣ ꠀꠝꠣꠞ ꠢꠇ꠆ꠇꠟ ꠢꠥꠇꠥꠝꠞ ꠇꠕꠣ ꠁꠀꠖ ꠇꠞꠤꠀ ꠅꠔꠣ ꠀꠝꠟ ꠇꠞꠛꠣꠄ। ꠔꠦꠃ ꠔꠥꠝꠞꠣ ꠀꠝꠣꠞ ꠟꠉꠦ ꠇꠥꠘꠥ ꠛꠦꠁꠝꠣꠘꠤ ꠇꠞꠔꠣꠄ ꠘꠣꠄ, ꠔꠥꠝꠞꠣꠞ ꠌꠃꠈꠞ ꠀꠞ ꠖꠤꠟꠞ ꠛꠖ ꠈꠣꠁꠡꠞ ꠀꠔꠅ ꠘꠤꠎꠞꠦ ꠡꠙꠤꠔꠣꠄ ꠘꠣꠄ।
NUM 15:40 ꠀꠝꠣꠞ ꠢꠇꠟ ꠢꠥꠇꠥꠝ-ꠀꠢꠇꠣꠝ ꠀꠝꠟ ꠇꠞꠣꠞ ꠇꠕꠣ ꠔꠥꠝꠞꠣꠞ ꠁꠀꠖ ꠞꠁꠛ, ꠔꠥꠝꠞꠣꠞ ꠀꠟ꠆ꠟꠣꠞ ꠘꠣꠝꠦ ꠔꠥꠝꠞꠣ ꠙꠣꠇ-ꠙꠞꠦꠎꠉꠣꠞ ꠛꠘ꠆ꠖꠣꠞ ꠢꠣꠟꠔꠦ ꠞꠁꠛꠣꠄ।
NUM 15:41 ꠀꠝꠤ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣ। ꠔꠥꠝꠞꠣꠞ ꠝꠣꠛꠥꠖ ꠅꠀꠞ ꠈꠤꠀꠟꠦ, ꠀꠝꠤ ꠔꠥꠝꠞꠣꠞꠦ ꠝꠤꠡꠞ ꠕꠣꠇꠤ ꠛꠣꠞ ꠇꠞꠤ ꠀꠘꠍꠤ। ꠀꠝꠤꠃ ꠀꠟ꠆ꠟꠣ, ꠔꠥꠝꠞꠣꠞ ꠝꠣꠛꠥꠖ।”
NUM 16:1 ꠟꠦꠛꠤ ꠈꠣꠘ꠆ꠖꠣꠘꠞ ꠇꠥꠞꠣꠢꠦ ꠝꠥꠍꠣ ꠘꠛꠤꠞ ꠛꠤꠞꠥꠖ꠆ꠖꠦ ꠖꠥꠡꠝꠘꠤ ꠟꠣꠉꠣꠁꠟ। ꠅꠃ ꠇꠥꠞꠣꠢ ꠅꠁꠟ ꠇꠣꠢꠣꠔꠤ ꠉꠥꠡ꠆ꠐꠤꠞ ꠁꠎꠢꠣꠞꠞ ꠙꠥꠀ। ꠔꠣꠞ ꠟꠉꠦ ꠞꠥꠛꠦꠘ ꠈꠣꠘ꠆ꠖꠣꠘꠞ ꠁꠟꠤꠀꠛꠞ ꠙꠥꠀ ꠖꠣꠕꠘ ꠀꠞ ꠀꠛꠤꠞꠣꠝ, ꠀꠞ ꠚꠟꠦꠔꠞ ꠙꠥꠀ ꠅꠃꠘꠦꠅ ꠝꠥꠍꠣ ꠘꠛꠤꠞ ꠛꠤꠞꠥꠗꠤꠔꠣ ꠇꠞꠟ। ꠄꠞꠣꠞ ꠖꠟꠅ ꠛꠘꠤ ꠁꠍꠞꠣꠁꠟꠞ ꠀꠞꠅ ꠀꠠꠣꠁ-ꠡ ꠎꠘ ꠘꠣꠝꠇꠞꠣ ꠝꠥꠞꠛ꠆ꠛꠤ ꠘꠦꠔꠣꠅ ꠡꠞꠤꠇ ꠅꠁꠟꠣ।
NUM 16:3 ꠅꠁꠀ ꠔꠣꠞꠣ ꠖꠟ ꠛꠣꠘ꠆ꠖꠤꠀ ꠝꠥꠍꠣ ꠀꠞ ꠢꠣꠞꠥꠘꠞꠦ ꠇꠁꠟꠣ, “ꠔꠥꠝꠞꠣ ꠔ ꠈꠥꠛ ꠛꠦꠡꠤ ꠛꠣꠠꠣꠛꠣꠠꠤ ꠇꠞꠞꠣꠄ। ꠀꠡ꠆ꠔꠣ ꠛꠘꠤ ꠁꠍꠞꠣꠁꠟꠞ ꠙꠞꠔꠦꠇ ꠝꠣꠘꠥꠡꠃ ꠎꠦꠛꠟꠣ ꠙꠣꠇ-ꠙꠛꠤꠔ꠆ꠞ, ꠝꠣꠛꠥꠖꠅ ꠔꠣꠞꠣꠞ ꠟꠉꠦ ꠀꠍꠂꠘ। ꠔꠦ ꠔꠥꠝꠞꠣ ꠝꠣꠛꠥꠖꠞ ꠛꠘ꠆ꠖꠣ ꠅꠇꠟꠞ ꠃꠙꠞꠦ ꠃꠡ꠆ꠔꠣꠖꠤ ꠇꠞꠞꠣꠄ ꠇꠦꠘꠦ?”
NUM 16:4 ꠁꠈꠣꠘ ꠢꠥꠘꠤꠀ ꠝꠥꠍꠣ ꠘꠛꠤ ꠃꠚꠁꠔ ꠅꠁꠀ ꠝꠣꠐꠤꠔ ꠙꠠꠟꠣ।
NUM 16:5 ꠛꠣꠖꠦ ꠔꠣꠁꠘ ꠇꠥꠞꠣꠢ ꠀꠞ ꠔꠣꠞ ꠖꠟꠞ ꠝꠣꠘꠡꠞꠦ ꠇꠁꠟꠣ, “ꠇꠣꠁꠟ ꠛꠤꠀꠘꠦꠃ ꠝꠣꠛꠥꠖꠦ ꠖꠦꠈꠣꠁꠛꠣ, ꠇꠦ ꠔꠣꠘ ꠛꠘ꠆ꠖꠣ, ꠀꠞ ꠇꠦ ꠙꠣꠇ-ꠙꠛꠤꠔ꠆ꠞ। ꠔꠣꠁꠘ ꠎꠣꠞꠦ ꠙꠍꠘ꠆ꠖ ꠇꠞꠂꠘ, ꠈꠣꠟꠤ ꠔꠣꠞꠣꠞꠦꠃ ꠔꠣꠘ ꠇꠣꠍꠣꠔ ꠀꠁꠔꠦ ꠖꠤꠛꠣ।
NUM 16:6 ꠅ ꠇꠥꠞꠣꠢ, ꠢꠥꠘꠅ, ꠔꠥꠝꠤ ꠀꠞ ꠔꠥꠝꠣꠞ ꠟꠉꠞ ꠢꠇꠟꠦ ꠄꠇ ꠇꠣꠝ ꠇꠞꠅ, ꠍꠣꠝꠘꠞ ꠇꠣꠁꠟ ꠔꠥꠝꠞꠣ ꠢꠇꠟꠦ ꠄꠇꠐꠣ ꠇꠞꠤ ꠀꠉꠞ ꠖꠣꠘꠤ ꠟꠁꠀ ꠝꠣꠛꠥꠖꠞ ꠍꠣꠝꠘꠦ ꠀꠉꠞ-ꠈꠥꠡꠛꠄ ꠎꠣꠟꠣꠅ। ꠔꠣꠁꠘ ꠎꠣꠞꠦ ꠙꠍꠘ꠆ꠖ ꠇꠞꠛꠣ, ꠛꠥꠎꠤꠟꠤꠅ ꠢꠦ-ꠃ ꠔꠣꠘ ꠙꠣꠇ-ꠙꠛꠤꠔ꠆ꠞ ꠛꠘ꠆ꠖꠣ। ꠔꠥꠝꠞꠣ ꠟꠦꠛꠤ ꠈꠣꠘ꠆ꠖꠣꠘꠞ ꠝꠣꠘꠥꠡ ꠔ ꠛꠦꠡꠤ ꠛꠣꠠꠤꠉꠦꠍꠦ।”
NUM 16:8 ꠝꠥꠍꠣꠄ ꠔꠣꠞꠦ ꠄꠅꠈꠣꠘ ꠇꠁꠟꠣ, “ꠔꠥꠝꠞꠣ ꠟꠦꠛꠤ ꠅꠇꠟꠦ ꠀꠝꠣꠞ ꠄꠇꠈꠣꠘ ꠇꠕꠣ ꠢꠥꠘꠅ।
NUM 16:9 ꠔꠥꠝꠞꠣ ꠝꠘꠅ ꠇꠞꠞꠣꠄ ꠘꠤ ꠝꠣꠛꠥꠖꠞ ꠇꠣꠛꠣ ꠊꠞꠅ ꠄꠛꠣꠖꠔꠤ ꠇꠞꠣ ꠀꠞ ꠡꠝꠣꠎꠞ ꠝꠣꠘꠡꠞ ꠈꠦꠎꠝꠔ ꠇꠞꠣ ꠁꠔꠣ ꠄꠇ꠆ꠇꠦꠞꠦ ꠢꠥꠞꠥ-ꠝꠥꠞꠥ ꠛꠦꠙꠣꠞ? ꠢꠥꠘꠅ, ꠛꠘꠤ ꠁꠍꠞꠣꠁꠟꠞ ꠀꠟ꠆ꠟꠣꠄ ꠡꠝꠣꠎꠞ ꠅꠁꠘ꠆ꠘꠣꠁꠘ꠆ꠘ ꠝꠣꠘꠥꠡ ꠕꠣꠇꠤ ꠔꠥꠝꠞꠣꠞꠦ ꠛꠣꠍꠤꠀ ꠘꠤꠀ, ꠔꠣꠘ ꠘꠤꠎꠞ ꠖꠤꠖꠣꠞꠅ ꠀꠘꠍꠂꠘ, ꠎꠣꠔꠦ ꠔꠥꠝꠞꠣ ꠅꠃ ꠇꠣꠝ ꠇꠞꠅ।
NUM 16:10 ꠔꠣꠁꠘ ꠔ ꠔꠥꠝꠣꠞꠦ ꠀꠞ ꠅꠁꠘ꠆ꠘꠣꠁꠘ꠆ꠘ ꠟꠦꠛꠤ ꠅꠇꠟꠞꠦ ꠘꠤꠎꠞ ꠗꠣꠞꠅ ꠀꠁꠛꠣꠞ ꠡꠥꠎꠥꠉ ꠖꠤꠍꠂꠘ, ꠅꠁꠟꠦ ꠔꠥꠝꠞꠣ ꠖꠦꠈꠤꠀꠞ ꠁꠝꠣꠝꠔꠤꠞ ꠙꠖꠞꠦꠅ ꠖꠈꠟ ꠇꠞꠔꠣꠄ ꠌꠣꠁꠞꠣꠄ।
NUM 16:11 ꠢꠣꠞꠥꠘ ꠀꠞ ꠇꠥꠘ ꠝꠣꠘꠥꠡ ꠎꠦꠘ, ꠔꠥꠝꠞꠣ ꠔꠣꠞ ꠛꠤꠞꠥꠖ꠆ꠖꠦ ꠛꠇꠣ-ꠎꠇꠣ ꠇꠞꠞꠣꠄ? ꠔꠥꠝꠤ ꠀꠞ ꠔꠥꠝꠣꠞ ꠖꠟꠞ ꠝꠣꠘꠡꠦ ꠔ ꠝꠣꠛꠥꠖꠞ ꠛꠤꠞꠥꠖ꠆ꠖꠦꠃ ꠖꠟ ꠛꠣꠘ꠆ꠖꠤꠍ।”
NUM 16:12 ꠄꠞꠣꠞ ꠛꠣꠖꠦ ꠝꠥꠍꠣꠄ ꠈꠛꠞ ꠖꠤꠟꠣ, ꠁꠟꠤꠀꠛꠞ ꠖꠥꠁ ꠙꠥꠀ ꠖꠣꠕꠘ ꠀꠞ ꠀꠛꠤꠞꠣꠝ ꠀꠁꠔꠣ ꠇꠞꠤ, ꠅꠁꠟꠦ ꠔꠣꠞꠣ ꠎꠣꠘꠣꠁꠟ, “ꠀꠝꠞꠣ ꠅꠔ ꠑꠦꠇꠣꠔ ꠘꠣꠄ।
NUM 16:13 ꠔꠥꠝꠤ ꠅꠃ ꠝꠞꠥꠜꠥꠝꠤꠔ ꠀꠘꠤꠀ ꠝꠣꠞꠔꠣꠄ ꠇꠞꠤ, ꠖꠥꠗ ꠀꠞ ꠝꠃꠞ ꠜꠣꠘ꠆ꠒꠣꠞ ꠀꠟꠣ ꠢꠃ ꠝꠤꠡꠞ ꠖꠦꠡ ꠕꠣꠇꠤ ꠀꠝꠞꠣꠞꠦ ꠛꠣꠞ ꠇꠞꠤ ꠀꠘꠍ, ꠢꠤ ꠖꠦꠡꠅ ꠔ ꠇꠥꠘ꠆ꠔꠣꠞꠃ ꠅꠜꠣꠛ ꠀꠍꠤꠟ ꠘꠣ। ꠄꠞ ꠛꠣꠖꠦꠅ ꠀꠝꠞꠣꠞ ꠃꠙꠞꠦ ꠛꠦꠐꠣꠉꠤꠞꠤ ꠖꠦꠈꠣꠘꠤꠔ ꠟꠣꠉꠍ।
NUM 16:14 ꠀꠞ ꠔꠥꠝꠤ ꠔ ꠀꠝꠞꠣꠞꠦ ꠢꠃ ꠟꠣꠈꠣꠘ ꠇꠥꠘꠥ ꠖꠥꠗ ꠀꠞ ꠝꠃꠞ ꠜꠣꠘ꠆ꠒꠣꠞ ꠀꠟꠣ ꠖꠦꠡꠅ-ꠅ ꠘꠤꠍ ꠘꠣ, ꠇꠥꠘꠥ ꠎꠝꠤ-ꠎꠝꠣ ꠛꠣ ꠀꠋꠉꠥꠞ ꠛꠣꠉꠣꠘꠞ ꠝꠣꠟꠤꠇꠣꠘꠣꠅ ꠖꠤꠍ ꠘꠣ। ꠔꠥꠝꠤ ꠁꠔꠣ ꠝꠣꠘꠡꠞꠦ ꠀꠘ꠆ꠖꠣ ꠛꠣꠘꠣꠁꠀ ꠞꠣꠈꠔꠣꠄ ꠌꠣꠅ ꠘꠤ? ꠘꠣ, ꠀꠝꠞꠣ ꠎꠣꠁꠔꠣꠝ ꠘꠣꠄ।”
NUM 16:15 ꠁꠔꠣ ꠢꠥꠘꠤꠀ ꠝꠥꠍꠣ ꠈꠥꠛ ꠉꠞꠝ ꠅꠁꠀ ꠝꠣꠛꠥꠖꠞꠦ ꠇꠁꠟꠣ, “ꠝꠣꠛꠥꠖ, ꠔꠥꠝꠤ ꠄꠞꠣꠞ ꠇꠥꠞꠛꠣꠘꠤ ꠇꠛꠥꠟ ꠇꠞꠤꠅ ꠘꠣ। ꠀꠝꠤ ꠔ ꠔꠣꠞꠣꠞ ꠇꠥꠘꠥ ꠈꠦꠔꠤ ꠇꠞꠍꠤ ꠘꠣ, ꠔꠣꠞꠣꠞ ꠄꠉꠥ ꠉꠣꠗꠣꠅ ꠀꠝꠤ ꠘꠤꠍꠤ ꠘꠣ।”
NUM 16:16 ꠛꠣꠖꠦ ꠝꠥꠍꠣꠄ ꠇꠥꠞꠣꠢꠞꠦ ꠇꠁꠟꠣ, “ꠇꠣꠁꠟ ꠔꠥꠝꠤ ꠀꠞ ꠔꠥꠝꠣꠞ ꠖꠟꠞ ꠢꠇꠟ ꠀꠁꠀ ꠝꠣꠛꠥꠖꠞ ꠍꠣꠝꠘꠦ ꠀꠎꠤꠞ ꠅꠁꠛꠣꠄ। ꠔꠥꠝꠞꠣꠞ ꠟꠉꠦ ꠢꠣꠞꠥꠘꠅ ꠀꠎꠤꠞ ꠅꠁꠛꠣ।
NUM 16:17 ꠙꠞꠔꠦꠇꠦ ꠀꠁꠀ ꠎꠣꠞꠎꠤꠞ ꠀꠉꠞ ꠖꠣꠘꠤꠔ ꠀꠉꠞ-ꠈꠥꠡꠛꠄ ꠜꠞꠤꠀ ꠝꠣꠛꠥꠖꠞ ꠘꠣꠝꠦ ꠎꠣꠟꠣꠁꠛꠣꠄ। ꠔꠥꠝꠞꠣꠞ ꠀꠠꠣꠁ-ꠡ ꠎꠘꠞ ꠢꠇ꠆ꠇꠟꠦ ꠅꠟꠣ ꠎꠣꠞꠎꠤꠞ ꠀꠉꠞ ꠖꠣꠘꠤ ꠎꠣꠟꠣꠁꠅ। ꠄꠞꠟꠉꠦ ꠔꠥꠝꠤ ꠀꠞ ꠢꠣꠞꠥꠘꠦꠅ ꠀꠉꠞ-ꠈꠥꠡꠛꠄ ꠎꠣꠟꠣꠁꠅ।”
NUM 16:18 ꠝꠥꠍꠣꠞ ꠢꠥꠇꠥꠝ ꠝꠣꠚꠤꠇ ꠙꠞꠔꠦꠇꠦ ꠎꠣꠞꠎꠤꠞ ꠀꠉꠞ ꠖꠣꠘꠤꠔ ꠀꠉꠞ-ꠈꠥꠡꠛꠄ ꠀꠞ ꠀꠉꠥꠁꠘ ꠟꠁꠀ, ꠝꠤꠟꠘ-ꠔꠣꠝ꠆ꠛꠥꠞ ꠖꠥꠀꠞꠞ ꠍꠣꠝꠘꠦ, ꠝꠥꠍꠣ ꠀꠞ ꠢꠣꠞꠥꠘꠞ ꠟꠉꠦ ꠉꠤꠀ ꠃꠛꠣꠁꠟꠣ।
NUM 16:19 ꠇꠥꠞꠣꠢꠦ ꠎꠦꠛꠟꠣ ꠡꠝꠣꠎꠞ ꠢꠇꠟ ꠝꠣꠘꠡꠞꠦ ꠃꠡ꠆ꠇꠣꠁꠀ ꠖꠟꠣ ꠇꠞꠟ, ꠇꠞꠤꠀ ꠝꠤꠟꠘ-ꠔꠣꠝ꠆ꠛꠥꠞ ꠖꠥꠀꠞꠞ ꠉꠦꠍꠦ ꠝꠥꠍꠣ ꠀꠞ ꠢꠣꠞꠥꠘꠞ ꠛꠤꠞꠥꠖ꠆ꠖꠦ ꠃꠛꠣꠁꠟ, ꠅꠃ ꠡꠝꠄ ꠔꠣꠞꠣ ꠢꠇ꠆ꠇꠟꠞ ꠍꠣꠝꠘꠦ ꠝꠣꠛꠥꠖꠞ ꠇꠥꠖꠞꠔꠤ ꠘꠥꠞ ꠎꠣꠁꠞ ꠅꠁꠟ।
NUM 16:20 ꠝꠣꠛꠥꠖꠦ ꠝꠥꠍꠣ ꠀꠞ ꠢꠣꠞꠥꠘꠞꠦ ꠇꠁꠟꠣ,
NUM 16:21 “ꠁꠔꠣ ꠝꠣꠘꠡꠞ ꠉꠦꠍ ꠕꠣꠇꠤ ꠔꠥꠝꠞꠣ ꠢꠞꠤ ꠎꠣꠅ, ꠀꠝꠤ ꠁꠔꠣꠞꠦ ꠌꠈꠥꠞ ꠙꠟꠇꠞ ꠟꠉꠦ ꠡꠦꠡ ꠇꠞꠤꠟꠤꠀꠞ।”
NUM 16:22 ꠅꠁꠟꠦ ꠝꠥꠍꠣ ꠀꠞ ꠢꠣꠞꠥꠘ ꠍꠁꠎꠖꠣꠔ ꠙꠠꠤꠀ ꠇꠁꠟꠣ, “ꠅ ꠀꠟ꠆ꠟꠣ, ꠔꠥꠝꠤ ꠔ ꠢꠇꠟ ꠝꠣꠘꠡꠞ ꠜꠤꠔꠞꠦ ꠎꠣꠘ ꠖꠦꠅ। ꠅꠈꠘ ꠈꠣꠟꠤ ꠄꠇꠎꠘꠞ ꠘꠣꠚꠞꠝꠣꠘꠤꠞ ꠖꠣꠄ ꠀꠡ꠆ꠔꠣ ꠛꠘꠤ ꠁꠍꠞꠣꠁꠟꠞ ꠃꠙꠞꠦ ꠔꠥꠝꠤ ꠉꠎꠛ ꠓꠣꠟꠤꠔꠣꠄ ꠘꠤ?”
NUM 16:23 ꠔꠦꠃ ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ,
NUM 16:24 “ꠔꠥꠝꠤ ꠛꠘꠤ ꠁꠍꠞꠣꠁꠟꠞꠦ ꠎꠣꠘꠣꠁ ꠖꠦꠅ, ꠔꠣꠞꠣ ꠎꠣꠘꠥ ꠇꠥꠞꠣꠢ, ꠖꠣꠕꠘ ꠀꠞ ꠀꠛꠤꠞꠣꠝꠞ ꠔꠣꠝ꠆ꠛꠥꠞ ꠉꠦꠍ ꠕꠣꠇꠤ ꠢꠞꠤ ꠎꠣꠁꠘ।”
NUM 16:25 ꠁꠈꠣꠘ ꠢꠥꠘꠤꠀ ꠝꠥꠍꠣ ꠍꠁꠎꠖꠣ ꠕꠣꠇꠤ ꠃꠑꠤꠀ ꠖꠣꠕꠘ ꠀꠞ ꠀꠛꠤꠞꠣꠝꠞ ꠉꠦꠍꠦ ꠉꠦꠟꠣ, ꠔꠣꠘ ꠈꠞꠦ ꠅꠁꠀ ꠛꠘꠤ ꠁꠍꠞꠣꠁꠟꠞ ꠝꠥꠞꠛ꠆ꠛꠤ ꠘꠦꠔꠣ ꠅꠇꠟꠅ ꠉꠦꠟꠣ।
NUM 16:26 ꠔꠣꠁꠘ ꠛꠘꠤ ꠁꠍꠞꠣꠁꠟꠞꠦ ꠇꠁꠟꠣ, “ꠔꠥꠝꠞꠣ ꠅꠃ ꠘꠣꠚꠞꠝꠣꠘ ꠅꠇꠟꠞ ꠔꠣꠝ꠆ꠛꠥ ꠕꠣꠇꠤ ꠢꠞꠤ ꠎꠣꠅ, ꠁꠔꠣꠞ ꠇꠥꠘꠥ ꠝꠣꠟ-ꠍꠣꠝꠣꠘꠣꠔ ꠍꠁꠅ ꠘꠣ। ꠀꠞꠘꠣꠄ ꠔꠣꠞꠣꠞ ꠉꠥꠘꠣꠞ ꠡꠣꠎꠣꠞ ꠟꠉꠦ ꠔꠥꠝꠞꠣꠞꠦꠅ ꠛꠤꠘꠣꠡ ꠇꠞꠣ ꠅꠁꠛ।”
NUM 16:27 ꠁꠈꠣꠘ ꠢꠥꠘꠤꠀ ꠇꠥꠞꠣꠢ, ꠖꠣꠕꠘ ꠀꠞ ꠀꠛꠤꠞꠣꠝꠞ ꠔꠣꠝ꠆ꠛꠥꠞ ꠉꠦꠍ ꠕꠣꠇꠤ ꠢꠇꠟ ꠝꠣꠘꠥꠡ ꠢꠞꠤ ꠉꠦꠟꠣ। ꠄꠞꠝꠣꠎꠦ ꠖꠣꠕꠘ ꠀꠞ ꠀꠛꠤꠞꠣꠝꠦ ꠔꠣꠞꠣꠞ ꠛꠃ-ꠛꠣꠁꠌ꠆ꠌꠣꠁꠘ ꠀꠞ ꠢꠥꠞꠥ-ꠛꠠ ꠢꠇꠟ ꠢꠥꠞꠥꠔ꠆ꠔꠣꠁꠘ ꠟꠁꠀ ꠀꠁꠀ ꠎꠣꠞꠎꠤꠞ ꠔꠣꠝ꠆ꠛꠥꠞ ꠖꠥꠀꠞꠞ ꠉꠦꠍꠦ ꠃꠛꠣꠔ ꠀꠍꠤꠟ।
NUM 16:28 ꠅꠃ ꠡꠝꠄ ꠝꠥꠍꠣꠄ ꠛꠘꠤ ꠁꠍꠞꠣꠁꠟꠞꠦ ꠇꠁꠟꠣ, “ꠔꠥꠝꠞꠣ ꠅꠃ ꠀꠟꠣꠝꠔ ꠖꠦꠈꠤꠀ ꠛꠥꠎꠤꠟꠤꠛꠣꠄ, ꠀꠝꠤ ꠎꠦꠔꠣ ꠇꠞꠤꠀꠞ ꠁꠔꠣ ꠀꠝꠣꠞ ꠝꠘꠉꠠꠣ ꠇꠥꠘ꠆ꠔꠣ ꠘꠣꠄ। ꠅꠃ ꠇꠣꠝꠞ ꠟꠣꠉꠤ ꠝꠣꠛꠥꠖꠦꠃ ꠀꠝꠣꠞꠦ ꠙꠣꠑꠣꠁꠍꠂꠘ।
NUM 16:29 ꠄꠞꠣꠞ ꠝꠞꠘ ꠎꠥꠖꠤ ꠅꠁꠘ꠆ꠘꠣꠁꠘ꠆ꠘ ꠝꠣꠘꠡꠞ ꠟꠣꠈꠣꠘ ꠡ꠆ꠛꠣꠜꠣꠛꠤꠇ ꠢꠣꠟꠔꠦ ꠅꠄ, ꠔꠦ ꠝꠘꠅ ꠇꠞꠤꠅ, ꠝꠣꠛꠥꠖꠦ ꠀꠝꠣꠞꠦ ꠙꠣꠑꠣꠁꠍꠂꠘ ꠘꠣ।
NUM 16:30 ꠅꠁꠟꠦ ꠝꠣꠛꠥꠖꠦ ꠎꠥꠖꠤ ꠀꠌꠣꠘꠇ ꠘꠄꠀ ꠇꠥꠘꠥ ꠇꠣꠝ ꠇꠞꠂꠘ, ꠅꠃ ꠎꠝꠤꠘꠦ ꠝꠥꠈ ꠈꠥꠟꠤꠀ ꠔꠣꠞꠣꠞꠦ ꠀꠞ ꠔꠣꠞꠣꠞ ꠢꠇꠟꠔꠣꠞꠦ ꠎꠤꠘ꠆ꠖꠣ ꠉꠤꠟꠤꠟꠣꠄ, ꠔꠣꠞꠣ ꠎꠤꠘ꠆ꠖꠣ ꠢꠣꠟꠔꠦꠃ ꠝꠣꠐꠤꠞ ꠔꠟꠞ ꠙꠣꠔꠣꠟꠅ ꠎꠣꠄꠉꠤ, ꠔꠦ ꠛꠥꠎꠤꠟꠤꠅ, ꠄꠞꠣ ꠝꠣꠛꠥꠖꠞꠦ ꠄꠟꠣꠝꠤ ꠇꠞꠍꠦ।”
NUM 16:31 ꠝꠥꠍꠣꠄ ꠅꠈꠣꠘ ꠇꠅꠀꠞ ꠟꠉꠦ ꠟꠉꠦꠃ ꠄꠞꠣꠞ ꠙꠣꠅꠞ ꠔꠟꠞ ꠝꠣꠐꠤ ꠚꠣꠐꠤꠀ ꠖꠥꠁ ꠛꠣꠐ ꠅꠁꠉꠦꠟ,
NUM 16:32 ꠀꠞ ꠝꠣꠐꠤꠄ ꠀ ꠇꠞꠤꠀ ꠇꠥꠞꠣꠢꠞ ꠙꠞꠤꠛꠣꠞꠞ ꠢꠇꠟꠞꠦ ꠔꠣꠞꠣꠞ ꠝꠣꠟ-ꠍꠣꠝꠣꠘꠣ ꠡꠢ ꠉꠤꠟꠤꠟꠤꠟ।
NUM 16:33 ꠝꠣꠟ-ꠍꠣꠝꠣꠘꠣ ꠡꠥꠖ꠆ꠖꠣ ꠎꠤꠘ꠆ꠖꠣ ꠢꠣꠟꠔꠦ ꠔꠣꠞꠣ ꠝꠣꠐꠤꠞ ꠔꠟꠦ ꠉꠦꠟꠉꠤ, ꠛꠣꠖꠦ ꠝꠣꠐꠤꠞ ꠚꠣꠐꠣ ꠛꠘ꠆ꠖ ꠅꠁꠉꠦꠟ। ꠅꠃꠟꠣ ꠛꠘꠤ ꠁꠍꠞꠣꠁꠟ ꠕꠣꠇꠤ ꠔꠣꠞꠣ ꠄꠇꠖꠝ ꠘꠤꠙꠣꠔ ꠅꠁꠉꠦꠟ।
NUM 16:34 ꠔꠣꠞꠣꠞ ꠌꠤꠇ-ꠌꠤꠟ꠆ꠟꠣꠘꠤ ꠢꠥꠘꠤꠀ ꠌꠣꠁꠞꠅꠛꠣꠄ ꠕꠣꠇꠤ ꠢꠇꠟ ꠝꠣꠘꠥꠡ ꠖꠃꠠꠣꠁꠀ ꠜꠣꠉꠤꠟꠣ, ꠁꠔꠣꠄ ꠌꠤꠟ꠆ꠟꠣꠁ ꠌꠤꠟ꠆ꠟꠣꠁ ꠖꠃꠠꠣꠁꠀ ꠇꠁꠟꠣ, “ꠝꠣꠐꠤꠄ ꠢꠄꠔ ꠀꠝꠞꠣꠞꠦꠅ ꠉꠤꠟꠤꠟꠤꠛ।”
NUM 16:35 ꠀꠞ ꠢꠃ ꠎꠦ ꠀꠠꠣꠁ-ꠡ ꠎꠘꠦ ꠀꠉꠞ-ꠈꠥꠡꠛꠄ ꠎꠣꠟꠣꠁꠀ ꠇꠥꠞꠛꠣꠘꠤ ꠇꠞꠍꠤꠟ, ꠝꠣꠛꠥꠖꠞ ꠉꠦꠍ ꠕꠣꠇꠤ ꠉꠣꠁꠛꠤ ꠀꠉꠥꠁꠘ ꠀꠁꠀ ꠁꠔꠣꠞꠦ ꠎꠣꠟꠣꠁꠀ ꠍꠣꠟꠤ ꠇꠞꠤꠟ꠆ꠟ।
NUM 16:36 ꠛꠣꠖꠦ ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ,
NUM 16:37 “ꠔꠥꠝꠤ ꠁꠝꠣꠝ ꠢꠣꠞꠥꠘꠞ ꠙꠥꠀ ꠀꠟꠤ-ꠀꠎꠞꠞꠦ ꠇꠅ, ꠅꠃ ꠎꠣꠟꠣꠁꠟ ꠎꠣꠉꠣ ꠕꠣꠇꠤ ꠀꠉꠞ ꠖꠣꠘꠤ ꠉꠥꠁꠘ ꠛꠣꠞ ꠇꠞꠤꠀ, ꠄꠞ ꠀꠋꠞꠣ-ꠍꠣꠟꠤ ꠘꠤꠀ ꠕꠥꠠꠣ ꠖꠥꠞꠁ ꠚꠣꠟꠣꠘꠤꠞ ꠟꠣꠉꠤ, ꠁ ꠀꠉꠞ ꠖꠣꠘꠤ ꠉꠥꠁꠘ ꠙꠣꠇ-ꠙꠛꠤꠔ꠆ꠞ ꠛꠘꠤꠉꠦꠍꠦ।
NUM 16:38 ꠘꠣꠚꠞꠝꠣꠘꠤꠞ ꠟꠣꠉꠤ ꠎꠦꠉꠥꠁꠘ ꠝꠞꠤꠉꠦꠍꠂꠘ, ꠅꠃ ꠀꠉꠞ ꠖꠣꠘꠤ ꠔ ꠔꠣꠞꠣꠞ ꠀꠍꠤꠟ। ꠅꠁꠟꠦ ꠝꠣꠛꠥꠖꠞ ꠍꠣꠝꠘꠦ ꠁꠔꠣ ꠀꠎꠤꠞ ꠇꠞꠣ ꠅꠁꠍꠤꠟ, ꠄꠞꠟꠣꠉꠤ ꠁ ꠢꠇꠟꠐꠤ ꠙꠣꠇ-ꠙꠛꠤꠔ꠆ꠞ ꠅꠁꠉꠦꠍꠦ। ꠔꠦ ꠔꠥꠝꠤ ꠁꠔꠣ ꠜꠣꠋꠉꠣꠁꠀ ꠙꠣꠔ ꠛꠣꠘꠣꠁꠀ ꠙꠛꠤꠔ꠆ꠞ ꠇꠥꠞꠛꠣꠘꠤ ꠈꠣꠘꠣꠞꠦ ꠉꠥꠞꠤꠀ ꠕꠁꠅ। ꠁꠔꠣ ꠘꠤꠡꠣꠘꠣ ꠢꠤꠡꠣꠛꠦ ꠛꠘꠤ ꠁꠍꠞꠣꠁꠟꠞ ꠉꠦꠍꠦ ꠞꠁꠛ।”
NUM 16:39 ꠔꠦꠃ ꠀꠉꠥꠁꠘꠦ ꠎꠟꠤꠀ ꠎꠦꠉꠥꠁꠘ ꠝꠞꠍꠤꠟꠣ, ꠅꠔꠣꠞ ꠀꠘꠣ ꠙꠤꠔꠟꠞ ꠀꠉꠞ ꠖꠣꠘꠤ ꠉꠥꠁꠘ ꠁꠝꠣꠝ ꠀꠟꠤ-ꠀꠎꠞꠦ ꠄꠇꠈꠣꠘꠅ ꠖꠟꠣ ꠇꠞꠟꠣ। ꠛꠣꠖꠦ ꠅꠔꠣ ꠜꠣꠋꠉꠣꠁꠀ ꠇꠥꠞꠛꠣꠘꠤ ꠈꠣꠘꠣ ꠉꠥꠞꠤꠀ ꠕꠅꠀꠞ ꠙꠣꠔ ꠛꠣꠘꠣꠁꠟꠣ।
NUM 16:40 ꠝꠣꠛꠥꠖꠦ ꠝꠥꠍꠣ ꠘꠛꠤꠞ ꠝꠣꠎꠖꠤ ꠎꠦꠟꠣ ꠢꠥꠇꠥꠝ ꠖꠤꠍꠟꠣ, ꠄꠁꠘ ꠅꠃ ꠟꠣꠈꠣꠘ ꠇꠞꠟꠣ। ꠁꠇꠐꠣ ꠇꠞꠣ ꠅꠁꠟ ꠎꠣꠔꠦ ꠛꠘꠤ ꠁꠍꠞꠣꠁꠟꠞ ꠝꠘꠅ ꠕꠣꠇꠦ ꠎꠦꠘ, ꠈꠣꠟꠤ ꠢꠣꠞꠥꠘꠞ ꠛꠋꠡ ꠍꠣꠠꠣ ꠖꠥꠍꠞꠣ ꠇꠥꠘꠥ ꠎꠘ, ꠀꠉꠞ-ꠈꠥꠡꠛꠄ ꠎꠣꠟꠣꠘꠤꠞ ꠟꠣꠉꠤ ꠝꠣꠛꠥꠖꠞ ꠍꠣꠝꠘꠦ ꠎꠣꠁꠔ ꠙꠣꠞꠔ ꠘꠣꠄ। ꠎꠥꠖꠤ ꠎꠣꠄ, ꠔꠦ ꠔꠣꠞ ꠖꠡꠣ ꠅꠃ ꠇꠥꠞꠣꠢ ꠀꠞ ꠔꠣꠞ ꠖꠟꠞ ꠟꠣꠈꠣꠘ ꠅꠁꠛ।
NUM 16:41 ꠅꠁꠟꠦ ꠛꠣꠖꠞ ꠖꠤꠘꠃ ꠛꠘꠤ ꠁꠍꠞꠣꠁꠟꠞ ꠝꠣꠘꠡꠦ ꠢꠎꠞꠔ ꠝꠥꠍꠣ ꠀꠞ ꠢꠣꠞꠥꠘꠞ ꠛꠤꠞꠥꠖ꠆ꠖꠦ ꠛꠦꠞ-ꠛꠦꠞꠤ ꠟꠣꠉꠣꠁꠟ, ꠔꠣꠞꠣ ꠇꠁꠟ, “ꠝꠣꠛꠥꠖꠞ ꠛꠘ꠆ꠖꠣ ꠅꠇꠟꠞꠦ ꠔꠥꠝꠞꠣꠃ ꠝꠣꠞꠍ।”
NUM 16:42 ꠀꠞ ꠡꠝꠣꠎꠞ ꠢꠇꠟ ꠝꠣꠘꠡꠦ ꠎꠦꠛꠟꠣ ꠝꠥꠍꠣ ꠀꠞ ꠢꠣꠞꠥꠘꠞ ꠛꠤꠞꠥꠗꠤꠔꠣ ꠇꠞꠤꠀ ꠝꠤꠟꠘ-ꠔꠣꠝ꠆ꠛꠥꠞ ꠝꠥꠈꠣ ꠊꠥꠞꠤꠀ ꠃꠛꠣꠁꠟ, ꠅꠃ ꠡꠝꠄ ꠢꠃ ꠉꠣꠁꠛꠤ ꠝꠦꠊꠞ ꠈꠥꠐꠤꠄ ꠀꠈꠔꠣꠃ ꠝꠤꠟꠘ-ꠔꠣꠝ꠆ꠛꠥ ꠉꠥꠞꠤ ꠉꠦꠟ, ꠝꠣꠛꠥꠖꠞ ꠇꠥꠖꠞꠔꠤ ꠘꠥꠞ ꠎꠣꠁꠞ ꠅꠁꠟ।
NUM 16:43 ꠔꠦꠃ ꠝꠥꠍꠣ ꠀꠞ ꠢꠣꠞꠥꠘ ꠝꠤꠟꠘ-ꠔꠣꠝ꠆ꠛꠥꠞ ꠍꠣꠝꠘꠦ ꠉꠦꠟꠣ,
NUM 16:44 ꠀꠞ ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ,
NUM 16:45 “ꠁꠔꠣ ꠝꠣꠘꠡꠞ ꠉꠦꠍ ꠕꠣꠇꠤ ꠔꠥꠝꠞꠣ ꠢꠞꠤ ꠎꠣꠅ, ꠀꠝꠤ ꠁꠔꠣꠞꠦ ꠌꠈꠥꠞ ꠙꠟꠇꠞ ꠟꠉꠦ ꠡꠦꠡ ꠇꠞꠤꠟꠤꠀꠞ।” ꠁꠈꠣꠘ ꠢꠥꠘꠤꠀꠃ ꠔꠣꠞꠣ ꠖꠥꠁꠅ ꠎꠘ ꠍꠁꠎꠖꠣꠔ ꠙꠠꠟꠣ।
NUM 16:46 ꠛꠣꠖꠦ ꠝꠥꠍꠣꠄ ꠢꠣꠞꠥꠘꠞꠦ ꠇꠁꠟꠣ, “ꠔꠥꠝꠣꠞ ꠀꠉꠞ ꠖꠣꠘꠤ ꠀꠔꠅ ꠟꠅ, ꠀꠞ ꠇꠥꠞꠛꠣꠘꠤ ꠈꠣꠘꠣ ꠕꠣꠇꠤ ꠀꠉꠥꠁꠘ ꠘꠦꠅ, ꠘꠤꠀ ꠄꠞ ꠃꠙꠞꠦ ꠀꠉꠞ-ꠈꠥꠡꠛꠄ ꠎꠣꠟꠣꠁꠀ, ꠎꠟꠖꠤ ꠇꠞꠤ ꠅꠔꠣ ꠝꠣꠘꠡꠞ ꠉꠥꠘꠣ ꠝꠣꠚꠤꠞ ꠇꠚꠞꠣ ꠀꠖꠣꠄ ꠇꠞꠅ। ꠝꠣꠛꠥꠖ ꠔ ꠉꠥꠍꠣꠄ ꠀꠉꠥꠁꠘ ꠅꠁꠉꠦꠍꠂꠘ, ꠔꠣꠘ ꠟꠣꠘ꠆ꠘꠔꠤ ꠝꠢꠣꠝꠣꠞꠤ ꠡꠥꠞꠥ ꠅꠁꠉꠦꠍꠦ।”
NUM 16:47 ꠔꠦꠃ ꠝꠥꠍꠣꠞ ꠇꠕꠣꠝꠔ ꠢꠣꠞꠥꠘꠦ ꠀꠉꠞ ꠖꠣꠘꠤꠔ ꠀꠉꠥꠁꠘ ꠀꠞ ꠀꠉꠞ-ꠈꠥꠡꠛꠄ ꠟꠁꠀ ꠔꠣꠞꠣꠞ ꠉꠦꠍꠦ ꠖꠃꠠꠣꠁꠀ ꠉꠦꠟꠣ। ꠄꠞ ꠝꠣꠎꠦꠃ ꠁꠔꠣꠞ ꠃꠙꠞꠦ ꠉꠎꠛ ꠡꠥꠞꠥ ꠅꠁꠉꠦꠍꠤꠟ, ꠅꠁꠟꠦ ꠢꠣꠞꠥꠘꠦ ꠀꠉꠞ-ꠈꠥꠡꠛꠄ ꠎꠣꠟꠣꠁꠀ ꠔꠣꠞꠣꠞ ꠉꠥꠘꠣꠞ ꠇꠚꠞꠣ ꠀꠖꠣꠄ ꠇꠞꠟꠣ।
NUM 16:48 ꠔꠣꠁꠘ ꠎꠤꠘ꠆ꠖꠣ ꠀꠞ ꠝꠥꠞ꠆ꠖꠣ ꠎꠘꠞ ꠝꠣꠎꠈꠣꠘꠅ ꠃꠛꠣꠁꠟꠣ, ꠄꠞꠟꠣꠉꠤ ꠉꠎꠛ ꠛꠘ꠆ꠖ ꠅꠁꠉꠦꠟ।
NUM 16:49 ꠇꠥꠞꠣꠢꠞ ꠘꠣꠚꠞꠝꠣꠘꠤꠞ ꠟꠣꠉꠤ ꠎꠦꠔꠣ ꠝꠣꠞꠣ ꠉꠦꠍꠟꠣ, ꠁꠉꠥꠁꠘ ꠛꠣꠖꠦꠅ ꠀꠞꠅ ꠌꠃꠖ꠆ꠖ ꠀꠎꠣꠞ ꠡꠣꠔ-ꠡ ꠝꠣꠘꠥꠡ ꠉꠎꠛꠤ ꠝꠢꠣꠝꠣꠞꠤꠄ ꠝꠞꠟꠣ।
NUM 16:50 ꠝꠢꠣꠝꠣꠞꠤ ꠛꠘ꠆ꠖ ꠅꠁꠀ ꠢꠣꠞꠟꠦ ꠢꠣꠞꠥꠘ ꠝꠤꠟꠘ-ꠔꠣꠝ꠆ꠛꠥꠞ ꠖꠥꠀꠞꠞ ꠉꠦꠍꠦ ꠝꠥꠍꠣꠞ ꠗꠣꠞꠅ ꠚꠤꠞꠤꠀ ꠀꠁꠟꠣ।
NUM 17:1 ꠛꠣꠖꠦ ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ,
NUM 17:2 “ꠔꠥꠝꠤ ꠛꠘꠤ ꠁꠍꠞꠣꠁꠟꠞꠦ ꠇꠅ, ꠔꠣꠞꠣ ꠎꠣꠘꠥ ꠔꠣꠞꠣꠞ ꠛꠣꠚ-ꠖꠣꠖꠣꠞ ꠈꠣꠘ꠆ꠖꠣꠘ ꠢꠤꠡꠣꠛꠦ ꠙꠞꠔꠦꠇ ꠈꠣꠘ꠆ꠖꠣꠘꠞ ꠡꠞ꠆ꠖꠣꠞꠞ ꠉꠦꠍ ꠕꠣꠇꠤ ꠄꠇꠐꠣ ꠇꠞꠤ ꠝꠥꠐ ꠛꠣꠞꠅꠐꠣ ꠟꠣꠑꠤ ꠀꠘꠤꠀ ꠔꠥꠝꠣꠞ ꠉꠦꠍꠦ ꠖꠦꠄ। ꠖꠤꠟꠦ ꠔꠥꠝꠤ ꠎꠣꠞꠎꠤꠞ ꠟꠣꠑꠤꠞ ꠃꠙꠞꠦ ꠅꠃ ꠎꠘꠞ ꠘꠣꠝ ꠟꠦꠈꠛꠣꠄ।
NUM 17:3 ꠟꠦꠛꠤ ꠈꠣꠘ꠆ꠖꠣꠘꠞ ꠟꠣꠑꠤꠔ ꠟꠦꠈꠤꠅ ꠁꠝꠣꠝ ꠢꠣꠞꠥꠘꠞ ꠘꠣꠝ, ꠅꠟꠣ ꠛꠣꠚ-ꠖꠣꠖꠣꠞ ꠈꠣꠘ꠆ꠖꠣꠘ ꠝꠣꠚꠤꠇ ꠙꠞꠔꠦꠇ ꠈꠣꠘ꠆ꠖꠣꠘꠞ ꠡꠞ꠆ꠖꠣꠞꠞ ꠟꠣꠉꠤ ꠄꠇꠅꠐꠣ ꠟꠣꠑꠤ ꠕꠣꠇꠛ।
NUM 17:4 ꠝꠤꠟꠘ-ꠔꠣꠝ꠆ꠛꠥꠞ ꠜꠤꠔꠞꠦ ꠙꠛꠤꠔ꠆ꠞ ꠡꠣꠢꠣꠖꠔ ꠡꠘ꠆ꠖꠥꠇꠞ ꠍꠣꠝꠘꠦ ꠎꠦ ꠎꠣꠉꠣꠔ ꠔꠥꠝꠞꠣꠞ ꠟꠉꠦ ꠀꠝꠣꠞ ꠖꠦꠈꠣ ꠅꠄ, ꠅꠃ ꠟꠣꠑꠤꠉꠥꠁꠘ ꠢꠘꠅ ꠕꠁꠅ।
NUM 17:5 ꠔꠦꠃ ꠀꠝꠣꠞ ꠙꠍꠘ꠆ꠖ ꠇꠞꠣ ꠛꠘ꠆ꠖꠣꠞ ꠟꠣꠑꠤꠞ ꠝꠣꠎꠦ ꠉꠣꠍꠞ ꠈꠦꠋ ꠚꠥꠐꠤꠛ। ꠅꠃ ꠟꠣꠈꠣꠘ ꠔꠥꠝꠞꠣꠞ ꠛꠤꠞꠥꠖ꠆ꠖꠦ ꠛꠘꠤ ꠁꠍꠞꠣꠁꠟꠞ ꠛꠦꠞ-ꠛꠦꠞꠤ ꠇꠞꠣ ꠀꠝꠤ ꠛꠘ꠆ꠖ ꠇꠞꠝꠥ।”
NUM 17:6 ꠔꠦꠃ ꠝꠥꠍꠣꠄ ꠁꠔꠣ ꠢꠇꠟꠔꠣ ꠛꠘꠤ ꠁꠍꠞꠣꠁꠟꠞꠦ ꠎꠣꠘꠣꠁꠟꠣ। ꠀꠞ ꠔꠣꠞꠣꠞ ꠛꠣꠚ-ꠖꠣꠖꠣꠞ ꠈꠣꠘ꠆ꠖꠣꠘ ꠝꠣꠚꠤꠇ ꠙꠞꠔꠦꠇ ꠡꠞ꠆ꠖꠣꠞꠦ ꠎꠣꠞꠎꠤꠞ ꠈꠣꠘ꠆ꠖꠣꠘꠞ ꠔꠞꠚ ꠕꠣꠇꠤ ꠄꠉꠥ ꠇꠞꠤ, ꠝꠥꠐ ꠛꠣꠞꠅ ꠈꠣꠘ꠆ꠖꠣꠘꠞ ꠛꠣꠞꠅꠐꠣ ꠟꠣꠑꠤ ꠀꠘꠤꠀ ꠖꠤꠟꠣ। ꠅꠃ ꠟꠣꠑꠤꠘ꠆ꠔꠞ ꠄꠉꠥ ꠟꠣꠑꠤ ꠀꠍꠤꠟ ꠢꠣꠞꠥꠘ ꠘꠛꠤꠞ।
NUM 17:7 ꠝꠥꠍꠣꠄ ꠅꠃ ꠟꠣꠑꠤꠉꠥꠁꠘ ꠘꠤꠀ ꠡꠣꠢꠣꠖꠔ ꠔꠣꠝ꠆ꠛꠥꠞ ꠜꠤꠔꠞꠦ ꠝꠣꠛꠥꠖꠞ ꠍꠣꠝꠘꠦ ꠕꠁꠟꠣ।
NUM 17:8 ꠛꠣꠖꠞ ꠖꠤꠘ ꠝꠥꠍꠣ ꠉꠤꠀ ꠡꠣꠢꠣꠖꠔ ꠔꠣꠝ꠆ꠛꠥꠞ ꠜꠤꠔꠞꠦ ꠢꠣꠝꠣꠁꠀ ꠖꠦꠈꠂꠘ, ꠟꠦꠛꠤ ꠈꠣꠘ꠆ꠖꠣꠘ ꠕꠣꠇꠤ ꠢꠣꠞꠥꠘꠞ ꠘꠣꠝꠦ ꠎꠦ ꠟꠣꠑꠤ ꠞꠣꠈꠣ ꠅꠁꠍꠦ, ꠁ ꠟꠣꠑꠤꠔ ꠈꠣꠟꠤ ꠈꠦꠋ ꠘꠣꠄ, ꠇꠥꠠꠤ ꠖꠤꠀ ꠚꠥꠟ ꠚꠥꠐꠤꠀ ꠛꠣꠖꠣꠝꠅ ꠗꠞꠤꠟꠤꠍꠦ।
NUM 17:9 ꠔꠦꠃ ꠝꠥꠍꠣꠄ ꠝꠣꠛꠥꠖꠞ ꠍꠣꠝꠘꠦ ꠕꠣꠇꠤ ꠟꠣꠑꠤ ꠉꠥꠁꠘ ꠛꠣꠞ ꠇꠞꠤ ꠀꠘꠤꠀ ꠛꠘꠤ ꠁꠍꠞꠣꠁꠟꠞ ꠍꠣꠝꠘꠦ ꠕꠁꠟꠣ। ꠡꠞ꠆ꠖꠣꠞ ꠅꠇꠟꠦ ꠟꠣꠑꠤ ꠉꠥꠁꠘ ꠖꠦꠈꠟꠣ, ꠖꠦꠈꠤꠀ ꠎꠣꠞꠎꠤꠞ ꠟꠣꠑꠤ ꠌꠤꠘꠤꠀ ꠘꠤꠟꠣ।
NUM 17:10 ꠛꠣꠖꠦ ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ, “ꠛꠤꠞꠥꠗꠤ ꠘꠣꠚꠞꠝꠣꠘ ꠅꠇꠟꠞ ꠝꠘꠅ ꠞꠅꠀꠞ ꠟꠣꠉꠤ ꠘꠤꠡꠣꠘꠣ ꠢꠤꠡꠣꠛꠦ ꠔꠥꠝꠤ ꠢꠣꠞꠥꠘꠞ ꠟꠣꠑꠤꠐꠣ ꠢꠤꠞꠛꠣꠞ ꠡꠣꠢꠣꠖꠔ ꠡꠘ꠆ꠖꠥꠇꠞ ꠍꠣꠝꠘꠦ ꠕꠅ। ꠔꠦꠃ ꠀꠝꠣꠞ ꠛꠤꠞꠥꠖ꠆ꠖꠦ ꠔꠣꠞꠣꠞ ꠛꠇꠛꠇ ꠇꠞꠣ ꠈꠣꠘ ꠔꠥꠝꠤ ꠛꠘ꠆ꠖ ꠇꠞꠔꠣꠄ ꠙꠣꠞꠛꠣꠄ, ꠔꠣꠞꠣꠅ ꠀꠞ ꠝꠞꠔꠣ ꠘꠣꠄ।”
NUM 17:11 ꠝꠣꠛꠥꠖꠦ ꠝꠥꠍꠣꠞꠦ ꠎꠦꠟꠣ ꠢꠥꠇꠥꠝ ꠖꠤꠟꠣ, ꠝꠥꠍꠣꠄ ꠑꠤꠇ ꠅꠟꠣ ꠇꠞꠟꠣ।
NUM 17:12 ꠁꠔꠣ ꠖꠦꠈꠤꠀ ꠛꠘꠤ ꠁꠍꠞꠣꠁꠟꠦ ꠝꠥꠍꠣꠞꠦ ꠇꠁꠟꠣ, “ꠀꠝꠞꠣ ꠔ ꠝꠞꠤꠎꠣꠁꠀꠞ, ꠛꠤꠘꠣꠡ ꠅꠁꠎꠤꠀꠞ, ꠀꠝꠞꠣꠞ ꠡꠞ꠆ꠛꠘꠣꠡ ꠅꠁꠎꠣꠞ!
NUM 17:13 ꠎꠦꠇꠥꠘꠥ ꠝꠣꠘꠥꠡ ꠝꠣꠛꠥꠖꠞ ꠊꠞꠞ ꠗꠣꠞꠅ ꠉꠦꠟꠦꠃ ꠝꠞꠤꠎꠣꠞ, ꠔꠦ ꠀꠝꠞꠣ ꠢꠇꠟꠃ ꠝꠞꠤꠎꠤꠝꠥ ꠘꠤ?”
NUM 18:1 ꠝꠣꠛꠥꠖꠦ ꠢꠣꠞꠥꠘ ꠘꠛꠤꠞꠦ ꠇꠁꠟꠣ, “ꠙꠛꠤꠔ꠆ꠞ ꠄꠛꠣꠖꠔ ꠈꠣꠘꠣꠞ ꠛꠦꠙꠣꠞꠦ ꠎꠔ ꠘꠣꠚꠞꠝꠣꠘꠤ ꠇꠞꠣ ꠅꠁꠛ, ꠄꠞ ꠖꠣꠄ-ꠖꠣꠄꠁꠔ꠆ꠔ ꠛꠞ꠆ꠔꠤꠛ ꠔꠥꠝꠣꠞ ꠃꠙꠞꠦ, ꠔꠥꠝꠣꠞ ꠙꠥꠀꠂꠘ ꠀꠞ ꠔꠥꠝꠣꠞ ꠉꠥꠡ꠆ꠐꠤꠞ ꠢꠇꠟꠞ ꠃꠙꠞꠦꠅ। ꠀꠞ ꠁꠝꠣꠝꠔꠤ ꠇꠣꠝꠞ ꠛꠣꠟꠣ ꠎꠔ ꠟꠣꠈꠣꠘ ꠘꠣꠚꠞꠝꠣꠘꠤ ꠇꠞꠣ ꠅꠁꠛ, ꠁꠔꠣꠞ ꠖꠣꠄꠁ ꠅꠁꠛꠣꠄ ꠈꠣꠟꠤ ꠔꠥꠝꠤ ꠀꠞ ꠔꠥꠝꠣꠞ ꠙꠥꠀꠂꠘ।
NUM 18:2 ꠔꠦ ꠔꠥꠝꠣꠞ ꠛꠣꠚ-ꠖꠣꠖꠣꠞ ꠈꠣꠘ꠆ꠖꠣꠘ ꠕꠣꠇꠤ ꠀꠞꠅ ꠟꠦꠛꠤ ꠅꠇꠟꠞꠦ ꠔꠥꠝꠤ ꠀꠘꠅ। ꠔꠣꠞꠣ ꠀꠁꠀ ꠔꠥꠝꠣꠞꠦ ꠀꠞ ꠔꠥꠝꠣꠞ ꠙꠥꠀꠂꠘꠞꠦ ꠡꠣꠢꠣꠖꠔ ꠔꠣꠝ꠆ꠛꠥꠞ ꠍꠣꠝꠘꠞ ꠄꠛꠣꠖꠔꠤ ꠇꠣꠝꠅ ꠡꠣꠁꠎ꠆ꠎ ꠇꠞꠛꠣ। ꠔꠣꠞꠣ ꠔꠥꠝꠣꠞ ꠎꠤꠝ꠆ꠝꠣꠄ ꠞꠁꠀ ꠡꠣꠢꠣꠖꠔ ꠔꠣꠝ꠆ꠛꠥꠞ ꠢꠇꠟ ꠇꠣꠝ-ꠇꠣꠎ ꠇꠞꠛꠣ।
NUM 18:3 ꠅꠁꠟꠦ ꠇꠥꠞꠛꠣꠘꠤ ꠈꠣꠘꠣ ꠛꠣ ꠀꠟ꠆ꠟꠣꠞ ꠊꠞꠞ ꠇꠥꠘꠥ ꠙꠛꠤꠔ꠆ꠞ ꠎꠤꠘꠤꠡꠞ ꠗꠣꠞꠅ ꠎꠣꠅꠀ ꠔꠣꠞꠣꠞ ꠟꠣꠉꠤ ꠘꠤꠡꠦꠗ। ꠘꠤꠡꠦꠗ ꠘꠣ ꠝꠣꠘꠟꠦ ꠔꠣꠞꠣ ꠀꠞ ꠔꠥꠝꠞꠣ ꠢꠇꠟꠃ ꠝꠞꠛꠣꠄ।
NUM 18:4 ꠔꠣꠞꠣ ꠔꠥꠝꠣꠞ ꠇꠣꠝꠅ ꠡꠞꠤꠇ ꠅꠁꠀ ꠝꠤꠟꠘ-ꠔꠣꠝ꠆ꠛꠥꠞ ꠈꠣꠖꠤꠝꠖꠣꠞꠤ ꠇꠞꠛꠣ, ꠢꠇꠟ ꠎꠣꠔ ꠇꠣꠝꠞ ꠖꠣꠄ-ꠖꠣꠄꠁꠔ꠆ꠔ ꠘꠤꠛꠣ। ꠔꠣ-ꠅ ꠈꠣꠟꠤ ꠟꠦꠛꠤ ꠅꠇꠟ ꠍꠣꠠꠣ ꠖꠥꠍꠞꠣ ꠇꠦꠃ ꠔꠥꠝꠞꠣꠞ ꠉꠦꠍꠦ ꠎꠣꠅꠀ ꠘꠤꠡꠦꠗ।
NUM 18:5 ꠛꠘꠤ ꠁꠍꠞꠣꠁꠟꠞ ꠃꠙꠞꠦ ꠀꠝꠤ ꠎꠣꠘꠥ ꠢꠤꠞꠛꠣꠞ ꠘꠣꠞꠣꠎ ꠘꠣ ꠅꠁ, ꠄꠞꠟꠣꠉꠤ ꠄꠛꠣꠖꠔ ꠈꠣꠘꠣ ꠀꠞ ꠇꠥꠞꠛꠣꠘꠤ ꠈꠣꠘꠣ ꠖꠦꠈꠣ-ꠢꠥꠘꠣꠞ ꠜꠣꠞ ꠔꠥꠝꠞꠣꠞ ꠃꠙꠞꠦ ꠞꠁꠛ।
NUM 18:6 ꠀꠝꠤ ꠘꠤꠎꠦ ꠔꠥꠝꠞꠣꠞꠦ ꠃꠙꠢꠣꠞ ꠢꠤꠡꠣꠛꠦ ꠖꠤꠛꠣꠞ ꠟꠣꠉꠤ, ꠛꠘꠤ ꠁꠍꠞꠣꠁꠟꠞ ꠝꠣꠎꠞ ꠟꠦꠛꠤ ꠅꠇꠟꠞꠦ ꠙꠍꠘ꠆ꠖ ꠇꠞꠍꠤ। ꠝꠤꠟꠘ-ꠔꠣꠝ꠆ꠛꠥꠞ ꠇꠣꠝ ꠇꠞꠣꠞ ꠟꠣꠉꠤ ꠄꠞꠣꠞꠦ ꠝꠣꠛꠥꠖꠞ ꠘꠣꠝꠦ ꠡꠙꠤ ꠖꠦꠅꠀ ꠅꠁꠍꠦ।
NUM 18:7 ꠅꠁꠟꠦ ꠁꠝꠣꠝ ꠢꠤꠡꠣꠛꠦ ꠈꠣꠟꠤ ꠔꠥꠝꠤ ꠀꠞ ꠔꠥꠝꠣꠞ ꠙꠥꠀꠂꠘ꠆ꠔꠦ ꠇꠥꠞꠛꠣꠘꠤ ꠈꠣꠘꠣ ꠀꠞ ꠙꠞ꠆ꠖꠣꠞ ꠜꠤꠔꠞꠞ ꠢꠦꠞꠦꠝ ꠡꠞꠤꠚꠅ ꠈꠦꠎꠝꠔ ꠇꠣꠝ ꠇꠞꠛꠣꠄ। ꠁꠝꠣꠝꠔꠤꠞ ꠙꠖ ꠈꠣꠘ ꠀꠝꠤ ꠃꠙꠢꠣꠞ ꠢꠤꠡꠣꠛꠦ ꠔꠥꠝꠞꠣꠞꠦ ꠖꠤꠟꠣꠝ। ꠈꠣꠟꠤ ꠟꠦꠛꠤ ꠅꠇꠟ ꠍꠣꠠꠣ ꠖꠥꠍꠞꠣ ꠇꠦꠃ ꠎꠥꠖꠤ ꠝꠤꠟꠘ-ꠔꠣꠝ꠆ꠛꠥꠞ ꠡꠤꠝꠣꠘꠣꠔ ꠀꠄ, ꠔꠦ ꠔꠣꠞꠦ ꠎꠣꠘꠦ ꠝꠣꠞꠤꠟꠤꠔꠦ ꠅꠁꠛ।”
NUM 18:8 ꠄꠞꠛꠣꠖꠦ ꠝꠣꠛꠥꠖꠦ ꠢꠣꠞꠥꠘꠞꠦ ꠇꠁꠟꠣ, “ꠀꠝꠣꠞ ꠘꠣꠝꠦ ꠎꠔ ꠟꠣꠈꠣꠘ ꠇꠥꠞꠛꠣꠘꠤ ꠖꠦꠅꠀ ꠅꠄ, ꠁꠔꠣꠞ ꠢꠇꠟ ꠎꠤꠝ꠆ꠝꠣꠖꠣꠞꠤ ꠀꠝꠤ ꠘꠤꠎꠦꠃ ꠔꠥꠝꠣꠞ ꠀꠔꠅ ꠡꠝꠎꠣꠁꠍꠤ। ꠔꠦ ꠀꠝꠣꠞ ꠘꠣꠝꠦ ꠛꠘꠤ ꠁꠍꠞꠣꠁꠟꠞ ꠇꠥꠞꠛꠣꠘꠤ ꠇꠞꠣ ꠢꠇꠟ ꠙꠣꠇ-ꠙꠛꠤꠔ꠆ꠞ ꠎꠤꠘꠤꠡ, ꠀꠝꠤ ꠔꠥꠝꠣꠞꠦ ꠀꠞ ꠔꠥꠝꠣꠞ ꠅꠀꠞꠤꠡꠞ ꠙꠣꠅꠘꠣ ꠛꠦꠔꠘ ꠢꠤꠡꠣꠛꠦ ꠌꠤꠞꠇꠣꠟꠞ ꠟꠣꠉꠤ ꠖꠤꠟꠣꠁꠟꠣꠝ।
NUM 18:9 ꠈꠣꠍ ꠙꠛꠤꠔ꠆ꠞ ꠇꠥꠞꠛꠣꠘꠤꠞ ꠎꠦ ꠅꠋꠡ ꠀꠉꠥꠁꠘꠅ ꠎꠣꠟꠣꠘꠤ ꠟꠣꠉꠔ ꠘꠣꠄ, ꠅꠃ ꠛꠣꠐꠅ ꠔꠥꠝꠞꠣ ꠘꠤꠅꠉꠤ। ꠔꠦ ꠗꠣꠘ-ꠉꠝꠞ ꠍꠖꠉꠣ, ꠉꠥꠘꠣꠞ ꠇꠚꠞꠣꠞ ꠇꠥꠞꠛꠣꠘꠤ, ꠀꠞ ꠖꠥꠡ-ꠇꠍꠥꠞꠤꠞ ꠇꠚꠞꠣꠞ ꠇꠥꠞꠛꠣꠘꠤꠞ ꠟꠣꠉꠤ ꠛꠘꠤ ꠁꠍꠞꠣꠁꠟꠦ ꠀꠝꠣꠞ ꠉꠦꠍꠦ ꠎꠔꠔꠣ ꠟꠁꠀ ꠀꠁꠛꠣ, ꠁꠔꠣ ꠔꠥꠝꠤ ꠀꠞ ꠔꠥꠝꠣꠞ ꠅꠀꠞꠤꠡ ꠅꠇꠟꠞ ꠙꠣꠅꠘꠣ ꠢꠇ।
NUM 18:10 ꠁꠔꠣ ꠘꠤꠀ ꠢꠣꠞꠤ ꠈꠣꠍ ꠙꠣꠇ-ꠙꠛꠤꠔ꠆ꠞ ꠎꠤꠘꠤꠡ ꠛꠥꠎꠤꠀ ꠁꠎ꠆ꠎꠔ ꠇꠞꠤꠀ ꠔꠥꠝꠞꠣ ꠈꠣꠁꠅ। ꠔꠥꠝꠞꠣꠞ ꠢꠇꠟ ꠛꠦꠐꠣꠁꠘ꠆ꠔꠦ ꠁꠔꠣ ꠈꠣꠁꠔꠣꠄ ꠙꠣꠞꠛꠣꠄ। ꠁ ꠈꠣꠘꠤ ꠔꠥꠝꠞꠣꠞ ꠟꠣꠉꠤ ꠙꠛꠤꠔ꠆ꠞ।
NUM 18:11 ꠀꠞ ꠛꠘꠤ ꠁꠍꠞꠣꠁꠟꠞ ꠖꠦꠅꠀ ꠢꠇꠟ ꠖꠥꠟꠘꠣ ꠇꠥꠞꠛꠣꠘꠤꠞ ꠎꠤꠘꠤꠡꠅ ꠔꠥꠝꠞꠣꠞ ꠅꠁꠛ। ꠁꠔꠣ ꠀꠝꠤ ꠔꠥꠝꠣꠞꠦ ꠀꠞ ꠔꠥꠝꠣꠞ ꠅꠀꠞꠤꠡ ꠅꠇꠟꠞꠦ ꠌꠤꠞꠇꠣꠟꠤꠘ ꠙꠣꠅꠘꠣ ꠢꠤꠡꠣꠛꠦ ꠖꠤꠞꠣꠝ। ꠔꠥꠝꠣꠞ ꠙꠞꠤꠛꠣꠞꠞ ꠎꠦꠞꠣ ꠙꠣꠇ-ꠙꠣꠇꠤꠎꠣ ꠢꠣꠟꠔꠦ ꠞꠁꠛꠣ, ꠔꠣꠞꠣ ꠁꠔꠣ ꠈꠣꠁꠔꠣ ꠙꠣꠞꠛꠣ।
NUM 18:12 “ꠛꠘꠤ ꠁꠍꠞꠣꠁꠟꠦ ꠔꠣꠞꠣꠞ ꠈꠦꠔꠞ ꠢꠇꠟ ꠕꠣꠇꠤ ꠜꠣꠟꠣ ꠎꠦ ꠔꠦꠟ, ꠘꠄꠀ ꠀꠋꠉꠥꠞꠞ ꠡꠞꠛꠔ ꠀꠞ ꠚꠡꠟꠞ ꠎꠦ ꠅꠋꠡ ꠝꠣꠛꠥꠖꠞ ꠘꠣꠝꠦ ꠍꠖꠉꠣ ꠖꠤꠛꠣ, ꠁꠔꠣ ꠢꠇ꠆ꠇꠟꠔꠣ ꠀꠝꠤ ꠔꠥꠝꠣꠞꠦ ꠖꠤꠟꠣꠁꠟꠣꠝ।
NUM 18:13 ꠝꠣꠛꠥꠖꠞ ꠉꠦꠍꠦ ꠀꠘꠣ ꠔꠣꠞꠣꠞ ꠚꠟꠣꠁꠟ ꠚꠄ-ꠚꠡꠟꠞ ꠙꠄꠟꠣ ꠅꠋꠡ ꠔꠥꠝꠣꠞ ꠅꠁꠛ। ꠔꠥꠝꠣꠞ ꠙꠞꠤꠛꠣꠞꠞ ꠝꠣꠎꠞ ꠎꠦꠞꠣ ꠙꠣꠇ-ꠙꠣꠇꠤꠎꠣ ꠢꠣꠟꠔꠦ ꠕꠣꠇꠛꠣ, ꠔꠣꠞꠣ ꠁꠔꠣ ꠈꠣꠁꠛꠣ।
NUM 18:14 “ꠛꠘꠤ ꠁꠍꠞꠣꠁꠟꠦ ꠙꠥꠞꠣꠙꠥꠞ ꠖꠣꠛꠤ-ꠖꠣꠅꠀ ꠍꠣꠠꠤꠀ ꠝꠣꠘ꠆ꠘꠔ ꠢꠤꠡꠣꠛꠦ ꠎꠔ ꠎꠤꠘꠤꠡ ꠖꠤꠛꠣ, ꠁꠔꠣꠅ ꠔꠥꠝꠤ ꠙꠣꠁꠛꠣꠄ।
NUM 18:15 ꠝꠣꠛꠥꠖꠞ ꠘꠣꠝꠦ ꠡꠙꠤ ꠖꠦꠅꠀ ꠙꠞꠔꠦꠇ ꠙꠄꠟꠣ ꠛꠣꠁꠌ꠆ꠌꠣ ꠔꠥꠝꠣꠞ ꠅꠁꠛ, ꠁꠔꠣ ꠝꠣꠘꠡꠞ ꠀꠅꠟꠣꠖ ꠅꠃꠇ ꠛꠣ ꠙꠡꠥꠞ ꠛꠣꠁꠌ꠆ꠌꠣ ꠅꠃꠇ। ꠝꠣꠘꠡꠞ ꠙꠄꠟꠣ ꠙꠥꠀꠞꠦ ꠔꠥꠝꠤ ꠘꠤꠌ꠆ꠌꠄ ꠈꠣꠟꠣꠍ ꠇꠞꠤꠀ ꠘꠤꠔꠦ ꠖꠤꠅ, ꠀꠞ ꠘꠣꠙꠣꠇ ꠙꠡꠥꠞ ꠙꠄꠟꠣ ꠝꠦꠖꠣ ꠛꠣꠁꠌ꠆ꠌꠣꠞꠦꠅ ꠅꠟꠣ ꠈꠣꠟꠣꠍ ꠇꠞꠤ ꠘꠤꠔꠦ ꠖꠤꠅ।
NUM 18:16 ꠝꠣꠘꠡꠞ ꠙꠄꠟꠣ ꠙꠥꠀꠞ ꠛꠄꠅꠡ ꠄꠇ ꠝꠣꠡ ꠅꠁꠟꠦ ꠈꠣꠟꠣꠍ ꠇꠞꠣꠘꠤꠞ ꠎꠣꠘꠞ ꠛꠖꠟꠣ ꠛꠣꠛꠔ, ꠄꠛꠣꠖꠔ ꠈꠣꠘꠣꠞ ꠝꠣꠙꠦ ꠙꠣꠌ ꠔꠟꠣ ꠞꠥꠙꠣ ꠘꠤꠀ ꠀꠎꠣꠖ ꠇꠞꠤ ꠖꠤꠅ।
NUM 18:17 ꠅꠁꠟꠦ ꠉꠣꠁ-ꠉꠞꠥ ꠛꠣ ꠝꠦꠠꠣ-ꠍꠣꠉꠟꠞ ꠙꠄꠟꠣ ꠛꠣꠁꠌ꠆ꠌꠣꠞꠦ ꠈꠣꠟꠣꠍ ꠇꠞꠣꠁ ꠘꠤꠔꠦ ꠖꠤꠅ ꠘꠣ, ꠁꠉꠥꠁꠘ ꠔ ꠢꠣꠟꠣꠟ। ꠁꠔꠣꠞꠦ ꠇꠥꠞꠛꠣꠘꠤ ꠖꠤꠀ ꠔꠥꠝꠤ ꠇꠥꠞꠛꠣꠘꠤ ꠈꠣꠘꠣꠞ ꠃꠙꠞꠦ ꠟꠃ ꠍꠤꠐꠣꠁꠀ ꠖꠤꠅ, ꠀꠞ ꠌꠞ꠆ꠛꠤꠞꠦ ꠀꠉꠥꠘꠤꠔ ꠖꠦꠅꠀ ꠇꠥꠞꠛꠣꠘꠤ ꠢꠤꠡꠣꠛꠦ ꠎꠣꠟꠣꠁꠅ। ꠁ ꠇꠥꠞꠛꠣꠘꠤꠞ ꠗꠥꠝꠣꠞ ꠊꠦꠞꠣꠘꠦ ꠀꠝꠤ ꠝꠣꠛꠥꠖ ꠈꠥꠡꠤ ꠅꠁ।
NUM 18:18 ꠖꠥꠟꠘꠣ ꠇꠞꠣꠁꠟ ꠍꠤꠘꠣ ꠀꠞ ꠒꠣꠁꠘꠞ ꠞꠣꠘꠞ ꠉꠥꠡ꠆ꠔꠞ ꠟꠣꠈꠣꠘ, ꠅꠉꠥꠁꠘ꠆ꠔꠞ ꠉꠥꠡ꠆ꠔꠅ ꠔꠥꠝꠤ ꠙꠣꠁꠛꠣꠄ।
NUM 18:19 ꠝꠣꠛꠥꠖꠞ ꠘꠣꠝꠦ ꠛꠘꠤ ꠁꠍꠞꠣꠁꠟꠞ ꠇꠥꠞꠛꠣꠘꠤ ꠇꠞꠣ ꠢꠇꠟ ꠙꠛꠤꠔ꠆ꠞ ꠎꠤꠘꠤꠡ ꠔꠥꠝꠣꠞ ꠙꠣꠅꠘꠣ ꠛꠣꠛꠔ ꠀꠝꠤ ꠔꠥꠝꠣꠞꠦ ꠀꠞ ꠔꠥꠝꠣꠞ ꠀꠅꠟꠣꠖ ꠅꠇꠟꠞꠦ ꠌꠤꠞꠇꠣꠟꠞ ꠟꠣꠉꠤ ꠖꠤꠟꠣꠁꠟꠣꠝ। ꠁꠔꠣ ꠅꠁꠟ ꠝꠣꠛꠥꠖꠞ ꠟꠉꠦ ꠔꠥꠝꠤ ꠀꠞ ꠔꠥꠝꠣꠞ ꠅꠀꠞꠤꠡꠞ ꠟꠣꠉꠤ ꠌꠤꠞꠇꠣꠟꠤꠘ ꠌꠥꠇ꠆ꠔꠤ, ꠄꠞ ꠇꠥꠘꠥ ꠞꠖ-ꠛꠖꠟ ꠅꠁꠔ ꠘꠣꠄ।”
NUM 18:20 ꠄꠞꠛꠣꠖꠦ ꠝꠣꠛꠥꠖꠦ ꠢꠣꠞꠥꠘꠞꠦ ꠇꠁꠟꠣ, “ꠛꠘꠤ ꠁꠍꠞꠣꠁꠟꠞ ꠖꠦꠡꠅ ꠔꠥꠝꠤ ꠇꠥꠘꠥ ꠗꠘ-ꠖꠃꠟꠔꠞ ꠝꠣꠟꠤꠇꠣꠘꠣ ꠛꠣ ꠎꠝꠤ-ꠎꠝꠣꠞ ꠇꠥꠘꠥ ꠛꠣꠐꠅ ꠙꠣꠁꠔꠣꠄ ꠘꠣꠄ। ꠄꠞꠣꠞ ꠝꠣꠎꠦ ꠔꠥꠝꠣꠞ ꠙꠣꠅꠘꠣ ꠛꠣꠐ ꠅꠁꠟꠣꠝ ꠡ꠆ꠛꠄꠅꠋ ꠀꠝꠤ, ꠀꠝꠤꠃ ꠔꠥꠝꠣꠞ ꠗꠘ-ꠖꠃꠟꠔ।”
NUM 18:21 ꠝꠣꠛꠥꠖꠦ ꠇꠁꠟꠣ, “ꠛꠘꠤ ꠁꠍꠞꠣꠁꠟꠦ ꠔꠣꠞꠣꠞ ꠞꠥꠎꠤ-ꠞꠥꠎꠉꠣꠞꠞ ꠖꠡ ꠛꠣꠐꠞ ꠄꠇ ꠛꠣꠐ ꠔ ꠀꠝꠣꠞꠦ ꠖꠤꠛꠣ, ꠀꠝꠤꠅ ꠁꠔꠣ ꠟꠦꠛꠤ ꠈꠣꠘ꠆ꠖꠣꠘꠞ ꠙꠣꠅꠘꠣ ꠛꠦꠔꠘ ꠛꠣꠛꠔ ꠖꠤꠟꠣꠁꠟꠣꠝ। ꠝꠤꠟꠘ-ꠔꠣꠝ꠆ꠛꠥꠔ ꠄꠛꠣꠖꠔꠤ ꠇꠣꠝꠞ ꠝꠎꠥꠞꠤ ꠢꠤꠡꠣꠛꠦ ꠔꠣꠞꠣ ꠁꠔꠣ ꠙꠣꠁꠛꠣ।
NUM 18:22 ꠀꠞ ꠀꠁꠎ ꠕꠣꠇꠤ ꠛꠘꠤ ꠁꠍꠞꠣꠁꠟꠞ ꠖꠥꠍꠞꠣ ꠇꠥꠘꠥ ꠉꠥꠡ꠆ꠐꠤꠞ ꠝꠣꠘꠥꠡ ꠝꠤꠟꠘ-ꠔꠣꠝ꠆ꠛꠥꠞ ꠗꠣꠞꠅ ꠎꠣꠅꠀ ꠘꠤꠡꠦꠗ। ꠉꠦꠟꠦ ꠔꠣꠞꠣꠞ ꠘꠣꠚꠞꠝꠣꠘꠤꠞ ꠖꠣꠄ ꠔꠣꠞꠣ ꠝꠞꠛꠣ।
NUM 18:23 ꠝꠤꠟꠘ-ꠔꠣꠝ꠆ꠛꠥꠞ ꠇꠣꠝ-ꠇꠣꠎ ꠈꠣꠟꠤ ꠟꠦꠛꠤ ꠈꠣꠘ꠆ꠖꠣꠘꠦ ꠇꠞꠛꠣ, ꠅꠃ ꠇꠣꠝꠅ ꠎꠦꠇꠥꠘꠥ ꠘꠣꠚꠞꠝꠣꠘꠤ ꠇꠞꠟꠦ ꠔꠣꠞꠣ ꠘꠤꠎꠦꠃ ꠖꠣꠄꠁ ꠅꠁꠛꠣ। ꠁꠔꠣ ꠅꠁꠛ ꠅꠀꠞꠤꠡꠞ ꠙꠞ ꠅꠀꠞꠤꠡ ꠗꠞꠤ ꠄꠇꠐꠣ ꠌꠤꠞꠇꠣꠟꠤꠘ ꠘꠤꠅꠝ। ꠛꠘꠤ ꠁꠍꠞꠣꠁꠟꠞ ꠅꠁꠘ꠆ꠘꠣꠁꠘ꠆ꠘ ꠈꠣꠘ꠆ꠖꠣꠘꠞ ꠟꠉꠦ ꠇꠥꠘꠥ ꠗꠘ-ꠖꠃꠟꠔꠞ ꠝꠣꠟꠤꠇꠣꠘꠣ ꠟꠦꠛꠤ ꠈꠣꠘ꠆ꠖꠣꠘꠦ ꠙꠣꠁꠔ ꠘꠣꠄ।
NUM 18:24 ꠄꠞ ꠛꠖꠟꠣ ꠛꠘꠤ ꠁꠍꠞꠣꠁꠟꠦ ꠔꠣꠞꠣꠞ ꠞꠥꠎꠤ-ꠞꠥꠎꠉꠣꠞꠞ ꠎꠦ ꠖꠡ ꠛꠣꠐꠞ ꠄꠇ ꠛꠣꠐ ꠝꠣꠛꠥꠖꠞ ꠖꠞꠛꠣꠞꠅ ꠀꠎꠤꠞ ꠇꠞꠛꠣ, ꠁꠔꠣ ꠀꠝꠤ ꠄꠞꠣꠞ ꠙꠣꠅꠘꠣ ꠢꠤꠡꠣꠛꠦ ꠖꠤꠟꠣꠁꠟꠣꠝ। ꠄꠞꠟꠣꠉꠤ ꠄꠞꠣꠞ ꠛꠦꠙꠣꠞꠦ ꠀꠝꠤ ꠝꠣꠛꠥꠖꠦ ꠇꠁꠍꠤ, ꠟꠦꠛꠤ ꠅꠇꠟꠦ ꠛꠘꠤ ꠁꠍꠞꠣꠁꠟꠞ ꠝꠣꠎꠦ ꠇꠥꠘꠥ ꠎꠝꠤ-ꠎꠝꠣꠞ ꠝꠣꠟꠤꠇꠣꠘꠣ ꠙꠣꠁꠔꠣ ꠘꠣꠄ।”
NUM 18:25 ꠛꠣꠖꠦ ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ,
NUM 18:26 “ꠔꠥꠝꠤ ꠟꠦꠛꠤ ꠅꠇꠟꠞꠦ ꠇꠅ, ꠅꠁꠘ꠆ꠘꠣꠁꠘ꠆ꠘ ꠛꠘꠤ ꠁꠍꠞꠣꠁꠟꠞ ꠞꠥꠎꠤ-ꠞꠥꠎꠉꠣꠞꠞ ꠎꠦ ꠖꠡ ꠛꠣꠐꠞ ꠄꠇ ꠛꠣꠐ ꠙꠣꠅꠘꠣ ꠢꠤꠡꠣꠛꠦ ꠀꠝꠤ ꠔꠥꠝꠞꠣꠞꠦ ꠖꠤꠟꠣꠝ, ꠁꠔꠣ ꠙꠣꠁꠀ ꠢꠣꠞꠟꠦ ꠔꠥꠝꠞꠣꠅ ꠅꠔꠣꠞ ꠖꠡ ꠛꠣꠐꠞ ꠄꠇ ꠛꠣꠐꠞꠦ, ꠎꠇꠣꠔꠞ ꠎꠇꠣꠔ ꠛꠣꠛꠔ ꠝꠣꠛꠥꠖꠞ ꠘꠣꠝꠦ ꠖꠤꠟꠣꠁꠛꠣꠄ।
NUM 18:27 ꠅꠃ ꠎꠇꠣꠔꠞꠦꠃ ꠔꠥꠝꠞꠣꠞ ꠈꠦꠔꠞ ꠚꠡꠟꠞ ꠀꠞ ꠘꠤꠎꠞ ꠛꠣꠘꠣꠁꠟ ꠀꠋꠉꠥꠞꠞ ꠡꠞꠛꠔꠞ ꠎꠇꠣꠔ ꠢꠤꠡꠣꠛꠦ ꠉꠘꠣ ꠅꠁꠛ।
NUM 18:28 ꠛꠘꠤ ꠁꠍꠞꠣꠁꠟꠞ ꠛꠣꠇꠤ ꠄꠉꠣꠞꠅ ꠈꠣꠘ꠆ꠖꠣꠘꠞ ꠎꠇꠣꠔ ꠛꠣꠛꠔ ꠎꠦ ꠖꠡ ꠛꠣꠐꠞ ꠄꠇ ꠛꠣꠐ ꠔꠥꠝꠞꠣ ꠙꠣꠁꠛꠣꠄ, ꠅꠈꠣꠘ ꠕꠣꠇꠤ ꠔꠥꠝꠞꠣꠅ ꠅꠟꠣ ꠖꠡ ꠛꠣꠐꠞ ꠄꠇ ꠛꠣꠐ ꠝꠣꠛꠥꠖꠞ ꠘꠣꠝꠦ ꠎꠇꠣꠔ ꠖꠤꠛꠣꠄ। ꠝꠣꠛꠥꠖꠞ ꠘꠣꠝꠞ ꠅꠃ ꠅꠋꠡ ꠔꠥꠝꠞꠣ ꠁꠝꠣꠝ ꠢꠣꠞꠥꠘꠞ ꠀꠔꠅ ꠖꠤꠅ।
NUM 18:29 ꠔꠥꠝꠞꠣꠞꠦ ꠎꠔꠔꠣ ꠖꠦꠅꠀ ꠅꠁꠛ, ꠔꠥꠝꠞꠣꠅ ꠅꠔꠣꠞ ꠢꠇꠟ ꠕꠣꠇꠤ ꠜꠣꠟꠣ ꠀꠞ ꠙꠛꠤꠔ꠆ꠞ ꠅꠋꠡ, ꠝꠣꠛꠥꠖꠞ ꠙꠣꠅꠘꠣ ꠢꠤꠡꠣꠛꠦ ꠔꠣꠘꠞꠦ ꠖꠤꠅ।
NUM 18:30 “ꠢꠇꠟ ꠕꠣꠇꠤ ꠜꠣꠟꠣ ꠅꠋꠡ ꠝꠣꠛꠥꠖꠞꠦ ꠖꠦꠅꠀꠞ ꠛꠣꠖꠦ ꠎꠦꠔꠣ ꠛꠣꠇꠤ ꠞꠁꠛ, ꠅꠔꠣꠞꠦ ꠔꠥꠝꠞꠣꠞ ꠘꠤꠎꠞ ꠈꠦꠔꠞ ꠚꠡꠟ, ꠀꠞ ꠔꠥꠝꠞꠣꠞ ꠘꠤꠎꠞ ꠛꠣꠘꠣꠁꠟ ꠀꠋꠉꠥꠞꠞ ꠡꠞꠛꠔ ꠢꠤꠡꠣꠛꠦ ꠉꠘꠣ ꠅꠁꠛ।
NUM 18:31 ꠅꠃ ꠅꠋꠡ ꠔꠥꠝꠞꠣ ꠀꠞ ꠔꠥꠝꠞꠣꠞ ꠙꠞꠤꠛꠣꠞꠞ ꠝꠣꠘꠡꠦ ꠎꠦꠇꠥꠘꠥ ꠎꠣꠉꠣꠔ ꠈꠣꠁꠔꠣꠄ ꠙꠣꠞ, ꠁꠔꠣ ꠔ ꠔꠥꠝꠞꠣꠞ ꠇꠣꠝꠞ ꠛꠦꠔꠘ, ꠝꠤꠟꠘ-ꠔꠣꠝ꠆ꠛꠥꠞ ꠈꠦꠎꠝꠔꠞ ꠛꠦꠔꠘ।
NUM 18:32 ꠢꠇꠟ ꠕꠣꠇꠤ ꠜꠣꠟꠣ ꠅꠋꠡ ꠝꠣꠛꠥꠖꠞ ꠘꠣꠝꠦ ꠖꠤꠟꠣꠁꠟꠦ, ꠛꠣꠇꠤꠔꠣ ꠈꠣꠁꠔꠦ ꠔꠥꠝꠞꠣꠞ ꠇꠥꠘꠥ ꠖꠥꠡ ꠘꠣꠁ। ꠀꠞ ꠛꠘꠤ ꠁꠍꠞꠣꠁꠟꠞ ꠖꠦꠅꠀ ꠙꠣꠇ-ꠙꠛꠤꠔ꠆ꠞ ꠝꠣꠟꠞꠦ ꠔꠥꠝꠞꠣ ꠅꠙꠛꠤꠔ꠆ꠞ ꠇꠞꠤꠅ ꠘꠣ, ꠔꠦꠃ ꠔꠥꠝꠞꠣ ꠝꠞꠔꠣꠄ ꠘꠣꠄ।”
NUM 19:1 ꠄꠞꠛꠣꠖꠦ ꠝꠣꠛꠥꠖꠦ ꠝꠥꠍꠣ ꠀꠞ ꠢꠣꠞꠥꠘꠞꠦ ꠇꠁꠟꠣ,
NUM 19:2 “ꠔꠥꠝꠞꠣ ꠛꠘꠤ ꠁꠍꠞꠣꠁꠟꠞꠦ ꠇꠅ, ꠝꠣꠛꠥꠖꠦ ꠡꠞꠤꠅꠔꠞ ꠢꠥꠇꠥꠝ ꠝꠣꠚꠤꠇ ꠛꠣꠔꠣꠁꠍꠂꠘ, ꠔꠥꠝꠞꠣ ꠙꠥꠞꠣꠙꠥꠞ ꠟꠣꠟ ꠞꠋꠉꠞ ꠄꠉꠥ ꠒꠦꠇꠤ ꠉꠞꠥ ꠟꠁꠀ ꠀꠝꠞꠣꠞ ꠉꠦꠍꠦ ꠀꠅ, ꠅꠃ ꠒꠦꠇꠤ ꠡꠥꠟ꠆ꠟꠀꠘꠣ ꠘꠤꠈꠥꠔ ꠅꠁꠔ, ꠀꠞ ꠔꠣꠁꠞ ꠇꠣꠘ꠆ꠖꠅ ꠇꠥꠘꠥꠖꠤꠘ ꠎꠥꠀꠟ ꠟꠣꠉꠣꠘꠤ ꠅꠁꠍꠦ ꠘꠣ।
NUM 19:3 ꠅꠉꠥ ꠀꠘꠤꠀ ꠔꠥꠝꠞꠣ ꠁꠝꠣꠝ ꠀꠟꠤ-ꠀꠎꠞꠞ ꠉꠦꠍꠦ ꠖꠤꠛꠣꠄ। ꠁꠝꠣꠝꠦ ꠁꠐꠣꠞꠦ ꠇꠦꠝ꠆ꠙꠞ ꠛꠣꠞꠦ ꠘꠤꠀ ꠔꠣꠘ ꠍꠣꠝꠘꠦ ꠎꠛ ꠇꠞꠣꠁꠛꠣ।
NUM 19:4 ꠎꠛꠞ ꠛꠣꠖꠦ ꠔꠣꠘ ꠀꠋꠉꠥꠟꠅ ꠇꠤꠍꠥ ꠟꠃ ꠟꠁꠀ ꠝꠤꠟꠘ-ꠔꠣꠝ꠆ꠛꠥꠞ ꠍꠣꠝꠘꠣ ꠛꠣꠄ ꠡꠣꠔ ꠛꠣꠞ ꠍꠤꠐꠣꠁꠛꠣ।
NUM 19:5 ꠔꠣꠘ ꠍꠣꠝꠘꠦꠃ ꠅꠃ ꠉꠣꠁꠞ ꠈꠣꠟ, ꠉꠥꠡ꠆ꠔ, ꠟꠃ ꠀꠞ ꠉꠥꠚꠞ ꠡꠥꠖ꠆ꠖꠣ ꠀꠔ-ꠜꠠ ꠀꠉꠥꠁꠘꠖꠤ ꠎꠣꠟꠣꠁꠟꠤꠅ।
NUM 19:6 ꠅꠃ ꠒꠦꠇꠤꠞꠦ ꠎꠣꠟꠣꠘꠤꠞ ꠡꠝꠄ ꠁꠝꠣꠝꠦ ꠖꠦꠛꠖꠣꠞꠥ ꠉꠣꠍꠞ ꠇꠤꠍꠥ ꠖꠣꠞꠥ, ꠄꠍꠥꠛ ꠉꠣꠍꠞ ꠒꠦꠐꠣ, ꠀꠞ ꠟꠣꠟ ꠞꠋꠉꠞ ꠇꠤꠍꠥ ꠡꠥꠔꠣꠞꠦ ꠅꠃ ꠀꠉꠥꠘꠤꠞ ꠝꠣꠎꠦ ꠚꠣꠟꠣꠁꠛꠣ।
NUM 19:7 ꠛꠣꠖꠦ ꠔꠣꠁꠘ ꠘꠣꠁꠛꠣ, ꠀꠞ ꠚꠤꠘ꠆ꠘꠞ ꠇꠣꠙꠠ-ꠌꠥꠙꠠꠅ ꠗꠁꠛꠣ। ꠘꠣꠁꠀ-ꠗꠁꠀ ꠢꠣꠞꠟꠦ ꠔꠣꠁꠘ ꠇꠦꠝ꠆ꠙꠞ ꠜꠤꠔꠞꠦ ꠎꠣꠁꠔꠣ ꠙꠣꠞꠛꠣ, ꠅꠁꠟꠦ ꠢꠣꠁꠘ꠆ꠎꠣ ꠙꠞ꠆ꠎꠘ꠆ꠔ ꠔꠣꠁꠘ ꠘꠣꠙꠣꠇ ꠢꠣꠟꠔꠦ ꠞꠁꠛꠣ।
NUM 19:8 ꠎꠦ ꠎꠘꠦ ꠅꠃ ꠒꠦꠇꠤꠞ ꠢꠇꠟꠔꠣ ꠎꠣꠟꠣꠁꠛ, ꠢꠦ-ꠅ ꠘꠣꠁꠀ ꠢꠣꠞꠤ ꠇꠣꠙꠠ-ꠌꠥꠙꠠ ꠗꠁꠛ ꠀꠞ ꠢꠣꠁꠘ꠆ꠎꠣ ꠙꠞ꠆ꠎꠘ꠆ꠔ ꠘꠣꠙꠣꠇ ꠞꠁꠛ।
NUM 19:9 ꠅꠃ ꠒꠦꠇꠤꠞ ꠎꠣꠟꠣꠁꠟ ꠍꠣꠟꠤ ꠈꠣꠘꠣꠁꠘ ꠇꠥꠘꠥ ꠙꠣꠇ-ꠍꠣꠚ ꠝꠣꠘꠡꠦ ꠔꠥꠟꠤꠀ ꠘꠤꠀ, ꠇꠦꠝ꠆ꠙꠞ ꠛꠣꠞꠦ ꠇꠥꠘꠥ ꠙꠣꠇ ꠎꠣꠉꠣꠔ ꠕꠁꠛ। ꠛꠘꠤ ꠁꠍꠞꠣꠁꠟꠦ ꠙꠣꠇ-ꠍꠣꠚ ꠅꠀꠞ ꠙꠣꠘꠤ ꠔꠤꠀꠞ ꠇꠞꠣꠞ ꠟꠣꠉꠤ ꠅꠃ ꠍꠣꠟꠤꠞꠦ ꠎꠔꠘꠦ ꠕꠁꠛꠣ। ꠛꠣꠖꠦ ꠘꠣꠙꠣꠇ ꠕꠣꠇꠤ ꠙꠣꠇ-ꠍꠣꠚ ꠅꠀꠞ ꠇꠣꠟꠅ ꠅꠃ ꠙꠣꠘꠤ ꠇꠣꠝꠅ ꠟꠣꠉꠣꠁꠛꠣ।
NUM 19:10 ꠎꠦ ꠎꠘꠦ ꠅꠃ ꠍꠣꠟꠤ ꠔꠥꠟꠛ, ꠢꠦ-ꠅ ꠔꠣꠞ ꠇꠣꠙꠠ-ꠌꠥꠙꠠ ꠗꠁꠔꠦ ꠅꠁꠛ ꠀꠞ ꠢꠣꠁꠘ꠆ꠎꠣ ꠙꠞ꠆ꠎꠘ꠆ꠔ ꠘꠣꠙꠣꠇ ꠞꠁꠛ। ꠁꠐꠣ ꠛꠘꠤ ꠁꠍꠞꠣꠁꠟ ꠀꠞ ꠔꠣꠞꠣꠞ ꠝꠣꠎꠦ ꠛꠡꠔ ꠇꠞꠞꠣ ꠢꠇꠟ ꠎꠣꠔꠤꠞ ꠟꠣꠉꠤ ꠌꠤꠞꠇꠣꠟꠤꠘ ꠘꠤꠅꠝ।
NUM 19:11 “ꠇꠦꠃ ꠎꠥꠖꠤ ꠇꠥꠘꠥ ꠝꠥꠞ꠆ꠖꠣꠞ ꠟꠣꠡ ꠍꠁꠟꠣꠄ, ꠔꠦ ꠡꠣꠔ ꠖꠤꠘ ꠜꠞꠣ ꠢꠦ ꠘꠣꠙꠣꠇ ꠞꠁꠛ।
NUM 19:12 ꠟꠣꠡ ꠍꠅꠀꠞ ꠔꠤꠘ ꠘꠝ꠆ꠛꠞ ꠀꠞ ꠡꠣꠔ ꠘꠝ꠆ꠛꠞ ꠖꠤꠘ, ꠙꠣꠇ-ꠍꠣꠚ ꠅꠀꠞ ꠙꠛꠤꠔ꠆ꠞ ꠙꠣꠘꠤ ꠖꠤꠀ ꠘꠤꠎꠞꠦ ꠗꠁꠀ ꠢꠣꠞꠟꠦ ꠢꠦ ꠙꠣꠇ-ꠍꠣꠚ ꠅꠁꠛ। ꠀꠞ ꠁ ꠘꠤꠅꠝ ꠘꠣ ꠝꠣꠘꠟꠦ ꠢꠦ ꠘꠣꠙꠣꠇꠃ ꠞꠁꠛ।
NUM 19:13 ꠟꠣꠡ ꠍꠅꠀꠞ ꠛꠣꠖꠦ ꠇꠦꠃ ꠎꠥꠖꠤ ꠙꠣꠇ-ꠍꠣꠚ ꠘꠣ ꠅꠄ, ꠔꠦ ꠢꠦ ꠝꠣꠛꠥꠖꠞ ꠊꠞꠞꠦ ꠘꠣꠙꠣꠇ ꠛꠣꠘꠣꠄ। ꠅꠃ ꠎꠘꠞꠦ ꠛꠘꠤ ꠁꠍꠞꠣꠁꠟꠞ ꠡꠝꠣꠎ ꠕꠣꠇꠤ ꠚꠥꠍꠤꠟꠤꠛꠣꠄ। ꠙꠣꠇ-ꠍꠣꠚ ꠅꠀꠞ ꠙꠣꠘꠤ ꠔꠣꠞ ꠡꠞꠤꠟꠅ ꠘꠣ ꠍꠤꠐꠣꠘꠤꠄ, ꠔꠣꠞ ꠘꠣꠙꠣꠇꠤ ꠔꠣꠞ ꠟꠉꠦ ꠞꠁꠛ।
NUM 19:14 “ꠀꠞ ꠔꠣꠝ꠆ꠛꠥꠞ ꠜꠤꠔꠞꠦ ꠇꠥꠘꠥ ꠝꠣꠘꠥꠡ ꠝꠞꠤꠉꠦꠟꠦ, ꠎꠦꠞꠣ ꠅꠃ ꠔꠣꠝ꠆ꠛꠥꠔ ꠢꠣꠝꠣꠁꠛꠣ ꠀꠞ ꠎꠦꠞꠣ ꠔꠣꠝ꠆ꠛꠥꠔ ꠀꠍꠟꠣ, ꠔꠣꠞꠣ ꠢꠇꠟꠃ ꠡꠣꠔ ꠖꠤꠘ ꠜꠞꠣ ꠘꠣꠙꠣꠇ ꠞꠁꠛꠣ।
NUM 19:15 ꠅꠃ ꠛꠡꠔ ꠔꠣꠝ꠆ꠛꠥꠞ ꠜꠤꠔꠞꠞ ꠎꠦꠔꠣ ꠕꠣꠟ-ꠛꠣꠡꠘ ꠢꠞꠣ ꠖꠤꠀ ꠉꠥꠞꠣ ꠀꠍꠤꠟ ꠘꠣ, ꠅꠔꠣꠅ ꠘꠣꠙꠣꠇ ꠅꠁꠎꠤꠛ।
NUM 19:16 “ꠛꠘ꠆ꠖꠞ ꠝꠣꠎꠦ ꠈꠥꠟꠣ ꠎꠣꠉꠣꠔ ꠚꠣꠟꠣꠁꠟ ꠇꠥꠘꠥ ꠟꠣꠡꠞꠦ ꠎꠥꠖꠤ ꠇꠦꠃ ꠍꠁꠟꠣꠄ, ꠔꠦ ꠢꠦ ꠡꠣꠔ ꠖꠤꠘ ꠜꠞꠣ ꠘꠣꠙꠣꠇ ꠞꠁꠛ। ꠁ ꠟꠣꠡ ꠇꠥꠘꠥ ꠟꠣꠠꠣꠁꠞ ꠇꠣꠞꠘꠦ ꠅꠃꠇ, ꠛꠣ ꠄꠝꠘꠦ ꠝꠞꠣ ꠅꠃꠇ, ꠎꠦꠞꠣ ꠍꠁꠛ ꠄꠞꠣ ꠘꠣꠙꠣꠇ। ꠇꠥꠘꠥ ꠝꠞꠣ ꠝꠣꠘꠡꠞ ꠀꠒ꠆ꠒꠤ ꠛꠣ ꠇꠄꠛꠞꠞꠦ ꠍꠁꠟꠦ, ꠢꠦ-ꠅ ꠡꠣꠔ ꠖꠤꠘ ꠜꠞꠣ ꠘꠣꠙꠣꠇ ꠞꠁꠛ।
NUM 19:17 “ꠅꠟꠣ ꠘꠣꠙꠣꠇ ꠝꠣꠘꠡꠞꠦ ꠙꠣꠇ-ꠍꠣꠚ ꠇꠞꠣꠞ ꠘꠤꠅꠔꠦ ꠎꠦ ꠟꠣꠟ ꠒꠦꠇꠤꠞ ꠉꠥꠡ꠆ꠔ ꠎꠣꠟꠣꠘꠤ ꠅꠁꠍꠦ, ꠅꠉꠥꠞ ꠇꠤꠍꠥ ꠍꠣꠟꠤ ꠄꠇꠐꠣ ꠉꠣꠝꠟꠣꠔ ꠟꠁꠀ, ꠅꠃ ꠉꠣꠝꠟꠣꠔ ꠚꠥꠔꠞ ꠙꠣꠘꠤ ꠜꠞꠔꠦ ꠅꠁꠛ।
NUM 19:18 ꠛꠣꠖꠦ ꠇꠥꠘꠥ ꠙꠣꠇ-ꠍꠣꠚ ꠝꠣꠘꠡꠦ ꠄꠍꠥꠛ ꠉꠣꠍꠞ ꠇꠄꠐꠣ ꠒꠦꠐꠣ ꠀꠘꠤꠀ ꠙꠣꠘꠤꠔ ꠛꠥꠠꠣꠁꠀ ꠢꠃ ꠝꠥꠞ꠆ꠖꠣꠞ ꠔꠣꠝ꠆ꠛꠥ, ꠄꠞ ꠜꠤꠔꠞꠞ ꠢꠇꠟ ꠝꠣꠟ-ꠍꠣꠝꠣꠘꠣ ꠀꠞ ꠝꠣꠘꠡꠞ ꠃꠙꠞꠦ ꠍꠤꠐꠣꠁ ꠖꠤꠛꠣ। ꠎꠔ ꠎꠘꠦ ꠄꠝꠘꠦ ꠝꠞꠣ, ꠛꠣ ꠈꠥꠘ ꠅꠁꠀ ꠝꠞꠣ ꠇꠥꠘꠥ ꠝꠥꠞ꠆ꠖꠣꠞ ꠟꠣꠡ, ꠝꠞꠣꠞ ꠀꠒ꠆ꠒꠤ-ꠉꠥꠒ꠆ꠒꠤ ꠛꠣ ꠇꠄꠛꠞ ꠍꠁꠍꠦ, ꠔꠣꠞꠣꠞ ꠃꠙꠞꠦꠅ ꠅꠃ ꠙꠣꠘꠤ ꠍꠤꠐꠣꠁ ꠖꠤꠛꠣ।
NUM 19:19 ꠙꠣꠇ-ꠍꠣꠚ ꠅꠃ ꠎꠘꠦ ꠘꠣꠙꠣꠇ ꠝꠣꠘꠡꠞ ꠃꠙꠞꠦ ꠢꠣꠙ꠆ꠔꠣꠞ ꠔꠤꠘ ꠘꠝ꠆ꠛꠞ ꠀꠞ ꠡꠣꠔ ꠘꠝ꠆ꠛꠞ ꠖꠤꠘ ꠙꠣꠘꠤ ꠍꠤꠐꠣꠁ ꠖꠤꠛꠣ, ꠀꠞ ꠡꠣꠔ ꠘꠝ꠆ꠛꠞ ꠖꠤꠘ ꠔꠣꠞꠣ ꠙꠣꠇ-ꠍꠣꠚ ꠅꠁꠛꠣ। ꠔꠣꠞꠣ ꠉꠥꠍꠟ ꠇꠞꠤꠀ ꠚꠤꠘ꠆ꠘꠞ ꠇꠣꠙꠠ-ꠌꠥꠙꠠ ꠗꠁꠛꠣ, ꠀꠞ ꠅꠃ ꠡꠣꠔ ꠘꠝ꠆ꠛꠞ ꠖꠤꠘꠞ ꠢꠣꠁꠘ꠆ꠎꠣ ꠕꠣꠇꠤ ꠙꠣꠇ-ꠍꠣꠚ ꠛꠘꠛꠣ।
NUM 19:20 ꠅꠁꠟꠦ ꠘꠣꠙꠣꠇ ꠅꠀꠞ ꠛꠣꠖꠦ ꠇꠦꠃ ꠎꠥꠖꠤ ꠘꠤꠎꠞꠦ ꠙꠣꠇ-ꠍꠣꠚ ꠘꠣ ꠇꠞꠦ, ꠔꠦ ꠔꠣꠞꠦ ꠡꠝꠣꠎ ꠕꠣꠇꠤ ꠚꠥꠍꠤꠀ ꠚꠣꠟꠣꠁꠛꠣꠄ। ꠢꠦ ꠘꠤꠎꠞꠦ ꠘꠣꠙꠣꠇ ꠞꠣꠈꠤꠀ ꠝꠣꠛꠥꠖꠞ ꠢꠦꠞꠦꠝ ꠡꠞꠤꠚꠞꠦꠅ ꠘꠣꠙꠣꠇ ꠛꠣꠘꠣꠁꠍꠦ। ꠙꠣꠇ-ꠍꠣꠚ ꠅꠀꠞ ꠙꠣꠘꠤ ꠔꠣꠞ ꠃꠙꠞꠦ ꠘꠣ ꠍꠤꠐꠣꠘꠤꠄ, ꠢꠦ ꠘꠣꠙꠣꠇ ꠞꠁꠍꠦ।
NUM 19:21 ꠁꠔꠣ ꠅꠁꠛ ꠛꠘꠤ ꠁꠍꠞꠣꠁꠟꠞ ꠟꠣꠉꠤ ꠄꠇꠐꠣ ꠌꠤꠞꠇꠣꠟꠤꠘ ꠘꠤꠅꠝ। “ꠎꠦ ꠎꠘꠦ ꠅꠃ ꠙꠣꠇ-ꠍꠣꠚ ꠅꠀꠞ ꠙꠣꠘꠤ ꠍꠤꠐꠣꠁꠛꠣ, ꠄꠁꠘ ꠘꠤꠎꠦꠅ ꠔꠣꠘ ꠇꠣꠙꠠ-ꠌꠥꠙꠠ ꠗꠁꠔꠦ ꠅꠁꠛ। ꠁ ꠙꠣꠇ-ꠍꠣꠚ ꠅꠀꠞ ꠙꠣꠘꠤ ꠇꠥꠘꠥ ꠝꠣꠘꠡꠦ ꠍꠁꠟꠦ, ꠢꠦ ꠢꠣꠁꠘ꠆ꠎꠣ ꠙꠞ꠆ꠎꠘ꠆ꠔ ꠘꠣꠙꠣꠇ ꠞꠁꠛ।
NUM 19:22 ꠘꠣꠙꠣꠇ ꠢꠣꠟꠔꠦ ꠁ ꠎꠘꠦ ꠎꠔꠔꠣ ꠍꠁꠛ, ꠁꠔꠣ ꠢꠇꠟꠔꠣ ꠘꠣꠙꠣꠇ ꠅꠁꠎꠤꠛ, ꠔꠣꠞ ꠍꠅꠀ ꠇꠥꠘꠥ ꠎꠤꠘꠤꠡ ꠎꠦꠉꠤꠄ ꠍꠁꠛ, ꠢꠦ-ꠅ ꠢꠣꠁꠘ꠆ꠎꠣ ꠙꠞ꠆ꠎꠘ꠆ꠔ ꠘꠣꠙꠣꠇ ꠞꠁꠛ।”
NUM 20:1 ꠛꠍꠞꠞ ꠙꠄꠟꠣ ꠌꠣꠘ꠆ꠖꠅ ꠢꠇ꠆ꠇꠟ ꠛꠘꠤ ꠁꠍꠞꠣꠁꠟ ꠎꠤꠘ ꠝꠞꠥꠜꠥꠝꠤꠔ ꠉꠤꠀ ꠇꠣꠖꠦꠡ ꠄꠟꠣꠇꠣꠔ ꠀꠁꠀ ꠞꠁꠟꠣ। ꠢꠘꠅ ꠝꠥꠍꠣ ꠘꠛꠤꠞ ꠛꠁꠘ ꠛꠤꠛꠤ ꠝꠞꠤꠅꠝꠞ ꠁꠘ꠆ꠔꠦꠇꠣꠟ ꠅꠁꠟ ꠀꠞ ꠔꠣꠘꠞꠦ ꠖꠣꠚꠘ ꠇꠞꠣ ꠅꠁꠟ।
NUM 20:2 ꠢꠤꠘꠅ ꠈꠣꠁꠛꠣꠞ ꠇꠥꠘꠥ ꠙꠣꠘꠤ ꠘꠣ ꠙꠣꠅꠀꠄ ꠛꠘꠤ ꠁꠍꠞꠣꠁꠟꠦ ꠝꠥꠍꠣ ꠀꠞ ꠢꠣꠞꠥꠘꠞ ꠛꠤꠞꠥꠖ꠆ꠖꠦ ꠖꠟ ꠛꠣꠘ꠆ꠖꠤꠀ ꠄꠞꠣꠞ ꠙꠤꠍꠦ ꠟꠣꠉꠟꠣ।
NUM 20:3 ꠔꠣꠞꠣ ꠝꠥꠍꠣꠞ ꠟꠉꠦ ꠇꠣꠁꠎ꠆ꠎꠣ ꠇꠞꠤꠀ ꠇꠁꠟꠣ, “ꠀꠝꠞꠣꠞ ꠟꠉꠞ ꠜꠣꠁꠀꠁꠘ ꠎꠦꠛꠟꠣ ꠝꠣꠛꠥꠖꠞ ꠍꠣꠝꠘꠦ ꠝꠞꠍꠟꠣ, ꠢꠃ ꠡꠝꠄ ꠀꠝꠞꠣꠅ ꠝꠞꠤꠉꠦꠟꠦ ꠜꠣꠟꠣ ꠀꠍꠤꠟ।
NUM 20:4 ꠝꠣꠛꠥꠖꠞ ꠛꠘ꠆ꠖꠣ ꠅꠇꠟꠞꠦ ꠔꠥꠝꠤ ꠇꠦꠘꠦ ꠅꠃ ꠝꠞꠥꠜꠥꠝꠤꠔ ꠀꠘꠟꠣꠄ, ꠅꠈꠘ ꠙꠡꠥꠞ ꠙꠣꠟ ꠡꠥꠖ꠆ꠖꠣ ꠀꠝꠞꠣ ꠢꠇ꠆ꠇꠟꠦ ꠅꠘꠅ ꠎꠣꠘ ꠈꠥꠀꠁꠔꠣꠝ ꠘꠤ?
NUM 20:5 ꠝꠤꠡꠞ ꠖꠦꠡ ꠕꠣꠇꠤ ꠔꠥꠝꠤ ꠇꠦꠘꠦ ꠀꠝꠞꠣꠞꠦ ꠅꠟꠣ ꠎꠝꠞ ꠉꠣꠔꠅ ꠟꠁꠀ ꠀꠁꠟꠣꠄ? ꠁ ꠎꠣꠉꠣꠔ ꠘꠣ ꠀꠍꠦ ꠇꠥꠘꠥ ꠗꠣꠘ-ꠌꠣꠃꠟ ꠛꠣ ꠒꠥꠝꠥꠞ ꠚꠟ, ꠘꠣ ꠀꠍꠦ ꠀꠋꠉꠥꠞ ꠛꠣ ꠀꠘꠥꠀꠞ ꠚꠟ? ꠀꠞ ꠈꠣꠁꠛꠣꠞ ꠙꠣꠘꠤꠅ ꠘꠣꠁ।”
NUM 20:6 ꠁꠔꠣ ꠢꠥꠘꠤꠀ ꠝꠥꠍꠣ ꠀꠞ ꠢꠣꠞꠥꠘ ꠝꠣꠘꠡꠞ ꠉꠦꠍ ꠕꠣꠇꠤ ꠢꠞꠤꠀ ꠝꠤꠟꠘ-ꠔꠣꠝ꠆ꠛꠥꠞ ꠖꠥꠀꠞꠞ ꠉꠦꠍꠦ ꠉꠤꠀ ꠍꠁꠎꠖꠣꠔ ꠙꠠꠟꠣ। ꠔꠦꠃ ꠝꠣꠛꠥꠖꠞ ꠘꠥꠞꠞ ꠔꠎꠟ꠆ꠟꠤ ꠔꠣꠞꠣꠞ ꠍꠣꠝꠘꠦ ꠎꠣꠁꠞ ꠅꠁꠟ।
NUM 20:7 ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ,
NUM 20:8 “ꠔꠥꠝꠤ ꠢꠃ ꠟꠣꠑꠤꠐꠣ ꠟꠅ, ꠟꠁꠀ ꠔꠥꠝꠤ ꠀꠞ ꠔꠥꠝꠣꠞ ꠜꠣꠁ ꠢꠣꠞꠥꠘꠦ ꠢꠇꠟ ꠛꠘꠤ ꠁꠍꠞꠣꠁꠟꠞꠦ ꠄꠇꠈꠣꠘꠅ ꠖꠟꠣ ꠇꠞꠅ। ꠀꠞ ꠅꠃ ꠛꠠ ꠎꠦ ꠙꠣꠔ꠆ꠔꠞꠉꠥ ꠖꠦꠈꠞꠣꠄ, ꠔꠣꠞꠣꠞ ꠍꠣꠝꠘꠦ ꠅꠃ ꠙꠣꠔ꠆ꠔꠞꠞꠦ ꠢꠥꠇꠥꠝ ꠖꠦꠅ, ꠖꠤꠟꠦ ꠅꠃ ꠙꠣꠔ꠆ꠔꠞꠦ ꠙꠣꠘꠤ ꠖꠤꠛ। ꠛꠘꠤ ꠁꠍꠞꠣꠁꠟ ꠀꠞ ꠔꠣꠞꠣꠞ ꠙꠡꠥꠙꠣꠟ ꠢꠇꠟꠦ ꠎꠣꠔꠦ ꠙꠣꠘꠤ ꠈꠣꠁꠔ ꠙꠣꠞꠦ, ꠄꠞꠟꠣꠉꠤ ꠔꠥꠝꠤ ꠅꠃ ꠙꠣꠔ꠆ꠔꠞ ꠕꠣꠇꠤ ꠙꠣꠘꠤ ꠛꠣꠞ ꠇꠞꠛꠣꠄ।”
NUM 20:9 ꠝꠣꠛꠥꠖꠞ ꠢꠥꠇꠥꠝ ꠝꠔ ꠔꠣꠘ ꠍꠣꠝꠘꠦ ꠕꠣꠇꠤ ꠝꠥꠍꠣꠄ ꠟꠣꠑꠤꠐꠣ ꠟꠁꠟꠣ।
NUM 20:10 ꠟꠁꠀ ꠝꠥꠍꠣ ꠀꠞ ꠢꠣꠞꠥꠘꠦ ꠝꠣꠘꠡꠞꠦ ꠅꠃ ꠙꠣꠔ꠆ꠔꠞꠞ ꠉꠦꠍꠦ ꠖꠟꠣ ꠇꠞꠟꠣ। ꠀꠞ ꠝꠥꠍꠣꠄ ꠔꠣꠞꠣꠞꠦ ꠇꠁꠟꠣ, “ꠅ ꠛꠦꠁꠝꠣꠘꠞ ꠎꠣꠔ, ꠢꠥꠘꠅ, ꠀꠝꠞꠣ ꠅꠃ ꠙꠣꠔ꠆ꠔꠞ ꠕꠣꠇꠤ ꠔꠥꠝꠞꠣꠞ ꠟꠣꠉꠤ ꠙꠣꠘꠤ ꠛꠣꠞ ꠇꠞꠔꠣꠝ ꠘꠤ?”
NUM 20:11 ꠅꠈꠣꠘ ꠇꠁꠀ ꠝꠥꠍꠣꠄ ꠟꠣꠑꠤ ꠖꠤꠀ ꠅꠃ ꠙꠣꠔ꠆ꠔꠞꠅ ꠖꠥꠁ ꠛꠣꠠꠤ ꠝꠣꠞꠟꠣ, ꠛꠣꠠꠤ ꠝꠣꠞꠣꠞ ꠟꠉꠦ ꠟꠉꠦ ꠙꠣꠔ꠆ꠔꠞ ꠕꠣꠇꠤ ꠎꠥꠞꠦ ꠎꠥꠞꠦ ꠙꠣꠘꠤ ꠛꠣꠞ ꠅꠁꠟ, ꠔꠦꠃ ꠔꠣꠞꠣ ꠀꠞ ꠔꠣꠞꠣꠞ ꠙꠡꠥꠞ ꠙꠣꠟꠦ ꠙꠣꠘꠤ ꠈꠣꠁꠟꠣ।
NUM 20:12 ꠅꠁꠟꠦ ꠝꠣꠛꠥꠖꠦ ꠝꠥꠍꠣ ꠀꠞ ꠢꠣꠞꠥꠘꠞꠦ ꠇꠁꠟꠣ, “ꠔꠥꠝꠞꠣ ꠔ ꠛꠘꠤ ꠁꠍꠞꠣꠁꠟꠞ ꠍꠣꠝꠘꠦ ꠀꠝꠣꠞꠦ ꠙꠣꠇ-ꠙꠛꠤꠔ꠆ꠞ ꠇꠁꠀ ꠝꠣꠘꠟꠣꠄ ꠘꠣ, ꠀꠝꠣꠞ ꠎꠛꠣꠘꠞ ꠃꠙꠞꠦ ꠜꠞꠡꠣ ꠇꠞꠟꠣꠄ ꠘꠣ। ꠄꠞꠟꠣꠉꠤ ꠀꠝꠤ ꠎꠦ ꠖꠦꠡꠈꠣꠘ ꠛꠘꠤ ꠁꠍꠞꠣꠁꠟꠞꠦ ꠖꠣꠘ ꠇꠞꠝꠥ, ꠔꠥꠝꠞꠣ ꠔꠣꠞꠣꠞꠦ ꠟꠁꠀ ꠢꠤꠘꠅ ꠎꠣꠁꠔꠣꠄ ꠙꠣꠞꠔꠣꠄ ꠘꠣꠄ।”
NUM 20:13 ꠙꠣꠔ꠆ꠔꠞ ꠕꠣꠇꠤ ꠎꠦ ꠎꠣꠉꠣꠔ ꠙꠣꠘꠤ ꠛꠣꠞ ꠅꠁꠟ, ꠅꠃ ꠎꠣꠉꠣꠞ ꠘꠣꠝ ꠖꠦꠅꠀ ꠅꠁꠟ ꠝꠦꠞꠤꠛꠣ, ꠝꠣꠘꠤ ꠇꠣꠁꠎ꠆ꠎꠣ। ꠁꠘꠅ ꠛꠘꠤ ꠁꠍꠞꠣꠁꠟꠦ ꠝꠣꠛꠥꠖꠞ ꠟꠉꠦ ꠇꠣꠁꠎ꠆ꠎꠣ ꠇꠞꠍꠤꠟ, ꠀꠞ ꠝꠣꠛꠥꠖꠦ ꠅꠘꠅꠃ ꠔꠣꠘ ꠙꠣꠇ-ꠙꠛꠤꠔ꠆ꠞꠔꠣ ꠔꠣꠞꠣꠞ ꠍꠣꠝꠘꠦ ꠎꠣꠁꠞ ꠇꠞꠍꠂꠘ।
NUM 20:14 ꠛꠣꠖꠦ ꠝꠥꠍꠣꠄ ꠇꠣꠖꠦꠡ ꠕꠣꠇꠤ ꠝꠣꠘꠥꠡ ꠙꠣꠑꠣꠁꠀ ꠁꠖꠥꠝ ꠖꠦꠡꠞ ꠛꠣꠖꠡꠣꠞꠦ ꠇꠁꠟꠣ, “ꠀꠝꠞꠣ ꠔ ꠛꠘꠤ ꠁꠍꠞꠣꠁꠟ, ꠀꠙꠘꠣꠞ ꠍꠤꠟꠍꠤꠟꠣꠞ ꠜꠣꠁꠀꠁꠘ। ꠀꠙꠘꠣꠞ ꠖꠞꠛꠣꠞꠅ ꠀꠝꠞꠣꠞ ꠄꠇꠈꠣꠘ ꠀꠞꠎꠤ ꠀꠍꠦ, ꠀꠙꠘꠦ ꠔ ꠀꠝꠞꠣꠞ ꠖꠥꠈ-ꠝꠍꠤꠛꠔꠞ ꠇꠕꠣ ꠎꠣꠘꠂꠘ।
NUM 20:15 ꠔꠦ ꠀꠝꠞꠣꠞ ꠛꠣꠚ-ꠖꠣꠖꠣꠁꠘ ꠔ ꠝꠤꠡꠞ ꠖꠦꠡꠅ ꠉꠦꠍꠟꠣ, ꠀꠞ ꠀꠝꠞꠣ ꠛꠃꠔ ꠛꠍꠞ ꠢꠘꠅ ꠀꠍꠟꠣꠝ। ꠝꠤꠡꠞꠤ ꠅꠇꠟꠦ ꠀꠝꠞꠣ ꠀꠞ ꠀꠝꠞꠣꠞ ꠝꠄ-ꠝꠥꠞꠛ꠆ꠛꠤꠞ ꠃꠙꠞꠦ ꠎꠥꠟꠥꠝ-ꠝꠍꠤꠛꠔ ꠇꠞꠣꠄ,
NUM 20:16 ꠀꠝꠞꠣ ꠝꠣꠛꠥꠖꠞ ꠖꠞꠛꠣꠞꠅ ꠇꠣꠘ꠆ꠖꠣ-ꠇꠣꠐꠤ ꠇꠞꠟꠣꠝ। ꠔꠦꠃ ꠝꠣꠛꠥꠖꠦ ꠀꠝꠞꠣꠞ ꠚꠞꠤꠀꠖ ꠇꠛꠥꠟ ꠇꠞꠤꠀ, ꠔꠣꠘ ꠚꠤꠞꠤꠡ꠆ꠔꠣ ꠙꠣꠑꠣꠁꠀ ꠀꠝꠞꠣꠞꠦ ꠢꠃ ꠖꠦꠡ ꠕꠣꠇꠤ ꠛꠣꠞ ꠇꠞꠤ ꠀꠘꠍꠂꠘ। “ꠄꠞꠟꠣꠉꠤ ꠀꠝꠞꠣ ꠅꠈꠘ ꠀꠙꠘꠣꠞ ꠖꠦꠡꠞ ꠡꠤꠝꠣꠘꠣꠞ ꠇꠣꠖꠦꠡ ꠐꠣꠃꠘꠞ ꠇꠣꠘ꠆ꠖꠣꠔ ꠀꠁꠍꠤ।
NUM 20:17 ꠀꠙꠘꠦ ꠀꠝꠞꠣꠞꠦ ꠀꠙꠘꠣꠞ ꠖꠦꠡꠞ ꠝꠣꠎꠖꠤ ꠎꠣꠁꠛꠣꠞ ꠡꠥꠎꠥꠉ ꠈꠣꠘ ꠖꠦꠃꠇ꠆ꠇꠣ। ꠀꠝꠞꠣ ꠀꠙꠘꠣꠞ ꠇꠥꠘꠥ ꠈꠦꠔ-ꠇꠤꠡꠤ ꠛꠣ ꠀꠋꠉꠥꠞ ꠛꠣꠉꠣꠘꠞ ꠝꠣꠎꠦꠖꠤ ꠎꠣꠁꠔꠣꠝ ꠘꠣꠄ, ꠇꠥꠘꠥ ꠇꠥꠀ ꠕꠣꠇꠤ ꠙꠣꠘꠤꠅ ꠔꠥꠟꠤꠀ ꠈꠣꠁꠔꠣꠝ ꠘꠣꠄ। ꠀꠝꠞꠣ ꠈꠣꠟꠤ ꠞꠣꠎ ꠙꠕꠦꠖꠤ ꠀꠐꠤꠀ ꠎꠣꠁꠝꠥ, ꠀꠙꠘꠣꠞ ꠖꠦꠡꠞ ꠡꠤꠝꠣꠘꠣ ꠙꠣꠞꠘꠤꠞ ꠀꠉ ꠙꠞ꠆ꠎꠘ꠆ꠔ ꠒꠣꠁꠘꠦ-ꠛꠣꠃꠄ ꠇꠥꠘꠥꠛꠣꠄ ꠙꠣꠅ ꠛꠣꠠꠣꠁꠔꠣꠝ ꠘꠣꠄ।”
NUM 20:18 ꠅꠁꠟꠦ ꠁꠖꠥꠝꠞ ꠛꠣꠖꠡꠣꠄ ꠇꠁꠟꠣ, “ꠘꠣ, ꠘꠣ, ꠔꠥꠝꠞꠣ ꠁꠛꠣꠄ ꠎꠣꠁꠔꠣꠄ ꠙꠣꠞꠔꠣꠄ ꠘꠣꠄ। ꠎꠣꠁꠛꠣꠞ ꠌꠦꠡ꠆ꠐꠣ ꠇꠞꠟꠦ ꠀꠝꠞꠣ ꠎꠥꠖ꠆ꠖꠔ ꠛꠣꠞ ꠅꠁꠀ ꠔꠥꠝꠞꠣꠞ ꠃꠙꠞꠦ ꠢꠣꠝꠟꠣ ꠇꠞꠝꠥ।”
NUM 20:19 ꠔꠦꠃ ꠛꠘꠤ ꠁꠍꠞꠣꠁꠟꠦ ꠎꠥꠀꠙ ꠖꠤꠟꠣ, “ꠀꠝꠞꠣ ꠔ ꠈꠣꠟꠤ ꠞꠣꠎ ꠙꠕꠦꠖꠤ ꠎꠣꠁꠝꠥ। ꠀꠝꠞꠣ ꠛꠣ ꠀꠝꠞꠣꠞ ꠙꠡꠥꠞ ꠙꠣꠟꠦ ꠎꠥꠖꠤ ꠀꠙꠘꠣꠞ ꠖꠦꠡꠞ ꠇꠥꠘꠥ ꠙꠣꠘꠤ ꠈꠣꠁ, ꠔꠦ ꠁꠔꠣꠞ ꠖꠣꠝ ꠖꠤꠟꠣꠁꠝꠥ। ꠀꠝꠞꠣ ꠙꠣꠅꠄ ꠀꠐꠤꠀ ꠈꠣꠟꠤ ꠖꠦꠡ ꠙꠣꠠꠤ ꠖꠤꠀ ꠎꠣꠁꠔꠣꠝ ꠌꠣꠁꠞꠣꠝ।”
NUM 20:20 ꠅꠁꠟꠦ ꠁꠖꠥꠝ ꠖꠦꠡꠞ ꠛꠣꠖꠡꠣꠄ ꠢꠤꠞꠛꠣꠞ ꠇꠁꠟ, “ꠘꠣ, ꠘꠣ, ꠁꠛꠣꠄꠖꠤ ꠔꠥꠝꠞꠣꠞ ꠎꠣꠅꠀ ꠘꠤꠡꠦꠗ।” ꠛꠣꠖꠦ ꠁꠖꠥꠝ ꠖꠦꠡꠞ ꠛꠃꠔ ꠍꠤꠙꠣꠁꠄ ꠛꠦꠐꠣꠉꠤꠞꠤ ꠖꠦꠈꠣꠁꠀ ꠛꠘꠤ ꠁꠍꠞꠣꠁꠟꠞ ꠟꠉꠦ ꠟꠣꠠꠣꠁ ꠇꠞꠣꠔ ꠛꠣꠞ ꠅꠁꠟ।
NUM 20:21 ꠔꠣꠞꠣ ꠛꠘꠤ ꠁꠍꠞꠣꠁꠟꠞꠦ ꠖꠦꠡꠞ ꠜꠤꠔꠞꠦꠖꠤ ꠎꠣꠁꠔꠦ ꠖꠤꠟ ꠘꠣ, ꠄꠞꠟꠣꠉꠤ ꠄꠞꠣ ꠢꠇꠟ ꠚꠤꠞꠤꠀ ꠀꠁꠟꠣ।
NUM 20:22 ꠄꠞꠛꠣꠖꠦ ꠛꠘꠤ ꠁꠍꠞꠣꠁꠟ ꠇꠣꠖꠦꠡ ꠕꠣꠇꠤ ꠞꠅꠀꠘꠣ ꠅꠁꠀ ꠢꠥꠞ ꠙꠣꠠꠞ ꠉꠦꠍꠦ ꠉꠤꠀ ꠀꠎꠤꠟꠣ।
NUM 20:23 ꠢꠤꠘꠅ ꠁꠖꠥꠝ ꠖꠦꠡꠞ ꠡꠤꠝꠣꠘꠣꠞ ꠗꠣꠞꠅ ꠝꠣꠛꠥꠖꠦ ꠝꠥꠍꠣ ꠀꠞ ꠢꠣꠞꠥꠘꠞꠦ ꠇꠁꠟꠣ,
NUM 20:24 “ꠢꠣꠞꠥꠘ ꠔ ꠔꠣꠞ ꠛꠣꠚ-ꠖꠣꠖꠣꠞ ꠉꠦꠍꠦ ꠇꠄꠛꠞꠅ ꠎꠣꠁꠔꠦꠉꠤ ꠅꠁꠛ। ꠀꠞ ꠀꠝꠤ ꠛꠘꠤ ꠁꠍꠞꠣꠁꠟꠞꠦ ꠎꠦ ꠖꠦꠡ ꠖꠤꠝꠥ, ꠢꠦ ꠔ ꠢꠤ ꠖꠦꠡꠅ ꠎꠣꠁꠔ ꠙꠣꠞꠔ ꠘꠣꠄ। ꠝꠘꠅ ꠀꠍꠦ ꠘꠤ, ꠝꠦꠞꠤꠛꠣ ꠘꠣꠝꠞ ꠎꠣꠉꠣꠔ ꠙꠣꠘꠤꠞ ꠛꠦꠙꠣꠞꠦ ꠔꠥꠝꠞꠣ ꠀꠝꠣꠞ ꠢꠥꠇꠥꠝꠞ ꠃꠟꠐꠣ ꠇꠣꠝ ꠇꠞꠍ।
NUM 20:25 ꠔꠦ ꠢꠣꠞꠥꠘ ꠀꠞ ꠔꠣꠞ ꠙꠥꠀ ꠀꠟꠤ-ꠀꠎꠞꠞꠦ ꠟꠁꠀ ꠔꠥꠝꠤ ꠢꠥꠞ ꠙꠣꠠꠞ ꠃꠙꠞꠦ ꠃꠑꠅ।
NUM 20:26 ꠃꠑꠤꠀ ꠢꠣꠞꠥꠘꠞ ꠉꠔꠞ ꠕꠣꠇꠤ ꠁꠝꠣꠝꠔꠤ ꠟꠦꠛꠣꠍ ꠈꠥꠟꠤꠀ ꠔꠣꠞ ꠙꠥꠀꠞꠦ ꠚꠤꠘ꠆ꠖꠣꠅ, ꠇꠣꠞꠘ ꠢꠣꠞꠥꠘ ꠔꠣꠞ ꠛꠣꠚ-ꠖꠣꠖꠣꠞ ꠉꠦꠍꠦ ꠎꠣꠁꠛꠉꠤ, ꠢꠘꠅꠃ ꠔꠣꠞ ꠁꠘ꠆ꠔꠦꠇꠣꠟ ꠅꠁꠛ।”
NUM 20:27 ꠝꠥꠍꠣꠄ ꠝꠣꠛꠥꠖꠞ ꠢꠥꠇꠥꠝ ꠝꠣꠚꠤꠇ ꠅꠟꠣ ꠇꠞꠟꠣ। ꠢꠇꠟ ꠛꠘꠤ ꠁꠍꠞꠣꠁꠟꠞ ꠍꠣꠝꠘꠦ ꠔꠣꠞꠣ ꠢꠥꠞ ꠙꠣꠠꠞ ꠃꠙꠞꠦ ꠃꠑꠟꠣ।
NUM 20:28 ꠃꠑꠣꠞ ꠛꠣꠖꠦ ꠝꠥꠍꠣꠄ ꠢꠣꠞꠥꠘꠞ ꠁꠝꠣꠝꠔꠤ ꠟꠦꠛꠣꠍ ꠈꠥꠟꠤꠀ ꠢꠣꠞꠤ ꠄꠘ ꠙꠥꠀ ꠀꠟꠤ-ꠀꠎꠞꠞꠦ ꠚꠤꠘ꠆ꠖꠣꠁꠟꠣ। ꠢꠃ ꠙꠣꠠꠞ ꠃꠙꠞꠦ ꠢꠣꠞꠥꠘꠦ ꠁꠘ꠆ꠔꠦꠇꠣꠟ ꠇꠞꠟꠣ। ꠛꠣꠖꠦ ꠝꠥꠍꠣ ꠀꠞ ꠀꠟꠤ-ꠀꠎꠞ ꠙꠣꠠ ꠕꠣꠇꠤ ꠟꠣꠝꠤꠀ ꠀꠁꠟꠣ।
NUM 20:29 ꠛꠘꠤ ꠁꠍꠞꠣꠁꠟꠦ ꠢꠣꠞꠥꠘꠞ ꠝꠃꠔꠞ ꠈꠛꠞ ꠢꠥꠘꠤꠀ ꠙꠥꠞꠣ ꠔꠤꠡ ꠖꠤꠘ ꠔꠣꠘ ꠟꠣꠉꠤ ꠝꠣꠔ꠆ꠔꠝ ꠇꠞꠟꠣ।
NUM 21:1 ꠀꠞ ꠇꠦꠘꠣꠘꠤ ꠎꠣꠔꠤꠞ ꠅꠞꠣꠖ ꠖꠦꠡꠞ ꠛꠣꠖꠡꠣ ꠘꠦꠉꠦꠜ ꠝꠞꠥꠜꠥꠝꠤꠔ ꠛꠡꠔ ꠇꠞꠂꠘ, ꠄꠁꠘ ꠈꠛꠞ ꠙꠣꠁꠟꠣ, ꠛꠘꠤ ꠁꠍꠞꠣꠁꠟ ꠎꠣꠔꠤ ꠅꠕꠣꠞꠤꠝꠞ ꠙꠕꠦꠖꠤ ꠀꠐꠤꠀ ꠀꠁꠞꠣ, ꠅꠈꠣꠘ ꠢꠥꠘꠤꠀ ꠛꠣꠖꠡꠣꠄ ꠔꠣꠞꠣꠞ ꠃꠙꠞꠦ ꠢꠣꠝꠟꠣ ꠇꠞꠤꠀ ꠇꠄꠎꠘꠞꠦ ꠗꠞꠤꠀ ꠘꠤꠟꠣꠉꠤ।
NUM 21:2 ꠔꠦꠃ ꠛꠘꠤ ꠁꠍꠞꠣꠁꠟꠦ ꠝꠣꠛꠥꠖꠞ ꠖꠞꠛꠣꠞꠅ ꠝꠣꠘ꠆ꠘꠔ ꠝꠣꠘꠤꠀ ꠇꠁꠟ, “ꠅ ꠝꠣꠛꠥꠖ, ꠔꠥꠝꠤ ꠎꠥꠖꠤ ꠅꠞꠣꠖꠞ ꠅꠃ ꠛꠣꠡꠤꠘ꠆ꠖꠣ ꠅꠇꠟꠞꠦ ꠀꠝꠞꠣꠞ ꠀꠔꠅ ꠡꠙꠤꠀ ꠖꠦꠅ, ꠔꠦ ꠀꠝꠞꠣ ꠔꠣꠞꠣꠞ ꠉꠣꠃ-ꠉꠦꠞꠣꠝ ꠀꠞ ꠐꠣꠃꠘ ꠅꠇꠟ ꠄꠇ꠆ꠇꠦꠛꠣꠞꠦ ꠛꠤꠘꠣꠡ ꠇꠞꠤꠟꠤꠝꠥ।”
NUM 21:3 ꠝꠣꠛꠥꠖꠦ ꠔꠣꠞꠣꠞ ꠝꠤꠘꠔꠤ ꠇꠛꠥꠟ ꠇꠞꠟꠣ, ꠀꠞ ꠅꠘꠞ ꠇꠦꠘꠣꠘꠤ ꠅꠇꠟꠞꠦ ꠔꠣꠞꠣꠞ ꠀꠔꠅ ꠡꠙꠤ ꠖꠤꠟꠣ। ꠔꠣꠞꠣ ꠄꠞꠣ ꠢꠇ꠆ꠇꠟꠞꠦ ꠀꠞ ꠄꠞꠣꠞ ꠐꠣꠃꠘ ꠅꠇꠟꠞꠦ ꠄꠇ꠆ꠇꠦꠛꠣꠞꠦ ꠛꠤꠘꠣꠡ ꠇꠞꠤꠟ꠆ꠟ। ꠄꠞꠟꠣꠉꠤ ꠅꠃ ꠎꠣꠉꠣꠞ ꠘꠣꠝ ꠅꠁꠟ ꠢꠞ꠆ꠝꠣ, ꠝꠣꠘꠤ ꠛꠤꠘꠣꠡ।
NUM 21:4 ꠄꠞꠛꠣꠖꠦ ꠛꠘꠤ ꠁꠍꠞꠣꠁꠟꠦ ꠁꠖꠥꠝ ꠖꠦꠡꠞ ꠉꠣꠟꠣꠛꠣꠄ ꠊꠥꠞꠤꠀ ꠎꠣꠅꠀꠞ ꠟꠣꠉꠤ ꠢꠥꠞ ꠙꠣꠠꠞ ꠉꠦꠍ ꠕꠣꠇꠤ ꠘꠤꠟ ꠖꠞꠤꠀꠞ ꠙꠣꠞꠦꠖꠤ ꠞꠅꠀꠘꠣ ꠖꠤꠟꠣ। ꠅꠁꠟꠦ ꠙꠕꠞ ꠝꠣꠎꠦ ꠔꠣꠞꠣ ꠅꠗꠂꠞ꠆ꠎ ꠅꠁꠀ,
NUM 21:5 ꠝꠥꠍꠣ ꠘꠛꠤ ꠀꠞ ꠀꠟ꠆ꠟꠣ ꠙꠣꠇꠞ ꠛꠤꠞꠥꠖ꠆ꠖꠦ ꠝꠣꠔꠣ-ꠝꠣꠔꠤ ꠟꠣꠉꠣꠁꠟꠣ, ꠔꠣꠞꠣ ꠇꠁꠟꠣ, “ꠀꠝꠞꠣꠞꠦ ꠝꠤꠡꠞ ꠖꠦꠡ ꠕꠣꠇꠤ ꠇꠦꠘꠦ ꠛꠣꠞ ꠇꠞꠤ ꠀꠘꠟꠣꠄ, ꠅꠃ ꠝꠞꠥꠜꠥꠝꠤꠔ ꠀꠘꠤꠀ ꠝꠣꠞꠣꠞ ꠟꠣꠉꠤ ꠘꠤ? ꠁꠘꠅ ꠔ ꠈꠣꠘꠤꠅ ꠘꠣꠁ, ꠙꠣꠘꠤꠅ ꠘꠣꠁ। ꠀꠞ ꠅꠟꠣ ꠛꠣꠎꠦ ꠈꠣꠘꠤ ꠀꠝꠞꠣ ꠖꠥꠁ ꠌꠃꠈꠦ ꠖꠦꠈꠔꠣꠝ ꠙꠣꠞꠤ ꠘꠣ।”
NUM 21:6 ꠅꠃ ꠡꠝꠄ ꠝꠣꠛꠥꠖꠦ ꠔꠣꠞꠣꠞ ꠝꠣꠎꠦ ꠛꠃꠔ ꠛꠤꠡꠣꠇ꠆ꠔ ꠢꠣꠚ ꠙꠣꠑꠣꠁꠟꠣ। ꠢꠣꠚꠞ ꠇꠣꠝꠠꠦ ꠔꠣꠞꠣꠞ ꠛꠃꠔ ꠎꠘ ꠝꠣꠞꠣ ꠉꠦꠟꠣ।
NUM 21:7 ꠔꠦꠃ ꠝꠣꠘꠡꠦ ꠉꠤꠀ ꠝꠥꠍꠣꠞꠦ ꠇꠁꠟꠣ, “ꠀꠝꠞꠣ ꠔ ꠀꠙꠘꠣꠞ ꠀꠞ ꠝꠣꠛꠥꠖꠞ ꠛꠤꠞꠥꠖ꠆ꠖꠦ ꠝꠣꠔꠤꠀ ꠉꠥꠘꠣ ꠇꠞꠤꠟꠤꠍꠤ। ꠔꠦ ꠀꠙꠘꠦ ꠅꠈꠘ ꠝꠣꠛꠥꠖꠞ ꠖꠞꠛꠣꠞꠅ ꠝꠤꠘꠔꠤ ꠇꠞꠃꠇ꠆ꠇꠣ, ꠎꠣꠔꠦ ꠅꠃ ꠢꠣꠚ ꠉꠥꠁꠘ ꠀꠝꠞꠣꠞ ꠉꠦꠍ ꠕꠣꠇꠤ ꠢꠞꠣꠁꠀ ꠘꠦꠁꠘꠉꠤ।” ꠔꠦꠃ ꠝꠥꠍꠣꠄ ꠔꠣꠞꠣꠞ ꠟꠣꠉꠤ ꠝꠤꠘꠔꠤ ꠇꠞꠟꠣ।
NUM 21:8 ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ, “ꠔꠥꠝꠤ ꠄꠇꠐꠣ ꠢꠣꠚ ꠛꠣꠘꠣꠁꠀ ꠃꠌꠣ ꠄꠇ ꠈꠥꠐꠤꠞ ꠃꠙꠞꠦ ꠕꠅ। ꠎꠦ ꠝꠣꠘꠡꠞꠦ ꠢꠣꠚꠦ ꠇꠣꠝꠠꠣꠁꠛ, ꠢꠦ ꠔꠥꠝꠣꠞ ꠅꠃ ꠢꠣꠚꠞ ꠛꠣꠄ ꠌꠣꠁꠟꠦ ꠜꠣꠟꠣ ꠅꠁꠎꠤꠛ।”
NUM 21:9 ꠔꠦꠃ ꠝꠥꠍꠣꠄ ꠈꠣꠐꠤ ꠔꠣꠝꠣꠖꠤ ꠄꠇ ꠢꠣꠚ ꠛꠣꠘꠣꠁꠀ ꠈꠥꠐꠤꠞ ꠃꠙꠞꠦ ꠕꠁꠟꠣ। ꠇꠥꠘꠥ ꠎꠘꠞꠦ ꠢꠣꠚꠦ ꠇꠣꠝꠠꠣꠁꠟꠦ ꠢꠦ ꠅꠃ ꠔꠣꠝꠣꠞ ꠢꠣꠚꠞ ꠛꠣꠄ ꠌꠣꠁꠔ, ꠀꠞ ꠛꠣꠌꠤꠎꠤꠔ।
NUM 21:10 ꠛꠣꠖꠦ ꠛꠘꠤ ꠁꠍꠞꠣꠁꠟꠦ ꠞꠅꠀꠘꠣ ꠖꠤꠟꠣ, ꠀꠞ ꠅꠛꠥꠔ ꠘꠣꠝꠞ ꠎꠣꠉꠣꠔ ꠉꠤꠀ ꠔꠣꠝ꠆ꠛꠥ ꠉꠣꠠꠤꠟꠣ।
NUM 21:11 ꠀꠞ ꠅꠛꠥꠔ ꠕꠣꠇꠤ ꠞꠅꠀꠘꠣ ꠅꠁꠀ ꠝꠥꠀꠛ ꠖꠦꠡꠞ ꠙꠥꠛꠞ ꠡꠤꠝꠣꠘꠣꠔ, ꠝꠞꠥꠜꠥꠝꠤꠞ ꠁꠀ-ꠀꠛꠣꠞꠤꠝꠅ ꠀꠁꠀ ꠔꠣꠝ꠆ꠛꠥ ꠐꠣꠘꠣꠁꠟꠣ।
NUM 21:12 ꠅꠈꠣꠘ ꠕꠣꠇꠤ ꠞꠅꠀꠘꠣ ꠅꠁꠀ ꠎꠦꠞꠦꠖ ꠘꠣꠝꠞ ꠢꠥꠇꠘꠣ ꠈꠣꠟꠞ ꠙꠣꠞꠅ ꠉꠤꠀ ꠔꠣꠝ꠆ꠛꠥ ꠉꠣꠠꠤꠟꠣ।
NUM 21:13 ꠎꠦꠞꠦꠖ ꠕꠣꠇꠤ ꠞꠅꠀꠘꠣ ꠖꠤꠀ ꠅꠞꠘꠘ ꠢꠥꠇꠘꠣ ꠈꠣꠟꠞ ꠢꠙꠣꠞꠅ ꠉꠤꠀ ꠔꠣꠝ꠆ꠛꠥ ꠐꠣꠘꠣꠁꠟꠣ। ꠀꠝꠥꠞꠤ ꠅꠇꠟꠞ ꠖꠦꠡꠅ ꠕꠣꠇꠤ ꠎꠦ ꠝꠞꠥꠜꠥꠝꠤ ꠡꠥꠞꠥ ꠅꠁꠍꠦ, ꠁ ꠈꠣꠟ ꠀꠍꠤꠟ ꠅꠃ ꠝꠞꠥꠜꠥꠝꠤꠔ। ꠈꠣꠟꠞ ꠄꠇ ꠙꠣꠞꠅ ꠝꠥꠀꠛ ꠖꠦꠡ, ꠅꠁꠘ꠆ꠘ ꠙꠣꠞꠅ ꠀꠝꠥꠞꠤ ꠅꠇꠟꠞ ꠖꠦꠡ।
NUM 21:14 ꠝꠣꠛꠥꠖꠞ ꠎꠤꠢꠣꠖ ꠘꠣꠝꠞ ꠇꠤꠔꠣꠛꠅ ꠔ ꠀꠍꠦ, “ꠡꠥꠚꠣ ꠄꠟꠣꠇꠣꠞ ꠛꠣꠢꠦꠛ ꠀꠞ ꠅꠞꠘꠘ ꠢꠥꠇꠘꠣ ꠈꠣꠟ,
NUM 21:15 ꠀꠃꠞ ꠐꠣꠃꠘꠞ ꠝꠥꠈꠣ ꠎꠣꠅꠞꠣ ꠃꠌꠣ-ꠘꠤꠌꠣ ꠘꠣꠟ, ꠁꠔꠣ ꠔ ꠝꠥꠀꠛ ꠖꠦꠡꠞ ꠄꠇ ꠡꠤꠝꠣꠘꠣ।”
NUM 21:16 ꠅꠈꠣꠘ ꠕꠘꠦ ꠞꠅꠀꠘꠣ ꠅꠁꠀ ꠔꠣꠞꠣ ꠛꠦꠞ ꠘꠣꠝꠞ ꠄꠇ ꠇꠥꠀꠞ ꠉꠦꠍꠦ ꠀꠁꠟꠣ। ꠅꠘꠅ ꠀꠁꠀ ꠢꠣꠞꠟꠦ ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ, “ꠔꠥꠝꠤ ꠢꠇꠟ ꠝꠣꠘꠡꠞꠦ ꠄꠇꠈꠣꠘꠅ ꠖꠟꠣ ꠇꠞꠅ, ꠀꠝꠤ ꠔꠣꠞꠣꠞꠦ ꠙꠣꠘꠤ ꠖꠤꠝꠥ।”
NUM 21:17 ꠁꠈꠣꠘ ꠢꠥꠘꠤꠀ ꠛꠘꠤ ꠁꠍꠞꠣꠁꠟꠦ ꠅꠃ ꠉꠎꠟ ꠉꠣꠁꠟ, “ꠅ ꠇꠥꠀ, ꠔꠥꠝꠣꠞ ꠙꠣꠘꠤ ꠃꠕꠟꠤꠀ ꠙꠠꠃꠇ। ꠔꠥꠝꠞꠣ ꠇꠥꠀꠞ ꠈꠣꠔꠤꠞꠦ ꠉꠎꠟ ꠉꠣꠅ।
NUM 21:18 ꠁꠇꠐꠣ ꠔ ꠢꠃ ꠡꠞ꠆ꠖꠣꠞ ꠅꠇꠟꠞ ꠇꠥꠀ, ꠞꠣꠎꠣ ꠅꠇꠟꠦ ꠔꠣꠞꠣꠞ ꠟꠣꠑꠤꠞ ꠛꠟꠦ ꠈꠥꠖꠤꠍꠂꠘ, ꠈꠣꠘ꠆ꠖꠣꠘꠤ ꠉꠟ꠆ꠟꠣꠞ ꠎꠥꠞꠦ ꠇꠞꠍꠂꠘ।” ꠛꠣꠖꠦ ꠔꠣꠞꠣ ꠝꠞꠥꠜꠥꠝꠤ ꠕꠣꠇꠤ ꠝꠔ꠆ꠔꠣꠘꠣ ꠘꠣꠝꠞ ꠎꠣꠉꠣꠔ ꠉꠦꠟꠣ।
NUM 21:19 ꠝꠔ꠆ꠔꠣꠘꠣ ꠕꠣꠇꠤ ꠘꠢꠟꠤꠄꠟ, ꠘꠢꠟꠤꠄꠟ ꠕꠣꠇꠤ ꠛꠣꠝꠥꠔ,
NUM 21:20 ꠛꠣꠝꠥꠔ ꠕꠣꠇꠤ ꠝꠥꠀꠛꠞ ꠙꠣꠠꠤꠀ ꠄꠇ ꠈꠣꠟꠞ ꠙꠣꠞꠅ ꠉꠦꠟꠣ। ꠅꠃ ꠈꠣꠟꠞ ꠇꠣꠘ꠆ꠖꠣꠞ ꠙꠤꠍꠉꠣ ꠙꠣꠠꠞ ꠃꠌꠣ ꠐꠤꠟ꠆ꠟꠣ ꠕꠣꠇꠤ ꠝꠞꠥꠜꠥꠝꠤ ꠖꠦꠈꠣ ꠎꠣꠄ।
NUM 21:21 ꠛꠘꠤ ꠁꠍꠞꠣꠁꠟꠦ ꠀꠝꠥꠞꠤ ꠅꠇꠟꠞ ꠛꠣꠖꠡꠣ ꠍꠤꠢꠥꠘꠞ ꠉꠦꠍꠦ ꠝꠣꠘꠥꠡ ꠙꠣꠑꠣꠁꠀ ꠝꠤꠘꠔ ꠇꠞꠟꠣ,
NUM 21:22 “ꠀꠝꠞꠣ ꠀꠙꠘꠣꠞ ꠖꠦꠡꠞ ꠜꠤꠔꠞꠦꠖꠤ ꠙꠣꠞ ꠅꠁ ꠎꠣꠁꠔꠣꠝ ꠌꠣꠁꠞꠣꠝ, ꠀꠝꠞꠣꠞꠦ ꠎꠣꠁꠛꠣꠞ ꠖꠤꠛꠣ ꠘꠤ? ꠀꠝꠞꠣ ꠔ ꠞꠣꠎ ꠙꠕ ꠍꠣꠠꠤꠀ ꠈꠦꠔ-ꠇꠤꠡꠤ ꠛꠣꠄ ꠛꠣ ꠀꠋꠉꠥꠞ ꠛꠣꠉꠣꠘꠦꠖꠤ ꠎꠣꠁꠔꠣꠝ ꠘꠣꠄ, ꠇꠥꠘꠥ ꠇꠥꠀꠞ ꠙꠣꠘꠤꠅ ꠈꠣꠁꠔꠣꠝ ꠘꠣꠄ। ꠀꠙꠘꠣꠞ ꠖꠦꠡꠞ ꠡꠤꠝꠣꠘꠣ ꠙꠣꠞꠘꠤꠞ ꠀꠉ ꠙꠞ꠆ꠎꠘ꠆ꠔ ꠢꠣꠝꠦꠡꠣ ꠞꠣꠎ ꠙꠕꠦꠖꠤ ꠀꠐꠣꠔ ꠞꠁꠝꠥ।”
NUM 21:23 ꠅꠁꠟꠦ ꠛꠣꠖꠡꠣ ꠍꠤꠢꠥꠘꠦ ꠔꠣꠘ ꠖꠦꠡꠞ ꠜꠤꠔꠞꠦꠖꠤ ꠔꠣꠞꠣꠞꠦ ꠎꠣꠁꠔꠦ ꠖꠤꠟꠣ ꠘꠣ। ꠔꠣꠁꠘ ꠔꠣꠘ ꠍꠤꠙꠣꠁ ꠖꠟ ꠟꠁꠀ ꠝꠞꠥꠜꠥꠝꠤꠞ ꠝꠣꠎꠦ ꠛꠘꠤ ꠁꠍꠞꠣꠁꠟꠞ ꠟꠉꠦ ꠎꠥꠖ꠆ꠖꠔ ꠛꠣꠞ ꠅꠁꠟꠣ। ꠔꠣꠁꠘ ꠁꠀꠢꠣꠎ ꠐꠣꠃꠘꠅ ꠀꠁꠀ ꠔꠣꠞꠣꠞ ꠟꠉꠦ ꠎꠥꠖ꠆ꠖ ꠟꠣꠉꠣꠁꠟꠣ।
NUM 21:24 ꠎꠥꠖ꠆ꠖꠔ ꠛꠘꠤ ꠁꠍꠞꠣꠁꠟꠦ ꠢꠃ ꠛꠣꠖꠡꠣꠞꠦ ꠔꠟꠥꠀꠞꠖꠤ ꠇꠣꠐꠤꠀ ꠅꠞꠘꠘ ꠈꠣꠟ ꠕꠣꠇꠤ ꠎꠣꠛ꠆ꠛꠥꠇ ꠈꠣꠟ ꠙꠞ꠆ꠎꠘ꠆ꠔ ꠔꠣꠞ ꠀꠡ꠆ꠔꠣ ꠖꠦꠡ ꠖꠈꠟ ꠇꠞꠤꠟꠤꠟꠣ। ꠔꠣꠞꠣ ꠛꠘꠤ-ꠀꠝ꠆ꠝꠣꠘꠞ ꠡꠤꠝꠣꠘꠣ ꠙꠞ꠆ꠎꠘ꠆ꠔ ꠢꠇꠟ ꠎꠣꠉꠣ ꠖꠈꠟ ꠇꠞꠟꠣ, ꠅꠁꠟꠦ ꠛꠘꠤ-ꠀꠝ꠆ꠝꠣꠘꠞ ꠡꠤꠝꠣꠘꠣ ꠀꠍꠤꠟ ꠈꠥꠛ ꠝꠎꠛꠥꠔ, ꠁꠈꠣꠘꠞꠦ ꠒꠤꠋꠉꠣꠁꠀ ꠎꠣꠅꠀ ꠇꠑꠤꠘ।
NUM 21:25 ꠛꠘꠤ ꠁꠍꠞꠣꠁꠟꠦ ꠢꠤꠡꠛꠘ ꠀꠞ ꠄꠞ ꠀꠡ-ꠙꠣꠡꠞ ꠉꠣꠃ-ꠉꠦꠞꠣꠝ ꠡꠥꠖ꠆ꠖꠣ ꠀꠝꠥꠞꠤ ꠅꠇꠟꠞ ꠢꠇꠟ ꠐꠣꠃꠘ ꠖꠈꠟ ꠇꠞꠤꠀ ꠢꠘꠅ ꠛꠡꠔꠤ ꠉꠣꠠꠤꠟꠣ।
NUM 21:26 ꠢꠤꠡꠛꠘ ꠀꠍꠤꠟ ꠔ ꠀꠝꠥꠞꠤ ꠛꠣꠖꠡꠣ ꠍꠤꠢꠥꠘꠞ ꠞꠣꠎꠗꠣꠘꠤ। ꠔꠣꠁꠘ ꠝꠥꠀꠛ ꠖꠦꠡꠞ ꠀꠉꠞ ꠛꠣꠖꠡꠣꠞ ꠟꠉꠦ ꠎꠥꠖ꠆ꠖ ꠇꠞꠤꠀ ꠅꠞꠘꠘ ꠈꠣꠟ ꠙꠞ꠆ꠎꠘ꠆ꠔ ꠀꠡ꠆ꠔꠣ ꠖꠦꠡ ꠖꠈꠟ ꠇꠞꠍꠤꠟꠣ।
NUM 21:27 ꠄꠞꠟꠣꠉꠤ ꠇꠛꠤ ꠅꠇꠟꠦ ꠇꠂꠘ, “ꠀꠅ ꠔꠥꠝꠞꠣ ꠢꠇꠟ, ꠢꠤꠡꠛꠘ ꠐꠣꠃꠘꠅ ꠀꠅ, ꠞꠣꠎꠣ ꠍꠤꠢꠥꠘꠞ ꠐꠣꠃꠘꠞꠦ ꠘꠄꠀ ꠇꠞꠤ ꠛꠣꠘꠣꠅ।
NUM 21:28 ꠍꠤꠢꠥꠘꠞ ꠅꠃ ꠐꠣꠃꠘ ꠕꠣꠇꠤ ꠀꠉꠥꠁꠘ ꠛꠣꠞ ꠅꠁꠀ, ꠝꠥꠀꠛꠞ ꠀꠃꠞ ꠐꠣꠃꠘꠞꠦ ꠍꠣꠞꠈꠣꠞ ꠇꠞꠟ ꠎꠣꠟꠣꠁꠀ, ꠅꠞꠘꠘ ꠈꠣꠟꠞ ꠃꠌꠣ ꠎꠣꠉꠣ ꠛꠤꠘꠣꠡ ꠅꠁꠉꠦꠟ, ꠢꠘꠞ ꠢꠇꠟ ꠑꠣꠇꠥꠞꠞꠦ ꠎꠣꠟꠣꠁꠀ ꠝꠣꠔꠤꠟ꠆ꠟ।
NUM 21:29 ꠢꠣꠄꠞꠦ ꠝꠥꠀꠛ, ꠡꠞ꠆ꠛꠘꠣꠡ! ꠅ ꠇꠝꠥꠡ-ꠖꠦꠛꠔꠣꠞ ꠜꠇ꠆ꠔ ꠅꠇꠟ ꠔꠥꠝꠞꠣ ꠔ ꠛꠤꠘꠣꠡ ꠅꠁꠉꠦꠟꠣꠄ। ꠇꠝꠥꠡꠞ ꠙꠥꠀꠂꠘ ꠜꠣꠉꠤꠀ ꠢꠞꠤꠉꠦꠍꠦ, ꠔꠣꠞ ꠙꠥꠠꠤꠘ ꠅꠇꠟ ꠛꠘ꠆ꠖꠤ ꠅꠁꠍꠦ, ꠀꠝꠥꠞꠤ ꠛꠣꠖꠡꠣ ꠍꠤꠢꠥꠘꠞ ꠀꠔꠅ ꠛꠘ꠆ꠖꠤ ꠔꠣꠞꠣ।
NUM 21:30 ꠀꠝꠞꠣꠃ ꠔ ꠔꠣꠞꠣꠞ ꠟꠉꠦ ꠎꠥꠖ꠆ꠖ ꠇꠞꠍꠤ, ꠖꠤꠛꠣꠘ ꠙꠞ꠆ꠎꠘ꠆ꠔ ꠀꠡ꠆ꠔꠣ ꠢꠤꠡꠛꠘ ꠛꠤꠘꠣꠡ ꠇꠞꠍꠤ, ꠔꠣꠞꠣꠞ ꠛꠣꠔ꠆ꠔꠤ ꠀꠝꠞꠣ ꠘꠤꠜꠣꠁꠟꠤꠍꠤ, ꠘꠥꠚꠣ ꠀꠞ ꠝꠤꠖꠦꠛꠣ ꠙꠞ꠆ꠎꠘ꠆ꠔ ꠗꠋꠡ-ꠟꠤꠟꠣ ꠌꠣꠟꠣꠁꠍꠤ।”
NUM 21:31 ꠄꠞꠛꠣꠖ ꠕꠣꠇꠤ ꠛꠘꠤ ꠁꠍꠞꠣꠁꠟꠦ ꠀꠝꠥꠞꠤ ꠅꠇꠟꠞ ꠖꠦꠡꠅ ꠛꠡꠔ ꠇꠞꠣꠔ ꠞꠁꠟꠣ।
NUM 21:32 ꠢꠎꠞꠔ ꠝꠥꠍꠣꠄ ꠎꠣꠎꠤꠞꠣ ꠐꠣꠃꠘꠅ ꠉꠥꠁꠀ ꠙꠣꠑꠣꠘꠤꠞ ꠛꠣꠖꠦ ꠛꠘꠤ ꠁꠍꠞꠣꠁꠟꠦ ꠅꠃ ꠐꠣꠃꠘꠞ ꠀꠡ-ꠙꠣꠡꠞ ꠉꠣꠃ-ꠉꠦꠞꠣꠝ ꠢꠇꠟꠔꠣ ꠖꠈꠟ ꠇꠞꠟꠣ, ꠀꠞ ꠢꠘꠞ ꠛꠣꠡꠤꠘ꠆ꠖꠣ ꠀꠝꠥꠞꠤ ꠅꠇꠟꠞꠦ ꠈꠦꠖꠣꠁ ꠖꠤꠟꠣ।
NUM 21:33 ꠛꠣꠖꠦ ꠔꠣꠞꠣ ꠚꠤꠞꠤꠀ ꠛꠣꠡꠘ ꠖꠦꠡꠞ ꠛꠣꠄ ꠞꠅꠀꠘꠣ ꠅꠁꠟꠣ। ꠔꠦꠃ ꠛꠣꠡꠘꠞ ꠛꠣꠖꠡꠣ ꠃꠎꠦ ꠔꠣꠞ ꠢꠇꠟ ꠍꠤꠙꠣꠁ ꠟꠁꠀ ꠔꠣꠞꠣꠞ ꠟꠉꠦ ꠎꠥꠖ꠆ꠖ ꠇꠞꠣꠞ ꠟꠣꠉꠤ ꠁꠖꠞꠤ ꠐꠣꠃꠘꠅ ꠀꠁꠀ ꠀꠎꠤꠟ।
NUM 21:34 ꠅꠃ ꠡꠝꠄ ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ, “ꠔꠥꠝꠤ ꠛꠣꠖꠡꠣ ꠃꠎꠞꠦ ꠒꠞꠣꠁꠅ ꠘꠣ, ꠀꠝꠤ ꠔꠣꠞꠦ, ꠔꠣꠞ ꠀꠡ꠆ꠔꠣ ꠖꠦꠡꠞꠦ ꠀꠞ ꠢꠇꠟ ꠍꠤꠙꠣꠁꠞꠦ ꠔꠥꠝꠣꠞ ꠀꠔꠅ ꠔꠥꠟꠤ ꠖꠤꠍꠤ। ꠄꠞꠟꠣꠉꠤ ꠢꠤꠡꠛꠘꠞ ꠀꠝꠥꠞꠤ ꠅꠇꠟꠞ ꠛꠣꠖꠡꠣ ꠍꠤꠢꠥꠘꠞꠦ ꠔꠥꠝꠤ ꠎꠦ ꠖꠡꠣ ꠊꠐꠣꠁꠍꠟꠣꠄ, ꠅꠉꠥꠞꠦꠅ ꠅꠟꠣ ꠇꠞꠤꠅ।”
NUM 21:35 ꠔꠦꠃ ꠔꠣꠞꠣ ꠛꠣꠖꠡꠣ ꠃꠎ, ꠔꠣꠞ ꠙꠥꠀꠂꠘ ꠀꠞ ꠢꠇꠟ ꠝꠣꠘꠡꠞꠦ ꠛꠤꠘꠣꠡ ꠇꠞꠟꠣ। ꠢꠦꠡ-ꠝꠦꠡ ꠔꠣꠞꠣ ꠇꠦꠃ ꠀꠞ ꠎꠤꠘ꠆ꠖꠣ ꠞꠁꠟ ꠘꠣ। ꠛꠘꠤ ꠁꠍꠞꠣꠁꠟꠦ ꠅꠃ ꠙꠥꠞꠣ ꠖꠦꠡ ꠖꠈꠟ ꠇꠞꠟꠣ।
NUM 22:1 ꠄꠞꠛꠣꠖꠦ ꠛꠘꠤ ꠁꠍꠞꠣꠁꠟ ꠉꠤꠀ ꠎꠤꠞꠤꠢꠅ ꠐꠣꠃꠘꠞ ꠃꠟꠐꠣꠛꠣꠄ ꠎꠞ꠆ꠖꠣꠘ ꠉꠣꠋꠉꠞ ꠗꠣꠞꠅ ꠝꠥꠀꠛ ꠖꠦꠡꠞ ꠔꠟ ꠎꠣꠉꠣꠔ ꠔꠣꠝ꠆ꠛꠥ ꠐꠣꠋꠉꠣꠁꠟꠣ।
NUM 22:2 ꠛꠘꠤ ꠁꠍꠞꠣꠁꠟꠦ ꠀꠝꠥꠞꠤ ꠅꠇꠟꠞ ꠎꠦ ꠢꠣꠟꠔ ꠇꠞꠍꠤꠟ, ꠝꠥꠀꠛ ꠖꠦꠡꠞ ꠛꠣꠖꠡꠣ ꠛꠣꠟꠣꠇ ꠛꠤꠘ ꠡꠤꠙꠣꠞꠦ ꠁꠔꠣ ꠢꠇꠟꠔꠣ ꠖꠦꠈꠍꠂꠘ।
NUM 22:3 ꠛꠘꠤ ꠁꠍꠞꠣꠁꠟꠞ ꠅꠔ ꠝꠣꠘꠥꠡ ꠖꠦꠈꠤꠀ ꠝꠥꠀꠛꠤ ꠅꠇꠟ ꠒꠞꠣꠁꠉꠦꠟꠣ। ꠀꠍꠟꠦꠃ ꠔꠣꠞꠣ ꠈꠥꠛ ꠛꠦꠡꠤ ꠊꠣꠛꠠꠤ ꠉꠦꠟꠣ।
NUM 22:4 ꠔꠣꠞꠣ ꠝꠣꠖꠤꠀꠘ ꠖꠦꠡꠞ ꠝꠥꠞꠛ꠆ꠛꠤ ꠘꠦꠔꠣ ꠅꠇꠟꠞꠦ ꠇꠁꠟꠣ, “ꠉꠞꠥꠄ ꠎꠦꠟꠣ ꠛꠘ꠆ꠖꠞ ꠈꠦꠍꠝꠣ ꠊꠣꠡꠞꠦ ꠟꠦꠁꠀ-ꠚꠥꠍꠤ ꠈꠣꠁꠟꠣꠄ, ꠅꠃ ꠖꠟꠦꠅ ꠅꠃꠟꠣ ꠀꠝꠞꠣꠞ ꠌꠣꠁꠞꠅ ꠉꠣꠟꠣꠞ ꠢꠇꠟꠔꠣ ꠟꠦꠁꠀ-ꠚꠥꠍꠤ ꠈꠣꠁꠟꠤꠛ।” ꠅꠃ ꠡꠝꠄ ꠝꠥꠀꠛ ꠖꠦꠡꠞ ꠛꠣꠖꠡꠣ ꠀꠍꠟꠣ ꠛꠣꠟꠣꠇ ꠛꠤꠘ ꠡꠤꠙꠣꠞ।
NUM 22:5 ꠛꠣꠖꠡꠣꠄ ꠒꠞꠣꠁꠀ ꠛꠣꠟꠣꠝ ꠛꠤꠘ ꠛꠣꠃꠞ ꠘꠣꠝꠞ ꠙꠤꠞ ꠍꠣꠛꠞꠦ ꠀꠘꠣꠞ ꠟꠣꠉꠤ ꠈꠛꠞꠤꠀ ꠙꠣꠑꠣꠁꠟꠣ। ꠛꠣꠟꠣꠝ ꠔ ꠅꠃ ꠡꠝꠄ ꠔꠣꠘ ꠘꠤꠎꠞ ꠖꠦꠡꠞ ꠚꠥꠞꠣꠔ ꠉꠣꠋꠉꠞ ꠙꠣꠞꠅ ꠚꠔꠥꠞ ꠐꠣꠃꠘꠅ ꠀꠍꠟꠣ। ꠛꠣꠟꠣꠇꠦ ꠈꠛꠞꠤꠀꠞꠦ ꠇꠁꠀ ꠖꠤꠟꠣ, “ꠔꠥꠝꠞꠣ ꠉꠤꠀ ꠔꠣꠘꠞꠦ ꠇꠁꠅ, ꠝꠤꠡꠞ ꠖꠦꠡ ꠕꠣꠇꠤ ꠄꠇꠖꠟ ꠝꠣꠘꠥꠡ ꠛꠣꠞ ꠅꠁꠀ ꠀꠁꠍꠦ। ꠀꠁꠀ ꠀꠡ꠆ꠔꠣ ꠎꠝꠤꠘ ꠜꠞꠤꠀ ꠈꠣꠟꠤ ꠉꠤꠍꠉꠤꠍ ꠇꠞꠞꠣ, ꠔꠣꠞꠣ ꠅꠈꠘ ꠀꠝꠣꠞ ꠍꠣꠝꠘꠦ ꠛꠡꠔ ꠇꠞꠞꠣ।
NUM 22:6 ꠁꠔꠣ ꠔ ꠀꠝꠞꠣ ꠕꠣꠇꠤ ꠛꠦꠡꠤ ꠛꠟꠛꠣꠘ। ꠄꠞꠟꠣꠉꠤ ꠀꠙꠘꠦ ꠀꠃꠇ꠆ꠇꠣ, ꠀꠁꠀ ꠅꠔꠣꠞꠦ ꠟꠣꠘ꠆ꠘꠔ ꠖꠦꠃꠇ꠆ꠇꠣ। ꠔꠦꠃ ꠀꠝꠤ ꠢꠄꠔ ꠔꠣꠞꠣꠞꠦ ꠝꠣꠞꠤꠀ ꠖꠦꠡ ꠕꠣꠇꠤ ꠈꠦꠖꠣꠁꠔꠣꠝ ꠙꠣꠞꠝꠥ। ꠀꠞ ꠀꠝꠤ ꠔ ꠎꠣꠘꠤ, ꠀꠙꠘꠦ ꠎꠣꠞꠦ ꠖꠥꠀ ꠖꠦꠁꠘ ꠢꠦ ꠑꠤꠇꠃ ꠖꠥꠀ ꠙꠣꠄ, ꠀꠞ ꠎꠣꠞꠦ ꠟꠣꠘ꠆ꠘꠔ ꠖꠦꠁꠘ ꠔꠣꠞ ꠃꠙꠞꠦ ꠢꠣꠍꠣꠃ ꠟꠣꠘ꠆ꠘꠔ ꠙꠠꠦ।”
NUM 22:7 ꠔꠦꠃ ꠝꠥꠀꠛ ꠀꠞ ꠝꠣꠖꠤꠀꠘꠞ ꠝꠥꠞꠛ꠆ꠛꠤ ꠘꠦꠔꠣ ꠅꠇꠟꠦ ꠁꠡ꠆ꠔꠦꠈꠣꠞꠣ-ꠀꠎꠤꠞꠣꠔ ꠇꠞꠣꠘꠤꠞ ꠐꠦꠇꠣ ꠟꠁꠀ ꠞꠅꠀꠘꠣ ꠅꠁꠉꠦꠟꠣ। ꠛꠣꠖꠡꠣ ꠛꠣꠟꠣꠇꠦ ꠎꠦꠟꠣ ꠢꠤꠇꠣꠁ ꠖꠤꠍꠟꠣ, ꠔꠣꠞꠣ ꠉꠤꠀ ꠛꠣꠟꠣꠝꠞ ꠉꠦꠍꠦ ꠅꠟꠣ ꠇꠁꠟꠣ।
NUM 22:8 ꠔꠦꠃ ꠛꠣꠟꠣꠝꠦ ꠔꠣꠞꠣꠞꠦ ꠇꠁꠟꠣ, “ꠔꠦ ꠀꠙꠘꠣꠞꠣ ꠀꠁꠎ ꠞꠣꠁꠔ ꠀꠝꠣꠞ ꠅꠘꠅ ꠞꠃꠇ꠆ꠇꠣ। ꠝꠣꠛꠥꠖꠦ ꠀꠝꠣꠞꠦ ꠎꠦꠔꠣ ꠎꠣꠘꠣꠁꠛꠣ, ꠀꠝꠤ ꠅꠔꠣ ꠀꠙꠘꠣꠞꠣꠞꠦ ꠎꠣꠘꠣꠁꠝꠥ।” ꠉꠔꠤꠇꠦꠃ ꠔꠣꠞꠣ ꠔꠣꠘ ꠅꠘꠅ ꠞꠁꠟꠣ।
NUM 22:9 ꠝꠣꠛꠥꠖꠦ ꠛꠣꠟꠣꠝꠞ ꠉꠦꠍꠦ ꠎꠣꠁꠞ ꠅꠁꠀ ꠎꠤꠇꠣꠁꠟꠣ, “ꠔꠥꠝꠣꠞ ꠟꠉꠦ ꠄꠞꠣ ꠇꠣꠞꠣ?”
NUM 22:10 ꠛꠣꠟꠣꠝꠦ ꠎꠥꠀꠙ ꠖꠤꠟꠣ, “ꠝꠥꠀꠛꠞ ꠛꠣꠖꠡꠣ ꠛꠣꠟꠣꠇ ꠛꠤꠘ ꠡꠤꠙꠣꠞꠦ ꠀꠝꠣꠞ ꠉꠦꠍꠦ ꠈꠛꠞꠤꠀ ꠙꠣꠑꠣꠁꠍꠂꠘ,
NUM 22:11 ꠇꠁꠍꠂꠘ, ꠝꠤꠡꠞ ꠖꠦꠡ ꠕꠣꠇꠤ ꠄꠇꠖꠟ ꠝꠣꠘꠥꠡ ꠀꠁꠀ ꠀꠡ꠆ꠔꠣ ꠖꠦꠡꠅ ꠉꠤꠍꠉꠤꠍ ꠇꠞꠞꠣ। ꠅꠈꠘ ꠀꠙꠘꠦ ꠀꠁꠀ ꠔꠣꠞꠣꠞꠦ ꠟꠣꠘ꠆ꠘꠔ ꠖꠦꠃꠇ꠆ꠇꠣ। ꠔꠦꠃ ꠀꠝꠤ ꠎꠥꠖ꠆ꠖ ꠇꠞꠤꠀ ꠔꠣꠞꠣꠞꠦ ꠛꠥꠟꠦ ꠈꠦꠖꠣꠁꠔꠣꠝ ꠙꠣꠞꠝꠥ।”
NUM 22:12 ꠅꠁꠟꠦ ꠝꠣꠛꠥꠖꠦ ꠛꠣꠟꠣꠝꠞꠦ ꠇꠁꠟꠣ, “ꠔꠥꠝꠤ ꠄꠞꠣꠞ ꠟꠉꠦ ꠎꠣꠁꠅ ꠘꠣ, ꠀꠞ ꠢꠤꠔꠣ ꠝꠣꠘꠡꠞꠦ ꠇꠥꠘꠥ ꠟꠣꠘ꠆ꠘꠔꠅ ꠖꠤꠅ ꠘꠣ। ꠝꠘꠅ ꠞꠣꠈꠤꠅ, ꠔꠣꠞꠣ ꠀꠝꠣꠞ ꠞꠢꠝ-ꠛꠞꠇꠔ ꠙꠣꠅꠀ ꠛꠘ꠆ꠖꠣ।”
NUM 22:13 ꠛꠣꠖꠞ ꠖꠤꠘ ꠛꠤꠀꠘꠦ ꠛꠣꠟꠣꠝ ꠊꠥꠝ ꠕꠣꠇꠤ ꠃꠑꠤꠀ ꠛꠣꠟꠣꠇꠞ ꠈꠛꠞꠤꠀ ꠅꠇꠟꠞꠦ ꠇꠁꠟꠣ, “ꠀꠙꠘꠣꠞꠣ ꠎꠣꠞꠎꠤꠞ ꠖꠦꠡꠅ ꠚꠤꠞꠔ ꠎꠣꠃꠇ꠆ꠇꠣꠉꠤ। ꠀꠞ ꠝꠣꠛꠥꠖꠦ ꠀꠝꠣꠞꠦ ꠝꠣꠘꠣ ꠇꠞꠍꠂꠘ, ꠀꠙꠘꠣꠞꠣꠞ ꠟꠉꠦ ꠘꠣ ꠎꠣꠅꠀꠞ ꠟꠣꠉꠤ।”
NUM 22:14 ꠔꠦꠃ ꠝꠥꠀꠛꠤ ꠘꠦꠔꠣ ꠅꠇꠟꠦ ꠚꠤꠞꠤꠀ ꠉꠤꠀ ꠛꠣꠖꠡꠣ ꠛꠣꠟꠣꠇꠞꠦ ꠇꠁꠟꠣ, “ꠛꠣꠟꠣꠝ ꠔ ꠀꠝꠞꠣꠞ ꠟꠉꠦ ꠀꠁꠔꠦ ꠞꠣꠎꠤ ꠅꠁꠍꠂꠘ ꠘꠣ।”
NUM 22:15 ꠅꠈꠣꠘ ꠢꠥꠘꠤꠀ ꠛꠣꠟꠣꠇꠦ ꠄꠞꠣꠞ ꠌꠣꠁꠔꠦ ꠀꠞꠅ ꠛꠦꠡꠤ, ꠀꠞꠅ ꠁꠎ꠆ꠎꠔꠤ ꠘꠦꠔꠣ ꠅꠇꠟꠞꠦ ꠙꠣꠑꠣꠁꠟꠣ।
NUM 22:16 ꠔꠣꠞꠣ ꠉꠤꠀ ꠛꠣꠟꠣꠝꠞꠦ ꠇꠁꠟꠣ, “ꠛꠣꠖꠡꠣ ꠛꠣꠟꠣꠇ ꠛꠤꠘ ꠡꠤꠙꠣꠞꠦ ꠇꠁꠍꠂꠘ, ꠀꠙꠘꠦ ꠔꠣꠘ ꠉꠦꠍꠦ ꠎꠣꠁꠔꠦ ꠇꠥꠘꠥꠎꠣꠔꠞ ꠇꠥꠘꠥ ꠛꠣꠗꠣ ꠝꠣꠘꠔꠣ ꠘꠣ।
NUM 22:17 ꠔꠣꠁꠘ ꠀꠙꠘꠣꠞꠦ ꠛꠃꠔ ꠁꠎ꠆ꠎꠔ-ꠛꠈꠡꠤꠡ ꠖꠤꠛꠣ, ꠀꠞ ꠀꠙꠘꠦ ꠎꠦꠟꠣ ꠇꠁꠛꠣ, ꠔꠣꠁꠘ ꠅꠟꠣꠃ ꠇꠞꠛꠣ। ꠈꠣꠟꠤ ꠀꠙꠘꠦ ꠎꠣꠘꠥ ꠔꠣꠘ ꠙꠇ꠆ꠇ ꠟꠁꠀ ꠅꠔꠣ ꠝꠣꠘꠡꠞꠦ ꠟꠣꠘ꠆ꠘꠔ ꠖꠦꠁꠘ, ꠔꠣꠁꠘ ꠅꠈꠣꠘꠃ ꠌꠣꠁꠞꠣ।”
NUM 22:18 ꠛꠣꠟꠣꠝꠦ ꠎꠥꠀꠙ ꠖꠤꠟꠣ, “ꠛꠣꠖꠡꠣ ꠛꠣꠟꠣꠇꠦ ꠎꠥꠖꠤ ꠔꠣꠘ ꠡꠥꠘꠣ-ꠞꠥꠙꠣꠄ ꠜꠞꠣ ꠞꠣꠎꠛꠣꠠꠤ ꠈꠣꠘꠅ ꠀꠝꠣꠞꠦ ꠖꠤꠟꠣꠁꠘ, ꠔꠣ-ꠅ ꠀꠝꠣꠞ ꠝꠣꠛꠥꠖꠞ ꠢꠥꠇꠥꠝꠞ ꠃꠟꠐꠣ ꠉꠤꠀ ꠀꠝꠤ ꠄꠇꠈꠣꠘ ꠇꠣꠝꠅ ꠇꠞꠔꠣꠝ ꠘꠣꠄ, ꠁꠔꠣ ꠢꠥꠞꠥ ꠇꠣꠝ ꠅꠃꠇ ꠛꠣ ꠛꠠ ꠇꠣꠝ ꠅꠃꠇ।
NUM 22:19 ꠅꠁꠟꠦ ꠀꠙꠘꠣꠞꠣꠅ ꠀꠉꠞ ꠄꠞꠣꠞ ꠟꠣꠈꠣꠘ ꠀꠁꠎꠇꠥꠞ ꠞꠣꠁꠔ ꠈꠣꠘ ꠅꠘꠅ ꠇꠣꠐꠣꠁ ꠟꠣꠃꠇ꠆ꠇꠣ। ꠀꠝꠤ ꠖꠦꠈꠤ, ꠝꠣꠛꠥꠖꠦ ꠀꠝꠣꠞꠦ ꠘꠄꠀ ꠇꠥꠘ꠆ꠔꠣ ꠇꠂꠘ ꠘꠤ।”
NUM 22:20 ꠢꠃ ꠞꠣꠁꠔ ꠀꠟ꠆ꠟꠣꠄ ꠎꠣꠁꠞ ꠅꠁꠀ ꠛꠣꠟꠣꠝꠞꠦ ꠇꠁꠟꠣ, “ꠄꠞꠣ ꠎꠦꠛꠟꠣ ꠔꠥꠝꠣꠞꠦ ꠘꠦꠅꠀꠔ ꠀꠁꠍꠦ, ꠔꠦ ꠔꠥꠝꠤ ꠔꠣꠞꠣꠞ ꠟꠉꠦ ꠎꠣꠅ। ꠉꠦꠟꠦ ꠀꠝꠤ ꠔꠥꠝꠣꠞꠦ ꠎꠦꠟꠣ ꠇꠁꠝꠥ, ꠔꠥꠝꠤ ꠈꠣꠟꠤ ꠅꠟꠣꠃ ꠇꠞꠤꠅ।”
NUM 22:21 ꠛꠣꠖꠞ ꠖꠤꠘ ꠛꠤꠀꠘꠦ ꠛꠣꠟꠣꠝ ꠙꠤꠞ ꠊꠥꠝ ꠕꠣꠇꠤ ꠃꠑꠤꠀ ꠔꠣꠘ ꠉꠣꠗꠤꠞ ꠃꠙꠞꠦ ꠉꠖꠤ ꠛꠤꠍꠣꠁꠀ ꠝꠥꠀꠛꠤ ꠘꠦꠔꠣ ꠅꠇꠟꠞ ꠟꠉꠦ ꠞꠅꠀꠘꠣ ꠅꠁꠟꠣ।
NUM 22:22 ꠔꠣꠘ ꠎꠣꠅꠀ ꠖꠦꠈꠤꠀ ꠀꠟ꠆ꠟꠣ ꠙꠣꠇ ꠔꠣꠘ ꠃꠙꠞꠦ ꠉꠥꠍꠣꠄ ꠀꠉꠥꠁꠘ ꠅꠁꠉꠦꠟꠣ। ꠔꠣꠘꠞꠦ ꠛꠣꠗꠣ ꠖꠤꠛꠣꠞ ꠈꠤꠀꠟꠦ ꠀꠟ꠆ꠟꠣꠞ ꠚꠤꠞꠤꠡ꠆ꠔꠣꠄ ꠙꠕ ꠀꠃꠉꠟꠤꠀ ꠃꠛꠣꠁ ꠞꠁꠟꠣ। ꠛꠣꠟꠣꠝ ꠔ ꠉꠣꠗꠤꠞ ꠃꠙꠞꠦ ꠌꠠꠤꠀ ꠎꠣꠁꠞꠣ, ꠔꠣꠘ ꠖꠥꠁꠎꠘ ꠌꠣꠇꠞ ꠔꠣꠘ ꠟꠉꠦ ꠀꠍꠤꠟ।
NUM 22:23 ꠝꠣꠛꠥꠖꠞ ꠚꠤꠞꠤꠡ꠆ꠔꠣꠄ ꠔꠟꠥꠀꠞ ꠀꠔꠅ ꠟꠁꠀ, ꠙꠕꠞ ꠝꠣꠎꠦ ꠃꠛꠣꠁ ꠞꠁꠍꠂꠘ ꠖꠦꠈꠤꠀ, ꠉꠣꠗꠤꠐꠣ ꠙꠕ ꠍꠣꠠꠤꠀ ꠎꠝꠤꠘꠦꠖꠤ ꠟꠣꠝꠤ ꠉꠦꠟ। ꠉꠣꠗꠤꠞꠦ ꠢꠤꠞꠛꠣꠞ ꠙꠕꠅ ꠔꠥꠟꠣꠞ ꠟꠣꠉꠤ ꠛꠣꠟꠣꠝꠦ ꠔꠣꠁꠞꠦ ꠝꠣꠁꠞ-ꠗꠁꠞ ꠇꠞꠟꠣ।
NUM 22:24 ꠛꠣꠖꠦ ꠝꠣꠛꠥꠖꠞ ꠚꠤꠞꠤꠡ꠆ꠔꠣ ꠎꠝꠤꠘꠞ ꠀꠋꠉꠥꠞ ꠛꠣꠉꠣꠘꠞ ꠖꠥꠁ ꠈꠦꠔꠞ ꠝꠣꠎꠞ ꠀꠁꠟꠞ ꠃꠙꠞꠦ ꠃꠛꠣꠁ ꠞꠁꠟꠣ। ꠀꠁꠟꠞ ꠖꠥꠁꠅ ꠉꠣꠟꠣꠛꠣꠄ ꠙꠣꠇꠣ ꠅꠀꠟ ꠖꠦꠅꠀ ꠀꠍꠤꠟ।
NUM 22:25 ꠝꠣꠛꠥꠖꠞ ꠚꠤꠞꠤꠡ꠆ꠔꠣꠞꠦ ꠖꠦꠈꠤꠀ ꠉꠣꠗꠤꠄ ꠅꠀꠟꠞ ꠉꠣꠟꠣꠛꠣꠄ ꠊꠦꠡꠤꠀ ꠉꠦꠟ। ꠄꠞꠖꠣꠄ ꠛꠣꠟꠣꠝꠞ ꠄꠇ ꠙꠣꠅ-ꠅ ꠈꠥꠛ ꠊꠡꠣ ꠟꠣꠉꠟ। ꠔꠦꠃ ꠔꠣꠁꠘ ꠢꠤꠞꠛꠣꠞ ꠉꠣꠗꠤꠞꠦ ꠝꠣꠞꠟꠣ।
NUM 22:26 ꠄꠞꠛꠣꠖꠦ ꠝꠣꠛꠥꠖꠞ ꠚꠤꠞꠤꠡ꠆ꠔꠣ ꠀꠉꠥꠀꠁꠀ ꠉꠤꠀ ꠙꠕꠞ ꠝꠣꠎꠞ ꠅꠟꠣ ꠄꠇ ꠌꠤꠙꠣ ꠎꠣꠉꠣꠔ ꠃꠛꠣꠁꠟꠣ, ꠎꠦꠘꠅ ꠒꠣꠁꠘꠦ-ꠛꠣꠃꠄ ꠇꠥꠘꠥꠛꠣꠄ ꠢꠞꠣꠞ ꠃꠙꠣꠄ ꠘꠣꠁ।
NUM 22:27 ꠝꠣꠛꠥꠖꠞ ꠚꠤꠞꠤꠡ꠆ꠔꠣꠞꠦ ꠖꠦꠈꠤꠀ ꠉꠣꠗꠤꠄ ꠛꠣꠟꠣꠝꠞꠦ ꠟꠁꠀ ꠝꠣꠐꠤꠔ ꠢꠥꠔꠤ ꠉꠦꠟ। ꠔꠦꠃ ꠛꠣꠟꠣꠝ ꠀꠞꠅ ꠉꠞꠝ ꠅꠁꠀ ꠟꠣꠑꠤ ꠖꠤꠀ ꠉꠣꠗꠤꠞꠦ ꠝꠣꠞꠟꠣ।
NUM 22:28 ꠅꠃ ꠡꠝꠄ ꠝꠣꠛꠥꠖꠦ ꠉꠣꠗꠤꠞ ꠝꠥꠈꠞ ꠎꠛꠣꠘ ꠈꠥꠟꠤ ꠖꠤꠟꠣ। ꠔꠣꠁ ꠛꠣꠟꠣꠝꠞꠦ ꠇꠁꠟ, “ꠀꠝꠤ ꠀꠙꠘꠣꠞꠦ ꠇꠤꠔꠣ ꠇꠞꠍꠤ, ꠀꠙꠘꠦ ꠔꠤꠘ-ꠔꠤꠘꠛꠣꠞ ꠀꠝꠣꠞꠦ ꠝꠣꠞꠟꠣ?”
NUM 22:29 ꠛꠣꠟꠣꠝꠦ ꠉꠣꠗꠤꠞꠦ ꠇꠁꠟꠣ, “ꠔꠥꠁ ꠀꠝꠣꠞꠦ ꠀꠃꠀ ꠛꠣꠘꠣꠁꠀ ꠈꠦꠁꠠ ꠈꠦꠟꠣꠁꠞꠦ ꠘꠤ? ꠢꠥꠘ, ꠀꠝꠣꠞ ꠀꠔꠅ ꠎꠥꠖꠤ ꠄꠇꠈꠣꠘ ꠔꠟꠥꠀꠞ ꠕꠣꠇꠔ, ꠔꠦ ꠔꠞꠦ ꠍꠦꠖ ꠝꠣꠞꠤ ꠅꠈꠘꠃ ꠇꠣꠐꠤꠟ꠆ꠟꠣꠝ ꠅꠘꠦ।”
NUM 22:30 ꠉꠣꠗꠤꠄ ꠛꠣꠟꠣꠝꠞꠦ ꠇꠁꠟ, “ꠀꠝꠤ ꠀꠙꠘꠣꠞ ꠢꠃ ꠉꠣꠗꠤ ꠘꠣꠄ ꠘꠤ, ꠎꠦꠉꠥꠞ ꠃꠙꠞꠦ ꠀꠙꠘꠦ ꠢꠣꠞꠣ ꠎꠘꠝ ꠗꠞꠤ ꠌꠠꠤꠀ ꠀꠁꠞꠣ, ꠀꠞ ꠀꠙꠘꠣꠞ ꠟꠉꠦ ꠀꠝꠤ ꠇꠥꠘꠥꠖꠤꠘ ꠁꠟꠣ ꠇꠞꠍꠤ ꠘꠤ?” ꠛꠣꠟꠣꠝꠦ ꠇꠁꠟꠣ, “ꠘꠣ, ꠁꠟꠣ ꠇꠞꠍꠔ ꠘꠣ।”
NUM 22:31 ꠄꠞꠛꠣꠖꠦ ꠝꠣꠛꠥꠖꠦ ꠛꠣꠟꠣꠝꠞ ꠌꠃꠈ ꠈꠥꠟꠤꠀ ꠖꠤꠟꠣ, ꠔꠣꠁꠘ ꠖꠦꠈꠟꠣ, ꠝꠣꠛꠥꠖꠞ ꠚꠤꠞꠤꠡ꠆ꠔꠣꠄ ꠔꠟꠥꠀꠞ ꠟꠁꠀ ꠙꠕ ꠛꠘ꠆ꠖ ꠇꠞꠤ ꠃꠛꠣꠁ ꠞꠁꠍꠂꠘ। ꠖꠦꠈꠤꠀ ꠔꠣꠁꠘ ꠝꠣꠕꠣ ꠘꠥꠀꠁꠀ ꠘꠣꠇ-ꠇꠙꠣꠟ ꠝꠣꠐꠤꠔ ꠟꠣꠉꠣꠁꠟꠣ।
NUM 22:32 ꠔꠦꠃ ꠝꠣꠛꠥꠖꠞ ꠚꠤꠞꠤꠡ꠆ꠔꠣꠄ ꠔꠣꠘꠞꠦ ꠎꠤꠇꠣꠁꠟꠣ, “ꠔꠥꠝꠣꠞ ꠉꠣꠗꠤꠞꠦ ꠇꠦꠘꠦ ꠔꠤꠘ-ꠔꠤꠘꠛꠣꠞ ꠝꠣꠞꠟꠣꠄ? ꠔꠥꠝꠤ ꠀꠝꠣꠞ ꠍꠣꠝꠘꠦ ꠀꠝꠣꠞ ꠛꠤꠞꠥꠖ꠆ꠖꠦ ꠇꠣꠝ ꠇꠞꠣꠔ ꠎꠣꠁꠞꠣꠄꠉꠤ ꠖꠦꠈꠤꠀ, ꠀꠝꠤ ꠔꠥꠝꠣꠞꠦ ꠀꠐꠇꠣꠁꠛꠣꠞ ꠟꠣꠉꠤ ꠅꠘꠅ ꠀꠁꠍꠤ।
NUM 22:33 ꠔꠥꠝꠣꠞ ꠉꠣꠗꠤꠄ ꠀꠝꠣꠞꠦ ꠖꠦꠈꠤꠀ ꠔꠤꠘ-ꠔꠤꠘꠛꠣꠞ ꠢꠞꠤꠀ ꠉꠦꠍꠦꠉꠤ। ꠔꠣꠁ ꠎꠥꠖꠤ ꠘꠣ ꠢꠞꠔ, ꠔꠦ ꠀꠝꠤ ꠔꠥꠝꠣꠞꠦ ꠝꠣꠞꠤꠟ꠆ꠟꠣꠝ ꠅꠘꠦ, ꠀꠞ ꠔꠣꠁꠞꠦ ꠛꠣꠌꠣꠁ ꠞꠣꠈꠟꠣꠝ ꠅꠘꠦ।”
NUM 22:34 ꠅꠃ ꠡꠝꠄ ꠛꠣꠟꠣꠝꠦ ꠝꠣꠛꠥꠖꠞ ꠚꠤꠞꠤꠡ꠆ꠔꠣꠞꠦ ꠇꠁꠟꠣ, “ꠀꠝꠤ ꠔ ꠉꠥꠘꠣ ꠇꠞꠍꠤ। ꠀꠍꠟꠦ ꠀꠝꠤ ꠛꠥꠎꠍꠤ ꠘꠣ, ꠀꠙꠘꠦ ꠀꠝꠣꠞꠦ ꠀꠐꠇꠣꠁꠛꠣꠞ ꠟꠣꠉꠤ ꠙꠕꠅ ꠃꠛꠣꠔ ꠀꠍꠂꠘ। ꠔꠦ ꠀꠙꠘꠦ ꠘꠣꠞꠣꠎ ꠅꠁꠟꠦ ꠀꠝꠤ ꠚꠤꠞꠤꠀ ꠎꠣꠁꠝꠥꠉꠤ।”
NUM 22:35 ꠝꠣꠛꠥꠖꠞ ꠚꠤꠞꠤꠡ꠆ꠔꠣꠄ ꠛꠣꠟꠣꠝꠞꠦ ꠇꠁꠟꠣ, “ꠑꠤꠇ ꠀꠍꠦ, ꠔꠥꠝꠤ ꠅꠔꠣ ꠝꠣꠘꠡꠞ ꠟꠉꠦ ꠎꠣꠅ। ꠅꠁꠟꠦ ꠀꠝꠤ ꠔꠥꠝꠣꠞꠦ ꠎꠦꠟꠣ ꠢꠤꠇꠣꠁ ꠖꠤꠝꠥ, ꠔꠥꠝꠤ ꠈꠣꠟꠤ ꠅꠟꠣꠃ ꠇꠁꠛꠣꠄ।” ꠔꠦꠃ ꠛꠣꠖꠡꠣ ꠛꠣꠟꠣꠇꠞ ꠙꠣꠑꠣꠁꠟ ꠘꠦꠔꠣ ꠅꠇꠟꠞ ꠟꠉꠦ ꠛꠣꠟꠣꠝ ꠙꠤꠞ ꠌꠟꠣꠔ ꠞꠁꠟꠣ।
NUM 22:36 ꠛꠣꠟꠣꠝ ꠙꠤꠞꠞ ꠀꠅꠀꠞ ꠈꠛꠞ ꠢꠥꠘꠤꠀ, ꠔꠣꠘꠞꠦ ꠀꠉꠥꠀꠁꠀ ꠀꠘꠣꠞ ꠟꠣꠉꠤ ꠛꠣꠖꠡꠣ ꠛꠣꠟꠣꠇ ꠅꠞꠘꠘ ꠈꠣꠟꠞ ꠙꠣꠞꠅ ꠝꠥꠀꠛ ꠖꠦꠡꠞ ꠄꠇ ꠐꠣꠃꠘꠅ ꠉꠦꠟꠣ। ꠁ ꠐꠣꠃꠘ ꠀꠍꠤꠟ ꠔꠣꠘ ꠖꠦꠡꠞ ꠢꠦꠡ ꠡꠤꠝꠣꠘꠣꠔ।
NUM 22:37 ꠛꠣꠖꠡꠣ ꠛꠣꠟꠣꠇꠦ ꠛꠣꠟꠣꠝ ꠙꠤꠞꠞꠦ ꠇꠁꠟꠣ, “ꠀꠝꠤ ꠔ ꠀꠙꠘꠣꠞꠦ ꠎꠞꠥꠞꠤ ꠔꠟꠛ ꠇꠞꠟꠣꠝ। ꠔꠦ ꠀꠙꠘꠦ ꠇꠦꠘꠦ ꠙꠄꠟꠣ ꠛꠣꠞ ꠀꠁꠟꠣ ꠘꠣ? ꠀꠙꠘꠣꠞꠦ ꠎꠁꠉ꠆ꠉ ꠛꠈꠡꠤꠡ ꠖꠤꠛꠣꠞ ꠈꠦꠝꠔꠣ ꠇꠥꠘꠥ ꠀꠝꠣꠞ ꠘꠣꠁ ꠘꠤ?”
NUM 22:38 ꠛꠣꠟꠣꠝꠦ ꠎꠥꠀꠙ ꠖꠤꠟꠣ, “ꠀꠝꠤ ꠅꠈꠘ ꠀꠙꠘꠣꠞ ꠉꠦꠍꠦ ꠀꠁꠍꠤ। ꠅꠁꠟꠦ ꠀꠝꠣꠞ ꠘꠤꠎꠞ ꠇꠥꠘꠥ ꠝꠣꠔ ꠝꠣꠔꠣꠞ ꠡꠣꠁꠖ꠆ꠖ ꠘꠣꠁ। ꠈꠣꠟꠤ ꠀꠟ꠆ꠟꠣꠄ ꠀꠝꠣꠞꠦꠖꠤ ꠎꠦꠔꠣ ꠇꠅꠀꠁꠛꠣ, ꠀꠝꠤ ꠈꠣꠟꠤ ꠅꠈꠣꠘꠃ ꠇꠁꠝꠥ।”
NUM 22:39 ꠄꠞꠛꠣꠖꠦ ꠛꠣꠟꠣꠇ ꠛꠣꠖꠡꠣꠞ ꠟꠉꠦ ꠅꠁꠀ ꠛꠣꠟꠣꠝ ꠙꠤꠞ ꠇꠤꠞꠤꠅꠔ-ꠢꠥꠍꠥꠔ ꠉꠣꠃꠔ ꠉꠦꠟꠣ।
NUM 22:40 ꠉꠤꠀ ꠛꠣꠖꠡꠣ ꠛꠣꠟꠣꠇꠦ ꠉꠞꠥ ꠀꠞ ꠝꠦꠠꠣ ꠇꠥꠞꠛꠣꠘꠤ ꠖꠤꠀ ꠇꠤꠍꠥ ꠉꠥꠡ꠆ꠔ ꠛꠣꠟꠣꠝ ꠙꠤꠞꠞꠦ ꠀꠞ ꠔꠣꠘ ꠟꠉꠞ ꠢꠃ ꠘꠦꠔꠣ ꠅꠇꠟꠞꠦ ꠖꠤꠟꠣ।
NUM 22:41 ꠛꠣꠖꠞ ꠖꠤꠘ ꠛꠤꠀꠘꠦ ꠛꠣꠖꠡꠣ ꠛꠣꠟꠣꠇꠦ ꠅꠃ ꠛꠣꠟꠣꠝꠞꠦ ꠟꠁꠀ ꠛꠣꠝꠥꠔ-ꠛꠣꠀꠟ ꠙꠣꠠꠅ ꠉꠦꠟꠣ। ꠢꠘꠅ ꠃꠛꠣꠁꠀ ꠛꠣꠟꠣꠝꠦ ꠛꠘꠤ ꠁꠍꠞꠣꠁꠟꠞ ꠄꠇ ꠅꠋꠡꠞꠦ ꠖꠦꠈꠟꠣ।
NUM 23:1 ꠀꠞ ꠅꠃ ꠛꠤꠀꠘꠇꠥ ꠛꠣꠟꠣ ꠛꠣꠟꠣꠝ ꠙꠤꠞꠦ ꠛꠣꠟꠣꠇ ꠛꠣꠖꠡꠣꠞꠦ ꠇꠁꠟꠣ, “ꠀꠙꠘꠦ ꠀꠝꠣꠞ ꠟꠣꠉꠤ ꠡꠣꠔꠈꠣꠘ ꠇꠥꠞꠛꠣꠘꠤ ꠈꠣꠘꠣ ꠛꠣꠘꠣꠃꠇ꠆ꠇꠣ, ꠛꠣꠘꠣꠁꠀ ꠇꠥꠞꠛꠣꠘꠤꠞ ꠟꠣꠉꠤ ꠡꠣꠔꠉꠥ ꠛꠤꠍꠣꠟ ꠀꠞ ꠡꠣꠔꠉꠥ ꠝꠦꠠꠣ ꠎꠥꠉꠣꠁ ꠖꠦꠃꠇ꠆ꠇꠣ।”
NUM 23:2 ꠛꠣꠟꠣꠝꠞ ꠇꠕꠣꠝꠔꠃ ꠛꠣꠟꠣꠇꠦ ꠅꠟꠣ ꠇꠞꠟꠣ, ꠇꠞꠤꠀ ꠖꠥꠁꠅꠎꠘꠦ ꠝꠤꠟꠤꠀ ꠙꠞꠔꠦꠇ ꠇꠥꠞꠛꠣꠘꠤ ꠈꠣꠘꠣꠞ ꠃꠙꠞꠦ ꠄꠉꠥ ꠇꠞꠤ ꠛꠤꠍꠣꠟ ꠀꠞ ꠄꠉꠥ ꠇꠞꠤ ꠝꠦꠠꠣ ꠇꠥꠞꠛꠣꠘꠤ ꠖꠤꠟꠣ।
NUM 23:3 ꠄꠞꠛꠣꠖꠦ ꠛꠣꠟꠣꠝ ꠙꠤꠞꠦ ꠛꠣꠟꠣꠇꠞꠦ ꠇꠁꠟꠣ, “ꠀꠙꠘꠣꠞ ꠇꠥꠞꠛꠣꠘꠤ ꠖꠦꠅꠀ ꠅꠃ ꠙꠡꠥꠞ ꠇꠣꠍꠣꠔ ꠀꠙꠘꠦ ꠞꠃꠇ꠆ꠇꠣ। ꠀꠝꠤ ꠕꠥꠠꠣ ꠢꠞꠤꠀ ꠎꠣꠁꠞꠣꠝ, ꠅꠁꠔ ꠙꠣꠞꠦ ꠝꠣꠛꠥꠖꠦ ꠀꠝꠣꠞꠦ ꠖꠞꠡꠘ ꠖꠤꠛꠣ। ꠔꠣꠁꠘ ꠀꠝꠣꠞꠦ ꠎꠦꠔꠣ ꠎꠣꠘꠣꠁꠛꠣ, ꠀꠝꠤ ꠀꠁꠀ ꠀꠙꠘꠣꠞꠦ ꠇꠁꠝꠥꠘꠦ।” ꠅꠈꠣꠘ ꠇꠁꠀ ꠛꠣꠟꠣꠝ ꠙꠤꠞ ꠉꠤꠀ ꠙꠣꠠꠞ ꠢꠇꠟ ꠕꠣꠇꠤ ꠃꠌꠣ ꠐꠤꠟ꠆ꠟꠣꠞ ꠃꠙꠞꠦ ꠃꠑꠤꠟꠣ।
NUM 23:4 ꠅꠃ ꠡꠝꠄ ꠝꠣꠛꠥꠖꠦ ꠔꠣꠘꠞꠦ ꠖꠞꠡꠘ ꠖꠤꠟꠣ। ꠛꠣꠟꠣꠝ ꠙꠤꠞꠦ ꠝꠣꠛꠥꠖꠞꠦ ꠇꠁꠟꠣ, “ꠅ ꠝꠣꠛꠥꠖ, ꠔꠥꠝꠤ ꠔ ꠖꠦꠈꠞꠣꠄ, ꠀꠝꠤ ꠡꠣꠔꠈꠣꠘ ꠇꠥꠞꠛꠣꠘꠤ ꠈꠣꠘꠣ ꠛꠣꠘꠣꠁꠍꠤ ꠀꠞ ꠙꠞꠔꠦꠇ ꠇꠥꠞꠛꠣꠘꠤ ꠈꠣꠘꠣꠞ ꠃꠙꠞꠦ ꠄꠉꠥ ꠇꠞꠤ ꠛꠤꠍꠣꠟ ꠀꠞ ꠄꠉꠥ ꠇꠞꠤ ꠝꠦꠠꠣ ꠇꠥꠞꠛꠣꠘꠤ ꠖꠤꠍꠤ।”
NUM 23:5 ꠔꠦꠃ ꠝꠣꠛꠥꠖꠦ ꠛꠣꠟꠣꠝ ꠙꠤꠞꠞꠦ ꠄꠇ ꠛꠥꠟꠤ ꠢꠤꠇꠣꠁ ꠖꠤꠟꠣ, ꠖꠤꠀ ꠇꠁꠟꠣ, “ꠔꠥꠝꠤ ꠉꠤꠀ ꠛꠣꠟꠣꠇ ꠛꠣꠖꠡꠣꠞꠦ ꠅꠔꠣ ꠇꠁꠅ।”
NUM 23:6 ꠔꠦꠃ ꠛꠣꠟꠣꠝ ꠙꠤꠞꠦ ꠝꠥꠀꠛ ꠖꠦꠡꠞ ꠛꠣꠖꠡꠣ ꠛꠣꠟꠣꠇꠞ ꠉꠦꠍꠦ ꠚꠤꠞꠤꠀ ꠀꠁꠀ ꠖꠦꠈꠟꠣ, ꠛꠣꠖꠡꠣ ꠛꠣꠟꠣꠇꠦ ꠝꠥꠀꠛ ꠖꠦꠡꠞ ꠢꠇꠟ ꠝꠥꠞꠛ꠆ꠛꠤ ꠘꠦꠔꠣꠞꠦ ꠟꠁꠀ ꠔꠣꠘ ꠇꠥꠞꠛꠣꠘꠤ ꠇꠞꠣ ꠙꠡꠥꠞ ꠅꠘꠅ ꠃꠛꠣꠁ ꠞꠁꠍꠂꠘ।
NUM 23:7 ꠅꠃ ꠡꠝꠄ ꠛꠣꠟꠣꠝ ꠙꠤꠞꠦ ꠀꠟ꠆ꠟꠣꠞ ꠢꠤꠇꠣꠁꠀ ꠖꠦꠅꠀ ꠅꠃ ꠛꠥꠟꠤ ꠢꠇꠟ ꠢꠥꠘꠣꠁꠟꠣ, ꠇꠁꠟꠣ, “ꠡꠤꠞꠤꠀ ꠖꠦꠡ ꠕꠣꠇꠤ ꠛꠣꠟꠣꠇꠦ ꠀꠝꠣꠞꠦ ꠀꠘꠣꠁꠍꠂꠘ, ꠙꠥꠛꠞ ꠙꠣꠠ ꠅꠇꠟꠞ ꠗꠣꠞꠅ ꠕꠣꠇꠤ ꠝꠥꠀꠛꠞ ꠛꠣꠖꠡꠣ ꠛꠣꠟꠣꠇꠦꠃ ꠝꠞꠦ ꠎꠥꠉꠣꠁꠍꠂꠘ। ꠎꠥꠉꠣꠁꠀ ꠇꠁꠟꠣ, ꠀꠝꠣꠞ ꠙꠇ꠆ꠇ ꠟꠁꠀ ꠁꠀꠇꠥꠛꠞ ꠀꠅꠟꠣꠖ ꠛꠘꠤ ꠁꠍꠞꠣꠁꠟꠞꠦ ꠟꠣꠘ꠆ꠘꠔ ꠖꠦꠃꠇ꠆ꠇꠣ, ꠅꠔꠣꠞꠦ ꠛꠖ꠆ꠖꠥꠀ ꠖꠦꠃꠇ꠆ꠇꠣ।
NUM 23:8 ꠅꠁꠟꠦ ꠀꠟ꠆ꠟꠣꠄ ꠟꠣꠘ꠆ꠘꠔ ꠖꠤꠍꠂꠘ ꠘꠣ ꠎꠣꠞꠦ, ꠀꠝꠤ ꠇꠤꠟꠣꠘ ꠖꠤꠝꠥ ꠟꠣꠘ꠆ꠘꠔ ꠔꠣꠞꠦ? ꠝꠣꠛꠥꠖꠦ ꠈꠦꠔꠤ ꠇꠞꠣꠞ ꠇꠕꠣ ꠘꠣ ꠇꠞꠍꠂꠘ ꠎꠣꠞ, ꠀꠝꠤ ꠇꠤꠟꠣꠘ ꠈꠦꠔꠤꠞ ꠇꠕꠣ ꠇꠁꠔꠣꠝ ꠔꠣꠞ?
NUM 23:9 ꠖꠦꠈꠍꠤ ꠀꠝꠤ ꠔꠣꠞꠣꠞꠦ ꠃꠌꠣ ꠐꠤꠟ꠆ꠟꠣ ꠕꠣꠇꠤ, ꠔꠣꠞꠣꠞ ꠛꠣꠄꠖꠤ ꠌꠣꠁꠍꠤ ꠔ ꠙꠣꠠꠞ ꠌꠥꠠꠣ ꠕꠣꠇꠤ, ꠖꠦꠈꠟꠣꠝ ꠀꠝꠤ ꠄꠞꠣ ꠅꠁꠟꠣ ꠅꠟꠣ ꠄꠇ ꠎꠣꠔꠤ, ꠔꠣꠞꠣ ꠞꠂꠘ ꠀꠟꠉ ꠅꠁꠀ ꠛꠣꠇꠤ ꠢꠇꠟ ꠕꠣꠇꠤ।
NUM 23:10 ꠁꠀꠇꠥꠛꠞ ꠀꠅꠟꠣꠖ ꠖꠦꠈꠤ ꠛꠣꠟꠥꠞ ꠖꠣꠘꠣꠞ ꠝꠔ, ꠉꠘꠤꠀ ꠚꠥꠠꠣꠁꠔ ꠔꠣꠞꠦ ꠇꠣꠞ ꠀꠍꠦ ꠡꠣꠁꠖ꠆ꠖ? ꠝꠞꠘ ꠎꠣꠘꠥ ꠅꠄ ꠀꠝꠣꠞ ꠘꠦꠇꠇꠣꠞ ꠅꠃ ꠖꠟꠞ ꠟꠣꠈꠣꠘ ꠀꠈꠦꠞꠣꠔꠅ ꠅꠃꠇ ꠝꠞ ꠔꠣꠞꠣꠞꠃ ꠟꠣꠈꠣꠘ।”
NUM 23:11 ꠁꠈꠣꠘ ꠢꠥꠘꠤꠀ ꠛꠣꠖꠡꠣ ꠛꠣꠟꠣꠇꠦ ꠛꠣꠟꠣꠝꠞꠦ ꠇꠁꠟꠣ, “ꠀꠙꠘꠦ ꠁꠔꠣ ꠇꠤꠔꠣ ꠇꠞꠟꠣ? ꠀꠙꠘꠣꠞꠦ ꠀꠘꠣꠁꠟꠣꠝ ꠀꠝꠣꠞ ꠖꠥꠡꠝꠘꠞꠦ ꠟꠣꠘ꠆ꠘꠔ ꠖꠤꠛꠣꠞ ꠟꠣꠉꠤ, ꠀꠞ ꠀꠙꠘꠦ ꠈꠣꠟꠤ ꠔꠣꠞꠣꠞꠦ ꠖꠥꠀ ꠖꠤꠟꠣ।”
NUM 23:12 ꠛꠣꠟꠣꠝ ꠙꠤꠞꠦ ꠎꠥꠀꠙ ꠖꠤꠟꠣ, “ꠝꠣꠛꠥꠖꠦ ꠀꠝꠣꠞ ꠝꠥꠈꠅ ꠎꠦꠔꠣ ꠎꠥꠉꠣꠁ ꠖꠤꠍꠂꠘ, ꠁꠔꠣ ꠀꠝꠤ ꠇꠁꠝꠥ ꠘꠣ ꠇꠤꠟꠣ?”
NUM 23:13 ꠛꠣꠖꠦ ꠛꠣꠖꠡꠣ ꠛꠣꠟꠣꠇꠦ ꠛꠣꠟꠣꠝ ꠙꠤꠞꠞꠦ ꠇꠁꠟꠣ, “ꠀꠙꠘꠦ ꠀꠝꠣꠞ ꠟꠉꠦ ꠀꠞꠇ ꠎꠣꠉꠣꠔ ꠀꠃꠇ꠆ꠇꠣ। ꠢꠘ ꠕꠘꠦ ꠀꠙꠘꠣꠞ ꠌꠃꠈꠦ ꠛꠘꠤ ꠁꠍꠞꠣꠁꠟꠞ ꠖꠦꠈꠣ ꠙꠣꠁꠛꠣ। ꠔꠣꠞꠣ ꠢꠇꠟꠞꠦ ꠖꠦꠈꠣ ꠎꠣꠁꠔ ꠘꠣꠄ, ꠈꠣꠟꠤ ꠄꠇ ꠅꠋꠡꠞꠦ ꠀꠙꠘꠦ ꠖꠦꠈꠛꠣ, ꠖꠦꠈꠤꠀ ꠀꠙꠘꠦ ꠀꠝꠣꠞ ꠙꠇ꠆ꠇ ꠟꠁꠀ ꠔꠣꠞꠣꠞꠦ ꠟꠣꠘ꠆ꠘꠔ ꠖꠤꠛꠣ।”
NUM 23:14 ꠅꠈꠣꠘ ꠇꠁꠀ ꠛꠣꠖꠡꠣ ꠛꠣꠟꠣꠇꠦ ꠔꠣꠘꠞꠦ ꠟꠁꠀ ꠙꠤꠍꠉꠣ ꠙꠣꠠꠞ ꠃꠙꠞꠞ ꠎꠚꠤꠝ ꠘꠣꠝꠞ ꠛꠘ꠆ꠖꠞ ꠝꠣꠎꠦ ꠟꠁꠀ ꠉꠦꠟꠣ। ꠉꠤꠀ ꠢꠘꠅ ꠡꠣꠔꠈꠣꠘ ꠇꠥꠞꠛꠣꠘꠤ ꠈꠣꠘꠣ ꠛꠣꠘꠣꠁꠀ ꠙꠞꠔꠦꠇ ꠇꠥꠞꠛꠣꠘꠤ ꠈꠣꠘꠣꠔ ꠄꠉꠥ ꠇꠞꠤ ꠛꠤꠍꠣꠟ ꠀꠞ ꠄꠉꠥ ꠇꠞꠤ ꠝꠦꠠꠣ ꠇꠥꠞꠛꠣꠘꠤ ꠖꠤꠟꠣ।
NUM 23:15 ꠛꠣꠖꠦ ꠛꠣꠟꠣꠝ ꠙꠤꠞꠦ ꠛꠣꠖꠡꠣ ꠛꠣꠟꠣꠇꠞꠦ ꠇꠁꠟꠣ, “ꠎꠣꠟꠣꠁꠟ ꠇꠥꠞꠛꠣꠘꠤꠞ ꠘꠤꠅꠔꠦ ꠎꠦꠔꠣ ꠙꠡꠥ ꠇꠥꠞꠛꠣꠘꠤ ꠖꠦꠅꠀ ꠅꠁꠍꠦ, ꠀꠙꠘꠦ ꠅꠔꠣꠞ ꠗꠣꠞꠅ ꠞꠃꠇ꠆ꠇꠣ। ꠀꠝꠤ ꠅꠤꠘ꠆ꠘꠛꠣꠄ ꠎꠣꠁꠞꠣꠝ, ꠝꠣꠛꠥꠖꠞ ꠖꠤꠖꠣꠞ ꠙꠣꠅꠀꠞ ꠀꠡꠣꠄ।”
NUM 23:16 ꠝꠣꠛꠥꠖꠦ ꠛꠣꠟꠣꠝ ꠙꠤꠞꠞꠦ ꠖꠤꠖꠣꠞ ꠖꠤꠟꠣ, ꠀꠞ ꠔꠣꠞ ꠎꠛꠣꠘꠞ ꠝꠣꠎꠦ ꠇꠤꠍꠥ ꠛꠥꠟꠤ ꠎꠥꠉꠣꠁ ꠖꠤꠀ ꠇꠁꠟꠣ, “ꠔꠥꠝꠤ ꠛꠣꠖꠡꠣ ꠛꠣꠟꠣꠇꠞ ꠉꠦꠍꠦ ꠀꠝꠣꠞ ꠢꠤꠇꠣꠁꠟ ꠅꠃ ꠝꠣꠔ ꠝꠣꠔꠤꠅ।”
NUM 23:17 ꠔꠦꠃ ꠔꠣꠁꠘ ꠛꠣꠖꠡꠣꠞ ꠉꠦꠍꠦ ꠉꠦꠟꠣ। ꠉꠤꠀ ꠖꠦꠈꠟꠣ ꠛꠣꠖꠡꠣꠄ ꠝꠥꠀꠛ ꠖꠦꠡꠞ ꠘꠦꠔꠣ ꠅꠇꠟꠞꠦ ꠟꠁꠀ ꠇꠥꠞꠛꠣꠘꠤ ꠇꠞꠣ ꠙꠡꠥꠞ ꠉꠦꠍꠦ ꠃꠛꠣꠁ ꠞꠁꠍꠂꠘ। ꠛꠣꠖꠡꠣꠄ ꠔꠣꠘꠞꠦ ꠎꠤꠇꠣꠁꠟꠣ, “ꠝꠣꠛꠥꠖꠦ ꠀꠙꠘꠣꠞꠦ ꠇꠤꠔꠣ ꠇꠁꠍꠂꠘ?”
NUM 23:18 ꠛꠣꠟꠣꠝ ꠙꠤꠞꠦ ꠅꠃ ꠡꠝꠄ ꠀꠟ꠆ꠟꠣꠞ ꠢꠤꠇꠣꠁꠟ ꠅꠃ ꠛꠥꠟꠤ ꠇꠁꠟꠣ, “ꠛꠣꠖꠡꠣ ꠛꠣꠟꠣꠇ ꠈꠤꠀꠟ ꠇꠞꠅ, ꠅꠈꠘ ꠢꠥꠘꠅ ꠖꠤꠀ ꠝꠘ, ꠄꠞꠦ ꠡꠤꠙꠣꠞꠞ ꠙꠥꠔ ꠛꠣꠟꠣꠇ, ꠝꠞ ꠇꠕꠣꠔ ꠖꠦꠅ ꠇꠣꠘ।
NUM 23:19 ꠀꠟ꠆ꠟꠣ ꠙꠣꠇ ꠔ ꠝꠣꠘꠥꠡ ꠘꠣꠄ ꠎꠦꠘ ꠝꠤꠍꠣ ꠝꠣꠔꠤꠛꠣ, ꠔꠣꠁꠘ ꠇꠥꠘꠥ ꠀꠖꠝ ꠡꠘ꠆ꠔꠣꠘ ꠘꠣꠄ ꠎꠦꠘ ꠖꠤꠟ ꠛꠖꠟꠣꠁꠛꠣ। ꠔꠣꠁꠘ ꠎꠦꠟꠣ ꠇꠕꠣ ꠇꠂꠘ ꠑꠤꠇ ꠅꠟꠣꠃ ꠇꠞꠂꠘ, ꠔꠣꠘ ꠅꠀꠖꠣ ꠅꠇꠟꠃ ꠘꠤꠌ꠆ꠌꠤꠔ ꠙꠥꠞꠣ ꠇꠞꠂꠘ।
NUM 23:20 ꠘꠦꠇ ꠖꠥꠀ ꠖꠤꠔꠣꠝ ꠇꠞꠤ ꠢꠥꠇꠥꠝ ꠎꠦꠟꠣ ꠙꠣꠁꠍꠤ, ꠇꠤꠟꠣ ꠛꠖꠟꠣꠁꠝꠥ ꠀꠝꠤ ꠝꠥꠘꠤꠛꠞ ꠅꠃ ꠝꠞ꠆ꠎꠤ?
NUM 23:21 ꠁꠀꠇꠥꠛꠞ ꠀꠅꠟꠣꠖꠞ ꠝꠣꠎꠦ ꠀꠟ꠆ꠟꠣꠄ ꠇꠥꠘꠥ ꠛꠖ-ꠘꠍꠤꠛ ꠖꠦꠈꠍꠂꠘ ꠘꠣ, ꠛꠘꠤ ꠁꠍꠞꠣꠁꠟꠞ ꠇꠙꠣꠟꠅ ꠇꠥꠘꠥ ꠖꠥꠈ-ꠝꠍꠤꠛꠔ ꠟꠦꠈꠍꠂꠘ ꠘꠣ। ꠔꠣꠞꠣꠞ ꠝꠣꠛꠥꠖ ꠀꠟ꠆ꠟꠣ ꠔꠣꠞꠣꠞ ꠟꠉꠦ ꠀꠍꠂꠘ ꠔꠣꠞꠣꠞ ꠝꠣꠟꠤꠇꠞ ꠎꠄ ꠉꠣꠘ ꠔꠣꠞꠣꠞ ꠟꠉꠦ ꠟꠉꠦ ꠀꠍꠦ।
NUM 23:22 ꠝꠤꠡꠞ ꠕꠣꠇꠤ ꠔꠣꠁꠘꠃ ꠔꠣꠞꠣꠞꠦ ꠛꠣꠞ ꠇꠞꠤ ꠀꠘꠍꠂꠘ ꠔꠣꠞꠣꠞ ꠙꠇ꠆ꠇꠦ ꠔꠣꠁꠘ ꠅꠁꠟꠣ ꠎꠋꠟꠤ ꠛꠄꠞꠣꠞ ꠛꠟ।
NUM 23:23 ꠁꠀꠇꠥꠛꠞ ꠀꠅꠟꠣꠖꠞ ꠃꠙꠞꠦ ꠇꠥꠘꠥ ꠎꠣꠖꠥ-ꠝꠘꠔ꠆ꠞ ꠌꠟꠔ ꠘꠣꠄ, ꠁꠍꠞꠣꠁꠟ ꠎꠣꠔꠤꠞ ꠃꠙꠞꠦ ꠇꠥꠘꠥ ꠔꠣꠛꠤꠎ-ꠇꠛꠎꠦ ꠇꠣꠝ ꠀꠁꠔ ꠘꠣꠄ। ꠔꠣꠞꠣꠞ ꠛꠦꠙꠣꠞꠦ ꠅꠈꠘ ꠅꠃ ꠛꠥꠟꠤ ꠇꠅꠀ ꠎꠣꠄ, ꠀꠟ꠆ꠟꠣꠄ ꠎꠦꠔꠣ ꠇꠞꠍꠂꠘ ꠅꠔꠣ ꠌꠣꠁꠀ ꠖꠦꠈꠅ।
NUM 23:24 ꠅꠃ ꠎꠣꠔꠤ ꠔ ꠡꠤꠋꠢꠤꠞ ꠟꠣꠈꠣꠘ ꠉꠥꠘ꠆ꠎꠞꠤꠀ ꠃꠑꠤꠛ, ꠀꠞ ꠡꠤꠋꠢꠞ ꠟꠣꠈꠣꠘ ꠃꠑꠤꠀ ꠀꠉ ꠛꠣꠠꠤꠛ। ꠡꠤꠇꠣꠞꠞ ꠟꠃ ꠀꠞ ꠉꠥꠡ꠆ꠔ ꠘꠣ ꠈꠣꠅꠀ ꠙꠞ꠆ꠎꠘ꠆ꠔ ꠔꠣꠞꠣ ꠖꠝ ꠟꠁꠔꠣ ꠘꠣꠄ।”
NUM 23:25 ꠁꠈꠣꠘ ꠢꠥꠘꠤꠀ ꠛꠣꠖꠡꠣ ꠛꠣꠟꠣꠇꠦ ꠇꠁꠟꠣ, “ꠛꠘ꠆ꠖ ꠇꠞꠃꠇ꠆ꠇꠣ, ꠀꠙꠘꠦ ꠔꠣꠞꠣꠞꠦ ꠖꠥꠀꠅ ꠖꠤꠛꠣ ꠘꠣ, ꠟꠣꠘ꠆ꠘꠔꠅ ꠖꠤꠛꠣ ꠘꠣ।”
NUM 23:26 ꠛꠣꠟꠣꠝ ꠙꠤꠞꠦ ꠎꠥꠀꠙ ꠖꠤꠟꠣ, “ꠀꠝꠤ ꠔ ꠀꠙꠘꠣꠞꠦ ꠀꠉꠦꠃ ꠇꠁꠍꠤ, ꠝꠣꠛꠥꠖꠦ ꠀꠝꠣꠞꠦ ꠎꠦꠟꠣ ꠇꠁꠛꠣ, ꠀꠝꠣꠞ ꠅꠟꠣꠃ ꠇꠞꠣ ꠟꠣꠉꠛ।”
NUM 23:27 ꠛꠣꠖꠦ ꠛꠣꠟꠣꠇ ꠛꠣꠖꠡꠣꠄ ꠛꠣꠟꠣꠝ ꠙꠤꠞꠞꠦ ꠇꠁꠟꠣ, “ꠀꠃꠇ꠆ꠇꠣ, ꠀꠝꠤ ꠀꠙꠘꠣꠞꠦ ꠀꠞꠇ ꠎꠣꠉꠣꠔ ꠟꠁꠀ ꠎꠣꠁꠝꠥ। ꠢꠘꠅ ꠉꠦꠟꠦ ꠅꠁꠔ ꠙꠣꠞꠦ ꠀꠟ꠆ꠟꠣꠄ ꠈꠥꠡꠤ ꠅꠁꠀ ꠀꠝꠣꠞ ꠙꠇ꠆ꠇ ꠟꠁꠛꠣ, ꠀꠞ ꠀꠙꠘꠣꠞꠦꠖꠤ ꠢꠔꠣꠞ ꠃꠙꠞꠦ ꠟꠣꠘ꠆ꠘꠔ ꠖꠤꠔꠦ ꠖꠤꠛꠣ।”
NUM 23:28 ꠅꠈꠣꠘ ꠇꠁꠀ ꠛꠣꠖꠡꠣꠄ ꠔꠣꠘꠞꠦ ꠟꠁꠀ ꠙꠤꠃꠞ ꠘꠣꠝꠞ ꠙꠣꠠꠞ ꠃꠙꠞꠦ ꠉꠦꠟꠣ, ꠅꠃ ꠎꠣꠉꠣ ꠕꠣꠇꠤ ꠝꠞꠥꠜꠥꠝꠤ ꠖꠦꠈꠣ ꠎꠣꠄ।
NUM 23:29 ꠅꠃ ꠡꠝꠄ ꠛꠣꠟꠣꠝ ꠙꠤꠞꠦ ꠇꠁꠟꠣ, “ꠅꠘꠅ ꠀꠝꠣꠞ ꠟꠣꠉꠤ ꠡꠣꠔꠈꠣꠘ ꠇꠥꠞꠛꠣꠘꠤ ꠈꠣꠘꠣ ꠛꠣꠘꠣꠁꠀ, ꠡꠣꠔꠉꠥ ꠛꠤꠍꠣꠟ ꠀꠞ ꠡꠣꠔꠉꠥ ꠝꠦꠠꠣ ꠇꠥꠞꠛꠣꠘꠤꠞ ꠛꠦꠛꠡ꠆ꠔꠣ ꠇꠞꠃꠇ꠆ꠇꠣ।”
NUM 23:30 ꠙꠤꠞ ꠍꠣꠛꠞ ꠇꠕꠣꠝꠔ ꠛꠣꠖꠡꠣꠄ ꠅꠟꠣꠃ ꠇꠞꠟꠣ। ꠔꠣꠁꠘ ꠙꠞꠔꠦꠇ ꠇꠥꠞꠛꠣꠘꠤ ꠈꠣꠘꠣꠞ ꠃꠙꠞꠦ ꠄꠉꠥ ꠇꠞꠤ ꠛꠤꠍꠣꠟ ꠀꠞ ꠄꠉꠥ ꠇꠞꠤ ꠝꠦꠠꠣ ꠇꠥꠞꠛꠣꠘꠤ ꠖꠤꠟꠣ।
NUM 24:1 ꠛꠣꠟꠣꠝ ꠙꠤꠞꠦ ꠎꠦꠛꠟꠣ ꠛꠥꠎꠟꠣ, ꠛꠘꠤ ꠁꠍꠞꠣꠁꠟꠞꠦ ꠖꠥꠀ ꠖꠦꠅꠀꠃ ꠅꠁꠟ ꠝꠣꠛꠥꠖꠞ ꠁꠌ꠆ꠍꠣ, ꠛꠥꠎꠤꠀ ꠔꠣꠁꠘ ꠀꠉꠞ ꠟꠣꠈꠣꠘ ꠀꠞ ꠁꠡ꠆ꠔꠦꠈꠣꠞꠣ-ꠀꠎꠤꠞꠣꠔꠞ ꠌꠦꠡ꠆ꠐꠣ ꠇꠞꠟꠣ ꠘꠣ। ꠛꠞꠋ ꠔꠣꠘ ꠘꠤꠎꠞ ꠝꠥꠈ ꠝꠞꠥꠜꠥꠝꠤꠞ ꠛꠣꠄ ꠚꠤꠞꠣꠁꠟ꠆ꠟꠣ।
NUM 24:2 ꠚꠤꠞꠣꠁꠀ ꠖꠦꠈꠟꠣ, ꠛꠘꠤ ꠁꠍꠞꠣꠁꠟꠞ ꠘꠣꠘꠣꠘ ꠈꠣꠘ꠆ꠖꠣꠘꠞ ꠔꠣꠝ꠆ꠛꠥ ꠄꠇ ꠄꠇ ꠇꠞꠤ ꠐꠣꠋꠉꠣꠘꠤ ꠅꠁꠍꠦ। ꠅꠃ ꠡꠝꠄ ꠔꠣꠘ ꠃꠙꠞꠦ ꠀꠟ꠆ꠟꠣꠞ ꠞꠥꠢꠥ ꠟꠣꠝꠤꠀ ꠀꠁꠟꠣ,
NUM 24:3 ꠔꠣꠁꠘ ꠀꠟ꠆ꠟꠣꠞ ꠖꠦꠅꠀ ꠅꠃ ꠅꠢꠤ ꠇꠁꠟꠣ, “ꠛꠣꠃꠞꠞ ꠙꠥꠔ ꠛꠣꠟꠣꠝꠦ ꠇꠁꠞꠣ, ꠌꠃꠈ ꠎꠣꠞ ꠈꠥꠟꠣ ꠀꠍꠦ ꠄꠁꠘ ꠅꠃ ꠛꠥꠟꠤ ꠇꠁꠞꠣ।
NUM 24:4 ꠎꠦ ꠎꠘꠦ ꠀꠟ꠆ꠟꠣꠞ ꠇꠣꠟꠣꠝ ꠢꠥꠘꠞꠣ, ꠡꠞ꠆ꠛ-ꠡꠇ꠆ꠔꠤꠝꠣꠘꠞ ꠖꠤꠖꠣꠞ ꠙꠣꠁꠞꠣ, ꠎꠦꠁꠘ ꠍꠁꠎꠖꠣꠔ ꠙꠠꠤꠀ ꠛꠣꠔꠥꠘꠤ ꠈꠛꠞ ꠖꠦꠈꠂꠘ, ꠄꠁꠘ ꠅꠈꠣꠘ ꠇꠁꠞꠣ।
NUM 24:5 ꠅ ꠁꠀꠇꠥꠛ ꠛꠋꠡ, ꠔꠥꠝꠣꠞ ꠔꠣꠝ꠆ꠛꠥ ꠅꠇꠟ ꠈꠥꠛ ꠌꠇꠌꠇꠣ! ꠅ ꠛꠘꠤ ꠁꠍꠞꠣꠁꠟ, ꠔꠥꠝꠣꠞ ꠞꠅꠀꠞ ꠎꠣꠉꠣ ꠇꠔ ꠜꠣꠟꠣ!
NUM 24:6 ꠁꠔꠣ ꠔ ꠖꠦꠈꠣꠞ ꠝꠔ ꠛꠠ ꠈꠦꠎꠥꠞ ꠛꠣꠉꠣꠘꠞ ꠟꠣꠈꠣꠘ, ꠉꠣꠋꠉꠞ ꠙꠣꠞꠞ ꠢꠣꠎꠣꠁꠟ-ꠙꠣꠠꠣꠁꠟ ꠛꠘꠞ ꠟꠣꠈꠣꠘ, ꠝꠣꠛꠥꠖꠞ ꠟꠣꠉꠣꠁꠟ ꠀꠉꠞꠞ ꠉꠣꠍꠞ ꠟꠣꠈꠣꠘ ꠔꠞꠔꠣꠎꠣ, ꠙꠣꠘꠤꠞ ꠗꠣꠞꠞ ꠖꠦꠛꠖꠣꠞꠥ ꠉꠣꠍꠞ ꠟꠣꠈꠣꠘ ꠡꠥꠘ꠆ꠖꠞ।
NUM 24:7 ꠔꠣꠞꠣꠞ ꠜꠞꠣ ꠇꠟꠡꠤ ꠕꠣꠇꠤ ꠙꠣꠘꠤ ꠃꠕꠟꠤꠀ ꠙꠠꠛ, ꠛꠤꠌꠤ ꠀꠞ ꠌꠦꠞꠣꠄ ꠛꠃꠔ ꠙꠣꠘꠤ ꠙꠣꠁꠛ। ꠔꠣꠞꠣꠞ ꠛꠣꠖꠡꠣ ꠅꠁꠛꠣ ꠅꠉꠣꠉ ꠛꠣꠖꠡꠣ ꠕꠣꠇꠤꠅ ꠢꠤꠝ꠆ꠝꠔꠤ, ꠔꠣꠞꠣꠞ ꠖꠦꠡ ꠅꠁꠛ ꠘꠣꠝꠇꠞꠣ ꠁꠎ꠆ꠎꠔꠤ।
NUM 24:8 ꠀꠟ꠆ꠟꠣꠄ ꠝꠤꠡꠞ ꠕꠣꠇꠤ ꠔꠣꠞꠣꠞꠦ ꠛꠣꠞ ꠇꠞꠤ ꠀꠘꠍꠂꠘ, ꠔꠣꠁꠘ ꠅꠁꠟꠣ ꠔꠣꠞꠣꠞ ꠙꠇ꠆ꠇꠦ ꠛꠟꠀꠟꠣ ꠎꠋꠟꠤ ꠛꠄꠞꠣ, ꠔꠣꠞꠣꠞ ꠟꠉꠦ ꠎꠔ ꠎꠣꠔꠤꠄ ꠟꠣꠉꠛꠣ, ꠁꠔꠣꠞꠦ ꠔꠣꠞꠣ ꠉꠤꠟꠤꠀ ꠈꠣꠁꠟꠤꠛꠣ, ꠔꠣꠞꠣꠞ ꠀꠒ꠆ꠒꠤ-ꠉꠥꠒ꠆ꠒꠤꠞꠦ ꠉꠥꠠꠣ ꠉꠥꠠꠣ ꠇꠞꠛꠣ, ꠔꠤꠞ-ꠗꠘꠥꠇꠖꠤ ꠔꠣꠞꠣꠞꠦ ꠉꠣꠕꠤꠛꠣ।
NUM 24:9 ꠡꠤꠋꠢꠞ ꠟꠣꠈꠣꠘ ꠔꠣꠞꠣ ꠈꠣꠙ ꠗꠞꠤ ꠢꠥꠔꠤꠛ, ꠔꠣꠞꠣꠞꠦ ꠟꠣꠠꠣꠘꠤꠞ ꠡꠣꠅꠡ ꠅꠁꠛ ꠇꠥꠘ ꠛꠦꠐꠣꠞ? ꠔꠥꠝꠞꠣꠞꠦ ꠎꠦꠞꠣ ꠖꠥꠀ ꠖꠤꠛꠣ, ꠄꠞꠣꠞ ꠃꠙꠞꠦ ꠖꠥꠀ ꠟꠣꠝꠃꠇ; ꠔꠥꠝꠞꠣꠞꠦ ꠎꠦꠔꠣꠄ ꠟꠣꠘ꠆ꠘꠔ ꠖꠤꠛꠣ, ꠁꠔꠣꠞ ꠃꠙꠞꠦ ꠟꠣꠘ꠆ꠘꠔ ꠙꠠꠃꠇ।”
NUM 24:10 ꠁꠔꠣ ꠢꠥꠘꠤꠀ ꠛꠣꠖꠡꠣ ꠛꠣꠟꠣꠇꠦ ꠛꠣꠟꠣꠝ ꠙꠤꠞꠞ ꠃꠙꠞꠦ ꠉꠥꠍꠣꠄ ꠀꠉꠥꠁꠘ ꠅꠁꠉꠦꠟꠣ। ꠔꠣꠘ ꠘꠤꠎꠞ ꠀꠔꠞ ꠙꠤꠑꠤꠔ ꠔꠣꠛꠠꠣꠁ ꠔꠣꠛꠠꠣꠁ ꠇꠤꠠꠤꠝꠤꠠꠤ ꠈꠣꠁꠀ ꠇꠁꠟꠣ, “ꠀꠝꠤ ꠀꠙꠘꠣꠞꠦ ꠀꠘꠣꠁꠟꠣꠝ ꠀꠝꠣꠞ ꠖꠥꠡꠝꠘꠞꠦ ꠟꠣꠘ꠆ꠘꠔ ꠖꠤꠛꠣꠞ ꠟꠣꠉꠤ, ꠀꠞ ꠀꠙꠘꠦ ꠔꠣꠞꠣꠞꠦ ꠅꠃ ꠟꠣꠉꠣꠁꠀ ꠔꠤꠘ-ꠔꠤꠘꠛꠣꠞ ꠖꠥꠀ ꠖꠤꠟꠣ।
NUM 24:11 ꠀꠙꠘꠦ ꠀꠝꠣꠞ ꠍꠣꠝꠘ ꠕꠣꠇꠤ ꠢꠞꠃꠇ꠆ꠇꠣ, ꠘꠤꠎꠞ ꠎꠣꠉꠣꠔ ꠎꠣꠃꠇ꠆ꠇꠣ। ꠀꠝꠤ ꠀꠙꠘꠣꠞꠦ ꠛꠃꠔ ꠙꠥꠞꠥꠡ꠆ꠇꠣꠞ ꠖꠤꠝꠥ ꠇꠁꠍꠟꠣꠝ, ꠅꠁꠟꠦ ꠝꠣꠛꠥꠖꠦ ꠖꠤꠟꠣ ꠘꠣ।”
NUM 24:12 ꠔꠦꠃ ꠛꠣꠟꠣꠝ ꠙꠤꠞꠦ ꠛꠣꠖꠡꠣ ꠛꠣꠟꠣꠇꠞꠦ ꠇꠁꠟꠣ, “ꠀꠙꠘꠣꠞ ꠙꠣꠑꠣꠁꠟ ꠝꠣꠘꠡꠞꠦ ꠀꠝꠤ ꠀꠉꠦꠃ ꠇꠁꠍꠤ ꠘꠣ ꠘꠤ,
NUM 24:13 ꠛꠣꠖꠡꠣꠄ ꠎꠥꠖꠤ ꠡꠥꠘꠣ-ꠞꠥꠙꠣꠄ ꠜꠞꠣ ꠔꠣꠘ ꠀꠡ꠆ꠔꠣ ꠞꠣꠎꠛꠣꠠꠤ ꠈꠣꠘꠃ ꠀꠝꠣꠞꠦ ꠖꠤꠟꠣꠁꠘ, ꠔꠦꠛꠃ ꠀꠝꠤ ꠀꠝꠣꠞ ꠘꠤꠎꠞ ꠁꠌ꠆ꠍꠣꠄ ꠜꠣꠟꠣ-ꠛꠥꠞꠣ ꠇꠥꠘ꠆ꠔꠣ ꠇꠞꠔꠣꠝ ꠙꠣꠞꠔꠣꠝ ꠘꠣꠄ, ꠀꠝꠤ ꠝꠣꠛꠥꠖꠞ ꠛꠤꠞꠥꠖ꠆ꠖꠦ ꠎꠣꠁꠔꠣꠝ ꠘꠣꠄ। ꠝꠣꠛꠥꠖꠦ ꠀꠝꠣꠞꠦ ꠎꠦꠟꠣ ꠢꠥꠇꠥꠝ ꠖꠤꠛꠣ, ꠀꠝꠤ ꠈꠣꠟꠤ ꠅꠟꠣꠃ ꠇꠁꠝꠥ।
NUM 24:14 ꠔꠦ ꠀꠝꠤ ꠅꠈꠘ ꠀꠝꠣꠞ ꠝꠣꠘꠡꠞ ꠉꠦꠍꠦ ꠚꠤꠞꠔ ꠎꠣꠁꠞꠣꠝꠉꠤ, ꠅꠁꠟꠦ ꠅꠃ ꠎꠣꠔꠤꠄ ꠜꠛꠤꠡꠔꠦ ꠀꠙꠘꠣꠞ ꠎꠣꠔꠤꠞ ꠟꠉꠦ ꠇꠤꠔꠣ ꠇꠤꠔꠣ ꠇꠞꠛꠣ, ꠀꠙꠘꠣꠞ ꠢꠥꠡꠤꠀꠞꠤꠞ ꠟꠣꠉꠤ ꠁꠔꠣ ꠀꠉꠣꠝ ꠎꠣꠘꠣꠁ ꠖꠤꠀꠞ।”
NUM 24:15 ꠛꠣꠟꠣꠝ ꠙꠤꠞꠦ ꠀꠟ꠆ꠟꠣꠞ ꠖꠦꠅꠀ ꠅꠃ ꠀꠞꠇ ꠅꠢꠤ ꠇꠁꠟꠣ, “ꠛꠣꠃꠞꠞ ꠙꠥꠔ ꠛꠣꠟꠣꠝꠦ ꠇꠁꠞꠣ, ꠌꠃꠈ ꠎꠣꠞ ꠈꠥꠟꠣ ꠀꠍꠦ ꠄꠁꠘ ꠅꠃ ꠛꠥꠟꠤ ꠇꠁꠞꠣ,
NUM 24:16 ꠎꠦ ꠎꠘꠦ ꠀꠟ꠆ꠟꠣꠞ ꠇꠣꠟꠣꠝ ꠢꠥꠘꠞꠣ, ꠎꠦꠁꠘ ꠉꠦꠍꠦ ꠀꠟ꠆ꠟꠣꠔꠣꠟꠣꠞ ꠀꠈꠟ-ꠢꠦꠇꠝꠔ ꠀꠍꠦ, ꠎꠦꠁꠘ ꠡꠞ꠆ꠛ-ꠡꠇ꠆ꠔꠤꠝꠣꠘꠞ ꠖꠤꠖꠣꠞ ꠙꠣꠁꠞꠣ, ꠎꠦꠁꠘ ꠍꠁꠎꠖꠣꠔ ꠙꠠꠤꠀ ꠛꠣꠔꠥꠘꠤ ꠈꠛꠞ ꠖꠦꠈꠂꠘ, ꠄꠁꠘ ꠅꠈꠣꠘ ꠇꠁꠞꠣ।
NUM 24:17 ꠀꠝꠤ ꠔ ꠢꠃ ꠎꠘꠞꠦ ꠖꠦꠈꠤꠀꠞ, ꠅꠈꠘ ꠍꠣꠝꠘꠦ ꠘꠣ ꠕꠣꠇꠟꠦꠅ ꠖꠦꠈꠤꠀꠞ। ꠔꠣꠁꠘ ꠀꠝꠣꠞ ꠇꠣꠍꠣꠔ ꠘꠣ ꠅꠁꠟꠦꠅ, ꠀꠝꠣꠞ ꠌꠃꠈ ꠉꠤꠀ ꠔꠣꠘ ꠃꠙꠞꠦ ꠙꠠꠍꠦ। ꠁꠀꠇꠥꠛꠞ ꠛꠋꠡꠔ ꠀꠁꠛꠣ ꠀꠍꠝꠣꠘꠞ ꠄꠇ ꠔꠦꠞꠣ, ꠛꠘꠤ ꠁꠍꠞꠣꠁꠟꠞ ꠝꠣꠎꠦꠃ ꠄꠇ ꠞꠣꠎ-ꠟꠣꠑꠤ ꠎꠘꠝꠤꠛꠣ। ꠄꠁꠘ ꠝꠥꠀꠛ ꠎꠣꠔꠤꠞ ꠝꠣꠕꠣ ꠚꠣꠐꠣꠁꠀ ꠖꠥꠁ ꠐꠥꠇꠞꠣ ꠇꠞꠛꠣ, ꠡꠤꠡ ꠘꠛꠤꠞ ꠀꠅꠟꠣꠖꠞ ꠇꠟ꠆ꠟꠣ ꠌꠥꠞꠝꠣꠞ ꠇꠞꠛꠣ।
NUM 24:18 ꠁꠖꠥꠝ ꠖꠦꠡꠞꠦ ꠄꠘꠞ ꠖꠈꠟꠅ ꠀꠘꠛꠣ, ꠔꠣꠘ ꠖꠥꠡꠝꠘꠞ ꠅꠃ ꠍꠦꠁꠞ ꠙꠣꠠꠞꠦ ꠇꠛꠎꠣ ꠇꠞꠛꠣ, ꠀꠞ ꠛꠘꠤ ꠁꠍꠞꠣꠁꠟ ꠎꠣꠔꠤꠄ ꠙꠄꠟꠥꠀꠘꠤ ꠇꠞꠛꠣ।
NUM 24:19 ꠁꠀꠇꠥꠛꠞ ꠛꠋꠡꠞ ꠄꠇꠎꠘꠦ ꠞꠣꠎ-ꠉꠖꠤ ꠌꠣꠟꠣꠁꠛꠣ, ꠁꠞ ꠐꠣꠃꠘꠅ ꠎꠣꠞꠣ ꠎꠤꠘ꠆ꠖꠣ ꠞꠁꠛꠣ ꠄꠁꠘ ꠔꠣꠞꠣꠞꠦꠅ ꠛꠤꠘꠣꠡ ꠇꠞꠤꠟꠤꠛꠣ।”
NUM 24:20 ꠅꠈꠘꠣꠁꠘ ꠇꠅꠀꠞ ꠛꠣꠖꠦ ꠛꠣꠟꠣꠝ ꠙꠤꠞꠦ ꠌꠃꠈ ꠝꠦꠟꠤꠀ ꠀꠝꠣꠟꠦꠇꠤ ꠅꠇꠟꠞꠦ ꠖꠦꠈꠟꠣ। ꠖꠦꠈꠤꠀ ꠀꠟ꠆ꠟꠣꠞ ꠅꠃ ꠅꠢꠤ ꠇꠁꠟꠣ, “ꠀꠝꠣꠟꠦꠇ ꠔ ꠢꠇꠟ ꠎꠣꠔꠤꠞ ꠝꠣꠎꠦ ꠀꠍꠤꠟ ꠙꠞꠗꠣꠘ, ꠅꠁꠟꠦ ꠔꠣꠞꠣꠞ ꠡꠦꠡ ꠖꠡꠣ ꠅꠁꠛ ꠡꠞ꠆ꠛꠘꠣꠡ।”
NUM 24:21 ꠛꠣꠖꠦ ꠔꠣꠁꠘ ꠇꠦꠘꠤ ꠅꠇꠟꠞꠦ ꠖꠦꠈꠟꠣ, ꠖꠦꠈꠤꠀ ꠀꠟ꠆ꠟꠣꠞ ꠅꠃ ꠅꠢꠤ ꠇꠁꠟꠣ, “ꠔꠥꠝꠞꠣꠞ ꠛꠡꠔ ꠈꠣꠘꠣ ꠈꠥꠛ ꠝꠎꠛꠥꠔ, ꠔꠥꠝꠞꠣ ꠔ ꠙꠣꠔ꠆ꠔꠞꠞ ꠙꠣꠠꠅ ꠛꠣꠡꠣ ꠛꠣꠘꠣꠁꠍ,
NUM 24:22 ꠅꠁꠟꠦ ꠀꠉꠦꠖꠤ ꠔꠥꠝꠞꠣꠞ ꠛꠤꠘꠣꠡ ꠊꠐꠤꠛ, ꠔꠥꠝꠞꠣꠞꠦ ꠛꠣꠘ꠆ꠖꠤꠀ ꠀꠡꠤꠞꠤꠀ ꠖꠦꠡꠅ ꠘꠦꠅꠀ ꠅꠁꠛ।”
NUM 24:23 ꠛꠣꠖꠦ ꠛꠣꠟꠣꠝ ꠙꠤꠞꠦ ꠀꠟ꠆ꠟꠣꠞ ꠖꠦꠅꠀ ꠅꠃ ꠡꠦꠡ ꠅꠢꠤ ꠇꠁꠟꠣ, “ꠢꠣꠄꠞꠦ ꠢꠣꠄ! ꠀꠟ꠆ꠟꠣꠄ ꠎꠦꠛꠟꠣ ꠅꠔꠣ ꠊꠐꠣꠁꠛꠣ, ꠅꠃ ꠡꠝꠄ ꠇꠦꠃ ꠀꠞ ꠎꠤꠘ꠆ꠖꠣ ꠞꠁꠛ ꠘꠤ?
NUM 24:24 ꠍꠣꠁꠙ꠆ꠞꠣꠍ ꠖꠤꠙꠞ ꠎꠣꠎ ꠅꠇꠟ ꠀꠁꠛ, ꠀꠁꠀ ꠀꠡꠤꠞꠤꠀꠞꠦ ꠖꠥꠞ꠆ꠖꠡꠣ ꠖꠤꠛ, ꠀꠛꠦꠞꠞ ꠝꠣꠘꠡꠞꠦꠅ ꠖꠝꠣꠁꠛ, ꠅꠁꠟꠦ ꠅꠃ ꠖꠤꠙ ꠘꠤꠎꠦꠅ ꠛꠣꠖꠦ ꠛꠤꠘꠣꠡ ꠅꠁꠎꠤꠛ।”
NUM 24:25 ꠅꠈꠣꠘ ꠇꠁꠀ ꠢꠣꠞꠤ ꠛꠣꠟꠣꠝ ꠙꠤꠞ ꠃꠑꠤꠀ ꠘꠤꠎꠞ ꠊꠞꠅ ꠉꠦꠟꠣꠉꠤ, ꠛꠣꠟꠣꠇ ꠛꠣꠖꠡꠣꠅ ꠔꠣꠘ ꠙꠕꠦ ꠞꠅꠀꠘꠣ ꠖꠤꠟꠣ।
NUM 25:1 ꠛꠘꠤ ꠁꠍꠞꠣꠁꠟ ꠝꠥꠀꠛ ꠖꠦꠡꠞ ꠡꠤꠐꠤꠝ ꠄꠟꠣꠇꠣꠔ ꠛꠡꠔ ꠇꠞꠟꠣ, ꠔꠣꠞꠣ ꠅꠘꠅ ꠞꠁꠀ ꠞꠁꠀ ꠝꠥꠀꠛꠤ ꠛꠦꠐꠤꠘ꠆ꠔꠞ ꠟꠉꠦ ꠎꠤꠘꠣ ꠇꠞꠣꠔ ꠟꠣꠉꠟꠣ।
NUM 25:2 ꠢꠘꠞ ꠛꠦꠐꠤꠘ꠆ꠔꠦ ꠔꠣꠞꠣꠞ ꠖꠦꠛ-ꠖꠦꠛꠤꠞ ꠘꠣꠝꠦ ꠛꠟꠤ ꠖꠤꠛꠣꠞ ꠅꠘꠥꠡ꠆ꠐꠣꠘꠅ ꠛꠘꠤ ꠁꠍꠞꠣꠁꠟꠞꠦ ꠖꠣꠅꠔ ꠖꠤꠟꠣ, ꠀꠞ ꠄꠞꠣ ꠉꠤꠀ ꠅꠔꠣ ꠛꠦꠐꠤꠘ꠆ꠔꠞ ꠟꠉꠦ ꠈꠣꠘꠣ-ꠖꠣꠘꠣ ꠈꠣꠁꠀ ꠢꠃ ꠖꠦꠛ-ꠖꠦꠛꠤꠞ ꠙꠥꠎꠣ ꠇꠞꠟꠣ।
NUM 25:3 ꠅꠃ ꠘꠝꠥꠘꠣꠄ ꠔꠣꠞꠣ ꠢꠘꠞ ꠙꠤꠃꠞ ꠙꠣꠠꠞ ꠛꠣꠀꠟ ꠖꠦꠛꠔꠣꠞ ꠙꠥꠎꠣ-ꠜꠇ꠆ꠔꠤ ꠖꠦꠅꠀꠔ ꠟꠣꠉꠤ ꠉꠦꠟꠣ। ꠄꠞꠖꠣꠄ ꠛꠘꠤ ꠁꠍꠞꠣꠁꠟꠞ ꠃꠙꠞꠦ ꠝꠣꠛꠥꠖꠞ ꠉꠎꠛꠞ ꠀꠉꠥꠁꠘ ꠎꠟꠤꠀ ꠃꠑꠟ।
NUM 25:4 ꠛꠣꠖꠦ ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ, “ꠔꠥꠝꠤ ꠡꠝꠣꠎꠞ ꠖꠥꠡꠤ ꠘꠦꠔꠣ ꠅꠇꠟꠞꠦ ꠗꠞꠤꠀ ꠎꠣꠘꠦ ꠝꠣꠞꠤꠟꠣꠅ, ꠀꠞ ꠅꠔꠣꠞ ꠟꠣꠡ ꠞꠂꠖꠞ ꠝꠣꠎꠦ ꠀꠘꠤꠀ ꠟꠐꠇꠣꠁ ꠕꠅ। ꠔꠦꠃ ꠛꠘꠤ ꠁꠍꠞꠣꠁꠟꠞ ꠃꠙꠞꠦ ꠕꠣꠇꠤ ꠀꠝꠣꠞ ꠢꠃ ꠟꠣꠘ꠆ꠘꠔꠤ ꠉꠎꠛ ꠢꠞꠛ।”
NUM 25:5 ꠅꠈꠣꠘ ꠢꠥꠘꠤꠀ ꠝꠥꠍꠣꠄ ꠛꠘꠤ ꠁꠍꠞꠣꠁꠟꠞ ꠢꠣꠇꠤꠝ-ꠡꠣꠟꠤꠡ ꠅꠇꠟꠞꠦ ꠇꠁꠟꠣ, “ꠔꠥꠝꠞꠣꠞ ꠎꠤꠝ꠆ꠝꠣꠄ ꠕꠣꠇꠣ ꠎꠔ ꠝꠣꠘꠡꠦ ꠙꠤꠃꠞ ꠙꠣꠠꠞ ꠛꠣꠀꠟ ꠖꠦꠛꠔꠣꠞ ꠙꠥꠎꠣꠔ ꠡꠞꠤꠇ ꠅꠁꠍꠦ, ꠅꠔꠣ ꠢꠇ꠆ꠇꠟꠐꠤꠞꠦ ꠔꠥꠝꠞꠣ ꠎꠣꠘꠦ ꠝꠣꠞꠤꠟꠣꠅ।”
NUM 25:6 ꠄꠞꠝꠣꠎꠦ ꠅꠟꠣ ꠅꠁꠟ, ꠝꠥꠍꠣ ꠘꠛꠤ ꠀꠞ ꠛꠘꠤ ꠁꠍꠞꠣꠁꠟꠦ ꠝꠤꠟꠤꠀ ꠎꠦꠛꠟꠣ ꠀꠟ꠆ꠟꠣꠞ ꠊꠞꠞ ꠖꠥꠀꠞꠞ ꠉꠦꠍꠦ ꠇꠣꠘ꠆ꠖꠣ-ꠇꠣꠐꠤ ꠇꠞꠞꠣ, ꠅꠃ ꠡꠝꠄ ꠔꠣꠞꠣꠞ ꠍꠣꠝꠘꠦꠖꠤ ꠛꠘꠤ ꠁꠍꠞꠣꠁꠟꠞ ꠄꠇ ꠛꠦꠐꠣꠄ ꠝꠣꠖꠤꠀꠘꠤ ꠄꠇ ꠛꠦꠐꠤꠞꠦ ꠟꠉꠦ ꠟꠁꠀ ꠇꠦꠝ꠆ꠙꠞ ꠜꠤꠔꠞꠦ ꠢꠣꠝꠣꠁꠟ।
NUM 25:7 ꠁꠔꠣ ꠖꠦꠈꠤꠀ ꠁꠝꠣꠝ ꠢꠣꠞꠥꠘꠞ ꠘꠣꠔꠤ ꠙꠤꠘꠢꠡ ꠛꠤꠘ ꠀꠟꠤ-ꠀꠎꠞ ꠝꠎꠟꠤꠍ ꠕꠣꠇꠤ ꠃꠑꠤꠀ ꠄꠇꠈꠣꠘ ꠍꠥꠟꠚꠤ ꠀꠔꠅ ꠟꠁꠟꠣ।
NUM 25:8 ꠟꠁꠀ ꠔꠣꠞꠣꠞ ꠈꠞꠦ ꠈꠞꠦ ꠉꠤꠀ ꠛꠘꠤ ꠁꠍꠞꠣꠁꠟꠞ ꠢꠃ ꠛꠦꠐꠣꠞ ꠔꠣꠝ꠆ꠛꠥꠔ ꠢꠣꠝꠣꠁꠀ ꠔꠣꠞ ꠀꠞ ꠢꠃ ꠛꠦꠐꠤꠞ ꠙꠦꠐꠦꠖꠤ ꠉꠣꠕꠤꠟ꠆ꠟꠣ। ꠔꠦꠃ ꠛꠘꠤ ꠁꠍꠞꠣꠁꠟꠞ ꠃꠙꠞ ꠕꠣꠇꠤ ꠀꠟ꠆ꠟꠣꠞ ꠉꠎꠛ ꠢꠞꠤꠉꠦꠟ।
NUM 25:9 ꠅꠁꠟꠦ ꠅꠃ ꠉꠎꠛꠞ ꠝꠣꠎꠦ ꠌꠛ꠆ꠛꠤꠡ ꠀꠎꠣꠞ ꠝꠣꠘꠥꠡ ꠝꠞꠤꠉꠦꠍꠤꠟ।
NUM 25:10 ꠅꠃ ꠡꠝꠄ ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ,
NUM 25:11 “ꠁꠝꠣꠝ ꠢꠣꠞꠥꠘꠞ ꠘꠣꠔꠤ ꠙꠤꠘꠢꠡ ꠛꠤꠘ ꠀꠟꠤ-ꠀꠎꠞ ꠛꠘꠤ ꠁꠍꠞꠣꠁꠟꠞ ꠃꠙꠞꠦ ꠕꠣꠇꠤ ꠀꠝꠣꠞ ꠉꠎꠛ ꠢꠞꠣꠁꠍꠦ। ꠛꠘꠤ ꠁꠍꠞꠣꠁꠟꠞ ꠝꠣꠎꠦ ꠀꠝꠣꠞ ꠙꠣꠅꠘꠣ ꠁꠎ꠆ꠎꠔ ꠀꠖꠣꠄ ꠇꠞꠣꠞ ꠛꠦꠙꠣꠞꠦ ꠢꠦ ꠔ ꠀꠝꠣꠞ ꠎꠣꠟꠣꠄꠃ ꠎꠟꠦꠞ। ꠄꠞꠟꠣꠉꠤ ꠀꠝꠣꠞ ꠙꠣꠅꠘꠣ ꠁꠎ꠆ꠎꠔ ꠀꠖꠣꠄ ꠇꠞꠣꠞ ꠟꠣꠉꠤ ꠝꠘꠞ ꠎꠣꠟꠣ ꠕꠣꠇꠟꠦꠅ ꠀꠝꠤ ꠔꠣꠞꠣꠞꠦ ꠀꠞ ꠝꠣꠞꠟꠣꠝ ꠘꠣ।
NUM 25:12 ꠔꠦ ꠅꠈꠘ ꠔꠥꠝꠤ ꠔꠣꠞꠦ ꠇꠅ, ꠀꠝꠤ ꠔꠣꠞ ꠟꠣꠉꠤ ꠄꠇꠐꠣ ꠈꠣꠍ ꠡꠣꠘ꠆ꠔꠤ-ꠌꠥꠇ꠆ꠔꠤ ꠛꠅꠀꠁꠟ ꠇꠞꠍꠤ।
NUM 25:13 ꠢꠦ ꠔꠣꠞ ꠀꠟ꠆ꠟꠣꠞ ꠙꠣꠅꠘꠣ ꠁꠎ꠆ꠎꠔꠞ ꠛꠦꠙꠣꠞꠦ ꠈꠤꠀꠟꠤ ꠅꠁꠀ ꠘꠤꠎꠞ ꠁꠌ꠆ꠍꠣꠄ ꠛꠘꠤ ꠁꠍꠞꠣꠁꠟꠞ ꠉꠥꠘꠣꠞ ꠇꠚꠞꠣ ꠀꠖꠣꠄ ꠇꠞꠣꠄ, ꠀꠝꠤꠅ ꠔꠣꠞ ꠟꠣꠉꠤ ꠅꠃ ꠡꠣꠘ꠆ꠔꠤ-ꠌꠥꠇ꠆ꠔꠤ ꠛꠅꠀꠁꠟ ꠇꠞꠍꠤ। ꠄꠞꠟꠣꠉꠤ ꠁꠝꠣꠝꠔꠤꠞ ꠙꠖ ꠢꠦ ꠀꠞ ꠔꠣꠞ ꠀꠅꠟꠣꠖꠞ ꠝꠣꠎꠦ ꠌꠤꠞꠇꠣꠟ ꠎꠣꠞꠤ ꠞꠁꠛ।”
NUM 25:14 ꠝꠣꠖꠤꠀꠘꠤ ꠢꠃ ꠛꠦꠐꠤꠞ ꠟꠉꠦ ꠛꠘꠤ ꠁꠍꠞꠣꠁꠟꠞ ꠎꠦ ꠛꠦꠐꠣꠞꠦ ꠝꠣꠞꠣ ꠅꠁꠍꠤꠟ, ꠢꠦ ꠅꠁꠟ ꠍꠣꠟꠥꠞ ꠙꠥꠀ ꠎꠤꠝꠞꠤ, ꠢꠦ ꠔ ꠡꠤꠝꠤꠅꠘ ꠈꠣꠘ꠆ꠖꠣꠘꠞ ꠄꠇ ꠉꠥꠡ꠆ꠐꠤꠞ ꠘꠦꠔꠣ।
NUM 25:15 ꠀꠞ ꠎꠦ ꠝꠣꠖꠤꠀꠘꠤ ꠛꠦꠐꠤꠞꠦ ꠝꠣꠞꠣ ꠅꠁꠍꠤꠟ, ꠔꠣꠁꠞ ꠘꠣꠝ ꠇꠍꠛꠤ, ꠔꠣꠁ ꠀꠍꠤꠟ ꠝꠣꠖꠤꠀꠘ ꠖꠦꠡꠞ ꠡꠥꠞ ꠘꠣꠝꠞ ꠄꠇ ꠘꠦꠔꠣꠞ ꠙꠥꠠꠤ, ꠅꠃ ꠡꠥꠞꠅ ꠅꠁꠟꠣ ꠄꠇ ꠉꠥꠡ꠆ꠐꠤꠞ ꠘꠦꠔꠣ।
NUM 25:16 ꠄꠞꠛꠣꠖꠦ ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ,
NUM 25:17 “ꠝꠣꠖꠤꠀꠘꠤ ꠅꠇꠟꠞꠦ ꠔꠥꠝꠞꠣꠞ ꠖꠥꠡꠝꠘ ꠝꠘꠅ ꠇꠞꠤꠅ, ꠁꠔꠣꠞꠦ ꠎꠣꠘꠦ ꠝꠣꠞꠤꠟꠤꠅ।
NUM 25:18 ꠇꠣꠞꠘ ꠙꠤꠃꠞꠞ ꠖꠦꠛꠔꠣꠞ ꠙꠥꠎꠣ ꠀꠞ ꠇꠍꠛꠤꠞ ꠛꠦꠙꠣꠞꠦ ꠚꠣꠘ꠆ꠖ ꠙꠣꠔꠣꠁꠀ ꠔꠥꠝꠞꠣꠞꠦ ꠜꠥꠟ ꠙꠕꠦ ꠘꠦꠅꠀꠄ ꠔꠣꠞꠣ ꠔꠥꠝꠞꠣꠞ ꠖꠥꠡꠝꠘ ꠛꠘꠍꠦ। ꠀꠞ ꠔꠥꠝꠤ ꠔ ꠎꠣꠘ, ꠅꠃ ꠇꠍꠛꠤ ꠀꠍꠤꠟ ꠔꠣꠞꠣꠞ ꠇꠥꠐꠥꠝ, ꠔꠣꠁ ꠔ ꠝꠣꠖꠤꠀꠘꠤ ꠄꠇ ꠡꠞ꠆ꠖꠣꠞꠞ ꠙꠥꠠꠤ। ꠙꠤꠃꠞꠞ ꠛꠣꠀꠟ ꠖꠦꠛꠔꠣꠞꠦ ꠙꠥꠎꠣ ꠇꠞꠣꠄ ꠔꠥꠝꠞꠣꠞ ꠃꠙꠞꠦ ꠎꠦꠛꠟꠣ ꠟꠣꠘ꠆ꠘꠔꠤ ꠉꠎꠛ ꠟꠣꠝꠍꠤꠟ, ꠅꠃ ꠡꠝꠄ ꠔꠣꠁꠞꠦ ꠎꠣꠘꠦ ꠝꠣꠞꠣ ꠅꠁꠍꠤꠟ।”
NUM 26:1 ꠟꠣꠘ꠆ꠘꠔꠤ ꠅꠃ ꠉꠎꠛ ꠕꠣꠝꠤ ꠎꠣꠅꠀꠞ ꠛꠣꠖꠦ ꠝꠣꠛꠥꠖꠦ ꠝꠥꠍꠣ ꠀꠞ ꠁꠝꠣꠝ ꠢꠣꠞꠥꠘꠞ ꠙꠥꠀ ꠀꠟꠤ-ꠀꠎꠞꠞꠦ ꠇꠁꠟꠣ,
NUM 26:2 “ꠛꠘꠤ ꠁꠍꠞꠣꠁꠟꠞ ꠝꠣꠎꠦ ꠎꠦꠞꠣꠞ ꠛꠄꠅꠡ ꠛꠤꠡ ꠛꠍꠞ ꠛꠣ ꠄꠞ ꠛꠦꠡꠤ, ꠝꠣꠘꠤ ꠎꠥꠖ꠆ꠖ ꠇꠞꠣꠞ ꠎꠁꠉ꠆ꠉ ꠎꠦꠞꠣ ꠅꠁꠉꠦꠍꠦ, ꠄꠞꠣꠞꠦ ꠎꠣꠞꠎꠤꠞ ꠉꠥꠡ꠆ꠐꠤ ꠝꠣꠚꠤꠇ ꠉꠘꠅ।”
NUM 26:3 ꠄꠞꠟꠣꠉꠤ ꠎꠤꠞꠤꠢꠅ ꠐꠣꠃꠘꠞ ꠃꠟꠐꠣꠛꠣꠄ ꠎꠞ꠆ꠖꠣꠘ ꠉꠣꠋꠉꠞ ꠙꠣꠞꠅ ꠝꠥꠀꠛ ꠖꠦꠡꠞ ꠎꠦ ꠔꠟ ꠎꠣꠉꠣ ꠀꠍꠦ, ꠢꠘꠅ ꠝꠥꠍꠣ ꠘꠛꠤꠄ ꠀꠞ ꠁꠝꠣꠝ ꠀꠟꠤ-ꠀꠎꠞꠦ ꠘꠦꠔꠣ ꠅꠇꠟꠞꠦ ꠇꠁꠟꠣ,
NUM 26:4 “ꠝꠣꠛꠥꠖꠦ ꠝꠥꠍꠣ ꠘꠛꠤꠞꠦ ꠎꠦꠟꠣ ꠢꠥꠇꠥꠝ ꠇꠞꠍꠂꠘ, ꠅꠃꠟꠣ ꠔꠥꠝꠞꠣ ꠛꠤꠡ ꠛꠍꠞ ꠛꠣ ꠄꠞ ꠛꠦꠡꠤ ꠛꠄꠅꠡꠤ ꠢꠇꠟ ꠛꠦꠐꠣꠁꠘ꠆ꠔꠞꠦ ꠉꠘꠅ।” ꠔꠦꠃ ꠝꠤꠡꠞ ꠖꠦꠡ ꠕꠣꠇꠤ ꠛꠘꠤ ꠁꠍꠞꠣꠁꠟꠞ ꠎꠔ ꠛꠦꠐꠣꠁꠘ ꠛꠣꠞ ꠅꠁꠀ ꠀꠁꠍꠟꠣ, ꠉꠘꠣꠞ ꠡꠝꠄ ꠄꠞꠣꠞ ꠛꠋꠡꠗꠞꠞ ꠘꠣꠝ ꠟꠦꠈꠣ ꠅꠁꠟ। ꠄꠞꠣ ꠅꠁꠟꠣ:
NUM 26:5 ꠁꠀꠇꠥꠛ ꠃꠞꠚꠦ ꠁꠍꠞꠣꠁꠟꠞ ꠛꠠ ꠙꠥꠀ ꠞꠥꠛꠦꠘꠞ ꠌꠣꠁꠞꠅ ꠙꠥꠀꠞ ꠛꠋꠡꠗꠞ: ꠞꠥꠛꠦꠘꠞ ꠛꠠ ꠙꠥꠀ ꠢꠘꠥꠇ ꠕꠣꠇꠤ ꠢꠘꠥꠇꠤ ꠛꠋꠡ, ꠚꠣꠟꠥ ꠕꠣꠇꠤ ꠚꠣꠟꠥꠁ ꠛꠋꠡ,
NUM 26:6 ꠢꠣꠍꠤꠞ ꠕꠣꠇꠤ ꠢꠣꠍꠤꠞꠤ ꠛꠋꠡ, ꠀꠞ ꠇꠞ꠆ꠝꠤ ꠕꠣꠇꠤ ꠇꠞ꠆ꠝꠤꠀ ꠛꠋꠡ।
NUM 26:7 ꠄꠞꠣ ꠢꠇꠟꠃ ꠞꠥꠛꠦꠘ ꠈꠣꠘ꠆ꠖꠣꠘꠞ ꠘꠣꠘꠣꠘ ꠛꠋꠡ। ꠄꠞꠣꠞ ꠝꠣꠎ ꠕꠣꠇꠤ ꠉꠘꠤꠀ ꠔꠦꠔꠣꠟ꠆ꠟꠤꠡ ꠀꠎꠣꠞ ꠡꠣꠔ-ꠡ ꠔꠤꠡ ꠎꠘꠞꠦ ꠙꠣꠅꠀ ꠉꠦꠟ।
NUM 26:8 ꠚꠣꠟꠥꠞ ꠙꠥꠀꠞ ꠘꠣꠝ ꠁꠟꠤꠀꠛ,
NUM 26:9 ꠁꠟꠤꠀꠛꠞ ꠙꠥꠀꠂꠘ ꠅꠁꠟꠣ ꠘꠝꠥꠄꠟ, ꠖꠣꠕꠘ ꠀꠞ ꠀꠛꠤꠞꠣꠝ। ꠖꠣꠕꠘ ꠀꠞ ꠀꠛꠤꠞꠣꠝ ꠛꠘꠤ ꠁꠍꠞꠣꠁꠟꠞ ꠖꠥꠁꠎꠘ ꠘꠦꠔꠣ ꠀꠍꠟꠣ, ꠔꠣꠞꠣ ꠝꠥꠍꠣ ꠀꠞ ꠢꠣꠞꠥꠘꠞ ꠛꠤꠙꠇ꠆ꠇꠦ ꠟꠣꠉꠟꠣ। ꠀꠞ ꠇꠥꠞꠣꠢꠞ ꠖꠟ ꠎꠦꠛꠟꠣ ꠝꠣꠛꠥꠖꠞ ꠛꠤꠞꠥꠖ꠆ꠖꠦ ꠀꠍꠤꠟ, ꠅꠃ ꠡꠝꠄ ꠄꠞꠣꠅ ꠇꠥꠞꠣꠢꠞ ꠖꠟꠅ ꠀꠍꠟꠣ।
NUM 26:10 ꠇꠥꠞꠣꠢꠞ ꠟꠉꠦ ꠅꠃ ꠖꠥꠁꠎꠘꠞꠦꠅ ꠝꠣꠐꠤꠄ ꠀ ꠇꠞꠤ ꠉꠤꠟꠤꠟꠤꠍꠤꠟ ꠀꠞ ꠔꠣꠞ ꠖꠟꠞ ꠀꠠꠣꠁ-ꠡ ꠎꠘ ꠀꠉꠥꠁꠘꠦ ꠎꠟꠤꠀ ꠝꠞꠍꠤꠟ। ꠁꠔꠣ ꠛꠘꠤ ꠁꠍꠞꠣꠁꠟꠞ ꠟꠣꠉꠤ ꠢꠥꠡꠤꠀꠞꠤꠞ ꠘꠤꠡꠣꠘꠣ ꠅꠁꠀ ꠞꠁꠟ।
NUM 26:11 ꠅꠁꠟꠦ ꠇꠥꠞꠣꠢꠞ ꠙꠥꠀꠂꠘ ꠢꠤ ꠡꠝꠄ ꠝꠞꠍꠂꠘ ꠘꠣ, ꠔꠣꠞꠣꠞ ꠛꠋꠡ ꠎꠣꠞꠤ ꠞꠁꠍꠦ।
NUM 26:12 ꠁꠀꠇꠥꠛꠞ ꠙꠥꠀ ꠡꠤꠝꠤꠅꠘꠞ ꠛꠋꠡꠗꠞ ꠅꠁꠟꠣ, ꠘꠝꠥꠄꠟ ꠕꠣꠇꠤ ꠘꠝꠥꠄꠟꠤ ꠛꠋꠡ, ꠎꠣꠝꠤꠘ ꠕꠣꠇꠤ ꠎꠣꠝꠤꠘꠤ ꠛꠋꠡ, ꠎꠣꠈꠤꠘ ꠕꠣꠇꠤ ꠎꠣꠈꠤꠘꠤ ꠛꠋꠡ,
NUM 26:13 ꠎꠣꠞꠣꠢ ꠕꠣꠇꠤ ꠎꠣꠞꠣꠢꠤ ꠛꠋꠡ ꠀꠞ ꠡꠃꠟ ꠕꠣꠇꠤ ꠡꠃꠟꠤ ꠛꠋꠡ।
NUM 26:14 ꠁꠔꠣ ꠡꠤꠝꠤꠅꠘ ꠈꠣꠘ꠆ꠖꠣꠘꠞ ꠘꠣꠘꠣꠘ ꠛꠋꠡ। ꠄꠞꠣꠞ ꠝꠣꠎ ꠕꠣꠇꠤ ꠉꠘꠤꠀ ꠛꠣꠁꠡ ꠀꠎꠣꠞ ꠖꠥꠁ-ꠡ ꠎꠘ ꠙꠣꠅꠀ ꠉꠦꠟ।
NUM 26:15 ꠁꠀꠇꠥꠛꠞ ꠙꠥꠀ ꠍꠣꠖꠥꠞ ꠛꠋꠡꠗꠞ ꠅꠁꠟꠣ, ꠍꠤꠚꠘ ꠕꠣꠇꠤ ꠍꠤꠚꠘꠤ ꠛꠋꠡ, ꠢꠉꠤ ꠕꠣꠇꠤ ꠢꠉꠤꠀ ꠛꠋꠡ, ꠡꠥꠘꠤ ꠕꠣꠇꠤ ꠡꠥꠘꠤꠀ ꠛꠋꠡ,
NUM 26:16 ꠅꠎꠘꠤ ꠕꠣꠇꠤ ꠅꠎꠘꠤꠀ ꠛꠋꠡ, ꠄꠁꠞꠤ ꠕꠣꠇꠤ ꠄꠁꠞꠤꠀ ꠛꠋꠡ,
NUM 26:17 ꠅꠞꠥꠖ ꠕꠣꠇꠤ ꠅꠞꠥꠖꠤ ꠛꠋꠡ, ꠀꠞ ꠅꠞꠦꠟꠤ ꠕꠣꠇꠤ ꠅꠞꠦꠟꠤꠀ ꠛꠋꠡ।
NUM 26:18 ꠄꠞꠣ ꠅꠁꠟꠣ ꠍꠣꠖꠥ ꠈꠣꠘ꠆ꠖꠣꠘꠞ ꠘꠣꠘꠣꠘ ꠛꠋꠡ। ꠄꠞꠣꠞ ꠝꠣꠎꠦ ꠉꠘꠣ ꠝꠣꠘꠥꠡ ꠅꠁꠟꠣ ꠌꠣꠟ꠆ꠟꠤꠡ ꠀꠎꠣꠞ ꠙꠣꠌ-ꠡ ꠎꠘ।
NUM 26:19 ꠁꠀꠇꠥꠛꠞ ꠙꠥꠀ ꠄꠢꠥꠖꠣꠞ ꠖꠥꠁ ꠙꠥꠀꠞ ꠘꠣꠝ ꠀꠍꠤꠟ ꠄꠁꠞ ꠀꠞ ꠅꠘꠘ, ꠇꠦꠘꠣꠘ ꠖꠦꠡꠅ ꠕꠣꠇꠣꠞ ꠇꠣꠟꠅ ꠄꠞꠣ ꠝꠣꠞꠣ ꠉꠦꠍꠤꠟ।
NUM 26:20 ꠅꠁꠟꠦ ꠄꠢꠥꠖꠣꠞ ꠀꠞꠅ ꠙꠥꠀꠂꠘ ꠀꠍꠟꠣ, ꠄꠞꠣꠞ ꠛꠋꠡꠗꠞ ꠅꠁꠟꠣ, ꠡꠦꠟꠣ ꠕꠣꠇꠤ ꠡꠦꠟꠣꠄꠁ ꠛꠋꠡ, ꠚꠤꠞꠥꠎ ꠕꠣꠇꠤ ꠚꠤꠞꠥꠎꠤ, ꠎꠣꠞꠣꠢ ꠕꠣꠇꠤ ꠎꠣꠞꠣꠢꠤ ꠛꠋꠡ।
NUM 26:21 ꠚꠤꠞꠥꠎꠞ ꠛꠋꠡꠗꠞ ꠅꠁꠟꠣ ꠢꠣꠍꠤꠞ ꠕꠣꠇꠤ ꠢꠣꠍꠤꠞꠤ ꠛꠋꠡ ꠀꠞ ꠢꠣꠝꠥꠟ ꠕꠣꠇꠤ ꠢꠣꠝꠥꠟꠤ ꠛꠋꠡ।
NUM 26:22 ꠄꠞꠣ ꠢꠇꠟꠃ ꠄꠢꠥꠖꠣ ꠈꠣꠘ꠆ꠖꠣꠘꠞ ꠘꠣꠘꠣꠘ ꠛꠋꠡ। ꠄꠞꠣꠞ ꠝꠣꠎ ꠕꠣꠇꠤ ꠉꠘꠤꠀ ꠍꠤꠅꠔ꠆ꠔꠁꠞ ꠀꠎꠣꠞ ꠙꠣꠌ-ꠡ ꠎꠘꠞꠦ ꠙꠣꠅꠀ ꠉꠦꠟ।
NUM 26:23 ꠁꠀꠇꠥꠛꠞ ꠙꠥꠀ ꠁꠍꠣꠈꠞꠞ ꠛꠋꠡꠗꠞ ꠅꠁꠟꠣ, ꠔꠟꠣ ꠕꠣꠇꠤ ꠔꠟꠣꠄꠁ ꠛꠋꠡ, ꠚꠅꠀ ꠕꠣꠇꠤ ꠚꠅꠀꠁ ꠛꠋꠡ,
NUM 26:24 ꠎꠣꠡꠥꠛ ꠕꠣꠇꠤ ꠎꠣꠡꠥꠛꠤ ꠛꠋꠡ ꠀꠞ ꠡꠤꠝꠞꠘ ꠕꠣꠇꠤ ꠡꠝꠞꠘꠤ ꠛꠋꠡ।
NUM 26:25 ꠄꠞꠣ ꠢꠇꠟ ꠁꠍꠣꠈꠞ ꠈꠣꠘ꠆ꠖꠣꠘꠞ ꠘꠣꠘꠣꠘ ꠛꠋꠡ। ꠄꠞꠣꠞ ꠝꠣꠎ ꠕꠣꠇꠤ ꠉꠘꠤꠀ ꠌꠃꠡꠐ꠆ꠐꠤ ꠀꠎꠣꠞ ꠔꠤꠘ-ꠡ ꠎꠘꠞꠦ ꠙꠣꠅꠀ ꠉꠦꠟ।
NUM 26:26 ꠁꠀꠇꠥꠛꠞ ꠙꠥꠀ ꠍꠛꠥꠟꠘꠞ ꠛꠋꠡꠗꠞ ꠅꠁꠟꠣ ꠍꠦꠞꠦꠖ ꠕꠣꠇꠤ ꠍꠦꠞꠦꠖꠤ ꠛꠋꠡ, ꠄꠟꠘ ꠕꠣꠇꠤ ꠄꠟꠘꠤ ꠛꠋꠡ ꠀꠞ ꠎꠢꠟꠦꠟ ꠕꠣꠇꠤ ꠎꠢꠟꠦꠟꠤ ꠛꠋꠡ।
NUM 26:27 ꠄꠞꠣ ꠢꠇꠟ ꠍꠛꠥꠟꠘ ꠈꠣꠘ꠆ꠖꠣꠘꠞ ꠘꠣꠘꠣꠘ ꠛꠋꠡ। ꠄꠞꠣꠞ ꠝꠣꠎ ꠕꠣꠇꠤ ꠡꠣꠁꠐ ꠀꠎꠣꠞ ꠙꠣꠌ-ꠡ ꠎꠘꠞꠦ ꠙꠣꠅꠀ ꠉꠦꠟ।
NUM 26:28 ꠁꠀꠇꠥꠛꠞ ꠙꠥꠀ ꠁꠃꠍꠥꠚꠞ ꠙꠥꠀꠂꠘ ꠅꠁꠟꠣ ꠝꠣꠘꠡꠣ ꠀꠞ ꠀꠚꠞꠣꠁꠝ।
NUM 26:29 ꠄꠞꠣꠞ ꠝꠣꠎꠦ, ꠝꠣꠘꠡꠣꠞ ꠛꠋꠡꠗꠞ ꠅꠁꠟꠣ, ꠝꠣꠈꠤꠞ ꠕꠣꠇꠤ ꠝꠣꠈꠤꠞꠤ ꠛꠋꠡ, ꠀꠞ ꠝꠣꠈꠤꠞꠞ ꠙꠥꠀ ꠉꠤꠟꠤꠅꠖ ꠕꠣꠇꠤ ꠉꠤꠟꠤꠅꠖꠤ ꠛꠋꠡ।
NUM 26:30 ꠉꠤꠟꠤꠅꠖꠞ ꠛꠋꠡꠗꠞ ꠅꠁꠟꠣ ꠁꠀꠎꠤꠞ ꠕꠣꠇꠤ ꠁꠀꠎꠤꠞꠤ ꠛꠋꠡ, ꠢꠦꠟꠇ ꠕꠣꠇꠤ ꠢꠦꠟꠇꠤ ꠛꠋꠡ,
NUM 26:31 ꠅꠍꠞꠤꠄꠟ ꠕꠣꠇꠤ ꠅꠍꠞꠤꠄꠟꠤ ꠛꠋꠡ, ꠡꠦꠈꠝ ꠕꠣꠇꠤ ꠡꠦꠈꠝꠤ ꠛꠋꠡ,
NUM 26:32 ꠡꠤꠝꠤꠖꠣ ꠕꠣꠇꠤ ꠡꠤꠝꠤꠖꠣꠁ ꠛꠋꠡ ꠀꠞ ꠢꠦꠚꠞ ꠕꠣꠇꠤ ꠢꠦꠚꠞꠤ ꠛꠋꠡ।
NUM 26:33 ꠢꠦꠚꠞꠞ ꠙꠥꠀ ꠎꠟꠣꠙꠈꠣꠖ, ꠔꠣꠞ ꠇꠥꠘꠥ ꠙꠥꠀꠂꠘ ꠀꠍꠟꠣ ꠘꠣ, ꠈꠣꠟꠤ ꠙꠥꠠꠤꠘ ꠀꠍꠟꠣ। ꠙꠥꠠꠤꠘ꠆ꠔꠞ ꠘꠣꠝ ꠅꠁꠟ, ꠝꠢꠟꠣ, ꠘꠥꠀ, ꠢꠉꠟꠣ, ꠝꠤꠟꠇꠣ ꠀꠞ ꠔꠤꠞꠎꠣ।
NUM 26:34 ꠄꠞꠣ ꠢꠇꠟꠃ ꠝꠣꠘꠡꠣ ꠈꠣꠘ꠆ꠖꠣꠘꠞ ꠘꠣꠘꠣꠘ ꠛꠋꠡ। ꠄꠞꠣꠞ ꠝꠣꠎ ꠕꠣꠇꠤ ꠉꠘꠤꠀ ꠛꠣꠄꠀꠘ꠆ꠘ ꠀꠎꠣꠞ ꠡꠣꠔ-ꠡ ꠎꠘꠞꠦ ꠙꠣꠅꠀ ꠉꠦꠟ।
NUM 26:35 ꠁꠀꠇꠥꠛꠞ ꠙꠥꠀ ꠀꠚꠞꠣꠁꠝꠞ ꠛꠋꠡꠗꠞ ꠅꠁꠟꠣ, ꠡꠥꠔꠟꠢ ꠕꠣꠇꠤ ꠡꠥꠔꠟꠢꠤ, ꠛꠦꠈꠞ ꠕꠣꠇꠤ ꠛꠦꠈꠞꠤ ꠀꠞ ꠔꠢꠘ ꠕꠣꠇꠤ ꠔꠢꠘꠤ ꠛꠋꠡ।
NUM 26:36 ꠡꠥꠔꠟꠢꠞ ꠛꠋꠡ, ꠄꠞꠘ ꠕꠣꠇꠤ ꠄꠞꠘꠤ ꠛꠋꠡ।
NUM 26:37 ꠄꠞꠣ ꠢꠇꠟ ꠀꠚꠞꠣꠁꠝ ꠈꠣꠘ꠆ꠖꠣꠘꠞ ꠘꠣꠘꠣꠘ ꠛꠋꠡ। ꠄꠞꠣꠞ ꠝꠣꠎ ꠕꠣꠇꠤ ꠉꠘꠤꠀ ꠛꠔ꠆ꠔꠤꠡ ꠀꠎꠣꠞ ꠙꠣꠌ-ꠡ ꠎꠘꠞꠦ ꠙꠣꠅꠀ ꠉꠦꠟ। ꠈꠣꠘ꠆ꠖꠣꠘ ꠢꠤꠡꠣꠛꠦ ꠄꠞꠣ ꠢꠇꠟꠃ ꠁꠃꠍꠥꠚꠞ ꠛꠋꠡꠗꠞ।
NUM 26:38 ꠁꠀꠇꠥꠛꠞ ꠙꠥꠀ ꠛꠤꠘ-ꠁꠀꠝꠤꠘꠞ ꠛꠋꠡꠗꠞ ꠅꠁꠟꠣ, ꠛꠦꠟꠣ ꠕꠣꠇꠤ ꠛꠦꠟꠣꠄꠁ ꠛꠋꠡ, ꠅꠡꠛꠦꠟ ꠕꠣꠇꠤ ꠅꠡꠛꠦꠟꠤ ꠛꠋꠡ, ꠀꠢꠤꠞꠣꠝ ꠕꠣꠇꠤ ꠀꠢꠤꠞꠣꠝꠤ ꠛꠋꠡ,
NUM 26:39 ꠡꠥꠚꠝ ꠕꠣꠇꠤ ꠡꠥꠚꠝꠤ ꠛꠋꠡ, ꠀꠞ ꠢꠥꠚꠝ ꠕꠣꠇꠤ ꠢꠥꠚꠝꠤ ꠛꠋꠡ।
NUM 26:40 ꠛꠦꠟꠣꠞ ꠙꠥꠀꠂꠘ ꠅꠞ꠆ꠖ ꠀꠞ ꠘꠣꠝꠣꠘꠞ ꠝꠣꠎꠖꠤ ꠛꠦꠟꠣꠞ ꠛꠋꠡꠗꠞ ꠅꠁꠟꠣ, ꠅꠞ꠆ꠖ ꠕꠣꠇꠤ ꠅꠞ꠆ꠖꠤ ꠛꠋꠡ ꠀꠞ ꠘꠣꠝꠣꠘ ꠕꠣꠇꠤ ꠘꠣꠝꠣꠘꠤ ꠛꠋꠡ।
NUM 26:41 ꠄꠞꠣ ꠛꠤꠘ-ꠁꠀꠝꠤꠘ ꠈꠣꠘ꠆ꠖꠣꠘꠞ ꠘꠣꠘꠣꠘ ꠛꠋꠡ। ꠄꠞꠣꠞ ꠝꠣꠎ ꠕꠣꠇꠤ ꠙꠄꠔꠣꠟ꠆ꠟꠤꠡ ꠀꠎꠣꠞ ꠍꠄ-ꠡ ꠎꠘꠞꠦ ꠙꠣꠅꠀ ꠉꠦꠟ।
NUM 26:42 ꠁꠀꠇꠥꠛꠞ ꠙꠥꠀ ꠖꠣꠘꠞ ꠛꠋꠡꠗꠞ ꠅꠁꠟꠣ, ꠡꠥꠢꠝ ꠕꠣꠇꠤ ꠡꠥꠢꠝꠤ ꠛꠋꠡ। ꠄꠞꠣꠃ ꠀꠍꠟꠣ ꠖꠣꠘ ꠈꠣꠘ꠆ꠖꠣꠘꠞ ꠝꠣꠘꠥꠡ।
NUM 26:43 ꠄꠞꠣꠞ ꠝꠣꠎ ꠕꠣꠇꠤ ꠉꠘꠤꠀ ꠌꠃꠡꠐ꠆ꠐꠤ ꠀꠎꠣꠞ ꠌꠣꠁꠞ-ꠡ ꠎꠘꠞꠦ ꠙꠣꠅꠀ ꠉꠦꠟ।
NUM 26:44 ꠁꠀꠇꠥꠛꠞ ꠙꠥꠀ ꠀꠡꠤꠞꠞ ꠛꠋꠡꠗꠞ ꠅꠁꠟꠣ, ꠁꠝꠘꠣ ꠕꠣꠇꠤ ꠁꠝꠘꠣꠄꠁ ꠛꠋꠡ, ꠎꠤꠍꠛꠤ ꠕꠣꠇꠤ ꠎꠤꠍꠛꠤꠀ ꠛꠋꠡ ꠀꠞ ꠛꠞꠤꠀ ꠕꠣꠇꠤ ꠛꠞꠤꠀꠄꠁ ꠛꠋꠡ।
NUM 26:45 ꠛꠞꠤꠀꠞ ꠛꠋꠡꠗꠞ ꠅꠁꠟꠣ ꠢꠦꠛꠞ ꠕꠣꠇꠤ ꠢꠦꠛꠞꠤ ꠛꠋꠡ, ꠀꠞ ꠝꠟꠇꠤꠄꠟ ꠕꠣꠇꠤ ꠝꠟꠇꠤꠄꠟꠤ ꠛꠋꠡ।
NUM 26:46 ꠀꠡꠤꠞꠞ ꠙꠥꠠꠤꠞ ꠘꠣꠝ ꠀꠍꠤꠟ ꠍꠦꠞꠣ।
NUM 26:47 ꠄꠞꠣ ꠢꠇꠟꠃ ꠀꠡꠤꠞ ꠈꠣꠘ꠆ꠖꠣꠘꠞ ꠘꠣꠘꠣꠘ ꠛꠋꠡ। ꠄꠞꠣꠞ ꠝꠣꠎ ꠕꠣꠇꠤ ꠉꠘꠤꠀ ꠔꠦꠙ꠆ꠙꠣꠘ꠆ꠘ ꠀꠎꠣꠞ ꠌꠣꠁꠞ-ꠡ ꠎꠘꠞꠦ ꠙꠣꠅꠀ ꠉꠦꠟ।
NUM 26:48 ꠁꠀꠇꠥꠛꠞ ꠙꠥꠀ ꠘꠙ꠆ꠔꠣꠟꠤꠞ ꠛꠋꠡꠗꠞ ꠅꠁꠟꠣ, ꠎꠢꠡꠤꠄꠟ ꠕꠣꠇꠤ ꠎꠢꠡꠤꠄꠟꠤ ꠛꠋꠡ, ꠉꠥꠘꠤ ꠕꠣꠇꠤ ꠉꠥꠘꠤꠀ ꠛꠋꠡ,
NUM 26:49 ꠁꠎꠦꠞ ꠕꠣꠇꠤ ꠁꠎꠦꠞꠤ ꠛꠋꠡ, ꠀꠞ ꠡꠤꠟ꠆ꠟꠦꠝ ꠕꠣꠇꠤ ꠡꠤꠟ꠆ꠟꠦꠝꠤ ꠛꠋꠡ।
NUM 26:50 ꠄꠞꠣ ꠢꠇꠟꠃ ꠘꠙ꠆ꠔꠣꠟꠤ ꠈꠣꠘ꠆ꠖꠣꠘꠞ ꠘꠣꠘꠣꠘ ꠛꠋꠡ। ꠄꠞꠣꠞ ꠝꠣꠎ ꠕꠣꠇꠤ ꠉꠘꠤꠀ ꠙꠄꠔꠣꠟ꠆ꠟꠤꠡ ꠀꠎꠣꠞ ꠌꠣꠁꠞ-ꠡ ꠎꠘꠞꠦ ꠙꠣꠅꠀ ꠉꠦꠟ।
NUM 26:51 ꠔꠦ ꠉꠘꠣꠞ ꠛꠣꠖꠦ ꠛꠘꠤ ꠁꠍꠞꠣꠁꠟꠞ ꠝꠣꠎꠦ ꠎꠥꠖ꠆ꠖꠔ ꠎꠣꠅꠀꠞ ꠎꠥꠇꠣ ꠛꠦꠐꠣꠁꠘ꠆ꠔꠞ ꠙꠞꠤꠝꠣꠘ ꠅꠁꠟ, ꠝꠥꠐ ꠍꠄ ꠟꠣꠈ ꠄꠇ ꠀꠎꠣꠞ ꠡꠣꠔ-ꠡ ꠔꠤꠡ ꠎꠘ।
NUM 26:52 ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ,
NUM 26:53 “ꠉꠘꠣ ꠅꠃ ꠝꠣꠘꠥꠡ ꠝꠣꠚꠤꠇ ꠀꠡ꠆ꠔꠣ ꠖꠦꠡꠞ ꠎꠝꠤꠘ ꠛꠣꠐꠤꠀ ꠖꠤꠔꠦ ꠅꠁꠛ, ꠎꠣꠔꠦ ꠢꠇꠟꠦ ꠎꠣꠞꠎꠤꠞ ꠛꠣꠐ ꠙꠣꠄ।
NUM 26:54 ꠎꠦ ꠈꠣꠘ꠆ꠖꠣꠘꠞ ꠝꠣꠘꠥꠡ ꠛꠦꠡꠤ ꠅꠃ ꠈꠣꠘ꠆ꠖꠣꠘꠞꠦ ꠛꠦꠡꠤ ꠀꠞ ꠎꠦ ꠈꠣꠘ꠆ꠖꠣꠘꠞ ꠝꠣꠘꠥꠡ ꠇꠝ, ꠅꠃ ꠈꠣꠘ꠆ꠖꠣꠘꠞꠦ ꠇꠝ ꠎꠣꠉꠣ ꠖꠤꠛꠣꠄ। ꠙꠞꠔꠦꠇ ꠈꠣꠘ꠆ꠖꠣꠘꠞ ꠝꠣꠘꠡꠦ ꠔꠣꠞ ꠝꠣꠘꠥꠡ ꠢꠤꠡꠣꠛꠦ ꠎꠣꠉꠣ-ꠎꠝꠤꠘ ꠙꠣꠁꠛ।
NUM 26:55 ꠀꠞ ꠇꠥꠘ ꠈꠣꠘ꠆ꠖꠣꠘꠦ ꠇꠥꠘ ꠎꠣꠉꠣꠔ ꠎꠝꠤꠘ ꠙꠣꠁꠛ, ꠁꠔꠣ ꠟꠐꠣꠞꠤ ꠝꠣꠞꠤꠀ ꠑꠤꠇ ꠇꠞꠣ ꠅꠁꠛ। ꠙꠞꠔꠦꠇ ꠛꠋꠡꠞ ꠙꠣꠅꠘꠣ ꠅꠋꠡ ꠔꠣꠞ ꠈꠣꠘ꠆ꠖꠣꠘꠞ ꠘꠣꠝꠦ ꠖꠦꠅꠀ ꠄꠟꠣꠇꠣꠞ ꠝꠣꠎꠦꠃ ꠕꠣꠇꠛ।
NUM 26:56 ꠈꠣꠘ꠆ꠖꠣꠘꠞ ꠝꠣꠘꠥꠡ ꠇꠝ ꠛꠣ ꠛꠦꠡꠤ ꠎꠦꠐꠣꠃ ꠅꠃꠇ, ꠟꠐꠣꠞꠤ ꠝꠣꠞꠤꠀ ꠎꠣꠉꠣ ꠑꠤꠇ ꠇꠞꠣ ꠅꠁꠛ।”
NUM 26:57 ꠢꠇꠟ ꠢꠦꠡꠦ ꠟꠦꠛꠤ ꠈꠣꠘ꠆ꠖꠣꠘꠞ ꠛꠋꠡꠗꠞ ꠉꠘꠣ ꠅꠁꠟ। ꠄꠞꠣ ꠅꠁꠟꠣ, ꠎꠣꠞꠍꠥꠘ ꠕꠣꠇꠤ ꠎꠣꠞꠍꠥꠘꠤ ꠉꠥꠡ꠆ꠐꠤ, ꠇꠣꠢꠣꠔ ꠕꠣꠇꠤ ꠇꠣꠢꠣꠔꠤ ꠉꠥꠡ꠆ꠐꠤ ꠀꠞ ꠝꠣꠞꠣꠞꠤ ꠕꠣꠇꠤ ꠝꠣꠞꠣꠞꠤꠀ ꠉꠥꠡ꠆ꠐꠤ।
NUM 26:58 ꠟꠦꠛꠤ ꠈꠣꠘ꠆ꠖꠣꠘꠞ ꠇꠤꠍꠥ ꠘꠣꠝꠇꠞꠣ ꠙꠞꠤꠛꠣꠞ ꠀꠍꠤꠟ, ꠄꠞꠣꠞ ꠝꠥꠟ ꠛꠣꠚꠞ ꠘꠣꠝ ꠅꠁꠟ ꠟꠤꠛꠘꠤ, ꠢꠦꠛꠞꠘ, ꠝꠢꠟꠤ, ꠝꠥꠡꠤ ꠀꠞ ꠇꠥꠞꠣꠢ। ꠇꠣꠢꠣꠔꠞ ꠄꠇ ꠙꠥꠀꠞ ꠘꠣꠝ ꠀꠍꠤꠟ ꠁꠝꠞꠣꠘ।
NUM 26:59 ꠁꠝꠞꠣꠘꠞ ꠛꠃꠞ ꠘꠣꠝ ꠁꠃꠈꠣꠛꠦꠎ, ꠝꠤꠡꠞ ꠖꠦꠡꠅ ꠕꠣꠇꠔꠦ ꠟꠦꠛꠤ ꠈꠣꠘ꠆ꠖꠣꠘꠞ ꠝꠣꠎꠦ ꠄꠘ ꠎꠘꠝ ꠅꠁꠍꠤꠟ। ꠄꠘ ꠙꠦꠐ ꠕꠣꠇꠤ ꠁꠝꠞꠣꠘꠞ ꠙꠥꠀꠂꠘ ꠢꠣꠞꠥꠘ ꠀꠞ ꠝꠥꠍꠣ ꠀꠞ ꠔꠣꠞꠣꠞ ꠛꠁꠘ ꠝꠞꠤꠅꠝꠞ ꠎꠘꠝ ꠅꠁꠍꠤꠟ।
NUM 26:60 ꠢꠣꠞꠥꠘꠞ ꠙꠥꠀꠂꠘ ꠅꠁꠟꠣ ꠘꠣꠖꠣꠛ, ꠀꠛꠤꠢꠥ, ꠀꠟꠤ-ꠀꠎꠞ ꠀꠞ ꠁꠍꠣꠝꠣꠞ।
NUM 26:61 ꠅꠁꠟꠦ ꠝꠣꠛꠥꠖꠞ ꠢꠥꠇꠥꠝ ꠜꠣꠋꠉꠤꠀ ꠖꠥꠍꠞꠣ ꠀꠉꠥꠁꠘ ꠖꠤꠀ ꠄꠛꠣꠖꠔ ꠇꠞꠣꠔ ꠉꠤꠀ ꠘꠣꠖꠣꠛ ꠀꠞ ꠀꠛꠤꠢꠥ ꠅꠃ ꠖꠥꠁ ꠎꠘꠞ ꠝꠞꠘ ꠅꠁꠍꠤꠟ।
NUM 26:62 ꠄꠇ ꠝꠣꠡ ꠛꠣ ꠄꠞ ꠛꠦꠡꠤ ꠛꠄꠅꠡꠞ ꠟꠦꠛꠤ ꠈꠣꠘ꠆ꠖꠣꠘꠞ ꠛꠦꠐꠣꠁꠘ꠆ꠔꠞ ꠙꠞꠤꠝꠣꠘ ꠀꠍꠤꠟ ꠔꠦꠁꠡ ꠀꠎꠣꠞ। ꠛꠘꠤ ꠁꠍꠞꠣꠁꠟꠞ ꠜꠤꠔꠞꠦ ꠄꠞꠣꠞꠦ ꠇꠥꠘꠥ ꠎꠣꠉꠣꠞ ꠝꠣꠟꠤꠇꠣꠘꠣ ꠖꠦꠅꠀ ꠅꠁꠍꠦ ꠘꠣ ꠉꠔꠤꠇꠦ ꠛꠘꠤ ꠁꠍꠞꠣꠁꠟꠞ ꠅꠁꠘ꠆ꠘꠣꠁꠘ꠆ꠘ ꠈꠣꠘ꠆ꠖꠣꠘꠞ ꠟꠉꠦ ꠄꠞꠣꠞꠦ ꠄꠇꠟꠉꠦ ꠉꠘꠣꠅ ꠅꠁꠍꠦ ꠘꠣ।
NUM 26:63 ꠎꠤꠞꠤꠢꠅ ꠐꠣꠃꠘꠞ ꠃꠟꠐꠣꠛꠣꠄ ꠎꠞ꠆ꠖꠣꠘ ꠉꠣꠋꠉꠞ ꠗꠣꠞꠅ ꠝꠥꠀꠛꠞ ꠔꠟ ꠎꠣꠉꠣꠔ ꠖꠥꠍꠞꠣꠛꠣꠞ ꠝꠣꠘꠥꠡ ꠉꠘꠣꠞ ꠡꠝꠄ ꠝꠥꠍꠣ ꠘꠛꠤ ꠀꠞ ꠁꠝꠣꠝ ꠀꠟꠤ-ꠀꠎꠞꠦ ꠛꠘꠤ ꠁꠍꠞꠣꠁꠟꠞꠦ ꠉꠘꠟꠣ।
NUM 26:64 ꠅꠁꠟꠦ ꠙꠄꠟꠣ ꠛꠣꠞ ꠍꠤꠘꠣꠁ ꠝꠞꠥꠜꠥꠝꠤꠔ ꠝꠥꠍꠣ ꠀꠞ ꠁꠝꠣꠝ ꠢꠣꠞꠥꠘꠦ ꠛꠘꠤ ꠁꠍꠞꠣꠁꠟꠞ ꠎꠣꠞꠣꠞꠦ ꠉꠘꠤꠍꠟꠣ, ꠅꠃ ꠖꠥꠍꠞꠣꠛꠣꠞ ꠉꠘꠣꠞ ꠡꠝꠄ ꠄꠞꠣꠞ ꠝꠣꠎꠞ ꠄꠇꠎꠘꠅ ꠎꠤꠘ꠆ꠖꠣ ꠞꠁꠍꠂꠘ ꠘꠣ।
NUM 26:65 ꠀꠍꠟꠦ ꠅꠔꠣ ꠛꠘꠤ ꠁꠍꠞꠣꠁꠟꠞ ꠛꠦꠙꠣꠞꠦ ꠝꠣꠛꠥꠖꠦ ꠀꠉꠦꠃ ꠇꠁꠍꠟꠣ, ꠔꠣꠞꠣ ꠘꠤꠌ꠆ꠌꠄ ꠅꠃ ꠝꠞꠥꠜꠥꠝꠤꠔ ꠝꠣꠞꠣ ꠎꠣꠁꠛꠣ। ꠀꠞ ꠢꠣꠍꠣꠃ ꠈꠣꠟꠤ ꠎꠤꠚꠥꠘ꠆ꠘꠤꠞ ꠙꠥꠀ ꠇꠣꠟꠥꠔ ꠀꠞ ꠘꠥꠘꠞ ꠙꠥꠀ ꠁꠃꠍꠣ ꠍꠣꠠꠣ ꠔꠣꠞꠣꠞ ꠝꠣꠎꠞ ꠖꠥꠍꠞꠣ ꠇꠦꠃ ꠎꠤꠘ꠆ꠖꠣ ꠞꠁꠍꠤꠟ ꠘꠣ।
NUM 27:1 ꠁꠃꠍꠥꠚꠞ ꠙꠥꠀ ꠝꠣꠘꠡꠣꠞ ꠈꠣꠘ꠆ꠖꠣꠘꠞ ꠎꠟꠣꠙꠈꠣꠖꠞ ꠙꠥꠠꠤꠘ꠆ꠔꠞ ꠍꠤꠟꠍꠤꠟꠣ ꠅꠁꠟ, ꠝꠣꠘꠡꠣꠞ ꠙꠥꠀ ꠝꠣꠈꠤꠞ, ꠝꠣꠈꠤꠞꠞ ꠙꠥꠀ ꠉꠤꠟꠤꠅꠖ, ꠉꠤꠟꠤꠅꠖꠞ ꠙꠥꠀ ꠢꠦꠚꠞ ꠀꠞ ꠢꠦꠚꠞꠞ ꠙꠥꠀꠞ ꠘꠣꠝ ꠎꠟꠣꠙꠈꠣꠖ। ꠎꠟꠣꠙꠈꠣꠖꠞ ꠙꠥꠠꠤꠘ ꠅꠁꠟꠣ ꠝꠢꠟꠣ, ꠘꠥꠀ, ꠢꠉꠟꠣ, ꠝꠤꠟꠇꠣ ꠀꠞ ꠔꠤꠞꠎꠣ।
NUM 27:2 ꠅꠃ ꠙꠥꠠꠤꠘ ꠀꠁꠀ ꠝꠤꠟꠘ-ꠔꠣꠝ꠆ꠛꠥꠞ ꠖꠥꠀꠞꠞ ꠍꠣꠝꠘꠦ ꠃꠛꠣꠁꠀ ꠝꠥꠍꠣ ꠘꠛꠤ, ꠁꠝꠣꠝ ꠀꠟꠤ-ꠀꠎꠞ, ꠝꠥꠞꠛ꠆ꠛꠤ ꠘꠦꠔꠣ ꠀꠞ ꠢꠇꠟ ꠛꠘꠤ ꠁꠍꠞꠣꠁꠟꠞꠦ ꠇꠁꠟꠣ,
NUM 27:3 “ꠀꠝꠞꠣꠞ ꠛꠣꠛꠣ ꠔ ꠝꠞꠥꠜꠥꠝꠤꠔ ꠝꠣꠞꠣ ꠉꠦꠍꠂꠘ। ꠀꠞ ꠇꠥꠞꠣꠢꠞ ꠖꠟꠞ ꠎꠦꠔꠣ ꠝꠣꠘꠡꠦ ꠝꠣꠛꠥꠖꠞ ꠛꠤꠞꠥꠖ꠆ꠖꠦ ꠘꠣꠚꠞꠝꠣꠘꠤ ꠇꠞꠍꠟꠣ, ꠔꠣꠁꠘ ꠔ ꠁꠔꠣꠞ ꠟꠉꠦ ꠀꠍꠟꠣ ꠘꠣ। ꠔꠣꠁꠘ ꠈꠣꠟꠤ ꠔꠣꠘ ꠘꠤꠎꠞ ꠉꠥꠘꠣꠞ ꠖꠣꠄ ꠝꠣꠞꠣ ꠉꠦꠍꠂꠘ। ꠀꠞ ꠀꠝꠞꠣꠞ ꠇꠥꠘꠥ ꠜꠣꠁ ꠎꠘꠝꠤꠍꠂꠘ ꠘꠣ,
NUM 27:4 ꠔꠦ ꠜꠣꠁ ꠘꠣ ꠕꠣꠇꠣꠄ ꠅꠈꠘ ꠀꠝꠞꠣꠞ ꠛꠣꠚꠞ ꠘꠣꠝ ꠇꠤꠔꠣ ꠁ ꠛꠋꠡ ꠕꠣꠇꠤ ꠝꠤꠐꠤꠎꠤꠔ ꠘꠤ? ꠔꠣꠘ ꠡꠞꠤꠇꠣꠘꠞ ꠟꠉꠦ ꠀꠝꠞꠣꠞꠦꠅ ꠎꠣꠉꠣ-ꠎꠝꠤꠘꠞ ꠛꠣꠐ ꠖꠦꠃꠇ꠆ꠇꠣ।”
NUM 27:5 ꠔꠦꠃ ꠝꠥꠍꠣ ꠘꠛꠤꠄ ꠔꠣꠞꠣꠞ ꠛꠦꠙꠣꠞꠦ ꠝꠣꠛꠥꠖꠞ ꠖꠞꠛꠣꠞꠅ ꠀꠞꠎ ꠇꠞꠟꠣ।
NUM 27:6 ꠝꠣꠛꠥꠖꠦ ꠔꠣꠘꠞꠦ ꠎꠥꠀꠙ ꠖꠤꠟꠣ,
NUM 27:7 “ꠎꠟꠣꠙꠈꠣꠖꠞ ꠙꠥꠠꠤꠘ꠆ꠔꠦ ꠑꠤꠇ ꠇꠕꠣꠃ ꠇꠁꠍꠦ। ꠔꠣꠞꠣꠞ ꠛꠣꠚꠞ ꠡꠞꠤꠇꠣꠘꠞ ꠟꠉꠦ ꠔꠣꠞꠣꠞꠦꠅ ꠎꠝꠤ-ꠎꠝꠣꠞ ꠛꠣꠐ ꠖꠤꠔꠦ ꠅꠁꠛ। ꠔꠣꠞꠣ ꠎꠣꠔꠦ ꠔꠣꠞꠣꠞ ꠛꠣꠚꠣꠁꠔꠤ ꠎꠝꠤꠘ ꠙꠣꠁꠘ, ꠁꠈꠣꠘ ꠔꠥꠝꠤ ꠈꠤꠀꠟ ꠞꠣꠈꠤꠅ।
NUM 27:8 ꠀꠞ ꠔꠥꠝꠤ ꠛꠘꠤ ꠁꠍꠞꠣꠁꠟꠞꠦ ꠇꠅ, ꠝꠞꠣꠞ ꠇꠣꠟꠅ ꠎꠥꠖꠤ ꠇꠥꠘꠥ ꠝꠣꠘꠡꠦ ꠙꠥꠀꠂꠘ ꠘꠣ ꠕꠁꠀ ꠝꠞꠤꠎꠣꠄ, ꠔꠦ ꠔꠣꠞ ꠎꠝꠤ-ꠎꠝꠣꠞ ꠛꠣꠐ ꠔꠣꠞ ꠙꠥꠠꠤꠘ꠆ꠔꠦ ꠙꠣꠁꠛꠣ।
NUM 27:9 ꠔꠣꠞ ꠇꠥꠘꠥ ꠙꠥꠠꠤꠘ ꠘꠣ ꠕꠣꠇꠟꠦ ꠔꠣꠞ ꠜꠣꠁꠀꠁꠘ꠆ꠔꠦ ꠁ ꠡꠝ꠆ꠙꠔ꠆ꠔꠤ ꠙꠣꠁꠛꠣ।
NUM 27:10 ꠔꠣꠞ ꠎꠥꠖꠤ ꠇꠥꠘꠥ ꠜꠣꠁ ꠘꠣ ꠕꠣꠇꠦ, ꠔꠦ ꠁꠔꠣ ꠔꠣꠞ ꠌꠣꠌꠣꠁꠘ꠆ꠔꠦ ꠙꠣꠁꠛꠣ।
NUM 27:11 ꠀꠞ ꠔꠣꠞ ꠎꠥꠖꠤ ꠇꠥꠘꠥ ꠌꠣꠌꠣꠅ ꠘꠣ ꠕꠣꠇꠂꠘ, ꠔꠦ ꠔꠣꠞ ꠛꠋꠡꠞ ꠢꠇꠟ ꠕꠣꠇꠤ ꠀꠙꠘ ꠎꠘꠦ ꠁ ꠡꠝ꠆ꠙꠔ꠆ꠔꠤ ꠙꠣꠁꠛꠣ, ꠄꠁꠘ ꠁꠔꠣꠞ ꠝꠣꠟꠤꠇ ꠅꠁꠛꠣ। ꠝꠥꠍꠣ ꠘꠛꠤꠞꠦ ꠛꠣꠔꠣꠁꠟ ꠝꠣꠛꠥꠖꠞ ꠅꠃ ꠢꠥꠇꠥꠝ ꠅꠁꠟ, ꠛꠘꠤ ꠁꠍꠞꠣꠁꠟꠞ ꠟꠣꠉꠤ ꠎꠝꠤ-ꠎꠝꠣꠞ ꠀꠁꠘꠞ ꠄꠇ ꠗꠣꠞꠣ।”
NUM 27:12 ꠄꠞꠛꠣꠖꠦ ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ, “ꠔꠥꠝꠤ ꠀꠛꠣꠞꠤꠝ ꠙꠣꠠꠞ ꠅꠃ ꠃꠌꠣ ꠐꠤꠟ꠆ꠟꠣꠞ ꠃꠙꠞꠦ ꠃꠑꠅ, ꠃꠑꠤꠀ ꠀꠝꠤ ꠛꠘꠤ ꠁꠍꠞꠣꠁꠟꠞꠦ ꠎꠦ ꠖꠦꠡ ꠖꠤꠍꠤ, ꠅꠈꠣꠘ ꠖꠦꠈꠤꠟꠣꠅ।
NUM 27:13 ꠀꠞ ꠢꠥꠘꠅ, ꠔꠥꠝꠣꠞ ꠜꠣꠁ ꠢꠣꠞꠥꠘ ꠎꠦꠟꠣ ꠔꠣꠞ ꠛꠣꠚ-ꠖꠣꠖꠣꠞ ꠟꠣꠈꠣꠘ ꠇꠄꠛꠞꠅ ꠢꠥꠔꠤ ꠞꠁꠍꠦ, ꠅꠃ ꠖꠦꠡ ꠖꠦꠈꠣꠞ ꠛꠣꠖꠦ ꠔꠥꠝꠤꠅ ꠅꠟꠣ ꠔꠥꠝꠣꠞ ꠛꠣꠚ-ꠖꠣꠖꠣꠞ ꠉꠦꠍꠦ ꠎꠣꠁꠛꠣꠄꠉꠤ।
NUM 27:14 ꠝꠘꠅ ꠀꠍꠦ ꠘꠤ, ꠎꠤꠘ ꠝꠞꠥꠜꠥꠝꠤꠞ ꠇꠣꠖꠦꠡ ꠄꠟꠣꠇꠣꠞ ꠝꠦꠞꠤꠛꠣ ꠘꠣꠝꠞ ꠎꠣꠉꠣꠞ ꠢꠃ ꠙꠣꠘꠤꠞ ꠇꠕꠣ? ꠝꠞꠥꠜꠥꠝꠤꠔ ꠛꠘꠤ ꠁꠍꠞꠣꠁꠟꠦ ꠎꠦꠛꠟꠣ ꠙꠣꠘꠤꠞ ꠟꠣꠉꠤ ꠀꠝꠣꠞ ꠛꠤꠞꠥꠗꠤꠔꠣ ꠇꠞꠍꠤꠟ, ꠔꠣꠞꠣꠞ ꠍꠣꠝꠘꠦ ꠔꠥꠝꠞꠣꠅ ꠀꠝꠣꠞꠦ ꠙꠣꠇ-ꠙꠛꠤꠔ꠆ꠞ ꠇꠁꠀ ꠘꠣ ꠝꠣꠘꠤꠀ ꠀꠝꠣꠞ ꠢꠥꠇꠥꠝꠞ ꠃꠟꠐꠣ ꠉꠦꠍꠟꠣꠄ।”
NUM 27:15 ꠅꠈꠣꠘ ꠢꠥꠘꠤꠀ ꠝꠥꠍꠣꠄ ꠀꠞꠎ ꠇꠞꠟꠣ,
NUM 27:16 “ꠅ ꠝꠣꠛꠥꠖ, ꠎꠦꠁꠘ ꠢꠇꠟ ꠝꠣꠘꠡꠞ ꠎꠤꠘ꠆ꠖꠦꠉꠤ ꠖꠣꠘ ꠇꠞꠂꠘ, ꠢꠃ ꠀꠟ꠆ꠟꠣ ꠝꠣꠛꠥꠖꠦ ꠛꠘꠤ ꠁꠍꠞꠣꠁꠟꠞ ꠃꠙꠞꠦ ꠅꠟꠣ ꠄꠇꠎꠘ ꠝꠣꠘꠡꠞꠦ ꠛꠅꠀꠁꠟ ꠇꠞꠃꠇ꠆ꠇꠣ,
NUM 27:17 ꠎꠦ ꠘꠦꠔꠣꠄ ꠢꠇꠟ ꠝꠣꠘꠡꠞꠦ ꠊꠞꠦ-ꠛꠣꠞꠦ, ꠝꠣꠑꠅ-ꠝꠄꠖꠣꠘꠅ ꠢꠇꠟ ꠛꠦꠙꠣꠞꠦ ꠌꠣꠟꠣꠁꠛꠣ। ꠔꠦꠃ ꠝꠣꠛꠥꠖꠞ ꠛꠘ꠆ꠖꠣ ꠅꠇꠟ ꠀ-ꠞꠣꠈꠣꠟꠤ ꠉꠞꠥ-ꠍꠣꠉꠟꠞ ꠟꠣꠈꠣꠘ ꠅꠁꠔꠣ ꠘꠣꠄ।”
NUM 27:18 ꠔꠦꠃ ꠝꠣꠛꠥꠖꠦ ꠎꠥꠀꠙ ꠖꠤꠟꠣ, “ꠘꠥꠘꠞ ꠙꠥꠔ ꠁꠃꠍꠣꠞ ꠜꠤꠔꠞꠦ ꠔ ꠀꠟ꠆ꠟꠣꠁ ꠞꠥꠢꠥ ꠀꠍꠂꠘ। ꠔꠥꠝꠤ ꠔꠣꠞꠦ ꠀꠘꠤꠀ ꠔꠣꠞ ꠃꠙꠞꠦ ꠔꠥꠝꠣꠞ ꠀꠔ ꠕꠁꠀ ꠈꠦꠟꠣꠚꠔꠤ ꠛꠈꠡꠤꠀ ꠖꠦꠅ।
NUM 27:19 ꠔꠥꠝꠤ ꠁꠝꠣꠝ ꠀꠟꠤ-ꠀꠎꠞ ꠀꠞ ꠢꠇꠟ ꠛꠘꠤ ꠁꠍꠞꠣꠁꠟꠞ ꠍꠣꠝꠘꠦ ꠔꠣꠞꠦ ꠀꠎꠤꠞ ꠇꠞꠤꠀ, ꠔꠣꠞꠣꠞ ꠍꠣꠝꠘꠦꠃ ꠔꠣꠞꠦ ꠖꠣꠄꠁꠔ꠆ꠔ ꠡꠝꠎꠣꠁ ꠖꠦꠅ।
NUM 27:20 ꠔꠥꠝꠣꠞꠦ ꠎꠦ ꠈꠦꠝꠔꠣ ꠖꠦꠅꠀ ꠅꠁꠍꠦ, ꠅꠃ ꠈꠦꠝꠔꠣꠞ ꠇꠤꠍꠥ ꠛꠣꠐ ꠔꠣꠞꠦ ꠖꠦꠅ, ꠔꠦꠃ ꠢꠇ꠆ꠇꠟ ꠛꠘꠤ ꠁꠍꠞꠣꠁꠟ ꠔꠣꠞ ꠇꠕꠣꠄ ꠌꠟꠛꠣ।
NUM 27:21 ꠛꠣꠖꠦ ꠢꠦ ꠁꠝꠣꠝ ꠀꠟꠤ-ꠀꠎꠞꠞ ꠉꠦꠍꠦ ꠎꠣꠁꠛ, ꠉꠦꠟꠦ ꠀꠟꠤ-ꠀꠎꠞꠦ ꠀꠟ꠆ꠟꠣꠞ ꠙꠛꠤꠔ꠆ꠞ ꠃꠞꠤꠝ ꠀꠞ ꠔꠥꠝ꠆ꠝꠤꠝ ꠙꠣꠔ꠆ꠔꠞꠖꠤ ꠟꠐꠣꠞꠤ ꠝꠣꠞꠤꠀ ꠝꠣꠛꠥꠖꠞ ꠝꠞ꠆ꠎꠤ ꠎꠣꠘꠔꠣ ꠙꠣꠞꠛꠣ। ꠅꠟꠣ ꠁꠃꠍꠣ ꠀꠞ ꠔꠣꠝꠣꠝ ꠛꠘꠤ ꠁꠍꠞꠣꠁꠟꠦ ꠌꠟꠣ-ꠚꠤꠞꠣ ꠇꠞꠛꠣ।”
NUM 27:22 ꠝꠥꠍꠣ ꠘꠛꠤꠄ ꠝꠣꠛꠥꠖꠞ ꠢꠥꠇꠥꠝ ꠝꠣꠚꠤꠇ ꠇꠣꠝ ꠇꠞꠟꠣ। ꠔꠣꠁꠘ ꠁꠝꠣꠝ ꠀꠟꠤ-ꠀꠎꠞ ꠀꠞ ꠛꠘꠤ ꠁꠍꠞꠣꠁꠟꠞ ꠍꠣꠝꠘꠦ ꠁꠃꠍꠣꠞꠦ ꠘꠤꠀ ꠀꠎꠤꠞ ꠇꠞꠟꠣ।
NUM 27:23 ꠀꠞ ꠝꠣꠛꠥꠖꠞ ꠢꠥꠇꠥꠝ ꠝꠣꠚꠤꠇ ꠔꠣꠘ ꠃꠙꠞꠦ ꠀꠔ ꠕꠁꠀ ꠔꠣꠘꠞꠦ ꠖꠣꠄꠁꠔ꠆ꠔ ꠡꠝꠎꠣꠁꠟꠣ।
NUM 28:1 ꠝꠣꠛꠥꠖꠦ ꠝꠥꠍꠣ ꠘꠛꠤꠞꠦ ꠇꠁꠟꠣ,
NUM 28:2 “ꠔꠥꠝꠤ ꠛꠘꠤ ꠁꠍꠞꠣꠁꠟꠞꠦ ꠀꠝꠣꠞ ꠅꠃ ꠢꠥꠇꠥꠝ ꠎꠣꠘꠣꠁ ꠖꠦꠅ, ꠀꠝꠣꠞꠦ ꠈꠥꠡꠤ ꠇꠞꠣꠞ ꠘꠤꠅꠔꠦ ꠊꠦꠞꠣꠘ ꠀꠟꠣ ꠎꠣꠟꠣꠁꠟ ꠇꠥꠞꠛꠣꠘꠤ ꠀꠝꠣꠞ ꠈꠣꠘꠤꠞ ꠟꠣꠉꠤ ꠡꠑꠤꠇ ꠡꠝꠄꠄ ꠀꠎꠤꠞ ꠇꠞꠔꠦ ꠅꠁꠛ।
NUM 28:3 ꠔꠣꠞꠣꠞꠦ ꠄꠅꠈꠣꠘ ꠇꠅ, ꠔꠥꠝꠞꠣ ꠝꠣꠛꠥꠖꠞ ꠘꠣꠝꠦ ꠙꠞꠔꠤꠖꠤꠘꠞ ꠀꠉꠥꠘꠤꠔ ꠖꠦꠅꠀ ꠇꠥꠞꠛꠣꠘꠤ ꠀꠖꠣꠄ ꠇꠞꠣꠞ ꠘꠤꠅꠔꠦ ꠅꠃ ꠙꠡꠥ ꠅꠇꠟ ꠀꠘꠤꠅ, ꠙꠞꠔꠤꠖꠤꠘ ꠄꠇ ꠛꠍꠞ ꠛꠄꠅꠡꠤ ꠖꠥꠉꠥ ꠘꠤꠈꠥꠔ ꠝꠦꠠꠣ-ꠛꠣꠁꠌ꠆ꠌꠣ ꠀꠘꠤꠅ।
NUM 28:4 ꠀꠘꠤꠀ ꠄꠉꠥ ꠛꠤꠀꠘꠦ ꠀꠞ ꠄꠉꠥ ꠢꠣꠁꠘ꠆ꠎꠣ ꠛꠣꠟꠣ ꠇꠥꠞꠛꠣꠘꠤ ꠖꠤꠛꠣꠄ।
NUM 28:5 ꠄꠞꠟꠉꠞ ꠙꠞꠔꠤꠖꠤꠘꠞ ꠗꠣꠘ-ꠉꠝꠞ ꠍꠖꠉꠣꠞ ꠟꠣꠉꠤ ꠖꠥꠁ ꠡꠦꠞ ꠝꠄꠖꠣ ꠀꠞ ꠄꠇ ꠡꠦꠞ ꠎꠄꠔꠥꠘꠞ ꠙꠤꠡꠣ ꠔꠦꠟ ꠀꠘꠛꠣꠄ।
NUM 28:6 ꠁꠐꠣ ꠅꠁꠟ ꠢꠃ ꠙꠞꠔꠤꠖꠤꠘꠞ ꠎꠣꠟꠣꠁꠟ ꠇꠥꠞꠛꠣꠘꠤ, ꠎꠦꠔꠣ ꠔꠥꠞ ꠙꠣꠠꠅ ꠡꠣꠁꠛꠡ꠆ꠔ ꠇꠞꠣ ꠅꠁꠍꠤꠟ। ꠀꠞ ꠁꠔꠣ ꠔ ꠀꠝꠣꠞ ꠘꠣꠝꠦ ꠀꠉꠥꠘꠤꠔ ꠖꠦꠅꠀ ꠇꠥꠞꠛꠣꠘꠤ, ꠄꠞ ꠗꠥꠝꠣꠞ ꠊꠦꠞꠣꠘꠦ ꠀꠝꠤ ꠈꠥꠡꠤ ꠅꠁ।
NUM 28:7 ꠙꠞꠔꠦꠇ ꠝꠦꠠꠣꠞ ꠟꠉꠦ ꠄꠇ ꠡꠦꠞ ꠀꠋꠉꠥꠞꠞ ꠡꠞꠛꠔ ꠖꠤꠀ ꠡꠞꠛꠔ-ꠙꠣꠘꠤꠞ ꠍꠖꠉꠣ ꠀꠖꠣꠄ ꠇꠞꠤꠅ। ꠝꠣꠛꠥꠖꠞ ꠘꠣꠝꠞ ꠇꠥꠞꠛꠣꠘꠤꠞ ꠅꠃ ꠡꠞꠛꠔ ꠄꠛꠣꠖꠔ ꠈꠣꠘꠣꠞ ꠃꠑꠣꠘꠅ ꠓꠣꠟꠤ ꠖꠤꠛꠣꠄ।
NUM 28:8 ꠝꠦꠠꠣꠞ ꠀꠞꠇ ꠛꠣꠁꠌ꠆ꠌꠣꠞꠦ ꠢꠣꠁꠘ꠆ꠎꠣ ꠛꠣꠟꠣ ꠇꠥꠞꠛꠣꠘꠤ ꠖꠤꠛꠣꠄ। ꠄꠞꠟꠉꠦ ꠛꠤꠀꠘꠇꠥꠞ ꠟꠣꠈꠣꠘ ꠗꠣꠘ-ꠉꠝꠞ ꠍꠖꠉꠣ ꠀꠞ ꠡꠞꠛꠔ-ꠙꠣꠘꠤꠞ ꠍꠖꠉꠣ ꠀꠖꠣꠄ ꠇꠞꠛꠣꠄ। ꠁꠔꠣ ꠅꠁꠟ ꠀꠉꠥꠘꠤꠔ ꠖꠦꠅꠀ ꠇꠥꠞꠛꠣꠘꠤ, ꠄꠞ ꠗꠥꠝꠣꠞ ꠊꠦꠞꠣꠘꠦ ꠀꠝꠤ ꠝꠣꠛꠥꠖ ꠈꠥꠡꠤ ꠅꠁ।
NUM 28:9 “ꠙꠞꠔꠦꠇ ꠎꠥꠝ꠆ꠝꠣꠛꠣꠞꠦ ꠄꠇ ꠛꠍꠞ ꠛꠄꠅꠡꠤ ꠖꠥꠉꠥ ꠝꠦꠠꠣ-ꠛꠣꠁꠌ꠆ꠌꠣ ꠇꠥꠞꠛꠣꠘꠤ ꠖꠤꠛꠣꠄ। ꠄꠞꠟꠉꠦ ꠡꠞꠛꠔ-ꠙꠣꠘꠤꠞ ꠍꠖꠉꠣꠞ ꠍꠣꠝꠣꠘꠣ ꠀꠞ ꠗꠣꠘ-ꠉꠝꠞ ꠍꠖꠉꠣꠞ ꠔꠦꠟ ꠝꠣꠈꠣꠁꠟ ꠌꠣꠁꠞ ꠡꠦꠞ ꠝꠄꠖꠣꠅ ꠖꠤꠛꠣꠄ।
NUM 28:10 ꠙꠞꠔꠤꠖꠤꠘꠞ ꠎꠣꠟꠣꠁꠟ ꠙꠡꠥ ꠇꠥꠞꠛꠣꠘꠤ ꠀꠞ ꠄꠞ ꠟꠉꠞ ꠡꠞꠛꠔ-ꠙꠣꠘꠤꠞ ꠍꠖꠉꠣ ꠍꠣꠠꠣꠅ ꠙꠞꠔꠦꠇ ꠎꠥꠝ꠆ꠝꠣꠛꠣꠞꠦ ꠅꠃ ꠎꠣꠟꠣꠁꠟ ꠇꠥꠞꠛꠣꠘꠤ ꠀꠖꠣꠄ ꠇꠞꠛꠣꠄ।
NUM 28:11 “ꠙꠞꠔꠦꠇ ꠌꠣꠘ꠆ꠖꠞ ꠙꠄꠟꠣ ꠖꠤꠘ ꠝꠣꠛꠥꠖꠞ ꠘꠣꠝꠦ ꠎꠣꠟꠣꠁꠟ ꠇꠥꠞꠛꠣꠘꠤꠞ ꠟꠣꠉꠤ ꠖꠥꠉꠥ ꠛꠤꠍꠣꠟ, ꠄꠉꠥ ꠝꠦꠠꠣ ꠀꠞ ꠄꠇ ꠛꠍꠞ ꠛꠄꠅꠡꠤ ꠡꠣꠔꠉꠥ ꠝꠦꠠꠣ-ꠛꠣꠁꠌ꠆ꠌꠣ ꠇꠥꠞꠛꠣꠘꠤ ꠖꠤꠛꠣꠄ, ꠁ ꠢꠇꠟ ꠙꠡꠥ ꠙꠥꠞꠣ ꠘꠤꠈꠥꠔ ꠅꠁꠔ।
NUM 28:12 ꠅꠃ ꠙꠞꠔꠦꠇ ꠛꠤꠍꠣꠟꠞ ꠟꠉꠦ ꠗꠣꠘ-ꠉꠝꠞ ꠍꠖꠉꠣ ꠢꠤꠡꠣꠛꠦ ꠔꠦꠟ ꠝꠣꠈꠣꠁꠟ ꠍꠄ ꠡꠦꠞ ꠝꠄꠖꠣ ꠖꠤꠛꠣꠄ, ꠀꠞ ꠝꠦꠠꠣꠞ ꠟꠉꠦ ꠌꠣꠁꠞ ꠡꠦꠞ ꠝꠄꠖꠣ ꠖꠤꠅ,
NUM 28:13 ꠀꠞ ꠙꠞꠔꠦꠇ ꠝꠦꠠꠣ-ꠛꠣꠁꠌ꠆ꠌꠣꠞ ꠟꠉꠦ ꠔꠦꠟ ꠝꠣꠈꠣꠁꠟ ꠖꠥꠁ ꠡꠦꠞ ꠝꠄꠖꠣ ꠖꠤꠅ। ꠁꠔꠣ ꠅꠁꠟ ꠀꠝꠣꠞ ꠘꠣꠝꠦ ꠀꠉꠥꠘꠤꠔ ꠖꠦꠅꠀ ꠇꠥꠞꠛꠣꠘꠤ, ꠁꠔꠣꠞ ꠗꠥꠝꠣꠞ ꠊꠦꠞꠣꠘꠦ ꠀꠝꠤ ꠝꠣꠛꠥꠖ ꠈꠥꠡꠤ ꠅꠁ।
NUM 28:14 ꠡꠞꠛꠔ-ꠙꠣꠘꠤꠞ ꠍꠖꠉꠣꠞ ꠟꠣꠉꠤ ꠙꠞꠔꠦꠇ ꠛꠤꠍꠣꠟꠞ ꠟꠉꠦ ꠖꠥꠁ ꠡꠦꠞ ꠀꠋꠉꠥꠞꠞ ꠡꠞꠛꠔ ꠖꠤꠛꠣꠄ। ꠙꠞꠔꠦꠇ ꠝꠦꠠꠣꠞ ꠟꠉꠦ ꠡꠥꠀ ꠡꠦꠞ ꠀꠞ ꠙꠞꠔꠦꠇ ꠝꠦꠠꠣ-ꠛꠣꠁꠌ꠆ꠌꠣꠞ ꠟꠉꠦ ꠄꠇ ꠡꠦꠞ ꠡꠞꠛꠔ ꠖꠤꠅ। ꠁꠔꠣ ꠅꠁꠟ ꠝꠣꠡꠤꠇ ꠎꠣꠟꠣꠁꠟ ꠇꠥꠞꠛꠣꠘꠤ, ꠛꠍꠞꠞ ꠙꠞꠔꠦꠇ ꠌꠣꠘ꠆ꠖꠅ ꠁꠔꠣ ꠀꠖꠣꠄ ꠇꠞꠛꠣꠄ।
NUM 28:15 ꠁꠔꠣꠞ ꠟꠉꠦ ꠉꠥꠘꠣꠞ ꠇꠚꠞꠣꠞ ꠘꠤꠅꠔꠦ ꠀꠝꠣꠞ ꠘꠣꠝꠦ ꠄꠉꠥ ꠍꠣꠉꠟ ꠇꠥꠞꠛꠣꠘꠤ ꠖꠤꠅ। ꠔꠣ-ꠅ ꠙꠞꠔꠦꠇ ꠖꠤꠘꠞ ꠎꠣꠟꠣꠁꠟ ꠇꠥꠞꠛꠣꠘꠤ, ꠀꠞ ꠄꠞ ꠟꠉꠞ ꠡꠞꠛꠔ-ꠙꠣꠘꠤꠞ ꠍꠖꠉꠣꠅ ꠀꠖꠣꠄ ꠇꠞꠤꠅ।
NUM 28:16 “ꠙꠞꠔꠦꠇ ꠛꠍꠞꠞ ꠙꠄꠟꠣ ꠌꠣꠘ꠆ꠖꠞ ꠌꠃꠖ꠆ꠖ ꠔꠣꠞꠤꠈ ꠝꠣꠛꠥꠖꠞ ꠘꠣꠝꠦ ꠀꠎꠣꠖꠤ ꠁꠖ ꠀꠖꠣꠄ ꠇꠞꠤꠅ।
NUM 28:17 ꠅꠃ ꠌꠣꠘ꠆ꠖꠞ ꠙꠘꠞ ꠔꠣꠞꠤꠈ ꠕꠣꠇꠤ ꠡꠣꠔ ꠖꠤꠘ ꠜꠞꠣ ꠀꠞꠇ ꠁꠖ ꠀꠖꠣꠄ ꠇꠞꠤꠅ, ꠁꠇꠐꠣꠞ ꠘꠣꠝ ꠈꠣꠝꠤꠞ ꠍꠣꠠꠣ ꠞꠥꠐꠤꠞ ꠁꠖ।
NUM 28:18 ꠄꠞ ꠙꠄꠟꠣ ꠖꠤꠘ ꠙꠛꠤꠔ꠆ꠞ ꠝꠤꠟꠘ-ꠝꠣꠢꠚꠤꠟ ꠇꠞꠤꠅ, ꠁ ꠖꠤꠘ ꠖꠥꠘꠤꠀꠛꠤ ꠘꠤꠅꠔꠦ ꠇꠥꠘꠥ ꠇꠣꠝ-ꠇꠣꠎ ꠇꠞꠣ ꠘꠣꠎꠣꠁꠎ।
NUM 28:19 ꠅꠃ ꠖꠤꠘ ꠀꠝꠣꠞ ꠘꠣꠝꠦ ꠖꠥꠉꠥ ꠛꠤꠍꠣꠟ, ꠄꠉꠥ ꠝꠦꠠꠣ ꠀꠞ ꠄꠇ ꠛꠍꠞ ꠛꠄꠅꠡꠤ ꠡꠣꠔꠉꠥ ꠝꠦꠠꠣ-ꠛꠣꠁꠌ꠆ꠌꠣꠖꠤ ꠀꠉꠥꠘꠤꠔ ꠖꠦꠅꠀ ꠎꠣꠟꠣꠁꠟ ꠇꠥꠞꠛꠣꠘꠤ ꠀꠖꠣꠄ ꠇꠞꠤꠅ। ꠇꠥꠞꠛꠣꠘꠤꠞ ꠙꠞꠔꠦꠇ ꠙꠡꠥ ꠘꠤꠈꠥꠔ ꠅꠁꠔꠦ ꠅꠁꠛ।
NUM 28:20 ꠅꠃ ꠙꠡꠥꠞ ꠟꠉꠞ ꠗꠣꠘ-ꠉꠝꠞ ꠍꠖꠉꠣ ꠢꠤꠡꠣꠛꠦ ꠔꠦꠟ ꠝꠣꠈꠣꠁꠟ ꠝꠄꠖꠣ ꠖꠤꠛꠣꠄ, ꠄꠇꠅꠐꠣ ꠛꠤꠍꠣꠟꠞ ꠟꠉꠦ ꠍꠄ ꠡꠦꠞ, ꠝꠦꠠꠣ ꠙꠣꠑꠣꠞ ꠟꠉꠦ ꠌꠣꠁꠞ ꠡꠦꠞ,
NUM 28:21 ꠀꠞ ꠝꠦꠠꠣ-ꠛꠣꠁꠌ꠆ꠌꠣꠞ ꠟꠉꠦ ꠖꠥꠁ ꠡꠦꠞ ꠖꠤꠛꠣꠄ।
NUM 28:22 ꠁꠔꠣꠞ ꠟꠉꠦ ꠔꠥꠝꠞꠣꠞ ꠉꠥꠘꠣꠞ ꠇꠚꠞꠣꠞ ꠟꠣꠉꠤ ꠄꠉꠥ ꠙꠣꠑꠣ ꠍꠣꠉꠟꠅ ꠇꠥꠞꠛꠣꠘꠤ ꠖꠤꠅ।
NUM 28:23 ꠙꠞꠔꠦꠇ ꠖꠤꠘꠞ ꠛꠤꠀꠘꠇꠥꠞ ꠎꠣꠟꠣꠁꠟ ꠇꠥꠞꠛꠣꠘꠤ ꠔ ꠖꠤꠛꠣꠄꠃ, ꠄꠞꠟꠉꠦ ꠅꠃ ꠇꠥꠞꠛꠣꠘꠤꠅ ꠀꠖꠣꠄ ꠇꠞꠛꠣꠄ।
NUM 28:24 ꠅꠃ ꠟꠣꠈꠣꠘ ꠙꠥꠞꠣ ꠢꠣꠙ꠆ꠔꠣꠞ ꠡꠣꠔꠅꠖꠤꠘ ꠀꠝꠣꠞꠦ ꠈꠥꠡꠤ ꠇꠞꠣꠞ ꠊꠦꠞꠣꠘ ꠀꠟꠣ ꠈꠣꠘꠤ ꠢꠤꠡꠣꠛꠦ ꠙꠞꠔꠦꠇ ꠖꠤꠘ ꠅꠃ ꠀꠉꠥꠘꠤꠔ ꠖꠦꠅꠀ ꠇꠥꠞꠛꠣꠘꠤ ꠀꠖꠣꠄ ꠇꠞꠛꠣꠄ। ꠙꠞꠔꠤꠖꠤꠘꠞ ꠎꠣꠟꠣꠁꠟ ꠇꠥꠞꠛꠣꠘꠤ ꠀꠞ ꠄꠞ ꠟꠉꠞ ꠡꠞꠛꠔ-ꠙꠣꠘꠤꠞ ꠍꠖꠉꠣꠞ ꠟꠉꠦ ꠅꠃ ꠇꠥꠞꠛꠣꠘꠤꠅ ꠀꠖꠣꠄ ꠇꠞꠛꠣꠄ।
NUM 28:25 ꠢꠦꠡꠦ ꠡꠣꠔ ꠘꠝ꠆ꠛꠞ ꠖꠤꠘꠅ ꠔꠥꠝꠞꠣ ꠙꠛꠤꠔ꠆ꠞ ꠝꠤꠟꠘ-ꠝꠣꠢꠚꠤꠟ ꠇꠞꠤꠅ, ꠅꠃ ꠖꠤꠘ ꠖꠥꠘꠤꠀꠛꠤ ꠘꠤꠅꠔꠦ ꠇꠥꠘꠥ ꠇꠣꠝ-ꠇꠣꠎ ꠇꠞꠣ ꠘꠣꠎꠣꠁꠎ।
NUM 28:26 “ꠙꠘ꠆ꠌꠣꠁꠡꠣ ꠁꠖꠞ ꠖꠤꠘ, ꠝꠣꠘꠤ ꠈꠦꠔꠞ ꠙꠄꠟꠣ ꠖꠣꠅꠀ ꠚꠡꠟ ꠖꠤꠀ ꠎꠦꠖꠤꠘ ꠔꠥꠝꠞꠣ ꠀꠝꠣꠞ ꠘꠣꠝꠦ ꠙꠛꠤꠔ꠆ꠞ ꠝꠤꠟꠘ-ꠝꠣꠢꠚꠤꠟ ꠇꠞꠛꠣꠄ, ꠢꠤ ꠖꠤꠘ ꠇꠥꠘꠥ ꠖꠥꠘꠤꠀꠛꠤ ꠘꠤꠅꠔꠦ ꠇꠣꠝ ꠇꠞꠤꠅ ꠘꠣ।
NUM 28:27 ꠅꠃ ꠖꠤꠘ ꠔꠥꠝꠞꠣ ꠖꠥꠉꠥ ꠛꠤꠍꠣꠟ, ꠄꠉꠥ ꠝꠦꠠꠣ ꠀꠞ ꠄꠇ ꠛꠍꠞ ꠛꠄꠅꠡꠤ ꠡꠣꠔꠉꠥ ꠝꠦꠠꠣ-ꠛꠣꠁꠌ꠆ꠌꠣ ꠖꠤꠀ ꠎꠣꠟꠣꠁꠟ ꠇꠥꠞꠛꠣꠘꠤ ꠀꠖꠣꠄ ꠇꠞꠤꠅ, ꠅꠃ ꠇꠥꠞꠛꠣꠘꠤꠞ ꠗꠥꠝꠣꠞ ꠊꠦꠞꠣꠘꠦ ꠀꠝꠤ ꠝꠣꠛꠥꠖ ꠈꠥꠡꠤ ꠅꠁ।
NUM 28:28 ꠀꠞ ꠅꠔꠣꠞ ꠟꠉꠞ ꠗꠣꠘ-ꠉꠝꠞ ꠍꠖꠉꠣ ꠢꠤꠡꠣꠛꠦ ꠄꠇꠅꠐꠣ ꠛꠤꠍꠣꠟꠞ ꠟꠉꠦ ꠔꠦꠟ ꠝꠣꠈꠣꠁꠟ ꠍꠄ ꠡꠦꠞ ꠝꠄꠖꠣ, ꠝꠦꠠꠣꠞ ꠟꠉꠦ ꠌꠣꠁꠞ ꠡꠦꠞ,
NUM 28:29 ꠀꠞ ꠝꠦꠠꠣ-ꠛꠣꠁꠌ꠆ꠌꠣꠞ ꠟꠉꠦ ꠖꠥꠁ ꠡꠦꠞ ꠖꠤꠛꠣꠄ।
NUM 28:30 ꠅꠔꠣꠞ ꠟꠉꠦ ꠄꠉꠥ ꠙꠣꠑꠣ ꠍꠣꠉꠟꠅ ꠇꠥꠞꠛꠣꠘꠤ ꠖꠤꠅ ꠔꠥꠝꠞꠣꠞ ꠉꠥꠘꠣꠞ ꠇꠚꠞꠣꠞ ꠟꠣꠉꠤ।
NUM 28:31 ꠅꠃ ꠢꠇꠟ ꠇꠥꠞꠛꠣꠘꠤ ꠀꠞ ꠁꠔꠣꠞ ꠟꠉꠞ ꠡꠞꠛꠔ-ꠙꠣꠘꠤꠞ ꠍꠖꠉꠣꠞ ꠟꠉꠦ ꠙꠞꠔꠤꠖꠤꠘꠞ ꠎꠣꠟꠣꠁꠟ ꠇꠥꠞꠛꠣꠘꠤ ꠀꠞ ꠄꠞ ꠟꠉꠞ ꠗꠣꠘ-ꠉꠝꠞ ꠍꠖꠉꠣ ꠀꠖꠣꠄ ꠇꠞꠛꠣꠄ। ꠈꠤꠀꠟ ꠞꠣꠈꠤꠅ, ꠇꠥꠞꠛꠣꠘꠤꠞ ꠢꠇꠟ ꠙꠡꠥ ꠎꠣꠘꠥ ꠙꠥꠞꠣꠙꠥꠞ ꠘꠤꠈꠥꠔ ꠅꠄ।
NUM 29:1 ꠝꠣꠛꠥꠖꠦ ꠀꠞꠅ ꠇꠁꠞꠣ, “ꠙꠞꠔꠦꠇ ꠛꠍꠞꠞ ꠡꠣꠔ ꠘꠝ꠆ꠛꠞ ꠌꠣꠘ꠆ꠖꠞ ꠙꠄꠟꠣ ꠖꠤꠘ ꠅꠁꠟ, ꠔꠥꠝꠞꠣꠞ ꠡꠤꠋꠉꠣ ꠛꠣꠎꠣꠘꠤꠞ ꠁꠖꠞ ꠖꠤꠘ। ꠅꠃ ꠖꠤꠘ ꠔꠥꠝꠞꠣ ꠙꠛꠤꠔ꠆ꠞ ꠝꠤꠟꠘ-ꠝꠣꠢꠚꠤꠟ ꠇꠞꠤꠅ। ꠁ ꠖꠤꠘ ꠖꠥꠘꠤꠀꠛꠤ ꠘꠤꠅꠔꠦ ꠇꠥꠘꠥ ꠇꠣꠝ-ꠇꠣꠎ ꠇꠞꠣ ꠘꠣꠎꠣꠁꠎ।
NUM 29:2 ꠅꠃ ꠖꠤꠘ ꠔꠥꠝꠞꠣ ꠀꠝꠣꠞꠦ ꠈꠥꠡꠤ ꠇꠞꠣꠞ ꠊꠦꠞꠣꠘ ꠀꠟꠣ ꠎꠣꠟꠣꠁꠟ ꠇꠥꠞꠛꠣꠘꠤ ꠢꠤꠡꠣꠛꠦ, ꠄꠉꠥ ꠛꠤꠍꠣꠟ, ꠄꠉꠥ ꠝꠦꠠꠣ ꠀꠞ ꠡꠣꠔꠉꠥ ꠄꠇ ꠛꠍꠞ ꠛꠄꠅꠡꠤ ꠝꠦꠠꠣ-ꠛꠣꠁꠌ꠆ꠌꠣꠞꠦ ꠇꠥꠞꠛꠣꠘꠤ ꠖꠤꠅ, ꠢꠇꠟ ꠙꠡꠥ ꠎꠣꠘꠥ ꠙꠥꠞꠣꠙꠥꠞ ꠘꠤꠈꠥꠔ ꠅꠄ।
NUM 29:3 ꠀꠞ ꠅꠔꠣꠞ ꠟꠉꠞ ꠗꠣꠘ-ꠉꠝꠞ ꠍꠖꠉꠣ ꠢꠤꠡꠣꠛꠦ ꠔꠦꠟ ꠝꠣꠈꠣꠁꠟ ꠝꠄꠖꠣ ꠖꠤꠅ। ꠛꠤꠍꠣꠟꠞ ꠟꠉꠦ ꠍꠄ ꠡꠦꠞ, ꠝꠦꠠꠣꠞ ꠟꠉꠦ ꠌꠣꠁꠞ ꠡꠦꠞ,
NUM 29:4 ꠀꠞ ꠙꠞꠔꠦꠇ ꠝꠦꠠꠣ-ꠛꠣꠁꠌ꠆ꠌꠣꠞ ꠟꠉꠦ ꠖꠥꠁ ꠡꠦꠞ ꠖꠤꠛꠣꠄ।
NUM 29:5 ꠁꠔꠣꠞ ꠟꠉꠦ ꠔꠥꠝꠞꠣꠞ ꠉꠥꠘꠣꠞ ꠇꠚꠞꠣꠞ ꠟꠣꠉꠤ ꠄꠉꠥ ꠙꠣꠑꠣ ꠍꠣꠉꠟꠅ ꠇꠥꠞꠛꠣꠘꠤ ꠖꠤꠛꠣꠄ।
NUM 29:6 ꠙꠞꠔꠦꠇ ꠌꠣꠘ꠆ꠖꠞ ꠀꠞ ꠙꠞꠔꠤ ꠖꠤꠘꠞ ꠎꠣꠟꠣꠁꠟ ꠇꠥꠞꠛꠣꠘꠤ, ꠁꠔꠣꠞ ꠟꠉꠞ ꠗꠣꠘ-ꠉꠝꠞ ꠍꠖꠉꠣ ꠀꠞ ꠡꠞꠛꠔ-ꠙꠣꠘꠤꠞ ꠍꠖꠉꠣ ꠍꠣꠠꠣꠅ ꠅꠃ ꠇꠥꠞꠛꠣꠘꠤ ꠅꠇꠟ ꠀꠖꠣꠄ ꠇꠞꠤꠅ। ꠁꠔꠣ ꠔ ꠀꠝꠣꠞ ꠘꠣꠝꠦ ꠀꠉꠥꠘꠤꠔ ꠖꠦꠅꠀ ꠇꠥꠞꠛꠣꠘꠤ, ꠁꠔꠣꠞ ꠗꠥꠝꠣꠞ ꠊꠦꠞꠣꠘꠦ ꠀꠝꠤ ꠝꠣꠛꠥꠖ ꠈꠥꠡꠤ ꠅꠁ।
NUM 29:7 “ꠀꠞ ꠅꠃ ꠡꠣꠔ ꠘꠝ꠆ꠛꠞ ꠌꠣꠘ꠆ꠖꠞ ꠖꠡ ꠔꠣꠞꠤꠈꠅ ꠄꠇꠐꠣ ꠙꠛꠤꠔ꠆ꠞ ꠝꠤꠟꠘ-ꠝꠣꠢꠚꠤꠟ ꠇꠞꠛꠣꠄ। ꠅꠃ ꠖꠤꠘ ꠔꠥꠝꠞꠣ ꠙꠞꠔꠦꠇꠦ ꠘꠔ ꠅꠁꠀ ꠎꠣꠞꠎꠤꠞ ꠖꠤꠟ ꠡꠙꠤꠀ ꠖꠤꠛꠣꠄ, ꠁ ꠖꠤꠘ ꠇꠦꠃ ꠇꠥꠘꠥꠎꠣꠔ ꠇꠣꠝ ꠇꠞꠤꠅ ꠘꠣ।
NUM 29:8 ꠀꠝꠤ ꠝꠣꠛꠥꠖꠞꠦ ꠈꠥꠡꠤ ꠇꠞꠣꠞ ꠘꠤꠅꠔꠦ ꠊꠦꠞꠣꠘ ꠀꠟꠣ ꠎꠣꠟꠣꠁꠟ ꠇꠥꠞꠛꠣꠘꠤ ꠢꠤꠡꠣꠛꠦ ꠘꠤꠈꠥꠔ ꠄꠉꠥ ꠛꠤꠍꠣꠟ, ꠄꠉꠥ ꠝꠦꠠꠣ, ꠀꠞ ꠡꠣꠔꠉꠥ ꠄꠇ ꠛꠍꠞ ꠛꠄꠅꠡꠤ ꠝꠦꠠꠣ-ꠛꠣꠁꠌ꠆ꠌꠣꠞꠦ ꠇꠥꠞꠛꠣꠘꠤ ꠖꠤꠅ।
NUM 29:9 ꠀꠞ ꠅꠔꠣꠞ ꠟꠉꠞ ꠗꠣꠘ-ꠉꠝꠞ ꠍꠖꠉꠣ ꠢꠤꠡꠣꠛꠦ ꠛꠤꠍꠣꠟꠞ ꠟꠉꠦ ꠔꠦꠟ ꠝꠣꠈꠣꠁꠟ ꠍꠄ ꠡꠦꠞ ꠝꠄꠖꠣ ꠖꠤꠅ, ꠝꠦꠠꠣꠞ ꠟꠉꠦ ꠌꠣꠁꠞ ꠡꠦꠞ,
NUM 29:10 ꠀꠞ ꠙꠞꠔꠦꠇ ꠝꠦꠠꠣ-ꠛꠣꠁꠌ꠆ꠌꠣꠞ ꠟꠉꠦ ꠖꠥꠁ ꠡꠦꠞ ꠖꠤꠛꠣꠄ।
NUM 29:11 ꠢꠦꠡꠦ ꠉꠥꠘꠣ ꠝꠣꠚꠤꠞ ꠇꠥꠞꠛꠣꠘꠤꠞ ꠟꠣꠉꠤ ꠄꠉꠥ ꠙꠣꠑꠣ ꠍꠣꠉꠟꠅ ꠖꠤꠛꠣꠄ। ꠁꠖꠞ ꠅꠃ ꠇꠥꠞꠛꠣꠘꠤ ꠅꠇꠟ ꠍꠣꠠꠣꠅ ꠉꠥꠘꠣꠞ ꠇꠚꠞꠣꠞ ꠇꠥꠞꠛꠣꠘꠤ ꠀꠞ ꠙꠞꠔꠤ ꠖꠤꠘꠞ ꠎꠣꠟꠣꠁꠟ ꠇꠥꠞꠛꠣꠘꠤ, ꠄꠞ ꠟꠉꠞ ꠗꠣꠘ-ꠉꠝꠞ ꠍꠖꠉꠣ ꠀꠞ ꠡꠞꠛꠔ-ꠙꠣꠘꠤꠞ ꠍꠖꠉꠣꠅ ꠖꠤꠅ।
NUM 29:12 “ꠔꠥꠝꠞꠣ ꠒꠦꠞꠣ-ꠊꠞꠞ ꠁꠖꠞ ꠢꠣꠙ꠆ꠔꠣꠞ ꠙꠄꠟꠣ ꠖꠤꠘ ꠝꠣꠘꠤ, ꠡꠣꠔ ꠘꠝ꠆ꠛꠞ ꠌꠣꠘ꠆ꠖꠞ ꠙꠘꠞ ꠔꠣꠞꠤꠈꠅ, ꠄꠇꠐꠣ ꠙꠛꠤꠔ꠆ꠞ ꠝꠤꠟꠘ-ꠝꠣꠢꠚꠤꠟ ꠇꠞꠛꠣꠄ, ꠅꠃ ꠖꠤꠘ ꠔꠥꠝꠞꠣ ꠖꠥꠘꠤꠀꠛꠤ ꠘꠤꠅꠔꠦ ꠇꠥꠘꠥ ꠇꠣꠝ-ꠇꠣꠎ ꠇꠞꠤꠅ ꠘꠣ। ꠅꠃ ꠡꠣꠔ ꠖꠤꠘ ꠝꠣꠛꠥꠖꠞ ꠘꠣꠝꠦ ꠁꠖꠞ ꠈꠥꠡꠤ-ꠛꠣꠡꠤ ꠇꠞꠤꠅ।
NUM 29:13 “ꠁꠖꠞ ꠙꠄꠟꠣ ꠖꠤꠘ ꠙꠥꠞꠣꠙꠥꠞ ꠘꠤꠈꠥꠔ ꠔꠦꠞꠅꠉꠥ ꠛꠤꠍꠣꠟ, ꠖꠥꠉꠥ ꠝꠦꠠꠣ ꠀꠞ ꠌꠃꠖ꠆ꠖꠉꠥ ꠄꠇ ꠛꠍꠞ ꠛꠄꠅꠡꠤ ꠝꠦꠠꠣ-ꠛꠣꠁꠌ꠆ꠌꠣ ꠖꠤꠀ ꠎꠣꠟꠣꠁꠟ ꠇꠥꠞꠛꠣꠘꠤ ꠀꠖꠣꠄ ꠇꠞꠤꠅ। ꠄꠞ ꠗꠥꠝꠣꠞ ꠊꠦꠞꠣꠘꠦ ꠀꠝꠤ ꠝꠣꠛꠥꠖ ꠈꠥꠡꠤ ꠅꠁ।
NUM 29:14 ꠅꠔꠣꠞ ꠙꠞꠔꠦꠇ ꠛꠤꠍꠣꠟꠞ ꠟꠉꠞ ꠗꠣꠘ-ꠉꠝꠞ ꠍꠖꠉꠣ ꠢꠤꠡꠣꠛꠦ ꠔꠦꠟ ꠝꠣꠈꠣꠁꠟ ꠍꠄ ꠡꠦꠞ ꠝꠄꠖꠣ, ꠙꠞꠔꠦꠇ ꠝꠦꠠꠣꠞ ꠟꠉꠦ ꠌꠣꠁꠞ ꠡꠦꠞ,
NUM 29:15 ꠀꠞ ꠙꠞꠔꠦꠇ ꠝꠦꠠꠣ-ꠛꠣꠁꠌ꠆ꠌꠣꠞ ꠟꠉꠦ ꠖꠥꠁ ꠡꠦꠞ ꠖꠤꠛꠣꠄ।
NUM 29:16 ꠢꠦꠡꠦ ꠉꠥꠘꠣ ꠝꠣꠚꠤꠞ ꠇꠥꠞꠛꠣꠘꠤꠞ ꠟꠣꠉꠤ ꠄꠉꠥ ꠙꠣꠑꠣ ꠍꠣꠉꠟꠅ ꠖꠤꠛꠣꠄ। ꠖꠤꠀ ꠙꠞꠔꠤ ꠖꠤꠘꠞ ꠎꠣꠟꠣꠁꠟ ꠇꠥꠞꠛꠣꠘꠤ, ꠄꠞ ꠟꠉꠞ ꠗꠣꠘ-ꠉꠝꠞ ꠍꠖꠉꠣ ꠀꠞ ꠡꠞꠛꠔ-ꠙꠣꠘꠤꠞ ꠍꠖꠉꠣꠅ ꠖꠤꠛꠣꠄ।
NUM 29:17 “ꠁꠖꠞ ꠖꠥꠁ ꠘꠝ꠆ꠛꠞ ꠖꠤꠘ ꠙꠥꠞꠣꠙꠥꠞ ꠘꠤꠈꠥꠔ ꠛꠣꠞꠅꠉꠥ ꠛꠤꠍꠣꠟ, ꠖꠥꠉꠥ ꠝꠦꠠꠣ ꠀꠞ ꠌꠃꠖ꠆ꠖꠉꠥ ꠄꠇ ꠛꠍꠞ ꠛꠄꠅꠡꠤ ꠝꠦꠠꠣ-ꠛꠣꠁꠌ꠆ꠌꠣ ꠇꠥꠞꠛꠣꠘꠤ ꠖꠤꠛꠣꠄ।
NUM 29:18 ꠅꠃ ꠛꠤꠍꠣꠟ, ꠝꠦꠠꠣ ꠀꠞ ꠝꠦꠠꠣ-ꠛꠣꠁꠌ꠆ꠌꠣ ꠢꠇ꠆ꠇꠟꠐꠤꠞ ꠟꠉꠦ ꠗꠣꠘ-ꠉꠝꠞ ꠍꠖꠉꠣ, ꠡꠞꠛꠔ-ꠙꠣꠘꠤꠞ ꠍꠖꠉꠣ, ꠙꠡꠥꠞ ꠙꠞꠤꠝꠣꠘ ꠝꠣꠚꠤꠇ ꠀꠖꠣꠄ ꠇꠞꠤꠅ।
NUM 29:19 ꠢꠦꠡꠦ ꠉꠥꠘꠣ ꠝꠣꠚꠤꠞ ꠇꠥꠞꠛꠣꠘꠤꠞ ꠟꠣꠉꠤ ꠄꠉꠥ ꠙꠣꠑꠣ ꠍꠣꠉꠟꠅ ꠖꠤꠛꠣꠄ। ꠖꠤꠀ ꠙꠞꠔꠤ ꠖꠤꠘꠞ ꠎꠣꠟꠣꠁꠟ ꠇꠥꠞꠛꠣꠘꠤ, ꠄꠞ ꠟꠉꠞ ꠗꠣꠘ-ꠉꠝꠞ ꠍꠖꠉꠣ ꠀꠞ ꠡꠞꠛꠔ-ꠙꠣꠘꠤꠞ ꠍꠖꠉꠣꠅ ꠖꠤꠛꠣꠄ।
NUM 29:20 “ꠁꠖꠞ ꠔꠤꠘ ꠘꠝ꠆ꠛꠞ ꠖꠤꠘꠅ ꠙꠥꠞꠣꠙꠥꠞ ꠘꠤꠈꠥꠔ ꠄꠉꠣꠞꠅꠉꠥ ꠛꠤꠍꠣꠟ, ꠖꠥꠉꠥ ꠝꠦꠠꠣ ꠀꠞ ꠌꠃꠖ꠆ꠖꠉꠥ ꠄꠇ ꠛꠍꠞ ꠛꠄꠅꠡꠤ ꠝꠦꠠꠣ-ꠛꠣꠁꠌ꠆ꠌꠣ ꠇꠥꠞꠛꠣꠘꠤ ꠖꠤꠛꠣꠄ।
NUM 29:21 ꠅꠃ ꠛꠤꠍꠣꠟ, ꠝꠦꠠꠣ ꠀꠞ ꠝꠦꠠꠣ-ꠛꠣꠁꠌ꠆ꠌꠣ ꠢꠇ꠆ꠇꠟꠐꠤꠞ ꠟꠉꠦ ꠗꠣꠘ-ꠉꠝꠞ ꠍꠖꠉꠣ, ꠡꠞꠛꠔ-ꠙꠣꠘꠤꠞ ꠍꠖꠉꠣ, ꠙꠡꠥꠞ ꠙꠞꠤꠝꠣꠘ ꠝꠣꠚꠤꠇ ꠀꠖꠣꠄ ꠇꠞꠤꠅ।
NUM 29:22 ꠢꠦꠡꠦ ꠉꠥꠘꠣ ꠝꠣꠚꠤꠞ ꠇꠥꠞꠛꠣꠘꠤꠞ ꠟꠣꠉꠤ ꠄꠉꠥ ꠙꠣꠑꠣ ꠍꠣꠉꠟꠅ ꠖꠤꠛꠣꠄ। ꠖꠤꠀ ꠙꠞꠔꠤ ꠖꠤꠘꠞ ꠎꠣꠟꠣꠁꠟ ꠇꠥꠞꠛꠣꠘꠤ, ꠄꠞ ꠟꠉꠞ ꠗꠣꠘ-ꠉꠝꠞ ꠍꠖꠉꠣ ꠀꠞ ꠡꠞꠛꠔ-ꠙꠣꠘꠤꠞ ꠍꠖꠉꠣꠅ ꠖꠤꠛꠣꠄ।
NUM 29:23 “ꠁꠖꠞ ꠌꠣꠁꠞ ꠘꠝ꠆ꠛꠞ ꠖꠤꠘ ꠙꠥꠞꠣꠙꠥꠞ ꠘꠤꠈꠥꠔ ꠖꠡꠉꠥ ꠛꠤꠍꠣꠟ, ꠖꠥꠉꠥ ꠝꠦꠠꠣ ꠀꠞ ꠌꠃꠖ꠆ꠖꠉꠥ ꠄꠇ ꠛꠍꠞ ꠛꠄꠅꠡꠤ ꠝꠦꠠꠣ-ꠛꠣꠁꠌ꠆ꠌꠣ ꠇꠥꠞꠛꠣꠘꠤ ꠖꠤꠛꠣꠄ।
NUM 29:24 ꠅꠃ ꠛꠤꠍꠣꠟ, ꠝꠦꠠꠣ ꠀꠞ ꠝꠦꠠꠣ-ꠛꠣꠁꠌ꠆ꠌꠣ ꠢꠇ꠆ꠇꠟꠐꠤꠞ ꠟꠉꠦ ꠗꠣꠘ-ꠉꠝꠞ ꠍꠖꠉꠣ, ꠡꠞꠛꠔ-ꠙꠣꠘꠤꠞ ꠍꠖꠉꠣ, ꠙꠡꠥꠞ ꠙꠞꠤꠝꠣꠘ ꠝꠣꠚꠤꠇ ꠀꠖꠣꠄ ꠇꠞꠤꠅ।
NUM 29:25 ꠢꠦꠡꠦ ꠉꠥꠘꠣ ꠝꠣꠚꠤꠞ ꠇꠥꠞꠛꠣꠘꠤꠞ ꠟꠣꠉꠤ ꠄꠉꠥ ꠙꠣꠑꠣ ꠍꠣꠉꠟꠅ ꠖꠤꠛꠣꠄ। ꠖꠤꠀ ꠙꠞꠔꠤ ꠖꠤꠘꠞ ꠎꠣꠟꠣꠁꠟ ꠇꠥꠞꠛꠣꠘꠤ, ꠄꠞ ꠟꠉꠞ ꠗꠣꠘ-ꠉꠝꠞ ꠍꠖꠉꠣ ꠀꠞ ꠡꠞꠛꠔ-ꠙꠣꠘꠤꠞ ꠍꠖꠉꠣꠅ ꠖꠤꠛꠣꠄ।
NUM 29:26 “ꠁꠖꠞ ꠙꠣꠌ ꠘꠝ꠆ꠛꠞ ꠖꠤꠘ ꠘꠤꠈꠥꠔ ꠘꠄꠉꠥ ꠛꠤꠍꠣꠟ, ꠖꠥꠉꠥ ꠝꠦꠠꠣ ꠀꠞ ꠌꠃꠖ꠆ꠖꠉꠥ ꠄꠇ ꠛꠍꠞ ꠛꠄꠅꠡꠤ ꠝꠦꠠꠣ-ꠛꠣꠁꠌ꠆ꠌꠣ ꠇꠥꠞꠛꠣꠘꠤ ꠖꠤꠛꠣꠄ।
NUM 29:27 ꠅꠃ ꠛꠤꠍꠣꠟ, ꠝꠦꠠꠣ ꠀꠞ ꠝꠦꠠꠣ-ꠛꠣꠁꠌ꠆ꠌꠣ ꠢꠇ꠆ꠇꠟꠐꠤꠞ ꠟꠉꠦ ꠗꠣꠘ-ꠉꠝꠞ ꠍꠖꠉꠣ, ꠡꠞꠛꠔ-ꠙꠣꠘꠤꠞ ꠍꠖꠉꠣ, ꠙꠡꠥꠞ ꠙꠞꠤꠝꠣꠘ ꠝꠣꠚꠤꠇ ꠀꠖꠣꠄ ꠇꠞꠤꠅ।
NUM 29:28 ꠢꠦꠡꠦ ꠉꠥꠘꠣ ꠝꠣꠚꠤꠞ ꠇꠥꠞꠛꠣꠘꠤꠞ ꠟꠣꠉꠤ ꠄꠉꠥ ꠙꠣꠑꠣ ꠍꠣꠉꠟꠅ ꠖꠤꠛꠣꠄ। ꠖꠤꠀ ꠙꠞꠔꠤ ꠖꠤꠘꠞ ꠎꠣꠟꠣꠁꠟ ꠇꠥꠞꠛꠣꠘꠤ, ꠄꠞ ꠟꠉꠞ ꠗꠣꠘ-ꠉꠝꠞ ꠍꠖꠉꠣ ꠀꠞ ꠡꠞꠛꠔ-ꠙꠣꠘꠤꠞ ꠍꠖꠉꠣꠅ ꠖꠤꠛꠣꠄ।
NUM 29:29 “ꠁꠖꠞ ꠍꠄ ꠘꠝ꠆ꠛꠞ ꠖꠤꠘ ꠘꠤꠈꠥꠔ ꠀꠐꠉꠥ ꠛꠤꠍꠣꠟ, ꠖꠥꠉꠥ ꠝꠦꠠꠣ ꠀꠞ ꠌꠃꠖ꠆ꠖꠉꠥ ꠄꠇ ꠛꠍꠞ ꠛꠄꠅꠡꠤ ꠝꠦꠠꠣ-ꠛꠣꠁꠌ꠆ꠌꠣ ꠇꠥꠞꠛꠣꠘꠤ ꠖꠤꠅ।
NUM 29:30 ꠅꠃ ꠛꠤꠍꠣꠟ, ꠝꠦꠠꠣ ꠀꠞ ꠝꠦꠠꠣ-ꠛꠣꠁꠌ꠆ꠌꠣ ꠢꠇ꠆ꠇꠟꠐꠤꠞ ꠟꠉꠦ ꠗꠣꠘ-ꠉꠝꠞ ꠍꠖꠉꠣ, ꠡꠞꠛꠔ-ꠙꠣꠘꠤꠞ ꠍꠖꠉꠣ, ꠙꠡꠥꠞ ꠙꠞꠤꠝꠣꠘ ꠝꠣꠚꠤꠇ ꠀꠖꠣꠄ ꠇꠞꠤꠅ।
NUM 29:31 ꠢꠦꠡꠦ ꠉꠥꠘꠣ ꠝꠣꠚꠤꠞ ꠇꠥꠞꠛꠣꠘꠤꠞ ꠟꠣꠉꠤ ꠄꠉꠥ ꠙꠣꠑꠣ ꠍꠣꠉꠟꠅ ꠖꠤꠛꠣꠄ। ꠖꠤꠀ ꠙꠞꠔꠤ ꠖꠤꠘꠞ ꠎꠣꠟꠣꠁꠟ ꠇꠥꠞꠛꠣꠘꠤ, ꠄꠞ ꠟꠉꠞ ꠗꠣꠘ-ꠉꠝꠞ ꠍꠖꠉꠣ ꠀꠞ ꠡꠞꠛꠔ-ꠙꠣꠘꠤꠞ ꠍꠖꠉꠣꠅ ꠖꠤꠛꠣꠄ।
NUM 29:32 “ꠁꠖꠞ ꠡꠣꠔ ꠘꠝ꠆ꠛꠞ ꠖꠤꠘ ꠙꠥꠞꠣꠙꠥꠞ ꠘꠤꠈꠥꠔ ꠡꠣꠔꠉꠥ ꠛꠤꠍꠣꠟ, ꠖꠥꠉꠥ ꠝꠦꠠꠣ ꠀꠞ ꠌꠃꠖ꠆ꠖꠉꠥ ꠄꠇ ꠛꠍꠞ ꠛꠄꠅꠡꠤ ꠝꠦꠠꠣ-ꠛꠣꠁꠌ꠆ꠌꠣ ꠇꠥꠞꠛꠣꠘꠤ ꠖꠤꠛꠣꠄ।
NUM 29:33 ꠅꠃ ꠛꠤꠍꠣꠟ, ꠝꠦꠠꠣ ꠀꠞ ꠝꠦꠠꠣ-ꠛꠣꠁꠌ꠆ꠌꠣ ꠢꠇ꠆ꠇꠟꠐꠤꠞ ꠟꠉꠦ ꠗꠣꠘ-ꠉꠝꠞ ꠍꠖꠉꠣ, ꠡꠞꠛꠔ-ꠙꠣꠘꠤꠞ ꠍꠖꠉꠣ, ꠙꠡꠥꠞ ꠙꠞꠤꠝꠣꠘ ꠝꠣꠚꠤꠇ ꠀꠖꠣꠄ ꠇꠞꠤꠅ।
NUM 29:34 ꠢꠦꠡꠦ ꠉꠥꠘꠣ ꠝꠣꠚꠤꠞ ꠇꠥꠞꠛꠣꠘꠤꠞ ꠟꠣꠉꠤ ꠄꠉꠥ ꠙꠣꠑꠣ ꠍꠣꠉꠟꠅ ꠖꠤꠛꠣꠄ। ꠖꠤꠀ ꠙꠞꠔꠤ ꠖꠤꠘꠞ ꠎꠣꠟꠣꠁꠟ ꠇꠥꠞꠛꠣꠘꠤ, ꠄꠞ ꠟꠉꠞ ꠗꠣꠘ-ꠉꠝꠞ ꠍꠖꠉꠣ ꠀꠞ ꠡꠞꠛꠔ-ꠙꠣꠘꠤꠞ ꠍꠖꠉꠣꠅ ꠖꠤꠛꠣꠄ।
NUM 29:35 “ꠁꠖꠞ ꠀꠐ ꠘꠝ꠆ꠛꠞ ꠖꠤꠘ ꠝꠣꠘꠤ, ꠀꠈꠦꠞꠤ ꠖꠤꠘ ꠛꠤꠖꠣꠄꠁ ꠝꠣꠢꠚꠤꠟ ꠇꠞꠤꠅ, ꠁ ꠖꠤꠘ ꠔꠥꠝꠞꠣ ꠖꠥꠘꠤꠀꠛꠤ ꠘꠤꠅꠔꠦ ꠇꠥꠘꠥ ꠇꠣꠝ-ꠇꠣꠎ ꠇꠞꠤꠅ ꠘꠣ।
NUM 29:36 ꠀꠞ ꠝꠣꠛꠥꠖꠞꠦ ꠈꠥꠡꠤ ꠇꠞꠣꠞ ꠘꠤꠅꠔꠦ ꠊꠦꠞꠣꠘ ꠀꠟꠣ ꠀꠉꠥꠘꠤꠔ ꠖꠦꠅꠀ ꠇꠥꠞꠛꠣꠘꠤ ꠢꠤꠡꠣꠛꠦ ꠄꠇꠈꠣꠘ ꠎꠣꠟꠣꠁꠟ ꠇꠥꠞꠛꠣꠘꠤ ꠖꠤꠛꠣꠄ। ꠄꠞꠟꠣꠉꠤ ꠘꠤꠈꠥꠔ ꠄꠉꠥ ꠛꠤꠍꠣꠟ, ꠄꠉꠥ ꠝꠦꠠꠣ ꠀꠞ ꠡꠣꠔꠉꠥ ꠄꠇ ꠛꠍꠞ ꠛꠄꠅꠡꠤ ꠝꠦꠠꠣ-ꠛꠣꠁꠌ꠆ꠌꠣ ꠇꠥꠞꠛꠣꠘꠤ ꠖꠤꠅ।
NUM 29:37 ꠅꠃ ꠛꠤꠍꠣꠟ, ꠝꠦꠠꠣ ꠀꠞ ꠝꠦꠠꠣ-ꠛꠣꠁꠌ꠆ꠌꠣ ꠢꠇ꠆ꠇꠟꠐꠤꠞ ꠟꠉꠦ ꠗꠣꠘ-ꠉꠝꠞ ꠍꠖꠉꠣ, ꠡꠞꠛꠔ-ꠙꠣꠘꠤꠞ ꠍꠖꠉꠣ, ꠙꠡꠥꠞ ꠙꠞꠤꠝꠣꠘ ꠝꠣꠚꠤꠇ ꠀꠖꠣꠄ ꠇꠞꠤꠅ।
NUM 29:38 ꠢꠦꠡꠦ ꠉꠥꠘꠣ ꠝꠣꠚꠤꠞ ꠇꠥꠞꠛꠣꠘꠤꠞ ꠟꠣꠉꠤ ꠄꠉꠥ ꠙꠣꠑꠣ ꠍꠣꠉꠟꠅ ꠖꠤꠛꠣꠄ। ꠖꠤꠀ ꠙꠞꠔꠤ ꠖꠤꠘꠞ ꠎꠣꠟꠣꠁꠟ ꠇꠥꠞꠛꠣꠘꠤ, ꠄꠞ ꠟꠉꠞ ꠗꠣꠘ-ꠉꠝꠞ ꠍꠖꠉꠣ ꠀꠞ ꠡꠞꠛꠔ-ꠙꠣꠘꠤꠞ ꠍꠖꠉꠣꠅ ꠖꠤꠛꠣꠄ।
NUM 29:39 “ꠔꠦ ꠙꠞꠔꠦꠇ ꠁꠖꠞ ꠇꠣꠟꠅ ꠝꠣꠛꠥꠖꠞ ꠘꠣꠝꠦ ꠔꠥꠝꠞꠣꠞ ꠁꠖ ꠅꠇꠟꠞ ꠘꠤꠅꠝ ꠝꠣꠚꠤꠇ ꠇꠥꠞꠛꠣꠘꠤ ꠀꠖꠣꠄ ꠇꠞꠤꠅ। ꠁꠔꠣ ꠍꠣꠠꠣ, ꠝꠣꠘ꠆ꠘꠔ ꠙꠥꠞꠘꠞ ꠇꠥꠞꠛꠣꠘꠤ, ꠎꠦꠇꠥꠘꠥ ꠘꠚꠟ ꠇꠥꠞꠛꠣꠘꠤꠞ ꠘꠤꠅꠔꠦ ꠎꠣꠟꠣꠁꠟ ꠇꠥꠞꠛꠣꠘꠤ, ꠗꠣꠘ-ꠉꠝꠞ ꠍꠖꠉꠣ, ꠡꠞꠛꠔ-ꠙꠣꠘꠤꠞ ꠍꠖꠉꠣ, ꠀꠞ ꠍꠣꠟꠣꠝꠔꠤ ꠇꠥꠞꠛꠣꠘꠤꠅ ꠀꠖꠣꠄ ꠇꠞꠤꠅ।”
NUM 29:40 ꠝꠣꠛꠥꠖꠦ ꠝꠥꠍꠣ ꠘꠛꠤꠞꠦ ꠎꠦꠔꠣ ꠢꠥꠇꠥꠝ-ꠀꠢꠇꠣꠝ ꠎꠣꠘꠣꠁꠍꠟꠣ, ꠔꠣꠁꠘ ꠁꠔꠣ ꠢꠇ꠆ꠇꠟꠔꠣ ꠛꠘꠤ ꠁꠍꠞꠣꠁꠟꠞꠦ ꠎꠣꠘꠣꠁꠟꠣ।
NUM 30:1 ꠛꠣꠖꠦ ꠝꠥꠍꠣ ꠘꠛꠤꠄ ꠛꠘꠤ ꠁꠍꠞꠣꠁꠟꠞ ꠢꠇꠟ ꠈꠣꠘ꠆ꠖꠣꠘꠞ ꠝꠥꠞꠛ꠆ꠛꠤꠞꠦ ꠇꠁꠟꠣ, “ꠝꠣꠛꠥꠖꠦ ꠢꠥꠇꠥꠝ ꠖꠤꠍꠂꠘ,
NUM 30:2 ꠇꠥꠘꠥ ꠛꠦꠐꠣꠄ ꠎꠥꠖꠤ ꠝꠣꠛꠥꠖꠞ ꠘꠣꠝꠦ ꠇꠥꠘ꠆ꠔꠣ ꠝꠣꠘ꠆ꠘꠔ ꠇꠞꠦ ꠛꠣ ꠇꠍꠝ ꠈꠣꠁꠀ ꠇꠥꠘꠥꠔꠣ ꠇꠞꠣꠞ ꠅꠀꠖꠣꠄ ꠛꠘ꠆ꠖꠤ ꠅꠄ, ꠔꠦ ꠢꠦ ꠎꠣꠘꠥ ꠔꠣꠞ ꠅꠀꠖꠣ ꠜꠋꠉ ꠘꠣ ꠇꠞꠦ। ꠢꠦ ꠎꠦꠔꠣ ꠇꠁꠍꠦ, ꠁꠔꠣ ꠙꠥꠞꠘ ꠇꠞꠣ ꠟꠣꠉꠛ।
NUM 30:3 “ꠇꠥꠘꠥ ꠀꠛꠤꠀꠔꠤ ꠙꠥꠠꠤꠄ ꠎꠥꠖꠤ ꠛꠣꠚꠞ ꠛꠣꠠꠤꠔ ꠕꠣꠇꠣꠞ ꠇꠣꠟꠅ ꠝꠣꠛꠥꠖꠞ ꠘꠣꠝꠦ ꠇꠥꠘ꠆ꠔꠣ ꠝꠣꠘ꠆ꠘꠔ ꠇꠞꠦ ꠛꠣ ꠇꠥꠘꠥꠔꠣ ꠇꠞꠣꠞ ꠅꠀꠖꠣꠄ ꠛꠘ꠆ꠖꠤ ꠅꠄ,
NUM 30:4 ꠀꠞ ꠛꠣꠚꠦ ꠁꠔꠣ ꠢꠥꠘꠤꠀꠅ ꠙꠥꠠꠤꠞꠦ ꠇꠥꠘ꠆ꠔꠣ ꠘꠣ ꠇꠂꠘ, ꠔꠦ ꠁ ꠝꠣꠘ꠆ꠘꠔ ꠛꠣ ꠅꠀꠖꠣ ꠔꠣꠁ ꠙꠥꠞꠘ ꠇꠞꠣ ꠟꠣꠉꠛ।
NUM 30:5 ꠅꠁꠟꠦ ꠁꠈꠣꠘ ꠢꠥꠘꠣꠞ ꠟꠉꠦ ꠟꠉꠦ ꠛꠣꠚꠦ ꠎꠥꠖꠤ ꠙꠥꠠꠤꠞꠦ ꠁꠔꠣ ꠇꠞꠔꠦ ꠘꠤꠡꠦꠗ ꠇꠞꠂꠘ, ꠔꠦ ꠁ ꠝꠣꠘ꠆ꠘꠔ ꠛꠣ ꠅꠀꠖꠣ ꠛꠣꠔꠤꠟ ꠅꠁꠎꠤꠛ। ꠛꠣꠚꠦ ꠘꠤꠡꠦꠗ ꠇꠞꠣꠄ ꠝꠣꠛꠥꠖꠦꠅ ꠁ ꠝꠣꠘ꠆ꠘꠔ ꠛꠣ ꠅꠀꠖꠣ ꠜꠣꠋꠉꠣꠞꠦ ꠝꠣꠚ ꠇꠞꠤ ꠖꠤꠛꠣ।
NUM 30:6 “ꠀꠞ ꠇꠥꠘꠥ ꠙꠥꠠꠤꠄ ꠎꠥꠖꠤ ꠌꠤꠘ꠆ꠔꠣ-ꠜꠣꠛꠘꠣ ꠘꠣ ꠇꠞꠤꠀ ꠀꠈꠔꠣ ꠇꠥꠘꠥ ꠝꠣꠘ꠆ꠘꠔ ꠛꠣ ꠅꠀꠖꠣ ꠇꠞꠤꠟꠣꠄ ꠀꠞ ꠛꠣꠖꠦ ꠔꠣꠁꠞ ꠛꠤꠀ ꠅꠁꠎꠣꠄ,
NUM 30:7 ꠛꠤꠀꠞ ꠛꠣꠖꠦ ꠎꠣꠝꠣꠁꠄ ꠁꠈꠣꠘ ꠢꠥꠘꠤꠀ ꠟꠉꠦ ꠟꠉꠦ ꠇꠥꠘ꠆ꠔꠣ ꠘꠣ ꠇꠂꠘ, ꠔꠦ ꠁ ꠝꠣꠘ꠆ꠘꠔ ꠛꠣ ꠅꠀꠖꠣꠞꠦ ꠔꠣꠁ ꠙꠥꠞꠘ ꠇꠞꠣ ꠟꠣꠉꠛ।
NUM 30:8 ꠅꠁꠟꠦ ꠁꠔꠣ ꠢꠥꠘꠣꠞ ꠟꠉꠦ ꠟꠉꠦ ꠎꠣꠝꠣꠁꠄ ꠎꠥꠖꠤ ꠘꠤꠡꠦꠗ ꠇꠞꠂꠘ, ꠔꠦ ꠁ ꠝꠣꠘ꠆ꠘꠔ ꠛꠣ ꠅꠀꠖꠣꠞ ꠛꠣꠘ꠆ꠖꠘ ꠕꠣꠇꠤ ꠔꠣꠁ ꠈꠣꠟꠣꠍ ꠙꠣꠁꠛ, ꠝꠣꠛꠥꠖꠦꠅ ꠁꠔꠣ ꠝꠣꠚ ꠇꠞꠤ ꠖꠤꠛꠣ।
NUM 30:9 “ꠀꠞ ꠇꠥꠘꠥ ꠠꠣꠠꠤ ꠛꠦꠐꠤ ꠛꠣ ꠔꠣꠟꠣꠇ ꠙꠣꠅꠀ ꠇꠥꠘꠥ ꠛꠦꠐꠤꠄ ꠎꠥꠖꠤ ꠝꠣꠘ꠆ꠘꠔ ꠇꠞꠤꠀ ꠅꠀꠖꠣꠄ ꠛꠘ꠆ꠖꠤ ꠅꠄ, ꠔꠦ ꠁꠔꠣ ꠙꠥꠞꠘ ꠇꠞꠣ ꠟꠣꠉꠛꠃ।
NUM 30:10 “ꠎꠣꠝꠣꠁꠞ ꠊꠞꠞ ꠇꠥꠘꠥ ꠛꠃꠄ ꠎꠥꠖꠤ ꠅꠟꠣ ꠝꠣꠘ꠆ꠘꠔ ꠝꠣꠘꠦ ꠛꠣ ꠇꠍꠝ ꠈꠣꠁꠀ ꠅꠀꠖꠣꠄ ꠛꠘ꠆ꠖꠤ ꠅꠄ,
NUM 30:11 ꠛꠣꠖꠦ ꠔꠣꠁꠞ ꠎꠣꠝꠣꠁꠄ ꠁꠈꠣꠘ ꠢꠥꠘꠤꠀ ꠇꠥꠘ꠆ꠔꠣ ꠘꠣ ꠝꠣꠔꠂꠘ, ꠔꠣꠁꠞꠦ ꠘꠤꠡꠦꠗ ꠘꠣ ꠖꠦꠁꠘ, ꠔꠦ ꠔꠣꠁ ꠁꠔꠣ ꠙꠥꠞꠘ ꠇꠞꠣ ꠟꠣꠉꠛ।
NUM 30:12 ꠅꠁꠟꠦ ꠎꠣꠝꠣꠁꠄ ꠢꠥꠘꠤꠀ ꠎꠥꠖꠤ ꠟꠉꠦ ꠟꠉꠦ ꠘꠤꠡꠦꠗ ꠖꠦꠁꠘ, ꠔꠦ ꠁ ꠝꠣꠘ꠆ꠘꠔ ꠛꠣ ꠅꠀꠖꠣ ꠛꠣꠔꠤꠟ ꠅꠁꠎꠤꠛ। ꠔꠣꠁꠞ ꠎꠣꠝꠣꠁꠄ ꠘꠤꠡꠦꠗ ꠇꠞꠣꠄ, ꠝꠣꠛꠥꠖꠦꠅ ꠁꠈꠣꠘ ꠝꠣꠚ ꠇꠞꠤ ꠖꠤꠛꠣ।
NUM 30:13 ꠛꠃꠄ ꠇꠍꠝ ꠈꠣꠁꠀ ꠅꠀꠖꠣ ꠇꠞꠟꠦ ꠛꠣ ꠇꠥꠘꠥ ꠝꠣꠘ꠆ꠘꠔ ꠝꠣꠘꠟꠦ ꠎꠣꠝꠣꠁꠞ ꠄꠈꠔꠤꠀꠞ ꠀꠍꠦ ꠁꠔꠣ ꠝꠣꠘꠣ ꠛꠣ ꠛꠣꠔꠤꠟ ꠇꠞꠣꠞ।
NUM 30:14 ꠅꠁꠟꠦ ꠎꠣꠝꠣꠁꠄ ꠎꠥꠖꠤ ꠛꠦꠡꠤ ꠖꠤꠘ ꠁ ꠛꠦꠙꠣꠞꠦ ꠇꠥꠘ꠆ꠔꠣ ꠘꠣ ꠝꠣꠔꠤꠀ ꠘꠤꠞꠣꠁ ꠞꠂꠘ, ꠔꠦ ꠔꠣꠞ ꠛꠃꠞ ꠝꠣꠘ꠆ꠘꠔ ꠛꠣ ꠅꠀꠖꠣꠞ ꠛꠣꠘ꠆ꠖꠘ ꠙꠣꠇ꠆ꠇꠣ ꠅꠁꠎꠣꠄ। ꠢꠇꠟꠔꠣ ꠢꠥꠘꠣꠞ ꠛꠣꠖꠦꠅ ꠎꠣꠝꠣꠁ ꠅꠃ ꠡꠝꠄ ꠘꠤꠞꠣꠁ ꠞꠅꠀꠄ ꠛꠃꠞ ꠝꠣꠘ꠆ꠘꠔ ꠛꠣ ꠅꠀꠖꠣꠞꠦ ꠙꠣꠇ꠆ꠇꠣ ꠛꠣꠘꠣꠁꠟꠣꠄ।
NUM 30:15 ꠅꠁꠟꠦ ꠢꠇꠟꠔꠣ ꠢꠥꠘꠣꠞ ꠛꠣꠖꠦ ꠎꠣꠝꠣꠁꠄ ꠎꠥꠖꠤ ꠢꠃ ꠖꠤꠘꠞ ꠝꠣꠎꠦ ꠇꠥꠘ꠆ꠔꠣ ꠘꠣ ꠝꠣꠔꠤꠀ ꠡꠝꠄ ꠙꠣꠞꠘꠤꠞ ꠛꠣꠖꠦ ꠘꠤꠡꠦꠗ ꠇꠞꠦ, ꠔꠦ ꠛꠃꠄ ꠅꠃ ꠝꠣꠘ꠆ꠘꠔ ꠙꠥꠞꠣ ꠘꠣ ꠇꠞꠣꠄ ꠄꠞ ꠖꠣꠄ-ꠜꠣꠞ ꠔꠣꠁꠞ ꠎꠣꠝꠣꠁꠞ ꠃꠙꠞꠦ ꠙꠠꠛ।”
NUM 30:16 ꠎꠣꠝꠣꠁ-ꠛꠃꠞ ꠛꠦꠙꠣꠞꠦ, ꠛꠣꠚ ꠀꠞ ꠛꠣꠚꠞ ꠛꠣꠠꠤꠔ ꠞꠅꠞꠣ ꠙꠥꠠꠤꠞ ꠛꠦꠙꠣꠞꠦ ꠝꠣꠛꠥꠖꠦ ꠝꠥꠍꠣ ꠘꠛꠤꠞꠦ ꠅꠟꠣ ꠀꠁꠘ ꠢꠤꠇꠣꠁ ꠖꠤꠟꠣ।
NUM 31:1 ꠝꠣꠛꠥꠖꠦ ꠝꠥꠍꠣ ꠘꠛꠤꠞꠦ ꠇꠁꠟꠣ,
NUM 31:2 “ꠝꠣꠖꠤꠀꠘꠤ ꠅꠇꠟꠦ ꠛꠘꠤ ꠁꠍꠞꠣꠁꠟꠞ ꠟꠉꠦ ꠎꠦꠔꠣ ꠇꠞꠍꠦ, ꠔꠥꠝꠤ ꠅꠔꠣꠞ ꠅꠙꠞꠣꠗꠞ ꠛꠖꠟꠣ ꠖꠦꠅ। ꠄꠞꠛꠣꠖꠦ ꠔꠥꠝꠤ ꠔꠥꠝꠣꠞ ꠛꠣꠚ-ꠖꠣꠖꠣꠞ ꠉꠦꠍꠦ ꠌꠤꠞꠇꠣꠟꠞ ꠟꠣꠉꠤ ꠢꠥꠔꠤ ꠞꠁꠛꠣꠄ।”
NUM 31:3 ꠔꠦꠃ ꠝꠥꠍꠣꠄ ꠛꠘꠤ ꠁꠍꠞꠣꠁꠟꠞꠦ ꠇꠁꠟꠣ, “ꠝꠣꠖꠤꠀꠘꠤ ꠅꠇꠟꠞ ꠟꠉꠦ ꠎꠥꠖ꠆ꠖ ꠇꠞꠣꠞ ꠟꠣꠉꠤ ꠔꠥꠝꠞꠣꠞ ꠇꠤꠍꠥ ꠍꠤꠙꠣꠁꠞꠦ ꠎꠥꠁꠔ ꠇꠞꠅ, ꠔꠣꠞꠣ ꠝꠣꠛꠥꠖꠞ ꠔꠞꠚ ꠕꠣꠇꠤ ꠝꠣꠖꠤꠀꠘꠤ ꠅꠇꠟꠞ ꠙꠣꠅꠘꠣ ꠡꠣꠎꠣ ꠖꠤꠛꠣ।
NUM 31:4 ꠅꠈꠘ ꠔꠥꠝꠞꠣ ꠛꠘꠤ ꠁꠍꠞꠣꠁꠟꠞ ꠙꠞꠔꠦꠇ ꠈꠣꠘ꠆ꠖꠣꠘ ꠕꠣꠇꠤ ꠄꠇ ꠀꠎꠣꠞ ꠇꠞꠤ ꠍꠤꠙꠣꠁꠞꠦ ꠎꠥꠖ꠆ꠖꠔ ꠙꠣꠑꠣꠅ।”
NUM 31:5 ꠔꠦꠃ ꠛꠘꠤ ꠁꠍꠞꠣꠁꠟꠞ ꠛꠣꠞꠅ ꠈꠣꠘ꠆ꠖꠣꠘ ꠕꠣꠇꠤ ꠄꠇꠅ ꠀꠎꠣꠞ ꠇꠞꠤ ꠝꠥꠐ ꠛꠣꠞꠅ ꠀꠎꠣꠞ ꠍꠤꠙꠣꠁꠞꠦ ꠎꠥꠖ꠆ꠖꠞ ꠟꠣꠉꠤ ꠎꠥꠁꠔ ꠇꠞꠣ ꠅꠁꠟ।
NUM 31:6 ꠝꠥꠍꠣꠄ ꠙꠞꠔꠦꠇ ꠈꠣꠘ꠆ꠖꠣꠘ ꠕꠣꠇꠤ ꠄꠇ ꠀꠎꠣꠞ ꠎꠘ ꠍꠤꠙꠣꠁꠞꠦ ꠎꠥꠖ꠆ꠖꠔ ꠙꠣꠑꠣꠁꠟꠣ। ꠄꠞꠣꠞ ꠟꠉꠦ ꠁꠝꠣꠝ ꠀꠟꠤ-ꠀꠎꠞꠞ ꠙꠥꠀ ꠙꠤꠘꠢꠡꠅ ꠉꠦꠟꠣ, ꠎꠣꠁꠔꠦ ꠙꠛꠤꠔ꠆ꠞ ꠇꠣꠛꠣ ꠊꠞꠞ ꠇꠤꠍꠥ ꠍꠣꠝꠣꠘꠣ ꠟꠉꠦ ꠇꠞꠤ ꠘꠤꠟꠣ ꠀꠞ ꠔꠣꠘ ꠀꠔꠅ ꠇꠞꠤ ꠎꠥꠖ꠆ꠖꠞ ꠀꠅꠀꠎꠞ ꠌꠥꠋꠉꠣ ꠅꠇꠟꠅ ꠘꠤꠟꠣ।
NUM 31:7 ꠝꠥꠍꠣ ꠘꠛꠤꠞꠦ ꠖꠦꠅꠀ ꠝꠣꠛꠥꠖꠞ ꠢꠥꠇꠥꠝ ꠝꠣꠚꠤꠇ ꠔꠣꠞꠣ ꠝꠣꠖꠤꠀꠘꠤ ꠅꠇꠟꠞ ꠟꠉꠦ ꠎꠥꠖ꠆ꠖ ꠇꠞꠤꠀ ꠅꠔꠣꠞ ꠢꠇꠟ ꠛꠦꠐꠣꠁꠘ꠆ꠔꠞꠦ ꠝꠣꠞꠤꠟꠤꠟꠣ।
NUM 31:8 ꠡꠣꠗꠣꠞꠘ ꠝꠣꠘꠡꠞ ꠟꠉꠦ ꠝꠣꠖꠤꠀꠘꠤ ꠅꠇꠟꠞ ꠙꠣꠌ ꠎꠘ ꠛꠣꠖꠡꠣꠞꠦꠅ ꠔꠣꠞꠣ ꠝꠣꠞꠤꠟꠤꠟꠣ। ꠅꠃ ꠛꠣꠖꠡꠣꠁꠘ ꠅꠁꠟꠣ, ꠁꠛꠤ, ꠞꠦꠇꠝ, ꠡꠥꠞ, ꠢꠥꠞ ꠀꠞ ꠞꠦꠛꠣ। ꠀꠞ ꠄꠞꠣꠞ ꠟꠉꠦ ꠛꠣꠟꠣꠝ ꠛꠤꠘ ꠛꠣꠃꠞ ꠘꠣꠝꠞ ꠢꠃ ꠙꠤꠞꠞꠦꠅ ꠔꠣꠞꠣ ꠎꠣꠘꠦ ꠝꠣꠞꠤꠟꠤꠟꠣ।
NUM 31:9 ꠔꠣꠞꠣ ꠝꠣꠖꠤꠀꠘ ꠖꠦꠡꠞ ꠢꠇꠟ ꠛꠦꠐꠤꠘ ꠀꠞ ꠢꠥꠞꠥꠔ꠆ꠔꠣꠁꠘꠞꠦ ꠛꠘ꠆ꠖꠤ ꠇꠞꠟꠣ, ꠔꠣꠞꠣꠞ ꠉꠞꠥ-ꠍꠣꠉꠟ ꠀꠞ ꠢꠇ꠆ꠇꠟ ꠝꠣꠟ-ꠍꠣꠝꠣꠘꠣ ꠟꠥꠐꠤꠀ ꠀꠘꠤꠟ꠆ꠟꠣ।
NUM 31:10 ꠝꠣꠖꠤꠀꠘꠤ ꠅꠇꠟ ꠎꠔ ꠐꠣꠃꠘꠅ ꠛꠡꠔ ꠇꠞꠔꠣ, ꠅꠃ ꠐꠣꠃꠘ ꠅꠇꠟ ꠀꠞ ꠐꠣꠃꠘꠞ ꠛꠣꠞꠞ ꠢꠇꠟ ꠔꠣꠝ꠆ꠛꠥ ꠔꠣꠞꠣ ꠀꠉꠥꠁꠘꠖꠤ ꠎꠣꠟꠣꠁꠟꠤꠟꠣ।
NUM 31:11 ꠎꠥꠖ꠆ꠖꠞ ꠛꠣꠖꠦ ꠔꠣꠞꠣꠞ ꠛꠘ꠆ꠖꠤ ꠇꠞꠣ ꠢꠇꠟ ꠝꠣꠘꠥꠡ, ꠉꠘꠤꠝꠔꠞ ꠝꠣꠟ-ꠍꠣꠝꠣꠘꠣ, ꠀꠞ ꠙꠡꠥꠞ ꠙꠣꠟ ꠟꠁꠀ ꠞꠅꠀꠘꠣ ꠅꠁꠟꠣ।
NUM 31:12 ꠔꠣꠞꠣ ꠝꠥꠍꠣ ꠘꠛꠤ, ꠁꠝꠣꠝ ꠀꠟꠤ-ꠀꠎꠞ ꠀꠞ ꠛꠘꠤ ꠁꠍꠞꠣꠁꠟꠞ ꠇꠦꠝ꠆ꠙꠅ ꠚꠤꠞꠣꠞ ꠘꠤꠅꠔꠦ ꠞꠅꠀꠘꠣ ꠖꠤꠟꠣ। ꠅꠃ ꠡꠝꠄ ꠔꠣꠞꠣꠞ ꠔꠣꠝ꠆ꠛꠥ ꠀꠍꠤꠟ ꠎꠤꠞꠤꠢꠅ ꠄꠟꠣꠇꠣꠞ ꠎꠞ꠆ꠖꠣꠘ ꠉꠣꠋꠉꠞ ꠗꠣꠞꠅ ꠝꠥꠀꠛ ꠖꠦꠡꠞ ꠔꠟ ꠎꠣꠉꠣꠔ।
NUM 31:13 ꠔꠣꠞꠣꠞ ꠈꠛꠞ ꠙꠣꠁꠀ ꠝꠥꠍꠣ ꠘꠛꠤ, ꠁꠝꠣꠝ ꠀꠟꠤ-ꠀꠎꠞ ꠀꠞ ꠛꠘꠤ ꠁꠍꠞꠣꠁꠟꠞ ꠢꠇꠟ ꠝꠥꠞꠛ꠆ꠛꠤ ꠇꠦꠝ꠆ꠙ ꠕꠣꠇꠤ ꠛꠣꠞ ꠅꠁꠀ ꠔꠣꠞꠣꠞ ꠟꠉꠦ ꠖꠦꠈꠣ ꠇꠞꠣꠔ ꠉꠦꠟꠣ।
NUM 31:14 ꠉꠤꠀ ꠎꠥꠖ꠆ꠖ ꠕꠣꠇꠤ ꠚꠤꠞꠔ ꠀꠅꠀ ꠢꠇꠟ ꠇꠣꠝꠣꠘ꠆ꠒꠣꠞꠞ ꠃꠙꠞꠦ ꠝꠣꠘꠤ ꠀꠎꠣꠞ ꠍꠤꠙꠣꠁꠞ ꠀꠞ ꠡ-ꠍꠤꠙꠣꠁꠞ ꠇꠣꠝꠣꠘ꠆ꠒꠣꠞ ꠅꠇꠟꠞ ꠃꠙꠞꠦ ꠝꠥꠍꠣꠄ ꠈꠥꠛ ꠉꠞꠝ ꠅꠁꠀ
NUM 31:15 ꠇꠁꠟꠣ, “ꠔꠥꠝꠞꠣ ꠖꠥꠡꠝꠘꠞ ꠢꠇꠟ ꠛꠦꠐꠤꠘ꠆ꠔꠞꠦ ꠎꠤꠘ꠆ꠖꠣ ꠞꠣꠈꠟꠣꠄ ꠇꠦꠘꠦ?
NUM 31:16 ꠝꠘꠅ ꠘꠣꠁ ꠘꠤ, ꠅꠉꠥꠁꠘ꠆ꠔꠦ ꠙꠤꠃꠞ ꠙꠣꠠꠞ ꠃꠙꠞꠦ ꠛꠣꠟꠣꠝ ꠙꠤꠞꠞ ꠙꠞꠣꠝꠤꠡꠦ, ꠛꠘꠤ ꠁꠍꠞꠣꠁꠟꠞꠦ ꠝꠣꠛꠥꠖꠞ ꠉꠦꠍ ꠕꠣꠇꠤ ꠖꠥꠞꠁ ꠢꠞꠣꠁꠍꠤꠟ, ꠄꠞꠟꠣꠉꠤ ꠔ ꠝꠣꠛꠥꠖꠞ ꠛꠘ꠆ꠖꠣ ꠅꠇꠟꠞ ꠃꠙꠞꠦ ꠉꠎꠛꠤ ꠛꠦꠝꠣꠞ ꠘꠣꠎꠤꠟ ꠅꠁꠍꠤꠟ।
NUM 31:17 ꠔꠦ ꠅꠈꠘ ꠔꠥꠝꠞꠣ ꠅꠔꠣꠞ ꠢꠇꠟ ꠙꠥꠀꠂꠘ꠆ꠔꠞꠦ ꠎꠣꠘꠦ ꠝꠣꠞꠤꠟꠣꠅ, ꠛꠤꠀꠔꠤ ꠛꠣ ꠅꠡꠔꠤ ꠢꠇꠟ ꠛꠦꠐꠤꠘ꠆ꠔꠞꠦꠅ ꠝꠣꠞꠤꠟꠣꠅ।
NUM 31:18 ꠈꠣꠟꠤ ꠀꠛꠤꠀꠔꠤ ꠡꠔꠤ ꠙꠥꠠꠤꠘ꠆ꠔꠞꠦ ꠔꠥꠝꠞꠣꠞ ꠟꠣꠉꠤ ꠎꠤꠔꠣ ꠞꠣꠈꠤꠅ।
NUM 31:19 “ꠀꠞ ꠔꠥꠝꠞꠣ ꠎꠦꠞꠣ ꠇꠥꠘꠥ ꠝꠣꠘꠡꠞꠦ ꠎꠣꠘꠦ ꠝꠣꠞꠍ ꠛꠣ ꠝꠥꠞ꠆ꠖꠣꠞ ꠟꠣꠡ ꠍꠁꠍ, ꠔꠥꠝꠞꠣ ꠡꠣꠔꠖꠤꠘ ꠜꠞꠣ ꠇꠦꠝ꠆ꠙꠞ ꠛꠣꠞꠦ ꠞꠁꠅ। ꠄꠞꠝꠣꠎꠦ ꠔꠤꠘ ꠘꠝ꠆ꠛꠞ ꠀꠞ ꠡꠣꠔ ꠘꠝ꠆ꠛꠞ ꠖꠤꠘ ꠔꠥꠝꠞꠣ ꠘꠤꠎꠦ ꠀꠞ ꠛꠘ꠆ꠖꠤ ꠇꠞꠤ ꠀꠘꠣ ꠝꠣꠘꠡꠞꠦꠅ ꠙꠣꠇ-ꠍꠣꠚ ꠇꠞꠛꠣꠄ।
NUM 31:20 ꠔꠥꠝꠞꠣꠞ ꠢꠇꠟ ꠇꠣꠙꠠ-ꠌꠥꠙꠠ, ꠌꠣꠝꠠꠣꠞ ꠝꠣꠟ-ꠍꠣꠝꠣꠘꠣ, ꠟꠣꠇꠠꠤ ꠀꠞ ꠍꠣꠉꠟꠞ ꠞꠥꠝꠣꠖꠤ ꠛꠣꠘꠣꠁꠟ ꠢꠇ꠆ꠇꠟ ꠍꠣꠝꠣꠘꠞꠦꠅ ꠙꠣꠇ-ꠍꠣꠚ ꠇꠞꠛꠣꠄ।”
NUM 31:21 ꠎꠦꠔꠣ ꠍꠤꠙꠣꠁ ꠅꠇꠟ ꠎꠥꠖ꠆ꠖꠔ ꠉꠦꠍꠟꠣ, ꠁꠝꠣꠝ ꠀꠟꠤ-ꠀꠎꠞꠦ ꠔꠣꠞꠣꠞꠦ ꠇꠁꠟꠣ, “ꠁꠔꠣ ꠅꠁꠟ ꠝꠥꠍꠣ ꠘꠛꠤꠞ ꠀꠔꠦ ꠖꠦꠅꠀ ꠝꠣꠛꠥꠖꠞ ꠡꠞꠤꠅꠔꠞ ꠄꠇꠈꠣꠘ ꠀꠁꠘ:
NUM 31:22 ꠔꠥꠝꠞꠣ ꠡꠥꠘꠣ, ꠞꠥꠙꠣ, ꠙꠤꠔꠟ, ꠟꠥꠀ, ꠐꠤꠘ, ꠡꠤꠡꠣꠖꠤ ꠛꠣꠘꠣꠁꠟ ꠢꠇꠟ ꠝꠣꠟ-ꠍꠣꠝꠣꠘꠣ,
NUM 31:23 ꠝꠣꠘꠤ ꠎꠦꠔꠣ ꠝꠣꠟ ꠀꠉꠥꠘꠤꠔ ꠖꠤꠟꠦ ꠎꠟꠦ ꠘꠣ, ꠁꠔꠣ ꠢꠇꠟꠔꠣ ꠀꠉꠥꠘꠤꠞ ꠝꠣꠎꠦ ꠖꠤꠛꠣꠄ, ꠔꠦꠃ ꠁꠔꠣ ꠙꠣꠇ-ꠍꠣꠚ ꠅꠁꠛ। ꠅꠁꠟꠦ ꠎꠣꠟꠣꠘꠤꠞ ꠛꠣꠖꠦ ꠁꠔꠣꠞꠦ ꠙꠣꠇ-ꠍꠣꠚ ꠇꠞꠣꠞ ꠙꠣꠘꠤꠖꠤ ꠗꠁꠀ ꠙꠣꠇ-ꠙꠣꠇꠤꠎꠣ ꠇꠞꠣ ꠟꠣꠉꠛ। ꠀꠞ ꠎꠦꠔꠣ ꠀꠉꠥꠁꠘꠦ ꠘꠡ꠆ꠐ ꠅꠁꠎꠣꠄ, ꠁꠔꠣꠞꠦ ꠈꠣꠟꠤ ꠙꠣꠇ-ꠍꠣꠚ ꠇꠞꠣꠞ ꠙꠣꠘꠤꠖꠤ ꠗꠁꠟꠤꠛꠣꠄ।
NUM 31:24 ꠛꠣꠖꠦ ꠡꠣꠔ ꠘꠝ꠆ꠛꠞ ꠖꠤꠘ ꠔꠥꠝꠞꠣꠞ ꠇꠣꠙꠠ-ꠌꠥꠙꠠ ꠗꠁꠀ ꠢꠣꠞꠟꠦ, ꠙꠣꠇ-ꠙꠣꠇꠤꠎꠣ ꠛꠘꠤꠀ ꠇꠦꠝ꠆ꠙꠞ ꠜꠤꠔꠞꠦ ꠢꠣꠝꠣꠁꠛꠣꠄ।”
NUM 31:25 ꠄꠞꠛꠣꠖꠦ ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ,
NUM 31:26 “ꠔꠥꠝꠤ ꠀꠞ ꠁꠝꠣꠝ ꠀꠟꠤ-ꠀꠎꠞ ꠀꠞ ꠡꠝꠣꠎꠞ ꠝꠥꠞꠛ꠆ꠛꠤ ꠅꠇꠟꠦ ꠝꠤꠟꠤꠀ, ꠛꠘ꠆ꠖꠤ ꠇꠞꠤ ꠀꠘꠣ ꠢꠇꠟ ꠝꠣꠘꠥꠡ ꠀꠞ ꠙꠡꠥꠁꠘ꠆ꠔꠞꠦ ꠉꠘꠅ।
NUM 31:27 ꠉꠘꠤꠀ ꠢꠇꠟ ꠝꠣꠟ ꠖꠥꠁ ꠛꠣꠐ ꠇꠞꠅ। ꠁꠔꠣꠞ ꠄꠇ ꠛꠣꠐ ꠖꠤꠛꠣꠄ ꠎꠥꠖ꠆ꠖꠔ ꠎꠦꠔꠣ ꠍꠤꠙꠣꠁ ꠅꠇꠟ ꠉꠦꠍꠤꠟ ꠔꠣꠞꠣꠞꠦ, ꠀꠞ ꠖꠥꠍꠞꠣ ꠛꠣꠐ ꠛꠣꠖ-ꠛꠣꠇꠤ ꠝꠣꠘꠡꠞꠦ ꠖꠤꠅ।
NUM 31:28 ꠅꠃ ꠍꠤꠙꠣꠁ ꠅꠇꠟꠞ ꠛꠣꠐꠅ ꠎꠔ ꠝꠣꠘꠥꠡ, ꠉꠞꠥ-ꠍꠣꠉꠟ ꠙꠠꠛ, ꠁꠔꠣꠞ ꠙꠞꠔꠦꠇ ꠙꠣꠌ-ꠡꠐꠣ ꠕꠣꠇꠤ ꠄꠇꠐꠣꠞꠦ ꠝꠣꠛꠥꠖꠞ ꠟꠣꠉꠤ ꠀꠟꠉꠣꠁ ꠕꠁꠅ।
NUM 31:29 ꠀꠟꠉꠣꠁꠀ ꠝꠣꠛꠥꠖꠞ ꠙꠣꠅꠘꠣ ꠅꠃ ꠛꠣꠐꠞꠦ ꠔꠥꠝꠤ ꠁꠝꠣꠝ ꠀꠟꠤ-ꠀꠎꠞꠞ ꠀꠔꠅ ꠖꠤꠛꠣꠄ।
NUM 31:30 ꠀꠞ ꠛꠘꠤ ꠁꠍꠞꠣꠁꠟꠞ ꠛꠣꠐꠅ ꠎꠦꠔꠣ ꠝꠣꠘꠥꠡ, ꠉꠞꠥ-ꠍꠣꠉꠟ ꠙꠣꠁꠛꠣ, ꠁꠔꠣꠞ ꠙꠞꠔꠦꠇ ꠙꠁꠘ꠆ꠌꠣꠡꠐꠣ ꠕꠣꠇꠤ ꠄꠇꠐꠣꠞꠦ ꠀꠟꠉ ꠇꠞꠤ ꠕꠁꠅ। ꠕꠁꠀ ꠀꠟ꠆ꠟꠣꠞ ꠛꠡꠔ ꠈꠣꠘꠣ, ꠛꠣꠄꠔꠥꠟ꠆ꠟꠣ ꠔꠣꠝ꠆ꠛꠥꠞ ꠈꠣꠖꠤꠝ ꠟꠦꠛꠤ ꠅꠇꠟꠞ ꠀꠔꠅ ꠁꠔꠣ ꠡꠝꠎꠣꠁꠅ।”
NUM 31:31 ꠝꠣꠛꠥꠖꠦ ꠝꠥꠍꠣꠞꠦ ꠎꠦꠟꠣ ꠢꠥꠇꠥꠝ ꠖꠤꠍꠟꠣ, ꠔꠣꠁꠘ ꠀꠞ ꠁꠝꠣꠝ ꠀꠟꠤ-ꠀꠎꠞꠦ ꠅꠟꠣꠃ ꠇꠞꠟꠣ।
NUM 31:32 ꠍꠤꠙꠣꠁ ꠅꠇꠟꠦ ꠎꠤꠔꠤꠀ ꠀꠘꠣ ꠉꠘꠤꠝꠔꠞ ꠝꠣꠟ-ꠍꠣꠝꠣꠘꠣ ꠍꠣꠠꠣꠅ ꠀꠞꠅ ꠀꠍꠤꠟ, ꠍꠄ ꠟꠣꠈ ꠙꠌꠔ꠆ꠔꠁꠞ ꠀꠎꠣꠞ ꠝꠦꠠꠣ ꠀꠞ ꠍꠣꠉꠟ,
NUM 31:33 ꠛꠣꠅꠔ꠆ꠔꠁꠞ ꠀꠎꠣꠞ ꠉꠞꠥ,
NUM 31:34 ꠄꠇꠡꠐ꠆ꠐꠤ ꠀꠎꠣꠞ ꠉꠣꠗꠣ
NUM 31:35 ꠀꠞ ꠛꠔ꠆ꠔꠤꠡ ꠀꠎꠣꠞ ꠀꠛꠤꠀꠔꠤ ꠡꠔꠤ ꠙꠥꠠꠤꠘ।
NUM 31:36 ꠔꠦꠃ ꠎꠥꠖ꠆ꠖ ꠇꠞꠞꠣ ꠍꠤꠙꠣꠁ ꠅꠇꠟꠞ ꠛꠣꠐꠅ ꠙꠠꠟ, ꠔꠤꠘ ꠟꠣꠈ ꠡꠣꠠꠔꠤꠡ ꠀꠎꠣꠞ ꠙꠣꠌ-ꠡꠐꠣ ꠝꠦꠠꠣ ꠀꠞ ꠍꠣꠉꠟ,
NUM 31:37 ꠁꠔꠣ ꠕꠣꠇꠤ ꠝꠣꠛꠥꠖꠞ ꠙꠣꠅꠘꠣ ꠛꠣꠐꠅ ꠙꠠꠟ, ꠍꠄ-ꠡ ꠙꠌꠔ꠆ꠔꠁꠞꠉꠥ ꠍꠣꠉꠟ-ꠝꠦꠠꠣ।
NUM 31:38 ꠀꠞ ꠉꠞꠥ ꠀꠍꠤꠟ ꠍꠄꠔꠤꠡ ꠀꠎꠣꠞ, ꠁꠔꠣ ꠕꠣꠇꠤ ꠝꠣꠛꠥꠖꠞ ꠛꠣꠐꠅ ꠙꠠꠟ ꠛꠣꠅꠔ꠆ꠔꠁꠞꠐꠣ।
NUM 31:39 ꠄꠞꠝꠣꠎꠦ ꠉꠣꠗꠣ ꠀꠍꠤꠟ ꠔꠤꠡ ꠀꠎꠣꠞ ꠙꠣꠌ-ꠡꠐꠣ, ꠁꠔꠣ ꠕꠣꠇꠤ ꠝꠣꠛꠥꠖꠞ ꠛꠣꠐꠅ ꠙꠠꠟ ꠄꠇꠡꠐ꠆ꠐꠤꠉꠥ।
NUM 31:40 ꠀꠞ ꠀꠛꠤꠀꠔꠤ ꠡꠔꠤ ꠙꠥꠠꠤꠘ ꠀꠍꠟꠣ ꠡꠥꠟ꠆ꠟ ꠀꠎꠣꠞ, ꠁꠔꠣ ꠕꠣꠇꠤ ꠝꠣꠛꠥꠖꠞ ꠛꠣꠐꠅ ꠙꠠꠟ ꠛꠔ꠆ꠔꠤꠡꠐꠣ।
NUM 31:41 ꠝꠣꠛꠥꠖꠦ ꠝꠥꠍꠣ ꠘꠛꠤꠞꠦ ꠎꠦꠟꠣ ꠢꠥꠇꠥꠝ ꠖꠤꠍꠟꠣ, ꠔꠣꠁꠘ ꠝꠣꠛꠥꠖꠞ ꠙꠣꠅꠘꠣ ꠛꠣꠐ ꠘꠤꠀ ꠁꠝꠣꠝ ꠀꠟꠤ-ꠀꠎꠞꠞ ꠀꠔꠅ ꠅꠟꠣ ꠡꠝꠎꠣꠁ ꠖꠤꠟꠣ।
NUM 31:42 ꠀꠞ ꠝꠥꠍꠣꠄ ꠛꠘꠤ ꠁꠍꠞꠣꠁꠟꠞ ꠛꠣꠖ-ꠛꠣꠇꠤ ꠝꠣꠘꠡꠞ ꠟꠣꠉꠤ ꠎꠦ ꠛꠣꠐ ꠍꠤꠙꠣꠁ ꠅꠇꠟꠞ ꠉꠦꠍ ꠕꠣꠇꠤ ꠘꠤꠍꠟꠣ,
NUM 31:43 ꠁ ꠛꠣꠐꠅ ꠔꠤꠘ ꠟꠣꠈ ꠡꠣꠠꠔꠤꠡ ꠀꠎꠣꠞ ꠙꠣꠌ-ꠡꠉꠥ ꠝꠦꠠꠣ ꠀꠞ ꠍꠣꠉꠟ,
NUM 31:44 ꠍꠄꠔꠤꠡ ꠀꠎꠣꠞ ꠉꠞꠥ,
NUM 31:45 ꠔꠤꠡ ꠀꠎꠣꠞ ꠙꠣꠌ-ꠡꠐꠣ ꠉꠣꠗꠣ,
NUM 31:46 ꠀꠞ ꠡꠥꠟ꠆ꠟ ꠀꠎꠣꠞ ꠀꠛꠤꠀꠔꠤ ꠡꠔꠤ ꠙꠥꠠꠤꠘ ꠀꠍꠟꠣ।
NUM 31:47 ꠛꠣꠖꠦ ꠝꠣꠛꠥꠖꠞ ꠢꠥꠇꠥꠝ ꠝꠣꠚꠤꠇ ꠝꠥꠍꠣ ꠘꠛꠤꠄ ꠛꠘꠤ ꠁꠍꠞꠣꠁꠟꠞ ꠙꠣꠅꠀ ꠛꠣꠐꠞ, ꠙꠞꠔꠦꠇ ꠙꠁꠘ꠆ꠌꠣꠡ ꠎꠘ ꠀꠛꠤꠀꠔꠤ ꠙꠥꠠꠤꠘ ꠀꠞ ꠙꠡꠥꠁꠘ ꠕꠣꠇꠤꠅ, ꠄꠉꠥ ꠇꠞꠤ ꠙꠥꠠꠤ ꠀꠞ ꠙꠡꠥ ꠘꠤꠀ ꠟꠦꠛꠤ ꠈꠣꠘ꠆ꠖꠣꠘꠞ ꠝꠣꠘꠡꠞꠦ ꠖꠤꠟꠣ, ꠎꠦꠞꠣꠞ ꠃꠙꠞꠦ ꠝꠣꠛꠥꠖꠞ ꠇꠣꠛꠣ ꠊꠞꠞ ꠖꠦꠈꠣ-ꠢꠥꠘꠣꠞ ꠎꠤꠝ꠆ꠝꠣꠖꠣꠞꠤ ꠀꠍꠤꠟ।
NUM 31:48 ꠄꠞꠛꠣꠖꠦ ꠍꠤꠙꠣꠁ ꠖꠟꠞ ꠀꠎꠣꠞ ꠍꠤꠙꠣꠁꠞ ꠀꠞ ꠡ-ꠍꠤꠙꠣꠁꠞ ꠇꠣꠝꠣꠘ꠆ꠒꠣꠞ ꠅꠇꠟ ꠝꠥꠍꠣꠞ ꠉꠦꠍꠦ ꠀꠁꠟꠣ,
NUM 31:49 ꠀꠁꠀ ꠇꠁꠟꠣ, “ꠀꠙꠘꠣꠞ ꠁ ꠉꠥꠟꠣꠝ ꠅꠇꠟꠦ ꠀꠝꠞꠣꠞ ꠎꠤꠝ꠆ꠝꠣꠄ ꠕꠣꠇꠣ ꠍꠤꠙꠣꠁ ꠅꠇꠟꠞꠦ ꠉꠘꠤꠟꠣꠝ। ꠉꠘꠤꠀ ꠖꠦꠈꠟꠣꠝ, ꠔꠣꠞꠣ ꠢꠇꠟ ꠙꠥꠞꠣ ꠀꠍꠂꠘ, ꠎꠥꠖ꠆ꠖꠔ ꠇꠦꠃ ꠝꠞꠍꠦ ꠘꠣ।
NUM 31:50 ꠄꠞꠟꠣꠉꠤ ꠀꠝꠞꠣ ꠙꠞꠔꠦꠇꠞ ꠛꠣꠐꠅ ꠎꠦꠔꠣ ꠡꠥꠘꠣꠞ ꠛꠣꠎꠥ, ꠛꠣꠟꠣ, ꠀꠔꠞ ꠀꠋꠐꠤ, ꠇꠣꠘꠞ ꠖꠥꠟ ꠀꠞ ꠉꠟꠣꠞ ꠢꠣꠞ ꠙꠣꠁꠍꠤ, ꠀꠝꠞꠣ ꠁꠔꠣ ꠢꠇꠟꠔꠣ ꠟꠁꠀ ꠀꠁꠍꠤ। ꠀꠝꠞꠣꠞ ꠎꠣꠘꠞ ꠇꠚꠞꠣꠞ ꠇꠥꠞꠛꠣꠘꠤ ꠢꠤꠡꠣꠛꠦ ꠅꠔꠣ ꠝꠣꠛꠥꠖꠞ ꠖꠞꠛꠣꠞꠅ ꠖꠤꠟꠣꠁꠔꠣꠝ।”
NUM 31:51 ꠔꠦꠃ ꠝꠥꠍꠣ ꠀꠞ ꠁꠝꠣꠝ ꠀꠟꠤ-ꠀꠎꠞꠦ ꠔꠣꠞꠣꠞ ꠉꠦꠍ ꠕꠣꠇꠤ ꠡꠥꠘꠣꠞ ꠢꠇꠟ ꠉꠄꠘꠣ ꠡꠝꠎꠤꠀ ꠙꠣꠁꠟꠣ।
NUM 31:52 ꠔꠣꠞꠣ ꠀꠎꠣꠞ ꠍꠤꠙꠣꠁꠞ ꠀꠞ ꠡ-ꠍꠤꠙꠣꠁꠞ ꠇꠣꠝꠣꠘ꠆ꠒꠣꠞ ꠅꠇꠟꠞ ꠉꠦꠍ ꠕꠣꠇꠤ ꠝꠣꠛꠥꠖꠞ ꠘꠣꠝꠦ ꠖꠦꠅꠀ ꠎꠦ ꠡꠥꠘꠣꠞ ꠉꠄꠘꠣ ꠡꠝꠎꠤꠀ ꠙꠣꠁꠟꠣ, ꠁꠔꠣꠞ ꠃꠎꠘ ꠀꠍꠤꠟ ꠡꠥꠟ꠆ꠟ ꠀꠎꠣꠞ ꠡꠣꠔ-ꠡ ꠙꠁꠘ꠆ꠌꠣꠡ ꠔꠟꠣ।
NUM 31:53 ꠝꠥꠍꠣ ꠘꠛꠤ ꠀꠞ ꠁꠝꠣꠝ ꠀꠟꠤ-ꠀꠎꠞꠦ ꠀꠎꠣꠞ ꠍꠤꠙꠣꠁ ꠀꠞ ꠡ-ꠍꠤꠙꠣꠁꠞ ꠇꠣꠝꠣꠘ꠆ꠒꠣꠞ ꠅꠇꠟꠞ ꠉꠦꠍ ꠕꠣꠇꠤ ꠅꠃ ꠡꠥꠘꠣ ꠅꠇꠟ ꠡꠝꠎꠤꠀ ꠞꠣꠈꠟꠣ। ꠞꠣꠈꠤꠀ ꠝꠣꠛꠥꠖꠞ ꠍꠣꠝꠘꠦ ꠛꠘꠤ ꠁꠍꠞꠣꠁꠟꠞ ꠁꠀꠖꠉꠣꠞꠤꠞ ꠘꠤꠡꠣꠘꠣ ꠢꠤꠡꠣꠛꠦ ꠅꠔꠣ ꠡꠥꠘꠣ ꠅꠇꠟ ꠇꠣꠛꠣ ꠊꠞꠞ ꠜꠤꠔꠞꠦ ꠕꠁꠟꠣ। ꠁꠔꠣ ꠍꠣꠠꠣꠅ ꠍꠤꠙꠣꠁ ꠅꠇꠟꠦ ꠉꠘꠤꠝꠔꠞ ꠀꠞꠅ ꠝꠣꠟ-ꠍꠣꠝꠣꠘꠣ ꠎꠣꠞꠎꠤꠞ ꠉꠦꠍꠦ ꠞꠣꠈꠍꠤꠟꠣ।
NUM 32:1 ꠞꠥꠛꠦꠘ ꠀꠞ ꠍꠣꠖꠥ ꠈꠣꠘ꠆ꠖꠣꠘꠞ ꠝꠣꠘꠡꠞ ꠉꠞꠥ-ꠍꠣꠉꠟꠞ ꠛꠠ ꠛꠠ ꠙꠣꠟ ꠀꠍꠤꠟ। ꠔꠣꠞꠣ ꠖꠦꠈꠟꠣ, ꠎꠣꠎꠤꠞꠣ ꠀꠞ ꠉꠤꠟꠤꠅꠖ ꠄꠟꠣꠇꠣ ꠙꠡꠥ ꠙꠣꠟꠤꠛꠣꠞ ꠟꠣꠉꠤ ꠈꠥꠛ ꠜꠣꠟꠣ ꠎꠣꠉꠣ।
NUM 32:2 ꠔꠦꠃ ꠔꠣꠞꠣ ꠝꠥꠍꠣ ꠘꠛꠤ, ꠁꠝꠣꠝ ꠀꠟꠤ-ꠀꠎꠞ ꠀꠞ ꠛꠘꠤ ꠁꠍꠞꠣꠁꠟꠞ ꠙꠞꠗꠣꠘ ꠝꠥꠞꠛ꠆ꠛꠤ ꠅꠇꠟꠞꠦ ꠇꠁꠟꠣ,
NUM 32:3 “ꠀꠙꠘꠣꠁꠘ꠆ꠔꠞ ꠁ ꠉꠥꠟꠣꠝ ꠅꠇꠟꠦ ꠔ ꠉꠞꠥ-ꠍꠣꠉꠟ ꠙꠣꠟꠤ। ꠀꠞ ꠀꠝꠞꠣꠞ ꠝꠣꠛꠥꠖꠦ ꠅꠐꠣꠞꠥꠔ, ꠖꠤꠛꠣꠘ, ꠎꠣꠎꠤꠞꠣ, ꠘꠤꠝ꠆ꠞꠣ, ꠢꠤꠡꠛꠘ, ꠁꠟꠤꠀꠟꠤ, ꠍꠦꠛꠣꠝ, ꠘꠛꠅ ꠀꠞ ꠛꠤꠃꠘ ꠘꠣꠝꠞ ꠎꠦꠔꠣ ꠎꠣꠉꠣ ꠛꠘꠤ ꠁꠍꠞꠣꠁꠟꠞ ꠖꠈꠟꠅ ꠀꠘꠍꠂꠘ, ꠁꠔꠣ ꠔ ꠙꠡꠥ ꠙꠣꠟꠤꠛꠣꠞ ꠟꠣꠉꠤ ꠈꠥꠛ ꠜꠣꠟꠣ ꠎꠣꠉꠣ।
NUM 32:5 ꠅꠈꠘ ꠀꠙꠘꠦ ꠎꠥꠖꠤ ꠀꠝꠞꠣꠞꠦ ꠖꠄꠀ ꠇꠞꠂꠘ, ꠔꠦ ꠅꠃ ꠎꠣꠉꠣ ꠈꠣꠘꠣꠁꠘ ꠀꠙꠘꠣꠞ ꠁ ꠉꠥꠟꠣꠝ ꠅꠇꠟꠞꠦ ꠖꠤꠟꠣꠃꠇ꠆ꠇꠣ। ꠀꠝꠞꠣꠞꠦ ꠎꠞ꠆ꠖꠣꠘ ꠉꠣꠋꠉꠞ ꠢꠤꠙꠣꠞꠅ ꠘꠦꠁꠘ ꠘꠣ ꠎꠣꠘꠥ।”
NUM 32:6 ꠝꠥꠍꠣ ꠘꠛꠤꠄ ꠔꠣꠞꠣꠞꠦ ꠎꠥꠀꠙ ꠖꠤꠟꠣ, “ꠔꠥꠝꠞꠣꠞ ꠜꠣꠁꠀꠁꠘ ꠎꠥꠖ꠆ꠖ ꠇꠞꠣꠔ ꠎꠣꠁꠛꠣ, ꠀꠞ ꠔꠥꠝꠞꠣ ꠅꠘꠅ ꠛꠁ ꠞꠁꠛꠣꠄ ꠘꠤ?
NUM 32:7 ꠝꠣꠛꠥꠖꠦ ꠛꠘꠤ ꠁꠍꠞꠣꠁꠟꠞꠦ ꠎꠦ ꠎꠣꠉꠣ ꠈꠣꠘꠣꠁꠘ ꠖꠤꠍꠂꠘ, ꠢꠤꠘꠅ ꠎꠣꠁꠔꠦ ꠔꠥꠝꠞꠣ ꠇꠦꠘꠦ ꠔꠣꠞꠣꠞ ꠝꠘꠅꠛꠟ ꠜꠣꠋꠉꠤ ꠖꠤꠞꠣꠄ?
NUM 32:8 ꠢꠥꠘꠅ, ꠀꠉꠦ ꠎꠦꠛꠟꠣ ꠅꠃ ꠖꠦꠡ ꠖꠦꠈꠣꠞ ꠟꠣꠉꠤ ꠔꠥꠝꠞꠣꠞ ꠛꠣꠚ-ꠖꠣꠖꠣꠁꠘꠞꠦ ꠀꠝꠤ ꠇꠣꠖꠦꠡ-ꠛꠞꠘꠦꠀ ꠕꠣꠇꠤ ꠙꠣꠑꠣꠁꠍꠟꠣꠝ, ꠢꠃ ꠡꠝꠄ ꠔꠣꠞꠣꠅ ꠅꠟꠣ ꠇꠞꠍꠟꠣ।
NUM 32:9 ꠔꠣꠞꠣ ꠛꠘꠤ ꠁꠍꠞꠣꠁꠟꠞ ꠟꠣꠉꠤ ꠝꠣꠛꠥꠖꠞ ꠖꠣꠘ ꠇꠞꠣ ꠖꠦꠡ ꠖꠦꠈꠣꠔ ꠉꠦꠍꠤꠟ, ꠉꠤꠀ ꠀꠡꠇꠥꠟꠞ ꠙꠣꠠꠤꠀ ꠈꠣꠟ ꠙꠞ꠆ꠎꠘ꠆ꠔ ꠖꠦꠈꠍꠤꠟ, ꠖꠦꠈꠤꠀ ꠀꠁꠀ ꠢꠃ ꠖꠦꠡꠅ ꠎꠣꠁꠔꠦ ꠄꠞꠣꠞ ꠝꠘꠅꠛꠟ ꠜꠣꠋꠉꠤ ꠖꠤꠍꠤꠟ।
NUM 32:10 ꠄꠞꠟꠣꠉꠤ ꠢꠃ ꠖꠤꠘ ꠉꠥꠍꠣꠄ ꠀꠉꠥꠁꠘ ꠅꠁꠀ ꠝꠣꠛꠥꠖꠦ ꠇꠍꠝ ꠈꠣꠁꠀ ꠇꠁꠍꠟꠣ,
NUM 32:11 ꠀꠝꠤ ꠝꠣꠛꠥꠖꠦ ꠎꠦ ꠖꠦꠡ ꠖꠤꠛꠣꠞ ꠟꠣꠉꠤ ꠁꠛ꠆ꠞꠣꠢꠤꠝ, ꠁꠍꠢꠣꠇ ꠀꠞ ꠁꠀꠇꠥꠛꠞ ꠉꠦꠍꠦ ꠇꠍꠝ ꠈꠣꠁꠍꠟꠣꠝ, ꠝꠤꠡꠞ ꠕꠣꠇꠤ ꠛꠣꠞ ꠅꠁꠀ ꠀꠅꠀ ꠝꠣꠘꠡꠞ ꠝꠣꠎꠦ ꠛꠤꠡ ꠛꠍꠞ ꠛꠣ ꠄꠞ ꠛꠦꠡꠤ ꠛꠄꠅꠡꠤ ꠇꠥꠘꠥ ꠎꠘꠦ ꠁ ꠖꠦꠡ ꠖꠦꠈꠣꠞ ꠡꠥꠎꠥꠉ ꠙꠣꠁꠔꠣ ꠘꠣꠄ, ꠇꠦꠘꠦꠘꠣ ꠔꠣꠞꠣ ꠀꠝꠣꠞ ꠇꠕꠣ ꠙꠥꠞꠣꠙꠥꠞ ꠡꠥꠟ꠆ꠟꠀꠘꠣ ꠝꠣꠘꠍꠦ ꠘꠣ।
NUM 32:12 ꠈꠣꠟꠤ ꠇꠘꠤꠎꠤ ꠎꠤꠚꠥꠘ꠆ꠘꠤꠞ ꠙꠥꠀ ꠇꠣꠟꠥꠔ ꠀꠞ ꠘꠥꠘꠞ ꠙꠥꠔ ꠁꠃꠍꠣꠄ ꠅꠃ ꠖꠦꠡ ꠖꠦꠈꠣꠞ ꠡꠥꠎꠥꠉ ꠙꠣꠁꠛꠣ। ꠔꠣꠞꠣ ꠔ ꠀꠝꠣꠞ ꠇꠕꠣꠞꠦ ꠡꠥꠟ꠆ꠟꠀꠘꠣ ꠝꠣꠘꠍꠦ।
NUM 32:13 ꠢꠃ ꠡꠝꠄ ꠝꠣꠛꠥꠖꠦ ꠛꠘꠤ ꠁꠍꠞꠣꠁꠟꠞ ꠃꠙꠞꠦ ꠉꠥꠍꠣꠄ ꠀꠉꠥꠁꠘ ꠅꠁꠉꠦꠍꠟꠣ, ꠄꠞꠟꠣꠉꠤ ꠔꠣꠘ ꠘꠎꠞꠅ ꠘꠣꠚꠞꠝꠣꠘꠤ ꠇꠞꠞꠣ ꠅꠔꠣ ꠝꠣꠘꠡꠞ ꠛꠤꠘꠣꠡ ꠘꠣ ꠅꠀ ꠙꠞ꠆ꠎꠘ꠆ꠔ, ꠌꠣꠟ꠆ꠟꠤꠡ ꠛꠍꠞ ꠗꠞꠤ ꠝꠞꠥꠜꠥꠝꠤꠞ ꠘꠣꠘꠣꠘ ꠎꠣꠉꠣꠔ ꠁꠔꠣꠞꠦ ꠌꠇ꠆ꠇꠞ ꠖꠦꠅꠀꠁꠟꠣ।
NUM 32:14 “ꠀꠞ ꠢꠃ ꠉꠥꠘꠣꠉꠣꠞ ꠅꠇꠟꠞ ꠀꠅꠟꠣꠖ ꠅꠀꠄ, ꠅꠈꠘ ꠔꠥꠝꠞꠣꠅ ꠎꠣꠞꠎꠤꠞ ꠛꠣꠚ-ꠖꠣꠖꠣꠞ ꠈꠣꠁꠍꠟꠔ ꠙꠣꠁꠍ, ꠄꠞꠟꠣꠉꠤ ꠛꠘꠤ ꠁꠍꠞꠣꠁꠟꠞ ꠃꠙꠞꠦ ꠝꠣꠛꠥꠖꠞ ꠉꠥꠍꠣꠞ ꠀꠉꠥꠁꠘꠞꠦ ꠀꠞꠅ ꠛꠣꠠꠣꠁꠛꠣꠄ।
NUM 32:15 ꠅꠈꠘ ꠔꠥꠝꠞꠣ ꠎꠥꠖꠤ ꠔꠣꠘ ꠢꠥꠇꠥꠝ ꠝꠣꠚꠤꠇ ꠘꠣ ꠌꠟꠅ, ꠔꠦ ꠔꠣꠁꠘ ꠢꠤꠞꠛꠣꠞ ꠅꠔꠣ ꠝꠣꠘꠡꠞꠦ ꠝꠞꠥꠜꠥꠝꠤꠔ ꠚꠣꠟꠣꠁ ꠕꠁꠛꠣ, ꠔꠣꠘ ꠁ ꠟꠣꠘ꠆ꠘꠔꠞ ꠇꠣꠞꠘ ꠅꠁꠛꠣꠄ ꠔꠥꠝꠞꠣꠃ।”
NUM 32:16 ꠁꠔꠣ ꠢꠥꠘꠤꠀ ꠔꠣꠞꠣ ꠝꠥꠍꠣꠞ ꠗꠣꠞꠅ ꠜꠤꠠꠤꠀ ꠇꠁꠟꠣ, “ꠍꠣꠛ, ꠀꠝꠞꠣ ꠔ ꠈꠣꠟꠤ ꠙꠡꠥꠞ ꠙꠣꠟ ꠞꠣꠈꠣꠞ ꠎꠣꠉꠣ ꠛꠣꠘꠣꠘꠤ ꠀꠞ ꠀꠝꠞꠣꠞ ꠛꠃ-ꠛꠣꠁꠌ꠆ꠌꠣꠞꠦ ꠕꠅꠀꠞ ꠟꠣꠉꠤ ꠅꠘꠅ ꠐꠣꠃꠘ ꠅꠇꠟ ꠛꠣꠘꠣꠘꠤꠞ ꠁꠎꠣꠎꠔ ꠌꠣꠁꠍꠤ।
NUM 32:17 ꠅꠁꠟꠦ ꠛꠘꠤ ꠁꠍꠞꠣꠁꠟꠞꠦ ꠘꠤꠎꠞ ꠎꠣꠉꠣꠔ ꠘꠣ ꠙꠃꠍꠣꠘꠤ ꠙꠞ꠆ꠎꠘ꠆ꠔ ꠀꠝꠞꠣ ꠎꠥꠖ꠆ꠖꠞ ꠍꠤꠙꠣꠁꠞ ꠟꠣꠈꠣꠘ ꠔꠣꠞꠣꠞ ꠀꠉꠦ ꠀꠉꠦ ꠎꠣꠁꠝꠥ। ꠄꠞꠝꠣꠎꠦ ꠀꠝꠞꠣꠞ ꠛꠃ-ꠛꠣꠁꠌ꠆ꠌꠣꠁꠘ ꠛꠣꠃꠘ꠆ꠒꠞꠤ ꠇꠞꠣ ꠅꠃ ꠐꠣꠃꠘꠅ ꠞꠁꠟꠦ, ꠅꠔꠣ ꠖꠦꠡꠞ ꠝꠣꠘꠡꠞ ꠀꠔ ꠕꠣꠇꠤ ꠔꠣꠞꠣ ꠘꠤꠞꠣꠙꠖꠦ ꠞꠁꠛꠣ।
NUM 32:18 ꠢꠇ꠆ꠇꠟ ꠛꠘꠤ ꠁꠍꠞꠣꠁꠟꠞꠦ ꠎꠣꠞꠎꠤꠞ ꠎꠝꠤ-ꠝꠤꠞꠣꠡ ꠘꠣ ꠡꠝꠎꠣꠘꠤ ꠙꠞ꠆ꠎꠘ꠆ꠔ ꠀꠝꠞꠣ ꠘꠤꠎꠞ ꠊꠞꠅ ꠚꠤꠞꠤꠀ ꠀꠁꠔꠣꠝ ꠘꠣꠄ।
NUM 32:19 ꠀꠞ ꠎꠞ꠆ꠖꠣꠘ ꠉꠣꠋꠉꠞ ꠢꠙꠣꠞꠅ ꠛꠘꠤ ꠁꠍꠞꠣꠁꠟꠞ ꠟꠉꠦ ꠀꠝꠞꠣ ꠇꠥꠘꠥ ꠎꠝꠤ-ꠎꠝꠣꠞ ꠛꠣꠐꠅ ꠘꠤꠔꠣꠝ ꠘꠣꠄ, ꠇꠦꠘꠦꠘꠣ ꠀꠝꠞꠣꠞ ꠛꠣꠐ ꠔ ꠉꠣꠋꠉꠞ ꠅꠃ ꠙꠥꠛꠞ ꠙꠣꠞꠅꠃ ꠝꠤꠟꠤꠉꠦꠍꠦ।”
NUM 32:20 ꠁꠈꠣꠘ ꠢꠥꠘꠤꠀ ꠝꠥꠍꠣꠄ ꠇꠁꠟꠣ, “ꠀꠁꠌ꠆ꠍꠣ, ꠔꠥꠝꠞꠣ ꠎꠥꠖꠤ ꠢꠣꠍꠣꠃ ꠁꠟꠣ ꠇꠞꠅ, ꠀꠟ꠆ꠟꠣꠞꠦ ꠀꠎꠤꠞ-ꠘꠣꠎꠤꠞ ꠎꠣꠘꠤꠀ ꠎꠥꠖ꠆ꠖꠞ ꠢꠣꠎꠦ ꠀꠔꠤꠀꠞ ꠟꠁꠀ ꠎꠥꠖꠤ ꠢꠘꠅ ꠟꠣꠠꠣꠁꠔ ꠎꠣꠅ,
NUM 32:21 ꠀꠞ ꠀꠟ꠆ꠟꠣꠄ ꠎꠔꠛꠁꠟ ꠔꠣꠘ ꠖꠥꠡꠝꠘ ꠅꠇꠟꠞꠦ ꠔꠣꠘ ꠍꠣꠝꠘꠦ ꠕꠣꠇꠤ ꠈꠦꠖꠣꠁꠀ ꠘꠣ ꠖꠦꠁꠘ ꠅꠔꠛꠁꠟ ꠔꠥꠝꠞꠣ ꠎꠥꠖ꠆ꠖꠞ ꠢꠣꠎꠦ ꠔꠣꠘ ꠟꠣꠉꠤ ꠉꠣꠋ ꠙꠣꠞ ꠅꠁꠀ ꠢꠙꠣꠞꠅ ꠎꠥꠖꠤ ꠎꠣꠅ,
NUM 32:22 ꠔꠦ ꠢꠃ ꠖꠦꠡꠅ ꠝꠣꠛꠥꠖꠞ ꠖꠈꠟꠖꠣꠞꠤ ꠇꠣꠁꠝ ꠅꠁꠀ ꠢꠣꠞꠟꠦ ꠔꠥꠝꠞꠣ ꠅꠘꠅ ꠚꠤꠞꠔ ꠀꠁꠔꠣꠄ ꠙꠣꠞꠛꠣꠄ। ꠔꠦꠃ ꠝꠣꠛꠥꠖ ꠀꠞ ꠛꠣꠖ-ꠛꠣꠇꠤ ꠛꠘꠤ ꠁꠍꠞꠣꠁꠟꠞ ꠟꠣꠉꠤ ꠔꠥꠝꠞꠣꠞ ꠎꠦ ꠖꠣꠄ-ꠖꠣꠄꠁꠔ꠆ꠔ ꠀꠍꠤꠟ, ꠁꠔꠣ ꠕꠣꠇꠤ ꠈꠣꠟꠣꠍ ꠅꠁꠛꠣꠄ; ꠀꠞ ꠝꠣꠛꠥꠖꠞ ꠈꠥꠡꠤ ꠝꠣꠚꠤꠇ ꠅꠃ ꠎꠝꠤꠘꠅ ꠔꠥꠝꠞꠣꠞ ꠝꠣꠟꠤꠇꠣꠘꠣ ꠇꠣꠁꠝ ꠅꠁꠛ।
NUM 32:23 ꠅꠁꠟꠦ ꠔꠥꠝꠞꠣ ꠎꠥꠖꠤ ꠁꠟꠣ ꠘꠣ ꠇꠞꠅ, ꠔꠦ ꠔꠥꠝꠞꠣ ꠝꠣꠛꠥꠖꠞ ꠉꠦꠍꠦ ꠉꠥꠘꠣꠉꠣꠞ ꠛꠘꠛꠣꠄ। ꠝꠘꠅ ꠞꠣꠈꠤꠅ, ꠔꠥꠝꠞꠣꠞ ꠙꠣꠙꠦ ꠔꠥꠝꠞꠣꠞꠦ ꠍꠣꠠꠔ ꠘꠣꠄ।
NUM 32:24 ꠅꠈꠘ ꠔꠥꠝꠞꠣꠞ ꠛꠃ-ꠛꠣꠁꠌ꠆ꠌꠣꠞ ꠟꠣꠉꠤ ꠐꠣꠃꠘ ꠅꠇꠟ ꠀꠞ ꠉꠞꠥ-ꠍꠣꠉꠟ ꠕꠅꠀꠞ ꠟꠣꠉꠤ ꠎꠣꠉꠣꠅ ꠛꠣꠘꠣꠁꠔꠣꠄ ꠙꠣꠞꠅ, ꠅꠁꠟꠦ ꠔꠥꠝꠞꠣ ꠎꠦꠈꠣꠘ ꠅꠀꠖꠣ ꠇꠞꠍ, ꠁꠔꠣ ꠙꠥꠞꠘ ꠇꠞꠣ ꠟꠣꠉꠛ।”
NUM 32:25 ꠔꠦꠃ ꠍꠣꠖꠥ ꠀꠞ ꠞꠥꠛꠦꠘ ꠈꠣꠘ꠆ꠖꠣꠘꠞ ꠝꠣꠘꠡꠦ ꠝꠥꠍꠣ ꠘꠛꠤꠞꠦ ꠇꠁꠟꠣ, “ꠀꠙꠘꠦ ꠔ ꠀꠝꠞꠣꠞ ꠝꠣꠟꠤꠇ, ꠀꠙꠘꠣꠞ ꠁ ꠉꠥꠟꠣꠝ ꠅꠇꠟꠞꠦ ꠀꠙꠘꠦ ꠎꠦꠟꠣ ꠢꠥꠇꠥꠝ ꠖꠤꠍꠂꠘ, ꠀꠝꠞꠣ ꠅꠟꠣꠃ ꠌꠟꠝꠥ।
NUM 32:26 ꠀꠝꠞꠣꠞ ꠛꠃ-ꠛꠣꠁꠌ꠆ꠌꠣꠁꠘ ꠀꠞ ꠉꠞꠥ-ꠍꠣꠉꠟꠞ ꠙꠣꠟ ꠅꠘꠞ ꠉꠤꠟꠤꠅꠖ ꠄꠟꠣꠇꠣꠞ ꠐꠣꠃꠘ ꠅꠇꠟꠅ ꠞꠁꠛꠣ।
NUM 32:27 ꠅꠁꠟꠦ ꠀꠝꠞꠣ ꠀꠝꠞꠣꠞ ꠝꠣꠟꠤꠇꠞ ꠢꠥꠇꠥꠝ ꠝꠣꠚꠤꠇ ꠎꠥꠖ꠆ꠖꠞ ꠡꠣꠎ-ꠡꠞꠘ꠆ꠎꠣꠝ ꠟꠁꠀ ꠉꠣꠋ ꠙꠣꠞ ꠅꠁꠀ ꠝꠣꠛꠥꠖꠞ ꠘꠣꠝꠦ ꠟꠣꠠꠣꠁ ꠇꠞꠣꠔ ꠎꠣꠁꠝꠥ।”
NUM 32:28 ꠔꠦꠃ ꠝꠥꠍꠣꠄ ꠅꠔꠣ ꠝꠣꠘꠡꠞ ꠛꠦꠙꠣꠞꠦ ꠁꠝꠣꠝ ꠀꠟꠤ-ꠀꠎꠞ, ꠘꠥꠘꠞ ꠙꠥꠀ ꠁꠃꠍꠣ, ꠀꠞ ꠛꠘꠤ ꠁꠍꠞꠣꠁꠟꠞ ꠛꠣꠞꠅ ꠈꠣꠘ꠆ꠖꠣꠘꠞ ꠘꠣꠘꠣꠘ ꠉꠥꠡ꠆ꠐꠤꠞ ꠝꠥꠞꠛ꠆ꠛꠤ ꠅꠇꠟꠞꠦ ꠢꠥꠇꠥꠝ ꠖꠤꠟꠣ।
NUM 32:29 ꠔꠣꠁꠘ ꠄꠞꠣꠞꠦ ꠇꠁꠟꠣ, “ꠍꠣꠖꠥ ꠀꠞ ꠞꠥꠛꠦꠘ ꠈꠣꠘ꠆ꠖꠣꠘꠞ ꠢꠇꠟ ꠛꠦꠐꠣꠁꠘ ꠎꠥꠖꠤ ꠢꠣꠍꠣꠃ ꠎꠥꠖ꠆ꠖꠞ ꠡꠣꠎ-ꠡꠞꠘ꠆ꠎꠣꠝ ꠟꠁꠀ ꠝꠣꠛꠥꠖꠞ ꠘꠣꠝꠦ ꠟꠣꠠꠣꠁ ꠇꠞꠣꠞ ꠘꠤꠅꠔꠦ ꠔꠥꠝꠞꠣꠞ ꠟꠉꠦ ꠎꠞ꠆ꠖꠣꠘ ꠉꠣꠋ ꠙꠣꠞ ꠅꠁꠀ ꠎꠣꠁꠘ, ꠔꠦ ꠢꠃ ꠖꠦꠡ ꠎꠦꠛꠟꠣ ꠔꠥꠝꠞꠣꠞ ꠖꠈꠟꠅ ꠀꠁꠛ, ꠅꠃ ꠡꠝꠄ ꠔꠥꠝꠞꠣ ꠉꠤꠟꠤꠅꠖ ꠄꠟꠣꠇꠣꠞꠦ ꠔꠣꠞꠣꠞ ꠝꠣꠟꠤꠇꠣꠘꠣꠄ ꠡꠝꠎꠣꠁ ꠖꠤꠅ।
NUM 32:30 ꠅꠁꠟꠦ ꠔꠣꠞꠣ ꠎꠥꠖꠤ ꠁꠟꠣ ꠘꠣ ꠇꠞꠂꠘ, ꠔꠦ ꠢꠃ ꠇꠦꠘꠣꠘ ꠖꠦꠡꠅꠃ ꠔꠥꠝꠞꠣꠞ ꠟꠉꠦ ꠔꠣꠞꠣꠞ ꠛꠣꠐ ꠘꠤꠛꠣ।”
NUM 32:31 ꠁꠈꠣꠘ ꠢꠥꠘꠤꠀ ꠍꠣꠖꠥ ꠀꠞ ꠞꠥꠛꠦꠘ ꠈꠣꠘ꠆ꠖꠣꠘꠞ ꠝꠣꠘꠡꠦ ꠇꠁꠟꠣ, “ꠝꠣꠛꠥꠖꠦ ꠔꠣꠘ ꠁ ꠉꠥꠟꠣꠝ ꠅꠇꠟꠞꠦ ꠎꠦꠟꠣ ꠢꠥꠇꠥꠝ ꠖꠤꠍꠂꠘ, ꠀꠝꠞꠣ ꠅꠟꠣꠃ ꠇꠞꠝꠥ।
NUM 32:32 ꠀꠝꠞꠣ ꠝꠣꠛꠥꠖꠞ ꠘꠣꠝꠦ ꠎꠥꠖ꠆ꠖꠞ ꠡꠣꠎ-ꠡꠞꠘ꠆ꠎꠣꠝ ꠟꠁꠀ ꠎꠞ꠆ꠖꠣꠘ ꠉꠣꠋ ꠙꠣꠞ ꠅꠁꠀ ꠇꠦꠘꠣꠘ ꠖꠦꠡꠅ ꠎꠣꠁꠝꠥ, ꠅꠁꠟꠦ ꠀꠝꠞꠣꠞ ꠎꠝꠤ-ꠎꠝꠣꠞ ꠛꠣꠐ ꠉꠣꠋꠉꠞ ꠅꠙꠣꠞꠅ ꠞꠁꠟ।”
NUM 32:33 ꠁꠈꠣꠘ ꠢꠥꠘꠤꠀ ꠝꠥꠍꠣ ꠘꠛꠤ ꠞꠣꠎꠤ ꠅꠁꠟꠣ। ꠔꠣꠁꠘ ꠍꠣꠖꠥ ꠀꠞ ꠞꠥꠛꠦꠘ ꠈꠣꠘ꠆ꠖꠣꠘꠞꠦ, ꠄꠞꠟꠉꠦ ꠁꠃꠍꠥꠚꠞ ꠙꠥꠀ ꠝꠣꠘꠡꠣ ꠈꠣꠘ꠆ꠖꠣꠘꠞ ꠅꠞ꠆ꠗꠦꠇ ꠝꠣꠘꠡꠞꠦ, ꠅꠃ ꠎꠣꠉꠣꠁꠘ ꠖꠤꠟꠣ। ꠝꠥꠍꠣꠄ ꠀꠝꠥꠞꠤ ꠅꠇꠟꠞ ꠛꠣꠖꠡꠣ ꠍꠤꠢꠥꠘ ꠀꠞ ꠛꠣꠡꠘꠞ ꠛꠣꠖꠡꠣ ꠃꠎꠞ ꠀꠡ꠆ꠔꠣ ꠞꠣꠎꠔ꠆ꠔꠞ ꠢꠇꠟ ꠐꠣꠃꠘ ꠀꠞ ꠉꠣꠃ-ꠉꠦꠞꠣꠝ ꠡꠢ ꠡꠛ ꠎꠝꠤ-ꠝꠤꠞꠣꠡ ꠔꠣꠞꠣꠞ ꠟꠣꠉꠤ ꠕꠁꠟꠣ।
NUM 32:34 ꠔꠦꠃ ꠍꠣꠖꠥ ꠈꠣꠘ꠆ꠖꠣꠘꠞ ꠝꠣꠘꠡꠦ ꠖꠤꠛꠣꠘ, ꠅꠐꠣꠞꠥꠔ, ꠀꠞꠥꠀꠞ,
NUM 32:35 ꠀꠐꠞꠥꠔ-ꠡꠥꠚꠣꠘ, ꠎꠣꠎꠤꠞꠣ, ꠎꠉꠛꠤꠀ,
NUM 32:36 ꠛꠣꠄꠔ-ꠘꠤꠝꠞꠣ, ꠛꠣꠄꠔ-ꠢꠣꠞꠣꠘ ꠘꠣꠝꠞ ꠉꠣꠃꠀꠁꠘ ꠀꠞ ꠐꠣꠃꠘ ꠅꠇꠟꠞꠦ ꠃꠌꠣ ꠃꠌꠣ ꠛꠣꠃꠘ꠆ꠒꠞꠤ ꠅꠀꠟ ꠉꠣꠕꠤꠀ ꠝꠎꠛꠥꠔ ꠇꠞꠟꠣ। ꠄꠞꠟꠉꠦ ꠔꠣꠞꠣꠞ ꠉꠞꠥ-ꠍꠣꠉꠟ ꠕꠁꠛꠣꠞ ꠎꠣꠉꠣꠅ ꠛꠣꠘꠣꠁꠟꠣ।
NUM 32:37 ꠞꠥꠛꠦꠘ ꠈꠣꠘ꠆ꠖꠣꠘꠞ ꠝꠣꠘꠡꠦ ꠢꠤꠡꠛꠘ, ꠁꠟꠤꠀꠟꠤ, ꠇꠤꠞꠤꠀꠔꠣꠁꠝ ꠐꠣꠃꠘ,
NUM 32:38 ꠀꠞ ꠘꠛꠅ, ꠛꠣꠀꠟ-ꠝꠤꠃꠘ, ꠍꠤꠛꠝꠣ ꠘꠣꠝꠞ ꠉꠣꠃꠀꠁꠘ ꠑꠤꠇ-ꠑꠣꠇ ꠇꠞꠟꠣ। ꠇꠞꠤꠀ ꠔꠣꠞꠣ ꠁꠔꠣꠞ ꠘꠄꠀ ꠘꠣꠝ ꠕꠁꠟꠣ।
NUM 32:39 ꠝꠣꠘꠡꠣꠞ ꠙꠥꠀ ꠝꠣꠈꠤꠞꠞ ꠀꠅꠟꠣꠖ ꠅꠇꠟꠦ ꠉꠤꠟꠤꠅꠖꠅ ꠉꠤꠀ ꠀꠉꠦꠃ ꠁꠔꠣ ꠖꠈꠟ ꠇꠞꠤꠟꠤꠍꠤꠟ, ꠀꠞ ꠢꠘꠞ ꠛꠣꠡꠤꠘ꠆ꠖꠣ ꠀꠝꠥꠞꠤ ꠅꠇꠟꠞꠦ ꠈꠦꠖꠣꠁ ꠖꠤꠍꠤꠟ।
NUM 32:40 ꠄꠞꠟꠣꠉꠤ ꠝꠥꠍꠣꠄ ꠝꠣꠘꠡꠣꠞ ꠅꠃ ꠀꠅꠟꠣꠖ ꠝꠣꠈꠤꠞꠤ ꠅꠇꠟꠞ ꠛꠣꠐꠅ ꠉꠤꠟꠤꠅꠖ ꠄꠟꠣꠇꠣꠞꠦ ꠖꠤꠟꠣꠁꠟꠣ, ꠔꠣꠞꠣ ꠅꠘꠅ ꠛꠡꠔ ꠇꠞꠟꠣ।
NUM 32:41 ꠄꠞꠝꠣꠎꠦ ꠝꠣꠘꠡꠣ ꠈꠣꠘ꠆ꠖꠣꠘꠞ ꠎꠣꠄꠁꠞ ꠘꠣꠝꠞ ꠄꠇꠎꠘꠦ ꠉꠤꠀ ꠀꠝꠥꠞꠤ ꠅꠇꠟꠞ ꠢꠇꠟ ꠉꠣꠃ-ꠉꠦꠞꠣꠝ ꠖꠈꠟ ꠇꠞꠤꠟꠤꠍꠤꠟ, ꠀꠞ ꠁꠔꠣꠞ ꠘꠣꠝ ꠖꠤꠍꠤꠟ ꠢꠣꠛ꠆ꠛꠥꠔ-ꠎꠣꠄꠁꠞ।
NUM 32:42 ꠀꠞ ꠘꠥꠛꠣ ꠘꠣꠝꠞ ꠄꠇꠎꠘꠦ ꠉꠤꠀ ꠇꠘꠣꠔ ꠀꠞ ꠄꠞ ꠇꠣꠘ꠆ꠖꠣ-ꠇꠣꠍꠣꠞ ꠉꠣꠃ-ꠉꠦꠞꠣꠝ ꠅꠇꠟ ꠖꠈꠟ ꠇꠞꠤꠀ, ꠔꠣꠞ ꠘꠤꠎꠞ ꠘꠣꠝꠦ ꠁ ꠎꠣꠉꠣꠞ ꠘꠣꠝ ꠖꠤꠟ ꠘꠥꠛꠣ।
NUM 33:1 ꠝꠥꠍꠣ ꠀꠞ ꠢꠣꠞꠥꠘ ꠘꠛꠤꠞ ꠘꠦꠔꠣꠉꠤꠞꠤꠄ ꠛꠘꠤ ꠁꠍꠞꠣꠁꠟ ꠎꠣꠔꠤ ꠚꠃꠎꠤ ꠖꠟ ꠢꠣꠎꠤꠀ, ꠝꠤꠡꠞ ꠖꠦꠡ ꠕꠣꠇꠤ ꠛꠣꠞ ꠅꠁꠀ ꠀꠅꠀꠞ ꠛꠣꠖꠦ ꠘꠣꠘꠣꠘ ꠎꠣꠉꠣꠔ ꠖꠝ ꠟꠁꠟꠣ।
NUM 33:2 ꠀꠞ ꠝꠣꠛꠥꠖꠞ ꠢꠥꠇꠥꠝꠦ ꠝꠥꠍꠣ ꠘꠛꠤꠄ ꠔꠣꠞꠣꠞ ꠖꠝ ꠟꠅꠀꠞ ꠎꠣꠉꠣꠁꠘ꠆ꠔꠞ ꠘꠣꠝ ꠟꠦꠈꠤꠀ ꠕꠁꠟꠣ। ꠅꠃ ꠎꠣꠉꠣꠁꠘ ꠅꠁꠟ,
NUM 33:3 ꠛꠍꠞꠞ ꠙꠄꠟꠣ ꠌꠣꠘ꠆ꠖꠞ ꠙꠘꠞ ꠔꠣꠞꠤꠈ, ꠝꠣꠘꠤ ꠀꠎꠣꠖꠤ ꠁꠖꠞ ꠛꠣꠖꠞ ꠖꠤꠘ, ꠔꠣꠞꠣ ꠝꠤꠡꠞ ꠖꠦꠡꠞ ꠞꠣꠝꠣꠡꠦꠡ ꠄꠟꠣꠇꠣ ꠕꠣꠇꠤ ꠞꠅꠀꠘꠣ ꠅꠁꠟꠣ। ꠝꠤꠡꠞꠞ ꠢꠇꠟ ꠝꠣꠘꠡꠞ ꠌꠈꠥꠞ ꠍꠣꠝꠘꠦꠖꠤ ꠔꠣꠞꠣ ꠛꠥꠇ ꠚꠥꠟꠣꠁꠀ ꠛꠣꠞ ꠅꠁꠀ ꠀꠁꠟꠣ।
NUM 33:4 ꠅꠃ ꠡꠝꠄ ꠝꠤꠡꠞꠤ ꠅꠇꠟꠦ ꠔꠣꠞꠣꠞ ꠛꠠ ꠙꠥꠀꠂꠘ꠆ꠔꠞ ꠟꠣꠡ ꠖꠣꠚꠘ ꠇꠞꠣꠔ ꠀꠍꠤꠟ। ꠝꠣꠛꠥꠖꠦ ꠀꠉꠞ ꠞꠣꠁꠔ ꠔꠣꠞꠣꠞ ꠢꠇꠟ ꠊꠞꠞ ꠛꠠ ꠙꠥꠀꠂꠘꠞꠦ ꠝꠣꠞꠤꠟꠤꠍꠟꠣ। ꠔꠣꠁꠘ ꠅꠔꠣꠞ ꠖꠦꠛ-ꠖꠦꠛꠤꠞ ꠃꠙꠞꠦꠅ ꠉꠎꠛ ꠓꠣꠟꠤꠀ ꠔꠣꠞꠣꠞ ꠙꠣꠅꠘꠣ ꠡꠣꠎꠣ ꠖꠤꠍꠟꠣ।
NUM 33:5 ꠛꠘꠤ ꠁꠍꠞꠣꠁꠟꠦ ꠞꠣꠝꠣꠡꠦꠡ ꠄꠟꠣꠇꠣ ꠍꠣꠠꠤꠀ ꠡꠥꠇ꠆ꠇꠔꠅ ꠀꠁꠀ ꠔꠣꠝ꠆ꠛꠥ ꠉꠣꠠꠤꠟꠣ।
NUM 33:6 ꠛꠣꠖꠦ ꠡꠥꠇ꠆ꠇꠔ ꠕꠣꠇꠤ ꠝꠞꠥꠜꠥꠝꠤꠞ ꠇꠣꠘ꠆ꠖꠣꠔ ꠄꠕꠝ ꠘꠣꠝꠞ ꠎꠣꠉꠣꠔ ꠀꠁꠀ ꠔꠣꠝ꠆ꠛꠥ ꠉꠣꠠꠤꠟꠣ।
NUM 33:7 ꠀꠞ ꠄꠕꠝ ꠕꠣꠇꠤ ꠛꠣꠀꠟ-ꠎꠣꠚꠘꠞ ꠍꠣꠝꠘꠦ ꠝꠤꠉꠖꠥꠟꠞ ꠇꠣꠘ꠆ꠖꠣꠔ ꠚꠣꠝꠣ-ꠢꠤꠞꠥꠔ ꠘꠣꠝꠞ ꠎꠣꠉꠣꠔ ꠀꠁꠀ ꠔꠣꠝ꠆ꠛꠥ ꠉꠣꠠꠤꠟꠣ।
NUM 33:8 ꠛꠣꠖꠦ ꠚꠣꠝꠣ-ꠢꠤꠞꠥꠔ ꠕꠣꠇꠤ ꠖꠞꠤꠀ ꠙꠣꠞ ꠅꠁꠀ ꠄꠕꠝ ꠝꠞꠥꠜꠥꠝꠤꠔ ꠉꠦꠟꠣ, ꠅꠃ ꠝꠞꠥꠜꠥꠝꠤ ꠛꠣꠄ ꠔꠤꠘ ꠖꠤꠘꠞ ꠙꠕ ꠙꠣꠠꠤ ꠖꠤꠀ ꠝꠣꠞꠥꠀꠔ ꠉꠤꠀ ꠔꠣꠝ꠆ꠛꠥ ꠉꠣꠠꠤꠟꠣ।
NUM 33:9 ꠛꠣꠖꠦ ꠝꠣꠞꠥꠀ ꠕꠣꠇꠤ ꠄꠟꠤꠝꠅ ꠉꠦꠟꠣ, ꠁꠘꠅ ꠙꠣꠘꠤꠞ ꠛꠣꠞꠅꠉꠥ ꠁꠘ꠆ꠖꠣꠞꠣ ꠀꠞ ꠡꠔ꠆ꠔꠁꠞꠉꠥ ꠈꠦꠎꠥꠞ ꠉꠣꠍ ꠀꠍꠤꠟ।
NUM 33:10 ꠄꠞꠛꠣꠖꠦ ꠄꠟꠤꠝ ꠍꠣꠠꠤꠀ ꠘꠤꠟ ꠖꠞꠤꠀꠞ ꠙꠣꠞꠅ ꠉꠤꠀ ꠔꠣꠝ꠆ꠛꠥ ꠉꠣꠠꠤꠟꠣ।
NUM 33:11 ꠢꠘꠅ ꠕꠣꠇꠤ ꠍꠤꠘ ꠝꠞꠥꠜꠥꠝꠤꠔ ꠀꠁꠀ ꠞꠁꠟꠣ।
NUM 33:12 ꠀꠞ ꠍꠤꠘ ꠝꠞꠥꠜꠥꠝꠤ ꠕꠣꠇꠤ ꠖꠙꠇꠣ ꠘꠣꠝꠞ ꠎꠣꠉꠣꠔ ꠉꠤꠀ ꠇꠦꠝ꠆ꠙ ꠉꠣꠠꠤꠟꠣ।
NUM 33:13 ꠛꠣꠖꠦ ꠖꠙꠇꠣ ꠍꠣꠠꠤꠀ ꠀꠟꠥꠡꠅ ꠉꠤꠀ ꠇꠦꠝ꠆ꠙ ꠉꠣꠠꠤꠟꠣ।
NUM 33:14 ꠀꠟꠥꠡ ꠕꠣꠇꠤ ꠞꠚꠤꠖꠤꠝꠅ ꠉꠦꠟꠣ, ꠁꠘꠅ ꠈꠣꠁꠛꠣꠞ ꠇꠥꠘꠥ ꠙꠣꠘꠤ ꠀꠍꠤꠟ ꠘꠣ।
NUM 33:15 ꠔꠦꠃ ꠞꠚꠤꠖꠤꠝ ꠍꠣꠠꠤꠀ ꠔꠣꠞꠣ ꠍꠤꠘꠣꠁ ꠝꠞꠥꠜꠥꠝꠤꠔ ꠉꠤꠀ ꠇꠦꠝ꠆ꠙ ꠉꠣꠠꠤꠟꠣ।
NUM 33:16 ꠄꠞꠛꠣꠖꠦ ꠍꠤꠘꠣꠁ ꠝꠞꠥꠜꠥꠝꠤ ꠕꠣꠇꠤ ꠇꠤꠛꠞꠥꠔ-ꠢꠥꠔꠣꠛꠣ।
NUM 33:17 ꠇꠤꠛꠞꠥꠔ-ꠢꠥꠔꠣꠛꠣ ꠕꠣꠇꠤ ꠢꠣꠎꠤꠞꠥꠔ।
NUM 33:18 ꠢꠣꠎꠤꠞꠥꠔ ꠕꠣꠇꠤ ꠞꠤꠔꠝꠣ।
NUM 33:19 ꠞꠤꠔꠝꠣ ꠕꠣꠇꠤ ꠞꠤꠝ꠆ꠝꠘ-ꠙꠦꠞꠡ।
NUM 33:20 ꠅꠈꠣꠘ ꠕꠣꠇꠤ ꠟꠤꠛꠘꠣ।
NUM 33:21 ꠟꠤꠛꠘꠣ ꠕꠣꠇꠤ ꠞꠤꠍꠍꠣ।
NUM 33:22 ꠞꠤꠍꠍꠣ ꠕꠣꠇꠤ ꠇꠢꠦꠟꠣꠔꠣ ꠘꠣꠝꠞ ꠎꠣꠉꠣꠔ ꠔꠣꠝ꠆ꠛꠥ ꠉꠣꠠꠤꠟꠣ।
NUM 33:23 ꠛꠣꠖꠦ ꠉꠦꠟꠣ ꠡꠦꠚꠞ ꠙꠣꠠꠅ।
NUM 33:24 ꠅꠈꠣꠘ ꠕꠣꠇꠤ ꠢꠞꠣꠖꠣ।
NUM 33:25 ꠢꠞꠣꠖꠣ ꠕꠣꠇꠤ ꠝꠈꠦꠟꠥꠔ।
NUM 33:26 ꠅꠘ ꠕꠣꠇꠤ ꠔꠢꠔ।
NUM 33:27 ꠛꠣꠖꠦ ꠔꠣꠞꠦꠈ।
NUM 33:28 ꠔꠣꠞꠦꠈ ꠕꠣꠇꠤ ꠝꠤꠔꠇꠣ।
NUM 33:29 ꠝꠤꠔꠇꠣ ꠕꠣꠇꠤ ꠢꠡꠝꠥꠘꠣ।
NUM 33:30 ꠛꠣꠖꠦ ꠝꠍꠦꠞꠥꠔ।
NUM 33:31 ꠅꠘ ꠕꠣꠇꠤ ꠛꠘꠤ-ꠁꠀꠇꠣꠘ।
NUM 33:32 ꠛꠣꠖꠦ ꠢꠥꠞ-ꠢꠉ꠆ꠉꠤꠖꠉꠖ।
NUM 33:33 ꠅꠘ ꠕꠣꠇꠤ ꠎꠔꠛꠣꠔꠣ।
NUM 33:34 ꠎꠔꠛꠣꠔꠣ ꠕꠣꠇꠤ ꠅꠛꠞꠥꠘꠣ।
NUM 33:35 ꠛꠣꠖꠦ ꠁꠎꠤꠅꠘ-ꠉꠦꠛꠦꠞ।
NUM 33:36 ꠀꠞ ꠅꠈꠣꠘ ꠕꠣꠇꠤ ꠎꠤꠘ ꠝꠞꠥꠜꠥꠝꠤꠞ ꠇꠣꠘ꠆ꠖꠣꠔ ꠇꠣꠖꠦꠡ ꠄꠟꠣꠇꠣꠔ ꠉꠤꠀ ꠔꠣꠝ꠆ꠛꠥ ꠉꠣꠠꠤꠟꠣ।
NUM 33:37 ꠛꠣꠖꠦ ꠇꠣꠖꠦꠡ ꠍꠣꠠꠤꠀ ꠁꠖꠥꠝ ꠖꠦꠡꠞ ꠡꠤꠝꠣꠘꠣꠞ ꠉꠦꠍꠦ ꠢꠥꠞ ꠙꠣꠠꠅ ꠞꠁꠟꠣ।
NUM 33:38 ꠛꠘꠤ ꠁꠍꠞꠣꠁꠟ ꠝꠤꠡꠞ ꠖꠦꠡ ꠕꠣꠇꠤ ꠛꠣꠞ ꠅꠁ ꠀꠅꠀꠞ ꠛꠣꠖꠦ, ꠌꠣꠟ꠆ꠟꠤꠡ ꠛꠍꠞꠞ ꠙꠣꠌ ꠘꠝ꠆ꠛꠞ ꠌꠣꠘ꠆ꠖꠞ ꠙꠄꠟꠣ ꠖꠤꠘ ꠁꠝꠣꠝ ꠢꠣꠞꠥꠘ ꠝꠣꠛꠥꠖꠞ ꠢꠥꠇꠥꠝꠦ ꠢꠥꠞ ꠙꠣꠠꠞ ꠃꠙꠞꠦ ꠃꠑꠤꠍꠟꠣ, ꠀꠞ ꠢꠘꠅ ꠔꠣꠘ ꠃꠚꠣꠔ ꠅꠁꠟ।
NUM 33:39 ꠔꠣꠁꠘ ꠄꠇ-ꠡ ꠔꠦꠁꠡ ꠛꠍꠞ ꠛꠄꠅꠡꠅ ꠢꠥꠞ ꠙꠣꠠꠞ ꠃꠙꠞꠦ ꠁꠘ꠆ꠔꠦꠇꠣꠟ ꠇꠞꠟꠣ।
NUM 33:40 ꠄꠞꠝꠣꠎꠦ ꠅꠞꠣꠖ ꠄꠟꠣꠇꠣꠞ ꠇꠦꠘꠣꠘꠤ ꠛꠣꠖꠡꠣꠄ ꠈꠛꠞ ꠙꠣꠁꠟꠣ, ꠛꠘꠤ ꠁꠍꠞꠣꠁꠟ ꠅꠘꠅ ꠀꠁꠍꠂꠘ। ꠔꠣꠁꠘ ꠔ ꠇꠦꠘꠣꠘ ꠖꠦꠡꠞ ꠘꠦꠉꠦꠜ ꠝꠞꠥꠜꠥꠝꠤꠔ ꠞꠁꠔꠣ।
NUM 33:41 ꠛꠣꠖꠦ ꠛꠘꠤ ꠁꠍꠞꠣꠁꠟꠦ ꠢꠥꠞ ꠙꠣꠠ ꠍꠣꠠꠤꠀ ꠍꠟꠝꠥꠘꠣ ꠘꠣꠝꠞ ꠎꠣꠉꠣꠔ ꠉꠤꠀ ꠔꠣꠝ꠆ꠛꠥ ꠉꠣꠠꠤꠟꠣ।
NUM 33:42 ꠍꠟꠝꠥꠘꠣ ꠕꠣꠇꠤ ꠙꠥꠘꠘ ꠉꠦꠟꠣ।
NUM 33:43 ꠙꠥꠘꠘ ꠕꠣꠇꠤ ꠅꠛꠥꠔ ꠉꠦꠟꠣ।
NUM 33:44 ꠅꠛꠥꠔ ꠕꠣꠇꠤ ꠝꠥꠀꠛ ꠖꠦꠡꠞ ꠡꠤꠝꠣꠘꠣꠔ ꠁꠀ-ꠀꠛꠣꠞꠤꠝꠅ ꠉꠦꠟꠣ।
NUM 33:45 ꠅꠈꠣꠘ ꠕꠣꠇꠤ ꠖꠤꠛꠣꠘ-ꠍꠣꠖꠥ ꠉꠦꠟꠣ।
NUM 33:46 ꠅꠘ ꠕꠣꠇꠤ ꠀꠟꠝꠥꠘ-ꠖꠤꠛ꠆ꠟꠣꠔꠤꠝꠅ ꠉꠦꠟꠣ।
NUM 33:47 ꠛꠣꠖꠦ ꠔꠣꠞꠣ ꠀꠛꠣꠞꠤꠝ ꠙꠣꠠꠅ ꠃꠑꠤꠀ ꠘꠛꠅ ꠘꠣꠝꠞ ꠐꠤꠟ꠆ꠟꠣꠞ ꠇꠣꠘ꠆ꠖꠣꠔ ꠇꠦꠝ꠆ꠙ ꠉꠣꠠꠤꠟꠣ।
NUM 33:48 ꠄꠞꠛꠣꠖꠦ ꠀꠛꠣꠞꠤꠝ ꠙꠣꠠ ꠍꠣꠠꠤꠀ ꠎꠤꠞꠤꠢꠅ ꠐꠣꠃꠘꠞ ꠃꠟꠐꠣꠛꠣꠄ ꠎꠞ꠆ꠖꠣꠘ ꠉꠣꠋꠉꠞ ꠇꠣꠘ꠆ꠖꠣꠔ ꠝꠥꠀꠛ ꠖꠦꠡꠞ ꠔꠟ ꠎꠣꠉꠣꠔ ꠔꠣꠝ꠆ꠛꠥ ꠉꠣꠠꠤꠟꠣ।
NUM 33:49 ꠁ ꠇꠦꠝ꠆ꠙꠞ ꠡꠤꠝꠣꠘꠣ ꠀꠍꠤꠟ ꠎꠞ꠆ꠖꠣꠘ ꠉꠣꠋꠉꠞ ꠙꠣꠞꠅ ꠝꠥꠀꠛ ꠄꠟꠣꠇꠣꠞ ꠔꠟ ꠎꠣꠉꠣ ꠛꠣꠄꠔ-ꠎꠤꠡꠤꠝꠥꠔ ꠕꠣꠇꠤ ꠀꠛꠦꠟ-ꠡꠤꠐꠤꠝ ꠐꠣꠃꠘ ꠙꠞ꠆ꠎꠘ꠆ꠔ।
NUM 33:50 ꠀꠞ ꠅꠃ ꠡꠝꠄ ꠎꠤꠞꠤꠢꠅ ꠄꠟꠣꠇꠣꠞ ꠎꠞ꠆ꠖꠣꠘ ꠉꠣꠋꠉꠞ ꠗꠣꠞꠅ ꠝꠥꠀꠛ ꠖꠦꠡꠞ ꠔꠟ ꠎꠣꠉꠣꠔ ꠝꠣꠛꠥꠖꠦ ꠝꠥꠍꠣ ꠘꠛꠤꠞꠦ ꠇꠁꠟꠣ,
NUM 33:51 “ꠔꠥꠝꠤ ꠛꠘꠤ ꠁꠍꠞꠣꠁꠟꠞꠦ ꠎꠣꠘꠣꠁ ꠖꠦꠅ, ꠔꠥꠝꠞꠣ ꠎꠦꠛꠟꠣ ꠎꠞ꠆ꠖꠣꠘ ꠉꠣꠋ ꠙꠣꠞ ꠅꠁꠀ ꠇꠦꠘꠣꠘ ꠖꠦꠡꠅ ꠉꠤꠀ ꠀꠎꠤꠛꠣꠄ,
NUM 33:52 ꠅꠃ ꠡꠝꠄ ꠔꠥꠝꠞꠣꠞ ꠍꠣꠝꠘ ꠕꠣꠇꠤ ꠢꠘꠞ ꠢꠇꠟ ꠝꠣꠘꠡꠞꠦ ꠈꠦꠖꠣꠁ ꠖꠤꠛꠣꠄ। ꠈꠦꠖꠣꠁꠀ ꠔꠣꠞꠣꠞ ꠙꠣꠔ꠆ꠔꠞ ꠈꠥꠖꠤꠀ ꠛꠣꠘꠣꠁꠟ ꠢꠇꠟ ꠝꠥꠞ꠆ꠔꠤ ꠜꠣꠋꠉꠤꠀ ꠌꠥꠞꠝꠣꠞ ꠇꠞꠛꠣꠄ। ꠢꠥꠘꠣꠞꠞ ꠀꠔꠤꠀꠞꠖꠤ ꠛꠣꠘꠣꠁꠟ ꠢꠇꠟ ꠖꠦꠛ-ꠖꠦꠛꠤꠞ ꠝꠥꠞ꠆ꠔꠤ ꠛꠤꠘꠣꠡ ꠇꠞꠛꠣꠄ। ꠀꠞ ꠐꠤꠟ꠆ꠟꠣꠞ ꠃꠙꠞꠞ ꠖꠦꠛꠔꠣꠞ ꠘꠣꠝꠞ ꠙꠡꠥꠞ-ꠛꠟꠤ ꠈꠣꠘꠣꠁꠘ ꠔꠥꠟꠤꠀ ꠚꠣꠟꠣꠁꠛꠣꠄ।
NUM 33:53 ꠅꠟꠣꠈꠣꠘ ꠔꠥꠝꠞꠣ ꠀꠡ꠆ꠔꠣ ꠖꠦꠡ ꠖꠈꠟ ꠇꠞꠤꠀ ꠢꠘꠅ ꠛꠡꠔ ꠇꠞꠛꠣꠄ। ꠝꠘꠅ ꠞꠣꠈꠤꠅ, ꠔꠥꠝꠞꠣꠞ ꠖꠈꠟꠖꠣꠞꠤꠞ ꠟꠣꠉꠤ ꠁ ꠖꠦꠡꠈꠣꠘ ꠀꠝꠤ ꠔꠥꠝꠞꠣꠞꠦ ꠖꠣꠘ ꠇꠞꠍꠤ।
NUM 33:54 ꠢꠘꠅ ꠟꠐꠣꠞꠤ ꠝꠣꠞꠤꠀ ꠔꠥꠝꠞꠣꠞ ꠘꠣꠘꠣꠘ ꠉꠥꠡ꠆ꠐꠤꠞ ꠎꠣꠉꠣ ꠛꠣꠐꠤꠀ ꠘꠤꠅ। ꠎꠦ ꠉꠥꠡ꠆ꠐꠤꠔ ꠛꠦꠡꠤ ꠝꠣꠘꠥꠡ ꠔꠣꠞꠣꠞꠦ ꠛꠦꠡꠤ ꠎꠣꠉꠣ, ꠀꠞ ꠇꠝ ꠅꠁꠟꠦ ꠇꠝ ꠎꠣꠉꠣ ꠖꠤꠅ। ꠟꠐꠣꠞꠤꠔ ꠎꠦ ꠉꠥꠡ꠆ꠐꠤꠄ ꠎꠦ ꠎꠣꠉꠣ ꠙꠣꠁꠛꠣ, ꠔꠣꠞꠣ ꠅꠘꠅꠃ ꠛꠡꠔ ꠇꠞꠛꠣ। ꠈꠣꠘ꠆ꠖꠣꠘꠞ ꠝꠣꠎꠞ ꠘꠣꠘꠣꠘ ꠉꠥꠡ꠆ꠐꠤꠄ ꠎꠣꠞꠎꠤꠞ ꠈꠣꠘ꠆ꠖꠣꠘꠞ ꠄꠟꠣꠇꠣꠞ ꠝꠣꠎꠦ ꠎꠣꠉꠣ ꠙꠣꠁꠛꠣ।
NUM 33:55 ꠅꠁꠟꠦ ꠔꠥꠝꠞꠣ ꠎꠥꠖꠤ ꠢꠘꠞ ꠛꠣꠡꠤꠘ꠆ꠖꠣ ꠅꠇꠟꠞꠦ ꠘꠣ ꠖꠦꠈꠣꠅ, ꠔꠦ ꠔꠣꠞꠣꠞ ꠎꠦꠉꠥꠁꠘ ꠞꠁꠛꠣ, ꠁꠉꠥꠁꠘ ꠔꠥꠝꠞꠣꠞ ꠌꠈꠥꠞ ꠇꠣꠐꠣ ꠀꠞ ꠛꠥꠇꠥꠞ ꠍꠦꠟ ꠛꠘꠤꠀ ꠞꠁꠛꠣ। ꠁꠔꠣꠄ ꠔꠥꠝꠞꠣꠞ ꠛꠡꠔꠤ ꠎꠝꠤꠘꠅ ꠔꠥꠝꠞꠣꠞꠦ ꠎꠥꠟꠥꠝ-ꠝꠍꠤꠛꠔꠅ ꠚꠣꠟꠣꠁꠛꠣ।
NUM 33:56 ꠢꠃ ꠡꠝꠄ ꠀꠝꠤ ꠔꠥꠝꠞꠣꠞꠦ ꠅꠟꠣ ꠡꠣꠎꠣ ꠖꠤꠝꠥ, ꠎꠦ ꠡꠣꠎꠣ ꠈꠣꠟꠤ ꠔꠣꠞꠣꠞ ꠟꠣꠉꠤꠃ ꠑꠤꠇ ꠇꠞꠤꠀ ꠕꠁꠍꠟꠣꠝ।”
NUM 34:1 ꠝꠣꠛꠥꠖꠦ ꠝꠥꠍꠣ ꠘꠛꠤꠞꠦ ꠇꠁꠟꠣ,
NUM 34:2 “ꠔꠥꠝꠤ ꠛꠘꠤ ꠁꠍꠞꠣꠁꠟꠞꠦ ꠀꠝꠣꠞ ꠅꠃ ꠢꠥꠇꠥꠝ ꠎꠣꠘꠣꠁ ꠖꠦꠅ, ꠔꠥꠝꠞꠣ ꠉꠤꠀ ꠇꠦꠘꠣꠘ ꠖꠦꠡꠅ ꠢꠣꠝꠣꠘꠤꠞ ꠛꠣꠖꠦ ꠢꠘꠅ ꠎꠦ ꠎꠣꠉꠣꠞ ꠝꠣꠟꠤꠇꠣꠘꠣ ꠙꠣꠁꠛꠣꠄ, ꠁ ꠎꠣꠉꠣꠞ ꠡꠤꠝꠣꠘꠣ ꠅꠁꠟ,
NUM 34:3 ꠁꠖꠥꠝ ꠖꠦꠡꠞ ꠛꠒꠣꠞꠞ ꠎꠤꠘ ꠝꠞꠥꠜꠥꠝꠤꠞ ꠇꠤꠍꠥ ꠄꠟꠣꠇꠣ ꠔꠥꠝꠞꠣꠞ ꠖꠦꠡꠞ ꠖꠃꠇꠘꠞ ꠡꠤꠝꠣꠘꠣ। ꠛꠣꠖꠦ ꠅꠃ ꠖꠃꠇꠘꠞ ꠡꠤꠝꠣꠘꠣ ꠕꠣꠇꠤ ꠙꠥꠛꠦꠖꠤ ꠉꠤꠀ ꠟꠥꠘꠣ ꠡꠣꠉꠞꠞ ꠢꠦꠡ ꠝꠣꠕꠣ ꠙꠞ꠆ꠎꠘ꠆ꠔ।
NUM 34:4 ꠄꠞꠟꠉꠦ ꠀꠇꠞꠣꠛ꠆ꠛꠤꠝ ꠙꠣꠠꠞ ꠙꠕ ꠙꠣꠞ ꠅꠁꠀ ꠢꠣꠞꠤ ꠎꠤꠘ ꠝꠞꠥꠜꠥꠝꠤꠔ ꠢꠣꠝꠣꠁꠀ ꠇꠣꠖꠦꠡ-ꠛꠞꠘꠦꠀꠞ ꠖꠃꠇꠘꠦꠖꠤ ꠡꠤꠝꠣꠘꠣ ꠎꠣꠁꠛ। ꠉꠤꠀ ꠅꠈꠣꠘ ꠕꠣꠇꠤ ꠢꠣꠎꠞ-ꠀꠖꠞ ꠅꠁꠀ ꠅꠎꠝꠥꠘ ꠙꠞ꠆ꠎꠘ꠆ꠔ ꠔꠥꠝꠞꠣꠞ ꠡꠤꠝꠣꠘꠣ।
NUM 34:5 ꠀꠞ ꠅꠎꠝꠥꠘ ꠕꠣꠇꠤ ꠊꠥꠞꠤꠀ ꠝꠤꠡꠞꠞ ꠡꠤꠝꠣꠘꠣꠞ ꠢꠥꠇꠘꠣ ꠈꠣꠟꠞ ꠙꠣꠞꠦꠖꠤ ꠜꠥꠝꠗꠤꠅ ꠡꠣꠉꠞꠅ ꠉꠤꠀ ꠟꠣꠉꠛ।
NUM 34:6 “ꠔꠥꠝꠞꠣꠞ ꠖꠦꠡꠞ ꠙꠁꠌꠝꠞ ꠡꠤꠝꠣꠘꠣ ꠅꠁꠛ ꠜꠥꠝꠗꠤꠅ ꠡꠣꠉꠞ। ꠁꠐꠣꠃ ꠔꠥꠝꠞꠣꠞ ꠙꠁꠌꠝꠞ ꠀꠁꠟ।
NUM 34:7 “ꠔꠥꠝꠞꠣꠞ ꠃꠔꠞꠞ ꠡꠤꠝꠣꠘꠣ ꠅꠁꠛ, ꠜꠥꠝꠗꠤꠅ ꠡꠣꠉꠞ ꠕꠣꠇꠤ ꠢꠥꠞ ꠘꠣꠝꠞ ꠙꠣꠠ,
NUM 34:8 ꠅꠃ ꠙꠣꠠ ꠕꠣꠇꠤ ꠢꠣꠝꠣꠔꠅ ꠎꠣꠁꠛꠣꠞ ꠙꠕ ꠙꠞ꠆ꠎꠘ꠆ꠔ, ꠢꠣꠝꠣꠔꠞ ꠙꠕ ꠕꠣꠇꠤ ꠔꠥꠝꠞꠣꠞ ꠡꠤꠝꠣꠘꠣ ꠎꠤꠖꠣꠖ ꠉꠣꠃ ꠙꠞ꠆ꠎꠘ꠆ꠔ ꠎꠣꠁꠛ।
NUM 34:9 ꠀꠞ ꠎꠤꠖꠣꠖ ꠕꠣꠇꠤ ꠎꠤꠚꠞꠥꠘ ꠅꠁꠀ ꠢꠣꠎꠞ-ꠅꠘꠘꠅ ꠉꠤꠀ ꠡꠦꠡ ꠅꠁꠛ। ꠁꠐꠣꠃ ꠅꠁꠛ ꠔꠥꠝꠞꠣꠞ ꠃꠔꠞꠞ ꠡꠤꠝꠣꠘꠣ।
NUM 34:10 “ꠖꠦꠡꠞ ꠙꠥꠛꠞ ꠡꠤꠝꠣꠘꠣ ꠅꠁꠟ, ꠢꠣꠎꠞ-ꠅꠘꠘ ꠕꠣꠇꠤ ꠡꠚꠣꠝ ꠙꠞ꠆ꠎꠘ꠆ꠔ ꠄꠇꠐꠣ ꠡꠤꠝꠣꠘꠣ ꠀꠁꠟ ꠑꠤꠇ ꠇꠞꠤꠅ।
NUM 34:11 ꠅꠃ ꠡꠚꠣꠝꠞ ꠡꠤꠝꠣꠘꠣ ꠕꠣꠇꠤ ꠅꠂꠘ ꠉꠣꠃꠞ ꠙꠥꠛꠦꠖꠤ ꠉꠤꠀ ꠞꠤꠛꠟꠣ ꠙꠞ꠆ꠎꠘ꠆ꠔ ꠀꠁꠀ ꠟꠣꠝꠛ, ꠟꠣꠝꠤꠀ ꠉꠣꠟꠤꠟ ꠀꠅꠞꠞ ꠌꠞꠦꠖꠤ ꠎꠣꠁꠛ,
NUM 34:12 ꠉꠤꠀ ꠎꠞ꠆ꠖꠣꠘ ꠉꠣꠋꠉꠞ ꠙꠣꠞꠦꠖꠤ ꠟꠥꠘꠣ ꠡꠣꠉꠞꠅ ꠀꠁꠀ ꠡꠦꠡ ꠅꠁꠛ। ꠅꠃ ꠡꠛ ꠅꠁꠟ ꠔꠥꠝꠞꠣꠞ ꠖꠦꠡꠞ ꠌꠣꠁꠞꠅ ꠉꠣꠟꠣꠞ ꠡꠤꠝꠣꠘꠣ ꠀꠁꠟ।”
NUM 34:13 ꠀꠞ ꠝꠥꠍꠣꠄ ꠛꠘꠤ ꠁꠍꠞꠣꠁꠟꠞꠦ ꠢꠥꠇꠥꠝ ꠖꠤꠟꠣ, “ꠝꠣꠛꠥꠖꠞ ꠢꠥꠇꠥꠝ ꠝꠣꠚꠤꠇ ꠔꠥꠝꠞꠣ ꠟꠐꠣꠞꠤ ꠝꠣꠞꠅ, ꠝꠣꠞꠤꠀ ꠔꠥꠝꠞꠣꠞ ꠘꠄ ꠈꠣꠘ꠆ꠖꠣꠘ ꠀꠞ ꠝꠣꠘꠡꠣ ꠈꠣꠘ꠆ꠖꠣꠘꠞ ꠅꠞ꠆ꠗꠦꠇ ꠝꠣꠘꠡꠞꠦ ꠅꠃ ꠖꠦꠡꠞ ꠎꠝꠤ-ꠝꠣꠐꠤ ꠛꠣꠐꠤꠀ ꠖꠤꠀ, ꠔꠥꠝꠞꠣꠞ ꠖꠈꠟꠖꠣꠞꠤ ꠇꠣꠁꠝ ꠇꠞꠅ।
NUM 34:14 ꠎꠣꠘ ꠔ, ꠞꠥꠛꠦꠘ ꠈꠣꠘ꠆ꠖꠣꠘ, ꠍꠣꠖꠥ ꠈꠣꠘ꠆ꠖꠣꠘ ꠀꠞ ꠝꠣꠘꠡꠣ ꠈꠣꠘ꠆ꠖꠣꠘꠞ ꠅꠞ꠆ꠗꠦꠇ ꠝꠣꠘꠡꠦ ꠔꠣꠞꠣꠞ ꠎꠣꠞꠎꠤꠞ ꠉꠥꠡ꠆ꠐꠤ ꠝꠣꠚꠤꠇ ꠎꠝꠤ-ꠎꠝꠣꠞ ꠛꠣꠐ ꠀꠉꠦꠃ ꠙꠣꠁꠟꠤꠍꠦ।
NUM 34:15 ꠔꠣꠞꠣ ꠎꠤꠞꠤꠢꠅ ꠄꠟꠣꠇꠣꠞ ꠎꠞ꠆ꠖꠣꠘ ꠉꠣꠋꠉꠞ ꠙꠥꠛꠞ ꠙꠣꠞꠅ ꠔꠣꠞꠣꠞ ꠛꠣꠐ ꠀꠉꠦꠃ ꠛꠣꠍꠤꠀ ꠘꠤꠍꠂꠘꠉꠤ।”
NUM 34:16 ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ,
NUM 34:17 “ꠅꠃ ꠖꠦꠡꠞ ꠎꠝꠤ-ꠝꠣꠐꠤꠞꠦ ꠛꠣꠐꠤꠀ ꠖꠤꠔꠦ ꠎꠦꠞꠣ ꠝꠣꠔꠛ꠆ꠛꠞꠤ ꠇꠞꠛꠣ, ꠄꠞꠣꠞ ꠘꠣꠝ ꠅꠁꠟ, ꠁꠝꠣꠝ ꠀꠟꠤ-ꠀꠎꠞ ꠀꠞ ꠘꠥꠘꠞ ꠙꠥꠀ ꠁꠃꠍꠣ।
NUM 34:18 ꠎꠝꠤ-ꠎꠝꠣ ꠛꠣꠐꠤꠛꠣꠞ ꠇꠣꠟꠅ ꠡꠣꠁꠎ꠆ꠎ ꠇꠞꠣꠞ ꠟꠣꠉꠤ ꠙꠞꠔꠦꠇ ꠈꠣꠘ꠆ꠖꠣꠘꠅ ꠕꠣꠇꠤ ꠄꠇꠎꠘ ꠇꠞꠤ ꠡꠞ꠆ꠖꠣꠞ ꠘꠤꠛꠣꠄ।
NUM 34:19 ꠅꠃ ꠡꠞ꠆ꠖꠣꠞ ꠅꠁꠟꠣ, ꠄꠢꠥꠖꠣ ꠈꠣꠘ꠆ꠖꠣꠘꠞ ꠎꠤꠚꠥꠘ꠆ꠘꠤꠞ ꠙꠥꠀ ꠇꠣꠟꠥꠔ,
NUM 34:20 ꠡꠤꠝꠤꠅꠘ ꠈꠣꠘ꠆ꠖꠣꠘꠞ ꠀꠝꠤꠢꠥꠖꠞ ꠙꠥꠀ ꠡꠣꠝꠥꠄꠟ,
NUM 34:21 ꠛꠤꠘ-ꠁꠀꠝꠤꠘ ꠈꠣꠘ꠆ꠖꠣꠘꠞ ꠇꠤꠍꠟꠥꠘꠞ ꠙꠥꠀ ꠁꠟꠤꠖꠖ,
NUM 34:22 ꠖꠣꠘ ꠈꠣꠘ꠆ꠖꠣꠘꠞ ꠡꠞ꠆ꠖꠣꠞ ꠃꠎꠟꠤꠞ ꠙꠥꠀ ꠛꠥꠇ꠆ꠇꠤ,
NUM 34:23 ꠁꠃꠍꠥꠚꠞ ꠙꠥꠀ ꠝꠣꠘꠡꠣ ꠈꠣꠘ꠆ꠖꠣꠘꠞ ꠡꠞ꠆ꠖꠣꠞ ꠁꠚꠣꠖꠞ ꠙꠥꠀ ꠢꠣꠘ꠆ꠘꠤꠄꠟ,
NUM 34:24 ꠁꠃꠍꠥꠚꠞ ꠙꠥꠀ ꠀꠚꠞꠣꠁꠝ ꠈꠣꠘ꠆ꠖꠣꠘꠞ ꠡꠞ꠆ꠖꠣꠞ ꠡꠤꠙ꠆ꠔꠘꠞ ꠙꠥꠀ ꠇꠝꠥꠄꠟ,
NUM 34:25 ꠍꠛꠥꠟꠘ ꠈꠣꠘ꠆ꠖꠣꠘꠞ ꠡꠞ꠆ꠖꠣꠞ ꠚꠞ꠆ꠘꠣꠈꠞ ꠙꠥꠀ ꠁꠟꠤꠎꠣꠚꠘ,
NUM 34:26 ꠁꠍꠣꠈꠞ ꠈꠣꠘ꠆ꠖꠣꠘꠞ ꠡꠞ꠆ꠖꠣꠞ ꠀꠎꠣꠘꠞ ꠙꠥꠀ ꠚꠟꠔꠤꠄꠟ,
NUM 34:27 ꠀꠡꠤꠞ ꠈꠣꠘ꠆ꠖꠣꠘꠞ ꠡꠞ꠆ꠖꠣꠞ ꠡꠟꠝꠤꠞ ꠙꠥꠀ ꠅꠢꠤꠢꠥꠖ,
NUM 34:28 ꠘꠙ꠆ꠔꠣꠟꠤ ꠈꠣꠘ꠆ꠖꠣꠘꠞ ꠡꠞ꠆ꠖꠣꠞ ꠀꠝꠤꠢꠥꠖꠞ ꠙꠥꠀ ꠙꠖꠢꠦꠟ।”
NUM 34:29 ꠝꠣꠛꠥꠖꠦ ꠅꠃ ꠡꠞ꠆ꠖꠣꠞ ꠅꠇꠟꠞꠦ ꠎꠤꠝ꠆ꠝꠣꠖꠣꠞꠤ ꠡꠝꠎꠣꠁꠟꠣ, ꠇꠦꠘꠣꠘ ꠖꠦꠡꠅ ꠛꠘꠤ ꠁꠍꠞꠣꠁꠟꠞ ꠎꠝꠤ-ꠎꠝꠣ ꠛꠣꠐꠤꠀ ꠖꠤꠛꠣꠞ ꠟꠣꠉꠤ।
NUM 35:1 ꠛꠣꠖꠦ ꠎꠤꠞꠤꠢꠅ ꠐꠣꠃꠘꠞ ꠇꠣꠍꠣꠔ ꠎꠞ꠆ꠖꠣꠘ ꠉꠣꠋꠉꠞ ꠗꠣꠞꠅ ꠝꠥꠀꠛ ꠖꠦꠡꠞ ꠔꠟ ꠎꠣꠉꠣꠔ ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ,
NUM 35:2 “ꠔꠥꠝꠤ ꠛꠘꠤ ꠁꠍꠞꠣꠁꠟꠞꠦ ꠅꠃ ꠢꠥꠇꠥꠝ ꠖꠦꠅ, ꠔꠣꠞꠣ ꠎꠣꠞꠎꠤꠞ ꠈꠣꠘ꠆ꠖꠣꠘꠞ ꠎꠝꠤ-ꠎꠝꠣꠞ ꠛꠣꠐ ꠙꠣꠁꠀ ꠢꠣꠞꠟꠦ, ꠅꠔꠣ ꠕꠣꠇꠤ ꠇꠤꠍꠥ ꠐꠣꠃꠘ ꠟꠦꠛꠤ ꠈꠣꠘ꠆ꠖꠣꠘꠞ ꠝꠣꠘꠡꠞꠦ ꠖꠤꠟꠣꠁꠔꠣ, ꠄꠞꠣ ꠅꠘꠅ ꠞꠁꠛꠣ, ꠄꠞꠟꠉꠦ ꠛꠘ꠆ꠖꠞ ꠇꠤꠍꠥ ꠎꠝꠤꠅ ꠄꠞꠣꠞꠦ ꠖꠤꠔꠣ।
NUM 35:3 ꠅꠃ ꠐꠣꠃꠘꠅ ꠔꠣꠞꠣ ꠛꠡꠔ ꠇꠞꠛꠣ, ꠀꠞ ꠛꠘ꠆ꠖꠞ ꠎꠝꠤꠘꠅ ꠔꠣꠞꠣꠞ ꠙꠡꠥꠞ ꠙꠣꠟ ꠞꠣꠈꠛꠣ।
NUM 35:4 ꠔꠥꠝꠞꠣ ꠟꠦꠛꠤ ꠈꠣꠘ꠆ꠖꠣꠘꠞꠦ ꠎꠦ ꠐꠣꠃꠘ ꠅꠇꠟ ꠖꠤꠛꠣꠄ, ꠁꠔꠣꠞ ꠛꠣꠃꠘ꠆ꠒꠞꠤ ꠅꠀꠟꠞ ꠛꠣꠞꠦ ꠔꠣꠞꠣꠞꠦ ꠀꠞꠅ ꠄꠇ ꠀꠎꠣꠞ ꠀꠔ ꠎꠣꠉꠣ ꠖꠤꠛꠣꠄ, ꠔꠣꠞꠣꠞ ꠙꠡꠥꠞ ꠙꠣꠟ ꠞꠣꠈꠣꠞ ꠟꠣꠉꠤ।
NUM 35:5 ꠔꠥꠝꠞꠣ ꠎꠔ ꠐꠣꠃꠘ ꠔꠣꠞꠣꠞꠦ ꠖꠤꠛꠣꠄ, ꠁꠔꠣꠞ ꠌꠣꠁꠞꠅ ꠉꠣꠟꠣꠞ ꠛꠣꠃꠘ꠆ꠒꠞꠤ ꠅꠀꠟꠞ ꠛꠣꠞꠦ, ꠝꠣꠘꠤ ꠃꠔꠞꠦ-ꠖꠃꠇꠘꠦ, ꠙꠥꠛꠦ-ꠙꠁꠌꠝꠦ, ꠢꠇ꠆ꠇꠟꠛꠣꠄ ꠀꠞꠅ ꠖꠥꠁ ꠀꠎꠣꠞ ꠀꠔ ꠛꠘ꠆ꠖꠞ ꠎꠣꠉꠣ ꠝꠣꠙꠤꠀ ꠖꠤꠅ। ꠅꠘꠅ ꠔꠣꠞꠣꠞ ꠙꠡꠥꠞ ꠙꠣꠟ ꠞꠣꠈꠛꠣ।
NUM 35:6 “ꠔꠥꠝꠞꠣ ꠟꠦꠛꠤ ꠈꠣꠘ꠆ꠖꠣꠘꠞꠦ ꠎꠦꠔꠣ ꠐꠣꠃꠘ ꠅꠇꠟ ꠖꠤꠛꠣꠄ, ꠄꠞꠝꠣꠎꠞ ꠍꠄꠈꠣꠘ ꠐꠣꠃꠘ ꠅꠁꠛ ꠈꠥꠘꠤ ꠝꠣꠘꠡꠞ ꠀꠡꠞꠄ ꠐꠣꠃꠘ। ꠇꠥꠘꠥ ꠝꠣꠘꠡꠦ ꠀꠈꠔꠣ ꠇꠦꠃꠞꠞꠦ ꠝꠣꠞꠤꠟꠤꠟꠦ, ꠢꠦ ꠅꠃ ꠐꠣꠃꠘꠅ ꠉꠤꠀ ꠀꠡꠞꠄ ꠟꠁꠛ। ꠅꠃ ꠍꠄ ꠐꠣꠃꠘ ꠛꠣꠖꠦꠅ ꠟꠦꠛꠤ ꠈꠣꠘ꠆ꠖꠣꠘꠞꠦ ꠀꠞꠅ ꠛꠦꠀꠟ꠆ꠟꠤꠡ ꠈꠣꠘ ꠐꠣꠃꠘ ꠖꠤꠟꠣꠁꠛꠣꠄ।
NUM 35:7 ꠝꠥꠐ ꠀꠐꠌꠣꠟ꠆ꠟꠤꠡ ꠈꠣꠘ ꠐꠣꠃꠘ ꠟꠦꠛꠤ ꠅꠇꠟꠞꠦ ꠖꠤꠛꠣꠄ, ꠀꠞ ꠄꠞꠟꠉꠦ ꠙꠡꠥꠞ ꠙꠣꠟ ꠞꠣꠈꠣꠞ ꠛꠘ꠆ꠖꠞ ꠎꠣꠉꠣꠅ ꠖꠤꠛꠣꠄ।
NUM 35:8 ꠛꠘꠤ ꠁꠍꠞꠣꠁꠟꠞ ꠎꠝꠤ-ꠎꠝꠣ ꠕꠣꠇꠤ ꠟꠦꠛꠤ ꠈꠣꠘ꠆ꠖꠣꠘꠞꠦ ꠎꠦꠛꠟꠣ ꠐꠣꠃꠘ ꠅꠇꠟ ꠖꠤꠛꠣꠄ, ꠅꠃ ꠡꠝꠄ ꠢꠇꠟ ꠈꠣꠘ꠆ꠖꠣꠘꠦ ꠙꠣꠅꠀ ꠎꠝꠤꠘꠞ ꠛꠣꠐ ꠕꠣꠇꠤ ꠔꠣꠞꠣꠞꠦ ꠖꠤꠛꠣꠄ। ꠎꠦ ꠈꠣꠘ꠆ꠖꠣꠘꠦ ꠛꠦꠡꠤ ꠙꠣꠁꠍꠦ ꠄꠞꠣ ꠛꠦꠡꠤ ꠖꠤꠛꠣ, ꠀꠞ ꠎꠦꠞꠣ ꠇꠝ ꠙꠣꠁꠍꠦ ꠄꠞꠣ ꠇꠝ ꠖꠤꠛꠣ।”
NUM 35:9 ꠄꠞꠛꠣꠖꠦ ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ,
NUM 35:10 “ꠔꠥꠝꠤ ꠛꠘꠤ ꠁꠍꠞꠣꠁꠟꠞꠦ ꠇꠅ, ꠔꠥꠝꠞꠣ ꠎꠦꠛꠟꠣ ꠎꠞ꠆ꠖꠣꠘ ꠉꠣꠋ ꠙꠣꠞ ꠅꠁꠀ ꠇꠦꠘꠣꠘ ꠖꠦꠡꠅ ꠉꠤꠀ ꠢꠣꠝꠣꠁꠛꠣꠄ,
NUM 35:11 ꠅꠃ ꠡꠝꠄ ꠔꠥꠝꠞꠣꠞ ꠘꠤꠎꠞ ꠟꠣꠉꠤ ꠇꠄꠈꠣꠘ ꠀꠡꠞꠄ ꠐꠣꠃꠘ ꠑꠤꠇ ꠇꠞꠤꠅ। ꠔꠦꠃ ꠇꠥꠘꠥ ꠝꠣꠘꠡꠦ ꠎꠥꠖꠤ ꠀꠈꠔꠣ ꠇꠎꠣ ꠇꠞꠤꠀ ꠇꠦꠃꠞꠞꠦ ꠈꠥꠘ ꠇꠞꠤꠟꠣꠄ, ꠔꠦ ꠜꠣꠉꠤꠀ ꠢꠘꠅ ꠉꠤꠀ ꠀꠡꠞꠄ ꠟꠁꠛ।
NUM 35:12 ꠈꠥꠘꠞ ꠛꠖꠟꠣ ꠟꠅꠞꠣ ꠝꠣꠘꠡꠞ ꠉꠦꠍ ꠕꠣꠇꠤ ꠜꠣꠉꠤꠀ ꠎꠣꠘ ꠛꠣꠌꠣꠘꠤꠞ ꠟꠣꠉꠤ ꠁ ꠀꠡꠞꠄ ꠐꠣꠃꠘ। ꠄꠔꠦ ꠛꠘꠤ ꠁꠍꠞꠣꠁꠟꠞ ꠀꠖꠣꠟꠔꠅ ꠛꠤꠌꠣꠞꠞ ꠀꠉ ꠙꠞ꠆ꠎꠘ꠆ꠔ ꠈꠥꠘꠞ ꠀꠡꠣꠝꠤꠞꠦ ꠇꠦꠃ ꠎꠣꠘꠦ ꠝꠣꠞꠣꠞ ꠡꠥꠎꠥꠉ ꠙꠣꠁꠔ ꠘꠣꠄ।
NUM 35:13 ꠄꠞꠟꠣꠉꠤ ꠟꠦꠛꠤ ꠈꠣꠘ꠆ꠖꠣꠘꠞꠦ ꠔꠥꠝꠞꠣ ꠎꠦ ꠐꠣꠃꠘ ꠅꠇꠟ ꠖꠤꠛꠣꠄ, ꠁꠔꠣꠞ ꠝꠣꠎꠞ ꠍꠄꠈꠣꠘ ꠐꠣꠃꠘ ꠅꠁꠛ ꠔꠥꠝꠞꠣꠞ ꠀꠡꠞꠄ ꠐꠣꠃꠘ।
NUM 35:14 ꠄꠞꠝꠣꠎꠞ ꠔꠤꠘꠈꠣꠘ ꠐꠣꠃꠘ ꠅꠁꠛ ꠎꠞ꠆ꠖꠣꠘ ꠉꠣꠋꠉꠞ ꠙꠥꠛꠞ ꠙꠣꠞꠅ, ꠀꠞ ꠔꠤꠘꠈꠣꠘ ꠅꠁꠛ ꠇꠦꠘꠣꠘ ꠖꠦꠡꠞ ꠜꠤꠔꠞꠦ।
NUM 35:15 ꠅꠃ ꠍꠄꠅꠈꠣꠘ ꠐꠣꠃꠘ ꠅꠁꠛ ꠛꠘꠤ ꠁꠍꠞꠣꠁꠟꠞ ꠟꠣꠉꠤ, ꠔꠥꠝꠞꠣꠞ ꠟꠉꠦ ꠞꠅꠞꠣ ꠜꠤꠘ-ꠖꠦꠡꠤ ꠅꠇꠟꠞ ꠟꠣꠉꠤ ꠀꠞ ꠝꠥꠍꠣꠚꠤꠞ ꠅꠇꠟꠞ ꠟꠣꠉꠤ ꠀꠡꠞꠄ ꠐꠣꠃꠘ। ꠄꠞꠣꠞ ꠝꠣꠎꠞ ꠇꠦꠃ ꠎꠥꠖꠤ ꠀꠈꠔꠣ ꠛꠦ-ꠈꠤꠀꠟꠦ ꠇꠦꠃꠞꠞꠦ ꠈꠥꠘ ꠇꠞꠤꠟꠣꠄ, ꠔꠦ ꠅꠈꠣꠘꠅ ꠉꠤꠀ ꠎꠣꠘ ꠛꠣꠌꠣꠁꠛ।
NUM 35:16 “ꠅꠁꠟꠦ ꠇꠥꠘꠥ ꠝꠣꠘꠡꠦ ꠎꠥꠖꠤ ꠟꠥꠀꠞ ꠇꠥꠘꠥ ꠀꠔꠤꠀꠞ ꠖꠤꠀ ꠇꠦꠃꠞꠞꠦ ꠝꠣꠞꠦ ꠀꠞ ꠢꠃ ꠎꠘ ꠝꠞꠤꠎꠣꠄ, ꠔꠦ ꠅꠉꠥ ꠈꠥꠘꠤ। ꠅꠃ ꠈꠥꠘꠤꠞꠦ ꠎꠣꠘꠦ ꠝꠣꠞꠤꠟꠤꠛꠣꠄ।
NUM 35:17 ꠎꠦ ꠙꠣꠔ꠆ꠔꠞ ꠖꠤꠀ ꠇꠥꠘꠥ ꠝꠣꠘꠡꠞꠦ ꠈꠥꠘ ꠇꠞꠣ ꠎꠣꠁꠛ, ꠁꠟꠣ ꠇꠥꠘꠥ ꠙꠣꠔ꠆ꠔꠞ ꠎꠥꠖꠤ ꠇꠦꠃꠞꠞ ꠀꠔꠅ ꠕꠣꠇꠦ, ꠀꠞ ꠅꠉꠥꠖꠤ ꠇꠦꠃꠞꠞꠦ ꠝꠣꠞꠣꠄ ꠢꠃ ꠝꠣꠘꠥꠡ ꠝꠞꠤꠎꠣꠄ, ꠔꠦ ꠅꠉꠥꠅ ꠈꠥꠘꠤ। ꠁ ꠈꠥꠘꠤꠞꠦ ꠎꠣꠘꠦ ꠝꠣꠞꠤꠟꠤꠛꠣꠄ।
NUM 35:18 ꠝꠣꠘꠥꠡ ꠈꠥꠘ ꠅꠀꠞ ꠝꠔ ꠇꠥꠘꠥ ꠟꠣꠇꠠꠤꠞ ꠎꠤꠘꠤꠡ ꠎꠥꠖꠤ ꠇꠦꠃꠞꠞ ꠀꠔꠅ ꠕꠣꠇꠦ, ꠀꠞ ꠅꠉꠥ ꠖꠤꠀ ꠇꠦꠃꠞꠞꠦ ꠝꠣꠞꠣꠄ ꠢꠃ ꠝꠣꠘꠥꠡ ꠝꠞꠤꠎꠣꠄ, ꠔꠦ ꠅꠉꠥꠅ ꠈꠥꠘꠤ। ꠁ ꠈꠥꠘꠤꠞꠦ ꠎꠣꠘꠦ ꠝꠣꠞꠤꠟꠤꠛꠣꠄ।
NUM 35:19 ꠈꠥꠘ ꠅꠀ ꠎꠘꠞ ꠀꠙꠘ ꠎꠦ ꠝꠣꠘꠡꠦ ꠁ ꠈꠥꠘꠞ ꠛꠖꠟꠣ ꠟꠅꠀꠞ ꠇꠕꠣ, ꠈꠣꠟꠤ ꠢꠦ-ꠃ ꠅꠃ ꠈꠥꠘꠤꠞꠦ ꠎꠣꠘꠦ ꠝꠣꠞꠤꠟꠤꠛ। ꠈꠥꠘꠤꠞ ꠖꠦꠈꠣ ꠙꠣꠁꠟꠦꠃ ꠔꠣꠞꠦ ꠎꠣꠘꠦ ꠝꠣꠞꠤꠟꠤꠛ।
NUM 35:20 “ꠀꠞ ꠁꠋꠡꠣ ꠇꠞꠤꠀ ꠎꠥꠖꠤ ꠄꠇ ꠎꠘꠦ ꠀꠞꠇ ꠎꠘꠞꠦ ꠒꠦꠇ꠆ꠇꠣ ꠝꠣꠞꠦ, ꠛꠣ ꠇꠥꠘꠥꠎꠣꠔ ꠅꠡꠔ꠆ꠞꠖꠤ ꠁꠌ꠆ꠍꠣ ꠇꠞꠤꠀ ꠁꠐꠣ ꠝꠣꠞꠦ ꠀꠞ ꠢꠃ ꠝꠣꠘꠥꠡ ꠝꠞꠤꠎꠣꠄ,
NUM 35:21 ꠛꠣ ꠖꠥꠡꠝꠘꠤꠞ ꠜꠣꠛꠦ ꠇꠦꠃꠞꠞꠦ ꠊꠥꠡꠤ ꠝꠣꠞꠦ ꠀꠞ ꠢꠦ ꠝꠞꠤꠎꠣꠄ, ꠔꠦ ꠎꠦ ꠝꠣꠞꠍꠦ ꠢꠦ ꠈꠥꠘꠤ। ꠁ ꠈꠥꠘꠤꠞꠦ ꠎꠣꠘꠦ ꠝꠣꠞꠤꠟꠤꠛꠣꠄ। ꠈꠥꠘ ꠅꠀ ꠎꠘꠞ ꠀꠙꠘ ꠎꠦ ꠝꠣꠘꠡꠦ ꠁ ꠈꠥꠘꠞ ꠛꠖꠟꠣ ꠟꠅꠀꠞ ꠇꠕꠣ, ꠢꠦ ꠅꠃ ꠈꠥꠘꠤꠞ ꠟꠣꠉꠣꠟ ꠙꠣꠁꠟꠦꠃ ꠔꠣꠞꠦ ꠎꠣꠘꠦ ꠝꠣꠞꠤꠟꠤꠛ।
NUM 35:22 “ꠅꠁꠟꠦ ꠝꠘꠅ ꠇꠥꠘꠥ ꠖꠥꠡꠝꠘꠤ ꠘꠣ ꠞꠣꠈꠤꠀ ꠜꠥꠟꠦ ꠀꠈꠔꠣ ꠇꠦꠃꠞꠞꠦ ꠒꠦꠇ꠆ꠇꠣ ꠝꠣꠞꠟꠦ, ꠛꠣ ꠝꠘꠅ ꠇꠥꠘꠥ ꠈꠣꠞꠣꠙꠤ ꠘꠣ ꠕꠣꠇꠟꠦꠅ ꠜꠥꠟꠦ ꠔꠣꠞ ꠃꠙꠞꠦ ꠁꠐꠣ ꠝꠣꠞꠤ ꠖꠤꠟꠦ,
NUM 35:23 ꠛꠣ ꠘꠣ ꠖꠦꠈꠤꠀ, ꠝꠣꠘꠥꠡ ꠝꠞꠤꠎꠤꠛꠣꠞ ꠎꠥꠇꠣ ꠇꠥꠘꠥ ꠙꠣꠔ꠆ꠔꠞ ꠇꠦꠃꠞꠞ ꠃꠙꠞꠦ ꠚꠣꠟꠣꠁ ꠖꠤꠟꠦ ꠢꠦ ꠎꠥꠖꠤ ꠝꠞꠤꠎꠣꠄ, ꠔꠦ ꠇꠥꠘꠥꠎꠣꠔ ꠖꠥꠡꠝꠘꠤꠞ ꠜꠣꠛ ꠘꠣ ꠕꠣꠇꠣꠄ, ꠀꠞ ꠈꠦꠔꠤ ꠇꠞꠣꠞ ꠇꠥꠘꠥ ꠁꠌ꠆ꠍꠣ ꠘꠣ ꠕꠣꠇꠣꠄ,
NUM 35:24 ꠛꠘꠤ ꠁꠍꠞꠣꠁꠟꠞ ꠀꠖꠣꠟꠔꠞ ꠝꠣꠘꠡꠦ, ꠅꠃ ꠈꠥꠘꠤꠞ ꠀꠞ ꠈꠥꠘꠞ ꠛꠖꠟꠣ ꠟꠅꠞꠣ ꠎꠘꠞ ꠛꠦꠙꠣꠞꠦ ꠅꠃ ꠘꠤꠅꠝ ꠝꠣꠘꠤꠀ ꠛꠤꠌꠣꠞ ꠇꠞꠛꠣ।
NUM 35:25 ꠅꠃ ꠡꠝꠄ ꠀꠖꠣꠟꠔꠞ ꠝꠣꠘꠡꠦ ꠈꠥꠘꠞ ꠛꠖꠟꠣ ꠟꠅꠞꠣꠞ ꠀꠔ ꠕꠣꠇꠤ ꠈꠥꠘꠤ ꠎꠘꠞꠦ ꠛꠣꠌꠣꠁꠛꠣ, ꠛꠣꠌꠣꠁꠀ ꠢꠦ ꠀꠉꠦ ꠎꠦꠈꠣꠘꠅ ꠜꠣꠉꠤꠀ ꠉꠦꠍꠤꠟ, ꠢꠃ ꠀꠡꠞꠄ ꠐꠣꠃꠘꠅ ꠔꠣꠞꠦ ꠢꠤꠞꠛꠣꠞ ꠙꠃꠍꠣꠁ ꠖꠤꠛꠣ। ꠀꠞ ꠙꠛꠤꠔ꠆ꠞ ꠔꠦꠟ ꠖꠤꠀ ꠈꠦꠟꠣꠚꠔꠤ ꠙꠣꠅꠀ ꠙꠞꠗꠣꠘ ꠁꠝꠣꠝ ꠍꠣꠛꠞ ꠝꠃꠔꠞ ꠀꠉ ꠙꠞ꠆ꠎꠘ꠆ꠔ ꠢꠦ ꠢꠘꠅ ꠞꠁꠛ।
NUM 35:26 ꠅꠁꠟꠦ ꠢꠦ ꠎꠥꠖꠤ ꠇꠥꠘꠥ ꠡꠝꠄ ꠢꠃ ꠀꠡꠞꠄ ꠐꠣꠃꠘꠞ ꠛꠣꠞꠦ ꠛꠣꠞ ꠅꠁꠀ ꠎꠣꠄꠉꠤ,
NUM 35:27 ꠀꠞ ꠛꠖꠟꠣ ꠟꠅꠞꠣꠄ ꠔꠣꠞꠦ ꠙꠣꠁꠀ ꠎꠣꠘꠦ ꠝꠣꠞꠤꠟꠣꠄ, ꠔꠦ ꠢꠦ ꠈꠥꠘꠞ ꠖꠣꠄꠁ ꠅꠁꠔ ꠘꠣꠄ।
NUM 35:28 ꠇꠣꠞꠘ ꠙꠞꠗꠣꠘ ꠁꠝꠣꠝꠞ ꠝꠃꠔ ꠘꠣ ꠅꠀ ꠙꠞ꠆ꠎꠘ꠆ꠔ ꠢꠦ ꠀꠡꠞꠄ ꠐꠣꠃꠘꠅ ꠞꠅꠀꠞ ꠇꠕꠣ। ꠈꠣꠟꠤ ꠙꠞꠗꠣꠘ ꠁꠝꠣꠝꠞ ꠝꠃꠔꠞ ꠛꠣꠖꠦ ꠢꠦ ꠘꠤꠎꠞ ꠛꠣꠠꠤꠔ ꠚꠤꠞꠤꠀ ꠀꠁꠔ ꠙꠣꠞꠛ।
NUM 35:29 ꠔꠥꠝꠞꠣ ꠖꠦꠡꠞ ꠎꠦꠘꠅꠃ ꠛꠡꠔ ꠇꠞꠅ ꠘꠣ ꠇꠦꠘꠦ, ꠅꠀꠞꠤꠡꠞ ꠙꠞ ꠅꠀꠞꠤꠡ ꠗꠞꠤ ꠁꠔꠣ ꠝꠣꠘꠔꠦ ꠅꠁꠛ, ꠁꠔꠣ ꠔ ꠅꠁꠟ ꠔꠥꠝꠞꠣꠞ ꠡꠞꠤꠅꠔꠞ ꠄꠇꠐꠣ ꠀꠁꠘ।
NUM 35:30 “ꠡꠣꠇ꠆ꠇꠤꠞ ꠎꠛꠣꠘꠛꠘ꠆ꠖꠤꠞ ꠃꠙꠞꠦ ꠘꠤꠞꠜꠞ ꠇꠞꠤꠀ ꠈꠥꠘꠤꠞꠦ ꠎꠣꠘꠦ ꠝꠣꠞꠤꠟꠣꠅꠀ ꠅꠁꠛ। ꠅꠁꠟꠦ ꠈꠣꠟꠤ ꠄꠇꠎꠘ ꠡꠣꠇ꠆ꠇꠤꠞ ꠇꠕꠣꠄ ꠇꠦꠃꠞꠞꠦ ꠝꠣꠞꠤꠟꠣꠅꠀ ꠎꠣꠁꠔ ꠘꠣꠄ।
NUM 35:31 ꠝꠃꠔꠃ ꠎꠣꠞ ꠙꠣꠅꠘꠣ ꠡꠣꠎꠣ, ꠁꠟꠣ ꠇꠥꠘꠥ ꠈꠥꠘꠤꠞꠦ ꠇꠥꠘꠥꠝꠘ꠆ꠔꠦꠃ ꠐꠦꠇꠣꠞ ꠛꠖꠟꠣ ꠈꠣꠟꠣꠍ ꠖꠦꠅꠀ ꠎꠣꠁꠔ ꠘꠣꠄ। ꠔꠣꠞꠦ ꠎꠣꠘꠦ ꠝꠣꠞꠤꠟꠤꠔꠦꠃ ꠅꠁꠛ।
NUM 35:32 ꠀꠡꠞꠄ ꠐꠣꠃꠘꠅ ꠞꠅꠞꠣ ꠇꠥꠘꠥ ꠀꠡꠣꠝꠤꠞꠦ ꠐꠦꠇꠣꠞ ꠛꠖꠟꠣ, ꠙꠞꠗꠣꠘ ꠁꠝꠣꠝꠞ ꠝꠃꠔꠞ ꠀꠉꠦ ꠔꠣꠞ ꠘꠤꠎꠞ ꠛꠣꠠꠤꠔ ꠚꠤꠞꠣꠁ ꠀꠘꠣ ꠎꠣꠁꠔ ꠘꠣꠄ।
NUM 35:33 ꠝꠘꠅ ꠞꠣꠈꠤꠅ, ꠁꠔꠣ ꠇꠞꠤꠀ ꠔꠥꠝꠞꠣ ꠘꠤꠎꠞ ꠖꠦꠡꠞ ꠝꠣꠐꠤꠞꠦ ꠘꠣꠙꠣꠇ ꠇꠞꠤꠅ ꠘꠣ। ꠎꠣꠘ ꠔ, ꠈꠥꠘꠞ ꠟꠃꠄ ꠖꠦꠡ ꠘꠣꠙꠣꠇ ꠅꠁꠎꠣꠄ। ꠀꠞ ꠎꠦ ꠖꠦꠡꠅ ꠈꠥꠘꠞ ꠟꠃ ꠏꠞꠍꠦ, ꠢꠃ ꠈꠥꠘꠤꠞ ꠟꠃ ꠍꠣꠠꠣ ꠀꠞ ꠇꠥꠘꠥꠝꠘ꠆ꠔꠦꠃ ꠢꠤ ꠖꠦꠡꠞ ꠘꠣꠙꠣꠇꠤꠞ ꠇꠚꠞꠣ ꠅꠄ ꠘꠣ।
NUM 35:34 ꠀꠞ ꠔꠥꠝꠞꠣ ꠎꠦ ꠖꠦꠡꠅ ꠞꠁꠛꠣꠄ ꠀꠝꠤꠅ ꠔ ꠢꠘꠅ ꠞꠁꠝꠥ, ꠄꠞꠟꠣꠉꠤ ꠁ ꠖꠦꠡꠞꠦ ꠘꠣꠙꠣꠇ ꠛꠣꠘꠣꠁꠅ ꠘꠣ। ꠇꠣꠞꠘ ꠀꠝꠤ ꠝꠣꠛꠥꠖ ꠛꠘꠤ ꠁꠍꠞꠣꠁꠟꠞ ꠝꠣꠎꠦ ꠛꠡꠔ ꠇꠞꠤ।”
NUM 36:1 ꠁꠃꠍꠥꠚ ꠘꠛꠤꠞ ꠀꠅꠟꠣꠖꠞ ꠈꠣꠘ꠆ꠖꠣꠘ ꠅꠇꠟ ꠕꠣꠇꠤ, ꠝꠣꠘꠡꠣꠞ ꠘꠣꠔꠤ ꠝꠣꠈꠤꠞꠞ ꠙꠥꠀ ꠉꠤꠟꠤꠅꠖ ꠉꠥꠡ꠆ꠐꠤꠞ ꠘꠣꠘꠣꠘ ꠙꠞꠤꠛꠣꠞ ꠕꠣꠇꠤ ꠝꠥꠞꠛ꠆ꠛꠤ ꠅꠇꠟ ꠀꠁꠟꠣ, ꠀꠁꠀ ꠔꠣꠞꠣ ꠝꠥꠍꠣ ꠘꠛꠤ ꠀꠞ ꠛꠘꠤ ꠁꠍꠞꠣꠁꠟꠞ ꠘꠣꠘꠣꠘ ꠉꠥꠡ꠆ꠐꠤꠞ ꠡꠞ꠆ꠖꠣꠞ ꠅꠇꠟꠞ ꠟꠉꠦ ꠝꠣꠔꠤꠟꠣ।
NUM 36:2 ꠇꠁꠟꠣ, “ꠝꠣꠛꠥꠖꠦ ꠀꠝꠞꠣꠞ ꠁ ꠝꠣꠟꠤꠇꠞꠦ ꠢꠥꠇꠥꠝ ꠖꠤꠍꠟꠣ, ꠟꠐꠣꠞꠤ ꠝꠣꠞꠤꠀ ꠛꠘꠤ ꠁꠍꠞꠣꠁꠟꠞ ꠝꠣꠎꠦ ꠖꠦꠡꠞ ꠎꠣꠉꠣ-ꠎꠝꠤꠘ ꠛꠣꠐꠤꠀ ꠖꠤꠔꠣ। ꠖꠤꠛꠣꠞ ꠡꠝꠄ ꠀꠝꠞꠣꠞ ꠜꠣꠁ ꠎꠟꠣꠙꠈꠣꠖꠞ ꠎꠝꠤ-ꠎꠝꠣ ꠈꠣꠘꠣꠁꠘ ꠔꠣꠞ ꠙꠥꠠꠤꠘ꠆ꠔꠞꠦ ꠖꠤꠛꠣꠞ ꠢꠥꠇꠥꠝ ꠖꠤꠍꠂꠘ।
NUM 36:3 ꠅꠁꠟꠦ ꠛꠘꠤ ꠁꠍꠞꠣꠁꠟꠞ ꠖꠥꠍꠞꠣ ꠇꠥꠘꠥ ꠈꠣꠘ꠆ꠖꠣꠘꠞ ꠝꠣꠘꠡꠞ ꠟꠉꠦ ꠎꠥꠖꠤ ꠅꠃ ꠙꠥꠠꠤꠘ꠆ꠔꠞ ꠛꠤꠀ ꠅꠄ, ꠔꠦ ꠀꠝꠞꠣꠞ ꠛꠣꠚ-ꠖꠣꠖꠣꠞ ꠍꠣꠝꠣꠘꠣ ꠕꠣꠇꠤ ꠔꠣꠞꠣꠞ ꠍꠣꠝꠣꠘꠣ ꠛꠣꠞ ꠅꠁꠀ ꠉꠤꠀ, ꠔꠣꠞꠣꠞ ꠎꠣꠝꠣꠁꠞ ꠈꠣꠘ꠆ꠖꠣꠘꠞ ꠎꠝꠤ-ꠎꠝꠣꠔ ꠢꠣꠝꠣꠁꠎꠤꠛ, ꠄꠔꠦ ꠀꠝꠞꠣꠞ ꠈꠣꠘ꠆ꠖꠣꠘꠞ ꠎꠝꠤ-ꠝꠤꠞꠣꠡꠞ ꠇꠤꠍꠥ ꠅꠋꠡ ꠇꠝꠤꠎꠤꠛ।
NUM 36:4 ꠛꠘꠤ ꠁꠍꠞꠣꠁꠟꠞ ꠎꠝꠤ-ꠝꠤꠞꠣꠡ ꠚꠤꠞꠔ ꠙꠣꠅꠀꠞ ꠢꠃ ꠙꠛꠤꠔ꠆ꠞ ꠙꠁꠘ꠆ꠌꠣꠡ ꠛꠍꠞꠞ ꠇꠣꠟꠅ, ꠔꠣꠞꠣꠞ ꠎꠝꠤ-ꠎꠝꠣ ꠉꠤꠀ ꠔ ꠔꠣꠞꠣꠞ ꠎꠣꠝꠣꠁꠞ ꠈꠣꠘ꠆ꠖꠣꠘꠞ ꠍꠣꠝꠣꠘꠣ ꠅꠁꠎꠤꠛ। ꠅꠃ ꠟꠣꠈꠣꠘ ꠀꠝꠞꠣꠞ ꠛꠣꠚ-ꠖꠣꠖꠣꠞ ꠎꠝꠤ-ꠝꠤꠞꠣꠡ ꠕꠣꠇꠤ ꠔꠣꠞꠣꠞ ꠅꠋꠡ ꠛꠣꠞ ꠅꠁꠀ ꠎꠣꠁꠛꠉꠤ।”
NUM 36:5 ꠁꠈꠣꠘ ꠢꠥꠘꠤꠀ ꠝꠣꠛꠥꠖꠞ ꠢꠥꠇꠥꠝ ꠝꠣꠚꠤꠇ ꠝꠥꠍꠣꠄ ꠛꠘꠤ ꠁꠍꠞꠣꠁꠟꠞꠦ ꠇꠁꠟꠣ, “ꠁꠃꠍꠥꠚꠞ ꠀꠅꠟꠣꠖꠞ ꠅꠃ ꠈꠣꠘ꠆ꠖꠣꠘꠞ ꠝꠣꠘꠡꠦ ꠎꠦꠔꠣ ꠇꠁꠞꠣ, ꠁꠔꠣ ꠔ ꠢꠣꠍꠣ।
NUM 36:6 ꠄꠞꠟꠣꠉꠤ ꠎꠟꠣꠙꠈꠣꠖꠞ ꠙꠥꠠꠤꠘ꠆ꠔꠞ ꠛꠦꠙꠣꠞꠦ ꠝꠣꠛꠥꠖꠦ ꠢꠥꠇꠥꠝ ꠖꠤꠞꠣ, ꠔꠣꠞꠣ ꠎꠣꠞꠦ ꠙꠍꠘ꠆ꠖ ꠇꠞꠂꠘ ꠔꠣꠞ ꠉꠦꠍꠦꠃ ꠛꠤꠀ ꠛꠁꠔꠣ ꠙꠣꠞꠛꠣ। ꠅꠁꠟꠦ ꠡꠞ꠆ꠔ ꠅꠁꠟ, ꠔꠣꠞꠣꠞ ꠛꠣꠚꠞ ꠈꠣꠘ꠆ꠖꠣꠘꠞ ꠜꠤꠔꠞꠦ ꠛꠤꠀ ꠛꠁꠔꠦ ꠅꠁꠛ।
NUM 36:7 ꠛꠘꠤ ꠁꠍꠞꠣꠁꠟꠞ ꠎꠝꠤ-ꠝꠤꠞꠣꠡ ꠄꠇ ꠈꠣꠘ꠆ꠖꠣꠘ ꠕꠣꠇꠤ ꠀꠞꠇ ꠈꠣꠘ꠆ꠖꠣꠘꠅ ꠎꠣꠁꠔ ꠙꠣꠞꠔ ꠘꠣꠄ। ꠛꠘꠤ ꠁꠍꠞꠣꠁꠟꠞ ꠙꠞꠔꠦꠇ ꠎꠘꠦ ꠔꠣꠞ ꠛꠣꠚ-ꠖꠣꠖꠣꠞ ꠎꠝꠤ-ꠝꠤꠞꠣꠡ ꠛꠣꠌꠣꠘꠤ ꠟꠣꠉꠛ।
NUM 36:8 ꠛꠘꠤ ꠁꠍꠞꠣꠁꠟꠞ ꠙꠞꠔꠦꠇꠦ ꠎꠣꠔꠦ ꠔꠣꠞꠣꠞ ꠛꠣꠚ-ꠖꠣꠖꠣꠞ ꠉꠦꠍ ꠕꠣꠇꠤ ꠙꠣꠅꠀ ꠎꠝꠤ-ꠎꠝꠣꠞ ꠝꠣꠟꠤꠇꠣꠘꠣ ꠐꠤꠇꠣꠁ ꠞꠣꠈꠔ ꠙꠣꠞꠦ, ꠅꠔꠣꠞ ꠟꠣꠉꠤ ꠙꠞꠔꠦꠇ ꠈꠣꠘ꠆ꠖꠣꠘꠞ ꠎꠝꠤ-ꠎꠝꠣꠞ ꠝꠣꠟꠤꠇꠣꠘꠣ ꠙꠣꠅꠀ ꠙꠥꠠꠤꠘ꠆ꠔꠦ ꠔꠣꠞꠣꠞ ꠛꠣꠚꠞ ꠈꠣꠘ꠆ꠖꠣꠘꠞ ꠘꠡꠣꠞ ꠉꠦꠍꠦ ꠛꠤꠀ ꠛꠁꠔꠦ ꠅꠁꠛ।
NUM 36:9 ꠄꠇ ꠈꠣꠘ꠆ꠖꠣꠘ ꠕꠣꠇꠤ ꠀꠞꠇ ꠈꠣꠘ꠆ꠖꠣꠘꠅ ꠇꠥꠘꠥ ꠎꠝꠤ-ꠎꠝꠣ ꠎꠣꠁꠔ ꠘꠣꠄ। ꠛꠘꠤ ꠁꠍꠞꠣꠁꠟꠞ ꠙꠞꠔꠦꠇ ꠈꠣꠘ꠆ꠖꠣꠘꠦ ꠔꠣꠞꠣꠞ ꠎꠝꠤ-ꠎꠝꠣꠞ ꠝꠣꠟꠤꠇꠣꠘꠣ ꠗꠞꠤꠀ ꠞꠣꠈꠔꠦ ꠅꠁꠛ।”
NUM 36:10 ꠝꠣꠛꠥꠖꠦ ꠝꠥꠍꠣꠞꠦ ꠎꠦꠟꠣ ꠢꠥꠇꠥꠝ ꠖꠤꠍꠟꠣ, ꠎꠟꠣꠙꠈꠣꠖꠞ ꠙꠥꠠꠤꠘ꠆ꠔꠦ ꠅꠟꠣ ꠝꠣꠘꠟꠣ।
NUM 36:11 ꠔꠣꠞꠣꠞ ꠛꠣꠚꠞ ꠈꠣꠘ꠆ꠖꠣꠘꠞ ꠜꠣꠁꠀꠁꠘ꠆ꠔꠞ ꠉꠦꠍꠦ ꠛꠤꠀ ꠛꠁꠟꠣ। ꠎꠟꠣꠙꠈꠣꠖꠞ ꠙꠥꠠꠤꠘ꠆ꠔꠞ ꠘꠣꠝ ꠅꠁꠟ, ꠝꠢꠟꠣ, ꠔꠤꠞꠎꠣ, ꠢꠉꠟꠣ, ꠝꠤꠟꠇꠣ, ꠀꠞ ꠘꠥꠀ।
NUM 36:12 ꠁꠃꠍꠥꠚꠞ ꠙꠥꠀ ꠝꠣꠘꠡꠣꠞ ꠈꠣꠘ꠆ꠖꠣꠘꠞ ꠉꠥꠡ꠆ꠐꠤ ꠅꠇꠟꠞ ꠝꠣꠎꠦꠃ ꠔꠣꠞꠣ ꠛꠤꠀ ꠛꠁꠟꠣ।
NUM 36:13 ꠀꠞ ꠢꠥꠘꠅ, ꠎꠤꠞꠤꠢꠅ ꠄꠟꠣꠇꠣꠞ ꠎꠞ꠆ꠖꠣꠘ ꠉꠣꠋꠉꠞ ꠗꠣꠞꠅ ꠝꠥꠀꠛ ꠖꠦꠡꠞ ꠔꠟ ꠎꠣꠉꠣꠔ, ꠝꠣꠛꠥꠖꠦ ꠝꠥꠍꠣ ꠘꠛꠤꠞ ꠝꠣꠎꠖꠤ ꠛꠘꠤ ꠁꠍꠞꠣꠁꠟꠞꠦ ꠅꠃ ꠢꠥꠇꠥꠝ-ꠀꠢꠇꠣꠝ ꠀꠞ ꠘꠤꠅꠝ-ꠇꠣꠘꠥꠘ ꠅꠇꠟ ꠖꠤꠍꠟꠣ॥
DEU 1:1 ꠝꠥꠍꠣ ꠘꠛꠤꠄ ꠎꠞ꠆ꠖꠣꠘ ꠉꠣꠋꠉꠞ ꠙꠥꠛ ꠙꠣꠞꠞ ꠀꠞꠣꠛꠣ ꠘꠣꠝꠞ ꠝꠞꠥꠜꠥꠝꠤꠔ ꠛꠘꠤ ꠁꠍꠞꠣꠁꠟ ꠎꠣꠔꠤꠞꠦ ꠅꠃ ꠛꠄꠀꠘ ꠇꠞꠍꠟꠣ, ꠔꠣꠁꠘ ꠡꠥꠚ ꠉꠣꠃꠞ ꠍꠣꠝꠘꠦ ꠃꠛꠣꠁꠀ ꠔꠣꠞꠣꠞ ꠟꠉꠦ ꠝꠣꠔꠤꠟꠣ। ꠄꠞ ꠄꠇꠛꠣꠄ ꠀꠍꠤꠟ ꠚꠣꠞꠣꠘ, ꠀꠞ ꠅꠁꠘ꠆ꠘꠛꠣꠄ ꠀꠍꠤꠟ ꠔꠥꠚꠟ, ꠟꠣꠛꠘ, ꠢꠣꠎꠤꠞꠥꠔ ꠀꠞ ꠖꠤꠎꠣꠢꠣꠛ, ꠅꠃ ꠌꠣꠁꠞ ꠉꠣꠃ।
DEU 1:2 ꠍꠦꠁꠞꠞ ꠙꠣꠠꠤꠀ ꠙꠕꠦꠖꠤ ꠔꠥꠞ ꠙꠣꠠ ꠕꠣꠇꠤ ꠇꠣꠖꠦꠡ-ꠛꠞꠘꠦꠀ ꠙꠞ꠆ꠎꠘ꠆ꠔ ꠀꠐꠤꠀ ꠎꠣꠁꠔꠦ ꠈꠣꠟꠤ ꠄꠉꠣꠞꠅ ꠖꠤꠘ ꠟꠣꠉꠦ।
DEU 1:3 ꠅꠁꠟꠦ ꠛꠘꠤ ꠁꠍꠞꠣꠁꠟ ꠝꠤꠡꠞ ꠕꠣꠇꠤ ꠛꠣꠞ ꠅꠁꠀ ꠃꠘꠌꠣꠟ꠆ꠟꠤꠡ ꠛꠍꠞ ꠄꠉꠣꠞꠅ ꠝꠣꠡ ꠙꠞ꠆ꠎꠘ꠆ꠔ, ꠅꠞ꠆ꠕꠣꠔ ꠍꠚꠞꠞ ꠌꠣꠟ꠆ꠟꠤꠡ ꠛꠞꠍ ꠌꠟꠣꠞ ꠇꠣꠟꠅ, ꠅꠘꠅ ꠊꠥꠞꠤꠟꠣ। ꠛꠣꠖꠦ ꠅꠃ ꠝꠣꠡꠞ ꠙꠄꠟꠣ ꠔꠣꠞꠤꠈꠅ ꠝꠥꠍꠣ ꠘꠛꠤꠄ ꠔꠣꠞꠣꠞꠦ ꠎꠣꠘꠣꠁꠟꠣ ꠝꠣꠛꠥꠖꠦ ꠔꠣꠘꠞꠦ ꠎꠦꠔꠣ ꠇꠁꠍꠟꠣ।
DEU 1:4 ꠔꠣꠁꠘ ꠟꠣꠠꠣꠁ ꠇꠞꠤ ꠀꠝꠥꠞꠤ ꠅꠇꠟꠞ ꠛꠣꠖꠡꠣ ꠍꠤꠢꠥꠘꠞꠦ ꠀꠞ ꠛꠣꠡꠘ ꠖꠦꠡꠞ ꠛꠣꠖꠡꠣ ꠃꠎꠞꠦ ꠀꠞꠣꠁꠀ ꠢꠣꠞꠟꠦ ꠁꠔꠣ ꠇꠁꠟꠣ। ꠅꠃ ꠍꠤꠢꠥꠘꠦ ꠛꠣꠖꠡꠣꠁ ꠇꠞꠔꠣ ꠢꠤꠡꠛꠘ ꠐꠣꠃꠘꠅ, ꠀꠞ ꠃꠎꠦ ꠛꠣꠖꠡꠣꠁ ꠇꠞꠔꠣ ꠅꠡ꠆ꠐꠣꠞꠥꠔ ꠀꠞ ꠁꠖꠞꠤ ꠐꠣꠃꠘꠅ।
DEU 1:5 ꠎꠞ꠆ꠖꠣꠘ ꠉꠣꠋꠉꠞ ꠙꠥꠛ ꠙꠣꠞꠞ ꠝꠥꠀꠛ ꠖꠦꠡꠅ, ꠝꠥꠍꠣ ꠘꠛꠤꠄ ꠀꠟ꠆ꠟꠣꠞ ꠖꠦꠅꠀ ꠔꠃꠞꠣꠔꠞ ꠔꠣꠟꠤꠝ ꠛꠄꠀꠘ ꠇꠞꠤꠀ ꠛꠥꠎꠣꠁꠟꠣ। ꠔꠣꠁꠘ ꠇꠁꠟꠣ,
DEU 1:6 “ꠅ ꠛꠘꠤ ꠁꠍꠞꠣꠁꠟ, ꠢꠥꠘꠅ, ꠀꠝꠞꠣ ꠔꠥꠞ ꠙꠣꠠꠞ ꠉꠣꠟꠣꠔ ꠕꠣꠇꠣꠞ ꠇꠣꠟꠅ ꠝꠣꠛꠥꠖ ꠀꠟ꠆ꠟꠣꠄ ꠀꠝꠞꠣꠞꠦ ꠇꠁꠍꠟꠣ, ꠅꠃ ꠙꠣꠠꠞ ꠉꠣꠟꠣꠔ ꠔꠥꠝꠞꠣꠞ ꠛꠃꠔ ꠖꠤꠘ ꠉꠥꠎꠞꠤ ꠉꠦꠍꠦ।
DEU 1:7 ꠔꠦ ꠅꠈꠘ ꠔꠥꠝꠞꠣ ꠢꠇꠟꠦ ꠔꠣꠝ꠆ꠛꠥ ꠔꠥꠟꠤꠀ ꠀꠝꠥꠞꠤ ꠅꠇꠟꠞ ꠙꠣꠠꠤꠀ ꠄꠟꠣꠇꠣ ꠀꠞ ꠅꠃ ꠄꠟꠣꠇꠣꠞ ꠇꠣꠘ꠆ꠖꠣ-ꠇꠣꠍꠣꠞ ꠢꠇꠟ ꠎꠣꠉꠣꠔ ꠎꠣꠅꠀꠞ ꠟꠣꠉꠤ ꠞꠅꠀꠘꠣ ꠅꠅ। ꠁ ꠎꠣꠉꠣ ꠢꠇꠟꠔꠣ ꠅꠁꠟ ꠉꠤꠀ: ꠀꠞꠣꠛꠣ ꠝꠞꠥꠜꠥꠝꠤ ꠀꠞ ꠅꠃ ꠝꠞꠥꠜꠥꠝꠤꠞ ꠇꠣꠘ꠆ꠖꠣ-ꠇꠣꠍꠣꠞ ꠃꠌꠣ ꠙꠣꠠꠤꠀ ꠎꠣꠉꠣ ꠀꠞ ꠘꠤꠌꠣ ꠙꠣꠠꠤꠀ ꠎꠣꠉꠣ, ꠘꠦꠉꠦꠜ ꠝꠞꠥꠜꠥꠝꠤ ꠀꠞ ꠖꠞꠤꠀꠞ ꠇꠤꠘꠣꠞꠣ, ꠝꠣꠘꠤ ꠇꠦꠘꠣꠘ ꠖꠦꠡ ꠕꠣꠇꠤ ꠀꠞꠝ꠆ꠛ ꠇꠞꠤꠀ ꠟꠦꠛꠣꠘꠘ ꠖꠦꠡ ꠅꠁꠀ ꠚꠥꠞꠣꠔ ꠉꠣꠋ ꠙꠞ꠆ꠎꠘ꠆ꠔ ꠁꠔꠣ ꠢꠇꠟ ꠎꠣꠉꠣ।
DEU 1:8 ꠝꠘꠅ ꠞꠣꠈꠤꠅ, ꠁꠔꠣ ꠢꠇꠟ ꠎꠣꠉꠣ ꠀꠝꠤ ꠔꠥꠝꠞꠣꠞꠦ ꠖꠤꠟꠣꠁꠍꠤ। ꠀꠝꠤ ꠝꠣꠛꠥꠖꠦ ꠔꠥꠝꠞꠣꠞ ꠛꠣꠚ-ꠖꠣꠖꠣꠁꠘ ꠁꠛ꠆ꠞꠣꠢꠤꠝ, ꠁꠍꠢꠣꠇ, ꠁꠀꠇꠥꠛ ꠀꠞ ꠔꠣꠞꠣꠞ ꠈꠣꠘ꠆ꠖꠣꠘꠞꠦ ꠎꠦ ꠖꠦꠡ ꠖꠦꠅꠀꠞ ꠅꠀꠖꠣ ꠇꠞꠍꠟꠣꠝ, ꠔꠥꠝꠞꠣ ꠅꠈꠘ ꠉꠤꠀ ꠁꠔꠣ ꠢꠇꠟ ꠎꠣꠉꠣ ꠖꠈꠟ ꠇꠞꠤꠟꠣꠅ।
DEU 1:9 “ꠔꠦ ꠜꠣꠁꠀꠁꠘꠞꠦ, ꠢꠃ ꠡꠝꠄ ꠀꠝꠤ ꠔꠥꠝꠞꠣꠞꠦ ꠇꠁꠍꠟꠣꠝ, ꠔꠥꠝꠞꠣ ꠢꠇꠟꠞ ꠜꠣꠞ ꠔ ꠀꠝꠤ ꠄꠇꠟꠣ ꠛꠁꠛꠣꠞ ꠡꠣꠁꠖ꠆ꠖ ꠘꠣꠁ।
DEU 1:10 ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠔꠥꠝꠞꠣꠞꠦ ꠅꠔ ꠀꠅꠟꠣꠖ ꠛꠣꠠꠣꠁ ꠖꠤꠍꠂꠘ, ꠄꠞꠟꠣꠉꠤ ꠔꠥꠝꠞꠣ ꠀꠁꠎ ꠀꠍꠝꠣꠘꠞ ꠔꠦꠞꠣꠞ ꠟꠣꠈꠣꠘ ꠅꠁꠍ, ꠉꠘꠤꠀ ꠚꠥꠠꠣꠁꠟ ꠎꠣꠄ ꠘꠣ।
DEU 1:11 ꠔꠥꠝꠞꠣꠞ ꠛꠣꠚ-ꠖꠣꠖꠣꠞ ꠝꠣꠛꠥꠖ ꠀꠟ꠆ꠟꠣꠄ ꠔꠥꠝꠞꠣꠞꠦ ꠀꠞꠅ ꠀꠎꠣꠞ ꠀꠎꠣꠞ ꠉꠥꠘ ꠛꠣꠠꠣꠃꠇ꠆ꠇꠣ, ꠀꠞ ꠔꠣꠘ ꠅꠀꠖꠣ ꠝꠣꠚꠤꠇ ꠔꠥꠝꠞꠣꠞꠦ ꠞꠢꠝ-ꠛꠞꠇꠔ ꠖꠦꠃꠇ꠆ꠇꠣ।
DEU 1:12 ꠅꠁꠟꠦ ꠀꠝꠤ ꠄꠇꠟꠣ ꠇꠦꠝꠘꠦ ꠔꠥꠝꠞꠣꠞ ꠇꠣꠁꠎ꠆ꠎꠣ-ꠚꠍꠣꠖ ꠝꠤꠐꠣꠁꠔꠣꠝ, ꠀꠞ ꠔꠥꠝꠞꠣꠞ ꠎꠤꠝ꠆ꠝꠣꠖꠣꠞꠤꠞ ꠜꠣꠞ ꠛꠁꠔꠣꠝ?
DEU 1:13 ꠄꠞꠟꠣꠉꠤ ꠔꠥꠝꠞꠣꠞ ꠙꠞꠔꠦꠇ ꠈꠣꠘ꠆ꠖꠣꠘ ꠕꠣꠇꠤ ꠇꠄꠎꠘ ꠀꠈꠟꠖꠣꠞ, ꠎꠣꠘꠞꠣ-ꠢꠥꠘꠞꠣ ꠀꠞ ꠢꠇꠟ ꠝꠣꠘꠡꠞ ꠉꠦꠍꠦ ꠁꠎ꠆ꠎꠔꠤ ꠎꠘꠞꠦ ꠙꠍꠘ꠆ꠖ ꠇꠞꠅ, ꠀꠝꠤ ꠔꠥꠝꠞꠣꠞ ꠎꠤꠝ꠆ꠝꠣꠖꠣꠞꠤ ꠄꠞꠣꠞ ꠀꠔꠅ ꠡꠝꠎꠣꠁꠝꠥ।
DEU 1:14 “ꠔꠥꠝꠞꠣ ꠎꠥꠀꠙ ꠖꠤꠍꠟꠣꠄ, ꠀꠁꠌ꠆ꠍꠣ, ꠀꠙꠘꠦ ꠎꠦꠟꠣ ꠇꠁꠞꠣ, ꠅꠟꠣꠃ ꠜꠣꠟꠣ ꠅꠁꠛ।
DEU 1:15 ꠔꠦꠃ ꠀꠝꠤ ꠔꠥꠝꠞꠣꠞ ꠙꠞꠔꠦꠇ ꠈꠣꠘ꠆ꠖꠣꠘ ꠕꠣꠇꠤ ꠀꠈꠟꠖꠣꠞ, ꠛꠥꠖ꠆ꠖꠤꠝꠣꠘ ꠀꠞ ꠎꠣꠘꠞꠣ-ꠢꠥꠘꠞꠣ ꠎꠘꠞꠦ ꠘꠤꠀ ꠔꠥꠝꠞꠣꠞ ꠀꠎꠣꠞ ꠎꠘꠞ ꠃꠙꠞꠦ, ꠡ ꠎꠘꠞ ꠃꠙꠞꠦ, ꠙꠁꠘ꠆ꠌꠣꠡ ꠎꠘꠞ ꠃꠙꠞꠦ, ꠖꠡ ꠎꠘꠞ ꠃꠙꠞꠦ ꠡꠞ꠆ꠖꠣꠞ ꠛꠣꠘꠣꠁ ꠖꠤꠍꠟꠣꠝ, ꠀꠞ ꠅꠚꠤꠡꠣꠞ ꠛꠅꠀꠁꠟ ꠇꠞꠍꠟꠣꠝ।
DEU 1:16 “ꠢꠃ ꠡꠝꠄ ꠀꠝꠤ ꠔꠥꠝꠞꠣꠞ ꠢꠣꠇꠤꠝ ꠅꠇꠟꠞꠦ ꠢꠥꠇꠥꠝ ꠖꠤꠍꠟꠣꠝ, ꠇꠁꠍꠟꠣꠝ, ꠇꠣꠁꠎ꠆ꠎꠣ-ꠚꠍꠣꠖꠞ ꠛꠤꠌꠣꠞꠅ ꠛꠣꠖꠤ-ꠛꠤꠛꠣꠖꠤ ꠖꠥꠁꠅ ꠙꠇ꠆ꠇꠞ ꠝꠣꠔ ꠢꠥꠘꠤꠀ ꠢꠇ ꠁꠘꠍꠣꠚ ꠇꠞꠤꠅ, ꠁꠔꠣ ꠘꠤꠎꠞ ꠎꠣꠔꠤꠞ ꠅꠃꠇ ꠛꠣ ꠜꠤꠘ ꠎꠣꠔꠤꠞ ꠅꠃꠇ।
DEU 1:17 ꠛꠤꠌꠣꠞꠞ ꠡꠝꠄ ꠔꠥꠝꠞꠣ ꠇꠦꠃꠞꠞ ꠙꠇ꠆ꠇ ꠟꠁꠅ ꠘꠣ, ꠗꠘꠤ-ꠉꠞꠤꠛ ꠢꠇꠟꠞ ꠇꠕꠣ ꠢꠥꠘꠤꠅ। ꠀꠍꠟꠦ ꠛꠤꠌꠣꠞꠞ ꠝꠣꠟꠤꠇ ꠔ ꠀꠟ꠆ꠟꠣ, ꠄꠞꠟꠣꠉꠤ ꠔꠥꠝꠞꠣ ꠇꠥꠘꠥ ꠝꠣꠘꠡꠞꠦ ꠒꠞꠣꠁꠅ ꠘꠣ। ꠎꠦ ꠛꠤꠌꠣꠞꠞ ꠝꠤꠝꠣꠋꠡꠣ ꠇꠞꠣ ꠔꠥꠝꠞꠣꠞ ꠟꠣꠉꠤ ꠇꠑꠤꠘ ꠅꠄ, ꠁꠈꠣꠘ ꠀꠝꠣꠞ ꠉꠦꠍꠦ ꠀꠘꠤꠅ, ꠀꠝꠤ ꠖꠦꠈꠝꠥ।
DEU 1:18 ꠀꠞ ꠔꠥꠝꠞꠣ ꠇꠤꠟꠣ ꠇꠤꠔꠣ ꠇꠞꠔꠣꠄ, ꠁꠔꠣ ꠔ ꠀꠝꠤ ꠢꠃ ꠡꠝꠄ ꠇꠁꠀ ꠖꠤꠍꠟꠣꠝ।
DEU 1:19 “ꠛꠣꠖꠦ ꠀꠝꠞꠣ ꠝꠣꠛꠥꠖ ꠀꠟ꠆ꠟꠣꠞ ꠢꠥꠇꠥꠝ ꠙꠣꠁꠀ, ꠔꠥꠞ ꠙꠣꠠ ꠍꠣꠠꠤꠀ ꠀꠝꠥꠞꠤ ꠅꠇꠟꠞ ꠙꠣꠠꠤꠀ ꠄꠟꠣꠇꠣ ꠝꠥꠈꠣ ꠞꠅꠀꠘꠣ ꠅꠁꠟꠣꠝ। ꠔꠥꠝꠞꠣ ꠔ ꠖꠦꠈꠍ, ꠇꠔ ꠛꠠ ꠀꠞ ꠇꠔ ꠝꠣꠞꠣꠔ꠆ꠔꠇ ꠝꠞꠥꠜꠥꠝꠤ ꠙꠣꠞ ꠅꠁꠀ ꠀꠝꠞꠣ ꠇꠣꠖꠦꠡ-ꠛꠞꠘꠦꠀ ꠀꠁꠀ ꠀꠎꠤꠟꠣꠝ।
DEU 1:20 ꠀꠎꠤꠀ ꠢꠣꠞꠤ ꠀꠝꠤ ꠇꠁꠍꠟꠣꠝ, ꠅꠈꠘ ꠔ ꠔꠥꠝꠞꠣ ꠀꠝꠥꠞꠤ ꠅꠇꠟꠞ ꠢꠃ ꠙꠣꠠꠤꠀ ꠄꠟꠣꠇꠣꠔ ꠀꠁꠀ ꠙꠃꠍꠤ ꠉꠦꠍ, ꠁ ꠖꠦꠡꠈꠣꠘ ꠀꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠀꠝꠞꠣꠞꠦ ꠖꠤꠟꠣꠁꠞꠣ।
DEU 1:21 ꠢꠥꠘꠅ, ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠖꠣꠘ ꠇꠞꠣ ꠅꠃ ꠀꠡ꠆ꠔꠣ ꠖꠦꠡꠃ ꠔꠥꠝꠞꠣꠞ ꠍꠣꠝꠘꠦ ꠙꠠꠤ ꠞꠁꠍꠦ। ꠅꠈꠘ ꠎꠣꠅ, ꠉꠤꠀ ꠔꠥꠝꠞꠣꠞ ꠛꠣꠚ-ꠖꠣꠖꠣꠞ ꠝꠣꠛꠥꠖ ꠀꠟ꠆ꠟꠣꠞ ꠅꠀꠖꠣ ꠇꠞꠣ ꠅꠃ ꠖꠦꠡꠞꠦ ꠖꠈꠟ ꠇꠞꠅ। ꠇꠦꠃ ꠒꠞꠣꠁꠅ ꠘꠣ, ꠘꠤꠞꠣꠡ ꠅꠁꠅ ꠘꠣ।
DEU 1:22 “ꠅꠃ ꠡꠝꠄ ꠔꠥꠝꠞꠣ ꠢꠇꠟ ꠀꠁꠀ ꠀꠝꠣꠞꠦ ꠇꠁꠟꠣꠄ, ꠔꠦ ꠙꠄꠟꠣ ꠇꠄꠎꠘ ꠉꠥꠁꠀꠞꠦ ꠅꠃ ꠖꠦꠡꠅ ꠙꠣꠑꠣꠁꠟ ꠅꠃꠇ, ꠔꠣꠞꠣ ꠉꠤꠀ ꠖꠦꠡꠈꠣꠘ ꠖꠦꠈꠤꠀ ꠀꠁꠀ ꠀꠝꠞꠣꠞꠦ ꠇꠁꠛꠣ, ꠇꠥꠘ ꠙꠕꠦ ꠎꠣꠅꠀ ꠀꠝꠞꠣꠞ ꠟꠣꠉꠤ ꠜꠣꠟꠣ ꠀꠞ ꠎꠣꠅꠀꠞ ꠙꠕꠅ ꠇꠥꠘ ꠇꠥꠘ ꠐꠣꠃꠘ ꠙꠠꠛ।
DEU 1:23 “ꠔꠥꠝꠞꠣꠞ ꠙꠞꠣꠝꠤꠡ ꠀꠝꠣꠞ ꠙꠍꠘ꠆ꠖ ꠅꠁꠟ, ꠄꠞꠟꠣꠉꠤ ꠙꠞꠔꠦꠇ ꠈꠣꠘ꠆ꠖꠣꠘ ꠕꠣꠇꠤ ꠄꠇꠎꠘ ꠇꠞꠤ ꠝꠥꠐ ꠛꠣꠞꠅ ꠎꠘꠞꠦ ꠀꠟꠉ ꠇꠞꠟꠣꠝ।
DEU 1:24 ꠔꠣꠞꠣ ꠔꠥꠝꠞꠣꠞꠦ ꠅꠘꠅ ꠕꠁꠀ ꠅꠃ ꠙꠣꠠꠞ ꠃꠙꠞꠦ ꠃꠑꠟ, ꠀꠞ ꠀꠡꠇꠥꠟ ꠘꠣꠝꠞ ꠙꠣꠠꠤꠀ ꠈꠣꠟꠅ ꠉꠤꠀ ꠜꠣꠟꠣ ꠇꠞꠤ ꠢꠇꠟꠔꠣ ꠖꠦꠈꠤꠀ ꠀꠁꠟ।
DEU 1:25 ꠔꠣꠞꠣ ꠢꠃ ꠖꠦꠡ ꠕꠣꠇꠤ ꠇꠤꠍꠥ ꠚꠟ-ꠝꠥꠟ ꠀꠘꠤꠀ ꠀꠝꠞꠣꠞꠦ ꠖꠦꠈꠣꠁꠀ ꠇꠁꠟ, ꠀꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠀꠝꠞꠣꠞꠦ ꠎꠦ ꠖꠦꠡꠈꠣꠘ ꠖꠣꠘ ꠇꠞꠞꠣ, ꠁꠈꠣꠘ ꠔ ꠛꠠ ꠜꠣꠟꠣ ꠎꠣꠉꠣ।
DEU 1:26 “ꠅꠁꠟꠦ ꠔꠥꠝꠞꠣ ꠅꠃ ꠖꠦꠡꠅ ꠎꠣꠁꠔꠦ ꠞꠣꠎꠤ ꠅꠁꠟꠣꠄ ꠘꠣ। ꠔꠥꠝꠞꠣ ꠘꠤꠎꠞ ꠝꠣꠛꠥꠖ ꠀꠟ꠆ꠟꠣꠞ ꠢꠥꠇꠥꠝꠞ ꠛꠤꠞꠥꠗꠤꠔꠣ ꠇꠞꠟꠣꠄ।
DEU 1:27 ꠔꠥꠝꠞꠣ ꠎꠣꠞꠎꠤꠞ ꠔꠣꠝ꠆ꠛꠥꠔ ꠢꠣꠝꠣꠁꠀ ꠛꠇꠣ-ꠎꠇꠣ ꠡꠥꠞꠥ ꠇꠞꠟꠣꠄ, ꠀꠞ ꠇꠁꠟꠣꠄ, ꠝꠣꠛꠥꠖꠦ ꠀꠝꠞꠣꠞ ꠟꠉꠦ ꠖꠥꠡꠝꠘꠤ ꠇꠞꠂꠘ, ꠄꠞꠟꠣꠉꠤꠃ ꠀꠝꠞꠣꠞꠦ ꠛꠤꠘꠣꠡ ꠇꠞꠣꠞ ꠘꠤꠅꠔꠦ, ꠀꠝꠥꠞꠤ ꠅꠇꠟꠞ ꠀꠔꠅ ꠚꠣꠟꠣꠁꠀ ꠝꠣꠞꠣꠞ ꠈꠤꠀꠟꠦ, ꠝꠤꠡꠞ ꠖꠦꠡ ꠕꠣꠇꠤ ꠔꠣꠁꠘ ꠀꠝꠞꠣꠞꠦ ꠛꠣꠞ ꠇꠞꠤ ꠀꠘꠍꠂꠘ।
DEU 1:28 ꠀꠝꠞꠣ ꠇꠤꠟꠣ ꠢꠤꠘꠅ ꠎꠣꠁꠝꠥ? ꠀꠝꠞꠣꠞ ꠉꠥꠁꠀ ꠜꠣꠁꠀꠁꠘ꠆ꠔꠦ ꠀꠁꠀ ꠎꠣꠘꠅ ꠒꠞ ꠢꠣꠞꠣꠁ ꠖꠤꠍꠂꠘ। ꠔꠣꠞꠣ ꠇꠁꠍꠂꠘ, ꠢꠤꠘꠞ ꠝꠣꠘꠥꠡ ꠛꠥꠟꠦ ꠀꠝꠞꠣ ꠕꠣꠇꠤ ꠛꠃꠔ ꠃꠌꠣ-ꠝꠥꠐꠣ ꠙꠄꠟꠥꠀꠘ। ꠔꠣꠞꠣꠞ ꠐꠣꠃꠘ ꠅꠇꠟꠅ ꠛꠠ ꠛꠠ, ꠁꠔꠣꠞ ꠌꠣꠁꠞꠅꠛꠣꠄ ꠃꠌꠣ ꠃꠌꠣ ꠅꠀꠟ ꠖꠤꠀ ꠛꠣꠃꠘ꠆ꠒꠞꠤ ꠇꠞꠣ, ꠀꠍꠝꠣꠘꠅ ꠍꠁꠟꠣꠞ ꠟꠣꠉꠦꠞ। ꠀꠞ ꠙꠄꠟꠥꠀꠘ ꠀꠘꠣꠇꠤ ꠅꠇꠟꠞꠦꠅ ꠛꠥꠟꠦ ꠢꠘꠅ ꠖꠦꠈꠍꠂꠘ।
DEU 1:29 “ꠁꠔꠣ ꠢꠥꠘꠤꠀ ꠀꠝꠤ ꠔꠥꠝꠞꠣꠞꠦ ꠇꠁꠍꠟꠣꠝ, ꠔꠥꠝꠞꠣ ꠝꠘ ꠊꠣꠛꠠꠣꠁꠅ ꠘꠣ, ꠁꠔꠣꠞꠦ ꠒꠞꠣꠁꠅ ꠘꠣ।
DEU 1:30 ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣ ꠔ ꠔꠥꠝꠞꠣꠞ ꠀꠉꠦ ꠀꠉꠦ ꠎꠣꠁꠞꠣ। ꠔꠣꠁꠘ ꠔꠥꠝꠞꠣꠞ ꠙꠇ꠆ꠇ ꠟꠁꠀ ꠔꠥꠝꠞꠣꠞ ꠌꠈꠥꠞ ꠍꠣꠝꠘꠦ ꠝꠤꠡꠞ ꠖꠦꠡꠅ ꠎꠦꠟꠣ ꠎꠥꠖ꠆ꠖ ꠇꠞꠍꠟꠣ, ꠅꠈꠘꠅ ꠅꠃꠟꠣ ꠇꠞꠛꠣ।
DEU 1:31 ꠀꠞ ꠅꠃ ꠝꠞꠥꠜꠥꠝꠤꠞ ꠝꠣꠎꠦꠅ ꠔ ꠔꠥꠝꠞꠣ ꠖꠦꠈꠍ, ꠅꠘꠅ ꠀꠁꠀ ꠙꠃꠍꠣꠞ ꠀꠉ ꠙꠞ꠆ꠎꠘ꠆ꠔ, ꠛꠣꠚꠦ ꠎꠦꠟꠣꠈꠣꠘ ꠀꠙꠘ ꠙꠥꠔꠞꠦ ꠇꠥꠟꠅ ꠇꠞꠤ ꠛꠁꠀ ꠘꠦꠁꠘ, ꠅꠃꠟꠣꠈꠣꠘ ꠀꠟ꠆ꠟꠣ ꠝꠣꠛꠥꠖꠦ ꠔꠥꠝꠞꠣꠞꠦꠅ ꠀꠡ꠆ꠔꠣ ꠙꠕ ꠛꠁꠀ ꠀꠘꠍꠂꠘ।
DEU 1:32 ꠅꠔꠔꠣ ꠢꠥꠘꠣꠞ ꠛꠣꠖꠦꠅ ꠔꠥꠝꠞꠣ ꠔꠣꠘ ꠃꠙꠞꠦ ꠜꠞꠡꠣ ꠇꠞꠟꠣꠄ ꠘꠣ।
DEU 1:33 ꠔꠣꠁꠘꠦꠃ ꠔ ꠔꠣꠝ꠆ꠛꠥ ꠉꠣꠠꠤꠛꠣꠞ ꠎꠣꠉꠣ ꠌꠤꠘꠣꠘꠤꠞ ꠟꠣꠉꠤ ꠀꠞ ꠙꠕ ꠌꠤꠘꠣꠁꠀ ꠘꠤꠛꠣꠞ ꠟꠣꠉꠤ, ꠞꠣꠁꠔꠇꠥꠞ ꠡꠝꠄ ꠀꠉꠥꠘꠤꠞ ꠈꠥꠐꠤ ꠀꠞ ꠖꠤꠘꠇꠥꠞ ꠡꠝꠄ ꠝꠦꠊꠞ ꠈꠥꠐꠤꠞ ꠘꠝꠥꠘꠣ ꠅꠁꠀ ꠔꠥꠝꠞꠣꠞ ꠀꠉꠦ ꠀꠉꠦ ꠉꠦꠍꠂꠘ।
DEU 1:34 “ꠅꠁꠟꠦ ꠔꠥꠝꠞꠣꠞ ꠁꠔꠣ ꠎꠥꠀꠙ ꠢꠥꠘꠤꠀ ꠝꠣꠛꠥꠖꠦ ꠈꠥꠛ ꠉꠥꠍꠣ ꠇꠞꠟꠣ, ꠔꠣꠁꠘ ꠇꠍꠝ ꠈꠣꠁꠀ ꠇꠁꠟꠣ,
DEU 1:35 ꠀꠝꠤ ꠝꠣꠛꠥꠖꠦ ꠔꠥꠝꠞꠣꠞ ꠛꠣꠚ-ꠖꠣꠖꠣꠞ ꠉꠦꠍꠦ ꠇꠍꠝ ꠈꠣꠁꠍꠟꠣꠝ ꠅꠃ ꠖꠦꠡꠈꠣꠘ ꠖꠤꠔꠣꠝ ꠇꠞꠤ, ꠔꠣ-ꠅ ꠅꠈꠘꠇꠥꠞ ꠁꠔꠣ ꠘꠣꠚꠞꠝꠣꠘ ꠅꠇꠟꠦ ꠁ ꠜꠣꠟꠣ ꠎꠣꠉꠣ ꠈꠣꠘ ꠖꠦꠈꠣꠞ ꠘꠍꠤꠛ ꠅꠁꠔ ꠘꠣꠄ,
DEU 1:36 ꠈꠣꠟꠤ ꠎꠤꠚꠥꠘ꠆ꠘꠤꠞ ꠙꠥꠀ ꠇꠣꠟꠥꠔ ꠍꠣꠠꠣ। ꠁꠈꠣꠘ ꠖꠦꠈꠣꠞ ꠡꠃꠜꠣꠁꠉ꠆ꠉ ꠅꠃ ꠇꠣꠟꠥꠔꠦ ꠙꠣꠁꠛ, ꠢꠦ ꠀꠝꠣꠞ ꠇꠕꠣꠞꠦ ꠙꠥꠞꠣꠙꠥꠞ ꠝꠣꠘꠍꠦ, ꠢꠦ ꠎꠦꠔꠣ ꠎꠣꠉꠣ ꠙꠣꠅꠖꠤ ꠙꠣꠠꠣꠁꠀ ꠀꠁꠍꠦ, ꠁꠔꠣ ꠎꠣꠉꠣ ꠀꠝꠤ ꠔꠣꠞꠦ ꠀꠞ ꠔꠣꠞ ꠀꠅꠟꠣꠖ ꠅꠇꠟꠞꠦ ꠖꠤꠝꠥ।
DEU 1:37 “ꠜꠣꠁꠀꠁꠘꠞꠦ, ꠔꠥꠝꠞꠣꠞ ꠇꠣꠞꠘꠦ ꠝꠣꠛꠥꠖꠦ ꠀꠝꠣꠞ ꠃꠙꠞꠦꠅ ꠉꠥꠍꠣ ꠇꠞꠟꠣ, ꠉꠥꠍꠣ ꠇꠞꠤ ꠀꠝꠣꠞꠦ ꠇꠁꠟꠣ, ꠔꠥꠝꠤ ꠝꠥꠍꠣꠅ ꠢꠃ ꠖꠦꠡꠅ ꠢꠣꠝꠣꠁꠔꠣꠄ ꠙꠣꠞꠔꠣꠄ ꠘꠣꠄ।
DEU 1:38 ꠈꠣꠟꠤ ꠔꠥꠝꠣꠞ ꠈꠣꠖꠤꠝ ꠘꠥꠘꠞ ꠙꠥꠀ ꠁꠃꠍꠣ ꠉꠤꠀ ꠢꠘꠅ ꠢꠣꠝꠣꠁꠛ। ꠔꠥꠝꠤ ꠔꠣꠞꠦ ꠡꠣꠅꠡ ꠖꠤꠅ, ꠢꠦ ꠛꠘꠤ ꠁꠍꠞꠣꠁꠟꠞꠦ ꠁ ꠖꠦꠡꠞ ꠖꠈꠟꠖꠣꠞꠤ ꠖꠤꠀ ꠝꠣꠟꠤꠇ ꠛꠣꠘꠣꠁꠛ।
DEU 1:39 ꠔꠥꠝꠞꠣ ꠇꠁꠍꠟꠣꠄ, ꠀꠝꠞꠣꠞ ꠛꠦꠛꠥꠎ ꠘꠣꠛꠣꠟꠤꠇ ꠢꠥꠞꠥꠔ꠆ꠔꠣꠁꠘ꠆ꠔꠞꠦ ꠢꠃ ꠖꠦꠡꠞ ꠝꠣꠘꠡꠦ ꠗꠞꠤꠀ ꠘꠤꠛꠉꠤ। ꠅꠁꠟꠦ ꠀꠝꠤ ꠝꠣꠛꠥꠖꠦ ꠄꠞꠣꠞꠦꠃ ꠅꠃ ꠇꠦꠘꠣꠘ ꠖꠦꠡꠞ ꠝꠣꠟꠤꠇ ꠛꠣꠘꠣꠁꠝꠥ, ꠄꠞꠣ ꠁꠈꠣꠘ ꠖꠈꠟ ꠇꠞꠛꠣ।
DEU 1:40 ꠔꠦ ꠅꠈꠘ ꠔꠥꠝꠞꠣ ꠢꠤꠞꠛꠣꠞ ꠙꠤꠍꠣꠁꠀ ꠉꠤꠀ ꠘꠤꠟ ꠖꠞꠤꠀꠞ ꠙꠣꠞꠦꠖꠤ ꠝꠞꠥꠜꠥꠝꠤꠞ ꠛꠣꠄ ꠞꠅꠀꠘꠣ ꠖꠦꠅ।
DEU 1:41 “ꠁꠈꠣꠘ ꠢꠥꠘꠤꠀ ꠔꠥꠝꠞꠣ ꠇꠁꠍꠟꠣꠄ, ꠀꠝꠞꠣ ꠔ ꠝꠣꠛꠥꠖꠞ ꠖꠞꠛꠣꠞꠅ ꠉꠥꠘꠣꠉꠣꠞ ꠅꠁꠉꠦꠍꠤ। ꠔꠣ-ꠅ ꠀꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠢꠥꠇꠥꠝ ꠝꠣꠚꠤꠇ ꠅꠈꠘ ꠉꠤꠀ ꠎꠥꠖ꠆ꠖ ꠇꠞꠝꠥ। ꠅꠈꠣꠘ ꠇꠁꠀ ꠔꠥꠝꠞꠣ ꠅꠡꠔ꠆ꠞ-ꠡꠡꠔ꠆ꠞ ꠟꠁꠟꠣꠄ, ꠀꠞ ꠝꠘꠅ ꠇꠞꠍꠟꠣꠄ, ꠙꠣꠠꠤ ꠄꠟꠣꠇꠣꠔ ꠃꠑꠤꠀ ꠎꠥꠖ꠆ꠖ ꠇꠞꠣꠅ ꠈꠥꠛ ꠡꠥꠎꠣ।
DEU 1:42 “ꠅꠁꠟꠦ ꠝꠣꠛꠥꠖꠦ ꠀꠝꠣꠞꠦ ꠇꠁꠟꠣ, ꠔꠥꠝꠤ ꠔꠣꠞꠣꠞꠦ ꠇꠅ, ꠔꠣꠞꠣ ꠎꠣꠘꠥ ꠎꠥꠖ꠆ꠖꠞ ꠟꠣꠉꠤ ꠙꠣꠠꠅ ꠘꠣ ꠃꠑꠦ, ꠇꠣꠞꠘ ꠀꠝꠤ ꠔꠣꠞꠣꠞ ꠟꠉꠦ ꠞꠁꠔꠣꠝ ꠘꠣꠄ, ꠀꠞ ꠀꠝꠣꠞꠦ ꠍꠣꠠꠤꠀ ꠎꠥꠖꠤ ꠔꠥꠝꠞꠣꠞ ꠘꠤꠎꠞ ꠁꠌ꠆ꠍꠣꠄ ꠎꠣꠅ, ꠔꠦ ꠖꠥꠡꠝꠘꠞ ꠉꠦꠍꠦ ꠀꠞꠤꠛꠣꠄ।
DEU 1:43 ꠀꠝꠤ ꠔꠥꠝꠞꠣꠞꠦ ꠢꠥꠡꠤꠀꠞꠤ ꠖꠦꠅꠀꠞ ꠛꠣꠖꠦꠅ ꠔꠥꠝꠞꠣ ꠁꠔꠣ ꠝꠣꠘꠟꠣꠄ ꠘꠣ। ꠔꠥꠝꠞꠣ ꠝꠣꠛꠥꠖꠞ ꠢꠥꠇꠥꠝꠞ ꠃꠟꠐꠣ ꠉꠤꠀ ꠛꠥꠇ ꠚꠥꠟꠣꠁꠀ ꠅꠃ ꠙꠣꠠꠅ ꠃꠑꠣꠔ ꠟꠣꠉꠟꠣꠄ।
DEU 1:44 ꠔꠦꠃ ꠙꠣꠠꠞ ꠛꠣꠡꠤꠘ꠆ꠖꠣ ꠀꠝꠥꠞꠤ ꠎꠣꠔꠤꠄ ꠔꠥꠝꠞꠣꠞꠦ ꠖꠦꠈꠤꠀ ꠙꠣꠟ ꠛꠣꠘ꠆ꠖꠤ ꠛꠣꠞ ꠅꠁꠟ, ꠝꠃꠌꠣꠇꠞ ꠝꠃ-ꠙꠥꠇꠞ ꠟꠣꠈꠣꠘ ꠙꠣꠟ ꠛꠣꠘ꠆ꠖꠤꠀ ꠔꠥꠝꠞꠣꠞ ꠈꠞꠦ ꠈꠞꠦ ꠀꠁꠟ, ꠀꠞ ꠝꠣꠞꠔꠦ ꠝꠣꠞꠔꠦ ꠍꠦꠁꠞꠞ ꠢꠞ꠆ꠝꠣ ꠐꠣꠃꠘ ꠙꠞ꠆ꠎꠘ꠆ꠔ ꠈꠦꠖꠣꠁꠀ ꠘꠤꠟ।
DEU 1:45 ꠛꠣꠖꠦ ꠔꠥꠝꠞꠣ ꠀꠁꠀ ꠝꠣꠛꠥꠖꠞ ꠉꠦꠍꠦ ꠇꠣꠘ꠆ꠖꠘ ꠟꠣꠉꠣꠁꠟꠣꠄ, ꠅꠁꠟꠦ ꠝꠣꠛꠥꠖꠦ ꠇꠣꠘ ꠛꠘ꠆ꠖ ꠇꠞꠤꠟ꠆ꠟꠣ, ꠁ ꠇꠣꠘ꠆ꠖꠘ ꠢꠥꠘꠟꠣ ꠘꠣ।
DEU 1:46 ꠅꠃ ꠘꠝꠥꠘꠣꠄ ꠔꠥꠝꠞꠣ ꠛꠃꠔ ꠖꠤꠘ ꠇꠣꠖꠦꠡ ꠄꠟꠣꠇꠣꠔ ꠞꠁꠟꠣꠄ, ꠟꠣꠝ꠆ꠛꠣ ꠡꠝꠄ ꠅꠘꠅ ꠉꠥꠎꠞꠤꠟ।”
DEU 2:1 ꠢꠎꠞꠔ ꠝꠥꠍꠣꠄ ꠀꠞꠅ ꠇꠁꠟꠣ, “ꠝꠣꠛꠥꠖꠦ ꠀꠝꠣꠞꠦ ꠎꠦꠟꠣ ꠢꠥꠇꠥꠝ ꠖꠤꠍꠟꠣ, ꠅꠃꠟꠣ ꠀꠝꠞꠣ ꠙꠤꠍꠣꠁꠀ ꠉꠤꠀ ꠝꠞꠥꠜꠥꠝꠤꠞ ꠝꠣꠎꠦꠖꠤ ꠘꠤꠟ ꠖꠞꠤꠀꠞ ꠝꠥꠈꠣ ꠞꠅꠀꠘꠣ ꠖꠤꠟꠣꠝ। ꠍꠦꠁꠞꠞ ꠙꠣꠠꠤꠀ ꠄꠟꠣꠇꠣ ꠌꠇ꠆ꠇꠞ ꠖꠤꠀ ꠎꠣꠁꠔꠦ ꠀꠝꠞꠣꠞ ꠛꠃꠔ ꠖꠤꠘ ꠉꠦꠟꠉꠤ।
DEU 2:2 ꠛꠣꠖꠦ ꠝꠣꠛꠥꠖꠦ ꠀꠝꠣꠞꠦ ꠇꠁꠟꠣ,
DEU 2:3 ꠔꠥꠝꠞꠣ ꠛꠣꠇ꠆ꠇꠣ ꠖꠤꠘ ꠕꠣꠇꠤ ꠅꠃ ꠙꠣꠠꠤꠀ ꠄꠟꠣꠇꠣꠔ ꠌꠇ꠆ꠇꠞ ꠖꠤꠞꠣꠄ, ꠅꠈꠘ ꠃꠔ꠆ꠔꠞ ꠝꠥꠈꠣ ꠞꠅꠀꠘꠣ ꠖꠦꠅ।
DEU 2:4 ꠄꠞꠛꠣꠖꠦ ꠔꠣꠁꠘ ꠀꠝꠣꠞꠦ ꠇꠁꠟꠣ, ꠀꠝꠤ ꠔꠥꠝꠞꠣꠞꠦ ꠎꠣꠘꠣꠁꠔꠣꠝ ꠔꠥꠝꠞꠣ ꠅꠈꠘ ꠡꠦꠈ ꠁꠡʼꠞ ꠀꠅꠟꠣꠖꠞ ꠖꠈꠟꠦ ꠕꠣꠇꠣ ꠍꠦꠁꠞ ꠖꠦꠡꠞ ꠜꠤꠔꠞꠦꠖꠤ ꠎꠣꠁꠔꠦ ꠅꠁꠛ। ꠉꠦꠟꠦ ꠔꠥꠝꠞꠣꠞꠦ ꠖꠦꠈꠤꠀ ꠔꠣꠞꠣ ꠒꠞꠣꠁꠛꠣ, ꠅꠁꠟꠦ ꠔꠥꠝꠞꠣ ꠈꠥꠛ ꠢꠥꠡꠤꠀꠞ ꠞꠁꠅ, ꠄꠞꠣ ꠔ ꠔꠥꠝꠞꠣꠞ ꠜꠣꠁꠀꠁꠘ।
DEU 2:5 ꠔꠣꠞꠣꠞ ꠟꠉꠦ ꠇꠣꠁꠎ꠆ꠎꠣ-ꠚꠍꠣꠖ ꠇꠞꠤꠅ ꠘꠣ। ꠝꠘꠅ ꠞꠣꠈꠤꠅ, ꠔꠣꠞꠣꠞ ꠖꠦꠡꠞ ꠄꠇ ꠁꠘ꠆ꠌꠤ ꠎꠝꠤꠅ ꠀꠝꠤ ꠔꠥꠝꠞꠣꠞꠦ ꠖꠤꠔꠣꠝ ꠘꠣꠄ। ꠇꠣꠞꠘ ꠀꠡ꠆ꠔꠣ ꠍꠦꠁꠞ ꠙꠣꠠꠞ ꠝꠣꠟꠤꠇꠣꠘꠣ ꠀꠝꠤ ꠡꠦꠈ ꠁꠡʼꠞꠦ ꠖꠤꠟꠣꠁꠍꠤ।
DEU 2:6 ꠔꠣꠞꠣꠞ ꠅꠃ ꠖꠦꠡ ꠙꠣꠞ ꠅꠁꠀ ꠎꠣꠁꠛꠣꠞ ꠇꠣꠟꠅ ꠔꠥꠝꠞꠣꠞ ꠈꠣꠘꠤ-ꠈꠥꠞꠣꠇꠤ ꠟꠣꠉꠟꠦ ꠐꠦꠇꠣꠖꠤ ꠟꠁꠀ ꠈꠣꠁꠛꠣꠄ, ꠅꠃꠟꠣ ꠙꠣꠘꠤꠅ ꠟꠁꠀ ꠈꠣꠁꠛꠣꠄ।
DEU 2:7 “ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠢꠇꠟ ꠇꠣꠝꠞ ꠝꠣꠎꠦꠃ ꠔꠥꠝꠞꠣꠞꠦ ꠞꠢꠝ-ꠛꠞꠇꠔ ꠖꠤꠍꠂꠘ। ꠅꠃ ꠅꠔ ꠛꠠ ꠝꠞꠥꠜꠥꠝꠤ ꠙꠣꠞꠘꠤꠞ ꠛꠣꠟꠣ ꠔꠣꠁꠘ ꠔꠥꠝꠞꠣꠞꠦ ꠢꠦꠚꠣꠎꠔ ꠇꠞꠍꠂꠘ। ꠅꠃ ꠌꠣꠟ꠆ꠟꠤꠡ ꠛꠍꠞ ꠗꠞꠤ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣ ꠔꠥꠝꠞꠣꠞ ꠟꠉꠦ ꠟꠉꠦ ꠀꠍꠂꠘ, ꠄꠞꠟꠣꠉꠤ ꠇꠥꠘꠥ ꠟꠣꠈꠣꠘ ꠅꠜꠣꠛ ꠅꠁꠍꠦ ꠘꠣ।
DEU 2:8 “ꠔꠦꠃ ꠀꠝꠞꠣ ꠚꠣꠔꠣꠞꠤ ꠙꠕꠦ ꠀꠐꠤꠟꠣꠝ, ꠀꠐꠤꠀ ꠀꠝꠞꠣꠞ ꠜꠣꠁ ꠍꠦꠁꠞꠞ ꠛꠣꠡꠤꠘ꠆ꠖꠣ ꠁꠡʼꠞ ꠀꠅꠟꠣꠖꠞ ꠖꠦꠡ ꠚꠣꠟꠣꠁꠀ ꠉꠦꠟꠣꠝ। ꠀꠝꠞꠣ ꠀꠞꠣꠛꠣ ꠔꠟꠜꠥꠝꠤꠞ ꠎꠦ ꠞꠣꠡ꠆ꠔꠣ ꠄꠟꠣꠔ ꠀꠞ ꠁꠎꠤꠅꠘ-ꠉꠦꠛꠦꠞ ꠕꠣꠇꠤ ꠛꠣꠞ ꠅꠁꠀ ꠀꠁꠍꠦ, ꠅꠃ ꠙꠕꠦꠖꠤ ꠘꠣ ꠉꠤꠀ ꠝꠥꠀꠛꠞ ꠝꠞꠥꠜꠥꠝꠤꠞ ꠝꠥꠈꠣ ꠀꠐꠣ ꠗꠞꠟꠣꠝ।
DEU 2:9 ꠀꠞ ꠝꠣꠛꠥꠖꠦ ꠀꠝꠣꠞꠦ ꠇꠁꠟꠣ, ꠔꠥꠝꠞꠣ ꠝꠥꠀꠛꠤ ꠅꠇꠟꠞꠦ ꠍꠣꠔꠣꠁꠅ ꠘꠣ, ꠇꠥꠘꠥ ꠎꠥꠖ꠆ꠖꠞ ꠜꠣꠛ-ꠡꠣꠛ ꠖꠦꠈꠣꠁꠅ ꠘꠣ। ꠝꠘꠅ ꠞꠣꠈꠤꠅ, ꠔꠣꠞꠣꠞ ꠖꠦꠡꠞ ꠇꠥꠘꠥ ꠎꠝꠤꠃ ꠀꠝꠤ ꠔꠥꠝꠞꠣꠞꠦ ꠖꠤꠔꠣꠝ ꠘꠣꠄ। ꠔꠣꠞꠣꠞ ꠞꠣꠎꠗꠣꠘꠤ ꠀꠃꠞ ꠐꠣꠃꠘꠞ ꠝꠣꠟꠤꠇꠣꠘꠣ ꠀꠝꠤ ꠟꠥꠔ ꠘꠛꠤꠞ ꠀꠅꠟꠣꠖ ꠝꠥꠀꠛꠤ ꠅꠇꠟꠞꠦ ꠖꠤꠟꠣꠁꠍꠤ।”
DEU 2:10 (ꠀꠉꠦ ꠄꠁꠝꠤ ꠎꠣꠔꠤꠞ ꠝꠣꠘꠥꠡ ꠅꠃ ꠄꠟꠣꠇꠣꠔ ꠞꠁꠔꠣ, ꠁꠔꠣ ꠀꠍꠟꠣ ꠙꠄꠟꠥꠀꠘ ꠎꠣꠔꠤ, ꠔꠣꠞꠣ ꠙꠞꠤꠝꠣꠘꠦ ꠀꠍꠟꠣ ꠛꠃꠔ ꠎꠘ, ꠀꠞ ꠖꠦꠈꠔꠦ ꠀꠘꠣꠇꠤ ꠎꠣꠔꠤꠞ ꠟꠣꠈꠣꠘ ꠃꠌꠣ-ꠝꠥꠐꠣ ꠟꠣꠝ꠆ꠛꠣ।
DEU 2:11 ꠀꠘꠣꠇꠤ ꠅꠇꠟꠞ ꠟꠣꠈꠣꠘ ꠄꠁꠝꠤ ꠅꠇꠟꠞꠦꠅ ꠞꠚꠣꠄꠁ ꠘꠣꠝꠦ ꠒꠣꠇꠣ ꠅꠁꠔ, ꠅꠁꠟꠦ ꠝꠥꠀꠛꠤ ꠅꠇꠟꠦ ꠁꠔꠣꠞꠦ ꠄꠁꠝꠤ ꠇꠁꠀ ꠒꠣꠇꠤꠔꠣ।
DEU 2:12 ꠍꠦꠁꠞ ꠙꠣꠠꠅ ꠢꠥꠞꠤꠅ ꠅꠇꠟꠦ ꠛꠡꠔ ꠇꠞꠔꠣ, ꠛꠣꠖꠦ ꠁꠡʼꠞ ꠀꠅꠟꠣꠖ ꠅꠇꠟꠦ ꠔꠣꠞꠣꠞꠦ ꠈꠦꠖꠣꠁꠀ ꠖꠤꠀ ꠁꠈꠣꠘ ꠖꠈꠟ ꠇꠞꠟꠣ। ꠝꠣꠛꠥꠖꠞ ꠀꠔꠦ ꠛꠘꠤ ꠁꠍꠞꠣꠁꠟꠦ ꠎꠦꠟꠣ ꠇꠦꠘꠣꠘ ꠖꠦꠡꠞ ꠝꠣꠟꠤꠇꠣꠘꠣ ꠙꠣꠁꠀ ꠇꠦꠘꠣꠘꠤ ꠅꠇꠟꠞꠦ ꠈꠦꠖꠣꠁꠛꠣ, ꠑꠤꠇ ꠅꠟꠣ ꠁꠡʼꠞ ꠀꠅꠟꠣꠖ ꠅꠇꠟꠦꠅ ꠇꠞꠍꠟꠣ। ꠔꠣꠞꠣ ꠢꠥꠞꠤꠅ ꠅꠇꠟꠞꠦ ꠛꠤꠘꠣꠡ ꠇꠞꠤꠀ ꠢꠇꠟ ꠎꠝꠤ-ꠝꠣꠐꠤ ꠖꠈꠟ ꠇꠞꠤꠀ ꠘꠤꠎꠦ ꠢꠘꠅ ꠛꠡꠔ ꠇꠞꠟꠣ।)
DEU 2:13 ꠝꠥꠍꠣ ꠘꠛꠤꠄ ꠀꠞꠅ ꠇꠁꠟꠣ, “ꠛꠣꠖꠦ ꠝꠣꠛꠥꠖꠦ ꠢꠥꠇꠥꠝ ꠖꠤꠟꠣ, ꠔꠥꠝꠞꠣ ꠎꠟꠖꠤ ꠇꠞꠤ ꠞꠅꠀꠘꠣ ꠅꠅ, ꠀꠞ ꠎꠦꠞꠦꠖ ꠙꠣꠠꠤꠀ ꠈꠣꠟ ꠙꠣꠞ ꠅꠁꠀ ꠢꠙꠣꠞꠅ ꠎꠣꠅ। ꠔꠦꠃ ꠀꠝꠞꠣ ꠙꠣꠞ ꠅꠁꠟꠣꠝ।
DEU 2:14 ꠀꠞ ꠇꠣꠖꠦꠡ-ꠛꠞꠘꠦꠀ ꠕꠣꠇꠤ ꠛꠣꠞ ꠅꠁꠀ ꠢꠣꠞꠤ ꠎꠦꠞꠦꠖ ꠉꠥꠟ꠆ꠟꠣ ꠙꠣꠞ ꠅꠁꠀ ꠀꠁꠔꠦ ꠀꠝꠞꠣꠞ ꠀꠐꠔꠤꠡ ꠛꠍꠞ ꠟꠣꠉꠍꠤꠟ। ꠄꠞꠝꠣꠎꠦ ꠅꠃꠟꠣ ꠅꠁꠟ, ꠝꠣꠛꠥꠖꠦ ꠀꠉꠦ ꠇꠍꠝ ꠈꠣꠁꠀ ꠎꠦꠟꠣ ꠇꠁꠍꠟꠣ, ꠅꠃꠟꠣ ꠇꠣꠖꠦꠡ-ꠛꠞꠘꠦꠀ ꠕꠣꠇꠤ ꠛꠣꠞꠘꠤꠞ ꠇꠣꠟꠅ ꠀꠝꠞꠣꠞ ꠎꠔ ꠍꠤꠙꠣꠁ ꠀꠍꠟꠣ, ꠄꠞꠣ ꠢꠇꠟꠃ ꠅꠃ ꠀꠐꠔꠤꠡ ꠛꠍꠞꠦ ꠝꠞꠤꠉꠦꠟꠣ।
DEU 2:15 ꠛꠘꠤ ꠁꠍꠞꠣꠁꠟ ꠡꠝꠣꠎ ꠕꠣꠇꠤ ꠔꠣꠞꠣꠞꠦ ꠛꠤꠘꠣꠡ ꠇꠞꠣꠞ ꠀꠉ ꠙꠞ꠆ꠎꠘ꠆ꠔ ꠝꠣꠛꠥꠖ ꠔꠣꠞꠣꠞ ꠛꠤꠙꠇ꠆ꠇꠦ ꠀꠍꠟꠣ।
DEU 2:16 “ꠅꠃ ꠢꠇꠟ ꠍꠤꠙꠣꠁ ꠝꠞꠤꠀ ꠡꠦꠡ ꠅꠁꠀ ꠢꠣꠞꠟꠦ,
DEU 2:17 ꠝꠣꠛꠥꠖꠦ ꠀꠝꠣꠞꠦ ꠇꠁꠟꠣ,
DEU 2:18 ꠀꠁꠎ ꠔꠥꠝꠞꠣ ꠝꠥꠀꠛꠤ ꠅꠇꠟꠞ ꠖꠦꠡꠞ ꠡꠤꠝꠣꠘꠣ ꠙꠣꠞ ꠅꠁꠛꠣꠄ, ꠔꠣꠞꠣꠞ ꠞꠣꠎꠗꠣꠘꠤ ꠀꠃꠞ ꠐꠣꠃꠘꠞ ꠇꠣꠘ꠆ꠖꠣꠛꠣꠄ ꠎꠣꠁꠛꠣꠄ।
DEU 2:19 ꠅꠁꠟꠦ ꠔꠥꠝꠞꠣ ꠎꠦꠛꠟꠣ ꠛꠘꠤ-ꠀꠝ꠆ꠝꠣꠘ ꠖꠦꠡꠞ ꠇꠣꠍꠣꠔ ꠎꠣꠁꠛꠣꠄꠉꠤ, ꠉꠤꠀ ꠔꠣꠞꠣꠞꠦ ꠍꠣꠔꠣꠁꠅ ꠘꠣ, ꠔꠣꠞꠣꠞꠦ ꠎꠥꠖ꠆ꠖꠞ ꠜꠣꠛ-ꠡꠣꠛ ꠖꠦꠈꠣꠁꠅ ꠘꠣ। ꠝꠘꠅ ꠞꠣꠈꠤꠅ, ꠔꠣꠞꠣꠞ ꠖꠦꠡꠞ ꠇꠥꠘꠥ ꠎꠣꠉꠣꠃ ꠀꠝꠤ ꠔꠥꠝꠞꠣꠞꠦ ꠖꠤꠔꠣꠝ ꠘꠣꠄ, ꠁꠈꠣꠘꠞ ꠝꠣꠟꠤꠇꠣꠘꠣ ꠔ ꠀꠝꠤ ꠟꠥꠔ ꠘꠛꠤꠞ ꠀꠅꠟꠣꠖ ꠛꠘꠤ-ꠀꠝ꠆ꠝꠣꠘꠞꠦ ꠖꠤꠟꠣꠁꠍꠤ।”
DEU 2:20 (ꠀꠉꠦ ꠞꠚꠣꠄꠁ ꠅꠇꠟ ꠅꠘꠅ ꠞꠁꠔꠣ, ꠄꠞꠟꠣꠉꠤ ꠁꠈꠣꠘꠞꠦ ꠞꠚꠣꠄꠁ ꠅꠇꠟꠞ ꠖꠦꠡ ꠇꠁꠀ ꠒꠣꠇꠣ ꠅꠁꠔ। ꠀꠞ ꠛꠘꠤ-ꠀꠝ꠆ꠝꠣꠘꠦ ꠁꠔꠣꠞꠦ ꠎꠣꠝ-ꠎꠣꠝꠤꠝꠤ ꠇꠁꠀ ꠒꠣꠇꠤꠔꠣ।
DEU 2:21 ꠞꠚꠣꠄꠁ ꠎꠣꠔꠤ ꠙꠄꠟꠥꠀꠘ ꠀꠍꠟꠣ, ꠖꠦꠈꠔꠦ ꠀꠘꠣꠇꠤ ꠎꠣꠔꠤꠞ ꠟꠣꠈꠣꠘ ꠃꠌꠣ-ꠝꠥꠐꠣ ꠟꠣꠝ꠆ꠛꠣ ꠀꠞ ꠙꠞꠤꠝꠣꠘꠦꠅ ꠛꠃꠔ ꠛꠦꠡꠤ ꠀꠍꠟꠣ। ꠝꠣꠛꠥꠖꠦ ꠛꠘꠤ-ꠀꠝ꠆ꠝꠣꠘ ꠎꠣꠔꠤꠞ ꠀꠔꠅ ꠁꠔꠣꠞꠦ ꠛꠤꠘꠣꠡ ꠇꠞꠣꠁꠟꠣ, ꠛꠘꠤ-ꠀꠝ꠆ꠝꠣꠘꠦ ꠞꠚꠣꠄꠁ ꠎꠣꠔꠤꠞꠦ ꠈꠦꠖꠣꠁ ꠖꠤꠀ ꠅꠃ ꠖꠦꠡ ꠖꠈꠟ ꠇꠞꠟꠣ।
DEU 2:22 ꠝꠣꠛꠥꠖꠦ ꠁꠡʼꠞ ꠀꠅꠟꠣꠖ ꠅꠇꠟꠞꠦꠖꠤ ꠅꠃ ꠄꠇꠁ ꠇꠣꠝ ꠇꠞꠣꠁꠟꠣ, ꠔꠣꠁꠘ ꠄꠞꠣꠞ ꠀꠔꠅ ꠢꠥꠞꠤꠅ ꠎꠣꠔꠤꠞꠦ ꠛꠤꠘꠣꠡ ꠇꠞꠟꠣ। ꠄꠞꠣ ꠢꠥꠞꠤꠅ ꠅꠇꠟꠞꠦ ꠈꠦꠖꠣꠁꠀ ꠖꠤꠀ, ꠔꠣꠞꠣꠞ ꠍꠦꠁꠞ ꠖꠦꠡ ꠖꠈꠟ ꠇꠞꠤꠀ ꠛꠡꠔ ꠇꠞꠞꠣ।
DEU 2:23 ꠄꠞꠝꠣꠎꠦ ꠇꠙ꠆ꠔꠥꠞ ꠖꠤꠙ ꠕꠣꠇꠤ ꠇꠙ꠆ꠔꠥꠞꠤ ꠎꠣꠔꠤꠄ ꠀꠁꠀ ꠅꠛ꠆ꠛꠤ ꠎꠣꠔꠤꠞꠦ ꠛꠤꠘꠣꠡ ꠇꠞꠟꠣ, ꠔꠣꠞꠣꠞ ꠝꠣꠐꠤꠞꠦ ꠖꠈꠟ ꠇꠞꠤꠀ ꠛꠡꠔ ꠇꠞꠟꠣ। ꠅꠃ ꠅꠛ꠆ꠛꠤ ꠅꠇꠟ ꠉꠣꠎꠣ ꠐꠣꠃꠘꠞ ꠗꠣꠞꠅ ꠛꠡꠔ ꠇꠞꠔꠣ, ꠢꠘꠞ ꠢꠇꠟ ꠉꠣꠃ-ꠉꠦꠞꠣꠝꠅ ꠔꠣꠞꠣ ꠞꠁꠔꠣ।)
DEU 2:24 “ꠄꠞꠛꠣꠖꠦ ꠝꠣꠛꠥꠖꠦ ꠇꠁꠍꠟꠣ, ꠅ ꠛꠘꠤ ꠁꠍꠞꠣꠁꠟ, ꠔꠥꠝꠞꠣ ꠛꠣꠞ ꠅꠅ, ꠛꠣꠞ ꠅꠁꠀ ꠅꠞꠘꠘ ꠈꠣꠟꠞ ꠢꠙꠣꠞꠅ ꠎꠣꠅ। ꠢꠥꠘꠅ, ꠀꠝꠥꠞꠤ ꠎꠣꠔꠤꠞ ꠛꠣꠖꠡꠣ ꠍꠤꠢꠥꠘ ꠀꠞ ꠔꠣꠞ ꠢꠤꠡꠛꠘ ꠖꠦꠡꠞꠦ ꠀꠝꠤ ꠔꠥꠝꠞꠣꠞ ꠀꠔꠅ ꠡꠙꠤ ꠖꠤꠍꠤ। ꠁꠈꠣꠘ ꠖꠈꠟ ꠇꠞꠣꠔ ꠉꠤꠀ ꠛꠣꠖꠡꠣꠞꠦ ꠎꠥꠖ꠆ꠖꠞ ꠚꠤꠟꠒꠅ ꠟꠣꠝꠣꠅ,
DEU 2:25 ꠔꠦꠃ ꠖꠦꠈꠛꠣꠄ, ꠀꠝꠤ ꠝꠣꠛꠥꠖꠦ ꠀꠁꠎ ꠕꠣꠇꠤ ꠎꠉꠔꠞ ꠢꠇꠟ ꠎꠣꠔꠤꠞ ꠖꠤꠟꠅ ꠒꠞ ꠢꠣꠞꠣꠁ ꠖꠤꠝꠥ, ꠔꠥꠝꠞꠣꠞ ꠒꠞꠦ ꠔꠣꠞꠣ ꠇꠣꠙꠤꠛꠣ। ꠔꠥꠝꠞꠣꠞ ꠀꠅꠀꠎ ꠢꠥꠘꠟꠦꠃ ꠔꠣꠞꠣꠞ ꠎꠣꠘꠅ ꠗꠠꠚꠠ ꠡꠥꠞꠥ ꠅꠁꠛ।”
DEU 2:26 ꠝꠥꠍꠣ ꠘꠛꠤꠄ ꠛꠘꠤ ꠁꠍꠞꠣꠁꠟꠞꠦ ꠀꠞꠅ ꠇꠁꠟꠣ, “ꠛꠣꠖꠦ ꠀꠝꠤ ꠡꠣꠘ꠆ꠔꠤ-ꠌꠥꠇ꠆ꠔꠤ ꠇꠞꠣꠞ ꠈꠤꠀꠟꠦ ꠈꠣꠖꠤꠝꠥꠔ ꠝꠞꠥꠜꠥꠝꠤ ꠕꠣꠇꠤ ꠢꠤꠡꠛꠘꠞ ꠛꠣꠖꠡꠣ ꠍꠤꠢꠥꠘꠞ ꠉꠦꠍꠦ ꠈꠛꠞꠤꠀ ꠙꠣꠑꠣꠁꠟꠣꠝ, ꠇꠁꠟꠣꠝ,
DEU 2:27 ꠀꠝꠞꠣ ꠀꠙꠘꠣꠞ ꠖꠦꠡꠞ ꠜꠤꠔꠞꠦꠖꠤ ꠙꠣꠞ ꠅꠁꠀ ꠎꠣꠁꠔꠣꠝ ꠌꠣꠁ, ꠅꠘꠥꠝꠔꠤ ꠖꠤꠛꠣ ꠘꠤ? ꠀꠝꠞꠣ ꠀꠔꠣꠞꠦ-ꠚꠣꠔꠣꠞꠦ ꠇꠥꠘꠥꠛꠣꠄ ꠎꠣꠁꠔꠣꠝ ꠘꠣꠄ, ꠈꠣꠟꠤ ꠝꠥꠟ ꠡꠠꠇꠦꠖꠤ ꠀꠐꠤꠀ ꠎꠣꠁꠝꠥ।
DEU 2:28 ꠀꠝꠞꠣ ꠘꠉꠖ ꠐꠦꠇꠣꠖꠤ ꠀꠙꠘꠣꠞ ꠉꠦꠍ ꠕꠣꠇꠤ ꠈꠣꠘꠤ-ꠈꠥꠞꠣꠇꠤ ꠛꠣ ꠙꠣꠘꠤꠅ ꠈꠞꠤꠖ ꠇꠞꠤꠀ ꠈꠣꠁꠝꠥ। ꠀꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠀꠝꠞꠣꠞꠦ ꠎꠦ ꠖꠦꠡꠈꠣꠘ ꠖꠤꠔꠣ ꠌꠣꠁꠞꠣ, ꠎꠞ꠆ꠖꠣꠘ ꠉꠣꠋ ꠙꠣꠞ ꠅꠁꠀ ꠢꠃ ꠖꠦꠡꠅ ꠎꠣꠁꠛꠣꠞ ꠀꠉ ꠙꠞ꠆ꠎꠘ꠆ꠔ, ꠀꠙꠘꠣꠞ ꠖꠦꠡꠞ ꠃꠙꠞꠦꠖꠤ ꠀꠝꠞꠣꠞꠦ ꠀꠐꠤꠀ ꠎꠣꠁꠔꠦ ꠖꠦꠃꠇ꠆ꠇꠣ। ꠍꠦꠁꠞꠞ ꠙꠣꠠꠤꠀ ꠄꠟꠣꠇꠣꠞ ꠛꠣꠡꠤꠘ꠆ꠖꠣ ꠁꠡʼꠞ ꠀꠅꠟꠣꠖ ꠅꠇꠟꠦ, ꠀꠞ ꠀꠃꠞ ꠐꠣꠃꠘꠞ ꠛꠣꠡꠤꠘ꠆ꠖꠣ ꠝꠥꠀꠛꠤ ꠅꠇꠟꠦꠅ ꠀꠝꠞꠣꠞꠦ ꠅꠟꠣ ꠙꠣꠞ ꠅꠁꠔꠦ ꠖꠤꠍꠂꠘ।
DEU 2:30 “ꠅꠁꠟꠦ ꠢꠤꠡꠛꠘꠞ ꠛꠣꠖꠡꠣ ꠍꠤꠢꠥꠘ ꠞꠣꠎꠤ ꠅꠁꠟ ꠘꠣ, ꠀꠝꠞꠣꠞꠦ ꠎꠣꠁꠔꠦ ꠖꠤꠟ ꠘꠣ। ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄꠃ ꠔꠣꠞ ꠖꠤꠟꠞꠦ ꠙꠣꠡꠣꠘ ꠛꠣꠘꠣꠁꠟ꠆ꠟꠣ, ꠔꠣꠞ ꠝꠘꠞ ꠜꠣꠛ ꠟꠥꠀꠞ ꠟꠣꠈꠣꠘ ꠅꠁꠉꠦꠟ, ꠎꠣꠔꠦ ꠔꠥꠝꠞꠣꠞ ꠀꠔꠅ ꠔꠣꠞ ꠛꠤꠘꠣꠡ ꠅꠄ, ꠀꠞ ꠑꠤꠇꠃ ꠅꠟꠣ ꠅꠁꠟ।
DEU 2:31 ꠔꠦꠃ ꠝꠣꠛꠥꠖꠦ ꠀꠝꠣꠞꠦ ꠇꠁꠟꠣ, ꠅ ꠝꠥꠍꠣ, ꠍꠤꠢꠥꠘ ꠀꠞ ꠔꠣꠞ ꠛꠣꠖꠡꠣꠁꠞꠦ ꠀꠝꠤ ꠔꠥꠝꠣꠞ ꠀꠔꠅ ꠡꠙꠤ ꠖꠤꠟꠣꠝ। ꠅꠈꠘ ꠔꠥꠝꠤ ꠢꠘꠅ ꠎꠣꠅ, ꠉꠤꠀ ꠅꠃ ꠖꠦꠡ ꠖꠈꠟꠦ ꠀꠘꠣꠔ ꠟꠣꠉꠅ, ꠀꠞ ꠢꠘꠅ ꠛꠡꠔ ꠇꠞꠅ।
DEU 2:32 “ꠔꠦꠃ ꠁꠀꠢꠣꠎ ꠄꠟꠣꠇꠣꠔ ꠍꠤꠢꠥꠘꠦ ꠔꠣꠞ ꠢꠇꠟ ꠍꠤꠙꠣꠁ ꠖꠟ ꠟꠁꠀ ꠀꠝꠞꠣꠞ ꠟꠉꠦ ꠟꠣꠠꠣꠁ ꠇꠞꠣꠔ ꠀꠁꠟ,
DEU 2:33 ꠅꠃ ꠡꠝꠄ ꠀꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠔꠣꠞꠦ ꠀꠝꠞꠣꠞ ꠀꠔꠅ ꠚꠣꠟꠣꠁꠟꠣ। ꠀꠝꠞꠣ ꠛꠣꠖꠡꠣꠞꠦ, ꠔꠣꠞ ꠙꠥꠀꠂꠘ꠆ꠔꠞꠦ, ꠔꠣꠞ ꠍꠤꠙꠣꠁ ꠖꠟꠞꠦ ꠘꠤꠙꠣꠔ ꠇꠞꠟꠣꠝ।
DEU 2:34 ꠀꠞ ꠀꠝꠞꠣ ꠔꠣꠞ ꠢꠇꠟ ꠐꠣꠃꠘ, ꠉꠣꠃ-ꠉꠦꠞꠣꠝ ꠢꠇꠟꠔꠣ ꠖꠈꠟ ꠇꠞꠟꠣꠝ, ꠔꠣꠞꠣꠞ ꠢꠇꠟ ꠛꠦꠐꠣꠁꠘ-ꠛꠦꠐꠤꠘ ꠀꠞ ꠢꠥꠞꠥꠔ꠆ꠔꠣꠞꠦ ꠛꠤꠘꠣꠡ ꠇꠞꠟꠣꠝ। ꠄꠇꠎꠘꠅ ꠎꠤꠘ꠆ꠖꠣ ꠞꠁꠍꠦ ꠘꠣ।
DEU 2:35 ꠈꠣꠟꠤ ꠔꠣꠞꠣꠞ ꠙꠡꠥꠞ ꠙꠣꠟ ꠀꠞ ꠉꠘꠤꠝꠔꠞ ꠝꠣꠟ-ꠍꠣꠝꠣꠘꠣ ꠀꠝꠞꠣꠞ ꠟꠣꠉꠤ ꠀꠘꠟꠣꠝ।
DEU 2:36 ꠅꠞꠘꠘ ꠈꠣꠟꠞ ꠡꠤꠝꠣꠘꠣꠞ ꠀꠞꠥꠀꠞ ꠐꠣꠃꠘ, ꠀꠞ ꠅꠃ ꠄꠟꠣꠇꠣꠞ ꠄꠇ ꠉꠣꠃ ꠕꠣꠇꠤ ꠀꠞꠇ ꠉꠣꠃ ꠖꠈꠟ ꠇꠞꠤ ꠇꠞꠤ, ꠉꠤꠟꠤꠅꠖ ꠙꠞ꠆ꠎꠘ꠆ꠔ ꠇꠥꠘꠥ ꠎꠣꠉꠣ ꠀꠝꠞꠣꠞ ꠖꠈꠟꠞ ꠛꠣꠁꠞꠦ ꠞꠁꠟ ꠘꠣ। ꠀꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠁꠔꠣ ꠢꠇꠟꠔꠣ ꠀꠝꠞꠣꠞ ꠀꠔꠅ ꠖꠤꠟꠣ।
DEU 2:37 ꠈꠣꠟꠤ ꠛꠘꠤ-ꠀꠝ꠆ꠝꠣꠘ ꠎꠣꠔꠤꠞ ꠖꠦꠡ, ꠎꠣꠛ꠆ꠛꠥꠇ ꠙꠣꠠꠤꠀ ꠈꠣꠟꠞ ꠇꠣꠘ꠆ꠖꠣ-ꠇꠣꠍꠣꠞ ꠢꠇꠟ ꠎꠤꠟꠣ, ꠙꠣꠠꠞ ꠃꠙꠞꠞ ꠉꠣꠃ-ꠉꠦꠞꠣꠝ, ꠀꠞ ꠀꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠎꠦꠔꠣ ꠎꠣꠉꠣ ꠖꠈꠟ ꠇꠞꠔꠦ ꠘꠤꠡꠦꠗ ꠇꠞꠍꠂꠘ, ꠅꠃ ꠎꠣꠉꠣ ꠈꠣꠘꠣꠁꠘ ꠔꠥꠝꠞꠣꠞ ꠖꠈꠟꠞ ꠛꠣꠁꠞꠦ ꠞꠁꠟ।”
DEU 3:1 ꠢꠎꠞꠔ ꠝꠥꠍꠣꠄ ꠛꠘꠤ ꠁꠍꠞꠣꠁꠟꠞꠦ ꠀꠞꠅ ꠇꠁꠟꠣ, “ꠢꠤꠡꠛꠘ ꠖꠦꠡ ꠕꠣꠇꠤ ꠀꠝꠞꠣ ꠛꠣꠡꠘ ꠖꠦꠡꠅ ꠎꠣꠅꠀꠞ ꠙꠕꠦ ꠞꠅꠀꠘꠣ ꠅꠁꠟꠣꠝ। ꠛꠣꠡꠘꠞ ꠛꠣꠖꠡꠣ ꠃꠎꠦ ꠈꠛꠞ ꠙꠣꠁꠀ ꠎꠥꠖ꠆ꠖ ꠇꠞꠣꠞ ꠟꠣꠉꠤ ꠔꠣꠞ ꠢꠇꠟ ꠍꠤꠙꠣꠁ ꠖꠟ ꠟꠁꠀ ꠁꠖꠞꠤ ꠐꠣꠃꠘꠅ ꠀꠁꠟ।
DEU 3:2 ꠀꠞ ꠝꠣꠛꠥꠖꠦ ꠀꠝꠣꠞꠦ ꠇꠁꠟꠣ, ꠅ ꠝꠥꠍꠣ, ꠁ ꠛꠣꠖꠡꠣꠞꠦ ꠔꠥꠝꠤ ꠒꠞꠣꠁꠅ ꠘꠣ। ꠢꠥꠘꠅ, ꠀꠝꠤ ꠔꠣꠞꠦ, ꠔꠣꠞ ꠀꠡ꠆ꠔꠣ ꠖꠦꠡꠞꠦ, ꠔꠣꠞ ꠍꠤꠙꠣꠁ ꠖꠟꠞꠦ ꠔꠥꠝꠣꠞ ꠀꠔꠅ ꠔꠥꠟꠤꠀ ꠖꠤꠟꠣꠁꠍꠤ। ꠔꠥꠝꠤ ꠢꠤꠡꠛꠘ ꠖꠦꠡꠅ ꠀꠝꠥꠞꠤ ꠎꠣꠔꠤꠞ ꠛꠣꠖꠡꠣ ꠍꠤꠢꠥꠘꠞ ꠎꠦ ꠖꠡꠣ ꠊꠐꠣꠁꠍ, ꠅꠉꠥꠞꠦꠅ ꠅꠃꠟꠣ ꠇꠞꠤꠅ।
DEU 3:3 “ꠅꠃ ꠘꠝꠥꠘꠣꠄ ꠀꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠛꠣꠡꠘ ꠖꠦꠡꠞ ꠛꠣꠖꠡꠣ ꠃꠎꠞꠦ, ꠔꠣꠞ ꠢꠇꠟ ꠝꠣꠘꠡꠞꠦ ꠀꠝꠞꠣꠞ ꠀꠔꠅ ꠡꠝꠎꠣꠁ ꠖꠤꠟꠣ। ꠀꠝꠞꠣꠅ ꠁꠔꠣ ꠢꠇ꠆ꠇꠟꠐꠤꠞꠦ ꠛꠤꠘꠣꠡ ꠇꠞꠟꠣꠝ, ꠇꠥꠘꠥꠉꠥꠞꠦ ꠎꠤꠘ꠆ꠖꠣ ꠞꠣꠈꠍꠤ ꠘꠣ।
DEU 3:4 ꠀꠝꠞꠣ ꠔꠣꠞ ꠖꠦꠡꠞ ꠢꠇꠟ ꠉꠣꠃ-ꠉꠦꠞꠣꠝ, ꠐꠣꠃꠘ-ꠛꠘ꠆ꠖꠞ ꠖꠈꠟ ꠇꠞꠟꠣꠝ। ꠔꠣꠞꠣꠞ ꠡꠣꠁꠐ ꠈꠣꠘ ꠐꠣꠃꠘꠃ ꠖꠈꠟ ꠇꠞꠤꠟ꠆ꠟꠣꠝ, ꠇꠥꠘ꠆ꠔꠣ ꠛꠣꠖ ꠞꠁꠟ ꠘꠣ। ꠀꠡ꠆ꠔꠣ ꠅꠞꠉꠥꠛ ꠄꠟꠣꠇꠣ, ꠝꠣꠘꠤ ꠛꠣꠡꠘꠞ ꠛꠣꠖꠡꠣ ꠃꠎꠞ ꠙꠥꠞꠣ ꠛꠣꠖꠡꠣꠁ ꠀꠝꠞꠣꠞ ꠖꠈꠟꠅ ꠘꠤꠟꠣꠝꠉꠤ।
DEU 3:5 ꠅꠃ ꠐꠣꠃꠘ ꠅꠇꠟꠅ ꠃꠌꠣ ꠃꠌꠣ ꠅꠀꠟ ꠖꠤꠀ ꠛꠣꠃꠘ꠆ꠒꠞꠤ ꠇꠞꠣ ꠀꠍꠤꠟ, ꠁꠔꠣꠞ ꠉꠦꠁꠐꠅ ꠀꠍꠤꠟ ꠛꠠ ꠛꠠ ꠈꠤꠟ। ꠀꠞ ꠛꠣꠃꠘ꠆ꠒꠞꠤ ꠍꠣꠠꠣꠅ ꠛꠃꠔ ꠉꠣꠃ-ꠉꠦꠞꠣꠝ ꠀꠍꠤꠟ।
DEU 3:6 ꠀꠝꠞꠣ ꠢꠇꠟ ꠐꠣꠃꠘ ꠀꠞ ꠉꠣꠃ-ꠉꠦꠞꠣꠝꠞꠦ ꠄꠇ꠆ꠇꠦꠛꠣꠞꠦ ꠛꠤꠘꠣꠡ ꠇꠞꠍꠤ। ꠀꠉꠦ ꠢꠤꠡꠛꠘꠞ ꠛꠣꠖꠡꠣ ꠍꠤꠢꠥꠘꠞ ꠎꠦ ꠖꠡꠣ ꠊꠐꠣꠁꠍꠤ, ꠅꠈꠘ ꠛꠣꠡꠘ ꠖꠦꠡꠞ ꠛꠦꠐꠣꠁꠘ-ꠛꠦꠐꠤꠘ, ꠢꠥꠞꠥꠔ꠆ꠔꠣꠁꠘ, ꠢꠇꠟ ꠉꠣꠃ-ꠉꠦꠞꠣꠝ ꠀꠞ ꠐꠣꠃꠘꠞꠦꠅ ꠄꠇꠁ ꠟꠣꠈꠣꠘ ꠛꠤꠘꠣꠡ ꠇꠞꠍꠤ।
DEU 3:7 ꠅꠁꠟꠦ ꠔꠣꠞꠣꠞ ꠢꠇꠟ ꠙꠡꠥꠞ ꠙꠣꠟ ꠀꠞ ꠉꠘꠤꠝꠔꠞ ꠝꠣꠟ-ꠍꠣꠝꠣꠘꠣ ꠀꠝꠞꠣ ꠟꠁꠀ ꠀꠁꠍꠤ।
DEU 3:8 “ꠀꠝꠞꠣ ꠅꠃ ꠡꠝꠄ ꠎꠞ꠆ꠖꠣꠘ ꠉꠣꠋꠉꠞ ꠙꠥꠛ ꠙꠣꠞꠞ ꠀꠝꠥꠞꠤ ꠎꠣꠔꠤꠞ ꠖꠥꠁꠅ ꠛꠣꠖꠡꠣꠞ ꠖꠈꠟꠞ, ꠅꠞꠘꠘ ꠈꠣꠟ ꠕꠣꠇꠤ ꠢꠞ꠆ꠝꠥꠘ ꠙꠣꠠ ꠙꠞ꠆ꠎꠘ꠆ꠔ ꠇꠛꠎꠣ ꠇꠞꠍꠟꠣꠝ।
DEU 3:9 (ꠍꠤꠖꠘꠞ ꠝꠣꠘꠡꠦ ꠅꠃ ꠢꠞ꠆ꠝꠥꠘ ꠄꠟꠣꠇꠣꠞꠦ ꠍꠤꠞꠤꠅꠘ ꠇꠁꠀ ꠒꠣꠇꠂꠘ, ꠀꠞ ꠀꠝꠥꠞꠤ ꠎꠣꠔꠤꠄ ꠇꠂꠘ ꠍꠘꠤꠞ।)
DEU 3:10 ꠙꠣꠠꠤꠀ ꠄꠟꠣꠇꠣꠞ ꠅꠃ ꠕꠟ ꠎꠣꠉꠣꠞ ꠢꠇꠟ ꠐꠣꠃꠘ ꠀꠞ ꠉꠣꠃ-ꠉꠦꠞꠣꠝ, ꠀꠡ꠆ꠔꠣ ꠉꠤꠟꠤꠅꠖ ꠄꠟꠣꠇꠣ, ꠛꠣꠖꠡꠣ ꠃꠎꠞ ꠍꠥꠟꠈꠣ ꠀꠞ ꠁꠖꠞꠤ ꠐꠣꠃꠘ ꠡꠢ ꠀꠡ꠆ꠔꠣ ꠛꠣꠡꠘ ꠖꠦꠡꠞꠦ ꠀꠝꠞꠣ ꠖꠈꠟ ꠇꠞꠟꠣꠝ।”
DEU 3:11 (ꠙꠥꠞꠣ ꠞꠚꠣꠄꠁ ꠎꠣꠔꠤꠞ ꠝꠣꠎꠦ ꠈꠣꠟꠤ ꠛꠣꠡꠘ ꠖꠦꠡꠞ ꠛꠣꠖꠡꠣ ꠃꠎ ꠎꠤꠔꠣ ꠞꠁꠍꠟꠣ। ꠅꠃ ꠛꠣꠖꠡꠣ ꠟꠥꠀꠞ ꠙꠣꠟꠋꠉꠅ ꠢꠥꠔꠤꠔꠣ, ꠁꠈꠣꠘ ꠟꠣꠝ꠆ꠛꠣꠄ ꠘꠄ ꠀꠔ ꠀꠞ ꠚꠣꠠꠦ ꠌꠣꠁꠞ ꠀꠔ। ꠛꠘꠤ-ꠀꠝ꠆ꠝꠣꠘ ꠎꠣꠔꠤꠞ ꠞꠣꠛ꠆ꠛꠣ ꠐꠣꠃꠘꠅ ꠁꠈꠣꠘ ꠅꠈꠘꠅ ꠕꠅꠀ ꠀꠍꠦ।)
DEU 3:12 ꠢꠎꠞꠔ ꠝꠥꠍꠣꠄ ꠀꠞꠅ ꠇꠁꠞꠣ, “ꠀꠝꠞꠣꠞ ꠖꠈꠟ ꠇꠞꠣ ꠅꠞꠘꠘ ꠈꠣꠟꠞ ꠙꠣꠞꠅ ꠀꠞꠥꠀꠞ ꠐꠣꠃꠘꠞ ꠛꠣꠁꠞꠞ ꠃꠔꠞꠞ ꠄꠟꠣꠇꠣ, ꠀꠞ ꠙꠣꠠꠤꠀ ꠉꠤꠟꠤꠅꠖ ꠄꠟꠣꠇꠣꠞ ꠅꠞ꠆ꠗꠦꠇ ꠎꠣꠉꠣ, ꠢꠘꠞ ꠢꠇꠟ ꠐꠣꠃꠘ ꠀꠞ ꠉꠣꠃ-ꠉꠦꠞꠣꠝ ꠅꠇꠟ, ꠛꠘꠤ ꠁꠍꠞꠣꠁꠟꠞ ꠞꠥꠛꠦꠘ ꠀꠞ ꠍꠣꠖꠥ ꠈꠣꠘ꠆ꠖꠣꠘꠞꠦ ꠖꠤꠟꠣꠁꠟꠣꠝ।
DEU 3:13 ꠉꠤꠟꠤꠅꠖ ꠖꠦꠡꠞ ꠛꠣꠇꠤ ꠅꠋꠡ ꠀꠞ ꠛꠣꠖꠡꠣ ꠃꠎꠞ ꠉꠦꠍ ꠕꠣꠇꠤ ꠀꠘꠣ ꠀꠡ꠆ꠔꠣ ꠛꠣꠡꠘ ꠖꠦꠡꠞꠦ ꠀꠝꠤ ꠝꠣꠘꠡꠣ ꠈꠣꠘ꠆ꠖꠣꠘꠞ ꠅꠞ꠆ꠗꠦꠇ ꠝꠣꠘꠡꠞꠦ ꠖꠤꠟꠣꠝ।” (ꠛꠣꠡꠘ ꠖꠦꠡꠞ ꠀꠡ꠆ꠔꠣ ꠅꠞꠉꠥꠛ ꠄꠟꠣꠇꠣꠞꠦ ꠞꠚꠣꠄꠁ ꠎꠣꠔꠤꠞ ꠖꠦꠡ ꠇꠁꠀ ꠒꠣꠇꠣ ꠅꠁꠔ।
DEU 3:14 ꠝꠣꠘꠡꠣ ꠈꠣꠘ꠆ꠖꠣꠘꠞ ꠄꠇ ꠎꠘꠞ ꠘꠣꠝ ꠀꠍꠤꠟ ꠎꠣꠄꠁꠞ, ꠢꠦ ꠀꠡ꠆ꠔꠣ ꠅꠞꠉꠥꠛ ꠄꠟꠣꠇꠣ ꠝꠣꠘꠤ, ꠉꠡꠥꠞꠤ ꠀꠞ ꠝꠣꠈꠣꠔꠤ ꠎꠣꠔꠤꠞ ꠡꠤꠝꠣꠘꠣ ꠙꠞ꠆ꠎꠘ꠆ꠔ ꠖꠈꠟ ꠇꠞꠤꠀ ꠔꠣꠞ ꠘꠤꠎꠞ ꠘꠣꠝꠞ ꠝꠤꠟꠦ ꠅꠃ ꠛꠣꠡꠘ ꠖꠦꠡꠞ ꠘꠣꠝ ꠖꠤꠟ ꠢꠣꠛ꠆ꠛꠥꠔ-ꠎꠣꠄꠁꠞ। ꠄꠞꠟꠣꠉꠤ ꠅꠈꠘꠅ ꠁꠈꠣꠘꠞꠦ ꠅꠃ ꠘꠣꠝꠦ ꠒꠣꠇꠣ ꠅꠄ।)
DEU 3:15 “ꠀꠞ ꠉꠤꠟꠤꠅꠖꠞ ꠙꠣꠠꠤꠀ ꠄꠟꠣꠇꠣ ꠀꠝꠤ ꠝꠣꠈꠤꠞꠞꠦ ꠖꠤꠟꠣꠝ।
DEU 3:16 ꠅꠁꠟꠦ ꠉꠤꠟꠤꠅꠖ ꠕꠣꠇꠤ ꠅꠞꠘꠘꠞ ꠙꠣꠠꠤꠀ ꠈꠣꠟꠞ ꠝꠣꠎꠣꠝꠣꠎꠤ ꠙꠞ꠆ꠎꠘ꠆ꠔ ꠢꠇꠟ ꠎꠣꠉꠣ, ꠀꠞ ꠢꠘ ꠕꠣꠇꠤ ꠛꠘꠤ-ꠀꠝ꠆ꠝꠣꠘ ꠎꠣꠔꠤꠞ ꠡꠤꠝꠣꠘꠣ ꠎꠣꠛ꠆ꠛꠥꠇ ꠈꠣꠟ ꠙꠞ꠆ꠎꠘ꠆ꠔ ꠀꠝꠤ ꠞꠥꠛꠦꠘ ꠀꠞ ꠍꠣꠖꠥ ꠈꠣꠘ꠆ꠖꠣꠘꠞꠦ ꠖꠤꠟꠣꠝ।
DEU 3:17 ꠔꠣꠞꠣꠞ ꠖꠦꠡꠞ ꠙꠁꠌꠝꠞ ꠡꠤꠝꠣꠘꠣ ꠀꠍꠤꠟ, ꠀꠞꠣꠛꠣ ꠝꠞꠥꠜꠥꠝꠤꠔ ꠎꠞ꠆ꠖꠣꠘ ꠉꠣꠋꠉꠞ ꠎꠦ ꠅꠋꠡ ꠉꠣꠟꠤꠟ ꠀꠅꠞꠞ ꠗꠣꠞꠦꠖꠤ, ꠙꠤꠍꠉꠣ ꠘꠣꠝꠞ ꠙꠣꠠꠤꠀ ꠄꠟꠣꠇꠣꠞ ꠀꠞꠣꠛꠣ ꠡꠣꠉꠞ ꠛꠣ ꠟꠥꠘꠣ ꠡꠣꠉꠞ ꠙꠞ꠆ꠎꠘ꠆ꠔ ꠉꠦꠍꠦ, ꠅꠃ ꠎꠣꠉꠣ।
DEU 3:18 “ꠅꠃ ꠎꠣꠉꠣ ꠅꠈꠘꠣꠁꠘ ꠡꠝꠎꠣꠁ ꠖꠤꠀ ꠔꠣꠞꠣꠞꠦ ꠇꠁꠟꠣꠝ, ꠁꠈꠘꠣꠁꠘ ꠜꠥꠉ-ꠖꠈꠟ ꠇꠞꠣꠞ ꠟꠣꠉꠤ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠔꠥꠝꠞꠣꠞꠦ ꠖꠤꠍꠂꠘ। ꠅꠁꠟꠦ ꠔꠥꠝꠞꠣꠞ ꠎꠦꠔꠣ ꠛꠦꠐꠣꠁꠘ꠆ꠔꠞ ꠡꠞꠤꠟꠅ ꠛꠟ ꠀꠍꠦ, ꠎꠦꠞꠣ ꠎꠥꠖ꠆ꠖ ꠇꠞꠣꠞ ꠟꠣꠈ, ꠄꠞꠣ ꠎꠥꠁꠔ-ꠎꠣꠁꠔ ꠅꠁꠀ ꠛꠘꠤ ꠁꠍꠞꠣꠁꠟꠞ ꠀꠉꠦ ꠉꠤꠀ ꠉꠣꠋ ꠙꠣꠞ ꠅꠅ।
DEU 3:19 ꠅꠁꠟꠦ ꠔꠥꠝꠞꠣꠞꠦ ꠖꠦꠅꠀ ꠐꠣꠃꠘ ꠀꠞ ꠉꠣꠃ-ꠉꠦꠞꠣꠝꠅ ꠔꠥꠝꠞꠣꠞ ꠛꠃ, ꠙꠥꠀ-ꠙꠥꠠꠤꠘ ꠀꠞ ꠉꠞꠥ-ꠍꠣꠉꠟ ꠢꠇꠟꠔꠣ ꠞꠁꠛꠣ। ꠀꠝꠤ ꠎꠣꠘꠤ ꠔꠥꠝꠞꠣꠞ ꠛꠃꠔ ꠙꠡꠥ ꠀꠍꠂꠘ।
DEU 3:20 ꠛꠣꠖꠦ ꠝꠣꠛꠥꠖꠦ ꠎꠦꠛꠟꠣ ꠔꠥꠝꠞꠣꠞ ꠎꠣꠔꠤꠞ ꠜꠣꠁꠀꠁꠘꠞꠦ ꠔꠥꠝꠞꠣꠞ ꠟꠣꠈꠣꠘ ꠀꠞꠣꠝꠞ ꠎꠣꠉꠣ ꠖꠤꠟꠣꠁꠛꠣ, ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠎꠞ꠆ꠖꠣꠘ ꠉꠣꠋꠉꠞ ꠢꠙꠣꠞꠅ ꠔꠣꠞꠣꠞꠦ ꠎꠦ ꠖꠦꠡ ꠖꠣꠘ ꠇꠞꠞꠣ, ꠅꠈꠣꠘꠞ ꠖꠈꠟ ꠙꠣꠁꠀ ꠢꠣꠞꠟꠦ, ꠔꠥꠝꠞꠣ ꠢꠤꠞꠛꠣꠞ ꠀꠝꠣꠞ ꠖꠦꠅꠀ ꠅꠃ ꠎꠣꠉꠣꠔ ꠚꠤꠞꠤꠀ ꠀꠁꠅ।”
DEU 3:21 ꠢꠎꠞꠔ ꠝꠥꠍꠣꠄ ꠔꠣꠞꠣꠞꠦ ꠇꠁꠞꠣ, “ꠅꠃ ꠡꠝꠄ ꠀꠝꠤ ꠁꠃꠍꠣꠞꠦ ꠇꠁꠟꠣꠝ, ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠅꠃ ꠖꠥꠁꠅ ꠛꠣꠖꠡꠣꠞ ꠇꠥꠘ ꠖꠡꠣ ꠊꠐꠣꠁꠍꠂꠘ, ꠁꠔꠣ ꠔ ꠘꠤꠎꠞ ꠌꠃꠈꠦ ꠖꠦꠈꠍ। ꠔꠦ ꠅꠈꠘ ꠎꠞ꠆ꠖꠣꠘ ꠙꠣꠞ ꠅꠁꠀ ꠔꠥꠝꠞꠣ ꠎꠔ ꠖꠦꠡꠣꠁꠘ꠆ꠔꠅ ꠎꠣꠁꠞꠣꠄ, ꠝꠣꠛꠥꠖꠦ ꠁꠔꠣ ꠢꠇ꠆ꠇꠟ ꠖꠦꠡꠣꠁꠘ꠆ꠔꠞ ꠖꠡꠣꠅ ꠅꠃ ꠟꠣꠈꠣꠘ ꠊꠐꠣꠁꠛꠣ।
DEU 3:22 ꠄꠞꠟꠣꠉꠤ ꠔꠥꠝꠞꠣ ꠁꠔꠣꠞꠦ ꠒꠞꠣꠁꠅ ꠘꠣ, ꠡ꠆ꠛꠄꠅꠋ ꠀꠟ꠆ꠟꠣ ꠝꠣꠛꠥꠖ ꠔꠥꠝꠞꠣꠞ ꠙꠇ꠆ꠇ ꠅꠁꠀ ꠔꠣꠞꠣꠞ ꠟꠉꠦ ꠎꠥꠖ꠆ꠖ ꠇꠞꠛꠣ।
DEU 3:23 “ꠀꠞ ꠅꠃ ꠡꠝꠄ ꠀꠝꠤ ꠝꠣꠛꠥꠖꠞ ꠖꠞꠛꠣꠞꠅ ꠀꠞꠎ ꠇꠞꠟꠣꠝ,
DEU 3:24 ꠅ ꠝꠣꠛꠥꠖ ꠝꠃꠟꠣ, ꠔꠥꠝꠣꠞ ꠉꠥꠟꠣꠝꠞꠦ ꠔ ꠅꠈꠘꠃ ꠖꠦꠈꠣꠘꠤ ꠗꠞꠍ, ꠔꠥꠝꠤ ꠇꠔ ꠝꠢꠣꠘ ꠀꠞ ꠇꠔ ꠛꠟꠛꠣꠘ। ꠔꠥꠝꠤ ꠅꠃ ꠎꠔꠔꠣ ꠇꠞꠍ, ꠁꠔꠣ ꠇꠞꠣꠞ ꠡꠣꠁꠖ꠆ꠖ ꠇꠣꠞ ꠀꠍꠦ, ꠀꠍꠝꠣꠘꠅ ꠛꠣ ꠎꠝꠤꠘꠞ ꠇꠥꠘꠥ ꠖꠦꠛꠔꠣꠞ ꠔꠣꠇ꠆ꠇꠔ ꠀꠍꠦ ꠘꠤ, ꠔꠥꠝꠣꠞ ꠟꠣꠈꠣꠘ ꠖꠣꠙꠐ ꠖꠦꠈꠣꠁꠔ?
DEU 3:25 ꠝꠃꠟꠣ ꠉ, ꠀꠝꠣꠞ ꠛꠠ ꠡꠈ ꠅꠁꠟ, ꠎꠞ꠆ꠖꠣꠘ ꠉꠣꠋꠉꠞ ꠢꠙꠣꠞꠅ ꠉꠤꠀ ꠔꠥꠝꠣꠞ ꠅꠀꠖꠣ ꠇꠞꠣ ꠅꠃ ꠡꠥꠘ꠆ꠖꠞ ꠙꠣꠠꠤꠀ ꠄꠟꠣꠇꠣ ꠀꠞ ꠟꠦꠛꠣꠘꠘ ꠖꠦꠡ ꠖꠦꠈꠔꠣꠝ, ꠝꠦꠢꠦꠞꠛꠣꠘꠤ ꠇꠞꠤ ꠎꠣꠁꠔꠦ ꠖꠤꠛꠣ ꠘꠤ?
DEU 3:26 ꠅꠁꠟꠦ ꠝꠣꠛꠥꠖꠦ ꠘꠣ ꠇꠞꠟꠣ, ꠔꠣꠁꠘ ꠀꠝꠣꠞ ꠀꠞꠎꠤ ꠢꠥꠘꠟꠣ ꠘꠣ, ꠔꠥꠝꠞꠣꠞ ꠇꠣꠞꠘꠦꠃ ꠔꠣꠁꠘ ꠀꠝꠣꠞ ꠃꠙꠞꠦ ꠘꠣꠞꠣꠎ ꠀꠍꠟꠣ। ꠝꠣꠛꠥꠖꠦ ꠎꠥꠀꠙ ꠖꠤꠟꠣ, ꠔꠥꠝꠤ ꠛꠃꠔ ꠇꠁꠍ, ꠁ ꠛꠦꠙꠣꠞꠦ ꠀꠞ ꠝꠣꠋꠉꠤꠅ ꠘꠣ।
DEU 3:27 ꠀꠁꠌ꠆ꠍꠣ, ꠔꠥꠝꠤ ꠅꠃ ꠙꠤꠍꠉꠣ ꠐꠤꠟ꠆ꠟꠣꠞ ꠃꠙꠞꠦ ꠃꠑꠅ, ꠃꠑꠤꠀ ꠃꠔꠞꠦ-ꠖꠃꠇꠘꠦ ꠀꠞ ꠙꠥꠛꠦ-ꠙꠁꠌꠝꠦ ꠌꠃꠈ ꠚꠣꠟꠣꠅ। ꠎꠞ꠆ꠖꠣꠘ ꠉꠣꠋ ꠙꠣꠞꠘꠤ ꠘꠤꠡꠦꠗ ꠅꠁꠟꠦꠅ, ꠅꠘ ꠕꠣꠇꠤ ꠃꠛꠣꠁꠀ ꠢꠃ ꠖꠦꠡꠞꠦ ꠖꠦꠈꠤꠟꠣꠅ।
DEU 3:28 ꠀꠞ ꠔꠥꠝꠣꠞ ꠈꠣꠖꠤꠝ ꠁꠃꠍꠣꠞꠦ ꠢꠤꠇꠣꠁ ꠖꠦꠅ, ꠇꠤꠔꠣ ꠇꠤꠔꠣ ꠇꠞꠣ ꠟꠣꠉꠛ। ꠔꠣꠞ ꠢꠤꠝ꠆ꠝꠔ ꠛꠣꠠꠣꠅ, ꠜꠤꠔꠞꠦ ꠡꠣꠅꠡ ꠖꠦꠅ, ꠇꠣꠞꠘ ꠢꠇꠟ ꠝꠣꠘꠡꠞ ꠀꠉꠦ ꠞꠁꠀ ꠢꠦ ꠉꠣꠋ ꠙꠣꠞ ꠇꠞꠣꠁꠛ, ꠀꠞ ꠔꠥꠝꠤ ꠅꠘ ꠕꠣꠇꠤ ꠎꠦ ꠖꠦꠡ ꠖꠦꠈꠞꠣꠄ, ꠢꠦ ꠄꠞꠣꠞꠦꠖꠤ ꠅꠃ ꠖꠦꠡ ꠖꠈꠟ ꠇꠞꠣꠁꠛ।
DEU 3:29 ꠅꠈꠣꠘ ꠢꠥꠘꠤꠀ ꠀꠝꠞꠣ ꠛꠣꠄꠔ-ꠙꠤꠃꠞꠞ ꠍꠣꠝꠘꠞ ꠘꠤꠌꠣ ꠎꠣꠉꠣꠔ ꠞꠁꠉꠦꠟꠣꠝ।”
DEU 4:1 ꠢꠎꠞꠔ ꠝꠥꠍꠣꠄ ꠔꠣꠞꠣꠞꠦ ꠇꠁꠟꠣ, “ꠅ ꠛꠘꠤ ꠁꠍꠞꠣꠁꠟ, ꠀꠝꠤ ꠅꠈꠘ ꠎꠦ ꠡꠞꠤꠅꠔ ꠀꠞ ꠢꠥꠇꠥꠝ-ꠀꠢꠇꠣꠝ ꠇꠁꠝꠥ, ꠁꠔꠣ ꠔꠥꠝꠞꠣ ꠈꠤꠀꠟ ꠇꠞꠤ ꠢꠥꠘꠅ। ꠔꠦꠃ ꠔꠥꠝꠞꠣ ꠎꠣꠘꠦ ꠛꠣꠌꠛꠣꠄ ꠀꠞ ꠔꠥꠝꠞꠣꠞ ꠛꠣꠚ-ꠖꠣꠖꠣꠞ ꠝꠣꠛꠥꠖ ꠀꠟ꠆ꠟꠣꠄ ꠔꠥꠝꠞꠣꠞꠦ ꠎꠦ ꠖꠦꠡ ꠖꠣꠘ ꠇꠞꠞꠣ, ꠢꠃ ꠖꠦꠡꠅ ꠉꠤꠀ ꠖꠈꠟ ꠇꠞꠔꠣꠄ ꠙꠣꠞꠛꠣꠄ।
DEU 4:2 ꠀꠝꠤ ꠔꠥꠝꠞꠣꠞꠦ ꠎꠦ ꠢꠥꠇꠥꠝ ꠖꠤꠀꠞ, ꠁ ꠢꠥꠇꠥꠝꠞ ꠟꠉꠦ ꠖꠥꠍꠞꠣ ꠇꠥꠘ꠆ꠔꠣ ꠛꠣꠠꠣꠁꠅ ꠘꠣ ꠛꠣ ꠇꠝꠣꠁꠅ ꠘꠣ। ꠀꠝꠤ ꠎꠦꠟꠣꠈꠣꠘ ꠇꠁꠞꠣꠝ, ꠔꠥꠝꠞꠣ ꠑꠤꠇ ꠅꠟꠣꠃ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠢꠇꠟ ꠢꠥꠇꠥꠝ-ꠀꠢꠇꠣꠝ ꠝꠣꠘꠤꠀ ꠌꠟꠤꠅ।
DEU 4:3 “ꠔꠥꠝꠞꠣ ꠔ ꠘꠤꠎꠞ ꠌꠃꠈꠦ ꠖꠦꠈꠍ, ꠀꠉꠦ ꠝꠣꠛꠥꠖꠦ ꠛꠣꠀꠟ-ꠙꠤꠃꠞꠞ ꠛꠦꠙꠣꠞꠦ ꠇꠤꠔꠣ ꠇꠞꠍꠂꠘ। ꠔꠥꠝꠞꠣꠞ ꠝꠣꠎꠞ ꠎꠔ ꠎꠘꠦ ꠙꠤꠃꠞ ꠄꠟꠣꠇꠣꠞ ꠛꠣꠀꠟ ꠖꠦꠛꠔꠣꠞ ꠙꠥꠎꠣ ꠇꠞꠍꠤꠟ, ꠀꠟ꠆ꠟꠣ ꠝꠣꠛꠥꠖꠦ ꠔꠥꠝꠞꠣꠞ ꠍꠣꠝꠘꠦ ꠁꠔꠣ ꠢꠇ꠆ꠇꠟꠐꠤꠞꠦ ꠛꠤꠘꠣꠡ ꠇꠞꠍꠂꠘ।
DEU 4:4 ꠅꠁꠟꠦ ꠔꠥꠝꠞꠣ ꠎꠦꠞꠣ ꠖꠤꠟꠦ-ꠎꠣꠘꠦ ꠀꠟ꠆ꠟꠣ ꠝꠣꠛꠥꠖꠞ ꠀꠡꠤꠇ ꠀꠍꠟꠣꠄ, ꠔꠥꠝꠞꠣ ꠢꠇꠟꠃ ꠅꠈꠘꠅ ꠎꠤꠘ꠆ꠖꠣ ꠞꠁꠍ।
DEU 4:5 “ꠅꠈꠘ ꠢꠥꠘꠅ, ꠀꠝꠣꠞ ꠝꠣꠛꠥꠖ ꠀꠟ꠆ꠟꠣꠄ ꠀꠝꠣꠞꠦ ꠎꠦꠟꠣꠈꠣꠘ ꠢꠥꠇꠥꠝ-ꠀꠢꠇꠣꠝ ꠖꠤꠍꠟꠣ, ꠀꠝꠤ ꠔꠥꠝꠞꠣꠞꠦ ꠑꠤꠇ ꠅꠃ ꠢꠥꠇꠥꠝ-ꠀꠢꠇꠣꠝ ꠀꠞ ꠘꠤꠅꠝ-ꠇꠣꠘꠥꠘ ꠢꠤꠇꠣꠁꠍꠤ। ꠎꠣꠔꠦ ꠔꠥꠝꠞꠣ ꠅꠈꠘ ꠎꠦ ꠖꠦꠡ ꠖꠈꠟ ꠇꠞꠣꠔ ꠎꠣꠁꠞꠣꠄ, ꠢꠃ ꠖꠦꠡꠅ ꠁꠔꠣ ꠇꠣꠝꠅ ꠟꠣꠉꠣꠅ।
DEU 4:6 ꠄꠞꠟꠣꠉꠤ ꠔꠥꠝꠞꠣ ꠈꠥꠛ ꠢꠥꠡꠤꠀꠞ ꠅꠁꠀ ꠁꠔꠣ ꠝꠣꠘꠤꠅ, ꠀꠞ ꠇꠣꠝꠅ ꠟꠣꠉꠣꠁꠅ। ꠔꠦꠃ ꠛꠣꠖ-ꠛꠣꠇꠤ ꠔꠣꠝꠣꠝ ꠎꠣꠔꠤꠞ ꠉꠦꠍꠦꠃ ꠁꠔꠣ ꠔꠥꠝꠞꠣꠞ ꠀꠈꠟ-ꠛꠥꠖ꠆ꠖꠤ ꠢꠤꠡꠣꠛꠦ ꠎꠣꠁꠞ ꠅꠁꠛ। ꠅꠃ ꠢꠥꠇꠥꠝ-ꠀꠢꠇꠣꠝꠞ ꠇꠕꠣ ꠢꠥꠘꠟꠦ ꠔꠣꠞꠣ ꠇꠁꠛꠣ, ꠢꠣꠍꠣꠃ ꠄꠞꠣ ꠈꠥꠛ ꠛꠠ ꠎꠣꠔꠤ ꠀꠞ ꠀꠈꠟ-ꠛꠥꠖ꠆ꠖꠤ ꠀꠟꠣ ꠎꠣꠔꠤ।
DEU 4:7 ꠀꠞ ꠀꠝꠞꠣꠞ ꠝꠣꠛꠥꠖ ꠀꠟ꠆ꠟꠣ ꠎꠦꠟꠣ ꠀꠝꠞꠣꠞ ꠟꠉꠦ ꠟꠉꠦ ꠞꠂꠘ, ꠔꠣꠘꠞꠦ ꠒꠣꠇꠤꠟꠦ ꠎꠦꠟꠣ ꠗꠣꠞꠅ ꠙꠣꠁ, ꠅꠃ ꠖꠥꠘꠤꠀꠞ ꠛꠥꠇꠥꠔ ꠖꠥꠍꠞꠣ ꠇꠥꠘꠥ ꠛꠠ ꠎꠣꠔꠤ ꠀꠍꠂꠘ ꠘꠤ, ꠎꠦꠔꠣꠞ ꠖꠦꠛꠔꠣ ꠅꠟꠣ ꠟꠉꠦ ꠟꠉꠦ ꠞꠂꠘ?
DEU 4:8 ꠛꠣ ꠀꠝꠤ ꠅꠈꠘ ꠎꠦ ꠡꠞꠤꠅꠔꠞ ꠇꠕꠣ ꠇꠁꠞꠣꠝ, ꠁꠔꠣ ꠖꠥꠍꠞꠣ ꠇꠥꠘꠥ ꠛꠠ ꠎꠣꠔꠤꠞ ꠀꠍꠦ ꠘꠤ? ꠁꠟꠣ ꠘꠤꠅꠝ-ꠇꠣꠘꠥꠘ ꠀꠞ ꠘꠤꠈꠥꠔ ꠢꠥꠇꠥꠝ-ꠀꠢꠇꠣꠝ ꠔꠣꠞꠣꠞ ꠀꠍꠦ ꠘꠤ?
DEU 4:9 “ꠅꠁꠟꠦ ꠔꠥꠝꠞꠣ ꠎꠔꠖꠤꠘ ꠛꠣꠌꠤꠀ ꠞꠁꠛꠣꠄ, ꠅꠔꠖꠤꠘ ꠘꠤꠎꠞ ꠛꠦꠙꠣꠞꠦ ꠈꠥꠛ ꠢꠥꠡꠤꠀꠞ ꠞꠁꠅ, ꠘꠤꠎꠞ ꠖꠤꠟꠞꠦ ꠡꠣꠛꠗꠣꠘꠦ ꠞꠣꠈꠤꠅ, ꠀꠞꠘꠣꠄ ꠘꠤꠎꠞ ꠌꠈꠥꠞ ꠖꠦꠈꠣ ꠊꠐꠘꠣ ꠅꠇꠟ ꠚꠣꠃꠞꠤꠟꠤꠛꠣꠄ, ꠁꠔꠣ ꠔꠥꠝꠞꠣꠞ ꠖꠤꠟ ꠕꠣꠇꠤ ꠈꠥꠀꠁꠟꠤꠛꠣꠄ। ꠀꠞ ꠅꠃ ꠢꠥꠇꠥꠝ-ꠀꠢꠇꠣꠝ ꠔꠥꠝꠞꠣꠞ ꠙꠥꠀ-ꠙꠥꠠꠤꠘꠞꠦ ꠢꠤꠇꠣꠅ, ꠔꠣꠞꠣꠅ ꠅꠟꠣ ꠔꠣꠞꠣꠞ ꠀꠅꠟꠣꠖꠞꠦ ꠢꠤꠇꠣꠁꠛꠣ।
DEU 4:10 ꠀꠞ ꠔꠥꠝꠞꠣ ꠢꠃ ꠖꠤꠘꠞ ꠊꠐꠘꠣ ꠝꠘꠅ ꠇꠞꠅ, ꠎꠦ ꠖꠤꠘ ꠔꠥꠝꠞꠣ ꠔꠥꠞ ꠙꠣꠠꠅ ꠀꠙꠘ ꠝꠣꠛꠥꠖ ꠀꠟ꠆ꠟꠣꠞ ꠍꠣꠝꠘꠦ ꠀꠎꠤꠞ ꠅꠁꠍꠟꠣꠄ। ꠎꠦꠛꠟꠣ ꠔꠣꠁꠘ ꠀꠝꠣꠞꠦ ꠇꠁꠍꠟꠣ, ꠀꠝꠣꠞ ꠇꠣꠟꠣꠝ ꠢꠥꠘꠣꠞ ꠟꠣꠉꠤ ꠔꠥꠝꠤ ꠢꠇ꠆ꠇꠟ ꠝꠣꠘꠡꠞꠦ ꠖꠟꠣ ꠇꠞꠤꠀ ꠀꠝꠣꠞ ꠍꠣꠝꠘꠦ ꠀꠘꠅ, ꠔꠦꠃ ꠔꠣꠞꠣ ꠢꠤꠇꠛꠣ, ꠁ ꠎꠉꠔꠅ ꠔꠣꠞꠣ ꠎꠔꠖꠤꠘ ꠎꠤꠘ꠆ꠖꠣ ꠞꠁꠛꠣ, ꠅꠔꠖꠤꠘ ꠀꠝꠣꠞꠦ ꠒꠞꠣꠁꠀ ꠞꠁꠔꠣ, ꠀꠞ ꠔꠣꠞꠣꠞ ꠢꠥꠞꠥꠔ꠆ꠔꠣꠁꠘꠞꠦꠅ ꠅꠟꠣ ꠌꠟꠣꠞ ꠔꠣꠟꠤꠝ ꠖꠤꠔꠣ।
DEU 4:11 ꠅꠃ ꠡꠝꠄ ꠔꠥꠝꠞꠣ ꠇꠣꠘ꠆ꠖꠣꠔ ꠉꠤꠀ ꠅꠃ ꠙꠣꠠꠞ ꠟꠣꠝꠣꠔ ꠃꠛꠣꠁꠍꠟꠣꠄ, ꠃꠛꠣꠁꠀ ꠖꠦꠈꠟꠣꠄ, ꠀꠡ꠆ꠔꠣ ꠙꠣꠠꠅ ꠖꠣꠃ ꠖꠣꠃ ꠇꠞꠤ ꠘꠥꠞꠞ ꠀꠉꠥꠁꠘ ꠎꠟꠦꠞ, ꠀꠉꠥꠁꠘꠦ ꠉꠤꠀ ꠀꠍꠝꠣꠘ ꠍꠁꠟꠤꠍꠦ, ꠀꠞ ꠉꠁꠘ ꠊꠘ ꠝꠦꠊꠞ ꠇꠣꠟꠘꠤꠄ ꠀꠘ꠆ꠖꠣꠁꠞ ꠀꠍꠤꠟ।
DEU 4:12 ꠢꠃ ꠘꠥꠞꠞ ꠀꠉꠥꠘꠤꠞ ꠜꠤꠔꠞꠦ ꠕꠣꠇꠤ, ꠝꠣꠛꠥꠖꠦ ꠔꠥꠝꠞꠣꠞꠦ ꠔꠣꠘ ꠇꠣꠟꠣꠝ ꠢꠥꠘꠣꠁꠟꠣ। ꠔꠥꠝꠞꠣ ꠔꠣꠘ ꠝꠥꠈꠞ ꠀꠅꠀꠎ ꠢꠥꠘꠟꠣꠄ, ꠅꠁꠟꠦ ꠔꠣꠘ ꠇꠥꠘꠥ ꠍꠥꠞꠔ-ꠀꠇꠣꠞ ꠖꠦꠈꠣꠁꠍꠂꠘ ꠘꠣ, ꠈꠣꠟꠤ ꠔꠣꠘ ꠉꠟꠣꠞ ꠀꠅꠀꠎ ꠢꠥꠘꠍ।
DEU 4:13 ꠔꠣꠁꠘ ꠘꠤꠎꠦ ꠔꠥꠝꠞꠣꠞꠦ ꠔꠣꠘ ꠟꠉꠦ ꠝꠤꠟꠘꠞ ꠃꠍꠤꠟ꠆ꠟꠣꠞ ꠀꠟ꠆ꠟꠣꠁ ꠅꠀꠖꠣ-ꠌꠥꠇ꠆ꠔꠤꠞ ꠈꠣꠍ ꠖꠡꠐꠣ ꠢꠥꠇꠥꠝ-ꠀꠢꠇꠣꠝ ꠖꠤꠟꠣ, ꠀꠞ ꠇꠁꠟꠣ ꠅꠉꠥꠁꠘ ꠝꠣꠘꠤꠀ ꠌꠟꠣꠞ ꠟꠣꠉꠤ। ꠔꠣꠘ ꠇꠥꠖꠞꠔꠤ ꠀꠔꠦ ꠖꠥꠁ ꠐꠥꠇꠞꠣ ꠙꠣꠔ꠆ꠔꠞꠞ ꠃꠙꠞꠦ ꠁꠔꠣ ꠟꠦꠈꠤꠀꠅ ꠖꠤꠟꠣ।
DEU 4:14 ꠢꠃ ꠡꠝꠄ ꠝꠣꠛꠥꠖꠦ ꠀꠝꠣꠞꠦ ꠢꠥꠇꠥꠝ ꠖꠤꠟꠣ, ꠀꠝꠤ ꠔꠥꠝꠞꠣꠞꠦ ꠔꠣꠘ ꠡꠞꠤꠅꠔꠞ ꠢꠥꠇꠥꠝ-ꠀꠢꠇꠣꠝ ꠢꠤꠇꠣꠁꠔꠣꠝ, ꠎꠣꠔꠦ ꠎꠞ꠆ꠖꠣꠘ ꠉꠣꠋꠉꠞ ꠢꠙꠣꠞꠅ ꠔꠥꠝꠞꠣ ꠎꠦ ꠖꠦꠡ ꠖꠈꠟꠅ ꠎꠣꠁꠞꠣꠄ, ꠢꠘꠅ ꠉꠤꠀ ꠢꠣꠞꠟꠦ ꠅꠔꠣ ꠝꠣꠘꠤꠀ ꠌꠟꠅ।
DEU 4:15 “ꠝꠣꠛꠥꠖꠦ ꠎꠦꠛꠟꠣ ꠘꠥꠞꠞ ꠀꠉꠥꠘꠤꠞ ꠝꠣꠎ ꠕꠣꠇꠤ ꠔꠥꠞ ꠙꠣꠠꠅ ꠔꠥꠝꠞꠣꠞ ꠟꠉꠦ ꠛꠣꠔꠌꠤꠔ ꠇꠞꠍꠟꠣ, ꠢꠃ ꠖꠤꠘ ꠔ ꠔꠥꠝꠞꠣ ꠔꠣꠘ ꠇꠥꠘꠥ ꠍꠥꠞꠔ-ꠀꠇꠣꠞ ꠖꠦꠈꠍ ꠘꠣ। ꠄꠞꠟꠣꠉꠤ ꠔꠥꠝꠞꠣ ꠘꠤꠎꠞ ꠛꠦꠙꠣꠞꠦ ꠈꠥꠛ ꠢꠥꠡꠤꠀꠞ ꠞꠁꠅ
DEU 4:16 ꠎꠣꠔꠦ ꠇꠥꠘꠥ ꠝꠥꠞ꠆ꠔꠤ ꠘꠣ ꠛꠣꠘꠣꠅ, ꠛꠦ-ꠙꠕꠤ ꠛꠘꠤꠀ ꠙꠥꠎꠣ ꠇꠞꠣꠞ ꠈꠤꠀꠟꠦ ꠇꠥꠘꠥ ꠛꠦꠐꠣ ꠛꠣ ꠛꠦꠐꠤꠞ ꠍꠥꠞꠔꠦ ꠝꠥꠞ꠆ꠔꠤ ꠛꠣꠘꠣꠁꠅ ꠘꠣ।
DEU 4:17 ꠝꠣꠐꠤꠞ ꠃꠙꠞꠦ ꠌꠟꠞꠣ ꠇꠥꠘꠥ ꠎꠤꠛ-ꠎꠣꠘꠥꠀꠞꠞ ꠍꠥꠞꠔꠦ, ꠀꠍꠝꠣꠘꠅ ꠃꠠꠞꠣ ꠇꠥꠘꠥ ꠙꠣꠈꠤꠞ ꠍꠥꠞꠔꠦ,
DEU 4:18 ꠛꠥꠇ ꠍꠦꠌꠠꠣꠁꠀ ꠌꠟꠞꠣ ꠇꠥꠘꠥ ꠎꠣꠘꠖꠣꠞꠞ ꠍꠥꠞꠔꠦ, ꠛꠣ ꠙꠣꠘꠤꠔ ꠞꠅꠞꠣ ꠇꠥꠘꠥ ꠎꠣꠘꠖꠣꠞꠞ ꠍꠥꠞꠔꠦ ꠝꠥꠞ꠆ꠔꠤ ꠛꠣꠘꠣꠁꠅ ꠘꠣ।
DEU 4:19 ꠀꠍꠝꠣꠘꠦꠖꠤ ꠌꠣꠁꠀ ꠢꠣꠞꠤ ꠌꠣꠘ꠆ꠖ, ꠡꠥꠞꠥꠎ, ꠔꠦꠞꠣ ꠅꠇꠟ ꠖꠦꠈꠤꠀ ꠅꠃ ꠘꠣꠝꠞ ꠖꠦꠛ-ꠖꠦꠛꠤ ꠛꠣ ꠚꠤꠞꠤꠡ꠆ꠔꠣꠞ ꠙꠥꠎꠣ ꠇꠞꠤꠅ ꠘꠣ, ꠄꠞꠣꠞ ꠈꠦꠎꠝꠔꠅ ꠟꠣꠉꠤꠅ ꠘꠣ। ꠁꠔꠣꠞꠦ ꠔ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠀꠍꠝꠣꠘꠞ ꠔꠟꠞ ꠢꠇꠟ ꠎꠣꠔꠤꠞ ꠟꠣꠉꠤ ꠖꠣꠘ ꠇꠞꠍꠂꠘ।
DEU 4:20 ꠝꠘꠅ ꠞꠣꠈꠤꠅ, ꠝꠣꠛꠥꠖꠦ ꠔꠥꠝꠞꠣꠞꠦ ꠙꠍꠘ꠆ꠖ ꠇꠞꠍꠂꠘ ꠟꠥꠀ ꠉꠟꠣꠘꠤꠞ ꠉꠞꠝ ꠀꠉꠥꠘꠤꠞ ꠉꠣꠔꠅ ꠕꠣꠇꠤ, ꠔꠣꠁꠘ ꠝꠤꠡꠞ ꠖꠦꠡ ꠕꠣꠇꠤ ꠔꠥꠝꠞꠣꠞꠦ ꠛꠣꠞ ꠇꠞꠤ ꠀꠘꠍꠂꠘ, ꠎꠣꠔꠦ ꠔꠥꠝꠞꠣ ꠔꠣꠘ ꠀꠙꠘ ꠙ꠆ꠞꠎꠣ ꠅꠅ, ꠀꠞ ꠅꠈꠘ ꠔ ꠢꠣꠍꠣꠃ ꠔꠣꠘ ꠙ꠆ꠞꠎꠣ ꠅꠁꠍ।
DEU 4:21 “ꠅ ꠛꠘꠤ ꠁꠍꠞꠣꠁꠟ, ꠔꠥꠝꠞꠣꠞ ꠇꠣꠞꠘꠦ ꠝꠣꠛꠥꠖꠦ ꠀꠝꠣꠞ ꠃꠙꠞꠦꠅ ꠉꠥꠍꠣ ꠇꠞꠍꠂꠘ। ꠔꠣꠁꠘ ꠇꠍꠝ ꠈꠣꠁꠀ ꠇꠁꠍꠂꠘ, ꠀꠝꠣꠞꠦ ꠎꠞ꠆ꠖꠣꠘ ꠉꠣꠋꠉꠞ ꠢꠙꠣꠞꠅ ꠎꠣꠁꠔꠦ ꠖꠤꠔꠣ ꠘꠣꠄ, ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠔꠥꠝꠞꠣꠞꠦ ꠎꠦ ꠖꠦꠡꠞ ꠝꠣꠟꠤꠇꠣꠘꠣ ꠖꠤꠞꠣ, ꠅꠃ ꠀꠞꠣꠝꠞ ꠖꠦꠡꠅ ꠀꠝꠣꠞ ꠎꠣꠅꠀ ꠘꠤꠡꠦꠗ।
DEU 4:22 ꠀꠝꠣꠞ ꠝꠃꠔ ꠅꠘꠅꠃ ꠅꠁꠛ। ꠎꠞ꠆ꠖꠣꠘ ꠉꠣꠋ ꠙꠣꠞꠘꠤꠞ ꠢꠥꠇꠥꠝ ꠘꠣꠄ। ꠅꠁꠟꠦ ꠔꠥꠝꠞꠣ ꠉꠣꠋ ꠙꠣꠞ ꠅꠁꠀ ꠢꠃ ꠀꠞꠣꠝꠞ ꠖꠦꠡ ꠖꠈꠟ ꠇꠞꠣꠔ ꠎꠣꠁꠞꠣꠄ।
DEU 4:23 ꠔꠦ ꠔꠥꠝꠞꠣ ꠘꠤꠎꠞ ꠛꠦꠙꠣꠞꠦ ꠢꠥꠡꠤꠀꠞ ꠞꠁꠅ, ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠔꠥꠝꠞꠣꠞ ꠟꠉꠦ ꠎꠦ ꠅꠀꠖꠣ-ꠌꠥꠇ꠆ꠔꠤ ꠇꠣꠁꠝ ꠇꠞꠍꠂꠘ, ꠁꠔꠣ ꠚꠣꠃꠞꠤꠅ ꠘꠣ। ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠘꠤꠡꠦꠗ ꠅꠝꠣꠁꠘ꠆ꠘ ꠇꠞꠤꠀ ꠇꠥꠘꠥ ꠎꠤꠘꠤꠡꠞ ꠝꠥꠞ꠆ꠔꠤ ꠛꠣꠘꠣꠁꠅ ꠘꠣ।
DEU 4:24 ꠝꠘꠅ ꠞꠣꠈꠤꠅ, ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣ ꠔ ꠝꠢꠣ ꠗꠋꠡꠞ ꠀꠉꠥꠘꠤꠞ ꠟꠣꠈꠣꠘ, ꠔꠣꠁꠘ ꠔ ꠟꠣ-ꠡꠞꠤꠇ, ꠇꠥꠘꠥ ꠡꠞꠤꠇ ꠡꠁꠎ꠆ꠎ ꠇꠞꠂꠘ ꠘꠣ, ꠔꠣꠘ ꠘꠤꠎꠞ ꠙꠣꠅꠘꠣ ꠄꠛꠣꠖꠔ ꠌꠣꠁꠘꠃ ꠌꠣꠁꠘ।”
DEU 4:25 ꠢꠎꠞꠔ ꠝꠥꠍꠣꠄ ꠔꠣꠞꠣꠞꠦ ꠄꠅꠈꠣꠘ ꠇꠁꠟꠣ, “ꠢꠃ ꠀꠞꠣꠝꠞ ꠖꠦꠡꠅ ꠉꠤꠀ ꠢꠣꠞꠤ, ꠔꠥꠝꠞꠣ ꠙꠥꠀ-ꠙꠥꠠꠤꠘ, ꠘꠣꠔꠤ-ꠙꠥꠔꠤꠞ ꠎꠘꠝ ꠖꠤꠀ ꠛꠃꠔ ꠖꠤꠘ ꠛꠡꠔ ꠇꠞꠣꠞ ꠛꠣꠖꠦꠅ ꠎꠥꠖꠤ ꠇꠥ-ꠙꠕꠦ ꠎꠣꠅꠉꠤ, ꠀꠞ ꠇꠥꠘꠥ ꠎꠤꠘꠤꠡꠞ ꠍꠥꠞꠔꠦ ꠝꠥꠞ꠆ꠔꠤ ꠛꠣꠘꠣꠅ, ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠎꠦꠔꠣꠞꠦ ꠊꠤꠘ꠆ꠘꠣ ꠇꠞꠂꠘ, ꠔꠥꠝꠞꠣ ꠅꠔꠣ ꠇꠞꠅ,
DEU 4:26 ꠔꠦ ꠀꠝꠤ ꠅꠈꠘ ꠀꠍꠝꠣꠘ-ꠎꠝꠤꠘ ꠡꠣꠇ꠆ꠇꠤ ꠞꠣꠈꠤꠀ ꠔꠥꠝꠞꠣꠞ ꠛꠤꠞꠥꠖ꠆ꠖꠦ ꠇꠁꠀꠞ, ꠎꠞ꠆ꠖꠣꠘ ꠉꠣꠋ ꠙꠣꠞ ꠅꠁꠀ ꠎꠦ ꠖꠦꠡ ꠖꠈꠟ ꠇꠞꠣꠔ ꠎꠣꠁꠞꠣꠄ, ꠢꠤꠘꠅ ꠈꠥꠛ ꠎꠟꠖꠤ ꠔꠥꠝꠞꠣꠞ ꠘꠣꠝ ꠝꠤꠐꠤꠎꠤꠛ। ꠛꠦꠡꠤ ꠖꠤꠘ ꠐꠤꠇꠔꠣꠄ ꠙꠣꠞꠔꠣꠄ ꠘꠣꠄ, ꠘꠤꠌ꠆ꠌꠤꠔ ꠛꠤꠘꠣꠡ ꠅꠁꠛꠣꠄ।
DEU 4:27 ꠝꠣꠛꠥꠖꠦ ꠔꠥꠝꠞꠣꠞꠦ ꠘꠣꠘꠣꠘ ꠎꠣꠔꠤꠞ ꠝꠣꠎꠦ ꠍꠤꠔ꠆ꠞꠣꠁ ꠖꠤꠛꠣ, ꠔꠣꠁꠘ ꠈꠦꠖꠣꠁ ꠖꠤꠀ ꠎꠦꠈꠣꠘꠅ ꠙꠣꠑꠣꠁꠛꠣ, ꠢꠘꠅ ꠔꠥꠝꠞꠣꠞ ꠈꠥꠛ ꠇꠝ ꠝꠣꠘꠥꠡ ꠎꠤꠘ꠆ꠖꠣ ꠞꠁꠛꠣ।
DEU 4:28 ꠅꠃ ꠢꠣꠟꠔꠦ ꠔꠥꠝꠞꠣ ꠝꠣꠘꠥꠡ-ꠀꠔꠦ ꠛꠣꠘꠣꠁꠟ ꠝꠥꠞ꠆ꠔꠤꠞ ꠙꠥꠎꠣ ꠇꠞꠛꠣꠄ, ꠎꠦꠔꠣꠄ ꠌꠃꠈꠦ ꠖꠦꠈꠦ ꠘꠣ, ꠇꠣꠘꠦ ꠢꠥꠘꠦ ꠘꠣ, ꠈꠣꠁꠔ ꠙꠣꠞꠦ ꠘꠣ, ꠇꠥꠘꠥꠎꠣꠔ ꠊꠦꠞꠣꠘꠅ ꠢꠥꠋꠉꠤꠔ ꠙꠣꠞꠦ ꠘꠣ, ꠟꠣꠇꠠꠤꠞ ꠀꠞ ꠙꠣꠔ꠆ꠔꠞꠞ ꠅꠔꠣ ꠝꠥꠞ꠆ꠔꠤꠞ ꠙꠥꠎꠣ ꠇꠞꠛꠣꠄ।
DEU 4:29 ꠔꠣ-ꠅ ꠢꠘꠅ ꠞꠁꠀ ꠎꠥꠖꠤ ꠔꠥꠝꠞꠣ ꠘꠤꠎꠞ ꠝꠣꠛꠥꠖ ꠀꠟ꠆ꠟꠣꠞ ꠔꠣꠟ꠆ꠟꠣꠡ ꠇꠞꠅ, ꠔꠦ ꠔꠣꠁꠘ ꠔꠥꠝꠞꠣꠞꠦ ꠖꠤꠖꠣꠞ ꠖꠤꠛꠣ। ꠇꠕꠣ ꠅꠁꠟ, ꠖꠤꠟꠦ-ꠎꠣꠘꠦ ꠇꠣꠔꠞ ꠅꠁꠀ ꠔꠣꠘꠦ ꠒꠣꠇꠤꠔꠦ ꠅꠁꠛ।
DEU 4:30 ꠢꠦꠡ-ꠝꠦꠡ ꠔꠥꠝꠞꠣ ꠝꠍꠤꠛꠔꠅ ꠙꠠꠤꠀ ꠢꠤꠞꠛꠣꠞ ꠔꠃꠛꠣ ꠇꠞꠤꠀ, ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠘꠣꠝ ꠟꠁꠛꠣꠄ, ꠀꠞ ꠔꠣꠘ ꠈꠥꠡꠤ ꠝꠣꠚꠤꠇ ꠌꠟꠛꠣꠄ।
DEU 4:31 ꠝꠘꠅ ꠞꠣꠈꠤꠅ, ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣ ꠞꠢꠝꠣꠘꠥꠞ ꠞꠢꠤꠝ, ꠔꠣꠁꠘ ꠔꠥꠝꠞꠣꠞꠦ ꠚꠣꠟꠣꠁꠔꠣ ꠘꠣꠄ ꠛꠣ ꠛꠤꠘꠣꠡ ꠇꠞꠔꠣ ꠘꠣꠄ। ꠀꠞ ꠔꠣꠁꠘ ꠇꠍꠝ ꠈꠣꠁꠀ ꠔꠥꠝꠞꠣꠞ ꠝꠄ-ꠝꠥꠞꠛ꠆ꠛꠤꠞ ꠟꠉꠦ ꠎꠦ ꠅꠀꠖꠣ-ꠌꠥꠇ꠆ꠔꠤ ꠇꠞꠍꠂꠘ, ꠁꠔꠣꠅ ꠚꠣꠃꠞꠤꠔꠣ ꠘꠣꠄ।”
DEU 4:32 ꠢꠎꠞꠔ ꠝꠥꠍꠣꠄ ꠔꠣꠞꠣꠞꠦ ꠄꠅꠈꠣꠘ ꠇꠁꠞꠣ, “ꠀꠟ꠆ꠟꠣ ꠙꠣꠇꠦ ꠎꠝꠤꠘꠅ ꠝꠣꠘꠥꠡ ꠙꠄꠖꠣ ꠇꠞꠣꠞ ꠛꠣꠖ ꠕꠣꠇꠤ ꠅꠈꠘ ꠙꠞ꠆ꠎꠘ꠆ꠔ, ꠔꠥꠝꠞꠣꠞ ꠀꠉꠞ ꠢꠇ꠆ꠇꠟ ꠎꠝꠣꠘꠣꠞ ꠁꠔꠤꠢꠣꠡ ꠔꠥꠇꠣꠅ, ꠀꠡ꠆ꠔꠣ ꠀꠍꠝꠣꠘ-ꠎꠝꠤꠘꠞ ꠄꠇ ꠝꠣꠕꠣ ꠕꠣꠇꠤ ꠀꠞꠇ ꠝꠣꠕꠣ ꠔꠥꠇꠣꠁꠀ ꠖꠦꠈꠅ, ꠛꠘꠤ ꠁꠍꠞꠣꠁꠟꠞ ꠃꠙꠞꠦ ꠎꠔ ꠀꠎꠛ ꠊꠐꠘꠣ ꠊꠐꠤꠍꠦ, ꠁꠔꠣ ꠟꠣꠈꠣꠘ ꠖꠥꠍꠞꠣ ꠇꠥꠘꠥ ꠊꠐꠘꠣ ꠊꠐꠍꠦ ꠘꠤ? ꠛꠣ ꠁꠟꠣ ꠇꠥꠘ꠆ꠔꠣ ꠇꠥꠘꠥꠖꠤꠘ ꠢꠥꠘꠣ ꠉꠦꠍꠦ ꠘꠤ?
DEU 4:33 ꠀꠞ ꠘꠥꠞꠞ ꠀꠉꠥꠁꠘ ꠕꠣꠇꠤ ꠀꠟ꠆ꠟꠣ ꠙꠣꠇꠞ ꠛꠥꠟꠤ ꠢꠥꠘꠣꠞ ꠛꠣꠖꠦ, ꠈꠣꠟꠤ ꠔꠥꠝꠞꠣ ꠍꠣꠠꠣ ꠖꠥꠍꠞꠣ ꠇꠥꠘꠥ ꠎꠣꠔꠤ ꠎꠤꠘ꠆ꠖꠣ ꠞꠁꠍꠦ ꠘꠤ?
DEU 4:34 ꠔꠥꠝꠞꠣ ꠔꠣꠟ꠆ꠟꠣꠡ ꠇꠞꠤ ꠖꠦꠈꠅ, ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠔꠥꠝꠞꠣꠞ ꠌꠈꠥꠞ ꠍꠣꠝꠘꠦ ꠝꠤꠡꠞ ꠖꠦꠡꠅ ꠔꠥꠝꠞꠣꠞ ꠟꠣꠉꠤ ꠎꠔꠔꠣ ꠇꠞꠍꠂꠘ, ꠀꠡ꠆ꠔꠣ ꠎꠉꠔꠞ ꠇꠥꠘꠥ ꠖꠦꠛ-ꠖꠦꠛꠤꠄ ꠁꠟꠣ ꠇꠞꠔ ꠙꠣꠞꠍꠦ ꠘꠤ? ꠁꠟꠣ ꠙꠞꠤꠇ꠆ꠇꠣ ꠟꠅꠀ, ꠇꠥꠖꠞꠔꠤ ꠘꠤꠡꠣꠘꠣ ꠖꠦꠈꠣꠘꠤ, ꠟꠣꠠꠣꠁ-ꠎꠥꠖ꠆ꠖ ꠇꠞꠣ, ꠝꠎꠛꠥꠔ ꠀꠔꠞ ꠛꠟ ꠖꠦꠈꠣꠘꠤ, ꠛꠠ ꠛꠠ ꠔꠣꠁꠎ꠆ꠎꠥꠛꠤ ꠟꠤꠟꠣ-ꠈꠦꠟꠣ ꠀꠞ ꠒꠞ-ꠈꠚ ꠖꠦꠈꠣꠁꠀ, ꠎꠦꠇꠥꠘꠥ ꠎꠣꠔꠤꠞꠦ ꠅꠁꠘ꠆ꠘ ꠎꠣꠔꠤꠞ ꠜꠤꠔꠞꠦ ꠕꠣꠇꠤ ꠛꠣꠞ ꠇꠞꠤ ꠀꠘꠤꠀ ꠘꠤꠎꠞ ꠙ꠆ꠞꠎꠣ ꠛꠣꠘꠣꠁꠔ ꠙꠣꠞꠍꠦ ꠘꠤ?
DEU 4:35 “ꠔꠦ ꠔꠥꠝꠞꠣ ꠎꠣꠔꠦ ꠙꠥꠞꠣꠙꠥꠞ ꠛꠥꠎꠅ, ꠅꠃ ꠀꠟ꠆ꠟꠣꠃ ꠅꠁꠟꠣ ꠝꠣꠛꠥꠖ, ꠔꠣꠁꠘ ꠍꠣꠠꠣ ꠀꠞ ꠇꠥꠘꠥ ꠝꠣꠛꠥꠖ ꠘꠣꠁ, ꠅꠈꠣꠘ ꠛꠥꠎꠣꠘꠤꠞ ꠟꠣꠉꠤꠃ ꠔꠥꠝꠞꠣꠞꠦ ꠅꠔꠔꠣ ꠖꠦꠈꠣꠘꠤ ꠅꠁꠍꠤꠟ।
DEU 4:36 ꠔꠥꠝꠞꠣꠞꠦ ꠢꠦꠖꠣꠄꠅꠔ ꠇꠞꠣꠞ ꠈꠤꠀꠟꠦ ꠔꠣꠁꠘ ꠛꠦꠢꠦꠡ꠆ꠔꠞ ꠀꠞꠡ ꠕꠣꠇꠤ ꠔꠣꠘ ꠘꠤꠎꠞ ꠛꠥꠟꠤ ꠢꠥꠘꠣꠁꠟꠣ, ꠀꠞ ꠎꠝꠤꠘꠞ ꠃꠙꠞꠦ ꠖꠦꠈꠣꠁꠟꠣ ꠘꠥꠞꠞ ꠀꠉꠥꠘꠤꠞ ꠇꠥꠘ꠆ꠒꠟꠤ। ꠅꠃ ꠀꠉꠥꠘꠤꠞ ꠝꠣꠎ ꠕꠣꠇꠤ ꠛꠣꠞꠅꠁꠟ ꠀꠟ꠆ꠟꠣꠁ ꠛꠥꠟꠤ ꠔꠥꠝꠞꠣ ꠢꠥꠘꠍ।
DEU 4:37 ꠔꠣꠁꠘ ꠔꠥꠝꠞꠣꠞ ꠝꠄ-ꠝꠥꠞꠛ꠆ꠛꠤ ꠅꠇꠟꠞꠦ ꠝꠢꠛ꠆ꠛꠔ ꠇꠞꠔꠣ, ꠄꠞꠟꠣꠉꠤ ꠄꠞꠣꠞ ꠝꠃꠔꠞ ꠛꠣꠖꠦ ꠔꠣꠞꠣꠞ ꠀꠅꠟꠣꠖ ꠅꠇꠟꠞꠦꠅ ꠙꠍꠘ꠆ꠖ ꠇꠞꠍꠂꠘ। ꠀꠞ ꠔꠣꠁꠘ ꠡ꠆ꠛꠄꠅꠋ ꠀꠎꠤꠞ ꠅꠁꠀ ꠔꠣꠘ ꠝꠢꠣ ꠇꠥꠖꠞꠔꠤ ꠈꠦꠝꠔꠣ ꠈꠣꠐꠣꠁꠀ ꠔꠥꠝꠞꠣꠞꠦ ꠝꠤꠡꠞ ꠖꠦꠡ ꠕꠣꠇꠤ ꠛꠣꠞ ꠇꠞꠤ ꠀꠘꠍꠂꠘ।
DEU 4:38 ꠔꠣꠘ ꠈꠤꠀꠟ ꠀꠍꠤꠟ, ꠔꠥꠝꠣꠔꠣꠘ ꠕꠣꠇꠤ ꠛꠠ ꠀꠞ ꠛꠟꠛꠣꠘ ꠎꠣꠔꠤ ꠅꠇꠟꠞꠦ ꠔꠥꠝꠞꠣꠞ ꠍꠣꠝꠘ ꠕꠣꠇꠤ ꠈꠦꠖꠣꠁꠀ ꠢꠣꠞꠤ, ꠔꠣꠞꠣꠞ ꠖꠦꠡꠅ ꠘꠤꠀ ꠢꠃ ꠢꠇꠟ ꠖꠦꠡꠞ ꠝꠣꠟꠤꠇꠣꠘꠣ ꠔꠥꠝꠞꠣꠞꠦ ꠖꠤꠔꠣ। ꠅꠈꠘ ꠖꠦꠈꠞꠣꠄ ꠘꠤ, ꠔꠣꠁꠘ ꠔ ꠁꠔꠣ ꠇꠞꠍꠂꠘ।
DEU 4:39 “ꠔꠦ ꠅꠈꠘꠇꠥꠞ ꠅꠃ ꠔꠣꠟꠤꠝ ꠝꠘꠅ ꠞꠣꠈꠤꠅ, ꠖꠤꠟꠞ ꠝꠣꠎꠦ ꠉꠣꠕꠤꠀ ꠕꠁꠅ, ꠢꠥꠘꠅ, ꠈꠣꠟꠤ ꠅꠃ ꠀꠟ꠆ꠟꠣꠃ ꠃꠙꠞꠦ ꠀꠍꠝꠣꠘ ꠀꠞ ꠔꠟꠦ ꠎꠝꠤꠘꠞ ꠝꠣꠟꠤꠇ, ꠔꠣꠁꠘ ꠍꠣꠠꠣ ꠖꠥꠍꠞꠣ ꠇꠥꠘꠥ ꠝꠣꠛꠥꠖ ꠘꠣꠁ।
DEU 4:40 ꠄꠞꠟꠣꠉꠤ ꠀꠝꠤ ꠅꠈꠘ ꠎꠦ ꠡꠞꠤꠅꠔ ꠀꠞ ꠢꠥꠇꠥꠝ-ꠀꠢꠇꠣꠝ ꠎꠣꠘꠣꠁꠞꠣꠝ, ꠔꠥꠝꠞꠣ ꠁꠔꠣ ꠝꠣꠘꠤꠀ ꠌꠟꠤꠅ, ꠔꠦꠃ ꠔꠥꠝꠞꠣ ꠀꠞ ꠔꠥꠝꠞꠣꠞ ꠀꠅꠟꠣꠖ ꠅꠇꠟꠞ ꠜꠣꠟꠣꠁ ꠅꠁꠛ। ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠌꠤꠞꠇꠣꠟꠞ ꠟꠣꠉꠤ ꠔꠥꠝꠞꠣꠞꠦ ꠎꠦ ꠖꠦꠡ ꠖꠣꠘ ꠇꠞꠞꠣ, ꠅꠃ ꠖꠦꠡꠅ ꠔꠥꠝꠞꠣꠞ ꠢꠣꠄꠀꠔꠤ ꠟꠣꠝ꠆ꠛꠣ ꠅꠁꠛ।”
DEU 4:41 ꠛꠣꠖꠦ ꠝꠥꠍꠣ ꠘꠛꠤꠄ ꠎꠞ꠆ꠖꠣꠘ ꠉꠣꠋꠉꠞ ꠙꠥꠛ-ꠙꠣꠞꠞ ꠔꠤꠘꠈꠣꠘ ꠐꠣꠃꠘ ꠀꠟꠉꠣꠁꠟꠣ,
DEU 4:42 ꠎꠣꠔꠦ ꠇꠥꠘꠥ ꠈꠥꠘꠤ ꠝꠣꠘꠥꠡ ꠜꠣꠉꠤꠀ ꠉꠤꠀ ꠅꠃ ꠐꠣꠃꠘꠅ ꠎꠣꠘ ꠛꠣꠌꠣꠁꠔ ꠙꠣꠞꠦ। ꠎꠦ ꠝꠣꠘꠡꠦ ꠈꠥꠘ ꠇꠞꠣꠞ ꠇꠥꠘꠥ ꠌꠤꠘ꠆ꠔꠣ ꠛꠣ ꠖꠥꠡꠝꠘꠤ ꠜꠣꠛ ꠀꠍꠤꠟ ꠘꠣ, ꠈꠣꠟꠤ ꠀꠈꠔꠣ ꠅꠘꠤꠌ꠆ꠍꠣꠄ ꠇꠦꠃꠞꠞꠦ ꠝꠣꠞꠤꠟꠣꠄ, ꠢꠦ ꠜꠣꠉꠤꠀ ꠛꠘꠛꠣꠡꠤ ꠛꠘꠤꠀ ꠅꠘꠅ ꠞꠁꠔ ꠙꠣꠞꠛ।
DEU 4:43 ꠔꠤꠘꠅ ꠐꠣꠃꠘ ꠅꠁꠟ, ꠞꠥꠛꠦꠘ ꠈꠣꠘ꠆ꠖꠣꠘꠞ ꠟꠣꠉꠤ ꠝꠞꠥꠜꠥꠝꠤꠞ ꠇꠤꠘꠣꠞꠣꠞ ꠙꠣꠠꠤꠀ ꠕꠟ ꠎꠣꠉꠣꠞ ꠛꠣꠍꠤꠞ ꠘꠣꠝꠞ ꠐꠣꠃꠘ। ꠍꠣꠖꠥ ꠈꠣꠘ꠆ꠖꠣꠘꠞ ꠟꠣꠉꠤ ꠉꠤꠟꠤꠅꠖ ꠄꠟꠣꠇꠣꠞ ꠞꠣꠝꠥꠔ ꠐꠣꠃꠘ। ꠝꠣꠘꠡꠣ ꠈꠣꠘ꠆ꠖꠣꠘꠞ ꠟꠣꠉꠤ ꠛꠣꠡꠘ ꠖꠦꠡꠞ ꠉꠥꠟꠣꠘ ꠐꠣꠃꠘ।
DEU 4:44 ꠝꠥꠍꠣ ꠘꠛꠤꠄ ꠛꠘꠤ ꠁꠍꠞꠣꠁꠟꠞ ꠍꠣꠝꠘꠦ ꠡꠞꠤꠅꠔꠞ ꠅꠃ ꠢꠥꠇꠥꠝ ꠛꠄꠀꠘ ꠇꠞꠟꠣ,
DEU 4:45 ꠝꠤꠡꠞ ꠖꠦꠡ ꠕꠣꠇꠤ ꠛꠣꠞ ꠅꠁꠀ ꠀꠅꠀꠞ ꠛꠣꠖꠦ, ꠢꠇꠟ ꠢꠥꠡꠤꠀꠞꠤꠞ ꠇꠕꠣ, ꠡꠞꠤꠅꠔꠞ ꠘꠤꠅꠝ-ꠇꠣꠘꠥꠘ ꠀꠞ ꠢꠥꠇꠥꠝ-ꠀꠢꠇꠣꠝ ꠛꠘꠤ ꠁꠍꠞꠣꠁꠟꠞꠦ ꠎꠣꠘꠣꠁꠟꠣ।
DEU 4:46 ꠔꠣꠁꠘ ꠎꠞ꠆ꠖꠣꠘ ꠉꠣꠋꠉꠞ ꠙꠥꠛꠞ ꠙꠣꠞꠅ, ꠢꠤꠡꠛꠘ ꠄꠟꠣꠇꠣꠞ ꠀꠝꠥꠞꠤ ꠎꠣꠔꠤꠞ ꠞꠣꠎꠣ ꠍꠤꠢꠥꠘꠞ ꠖꠦꠡꠞ ꠛꠣꠄꠔ-ꠙꠤꠃꠞꠞ ꠍꠣꠝꠘꠞ ꠔꠟ ꠎꠣꠉꠣꠔ ꠁꠔꠣ ꠇꠁꠟꠣ। ꠝꠤꠡꠞ ꠕꠣꠇꠤ ꠛꠣꠞ ꠅꠁꠀ ꠀꠁꠀ ꠢꠣꠞꠟꠦ ꠝꠥꠍꠣ ꠘꠛꠤꠄ ꠀꠞ ꠛꠘꠤ ꠁꠍꠞꠣꠁꠟꠦ ꠎꠥꠖ꠆ꠖ ꠇꠞꠤ ꠅꠃ ꠛꠣꠖꠡꠣ ꠍꠤꠢꠥꠘꠞꠦ ꠀꠞꠣꠁꠍꠟꠣ।
DEU 4:47 ꠔꠣꠞꠣ ꠛꠣꠖꠡꠣ ꠍꠤꠢꠥꠘꠞ ꠖꠦꠡ ꠀꠞ ꠛꠣꠡꠘꠞ ꠛꠣꠖꠡꠣ ꠃꠎꠞ ꠖꠦꠡ ꠖꠈꠟ ꠇꠞꠍꠟꠣ। ꠀꠝꠥꠞꠤ ꠎꠣꠔꠤꠞ ꠅꠃ ꠖꠥꠁꠅ ꠛꠣꠖꠡꠣꠞ ꠛꠣꠖꠡꠣꠁ ꠀꠍꠤꠟ ꠎꠞ꠆ꠖꠣꠘ ꠉꠣꠋꠉꠞ ꠙꠥꠛꠞ ꠙꠣꠞꠅ।
DEU 4:48 ꠅꠞꠘꠘ ꠈꠣꠟꠞ ꠙꠣꠞꠞ ꠀꠞꠥꠀꠞ ꠐꠣꠃꠘ ꠕꠣꠇꠤ ꠍꠤꠞꠤꠅꠘ ꠙꠣꠠ, ꠝꠣꠘꠤ ꠢꠞ꠆ꠝꠥꠘ ꠙꠣꠠ ꠙꠞ꠆ꠎꠘ꠆ꠔ ꠅꠃ ꠖꠥꠁꠅ ꠞꠣꠎꠣꠞ ꠡꠤꠝꠣꠘꠣ ꠀꠍꠤꠟ।
DEU 4:49 ꠄꠞ ꠜꠤꠔꠞꠦ ꠀꠍꠦ ꠎꠞ꠆ꠖꠣꠘ ꠉꠣꠋꠉꠞ ꠙꠥꠛꠞ ꠙꠣꠞꠞ ꠀꠡ꠆ꠔꠣ ꠄꠟꠣꠇꠣ। ꠁꠇꠐꠣ ꠙꠤꠍꠉꠣ ꠙꠣꠠꠞ ꠐꠤꠟ꠆ꠟꠣꠞ ꠔꠟꠦꠖꠤ ꠀꠞꠣꠛꠣ ꠡꠣꠉꠞꠞ ꠇꠤꠘꠣꠞꠣ ꠙꠞ꠆ꠎꠘ꠆ꠔ ꠉꠦꠍꠦ।
DEU 5:1 ꠝꠥꠍꠣ ꠘꠛꠤꠄ ꠔꠣꠝꠣꠝ ꠛꠘꠤ ꠁꠍꠞꠣꠁꠟꠞꠦ ꠖꠟꠣ ꠇꠞꠣꠁꠟꠣ, ꠔꠣꠞꠣꠞꠦ ꠇꠁꠟꠣ, “ꠅ ꠛꠘꠤ ꠁꠍꠞꠣꠁꠟ, ꠀꠝꠤ ꠅꠈꠘ ꠎꠦꠔꠣ ꠢꠥꠇꠥꠝ-ꠀꠢꠇꠣꠝ ꠀꠞ ꠀꠁꠘ-ꠇꠣꠘꠥꠘ ꠔꠥꠝꠞꠣꠞꠦ ꠎꠣꠘꠣꠁꠝꠥ, ꠁꠔꠣ ꠔꠥꠝꠞꠣ ꠈꠤꠀꠟ ꠇꠞꠤ ꠢꠥꠘꠤꠅ, ꠢꠥꠘꠤꠀ ꠖꠤꠟꠅ ꠉꠣꠕꠤꠀ ꠞꠣꠈꠤꠅ ꠀꠞ ꠀꠝꠟ ꠇꠞꠤꠅ।
DEU 5:2 ꠀꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠔꠥꠞ ꠙꠣꠠꠅ ꠀꠝꠞꠣꠞ ꠟꠉꠦ ꠄꠇ ꠅꠀꠖꠣ-ꠌꠥꠇ꠆ꠔꠤ ꠛꠅꠀꠁꠟ ꠇꠞꠍꠂꠘ।
DEU 5:3 ꠅꠃ ꠌꠥꠇ꠆ꠔꠤ ꠔꠣꠁꠘ ꠀꠝꠞꠣꠞ ꠝꠄ-ꠝꠥꠞꠛ꠆ꠛꠤꠞ ꠟꠉꠦ ꠘꠣ ꠇꠞꠤꠀ, ꠀꠝꠞꠣꠞ ꠟꠉꠦ ꠇꠞꠍꠂꠘ, ꠀꠝꠞꠣ ꠎꠔ ꠎꠘ ꠅꠘꠅ ꠎꠤꠘ꠆ꠖꠣ ꠀꠍꠤ, ꠀꠝꠞꠣꠞ ꠟꠉꠦ ꠇꠞꠍꠂꠘ।
DEU 5:4 ꠝꠣꠛꠥꠖꠦ ꠅꠃ ꠙꠣꠠꠞ ꠃꠙꠞꠦ ꠘꠥꠞꠞ ꠀꠉꠥꠘꠤꠞ ꠝꠣꠎ ꠕꠣꠇꠤ ꠔꠥꠝꠞꠣꠞ ꠟꠉꠦ ꠍꠣꠝꠘꠣ-ꠍꠣꠝꠘꠤ ꠛꠣꠔꠌꠤꠔ ꠇꠞꠍꠂꠘ।
DEU 5:5 ꠔꠥꠝꠞꠣ ꠀꠉꠥꠘꠤꠞ ꠒꠞꠦ ꠢꠃ ꠡꠝꠄ ꠙꠣꠠꠞ ꠃꠙꠞꠦ ꠃꠑꠟꠣꠄ ꠘꠣ, ꠄꠞꠟꠣꠉꠤ ꠀꠝꠤ ꠔꠥꠝꠞꠣ ꠀꠞ ꠝꠣꠛꠥꠖꠞ ꠝꠣꠎꠈꠣꠘꠅ ꠃꠛꠣꠁꠀ, ꠔꠣꠘ ꠝꠥꠈꠞ ꠛꠥꠟꠤ ꠔꠥꠝꠞꠣꠞꠦ ꠢꠥꠘꠣꠁꠍꠤ। ꠔꠣꠁꠘ ꠇꠁꠍꠟꠣ,
DEU 5:6 “ꠀꠝꠤ ꠀꠟ꠆ꠟꠣꠃ ꠔꠥꠝꠞꠣꠞ ꠝꠣꠛꠥꠖ। ꠝꠤꠡꠞ ꠖꠦꠡꠞ ꠉꠥꠟꠣꠝꠤ ꠕꠣꠇꠤ ꠀꠝꠤꠃ ꠔꠥꠝꠞꠣꠞꠦ ꠈꠣꠟꠣꠍ ꠇꠞꠤ ꠀꠘꠍꠤ।
DEU 5:7 “ꠀꠝꠣꠞ ꠛꠖꠟꠣ ꠔꠥꠝꠞꠣ ꠖꠥꠍꠞꠣ ꠇꠥꠘꠥ ꠖꠦꠛꠔꠣ ꠝꠣꠘꠤꠅ ꠘꠣ।
DEU 5:8 “ꠙꠥꠎꠣ ꠇꠞꠣꠞ ꠈꠤꠀꠟꠦ ꠔꠥꠝꠞꠣ ꠇꠥꠘꠥ ꠝꠥꠞ꠆ꠔꠤ ꠛꠣꠘꠣꠁꠅ ꠘꠣ, ꠀꠍꠝꠣꠘ, ꠎꠝꠤꠘ ꠛꠣ ꠙꠣꠘꠤꠞ ꠔꠟꠦ ꠎꠔꠔꠣ ꠀꠍꠦ, ꠁꠔꠣ ꠇꠥꠘꠥꠔꠣꠞ ꠍꠥꠞꠔꠦ ꠝꠥꠞ꠆ꠔꠤ ꠛꠣꠘꠣꠁꠅ ꠘꠣ।
DEU 5:9 ꠔꠥꠝꠞꠣ ꠁꠔꠣꠞ ꠙꠥꠎꠣ ꠇꠞꠤꠅ ꠘꠣ, ꠁꠔꠣꠞ ꠡꠦꠛꠣ-ꠎꠔꠘ ꠇꠞꠤꠅ ꠘꠣ। ꠝꠘꠅ ꠞꠣꠈꠤꠅ, ꠀꠝꠤ ꠀꠟ꠆ꠟꠣꠃ ꠔꠥꠝꠞꠣꠞ ꠝꠣꠛꠥꠖ, ꠇꠥꠘꠥ ꠡꠞꠤꠇ ꠡꠁꠎ꠆ꠎ ꠇꠞꠤ ꠘꠣ। ꠀꠝꠣꠞꠦ ꠎꠦꠞꠣ ꠝꠣꠘꠦ ꠘꠣ, ꠀꠝꠤ ꠔꠣꠞꠣꠞ ꠉꠥꠘꠣꠞ ꠡꠣꠎꠣ ꠖꠦꠁ, ꠔꠣꠞꠣꠞ ꠙꠄꠟꠣ ꠍꠤꠠꠤ ꠕꠣꠇꠤ ꠌꠣꠁꠞ ꠍꠤꠠꠤ ꠀꠅꠟꠣꠖ ꠙꠞ꠆ꠎꠘ꠆ꠔ ꠡꠣꠎꠣ ꠖꠦꠁ।
DEU 5:10 ꠅꠁꠟꠦ ꠎꠦꠞꠣ ꠀꠝꠣꠞ ꠀꠡꠤꠇ ꠛꠘꠤꠀ ꠀꠝꠣꠞ ꠢꠥꠇꠥꠝ-ꠀꠢꠇꠣꠝ ꠀꠝꠟ ꠇꠞꠦ, ꠀꠝꠤ ꠔꠣꠞꠣꠞ ꠀꠎꠣꠞ ꠀꠎꠣꠞ ꠅꠀꠞꠤꠡ ꠙꠞ꠆ꠎꠘ꠆ꠔ ꠀꠝꠣꠞ ꠅꠛꠤꠞꠣꠝ ꠝꠣꠄꠀ-ꠝꠢꠛ꠆ꠛꠔ ꠖꠦꠈꠣꠁꠝꠥ।
DEU 5:11 “ꠛꠦꠇꠣꠝꠣ ꠇꠥꠘꠥ ꠇꠣꠞꠘꠦ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠘꠣꠝ ꠝꠥꠈꠅ ꠟꠁꠅ ꠘꠣ। ꠇꠦꠃ ꠎꠥꠖꠤ ꠈꠣꠝꠈꠣ ꠝꠣꠛꠥꠖꠞ ꠘꠣꠝ ꠟꠄ, ꠔꠦ ꠇꠥꠘꠥꠝꠘ꠆ꠔꠦꠃ ꠀꠝꠣꠞ ꠡꠣꠎꠣ ꠕꠣꠇꠤ ꠞꠦꠢꠣꠁ ꠙꠣꠁꠔ ꠘꠣꠄ।
DEU 5:12 “ꠀꠞ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠢꠥꠇꠥꠝ ꠝꠣꠚꠤꠇ, ꠎꠥꠝ꠆ꠝꠣꠛꠣꠞꠞꠦ ꠙꠛꠤꠔ꠆ꠞ ꠖꠤꠘ ꠝꠣꠘꠤꠅ।
DEU 5:13 ꠢꠣꠙ꠆ꠔꠣꠞ ꠍꠄꠖꠤꠘ ꠔꠥꠝꠞꠣ ꠇꠣꠝ-ꠇꠣꠎ ꠇꠞꠤꠅ, ꠔꠥꠝꠞꠣꠞ ꠖꠞꠇꠣꠞꠤ ꠢꠇꠟ ꠇꠣꠝ ꠡꠣꠞꠤꠅ।
DEU 5:14 ꠅꠁꠟꠦ ꠡꠣꠔ ꠘꠝ꠆ꠛꠞ ꠖꠤꠘ ꠅꠁꠟ ꠎꠥꠝ꠆ꠝꠣꠛꠣꠞ, ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠘꠣꠝꠦ ꠎꠤꠞꠣꠁꠛꠣꠞ ꠖꠤꠘ। ꠁ ꠖꠤꠘ ꠔꠥꠝꠞꠣ, ꠔꠥꠝꠞꠣꠞ ꠙꠥꠀ-ꠙꠥꠠꠤꠘ, ꠉꠥꠟꠣꠝ-ꠛꠣꠘ꠆ꠖꠤꠘ, ꠉꠞꠥ-ꠉꠣꠗꠣꠁꠘ, ꠔꠥꠝꠞꠣꠞ ꠉꠣꠃꠔ ꠛꠣ ꠐꠣꠃꠘꠅ ꠞꠅꠞꠣ ꠝꠥꠍꠣꠚꠤꠞ ꠛꠣ ꠜꠤꠘ-ꠖꠦꠡꠤ, ꠇꠦꠃ ꠇꠥꠘꠥꠎꠣꠔꠞ ꠇꠣꠝ-ꠇꠣꠎ ꠇꠞꠤꠅ ꠘꠣ। ꠔꠥꠝꠣꠞ ꠉꠥꠟꠣꠝ-ꠛꠣꠘ꠆ꠖꠤꠄꠅ ꠔꠥꠝꠣꠞ ꠟꠣꠈꠣꠘ ꠎꠤꠞꠣꠁꠛꠣ।
DEU 5:15 ꠝꠘꠅ ꠞꠣꠈꠤꠅ, ꠝꠤꠡꠞ ꠖꠦꠡꠅ ꠕꠣꠇꠔꠦ ꠔꠥꠝꠞꠣꠅ ꠅꠟꠣ ꠉꠥꠟꠣꠝ ꠀꠍꠟꠣꠄ, ꠀꠞ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠔꠣꠘ ꠛꠟꠀꠟꠣ-ꠝꠎꠛꠥꠔ ꠇꠥꠖꠞꠔꠤ ꠀꠔꠖꠤ ꠔꠥꠝꠞꠣꠞꠦ ꠀꠎꠣꠖ ꠇꠞꠤ ꠀꠘꠍꠂꠘ। ꠄꠞꠟꠣꠉꠤ ꠔꠣꠁꠘ ꠢꠥꠇꠥꠝ ꠖꠤꠍꠂꠘ, ꠔꠥꠝꠞꠣ ꠎꠥꠝ꠆ꠝꠣꠛꠣꠞꠞꠦ ꠙꠛꠤꠔ꠆ꠞ ꠖꠤꠘ ꠝꠣꠘꠔꠣꠄ।
DEU 5:16 “ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠢꠥꠇꠥꠝ ꠝꠣꠚꠤꠇ ꠔꠥꠝꠞꠣꠞ ꠝꠣ-ꠛꠣꠚꠞꠦ ꠁꠎ꠆ꠎꠔ ꠇꠞꠤꠅ। ꠔꠦꠃ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠎꠦ ꠖꠦꠡ ꠖꠤꠞꠣ, ꠢꠃ ꠖꠦꠡꠅ ꠔꠥꠝꠞꠣꠞ ꠢꠣꠄꠀꠔꠤ ꠛꠣꠠꠤꠛ ꠀꠞ ꠔꠥꠝꠞꠣꠞ ꠜꠣꠟꠣꠁ ꠅꠁꠛ।
DEU 5:17 “ꠈꠥꠘ ꠇꠞꠤꠅ ꠘꠣ।
DEU 5:18 “ꠎꠤꠘꠣ ꠇꠞꠤꠅ ꠘꠣ।
DEU 5:19 “ꠌꠥꠞꠤ ꠇꠞꠤꠅ ꠘꠣ।
DEU 5:20 “ꠇꠦꠃꠞꠞ ꠛꠤꠞꠥꠖ꠆ꠖꠦ ꠝꠤꠍꠣ ꠡꠣꠇ꠆ꠇꠤ ꠖꠤꠅ ꠘꠣ।
DEU 5:21 “ꠙꠞꠞ ꠛꠃꠞ ꠛꠣꠄ ꠟꠣꠟꠌ ꠇꠞꠤꠅ ꠘꠣ। ꠙꠞꠞ ꠊꠞ-ꠛꠣꠠꠤ, ꠎꠝꠤ-ꠝꠤꠞꠣꠡ, ꠉꠥꠟꠣꠝ-ꠛꠣꠘ꠆ꠖꠤ, ꠉꠞꠥ-ꠉꠣꠗꠣ, ꠛꠣ ꠇꠥꠘꠥ ꠎꠤꠘꠤꠡꠞ ꠛꠣꠄ ꠟꠣꠟꠌ ꠇꠞꠤꠅ ꠘꠣ।
DEU 5:22 “ꠝꠘꠅ ꠞꠣꠈꠤꠅ, ꠡ꠆ꠛꠄꠅꠋ ꠝꠣꠛꠥꠖꠦ ꠔꠥꠝꠞꠣꠞꠦ ꠔꠥꠞ ꠙꠣꠠꠞ ꠃꠙꠞꠞ ꠢꠃ ꠘꠥꠞꠞ ꠀꠉꠥꠁꠘ ꠕꠣꠇꠤ, ꠝꠦꠊꠞ ꠇꠣꠟꠘꠤ ꠀꠞ ꠉꠁꠘ ꠀꠘ꠆ꠖꠣꠞꠤꠞ ꠜꠤꠔꠞꠦ ꠕꠣꠇꠤ, ꠈꠥꠛ ꠎꠥꠞꠦ ꠎꠥꠞꠦ ꠅꠃ ꠢꠥꠇꠥꠝ ꠖꠤꠍꠂꠘ। ꠈꠣꠟꠤ ꠅꠃ ꠢꠥꠇꠥꠝ-ꠀꠢꠇꠣꠝ ꠍꠣꠠꠣ ꠔꠥꠝꠞꠣꠞꠦ ꠀꠞ ꠇꠥꠘꠥꠔꠣ ꠇꠁꠍꠂꠘ ꠘꠣ। ꠛꠣꠖꠦ ꠅꠃ ꠇꠣꠟꠣꠝ ꠅꠇꠟꠞꠦ ꠖꠥꠁ ꠐꠥꠇꠞꠣ ꠙꠣꠔ꠆ꠔꠞꠞ ꠃꠙꠞꠦ ꠔꠣꠘ ꠇꠥꠖꠞꠔꠤ ꠀꠔꠦ ꠟꠦꠈꠤꠀ ꠀꠝꠣꠞ ꠀꠔꠅ ꠖꠤꠍꠟꠣ।
DEU 5:23 ꠅꠁꠟꠦ ꠔꠣꠘ ꠘꠥꠞꠞ ꠔꠎꠟ꠆ꠟꠤꠄ ꠎꠦꠛꠟꠣ ꠙꠣꠠ ꠎꠟꠦꠞ, ꠄꠞꠝꠣꠎꠦ ꠔꠥꠝꠞꠣ ꠘꠤꠎꠞ ꠇꠣꠘꠦ ꠢꠥꠘꠟꠣꠄ, ꠢꠃ ꠀꠘ꠆ꠖꠣꠞꠤꠞ ꠜꠤꠔꠞꠦ ꠕꠣꠇꠤ ꠝꠣꠛꠥꠖꠞ ꠉꠟꠣꠞ ꠀꠅꠀꠎ, ꠢꠥꠘꠤꠀ ꠔꠥꠝꠞꠣꠞ ꠢꠇꠟ ꠈꠣꠘ꠆ꠖꠣꠘꠞ ꠀꠝꠤꠞ ꠅꠇꠟ, ꠔꠥꠝꠞꠣꠞ ꠝꠄ-ꠝꠥꠞꠛ꠆ꠛꠤ ꠅꠇꠟ ꠀꠝꠣꠞ ꠉꠦꠍꠦ ꠃꠑꠤꠀ ꠀꠁꠟꠣ,
DEU 5:24 ꠀꠁꠀ ꠇꠁꠟꠣ, ꠀꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠖꠤꠖꠣꠞ ꠖꠤꠀ ꠔꠣꠘ ꠎꠣꠟꠣꠟ ꠀꠞ ꠝꠢꠤꠝꠣ ꠀꠝꠞꠣꠞꠦ ꠖꠦꠈꠣꠁꠍꠂꠘ, ꠘꠥꠞꠞ ꠀꠉꠥꠁꠘ ꠕꠣꠇꠤ ꠛꠣꠞꠅꠁꠟ ꠔꠣꠘ ꠉꠟꠣꠞ ꠀꠅꠀꠎ ꠀꠝꠞꠣ ꠢꠥꠘꠍꠤ। ꠀꠞ ꠅꠈꠘ ꠀꠝꠞꠣ ꠛꠥꠎꠟꠣꠝ, ꠇꠥꠘꠥ ꠀꠖꠝ ꠎꠣꠔꠦ ꠀꠟ꠆ꠟꠣ ꠙꠣꠇꠞ ꠟꠉꠦ ꠛꠣꠔꠌꠤꠔ ꠇꠞꠣꠞ ꠛꠣꠖꠦꠅ, ꠁ ꠀꠖꠝ ꠛꠣꠌꠤꠀ ꠞꠄ।
DEU 5:25 ꠅꠁꠟꠦ ꠅꠈꠘ ꠇꠦꠘꠦ ꠀꠝꠞꠣ ꠁꠘꠅ ꠝꠞꠔꠣꠝ? ꠇꠥꠖꠞꠔꠤ ꠁ ꠀꠉꠥꠁꠘꠦ ꠔ ꠀꠝꠞꠣꠞꠦ ꠎꠣꠟꠣꠁꠟꠤꠛ, ꠀꠝꠞꠣ ꠎꠥꠖꠤ ꠀꠞꠅ ꠛꠦꠡ ꠇꠞꠤ ꠀꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠉꠟꠣꠞ ꠀꠅꠀꠎ ꠢꠥꠘꠣꠔ ꠞꠁ, ꠔꠦ ꠔ ꠘꠤꠞ꠆ꠉꠣꠔ ꠝꠞꠘ ꠅꠁꠛ।
DEU 5:26 ꠀꠝꠞꠣꠞ ꠟꠣꠈꠣꠘ ꠁꠟꠣ ꠀꠞ ꠇꠥꠘꠥ ꠀꠖꠝ ꠎꠣꠔ ꠀꠍꠂꠘ ꠘꠤ, ꠎꠦꠞꠣ ꠘꠥꠞꠞ ꠀꠉꠥꠁꠘ ꠕꠣꠇꠤ ꠎꠤꠘ꠆ꠖꠣ ꠀꠟ꠆ꠟꠣ ꠙꠣꠇꠞ ꠉꠟꠣꠞ ꠀꠅꠀꠎ ꠢꠥꠘꠣꠞ ꠛꠣꠖꠦꠅ ꠎꠤꠔꠣ ꠀꠍꠦ?
DEU 5:27 ꠔꠦ ꠀꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠎꠔꠔꠣ ꠛꠣꠔꠣꠁꠍꠂꠘ, ꠔꠣꠘ ꠇꠣꠘ꠆ꠖꠣꠔ ꠉꠤꠀ ꠀꠙꠘꠦꠃ ꠅꠔꠣ ꠢꠥꠘꠤꠀ ꠀꠁꠃꠇ꠆ꠇꠣ। ꠔꠣꠁꠘ ꠀꠙꠘꠣꠞ ꠉꠦꠍꠦ ꠎꠦꠔꠣ ꠎꠣꠘꠣꠁꠛꠣ, ꠀꠙꠘꠦ ꠀꠁꠀ ꠅꠔꠣ ꠀꠝꠞꠣꠞꠦ ꠢꠥꠘꠣꠁꠛꠣ। ꠔꠦꠃ ꠀꠝꠞꠣ ꠅꠔꠣ ꠀꠝꠟ ꠇꠞꠝꠥ।
DEU 5:28 “ꠀꠞ ꠢꠃ ꠡꠝꠄ ꠔꠥꠝꠞꠣ ꠎꠦꠛꠟꠣ ꠀꠝꠣꠞ ꠟꠉꠦ ꠝꠣꠔꠤꠞꠣꠄ, ꠡ꠆ꠛꠄꠅꠋ ꠝꠣꠛꠥꠖꠦ ꠁꠔꠣ ꠢꠥꠘꠟꠣ, ꠢꠥꠘꠤꠀ ꠀꠝꠣꠞꠦ ꠇꠁꠟꠣ, ꠅꠃ ꠝꠣꠘꠥꠡ ꠅꠇꠟꠞ ꠝꠣꠔ-ꠇꠕꠣ ꠔ ꠀꠝꠤ ꠢꠥꠘꠍꠤ, ꠔꠣꠞꠣ ꠔꠥꠝꠣꠞꠦ ꠎꠦꠔꠣ ꠇꠁꠍꠂꠘ ꠁꠔꠣ ꠢꠇꠟꠔꠣꠃ ꠜꠣꠟꠣ।
DEU 5:29 ꠢꠣꠍꠣꠃ ꠎꠥꠖꠤ ꠔꠣꠞꠣ ꠀꠝꠣꠞꠦ ꠅꠟꠣ ꠒꠞꠣꠁꠘ, ꠢꠣꠝꠦꠡꠣ ꠀꠝꠣꠞ ꠢꠥꠇꠥꠝ-ꠀꠢꠇꠣꠝ ꠝꠣꠘꠤꠀ ꠌꠟꠣꠞ ꠈꠤꠀꠟꠤ ꠅꠁꠘ, ꠔꠦ ꠔꠣꠞꠣ ꠀꠞ ꠔꠣꠞꠣꠞ ꠀꠅꠟꠣꠖ ꠅꠇꠟꠞ ꠌꠤꠞꠇꠣꠟꠤꠘ ꠜꠣꠟꠣꠁ ꠅꠁꠛ।
DEU 5:30 “ꠅꠈꠘ ꠔꠥꠝꠤ ꠟꠣꠝꠣꠔ ꠎꠣꠅ ꠀꠞ ꠔꠣꠞꠣꠞꠦ ꠇꠅ, ꠔꠣꠞꠣꠞ ꠔꠣꠝ꠆ꠛꠥꠔ ꠚꠤꠞꠤꠀ ꠎꠣꠁꠔꠣꠉꠤ।
DEU 5:31 ꠅꠁꠟꠦ ꠔꠥꠝꠤ ꠅꠘꠅ ꠀꠝꠣꠞ ꠇꠣꠘ꠆ꠖꠣꠔ ꠞꠁꠅ। ꠀꠝꠤ ꠔꠥꠝꠣꠞꠦ ꠀꠝꠣꠞ ꠢꠇꠟ ꠢꠥꠇꠥꠝ-ꠀꠢꠇꠣꠝ, ꠀꠁꠘ-ꠇꠣꠘꠥꠘ ꠀꠞ ꠡꠞꠤꠅꠔ ꠛꠣꠔꠣꠁꠝꠥ, ꠔꠥꠝꠤ ꠉꠤꠀ ꠔꠣꠞꠣꠞꠦ ꠅꠔꠣ ꠢꠤꠇꠣꠁꠛꠣꠄ। ꠔꠦꠃ ꠀꠝꠤ ꠔꠣꠞꠣꠞꠦ ꠎꠦ ꠖꠦꠡꠞ ꠖꠈꠟꠖꠣꠞꠤ ꠖꠤꠀꠞ, ꠢꠃ ꠖꠦꠡꠅ ꠉꠤꠀ ꠢꠣꠞꠤ ꠔꠣꠞꠣ ꠅꠔꠣ ꠀꠝꠟ ꠇꠞꠛꠣ।
DEU 5:32 “ꠄꠞꠟꠣꠉꠤꠃ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠔꠥꠝꠞꠣꠞꠦ ꠎꠦꠔꠣ ꠢꠥꠇꠥꠝ-ꠀꠢꠇꠣꠝ ꠖꠤꠍꠂꠘ, ꠁꠔꠣ ꠎꠔꠘ ꠇꠞꠤꠀ ꠀꠖꠣꠄ ꠇꠞꠤꠅ, ꠁꠔꠣꠞ ꠔꠤꠟ ꠙꠞꠤꠝꠣꠘ ꠢꠦꠞ-ꠚꠦꠞ ꠇꠞꠤꠅ ꠘꠣ।
DEU 5:33 ꠔꠣꠁꠘ ꠎꠦ ꠙꠕꠦ ꠌꠟꠣꠞ ꠟꠣꠉꠤ ꠢꠥꠇꠥꠝ ꠖꠤꠍꠂꠘ, ꠑꠤꠇ ꠅꠃ ꠙꠕꠦ ꠌꠟꠤꠅ, ꠔꠦꠃ ꠔꠥꠝꠞꠣ ꠎꠣꠘꠦ ꠛꠣꠌꠛꠣꠄ, ꠔꠥꠝꠞꠣꠞ ꠜꠣꠟꠣꠁ ꠅꠁꠛ, ꠀꠞ ꠔꠥꠝꠞꠣ ꠎꠦ ꠖꠦꠡꠞ ꠖꠈꠟꠖꠣꠞꠤ ꠙꠣꠁꠛꠣꠄ, ꠢꠃ ꠖꠦꠡꠅ ꠔꠥꠝꠞꠣꠞ ꠢꠣꠄꠀꠔꠤ ꠛꠃꠔ ꠟꠣꠝ꠆ꠛꠣ ꠅꠁꠛ।
DEU 6:1 “ꠔꠥꠝꠞꠣꠞꠦ ꠢꠤꠇꠣꠘꠤꠞ ꠘꠤꠅꠔꠦ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠀꠝꠣꠞꠦ ꠅꠃ ꠢꠥꠇꠥꠝ-ꠀꠢꠇꠣꠝ, ꠡꠞꠤꠅꠔ ꠀꠞ ꠀꠁꠘ-ꠇꠣꠘꠥꠘ ꠖꠤꠍꠂꠘ, ꠎꠣꠔꠦ ꠢꠃ ꠎꠦ ꠖꠦꠡ ꠖꠈꠟ ꠇꠞꠣꠞ ꠘꠤꠅꠔꠦ ꠔꠥꠝꠞꠣ ꠎꠞ꠆ꠖꠣꠘ ꠉꠣꠋ ꠙꠣꠞ ꠅꠁꠀ ꠎꠣꠁꠞꠣꠄ, ꠢꠘꠅ ꠉꠤꠀ ꠢꠣꠞꠤ ꠔꠥꠝꠞꠣ ꠁꠔꠣ ꠀꠝꠟ ꠇꠞꠅ।
DEU 6:2 ꠔꠦꠃ ꠔꠥꠝꠞꠣ, ꠔꠥꠝꠞꠣꠞ ꠢꠥꠞꠥꠔ꠆ꠔꠣꠁꠘ ꠀꠞ ꠔꠣꠞꠣꠞ ꠀꠅꠟꠣꠖ ꠅꠇꠟꠦ ꠢꠣꠞꠣ ꠎꠤꠘ꠆ꠖꠦꠉꠤ ꠀꠟ꠆ꠟꠣ ꠝꠣꠛꠥꠖꠞꠦ ꠒꠞꠣꠁꠀ ꠔꠣꠘ ꠖꠦꠅꠀ ꠘꠤꠅꠝ ꠀꠞ ꠢꠥꠇꠥꠝ ꠅꠇꠟ ꠀꠝꠟ ꠇꠞꠤꠅ। ꠅꠟꠣ ꠇꠞꠟꠦ ꠔꠥꠝꠞꠣ ꠛꠃꠔ ꠖꠤꠘ ꠛꠣꠌꠤꠀ ꠞꠁꠛꠣꠄ।
DEU 6:3 ꠅ ꠛꠘꠤ ꠁꠍꠞꠣꠁꠟ, ꠔꠥꠝꠞꠣ ꠀꠝꠣꠞ ꠇꠕꠣ ꠢꠥꠘꠅ ꠀꠞ ꠢꠥꠡꠤꠀꠞ ꠅꠁꠀ ꠁꠔꠣ ꠀꠝꠟ ꠇꠞꠅ, ꠔꠦꠃ ꠔꠥꠝꠞꠣꠞ ꠛꠣꠚ-ꠖꠣꠖꠣ ꠅꠇꠟꠞ ꠝꠣꠛꠥꠖ ꠀꠟ꠆ꠟꠣꠞ ꠅꠀꠖꠣ ꠝꠣꠚꠤꠇ, ꠢꠃ ꠖꠥꠗ ꠀꠞ ꠝꠃꠞ ꠜꠣꠘ꠆ꠒꠣꠞ ꠀꠟꠣ ꠖꠦꠡꠅ ꠔꠥꠝꠞꠣꠞ ꠜꠣꠟꠣꠁ ꠅꠁꠛ ꠀꠞ ꠔꠥꠝꠞꠣ ꠛꠃꠔ ꠛꠣꠠꠤꠛꠣꠄ।
DEU 6:4 “ꠅ ꠛꠘꠤ ꠁꠍꠞꠣꠁꠟ, ꠢꠥꠘꠅ, ꠀꠟ꠆ꠟꠣ ꠀꠝꠞꠣꠞ ꠝꠣꠛꠥꠖ, ꠔꠣꠁꠘꠃ ꠄꠇ।
DEU 6:5 ꠔꠥꠝꠞꠣ ꠙꠞꠔꠦꠇꠦ ꠔꠥꠝꠞꠣꠞ ꠀꠡ꠆ꠔꠣ ꠖꠤꠟ, ꠀꠡ꠆ꠔꠣ ꠎꠣꠘ ꠀꠞ ꠢꠇꠟ ꠛꠟ-ꠡꠇ꠆ꠔꠤ ꠖꠤꠀ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞꠦ ꠝꠢꠛ꠆ꠛꠔ ꠇꠞꠤꠅ।
DEU 6:6 ꠀꠁꠎ ꠀꠝꠤ ꠔꠥꠝꠞꠣꠞꠦ ꠎꠦ ꠢꠥꠇꠥꠝ ꠖꠤꠀꠞ, ꠁꠔꠣ ꠔꠥꠝꠞꠣꠞ ꠖꠤꠟꠅ ꠉꠣꠕꠤꠀ ꠞꠣꠈꠤꠅ।
DEU 6:7 ꠔꠥꠝꠞꠣ ꠢꠇꠟꠦ ꠔꠥꠝꠞꠣꠞ ꠢꠥꠞꠥꠔ꠆ꠔꠣꠁꠘꠞꠦ ꠁꠔꠣ ꠈꠤꠀꠟ ꠇꠞꠤ ꠢꠤꠇꠣꠁꠅ। ꠀꠞ ꠊꠞꠅ ꠛꠁꠀ, ꠙꠕꠦ-ꠊꠣꠐꠦ ꠌꠟꠣꠞ ꠡꠝꠄ, ꠊꠥꠝꠣꠘꠤꠞ ꠡꠝꠄ, ꠊꠥꠝ ꠕꠣꠇꠤ ꠃꠑꠣꠞ ꠛꠣꠖꠦꠅ ꠅꠔꠣ ꠛꠦꠙꠣꠞꠦ ꠝꠣꠔꠣ-ꠝꠣꠔꠤ ꠇꠞꠤꠅ।
DEU 6:8 ꠝꠘꠅ ꠞꠣꠈꠣꠞ ꠘꠤꠡꠣꠘꠣ ꠢꠤꠡꠣꠛꠦ ꠁꠔꠣ ꠀꠔꠅ ꠛꠣꠘ꠆ꠖꠤꠀ ꠞꠣꠈꠤꠅ ꠀꠞ ꠇꠙꠣꠟꠞ ꠝꠣꠎꠦ ꠟꠣꠉꠣꠁꠅ।
DEU 6:9 ꠔꠥꠝꠞꠣꠞ ꠖꠥꠀꠞꠞ ꠌꠃꠇꠣꠑꠅ ꠀꠞ ꠝꠥꠟ ꠉꠦꠁꠐꠅ ꠟꠦꠈꠤꠀ ꠞꠣꠈꠤꠅ।
DEU 6:10 “ꠔꠥꠝꠞꠣꠞ ꠛꠣꠚ-ꠖꠣꠖꠣ ꠁꠛ꠆ꠞꠣꠢꠤꠝ, ꠁꠍꠢꠣꠇ ꠀꠞ ꠁꠀꠇꠥꠛꠞ ꠉꠦꠍꠦ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠇꠍꠝ ꠈꠣꠁꠀ ꠎꠦ ꠖꠦꠡ ꠖꠦꠅꠀꠞ ꠅꠀꠖꠣ ꠇꠞꠍꠂꠘ, ꠢꠃ ꠖꠦꠡ ꠔꠣꠁꠘ ꠔꠥꠝꠞꠣꠞꠦ ꠘꠤꠛꠣ। ꠢꠤꠘꠅ ꠡꠥꠘ꠆ꠖꠞ ꠡꠥꠘ꠆ꠖꠞ ꠀꠞ ꠛꠠ ꠛꠠ ꠐꠣꠃꠘ ꠅꠇꠟ ꠀꠍꠦ, ꠎꠦꠔꠣ ꠔꠥꠝꠞꠣ ꠛꠣꠘꠣꠁꠍ ꠘꠣ, ꠈꠣꠟꠤ ꠄꠝꠘꠦꠃ ꠙꠣꠁꠛꠣꠄ।
DEU 6:11 ꠀꠞ ꠝꠣꠟ-ꠍꠣꠝꠣꠘꠣꠄ ꠜꠞꠣ ꠢꠣꠎꠣꠁꠟ-ꠙꠣꠠꠣꠁꠟ ꠊꠞ-ꠖꠥꠀꠞ ꠙꠣꠁꠛꠣꠄ, ꠎꠦꠔꠣ ꠔꠥꠝꠞꠣ ꠎꠥꠉꠣꠁꠍ ꠘꠣ, ꠙꠣꠘꠤꠞ ꠇꠥꠀ ꠙꠣꠁꠛꠣꠄ ꠎꠦꠔꠣ ꠔꠥꠝꠞꠣ ꠈꠥꠖꠤꠍ ꠘꠣ, ꠀꠋꠉꠥꠞꠞ ꠛꠣꠉꠣꠘ ꠀꠞ ꠎꠄꠔꠥꠘꠞ ꠛꠣꠉꠣꠘ ꠙꠣꠁꠛꠣꠄ ꠎꠦꠔꠣ ꠔꠥꠝꠞꠣ ꠟꠣꠉꠣꠁꠍ ꠘꠣ।
DEU 6:12 ꠅꠁꠟꠦ ꠔꠥꠝꠞꠣ ꠢꠥꠡꠤꠀꠞ ꠞꠁꠅ, ꠁꠔꠣ ꠢꠇꠟꠔꠣ ꠙꠣꠁꠀ ꠢꠣꠞꠤ ꠝꠣꠟꠖꠣꠞ ꠛꠘꠤꠀ ꠔꠥꠝꠞꠣꠞ ꠢꠃ ꠀꠟ꠆ꠟꠣ ꠝꠣꠛꠥꠖꠞꠦ ꠚꠣꠃꠞꠤꠅ ꠘꠣ, ꠎꠦꠁꠘ ꠔꠥꠝꠞꠣꠞꠦ ꠝꠤꠡꠞ ꠖꠦꠡꠞ ꠉꠥꠟꠣꠝꠤ ꠕꠣꠇꠤ ꠈꠣꠟꠣꠍ ꠇꠞꠤꠀ ꠀꠘꠍꠂꠘ।
DEU 6:13 “ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞꠦ ꠒꠞꠣꠁꠀ ꠌꠟꠤꠅ, ꠈꠣꠟꠤ ꠔꠣꠘ ꠄꠛꠣꠖꠔ ꠇꠞꠤꠅ, ꠀꠞ ꠔꠣꠘ ꠘꠣꠝꠦ ꠇꠍꠝ ꠈꠣꠁꠅ।
DEU 6:14 ꠔꠥꠝꠞꠣ ꠀꠞꠤ-ꠚꠞꠤ ꠎꠣꠔꠤꠞ ꠖꠦꠛ-ꠖꠦꠛꠤꠞ ꠙꠥꠎꠣ ꠇꠞꠤꠅ ꠘꠣ।
DEU 6:15 ꠎꠣꠘ ꠔ, ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣ ꠎꠦꠁꠘ ꠔꠥꠝꠞꠣꠞ ꠟꠉꠦ ꠀꠍꠂꠘ, ꠔꠣꠁꠘ ꠔ ꠟꠣ-ꠡꠞꠤꠇ ꠝꠣꠛꠥꠖ, ꠇꠥꠘꠥ ꠡꠞꠤꠇ ꠡꠁꠎ꠆ꠎ ꠇꠞꠂꠘ ꠘꠣ। ꠄꠞꠟꠣꠉꠤ ꠢꠥꠡꠤꠀꠞ ꠞꠁꠅ, ꠁꠔꠣꠞ ꠙꠥꠎꠣ ꠇꠞꠟꠦ ꠔꠣꠁꠘ ꠉꠥꠍꠣꠄ ꠀꠉꠥꠁꠘ ꠅꠁꠀ ꠔꠥꠝꠞꠣꠞꠦ ꠖꠥꠘꠤꠀ ꠕꠣꠇꠤ ꠚꠥꠍꠤꠟꠤꠛꠣ।
DEU 6:16 ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞꠦ ꠙꠞꠤꠇ꠆ꠇꠣ ꠇꠞꠣꠔ ꠟꠣꠉꠤꠅ ꠘꠣ, ꠎꠦꠟꠣ ꠀꠉꠦ ꠢꠃ ꠝꠣꠍꠣ ꠘꠣꠝꠞ ꠎꠣꠉꠣꠔ ꠇꠞꠍꠟꠣꠄ।
DEU 6:17 ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠔꠥꠝꠞꠣꠞꠦ ꠎꠔ ꠢꠥꠇꠥꠝ-ꠀꠢꠇꠣꠝ, ꠢꠥꠡꠤꠀꠞꠤ ꠀꠞ ꠘꠤꠅꠝ-ꠇꠣꠘꠥꠘ ꠖꠤꠍꠂꠘ, ꠁꠔꠣ ꠔꠥꠝꠞꠣ ꠈꠤꠀꠟ ꠇꠞꠤ ꠝꠣꠘꠤꠅ।
DEU 6:18 ꠀꠞ ꠝꠣꠛꠥꠖꠞ ꠘꠎꠞꠅ ꠎꠦꠔꠣ ꠡꠑꠤꠇ, ꠔꠣꠁꠘ ꠎꠦꠔꠣ ꠜꠣꠟꠣ ꠙꠣꠁꠘ, ꠔꠥꠝꠞꠣ ꠅꠔꠣꠃ ꠇꠞꠤꠅ, ꠔꠦꠃ ꠔꠥꠝꠞꠣꠞ ꠜꠣꠟꠣꠁ ꠅꠁꠛ। ꠝꠣꠛꠥꠖꠦ ꠔꠥꠝꠞꠣꠞ ꠛꠣꠚ-ꠖꠣꠖꠣꠞ ꠉꠦꠍꠦ ꠎꠦ ꠖꠦꠡ ꠖꠤꠛꠣꠞ ꠇꠍꠝ ꠇꠞꠍꠂꠘ, ꠢꠃ ꠖꠦꠡ ꠕꠣꠇꠤ ꠔꠥꠝꠞꠣꠞ ꠖꠥꠡꠝꠘꠞꠦ ꠔꠣꠁꠘ ꠈꠦꠖꠣꠁꠀ ꠖꠤꠛꠣ। ꠀꠞ ꠝꠣꠛꠥꠖꠞ ꠅꠀꠖꠣ ꠝꠣꠚꠤꠇ ꠢꠃ ꠀꠞꠣꠝꠞ ꠖꠦꠡꠞ ꠖꠈꠟꠖꠣꠞꠤꠅ ꠔꠥꠝꠞꠣ ꠙꠣꠁꠛꠣꠄ।
DEU 6:20 “ꠜꠛꠤꠡꠔꠦ ꠎꠦꠛꠟꠣ ꠔꠥꠝꠞꠣꠞ ꠀꠅꠟꠣꠖ ꠅꠇꠟꠦ ꠔꠥꠝꠞꠣꠞꠦ ꠎꠤꠇꠣꠁꠛꠣ, ꠀꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠅꠃ ꠎꠦꠔꠣ ꠢꠥꠇꠥꠝ-ꠀꠢꠇꠣꠝ, ꠘꠤꠅꠝ-ꠇꠣꠘꠥꠘ, ꠀꠞ ꠢꠥꠡꠤꠀꠞꠤ ꠖꠤꠍꠂꠘ ꠁꠔꠣꠞ ꠝꠣꠘꠤ ꠇꠤꠔꠣ?
DEU 6:21 ꠅꠃ ꠡꠝꠄ ꠎꠥꠀꠙ ꠖꠤꠅ, ꠝꠤꠡꠞ ꠖꠦꠡꠅ ꠀꠝꠞꠣ ꠚꠦꠞꠣꠃꠘꠞ ꠉꠥꠟꠣꠝ ꠀꠍꠟꠣꠝ, ꠅꠁꠟꠦ ꠀꠟ꠆ꠟꠣꠄ ꠔꠣꠘ ꠛꠟꠀꠟꠣ ꠇꠥꠖꠞꠔꠤ ꠀꠔ ꠖꠤꠀ ꠀꠝꠞꠣꠞꠦ ꠛꠣꠞ ꠇꠞꠤꠀ ꠀꠘꠍꠂꠘ।
DEU 6:22 ꠝꠣꠛꠥꠖꠦ ꠀꠝꠞꠣꠞ ꠌꠈꠥꠞ ꠍꠣꠝꠘꠦ ꠚꠦꠞꠣꠃꠘ ꠀꠞ ꠔꠣꠞ ꠛꠣꠠꠤꠞ ꠢꠇꠟꠞ ꠃꠙꠞꠦ, ꠀꠡ꠆ꠔꠣ ꠝꠤꠡꠞ ꠖꠦꠡꠞ ꠃꠙꠞꠦ ꠛꠠ ꠛꠠ ꠉꠎꠛꠤ ꠘꠤꠡꠣꠘꠣ, ꠛꠦꠎꠥꠁꠔꠣ ꠛꠣꠟꠣ-ꠝꠍꠤꠛꠔ ꠀꠞ ꠇꠥꠖꠞꠔꠤ ꠇꠣꠝ ꠖꠦꠈꠣꠁꠟꠣ।
DEU 6:23 ꠅꠁꠟꠦ ꠀꠝꠞꠣꠞꠦ ꠔꠣꠁꠘ ꠢꠃ ꠖꠦꠡ ꠕꠣꠇꠤ ꠛꠣꠞ ꠇꠞꠤꠀ ꠀꠘꠟꠣ, ꠎꠣꠔꠦ ꠎꠦ ꠖꠦꠡ ꠖꠤꠛꠣꠞ ꠟꠣꠉꠤ ꠀꠝꠞꠣꠞ ꠛꠣꠚ-ꠖꠣꠖꠣ ꠅꠇꠟꠞ ꠉꠦꠍꠦ ꠇꠍꠝ ꠈꠣꠁꠍꠟꠣ, ꠢꠃ ꠖꠦꠡꠅ ꠀꠝꠞꠣꠞꠦ ꠙꠣꠞ ꠇꠞꠤꠀ ꠖꠈꠟꠖꠣꠞꠤ ꠖꠦꠁꠘ।
DEU 6:24 ꠀꠞ ꠔꠣꠁꠘ ꠢꠥꠇꠥꠝ ꠖꠤꠟꠣ, ꠀꠝꠞꠣ ꠎꠣꠘꠥ ꠔꠣꠘ ꠢꠇꠟ ꠢꠥꠇꠥꠝ-ꠀꠢꠇꠣꠝ ꠝꠣꠘꠤ, ꠔꠣꠘꠞꠦ ꠒꠞꠣꠁꠀ ꠌꠟꠤ, ꠔꠦꠃ ꠀꠝꠞꠣꠞ ꠜꠣꠟꠣꠁ ꠅꠁꠛ ꠀꠞ ꠀꠝꠞꠣ ꠅꠈꠘꠇꠥꠞ ꠟꠣꠈꠣꠘ ꠢꠣꠝꠦꠡꠣ ꠛꠣꠌꠤꠀ ꠞꠁꠝꠥ।
DEU 6:25 ꠅꠈꠘ ꠀꠝꠞꠣ ꠎꠥꠖꠤ ꠀꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠢꠥꠇꠥꠝ ꠝꠣꠚꠤꠇ ꠔꠣꠘ ꠖꠦꠅꠀ ꠘꠤꠅꠝ-ꠇꠣꠘꠥꠘ ꠈꠤꠀꠟ ꠇꠞꠤꠀ ꠝꠣꠘꠤ, ꠔꠦ ꠁꠐꠣꠃ ꠅꠁꠟ ꠀꠝꠞꠣꠞ ꠙꠞꠦꠎꠉꠣꠞꠤ।”
DEU 7:1 ꠢꠎꠞꠔ ꠝꠥꠍꠣꠄ ꠀꠞꠅ ꠇꠁꠟꠣ, “ꠢꠥꠘꠅ, ꠔꠥꠝꠞꠣ ꠎꠦ ꠖꠦꠡ ꠖꠈꠟ ꠇꠞꠣꠔ ꠎꠣꠁꠞꠣꠄ, ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄꠃ ꠔꠥꠝꠞꠣꠞꠦ ꠢꠘꠅ ꠘꠤꠛꠣ ꠀꠞ ꠛꠃꠔ ꠎꠣꠔꠤꠞꠦ ꠔꠥꠝꠞꠣꠞ ꠍꠣꠝꠘꠦ ꠕꠣꠇꠤ ꠈꠦꠖꠣꠁꠀ ꠢꠣꠞꠤ ꠁꠔꠣ ꠖꠈꠟ ꠇꠞꠣꠁꠛꠣ। ꠔꠣꠁꠘ ꠢꠤꠐ꠆ꠐꠤ, ꠉꠤꠞ꠆ꠉꠣꠡꠤ, ꠀꠝꠥꠞꠤ, ꠇꠦꠘꠣꠘꠤ, ꠚꠣꠞꠤꠎꠤ, ꠢꠤꠛ꠆ꠛꠤ ꠀꠞ ꠎꠤꠛꠥꠎꠤ ꠎꠣꠔꠤꠞꠦ ꠈꠦꠖꠣꠁ ꠖꠤꠛꠣ, ꠁ ꠡꠣꠔꠅ ꠎꠣꠔꠤꠃ ꠙꠞꠤꠝꠣꠘꠦ ꠔꠥꠝꠞꠣ ꠕꠣꠇꠤ ꠛꠠ ꠀꠞ ꠛꠟꠀꠟꠣ।
DEU 7:2 ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠎꠦꠛꠟꠣ ꠁꠔꠣꠞꠦ ꠔꠥꠝꠞꠣꠞ ꠀꠔꠅ ꠡꠙꠤꠀ ꠖꠤꠛꠣ, ꠅꠃ ꠡꠝꠄ ꠔꠥꠝꠞꠣ ꠔꠣꠞꠣꠞꠦ ꠄꠇ꠆ꠇꠦꠛꠣꠞꠦ ꠛꠤꠘꠣꠡ ꠇꠞꠤꠟꠤꠅ, ꠔꠣꠞꠣꠞ ꠟꠉꠦ ꠇꠥꠘꠥ ꠌꠥꠇ꠆ꠔꠤ ꠇꠞꠤꠅ ꠘꠣ, ꠀꠞ ꠇꠥꠘꠥ ꠖꠄꠀ-ꠝꠣꠄꠀ ꠖꠦꠈꠣꠁꠅ ꠘꠣ।
DEU 7:3 ꠁꠔꠣꠞ ꠟꠉꠦ ꠛꠤꠀ-ꠡꠣꠖꠤꠞ ꠛꠦꠙꠣꠞꠦ ꠇꠥꠘꠥ ꠌꠥꠇ꠆ꠔꠤ ꠇꠞꠤꠅ ꠘꠣ। ꠔꠥꠝꠞꠣꠞ ꠙꠥꠠꠤꠘ꠆ꠔꠞꠦ ꠔꠣꠞꠣꠞ ꠙꠥꠀꠂꠘ꠆ꠔꠞ ꠉꠦꠍꠦ ꠛꠤꠀ ꠖꠤꠅ ꠘꠣ, ꠀꠞ ꠔꠣꠞꠣꠞ ꠙꠥꠠꠤꠘꠞꠦꠅ ꠔꠥꠝꠞꠣꠞ ꠙꠥꠀꠂꠘ꠆ꠔꠞ ꠟꠣꠉꠤ ꠀꠘꠤꠅ ꠘꠣ।
DEU 7:4 ꠇꠣꠞꠘ ꠁꠔꠣꠄ ꠔꠥꠝꠞꠣꠞ ꠙꠥꠀ-ꠙꠥꠠꠤꠘꠞꠦ ꠀꠝꠣꠞ ꠉꠦꠍ ꠕꠣꠇꠤ ꠢꠞꠣꠁꠀ ꠖꠦꠛ-ꠖꠦꠛꠤꠞ ꠙꠥꠎꠣ ꠇꠞꠣꠁꠛ। ꠔꠦꠃ ꠀꠟ꠆ꠟꠣ ꠝꠣꠛꠥꠖꠦ ꠔꠥꠝꠞꠣꠞ ꠃꠙꠞꠦ ꠉꠥꠍꠣ ꠅꠁꠀ, ꠟꠉꠦ ꠟꠉꠦꠃ ꠔꠥꠝꠞꠣꠞꠦ ꠛꠤꠘꠣꠡ ꠇꠞꠛꠣ।
DEU 7:5 ꠄꠞꠟꠣꠉꠤ ꠔꠥꠝꠞꠣ ꠔꠣꠞꠣꠞ ꠢꠇꠟ ꠙꠥꠎꠣ-ꠝꠘ꠆ꠒꠙ ꠜꠣꠋꠉꠤꠟꠤꠅ, ꠙꠥꠎꠣꠞ ꠎꠣꠉꠣ ꠅꠇꠟ ꠛꠤꠘꠣꠡ ꠇꠞꠤꠅ, ꠀꠡꠦꠞꠣ-ꠖꠦꠛꠤꠞ ꠘꠤꠡꠣꠘꠣ ꠈꠥꠐꠤ ꠇꠣꠐꠤꠀ ꠚꠣꠟꠣꠁꠅ, ꠀꠞ ꠢꠇꠟ ꠎꠣꠔꠞ ꠝꠥꠞ꠆ꠔꠤꠞꠦ ꠀꠉꠥꠁꠘꠖꠤ ꠎꠣꠟꠣꠁꠅ।
DEU 7:6 ꠝꠘꠅ ꠞꠣꠈꠤꠅ, ꠔꠥꠝꠞꠣꠃ ꠅꠁꠟꠣꠄ ꠀꠟ꠆ꠟꠣ ꠝꠣꠛꠥꠖꠞ ꠙꠛꠤꠔ꠆ꠞ ꠙ꠆ꠞꠎꠣ। ꠖꠥꠘꠤꠀꠞ ꠢꠇꠟ ꠎꠣꠔꠤꠞ ꠝꠣꠎ ꠕꠣꠇꠤ ꠔꠣꠁꠘꠃ ꠔꠥꠝꠞꠣꠞꠦ ꠘꠤꠎꠞ ꠙ꠆ꠞꠎꠣ ꠀꠞ ꠈꠣꠍ ꠡꠝ꠆ꠙꠖ ꠢꠤꠡꠣꠛꠦ ꠀꠟꠉ ꠇꠞꠍꠂꠘ।
DEU 7:7 “ꠇꠦꠘꠦ ꠀꠟꠉ ꠇꠞꠍꠂꠘ? ꠅꠁꠘ꠆ꠘ ꠎꠣꠔꠤ ꠕꠣꠇꠤ ꠔꠥꠝꠞꠣꠞ ꠝꠣꠘꠥꠡ ꠛꠦꠡꠤ, ꠅꠔꠣꠞ ꠟꠣꠉꠤ ꠘꠤ? ꠘꠣ, ꠝꠥꠐꠦꠃ ꠘꠣ। ꠔꠥꠝꠞꠣ ꠔ ꠢꠇꠟ ꠎꠣꠔꠤ ꠕꠣꠇꠤ ꠇꠝ ꠀꠍꠟꠣꠄ।
DEU 7:8 ꠔꠣ-ꠅ ꠔꠣꠁꠘ ꠔꠥꠝꠞꠣꠞꠦ ꠈꠥꠛ ꠝꠣꠄꠀ-ꠝꠢꠛ꠆ꠛꠔ ꠇꠞꠂꠘ, ꠀꠞ ꠔꠥꠝꠞꠣꠞ ꠛꠣꠚ-ꠖꠣꠖꠣ ꠅꠇꠟꠞ ꠉꠦꠍꠦ ꠎꠦ ꠇꠍꠝ ꠇꠞꠍꠟꠣ, ꠅꠔꠣꠞ ꠟꠣꠉꠤꠃ ꠔꠥꠝꠞꠣꠞꠦ ꠀꠟꠉ ꠇꠞꠍꠂꠘ। ꠝꠣꠛꠥꠖꠦ ꠔꠣꠘ ꠇꠥꠖꠞꠔꠤ ꠀꠔ ꠟꠣꠉꠣꠁꠀ ꠔꠥꠝꠞꠣꠞꠦ ꠛꠣꠞ ꠇꠞꠤꠀ ꠀꠘꠍꠂꠘ, ꠝꠤꠡꠞꠞ ꠛꠣꠖꠡꠣ ꠚꠦꠞꠣꠃꠘꠞ ꠀꠔ ꠕꠣꠇꠤ ꠀꠞ ꠉꠥꠟꠣꠝꠤꠞ ꠖꠦꠡ ꠕꠣꠇꠤ ꠔꠥꠝꠞꠣꠞꠦ ꠀꠎꠣꠖ ꠇꠞꠍꠂꠘ।
DEU 7:9 ꠅꠈꠘ ꠔꠥꠝꠞꠣ ꠝꠘꠅ ꠞꠣꠈꠤꠅ, ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠃ ꠅꠁꠟꠣ ꠀꠍꠟ ꠝꠣꠛꠥꠖ। ꠔꠣꠁꠘꠃ ꠌꠤꠞꠇꠣꠟꠤꠘ ꠢꠇ-ꠢꠣꠟꠣꠟ। ꠎꠦꠞꠣ ꠀꠡꠤꠇ ꠅꠁꠀ ꠔꠣꠘꠦ ꠝꠢꠛ꠆ꠛꠔ ꠇꠞꠦ ꠀꠞ ꠔꠣꠘ ꠢꠥꠇꠥꠝ-ꠀꠢꠇꠣꠝ ꠝꠣꠘꠦ, ꠔꠣꠁꠘ ꠔꠣꠞꠣꠞ ꠀꠎꠣꠞ ꠀꠎꠣꠞ ꠍꠤꠠꠤ ꠙꠞ꠆ꠎꠘ꠆ꠔ ꠘꠤꠎꠞ ꠅꠀꠖꠣ ꠇꠞꠣ ꠎꠛꠣꠘ ꠀꠞ ꠖꠄꠀ ꠛꠅꠀꠁꠟ ꠞꠣꠈꠂꠘ।
DEU 7:10 ꠅꠁꠟꠦ ꠎꠦꠔꠣꠄ ꠛꠖ ꠡꠣꠅꠡ ꠇꠞꠤꠀ ꠔꠣꠘ ꠛꠣꠄ ꠙꠤꠍ ꠖꠤꠟꠣꠄ, ꠔꠣꠁꠘ ꠁꠔꠣꠞꠦ ꠛꠤꠘꠣꠡ ꠇꠞꠤꠀ ꠎꠟꠖꠤ ꠇꠞꠤ ꠛꠖꠟꠣ ꠖꠦꠁꠘ।
DEU 7:11 ꠄꠞꠟꠣꠉꠤ ꠀꠁꠎ ꠔꠥꠝꠞꠣꠞꠦ ꠎꠦ ꠢꠥꠇꠥꠝ-ꠀꠢꠇꠣꠝ, ꠘꠤꠅꠝ-ꠇꠣꠘꠥꠘ ꠀꠞ ꠡꠞꠤꠅꠔ ꠖꠤꠞꠣꠝ, ꠁꠔꠣ ꠈꠥꠛ ꠈꠤꠀꠟ ꠇꠞꠤꠀ ꠀꠝꠟ ꠇꠞꠤꠅ।
DEU 7:12 “ꠅ ꠛꠘꠤ ꠁꠍꠞꠣꠁꠟ, ꠔꠥꠝꠞꠣ ꠅꠃ ꠢꠥꠇꠥꠝ-ꠀꠢꠇꠣꠝꠞ ꠇꠕꠣ ꠇꠣꠘ ꠙꠣꠔꠤꠀ ꠢꠥꠘꠅ, ꠀꠞ ꠁꠔꠣ ꠈꠤꠀꠟ ꠇꠞꠤ ꠀꠝꠟ ꠇꠞꠅ। ꠔꠦꠃ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠔꠥꠝꠞꠣꠞ ꠛꠣꠚ-ꠖꠣꠖꠣꠁꠘ꠆ꠔꠞ ꠟꠉꠦ, ꠔꠣꠘ ꠖꠄꠀ-ꠝꠣꠄꠀꠞ ꠛꠦꠙꠣꠞꠦ ꠇꠍꠝ ꠈꠣꠁꠀ ꠎꠦ ꠅꠀꠖꠣ-ꠌꠥꠇ꠆ꠔꠤ ꠇꠞꠍꠟꠣ, ꠁꠔꠣ ꠔꠥꠝꠞꠣꠞ ꠟꠉꠦ ꠛꠅꠀꠁꠟ ꠞꠣꠈꠛꠣ।
DEU 7:13 ꠔꠣꠁꠘ ꠔꠥꠝꠞꠣꠞꠦ ꠝꠣꠄꠀ-ꠝꠢꠛ꠆ꠛꠔ ꠇꠞꠛꠣ, ꠞꠢꠝ-ꠛꠞꠇꠔ ꠖꠤꠛꠣ ꠀꠞ ꠔꠥꠝꠞꠣꠞ ꠝꠣꠘꠡꠞ ꠙꠞꠤꠝꠣꠘ ꠛꠣꠠꠣꠁꠛꠣ। ꠔꠥꠝꠞꠣꠞꠦ ꠎꠦ ꠖꠦꠡ ꠖꠤꠛꠣꠞ ꠟꠣꠉꠤ ꠔꠥꠝꠞꠣꠞ ꠝꠄ-ꠝꠥꠞꠛ꠆ꠛꠤꠞ ꠉꠦꠍꠦ ꠇꠍꠝ ꠈꠣꠁꠍꠟꠣ, ꠅꠃ ꠖꠦꠡꠅ ꠔꠥꠝꠞꠣꠞꠦ ꠞꠢꠝ-ꠛꠞꠇꠔ ꠖꠤꠛꠣ। ꠔꠥꠝꠞꠣꠞꠦ ꠀꠅꠟꠣꠖ ꠛꠣꠠꠣꠁ ꠖꠤꠛꠣ, ꠔꠥꠝꠞꠣꠞ ꠛꠣꠉꠣꠘꠞ ꠚꠟ-ꠝꠥꠟ, ꠈꠦꠔꠞ ꠚꠡꠟ, ꠀꠋꠉꠥꠞꠞ ꠞꠡ, ꠎꠄꠔꠥꠘꠞ ꠔꠦꠟ, ꠉꠞꠥ-ꠛꠣꠍꠥꠞ, ꠝꠦꠠꠣ-ꠍꠣꠉꠟ ꠢꠇꠟꠔꠣꠞꠦ ꠛꠣꠠꠣꠁ ꠖꠤꠛꠣ।
DEU 7:14 ꠢꠇꠟ ꠎꠣꠔꠤ ꠕꠣꠇꠤ ꠔꠥꠝꠞꠣ ꠛꠦꠡꠤ ꠞꠢꠝ-ꠛꠞꠇꠔ ꠙꠣꠁꠛꠣꠄ, ꠔꠥꠝꠞꠣꠞ ꠛꠦꠐꠣꠁꠘ-ꠛꠦꠐꠤꠘ ꠛꠣ ꠔꠥꠝꠞꠣꠞ ꠙꠡꠥꠞ ꠙꠣꠟꠞ ꠇꠦꠃ ꠀꠐꠈꠥꠞꠣ ꠞꠁꠔ ꠘꠣꠄ।
DEU 7:15 ꠀꠟ꠆ꠟꠣ ꠝꠣꠛꠥꠖꠦ ꠔꠥꠝꠞꠣꠞꠦ ꠢꠇꠟ ꠟꠣꠈꠣꠘ ꠛꠦꠝꠣꠞ ꠕꠣꠇꠤ ꠛꠣꠌꠣꠁꠛꠣ। ꠝꠤꠡꠞ ꠖꠦꠡꠅ ꠔꠥꠝꠞꠣ ꠎꠦꠔꠣ ꠇꠑꠤꠘ ꠛꠦꠝꠣꠞ-ꠀꠎꠣꠞ ꠖꠦꠈꠍ, ꠁꠔꠣ ꠔꠥꠝꠞꠣꠞꠦ ꠖꠤꠔꠣ ꠘꠣꠄ, ꠈꠣꠟꠤ ꠔꠥꠝꠞꠣꠞ ꠖꠥꠡꠝꠘ ꠅꠇꠟꠞꠦ ꠖꠤꠛꠣ।
DEU 7:16 ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠎꠔ ꠎꠣꠔꠤꠞ ꠝꠣꠘꠡꠞꠦ ꠔꠥꠝꠞꠣꠞ ꠀꠔꠅ ꠡꠙꠤꠛꠣ, ꠁꠔꠣꠞꠦ ꠔꠥꠝꠞꠣ ꠄꠇ꠆ꠇꠦꠛꠣꠞꠦ ꠡꠦꠡ ꠇꠞꠤꠟꠣꠁꠅ, ꠇꠥꠘꠥ ꠖꠄꠀ ꠇꠞꠤꠅ ꠘꠣ, ꠀꠞ ꠔꠥꠝꠞꠣ ꠁꠔꠣꠞ ꠖꠦꠛꠔꠣꠞꠦ ꠙꠥꠎꠣ ꠇꠞꠤꠅ ꠘꠣ, ꠀꠞꠘꠣꠄ ꠁꠔꠣ ꠔꠥꠝꠞꠣꠞ ꠙꠕꠞ ꠇꠣꠐꠣ ꠅꠁꠛꠣ।
DEU 7:17 “ꠔꠥꠝꠞꠣ ꠢꠄꠔ ꠝꠘꠦ ꠝꠘꠦ ꠇꠁꠛꠣꠄ, ꠀꠝꠞꠣ ꠇꠤꠟꠣꠈꠣꠘ ꠔꠣꠞꠣꠞꠦ ꠈꠦꠖꠣꠁꠀ ꠖꠤꠝꠥ? ꠁꠔꠣ ꠎꠣꠔꠤꠞ ꠝꠣꠘꠥꠡ ꠔ ꠙꠞꠤꠝꠣꠘꠦ ꠀꠝꠞꠣ ꠕꠣꠇꠤ ꠛꠣꠇ꠆ꠇꠣ ꠛꠦꠡꠤ।
DEU 7:18 ꠅꠁꠟꠦ ꠔꠥꠝꠞꠣ ꠁꠔꠣꠞꠦ ꠒꠞꠣꠁꠅ ꠘꠣ। ꠚꠦꠞꠣꠃꠘ ꠀꠞ ꠀꠡ꠆ꠔꠣ ꠝꠤꠡꠞ ꠖꠦꠡꠞ ꠃꠙꠞꠦ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠇꠤꠔꠣ ꠇꠞꠍꠂꠘ, ꠁꠔꠣ ꠔꠥꠝꠞꠣ ꠚꠣꠃꠞꠤꠅ ꠘꠣ।
DEU 7:19 ꠝꠣꠛꠥꠖꠦ ꠇꠔ ꠛꠠ ꠛꠠ ꠉꠎꠛ-ꠝꠍꠤꠛꠔ ꠓꠣꠟꠤꠀ ꠔꠣꠞꠣꠞꠦ ꠛꠤꠘꠣꠡ ꠇꠞꠍꠂꠘ, ꠁꠔꠣ ꠔ ꠘꠤꠎꠞ ꠌꠃꠈꠦꠅ ꠖꠦꠈꠍ। ꠔꠣꠘ ꠛꠃꠔ ꠇꠥꠖꠞꠔꠤ ꠇꠣꠝ, ꠛꠃꠔ ꠟꠣꠈꠣꠘ ꠘꠤꠡꠣꠘꠣ ꠖꠦꠈꠍ, ꠔꠣꠘ ꠛꠟꠀꠟꠣ ꠝꠎꠛꠥꠔ ꠀꠔ ꠖꠤꠀ ꠔꠥꠝꠞꠣꠞꠦ ꠛꠣꠞ ꠇꠞꠤꠀ ꠀꠘꠍꠂꠘ, ꠁꠔꠣ ꠢꠇꠟꠔꠣ ꠝꠘꠅ ꠞꠣꠈꠤꠅ। ꠀꠞ ꠔꠥꠝꠞꠣ ꠅꠈꠘ ꠎꠦꠔꠣ ꠎꠣꠔꠤ ꠅꠇꠟꠞꠦ ꠖꠦꠈꠤꠀ ꠒꠞꠣꠁꠞꠣꠄ, ꠁꠔꠣꠞ ꠃꠙꠞꠦꠅ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠑꠤꠇ ꠅꠃꠟꠣ ꠊꠐꠣꠁꠛꠣ।
DEU 7:20 ꠄꠞꠛꠣꠖꠦꠅ ꠔꠥꠝꠞꠣꠞ ꠉꠦꠍ ꠕꠣꠇꠤ ꠟꠥꠇꠣꠁꠀ ꠎꠦꠉꠥꠁꠘ ꠎꠤꠔꠣ ꠞꠁꠎꠤꠛꠣ, ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠜꠤꠋꠉꠥꠟꠞ ꠙꠣꠟ ꠙꠣꠑꠣꠁꠀ ꠁꠔꠣ ꠢꠇꠟꠐꠤꠞꠦ ꠛꠤꠘꠣꠡ ꠇꠞꠛꠣ।
DEU 7:21 ꠔꠦ ꠔꠥꠝꠞꠣ ꠁꠔꠣꠞꠦ ꠒꠞꠣꠁꠅ ꠘꠣ, ꠎꠣꠘ ꠔ, ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣ ꠎꠦꠁꠘ ꠔꠥꠝꠞꠣꠞ ꠟꠉꠦ ꠛꠡꠔ ꠇꠞꠂꠘ, ꠄꠁꠘ ꠛꠠ ꠜꠄꠅꠋꠇꠞ ꠀꠞ ꠝꠢꠣꠘ।
DEU 7:22 ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠔꠥꠝꠞꠣꠞ ꠍꠣꠝꠘꠦ ꠕꠣꠇꠤ ꠀꠡ꠆ꠔꠦ ꠀꠡ꠆ꠔꠦ ꠅꠔꠣ ꠎꠣꠔꠤꠞꠦ ꠈꠦꠖꠣꠁ ꠖꠤꠛꠣ। ꠅꠁꠟꠦ ꠢꠇꠟꠐꠤꠞꠦ ꠔ ꠔꠥꠝꠞꠣ ꠄꠇꠟꠉꠦ ꠈꠦꠖꠣꠁꠔꠣꠄ ꠙꠣꠞꠔꠣꠄ ꠘꠣꠄ, ꠈꠦꠖꠣꠁꠟꠦ ꠎꠋꠟꠤ ꠎꠣꠘꠥꠀꠞꠦ ꠔꠥꠝꠞꠣꠞ ꠌꠣꠁꠞꠅꠛꠣꠄ ꠜꠞꠤꠎꠤꠛꠣ।
DEU 7:23 ꠔꠣ-ꠅ ꠔꠣꠞꠣ ꠄꠇ꠆ꠇꠦꠞꠦ ꠛꠤꠘꠣꠡ ꠅꠀꠞ ꠀꠉ ꠙꠞ꠆ꠎꠘ꠆ꠔ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠔꠣꠞꠣꠞꠦ ꠛꠦꠎꠥꠁꠔꠣ ꠅꠡꠣꠘ꠆ꠔꠤꠔ ꠚꠣꠟꠣꠁꠀ ꠔꠥꠝꠞꠣꠞ ꠀꠔꠅ ꠡꠙꠤꠀ ꠛꠤꠘꠣꠡ ꠇꠞꠣꠁꠛꠣ।
DEU 7:24 ꠔꠣꠞꠣꠞ ꠞꠣꠎꠣ-ꠛꠣꠖꠡꠣ ꠅꠇꠟꠞꠦꠅ ꠔꠥꠝꠞꠣꠞ ꠀꠔꠅ ꠡꠙꠤꠛꠣ, ꠔꠥꠝꠞꠣ ꠖꠥꠘꠤꠀ ꠕꠣꠇꠤ ꠁꠔꠣꠞ ꠘꠣꠝ ꠝꠤꠐꠣꠁꠟꠤꠛꠣꠄ, ꠁꠔꠣꠞꠦ ꠛꠤꠘꠣꠡ ꠇꠞꠣꠞ ꠀꠉ ꠙꠞ꠆ꠎꠘ꠆ꠔ ꠇꠦꠃ ꠀꠁꠀ ꠔꠥꠝꠞꠣꠞ ꠍꠣꠝꠘꠦ ꠃꠛꠣꠘꠤꠞ ꠔꠣꠇ꠆ꠇꠔ ꠅꠁꠔ ꠘꠣꠄ।
DEU 7:25 “ꠔꠥꠝꠞꠣ ꠁꠔꠣꠞ ꠝꠥꠞ꠆ꠔꠤ ꠅꠇꠟꠞꠦ ꠀꠉꠥꠘꠤꠔ ꠚꠣꠟꠣꠁꠀ ꠎꠣꠟꠣꠁꠟꠤꠅ। ꠔꠣꠞꠣꠞ ꠉꠔꠞꠞ ꠡꠥꠘꠣ-ꠞꠥꠙꠣꠞ ꠛꠣꠄ ꠟꠣꠟꠌ ꠇꠞꠤꠅ ꠘꠣ, ꠀꠞꠘꠣꠄ ꠚꠣꠘ꠆ꠖꠅ ꠙꠠꠛꠣꠄ। ꠝꠘꠅ ꠞꠣꠈꠤꠅ, ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠁꠔꠣꠞꠦ ꠊꠤꠘ꠆ꠘꠣꠁꠘ।
DEU 7:26 ꠊꠤꠘ꠆ꠘꠣꠞ ꠇꠥꠘꠥ ꠎꠤꠘꠤꠡ ꠔꠥꠝꠞꠣꠞ ꠊꠞꠅ ꠢꠣꠞꠣꠁꠟꠦ ꠔꠥꠝꠞꠣꠅ ꠅꠔꠣꠞ ꠟꠣꠈꠣꠘ ꠛꠘꠤꠎꠤꠛꠣꠄ। ꠛꠞꠋ ꠔꠥꠝꠞꠣꠅ ꠁꠔꠣꠞꠦ ꠈꠥꠛ ꠊꠤꠘ꠆ꠘꠣꠁꠅ ꠀꠞ ꠔꠥꠌ꠆ꠍ ꠇꠞꠤꠅ, ꠁꠔꠣ ꠔ ꠟꠣꠘ꠆ꠘꠔꠤ।
DEU 8:1 “ꠅꠈꠘ ꠀꠝꠤ ꠔꠥꠝꠞꠣꠞꠦ ꠎꠦ ꠢꠥꠇꠥꠝ ꠖꠤꠞꠣꠝ, ꠔꠥꠝꠞꠣ ꠈꠥꠛ ꠈꠤꠀꠟꠤ ꠅꠁꠀ ꠁꠔꠣ ꠀꠝꠟ ꠇꠞꠤꠅ, ꠔꠦꠃ ꠔꠥꠝꠞꠣ ꠛꠣꠌꠤꠀ ꠞꠁꠛꠣꠄ, ꠔꠥꠝꠞꠣꠞ ꠀꠅꠟꠣꠖ ꠛꠣꠠꠤꠛ, ꠀꠞ ꠔꠥꠝꠞꠣꠞ ꠝꠄ-ꠝꠥꠞꠛ꠆ꠛꠤꠞ ꠉꠦꠍꠦ ꠝꠣꠛꠥꠖꠦ ꠇꠍꠝ ꠈꠣꠁꠀ ꠎꠦ ꠖꠦꠡ ꠖꠤꠛꠣꠞ ꠅꠀꠖꠣ ꠇꠞꠍꠂꠘ, ꠢꠃ ꠖꠦꠡꠅ ꠢꠣꠝꠣꠁꠀ ꠖꠈꠟ ꠇꠞꠔꠣꠄ ꠙꠣꠞꠛꠣꠄ।
DEU 8:2 ꠀꠞ ꠔꠥꠝꠞꠣ ꠝꠘꠅ ꠞꠣꠈꠤꠅ, ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠅꠃ ꠌꠣꠟ꠆ꠟꠤꠡ ꠛꠍꠞꠦ ꠝꠞꠥꠜꠥꠝꠤꠞ ꠝꠣꠎꠖꠤ ꠔꠥꠝꠞꠣꠞꠦ ꠇꠤꠟꠣ ꠟꠁꠀ ꠀꠁꠍꠟꠣ, ꠔꠥꠝꠞꠣꠞ ꠛꠠꠣꠁ-ꠛꠦꠐꠣꠉꠤꠞꠤ ꠜꠣꠋꠉꠤꠛꠣꠞ ꠟꠣꠉꠤ, ꠀꠞ ꠔꠥꠝꠞꠣ ꠔꠣꠘ ꠢꠥꠇꠥꠝ-ꠀꠢꠇꠣꠝ ꠝꠣꠘꠛꠣꠄ ꠇꠤ ꠘꠣ ꠅꠈꠣꠘ ꠙꠞꠤꠇ꠆ꠇꠣ ꠇꠞꠣꠞ ꠘꠤꠅꠔꠦ, ꠔꠥꠝꠞꠣꠞ ꠖꠤꠟꠞ ꠈꠛꠞ ꠎꠣꠘꠣꠞ ꠟꠣꠉꠤ ꠔꠣꠁꠘ ꠔꠥꠝꠞꠣꠞꠦ ꠘꠔ ꠇꠞꠍꠂꠘ।
DEU 8:3 ꠔꠥꠝꠞꠣꠞ ꠝꠄ-ꠝꠥꠞꠛ꠆ꠛꠤꠞꠦ ꠈꠣꠘꠤ-ꠈꠥꠞꠣꠇꠤ ꠘꠣ ꠖꠤꠀ ꠃꠙꠣꠡ ꠞꠣꠈꠟꠣ, ꠛꠣꠖꠦ ꠎꠦ ꠈꠣꠘꠤ ꠔꠣꠞꠣ ꠌꠤꠘꠔꠣ ꠘꠣ, ꠝꠣꠘ꠆ꠘꠣ ꠘꠣꠝꠞ ꠅꠃ ꠈꠣꠘꠤ ꠈꠣꠅꠀꠁꠀ ꠔꠣꠁꠘ ꠔꠥꠝꠞꠣꠞ ꠛꠠꠣꠁ-ꠛꠦꠐꠣꠉꠤꠞꠤ ꠜꠣꠋꠉꠤꠍꠂꠘ। ꠔꠣꠁꠘ ꠔꠥꠝꠞꠣꠞꠦ ꠢꠤꠇꠣꠁꠔꠣ ꠌꠣꠁꠟꠣ, ꠈꠣꠟꠤ ꠞꠥꠐꠤ ꠈꠣꠁꠟꠦꠃ ꠝꠣꠘꠥꠡ ꠛꠣꠌꠦ ꠘꠣ, ꠛꠞꠋ ꠀꠟ꠆ꠟꠣꠞ ꠙꠞꠔꠦꠇ ꠇꠣꠟꠣꠝꠦꠃ ꠝꠣꠘꠡꠞ ꠎꠣꠘ ꠛꠣꠌꠦ।
DEU 8:4 ꠅꠃ ꠌꠣꠟ꠆ꠟꠤꠡ ꠛꠍꠞꠞ ꠝꠣꠎꠦ ꠔꠥꠝꠞꠣꠞ ꠉꠔꠞꠞ ꠇꠣꠙꠠ-ꠌꠥꠙꠠ ꠘꠡ꠆ꠐ ꠅꠁꠍꠦ ꠘꠣ, ꠖꠤꠘ-ꠞꠣꠁꠔ ꠀꠐꠤꠟꠦꠅ ꠔꠥꠝꠞꠣꠞ ꠙꠣꠅ ꠚꠥꠟꠍꠦ ꠘꠣ।
DEU 8:5 ꠅꠈꠘ ꠔꠥꠝꠞꠣꠞ ꠖꠤꠟꠅ ꠉꠣꠕꠤꠀ ꠞꠣꠈꠤꠅ, ꠛꠣꠚꠦ ꠎꠦꠟꠣ ꠘꠤꠎꠞ ꠙꠥꠀꠞꠦ ꠡꠣꠡꠘ ꠇꠞꠦ, ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠔꠥꠝꠞꠣꠞꠦꠅ ꠅꠟꠣ ꠡꠣꠡꠘ ꠇꠞꠂꠘ।
DEU 8:6 “ꠔꠥꠝꠞꠣ ꠘꠤꠎꠞ ꠝꠣꠛꠥꠖ ꠀꠟ꠆ꠟꠣꠞ ꠢꠥꠇꠥꠝ-ꠀꠢꠇꠣꠝ ꠀꠝꠟ ꠇꠞꠤꠅ, ꠔꠣꠘ ꠙꠕꠦ ꠌꠟꠤꠅ, ꠀꠞ ꠔꠣꠘꠞꠦ ꠒꠞꠣꠁꠅ।
DEU 8:7 ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠔꠥꠝꠞꠣꠞꠦ ꠎꠦ ꠀꠞꠣꠝꠞ ꠖꠦꠡꠅ ꠘꠤꠞꠣ, ꠁ ꠎꠣꠉꠣꠔ ꠙꠣꠠ-ꠙꠞꠛꠔ, ꠙꠣꠠꠤꠀ ꠈꠣꠟ, ꠙꠣꠘꠤꠞ ꠁꠘ꠆ꠖꠣꠞꠣ ꠀꠍꠦ, ꠀꠞ ꠝꠣꠐꠤꠞ ꠔꠟꠦꠅ ꠙꠣꠘꠤ ꠀꠍꠦ।
DEU 8:8 ꠢꠤꠘꠅ ꠉꠝ, ꠛꠣꠞ꠆ꠟꠤ, ꠀꠋꠉꠥꠞ, ꠒꠥꠝꠥꠞ ꠉꠣꠍ, ꠀꠘꠥꠀꠞ ꠚꠟ, ꠎꠄꠔꠥꠘꠞ ꠔꠦꠟ ꠀꠞ ꠝꠃ ꠀꠍꠦ।
DEU 8:9 ꠢꠤ ꠖꠦꠡꠅ ꠛꠃꠔ ꠈꠣꠘꠤ-ꠙꠣꠘꠤ ꠙꠣꠁꠛꠣꠄ, ꠇꠥꠘ꠆ꠔꠣꠞ ꠅꠜꠣꠛ ꠔꠥꠝꠞꠣꠞ ꠅꠁꠔ ꠘꠣꠄ। ꠢꠤꠘꠞ ꠙꠣꠔ꠆ꠔꠞꠞ ꠝꠣꠎꠦ ꠟꠥꠀ ꠀꠍꠦ, ꠢꠘꠞ ꠙꠣꠠ ꠈꠥꠖꠤꠟꠦ ꠔꠥꠝꠞꠣ ꠔꠣꠝꠣ-ꠙꠤꠔꠟ ꠙꠣꠁꠛꠣꠄ।
DEU 8:10 ꠢꠃ ꠖꠦꠡꠅ ꠙꠦꠐ ꠜꠞꠤꠀ ꠈꠣꠘꠣ-ꠙꠤꠘꠣ ꠈꠣꠁꠀ ꠢꠣꠞꠟꠦ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠖꠦꠅꠀ ꠅꠃ ꠀꠞꠣꠝꠞ ꠖꠦꠡꠞ ꠟꠣꠉꠤ ꠔꠣꠘ ꠡꠥꠇꠞꠤꠀ ꠀꠖꠣꠄ ꠇꠞꠤꠅ।
DEU 8:11 “ꠔꠣ-ꠅ ꠔꠥꠝꠞꠣ ꠢꠥꠡꠤꠀꠞ ꠞꠁꠅ, ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞꠦ ꠇꠥꠘꠥ ꠡꠝꠄ ꠚꠣꠃꠞꠤꠅ ꠘꠣ, ꠀꠞ ꠀꠝꠤ ꠅꠈꠘ ꠔꠥꠝꠞꠣꠞꠦ ꠎꠦꠔꠣ ꠢꠥꠇꠥꠝ-ꠀꠢꠇꠣꠝ, ꠘꠤꠅꠝ-ꠇꠣꠘꠥꠘ, ꠀꠞ ꠡꠞꠤꠅꠔ ꠎꠣꠘꠣꠁꠞꠣꠝ, ꠁꠔꠣ ꠀꠝꠟ ꠇꠞꠔꠦ ꠇꠥꠘꠥ ꠉꠣꠚꠟꠔꠤ ꠇꠞꠤꠅ ꠘꠣ।
DEU 8:12 ꠢꠘꠅ ꠉꠤꠀ ꠙꠦꠐ ꠜꠞꠤ ꠈꠣꠘꠣ-ꠙꠤꠘꠣ ꠈꠣꠁꠀ, ꠡꠥꠘ꠆ꠖꠞ ꠇꠞꠤ ꠊꠞ-ꠛꠣꠠꠤ ꠛꠣꠘꠣꠁꠀ,
DEU 8:13 ꠔꠥꠝꠞꠣꠞ ꠉꠞꠥ-ꠍꠣꠉꠟꠞ ꠙꠣꠟ ꠛꠣꠠꠤꠟꠦ, ꠡꠥꠘꠣ-ꠞꠥꠙꠣ ꠎꠝꠣꠁꠀ, ꠢꠇꠟ ꠝꠘ꠆ꠔꠦ ꠗꠘ-ꠍꠣꠝꠣꠘꠣ ꠛꠣꠠꠤꠀ ꠢꠣꠞꠟꠦ ꠢꠥꠡꠤꠀꠞ ꠞꠁꠅ।
DEU 8:14 ꠔꠥꠝꠞꠣꠞ ꠖꠤꠟꠞꠦ ꠛꠠꠣꠁ-ꠛꠦꠐꠣꠉꠤꠞꠤ ꠇꠞꠔꠦ ꠖꠤꠅ ꠘꠣ। ꠀꠞ ꠢꠃ ꠀꠟ꠆ꠟꠣ ꠝꠣꠛꠥꠖꠞꠦ ꠚꠣꠃꠞꠤꠅ ꠘꠣ, ꠎꠦꠁꠘ ꠔꠥꠝꠞꠣꠞꠦ ꠝꠤꠡꠞ ꠖꠦꠡ ꠕꠣꠇꠤ, ꠢꠃ ꠉꠥꠟꠣꠝꠤ ꠕꠣꠇꠤ ꠛꠣꠞ ꠇꠞꠤꠀ ꠀꠘꠍꠂꠘ।
DEU 8:15 ꠔꠣꠁꠘ ꠔ ꠔꠥꠝꠞꠣꠞꠦ ꠛꠦꠎꠥꠁꠔꠣ ꠛꠤꠙꠖ-ꠀꠙꠖꠦ ꠜꠞꠣ ꠛꠤꠞꠣꠐ ꠝꠞꠥꠜꠥꠝꠤ ꠕꠣꠇꠤ, ꠇꠑꠤꠘ ꠛꠤꠡꠣꠇ꠆ꠔ ꠢꠣꠚ, ꠛꠤꠡꠣꠇ꠆ꠔ ꠇꠣꠇꠠꠣ-ꠛꠤꠍꠣꠄ ꠜꠞꠣ ꠙꠕꠦꠖꠤ ꠔꠥꠝꠞꠣꠞꠦ ꠙꠣꠞ ꠇꠞꠤ ꠀꠘꠍꠂꠘ। ꠡꠇ꠆ꠔ ꠙꠣꠔ꠆ꠔꠞꠞ ꠜꠤꠔꠞ ꠕꠣꠇꠤ ꠔꠥꠝꠞꠣꠞ ꠟꠣꠉꠤ ꠙꠣꠘꠤ ꠛꠣꠞ ꠇꠞꠍꠂꠘ।
DEU 8:16 ꠔꠣꠁꠘ ꠢꠃ ꠝꠞꠥꠜꠥꠝꠤꠞ ꠝꠣꠎꠦ ꠔꠥꠝꠞꠣꠞꠦ ꠝꠣꠘ꠆ꠘꠣ ꠈꠣꠛꠣꠁꠍꠂꠘ, ꠎꠦꠔꠣꠞ ꠘꠣꠝ ꠔꠥꠝꠞꠣꠞ ꠝꠄ-ꠝꠥꠞꠛ꠆ꠛꠤ ꠅꠇꠟꠦ ꠢꠥꠘꠍꠂꠘꠅ ꠘꠣ। ꠔꠥꠝꠞꠣꠞ ꠜꠤꠔꠞꠞ ꠛꠠꠣꠁ-ꠛꠦꠐꠣꠉꠤꠞꠤ ꠜꠣꠋꠉꠤꠛꠣꠞ ꠟꠣꠉꠤ, ꠀꠞ ꠔꠥꠝꠞꠣꠞꠦ ꠙꠞꠤꠇ꠆ꠇꠣ ꠇꠞꠣꠞ ꠘꠤꠅꠔꠦꠃ ꠁꠔꠣ ꠇꠞꠍꠂꠘ, ꠎꠣꠔꠦ ꠢꠦꠡꠦ ꠔꠥꠝꠞꠣꠞ ꠜꠣꠟꠣꠁ ꠅꠄ।
DEU 8:17 ꠔꠥꠝꠞꠣ ꠝꠘꠦ ꠝꠘꠦ ꠇꠁꠅ ꠘꠣ, ꠀꠝꠣꠞ ꠘꠤꠎꠞ ꠛꠟ-ꠡꠇ꠆ꠔꠤꠄ ꠘꠤꠎꠞ ꠇꠣꠝꠣꠁ ꠖꠤꠀ ꠗꠘꠤ ꠅꠁꠍꠤ।
DEU 8:18 ꠅꠁꠟꠦ ꠔꠥꠝꠞꠣꠞ ꠘꠤꠎꠞ ꠝꠣꠛꠥꠖ ꠀꠟ꠆ꠟꠣꠄ ꠔꠥꠝꠞꠣꠞ ꠝꠄ-ꠝꠥꠞꠛ꠆ꠛꠤꠞ ꠉꠦꠍꠦ ꠇꠍꠝ ꠈꠣꠁꠀ ꠎꠦꠔꠣ ꠅꠀꠖꠣ-ꠌꠥꠇ꠆ꠔꠤ ꠇꠞꠍꠟꠣ, ꠅꠔꠣ ꠅꠈꠘ ꠙꠥꠞꠣꠙꠥꠞ ꠇꠞꠣꠞ ꠟꠣꠉꠤ ꠔꠥꠝꠞꠣꠞꠦ ꠁ ꠗꠘ-ꠍꠣꠝꠣꠘꠣ ꠖꠤꠍꠂꠘ, ꠄꠞꠟꠣꠉꠤ ꠔꠣꠘꠞꠦ ꠝꠘꠅ ꠞꠣꠈꠤꠅ।
DEU 8:19 “ꠔꠥꠝꠞꠣ ꠎꠥꠖꠤ ꠇꠥꠘꠥ ꠖꠤꠘ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞꠦ ꠚꠣꠃꠞꠤꠟꠣꠅ, ꠀꠞ ꠖꠦꠛ-ꠖꠦꠛꠤꠞ ꠙꠥꠎꠣ ꠇꠞꠣꠔ ꠟꠣꠉꠅ, ꠅꠔꠣꠞ ꠈꠦꠎꠝꠔ ꠛꠣ ꠜꠎꠘꠣ ꠇꠞꠅ, ꠔꠦ ꠀꠝꠤ ꠅꠈꠘ ꠔꠥꠝꠞꠣꠞꠦ ꠢꠥꠡꠤꠀꠞꠤ ꠖꠤꠀꠞ, ꠔꠥꠝꠞꠣ ꠘꠤꠌ꠆ꠌꠤꠔ ꠛꠤꠘꠣꠡ ꠅꠁꠎꠤꠛꠣꠄ।
DEU 8:20 ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠢꠥꠇꠥꠝ-ꠀꠢꠇꠣꠝ ꠘꠣ ꠝꠣꠘꠟꠦ, ꠔꠥꠝꠞꠣꠞ ꠍꠣꠝꠘꠦ ꠢꠃ ꠎꠦꠔꠣ ꠎꠣꠔꠤ ꠅꠇꠟꠞꠦ ꠔꠣꠁꠘ ꠛꠤꠘꠣꠡ ꠇꠞꠍꠂꠘ, ꠔꠥꠝꠞꠣꠞꠦꠅ ꠅꠟꠣ ꠛꠤꠘꠣꠡ ꠇꠞꠛꠣ।”
DEU 9:1 ꠢꠎꠞꠔ ꠝꠥꠍꠣꠄ ꠀꠞꠅ ꠇꠁꠟꠣ, “ꠅ ꠛꠘꠤ ꠁꠍꠞꠣꠁꠟ ꠢꠥꠘꠅ, ꠔꠥꠝꠞꠣ ꠕꠣꠇꠤ ꠛꠟꠀꠟꠣ ꠀꠞ ꠙꠞꠤꠝꠣꠘꠦꠅ ꠛꠃꠔ ꠛꠦꠡꠤ, ꠛꠠ ꠛꠠ ꠎꠣꠔꠤꠞ ꠖꠦꠡꠞꠦ ꠖꠈꠟ ꠇꠞꠣꠞ ꠟꠣꠉꠤ ꠅꠈꠘ ꠎꠞ꠆ꠖꠣꠘ ꠉꠣꠋ ꠙꠣꠞ ꠅꠁꠀ ꠎꠣꠁꠛꠣꠄ, ꠔꠣꠞꠣꠞ ꠐꠣꠃꠘ ꠅꠇꠟꠅ ꠛꠠ ꠛꠠ, ꠅꠃ ꠐꠣꠃꠘꠞ ꠛꠣꠃꠘ꠆ꠒꠞꠤꠞ ꠅꠀꠟ ꠀꠍꠝꠣꠘꠅ ꠍꠁꠟꠤꠍꠦ।
DEU 9:2 ꠔꠣꠞꠣ ꠅꠁꠟꠣ ꠃꠌꠣ-ꠝꠥꠐꠣ ꠙꠄꠟꠥꠀꠘ, ꠄꠞꠣ ꠢꠇꠟꠃ ꠀꠘꠣꠇꠤ ꠛꠋꠡꠞ ꠝꠣꠘꠥꠡ। ꠔꠥꠝꠞꠣ ꠔ ꠀꠉꠦꠃ ꠔꠣꠞꠣꠞ ꠛꠦꠙꠣꠞꠦ ꠢꠥꠘꠍ, ꠀꠘꠣꠇꠤ ꠅꠇꠟꠞ ꠟꠉꠦ ꠟꠣꠉꠣꠞ ꠔꠣꠇ꠆ꠇꠔ ꠇꠣꠞ ꠀꠍꠦ?
DEU 9:3 ꠅꠁꠟꠦ ꠔꠥꠝꠞꠣ ꠅꠈꠣꠘ ꠝꠘꠅ ꠞꠣꠈꠤꠅ, ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣ ꠔ ꠔꠥꠝꠞꠣꠞ ꠀꠉꠦ ꠀꠉꠦ ꠎꠣꠁꠞꠣ, ꠔꠣꠁꠘ ꠎꠣꠟꠣꠁꠀ ꠍꠣꠞꠈꠣꠞ ꠇꠞꠞꠣ ꠀꠉꠥꠘꠤꠞ ꠟꠣꠈꠣꠘ। ꠔꠣꠁꠘꠃ ꠁꠔꠣꠞꠦ ꠖꠝꠣꠁꠀ ꠔꠥꠝꠞꠣꠞ ꠔꠟꠥꠀ ꠛꠣꠘꠣꠁꠛꠣ। ꠔꠦꠃ ꠝꠣꠛꠥꠖꠦ ꠀꠉꠦ ꠎꠦꠟꠣꠈꠣꠘ ꠇꠁꠍꠟꠣ, ꠔꠥꠝꠞꠣ ꠅꠟꠣꠃ ꠔꠣꠞꠣꠞꠦ ꠈꠦꠖꠣꠁ ꠖꠤꠀ ꠎꠟꠖꠤ ꠇꠞꠤ ꠛꠤꠘꠣꠡ ꠇꠞꠛꠣꠄ।
DEU 9:4 “ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠎꠦꠛꠟꠣ ꠔꠥꠝꠞꠣꠞ ꠍꠣꠝꠘꠦ ꠕꠣꠇꠤ ꠔꠣꠞꠣꠞꠦ ꠈꠦꠖꠣꠁꠀ ꠖꠤꠛꠣ, ꠢꠃ ꠡꠝꠄ ꠔꠥꠝꠞꠣ ꠝꠘꠦ ꠝꠘꠦ ꠇꠁꠅ ꠘꠣ, ꠀꠝꠞꠣꠞ ꠙꠞꠦꠎꠉꠣꠞꠤꠞ ꠚꠟ ꠢꠤꠡꠣꠛꠦ ꠝꠣꠛꠥꠖꠦ ꠀꠝꠞꠣꠞꠦ ꠅꠃ ꠖꠦꠡ ꠖꠈꠟ ꠇꠞꠣꠞ ꠟꠣꠉꠤ ꠀꠘꠍꠂꠘ। ꠀꠍꠟꠦ ꠢꠃ ꠎꠣꠔꠤ ꠅꠇꠟꠞ ꠘꠣꠚꠞꠝꠣꠘꠤꠞ ꠟꠣꠉꠤꠃ ꠝꠣꠛꠥꠖꠦ ꠔꠣꠞꠣꠞꠦ ꠔꠥꠝꠞꠣꠞ ꠍꠣꠝꠘꠦ ꠕꠣꠇꠤ ꠈꠦꠖꠣꠁ ꠖꠤꠛꠣ।
DEU 9:5 ꠔꠥꠝꠞꠣꠞ ꠙꠞꠦꠎꠉꠣꠞꠤ ꠛꠣ ꠡꠔꠔꠣꠞ ꠟꠣꠉꠤ ꠔ ꠢꠤ ꠖꠦꠡꠞ ꠖꠈꠟꠖꠣꠞꠤ ꠙꠣꠁꠞꠣꠄ ꠘꠣ, ꠛꠞꠋ ꠢꠃ ꠎꠣꠔꠤꠞ ꠘꠣꠚꠞꠝꠣꠘꠤꠞ ꠟꠣꠉꠤ, ꠀꠞ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠔꠥꠝꠞꠣꠞ ꠝꠄ-ꠝꠥꠞꠛ꠆ꠛꠤ ꠁꠛ꠆ꠞꠣꠢꠤꠝ, ꠁꠍꠢꠣꠇ ꠀꠞ ꠁꠀꠇꠥꠛꠞ ꠉꠦꠍꠦ ꠎꠦ ꠅꠀꠖꠣ ꠇꠞꠍꠟꠣ, ꠅꠈꠣꠘ ꠙꠥꠞꠘ ꠇꠞꠣꠞ ꠟꠣꠉꠤ, ꠔꠣꠁꠘꠃ ꠔꠥꠝꠞꠣꠞ ꠍꠣꠝꠘꠦ ꠕꠣꠇꠤ ꠁꠔꠣꠞꠦ ꠈꠦꠖꠣꠁꠀ ꠖꠤꠛꠣ।
DEU 9:6 ꠄꠞꠟꠣꠉꠤ ꠔꠥꠝꠞꠣ ꠎꠣꠘꠤꠀ ꠞꠣꠈꠤꠅ, ꠔꠥꠝꠞꠣꠞ ꠙꠞꠦꠎꠉꠣꠞꠤ ꠖꠦꠈꠤꠀ ꠔ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠅꠃ ꠀꠞꠣꠝꠞ ꠖꠦꠡꠞ ꠖꠈꠟꠖꠣꠞꠤ ꠔꠥꠝꠞꠣꠞꠦ ꠖꠤꠞꠣ ꠘꠣ, ꠔꠥꠝꠞꠣ ꠅꠁꠟꠣꠄ ꠉꠣꠠꠔꠦꠠꠣ-ꠄꠇꠉꠥꠁꠀ ꠎꠣꠔꠤ।
DEU 9:7 “ꠀꠞ ꠢꠃ ꠝꠞꠥꠜꠥꠝꠤꠞ ꠝꠣꠎꠦ ꠔꠥꠝꠞꠣ ꠇꠤꠟꠣ ꠘꠤꠎꠞ ꠝꠣꠛꠥꠖ ꠀꠟ꠆ꠟꠣꠞ ꠉꠥꠍꠣ ꠔꠥꠟꠣꠁꠍꠟꠣꠄ, ꠁꠈꠣꠘ ꠝꠘꠅ ꠞꠣꠈꠤꠅ, ꠇꠥꠘꠥꠖꠤꠘ ꠚꠣꠃꠞꠤꠅ ꠘꠣ। ꠝꠤꠡꠞ ꠖꠦꠡ ꠍꠣꠠꠤꠀ ꠀꠅꠀꠞ ꠖꠤꠘ ꠕꠣꠇꠤ ꠅꠈꠣꠘꠅ ꠀꠅꠀ ꠙꠞ꠆ꠎꠘ꠆ꠔ, ꠢꠣꠝꠦꠡꠣ ꠔꠥꠝꠞꠣꠞ ꠝꠘꠞ ꠜꠤꠔꠞꠦ ꠝꠣꠛꠥꠖꠞ ꠛꠤꠞꠥꠗꠤꠔꠣ ꠀꠍꠦ।
DEU 9:8 ꠔꠥꠞ ꠙꠣꠠꠞ ꠝꠣꠎꠦꠅ ꠔꠥꠝꠞꠣ ꠝꠣꠛꠥꠖꠞ ꠉꠥꠍꠣ ꠔꠥꠟꠣꠁꠍꠟꠣꠄ, ꠄꠞꠟꠣꠉꠤ ꠔꠣꠁꠘ ꠔꠥꠝꠞꠣꠞꠦ ꠛꠤꠘꠣꠡ ꠇꠞꠤꠟꠔꠣ ꠌꠣꠁꠟꠣ।
DEU 9:9 ꠝꠣꠛꠥꠖꠦ ꠔꠥꠝꠞꠣꠞ ꠟꠉꠦ ꠎꠦ ꠅꠀꠖꠣ-ꠌꠥꠇ꠆ꠔꠤ ꠛꠅꠀꠁꠟ ꠇꠞꠍꠂꠘ, ꠅꠃ ꠌꠥꠇ꠆ꠔꠤ ꠘꠣꠝꠣ ꠟꠦꠈꠣ ꠖꠥꠁꠅ ꠈꠣꠘ ꠙꠣꠔ꠆ꠔꠞ ꠀꠘꠣꠞ ꠟꠣꠉꠤ ꠀꠝꠤ ꠙꠣꠠꠅ ꠃꠑꠤꠍꠟꠣꠝ, ꠌꠣꠟ꠆ꠟꠤꠡ ꠖꠤꠘ ꠌꠣꠟ꠆ꠟꠤꠡ ꠞꠣꠁꠔ ꠇꠥꠘꠥ ꠖꠣꠘꠣ-ꠙꠣꠘꠤ ꠘꠣ ꠈꠣꠁꠀ ꠀꠝꠤ ꠞꠥꠎꠣ ꠀꠍꠟꠣꠝ।
DEU 9:10 ꠀꠞ ꠝꠣꠛꠥꠖꠦ ꠔꠣꠘ ꠙꠛꠤꠔ꠆ꠞ ꠀꠔꠞ ꠀꠋꠉꠥꠁꠟꠖꠤ ꠟꠦꠈꠣ ꠢꠃ ꠖꠥꠁꠅ ꠈꠣꠘ ꠙꠣꠔ꠆ꠔꠞ ꠀꠝꠣꠞꠦ ꠖꠤꠟꠣ। ꠔꠥꠝꠞꠣ ꠢꠇꠟ ꠎꠦꠖꠤꠘ ꠔꠥꠞ ꠙꠣꠠꠅ ꠀꠁꠀ ꠖꠟꠣ ꠅꠁꠟꠣꠄ, ꠅꠃ ꠖꠤꠘ ꠝꠣꠛꠥꠖꠦ ꠎꠣꠟꠣꠁꠟ ꠀꠉꠥꠘꠤꠞ ꠝꠣꠎ ꠕꠣꠇꠤ ꠔꠥꠝꠞꠣꠞꠦ ꠎꠦꠔꠣ ꠛꠣꠔꠣꠁꠍꠟꠣ, ꠅꠃ ꠖꠥꠁꠅ ꠙꠣꠔ꠆ꠔꠞꠞ ꠝꠣꠎꠦ ꠔ ꠅꠔꠣ ꠟꠦꠈꠣ ꠀꠍꠤꠟ।
DEU 9:11 “ꠢꠃ ꠌꠣꠟ꠆ꠟꠤꠡ ꠖꠤꠘ ꠀꠞ ꠌꠣꠟ꠆ꠟꠤꠡ ꠞꠣꠁꠔꠞ ꠛꠣꠖꠦ ꠝꠣꠛꠥꠖꠦ ꠅꠃ ꠌꠥꠇ꠆ꠔꠤ ꠘꠣꠝꠣ ꠟꠦꠈꠣ ꠙꠣꠔ꠆ꠔꠞ ꠖꠥꠁꠅ ꠈꠣꠘ ꠀꠝꠣꠞ ꠀꠔꠅ ꠖꠤꠟꠣ।
DEU 9:12 ꠖꠤꠀ ꠇꠁꠟꠣ, ꠎꠣꠅ, ꠔꠥꠝꠤ ꠎꠟꠖꠤ ꠇꠞꠤ ꠟꠣꠝꠣꠔ ꠎꠣꠅ, ꠇꠣꠞꠘ ꠔꠥꠝꠤ ꠎꠦꠔꠣ ꠝꠣꠘꠡꠞꠦ ꠝꠤꠡꠞ ꠕꠣꠇꠤ ꠛꠣꠞ ꠇꠞꠤꠀ ꠀꠘꠍ, ꠁꠔꠣ ꠇꠥ-ꠙꠕꠦ ꠉꠦꠍꠂꠘꠉꠤ। ꠀꠝꠣꠞ ꠛꠣꠔꠣꠁꠟ ꠙꠕ ꠕꠣꠇꠤ ꠔꠣꠞꠣ ꠅꠔ ꠎꠟꠖꠤ ꠛꠦ-ꠙꠕꠤ ꠅꠁꠉꠦꠍꠦ, ꠔꠣꠞꠣ ꠙꠥꠎꠣ ꠇꠞꠣꠞ ꠟꠣꠉꠤ ꠡꠥꠘꠣ ꠉꠟꠣꠁꠀ ꠄꠇ ꠝꠥꠞ꠆ꠔꠤ ꠛꠣꠘꠣꠁꠍꠦ।
DEU 9:13 ꠝꠣꠛꠥꠖꠦ ꠀꠝꠣꠞꠦ ꠀꠞꠅ ꠇꠁꠟꠣ, ꠀꠝꠤ ꠔ ꠁꠔꠣ ꠝꠣꠘꠡꠞꠦ ꠖꠦꠈꠟꠣꠝ, ꠁꠔꠣ ꠛꠠ ꠉꠣꠠꠔꠦꠠꠣ-ꠄꠇꠉꠥꠁꠀ ꠎꠣꠔꠤ।
DEU 9:14 ꠅꠈꠘ ꠔꠥꠝꠤ ꠀꠝꠣꠞ ꠉꠦꠍ ꠕꠣꠇꠤ ꠢꠞꠤ ꠎꠣꠅ, ꠇꠥꠘꠥ ꠛꠣꠗꠣ ꠖꠤꠅ ꠘꠣ, ꠀꠝꠤ ꠁꠔꠣꠞꠦ ꠛꠤꠘꠣꠡ ꠇꠞꠤꠟꠤꠝꠥ, ꠖꠥꠘꠤꠀ ꠕꠣꠇꠤ ꠁꠔꠣꠞ ꠘꠣꠝ ꠝꠤꠐꠣꠁꠟꠤꠝꠥ। ꠀꠞ ꠔꠥꠝꠣꠞ ꠝꠣꠎ ꠕꠣꠇꠤ ꠄꠇ ꠘꠄꠀ ꠎꠣꠔꠤ ꠙꠄꠖꠣ ꠇꠞꠝꠥ, ꠁꠔꠣ ꠀꠞꠅ ꠛꠠ ꠀꠞꠅ ꠛꠟꠀꠟꠣ ꠎꠣꠔꠤ ꠅꠁꠛ।
DEU 9:15 “ꠔꠦꠃ ꠀꠝꠤ ꠙꠣꠠ ꠕꠣꠇꠤ ꠟꠣꠝꠤꠀ ꠀꠁꠟꠣꠝ, ꠙꠣꠠꠞ ꠃꠙꠞꠦ ꠀꠉꠥꠁꠘ ꠎꠟꠦꠞ, ꠀꠞ ꠀꠝꠣꠞ ꠀꠔꠅ ꠀꠍꠤꠟ ꠌꠥꠇ꠆ꠔꠤ ꠘꠣꠝꠣ ꠟꠦꠈꠣ ꠢꠃ ꠖꠥꠁꠅ ꠈꠣꠘ ꠙꠣꠔ꠆ꠔꠞ।
DEU 9:16 ꠛꠣꠖꠦ ꠀꠝꠤ ꠌꠣꠁꠟꠣꠝ, ꠌꠣꠁꠀ ꠖꠦꠈꠤ ꠔꠥꠝꠞꠣ ꠘꠤꠎꠞ ꠝꠣꠛꠥꠖ ꠀꠟ꠆ꠟꠣꠞ ꠖꠞꠛꠣꠞꠅ ꠉꠥꠘꠣ ꠇꠞꠞꠣꠄ। ꠔꠥꠝꠞꠣ ꠙꠥꠎꠣ ꠇꠞꠣꠞ ꠟꠣꠉꠤ ꠡꠥꠘꠣ ꠉꠟꠣꠁꠀ ꠚꠞ꠆ꠝꠣꠔ ꠓꠣꠟꠤꠀ ꠄꠇ ꠉꠞꠥꠞ ꠛꠣꠍꠥꠞ ꠛꠣꠘꠣꠁꠟꠣꠄ। ꠝꠣꠛꠥꠖꠞ ꠛꠣꠔꠣꠁꠟ ꠙꠕ ꠍꠣꠠꠤꠀ ꠔꠥꠝꠞꠣ ꠅꠔ ꠎꠟꠖꠤ ꠛꠦ-ꠙꠕꠦ ꠉꠦꠟꠣꠄꠉꠤ!
DEU 9:17 ꠄꠞꠟꠣꠉꠤ ꠀꠝꠤ ꠅꠃ ꠖꠥꠁꠅ ꠈꠣꠘ ꠙꠣꠔ꠆ꠔꠞ ꠀꠝꠣꠞ ꠀꠔ ꠕꠣꠇꠤ ꠚꠣꠟꠣꠁ ꠖꠤꠟꠣꠝ, ꠔꠦꠃ ꠁꠔꠣ ꠜꠣꠋꠉꠤꠀ ꠔꠥꠝꠞꠣꠞ ꠌꠈꠥꠞ ꠍꠣꠝꠘꠦ ꠐꠥꠇꠞꠣ ꠐꠥꠇꠞꠣ ꠅꠁꠉꠦꠟ।
DEU 9:18 “ꠝꠣꠛꠥꠖꠦ ꠎꠦꠔꠣꠞꠦ ꠘꠣꠙꠍꠘ꠆ꠖ ꠇꠞꠂꠘ, ꠅꠟꠣꠈꠣꠘ ꠉꠥꠘꠣ ꠇꠞꠤꠀ ꠔꠥꠝꠞꠣ ꠔꠣꠘ ꠉꠥꠍꠣ ꠔꠥꠟꠣꠁꠟꠣꠄ, ꠄꠞꠟꠣꠉꠤ ꠀꠝꠤ ꠀꠉꠞ ꠟꠣꠈꠣꠘ ꠢꠤꠞꠛꠣꠞ ꠌꠣꠟ꠆ꠟꠤꠡ ꠖꠤꠘ ꠌꠣꠟ꠆ꠟꠤꠡ ꠞꠣꠁꠔ ꠇꠥꠘꠥ ꠖꠣꠘꠣ-ꠙꠣꠘꠤ ꠘꠣ ꠈꠣꠁꠀ, ꠔꠣꠘ ꠍꠣꠝꠘꠦ ꠍꠁꠎꠖꠣꠔ ꠙꠠꠤ ꠞꠁꠟꠣꠝ।
DEU 9:19 ꠝꠣꠛꠥꠖꠞ ꠛꠦꠎꠥꠁꠔꠣ ꠉꠥꠍꠣꠞꠦ ꠀꠝꠤ ꠈꠥꠛ ꠒꠞꠣꠁꠟꠣꠝ, ꠔꠣꠁꠘ ꠉꠥꠍꠣꠄ ꠀꠉꠥꠁꠘ ꠅꠁꠀ ꠔꠥꠝꠞꠣꠞꠦ ꠛꠤꠘꠣꠡ ꠇꠞꠤꠟꠔꠣ ꠌꠣꠁꠟꠣ, ꠅꠁꠟꠦ ꠅꠃꠛꠣꠞꠅ ꠔꠣꠁꠘ ꠀꠝꠣꠞ ꠚꠞꠤꠀꠖ ꠢꠥꠘꠟꠣ।
DEU 9:20 ꠝꠣꠛꠥꠖꠦ ꠢꠣꠞꠥꠘꠞ ꠃꠙꠞꠦꠅ ꠈꠥꠛ ꠉꠥꠍꠣ ꠅꠁꠀ ꠔꠣꠘꠞꠦ ꠡꠦꠡ ꠇꠞꠤꠟꠔꠣ ꠌꠣꠁꠟꠣ, ꠔꠦꠃ ꠀꠝꠤ ꠢꠣꠞꠥꠘꠞ ꠟꠣꠉꠤꠅ ꠔꠣꠘ ꠖꠞꠛꠣꠞꠅ ꠝꠤꠘꠔꠤ ꠇꠞꠟꠣꠝ।
DEU 9:21 ꠀꠞ ꠔꠥꠝꠞꠣꠞ ꠉꠥꠘꠣꠞ ꠀꠔꠤꠀꠞ ꠝꠣꠘꠤ ꠔꠥꠝꠞꠣꠞ ꠛꠣꠘꠣꠁꠟ ꠢꠃ ꠛꠣꠍꠥꠞꠞ ꠝꠥꠞ꠆ꠔꠤꠞꠦ ꠀꠉꠥꠘꠤꠔ ꠚꠣꠟꠣꠁꠀ ꠎꠣꠟꠣꠁꠀ ꠍꠣꠞꠈꠣꠞ ꠇꠞꠟꠣꠝ। ꠅꠉꠥꠞ ꠎꠣꠟꠣꠁꠟ ꠐꠥꠇꠞꠣꠞꠦ ꠙꠤꠡꠤꠀ ꠍꠣꠟꠤ ꠛꠣꠘꠣꠁꠀ ꠙꠣꠠꠤꠀ ꠉꠣꠋꠉꠞ ꠙꠣꠘꠤꠞ ꠚꠥꠔꠞ ꠝꠣꠎꠦ ꠚꠣꠟꠣꠁꠟꠣꠝ।
DEU 9:22 “ꠔꠥꠝꠞꠣ ꠔ ꠔꠣꠛꠦꠞꠣꠔ, ꠝꠣꠍꠣꠔ ꠀꠞ ꠇꠤꠛꠞꠥꠔ-ꠢꠥꠔꠣꠛꠣ ꠘꠣꠝꠞ ꠎꠣꠉꠣꠔ ꠝꠣꠛꠥꠖꠞ ꠉꠥꠍꠣ ꠔꠥꠟꠣꠁꠍꠟꠣꠄ।
DEU 9:23 ꠄꠞꠛꠣꠖꠦ ꠇꠣꠖꠦꠡ-ꠛꠞꠘꠦꠀ ꠕꠣꠇꠤ ꠞꠅꠀꠘꠣ ꠅꠀꠞ ꠇꠣꠟꠅ ꠝꠣꠛꠥꠖꠦ ꠎꠦꠛꠟꠣ ꠇꠁꠟꠣ, ꠀꠝꠤ ꠔꠥꠝꠞꠣꠞꠦ ꠀꠞꠣꠝꠞ ꠎꠦ ꠖꠦꠡ ꠖꠣꠘ ꠇꠞꠍꠤ, ꠔꠥꠝꠞꠣ ꠉꠤꠀ ꠅꠈꠣꠘ ꠖꠈꠟ ꠇꠞꠅ, ꠢꠃ ꠡꠝꠄꠅ ꠔꠥꠝꠞꠣ ꠘꠤꠎꠞ ꠝꠣꠛꠥꠖ ꠀꠟ꠆ꠟꠣꠞ ꠢꠥꠇꠥꠝꠞ ꠛꠤꠞꠥꠗꠤꠔꠣ ꠇꠞꠟꠣꠄ, ꠔꠣꠘꠞꠦ ꠝꠣꠘꠟꠣꠄ ꠘꠣ, ꠔꠣꠘ ꠇꠕꠣꠞꠦꠅ ꠄꠇꠤꠘ ꠇꠞꠟꠣꠄ ꠘꠣ।
DEU 9:24 ꠀꠍꠟꠦ ꠀꠝꠤ ꠎꠦꠖꠤꠘ ꠕꠣꠇꠤ ꠔꠥꠝꠞꠣꠞꠦ ꠌꠤꠘꠤ, ꠢꠃ ꠖꠤꠘ ꠕꠣꠇꠤꠃ ꠖꠦꠈꠤꠀꠞ, ꠔꠥꠝꠞꠣ ꠢꠣꠝꠦꠡꠣ ꠝꠣꠛꠥꠖꠞ ꠢꠥꠇꠥꠝꠞ ꠃꠟꠐꠣ ꠌꠟꠞꠣꠄ।
DEU 9:25 “ꠎꠣꠁ ꠅꠃꠇ, ꠝꠣꠛꠥꠖꠦ ꠔꠥꠝꠞꠣꠞꠦ ꠛꠤꠘꠣꠡ ꠇꠞꠣꠞ ꠇꠕꠣ ꠇꠅꠀꠄ ꠀꠝꠤ ꠌꠣꠟ꠆ꠟꠤꠡ ꠖꠤꠘ ꠌꠣꠟ꠆ꠟꠤꠡ ꠞꠣꠁꠔ, ꠔꠣꠘ ꠍꠣꠝꠘꠦ ꠍꠁꠎꠖꠣꠔ ꠙꠠꠤ ꠞꠁꠟꠣꠝ।
DEU 9:26 ꠀꠝꠤ ꠔꠣꠘ ꠖꠞꠛꠣꠞꠅ ꠝꠤꠘꠔ ꠇꠞꠤ ꠇꠁꠟꠣꠝ, ꠅ ꠝꠣꠛꠥꠖ ꠝꠃꠟꠣ, ꠔꠥꠝꠤ ꠄꠞꠣꠞꠦ ꠛꠤꠘꠣꠡ ꠇꠞꠤꠅ ꠘꠣ, ꠄꠞꠣ ꠔ ꠔꠥꠝꠣꠞꠃ ꠛꠘ꠆ꠖꠣ, ꠔꠥꠝꠣꠞꠃ ꠈꠣꠍ ꠡꠝ꠆ꠙꠖ। ꠔꠥꠝꠣꠞ ꠇꠥꠖꠞꠔꠤ ꠇꠣꠝ ꠖꠤꠀ, ꠔꠥꠝꠣꠞ ꠘꠤꠎꠞ ꠛꠟꠀꠟꠣ ꠀꠔꠖꠤ ꠎꠦꠔꠣꠞꠦ ꠝꠤꠡꠞ ꠖꠦꠡ ꠕꠣꠇꠤ ꠛꠣꠞ ꠇꠞꠤ ꠀꠘꠍ, ꠁꠔꠣꠞꠦ ꠝꠣꠞꠤꠅ ꠘꠣ।
DEU 9:27 ꠁꠔꠣꠞ ꠉꠣꠠꠔꠦꠠꠣꠝꠤ, ꠘꠣꠚꠞꠝꠣꠘꠤ ꠀꠞ ꠉꠥꠘꠣꠞ ꠛꠣꠄ ꠘꠣ ꠌꠣꠁꠀ, ꠔꠥꠝꠤ ꠈꠣꠟꠤ ꠔꠥꠝꠣꠞ ꠉꠥꠟꠣꠝ ꠁꠛ꠆ꠞꠣꠢꠤꠝ, ꠁꠍꠢꠣꠇ ꠀꠞ ꠁꠀꠇꠥꠛꠞ ꠇꠕꠣ ꠝꠘꠅ ꠇꠞꠅ।
DEU 9:28 ꠅꠈꠘ ꠔꠥꠝꠤ ꠎꠥꠖꠤ ꠁꠔꠣꠞꠦ ꠝꠣꠞꠤꠟꠣꠅ, ꠔꠦ ꠔꠥꠝꠤ ꠎꠦ ꠖꠦꠡ ꠕꠣꠇꠤ ꠀꠝꠞꠣꠞꠦ ꠛꠣꠞ ꠇꠞꠤꠀ ꠀꠘꠍ, ꠢꠃ ꠖꠦꠡꠞ ꠝꠣꠘꠡꠦ ꠇꠁꠛ, ꠝꠣꠛꠥꠖꠦ ꠔꠣꠘ ꠅꠀꠖꠣ ꠇꠞꠣ ꠖꠦꠡꠅ ꠁꠔꠣꠞꠦ ꠘꠤꠔꠣ ꠙꠣꠞꠍꠂꠘ ꠘꠣ, ꠛꠣ ꠔꠣꠞꠣꠞꠦ ꠁꠋꠡꠣ ꠇꠞꠤꠀ ꠎꠣꠘꠦ ꠝꠣꠞꠣꠞ ꠟꠣꠉꠤ ꠅꠃ ꠝꠞꠥꠜꠥꠝꠤꠔ ꠘꠤꠍꠂꠘ।
DEU 9:29 ꠀꠍꠟꠦ ꠄꠞꠣ ꠔ ꠔꠥꠝꠣꠞꠃ ꠛꠘ꠆ꠖꠣ, ꠔꠥꠝꠣꠞ ꠘꠤꠎꠞ ꠡꠝ꠆ꠙꠖ। ꠔꠥꠝꠣꠞ ꠀꠙꠘ ꠇꠥꠖꠞꠔꠤ ꠀꠔ ꠟꠣꠉꠣꠁꠀ, ꠔꠥꠝꠣꠞ ꠛꠟ-ꠔꠣꠇ꠆ꠇꠔ ꠈꠣꠐꠣꠁꠀ ꠄꠞꠣꠞꠦ ꠝꠤꠡꠞ ꠕꠣꠇꠤ ꠛꠣꠞ ꠇꠞꠤꠀ ꠀꠘꠍ।”
DEU 10:1 ꠢꠎꠞꠔ ꠝꠥꠍꠣꠄ ꠔꠣꠞꠣꠞꠦ ꠇꠁꠞꠣ, “ꠢꠃ ꠡꠝꠄ ꠝꠣꠛꠥꠖꠦ ꠇꠁꠟꠣ, ꠔꠥꠝꠤ ꠙꠣꠔ꠆ꠔꠞ ꠇꠣꠐꠤꠀ ꠀꠉꠞ ꠟꠣꠈꠣꠘ ꠖꠥꠈꠣꠘ ꠐꠥꠇꠞꠣ ꠛꠣꠘꠣꠅ, ꠀꠞ ꠅꠈꠘꠣꠁꠘ ꠟꠁꠀ ꠙꠣꠠꠞ ꠃꠙꠞꠦ ꠃꠑꠤꠀ ꠀꠝꠣꠞ ꠗꠣꠞꠅ ꠀꠅ। ꠄꠞꠟꠉꠦ ꠟꠣꠇꠠꠤꠖꠤ ꠄꠇꠐꠣ ꠡꠘ꠆ꠖꠥꠇꠅ ꠛꠣꠘꠣꠁꠅ।
DEU 10:2 ꠔꠥꠝꠤ ꠀꠉꠦ ꠎꠦ ꠖꠥꠁ ꠐꠥꠇꠞꠣ ꠙꠣꠔ꠆ꠔꠞ ꠜꠣꠋꠉꠤꠟꠤꠍ, ꠢꠃ ꠙꠣꠔ꠆ꠔꠞꠞ ꠃꠙꠞꠦ ꠎꠦꠔꠣ ꠟꠦꠈꠣ ꠀꠍꠤꠟ, ꠅꠔꠣ ꠀꠝꠤ ꠅꠃ ꠖꠥꠁꠅ ꠙꠣꠔ꠆ꠔꠞ ꠐꠥꠇꠞꠣꠞ ꠃꠙꠞꠦ ꠢꠤꠞꠛꠣꠞ ꠟꠦꠈꠤꠀ ꠖꠤꠝꠥ, ꠛꠣꠖꠦ ꠔꠥꠝꠤ ꠅꠈꠘꠣꠁꠘ ꠘꠤꠀ ꠢꠃ ꠡꠘ꠆ꠖꠥꠇꠞ ꠜꠤꠔꠞꠦ ꠕꠁꠛꠣꠄ।
DEU 10:3 “ꠢꠥꠇꠥꠝ ꠙꠣꠁꠀ ꠀꠝꠤ ꠛꠣꠛꠟꠣ ꠟꠣꠇꠠꠤꠖꠤ ꠄꠇ ꠡꠘ꠆ꠖꠥꠇ ꠛꠣꠘꠣꠁꠟꠣꠝ, ꠀꠞ ꠖꠥꠉꠥ ꠙꠣꠔ꠆ꠔꠞ ꠇꠣꠐꠤꠀ ꠀꠉꠞ ꠟꠣꠈꠣꠘ ꠖꠥꠁ ꠐꠥꠇꠞꠣ ꠇꠞꠟꠣꠝ, ꠛꠣꠖꠦ ꠅꠃ ꠖꠥꠁꠅ ꠐꠥꠇꠞꠣ ꠀꠔꠅ ꠟꠁꠀ ꠀꠝꠤ ꠙꠣꠠꠞ ꠃꠙꠞꠦ ꠃꠑꠟꠣꠝ।
DEU 10:4 ꠃꠑꠤꠀ ꠢꠣꠞꠟꠦ ꠝꠣꠛꠥꠖꠦ ꠢꠃ ꠙꠄꠟꠣ ꠖꠥꠁꠅ ꠙꠣꠔ꠆ꠔꠞ ꠐꠥꠇꠞꠣꠞ ꠃꠙꠞꠦ ꠎꠦꠔꠣ ꠟꠦꠈꠤꠍꠟꠣ, ꠅꠔꠣ ꠢꠤꠞꠛꠣꠞ ꠅꠃ ꠖꠥꠁꠅ ꠐꠥꠇꠞꠣꠞ ꠃꠙꠞꠦ ꠟꠦꠈꠤꠀ ꠀꠝꠣꠞꠦ ꠖꠤꠟꠣ, ꠅꠃ ꠟꠦꠈꠣ ꠀꠄꠀꠔ ꠅꠁꠟ, ꠡꠞꠤꠅꠔꠞ ꠈꠣꠍ ꠖꠡ ꠢꠥꠇꠥꠝ। ꠀꠉꠦ ꠎꠦꠖꠤꠘ ꠔꠥꠝꠞꠣ ꠢꠇꠟ ꠔꠥꠞ ꠙꠣꠠꠅ ꠀꠁꠍꠟꠣꠄ, ꠢꠃ ꠖꠤꠘ ꠝꠣꠛꠥꠖꠦ ꠎꠣꠟꠣꠁꠟ ꠀꠉꠥꠘꠤꠞ ꠝꠣꠎ ꠕꠣꠇꠤ ꠔꠥꠝꠞꠣꠞꠦ ꠅꠃ ꠢꠥꠇꠥꠝ-ꠀꠢꠇꠣꠝ ꠛꠣꠔꠣꠁꠍꠟꠣ।
DEU 10:5 ꠛꠣꠖꠦ ꠀꠝꠤ ꠙꠣꠠ ꠕꠣꠇꠤ ꠟꠣꠝꠣꠔ ꠟꠣꠝꠤꠀ ꠀꠁꠀ ꠀꠝꠣꠞ ꠛꠣꠘꠣꠁꠟ ꠢꠃ ꠡꠘ꠆ꠖꠥꠇꠞ ꠜꠤꠔꠞꠦ ꠖꠥꠁꠅ ꠈꠣꠘ ꠙꠣꠔ꠆ꠔꠞ ꠕꠁꠟꠣꠝ, ꠎꠦꠟꠣ ꠝꠣꠛꠥꠖꠦ ꠢꠥꠇꠥꠝ ꠖꠤꠍꠟꠣ। ꠁꠔꠣ ꠅꠈꠘꠅ ꠢꠘꠅ ꠀꠍꠦ।”
DEU 10:6 ꠛꠘꠤ ꠁꠍꠞꠣꠁꠟꠦ ꠛꠤꠞꠥꠔ-ꠛꠘꠤ-ꠁꠀꠇꠣꠘ ꠕꠣꠇꠤ ꠞꠅꠀꠘꠣ ꠅꠁꠀ ꠝꠥꠍꠦꠞꠣꠔ ꠉꠦꠟꠣꠉꠤ। ꠅꠃ ꠎꠣꠉꠣꠔ ꠢꠣꠞꠥꠘ ꠘꠛꠤꠞ ꠃꠚꠣꠔ ꠅꠀꠄ, ꠔꠣꠘꠞꠦ ꠅꠘꠅ ꠖꠣꠚꠘ ꠇꠞꠣ ꠅꠁꠟ। ꠛꠣꠖꠦ ꠔꠣꠘ ꠛꠖꠟꠣ ꠔꠣꠘ ꠙꠥꠀ ꠀꠟꠤ-ꠀꠎꠞ ꠙꠞꠗꠣꠘ ꠁꠝꠣꠝ ꠅꠁꠟꠣ।
DEU 10:7 ꠛꠣꠖꠦ ꠛꠘꠤ ꠁꠍꠞꠣꠁꠟꠞ ꠇꠣꠚꠦꠟꠣ ꠉꠥꠖꠉꠥꠖꠣꠔ ꠉꠦꠟꠣꠉꠤ, ꠢꠘ ꠕꠣꠇꠤ ꠎꠔꠛꠣꠔꠣꠔ ꠉꠦꠟꠣ, ꠁ ꠎꠣꠉꠣꠔ ꠙꠣꠘꠤꠞ ꠚꠥꠔ ꠀꠟꠣ ꠛꠃꠔ ꠈꠣꠟ-ꠘꠣꠟꠣ ꠀꠍꠤꠟ।
DEU 10:8 ꠅꠃ ꠡꠝꠄ ꠕꠣꠇꠤ ꠝꠣꠛꠥꠖꠦ ꠟꠦꠛꠤ ꠈꠣꠘ꠆ꠖꠣꠘꠞꠦ ꠙꠍꠘ꠆ꠖ ꠇꠞꠟꠣ ꠡꠣꠢꠣꠖꠔ ꠡꠘ꠆ꠖꠥꠇ ꠛꠁꠀ ꠘꠤꠛꠣꠞ ꠟꠣꠉꠤ, ꠝꠣꠛꠥꠖꠞ ꠄꠛꠣꠖꠔ-ꠛꠘ꠆ꠖꠦꠉꠤ ꠇꠞꠣꠞ ꠘꠤꠅꠔꠦ ꠔꠣꠘ ꠍꠣꠝꠘꠦ ꠀꠎꠤꠞꠣ ꠖꠤꠛꠣꠞ ꠟꠣꠉꠤ, ꠀꠞ ꠔꠣꠘ ꠘꠣꠝꠦ ꠝꠣꠘꠡꠞꠦ ꠖꠥꠀ ꠖꠤꠛꠣꠞ ꠟꠣꠉꠤ। ꠅꠃ ꠁꠝꠣꠝꠔꠤ ꠇꠣꠝ ꠔꠣꠞꠣ ꠅꠈꠘꠅ ꠇꠞꠞꠣ।
DEU 10:9 ꠅꠔꠣꠞ ꠟꠣꠉꠤ ꠟꠦꠛꠤ ꠈꠣꠘ꠆ꠖꠣꠘꠞ ꠝꠣꠘꠡꠦ ꠛꠘꠤ ꠁꠍꠞꠣꠁꠟꠞ ꠖꠥꠍꠞꠣ ꠈꠣꠘ꠆ꠖꠣꠘ ꠅꠇꠟꠞ ꠟꠣꠈꠣꠘ ꠎꠝꠤ-ꠎꠝꠣꠞ ꠇꠥꠘꠥ ꠛꠣꠐ ꠛꠣ ꠇꠥꠘꠥ ꠝꠤꠞꠣꠡꠖꠣꠞꠤ ꠙꠣꠁꠟꠣ ꠘꠣ। ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠎꠛꠣꠘ ꠝꠣꠚꠤꠇ ꠡ꠆ꠛꠄꠅꠋ ꠝꠣꠛꠥꠖꠃ ꠅꠁꠟꠣ ꠔꠣꠞꠣꠞ ꠝꠤꠞꠣꠡ।
DEU 10:10 ꠢꠎꠞꠔ ꠝꠥꠍꠣꠄ ꠔꠣꠞꠣꠞꠦ ꠇꠁꠟꠣ, “ꠀꠉꠞ ꠛꠣꠞꠞ ꠟꠣꠈꠣꠘ ꠁꠛꠣꠞꠅ ꠀꠝꠤ ꠌꠣꠟ꠆ꠟꠤꠡ ꠖꠤꠘ ꠌꠣꠟ꠆ꠟꠤꠡ ꠞꠣꠁꠔ ꠔꠥꠞ ꠙꠣꠠꠞ ꠃꠙꠞꠦ ꠀꠍꠟꠣꠝ, ꠁꠛꠣꠞꠅ ꠝꠣꠛꠥꠖꠦ ꠀꠝꠣꠞ ꠚꠞꠤꠀꠖ ꠇꠛꠥꠟ ꠇꠞꠟꠣ, ꠔꠣꠁꠘ ꠔꠥꠝꠞꠣꠞꠦ ꠛꠤꠘꠣꠡ ꠇꠞꠣ ꠛꠣꠖ ꠖꠤꠟꠣꠁꠟꠣ।
DEU 10:11 ꠛꠣꠖꠦ ꠝꠣꠛꠥꠖꠦ ꠀꠝꠣꠞꠦ ꠇꠁꠟꠣ, ‘ꠔꠥꠝꠤ ꠃꠑꠅ, ꠃꠑꠤꠀ ꠀꠉꠦꠖꠤ ꠀꠉꠥꠀꠘꠤꠞ ꠟꠣꠉꠤ ꠅꠔꠣ ꠝꠣꠘꠡꠞꠦ ꠎꠥꠁꠔ ꠇꠞꠤꠀ ꠔꠣꠞꠣꠞ ꠀꠉ ꠅꠁꠀ ꠞꠅꠀꠘꠣ ꠖꠦꠅ, ꠀꠝꠤ ꠔꠣꠞꠣꠞ ꠝꠄ-ꠝꠥꠞꠛ꠆ꠛꠤ ꠅꠇꠟꠞ ꠉꠦꠍꠦ ꠎꠦ ꠖꠦꠡ ꠖꠤꠛꠣꠞ ꠟꠣꠉꠤ ꠇꠍꠝ ꠈꠣꠁꠀ ꠅꠀꠖꠣ ꠇꠞꠍꠤ, ꠔꠣꠞꠣ ꠢꠃ ꠖꠦꠡꠅ ꠉꠤꠀ ꠁꠔꠣ ꠖꠈꠟ ꠇꠞꠃꠇ।’
DEU 10:12 “ꠅ ꠛꠘꠤ ꠁꠍꠞꠣꠁꠟ, ꠢꠥꠘꠅ, ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠔꠥꠝꠞꠣꠞ ꠉꠦꠍꠦ ꠇꠤꠔꠣ ꠌꠣꠁꠘ। ꠔꠣꠁꠘ ꠌꠣꠁꠞꠣ, ꠔꠥꠝꠞꠣ ꠈꠣꠟꠤ ꠔꠣꠘ ꠒꠞ-ꠈꠚ ꠜꠤꠔꠞꠦ ꠞꠣꠈꠅ, ꠔꠣꠘ ꠙꠕꠦ ꠌꠟꠅ, ꠔꠣꠘꠞꠦ ꠝꠢꠛ꠆ꠛꠔ ꠇꠞꠅ, ꠔꠥꠝꠞꠣꠞ ꠀꠡ꠆ꠔꠣ ꠖꠤꠟ-ꠝꠘ ꠖꠤꠀ ꠔꠣꠘ ꠄꠛꠣꠖꠔ-ꠛꠘ꠆ꠖꠦꠉꠤ ꠇꠞꠅ।
DEU 10:13 ꠀꠞ ꠔꠥꠝꠞꠣꠞ ꠜꠣꠟꠣꠁꠞ ꠟꠣꠉꠤ ꠀꠁꠎ ꠀꠝꠤ ꠔꠥꠝꠞꠣꠞꠦ ꠝꠣꠛꠥꠖꠞ ꠖꠦꠅꠀ ꠎꠦ ꠢꠥꠇꠥꠝ-ꠀꠢꠇꠣꠝ ꠀꠞ ꠡꠞꠤꠅꠔ ꠎꠣꠘꠣꠁꠞꠣꠝ, ꠁꠔꠣ ꠙꠥꠞꠣꠙꠥꠞ ꠀꠝꠟ ꠇꠞꠅ।
DEU 10:14 “ꠎꠣꠘ ꠔ, ꠀꠍꠝꠣꠘ ꠀꠞ ꠀꠍꠝꠣꠘꠤ ꠢꠇ꠆ꠇꠟꠔꠣ, ꠎꠝꠤꠘ ꠀꠞ ꠎꠝꠤꠘꠞ ꠔꠣꠝꠣꠝ ꠍꠣꠝꠣꠘꠣ ꠔ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ।
DEU 10:15 ꠔꠣ-ꠅ ꠔꠥꠝꠞꠣꠞ ꠝꠄ-ꠝꠥꠞꠛ꠆ꠛꠤꠞ ꠛꠣꠄ ꠔꠣꠘ ꠐꠣꠘ ꠕꠣꠇꠣꠄ, ꠔꠣꠁꠘ ꠄꠞꠣꠞꠦ ꠝꠢꠛ꠆ꠛꠔ ꠇꠞꠔꠣ। ꠔꠣꠞꠣꠞ ꠛꠣꠖꠦ ꠔꠣꠞꠣꠞ ꠀꠅꠟꠣꠖ ꠅꠇꠟꠞꠦ ꠝꠣꠘꠤ, ꠅꠈꠘꠇꠥꠞ ꠎꠝꠣꠘꠣꠞ ꠖꠥꠘꠤꠀꠞ ꠢꠇꠟ ꠎꠣꠔꠤꠞ ꠝꠣꠎ ꠕꠣꠇꠤ ꠈꠣꠟꠤ ꠔꠥꠝꠞꠣꠞꠦ ꠙꠍꠘ꠆ꠖ ꠇꠞꠍꠂꠘ।
DEU 10:16 ꠄꠞꠟꠣꠉꠤ ꠔꠥꠝꠞꠣꠞ ꠎꠣꠞꠎꠤꠞ ꠖꠤꠟꠞ ꠝꠍꠟꠝꠣꠘꠤ ꠇꠞꠣꠅ, ꠉꠣꠠꠔꠦꠠꠣ ꠘꠣꠚꠞꠝꠣꠘ ꠛꠘꠤꠀ ꠞꠁꠅ ꠘꠣ।
DEU 10:17 ꠝꠘꠅ ꠞꠣꠈꠤꠅ, ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣ ꠔ ꠢꠇꠟ ꠖꠦꠛ-ꠖꠦꠛꠤꠞ ꠃꠙꠞꠦ, ꠝꠥꠘꠤꠛ ꠅꠇꠟꠞ ꠝꠥꠘꠤꠛ, ꠔꠣꠁꠘꠃ ꠝꠢꠣꠘ, ꠛꠟꠛꠣꠘ ꠀꠞ ꠒꠞ-ꠈꠚ ꠙꠄꠖꠣ ꠇꠞꠞꠣ ꠀꠟ꠆ꠟꠣ। ꠔꠣꠁꠘ ꠇꠥꠘꠥ ꠙꠇ꠆ꠇꠙꠣꠔꠤ ꠇꠞꠂꠘ ꠘꠣ, ꠊꠥꠡ ꠈꠣꠁꠘ ꠘꠣ।
DEU 10:18 ꠄꠔꠤꠝ ꠅꠇꠟ ꠀꠞ ꠠꠣꠠꠤ ꠛꠦꠐꠤꠘ꠆ꠔꠞ ꠛꠣꠄ ꠢꠇ ꠁꠘꠍꠣꠚ ꠇꠞꠂꠘ, ꠀꠞ ꠔꠥꠝꠞꠣꠞ ꠟꠉꠦ ꠛꠡꠔ ꠇꠞꠞꠣ ꠜꠤꠘ-ꠖꠦꠡꠤ ꠅꠇꠟꠞꠦ ꠈꠣꠅꠀ-ꠚꠤꠘ꠆ꠖꠣꠞ ꠢꠇꠟꠔꠣ ꠖꠤꠀ ꠔꠣꠘ ꠝꠢꠛ꠆ꠛꠔꠞ ꠙꠞꠝꠣꠘ ꠖꠦꠈꠣꠁꠘ।
DEU 10:19 ꠀꠉꠦ ꠔ ꠝꠤꠡꠞ ꠖꠦꠡꠅ ꠔꠥꠝꠞꠣꠅ ꠅꠟꠣ ꠜꠤꠘ-ꠖꠦꠡꠤ ꠀꠍꠟꠣꠄ, ꠄꠞꠟꠣꠉꠤ ꠜꠤꠘ-ꠖꠦꠡꠤ ꠝꠣꠘꠡꠞꠦ ꠔꠥꠝꠞꠣ ꠝꠣꠄꠀ-ꠝꠢꠛ꠆ꠛꠔ ꠇꠞꠤꠅ।
DEU 10:20 ꠔꠥꠝꠞꠣ ꠘꠤꠎꠞ ꠝꠣꠛꠥꠖ ꠀꠟ꠆ꠟꠣꠞꠦ ꠒꠞꠣꠁꠀ ꠌꠟꠤꠅ, ꠔꠣꠘ ꠄꠛꠣꠖꠔ-ꠛꠘ꠆ꠖꠦꠉꠤ ꠇꠞꠤꠅ, ꠔꠣꠘ ꠀꠡꠤꠇ ꠛꠘꠤꠀ ꠞꠁꠅ, ꠀꠞ ꠈꠣꠟꠤ ꠔꠣꠘ ꠘꠣꠝꠦ ꠇꠍꠝ ꠈꠣꠁꠅ।
DEU 10:21 ꠔꠣꠁꠘꠃ ꠔꠥꠝꠞꠣꠞ ꠔꠣꠞꠤꠚꠞ ꠈꠥꠐꠤ, ꠔꠣꠁꠘꠃ ꠔꠥꠝꠞꠣꠞ ꠀꠟ꠆ꠟꠣ। ꠔꠥꠝꠞꠣ ꠘꠤꠎꠞ ꠌꠃꠈꠦ ꠎꠔ ꠀꠌꠣꠘꠇ ꠔꠣꠁꠎ꠆ꠎꠥꠛꠤ ꠀꠞ ꠛꠦꠎꠥꠁꠔꠣ ꠇꠥꠖꠞꠔꠤ ꠇꠣꠝ ꠖꠦꠈꠍ, ꠁꠔꠣ ꠢꠇ꠆ꠇꠟꠔꠣ ꠔ ꠔꠥꠝꠞꠣꠞ ꠟꠣꠉꠤ ꠔꠣꠁꠘꠃ ꠇꠞꠍꠂꠘ।
DEU 10:22 ꠔꠥꠝꠞꠣꠞ ꠎꠦꠔꠣ ꠝꠄ-ꠝꠥꠞꠛ꠆ꠛꠤ ꠝꠤꠡꠞ ꠖꠦꠡꠅ ꠉꠦꠍꠟꠣ, ꠄꠞꠣ ꠀꠍꠟꠣ ꠝꠥꠐ ꠡꠔ꠆ꠔꠁꠞ ꠎꠘ, ꠀꠞ ꠅꠈꠘ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠔꠥꠝꠞꠣꠞꠦ ꠀꠍꠝꠣꠘꠞ ꠔꠦꠞꠣꠞ ꠟꠣꠈꠣꠘ ꠇꠞꠍꠂꠘ, ꠎꠦꠔꠣ ꠉꠘꠤꠀ ꠚꠥꠠꠣꠁꠟ ꠎꠣꠄ ꠘꠣ।
DEU 11:1 “ꠄꠞꠟꠣꠉꠤ, ꠅ ꠛꠘꠤ ꠁꠍꠞꠣꠁꠟ, ꠔꠥꠝꠞꠣ ꠘꠤꠎꠞ ꠝꠣꠛꠥꠖ ꠀꠟ꠆ꠟꠣꠞꠦ ꠝꠢꠛ꠆ꠛꠔ ꠇꠞꠤꠅ, ꠀꠞ ꠔꠣꠘ ꠝꠞ꠆ꠎꠤ ꠎꠥꠉꠣꠁꠀ ꠌꠟꠤꠅ, ꠔꠣꠘ ꠖꠦꠅꠀ ꠡꠞꠤꠅꠔ, ꠢꠇꠟ ꠘꠤꠅꠝ-ꠇꠣꠘꠥꠘ, ꠢꠥꠇꠥꠝ-ꠀꠢꠇꠣꠝ ꠢꠞ-ꠢꠣꠝꠦꠡꠣ ꠝꠣꠘꠤꠅ।
DEU 11:2 ꠔꠥꠝꠞꠣ ꠅꠈꠘ ꠝꠘꠅ ꠞꠣꠈꠤꠅ, ꠁꠔꠣ ꠀꠝꠤ ꠔꠥꠝꠞꠣꠞ ꠢꠥꠞꠥꠔ꠆ꠔꠣꠁꠘ꠆ꠔꠞꠦ ꠘꠣ ꠇꠁꠀ ꠈꠣꠟꠤ ꠔꠥꠝꠞꠣꠞ ꠉꠦꠍꠦ ꠇꠁꠀꠞ, ꠔꠣꠞꠣ ꠔ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠢꠦꠖꠣꠄꠅꠔ ꠖꠦꠈꠍꠦ ꠘꠣ, ꠁꠔꠣ ꠌꠤꠘꠦꠅ ꠘꠣ। ꠔꠥꠝꠞꠣꠞ ꠉꠦꠍꠦ ꠔꠣꠘ ꠀꠙꠘ ꠝꠢꠤꠝꠣ, ꠔꠣꠘ ꠇꠥꠖꠞꠔꠤ ꠀꠔꠞ ꠛꠣꠢꠣꠖꠥꠞꠤ,
DEU 11:3 ꠀꠞ ꠝꠤꠡꠞꠞ ꠛꠣꠖꠡꠣ ꠚꠦꠞꠣꠃꠘꠞ ꠃꠙꠞꠦ, ꠔꠣꠞ ꠀꠡ꠆ꠔꠣ ꠖꠦꠡꠞ ꠃꠙꠞꠦ ꠔꠣꠁꠘ ꠎꠔ ꠘꠝꠥꠘꠣꠞ ꠇꠥꠖꠞꠔꠤ ꠟꠤꠟꠣ-ꠈꠦꠟꠣ ꠖꠦꠈꠣꠁꠍꠂꠘ ꠁꠔꠣ ꠔ ꠔꠣꠞꠣ ꠖꠦꠈꠍꠦ ꠘꠣ।
DEU 11:4 ꠔꠣꠞꠣ ꠝꠤꠡꠞꠞ ꠍꠤꠙꠣꠁ ꠖꠟ, ꠁꠔꠣꠞ ꠊꠥꠠꠣ, ꠊꠥꠠꠣꠞ ꠉꠣꠠꠤꠘ ꠀꠞ ꠁꠔꠣꠞꠦ ꠔꠣꠁꠘ ꠇꠤꠟꠣ ꠘꠤꠟ ꠖꠞꠤꠀꠔ ꠛꠥꠠꠣꠁꠀ ꠝꠣꠞꠤꠀ ꠄꠇ꠆ꠇꠦꠞꠦ ꠛꠤꠘꠣꠡ ꠇꠞꠍꠂꠘ, ꠁꠔꠣꠅ ꠔ ꠖꠦꠈꠍꠦ ꠘꠣ,
DEU 11:5 ꠅꠃ ꠎꠣꠉꠣꠔ ꠀꠁꠀ ꠔꠥꠝꠞꠣ ꠙꠃꠍꠤꠛꠣꠞ ꠀꠉꠦ ꠝꠞꠥꠜꠥꠝꠤꠞ ꠝꠣꠎꠦ ꠔꠣꠁꠘ ꠔꠥꠝꠞꠣꠞ ꠃꠙꠞꠦ ꠎꠔꠔꠣ ꠊꠐꠣꠁꠍꠂꠘ, ꠔꠥꠝꠞꠣꠞ ꠢꠥꠞꠥꠔ꠆ꠔꠣꠁꠘ꠆ꠔꠦ ꠁꠔꠣꠅ ꠖꠦꠈꠍꠦ ꠘꠣ।
DEU 11:6 ꠔꠣꠁꠘ ꠞꠥꠛꠦꠘ ꠈꠣꠘ꠆ꠖꠣꠘꠞ ꠁꠟꠤꠀꠛꠞ ꠙꠥꠀ ꠖꠣꠕꠘ ꠀꠞ ꠀꠛꠤꠞꠣꠝꠞꠦ ꠎꠦ ꠡꠣꠎꠣ ꠖꠤꠍꠂꠘ ꠝꠣꠘꠤ, ꠖꠥꠘꠤꠀꠞ ꠝꠣꠐꠤ ꠚꠣꠐꠤꠀ ꠀ ꠇꠞꠤꠀ ꠀꠡ꠆ꠔꠣ ꠛꠘꠤ ꠁꠍꠞꠣꠁꠟꠞ ꠝꠣꠎꠈꠣꠘ ꠕꠣꠇꠤ ꠔꠣꠞꠣꠞꠦ ꠉꠤꠟꠤꠟꠤꠟ, ꠔꠣꠞꠣꠞ ꠛꠃ-ꠛꠣꠁꠌ꠆ꠌꠣꠁꠘ ꠡꠥꠖ꠆ꠖꠣ ꠀꠡ꠆ꠔꠣ ꠙꠞꠤꠛꠣꠞ, ꠔꠣꠞꠣꠞ ꠊꠞ-ꠖꠥꠀꠞ, ꠀꠞ ꠢꠦꠝꠣꠘ-ꠎꠣꠘꠥꠀꠞ ꠡꠢ ꠢꠇꠟ ꠝꠣꠟ-ꠍꠣꠝꠣꠘꠣ ꠝꠣꠐꠤꠞ ꠔꠟꠦ ꠢꠣꠝꠣꠁꠉꠦꠟ, ꠁꠔꠣꠅ ꠄꠞꠣ ꠖꠦꠈꠍꠦ ꠘꠣ।
DEU 11:7 ꠅꠁꠟꠦ ꠔꠥꠝꠞꠣ ꠘꠤꠎꠞ ꠌꠃꠈꠦ ꠝꠣꠛꠥꠖꠞ ꠢꠇꠟ ꠇꠥꠖꠞꠔꠤ ꠟꠤꠟꠣ-ꠈꠦꠟꠣ ꠖꠦꠈꠍ।
DEU 11:8 “ꠔꠦ ꠅꠈꠘ ꠀꠝꠤ ꠔꠥꠝꠞꠣꠞꠦ ꠎꠦꠟꠣ ꠢꠥꠇꠥꠝ ꠖꠤꠞꠣꠝ, ꠔꠥꠝꠞꠣ ꠁꠔꠣ ꠢꠇ꠆ꠇꠟꠔꠣ ꠝꠣꠘꠤꠅ, ꠔꠦꠃ ꠎꠞ꠆ꠖꠣꠘ ꠉꠣꠋ ꠙꠣꠞ ꠅꠁꠀ ꠎꠦ ꠖꠦꠡ ꠖꠈꠟꠞ ꠟꠣꠉꠤ ꠎꠣꠁꠞꠣꠄ, ꠔꠥꠝꠞꠣ ꠛꠟꠀꠟꠣ ꠛꠘꠤꠀ ꠢꠘꠞ ꠖꠈꠟꠖꠣꠞꠤ ꠙꠣꠁꠛꠣꠄ।
DEU 11:9 ꠝꠣꠛꠥꠖꠦ ꠔꠥꠝꠞꠣꠞ ꠝꠄ-ꠝꠥꠞꠛ꠆ꠛꠤ ꠅꠇꠟꠞꠦ ꠀꠞ ꠔꠣꠞꠣꠞ ꠀꠅꠟꠣꠖ ꠅꠇꠟꠞꠦ ꠎꠦ ꠖꠦꠡ ꠖꠤꠛꠣꠞ ꠟꠣꠉꠤ ꠇꠍꠝ ꠈꠣꠁꠍꠟꠣ, ꠖꠥꠗ ꠀꠞ ꠝꠃꠞ ꠜꠣꠘ꠆ꠒꠣꠞ ꠀꠟꠣ ꠢꠃ ꠀꠞꠣꠝꠞ ꠖꠦꠡꠅ ꠔꠥꠝꠞꠣꠞ ꠢꠣꠄꠀꠔꠤ ꠟꠣꠝ꠆ꠛꠣ ꠅꠁꠛ।
DEU 11:10 ꠁ ꠖꠦꠡꠈꠣꠘ ꠔ ꠢꠃ ꠝꠤꠡꠞ ꠖꠦꠡꠞ ꠟꠣꠈꠣꠘ ꠘꠣꠄ ꠎꠦꠈꠣꠘ ꠕꠣꠇꠤ ꠔꠥꠝꠞꠣ ꠛꠣꠞ ꠅꠁꠀ ꠀꠁꠍ, ꠝꠘꠅ ꠅꠞ ꠘꠤ, ꠢꠣꠉ-ꠔꠞꠇꠣꠞꠤꠞ ꠈꠦꠔꠅ ꠎꠦꠟꠣ ꠙꠣꠘꠤ ꠖꠦꠁꠘ, ꠢꠃ ꠖꠦꠡꠅ ꠛꠤꠌꠤ ꠛꠣꠁꠘ ꠖꠤꠀ ꠢꠣꠞꠟꠦ ꠔꠥꠝꠞꠣ ꠙꠣꠅꠞ ꠘꠣꠃꠠꠣ ꠖꠤꠀ ꠅꠟꠣ ꠙꠣꠘꠤ ꠢꠤꠌꠤꠔꠣꠄ?
DEU 11:11 ꠅꠁꠟꠦ ꠉꠣꠋ ꠙꠣꠞ ꠅꠁꠀ ꠎꠦ ꠖꠦꠡ ꠔꠥꠝꠞꠣ ꠖꠈꠟ ꠇꠞꠣꠔ ꠎꠣꠁꠞꠣꠄ, ꠁ ꠖꠦꠡꠅ ꠙꠣꠠꠤꠀ ꠔꠟ ꠎꠣꠉꠣ ꠀꠞ ꠙꠣꠠ-ꠙꠞꠛꠔꠦ ꠜꠞꠣ, ꠁ ꠎꠝꠤꠘꠦ ꠀꠟ꠆ꠟꠣꠞ ꠖꠦꠅꠀ ꠝꠦꠊꠞ ꠙꠣꠘꠤ ꠈꠣꠄ।
DEU 11:12 ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠁ ꠖꠦꠡꠞ ꠈꠤꠀꠟ ꠞꠣꠈꠂꠘ। ꠛꠍꠞꠞ ꠙꠄꠟꠣ ꠕꠣꠇꠤ ꠢꠦꠡ ꠙꠞ꠆ꠎꠘ꠆ꠔ ꠔꠣꠘ ꠖꠄꠀꠞ ꠘꠎꠞ ꠕꠣꠇꠦ ꠁ ꠎꠝꠤꠘꠞ ꠃꠙꠞꠦ।
DEU 11:13 “ꠔꠦ ꠀꠝꠤ ꠀꠁꠎ ꠔꠥꠝꠞꠣꠞꠦ ꠎꠦꠟꠣ ꠢꠥꠇꠥꠝ ꠖꠤꠀꠞ, ꠁꠔꠣ ꠔꠥꠝꠞꠣ ꠈꠥꠛ ꠈꠤꠀꠟꠤ ꠅꠁꠀ ꠝꠣꠘꠤꠅ, ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞꠦ ꠝꠢꠛ꠆ꠛꠔ ꠇꠞꠤꠅ, ꠀꠞ ꠙꠥꠞꠣꠙꠥꠞ ꠖꠤꠟꠦ-ꠎꠣꠘꠦ ꠔꠣꠘ ꠄꠛꠣꠖꠔ-ꠛꠘ꠆ꠖꠦꠉꠤ ꠇꠞꠤꠅ।
DEU 11:14 ꠔꠦꠃ ꠝꠣꠛꠥꠖꠦ ꠎꠞꠥꠞ ꠝꠣꠚꠤꠇ ꠛꠍꠞꠞ ꠙꠄꠟꠣ ꠀꠞ ꠡꠦꠡꠦꠅ ꠞꠢꠝꠔꠤ ꠝꠦꠊ ꠖꠤꠀ, ꠔꠥꠝꠞꠣꠞ ꠈꠦꠔꠞ ꠚꠡꠟ, ꠀꠋꠉꠥꠞꠞ ꠞꠡ, ꠎꠄꠔꠥꠘꠞ ꠔꠦꠟ ꠢꠇ꠆ꠇꠟꠔꠣ ꠎꠥꠉꠣꠘ ꠖꠤꠛꠣ।
DEU 11:15 ꠔꠥꠝꠞꠣꠞ ꠙꠡꠥꠞ ꠙꠣꠟꠞ ꠟꠣꠉꠤ ꠎꠝꠤꠘꠅ ꠊꠣꠡ ꠖꠤꠛꠣ, ꠔꠥꠝꠞꠣ ꠔꠥꠡ꠆ꠐ ꠅꠁꠀ ꠈꠣꠘꠤ-ꠙꠣꠘꠤ ꠈꠣꠁꠛꠣꠄ।
DEU 11:16 “ꠔꠣ-ꠅ ꠔꠥꠝꠞꠣ ꠢꠥꠡꠤꠀꠞ ꠞꠁꠅ, ꠀꠞꠘꠣꠄ ꠔꠥꠝꠞꠣꠞ ꠝꠘ ꠇꠥ-ꠙꠕꠦ ꠎꠣꠁꠛꠉꠤ, ꠀꠞ ꠔꠥꠝꠞꠣ ꠛꠦ-ꠙꠕꠤ ꠛꠘꠤꠀ ꠖꠦꠛ-ꠖꠦꠛꠤꠞ ꠙꠥꠎꠣ ꠇꠞꠛꠣꠄ, ꠁꠔꠣꠞꠦ ꠜꠇ꠆ꠔꠤ ꠇꠞꠛꠣꠄ।
DEU 11:17 ꠁꠟꠣ ꠇꠞꠟꠦ ꠔꠥꠝꠞꠣꠞ ꠃꠙꠞꠦ ꠝꠣꠛꠥꠖꠞ ꠉꠥꠍꠣꠞ ꠀꠉꠥꠁꠘ ꠉꠞꠝ ꠅꠁꠛ, ꠔꠣꠁꠘ ꠀꠍꠝꠣꠘꠞ ꠞꠢꠝꠔꠤ ꠖꠥꠀꠞ ꠛꠘ꠆ꠖ ꠇꠞꠤꠟꠤꠛꠣ, ꠔꠦꠃ ꠝꠦꠊ-ꠙꠣꠘꠤ ꠛꠘ꠆ꠖ ꠅꠁꠀ ꠎꠝꠤꠘꠅ ꠀꠞ ꠚꠡꠟ ꠚꠟꠤꠔ ꠘꠣꠄ, ꠀꠞ ꠝꠣꠛꠥꠖꠦ ꠔꠥꠝꠞꠣꠞꠦ ꠎꠦ ꠖꠦꠡ ꠖꠣꠘ ꠇꠞꠞꠣ, ꠢꠃ ꠀꠞꠣꠝꠞ ꠖꠦꠡ ꠕꠣꠇꠤ ꠔꠥꠝꠞꠣꠞꠦ ꠎꠟꠖꠤ ꠇꠞꠤ ꠚꠥꠍꠤꠀ ꠚꠣꠟꠣꠁꠟ ꠅꠁꠛ।
DEU 11:18 ꠄꠞꠟꠣꠉꠤ ꠔꠥꠝꠞꠣꠞ ꠝꠘꠞ ꠝꠣꠎꠦ, ꠔꠥꠝꠞꠣꠞ ꠖꠤꠟꠞ ꠜꠤꠔꠞꠦ ꠀꠝꠣꠞ ꠅꠃ ꠢꠥꠇꠥꠝ ꠈꠣꠘ ꠉꠣꠕꠤꠀ ꠞꠣꠈꠤꠅ, ꠔꠥꠝꠞꠣꠞ ꠖꠥꠁꠅ ꠀꠔꠅ ꠁꠔꠣ ꠘꠤꠡꠣꠘꠣ ꠢꠤꠡꠣꠛꠦ ꠛꠣꠘ꠆ꠖꠤꠀ ꠕꠁꠅ, ꠀꠞ ꠇꠙꠣꠟꠞ ꠝꠣꠎꠦꠅ ꠟꠣꠉꠣꠁꠅ।
DEU 11:19 ꠔꠥꠝꠞꠣꠞ ꠢꠥꠞꠥꠔ꠆ꠔꠣꠁꠘ꠆ꠔꠞꠦꠅ ꠁꠔꠣ ꠢꠇ꠆ꠇꠟꠔꠣ ꠔꠣꠟꠤꠝ ꠖꠤꠅ। ꠔꠥꠝꠞꠣ ꠊꠞꠅ ꠞꠅꠀꠞ ꠡꠝꠄ, ꠙꠕꠦ-ꠊꠣꠐꠦ ꠀꠐꠤꠛꠣꠞ ꠡꠝꠄ, ꠢꠥꠔꠤꠛꠣꠞ ꠡꠝꠄ ꠀꠞ ꠢꠥꠔꠘꠅ ꠕꠣꠇꠤ ꠃꠑꠤꠀ ꠢꠣꠞꠟꠦ ꠢꠣꠝꠦꠡꠣ ꠅꠔꠣ ꠛꠦꠙꠣꠞꠦ ꠛꠣꠔꠌꠤꠔ ꠇꠞꠤꠅ।
DEU 11:20 ꠁꠔꠣ ꠟꠦꠈꠤꠀ ꠔꠥꠝꠞꠣꠞ ꠛꠣꠠꠤꠞ ꠉꠦꠁꠐꠅ ꠀꠞ ꠖꠥꠀꠞꠞ ꠌꠃꠇꠣꠑꠅ ꠟꠣꠉꠣꠁꠅ।
DEU 11:21 ꠁꠔꠣ ꠝꠣꠘꠟꠦ ꠝꠣꠛꠥꠖꠦ ꠔꠥꠝꠞꠣꠞ ꠝꠄ-ꠝꠥꠞꠛ꠆ꠛꠤꠞ ꠉꠦꠍꠦ ꠎꠦ ꠖꠦꠡ ꠖꠤꠛꠣꠞ ꠇꠍꠝ ꠈꠣꠁꠍꠟꠣ, ꠢꠃ ꠖꠦꠡꠅ ꠔꠥꠝꠞꠣ ꠀꠞ ꠔꠥꠝꠞꠣꠞ ꠀꠅꠟꠣꠖꠞ ꠢꠣꠄꠀꠔꠤ ꠅꠔꠖꠤꠘ ꠞꠁꠛ, ꠎꠔꠖꠤꠘ ꠁ ꠖꠥꠘꠤꠀꠞ ꠃꠙꠞꠦ ꠀꠍꠝꠣꠘ ꠞꠁꠛ।
DEU 11:22 “ꠀꠁꠎ ꠀꠝꠤ ꠔꠥꠝꠞꠣꠞꠦ ꠎꠦꠔꠣ ꠢꠥꠇꠥꠝ-ꠀꠢꠇꠣꠝ ꠖꠤꠀꠞ, ꠔꠥꠝꠞꠣ ꠎꠥꠖꠤ ꠈꠥꠛ ꠈꠤꠀꠟꠤ ꠅꠁꠀ ꠁꠔꠣ ꠝꠣꠘꠅ, ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞꠦ ꠝꠢꠛ꠆ꠛꠔ ꠇꠞꠅ, ꠔꠣꠘ ꠛꠣꠔꠣꠁꠟ ꠙꠕꠦ ꠌꠟꠅ ꠀꠞ ꠔꠣꠘ ꠀꠡꠤꠇ ꠛꠘꠤꠀ ꠞꠅ,
DEU 11:23 ꠔꠦ ꠝꠣꠛꠥꠖꠦ ꠔꠥꠝꠞꠣꠞ ꠍꠣꠝꠘꠦ ꠕꠣꠇꠤ ꠢꠃ ꠖꠦꠡꠞ ꠢꠇꠟ ꠎꠣꠔꠤꠞꠦ ꠛꠣꠞ ꠇꠞꠤ ꠖꠤꠛꠣ, ꠔꠦꠃ ꠔꠥꠝꠞꠣ ꠘꠤꠎꠞ ꠕꠣꠇꠤ ꠀꠞꠅ ꠛꠠ ꠛꠠ ꠀꠞ ꠛꠟꠀꠟꠣ ꠎꠣꠔꠤꠞꠦ ꠈꠦꠖꠣꠁꠀ ꠢꠘꠞ ꠖꠈꠟꠖꠣꠞꠤ ꠙꠣꠁꠛꠣꠄ।
DEU 11:24 ꠔꠥꠝꠞꠣꠞ ꠙꠣꠅꠖꠤ ꠎꠦꠔꠣ ꠎꠣꠉꠣꠞ ꠃꠙꠞꠦ ꠀꠐꠤꠛꠣꠄ, ꠁꠔꠣ ꠢꠇꠟ ꠎꠣꠉꠣ ꠔꠥꠝꠞꠣꠞ ꠖꠈꠟꠅ ꠀꠁꠛ। ꠖꠃꠇꠘꠞ ꠝꠞꠥꠜꠥꠝꠤ ꠕꠣꠇꠤ ꠟꠦꠛꠣꠘꠘ ꠙꠞ꠆ꠎꠘ꠆ꠔ, ꠚꠥꠞꠣꠔ ꠉꠣꠋ ꠕꠣꠇꠤ ꠙꠁꠌꠝꠞ ꠖꠞꠤꠀ ꠙꠞ꠆ꠎꠘ꠆ꠔ ꠖꠈꠟꠖꠣꠞꠤ ꠙꠣꠁꠛꠣꠄ।
DEU 11:25 ꠇꠥꠘꠥ ꠛꠦꠐꠣ ꠔꠥꠝꠞꠣꠞ ꠍꠣꠝꠘꠦ ꠃꠛꠣꠘꠤꠞ ꠔꠣꠇ꠆ꠇꠔ ꠅꠁꠔ ꠘꠣꠄ, ꠔꠥꠝꠞꠣ ꠢꠃ ꠖꠦꠡꠞ ꠎꠦꠈꠣꠘꠅ ꠎꠣꠁꠛꠣꠄ, ꠅꠈꠣꠘꠞ ꠝꠣꠘꠡꠦꠃ ꠔꠥꠝꠞꠣꠞꠦ ꠒꠞꠣꠁꠛꠣ, ꠔꠣꠞꠣꠞ ꠜꠤꠔꠞꠦ ꠇꠣꠙꠤꠛ, ꠁꠔꠣ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠔꠣꠘ ꠘꠤꠎꠞ ꠅꠀꠖꠣ ꠝꠣꠚꠤꠇꠃ ꠇꠞꠣꠁꠛꠣ।
DEU 11:26 “ꠢꠥꠘꠅ, ꠀꠁꠎ ꠀꠝꠤ ꠔꠥꠝꠞꠣꠞ ꠍꠣꠝꠘꠦ ꠞꠢꠝꠔ ꠀꠞ ꠟꠣꠘ꠆ꠘꠔ ꠖꠥꠁꠅꠔꠣ ꠖꠦꠈꠣꠁꠟꠣꠝ।
DEU 11:27 ꠀꠝꠤ ꠅꠈꠘ ꠔꠥꠝꠞꠣꠞꠦ ꠎꠦꠟꠣ ꠢꠥꠇꠥꠝ ꠖꠤꠟꠣꠝ, ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠅꠃ ꠢꠥꠇꠥꠝ-ꠀꠢꠇꠣꠝ ꠎꠥꠖꠤ ꠔꠥꠝꠞꠣ ꠝꠣꠘꠅ, ꠔꠦ ꠔꠥꠝꠞꠣ ꠅꠃ ꠞꠢꠝꠔ ꠙꠣꠁꠛꠣꠄ।
DEU 11:28 ꠀꠞ ꠁꠔꠣ ꠘꠣ ꠝꠣꠘꠤꠀ ꠔꠥꠝꠞꠣ ꠎꠥꠖꠤ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠢꠥꠇꠥꠝꠞ ꠃꠟꠐꠣ ꠌꠟꠅ, ꠁ ꠙꠕ ꠕꠣꠇꠤ ꠢꠞꠤꠀ ꠇꠥꠘꠥ ꠖꠦꠛ-ꠖꠦꠛꠤꠞ ꠈꠞꠦ ꠈꠞꠦ ꠎꠣꠅ, ꠔꠦ ꠔꠥꠝꠞꠣ ꠟꠣꠘ꠆ꠘꠔꠤ ꠅꠁꠛꠣꠄ।
DEU 11:29 “ꠔꠥꠝꠞꠣ ꠎꠦ ꠖꠦꠡ ꠖꠈꠟ ꠇꠞꠣꠞ ꠟꠣꠉꠤ ꠎꠣꠁꠞꠣꠄ, ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠎꠦꠛꠟꠣ ꠔꠥꠝꠞꠣꠞꠦ ꠢꠃ ꠖꠦꠡꠅ ꠘꠤꠀ ꠢꠣꠞꠣꠁꠛꠣ, ꠢꠣꠞꠣꠁꠀ ꠢꠣꠞꠟꠦ ꠔꠥꠝꠞꠣ ꠅꠃ ꠞꠢꠝꠔꠞ ꠇꠕꠣ ꠉꠞꠤꠍꠤꠝ ꠙꠣꠠꠞ ꠃꠙꠞꠦ ꠃꠑꠤꠀ ꠄꠟꠣꠘ ꠇꠞꠛꠣꠄ, ꠀꠞ ꠅꠃ ꠟꠣꠘ꠆ꠘꠔꠞ ꠇꠕꠣ ꠄꠟꠣꠘ ꠇꠞꠛꠣꠄ ꠁꠛꠣꠟ ꠙꠣꠠꠞ ꠃꠙꠞꠦ ꠃꠑꠤꠀ।
DEU 11:30 ꠔꠥꠝꠞꠣ ꠔ ꠌꠤꠘꠅ, ꠎꠞ꠆ꠖꠣꠘ ꠉꠣꠋ ꠙꠣꠞ ꠅꠁꠀ ꠙꠕꠞ ꠙꠁꠌꠝꠦꠖꠤ ꠉꠤꠟꠉꠟꠞ ꠗꠣꠞꠅ ꠅꠃ ꠖꠥꠁꠅ ꠙꠣꠠ ꠀꠍꠦ, ꠀꠞꠣꠛꠣ ꠘꠣꠝꠞ ꠔꠟ ꠎꠣꠉꠣꠞ ꠛꠣꠡꠤꠘ꠆ꠖꠣ ꠇꠦꠘꠣꠘꠤ ꠅꠇꠟꠞ ꠖꠦꠡꠞ ꠝꠥꠞꠤꠞ ꠄꠟꠘ ꠛꠘꠞ ꠇꠣꠘ꠆ꠖꠣꠞ ꠅꠃ ꠖꠥꠁꠅ ꠙꠣꠠ ꠌꠤꠘꠅ ꠘꠣ ꠘꠤ?
DEU 11:31 ꠝꠘꠅ ꠞꠣꠈꠤꠅ, ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠔꠥꠝꠞꠣꠞꠦ ꠎꠦ ꠖꠦꠡꠞ ꠖꠈꠟꠖꠣꠞꠤ ꠖꠤꠞꠣ, ꠎꠞ꠆ꠖꠣꠘ ꠉꠣꠋ ꠙꠣꠞ ꠅꠁꠀ ꠢꠃ ꠖꠦꠡꠅ ꠢꠣꠝꠣꠁꠀ ꠢꠣꠞꠤ ꠔꠥꠝꠞꠣ ꠎꠦꠛꠟꠣ ꠢꠘꠅ ꠛꠡꠔ ꠇꠞꠛꠣꠄ,
DEU 11:32 ꠢꠃ ꠡꠝꠄ ꠔꠥꠝꠞꠣ ꠅꠃ ꠢꠥꠇꠥꠝ-ꠀꠢꠇꠣꠝ ꠀꠞ ꠘꠤꠅꠝ-ꠇꠣꠘꠥꠘ ꠈꠥꠛ ꠈꠤꠀꠟ ꠇꠞꠤꠀ ꠀꠝꠟ ꠇꠞꠤꠅ, ꠎꠦꠔꠣ ꠅꠈꠘ ꠔꠥꠝꠞꠣꠞꠦ ꠇꠁꠟꠣꠝ।
DEU 12:1 “ꠅ ꠛꠘꠤ ꠁꠍꠞꠣꠁꠟ, ꠔꠥꠝꠞꠣꠞ ꠝꠄ-ꠝꠥꠞꠛ꠆ꠛꠤꠞ ꠝꠣꠛꠥꠖ ꠀꠟ꠆ꠟꠣꠄ ꠔꠥꠝꠞꠣꠞꠦ ꠎꠦ ꠖꠦꠡꠞ ꠖꠈꠟꠖꠣꠞꠤ ꠖꠤꠍꠂꠘ, ꠢꠃ ꠖꠦꠡꠅ ꠉꠤꠀ ꠀꠝꠣꠞ ꠛꠣꠔꠣꠁꠟ ꠅꠃ ꠢꠥꠇꠥꠝ-ꠀꠢꠇꠣꠝ ꠀꠞ ꠘꠤꠅꠝ-ꠇꠣꠘꠥꠘ ꠢꠞ-ꠢꠣꠝꠦꠡꠣ ꠝꠣꠘꠤꠀ ꠌꠟꠤꠅ।
DEU 12:2 ꠢꠘꠞ ꠎꠔ ꠎꠣꠔꠤꠞꠦ ꠈꠦꠖꠣꠁꠀ ꠢꠣꠞꠤ ꠔꠥꠝꠞꠣ ꠖꠈꠟꠖꠣꠞꠤ ꠙꠣꠁꠞꠣꠄ, ꠔꠣꠞꠣꠞ ꠢꠥꠞꠥ-ꠛꠠ ꠢꠇꠟ ꠙꠣꠠ-ꠙꠞꠛꠔꠞ ꠃꠙꠞꠦ, ꠒꠣꠟ-ꠙꠣꠟꠣ ꠝꠦꠟꠣꠁꠟ ꠔꠞꠔꠣꠎꠣ ꠢꠇꠟ ꠉꠣꠍꠞ ꠔꠟꠦ ꠔꠣꠞꠣ ꠎꠦꠔꠣ ꠖꠦꠛ-ꠖꠦꠛꠤꠞ ꠙꠥꠎꠣ ꠇꠞꠂꠘ, ꠔꠥꠝꠞꠣ ꠁꠔꠣ ꠖꠦꠛ-ꠖꠦꠛꠤꠞ ꠀꠡ꠆ꠔꠣꠘꠣ ꠜꠣꠋꠉꠤꠀ ꠄꠇ꠆ꠇꠦꠛꠣꠞꠦ ꠌꠥꠞꠝꠣꠞ ꠇꠞꠤꠟꠣꠁꠅ।
DEU 12:3 ꠔꠣꠞꠣꠞ ꠢꠇꠟ ꠛꠟꠤ ꠈꠣꠘꠣ ꠜꠣꠋꠉꠤꠟꠤꠅ, ꠙꠥꠎꠣꠞ ꠙꠣꠔ꠆ꠔꠞ ꠅꠇꠟ ꠌꠥꠞꠝꠣꠞ ꠇꠞꠤꠅ, ꠀꠡꠦꠞꠣ-ꠖꠦꠛꠤꠞ ꠘꠤꠡꠣꠘꠣ ꠈꠥꠐꠤ ꠅꠇꠟ ꠀꠉꠥꠁꠘꠖꠤ ꠎꠣꠟꠣꠁꠟꠤꠅ, ꠔꠣꠞꠣꠞ ꠛꠣꠘꠣꠁꠟ ꠝꠥꠞ꠆ꠔꠤ ꠅꠇꠟ ꠜꠣꠋꠉꠤꠟꠤꠅ, ꠁꠔꠣꠞ ꠘꠣꠝ ꠢꠤ ꠎꠝꠤꠘ ꠕꠣꠇꠤ ꠙꠥꠞꠣꠙꠥꠞ ꠚꠥꠍꠤꠀ ꠚꠣꠟꠣꠁꠅ।
DEU 12:4 “ꠀꠞ ꠔꠣꠞꠣꠞ ꠖꠦꠛ-ꠖꠦꠛꠤꠞ ꠙꠥꠎꠣꠞ ꠘꠝꠥꠘꠣꠄ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠄꠛꠣꠖꠔ-ꠛꠘ꠆ꠖꠦꠉꠤ ꠇꠞꠤꠅ ꠘꠣ।
DEU 12:5 ꠅꠁꠟꠦ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠔꠥꠝꠞꠣꠞꠦ ꠖꠤꠖꠣꠞ-ꠖꠞꠡꠘ ꠖꠤꠛꠣꠞ ꠈꠤꠀꠟꠦ, ꠔꠣꠘ ꠘꠤꠎꠞ ꠛꠣꠄꠔꠥꠟ꠆ꠟꠣ ꠡꠞꠤꠚ ꠢꠤꠡꠣꠛꠦ, ꠔꠥꠝꠞꠣꠞ ꠢꠇꠟ ꠈꠣꠘ꠆ꠖꠣꠘꠞꠦ ꠖꠦꠅꠀ ꠎꠣꠉꠣ ꠕꠣꠇꠤ ꠔꠣꠁꠘ ꠎꠦ ꠎꠣꠉꠣꠞꠦ ꠙꠍꠘ꠆ꠖ ꠇꠞꠛꠣ, ꠔꠥꠝꠞꠣ ꠔꠣꠘ ꠄꠛꠣꠖꠔꠤꠞ ꠟꠣꠉꠤ ꠢꠃ ꠎꠣꠉꠣꠔ ꠀꠎꠤꠞ ꠅꠁꠅ।
DEU 12:6 ꠔꠥꠝꠞꠣ ꠎꠣꠞꠎꠤꠞ ꠎꠣꠟꠣꠁꠟ ꠇꠥꠞꠛꠣꠘꠤ, ꠢꠇꠟ ꠎꠣꠔꠞ ꠙꠡꠥ ꠇꠥꠞꠛꠣꠘꠤ, ꠢꠇꠟ ꠞꠥꠎꠤ-ꠞꠥꠎꠉꠣꠞꠞ ꠖꠡ ꠛꠣꠐꠞ ꠄꠇ ꠛꠣꠐ, ꠟꠤꠟ꠆ꠟꠣ-ꠍꠖꠉꠣ, ꠝꠣꠘ꠆ꠘꠔꠞ ꠇꠥꠞꠛꠣꠘꠤ, ꠖꠣꠘ-ꠈꠄꠞꠣꠔ ꠀꠞ ꠔꠥꠝꠞꠣꠞ ꠙꠡꠥꠞ ꠙꠄꠟꠣ ꠛꠣꠁꠌ꠆ꠌꠣꠞꠦ ꠅꠃ ꠎꠣꠉꠣꠔ ꠀꠘꠤꠅ।
DEU 12:7 ꠅꠈꠣꠘꠅ ꠔꠥꠝꠞꠣꠞ ꠙꠞꠤꠛꠣꠞꠞ ꠢꠇꠟꠞꠦ ꠟꠁꠀ, ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠍꠣꠝꠘꠦ ꠈꠣꠘꠣ-ꠙꠤꠘꠣ ꠇꠞꠤꠅ, ꠀꠞ ꠔꠣꠘ ꠞꠢꠝ-ꠛꠞꠇꠔ ꠙꠣꠅꠀ ꠢꠇꠟ ꠟꠣꠈꠣꠘ ꠇꠣꠝꠣꠁ-ꠞꠥꠎꠉꠣꠞꠞ ꠟꠣꠉꠤ ꠈꠥꠡꠤ-ꠛꠣꠡꠤ ꠇꠞꠤꠅ।
DEU 12:8 “ꠀꠞ ꠅꠈꠘ ꠀꠝꠞꠣ ꠎꠦꠟꠣ ꠎꠦꠝꠘꠦ ꠈꠥꠡꠤ ꠅꠝꠘꠦꠃ ꠌꠟꠞꠣꠝ, ꠢꠘꠅ ꠉꠤꠀ ꠢꠣꠞꠟꠦ ꠔꠥꠝꠞꠣ ꠁꠟꠣ ꠇꠞꠤꠅ ꠘꠣ।
DEU 12:9 ꠔꠥꠝꠞꠣ ꠡꠥꠈ-ꠡꠣꠘ꠆ꠔꠤꠄ ꠛꠡꠔ ꠇꠞꠣꠞ ꠟꠣꠉꠤ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠎꠦ ꠎꠣꠉꠣꠞ ꠖꠈꠟꠖꠣꠞꠤ ꠖꠤꠞꠣ, ꠔꠥꠝꠞꠣ ꠔ ꠅꠈꠘꠅ ꠢꠤꠘꠅ ꠉꠦꠍ ꠘꠣ।
DEU 12:10 ꠔꠣ-ꠅ ꠔꠥꠝꠞꠣ ꠎꠦꠛꠟꠣ ꠎꠞ꠆ꠖꠣꠘ ꠉꠣꠋ ꠙꠣꠞ ꠅꠁꠀ, ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠖꠦꠅꠀ ꠖꠦꠡꠅ ꠉꠤꠀ ꠛꠡꠔꠤ ꠇꠞꠛꠣꠄ, ꠢꠃ ꠡꠝꠄ ꠝꠣꠛꠥꠖꠦ ꠔꠥꠝꠞꠣꠞ ꠌꠣꠁꠞꠅ ꠉꠣꠟꠣꠞ ꠖꠥꠡꠝꠘꠞ ꠀꠔ ꠕꠣꠇꠤ ꠡꠣꠘ꠆ꠔꠤ ꠖꠤꠀ ꠢꠣꠞꠟꠦ,
DEU 12:11 ꠔꠣꠁꠘ ꠘꠤꠎꠞ ꠛꠣꠄꠔꠥꠟ꠆ꠟꠣ ꠡꠞꠤꠚ ꠢꠤꠡꠣꠛꠦ ꠎꠦ ꠎꠣꠉꠣꠞꠦ ꠙꠍꠘ꠆ꠖ ꠇꠞꠛꠣ, ꠢꠃ ꠎꠣꠉꠣꠔ ꠔꠥꠝꠞꠣ ꠀꠝꠣꠞ ꠛꠣꠔꠣꠁꠟ ꠢꠇꠟꠔꠣ ꠟꠁꠀ ꠀꠎꠤꠞ ꠅꠁꠅ। ꠔꠥꠝꠞꠣꠞ ꠎꠣꠟꠣꠁꠟ ꠇꠥꠞꠛꠣꠘꠤ, ꠢꠇꠟ ꠎꠣꠔꠞ ꠇꠥꠞꠛꠣꠘꠤꠞ ꠙꠡꠥ, ꠢꠇꠟ ꠞꠥꠎꠤ-ꠞꠥꠎꠉꠣꠞꠞ ꠖꠡ ꠛꠣꠐꠞ ꠄꠇ ꠛꠣꠐ, ꠟꠤꠟ꠆ꠟꠣ-ꠍꠖꠉꠣ, ꠖꠣꠘ-ꠈꠄꠞꠣꠔ ꠀꠞ ꠢꠇꠟ ꠘꠝꠥꠘꠣꠞ ꠝꠣꠘ꠆ꠘꠔꠞ ꠇꠥꠞꠛꠣꠘꠤ ꠟꠁꠀ ꠅꠘꠅ ꠀꠁꠅ।
DEU 12:12 ꠀꠁꠀ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠍꠣꠝꠘꠦ ꠔꠥꠝꠞꠣ ꠘꠤꠎꠦ, ꠔꠥꠝꠞꠣꠞ ꠙꠥꠀ-ꠙꠥꠠꠤꠘ, ꠔꠥꠝꠞꠣꠞ ꠛꠣꠘ꠆ꠖꠤ-ꠉꠥꠟꠣꠝ, ꠔꠥꠝꠞꠣꠞ ꠉꠣꠃ ꠀꠞ ꠐꠣꠃꠘꠞ ꠟꠦꠛꠤ ꠈꠣꠘ꠆ꠖꠣꠘꠞ ꠝꠣꠘꠥꠡ ꠅꠇꠟ, ꠎꠦꠞꠣ ꠔꠥꠝꠞꠣꠞ ꠟꠣꠈꠣꠘ ꠇꠥꠘꠥ ꠎꠣꠉꠣ-ꠎꠝꠤ ꠙꠣꠁꠍꠦ ꠘꠣ, ꠔꠥꠝꠞꠣ ꠢꠇꠟꠦ ꠝꠤꠟꠤꠀ ꠈꠥꠡꠤ-ꠛꠣꠡꠤ ꠇꠞꠤꠅ।
DEU 12:13 ꠀꠞ ꠈꠥꠛ ꠢꠥꠡꠤꠀꠞ ꠞꠁꠅ, ꠔꠥꠝꠞꠣ ꠘꠤꠎꠞ ꠙꠍꠘ꠆ꠖ ꠝꠔ ꠎꠦꠍꠣ ꠎꠣꠉꠣꠔ ꠎꠣꠟꠣꠁꠟ ꠇꠥꠞꠛꠣꠘꠤ ꠖꠤꠅ ꠘꠣ।
DEU 12:14 ꠛꠞꠋ ꠔꠥꠝꠞꠣꠞ ꠈꠣꠘ꠆ꠖꠣꠘ ꠅꠇꠟꠞꠦ ꠖꠦꠅꠀ ꠎꠝꠤꠘ ꠕꠣꠇꠤ ꠔꠣꠁꠘ ꠎꠦ ꠈꠣꠘ꠆ꠖꠣꠘꠞ ꠎꠣꠉꠣ ꠙꠍꠘ꠆ꠖ ꠇꠞꠛꠣ, ꠈꠣꠟꠤ ꠢꠃ ꠎꠣꠉꠣꠔ ꠎꠣꠟꠣꠁꠟ ꠇꠥꠞꠛꠣꠘꠤ ꠀꠖꠣꠄ ꠇꠞꠤꠅ, ꠀꠞ ꠢꠃ ꠎꠣꠉꠣꠞ ꠟꠣꠉꠤ ꠀꠝꠣꠞ ꠛꠣꠔꠣꠁꠟ ꠢꠇꠟ ꠇꠣꠝ-ꠇꠣꠎ ꠇꠞꠤꠅ।
DEU 12:15 “ꠔꠣ-ꠅ ꠔꠥꠝꠞꠣꠞ ꠝꠘꠞ ꠡꠈ ꠅꠁꠟꠦ ꠙꠣꠇ-ꠘꠣꠙꠣꠇ ꠢꠣꠟꠔꠦꠅ ꠢꠇꠟꠦꠃ ꠎꠦꠇꠥꠘꠥ ꠎꠣꠔꠞ ꠎꠋꠟꠤ ꠅꠞꠤꠘꠞ ꠉꠥꠡ꠆ꠔ ꠈꠣꠅꠀ ꠎꠦꠟꠣ ꠎꠣꠁꠎ ꠀꠍꠦ, ꠅꠟꠣ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠞꠢꠝ-ꠛꠞꠇꠔꠦ ꠙꠣꠅꠀ ꠙꠡꠥꠞꠦ ꠎꠛ ꠇꠞꠤꠀ, ꠔꠥꠝꠞꠣꠞ ꠄꠟꠣꠇꠣꠞ ꠉꠣꠃ ꠛꠣ ꠐꠣꠃꠘꠅ ꠈꠣꠁꠔꠣꠄ ꠙꠣꠞꠛꠣꠄ।
DEU 12:16 ꠈꠣꠟꠤ ꠔꠥꠝꠞꠣ ꠇꠥꠘꠥ ꠟꠃ ꠈꠣꠁꠅ ꠘꠣ, ꠟꠃꠞꠦ ꠙꠣꠘꠤꠞ ꠘꠝꠥꠘꠣꠄ ꠝꠣꠐꠤꠔ ꠓꠣꠟꠤ ꠖꠤꠛꠣꠄ।
DEU 12:17 “ꠔꠥꠝꠞꠣꠞ ꠢꠇꠟ ꠎꠣꠔꠞ ꠚꠄ-ꠚꠡꠟꠞ, ꠀꠋꠉꠥꠞꠞ ꠡꠞꠛꠔꠞ ꠀꠞ ꠔꠦꠟꠞ ꠖꠡ ꠛꠣꠐꠞ ꠄꠇ ꠛꠣꠐ, ꠔꠥꠝꠞꠣꠞ ꠉꠞꠥ-ꠍꠣꠉꠟꠞ ꠙꠄꠟꠣ ꠛꠣꠁꠌ꠆ꠌꠣ, ꠔꠥꠝꠞꠣꠞ ꠝꠣꠘ꠆ꠘꠔꠞ ꠢꠇꠟꠔꠣ, ꠔꠥꠝꠞꠣꠞ ꠟꠤꠟ꠆ꠟꠣ-ꠍꠖꠉꠣ, ꠖꠣꠘ-ꠈꠄꠞꠣꠔ, ꠁꠔꠣ ꠇꠥꠘ꠆ꠔꠣꠃ ꠔꠥꠝꠞꠣꠞ ꠛꠡꠔꠤ ꠄꠟꠣꠇꠣꠞ ꠇꠥꠘꠥ ꠉꠣꠃꠔ ꠛꠣ ꠐꠣꠃꠘꠅ ꠈꠣꠁꠅ ꠘꠣ।
DEU 12:18 ꠁꠔꠣ ꠈꠣꠟꠤ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠙꠍꠘ꠆ꠖ ꠇꠞꠣ ꠎꠣꠉꠣꠔ ꠘꠤꠀ ꠔꠣꠘ ꠍꠣꠝꠘꠦ ꠈꠣꠁꠅ। ꠔꠥꠝꠞꠣ ꠘꠤꠎꠦ, ꠔꠥꠝꠞꠣꠞ ꠙꠥꠀ-ꠙꠥꠠꠤꠘ, ꠔꠥꠝꠞꠣꠞ ꠉꠥꠟꠣꠝ-ꠛꠣꠘ꠆ꠖꠤ, ꠀꠞ ꠔꠥꠝꠞꠣꠞ ꠉꠣꠃ ꠛꠣ ꠐꠣꠃꠘꠞ ꠟꠦꠛꠤ ꠈꠣꠘ꠆ꠖꠣꠘꠞ ꠝꠣꠘꠡꠦ ꠈꠣꠁꠛꠣ। ꠔꠥꠝꠞꠣꠞ ꠢꠇꠟ ꠘꠝꠥꠘꠣꠞ ꠇꠣꠝ-ꠇꠣꠎꠞ ꠝꠣꠎꠦ ꠘꠤꠎꠞ ꠝꠣꠛꠥꠖ ꠀꠟ꠆ꠟꠣꠞ ꠍꠣꠝꠘꠦ ꠈꠥꠡꠤ-ꠛꠣꠡꠤ ꠇꠞꠤꠅ।
DEU 12:19 ꠔꠣ-ꠅ ꠔꠥꠝꠞꠣꠞ ꠖꠦꠡꠅ ꠎꠔꠖꠤꠘ ꠛꠡꠔ ꠇꠞꠛꠣꠄ, ꠅꠔꠖꠤꠘ ꠟꠦꠛꠤ ꠈꠣꠘ꠆ꠖꠣꠘꠞ ꠝꠣꠘꠡꠞ ꠃꠙꠞꠦ ꠈꠤꠀꠟ-ꠘꠎꠞ ꠞꠣꠈꠤꠅ।
DEU 12:20 “ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠔꠣꠘ ꠅꠀꠖꠣ ꠝꠣꠚꠤꠇ ꠔꠥꠝꠞꠣꠞ ꠖꠦꠡꠞ ꠡꠤꠝꠣꠘꠣ ꠛꠣꠠꠣꠁꠀ ꠢꠣꠞꠟꠦ, ꠔꠥꠝꠞꠣ ꠎꠦꠛꠟꠣ ꠉꠥꠡ꠆ꠔ ꠈꠣꠁꠛꠣꠞ ꠘꠤꠅꠔꠦ ꠇꠁꠛꠣꠄ, ꠉꠥꠡ꠆ꠔ ꠈꠣꠁꠔꠣꠝ ꠝꠘꠦ ꠌꠣꠞ, ꠢꠃ ꠡꠝꠄ ꠔꠥꠝꠞꠣꠞ ꠝꠘꠞ ꠡꠈ ꠝꠤꠐꠣꠁꠀ ꠉꠥꠡ꠆ꠔ ꠈꠣꠁꠅ।
DEU 12:21 ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠛꠣꠄꠔꠥꠟ꠆ꠟꠣ ꠡꠞꠤꠚ ꠢꠤꠡꠣꠛꠦ ꠎꠦ ꠎꠣꠉꠣ ꠙꠍꠘ꠆ꠖ ꠇꠞꠛꠣ, ꠢꠤ ꠎꠣꠉꠣ ꠎꠥꠖꠤ ꠔꠥꠝꠞꠣꠞ ꠛꠡꠔ ꠈꠣꠘꠣ ꠕꠣꠇꠤ ꠛꠣꠇ꠆ꠇꠣ ꠖꠥꠞꠁ ꠅꠄ, ꠔꠦ ꠔꠥꠝꠞꠣ ꠀꠝꠣꠞ ꠛꠣꠔꠣꠁꠟ ꠢꠥꠇꠥꠝ ꠝꠣꠚꠤꠇ ꠔꠥꠝꠞꠣꠞ ꠝꠣꠛꠥꠖꠞ ꠖꠦꠅꠀ ꠉꠞꠥ-ꠍꠣꠉꠟꠞ ꠙꠣꠟ ꠕꠣꠇꠤ ꠙꠡꠥ ꠘꠤꠀ ꠎꠛ ꠇꠞꠤꠅ, ꠀꠞ ꠎꠣꠞꠎꠤꠞ ꠉꠣꠃ ꠛꠣ ꠐꠣꠃꠘꠅ ꠘꠤꠎꠞ ꠈꠥꠡꠤꠄ ꠉꠥꠡ꠆ꠔ ꠈꠣꠁꠅ।
DEU 12:22 ꠡꠤꠇꠣꠞꠞ ꠎꠋꠟꠤ ꠅꠞꠤꠘꠞ ꠉꠥꠡ꠆ꠔꠞ ꠟꠣꠈꠣꠘ ꠔꠥꠝꠞꠣ ꠁꠔꠣ ꠈꠣꠁꠅ, ꠙꠣꠇ-ꠘꠣꠙꠣꠇ ꠢꠣꠟꠔꠦ ꠢꠇꠟꠦꠃ ꠈꠣꠁꠅ।
DEU 12:23 ꠅꠁꠟꠦ ꠢꠥꠡꠤꠀꠞ ꠞꠁꠅ, ꠟꠃ ꠈꠣꠁꠅ ꠘꠣ, ꠟꠃ ꠅꠁꠟꠉꠤ ꠎꠣꠘ, ꠔꠥꠝꠞꠣ ꠉꠥꠡ꠆ꠔꠞ ꠟꠉꠦ ꠎꠣꠘ ꠈꠣꠁꠅ ꠘꠣ।
DEU 12:24 ꠔꠥꠝꠞꠣ ꠇꠥꠘꠥꠝꠘ꠆ꠔꠦꠃ ꠟꠃ ꠈꠣꠁꠅ ꠘꠣ, ꠁꠔꠣꠞꠦ ꠙꠣꠘꠤꠞ ꠘꠝꠥꠘꠣꠄ ꠝꠣꠐꠤꠔ ꠓꠣꠟꠤ ꠖꠤꠅ।
DEU 12:25 ꠔꠥꠝꠞꠣ ꠟꠃ ꠈꠣꠁꠅ ꠘꠣ, ꠝꠣꠛꠥꠖꠞ ꠘꠎꠞꠅ ꠎꠦꠇꠐꠣ ꠡꠑꠤꠇ, ꠅꠇꠐꠣ ꠀꠝꠟ ꠇꠞꠟꠦ ꠔꠥꠝꠞꠣ ꠀꠞ ꠔꠥꠝꠞꠣꠞ ꠜꠛꠤꠡꠔ ꠀꠅꠟꠣꠖ ꠅꠇꠟꠞ ꠜꠣꠟꠣꠁ ꠅꠁꠛ।
DEU 12:26 “ꠝꠣꠛꠥꠖꠞ ꠙꠍꠘ꠆ꠖ ꠇꠞꠣ ꠎꠣꠉꠣꠔ ꠔꠥꠝꠞꠣꠞ ꠙꠣꠇ-ꠙꠛꠤꠔ꠆ꠞ ꠎꠤꠘꠤꠡ ꠀꠞ ꠝꠣꠘ꠆ꠘꠔꠞ ꠎꠤꠘꠤꠡ ꠟꠁꠀ ꠎꠣꠁꠅ।
DEU 12:27 ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠇꠥꠞꠛꠣꠘꠤ ꠈꠣꠘꠣꠞ ꠃꠙꠞꠦ ꠔꠥꠝꠞꠣꠞ ꠎꠣꠟꠣꠁꠟ ꠇꠥꠞꠛꠣꠘꠤꠞ ꠉꠥꠡ꠆ꠔ ꠀꠞ ꠟꠃ ꠎꠣꠟꠣꠁꠅ। ꠅꠁꠟꠦ ꠔꠥꠝꠞꠣꠞ ꠅꠁꠘ꠆ꠘ ꠢꠇꠟ ꠇꠥꠞꠛꠣꠘꠤꠞ ꠟꠃ ꠇꠥꠞꠛꠣꠘꠤ ꠈꠣꠘꠣꠞ ꠝꠣꠎꠦ ꠓꠣꠟꠤꠅ ꠀꠞ ꠁ ꠇꠥꠞꠛꠣꠘꠤꠞ ꠉꠥꠡ꠆ꠔ ꠔꠥꠝꠞꠣ ꠈꠣꠁꠅ।
DEU 12:28 ꠔꠥꠝꠞꠣ ꠀꠞ ꠔꠥꠝꠞꠣꠞ ꠜꠛꠤꠡꠔ ꠀꠅꠟꠣꠖ ꠅꠇꠟꠞ ꠎꠣꠔꠦ ꠢꠞ-ꠢꠣꠝꠦꠡꠣ ꠀꠄ-ꠃꠘ꠆ꠘꠔꠤ ꠅꠄ, ꠅꠔꠣꠞ ꠟꠣꠉꠤ ꠔꠥꠝꠞꠣ ꠀꠝꠣꠞ ꠛꠣꠔꠣꠁꠟ ꠅꠃ ꠢꠥꠇꠥꠝ ꠈꠣꠘꠣꠁꠘ ꠎꠔꠘ ꠇꠞꠤ ꠝꠣꠘꠤꠅ, ꠁꠟꠣ ꠌꠟꠟꠦ ꠔꠥꠝꠞꠣ ꠀꠟ꠆ꠟꠣ ꠝꠣꠛꠥꠖꠞ ꠘꠎꠞꠅ ꠎꠦꠔꠣ ꠡꠑꠤꠇ ꠀꠞ ꠜꠣꠟꠣ, ꠅꠐꠣꠃ ꠔꠥꠝꠞꠣ ꠇꠞꠛꠣꠄ।
DEU 12:29 “ꠔꠥꠝꠞꠣ ꠎꠔ ꠎꠣꠔꠤꠞꠦ ꠛꠦ-ꠖꠈꠟ ꠇꠞꠛꠣꠄ, ꠔꠣꠞꠣꠞꠦ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠔꠥꠝꠞꠣꠞ ꠍꠣꠝꠘ ꠕꠣꠇꠤ ꠈꠦꠖꠣꠁꠀ ꠢꠣꠞꠟꠦ, ꠔꠥꠝꠞꠣ ꠎꠦꠛꠟꠣ ꠢꠃ ꠖꠦꠡꠞ ꠖꠈꠟꠖꠣꠞꠤ ꠙꠣꠁꠀ ꠢꠘꠅ ꠛꠡꠔ ꠇꠞꠛꠣꠄ,
DEU 12:30 ꠢꠃ ꠡꠝꠄ ꠔꠥꠝꠞꠣ ꠢꠥꠡꠤꠀꠞ ꠞꠁꠅ, ꠀꠞꠘꠣꠄ ꠔꠥꠝꠞꠣꠅ ꠔꠣꠞꠣꠞ ꠚꠣꠘ꠆ꠖꠅ ꠙꠠꠤꠀ ꠔꠣꠞꠣꠞ ꠖꠦꠛꠔꠣꠞ ꠜꠎꠘꠣ ꠇꠞꠤꠀ ꠎꠥꠖꠤ ꠇꠅ, ꠅꠔꠣ ꠝꠣꠘꠡꠦ ꠎꠦꠟꠣ ꠔꠣꠞꠣꠞ ꠖꠦꠛ-ꠖꠦꠛꠤꠞ ꠙꠥꠎꠣ ꠇꠞꠂꠘ, ꠀꠝꠞꠣꠅ ꠅꠟꠣ ꠔꠣꠞꠣꠞ ꠟꠣꠈꠣꠘ ꠙꠥꠎꠣ ꠇꠞꠔꠣꠝ।
DEU 12:31 ꠈꠛꠞꠖꠣꠞ! ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠄꠛꠣꠖꠔ-ꠛꠘ꠆ꠖꠦꠉꠤ ꠔꠣꠞꠣꠞ ꠙꠥꠎꠣꠞ ꠘꠝꠥꠘꠣꠄ ꠇꠞꠤꠅ ꠘꠣ। ꠔꠣꠞꠣ ꠔ ꠎꠣꠞꠎꠤꠞ ꠖꠦꠛ-ꠖꠦꠛꠤꠞ ꠘꠣꠝꠦ ꠝꠣꠛꠥꠖꠞ ꠘꠣꠙꠍꠘ꠆ꠖꠞ ꠢꠇꠟ ꠘꠝꠥꠘꠣꠞ ꠀꠇꠣꠝ-ꠇꠥꠇꠣꠝ ꠇꠞꠦ, ꠄꠝꠘꠇꠤ ꠔꠣꠞꠣꠞ ꠖꠦꠛ-ꠖꠦꠛꠤꠞ ꠘꠣꠝꠦ ꠘꠤꠎꠞ ꠙꠥꠀ-ꠙꠥꠠꠤꠘꠞꠦ ꠀꠉꠥꠘꠤꠔ ꠎꠣꠟꠣꠁꠀ ꠛꠟꠤ ꠖꠤꠟꠣꠄ।
DEU 12:32 “ꠔꠦ ꠀꠝꠤ ꠔꠥꠝꠞꠣꠞꠦ ꠎꠦꠔꠣ ꠢꠥꠇꠥꠝ-ꠀꠢꠇꠣꠝ ꠎꠣꠘꠣꠁꠟꠣꠝ, ꠔꠥꠝꠞꠣ ꠈꠣꠟꠤ ꠅꠔꠣꠃ ꠝꠣꠘꠤꠅ। ꠁꠔꠣꠞ ꠟꠉꠦ ꠖꠥꠍꠞꠣ ꠇꠥꠘ꠆ꠔꠣ ꠛꠣꠠꠣꠁꠅ ꠘꠣ, ꠀꠞ ꠇꠥꠘ꠆ꠔꠣ ꠛꠣꠖꠅ ꠖꠤꠅ ꠘꠣ।
DEU 13:1 “ꠅꠈꠘ ꠔꠥꠝꠞꠣꠞ ꠝꠣꠎꠞ ꠇꠥꠘꠥ ꠙꠤꠞ-ꠖꠞꠛꠦꠡꠦ ꠛꠣ ꠁꠡ꠆ꠔꠦꠈꠣꠞꠣ ꠇꠞꠞꠣꠄ ꠇꠥꠘ꠆ꠔꠣ ꠊꠐꠤꠛ ꠇꠁꠀ ꠎꠥꠖꠤ ꠀꠉꠣꠝ ꠈꠛꠞ ꠎꠣꠘꠣꠄ, ꠀꠞ ꠇꠥꠘꠥ ꠇꠦꠞꠣꠝꠔꠤꠞ ꠇꠕꠣ ꠇꠄ,
DEU 13:2 ꠇꠅꠀꠞ ꠛꠣꠖꠦ ꠢꠣꠍꠣꠃ ꠎꠥꠖꠤ ꠅꠟꠣ ꠚꠟꠤ ꠎꠣꠄ, ꠀꠞ ꠅꠃ ꠎꠘꠦꠃ ꠇꠥꠘꠥ ꠖꠦꠛ-ꠖꠦꠛꠤꠞ ꠇꠕꠣ ꠢꠥꠘꠣꠁꠀ ꠔꠥꠝꠞꠣꠞꠦ ꠇꠄ, ꠌꠟꠅ, ꠀꠝꠞꠣ ꠉꠤꠀ ꠢꠃ ꠖꠦꠛꠔꠣꠞ ꠙꠥꠎꠣ ꠇꠞꠤ,
DEU 13:3 ꠔꠦ ꠔꠥꠝꠞꠣ ꠅꠃ ꠙꠤꠞ-ꠖꠞꠛꠦꠡ ꠛꠣ ꠁꠡ꠆ꠔꠦꠈꠣꠞꠣ ꠇꠞꠞꠣꠞ ꠇꠕꠣ ꠝꠣꠘꠤꠅ ꠘꠣ। ꠝꠘꠅ ꠞꠣꠈꠤꠅ, ꠔꠥꠝꠞꠣ ꠎꠣꠘꠦ-ꠙꠞꠣꠘꠦ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞꠦ ꠝꠢꠛ꠆ꠛꠔ ꠇꠞꠞꠣꠄ ꠇꠤ ꠘꠣ, ꠅꠃꠈꠣꠘ ꠎꠣꠌꠣꠁ ꠇꠞꠣꠞ ꠟꠣꠉꠤ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠔꠥꠝꠞꠣꠞꠦ ꠙꠞꠤꠇ꠆ꠇꠣ ꠇꠞꠂꠘ।
DEU 13:4 ꠔꠥꠝꠞꠣ ꠘꠤꠎꠞ ꠝꠣꠛꠥꠖ ꠀꠟ꠆ꠟꠣꠞ ꠢꠥꠇꠥꠝ ꠝꠣꠚꠤꠇ ꠌꠟꠤꠅ, ꠈꠣꠟꠤ ꠔꠣꠘꠞꠦꠃ ꠒꠞꠣꠁꠅ, ꠔꠣꠘ ꠢꠥꠇꠥꠝ-ꠀꠢꠇꠣꠝ ꠝꠣꠘꠤꠅ, ꠔꠣꠘ ꠇꠣꠟꠣꠝ ꠢꠥꠘꠤꠀ ꠀꠝꠟ ꠇꠞꠤꠅ, ꠔꠣꠘ ꠄꠛꠣꠖꠔ-ꠛꠘ꠆ꠖꠦꠉꠤ ꠇꠞꠤꠅ, ꠀꠞ ꠔꠣꠘ ꠀꠡꠤꠇ ꠛꠘꠤꠀ ꠞꠁꠅ।
DEU 13:5 ꠄꠞꠟꠣꠉꠤ ꠢꠃ ꠜꠘ꠆ꠒ ꠙꠤꠞ-ꠖꠞꠛꠦꠡ ꠛꠣ ꠁꠡ꠆ꠔꠦꠈꠣꠞꠣ ꠇꠞꠞꠣꠞꠦ ꠎꠣꠘꠦ ꠝꠣꠞꠤꠟꠣꠁꠅ। ꠝꠘꠅ ꠞꠣꠈꠤꠅ, ꠔꠥꠝꠞꠣꠞ ꠎꠦ ꠀꠟ꠆ꠟꠣ ꠝꠣꠛꠥꠖꠦ ꠔꠥꠝꠞꠣꠞꠦ ꠝꠤꠡꠞ ꠖꠦꠡ ꠕꠣꠇꠤ ꠛꠣꠞ ꠇꠞꠤꠀ ꠀꠘꠍꠂꠘ, ꠉꠥꠟꠣꠝꠤ ꠕꠣꠇꠤ ꠔꠥꠝꠞꠣꠞꠦ ꠀꠎꠣꠖ ꠇꠞꠍꠂꠘ, ꠅꠃ ꠜꠘ꠆ꠒꠄ ꠔ ꠔꠥꠝꠞꠣꠞꠦ ꠢꠃ ꠝꠣꠛꠥꠖꠞ ꠛꠤꠞꠥꠖ꠆ꠖꠦ ꠘꠣꠚꠞꠝꠣꠘꠤꠞ ꠟꠣꠉꠤ ꠐꠣꠘꠦꠞ, ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠛꠣꠔꠣꠁꠟ ꠙꠕ ꠕꠣꠇꠤ ꠛꠦ-ꠙꠕꠤ ꠛꠣꠘꠣꠁꠔ ꠌꠣꠞ। ꠄꠞꠟꠣꠉꠤ ꠔꠥꠝꠞꠣꠞ ꠝꠣꠎ ꠕꠣꠇꠤ ꠅꠃ ꠈꠣꠞꠣꠙꠤꠞꠦ ꠛꠤꠘꠣꠡ ꠇꠞꠤꠟꠣꠁꠛꠣꠄ।
DEU 13:6 “ꠅꠈꠘ ꠔꠥꠝꠞꠣꠞ ꠀꠙꠘ ꠜꠣꠁ, ꠔꠥꠝꠞꠣꠞ ꠘꠤꠎꠞ ꠙꠥꠀ ꠛꠣ ꠙꠥꠠꠤ, ꠔꠥꠝꠞꠣꠞ ꠎꠣꠘꠞ ꠐꠥꠇꠞꠣ ꠛꠃ, ꠛꠣ ꠔꠥꠝꠞꠣꠞ ꠝꠣꠄꠀꠞ ꠛꠘ꠆ꠖꠥ ꠀꠁꠀ ꠎꠥꠖꠤ ꠘꠤꠞꠣꠟꠣꠄ ꠇꠄ, ‘ꠌꠟꠅ, ꠀꠝꠞꠣ ꠉꠤꠀ ꠖꠦꠛ-ꠖꠦꠛꠤꠞ ꠜꠎꠘꠣ ꠇꠞꠤ।’ ꠁꠔꠣ ꠖꠦꠛꠔꠣꠁꠘ ꠔꠥꠝꠣꠞ ꠛꠣ ꠔꠥꠝꠣꠞ ꠛꠣꠚ-ꠖꠣꠖꠣꠞ ꠅꠌꠤꠘꠣ,
DEU 13:7 ꠔꠥꠝꠣꠞ ꠀꠡ-ꠙꠣꠡ ꠄꠟꠣꠇꠣꠞ ꠛꠣ ꠖꠥꠞꠁꠞ ꠖꠦꠡꠞ ꠇꠥꠘꠥ ꠖꠦꠛꠔꠣ ꠅꠃꠇ, ꠖꠥꠘꠤꠀꠞ ꠄꠇ ꠡꠤꠝꠣꠘꠣ ꠕꠣꠇꠤ ꠀꠞꠦꠇ ꠡꠤꠝꠣꠘꠣꠞ ꠎꠦꠇꠥꠘꠥ ꠎꠣꠔꠤꠞ ꠎꠦꠇꠥꠘꠥ ꠖꠦꠛꠔꠣ ꠅꠃꠇ,
DEU 13:8 ꠢꠦ ꠎꠥꠖꠤ ꠔꠥꠝꠣꠞꠦ ꠢꠘꠅ ꠘꠤꠔ ꠌꠣꠄ, ꠔꠦ ꠔꠥꠝꠤ ꠎꠣꠁꠅ ꠘꠣ, ꠔꠣꠞ ꠇꠕꠣ ꠢꠥꠘꠤꠅ ꠘꠣ, ꠔꠣꠞꠦ ꠖꠄꠀ ꠖꠦꠈꠣꠁꠅ ꠘꠣ, ꠔꠣꠞ ꠎꠣꠘ ꠛꠣꠌꠣꠁꠅ ꠘꠣ, ꠀꠞ ꠟꠥꠇꠣꠘꠤꠞ ꠎꠣꠉꠣ ꠖꠤꠅ ꠘꠣ।
DEU 13:9 ꠔꠣꠞꠦ ꠘꠤꠌ꠆ꠌꠤꠔ ꠎꠣꠘꠦ ꠝꠣꠞꠤꠟꠣꠁꠅ। ꠎꠣꠘꠦ ꠝꠣꠞꠤꠟꠣꠅꠀꠞ ꠟꠣꠉꠤ ꠙꠄꠟꠣ ꠔꠥꠝꠣꠞ ꠘꠤꠎꠞ ꠀꠔꠖꠤ ꠡꠥꠞꠥ ꠇꠞꠅ, ꠛꠣꠖꠦ ꠢꠇꠟꠦ ꠀꠁꠀ ꠡꠞꠤꠇ ꠅꠁꠛꠣ।
DEU 13:10 ꠅꠉꠥꠞꠦ ꠙꠣꠔ꠆ꠔꠞꠖꠤ ꠁꠐꠣꠁꠀ ꠎꠣꠘꠦ ꠝꠣꠞꠤꠟꠤꠅ, ꠢꠦ ꠔ ꠔꠥꠝꠣꠞꠦ ꠢꠃ ꠀꠟ꠆ꠟꠣ ꠝꠣꠛꠥꠖꠞ ꠄꠛꠣꠖꠔꠤ ꠕꠣꠇꠤ ꠢꠞꠣꠁꠀ ꠇꠥ-ꠙꠕꠦ ꠘꠤꠔ ꠌꠣꠞ, ꠎꠦꠁꠘ ꠔꠥꠝꠣꠞꠦ ꠝꠤꠡꠞ ꠖꠦꠡꠞ ꠉꠥꠟꠣꠝꠤ ꠕꠣꠇꠤ ꠀꠎꠣꠖ ꠇꠞꠤꠀ ꠀꠘꠍꠂꠘ।
DEU 13:11 ꠅꠉꠥꠞꠦ ꠝꠣꠞꠤꠟꠣꠅꠀꠞ ꠈꠛꠞ ꠢꠥꠘꠤꠀ ꠢꠇꠟ ꠛꠘꠤ ꠁꠍꠞꠣꠁꠟꠦ ꠒꠞꠣꠁꠛꠣ, ꠄꠞꠛꠣꠖꠦ ꠁꠟꠣ ꠘꠣꠚꠞꠝꠣꠘꠤ ꠇꠞꠣꠞ ꠡꠣꠅꠡ ꠀꠞ ꠇꠦꠃꠞꠞ ꠅꠁꠔ ꠘꠣꠄ।
DEU 13:12 “ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠔꠥꠝꠞꠣꠞ ꠛꠡꠔ ꠈꠣꠘꠣꠞ ꠟꠣꠉꠤ ꠎꠦ ꠉꠣꠃ ꠀꠞ ꠐꠣꠃꠘ ꠅꠇꠟ ꠖꠣꠘ ꠇꠞꠞꠣ, ꠁꠔꠣ ꠇꠥꠘꠥ ꠎꠣꠉꠣꠞ ꠛꠦꠙꠣꠞꠦ ꠔꠥꠝꠞꠣ ꠎꠥꠖꠤ ꠢꠥꠘꠅ,
DEU 13:13 ꠢꠘꠞ ꠛꠘꠤ ꠁꠍꠞꠣꠁꠟꠞ ꠝꠣꠎꠞ ꠇꠥꠘꠥ ꠘꠣꠚꠞꠝꠣꠘꠞ ꠖꠟ ꠛꠣꠞ ꠅꠁꠀ, ꠢꠃ ꠎꠣꠉꠣꠞ ꠝꠣꠘꠡꠞꠦ ꠛꠦ-ꠙꠕꠦ ꠘꠤꠛꠣꠞ ꠟꠣꠉꠤ ꠇꠞ, ꠌꠟꠅ, ꠀꠝꠞꠣ ꠉꠤꠀ ꠘꠄꠀ ꠘꠄꠀ ꠖꠦꠛ-ꠖꠦꠛꠤꠞ ꠙꠥꠎꠣ ꠇꠞꠤ।
DEU 13:14 ꠔꠦ ꠔꠥꠝꠞꠣ ꠈꠥꠛ ꠜꠣꠟꠣꠝꠘ꠆ꠔꠦ ꠈꠥꠎ-ꠈꠛꠞ ꠟꠁꠅ ꠀꠞ ꠔꠖꠘ꠆ꠔ ꠇꠞꠤꠅ। ꠔꠖꠘ꠆ꠔ ꠇꠞꠤꠀ ꠎꠥꠖꠤ ꠁꠔꠣ ꠎꠊꠁꠘ꠆ꠘ ꠇꠣꠝꠞ ꠙꠞꠝꠣꠘ ꠝꠤꠟꠦ,
DEU 13:15 ꠔꠦ ꠢꠘꠞ ꠢꠇꠟ ꠛꠣꠡꠤꠘ꠆ꠖꠣꠞꠦ ꠎꠣꠘꠦ ꠝꠣꠞꠤꠟꠤꠅ। ꠢꠃ ꠉꠣꠃ ꠛꠣ ꠐꠣꠃꠘꠞ ꠢꠇꠟ ꠝꠣꠘꠥꠡ ꠀꠞ ꠙꠡꠥ-ꠙꠋꠇꠤꠞꠦ ꠔꠟꠥꠀꠞꠖꠤ ꠇꠣꠐꠤꠟꠤꠅ।
DEU 13:16 ꠢꠤꠘ ꠕꠣꠇꠤ ꠀꠘꠣ ꠢꠇꠟ ꠝꠣꠟ-ꠍꠣꠝꠣꠘꠣ ꠐꠣꠃꠘꠞ ꠝꠄꠖꠣꠘꠅ ꠘꠤꠀ ꠎꠣꠟꠣꠁꠟꠤꠅ। ꠢꠃ ꠀꠡ꠆ꠔꠣ ꠉꠣꠃꠞꠦ ꠛꠣ ꠐꠣꠃꠘꠞꠦꠅ ꠎꠣꠟꠣꠁꠟ ꠇꠥꠞꠛꠣꠘꠤꠞ ꠟꠣꠈꠣꠘ ꠎꠣꠟꠣꠁꠀ ꠍꠣꠟꠤ ꠇꠞꠤꠅ। ꠢꠃ ꠎꠣꠉꠣꠞꠦ ꠌꠤꠞꠇꠣꠟꠞ ꠟꠣꠉꠤ ꠛꠤꠘꠣꠡ ꠇꠞꠤꠅ, ꠇꠦꠃ ꠎꠣꠘꠥ ꠇꠥꠘꠥꠖꠤꠘ ꠢꠤꠘꠅ ꠇꠥꠘ꠆ꠔꠣ ꠛꠣꠘꠣꠁꠔ ꠘꠣ ꠙꠣꠞꠦ।
DEU 13:17 ꠝꠣꠛꠥꠖꠞ ꠛꠦꠎꠥꠁꠔꠣ ꠉꠥꠍꠣ ꠕꠣꠇꠤ ꠞꠦꠢꠣꠁ ꠙꠣꠅꠀꠞ ꠟꠣꠉꠤ, ꠢꠘꠞ ꠇꠥꠘꠥ ꠝꠣꠟ-ꠍꠣꠝꠣꠘꠣ ꠎꠣꠘꠥ ꠔꠥꠝꠞꠣꠞ ꠉꠦꠍꠦ ꠘꠣ ꠞꠄ, ꠁꠔꠣ ꠔ ꠟꠣꠘ꠆ꠘꠔꠤ ꠝꠣꠟ। ꠔꠦꠃ ꠝꠣꠛꠥꠖꠦ ꠔꠥꠝꠞꠣꠞꠦ ꠞꠢꠝ-ꠛꠞꠇꠔ ꠀꠞ ꠖꠄꠀ-ꠝꠣꠄꠀ ꠇꠞꠛꠣ, ꠔꠥꠝꠞꠣꠞ ꠛꠣꠚ-ꠖꠣꠖꠣꠞ ꠟꠉꠞ ꠅꠀꠖꠣ ꠝꠣꠚꠤꠇ ꠔꠣꠁꠘ ꠔꠥꠝꠞꠣꠞ ꠀꠅꠟꠣꠖ-ꠅꠀꠞꠤꠡ ꠛꠣꠠꠣꠁꠛꠣ।
DEU 13:18 ꠈꠣꠟꠤ ꠀꠁꠎ ꠀꠝꠤ ꠔꠥꠝꠞꠣꠞꠦ ꠎꠦꠔꠣ ꠢꠥꠇꠥꠝ-ꠀꠢꠇꠣꠝ ꠎꠣꠘꠣꠁꠀꠞ, ꠅꠔꠣ ꠢꠇꠟꠔꠣ ꠝꠣꠘꠤꠅ, ꠀꠟ꠆ꠟꠣ ꠝꠣꠛꠥꠖꠞ ꠈꠥꠡꠤ ꠝꠣꠚꠤꠇ ꠌꠟꠤꠀ ꠔꠥꠝꠞꠣꠞ ꠎꠤꠘ꠆ꠖꠦꠉꠤ ꠇꠣꠐꠣꠁꠅ।
DEU 14:1 “ꠔꠥꠝꠞꠣ ꠔ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠈꠣꠍ ꠙ꠆ꠞꠎꠣ। ꠄꠞꠟꠣꠉꠤ ꠔꠥꠝꠞꠣ ꠇꠥꠘꠥ ꠝꠥꠞ꠆ꠖꠣꠞ ꠟꠣꠉꠤ ꠇꠣꠘ꠆ꠖꠣ-ꠇꠣꠐꠤ ꠛꠣ ꠀꠢꠣꠎꠣꠞꠤ ꠇꠞꠣꠔ ꠉꠤꠀ, ꠘꠤꠎꠞ ꠡꠞꠤꠟꠞꠦ ꠇꠣꠐꠣ-ꠌꠤꠞꠣ ꠇꠞꠤꠅ ꠘꠣ, ꠀꠞ ꠝꠣꠕꠣꠞ ꠍꠣꠝꠘꠞ ꠉꠣꠟꠣꠞ ꠌꠥꠟ ꠇꠣꠝꠣꠁꠅ ꠘꠣ।
DEU 14:2 ꠝꠘꠅ ꠞꠣꠈꠤꠅ, ꠔꠥꠝꠞꠣ ꠅꠁꠟꠣꠄ ꠘꠤꠎꠞ ꠝꠣꠛꠥꠖ ꠀꠟ꠆ꠟꠣꠞ ꠈꠣꠍ ꠙꠛꠤꠔ꠆ꠞ ꠎꠣꠔꠤ। ꠖꠥꠘꠤꠀꠞ ꠢꠇꠟ ꠎꠣꠔꠤꠞ ꠝꠣꠎ ꠕꠣꠇꠤ, ꠝꠣꠛꠥꠖꠦ ꠔꠣꠘ ꠈꠣꠍ ꠙ꠆ꠞꠎꠣ ꠀꠞ ꠔꠣꠘ ꠘꠤꠎꠞ ꠡꠝ꠆ꠙꠖ ꠢꠤꠡꠣꠛꠦ ꠔꠥꠝꠞꠣꠞꠦ ꠀꠟꠉ ꠇꠞꠍꠂꠘ।
DEU 14:3 “ꠔꠦ ꠇꠥꠘꠥꠎꠣꠔ ꠘꠚꠞꠔꠤ ꠈꠣꠘꠤ ꠔꠥꠝꠞꠣ ꠈꠣꠁꠅ ꠘꠣ।
DEU 14:4 ꠅꠃ ꠟꠣꠈꠣꠘ ꠙꠡꠥꠞ ꠉꠥꠡ꠆ꠔ ꠈꠣꠁꠔꠣꠄ ꠙꠣꠞꠛꠣꠄ: ꠉꠞꠥ, ꠝꠦꠠꠣ, ꠍꠣꠉꠟ, ꠁꠔꠣ ꠔ ꠢꠣꠟꠣꠟ।
DEU 14:5 ꠀꠞ ꠅꠞꠤꠘ, ꠝꠣꠄꠀ-ꠅꠞꠤꠘ, ꠌꠤꠔꠞꠣ-ꠅꠞꠤꠘ, ꠎꠋꠟꠤ ꠍꠣꠉꠟ, ꠟꠣꠝ꠆ꠛꠣ ꠢꠤꠋꠉꠤ ꠞꠣꠝ-ꠍꠣꠉꠟ, ꠙꠤꠍꠘꠦ ꠗꠟꠣ ꠅꠞꠤꠘ ꠀꠞ ꠙꠣꠠꠤꠀ ꠝꠦꠠꠣ ꠈꠣꠁꠅ।
DEU 14:6 ꠎꠦꠔꠣ ꠙꠡꠥꠞ ꠈꠥꠞꠣ ꠙꠥꠞꠣꠙꠥꠞ ꠖꠥꠁ ꠅꠋꠡ ꠟꠣꠈꠣꠘ ꠌꠤꠞꠣ, ꠀꠞ ꠎꠦꠔꠣ ꠙꠡꠥꠁꠘ꠆ꠔꠦ ꠈꠣꠘꠤꠞꠦ ꠙꠣꠎꠣꠁꠘ, ꠁꠔꠣꠞ ꠉꠥꠡ꠆ꠔ ꠎꠣꠁꠎ।
DEU 14:7 ꠅꠁꠟꠦ ꠎꠦꠔꠣ ꠙꠡꠥꠞ ꠈꠣꠟꠤ ꠈꠥꠞꠣ ꠌꠤꠞꠣ ꠅꠁꠟꠦ ꠙꠣꠎꠣꠁꠘ ꠘꠣ, ꠛꠣ ꠎꠦꠔꠣ ꠙꠡꠥꠁꠘ꠆ꠔꠦ ꠈꠣꠟꠤ ꠈꠣꠘꠤꠞꠦ ꠙꠣꠎꠣꠁꠘ ꠅꠁꠟꠦ ꠈꠥꠞꠣ ꠌꠤꠞꠣ ꠘꠣꠁ, ꠅꠔꠣ ꠙꠡꠥꠞ ꠉꠥꠡ꠆ꠔ ꠔꠥꠝꠞꠣ ꠈꠣꠁꠅ ꠘꠣ। ꠔꠦ ꠔꠥꠝꠞꠣ ꠃꠐ, ꠈꠞꠉꠥꠡ ꠛꠣ ꠡꠣꠚꠘ-ꠃꠘ꠆ꠖꠥꠞꠞ ꠉꠥꠡ꠆ꠔ ꠈꠣꠁꠅ ꠘꠣ, ꠁꠔꠣꠄ ꠈꠣꠘꠤꠞꠦ ꠙꠣꠎꠣꠁꠘ ꠅꠁꠟꠦ ꠁꠔꠣꠞ ꠈꠥꠞꠣ ꠌꠤꠞꠣ ꠘꠣꠄ, ꠄꠞꠟꠣꠉꠤ ꠢꠣꠞꠣꠝ।
DEU 14:8 ꠀꠞ ꠡꠥꠅꠞꠞ ꠉꠥꠡ꠆ꠔꠅ ꠢꠣꠞꠣꠝ, ꠁꠔꠣꠞ ꠈꠥꠞꠣ ꠌꠤꠞꠣ ꠅꠁꠟꠦꠅ ꠁꠔꠣꠄ ꠈꠣꠘꠤꠞꠦ ꠙꠣꠎꠣꠁꠘ ꠘꠣ। ꠁꠔꠣ ꠙꠡꠥ ꠅꠇꠟꠞ ꠝꠞꠣ ꠟꠣꠡꠅ ꠗꠞꠣ-ꠍꠀ ꠘꠣꠎꠣꠁꠎ।
DEU 14:9 “ꠙꠣꠘꠤꠞ ꠝꠣꠎꠦ ꠛꠡꠔ ꠇꠞꠞꠣ ꠎꠦꠔꠣ ꠎꠣꠘꠖꠣꠞꠞ ꠚꠁꠞ ꠀꠞ ꠒꠣꠈꠘꠣ ꠀꠍꠦ, ꠁꠔꠣ ꠔꠥꠝꠞꠣꠞ ꠟꠣꠉꠤ ꠢꠣꠟꠣꠟ।
DEU 14:10 ꠅꠁꠟꠦ ꠎꠦꠔꠣꠞ ꠚꠁꠞ ꠀꠞ ꠒꠣꠈꠘꠣ ꠘꠣꠁ, ꠁꠔꠣ ꠘꠣꠎꠣꠁꠎ। ꠁꠔꠣ ꠔꠥꠝꠞꠣꠞ ꠟꠣꠉꠤ ꠢꠣꠞꠣꠝ।
DEU 14:11 “ꠢꠇꠟ ꠎꠣꠔꠞ ꠙꠣꠇ-ꠙꠛꠤꠔ꠆ꠞ ꠙꠣꠈꠤ ꠔꠥꠝꠞꠣꠞ ꠟꠣꠉꠤ ꠢꠣꠟꠣꠟ।
DEU 14:12 ꠅꠁꠟꠦ ꠛꠠ ꠌꠤꠟ, ꠢꠇꠥꠘ, ꠢꠣꠚ-ꠈꠣꠃꠞꠤ,
DEU 14:13 ꠢꠇꠟ ꠎꠣꠔꠞ ꠌꠤꠟ,
DEU 14:14 ꠢꠇꠟ ꠎꠣꠔ ꠇꠣꠃꠀ,
DEU 14:15 ꠃꠐꠙꠣꠈꠤ, ꠘꠤꠝ ꠙꠣꠈꠤ, ꠉꠣꠋꠌꠤꠟ, ꠢꠇꠟ ꠘꠝꠥꠘꠣꠞ ꠛꠣꠎ ꠙꠣꠈꠤ,
DEU 14:16 ꠢꠇꠟ ꠎꠣꠔ ꠙꠦꠌꠣ, ꠢꠇꠟ ꠎꠣꠔꠞ ꠇꠥꠠꠣ,
DEU 14:17 ꠍꠟꠣ-ꠇꠣꠇ, ꠛꠟꠥꠀ ꠙꠣꠈꠤ, ꠙꠣꠘꠤ-ꠈꠣꠃꠞꠤ,
DEU 14:18 ꠢꠇꠟ ꠎꠣꠔꠞ ꠎꠣꠐꠤꠀ, ꠢꠇꠟ ꠎꠣꠔꠞ ꠛꠉꠟꠣ, ꠝꠘ-ꠌꠥꠞꠣ ꠙꠣꠈꠤ ꠀꠞ ꠛꠣꠖꠥꠞ ꠔꠥꠝꠞꠣꠞ ꠟꠣꠉꠤ ꠢꠣꠞꠣꠝ।
DEU 14:19 “ꠀꠞ ꠒꠣꠈꠘꠣ ꠀꠟꠣ ꠢꠇꠟ ꠎꠣꠔꠞ ꠙꠥꠇ-ꠎꠥꠇ, ꠎꠦꠔꠣꠄ ꠑꠦꠋ ꠖꠤꠀ ꠀꠐꠂꠘ, ꠁꠔꠣ ꠔꠥꠝꠞꠣꠞ ꠟꠣꠉꠤ ꠢꠣꠞꠣꠝ, ꠁꠔꠣ ꠔ ꠘꠣꠙꠣꠇ।
DEU 14:20 ꠅꠁꠟꠦ ꠒꠣꠈꠘꠣ ꠀꠟꠣ ꠢꠇꠟ ꠎꠣꠔꠞ ꠙꠣꠇ-ꠙꠛꠤꠔ꠆ꠞ ꠚꠞꠤꠋ ꠔꠥꠝꠞꠣꠞ ꠟꠣꠉꠤ ꠢꠣꠟꠣꠟ।
DEU 14:21 “ꠔꠥꠝꠞꠣ ꠅꠁꠟꠣꠄ ꠔ ꠔꠥꠝꠞꠣꠞ ꠝꠣꠛꠥꠖꠞ ꠘꠣꠝꠦ ꠄꠇꠐꠣ ꠙꠣꠇ-ꠙꠛꠤꠔ꠆ꠞ ꠎꠣꠔꠤ, ꠄꠞꠟꠣꠉꠤ ꠅꠝꠘꠦ ꠅꠝꠘꠦ ꠝꠞꠤ ꠎꠣꠅꠀ ꠇꠥꠘꠥ ꠎꠤꠛ-ꠎꠣꠘꠥꠀꠞꠞ ꠉꠥꠡ꠆ꠔ ꠔꠥꠝꠞꠣ ꠈꠣꠁꠅ ꠘꠣ, ꠁꠔꠣ ꠔꠥꠝꠞꠣꠞ ꠟꠣꠉꠤ ꠢꠣꠞꠣꠝ। ꠅꠁꠟꠦ ꠔꠥꠝꠞꠣꠞ ꠉꠣꠃꠔ ꠛꠣ ꠐꠣꠃꠘꠅ ꠛꠡꠔ ꠇꠞꠞꠣ ꠖꠥꠍꠞꠣ ꠎꠦꠇꠥꠘꠥ ꠎꠣꠔꠤꠞ ꠝꠣꠘꠡꠞꠦ ꠁꠔꠣ ꠈꠣꠛꠣꠁꠔꠣꠄ ꠙꠣꠞꠛꠣꠄ, ꠜꠤꠘ ꠎꠣꠔꠤꠞ ꠉꠦꠍꠦ ꠛꠦꠌꠔꠣꠄꠅ ꠙꠣꠞꠛꠣꠄ। “ꠀꠞ ꠢꠥꠘꠅ, ꠔꠥꠝꠞꠣ ꠛꠇꠞꠤꠞ ꠛꠣꠁꠌ꠆ꠌꠣꠞꠦ ꠔꠣꠞ ꠝꠣʼꠞ ꠖꠥꠗ ꠖꠤꠀ ꠞꠣꠘ꠆ꠖꠤꠅ ꠘꠣ।
DEU 14:22 “ꠙꠞꠔꠦꠇ ꠛꠍꠞ ꠔꠥꠝꠞꠣꠞ ꠎꠝꠤꠘꠅ ꠎꠦꠔꠣ ꠚꠄ-ꠚꠡꠟ ꠙꠣꠅ, ꠁꠔꠣꠞ ꠖꠡ ꠛꠣꠐꠞ ꠄꠇ ꠛꠣꠐ ꠀꠔꠞꠣ ꠇꠞꠤ ꠕꠁꠅ।
DEU 14:23 ꠀꠞ ꠔꠥꠝꠞꠣꠞ ꠝꠣꠛꠥꠖꠦ ꠔꠣꠘ ꠛꠣꠄꠔꠥꠟ꠆ꠟꠣ ꠡꠞꠤꠚ ꠢꠤꠡꠣꠛꠦ ꠎꠦ ꠎꠣꠉꠣꠞꠦ ꠙꠍꠘ꠆ꠖ ꠇꠞꠛꠣ, ꠢꠃ ꠎꠣꠉꠣꠔ ꠅꠔꠣ ꠟꠁꠀ ꠀꠁꠅ। ꠔꠥꠝꠞꠣꠞ ꠈꠦꠔꠞ ꠚꠡꠟ, ꠀꠋꠉꠥꠞꠞ ꠡꠞꠛꠔ, ꠎꠄꠔꠥꠘꠞ ꠔꠦꠟꠞ ꠖꠡ ꠛꠣꠐꠞ ꠄꠇ ꠛꠣꠐ ꠀꠘꠤꠅ। ꠁꠔꠣ ꠚꠡꠟꠞ ꠟꠉꠦ ꠔꠥꠝꠞꠣꠞ ꠙꠣꠟꠣ ꠉꠞꠥ-ꠍꠣꠉꠟꠞ ꠙꠄꠟꠣ ꠛꠣꠁꠌ꠆ꠌꠣꠞꠦ ꠎꠛ ꠇꠞꠤꠀ ꠢꠇ꠆ꠇꠟꠔꠣ ꠝꠣꠛꠥꠖꠞ ꠍꠣꠝꠘꠦ ꠈꠣꠁꠅ, ꠅꠃ ꠟꠣꠈꠣꠘ ꠔꠥꠝꠞꠣ ꠢꠣꠝꠦꠡꠣ ꠘꠤꠎꠞ ꠝꠣꠛꠥꠖ ꠀꠟ꠆ꠟꠣꠞꠦ ꠒꠞꠣꠁꠀ ꠌꠟꠣ ꠢꠤꠇꠤꠅ।
DEU 14:24 ꠅꠁꠟꠦ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠙꠍꠘ꠆ꠖ ꠇꠞꠣ ꠎꠣꠉꠣ ꠎꠥꠖꠤ ꠛꠣꠇ꠆ꠇꠣ ꠖꠥꠞꠁ ꠅꠄ, ꠀꠞ ꠝꠣꠛꠥꠖꠞ ꠞꠢꠝ-ꠛꠞꠇꠔꠦ ꠙꠣꠅꠀ ꠅꠃ ꠍꠣꠝꠣꠘꠣ ꠟꠁꠀ ꠢꠤꠘꠅ ꠎꠣꠁꠔꠣꠄ ꠘꠣ ꠙꠣꠞ,
DEU 14:25 ꠔꠦ ꠅꠃ ꠍꠣꠝꠣꠘꠣ ꠛꠦꠌꠤꠀ ꠁꠔꠣꠞ ꠐꠦꠇꠣ ꠟꠁꠀ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠙꠍꠘ꠆ꠖ ꠇꠞꠣ ꠢꠃ ꠎꠣꠉꠣꠔ ꠎꠣꠁꠅ।
DEU 14:26 ꠉꠤꠀ ꠅꠃ ꠐꠦꠇꠣꠖꠤ ꠔꠥꠝꠞꠣꠞ ꠈꠥꠡꠤ ꠝꠣꠚꠤꠇ ꠉꠞꠥ-ꠍꠣꠉꠟ, ꠀꠋꠉꠥꠞꠞ ꠡꠞꠛꠔ, ꠔꠣꠠꠤ, ꠛꠣ ꠔꠥꠝꠞꠣꠞ ꠙꠍꠘ꠆ꠖꠞ ꠎꠦꠇꠥꠘꠥꠔꠣ ꠇꠤꠘꠤꠟꠣꠁꠅ। ꠛꠣꠖꠦ ꠙꠞꠤꠛꠣꠞꠞ ꠢꠇꠟꠞꠦ ꠟꠁꠀ ꠁꠔꠣ ꠈꠣꠘꠤ-ꠖꠣꠘꠤ ꠈꠣꠁꠀ ꠢꠣꠞꠤ, ꠀꠟ꠆ꠟꠣ ꠝꠣꠛꠥꠖꠞ ꠍꠣꠝꠘꠦ ꠈꠥꠡꠤ-ꠛꠣꠡꠤ ꠇꠞꠤꠅ।
DEU 14:27 ꠅꠃ ꠡꠝꠄ ꠔꠥꠝꠞꠣꠞ ꠉꠣꠃ ꠛꠣ ꠐꠣꠃꠘꠅ ꠛꠡꠔ ꠇꠞꠞꠣ ꠟꠦꠛꠤ ꠈꠣꠘ꠆ꠖꠣꠘꠞ ꠝꠣꠘꠡꠞꠦ ꠚꠣꠃꠞꠤꠅ ꠘꠣ। ꠇꠣꠞꠘ ꠔꠥꠝꠞꠣꠞ ꠔ ꠎꠣꠉꠣ-ꠎꠝꠤꠘ ꠀꠍꠦ, ꠅꠁꠟꠦ ꠔꠣꠞꠣꠞ ꠁꠔꠣ ꠇꠥꠘ꠆ꠔꠣ ꠘꠣꠁ।
DEU 14:28 “ꠙꠞꠔꠦꠇ ꠔꠤꠘ ꠛꠍꠞ ꠛꠣꠖꠦ ꠛꠣꠖꠦ ꠔꠥꠝꠞꠣꠞ ꠈꠦꠔꠞ ꠚꠡꠟꠞ ꠖꠡ ꠛꠣꠐꠞ ꠄꠇ ꠛꠣꠐ ꠀꠘꠤꠀ ꠐꠣꠃꠘꠅ ꠖꠟꠣ ꠇꠞꠤꠅ।
DEU 14:29 ꠔꠦꠃ ꠟꠦꠛꠤ ꠈꠣꠘ꠆ꠖꠣꠘꠞ ꠝꠣꠘꠡꠦ, ꠎꠦꠞꠣ ꠎꠣꠉꠣ-ꠎꠝꠤꠘ ꠛꠣ ꠗꠘ-ꠍꠣꠝꠣꠘꠣꠞ ꠛꠣꠐ ꠙꠣꠁꠍꠦ ꠘꠣ ꠄꠞꠣ, ꠀꠞ ꠛꠤꠖꠦꠡꠤ ꠝꠥꠍꠣꠚꠤꠞ ꠅꠇꠟꠦ, ꠄꠔꠤꠝ ꠅꠇꠟꠦ, ꠠꠣꠠꠤ ꠛꠦꠐꠤꠘ꠆ꠔꠦ ꠁꠔꠣ ꠙꠦꠐ ꠜꠞꠤꠀ ꠈꠣꠁꠛꠣ। ꠀꠞ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠔꠥꠝꠞꠣꠞ ꠢꠇꠟ ꠇꠣꠝꠞ ꠝꠣꠎꠦ ꠞꠢꠝ-ꠛꠞꠇꠔ ꠖꠤꠛꠣ।
DEU 15:1 “ꠔꠥꠝꠞꠣꠞ ꠢꠇꠟ ꠎꠣꠔꠞ ꠙꠣꠅꠘꠣ ꠙꠞꠔꠦꠇ ꠡꠣꠔ ꠛꠞꠍ ꠛꠣꠖꠦ ꠛꠣꠖꠦ ꠝꠣꠚ ꠇꠞꠤ ꠖꠤꠅ।
DEU 15:2 ꠁꠔꠣ ꠅꠃ ꠟꠣꠈꠣꠘ ꠝꠣꠚꠤ ꠖꠤꠅ, ꠛꠘꠤ ꠁꠍꠞꠣꠁꠟꠞ ꠝꠣꠎꠦ ꠙꠞꠔꠦꠇꠦ ꠄꠇꠦ-ꠅꠁꠘ꠆ꠘꠞ ꠙꠣꠅꠘꠣꠞꠦ ꠝꠣꠚꠤ ꠖꠤꠅ। ꠝꠣꠛꠥꠖꠦ ꠢꠥꠇꠥꠝ ꠖꠤꠍꠂꠘ ꠙꠣꠅꠘꠣ ꠝꠣꠚꠤ ꠖꠤꠛꠣꠞ ꠟꠣꠉꠤ, ꠄꠞꠟꠣꠉꠤ ꠀꠞ ꠇꠥꠘꠥ ꠙꠣꠅꠘꠣ ꠖꠣꠛꠤ ꠇꠞꠤꠅ ꠘꠣ।
DEU 15:3 ꠜꠤꠘ ꠎꠣꠔꠤꠞ ꠝꠣꠘꠡꠞ ꠉꠦꠍꠞ ꠙꠣꠅꠘꠣ ꠖꠣꠛꠤ ꠛꠅꠀꠁꠟ ꠕꠣꠇꠔ ꠙꠣꠞꠦ, ꠅꠁꠟꠦ ꠘꠤꠎꠞ ꠎꠣꠔꠤꠞ ꠜꠣꠁꠞ ꠉꠦꠍꠦ ꠢꠇꠟ ꠎꠣꠔꠞ ꠙꠣꠅꠘꠣ ꠝꠣꠚ ꠇꠞꠤ ꠖꠤꠅ।
DEU 15:4 ꠀꠍꠟꠦ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠔꠥꠝꠞꠣꠞꠦ ꠎꠦ ꠖꠦꠡꠞ ꠖꠈꠟꠖꠣꠞꠤ ꠖꠤꠞꠣ, ꠢꠃ ꠎꠝꠤꠘꠅ ꠔꠣꠁꠘ ꠘꠤꠌ꠆ꠌꠤꠔ ꠔꠥꠝꠞꠣꠞꠦ ꠞꠢꠝ-ꠛꠞꠇꠔ ꠖꠤꠛꠣ, ꠄꠞꠟꠣꠉꠤ ꠔꠥꠝꠞꠣꠞ ꠝꠣꠎꠦ ꠇꠦꠃ ꠉꠞꠤꠛ ꠞꠅꠀꠞ ꠇꠕꠣ ꠘꠣꠄ।
DEU 15:5 ꠔꠣꠁꠘ ꠔ ꠁꠟꠣ ꠞꠢꠝ-ꠛꠞꠇꠔ ꠖꠤꠛꠣ ꠔꠥꠝꠞꠣ ꠝꠣꠛꠥꠖ ꠀꠟ꠆ꠟꠣꠞꠦ ꠈꠥꠡꠤ ꠇꠞꠣꠞ ꠈꠤꠀꠟꠦ ꠀꠁꠎ ꠀꠝꠣꠞ ꠛꠣꠔꠣꠁꠟ ꠁꠔꠣ ꠢꠥꠇꠥꠝ ꠅꠇꠟ ꠈꠣꠟꠤ ꠔꠥꠝꠞꠣ ꠎꠥꠖꠤ ꠙꠥꠞꠣꠙꠥꠞ ꠝꠣꠘꠤꠀ ꠌꠟꠅ।
DEU 15:6 ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠔꠣꠘ ꠅꠀꠖꠣ ꠝꠣꠚꠤꠇ ꠎꠦ ꠡꠝꠄ ꠞꠢꠝ-ꠛꠞꠇꠔ ꠖꠤꠛꠣ, ꠅꠃ ꠡꠝꠄ ꠔꠥꠝꠞꠣ ꠛꠃꠔ ꠎꠣꠔꠤꠞꠦ ꠀꠅꠟꠣꠔ ꠖꠤꠛꠣꠄ, ꠅꠁꠟꠦ ꠔꠥꠝꠞꠣꠞ ꠀꠅꠟꠣꠔ ꠇꠞꠣꠞ ꠇꠥꠘꠥ ꠖꠞꠇꠣꠞ ꠅꠁꠔ ꠘꠣꠄ। ꠀꠞ ꠔꠥꠝꠞꠣ ꠢꠇꠟ ꠎꠣꠔꠤꠞ ꠃꠙꠞꠦ ꠞꠣꠎꠔ꠆ꠔ ꠇꠞꠛꠣꠄ, ꠅꠁꠟꠦ ꠔꠥꠝꠞꠣꠞ ꠃꠙꠞꠦ ꠇꠦꠃ ꠞꠣꠎꠔ꠆ꠔ ꠇꠞꠔ ꠘꠣꠄ।
DEU 15:7 “ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠔꠥꠝꠞꠣꠞꠦ ꠎꠦ ꠖꠦꠡ ꠖꠤꠞꠣ, ꠢꠃ ꠖꠦꠡꠞ ꠇꠥꠘꠥꠈꠣꠘꠅ ꠔꠥꠝꠞꠣꠞ ꠜꠣꠁꠀꠁꠘ꠆ꠔꠞ ꠝꠣꠎꠦ ꠇꠦꠃ ꠎꠥꠖꠤ ꠉꠞꠤꠛ ꠅꠄ, ꠔꠦ ꠔꠣꠞ ꠛꠣꠄ ꠔꠥꠝꠞꠣꠞ ꠖꠤꠟ ꠙꠣꠡꠣꠘ ꠇꠞꠤꠅ ꠘꠣ, ꠔꠣꠞ ꠟꠣꠉꠤ ꠔꠥꠝꠞꠣꠞ ꠀꠔ ꠝꠥꠁꠐ ꠇꠞꠤꠀ ꠞꠣꠈꠤꠅ ꠘꠣ।
DEU 15:8 ꠀꠔ ꠈꠥꠟꠣ ꠞꠣꠈꠤꠀ ꠔꠣꠞ ꠎꠞꠥꠞ ꠛꠥꠎꠤꠀ ꠀꠅꠟꠣꠔ ꠖꠤꠅ।
DEU 15:9 ꠢꠥꠡꠤꠀꠞ ꠞꠁꠅ, ꠡꠣꠔ ꠘꠝ꠆ꠛꠞ ꠛꠍꠞ ꠝꠣꠘꠤ, ꠀꠅꠟꠣꠔ ꠝꠣꠚꠤꠞ ꠛꠍꠞ ꠇꠣꠘ꠆ꠖꠣꠔ ꠀꠁꠌ꠆ꠌꠦ ꠖꠦꠈꠤꠀ ꠝꠘꠞ ꠇꠥ-ꠝꠔꠟꠛꠦ ꠔꠥꠝꠞꠣꠞ ꠅꠜꠣꠛꠤ ꠜꠣꠁꠞꠦ ꠈꠣꠟꠤ ꠀꠔꠦ ꠚꠤꠞꠣꠁ ꠖꠤꠅ ꠘꠣ, ꠀꠞꠘꠣꠄ ꠢꠦ ꠝꠣꠛꠥꠖꠞ ꠖꠞꠛꠣꠞꠅ ꠚꠞꠤꠀꠖ ꠇꠞꠟꠦ ꠔꠥꠝꠞꠣ ꠉꠥꠘꠣꠞ ꠜꠣꠉꠤ ꠅꠁꠛꠣꠄ।
DEU 15:10 ꠝꠘꠞ ꠝꠣꠎꠦ ꠇꠥꠘꠥꠎꠣꠔ ꠛꠦꠎꠣꠞꠤ ꠘꠣ ꠀꠘꠤꠀ ꠔꠣꠞꠦ ꠖꠤꠅ, ꠔꠦꠃ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠔꠥꠝꠞꠣꠞ ꠢꠇꠟ ꠇꠣꠝꠅ ꠞꠢꠝ-ꠛꠞꠇꠔ ꠖꠤꠛꠣ, ꠔꠥꠝꠞꠣ ꠎꠦ ꠇꠣꠝꠅ ꠀꠔ ꠖꠤꠛꠣꠄ, ꠅꠃ ꠇꠣꠝꠅꠃ ꠞꠢꠝ-ꠛꠞꠇꠔ ꠙꠣꠁꠛꠣꠄ।
DEU 15:11 ꠖꠦꠡꠞ ꠝꠣꠎꠦ ꠔ ꠢꠞ-ꠢꠣꠝꠦꠡꠣ ꠉꠞꠤꠛ ꠝꠣꠘꠥꠡ ꠞꠁꠛꠣ, ꠄꠞꠟꠣꠉꠤ ꠀꠝꠤ ꠔꠥꠝꠞꠣꠞꠦ ꠅꠃ ꠢꠥꠇꠥꠝ ꠖꠤꠞꠣꠝ, ꠔꠥꠝꠞꠣꠞ ꠜꠣꠁꠀꠁꠘ꠆ꠔꠞ ꠛꠣꠄ, ꠖꠦꠡꠞ ꠉꠞꠤꠛ-ꠖꠥꠈꠤ, ꠅꠜꠣꠛꠤ ꠝꠣꠘꠡꠞ ꠛꠣꠄ ꠘꠤꠎꠞ ꠀꠔ ꠈꠥꠟꠣ ꠞꠣꠈꠤꠅ।
DEU 15:12 “ꠔꠥꠝꠞꠣꠞ ꠡꠝꠣꠎꠞ ꠇꠥꠘꠥ ꠁꠛꠞꠣꠘꠤ ꠛꠦꠐꠣ ꠛꠣ ꠛꠦꠐꠤꠄ ꠎꠥꠖꠤ ꠘꠤꠎꠞꠦ ꠔꠥꠝꠞꠣꠞ ꠉꠦꠍꠦ ꠛꠦꠌꠤꠟꠣꠄ, ꠔꠦ ꠍꠄ ꠛꠞꠍ ꠇꠣꠝ ꠇꠞꠣꠘꠤꠞ ꠛꠣꠖꠦ ꠡꠣꠔ ꠘꠝ꠆ꠛꠞ ꠛꠞꠍ ꠀꠞꠝ꠆ꠛ ꠅꠀꠞ ꠇꠣꠟꠅ ꠔꠣꠞꠦ ꠀꠎꠣꠖ ꠇꠞꠤ ꠖꠤꠅ।
DEU 15:13 ꠀꠎꠣꠖ ꠇꠞꠛꠣꠞ ꠇꠣꠟꠅ ꠔꠣꠞꠦ ꠈꠣꠟꠤ ꠀꠔꠦ ꠛꠤꠖꠣꠄ ꠖꠤꠅ ꠘꠣ।
DEU 15:14 ꠔꠥꠝꠞꠣ ꠔꠣꠞꠦ ꠈꠥꠟꠣ ꠀꠔꠦ ꠔꠥꠝꠞꠣꠞ ꠙꠣꠟꠅ ꠕꠣꠇꠤ ꠝꠦꠠꠣ-ꠍꠣꠉꠟ, ꠈꠦꠔ-ꠈꠣꠝꠣꠞ ꠕꠣꠇꠤ ꠚꠡꠟ ꠀꠞ ꠀꠋꠉꠥꠞ ꠝꠣꠠꠣꠞ ꠎꠣꠉꠣ ꠕꠣꠇꠤ ꠀꠋꠉꠥꠞꠞ ꠡꠞꠛꠔ ꠖꠤꠅ। ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠔꠥꠝꠞꠣꠞꠦ ꠎꠦꠟꠣ ꠞꠢꠝ-ꠛꠞꠇꠔ ꠖꠤꠍꠂꠘ, ꠔꠥꠝꠞꠣꠅ ꠔꠣꠞꠦ ꠅꠟꠣ ꠇꠞꠤꠅ।
DEU 15:15 ꠝꠘꠅ ꠞꠣꠈꠤꠅ, ꠔꠥꠝꠞꠣꠅ ꠀꠉꠦ ꠝꠤꠡꠞ ꠖꠦꠡꠅ ꠉꠥꠟꠣꠝ ꠀꠍꠟꠣꠄ, ꠀꠞ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠔꠥꠝꠞꠣꠞꠦ ꠀꠎꠣꠖ ꠇꠞꠍꠂꠘ। ꠄꠞꠟꠣꠉꠤꠃ ꠀꠁꠎ ꠀꠝꠤ ꠔꠥꠝꠞꠣꠞꠦ ꠅꠟꠣ ꠢꠥꠇꠥꠝ ꠖꠤꠞꠣꠝ।
DEU 15:16 “ꠅꠁꠟꠦ ꠢꠃ ꠉꠥꠟꠣꠝꠦ ꠔꠥꠝꠞꠣꠞ ꠉꠦꠍꠦ ꠡꠥꠈ ꠙꠣꠁꠀ, ꠔꠥꠝꠞꠣꠞ ꠙꠞꠤꠛꠣꠞꠞ ꠝꠣꠘꠡꠞꠦ ꠜꠣꠟꠣ ꠙꠣꠅꠀꠄ ꠎꠥꠖꠤ ꠇꠄ, ꠔꠥꠝꠞꠣꠞ ꠉꠦꠍ ꠕꠣꠇꠤ ꠎꠣꠁꠔ ꠘꠣꠄ,
DEU 15:17 ꠔꠦ ꠔꠥꠝꠞꠣ ꠔꠣꠞ ꠇꠣꠘꠞ ꠟꠔꠤꠞꠦ ꠖꠥꠀꠞꠞ ꠇꠙꠣꠐꠅ ꠟꠣꠉꠣꠁꠀ ꠡꠤꠇ ꠖꠤꠀ ꠚꠥꠠ ꠇꠞꠤ ꠖꠤꠛꠣꠄ, ꠔꠦꠃ ꠢꠦ ꠎꠤꠘ꠆ꠖꠦꠉꠤꠜꠞ ꠔꠥꠝꠞꠣꠞ ꠉꠥꠟꠣꠝꠤꠔ ꠞꠁꠛ। ꠁ ꠢꠥꠇꠥꠝ ꠉꠥꠟꠣꠝ ꠛꠣ ꠛꠣꠘ꠆ꠖꠤꠞ ꠟꠣꠉꠤ ꠄꠇ ꠢꠝꠣꠘ।
DEU 15:18 ꠉꠥꠟꠣꠝ ꠛꠣ ꠛꠣꠘ꠆ꠖꠤꠞꠦ ꠀꠎꠣꠖ ꠇꠞꠤ ꠖꠤꠔꠦ ꠔꠥꠝꠞꠣꠞ ꠝꠘꠅ ꠇꠡ꠆ꠐ ꠀꠘꠣ ꠑꠤꠇ ꠘꠣꠄ, ꠢꠦ ꠔ ꠍꠄ ꠛꠞꠍ ꠗꠞꠤ ꠛꠦꠔꠘꠖꠣꠞꠤ ꠇꠣꠝꠟꠣꠞ ꠌꠣꠁꠔꠦꠅ ꠒꠣꠛꠟ ꠇꠣꠝ ꠇꠞꠍꠦ। ꠅꠈꠘ ꠔꠣꠞꠦ ꠀꠎꠣꠖ ꠇꠞꠟꠦ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠔꠥꠝꠞꠣꠞ ꠢꠇꠟ ꠇꠣꠝꠅ ꠞꠢꠝ-ꠛꠞꠇꠔ ꠖꠤꠛꠣ।
DEU 15:19 “ꠔꠥꠝꠞꠣꠞ ꠉꠞꠥ-ꠍꠣꠉꠟꠞ ꠙꠞꠔꠦꠇ ꠙꠄꠟꠣ ꠝꠦꠖꠣ ꠛꠣꠁꠌ꠆ꠌꠣꠞꠦ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠘꠣꠝꠦ ꠀꠟꠉꠣꠁꠀ ꠕꠁꠅ। ꠉꠞꠥꠞ ꠙꠄꠟꠣ ꠛꠣꠁꠌ꠆ꠌꠣꠖꠤ ꠇꠣꠝ-ꠇꠣꠎ ꠇꠞꠣꠁꠅ ꠘꠣ, ꠝꠦꠠꠣ-ꠍꠣꠉꠟꠞ ꠙꠄꠟꠣ ꠛꠣꠁꠌ꠆ꠌꠣꠞ ꠞꠥꠝꠣ ꠇꠣꠐꠤꠅ ꠘꠣ।
DEU 15:20 ꠁꠔꠣꠞꠦ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠙꠍꠘ꠆ꠖ ꠇꠞꠣ ꠎꠣꠉꠣꠔ ꠘꠤꠀ, ꠙꠞꠤꠛꠣꠞꠞ ꠢꠇꠟꠞꠦ ꠟꠁꠀ ꠔꠣꠘ ꠍꠣꠝꠘꠦ ꠙꠞꠔꠦꠇ ꠛꠍꠞ ꠅꠔꠣꠞ ꠉꠥꠡ꠆ꠔ ꠈꠣꠁꠅ।
DEU 15:21 ꠅꠁꠟꠦ ꠁꠔꠣꠞ ꠝꠣꠎꠦ ꠎꠥꠖꠤ ꠇꠥꠘꠥ ꠟꠣꠈꠣꠘ ꠈꠥꠔ ꠕꠣꠇꠦ, ꠁꠔꠣ ꠟꠦꠋꠠꠣ, ꠀꠘ꠆ꠖꠣ ꠛꠣ ꠀꠞꠅ ꠇꠥꠘꠥ ꠎꠣꠔꠞ ꠈꠥꠔ ꠕꠣꠇꠦ, ꠔꠦ ꠁꠉꠥꠞꠦꠃ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠘꠣꠝꠦ ꠇꠥꠞꠛꠣꠘꠤ ꠖꠤꠅ ꠘꠣ,
DEU 15:22 ꠅꠁꠟꠦ ꠁꠔꠣ ꠈꠥꠔꠀꠟꠣ ꠙꠡꠥ ꠔꠥꠝꠞꠣꠞ ꠘꠤꠎꠞ ꠄꠟꠣꠇꠣꠔ ꠎꠛ ꠇꠞꠤ ꠈꠣꠁꠔꠣꠄ ꠙꠣꠞꠛꠣꠄ। ꠡꠤꠇꠣꠞꠞ ꠅꠞꠤꠘꠞ ꠟꠣꠈꠣꠘ ꠎꠛ ꠇꠞꠤꠀ ꠙꠣꠇ-ꠘꠣꠙꠣꠇ ꠢꠣꠟꠔꠦ ꠎꠦꠇꠥꠘꠥ ꠎꠘꠦ ꠈꠣꠁꠔꠣꠄ ꠙꠣꠞꠛꠣꠄ।
DEU 15:23 ꠈꠣꠟꠤ ꠟꠃ ꠈꠣꠁꠅ ꠘꠣ, ꠟꠃꠞꠦ ꠙꠣꠘꠤꠞ ꠟꠣꠈꠣꠘ ꠝꠣꠐꠤꠔ ꠓꠣꠟꠤ ꠖꠤꠅ।
DEU 16:1 “ꠅ ꠛꠘꠤ ꠁꠍꠞꠣꠁꠟ, ꠀꠛꠤꠛ ꠝꠣꠡꠞ ꠌꠣꠘ꠆ꠖꠅ ꠔꠥꠝꠞꠣ ꠝꠣꠛꠥꠖ ꠀꠟ꠆ꠟꠣꠞ ꠘꠣꠝꠦ ꠀꠎꠣꠖꠤ ꠁꠖ ꠀꠖꠣꠄ ꠇꠞꠤꠅ। ꠇꠣꠞꠘ ꠅꠃ ꠌꠣꠘ꠆ꠖꠞ ꠄꠇꠖꠤꠘ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠞꠣꠁꠔꠇꠥꠞ ꠛꠣꠟꠣ ꠝꠤꠡꠞ ꠖꠦꠡ ꠕꠣꠇꠤ ꠔꠥꠝꠞꠣꠞꠦ ꠛꠣꠞ ꠇꠞꠤꠀ ꠀꠘꠍꠂꠘ।
DEU 16:2 ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠘꠤꠎꠞ ꠛꠣꠄꠔꠥꠟ꠆ꠟꠣ ꠡꠞꠤꠚ ꠢꠤꠡꠣꠛꠦ ꠎꠦ ꠎꠣꠉꠣꠞꠦ ꠙꠍꠘ꠆ꠖ ꠇꠞꠛꠣ, ꠅꠃ ꠎꠣꠉꠣꠔ ꠔꠥꠝꠞꠣ ꠔꠣꠘ ꠘꠣꠝꠦ ꠉꠞꠥ-ꠍꠣꠉꠟꠞ ꠙꠣꠟ ꠕꠣꠇꠤ ꠙꠡꠥ ꠘꠤꠀ ꠀꠎꠣꠖꠤ ꠁꠖꠞ ꠇꠥꠞꠛꠣꠘꠤ ꠖꠤꠅ।
DEU 16:3 ꠇꠥꠞꠛꠣꠘꠤꠞ ꠙꠡꠥꠞ ꠉꠥꠡ꠆ꠔ ꠔꠥꠝꠞꠣ ꠈꠣꠝꠤꠞ ꠀꠟꠣ ꠘꠣꠘ ꠞꠥꠐꠤꠖꠤ ꠈꠣꠁꠅ ꠘꠣ। ꠝꠤꠡꠞ ꠖꠦꠡ ꠕꠣꠇꠤ ꠔꠣꠠꠣ-ꠃꠠꠣ ꠇꠞꠤ ꠎꠦꠝꠘꠦ ꠈꠣꠝꠤꠞ ꠍꠣꠠꠣ ꠢꠣꠟꠔꠦ ꠛꠣꠞ ꠅꠁꠀ ꠀꠁꠍꠟꠣꠄ, ꠅꠈꠘ ꠔꠥꠝꠞꠣ ꠝꠤꠡꠞ ꠖꠦꠡꠞ ꠖꠥꠈ-ꠝꠍꠤꠛꠔꠞ ꠇꠕꠣ ꠁꠀꠖ ꠇꠞꠣꠞ ꠟꠣꠉꠤ ꠙꠥꠞꠣ ꠡꠣꠔ ꠖꠤꠘ ꠔꠥꠝꠞꠣ ꠅꠟꠣ ꠈꠣꠝꠤꠞ ꠍꠣꠠꠣ ꠞꠥꠐꠤ ꠈꠣꠁꠅ। ꠢꠃ ꠖꠤꠘꠞꠦ ꠢꠣꠞꠣ ꠎꠤꠘ꠆ꠖꠦꠉꠤꠜꠞ ꠝꠘꠅ ꠞꠣꠈꠣꠞ ꠟꠣꠉꠤ ꠔꠥꠝꠞꠣ ꠅꠟꠣ ꠇꠞꠤꠅ।
DEU 16:4 ꠅꠃ ꠡꠣꠔꠅ ꠖꠤꠘ ꠔꠥꠝꠞꠣꠞ ꠇꠥꠘꠥ ꠎꠣꠉꠣꠔ ꠎꠣꠘꠥ ꠈꠣꠝꠤꠞ ꠀꠟꠣ ꠇꠥꠘꠥꠎꠣꠔ ꠈꠣꠘꠤ ꠘꠣ ꠝꠤꠟꠦ। ꠙꠄꠟꠣ ꠖꠤꠘ ꠢꠣꠁꠘ꠆ꠎꠣ ꠛꠣꠟꠣ ꠎꠦ ꠙꠡꠥ ꠇꠥꠞꠛꠣꠘꠤ ꠖꠤꠛꠣꠄ, ꠁꠔꠣꠞ ꠉꠥꠡ꠆ꠔ ꠎꠣꠘꠥ ꠚꠎꠞꠞ ꠡꠝꠄ ꠙꠞ꠆ꠎꠘ꠆ꠔ ꠘꠣ ꠞꠄ।
DEU 16:5 “ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠔꠥꠝꠞꠣꠞꠦ ꠎꠦ ꠐꠣꠃꠘ ꠅꠇꠟ ꠖꠣꠘ ꠇꠞꠛꠣ, ꠁꠔꠣ ꠇꠥꠘꠥ ꠐꠣꠃꠘꠞ ꠝꠣꠎꠦ ꠔꠥꠝꠞꠣ ꠀꠎꠣꠖꠤ ꠁꠖꠞ ꠇꠥꠞꠛꠣꠘꠤ ꠖꠤꠅ ꠘꠣ।
DEU 16:6 ꠈꠣꠟꠤ ꠛꠣꠄꠔꠥꠟ꠆ꠟꠣ ꠡꠞꠤꠚ ꠢꠤꠡꠣꠛꠦ ꠔꠣꠁꠘ ꠎꠦ ꠎꠣꠉꠣꠞꠦ ꠙꠍꠘ꠆ꠖ ꠇꠞꠛꠣ, ꠢꠃ ꠎꠣꠉꠣꠔ ꠇꠥꠞꠛꠣꠘꠤ ꠖꠤꠅ। ꠌꠣꠘ꠆ꠖꠞ ꠎꠦ ꠔꠣꠞꠤꠈꠅ ꠔꠥꠝꠞꠣ ꠝꠤꠡꠞ ꠖꠦꠡ ꠕꠣꠇꠤ ꠛꠣꠞ ꠅꠁꠀ ꠀꠁꠍꠟꠣꠄ, ꠙꠞꠔꠦꠇ ꠛꠍꠞ ꠅꠃ ꠔꠣꠞꠤꠈꠞ ꠢꠣꠁꠘ꠆ꠎꠣ ꠛꠣꠟꠣ ꠔꠥꠝꠞꠣ ꠀꠎꠣꠖꠤ ꠁꠖꠞ ꠙꠡꠥ ꠇꠥꠞꠛꠣꠘꠤ ꠖꠤꠅ।
DEU 16:7 ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠙꠍꠘ꠆ꠖ ꠇꠞꠣ ꠎꠣꠉꠣꠔ ꠇꠥꠞꠛꠣꠘꠤꠞ ꠉꠥꠡ꠆ꠔ ꠞꠣꠘ꠆ꠖꠤꠀ ꠈꠣꠁꠅ। ꠛꠣꠖꠦ ꠛꠤꠀꠘ ꠅꠁꠟꠦ ꠎꠣꠞꠎꠤꠞ ꠊꠞꠅ ꠚꠤꠞꠤꠀ ꠎꠣꠁꠅ।
DEU 16:8 ꠙꠥꠞꠣ ꠍꠄ ꠖꠤꠘ ꠔꠥꠝꠞꠣ ꠈꠣꠝꠤꠞ ꠍꠣꠠꠣ ꠞꠥꠐꠤ ꠈꠣꠁꠅ, ꠀꠞ ꠡꠣꠔ ꠘꠝ꠆ꠛꠞ ꠖꠤꠘ ꠔꠥꠝꠞꠣ ꠀꠟ꠆ꠟꠣ ꠝꠣꠛꠥꠖꠞ ꠘꠣꠝꠦ ꠝꠤꠟꠘ-ꠝꠣꠢꠚꠤꠟ ꠇꠞꠤꠅ, ꠅꠃ ꠖꠤꠘ ꠇꠥꠘꠥꠎꠣꠔ ꠇꠣꠝ-ꠇꠣꠎ ꠇꠞꠤꠅ ꠘꠣ।
DEU 16:9 “ꠈꠦꠔꠞ ꠚꠡꠟ ꠇꠣꠐꠣꠔ ꠙꠄꠟꠣ ꠇꠣꠌꠤ ꠟꠣꠉꠣꠘꠤꠞ ꠖꠤꠘ ꠕꠣꠇꠤ ꠔꠥꠝꠞꠣ ꠡꠣꠔ ꠢꠣꠙ꠆ꠔꠣ ꠉꠘꠣ ꠡꠥꠞꠥ ꠇꠞꠤꠅ।
DEU 16:10 ꠛꠣꠖꠦ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠞꠢꠝ-ꠛꠞꠇꠔꠦ ꠎꠔ ꠚꠡꠟ ꠙꠣꠁꠍ, ꠅꠔꠣ ꠕꠣꠇꠤ ꠘꠤꠎꠦ ꠈꠥꠡ ꠅꠁꠀ ꠟꠤꠟ꠆ꠟꠣ ꠖꠤꠀ ꠔꠣꠘ ꠘꠣꠝꠦ ꠙꠘ꠆ꠌꠣꠁꠡꠣ ꠁꠖ ꠀꠖꠣꠄ ꠇꠞꠤꠅ।
DEU 16:11 ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠛꠣꠄꠔꠥꠟ꠆ꠟꠣ ꠡꠞꠤꠚ ꠢꠤꠡꠣꠛꠦ ꠎꠦ ꠎꠣꠉꠣꠞꠦ ꠙꠍꠘ꠆ꠖ ꠇꠞꠛꠣ, ꠔꠥꠝꠞꠣ ꠢꠃ ꠎꠣꠉꠣꠔ ꠔꠣꠘ ꠍꠣꠝꠘꠦ ꠔꠥꠝꠞꠣꠞ ꠙꠥꠀ-ꠙꠥꠠꠤꠘ, ꠉꠥꠟꠣꠝ-ꠛꠣꠘ꠆ꠖꠤ, ꠔꠥꠝꠞꠣꠞ ꠟꠉꠦ ꠛꠡꠔ ꠇꠞꠞꠣ ꠟꠦꠛꠤ ꠈꠣꠘ꠆ꠖꠣꠘꠞ ꠝꠣꠘꠥꠡ, ꠜꠤꠘ-ꠖꠦꠡꠤ ꠅꠇꠟ, ꠄꠔꠤꠝ ꠢꠥꠞꠥꠔ꠆ꠔꠣꠁꠘ ꠀꠞ ꠠꠣꠠꠤ ꠛꠦꠐꠤꠘ, ꠢꠇ꠆ꠇꠟꠦ ꠝꠤꠟꠤꠀ ꠁꠖꠞ ꠈꠥꠡꠤ-ꠛꠣꠡꠤ ꠇꠞꠤꠅ।
DEU 16:12 ꠔꠥꠝꠞꠣ ꠝꠘꠅ ꠞꠣꠈꠤꠅ, ꠀꠉꠦ ꠔꠥꠝꠞꠣ ꠝꠤꠡꠞ ꠖꠦꠡꠅ ꠉꠥꠟꠣꠝ ꠀꠍꠟꠣꠄ, ꠔꠦ ꠈꠥꠛ ꠈꠤꠀꠟꠤ ꠅꠁꠀ ꠅꠃ ꠘꠤꠅꠝ-ꠇꠣꠘꠥꠘ ꠀꠖꠣꠄ ꠇꠞꠤꠅ।
DEU 16:13 “ꠔꠥꠝꠞꠣꠞ ꠈꠦꠔꠞ ꠚꠡꠟ ꠀꠞ ꠀꠋꠉꠥꠞ ꠝꠣꠠꠣꠞ ꠎꠣꠉꠣ ꠕꠣꠇꠤ ꠢꠇꠟꠔꠣ ꠃꠉꠣꠞꠅ ꠔꠥꠟꠤꠀ ꠢꠣꠞꠟꠦ, ꠙꠥꠞꠣ ꠡꠣꠔ ꠖꠤꠘ ꠔꠥꠝꠞꠣ ꠒꠦꠞꠣ-ꠊꠞꠞ ꠁꠖ ꠀꠖꠣꠄ ꠇꠞꠤꠅ।
DEU 16:14 ꠁꠖꠞ ꠇꠣꠟꠅ ꠔꠥꠝꠞꠣꠞ ꠙꠥꠀ-ꠙꠥꠠꠤꠘ, ꠉꠥꠟꠣꠝ-ꠛꠣꠘ꠆ꠖꠤ, ꠔꠥꠝꠞꠣꠞ ꠟꠉꠦ ꠛꠡꠔ ꠇꠞꠞꠣ ꠟꠦꠛꠤ ꠈꠣꠘ꠆ꠖꠣꠘꠞ ꠝꠣꠘꠥꠡ, ꠜꠤꠘ-ꠖꠦꠡꠤ ꠝꠥꠍꠣꠚꠤꠞ, ꠄꠔꠤꠝ ꠢꠥꠞꠥꠔ꠆ꠔꠣꠁꠘ ꠀꠞ ꠠꠣꠠꠤ ꠛꠦꠐꠤꠘ ꠢꠇꠟꠦ ꠝꠤꠟꠤꠀ ꠈꠥꠡꠤ-ꠛꠣꠡꠤ ꠇꠞꠤꠅ।
DEU 16:15 ꠝꠣꠛꠥꠖꠞ ꠙꠍꠘ꠆ꠖ ꠇꠞꠣ ꠎꠣꠉꠣꠔ ꠉꠤꠀ ꠀꠟ꠆ꠟꠣ ꠝꠣꠛꠥꠖꠞ ꠘꠣꠝꠦ ꠙꠥꠞꠣ ꠡꠣꠔ ꠖꠤꠘ ꠔꠥꠝꠞꠣ ꠅꠃ ꠁꠖ ꠀꠖꠣꠄ ꠇꠞꠤꠅ। ꠝꠣꠛꠥꠖꠦ ꠔ ꠔꠥꠝꠞꠣꠞ ꠢꠇꠟ ꠎꠣꠔꠞ ꠚꠡꠟꠞ ꠝꠣꠎꠦ, ꠔꠥꠝꠞꠣꠞ ꠢꠇꠟ ꠇꠣꠝ-ꠇꠣꠎꠅ ꠞꠢꠝ-ꠛꠞꠇꠔ ꠖꠤꠍꠂꠘ, ꠄꠞꠟꠣꠉꠤ ꠔꠥꠝꠞꠣ ꠢꠇꠟꠦ ꠈꠥꠡꠤ-ꠛꠣꠡꠤ ꠇꠞꠛꠣꠄ।
DEU 16:16 “ꠔꠥꠝꠞꠣꠞ ꠝꠣꠎꠞ ꠢꠇꠟ ꠛꠦꠐꠣꠁꠘ꠆ꠔꠦ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠙꠍꠘ꠆ꠖ ꠇꠞꠣ ꠎꠣꠉꠣꠔ ꠉꠤꠀ ꠛꠍꠞꠅ ꠔꠤꠘꠛꠣꠞ ꠔꠣꠘ ꠖꠤꠖꠣꠞꠅ ꠀꠎꠤꠞ ꠅꠁꠅ। ꠈꠣꠝꠤꠞ ꠍꠣꠠꠣ ꠞꠥꠐꠤꠞ ꠁꠖ, ꠙꠘ꠆ꠌꠣꠁꠡꠣ ꠁꠖ, ꠒꠦꠞꠣ-ꠊꠞꠞ ꠁꠖ, ꠅꠃ ꠔꠤꠘꠅ ꠁꠖꠞ ꠇꠣꠟꠅ ꠀꠎꠤꠞ ꠅꠁꠅ। ꠈꠤꠀꠟ ꠞꠣꠈꠤꠅ, ꠇꠦꠃ ꠎꠣꠘꠥ ꠈꠣꠟꠤ ꠀꠔꠦ ꠝꠣꠛꠥꠖꠞ ꠍꠣꠝꠘꠦ ꠘꠣ ꠀꠄ।
DEU 16:17 ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠎꠣꠞꠦ ꠎꠦ ꠟꠣꠈꠣꠘ ꠞꠢꠝ-ꠛꠞꠇꠔ ꠖꠤꠍꠂꠘ, ꠅꠃ ꠢꠤꠡꠣꠛꠦ ꠘꠤꠎꠞ ꠔꠚꠤꠇ ꠀꠘꠝꠣꠘ ꠙꠞꠔꠦꠇ ꠎꠘꠦ ꠝꠣꠛꠥꠖ ꠀꠟ꠆ꠟꠣꠞ ꠘꠣꠝꠦ ꠟꠤꠟ꠆ꠟꠣ ꠖꠤꠅ।
DEU 16:18 “ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠔꠥꠝꠞꠣꠞꠦ ꠎꠦꠔꠣ ꠐꠣꠃꠘ ꠅꠇꠟ ꠖꠣꠘ ꠇꠞꠞꠣ, ꠁꠔꠣ ꠢꠇꠟ ꠐꠣꠃꠘꠅ ꠔꠥꠝꠞꠣꠞ ꠢꠇꠟ ꠈꠣꠘ꠆ꠖꠣꠘ ꠕꠣꠇꠤ ꠢꠣꠇꠤꠝ-ꠡꠣꠟꠤꠡ ꠀꠞ ꠅꠚꠤꠡꠣꠞ ꠛꠅꠀꠁꠟ ꠇꠞꠤꠅ। ꠄꠞꠣ ꠢꠇ ꠛꠤꠌꠣꠞ-ꠡꠣꠟꠤꠡ ꠇꠞꠛꠣ।
DEU 16:19 ꠔꠥꠝꠞꠣ ꠢꠇ ꠛꠤꠌꠣꠞ ꠕꠣꠇꠤ ꠟꠠꠤꠅ ꠘꠣ, ꠇꠦꠃꠞꠞ ꠝꠥꠈ ꠌꠣꠁꠀ ꠝꠍꠟꠝꠣꠘꠤ ꠇꠞꠤꠅ ꠘꠣ। ꠊꠥꠡ ꠈꠣꠁꠅ ꠘꠣ, ꠊꠥꠡꠦ ꠔ ꠀꠈꠟꠖꠣꠞꠞ ꠌꠃꠈꠞꠦꠅ ꠀꠘ꠆ꠖꠣ ꠛꠣꠘꠣꠁꠟꠣꠄ, ꠀꠞ ꠙꠞꠦꠎꠉꠣꠞꠞ ꠝꠥꠈꠞ ꠎꠛꠣꠘꠅ ꠛꠖꠟꠣꠁꠟꠣꠄ।
DEU 16:20 ꠢꠇꠟ ꠘꠝꠥꠘꠣꠄ ꠎꠦꠐꠣ ꠡꠑꠤꠇ, ꠔꠥꠝꠞꠣ ꠈꠣꠟꠤ ꠅꠃ ꠙꠕꠦ ꠌꠟꠤꠅ। ꠔꠦꠃ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠔꠥꠝꠞꠣꠞꠦ ꠎꠦ ꠖꠦꠡ ꠖꠣꠘ ꠇꠞꠞꠣ, ꠅꠔꠣ ꠖꠈꠟ ꠇꠞꠤꠀ ꠟꠣꠝ꠆ꠛꠣ ꠢꠣꠄꠀꠔꠤ ꠙꠣꠁꠛꠣꠄ।”
DEU 16:21 ꠢꠎꠞꠔ ꠝꠥꠍꠣꠄ ꠀꠞꠅ ꠇꠁꠟꠣ, “ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠘꠣꠝꠦ ꠔꠥꠝꠞꠣ ꠎꠦ ꠇꠥꠞꠛꠣꠘꠤ ꠈꠣꠘꠣ ꠛꠣꠘꠣꠁꠛꠣꠄ, ꠄꠞ ꠇꠣꠘ꠆ꠖꠣ-ꠇꠣꠍꠣꠔ ꠟꠣꠇꠠꠤꠖꠤ ꠛꠣꠘꠣꠁꠟ ꠀꠡꠦꠞꠣ-ꠖꠦꠛꠤꠞ ꠇꠥꠘꠥ ꠘꠤꠡꠣꠘꠣ ꠈꠥꠐꠤ ꠕꠁꠅ ꠘꠣ।
DEU 16:22 ꠙꠥꠎꠣꠞ ꠘꠤꠅꠔꠦ ꠙꠣꠔ꠆ꠔꠞꠞ ꠇꠥꠘꠥ ꠈꠥꠐꠤ ꠉꠣꠠꠤꠅ ꠘꠣ, ꠇꠣꠞꠘ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠁꠔꠣꠞꠦ ꠊꠤꠘ ꠇꠞꠂꠘ।”
DEU 17:1 ꠢꠎꠞꠔ ꠝꠥꠍꠣꠄ ꠀꠞꠅ ꠇꠁꠟꠣ, “ꠀꠞ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠘꠣꠝꠦ ꠁꠟꠣꠈꠣꠘ ꠇꠥꠘꠥ ꠉꠞꠥ-ꠍꠣꠉꠟꠞꠦ ꠇꠥꠞꠛꠣꠘꠤ ꠖꠤꠅ ꠘꠣ, ꠎꠦꠔꠣꠞ ꠉꠔꠞꠅ ꠈꠥꠔ ꠀꠍꠦ, ꠔꠣꠁꠘ ꠔ ꠈꠥꠔ ꠀꠟꠣ ꠇꠥꠞꠛꠣꠘꠤꠞꠦ ꠊꠤꠘ ꠇꠞꠂꠘ।
DEU 17:2 “ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠔꠥꠝꠞꠣꠞꠦ ꠎꠦ ꠉꠣꠃ ꠀꠞ ꠐꠣꠃꠘ ꠅꠇꠟ ꠖꠣꠘ ꠇꠞꠛꠣ, ꠅꠃ ꠎꠣꠉꠣꠔ ꠎꠥꠖꠤ ꠁꠟꠣꠈꠣꠘ ꠇꠥꠘꠥ ꠛꠦꠐꠣ ꠛꠣ ꠛꠦꠐꠤ ꠝꠤꠟꠦ, ꠎꠦꠉꠥꠄ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠅꠀꠖꠣ-ꠌꠥꠇ꠆ꠔꠤꠞ ꠃꠟꠐꠣ ꠉꠤꠀ ꠔꠣꠁꠘ ꠎꠦꠔꠣ ꠇꠣꠝ ꠊꠤꠘ ꠇꠞꠂꠘ ꠅꠔꠣ ꠇꠣꠝ ꠇꠞꠦ,
DEU 17:3 ꠅꠉꠥꠄ ꠎꠥꠖꠤ ꠀꠟ꠆ꠟꠣ ꠍꠣꠠꠣ ꠖꠥꠍꠞꠣ ꠇꠥꠘꠥ ꠖꠦꠛ-ꠖꠦꠛꠤꠞ ꠙꠥꠎꠣ ꠇꠞꠦ, ꠌꠣꠘ꠆ꠖ, ꠡꠥꠞꠥꠎ, ꠔꠦꠞꠣꠞ ꠙꠥꠎꠣ ꠇꠞꠦ,
DEU 17:4 ꠀꠞ ꠁꠔꠣ ꠔꠥꠝꠞꠣꠞꠦ ꠎꠣꠘꠣꠁꠟ ꠅꠄ, ꠔꠦ ꠔꠥꠝꠞꠣ ꠈꠥꠛ ꠡꠣꠛꠗꠣꠘꠦ ꠔꠣꠟ꠆ꠟꠣꠡ ꠇꠞꠤꠀ ꠖꠦꠈꠤꠅ ꠁꠔꠣ ꠢꠣꠍꠣ ꠘꠣ ꠝꠤꠍꠣ। ꠢꠣꠍꠣ ꠅꠁꠟꠦ ꠛꠘꠤ ꠁꠍꠞꠣꠁꠟꠞ ꠜꠤꠔꠞꠦ ꠁꠟꠣ ꠟꠣꠘ꠆ꠘꠔꠤ ꠇꠣꠝ ꠇꠞꠣꠄ,
DEU 17:5 ꠢꠃ ꠛꠦꠐꠣ ꠛꠣ ꠛꠦꠐꠤꠞꠦ ꠡꠣꠎꠣ ꠖꠤꠅ। ꠅꠉꠥꠞꠦ ꠗꠞꠤꠀ ꠉꠣꠃ ꠛꠣ ꠐꠣꠃꠘꠞ ꠙꠣꠁꠘ꠆ꠌꠣꠁꠔꠤ ꠛꠂꠑꠇ ꠈꠣꠘꠣꠔ ꠀꠘꠤꠅ, ꠀꠘꠤꠀ ꠙꠣꠔ꠆ꠔꠞ ꠝꠣꠞꠤꠀ ꠝꠣꠞꠤꠟꠤꠅ।
DEU 17:6 ꠅꠁꠟꠦ ꠝꠞꠣꠞ ꠎꠥꠇꠣ ꠅꠙꠞꠣꠗ ꠙꠞꠝꠣꠘꠞ ꠟꠣꠉꠤ ꠖꠥꠁ ꠛꠣ ꠔꠤꠘ ꠎꠘꠞ ꠡꠣꠇ꠆ꠇꠤ ꠟꠣꠉꠛ, ꠄꠇꠟꠣ ꠄꠇ ꠎꠘꠞ ꠡꠣꠇ꠆ꠇꠤꠄ ꠝꠣꠞꠣ ꠎꠣꠁꠔ ꠘꠣꠄ।
DEU 17:7 ꠔꠣꠞꠦ ꠝꠣꠞꠣꠞ ꠛꠣꠟꠣ ꠙꠄꠟꠣ ꠡꠣꠇ꠆ꠇꠤ ꠅꠇꠟꠦ ꠙꠣꠔ꠆ꠔꠞ ꠝꠣꠞꠛꠣ, ꠛꠣꠖꠦ ꠢꠇꠟ ꠝꠣꠘꠡꠦ ꠝꠣꠞꠛꠣ। ꠅꠃ ꠘꠝꠥꠘꠣꠄ ꠔꠥꠝꠞꠣꠞ ꠡꠝꠣꠎꠞ ꠜꠤꠔꠞ ꠕꠣꠇꠤ ꠅꠟꠣꠈꠣꠘ ꠘꠣꠚꠞꠝꠣꠘꠤꠞꠦ ꠈꠦꠖꠣꠁꠛꠣꠄ।
DEU 17:8 “ꠔꠥꠝꠞꠣꠞ ꠉꠦꠍꠦ ꠎꠥꠖꠤ ꠁꠟꠣꠈꠣꠘ ꠇꠑꠤꠘ ꠇꠥꠘꠥ ꠘꠣꠟꠤꠡ ꠀꠄ, ꠎꠦꠔꠣꠞ ꠛꠤꠌꠣꠞ ꠇꠞꠣꠞ ꠈꠦꠝꠔꠣ ꠔꠥꠝꠞꠣꠞ ꠀꠖꠣꠟꠔꠞ ꠘꠣꠁ, ꠔꠦ ꠁꠔꠣ ꠟꠁꠀ ꠀꠟ꠆ꠟꠣ ꠝꠣꠛꠥꠖꠞ ꠙꠍꠘ꠆ꠖ ꠇꠞꠣ ꠎꠣꠉꠣꠔ ꠎꠣꠁꠅ। ꠗꠞꠤꠟꠣꠅ, ꠇꠥꠘꠥ ꠈꠥꠘ-ꠈꠣꠞꠣꠙꠤ, ꠝꠣꠞꠣ-ꠝꠣꠞꠤ, ꠎꠛꠞ-ꠖꠈꠟꠖꠣꠞꠤ ꠙꠞꠝꠣꠘ-ꠔꠖꠘ꠆ꠔꠞ ꠛꠤꠌꠣꠞ-ꠀꠌꠣꠞ।
DEU 17:9 ꠉꠤꠀ ꠟꠦꠛꠤ ꠈꠣꠘ꠆ꠖꠣꠘꠞ ꠁꠝꠣꠝ ꠅꠇꠟ ꠀꠞ ꠢꠃ ꠀꠝꠟꠞ ꠙꠞꠗꠣꠘ ꠢꠣꠇꠤꠝ ꠍꠣꠛꠞ ꠖꠞꠛꠣꠞꠅ ꠘꠣꠟꠤꠡ ꠢꠥꠘꠣꠁꠅ, ꠢꠥꠘꠣꠁꠟꠦ ꠔꠣꠞꠣ ꠔꠥꠝꠞꠣꠞꠦ ꠛꠤꠌꠣꠞꠞ ꠞꠣꠄ ꠛꠣꠔꠣꠁ ꠖꠤꠛꠣ।
DEU 17:10 ꠀꠞ ꠝꠣꠛꠥꠖꠞ ꠙꠍꠘ꠆ꠖ ꠇꠞꠣ ꠎꠣꠉꠣꠔ ꠔꠣꠞꠣ ꠎꠦ ꠞꠣꠄ ꠎꠣꠘꠣꠁꠛꠣ, ꠅꠃ ꠞꠣꠄꠅꠞ ꠝꠞ꠆ꠝ ꠛꠥꠎꠤꠀ ꠔꠥꠝꠞꠣ ꠇꠣꠝ ꠇꠞꠛꠣꠄ, ꠔꠣꠞꠣ ꠎꠦꠔꠣ ꠢꠤꠇꠣꠁ ꠖꠤꠛꠣ, ꠈꠥꠛ ꠈꠤꠀꠟ ꠇꠞꠤꠀ ꠁꠔꠣ ꠝꠣꠘꠤꠅ।
DEU 17:11 ꠀꠟ꠆ꠟꠣꠁ ꠡꠞꠤꠅꠔꠞ ꠢꠥꠇꠥꠝꠞ ꠛꠦꠙꠣꠞꠦ ꠔꠣꠞꠣ ꠎꠦꠟꠣ ꠔꠣꠟꠤꠝ ꠖꠤꠛꠣ, ꠔꠣꠞꠣ ꠎꠦꠟꠣꠈꠣꠘ ꠛꠤꠌꠣꠞꠞ ꠞꠣꠄ ꠖꠤꠛꠣ, ꠅꠔꠣꠞ ꠝꠞ꠆ꠝ ꠛꠥꠎꠤꠀ ꠔꠥꠝꠞꠣ ꠇꠣꠝ ꠇꠞꠤꠅ, ꠔꠣꠞꠣꠞ ꠇꠕꠣ ꠕꠣꠇꠤ ꠃꠘ꠆ꠘꠤꠡ-ꠛꠤꠡ ꠇꠤꠌ꠆ꠍꠥ ꠇꠞꠤꠅ ꠘꠣ।
DEU 17:12 ꠇꠥꠘꠥ ꠝꠣꠘꠡꠦ ꠛꠦꠐꠣꠉꠤꠞꠤ ꠖꠦꠈꠣꠁꠀ ꠎꠥꠖꠤ ꠢꠃ ꠢꠣꠇꠤꠝꠞ ꠞꠣꠄ ꠘꠣ ꠝꠣꠘꠦ, ꠛꠣ ꠀꠟ꠆ꠟꠣ ꠝꠣꠛꠥꠖꠞ ꠈꠣꠖꠤꠝ ꠅꠃ ꠁꠝꠣꠝ ꠍꠣꠛꠞ ꠢꠥꠇꠥꠝ ꠘꠣ ꠝꠣꠘꠦ, ꠔꠦ ꠔꠣꠞꠦ ꠘꠤꠌ꠆ꠌꠤꠔ ꠎꠣꠘꠦ ꠝꠣꠞꠤꠟꠤꠅ। ꠛꠘꠤ ꠁꠍꠞꠣꠁꠟꠞ ꠜꠤꠔꠞꠦ ꠕꠣꠇꠤ ꠅꠃ ꠘꠝꠥꠘꠣꠄ ꠘꠣꠚꠞꠝꠣꠘꠤ ꠈꠦꠖꠣꠁꠅ।
DEU 17:13 ꠔꠦꠃ ꠁꠔꠣ ꠢꠥꠘꠤꠀ ꠢꠇꠟ ꠝꠣꠘꠡꠦ ꠒꠞꠣꠁꠛꠣ, ꠔꠣꠞꠣ ꠀꠞ ꠛꠦꠐꠣꠉꠤꠞꠤ ꠖꠦꠈꠣꠘꠤꠞ ꠡꠣꠅꠡ ꠙꠣꠁꠔꠣ ꠘꠣꠄ।
DEU 17:14 “ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠔꠥꠝꠞꠣꠞꠦ ꠎꠦ ꠖꠦꠡꠞ ꠖꠈꠟꠖꠣꠞꠤ ꠖꠤꠞꠣ, ꠢꠘꠅ ꠉꠤꠀ ꠛꠡꠔ ꠇꠞꠤꠀ ꠢꠣꠞꠟꠦ ꠔꠥꠝꠞꠣ ꠇꠁꠛꠣꠄ, ꠀꠅ, ꠀꠝꠞꠣꠞ ꠀꠡ-ꠙꠣꠡꠞ ꠎꠣꠔꠤ ꠅꠇꠟꠞ ꠟꠣꠈꠣꠘ ꠀꠝꠞꠣꠞ ꠘꠤꠎꠞ ꠎꠣꠔꠤꠞ ꠟꠣꠉꠤꠅ ꠄꠇꠎꠘ ꠛꠣꠖꠡꠣ ꠛꠣꠘꠣꠁ।
DEU 17:15 ꠢꠃ ꠡꠝꠄ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠎꠣꠞꠦ ꠙꠍꠘ꠆ꠖ ꠇꠞꠛꠣ, ꠔꠣꠞꠦꠃ ꠔꠥꠝꠞꠣꠞ ꠛꠣꠖꠡꠣ ꠛꠣꠘꠣꠁꠅ। ꠢꠦ ꠎꠣꠘꠥ ꠔꠥꠝꠞꠣꠞ ꠘꠤꠎꠞ ꠎꠣꠔꠤꠞ ꠜꠣꠁ ꠅꠄ, ꠇꠥꠘꠥ ꠜꠤꠘ ꠎꠣꠔꠤꠞ ꠝꠣꠘꠡꠞꠦ ꠔꠥꠝꠞꠣꠞ ꠛꠣꠖꠡꠣ ꠛꠣꠘꠣꠁꠅ ꠘꠣ।
DEU 17:16 ꠁ ꠛꠣꠖꠡꠣꠄ ꠔꠣꠞ ꠘꠤꠎꠞ ꠟꠣꠉꠤ ꠛꠃꠔ ꠊꠥꠠꠣ ꠎꠣꠘꠥ ꠘꠣ ꠎꠝꠣꠄ, ꠊꠥꠠꠣ ꠎꠥꠉꠣꠘꠤꠞ ꠘꠤꠅꠔꠦ ꠢꠦ ꠎꠣꠘꠥ ꠛꠘꠤ ꠁꠍꠞꠣꠁꠟꠞ ꠝꠣꠘꠡꠞꠦ ꠝꠤꠡꠞ ꠖꠦꠡꠅ ꠘꠣ ꠙꠣꠑꠣꠄ। ꠝꠘꠅ ꠞꠣꠈꠤꠅ, ꠝꠣꠛꠥꠖꠦ ꠀꠉꠦ ꠢꠥꠇꠥꠝ ꠖꠤꠍꠂꠘ, ꠔꠥꠝꠞꠣ ꠀꠞ ꠇꠥꠘꠥꠖꠤꠘ ꠢꠤ ꠙꠕꠦꠖꠤ ꠎꠣꠁꠅ ꠘꠣ।
DEU 17:17 ꠁ ꠛꠣꠖꠡꠣꠄ ꠎꠣꠘꠥ ꠛꠃꠔ ꠛꠤꠀ-ꠡꠣꠖꠤ ꠘꠣ ꠇꠞꠦ, ꠀꠞꠘꠣꠄ ꠔꠣꠞ ꠖꠤꠟ ꠛꠦ-ꠙꠕꠦ ꠎꠣꠁꠛꠉꠤ। ꠢꠦ ꠎꠣꠘꠥ ꠘꠤꠎꠞ ꠟꠣꠉꠤ ꠛꠦꠡ ꠇꠞꠤ ꠡꠥꠘꠣ-ꠞꠥꠙꠣ ꠘꠣ ꠎꠝꠣꠄ।
DEU 17:18 “ꠔꠣꠞꠦ ꠞꠣꠎ-ꠉꠖꠤꠔ ꠛꠅꠀꠘꠤꠞ ꠇꠣꠟꠅ ꠟꠦꠛꠤ ꠈꠣꠘ꠆ꠖꠣꠘꠞ ꠁꠝꠣꠝ ꠍꠣꠛ ꠅꠇꠟꠞ ꠉꠦꠍꠦ ꠎꠦ ꠔꠃꠞꠣꠔ ꠇꠤꠔꠣꠛ ꠕꠣꠇꠛ, ꠅꠃ ꠇꠤꠔꠣꠛꠞ ꠀꠞꠅ ꠄꠇ ꠇꠙꠤ ꠟꠦꠈꠤꠀ ꠔꠣꠞ ꠘꠤꠎꠞ ꠟꠣꠉꠤ ꠘꠤꠔꠦ ꠅꠁꠛ।
DEU 17:19 ꠁꠈꠣꠘ ꠔꠣꠞ ꠘꠤꠎꠞ ꠉꠦꠍꠦ ꠞꠁꠛ, ꠔꠣꠞ ꠖꠤꠟꠅ ꠀꠟ꠆ꠟꠣ ꠝꠣꠛꠥꠖꠞ ꠒꠞ-ꠈꠚ ꠞꠣꠈꠣꠞ ꠟꠣꠉꠤ ꠅꠃ ꠔꠃꠞꠣꠔ ꠀꠞ ꠄꠞ ꠜꠤꠔꠞꠞ ꠢꠇꠟ ꠢꠥꠇꠥꠝ-ꠀꠢꠇꠣꠝ ꠙꠥꠞꠣꠙꠥꠞ ꠝꠣꠘꠤꠀ ꠌꠟꠣꠞ ꠘꠤꠅꠔꠦ, ꠢꠦ ꠎꠤꠘ꠆ꠖꠦꠉꠤꠜꠞ ꠅꠃ ꠇꠤꠔꠣꠛ ꠔꠤꠟꠣꠅꠔ ꠇꠞꠛ।
DEU 17:20 ꠔꠦꠃ ꠔꠣꠞ ꠎꠣꠔꠤꠞ ꠜꠣꠁꠀꠁꠘ ꠕꠣꠇꠤ ꠘꠤꠎꠞꠦ ꠛꠠ ꠝꠘꠅ ꠇꠞꠔ ꠘꠣꠄ, ꠢꠦ ꠔꠃꠞꠣꠔꠞ ꠢꠥꠇꠥꠝ-ꠀꠢꠇꠣꠝꠞ ꠃꠘ꠆ꠘꠤꠡ-ꠛꠤꠡ ꠇꠞꠔ ꠘꠣꠄ। ꠔꠦꠃ ꠢꠦ ꠀꠞ ꠔꠣꠞ ꠀꠅꠟꠣꠖ ꠅꠇꠟꠞ ꠉꠖꠤ ꠡ꠆ꠕꠣꠄꠁ ꠅꠁꠛ, ꠔꠣꠞꠣ ꠛꠃꠔ ꠖꠤꠘ ꠛꠘꠤ ꠁꠍꠞꠣꠁꠟꠞ ꠃꠙꠞꠦ ꠛꠣꠖꠡꠣꠁ ꠇꠞꠛꠣ।
DEU 18:1 “ꠟꠦꠛꠤ ꠈꠣꠘ꠆ꠖꠣꠘꠞ ꠁꠝꠣꠝ ꠅꠇꠟꠦ ꠀꠞ ꠀꠡ꠆ꠔꠣ ꠟꠦꠛꠤ ꠈꠣꠘ꠆ꠖꠣꠘꠞ ꠝꠣꠘꠡꠦ, ꠛꠘꠤ ꠁꠍꠞꠣꠁꠟꠞ ꠀꠞꠅ ꠈꠣꠘ꠆ꠖꠣꠘꠞ ꠟꠣꠈꠣꠘ ꠇꠥꠘꠥ ꠎꠝꠤ-ꠝꠤꠞꠣꠡ ꠛꠣ ꠗꠘ-ꠍꠣꠝꠣꠘꠣ ꠙꠣꠁꠔꠣ ꠘꠣꠄ। ꠝꠣꠛꠥꠖꠞ ꠘꠣꠝꠦ ꠖꠦꠅꠀ ꠢꠇꠟ ꠎꠣꠔꠞ ꠇꠥꠞꠛꠣꠘꠤꠞ ꠉꠥꠡ꠆ꠔ ꠀꠞ ꠢꠇꠟ ꠟꠤꠟ꠆ꠟꠣ-ꠍꠖꠉꠣꠞ ꠛꠣꠐꠅ ꠔꠣꠞꠣ ꠈꠣꠁꠛꠣ।
DEU 18:2 ꠔꠣꠞꠣ ꠘꠤꠎꠞ ꠛꠘꠤ ꠁꠍꠞꠣꠁꠟꠞ ꠎꠣꠔꠤꠞ ꠜꠣꠁꠀꠁꠘ꠆ꠔꠞ ꠟꠣꠈꠣꠘ ꠇꠥꠘꠥ ꠎꠝꠤ-ꠝꠤꠞꠣꠡ ꠙꠣꠁꠔꠣ ꠘꠣꠄ। ꠡ꠆ꠛꠄꠅꠋ ꠀꠟ꠆ꠟꠣ ꠝꠣꠛꠥꠖꠃ ꠔꠣꠞꠣꠞ ꠝꠤꠞꠣꠡ, ꠔꠣꠁꠘ ꠘꠤꠎꠦꠅ ꠔꠣꠞꠣꠞꠦ ꠁ ꠅꠀꠖꠣ ꠖꠤꠍꠂꠘ।
DEU 18:3 “ꠝꠣꠘꠡꠦ ꠎꠔ ꠉꠞꠥ-ꠍꠣꠉꠟ ꠇꠥꠞꠛꠣꠘꠤ ꠖꠤꠛꠣ, ꠁꠔꠣꠞ ꠇꠣꠘ꠆ꠖꠞ ꠉꠥꠡ꠆ꠔ, ꠖꠥꠁꠅ ꠉꠣꠟ ꠀꠞ ꠙꠦꠐꠞ ꠜꠤꠔꠞꠞ ꠢꠇ꠆ꠇꠟꠔꠣ ꠁꠝꠣꠝ ꠍꠣꠛꠞꠦ ꠖꠤꠛꠣꠄ, ꠁꠔꠣ ꠔꠣꠘ ꠙꠣꠅꠘꠣ।
DEU 18:4 ꠔꠥꠝꠞꠣꠞ ꠈꠦꠔꠞ ꠙꠄꠟꠣ ꠚꠡꠟ, ꠛꠣꠉꠣꠘꠞ ꠀꠋꠉꠥꠞ ꠕꠣꠇꠤ ꠛꠣꠘꠣꠁꠟ ꠙꠄꠟꠣ ꠡꠞꠛꠔ ꠀꠞ ꠎꠄꠔꠥꠘ ꠕꠣꠇꠤ ꠛꠣꠘꠣꠁꠟ ꠔꠦꠟꠞ ꠙꠄꠟꠣ ꠅꠋꠡ, ꠍꠣꠉꠟ-ꠝꠦꠠꠣꠞ ꠙꠄꠟꠣ ꠛꠣꠞ ꠇꠣꠐꠣ ꠞꠥꠝꠣ ꠁꠝꠣꠝ ꠍꠣꠛꠞꠦ ꠖꠤꠛꠣꠄ।
DEU 18:5 ꠎꠣꠘ ꠔ, ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠔꠥꠝꠞꠣꠞ ꠢꠇꠟ ꠈꠣꠘ꠆ꠖꠣꠘꠞ ꠝꠣꠎ ꠕꠣꠇꠤ ꠟꠦꠛꠤ ꠈꠣꠘ꠆ꠖꠣꠘꠞꠦ ꠙꠍꠘ꠆ꠖ ꠇꠞꠤꠀ ꠀꠟꠉ ꠇꠞꠍꠂꠘ, ꠎꠣꠔꠦ ꠔꠣꠞꠣ ꠢꠞ-ꠢꠣꠝꠦꠡꠣ ꠝꠣꠛꠥꠖꠞ ꠄꠛꠣꠖꠔ-ꠛꠘ꠆ꠖꠦꠉꠤꠞ ꠇꠣꠝꠅ ꠞꠂꠘ।
DEU 18:6 “ꠀꠞ ꠁꠍꠞꠣꠁꠟ ꠖꠦꠡꠞ ꠎꠦꠇꠥꠘꠥ ꠐꠣꠃꠘ ꠕꠣꠇꠤ ꠟꠦꠛꠤ ꠈꠣꠘ꠆ꠖꠣꠘꠞ ꠇꠥꠘꠥ ꠀꠅꠟꠣꠖ ꠎꠥꠖꠤ ꠝꠣꠛꠥꠖꠞ ꠀꠡꠤꠇ ꠛꠘꠤꠀ ꠝꠣꠛꠥꠖꠞ ꠙꠍꠘ꠆ꠖ ꠇꠞꠣ ꠎꠣꠉꠣꠔ ꠀꠄ,
DEU 18:7 ꠔꠦ ꠢꠦ-ꠅ ꠔꠣꠞ ꠈꠣꠘ꠆ꠖꠣꠘꠞ ꠜꠣꠁꠀꠁꠘ꠆ꠔꠞ ꠟꠣꠈꠣꠘ ꠀꠟ꠆ꠟꠣ ꠝꠣꠛꠥꠖꠞ ꠖꠞꠛꠣꠞꠅ ꠄꠛꠣꠖꠔ-ꠛꠘ꠆ꠖꠦꠉꠤꠞ ꠇꠣꠝ ꠇꠞꠛ।
DEU 18:8 ꠛꠣꠇꠤ ꠁꠝꠣꠝ ꠅꠇꠟꠞ ꠟꠣꠈꠣꠘ ꠢꠦ-ꠅ ꠔꠣꠞ ꠈꠣꠘꠣ-ꠙꠤꠘꠣꠞ ꠛꠣꠐ ꠙꠣꠁꠛ, ꠄꠞꠟꠉꠦ ꠔꠣꠞ ꠝꠃꠞꠡꠤ ꠍꠣꠝꠣꠘꠣ ꠛꠦꠌꠣꠞ ꠐꠦꠇꠣ-ꠙꠄꠡꠣꠅ ꠙꠣꠁꠛ।
DEU 18:9 “ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠔꠥꠝꠞꠣꠞꠦ ꠎꠦ ꠖꠦꠡ ꠖꠤꠞꠣ, ꠢꠃ ꠖꠦꠡꠞ ꠛꠣꠡꠤꠘ꠆ꠖꠣ ꠅꠇꠟꠦ ꠎꠦꠟꠣ ꠎꠊꠁꠘ꠆ꠘ ꠘꠣꠚꠞꠝꠣꠘꠤ ꠇꠞꠂꠘ, ꠔꠥꠝꠞꠣ ꠁꠔꠣ ꠢꠤꠇꠤꠅ ꠘꠣ।
DEU 18:10 ꠔꠥꠝꠞꠣꠞ ꠝꠣꠎꠦ ꠎꠣꠘꠥ ꠁꠟꠣ ꠇꠥꠘꠥ ꠝꠣꠘꠥꠡ ꠘꠣ ꠝꠤꠟꠦ, ꠎꠦꠉꠥꠄ ꠔꠣꠞ ꠘꠤꠎꠞ ꠀꠅꠟꠣꠖꠞꠦ ꠀꠉꠥꠘꠤꠔ ꠚꠣꠟꠣꠁꠀ ꠛꠟꠤ ꠖꠦꠄ, ꠔꠣꠛꠎꠣꠔꠤ ꠝꠘꠔ꠆ꠞ ꠙꠠꠦ, ꠉꠘꠣ-ꠛꠣꠍꠣ ꠇꠞꠦ, ꠎꠣꠖꠥ-ꠐꠥꠘꠣ ꠇꠞꠦ,
DEU 18:11 ꠎꠦꠉꠥꠄ ꠔꠘꠔ꠆ꠞ-ꠝꠘꠔ꠆ꠞ ꠌꠣꠟꠣꠄ, ꠎꠤꠘ-ꠜꠥꠔ-ꠙꠦꠞꠔ ꠡꠣꠗꠘ ꠇꠞꠦ ꠀꠞ ꠝꠥꠞ꠆ꠖꠣꠞ ꠞꠥꠢꠖꠤ ꠀꠎꠤꠞꠣꠔ ꠇꠞꠦ।
DEU 18:12 ꠁꠔꠣ ꠘꠣꠚꠞꠝꠣꠘꠤ ꠇꠣꠝ ꠎꠦꠉꠥꠄ ꠇꠞꠦ, ꠝꠣꠛꠥꠖꠦ ꠔꠣꠞꠦ ꠊꠤꠘ ꠇꠞꠂꠘ। ꠅꠔꠣ ꠇꠣꠝ ꠇꠞꠣꠄ ꠝꠣꠛꠥꠖꠦ ꠢꠃ ꠎꠣꠔꠤ ꠅꠇꠟꠞꠦ, ꠔꠥꠝꠞꠣꠞ ꠍꠣꠝꠘꠦ ꠕꠣꠇꠤ ꠈꠦꠖꠣꠁ ꠖꠤꠞꠣ।
DEU 18:13 ꠄꠞꠟꠣꠉꠤ ꠔꠥꠝꠞꠣ ꠘꠤꠎꠞ ꠝꠣꠛꠥꠖ ꠀꠟ꠆ꠟꠣꠞ ꠍꠣꠝꠘꠦ ꠘꠤꠞ꠆ꠖꠥꠡꠤ ꠞꠁꠅ।”
DEU 18:14 ꠢꠎꠞꠔ ꠝꠥꠍꠣꠄ ꠀꠞꠅ ꠇꠁꠟꠣ, “ꠝꠘꠅ ꠞꠣꠈꠤꠅ, ꠔꠥꠝꠞꠣ ꠎꠦꠔꠣ ꠎꠣꠔꠤ ꠅꠇꠟꠞꠦ ꠈꠦꠖꠣꠁꠀ ꠖꠤꠞꠣꠄ, ꠁꠔꠣ ꠔ ꠎꠣꠖꠥꠉꠤꠞ ꠀꠞ ꠉꠘꠇ ꠅꠇꠟꠞ ꠇꠕꠣꠄ ꠌꠟꠦ, ꠅꠁꠟꠦ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠔꠥꠝꠞꠣꠞ ꠟꠣꠉꠤ ꠁꠔꠣ ꠘꠤꠡꠦꠗ ꠇꠞꠍꠂꠘ।
DEU 18:15 ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠔꠥꠝꠞꠣꠞ ꠡꠝꠣꠎ ꠕꠣꠇꠤ, ꠔꠥꠝꠞꠣꠞ ꠜꠣꠁꠀꠁꠘ꠆ꠔꠞ ꠝꠣꠎ ꠕꠣꠇꠤ, ꠀꠝꠣꠞ ꠟꠣꠈꠣꠘ ꠄꠇꠎꠘ ꠘꠛꠤ ꠙꠣꠑꠣꠁꠛꠣ, ꠔꠥꠝꠞꠣ ꠢꠇꠟ ꠄꠘ ꠢꠥꠇꠥꠝꠦ ꠌꠟꠔꠦ ꠅꠁꠛ।
DEU 18:16 ꠢꠃ ꠔꠥꠞ ꠙꠣꠠꠞ ꠗꠣꠞꠅ ꠔꠥꠝꠞꠣ ꠢꠇꠟ ꠎꠦ ꠖꠤꠘ ꠝꠣꠛꠥꠖꠞ ꠍꠣꠝꠘꠦ ꠀꠎꠤꠞ ꠅꠁꠍꠟꠣꠄ, ꠢꠃ ꠖꠤꠘ ꠔ ꠔꠥꠝꠞꠣ ꠀꠟ꠆ꠟꠣ ꠝꠣꠛꠥꠖꠞ ꠉꠦꠍꠦ ꠝꠣꠋꠉꠤꠀ ꠇꠁꠍꠟꠣꠄ, ꠀꠝꠞꠣ ꠀꠞ ꠀꠟ꠆ꠟꠣ ꠝꠣꠛꠥꠖꠞ ꠝꠥꠈꠞ ꠀꠅꠀꠎ ꠢꠥꠘꠔꠣꠝ ꠌꠣꠁ ꠘꠣ, ꠔꠣꠘ ꠘꠥꠞꠞ ꠀꠉꠥꠁꠘꠅ ꠀꠞ ꠖꠦꠈꠔꠣꠝ ꠌꠣꠁ ꠘꠣ, ꠀꠞꠘꠣꠄ ꠀꠝꠞꠣ ꠝꠞꠤꠎꠤꠝꠥ।
DEU 18:17 “ꠔꠦꠃ ꠝꠣꠛꠥꠖꠦ ꠀꠝꠣꠞꠦ ꠇꠁꠟꠣ, ꠔꠣꠞꠣ ꠑꠤꠇ ꠝꠣꠔꠃ ꠝꠣꠔꠤꠍꠂꠘ।
DEU 18:18 ꠀꠝꠤ ꠔꠣꠞꠣꠞ ꠟꠣꠉꠤ ꠔꠣꠞꠣꠞ ꠘꠤꠎꠞ ꠜꠣꠁꠀꠁꠘ ꠕꠣꠇꠤ ꠔꠥꠝꠣꠞ ꠟꠣꠈꠣꠘ ꠄꠇꠎꠘ ꠘꠛꠤ ꠙꠣꠑꠣꠁꠝꠥ, ꠄꠘ ꠝꠥꠈꠅ ꠀꠝꠣꠞ ꠇꠣꠟꠣꠝ ꠡꠞꠤꠚ ꠖꠤꠝꠥ, ꠀꠞ ꠀꠝꠤ ꠄꠘꠞꠦ ꠎꠦꠔꠣ ꠎꠦꠔꠣ ꠢꠤꠇꠣꠁ ꠖꠤꠝꠥ, ꠄꠁꠘ ꠔꠥꠝꠞꠣꠞꠦ ꠅꠔꠣ ꠎꠣꠘꠣꠁꠛꠣ।
DEU 18:19 ꠀꠞ ꠀꠝꠣꠞ ꠘꠣꠝ ꠟꠁꠀ ꠔꠣꠁꠘ ꠀꠝꠣꠞ ꠇꠣꠟꠣꠝ ꠅꠇꠟ ꠛꠣꠔꠣꠁꠛꠣ, ꠘꠣ-ꠝꠣꠘꠞꠣ ꠅꠇꠟꠞꠦ ꠀꠝꠤ ꠖꠣꠄꠁ ꠇꠞꠝꠥ।
DEU 18:20 ꠅꠁꠟꠦ ꠀꠝꠤ ꠎꠦꠔꠣ ꠇꠁꠍꠤ ꠘꠣ ꠇꠥꠘꠥ ꠘꠛꠤꠄ ꠎꠥꠖꠤ ꠛꠖ ꠡꠣꠅꠡ ꠇꠞꠤ ꠀꠝꠣꠞ ꠘꠣꠝꠦ ꠁꠟꠣ ꠇꠥꠘꠥ ꠇꠣꠟꠣꠝ ꠛꠣꠔꠣꠄ, ꠛꠣ ꠇꠥꠘꠥ ꠖꠦꠛ-ꠖꠦꠛꠤꠞ ꠘꠣꠝ ꠟꠁꠀ ꠁꠟꠣꠈꠣꠘ ꠝꠣꠔ ꠝꠣꠔꠦ, ꠔꠦ ꠢꠦ ꠝꠞꠔꠦꠃ ꠅꠁꠛ।
DEU 18:21 “ꠅꠈꠘ ꠇꠥꠘꠥ ꠛꠥꠟꠤ ꠢꠥꠘꠣꠞ ꠛꠣꠖꠦ ꠔꠥꠝꠞꠣꠞ ꠝꠘꠞ ꠝꠣꠎꠦ ꠌꠤꠘ꠆ꠔꠣ ꠀꠁꠔ ꠙꠣꠞꠦ, ꠁꠈꠣꠘ ꠝꠣꠛꠥꠖꠦ ꠛꠣꠔꠣꠁꠍꠂꠘ ꠇꠤ ꠘꠣ, ꠇꠤꠟꠣ ꠛꠥꠎꠝꠥ?
DEU 18:22 ꠄꠞꠟꠣꠉꠤ ꠢꠥꠘꠅ, ꠝꠣꠛꠥꠖꠞ ꠘꠣꠝ ꠟꠁꠀ ꠇꠥꠘꠥ ꠘꠛꠤꠄ ꠇꠥꠘ꠆ꠔꠣ ꠇꠅꠀꠞ ꠛꠣꠖꠦ ꠎꠥꠖꠤ ꠁꠔꠣ ꠘꠣ ꠚꠟꠦ, ꠛꠣ ꠅꠟꠣ ꠘꠣ ꠊꠐꠦ, ꠔꠦ ꠛꠥꠎꠤꠟꠤꠅ ꠁꠈꠣꠘ ꠝꠣꠛꠥꠖꠞ ꠇꠕꠣ ꠘꠣꠄ। ꠢꠃ ꠘꠛꠤꠄ ꠔꠣꠞ ꠛꠖ ꠡꠣꠅꠡꠦ ꠁꠔꠣ ꠇꠁꠍꠦ, ꠁꠟꠣꠈꠣꠘ ꠎꠘꠞꠦ ꠔꠥꠝꠞꠣ ꠒꠞꠣꠁꠅ ꠘꠣ।”
DEU 19:1 ꠝꠥꠍꠣ ꠘꠛꠤꠄ ꠔꠣꠞꠣꠞꠦ ꠀꠞꠅ ꠇꠁꠟꠣ, “ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠎꠦꠔꠣ ꠖꠦꠡꠞ ꠖꠈꠟꠖꠣꠞꠤ ꠖꠤꠞꠣ, ꠢꠘꠞ ꠛꠣꠡꠤꠘ꠆ꠖꠣ ꠅꠇꠟꠞꠦ ꠔꠣꠁꠘ ꠛꠤꠘꠣꠡ ꠇꠞꠤꠀ ꠢꠣꠞꠟꠦ, ꠔꠥꠝꠞꠣ ꠎꠦꠛꠟꠣ ꠔꠣꠞꠣꠞ ꠛꠣꠠꠤ-ꠊꠞ ꠀꠞ ꠐꠣꠃꠘꠅ ꠢꠣꠝꠣꠁꠀ ꠛꠡꠔ ꠇꠞꠛꠣꠄ,
DEU 19:2 ꠢꠃ ꠡꠝꠄ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠖꠦꠅꠀ ꠅꠃ ꠎꠝꠤꠘꠞꠦ ꠔꠤꠘ ꠛꠣꠐꠦ ꠛꠣꠐꠤꠅ, ꠀꠞ ꠄꠇꠐꠣ ꠄꠇꠐꠣ ꠇꠞꠤ ꠝꠥꠐ ꠔꠤꠘꠐꠣ ꠐꠣꠃꠘꠞꠦ ꠙꠍꠘ꠆ꠖ ꠇꠞꠤꠀ ꠀꠟꠉ ꠇꠞꠤꠅ, ꠀꠞ ꠅꠔꠣ ꠐꠣꠃꠘꠅ ꠎꠣꠁꠛꠣꠞ ꠟꠣꠉꠤ ꠞꠣꠡ꠆ꠔꠣ ꠎꠥꠁꠔ-ꠎꠣꠁꠔ ꠞꠣꠈꠤꠅ। ꠔꠦꠃ ꠔꠥꠝꠞꠣꠞ ꠝꠣꠎꠞ ꠇꠦꠃ ꠎꠥꠖꠤ ꠅꠘꠤꠌ꠆ꠍꠣꠄ ꠇꠦꠃꠞꠞꠦ ꠈꠥꠘ ꠇꠞꠤꠟꠣꠄ, ꠔꠦ ꠅꠃ ꠘꠝꠥꠘꠣꠞ ꠈꠥꠘꠤ ꠜꠣꠉꠤꠀ ꠉꠤꠀ ꠢꠃ ꠐꠣꠃꠘꠅ ꠛꠘꠛꠣꠡꠤ ꠅꠁꠀ ꠀꠡꠞꠄ ꠟꠁꠛ।
DEU 19:4 “ꠝꠘꠞ ꠝꠣꠎꠦ ꠇꠥꠘꠥꠎꠣꠔ ꠁꠋꠡꠣ-ꠖꠥꠡꠝꠘꠤ ꠍꠣꠠꠣ ꠁꠌ꠆ꠍꠣ ꠘꠣ ꠇꠞꠤꠀ ꠀꠈꠔꠣ ꠎꠥꠖꠤ ꠄꠇꠎꠘꠦ ꠀꠞꠇ ꠎꠘꠞꠦ ꠈꠥꠘ ꠇꠞꠤꠟꠣꠄ, ꠔꠦ ꠎꠣꠘ ꠛꠣꠌꠣꠘꠤꠞ ꠟꠣꠉꠤ ꠅꠃ ꠈꠥꠘꠤ ꠜꠣꠉꠤꠀ ꠉꠤꠀ ꠔꠣꠞ ꠇꠣꠘ꠆ꠖꠣ-ꠇꠣꠍꠣꠞ ꠛꠘꠛꠣꠡꠤ ꠐꠣꠃꠘꠅ ꠀꠡꠞꠄ ꠟꠁꠛ।
DEU 19:5 ꠝꠘꠅ ꠇꠞꠅ, ꠄꠇꠎꠘ ꠝꠣꠘꠥꠡ ꠖꠥꠍꠞꠣ ꠎꠘꠞ ꠟꠉ ꠅꠁꠀ ꠎꠋꠉꠟꠅ ꠟꠣꠇꠠꠤ ꠇꠣꠐꠣꠔ ꠉꠦꠟ, ꠉꠤꠀ ꠇꠥꠠꠣꠟꠖꠤ ꠉꠣꠍ ꠇꠣꠐꠤꠛꠣꠞ ꠛꠣꠟꠣ ꠀꠈꠔꠣꠃ ꠇꠥꠠꠣꠟꠞ ꠀꠍꠣꠞꠤ ꠕꠣꠇꠤ ꠇꠥꠠꠣꠟ ꠍꠥꠐꠤꠀ, ꠖꠥꠍꠞꠣ ꠎꠘꠞ ꠉꠔꠞꠅ ꠟꠣꠉꠤꠀ ꠢꠦ ꠝꠞꠤꠉꠦꠟ, ꠅꠃ ꠢꠣꠟꠔꠦ ꠈꠥꠘꠤ ꠉꠤꠀ ꠔꠣꠞ ꠇꠣꠘ꠆ꠖꠣ-ꠇꠣꠍꠣꠞ ꠀꠡꠞꠄ ꠐꠣꠃꠘꠅ ꠎꠣꠘ ꠛꠣꠌꠣꠘꠤꠞ ꠡꠥꠎꠥꠉ ꠙꠣꠁꠛ।
DEU 19:6 ꠀꠞꠘꠣꠄ ꠈꠥꠘꠞ ꠛꠖꠟꠣ ꠟꠅꠞꠣꠄ ꠉꠥꠍꠣ ꠇꠞꠤꠀ ꠛꠖꠟꠣ ꠟꠁꠛꠣꠞ ꠘꠤꠅꠔꠦ ꠅꠃ ꠝꠣꠘꠡꠞꠦ ꠗꠞꠔ ꠌꠣꠁꠛ, ꠀꠞ ꠎꠣꠘ ꠛꠣꠌꠣꠘꠤꠞ ꠀꠡꠞꠄ ꠐꠣꠃꠘ ꠗꠣꠞꠅ ꠘꠣ ꠞꠁꠟꠦ ꠔꠣꠞꠦ ꠗꠞꠤꠀ ꠝꠣꠞꠤꠟꠔ ꠙꠣꠞꠦ। ꠀꠍꠟꠦ ꠔ ꠢꠤ ꠛꠦꠐꠣꠄ ꠁꠌ꠆ꠍꠣ ꠇꠞꠤꠀ ꠈꠥꠘ ꠇꠞꠍꠦ ꠘꠣ, ꠢꠦ ꠡꠣꠎꠣ ꠙꠣꠁꠛꠣꠞ ꠇꠕꠣ ꠘꠣꠄ।
DEU 19:7 ꠄꠞꠟꠣꠉꠤ ꠀꠝꠤ ꠔꠥꠝꠞꠣꠞꠦ ꠢꠥꠇꠥꠝ ꠖꠤꠞꠣꠝ, ꠔꠥꠝꠞꠣꠞ ꠟꠣꠉꠤ ꠔꠤꠘꠐꠣ ꠀꠡꠞꠄ ꠐꠣꠃꠘ ꠀꠟꠉ ꠇꠞꠤ ꠞꠣꠈꠤꠅ।
DEU 19:8 “ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠔꠥꠝꠞꠣꠞ ꠛꠣꠚ-ꠖꠣꠖꠣꠞ ꠟꠉꠦ ꠇꠍꠝ ꠝꠣꠚꠤꠇ ꠎꠣꠉꠣ ꠛꠣꠠꠣꠁꠀ ꠎꠦꠛꠟꠣ ꠔꠥꠝꠞꠣꠞꠦ ꠀꠡ꠆ꠔꠣ ꠖꠦꠡꠞ ꠝꠣꠟꠤꠇꠣꠘꠣ ꠖꠤꠛꠣ,
DEU 19:9 ꠅꠃ ꠡꠝꠄ ꠔꠥꠝꠞꠣ ꠀꠞꠅ ꠔꠤꠘꠈꠣꠘ ꠀꠡꠞꠄ ꠐꠣꠃꠘ ꠀꠟꠉ ꠇꠞꠤ ꠞꠣꠈꠛꠣꠄ। ꠈꠣꠟꠤ ꠀꠁꠎ ꠀꠝꠤ ꠔꠥꠝꠞꠣꠞꠦ ꠎꠦꠔꠣ ꠢꠥꠇꠥꠝ ꠖꠤꠍꠤ ꠔꠥꠝꠞꠣ ꠎꠥꠖꠤ ꠈꠥꠛ ꠈꠤꠀꠟꠤ ꠅꠁꠀ ꠁꠔꠣ ꠝꠣꠘꠤꠀ ꠌꠟꠅ ꠀꠞ ꠎꠥꠖꠤ ꠢꠞ-ꠢꠣꠝꠦꠡꠣ ꠀꠟ꠆ꠟꠣꠞꠦ ꠝꠢꠛ꠆ꠛꠔ ꠇꠞꠅ ꠀꠞ ꠔꠣꠘ ꠙꠕꠦ ꠌꠟꠅ, ꠔꠦ ꠔꠣꠁꠘ ꠘꠤꠌ꠆ꠌꠄ ꠔꠥꠝꠞꠣꠞꠦ ꠀꠡ꠆ꠔꠣ ꠖꠦꠡꠞ ꠝꠣꠟꠤꠇꠣꠘꠣ ꠖꠤꠛꠣꠃ।
DEU 19:10 ꠅꠃ ꠀꠡꠞꠄ ꠐꠣꠃꠘ ꠞꠣꠈꠣꠞ ꠇꠣꠞꠘ ꠅꠁꠟ, ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠔꠥꠝꠞꠣꠞꠦ ꠎꠦ ꠖꠦꠡꠞ ꠝꠣꠟꠤꠇꠣꠘꠣ ꠖꠤꠞꠣ, ꠢꠃ ꠎꠝꠤꠘꠅ ꠎꠣꠘꠥ ꠇꠥꠘꠥ ꠘꠤ-ꠅꠙꠞꠣꠗꠤꠞ ꠟꠃ ꠘꠣ ꠙꠠꠦ, ꠀꠞ ꠔꠥꠝꠞꠣ ꠇꠥꠘꠥꠎꠣꠔ ꠈꠥꠘꠞ ꠖꠣꠄꠁ ꠘꠣ ꠅꠅ।
DEU 19:11 “ꠅꠁꠟꠦ ꠇꠦꠃ ꠎꠥꠖꠤ ꠞꠣꠉ-ꠉꠥꠍꠣ, ꠁꠋꠡꠣ ꠇꠞꠤꠀ ꠀꠞꠇ ꠎꠘꠞꠦ ꠈꠥꠘ ꠇꠞꠣꠞ ꠘꠤꠅꠔꠦ ꠃꠔ ꠙꠣꠔꠤꠀ ꠞꠄ, ꠛꠣꠖꠦ ꠢꠣꠝꠟꠣ ꠇꠞꠤꠀ ꠈꠥꠘ ꠇꠞꠤꠟꠣꠄ, ꠀꠞ ꠅꠃ ꠈꠥꠘꠤ ꠉꠤꠀ ꠇꠥꠘꠥ ꠀꠡꠞꠄ ꠐꠣꠃꠘꠅ ꠢꠣꠝꠣꠁ ꠎꠣꠄ,
DEU 19:12 ꠔꠦ ꠔꠣꠞ ꠉꠣꠃ ꠛꠣ ꠐꠣꠃꠘꠞ ꠝꠥꠞꠛ꠆ꠛꠤ-ꠡꠣꠟꠤꠡ ꠅꠇꠟꠦ, ꠝꠣꠘꠥꠡ ꠙꠣꠑꠣꠁꠀ ꠔꠣꠞꠦ ꠗꠞꠣꠁ ꠀꠘꠤꠀ, ꠅꠉꠥꠞꠦ ꠝꠣꠞꠤꠟꠣꠅꠀꠞ ꠟꠣꠉꠤ ꠈꠥꠘꠞ ꠛꠖꠟꠣ ꠟꠅꠞꠣꠞ ꠀꠔꠅ ꠡꠙꠤ ꠖꠤꠛꠣ।
DEU 19:13 ꠅꠃ ꠈꠥꠘꠤꠞꠦ ꠔꠥꠝꠞꠣ ꠇꠥꠘꠥ ꠖꠄꠀ-ꠝꠣꠄꠀ ꠇꠞꠤꠅ ꠘꠣ। ꠔꠥꠝꠞꠣ ꠛꠘꠤ ꠁꠍꠞꠣꠁꠟꠞ ꠝꠣꠎ ꠕꠣꠇꠤ ꠘꠤ-ꠅꠙꠞꠣꠗꠤꠞꠦ ꠈꠥꠘꠞ ꠖꠣꠄ-ꠜꠣꠞ ꠚꠥꠍꠤꠀ ꠚꠣꠟꠣꠁꠅ, ꠔꠦꠃ ꠔꠥꠝꠞꠣꠞ ꠜꠣꠟꠣꠁ ꠅꠁꠛ।
DEU 19:14 “ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠔꠥꠝꠞꠣꠞꠦ ꠎꠦ ꠖꠦꠡꠞ ꠖꠈꠟꠖꠣꠞꠤ ꠖꠤꠞꠣ, ꠢꠃ ꠖꠦꠡꠞ ꠎꠝꠤꠘꠞ ꠙꠥꠞꠣꠘ ꠀꠝꠟꠅ ꠉꠣꠠꠣ ꠀꠞꠤ-ꠚꠞꠤꠞ ꠇꠥꠘꠥ ꠡꠤꠝꠣꠘꠣ ꠈꠥꠐꠤ ꠃꠘ꠆ꠘꠁꠡ-ꠛꠤꠡ ꠇꠞꠤꠅ ꠘꠣ।
DEU 19:15 “ꠇꠦꠃꠞꠞ ꠛꠦꠙꠣꠞꠦ ꠇꠥꠘꠥꠎꠣꠔ ꠉꠥꠘꠣ ꠛꠣ ꠅꠙꠞꠣꠗꠞ ꠘꠣꠟꠤꠡ ꠀꠁꠟꠦ, ꠔꠦ ꠈꠣꠟꠤ ꠄꠇꠎꠘꠞ ꠡꠣꠇ꠆ꠇꠤ ꠢꠥꠘꠤꠀ ꠞꠣꠄ ꠖꠤꠅ ꠘꠣ, ꠖꠥꠁ ꠛꠣ ꠔꠤꠘ ꠎꠘꠞ ꠡꠣꠇ꠆ꠇꠤ ꠙꠞꠝꠣꠘ ꠟꠁꠀ ꠛꠤꠌꠣꠞ-ꠡꠣꠟꠤꠡꠞ ꠞꠣꠄ ꠖꠤꠅ।
DEU 19:16 “ꠇꠥꠘꠥ ꠝꠣꠘꠡꠦ ꠎꠥꠖꠤ ꠀꠞꠇ ꠎꠘꠞ ꠈꠦꠔꠤ ꠇꠞꠣꠞ ꠘꠤꠅꠔꠦ ꠇꠥꠘꠥ ꠘꠣꠟꠤꠡ ꠖꠦꠄ,
DEU 19:17 ꠔꠦ ꠅꠃ ꠛꠣꠖꠤ ꠀꠞ ꠛꠤꠛꠣꠖꠤ ꠖꠥꠁꠅ ꠙꠇ꠆ꠇ ꠢꠃ ꠀꠝꠟꠞ ꠢꠣꠇꠤꠝ ꠀꠞ ꠁꠝꠣꠝ ꠍꠣꠛ ꠅꠇꠟꠞ ꠉꠦꠍꠦ ꠉꠤꠀ ꠝꠣꠛꠥꠖꠞ ꠍꠣꠝꠘꠦ ꠀꠎꠤꠞ ꠅꠁꠛꠣ।
DEU 19:18 ꠛꠣꠖꠦ ꠡꠣꠟꠤꠡ ꠅꠇꠟꠦ ꠈꠥꠛ ꠈꠤꠀꠟ ꠇꠞꠤꠀ ꠁꠔꠣꠞ ꠔꠣꠟ꠆ꠟꠣꠡ ꠇꠞꠛꠣ, ꠔꠣꠟ꠆ꠟꠣꠡꠤ ꠇꠣꠟꠅ ꠎꠥꠖꠤ ꠗꠞꠣ ꠙꠠꠦ ꠢꠦ ꠔꠣꠞ ꠀꠙꠘ ꠎꠣꠔꠤꠞ ꠜꠣꠁꠞ ꠛꠦꠙꠣꠞꠦ ꠝꠤꠍꠣ ꠘꠣꠟꠤꠡ ꠖꠤꠍꠦ,
DEU 19:19 ꠔꠦ ꠅꠃ ꠘꠣꠟꠤꠡ ꠖꠤꠀ ꠢꠦ ꠢꠃ ꠎꠘꠞ ꠎꠦꠔꠣ ꠈꠦꠔꠤ ꠇꠞꠔ ꠌꠣꠁꠍꠤꠟ, ꠔꠥꠝꠞꠣ ꠅꠉꠥꠞ ꠅꠃꠟꠣ ꠈꠦꠔꠤ ꠇꠞꠤꠅ। ꠅꠃ ꠘꠝꠥꠘꠣꠄ ꠔꠥꠝꠞꠣ ꠘꠤꠎꠞ ꠡꠝꠣꠎ ꠕꠣꠇꠤ ꠘꠣꠚꠞꠝꠣꠘꠤꠞꠦ ꠚꠥꠍꠤꠀ ꠚꠣꠟꠣꠁꠅ।
DEU 19:20 ꠁꠔꠣ ꠢꠥꠘꠤꠀ ꠛꠣꠇꠤ ꠢꠇꠟ ꠛꠘꠤ ꠁꠍꠞꠣꠁꠟꠦ ꠒꠞꠣꠁꠛꠣ, ꠔꠦꠃ ꠁꠟꠣ ꠇꠣꠝ ꠀꠞ ꠇꠦꠃ ꠇꠞꠔ ꠘꠣꠄ।
DEU 19:21 ꠁꠟꠣ ꠅꠙꠞꠣꠗꠤꠞꠦ ꠔꠥꠝꠞꠣ ꠇꠥꠘꠥ ꠟꠣꠈꠣꠘ ꠖꠄꠀ-ꠝꠣꠄꠀ ꠇꠞꠤꠅ ꠘꠣ, ꠎꠣꠘꠞ ꠛꠖꠟꠣ ꠎꠣꠘ, ꠌꠃꠈꠞ ꠛꠖꠟꠣ ꠌꠃꠈ, ꠖꠣꠔꠞ ꠛꠖꠟꠣ ꠖꠣꠔ, ꠀꠔꠞ ꠛꠖꠟꠣ ꠀꠔ, ꠙꠣꠅꠞ ꠛꠖꠟꠣ ꠙꠣꠅ ꠀꠖꠣꠄ ꠇꠞꠤꠅ।
DEU 20:1 “ꠔꠥꠝꠞꠣꠞ ꠖꠥꠡꠝꠘꠞ ꠟꠉꠦ ꠟꠣꠠꠣꠁ ꠇꠞꠣꠔ ꠉꠤꠀ ꠎꠥꠖꠤ ꠖꠦꠈꠅ, ꠔꠣꠞꠣꠞ ꠊꠥꠠꠣ, ꠊꠥꠠꠣꠞ ꠉꠣꠠꠤ, ꠔꠣꠞꠣꠞ ꠍꠤꠙꠣꠁ ꠔꠥꠝꠞꠣ ꠕꠣꠇꠤ ꠛꠦꠡꠤ, ꠔꠦ ꠒꠞꠣꠁꠅ ꠘꠣ। ꠎꠣꠘ ꠔ, ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣ, ꠎꠦꠁꠘ ꠔꠥꠝꠞꠣꠞꠦ ꠝꠤꠡꠞ ꠖꠦꠡ ꠕꠣꠇꠤ ꠛꠣꠞ ꠇꠞꠤꠀ ꠀꠘꠍꠂꠘ, ꠔꠣꠁꠘ ꠘꠤꠎꠦ ꠔꠥꠝꠞꠣꠞ ꠟꠉꠦ ꠀꠍꠂꠘ।
DEU 20:2 ꠟꠣꠠꠣꠁꠞ ꠘꠤꠅꠔꠦ ꠛꠣꠞꠘꠤꠞ ꠀꠉꠦ ꠁꠝꠣꠝ ꠍꠣꠛꠦ ꠀꠁꠀ ꠍꠤꠙꠣꠁ ꠅꠇꠟꠞꠦ ꠇꠁꠛꠣ,
DEU 20:3 ꠅ ꠛꠘꠤ ꠁꠍꠞꠣꠁꠟ, ꠢꠥꠘꠅ, ꠔꠥꠝꠞꠣ ꠀꠁꠎ ꠔꠥꠝꠞꠣꠞ ꠖꠥꠡꠝꠘꠞ ꠟꠉꠦ ꠟꠣꠠꠣꠁ ꠇꠞꠣꠔ ꠎꠣꠁꠞꠣꠄ, ꠅꠈꠘ ꠔꠥꠝꠞꠣꠞ ꠝꠘꠞꠦ ꠇꠝꠎꠥꠞ ꠛꠣꠘꠣꠁꠅ ꠘꠣ, ꠒꠞꠣꠁꠅ ꠘꠣ, ꠒꠞꠣꠁꠀ ꠘꠤꠞꠣꠡ ꠅꠁꠅ ꠘꠣ, ꠖꠥꠡꠝꠘꠞ ꠒꠞꠦ ꠇꠣꠙꠤꠅ ꠘꠣ।
DEU 20:4 ꠖꠥꠡꠝꠘꠞ ꠟꠉꠦ ꠟꠣꠠꠣꠁꠔ ꠎꠤꠔꠣꠘꠤꠞ ꠟꠣꠉꠤ, ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣ ꠔ ꠔꠥꠝꠞꠣꠞ ꠟꠉꠦ ꠅꠁꠀ ꠎꠣꠁꠞꠣ।
DEU 20:5 “ꠛꠣꠖꠦ ꠔꠣꠞꠣꠞ ꠅꠚꠤꠡꠣꠞ ꠅꠇꠟ ꠀꠁꠀ ꠍꠤꠙꠣꠁ ꠅꠇꠟꠞꠦ ꠎꠤꠇꠣꠁꠛꠣ, ꠔꠥꠝꠞꠣꠞ ꠝꠣꠎꠦ ꠁꠟꠣ ꠇꠥꠘꠥ ꠍꠤꠙꠣꠁ ꠀꠍꠦ ꠘꠤ, ꠎꠦꠉꠥꠄ ꠘꠄꠀ ꠊꠞ ꠛꠣꠘꠣꠁꠀ ꠢꠣꠞꠤ, ꠅꠃ ꠊꠞꠅ ꠛꠡꠔ ꠇꠞꠣꠞ ꠟꠣꠉꠤ ꠖꠥꠀꠞ ꠅꠘꠥꠡ꠆ꠑꠣꠘ ꠛꠣꠇꠤ ꠞꠣꠈꠍꠦ? ꠔꠦ ꠔꠥꠝꠤ ꠘꠤꠎꠞ ꠛꠣꠠꠤꠔ ꠎꠣꠅꠉꠤ, ꠀꠞꠘꠣꠄ ꠟꠣꠠꠣꠁꠔ ꠉꠤꠀ ꠝꠞꠤꠉꠦꠟꠦ ꠖꠥꠍꠞꠣ ꠝꠣꠘꠥꠡ ꠀꠁꠀ ꠅꠃ ꠅꠘꠥꠡ꠆ꠑꠣꠘ ꠇꠞꠤꠟꠣꠁꠛ।
DEU 20:6 ꠀꠞ ꠇꠥꠘꠥ ꠍꠤꠙꠣꠁ ꠀꠍꠦ ꠘꠤ, ꠎꠦꠉꠥꠄ ꠀꠋꠉꠥꠞꠞ ꠛꠣꠉꠣꠘ ꠇꠞꠤꠀ ꠙꠄꠟꠣꠇꠥꠞ ꠚꠟ ꠘꠣ ꠈꠣꠁꠀ ꠟꠣꠠꠣꠁꠔ ꠀꠁꠍꠦ? ꠔꠦ ꠔꠥꠝꠤꠅ ꠛꠣꠠꠤꠔ ꠎꠣꠅꠉꠤ, ꠀꠞꠘꠣꠄ ꠟꠣꠠꠣꠁꠔ ꠉꠤꠀ ꠝꠞꠤꠉꠦꠟꠦ ꠖꠥꠍꠞꠣ ꠝꠣꠘꠡꠦ ꠀꠁꠀ ꠔꠥꠝꠣꠞ ꠛꠣꠉꠣꠘꠞ ꠚꠟ ꠈꠣꠁꠟꠤꠛ।
DEU 20:7 ꠀꠞ ꠔꠥꠝꠞꠣ ꠇꠦꠃꠞꠞ ꠀꠈꠔ ꠇꠞꠤꠀ ꠢꠣꠞꠤ ꠛꠣꠡꠞ ꠞꠣꠁꠔ ꠛꠣꠇꠤ ꠞꠁꠍꠦ ꠘꠤ? ꠔꠦ ꠔꠥꠝꠤꠅ ꠛꠣꠠꠤꠔ ꠎꠣꠅꠉꠤ, ꠀꠞꠘꠣꠄ ꠟꠣꠠꠣꠁꠔ ꠉꠤꠀ ꠝꠞꠤꠉꠦꠟꠦ ꠖꠥꠍꠞꠣ ꠛꠦꠐꠣꠄ ꠀꠁꠀ ꠅꠃ ꠇꠁꠘꠣꠞꠦ ꠛꠤꠀ ꠇꠞꠤꠟꠤꠛ।
DEU 20:8 ꠅꠃ ꠅꠚꠤꠡꠣꠞ ꠅꠇꠟꠦ ꠀꠞꠅ ꠎꠤꠇꠣꠁꠛꠣ, ꠔꠥꠝꠞꠣꠞ ꠝꠣꠎꠦ ꠁꠟꠣ ꠇꠥꠘꠥ ꠍꠤꠙꠣꠁ ꠀꠍꠦ ꠘꠤ, ꠎꠦꠉꠥꠞ ꠎꠣꠘꠅ ꠒꠞ ꠇꠞꠦꠞ, ꠝꠘꠦ ꠇꠣꠙꠦꠞ? ꠔꠦ ꠔꠥꠝꠤꠅ ꠔꠥꠝꠣꠞ ꠛꠣꠠꠤꠔ ꠎꠣꠅꠉꠤ, ꠀꠞꠘꠣꠄ ꠔꠥꠝꠣꠞꠦ ꠖꠦꠈꠤꠀ ꠟꠉꠞ ꠍꠤꠙꠣꠁ ꠅꠇꠟꠅ ꠇꠝꠎꠥꠞ ꠅꠁꠎꠤꠛꠣ।
DEU 20:9 ꠅꠃ ꠘꠝꠥꠘꠣꠄ ꠅꠚꠤꠡꠣꠞ ꠅꠇꠟꠞ ꠎꠤꠇꠣꠘꠤ ꠡꠦꠡ ꠅꠁꠟꠦ, ꠔꠣꠞꠣ ꠍꠤꠙꠣꠁ ꠖꠟ ꠅꠇꠟꠞ ꠃꠙꠞꠦ ꠇꠣꠝꠣꠘ꠆ꠒꠣꠞ ꠛꠅꠀꠁꠟ ꠇꠞꠛꠣ।
DEU 20:10 “ꠔꠥꠝꠞꠣ ꠇꠥꠘꠥ ꠉꠣꠃ ꠛꠣ ꠐꠣꠃꠘꠞ ꠟꠉꠦ ꠟꠣꠠꠣꠁ ꠇꠞꠣꠞ ꠘꠤꠅꠔꠦ ꠎꠦꠛꠟꠣ ꠢꠃ ꠎꠣꠉꠣꠞ ꠗꠣꠞꠅ ꠎꠣꠁꠛꠣꠄ, ꠉꠤꠀ ꠢꠘꠞ ꠝꠣꠘꠡꠞ ꠉꠦꠍꠦ ꠈꠛꠞꠤꠀ ꠙꠣꠑꠣꠁꠀ ꠇꠁꠅ, ꠔꠣꠞꠣ ꠎꠣꠘꠥ ꠀꠙꠥꠡꠦ ꠔꠥꠝꠞꠣꠞ ꠔꠣꠛꠦꠖꠣꠞꠤ ꠝꠣꠘꠤꠟꠣꠁꠘ।
DEU 20:11 ꠔꠣꠞꠣ ꠎꠥꠖꠤ ꠞꠣꠎꠤ ꠅꠁꠀ ꠐꠣꠃꠘꠅ ꠢꠣꠝꠣꠘꠤꠞ ꠉꠦꠁꠐ ꠈꠥꠟꠤꠀ ꠖꠤꠟꠣꠁꠘ, ꠔꠦ ꠔꠣꠞꠣ ꠢꠇꠟ ꠔꠥꠝꠞꠣꠞ ꠞꠣꠁꠅꠔ ꠛꠘꠤꠀ ꠈꠣꠎꠘꠣ ꠖꠤꠛꠣ ꠀꠞ ꠔꠥꠝꠞꠣꠞ ꠉꠥꠟꠣꠝꠤ ꠇꠞꠛꠣ।
DEU 20:12 ꠀꠞ ꠞꠣꠎꠤ ꠘꠣ ꠅꠁꠀ ꠟꠣꠠꠣꠁ ꠇꠞꠔ ꠌꠣꠁꠟꠦ, ꠔꠥꠝꠞꠣ ꠅꠃ ꠐꠣꠃꠘꠞꠦ ꠛꠦꠞꠤꠀ ꠞꠣꠈꠤꠅ।
DEU 20:13 ꠛꠣꠖꠦ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠢꠃ ꠎꠣꠉꠣꠞꠦ ꠔꠥꠝꠞꠣꠞ ꠀꠔꠅ ꠡꠙꠤꠀ ꠢꠣꠞꠟꠦ, ꠔꠥꠝꠞꠣ ꠢꠇꠟ ꠛꠦꠐꠣꠁꠘ꠆ꠔꠞꠦ ꠎꠣꠘꠦ ꠝꠣꠞꠤꠟꠤꠅ।
DEU 20:14 ꠅꠁꠟꠦ ꠢꠘꠞ ꠛꠦꠐꠤ ꠝꠣꠘꠥꠡ, ꠢꠥꠞꠥꠔ꠆ꠔꠣꠁꠘ, ꠙꠡꠥꠞ ꠙꠣꠟ ꠀꠞ ꠢꠃ ꠎꠣꠉꠣꠞ ꠢꠇ꠆ꠇꠟꠔꠣ ꠉꠘꠤꠝꠔꠞ ꠝꠣꠟ ꠢꠤꠡꠣꠛꠦ ꠔꠥꠝꠞꠣ ꠘꠤꠔꠣꠄ ꠙꠣꠞꠛꠣꠄ। ꠖꠥꠡꠝꠘꠞ ꠎꠝꠤꠘ ꠕꠣꠇꠤ ꠉꠘꠤꠝꠔꠞ ꠝꠣꠟ ꠢꠤꠡꠣꠛꠦ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠔꠥꠝꠞꠣꠞꠦ ꠎꠔꠔꠣ ꠖꠣꠘ ꠇꠞꠛꠣ, ꠁꠔꠣ ꠔꠥꠝꠞꠣ ꠜꠥꠉ-ꠖꠈꠟ ꠇꠞꠔꠣꠄ ꠙꠣꠞꠛꠣꠄ।
DEU 20:15 ꠎꠦꠔꠣ ꠐꠣꠃꠘ ꠅꠇꠟ ꠔꠥꠝꠞꠣꠞ ꠖꠦꠡ ꠕꠣꠇꠤ ꠛꠣꠇ꠆ꠇꠣ ꠖꠥꠞꠁ ꠀꠞ ꠔꠥꠝꠞꠣꠞ ꠇꠣꠘ꠆ꠖꠣ-ꠇꠣꠍꠣꠞ ꠎꠣꠔꠤ ꠅꠇꠟꠞ ꠐꠣꠃꠘ ꠘꠣꠄ, ꠅꠔꠣ ꠐꠣꠃꠘꠞ ꠝꠣꠘꠡꠞ ꠟꠉꠦ ꠅꠃ ꠟꠣꠈꠣꠘ ꠛꠦꠛꠢꠣꠞ ꠇꠞꠤꠅ।
DEU 20:16 “ꠅꠁꠟꠦ ꠔꠥꠝꠞꠣꠞ ꠇꠣꠘ꠆ꠖꠣ-ꠇꠣꠍꠣꠞ ꠎꠦꠔꠣ ꠎꠣꠔꠤ ꠅꠇꠟꠞꠦ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠔꠥꠝꠞꠣꠞ ꠀꠔꠅ ꠖꠤꠞꠣ, ꠁꠔꠣ ꠇꠥꠘꠥꠉꠥꠞꠦꠃ ꠎꠤꠘ꠆ꠖꠣ ꠞꠣꠈꠤꠅ ꠘꠣ।
DEU 20:17 ꠔꠥꠝꠞꠣ ꠘꠤꠎꠞ ꠝꠣꠛꠥꠖ ꠀꠟ꠆ꠟꠣꠞ ꠢꠥꠇꠥꠝ ꠝꠣꠚꠤꠇ, ꠢꠤꠐ꠆ꠐꠤ, ꠀꠝꠥꠞꠤ, ꠇꠦꠘꠣꠘꠤ, ꠚꠣꠞꠤꠎꠤ, ꠢꠤꠛ꠆ꠛꠤ ꠀꠞ ꠎꠤꠛꠥꠎꠤ ꠅꠇꠟꠞꠦ ꠙꠥꠞꠣꠙꠥꠞ ꠘꠤꠙꠣꠔ ꠇꠞꠛꠣꠄ।
DEU 20:18 ꠀꠞꠘꠣꠄ ꠔꠣꠞꠣ ꠘꠤꠎꠞ ꠖꠦꠛ-ꠖꠦꠛꠤꠞꠦ ꠙꠥꠎꠣ ꠇꠞꠣꠞ ꠛꠣꠟꠣ ꠎꠔ ꠎꠊꠁꠘ꠆ꠘ ꠘꠣꠚꠞꠝꠣꠘꠤ ꠇꠞꠂꠘ, ꠔꠣꠞꠣꠞ ꠅꠔꠣ ꠔꠥꠝꠞꠣꠅ ꠢꠤꠇꠤꠛꠣꠄ, ꠢꠤꠇꠤꠀ ꠘꠤꠎꠞ ꠝꠣꠛꠥꠖ ꠀꠟ꠆ꠟꠣꠞ ꠖꠞꠛꠣꠞꠅ ꠉꠥꠘꠣꠞ ꠇꠣꠝ ꠇꠞꠛꠣꠄ।
DEU 20:19 “ꠇꠥꠘꠥ ꠉꠣꠃ ꠛꠣ ꠐꠣꠃꠘꠞ ꠟꠉꠦ ꠟꠣꠠꠣꠁꠔ ꠉꠤꠀ ꠔꠥꠝꠞꠣ ꠎꠦꠛꠟꠣ ꠛꠃꠔ ꠟꠣꠝ꠆ꠛꠣ ꠡꠝꠄ ꠗꠞꠤ ꠛꠦꠞꠤꠀ ꠞꠣꠈꠅ, ꠅꠃ ꠡꠝꠄ ꠢꠘꠞ ꠚꠟꠖꠣꠞ ꠇꠥꠘꠥꠎꠣꠔ ꠉꠣꠍ-ꠙꠣꠟꠣ ꠇꠥꠠꠣꠟꠖꠤ ꠇꠣꠐꠤꠅ ꠘꠣ। ꠔꠥꠝꠞꠣ ꠁꠔꠣꠞ ꠚꠟ ꠈꠣꠁꠅ, ꠅꠁꠟꠦ ꠉꠣꠍ ꠇꠣꠐꠤꠅ ꠘꠣ। ꠉꠣꠍ-ꠉꠣꠍꠣꠟꠤ ꠔ ꠔꠥꠝꠞꠣꠞ ꠖꠥꠡꠝꠘ ꠘꠣꠄ ꠎꠦꠘ ꠅꠔꠣꠞꠦ ꠢꠣꠝꠟꠣ ꠇꠞꠔꠣꠄ।
DEU 20:20 ꠔꠣ-ꠅ ꠎꠦꠔꠣ ꠉꠣꠍ ꠇꠥꠘꠥ ꠚꠟ-ꠚꠟꠣꠖꠤꠞ ꠉꠣꠍ ꠘꠣꠄ, ꠁꠔꠣ ꠇꠣꠐꠤꠀ ꠢꠘꠞ ꠛꠣꠡꠤꠘ꠆ꠖꠣ ꠅꠇꠟꠞꠦ ꠟꠣꠠꠣꠁꠔ ꠀꠞꠣꠘꠤꠞ ꠀꠉ ꠙꠞ꠆ꠎꠘ꠆ꠔ, ꠅꠔꠣ ꠖꠤꠀ ꠀꠔꠤꠀꠞ ꠛꠣꠘꠣꠁꠀ ꠢꠣꠝꠟꠣ ꠇꠞꠔꠣꠄ ꠙꠣꠞꠛꠣꠄ।
DEU 21:1 “ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠔꠥꠝꠞꠣꠞꠦ ꠎꠦ ꠖꠦꠡꠞ ꠖꠈꠟꠖꠣꠞꠤ ꠖꠤꠞꠣ, ꠢꠘꠅ ꠛꠘ꠆ꠖꠞ ꠝꠣꠎꠦ ꠎꠥꠖꠤ ꠇꠥꠘꠥ ꠝꠣꠘꠡꠞ ꠟꠣꠡ ꠙꠠꠤ ꠞꠁꠍꠦ ꠖꠦꠈꠣ ꠎꠣꠄ, ꠀꠞ ꠔꠣꠞ ꠈꠥꠘꠤꠞ ꠇꠥꠘꠥ ꠙꠞꠤꠌꠄ ꠘꠣ ꠝꠤꠟꠦ,
DEU 21:2 ꠔꠦ ꠔꠥꠝꠞꠣꠞ ꠝꠄ-ꠝꠥꠞꠛ꠆ꠛꠤ ꠀꠞ ꠢꠣꠇꠤꠝ-ꠡꠣꠟꠤꠡ ꠅꠇꠟ ꠛꠣꠞ ꠅꠁ ꠀꠁꠀ, ꠝꠣꠙꠤꠀ ꠖꠦꠈꠛꠣ ꠅꠃ ꠟꠣꠡꠞ ꠉꠦꠍ ꠕꠣꠇꠤ ꠇꠥꠘ ꠉꠣꠃ ꠇꠔꠈꠣꠘ ꠖꠥꠞꠁ।
DEU 21:3 ꠖꠦꠈꠤꠀ ꠢꠇꠟ ꠕꠣꠇꠤ ꠇꠣꠍꠣꠞ ꠉꠣꠃꠞ ꠝꠥꠞꠛ꠆ꠛꠤ ꠅꠇꠟꠦ ꠅꠃ ꠟꠣꠈꠣꠘ ꠄꠇ ꠉꠣꠁ-ꠛꠣꠍꠥꠞ ꠙꠍꠘ꠆ꠖ ꠇꠞꠛꠣ, ꠎꠦꠐꠣ ꠖꠤꠀ ꠇꠥꠘꠥꠎꠣꠔ ꠇꠣꠝ-ꠇꠣꠎ, ꠀꠟ-ꠌꠣꠡ ꠇꠞꠣ ꠅꠁꠍꠦ ꠘꠣ।
DEU 21:4 ꠛꠣꠖꠦ ꠢꠘꠞ ꠝꠥꠞꠛ꠆ꠛꠤ ꠅꠇꠟꠦ ꠅꠃ ꠛꠣꠍꠥꠞ ꠟꠁꠀ ꠅꠝꠘ ꠄꠇ ꠎꠣꠉꠣꠔ ꠎꠣꠁꠛꠣ, ꠎꠦꠈꠣꠘꠅ ꠙꠣꠘꠤꠞ ꠚꠥꠔ ꠀꠟꠣ ꠈꠣꠟ ꠀꠍꠦ, ꠀꠞ ꠈꠣꠟꠞ ꠙꠣꠞꠞ ꠎꠝꠤꠘꠅ ꠇꠥꠘꠥꠎꠣꠔ ꠀꠟ-ꠌꠣꠡ ꠛꠣ ꠀꠟꠤ ꠚꠣꠟꠣꠁꠟ ꠅꠁꠍꠦ ꠘꠣ। ꠢꠘꠅ ꠉꠤꠀ ꠅꠃ ꠛꠣꠍꠥꠞꠞ ꠉꠞ꠆ꠖꠘꠣ ꠜꠣꠋꠉꠤꠟꠤꠛꠣ।
DEU 21:5 ꠛꠣꠖꠦ ꠟꠦꠛꠤ ꠈꠣꠘ꠆ꠖꠣꠘꠞ ꠁꠝꠣꠝ ꠅꠇꠟ ꠅꠃ ꠎꠣꠉꠣꠔ ꠀꠁꠛꠣ। ꠇꠣꠞꠘ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠔꠣꠞꠣꠞꠦ ꠙꠍꠘ꠆ꠖ ꠇꠞꠍꠂꠘ, ꠔꠣꠘ ꠄꠛꠣꠖꠔ-ꠛꠘ꠆ꠖꠦꠉꠤ ꠇꠞꠣ, ꠔꠣꠘ ꠘꠣꠝꠦ ꠝꠣꠘꠡꠞ ꠟꠣꠉꠤ ꠖꠥꠀ-ꠖꠥꠞꠥꠖ ꠇꠞꠣ, ꠀꠞ ꠢꠇꠟ ꠘꠝꠥꠘꠣꠞ ꠚꠤꠔꠘꠣ-ꠚꠍꠣꠖ, ꠝꠣꠞꠣ-ꠝꠣꠞꠤꠞ ꠛꠤꠌꠣꠞ ꠇꠞꠣꠞ ꠟꠣꠉꠤ।
DEU 21:6 ꠛꠣꠍꠥꠞꠞ ꠉꠞ꠆ꠖꠘꠣ ꠜꠣꠋꠉꠤꠀ ꠢꠣꠞꠟꠦ ꠇꠣꠘ꠆ꠖꠣ-ꠇꠣꠍꠣꠞ ꠉꠣꠃꠞ ꠢꠃ ꠝꠥꠞꠛ꠆ꠛꠤ ꠅꠇꠟꠦ, ꠅꠃ ꠈꠣꠟꠞ ꠙꠣꠘꠤꠖꠤ ꠛꠣꠍꠥꠞꠞ ꠃꠙꠞꠦ ꠔꠣꠞꠣꠞ ꠀꠔ ꠗꠁꠛꠣ।
DEU 21:7 ꠗꠁꠀ ꠇꠁꠛꠣ, ꠅꠃ ꠝꠣꠘꠥꠡ ꠈꠥꠘ ꠅꠁꠔꠦ ꠀꠝꠞꠣ ꠇꠦꠃ ꠖꠦꠈꠍꠤ ꠘꠣ, ꠀꠝꠞꠣꠞ ꠀꠔꠦ ꠔꠣꠞꠦ ꠝꠣꠞꠍꠤꠅ ꠘꠣ।
DEU 21:8 ꠅ ꠝꠣꠛꠥꠖ, ꠔꠥꠝꠣꠞ ꠀꠎꠣꠖ ꠇꠞꠣ ꠛꠘꠤ ꠁꠍꠞꠣꠁꠟꠞꠦ ꠔꠥꠝꠤ ꠅꠈꠘ ꠝꠣꠚꠤ ꠖꠦꠅ, ꠈꠥꠘ ꠅꠀ ꠅꠃ ꠘꠤ-ꠅꠙꠞꠣꠗꠤ ꠎꠘꠞ ꠟꠣꠉꠤ ꠔꠥꠝꠣꠞ ꠁ ꠛꠘ꠆ꠖꠣ ꠅꠇꠟꠞꠦ ꠔꠥꠝꠤ ꠖꠣꠄꠁ ꠇꠞꠤꠅ ꠘꠣ। ꠅꠈꠣꠘ ꠇꠁꠀ ꠢꠣꠞꠟꠦ ꠢꠃ ꠈꠥꠘꠞ ꠖꠣꠄ ꠕꠣꠇꠤ ꠔꠣꠞꠣ ꠞꠦꠢꠣꠁ ꠙꠣꠁꠛꠣ।
DEU 21:9 ꠅꠃ ꠘꠝꠥꠘꠣꠄ ꠔꠥꠝꠞꠣꠞ ꠡꠝꠣꠎ ꠕꠣꠇꠤ ꠘꠤ-ꠅꠙꠞꠣꠗꠤ ꠝꠣꠘꠡꠞ ꠈꠥꠘꠞ ꠖꠣꠄ-ꠜꠣꠞ ꠢꠞꠣꠁꠔꠣꠄ ꠙꠣꠞꠛꠣꠄ, ꠇꠣꠞꠘ ꠀꠟ꠆ꠟꠣ ꠝꠣꠛꠥꠖꠦ ꠎꠦꠟꠣ ꠙꠍꠘ꠆ꠖ ꠇꠞꠂꠘ, ꠔꠥꠝꠞꠣ ꠅꠟꠣꠃ ꠇꠞꠍ।
DEU 21:10 “ꠖꠥꠡꠝꠘꠞ ꠟꠉꠦ ꠟꠣꠠꠣꠁꠔ ꠉꠤꠀ ꠢꠣꠞꠟꠦ, ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠎꠦꠛꠟꠣ ꠖꠥꠡꠝꠘ ꠅꠇꠟꠞꠦ ꠔꠥꠝꠞꠣꠞ ꠀꠔꠅ ꠡꠙꠤꠀ ꠖꠤꠛꠣ, ꠀꠞ ꠔꠥꠝꠞꠣ ꠔꠣꠞꠣꠞꠦ ꠛꠘ꠆ꠖꠤ ꠇꠞꠛꠣꠄ,
DEU 21:11 ꠅꠃ ꠡꠝꠄ ꠔꠣꠞꠣꠞ ꠝꠣꠎꠞ ꠇꠥꠘꠥ ꠡꠥꠘ꠆ꠖꠞꠤ ꠛꠦꠐꠤꠞꠦ ꠖꠦꠈꠤꠀ ꠔꠥꠝꠞꠣꠞ ꠝꠣꠎꠦ ꠇꠦꠃ ꠎꠥꠖꠤ ꠀꠡꠤꠇ ꠛꠘꠤꠎꠣꠄ, ꠀꠞ ꠅꠃ ꠛꠦꠐꠤꠞꠦ ꠛꠤꠀ ꠇꠞꠣꠞ ꠈꠤꠀꠟ ꠅꠄ,
DEU 21:12 ꠔꠦ ꠔꠣꠁꠞꠦ ꠘꠤꠎꠞ ꠛꠣꠠꠤꠔ ꠀꠘꠛꠣꠄ। ꠛꠣꠖꠦ ꠔꠣꠁ ꠘꠤꠎꠞ ꠝꠣꠕꠣꠞ ꠌꠥꠟ ꠇꠣꠝꠣꠁꠛ, ꠘꠃꠇ ꠇꠣꠐꠤꠛ,
DEU 21:13 ꠀꠞ ꠛꠘ꠆ꠖꠤ ꠇꠣꠟꠤꠘ ꠢꠣꠟꠔꠞ ꠇꠣꠙꠠ-ꠌꠥꠙꠠ ꠚꠣꠟꠣꠁꠀ, ꠔꠥꠝꠣꠞ ꠛꠣꠠꠤꠔ ꠞꠁꠀ ꠔꠣꠁꠞ ꠝꠣ-ꠛꠣꠚꠞ ꠟꠣꠉꠤ ꠙꠥꠞꠣ ꠄꠇ ꠝꠣꠡ ꠇꠣꠘ꠆ꠖꠣ-ꠇꠣꠐꠤ, ꠀꠢꠣꠎꠣꠞꠤ ꠇꠞꠛ। ꠅꠃ ꠄꠇ ꠝꠣꠡ ꠛꠣꠖꠦ ꠔꠣꠁꠞꠦ ꠛꠤꠀ ꠇꠞꠤꠀ ꠢꠣꠞꠟꠦ, ꠔꠥꠝꠞꠣ ꠎꠣꠝꠣꠁ-ꠛꠃ ꠅꠁꠛꠣꠄ।
DEU 21:14 ꠛꠤꠀ-ꠡꠣꠖꠤꠞ ꠛꠣꠖꠦ ꠎꠥꠖꠤ ꠔꠥꠝꠤ ꠅꠃ ꠛꠦꠐꠤꠞ ꠃꠙꠞꠦ ꠈꠥꠡꠤ ꠘꠣ ꠅꠅ, ꠔꠦ ꠔꠣꠁꠞꠦ ꠔꠣꠁꠞ ꠈꠥꠡꠤ ꠝꠣꠚꠤꠇ ꠍꠣꠠꠤ ꠖꠤꠔꠦ ꠅꠁꠛ। ꠔꠣꠁꠞꠦ ꠛꠣꠘ꠆ꠖꠤ ꠢꠤꠡꠣꠛꠦ ꠞꠣꠈꠣ ꠛꠣ ꠛꠦꠌꠣꠞ ꠄꠈꠔꠤꠀꠞ ꠔꠥꠝꠣꠞ ꠘꠣꠁ, ꠇꠣꠞꠘ ꠔꠥꠝꠤ ꠔꠣꠁꠞ ꠁꠎ꠆ꠎꠔ ꠘꠡ꠆ꠐ ꠇꠞꠍ।
DEU 21:15 “ꠇꠥꠘꠥ ꠛꠦꠐꠣꠞ ꠎꠥꠖꠤ ꠖꠥꠁ ꠛꠃ ꠅꠄ, ꠀꠞ ꠛꠦꠐꠣꠄ ꠄꠇ ꠛꠃꠞꠦ ꠝꠣꠄꠀ ꠇꠞꠦ, ꠖꠥꠍꠞꠣ ꠛꠃꠞꠦ ꠝꠣꠄꠀ ꠘꠣ ꠇꠞꠦ। ꠅꠃ ꠖꠥꠁꠅ ꠛꠃꠞ ꠊꠞꠅ ꠎꠥꠖꠤ ꠙꠥꠀꠂꠘ ꠅꠁꠘ, ꠄꠞ ꠝꠣꠎꠞ ꠛꠠ ꠙꠥꠀ ꠎꠥꠖꠤ ꠢꠃ ꠝꠣꠄꠀ ꠘꠣ ꠇꠞꠣ ꠛꠃꠞ ꠊꠞꠅ ꠅꠄ,
DEU 21:16 ꠔꠦ ꠔꠣꠘ ꠎꠝꠤ-ꠝꠤꠞꠣꠡ ꠛꠣꠐꠤꠀ ꠖꠤꠛꠣꠞ ꠇꠣꠟꠅ, ꠔꠣꠘ ꠝꠣꠄꠀꠞ ꠛꠃꠞ ꠊꠞꠞ ꠙꠥꠀꠞꠦ ꠛꠠ ꠙꠥꠀꠞ ꠢꠇ ꠖꠤꠔꠣ ꠙꠣꠞꠔꠣ ꠘꠣꠄ।
DEU 21:17 ꠛꠞꠋ ꠛꠠ ꠙꠥꠀꠞꠦ ꠔꠣꠘ ꠅꠁꠘ꠆ꠘ ꠙꠥꠀꠂꠘ ꠕꠣꠇꠤ ꠒꠣꠛꠟ ꠖꠤꠔꠦ ꠅꠁꠛ। ꠢꠦ ꠔ ꠅꠁꠟ ꠔꠣꠘ ꠎꠥꠀꠘꠇꠤꠞ ꠙꠄꠟꠣ ꠚꠟ, ꠛꠠ ꠙꠥꠔꠞ ꠖꠣꠛꠤꠖꠣꠞ ꠈꠣꠟꠤ ꠢꠦ-ꠃ।
DEU 21:18 “ꠇꠦꠃꠞꠞ ꠇꠥꠘꠥ ꠙꠥꠀꠄ ꠎꠥꠖꠤ ꠝꠣ-ꠛꠣꠚꠞ ꠇꠕꠣ ꠘꠣ ꠢꠥꠘꠦ, ꠝꠣ-ꠛꠣꠚꠞ ꠢꠥꠇꠥꠝꠞ ꠃꠟꠐꠣ ꠌꠟꠦ, ꠔꠣꠞꠣꠞ ꠛꠥꠎ-ꠡꠣꠡꠘ ꠘꠣ ꠝꠣꠘꠤꠀ ꠇꠥ-ꠙꠕꠦ ꠎꠣꠄꠉꠤ,
DEU 21:19 ꠔꠦ ꠔꠣꠞ ꠝꠣ-ꠛꠣꠚꠦ ꠔꠣꠞꠦ ꠗꠞꠤꠀ ꠝꠥꠞꠛ꠆ꠛꠤ ꠅꠇꠟꠞ ꠉꠦꠍꠦ ꠘꠤꠛꠣ, ꠔꠣꠞꠣꠞ ꠉꠣꠃ ꠛꠣ ꠐꠣꠃꠘꠅ ꠢꠣꠝꠣꠘꠤꠞ ꠉꠦꠁꠐꠞ ꠉꠦꠍꠦ ꠙꠣꠁꠘ꠆ꠌꠣꠁꠔꠤ ꠛꠂꠑꠇ ꠈꠣꠘꠣꠔ ꠘꠤꠛꠣ।
DEU 21:20 ꠘꠤꠀ ꠢꠃ ꠝꠥꠞꠛ꠆ꠛꠤ ꠅꠇꠟꠞꠦ ꠇꠁꠛꠣ, ꠀꠝꠞꠣꠞ ꠅꠃ ꠙꠥꠀ ꠈꠥꠛ ꠘꠣꠚꠞꠝꠣꠘ ꠀꠞ ꠇꠥ-ꠙꠕꠤ ꠛꠘꠤꠉꠦꠍꠦ, ꠢꠦ ꠀꠝꠞꠣꠞ ꠇꠕꠣ ꠝꠣꠘꠦ ꠘꠣ, ꠝꠖ ꠈꠣꠁꠀ ꠝꠣꠔꠟꠣꠝꠤ ꠇꠞꠦ, ꠀꠞ ꠐꠦꠇꠣ-ꠙꠄꠡꠣ ꠃꠠꠣꠄ।
DEU 21:21 ꠔꠦꠃ ꠢꠃ ꠐꠣꠃꠘꠞ ꠢꠇꠟ ꠛꠦꠐꠣꠁꠘ꠆ꠔꠦ ꠙꠣꠔ꠆ꠔꠞ ꠝꠣꠞꠤꠀ ꠔꠣꠞꠦ ꠎꠣꠘꠦ ꠝꠣꠞꠤꠟꠤꠛꠣ। ꠅꠃ ꠘꠝꠥꠘꠣꠄ ꠔꠥꠝꠞꠣꠞ ꠝꠣꠎ ꠕꠣꠇꠤ ꠅꠟꠣꠈꠣꠘ ꠘꠣꠚꠞꠝꠣꠘꠤ ꠚꠥꠍꠤꠀ ꠚꠣꠟꠣꠁꠛꠣꠄ। ꠀꠞ ꠁꠔꠣ ꠢꠥꠘꠤꠀ ꠢꠇꠟ ꠛꠘꠤ ꠁꠍꠞꠣꠁꠟꠦ ꠒꠞꠣꠁꠛꠣ।
DEU 21:22 “ꠇꠥꠘꠥ ꠝꠣꠘꠡꠦ ꠎꠥꠖꠤ ꠝꠃꠔꠞ ꠡꠣꠎꠣ ꠙꠣꠅꠀꠞ ꠎꠥꠇꠣ ꠅꠙꠞꠣꠗ ꠇꠞꠦ, ꠀꠞ ꠔꠣꠞꠦ ꠝꠣꠞꠣꠞ ꠛꠣꠖꠦ ꠟꠣꠡ ꠉꠣꠍꠅ ꠟꠐꠇꠣꠁꠟ ꠅꠄ,
DEU 21:23 ꠔꠦ ꠔꠣꠞ ꠟꠣꠡꠞꠦ ꠞꠣꠁꠔ ꠙꠞ꠆ꠎꠘ꠆ꠔ ꠉꠣꠍꠅ ꠟꠐꠇꠣꠁꠀ ꠞꠣꠈꠤꠅ ꠘꠣ, ꠖꠤꠘ ꠕꠣꠇꠔꠦꠃ ꠔꠣꠞꠦ ꠝꠣꠐꠤ ꠖꠤꠟꠣꠁꠅ। ꠎꠣꠘ ꠔ, ꠉꠣꠍꠅ ꠟꠐꠇꠣꠁꠟ ꠝꠣꠘꠥꠡ ꠀꠟ꠆ꠟꠣꠞ ꠟꠣꠘ꠆ꠘꠔꠤ। ꠈꠤꠀꠟ ꠞꠣꠈꠤꠅ, ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠔꠥꠝꠞꠣꠞꠦ ꠎꠦ ꠖꠦꠡꠞ ꠝꠣꠟꠤꠇꠣꠘꠣ ꠖꠤꠞꠣ, ꠁꠔꠣ ꠔꠥꠝꠞꠣ ꠘꠣꠙꠣꠇ ꠛꠣꠘꠣꠁꠅ ꠘꠣ।
DEU 22:1 “ꠔꠥꠝꠞꠣꠞ ꠎꠣꠔꠤꠞ ꠇꠥꠘꠥ ꠜꠣꠁꠞ ꠉꠞꠥ-ꠍꠣꠉꠟ ꠎꠥꠖꠤ ꠙꠕ ꠀꠞꠣꠁꠀ ꠎꠣꠅꠀꠔ ꠖꠦꠈꠅ, ꠔꠦ ꠔꠥꠝꠞꠣ ꠘꠤꠞꠣꠁ ꠘꠣ ꠕꠣꠇꠤꠀ, ꠁꠐꠣꠞꠦ ꠚꠤꠞꠣꠁꠀ ꠀꠘꠤꠀ ꠔꠣꠞ ꠝꠣꠟꠤꠇꠞ ꠉꠦꠍꠦ ꠖꠤꠅ।
DEU 22:2 ꠅꠃ ꠝꠣꠟꠤꠇ ꠎꠥꠖꠤ ꠔꠥꠝꠞꠣꠞ ꠗꠣꠞꠅ-ꠇꠣꠍꠞ ꠘꠣ ꠅꠄ, ꠛꠣ ꠅꠌꠤꠘꠣ ꠇꠥꠘꠥ ꠎꠘ ꠅꠄ, ꠔꠦ ꠁꠐꠣ ꠔꠥꠝꠞꠣ ꠘꠤꠎꠞ ꠛꠣꠠꠤꠔ ꠘꠤꠛꠣꠄꠉꠤ, ꠛꠣꠖꠦ ꠢꠦ ꠎꠦꠛꠟꠣ ꠔꠥꠇꠣꠘꠤꠔ ꠀꠁꠛ ꠅꠃ ꠡꠝꠄ ꠔꠣꠞꠦ ꠖꠤꠛꠣꠄ।
DEU 22:3 ꠔꠥꠝꠞꠣꠞ ꠎꠣꠔꠤꠞ ꠇꠥꠘꠥ ꠜꠣꠁꠞ ꠉꠣꠗꠣ, ꠔꠣꠞ ꠚꠤꠘ꠆ꠘꠞ ꠇꠣꠙꠠ, ꠛꠣ ꠔꠣꠞ ꠀꠞꠣꠁꠟ ꠎꠦꠇꠥꠘꠥ ꠍꠣꠝꠣꠘꠣ ꠙꠣꠁꠟꠦ ꠔꠥꠝꠞꠣ ꠅꠟꠣ ꠇꠞꠤꠅ, ꠘꠤꠞꠣꠁ ꠢꠞꠤꠀ ꠎꠣꠁꠅ ꠘꠣ।
DEU 22:4 “ꠔꠥꠝꠣꠞ ꠎꠣꠔꠤꠞ ꠜꠣꠁꠞ ꠇꠥꠘꠥ ꠉꠞꠥ-ꠉꠣꠗꠣ ꠙꠕꠞ ꠝꠣꠎꠦ ꠙꠠꠤꠉꠦꠍꠦ ꠖꠦꠈꠤꠀ ꠔꠥꠝꠤ ꠢꠞꠤꠀ ꠎꠣꠁꠅ ꠘꠣ, ꠁꠐꠣ ꠃꠛꠣꠘꠤꠞ ꠟꠣꠉꠤ ꠔꠥꠝꠤ ꠗꠞꠤꠀ ꠡꠣꠁꠎ꠆ꠎ ꠇꠞꠤꠅ।
DEU 22:5 “ꠛꠦꠐꠤꠘ꠆ꠔꠦ ꠛꠦꠐꠣꠁꠘ꠆ꠔꠞ ꠇꠣꠙꠠ ꠀꠞ ꠛꠦꠐꠣꠁꠘ꠆ꠔꠦ ꠛꠦꠐꠤꠘ꠆ꠔꠞ ꠇꠣꠙꠠ ꠚꠤꠘ꠆ꠖꠤꠅ ꠘꠣ। ꠎꠦꠉꠤꠄ ꠁꠟꠣ ꠇꠣꠝ ꠇꠞꠦ, ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠔꠣꠞꠦ ꠊꠤꠘ ꠇꠞꠂꠘ।
DEU 22:6 “ꠙꠕꠦꠖꠤ ꠀꠐꠤꠀ ꠎꠣꠁꠔꠦ ꠡꠝꠄ ꠇꠥꠘꠥ ꠉꠣꠍꠞ ꠒꠣꠟꠅ, ꠛꠣ ꠝꠣꠐꠤꠞ ꠃꠙꠞꠦ ꠇꠥꠘꠥ ꠙꠣꠈꠤꠞ ꠛꠣꠖꠣ ꠖꠦꠈꠟꠦ, ꠛꠣꠖꠣꠔ ꠇꠥꠘꠥ ꠙꠣꠈꠤꠄ ꠒꠤꠝꠅ ꠃꠝ ꠖꠦꠞ, ꠛꠣ ꠔꠣꠞ ꠛꠣꠁꠌ꠆ꠌꠣꠞ ꠟꠉꠦ ꠀꠍꠦ, ꠔꠦ ꠛꠣꠁꠌ꠆ꠌꠣꠞ ꠟꠉꠦ ꠔꠣꠞ ꠝꠣʼꠞꠦ ꠗꠞꠤꠀ ꠘꠤꠅ ꠘꠣ।
DEU 22:7 ꠡꠈ ꠅꠁꠟꠦ ꠛꠣꠁꠌ꠆ꠌꠣ ꠘꠤꠅꠉꠤ, ꠅꠁꠟꠦ ꠔꠣꠞ ꠝꠣʼꠞꠦ ꠘꠤꠌ꠆ꠌꠤꠔ ꠍꠣꠠꠤꠀ ꠎꠣꠁꠅ। ꠔꠦꠃ ꠔꠥꠝꠣꠞ ꠜꠣꠟꠣꠁ ꠅꠁꠛ, ꠔꠥꠝꠣꠞ ꠢꠣꠄꠀꠔꠤ ꠛꠣꠠꠤꠛ।
DEU 22:8 “ꠘꠄꠀ ꠊꠞ ꠛꠣꠘꠣꠁꠟꠦ ꠔꠥꠝꠞꠣ ꠊꠞꠞ ꠍꠣꠔꠞ ꠃꠙꠞꠦ ꠌꠣꠁꠞꠅ ꠉꠣꠟꠣꠛꠣꠄ ꠛꠦꠠꠣ ꠖꠤꠛꠣꠄ, ꠀꠞꠘꠣꠄ ꠍꠣꠔꠞ ꠃꠙꠞꠦ ꠕꠣꠇꠤ ꠇꠦꠃ ꠙꠠꠤꠀ ꠝꠞꠤꠉꠦꠟꠦ ꠔꠥꠝꠞꠣ ꠈꠥꠘꠞ ꠖꠣꠄꠁ ꠅꠁꠛꠣꠄ।
DEU 22:9 “ꠔꠥꠝꠞꠣꠞ ꠀꠋꠉꠥꠞꠞ ꠛꠣꠉꠣꠘꠅ ꠖꠥꠁ ꠎꠣꠔꠞ ꠛꠤꠌꠤ ꠟꠣꠉꠣꠁꠅ ꠘꠣ, ꠁꠟꠣ ꠇꠞꠟꠦ ꠀꠋꠉꠥꠞ ꠚꠟ ꠀꠞ ꠖꠥꠍꠞꠣ ꠎꠣꠔꠞ ꠛꠤꠌꠤꠞ ꠚꠟꠅ ꠔꠥꠝꠞꠣꠞ ꠟꠣꠉꠤ ꠢꠣꠞꠣꠝ ꠅꠁꠎꠤꠛ।
DEU 22:10 “ꠉꠞꠥ ꠀꠞ ꠉꠣꠗꠣꠞꠦ ꠄꠇ ꠎꠥꠀꠟꠅ ꠟꠣꠉꠣꠁꠀ ꠀꠟ-ꠌꠣꠡ ꠇꠞꠤꠅ ꠘꠣ।
DEU 22:11 “ꠔꠥꠝꠞꠣ ꠖꠥꠁ ꠎꠣꠔꠞ ꠡꠥꠔꠣꠖꠤ ꠛꠣꠘꠣꠁꠟ ꠇꠣꠙꠠ ꠚꠤꠘ꠆ꠖꠤꠅ ꠘꠣ।
DEU 22:12 “ꠔꠥꠝꠞꠣꠞ ꠃꠠꠤꠛꠣꠞ ꠌꠣꠖ꠆ꠖꠞꠞ ꠌꠣꠁꠞꠅ ꠇꠥꠘꠣꠔ ꠡꠥꠔꠣꠉꠦꠍꠣ ꠖꠤꠅ।
DEU 22:13 “ꠇꠥꠘꠥ ꠛꠦꠐꠣꠄ ꠛꠤꠀ ꠇꠞꠤꠀ ꠛꠣꠡꠞ ꠊꠞ ꠇꠞꠣꠞ ꠛꠣꠖꠦ ꠎꠥꠖꠤ ꠛꠃꠞꠦ ꠙꠍꠘ꠆ꠖ ꠘꠣ ꠅꠄ,
DEU 22:14 ꠢꠦ ꠎꠥꠖꠤ ꠛꠃꠞ ꠘꠣꠝꠦ ꠛꠖꠘꠣꠝ ꠞꠐꠣꠁꠀ ꠔꠣꠁꠞ ꠉꠤꠛꠔ ꠉꠣꠁꠀ ꠇꠄ, ꠀꠝꠤ ꠔ ꠅꠃ ꠛꠦꠐꠤꠞꠦ ꠛꠤꠀ ꠇꠞꠍꠤ ꠑꠤꠇꠃ, ꠅꠁꠟꠦ ꠔꠣꠁꠞ ꠡꠔꠤꠔ꠆ꠔꠞ ꠇꠥꠘꠥ ꠌꠤꠘ꠆ꠘꠔ ꠙꠣꠁꠍꠤ ꠘꠣ।
DEU 22:15 ꠔꠦ ꠅꠃ ꠇꠁꠘꠣꠞ ꠝꠣ-ꠛꠣꠚꠦ ꠔꠣꠞꠣꠞ ꠙꠥꠠꠤꠞ ꠡꠔꠤꠔ꠆ꠔꠞ ꠌꠤꠘ ꠟꠣꠉꠣꠁꠟ ꠛꠤꠍꠘꠣꠞ ꠇꠣꠙꠠ ꠟꠁꠀ, ꠢꠘꠞ ꠉꠣꠃ ꠛꠣ ꠐꠣꠃꠘꠅ ꠢꠣꠝꠣꠘꠤꠞ ꠉꠦꠁꠐꠞ ꠝꠥꠈꠅ ꠝꠥꠞꠛ꠆ꠛꠤ-ꠡꠣꠟꠤꠡ ꠅꠇꠟꠞ ꠉꠦꠍꠦ ꠎꠣꠁꠛꠣ।
DEU 22:16 ꠉꠤꠀ ꠇꠁꠘꠣꠞ ꠛꠣꠚꠦ ꠝꠥꠞꠛ꠆ꠛꠤ ꠅꠇꠟꠞꠦ ꠇꠁꠛꠣ, ꠀꠝꠤ ꠔ ꠅꠃ ꠖꠣꠝꠣꠘ꠆ꠖꠞ ꠟꠉꠦ ꠀꠝꠣꠞ ꠙꠥꠠꠤꠞꠦ ꠡꠣꠖꠤ ꠖꠤꠍꠟꠣꠝ, ꠅꠈꠘ ꠢꠦ ꠀꠝꠣꠞ ꠙꠥꠠꠤꠞꠦ ꠙꠍꠘ꠆ꠖ ꠇꠞꠦ ꠘꠣ।
DEU 22:17 ꠀꠞ ꠢꠦ ꠛꠖꠘꠣꠝ ꠞꠐꠣꠁꠀ ꠇꠁꠍꠦ, ꠢꠦ ꠛꠥꠟꠦ ꠀꠝꠣꠞ ꠙꠥꠠꠤꠞ ꠡꠔꠤꠔ꠆ꠔꠞ ꠌꠤꠘ꠆ꠘꠔ ꠙꠣꠁꠍꠦ ꠘꠣ, ꠅꠁꠟꠦ ꠀꠙꠘꠣꠞꠣ ꠖꠦꠈꠃꠇ꠆ꠇꠣ, ꠀꠝꠣꠞ ꠙꠥꠠꠤꠞ ꠡꠔꠤꠔ꠆ꠔꠞ ꠌꠤꠘ꠆ꠘꠔ ꠟꠁꠀ ꠀꠝꠤ ꠀꠎꠤꠞ ꠅꠁꠍꠤ। ꠅꠈꠣꠘ ꠇꠁꠀ ꠢꠦ ꠅꠃ ꠛꠤꠍꠘꠣꠞ ꠇꠣꠙꠠ ꠝꠦꠟꠤꠀ ꠝꠥꠞꠛ꠆ꠛꠤ ꠅꠇꠟꠞꠦ ꠌꠤꠘ꠆ꠘꠔ ꠖꠦꠈꠣꠁꠛ।
DEU 22:18 ꠔꠦꠃ ꠢꠤ ꠝꠥꠞꠛ꠆ꠛꠤ ꠅꠇꠟꠦ ꠅꠃ ꠖꠣꠝꠣꠘ꠆ꠖꠞꠦ ꠡꠣꠎꠣ ꠖꠤꠛꠣ।
DEU 22:19 ꠔꠣꠞ ꠎꠞꠤꠝꠣꠘꠣ ꠛꠣꠛꠔ ꠄꠇ-ꠡ ꠔꠟꠣ ꠞꠥꠙꠣ ꠀꠖꠣꠄ ꠇꠞꠤꠀ ꠇꠁꠘꠣꠞ ꠛꠣꠚꠞꠦ ꠖꠤꠛꠣ, ꠇꠣꠞꠘ ꠅꠃ ꠖꠣꠝꠣꠘ꠆ꠖꠦ ꠛꠘꠤ ꠁꠍꠞꠣꠁꠟꠤ ꠄꠇ ꠡꠔꠤ ꠇꠁꠘꠣꠞ ꠛꠖꠘꠣꠝ ꠞꠐꠣꠁꠍꠦ। ꠀꠞ ꠅꠃ ꠇꠁꠘꠣꠞꠦ ꠟꠁꠀ ꠢꠦ ꠡꠋꠡꠣꠞ ꠇꠞꠔꠦ ꠅꠁꠛ, ꠎꠤꠘ꠆ꠖꠦꠉꠤꠄ ꠇꠥꠘꠥꠖꠤꠘ ꠔꠣꠁꠞꠦ ꠍꠣꠠꠣꠞ ꠇꠥꠘꠥ ꠙꠕ ꠘꠣꠁ।
DEU 22:20 “ꠀꠞ ꠖꠣꠝꠣꠘ꠆ꠖꠞ ꠇꠕꠣ ꠢꠣꠍꠣ ꠅꠁꠟꠦ, ꠅꠃ ꠇꠁꠘꠣꠞ ꠡꠔꠤꠔ꠆ꠔꠞ ꠌꠤꠘ꠆ꠘꠔ ꠘꠣ ꠙꠣꠁꠟꠦ,
DEU 22:21 ꠇꠁꠘꠣꠞꠦ ꠔꠣꠁꠞ ꠛꠣꠚꠞ ꠛꠣꠠꠤꠞ ꠉꠦꠁꠐꠞ ꠉꠦꠍꠦ ꠘꠤꠀ, ꠢꠘꠞ ꠛꠦꠐꠣꠁꠘ꠆ꠔꠦ ꠙꠣꠔ꠆ꠔꠞ ꠝꠣꠞꠤꠀ ꠔꠣꠁꠞꠦ ꠝꠣꠞꠤꠟꠤꠛꠣ। ꠔꠣꠁ ꠔ ꠛꠣꠚꠞ ꠛꠣꠠꠤꠔ ꠕꠣꠇꠣꠞ ꠇꠣꠟꠅ ꠎꠤꠘꠣꠞ ꠇꠣꠝ ꠇꠞꠤꠀ, ꠛꠘꠤ ꠁꠍꠞꠣꠁꠟꠞ ꠝꠣꠎꠦ ꠎꠊꠁꠘ꠆ꠘ ꠘꠣꠚꠞꠝꠣꠘꠤ ꠇꠞꠍꠦ। ꠅꠃ ꠘꠝꠥꠘꠣꠄ ꠔꠥꠝꠞꠣ ꠘꠤꠎꠞ ꠡꠝꠣꠎ ꠕꠣꠇꠤ ꠅꠟꠣ ꠘꠣꠚꠞꠝꠣꠘꠤꠞꠦ ꠚꠥꠍꠤꠀ ꠚꠣꠟꠣꠁꠛꠣꠄ।
DEU 22:22 “ꠇꠥꠘꠥ ꠛꠦꠐꠣꠄ ꠎꠥꠖꠤ ꠀꠞꠇ ꠛꠦꠐꠣꠞ ꠛꠃꠞ ꠟꠉꠦ ꠎꠤꠘꠣ ꠇꠞꠣꠔ ꠗꠞꠣ ꠈꠣꠄ, ꠔꠦ ꠅꠃ ꠛꠦꠐꠣ-ꠛꠦꠐꠤ ꠖꠥꠁꠅ ꠎꠘꠞꠦ ꠝꠣꠞꠤꠟꠤꠔꠦ ꠅꠁꠛ। ꠛꠘꠤ ꠁꠍꠞꠣꠁꠟ ꠕꠣꠇꠤ ꠔꠥꠝꠞꠣ ꠁ ꠟꠣꠈꠣꠘ ꠘꠣꠚꠞꠝꠣꠘꠤꠞ ꠘꠣꠝ ꠝꠤꠐꠣꠁꠛꠣꠄ।
DEU 22:23 “ꠛꠤꠀ ꠑꠤꠇ ꠅꠁꠉꠦꠍꠦ ꠁꠟꠣ ꠇꠥꠘꠥ ꠙꠥꠠꠤꠞꠦ ꠇꠦꠃ ꠐꠣꠃꠘꠞ ꠝꠣꠎꠦ ꠙꠣꠁꠀ ꠎꠥꠖꠤ ꠔꠣꠁꠞ ꠟꠉꠦ ꠎꠤꠘꠣ ꠇꠞꠦ,
DEU 22:24 ꠔꠦ ꠔꠣꠞꠣ ꠖꠥꠁꠅꠉꠥꠞꠦ ꠢꠃ ꠎꠣꠉꠣꠞ ꠝꠦꠁꠘ ꠉꠦꠁꠐꠞ ꠉꠦꠍꠦ ꠘꠤꠀ ꠙꠣꠔ꠆ꠔꠞ ꠝꠣꠞꠤꠀ ꠝꠣꠞꠤꠟꠤꠛꠣꠄ। ꠙꠥꠠꠤꠞꠦ ꠝꠣꠞꠤꠟꠤꠛꠣꠞ ꠇꠣꠞꠘ ꠅꠁꠟ, ꠔꠣꠁ ꠔ ꠢꠘꠅ ꠕꠣꠇꠤ ꠡꠣꠁꠎ꠆ꠎꠞ ꠟꠣꠉꠤ ꠇꠥꠘꠥ ꠌꠤꠇ-ꠌꠤꠟ꠆ꠟꠣꠘꠤ ꠖꠤꠍꠦ ꠘꠣ, ꠀꠞ ꠛꠦꠐꠣꠞꠦ ꠎꠣꠘꠦ ꠝꠣꠞꠣꠞ ꠇꠣꠞꠘ ꠅꠁꠟ, ꠢꠦ ꠀꠞꠇ ꠛꠦꠐꠣꠞ ꠛꠃꠞ ꠁꠎ꠆ꠎꠔ ꠝꠣꠞꠍꠦ। ꠅꠃ ꠘꠝꠥꠘꠣꠄ ꠔꠥꠝꠞꠣ ꠛꠘꠤ ꠁꠍꠞꠣꠁꠟ ꠕꠣꠇꠤ ꠅꠟꠣ ꠘꠣꠚꠞꠝꠣꠘꠤ ꠚꠥꠍꠤꠀ ꠚꠣꠟꠣꠁꠛꠣꠄ।
DEU 22:25 “ꠛꠤꠀ ꠑꠤꠇ ꠅꠁꠉꠦꠍꠦ ꠅꠝꠘ ꠇꠥꠘꠥ ꠙꠥꠠꠤꠞꠦ ꠇꠦꠃ ꠇꠥꠘꠥ ꠘꠤꠞꠣꠁ ꠎꠣꠉꠣꠔ ꠙꠣꠁꠀ ꠢꠣꠞꠤ, ꠎꠥꠞ ꠇꠞꠤꠀ ꠔꠣꠁꠞ ꠟꠉꠦ ꠝꠤꠟꠣ-ꠝꠤꠡꠣ ꠇꠞꠟꠦ, ꠈꠣꠟꠤ ꠅꠃ ꠛꠦꠐꠣ ꠝꠞꠛ।
DEU 22:26 ꠀꠞ ꠅꠃ ꠙꠥꠠꠤꠞꠦ ꠍꠣꠠꠤ ꠖꠤꠛꠣꠄ, ꠔꠣꠁ ꠔ ꠝꠞꠣꠞ ꠎꠥꠇꠣ ꠉꠥꠘꠣ ꠇꠞꠍꠦ ꠘꠣ। ꠁꠔꠣ ꠔ ꠄꠇꠎꠘꠦ ꠖꠥꠍꠞꠣ ꠎꠘꠞꠦ ꠈꠥꠘ ꠇꠞꠣꠞ ꠟꠣꠈꠣꠘꠃ।
DEU 22:27 ꠇꠣꠞꠘ ꠅꠃ ꠛꠦꠐꠣꠄ ꠔꠣꠁꠞꠦ ꠘꠤꠞꠣꠁ ꠎꠣꠉꠣꠔ ꠗꠞꠍꠦ, ꠌꠤꠇ-ꠌꠤꠟ꠆ꠟꠣꠘꠤ ꠖꠤꠟꠦꠅ ꠔꠣꠁꠞꠦ ꠛꠣꠌꠣꠘꠤꠞ ꠇꠦꠃ ꠔ ꠁꠘꠅ ꠀꠍꠤꠟ ꠘꠣ।
DEU 22:28 “ꠛꠤꠀ-ꠡꠣꠖꠤ ꠑꠤꠇ ꠅꠁꠍꠦ ꠘꠣ, ꠅꠝꠘ ꠇꠥꠘꠥ ꠙꠥꠠꠤꠞꠦ ꠙꠣꠁꠀ ꠇꠦꠃ ꠎꠥꠖꠤ ꠎꠥꠞ ꠇꠞꠤꠀ ꠔꠣꠁꠞ ꠟꠉꠦ ꠝꠤꠟꠣ-ꠝꠤꠡꠣ ꠇꠞꠦ, ꠀꠞ ꠔꠣꠞꠣ ꠗꠞꠣ ꠈꠣꠄ,
DEU 22:29 ꠔꠦ ꠅꠃ ꠛꠦꠐꠣꠄ ꠙꠥꠠꠤꠞ ꠛꠣꠚꠞꠦ ꠙꠁꠘ꠆ꠌꠣꠡ ꠔꠟꠣ ꠞꠥꠙꠣ ꠖꠤꠛ, ꠀꠞ ꠙꠥꠠꠤꠞ ꠁꠎ꠆ꠎꠔ ꠝꠣꠞꠣꠄ ꠔꠣꠁꠞꠦ ꠛꠤꠀ ꠇꠞꠔꠦ ꠅꠁꠛ। ꠎꠤꠘ꠆ꠖꠦꠉꠤꠄ ꠇꠥꠘꠥꠖꠤꠘ ꠔꠣꠁꠞꠦ ꠔꠣꠟꠣꠇ ꠖꠤꠔ ꠙꠣꠞꠔ ꠘꠣꠄ।
DEU 22:30 “ꠇꠥꠘꠥ ꠛꠦꠐꠣꠄ ꠔꠣꠞ ꠢꠣꠔꠘ ꠝꠣʼꠞꠦ ꠛꠤꠀ ꠇꠞꠣ ꠎꠣꠁꠎ ꠘꠣꠄ, ꠁꠟꠣ ꠇꠞꠟꠦ ꠢꠦ ꠔꠣꠞ ꠛꠣꠚꠞ ꠛꠃꠞ ꠟꠉꠦ ꠎꠤꠘꠣ ꠇꠞꠤꠀ ꠛꠣꠚꠞꠦ ꠛꠦꠁꠎ꠆ꠎꠔ ꠇꠞꠛ।”
DEU 23:1 ꠢꠎꠞꠔ ꠝꠥꠍꠣꠄ ꠀꠞꠅ ꠇꠁꠞꠣ, “ꠇꠥꠘꠥ ꠛꠦꠐꠣꠞ ꠎꠥꠖꠤ ꠅꠘ꠆ꠒꠇꠥꠡ ꠍꠦꠌꠣ ꠅꠄ, ꠛꠣ ꠔꠣꠞ ꠙꠥꠞꠥꠡꠣꠟꠤ ꠘꠚꠍ ꠇꠣꠐꠤꠀ ꠚꠣꠟꠣꠁꠟ ꠅꠄ, ꠔꠦ ꠢꠤ ꠛꠦꠐꠣ ꠝꠣꠛꠥꠖꠞ ꠛꠘ꠆ꠖꠣ ꠅꠇꠟꠞ ꠝꠣꠢꠚꠤꠟꠅ ꠢꠣꠝꠣꠘꠤꠞ ꠡꠥꠎꠥꠉ ꠘꠣꠁ।
DEU 23:2 “ꠇꠥꠘꠥ ꠚꠥꠋꠉꠣ ꠝꠣꠘꠥꠡ ꠝꠣꠛꠥꠖꠞ ꠛꠘ꠆ꠖꠣ ꠅꠇꠟꠞ ꠝꠣꠢꠚꠤꠟꠅ ꠢꠣꠝꠣꠘꠤꠞ ꠡꠥꠎꠥꠉ ꠘꠣꠁ, ꠔꠣꠞ ꠌꠃꠖ꠆ꠖ ꠍꠤꠠꠤꠞ ꠇꠦꠃꠞꠞ ꠢꠣꠝꠣꠘꠤꠞ ꠙꠕ ꠘꠣꠁ।
DEU 23:3 “ꠛꠘꠤ-ꠀꠝ꠆ꠝꠣꠘ ꠛꠣ ꠝꠥꠀꠛꠤ ꠎꠣꠔꠤꠞ ꠇꠥꠘꠥ ꠝꠣꠘꠥꠡ ꠝꠣꠛꠥꠖꠞ ꠛꠘ꠆ꠖꠣ ꠅꠇꠟꠞ ꠝꠣꠢꠚꠤꠟꠅ ꠢꠣꠝꠣꠘꠤꠞ ꠡꠥꠎꠥꠉ ꠘꠣꠁ, ꠔꠣꠞꠣꠞ ꠌꠃꠖ꠆ꠖ ꠍꠤꠠꠤꠞ ꠇꠦꠃ ꠢꠣꠝꠣꠘꠤꠞ ꠙꠕ ꠙꠣꠁꠔ ꠘꠣꠄ।
DEU 23:4 ꠝꠘꠅ ꠀꠍꠦ ꠘꠤ, ꠔꠥꠝꠞꠣ ꠝꠤꠡꠞ ꠖꠦꠡ ꠕꠣꠇꠤ ꠛꠣꠞ ꠅꠁꠀ ꠀꠁꠛꠣꠞ ꠇꠣꠟꠅ, ꠙꠕꠞ ꠝꠣꠎꠦ ꠔꠣꠞꠣ ꠔꠥꠝꠞꠣꠞ ꠈꠣꠘꠤ-ꠙꠣꠘꠤ ꠟꠁꠀ ꠀꠉꠥꠀꠁ ꠀꠁꠍꠦ ꠘꠣ, ꠛꠞꠋ ꠔꠥꠝꠞꠣꠞꠦ ꠛꠖ꠆ꠖꠥꠀ ꠖꠤꠛꠣꠞ ꠟꠣꠉꠤ ꠛꠣꠟꠣꠝ ꠛꠤꠘ ꠛꠣꠃꠞ ꠘꠣꠝꠞ ꠄꠇ ꠙꠤꠞꠞꠦ ꠔꠣꠞꠣ ꠊꠥꠡ ꠖꠤꠍꠤꠟ, ꠖꠤꠀ ꠅꠞꠣꠝ-ꠘꠢꠞꠄꠁꠝ ꠖꠦꠡꠞ ꠚꠔꠥꠞ ꠐꠣꠃꠘ ꠕꠣꠇꠤ ꠔꠣꠞꠦ ꠜꠣꠠꠣ ꠇꠞꠤ ꠀꠘꠍꠤꠟ।
DEU 23:5 ꠅꠁꠟꠦ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠅꠃ ꠛꠣꠟꠣꠝꠞ ꠀꠞꠎꠤꠔ ꠡꠣꠄ ꠖꠤꠍꠂꠘ ꠘꠣ, ꠔꠣꠁꠘ ꠔ ꠔꠥꠝꠞꠣꠞꠦ ꠝꠢꠛ꠆ꠛꠔ ꠇꠞꠂꠘ, ꠄꠞꠟꠣꠉꠤ ꠢꠃ ꠛꠣꠟꠣꠝ ꠙꠤꠞꠞ ꠛꠖ꠆ꠖꠥꠀꠞꠦ ꠛꠖꠟꠣꠁꠀ ꠔꠣꠁꠘ ꠘꠦꠇ-ꠖꠥꠀ ꠛꠣꠘꠣꠁꠟꠣ।
DEU 23:6 ꠅꠈꠘ ꠔꠥꠝꠞꠣ ꠎꠤꠘ꠆ꠖꠦꠉꠤꠄ ꠇꠥꠘꠥꠖꠤꠘ ꠁꠔꠣꠞ ꠇꠥꠘꠥ ꠜꠣꠟꠣꠁ ꠛꠣ ꠃꠙꠇꠣꠞ ꠇꠞꠤꠅ ꠘꠣ।
DEU 23:7 “ꠔꠣ-ꠅ ꠁꠖꠥꠝꠤ ꠅꠇꠟꠞꠦ ꠔꠥꠝꠞꠣ ꠁꠋꠡꠣ ꠇꠞꠤꠅ ꠘꠣ, ꠄꠞꠣ ꠔ ꠔꠥꠝꠞꠣꠞ ꠜꠣꠁ। ꠝꠤꠡꠞꠤ ꠝꠣꠘꠡꠞꠦ ꠁꠋꠡꠣ ꠇꠞꠤꠅ ꠘꠣ, ꠔꠥꠝꠞꠣ ꠝꠥꠍꠣꠚꠤꠞ ꠢꠣꠟꠔꠦ ꠀꠉꠦ ꠔꠣꠞꠣꠞ ꠖꠦꠡꠅ ꠛꠡꠔ ꠇꠞꠍ।
DEU 23:8 ꠔꠥꠝꠞꠣꠞ ꠟꠉꠦ ꠛꠡꠔ ꠇꠞꠣꠞ ꠔꠤꠘ ꠍꠤꠠꠤ ꠕꠣꠇꠤ ꠔꠣꠞꠣ ꠝꠣꠛꠥꠖꠞ ꠛꠘ꠆ꠖꠣ ꠅꠇꠟꠞ ꠝꠣꠢꠚꠤꠟꠅ ꠢꠣꠝꠣꠁꠔꠣ ꠙꠣꠞꠛꠣ।
DEU 23:9 “ꠖꠥꠡꠝꠘꠞ ꠟꠉꠦ ꠟꠣꠠꠣꠁꠔ ꠛꠣꠞ ꠅꠁꠀ ꠔꠥꠝꠞꠣ ꠢꠇꠟ ꠘꠝꠥꠘꠣꠞ ꠘꠣꠙꠣꠇꠤ ꠕꠣꠇꠤ ꠛꠣꠌꠤꠀ ꠞꠁꠅ।
DEU 23:10 ꠞꠣꠁꠔꠞ ꠛꠣꠟꠣ ꠇꠥꠘꠥ ꠍꠤꠙꠣꠁꠞ ꠎꠃꠛꠘꠞ ꠙꠣꠘꠤ ꠛꠣꠞ ꠅꠁꠀ ꠘꠣꠙꠣꠇ ꠛꠘꠤꠉꠦꠟꠦ, ꠢꠦ ꠇꠦꠝ꠆ꠙꠞ ꠛꠣꠞꠦ ꠎꠣꠁꠔꠦ ꠅꠁꠛ।
DEU 23:11 ꠛꠣꠖꠦ ꠛꠤꠀꠟꠤ ꠛꠣꠟꠣ ꠢꠦ ꠘꠣꠁꠀ ꠢꠣꠞꠤ, ꠡꠥꠞꠥꠎ ꠒꠥꠛꠤꠀ ꠢꠣꠞꠟꠦ ꠇꠦꠝ꠆ꠙꠅ ꠀꠁꠀ ꠢꠣꠝꠣꠁꠛ।
DEU 23:12 “ꠙꠣꠄꠈꠣꠘꠣ ꠇꠞꠣꠞ ꠟꠣꠉꠤ ꠔꠥꠝꠞꠣ ꠇꠦꠝ꠆ꠙꠞ ꠛꠣꠞꠦ ꠄꠇ ꠎꠣꠉꠣ ꠛꠣꠘꠣꠁꠛꠣꠄ।
DEU 23:13 ꠔꠥꠝꠞꠣꠞ ꠀꠔꠤꠀꠞ-ꠙꠔ꠆ꠞꠞ ꠟꠉꠦ ꠝꠣꠐꠤ ꠈꠥꠠꠤꠛꠣꠞ ꠇꠥꠖꠣꠟ ꠞꠣꠈꠤꠅ। ꠙꠣꠄꠈꠣꠘꠣ ꠇꠞꠤꠀ ꠢꠣꠞꠟꠦ ꠇꠥꠖꠣꠟꠖꠤ ꠉꠣꠔ ꠈꠥꠖꠤꠀ ꠝꠣꠐꠤꠞ ꠔꠟꠦ ꠢꠣꠞꠣꠁꠅ।
DEU 23:14 ꠈꠤꠀꠟ ꠞꠣꠈꠤꠅ, ꠔꠥꠝꠞꠣꠞꠦ ꠛꠣꠌꠣꠘꠤꠞ ꠟꠣꠉꠤ, ꠀꠞ ꠖꠥꠡꠝꠘꠞꠦ ꠔꠥꠝꠞꠣꠞ ꠀꠔꠅ ꠡꠙꠤꠛꠣꠞ ꠈꠤꠀꠟꠦ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣ ꠔꠥꠝꠞꠣꠞ ꠇꠦꠝ꠆ꠙꠞ ꠜꠤꠔꠞꠦ ꠊꠥꠞꠣ-ꠚꠤꠞꠣ ꠇꠞꠂꠘ। ꠄꠞꠟꠣꠉꠤ ꠔꠥꠝꠞꠣꠞ ꠇꠦꠝ꠆ꠙꠞꠦ ꠙꠣꠇ-ꠙꠛꠤꠔ꠆ꠞ ꠞꠣꠈꠤꠅ, ꠀꠞꠘꠣꠄ ꠔꠥꠝꠞꠣꠞ ꠘꠣꠙꠣꠇꠤ ꠖꠦꠈꠤꠀ ꠝꠣꠛꠥꠖꠦ ꠔꠥꠝꠞꠣꠞ ꠃꠙꠞꠦ ꠕꠣꠇꠤ ꠝꠥꠈ ꠚꠤꠞꠣꠁꠟꠤꠛꠣ।
DEU 23:15 “ꠇꠥꠘꠥ ꠝꠣꠘꠡꠞ ꠇꠤꠘꠣ ꠉꠥꠟꠣꠝ ꠜꠣꠉꠤꠀ ꠀꠁꠀ ꠎꠥꠖꠤ ꠔꠥꠝꠞꠣꠞ ꠉꠦꠍꠦ ꠀꠡꠞꠄ ꠟꠄ, ꠔꠦ ꠔꠣꠞꠦ ꠔꠣꠞ ꠝꠣꠟꠤꠇꠞ ꠉꠦꠍꠦ ꠚꠤꠞꠣꠁ ꠖꠤꠅ ꠘꠣ।
DEU 23:16 ꠢꠦ ꠔꠥꠝꠞꠣꠞ ꠖꠦꠡꠞ ꠎꠦꠈꠣꠘꠅ ꠞꠁꠔ ꠌꠣꠄ, ꠅꠘꠅꠃ ꠔꠣꠞꠦ ꠎꠣꠉꠣ ꠖꠤꠅ, ꠔꠣꠞꠦ ꠖꠥꠈ ꠖꠤꠅ ꠘꠣ।
DEU 23:17 “ꠛꠘꠤ ꠁꠍꠞꠣꠁꠟꠞ ꠇꠥꠘꠥ ꠛꠦꠐꠤꠘ꠆ꠔꠦ ꠎꠣꠘꠥ ꠝꠘ꠆ꠖꠤꠞ-ꠀꠈꠠꠣꠞ ꠘꠐꠤꠉꠤꠞꠤ ꠘꠣ ꠇꠞꠦ। ꠇꠥꠘꠥ ꠛꠦꠐꠣꠄꠅ ꠎꠣꠘꠥ ꠅꠟꠣ ꠘꠐꠣꠉꠤꠞꠤ ꠘꠣ ꠇꠞꠦ।
DEU 23:18 ꠘꠐꠤ ꠛꠦꠐꠤ ꠛꠣ ꠘꠐꠣ ꠛꠦꠐꠣꠞ ꠞꠥꠎꠤ-ꠞꠥꠎꠉꠣꠞꠞ ꠐꠦꠇꠣ-ꠙꠄꠡꠣꠞ ꠇꠥꠘꠥꠎꠣꠔ ꠝꠣꠘ꠆ꠘꠔ-ꠇꠥꠞꠛꠣꠘꠤ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠊꠞꠅ ꠀꠘꠤꠅ ꠘꠣ। ꠁꠟꠣꠈꠣꠘ ꠛꠦꠐꠣ-ꠛꠦꠐꠤꠘ꠆ꠔꠞꠦ ꠔ ꠝꠣꠛꠥꠖꠦ ꠊꠤꠘ ꠇꠞꠂꠘ।
DEU 23:19 “ꠔꠥꠝꠞꠣꠞ ꠎꠣꠔꠤꠞ ꠇꠥꠘꠥ ꠜꠣꠁꠞ ꠉꠦꠍ ꠕꠣꠇꠤ ꠡꠥꠖ ꠈꠣꠁꠅ ꠘꠣ, ꠁꠔꠣ ꠐꠦꠇꠣ-ꠙꠄꠡꠣ, ꠈꠣꠘꠤ-ꠈꠥꠞꠣꠇꠤꠞ ꠎꠤꠘꠤꠡ ꠛꠣ ꠀꠞꠅ ꠇꠥꠘꠥꠔꠣ ꠅꠁꠟꠦꠅ ꠇꠥꠘꠥꠎꠣꠔ ꠡꠥꠖ ꠟꠁꠅ ꠘꠣ।
DEU 23:20 ꠅꠁꠘ꠆ꠘ ꠎꠣꠔꠤꠞ ꠉꠦꠍ ꠕꠣꠇꠤ ꠡꠥꠖ ꠘꠤꠔꠣꠄ ꠙꠣꠞꠛꠣꠄ, ꠅꠁꠟꠦ ꠛꠘꠤ ꠁꠍꠞꠣꠁꠟ ꠕꠣꠇꠤ ꠡꠥꠖ ꠈꠣꠅꠀ ꠢꠣꠞꠣꠝ। ꠁꠔꠣ ꠝꠣꠘꠤꠀ ꠌꠟꠟꠦ ꠔꠥꠝꠞꠣ ꠎꠦ ꠖꠦꠡꠞ ꠖꠈꠟꠖꠣꠞꠤ ꠙꠣꠁꠞꠣꠄ, ꠢꠃ ꠎꠣꠉꠣꠔ ꠉꠤꠀ ꠢꠣꠞꠟꠦ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠔꠥꠝꠞꠣꠞ ꠢꠇꠟ ꠇꠣꠝ-ꠇꠣꠎꠅ ꠞꠢꠝ-ꠛꠞꠇꠔ ꠖꠤꠛꠣ।
DEU 23:21 “ꠔꠥꠝꠞꠣ ꠘꠤꠎꠞ ꠝꠣꠛꠥꠖ ꠀꠟ꠆ꠟꠣꠞ ꠘꠣꠝꠦ ꠇꠥꠘꠥꠔꠣ ꠝꠣꠘ꠆ꠘꠔ ꠇꠞꠟꠦ, ꠁꠔꠣ ꠎꠟꠖꠤ ꠇꠞꠤ ꠀꠖꠣꠄ ꠇꠞꠤꠅ, ꠁꠔꠣ ꠀꠖꠣꠄ ꠘꠣ ꠇꠞꠟꠦ ꠔꠥꠝꠞꠣꠞ ꠉꠥꠘꠣ ꠅꠁꠛ। ꠀꠞ ꠁ ꠢꠤꠡꠣꠛ ꠔ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠛꠣꠖ ꠖꠤꠔꠣ ꠘꠣꠄ।
DEU 23:22 ꠅꠁꠟꠦ ꠇꠥꠘꠥꠎꠣꠔ ꠝꠣꠘ꠆ꠘꠔ ꠘꠣ ꠇꠞꠟꠦ ꠉꠥꠘꠣ ꠘꠣꠄ।
DEU 23:23 ꠔꠥꠝꠞꠣꠞ ꠎꠛꠣꠘ ꠕꠣꠇꠤ ꠎꠦ ꠝꠣꠘ꠆ꠘꠔ ꠇꠞꠍ, ꠁꠐꠣ ꠘꠤꠌ꠆ꠌꠤꠔ ꠀꠖꠣꠄ ꠇꠞꠛꠣꠄ, ꠇꠣꠞꠘ ꠔꠥꠝꠣꠞ ꠘꠤꠎꠞ ꠎꠛꠣꠘꠦ, ꠘꠤꠎꠞ ꠈꠥꠡꠤꠄ ꠀꠟ꠆ꠟꠣ ꠝꠣꠛꠥꠖꠞ ꠘꠣꠝꠦ ꠁꠔꠣ ꠝꠣꠘꠍ, ꠄꠞꠟꠣꠉꠤ ꠀꠖꠣꠄꠅ ꠇꠞꠛꠣꠄ।
DEU 23:24 “ꠔꠥꠝꠞꠣꠞ ꠀꠞꠤ-ꠚꠞꠤꠞ ꠀꠋꠉꠥꠞꠞ ꠛꠣꠉꠣꠘꠅ ꠢꠣꠝꠣꠁꠟꠦ ꠘꠤꠎꠞ ꠢꠣꠃꠍ ꠝꠤꠐꠣꠁꠀ ꠀꠋꠉꠥꠞ ꠈꠣꠁꠅ, ꠅꠁꠟꠦ ꠇꠥꠘꠥ ꠛꠃꠟ ꠛꠣ ꠛꠡ꠆ꠔꠣꠔ ꠇꠞꠤ ꠇꠥꠘ꠆ꠔꠣ ꠘꠤꠔꠣꠄ ꠙꠣꠞꠔꠣꠄ ꠘꠣꠄ।
DEU 23:25 ꠇꠦꠃꠞꠞ ꠎꠝꠤꠘꠅ ꠉꠤꠀ ꠀꠔꠖꠤ ꠇꠥꠘꠥꠎꠣꠔ ꠚꠄ-ꠚꠍꠟꠞ ꠍꠠꠣ ꠍꠤꠠꠤꠔꠣꠄ ꠙꠣꠞꠛꠣꠄ, ꠅꠁꠟꠦ ꠇꠣꠌꠤ ꠖꠤꠀ ꠖꠣꠁꠀ ꠘꠤꠔꠣꠄ ꠙꠣꠞꠔꠣꠄ ꠘꠣꠄ।”
DEU 24:1 ꠢꠎꠞꠔ ꠝꠥꠍꠣꠄ ꠀꠞꠅ ꠇꠁꠞꠣ, “ꠛꠤꠀꠞ ꠛꠣꠖꠦ ꠎꠥꠖꠤ ꠇꠥꠘꠥ ꠎꠣꠝꠣꠁꠄ ꠔꠣꠞ ꠛꠃꠞ ꠝꠣꠎꠦ ꠈꠥꠔ ꠙꠣꠄ, ꠙꠣꠁꠀ ꠔꠣꠁꠞ ꠃꠙꠞꠦ ꠘꠣꠞꠣꠎ ꠅꠄ, ꠀꠞ ꠔꠣꠟꠣꠇ ꠘꠣꠝꠣ ꠟꠦꠈꠤꠀ ꠔꠣꠁꠞ ꠀꠔꠅ ꠖꠤꠀ ꠛꠤꠖꠣꠄ ꠇꠞꠤ ꠖꠦꠄ।
DEU 24:2 ꠀꠞ ꠅꠃ ꠛꠃꠄ ꠉꠤꠀ ꠎꠥꠖꠤ ꠖꠥꠍꠞꠣ ꠎꠣꠝꠣꠁꠞ ꠉꠦꠍꠦ ꠛꠤꠀ ꠛꠄ,
DEU 24:3 ꠛꠣꠖꠦ ꠢꠃ ꠖꠥꠍꠞꠣ ꠎꠣꠝꠣꠁꠄꠅ ꠔꠣꠁꠞꠦ ꠘꠣꠙꠍꠘ꠆ꠖ ꠇꠞꠤꠀ ꠎꠥꠖꠤ ꠅꠟꠣ ꠔꠣꠟꠣꠇ ꠖꠤꠟꠣꠄ, ꠛꠣ ꠢꠃ ꠎꠣꠝꠣꠁ ꠝꠞꠤꠎꠣꠄ,
DEU 24:4 ꠔꠦ ꠔꠣꠁꠞ ꠢꠃ ꠙꠄꠟꠣ ꠎꠣꠝꠣꠁꠄ ꠔꠣꠁꠞꠦ ꠀꠞ ꠛꠤꠀ ꠇꠞꠔ ꠙꠣꠞꠔ ꠘꠣꠄ, ꠔꠣꠁ ꠔ ꠄꠘ ꠟꠣꠉꠤ ꠘꠣꠙꠣꠇ ꠅꠁꠉꠦꠍꠦ। ꠁꠟꠣꠈꠣꠘ ꠛꠤꠀ-ꠡꠣꠖꠤꠞꠦ ꠝꠣꠛꠥꠖꠦ ꠊꠤꠘ ꠇꠞꠂꠘ। ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠔꠥꠝꠞꠣꠞꠦ ꠎꠦ ꠖꠦꠡꠞ ꠝꠣꠟꠤꠇꠣꠘꠣ ꠖꠤꠞꠣ, ꠔꠥꠝꠞꠣ ꠁꠟꠣ ꠉꠥꠘꠣ ꠇꠞꠤꠀ ꠁ ꠖꠦꠡꠞꠦ ꠘꠣꠙꠣꠇ ꠛꠣꠘꠣꠁꠅ ꠘꠣ।
DEU 24:5 “ꠘꠄꠀ ꠛꠤꠀ ꠇꠞꠣ ꠇꠥꠘꠥ ꠛꠦꠐꠣꠞꠦ ꠎꠥꠖ꠆ꠖꠔ ꠙꠣꠑꠣꠁꠅ ꠘꠣ, ꠎꠥꠞ-ꠎꠛꠞꠖꠡ꠆ꠔꠤ ꠇꠞꠤꠀ ꠔꠣꠞꠦ ꠇꠥꠘꠥ ꠇꠣꠝꠞ ꠜꠣꠞ ꠖꠤꠅ ꠘꠣ। ꠢꠦ ꠙꠥꠞꠣ ꠄꠇ ꠛꠍꠞ ꠇꠣꠝ-ꠇꠣꠎ ꠘꠣ ꠇꠞꠤꠀ, ꠔꠣꠞ ꠛꠃꠞ ꠟꠉꠦ ꠈꠥꠡꠤ-ꠛꠣꠡꠤ ꠇꠞꠣꠞ ꠡꠥꠎꠥꠉ ꠖꠤꠅ।
DEU 24:6 “ꠀꠅꠟꠣꠔꠤ ꠝꠣꠟꠞ ꠛꠘ꠆ꠖꠇ ꠢꠤꠡꠣꠛꠦ ꠔꠥꠝꠞꠣ ꠇꠦꠃꠞꠞ ꠊꠣꠁꠟ-ꠍꠤꠀ, ꠛꠣ ꠈꠣꠟꠤ ꠍꠤꠀ ꠛꠘ꠆ꠖꠇ ꠞꠣꠈꠤꠅ ꠘꠣ। ꠁꠟꠣ ꠇꠞꠟꠦ ꠔꠣꠞ ꠎꠣꠘ ꠛꠣꠌꠣꠘꠤꠞ ꠈꠣꠘꠤ-ꠈꠥꠞꠣꠇꠤꠞ ꠙꠕ ꠛꠘ꠆ꠖ ꠅꠁꠎꠤꠛ।
DEU 24:7 “ꠇꠥꠘꠥ ꠝꠣꠘꠡꠦ ꠎꠥꠖꠤ ꠛꠘꠤ ꠁꠍꠞꠣꠁꠟꠞ ꠀꠞꠇ ꠜꠣꠁꠞꠦ ꠌꠥꠞꠤ ꠇꠞꠤꠀ ꠘꠤꠀ ꠉꠥꠟꠣꠝ ꠛꠣꠘꠣꠁꠟꠣꠄ, ꠛꠣ ꠖꠥꠍꠞꠣ ꠎꠣꠉꠣꠔ ꠛꠦꠌꠤꠀ ꠢꠣꠞꠤ ꠗꠞꠣ ꠈꠣꠄ, ꠔꠦ ꠔꠣꠞꠦ ꠎꠣꠘꠦ ꠝꠣꠞꠛꠣꠄ। ꠅꠃ ꠘꠝꠥꠘꠣꠄ ꠔꠥꠝꠞꠣꠞ ꠡꠝꠣꠎ ꠕꠣꠇꠤ ꠁꠟꠣ ꠘꠣꠚꠞꠝꠣꠘꠤꠞꠦ ꠚꠥꠍꠤꠀ ꠚꠣꠟꠣꠁꠛꠣꠄ।
DEU 24:8 “ꠇꠦꠃꠞꠞ ꠉꠔꠞꠅ ꠙꠌꠣ-ꠇꠥꠡ꠆ꠑ ꠛꠦꠝꠣꠞ ꠖꠦꠈꠣ ꠖꠤꠟꠦ, ꠟꠦꠛꠤ ꠈꠣꠘ꠆ꠖꠣꠘꠞ ꠁꠝꠣꠝ ꠅꠇꠟꠞ ꠙꠞꠣꠝꠤꠡ ꠝꠣꠚꠤꠇ ꠌꠟꠤꠅ। ꠀꠝꠤ ꠔꠣꠞꠣꠞꠦ ꠎꠦꠔꠣ ꠢꠥꠇꠥꠝ ꠖꠤꠍꠤ, ꠔꠥꠝꠞꠣ ꠈꠥꠛ ꠈꠤꠀꠟꠤ ꠅꠁꠀ ꠁꠔꠣ ꠝꠣꠘꠤꠅ।
DEU 24:9 ꠝꠤꠡꠞ ꠖꠦꠡ ꠕꠣꠇꠤ ꠛꠣꠞ ꠅꠁꠀ ꠀꠁꠛꠣꠞ ꠙꠕꠅ, ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠀꠝꠣꠞ ꠛꠁꠘ ꠝꠞꠤꠅꠝꠞ ꠎꠦ ꠖꠡꠣ ꠊꠐꠣꠁꠍꠤꠟ, ꠁꠔꠣ ꠔꠥꠝꠞꠣ ꠝꠘꠅ ꠞꠣꠈꠤꠅ।
DEU 24:10 “ꠔꠥꠝꠣꠞ ꠀꠞꠤ-ꠚꠞꠤꠞꠦ ꠇꠥꠘ꠆ꠔꠣ ꠀꠅꠟꠣꠔ ꠖꠤꠟꠦ, ꠔꠣꠞ ꠉꠦꠍ ꠕꠣꠇꠤ ꠇꠥꠘꠥ ꠝꠣꠟ ꠛꠘ꠆ꠖꠇ ꠘꠤꠛꠣꠞ ꠘꠤꠅꠔꠦ, ꠔꠥꠝꠤ ꠔꠣꠞ ꠊꠞꠅ ꠢꠣꠝꠣꠁꠅ ꠘꠣ।
DEU 24:11 ꠔꠥꠝꠤ ꠊꠞꠞ ꠛꠣꠞꠦ ꠃꠛꠣꠁꠅ, ꠀꠞ ꠎꠣꠞꠦ ꠀꠅꠟꠣꠔ ꠖꠤꠍ, ꠢꠦ ꠔꠣꠞ ꠊꠞ ꠕꠣꠇꠤ ꠛꠘ꠆ꠖꠇꠤ ꠝꠣꠟ ꠀꠘꠤꠀ ꠔꠥꠝꠣꠞꠦ ꠖꠤꠛ।
DEU 24:12 ꠀꠅꠟꠣꠔ ꠘꠦꠅꠞꠣ ꠎꠘ ꠉꠞꠤꠛ-ꠖꠥꠈꠤ ꠅꠁꠟꠦ, ꠔꠣꠞ ꠖꠦꠅꠀ ꠛꠘ꠆ꠖꠇꠤ ꠈꠦꠔꠣ-ꠇꠝꠟꠤ ꠘꠤꠀ ꠔꠥꠝꠤ ꠞꠣꠁꠔ ꠊꠥꠝꠣꠁꠅ ꠘꠣ।
DEU 24:13 ꠢꠣꠁꠘ꠆ꠎꠣ ꠛꠣꠟꠣ ꠔꠥꠝꠤ ꠔꠣꠞ ꠝꠣꠟ ꠚꠤꠞꠣꠁ ꠖꠤꠅ, ꠅꠔꠣ ꠃꠠꠤꠀ ꠢꠦ ꠞꠣꠁꠔ ꠊꠥꠝꠣꠁꠀ ꠔꠥꠝꠣꠞꠦ ꠖꠥꠀ ꠖꠤꠛ। ꠔꠦꠃ ꠔꠥꠝꠣꠞ ꠜꠣꠟꠣꠁ ꠅꠁꠛ, ꠀꠞ ꠛꠘ꠆ꠖꠇꠤ ꠍꠣꠝꠣꠘꠣ ꠚꠤꠞꠔ ꠖꠦꠅꠀ ꠔ, ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠘꠎꠞꠅ ꠘꠦꠇꠤꠞ ꠇꠣꠝ।
DEU 24:14 “ꠔꠥꠝꠞꠣꠞ ꠛꠘꠤ ꠁꠍꠞꠣꠁꠟ ꠡꠝꠣꠎꠞ ꠇꠥꠘꠥ ꠜꠣꠁ ꠛꠣ ꠔꠥꠝꠞꠣꠞ ꠖꠦꠡꠅ ꠞꠅꠞꠣ ꠜꠤꠘ ꠎꠣꠔꠤꠞ ꠇꠥꠘꠥ ꠝꠣꠘꠡꠞ ꠉꠦꠍꠦ ꠙꠣꠅꠘꠣ ꠕꠣꠇꠟꠦ, ꠀꠞ ꠢꠦ ꠉꠞꠤꠛ-ꠖꠥꠈꠤ, ꠞꠥꠎꠤ ꠇꠣꠝꠟꠣ ꠎꠘ ꠅꠁꠟꠦ, ꠔꠣꠞ ꠃꠙꠞꠦ ꠎꠥꠟꠥꠝ ꠇꠞꠤꠅ ꠘꠣ।
DEU 24:15 ꠡꠥꠞꠥꠎ ꠒꠥꠛꠣꠞ ꠀꠉꠦ ꠔꠥꠝꠞꠣ ꠔꠣꠞ ꠙꠣꠅꠘꠣ ꠝꠎꠥꠞꠤ ꠖꠤꠟꠣꠁꠅ, ꠢꠦ ꠔ ꠉꠞꠤꠛ ꠝꠣꠘꠥꠡ, ꠅꠃ ꠝꠎꠥꠞꠤ ꠖꠤꠀꠃ ꠔꠣꠞ ꠎꠤꠘ꠆ꠖꠦꠉꠤ ꠌꠟꠦ। ꠀꠞꠘꠣꠄ ꠝꠎꠥꠞꠤꠞ ꠟꠣꠉꠤ ꠢꠦ ꠝꠣꠛꠥꠖꠞ ꠖꠞꠛꠣꠞꠅ ꠚꠞꠤꠀꠖ ꠇꠞꠟꠦ, ꠔꠥꠝꠞꠣ ꠉꠥꠘꠣꠞ ꠜꠣꠉꠤ ꠅꠁꠛꠣꠄ।
DEU 24:16 “ꠙꠥꠀ-ꠙꠥꠠꠤꠞ ꠅꠙꠞꠣꠗꠞ ꠟꠣꠉꠤ ꠔꠣꠞꠣꠞ ꠝꠣ-ꠛꠣꠚꠞꠦ, ꠛꠣ ꠝꠣ-ꠛꠣꠚꠞ ꠅꠙꠞꠣꠗꠦ ꠙꠥꠀ-ꠙꠥꠠꠤꠞꠦ ꠎꠣꠘꠦ ꠝꠣꠞꠣ ꠎꠣꠁꠔ ꠘꠣꠄ। ꠙꠞꠔꠦꠇ ꠎꠘꠦ ꠘꠤꠎꠞ ꠅꠙꠞꠣꠗꠞ ꠡꠣꠎꠣ ꠘꠤꠎꠦ ꠙꠣꠁꠛ।
DEU 24:17 “ꠇꠥꠘꠥ ꠛꠤꠖꠦꠡꠤ ꠝꠥꠍꠣꠚꠤꠞ ꠛꠣ ꠄꠔꠤꠝꠞ ꠃꠙꠞꠦ ꠘꠣ-ꠢꠇ ꠛꠤꠌꠣꠞ ꠅꠁꠔꠦ ꠖꠤꠅ ꠘꠣ। ꠇꠥꠘꠥ ꠠꠣꠠꠤ ꠛꠦꠐꠤꠞ ꠚꠤꠘ꠆ꠖꠤꠛꠣꠞ ꠇꠣꠙꠠ ꠛꠘ꠆ꠖꠇ ꠞꠣꠈꠤꠅ ꠘꠣ।
DEU 24:18 ꠝꠘꠅ ꠞꠣꠈꠤꠅ, ꠝꠤꠡꠞ ꠖꠦꠡꠅ ꠔꠥꠝꠞꠣ ꠉꠥꠟꠣꠝ ꠀꠍꠟꠣꠄ, ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠔꠥꠝꠞꠣꠞꠦ ꠢꠘ ꠕꠣꠇꠤ ꠀꠎꠣꠖ ꠇꠞꠤ ꠀꠘꠍꠂꠘ। ꠄꠞꠟꠣꠉꠤ ꠀꠝꠤ ꠔꠥꠝꠞꠣꠞꠦ ꠁꠔꠣ ꠇꠣꠝ ꠇꠞꠣꠞ ꠢꠥꠇꠥꠝ ꠖꠤꠞꠣꠝ।
DEU 24:19 “ꠔꠥꠝꠞꠣꠞ ꠎꠝꠤꠘꠞ ꠗꠣꠘ ꠇꠣꠐꠣꠞ ꠛꠣꠖꠦ, ꠗꠣꠘꠞ ꠇꠥꠘꠥ ꠝꠥꠁꠐ ꠚꠣꠃꠞꠤꠀ ꠉꠦꠟꠦꠉꠤ, ꠁꠐꠣ ꠀꠘꠣꠞ ꠟꠣꠉꠤ ꠀꠞ ꠚꠤꠞꠔ ꠎꠣꠁꠅ ꠘꠣ। ꠛꠤꠖꠦꠡꠤ ꠝꠥꠍꠣꠚꠤꠞ, ꠄꠔꠤꠝ ꠀꠞ ꠠꠣꠠꠤ ꠛꠦꠐꠤꠘ꠆ꠔꠞ ꠟꠣꠉꠤ ꠁꠐꠣ ꠖꠤꠟꠣꠁꠅ, ꠔꠦꠃ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠔꠥꠝꠞꠣꠞ ꠢꠇꠟ ꠇꠣꠝ-ꠇꠣꠎꠅ ꠞꠢꠝ-ꠛꠞꠇꠔ ꠖꠤꠛꠣ।
DEU 24:20 ꠎꠄꠔꠥꠘ ꠉꠣꠍꠞ ꠚꠟ ꠙꠣꠠꠤꠛꠣꠞ ꠇꠣꠟꠅ ꠄꠇꠁ ꠒꠣꠟꠞ ꠚꠟ ꠖꠥꠁꠛꠣꠞ ꠙꠣꠠꠤꠅ ꠘꠣ। ꠄꠇꠛꠣꠞ ꠙꠣꠠꠣꠞ ꠛꠣꠖꠦ ꠎꠦꠔꠣ ꠞꠄ, ꠁꠔꠣ ꠛꠤꠖꠦꠡꠤ ꠝꠥꠍꠣꠚꠤꠞ, ꠄꠔꠤꠝ ꠀꠞ ꠠꠣꠠꠤ ꠛꠦꠐꠤꠘ꠆ꠔꠞ ꠟꠣꠉꠤ ꠕꠁꠅ।
DEU 24:21 ꠔꠥꠝꠞꠣꠞ ꠀꠋꠉꠥꠞ ꠛꠣꠉꠣꠘꠞ ꠄꠇ ꠟꠔ ꠕꠣꠇꠤ ꠖꠥꠁ ꠛꠣꠞ ꠀꠋꠉꠥꠞ ꠙꠣꠠꠤꠅ ꠘꠣ, ꠄꠇꠛꠣꠞ ꠙꠣꠠꠣꠞ ꠛꠣꠖꠦ ꠎꠦꠔꠣ ꠞꠄ, ꠁꠔꠣ ꠛꠤꠖꠦꠡꠤ ꠝꠥꠍꠣꠚꠤꠞ, ꠄꠔꠤꠝ ꠀꠞ ꠠꠣꠠꠤ ꠛꠦꠐꠤꠘ꠆ꠔꠞ ꠟꠣꠉꠤ ꠕꠁ ꠖꠤꠅ।
DEU 24:22 ꠚꠣꠃꠞꠤꠅ ꠘꠣ, ꠔꠥꠝꠞꠣ ꠔ ꠀꠉꠦ ꠝꠤꠡꠞ ꠖꠦꠡꠅ ꠉꠥꠟꠣꠝ ꠀꠍꠟꠣꠄ। ꠄꠞꠟꠣꠉꠤ ꠀꠝꠤ ꠔꠥꠝꠞꠣꠞꠦ ꠁꠔꠣ ꠇꠞꠣꠞ ꠢꠥꠇꠥꠝ ꠖꠤꠞꠣꠝ।”
DEU 25:1 ꠝꠥꠍꠣ ꠘꠛꠤꠄ ꠔꠣꠞꠣꠞꠦ ꠀꠞꠅ ꠇꠁꠞꠣ, “ꠝꠣꠘꠡꠞ ꠝꠣꠎꠦ ꠇꠣꠁꠎ꠆ꠎꠣ-ꠚꠍꠣꠖ ꠟꠣꠉꠤꠀ ꠎꠥꠖꠤ ꠁꠔꠣ ꠢꠣꠇꠤꠝꠞ ꠀꠖꠣꠟꠔꠅ ꠎꠣꠄ, ꠔꠦ ꠢꠣꠇꠤꠝ ꠅꠇꠟꠦ ꠅꠙꠞꠣꠗꠤ ꠎꠘꠞꠦ ꠖꠥꠡꠤ ꠡꠣꠁꠛꠡ꠆ꠔ ꠇꠞꠛꠣ, ꠀꠞ ꠘꠤ-ꠅꠙꠞꠣꠗꠤꠞꠦ ꠈꠣꠟꠣꠍ ꠖꠤꠛꠣ।
DEU 25:2 ꠅꠃ ꠛꠤꠌꠣꠞꠅ ꠖꠥꠡꠤ ꠎꠘꠞꠦ ꠍꠤꠋꠟꠣꠖꠤ ꠝꠣꠞꠣꠞ ꠞꠣꠄ ꠖꠤꠟꠦ, ꠢꠣꠇꠤꠝꠦ ꠔꠣꠞꠦ ꠝꠣꠐꠤꠔ ꠢꠥꠔꠣꠁꠀ ꠔꠣꠞ ꠙꠣꠅꠘꠣ ꠝꠣꠁꠞ ꠔꠣꠘ ꠘꠤꠎꠞ ꠍꠣꠝꠘꠦ ꠝꠣꠞꠣꠁꠛꠣ,
DEU 25:3 ꠅꠁꠟꠦ ꠌꠣꠟ꠆ꠟꠤꠡꠐꠣꠞ ꠛꠦꠡꠤ ꠝꠣꠞꠣ ꠎꠣꠁꠔ ꠘꠣꠄ। ꠀꠞꠘꠣꠄ ꠘꠤꠎꠞ ꠎꠣꠔꠤꠞ ꠄꠇ ꠜꠣꠁꠞꠦ ꠡꠝꠣꠎꠞ ꠍꠣꠝꠘꠦ ꠛꠦꠁꠎ꠆ꠎꠔ ꠇꠞꠣ ꠅꠁꠛ।
DEU 25:4 “ꠗꠣꠘ ꠝꠣꠠꠣ ꠖꠤꠛꠣꠞ ꠇꠣꠟꠅ ꠉꠞꠥꠞ ꠝꠥꠈꠅ ꠢꠥꠚꠤ ꠟꠣꠉꠣꠁꠅ ꠘꠣ।
DEU 25:5 “ꠄꠇ ꠙꠞꠤꠛꠣꠞꠞ ꠢꠇꠟ ꠜꠣꠁꠀꠁꠘ ꠄꠇꠈꠣꠘꠅ ꠞꠅꠀꠞ ꠇꠣꠟꠅ ꠎꠥꠖꠤ ꠛꠤꠀꠔꠤ ꠇꠥꠘꠥ ꠜꠣꠁ ꠝꠞꠤꠎꠣꠄ, ꠀꠞ ꠔꠣꠞ ꠇꠥꠘꠥ ꠙꠥꠀꠂꠘ ꠘꠣ ꠕꠣꠇꠦ, ꠔꠦ ꠔꠣꠞ ꠠꠣꠠꠤ ꠛꠃꠄ ꠔꠣꠁꠞ ꠖꠦꠅꠞ ꠍꠣꠠꠣ ꠖꠥꠍꠞꠣ ꠇꠦꠃꠞꠞ ꠉꠦꠍꠦ ꠛꠤꠀ ꠛꠁꠔ ꠙꠣꠞꠔ ꠘꠣꠄ। ꠔꠣꠁꠞ ꠖꠦꠅꠞꠦ ꠔꠣꠁꠞꠦ ꠛꠤꠀ ꠇꠞꠤꠀ ꠔꠣꠞ ꠃꠙꠞꠦ ꠛꠞ꠆ꠔꠣꠁꠟ ꠖꠣꠄꠁꠔ꠆ꠔ ꠀꠖꠣꠄ ꠇꠞꠛ।
DEU 25:6 ꠔꠣꠞꠣꠞ ꠙꠄꠟꠣ ꠙꠥꠀꠞ ꠎꠘꠝ ꠅꠁꠟꠦ, ꠁ ꠙꠥꠀ ꠅꠃ ꠝꠞꠣ ꠜꠣꠁꠞ ꠅꠀꠞꠤꠡ ꠢꠤꠡꠣꠛꠦ ꠉꠁꠘ꠆ꠘ ꠅꠁꠛ, ꠔꠦꠃ ꠅꠃ ꠜꠣꠁꠞ ꠘꠣꠝ ꠛꠘꠤ ꠁꠍꠞꠣꠁꠟ ꠕꠣꠇꠤ ꠝꠥꠍꠤ ꠎꠣꠁꠔ ꠘꠣꠄ।
DEU 25:7 ꠅꠁꠟꠦ ꠔꠣꠁꠞ ꠖꠦꠅꠞꠦ ꠎꠥꠖꠤ ꠔꠣꠁꠞꠦ ꠛꠤꠀ ꠇꠞꠔ ꠞꠣꠎꠤ ꠘꠣ ꠅꠄ, ꠔꠦ ꠔꠣꠁ ꠢꠃ ꠉꠣꠃ ꠛꠣ ꠐꠣꠃꠘꠞ ꠙꠣꠁꠘ꠆ꠌꠣꠁꠔꠞ ꠉꠦꠍꠦ ꠉꠤꠀ ꠢꠘꠞ ꠝꠥꠞꠛ꠆ꠛꠤ ꠅꠇꠟꠞꠦ ꠇꠁꠛ, ꠀꠝꠣꠞ ꠖꠦꠅꠞꠦ ꠀꠝꠣꠞꠦ ꠛꠤꠀ ꠇꠞꠔ ꠞꠣꠎꠤ ꠘꠣꠄ, ꠢꠦ ꠔꠣꠞ ꠝꠞꠣ ꠜꠣꠁꠞ ꠘꠣꠝ ꠛꠘꠤ ꠁꠍꠞꠣꠁꠟꠞ ꠝꠣꠎꠦ ꠎꠤꠘ꠆ꠖꠣ ꠞꠣꠈꠔ ꠌꠣꠄ ꠘꠣ। ꠀꠝꠣꠞ ꠛꠦꠙꠣꠞꠦ ꠔꠣꠞ ꠃꠙꠞꠦ ꠛꠞ꠆ꠔꠣꠁꠟ ꠖꠣꠄ-ꠖꠣꠄꠁꠔ꠆ꠔ ꠀꠖꠣꠄ ꠇꠞꠦꠞ ꠘꠣ।
DEU 25:8 ꠔꠦꠃ ꠢꠃ ꠝꠥꠞꠛ꠆ꠛꠤ ꠅꠇꠟꠦ ꠔꠣꠞꠦ ꠀꠘꠣꠁꠀ ꠛꠥꠎꠣꠁꠛꠣ, ꠄꠞꠛꠣꠖꠦꠅ ꠢꠦ ꠘꠤꠇꠣ ꠇꠞꠔꠦ ꠞꠣꠎꠤ ꠘꠣ ꠅꠁꠟꠦ,
DEU 25:9 ꠅꠃ ꠠꠣꠠꠤ ꠛꠦꠐꠤꠄ ꠢꠃ ꠝꠥꠞꠛ꠆ꠛꠤ ꠅꠇꠟꠞ ꠍꠣꠝꠘꠦ, ꠔꠣꠞ ꠇꠣꠍꠣꠔ ꠉꠤꠀ ꠔꠣꠞ ꠙꠣꠅꠞ ꠄꠇꠈꠣꠘ ꠎꠥꠔꠣ ꠘꠤꠎꠦ ꠈꠥꠟꠤꠀ ꠘꠤꠛꠉꠤ, ꠀꠞ ꠔꠣꠞ ꠝꠥꠈꠅ ꠍꠦꠚ ꠚꠣꠟꠣꠁꠀ ꠇꠁꠛ, ꠀꠙꠘ ꠜꠣꠁꠞ ꠛꠋꠡ ꠎꠦꠉꠤꠄ ꠛꠣꠌꠣꠁꠔ ꠌꠣꠄ ꠘꠣ, ꠅꠉꠥꠞ ꠖꠡꠣ ꠅꠟꠣ ꠅꠃꠇ।
DEU 25:10 ꠛꠣꠖꠦ ꠅꠃ ꠛꠦꠐꠣꠞ ꠛꠋꠡꠞꠦ ꠛꠘꠤ ꠁꠍꠞꠣꠁꠟꠞ ꠝꠣꠎꠦ, ꠎꠥꠔꠣ ꠀꠞꠣꠅꠀꠞꠣꠞ ꠛꠋꠡ ꠘꠣꠝꠦ ꠒꠣꠇꠣ ꠅꠁꠛ।
DEU 25:11 “ꠖꠥꠁ ꠛꠦꠐꠣꠄ ꠝꠣꠞꠣ-ꠝꠣꠞꠤꠞ ꠇꠣꠟꠅ ꠎꠥꠖꠤ, ꠄꠇꠎꠘꠞ ꠛꠃ ꠉꠤꠀ ꠔꠣꠁꠞ ꠎꠣꠝꠣꠁꠞꠦ ꠢꠃ ꠛꠦꠐꠣꠞ ꠀꠔ ꠕꠣꠇꠤ ꠛꠣꠌꠣꠘꠤꠞ ꠘꠤꠅꠔꠦ, ꠢꠃ ꠛꠦꠐꠣꠞ ꠙꠥꠞꠥꠡꠣꠟꠤ ꠘꠚꠍꠅ ꠌꠤꠙꠤꠀ ꠗꠞꠦ,
DEU 25:12 ꠔꠦ ꠔꠥꠝꠞꠣ ꠢꠃ ꠛꠦꠐꠤꠞ ꠀꠔ ꠇꠣꠐꠤꠀ ꠚꠣꠟꠣꠁ ꠖꠤꠅ। ꠔꠣꠁꠞꠦ ꠇꠥꠘꠥ ꠖꠄꠀ ꠇꠞꠤꠅ ꠘꠣ।
DEU 25:13 “ꠝꠣꠙꠅ ꠐꠉꠤꠛꠣꠞ ꠟꠣꠉꠤ ꠔꠥꠝꠞꠣꠞ ꠕꠟꠤꠞ ꠝꠣꠎꠦ ꠄꠇꠁ ꠝꠣꠙꠞ ꠢꠥꠞꠥ-ꠛꠠ ꠖꠥꠁ ꠙꠣꠔ꠆ꠔꠞ ꠞꠣꠈꠤꠅ ꠘꠣ।
DEU 25:14 ꠔꠥꠝꠞꠣꠞ ꠊꠞꠅ ꠄꠇꠁ ꠝꠣꠙꠞ ꠢꠥꠞꠥ-ꠛꠠ ꠖꠥꠁꠐꠣ ꠢꠦꠞ-ꠙꠦꠐꠥ ꠞꠣꠈꠤꠅ ꠘꠣ।
DEU 25:15 ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠔꠥꠝꠞꠣꠞꠦ ꠎꠦ ꠖꠦꠡꠞ ꠖꠈꠟꠖꠣꠞꠤ ꠖꠤꠞꠣ, ꠢꠘꠅ ꠟꠣꠝ꠆ꠛꠣ ꠢꠣꠄꠀꠔꠤ ꠙꠣꠁꠛꠣꠞ ꠟꠣꠉꠤ, ꠔꠥꠝꠞꠣꠞ ꠝꠣꠙꠤꠛꠣꠞ ꠙꠣꠔ꠆ꠔꠞ ꠀꠞ ꠢꠦꠞ-ꠙꠦꠐꠥꠞ ꠃꠎꠘ ꠡꠑꠤꠇ ꠞꠣꠈꠤꠅ।
DEU 25:16 ꠇꠣꠞꠘ ꠎꠦꠉꠤꠄ ꠝꠣꠙꠞ ꠝꠣꠎꠦ ꠐꠉꠣ-ꠐꠉꠤ ꠇꠞꠦ, ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠔꠣꠞꠦ ꠊꠤꠘ ꠇꠞꠂꠘ।
DEU 25:17 “ꠝꠤꠡꠞ ꠖꠦꠡ ꠕꠣꠇꠤ ꠔꠥꠝꠞꠣ ꠛꠣꠞ ꠅꠁꠀ ꠀꠁꠛꠣꠞ ꠙꠕꠅ, ꠀꠝꠣꠟꠦꠇꠤ ꠅꠇꠟꠦ ꠔꠥꠝꠞꠣꠞ ꠟꠉꠦ ꠎꠦ ꠛꠦꠛꠢꠣꠞ ꠇꠞꠍꠤꠟ, ꠁꠔꠣ ꠚꠣꠃꠞꠤꠅ ꠘꠣ।
DEU 25:18 ꠀꠐꠤꠔꠦ ꠀꠐꠤꠔꠦ ꠔꠥꠝꠞꠣꠞ ꠇꠦꠃ ꠇꠦꠃ ꠎꠦꠛꠟꠣ ꠢꠦꠞꠣꠘ ꠅꠁꠀ ꠙꠤꠍꠦ ꠙꠠꠤ ꠉꠦꠍꠤꠟ, ꠅꠃ ꠡꠝꠄ ꠀꠝꠣꠟꠦꠇꠤ ꠅꠇꠟꠦ ꠀꠁꠀ ꠢꠣꠝꠟꠣ ꠇꠞꠍꠤꠟ, ꠔꠣꠞꠣ ꠔ ꠀꠟ꠆ꠟꠣꠞꠦꠅ ꠒꠞꠣꠁꠍꠦ ꠘꠣ।
DEU 25:19 ꠔꠥꠝꠞꠣꠞ ꠀꠟ꠆ꠟꠣ ꠝꠣꠛꠥꠖꠦ ꠔꠥꠝꠞꠣꠞꠦ ꠎꠦ ꠖꠦꠡꠞ ꠝꠣꠟꠤꠇꠣꠘꠣ ꠖꠤꠞꠣ, ꠢꠃ ꠖꠦꠡꠞ ꠀꠡ-ꠙꠣꠡꠞ ꠖꠥꠡꠝꠘ ꠅꠇꠟ ꠕꠣꠇꠤ ꠔꠣꠁꠘ ꠎꠦꠛꠟꠣ ꠔꠥꠝꠞꠣꠞꠦ ꠡꠣꠘ꠆ꠔꠤ ꠖꠤꠛꠣ, ꠢꠃ ꠡꠝꠄ ꠔꠥꠝꠞꠣ ꠖꠥꠘꠤꠀ ꠕꠣꠇꠤ ꠀꠝꠣꠟꠦꠇꠤ ꠅꠇꠟꠞ ꠘꠣꠝ ꠝꠤꠐꠣꠁꠟꠤꠛꠣꠄ। ꠁ ꠢꠥꠇꠥꠝ ꠈꠣꠘ ꠔꠥꠝꠞꠣ ꠇꠥꠘꠥ ꠖꠤꠘꠃ ꠚꠣꠃꠞꠤꠅ ꠘꠣ।
DEU 26:1 “ꠅ ꠛꠘꠤ ꠁꠍꠞꠣꠁꠟ ꠢꠥꠘꠅ, ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠔꠥꠝꠞꠣꠞꠦ ꠎꠦ ꠖꠦꠡꠞ ꠝꠣꠟꠤꠇꠣꠘꠣ ꠖꠤꠞꠣ, ꠔꠥꠝꠞꠣ ꠎꠦꠛꠟꠣ ꠢꠃ ꠖꠦꠡꠞ ꠖꠈꠟ ꠙꠣꠁꠀ ꠢꠘꠅ ꠛꠡꠔꠤ ꠇꠞꠛꠣꠄ,
DEU 26:2 ꠅꠃ ꠡꠝꠄ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠖꠦꠅꠀ ꠎꠝꠤꠘꠞ ꠢꠇꠟ ꠎꠣꠔꠞ ꠚꠡꠟ ꠕꠣꠇꠤ, ꠙꠄꠟꠣ ꠙꠣꠅꠀ ꠚꠡꠟꠞ ꠄꠇꠐꠣ ꠅꠋꠡ ꠄꠇ ꠐꠥꠇꠞꠤꠔ ꠜꠞꠤꠀ ꠀꠟꠉꠣꠁꠀ ꠕꠁꠅ। ꠀꠞ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠘꠤꠎꠞ ꠛꠣꠄꠔꠥꠟ꠆ꠟꠣ ꠡꠞꠤꠚ ꠢꠤꠡꠣꠛꠦ ꠎꠦ ꠎꠣꠉꠣꠞꠦ ꠙꠍꠘ꠆ꠖ ꠇꠞꠛꠣ, ꠅꠃ ꠚꠡꠟ ꠟꠁꠀ ꠢꠘꠅ ꠎꠣꠁꠅ।
DEU 26:3 ꠉꠤꠀ ꠢꠘꠅ ꠀꠎꠤꠞ ꠁꠝꠣꠝ ꠍꠣꠛꠞꠦ ꠇꠁꠅ, ꠀꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠀꠝꠞꠣꠞ ꠝꠄ-ꠝꠥꠞꠛ꠆ꠛꠤꠞ ꠉꠦꠍꠦ ꠇꠍꠝ ꠈꠣꠁꠀ ꠎꠦ ꠖꠦꠡꠈꠣꠘ ꠖꠤꠛꠣꠞ ꠅꠀꠖꠣ ꠇꠞꠍꠟꠣ, ꠀꠝꠞꠣ ꠅꠈꠘ ꠅꠘꠅ ꠀꠁꠍꠤ, ꠀꠁꠀ ꠔꠣꠘ ꠍꠣꠝꠘꠦ ꠀꠎꠤꠞ ꠅꠁꠍꠤ।
DEU 26:4 ꠔꠦꠃ ꠁꠝꠣꠝ ꠍꠣꠛꠦ ꠔꠥꠝꠞꠣꠞ ꠀꠔ ꠕꠣꠇꠤ ꠚꠟꠞ ꠐꠥꠇꠞꠤ ꠘꠤꠀ ꠀꠟ꠆ꠟꠣ ꠝꠣꠛꠥꠖꠞ ꠇꠥꠞꠛꠣꠘꠤ ꠈꠣꠘꠣꠞ ꠍꠣꠝꠘꠦ ꠕꠁꠛꠣ।
DEU 26:5 ꠛꠣꠖꠦ ꠔꠥꠝꠞꠣ ꠙꠞꠔꠦꠇꠦ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠍꠣꠝꠘꠦ ꠃꠛꠣꠁꠀ ꠇꠁꠅ, ꠀꠝꠞꠣꠞ ꠈꠣꠘ꠆ꠖꠣꠘꠞ ꠝꠥꠟ ꠝꠥꠞꠛ꠆ꠛꠤ ꠢꠎꠞꠔ ꠁꠀꠇꠥꠛ ꠀꠍꠟꠣ ꠄꠇꠎꠘ ꠅꠞꠣꠝꠤ ꠝꠥꠍꠣꠚꠤꠞ, ꠔꠣꠁꠘ ꠕꠥꠠꠣ ꠇꠄꠎꠘ ꠝꠣꠘꠡꠞꠦ ꠟꠉꠦ ꠟꠁꠀ ꠝꠤꠡꠞ ꠖꠦꠡꠅ ꠉꠦꠍꠟꠣꠉꠤ। ꠉꠤꠀ ꠝꠤꠡꠞ ꠖꠦꠡꠅ ꠝꠥꠍꠣꠚꠤꠞ ꠢꠣꠟꠔꠦ ꠛꠡꠔ ꠇꠞꠣꠞ ꠇꠣꠟꠅ ꠔꠣꠘ ꠃꠍꠤꠟ꠆ꠟꠣꠄ ꠔꠣꠞꠣ ꠄꠇ ꠝꠢꠣꠘ ꠎꠣꠔꠤ, ꠀꠞ ꠛꠃꠔ ꠛꠠ ꠛꠟꠀꠟꠣ ꠎꠣꠔꠤ ꠛꠘꠟꠣ।
DEU 26:6 ꠛꠣꠖꠦ ꠝꠤꠡꠞꠞ ꠝꠣꠘꠡꠦ ꠀꠝꠞꠣꠞ ꠟꠉꠦ ꠛꠎ꠆ꠎꠣꠔꠤ ꠇꠞꠟꠣ, ꠀꠝꠞꠣꠞꠦ ꠖꠥꠈ-ꠇꠡ꠆ꠐ ꠖꠤꠀ, ꠀꠝꠞꠣꠞꠦꠖꠤ ꠇꠑꠤꠘ ꠉꠥꠟꠣꠝꠤ ꠇꠞꠣꠁꠟ।
DEU 26:7 ꠀꠝꠞꠣ ꠖꠥꠈ ꠙꠣꠁꠀ ꠀꠝꠞꠣꠞ ꠝꠄ-ꠝꠥꠞꠛ꠆ꠛꠤꠞ ꠝꠣꠛꠥꠖ ꠀꠟ꠆ꠟꠣꠞ ꠖꠞꠛꠣꠞꠅ ꠇꠣꠘ꠆ꠖꠤꠟꠣꠝ। ꠔꠦꠃ ꠝꠣꠛꠥꠖꠦ ꠀꠝꠞꠣꠞ ꠚꠞꠤꠀꠖ ꠢꠥꠘꠤꠀ, ꠀꠝꠞꠣꠞ ꠖꠥꠈ-ꠇꠡ꠆ꠐ, ꠇꠑꠤꠘ ꠉꠥꠟꠣꠝꠤ, ꠀꠞ ꠀꠝꠞꠣꠞ ꠃꠙꠞꠞ ꠎꠥꠟꠥꠝꠞ ꠛꠣꠄ ꠘꠎꠞ ꠖꠤꠟꠣ।
DEU 26:8 ꠀꠞ ꠔꠣꠘ ꠛꠟꠀꠟꠣ-ꠝꠎꠛꠥꠔ ꠀꠔ ꠛꠣꠠꠣꠁꠀ, ꠈꠥꠛ ꠒꠞ-ꠈꠚ ꠖꠦꠈꠣꠁꠀ, ꠇꠥꠖꠞꠔꠤ ꠟꠤꠟꠣ-ꠈꠦꠟꠣ ꠖꠤꠀ ꠀꠞ ꠀꠌꠣꠘꠇ ꠉꠎꠛ ꠓꠣꠟꠤꠀ ꠝꠤꠡꠞ ꠖꠦꠡ ꠕꠣꠇꠤ ꠀꠝꠞꠣꠞꠦ ꠛꠣꠞ ꠇꠞꠤ ꠀꠘꠟꠣ।
DEU 26:9 ꠔꠣꠁꠘꠃ ꠀꠝꠞꠣꠞꠦ ꠅꠃ ꠖꠦꠡꠅ ꠀꠘꠍꠂꠘ, ꠖꠥꠗ ꠀꠞ ꠝꠃꠞ ꠜꠣꠘ꠆ꠒꠣꠞ ꠀꠟꠣ ꠀꠞꠣꠝꠞ ꠅꠃ ꠖꠦꠡ ꠀꠝꠞꠣꠞꠦ ꠖꠣꠘ ꠇꠞꠍꠂꠘ।
DEU 26:10 ꠄꠞꠟꠣꠉꠤ ꠅ ꠀꠝꠞꠣꠞ ꠝꠣꠛꠥꠖ, ꠔꠥꠝꠣꠞ ꠖꠦꠅꠀ ꠎꠝꠤꠘꠞ ꠚꠡꠟꠞ ꠙꠄꠟꠣ ꠛꠣꠐ ꠟꠁꠀ ꠀꠝꠤ ꠔꠥꠝꠣꠞ ꠍꠣꠝꠘꠦ ꠀꠎꠤꠞ ꠅꠁꠍꠤ। ꠅꠈꠣꠘ ꠇꠁꠀ, ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠍꠣꠝꠘꠦ ꠅꠃ ꠐꠥꠇꠞꠤ ꠕꠁꠅ, ꠕꠁꠀ ꠔꠣꠘꠞꠦ ꠍꠁꠎꠖꠣ ꠇꠞꠤꠅ।
DEU 26:11 ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠔꠥꠝꠞꠣꠞꠦ ꠀꠞ ꠔꠥꠝꠞꠣꠞ ꠙꠞꠤꠛꠣꠞꠞꠦ ꠎꠔ ꠘꠝꠥꠘꠣꠞ ꠜꠣꠟꠣꠁ ꠇꠞꠍꠂꠘ, ꠅꠔꠣ ꠝꠘꠅ ꠇꠞꠤꠀ ꠔꠥꠝꠞꠣ ꠘꠤꠎꠦ, ꠟꠦꠛꠤ ꠈꠣꠘ꠆ꠖꠣꠘꠞ ꠢꠇꠟꠦ, ꠀꠞ ꠔꠥꠝꠞꠣꠞ ꠟꠉꠦ ꠞꠅꠞꠣ ꠛꠤꠖꠦꠡꠤ ꠝꠥꠍꠣꠚꠤꠞ ꠅꠇꠟꠦ ꠈꠥꠡꠤ-ꠛꠣꠡꠤ ꠇꠞꠤꠅ।
DEU 26:12 “ꠙꠞꠔꠤ ꠔꠤꠘ ꠛꠍꠞ ꠛꠣꠖꠦ ꠛꠣꠖꠦ ꠔꠥꠝꠞꠣ ꠚꠄ-ꠚꠡꠟꠞ ꠖꠡ ꠛꠣꠐꠞ ꠄꠇ ꠛꠣꠐ ꠟꠦꠛꠤ ꠈꠣꠘ꠆ꠖꠣꠘꠞ ꠝꠣꠘꠡꠞꠦ, ꠛꠤꠖꠦꠡꠤ ꠝꠥꠍꠣꠚꠤꠞ ꠅꠇꠟꠞꠦ, ꠄꠔꠤꠝ ꠀꠞ ꠠꠣꠠꠤ ꠛꠦꠐꠤꠘ꠆ꠔꠞ ꠝꠣꠎꠦ ꠛꠤꠟꠣꠁ ꠖꠤꠅ। ꠔꠦꠃ ꠄꠞꠣ ꠙꠦꠐ ꠜꠞꠤ ꠈꠣꠁꠀ ꠔꠥꠝꠞꠣꠞ ꠖꠦꠡꠞ ꠝꠣꠎꠦ ꠀꠞꠣꠝꠦ ꠞꠁꠛꠣ। ꠄꠞꠟꠣꠉꠤ ꠁꠇꠐꠣꠞ ꠘꠣꠝ ꠅꠁꠟ ꠖꠡꠝꠣꠋꠡꠞ ꠛꠍꠞ।
DEU 26:13 ꠛꠣꠖꠦ ꠔꠥꠝꠞꠣ ꠙꠞꠔꠦꠇꠦ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞꠦ ꠇꠁꠅ, ꠝꠣꠛꠥꠖ, ꠀꠝꠤ ꠔꠥꠝꠣꠞ ꠢꠥꠇꠥꠝ ꠝꠣꠚꠤꠇ ꠀꠝꠣꠞ ꠞꠥꠎꠤꠞ ꠙꠛꠤꠔ꠆ꠞ ꠛꠣꠐꠞꠦ, ꠀꠝꠣꠞ ꠊꠞ ꠕꠣꠇꠤ ꠘꠤꠀ ꠟꠦꠛꠤ ꠈꠣꠘ꠆ꠖꠣꠘꠞꠦ, ꠝꠥꠍꠣꠚꠤꠞ ꠅꠇꠟꠞꠦ, ꠄꠔꠤꠝ ꠀꠞ ꠠꠣꠠꠤ ꠛꠦꠐꠤꠘ꠆ꠔꠞꠦ ꠛꠤꠟꠣꠁ ꠖꠤꠍꠤ। ꠀꠝꠤ ꠔꠥꠝꠣꠞ ꠇꠥꠘꠥ ꠢꠥꠇꠥꠝꠞ ꠈꠦꠟꠣꠚ ꠇꠞꠍꠤ ꠘꠣ, ꠛꠣ ꠚꠣꠃꠞꠤꠍꠤ ꠘꠣ।
DEU 26:14 ꠝꠥꠞ꠆ꠖꠣꠞ ꠟꠣꠉꠤ ꠇꠣꠘ꠆ꠖꠣ-ꠇꠣꠐꠤ ꠀꠞ ꠀꠢꠣꠎꠣꠞꠤ ꠇꠞꠣꠞ ꠡꠝꠄ ꠀꠝꠤ ꠅꠃ ꠙꠛꠤꠔ꠆ꠞ ꠅꠋꠡꠞ ꠇꠥꠘꠥꠔꠣ ꠈꠣꠁꠍꠤ ꠘꠣ, ꠛꠣ ꠘꠣꠙꠣꠇ ꠢꠣꠟꠔꠦ ꠁꠔꠣ ꠛꠣꠠꠤꠞ ꠛꠣꠞꠦ ꠘꠤꠍꠤ ꠘꠣ, ꠀꠞ ꠁꠔꠣꠞ ꠇꠥꠘꠥ ꠅꠋꠡ ꠝꠥꠞ꠆ꠖꠣꠞ ꠘꠣꠝꠦ ꠖꠣꠘ-ꠈꠄꠞꠣꠔꠅ ꠇꠞꠍꠤ ꠘꠣ। ꠀꠝꠤ ꠀꠝꠣꠞ ꠝꠣꠛꠥꠖ ꠀꠟ꠆ꠟꠣꠞ ꠢꠥꠇꠥꠝ ꠝꠣꠚꠤꠇ ꠌꠟꠍꠤ, ꠔꠥꠝꠣꠞ ꠢꠥꠇꠥꠝ ꠝꠣꠚꠤꠇ ꠢꠇꠟ ꠇꠣꠝ ꠇꠞꠍꠤ।
DEU 26:15 ꠅꠈꠘ, ꠅ ꠝꠣꠛꠥꠖ, ꠔꠥꠝꠣꠞ ꠙꠛꠤꠔ꠆ꠞ ꠛꠡꠔ ꠈꠣꠘꠣ ꠕꠣꠇꠤ, ꠔꠥꠝꠣꠞ ꠀꠞꠡꠦ-ꠀꠎꠤꠝ ꠕꠣꠇꠤ ꠔꠟꠦꠖꠤ ꠌꠣꠁꠀ ꠖꠦꠈꠅ, ꠀꠞ ꠔꠥꠝꠣꠞ ꠈꠣꠍ ꠙ꠆ꠞꠎꠣ ꠛꠘꠤ ꠁꠍꠞꠣꠁꠟꠞꠦ ꠞꠢꠝ-ꠛꠞꠇꠔ ꠖꠦꠅ। ꠀꠝꠞꠣꠞ ꠝꠄ-ꠝꠥꠞꠛ꠆ꠛꠤꠞ ꠟꠉꠦ ꠇꠍꠝ ꠇꠞꠣ ꠅꠀꠖꠣ ꠝꠣꠚꠤꠇ, ꠔꠥꠝꠤ ꠀꠝꠞꠣꠞꠦ ꠖꠥꠗ ꠀꠞ ꠝꠃꠞ ꠜꠣꠘ꠆ꠒꠣꠞ ꠀꠟꠣ ꠅꠃ ꠎꠦ ꠖꠦꠡꠈꠣꠘ ꠖꠣꠘ ꠇꠞꠍ, ꠄꠞ ꠝꠣꠐꠤꠔ ꠔꠥꠝꠤ ꠞꠢꠝ-ꠛꠞꠇꠔ ꠘꠣꠎꠤꠟ ꠇꠞꠅ।
DEU 26:16 “ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠀꠁꠎ ꠔꠥꠝꠞꠣꠞꠦ ꠅꠃ ꠢꠥꠇꠥꠝ ꠖꠤꠞꠣ, ꠔꠥꠝꠞꠣ ꠔꠣꠘ ꠛꠣꠔꠣꠁꠟ ꠘꠤꠅꠝ-ꠇꠣꠘꠥꠘ ꠀꠞ ꠢꠥꠇꠥꠝ-ꠀꠢꠇꠣꠝ ꠝꠣꠘꠤꠀ ꠌꠟꠤꠅ। ꠔꠥꠝꠞꠣ ꠖꠤꠟꠦ-ꠎꠣꠘꠦ ꠀꠡꠤꠇ ꠛꠘꠤꠀ ꠁꠔꠣ ꠀꠝꠟ ꠇꠞꠤꠅ।
DEU 26:17 ꠔꠥꠝꠞꠣ ꠔ ꠀꠁꠎ ꠡ꠆ꠛꠤꠇꠣꠞ ꠇꠞꠍ, ꠅꠃ ꠀꠟ꠆ꠟꠣꠃ ꠅꠁꠟꠣ ꠔꠥꠝꠞꠣꠞ ꠝꠣꠛꠥꠖ, ꠔꠥꠝꠞꠣ ꠔꠣꠘ ꠙꠕꠦ ꠌꠟꠛꠣꠄ, ꠔꠣꠘ ꠢꠥꠇꠥꠝ-ꠀꠢꠇꠣꠝ, ꠔꠣꠘ ꠡꠞꠤꠅꠔ ꠀꠞ ꠘꠤꠅꠝ-ꠇꠣꠘꠥꠘ ꠝꠣꠘꠛꠣꠄ, ꠔꠣꠘ ꠇꠕꠣ ꠢꠥꠘꠛꠣꠄ।
DEU 26:18 ꠄꠞꠟꠣꠉꠤ ꠝꠣꠛꠥꠖꠦꠅ ꠀꠁꠎ ꠡ꠆ꠛꠤꠇꠣꠞ ꠇꠞꠍꠂꠘ, ꠔꠣꠘ ꠅꠀꠖꠣ ꠝꠣꠚꠤꠇ ꠔꠥꠝꠞꠣ ꠅꠈꠘ ꠔꠣꠘ ꠙ꠆ꠞꠎꠣ, ꠔꠥꠝꠞꠣꠃ ꠔꠣꠘ ꠈꠣꠍ ꠡꠝ꠆ꠙꠖ, ꠔꠥꠝꠞꠣ ꠔꠣꠘ ꠢꠇꠟ ꠢꠥꠇꠥꠝ-ꠀꠢꠇꠣꠝ ꠀꠝꠟ ꠇꠞꠛꠣꠄ।
DEU 26:19 ꠔꠣꠁꠘ ꠀꠞꠅ ꠇꠁꠞꠣ, ꠔꠣꠘ ꠙꠄꠖꠣ ꠇꠞꠣ ꠔꠣꠝꠣꠝ ꠎꠣꠔꠤꠞ ꠃꠙꠞꠦ ꠔꠥꠝꠞꠣꠞꠦ ꠛꠠ ꠇꠞꠛꠣ। ꠔꠥꠝꠞꠣꠞ ꠁꠎ꠆ꠎꠔ, ꠡꠥꠘꠣꠝ ꠀꠞ ꠔꠣꠞꠤꠚ, ꠢꠇꠟ ꠎꠣꠔꠤꠞ ꠃꠙꠞꠦ ꠞꠁꠛ। ꠔꠣꠘ ꠅꠀꠖꠣ ꠝꠣꠚꠤꠇ ꠔꠥꠝꠞꠣ ꠅꠁꠛꠣꠄ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠘꠣꠝꠦ ꠄꠇ ꠙꠛꠤꠔ꠆ꠞ ꠙ꠆ꠞꠎꠣ।”
DEU 27:1 ꠝꠥꠍꠣ ꠘꠛꠤꠄ ꠛꠘꠤ ꠁꠍꠞꠣꠁꠟꠞ ꠝꠥꠞꠛ꠆ꠛꠤ ꠅꠇꠟꠞꠦ ꠟꠁꠀ ꠝꠣꠘꠡꠞꠦ ꠇꠁꠟꠣ, “ꠀꠝꠤ ꠔꠥꠝꠞꠣꠞꠦ ꠀꠁꠎ ꠎꠦꠔꠣ ꠎꠦꠔꠣ ꠢꠥꠇꠥꠝ ꠖꠤꠞꠣꠝ, ꠔꠥꠝꠞꠣ ꠁꠔꠣ ꠙꠥꠞꠣꠙꠥꠞ ꠀꠝꠟ ꠇꠞꠤꠅ।
DEU 27:2 ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠔꠥꠝꠞꠣꠞꠦ ꠎꠦ ꠖꠦꠡ ꠖꠣꠘ ꠇꠞꠞꠣ, ꠎꠞ꠆ꠖꠣꠘ ꠉꠣꠋ ꠙꠣꠞ ꠅꠁꠀ ꠢꠣꠞꠤ ꠔꠥꠝꠞꠣ ꠎꠦꠛꠟꠣ ꠢꠃ ꠖꠦꠡꠅ ꠎꠣꠁꠛꠣꠄ, ꠎꠣꠅꠀꠞ ꠛꠣꠖꠦ ꠇꠁꠄꠇꠐꠣ ꠛꠠ ꠛꠠ ꠙꠣꠔ꠆ꠔꠞ ꠈꠣꠠꠣ ꠇꠞꠤ ꠢꠣꠎꠣꠁꠀ, ꠁꠔꠣꠞꠦ ꠌꠥꠘꠣ ꠖꠤꠀ ꠙꠣꠇꠣ ꠇꠞꠤꠅ।
DEU 27:3 ꠀꠞ ꠅꠔꠣꠞ ꠃꠙꠞꠦ ꠅꠃ ꠔꠃꠞꠣꠔꠞ ꠔꠣꠝꠣꠝ ꠢꠥꠇꠥꠝ-ꠀꠢꠇꠣꠝ ꠟꠦꠈꠤꠅ। ꠛꠥꠎꠞꠣꠄ ꠘꠤ, ꠔꠥꠝꠞꠣꠞ ꠝꠄ-ꠝꠥꠞꠛ꠆ꠛꠤꠞ ꠝꠣꠛꠥꠖ ꠀꠟ꠆ꠟꠣꠄ, ꠖꠥꠗ ꠀꠞ ꠝꠃꠞ ꠜꠣꠘ꠆ꠒꠣꠞ ꠀꠟꠣ ꠎꠦ ꠖꠦꠡꠈꠣꠘ ꠔꠥꠝꠞꠣꠞꠦ ꠖꠤꠛꠣꠞ ꠅꠀꠖꠣ ꠇꠞꠍꠂꠘ, ꠁꠘ ꠕꠣꠇꠤ ꠢꠃ ꠖꠦꠡꠅ ꠉꠤꠀ ꠢꠣꠞꠟꠦ,
DEU 27:4 ꠎꠞ꠆ꠖꠣꠘ ꠉꠣꠋ ꠙꠣꠞ ꠅꠁꠀ ꠁꠛꠣꠟ ꠙꠣꠠꠞ ꠃꠙꠞꠦ ꠃꠑꠤꠀ, ꠀꠝꠣꠞ ꠛꠣꠔꠣꠁꠟ ꠀꠁꠎꠇꠥꠞ ꠢꠥꠇꠥꠝ ꠝꠣꠚꠤꠇ ꠔꠥꠝꠞꠣ ꠢꠃ ꠙꠣꠔ꠆ꠔꠞ ꠅꠇꠟ ꠢꠣꠎꠣꠁꠀ ꠈꠣꠠꠣ ꠇꠞꠤꠅ, ꠀꠞ ꠁꠔꠣꠞꠦ ꠌꠥꠘꠣ ꠖꠤꠀ ꠙꠣꠇꠣ ꠇꠞꠤꠅ।
DEU 27:5 ꠀꠞ ꠢꠘꠅ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠘꠣꠝꠦ ꠙꠣꠔ꠆ꠔꠞꠖꠤ ꠄꠇꠈꠣꠘ ꠇꠥꠞꠛꠣꠘꠤ ꠈꠣꠘꠣ ꠛꠣꠘꠣꠁꠅ। ꠅꠃ ꠙꠣꠔ꠆ꠔꠞꠞ ꠝꠣꠎꠦ ꠟꠥꠀꠞ ꠇꠥꠘꠥ ꠀꠔꠤꠀꠞ ꠟꠣꠉꠣꠁꠅ ꠘꠣ।
DEU 27:6 ꠀꠡ꠆ꠔꠣ ꠀꠡ꠆ꠔꠣ ꠙꠣꠔ꠆ꠔꠞ ꠖꠤꠀ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠅꠃ ꠇꠥꠞꠛꠣꠘꠤ ꠈꠣꠘꠣ ꠛꠣꠘꠣꠁꠅ, ꠛꠣꠘꠣꠁꠀ ꠄꠞ ꠃꠙꠞꠦ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠘꠣꠝꠦ ꠎꠣꠟꠣꠁꠟ ꠇꠥꠞꠛꠣꠘꠤ ꠀꠖꠣꠄ ꠇꠞꠤꠅ।
DEU 27:7 ꠀꠞ ꠍꠣꠟꠣꠝꠔꠤ ꠇꠥꠞꠛꠣꠘꠤꠅ ꠀꠖꠣꠄ ꠇꠞꠤꠅ। ꠅꠃ ꠇꠥꠞꠛꠣꠘꠤꠞ ꠉꠥꠡ꠆ꠔ ꠈꠣꠁꠀ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠍꠣꠝꠘꠦ ꠈꠥꠡꠤ-ꠛꠣꠡꠤ ꠇꠞꠤꠅ।
DEU 27:8 ꠀꠞ ꠌꠥꠘꠣ ꠟꠦꠙꠣ ꠢꠃ ꠙꠣꠔ꠆ꠔꠞꠞ ꠃꠙꠞꠦ ꠔꠃꠞꠣꠔꠞ ꠅꠃ ꠢꠥꠇꠥꠝ-ꠀꠢꠇꠣꠝ ꠅꠇꠟ ꠈꠥꠛ ꠡꠥꠘ꠆ꠖꠞ ꠇꠞꠤ ꠟꠦꠈꠤꠅ।”
DEU 27:9 ꠛꠣꠖꠦ ꠝꠥꠍꠣ ꠘꠛꠤꠄ ꠟꠦꠛꠤ ꠈꠣꠘ꠆ꠖꠣꠘꠞ ꠁꠝꠣꠝ ꠅꠇꠟꠞꠦ ꠟꠁꠀ ꠢꠇꠟ ꠛꠘꠤ ꠁꠍꠞꠣꠁꠟꠞꠦ ꠇꠁꠟꠣ, “ꠅ ꠛꠘꠤ ꠁꠍꠞꠣꠁꠟ, ꠘꠤꠞꠣꠁ ꠅꠅ, ꠀꠞ ꠀꠝꠣꠞ ꠇꠕꠣ ꠢꠥꠘꠅ, ꠅꠈꠘ ꠔ ꠔꠥꠝꠞꠣ ꠘꠤꠎꠞ ꠝꠣꠛꠥꠖ ꠀꠟ꠆ꠟꠣꠞ ꠈꠣꠍ ꠙ꠆ꠞꠎꠣ ꠛꠘꠤꠉꠦꠍ।
DEU 27:10 ꠔꠦ ꠔꠥꠝꠞꠣ ꠔꠣꠘ ꠢꠥꠇꠥꠝꠦ ꠌꠟꠤꠅ, ꠀꠞ ꠀꠝꠤ ꠀꠁꠎ ꠎꠦꠔꠣ ꠘꠤꠅꠝ-ꠇꠣꠘꠥꠘ, ꠢꠥꠇꠥꠝ-ꠀꠢꠇꠣꠝ ꠎꠣꠘꠣꠁꠟꠣꠝ, ꠁꠔꠣ ꠀꠝꠟ ꠇꠞꠤꠅ।”
DEU 27:11 ꠝꠥꠍꠣ ꠘꠛꠤꠄ ꠅꠃ ꠖꠤꠘ ꠝꠣꠘꠡꠞꠦ ꠢꠥꠇꠥꠝ ꠖꠤꠟꠣ, ꠇꠁꠟꠣ,
DEU 27:12 “ꠎꠞ꠆ꠖꠣꠘ ꠉꠣꠋ ꠙꠣꠞ ꠅꠁꠀ ꠢꠣꠞꠟꠦ ꠅꠃ ꠡꠝꠄ ꠡꠤꠝꠤꠅꠘ, ꠟꠦꠛꠤ, ꠄꠢꠥꠖꠣ, ꠁꠍꠣꠈꠞ, ꠁꠃꠍꠥꠚ, ꠀꠞ ꠛꠤꠘ-ꠁꠀꠝꠤꠘ ꠈꠣꠘ꠆ꠖꠣꠘꠞ ꠝꠣꠘꠥꠡ ꠅꠇꠟ ꠉꠤꠀ ꠘꠦꠇ ꠖꠥꠀꠞ ꠘꠤꠡꠣꠘꠣ ꠢꠤꠡꠣꠛꠦ ꠉꠞꠤꠍꠤꠝ ꠙꠣꠠꠞ ꠃꠙꠞꠦ ꠃꠑꠤꠅ।
DEU 27:13 ꠀꠞ ꠛꠖ꠆ꠖꠥꠀꠞ ꠘꠤꠡꠣꠘꠣ ꠢꠤꠡꠣꠛꠦ ꠞꠥꠛꠦꠘ, ꠍꠣꠖꠥ, ꠀꠡꠤꠞ, ꠍꠛꠥꠟꠘ, ꠖꠣꠘ ꠀꠞ ꠘꠙ꠆ꠔꠣꠟꠤ ꠈꠣꠘ꠆ꠖꠣꠘꠞ ꠝꠣꠘꠥꠡ ꠉꠤꠀ ꠁꠛꠣꠟ ꠙꠣꠠꠞ ꠃꠙꠞꠦ ꠃꠑꠤꠅ।
DEU 27:14 ꠛꠣꠖꠦ ꠟꠦꠛꠤ ꠈꠣꠘ꠆ꠖꠣꠘꠞ ꠝꠣꠘꠥꠡ ꠅꠇꠟ ꠃꠛꠣꠁꠀ, ꠛꠘꠤ ꠁꠍꠞꠣꠁꠟꠞ ꠔꠣꠝꠣꠝ ꠝꠣꠘꠡꠞꠦ ꠎꠥꠞꠦ ꠎꠥꠞꠦ ꠌꠤꠟ꠆ꠟꠣꠁꠀ ꠇꠁꠛꠣꠄ,
DEU 27:15 “ꠎꠦ ꠝꠣꠘꠡꠦ ꠟꠣꠇꠠꠤ ꠛꠣ ꠙꠣꠔ꠆ꠔꠞ ꠈꠥꠖꠤꠀ, ꠡꠥꠘꠣ-ꠞꠥꠙꠣ ꠛꠣ ꠙꠤꠔꠟ ꠉꠟꠣꠁꠀ ꠇꠥꠘꠥ ꠝꠥꠞ꠆ꠔꠤ ꠛꠣꠘꠣꠄ, ꠀꠞ ꠙꠥꠎꠣ ꠇꠞꠣꠞ ꠘꠤꠅꠔꠦ ꠅꠉꠥꠞꠦ ꠘꠤꠀ ꠟꠥꠇꠣꠁꠟ ꠎꠣꠉꠣꠔ ꠕꠄ, ꠢꠦ ꠔ ꠟꠣꠘ꠆ꠘꠔꠤ। ꠁ ꠝꠥꠞ꠆ꠔꠤꠞꠦ ꠔ ꠝꠣꠛꠥꠖꠦ ꠊꠤꠘ ꠇꠞꠂꠘ, ꠁꠔꠣ ꠈꠣꠟꠤ ꠇꠣꠝꠣꠞꠞ ꠀꠔꠞ ꠇꠣꠝ। ꠁꠈꠣꠘ ꠢꠥꠘꠤꠀ ꠢꠇꠟꠦ ꠇꠁꠅ, ꠀꠝꠤꠘ।
DEU 27:16 “ꠝꠣ-ꠛꠣꠚꠞꠦ ꠎꠦꠉꠤꠄ ꠛꠦꠁꠎ꠆ꠎꠔ ꠇꠞꠦ, ꠢꠦ ꠟꠣꠘ꠆ꠘꠔꠤ। ꠁꠈꠣꠘ ꠢꠥꠘꠤꠀ ꠢꠇꠟꠦ ꠇꠁꠅ, ꠀꠝꠤꠘ।
DEU 27:17 “ꠖꠈꠟꠖꠣꠞꠤꠞ ꠘꠤꠅꠔꠦ ꠎꠝꠤꠘꠞ ꠀꠁꠟ ꠛꠣ ꠡꠤꠝꠣꠘꠣ ꠈꠥꠐꠤ ꠎꠦꠉꠤꠄ ꠢꠞꠣꠄ, ꠢꠦ ꠟꠣꠘ꠆ꠘꠔꠤ। ꠁꠈꠣꠘ ꠢꠥꠘꠤꠀ ꠢꠇꠟꠦ ꠇꠁꠅ, ꠀꠝꠤꠘ।
DEU 27:18 “ꠀꠘ꠆ꠖꠣ ꠝꠣꠘꠡꠞꠦ ꠎꠦꠉꠤꠄ ꠜꠥꠟ ꠙꠕ ꠖꠦꠈꠣꠁ ꠖꠦꠄ, ꠢꠦ ꠟꠣꠘ꠆ꠘꠔꠤ। ꠁꠈꠣꠘ ꠢꠥꠘꠤꠀ ꠢꠇꠟꠦ ꠇꠁꠅ, ꠀꠝꠤꠘ।
DEU 27:19 “ꠛꠤꠖꠦꠡꠤ ꠝꠥꠍꠣꠚꠤꠞ, ꠄꠔꠤꠝ, ꠀꠞ ꠠꠣꠠꠤ ꠛꠦꠐꠤꠘ꠆ꠔꠞ ꠛꠤꠌꠣꠞ-ꠡꠣꠟꠤꠡꠤꠔ ꠎꠦꠉꠤꠄ ꠛꠦ-ꠁꠘꠍꠣꠚꠤ ꠇꠞꠦ, ꠢꠦ ꠟꠣꠘ꠆ꠘꠔꠤ। ꠁꠈꠣꠘ ꠢꠥꠘꠤꠀ ꠢꠇꠟꠦ ꠇꠁꠅ, ꠀꠝꠤꠘ।
DEU 27:20 “ꠢꠣꠔꠘ ꠝꠣʼꠞ ꠟꠉꠦ ꠎꠦꠉꠤꠄ ꠎꠤꠘꠣ ꠇꠞꠦ, ꠢꠦ ꠀꠙꠘ ꠛꠣꠚꠞꠦ ꠛꠦꠁꠎ꠆ꠎꠔ ꠇꠞꠦ। ꠢꠦ ꠔ ꠟꠣꠘ꠆ꠘꠔꠤ। ꠁꠈꠣꠘ ꠢꠥꠘꠤꠀ ꠢꠇꠟꠦ ꠇꠁꠅ, ꠀꠝꠤꠘ।
DEU 27:21 “ꠇꠥꠘꠥ ꠙꠡꠥꠞ ꠟꠉꠦ ꠎꠦꠉꠤꠄ ꠎꠤꠘꠣ ꠇꠞꠦ, ꠢꠦ ꠔ ꠟꠣꠘ꠆ꠘꠔꠤ। ꠁꠈꠣꠘ ꠢꠥꠘꠤꠀ ꠢꠇꠟꠦ ꠇꠁꠅ, ꠀꠝꠤꠘ।
DEU 27:22 “ꠎꠦꠉꠤꠄ ꠘꠤꠎꠞ ꠛꠁꠘꠞ ꠟꠉꠦ, ꠢꠣꠔꠘ ꠝꠣʼꠞ, ꠛꠣ ꠢꠣꠔꠘ ꠛꠣꠚꠞ ꠔꠞꠚꠣ ꠛꠁꠘꠞ ꠟꠉꠦ ꠎꠤꠘꠣ ꠇꠞꠦ, ꠢꠦ ꠔ ꠟꠣꠘ꠆ꠘꠔꠤ। ꠁꠈꠣꠘ ꠢꠥꠘꠤꠀ ꠢꠇꠟꠦ ꠇꠁꠅ, ꠀꠝꠤꠘ।
DEU 27:23 “ꠘꠤꠎꠞ ꠢꠠꠤꠞ ꠟꠉꠦ ꠎꠦꠉꠤꠄ ꠎꠤꠘꠣ ꠇꠞꠦ, ꠢꠦ ꠔ ꠟꠣꠘ꠆ꠘꠔꠤ। ꠁꠈꠣꠘ ꠢꠥꠘꠤꠀ ꠢꠇꠟꠦ ꠇꠁꠅ, ꠀꠝꠤꠘ।
DEU 27:24 “ꠎꠦꠉꠤꠄ ꠟꠥꠇꠣꠁꠀ ꠇꠥꠘꠥ ꠝꠣꠘꠡꠞꠦ ꠈꠥꠘ ꠇꠞꠦ, ꠢꠦ ꠔ ꠟꠣꠘ꠆ꠘꠔꠤ। ꠁꠈꠣꠘ ꠢꠥꠘꠤꠀ ꠢꠇꠟꠦ ꠇꠁꠅ, ꠀꠝꠤꠘ।
DEU 27:25 “ꠘꠤ-ꠅꠙꠞꠣꠗꠤ ꠝꠣꠘꠡꠞꠦ ꠈꠥꠘ ꠇꠞꠣꠞ ꠌꠥꠇ꠆ꠔꠤꠄ ꠎꠦꠉꠤꠄ ꠐꠦꠇꠣ ꠈꠣꠄ, ꠢꠦ ꠔ ꠟꠣꠘ꠆ꠘꠔꠤ। ꠁꠈꠣꠘ ꠢꠥꠘꠤꠀ ꠢꠇꠟꠦ ꠇꠁꠅ, ꠀꠝꠤꠘ।
DEU 27:26 “ꠅꠃ ꠡꠞꠤꠅꠔꠞ ꠇꠥꠘꠥ ꠢꠥꠇꠥꠝ-ꠀꠢꠇꠣꠝ ꠎꠦꠉꠤꠄ ꠝꠣꠘꠦ ꠘꠣ, ꠎꠦꠉꠤꠄ ꠁꠔꠣ ꠀꠝꠟ ꠇꠞꠦ ꠘꠣ, ꠢꠦ ꠔ ꠟꠣꠘ꠆ꠘꠔꠤ। ꠁꠈꠣꠘ ꠢꠥꠘꠤꠀ ꠢꠇꠟꠦ ꠇꠁꠅ, ꠀꠝꠤꠘ।
DEU 28:1 “ꠅ ꠛꠘꠤ ꠁꠍꠞꠣꠁꠟ, ꠀꠝꠤ ꠀꠁꠎ ꠔꠥꠝꠞꠣꠞꠦ ꠎꠦꠔꠣ ꠢꠥꠇꠥꠝ-ꠀꠢꠇꠣꠝ ꠖꠤꠞꠣꠝ, ꠅꠔꠣ ꠀꠝꠟ ꠇꠞꠣꠞ ꠘꠤꠅꠔꠦ ꠔꠥꠝꠞꠣ ꠎꠥꠖꠤ ꠘꠤꠎꠞ ꠝꠣꠛꠥꠖ ꠀꠟ꠆ꠟꠣꠞ ꠇꠣꠟꠣꠝꠞꠦ ꠈꠤꠀꠟ ꠇꠞꠤ ꠝꠣꠘꠅ, ꠔꠦ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠖꠥꠘꠤꠀꠞ ꠢꠇ꠆ꠇꠟ ꠎꠣꠔꠤꠞ ꠃꠙꠞꠦ ꠔꠥꠝꠞꠣꠞꠦ ꠃꠌꠣ ꠇꠞꠛꠣ।
DEU 28:2 ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠇꠣꠟꠣꠝ ꠝꠣꠘꠤꠀ ꠌꠟꠟꠦ, ꠔꠥꠝꠞꠣ ꠅꠃ ꠞꠢꠝꠔ ꠙꠣꠁꠛꠣꠄ, ꠀꠞ ꠅꠃ ꠞꠢꠝꠔ ꠅꠇꠟ ꠢꠣꠝꠦꠡꠣ ꠔꠥꠝꠞꠣꠞ ꠟꠉꠦ ꠟꠉꠦ ꠞꠁꠛ,
DEU 28:3 “ꠔꠥꠝꠞꠣꠞ ꠛꠡꠔ-ꠛꠣꠠꠤ ꠀꠞ ꠈꠦꠔ-ꠈꠣꠝꠣꠞꠞ ꠝꠣꠎꠦ ꠞꠢꠝ-ꠛꠞꠇꠔ ꠙꠣꠁꠛꠣꠄ।
DEU 28:4 “ꠔꠣꠘ ꠞꠢꠝꠔꠦ ꠔꠥꠝꠞꠣ ꠛꠃꠔ ꠀꠅꠟꠣꠖ ꠙꠣꠁꠛꠣꠄ, ꠎꠝꠤꠘꠅ ꠛꠃꠔ ꠚꠡꠟ ꠚꠟꠤꠛ, ꠉꠞꠥ-ꠍꠣꠉꠟꠦ ꠛꠃꠔ ꠛꠣꠁꠌ꠆ꠌꠣ ꠖꠤꠛꠣ।
DEU 28:5 “ꠔꠥꠝꠣꠞ ꠃꠉꠣꠞꠅ ꠀꠞ ꠔꠥꠝꠣꠞ ꠌꠣꠃꠟꠞ ꠝꠐꠇꠤꠔ ꠛꠞꠇꠔ ꠙꠣꠁꠛꠣꠄ।
DEU 28:6 “ꠢꠇꠟ ꠢꠣꠟꠔꠦ ꠢꠇꠟ ꠇꠣꠝꠅ ꠔꠥꠝꠤ ꠞꠢꠝ-ꠛꠞꠇꠔ ꠙꠣꠁꠛꠣꠄ।
DEU 28:7 “ꠖꠥꠡꠝꠘꠤꠞ ꠘꠤꠅꠔꠦ ꠎꠦꠔꠣꠄ ꠔꠥꠝꠞꠣꠞ ꠟꠉꠦ ꠟꠣꠉꠛꠣ, ꠝꠣꠛꠥꠖꠦ ꠁꠔꠣꠞꠦ ꠔꠥꠝꠞꠣꠞ ꠉꠦꠍꠦ ꠀꠞꠣꠁꠛꠣ। ꠔꠣꠞꠣ ꠄꠇ ꠖꠥꠀꠞꠦꠖꠤ ꠔꠥꠝꠞꠣꠞꠦ ꠝꠣꠞꠣꠔ ꠀꠁꠟꠦ, ꠡꠣꠔ ꠖꠥꠀꠞꠦꠖꠤ ꠜꠣꠉꠤꠛꠣ।
DEU 28:8 “ꠔꠥꠝꠞꠣꠞ ꠃꠉꠣꠞꠞ ꠝꠣꠎꠦ ꠝꠣꠛꠥꠖꠦ ꠛꠞꠇꠔ ꠖꠤꠛꠣ, ꠔꠥꠝꠞꠣ ꠎꠦ ꠇꠣꠝꠅ ꠀꠔ ꠖꠤꠛꠣꠄ, ꠅꠃ ꠇꠣꠝꠅꠃ ꠔꠣꠁꠘ ꠛꠞꠇꠔ ꠖꠤꠛꠣ। ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠔꠥꠝꠞꠣꠞꠦ ꠎꠦ ꠖꠦꠡ ꠖꠣꠘ ꠇꠞꠞꠣ, ꠢꠘꠅ ꠔꠥꠝꠞꠣꠞꠦ ꠞꠢꠝ-ꠛꠞꠇꠔ ꠖꠤꠛꠣ।
DEU 28:9 “ꠔꠥꠝꠞꠣ ꠎꠥꠖꠤ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠢꠥꠇꠥꠝ-ꠀꠢꠇꠣꠝ ꠝꠣꠘꠤꠀ, ꠔꠣꠘ ꠛꠣꠔꠣꠁꠟ ꠙꠕꠦ ꠌꠟꠅ, ꠔꠦ ꠔꠣꠁꠘ ꠇꠍꠝ ꠈꠣꠁꠀ ꠎꠦꠟꠣ ꠅꠀꠖꠣ ꠇꠞꠍꠂꠘ, ꠅꠟꠣ ꠔꠣꠘ ꠘꠤꠎꠞ ꠙꠛꠤꠔ꠆ꠞ ꠙ꠆ꠞꠎꠣ ꠢꠤꠡꠣꠛꠦ ꠔꠥꠝꠞꠣꠞꠦ ꠇꠣꠁꠝ ꠇꠞꠛꠣ।
DEU 28:10 ꠀꠞ ꠀꠡ꠆ꠔꠣ ꠖꠥꠘꠤꠀꠞ ꠢꠇꠟ ꠎꠣꠔꠤꠄ ꠖꠦꠈꠛꠣ, ꠔꠥꠝꠞꠣꠃ ꠅꠁꠟꠣꠄ ꠝꠣꠛꠥꠖꠞ ꠈꠣꠍ ꠝꠣꠘꠥꠡ, ꠖꠦꠈꠤꠀ ꠔꠣꠞꠣ ꠢꠇꠟꠦ ꠔꠥꠝꠞꠣꠞꠦ ꠒꠞꠣꠁꠛꠣ।
DEU 28:11 “ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠔꠥꠝꠞꠣꠞ ꠝꠄ-ꠝꠥꠞꠛ꠆ꠛꠤꠞ ꠉꠦꠍꠦ ꠎꠦ ꠖꠦꠡ ꠖꠤꠛꠣꠞ ꠟꠣꠉꠤ ꠇꠍꠝ ꠈꠣꠁꠍꠟꠣ, ꠅꠃ ꠖꠦꠡꠅ ꠔꠣꠁꠘ ꠔꠥꠝꠞꠣꠞ ꠛꠃꠔ ꠜꠣꠟꠣꠁ ꠇꠞꠛꠣ, ꠔꠥꠝꠞꠣꠞꠦ ꠛꠃꠔ ꠀꠅꠟꠣꠖ ꠖꠤꠛꠣ, ꠔꠥꠝꠞꠣꠞ ꠙꠡꠥꠞ ꠙꠣꠟꠣꠁꠘ꠆ꠔꠦ ꠛꠃꠔ ꠛꠣꠁꠌ꠆ꠌꠣ ꠖꠤꠛꠣ, ꠎꠝꠤꠘꠅ ꠛꠃꠔ ꠚꠡꠟ ꠚꠟꠤꠛ।
DEU 28:12 ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠔꠣꠘ ꠀꠍꠝꠣꠘꠤ ꠞꠢꠝꠔꠞ ꠖꠥꠀꠞ ꠈꠥꠟꠤꠀ ꠖꠤꠛꠣ, ꠎꠞꠥꠞ ꠝꠣꠚꠤꠇ ꠝꠦꠊ-ꠙꠣꠘꠤ ꠖꠤꠀ ꠔꠥꠝꠞꠣꠞ ꠀꠔꠞ ꠢꠇꠟ ꠇꠣꠝꠞ ꠝꠣꠎꠦ ꠞꠢꠝ-ꠛꠞꠇꠔ ꠖꠤꠛꠣ, ꠛꠃꠔ ꠎꠣꠔꠤꠞꠦ ꠔꠥꠝꠞꠣ ꠐꠦꠇꠣ-ꠙꠄꠡꠣ ꠀꠅꠟꠣꠔ ꠖꠤꠛꠣꠄ, ꠅꠁꠟꠦ ꠔꠥꠝꠞꠣ ꠇꠥꠘꠥ ꠀꠅꠟꠣꠔ ꠘꠤꠛꠣꠞ ꠖꠞꠇꠣꠞ ꠅꠁꠔ ꠘꠣꠄ।
DEU 28:13 ꠝꠣꠛꠥꠖꠦ ꠔꠥꠝꠞꠣꠞꠦ ꠅꠟꠣ ꠛꠣꠘꠣꠁꠛꠣ, ꠎꠣꠔꠦ ꠔꠥꠝꠞꠣ ꠢꠇꠟꠞ ꠝꠣꠕꠣꠞ ꠃꠙꠞꠦ ꠞꠅ, ꠇꠦꠃꠞꠞ ꠙꠣꠅꠞ ꠔꠟꠣꠔ ꠘꠣ ꠕꠣꠇꠅ। ꠔꠥꠝꠞꠣ ꠈꠣꠟꠤ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠅꠃ ꠢꠥꠇꠥꠝ-ꠀꠢꠇꠣꠝ ꠅꠇꠟ ꠈꠥꠛ ꠎꠔꠘ ꠇꠞꠤꠀ ꠀꠝꠟ ꠇꠞꠤꠅ, ꠎꠦꠔꠣ ꠀꠁꠎ ꠀꠝꠤ ꠔꠥꠝꠞꠣꠞꠦ ꠇꠁꠀꠞ, ꠔꠦꠃ ꠔꠥꠝꠞꠣ ꠢꠇꠟꠞ ꠃꠙꠞꠦ ꠞꠁꠛꠣꠄ, ꠔꠟꠦ ꠙꠠꠔꠣꠄ ꠘꠣꠄ।
DEU 28:14 ꠀꠞ ꠀꠁꠎ ꠀꠝꠤ ꠔꠥꠝꠞꠣꠞꠦ ꠎꠦꠔꠣ ꠢꠥꠇꠥꠝ ꠖꠤꠀꠞ, ꠀꠝꠣꠞ ꠅꠃ ꠔꠣꠟꠤꠝ ꠕꠣꠇꠤ ꠔꠥꠝꠞꠣ ꠒꠣꠁꠘꠦ-ꠛꠣꠃꠄ ꠢꠞꠤꠅ ꠘꠣ। ꠇꠥꠘꠥ ꠖꠦꠛ-ꠖꠦꠛꠤꠞ ꠈꠞꠦꠖꠤ ꠖꠃꠠꠣꠁꠀ ꠁꠔꠣꠞ ꠙꠥꠎꠣ ꠇꠞꠣꠔ ꠟꠣꠉꠤꠅ ꠘꠣ।
DEU 28:15 “ꠅꠁꠟꠦ ꠔꠥꠝꠞꠣ ꠎꠥꠖꠤ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠢꠥꠇꠥꠝ ꠘꠣ ꠝꠣꠘꠅ, ꠔꠣꠘ ꠎꠦꠔꠣ ꠢꠥꠇꠥꠝ-ꠀꠢꠇꠣꠝ ꠀꠞ ꠘꠤꠅꠝ-ꠇꠣꠘꠥꠘ ꠀꠁꠎ ꠀꠝꠤ ꠎꠣꠘꠣꠁꠍꠤ, ꠔꠥꠝꠞꠣ ꠈꠥꠛ ꠈꠤꠀꠟꠤ ꠅꠁꠀ ꠁꠔꠣ ꠘꠣ ꠝꠣꠘꠟꠦ, ꠔꠥꠝꠞꠣꠞ ꠃꠙꠞꠦ ꠅꠃ ꠟꠣꠘ꠆ꠘꠔ ꠅꠇꠟ ꠙꠠꠛ, ꠁꠔꠣ ꠢꠣꠝꠦꠡꠣ ꠔꠥꠝꠞꠣꠞ ꠟꠉꠦ ꠟꠉꠦ ꠞꠁꠛ:
DEU 28:16 “ꠔꠥꠝꠞꠣꠞ ꠛꠡꠔ-ꠛꠣꠠꠤ, ꠈꠦꠔ-ꠈꠣꠝꠣꠞ ꠢꠇꠟ ꠎꠣꠉꠣꠔ ꠟꠣꠘ꠆ꠘꠔ ꠙꠠꠛ।
DEU 28:17 “ꠔꠥꠝꠞꠣꠞ ꠃꠉꠣꠞꠅ ꠀꠞ ꠌꠣꠃꠟꠞ ꠝꠐꠇꠤꠔ ꠟꠣꠘ꠆ꠘꠔ ꠙꠠꠛ।
DEU 28:18 “ꠔꠥꠝꠞꠣꠞ ꠢꠥꠞꠥꠔ꠆ꠔꠣ ꠇꠝ ꠎꠘꠝꠤꠛꠣ, ꠎꠝꠤꠘꠅ ꠚꠄ-ꠚꠡꠟ ꠇꠝꠤꠎꠤꠛ, ꠉꠞꠥ-ꠍꠣꠉꠟꠦ ꠛꠣꠁꠌ꠆ꠌꠣ ꠇꠝ ꠖꠤꠛꠣ, ꠅꠃ ꠘꠝꠥꠘꠣꠄ ꠔꠥꠝꠞꠣꠞ ꠃꠙꠞꠦ ꠟꠣꠘ꠆ꠘꠔ ꠙꠠꠛ।
DEU 28:19 “ꠊꠞꠅ ꠛꠣ ꠛꠣꠁꠞꠣ ꠢꠇꠟ ꠈꠣꠘꠅ ꠔꠥꠝꠞꠣ ꠙꠞꠔꠤ ꠖꠤꠘ ꠟꠣꠘ꠆ꠘꠔ ꠙꠣꠁꠛꠣꠄ।
DEU 28:20 “ꠘꠣꠚꠞꠝꠣꠘꠤ ꠇꠣꠝ ꠇꠞꠤꠀ ꠝꠣꠛꠥꠖꠞ ꠉꠦꠍ ꠕꠣꠇꠤ ꠢꠞꠤ ꠎꠣꠅꠀꠄ, ꠔꠥꠝꠞꠣꠞ ꠢꠇꠟ ꠇꠣꠝ-ꠇꠣꠎꠞ ꠝꠣꠎꠦ ꠔꠣꠁꠘ ꠟꠣꠘ꠆ꠘꠔ ꠖꠤꠛꠣ। ꠛꠣꠟꠣ-ꠝꠍꠤꠛꠔꠅ ꠙꠠꠤꠀ, ꠀꠟ꠆ꠟꠣꠁ ꠉꠎꠛꠞ ꠎꠣꠔꠣꠄ, ꠔꠥꠝꠞꠣ ꠄꠇ꠆ꠇꠦꠞꠦ ꠛꠤꠘꠣꠡ ꠅꠀꠞ ꠀꠉ ꠙꠞ꠆ꠎꠘ꠆ꠔ, ꠀꠡ꠆ꠔꠦ ꠀꠡ꠆ꠔꠦ ꠈꠣꠟꠤ ꠇ꠆ꠇꠄ ꠅꠁꠛꠣꠄ।
DEU 28:21 ꠔꠥꠝꠞꠣ ꠎꠦ ꠖꠦꠡꠞ ꠖꠈꠟꠖꠣꠞꠤ ꠙꠣꠁꠞꠣꠄ, ꠝꠣꠛꠥꠖꠦ ꠢꠘꠅ ꠔꠥꠝꠞꠣꠞ ꠃꠙꠞꠦ ꠛꠦꠝꠣꠞ ꠍꠣꠠꠤꠛꠣ, ꠛꠦꠝꠣꠞꠦ ꠔꠥꠝꠞꠣ ꠝꠞꠔꠦ ꠝꠞꠔꠦ ꠢꠃ ꠖꠦꠡꠅ ꠕꠣꠇꠤ ꠛꠤꠘꠣꠡ ꠅꠁꠛꠣꠄ।
DEU 28:22 ꠝꠣꠛꠥꠖꠦ ꠔꠥꠝꠞꠣꠞ ꠡꠞꠤꠟꠅ ꠘꠡ꠆ꠐ ꠅꠀ ꠛꠦꠝꠣꠞ, ꠛꠣꠇ꠆ꠇꠣ ꠔꠣꠙ ꠀꠞ ꠎꠟꠣ-ꠚꠥꠠꠣ, ꠅꠔꠣ ꠛꠦꠝꠣꠞꠖꠤ ꠔꠥꠝꠞꠣꠞ ꠃꠙꠞꠦ ꠉꠎꠛ ꠖꠤꠛꠣ। ꠀꠞ ꠝꠞꠇꠤ, ꠢꠥꠇꠘꠣ ꠉꠞꠝ ꠛꠣꠔꠣꠡ, ꠚꠡꠟꠞ ꠢꠥꠘꠣ-ꠇꠣꠘꠤ ꠢꠥꠇꠣꠁ ꠎꠣꠅꠀꠞ ꠛꠦꠝꠣꠞ ꠀꠞ ꠙꠣꠔꠣ ꠝꠞꠣ, ꠅꠔꠣ ꠉꠎꠛ ꠅꠇꠟ ꠔꠥꠝꠞꠣꠞ ꠎꠝꠤꠘꠅ ꠖꠤꠛꠣ। ꠔꠥꠝꠞꠣ ꠝꠞꠤꠀ ꠚꠥꠠꠣꠘꠤꠞ ꠀꠉ ꠙꠞ꠆ꠎꠘ꠆ꠔ ꠁ ꠉꠎꠛ ꠔꠥꠝꠞꠣꠞ ꠈꠞꠦ ꠈꠞꠦ ꠞꠁꠛ।
DEU 28:23 ꠔꠥꠝꠞꠣꠞ ꠝꠣꠕꠣꠞ ꠃꠙꠞꠞ ꠀꠍꠝꠣꠘ ꠅꠁꠛ ꠙꠤꠔꠟꠞ ꠟꠣꠈꠣꠘ ꠡꠇ꠆ꠔ, ꠀꠞ ꠙꠣꠅꠞ ꠔꠟꠞ ꠎꠝꠤꠘ ꠅꠁꠛ ꠟꠥꠀꠞ ꠟꠣꠈꠣꠘ ꠇꠑꠤꠘ।
DEU 28:24 ꠝꠣꠛꠥꠖꠦ ꠝꠦꠊꠞ ꠛꠖꠟꠣ ꠔꠥꠝꠞꠣꠞ ꠖꠦꠡꠅ ꠀꠍꠝꠣꠘ ꠕꠣꠇꠤ ꠗꠥꠁꠟ ꠍꠣꠠꠤꠛꠣ, ꠔꠥꠝꠞꠣ ꠛꠤꠘꠣꠡ ꠅꠀꠞ ꠀꠉ ꠙꠞ꠆ꠎꠘ꠆ꠔ ꠁꠔꠣ ꠢꠣꠝꠦꠡꠣ ꠙꠠꠣꠔ ꠞꠁꠛ।
DEU 28:25 “ꠝꠣꠛꠥꠖꠦ ꠔꠥꠝꠞꠣꠞ ꠖꠥꠡꠝꠘ ꠅꠇꠟꠞ ꠝꠥꠇꠣꠛꠤꠟꠣꠔ ꠔꠥꠝꠞꠣꠞꠦ ꠀꠞꠣꠁꠛꠣ, ꠄꠞꠣꠞꠦ ꠄꠇ ꠙꠕꠦꠖꠤ ꠝꠣꠞꠣꠔ ꠉꠦꠟꠦ ꠡꠣꠔ ꠙꠕꠦꠖꠤ ꠜꠣꠉꠤꠛꠣꠄ। ꠔꠥꠝꠞꠣꠞ ꠖꠡꠣ ꠖꠦꠈꠤꠀ ꠎꠉꠔꠞ ꠢꠇꠟ ꠎꠣꠔꠤꠄ ꠒꠞꠣꠁꠀ ꠇꠣꠙꠤꠛꠣ।
DEU 28:26 ꠔꠥꠝꠞꠣꠞ ꠟꠣꠡ ꠅꠁꠛ ꠙꠡꠥ-ꠙꠣꠈꠤꠘ꠆ꠔꠞ ꠈꠥꠞꠣꠇ। ꠁꠔꠣꠞꠦ ꠈꠦꠖꠣꠘꠤꠞ ꠟꠣꠉꠤ ꠇꠦꠃ ꠞꠁꠔ ꠘꠣꠄ।
DEU 28:27 ꠝꠣꠛꠥꠖꠦ ꠢꠃ ꠝꠤꠡꠞꠤ ꠅꠇꠟꠞ ꠟꠣꠈꠣꠘ ꠔꠥꠝꠞꠣꠞ ꠉꠔꠞꠅ ꠉꠎꠛꠤ ꠛꠤꠡ-ꠚꠥꠞꠤ, ꠐꠤꠃꠝꠣꠞ, ꠚꠥꠐ-ꠈꠣꠃꠎꠟꠤ ꠛꠦꠝꠣꠞ ꠖꠤꠛꠣ, ꠁꠔꠣ ꠕꠣꠇꠤ ꠇꠦꠃ ꠔꠥꠝꠞꠣꠞꠦ ꠡꠤꠚꠣ ꠇꠞꠣꠞ ꠈꠦꠝꠔꠣ ꠘꠣꠁ।
DEU 28:28 ꠔꠣꠁꠘ ꠔꠥꠝꠞꠣꠞꠦ ꠙꠣꠉꠟ, ꠀꠘ꠆ꠖꠣ ꠀꠞ ꠛꠦꠖꠤꠡꠣ ꠛꠣꠘꠣꠁꠛꠣ।
DEU 28:29 ꠀꠘ꠆ꠖꠣꠄ ꠎꠦꠟꠣ ꠀꠘ꠆ꠖꠣꠞꠤꠞ ꠝꠣꠎꠦ ꠀꠔꠣꠁ ꠀꠔꠣꠁ ꠀꠐꠦ, ꠔꠥꠝꠞꠣ ꠖꠤꠘꠞ ꠛꠣꠟꠣ ꠅꠟꠣ ꠀꠐꠤꠛꠣꠄ, ꠔꠥꠝꠞꠣꠞ ꠇꠥꠘꠥ ꠇꠣꠝꠃ ꠇꠣꠝꠤꠀꠛ ꠅꠁꠔ ꠘꠣꠄ। ꠔꠥꠝꠞꠣꠞ ꠃꠙꠞꠦ ꠢꠣꠝꠦꠡꠣ ꠎꠥꠟꠥꠝ ꠀꠞ ꠟꠥꠐ-ꠔꠞꠣꠎ ꠌꠟꠛ, ꠁꠔꠣ ꠕꠣꠇꠤ ꠛꠣꠌꠣꠘꠤꠞ ꠟꠣꠉꠤ ꠇꠦꠃ ꠀꠁꠔ ꠘꠣꠄ।
DEU 28:30 “ꠡꠣꠖꠤ ꠇꠞꠣꠞ ꠟꠣꠉꠤ ꠎꠦ ꠇꠁꠘꠣꠞ ꠟꠉꠦ ꠔꠥꠝꠣꠞ ꠀꠈꠔ ꠅꠁꠛ, ꠀꠞꠇ ꠛꠦꠐꠣꠄ ꠀꠁꠀ ꠅꠃ ꠇꠁꠘꠣꠞ ꠁꠎ꠆ꠎꠔ ꠟꠥꠐꠤꠛ। ꠔꠥꠝꠤ ꠊꠞ ꠛꠣꠘꠣꠁꠛꠣꠄ, ꠅꠁꠟꠦ ꠊꠞꠅ ꠛꠡꠔ ꠇꠞꠔꠣꠄ ꠙꠣꠞꠔꠣꠄ ꠘꠣꠄ। ꠀꠋꠉꠥꠞꠞ ꠛꠣꠉꠣꠘ ꠇꠞꠤꠀ, ꠚꠟ ꠈꠣꠅꠀ ꠇꠙꠣꠟꠅ ꠎꠥꠐꠔ ꠘꠣꠄ।
DEU 28:31 ꠔꠥꠝꠞꠣꠞ ꠌꠈꠥꠞ ꠍꠣꠝꠘꠦ ꠔꠥꠝꠞꠣꠞ ꠉꠞꠥ ꠎꠛ ꠇꠞꠣ ꠅꠁꠛ, ꠅꠁꠟꠦ ꠄꠇ ꠐꠥꠇꠞꠣ ꠉꠥꠡ꠆ꠔꠅ ꠔꠥꠝꠞꠣꠞ ꠙꠦꠐꠅ ꠎꠣꠁꠔ ꠘꠣꠄ। ꠔꠥꠝꠞꠣꠞ ꠉꠣꠗꠣꠞꠦ ꠔꠥꠝꠞꠣꠞ ꠀꠔ ꠕꠣꠇꠤ ꠇꠣꠠꠤꠀ ꠘꠦꠅꠀ ꠅꠁꠛ, ꠁꠔꠣ ꠀꠞ ꠚꠤꠞꠔ ꠙꠣꠁꠔꠣꠄ ꠘꠣꠄ। ꠔꠥꠝꠞꠣꠞ ꠝꠦꠠꠣ-ꠍꠣꠉꠟ ꠔꠥꠝꠞꠣꠞ ꠖꠥꠡꠝꠘꠞ ꠀꠔꠅ ꠎꠣꠁꠛ, ꠅꠔꠣ ꠛꠤꠙꠖ ꠕꠣꠇꠤ ꠛꠣꠌꠣꠘꠤꠞ ꠟꠣꠉꠤ ꠇꠦꠃ ꠀꠉꠥꠀꠁ ꠀꠁꠔ ꠘꠣꠄ।
DEU 28:32 ꠔꠥꠝꠞꠣꠞ ꠙꠥꠀ-ꠙꠥꠠꠤꠘ ꠖꠥꠍꠞꠣ ꠎꠣꠔꠤꠞ ꠀꠔꠅ ꠀꠐꠇ ꠅꠁꠛꠣ, ꠔꠣꠞꠣꠞ ꠀꠡꠣꠄ ꠛꠣꠞ ꠌꠣꠁꠔꠦ ꠌꠣꠁꠔꠦ ꠔꠥꠝꠞꠣꠞ ꠌꠈꠥꠞ ꠎꠥꠔꠤ ꠘꠡ꠆ꠐ ꠅꠁꠛ, ꠅꠁꠟꠦ ꠇꠥꠘ꠆ꠔꠣ ꠇꠞꠣꠞ ꠡꠥꠎꠥꠉ ꠅꠁꠔ ꠘꠣꠄ।
DEU 28:33 ꠔꠥꠝꠞꠣꠞ ꠅꠌꠤꠘꠣ ꠜꠤꠘ ꠎꠣꠔꠤꠄ ꠔꠥꠝꠞꠣꠞ ꠈꠦꠔꠞ ꠚꠄ-ꠚꠡꠟ, ꠀꠞ ꠔꠥꠝꠞꠣꠞ ꠝꠦꠘꠔꠞ ꠢꠇꠟ ꠝꠎꠥꠞꠤ ꠟꠥꠐꠤꠀ ꠘꠤꠛꠉꠤ, ꠔꠥꠝꠞꠣ ꠢꠣꠞꠣ ꠎꠤꠘ꠆ꠖꠦꠉꠤ ꠈꠣꠟꠤ ꠎꠥꠟꠥꠝ-ꠝꠍꠤꠛꠔ ꠙꠣꠁꠛꠣꠄ ꠀꠞ ꠌꠥꠞꠝꠣꠞ ꠅꠁꠛꠣꠄ।
DEU 28:34 ꠔꠥꠝꠞꠣꠞ ꠌꠃꠈꠦ ꠁ ꠟꠣꠈꠣꠘ ꠀꠞꠅ ꠎꠦꠔꠣ ꠖꠦꠈꠛꠣꠄ, ꠖꠦꠈꠤꠀ ꠝꠣꠕꠣ ꠈꠣꠞꠣꠙ ꠅꠁꠛ।
DEU 28:35 ꠝꠣꠛꠥꠖꠦ ꠔꠥꠝꠞꠣꠞ ꠃꠞꠣꠔꠅ ꠀꠞ ꠀꠐꠥꠔ ꠡꠥꠞꠥ ꠇꠞꠤꠀ, ꠙꠣꠅꠞ ꠔꠟꠣ ꠕꠣꠇꠤ ꠝꠣꠕꠣꠞ ꠔꠣꠟꠥ ꠙꠞ꠆ꠎꠘ꠆ꠔ ꠀꠡ꠆ꠔꠣ ꠉꠔꠞꠅ ꠛꠤꠡ-ꠚꠥꠞꠤ ꠖꠤꠛꠣ, ꠁꠔꠣꠞ ꠇꠥꠘꠥ ꠡꠤꠚꠣ ꠘꠣꠁ।
DEU 28:36 “ꠔꠥꠝꠞꠣꠞ ꠃꠙꠞꠦ ꠛꠣꠖꠡꠣꠁ ꠇꠞꠣꠞ ꠟꠣꠉꠤ ꠔꠥꠝꠞꠣ ꠎꠣꠞꠦ ꠉꠖꠤꠔ ꠛꠅꠀꠁꠛꠣꠄ, ꠝꠣꠛꠥꠖꠦ ꠢꠃ ꠛꠣꠖꠡꠣ ꠀꠞ ꠔꠥꠝꠞꠣꠞꠦ ꠛꠘ꠆ꠖꠤ ꠇꠞꠣꠁꠀ ꠅꠝꠘ ꠄꠇ ꠎꠣꠔꠤꠞ ꠀꠔꠅ ꠚꠣꠟꠣꠁꠛꠣ, ꠎꠦꠔꠣꠞ ꠘꠣꠝꠃ ꠔꠥꠝꠞꠣ ꠢꠥꠘꠍ ꠘꠣ, ꠔꠥꠝꠞꠣꠞ ꠝꠄ-ꠝꠥꠞꠛ꠆ꠛꠤꠄꠅ ꠢꠥꠘꠍꠂꠘ ꠘꠣ। ꠢꠘꠅ ꠉꠤꠀ ꠔꠥꠝꠞꠣ ꠙꠣꠔ꠆ꠔꠞ ꠀꠞ ꠟꠣꠇꠠꠤꠖꠤ ꠛꠣꠘꠣꠁꠟ ꠝꠥꠞ꠆ꠔꠤꠞ ꠙꠥꠎꠣ ꠇꠞꠛꠣꠄ।
DEU 28:37 ꠝꠣꠛꠥꠖꠦ ꠔꠥꠝꠞꠣꠞꠦ ꠎꠦꠔꠣ ꠎꠣꠔꠤꠞ ꠝꠣꠎꠦ ꠈꠦꠖꠣꠁ ꠖꠤꠛꠣ, ꠢꠔꠣꠄ ꠔꠥꠝꠞꠣꠞꠦ ꠖꠦꠈꠤꠀ ꠌꠝꠇꠤꠎꠤꠛ, ꠔꠥꠝꠞꠣꠞ ꠖꠡꠣ ꠌꠤꠠ ꠀꠞ ꠑꠣꠐ꠆ꠐꠣ-ꠝꠡꠇꠞꠣꠞ ꠛꠤꠡꠄ ꠅꠁꠛ।
DEU 28:38 “ꠔꠥꠝꠞꠣ ꠈꠦꠔ ꠇꠞꠛꠣꠄ ꠛꠃꠔ, ꠅꠁꠟꠦ ꠚꠡꠟ ꠙꠣꠁꠛꠣꠄ ꠕꠥꠠꠣ, ꠇꠣꠞꠘ ꠙꠋꠉꠙꠣꠟꠦ ꠈꠣꠁꠟꠤꠛꠣ।
DEU 28:39 ꠔꠥꠝꠞꠣ ꠀꠋꠉꠥꠞꠞ ꠛꠣꠉꠣꠘ ꠇꠞꠤꠀ ꠎꠣꠄ-ꠎꠔꠘ ꠇꠞꠛꠣꠄ, ꠅꠁꠟꠦ ꠇꠤꠠꠣ ꠀꠞ ꠙꠥꠇꠦ ꠛꠣꠉꠣꠘ ꠈꠣꠁꠟꠤꠛ, ꠄꠞꠟꠣꠉꠤ ꠔꠥꠝꠞꠣ ꠀꠋꠉꠥꠞꠅ ꠙꠣꠁꠔꠣꠄ ꠘꠣꠄ, ꠄꠞ ꠡꠞꠛꠔꠅ ꠈꠣꠁꠔꠣꠄ ꠙꠣꠞꠔꠣꠄ ꠘꠣꠄ।
DEU 28:40 ꠔꠥꠝꠞꠣꠞ ꠢꠣꠞꠣ ꠖꠦꠡ ꠎꠄꠔꠥꠘ ꠉꠣꠍꠦ ꠜꠞꠣ ꠞꠁꠟꠦꠅ, ꠎꠄꠔꠥꠘ ꠚꠟ ꠏꠞꠤꠀ ꠙꠠꠤꠎꠤꠛ, ꠄꠞꠟꠣꠉꠤ ꠔꠥꠝꠞꠣꠞ ꠡꠞꠤꠟꠅ ꠔꠦꠟ ꠝꠣꠈꠣ ꠅꠁꠔ ꠘꠣꠄ।
DEU 28:41 ꠔꠥꠝꠞꠣꠞ ꠎꠔ ꠀꠅꠟꠣꠖ ꠅꠁꠛꠣ, ꠁꠔꠣ ꠔꠥꠝꠞꠣꠞ ꠉꠦꠍꠦ ꠞꠁꠔꠣ ꠘꠣꠄ, ꠁꠔꠣꠞꠦ ꠛꠘ꠆ꠖꠤ ꠇꠞꠤ ꠘꠦꠅꠀ ꠅꠁꠛ।
DEU 28:42 ꠉꠎꠛꠤ ꠝꠃꠀ-ꠙꠥꠇꠞ ꠙꠣꠟ ꠀꠁꠀ ꠔꠥꠝꠞꠣꠞ ꠉꠣꠍ-ꠉꠣꠍꠣꠟꠤ ꠀꠞ ꠚꠡꠟ ꠈꠣꠁꠟꠤꠛꠣ।
DEU 28:43 “ꠔꠥꠝꠞꠣꠞ ꠝꠣꠎꠦ ꠛꠡꠔ ꠇꠞꠞꠣ ꠜꠤꠘ ꠎꠣꠔꠤꠞ ꠝꠣꠘꠥꠡ ꠅꠇꠟ ꠀꠡ꠆ꠔꠦ ꠀꠡ꠆ꠔꠦ ꠃꠙꠞꠦꠖꠤ ꠃꠑꠛꠣ, ꠀꠞ ꠔꠥꠝꠞꠣ ꠔꠟꠦꠖꠤ ꠟꠣꠝꠛꠣꠄ।
DEU 28:44 ꠔꠣꠞꠣ ꠔꠥꠝꠞꠣꠞꠦ ꠐꠦꠇꠣ-ꠙꠄꠡꠣ ꠀꠅꠟꠣꠔ ꠖꠤꠛꠣ, ꠔꠥꠝꠞꠣ ꠔꠣꠞꠣꠞꠦ ꠀꠅꠟꠣꠔ ꠖꠤꠛꠣꠞ ꠡꠣꠁꠖ꠆ꠖ ꠅꠁꠔ ꠘꠣꠄ। ꠔꠣꠞꠣ ꠞꠁꠛꠣ ꠔꠥꠝꠞꠣꠞ ꠝꠣꠕꠣꠞ ꠃꠙꠞꠦ, ꠔꠥꠝꠞꠣ ꠞꠁꠛꠣꠄ ꠔꠣꠞꠣꠞ ꠙꠣꠅꠞ ꠔꠟꠣꠔ।
DEU 28:45 “ꠅꠃ ꠔꠣꠝꠣꠝ ꠟꠣꠘ꠆ꠘꠔ ꠔꠥꠝꠞꠣꠞ ꠃꠙꠞꠦ ꠙꠠꠛ। ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠈꠥꠡꠤ ꠝꠣꠚꠤꠇ ꠘꠣ ꠌꠟꠣꠄ, ꠔꠣꠘ ꠢꠥꠇꠥꠝ-ꠀꠢꠇꠣꠝ ꠀꠞ ꠘꠤꠅꠝ-ꠇꠣꠘꠥꠘ ꠘꠣ ꠝꠣꠘꠣꠄ ꠅꠃ ꠟꠣꠘ꠆ꠘꠔ ꠅꠇꠟ ꠔꠥꠝꠞꠣꠞ ꠟꠉꠦ ꠟꠣꠉꠣꠁꠟ ꠞꠁꠛ। ꠁꠔꠣꠄ ꠔꠥꠝꠞꠣꠞꠦ ꠎꠣꠔꠤꠀ ꠗꠞꠤꠀ ꠛꠤꠘꠣꠡ ꠇꠞꠤꠟꠣꠁꠛ।
DEU 28:46 ꠅꠃ ꠟꠣꠘ꠆ꠘꠔ ꠅꠇꠟ ꠔꠥꠝꠞꠣ ꠀꠞ ꠔꠥꠝꠞꠣꠞ ꠀꠅꠟꠣꠖꠞ ꠃꠙꠞꠦ, ꠎꠥꠉ ꠎꠥꠉ ꠗꠞꠤ ꠇꠥꠖꠞꠔꠤ ꠢꠥꠡꠤꠀꠞꠤ ꠢꠤꠡꠣꠛꠦ ꠞꠁꠛ।
DEU 28:47 ꠔꠥꠝꠞꠣ ꠘꠤꠎꠞ ꠡꠥꠖꠤꠘꠞ ꠇꠣꠟꠅ ꠝꠘꠞ ꠈꠥꠡꠤꠄ ꠀꠡꠤꠇ ꠛꠘꠤꠀ ꠘꠤꠎꠞ ꠝꠣꠛꠥꠖ ꠀꠟ꠆ꠟꠣꠞ ꠉꠥꠟꠣꠝꠤ ꠇꠞꠍ ꠘꠣ,
DEU 28:48 ꠄꠞꠟꠣꠉꠤ ꠝꠣꠛꠥꠖꠦ ꠔꠥꠝꠞꠣꠞ ꠈꠞꠦꠖꠤ ꠖꠥꠡꠝꠘ ꠟꠣꠉꠣꠁꠛꠣ, ꠔꠥꠝꠞꠣ ꠙꠦꠐꠞ ꠜꠥꠇꠦ, ꠙꠣꠘꠤꠞ ꠙꠤꠀꠍꠦ, ꠅꠜꠣꠛ-ꠅꠘꠐꠘꠦ ꠢꠇꠤꠞ ꠛꠘꠤꠀ ꠔꠣꠞꠣꠞ ꠉꠥꠟꠣꠝꠤ ꠇꠞꠛꠣꠄ। ꠝꠣꠛꠥꠖꠦ ꠔꠥꠝꠞꠣꠞ ꠇꠣꠘ꠆ꠖꠅ ꠟꠥꠀꠞ ꠎꠥꠀꠟ ꠚꠤꠘ꠆ꠖꠣꠁꠛꠣ, ꠅꠃ ꠎꠥꠀꠟꠤꠞ ꠔꠟꠦ ꠔꠥꠝꠞꠣꠞ ꠛꠤꠘꠣꠡ ꠅꠁꠛ।
DEU 28:49 “ꠝꠣꠛꠥꠖꠦ ꠛꠃꠔ ꠖꠥꠞꠁ ꠕꠣꠇꠤ, ꠎꠉꠔꠞ ꠢꠦꠡ ꠡꠤꠝꠣꠘꠣ ꠕꠣꠇꠤ, ꠅꠟꠣ ꠄꠇ ꠎꠣꠔꠤꠞꠦ ꠌꠤꠟꠞ ꠘꠝꠥꠘꠣꠄ ꠃꠠꠣꠁꠀ ꠀꠘꠛꠣ, ꠎꠦꠔꠣꠞ ꠝꠥꠈꠞ ꠛꠥꠟꠤ ꠔꠥꠝꠞꠣ ꠛꠥꠎꠔꠣꠄ ꠘꠣꠄ।
DEU 28:50 ꠁꠔꠣꠞ ꠉꠑꠘ ꠅꠁꠛ ꠛꠖꠍꠥꠞꠔ, ꠁꠔꠣꠄ ꠇꠥꠘꠥ ꠛꠥꠠꠣ-ꠛꠥꠠꠤꠞꠦ ꠁꠎ꠆ꠎꠔ ꠖꠤꠔꠣ ꠘꠣꠄ, ꠀꠞ ꠢꠥꠞꠥꠔ꠆ꠔꠣꠞꠦꠅ ꠝꠣꠄꠀ ꠇꠞꠔꠣ ꠘꠣꠄ।
DEU 28:51 ꠔꠣꠞꠣ ꠔꠥꠝꠞꠣꠞ ꠙꠡꠥꠞ ꠛꠣꠁꠌ꠆ꠌꠣ ꠀꠞ ꠈꠦꠔꠞ ꠚꠡꠟ ꠈꠣꠁꠟꠤꠛꠣ, ꠢꠦꠡ-ꠝꠦꠡ ꠔꠥꠝꠞꠣ ꠛꠤꠘꠣꠡ ꠅꠁꠛꠣꠄ। ꠔꠣꠞꠣ ꠇꠥꠘꠥꠎꠣꠔ ꠚꠡꠟ, ꠘꠄꠀ ꠇꠥꠘꠥ ꠀꠋꠉꠥꠞꠞ ꠡꠞꠛꠔ, ꠔꠦꠟ, ꠉꠞꠥ-ꠍꠣꠉꠟꠞ ꠛꠣꠁꠌ꠆ꠌꠣ, ꠇꠥꠘ꠆ꠔꠣꠃ ꠔꠥꠝꠞꠣꠞ ꠟꠣꠉꠤ ꠕꠁꠔꠣ ꠘꠣꠄ, ꠢꠦꠡ-ꠝꠦꠡ ꠔꠥꠝꠞꠣ ꠛꠤꠘꠣꠡ ꠅꠁꠎꠤꠛꠣꠄ।
DEU 28:52 ꠔꠣꠞꠣ ꠔꠥꠝꠞꠣꠞ ꠐꠣꠃꠘ ꠅꠇꠟ ꠛꠦꠞꠤꠀ ꠞꠣꠈꠛꠣ, ꠀꠞ ꠔꠥꠝꠞꠣ ꠎꠦꠔꠣꠞ ꠃꠙꠞꠦ ꠜꠞꠡꠣ ꠇꠞꠞꠣꠄ, ꠔꠥꠝꠞꠣꠞ ꠢꠃ ꠃꠌꠣ ꠃꠌꠣ ꠝꠎꠛꠥꠔ ꠛꠣꠃꠘ꠆ꠒꠞꠤꠞ ꠅꠀꠟ ꠅꠇꠟ ꠢꠦꠡ-ꠝꠦꠡ ꠜꠣꠋꠉꠤꠀ ꠙꠠꠤꠎꠤꠛ। ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠔꠥꠝꠞꠣꠞꠦ ꠎꠦ ꠖꠦꠡꠞ ꠖꠈꠟꠖꠣꠞꠤ ꠖꠤꠞꠣ, ꠢꠃ ꠖꠦꠡꠞ ꠢꠇ꠆ꠇꠟ ꠉꠣꠃ ꠀꠞ ꠐꠣꠃꠘ ꠔꠣꠞꠣ ꠛꠦꠞꠤꠟꠤꠛꠣ।
DEU 28:53 “ꠀꠞ ꠖꠥꠡꠝꠘꠦ ꠛꠦꠞꠤꠀ ꠞꠣꠈꠣꠞ ꠇꠣꠟꠅ ꠔꠥꠝꠞꠣ ꠅꠔ ꠛꠠ ꠝꠍꠤꠛꠔꠅ ꠙꠠꠛꠣꠄ, ꠄꠞꠟꠣꠉꠤ ꠔꠥꠝꠞꠣꠞ ꠘꠤꠎꠞ ꠙꠥꠀ-ꠙꠥꠠꠤꠞꠦ ꠈꠣꠁꠟꠤꠛꠣꠄ, ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠖꠦꠅꠀ ꠀꠅꠟꠣꠖꠞ ꠉꠥꠡ꠆ꠔ ꠘꠤꠎꠦ ꠈꠣꠁꠛꠣꠄ।
DEU 28:54 ꠢꠃ ꠡꠝꠄ ꠔꠥꠝꠞꠣꠞ ꠝꠣꠎꠦ ꠎꠦꠞꠣ ꠜꠣꠟꠣ ꠝꠣꠘꠥꠡ, ꠎꠦꠞꠣ ꠡꠥꠈꠦ ꠀꠞ ꠀꠞꠣꠝ-ꠀꠄꠄꠡꠦ ꠀꠍꠦ, ꠔꠣꠞꠣꠞ ꠝꠘ-ꠝꠤꠎꠣꠎꠅ ꠅꠟꠣꠈꠣꠘ ꠅꠁꠎꠤꠛ, ꠔꠣꠞꠣ ꠀꠙꠘ ꠜꠣꠁꠞꠦ, ꠘꠤꠎꠞ ꠛꠃꠞꠦ ꠀꠞ ꠛꠣꠇꠤ ꠙꠥꠀ-ꠙꠥꠠꠤꠞꠦ ꠇꠥꠘꠥ ꠖꠄꠀ-ꠝꠣꠄꠀ ꠇꠞꠔ ꠘꠣꠄ।
DEU 28:55 ꠢꠦ ꠔꠣꠞ ꠎꠦ ꠀꠅꠟꠣꠖꠞ ꠉꠥꠡ꠆ꠔ ꠈꠣꠁꠛ, ꠁꠔꠣꠞ ꠄꠇꠈꠣꠘ ꠐꠥꠇꠞꠣꠅ ꠔꠣꠞꠣꠞꠦ ꠖꠤꠔ ꠘꠣꠄ। ꠇꠣꠞꠘ ꠖꠥꠡꠝꠘꠦ ꠎꠦꠛꠟꠣ ꠔꠥꠝꠞꠣꠞ ꠐꠣꠃꠘ ꠅꠇꠟ ꠛꠦꠞꠤꠀ ꠞꠣꠈꠛꠣ, ꠅꠃ ꠡꠝꠄ ꠔꠥꠝꠞꠣꠞ ꠙꠦꠐꠞ ꠜꠥꠇ ꠝꠤꠐꠣꠘꠤꠞ ꠟꠣꠉꠤ ꠘꠤꠎꠞ ꠢꠥꠞꠥꠔ꠆ꠔꠣꠞ ꠉꠥꠡ꠆ꠔ ꠍꠣꠠꠣ ꠀꠞ ꠇꠥꠘꠥꠔꠣꠅ ꠝꠤꠟꠔ ꠘꠣꠄ।
DEU 28:56 ꠔꠥꠝꠞꠣꠞ ꠝꠣꠎꠞ ꠈꠥꠛ ꠘꠞꠝ ꠖꠤꠟꠞ ꠎꠦ ꠛꠦꠐꠤ ꠝꠣꠘꠥꠡ ꠀꠍꠦ, ꠎꠦ ꠛꠦꠐꠤꠄ ꠡꠥꠇꠤꠟꠣ ꠎꠤꠘ꠆ꠖꠦꠉꠤꠞ ꠖꠣꠄ ꠇꠥꠘꠥꠖꠤꠘ ꠝꠣꠐꠤꠔ ꠙꠣꠅ ꠚꠣꠟꠣꠁꠍꠦ ꠘꠣ, ꠢꠃ ꠛꠦꠐꠤꠄꠅ ꠔꠣꠁꠞ ꠎꠣꠘꠞ ꠐꠥꠇꠞꠣ ꠎꠣꠝꠣꠁ ꠛꠣ ꠀꠅꠟꠣꠖꠞ ꠛꠣꠄ ꠇꠥꠘꠥ ꠖꠄꠀ-ꠝꠣꠄꠀ ꠇꠞꠔ ꠘꠣꠄ।
DEU 28:57 ꠖꠥꠡꠝꠘꠦ ꠔꠥꠝꠞꠣꠞꠦ ꠛꠦꠞꠤꠀ ꠞꠣꠈꠣꠄ ꠙꠦꠐꠞ ꠜꠥꠇꠞ ꠎꠣꠟꠣꠄ ꠀꠅꠟꠣꠖꠞ ꠎꠘꠝ ꠖꠦꠅꠀꠞ ꠟꠉꠦ ꠟꠉꠦ, ꠅꠃ ꠝꠣʼꠄ ꠘꠤꠎꠞ ꠀꠅꠟꠣꠖꠞ ꠉꠥꠡ꠆ꠔ, ꠀꠞ ꠙꠦꠐꠅ ꠕꠣꠇꠤ ꠛꠣꠞꠅꠁꠟ ꠙꠥꠀꠔꠤ-ꠚꠥꠟ ꠙꠞ꠆ꠎꠘ꠆ꠔ ꠘꠤꠎꠦ ꠘꠤꠎꠦ ꠟꠥꠇꠣꠁꠀ ꠈꠣꠁꠟꠤꠛ।
DEU 28:58 “ꠅꠃ ꠇꠤꠔꠣꠛꠞ ꠝꠣꠎꠦ ꠡꠞꠤꠅꠔꠞ ꠎꠔ ꠢꠥꠇꠥꠝ-ꠀꠢꠇꠣꠝ ꠟꠦꠈꠣ ꠀꠍꠦ, ꠁꠔꠣ ꠎꠥꠖꠤ ꠔꠥꠝꠞꠣ ꠈꠥꠛ ꠈꠤꠀꠟ ꠇꠞꠤꠀ ꠀꠝꠟ ꠘꠣ ꠇꠞꠅ, ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠝꠢꠤꠝꠣ ꠀꠞ ꠒꠞ-ꠈꠚ ꠀꠟꠣ ꠘꠣꠝꠞ ꠁꠎ꠆ꠎꠔ ꠘꠣ ꠇꠞꠅ,
DEU 28:59 ꠔꠦ ꠝꠣꠛꠥꠖꠦ ꠔꠥꠝꠞꠣ ꠀꠞ ꠔꠥꠝꠞꠣꠞ ꠀꠅꠟꠣꠖ ꠅꠇꠟꠞꠦ ꠛꠦꠎꠥꠁꠔꠣ ꠛꠦꠝꠣꠞ ꠖꠤꠛꠣ, ꠅꠃ ꠛꠦꠝꠣꠞꠦ ꠔꠥꠝꠞꠣ ꠟꠣꠝ꠆ꠛꠣ ꠡꠝꠄ ꠜꠥꠉꠣꠘ꠆ꠔꠤ ꠇꠞꠛꠣꠄ।
DEU 28:60 ꠝꠤꠡꠞꠅ ꠕꠣꠇꠔꠦ ꠛꠦꠎꠥꠁꠔꠣ ꠎꠔ ꠛꠦꠝꠣꠞ-ꠀꠎꠣꠞ ꠖꠦꠈꠤꠀ ꠔꠥꠝꠞꠣ ꠇꠣꠙꠤꠔꠣꠄ, ꠢꠃ ꠛꠦꠝꠣꠞ-ꠀꠎꠣꠞ ꠅꠈꠘ ꠔꠥꠝꠞꠣꠞ ꠃꠙꠞꠦ ꠖꠤꠛꠣ, ꠁꠔꠣꠄ ꠔꠥꠝꠞꠣꠞ ꠙꠤꠍ ꠍꠣꠠꠔ ꠘꠣꠄ।
DEU 28:61 ꠀꠞ ꠅꠃ ꠔꠃꠞꠣꠔ ꠇꠤꠔꠣꠛꠅ ꠎꠦꠔꠣ ꠛꠦꠝꠣꠞꠞ ꠘꠣꠝ ꠟꠦꠈꠣ ꠘꠣꠁ, ꠅꠟꠣ ꠇꠑꠤꠘ ꠉꠎꠛꠤ ꠀꠞꠅ ꠛꠃꠔ ꠛꠦꠝꠣꠞ-ꠀꠎꠣꠞ ꠝꠣꠛꠥꠖꠦ ꠔꠥꠝꠞꠣꠞ ꠃꠙꠞꠦ ꠍꠣꠠꠤꠛꠣ, ꠔꠥꠝꠞꠣ ꠛꠤꠘꠣꠡ ꠅꠀꠞ ꠀꠉ ꠙꠞ꠆ꠎꠘ꠆ꠔ ꠁꠔꠣ ꠌꠣꠟꠥ ꠞꠁꠛ।
DEU 28:62 ꠔꠥꠝꠞꠣ ꠘꠤꠎꠞ ꠝꠣꠛꠥꠖ ꠀꠟ꠆ꠟꠣꠞ ꠢꠥꠇꠥꠝ ꠘꠣ ꠝꠣꠘꠣꠄ, ꠔꠥꠝꠞꠣꠞ ꠝꠣꠘꠡꠞ ꠙꠞꠤꠝꠣꠘ ꠅꠈꠘ ꠀꠍꠝꠣꠘꠞ ꠔꠦꠞꠣꠞ ꠟꠣꠈꠣꠘ ꠛꠃꠔ ꠛꠦꠡꠤ ꠅꠁꠟꠦꠅ, ꠁꠔꠣ ꠝꠞꠤꠀ ꠈꠥꠛ ꠕꠥꠠꠣ ꠛꠣꠌꠤꠀ ꠞꠁꠛꠣ।
DEU 28:63 ꠝꠣꠛꠥꠖꠦ ꠈꠥꠡꠤ ꠅꠁꠀ ꠔꠥꠝꠞꠣꠞꠦ ꠎꠦꠟꠣ ꠀꠄ-ꠃꠘ꠆ꠘꠔꠤ ꠖꠤꠀ ꠛꠣꠠꠣꠁꠍꠟꠣ, ꠔꠥꠝꠞꠣꠞ ꠝꠣꠘꠡꠞ ꠙꠞꠤꠝꠣꠘ ꠛꠠ ꠇꠞꠍꠟꠣ, ꠢꠃ ꠟꠣꠈꠣꠘ ꠈꠥꠡꠤ ꠇꠞꠤꠀ ꠅꠈꠘ ꠢꠤꠞꠛꠣꠞ ꠔꠥꠝꠞꠣꠞꠦ ꠛꠤꠘꠣꠡ ꠇꠞꠤꠀ ꠘꠤꠙꠣꠔ ꠇꠞꠛꠣ। ꠔꠥꠝꠞꠣ ꠅꠈꠘ ꠎꠦ ꠖꠦꠡꠞ ꠖꠈꠟꠖꠣꠞꠤ ꠙꠣꠁꠞꠣꠄ, ꠢꠃ ꠖꠦꠡ ꠕꠣꠇꠤ ꠔꠥꠝꠞꠣꠞꠦ ꠇꠣꠠꠤꠀ ꠘꠦꠅꠀ ꠅꠁꠛ।
DEU 28:64 “ꠛꠣꠖꠦ ꠎꠉꠔꠞ ꠄꠇ ꠇꠤꠘꠣꠞꠣ ꠕꠣꠇꠤ ꠀꠞꠇ ꠇꠤꠘꠣꠞꠣ ꠙꠞ꠆ꠎꠘ꠆ꠔ, ꠢꠇꠟ ꠎꠣꠔꠤꠞ ꠝꠣꠎꠦ ꠔꠥꠝꠞꠣꠞꠦ ꠍꠤꠔ꠆ꠞꠣꠁ ꠖꠤꠛꠣ। ꠢꠘꠅ ꠞꠁꠀ ꠔꠥꠝꠞꠣ ꠀꠞ ꠔꠥꠝꠞꠣꠞ ꠝꠄ-ꠝꠥꠞꠛ꠆ꠛꠤꠞ ꠅꠌꠤꠘꠣ ꠖꠦꠛ-ꠖꠦꠛꠤꠞ ꠡꠦꠛꠣ ꠇꠞꠛꠣꠄ, ꠟꠣꠇꠠꠤ ꠀꠞ ꠙꠣꠔ꠆ꠔꠞꠞ ꠝꠥꠞ꠆ꠔꠤꠞꠦ ꠙꠥꠎꠣ ꠖꠤꠛꠣꠄ।
DEU 28:65 ꠢꠃ ꠎꠣꠔꠤ ꠅꠇꠟꠞ ꠟꠉꠦ ꠞꠁꠀ ꠔꠥꠝꠞꠣꠞ ꠡꠣꠘ꠆ꠔꠤ ꠝꠤꠟꠔ ꠘꠣꠄ, ꠔꠥꠝꠞꠣꠞ ꠀꠞꠣꠝꠞ ꠟꠣꠉꠤ ꠇꠥꠘꠥ ꠎꠣꠉꠣ ꠞꠁꠔ ꠘꠣꠄ। ꠢꠘꠅ ꠝꠣꠛꠥꠖꠦ ꠔꠥꠝꠞꠣꠞ ꠝꠘꠞ ꠝꠣꠎꠦ ꠢꠣꠄ-ꠢꠥꠔꠣꠡ ꠛꠣꠠꠣꠁꠛꠣ, ꠔꠥꠝꠞꠣꠞ ꠌꠈꠥꠞ ꠢꠇꠟ ꠀꠡꠣ-ꠜꠞꠡꠣ, ꠀꠞ ꠖꠤꠟꠞ ꠡꠈꠞꠦ ꠔꠣꠁꠘ ꠘꠤꠞꠣꠡ, ꠘꠤꠡ꠆ꠔꠦꠎ ꠇꠞꠛꠣ।
DEU 28:66 ꠇꠤꠔꠣ ꠊꠐꠤꠛ ꠛꠣ ꠘꠣ ꠊꠐꠤꠛ ꠅꠔꠣ ꠌꠤꠘ꠆ꠔꠣꠄ ꠔꠥꠝꠞꠣꠞ ꠖꠤꠘ ꠉꠥꠎꠞꠤꠛ, ꠖꠤꠘ-ꠞꠣꠁꠔ ꠢꠣꠝꠦꠡꠣ ꠈꠣꠟꠤ ꠎꠣꠘꠞ ꠒꠞ-ꠜꠄꠄ ꠅꠡꠣꠘ꠆ꠔꠤꠔ ꠞꠁꠛꠣꠄ, ꠛꠣꠌꠤꠀ ꠞꠅꠀꠞ ꠇꠥꠘꠥ ꠘꠤꠌ꠆ꠌꠄꠅꠔꠣ ꠙꠣꠁꠔꠣꠄ ꠘꠣꠄ।
DEU 28:67 ꠔꠥꠝꠞꠣ ꠝꠘꠞ ꠒꠞꠦ, ꠎꠣꠘꠞ ꠝꠣꠁꠞꠦ, ꠌꠃꠈꠦ ꠇꠥꠘꠥ ꠇꠥꠟ-ꠇꠤꠘꠣꠞ ꠘꠣ ꠖꠦꠈꠤꠀ ꠈꠣꠟꠤ ꠢꠣꠄ ꠢꠣꠄ ꠇꠞꠛꠣꠄ। ꠛꠤꠀꠘ ꠅꠁꠟꠦ ꠇꠁꠛꠣꠄ ꠎꠟꠖꠤ ꠞꠣꠁꠔ ꠅꠃꠇ, ꠀꠞ ꠞꠣꠁꠔ ꠅꠁꠟꠦ ꠇꠁꠛꠣꠄ ꠎꠟꠖꠤ ꠖꠤꠘ ꠅꠃꠇ।
DEU 28:68 ꠢꠃ ꠎꠦ ꠝꠤꠡꠞ ꠖꠦꠡꠞ ꠛꠦꠙꠣꠞꠦ ꠀꠝꠤ ꠇꠁꠍꠟꠣꠝ, ꠔꠥꠝꠞꠣ ꠢꠤꠘꠅ ꠀꠞ ꠎꠣꠅꠀ ꠅꠁꠔ ꠘꠣꠄ। ꠅꠁꠟꠦ ꠢꠃ ꠉꠎꠛꠞ ꠡꠝꠄ ꠝꠣꠛꠥꠖꠦ ꠔꠥꠝꠞꠣꠞꠦ ꠎꠣꠎꠅ ꠇꠞꠤ ꠢꠤꠞꠛꠣꠞ ꠝꠤꠡꠞ ꠖꠦꠡꠅ ꠘꠦꠅꠀꠁꠛꠣ, ꠘꠤꠀ ꠢꠣꠞꠟꠦ ꠔꠥꠝꠞꠣ ꠉꠥꠟꠣꠝꠤ ꠇꠞꠣꠞ ꠟꠣꠉꠤ ꠢꠘꠅ ꠛꠤꠇꠤ ꠈꠣꠁꠔꠣꠄ ꠌꠣꠁꠛꠣꠄ, ꠅꠁꠟꠦ ꠇꠦꠃ ꠔꠥꠝꠞꠣꠞꠦ ꠇꠤꠘꠔ ꠘꠣꠄ।”
DEU 29:1 ꠝꠣꠛꠥꠖꠦ ꠝꠥꠍꠣ ꠘꠛꠤꠞ ꠝꠣꠞꠚꠔꠦ ꠔꠥꠞ ꠙꠣꠠꠞ ꠃꠙꠞꠦ, ꠛꠘꠤ ꠁꠍꠞꠣꠁꠟ ꠎꠣꠔꠤꠞ ꠟꠉꠦ ꠀꠉꠦ ꠄꠇ ꠅꠀꠖꠣ-ꠌꠥꠇ꠆ꠔꠤ ꠇꠞꠍꠟꠣ, ꠅꠈꠘ ꠝꠥꠀꠛ ꠖꠦꠡꠅ ꠝꠣꠛꠥꠖꠦ ꠖꠥꠍꠞꠣ ꠅꠀꠖꠣ-ꠌꠥꠇ꠆ꠔꠤ ꠛꠅꠀꠁꠟ ꠇꠞꠟꠣ। ꠁꠔꠣ ꠅꠁꠟ ꠅꠃ ꠅꠀꠖꠣ-ꠌꠥꠇ꠆ꠔꠤꠞ ꠡꠞ꠆ꠔ ꠅꠇꠟ।
DEU 29:2 ꠝꠥꠍꠣ ꠘꠛꠤꠄ ꠢꠇꠟ ꠛꠘꠤ ꠁꠍꠞꠣꠁꠟꠞꠦ ꠀꠘꠣꠁꠀ ꠇꠁꠟꠣ, “ꠀꠟ꠆ꠟꠣ ꠝꠣꠛꠥꠖꠦ ꠝꠤꠡꠞꠞ ꠚꠦꠞꠣꠃꠘꠞ ꠟꠉꠦ, ꠔꠣꠞ ꠃꠎꠤꠞ-ꠘꠣꠎꠤꠞꠞ ꠟꠉꠦ, ꠀꠞ ꠝꠤꠡꠞꠞ ꠢꠇ꠆ꠇꠟꠔꠣꠞ ꠟꠉꠦ ꠎꠦꠔꠣ ꠇꠞꠍꠤꠟꠣ, ꠁꠔꠣ ꠔ ꠔꠥꠝꠞꠣ ꠖꠦꠈꠍ।
DEU 29:3 ꠛꠠ ꠛꠠ ꠀꠎꠛ ꠊꠐꠘꠣ, ꠝꠣꠛꠥꠖꠞ ꠘꠣꠘꠣꠘ ꠟꠣꠈꠣꠘ ꠘꠤꠡꠣꠘꠣ, ꠀꠞ ꠇꠥꠖꠞꠔꠤ ꠇꠣꠝ ꠔ ꠔꠥꠝꠞꠣ ꠘꠤꠎꠞ ꠌꠃꠈꠦ ꠖꠦꠈꠍ।
DEU 29:4 ꠅꠁꠟꠦ ꠁꠔꠣꠞ ꠝꠞ꠆ꠝ ꠛꠥꠎꠣꠞ ꠝꠔ ꠝꠘ, ꠖꠦꠈꠣꠞ ꠝꠔ ꠌꠃꠈ, ꠢꠥꠘꠣꠞ ꠝꠔ ꠇꠣꠘ, ꠝꠣꠛꠥꠖꠦ ꠅꠈꠘꠅ ꠔꠥꠝꠞꠣꠞꠦ ꠖꠤꠍꠂꠘ ꠘꠣ।
DEU 29:5 ꠀꠝꠤ ꠌꠣꠟ꠆ꠟꠤꠡ ꠛꠍꠞ ꠗꠞꠤ ꠔꠥꠝꠞꠣꠞꠦ ꠅꠃ ꠝꠞꠥꠜꠥꠝꠤꠞ ꠝꠣꠎꠦ ꠍꠚꠞ ꠇꠞꠣꠁꠍꠤ, ꠄꠞꠝꠣꠎꠦ ꠔꠥꠝꠞꠣꠞ ꠚꠤꠘ꠆ꠘꠞ ꠇꠣꠙꠠ ꠘꠡ꠆ꠐ ꠅꠁꠍꠦ ꠘꠣ, ꠙꠣꠅꠞ ꠎꠥꠔꠣꠅ ꠍꠤꠠꠍꠦ ꠘꠣ।
DEU 29:6 ꠇꠥꠘꠥ ꠜꠣꠔ-ꠞꠥꠐꠤꠅ ꠈꠣꠁꠍ ꠘꠣ, ꠀꠋꠉꠥꠞꠞ ꠡꠞꠛꠔ ꠛꠣ ꠇꠥꠘꠥꠎꠣꠔ ꠡꠞꠣꠛ ꠔꠥꠝꠞꠣ ꠈꠣꠁꠔꠣꠄ ꠙꠣꠁꠍ ꠘꠣ। ꠁꠔꠣ ꠢꠇꠟꠔꠣ ꠔ ꠔꠣꠁꠘꠃ ꠇꠞꠍꠂꠘ, ꠎꠣꠔꠦ ꠔꠥꠝꠞꠣ ꠛꠥꠎꠅ, ꠔꠣꠁꠘꠃ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣ।
DEU 29:7 “ꠔꠥꠝꠞꠣ ꠢꠃ ꠎꠣꠉꠣꠔ ꠎꠣꠅꠀꠞ ꠛꠣꠖꠦ, ꠢꠤꠡꠛꠘꠞ ꠛꠣꠖꠡꠣ ꠍꠤꠢꠥꠘ ꠀꠞ ꠛꠣꠡꠘꠞ ꠛꠣꠖꠡꠣ ꠃꠎꠦ ꠀꠝꠞꠣꠞ ꠟꠉꠦ ꠟꠣꠠꠣꠁ ꠇꠞꠣꠔ ꠀꠁꠍꠟꠣ, ꠀꠁꠟꠦ ꠀꠝꠞꠣ ꠔꠣꠞꠣꠞꠦ ꠀꠞꠣꠁ ꠖꠤꠟꠣꠝ।
DEU 29:8 ꠔꠣꠞꠣꠞ ꠖꠦꠡꠞꠦ ꠖꠈꠟꠅ ꠀꠘꠤꠀ ꠀꠝꠞꠣ ꠀꠡ꠆ꠔꠣ ꠞꠥꠛꠦꠘ ꠈꠣꠘ꠆ꠖꠣꠘ, ꠀꠡ꠆ꠔꠣ ꠍꠣꠖꠥ ꠈꠣꠘ꠆ꠖꠣꠘ ꠀꠞ ꠝꠣꠘꠡꠣ ꠈꠣꠘ꠆ꠖꠣꠘꠞ ꠅꠞ꠆ꠗꠦꠇ ꠝꠣꠘꠡꠞꠦ ꠛꠣꠐꠤꠀ ꠖꠤꠟꠣꠝ।
DEU 29:9 ꠄꠞꠟꠣꠉꠤ ꠔꠥꠝꠞꠣ ꠅꠃ ꠅꠀꠖꠣ-ꠌꠥꠇ꠆ꠔꠤꠞ ꠢꠇꠟ ꠢꠥꠇꠥꠝ-ꠀꠢꠇꠣꠝ ꠈꠥꠛ ꠈꠤꠀꠟꠤ ꠅꠁꠀ ꠝꠣꠘꠤꠅ, ꠝꠣꠘꠟꠦ ꠢꠇꠟ ꠇꠣꠝ-ꠇꠣꠎꠅ ꠔꠥꠝꠞꠣꠞ ꠚꠣꠄꠖꠣ ꠅꠁꠛ।
DEU 29:10 “ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠍꠣꠝꠘꠦ ꠀꠁꠎ ꠔꠥꠝꠞꠣ ꠢꠇꠟ ꠀꠁꠀ ꠀꠎꠤꠞ ꠅꠁꠍ, ꠔꠥꠝꠞꠣꠞ ꠈꠣꠘ꠆ꠖꠣꠘꠞ ꠀꠝꠤꠞ ꠅꠇꠟ, ꠝꠄ-ꠝꠥꠞꠛ꠆ꠛꠤ ꠅꠇꠟ, ꠅꠚꠤꠡꠣꠞ ꠅꠇꠟ, ꠀꠞ ꠛꠘꠤ ꠁꠍꠞꠣꠁꠟꠞ ꠢꠇꠟ ꠛꠦꠐꠣꠁꠘ।
DEU 29:11 ꠔꠥꠝꠞꠣꠞ ꠟꠉꠦ ꠅꠁꠀ ꠔꠥꠝꠞꠣꠞ ꠛꠃ, ꠙꠥꠀ-ꠙꠥꠠꠤꠘ, ꠀꠞ ꠜꠤꠘ ꠎꠣꠔꠤꠞ ꠢꠃ ꠝꠣꠘꠥꠡ ꠅꠇꠟ ꠎꠦꠔꠣꠄ ꠔꠥꠝꠞꠣꠞ ꠖꠣꠞꠥ ꠚꠣꠠꠂꠘ ꠀꠞ ꠙꠣꠘꠤ ꠛꠁꠀ ꠀꠘꠂꠘ ꠔꠣꠞꠣꠅ ꠀꠁꠍꠂꠘ।
DEU 29:12 ꠔꠥꠝꠞꠣ ꠢꠇꠟ ꠅꠘꠅ ꠀꠁꠀ ꠀꠎꠤꠞ ꠅꠁꠍ, ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠇꠍꠝ ꠈꠣꠁꠀ ꠎꠦ ꠅꠀꠖꠣ-ꠌꠥꠇ꠆ꠔꠤ ꠀꠁꠎ ꠛꠅꠀꠁꠟ ꠇꠞꠞꠣ, ꠅꠃ ꠅꠀꠖꠣ-ꠌꠥꠇ꠆ꠔꠤꠔ ꠔꠥꠝꠞꠣ ꠘꠤꠎꠦ ꠘꠤꠎꠦ ꠀꠁꠎ ꠢꠣꠝꠣꠁꠞꠣ।
DEU 29:13 ꠀꠞ ꠝꠣꠛꠥꠖꠦ ꠀꠉꠞ ꠀꠝꠟꠞ ꠔꠥꠝꠞꠣꠞ ꠝꠄ-ꠝꠥꠞꠛ꠆ꠛꠤ ꠁꠛ꠆ꠞꠣꠢꠤꠝ, ꠁꠍꠢꠣꠇ, ꠀꠞ ꠁꠀꠇꠥꠛ ꠘꠛꠤꠞ ꠟꠉꠦ ꠇꠍꠝ ꠈꠣꠁꠀ ꠎꠦ ꠅꠀꠖꠣ ꠇꠞꠍꠟꠣ, ꠢꠃ ꠅꠀꠖꠣ ꠝꠣꠚꠤꠇ ꠅꠈꠘ ꠕꠣꠇꠤ ꠔꠣꠁꠘ ꠔꠥꠝꠞꠣꠞ ꠀꠟ꠆ꠟꠣ, ꠀꠞ ꠔꠥꠝꠞꠣ ꠔꠣꠘ ꠈꠣꠍ ꠙ꠆ꠞꠎꠣ ꠛꠘꠤꠀ ꠞꠁꠔꠦ ꠞꠣꠎꠤ ꠀꠍ, ꠅꠈꠣꠘ ꠝꠣꠘꠣꠔ ꠀꠁꠍ।
DEU 29:14 ꠔꠦ ꠀꠝꠤ ꠅꠈꠘ ꠎꠦ ꠅꠀꠖꠣ-ꠌꠥꠇ꠆ꠔꠤ ꠛꠅꠀꠁꠟ ꠇꠞꠞꠣꠝ, ꠁꠔꠣ ꠈꠣꠟꠤ ꠔꠥꠝꠞꠣꠞ ꠟꠉꠦ ꠘꠣꠄ, ꠛꠞꠋ ꠔꠥꠝꠞꠣ ꠎꠔ ꠎꠘ ꠅꠈꠘ ꠀꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠍꠣꠝꠘꠦ ꠀꠎꠤꠞ ꠀꠍ, ꠔꠥꠝꠞꠣꠞ ꠟꠉꠦ, ꠀꠞ ꠔꠥꠝꠞꠣꠞ ꠎꠦꠔꠣ ꠀꠅꠟꠣꠖꠞ ꠎꠘꠝ ꠅꠈꠘꠅ ꠅꠁꠍꠦ ꠘꠣ, ꠔꠣꠞꠣꠞ ꠟꠉꠦꠅ ꠅꠃ ꠅꠀꠖꠣ-ꠌꠥꠇ꠆ꠔꠤ ꠎꠣꠞꠤ ꠞꠁꠛ।
DEU 29:16 “ꠔꠥꠝꠞꠣ ꠘꠤꠎꠦꠃ ꠔ ꠎꠣꠘ, ꠝꠤꠡꠞ ꠖꠦꠡꠅ ꠀꠝꠞꠣ ꠇꠤꠟꠣ ꠖꠤꠘ ꠇꠣꠐꠣꠁꠍꠤ, ꠛꠣꠖꠦ ꠇꠔ ꠖꠦꠡ ꠀꠞ ꠇꠔ ꠙꠕ-ꠊꠣꠐ ꠙꠣꠞ ꠅꠁꠀ ꠅꠘꠅ ꠀꠁꠀ ꠀꠎꠤꠍꠤ।
DEU 29:17 ꠔꠥꠝꠞꠣ ꠔ ꠅꠔꠣ ꠖꠦꠡꠞ ꠝꠣꠘꠡꠞꠦ ꠡꠥꠘꠣ, ꠞꠥꠙꠣ, ꠙꠣꠔ꠆ꠔꠞ ꠀꠞ ꠟꠣꠇꠠꠤꠖꠤ ꠛꠣꠘꠣꠁꠟ ꠎꠊꠁꠘ꠆ꠘ ꠖꠦꠛ-ꠖꠦꠛꠤꠞ ꠝꠥꠞ꠆ꠔꠤ ꠅꠇꠟꠞ ꠙꠥꠎꠣ ꠇꠞꠔꠦ ꠖꠦꠈꠍ।
DEU 29:18 ꠔꠥꠝꠞꠣ ꠈꠥꠎ-ꠈꠛꠞ ꠟꠁꠀ ꠖꠦꠈꠅ, ꠔꠥꠝꠞꠣꠞ ꠝꠣꠎꠦ ꠎꠣꠘꠥ ꠅꠃ ꠟꠣꠈꠣꠘ ꠇꠥꠘꠥ ꠛꠦꠐꠣ ꠛꠣ ꠛꠦꠐꠤ, ꠇꠥꠘꠥ ꠛꠋꠡ ꠛꠣ ꠈꠣꠘ꠆ꠖꠣꠘ ꠘꠣ ꠕꠣꠇꠦ, ꠎꠦꠔꠣꠄ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞꠦ ꠛꠣꠖ ꠖꠤꠀ ꠢꠔꠣ ꠖꠦꠛ-ꠖꠦꠛꠤꠞ ꠙꠥꠎꠣ ꠇꠞꠣꠞ ꠟꠣꠉꠤ ꠈꠤꠀꠟꠤ ꠅꠁꠎꠣꠄ। ꠎꠥꠖꠤ ꠁꠟꠣ ꠇꠥꠘꠥꠉꠥ ꠕꠣꠇꠦ, ꠔꠦ ꠅꠉꠥ ꠅꠁꠟ ꠅꠟꠣ ꠛꠤꠡꠣꠇ꠆ꠔ ꠉꠣꠍꠞ ꠎꠠ, ꠎꠦ ꠎꠠꠞ ꠒꠦꠝ ꠅꠃ ꠛꠤꠡꠣꠇ꠆ꠔ ꠔꠤꠔ꠆ꠔꠣ ꠉꠣꠍ ꠛꠘꠛ।
DEU 29:19 ꠎꠦꠔꠣ ꠝꠣꠘꠡꠦ ꠅꠃ ꠇꠍꠝ ꠈꠣꠅꠀꠞ ꠇꠕꠣ ꠢꠥꠘꠤꠀꠅ ꠎꠥꠖꠤ ꠔꠣꠞ ꠘꠤꠎꠞꠦ ꠈꠥꠛ ꠇꠙꠣꠟꠤ ꠝꠘꠅ ꠇꠞꠦ, ꠀꠞ ꠛꠦꠙꠞꠥꠀ ꠅꠁꠀ ꠌꠟꠟꠦꠅ ꠇꠥꠘꠥ ꠡꠝꠁꠡꠣ ꠘꠣꠁ ꠁꠟꠣ ꠝꠘꠅ ꠇꠞꠦ, ꠔꠦ ꠔꠥꠝꠞꠣꠞ ꠜꠣꠟꠣ-ꠛꠥꠞꠣ ꠖꠥꠁꠅꠐꠣꠞ ꠃꠙꠞꠦ ꠅꠔꠣ ꠝꠣꠘꠡꠦ ꠡꠞ꠆ꠛꠘꠣꠡ ꠒꠣꠇꠤꠀ ꠀꠘꠛ।
DEU 29:20 ꠝꠣꠛꠥꠖꠦ ꠇꠥꠘꠥꠝꠘ꠆ꠔꠦꠃ ꠄꠞꠣꠞꠦ ꠝꠣꠚꠤ ꠖꠤꠔꠣ ꠘꠣꠄ, ꠄꠞꠣꠞ ꠃꠙꠞꠦ ꠔꠣꠘ ꠉꠥꠍꠣꠞ ꠀꠉꠥꠁꠘ ꠖꠣꠃ ꠖꠣꠃ ꠇꠞꠤ ꠎꠟꠤꠀ ꠃꠑꠛ। ꠀꠞ ꠅꠃ ꠇꠤꠔꠣꠛꠞ ꠝꠣꠎꠦ ꠎꠔ ꠟꠣꠈꠣꠘ ꠟꠣꠘ꠆ꠘꠔꠞ ꠇꠕꠣ ꠟꠦꠈꠣ ꠀꠍꠦ, ꠁꠔꠣ ꠢꠇ꠆ꠇꠟꠔꠣ ꠄꠞꠣꠞ ꠃꠙꠞꠦ ꠓꠣꠟꠤꠛꠣ, ꠝꠣꠛꠥꠖꠦ ꠀꠡ꠆ꠔꠣ ꠖꠥꠘꠤꠀ ꠕꠣꠇꠤ ꠔꠣꠞꠣꠞ ꠘꠣꠝ ꠝꠤꠐꠣꠁꠟꠤꠛꠣ।
DEU 29:21 ꠔꠣꠁꠘ ꠖꠥꠈ-ꠝꠍꠤꠛꠔꠅ ꠚꠣꠟꠣꠘꠤꠞ ꠟꠣꠉꠤ ꠢꠇ꠆ꠇꠟ ꠛꠘꠤ ꠁꠍꠞꠣꠁꠟ ꠕꠣꠇꠤ ꠔꠣꠞꠣꠞꠦ ꠛꠣꠍꠤꠀ ꠀꠟꠉ ꠇꠞꠛꠣ, ꠅꠃ ꠔꠃꠞꠣꠔ ꠇꠤꠔꠣꠛꠞ ꠅꠀꠖꠣ-ꠌꠥꠇ꠆ꠔꠤꠞ ꠝꠣꠎꠦ ꠎꠔ ꠟꠣꠈꠣꠘ ꠟꠣꠘ꠆ꠘꠔꠞ ꠇꠕꠣ ꠟꠦꠈꠣ ꠀꠍꠦ, ꠁꠔꠣ ꠅꠔꠣ ꠝꠣꠘꠡꠞ ꠃꠙꠞꠦ ꠍꠣꠠꠤꠛꠣ।
DEU 29:22 “ꠀꠞ ꠝꠣꠛꠥꠖꠦ ꠅꠃ ꠖꠦꠡꠞ ꠃꠙꠞꠦ ꠎꠔ ꠘꠝꠥꠘꠣꠞ ꠟꠣꠘ꠆ꠘꠔꠤ ꠉꠎꠛ ꠀꠞ ꠛꠦꠝꠣꠞ-ꠀꠎꠣꠞ ꠓꠣꠟꠤꠛꠣ, ꠁꠔꠣ ꠖꠦꠈꠤꠀ ꠔꠥꠝꠞꠣꠞ ꠀꠅꠟꠣꠖ ꠅꠇꠟꠦ ꠀꠞ ꠜꠤꠘ ꠖꠦꠡ ꠕꠣꠇꠤ ꠀꠅꠀ ꠝꠥꠍꠣꠚꠤꠞ ꠅꠇꠟꠦ ꠔꠥꠝꠞꠣꠞ ꠁ ꠖꠡꠣ ꠖꠦꠈꠤꠀ ꠇꠣꠞꠘ ꠎꠤꠇꠣꠁꠛꠣ।
DEU 29:23 ꠘꠥꠘ ꠀꠞ ꠉꠘ꠆ꠖꠇꠦ ꠀꠡ꠆ꠔꠣ ꠖꠦꠡꠞ ꠝꠣꠐꠤ ꠎꠟꠤꠎꠤꠛ, ꠁ ꠝꠣꠐꠤꠔ ꠇꠥꠘ꠆ꠔꠣ ꠚꠟꠤꠔ ꠘꠣꠄ, ꠇꠥꠘ꠆ꠔꠣ ꠟꠣꠉꠣꠁꠟꠦ ꠅꠁꠔ ꠘꠣꠄ, ꠝꠣꠐꠤꠞ ꠃꠙꠞꠦ ꠇꠥꠘꠥꠎꠣꠔꠞ ꠊꠣꠡ, ꠟꠔꠣ-ꠙꠣꠔꠣ ꠎꠘꠝꠤꠔ ꠘꠣꠄ। ꠁꠈꠣꠘ ꠢꠃ ꠟꠣꠘ꠆ꠘꠔꠤ ꠖꠦꠡ ꠍꠣꠖꠥꠝ, ꠀꠝꠥꠞꠣ, ꠅꠖꠝꠣ ꠀꠞ ꠍꠛꠂꠁꠝꠞ ꠟꠣꠈꠣꠘ ꠛꠘꠤꠎꠤꠛ, ꠝꠣꠛꠥꠖꠞ ꠉꠥꠍꠣꠞ ꠀꠉꠥꠁꠘ ꠎꠟꠤꠀ ꠃꠑꠣꠄ ꠔꠣꠁꠘ ꠔ ꠁꠔꠣꠞꠦ ꠛꠤꠘꠣꠡ ꠇꠞꠤꠟꠤꠍꠟꠣ।
DEU 29:24 ꠅꠔꠣ ꠖꠦꠈꠤꠀ ꠢꠇꠟ ꠎꠣꠔꠤꠞ ꠝꠣꠘꠡꠦ ꠎꠤꠇꠣꠁꠛꠣ, ꠝꠣꠛꠥꠖꠦ ꠁ ꠖꠦꠡꠞ ꠢꠣꠟꠔ ꠇꠦꠘꠦ ꠁꠟꠣ ꠇꠞꠟꠣ? ꠔꠣꠁꠘ ꠇꠦꠘꠦ ꠅꠔ ꠛꠠ ꠉꠥꠍꠣ ꠇꠞꠟꠣ?
DEU 29:25 “ꠔꠦꠃ ꠝꠣꠘꠡꠦ ꠎꠥꠀꠙ ꠖꠤꠛꠣ, ꠅꠃ ꠎꠣꠔꠤꠞ ꠝꠣꠘꠡꠦ ꠔꠣꠞꠣꠞ ꠝꠄ-ꠝꠥꠞꠛ꠆ꠛꠤꠞ ꠝꠣꠛꠥꠖ ꠀꠟ꠆ꠟꠣꠞ ꠛꠅꠀꠁꠟ ꠇꠞꠣ ꠢꠃ ꠅꠀꠖꠣ-ꠌꠥꠇ꠆ꠔꠤ ꠛꠣꠖ ꠖꠤꠟꠣꠁꠍꠦ, ꠝꠤꠡꠞ ꠖꠦꠡ ꠕꠣꠇꠤ ꠔꠣꠞꠣꠞꠦ ꠛꠣꠞ ꠇꠞꠤ ꠀꠘꠣꠞ ꠛꠣꠖꠦ ꠎꠦ ꠌꠥꠇ꠆ꠔꠤ ꠛꠅꠀꠁꠟ ꠇꠞꠣ ꠅꠁꠍꠤꠟ।
DEU 29:26 ꠔꠣꠞꠣ ꠢꠃ ꠝꠣꠛꠥꠖꠞꠦ ꠛꠣꠖ ꠖꠤꠀ ꠔꠣꠞꠣꠞ ꠉꠦꠍꠦ ꠘꠄꠀ, ꠅꠔꠣ ꠖꠦꠛ-ꠖꠦꠛꠤꠞ ꠙꠥꠎꠣꠔ ꠟꠣꠉꠍꠦ, ꠎꠦꠔꠣ ꠖꠦꠛ-ꠖꠦꠛꠤꠞ ꠇꠕꠣ ꠝꠣꠛꠥꠖꠦ ꠇꠁꠍꠂꠘ ꠘꠣ, ꠅꠔꠣꠞ ꠉꠦꠍꠦ ꠝꠣꠕꠣ ꠘꠥꠀꠁꠀ ꠍꠁꠎꠖꠣ ꠇꠞꠣꠔ ꠟꠣꠉꠍꠦ।
DEU 29:27 ꠄꠞꠟꠣꠉꠤ ꠅꠃ ꠖꠦꠡꠞ ꠃꠙꠞꠦ ꠝꠣꠛꠥꠖꠞ ꠉꠥꠍꠣꠞ ꠀꠉꠥꠁꠘ ꠎꠟꠤꠀ ꠃꠑꠍꠦ, ꠔꠣꠁꠘ ꠅꠃ ꠇꠤꠔꠣꠛꠅ ꠟꠦꠈꠣ ꠢꠇꠟ ꠘꠝꠥꠘꠣꠞ ꠟꠣꠘ꠆ꠘꠔꠤ ꠉꠎꠛ ꠁ ꠖꠦꠡꠅ ꠘꠣꠎꠤꠟ ꠇꠞꠍꠂꠘ।
DEU 29:28 ꠉꠥꠍꠣꠞ ꠀꠉꠥꠁꠘꠦ ꠎꠟꠤꠀ, ꠔꠣꠞꠣꠞ ꠃꠙꠞꠦ ꠛꠦꠎꠥꠁꠔꠣ ꠉꠎꠛ ꠓꠣꠟꠤꠀ ꠔꠣꠞꠣꠞꠦ ꠅꠃ ꠖꠦꠡ ꠕꠣꠇꠤ ꠎꠠꠦ-ꠚꠠꠦ ꠔꠥꠟꠤꠀ ꠔꠣꠞꠣꠞꠦ ꠜꠤꠘ ꠖꠦꠡꠅ ꠘꠤꠀ ꠀꠍꠣꠠ ꠝꠣꠞꠤ ꠚꠣꠟꠣꠁꠍꠂꠘ, ꠀꠞ ꠅꠈꠘꠅ ꠔꠣꠞꠣ ꠢꠘꠅ ꠀꠍꠂꠘ।
DEU 29:29 “ꠛꠣꠔꠥꠘꠤ ꠢꠇꠟꠔꠣꠃ ꠔ ꠀꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠀꠔꠅ, ꠅꠁꠟꠦ ꠎꠣꠁꠞ ꠇꠞꠣ ꠢꠇꠟꠔꠣ ꠌꠤꠞꠇꠣꠟꠞ ꠟꠣꠉꠤ ꠀꠝꠞꠣ ꠀꠞ ꠀꠝꠞꠣꠞ ꠀꠅꠟꠣꠖ ꠅꠇꠟꠞ ꠀꠔꠅ, ꠎꠣꠔꠦ ꠀꠝꠞꠣ ꠅꠃ ꠡꠞꠤꠅꠔꠞ ꠢꠇꠟ ꠢꠥꠇꠥꠝ-ꠀꠢꠇꠣꠝ ꠀꠝꠟ ꠇꠞꠔꠣꠝ ꠙꠣꠞꠤ।”
DEU 30:1 ꠢꠎꠞꠔ ꠝꠥꠍꠣꠄ ꠇꠁꠞꠣ, “ꠅ ꠛꠘꠤ ꠁꠍꠞꠣꠁꠟ ꠢꠥꠘꠅ, ꠀꠝꠤ ꠔꠥꠝꠞꠣꠞ ꠍꠣꠝꠘꠦ ꠎꠦ ꠞꠢꠝꠔ ꠀꠞ ꠟꠣꠘ꠆ꠘꠔꠞ ꠙꠕ ꠖꠦꠈꠣꠁꠍꠤ, ꠁꠔꠣ ꠢꠇꠟꠔꠣ ꠔꠥꠝꠞꠣꠞ ꠃꠙꠞꠦ ꠚꠟꠤꠛ। ꠚꠟꠤꠀ ꠢꠣꠞꠟꠦ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠔꠥꠝꠞꠣꠞꠦ ꠎꠦꠔꠣ ꠎꠣꠔꠤ ꠅꠇꠟꠞ ꠝꠣꠎꠦ ꠍꠤꠔ꠆ꠞꠣꠁ ꠖꠤꠛꠣ, ꠔꠣꠞꠣꠞ ꠟꠉꠦ ꠛꠡꠔ ꠇꠞꠣꠞ ꠛꠣꠟꠣ ꠔꠥꠝꠞꠣ ꠁꠔꠣ ꠈꠤꠀꠟ ꠇꠞꠤꠅ।
DEU 30:2 ꠢꠃ ꠡꠝꠄ ꠔꠥꠝꠞꠣ ꠀꠞ ꠔꠥꠝꠞꠣꠞ ꠀꠅꠟꠣꠖ ꠅꠇꠟ ꠎꠥꠖꠤ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠉꠦꠍꠦ ꠚꠤꠞꠤꠀ ꠀꠅ, ꠀꠞ ꠀꠁꠎ ꠀꠝꠤ ꠔꠥꠝꠞꠣꠞꠦ ꠎꠦꠔꠣ ꠢꠥꠇꠥꠝ-ꠀꠢꠇꠣꠝ ꠎꠣꠘꠣꠁꠞꠣꠝ, ꠁꠔꠣ ꠖꠤꠟꠦ-ꠎꠣꠘꠦ ꠀꠝꠟ ꠇꠞꠅ,
DEU 30:3 ꠔꠦ ꠢꠃ ꠡꠝꠄ ꠝꠣꠛꠥꠖꠦ ꠔꠥꠝꠞꠣꠞꠦ ꠛꠘ꠆ꠖꠤ ꠢꠣꠟꠔ ꠕꠣꠇꠤ ꠀꠎꠣꠖ ꠇꠞꠛꠣ। ꠔꠣꠁꠘ ꠔꠥꠝꠞꠣꠞꠦ ꠝꠣꠄꠀ-ꠝꠝꠔꠣ ꠇꠞꠛꠣ, ꠀꠞ ꠔꠣꠁꠘ ꠎꠦꠔꠣ ꠎꠣꠔꠤꠞ ꠝꠣꠎꠦ ꠔꠥꠝꠞꠣꠞꠦ ꠍꠤꠔ꠆ꠞꠣꠁꠀ ꠖꠤꠍꠟꠣ, ꠅꠔꠣ ꠕꠣꠇꠤ ꠢꠤꠞꠛꠣꠞ ꠔꠥꠝꠞꠣꠞꠦ ꠔꠥꠇꠣꠁꠀ ꠀꠘꠛꠣ।
DEU 30:4 ꠖꠥꠘꠤꠀꠞ ꠀꠈꠦꠞꠤ ꠇꠤꠘꠣꠞꠣꠔꠅ ꠎꠥꠖꠤ ꠔꠥꠝꠞꠣꠞꠦ ꠚꠣꠟꠣꠁꠟ ꠅꠄ, ꠔꠦ ꠢꠘꠅ ꠕꠣꠇꠤ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠔꠥꠝꠞꠣꠞꠦ ꠔꠥꠇꠣꠁꠀ ꠀꠘꠛꠣ।
DEU 30:5 ꠔꠥꠝꠞꠣꠞ ꠝꠄ-ꠝꠥꠞꠛ꠆ꠛꠤꠞ ꠖꠦꠡꠅ ꠔꠥꠝꠞꠣꠞꠦ ꠚꠤꠞꠣꠁꠀ ꠀꠘꠛꠣ, ꠁꠔꠣ ꠢꠤꠞꠛꠣꠞ ꠔꠥꠝꠞꠣ ꠖꠈꠟ ꠇꠞꠛꠣꠄ। ꠔꠣꠁꠘ ꠔꠥꠝꠞꠣꠞꠦ ꠛꠃꠔ ꠛꠣꠠꠣꠁ ꠖꠤꠛꠣ, ꠀꠞ ꠔꠥꠝꠞꠣꠞ ꠝꠄ-ꠝꠥꠞꠛ꠆ꠛꠤꠞ ꠌꠣꠁꠔꠦꠅ ꠔꠥꠝꠞꠣꠞ ꠀꠅꠟꠣꠖꠞ ꠙꠞꠤꠝꠣꠘ ꠀꠞꠅ ꠛꠣꠠꠣꠁꠛꠣ।
DEU 30:6 ꠔꠥꠝꠞꠣ ꠎꠣꠔꠦ ꠙꠥꠞꠣꠙꠥꠞ ꠖꠤꠟꠦ-ꠎꠣꠘꠦ ꠀꠟ꠆ꠟꠣꠞ ꠝꠢꠛ꠆ꠛꠔꠞ ꠀꠡꠤꠇ ꠛꠘꠤꠀ ꠛꠣꠌꠤꠀ ꠞꠅ, ꠅꠃ ꠘꠤꠅꠔꠦ ꠔꠥꠝꠞꠣ ꠀꠞ ꠔꠥꠝꠞꠣꠞ ꠀꠅꠟꠣꠖ ꠅꠇꠟꠞ ꠖꠤꠟꠞ ꠝꠍꠟꠝꠣꠘꠤ ꠔꠣꠁꠘ ꠘꠤꠎꠦ ꠖꠤꠛꠣ।
DEU 30:7 ꠀꠞ ꠅꠃ ꠟꠣꠘ꠆ꠘꠔ ꠅꠇꠟ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠔꠥꠝꠞꠣꠞ ꠢꠃ ꠖꠥꠡꠝꠘꠞ ꠃꠙꠞꠦ ꠚꠣꠟꠣꠁꠛꠣ, ꠎꠦꠔꠣꠄ ꠔꠥꠝꠞꠣꠞꠦ ꠁꠋꠡꠣ ꠀꠞ ꠎꠥꠟꠥꠝ ꠇꠞꠂꠘ।
DEU 30:8 ꠢꠃ ꠡꠝꠄ ꠔꠥꠝꠞꠣ ꠢꠤꠞꠛꠣꠞ ꠔꠥꠝꠞꠣꠞ ꠝꠣꠛꠥꠖꠞ ꠢꠥꠇꠥꠝ ꠝꠣꠚꠤꠇ ꠎꠤꠘ꠆ꠖꠦꠉꠤ ꠇꠣꠐꠣꠁꠛꠣꠄ, ꠔꠣꠘ ꠛꠣꠔꠣꠁꠟ ꠎꠦꠔꠣ ꠢꠥꠇꠥꠝ-ꠀꠢꠇꠣꠝ ꠀꠁꠎ ꠀꠝꠤ ꠔꠥꠝꠞꠣꠞꠦ ꠎꠣꠘꠣꠁꠞꠣꠝ, ꠅꠔꠣ ꠢꠇꠟꠔꠣ ꠀꠝꠟ ꠇꠞꠛꠣꠄ।
DEU 30:9 “ꠢꠃ ꠡꠝꠄ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠢꠇꠟ ꠘꠝꠥꠘꠣꠄ ꠔꠥꠝꠞꠣꠞꠦ ꠀꠄ-ꠃꠘ꠆ꠘꠔꠤ ꠖꠤꠛꠣ, ꠔꠣꠁꠘ ꠔꠥꠝꠞꠣꠞ ꠇꠣꠝ-ꠇꠣꠎꠅ ꠛꠞꠇꠔ ꠖꠤꠛꠣ, ꠔꠥꠝꠞꠣꠞ ꠀꠅꠟꠣꠖꠞ ꠙꠞꠤꠝꠣꠘ ꠛꠣꠠꠣꠁꠛꠣ, ꠔꠥꠝꠞꠣꠞ ꠉꠞꠥ-ꠍꠣꠉꠟꠞ ꠛꠣꠁꠌ꠆ꠌꠣꠁꠘ ꠀꠞ ꠎꠝꠤꠘꠞ ꠚꠡꠟ ꠛꠣꠠꠣꠁ ꠖꠤꠛꠣ। ꠔꠥꠝꠞꠣꠞ ꠝꠄ-ꠝꠥꠞꠛ꠆ꠛꠤꠞ ꠃꠙꠞꠦ ꠔꠣꠁꠘ ꠎꠦꠟꠣ ꠈꠥꠡꠤ ꠀꠍꠟꠣ, ꠔꠥꠝꠞꠣꠞ ꠃꠙꠞꠦꠅ ꠅꠟꠣ ꠈꠥꠡꠤ ꠅꠁꠀ ꠔꠥꠝꠞꠣꠞꠦ ꠢꠇꠟ ꠘꠝꠥꠘꠣꠄ ꠛꠣꠠꠣꠁꠛꠣ।
DEU 30:10 ꠈꠣꠟꠤ ꠔꠥꠝꠞꠣ ꠘꠤꠎꠞ ꠝꠣꠛꠥꠖ ꠀꠟ꠆ꠟꠣꠞ ꠈꠥꠡꠤ ꠝꠣꠚꠤꠇ ꠌꠟꠤꠀ, ꠅꠃ ꠔꠃꠞꠣꠔ ꠇꠤꠔꠣꠛꠅ ꠟꠦꠈꠣ ꠔꠣꠘ ꠢꠇꠟ ꠢꠥꠇꠥꠝ-ꠀꠢꠇꠣꠝ ꠀꠞ ꠘꠤꠅꠝ-ꠇꠣꠘꠥꠘ ꠝꠣꠘꠟꠦ, ꠀꠡ꠆ꠔꠣ ꠖꠤꠟꠦ-ꠎꠣꠘꠦ ꠔꠣꠘ ꠛꠣꠄ ꠚꠤꠞꠟꠦ, ꠔꠣꠁꠘ ꠅꠃ ꠞꠢꠝ-ꠛꠞꠇꠔ ꠖꠤꠛꠣ।
DEU 30:11 “ꠅ ꠛꠘꠤ ꠁꠍꠞꠣꠁꠟ ꠢꠥꠘꠅ, ꠀꠁꠎ ꠀꠝꠤ ꠔꠥꠝꠞꠣꠞꠦ ꠎꠦꠔꠣ ꠢꠥꠇꠥꠝ ꠖꠤꠞꠣꠝ, ꠁꠔꠣ ꠝꠣꠘꠤꠀ ꠌꠟꠣ ꠔꠥꠝꠞꠣꠞ ꠟꠣꠉꠤ ꠛꠦꠡꠤ ꠇꠡ꠆ꠐꠞ ꠇꠥꠘꠥ ꠇꠣꠝ ꠘꠣꠄ, ꠁꠔꠣ ꠔꠥꠝꠞꠣꠞ ꠟꠣꠉꠣꠟꠞ ꠛꠣꠞꠦꠅ ꠘꠣꠄ।
DEU 30:12 ꠁꠔꠣ ꠔ ꠛꠦꠢꠦꠡ꠆ꠔꠅ ꠔꠥꠟꠤꠀ ꠕꠅꠀ ꠇꠥꠘꠥ ꠌꠤꠎ ꠘꠣꠄ ꠎꠦꠘ ꠔꠥꠝꠞꠣ ꠇꠁꠔꠣꠄ, ꠛꠦꠢꠦꠡ꠆ꠔꠅ ꠕꠣꠇꠤ ꠇꠦꠉꠤꠄ ꠟꠣꠝꠣꠁ ꠀꠘꠤꠀ ꠁꠔꠣ ꠀꠝꠞꠣꠞꠦ ꠢꠥꠘꠣꠁꠔ, ꠀꠞ ꠀꠝꠞꠣ ꠀꠝꠟ ꠇꠞꠔꠣꠝ?
DEU 30:13 ꠁꠔꠣ ꠖꠞꠤꠀꠞ ꠢꠙꠣꠞꠞ ꠇꠥꠘꠥ ꠌꠤꠎꠅ ꠘꠣꠄ ꠎꠦꠘ ꠔꠥꠝꠞꠣ ꠇꠁꠔꠣꠄ, ꠖꠞꠤꠀ ꠙꠣꠞ ꠅꠁꠀ ꠇꠦꠉꠤꠄ ꠉꠤꠀ ꠁꠔꠣ ꠀꠘꠤꠀ ꠀꠝꠞꠣꠞꠦ ꠢꠥꠘꠣꠁꠔ, ꠀꠞ ꠀꠝꠞꠣ ꠀꠝꠟ ꠇꠞꠔꠣꠝ?
DEU 30:14 ꠛꠞꠋ ꠝꠣꠛꠥꠖꠞ ꠇꠣꠟꠣꠝ ꠔ ꠔꠥꠝꠞꠣꠞ ꠟꠉꠦꠃ ꠀꠍꠦ, ꠔꠥꠝꠞꠣꠞ ꠝꠥꠈꠞ ꠝꠣꠎꠦ ꠀꠞ ꠖꠤꠟꠞ ꠜꠤꠔꠞꠦ ꠁꠔꠣ ꠀꠍꠦ, ꠎꠣꠔꠦ ꠁꠔꠣ ꠀꠝꠟ ꠇꠞꠅ।
DEU 30:15 “ꠢꠥꠘꠅ, ꠀꠁꠎ ꠀꠝꠤ ꠔꠥꠝꠞꠣꠞ ꠍꠣꠝꠘꠦ ꠎꠦꠔꠣ ꠔꠥꠟꠤꠀ ꠗꠞꠍꠤ, ꠁꠔꠣ ꠅꠁꠟ ꠎꠤꠘ꠆ꠖꠦꠉꠤ ꠀꠞ ꠜꠣꠟꠣꠁ, ꠛꠣ ꠝꠃꠔ ꠀꠞ ꠖꠥꠈ-ꠝꠍꠤꠛꠔ।
DEU 30:16 ꠀꠁꠎ ꠀꠝꠤ ꠔꠥꠝꠞꠣꠞꠦ ꠅꠃ ꠢꠥꠇꠥꠝ ꠖꠤꠞꠣꠝ, ꠔꠥꠝꠞꠣ ꠘꠤꠎꠞ ꠝꠣꠛꠥꠖ ꠀꠟ꠆ꠟꠣꠞꠦ ꠝꠢꠛ꠆ꠛꠔ ꠇꠞꠤꠅ, ꠔꠣꠘ ꠝꠞ꠆ꠎꠤ ꠎꠥꠉꠣꠁꠀ ꠌꠟꠤꠅ, ꠔꠣꠘ ꠖꠦꠅꠀ ꠡꠞꠤꠅꠔ, ꠢꠇꠟ ꠘꠤꠅꠝ-ꠇꠣꠘꠥꠘ, ꠢꠥꠇꠥꠝ-ꠀꠢꠇꠣꠝ ꠢꠞ-ꠢꠣꠝꠦꠡꠣ ꠝꠣꠘꠤꠅ। ꠔꠦꠃ ꠔꠥꠝꠞꠣ ꠎꠣꠘꠦ ꠛꠣꠌꠛꠣꠄ, ꠙꠞꠤꠝꠣꠘꠦ ꠛꠣꠠꠛꠣꠄ, ꠀꠞ ꠎꠦ ꠖꠦꠡꠈꠣꠘ ꠔꠥꠝꠞꠣ ꠖꠈꠟ ꠇꠞꠣꠔ ꠎꠣꠁꠞꠣꠄ, ꠢꠃ ꠖꠦꠡꠅ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠔꠥꠝꠞꠣꠞꠦ ꠞꠢꠝ-ꠛꠞꠇꠔ ꠖꠤꠛꠣ।
DEU 30:17 “ꠅꠁꠟꠦ ꠔꠥꠝꠞꠣꠞ ꠝꠘ ꠎꠥꠖꠤ ꠀꠟ꠆ꠟꠣ ꠝꠣꠛꠥꠖꠞ ꠛꠣꠄ ꠕꠣꠇꠤ ꠚꠤꠞꠤꠎꠣꠄ, ꠔꠣꠘ ꠢꠥꠇꠥꠝ ꠘꠣ ꠝꠣꠘꠤꠀ ꠔꠥꠝꠞꠣ ꠎꠥꠖꠤ ꠇꠥꠘꠥ ꠖꠦꠛ-ꠖꠦꠛꠤꠞ ꠙꠥꠎꠣꠔ ꠟꠣꠉꠤꠀ ꠅꠔꠣꠞꠦ ꠙꠞꠘꠣꠝ ꠇꠞꠅ,
DEU 30:18 ꠔꠦ ꠀꠁꠎ ꠀꠝꠤ ꠔꠥꠝꠞꠣꠞꠦ ꠎꠣꠘꠣꠁ ꠖꠤꠞꠣꠝ, ꠔꠥꠝꠞꠣ ꠘꠤꠡ꠆ꠌꠤꠔ ꠛꠤꠘꠣꠡ ꠅꠁꠎꠤꠛꠣꠄ। ꠎꠞ꠆ꠖꠣꠘ ꠉꠣꠋꠉꠞ ꠢꠙꠣꠞꠅ ꠎꠦ ꠖꠦꠡ ꠔꠥꠝꠞꠣ ꠖꠈꠟ ꠇꠞꠣꠔ ꠎꠣꠁꠞꠣꠄ, ꠢꠤꠘꠅ ꠔꠥꠝꠞꠣ ꠛꠦꠡꠤ ꠖꠤꠘ ꠛꠣꠌꠔꠣꠄ ꠘꠣꠄ।
DEU 30:19 “ꠅꠃ ꠀꠍꠝꠣꠘ-ꠎꠝꠤꠘꠞꠦ ꠔꠥꠝꠞꠣꠞ ꠛꠤꠞꠥꠖ꠆ꠖꠦ ꠡꠣꠇ꠆ꠇꠤ ꠞꠣꠈꠤꠀ ꠇꠁꠀꠞ, ꠀꠁꠎ ꠀꠝꠤ ꠔꠥꠝꠞꠣꠞ ꠍꠣꠝꠘꠦ ꠎꠤꠘ꠆ꠖꠦꠉꠤ ꠀꠞ ꠝꠃꠔ, ꠞꠢꠝꠔ ꠀꠞ ꠟꠣꠘ꠆ꠘꠔꠞꠦ ꠔꠥꠟꠤꠀ ꠗꠞꠍꠤ। ꠄꠞꠟꠣꠉꠤ ꠅ ꠜꠣꠁꠀꠁꠘ, ꠔꠥꠝꠞꠣ ꠎꠤꠘ꠆ꠖꠦꠉꠤꠞꠦ ꠙꠍꠘ꠆ꠖ ꠇꠞꠤꠟꠣꠅ, ꠔꠦꠃ ꠔꠥꠝꠞꠣ ꠀꠞ ꠔꠥꠝꠞꠣꠞ ꠀꠅꠟꠣꠖ ꠅꠇꠟꠞ ꠎꠣꠘ ꠛꠣꠌꠤꠛ।
DEU 30:20 ꠔꠥꠝꠞꠣ ꠘꠤꠎꠞ ꠝꠣꠛꠥꠖ ꠀꠟ꠆ꠟꠣꠞꠦ ꠝꠢꠛ꠆ꠛꠔ ꠇꠞꠤꠅ, ꠔꠣꠘ ꠢꠥꠇꠥꠝ-ꠀꠢꠇꠣꠝ ꠝꠣꠘꠤꠅ, ꠔꠣꠘ ꠀꠡꠤꠇ ꠛꠘꠤꠀ ꠔꠣꠘꠞꠦ ꠀꠁꠘ꠆ꠎꠣ ꠇꠞꠤ ꠗꠞꠤꠀ ꠞꠣꠈꠤꠅ, ꠅꠔꠣꠞ ꠝꠣꠎꠦꠃ ꠔꠥꠝꠞꠣꠞ ꠎꠤꠘ꠆ꠖꠦꠉꠤ। ꠔꠣꠁꠘ ꠎꠦ ꠖꠦꠡꠞ ꠖꠈꠟꠖꠣꠞꠤ ꠖꠤꠛꠣꠞ ꠟꠣꠉꠤ ꠔꠥꠝꠞꠣꠞ ꠝꠄ-ꠝꠥꠞꠛ꠆ꠛꠤ ꠁꠛ꠆ꠞꠣꠢꠤꠝ, ꠁꠍꠢꠣꠇ, ꠀꠞ ꠁꠀꠇꠥꠛꠞ ꠟꠉꠦ ꠇꠍꠝ ꠈꠣꠁꠀ ꠅꠀꠖꠣ ꠖꠤꠍꠂꠘ, ꠢꠃ ꠖꠦꠡꠅ ꠅꠔꠣ ꠢꠥꠇꠥꠝ-ꠀꠢꠇꠣꠝ ꠝꠣꠘꠣꠞ ꠝꠣꠎꠦꠃ ꠔꠥꠝꠞꠣꠞ ꠎꠤꠘ꠆ꠖꠦꠉꠤ।”
DEU 31:1 ꠄꠞꠛꠣꠖꠦ ꠝꠥꠍꠣꠄ ꠢꠇꠟ ꠛꠘꠤ ꠁꠍꠞꠣꠁꠟꠞꠦ ꠇꠁꠟꠣ,
DEU 31:2 “ꠅ ꠛꠘꠤ ꠁꠍꠞꠣꠁꠟ ꠢꠥꠘꠅ, ꠀꠝꠣꠞ ꠛꠄꠅꠡ ꠔ ꠄꠇ-ꠡ ꠛꠤꠡ ꠛꠍꠞ ꠅꠁꠉꠦꠍꠦ, ꠀꠝꠤ ꠀꠞ ꠀꠝꠣꠞ ꠇꠣꠝ ꠇꠞꠔꠣꠝ ꠙꠣꠞꠤꠀꠞ ꠘꠣ, ꠇꠣꠞꠘ ꠝꠣꠛꠥꠖꠦ ꠀꠝꠣꠞꠦ ꠎꠣꠘꠣꠁꠍꠂꠘ, ꠀꠝꠤ ꠎꠞ꠆ꠖꠣꠘ ꠉꠣꠋꠉꠞ ꠢꠤꠙꠣꠞꠅ ꠎꠣꠁꠔꠣꠝ ꠙꠣꠞꠔꠣꠝ ꠘꠣꠄ।
DEU 31:3 ꠔꠦ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣ ꠘꠤꠎꠦ ꠔꠥꠝꠞꠣꠞ ꠀꠉꠦ ꠀꠉꠦ ꠞꠁꠀ ꠎꠞ꠆ꠖꠣꠘ ꠉꠣꠋ ꠙꠣꠞ ꠅꠁꠀ ꠎꠣꠁꠛꠣ। ꠔꠣꠁꠘ ꠔꠥꠝꠞꠣꠞ ꠍꠣꠝꠘꠦ ꠕꠣꠇꠤ ꠢꠘꠞ ꠢꠇꠟ ꠎꠣꠔꠤꠞꠦ ꠛꠤꠘꠣꠡ ꠇꠞꠛꠣ, ꠔꠦꠃ ꠔꠥꠝꠞꠣ ꠢꠃ ꠖꠦꠡ ꠖꠈꠟ ꠇꠞꠛꠣꠄ। ꠀꠞ ꠝꠣꠛꠥꠖꠞ ꠇꠕꠣ ꠝꠣꠚꠤꠇ ꠢꠎꠞꠔ ꠁꠃꠍꠣꠄ ꠔꠥꠝꠞꠣꠞꠦ ꠟꠁꠀ ꠢꠙꠣꠞꠅ ꠔꠥꠝꠞꠣꠞ ꠀꠉꠦ ꠀꠉꠦ ꠎꠣꠁꠛꠣ।
DEU 31:4 ꠝꠣꠛꠥꠖꠦ ꠀꠝꠥꠞꠤ ꠅꠇꠟꠞ ꠛꠣꠖꠡꠣ ꠍꠤꠢꠥꠘ ꠀꠞ ꠃꠎꠞꠦ ꠎꠦꠟꠣꠈꠣꠘ ꠛꠤꠘꠣꠡ ꠇꠞꠍꠤꠟꠣ, ꠢꠃ ꠎꠣꠔꠤ ꠅꠇꠟꠞꠦꠅ ꠅꠟꠣ ꠛꠤꠘꠣꠡ ꠇꠞꠛꠣ।
DEU 31:5 ꠔꠣꠁꠘ ꠢꠤꠔꠣꠞꠦ ꠔꠥꠝꠞꠣꠞ ꠀꠔꠅ ꠡꠙꠤꠀ ꠖꠤꠛꠣ, ꠢꠃ ꠡꠝꠄ ꠔꠥꠝꠞꠣ ꠀꠝꠣꠞ ꠛꠣꠔꠣꠁꠟ ꠢꠥꠇꠥꠝ ꠝꠣꠚꠤꠇ ꠇꠣꠝ ꠇꠞꠤꠅ।
DEU 31:6 ꠔꠥꠝꠞꠣꠞ ꠛꠥꠇꠥꠔ ꠛꠟ ꠞꠣꠈꠅ ꠀꠞ ꠡꠣꠅꠡ ꠇꠞꠅ। ꠒꠞꠣꠁꠅ ꠘꠣ, ꠔꠣꠞꠣꠞꠦ ꠖꠦꠈꠤꠀ ꠊꠣꠛꠠꠣꠁꠅ ꠘꠣ। ꠝꠘꠅ ꠞꠣꠈꠤꠅ, ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣ ꠔꠥꠝꠞꠣꠞ ꠟꠉꠦ ꠟꠉꠦ ꠎꠣꠁꠞꠣ, ꠔꠣꠁꠘ ꠇꠥꠘꠥꠝꠘ꠆ꠔꠦꠃ ꠔꠥꠝꠞꠣꠞꠦ ꠍꠣꠠꠔꠣ ꠘꠣꠄ, ꠇꠥꠘꠥ ꠢꠣꠟꠔꠦꠃ ꠔꠥꠝꠞꠣꠞꠦ ꠚꠣꠟꠣꠁꠔꠣ ꠘꠣꠄ।”
DEU 31:7 ꠛꠣꠖꠦ ꠝꠥꠍꠣ ꠘꠛꠤꠄ ꠢꠇꠟ ꠛꠘꠤ ꠁꠍꠞꠣꠁꠟꠞ ꠍꠣꠝꠘꠦ ꠁꠃꠍꠣ ꠘꠛꠤꠞꠦ ꠀꠘꠣꠁꠟꠣ, ꠀꠘꠣꠁꠀ ꠇꠁꠟꠣ, “ꠔꠥꠝꠤ ꠛꠥꠇꠥꠔ ꠛꠟ ꠞꠣꠈꠅ ꠀꠞ ꠡꠣꠅꠡ ꠇꠞꠅ। ꠅꠃ ꠝꠣꠘꠥꠡ ꠅꠇꠟꠞꠦ ꠟꠁꠀ ꠔꠥꠝꠤ ꠉꠣꠋ ꠙꠣꠞ ꠅꠁꠀ ꠢꠃ ꠖꠦꠡꠅ ꠎꠣꠁꠛꠣꠄ, ꠢꠃ ꠖꠦꠡ ꠖꠤꠛꠣꠞ ꠟꠣꠉꠤ ꠝꠣꠛꠥꠖꠦ ꠔ ꠔꠣꠞꠣꠞ ꠝꠄ-ꠝꠥꠞꠛ꠆ꠛꠤꠞ ꠉꠦꠍꠦ ꠅꠀꠖꠣ ꠇꠞꠍꠟꠣ। ꠔꠥꠝꠤ ꠔꠣꠞꠣꠞꠦ ꠢꠘꠅ ꠘꠤꠀ ꠢꠘꠞ ꠎꠝꠤ-ꠎꠝꠣ ꠔꠣꠞꠣꠞꠦ ꠛꠣꠐꠤꠀ ꠖꠤꠅ।
DEU 31:8 ꠡ꠆ꠛꠄꠅꠋ ꠝꠣꠛꠥꠖ ꠔꠥꠝꠣꠞ ꠀꠉꠦ ꠀꠉꠦ ꠞꠁꠛꠣ, ꠔꠥꠝꠣꠞꠦ ꠡꠣꠁꠎ꠆ꠎ ꠇꠞꠛꠣ, ꠔꠣꠁꠘ ꠔꠥꠝꠣꠞꠦꠅ ꠍꠣꠠꠔꠣ ꠘꠣꠄ ꠀꠞ ꠔꠥꠝꠣꠞꠦ ꠚꠣꠟꠣꠁꠔꠣꠅ ꠘꠣꠄ, ꠔꠦ ꠔꠥꠝꠤ ꠒꠞꠣꠁꠅ ꠘꠣ, ꠡꠣꠅꠡ ꠀꠞꠣꠁꠅ ꠘꠣ।”
DEU 31:9 ꠛꠣꠖꠦ ꠝꠥꠍꠣ ꠘꠛꠤꠄ ꠔꠃꠞꠣꠔꠞ ꠅꠃ ꠢꠥꠇꠥꠝ-ꠀꠢꠇꠣꠝ ꠅꠇꠟ ꠟꠦꠈꠟꠣ, ꠟꠦꠈꠤꠀ ꠟꠦꠛꠤ ꠈꠣꠘ꠆ꠖꠣꠘꠞ ꠢꠃ ꠁꠝꠣꠝ ꠅꠇꠟ, ꠎꠣꠞꠣ ꠝꠣꠛꠥꠖꠞ ꠡꠣꠢꠣꠖꠔ ꠡꠘ꠆ꠖꠥꠇ ꠛꠁꠀ ꠘꠤꠔꠣ, ꠔꠣꠞꠣꠞ ꠀꠔꠅ ꠀꠞ ꠛꠘꠤ ꠁꠍꠞꠣꠁꠟꠞ ꠝꠄ-ꠝꠥꠞꠛ꠆ꠛꠤꠞ ꠀꠔꠅ ꠖꠤꠟꠣ।
DEU 31:10 ꠖꠤꠀ ꠔꠣꠞꠣꠞꠦ ꠢꠥꠇꠥꠝ ꠖꠤꠟꠣ, “ꠙꠞꠔꠦꠇ ꠡꠣꠔ ꠛꠍꠞ ꠛꠣꠖꠦ ꠛꠣꠖꠦ, ꠀꠅꠟꠣꠔ ꠝꠣꠚꠤꠞ ꠛꠍꠞꠞ ꠇꠣꠟꠅ, ꠒꠦꠞꠣ-ꠊꠞꠞ ꠁꠖꠞ ꠅꠇ꠆ꠔꠅ,
DEU 31:11 ꠢꠇꠟ ꠛꠘꠤ ꠁꠍꠞꠣꠁꠟ ꠎꠦꠛꠟꠣ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠙꠍꠘ꠆ꠖ ꠇꠞꠣ ꠎꠣꠉꠣꠔ ꠉꠤꠀ ꠔꠣꠘ ꠍꠣꠝꠘꠦ ꠀꠎꠤꠞ ꠅꠁꠛꠣ, ꠢꠃ ꠡꠝꠄ ꠔꠥꠝꠤ ꠔꠣꠞꠣ ꠢꠇꠟꠞ ꠍꠣꠝꠘꠦ ꠅꠃ ꠔꠃꠞꠣꠔ ꠇꠤꠔꠣꠛ ꠔꠤꠟꠣꠅꠔ ꠇꠞꠤꠀ ꠢꠥꠘꠣꠁꠅ।
DEU 31:12 ꠛꠦꠐꠣꠁꠘ, ꠛꠦꠐꠤꠘ, ꠢꠥꠞꠥꠔ꠆ꠔꠣꠁꠘ, ꠀꠞ ꠔꠥꠝꠞꠣꠞ ꠟꠉꠦ ꠛꠡꠔ ꠇꠞꠞꠣ ꠉꠣꠃ ꠛꠣ ꠐꠣꠃꠘꠞ ꠜꠤꠘ ꠎꠣꠔꠤꠞ ꠢꠇꠟ ꠝꠣꠘꠡꠞꠦ ꠄꠇ ꠎꠣꠉꠣꠔ ꠖꠟꠣ ꠇꠞꠤꠀ ꠁꠔꠣ ꠢꠥꠘꠣꠁꠅ, ꠁꠔꠣ ꠢꠥꠘꠤꠀ ꠔꠣꠞꠣ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞꠦ ꠒꠞꠣꠁꠛꠣ, ꠀꠞ ꠅꠃ ꠡꠞꠤꠅꠔꠞ ꠢꠇꠟ ꠢꠥꠇꠥꠝ-ꠀꠢꠇꠣꠝ ꠎꠔꠘ ꠇꠞꠤ ꠀꠝꠟ ꠇꠞꠛꠣ।
DEU 31:13 ꠀꠞ ꠔꠣꠞꠣꠞ ꠎꠦꠔꠣ ꠢꠥꠞꠥꠔ꠆ꠔꠣꠄ ꠔꠃꠞꠣꠔꠞ ꠅꠃ ꠢꠥꠇꠥꠝ-ꠀꠢꠇꠣꠝ ꠢꠥꠘꠍꠂꠘ ꠘꠣ, ꠎꠞ꠆ꠖꠣꠘ ꠉꠣꠋꠉꠞ ꠢꠙꠣꠞꠅ ꠔꠥꠝꠞꠣ ꠎꠦ ꠖꠦꠡꠞ ꠖꠈꠟꠖꠣꠞꠤ ꠙꠣꠁꠞꠣꠄ, ꠔꠥꠝꠞꠣ ꠢꠘꠅ ꠉꠤꠀ ꠢꠣꠞꠟꠦ ꠔꠣꠞꠣꠅ ꠢꠣꠞꠣ ꠎꠤꠘ꠆ꠖꠦꠉꠤꠜꠞ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠒꠞ-ꠈꠚꠦ ꠌꠟꠣ ꠢꠤꠇꠛꠣ।”
DEU 31:14 ꠛꠣꠖꠦ ꠝꠣꠛꠥꠖꠦ ꠝꠥꠍꠣ ꠘꠛꠤꠞꠦ ꠇꠁꠟꠣ, “ꠔꠥꠝꠣꠞ ꠢꠣꠄꠀꠔꠤ ꠔ ꠀꠞ ꠛꠦꠡꠤ ꠘꠣꠁ, ꠝꠃꠔ ꠗꠣꠞꠅ ꠀꠁꠌ꠆ꠍꠦ, ꠔꠦ ꠔꠥꠝꠤ ꠁꠃꠍꠣꠞꠦ ꠀꠘꠣꠅ, ꠀꠘꠣꠁꠀ ꠖꠥꠁꠅ ꠎꠘ ꠝꠤꠟꠘ-ꠔꠣꠝ꠆ꠛꠥꠞ ꠍꠣꠝꠘꠦ ꠀꠅ, ꠀꠝꠤ ꠔꠣꠞ ꠃꠙꠞꠦ ꠔꠣꠞ ꠘꠄꠀ ꠇꠣꠝ ꠡꠝꠎꠣꠁ ꠖꠤꠝꠥ।” ꠔꠦꠃ ꠔꠣꠞꠣ ꠖꠥꠁꠅ ꠎꠘ ꠉꠤꠀ ꠝꠤꠟꠘ-ꠔꠣꠝ꠆ꠛꠥꠞ ꠍꠣꠝꠘꠦ ꠀꠎꠤꠞ ꠅꠁꠟꠣ।
DEU 31:15 ꠅꠃ ꠡꠝꠄ ꠝꠣꠛꠥꠖꠦ ꠝꠦꠊꠞ ꠈꠥꠐꠤꠞ ꠝꠣꠎꠦ ꠕꠣꠇꠤꠀ ꠝꠤꠟꠘ-ꠔꠣꠝ꠆ꠛꠥꠞ ꠖꠥꠀꠞꠞ ꠍꠣꠝꠘꠦ ꠀꠁꠀ ꠔꠣꠞꠣꠞꠦ ꠖꠞꠡꠘ ꠖꠤꠟꠣ, ꠅꠃ ꠈꠥꠐꠤ ꠔꠣꠝ꠆ꠛꠥꠞ ꠖꠥꠀꠞꠞ ꠃꠙꠞꠦ ꠃꠛꠣꠁ ꠞꠁꠟ।
DEU 31:16 ꠀꠞ ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ, “ꠢꠥꠘꠅ, ꠔꠥꠝꠤ ꠔ ꠔꠥꠝꠣꠞ ꠛꠣꠚ-ꠖꠣꠖꠣꠁꠘ꠆ꠔꠞ ꠉꠦꠍꠦ ꠀꠞꠣꠝ ꠇꠞꠣꠔ ꠎꠣꠁꠞꠣꠄꠉꠤ, ꠅꠁꠟꠦ ꠅꠃ ꠝꠣꠘꠥꠡ ꠅꠇꠟ ꠎꠦ ꠖꠦꠡꠅ ꠢꠣꠝꠣꠁꠞꠣ, ꠢꠣꠝꠣꠘꠤꠞ ꠕꠥꠠꠣ ꠛꠣꠖꠦꠃ ꠀꠝꠣꠞ ꠟꠉꠦ ꠔꠣꠞꠣꠞ ꠅꠀꠖꠣ-ꠌꠥꠇ꠆ꠔꠤꠞꠦ ꠔꠣꠞꠣ ꠜꠋꠉ ꠇꠞꠛꠣ, ꠔꠣꠞꠣ ꠀꠝꠣꠞꠦ ꠛꠣꠖ ꠖꠤꠀ ꠢꠘꠞ ꠖꠦꠛ-ꠖꠦꠛꠤꠞ ꠀꠔꠅ ꠘꠤꠎꠞꠦ ꠡꠙꠤ ꠖꠤꠛꠣ।
DEU 31:17 ꠔꠣꠞꠣ ꠁꠔꠣ ꠇꠞꠤꠀ ꠢꠣꠞꠟꠦ ꠀꠝꠣꠞ ꠉꠥꠍꠣꠞ ꠀꠉꠥꠁꠘ ꠎꠟꠤꠛ, ꠀꠝꠤ ꠔꠣꠞꠣꠞ ꠟꠉ ꠍꠣꠠꠤ ꠖꠤꠝꠥ, ꠔꠣꠞꠣꠞ ꠛꠣꠄ ꠕꠣꠇꠤ ꠀꠝꠣꠞ ꠝꠥꠈ ꠚꠤꠞꠣꠁꠟꠤꠝꠥ, ꠔꠦꠃ ꠔꠣꠞꠣ ꠛꠤꠘꠣꠡꠞ ꠙꠕꠅ ꠎꠣꠁꠛꠣ। ꠔꠣꠞꠣꠞ ꠃꠙꠞꠦ ꠘꠣꠘꠣꠘ ꠛꠣꠟꠣ-ꠝꠍꠤꠛꠔ ꠀꠁꠛ। ꠢꠃ ꠡꠝꠄ ꠔꠣꠞꠣ ꠇꠁꠛꠣ, ꠀꠝꠞꠣꠞ ꠖꠡꠣ ꠁꠟꠣ ꠅꠁꠟ ꠇꠦꠘꠦ? ꠘꠤꠡ꠆ꠌꠄ, ꠀꠝꠞꠣꠞ ꠀꠟ꠆ꠟꠣ ꠀꠝꠞꠣꠞ ꠟꠉꠦ ꠘꠣꠄ ꠇꠞꠤꠃ, ꠁꠔꠣ ꠊꠐꠦꠞ।
DEU 31:18 ꠀꠍꠟꠦ ꠔꠣꠞꠣꠞ ꠢꠃ ꠖꠦꠛ-ꠖꠦꠛꠤꠘ꠆ꠔꠞ ꠉꠦꠍꠦ ꠉꠤꠀ ꠎꠦꠔꠣ ꠇꠥ-ꠇꠣꠝ ꠇꠞꠍꠂꠘ, ꠅꠔꠣꠞ ꠟꠣꠉꠤꠃ ꠀꠝꠤ ꠢꠃ ꠡꠝꠄ ꠔꠣꠞꠣꠞ ꠉꠦꠍ ꠕꠣꠇꠤ ꠀꠝꠣꠞ ꠝꠥꠈ ꠚꠤꠞꠣꠁꠟꠤꠍꠤ।
DEU 31:19 “ꠔꠦ ꠔꠥꠝꠞꠣ ꠅꠃ ꠉꠎꠟꠐꠣ ꠟꠦꠈꠤꠟꠣꠅ, ꠟꠦꠈꠤꠀ ꠛꠘꠤ ꠁꠍꠞꠣꠁꠟꠞꠦ ꠢꠤꠇꠣꠅ ꠀꠞ ꠔꠣꠞꠣ ꠉꠣꠁꠛꠣ। ꠅꠃ ꠉꠎꠟ ꠔ ꠔꠣꠞꠣꠞ ꠛꠤꠞꠥꠖ꠆ꠖꠦ ꠀꠝꠣꠞ ꠡꠣꠇ꠆ꠇꠤ ꠅꠁꠀ ꠞꠁꠛ।
DEU 31:20 ꠛꠥꠎꠞꠣꠄ ꠘꠤ, ꠀꠝꠤ ꠔꠣꠞꠣꠞꠦ ꠎꠦ ꠖꠦꠡ ꠖꠤꠛꠣꠞ ꠟꠣꠉꠤ ꠔꠣꠞꠣꠞ ꠝꠄ-ꠝꠥꠞꠛ꠆ꠛꠤꠞ ꠉꠦꠍꠦ ꠅꠀꠖꠣ ꠇꠞꠍꠤ, ꠖꠥꠗ ꠀꠞ ꠝꠃꠞ ꠜꠣꠘ꠆ꠒꠣꠞ ꠀꠟꠣ ꠀꠞꠣꠝꠞ ꠢꠃ ꠖꠦꠡꠅ ꠔꠣꠞꠣꠞꠦ ꠘꠤꠀ ꠢꠣꠞꠟꠦꠃ, ꠔꠣꠞꠣ ꠈꠣꠘꠣ-ꠙꠤꠘꠣ ꠈꠣꠁꠀ ꠝꠥꠐꠣ-ꠔꠣꠎꠣ ꠅꠁꠛꠣ। ꠅꠁꠀ ꠢꠘꠞ ꠖꠦꠛ-ꠖꠦꠛꠤꠞ ꠙꠥꠎꠣ ꠇꠞꠣꠔ ꠟꠣꠉꠛꠣ, ꠢꠔꠣꠞ ꠜꠎꠘꠣ ꠇꠞꠛꠣ, ꠀꠝꠣꠞꠦ ꠄꠟꠣꠝꠤ ꠇꠞꠤꠀ ꠀꠝꠣꠞ ꠟꠉꠞ ꠅꠀꠖꠣ-ꠌꠥꠇ꠆ꠔꠤ ꠜꠣꠋꠉꠤꠛꠣ।
DEU 31:21 ꠔꠦꠃ ꠔꠣꠞꠣꠞ ꠃꠙꠞꠦ ꠎꠦꠛꠟꠣ ꠘꠣꠘꠣꠘ ꠘꠝꠥꠘꠣꠞ ꠛꠣꠟꠣ-ꠝꠍꠤꠛꠔ ꠀꠞ ꠛꠤꠙꠖ-ꠀꠙꠖ ꠀꠁꠛ, ꠢꠃ ꠡꠝꠄ ꠅꠃ ꠉꠎꠟꠦ ꠔꠣꠞꠣꠞ ꠍꠣꠝꠘꠦ ꠡꠣꠇ꠆ꠇꠤ ꠖꠤꠛ, ꠅꠃ ꠉꠎꠟ ꠔ ꠔꠣꠞꠣꠞ ꠀꠅꠟꠣꠖ ꠅꠇꠟꠦ ꠚꠣꠃꠞꠤꠔꠣ ꠘꠣꠄ। ꠢꠣꠍꠣ ꠇꠕꠣ ꠅꠁꠟ, ꠀꠝꠣꠞ ꠅꠀꠖꠣ ꠇꠞꠣ ꠢꠃ ꠖꠦꠡꠅ ꠘꠤꠛꠣꠞ ꠀꠉꠦꠃ, ꠔꠣꠞꠣ ꠝꠘꠦ ꠝꠘꠦ ꠇꠤꠔꠣ ꠌꠤꠘ꠆ꠔꠣ ꠇꠞꠦꠞ, ꠁꠔꠣ ꠔ ꠀꠝꠣꠞ ꠎꠣꠘꠣ ꠀꠍꠦ।”
DEU 31:22 ꠝꠥꠍꠣꠄ ꠟꠉꠦ ꠟꠉꠦ ꠅꠃ ꠉꠎꠟ ꠟꠦꠈꠤꠀ ꠛꠘꠤ ꠁꠍꠞꠣꠁꠟꠞꠦ ꠢꠤꠇꠣꠁꠟꠣ।
DEU 31:23 ꠀꠞ ꠝꠣꠛꠥꠖꠦ ꠘꠥꠘꠞ ꠙꠥꠀ ꠁꠃꠍꠣꠞꠦ ꠔꠣꠘ ꠘꠄꠀ ꠇꠣꠝꠞ ꠟꠣꠉꠤ ꠅꠃꠟꠣ ꠢꠥꠇꠥꠝ ꠖꠤꠟꠣ, “ꠔꠥꠝꠤ ꠛꠥꠇꠥꠔ ꠛꠟ ꠞꠣꠈꠅ ꠀꠞ ꠡꠣꠅꠡ ꠇꠞꠅ। ꠀꠝꠤ ꠇꠍꠝ ꠈꠣꠁꠀ ꠛꠘꠤ ꠁꠍꠞꠣꠁꠟꠞꠦ ꠎꠦ ꠖꠦꠡ ꠖꠤꠛꠣꠞ ꠟꠣꠉꠤ ꠅꠀꠖꠣ ꠇꠞꠍꠤ, ꠔꠥꠝꠤ ꠔꠣꠞꠣꠞꠦ ꠟꠁꠀ ꠢꠃ ꠖꠦꠡꠅ ꠎꠣꠁꠛꠣꠄ, ꠀꠝꠤ ꠔꠥꠝꠣꠞ ꠟꠉꠦ ꠟꠉꠦ ꠞꠁꠝꠥ।”
DEU 31:24 ꠡꠞꠤꠅꠔꠞ ꠅꠃ ꠢꠥꠇꠥꠝ-ꠀꠢꠇꠣꠝꠞ ꠢꠇꠟꠔꠣ ꠝꠥꠍꠣꠄ ꠡꠥꠟ꠆ꠟꠀꠘꠣ ꠟꠦꠈꠟꠣ,
DEU 31:25 ꠟꠦꠈꠤꠀ ꠝꠣꠛꠥꠖꠞ ꠡꠣꠢꠣꠖꠔ ꠡꠘ꠆ꠖꠥꠇ ꠛꠁꠀ ꠘꠦꠅꠞꠣ ꠟꠦꠛꠤ ꠈꠣꠘ꠆ꠖꠣꠘꠞ ꠝꠣꠘꠡꠞꠦ ꠢꠥꠇꠥꠝ ꠖꠤꠟꠣ,
DEU 31:26 “ꠅꠃ ꠔꠃꠞꠣꠔ ꠇꠤꠔꠣꠛꠈꠣꠘ ꠘꠤꠀ ꠔꠥꠝꠞꠣ ꠀꠟ꠆ꠟꠣ ꠝꠣꠛꠥꠖꠞ ꠡꠣꠢꠣꠖꠔ ꠡꠘ꠆ꠖꠥꠇꠞ ꠇꠣꠍꠣꠔ ꠕꠁꠅ। ꠁꠈꠣꠘ ꠛꠘꠤ ꠁꠍꠞꠣꠁꠟꠞ ꠛꠤꠞꠥꠖ꠆ꠖꠦ ꠡꠣꠇ꠆ꠇꠤ ꠢꠤꠡꠣꠛꠦ ꠢꠘꠅ ꠞꠁꠛ।
DEU 31:27 ꠔꠥꠝꠞꠣ ꠇꠔ ꠛꠠ ꠉꠣꠠꠔꠦꠠꠣ ꠀꠞ ꠘꠣꠚꠞꠝꠣꠘ, ꠁꠔꠣ ꠀꠝꠣꠞ ꠎꠣꠘꠣ ꠀꠍꠦ। ꠀꠝꠤ ꠎꠤꠘ꠆ꠖꠣ ꠢꠣꠟꠔꠦ ꠔꠥꠝꠞꠣꠞ ꠟꠉꠦ ꠞꠁꠔꠦꠃ ꠔꠥꠝꠞꠣ ꠎꠦꠛꠟꠣ ꠝꠣꠛꠥꠖꠞ ꠘꠣꠚꠞꠝꠣꠘꠤ ꠇꠞꠍ, ꠔꠦ ꠀꠝꠣꠞ ꠝꠞꠘꠞ ꠛꠣꠖꠦ ꠔꠥꠝꠞꠣ ꠀꠞ ꠇꠤꠔꠣ ꠘꠣ ꠇꠞꠛꠣꠄ!
DEU 31:28 ꠔꠥꠝꠞꠣ ꠢꠇꠟꠦ ꠎꠣꠞꠎꠤꠞ ꠈꠣꠘ꠆ꠖꠣꠘꠞ ꠝꠥꠞꠛ꠆ꠛꠤ ꠀꠞ ꠅꠚꠤꠡꠣꠞ ꠅꠇꠟꠞꠦ ꠀꠝꠣꠞ ꠉꠦꠍꠦ ꠀꠘꠅ, ꠀꠝꠤ ꠘꠤꠎꠦ ꠔꠣꠞꠣꠞ ꠉꠦꠍꠦ ꠅꠔꠣ ꠈꠥꠟꠣꠍꠣ ꠇꠞꠤꠀ ꠇꠁꠀ ꠎꠣꠁꠝꠥ, ꠀꠍꠝꠣꠘ-ꠎꠝꠤꠘꠞꠦ ꠔꠣꠞꠣꠞ ꠛꠤꠞꠥꠖ꠆ꠖꠦ ꠡꠣꠇ꠆ꠇꠤ ꠞꠣꠈꠔꠣꠝ ꠌꠣꠁ।
DEU 31:29 ꠀꠝꠤ ꠔ ꠎꠣꠘꠤ, ꠀꠝꠤ ꠌꠃꠈ ꠝꠥꠎꠣꠞ ꠛꠣꠖꠦ ꠔꠥꠝꠞꠣ ꠄꠇ꠆ꠇꠦꠛꠣꠞꠦ ꠛꠦ-ꠙꠕꠤ ꠛꠘꠤꠎꠤꠛꠣꠄ, ꠀꠝꠣꠞ ꠛꠣꠔꠣꠁꠟ ꠙꠕ ꠕꠣꠇꠤ ꠔꠥꠝꠞꠣ ꠢꠞꠤꠎꠤꠛꠣꠄ, ꠔꠦꠃ ꠔꠥꠝꠞꠣꠞ ꠃꠙꠞꠦ ꠉꠎꠛ ꠟꠣꠝꠛ। ꠇꠣꠞꠘ ꠝꠣꠛꠥꠖꠦ ꠎꠦꠔꠣ ꠊꠤꠘ ꠇꠞꠂꠘ, ꠔꠥꠝꠞꠣ ꠅꠔꠣ ꠇꠣꠝ ꠇꠞꠤꠀ, ꠘꠤꠎꠞ ꠀꠔꠦ ꠝꠥꠞ꠆ꠔꠤ ꠛꠣꠘꠣꠁꠀ, ꠔꠣꠘ ꠉꠥꠍꠣ ꠔꠥꠟꠣꠁꠛꠣꠄ।”
DEU 31:30 ꠛꠣꠖꠦ ꠝꠥꠍꠣ ꠘꠛꠤꠄ ꠢꠇꠟ ꠛꠘꠤ ꠁꠍꠞꠣꠁꠟꠞ ꠍꠣꠝꠘꠦ ꠅꠃ ꠉꠎꠟꠞ ꠙꠄꠟꠣ ꠕꠣꠇꠤ ꠀꠈꠦꠞ ꠙꠞ꠆ꠎꠘ꠆ꠔ ꠢꠥꠘꠣꠁꠟꠣ; ꠔꠣꠁꠘ ꠉꠣꠁꠟꠣ,
DEU 32:1 ꠅ ꠀꠍꠝꠣꠘ, ꠇꠣꠘ ꠙꠣꠔꠤꠀ ꠢꠥꠘꠅ ꠀꠝꠤ ꠎꠦꠔꠣ ꠉꠣꠁ, ꠅ ꠎꠝꠤꠘ, ꠔꠥꠝꠤꠅ ꠢꠥꠘꠅ ꠀꠝꠤ ꠎꠣ ꠛꠣꠔꠣꠁ।
DEU 32:2 ꠀꠝꠣꠞ ꠔꠣꠟꠤꠝ ꠟꠣꠝꠃꠇ ꠝꠦꠊꠞ ꠚꠥꠐꠣꠞ ꠟꠣꠈꠣꠘ, ꠈꠥꠀꠞ ꠝꠔꠘ ꠙꠠꠃꠇ ꠀꠝꠣꠞ ꠝꠥꠈꠞ ꠛꠄꠀꠘ। ꠈꠦꠍꠝꠣ ꠊꠣꠡꠞ ꠃꠙꠞꠦ ꠚꠥꠐꠣ ꠚꠥꠐꠣ ꠝꠦꠊ ꠅꠁꠀ ꠙꠠꠃꠇ, ꠘꠄꠀ ꠌꠦꠞꠣ ꠉꠣꠍꠞ ꠃꠙꠞꠦ ꠡꠣꠘ꠆ꠔꠤꠞ ꠝꠦꠊ ꠅꠁꠀ ꠟꠣꠝꠃꠇ।
DEU 32:3 ꠀꠝꠤ ꠔ ꠄꠟꠣꠘ ꠇꠞꠝꠥ ꠀꠝꠣꠞ ꠝꠣꠛꠥꠖꠞ ꠘꠣꠝ, ꠔꠥꠝꠞꠣꠅ ꠉꠣꠁꠅ ꠀꠟ꠆ꠟꠣꠞ ꠝꠢꠤꠝꠣ ꠉꠣꠘ।
DEU 32:4 ꠔꠣꠁꠘꠃ ꠔ ꠀꠡꠞꠄ ꠐꠤꠟ꠆ꠟꠣ, ꠘꠤꠈꠥꠔ ꠔꠣꠘ ꠇꠣꠝ, ꠢꠇ-ꠢꠣꠍꠣ ꠔꠣꠘ ꠙꠕ ꠡꠑꠤꠇ ꠔꠣꠝꠣꠝ। ꠍꠟ-ꠌꠔꠥꠞꠤ ꠘꠣꠁ ꠔꠣꠘ, ꠢꠇ-ꠢꠣꠟꠣꠟ ꠀꠍꠦ ꠡꠞ꠆ꠛꠖꠣ, ꠢꠇ ꠁꠘꠍꠣꠚ ꠙꠞꠦꠎꠉꠣꠞꠤ ꠀꠍꠦ ꠡꠔꠔꠣ।
DEU 32:5 ꠔꠣ-ꠅ ꠔꠣꠘ ꠈꠛꠤꠍ ꠛꠘ꠆ꠖꠣꠄ ꠇꠞꠍꠦ ꠛꠦꠁꠝꠣꠘꠤ, ꠖꠤꠟꠞ ꠈꠣꠞꠣꠙꠤꠄ ꠔꠣꠞꠣ ꠛꠘꠍꠦ ꠇꠟꠋꠇꠤꠘꠤ।
DEU 32:6 ꠢꠣꠄꠞꠦ ꠀꠝ꠆ꠝꠇ ꠘꠣꠖꠣꠘ, ꠢꠣꠄꠞꠦ ꠛꠦꠀꠈꠟ, ꠅꠃꠘꠤ ꠔꠥꠝꠞꠣ ꠛꠖꠟꠣ ꠖꠤꠟꠣꠄ, ꠝꠣꠛꠥꠖꠞ ꠖꠣꠘꠞ? ꠔꠣꠁꠘꠦꠃ ꠔꠥꠝꠞꠣꠞ ꠙꠄꠖꠣ ꠇꠞꠞꠣ ꠙꠞꠅꠀꠞ ꠖꠤꠉꠣꠞ ꠘꠤ? ꠛꠅꠀꠁꠟ ꠇꠞꠟꠣ ꠔꠥꠝꠞꠣꠞ ꠁꠍꠞꠣꠁꠟ ꠎꠣꠔꠤ।
DEU 32:7 ꠁꠀꠖ ꠇꠞꠅ ꠔꠥꠝꠞꠣ ꠢꠃ ꠀꠉꠞ ꠀꠝꠟꠞ ꠝꠣꠔ, ꠝꠘꠅ ꠞꠣꠈꠅ ꠇꠤꠔꠣ ꠅꠁꠍꠤꠟ ꠙꠥꠞꠣꠘ ꠎꠝꠣꠘꠣꠔ। ꠛꠣꠚ-ꠖꠣꠖꠣꠞꠦ ꠎꠤꠇꠣꠞ ꠇꠞꠤ ꠁꠔꠤꠢꠣꠡ ꠢꠥꠘꠅ, ꠛꠥꠠꠣ-ꠛꠥꠠꠤꠞ ꠝꠥꠈ ꠕꠣꠇꠤ ꠢꠇꠟꠔꠣ ꠎꠣꠘꠅ।
DEU 32:8 ꠀꠟ꠆ꠟꠣꠔꠣꠟꠣꠄ ꠖꠤꠟꠣ ꠎꠦꠛꠟꠣ ꠎꠝꠤꠘ ꠛꠣꠐꠤꠀ, ꠘꠣꠘꠣꠘ ꠎꠣꠔꠤꠞꠦ ꠖꠤꠟꠣ ꠜꠣꠉ-ꠛꠣꠐꠥꠞꠣ ꠇꠞꠤꠀ। ꠛꠘꠤ ꠁꠍꠞꠣꠁꠟꠞ ꠙꠞꠤꠝꠣꠘ ꠔ ꠎꠣꠘꠣ ꠀꠍꠤꠟ ꠔꠣꠘ, ꠄꠞꠣꠞ ꠅꠋꠡ ꠀꠟꠉꠣꠁ ꠕꠁꠀ ꠛꠣꠇꠤ ꠇꠞꠟꠣ ꠖꠣꠘ।
DEU 32:9 ꠝꠣꠛꠥꠖꠞ ꠈꠣꠍ ꠡꠝ꠆ꠙꠔ꠆ꠔꠤ ꠔ ꠔꠣꠘ ꠘꠤꠎꠞ ꠙ꠆ꠞꠎꠣ, ꠁꠀꠇꠥꠛ ꠛꠋꠡ ꠁꠍꠞꠣꠁꠟ ꠎꠣꠔꠤ ꠀꠙꠘ ꠍꠣꠝꠣꠘꠣ।
DEU 32:10 ꠔꠣꠞꠣꠞꠦ ꠔꠣꠁꠘ ꠔꠥꠇꠣꠁ ꠙꠣꠁꠟꠣ ꠝꠞꠥꠜꠥꠝꠤꠞ ꠖꠦꠡꠅ, ꠘꠤꠞꠣꠁ-ꠘꠤꠞ꠆ꠎꠘ ꠖꠦꠡ ꠀꠞ ꠛꠣꠊ-ꠡꠤꠋꠢꠞ ꠉꠞ꠆ꠎꠘꠅ। ꠇꠥꠖꠞꠔꠤ ꠒꠣꠈꠘꠣꠖꠤ ꠊꠥꠞꠤꠀ ꠎꠔꠘ ꠇꠞꠤꠟꠣ, ꠌꠈꠥꠞ ꠝꠘꠤꠞ ꠟꠣꠈꠣꠘꠃ ꠔꠣꠞꠣꠞꠦ ꠛꠣꠌꠣꠁꠟꠣ।
DEU 32:11 ꠌꠤꠟꠦ ꠎꠦꠟꠣ ꠘꠤꠎꠞ ꠛꠣꠖꠣꠞ ꠛꠣꠁꠌ꠆ꠌꠣꠞꠦ ꠘꠣꠌꠣꠄ, ꠀꠡ꠆ꠔꠦ ꠀꠡ꠆ꠔꠦ ꠃꠠꠤ ꠃꠠꠤ ꠒꠣꠈꠘꠣꠞꠦ ꠟꠣꠠꠣꠄ, ꠒꠣꠈꠘꠣ ꠝꠦꠟꠤꠀ ꠛꠣꠁꠌ꠆ꠌꠣꠁꠘꠞꠦ ꠃꠙꠞꠦ ꠔꠥꠟꠦ, ꠔꠥꠟꠤꠀ ꠢꠣꠞꠤ ꠃꠠꠣꠟ ꠖꠤꠀ ꠟꠁꠀ ꠟꠁꠀ ꠊꠥꠞꠦ,
DEU 32:12 ꠝꠣꠛꠥꠖꠦ ꠄꠇꠟꠣ ꠅꠃꠟꠣ ꠇꠞꠤ ꠔꠣꠞꠣꠞꠦ ꠘꠤꠟꠣ, ꠇꠥꠘꠥꠎꠣꠔꠞ ꠖꠦꠛ-ꠖꠦꠛꠤ ꠔꠣꠘ ꠟꠉꠦ ꠀꠍꠤꠟ ꠘꠣ।
DEU 32:13 ꠙꠣꠠꠦ ꠙꠣꠠꠦ ꠃꠠꠣꠁ ꠃꠠꠣꠁ ꠘꠤꠟꠣ ꠔꠣꠞꠣꠞꠦ, ꠙꠣꠠꠤꠀ ꠖꠦꠡꠞ ꠖꠈꠟ ꠖꠤꠟꠣ ꠛꠘꠤ ꠁꠍꠞꠣꠁꠟꠞꠦ। ꠈꠦꠔꠞ ꠜꠣꠟꠣ ꠚꠡꠟ ꠖꠤꠟꠣ ꠈꠣꠁꠛꠣꠞ ꠟꠣꠉꠤ, ꠙꠣꠠꠤꠀ ꠌꠣꠇꠞ ꠝꠃ ꠈꠣꠛꠣꠁꠟꠣ ꠚꠣꠐꠣ-ꠌꠤꠙꠣ ꠕꠣꠇꠤ। ꠈꠣꠛꠣꠁꠟꠣ ꠝꠣꠟꠤꠇꠦ ꠎꠄꠔꠥꠘꠞ ꠔꠦꠟ, ꠟꠥꠀꠞ ꠟꠣꠈꠣꠘ ꠡꠇ꠆ꠔ ꠝꠣꠐꠤꠔ ꠔꠦꠟ ꠚꠟꠤ ꠉꠦꠟ।
DEU 32:14 ꠈꠣꠛꠣꠁꠟꠣ ꠔꠣꠞꠣꠞꠦ ꠔꠣꠁꠘ ꠉꠞꠥꠞ ꠖꠥꠗꠞ ꠖꠁ, ꠍꠣꠉꠟ-ꠝꠦꠠꠣꠞ ꠖꠥꠗꠅ ꠈꠣꠁꠟꠣ ꠎꠣꠘꠤꠅ ꠘꠤꠌ꠆ꠌꠄ। ꠝꠥꠐꠣ-ꠔꠣꠎꠣ ꠝꠦꠠꠣꠞ ꠉꠥꠡ꠆ꠔ ꠈꠣꠁꠟꠣ ꠝꠎꠣ ꠇꠞꠤ, ꠛꠣꠡꠘ ꠖꠦꠡꠞ ꠉꠞꠥ-ꠈꠡꠤ ꠈꠣꠁꠟꠣ ꠞꠥꠐꠤꠖꠤ। ꠔꠣꠎꠣ-ꠙꠥꠡ꠆ꠐ ꠉꠝꠞ ꠞꠥꠐꠤ ꠀꠋꠉꠥꠞꠞ ꠡꠞꠛꠔ, ꠒꠦꠝꠖꠤ ꠃꠑꠣ ꠀꠋꠉꠥꠞ ꠅꠁꠟ ꠀꠟ꠆ꠟꠣꠞ ꠘꠤꠀꠝꠔ।
DEU 32:15 ꠛꠣꠖꠦ ꠔꠣꠞꠣ ꠟꠣꠕ ꠝꠣꠞꠤꠟꠣ ꠙꠦꠐꠟꠣ ꠛꠘꠤꠀ, ꠛꠘꠤ ꠁꠍꠞꠣꠁꠟꠦ ꠟꠣꠕ ꠝꠣꠞꠟꠣ ꠔꠣꠞꠣꠞ ꠙꠣꠅ ꠖꠤꠀ। ꠈꠣꠁꠀ ꠈꠣꠁꠀ ꠙꠦꠐ ꠚꠥꠟꠣꠁꠀ ꠝꠣꠞꠟ ꠅꠈꠘ ꠟꠣꠕ, ꠚꠣꠃꠞꠤꠟꠤꠟ ꠢꠃ ꠀꠟ꠆ꠟꠣꠞꠦ ꠎꠦꠁꠘ ꠖꠤꠟꠣ ꠜꠣꠔ। ꠙꠄꠖꠣ ꠇꠞꠞꠣ ꠀꠟ꠆ꠟꠣꠞ ꠟꠉ ꠔꠣꠞꠣ ꠍꠣꠠꠤ ꠖꠤꠟ, ꠀꠡꠞꠄ ꠐꠤꠟ꠆ꠟꠣ ꠀꠟ꠆ꠟꠣꠞꠦ ꠔꠣꠞꠣ ꠢꠥꠞꠥ ꠝꠘꠅ ꠇꠞꠟ।
DEU 32:16 ꠖꠦꠛ-ꠖꠦꠛꠤꠞ ꠙꠥꠎꠣ ꠇꠞꠤꠀ ꠎꠣꠟꠣꠁꠟ ꠀꠉꠥꠁꠘ, ꠄꠇ ꠀꠟ꠆ꠟꠣ ꠍꠣꠠꠤꠀ ꠔꠣꠞꠣ ꠜꠎꠤꠟ ꠢꠉꠥꠁꠘ। ꠉꠥꠍꠣꠞ ꠀꠉꠥꠁꠘ ꠎꠣꠟꠣꠁꠟ ꠔꠣꠘ ꠀꠞꠡꠞ ꠝꠣꠎꠦ, ꠝꠥꠞ꠆ꠔꠤ ꠙꠥꠎꠣ ꠊꠤꠘ ꠇꠞꠂꠘ ꠝꠢꠣꠘ ꠀꠟ꠆ꠟꠣ ꠙꠣꠇꠦ।
DEU 32:17 ꠜꠥꠔꠞ ꠘꠣꠝꠦ ꠛꠟꠤ ꠖꠤꠟ ꠔꠣꠘꠞꠦ ꠍꠣꠠꠤꠀ, ꠜꠥꠔ ꠔ ꠇꠥꠘꠥ ꠀꠟ꠆ꠟꠣ ꠘꠣꠄ ꠔꠣ-ꠅ ꠙꠣꠁꠟ ꠙꠥꠎꠣ। ꠘꠄꠀ ꠘꠄꠀ ꠖꠦꠛꠔꠣ ꠎꠦꠔꠣ ꠇꠄꠖꠤꠘ ꠕꠣꠇꠤ ꠌꠤꠘꠦ, ꠛꠣꠚ-ꠖꠣꠖꠣꠞ ꠅꠌꠤꠘ ꠖꠦꠛꠔꠣ ꠅꠈꠘ ꠔꠣꠞꠣ ꠜꠎꠦ।
DEU 32:18 ꠎꠘꠝ ꠖꠣꠔꠣ ꠛꠣꠚꠞ ꠟꠣꠈꠣꠘ ꠎꠦꠁꠘ ꠀꠡꠞꠄ ꠐꠤꠟ꠆ꠟꠣ, ꠔꠣꠘꠞꠦ ꠔꠥꠝꠞꠣ ꠚꠣꠃꠞꠤꠀ ꠢꠣꠞꠤ ꠇꠞꠟꠣꠄ ꠅꠛꠢꠦꠟꠣ।
DEU 32:19 ꠀꠅꠟꠣꠖꠞ ꠅꠃ ꠢꠣꠟꠔ ꠖꠦꠈꠤꠀ ꠝꠥꠈ ꠚꠤꠞꠣꠁꠟ꠆ꠟꠣ ꠝꠣꠛꠥꠖꠦ, ꠞꠣꠉꠦ-ꠉꠥꠍꠣꠄ ꠀꠉꠥꠁꠘ ꠅꠁꠟꠣ ꠔꠣꠞꠣꠞꠃ ꠛꠖ ꠀꠝꠟꠦ।
DEU 32:20 ꠉꠥꠍꠣ ꠇꠞꠤ ꠝꠣꠛꠥꠖꠦ ꠇꠁꠟꠣ ꠝꠥꠈ ꠚꠤꠞꠣꠁꠟꠣꠝ ꠀꠝꠤ, ꠔꠣꠞꠣꠞ ꠢꠦꠡ ꠖꠡꠣ ꠇꠤꠔꠣ ꠀꠝꠤ ꠘꠤꠌ꠆ꠌꠤꠔ ꠎꠣꠘꠤ। ꠖꠦꠈꠝꠥ ꠌꠣꠁꠀ ꠔꠣꠞꠣꠞ ꠢꠇꠟ ꠛꠦꠁꠝꠣꠘꠤꠞ ꠡꠣꠎꠣ, ꠛꠦ-ꠙꠕꠤ ꠛꠦꠁꠝꠣꠘ ꠎꠣꠔꠦ ꠛꠥꠎꠛꠣ ꠘꠤꠎꠞ ꠖꠡꠣ।
DEU 32:21 ꠎꠦꠐꠣ ꠀꠟ꠆ꠟꠣ ꠘꠣꠁ ꠁꠟꠣ ꠖꠦꠛꠔꠣꠞ ꠙꠥꠎꠣ ꠇꠞꠤꠀ, ꠀꠝꠣꠞ ꠜꠤꠔꠞꠦ ꠖꠤꠍꠦ ꠔꠣꠞꠣ ꠉꠥꠍꠣ ꠔꠥꠟꠤꠀ। ꠎꠦꠐꠣ ꠎꠣꠔꠤ ꠘꠣꠁ ꠁꠟꠣ ꠎꠣꠔꠤ ꠖꠤꠀ ꠁꠋꠡꠣ ꠇꠞꠣꠁꠝꠥ, ꠀꠝ꠆ꠝꠇ ꠎꠣꠔꠤ ꠖꠤꠀ ꠔꠣꠞꠣꠞ ꠉꠥꠍꠣ ꠔꠥꠟꠣꠁꠝꠥ।
DEU 32:22 ꠀꠝꠣꠞ ꠉꠥꠍꠣꠞ ꠀꠉꠥꠁꠘ ꠅꠈꠘ ꠖꠣꠃ ꠖꠣꠃ ꠇꠞꠤ ꠎꠟꠦꠞ, ꠝꠣꠐꠤꠞ ꠔꠟꠞ ꠙꠣꠔꠣꠟꠞꠦꠅ ꠎꠣꠟꠣꠁꠀ ꠍꠣꠞꠈꠣꠞ ꠇꠞꠦꠞ। ꠢꠣꠞꠣ ꠎꠉꠔ ꠀꠞ ꠚꠄ-ꠚꠡꠟ ꠎꠣꠟꠣꠁ ꠇꠞꠛ ꠍꠣꠟꠤ, ꠙꠣꠠꠞ ꠔꠟꠣꠔ ꠀꠉꠥꠁꠘ ꠎꠟꠛ, ꠎꠟꠛ ꠗꠥꠁꠟ ꠛꠣꠟꠤ।
DEU 32:23 ꠟꠣꠈꠅ ꠟꠣꠈꠅ ꠛꠤꠙꠖ ꠖꠤꠝꠥ ꠢꠇꠟꠔꠣꠞ ꠃꠙꠞ, ꠀꠝꠣꠞ ꠔꠣꠝꠣꠝ ꠔꠤꠞ ꠝꠣꠞꠝꠥ ꠙꠦꠐꠞ ꠜꠥꠇꠦ ꠇꠞꠝꠥ ꠇꠣꠔꠞ।
DEU 32:24 ꠃꠙꠣꠡꠤ ꠘꠤꠖꠣꠘꠦ ꠔꠣꠞꠣ ꠢꠥꠇꠣꠁ ꠢꠥꠇꠣꠁ ꠝꠞꠛꠣ, ꠉꠎꠛꠤ ꠛꠦꠝꠣꠞꠞ ꠟꠉꠦ ꠖꠥꠈ-ꠔꠇꠟꠤꠚ ꠙꠣꠁꠛꠣ। ꠖꠣꠔ ꠀꠟꠣ ꠎꠋꠟꠤ ꠙꠡꠥ ꠙꠣꠑꠣꠁꠝꠥ ꠀꠝꠤ, ꠛꠤꠡꠣꠇ꠆ꠔ ꠡꠛ ꠢꠣꠚꠞ ꠙꠣꠟꠦ ꠖꠤꠛꠣ ꠇꠣꠝꠠꠣꠘꠤ।
DEU 32:25 ꠛꠣꠞꠦ ꠉꠦꠟꠦ ꠝꠞꠛꠣ ꠔꠣꠞꠣ ꠔꠟꠥꠀꠞꠞ ꠔꠟꠦ, ꠊꠞꠅ ꠞꠁꠟꠦ ꠝꠞꠛꠣ ꠢꠇꠟ ꠎꠣꠘꠞ ꠒꠞ-ꠈꠚꠦ। ꠎꠥꠀꠘ ꠙꠥꠀ ꠎꠥꠀꠘ ꠙꠥꠠꠤꠘ ꠖꠥꠗꠞ ꠢꠥꠞꠥꠔ꠆ꠔꠣ, ꠛꠤꠘꠣꠡꠤ ꠉꠎꠛꠦ ꠝꠞꠛꠣ ꠖꠣꠠꠤ ꠌꠥꠟ ꠙꠣꠇꠘꠣ।
DEU 32:26 ꠇꠁꠍꠟꠣꠝ ꠀꠝꠤ ꠃꠠꠣꠁ ꠝꠣꠞꠝꠥ ꠛꠘꠤ ꠁꠍꠞꠣꠁꠟꠞꠦ, ꠁꠔꠣꠞ ꠘꠣꠝ ꠚꠥꠍꠤꠟꠣꠁꠝꠥ ꠝꠣꠘꠡꠞ ꠝꠘ ꠕꠘꠦ।
DEU 32:27 ꠅꠁꠟꠦ ꠀꠝꠣꠞ ꠎꠣꠘꠣ ꠀꠍꠦ ꠖꠥꠡꠝꠘꠞ ꠜꠣꠛ-ꠡꠣꠛ, ꠛꠦꠐꠣꠉꠤꠞꠤ ꠇꠞꠛꠣ ꠔꠣꠞꠣ ꠅꠁꠛ ꠔꠣꠞꠣꠞ ꠟꠣꠜ। ꠘꠣ ꠛꠥꠎꠤꠀ ꠇꠁꠛ ꠔꠣꠞꠣ ꠎꠤꠔꠍꠦ ꠘꠤꠎꠞ ꠛꠟꠦ, ꠝꠣꠛꠥꠖ ꠁꠔꠣ ꠇꠥꠘ꠆ꠔꠣꠔ ꠘꠣꠄ ꠎꠤꠔꠍꠤ ꠇꠟꠦ-ꠛꠟꠦ।
DEU 32:28 ꠛꠤꠌꠣꠞ-ꠛꠤꠛꠦꠇ ꠈꠥꠀꠁꠀ ꠅꠈꠘ ꠘꠣꠝꠦ ꠁꠍꠞꠣꠁꠟ ꠎꠣꠔꠤ, ꠀꠈꠟ-ꠛꠥꠖ꠆ꠖꠤ ꠀꠞꠣꠁꠀ ꠔꠣꠞꠣ ꠅꠁꠍꠦ ꠛꠦ-ꠙꠕꠤ।
DEU 32:29 ꠀꠈꠟ ꠕꠣꠇꠟꠦ ꠛꠥꠎꠔ ꠔꠣꠞꠣꠞ ꠘꠤꠎꠞ ꠖꠥꠞ꠆ꠖꠡꠣ, ꠛꠤꠛꠦꠇ ꠈꠣꠐꠣꠁ ꠎꠣꠘ ꠛꠣꠌꠣꠁꠀ ꠞꠁꠔ ꠢꠣꠝꠦꠡꠣ।
DEU 32:30 ꠄꠇ ꠖꠥꠡꠝꠘꠦ ꠀꠁꠀ ꠇꠤꠟꠣ ꠀꠎꠣꠞ ꠎꠘ ꠈꠦꠖꠣꠄ, ꠖꠥꠁ ꠍꠤꠙꠣꠁꠞꠦ ꠖꠦꠈꠤꠀ ꠇꠦꠘꠦ ꠖꠡ ꠀꠎꠣꠞ ꠖꠃꠠꠣꠄ। ꠘꠤꠎꠞ ꠀꠡꠞꠄ ꠐꠤꠟ꠆ꠟꠣ ꠎꠥꠖꠤ ꠔꠣꠞꠣꠞꠦ ꠘꠣ ꠛꠦꠌꠤꠔꠣ, ꠡ꠆ꠛꠄꠅꠋ ꠝꠣꠛꠥꠖꠦ ꠎꠥꠖꠤ ꠍꠣꠠꠤꠀ ꠘꠣ ꠖꠤꠔꠣ।
DEU 32:31 ꠖꠥꠡꠝꠘꠞ ꠀꠡꠞꠄ ꠐꠤꠟ꠆ꠟꠣ ꠅꠔ ꠝꠎꠛꠥꠔ ꠘꠣꠄ, ꠔꠣꠞꠣꠃ ꠁꠈꠣꠘ ꠡ꠆ꠛꠤꠇꠣꠞ ꠇꠞꠤ ꠢꠇꠟꠞꠦ ꠢꠥꠘꠣꠄ। ꠀꠝꠞꠣꠞ ꠀꠡꠞꠄ ꠐꠤꠟ꠆ꠟꠣ ꠔ ꠛꠃꠔ ꠛꠠ ꠛꠟꠛꠣꠘ, ꠔꠣꠞꠣꠞ ꠝꠥꠈꠦ ꠉꠣꠁꠀ ꠁꠔꠣ ꠎꠙꠦ ꠔꠣꠘ ꠡꠥꠘꠣꠝ।
DEU 32:32 ꠝꠣꠛꠥꠖꠦ ꠛꠣꠔꠣꠁꠞꠣ ꠅꠈꠘ ꠔꠣꠞꠣꠞ ꠈꠦꠔꠞ ꠇꠕꠣ, ꠍꠣꠖꠥꠝ ꠐꠣꠃꠘ ꠕꠣꠇꠤ ꠀꠁꠍꠦ ꠁꠔꠣꠞ ꠀꠋꠉꠥꠞꠞ ꠟꠔꠣ, ꠀꠝꠥꠞꠣ ꠡꠢꠞ ꠕꠣꠇꠤ ꠁꠔꠣꠄ ꠀꠋꠉꠥꠞ ꠚꠟ ꠙꠣꠁꠍꠦ, ꠛꠤꠡ ꠀꠞ ꠔꠤꠔ꠆ꠔꠣꠄ ꠁ ꠚꠟꠞ ꠍꠠꠤ ꠙꠥꠞꠣꠙꠥꠞ ꠅꠁꠍꠦ।
DEU 32:33 ꠀꠋꠉꠥꠞꠞ ꠡꠞꠛꠔ ꠎꠦꠟꠣ ꠘꠣꠉ-ꠘꠣꠉꠤꠘꠤꠞ ꠛꠤꠡ, ꠀꠟꠖ ꠢꠣꠚꠞ ꠛꠤꠡꠅ ꠅꠟꠣ ꠝꠣꠞꠣꠔ꠆ꠔꠇ ꠎꠤꠘꠤꠡ।
DEU 32:34 ꠀꠝꠣꠞ ꠉꠦꠍꠦ ꠁꠔꠣ ꠉꠎꠛ ꠔꠥꠝꠞꠣꠞ ꠟꠣꠉꠤ ꠈꠣꠠꠣ, ꠀꠝꠣꠞ ꠜꠣꠘ꠆ꠒꠣꠞꠅ ꠕꠅꠀ ꠡꠛ ꠡꠤꠟ-ꠌꠣꠙ꠆ꠙꠠ ꠝꠣꠞꠣ।
DEU 32:35 ꠘꠣꠚꠞꠝꠣꠘꠤꠞ ꠡꠣꠎꠣ ꠖꠦꠅꠀ ꠀꠝꠣꠞꠃ ꠇꠣꠝ, ꠀꠝꠟ ꠝꠣꠚꠤꠇ ꠛꠖꠟꠣ ꠖꠤꠝꠥ ꠔꠣꠝꠣꠝ ꠁꠘꠍꠣꠘ। ꠡꠝꠄ ꠅꠁꠟꠦ ꠙꠤꠍꠟꠤꠎꠤꠛ ꠖꠥꠡꠝꠘꠞ ꠙꠣꠅ, ꠝꠍꠤꠛꠔꠞ ꠖꠤꠘ ꠔꠣꠞꠣꠞ ꠘꠎꠖꠤꠇ ꠎꠣꠘꠤꠟꠣꠅ। ꠑꠤꠇ ꠇꠞꠤ ꠕꠅꠀ ꠀꠍꠦ ꠔꠣꠞꠣꠞ ꠇꠣꠝꠞ ꠛꠖꠟꠣ, ꠎꠟꠖꠤ ꠇꠞꠤ ꠙꠣꠁꠛꠣ ꠘꠤꠎꠞ ꠀꠝꠟ-ꠘꠣꠝꠣ ꠎꠦꠟꠣ।
DEU 32:36 ꠝꠣꠛꠥꠖꠦ ꠖꠦꠈꠛꠣ ꠎꠦꠛꠟꠣ ꠛꠟ-ꠡꠇ꠆ꠔꠤ ꠘꠣꠁ, ꠔꠣꠘ ꠛꠘ꠆ꠖꠣꠞ ꠛꠟ-ꠔꠣꠇ꠆ꠇꠔ ꠉꠦꠍꠦꠉꠤ ꠚꠥꠠꠣꠁ। ꠉꠥꠟꠣꠝ ꠇꠤꠛꠣ ꠀꠎꠣꠖ ꠛꠘ꠆ꠖꠣ ꠢꠇꠟꠃ ꠝꠣꠎꠥꠞ, ꠖꠦꠈꠤꠀ ꠔꠣꠁꠘ ꠙꠇ꠆ꠇ ꠟꠁꠛꠣ ꠀꠙꠘ ꠉꠥꠟꠣꠝꠞ। ꠝꠣꠄꠀ-ꠖꠄꠀ ꠇꠞꠛꠣ ꠀꠟ꠆ꠟꠣꠄ ꠔꠣꠘ ꠉꠥꠟꠣꠝꠞꠦ, ꠝꠣꠎꠥꠞ ꠕꠣꠇꠤ ꠡꠛꠟ ꠇꠞꠛꠣ ꠖꠄꠀ-ꠞꠢꠝꠦ।
DEU 32:37 ꠇꠁꠛꠣ ꠔꠣꠁꠘ ꠢꠃ ꠡꠝꠄ ꠇꠥꠀꠁ ꠉꠦꠟꠣ ꠢꠤꠔꠣ, ꠅꠔꠖꠤꠘ ꠜꠎꠤꠍꠟꠣ ꠔꠣꠞꠣ ꠎꠦꠔꠣ ꠖꠦꠛꠔꠣ। ꠜꠣꠉꠤꠀ ꠉꠦꠟꠉꠤ ꠇꠥꠀꠁ ꠔꠣꠞꠣꠞ ꠀꠡꠞꠄ ꠙꠣꠠ, ꠔꠣꠞꠣꠞ ꠢꠇꠟ ꠖꠦꠛ-ꠖꠦꠛꠤ ꠅꠡꠣꠠꠞ ꠅꠡꠣꠠ।
DEU 32:38 ꠇꠁ ꠉꠦꠟꠣ ꠢꠃ ꠖꠦꠛ-ꠖꠦꠛꠤ ꠎꠦꠔꠣꠄ ꠈꠣꠁꠍꠟꠣ ꠌꠞ꠆ꠛꠤ, ꠌꠞ꠆ꠛꠤ ꠀꠟꠣ ꠛꠟꠤꠞ ꠉꠥꠡ꠆ꠔ ꠈꠣꠁꠍꠤꠟ ꠛꠦꠡ ꠇꠞꠤ। ꠎꠦꠔꠣ ꠖꠦꠛꠔꠣꠁꠘ ꠈꠣꠁꠍꠤꠟ ꠍꠖꠉꠣꠞ ꠡꠞꠛꠔ, ꠅꠈꠘ ꠔꠣꠞꠣ ꠛꠣꠌꠣꠃꠇ ꠀꠁꠀ ꠔꠣꠞꠣꠞ ꠃꠝ꠆ꠝꠔ। ꠡꠣꠁꠎ꠆ꠎ ꠇꠞꠃꠇ ꠘꠣ ꠀꠁꠀ ꠔꠥꠝꠞꠣꠞ ꠢꠃ ꠑꠣꠇꠥꠞ, ꠀꠡꠞꠄ ꠖꠦꠄ ꠘꠣ ꠇꠦꠘꠦ ꠘꠣꠚꠞꠝꠣꠘ ꠛꠖꠈꠥꠞ।
DEU 32:39 ꠌꠤꠘ꠆ꠔꠣ-ꠜꠣꠛꠘꠣ ꠇꠞꠤꠀ ꠖꠦꠈꠅ ꠢꠃ ꠔꠣꠁꠘꠃ ꠀꠝꠤ, ꠀꠝꠤ ꠍꠣꠠꠣ ꠝꠣꠛꠥꠖ ꠘꠣꠁ ꠁꠈꠣꠘ ꠎꠣꠘꠍ ꠘꠤ। ꠀꠝꠤꠃ ꠝꠣꠞꠤꠟꠣꠁ ꠀꠝꠤꠃ ꠛꠣꠌꠣꠁ, ꠀꠝꠤꠃ ꠔ ꠎꠈꠝ ꠇꠞꠤ ꠀꠝꠤ ꠖꠦꠁ ꠜꠣꠟꠣꠁ। ꠀꠝꠣ ꠕꠣꠇꠤ ꠛꠣꠌꠣꠁꠟꠤꠔ ꠡꠣꠁꠖ꠆ꠖ ꠀꠍꠦ ꠇꠣꠞ, ꠢꠣꠄꠀꠔ ꠝꠃꠔꠞ ꠝꠣꠟꠤꠇ ꠀꠝꠤ ꠀꠟ꠆ꠟꠣꠢꠥ ꠀꠇꠛꠣꠞ।
DEU 32:40 ꠀꠞꠡꠞ ꠛꠣꠄ ꠀꠔ ꠔꠥꠟꠤꠀ ꠇꠍꠝ ꠈꠣꠁꠀ ꠇꠁ, ꠌꠤꠞꠇꠣꠟꠤꠘ ꠎꠤꠘ꠆ꠖꠣ ꠀꠝꠤ ꠎꠣꠘꠤꠅ ꠘꠤꠌ꠆ꠌꠄ।
DEU 32:41 ꠖꠣꠞ ꠎꠦꠛꠟꠣ ꠖꠤꠝꠥ ꠀꠝꠣꠞ ꠌꠇꠌꠇꠣ ꠔꠟꠥꠀꠞ, ꠇꠣꠁꠝ ꠇꠞꠣꠔ ꠟꠣꠉꠝꠥ ꠎꠦꠛꠟꠣ ꠀꠝꠣꠞ ꠞꠣꠄ-ꠛꠤꠌꠣꠞ। ꠢꠃ ꠡꠝꠄ ꠡꠣꠎꠣ ꠖꠤꠝꠥ ꠀꠝꠣꠞ ꠢꠇꠟ ꠖꠥꠡꠝꠘꠞꠦ, ꠀꠝꠣꠞꠦ ꠊꠤꠘ꠆ꠘꠣꠘꠤꠞ ꠛꠖꠟꠣ ꠖꠤꠝꠥ ꠔꠣꠞꠣꠞꠦ।
DEU 32:42 ꠔꠤꠞ-ꠗꠘꠥꠇꠦ ꠟꠃ ꠈꠣꠁꠀ ꠇꠞꠛ ꠝꠣꠔꠟꠣꠝꠤ, ꠀꠝꠣꠞ ꠔꠟꠥꠀꠞꠦꠅ ꠔ ꠟꠃ ꠈꠣꠁꠛ ꠎꠣꠘꠤ। ꠝꠥꠞ꠆ꠖꠣ ꠀꠞ ꠛꠘ꠆ꠖꠤ ꠅꠇꠟꠞ ꠟꠃ ꠢꠦ ꠈꠣꠁꠛ, ꠖꠥꠡꠝꠘꠞ ꠉꠥꠡ꠆ꠔ ꠈꠣꠁꠀ ꠙꠦꠐ ꠚꠥꠟꠣꠁꠛ। ꠟꠣꠝ꠆ꠛꠣ-ꠌꠥꠟꠤ ꠍꠤꠙꠣꠁꠞ ꠇꠟ꠆ꠟꠣ ꠈꠣꠁꠛꠞꠦ ꠝꠥꠈꠦ, ꠔꠣꠞꠣꠞ ꠇꠟ꠆ꠟꠣ ꠌꠤꠛꠣꠁ ꠈꠣꠁꠛ ꠀꠝꠣꠞ ꠗꠘꠥꠇꠦ।
DEU 32:43 ꠝꠣꠄꠀꠞ ꠙ꠆ꠞꠎꠣꠞ ꠟꠉꠦ ꠅꠁꠀ ꠀꠍꠝꠣꠘ ꠈꠥꠡꠤ ꠅꠅ, ꠛꠦꠢꠦꠡ꠆ꠔꠞ ꠢꠇꠟ ꠚꠤꠞꠤꠡ꠆ꠔꠣꠄ ꠔꠣꠘꠦ ꠍꠁꠎꠖꠣ ꠖꠦꠅ। ꠎꠉꠔꠞ ꠔꠣꠝꠣꠝ ꠎꠣꠔꠤꠄ ꠉꠣꠅ ꠉꠥꠘꠉꠣꠘ, ꠀꠟ꠆ꠟꠣꠞ ꠢꠇꠟ ꠛꠘ꠆ꠖꠣꠞ ꠟꠉꠦ ꠟꠅ ꠔꠣꠘ ꠝꠢꠣ ꠘꠣꠝ। ꠔꠣꠘ ꠉꠥꠟꠣꠝꠞ ꠟꠃꠞ ꠛꠖꠟꠣ ꠅꠈꠘ ꠟꠁꠛꠣ ꠔꠣꠁꠘ, ꠖꠥꠡꠝꠘꠞꠦ ꠡꠣꠎꠣ ꠖꠤꠀ ꠍꠣꠚ ꠇꠞꠛꠣ ꠎꠝꠤꠈꠣꠘ। ꠔꠣꠘ ꠛꠘ꠆ꠖꠣꠄ ꠇꠦꠘꠣꠘ ꠖꠦꠡꠅ ꠙꠣꠁꠟꠤꠛꠣ ꠞꠦꠢꠣꠁ, ꠉꠥꠘꠣꠞ ꠇꠚꠞꠣ ꠖꠤꠀ ꠖꠤꠛꠣ ꠔꠣꠞ ꠛꠖꠟꠣꠁ।
DEU 32:44 ꠝꠥꠍꠣ ꠘꠛꠤ ꠀꠞ ꠔꠣꠘ ꠈꠣꠖꠤꠝ ꠘꠥꠘꠞ ꠙꠥꠀ ꠁꠃꠍꠣ ꠉꠤꠀ ꠢꠇꠟ ꠝꠣꠘꠡꠞ ꠉꠦꠍꠦ ꠅꠃ ꠉꠎꠟꠞ ꠡꠛ ꠇꠕꠣ ꠎꠣꠘꠣꠁꠟꠣ।
DEU 32:45 ꠝꠥꠍꠣꠄ ꠢꠇꠟ ꠛꠘꠤ ꠁꠍꠞꠣꠁꠟꠞ ꠉꠦꠍꠦ ꠉꠤꠀ ꠁꠔꠣ ꠢꠇꠟꠔꠣ ꠇꠁꠀ ꠢꠣꠞꠤ,
DEU 32:46 ꠇꠁꠟꠣ, “ꠀꠝꠤ ꠅꠃ ꠎꠔ ꠢꠥꠡꠤꠀꠞꠤꠞ ꠇꠕꠣ ꠔꠥꠝꠞꠣꠞꠦ ꠎꠣꠘꠣꠁꠍꠤ, ꠁꠔꠣ ꠔꠥꠝꠞꠣꠞ ꠖꠤꠟꠅ ꠉꠣꠕꠤꠀ ꠞꠣꠈꠤꠅ, ꠁꠔꠣ ꠔ ꠔꠥꠝꠞꠣꠞ ꠛꠤꠞꠥꠖ꠆ꠖꠦ ꠡꠣꠇ꠆ꠇꠤ ꠛꠘꠤꠀ ꠞꠁꠛ। ꠀꠞ ꠔꠥꠝꠞꠣꠞ ꠀꠅꠟꠣꠖ ꠅꠇꠟꠞꠦ ꠢꠥꠇꠥꠝ ꠖꠤꠅ, ꠅꠃ ꠡꠞꠤꠅꠔꠞ ꠢꠇꠟ ꠢꠥꠇꠥꠝ-ꠀꠢꠇꠣꠝ ꠈꠤꠀꠟꠤ ꠅꠁꠀ ꠀꠝꠟ ꠇꠞꠔꠣ।
DEU 32:47 ꠁꠔꠣ ꠔ ꠀꠎꠦ-ꠛꠣꠎꠦ ꠇꠥꠘꠥ ꠝꠣꠔ-ꠇꠕꠣ ꠘꠣꠄ, ꠁꠔꠣ ꠅꠁꠟ ꠔꠥꠝꠞꠣꠞ ꠎꠤꠘ꠆ꠖꠦꠉꠤ! ꠎꠞ꠆ꠖꠣꠘ ꠉꠣꠋ ꠙꠣꠞ ꠅꠁꠀ ꠢꠣꠞꠤ ꠔꠥꠝꠞꠣ ꠎꠦ ꠖꠦꠡꠞ ꠖꠈꠟꠖꠣꠞꠤ ꠙꠣꠁꠞꠣꠄ, ꠅꠔꠣ ꠀꠝꠟ ꠇꠞꠟꠦ ꠢꠘꠅ ꠔꠥꠝꠞꠣ ꠟꠣꠝ꠆ꠛꠣ ꠢꠣꠄꠀꠔꠤ ꠙꠣꠁꠛꠣꠄ।”
DEU 32:48 ꠢꠃ ꠖꠤꠘꠃ ꠝꠣꠛꠥꠖꠦ ꠝꠥꠍꠣ ꠘꠛꠤꠞꠦ ꠇꠁꠟꠣ,
DEU 32:49 “ꠔꠥꠝꠤ ꠉꠤꠀ ꠅꠃ ꠀꠛꠣꠞꠤꠝ ꠙꠣꠠꠅ ꠃꠑꠅ, ꠁꠐꠣ ꠔ ꠝꠥꠀꠛ ꠖꠦꠡꠞ ꠎꠤꠞꠤꠢꠅ ꠐꠣꠃꠘꠞ ꠍꠣꠝꠘꠦ ꠀꠍꠦ। ꠢꠘꠅ ꠃꠑꠤꠀ ꠘꠛꠅ ꠘꠣꠝꠞ ꠢꠃ ꠃꠌꠣ ꠐꠤꠟ꠆ꠟꠣꠞ ꠃꠙꠞꠦ ꠎꠣꠅ, ꠀꠞ ꠛꠘꠤ ꠁꠍꠞꠣꠁꠟꠞꠦ ꠀꠝꠤ ꠎꠦ ꠖꠦꠡꠞ ꠝꠣꠟꠤꠇꠣꠘꠣ ꠖꠤꠞꠣꠝ, ꠅꠃ ꠇꠦꠘꠣꠘ ꠖꠦꠡ ꠄꠇꠛꠣꠞ ꠖꠦꠈꠤꠟꠣꠅ।
DEU 32:50 ꠔꠥꠝꠣꠞ ꠜꠣꠁ ꠢꠣꠞꠥꠘ ꠎꠦꠟꠣ ꠢꠥꠞ ꠙꠣꠠꠞ ꠃꠙꠞꠦ ꠃꠑꠤꠀ ꠢꠣꠞꠟꠦ ꠃꠚꠣꠔ ꠅꠁꠍꠤꠟ, ꠛꠣꠖꠦ ꠔꠣꠞ ꠛꠣꠚ-ꠖꠣꠖꠣꠞ ꠇꠣꠔꠣꠞꠅ ꠉꠤꠀ ꠀꠎꠤꠍꠤꠟ, ꠅꠃ ꠘꠛꠅ ꠙꠣꠠꠅ ꠃꠑꠣꠞ ꠛꠣꠖꠦ ꠅꠃꠟꠣ ꠔꠥꠝꠣꠞꠅ ꠃꠚꠣꠔ ꠅꠁꠛ, ꠀꠞ ꠔꠥꠝꠣꠞ ꠛꠣꠚ-ꠖꠣꠖꠣꠞ ꠉꠦꠍꠦ ꠉꠤꠀ ꠅꠃꠟꠣꠈꠣꠘ ꠔꠥꠝꠤꠅ ꠀꠎꠤꠛꠣꠄ।
DEU 32:51 ꠝꠘꠅ ꠀꠍꠦ ꠘꠤ, ꠢꠇꠟ ꠛꠘꠤ ꠁꠍꠞꠣꠁꠟꠞ ꠍꠣꠝꠘꠦ ꠔꠥꠝꠞꠣ ꠖꠥꠁꠅ ꠜꠣꠁꠄ ꠀꠝꠣꠞꠦ ꠙꠣꠇ-ꠙꠛꠤꠔ꠆ꠞ ꠇꠁꠀ ꠝꠣꠁꠘ꠆ꠘ ꠇꠞꠍ ꠘꠣ, ꠢꠃ ꠎꠤꠘ ꠝꠞꠥꠜꠥꠝꠤꠞ ꠇꠣꠖꠦꠡ ꠄꠟꠣꠇꠣꠞ ꠝꠦꠞꠤꠛꠣ ꠘꠣꠝꠞ ꠎꠣꠉꠣꠔ ꠙꠣꠘꠤꠞ ꠉꠦꠍꠦ ꠔꠥꠝꠞꠣ ꠀꠝꠣꠞ ꠘꠣꠝꠦ ꠎꠣꠟꠤꠀꠔꠤ ꠇꠞꠍꠟꠣꠄ।
DEU 32:52 ꠢꠘꠅ ꠃꠑꠤꠀ ꠢꠣꠞꠟꠦ ꠔꠥꠝꠣꠞ ꠌꠈꠥꠞ ꠍꠣꠝꠘꠦ ꠢꠃ ꠖꠦꠡ ꠖꠦꠈꠛꠣꠄ, ꠎꠦ ꠖꠦꠡꠈꠣꠘ ꠀꠝꠤ ꠛꠘꠤ ꠁꠍꠞꠣꠁꠟꠞꠦ ꠖꠣꠘ ꠇꠞꠞꠣꠝ, ꠔꠥꠝꠤ ꠈꠣꠟꠤ ꠌꠃꠈꠖꠤ ꠖꠦꠈꠛꠣꠄ, ꠅꠁꠟꠦ ꠢꠤ ꠖꠦꠡꠅ ꠢꠣꠝꠣꠁꠛꠣꠞ ꠡꠥꠎꠥꠉ ꠔꠥꠝꠣꠞ ꠅꠁꠔ ꠘꠣꠄ।”
DEU 33:1 ꠀꠟ꠆ꠟꠣꠞ ꠈꠣꠍ ꠛꠘ꠆ꠖꠣ ꠝꠥꠍꠣ ꠘꠛꠤꠞ ꠃꠚꠣꠔꠞ ꠀꠉꠦ, ꠛꠘꠤ ꠁꠍꠞꠣꠁꠟꠞꠦ ꠔꠣꠁꠘ ꠅꠃ ꠖꠥꠀ ꠖꠤꠟꠣ:
DEU 33:2 ꠔꠡꠞꠤꠚ ꠀꠘꠟꠣ ꠝꠣꠛꠥꠖ ꠀꠟ꠆ꠟꠣꠄ ꠔꠥꠞ ꠙꠣꠠ ꠕꠣꠇꠤ, ꠀꠝꠞꠣ ꠢꠇꠟꠦ ꠖꠦꠈꠣ ꠙꠣꠁꠟꠣꠝ ꠘꠥꠞꠦ ꠄꠟꠣꠢꠤ। ꠍꠦꠁꠞ ꠀꠞ ꠚꠣꠞꠣꠘ ꠙꠣꠠ ꠕꠣꠇꠤ ꠖꠦꠈꠣꠁꠘ ꠘꠥꠞꠞ ꠔꠦꠎ, ꠟꠣꠈꠅ ꠟꠣꠈꠅ ꠚꠤꠞꠤꠡ꠆ꠔꠣ ꠇꠤꠛꠣ ꠀꠞꠅ ꠛꠦꠡ। ꠖꠤꠖꠣꠞ ꠖꠤꠟꠣ ꠝꠣꠛꠥꠖꠦ ꠄꠞꠣꠞ ꠝꠣꠎ ꠕꠘꠦ, ꠒꠣꠁꠘ ꠀꠔꠅ ꠜꠞꠣ ꠀꠍꠤꠟ ꠘꠥꠞꠞ ꠀꠉꠥꠁꠘꠦ।
DEU 33:3 ꠢꠣꠍꠣꠃ ꠔꠣꠁꠘ ꠝꠣꠄꠀ ꠇꠞꠂꠘ ꠘꠤꠎꠞ ꠛꠘ꠆ꠖꠣꠞꠦ, ꠔꠣꠝꠣꠝ ꠙꠞꠦꠎꠉꠣꠞ ꠛꠘ꠆ꠖꠣ ꠔꠣꠘ ꠢꠥꠇꠥꠝꠦ ꠌꠟꠦ। ꠍꠁꠎꠖꠣ ꠇꠞꠣꠔ ꠀꠍꠂꠘ ꠔꠣꠞꠣ ꠔꠣꠘ ꠙꠣꠅꠞ ꠔꠟꠣꠔ, ꠢꠥꠇꠥꠝ ꠙꠣꠁꠟꠦ ꠔꠣꠝꠤꠟ ꠇꠞꠂꠘ ꠞꠂꠘ ꠔꠣꠘ ꠇꠕꠣꠔ।
DEU 33:4 ꠝꠥꠍꠣ ꠘꠛꠤꠄ ꠎꠦ ꠡꠞꠤꠅꠔ ꠖꠤꠍꠟꠣ ꠀꠝꠞꠣꠞꠦ, ꠛꠘꠤ ꠁꠍꠞꠣꠁꠟꠞ ꠗꠘ ꠁꠔꠣ ꠎꠣꠘꠦ ꠢꠇꠟꠦ।
DEU 33:5 ꠖꠟꠣ ꠅꠁꠀ ꠀꠁꠟꠣ ꠎꠦꠛꠟꠣ ꠝꠄ-ꠝꠥꠞꠛ꠆ꠛꠤꠞ ꠖꠟ, ꠟꠉ ꠅꠁꠀ ꠀꠁꠍꠟꠣ ꠁꠍꠞꠣꠁꠟꠞ ꠈꠣꠘ꠆ꠖꠣꠘꠞ ꠢꠇꠟ, ꠢꠃ ꠡꠝꠄ ꠔ ꠝꠣꠛꠥꠖ ꠀꠍꠟꠣ ꠔꠣꠞꠣꠞ ꠃꠙꠞꠞ ꠛꠣꠖꠡꠣ, ꠄꠞꠣ ꠢꠇꠟ ꠔꠣꠘ ꠙ꠆ꠞꠎꠣ ꠔꠣꠁꠘꠃ ꠡꠣꠢꠣꠘꠡꠣ।
DEU 33:6 ꠞꠥꠛꠦꠘ ꠈꠣꠘ꠆ꠖꠣꠘꠞ ꠛꠦꠙꠣꠞꠦ ꠢꠎꠞꠔ ꠝꠥꠍꠣꠄ ꠇꠁꠟꠣ: ꠞꠥꠛꠦꠘ ꠈꠣꠘ꠆ꠖꠣꠘ ꠎꠤꠘ꠆ꠖꠣ ꠞꠃꠇ, ꠘꠤꠙꠣꠔ ꠘꠣꠄ ꠇꠥꠘꠥꠖꠤꠘ, ꠔꠣ-ꠅ ꠔꠣꠞ ꠊꠞꠅ ꠙꠄꠖꠣ ꠅꠁꠛ ꠇꠝ ꠙꠥꠀ-ꠙꠥꠠꠤꠘ।
DEU 33:7 ꠄꠢꠥꠖꠣ ꠈꠣꠘ꠆ꠖꠣꠘꠞ ꠛꠦꠙꠣꠞꠦ ꠇꠁꠟꠣ: ꠅ ꠝꠣꠛꠥꠖ, ꠔꠥꠝꠤ ꠅꠈꠘ ꠄꠢꠥꠖꠣꠞ ꠚꠞꠤꠀꠖ ꠢꠥꠘꠅ, ꠜꠣꠁ-ꠛꠤꠞꠣꠖꠞꠞ ꠗꠣꠞꠅ ꠔꠣꠞꠦ ꠚꠤꠞꠣꠁꠀ ꠀꠘꠅ। ꠖꠥꠁꠅ ꠀꠔ ꠔꠣꠞ ꠡꠛꠟ ꠞꠣꠈꠅ ꠟꠣꠠꠣꠁꠞ ꠡꠝꠄ, ꠡꠣꠁꠎ꠆ꠎ ꠇꠞꠅ ꠔꠥꠝꠤ ꠔꠣꠞꠦ ꠖꠥꠡꠝꠘꠞꠦ ꠖꠦꠅ ꠀꠞꠣꠁ।
DEU 33:8 ꠟꠦꠛꠤ ꠈꠣꠘ꠆ꠖꠣꠘꠞ ꠛꠦꠙꠣꠞꠦ ꠇꠁꠟꠣ: ꠔꠥꠝꠣꠞ ꠀꠡꠤꠇꠞ ꠀꠔꠅ ꠀꠍꠦ ꠔꠥꠝ꠆ꠝꠤꠝ ꠀꠞ ꠃꠞꠤꠝ, ꠇꠥꠖꠞꠔꠤ ꠢꠃ ꠖꠥꠁ ꠍꠣꠝꠣꠘꠣꠞ ꠝꠣꠟꠤꠇ ꠈꠣꠟꠤ ꠅꠃ ꠟꠦꠛꠤꠘ। ꠝꠣꠍꠣ ꠘꠣꠝꠞ ꠎꠣꠉꠣꠔ ꠟꠁꠍ ꠔꠣꠞ ꠙꠞꠤꠇ꠆ꠇꠣ, ꠝꠦꠞꠤꠛꠣ ꠘꠣꠝꠞ ꠙꠣꠘꠤꠞ ꠎꠣꠉꠣꠔ ꠅꠁꠍꠤꠟ ꠅꠃ ꠇꠣꠁꠎ꠆ꠎꠣ।
DEU 33:9 ꠝꠣ-ꠛꠣꠚꠞꠦꠅ ꠔꠥꠟꠍꠦ ꠘꠣ ꠢꠦ ꠔꠥꠝꠣꠞ ꠃꠙꠞꠦ, ꠉꠥꠘꠣꠞ ꠡꠣꠎꠣ ꠖꠤꠍꠦ ꠔꠣꠞ ꠝꠣʼꠞ ꠙꠦꠐꠞ ꠜꠣꠁꠞꠦ। ꠖꠣꠛꠤ ꠍꠣꠠꠤꠀ ꠡꠙꠤ ꠖꠤꠍꠦ ꠀꠙꠘ ꠙꠥꠀ-ꠙꠥꠠꠤ, ꠎꠤꠘ꠆ꠖꠦꠉꠤ ꠇꠥꠞꠛꠣꠘꠤ ꠖꠤꠍꠦ ꠔꠥꠝꠣꠞ ꠀꠁꠘ ꠝꠣꠘꠤ। ꠔꠥꠝꠣꠞ ꠇꠣꠟꠣꠝ ꠙꠣꠞꠣ ꠖꠤꠍꠦ ꠝꠣꠘꠍꠦ ꠡꠞꠤꠅꠔ, ꠅꠀꠖꠣ-ꠌꠥꠇ꠆ꠔꠤ ꠝꠣꠘꠤꠀ ꠌꠟꠍꠦ, ꠘꠣ ꠇꠞꠤ ꠈꠤꠀꠘꠔ।
DEU 33:10 ꠔꠥꠝꠣꠞ ꠢꠥꠇꠥꠝ ꠔꠣꠞꠣ ꠢꠤꠇꠣꠄ ꠁꠀꠇꠥꠛ ꠛꠋꠡꠞꠦ, ꠔꠥꠝꠣꠞ ꠡꠞꠤꠅꠔ ꠛꠥꠎꠣꠄ ꠔꠣꠞꠣ ꠁꠍꠞꠣꠁꠟ ꠎꠣꠔꠤꠞꠦ। ꠀꠉꠞ-ꠈꠥꠡꠛꠄ ꠎꠣꠟꠣꠄ ꠔꠣꠞꠣ ꠔꠥꠝꠣꠞ ꠍꠣꠝꠘꠦ ꠀꠁꠀ, ꠎꠣꠟꠣꠁꠟ ꠇꠥꠞꠛꠣꠘꠤ ꠖꠦꠄ ꠇꠥꠞꠛꠣꠘ-ꠉꠣꠔ ꠉꠤꠀ।
DEU 33:11 ꠔꠣꠞ ꠍꠣꠝꠣꠘꠣꠔ ꠛꠞꠇꠔ ꠖꠦꠅ ꠉ ꠅ ꠀꠝꠣꠞ ꠝꠣꠛꠥꠖ, ꠞꠣꠎꠤ-ꠈꠥꠡꠤ ꠞꠅ ꠔꠥꠝꠤ ꠔꠣꠞ ꠃꠙꠞꠦ ꠛꠃꠔ। ꠔꠣꠞ ꠖꠥꠡꠝꠘꠞ ꠇꠝꠞ ꠔꠥꠝꠤ ꠜꠣꠋꠉꠤ-ꠌꠥꠞꠤ ꠖꠦꠅ, ꠊꠤꠘ꠆ꠘꠣ ꠇꠞꠞꠣꠞ ꠇꠝꠞ ꠜꠣꠋꠉꠤ ꠛꠞꠛꠣꠖ ꠇꠞꠤꠟꠣꠅ।
DEU 33:12 ꠛꠤꠘ-ꠁꠀꠝꠤꠘ ꠈꠣꠘ꠆ꠖꠣꠘꠞ ꠛꠦꠙꠣꠞꠦ ꠔꠣꠁꠘ ꠇꠁꠟꠣ: ꠝꠣꠛꠥꠖꠞ ꠝꠣꠄꠀꠞ ꠛꠘ꠆ꠖꠣ ꠡꠣꠄ-ꠡꠣꠘ꠆ꠔꠤꠄ ꠞꠁꠛ, ꠘꠤꠞꠣꠙꠖꠦ ꠞꠁꠛ ꠢꠦ ꠔꠣꠘ ꠒꠣꠈꠘꠣꠞ ꠔꠟꠅ। ꠢꠣꠞꠣ ꠖꠤꠘ ꠢꠣꠞꠣ ꠞꠣꠁꠔ ꠍꠣꠄꠀꠔ ꠞꠣꠈꠛꠣ ꠔꠣꠞꠦ, ꠎꠤꠘ꠆ꠖꠦꠉꠤ ꠉꠥꠎꠞꠤꠛ ꠔꠣꠞ ꠔꠣꠘ ꠛꠉꠟ ꠔꠟꠦ।
DEU 33:13 ꠁꠃꠍꠥꠚ ꠈꠣꠘ꠆ꠖꠣꠘꠞ ꠛꠦꠙꠣꠞꠦ ꠔꠣꠁꠘ ꠇꠁꠟꠣ: ꠞꠢꠝ-ꠛꠞꠇꠔ ꠇꠞꠅ ꠝꠣꠛꠥꠖ ꠔꠣꠞ ꠖꠦꠡꠈꠣꠘꠞꠦ, ꠀꠍꠝꠣꠘ ꠕꠣꠇꠤ ꠖꠣꠝꠤ ꠖꠣꠝꠤ ꠎꠤꠘꠤꠡ ꠖꠦꠅ ꠔꠣꠞꠦ। ꠈꠥꠀ ꠖꠤꠀ ꠜꠤꠎꠣꠁ ꠖꠦꠅ ꠃꠙꠞꠞ ꠀꠍꠝꠣꠘ ꠕꠣꠇꠤ, ꠀꠞꠅ ꠖꠦꠅ ꠔꠣꠞ ꠎꠝꠤꠘꠅ ꠝꠣꠐꠤꠞ ꠝꠥꠞꠞ ꠙꠣꠘꠤ।
DEU 33:14 ꠡꠥꠞꠥꠎꠞ ꠔꠦꠎꠦ ꠙꠣꠇꠣꠁꠀ ꠖꠦꠅ ꠜꠣꠟꠣ ꠚꠟ, ꠌꠣꠘ꠆ꠖꠦ ꠌꠣꠘ꠆ꠖꠦ ꠖꠦꠅ ꠔꠣꠞꠦ ꠝꠎꠣꠞ ꠚꠡꠟ।
DEU 33:15 ꠙꠥꠞꠣꠘꠣ ꠙꠣꠠ ꠕꠣꠇꠤ ꠗꠘ-ꠍꠣꠝꠣꠘꠣ ꠖꠦꠅ, ꠌꠤꠞꠇꠣꠟꠤꠘ ꠙꠣꠠꠤꠀ ꠝꠣꠟ ꠔꠣꠞ ꠎꠝꠤꠘꠅ ꠘꠦꠅ।
DEU 33:16 ꠎꠝꠤꠘ ꠕꠣꠇꠤ ꠖꠦꠅ ꠉ ꠝꠣꠛꠥꠖ ꠜꠣꠟꠣ ꠜꠣꠟꠣ ꠝꠣꠟ, ꠎꠣꠟꠣꠁꠟ ꠎꠋꠟꠣꠞ ꠘꠥꠞꠞ ꠝꠣꠟꠤꠇ ꠞꠢꠝ ꠇꠞꠅ ꠌꠤꠞꠇꠣꠟ, ꠁꠃꠍꠥꠚꠞ ꠝꠣꠕꠣꠔ ꠟꠣꠝꠃꠇ ꠀꠝꠣꠞ ꠅꠃ ꠖꠥꠀ, ꠜꠣꠁꠀꠁꠘ ꠕꠣꠇꠤ ꠝꠢꠣꠘ ꠎꠘꠞ ꠔꠣꠟꠥꠔ ꠟꠣꠝꠃꠇ ꠁꠔꠣ।
DEU 33:17 ꠒꠦꠇꠣ ꠛꠣꠁꠌ꠆ꠌꠣꠞ ꠝꠔ ꠅꠃꠇ ꠔꠣꠞ ꠛꠟ-ꠡꠇ꠆ꠔꠤ ꠀꠞ ꠡꠣꠘ, ꠔꠣꠞ ꠝꠣꠕꠣꠞ ꠢꠤꠋ ꠎꠥꠠꠣ ꠔ ꠎꠋꠟꠤ ꠛꠄꠞꠣꠞ ꠟꠣꠈꠣꠘ। ꠢꠤꠋ ꠖꠤꠀ ꠉꠥꠔꠣꠁꠛ ꠢꠦ ꠢꠣꠞꠣ ꠎꠉꠔꠞꠦ, ꠙꠥꠛ ꠙꠌꠤꠝ ꠃꠔ꠆ꠔꠞ ꠖꠇ꠆ꠇꠤꠘ ꠖꠃꠠꠣꠁꠛ ꠢꠇꠟꠞꠦ। ꠀꠚꠞꠣꠁꠝꠞ ꠅꠁꠛꠣ ꠅꠟꠣ ꠟꠣꠈꠅ ꠟꠣꠈꠅ ꠎꠘ, ꠀꠎꠣꠞ ꠀꠎꠣꠞ ꠎꠘ ꠅꠁꠛꠣ ꠝꠣꠘꠡꠣꠞ ꠝꠥꠟ ꠗꠘ।
DEU 33:18 ꠍꠛꠥꠟꠘ ꠀꠞ ꠁꠍꠣꠈꠞꠞ ꠈꠣꠘ꠆ꠖꠣꠘꠞ ꠛꠦꠙꠣꠞꠦ ꠔꠣꠁꠘ ꠇꠁꠟꠣ: ꠍꠛꠥꠟꠘꠦ ꠈꠥꠡꠤ ꠇꠞꠃꠇ ꠛꠣꠁꠞꠞ ꠇꠣꠝ-ꠇꠣꠎ ꠟꠁꠀ, ꠁꠍꠣꠈꠞ ꠈꠥꠡꠤ ꠞꠃꠇ ꠊꠞꠞ ꠇꠣꠝꠅ ꠞꠁꠀ।
DEU 33:19 ꠒꠣꠇꠤ ꠒꠣꠇꠤ ꠙꠣꠠꠞ ꠗꠣꠞꠅ ꠀꠘꠛ ꠝꠣꠘꠡꠞꠦ, ꠇꠥꠞꠛꠣꠘꠤ ꠖꠤꠛ ꠢꠘꠅ ꠈꠣꠍ ꠍꠢꠤ ꠖꠤꠟꠦ। ꠖꠞꠤꠀ ꠕꠣꠇꠤ ꠔꠥꠟꠛꠣ ꠔꠣꠞꠣ ꠖꠞꠤꠀꠞ ꠙꠦꠐꠞ ꠗꠘ, ꠛꠣꠟꠤ ꠕꠣꠇꠤ ꠔꠥꠟꠤꠀ ꠀꠘꠛꠣ ꠟꠥꠇꠣꠁꠟ ꠡꠛ ꠞꠔꠘ।
DEU 33:20 ꠍꠣꠖꠥ ꠈꠣꠘ꠆ꠖꠣꠘꠞ ꠛꠦꠙꠣꠞꠦ ꠔꠣꠁꠘ ꠇꠁꠟꠣ: ꠝꠥꠛꠣꠞꠇ ꠢꠃ ꠎꠘ, ꠍꠣꠖꠥꠞ ꠎꠣꠄꠉꠣ ꠛꠣꠠꠣꠁ ꠖꠤꠛꠣ ꠎꠦꠁꠘ, ꠍꠣꠖꠥ ꠔ ꠡꠤꠋꠢꠞ ꠟꠣꠈꠣꠘ ꠈꠣꠙ ꠗꠞꠤ ꠞꠄ, ꠖꠥꠡꠝꠘꠞ ꠀꠔ ꠀꠞ ꠇꠟ꠆ꠟꠣ ꠍꠤꠠꠤꠀ ꠚꠣꠟꠣꠄ।
DEU 33:21 ꠢꠇꠟ ꠕꠣꠇꠤ ꠡꠞꠟ ꠎꠝꠤ ꠘꠤꠎꠞ ꠟꠣꠉꠤ ꠘꠤꠍꠦ, ꠎꠁꠉ꠆ꠉ ꠝꠥꠞꠛ꠆ꠛꠤꠞ ꠀꠡꠘ ꠔꠣꠞ ꠟꠣꠉꠤ ꠕꠅꠀ ꠅꠁꠍꠦ। ꠎꠣꠔꠤꠞ ꠡꠞ꠆ꠖꠣꠞ ꠅꠇꠟ ꠖꠟꠣ ꠅꠀꠞ ꠇꠣꠟꠅ, ꠝꠣꠛꠥꠖꠞ ꠘꠤꠀꠄ ꠛꠤꠌꠣꠞ ꠢꠦ ꠔꠣꠝꠤꠟ ꠇꠞꠤꠟ, ꠛꠘꠤ ꠁꠍꠞꠣꠁꠟꠞꠦ ꠖꠦꠅꠀ ꠢꠥꠇꠥꠝ ꠙꠥꠞꠣ ꠝꠣꠁꠘ꠆ꠘ ꠇꠞꠟ।
DEU 33:22 ꠖꠣꠘ ꠈꠣꠘ꠆ꠖꠣꠘꠞ ꠛꠦꠙꠣꠞ ꠔꠣꠁꠘ ꠇꠁꠟꠣ: ꠚꠥꠞꠚꠥꠞꠣ ꠡꠤꠋꠢꠞ ꠛꠣꠁꠌ꠆ꠌꠣ ꠅꠁꠟ ꠖꠣꠘ ꠈꠣꠘ꠆ꠖꠣꠘ, ꠛꠣꠡꠘ ꠖꠦꠡ ꠕꠘ ꠚꠣꠟꠖꠤ ꠀꠁꠀ ꠇꠞꠦ ꠛꠠꠣꠁ ꠡꠣꠘ।
DEU 33:23 ꠘꠙ꠆ꠔꠣꠟꠤ ꠈꠣꠘ꠆ꠖꠣꠘꠞ ꠛꠦꠙꠣꠞꠦ ꠔꠣꠁꠘ ꠇꠁꠟꠣ: ꠘꠙ꠆ꠔꠣꠟꠤ ꠔ ꠝꠣꠛꠥꠖꠞ ꠝꠣꠄꠀ-ꠝꠝꠔꠣꠔ ꠢꠣꠛꠥꠒꠥꠛꠥ ꠈꠣꠞ, ꠔꠣꠘ ꠞꠢꠝ-ꠛꠞꠇꠔꠅ ꠢꠦ ꠢꠣꠔꠣꠞ ꠇꠣꠐꠦꠞ। ꠔꠥꠝꠤ ꠔꠣꠞꠦ ꠔꠣꠞ ꠀꠙꠘ ꠡꠤꠝꠣꠘꠣꠔ ꠀꠘꠅ, ꠍꠁ-ꠍꠣꠟꠣꠝꠔꠦ ꠉꠣꠟꠤꠟ ꠀꠅꠞ ꠀꠞ ꠖꠃꠇꠘꠞ ꠖꠦꠡꠅ ꠘꠦꠅ।
DEU 33:24 ꠀꠡꠤꠞ ꠈꠣꠘ꠆ꠖꠣꠘꠞ ꠛꠦꠙꠣꠞꠦ ꠔꠣꠁꠘ ꠇꠁꠟꠣ: ꠀꠡꠤꠞꠦ ꠙꠣꠁꠛ ꠞꠢꠝꠔ ꠅꠁꠘ꠆ꠘ ꠕꠣꠇꠤ ꠛꠦꠡꠤ, ꠢꠇꠟ ꠜꠣꠁꠄ ꠝꠣꠄꠀ ꠇꠞꠛꠣ ꠔꠣꠞꠦ ꠞꠣꠡꠤ ꠞꠣꠡꠤ। ꠅꠔ ꠞꠢꠝ-ꠛꠞꠇꠔ ꠙꠣꠁꠀ ꠈꠥꠡꠤ ꠕꠣꠇꠣꠞ ꠇꠣꠟꠅ, ꠖꠥꠁ ꠙꠣꠅ ꠔꠣꠞ ꠒꠥꠛꠣꠁꠟ ꠞꠁꠛ ꠎꠄꠔꠥꠘꠞ ꠔꠦꠟꠅ।
DEU 33:25 ꠔꠣꠞ ꠉꠦꠁꠐ ꠅꠇꠟ ꠛꠣꠘ꠆ꠖꠣꠁꠟ ꠅꠃꠇ ꠟꠥꠀ ꠀꠞ ꠔꠣꠝꠣꠖꠤ, ꠢꠦ ꠛꠟꠀꠟꠣ ꠝꠎꠛꠥꠔ ꠞꠃꠇ ꠔꠣꠞ ꠙꠥꠞꠣ ꠎꠤꠘ꠆ꠖꠦꠉꠤ।
DEU 33:26 ꠝꠥꠍꠣ ꠘꠛꠤꠄ ꠀꠞꠅ ꠇꠁꠟꠣ: ꠛꠘꠤ ꠁꠍꠞꠣꠁꠟꠞ ꠀꠟ꠆ꠟꠣꠞ ꠢꠝꠣꠘꠤ ꠖꠥꠍꠞꠣ ꠇꠦꠃ ꠘꠣꠁ, ꠔꠥꠝꠞꠣꠞꠦ ꠡꠣꠁꠎ꠆ꠎꠞ ꠟꠣꠉꠤ ꠀꠍꠝꠣꠘꠅ ꠛꠦꠠꠣꠁꠘ। ꠔꠣꠘ ꠘꠤꠎꠞ ꠡꠣꠘ-ꠝꠢꠤꠝꠣꠄ ꠝꠦꠊꠞ ꠌꠣꠇꠣꠔ ꠌꠠꠤꠀ, ꠡꠣꠁꠎ꠆ꠎꠇꠣꠞꠤ ꠅꠁꠔꠣ ꠌꠣꠁꠘ ꠔꠥꠝꠞꠣꠞ ꠟꠣꠉꠤꠀ।
DEU 33:27 ꠢꠇꠟ ꠙꠄꠟꠣꠇꠥꠞ ꠄꠇ ꠀꠟ꠆ꠟꠣꠃ ꠅꠁꠟꠣ ꠀꠡꠞꠄ ꠑꠤꠇꠣꠘꠣ, ꠔꠣꠘ ꠌꠤꠞꠇꠣꠟꠤꠘ ꠀꠔ ꠖꠤꠀ ꠔꠥꠝꠞꠣꠞꠦ ꠞꠣꠈꠍꠂꠘ ꠗꠞꠤꠀ। ꠔꠥꠝꠞꠣꠞ ꠍꠣꠝꠘꠞ ꠢꠇꠟ ꠖꠥꠡꠝꠘ ꠔꠣꠁꠘꠃ ꠈꠦꠖꠣꠁ ꠖꠦꠁꠘ, ꠁꠔꠣꠞꠦ ꠛꠤꠘꠣꠡ ꠇꠞꠅ ꠢꠥꠇꠥꠝ ꠖꠤꠍꠂꠘ ꠔꠣꠁꠘ।
DEU 33:28 ꠄꠞꠟꠣꠉꠤ ꠁꠍꠞꠣꠁꠟ ꠎꠣꠔꠤ ꠜꠣꠟꠣ-ꠀꠚꠔꠣ ꠞꠂꠘ, ꠁꠀꠇꠥꠛ ꠛꠋꠡꠞ ꠙꠣꠘꠤꠞ ꠏꠞꠘꠣ ꠘꠤꠞꠣꠙꠖ ꠕꠣꠇꠂꠘ। ꠢꠤꠘꠅ ꠞꠁꠛ ꠚꠄ-ꠚꠡꠟ ꠀꠞ ꠀꠋꠉꠥꠞ ꠞꠡꠦ ꠜꠞꠣ, ꠔꠣꠞ ꠃꠙꠞꠦ ꠟꠣꠝꠛ ꠀꠍꠝꠣꠘꠤ ꠈꠥꠀ।
DEU 33:29 ꠅ ꠛꠘꠤ ꠁꠍꠞꠣꠁꠟ, ꠝꠥꠛꠣꠞꠇ ꠀꠅꠟꠣꠖ ꠔꠥꠝꠤ! ꠔꠥꠝꠤ ꠅꠁꠟꠣꠄ ꠝꠣꠛꠥꠖ ꠀꠟ꠆ꠟꠣꠞ ꠀꠎꠣꠖ ꠇꠞꠣ ꠎꠣꠔꠤ। ꠡ꠆ꠛꠄꠅꠋ ꠝꠣꠛꠥꠖ ꠅꠁꠟꠣ ꠔꠥꠝꠣꠞ ꠎꠣꠘ ꠛꠣꠌꠣꠘꠤꠞ ꠓꠣꠟ, ꠔꠣꠁꠘꠃ ꠅꠁꠟꠣ ꠔꠥꠝꠣꠞ ꠎꠄꠅꠞ ꠗꠣꠞꠣꠁꠟ ꠔꠟꠥꠀꠞ। ꠖꠥꠡꠝꠘ ꠔꠥꠝꠣꠞ ꠍꠣꠝꠘꠦ ꠀꠁꠟꠦ ꠕꠞ-ꠕꠞꠣꠁꠀ ꠇꠣꠙꠦ, ꠔꠥꠝꠤ ꠔꠣꠞꠣꠞ ꠛꠥꠇꠥꠞ ꠃꠙꠞꠦ ꠝꠣꠠꠣ ꠖꠤꠛꠣꠄ ꠘꠦ।
DEU 34:1 ꠛꠣꠖꠦ ꠝꠥꠍꠣ ꠘꠛꠤ ꠝꠥꠀꠛ ꠖꠦꠡꠞ ꠔꠟ ꠎꠣꠉꠣ ꠕꠣꠇꠤ, ꠘꠛꠅ ꠙꠣꠠꠞ ꠐꠤꠟ꠆ꠟꠣꠞ ꠃꠙꠞꠦ ꠃꠑꠤꠟꠣ, ꠅꠃ ꠐꠤꠟ꠆ꠟꠣ ꠔ ꠎꠤꠞꠤꠢꠅ ꠐꠣꠃꠘꠞ ꠍꠣꠝꠘꠦ ꠙꠤꠍꠉꠣ ꠙꠣꠠꠞ ꠢꠇꠟ ꠕꠣꠇꠤ ꠃꠌꠣ ꠐꠤꠟ꠆ꠟꠣ। ꠢꠘꠅ ꠝꠣꠛꠥꠖꠦ ꠔꠣꠘꠞꠦ ꠢꠇꠟ ꠖꠦꠡ ꠖꠦꠈꠣꠁꠟꠣ, ꠉꠤꠟꠤꠅꠖ ꠕꠣꠇꠤ ꠖꠣꠘ ꠙꠞ꠆ꠎꠘ꠆ꠔ,
DEU 34:2 ꠀꠡ꠆ꠔꠣ ꠘꠙ꠆ꠔꠣꠟꠤ ꠖꠦꠡ, ꠀꠚꠞꠣꠁꠝ ꠀꠞ ꠝꠣꠘꠡꠣ ꠖꠦꠡ, ꠀꠞ ꠙꠁꠌꠝꠞ ꠖꠞꠤꠀꠞ ꠙꠣꠞ ꠙꠞ꠆ꠎꠘ꠆ꠔ ꠙꠥꠞꠣ ꠄꠢꠥꠖꠣ ꠖꠦꠡ,
DEU 34:3 ꠖꠃꠇꠘꠞ ꠘꠦꠉꠦꠜ ꠝꠞꠥꠜꠥꠝꠤ, ꠈꠦꠎꠥꠞꠤ ꠐꠣꠃꠘ ꠎꠤꠞꠤꠢꠅ, ꠀꠞ ꠄꠞ ꠇꠣꠘ꠆ꠖꠣꠞ ꠎꠞ꠆ꠖꠣꠘ ꠉꠣꠋꠉꠞ ꠖꠃꠇꠘꠞ ꠝꠞꠥꠜꠥꠝꠤ ꠕꠣꠇꠤ ꠍꠥꠀꠞ ꠉꠣꠃ ꠙꠞ꠆ꠎꠘ꠆ꠔ ꠢꠇꠟ ꠎꠣꠉꠣ।
DEU 34:4 ꠅꠔꠣ ꠖꠦꠈꠣꠘꠤꠞ ꠛꠣꠖꠦ ꠝꠣꠛꠥꠖꠦ ꠔꠣꠘꠞꠦ ꠇꠁꠟꠣ, “ꠁꠈꠣꠘ ꠅꠁꠟ ꠢꠃ ꠖꠦꠡ, ꠎꠦꠈꠣꠘꠞ ꠛꠦꠙꠣꠞꠦ ꠀꠝꠤ ꠁꠛ꠆ꠞꠣꠢꠤꠝ, ꠁꠍꠢꠣꠇ ꠀꠞ ꠁꠀꠇꠥꠛꠞ ꠉꠦꠍꠦ ꠇꠍꠝ ꠈꠣꠁꠍꠟꠣꠝ। ꠔꠣꠞꠣꠞꠦ ꠇꠁꠍꠟꠣꠝ, ꠖꠦꠡꠈꠣꠘ ꠀꠝꠤ ꠔꠥꠝꠣꠞ ꠅꠀꠞꠤꠡꠞꠦ ꠖꠤꠝꠥ। ꠔꠦ ꠁꠔꠣ ꠀꠝꠤ ꠔꠥꠝꠣꠞꠦ ꠡꠞꠣꠡꠞꠤ ꠖꠦꠈꠣꠁꠟꠣꠝ, ꠅꠁꠟꠦ ꠔꠥꠝꠤ ꠎꠞ꠆ꠖꠣꠘ ꠉꠣꠋ ꠙꠣꠞ ꠅꠁꠀ ꠢꠤꠘꠅ ꠢꠣꠝꠣꠁꠔꠣꠄ ꠙꠣꠞꠔꠣꠄ ꠘꠣꠄ।”
DEU 34:5 ꠝꠣꠛꠥꠖꠞ ꠎꠛꠣꠘ ꠝꠣꠚꠤꠇ, ꠔꠣꠘ ꠉꠥꠟꠣꠝ ꠝꠥꠍꠣ ꠘꠛꠤꠞ ꠃꠚꠣꠔ ꠅꠃ ꠝꠥꠀꠛ ꠖꠦꠡꠅꠃ ꠅꠁꠟ।
DEU 34:6 ꠝꠥꠀꠛ ꠖꠦꠡꠞ ꠛꠣꠄꠔ-ꠙꠤꠃꠞꠞ ꠗꠣꠞꠅ ꠙꠣꠠꠤꠀ ꠔꠟ ꠎꠣꠉꠣꠔ ꠀꠟ꠆ꠟꠣꠞ ꠇꠥꠖꠞꠔꠤ ꠀꠔꠦ ꠔꠣꠘꠞꠦ ꠖꠣꠚꠘ ꠇꠞꠟꠣ। ꠅꠁꠟꠦ ꠔꠣꠘ ꠞꠅꠎꠣ ꠡꠞꠤꠚꠞꠦ ꠅꠈꠘꠅ ꠇꠦꠃ ꠌꠤꠘꠦ ꠘꠣ।
DEU 34:7 ꠃꠚꠣꠔꠞ ꠇꠣꠟꠅ ꠔꠣꠘ ꠛꠄꠅꠡ ꠀꠍꠤꠟ ꠄꠇ-ꠡ ꠛꠤꠡ ꠛꠍꠞ। ꠢꠃ ꠡꠝꠄꠅ ꠔꠣꠘ ꠌꠃꠈꠞ ꠙꠣꠅꠀꠞ ꠇꠝꠍꠦ ꠘꠣ, ꠔꠣꠘ ꠡꠞꠤꠟ ꠇꠝꠎꠥꠞ ꠅꠁꠍꠦ ꠘꠣ।
DEU 34:8 ꠃꠚꠣꠔꠞ ꠛꠣꠖꠦ ꠛꠘꠤ ꠁꠍꠞꠣꠁꠟꠦ ꠔꠤꠡ ꠖꠤꠘ ꠗꠞꠤ ꠝꠥꠀꠛ ꠖꠦꠡꠞ ꠘꠤꠌꠣ ꠔꠟ ꠎꠣꠉꠣꠔ ꠔꠣꠘ ꠟꠣꠉꠤ ꠇꠣꠘ꠆ꠖꠣ-ꠇꠣꠐꠤ ꠀꠞ ꠀꠢꠣꠎꠣꠞꠤ ꠇꠞꠟꠣ। ꠅꠃ ꠔꠤꠡ ꠖꠤꠘ ꠛꠣꠖꠦ ꠔꠣꠞꠣꠞ ꠖꠥꠈ-ꠀꠢꠣꠎꠣꠞꠤ ꠡꠦꠡ ꠅꠁꠟ।
DEU 34:9 ꠢꠎꠞꠔ ꠝꠥꠍꠣꠄ ꠘꠥꠘꠞ ꠙꠥꠀ ꠁꠃꠍꠣꠞ ꠝꠣꠕꠣꠞ ꠃꠙꠞꠦ ꠀꠔ ꠞꠣꠈꠣꠞ ꠇꠣꠞꠘꠦ, ꠅꠃ ꠡꠝꠄ ꠕꠘꠦ ꠁꠃꠍꠣ ꠀꠈꠟꠞ ꠞꠥꠢꠦ ꠙꠥꠞꠣꠙꠥꠞ ꠇꠣꠝꠤꠟ ꠅꠁꠉꠦꠟꠣ। ꠔꠦꠃ ꠛꠘꠤ ꠁꠍꠞꠣꠁꠟ ꠅꠇꠟ ꠔꠣꠘ ꠙꠞꠣꠝꠤꠡꠦ ꠌꠟꠟꠣ, ꠀꠞ ꠝꠥꠍꠣ ꠘꠛꠤꠞ ꠝꠣꠞꠚꠔꠦ ꠝꠣꠛꠥꠖꠞ ꠛꠣꠔꠣꠁꠟ ꠢꠥꠇꠥꠝ ꠝꠣꠚꠤꠇ ꠔꠣꠞꠣ ꠎꠤꠘ꠆ꠖꠦꠉꠤ ꠇꠣꠐꠣꠁꠟꠣ।
DEU 34:10 ꠢꠎꠞꠔ ꠝꠥꠍꠣꠞ ꠟꠣꠈꠣꠘ ꠁꠟꠣ ꠇꠥꠘꠥ ꠘꠛꠤ ꠅꠈꠘ ꠙꠞ꠆ꠎꠘ꠆ꠔ ꠛꠘꠤ ꠁꠍꠞꠣꠁꠟꠞ ꠝꠣꠎꠦ ꠎꠘꠝ ꠟꠁꠍꠂꠘ ꠘꠣ, ꠎꠣꠘ ꠟꠉꠦ ꠝꠣꠛꠥꠖꠦ ꠍꠣꠝꠘꠣ-ꠍꠣꠝꠘꠤ ꠅꠁꠀ ꠛꠣꠔꠌꠤꠔ ꠇꠞꠔꠣ।
DEU 34:11 ꠝꠣꠛꠥꠖꠦ ꠝꠥꠍꠣ ꠘꠛꠤꠞꠦ ꠛꠦꠎꠤꠀ ꠝꠤꠡꠞꠞ ꠛꠣꠖꠡꠣ ꠚꠦꠞꠣꠃꠘ ꠀꠞ ꠔꠣꠞ ꠃꠎꠤꠞ-ꠘꠣꠎꠤꠞ, ꠔꠣꠞ ꠀꠡ꠆ꠔꠣ ꠖꠦꠡꠞ ꠃꠙꠞꠦ ꠎꠔ ꠟꠣꠈꠣꠘ ꠇꠥꠖꠞꠔꠤ ꠘꠤꠡꠣꠘꠣ ꠀꠞ ꠇꠦꠞꠣꠝꠔꠤ ꠇꠣꠝ ꠖꠦꠈꠣꠁꠍꠂꠘ, ꠁꠔꠣꠅ ꠀꠞ ꠇꠦꠃ ꠇꠞꠍꠂꠘ ꠘꠣ।
DEU 34:12 ꠔꠣꠝꠣꠝ ꠛꠘꠤ ꠁꠍꠞꠣꠁꠟꠞ ꠌꠃꠈꠞ ꠍꠣꠝꠘꠦ ꠝꠥꠍꠣ ꠘꠛꠤꠄ ꠎꠦꠟꠣ ꠇꠥꠖꠞꠔꠤ ꠝꠢꠣ ꠔꠣꠁꠎ꠆ꠎꠥꠛꠤ ꠀꠞ ꠒꠞ-ꠈꠚꠞ ꠘꠣꠘꠣꠘ ꠇꠦꠞꠣꠝꠔꠤꠞ ꠇꠣꠝ ꠇꠞꠍꠂꠘ, ꠁꠟꠣ ꠇꠣꠝ ꠖꠥꠍꠞꠣ ꠇꠦꠃ ꠇꠞꠣꠞ ꠔꠣꠇ꠆ꠇꠔ ꠅꠁꠍꠦ ꠘꠣ। ꠈꠔꠝ॥
RUT 1:1 ꠢꠎꠞꠔ ꠖꠣꠃꠖ ꠘꠛꠤꠞ ꠔꠤꠘ ꠍꠤꠠꠤ ꠀꠉꠦ ꠀꠝꠤꠞ ꠅꠇꠟꠞ ꠢꠥꠇꠥꠝꠔꠞ ꠀꠝꠟꠅ, ꠄꠢꠥꠖꠣ ꠖꠦꠡꠅ ꠀꠟꠤ ꠝꠣꠟꠤꠇ ꠘꠣꠝꠦ ꠄꠇ ꠛꠦꠐꠣ ꠀꠍꠟꠣ, ꠔꠣꠘ ꠛꠤꠛꠤꠞ ꠘꠣꠝ ꠘꠄꠅꠝꠤ, ꠝꠢꠟꠥꠘ ꠀꠞ ꠇꠤꠟꠤꠅꠘ ꠘꠣꠝꠞ ꠔꠣꠞꠣꠞ ꠖꠥꠁ ꠙꠥꠀ ꠀꠍꠟꠣ। ꠅꠃ ꠡꠝꠄ ꠖꠦꠡꠅ ꠈꠥꠛ ꠛꠦꠎꠥꠁꠔꠣ ꠘꠤꠖꠣꠘ ꠖꠦꠈꠣ ꠖꠤꠟ। ꠘꠤꠖꠣꠘꠞ ꠑꠦꠟꠣꠄ ꠛꠦꠕꠦꠟꠢꠣꠝ ꠉꠣꠃꠞ ꠁꠚ꠆ꠞꠣꠕꠣ ꠉꠥꠡ꠆ꠐꠤꠞ ꠅꠃ ꠀꠟꠤ ꠝꠣꠟꠤꠇꠦ ꠔꠣꠘ ꠛꠤꠛꠤ ꠀꠞ ꠙꠥꠀꠂꠘꠞꠦ ꠟꠁꠀ ꠝꠥꠀꠛ ꠖꠦꠡꠅ ꠉꠦꠟꠣꠉꠤ।
RUT 1:3 ꠢꠘꠅ ꠎꠣꠅꠀꠞ ꠇꠄꠖꠤꠘ ꠛꠣꠖꠦ ꠀꠟꠤ ꠝꠣꠟꠤꠇ ꠝꠞꠤꠉꠦꠟꠣ, ꠔꠣꠘ ꠛꠃ ꠘꠄꠅꠝꠤ ꠀꠞ ꠖꠥꠁꠅ ꠙꠥꠀ ꠄꠔꠤꠝ ꠅꠁꠉꠦꠟ।
RUT 1:4 ꠛꠣꠖꠦ ꠛꠤꠛꠤ ꠘꠄꠅꠝꠤꠄ ꠖꠥꠁꠅ ꠙꠥꠀꠞꠦ ꠅꠃ ꠝꠥꠀꠛ ꠖꠦꠡꠞ ꠖꠥꠁ ꠇꠁꠘꠣꠞ ꠟꠉꠦ ꠡꠣꠖꠤ ꠖꠤꠟꠣ। ꠄꠇ ꠇꠁꠘꠣꠞ ꠘꠣꠝ ꠞꠥꠔ, ꠀꠞꠇ ꠇꠁꠘꠣꠞ ꠘꠣꠝ ꠅꠞꠙꠣ। ꠡꠣꠖꠤꠞ ꠇꠄꠖꠤꠘ ꠛꠣꠖꠦ ꠖꠥꠁꠅ ꠙꠥꠀꠅ ꠝꠞꠤꠉꠦꠟꠣ। ꠅꠃꠟꠣ ꠄꠇ ꠖꠡ ꠛꠞꠍ ꠉꠦꠟ। ꠛꠤꠛꠤ ꠘꠄꠅꠝꠤꠄ ꠔꠣꠘ ꠖꠥꠁꠅ ꠛꠃꠞꠦ ꠟꠁꠀ ꠠꠣꠠꠤ ꠢꠣꠟꠔꠦ ꠢꠃ ꠝꠥꠀꠛ ꠖꠦꠡꠅꠃ ꠞꠁꠟꠣ।
RUT 1:6 ꠀꠈꠔꠣ ꠄꠇꠖꠤꠘ ꠔꠣꠁꠘ ꠈꠛꠞ ꠙꠣꠁꠟꠣ, ꠔꠣꠘ ꠘꠤꠎꠞ ꠢꠃ ꠄꠢꠥꠖꠣ ꠖꠦꠡꠅ ꠝꠣꠛꠥꠖꠦ ꠛꠞꠇꠔ ꠘꠣꠎꠤꠟ ꠇꠞꠤꠀ ꠈꠣꠘꠤ-ꠈꠥꠞꠣꠇꠤ ꠖꠣꠘ ꠇꠞꠍꠂꠘ।
RUT 1:7 ꠅꠃ ꠈꠛꠞ ꠙꠣꠁꠀ ꠔꠣꠁꠘ ꠖꠥꠁꠅ ꠙꠥꠀꠞ ꠛꠃꠞꠦ ꠟꠁꠀ ꠢꠤꠞꠛꠣꠞ ꠖꠦꠡꠅ ꠎꠣꠁꠔꠣꠉꠤ ꠇꠞꠤ ꠔꠤꠀꠞ ꠅꠁꠟꠣ।
RUT 1:8 ꠙꠕꠅ ꠛꠣꠞ ꠅꠁꠀ ꠛꠤꠛꠤ ꠘꠄꠅꠝꠤꠄ ꠔꠣꠘ ꠙꠥꠀꠞ ꠛꠃꠀꠁꠘꠞꠦ ꠇꠁꠟꠣ, “ꠅ ꠛꠦꠐꠤꠘ, ꠔꠥꠝꠤꠔꠣꠁꠘ ꠔꠥꠝꠣꠞꠔꠣꠘꠞ ꠝꠣʼꠞ ꠉꠦꠍꠦ ꠎꠣꠅꠉꠤ, ꠢꠘꠅ ꠉꠦꠟꠦ ꠔꠥꠝꠞꠣ ꠡꠥꠈ ꠙꠣꠁꠛꠣꠄ। ꠝꠣ-ꠛꠣꠚꠦ ꠔꠥꠝꠞꠣꠞꠦ ꠛꠤꠀ-ꠡꠣꠖꠤ ꠖꠤꠛꠣ, ꠔꠥꠝꠞꠣ ꠘꠄꠀ ꠊꠞ-ꠡꠋꠡꠣꠞ ꠇꠞꠛꠣꠄ। ꠀꠞ ꠝꠣꠁ ꠅꠇꠟꠞꠦ, ꠀꠝꠣꠞ ꠙꠞꠤꠛꠣꠞꠞ ꠟꠉꠦ ꠔꠥꠝꠞꠣ ꠎꠦꠟꠣ ꠜꠣꠟꠣ ꠛꠦꠛꠢꠣꠞ ꠇꠞꠍ, ꠀꠟ꠆ꠟꠣꠄꠅ ꠔꠥꠝꠞꠣꠞꠦ ꠅꠃꠟꠣ ꠜꠣꠟꠣꠁ ꠇꠞꠃꠇ꠆ꠇꠣ,
RUT 1:9 ꠔꠥꠝꠞꠣꠞꠦ ꠜꠣꠟꠣ ꠛꠦꠐꠣ ꠝꠤꠟꠣꠁ ꠖꠦꠃꠇ꠆ꠇꠣ, ꠔꠥꠝꠞꠣ ꠎꠣꠔꠦ ꠡꠥꠈ-ꠡꠣꠘ꠆ꠔꠤꠄ ꠎꠤꠘ꠆ꠖꠦꠉꠤ ꠇꠣꠐꠣꠁꠔꠣꠄ ꠙꠣꠞ।” ꠇꠁꠀ ꠔꠣꠁꠘ ꠔꠣꠞꠣꠞꠦ ꠀꠁꠘ꠆ꠎꠣ ꠇꠞꠤ ꠗꠞꠤꠀ ꠝꠣꠄꠀ ꠖꠤꠟꠣ। ꠔꠦꠃ ꠔꠣꠞꠣ ꠖꠥꠁꠅꠎꠘꠦ ꠀꠃ ꠀꠃ ꠇꠞꠤ ꠒꠣꠇꠣꠁꠀ ꠇꠣꠘ꠆ꠖꠤ ꠇꠣꠘ꠆ꠖꠤ ꠇꠁꠟꠣ,
RUT 1:10 “ꠝꠣꠁ ꠉ, ꠀꠝꠞꠣꠞꠦꠅ ꠀꠙꠘꠣꠞ ꠟꠉꠈꠣꠘꠅ ꠀꠙꠘꠣꠞ ꠖꠦꠡꠅ ꠘꠦꠃꠇ꠆ꠇꠣꠉꠤ।”
RUT 1:11 ꠢꠠꠤꠄ ꠇꠁꠟꠣ, “ꠘꠣ ꠞꠦꠉ ꠝꠣꠁ, ꠔꠥꠝꠞꠣ ꠇꠤꠔꠣꠟ꠆ꠟꠣꠉꠤ ꠀꠝꠣꠞ ꠟꠉꠦ ꠎꠣꠁꠔꠣꠄ? ꠔꠥꠝꠞꠣꠞ ꠛꠣꠚ-ꠝꠣʼꠞ ꠉꠦꠍꠦ ꠎꠣꠅꠉꠤ। ꠀꠝꠣꠞ ꠟꠉꠦ ꠉꠦꠟꠦ ꠔ ꠟꠣꠜ-ꠃꠛ ꠅꠁꠔ ꠘꠣꠄ। ꠁꠟꠣ ꠔ ꠘꠣꠄ ꠎꠦꠘ ꠀꠝꠣꠞ ꠀꠞꠅ ꠙꠥꠀꠂꠘ ꠀꠍꠂꠘ, ꠅꠔꠣꠞ ꠟꠉꠦ ꠔꠥꠝꠞꠣꠞꠦ ꠞꠣꠈꠝꠥ,
RUT 1:12 ꠛꠣ ꠀꠝꠤ ꠀꠞꠇ ꠡꠋꠡꠣꠞ ꠙꠣꠔꠤꠀ ꠢꠃ ꠔꠞꠚꠣ ꠙꠥꠀꠞ ꠟꠉꠦ ꠔꠥꠝꠞꠣꠞꠦ ꠞꠣꠈꠔꠣꠝ ꠙꠣꠞꠝꠥ। ꠀꠝꠣꠞ ꠔ ꠀꠞ ꠁ ꠛꠄꠅꠡꠅ ꠞꠁꠍꠦ ꠘꠣ। ꠀꠞ ꠞꠁꠟꠦꠅ ꠀꠝꠤ ꠀꠁꠎ ꠞꠣꠁꠔꠃ ꠀꠞꠇ ꠡꠋꠡꠣꠞ ꠙꠣꠔꠤꠀ ꠢꠣꠞꠤ ꠀꠝꠣꠞ ꠊꠞꠅ ꠇꠥꠘꠥ ꠙꠥꠔ ꠎꠘꠝꠤꠟꠦꠅ,
RUT 1:13 ꠔꠥꠝꠞꠣ ꠇꠥꠘꠥ ꠅꠔꠖꠤꠘ ꠛꠣꠠ ꠌꠣꠁꠛꠣꠄ ꠘꠤ? ꠔꠥꠝꠞꠣ ꠎꠣꠞꠎꠤꠞ ꠛꠣꠠꠤꠔ ꠎꠣꠅꠉꠤ, ꠀꠝꠤ ꠔ ꠅꠜꠣꠉꠤ, ꠇꠙꠣꠟ-ꠙꠥꠠꠣ। ꠡ꠆ꠛꠄꠅꠋ ꠝꠣꠛꠥꠖꠦ ꠀꠝꠣꠞ ꠃꠙꠞꠦ ꠑꠣꠐꠣ ꠚꠣꠟꠣꠁ ꠖꠤꠍꠂꠘ।”
RUT 1:14 ꠁꠈꠣꠘ ꠢꠥꠘꠤꠀ ꠔꠣꠞꠣ ꠀꠃ ꠀꠃ ꠇꠞꠤ ꠇꠣꠘ꠆ꠖꠘ ꠗꠞꠟꠣ। ꠇꠔ ꠡꠝꠄ ꠇꠣꠘ꠆ꠖꠤꠀ ꠢꠣꠞꠤ ꠅꠞꠙꠣꠄ ꠔꠣꠘ ꠢꠠꠤꠞꠦ ꠝꠣꠄꠀ ꠖꠤꠀ ꠛꠤꠖꠣꠄ ꠟꠁꠀ ꠛꠣꠚꠞ ꠛꠣꠠꠤꠔ ꠉꠦꠟꠣꠉꠤ। ꠅꠁꠟꠦ ꠞꠥꠔ ꠔꠣꠘ ꠢꠠꠤꠞ ꠟꠉꠦꠃ ꠞꠁꠉꠦꠟꠣ।
RUT 1:15 ꠄꠁꠘ ꠉꠤꠀ ꠢꠣꠞꠟꠦ ꠢꠠꠤꠄ ꠞꠥꠔꠞꠦ ꠇꠁꠟꠣ, “ꠅ ꠛꠦꠐꠤ, ꠔꠥꠝꠣꠞ ꠎꠣꠟ ꠔ ꠔꠣꠁꠞ ꠘꠤꠎꠞ ꠛꠣꠠꠤ ꠀꠞ ꠖꠦꠛꠔꠣꠞ ꠉꠦꠍꠦ ꠎꠣꠞꠉꠤ, ꠔꠦ ꠔꠥꠝꠤꠅ ꠔꠣꠁꠞ ꠟꠉꠦ ꠎꠣꠅꠉꠤ।”
RUT 1:16 ꠞꠥꠔꠦ ꠎꠥꠀꠙ ꠖꠤꠟꠣ, “ꠎꠤ ꠘꠣ ꠀꠝ꠆ꠝꠣ, ꠀꠙꠘꠦ ꠁꠟꠣ ꠝꠣꠔꠂꠘ ꠘꠣ ꠎꠣꠘꠥ, ꠀꠙꠘꠣꠞ ꠈꠞ ꠅꠁꠀ ꠞꠁꠔꠦ ꠀꠝꠣꠞꠦ ꠘꠤꠡꠦꠗ ꠇꠞꠂꠘ ꠘꠣ ꠎꠣꠘꠥ। ꠀꠙꠘꠦ ꠎꠦꠘꠅꠃ ꠎꠣꠁꠘ ꠘꠣ ꠇꠦꠘꠦ ꠀꠝꠤꠅ ꠎꠣꠁꠝꠥ, ꠀꠙꠘꠦ ꠎꠦꠘꠅ ꠞꠁꠛꠣ ꠀꠝꠤꠅ ꠅꠘꠅ ꠞꠁꠝꠥ। ꠀꠙꠘꠣꠞ ꠎꠣꠔꠤꠃ ꠅꠁꠛ ꠀꠝꠣꠞ ꠎꠣꠔꠤ, ꠀꠙꠘꠣꠞ ꠝꠣꠛꠥꠖꠃ ꠅꠁꠛꠣ ꠀꠝꠣꠞ ꠝꠣꠛꠥꠖ।
RUT 1:17 ꠎꠦ ꠎꠣꠉꠣꠔ ꠀꠙꠘꠦ ꠝꠞꠤꠎꠤꠛꠣꠄ, ꠅꠘꠅ ꠀꠝꠤꠅ ꠝꠞꠤꠎꠤꠝꠥ, ꠀꠞ ꠅꠘꠅꠃ ꠀꠝꠣꠞ ꠇꠄꠛꠞ ꠅꠁꠛ। ꠈꠣꠟꠤ ꠝꠞꠘ ꠍꠣꠠꠣ ꠖꠥꠍꠞꠣ ꠇꠥꠘꠥꠔꠣꠄ ꠎꠥꠖꠤ ꠀꠝꠣꠞꠦ ꠀꠙꠘꠣꠞ ꠟꠉ ꠍꠣꠠꠣꠁꠔ ꠙꠣꠞꠦ, ꠔꠦ ꠀꠟ꠆ꠟꠣꠄ ꠎꠣꠘꠥ ꠀꠝꠣꠞꠦ ꠉꠎꠛꠤ ꠡꠣꠡ꠆ꠔꠤ ꠖꠦꠁꠘ।”
RUT 1:18 ꠁꠈꠣꠘ ꠢꠥꠘꠤꠀ ꠢꠠꠤꠄ ꠀꠞ ꠇꠥꠘ꠆ꠔꠣ ꠇꠁꠟꠣ ꠘꠣ, ꠔꠣꠁꠘ ꠛꠥꠎꠤꠟꠤꠟꠣ ꠞꠥꠔꠦ ꠔꠣꠘ ꠟꠉꠦ ꠎꠣꠁꠔ ꠇꠞꠤ ꠖꠤꠟ ꠛꠣꠘ꠆ꠖꠤꠟꠤꠍꠦ।
RUT 1:19 ꠛꠣꠖꠦ ꠔꠣꠞꠣ ꠖꠥꠁꠅꠎꠘꠦ ꠀꠐꠣ ꠗꠞꠟꠣ, ꠀꠐꠤ ꠀꠐꠤ ꠔꠣꠞꠣ ꠛꠦꠕꠦꠟꠢꠣꠝ ꠉꠣꠃꠔ ꠀꠁꠀ ꠙꠃꠍꠤꠟꠣ। ꠉꠣꠃꠔ ꠀꠁꠔꠦꠃ ꠉꠣꠃꠞ ꠛꠦꠐꠤꠘ꠆ꠔꠦ ꠀꠁꠀ ꠃꠟꠁꠡ꠆ꠔꠟ ꠟꠣꠉꠣꠁꠀ ꠇꠁꠟꠣ, “ꠁꠀꠟ꠆ꠟꠣꠞꠦ, ꠘꠄꠅꠝꠤꠞ ꠅꠃ ꠢꠣꠟꠔ ꠅꠁꠍꠦ ꠘꠤ?”
RUT 1:20 “ꠅꠄ ꠉ ꠡꠥꠘꠣ, ꠀꠝꠣꠞꠦ ꠀꠞ ꠘꠄꠅꠝꠤ [ꠝꠣꠘꠤ, ꠡꠥꠈꠤ] ꠇꠁꠀ ꠒꠣꠇꠤꠅ ꠘꠣ, ꠝꠣꠞꠥꠀ [ꠝꠣꠘꠤ, ꠔꠤꠔ꠆ꠔꠣ] ꠇꠁꠀ ꠒꠣꠇꠤꠅ, ꠡꠞ꠆ꠛ-ꠡꠇ꠆ꠔꠤꠝꠣꠘ ꠀꠟ꠆ꠟꠣꠄ ꠔ ꠀꠝꠣꠞ ꠎꠤꠘ꠆ꠖꠦꠉꠤꠞꠦ ꠔꠤꠔ꠆ꠔꠣ ꠛꠣꠘꠣꠁꠟꠤꠍꠦ।
RUT 1:21 ꠀꠝꠤ ꠅꠜꠣꠉꠤꠘꠤ ꠇꠙꠣꠟ-ꠙꠥꠠꠣ। ꠀꠝꠣꠞꠦ ꠀꠞ ꠇꠤꠔꠣꠟ꠆ꠟꠣꠉꠤ ꠘꠄꠅꠝꠤ ꠇꠁꠀ ꠒꠣꠇꠤꠞꠣꠄ? ꠖꠦꠡ ꠕꠣꠇꠤ ꠉꠦꠍꠟꠣꠝ ꠜꠞꠣ ꠀꠔꠦ, ꠀꠞ ꠝꠣꠛꠥꠖꠦ ꠀꠘꠟꠣ ꠈꠣꠟꠤ ꠀꠔꠦ। ꠡ꠆ꠛꠄꠅꠋ ꠡꠞ꠆ꠛ-ꠡꠇ꠆ꠔꠤꠝꠣꠘꠦꠃ ꠀꠝꠣꠞ ꠜꠞꠣ ꠒꠥꠛꠤ ꠇꠞꠤꠟꠤꠍꠂꠘ।”
RUT 1:22 ꠅꠟꠣꠈꠣꠘ ꠇꠞꠤ ꠝꠥꠀꠛꠤ ꠞꠥꠔꠞꠦ ꠟꠁꠀ ꠘꠄꠅꠝꠤꠄ ꠝꠥꠀꠛ ꠖꠦꠡ ꠍꠣꠠꠤꠀ ꠘꠤꠎꠞ ꠛꠣꠠꠤꠔ ꠛꠦꠕꠦꠟꠢꠣꠝ ꠉꠤꠀ ꠢꠣꠝꠣꠁꠟꠣ। ꠅꠃ ꠡꠝꠄ ꠛꠣꠞ꠆ꠟꠤ ꠚꠡꠟ ꠇꠣꠐꠣꠞ ꠝꠃꠡꠥꠝ ꠀꠍꠤꠟ।
RUT 2:1 ꠛꠣꠠꠤꠔ ꠀꠁꠀ ꠢꠣꠞꠟꠦ ꠄꠇꠖꠤꠘ ꠝꠥꠀꠛꠤ ꠞꠥꠔꠦ ꠔꠣꠘ ꠢꠠꠤꠞꠦ ꠇꠁꠟꠣ, “ꠝꠣꠁꠎꠤ, ꠀꠝꠤ ꠌꠣꠁꠍꠟꠣꠝ ꠛꠘ꠆ꠖꠅ ꠎꠣꠁꠔꠣꠝ, ꠀꠞ ꠇꠦꠃ ꠎꠥꠖꠤ ꠝꠦꠢꠦꠞꠛꠣꠘꠤ ꠇꠞꠤꠀ ꠀꠝꠣꠞꠦ ꠔꠣꠞ ꠎꠝꠤꠘꠅ ꠟꠥꠞꠤꠔꠦ ꠖꠦꠄ, ꠔꠦ ꠟꠥꠞꠤꠟꠣꠝ ꠅꠘꠦ। ꠔꠦ ꠀꠙꠘꠦ ꠇꠤꠔꠣ ꠝꠘꠅ ꠇꠞꠂꠘ?” ꠘꠄꠅꠝꠤꠄ ꠎꠥꠀꠙ ꠖꠤꠟꠣ, “ꠀꠁꠌ꠆ꠍꠣ, ꠔꠥꠝꠣꠞ ꠜꠣꠟꠣ ꠟꠣꠉꠟꠦ ꠎꠣꠅ।” ꠔꠦꠃ ꠞꠥꠔ ꠟꠥꠞꠣꠔ ꠉꠦꠟꠣ। ꠛꠘ꠆ꠖꠅ ꠛꠃꠔ ꠝꠣꠘꠡꠦ ꠛꠣꠞ꠆ꠟꠤ ꠖꠣꠁꠞꠣ, ꠅꠁꠟꠦ ꠔꠣꠁꠎ꠆ꠎꠥꠛꠤ ꠝꠣꠝꠦꠟꠣ ꠅꠁꠟ, ꠞꠥꠔꠦ ꠎꠦ ꠎꠣꠉꠣꠔ ꠟꠥꠞꠤꠔꠣ ꠉꠦꠟꠣ, ꠁ ꠈꠦꠔꠞ ꠝꠣꠟꠤꠇ ꠀꠍꠟꠣ ꠔꠣꠘ ꠢꠃꠞ ꠀꠟꠤ ꠝꠣꠟꠤꠇꠞ ꠇꠥꠐꠥꠝ ꠛꠥꠀꠎ। ꠄꠁꠘ ꠅꠁꠟꠣ ꠢꠤ ꠄꠟꠣꠇꠣꠞ ꠘꠣꠝꠤ-ꠖꠣꠝꠤ ꠈꠣꠘ꠆ꠖꠣꠘꠤ ꠝꠣꠘꠥꠡ। ꠞꠥꠔꠦ ꠢꠤꠘꠅ ꠇꠣꠝꠟꠣꠁꠘ꠆ꠔꠞ ꠈꠞꠦ ꠈꠞꠦ ꠟꠥꠞꠤꠞꠣ,
RUT 2:4 ꠅꠃ ꠡꠝꠄ ꠀꠈꠔꠣꠃ ꠈꠦꠔꠞ ꠝꠣꠟꠤꠇ ꠛꠥꠀꠎ ꠛꠦꠕꠦꠟꠢꠣꠝ ꠉꠣꠃ ꠕꠣꠇꠤ ꠀꠁꠀ ꠇꠁꠟꠣ, “ꠀꠍꠍꠣꠟꠣꠝꠥ ꠀꠟꠣꠁꠇꠥꠝ, ꠇꠤꠔꠣ ꠛꠣ ꠔꠥꠝꠞꠣ ꠜꠣꠟꠣ ꠀꠍ ꠘꠤ?” ꠍꠣꠟꠣꠝꠞ ꠀꠟꠦꠇ ꠟꠁꠀ ꠔꠣꠞꠣ ꠇꠁꠟꠣ, “ꠎꠤꠅꠄ ꠍꠣꠛ, ꠜꠣꠟꠣ ꠀꠍꠤ।”
RUT 2:5 ꠔꠦꠃ ꠛꠥꠀꠎꠦ ꠔꠣꠘ ꠙꠞꠗꠣꠘ ꠇꠣꠝꠟꠣꠞꠦ ꠎꠤꠇꠣꠁꠟꠣ, “ꠅꠛꠣ, ꠅꠃ ꠎꠦꠘ ꠟꠥꠞꠦꠞ ꠁ ꠛꠦꠐꠤꠉꠥ ꠇꠦ?”
RUT 2:6 ꠅꠃ ꠢꠦ ꠇꠁꠟ, “ꠍꠣꠛ, ꠄꠘꠞꠦ ꠌꠤꠘꠍꠂꠘ ꠘꠣ ꠘꠤ? ꠄꠁꠘ ꠔ ꠀꠙꠘꠣꠞꠣꠞ ꠇꠥꠐꠥꠝ ꠘꠄꠅꠝꠤ ꠛꠦꠐꠤꠞ ꠙꠥꠀꠞ ꠛꠃ, ꠁ ꠛꠦꠐꠤꠞ ꠛꠣꠚꠞ ꠛꠣꠠꠤ ꠀꠍꠤꠟ ꠝꠥꠀꠛ ꠖꠦꠡꠅ।
RUT 2:7 ꠛꠦꠐꠤꠄ ꠀꠁꠀ ꠀꠝꠣꠞꠦ ꠇꠁꠟꠣ, ꠅꠃ ꠎꠦꠞꠣ ꠛꠣꠞ꠆ꠟꠤ ꠖꠣꠁꠞꠣ, ꠝꠦꠢꠦꠞꠛꠣꠘꠤ ꠇꠞꠤꠀ ꠀꠝꠣꠞꠦ ꠄꠞꠣꠞ ꠈꠞꠦ ꠈꠞꠦ ꠟꠥꠞꠤꠔꠦ ꠖꠤꠛꠣ ꠘꠤ? ꠛꠦꠐꠤ ꠔ ꠛꠤꠀꠘ ꠕꠣꠇꠤ ꠅꠈꠘ ꠙꠞ꠆ꠎꠘ꠆ꠔ ꠅꠘꠅ ꠀꠍꠂꠘ, ꠝꠣꠎꠈꠣꠘꠅ ꠈꠣꠟꠤ ꠃꠠꠣꠞ ꠔꠟꠦ ꠕꠥꠠꠣ ꠎꠤꠞꠣꠁꠍꠂꠘ।”
RUT 2:8 ꠅꠃ ꠛꠥꠀꠎꠦ ꠞꠥꠔꠞꠦ ꠇꠁꠟꠣ, “ꠅ ꠛꠁꠘ, ꠔꠥꠝꠤ ꠢꠣꠝꠦꠡꠣ ꠀꠝꠣꠞ ꠎꠝꠤꠘꠅ ꠟꠥꠞꠤꠅ, ꠀꠝꠣꠞ ꠅꠔꠣ ꠛꠦꠐꠤꠘ꠆ꠔꠞ ꠟꠉꠦ ꠟꠉꠦ ꠞꠁꠅ, ꠛꠣꠞꠣ ꠝꠣꠘꠡꠞ ꠎꠝꠤꠘꠅ ꠎꠣꠁꠅ ꠘꠣ,
RUT 2:9 ꠀꠝꠤ ꠀꠝꠣꠞ ꠇꠣꠝꠟꠣꠁꠘ꠆ꠔꠞꠦ ꠇꠁꠍꠤ, ꠔꠣꠞꠣ ꠔꠥꠝꠣꠞꠦ ꠍꠣꠔꠣꠁꠔ ꠘꠣꠄ, ꠈꠤꠀꠟ ꠞꠣꠈꠤꠅ ꠔꠣꠞꠣ ꠇꠥꠘꠖꠤꠘ ꠇꠥꠘ ꠎꠣꠉꠣꠔ ꠖꠣꠁꠞꠣ। ꠀꠞ ꠇꠣꠝꠟꠣꠁꠘ꠆ꠔꠦ ꠈꠣꠅꠀꠞ ꠟꠣꠉꠤ ꠎꠦꠔꠣ ꠙꠣꠘꠤ-ꠃꠘꠤ ꠀꠘꠍꠂꠘ, ꠙꠤꠀꠍꠦ ꠗꠞꠟꠦ ꠔꠥꠝꠤꠅ ꠅꠘ ꠕꠘꠦ ꠈꠣꠁꠅ।”
RUT 2:10 ꠁꠈꠣꠘ ꠢꠥꠘꠤꠀ ꠞꠥꠔꠦ ꠛꠥꠀꠎꠞ ꠙꠣꠅꠔ ꠗꠞꠤꠀ ꠇꠖꠝꠛꠥꠍꠤ ꠇꠞꠤꠀ ꠇꠁꠟꠣ, “ꠍꠣꠛ, ꠀꠝꠤ ꠔ ꠄꠇ ꠛꠤꠖꠦꠡꠤ ꠛꠦꠐꠤ, ꠔꠦꠛꠃ ꠀꠙꠘꠦ ꠇꠦꠘꠦ ꠀꠝꠣꠞꠦ ꠅꠔ ꠝꠣꠄꠀ-ꠖꠄꠀ ꠇꠞꠞꠣ?”
RUT 2:11 ꠔꠦꠃ ꠛꠥꠀꠎꠦ ꠎꠥꠀꠙ ꠖꠤꠟꠣ, “ꠔꠥꠝꠤ ꠠꠣꠠꠤ ꠛꠦꠐꠤ ꠅꠁꠀꠅ ꠔꠥꠝꠣꠞ ꠢꠠꠤꠞ ꠟꠣꠉꠤ ꠎꠦꠔꠣ ꠇꠞꠞꠣꠄ ꠁꠔꠣ ꠢꠇꠟꠔꠣꠃ ꠀꠝꠤ ꠢꠥꠘꠍꠤ, ꠔꠥꠝꠣꠞ ꠝꠣ-ꠛꠣꠚ ꠀꠞ ꠎꠘꠝ-ꠝꠣꠐꠤ ꠍꠣꠠꠤꠀ ꠁ ꠅꠌꠤꠘ ꠎꠣꠉꠣꠔ ꠀꠁꠍ।
RUT 2:12 ꠀꠟ꠆ꠟꠣꠄ ꠔꠥꠝꠣꠞꠦ ꠞꠢꠝ ꠇꠞꠃꠇ। ꠛꠘꠤ ꠁꠍꠞꠣꠁꠟꠞ ꠝꠣꠛꠥꠖ, ꠎꠦꠘ ꠒꠣꠈꠘꠣꠞ ꠔꠟꠦ ꠀꠁꠀ ꠔꠥꠝꠤ ꠀꠡꠞꠄ ꠟꠁꠍ, ꠄꠁꠘ ꠔꠥꠝꠣꠞ ꠡꠥꠟ꠆ꠟꠀꠘꠣ ꠙꠣꠅꠘꠣ ꠢꠇ ꠖꠣꠘ ꠇꠞꠃꠇ꠆ꠇꠣ।”
RUT 2:13 ꠅꠃ ꠞꠥꠔꠦ ꠇꠁꠟꠣ, “ꠍꠣꠛ, ꠀꠙꠘꠦ ꠎꠦꠘ ꠀꠝꠣꠞꠦ ꠅꠔ ꠝꠣꠄꠀꠖꠣꠞꠤ ꠝꠣꠔ ꠝꠣꠔꠤꠀ ꠀꠙꠘꠣꠞ ꠁ ꠛꠣꠘ꠆ꠖꠤꠞꠦ ꠡꠣꠅꠡ ꠎꠥꠉꠣꠁ ꠖꠤꠍꠂꠘ, ꠀꠝꠤ ꠔ ꠀꠙꠘꠣꠞ ꠁꠔꠣ ꠄꠇ ꠇꠣꠝꠟꠣ ꠛꠦꠐꠤꠞꠅ ꠢꠝꠣꠘꠤ ꠘꠣꠄ।”
RUT 2:14 ꠛꠣꠖꠦ ꠈꠣꠘꠤꠞ ꠅꠇ꠆ꠔ ꠀꠁꠀ ꠢꠣꠞꠟꠦ, ꠛꠥꠀꠎꠦ ꠞꠥꠔꠞꠦ ꠒꠣꠇꠖꠤ ꠀꠘꠤꠀ ꠇꠁꠟꠣ, “ꠅ ꠛꠁꠘ, ꠀꠁꠅ, ꠅꠘ ꠕꠣꠇꠤ ꠞꠥꠐꠤ ꠘꠤꠀ ꠕꠣꠟꠅ ꠜꠤꠎꠣꠁꠀ ꠈꠣꠅ।” ꠞꠥꠔ ꠀꠁꠀ ꠇꠣꠝꠟꠣ ꠛꠦꠐꠤꠘ꠆ꠔꠞ ꠉꠣꠟꠣꠔ ꠈꠣꠘꠤꠔ ꠛꠁꠟꠣ, ꠛꠁꠀ ꠢꠣꠞꠟꠦ ꠛꠥꠀꠎꠦ ꠔꠣꠘꠞꠦ ꠇꠤꠍꠥ ꠌꠤꠠꠣ-ꠝꠥꠠꠤ ꠖꠤꠟꠣ। ꠔꠦꠃ ꠞꠥꠔꠦ ꠁꠔꠣ ꠢꠇꠟꠔꠣ ꠈꠣꠁꠟꠣ, ꠈꠣꠁꠀ ꠢꠣꠞꠟꠦ ꠎꠦꠔꠣ ꠃꠙꠞꠤꠟ ꠁꠔꠣ ꠔꠣꠘ ꠛꠦꠉꠅ ꠢꠣꠞꠣꠁꠀ ꠕꠁꠟꠣ।
RUT 2:15 ꠛꠣꠖꠦ ꠞꠥꠔ ꠃꠑꠤꠀ ꠢꠤꠞꠛꠣꠞ ꠟꠥꠞꠣꠔ ꠎꠣꠁꠔꠣ ꠔꠤꠀꠞ ꠅꠁꠍꠂꠘ, ꠅꠃ ꠡꠝꠄ ꠛꠥꠀꠎꠦ ꠔꠣꠘ ꠇꠣꠝꠟꠣꠁꠘ꠆ꠔꠞꠦ ꠇꠁꠟꠣ, “ꠅꠛꠣ, ꠔꠥꠝꠞꠣ ꠛꠣꠞ꠆ꠟꠤ ꠖꠣꠅꠀꠞ ꠛꠣꠟꠣ ꠕꠥꠠꠣꠕꠥꠠꠤ ꠍꠠꠣꠁꠘ ꠕꠁꠀ ꠎꠣꠁꠅ, ꠔꠦꠃ ꠄꠁꠘ ꠟꠥꠞꠤꠟꠦ ꠅꠔꠣ ꠙꠣꠁꠛꠣ। ꠄꠁꠘ ꠇꠣꠐꠣ ꠝꠥꠁꠐ ꠕꠣꠇꠤ ꠍꠠꠣꠁꠘ ꠍꠤꠠꠤꠀ ꠘꠤꠟꠦꠅ ꠄꠘꠞꠦ ꠗꠝꠇ-ꠐꠝꠇ ꠖꠤꠅ ꠘꠣ।”
RUT 2:17 ꠞꠥꠔꠦ ꠢꠣꠁꠘ꠆ꠎꠣ ꠙꠞ꠆ꠎꠘ꠆ꠔ ꠅꠘꠅ ꠟꠥꠞꠤꠀ ꠝꠣꠠꠣ ꠖꠤꠀ ꠏꠣꠠꠤꠀ ꠍꠣꠚ ꠇꠞꠤꠀ ꠅꠘꠥꠝꠣꠘ ꠄꠇ ꠚꠥꠞꠣꠞ ꠛꠣꠞ꠆ꠟꠤ ꠟꠁꠀ ꠔꠣꠁꠘ ꠛꠣꠠꠤꠔ ꠉꠦꠟꠣ।
RUT 2:18 ꠉꠤꠀ ꠢꠣꠞꠟꠦ ꠔꠣꠘ ꠛꠦꠉꠞ ꠝꠍꠣ ꠛꠣꠞ ꠇꠞꠤꠀ ꠢꠠꠤꠞꠦ ꠖꠤꠟꠣ, ꠀꠞ ꠟꠥꠞꠣꠞ ꠛꠣꠞ꠆ꠟꠤꠞ ꠉꠣꠁꠐ ꠈꠥꠟꠤꠀ ꠔꠣꠘꠞꠦ ꠖꠦꠈꠣꠁꠟꠣ।
RUT 2:19 ꠛꠣꠞ꠆ꠟꠤ ꠖꠦꠈꠤꠀ ꠘꠄꠅꠝꠤꠄ ꠇꠁꠟꠣ, “ꠔꠥꠝꠤ ꠇꠣꠞ ꠎꠝꠤꠘꠅ ꠟꠥꠞꠣꠔ ꠉꠦꠍꠟꠣꠄ ꠉ? ꠔꠥꠝꠣꠞꠦ ꠎꠣꠞ ꠎꠝꠤꠘꠅ ꠟꠥꠞꠤꠔꠦ ꠖꠤꠍꠦ, ꠀꠟ꠆ꠟꠣꠄ ꠔꠣꠞ ꠜꠣꠟꠣ ꠇꠞꠃꠇ।” ꠔꠦꠃ ꠞꠥꠔꠦ ꠇꠁꠟꠣ, “ꠝꠣꠁꠎꠤ, ꠎꠦ ꠉꠤꠞꠡ꠆ꠔꠞ ꠎꠝꠤꠘꠅ ꠀꠝꠤ ꠟꠥꠞꠤꠍꠤ, ꠄꠘ ꠘꠣꠝ ꠅꠁꠟ ꠛꠥꠀꠎ।”
RUT 2:20 ꠁꠈꠣꠘ ꠢꠥꠘꠤꠀ ꠘꠄꠅꠝꠤꠄ ꠇꠁꠟꠣ, “ꠔꠣꠝꠣꠝ ꠎꠤꠘ꠆ꠖꠣ ꠀꠞ ꠝꠥꠞ꠆ꠖꠣꠞ ꠃꠙꠞꠦ ꠢꠇ ꠁꠘꠍꠣꠚ ꠇꠞꠘꠦꠀꠟꠣ ꠝꠣꠛꠥꠖꠦ ꠄꠞꠦ ꠞꠢꠝꠔ ꠖꠦꠃꠇ꠆ꠇꠣ। ꠄꠁꠘ ꠔ ꠔꠥꠝꠣꠞ ꠢꠃꠞꠞ ꠇꠞꠤꠛ ꠝꠣꠘꠥꠡ। ꠀꠝꠞꠣꠞ ꠙꠞꠤꠛꠣꠞꠞꠦ ꠖꠦꠈꠣ-ꠢꠥꠘꠣ ꠀꠞ ꠈꠣꠟꠣꠍ ꠇꠞꠣꠞ ꠄꠈꠔꠤꠀꠞ ꠎꠦꠞꠣꠞ ꠀꠍꠦ, ꠄꠁꠘ ꠅꠁꠟꠣ ꠄꠞꠣꠞ ꠝꠣꠎꠞ ꠄꠇꠎꠘ।”
RUT 2:21 ꠞꠥꠔꠦ ꠇꠁꠟꠣ, “ꠝꠣꠁꠎꠤ, ꠄꠝꠘ ꠇꠤ ꠅꠃ ꠍꠣꠛꠦ ꠀꠝꠣꠞꠦ ꠇꠁꠍꠂꠘ, ꠅ ꠛꠁꠘ, ꠎꠔꠖꠤꠘ ꠀꠝꠣꠞ ꠖꠣꠅꠀ-ꠇꠣꠐꠤ ꠀꠍꠦ, ꠅꠔꠖꠤꠘ ꠔꠥꠝꠤ ꠀꠝꠣꠞ ꠎꠝꠤꠘꠅ ꠀꠁꠀ ꠀꠝꠣꠞ ꠛꠣꠘ꠆ꠖꠤꠘ꠆ꠔꠞ ꠟꠉꠦ ꠞꠁꠀ ꠟꠥꠞꠤꠅ।”
RUT 2:22 ꠘꠄꠅꠝꠤꠄ ꠇꠁꠟꠣ, “ꠁꠈꠣꠘ ꠔ ꠜꠣꠟꠣ ꠅꠁꠛꠞꠦ ꠝꠣꠁ, ꠔꠥꠝꠤ ꠄꠘ ꠎꠝꠤꠘꠅ ꠉꠤꠀ ꠔꠣꠘ ꠛꠣꠘ꠆ꠖꠤꠘ꠆ꠔꠞ ꠟꠉꠦ ꠞꠁꠀ ꠟꠥꠞꠤꠅ। ꠛꠣꠞꠣ ꠎꠝꠤꠘꠅ ꠎꠣꠁꠅ ꠘꠣ, ꠔꠦꠃ ꠇꠦꠃ ꠔꠥꠝꠣꠞꠦ ꠍꠣꠔꠣꠁꠔ ꠘꠣꠄ।”
RUT 2:23 ꠛꠣꠞ꠆ꠟꠤ ꠀꠞ ꠉꠝ ꠖꠣꠅꠀ ꠎꠔꠖꠤꠘ ꠀꠍꠤꠟ ꠅꠔꠖꠤꠘꠃ ꠞꠥꠔꠦ ꠉꠤꠀ ꠛꠥꠀꠎꠞ ꠇꠣꠝꠟꠣ ꠛꠦꠐꠤꠘ꠆ꠔꠞ ꠟꠉꠦ ꠞꠁꠀ ꠟꠥꠞꠤꠟꠣ, ꠀꠞ ꠔꠣꠘ ꠢꠠꠤꠞ ꠟꠉꠦ ꠝꠤꠟꠤ-ꠝꠤꠡꠤ ꠞꠁꠟꠣ।
RUT 3:1 ꠇꠄꠖꠤꠘ ꠛꠣꠖꠦ ꠛꠤꠛꠤ ꠘꠄꠅꠝꠤꠄ ꠞꠥꠔꠞꠦ ꠇꠁꠟꠣ, “ꠀꠝꠤ ꠝꠘꠅ ꠇꠞꠞꠣꠝ ꠔꠥꠝꠤ ꠢꠤꠞꠛꠣꠞ ꠡꠥꠈꠤ-ꠡꠋꠡꠣꠞꠤ ꠅꠅ।
RUT 3:2 ꠔꠥꠝꠤ ꠎꠣꠞ ꠇꠣꠝꠟꠣ ꠛꠦꠐꠤꠘ꠆ꠔꠞ ꠟꠉꠦ ꠞꠁꠀ ꠟꠥꠞꠤꠛꠣꠄ, ꠅꠃ ꠛꠥꠀꠎ ꠔ ꠄꠝꠘꠦꠃ ꠀꠝꠞꠣꠞ ꠇꠥꠐꠥꠝ। ꠀꠁꠎ ꠞꠣꠁꠔ ꠔꠣꠁꠘ ꠈꠟꠣꠔ ꠀꠁꠀ ꠛꠣꠞ꠆ꠟꠤ ꠝꠣꠠꠣ ꠖꠤꠛꠣ।
RUT 3:3 ꠔꠦ ꠔꠥꠝꠤ ꠄꠇ ꠇꠣꠝ ꠇꠞꠅ, ꠔꠥꠝꠤ ꠘꠣꠁꠀ-ꠗꠁꠀ, ꠔꠦꠟ-ꠔꠥꠟ ꠝꠣꠈꠤꠀ, ꠢꠣꠎꠤ-ꠙꠣꠠꠤ ꠔꠣꠘ ꠈꠟꠣꠔ ꠎꠣꠅꠉꠤ। ꠅꠁꠟꠦ ꠔꠣꠁꠘ ꠔꠥꠝꠣꠞꠦ ꠖꠦꠈꠂꠘ ꠘꠣ ꠎꠣꠘꠥ।
RUT 3:4 ꠞꠣꠁꠔꠇꠥꠞ ꠈꠣꠅꠀ-ꠖꠣꠅꠀ ꠛꠣꠖꠦ ꠄꠁꠘ ꠎꠦꠛꠟꠣ ꠢꠥꠔꠤꠛꠣ, ꠅꠃ ꠡꠝꠄ ꠔꠥꠝꠤ ꠄꠘ ꠛꠤꠍꠘꠣ ꠌꠤꠘꠤꠀ ꠞꠣꠈꠤꠅ। ꠛꠣꠖꠦ ꠢꠘꠅ ꠉꠤꠀ ꠔꠣꠘ ꠙꠣꠅꠞ ꠃꠙꠞꠞ ꠈꠦꠔꠣ ꠢꠞꠣꠁꠀ ꠢꠘꠅ ꠢꠥꠔꠤꠞꠁꠅ। ꠢꠥꠔꠤꠀ ꠢꠣꠞꠟꠦ ꠇꠤꠔꠣ ꠅꠁꠛ, ꠔꠣꠁꠘ ꠄꠝꠘꠦꠃ ꠇꠁꠀ ꠖꠤꠛꠣ।”
RUT 3:5 ꠞꠥꠔꠦ ꠇꠁꠟꠣ, “ꠎꠤ ꠀꠁꠌ꠆ꠍꠣ, ꠀꠙꠘꠦ ꠎꠦꠟꠣ ꠇꠁꠞꠣ ꠅꠟꠣꠃ ꠇꠞꠝꠥꠘꠦ।”
RUT 3:6 ꠛꠣꠖꠦ ꠡꠝꠄ ꠝꠔ ꠔꠣꠁꠘ ꠈꠟꠣꠔ ꠉꠦꠟꠣ, ꠀꠞ ꠢꠠꠤꠄ ꠎꠦꠟꠣ ꠇꠁꠍꠟꠣ ꠅꠟꠣꠃ ꠇꠞꠟꠣ।
RUT 3:7 ꠈꠣꠅꠀ-ꠖꠣꠅꠀ ꠛꠣꠖꠦ ꠛꠥꠀꠎ ꠎꠦꠛꠟꠣ ꠈꠥꠡ ꠝꠤꠎꠣꠎꠦ ꠔꠣꠘ ꠈꠟꠣꠞ ꠃꠠꠣꠞ ꠔꠟꠦ ꠉꠤꠀ ꠢꠥꠔꠤꠟꠣ, ꠞꠥꠔꠅ ꠟꠣꠄ ꠟꠣꠄ ꠢꠘꠅ ꠉꠤꠀ ꠛꠥꠀꠎꠞ ꠙꠣꠅꠞ ꠃꠙꠞ ꠕꠘꠦ ꠈꠦꠔꠣ ꠢꠞꠣꠁꠀ ꠙꠣꠅꠞ ꠇꠣꠘ꠆ꠖꠣꠔ ꠢꠥꠔꠤꠞꠁꠟꠣ।
RUT 3:8 ꠀꠗꠣ ꠞꠣꠁꠔꠇꠥꠞ ꠛꠣꠟꠣ ꠛꠥꠀꠎꠦ ꠇꠞꠐ ꠚꠤꠞꠣꠁꠀ ꠄꠘꠞꠦ ꠖꠦꠈꠤꠀ ꠌꠝꠇꠤꠀ ꠃꠑꠤꠀ ꠇꠁꠟꠣ, “ꠔꠥꠝꠤ ꠇꠦ ꠉ?” ꠞꠥꠔꠦ ꠇꠁꠟꠣ, “ꠍꠣꠛ, ꠀꠝꠤ ꠀꠙꠘꠣꠞ ꠛꠣꠘ꠆ꠖꠤ ꠞꠥꠔ, ꠀꠙꠘꠦ ꠀꠙꠘꠣꠞ ꠈꠦꠔꠣꠞ ꠔꠟꠈꠣꠘꠅ ꠛꠣꠘ꠆ꠖꠤꠞꠦ ꠄꠇꠎꠞꠣ ꠑꠣꠁ ꠖꠦꠃꠇ꠆ꠇꠣ। ꠀꠝꠞꠣꠞꠦ ꠖꠦꠈꠣ-ꠢꠥꠘꠣ ꠇꠞꠞꠣ ꠇꠥꠐꠥꠝ ꠅꠇꠟꠞ ꠝꠣꠎꠦ ꠀꠙꠘꠦ ꠔ ꠄꠇꠎꠘ।”
RUT 3:10 ꠛꠥꠀꠎꠦ ꠎꠥꠀꠙ ꠖꠤꠟꠣ, “ꠛꠁꠘꠞꠦ, ꠀꠟ꠆ꠟꠣꠄ ꠔꠥꠝꠣꠞꠦ ꠞꠢꠝ ꠇꠞꠃꠇ꠆ꠇꠣ, ꠔꠥꠝꠤ ꠙꠄꠟꠣ ꠕꠣꠇꠤꠃ ꠎꠦꠟꠣ ꠢꠞꠤꠞ ꠛꠤꠡ꠆ꠛꠣꠡꠤ ꠀꠍꠟꠣꠄ, ꠔꠣꠁꠞ ꠜꠣꠟꠣꠁꠞ ꠟꠣꠉꠤ ꠀꠁꠎ ꠀꠞꠅ ꠛꠦꠡꠤ ꠛꠤꠡ꠆ꠛꠣꠡꠤ ꠎꠣꠁꠞ ꠇꠞꠟꠣꠄ, ꠔꠥꠝꠤ ꠔ ꠗꠘꠤ-ꠉꠞꠤꠛ ꠇꠥꠘꠥ ꠎꠥꠀꠘ ꠛꠦꠐꠣꠞ ꠟꠉꠦ ꠎꠣꠅꠀꠞ ꠟꠣꠉꠤ ꠌꠤꠘ꠆ꠔꠣ ꠇꠞꠍ ꠘꠣ।
RUT 3:11 ꠀꠡ꠆ꠔꠣ ꠉꠣꠃꠞ ꠢꠇꠟ ꠝꠣꠘꠡꠦꠃ ꠔꠥꠝꠣꠞꠦ ꠜꠣꠟꠣ ꠙꠣꠄ। ꠔꠥꠝꠤ ꠌꠤꠘ꠆ꠔꠣ ꠇꠞꠤꠅ ꠘꠣ, ꠔꠥꠝꠤ ꠎꠦꠟꠣ ꠌꠣꠁꠞꠣꠄ, ꠀꠝꠤ ꠅꠟꠣꠃ ꠇꠞꠝꠥ।
RUT 3:12 ꠅꠁꠟꠦ ꠀꠝꠣ ꠕꠘꠦ ꠀꠞꠅ ꠇꠞꠤꠛ ꠔꠥꠝꠣꠔꠣꠘꠞ ꠄꠇꠎꠘ ꠀꠍꠂꠘ,
RUT 3:13 ꠇꠣꠁꠟ ꠛꠤꠀꠘꠇꠥ ꠛꠣꠟꠣ ꠀꠝꠤ ꠔꠣꠘ ꠟꠉꠦ ꠝꠣꠔꠤꠝꠥ, ꠔꠣꠁꠘ ꠎꠥꠖꠤ ꠔꠥꠝꠣꠞꠦ ꠡꠣꠖꠤ ꠇꠞꠔꠦ ꠞꠣꠎꠤ ꠅꠁꠘ ꠔꠦ ꠔ ꠜꠣꠟꠣ, ꠔꠣꠁꠘꠃ ꠡꠣꠖꠤ ꠇꠞꠤꠟ꠆ꠟꠣ। ꠀꠞ ꠘꠣ ꠅꠁꠟꠦ ꠀꠝꠤ ꠀꠟ꠆ꠟꠣꠞ ꠇꠍꠝ ꠈꠣꠁꠀ ꠇꠁꠀꠞ, ꠀꠝꠤ ꠔꠥꠝꠣꠞꠦ ꠡꠝꠎꠤꠀ ꠟꠁꠝꠥ। ꠅꠈꠘ ꠔꠥꠝꠤ ꠅꠘꠅꠃ ꠞꠣꠁꠔ ꠇꠣꠐꠣꠁꠟꠣꠅ, ꠞꠣꠁꠔꠇꠣꠟ ꠀꠞ ꠎꠣꠁꠅ ꠘꠣ।”
RUT 3:14 ꠚꠎꠞꠞ ꠀꠉ ꠙꠞ꠆ꠎꠘ꠆ꠔ ꠞꠥꠔ ꠛꠥꠀꠎꠞ ꠙꠣꠅꠞ ꠇꠣꠘ꠆ꠖꠣꠔ ꠢꠥꠔꠤꠞꠁꠟꠣ। ꠛꠥꠀꠎꠦ ꠞꠥꠔꠞꠦ ꠇꠁꠟꠣ, “ꠔꠥꠝꠤ ꠎꠦꠘ ꠁꠘꠅ ꠀꠁꠍ, ꠁꠈꠣꠘ ꠎꠣꠘꠥ ꠇꠦꠃ ꠘꠣ ꠎꠣꠘꠦ।” ꠔꠦꠃ ꠀꠘ꠆ꠖꠣꠁꠞ ꠞꠁꠔꠦꠃ ꠞꠥꠔ ꠛꠣꠠꠤꠔ ꠎꠣꠁꠔꠣꠉꠤ ꠇꠞꠤ ꠎꠥꠁꠔ ꠅꠁꠟꠣ।
RUT 3:15 ꠀꠞ ꠛꠥꠀꠎꠦ ꠔꠣꠘꠞꠦ ꠇꠁꠟꠣ, “ꠢꠠꠤꠞ ꠍꠣꠝꠘꠦ ꠈꠣꠟꠤ ꠀꠔꠦ ꠇꠤꠟꠣ ꠎꠣꠁꠔꠣꠄ? ꠖꠦꠈꠤ, ꠔꠥꠝꠣꠞ ꠌꠣꠖ꠆ꠖꠞꠈꠣꠘ ꠝꠦꠟꠣꠅ।” ꠞꠥꠔꠦ ꠌꠣꠖ꠆ꠖꠞ ꠝꠦꠟꠤꠀ ꠇꠥꠘꠣꠔ ꠗꠞꠟꠣ ꠀꠞ ꠛꠥꠀꠎꠦ ꠍꠄ ꠙꠦꠐꠥ ꠛꠣꠞ꠆ꠟꠤ ꠀꠘꠤꠀ ꠌꠣꠖ꠆ꠖꠞꠖꠤ ꠛꠣꠘ꠆ꠖꠤꠀ ꠔꠣꠘ ꠇꠣꠘ꠆ꠖꠅ ꠔꠥꠟꠤꠀ ꠖꠤꠟꠣ। ꠞꠥꠔꠦ ꠅꠃ ꠉꠣꠁꠐ ꠟꠁꠀ ꠛꠣꠠꠤꠔ ꠉꠦꠟꠣꠉꠤ।
RUT 3:16 ꠉꠤꠀ ꠢꠣꠞꠟꠦ ꠔꠣꠘ ꠢꠠꠤꠄ ꠎꠤꠇꠣꠁꠟꠣ, “ꠇꠤꠔꠣ ꠉ ꠝꠣꠁ, ꠈꠛꠞ ꠇꠤꠔꠣ?” ꠔꠦꠃ ꠛꠥꠀꠎꠦ ꠎꠦꠔꠣ ꠎꠦꠔꠣ ꠇꠁꠍꠂꠘ ꠅꠔꠣ ꠔꠣꠘ ꠢꠠꠤꠞ ꠉꠦꠍꠦ ꠈꠥꠟꠤꠀ ꠇꠁꠟꠣ,
RUT 3:17 ꠟꠉꠦ ꠄꠅꠈꠣꠘꠅ ꠇꠁꠟꠣ, “ꠛꠥꠀꠎꠦ ꠇꠁꠍꠂꠘ ꠔꠥꠝꠤ ꠢꠠꠤꠞ ꠉꠦꠍꠦ ꠈꠣꠟꠤ ꠀꠔꠦ ꠇꠤꠟꠣ ꠎꠣꠁꠔꠣꠄ, ꠇꠁꠀ ꠔꠣꠁꠘ ꠀꠝꠣꠞꠦ ꠍꠄ ꠙꠦꠐꠥ ꠛꠣꠞ꠆ꠟꠤꠅ ꠛꠣꠘ꠆ꠖꠤꠀ ꠖꠤꠍꠂꠘ।”
RUT 3:18 ꠁꠔꠣ ꠢꠥꠘꠤꠀ ꠢꠠꠤꠄ ꠇꠁꠟꠣ, “ꠔꠦ ꠢꠦꠡ ꠙꠞ꠆ꠎꠘ꠆ꠔ ꠇꠤꠔꠣ ꠅꠄ ꠖꠦꠈꠅ, ꠁ ꠝꠣꠘꠡꠦ ꠀꠁꠎꠇꠥꠞ ꠝꠣꠎꠦꠃ ꠄꠞ ꠄꠇ ꠉꠣꠟꠣ ꠘꠣ ꠟꠣꠉꠣꠁꠀ ꠖꠝ ꠟꠁꠔꠣ ꠘꠣꠄ।”
RUT 4:1 ꠛꠤꠀꠘꠦ ꠃꠑꠤꠀ ꠛꠥꠀꠎ ꠉꠣꠃꠞ ꠙꠣꠁꠘ꠆ꠌꠣꠁꠔꠤ ꠛꠂꠑꠇ ꠈꠣꠘꠣꠔ ꠀꠁꠀ ꠛꠁꠞꠁꠟꠣ, ꠝꠘꠦ ꠝꠘꠦ, ꠢꠃ ꠇꠥꠐꠥꠝꠞ ꠛꠣꠞ ꠌꠣꠁꠞꠣ ꠎꠣꠞ ꠇꠕꠣ ꠔꠣꠁꠘ ꠇꠁꠍꠟꠣ। ꠀꠈꠔꠣꠃ ꠖꠦꠈꠟꠣ, ꠢꠃ ꠝꠣꠘꠥꠡ ꠙꠕꠦꠖꠤ ꠀꠐꠤꠀ ꠎꠣꠁꠞꠣ, ꠖꠦꠈꠤꠀ ꠔꠣꠁꠘ ꠄꠘꠞꠦ ꠒꠣꠇ ꠖꠤꠀ ꠇꠁꠟꠣ, “ꠅ ꠜꠣꠁ ꠍꠣꠛ, ꠅꠛꠣꠄ ꠕꠥꠠꠣ ꠢꠥꠘꠤ ꠎꠣꠅ।” ꠔꠦꠃ ꠢꠦꠁꠘ ꠀꠁꠟꠣ,
RUT 4:2 ꠀꠞ ꠛꠥꠀꠎꠦ ꠉꠣꠃꠞ ꠛꠥꠎꠖꠣꠞ ꠝꠄ-ꠝꠥꠞꠛ꠆ꠛꠤ ꠖꠡ ꠎꠘꠞꠦ ꠀꠘꠤꠀ ꠛꠅꠀꠁꠟꠣ।
RUT 4:3 ꠛꠁꠀ ꠢꠣꠞꠟꠦ ꠛꠥꠀꠎꠦ ꠢꠇꠟꠞ ꠍꠣꠝꠘꠦ ꠢꠃ ꠎꠘꠞꠦ ꠇꠁꠟꠣ, “ꠘꠄꠅꠝꠤ ꠛꠦꠐꠤꠄ ꠝꠥꠀꠛ ꠖꠦꠡ ꠕꠣꠇꠤ ꠚꠤꠞꠤꠀ ꠀꠁꠀ ꠅꠈꠘ ꠀꠝꠞꠣꠞ ꠇꠥꠐꠥꠝ ꠀꠟꠤ ꠝꠣꠟꠤꠇꠞ ꠎꠣꠉꠣ-ꠎꠝꠤꠘ ꠅꠔꠣ ꠛꠦꠌꠤꠟꠣꠁꠔꠣ ꠌꠣꠁꠞꠣ।
RUT 4:4 ꠀꠝꠤ ꠢꠇꠟꠞꠦ ꠄꠇꠟꠉꠦ ꠖꠟꠣ ꠇꠞꠍꠤ, ꠔꠦ ꠔꠥꠝꠤ ꠅꠁꠟꠣꠄ ꠔꠣꠘ ꠇꠞꠤꠛ ꠝꠣꠘꠥꠡ, ꠄꠞꠟꠣꠉꠤ ꠅꠃ ꠝꠥꠞꠛ꠆ꠛꠤ ꠅꠇꠟ ꠀꠞ ꠉꠥꠡ꠆ꠐꠤꠞ ꠢꠇꠟꠞ ꠍꠣꠝꠘꠦ ꠅꠈꠘꠣꠁꠘꠔꠣ ꠈꠣꠟꠣꠍ ꠇꠞꠣꠞ ꠟꠣꠉꠤ ꠔꠥꠝꠤ ꠟꠁꠟꠣꠅ। ꠀꠞ ꠔꠥꠝꠤ ꠎꠥꠖꠤ ꠘꠣ ꠘꠦꠅ, ꠔꠦ ꠀꠝꠣꠞꠦ ꠇꠅ, ꠀꠝꠤ ꠘꠤꠝꠥ। ꠁ ꠙꠞꠤꠛꠣꠞꠞ ꠟꠣꠉꠤ ꠔꠥꠝꠤꠃ ꠛꠠ ꠇꠞꠤꠛ, ꠄꠞꠛꠣꠖꠦ ꠅꠁꠟꠣꠝ ꠀꠝꠤ।” ꠁꠈꠣꠘ ꠢꠥꠘꠤꠀ ꠢꠦꠁꠘ ꠇꠁꠟꠣ, “ꠀꠁꠌ꠆ꠍꠣ, ꠀꠝꠤ ꠟꠁꠝꠥꠘꠦ।”
RUT 4:5 ꠔꠦꠃ ꠛꠥꠀꠎꠦ ꠃꠑꠤꠀ ꠇꠁꠟꠣ, “ꠔꠦ ꠔꠥꠝꠤ ꠀꠞꠅ ꠄꠇꠈꠣꠘ ꠇꠣꠝ ꠇꠞꠔꠦ ꠅꠁꠛ, ꠔꠥꠝꠤ ꠘꠄꠅꠝꠤ ꠛꠦꠐꠤꠞ ꠎꠝꠤꠘꠞ ꠟꠉꠦ ꠇꠞꠤ ꠝꠞꠣꠞ ꠈꠣꠘ꠆ꠖꠣꠘꠈꠣꠘ ꠇꠣꠁꠝ ꠞꠣꠈꠣꠞ ꠟꠣꠉꠤ, ꠔꠣꠞ ꠠꠣꠠꠤ ꠛꠃ ꠝꠥꠀꠛ ꠖꠦꠡꠞ ꠞꠥꠔꠞꠦꠅ ꠡꠣꠖꠤ ꠇꠞꠣ ꠟꠣꠉꠛ।”
RUT 4:6 ꠔꠦꠃ ꠢꠦꠁꠘ ꠎꠥꠀꠙ ꠖꠤꠟꠣ, “ꠘꠣ, ꠔꠦ ꠀꠝꠤ ꠙꠣꠞꠔꠣꠝ ꠘꠣꠄ। ꠀꠞꠘꠣꠄ ꠀꠝꠣꠞ ꠘꠤꠎꠞꠔꠣ ꠟꠁꠀꠃ ꠜꠦꠎꠣꠟ ꠟꠣꠉꠤꠎꠤꠛ। ꠀꠞ ꠀꠝꠤ ꠎꠦꠛꠟꠣ ꠙꠣꠞꠤꠀꠞ ꠘꠣ, ꠔꠦ ꠀꠙꠘꠦꠃ ꠁꠔꠣ ꠉꠍꠤꠟꠣꠃꠇ꠆ꠇꠣ।”
RUT 4:7 ꠅꠈꠣꠘ ꠇꠁꠀ ꠢꠣꠞꠤ ꠢꠤ ꠀꠝꠟꠞ ꠡꠞꠤꠅꠔꠞ ꠀꠁꠘ, ꠀꠞ ꠁꠍꠞꠣꠁꠟ ꠡꠝꠣꠎꠞ ꠇꠥꠐꠝꠞ ꠎꠣꠉꠣ-ꠎꠝꠤꠘ ꠈꠞꠤꠖ-ꠛꠤꠇꠤꠞ ꠞꠦꠅꠀꠎ ꠝꠣꠚꠤꠇ ꠢꠦꠁꠘ ꠔꠣꠘ ꠙꠣꠅꠞ ꠎꠥꠔꠣ ꠈꠥꠟꠤꠀ ꠛꠥꠀꠎꠞꠦ ꠖꠤꠟꠣꠁꠟꠣ, ꠀꠞ ꠇꠁꠟꠣ, “ꠀꠙꠘꠦꠃ ꠁꠔꠣ ꠟꠁꠟꠣꠃꠇ꠆ꠇꠣ।”
RUT 4:9 ꠔꠦꠃ ꠛꠥꠀꠎꠦ ꠇꠁꠟꠣ, “ꠔꠦ ꠀꠝꠤ ꠝꠄ-ꠝꠥꠞꠛ꠆ꠛꠤ ꠀꠞ ꠛꠣꠇꠤ ꠢꠇꠟꠞꠦ ꠡꠣꠇ꠆ꠇꠤ ꠞꠣꠈꠤꠀ ꠇꠁꠀꠞ, ꠀꠝꠤ ꠘꠄꠅꠝꠤ ꠛꠦꠐꠤꠞ ꠉꠦꠍ ꠕꠘꠦ ꠀꠟꠤ ꠝꠣꠟꠤꠇꠞ ꠢꠇ꠆ꠇꠟꠔꠣ ꠀꠞ ꠔꠣꠘ ꠖꠥꠁ ꠙꠥꠀ ꠝꠢꠟꠥꠘ ꠀꠞ ꠇꠤꠟꠤꠅꠘꠞ ꠢꠇ꠆ꠇꠟꠔꠣꠅ ꠟꠁꠟꠤꠟꠣꠝ।
RUT 4:10 ꠀꠞ ꠝꠞꠣ ꠝꠣꠘꠡꠞ ꠘꠣꠝ ꠎꠤꠘ꠆ꠖꠣ ꠞꠣꠈꠣꠞ ꠟꠣꠉꠤ, ꠔꠣꠞ ꠗꠘ-ꠍꠣꠝꠣꠘꠣ ꠀꠞ ꠎꠝꠤ-ꠝꠤꠞꠣꠡ ꠛꠣꠌꠣꠘꠤꠞ ꠟꠣꠉꠤ ꠀꠝꠤ ꠝꠢꠟꠥꠘꠞ ꠠꠣꠠꠤ ꠛꠃ ꠝꠥꠀꠛ ꠖꠦꠡꠞ ꠞꠥꠔꠞꠦꠅ ꠇꠛꠥꠟ ꠇꠞꠤꠟ꠆ꠟꠣꠝ, ꠎꠣꠔꠦ ꠁ ꠉꠣꠃ ꠀꠞ ꠉꠥꠡ꠆ꠐꠤꠞ ꠝꠣꠎꠦ ꠝꠞꠣꠞ ꠘꠣꠝꠈꠣꠘ ꠇꠣꠁꠝ ꠞꠄ। ꠀꠁꠎ ꠀꠙꠘꠣꠞꠣ ꠁꠔꠣ ꠢꠇ꠆ꠇꠟꠔꠣꠞ ꠡꠣꠇ꠆ꠇꠤ ꠞꠁꠟꠣ।”
RUT 4:11 ꠔꠦꠃ ꠝꠎꠟꠤꠍꠞ ꠢꠇꠟꠦ ꠇꠁꠟꠣ, “ꠅꠄ, ꠀꠝꠞꠣ ꠁꠔꠣꠞ ꠡꠣꠇ꠆ꠇꠤ ꠞꠁꠟꠣꠝ।” ꠅꠈꠣꠘ ꠇꠁꠀꠃ ꠔꠣꠞꠣ ꠖꠥꠀ ꠇꠞꠟꠣ, “ꠅꠃ ꠎꠦ ꠇꠁꠘꠣꠞꠦ ꠀꠙꠘꠦ ꠇꠛꠥꠟ ꠇꠞꠟꠣ, ꠝꠣꠛꠥꠖꠦ ꠁꠀꠇꠥꠛ ꠘꠛꠤꠞ ꠖꠥꠁ ꠛꠤꠛꠤ ꠞꠣꠢꠦꠟꠣ ꠀꠞ ꠟꠦꠀ, ꠎꠦ ꠖꠥꠁꠎꠘꠦ ꠀꠡ꠆ꠔꠣ ꠛꠘꠤ ꠁꠍꠞꠣꠁꠟ ꠎꠣꠔꠤꠞꠦ ꠉꠠꠤꠀ ꠔꠥꠟꠍꠦ, ꠄꠞꠣꠞ ꠟꠣꠈꠣꠘꠃ ꠁ ꠇꠁꠘꠣꠞꠦ ꠃꠎꠤꠟꠣ ꠇꠞꠃꠇ꠆ꠇꠣ। ꠀꠡ꠆ꠔꠣ ꠛꠦꠕꠦꠟꠢꠣꠝ ꠉꠣꠃꠔ ꠀꠙꠘꠣꠞ ꠡꠥꠘꠣꠝ ꠛꠣꠠꠃꠇ, ꠁꠚ꠆ꠞꠣꠕꠣ ꠉꠥꠡ꠆ꠐꠤꠞ ꠝꠣꠎꠦ ꠀꠟ꠆ꠟꠣꠄ ꠀꠙꠘꠣꠞꠦ ꠗꠘꠤ-ꠍꠣꠝꠘꠤ ꠛꠣꠘꠣꠃꠇ।
RUT 4:12 ꠞꠥꠔꠞ ꠙꠦꠐꠅ ꠕꠣꠇꠤ ꠀꠟ꠆ꠟꠣꠄ ꠀꠙꠘꠣꠞꠦ ꠎꠔ ꠀꠅꠟꠣꠖ ꠖꠤꠛꠣ, ꠄꠞꠣ ꠎꠣꠘꠥ ꠔꠣꠝꠣꠞ ꠀꠞ ꠄꠢꠥꠖꠣꠞ ꠙꠥꠔ ꠚꠤꠞꠥꠎꠞ ꠈꠣꠘ꠆ꠖꠣꠘꠞ ꠟꠣꠈꠣꠘ ꠅꠁꠘ।”
RUT 4:13 ꠛꠥꠀꠎꠦ ꠛꠤꠛꠤ ꠞꠥꠔꠞꠦ ꠡꠣꠖꠤ ꠇꠞꠤꠀ ꠔꠣꠘ ꠛꠣꠠꠤꠔ ꠟꠁꠀ ꠉꠦꠟꠣ, ꠔꠣꠞꠣ ꠖꠥꠁꠅꠎꠘꠦ ꠊꠞ-ꠡꠋꠡꠣꠞ ꠇꠞꠟꠣ, ꠛꠣꠖꠦ ꠝꠣꠛꠥꠖꠞ ꠞꠢꠝꠔꠦ ꠔꠣꠞꠣꠞ ꠄꠇ ꠙꠥꠀ ꠅꠁꠟ।
RUT 4:14 ꠔꠦꠃ ꠀꠞꠤ-ꠚꠞꠤꠞ ꠛꠦꠐꠤꠘ꠆ꠔꠦ ꠀꠁꠀ ꠢꠥꠞꠥꠔ꠆ꠔꠣ ꠖꠦꠈꠤꠀ ꠘꠄꠅꠝꠤꠞꠦ ꠇꠁꠟꠣ, “ꠀꠟꠢꠣꠝꠖꠥꠟꠤꠟ꠆ꠟꠣ, ꠔꠥꠝꠣꠞꠦ ꠉ ꠡꠥꠘꠣ, ꠀꠟ꠆ꠟꠣꠄ ꠀꠁꠎ ꠀꠎꠣꠖ ꠇꠞꠣꠞ ꠟꠣꠉꠤ ꠄꠇ ꠘꠄꠀ ꠎꠣꠝꠣꠁ ꠖꠤꠍꠂꠘ। ꠀꠡ꠆ꠔꠣ ꠁꠍꠞꠣꠁꠟ ꠖꠦꠡ ꠎꠥꠠꠤ ꠄꠘ ꠡꠥꠘꠣꠝ ꠅꠃꠇ।
RUT 4:15 ꠄꠁꠘ ꠔꠥꠝꠣꠞꠦ ꠛꠥꠠꠣ ꠇꠣꠟꠅ ꠚꠥꠞꠚꠥꠞꠣ ꠇꠞꠤ ꠔꠥꠟꠃꠇ꠆ꠇꠣ, ꠛꠥꠠꠤꠞ ꠈꠦꠎꠝꠔ ꠇꠞꠃꠇ꠆ꠇꠣ। ꠔꠥꠝꠣꠞ ꠙꠥꠔꠞ ꠅꠃ ꠛꠃ ꠔ ꠔꠥꠝꠣꠞ ꠟꠣꠉꠤ ꠡꠣꠔ ꠙꠥꠀ ꠕꠣꠇꠤꠅ ꠖꠣꠝꠤ, ꠔꠣꠁ ꠔꠥꠝꠣꠞꠦ ꠖꠤꠟꠦ-ꠎꠣꠘꠦ ꠝꠣꠄꠀ ꠇꠞꠦ, ꠅꠃ ꠛꠃꠞ ꠙꠦꠐ ꠕꠘꠦꠃ ꠁ ꠀꠅꠟꠣꠖꠞ ꠎꠘꠝ ꠅꠁꠍꠦ।”
RUT 4:16 ꠔꠦꠃ ꠛꠤꠛꠤ ꠘꠄꠅꠝꠤꠄ ꠁ ꠘꠣꠔꠤꠞꠦ ꠃꠞꠅ ꠟꠁꠀ ꠔꠣꠞ ꠎꠄ-ꠎꠔꠘ ꠇꠞꠟꠣ।
RUT 4:17 ꠀꠞ ꠀꠞꠤ-ꠚꠞꠤꠞ ꠛꠦꠐꠤꠘ꠆ꠔꠦ ꠒꠋ ꠇꠞꠤ ꠇꠁꠔꠞꠣ, “ꠅꠈꠘ ꠘꠄꠅꠝꠤꠄ ꠄꠇ ꠘꠄꠀ ꠢꠣꠁ ꠙꠣꠁꠍꠦ।” ꠇꠁꠀ ꠔꠣꠞꠣ ꠁ ꠉꠦꠖꠣ ꠛꠣꠁꠌ꠆ꠌꠣꠞ ꠘꠣꠝ ꠞꠣꠈꠟꠣ ꠃꠛꠣꠄꠖ। ꠃꠛꠣꠄꠖꠞ ꠙꠥꠀꠞ ꠘꠣꠝ ꠁꠀꠍ, ꠀꠞ ꠁꠀꠍꠞ ꠙꠥꠀꠞ ꠘꠣꠝ ꠢꠎꠞꠔ ꠖꠣꠃꠖ।
RUT 4:18 ꠅꠃ ꠅꠁꠟ ꠁꠀꠇꠥꠛꠞ ꠘꠣꠔꠤ ꠚꠤꠞꠥꠎꠞ ꠈꠣꠘ꠆ꠖꠣꠘ-ꠘꠣꠝꠣ। ꠚꠤꠞꠥꠎꠞ ꠙꠥꠀꠞ ꠘꠣꠝ ꠢꠣꠍꠤꠞ,
RUT 4:19 ꠢꠣꠍꠤꠞꠞ ꠙꠥꠀ ꠞꠣꠄꠀꠝ, ꠞꠣꠄꠀꠝꠞ ꠙꠥꠀ ꠀꠝꠤꠘꠣꠖꠣꠛ,
RUT 4:20 ꠀꠝꠤꠘꠣꠖꠣꠛꠞ ꠙꠥꠀ ꠘꠣꠢꠤꠡ, ꠘꠣꠢꠤꠡꠞ ꠙꠥꠀ ꠍꠦꠟꠤꠝ,
RUT 4:21 ꠍꠦꠟꠤꠝꠞ ꠙꠥꠀ ꠛꠥꠀꠎ, ꠛꠥꠀꠎꠞ ꠙꠥꠀ ꠃꠛꠣꠄꠖ,
RUT 4:22 ꠃꠛꠣꠄꠖꠞ ꠙꠥꠀ ꠁꠀꠍ, ꠁꠀꠍꠞ ꠙꠥꠀ ꠢꠎꠞꠔ ꠖꠣꠃꠖ॥
PSA 1:1 ꠡꠥꠈꠤ ꠢꠃ ꠎꠘ, ꠘꠣꠚꠞꠝꠣꠘꠞ ꠍꠣꠟ꠆ꠟꠣꠄ ꠎꠦ ꠌꠟꠦ ꠘꠣ, ꠙꠣꠙꠤꠞ ꠙꠕꠅ ꠎꠦ ꠃꠛꠣꠄ ꠘꠣ, ꠝꠡꠇꠞꠣ ꠇꠞꠞꠣꠞ ꠀꠒ꠆ꠒꠣꠔ ꠛꠄ ꠘꠣ।
PSA 1:2 ꠅꠁꠟꠦ ꠝꠣꠛꠥꠖꠞ ꠖꠦꠅꠀ ꠢꠦꠖꠣꠄꠅꠔꠃ ꠔꠣꠞ ꠈꠥꠡꠤ, ꠁ ꠢꠦꠖꠣꠄꠅꠔꠞꠦ ꠗꠤꠀꠘ ꠇꠞꠦ ꠢꠦ ꠖꠤꠘ-ꠞꠣꠁꠔ ꠗꠞꠤ।
PSA 1:3 ꠔꠣꠞ ꠎꠤꠘ꠆ꠖꠦꠉꠤ ꠔ ꠙꠣꠘꠤꠞ ꠚꠥꠔꠞ ꠗꠣꠞꠞ ꠉꠣꠍꠞ ꠟꠣꠈꠣꠘ, ꠎꠦ ꠉꠣꠍꠦ ꠡꠑꠤꠇ ꠡꠝꠄꠄ ꠚꠟ ꠗꠞꠦ, ꠈꠞꠣꠞ ꠖꠤꠘꠅ ꠔꠣꠞ ꠙꠣꠔꠣ ꠢꠥꠇꠣꠄ ꠘꠣ, ꠢꠦ ꠎꠦꠔꠣꠔꠃ ꠀꠔ ꠖꠦꠄ, ꠅꠔꠣꠔꠃ ꠟꠣꠜꠛꠣꠘ ꠅꠄ।
PSA 1:4 ꠅꠁꠟꠦ ꠈꠛꠤꠍ-ꠛꠎ꠆ꠎꠣꠔꠞ ꠌꠟꠣ ꠔ ꠅꠟꠣ ꠘꠣꠄ, ꠁꠔꠣꠞ ꠎꠤꠘ꠆ꠖꠦꠉꠤ ꠗꠣꠘꠞ ꠍꠥꠍꠣꠞ ꠟꠣꠈꠣꠘ ꠛꠣꠔꠣꠡꠦ ꠃꠠꠦ।
PSA 1:5 ꠢꠣꠡꠞꠞ ꠖꠤꠘ ꠃꠛꠣꠁꠔ ꠔꠣꠞꠣꠞ ꠅꠟꠣ ꠡꠣꠅꠡ ꠘꠣꠁ, ꠙꠣꠇ-ꠙꠞꠦꠎꠉꠣꠞꠞ ꠝꠎꠟꠤꠍꠅ ꠘꠣꠚꠞꠝꠣꠘꠞ ꠘꠣꠁ ꠇꠥꠘꠥ ꠑꠣꠁ।
PSA 1:6 ꠙꠞꠦꠎꠉꠣꠞ ꠛꠘ꠆ꠖꠣꠞ ꠌꠟꠣ-ꠚꠤꠞꠣꠞ ꠙꠕꠅ ꠝꠣꠛꠥꠖꠦ ꠘꠎꠞ ꠞꠣꠈꠂꠘ, ꠅꠁꠟꠦ ꠈꠛꠤꠍ-ꠛꠎ꠆ꠎꠣꠔꠞ ꠙꠕꠅ ꠀꠍꠦ ꠡꠞ꠆ꠛꠘꠣꠡ॥
PSA 2:1 ꠢꠇ꠆ꠇꠟ ꠎꠣꠔꠤꠄ ꠇꠦꠘꠦ ꠅꠡ꠆ꠕꠤꠞ ꠅꠁꠀ ꠌꠤꠟ꠆ꠟꠣꠁꠞꠣ, ꠇꠤꠅꠞ ꠟꠣꠉꠤ ꠝꠣꠘꠡꠦ ꠛꠦꠢꠥꠖꠣ ꠚꠘ꠆ꠖꠤ ꠇꠞꠦꠞ?
PSA 2:2 ꠎꠉꠔꠞ ꠛꠣꠖꠡꠣ ꠅꠇꠟ ꠛꠤꠉꠠꠤ ꠉꠦꠟ, ꠞꠣꠎꠣ ꠅꠇꠟ ꠄꠇꠈꠣꠘꠅ ꠖꠟꠣ ꠅꠁꠟ, ꠝꠣꠛꠥꠖꠞ ꠛꠤꠞꠥꠖ꠆ꠖꠦ ꠀꠞ ꠔꠣꠘ ꠀꠟ-ꠝꠍꠤꠞ ꠛꠤꠞꠥꠖ꠆ꠖꠦ।
PSA 2:3 ꠄꠞꠣ ꠖꠟꠣ ꠅꠁꠀ ꠇꠁꠟ, ꠀꠅ, ꠍꠤꠠꠤꠀ ꠚꠣꠟꠣꠁ ꠔꠣꠞꠣꠞ ꠒꠣꠘ꠆ꠒꠣ-ꠛꠦꠠꠤ, ꠔꠣꠞꠣꠞ ꠛꠣꠘ꠆ꠖꠘ ꠈꠥꠟꠤꠀ ꠡ꠆ꠛꠣꠗꠤꠘ ꠛꠘꠤ।
PSA 2:4 ꠀꠞꠡꠦ-ꠀꠎꠤꠝꠞ ꠇꠥꠞꠍꠤꠔ ꠛꠁꠀ ꠝꠣꠛꠥꠖꠦ ꠀꠡꠂꠘ, ꠔꠣꠁꠘ ꠁꠔꠣꠞꠦ ꠟꠁꠀ ꠝꠡꠇꠞꠣ ꠇꠞꠂꠘ।
PSA 2:5 ꠔꠣꠘ ꠉꠞꠝ ꠖꠦꠈꠣꠁꠀ ꠛꠦꠚꠣꠘꠣ ꠟꠣꠉꠣꠁꠛꠣ, ꠀꠞ ꠉꠥꠍꠣꠄ ꠀꠉꠥꠁꠘ ꠅꠁꠀ ꠅꠔꠣꠞꠦ ꠇꠁꠛꠣ,
PSA 2:6 ꠀꠝꠤ ꠡ꠆ꠛꠄꠅꠋ ꠀꠝꠣꠞ ꠛꠣꠖꠡꠣꠞꠦ ꠛꠅꠀꠁꠟ ꠇꠞꠍꠤ, ꠀꠝꠣꠞ ꠙꠛꠤꠔ꠆ꠞ ꠍꠤꠅꠘ ꠙꠣꠠꠞ ꠃꠙꠞꠦ।
PSA 2:7 ꠀꠞ ꠢꠃ ꠛꠣꠖꠡꠣꠄ ꠇꠁꠞꠣ, ꠀꠝꠤ ꠈꠣꠟꠤ ꠝꠣꠛꠥꠖꠞ ꠅꠃ ꠢꠥꠇꠥꠝ ꠎꠣꠘꠣꠁ, ꠔꠣꠁꠘ ꠀꠝꠣꠞꠦ ꠇꠁꠍꠂꠘ, ꠔꠥꠝꠤ ꠔ ꠀꠝꠣꠞ ꠙꠥꠔ, ꠀꠁꠎꠃ ꠀꠝꠤ ꠔꠥꠝꠣꠞ ꠛꠣꠚꠞ ꠟꠣꠈꠣꠘ ꠅꠁꠟꠣꠝ।
PSA 2:8 ꠔꠥꠝꠤ ꠀꠝꠣꠞ ꠉꠦꠍꠦ ꠌꠣꠅ, ꠌꠣꠁꠟꠦ ꠎꠉꠔꠞ ꠢꠇ꠆ꠇꠟ ꠎꠣꠔꠤ ꠔꠥꠝꠣꠞꠃ ꠅꠁꠛ, ꠖꠥꠘꠤꠀꠞ ꠢꠦꠡ ꠝꠣꠕꠣꠞ ꠖꠈꠟꠅ ꠙꠣꠁꠛꠣꠄ,
PSA 2:9 ꠔꠥꠝꠤ ꠟꠥꠀꠞ ꠟꠣꠑꠤ ꠖꠤꠀ ꠁꠔꠣꠞꠦ ꠜꠣꠋꠉꠤꠛꠣꠄ, ꠝꠣꠐꠤꠞ ꠙꠣꠔꠤꠟꠞ ꠟꠣꠈꠣꠘ ꠌꠥꠞꠝꠣꠞ ꠇꠞꠛꠣꠄ।
PSA 2:10 ꠅ ꠞꠣꠎꠣ ꠅꠇꠟ, ꠡꠑꠤꠇ ꠀꠈꠟ ꠈꠣꠐꠣꠅ, ꠎꠉꠔꠞ ꠡꠣꠡꠇ ꠅꠇꠟ, ꠢꠥꠡꠤꠀꠞ ꠞꠅ,
PSA 2:11 ꠖꠤꠟꠞ ꠒꠞ-ꠈꠚꠦ ꠝꠣꠛꠥꠖꠞ ꠄꠛꠣꠖꠔ ꠇꠞꠅ, ꠇꠣꠙꠤ ꠇꠣꠙꠤ
PSA 2:12 ꠔꠣꠘ ꠇꠥꠖꠞꠔꠤ ꠇꠖꠝꠅ ꠌꠥꠝꠣ ꠖꠦꠅ, ꠔꠣꠁꠘ ꠔ ꠌꠈꠥꠞ ꠙꠟꠇꠦ ꠉꠥꠍꠣꠄ ꠎꠟꠤꠀ ꠃꠑꠂꠘ, ꠉꠥꠍꠣꠄ ꠔꠣꠘ ꠉꠎꠛ ꠘꠣꠎꠤꠟ ꠇꠞꠟꠦ, ꠔꠥꠝꠞꠣ ꠝꠣꠎꠙꠕꠅ ꠀꠈꠔꠣꠃ ꠛꠤꠘꠣꠡ ꠅꠁꠛꠣꠄ। ꠔꠣꠞꠣꠃ ꠔ ꠛꠠ ꠇꠙꠣꠟꠤ, ꠎꠦꠞꠣ ꠔꠣꠘ ꠍꠣꠄꠀꠔ ꠀꠡꠞꠄ ꠟꠂꠘ॥
PSA 3:1 ꠀꠙꠘ ꠙꠥꠀ ꠀꠛꠍꠣꠟꠝꠞ ꠍꠣꠝꠘ ꠕꠣꠇꠤ ꠜꠣꠉꠤꠛꠣꠞ ꠇꠣꠟꠅ ꠢꠎꠞꠔ ꠖꠣꠃꠖꠞ ꠝꠤꠎꠝꠞ। ꠅ ꠝꠣꠛꠥꠖ, ꠀꠝꠣꠞ ꠖꠥꠡꠝꠘꠞ ꠙꠞꠤꠝꠣꠘ ꠇꠔ ꠛꠣꠠꠤꠉꠦꠍꠦ, ꠖꠦꠈꠞꠣ ꠘꠤ, ꠇꠔ ꠝꠣꠘꠡꠦ ꠀꠝꠣꠞ ꠟꠉꠦ ꠟꠣꠉꠦꠞ।
PSA 3:2 ꠀꠝꠣꠞ ꠛꠦꠙꠣꠞꠦ ꠇꠔ ꠎꠘꠦ ꠝꠣꠔꠤꠞꠣ, ꠇꠁꠞꠣ, ꠀꠟ꠆ꠟꠣꠞ ꠖꠞꠛꠣꠞꠅ ꠔꠣꠞ ꠎꠣꠘ ꠛꠣꠌꠣꠘꠤꠞ ꠙꠕ ꠘꠣꠁ। (ꠍꠦꠟꠣ)
PSA 3:3 ꠅꠁꠟꠦ ꠅ ꠝꠣꠛꠥꠖ, ꠈꠞꠞ ꠖꠥꠡꠝꠘ ꠕꠣꠇꠤ ꠔꠥꠝꠤꠃ ꠀꠝꠣꠞ ꠞꠁꠇ꠆ꠇꠣꠇꠣꠞꠤ, ꠔꠥꠝꠤꠃ ꠀꠝꠣꠞ ꠡꠣꠘ-ꠛꠠꠣꠁ, ꠛꠤꠙꠖꠞ ꠝꠣꠎꠦ ꠀꠝꠣꠞꠦ ꠡꠣꠅꠡ ꠖꠤꠞꠣꠄ।
PSA 3:4 ꠀꠝꠤ ꠎꠥꠞꠦ ꠎꠥꠞꠦ ꠝꠣꠛꠥꠖꠞꠦ ꠒꠣꠇꠤ, ꠘꠤꠎꠞ ꠙꠛꠤꠔ꠆ꠞ ꠙꠣꠠꠅ ꠕꠣꠇꠤ ꠀꠝꠣꠞ ꠀꠞꠎꠤ ꠢꠥꠘꠂꠘ। (ꠍꠦꠟꠣ)
PSA 3:5 ꠀꠝꠤ ꠢꠥꠔꠤꠟꠣꠝ, ꠢꠥꠔꠤꠀ ꠊꠥꠝꠣꠁꠟꠣꠝ, ꠛꠣꠖꠦ ꠢꠎꠣꠉꠅ ꠅꠁꠟꠣꠝ, ꠡ꠆ꠛꠄꠅꠋ ꠝꠣꠛꠥꠖꠦꠃ ꠀꠝꠣꠞꠦ ꠔꠣꠘ ꠇꠥꠟꠅ ꠑꠣꠁ ꠖꠦꠁꠘ।
PSA 3:6 ꠀꠝꠣꠞ ꠌꠣꠁꠞꠅꠛꠣꠄ ꠢꠣꠎꠣꠞꠦ ꠢꠣꠎꠣꠞ ꠖꠥꠡꠝꠘꠦ ꠛꠦꠞꠤꠀ ꠃꠛꠣꠁ ꠞꠁꠍꠦ, ꠃꠛꠣꠁꠟꠦꠅ ꠀꠝꠤ ꠁꠔꠣꠞꠦ ꠒꠞꠣꠁ ꠘꠣ।
PSA 3:7 ꠅ ꠝꠣꠛꠥꠖ, ꠎꠟꠖꠤ ꠇꠞꠅ! ꠅ ꠀꠝꠣꠞ ꠀꠟ꠆ꠟꠣ, ꠀꠝꠣꠞ ꠎꠣꠘ ꠛꠣꠌꠣꠅ! ꠔꠥꠝꠤ ꠔ ꠀꠝꠣꠞ ꠢꠇ꠆ꠇꠟ ꠖꠥꠡꠝꠘꠞ ꠝꠥꠈꠅ ꠊꠥꠡꠤ ꠝꠣꠞꠛꠣꠄ, ꠛꠎ꠆ꠎꠣꠔ ꠅꠇꠟꠞ ꠖꠣꠔ ꠜꠣꠋꠉꠤꠟꠤꠛꠣꠄ।
PSA 3:8 ꠎꠣꠘ ꠛꠣꠌꠣꠘꠤ ꠔ ꠝꠣꠛꠥꠖꠞꠃ ꠇꠣꠝ, ꠀꠙꠘ ꠙ꠆ꠞꠎꠣꠞ ꠃꠙꠞꠦ ꠔꠥꠝꠣꠞ ꠞꠢꠝ-ꠛꠞꠇꠔ ꠎꠣꠞꠤ ꠞꠃꠇ॥ (ꠍꠦꠟꠣ)
PSA 4:1 ꠄꠛꠣꠖꠔ-ꠛꠘ꠆ꠖꠦꠉꠤ ꠙꠞꠤꠌꠣꠟꠇꠞ ꠟꠣꠉꠤ: ꠔꠣꠞꠀꠟꠣ ꠛꠣꠎꠘꠣꠖꠤ ꠉꠣꠁꠔꠦ ꠅꠁꠛ। ꠢꠎꠞꠔ ꠖꠣꠃꠖꠞ ꠝꠤꠎꠝꠞ। ꠅ ꠀꠟ꠆ꠟꠣ, ꠀꠝꠣꠞ ꠒꠣꠇꠅ ꠇꠣꠘ ꠖꠤꠅ, ꠀꠝꠣꠞꠦ ꠘꠤꠞ꠆ꠖꠥꠡ ꠇꠁꠀ ꠔꠥꠝꠤ ꠔ ꠎꠣꠁꠞ ꠇꠞꠍ। ꠝꠍꠤꠛꠔꠞ ꠇꠣꠟꠅ ꠔꠥꠝꠤ ꠀꠝꠣꠞ ꠎꠣꠘꠅ ꠀꠞꠣꠝ ꠖꠤꠍ, ꠝꠦꠢꠦꠞꠛꠣꠘꠤ ꠇꠞꠤꠀ ꠀꠝꠣꠞ ꠖꠥꠀ ꠇꠛꠥꠟ ꠇꠞꠅ।
PSA 4:2 ꠅ ꠝꠣꠘꠥꠡ ꠅꠇꠟ, ꠀꠝꠣꠞ ꠁꠎ꠆ꠎꠔꠞꠦ ꠔꠥꠝꠞꠣ ꠀꠞ ꠇꠔꠖꠤꠘ ꠛꠦꠁꠎ꠆ꠎꠔ ꠇꠞꠔꠣꠄ, ꠇꠔꠖꠤꠘ ꠛꠦꠇꠣꠝꠣ ꠝꠣꠔꠞ ꠝꠣꠄꠀꠔ ꠞꠁꠔꠣꠄ, ꠝꠤꠍꠣ ꠝꠣꠔꠞ ꠈꠞꠦ ꠈꠞꠦ ꠊꠥꠞꠔꠣꠄ? (ꠍꠦꠟꠣ)
PSA 4:3 ꠝꠘꠅ ꠞꠣꠈꠤꠅ, ꠝꠣꠛꠥꠖꠦ ꠔꠣꠘ ꠀꠡꠤꠇ ꠛꠘ꠆ꠖꠣꠞꠦ ꠘꠤꠎꠞ ꠟꠣꠉꠤ ꠀꠟꠉ ꠇꠞꠍꠂꠘ, ꠔꠦ ꠀꠝꠤ ꠒꠣꠇꠟꠦꠃ ꠔꠣꠁꠘ ꠢꠥꠘꠂꠘ।
PSA 4:4 ꠔꠥꠝꠞꠣꠞ ꠞꠣꠉ-ꠉꠥꠍꠣꠞ ꠡꠝꠄ ꠇꠥꠘꠥ ꠉꠥꠘꠣ ꠇꠞꠤꠅ ꠘꠣ, ꠛꠤꠍꠘꠣꠔ ꠢꠥꠔꠤꠀ ꠖꠤꠟ ꠖꠤ ꠌꠤꠘ꠆ꠔꠣ ꠇꠞꠅ, ꠀꠞ ꠘꠤꠞꠣꠁ ꠕꠣꠇꠅ। (ꠍꠦꠟꠣ)
PSA 4:5 ꠙꠣꠇ-ꠙꠞꠦꠎꠉꠣꠞꠤꠞ ꠇꠥꠞꠛꠣꠘꠤ ꠀꠖꠣꠄ ꠇꠞꠅ, ꠝꠣꠛꠥꠖꠞ ꠃꠙꠞꠦ ꠡꠥꠟ꠆ꠟꠀꠘꠣ ꠜꠞꠡꠣ ꠞꠣꠈꠅ।
PSA 4:6 ꠛꠃꠔ ꠎꠘꠦ ꠇꠄ, “ꠀꠝꠞꠣꠞꠦ ꠇꠦꠉꠤꠄ ꠜꠣꠟꠣꠁꠞ ꠙꠕ ꠖꠦꠈꠣꠁꠛ?” ꠅ ꠝꠣꠛꠥꠖ, ꠔꠥꠝꠣꠞ ꠙꠛꠤꠔ꠆ꠞ ꠝꠥꠈꠞ ꠘꠥꠞꠞ ꠖꠤꠖꠣꠞ ꠈꠣꠘ ꠀꠝꠞꠣꠞ ꠘꠍꠤꠛ ꠅꠃꠇ।
PSA 4:7 ꠛꠦꠡ ꠇꠞꠤ ꠚꠄ-ꠚꠡꠟ ꠙꠣꠁꠀ ꠔꠣꠞꠣꠞ ꠎꠔ ꠚꠥꠞ꠆ꠔꠤ ꠎꠥꠉꠣꠄ, ꠁꠔꠣ ꠕꠣꠇꠤ ꠛꠃꠔ ꠛꠦꠡꠤ ꠚꠥꠞ꠆ꠔꠤ ꠔ ꠔꠥꠝꠤ ꠀꠝꠣꠞ ꠖꠤꠟꠅ ꠖꠤꠍ।
PSA 4:8 ꠀꠝꠤ ꠔ ꠡꠣꠄ-ꠡꠣꠘ꠆ꠔꠤ ꠀꠞ ꠀꠞꠣꠝꠦ ꠊꠥꠝꠣꠁ, ꠅ ꠝꠣꠛꠥꠖ, ꠈꠣꠟꠤ ꠔꠥꠝꠤꠃ ꠀꠝꠣꠞꠦ ꠛꠡꠔ ꠇꠞꠣꠅ ꠍꠢꠤ-ꠍꠣꠟꠣꠝꠔꠦ॥
PSA 5:1 ꠄꠛꠣꠖꠔ-ꠛꠘ꠆ꠖꠦꠉꠤ ꠙꠞꠤꠌꠣꠟꠇꠞ ꠟꠣꠉꠤ: ꠛꠣꠡꠤꠞ ꠡꠥꠞꠦ। ꠢꠎꠞꠔ ꠖꠣꠃꠖꠞ ꠝꠤꠎꠝꠞ। ꠅ ꠝꠣꠛꠥꠖ, ꠀꠝꠣꠞ ꠚꠞꠤꠀꠖ ꠇꠛꠥꠟ ꠇꠞꠅ, ꠖꠤꠟꠞ ꠇꠣꠘ꠆ꠖꠘ ꠀꠝꠣꠞ ꠔꠥꠝꠣꠞ ꠇꠣꠘꠦ ꠢꠥꠘꠅ।
PSA 5:2 ꠅ ꠀꠝꠣꠞ ꠀꠟ꠆ꠟꠣ, ꠀꠝꠣꠞ ꠛꠣꠖꠡꠣ ꠔꠥꠝꠤ, ꠀꠝꠣꠞ ꠀꠅꠀꠎ ꠢꠥꠘꠅ ꠔꠥꠝꠤ ꠖꠄꠀ ꠇꠞꠤ, ꠖꠥꠀ-ꠝꠤꠘꠔꠤ ꠇꠞꠤ ꠔꠥꠝꠣꠞ ꠉꠦꠍꠦꠃ ꠈꠣꠟꠤ।
PSA 5:3 ꠔꠥꠝꠤ ꠙꠞꠔꠤ ꠖꠤꠘ ꠚꠎꠞꠦ ꠀꠝꠣꠞ ꠛꠥꠟꠤ ꠔ ꠢꠥꠘꠅ, ꠖꠤꠟꠞ ꠢꠇ꠆ꠇꠟꠔꠣ ꠢꠣꠎꠣꠁ ꠞꠣꠈꠤ ꠔꠥꠝꠣꠞ ꠖꠤꠖꠣꠞꠅ।
PSA 5:4 ꠔꠥꠝꠤ ꠔ ꠁꠟꠣ ꠀꠟ꠆ꠟꠣ ꠘꠣꠄ ꠈꠣꠞꠣꠙꠤ ꠎꠣꠞ ꠙꠍꠘ꠆ꠖ, ꠔꠥꠝꠣꠞ ꠝꠦꠝꠣꠘ ꠅꠁꠔ ꠘꠣꠄ ꠇꠥꠘꠥ ꠙꠣꠙꠤ ꠎꠘ।
PSA 5:5 ꠛꠠꠣꠁ-ꠛꠦꠐꠣꠉꠤꠞꠤ ꠖꠦꠈꠣꠅꠞꠣꠞ ꠑꠣꠁ ꠘꠣꠁ ꠔꠥꠝꠣꠞ ꠍꠣꠝꠘꠦ, ꠢꠇꠟ ꠟꠣꠈꠣꠘ ꠘꠣꠚꠞꠝꠣꠘꠤ ꠔꠥꠝꠤ ꠊꠤꠘ꠆ꠘꠣ ꠇꠞꠅ ꠘꠤꠎꠦ।
PSA 5:6 ꠝꠤꠍꠣ ꠇꠕꠣ ꠝꠣꠔꠞꠣꠞꠦ ꠘꠤꠌ꠆ꠌꠄ ꠛꠤꠘꠣꠡ ꠇꠞꠅ ꠔꠥꠝꠤ, ꠝꠣꠛꠥꠖꠦ ꠔ ꠊꠤꠘ꠆ꠘꠣꠁꠘ ꠛꠦꠡꠤ ꠈꠥꠘ-ꠈꠣꠞꠣꠙꠤ ꠍꠟ-ꠌꠔꠥꠞꠤ।
PSA 5:7 ꠅꠁꠟꠦ ꠔꠥꠝꠣꠞ ꠖꠄꠀ-ꠝꠣꠄꠀꠄ ꠔꠥꠝꠣꠞ ꠊꠞꠅ ꠢꠣꠝꠣꠁꠝꠥ ꠀꠝꠤ, ꠘꠔ ꠅꠁꠀ ꠍꠁꠎꠖꠣ ꠇꠞꠝꠥ ꠔꠥꠝꠣꠞ ꠙꠛꠤꠔ꠆ꠞ ꠊꠞ ꠝꠥꠈꠤ।
PSA 5:8 ꠅ ꠝꠣꠛꠥꠖ, ꠀꠝꠣꠞ ꠌꠣꠁꠞꠅꠛꠣꠄ ꠔ ꠖꠥꠡꠝꠘꠦ ꠜꠞꠣ, ꠔꠥꠝꠣꠞ ꠙꠞꠦꠎꠉꠣꠞꠤꠞ ꠙꠕꠦ ꠝꠞꠦ ꠘꠦꠅ ꠌꠣꠟꠣꠁꠀ, ꠀꠝꠣꠞ ꠍꠣꠝꠘꠦ ꠔꠥꠝꠣꠞ ꠙꠕ ꠇꠞꠅ ꠍꠢꠤ-ꠡꠥꠎꠣ।
PSA 5:9 ꠔꠣꠞꠣꠞ ꠝꠥꠈꠞ ꠇꠥꠘꠥ ꠇꠕꠣꠃ ꠄꠇꠤꠘꠞ ꠎꠥꠇꠣ ꠘꠣꠄ, ꠔꠣꠞꠣꠞ ꠖꠤꠟ-ꠝꠘ ꠜꠞꠣ ꠈꠣꠟꠤ ꠛꠤꠘꠣꠡꠞ ꠌꠤꠘ꠆ꠔꠣꠄ, ꠈꠥꠟꠣ ꠇꠄꠛꠞꠞ ꠙꠌꠣ ꠟꠣꠡꠞ ꠟꠣꠈꠣꠘ ꠔꠣꠞꠣꠞ ꠉꠟꠣ, ꠚꠣꠝ-ꠙꠐ꠆ꠐꠤ ꠝꠣꠞꠣꠞ ꠃꠡ꠆ꠔꠣꠖ ꠔ ꠔꠣꠞꠣꠞ ꠎꠤꠚꠞꠣ।
PSA 5:10 ꠅ ꠀꠟ꠆ꠟꠣ, ꠔꠥꠝꠤ ꠁꠔꠣꠞꠦ ꠖꠥꠡꠤ ꠡꠣꠁꠛꠡ꠆ꠔ ꠇꠞꠅ, ꠔꠣꠞꠣꠞ ꠡꠞ꠆ꠛꠘꠣꠡ ꠅꠃꠇ ꠔꠣꠞꠣꠞ ꠙꠣꠔꠣꠁꠟ ꠚꠣꠘ꠆ꠖꠅ, ꠡꠤꠝꠣ ꠍꠣꠠꠣ ꠘꠣꠚꠞꠝꠣꠘꠤꠞ ꠖꠣꠄ ꠈꠦꠖꠣꠅ ꠅꠔꠣꠞꠦ, ꠛꠤꠞꠥꠗꠤꠔꠣ ꠇꠞꠞꠣ ꠔ ꠅꠔꠣꠄ ꠔꠥꠝꠤ ꠀꠟ꠆ꠟꠣꠞ ꠟꠉꠦ।
PSA 5:11 ꠅꠁꠟꠦ ꠔꠥꠝꠣꠞ ꠍꠣꠄꠀꠔ ꠛꠡꠔꠇꠣꠞꠤ ꠈꠥꠡꠦ-ꠛꠣꠡꠦ ꠞꠃꠇ, ꠢꠞ-ꠢꠣꠝꠦꠡꠣ ꠈꠥꠡꠤꠞ ꠉꠎꠟ ꠔꠣꠞꠣ ꠢꠇꠟꠦ ꠉꠣꠃꠇ। ꠔꠥꠝꠤ ꠛꠣꠌꠣꠅ ꠔꠣꠞꠣꠞꠦ ꠔꠥꠝꠣꠞ ꠀꠡꠤꠇ ꠎꠣꠞꠣ, ꠀꠝꠥꠖ-ꠚꠥꠞ꠆ꠔꠤ ꠇꠞꠃꠇ ꠡꠛꠦ ꠔꠥꠝꠣꠞ ꠘꠣꠝꠦ ꠔꠣꠞꠣ।
PSA 5:12 ꠔꠥꠝꠤꠃ ꠝꠣꠛꠥꠖꠦ ꠙꠞꠦꠎꠉꠣꠞꠞꠦ ꠖꠦꠅ ꠞꠢꠝ-ꠛꠞꠇꠔ, ꠞꠢꠝꠔꠞ ꠛꠦꠠꠣꠖꠤ ꠔꠥꠝꠤ ꠔꠣꠞꠣꠞꠦ ꠞꠣꠈꠅ ꠘꠤꠞꠣꠙꠖ॥
PSA 6:1 ꠄꠛꠣꠖꠔ-ꠛꠘ꠆ꠖꠦꠉꠤ ꠙꠞꠤꠌꠣꠟꠇꠞ ꠟꠣꠉꠤ: ꠔꠣꠞꠀꠟꠣ ꠛꠣꠎꠘꠣꠖꠤ ꠉꠣꠁꠔꠦ ꠅꠁꠛ, ꠛꠣꠎꠘꠣ ꠡꠥꠞ ‘ꠡꠦꠝꠤꠘꠤꠕ’। ꠢꠎꠞꠔ ꠖꠣꠃꠖꠞ ꠝꠤꠎꠝꠞ। ꠗꠣꠝꠇꠤ ꠖꠤꠅ ꠘꠣ ꠉ ꠝꠣꠛꠥꠖ ꠉꠥꠍꠣ ꠇꠞꠤꠀ, ꠡꠣꠎꠣ ꠖꠤꠅ ꠘꠣ ꠝꠞꠦ ꠞꠣꠉ ꠇꠞꠤꠀ।
PSA 6:2 ꠖꠄꠀ ꠇꠞꠅ ꠀꠝꠣꠄ ꠝꠣꠛꠥꠖ ꠢꠥꠇꠣꠁ ꠎꠣꠁꠀꠞ ꠀꠝꠤ, ꠛꠦꠝꠣꠞ ꠡꠤꠚꠣ ꠇꠞꠅ ꠔꠥꠝꠤ ꠇꠣꠙꠦꠞ ꠝꠞ ꠀꠒ꠆ꠒꠤ।
PSA 6:3 ꠒꠞꠞ ꠌꠥꠐꠦ ꠀꠝꠣꠞ ꠎꠣꠘ ꠗꠠꠚꠠ ꠗꠠꠚꠠ ꠇꠞꠦ, ꠀꠞ ꠇꠔꠖꠤꠘ ꠌꠟꠛ ꠁꠟꠣ ꠝꠞ ꠎꠤꠛꠘꠦ?
PSA 6:4 ꠚꠤꠞꠤꠀ ꠌꠣꠅ ꠉ ꠝꠣꠛꠥꠖ ꠛꠣꠌꠣꠅ ꠀꠝꠣꠞ ꠎꠣꠘ, ꠔꠥꠝꠣꠞ ꠖꠄꠀꠞ ꠖꠥꠀꠁ ꠟꠣꠉꠦ ꠇꠞꠅ ꠝꠞ ꠀꠍꠣꠘ।
PSA 6:5 ꠝꠞꠣꠞ ꠛꠣꠖꠦ ꠔꠥꠝꠣꠞꠦ ꠔ ꠒꠣꠇꠣꠞ ꠘꠣꠁ ꠃꠙꠣꠄ, ꠙꠣꠔꠣꠟꠅ ꠢꠣꠝꠣꠘꠤꠞ ꠛꠣꠖꠦ ꠔꠥꠝꠣꠞ ꠉꠥꠘꠉꠣꠘ ꠇꠦ ꠉꠣꠄ?
PSA 6:6 ꠇꠣꠘ꠆ꠖꠤ ꠇꠣꠘ꠆ꠖꠤ ꠀꠝꠣꠞ ꠛꠤꠍꠘꠣ ꠙꠞꠔꠤ ꠞꠣꠁꠔ ꠜꠤꠎꠣꠁꠟꠣꠁ, ꠀꠝꠣꠞ ꠌꠃꠈꠞ ꠙꠣꠘꠤꠄ ꠛꠤꠍꠘꠣ-ꠛꠣꠟꠤꠡ ꠜꠤꠎꠤꠀ ꠎꠣꠄ,
PSA 6:7 ꠖꠤꠟꠞ ꠖꠥꠈꠦ ꠀꠝꠣꠞ ꠌꠃꠈ ꠢꠥꠇꠣꠁ ꠎꠣꠞ, ꠖꠥꠡꠝꠘꠞ ꠒꠞꠦ ꠌꠃꠈ ꠀꠝꠣꠞ ꠇꠝꠎꠥꠞ ꠛꠘꠤꠎꠣꠞ।
PSA 6:8 ꠀꠝꠣꠞ ꠉꠦꠍ ꠕꠣꠇꠤ ꠜꠣꠉꠅ ꠢꠇꠟ ꠘꠣꠚꠞꠝꠣꠘ, ꠝꠣꠛꠥꠖꠦ ꠔ ꠢꠥꠘꠍꠂꠘ ꠀꠝꠣꠞ ꠖꠤꠟꠞ ꠇꠣꠘ꠆ꠖꠘ।
PSA 6:9 ꠙꠥꠞꠣꠙꠥꠞ ꠢꠥꠘꠍꠂꠘ ꠔꠣꠁꠘ ꠀꠝꠣꠞ ꠝꠤꠘꠔꠤ, ꠇꠛꠥꠟ ꠇꠞꠍꠂꠘ ꠔꠣꠁꠘ ꠀꠝꠣꠞ ꠀꠞꠎꠤ।
PSA 6:10 ꠀꠝꠣꠞ ꠢꠇ꠆ꠇꠟ ꠖꠥꠡꠝꠘ ꠒꠞꠞ ꠌꠥꠐꠦ ꠇꠣꠙꠃꠇ, ꠡꠞꠝ ꠙꠣꠁꠀ ꠅꠈꠘꠃ ꠀꠝꠣꠞ ꠙꠤꠍ ꠍꠣꠠꠃꠇ॥
PSA 7:1 ꠢꠎꠞꠔ ꠖꠣꠃꠖꠞ ꠝꠤꠎꠝꠞ। ꠡꠥꠞ ‘ꠡꠤꠉ꠆ꠉꠣꠁꠅꠘ’। ꠛꠤꠘ-ꠁꠀꠝꠤꠘ ꠈꠣꠘ꠆ꠖꠣꠘꠞ ꠡꠞ꠆ꠖꠣꠞ ꠇꠥꠡꠦ ꠔꠣꠘꠞꠦ ꠉꠣꠟꠤ ꠖꠦꠅꠀꠄ ꠝꠣꠛꠥꠖꠞ ꠖꠞꠛꠣꠞꠅ ꠔꠣꠘ ꠚꠞꠤꠀꠖ। ꠅꠉ ꠀꠝꠣꠞ ꠝꠣꠛꠥꠖ ꠄꠟꠣꠢꠤ ꠔꠥꠝꠣꠞ ꠍꠣꠄꠀꠔ ꠀꠡꠞꠄ ꠟꠁꠍꠤ, ꠈꠞꠦ ꠅꠁꠀ ꠈꠦꠖꠣꠁꠞꠣ ꠎꠣꠞꠣ ꠀꠝꠣꠞꠦ, ꠔꠣꠞꠣꠞ ꠀꠔ ꠕꠣꠇꠤ ꠛꠣꠌꠣꠅ ꠝꠞꠦ।
PSA 7:2 ꠘꠣꠁꠟꠦ ꠡꠤꠋꠢꠞ ꠟꠣꠈꠣꠘ ꠐꠥꠇꠞꠣ ꠐꠥꠇꠞꠣ ꠇꠞꠛ ꠝꠞꠦ, ꠚꠣꠞꠤꠀ-ꠌꠤꠞꠤꠀ ꠝꠣꠞꠛ ꠔ ꠛꠣꠌꠣꠘꠤꠔ ꠇꠦꠃ ꠘꠣ ꠀꠁꠟꠦ।
PSA 7:3 ꠅꠉ ꠀꠝꠣꠞ ꠝꠣꠛꠥꠖ ꠄꠟꠣꠢꠤ, ꠎꠥꠖꠤ ꠇꠞꠤꠀ ꠕꠣꠇꠤ ꠇꠥꠘꠥ ꠈꠣꠞꠣꠙꠤ, ꠀꠝꠣꠞ ꠀꠔꠅ ꠞꠄ ꠎꠥꠖꠤ ꠇꠥꠘꠥ ꠘꠣꠚꠞꠝꠣꠘꠤ,
PSA 7:4 ꠝꠞ ꠛꠤꠞꠥꠗꠤ ꠘꠣꠄ ꠔꠦꠛꠥꠅ ꠎꠥꠖꠤ ꠈꠦꠔꠤ ꠇꠞꠤꠀ ꠕꠣꠇꠤ, —ꠛꠞꠋ ꠛꠤꠘꠣ ꠇꠣꠞꠘꠦ ꠎꠦ ꠖꠥꠡꠝꠘ ꠅꠁꠍꠦ ꠔꠣꠞꠅ ꠃꠙꠇꠣꠞ ꠇꠞꠍꠤ—
PSA 7:5 ꠔꠦ ꠖꠥꠡꠝꠘꠦ ꠀꠝꠣꠞꠦ ꠗꠞꠤꠟꠣꠃꠇ ꠈꠦꠖꠣꠁꠀ, ꠝꠣꠐꠤꠔ ꠚꠣꠟꠣꠁꠀ ꠙꠣꠅꠖꠤ ꠙꠣꠠꠣꠁꠀ, ꠗꠥꠟꠣꠔ ꠝꠤꠡꠣꠁꠟꠣꠃꠇ ꠀꠝꠣꠞ ꠇꠣꠄꠀ। (ꠍꠦꠟꠣ)
PSA 7:6 ꠝꠣꠛꠥꠖ ꠉ, ꠔꠥꠝꠣꠞ ꠝꠢꠣ ꠉꠥꠍꠣꠄ ꠀꠝꠣꠞ ꠙꠇ꠆ꠇꠦ ꠃꠛꠣꠅ, ꠎꠣꠞꠣ ꠝꠞꠦ ꠁꠋꠡꠣꠄ ꠅꠔꠣ ꠖꠥꠡꠝꠘꠞ ꠛꠤꠙꠇ꠆ꠇꠦ ꠈꠣꠠꠣ ꠅꠅ, ꠅ ꠀꠝꠣꠞ ꠀꠟ꠆ꠟꠣ, ꠔꠥꠝꠣꠞ ꠢꠇ ꠛꠤꠌꠣꠞ ꠎꠣꠞꠤ ꠇꠞꠤꠟꠣꠅ।
PSA 7:7 ꠔꠥꠝꠣꠞ ꠌꠣꠁꠞꠅ ꠉꠣꠟꠣꠔ ꠎꠝꠣ ꠅꠃꠇ ꠖꠥꠘꠤꠀꠞ ꠢꠇꠟ ꠎꠣꠔꠤ, ꠀꠞꠡꠅ ꠛꠁꠀ ꠖꠦꠈꠅ ꠔꠣꠞꠣꠞ ꠢꠇꠟ ꠇꠥ-ꠇꠤꠞ꠆ꠔꠤ।
PSA 7:8 ꠝꠣꠛꠥꠖ ꠅꠔꠣ ꠢꠇꠟ ꠎꠣꠔꠤꠞ ꠛꠤꠌꠣꠞꠇ ꠔ ꠔꠥꠝꠤ, ꠞꠣꠄ ꠖꠤꠅ ꠖꠦꠈꠤꠀ ꠝꠞ ꠙꠞꠦꠎꠉꠣꠞꠤ ꠀꠞ ꠢꠇ-ꠢꠣꠟꠣꠟꠤ।
PSA 7:9 ꠘꠣꠚꠞꠝꠣꠘꠞ ꠎꠥꠟꠥꠝ ꠛꠘ꠆ꠖ ꠇꠞꠤꠟꠣꠃꠇ꠆ꠇꠣ, ꠙꠞꠦꠎꠉꠣꠞꠞꠦ ꠝꠎꠛꠥꠔ ꠛꠣꠘꠣꠅ ꠅ ꠢꠇ ꠀꠟ꠆ꠟꠣ, ꠖꠤꠟ-ꠝꠘꠞ ꠜꠤꠔꠞ ꠔꠥꠝꠤ ꠎꠣꠌꠣꠁ ꠇꠞꠅ ꠢꠇꠟꠔꠣ।
PSA 7:10 ꠀꠟ꠆ꠟꠣ ꠙꠣꠇ ꠝꠞ ꠞꠇ꠆ꠇꠣꠇꠣꠞꠤ, ꠎꠣꠘ ꠛꠣꠌꠣꠁꠘ ꠀꠝꠣꠞ, ꠔꠣꠁꠘꠃ ꠛꠣꠌꠣꠘꠦꠀꠟꠣ ꠡꠞꠟ ꠝꠘꠞ ꠛꠘ꠆ꠖꠣꠞ।
PSA 7:11 ꠀꠟ꠆ꠟꠣ ꠙꠣꠇꠦ ꠇꠞꠂꠘ ꠢꠇ ꠛꠤꠌꠣꠞ, ꠘꠣꠚꠞꠝꠣꠘꠞ ꠃꠙꠞꠦ ꠉꠥꠍꠣ ꠇꠞꠂꠘ ꠛꠞꠣꠛꠞ,
PSA 7:12 ꠝꠣꠘꠡꠦ ꠔꠃꠛꠣ ꠘꠣ ꠇꠞꠤꠟꠦ ꠔꠣꠘ ꠔꠟꠥꠀꠞ ꠗꠣꠞꠣꠁꠛꠣ, ꠔꠤꠞ-ꠗꠘꠥꠇ ꠟꠁꠀ ꠔꠣꠁꠘ ꠗꠘꠥꠇꠅ ꠔꠤꠞ ꠟꠣꠉꠣꠁꠛꠣ।
PSA 7:13 ꠎꠣꠘꠦ ꠝꠣꠞꠣꠞ ꠀꠔꠤꠀꠞ ꠔꠣꠁꠘ ꠎꠥꠁꠔ ꠇꠞꠍꠂꠘ, ꠔꠣꠘ ꠔꠤꠞ ꠅꠇꠟꠞꠦ ꠔꠣꠁꠘ ꠀꠉꠥꠁꠘꠖꠤ ꠢꠣꠎꠣꠁꠍꠂꠘ।
PSA 7:14 ꠘꠣꠚꠞꠝꠣꠘꠦ ꠛꠖ ꠇꠣꠝꠞꠦ ꠙꠦꠐꠞ ꠜꠤꠔꠞꠦ ꠞꠣꠈꠦ, ꠛꠖ ꠇꠣꠝꠦ ꠙꠦꠐ ꠜꠞꠤ ꠉꠦꠟꠦ ꠎꠘꠝ ꠖꠦꠄ ꠝꠤꠍꠣꠞꠦ।
PSA 7:15 ꠝꠣꠐꠤ ꠈꠥꠠꠤꠀ ꠇꠥꠙ ꠈꠥꠖꠦ ꠢꠦ ꠉꠁꠘ ꠇꠞꠤꠀ, ꠔꠣꠞ ꠛꠣꠘꠣꠁꠟ ꠅꠃ ꠇꠥꠙꠅ ꠘꠤꠎꠦ ꠎꠣꠄ ꠙꠠꠤꠀ।
PSA 7:16 ꠔꠣꠞ ꠘꠣꠚꠞꠝꠣꠘꠤ ꠔ ꠔꠣꠞ ꠝꠣꠕꠣꠔ ꠚꠤꠞꠤꠀ ꠀꠄ, ꠔꠣꠞ ꠎꠥꠟꠥꠝ ꠀꠁꠀ ꠘꠤꠎꠞ ꠔꠣꠟꠥꠔ ꠙꠠꠤ ꠎꠣꠄ।
PSA 7:17 ꠝꠣꠛꠥꠖꠞ ꠢꠇ ꠛꠤꠌꠣꠞꠞ ꠟꠣꠉꠤ ꠡꠥꠇꠥꠞ-ꠉꠥꠎꠣꠞ ꠇꠞꠝꠥ ꠔꠣꠘ, ꠞꠣꠛ꠆ꠛꠥꠟ ꠀꠟꠣꠝꠤꠘꠞ ꠘꠣꠝꠦ ꠀꠝꠤ ꠇꠞꠝꠥ ꠉꠥꠘꠉꠣꠘ॥
PSA 8:1 ꠄꠛꠣꠖꠔ-ꠛꠘ꠆ꠖꠦꠉꠤ ꠙꠞꠤꠌꠣꠟꠇꠞ ꠟꠣꠉꠤ: ꠡꠥꠞ ‘ꠉꠤꠔ꠆ꠔꠤꠔ’। ꠢꠎꠞꠔ ꠖꠣꠃꠖꠞ ꠝꠤꠎꠝꠞ। ꠅ ꠝꠣꠛꠥꠖ ꠀꠝꠞꠣꠞ ꠝꠣꠟꠤꠇ, ꠔꠥꠝꠣꠞ ꠡꠣꠘ-ꠡꠃꠇꠔꠦ ꠜꠞꠣ ꠢꠣꠞꠣ ꠖꠥꠘꠤꠀ! ꠔꠥꠝꠣꠞ ꠘꠥꠞꠞ ꠔꠎꠟ꠆ꠟꠤ ꠇꠣꠁꠝ ꠇꠞꠍ ꠀꠍꠝꠣꠘ ꠊꠦꠞꠤꠀ!
PSA 8:2 ꠔꠥꠝꠣꠞ ꠛꠤꠞꠥꠗꠤ ꠅꠇꠟꠞ ꠛꠤꠙꠇ꠆ꠇꠦ, ꠉꠦꠖꠣ ꠀꠞ ꠘꠣꠛꠣꠟꠤꠇ ꠢꠥꠞꠥꠔ꠆ꠔꠣꠞ ꠝꠥꠈꠞ ꠎꠛꠣꠘꠖꠤ ꠔꠥꠝꠤ ꠡꠇ꠆ꠔꠤꠞ ꠜꠣꠘ꠆ꠒꠣꠞ ꠛꠣꠘꠣꠁꠍ। ꠅꠟꠣ ꠇꠞꠤꠀ ꠖꠥꠡꠝꠘ ꠀꠞ ꠎꠤꠖꠈꠥꠞꠞꠦ ꠔꠥꠝꠤ ꠟꠦꠐꠣꠁꠟꠤꠟꠣꠄ।
PSA 8:3 ꠔꠥꠝꠣꠞ ꠀꠔꠞ ꠛꠣꠘꠣꠁꠟ ꠀꠍꠝꠣꠘꠞ ꠛꠣꠄꠖꠤ ꠀꠝꠤ ꠎꠦꠛꠟꠣ ꠌꠣꠁ, ꠢꠘꠅ ꠔꠥꠝꠣꠞ ꠛꠅꠀꠁꠟ ꠇꠞꠣ ꠌꠣꠘ꠆ꠖ-ꠔꠦꠞꠣ ꠖꠦꠈꠔꠣꠝ ꠙꠣꠁ,
PSA 8:4 ꠖꠦꠈꠤꠀ ꠝꠘꠦ ꠝꠘꠦ ꠇꠁ, ꠝꠣꠘꠥꠡ ꠀꠞꠇꠔꠣ ꠇꠤꠔꠣ ꠎꠦꠘ, ꠔꠥꠝꠤ ꠔꠣꠞꠣꠞꠦ ꠁꠀꠖ ꠇꠞꠅ? ꠀꠖꠝ ꠎꠣꠔꠤ ꠅꠔ ꠇꠤꠔꠣ ꠎꠦꠘ, ꠔꠥꠝꠤ ꠔꠣꠞꠣꠞ ꠈꠤꠀꠟ ꠞꠣꠈꠅ?
PSA 8:5 ꠝꠣꠘꠥꠡꠞꠦ ꠛꠣꠘꠣꠁꠍ ꠈꠣꠟꠤ ꠚꠤꠞꠤꠡ꠆ꠔꠣ ꠕꠣꠇꠤ ꠕꠥꠠꠣ ꠇꠝ ꠉꠥꠘꠤ, ꠅꠁꠟꠦ ꠉꠃꠞꠛ-ꠁꠎ꠆ꠎꠔꠞ ꠝꠣꠟꠣ ꠔ ꠔꠣꠞꠣꠞꠦ ꠚꠤꠘ꠆ꠖꠣꠁꠍ ꠔꠥꠝꠤ।
PSA 8:6 ꠔꠥꠝꠣꠞ ꠙꠄꠖꠣ ꠢꠇ꠆ꠇꠟꠔꠣꠞꠦ ꠡꠣꠡꠘꠞ ꠈꠦꠝꠔꠣ ꠄꠞꠣꠞ ꠀꠔꠅ ꠖꠤꠍ, ꠢꠇ꠆ꠇꠟꠔꠣꠃ ꠄꠞꠣꠞ ꠙꠣꠅꠞ ꠔꠟꠣꠔ, ꠄꠞꠣꠞ ꠀꠅꠔꠣꠄ ꠞꠣꠈꠍ—
PSA 8:7 ꠉꠞꠥ-ꠍꠣꠉꠟꠞ ꠙꠣꠟ ꠀꠞ ꠎꠉꠔꠞ ꠔꠣꠝꠣꠝ ꠎꠣꠘꠥꠀꠞ,
PSA 8:8 ꠀꠍꠝꠣꠘꠅ ꠃꠠꠞꠣ ꠙꠣꠈꠤ ꠀꠞ ꠖꠞꠤꠀꠞ ꠢꠇ꠆ꠇꠟ ꠝꠣꠍ, ꠡꠣꠉꠞꠞ ꠙꠣꠘꠤꠔ ꠌꠟꠞꠣ ꠢꠇꠟ ꠘꠝꠥꠘꠣꠞ ꠎꠣꠘꠖꠣꠞ।
PSA 8:9 ꠅ ꠝꠣꠛꠥꠖ ꠀꠝꠞꠣꠞ ꠝꠣꠟꠤꠇ, ꠔꠥꠝꠣꠞ ꠡꠣꠘ-ꠡꠃꠇꠔꠦ ꠜꠞꠣ ꠢꠣꠞꠣ ꠖꠥꠘꠤꠀ॥
PSA 9:1 ꠄꠛꠣꠖꠔ-ꠛꠘ꠆ꠖꠦꠉꠤ ꠙꠞꠤꠌꠣꠟꠇꠞ ꠟꠣꠉꠤ: ꠡꠥꠞ ‘ꠝꠃꠔ-ꠟꠣꠛ꠆ꠛꠦꠘ’। ꠢꠎꠞꠔ ꠖꠣꠃꠖꠞ ꠝꠤꠎꠝꠞ। ꠀꠝꠤ ꠙꠥꠞꠣꠙꠥꠞ ꠖꠤꠟꠦ-ꠎꠣꠘꠦ ꠝꠣꠛꠥꠖꠞ ꠉꠥꠘꠉꠣꠘ ꠉꠣꠁꠝꠥ, ꠔꠥꠝꠣꠞ ꠇꠥꠖꠞꠔꠤ ꠇꠣꠝ-ꠇꠣꠎꠞ ꠇꠕꠣ ꠀꠝꠤ ꠔꠛꠟꠤꠉ ꠇꠞꠝꠥ।
PSA 9:2 ꠀꠝꠤ ꠔꠥꠝꠣꠞꠦ ꠟꠁꠀꠃ ꠚꠥꠞ꠆ꠔꠤ-ꠀꠝꠥꠖ ꠇꠞꠝꠥ, ꠅ ꠞꠣꠛ꠆ꠛꠥꠟ ꠀꠟꠣꠝꠤꠘ, ꠔꠥꠝꠣꠞ ꠘꠣꠝꠞ ꠔꠣꠞꠤꠚ ꠉꠤꠔ ꠉꠣꠁꠝꠥ।
PSA 9:3 ꠖꠥꠡꠝꠘ ꠅꠇꠟ ꠎꠦꠛꠟꠣ ꠀꠝꠣꠞ ꠈꠞ ꠕꠣꠇꠤ ꠚꠤꠞꠤꠀ ꠎꠣꠄ, ꠎꠣꠅꠀꠞ ꠇꠣꠟꠅ ꠃꠡ꠆ꠐꠣ ꠈꠣꠁꠀ ꠙꠠꠤꠀ ꠔꠣꠞꠣ ꠝꠞꠤꠎꠣꠄ।
PSA 9:4 ꠘꠣꠟꠤꠡ ꠢꠥꠘꠤꠀ ꠔꠥꠝꠤ ꠀꠝꠣꠞ ꠙꠇ꠆ꠇꠦ ꠞꠣꠄ ꠖꠤꠍ, ꠞꠣꠎ-ꠉꠖꠤꠔ ꠛꠁꠀ ꠔꠥꠝꠤ ꠔ ꠢꠇ ꠛꠤꠌꠣꠞ ꠇꠞꠍ।
PSA 9:5 ꠔꠥꠝꠤ ꠜꠤꠘ ꠎꠣꠔꠤꠞꠦ ꠗꠣꠝꠇꠤ ꠖꠤꠀ ꠅꠃ ꠘꠣꠚꠞꠝꠣꠘ ꠛꠤꠘꠣꠡ ꠇꠞꠍ, ꠔꠥꠝꠤ ꠌꠤꠞꠇꠣꠟꠞ ꠟꠣꠉꠤꠀ ꠁꠔꠣꠞ ꠘꠣꠝ ꠝꠤꠐꠣꠁꠟꠤꠍ।
PSA 9:6 ꠁꠔꠣ ꠖꠥꠡꠝꠘ ꠅꠇꠟ ꠉꠦꠍꠦ ꠘꠤꠙꠣꠔ ꠅꠁꠀ, ꠔꠣꠞꠣꠞ ꠛꠣꠠꠤ-ꠊꠞ ꠛꠤꠘꠣꠡ ꠌꠤꠞꠇꠣꠟꠞ ꠟꠣꠉꠤꠀ, ꠔꠣꠞꠣꠞ ꠐꠣꠃꠘ ꠅꠇꠟ ꠔꠥꠝꠤ ꠚꠣꠟꠣꠁꠍ ꠔꠥꠟꠤꠀ, ꠇꠥꠘꠥ ꠌꠤꠘ ꠘꠣꠝ-ꠘꠤꠡꠣꠘꠣ ꠘꠣ ꠞꠣꠈꠤꠀ।
PSA 9:7 ꠅꠁꠟꠦ ꠝꠣꠛꠥꠖ ꠔ ꠞꠂꠘ ꠌꠤꠞꠇꠣꠟ, ꠔꠣꠁꠘ ꠇꠞꠍꠂꠘ ꠛꠤꠌꠣꠞꠞ ꠉꠖꠤ ꠛꠅꠀꠁꠟ,
PSA 9:8 ꠢꠇ-ꠁꠘꠍꠣꠚꠦ ꠎꠉꠔꠞ ꠛꠤꠌꠣꠞ-ꠚꠄꠍꠣꠟꠣ ꠇꠞꠛꠣ, ꠢꠇ-ꠢꠣꠟꠣꠟꠤꠄ ꠔꠣꠝꠣꠝ ꠎꠣꠔꠤꠞ ꠛꠤꠌꠣꠞ ꠇꠞꠛꠣ।
PSA 9:9 ꠎꠥꠟꠥꠝꠅ ꠙꠠꠣ ꠎꠘꠞ ꠟꠣꠉꠤ ꠝꠣꠛꠥꠖꠃ ꠔꠣꠞ ꠀꠡꠞꠄ, ꠝꠍꠤꠛꠔꠞ ꠇꠣꠟꠅ ꠔꠣꠁꠘ ꠘꠤꠞꠣꠙꠖ ꠑꠤꠇꠣꠘꠣ ꠅꠄ।
PSA 9:10 ꠔꠥꠝꠣꠞꠦ ꠌꠤꠘꠦ ꠎꠣꠞꠣ, ꠔꠥꠝꠣꠞ ꠃꠙꠞꠦ ꠜꠞꠡꠣ ꠇꠞꠦ ꠔꠣꠞꠣ, ꠝꠣꠛꠥꠖ ꠉ, ꠔꠥꠝꠣꠞ ꠔꠣꠟ꠆ꠟꠣꠡ ꠇꠞꠞꠣ ꠀꠡꠤꠇꠞ ꠟꠉ ꠔꠥꠝꠤ ꠍꠣꠠꠍ ꠘꠣ।
PSA 9:11 ꠍꠤꠅꠘ ꠘꠉꠞꠅ ꠛꠡꠔ ꠇꠣꠞꠤ ꠝꠣꠛꠥꠖꠞ ꠔꠣꠞꠤꠚ-ꠉꠎꠟ ꠉꠣꠅ, ꠔꠣꠘ ꠇꠥꠖꠞꠔꠤ ꠟꠤꠟꠣ-ꠈꠦꠟꠣꠞ ꠛꠄꠀꠘ ꠢꠇ꠆ꠇꠟ ꠎꠣꠔꠤꠞꠦ ꠎꠣꠘꠣꠅ।
PSA 9:12 ꠈꠥꠘ-ꠈꠣꠞꠣꠙꠤꠞ ꠛꠖꠟꠣ ꠖꠦꠅꠞꠣꠄ ꠝꠘꠅ ꠞꠣꠈꠂꠘ ꠢꠇꠟꠔꠣ, ꠖꠥꠈꠤ-ꠇꠣꠋꠉꠣꠟꠞ ꠇꠣꠘ꠆ꠖꠘ ꠔꠣꠁꠘ ꠇꠥꠘꠥꠖꠤꠘ ꠚꠣꠃꠞꠂꠘ ꠘꠣ।
PSA 9:13 ꠖꠥꠡꠝꠘꠞ ꠀꠔꠅ ꠖꠥꠞ꠆ꠖꠡꠣ ꠖꠦꠈꠤꠀ ꠞꠢꠝ ꠇꠞꠅ ꠝꠣꠛꠥꠖ ꠉ, ꠝꠃꠔꠞ ꠖꠥꠀꠞ ꠕꠣꠇꠤ ꠔꠥꠝꠤ ꠀꠝꠣꠞꠦ ꠔꠥꠟꠤꠀ ꠘꠦꠅ ꠉ,
PSA 9:14 ꠎꠣꠔꠦ ꠔꠥꠝꠣꠞ ꠡꠥꠇꠞꠤꠀ-ꠔꠣꠞꠤꠚ ꠀꠝꠤ ꠉꠣꠁꠔꠣꠝ ꠙꠣꠞꠤ, ꠔꠥꠝꠤ ꠀꠝꠣꠞ ꠎꠣꠘ ꠛꠣꠌꠣꠘꠤꠄ ꠀꠝꠤ ꠇꠞꠝꠥ ꠈꠥꠡꠤ-ꠛꠣꠡꠤ, ꠍꠤꠅꠘ ꠘꠉꠞꠤꠞ ꠙꠣꠠꠣꠄ ꠙꠣꠠꠣꠄ ꠇꠞꠝꠥ ꠘꠣꠌꠣ-ꠘꠣꠌꠤ।
PSA 9:15 ꠘꠤꠎꠞ ꠈꠥꠠꠣ ꠉꠣꠔꠅ ꠙꠠꠤꠀ ꠜꠤꠘ ꠎꠣꠔꠤ ꠛꠥꠠꠤꠉꠦꠍꠦ, ꠔꠣꠞꠣꠞ ꠙꠣꠔꠣꠁꠟ ꠟꠥꠇꠣꠁꠟ ꠚꠣꠘ꠆ꠖꠅ ꠔꠣꠞꠣꠞꠃ ꠙꠣꠅ ꠢꠣꠝꠣꠁꠍꠦ।
PSA 9:16 ꠝꠣꠛꠥꠖꠦ ꠘꠤꠎꠞꠦ ꠎꠣꠁꠞ ꠇꠞꠤꠀ ꠢꠇ ꠛꠤꠌꠣꠞ ꠇꠞꠍꠂꠘ, ꠘꠣꠚꠞꠝꠣꠘ ꠖꠟꠞ ꠛꠣꠘꠣꠁꠟ ꠚꠣꠘ꠆ꠖꠅ ꠔꠣꠞꠣꠃ ꠀꠐꠇꠤꠍꠂꠘ। (ꠢꠤꠉ꠆ꠉꠣꠄꠅꠘ-ꠍꠦꠟꠣ)
PSA 9:17 ꠘꠣꠚꠞꠝꠣꠘ ꠅꠇꠟ ꠢꠣꠝꠣꠃꠇ ꠉꠤꠀ ꠉꠁꠘ ꠙꠣꠔꠣꠟꠦ, ꠅꠔꠣꠞ ꠟꠉꠦ ꠜꠤꠘ ꠎꠣꠔꠤꠅ ꠜꠥꠟꠤ ꠎꠣꠁꠘ ꠎꠦꠔꠣꠄ ꠀꠟ꠆ꠟꠣꠞꠦ।
PSA 9:18 ꠘꠤꠞꠣꠡ꠆ꠞꠄꠞꠦ ꠚꠣꠃꠞꠂꠘ ꠘꠣ ꠔꠣꠁꠘ ꠌꠤꠞꠇꠣꠟꠞ ꠖꠣꠄ, ꠖꠥꠈꠤ-ꠇꠣꠋꠉꠣꠟꠞ ꠀꠡꠣꠅ ꠇꠥꠘꠥꠖꠤꠘ ꠛꠤꠚꠟꠦ ꠎꠣꠁꠔ ꠘꠣꠄ।
PSA 9:19 ꠎꠟꠖꠤ ꠀꠅ ꠉ ꠝꠣꠛꠥꠖ! ꠝꠣꠘꠡꠦ ꠎꠣꠘꠥ ꠘꠣ ꠖꠦꠈꠣꠄ ꠛꠣꠠꠔꠤ ꠛꠣꠢꠣꠖꠥꠞꠤ, ꠔꠥꠝꠣꠞ ꠍꠣꠝꠘꠦ ꠛꠤꠌꠣꠞ ꠅꠃꠇ ꠢꠇꠟ ꠜꠤꠘ ꠎꠣꠔꠤ।
PSA 9:20 ꠒꠞ-ꠜꠄ ꠖꠦꠈꠣꠅ ꠝꠣꠛꠥꠖ ꠔꠥꠝꠤ ꠔꠣꠞꠣꠞꠦ, ꠔꠣꠞꠣ ꠈꠣꠟꠤ ꠝꠣꠐꠤꠞ ꠝꠣꠘꠥꠡ ꠎꠣꠘꠃꠇ ꠜꠤꠘ ꠎꠣꠔꠤꠄ। (ꠍꠦꠟꠣ)॥
PSA 10:1 ꠝꠣꠛꠥꠖ ꠉ, ꠔꠥꠝꠤ ꠇꠦꠘꠦ ꠖꠥꠞꠁ ꠞꠁꠞꠣꠄ? ꠛꠤꠙꠖꠞ ꠇꠣꠟꠅ ꠇꠤꠔꠣꠟ꠆ꠟꠣꠉꠤ ꠟꠥꠇꠣꠁꠞꠣꠄ?
PSA 10:2 ꠎꠣꠟꠤꠝꠞ ꠛꠣꠢꠣꠖꠥꠞꠤꠄ ꠖꠥꠈꠤ-ꠇꠣꠋꠉꠣꠟ ꠜꠥꠉꠦ, ꠢꠦꠡꠦ ꠔꠣꠞꠣꠞ ꠌꠔꠥꠞꠤꠞ ꠚꠣꠘ꠆ꠖꠅ ꠔꠣꠞꠣꠃ ꠗꠞꠣ ꠙꠠꠦ।
PSA 10:3 ꠝꠘ꠆ꠖ ꠎꠘꠦ ꠔꠣꠞ ꠝꠘꠞ ꠛꠎ꠆ꠎꠣꠔꠤꠞ ꠛꠣꠢꠣꠖꠥꠞꠤ ꠖꠦꠈꠣꠄ, ꠟꠥꠜꠤ ꠝꠣꠘꠡꠦ ꠝꠣꠛꠥꠖꠞꠦ ꠔꠥꠌ꠆ꠍ ꠝꠘꠅ ꠇꠞꠤꠀ ꠉꠣꠟꠤꠀꠄ।
PSA 10:4 ꠛꠦꠐꠣꠉꠤꠞꠤ ꠇꠞꠤꠀ ꠝꠘ꠆ꠖ ꠟꠥꠇꠦ ꠌꠣꠄ ꠘꠣ ꠔꠣꠘ ꠖꠤꠖꠣꠞ, ꠀꠟ꠆ꠟꠣ ꠛꠟꠔꠦ ꠇꠦꠃ ꠘꠣꠁ, ꠅꠟꠣ ꠄꠇꠤꠘ ꠔꠣꠞꠣꠞ।
PSA 10:5 ꠖꠥꠘꠤꠀꠛꠤ ꠎꠤꠘ꠆ꠖꠦꠉꠤ ꠢꠣꠝꠦꠡꠣ ꠟꠣꠜꠛꠣꠘ ꠔꠣꠞꠣꠞ, ꠔꠣꠞꠣꠞ ꠌꠃꠈꠦ ꠖꠦꠈꠦ ꠘꠣ ꠔ ꠢꠇ ꠁꠘꠍꠣꠚ ꠔꠥꠝꠣꠞ, “ꠁꠔꠣ ꠛꠥꠟꠦ ꠛꠃꠔ ꠃꠙꠞꠦ,” ꠅꠈꠣꠘ ꠔꠣꠞꠣ ꠇꠄ, “ꠀꠝꠣꠞ ꠛꠤꠞꠥꠗꠤꠞꠦ ꠚꠥ ꠖꠤꠀ ꠃꠠꠣꠁꠟꠤꠝꠥ ꠘꠤꠌ꠆ꠌꠄ।”
PSA 10:6 ꠝꠘꠦ ꠝꠘꠦ ꠇꠄ ꠔꠣꠞꠣ, “ꠀꠝꠣꠞ ꠇꠥꠘꠥ ꠙꠔꠘ ꠘꠣꠁ, ꠇꠥꠘꠥ ꠎꠥꠉꠦ ꠇꠥꠘꠥ ꠖꠤꠘꠃ ꠛꠤꠙꠖ-ꠀꠙꠖ ꠀꠁꠔ ꠘꠣꠄ।”
PSA 10:7 ꠔꠣꠞ ꠝꠣꠔꠅ ꠟꠣꠘ꠆ꠘꠔ ꠀꠞ ꠗꠣꠘ꠆ꠖꠣ, ꠎꠥꠞ-ꠎꠥꠟꠥꠝꠦ ꠜꠞꠣ, ꠎꠤꠚꠞꠣ ꠜꠞꠣ ꠘꠣꠚꠞꠝꠣꠘꠤ ꠛꠎ꠆ꠎꠣꠔꠤꠞ ꠛꠡꠔ ꠈꠣꠘꠣ।
PSA 10:8 ꠘꠤꠞꠣꠁ ꠎꠋꠟꠣꠞ ꠝꠣꠎꠦ ꠢꠦ ꠃꠔ ꠙꠣꠔꠤꠀ ꠛꠄ, ꠘꠤꠞ꠆ꠎꠘ ꠎꠣꠉꠣꠔ ꠘꠤ-ꠅꠙꠞꠣꠗꠤꠞꠦ ꠈꠥꠘ ꠇꠞꠣꠔ ꠞꠄ। ꠅꠡꠢꠣꠄ-ꠅꠜꠣꠉꠣ ꠅꠇꠟ ꠔꠣꠞꠣꠞ ꠖꠥꠁꠅ ꠌꠃꠈꠞ ꠘꠤꠡꠣꠘꠣ, ꠡꠤꠋꠢꠄ ꠎꠦꠟꠣ ꠈꠣꠙ ꠗꠞꠤꠀ ꠎꠋꠟꠣꠔ ꠛꠄ ꠟꠥꠇꠣꠁꠀ, ꠖꠥꠈꠤ ꠎꠘꠞꠦ ꠗꠞꠣꠞ ꠟꠣꠉꠤ ꠔꠣꠞꠣꠅ ꠅꠟꠣ ꠛꠄ, ꠗꠞꠤꠀ ꠔꠣꠞꠦ ꠐꠣꠘꠤꠀ ꠀꠘꠤ ꠚꠣꠘ꠆ꠖꠅ ꠢꠣꠞꠣꠁ ꠕꠄ।
PSA 10:10 ꠚꠣꠘ꠆ꠖꠅ ꠢꠣꠞꠣꠁ ꠘꠞꠝ ꠇꠞꠤ ꠙꠤꠡꠤꠀ ꠌꠥꠞꠝꠣꠞ ꠇꠞꠦ, ꠅꠡꠢꠣꠄ-ꠅꠜꠣꠉꠣ ꠎꠘ ꠔꠣꠞꠣꠞ ꠘꠈꠥꠞ ꠕꠣꠛꠣꠔ ꠙꠠꠦ।
PSA 10:11 ꠝꠘꠦ ꠝꠘꠦ ꠇꠄ ꠔꠣꠞꠣ, “ꠀꠟ꠆ꠟꠣꠄ ꠁꠔꠣ ꠖꠦꠈꠂꠘ ꠘꠣ, ꠔꠣꠘ ꠝꠥꠈ ꠔ ꠟꠥꠇꠣꠁꠟꠤꠍꠂꠘ, ꠁꠔꠣꠞ ꠛꠣꠄꠖꠤ ꠌꠣꠁꠘꠅ ꠘꠣ।”
PSA 10:12 ꠅ ꠝꠣꠛꠥꠖ ꠎꠟꠖꠤ ꠀꠅ, ꠔꠥꠝꠣꠞ ꠀꠔ ꠈꠣꠘ ꠛꠣꠠꠣꠅ, ꠖꠥꠈꠤ-ꠇꠣꠋꠉꠣꠟꠞꠦ ꠘꠣ ꠚꠣꠃꠞꠤꠀ ꠎꠣꠘ ꠈꠣꠘ ꠛꠣꠌꠣꠅ।
PSA 10:13 ꠘꠣꠚꠞꠝꠣꠘꠦ ꠇꠦꠘꠦ ꠇꠞꠦ ꠀꠟ꠆ꠟꠣ ꠙꠣꠇꠞꠦ ꠄꠟꠣꠝꠤ? ꠝꠘꠦ ꠝꠘꠦ ꠇꠦꠘꠦ ꠇꠄ, “ꠔꠣꠁꠘ ꠢꠤꠡꠣꠛ ꠟꠁꠛꠣ ꠘꠤ?”
PSA 10:14 ꠅꠕꠌ ꠔꠥꠝꠤ ꠔ ꠖꠥꠈ-ꠝꠍꠤꠛꠔ ꠖꠦꠈꠞꠣꠄ, ꠄꠞꠣꠞ ꠎꠤꠝ꠆ꠝꠣꠖꠣꠞꠤ ꠔꠥꠝꠣꠞ ꠀꠔꠞ ꠇꠛꠎꠣꠄ। ꠅꠡꠢꠣꠄ ꠎꠘꠦ ꠔ ꠔꠥꠝꠣꠞ ꠀꠔꠅꠃ ꠘꠤꠎꠞꠦ ꠡꠙꠦ, ꠔꠥꠝꠣꠞ ꠉꠦꠍꠦꠃ ꠀꠡꠞꠄ ꠙꠣꠄ ꠄꠔꠤꠝ-ꠝꠤꠍꠇꠤꠘꠦ।
PSA 10:15 ꠘꠣꠚꠞꠝꠣꠘ ꠛꠎ꠆ꠎꠣꠔꠞ ꠛꠟ ꠅꠈꠘ ꠜꠣꠋꠉꠤꠟꠣꠅ, ꠔꠣꠞꠣꠞ ꠢꠇꠟ ꠛꠖ ꠇꠣꠝꠞ ꠢꠤꠡꠣꠛ ꠔꠥꠝꠤ ꠟꠁꠟꠣꠅ।
PSA 10:16 ꠌꠤꠞꠖꠤꠘ ꠌꠤꠞꠇꠣꠟ ꠝꠣꠛꠥꠖꠃ ꠅꠁꠟꠣ ꠛꠣꠖꠡꠣ, ꠔꠣꠘ ꠎꠝꠤꠘ ꠕꠣꠇꠤ ꠛꠤꠗꠞ꠆ꠝꠤ ꠎꠣꠔꠤ ꠡꠞ꠆ꠛꠘꠣꠡ ꠅꠁꠛꠣ।
PSA 10:17 ꠝꠣꠛꠥꠖ ꠉ, ꠇꠣꠋꠉꠣꠟ-ꠖꠥꠈꠤꠞ ꠀꠡꠣ ꠔꠥꠝꠤ ꠙꠥꠞꠣ ꠇꠞꠅ, ꠔꠣꠞꠣꠞ ꠝꠘꠅ ꠡꠣꠅꠡ ꠎꠥꠉꠣꠁ ꠖꠤꠟꠞ ꠚꠞꠤꠀꠖ ꠢꠥꠘꠅ।
PSA 10:18 ꠄꠔꠤꠝꠞ ꠛꠣꠄ ꠌꠣꠅ ꠉ ꠀꠟ꠆ꠟꠣ, ꠛꠤꠌꠣꠞ ꠇꠞꠅ ꠡꠛ ꠎꠣꠟꠤꠝꠞ, ꠒꠞ ꠖꠦꠈꠣꠘꠤ ꠛꠘ꠆ꠖ ꠇꠞꠤꠟꠣꠅ ꠝꠣꠐꠤꠞ ꠙꠄꠖꠣ ꠝꠣꠘꠥꠡꠞ॥
PSA 11:1 ꠄꠛꠣꠖꠔ-ꠛꠘ꠆ꠖꠦꠉꠤ ꠙꠞꠤꠌꠣꠟꠇꠞ ꠟꠣꠉꠤ: ꠢꠎꠞꠔ ꠖꠣꠃꠖꠞ ꠝꠤꠎꠝꠞ। ꠀꠝꠤ ꠔ ꠝꠣꠛꠥꠖꠞ ꠉꠦꠍꠦꠃ ꠀꠡꠞꠄ ꠟꠁꠍꠤ, ꠔꠦ ꠔꠥꠝꠞꠣ ꠇꠦꠘꠦ ꠀꠝꠣꠞꠦ ꠇꠁꠞꠣꠄ, “ꠅ ꠙꠣꠈꠤ, ꠔꠥꠝꠣꠞ ꠀꠡꠞꠄ ꠙꠣꠠꠦꠖꠤ ꠜꠣꠉꠤꠀ ꠎꠣꠅ।
PSA 11:2 ꠛꠎ꠆ꠎꠣꠔꠞ ꠖꠟꠦ ꠗꠘꠥꠇꠞꠦ ꠙꠥꠞꠣꠙꠥꠞ ꠎꠥꠁꠔ ꠇꠞꠤ ꠗꠞꠍꠦ, ꠡꠞꠟ ꠝꠣꠘꠡꠞꠦ ꠀꠘ꠆ꠖꠣꠞꠤꠔ ꠝꠣꠞꠔ ꠇꠞꠤ ꠔꠤꠞ ꠟꠣꠉꠣꠁꠍꠦ।
PSA 11:3 ꠜꠣꠋꠉꠤꠀ ꠙꠠꠤ ꠎꠣꠄ ꠎꠥꠖꠤ ꠡꠝꠣꠎꠞ ꠝꠥꠟ ꠙꠤꠟꠣꠞ, ꠁꠟꠣ ꠅꠁꠟꠦ ꠇꠤꠔꠣ ꠇꠞꠛ ꠎꠣꠞꠣ ꠙꠞꠦꠎꠉꠣꠞ?”
PSA 11:4 ꠝꠣꠛꠥꠖ ꠔ ꠞꠂꠘ ꠔꠣꠘ ꠙꠛꠤꠔ꠆ꠞ ꠝꠥꠇꠣꠝꠅ, ꠔꠣꠘ ꠀꠞꠡ-ꠇꠥꠞꠍꠤ ꠛꠅꠀꠁꠟ ꠀꠍꠦ ꠀꠍꠝꠣꠘꠅ, ꠀꠖꠝ ꠎꠣꠔꠤꠞꠦ ꠞꠣꠈꠂꠘ ꠔꠣꠘ ꠌꠈꠥꠞ ꠘꠎꠞꠅ।
PSA 11:5 ꠜꠣꠟꠣ-ꠛꠥꠞꠣ ꠢꠇꠟꠞꠦ ꠎꠣꠌꠣꠁ ꠇꠞꠂꠘ ꠝꠣꠛꠥꠖꠦ, ꠎꠣꠟꠤꠝ ꠅꠇꠟ ꠔꠣꠘ ꠖꠥꠡꠝꠘ, ꠊꠤꠘ ꠇꠞꠂꠘ ꠔꠣꠞꠣꠞꠦ।
PSA 11:6 ꠛꠎ꠆ꠎꠣꠔꠞ ꠃꠙꠞꠦ ꠓꠣꠟꠤꠛꠣ ꠔꠣꠁꠘ ꠎꠣꠟꠣꠁꠟ ꠉꠘ꠆ꠖꠇ ꠀꠞ ꠀꠋꠞꠣ, ꠉꠞꠝ ꠀꠉꠥꠘꠤꠞ ꠉꠥꠟ꠆ꠟꠣꠃ ꠅꠁꠛ ꠔꠣꠞꠣꠞ ꠈꠣꠘꠤ-ꠙꠣꠘꠤ ꠢꠣꠝꠦꠡꠣ।
PSA 11:7 ꠝꠣꠛꠥꠖ ꠘꠤꠎꠦ ꠙꠞꠦꠎꠉꠣꠞ, ꠙꠍꠘ꠆ꠖ ꠇꠞꠂꠘ ꠙꠞꠦꠎꠉꠣꠞꠞꠦ, ꠢꠇ-ꠘꠤꠈꠥꠔ ꠛꠘ꠆ꠖꠣꠄ ꠙꠣꠁꠛꠣ ꠔꠣꠘ ꠝꠥꠈꠞ ꠖꠤꠖꠣꠞꠞꠦ॥
PSA 12:1 ꠄꠛꠣꠖꠔ-ꠛꠘ꠆ꠖꠦꠉꠤ ꠙꠞꠤꠌꠣꠟꠇꠞ ꠟꠣꠉꠤ: ꠡꠥꠞ ‘ꠡꠦꠝꠤꠘꠤꠕ’। ꠢꠎꠞꠔ ꠖꠣꠃꠖꠞ ꠝꠤꠎꠝꠞ। ꠅ ꠝꠣꠛꠥꠖ, ꠎꠣꠘꠦ ꠛꠣꠌꠣꠃꠇ꠆ꠇꠣ, ꠅꠈꠘ ꠀꠞ ꠘꠣꠁ ꠇꠥꠘꠥ ꠀꠡꠤꠇ ꠛꠘ꠆ꠖꠣ, ꠀꠖꠝ ꠎꠣꠔꠤꠞ ꠝꠣꠎꠦ ꠢꠇ ꠇꠥꠘꠥ ꠎꠘ ꠔꠥꠇꠣꠁꠀ ꠝꠤꠟꠦꠞ ꠘꠣ।
PSA 12:2 ꠙꠞꠔꠦꠇꠦꠃ ꠄꠇꠦ-ꠅꠁꠘ꠆ꠘꠦ ꠝꠤꠍꠣ ꠝꠣꠔ ꠝꠣꠔꠦ, ꠈꠣꠟꠤ ꠚꠣꠝ-ꠙꠐ꠆ꠐꠤ ꠝꠣꠞꠦ ꠀꠞ ꠝꠥꠘꠣꠚꠤꠇꠤ ꠇꠞꠦ।
PSA 12:3 ꠅ ꠝꠣꠛꠥꠖ, ꠚꠣꠝ-ꠙꠐ꠆ꠐꠤ ꠝꠣꠞꠞꠣ ꠢꠇ꠆ꠇꠟ ꠑꠥꠐ ꠇꠣꠐꠤꠀ ꠚꠣꠟꠣꠅ, ꠛꠠꠣꠁ-ꠛꠦꠐꠣꠉꠤꠞꠤ ꠖꠦꠈꠣꠅꠞꠣꠞ ꠎꠤꠚꠞꠣ ꠔꠥꠝꠤ ꠇꠣꠐꠤꠟꠣꠅ।
PSA 12:4 ꠔꠣꠞꠣ ꠇꠄ, “ꠎꠤꠔꠤꠝꠥ ꠘꠤꠌ꠆ꠌꠤꠔ ꠀꠝꠞꠣꠞ ꠎꠤꠚꠞꠣꠞ ꠛꠟꠦ, ꠀꠞ ꠇꠦꠉꠥ ꠅꠁꠛ ꠌꠣꠟꠇꠖꠣꠞ ꠘꠤꠎꠞ ꠑꠥꠐ ꠕꠣꠇꠔꠦ?”
PSA 12:5 “ꠉꠞꠤꠛ-ꠖꠥꠈꠤꠞ ꠎꠥꠟꠥꠝ ꠖꠦꠈꠤꠀ ꠀꠝꠤ ꠝꠣꠛꠥꠖ ꠃꠛꠣꠁꠝꠥ, ꠘꠤꠞꠥꠙꠣꠄꠞ ꠖꠤꠟꠞ ꠇꠣꠘ꠆ꠖꠘ ꠀꠝꠤ ꠘꠤꠌ꠆ꠌꠤꠔ ꠢꠥꠘꠤꠝꠥ। ꠡꠣꠄ-ꠡꠣꠘ꠆ꠔꠤꠄ ꠖꠤꠘ ꠇꠣꠐꠣꠁꠔ ꠎꠣꠞꠣ ꠖꠤꠟꠦ-ꠎꠣꠘꠦ ꠌꠣꠄ, ꠔꠣꠞꠣꠞ ꠀꠡꠣ ꠇꠞꠝꠥ ꠙꠥꠞꠘ ꠀꠝꠤ ꠀꠟ꠆ꠟꠣꠄ।”
PSA 12:6 ꠝꠣꠛꠥꠖꠞ ꠎꠛꠣꠘꠅ ꠔ ꠇꠥꠘꠥ ꠈꠣꠖ ꠘꠣꠁ, ꠇꠡ꠆ꠐꠤ-ꠙꠣꠔ꠆ꠔꠞꠅ ꠎꠦꠟꠣ ꠞꠥꠙꠣ ꠅꠄ ꠎꠣꠌꠣꠁ, ꠡꠣꠔꠛꠣꠞꠞ ꠀꠉꠥꠁꠘꠖꠤ ꠍꠣꠚ ꠇꠞꠣ ꠞꠥꠙꠣ, ꠔꠣꠘ ꠎꠛꠣꠘ ꠈꠣꠐꠤ ꠘꠤꠈꠥꠔ-ꠘꠤꠈꠣꠖ ꠅꠟꠣ।
PSA 12:7 ꠅ ꠝꠣꠛꠥꠖ, ꠔꠥꠝꠤ ꠘꠤꠌ꠆ꠌꠄ ꠀꠝꠞꠣꠞ ꠛꠣꠄ ꠌꠣꠁꠛꠣꠄ, ꠅꠟꠣ ꠝꠣꠘꠡꠞ ꠀꠔ ꠕꠣꠇꠤ ꠌꠤꠞꠇꠣꠟ ꠛꠣꠌꠣꠁꠛꠣꠄ।
PSA 12:8 ꠘꠣꠚꠞꠝꠣꠘ-ꠛꠎ꠆ꠎꠣꠔꠦ ꠎꠦꠛꠟꠣ ꠌꠣꠁꠞꠅꠛꠣꠄꠖꠤ ꠊꠥꠞꠦ, ꠀꠖꠝ ꠎꠣꠔꠤꠞ ꠝꠣꠎꠦ ꠅꠛꠟꠣ ꠈꠣꠞꠣꠙꠤ ꠇꠣꠝ ꠛꠣꠠꠦ॥
PSA 13:1 ꠄꠛꠣꠖꠔ-ꠛꠘ꠆ꠖꠦꠉꠤ ꠙꠞꠤꠌꠣꠟꠇꠞ ꠟꠣꠉꠤ: ꠢꠎꠞꠔ ꠖꠣꠃꠖꠞ ꠝꠤꠎꠝꠞ। ꠅ ꠝꠣꠛꠥꠖ, ꠀꠞ ꠇꠔꠖꠤꠘ? ꠔꠥꠝꠤ ꠀꠝꠣꠞꠦ ꠌꠤꠞꠇꠣꠟꠃ ꠚꠣꠃꠞꠤꠀ ꠞꠁꠔꠣꠄ ꠘꠤ? ꠔꠥꠝꠣꠞ ꠙꠛꠤꠔ꠆ꠞ ꠝꠥꠈ ꠈꠣꠘ ꠀꠞ ꠇꠔꠖꠤꠘ ꠀꠝꠣꠞ ꠉꠦꠍ ꠕꠣꠇꠤ ꠟꠥꠇꠣꠁ ꠞꠣꠈꠔꠣꠄ?
PSA 13:2 ꠀꠞ ꠇꠔꠖꠤꠘ ꠀꠝꠤ ꠝꠘꠞ ꠌꠤꠘ꠆ꠔꠣꠞ ꠜꠣꠞ, ꠖꠤꠟꠞ ꠇꠡ꠆ꠐꠞ ꠛꠥꠏꠣ ꠙꠞꠔꠤꠖꠤꠘ ꠡꠁꠔꠣꠝ ꠘꠤ? ꠀꠝꠣꠞ ꠖꠥꠡꠝꠘ ꠅꠇꠟ ꠇꠔꠖꠤꠘ ꠀꠝꠣꠞ ꠃꠙꠞꠦ ꠘꠣꠌꠤꠔ?
PSA 13:3 ꠅ ꠀꠟ꠆ꠟꠣ, ꠀꠝꠣꠞ ꠛꠣꠄꠖꠤ ꠌꠣꠅ, ꠝꠣꠛꠥꠖ ꠉ, ꠀꠝꠣꠞ ꠝꠤꠘꠔꠤꠞ ꠎꠥꠀꠙ ꠖꠦꠅ, ꠀꠝꠣꠞ ꠌꠃꠈꠅ ꠛꠟ-ꠞꠥꠡꠘꠤ ꠖꠦꠅ, ꠀꠞꠘꠣꠄ ꠀꠝꠤ ꠢꠄꠔ ꠀꠈꠦꠞꠤ ꠊꠥꠝꠅ ꠙꠠꠤꠎꠤꠝꠥ।
PSA 13:4 ꠛꠣꠖꠦ ꠖꠥꠡꠝꠘꠦ ꠇꠁꠛꠣ, “ꠅꠈꠘ ꠔ ꠀꠝꠞꠣ ꠎꠤꠔꠤ ꠉꠦꠍꠤ,” ꠀꠞ ꠀꠝꠤ ꠅꠡꠢꠣꠄ-ꠝꠣꠎꠥꠞ ꠛꠘꠤꠉꠦꠟꠦ ꠀꠝꠣꠞ ꠛꠤꠞꠥꠗꠤ ꠅꠇꠟꠦ ꠔ ꠚꠥꠞ꠆ꠔꠤ-ꠀꠝꠥꠖ ꠇꠞꠛꠣ।
PSA 13:5 ꠅꠁꠟꠦ ꠀꠝꠤ ꠜꠞꠡꠣ ꠇꠞꠤ ꠔꠥꠝꠣꠞ ꠖꠄꠀꠞ ꠃꠙꠞꠦꠃ, ꠔꠥꠝꠤ ꠎꠣꠘ ꠛꠣꠌꠣꠁꠛꠣꠄ, ꠅꠔꠣꠞ ꠟꠣꠉꠤ ꠀꠝꠣꠞ ꠖꠤꠟ ꠈꠥꠡꠤꠄ ꠜꠞꠤꠉꠦꠍꠦ।
PSA 13:6 ꠀꠝꠤ ꠝꠣꠛꠥꠖꠞ ꠘꠣꠝꠦ ꠉꠎꠟ ꠉꠣꠁꠝꠥ, ꠀꠝꠣꠞ ꠜꠣꠟꠣꠁ ꠔ ꠔꠣꠁꠘꠃ ꠇꠞꠍꠂꠘ॥
PSA 14:1 ꠄꠛꠣꠖꠔ-ꠛꠘ꠆ꠖꠦꠉꠤ ꠙꠞꠤꠌꠣꠟꠇꠞ ꠟꠣꠉꠤ: ꠢꠎꠞꠔ ꠖꠣꠃꠖꠞ ꠝꠤꠎꠝꠞ। ꠛꠦꠀꠈꠟꠦ ꠝꠘꠦ ꠝꠘꠦ ꠇꠄ, “ꠀꠟ꠆ꠟꠣ ꠛꠟꠔꠦ ꠇꠦꠃ ꠘꠣꠁ।” ꠀꠍꠟꠦ ꠔꠣꠞꠣ ꠛꠦꠖꠤꠘ-ꠛꠦꠁꠝꠣꠘ, ꠇꠞꠦꠞ ꠈꠣꠟꠤ ꠎꠊꠁꠘ꠆ꠘ ꠇꠣꠝ, ꠢꠇ ꠇꠣꠝ ꠇꠞꠦ ꠁꠟꠣ ꠇꠦꠃ ꠘꠣꠁ।
PSA 14:2 ꠀꠞꠡꠦ-ꠀꠎꠤꠝ ꠕꠣꠇꠤ ꠀꠟ꠆ꠟꠣ ꠙꠣꠇꠦ ꠀꠖꠝ ꠎꠣꠔꠤꠞ ꠛꠣꠄ ꠌꠣꠁꠘ, ꠌꠣꠁꠀ ꠖꠦꠈꠂꠘ, ꠢꠣꠍꠣꠞꠞ ꠀꠈꠟꠖꠣꠞ ꠇꠥꠘꠥ ꠝꠣꠘꠥꠡ ꠀꠍꠦ ꠘꠤ, ꠀꠟ꠆ꠟꠣꠞ ꠀꠡꠤꠇ-ꠖꠦꠅꠀꠘꠣ ꠇꠦꠃ ꠀꠍꠦ ꠘꠤ।
PSA 14:3 ꠔꠣꠁꠘ ꠖꠦꠈꠟꠣ, ꠢꠇꠟ ꠝꠣꠘꠥꠡ ꠛꠦ-ꠙꠕꠤ ꠅꠁꠉꠦꠍꠦ, ꠢꠇ꠆ꠇꠟ ꠄꠇꠟꠉꠦ ꠘꠣꠚꠞꠝꠣꠘ ꠛꠘꠤꠉꠦꠍꠦ, ꠢꠇ ꠇꠣꠝ ꠇꠞꠦ ꠁꠟꠣ ꠇꠦꠃ ꠘꠣꠁ, ꠄꠇꠎꠘꠅ ꠘꠣꠁ।
PSA 14:4 ꠅꠃ ꠛꠎ꠆ꠎꠣꠔ ꠅꠇꠟꠞ ꠝꠣꠎꠦ ꠇꠥꠘꠥ ꠀꠈꠟ ꠘꠣꠁ ꠘꠤ? ꠝꠣꠘꠡꠦ ꠎꠦꠟꠣ ꠈꠣꠘꠣ-ꠈꠣꠁꠖ꠆ꠖ ꠈꠣꠁꠘ, ꠔꠣꠞꠣ ꠅꠟꠣ ꠀꠝꠣꠞ ꠛꠘ꠆ꠖꠣꠞꠦ ꠈꠣꠁꠟꠣꠄ, ꠀꠟ꠆ꠟꠣ ꠝꠣꠛꠥꠖꠞ ꠘꠣꠝꠅ ꠀꠄ ꠘꠣ ꠔꠣꠞꠣꠞ ꠝꠥꠈꠦꠖꠤ।
PSA 14:5 ꠔꠣꠞꠣ ꠒꠞꠞ ꠌꠥꠐꠦ ꠕꠞ-ꠕꠞꠣꠁꠀ ꠇꠣꠙꠤꠛꠣ, ꠀꠟ꠆ꠟꠣ ꠙꠣꠇ ꠔ ꠔꠣꠘ ꠀꠡꠤꠇꠞ ꠝꠣꠎꠦ ꠛꠡꠔ ꠇꠞꠂꠘ।
PSA 14:6 ꠔꠥꠝꠞꠣꠞ ꠌꠤꠘ꠆ꠔꠣ ꠅꠁꠟ ꠛꠤꠘꠣꠡ ꠇꠞꠣ ꠖꠥꠈꠤ-ꠇꠣꠋꠉꠣꠟꠞ ꠀꠡꠣ-ꠜꠞꠡꠣ, ꠅꠁꠟꠦ ꠝꠣꠛꠥꠖꠃ ꠔꠣꠞꠣꠞ ꠀꠡꠞꠄ ꠑꠤꠇꠣꠘꠣ।
PSA 14:7 ꠛꠘꠤ ꠁꠍꠞꠣꠁꠟꠞ ꠛꠣꠌꠣꠞ ꠙꠕ ꠍꠤꠅꠘ ꠙꠣꠠ ꠕꠣꠇꠤ ꠟꠣꠝꠤꠀ ꠀꠃꠇ! ꠝꠣꠛꠥꠖꠦ ꠎꠦꠛꠟꠣ ꠔꠣꠘ ꠙ꠆ꠞꠎꠣ ꠅꠇꠟꠞ ꠢꠣꠟꠔ ꠛꠖꠟꠣꠁꠛꠣ, ꠁꠀꠇꠥꠛꠞ ꠈꠣꠘ꠆ꠖꠣꠘꠦ ꠅꠃ ꠡꠝꠄ ꠚꠥꠞ꠆ꠔꠤ-ꠀꠝꠥꠖ ꠇꠞꠛꠣ, ꠛꠘꠤ ꠁꠍꠞꠣꠁꠟꠦ ꠈꠥꠡꠤꠞ ꠡꠥꠇꠥꠞ-ꠉꠥꠎꠣꠞꠤ ꠉꠣꠁꠛꠣ॥
PSA 15:1 ꠢꠎꠞꠔ ꠖꠣꠃꠖꠞ ꠝꠤꠎꠝꠞ। ꠅ ꠝꠣꠛꠥꠖ, ꠔꠥꠝꠣꠞ ꠖꠞꠛꠣꠞꠅ ꠝꠦꠝꠣꠘ ꠅꠀꠞ ꠇꠦ ꠎꠁꠉ꠆ꠉ, ꠇꠥꠘ ꠝꠣꠘꠥꠡ ꠔꠥꠝꠣꠞ ꠙꠛꠤꠔ꠆ꠞ ꠙꠣꠠꠅ ꠞꠅꠀꠞ ꠎꠁꠉ꠆ꠉ?
PSA 15:2 ꠎꠦ ꠎꠘꠦ ꠘꠤꠈꠥꠔ ꠎꠤꠘ꠆ꠖꠦꠉꠤ ꠇꠣꠐꠣꠄ, ꠘꠦꠇ ꠀꠝꠟꠦ ꠖꠤꠘ ꠉꠥꠎꠞꠣꠄ, ꠎꠣꠞ ꠖꠤꠟ ꠕꠣꠇꠤ ꠢꠇ ꠝꠣꠔ ꠛꠣꠞ ꠅꠄ।
PSA 15:3 ꠅꠁꠘ꠆ꠘ ꠝꠣꠘꠡꠞ ꠛꠖꠘꠣꠝ ꠎꠦ ꠎꠘꠦ ꠉꠣꠄ ꠘꠣ, ꠔꠣꠞ ꠇꠥꠘꠥ ꠖꠥꠡ꠆ꠔꠞ ꠈꠦꠔꠤ ꠢꠦ ꠇꠞꠦ ꠘꠣ, ꠀꠞꠤ-ꠚꠞꠤꠞ ꠖꠥꠞꠘꠣꠝꠅ ꠢꠦ ꠞꠐꠣꠄ ꠘꠣ।
PSA 15:4 ꠇꠥ-ꠙꠕꠤ ꠘꠣꠚꠞꠝꠣꠘ ꠕꠣꠇꠤ ꠢꠞꠤꠀ ꠞꠄ ꠎꠦ, ꠛꠞꠋ ꠀꠟ꠆ꠟꠣꠞ ꠙꠤꠀꠞꠣ ꠛꠘ꠆ꠖꠣꠞꠦ ꠁꠎ꠆ꠎꠔ ꠇꠞꠦ ꠢꠦ, ꠀꠞ ꠘꠤꠎꠞ ꠈꠦꠔꠤ ꠝꠣꠘꠤꠀꠅ ꠅꠀꠖꠣ ꠙꠥꠞꠘ ꠇꠞꠦ।
PSA 15:5 ꠐꠦꠇꠣ-ꠙꠄꠡꠣ ꠇꠞꠎ ꠖꠦꠄ ꠡꠥꠖ ꠘꠣ ꠟꠁꠀ, ꠘꠤ-ꠅꠙꠞꠣꠗꠤꠞ ꠙꠇ꠆ꠇ ꠟꠄ ꠊꠥꠡ ꠘꠣ ꠈꠣꠁꠀ। ꠅꠃ ꠟꠣꠈꠣꠘ ꠀꠝꠟꠦ ꠌꠟꠦ ꠎꠦꠁ ꠎꠘ, ꠇꠥꠘꠥ ꠖꠤꠘꠃ ꠊꠣꠛꠠꠤꠔ ꠘꠣꠄ ꠢꠃ ꠡꠣꠗꠥ ꠝꠘ॥
PSA 16:1 ꠢꠎꠞꠔ ꠖꠣꠃꠖꠞ ꠚꠞꠤꠀꠖ। ꠔꠥꠝꠤ ꠀꠝꠣꠞꠦ ꠢꠦꠚꠣꠎꠔꠦ ꠞꠣꠈꠅ ꠀꠟ꠆ꠟꠣ ꠉ, ꠀꠝꠤ ꠔ ꠀꠡꠞꠄ ꠟꠁꠍꠤ ꠔꠥꠝꠣꠞꠃ ꠖꠞꠛꠣꠞꠅ।
PSA 16:2 ꠝꠣꠛꠥꠖꠞꠦ ꠇꠁꠍꠤ ꠀꠝꠤ, “ꠀꠝꠣꠞꠃ ꠝꠥꠘꠤꠛ ꠔꠥꠝꠤ, ꠔꠥꠝꠤ ꠍꠣꠠꠣ ꠘꠣꠁ ꠔ ꠜꠣꠟꠣꠁ ꠀꠝꠤ ꠘꠤꠌ꠆ꠌꠤꠔ ꠎꠣꠘꠤ।”
PSA 16:3 ꠎꠝꠤꠘꠞ ꠙꠞꠦꠎꠉꠣꠞ ꠛꠘ꠆ꠖꠣꠁꠘ ꠔꠥꠝꠣꠞ ꠌꠈꠥꠔ ꠁꠎ꠆ꠎꠔꠤ, ꠔꠣꠞꠣꠞ ꠟꠉꠦꠃ ꠀꠝꠣꠞ ꠖꠥꠡ꠆ꠔꠤ ꠀꠞ ꠙꠤꠞꠤꠔꠤ।
PSA 16:4 ꠅꠁꠟꠦ ꠀꠟ꠆ꠟꠣ ꠍꠣꠠꠣ ꠅꠘ꠆ꠘ ꠘꠣꠝ ꠎꠦꠔꠣ ꠎꠘꠦ ꠟꠄ, ꠔꠣꠞꠣꠞ ꠛꠠ ꠖꠥꠈ-ꠝꠍꠤꠛꠔ ꠛꠣꠠꠤꠛ ꠘꠤꠌ꠆ꠌꠄ। ꠎꠦꠔꠣꠞ ꠘꠣꠝꠦ ꠖꠦꠄ ꠔꠣꠞꠣ ꠛꠟꠤꠞ ꠟꠃ ꠛꠤꠟꠣꠁꠀ, ꠁꠔꠣꠞ ꠘꠣꠝ ꠔ ꠟꠁꠔꠣꠝ ꠘꠣꠄ ꠀꠝꠣꠞ ꠝꠥꠈꠦ ꠖꠤꠀ।
PSA 16:5 ꠝꠣꠛꠥꠖꠃ ꠀꠝꠣꠞ ꠗꠘ, ꠀꠝꠣꠞ ꠙꠤꠀꠍꠞ ꠙꠣꠘꠤ, ꠀꠝꠣꠞ ꠇꠙꠣꠟ ꠀꠍꠦ ꠔ ꠔꠣꠘ ꠀꠔꠅꠃ ꠎꠣꠘꠤ।
PSA 16:6 ꠀꠝꠣꠞ ꠛꠣꠐꠅ ꠙꠠꠍꠦ ꠎꠦꠔꠣ ꠖꠃꠟꠔꠞ ꠡꠤꠝꠣꠘꠣ, ꠝꠤꠞꠣꠡꠖꠣꠞꠤ ꠖꠦꠈꠤꠀ ꠌꠃꠈꠦ ꠖꠤꠟ ꠖꠦꠅꠀꠘꠣ।
PSA 16:7 ꠝꠣꠛꠥꠖꠞ ꠡꠥꠇꠞꠤꠀ ꠎꠣꠘꠣꠁ! ꠛꠥꠖ꠆ꠖꠤ-ꠙꠞꠣꠝꠤꠡ ꠔ ꠖꠦꠁꠘ ꠔꠣꠁꠘꠃ ꠀꠝꠣꠞꠦ, ꠞꠣꠁꠔꠞ ꠛꠣꠟꠣ ꠢꠥꠡꠤꠀꠞ ꠞꠣꠈꠦ ꠀꠝꠣꠞ ꠛꠤꠛꠦꠇꠦ।
PSA 16:8 ꠀꠝꠣꠞ ꠌꠃꠈ ꠢꠣꠝꠦꠡꠣ ꠞꠄ ꠝꠣꠛꠥꠖꠞ ꠛꠣꠄ ꠈꠣꠟꠤ, ꠔꠣꠁꠘꠃ ꠀꠝꠣꠞ ꠒꠣꠁꠘ ꠉꠣꠟꠣꠔ, ꠀꠟꠤꠔꠣꠝ ꠘꠣꠄ ꠀꠝꠤ।
PSA 16:9 ꠔꠦ ꠈꠥꠡꠤꠄ ꠜꠞꠣ ꠀꠝꠣꠞ ꠖꠤꠟ, ꠚꠥꠞ꠆ꠔꠤ ꠇꠞꠦꠞ ꠙꠞꠣꠘ, ꠀꠝꠣꠞ ꠇꠣꠄꠀꠄ ꠜꠞꠡꠣ ꠙꠣꠁꠀ ꠇꠞꠦ ꠡꠣꠘ꠆ꠔꠤ-ꠀꠞꠣꠝ।
PSA 16:10 ꠀꠝꠣꠞꠦ ꠚꠣꠟꠣꠁꠔꠣꠄ ꠘꠣꠄ ꠔꠥꠝꠤ ꠉꠁꠘ ꠙꠣꠔꠣꠟꠅ, ꠔꠥꠝꠣꠞ ꠀꠡꠤꠇ ꠛꠘ꠆ꠖꠣꠞ ꠇ꠆ꠇꠄ ꠘꠣꠁ ꠔ ꠇꠄꠛꠞꠞ ꠉꠣꠔꠅ।
PSA 16:11 ꠖꠦꠈꠣꠁꠞꠣꠄ ꠎꠤꠘ꠆ꠖꠦꠉꠤꠞ ꠙꠕ ꠀꠝꠣꠞꠦ ꠔꠥꠝꠤ, ꠔꠥꠝꠣꠞ ꠖꠤꠖꠣꠞꠞ ꠝꠣꠎꠦ ꠀꠍꠦ ꠙꠥꠞꠣꠙꠥꠞ ꠚꠥꠞ꠆ꠔꠤ, ꠔꠥꠝꠣꠞ ꠒꠣꠁꠘ ꠇꠣꠘ꠆ꠖꠣꠔ ꠀꠍꠦ ꠌꠤꠞꠇꠣꠟꠤꠘ ꠡꠥꠈ-ꠡꠣꠘ꠆ꠔꠤ॥
PSA 17:1 ꠢꠎꠞꠔ ꠖꠣꠃꠖꠞ ꠖꠥꠀ ꠅ ꠝꠣꠛꠥꠖ, ꠔꠥꠝꠤ ꠢꠇ ꠚꠞꠤꠀꠖ ꠢꠥꠘꠅ, ꠀꠝꠣꠞ ꠝꠤꠘꠔꠤꠞ ꠛꠣꠄ ꠈꠤꠀꠟ ꠇꠞꠅ, ꠀꠝꠣꠞ ꠖꠥꠀ ꠇꠛꠥꠟ ꠇꠞꠅ ꠉ ꠔꠥꠝꠤ, ꠀꠝꠣꠞ ꠝꠥꠈꠅ ꠘꠣꠄ ꠇꠥꠘꠥ ꠍꠟ-ꠌꠔꠥꠞꠤ।
PSA 17:2 ꠀꠝꠣꠞ ꠢꠇ ꠁꠘꠍꠣꠚ ꠔꠥꠝꠣꠞ ꠀꠞꠡ ꠕꠣꠇꠤ ꠀꠃꠇ, ꠔꠥꠝꠣꠞ ꠙꠛꠤꠔ꠆ꠞ ꠌꠃꠈꠦ ꠢꠇ-ꠢꠣꠟꠣꠟꠤꠞ ꠛꠣꠄ ꠌꠣꠃꠇ।
PSA 17:3 ꠔꠥꠝꠤ ꠀꠝꠣꠞ ꠖꠤꠟꠞ ꠈꠛꠞ ꠟꠁꠟꠦ, ꠞꠣꠁꠔꠞ ꠛꠣꠟꠣꠅ ꠎꠣꠌꠣꠁ ꠇꠞꠟꠦ, ꠢꠥꠘꠣꠞꠞ ꠟꠣꠈꠣꠘ ꠔꠥꠇꠣꠁꠟꠦꠅ ꠈꠣꠖ ꠙꠣꠁꠔꠣꠄ ꠘꠣꠄ, ꠘꠤꠅꠔ ꠇꠞꠍꠤ ꠝꠥꠈꠖꠤ ꠔ ꠉꠥꠘꠣꠞ ꠇꠣꠝ ꠇꠞꠔꠣꠝ ꠘꠣꠄ।
PSA 17:4 ꠝꠣꠘꠡꠦ ꠎꠦꠟꠣ ꠇꠞꠦ ꠛꠖ ꠇꠣꠝ ꠀꠝꠤ ꠁꠟꠣ ꠇꠞꠤ ꠘꠣ, ꠎꠣꠟꠤꠝꠞ ꠙꠕ ꠢꠞꠣꠁꠀ ꠕꠁ ꠔꠥꠝꠣꠞ ꠙꠣꠇ ꠛꠥꠟꠤ ꠢꠥꠘꠤꠀ।
PSA 17:5 ꠀꠝꠣꠞ ꠙꠣꠅꠞꠦ ꠡꠇ꠆ꠔ ꠇꠞꠍꠤ ꠔꠥꠝꠣꠞ ꠙꠕꠅ ꠞꠁꠔ, ꠟꠠꠍꠦ ꠘꠣ ꠝꠞ ꠙꠣꠅ ꠖꠥꠈꠣꠘ ꠄꠇ ꠌꠥꠟ ꠙꠞꠤꠝꠣꠘꠅ।
PSA 17:6 ꠀꠟ꠆ꠟꠣ ꠔꠥꠝꠤ ꠢꠥꠘꠛꠣꠄ ꠇꠞꠤꠃ ꠔꠥꠝꠣꠞꠦ ꠒꠣꠇꠤꠀꠞ, ꠇꠣꠘ ꠙꠣꠔꠤꠀ ꠢꠥꠘꠅ ꠛꠘ꠆ꠖꠥ ꠚꠞꠤꠀꠖ ꠀꠝꠣꠞ।
PSA 17:7 ꠇꠔ ꠀꠌꠣꠘꠇ ꠖꠦꠈꠤ ꠀꠝꠤ ꠔꠥꠝꠣꠞ ꠖꠄꠀ-ꠝꠣꠄꠀ, ꠅꠃ ꠝꠤꠘꠔꠤ ꠇꠞꠅ ꠇꠛꠥꠟ ꠅꠉ ꠖꠄꠀꠟ ꠀꠟ꠆ꠟꠣ, ꠛꠣꠌꠣꠞ ꠟꠣꠉꠤ ꠔꠥꠝꠣꠞ ꠉꠦꠍꠦ ꠀꠡꠞꠄ ꠟꠄ ꠎꠣꠞꠣ, ꠖꠥꠡꠝꠘ ꠕꠣꠇꠤ ꠛꠣꠌꠣꠅ ꠔꠣꠞꠦ ꠔꠥꠝꠣꠞ ꠒꠣꠁꠘ ꠀꠔ ꠖꠤꠀ।
PSA 17:8 ꠌꠈꠥꠞ ꠝꠘꠤ ꠎꠦꠟꠣ ꠘꠤꠞꠣꠙꠖ ꠅꠟꠣ ꠞꠣꠈꠅ ꠀꠝꠣꠞꠦ, ꠀꠝꠣꠞꠦ ꠟꠥꠇꠣꠅ ꠔꠥꠝꠣꠞ ꠒꠣꠈꠘꠣꠞ ꠔꠟꠦ।
PSA 17:9 ꠝꠣꠞꠣꠞ ꠟꠣꠉꠤ ꠎꠦꠉꠥꠁꠘ ꠀꠁꠀ ꠛꠦꠞꠤꠟꠤꠍꠂꠘ ꠝꠞꠦ, ꠅꠟꠣ ꠎꠣꠟꠤꠝ-ꠛꠎ꠆ꠎꠣꠔ ꠕꠣꠇꠤ ꠛꠣꠌꠣꠅ ꠀꠝꠣꠞꠦ।
PSA 17:10 ꠔꠣꠞꠣꠞ ꠅꠡꠣꠠ ꠖꠤꠟꠞ ꠖꠥꠀꠞ ꠔꠣꠟꠣ ꠝꠣꠞꠤ ꠞꠣꠈꠦ, ꠔꠣꠞꠣꠞ ꠎꠛꠣꠘ ꠜꠞꠣ ꠈꠣꠟꠤ ꠛꠦꠐꠣꠉꠤꠞꠤꠞ ꠝꠣꠔꠦ।
PSA 17:11 ꠈꠞꠦ ꠈꠞꠦ ꠀꠁꠀ ꠔꠣꠞꠣ ꠛꠦꠞꠤꠟꠤꠍꠦ ꠝꠞꠦ, ꠝꠣꠐꠤꠔ ꠚꠣꠟꠣꠁ ꠝꠣꠞꠔ ꠇꠞꠤ ꠇꠠꠣ ꠘꠎꠞ ꠞꠣꠈꠦ।
PSA 17:12 ꠡꠤꠇꠣꠞꠤ ꠡꠤꠋꠢꠄ ꠎꠦꠟꠣ ꠈꠣꠙ ꠗꠞꠤꠀ ꠞꠄ ꠛꠘꠅ, ꠔꠣꠞꠣ ꠅꠟꠣ ꠟꠥꠇꠣꠁ ꠛꠁꠍꠦ ꠀꠝꠣꠞ ꠎꠣꠘ ꠘꠤꠔ।
PSA 17:13 ꠀꠅ ꠉ ꠝꠣꠛꠥꠖ, ꠎꠣꠟꠤꠝꠞꠦ ꠀꠐꠇꠣꠁꠀ ꠝꠣꠐꠤꠔ ꠢꠥꠔꠣꠁꠟꠣꠅ, ꠔꠥꠝꠣꠞ ꠇꠥꠖꠞꠔꠤ ꠔꠟꠥꠀꠞ ꠖꠤꠀ ꠀꠝꠣꠞꠦ ꠛꠣꠌꠣꠅ।
PSA 17:14 ꠔꠥꠝꠣꠞ ꠀꠔꠦ ꠛꠣꠌꠣꠅ ꠝꠣꠛꠥꠖ ꠅꠔꠣ ꠝꠣꠘꠥꠡ ꠕꠣꠇꠤ, ꠖꠥꠘꠤꠀꠈꠥꠞꠞ ꠇꠛꠎꠣ ꠕꠣꠇꠤ ꠎꠣꠘ ꠛꠣꠌꠣꠅ ꠔꠥꠝꠤ। ꠔꠣꠞꠣꠞ ꠝꠘꠞ ꠀꠡꠣ ꠈꠣꠟꠤ ꠅꠃ ꠎꠉꠔꠞ ꠃꠙꠞꠦ, ꠔꠣꠞꠣꠞ ꠙꠦꠐ ꠜꠞꠣꠅ ꠔꠥꠝꠣꠞ ꠟꠣꠘ꠆ꠘꠔꠤ ꠉꠎꠛꠦ। ꠅꠔꠣ ꠈꠣꠁꠀ ꠔꠣꠞꠣꠞ ꠀꠅꠟꠣꠖꠦ ꠙꠦꠐ ꠜꠞꠤꠟꠣꠃꠇ, ꠅꠔꠣꠞ ꠢꠥꠞꠥꠔ꠆ꠔꠣꠞ ꠟꠣꠉꠤ ꠛꠣꠇꠤ ꠅꠋꠡ ꠛꠦꠡ ꠇꠞꠤ ꠕꠁꠀ ꠎꠣꠃꠇ।
PSA 17:15 ꠅꠁꠟꠦ ꠀꠝꠤ ꠎꠣꠘꠥ ꠘꠤ-ꠅꠙꠞꠣꠗꠤ ꠞꠁ ꠔꠥꠝꠣꠞ ꠖꠞꠛꠣꠞꠅ, ꠢꠎꠣꠉ ꠅꠁꠀ ꠡ꠆ꠛꠣꠖ ꠝꠤꠐꠣꠁꠀ ꠞꠁꠝꠥ ꠔꠥꠝꠣꠞ ꠖꠤꠖꠣꠞꠅ॥
PSA 18:1 ꠄꠛꠣꠖꠔ-ꠛꠘ꠆ꠖꠦꠉꠤ ꠙꠞꠤꠌꠣꠟꠇꠞ ꠟꠣꠉꠤ: ꠝꠣꠛꠥꠖꠞ ꠛꠘ꠆ꠖꠣ ꠢꠎꠞꠔ ꠖꠣꠃꠖꠞ ꠝꠤꠎꠝꠞ। ꠝꠣꠛꠥꠖꠦ ꠎꠦꠛꠟꠣ ꠛꠣꠖꠡꠣ ꠔꠣꠟꠥꠔ ꠀꠞ ꠛꠣꠖ-ꠛꠣꠇꠤ ꠢꠇꠟ ꠖꠥꠡꠝꠘꠞ ꠀꠔ ꠕꠣꠇꠤ ꠖꠣꠃꠖꠞꠦ ꠢꠦꠚꠣꠎꠔ ꠇꠞꠟꠣ, ꠅꠃ ꠡꠝꠄ ꠖꠣꠃꠖꠦ ꠝꠣꠛꠥꠖꠞ ꠘꠣꠝꠦ ꠅꠃ ꠝꠤꠎꠝꠞ ꠉꠣꠁꠟꠣ। ꠅ ꠝꠣꠛꠥꠖ, ꠀꠝꠣꠞ ꠛꠟ-ꠡꠇ꠆ꠔꠤ, ꠀꠝꠤ ꠔꠥꠝꠣꠞꠃ ꠀꠡꠤꠇ।
PSA 18:2 ꠀꠟ꠆ꠟꠣꠃ ꠀꠝꠣꠞ ꠘꠤꠞꠣꠙꠖ ꠝꠤꠘꠣꠞ, ꠀꠝꠣꠞ ꠎꠣꠘ ꠛꠣꠌꠣꠘꠤꠞ ꠝꠣꠟꠤꠇ, ꠀꠝꠣꠞ ꠝꠣꠛꠥꠖ, ꠀꠝꠣꠞ ꠙꠣꠠ, ꠔꠣꠘ ꠍꠣꠄꠀꠔ ꠀꠡꠞꠄ ꠟꠁꠍꠤ। ꠎꠥꠖ꠆ꠖꠞ ꠝꠄꠖꠣꠘꠅ ꠔꠣꠁꠘꠃ ꠀꠝꠣꠞ ꠓꠣꠟ, ꠎꠣꠘ ꠛꠣꠌꠣꠘꠤꠞ ꠛꠟ-ꠔꠣꠇ꠆ꠇꠔ, ꠀꠝꠣꠞ ꠀꠡꠞꠄ ꠝꠥꠇꠣꠝ।
PSA 18:3 ꠉꠥꠘꠉꠣꠘ ꠙꠣꠅꠀꠞ ꠟꠣꠈ ꠝꠣꠛꠥꠖꠞ ꠘꠣꠝ ꠟꠁꠝꠥ, ꠔꠦꠃ ꠖꠥꠡꠝꠘꠞ ꠀꠔ ꠕꠣꠇꠤ ꠀꠝꠤ ꠎꠣꠘꠦ ꠛꠣꠌꠤꠝꠥ।
PSA 18:4 ꠝꠞꠘꠞ ꠖꠠꠤꠄ ꠙꠦꠌꠣꠁꠟꠤꠍꠤꠟ ꠀꠝꠣꠞꠦ, ꠡꠞ꠆ꠛꠘꠣꠡꠣ ꠚꠥꠔꠞ ꠙꠣꠘꠤꠔ ꠒꠥꠛꠣꠁꠟꠤꠍꠤꠟ ꠝꠞꠦ,
PSA 18:5 ꠙꠣꠔꠣꠟꠞ ꠖꠠꠤ ꠖꠤꠀ ꠅꠁꠍꠤꠟ ꠝꠞꠦ ꠛꠣꠘ꠆ꠖꠣ, ꠀꠝꠣꠞ ꠟꠣꠉꠤ ꠅꠁꠍꠤꠟ ꠇꠄꠛꠞꠞ ꠉꠣꠔ ꠈꠥꠖꠣ।
PSA 18:6 ꠅꠟꠣꠈꠣꠘ ꠛꠤꠙꠖꠅ ꠙꠠꠤꠀ ꠝꠣꠛꠥꠖꠞꠦ ꠒꠣꠇꠤꠟꠣꠝ, ꠎꠥꠞꠦ ꠎꠥꠞꠦ ꠔꠣꠘ ꠡꠣꠁꠎ꠆ꠎ ꠀꠝꠤ ꠝꠣꠋꠉꠤꠟꠣꠝ, ꠔꠣꠁꠘ ꠘꠤꠎꠞ ꠀꠞꠡ ꠕꠣꠇꠤ ꠢꠥꠘꠟꠣ ꠀꠝꠣꠞ ꠒꠣꠇ, ꠔꠣꠘ ꠖꠞꠛꠣꠞꠅ ꠀꠎꠤꠟ ꠀꠝꠣꠞ ꠚꠞꠤꠀꠖ।
PSA 18:7 ꠀꠡ꠆ꠔꠣ ꠖꠥꠘꠤꠀ ꠇꠣꠙꠤꠀ ꠕꠞ-ꠕꠞꠣꠘꠤ ꠗꠞꠟ, ꠙꠣꠠ-ꠐꠤꠟ꠆ꠟꠣꠞ ꠜꠤꠔ ꠅꠇꠟ ꠟꠠꠣ-ꠌꠠꠣ ꠇꠞꠟ, ꠉꠥꠍꠣꠞ ꠀꠉꠥꠁꠘꠦ ꠔꠣꠘ ꠁꠔꠣꠄ ꠔ ꠇꠣꠙꠤꠟ।
PSA 18:8 ꠘꠣꠇꠦꠖꠤ ꠛꠣꠞ ꠅꠁꠟ ꠔꠣꠘ ꠉꠥꠍꠣꠞ ꠉꠞꠝ ꠗꠥꠝꠣ, ꠝꠥꠈ ꠕꠣꠇꠤ ꠀꠁꠟ ꠔꠣꠘ ꠀꠉꠥꠘꠤꠞ ꠟꠥꠇ꠆ꠇꠣ, ꠀꠞꠅ ꠔ ꠛꠣꠞ ꠅꠁꠀ ꠀꠁꠟ ꠎꠣꠟꠣꠁꠟ ꠀꠋꠞꠣ।
PSA 18:9 ꠀꠍꠝꠣꠘꠞꠦ ꠟꠣꠝꠣꠁꠀ ꠔꠣꠁꠘ ꠔꠟꠦ ꠟꠣꠝꠤꠀ ꠀꠁꠟꠣ, ꠔꠣꠘ ꠇꠖꠝꠞ ꠔꠟꠦ ꠀꠍꠤꠟ ꠊꠘ ꠇꠣꠟꠣ ꠝꠦꠊꠞ ꠌꠣꠇꠣ।
PSA 18:10 ꠔꠣꠁꠘ ꠇꠣꠞꠥꠛꠤꠞ ꠃꠙꠞꠦ ꠌꠠꠤꠀ ꠃꠠꠣꠟ ꠖꠤꠟꠣ, ꠛꠣꠔꠣꠡꠞ ꠒꠣꠈꠘꠣꠔ ꠜꠞ ꠖꠤꠀ ꠃꠠꠤꠀ ꠀꠁꠟꠣ।
PSA 18:11 ꠔꠣꠁꠘ ꠀꠘ꠆ꠖꠣꠁꠞꠞ ꠜꠤꠔꠞꠦ ꠘꠤꠎꠞꠦ ꠀꠅꠠ ꠇꠞꠤꠟ꠆ꠟꠣ, ꠊꠘ ꠝꠦꠊꠞ ꠌꠣꠇꠣꠄ ꠔꠣꠘ ꠙꠛꠤꠔ꠆ꠞ ꠔꠣꠝ꠆ꠛꠥ ꠉꠥꠞꠤꠟ꠆ꠟꠣ।
PSA 18:12 ꠘꠥꠞꠞ ꠎꠤꠟꠇꠤꠄ ꠔꠣꠘ ꠀꠘ꠆ꠖꠣꠁꠞ ꠝꠦꠊ ꠢꠞꠤ ꠉꠦꠟ, ꠝꠦꠊꠞ ꠢꠤꠟ ꠀꠞ ꠎꠣꠟꠣꠁꠟ ꠀꠋꠞꠣ ꠎꠝꠤꠘꠅ ꠙꠠꠟ।
PSA 18:13 ꠝꠣꠛꠥꠖꠦ ꠀꠍꠝꠣꠘ ꠕꠣꠇꠤ ꠉꠞ꠆ꠎꠤꠀ ꠃꠑꠤꠟꠣ, ꠀꠟ꠆ꠟꠣꠔꠣꠟꠣꠄ ꠔꠣꠘ ꠉꠟꠣꠞ ꠀꠅꠀꠎ ꠢꠥꠘꠣꠁꠟꠣ।
PSA 18:14 ꠔꠣꠘ ꠗꠘꠥꠇꠞ ꠔꠤꠞ ꠝꠣꠞꠤꠀ ꠖꠥꠡꠝꠘꠞꠦ ꠍꠤꠔꠞꠣꠁꠟ꠆ꠟꠣ, ꠝꠦꠊꠞ ꠎꠤꠟꠇꠣꠘꠤꠄ ꠔꠣꠞꠣꠞꠦ ꠛꠦꠚꠣꠘꠣ ꠛꠣꠘꠣꠁꠟꠣ।
PSA 18:15 ꠔꠥꠝꠣꠞ ꠗꠝꠇꠦ ꠀꠞ ꠘꠣꠇꠞ ꠡ꠆ꠛꠣꠡꠦ, ꠝꠣꠛꠥꠖ ꠉ, ꠖꠞꠤꠀꠞ ꠝꠥꠞꠞ ꠙꠣꠘꠤꠞ ꠚꠥꠔ ꠅꠇꠟ ꠖꠦꠈꠣ ꠖꠤꠟ, ꠎꠉꠔꠞ ꠝꠥꠟ ꠜꠤꠔ ꠅꠇꠟꠅ ꠃꠖꠟꠣ ꠅꠁꠉꠦꠟ।
PSA 18:16 ꠃꠙꠞꠦ ꠕꠣꠇꠤ ꠀꠔ ꠛꠣꠠꠣꠁꠀ ꠔꠣꠁꠘ ꠝꠞꠦ ꠗꠞꠟꠣ, ꠉꠁꠘ ꠙꠣꠘꠤ ꠕꠘꠦ ꠀꠝꠣꠞꠦ ꠐꠣꠘꠤꠀ ꠔꠥꠟꠟꠣ।
PSA 18:17 ꠛꠣꠌꠣꠁꠟꠣ ꠀꠝꠣꠞꠦ ꠔꠣꠁꠘ ꠙꠄꠟꠥꠀꠘ ꠖꠥꠡꠝꠘ ꠕꠣꠇꠤ, ꠛꠣꠌꠣꠁꠟꠣ ꠖꠥꠡꠝꠘ-ꠞꠤꠙꠥ ꠅꠇꠟꠞ ꠇꠛꠎꠣ ꠕꠣꠇꠤ, ꠎꠦꠔꠣꠞ ꠛꠟ-ꠔꠣꠇ꠆ꠇꠔ ꠔ ꠀꠝꠣꠞ ꠕꠣꠇꠤꠅ ꠛꠃꠔ ꠛꠦꠡꠤ।
PSA 18:18 ꠀꠝꠣꠞ ꠝꠍꠤꠛꠔꠞ ꠖꠤꠘꠅ-ꠅ ꠔꠣꠞꠣ ꠝꠞꠦ ꠝꠣꠞꠣꠔ ꠀꠁꠟꠣ, ꠅꠁꠟꠦ ꠝꠣꠛꠥꠖ ꠀꠟ꠆ꠟꠣ ꠔ ꠀꠝꠣꠞ ꠡꠢꠣꠄ ꠅꠁꠟꠣ।
PSA 18:19 ꠈꠥꠟꠣ ꠝꠄꠖꠣꠘꠅ ꠔꠣꠁꠘ ꠀꠝꠣꠞꠦ ꠛꠣꠞ ꠇꠞꠤ ꠀꠘꠟꠣ, ꠀꠝꠣꠞ ꠃꠙꠞꠦ ꠈꠥꠡ ꠅꠀꠄ ꠀꠝꠣꠞꠦ ꠛꠣꠌꠣꠁꠟꠣ।
PSA 18:20 ꠝꠣꠛꠥꠖꠦ ꠖꠤꠟꠣ ꠀꠝꠣꠞ ꠙꠞꠦꠎꠉꠣꠞꠤꠞ ꠛꠖꠟꠣ, ꠀꠝꠣꠞ ꠀꠔꠞ ꠘꠦꠇ ꠇꠣꠝꠞ ꠛꠈꠡꠤꠡ ꠔꠣꠁꠘ ꠖꠤꠟꠣ।
PSA 18:21 ꠝꠣꠛꠥꠖꠞ ꠙꠕꠦꠃ ꠌꠟꠍꠤ ꠀꠝꠤ, ꠇꠞꠍꠤ ꠘꠣ ꠘꠣꠚꠞꠝꠣꠘꠤ, ꠁꠟꠣ ꠇꠣꠝ ꠇꠞꠍꠤ ꠘꠣ ꠎꠦꠔꠣꠄ ꠢꠞꠣꠄ ꠀꠟ꠆ꠟꠣꠞ ꠖꠤꠖꠣꠞ ꠕꠣꠇꠤ।
PSA 18:22 ꠔꠣꠘ ꠔꠣꠝꠣꠝ ꠢꠇ-ꠚꠄꠍꠣꠟꠣ ꠀꠝꠣꠞ ꠌꠈꠥꠞ ꠀꠄꠘꠣ, ꠀꠝꠤ ꠔ ꠔꠣꠘ ꠢꠥꠇꠥꠝꠞ ꠇꠥꠘꠥ ꠈꠦꠟꠣꠚ ꠇꠞꠍꠤ ꠘꠣ।
PSA 18:23 ꠔꠣꠘ ꠘꠎꠞꠅ ꠀꠝꠤ ꠘꠤꠈꠥꠔ ꠞꠁꠍꠤ ꠢꠞ-ꠢꠣꠝꠦꠡꠣ, ꠉꠥꠘꠣ-ꠘꠣꠚꠞꠝꠣꠘꠤ ꠕꠣꠇꠤ ꠘꠤꠎꠞꠦ ꠞꠣꠈꠍꠤ ꠢꠞꠣꠁꠀ।
PSA 18:24 ꠄꠞꠖꠣꠄ ꠝꠣꠛꠥꠖꠦ ꠀꠝꠣꠞ ꠙꠞꠦꠎꠉꠣꠞꠤꠞ ꠖꠤꠍꠂꠘ ꠙꠥꠞꠥꠡ꠆ꠇꠣꠞ, ꠀꠝꠣꠞ ꠘꠦꠇ ꠇꠣꠝ ꠖꠦꠈꠤꠀ ꠔꠣꠁꠘ ꠇꠞꠍꠂꠘ ꠅꠃ ꠛꠤꠌꠣꠞ।
PSA 18:25 ꠖꠄꠀ-ꠝꠣꠄꠀ ꠇꠞꠞꠣꠞꠦ ꠔꠥꠝꠤꠅ ꠖꠄꠀ-ꠝꠣꠄꠀ ꠇꠞ, ꠈꠣꠐꠤ ꠛꠘ꠆ꠖꠣꠞ ꠟꠉꠦ ꠔꠥꠝꠤꠅ ꠈꠣꠐꠤ ꠞꠅ।
PSA 18:26 ꠘꠤꠞꠜꠦꠎꠣꠟꠤꠞ ꠛꠣꠄ ꠔꠥꠝꠤꠅ ꠘꠤꠞꠜꠦꠎꠣꠟ, ꠀꠞ ꠇꠝꠤꠘꠞꠦ ꠖꠦꠈꠣꠅ ꠔꠥꠝꠣꠞ ꠙꠦꠌꠞ ꠚꠣꠘ꠆ꠖ।
PSA 18:27 ꠘꠞꠝ ꠖꠤꠟꠞ ꠝꠣꠘꠡꠞꠦ ꠔꠥꠝꠤꠃ ꠛꠣꠌꠣꠅ, ꠅꠁꠟꠦ ꠛꠠꠣꠁ-ꠉꠞꠤꠝꠣ ꠖꠦꠈꠣꠅꠞꠣꠞꠦ ꠔꠟꠦꠖꠤ ꠟꠣꠝꠣꠅ।
PSA 18:28 ꠈꠣꠟꠤ ꠔꠥꠝꠤ ꠀꠟ꠆ꠟꠣꠄ ꠚꠞ ꠇꠞꠅ ꠀꠝꠣꠞ ꠝꠥꠡꠣꠟꠞꠦ, ꠀꠝꠣꠞ ꠝꠣꠛꠥꠖꠦ ꠃꠎꠤꠟꠣ ꠇꠞꠂꠘ ꠀꠝꠣꠞ ꠀꠘ꠆ꠖꠣꠁꠞꠞꠦ।
PSA 18:29 ꠔꠥꠝꠣꠞꠦ ꠟꠉꠦ ꠟꠁꠀ ꠖꠥꠡꠝꠘꠞ ꠍꠤꠙꠣꠁ ꠖꠟꠞꠦ ꠀꠞꠣꠁꠝꠥ, ꠀꠝꠣꠞ ꠝꠣꠛꠥꠖꠞ ꠟꠉꠦ ꠃꠌꠣ ꠖꠦꠅꠀꠟꠅ ꠚꠣꠟꠖꠤ ꠙꠣꠞ ꠅꠁꠝꠥ।
PSA 18:30 ꠔꠣꠁꠘꠃ ꠀꠟ꠆ꠟꠣ, ꠔꠣꠘ ꠙꠕ ꠔ ꠘꠤꠈꠥꠔ, ꠝꠣꠛꠥꠖꠞ ꠎꠛꠣꠘ ꠅꠇ꠆ꠇꠄ। ꠔꠣꠘ ꠉꠦꠍꠦ ꠎꠔ ꠎꠘꠦ ꠀꠡꠞꠄ ꠟꠂꠘ, ꠔꠣꠁꠘꠃ ꠔꠣꠞꠣꠞ ꠎꠣꠘ ꠛꠣꠌꠣꠘꠤꠞ ꠀꠔꠤꠀꠞ ꠅꠁꠘ।
PSA 18:31 ꠈꠣꠟꠤ ꠀꠟ꠆ꠟꠣ ꠍꠣꠠꠣ ꠀꠞ ꠖꠥꠍꠞꠣ ꠇꠥꠘꠥ ꠝꠣꠛꠥꠖ ꠀꠍꠦ ꠘꠤ? ꠀꠝꠞꠣꠞ ꠀꠟ꠆ꠟꠣ ꠛꠣꠖꠦ ꠖꠥꠍꠞꠣ ꠇꠥꠘꠥ ꠀꠡꠞꠄ ꠙꠣꠠ ꠝꠤꠟꠦ ꠘꠤ?
PSA 18:32 ꠀꠟ꠆ꠟꠣꠄꠃ ꠀꠝꠣꠞ ꠇꠝꠞꠅ ꠛꠟ-ꠡꠇ꠆ꠔꠤ ꠛꠣꠘ꠆ꠖꠤꠀ ꠖꠤꠍꠂꠘ, ꠔꠣꠁꠘ ꠔ ꠀꠝꠣꠞ ꠌꠟꠣꠞ ꠙꠕ ꠘꠤꠈꠥꠔ ꠇꠞꠍꠂꠘ।
PSA 18:33 ꠔꠣꠁꠘ ꠀꠝꠣꠞ ꠙꠣꠅꠞꠦ ꠖꠤꠍꠂꠘ ꠅꠞꠤꠘꠞ ꠟꠣꠈꠣꠘ ꠢꠦꠇꠝꠔ, ꠔꠣꠁꠘ ꠀꠝꠣꠞꠦ ꠐꠤꠇꠣꠁ ꠞꠣꠈꠂꠘ ꠙꠣꠠꠤꠀ ꠇꠑꠤꠘ ꠐꠤꠟ꠆ꠟꠣꠔ।
PSA 18:34 ꠔꠣꠁꠘꠃ ꠀꠝꠣꠞ ꠀꠔꠞꠦ ꠟꠣꠠꠣꠁ ꠇꠞꠣꠞ ꠇꠟꠣ-ꠇꠃꠡꠟ ꠢꠤꠇꠣꠁꠘ, ꠄꠞꠟꠣꠉꠤ ꠀꠝꠣꠞ ꠀꠔꠦ ꠙꠤꠔꠟꠞ ꠔꠤꠞ-ꠗꠘꠥꠇꠞꠦꠅ ꠛꠦꠇꠣ ꠇꠞꠤꠟꠣꠄ।
PSA 18:35 ꠔꠥꠝꠤ ꠀꠝꠣꠞꠦ ꠎꠣꠘ ꠛꠣꠌꠣꠘꠤꠞ ꠀꠔꠤꠀꠞ ꠖꠣꠘ ꠇꠞꠍ, ꠔꠥꠝꠣꠞ ꠒꠣꠁꠘ ꠀꠔꠖꠤ ꠀꠝꠣꠞꠦ ꠗꠞꠤꠀ ꠞꠣꠈꠍ, ꠔꠥꠝꠣꠞ ꠖꠦꠅꠀ ꠘꠞꠝ ꠝꠘꠦ ꠀꠝꠤ ꠅꠁꠍꠤ ꠛꠠ।
PSA 18:36 ꠔꠥꠝꠤ ꠀꠝꠣꠞ ꠌꠟꠣꠞ ꠙꠕꠞꠦ ꠇꠞꠍ ꠡꠥꠎꠣ, ꠄꠞꠟꠣꠉꠤ ꠀꠝꠣꠞ ꠙꠣꠅ ꠔ ꠙꠤꠍꠟꠤꠍꠦ ꠘꠣ।
PSA 18:37 ꠀꠝꠣꠞ ꠖꠥꠡꠝꠘ ꠖꠟꠞ ꠈꠞꠦ ꠖꠃꠠꠣꠁꠀ ꠁꠔꠣꠞꠦ ꠗꠞꠍꠤ, ꠅꠔꠣꠞ ꠡꠞ꠆ꠛꠘꠣꠡ ꠘꠣ ꠇꠞꠤꠀ ꠀꠝꠤ ꠚꠤꠞꠔ ꠘꠣ ꠀꠁꠍꠤ।
PSA 18:38 ꠌꠥꠞꠝꠣꠞ ꠇꠞꠍꠤ ꠔꠣꠞꠣꠞꠦ, ꠃꠛꠣꠁꠔ ꠀꠞ ꠙꠣꠞꠔ ꠘꠣꠄ, ꠙꠤꠡꠤꠍꠤ ꠔꠣꠞꠣꠞꠦ ꠀꠝꠣꠞ ꠙꠣꠅꠞ ꠔꠟꠣꠄ।
PSA 18:39 ꠎꠥꠖ꠆ꠖꠞ ꠟꠣꠉꠤ ꠔꠥꠝꠤꠃ ꠀꠝꠣꠞ ꠇꠝꠞꠅ ꠛꠟ-ꠡꠇ꠆ꠔꠤ ꠛꠣꠘ꠆ꠖꠤꠀ ꠖꠤꠍ, ꠀꠝꠣꠞ ꠛꠤꠞꠥꠗꠤ ꠍꠤꠙꠣꠁꠞꠦ ꠀꠝꠣꠞ ꠙꠣꠅꠔ ꠚꠣꠟꠣꠁꠍ।
PSA 18:40 ꠔꠥꠝꠤ ꠀꠝꠣꠞ ꠖꠥꠡꠝꠘ ꠖꠟꠞꠦ ꠜꠣꠉꠣꠁꠍ ꠍꠣꠝꠘ ꠕꠣꠇꠤ, ꠀꠝꠣꠞꠦ ꠎꠦꠔꠣꠄ ꠁꠋꠡꠣꠁꠘ ꠀꠝꠤ ꠔꠣꠞꠣꠞ ꠛꠤꠘꠣꠡ ꠇꠞꠍꠤ।
PSA 18:41 ꠛꠣꠌꠣꠞ ꠟꠣꠉꠤ ꠔꠣꠞꠣ ꠌꠤꠟ꠆ꠟꠣꠁꠍꠤꠟ, ꠛꠣꠌꠣꠘꠤꠔ ꠇꠦꠃ ꠀꠁꠍꠤꠟ ꠘꠣ, ꠝꠣꠛꠥꠖꠞ ꠉꠦꠍꠦ ꠡꠣꠁꠎ꠆ꠎ ꠌꠣꠁꠍꠤꠟ, ꠔꠣꠁꠘꠅ ꠁꠔꠣ ꠢꠥꠘꠟꠣ ꠘꠣ।
PSA 18:42 ꠀꠝꠤ ꠁꠔꠣꠞꠦ ꠝꠣꠞꠤꠀ ꠗꠥꠁꠟ-ꠛꠣꠟꠥꠞ ꠟꠣꠈꠣꠘ ꠛꠣꠔꠣꠡꠅ ꠃꠠꠣꠁꠟꠣꠝ, ꠙꠕꠞ ꠛꠣꠖꠣ-ꠍꠣꠖꠣꠞ ꠟꠣꠈꠣꠘ ꠁꠔꠣꠞꠦ ꠢꠞꠣꠁꠀ ꠚꠣꠟꠣꠁꠟꠣꠝ।
PSA 18:43 ꠅ ꠝꠣꠛꠥꠖ, ꠝꠣꠘꠡꠞ ꠉꠘ꠆ꠒꠉꠥꠟ ꠕꠣꠇꠤ ꠔꠥꠝꠤꠃ ꠛꠣꠌꠣꠁꠍ ꠀꠝꠣꠞꠦ, ꠀꠝꠣꠞꠦ ꠌꠣꠟꠇꠖꠣꠞ ꠛꠣꠘꠣꠁꠍ ꠢꠇꠟ ꠎꠣꠔꠤꠞ ꠃꠙꠞꠦ, ꠅꠈꠘ ꠀꠝꠣꠞ ꠈꠦꠎꠝꠔ ꠇꠞꠦꠞ ꠅꠌꠤꠘꠣ ꠎꠣꠔꠤꠄ।
PSA 18:44 ꠀꠝꠣꠞ ꠘꠣꠝ ꠢꠥꠘꠟꠦꠃ ꠔꠣꠞꠣ ꠀꠁꠅꠁꠘ ꠀꠝꠣꠞ ꠔꠟꠦ, ꠜꠤꠘ-ꠖꠦꠡꠤ ꠅꠇꠟꠦ ꠀꠝꠣꠞ ꠉꠦꠍꠦ ꠝꠤꠘꠔ-ꠇꠣꠎ꠆ꠎꠤ ꠇꠞꠦ।
PSA 18:45 ꠢꠃ ꠜꠤꠘ-ꠖꠦꠡꠤ ꠅꠇꠟ ꠘꠤꠞꠣꠡ ꠅꠁꠀ ꠎꠣꠄ, ꠔꠣꠞꠣ ꠛꠣꠋꠇꠣꠞ ꠕꠣꠇꠤ ꠛꠣꠞ ꠅꠁꠀ ꠇꠣꠙꠤ ꠇꠣꠙꠤ ꠀꠄ।
PSA 18:46 ꠝꠣꠛꠥꠖ ꠔ ꠎꠤꠘ꠆ꠖꠣ! ꠀꠝꠣꠞ ꠀꠡꠞꠄ ꠙꠣꠠꠞ ꠔꠣꠞꠤꠚ ꠅꠃꠇ! ꠀꠝꠣꠞꠦ ꠛꠣꠌꠣꠅꠞꠣ ꠀꠟ꠆ꠟꠣꠞ ꠁꠎ꠆ꠎꠔ-ꠔꠣꠎꠤꠝ ꠛꠣꠠꠃꠇ!
PSA 18:47 ꠎꠣꠔꠤ ꠅꠇꠟꠞꠦ ꠎꠦꠁꠘ ꠀꠝꠣꠞ ꠅꠗꠤꠘꠦ ꠀꠘꠂꠘ, ꠔꠣꠁꠘꠃ ꠀꠟ꠆ꠟꠣ, ꠀꠝꠣꠞ ꠙꠇ꠆ꠇ ꠟꠁꠀ ꠔꠣꠞꠣꠞꠦ ꠛꠖꠟꠣ ꠖꠦꠁꠘ।
PSA 18:48 ꠖꠥꠡꠝꠘꠞ ꠀꠔ ꠕꠣꠇꠤ ꠎꠦꠁꠘ ꠀꠝꠣꠞꠦ ꠛꠣꠌꠣꠁꠘ, ꠔꠥꠝꠤꠃ ꠀꠟ꠆ꠟꠣ, ꠛꠤꠙꠇ꠆ꠇ ꠅꠇꠟꠞ ꠃꠙꠞꠦ ꠔꠥꠝꠤꠃ ꠀꠝꠣꠞꠦ ꠔꠥꠟꠍ, ꠁꠋꠡꠣ-ꠉꠘ꠆ꠒꠉꠥꠟ ꠇꠞꠞꠣꠞ ꠀꠔ ꠕꠣꠇꠤ ꠔꠥꠝꠤ ꠀꠝꠣꠞꠦ ꠛꠣꠌꠣꠁꠍ।
PSA 18:49 ꠄꠞꠟꠣꠉꠤ ꠅ ꠝꠣꠛꠥꠖ, ꠢꠇ꠆ꠇꠟ ꠎꠣꠔꠤꠞ ꠉꠦꠍꠦ ꠀꠝꠤ ꠔꠥꠝꠣꠞ ꠔꠣꠞꠤꠚ ꠇꠞꠝꠥ, ꠢꠣꠝꠦꠡꠣ ꠔꠥꠝꠣꠞ ꠙꠣꠇ ꠘꠣꠝꠞ ꠉꠥꠘꠉꠣꠘ ꠉꠣꠁꠝꠥ।
PSA 18:50 ꠝꠣꠛꠥꠖꠦ ꠔꠣꠘ ꠛꠣꠖꠡꠣꠞꠦ ꠛꠃꠔ ꠛꠣꠞ ꠝꠢꠣ ꠎꠄꠁ ꠇꠞꠍꠂꠘ, ꠔꠣꠘ ꠈꠦꠟꠣꠚꠔꠤ ꠙꠣꠅꠀ ꠛꠣꠖꠡꠣ ꠖꠣꠃꠖ ꠀꠞ ꠔꠣꠘ ꠈꠣꠘ꠆ꠖꠣꠘꠞꠦ ꠢꠞ-ꠢꠣꠝꠦꠡꠣ ꠖꠄꠀ-ꠝꠣꠄꠀꠔ ꠞꠣꠈꠍꠂꠘ॥
PSA 19:1 ꠄꠛꠣꠖꠔ-ꠛꠘ꠆ꠖꠦꠉꠤ ꠙꠞꠤꠌꠣꠟꠇꠞ ꠟꠣꠉꠤ: ꠢꠎꠞꠔ ꠖꠣꠃꠖꠞ ꠝꠤꠎꠝꠞ। ꠀꠍꠝꠣꠘ ꠅꠇꠟꠦ ꠛꠄꠀꠘ ꠇꠞꠦ ꠀꠟ꠆ꠟꠣ ꠙꠣꠇꠞ ꠝꠢꠤꠝꠣ, ꠌꠣꠘ-ꠡꠥꠞꠥꠎ ꠉ꠆ꠞꠢ-ꠔꠦꠞꠣꠄ ꠖꠦꠈꠣꠄ ꠔꠣꠘ ꠟꠤꠟꠣ-ꠈꠦꠟꠣ।
PSA 19:2 ꠖꠤꠘꠦ ꠖꠤꠘꠦ ꠉꠣꠄ ꠔꠣꠘ ꠎꠣꠟꠣꠟ ꠀꠞ ꠡꠣꠘ, ꠞꠣꠁꠔꠦ ꠞꠣꠁꠔꠦ ꠢꠤꠇꠣꠄ ꠔꠣꠘ ꠀꠈꠟꠞ ꠛꠄꠀꠘ।
PSA 19:3 ꠘꠣꠁ ꠇꠥꠘꠥ ꠝꠣꠔ-ꠇꠕꠣ ꠘꠣꠁ ꠇꠥꠘꠥ ꠛꠥꠟꠤ, ꠀꠅꠀꠎ-ꠡꠥꠞ ꠎꠣꠄ ꠘꠣ ꠢꠥꠘꠣ ꠄꠞꠣꠞ ꠝꠥꠈꠅ ꠕꠣꠇꠤ।
PSA 19:4 ꠔꠣ-ꠅ ꠔꠣꠞꠣꠞ ꠀꠅꠀꠎ ꠝꠤꠟꠦ ꠖꠥꠘꠤꠀꠁ ꠎꠥꠠꠤ, ꠙꠥꠛ ꠙꠌꠤꠝ ꠃꠔ꠆ꠔꠞ ꠖꠇ꠆ꠇꠤꠘ ꠢꠣꠞꠣ ꠎꠉꠔ ꠜꠞꠤ। ꠉꠣꠠꠤꠟꠣ ꠀꠟ꠆ꠟꠣꠄ ꠅꠘꠅ ꠡꠥꠞꠥꠎꠞ ꠛꠡꠔ ꠊꠞ, ꠔꠣꠝ꠆ꠛꠥꠞ ꠝꠣꠎꠦ ꠞꠁꠀ ꠡꠥꠞꠥꠎ ꠇꠞꠦ ꠎꠉꠔ ꠚꠞ।
PSA 19:5 ꠛꠣꠡꠞ ꠕꠣꠇꠤ ꠛꠣꠞ ꠅꠁꠘ ꠎꠦꠟꠣ ꠘꠄꠀ ꠛꠤꠀꠔꠤ ꠖꠣꠝꠣꠘ꠆ꠖ, ꠖꠃꠠꠣꠁ ꠖꠃꠠꠣꠁ ꠚꠥꠞ꠆ꠔꠤ ꠇꠞꠂꠘ ꠎꠄꠁ ꠎꠘꠞ ꠟꠣꠈꠣꠘ।
PSA 19:6 ꠀꠍꠝꠣꠘꠞ ꠄꠇ ꠇꠤꠘꠣꠞ ꠕꠣꠇꠤ ꠎꠣꠁꠘ ꠀꠞꠇ ꠇꠤꠘꠣꠞꠅ, ꠁꠐꠣꠞ ꠉꠞꠝ ꠕꠣꠇꠤ ꠡꠣꠁꠖ꠆ꠖ ꠘꠣꠁ ꠇꠥꠘꠥ ꠇꠤꠌ꠆ꠍꠥ ꠟꠥꠇꠣꠁꠔ।
PSA 19:7 ꠀꠟ꠆ꠟꠣꠞ ꠖꠦꠅꠀ ꠢꠦꠖꠣꠄꠅꠔ ꠙꠥꠞꠣꠙꠥꠞ ꠘꠤꠈꠥꠔ, ꠛꠘ꠆ꠖꠣꠞ ꠎꠣꠘꠞꠦ ꠇꠞꠦ ꠁꠈꠣꠘ ꠔꠞꠔꠣꠎꠣ ꠝꠎꠛꠥꠔ। ꠀꠟ꠆ꠟꠣꠞ ꠚꠞꠝꠣꠘ ꠢꠇ ꠀꠞ ꠡꠑꠤꠇ ꠌꠤꠞꠇꠣꠟ ꠛꠅꠀꠁꠟ, ꠛꠦꠀꠈꠟ ꠎꠘꠞꠦ ꠛꠣꠘꠣꠄ ꠙꠥꠞꠣꠙꠥꠞ ꠀꠈꠟꠖꠣꠞ।
PSA 19:8 ꠀꠟ꠆ꠟꠣꠞ ꠖꠦꠅꠀ ꠘꠤꠅꠝ-ꠘꠤꠔꠤ ꠡꠑꠤꠇ ꠢꠣꠝꠦꠡꠣ, ꠝꠘꠞ ꠝꠣꠎꠦ ꠎꠥꠉꠣꠄ ꠁꠔꠣꠄ ꠈꠥꠡꠤꠞ ꠚꠥꠀꠞꠣ। ꠀꠟ꠆ꠟꠣꠞ ꠢꠥꠇꠥꠝ-ꠀꠢꠇꠣꠝ ꠔ ꠈꠥꠟꠣ-ꠝꠦꠟꠣ ꠙꠞꠤꠡ꠆ꠇꠣꠞ, ꠃꠎꠤꠟꠣ ꠇꠞꠦ ꠁꠔꠣꠄ ꠖꠤꠟꠞ ꠌꠃꠈ ꠀꠝꠞꠣꠞ।
PSA 19:9 ꠀꠟ꠆ꠟꠣꠞ ꠒꠞ-ꠈꠚ ꠔ ꠘꠤꠈꠥꠔ, ꠢꠞ-ꠢꠣꠝꠦꠡꠣ ꠎꠣꠞꠤ, ꠙꠥꠞꠣꠙꠥꠞ ꠡꠑꠤꠇ ꠞꠣꠄ ꠖꠦꠁꠘ ꠢꠇ-ꠁꠘꠍꠣꠚꠇꠣꠞꠤ,
PSA 19:10 ꠡꠥꠘꠣ ꠕꠣꠇꠤꠅ ꠛꠃꠔ ꠖꠣꠝꠤ, ꠝꠥꠟ꠆ꠟꠛꠣꠘ ꠀꠞ ꠈꠣꠐꠤ, ꠝꠃꠌꠣꠇꠞ ꠚꠥꠐꠣ ꠙꠠꠣ ꠝꠃ ꠕꠣꠇꠤꠅ ꠝꠤꠡ꠆ꠐꠤ।
PSA 19:11 ꠔꠥꠝꠣꠞ ꠁ ꠉꠥꠟꠣꠝꠦ ꠅꠔꠣ ꠢꠥꠘꠤꠀ ꠢꠥꠡꠤꠀꠞ ꠞꠄ, ꠀꠝꠟ ꠇꠞꠟꠦ ꠁꠔꠣ ꠘꠤꠌ꠆ꠌꠄ ꠛꠃꠔ ꠚꠣꠄꠖꠣ ꠅꠄ।
PSA 19:12 ꠛꠘ꠆ꠖꠣꠄ ꠇꠥꠘꠥ ꠘꠤꠎꠞ ꠜꠥꠟ ꠘꠤꠎꠦꠃ ꠛꠥꠎꠦ ꠘꠤ? ꠛꠦꠈꠤꠀꠟꠦ ꠇꠞꠣ ꠉꠥꠘꠣꠞ ꠟꠣꠉꠤ ꠀꠝꠤ ꠝꠣꠚꠤ ꠝꠣꠋꠉꠤ।
PSA 19:13 ꠝꠘꠞ ꠉꠞꠤꠝꠣꠄ ꠇꠞꠣ ꠉꠥꠘꠣ ꠕꠣꠇꠤ ꠛꠣꠌꠣꠅ ꠀꠝꠣꠞꠦ, ꠁꠔꠣꠄ ꠎꠣꠘꠥ ꠇꠛꠎꠣ ꠇꠞꠔ ꠘꠣ ꠙꠣꠞꠦ ꠝꠞꠦ। ꠔꠦꠃꠉꠤ ꠀꠝꠤ ꠘꠦꠇꠇꠣꠞ ꠛꠘ꠆ꠖꠣ ꠛꠘꠤꠔꠣꠝ ꠙꠣꠞꠝꠥ, ꠛꠠ ꠛꠠ ꠉꠥꠘꠣ ꠕꠣꠇꠤ ꠝꠞ ꠎꠣꠘ ꠛꠣꠌꠣꠁꠝꠥ।
PSA 19:14 ꠔꠞꠣꠘꠦꠀꠟꠣ ꠅ ꠝꠣꠛꠥꠖ, ꠀꠝꠣꠞ ꠀꠡꠞꠄ ꠐꠤꠟ꠆ꠟꠣ, ꠖꠤꠟꠞ ꠗꠤꠀꠘ ꠝꠥꠈꠞ ꠎꠛꠣꠘ ꠇꠛꠥꠟ ꠇꠞꠅ ꠉ ꠀꠟ꠆ꠟꠣ॥
PSA 20:1 ꠄꠛꠣꠖꠔ-ꠛꠘ꠆ꠖꠦꠉꠤ ꠙꠞꠤꠌꠣꠟꠇꠞ ꠟꠣꠉꠤ: ꠢꠎꠞꠔ ꠖꠣꠃꠖꠞ ꠝꠤꠎꠝꠞ। ꠝꠍꠤꠛꠔꠞ ꠡꠝꠄ ꠝꠣꠛꠥꠖꠦ ꠔꠥꠝꠣꠞ ꠚꠞꠤꠀꠖ ꠢꠥꠘꠃꠇ꠆ꠇꠣ, ꠁꠀꠇꠥꠛꠞ ꠀꠟ꠆ꠟꠣꠞ ꠘꠣꠝ ꠔꠥꠝꠣꠞꠦ ꠍꠢꠤ-ꠍꠣꠟꠣꠝꠔꠦ ꠞꠣꠈꠃꠇ꠆ꠇꠣ।
PSA 20:2 ꠔꠣꠘ ꠙꠣꠇ ꠝꠥꠇꠣꠝ ꠕꠣꠇꠤ ꠔꠥꠝꠣꠞ ꠟꠣꠉꠤ ꠡꠣꠁꠎ꠆ꠎ ꠙꠣꠑꠣꠃꠇ꠆ꠇꠣ, ꠙꠛꠤꠔ꠆ꠞ ꠍꠤꠅꠘ ꠕꠣꠇꠤ ꠔꠥꠝꠣꠞꠦ ꠛꠟ-ꠔꠣꠇ꠆ꠇꠔ ꠖꠦꠃꠇ꠆ꠇꠣ।
PSA 20:3 ꠔꠣꠁꠘ ꠔꠥꠝꠣꠞ ꠢꠇꠟ ꠟꠤꠟ꠆ꠟꠣ-ꠍꠖꠉꠣꠞꠦ ꠝꠘꠅ ꠞꠣꠈꠃꠇ꠆ꠇꠣ, ꠇꠛꠥꠟ ꠇꠞꠃꠇ꠆ꠇꠣ ꠔꠥꠝꠣꠞ ꠎꠣꠟꠣꠁꠟ ꠇꠥꠞꠛꠣꠘꠤ। (ꠍꠦꠟꠣ)
PSA 20:4 ꠔꠥꠝꠣꠞ ꠖꠤꠟꠞ ꠀꠞꠎꠤꠞꠦ ꠇꠛꠥꠟ ꠇꠞꠃꠇ꠆ꠇꠣ, ꠝꠘꠞ ꠀꠡꠣ ꠅꠇꠟ ꠙꠥꠞꠘ ꠇꠞꠃꠇ꠆ꠇꠣ।
PSA 20:5 ꠔꠥꠝꠤ ꠎꠄꠁ ꠅꠁꠟꠦ ꠀꠝꠞꠣ ꠈꠥꠡꠤ-ꠛꠣꠡꠤꠞ ꠉꠎꠟ ꠉꠣꠁꠝꠥ, ꠀꠝꠞꠣꠞ ꠀꠟ꠆ꠟꠣꠞ ꠘꠣꠝꠦ ꠏꠣꠘ꠆ꠒꠣ ꠃꠠꠣꠁꠝꠥ, ꠝꠣꠛꠥꠖꠦ ꠔꠥꠝꠣꠞ ꠢꠇꠟ ꠝꠤꠘꠔꠤ ꠙꠥꠞꠘ ꠇꠞꠃꠇ꠆ꠇꠣ।
PSA 20:6 ꠀꠝꠤ ꠔ ꠅꠈꠘ ꠎꠣꠘꠤꠃ, ꠝꠣꠛꠥꠖꠦ ꠔꠣꠘ ꠘꠤꠎꠞ ꠈꠦꠟꠣꠚꠔꠤ ꠙꠣꠅꠀ ꠎꠘꠞꠦ ꠛꠣꠌꠣꠁꠛꠣ। ꠔꠣꠘ ꠀꠙꠘ ꠒꠣꠁꠘ ꠀꠔꠞ ꠛꠟ-ꠔꠣꠇ꠆ꠇꠔꠦ ꠎꠥꠖ꠆ꠖꠔ ꠎꠤꠔꠣꠁꠛꠣ, ꠘꠤꠎꠞ ꠙꠛꠤꠔ꠆ꠞ ꠀꠞꠡ ꠕꠣꠇꠤ ꠄꠘ ꠝꠤꠘꠔꠤ ꠢꠥꠘꠛꠣ।
PSA 20:7 ꠇꠦꠃꠞꠞ ꠜꠞꠡꠣ ꠅꠁꠟ ꠔꠣꠞ ꠎꠥꠖ꠆ꠖꠞ ꠞꠕ, ꠀꠞ ꠇꠦꠃꠞꠞ ꠜꠞꠡꠣ ꠔꠣꠞ ꠊꠥꠠꠣꠁꠘ꠆ꠔꠞ ꠃꠙꠞꠦ, ꠀꠝꠞꠣꠞ ꠜꠞꠡꠣ ꠈꠣꠟꠤ ꠀꠝꠞꠣꠞ ꠀꠟ꠆ꠟꠣ ꠝꠣꠛꠥꠖꠞ ꠃꠙꠞꠦ।
PSA 20:8 ꠔꠣꠞꠣ ꠔ ꠃꠘ꠆ꠖꠣ ꠅꠁꠀ ꠟꠦꠐꠤꠎꠣꠁꠘ, ꠅꠁꠟꠦ ꠀꠝꠞꠣ ꠡꠤꠗꠣ ꠅꠁꠀ ꠢꠣꠝꠦꠡꠣ ꠈꠣꠠꠣ ꠞꠁ।
PSA 20:9 ꠅ ꠝꠣꠛꠥꠖ, ꠛꠣꠖꠡꠣꠞꠦ ꠎꠄꠁ ꠇꠞꠃꠇ꠆ꠇꠣ, ꠀꠝꠞꠣꠞ ꠒꠣꠇ ꠢꠥꠘꠤꠀ ꠎꠥꠀꠙ ꠖꠦꠃꠇ꠆ꠇꠣ॥
PSA 21:1 ꠄꠛꠣꠖꠔ-ꠛꠘ꠆ꠖꠦꠉꠤ ꠙꠞꠤꠌꠣꠟꠇꠞ ꠟꠣꠉꠤ: ꠢꠎꠞꠔ ꠖꠣꠃꠖꠞ ꠝꠤꠎꠝꠞ। ꠅ ꠝꠣꠛꠥꠖ, ꠔꠥꠝꠣꠞ ꠛꠟ-ꠔꠣꠇ꠆ꠇꠔꠦ ꠛꠣꠖꠡꠣꠄ ꠈꠥꠡꠤ ꠇꠞꠞꠣ, ꠔꠥꠝꠤ ꠎꠥꠖ꠆ꠖꠔ ꠎꠤꠔꠣꠘꠤꠄ ꠔꠣꠁꠘ ꠈꠥꠛ ꠈꠥꠡꠤ-ꠛꠣꠡꠤ ꠇꠞꠞꠣ।
PSA 21:2 ꠔꠣꠘ ꠝꠘꠞ ꠀꠡꠣ ꠔꠥꠝꠤ ꠙꠥꠞꠣꠁꠍ, ꠔꠣꠘ ꠝꠥꠈꠞ ꠀꠛꠖꠣꠞꠞꠦ ꠔꠥꠝꠤ ꠚꠤꠞꠣꠁ ꠖꠤꠍ ꠘꠣ। (ꠍꠦꠟꠣ)
PSA 21:3 ꠛꠃꠔ ꠞꠢꠝ-ꠛꠞꠇꠔ ꠟꠁꠀ ꠔꠥꠝꠤ ꠔꠣꠘ ꠉꠦꠍꠦ ꠀꠁꠍ, ꠈꠣꠐꠤ ꠡꠥꠘꠣꠞ ꠝꠥꠇꠥꠐ-ꠔꠣꠎ ꠔꠣꠘ ꠝꠣꠕꠣꠔ ꠚꠤꠘ꠆ꠖꠣꠁꠍ।
PSA 21:4 ꠛꠣꠖꠡꠣꠄ ꠔꠥꠝꠣꠞ ꠖꠞꠛꠣꠞꠅ ꠌꠣꠁꠟꠣ ꠎꠤꠘ꠆ꠖꠦꠉꠤ, ꠀꠞ ꠔꠣꠘꠞꠦ ꠖꠤꠟꠣꠄ ꠔꠥꠝꠤ ꠌꠤꠞꠇꠣꠟꠞ ꠢꠣꠄꠀꠔꠤ।
PSA 21:5 ꠔꠥꠝꠣꠞ ꠖꠦꠅꠀ ꠎꠄꠄ ꠛꠣꠠꠣꠁꠍꠦ ꠔꠣꠘ ꠁꠎ꠆ꠎꠔ, ꠉꠃꠞꠛ-ꠝꠢꠤꠝꠣ ꠖꠤꠍ ꠔꠣꠘꠦ ꠔꠥꠝꠣꠞꠃ ꠞꠢꠝꠔ।
PSA 21:6 ꠔꠣꠘꠞꠦ ꠖꠤꠍ ꠔꠥꠝꠤ ꠌꠤꠞꠇꠣꠟꠤꠘ ꠛꠞꠇꠔ, ꠔꠥꠝꠣꠞ ꠙꠣꠇ ꠖꠤꠖꠣꠞꠅ ꠖꠤꠍ ꠔꠣꠘꠞꠦ ꠈꠥꠡꠤꠞ ꠘꠤꠀꠝꠔ।
PSA 21:7 ꠛꠣꠖꠡꠣꠄ ꠔ ꠝꠣꠛꠥꠖꠞ ꠃꠙꠞꠦꠃ ꠜꠞꠡꠣ ꠇꠞꠂꠘ, ꠀꠟ꠆ꠟꠣꠔꠣꠟꠣꠞ ꠖꠄꠀ-ꠝꠣꠄꠀꠄ ꠔꠣꠁꠘ ꠝꠎꠛꠥꠔ ꠞꠂꠘ।
PSA 21:8 ꠅ ꠛꠣꠖꠡꠣ, ꠔꠥꠝꠣꠞ ꠀꠔꠦ ꠖꠥꠡꠝꠘ ꠙꠣꠟꠞꠦ ꠗꠞꠛ, ꠒꠣꠁꠘ ꠀꠔꠦ ꠔꠥꠝꠣꠞ ꠛꠤꠞꠥꠗꠤꠞꠦ ꠔꠣꠟ꠆ꠟꠣꠡ ꠇꠞꠤ ꠀꠘꠛ।
PSA 21:9 ꠔꠥꠝꠤ ꠀꠁꠛꠣꠞ ꠇꠣꠟꠅ ꠁꠔꠣꠞꠦ ꠀꠉꠥꠘꠤꠞ ꠇꠥꠘ꠆ꠒꠟꠤ ꠛꠣꠘꠣꠁꠛꠣꠄ, ꠀꠉꠥꠁꠘꠦ ꠔꠣꠞꠣꠞꠦ ꠀ ꠇꠞꠤ ꠉꠤꠟꠛ ꠝꠣꠛꠥꠖꠞ ꠉꠥꠍꠣꠄ।
PSA 21:10 ꠖꠥꠘꠤꠀ ꠕꠣꠇꠤ ꠝꠤꠐꠣꠁꠟꠤꠛꠣꠄ ꠁꠔꠣꠞ ꠀꠅꠟꠣꠖ ꠅꠇꠟꠞ ꠘꠣꠝ, ꠀꠖꠝ ꠎꠣꠔ ꠕꠣꠇꠤ ꠚꠥꠍꠤꠟꠤꠛꠣꠄ ꠔꠣꠞꠣꠞ ꠡꠛ ꠈꠣꠘ꠆ꠖꠣꠘ।
PSA 21:11 ꠔꠥꠝꠣꠞ ꠛꠤꠙꠇ꠆ꠇꠦ ꠇꠥ-ꠝꠔꠟꠛꠦ ꠚꠣꠘ꠆ꠖ ꠙꠣꠔꠤꠍꠦ ꠔꠣꠞꠣ, ꠔꠣꠞꠣꠞ ꠁꠔꠣ ꠢꠇꠟꠔꠣꠃ ꠅꠁꠛ ꠛꠦꠇꠣꠝꠣ।
PSA 21:12 ꠔꠣꠞꠣꠞ ꠝꠥꠈꠞꠦ ꠘꠤꠡꠣꠘ ꠇꠞꠤꠀ ꠔꠥꠝꠣꠞ ꠗꠘꠥꠇꠅ ꠝꠣꠞꠟꠦ ꠐꠣꠘ, ꠙꠤꠑ ꠊꠥꠞꠣꠁꠀ ꠜꠣꠉꠤꠀ ꠔꠣꠞꠣ ꠛꠣꠌꠣꠁꠔ ꠌꠣꠁꠛ ꠎꠣꠘ।
PSA 21:13 ꠔꠥꠝꠣꠞ ꠛꠟ-ꠡꠇ꠆ꠔꠤ ꠎꠣꠁꠞ ꠇꠞꠅ ꠅꠉ ꠀꠝꠣꠞ ꠀꠟ꠆ꠟꠣ, ꠉꠣꠘ-ꠛꠣꠎꠘꠣꠄ ꠉꠣꠁꠝꠥ ꠀꠝꠞꠣ ꠔꠥꠝꠣꠞ ꠟꠤꠟꠣ-ꠈꠦꠟꠣ॥
PSA 22:1 ꠄꠛꠣꠖꠔ-ꠛꠘ꠆ꠖꠦꠉꠤ ꠙꠞꠤꠌꠣꠟꠇꠞ ꠟꠣꠉꠤ: ‘ꠛꠤꠀꠘꠇꠥꠞ ꠢꠞꠤꠘꠤ’ ꠡꠥꠞꠦ। ꠢꠎꠞꠔ ꠖꠣꠃꠖꠞ ꠝꠤꠎꠝꠞ। ꠅ ꠀꠝꠣꠞ ꠀꠟ꠆ꠟꠣ, ꠀꠝꠣꠞ ꠝꠃꠟꠣ, ꠔꠥꠝꠤ ꠇꠦꠘꠦ ꠀꠝꠣꠞ ꠟꠉ ꠍꠣꠠꠤ ꠖꠤꠟꠣꠄ? ꠀꠝꠣꠞꠦ ꠘꠣ ꠛꠣꠌꠣꠁꠀ ꠀꠝꠣꠞ ꠇꠣꠘ꠆ꠖꠘ ꠘꠣ ꠢꠥꠘꠤꠀ ꠇꠦꠘꠦ ꠖꠥꠞꠁ ꠢꠞꠤꠀ ꠞꠁꠟꠣꠄ?
PSA 22:2 ꠅ ꠀꠝꠣꠞ ꠀꠟ꠆ꠟꠣ, ꠀꠝꠤ ꠖꠤꠘꠞ ꠛꠣꠟꠣ ꠒꠣꠇꠤꠟꠣꠝ ꠔꠥꠝꠤ ꠇꠥꠘꠥ ꠎꠥꠀꠙ ꠘꠣ ꠖꠤꠟꠣꠄ, ꠞꠣꠁꠔꠞ ꠛꠣꠟꠣꠅ ꠘꠣ ꠒꠣꠇꠤꠀ ꠀꠝꠤ ꠞꠁ ꠘꠣ ꠘꠤꠞꠣꠁ।
PSA 22:3 ꠅꠁꠟꠦ ꠔꠥꠝꠤꠃ ꠔ ꠙꠣꠇ-ꠙꠛꠤꠔ꠆ꠞ, ꠛꠘꠤ ꠁꠍꠞꠣꠁꠟꠞ ꠉꠣꠅꠀ ꠙ꠆ꠞꠡꠋꠡꠣ-ꠔꠣꠞꠤꠚꠃ ꠔꠥꠝꠣꠞ ꠞꠣꠎ-ꠉꠖꠤ।
PSA 22:4 ꠀꠝꠞꠣꠞ ꠝꠄ-ꠝꠥꠞꠛ꠆ꠛꠤꠄ ꠔꠥꠝꠣꠞ ꠃꠙꠞꠦ ꠄꠇꠤꠘ ꠞꠣꠈꠍꠂꠘ, ꠔꠣꠞꠣ ꠔꠥꠝꠣꠞ ꠃꠙꠞꠦ ꠜꠞꠡꠣ ꠇꠞꠣꠄ ꠔꠥꠝꠤꠅ ꠔꠣꠞꠣꠞꠦ ꠛꠣꠌꠣꠁꠔꠣꠄ।
PSA 22:5 ꠔꠥꠝꠣꠞ ꠖꠞꠛꠣꠞꠅ ꠚꠞꠤꠀꠖ ꠇꠞꠤꠀ ꠎꠣꠘ-ꠝꠣꠘ ꠛꠣꠌꠣꠁꠔꠣ, ꠔꠣꠞꠣ ꠜꠞꠡꠣ ꠇꠞꠤꠀ ꠔ ꠡꠞꠝ ꠙꠣꠁꠍꠂꠘ ꠘꠣ।
PSA 22:6 ꠅꠁꠟꠦ ꠀꠝꠤ ꠔ ꠝꠣꠘꠥꠡ ꠘꠣꠄ, ꠈꠣꠟꠤ ꠄꠟꠣꠝꠤꠞ ꠄꠇ ꠇꠤꠠꠣ-ꠙꠥꠇ, ꠝꠣꠘꠡꠦ ꠀꠝꠣꠞꠦ ꠟꠁꠀ ꠈꠣꠃꠞꠤ ꠈꠣꠄ ꠑꠣꠐ꠆ꠐꠣ ꠇꠞꠤꠀ ꠍꠤꠠꠣꠄ।
PSA 22:7 ꠎꠔ ꠎꠘꠦ ꠀꠝꠣꠞꠦ ꠖꠦꠈꠦ, ꠢꠇ꠆ꠇꠟꠦ ꠑꠥꠐ ꠛꠦꠇꠣꠁꠀ ꠐꠤꠐꠇꠣꠞꠤ ꠝꠣꠞꠤꠀ ꠇꠄ,
PSA 22:8 “ꠢꠦ ꠎꠦꠛꠟꠣ ꠝꠣꠛꠥꠖꠞ ꠃꠙꠞꠦ ꠇꠞꠦ ꠜꠞꠡꠣ, ꠔꠦ ꠅꠈꠘ ꠖꠦꠈꠤ ꠔꠣꠁꠘ ꠔꠣꠞꠦ ꠛꠣꠌꠣꠃꠇ꠆ꠇꠣ, ꠔꠣꠁꠘ ꠎꠦꠛꠟꠣ ꠔꠣꠞ ꠃꠙꠞꠦ ꠈꠥꠡꠤ ꠀꠞ ꠞꠣꠎꠤ, ꠅꠈꠘ ꠔꠣꠞꠦ ꠞꠇ꠆ꠇꠣ ꠇꠞꠂꠘ ꠘꠤ ꠖꠦꠈꠤ।”
PSA 22:9 ꠝꠣʼꠞ ꠙꠦꠐꠅ ꠕꠣꠇꠤ ꠔꠥꠝꠤꠃ ꠀꠝꠣꠞꠦ ꠎꠉꠔꠅ ꠀꠘꠟꠣꠄ, ꠝꠣʼꠞ ꠖꠥꠗ ꠈꠣꠅꠀꠞ ꠡꠝꠄꠅ ꠀꠝꠣꠞꠦ ꠜꠞꠡꠣ ꠖꠤꠟꠣꠄ।
PSA 22:10 ꠎꠘꠝ ꠕꠣꠇꠤ ꠀꠝꠣꠞꠦ ꠔꠥꠝꠣꠞ ꠀꠔꠅ ꠡꠙꠤ ꠖꠦꠅꠀ ꠅꠁꠍꠦ, ꠝꠣʼꠞ ꠙꠦꠐꠅ ꠕꠣꠇꠤꠃ ꠔꠥꠝꠤ ꠀꠝꠣꠞ ꠀꠟ꠆ꠟꠣ।
PSA 22:11 ꠅꠈꠘ ꠀꠝꠣꠞꠦ ꠚꠣꠟꠣꠁꠀ ꠔꠥꠝꠤ ꠢꠞꠤꠀ ꠞꠁꠅ ꠘꠣ, ꠍꠣꠝꠘꠦ ꠛꠃꠔ ꠛꠠ ꠛꠤꠙꠖ, ꠀꠝꠣꠞꠦ ꠛꠣꠌꠣꠘꠤꠞ ꠖꠥꠍꠞꠣ ꠇꠦꠃ ꠘꠣꠁ।
PSA 22:12 ꠎꠋꠟꠤ ꠛꠤꠍꠣꠟꠞ ꠙꠣꠟꠞ ꠟꠣꠈꠣꠘ ꠔꠣꠞꠣ ꠀꠝꠣꠞꠦ ꠛꠦꠞꠤꠟꠤꠍꠂꠘ, ꠛꠣꠡꠘ ꠖꠦꠡꠞ ꠙꠄꠟꠥꠀꠘ ꠛꠟꠖ ꠅꠇꠟꠦ ꠀꠝꠣꠞꠦ ꠀꠐꠇꠣꠁꠍꠂꠘ।
PSA 22:13 ꠉꠞ꠆ꠎꠘ ꠇꠞꠞꠣ ꠙꠣꠡꠣꠘ ꠡꠤꠋꠢꠞ ꠟꠣꠈꠣꠘ ꠔꠣꠞꠣ, ꠀ ꠇꠞꠤꠀ ꠀꠝꠣꠞꠦ ꠉꠤꠟꠤꠟꠤꠔꠣ ꠌꠣꠁꠞꠣ।
PSA 22:14 ꠛꠞꠛꠣꠖ ꠙꠣꠘꠤꠞ ꠟꠣꠈꠣꠘ ꠀꠝꠣꠞꠦ ꠓꠣꠟꠤꠀ ꠚꠣꠟꠣꠁ ꠖꠦꠅꠀ ꠅꠁꠍꠦ, ꠀꠝꠣꠞ ꠀꠡ꠆ꠔꠣ ꠡꠞꠤꠟꠞ ꠀꠒ꠆ꠒꠤ-ꠉꠥꠒ꠆ꠒꠤꠞ ꠎꠥꠠꠣ ꠍꠥꠐꠤ ꠉꠦꠍꠦ, ꠀꠝꠣꠞ ꠇꠁꠟꠎꠣ-ꠉꠥꠞ꠆ꠖꠣ ꠝꠝꠞ ꠟꠣꠈꠣꠘ ꠉꠟꠤꠀ, ꠙꠦꠐꠞ ꠀꠔ-ꠜꠠꠅ ꠢꠣꠝꠣꠁꠍꠦ।
PSA 22:15 ꠀꠝꠣꠞ ꠛꠟ-ꠡꠇ꠆ꠔꠤ ꠢꠥꠇꠣꠁꠀ ꠝꠣꠐꠤꠞ ꠍꠣꠠꠞ ꠟꠣꠈꠣꠘ ꠅꠁꠍꠦ, ꠀꠞ ꠎꠤꠚꠞꠣ ꠢꠥꠇꠣꠁꠀ ꠔꠣꠟꠥꠔ ꠟꠣꠉꠤꠉꠦꠍꠦ, ꠔꠥꠝꠤ ꠀꠝꠣꠞꠦ ꠗꠥꠟꠣ-ꠛꠣꠟꠥꠞ ꠇꠄꠛꠞꠅ ꠢꠣꠞꠣꠁ ꠕꠁꠍ।
PSA 22:16 ꠈꠛꠤꠍ ꠅꠇꠟꠦ ꠀꠝꠣꠞꠦ ꠇꠥꠔ꠆ꠔꠣꠞ ꠙꠣꠟꠞ ꠟꠣꠈꠣꠘ ꠛꠦꠞꠤꠟꠤꠍꠂꠘ, ꠀꠝꠣꠞ ꠀꠔ-ꠙꠣꠅꠞꠦ ꠉꠣꠕꠤꠟꠤꠍꠂꠘ।
PSA 22:17 ꠀꠝꠤ ꠔ ꠀꠝꠣꠞ ꠢꠇ꠆ꠇꠟ ꠀꠒ꠆ꠒꠤ ꠉꠘꠤꠔꠣꠝ ꠙꠣꠞꠤ, ꠅꠔꠣꠄ ꠀꠝꠣꠞ ꠛꠣꠄ ꠌꠃꠈ ꠝꠦꠟꠤꠀ ꠌꠣꠁ ꠞꠁꠍꠂꠘ।
PSA 22:18 ꠔꠣꠞꠣ ꠘꠤꠎꠞ ꠝꠣꠎꠦ ꠀꠝꠣꠞ ꠇꠣꠙꠠ-ꠌꠥꠙꠠ ꠛꠣꠐꠣ-ꠛꠣꠐꠤ ꠇꠞꠍꠦ, ꠀꠝꠣꠞ ꠇꠥꠞ꠆ꠔꠣꠞ ꠟꠣꠉꠤ ꠔꠣꠞꠣ ꠟꠐꠣꠞꠤꠅ ꠝꠣꠞꠍꠦ।
PSA 22:19 ꠅꠁꠟꠦ ꠅ ꠝꠣꠛꠥꠖ, ꠔꠥꠝꠤ ꠖꠥꠞꠁ ꠢꠞꠤꠀ ꠞꠁꠅ ꠘꠣ, ꠅ ꠀꠝꠣꠞ ꠇꠣꠘ꠆ꠒꠣꠞꠤ, ꠀꠝꠣꠞꠦ ꠡꠣꠁꠎ꠆ꠎꠞ ꠟꠣꠉꠤ ꠎꠟꠖꠤ ꠀꠉꠥꠀꠁ ꠀꠅ।
PSA 22:20 ꠔꠟꠥꠀꠞꠞ ꠔꠟ ꠕꠣꠇꠤ ꠛꠣꠌꠣꠅ ꠀꠝꠣꠞ ꠎꠣꠘ, ꠅꠔꠣ ꠇꠥꠇꠞꠞ ꠝꠥꠈ ꠕꠣꠇꠤ ꠛꠣꠌꠣꠅ ꠝꠞ ꠙꠞꠣꠘ।
PSA 22:21 ꠡꠤꠋꠢ ꠙꠣꠟꠞ ꠝꠥꠈ ꠕꠣꠇꠤ ꠞꠇ꠆ꠇꠣ ꠇꠞꠅ ꠝꠞꠦ, ꠎꠋꠟꠤ ꠛꠤꠍꠣꠟꠞ ꠗꠣꠞꠣꠁꠟ ꠢꠤꠋꠉꠞꠦ ꠢꠞꠣꠅ ꠛꠃꠔ ꠖꠥꠞꠦ! ꠅꠃ ꠚꠞꠤꠀꠖ ꠢꠥꠘꠤꠀ ꠔꠥꠝꠤ ꠀꠝꠣꠞ ꠎꠣꠘ ꠛꠣꠌꠣꠁꠍ,
PSA 22:22 ꠔꠦ ꠀꠝꠤꠅ ꠀꠝꠣꠞ ꠜꠣꠁꠀꠁꠘ꠆ꠔꠞ ꠉꠦꠍꠦ ꠔꠥꠝꠣꠞ ꠘꠣꠝ ꠔꠛꠟꠤꠉ ꠇꠞꠝꠥ, ꠡꠝꠣꠎꠞ ꠝꠣꠎꠦ ꠔꠥꠝꠣꠞ ꠔꠣꠞꠤꠚ-ꠉꠎꠟ ꠉꠣꠁꠝꠥ।
PSA 22:23 ꠔꠥꠝꠞꠣ ꠎꠣꠞꠣ ꠝꠣꠛꠥꠖꠞ ꠒꠞ-ꠈꠚꠦ ꠞꠅ, ꠔꠥꠝꠞꠣ ꠔꠣꠘ ꠔꠣꠞꠤꠚ-ꠉꠎꠟ ꠉꠣꠅ। ꠅ ꠁꠀꠇꠥꠛꠞ ꠀꠅꠟꠣꠖ ꠅꠇꠟ ꠢꠥꠘꠅ, ꠝꠣꠛꠥꠖ ꠄꠟꠣꠢꠤꠞꠦ ꠔꠣꠎꠤꠝ ꠇꠞꠅ। ꠄꠛꠣꠖꠔ-ꠛꠘ꠆ꠖꠦꠉꠤ ꠇꠞꠅ ꠔꠥꠝꠞꠣ ꠢꠇꠟꠦ, ꠛꠘꠤ ꠁꠍꠞꠣꠁꠟꠞ ꠢꠇꠟ ꠈꠣꠘ꠆ꠖꠣꠘ ꠄꠇꠈꠣꠘꠅ ꠝꠤꠟꠦ।
PSA 22:24 ꠖꠥꠈꠤ ꠎꠘꠞ ꠖꠥꠈ ꠖꠦꠈꠤꠀ ꠔꠣꠁꠘ ꠢꠞꠂꠘ ꠘꠣ, ꠇꠣꠋꠉꠣꠟꠞꠦ ꠖꠦꠈꠟꠦ ꠔꠣꠁꠘ ꠢꠞꠤꠀ ꠎꠣꠁꠘ ꠘꠣ, ꠀꠙꠘ ꠙꠣꠇ ꠝꠥꠈ ꠟꠥꠇꠣꠁꠘ ꠘꠣ ꠔꠣꠞꠣꠞꠦ ꠖꠦꠈꠟꠦ, ꠝꠤꠘꠔ-ꠇꠣꠎ꠆ꠎꠤ ꠢꠥꠘꠤꠀ ꠔꠣꠁꠘ ꠡꠣꠁꠎ꠆ꠎ ꠇꠞꠟꠣ ꠔꠣꠞꠣꠞꠦ।
PSA 22:25 ꠔꠥꠝꠣꠞ ꠘꠣꠝꠦ ꠝꠢꠣ ꠝꠣꠢꠚꠤꠟꠅ ꠎꠔ ꠔꠣꠞꠤꠚ-ꠉꠎꠟ ꠉꠣꠁ, ꠔꠥꠝꠣꠞꠦ ꠒꠞꠣꠅꠞꠣ ꠎꠘꠞ ꠍꠣꠝꠘꠦ ꠝꠞ ꠝꠣꠘ꠆ꠘꠔ ꠇꠞꠝꠥ ꠀꠖꠣꠄ।
PSA 22:26 ꠙꠦꠐ ꠜꠞꠣ ꠈꠣꠘꠤ ꠈꠣꠁꠛꠣ ꠖꠥꠈꠤ-ꠇꠣꠋꠉꠣꠟ ꠎꠘꠦ, ꠝꠣꠛꠥꠖ ꠝꠃꠟꠣꠞ ꠔꠣꠞꠤꠚ ꠉꠣꠁꠛꠣ ꠔꠣꠘ ꠀꠡꠤꠇ ꠖꠟꠦ। ꠌꠤꠞꠇꠣꠟ ꠎꠤꠘ꠆ꠖꠣ ꠞꠃꠇ ꠀꠡꠤꠇꠞ ꠅꠘ꠆ꠔꠞ!
PSA 22:27 ꠎꠉꠔꠞ ꠢꠦꠡ ꠡꠤꠝꠣꠘꠣꠞ ꠝꠣꠘꠡꠦꠅ ꠔꠃꠛꠣ ꠇꠞꠤ ꠚꠤꠞꠤꠀ ꠀꠁꠛꠣ, ꠎꠣꠔꠤ ꠅꠇꠟꠞ ꠢꠇ꠆ꠇꠟ ꠉꠥꠡ꠆ꠐꠤꠄ ꠝꠣꠛꠥꠖꠞ ꠍꠣꠝꠘꠦ ꠇꠞꠛꠣ ꠍꠁꠎꠖꠣ।
PSA 22:28 ꠞꠣꠎ-ꠡꠤꠋꠢꠣꠡꠘ ꠘꠤꠌ꠆ꠌꠤꠔ ꠝꠣꠛꠥꠖ ꠝꠃꠟꠣꠞꠃ, ꠔꠣꠁꠘꠃ ꠢꠇꠟ ꠎꠣꠔꠤꠞ ꠃꠙꠞꠦ ꠛꠣꠖꠡꠣꠁ ꠇꠞꠂꠘ।
PSA 22:29 ꠎꠉꠔꠞ ꠛꠟꠛꠣꠘ ꠅꠇꠟꠦ ꠈꠣꠅꠀ-ꠖꠣꠅꠀ ꠇꠞꠛꠣ, ꠔꠣꠘ ꠍꠣꠝꠘꠦ ꠀꠁꠀ ꠄꠛꠣꠖꠔ ꠇꠞꠛꠣ, ꠀꠞ ꠎꠣꠞꠣꠞ ꠘꠤꠎꠞ ꠎꠣꠘ ꠛꠣꠌꠣꠘꠤꠞ ꠃꠙꠣꠄ ꠘꠣꠁ, ꠔꠣꠞꠣꠅ ꠀꠁꠀ ꠘꠔ ꠅꠁꠀ ꠔꠣꠘꠞꠦ ꠍꠁꠎꠖꠣ ꠇꠞꠛꠣ।
PSA 22:30 ꠔꠣꠘ ꠄꠛꠣꠖꠔ-ꠛꠘ꠆ꠖꠦꠉꠤ ꠇꠞꠛꠣ ꠍꠣꠝꠘꠞ ꠎꠥꠉꠞ ꠈꠣꠘ꠆ꠖꠣꠘꠦ, ꠝꠣꠟꠤꠇ ꠝꠃꠟꠣꠞ ꠈꠛꠞ ꠢꠥꠘꠛꠣ ꠢꠃ ꠎꠝꠣꠘꠣꠞ ꠢꠇꠟꠦ।
PSA 22:31 ꠜꠛꠤꠡꠔꠦ ꠎꠘꠝ ꠅꠁꠛ ꠖꠥꠘꠤꠀꠁꠔ ꠎꠣꠞꠣꠞ, ꠔꠣꠞꠣꠞ ꠉꠦꠍꠦ ꠎꠣꠘꠣꠁꠟ ꠅꠁꠛ ꠅꠃ ꠇꠥꠖꠞꠔꠤ ꠇꠣꠞꠛꠣꠞ॥
PSA 23:1 ꠢꠎꠞꠔ ꠖꠣꠃꠖꠞ ꠝꠤꠎꠝꠞ। ꠀꠝꠣꠞ ꠝꠣꠛꠥꠖꠦ ꠀꠝꠣꠞꠦ ꠙꠣꠟꠂꠘ, ꠀꠝꠣꠞ ꠔ ꠀꠞ ꠅꠜꠣꠛ ꠘꠣꠁ।
PSA 23:2 ꠈꠦꠍꠝꠣ ꠊꠣꠡꠅ ꠔꠣꠁꠘ ꠀꠝꠣꠞꠦ ꠢꠥꠔꠣꠁꠘ, ꠀꠞꠣꠝꠞ ꠈꠣꠟꠞ ꠙꠣꠞꠦꠖꠤ ꠀꠝꠣꠞꠦ ꠀꠐꠣꠁꠘ,
PSA 23:3 ꠀꠝꠣꠞ ꠎꠣꠘꠞꠦ ꠔꠞꠔꠣꠎꠣ ꠇꠞꠂꠘ, ꠔꠣꠘ ꠁꠎ꠆ꠎꠔꠞ ꠟꠣꠉꠤ ꠍꠢꠤ ꠙꠕꠦ ꠀꠝꠣꠞꠦ ꠌꠣꠟꠣꠁꠘ।
PSA 23:4 ꠉꠁꠘ ꠊꠘ ꠀꠘ꠆ꠖꠣꠞꠤꠔ ꠀꠐꠤꠟꠦꠅ ꠀꠝꠤ ꠒꠞꠣꠁ ꠘꠣ, ꠔꠥꠝꠣꠞ ꠀꠔꠖꠤ ꠔ ꠀꠝꠣꠞꠦ ꠗꠞꠤꠀ ꠞꠣꠈꠍ, ꠔꠥꠝꠣꠞ ꠝꠥꠐꠤꠔ ꠔ ꠀꠍꠦ ꠝꠥꠘꠤꠛ ꠞꠣꠈꠣꠟꠞ ꠟꠣꠑꠤ-ꠍꠥꠟꠚꠤ, ꠀꠝꠤ ꠀꠞ ꠒꠞꠣꠁꠔꠣꠝ ꠇꠦꠘꠦ?
PSA 23:5 ꠖꠥꠡꠝꠘ ꠖꠟꠞ ꠍꠣꠝꠘꠦꠃ ꠀꠝꠣꠞꠦ ꠙꠦꠐ ꠜꠞꠤ ꠈꠣꠅꠀꠁꠍ, ꠀꠝꠣꠞ ꠝꠣꠕꠣꠔ ꠈꠥꠡꠛꠄ ꠔꠦꠟ ꠝꠣꠈꠣꠁꠍ, ꠡꠞꠛꠔꠞ ꠙꠤꠀꠟꠣ ꠜꠞꠤꠀ ꠃꠕꠟꠤꠀ ꠙꠠꠦꠞ।
PSA 23:6 ꠅ ꠝꠥꠘꠤꠛ, ꠔꠥꠝꠣꠞ ꠅꠡꠤꠝ ꠝꠣꠄꠀ-ꠖꠄꠀ ꠀꠞ ꠜꠣꠟꠣꠁ ꠀꠝꠣꠞ ꠟꠉꠦ ꠢꠣꠞꠣ ꠎꠤꠛꠘ ꠞꠁꠛ, ꠀꠝꠤ ꠌꠤꠞꠇꠣꠟ ꠝꠣꠛꠥꠖꠞ ꠊꠞꠅ ꠛꠡꠔ ꠇꠞꠝꠥ॥
PSA 24:1 ꠢꠎꠞꠔ ꠖꠣꠃꠖꠞ ꠝꠤꠎꠝꠞ। ꠁ ꠎꠉꠔ ꠀꠞ ꠎꠉꠔꠞ ꠢꠇ꠆ꠇꠟꠔꠣꠃ ꠝꠣꠛꠥꠖꠞ, ꠖꠥꠘꠤꠀ ꠀꠞ ꠖꠥꠘꠤꠀꠞ ꠛꠣꠡꠤꠘ꠆ꠖꠣ ꠅꠇꠟ ꠔ ꠔꠣꠘ।
PSA 24:2 ꠔꠣꠁꠘ ꠖꠞꠤꠀꠞ ꠙꠣꠘꠤꠞ ꠃꠙꠞꠦ ꠖꠥꠘꠤꠀꠞ ꠜꠤꠔ ꠛꠅꠀꠁꠟ ꠇꠞꠟꠣ, ꠉꠣꠋ-ꠈꠣꠟꠞ ꠃꠙꠞꠦ ꠁꠀꠘ ꠈꠥꠐꠤ ꠛꠅꠀꠁꠟꠣ।
PSA 24:3 ꠇꠦ ꠉꠤꠀ ꠝꠣꠛꠥꠖꠞ ꠙꠣꠠꠞ ꠃꠙꠞꠦ ꠃꠑꠤꠔ, ꠔꠣꠘ ꠙꠣꠇ-ꠙꠛꠤꠔ꠆ꠞ ꠝꠥꠇꠣꠝꠅ ꠇꠥꠘ ꠎꠘ ꠈꠣꠠꠣ ꠞꠁꠛ?
PSA 24:4 ꠢꠃ ꠎꠘꠃ ꠔ, ꠎꠣꠞ ꠀꠔ ꠘꠤ-ꠅꠙꠞꠣꠗꠤ, ꠎꠣꠞ ꠖꠤꠟ ꠙꠣꠇ-ꠍꠣꠚ; ꠢꠦ ꠎꠉꠔꠞ ꠝꠣꠄꠀ ꠎꠣꠟꠅ ꠛꠘ꠆ꠖꠤ ꠘꠣꠄ, ꠀꠞ ꠐꠉꠣꠐꠉꠤꠞ ꠘꠤꠅꠔꠦ ꠇꠍꠝ ꠈꠣꠄ ꠘꠣ।
PSA 24:5 ꠢꠦ-ꠃ ꠙꠣꠁꠛ ꠀꠟ꠆ꠟꠣꠞ ꠔꠞꠚ ꠕꠣꠇꠤ ꠞꠢꠝ-ꠛꠞꠇꠔ, ꠔꠣꠞ ꠎꠣꠘ ꠛꠣꠌꠣꠅꠞꠣ ꠝꠣꠟꠤꠇꠞ ꠉꠦꠍ ꠕꠣꠇꠤ ꠛꠦ-ꠇꠍꠥꠞ ꠈꠣꠟꠣꠍ ꠙꠣꠁꠛ।
PSA 24:6 ꠄꠞꠣꠃ ꠅꠁꠟꠣ ꠔꠣꠘ ꠀꠡꠤꠇ ꠛꠘ꠆ꠖꠣꠞ ꠖꠟ, ꠔꠥꠝꠣꠞ ꠖꠤꠖꠣꠞ ꠙꠣꠁꠔ ꠌꠣꠄ, ꠅ ꠁꠀꠇꠥꠛꠞ ꠀꠟ꠆ꠟꠣ। (ꠍꠦꠟꠣ)
PSA 24:7 ꠅ ꠉꠦꠁꠐ ꠅꠇꠟ, ꠝꠣꠕꠣ ꠃꠌꠣ ꠇꠞꠅ, ꠃꠌꠣ ꠅꠁꠎꠣꠅ, ꠅ ꠌꠤꠞꠡ꠆ꠕꠣꠄꠁ ꠖꠥꠀꠞ ꠅꠇꠟ, ꠎꠣꠟꠣꠟ-ꠡꠣꠘꠞ ꠛꠣꠖꠡꠣꠄ ꠔꠡꠞꠤꠚ ꠀꠘꠤꠟꠣꠃꠇ꠆ꠇꠣ।
PSA 24:8 ꠅꠃ ꠎꠣꠟꠣꠟ-ꠡꠣꠘꠞ ꠛꠣꠖꠡꠣ ꠇꠦ? ꠛꠟꠛꠣꠘ ꠀꠞ ꠙꠄꠟꠥꠀꠘ ꠝꠣꠛꠥꠖ, ꠟꠣꠠꠣꠁ-ꠎꠥꠖ꠆ꠖꠔ ꠙꠄꠟꠥꠀꠘ ꠝꠣꠛꠥꠖ।
PSA 24:9 ꠅ ꠉꠦꠁꠐ ꠅꠇꠟ, ꠝꠣꠕꠣ ꠃꠌꠣ ꠇꠞꠅ, ꠃꠌꠣ ꠅꠅ, ꠅ ꠌꠤꠞꠡ꠆ꠕꠣꠄꠁ ꠖꠥꠀꠞ ꠅꠇꠟ, ꠎꠣꠟꠣꠟ-ꠡꠣꠘꠞ ꠛꠣꠖꠡꠣꠄ ꠔꠡꠞꠤꠚ ꠀꠘꠤꠟꠣꠃꠇ꠆ꠇꠣ।
PSA 24:10 ꠎꠣꠟꠣꠟ-ꠡꠣꠘꠞ ꠅꠃ ꠛꠣꠖꠡꠣ ꠇꠦ? ꠍꠤꠙꠣꠁ ꠖꠟ ꠅꠇꠟꠞ ꠇꠣꠝꠣꠘ꠆ꠒꠣꠞ ꠝꠣꠛꠥꠖ, ꠔꠣꠁꠘꠃ ꠎꠣꠟꠣꠟ-ꠡꠣꠘꠞ ꠛꠣꠖꠡꠣ। (ꠍꠦꠟꠣ)॥
PSA 25:1 ꠢꠎꠞꠔ ꠖꠣꠃꠖꠞ ꠝꠤꠎꠝꠞ। ꠅ ꠝꠣꠛꠥꠖ, ꠀꠝꠣꠞ ꠎꠣꠘꠞꠦ ꠔꠥꠝꠣꠞ ꠖꠞꠛꠣꠞꠅ ꠖꠤꠟꠣꠁꠍꠤ ꠡꠙꠤꠀ,
PSA 25:2 ꠈꠣꠟꠤ ꠔꠥꠝꠣꠞ ꠃꠙꠞꠦꠃ ꠜꠞꠡꠣ ꠇꠞꠤ, ꠅꠉ ꠀꠝꠣꠞ ꠀꠟ꠆ꠟꠣ। ꠡꠞꠝꠤꠘ꠆ꠖꠣ ꠇꠞꠤꠅ ꠘꠣ ꠝꠞꠦ ꠖꠥꠡꠝꠘꠞ ꠍꠣꠝꠘꠦ, ꠛꠣꠢꠣꠖꠥꠞꠤ ꠘꠣ ꠇꠞꠃꠇ ꠔꠣꠞꠣ ꠀꠝꠣꠞ ꠃꠙꠞꠦ।
PSA 25:3 ꠔꠥꠝꠣꠞ ꠃꠙꠞꠦ ꠇꠞꠦ ꠎꠣꠞꠣ ꠀꠡꠣ-ꠜꠞꠡꠣ, ꠔꠣꠞꠣꠞ ꠝꠣꠎꠞ ꠇꠥꠘꠥ ꠎꠘ ꠅꠁꠔ ꠘꠣꠄ ꠔ ꠡꠞꠝꠤꠘ꠆ꠖꠣ, ꠡꠞꠝ ꠙꠣꠁꠛ ꠔꠣꠞꠣ, ꠈꠣꠝꠈꠣ ꠛꠦꠁꠝꠣꠘꠤ ꠇꠞꠦ ꠎꠣꠞꠣ।
PSA 25:4 ꠅ ꠀꠟ꠆ꠟꠣ, ꠔꠥꠝꠣꠞ ꠙꠕ ꠅꠇꠟ ꠀꠝꠣꠞꠦ ꠌꠤꠘꠣꠅ, ꠔꠥꠝꠣꠞ ꠡꠑꠤꠇ ꠞꠣꠡ꠆ꠔꠣ ꠀꠝꠣꠞꠦ ꠖꠦꠈꠣꠅ।
PSA 25:5 ꠔꠥꠝꠣꠞ ꠢꠇꠦ ꠀꠝꠣꠞꠦ ꠌꠣꠟꠣꠅ ꠀꠞ ꠢꠤꠇꠣꠅ, ꠀꠝꠣꠞ ꠎꠣꠘ ꠛꠣꠌꠣꠘꠤꠞ ꠝꠣꠟꠤꠇ ꠔ ꠔꠥꠝꠤꠃ, ꠢꠞ-ꠢꠣꠝꠦꠡꠣ ꠔꠥꠝꠣꠞ ꠃꠙꠞꠦ ꠀꠡꠣ ꠞꠣꠈꠤ।
PSA 25:6 ꠅꠉ ꠝꠣꠛꠥꠖ, ꠁꠀꠖ ꠇꠞꠅ ꠔꠥꠝꠣꠞ ꠖꠄꠀ-ꠝꠣꠄꠀ, ꠡꠥꠞꠥ ꠕꠣꠇꠤ ꠔ ꠄꠛ ꠇꠞꠣꠔ ꠀꠍ ꠅꠔꠣ।
PSA 25:7 ꠀꠝꠣꠞ ꠎꠥꠀꠘ ꠇꠣꠟꠞ ꠉꠥꠘꠣ-ꠘꠣꠚꠞꠝꠣꠘꠤ ꠘꠣ ꠞꠣꠈꠤꠅ ꠝꠘꠅ, ꠅ ꠉ ꠝꠣꠛꠥꠖ, ꠔꠥꠝꠣꠞ ꠖꠄꠀ-ꠝꠣꠄꠀꠄ ꠝꠞꠦ ꠁꠀꠖ ꠇꠞꠅ, ꠔꠥꠝꠣꠞ ꠅꠐꠟ ꠝꠦꠢꠦꠞꠛꠣꠘꠤꠞ ꠈꠣꠔꠤꠞꠦ ꠔꠥꠝꠤ ꠅꠟꠣ ꠇꠞꠅ।
PSA 25:8 ꠝꠣꠛꠥꠖ ꠔ ꠖꠄꠀꠟꠥ, ꠅꠔꠤ ꠢꠇ ꠔꠣꠁꠘ, ꠄꠞꠟꠣꠉꠤ ꠉꠥꠘꠣꠉꠣꠞꠞꠦꠅ ꠔꠣꠘ ꠙꠕ ꠌꠤꠘꠣꠁꠘ।
PSA 25:9 ꠢꠇ ꠙꠕꠦ ꠌꠣꠟꠣꠁꠘ ꠔꠣꠁꠘ ꠘꠞꠝ ꠖꠤꠟꠞ ꠝꠣꠘꠡꠞꠦ, ꠔꠣꠘ ꠙꠕ ꠖꠦꠈꠣꠁ ꠖꠦꠁꠘ ꠔꠣꠞꠣ ꠢꠇꠟꠞꠦ।
PSA 25:10 ꠔꠣꠘ ꠅꠀꠖꠣ-ꠌꠥꠇ꠆ꠔꠤ ꠢꠥꠇꠥꠝ-ꠀꠢꠇꠣꠝ ꠝꠣꠘꠤꠀ ꠌꠟꠦ ꠎꠣꠞꠣ, ꠔꠣꠞꠣꠞ ꠟꠣꠉꠤ ꠔꠣꠘ ꠙꠕ ꠅꠇꠟ ꠢꠇ ꠀꠞ ꠖꠄꠀꠄ ꠜꠞꠣ।
PSA 25:11 ꠛꠃꠔ ꠛꠖ ꠇꠣꠝ ꠘꠣꠚꠞꠝꠣꠘꠤ ꠇꠞꠤꠟꠤꠍꠤ ꠀꠝꠤ, ꠔꠥꠝꠣꠞ ꠘꠣꠝꠞ ꠖꠥꠀꠁ ꠉ ꠝꠣꠛꠥꠖ, ꠖꠤꠟꠣꠅ ꠝꠞꠦ ꠝꠣꠚꠤ।
PSA 25:12 ꠝꠣꠛꠥꠖꠞꠦ ꠢꠣꠍꠣꠃ ꠒꠞꠣꠁꠀ ꠌꠟꠦꠞ ꠅꠟꠣ ꠀꠖꠝ ꠇꠦ? ꠇꠥꠘ ꠙꠕ ꠛꠣꠍꠤꠀ ꠘꠤꠔ, ꠝꠣꠛꠥꠖꠦꠃ ꠖꠦꠈꠣꠁꠘ ꠔꠣꠞꠦ।
PSA 25:13 ꠡꠥꠈ-ꠡꠣꠘ꠆ꠔꠤ ꠀꠞꠣꠝꠦ ꠇꠣꠐꠣꠁꠘ ꠔꠣꠞꠣꠞ ꠎꠤꠘ꠆ꠖꠦꠉꠣꠘꠤ, ꠔꠣꠞꠣꠞ ꠀꠅꠟꠣꠖꠦꠅ ꠙꠣꠁꠛꠣ ꠖꠦꠡꠞ ꠝꠤꠞꠣꠡꠖꠣꠞꠤ।
PSA 25:14 ꠝꠣꠛꠥꠖꠞ ꠒꠞ-ꠈꠚꠦ ꠎꠣꠞꠣ ꠎꠤꠘ꠆ꠖꠦꠉꠤ ꠇꠣꠐꠣꠁꠘ, ꠔꠣꠞꠣꠞꠦꠃ ꠔꠣꠘ ꠖꠤꠟꠞ ꠉꠥꠙꠘ ꠇꠕꠣ ꠎꠣꠘꠣꠁꠘ, ꠔꠣꠘ ꠅꠀꠖꠣ-ꠌꠥꠇ꠆ꠔꠤꠞ ꠛꠦꠙꠣꠞ ꠔꠣꠞꠣꠞꠦ ꠢꠤꠇꠣꠁꠘ।
PSA 25:15 ꠀꠝꠣꠞ ꠌꠃꠈꠦ ꠢꠞ-ꠢꠣꠝꠦꠡꠣ ꠝꠣꠛꠥꠖꠞ ꠛꠣꠄ ꠌꠣꠁ ꠞꠁꠍꠦ, ꠡꠤꠇꠣꠞꠤꠞ ꠎꠣꠟ ꠕꠣꠇꠤ ꠔꠣꠁꠘ ꠛꠣꠌꠣꠁꠘ ꠀꠝꠣꠞ ꠙꠣꠅꠞꠦ।
PSA 25:16 ꠞꠢꠝ ꠇꠞꠅ ꠔꠥꠝꠤ ꠝꠞꠦ, ꠀꠝꠣꠞ ꠛꠣꠄꠖꠤ ꠌꠣꠁꠀ, ꠀꠝꠤ ꠅꠁꠟꠣꠝ ꠖꠥꠈꠤ-ꠇꠣꠋꠉꠣꠟ, ꠀꠍꠤ ꠛꠠ ꠄꠇꠟꠣ।
PSA 25:17 ꠀꠝꠣꠞ ꠖꠤꠟꠞ ꠖꠥꠈ-ꠎꠘꠔ꠆ꠞꠘꠣ ꠖꠤꠟꠣꠅ ꠢꠞꠣꠁꠀ, ꠢꠇ꠆ꠇꠟ ꠛꠣꠟꠣ-ꠝꠍꠤꠛꠔ ꠕꠣꠇꠤ ꠞꠣꠈꠅ ꠛꠣꠌꠣꠁꠀ।
PSA 25:18 ꠖꠦꠈꠅ ꠝꠞ ꠖꠥꠈ-ꠝꠍꠤꠛꠔ ꠛꠦꠢꠣꠟꠔ ꠖꠡꠣ, ꠝꠣꠚ ꠇꠞꠤꠀ ꠖꠤꠟꠣꠅ ꠝꠞ ꠎꠤꠘ꠆ꠖꠦꠉꠤꠞ ꠉꠥꠘꠣ।
PSA 25:19 ꠖꠦꠈꠞꠣꠄ ꠘꠤ ꠇꠔ ꠖꠥꠡꠝꠘ ꠟꠣꠉꠍꠦ ꠀꠝꠣꠞ ꠈꠞꠦ, ꠔꠣꠞꠣ ꠌꠞꠝ ꠁꠋꠡꠣ-ꠊꠤꠘ꠆ꠘꠣ ꠇꠞꠦꠞ ꠀꠝꠣꠞꠦ।
PSA 25:20 ꠚꠣꠘꠣ ꠖꠦꠅ ꠀꠝꠣꠞꠦ, ꠛꠣꠌꠣꠅ ꠀꠝꠣꠞ ꠎꠣꠘ ꠈꠣꠘ, ꠀꠡꠞꠄ ꠟꠁꠍꠤ ꠔꠥꠝꠣꠞ ꠉꠦꠍꠦ, ꠞꠣꠈꠅ ꠀꠝꠣꠞ ꠝꠣꠘ-ꠡꠝ꠆ꠝꠣꠘ।
PSA 25:21 ꠢꠇ-ꠢꠣꠟꠣꠟꠤ ꠡꠞꠟꠔꠣ ꠇꠞꠃꠇ ꠀꠝꠣꠞꠦ ꠞꠇ꠆ꠇꠣ, ꠀꠝꠤ ꠔ ꠔꠥꠝꠣꠞꠃ ꠃꠙꠞꠦ ꠇꠞꠍꠤ ꠜꠞꠡꠣ।
PSA 25:22 ꠅ ꠉ ꠀꠟ꠆ꠟꠣ, ꠈꠣꠟꠣꠍ ꠇꠞꠅ ꠛꠘꠤ ꠁꠍꠞꠣꠁꠟꠞꠦ, ꠔꠣꠞꠣꠞ ꠢꠇꠟ ꠝꠍꠤꠛꠔ ꠕꠣꠇꠤ ꠛꠣꠌꠣꠅ ꠔꠣꠞꠣꠞꠦ॥
PSA 26:1 ꠢꠎꠞꠔ ꠖꠣꠃꠖꠞ ꠝꠤꠎꠝꠞ। ꠀꠝꠤ ꠎꠦꠘ ꠘꠤꠞ꠆ꠖꠥꠡꠤ ꠝꠣꠛꠥꠖ, ꠔꠥꠝꠤ ꠔꠣ ꠇꠞꠅ ꠉ ꠎꠣꠁꠞ, ꠀꠝꠤ ꠔ ꠢꠇ ꠙꠕꠦꠃ ꠌꠟꠤꠀꠞ, ꠝꠣꠛꠥꠖꠞ ꠃꠙꠞꠦꠃ ꠜꠞꠡꠣ ꠇꠞꠤꠀꠞ, ꠛꠖꠟꠣꠁꠔꠣꠝ ꠘꠣꠄ ꠘꠤꠅꠔ ꠀꠝꠣꠞ।
PSA 26:2 ꠝꠣꠛꠥꠖ ꠉ, ꠀꠝꠣꠞꠦ ꠀꠎꠝꠣꠁꠀ ꠖꠦꠈꠅ, ꠀꠝꠣꠞ ꠖꠤꠟ ꠙꠞꠤꠇ꠆ꠇꠣ ꠇꠞꠤꠀ ꠎꠣꠌꠣꠁ ꠇꠞꠅ।
PSA 26:3 ꠔꠥꠝꠣꠞ ꠖꠄꠀ-ꠝꠣꠄꠀ ꠔ ꠀꠝꠣꠞ ꠌꠈꠥꠞ ꠍꠣꠝꠘꠦ, ꠀꠝꠤ ꠌꠟꠤ ꠔꠥꠝꠣꠞ ꠖꠦꠈꠣꠁꠟ ꠢꠇ ꠙꠕꠦ।
PSA 26:4 ꠝꠤꠍꠣ ꠝꠣꠔꠞꠣꠞ ꠀꠒ꠆ꠒꠣꠔ ꠀꠝꠤ ꠛꠁ ꠘꠣ, ꠛꠦꠁꠝꠣꠘ-ꠝꠥꠘꠣꠚꠤꠇꠞ ꠗꠣꠞꠅ ꠇꠣꠍꠦ ꠎꠣꠁ ꠘꠣ।
PSA 26:5 ꠈꠛꠤꠍ-ꠘꠣꠚꠞꠝꠣꠘꠞ ꠡꠋ ꠕꠣꠇꠤ ꠢꠞꠤꠀ ꠞꠁ, ꠛꠎ꠆ꠎꠣꠔ ꠅꠇꠟꠞ ꠀꠒ꠆ꠒꠣꠔ ꠀꠝꠤ ꠘꠣ ꠛꠁ।
PSA 26:6 ꠈꠣꠟꠣꠍꠞ ꠞꠣꠄ ꠙꠣꠁꠀ ꠉ ꠝꠣꠛꠥꠖ, ꠀꠔ ꠗꠁꠍꠤ ꠀꠝꠤ, ꠔꠥꠝꠣꠞ ꠊꠞ ꠔꠅꠀꠚ ꠇꠞꠤꠀ ꠀꠖꠣꠄ ꠇꠞꠤ ꠇꠥꠞꠛꠣꠘꠤ।
PSA 26:7 ꠎꠥꠞꠦ ꠎꠥꠞꠦ ꠔꠥꠝꠣꠞ ꠡꠥꠇꠞꠤꠀ ꠎꠣꠘꠣꠁꠞꠣꠝ, ꠔꠥꠝꠣꠞ ꠢꠇ꠆ꠇꠟ ꠇꠦꠞꠣꠝꠔꠤꠞ ꠇꠕꠣ ꠇꠁꠞꠣꠝ।
PSA 26:8 ꠝꠣꠛꠥꠖ, ꠔꠥꠝꠣꠞ ꠛꠡꠔ ꠊꠞ ꠀꠝꠤ ꠜꠣꠟꠛꠣꠡꠤ, ꠎꠦ ꠎꠣꠉꠣꠔ ꠔꠥꠝꠣꠞ ꠉꠃꠞꠛ-ꠝꠢꠤꠝꠣꠞ ꠛꠡꠔꠤ।
PSA 26:9 ꠉꠥꠘꠣꠉꠣꠞꠞ ꠟꠉꠦ ꠀꠝꠣꠞ ꠎꠣꠘ ꠘꠣ ꠘꠤꠅ, ꠈꠥꠘꠤ ꠅꠇꠟꠞ ꠟꠉꠦ ꠀꠝꠣꠞ ꠝꠞꠘ ꠘꠣ ꠖꠤꠅ।
PSA 26:10 ꠔꠣꠞꠣꠞ ꠀꠔꠅ ꠀꠍꠦ ꠈꠣꠟꠤ ꠘꠣꠚꠞꠝꠣꠘꠤ, ꠒꠣꠁꠘ ꠀꠔ ꠜꠞꠣ ꠔꠣꠞꠣꠞ ꠊꠥꠡꠞ ꠐꠦꠇꠣꠖꠤ।
PSA 26:11 ꠀꠝꠤ ꠔ ꠌꠟꠤ ꠢꠇ-ꠢꠣꠟꠣꠟ ꠙꠕꠦ, ꠖꠄꠀ-ꠝꠣꠄꠀ ꠇꠞꠤꠀ ꠈꠣꠟꠣꠍ ꠇꠞꠅ ꠝꠞꠦ।
PSA 26:12 ꠢꠝꠣꠘ ꠎꠣꠉꠣꠔ ꠝꠎꠛꠥꠔ ꠀꠍꠦ ꠀꠝꠣꠞ ꠖꠥꠁꠅ ꠙꠣꠅ, ꠝꠣꠛꠥꠖꠞ ꠔꠣꠞꠤꠚ ꠇꠞꠝꠥ ꠀꠝꠤ ꠝꠢꠣ ꠝꠎꠟꠤꠍꠅ॥
PSA 27:1 ꠢꠎꠞꠔ ꠖꠣꠃꠖꠞ ꠝꠤꠎꠝꠞ। ꠝꠣꠛꠥꠖꠃ ꠀꠝꠣꠞ ꠞꠥꠡꠘꠤ, ꠀꠝꠣꠞꠦ ꠛꠣꠌꠣꠘꠦꠀꠟꠣ, ꠀꠝꠤ ꠇꠣꠞꠦ ꠒꠞꠣꠁꠔꠣꠝ? ꠝꠣꠛꠥꠖꠃ ꠀꠝꠣꠞ ꠀꠡꠞꠄ ꠑꠤꠇꠣꠘꠣ, ꠇꠣꠞ ꠒꠞꠦ ꠀꠝꠤ ꠇꠣꠙꠤꠔꠣꠝ?
PSA 27:2 ꠀꠝꠣꠞꠦ ꠉꠤꠟꠤꠛꠣꠞ ꠟꠣꠉꠤ ꠘꠣꠚꠞꠝꠣꠘ ꠅꠇꠟ, ꠀꠉꠥꠁꠀ ꠀꠄ ꠎꠦꠛꠟꠣ ꠅꠃ ꠖꠥꠡꠝꠘ ꠖꠟ, ꠅꠃ ꠡꠝꠄ ꠃꠡ꠆ꠐꠣ ꠈꠣꠁꠀ ꠔꠣꠞꠣ ꠙꠠꠤ ꠎꠣꠄ, ꠙꠠꠤ ꠎꠣꠅꠀꠄ ꠔꠣꠞꠣ ꠛꠤꠚꠟ ꠛꠘꠤꠎꠣꠄ।
PSA 27:3 ꠡꠦꠘꠣ ꠛꠣꠢꠤꠘꠤꠄ ꠎꠥꠖꠤ ꠛꠦꠞꠤꠟꠣꠄ ꠝꠞꠦ, ꠀꠝꠣꠞ ꠖꠤꠟꠦ ꠒꠞꠣꠁꠔ ꠘꠣꠄ ꠔꠣꠞꠣꠞꠦ। ꠀꠝꠣꠞ ꠛꠤꠞꠥꠖ꠆ꠖꠦ ꠎꠥꠖꠤ ꠎꠥꠖ꠆ꠖ ꠟꠣꠉꠣꠄ, ꠀꠝꠤ ꠔ ꠞꠁꠝꠥ ꠔꠥꠝꠣꠞꠃ ꠜꠞꠡꠣꠄ।
PSA 27:4 ꠝꠣꠛꠥꠖꠞ ꠉꠦꠍꠦ ꠀꠝꠣꠞ ꠅꠃ ꠝꠤꠘꠔꠤ ꠎꠣꠘꠣꠁ, ꠔꠣꠘ ꠖꠞꠛꠣꠞꠅ ꠈꠣꠟꠤ ꠅꠔꠈꠣꠘꠃ ꠌꠣꠁ— ꠞꠁꠔꠣꠝ ꠌꠣꠁ ꠀꠝꠤ ꠝꠣꠛꠥꠖꠞ ꠊꠞꠅ, ꠀꠝꠣꠞ ꠢꠣꠞꠣ ꠎꠤꠘ꠆ꠖꠦꠉꠤ ꠇꠣꠐꠃꠇ ꠢꠘꠅ, ꠔꠣꠘ ꠡꠥꠘ꠆ꠖꠞ ꠍꠥꠞꠔ ꠈꠣꠘ ꠀꠝꠤ ꠎꠣꠘꠥ ꠖꠦꠈꠤ, ꠔꠣꠘ ꠝꠥꠇꠣꠝꠅ ꠞꠁꠀ ꠀꠝꠤ ꠎꠤꠇꠤꠞ ꠇꠞꠤ।
PSA 27:5 ꠝꠍꠤꠛꠔꠞ ꠖꠤꠘꠅ ꠔꠣꠁꠘꠃ ꠔ ꠝꠞꠦ ꠟꠥꠇꠣꠁꠀ ꠞꠣꠈꠛꠣ ꠔꠣꠘ ꠀꠡꠞꠄ ꠛꠣꠋꠇꠣꠞꠦ, ꠔꠥꠟꠤꠀ ꠞꠣꠈꠛꠣ ꠝꠞꠦ ꠙꠣꠠꠞ ꠃꠌꠣ ꠐꠤꠟ꠆ꠟꠣꠔ, ꠘꠤꠞꠣꠙꠖꠦ ꠞꠣꠈꠛꠣ ꠝꠞꠦ ꠔꠣꠘ ꠛꠡꠔ ꠈꠣꠘꠣꠔ।
PSA 27:6 ꠅꠃ ꠡꠝꠄ ꠝꠞꠦ ꠛꠦꠞꠤꠀ ꠞꠣꠈꠍꠦ ꠎꠦꠔꠣ ꠖꠥꠡꠝꠘꠦ, ꠀꠝꠣꠞ ꠁꠎ꠆ꠎꠔ ꠛꠣꠠꠤꠛ ꠅꠔꠣ ꠎꠘꠞ ꠃꠙꠞꠦ। ꠈꠥꠡꠤꠞ ꠌꠥꠐꠦ ꠎꠥꠞꠦ ꠎꠥꠞꠦ ꠉꠎꠟ ꠉꠣꠁꠝꠥ ꠀꠝꠤ, ꠔꠣꠘ ꠊꠞꠅ ꠖꠣꠘ ꠇꠞꠝꠥ ꠟꠤꠟ꠆ꠟꠣ-ꠇꠥꠞꠛꠣꠘꠤ, ꠛꠣꠎꠘꠣꠞ ꠔꠣꠟꠦ ꠔꠣꠟꠦ ꠔꠣꠘ ꠘꠣꠝꠦ ꠉꠣꠁꠝꠥ ꠀꠝꠤ, ꠃꠌꠣ ꠉꠟꠣꠄ ꠉꠣꠁꠝꠥ ꠀꠝꠤ ꠉꠎꠟ-ꠇꠣꠅꠀꠟꠤ।
PSA 27:7 ꠀꠝꠣꠞ ꠀꠅꠀꠎ ꠢꠥꠘꠅ ꠝꠣꠛꠥꠖ, ꠇꠞꠤ ꠝꠤꠘꠔꠤ, ꠖꠄꠀ ꠇꠞꠤꠀ ꠀꠝꠣꠞ ꠒꠣꠇꠞ ꠎꠥꠀꠙ ꠖꠦꠅ ꠔꠥꠝꠤ।
PSA 27:8 ꠔꠥꠝꠣ ꠕꠣꠇꠤ ꠅꠃ ꠇꠣꠟꠣꠝ ꠖꠤꠟꠅ ꠀꠁꠍꠦ ꠝꠞ, “ꠀꠝꠣꠞ ꠀꠡꠤꠇ ꠛꠘꠤꠀ ꠔꠥꠝꠞꠣ ꠔꠣꠟ꠆ꠟꠣꠡ ꠇꠞꠅ ꠝꠞ ꠖꠤꠖꠣꠞ।” ꠝꠣꠛꠥꠖ ꠉ, ꠄꠞꠟꠣꠉꠤꠃ ꠔꠥꠝꠣꠞꠦ ꠒꠣꠇꠤꠀꠞ,
PSA 27:9 ꠘꠣ ꠟꠥꠇꠣꠁꠀ ꠖꠦꠈꠣꠅ ꠉ ꠀꠝꠣꠞꠦ ꠝꠥꠈ ꠈꠣꠘ ꠔꠥꠝꠣꠞ। ꠉꠥꠍꠣ ꠇꠞꠤꠀ ꠈꠦꠖꠣꠁ ꠖꠤꠅ ꠘꠣ ꠔꠥꠝꠣꠞ ꠁ ꠉꠥꠟꠣꠝꠞꠦ, ꠔꠥꠝꠤꠃ ꠀꠝꠣꠞ ꠜꠞꠡꠣ, ꠢꠞꠣꠁ ꠖꠤꠅ ꠘꠣ ꠝꠞꠦ, ꠍꠣꠠꠤꠀ ꠎꠣꠁꠅ ꠘꠣ ꠔꠥꠝꠤ ꠀꠝꠣꠞꠦ ꠚꠣꠟꠣꠁꠀ, ꠝꠣꠛꠥꠖ ꠉ ꠔꠥꠝꠤꠃ ꠈꠣꠟꠤ ꠀꠝꠣꠞ ꠛꠣꠌꠣꠘꠦꠀꠟꠣ।
PSA 27:10 ꠝꠣ-ꠛꠣꠚꠦ ꠀꠝꠣꠞꠦ ꠚꠣꠟꠣꠁ ꠖꠤꠟꠦꠅ, ꠝꠣꠛꠥꠖꠦ ꠔ ꠟꠁꠍꠂꠘ ꠝꠞꠦ ꠔꠣꠘꠃ ꠇꠥꠟꠅ।
PSA 27:11 ꠅ ꠝꠣꠛꠥꠖ, ꠔꠥꠝꠣꠞ ꠀꠙꠘ ꠙꠕ ꠌꠤꠘꠣꠅ ꠀꠝꠣꠞꠦ, ꠡꠞꠟ ꠙꠕꠦ ꠌꠣꠟꠣꠅ ꠝꠞꠦ, ꠛꠣꠌꠣꠅ ꠖꠥꠡꠝꠘ ꠕꠘꠦ।
PSA 27:12 ꠖꠥꠡꠝꠘ ꠖꠟꠞ ꠝꠞ꠆ꠎꠤꠞ ꠀꠔꠅ ꠖꠤꠅ ꠘꠣ ꠡꠙꠤꠀ, ꠝꠤꠍꠣ ꠡꠣꠇ꠆ꠇꠤꠞ ꠖꠟ ꠀꠁꠀ ꠖꠝꠦ ꠖꠝꠦ ꠍꠣꠠꠦꠞ ꠁꠋꠡꠣ।
PSA 27:13 ꠀꠝꠣꠞ ꠝꠎꠛꠥꠔ ꠄꠇꠤꠘ ꠀꠍꠦ ꠝꠘꠞ ꠜꠤꠔꠞꠦ, ꠝꠣꠛꠥꠖꠞ ꠀꠍꠣꠘ ꠖꠦꠈꠝꠥ ꠀꠝꠤ ꠎꠤꠘ꠆ꠖꠣ ꠢꠣꠟꠔꠦ।
PSA 27:14 ꠝꠎꠛꠥꠔ ꠅꠅ ꠝꠣꠛꠥꠖꠞ ꠀꠡꠣꠄ, ꠅꠞꠦ ꠎꠣꠘ ꠀꠝꠣꠞ, ꠖꠤꠟꠞ ꠝꠣꠎꠦ ꠡꠣꠅꠡ ꠀꠘꠅ, ꠞꠅ ꠀꠡꠣꠄ ꠝꠣꠛꠥꠖꠞ॥
PSA 28:1 ꠢꠎꠞꠔ ꠖꠣꠃꠖꠞ ꠝꠤꠎꠝꠞ। ꠅ ꠝꠣꠛꠥꠖ ꠀꠝꠣꠞ ꠀꠡꠞꠄ ꠙꠣꠠ, ꠔꠥꠝꠣꠞꠦ ꠒꠣꠇꠤꠀꠞ, ꠀꠝꠣꠞ ꠟꠣꠉꠤ ꠛꠘ꠆ꠖ ꠇꠞꠤꠅ ꠘꠣ ꠖꠥꠁꠅ ꠇꠣꠘ ꠔꠥꠝꠣꠞ, ꠘꠤꠞꠣꠁ ꠞꠁꠟꠦ ꠔꠥꠝꠤ ꠀꠝꠣꠞ ꠟꠣꠉꠤꠀ, ꠞꠡꠣꠔꠟꠅ ꠎꠣꠅꠞꠣꠞ ꠟꠣꠈꠣꠘ ꠅꠁꠛ ꠝꠞ ꠖꠡꠣ।
PSA 28:2 ꠀꠝꠤ ꠎꠦꠛꠟꠣ ꠔꠥꠝꠣꠞ ꠉꠦꠍꠦ ꠎꠥꠞꠦ ꠎꠥꠞꠦ ꠇꠣꠘ꠆ꠖꠤ, ꠔꠥꠝꠣꠞ ꠈꠣꠍ ꠙꠣꠇ ꠎꠣꠉꠣꠞ ꠛꠣꠄ ꠖꠥꠁꠅ ꠀꠔ ꠔꠥꠟꠤ, ꠅꠃ ꠡꠝꠄ ꠢꠥꠘꠤꠅ ꠉ ꠖꠄꠀꠟ ꠀꠝꠣꠞ ꠝꠤꠘꠔꠤ।
PSA 28:3 ꠘꠣꠚꠞꠝꠣꠘ ꠛꠖꠈꠥꠞꠞ ꠟꠉꠦ ꠇꠞꠤ ꠘꠤꠅ ꠘꠣ ꠝꠞꠦ ꠐꠣꠘꠤꠀ, ꠔꠣꠞꠣ ꠝꠥꠈꠦ ꠝꠥꠈꠦ ꠖꠦꠈꠣꠄ ꠜꠣꠟꠣ ꠖꠤꠟꠅ ꠈꠣꠞꠣꠙꠤ ꠞꠣꠈꠤꠀ।
PSA 28:4 ꠔꠣꠞꠣꠞ ꠇꠣꠝ ꠝꠣꠚꠤꠇ ꠚꠟ ꠔꠣꠞꠣꠞꠦ ꠖꠦꠅ, ꠔꠣꠞꠣꠞ ꠈꠣꠞꠣꠙ ꠇꠣꠝꠞ ꠚꠟ ꠔꠣꠞꠣꠞꠦ ꠖꠦꠅ, ꠔꠣꠞꠣꠞ ꠀꠔꠞ ꠛꠖ ꠇꠣꠝꠞ ꠛꠖꠟꠣꠁ ꠔꠣꠞꠣꠞꠦ ꠖꠦꠅ, ꠔꠣꠞꠣꠞ ꠙꠣꠅꠘꠣ ꠡꠑꠤꠇ ꠡꠣꠎꠣ ꠔꠣꠞꠣꠞꠦ ꠖꠤꠟꠣꠅ।
PSA 28:5 ꠝꠣꠛꠥꠖꠞ ꠇꠣꠝ-ꠇꠣꠎ ꠔꠣꠞꠣꠞ ꠖꠤꠟꠅ ꠎꠣꠉꠣ ꠘꠣ ꠙꠣꠄ, ꠔꠣꠘ ꠀꠔꠞ ꠇꠣꠝꠞ ꠛꠣꠄ ꠔꠣꠞꠣꠞ ꠇꠥꠘꠥ ꠈꠤꠀꠟ ꠘꠣꠄ, ꠄꠞꠟꠣꠉꠤ ꠝꠣꠛꠥꠖꠦ ꠁꠔꠣꠞꠦ ꠇꠞꠤꠟꠤꠛꠣ ꠌꠥꠞꠝꠣꠞ, ꠛꠣꠖꠦ ꠇꠥꠘꠥ ꠖꠤꠘꠃ ꠁꠔꠣꠞꠦ ꠉꠠꠤꠔꠣ ꠘꠣꠄ ꠀꠞ।
PSA 28:6 ꠢꠇꠟ ꠔꠣꠞꠤꠚ-ꠉꠥꠘꠉꠣꠘ ꠈꠣꠟꠤ ꠝꠣꠛꠥꠖꠞ, ꠔꠣꠁꠘꠃ ꠔ ꠢꠥꠘꠍꠂꠘ ꠝꠤꠘꠔꠤ ꠝꠞ!
PSA 28:7 ꠝꠣꠛꠥꠖ ꠀꠝꠣꠞ ꠛꠟ-ꠡꠇ꠆ꠔꠤ, ꠎꠣꠘ ꠛꠣꠌꠣꠘꠤꠞ ꠀꠔꠤꠀꠞ, ꠔꠣꠘ ꠃꠙꠞꠦ ꠜꠞꠡꠣ ꠇꠞꠦ ꠖꠤꠟ-ꠎꠣꠘ ꠀꠝꠣꠞ, ꠔꠣꠘ ꠡꠣꠁꠎ꠆ꠎ ꠙꠣꠁꠀ ꠢꠣꠞꠤ ꠈꠥꠡꠤꠄ ꠜꠞꠍꠦ ꠝꠞ ꠖꠤꠟ, ꠀꠝꠣꠞ ꠉꠟꠣꠄ ꠡꠥꠇꠞꠤꠀ ꠎꠣꠘꠣꠁ ꠇꠞꠤ ꠔꠣꠘ ꠎꠤꠇꠤꠞ।
PSA 28:8 ꠝꠣꠛꠥꠖꠃ ꠔ ꠛꠟ-ꠡꠇ꠆ꠔꠤ ꠔꠣꠘ ꠀꠙꠘ ꠙ꠆ꠞꠎꠣꠞ, ꠔꠣꠘ ꠈꠦꠟꠣꠚꠔꠤ ꠙꠣꠅꠀ ꠎꠘꠞ ꠎꠣꠘ ꠛꠣꠌꠣꠘꠤꠞ ꠛꠣꠋꠇꠣꠞ।
PSA 28:9 ꠔꠥꠝꠣꠞ ꠀꠙꠘ ꠙ꠆ꠞꠎꠣꠞꠦ ꠔꠥꠝꠤ ꠛꠣꠌꠣꠅ ꠉ, ꠔꠣꠞꠣ ꠔꠥꠝꠣꠞ ꠗꠘ-ꠖꠃꠟꠔ, ꠞꠢꠝ-ꠛꠞꠇꠔ ꠖꠦꠅ, ꠔꠥꠝꠤ ꠔ ꠔꠣꠞꠣꠞ ꠞꠣꠈꠣꠟ, ꠌꠤꠞꠇꠣꠟ ꠛꠁꠀ ꠘꠦꠅ॥
PSA 29:1 ꠢꠎꠞꠔ ꠖꠣꠃꠖꠞ ꠝꠤꠎꠝꠞ। ꠅ ꠚꠤꠞꠤꠡ꠆ꠔꠣ ꠅꠇꠟ, ꠎꠣꠘꠣꠅ ꠝꠣꠛꠥꠖꠞ ꠉꠥꠘꠉꠣꠘ, ꠉꠃꠞꠛ ꠀꠞ ꠛꠟ-ꠡꠇ꠆ꠔꠤꠞ ꠇꠕꠣ ꠎꠣꠘꠣꠅ ꠔꠣꠘ,
PSA 29:2 ꠝꠣꠛꠥꠖꠞ ꠘꠣꠝꠦ ꠔꠣꠘ ꠙꠣꠅꠘꠣ ꠉꠃꠞꠛ ꠎꠣꠘꠣꠅ, ꠙꠛꠤꠔ꠆ꠞꠔꠣꠞ ꠢꠣꠎꠦ ꠢꠣꠎꠤꠀ ꠍꠁꠎꠖꠣꠔ ꠙꠠꠤ ꠎꠣꠅ।
PSA 29:3 ꠝꠣꠛꠥꠖꠞ ꠉꠟꠣꠞ ꠀꠅꠀꠎ ꠖꠞꠤꠀꠞ ꠃꠙꠞꠦ ꠎꠣꠞꠤ ꠀꠍꠦ, ꠛꠠꠣꠁ-ꠡꠣꠘꠞ ꠀꠟ꠆ꠟꠣꠞ ꠉꠞ꠆ꠎꠘ ꠛꠣꠎ ꠙꠠꠣꠞ ꠟꠣꠈꠣꠘ ꠒꠣꠇꠦ, ꠀꠟ꠆ꠟꠣꠞ ꠢꠥꠋꠇꠣꠞ ꠎꠣꠞꠤ ꠀꠍꠦ ꠉꠁꠘ ꠖꠞꠤꠀꠞ ꠃꠙꠞꠦ।
PSA 29:4 ꠝꠣꠛꠥꠖꠞ ꠉꠟꠣꠞ ꠀꠅꠀꠎ ꠛꠃꠔ ꠛꠟꠛꠣꠘ, ꠔꠣꠘ ꠉꠟꠣꠞ ꠀꠅꠀꠎ ꠅꠔꠤ ꠝꠢꠣꠘ।
PSA 29:5 ꠝꠣꠛꠥꠖꠞ ꠉꠟꠣꠞ ꠡꠥꠞꠦ ꠖꠦꠛꠖꠣꠞꠥ ꠉꠣꠍ ꠜꠣꠋꠉꠤꠎꠣꠄ, ꠟꠦꠛꠣꠘꠘꠞ ꠖꠦꠛꠖꠣꠞꠥ ꠉꠣꠍꠅ ꠜꠣꠋꠉꠤꠀ ꠙꠠꠤꠎꠣꠄ।
PSA 29:6 ꠔꠣꠘ ꠡꠥꠞꠦ ꠛꠣꠍꠥꠞꠞ ꠟꠣꠈꠣꠘ ꠘꠣꠌꠦ ꠟꠦꠛꠣꠘꠘ, ꠎꠋꠟꠤ ꠛꠄꠞꠣꠞ ꠛꠣꠁꠌ꠆ꠌꠣꠞ ꠟꠣꠈꠣꠘ ꠚꠣꠟꠣꠄ ꠍꠤꠞꠤꠅꠘ।
PSA 29:7 ꠔꠣꠘ ꠉꠟꠣꠞ ꠀꠅꠀꠎ ꠢꠥꠘꠤꠀ, ꠀꠍꠝꠣꠘ ꠃꠑꠦ ꠎꠤꠟꠇꠣꠁꠀ।
PSA 29:8 ꠝꠣꠛꠥꠖꠞ ꠉꠟꠣꠞ ꠡꠥꠞꠦ ꠝꠞꠥꠜꠥꠝꠤ ꠇꠣꠙꠤꠀ ꠃꠑꠦ, ꠇꠣꠖꠦꠡ ꠖꠦꠡꠞ ꠝꠞꠥꠜꠥꠝꠤ ꠇꠣꠙꠣꠁꠘ ꠝꠣꠛꠥꠖꠦ।
PSA 29:9 ꠄꠟꠘ ꠉꠣꠍꠅ ꠀꠟꠤꠎꠣꠄ ꠝꠣꠛꠥꠖꠞ ꠀꠅꠀꠎ ꠢꠥꠘꠤꠀ, ꠎꠋꠟꠣꠞ ꠙꠣꠔꠣ-ꠍꠣꠔꠣ ꠙꠠꠤ ꠎꠣꠄ ꠍꠤꠠꠤꠀ, ꠇꠣꠛꠣ ꠊꠞꠞ ꠢꠇꠟꠦ ꠇꠄ, ꠍꠥꠛꠢꠣꠘ ꠀꠟ꠆ꠟꠣ!
PSA 29:10 ꠝꠢꠣ ꠛꠁꠘ꠆ꠘꠣꠞ ꠙꠣꠘꠤ ꠀꠍꠤꠟ ꠝꠣꠛꠥꠖꠞ ꠎꠤꠝ꠆ꠝꠣꠄ, ꠌꠤꠞꠇꠣꠟꠤꠘ ꠛꠣꠖꠡꠣ ꠔꠣꠁꠘ, ꠛꠁꠍꠂꠘ ꠀꠞꠡ ꠈꠣꠘꠣꠄ।
PSA 29:11 ꠛꠟ-ꠡꠇ꠆ꠔꠤ ꠖꠦꠁꠘ ꠝꠣꠛꠥꠖ ꠔꠣꠘ ꠀꠙꠘ ꠙ꠆ꠞꠎꠣꠞꠦ, ꠡꠣꠘ꠆ꠔꠤ ꠖꠤꠀ ꠞꠢꠝ ꠇꠞꠂꠘ ꠔꠣꠞꠣ ꠢꠇꠟꠞꠦ॥
PSA 30:1 ꠀꠟ꠆ꠟꠣꠞ ꠊꠞꠞ ꠁꠀꠘ ꠖꠤꠛꠣꠞ ꠇꠣꠟꠅ ꠢꠎꠞꠔ ꠖꠣꠃꠖꠞ ꠝꠤꠎꠝꠞ। ꠔꠥꠝꠣꠞ ꠔꠣꠞꠤꠚ ꠇꠞꠝꠥ ꠝꠣꠛꠥꠖ ꠔꠥꠟꠤꠀ ꠀꠘꠍ ꠝꠞꠦ, ꠖꠥꠡꠝꠘꠞꠦ ꠖꠤꠍ ꠘꠣ ꠡꠥꠎꠥꠉ ꠚꠥꠞ꠆ꠔꠤ ꠇꠞꠔ ꠝꠞ ꠃꠙꠞꠦ।
PSA 30:2 ꠅꠉ ꠝꠣꠛꠥꠖ ꠀꠟ꠆ꠟꠣ ꠎꠥꠞꠦ ꠎꠥꠞꠦ ꠚꠣꠘꠣ ꠌꠣꠁꠍꠤ ꠔꠥꠝꠣꠞ ꠖꠞꠛꠣꠞꠦ, ꠚꠞꠤꠀꠖ ꠢꠥꠘꠤꠀ ꠔꠥꠝꠤꠃ ꠛꠦꠝꠣꠞ ꠕꠣꠇꠤ ꠡꠤꠚꠣ ꠇꠞꠍ ꠀꠝꠣꠞꠦ।
PSA 30:3 ꠙꠣꠔꠣꠟ ꠕꠣꠇꠤꠀ ꠝꠣꠛꠥꠖ ꠔꠥꠟꠤꠀ ꠀꠘꠍ ꠝꠞꠦ, ꠢꠣꠝꠣꠁ ꠉꠦꠍꠟꠣꠝ ꠉꠁꠘ ꠉꠣꠔꠅ ꠛꠣꠌꠣꠁꠍ ꠀꠝꠣꠞꠦ।
PSA 30:4 ꠝꠣꠛꠥꠖꠞ ꠀꠡꠤꠇ ꠛꠘ꠆ꠖꠣꠄ ꠉꠣꠅ ꠔꠣꠘ ꠉꠥꠘꠉꠣꠘ, ꠙꠣꠇ-ꠙꠛꠤꠔ꠆ꠞ ꠎꠣꠘꠤꠀ ꠔꠣꠘꠦ ꠡꠥꠇꠥꠞ-ꠉꠥꠎꠣꠞ ꠇꠞꠅ ꠔꠣꠘ।
PSA 30:5 ꠔꠣꠘ ꠉꠥꠍꠣ ꠞꠄ ꠘꠣ ꠔ ꠛꠦꠡꠤ ꠡꠝꠄ, ꠢꠣꠞꠣ ꠎꠤꠛꠘꠃ ꠔꠣꠘ ꠖꠄꠀ-ꠞꠢꠝ ꠞꠄ, ꠞꠣꠁꠔꠞ ꠛꠣꠟꠣ ꠎꠣꠄ ꠈꠣꠟꠤ ꠇꠣꠘ꠆ꠖꠣ-ꠇꠣꠐꠤ ꠇꠞꠤ, ꠛꠤꠀꠘ ꠅꠁꠔꠦꠃ ꠀꠄ ꠈꠥꠡꠤ ꠀꠞ ꠚꠥꠞ꠆ꠔꠤ।
PSA 30:6 ꠡꠥꠖꠤꠘꠞ ꠇꠣꠟꠅ ꠇꠁꠍꠟꠣꠝ ꠔ ꠀꠝꠤꠃ, ꠀꠝꠣꠞ ꠛꠤꠘꠣꠡ ꠅꠁꠔ ꠘꠣꠄ ꠇꠥꠘꠥ ꠖꠤꠘꠃ।
PSA 30:7 ꠔꠥꠝꠣꠞ ꠞꠢꠝꠔꠦ ꠝꠣꠛꠥꠖ ꠙꠣꠠꠞ ꠟꠣꠈꠣꠘ ꠝꠎꠛꠥꠔ ꠇꠞꠍꠦ ꠝꠞꠦ, ꠎꠦꠛꠟꠣ ꠔꠥꠝꠣꠞ ꠝꠥꠈ ꠟꠥꠇꠣꠁꠟꠣꠄ ꠒꠞ ꠢꠣꠝꠣꠁꠍꠦ ꠝꠞ ꠜꠤꠔꠞꠦ।
PSA 30:8 ꠎꠥꠞꠦ ꠎꠥꠞꠦ ꠒꠣꠇꠍꠤ ꠉ ꠝꠣꠛꠥꠖ ꠀꠝꠤ ꠔꠥꠝꠣꠞꠦ, ꠖꠄꠀ ꠝꠣꠋꠉꠤꠍꠤ ꠀꠝꠤ ꠀꠝꠣꠞ ꠀꠟ꠆ꠟꠣꠞ ꠖꠞꠛꠣꠞꠦ।
PSA 30:9 ꠀꠝꠤ ꠎꠥꠖꠤ ꠢꠣꠝꠣꠁ ꠎꠣꠁ ꠉꠁꠘ ꠞꠡꠣꠔꠟꠦ, ꠟꠣꠜ ꠇꠤꠔꠣ ꠅꠁꠛ ꠔꠥꠝꠣꠞ ꠀꠝꠤ ꠝꠞꠤ ꠉꠦꠟꠦ? ꠝꠥꠞ꠆ꠖꠣꠞ ꠇꠣꠄꠀꠞ ꠗꠥꠁꠟ-ꠛꠣꠟꠥꠄ ꠇꠞꠛ ꠘꠤ ꠔꠥꠝꠣꠞ ꠉꠥꠘꠉꠣꠘ, ꠉꠣꠁꠛ ꠘꠤ ꠁꠔꠣꠄ ꠔꠥꠝꠣꠞ ꠢꠇ-ꠢꠣꠟꠣꠟꠤꠞ ꠛꠄꠀꠘ?
PSA 30:10 ꠢꠥꠘꠤꠀ ꠝꠞ ꠚꠞꠤꠀꠖ ꠝꠣꠛꠥꠖ ꠞꠢꠝ ꠇꠞꠅ ꠝꠞꠦ, ꠡꠣꠁꠎ꠆ꠎ ꠇꠞꠅ ꠅꠉ ꠝꠣꠛꠥꠖ ꠔꠥꠝꠤ ꠀꠝꠣꠞꠦ।
PSA 30:11 ꠖꠥꠈ-ꠇꠡ꠆ꠐꠞ ꠢꠣꠟꠔ ꠕꠣꠇꠤ ꠅꠈꠘ ꠀꠝꠣꠞꠦ ꠔꠥꠟꠤꠀ ꠀꠘꠍ ꠔꠥꠝꠤꠃ ꠝꠞꠦ ꠈꠥꠡꠤꠞ ꠝꠣꠢꠚꠤꠟꠦ, ꠍꠟꠣꠞ ꠌꠐꠞ ꠟꠦꠛꠣꠍ ꠝꠞ ꠔꠥꠝꠤ ꠛꠖꠟꠣꠁꠍ, ꠈꠥꠡꠤ-ꠛꠣꠡꠤꠞ ꠡꠥꠘ꠆ꠖꠞ ꠟꠦꠛꠣꠍ ꠝꠞꠦ ꠚꠤꠘ꠆ꠖꠣꠁꠍ।
PSA 30:12 ꠀꠝꠣꠞ ꠖꠤꠟꠦ ꠢꠞ-ꠢꠣꠝꠦꠡꠣ ꠉꠥꠘꠉꠣꠘ ꠉꠣꠁꠛ ꠔꠥꠝꠣꠞ, ꠡꠥꠇꠞꠤꠀ ꠎꠣꠘꠣꠁꠝꠥ ꠌꠤꠞꠇꠣꠟ ꠀꠟ꠆ꠟꠣ ꠝꠣꠛꠥꠖ ꠀꠝꠣꠞ॥
PSA 31:1 ꠄꠛꠣꠖꠔ-ꠛꠘ꠆ꠖꠦꠉꠤ ꠙꠞꠤꠌꠣꠟꠇꠞ ꠟꠣꠉꠤ: ꠢꠎꠞꠔ ꠖꠣꠃꠖꠞ ꠝꠤꠎꠝꠞ। ꠀꠡꠞꠄ ꠟꠁꠍꠤ ꠉ ꠝꠣꠛꠥꠖ ꠔꠥꠝꠣꠞ ꠍꠣꠄꠀꠄ, ꠝꠞꠦ ꠎꠣꠘꠥ ꠘꠣ ꠙꠣꠄ ꠇꠥꠘꠥꠖꠤꠘ ꠡꠞꠝ-ꠟꠎ꠆ꠎꠣꠄ, ꠔꠥꠝꠣꠞ ꠢꠇ ꠛꠤꠌꠣꠞꠦ ꠞꠦꠢꠣꠁ ꠖꠦꠅ ꠀꠝꠣꠄ।
PSA 31:2 ꠀꠝꠣꠞ ꠝꠤꠘꠔꠤ ꠢꠥꠘꠤꠀ ꠎꠟꠖꠤ ꠛꠣꠌꠣꠅ ꠝꠞꠦ, ꠙꠣꠠꠞ ꠡꠥꠠꠋ ꠅꠁꠀ ꠔꠥꠝꠤ ꠛꠣꠌꠣꠅ ꠀꠝꠣꠞ ꠎꠣꠘꠞꠦ, ꠀꠡꠞꠄ ꠛꠣꠋꠇꠣꠞ ꠅꠅ ꠉ ꠔꠥꠝꠤ ꠘꠤꠞꠣꠙꠖꠦ ꠞꠣꠈꠅ ꠝꠞꠦ।
PSA 31:3 ꠔꠥꠝꠤ ꠀꠝꠣꠞ ꠀꠡꠞꠄ-ꠡꠥꠠꠋ, ꠝꠎꠛꠥꠔ ꠛꠣꠋꠇꠣꠞ, ꠙꠕ ꠖꠦꠈꠣꠁꠀ ꠌꠣꠟꠣꠅ ꠝꠞꠦ ꠖꠥꠀꠁ ꠟꠣꠉꠦ ꠔꠥꠝꠣꠞ।
PSA 31:4 ꠟꠥꠇꠣꠁꠀ ꠙꠣꠔꠣꠁꠟ ꠚꠣꠘ꠆ꠖꠅ ꠕꠣꠇꠤ ꠝꠞꠦ ꠇꠞꠅ ꠃꠖ꠆ꠖꠣꠞ, ꠔꠥꠝꠤꠃ ꠈꠣꠟꠤ ꠀꠝꠣꠞ ꠀꠡꠞꠄ, ꠀꠝꠣꠞ ꠛꠣꠋꠇꠣꠞ।
PSA 31:5 ꠀꠝꠣꠞ ꠞꠥꠢꠥ ꠔꠥꠝꠣꠞ ꠀꠔꠅ ꠡꠙꠤꠀ ꠖꠤꠟꠣꠁꠟꠣꠝ, ꠅ ꠝꠣꠛꠥꠖ, ꠢꠇ ꠀꠟ꠆ꠟꠣ, ꠛꠣꠌꠣꠁꠍ ꠔ ꠀꠝꠣꠞ ꠎꠣꠘ।
PSA 31:6 ꠅꠡꠣꠠ ꠝꠥꠞ꠆ꠔꠤꠞ ꠙꠥꠎꠣꠞꠤꠞꠦ ꠊꠤꠘ꠆ꠘꠣꠁ ꠀꠝꠤ, ꠝꠣꠛꠥꠖꠞ ꠃꠙꠞꠦꠃ ꠀꠝꠤ ꠜꠞꠡꠣ ꠇꠞꠤ ꠈꠣꠟꠤ।
PSA 31:7 ꠀꠝꠣꠞ ꠎꠣꠘꠞ ꠡꠛ ꠝꠍꠤꠛꠔ ꠛꠦꠢꠣꠟ ꠖꠡꠣ ꠖꠦꠈꠍ ꠔꠥꠝꠤ, ꠔꠥꠝꠣꠞ ꠖꠄꠀ-ꠝꠣꠄꠀ ꠙꠣꠁꠀ ꠈꠥꠡꠤ-ꠚꠥꠞ꠆ꠔꠤ ꠇꠞꠝꠥ ꠀꠝꠤ।
PSA 31:8 ꠖꠥꠡꠝꠘꠞ ꠀꠔꠅ ꠔꠥꠝꠤ ꠖꠤꠍ ꠘꠣ ꠝꠞꠦ ꠔꠥꠟꠤꠀ, ꠈꠥꠟꠣ-ꠝꠦꠟꠣ ꠝꠣꠑꠅ ꠝꠞꠦ ꠞꠣꠈꠍ ꠃꠛꠣ ꠇꠞꠣꠁꠀ।
PSA 31:9 ꠖꠄꠀ ꠇꠞꠅ ꠅꠉ ꠝꠣꠛꠥꠖ ꠝꠍꠤꠛꠔꠅ ꠀꠍꠤ, ꠌꠃꠈ ꠀꠞ ꠖꠦꠢ-ꠇꠣꠄꠀꠄ ꠇꠥꠘꠥꠝꠘ꠆ꠔꠦ ꠎꠤꠔꠣ ꠞꠁꠍꠤ।
PSA 31:10 ꠎꠤꠘ꠆ꠖꠦꠉꠤ ꠝꠞ ꠇ꠆ꠇꠄ ꠅꠁꠟ ꠖꠥꠈ-ꠇꠡ꠆ꠐꠄ ꠇꠣꠘ꠆ꠖꠤ ꠇꠣꠘ꠆ꠖꠤ, ꠉꠥꠘꠣꠞ ꠖꠣꠄ ꠛꠟ ꠇꠝꠤꠀ ꠢꠥꠇꠣꠁ ꠉꠦꠍꠦ ꠝꠞ ꠀꠒ꠆ꠒꠤ।
PSA 31:11 ꠖꠥꠡꠝꠘ ꠅꠇꠟꠦ ꠝꠞꠦ ꠊꠤꠘ꠆ꠘꠣꠄ, ꠀꠝꠣꠞ ꠀꠞꠤ-ꠚꠞꠤꠄꠅ ꠘꠤꠘ꠆ꠖꠣꠄ, ꠌꠤꠘꠣ-ꠎꠣꠘꠣ ꠎꠘꠦ ꠖꠦꠈꠟꠦ ꠒꠞꠣꠁꠀ ꠢꠞꠦ, ꠖꠃꠠꠣꠁꠀ ꠜꠣꠉꠦ ꠝꠣꠘꠡꠦ ꠙꠕꠦ-ꠊꠣꠐꠦ ꠖꠦꠈꠟꠦ ꠝꠞꠦ।
PSA 31:12 ꠝꠥꠞ꠆ꠖꠣ ꠎꠘꠞ ꠟꠣꠈꠣꠘ ꠔ ꠚꠣꠃꠞꠤꠟꠤꠍꠦ ꠝꠞꠦ, ꠜꠣꠋꠉꠣ-ꠘꠡ꠆ꠐ ꠝꠣꠟꠞ ꠟꠣꠈꠣꠘ ꠝꠘꠅ ꠇꠞꠦ ꠀꠝꠣꠞꠦ।
PSA 31:13 ꠛꠃꠔꠞ ꠇꠣꠘꠣ-ꠇꠣꠘꠤ ꠀꠝꠤ ꠢꠥꠘꠤꠀꠞ, ꠒꠞ-ꠈꠚꠦ ꠜꠞꠣ ꠌꠣꠁꠞꠅꠛꠣꠄ ꠀꠝꠣꠞ, ꠀꠝꠣꠞ ꠛꠤꠞꠥꠖ꠆ꠖꠦ ꠔꠣꠞꠣ ꠢꠇꠟ ꠄꠇꠈꠣꠘꠅ ꠅꠁꠍꠦ, ꠎꠣꠘ ꠇꠣꠠꠤꠀ ꠘꠤꠔꠉꠤ ꠇꠞꠤ ꠚꠘ꠆ꠖꠤ ꠇꠞꠤꠍꠦ।
PSA 31:14 ꠀꠝꠤ ꠔ ꠜꠞꠡꠣ ꠇꠞꠍꠤ ꠝꠣꠛꠥꠖ ꠔꠥꠝꠣꠞ ꠃꠙꠞꠦ, ꠔꠥꠝꠤꠃ ꠀꠝꠣꠞ ꠝꠣꠛꠥꠖ ꠀꠟ꠆ꠟꠣ ꠎꠣꠘꠣꠁ ꠢꠇꠟꠞꠦ।
PSA 31:15 ꠀꠝꠣꠞ ꠢꠣꠄꠀꠔꠤ ꠔ ꠔꠥꠝꠣꠞꠃ ꠀꠔꠅ, ꠈꠦꠖꠣꠅꠞꠣ ꠖꠥꠡꠝꠘ ꠕꠣꠇꠤ ꠢꠦꠚꠣꠎꠔ ꠇꠞꠅ।
PSA 31:16 ꠔꠥꠝꠣꠞ ꠘꠥꠞꠞ ꠖꠤꠖꠣꠞ ꠖꠦꠈꠣꠅ ꠀꠝꠤ ꠉꠥꠟꠣꠝꠞꠦ, ꠔꠥꠝꠣꠞ ꠀꠙꠘ ꠖꠄꠀ-ꠝꠣꠄꠀꠄ ꠛꠣꠌꠣꠅ ꠀꠝꠣꠞꠦ।
PSA 31:17 ꠡꠞꠝ ꠖꠤꠅ ꠘꠣ ꠝꠞꠦ ꠝꠣꠛꠥꠖ ꠎꠣꠘꠣꠁ ꠝꠤꠘꠔꠤ, ꠘꠣꠚꠞꠝꠣꠘꠦ ꠡꠞꠝ ꠙꠣꠁꠀ ꠞꠡꠣꠔꠟꠦ ꠎꠣꠃꠇꠉꠤ।
PSA 31:18 ꠖꠥꠁꠅ ꠑꠥꠐ ꠛꠘ꠆ꠖ ꠅꠁꠎꠣꠃꠇ ꠛꠦꠁꠝꠣꠘꠤ ꠎꠦ ꠝꠣꠔꠦ, ꠛꠠꠣꠁ-ꠉꠞꠤꠝꠣ ꠖꠦꠈꠣꠄ ꠎꠣꠞꠣ ꠙꠞꠦꠎꠉꠣꠞꠞ ꠟꠉꠦ।
PSA 31:19 ꠔꠥꠝꠣꠞ ꠀꠡꠤꠇ ꠛꠘ꠆ꠖꠣꠞ ꠟꠣꠉꠤ ꠎꠝꠣ ꠀꠍꠦ ꠇꠔ ꠖꠄꠀ, ꠀꠡꠞꠄ ꠟꠁꠍꠦ ꠎꠣꠞꠣ ꠔꠥꠝꠣꠞ ꠍꠣꠄꠀꠔ ꠀꠁꠀ, ꠢꠇꠟꠞ ꠍꠣꠝꠘꠦ ꠔꠣꠞꠣꠞꠦ ꠖꠦꠈꠣꠁꠍ ꠔꠥꠝꠣꠞ ꠅꠔ ꠝꠣꠄꠀ।
PSA 31:20 ꠔꠣꠞꠣꠞꠦ ꠟꠥꠇꠣꠁꠀ ꠞꠣꠈꠅ ꠔꠥꠝꠣꠞꠃ ꠙꠣꠇ ꠖꠤꠖꠣꠞꠅ, ꠖꠥꠡꠝꠘꠞ ꠎꠤꠚꠞꠣꠞ ꠖꠣꠙꠐ ꠕꠣꠇꠤ ꠞꠣꠈꠅ ꠔꠥꠝꠣꠞ ꠛꠡꠔ ꠊꠞꠅ।
PSA 31:21 ꠝꠣꠛꠥꠖꠃ ꠝꠥꠛꠣꠞꠇ, ꠖꠥꠡꠝꠘꠞ ꠊꠦꠞꠣꠅ ꠇꠞꠣ ꠘꠉꠞꠅ, ꠀꠌꠣꠘꠇ ꠖꠄꠀ-ꠝꠣꠄꠀꠄ ꠞꠣꠈꠍꠂꠘ ꠝꠞꠦ ꠘꠤꠞꠣꠙꠖꠅ।
PSA 31:22 ꠒꠞꠞ ꠌꠥꠐꠦ ꠇꠁꠍꠟꠣꠝ ꠔ ꠀꠝꠤ, “ꠢꠞꠤ ꠉꠦꠍꠤ ꠖꠥꠞꠁ ꠔꠥꠝꠣꠞ ꠘꠎꠞ ꠕꠣꠇꠤ,” ꠀꠝꠤ ꠎꠦꠛꠟꠣ ꠒꠣꠇꠤꠍꠟꠣꠝ ꠡꠣꠁꠎ꠆ꠎꠞ ꠟꠣꠉꠤ, ꠒꠣꠇꠞ ꠎꠥꠀꠙ ꠖꠤꠟꠣꠄ ꠔꠥꠝꠤ ꠢꠥꠘꠟꠣꠄ ꠝꠤꠘꠔꠤ।
PSA 31:23 ꠝꠣꠛꠥꠖꠞ ꠀꠡꠤꠇ ꠛꠘꠅ ꠅꠞꠦ ꠙꠞꠦꠎꠉꠣꠞ ꠢꠇꠟ ꠛꠘ꠆ꠖꠣ, ꠢꠇ ꠝꠣꠘꠡꠞꠦ ꠛꠣꠌꠣꠁꠀ ꠔꠣꠁꠘ ꠅꠢꠋꠇꠣꠞꠤꠞꠦ ꠖꠦꠁꠘ ꠇꠑꠤꠘ ꠡꠣꠎꠣ।
PSA 31:24 ꠛꠥꠇꠥꠔ ꠡꠣꠅꠡ ꠞꠣꠈꠅ ꠖꠤꠟꠅ ꠎꠥꠉꠣꠅ ꠛꠟ, ꠀꠍ ꠎꠔ ꠝꠣꠛꠥꠖꠞ ꠀꠡꠤꠇ ꠛꠘ꠆ꠖꠣ ꠅꠇꠟ॥
PSA 32:1 ꠢꠎꠞꠔ ꠖꠣꠃꠖꠞ ꠝꠣꠡ꠆ꠇꠤꠟ-ꠇꠣꠅꠀꠟꠤ। ꠘꠦꠇ-ꠇꠙꠣꠟꠤ ꠇꠄ ꠔꠣꠞꠣꠞꠦ, ꠝꠣꠚ ꠇꠞꠣ ꠅꠁꠍꠦ ꠎꠣꠞꠣꠞ ꠘꠣꠚꠞꠝꠣꠘꠤꠞꠦ, ꠝꠣꠛꠥꠖ ꠝꠃꠟꠣꠄ ꠎꠦꠞꠣꠞ ꠉꠥꠘꠣꠞꠦ ꠀꠝꠟ-ꠘꠣꠝꠣꠞ ꠢꠤꠡꠣꠛꠅ ꠗꠞꠔꠣ ꠘꠣꠄꠞꠦ।
PSA 32:2 ꠢꠃ ꠎꠘꠅ ꠘꠦꠇ-ꠇꠙꠣꠟꠤ, ꠀꠟ꠆ꠟꠣꠄ ꠎꠣꠞ ꠉꠥꠘꠣꠞꠦ ꠇꠣꠐꠤ ꠖꠤꠍꠂꠘ ꠈꠣꠔꠣ ꠕꠣꠇꠤ, ꠎꠣꠞ ꠝꠣꠎꠦ ꠘꠣꠁ ꠇꠥꠘꠥ ꠗꠥꠇꠣꠛꠣꠎꠤ।
PSA 32:3 ꠔꠃꠛꠣ ꠇꠞꠍꠟꠣꠝ ꠘꠣ ꠎꠦꠛꠟꠣ ꠀꠝꠣꠞ ꠉꠥꠘꠣꠞ ꠟꠣꠉꠤ, ꠢꠣꠞꠣ ꠖꠤꠘ ꠇꠥꠇꠣꠁ ꠇꠥꠇꠣꠁ ꠇ꠆ꠇꠄ ꠅꠁꠍꠤꠟ ꠝꠞ ꠀꠒ꠆ꠒꠤ-ꠉꠥꠒ꠆ꠒꠤ।
PSA 32:4 ꠔꠥꠝꠣꠞ ꠀꠔꠦ ꠎꠣꠔꠤꠀ ꠗꠞꠍꠤꠟ ꠖꠤꠘ-ꠞꠣꠁꠔ ꠀꠝꠣꠞꠦ, ꠇꠝꠤ ꠉꠦꠍꠤꠟ ꠝꠞ ꠇꠣꠄꠀꠞ ꠡꠇ꠆ꠔꠤ ꠌꠂꠔ-ꠝꠣꠁꠀ ꠉꠞꠝꠦ। (ꠍꠦꠟꠣ)
PSA 32:5 ꠀꠝꠤ ꠎꠦꠛꠟꠣ ꠔꠃꠛꠣ ꠇꠞꠟꠣꠝ ꠔꠥꠝꠣꠞ ꠖꠞꠛꠣꠞꠦ, ꠅꠙꠞꠣꠗ ꠡ꠆ꠛꠤꠇꠣꠞ ꠇꠞꠟꠣꠝ ꠟꠥꠇꠣꠁꠟꠣꠝ ꠘꠣ ꠇꠥꠘꠥꠔꠣꠞꠦ, ꠇꠁꠟꠣꠝ ꠀꠝꠤ ꠎꠦꠛꠟꠣ ꠡ꠆ꠛꠤꠇꠣꠞ ꠇꠞꠝꠥ ꠅꠙꠞꠣꠗꠞꠦ, ꠟꠉꠦ ꠟꠉꠦꠃ ꠝꠣꠚꠤ ꠖꠤꠟꠣꠄ ꠔꠥꠝꠤ ꠀꠝꠣꠞ ꠡꠛ ꠡꠣꠎꠣꠞꠦ। (ꠍꠦꠟꠣ)
PSA 32:6 ꠔꠦ ꠝꠍꠤꠛꠔꠞ ꠇꠣꠟꠅ ꠙꠞꠔꠦꠇ ꠙꠞꠦꠎꠉꠣꠞꠦ ꠖꠥꠀ ꠇꠞꠃꠇ ꠔꠥꠝꠣꠞꠃ ꠖꠞꠛꠣꠞꠦ, ꠝꠢꠣ ꠛꠁꠘ꠆ꠘꠣ ꠅꠁꠟꠦꠅ ꠙꠣꠁꠔ ꠘꠣꠄ ꠔ ꠔꠣꠞꠣꠞꠦ।
PSA 32:7 ꠝꠞ ꠟꠥꠇꠣꠘꠤꠞ ꠛꠣꠋꠇꠣꠞ ꠔꠥꠝꠤ ꠛꠣꠌꠣꠁꠍ ꠝꠞꠦ ꠝꠍꠤꠛꠔ ꠕꠣꠇꠤ, ꠀꠝꠤ ꠃꠖ꠆ꠖꠣꠞ ꠙꠣꠅꠀꠄ ꠛꠦꠞꠤꠀ ꠞꠣꠈꠍ ꠔꠥꠝꠤ ꠝꠞ ꠌꠣꠁꠞꠅꠛꠣꠄ ꠈꠥꠡꠤꠞ ꠇꠣꠅꠀꠟꠤ। (ꠍꠦꠟꠣ)
PSA 32:8 ꠀꠝꠤ ꠀꠟ꠆ꠟꠣꠄ ꠔꠣꠟꠤꠝ ꠖꠤꠝꠥ, ꠔꠥꠝꠣꠞꠦ ꠌꠟꠣꠞ ꠙꠕ ꠖꠦꠈꠣꠁꠝꠥ, ꠀꠝꠤ ꠔ ꠌꠃꠈꠖꠤ ꠘꠎꠞ ꠞꠣꠈꠝꠥ, ꠀꠈꠟ-ꠛꠥꠖ꠆ꠖꠤ ꠔꠥꠝꠣꠞꠦ ꠖꠤꠝꠥ,
PSA 32:9 ꠉꠣꠗꠣ ꠇꠤꠛꠣ ꠊꠥꠠꠣꠞ ꠟꠣꠈꠣꠘ ꠅꠛꠥꠎ ꠅꠁꠅ ꠘꠣ, ꠁꠔꠣꠞꠦ ꠡꠣꠝꠟꠣꠁꠔꠦ ꠅꠄ ꠖꠠꠤ-ꠟꠣꠉꠣꠝ ꠖꠤꠀ, ꠘꠣ ꠖꠤꠟꠦ ꠝꠣꠘꠔ ꠘꠣꠄ ꠁꠔꠣ ꠔꠥꠝꠣꠞ ꠇꠥꠘꠥ ꠇꠕꠣ।
PSA 32:10 ꠘꠣꠚꠞꠝꠣꠘꠞ ꠟꠣꠉꠤ ꠛꠃꠔ ꠎꠣꠟꠣ-ꠎꠘꠔ꠆ꠞꠘꠣ ꠀꠍꠦ, ꠝꠣꠛꠥꠖꠞ ꠃꠙꠞꠦ ꠜꠞꠡꠣ ꠇꠞꠟꠦ ꠖꠄꠀ-ꠝꠣꠄꠀꠄ ꠛꠦꠞꠤꠀ ꠞꠣꠈꠦ।
PSA 32:11 ꠝꠣꠛꠥꠖꠞ ꠘꠣꠝꠦ ꠀꠘꠘ꠆ꠖ-ꠃꠟ꠆ꠟꠣꠡ ꠇꠞꠅ ꠡꠛ ꠙꠞꠦꠎꠉꠣꠞ, ꠎꠥꠞ ꠉꠟꠣꠄ ꠉꠣꠅ ꠉꠎꠟ-ꠉꠤꠔ ꠘꠤꠈꠥꠔ ꠖꠤꠟ ꠎꠣꠞ॥
PSA 33:1 ꠝꠣꠛꠥꠖꠞ ꠘꠣꠝꠦ ꠉꠎꠟ ꠉꠣꠅ ꠅꠞꠦ ꠖꠤꠘꠖꠣꠞ ꠛꠘ꠆ꠖꠣ, ꠘꠤꠈꠥꠔ ꠝꠥꠝꠤꠘꠞ ꠇꠣꠝ ꠅꠁꠟꠉꠤ ꠡꠥꠇꠥꠞ-ꠉꠥꠎꠣꠞ ꠇꠞꠣ।
PSA 33:2 ꠖꠥꠔꠣꠞꠣꠞ ꠔꠣꠟꠦ ꠔꠣꠟꠦ ꠡꠥꠇꠞꠤꠀ ꠎꠣꠘꠣꠅ ꠔꠣꠘ, ꠖꠡ ꠔꠣꠞꠞ ꠛꠤꠘꠣ ꠛꠣꠎꠣꠁꠀ ꠇꠞꠅ ꠔꠣꠘ ꠉꠥꠘꠉꠣꠘ।
PSA 33:3 ꠝꠣꠛꠥꠖꠞ ꠘꠣꠝꠦ ꠘꠄꠀ ꠘꠄꠀ ꠉꠤꠔ ꠛꠠ ꠉꠟꠣꠄ ꠉꠣꠅ, ꠘꠤꠈꠥꠔ ꠀꠔꠦ ꠔꠣꠘ ꠘꠤꠅꠔꠦ ꠛꠣꠎꠘꠣ ꠛꠣꠎꠣꠅ।
PSA 33:4 ꠝꠣꠛꠥꠖꠞ ꠇꠣꠟꠣꠝ ꠔ ꠢꠇ ꠌꠤꠞꠇꠣꠟ, ꠔꠣꠘ ꠢꠇꠟ ꠇꠣꠝ ꠢꠣꠝꠦꠡꠣ ꠢꠇ-ꠢꠣꠟꠣꠟ।
PSA 33:5 ꠙꠞꠦꠎꠉꠣꠞꠤ ꠀꠞ ꠢꠇ-ꠁꠘꠍꠣꠚ ꠝꠣꠛꠥꠖꠦ ꠙꠣꠁꠘ ꠜꠣꠟꠣ, ꠀꠡ꠆ꠔꠣ ꠎꠉꠔ ꠜꠞꠣ ꠀꠍꠦ ꠔꠣꠘ ꠖꠄꠀ-ꠝꠣꠄꠀ।
PSA 33:6 ꠀꠍꠝꠣꠘ ꠔꠤꠀꠞ ꠅꠁꠍꠦ ꠝꠣꠛꠥꠖꠞ ꠅꠃ ꠇꠣꠟꠣꠝꠦ, ꠄꠞ ꠝꠣꠎꠞ ꠡꠛꠔꠣꠃ ꠅꠁꠍꠦ ꠔꠣꠘ ꠝꠥꠈꠞ ꠚꠥꠄ।
PSA 33:7 ꠖꠞꠤꠀꠞ ꠢꠇꠟ ꠙꠣꠘꠤꠞꠦ ꠇꠟꠡꠤꠔ ꠞꠣꠈꠂꠘ ꠔꠣꠁꠘ, ꠙꠣꠔꠣꠟꠞ ꠙꠣꠘꠤꠞꠦꠅ ꠔꠣꠁꠘ ꠜꠣꠘ꠆ꠒꠣꠞꠅ ꠎꠝꠣꠁꠘ।
PSA 33:8 ꠀꠡ꠆ꠔꠣ ꠖꠥꠘꠤꠀꠄ ꠝꠣꠛꠥꠖꠞꠦ ꠒꠞꠣꠃꠇ, ꠖꠥꠘꠤꠀꠞ ꠛꠣꠡꠤꠘ꠆ꠖꠣ ꠅꠇꠟ ꠔꠣꠘ ꠒꠞꠦ ꠇꠣꠙꠃꠇ,
PSA 33:9 ꠔꠣꠘ ꠇꠕꠣꠄ ꠔ ꠢꠇ꠆ꠇꠟꠔꠣꠞ ꠅꠁꠍꠦ ꠙꠄꠖꠣ, ꠔꠣꠘ ꠢꠥꠇꠥꠝꠞ ꠟꠉꠦ ꠟꠉꠦ ꠛꠅꠀꠁꠟ ꠅꠁꠍꠦ ꠢꠇꠟꠔꠣ।
PSA 33:10 ꠎꠣꠔꠤ ꠅꠇꠟꠞ ꠙꠞꠤꠇꠟ꠆ꠙꠘꠣ ꠝꠣꠛꠥꠖꠦ ꠇꠞꠂꠘ ꠛꠦꠇꠣꠝꠣ, ꠛꠤꠘꠣꠡ ꠇꠞꠂꠘ ꠔꠣꠁꠘ ꠔꠣꠞꠣꠞ ꠌꠤꠘ꠆ꠔꠣ-ꠜꠣꠛꠘꠣ।
PSA 33:11 ꠝꠣꠛꠥꠖꠞꠃ ꠙꠞꠤꠇꠟ꠆ꠙꠘꠣ ꠌꠤꠞꠇꠣꠟ ꠐꠤꠇꠤꠀ ꠕꠣꠇꠦ, ꠔꠣꠘ ꠝꠘꠞ ꠌꠤꠘ꠆ꠔꠣ-ꠜꠣꠛꠘꠣ ꠎꠥꠉ ꠎꠥꠉ ꠗꠞꠤ ꠛꠅꠀꠁꠟ ꠕꠣꠇꠦ।
PSA 33:12 ꠡꠥꠈꠤ ꠢꠃ ꠎꠣꠔꠤ, ꠀꠟ꠆ꠟꠣ ꠎꠣꠞ ꠀꠙꠘ ꠝꠣꠛꠥꠖ, ꠔꠣꠁꠘ ꠎꠣꠞꠦ ꠙꠍꠘ꠆ꠖ ꠇꠞꠍꠂꠘ ꠇꠁꠀ ꠀꠙꠘ ꠖꠃꠟꠔ।
PSA 33:13 ꠀꠍꠝꠣꠘ ꠕꠣꠇꠤ ꠝꠣꠛꠥꠖꠦ ꠌꠣꠁꠀ ꠖꠦꠈꠂꠘ, ꠢꠇ꠆ꠇꠟ ꠀꠖꠝ ꠡꠘ꠆ꠔꠣꠘꠞ ꠃꠙꠞꠦ ꠔꠣꠁꠘ ꠌꠃꠈ ꠞꠣꠈꠂꠘ।
PSA 33:14 ꠁ ꠖꠥꠘꠤꠀꠔ ꠎꠦꠁꠘ-ꠔꠣꠁꠘ ꠛꠡꠔ ꠇꠞꠂꠘ, ꠀꠞꠡ ꠕꠣꠇꠤ ꠔꠣꠞꠣꠞ ꠛꠣꠄ ꠈꠤꠀꠟ ꠞꠣꠈꠂꠘ,
PSA 33:15 ꠙꠞꠔꠦꠇ ꠎꠘꠞ ꠖꠤꠟ ꠔ ꠔꠣꠁꠘ ꠉꠠꠤꠍꠂꠘ, ꠎꠦꠉꠤꠄ ꠎꠦꠔꠣ ꠇꠞꠦ ꠁꠔꠣ ꠛꠥꠎꠤꠔꠣ ꠙꠣꠞꠂꠘ।
PSA 33:16 ꠛꠠ ꠍꠤꠙꠣꠁ ꠖꠟ ꠕꠣꠇꠟꠦꠅ ꠞꠣꠎꠣꠞ ꠞꠇ꠆ꠇꠣ ꠘꠣꠁ, ꠝꠢꠣꠡꠇ꠆ꠔꠤ ꠖꠤꠀꠅ ꠇꠥꠘꠥ ꠛꠤꠞ ꠎꠥꠖ꠆ꠖꠣꠄ ꠙꠣꠄ ꠘꠣ ꠞꠦꠢꠣꠁ,
PSA 33:17 ꠎꠄꠅꠞ ꠟꠣꠉꠤ ꠊꠥꠠꠣꠞ ꠃꠙꠞꠦ ꠜꠞꠡꠣ ꠇꠞꠣ ꠛꠦꠇꠣꠝꠣ, ꠊꠥꠠꠣꠞ ꠡꠇ꠆ꠔꠤ ꠎꠔꠃ ꠕꠣꠇꠃꠇ ꠛꠣꠌꠣꠁꠔ ꠙꠣꠞꠦ ꠘꠣ।
PSA 33:18 ꠝꠣꠛꠥꠖꠞꠦ ꠎꠣꠞꠣ ꠒꠞꠣꠄ, ꠕꠣꠇꠦ ꠔꠣꠘ ꠖꠄꠀ-ꠝꠣꠄꠀꠞ ꠀꠡꠣꠄ, ꠔꠣꠁꠘ ꠈꠤꠀꠟ ꠞꠣꠈꠂꠘ ꠔꠣꠞꠣꠞ ꠛꠣꠄ,
PSA 33:19 ꠝꠞꠘ ꠕꠣꠇꠤ ꠔꠣꠞꠣꠞ ꠎꠤꠛꠘ ꠞꠇ꠆ꠇꠣ ꠇꠞꠂꠘ ꠔꠣꠁꠘ, ꠛꠠ ꠛꠠ ꠘꠤꠖꠣꠘ ꠇꠣꠟꠅ ꠔꠣꠞꠣꠞꠦ ꠛꠣꠌꠣꠁꠘ।
PSA 33:20 ꠝꠣꠛꠥꠖꠞ ꠅꠙꠦꠇ꠆ꠇꠣꠔ ꠀꠍꠤ ꠔ ꠀꠝꠞꠣ, ꠔꠣꠁꠘꠃ ꠎꠣꠘ ꠛꠣꠌꠣꠘꠤꠞ ꠝꠣꠟꠤꠇ, ꠀꠝꠞꠣꠞ ꠜꠞꠡꠣ।
PSA 33:21 ꠔꠣꠘꠞꠦ ꠟꠁꠀꠃ ꠀꠝꠞꠣꠞ ꠖꠤꠟꠞ ꠚꠥꠞ꠆ꠔꠤ, ꠔꠣꠘ ꠙꠣꠇ ꠘꠣꠝꠞ ꠃꠙꠞꠦ ꠜꠞꠡꠣ ꠇꠞꠤ।
PSA 33:22 ꠅꠉ ꠝꠣꠛꠥꠖ, ꠔꠥꠝꠣꠞ ꠝꠣꠄꠀ-ꠖꠄꠀ ꠞꠃꠇ ꠀꠝꠞꠣꠞ ꠃꠙꠞꠦ, ꠀꠝꠞꠣꠞ ꠀꠡꠣ-ꠜꠞꠡꠣ ꠔꠥꠝꠣꠞꠃ ꠃꠙꠞꠦ॥
PSA 34:1 ꠢꠎꠞꠔ ꠖꠣꠃꠖꠞ ꠝꠤꠎꠝꠞ, ꠞꠣꠎꠣ ꠀꠛꠤꠝꠣꠟꠤꠇꠞ ꠍꠣꠝꠘꠦ ꠎꠦꠛꠟꠣ ꠙꠣꠉꠟ ꠛꠦꠡ ꠗꠞꠍꠟꠣ ꠀꠞ ꠔꠣꠘꠦ ꠈꠦꠖꠣꠁ ꠖꠤꠟꠣ, ꠔꠣꠁꠘꠅ ꠉꠦꠟꠣꠉꠤ, ꠅꠃ ꠡꠝꠄꠇꠥꠞ ꠝꠤꠎꠝꠞ। ꠢꠞ-ꠢꠣꠝꠦꠡꠣ ꠀꠝꠤ ꠝꠣꠛꠥꠖꠞ ꠔꠣꠞꠤꠚ ꠇꠞꠝꠥ, ꠔꠣꠘ ꠉꠥꠘꠉꠣꠘ ꠢꠣꠝꠦꠡꠣ ꠞꠁꠛ ꠝꠞ ꠝꠥꠈꠅ।
PSA 34:2 ꠀꠝꠣꠞ ꠎꠣꠘꠦ ꠛꠠꠣꠁ ꠇꠞꠦ ꠝꠣꠛꠥꠖꠞꠦ ꠟꠁꠀ, ꠖꠥꠈꠤ ꠎꠘꠦ ꠇꠞꠃꠇ ꠚꠥꠞ꠆ꠔꠤ ꠁꠔꠣ ꠢꠥꠘꠤꠀ।
PSA 34:3 ꠀꠝꠣꠞ ꠟꠉꠦ ꠝꠣꠛꠥꠖꠞ ꠉꠥꠘꠉꠣꠘ ꠇꠞꠅ, ꠀꠅ ꠢꠇ꠆ꠇꠟꠦ ꠄꠇꠟꠉꠦ ꠔꠣꠘ ꠘꠣꠝꠦ ꠔꠣꠞꠤꠚ ꠇꠞꠤ।
PSA 34:4 ꠀꠝꠤ ꠝꠣꠛꠥꠖꠞꠦ ꠒꠣꠇꠤꠍꠤ, ꠔꠣꠁꠘ ꠎꠥꠀꠙ ꠖꠤꠍꠂꠘ, ꠡꠛ ꠒꠞ-ꠈꠚ ꠕꠣꠇꠤ ꠔꠣꠁꠘ ꠀꠝꠣꠞꠦ ꠞꠇ꠆ꠇꠣ ꠇꠞꠍꠂꠘ।
PSA 34:5 ꠔꠣꠘ ꠛꠣꠄ ꠌꠣꠅ, ꠔꠥꠝꠞꠣ ꠘꠥꠞꠣꠘꠤ ꠅꠁꠎꠤꠛꠣꠄ, ꠔꠥꠝꠞꠣꠞ ꠝꠥꠈ ꠡꠞꠝ ꠙꠣꠁꠔ ꠘꠣꠄ।
PSA 34:6 ꠁ ꠇꠣꠋꠉꠣꠟꠞ ꠒꠣꠇ ꠝꠣꠛꠥꠖꠦ ꠢꠥꠘꠍꠂꠘ, ꠡꠛ ꠝꠍꠤꠛꠔ ꠕꠣꠇꠤ ꠔꠣꠁꠘ ꠛꠣꠌꠣꠁꠍꠂꠘ।
PSA 34:7 ꠝꠣꠛꠥꠖꠞ ꠀꠡꠤꠇꠞ ꠌꠣꠁꠞꠅꠛꠣꠄ ꠢꠦꠚꠣꠎꠔ ꠇꠞꠂꠘ ꠔꠣꠘ ꠚꠤꠞꠤꠡ꠆ꠔꠣꠄ, ꠖꠤꠀ ꠄꠞꠣꠞ ꠎꠣꠘ ꠛꠣꠌꠣꠄ।
PSA 34:8 ꠎꠣꠌꠣꠁ ꠇꠞꠤꠀ ꠖꠦꠈꠅ ꠝꠣꠛꠥꠖ ꠇꠔ ꠝꠦꠢꠦꠞꠛꠣꠘ, ꠛꠠ ꠇꠙꠣꠟꠤ ꠢꠃ ꠎꠘ ꠎꠦ ꠀꠡꠞꠄ ꠟꠄ ꠍꠣꠄꠀꠔ ꠔꠣꠘ।
PSA 34:9 ꠅ ꠝꠣꠛꠥꠖꠞ ꠙꠣꠇ ꠛꠘ꠆ꠖꠣ ꠅꠇꠟ, ꠔꠣꠘꠞꠦ ꠒꠞꠣꠅ, ꠔꠣꠞꠣꠞ ꠇꠥꠘꠥꠔꠣꠞ ꠅꠜꠣꠛ ꠘꠣꠁ ꠎꠣꠞꠣ ꠒꠞꠣꠄ।
PSA 34:10 ꠛꠟꠀꠟꠣ ꠡꠤꠋꠢꠞ ꠙꠣꠟ ꠈꠣꠘꠤꠞ ꠅꠜꠣꠛꠦ ꠃꠙꠣꠡ, ꠝꠣꠛꠥꠖꠞ ꠀꠡꠤꠇ ꠅꠇꠟꠞ ꠜꠣꠟꠣꠁꠞ ꠇꠥꠘꠥ ꠅꠜꠣꠛ ꠘꠣꠁ।
PSA 34:11 ꠅꠞꠦ ꠙꠥꠀ-ꠙꠥꠠꠤꠘ ꠀꠅ, ꠀꠝꠣꠞ ꠇꠕꠣ ꠢꠥꠘꠅ, ꠔꠥꠝꠞꠣꠞꠦ ꠝꠣꠛꠥꠖꠞ ꠒꠞ-ꠈꠚꠞ ꠇꠕꠣ ꠢꠤꠇꠣꠁꠝꠥ।
PSA 34:12 ꠎꠤꠘ꠆ꠖꠦꠉꠤꠔ ꠡꠥꠈ ꠌꠣꠄ ꠇꠥꠘ ꠎꠘꠦ, ꠡꠥꠖꠤꠘ ꠖꠦꠈꠣꠞ ꠀꠡꠣ ꠇꠞꠦ ꠇꠦ?
PSA 34:13 ꠔꠦ ꠢꠦ ꠛꠣꠖ ꠇꠕꠣ ꠕꠣꠇꠤ ꠎꠤꠚꠞꠣꠞꠦ ꠡꠣꠝꠟꠣꠃꠇ ꠍꠟ-ꠌꠔꠥꠞꠤ ꠕꠣꠇꠤ ꠑꠥꠐꠞꠦ,
PSA 34:14 ꠛꠣꠖ ꠇꠣꠝ ꠕꠣꠇꠤ ꠚꠤꠞꠤꠀ ꠜꠣꠟꠣ ꠇꠣꠝ ꠇꠞꠃꠇ, ꠡꠣꠘ꠆ꠔꠤꠞ ꠀꠡꠤꠇ ꠅꠁꠀ ꠄꠞ ꠈꠞꠦ ꠈꠞꠦ ꠞꠃꠇ।
PSA 34:15 ꠝꠣꠛꠥꠖꠞ ꠘꠎꠞ ꠔ ꠙꠞꠦꠎꠉꠣꠞꠞ ꠃꠙꠞꠦ, ꠔꠣꠞꠣꠞ ꠖꠥꠀ ꠢꠥꠘꠣꠞ ꠟꠣꠉꠤ ꠔꠣꠘ ꠇꠣꠘ ꠈꠣꠠꠣ ꠕꠣꠇꠦ।
PSA 34:16 ꠛꠣꠖ ꠇꠣꠝ ꠇꠞꠞꠣꠞ ꠃꠙꠞ ꠝꠣꠛꠥꠖꠞ ꠛꠖ ꠘꠎꠞ, ꠖꠥꠘꠤꠀ ꠕꠣꠇꠤ ꠚꠥꠍꠤꠟꠤꠛꠣ ꠘꠣꠝ-ꠘꠤꠡꠣꠘꠣ ꠔꠣꠞꠣꠞ।
PSA 34:17 ꠖꠤꠘꠖꠣꠞꠦ ꠚꠞꠤꠀꠖ ꠇꠞꠟꠦ ꠢꠥꠘꠂꠘ ꠝꠣꠛꠥꠖꠦ, ꠛꠣꠟꠣ-ꠝꠍꠤꠛꠔ ꠕꠣꠇꠤ ꠞꠇ꠆ꠇꠣ ꠇꠞꠂꠘ ꠔꠣꠞꠣꠞꠦ।
PSA 34:18 ꠝꠘ ꠎꠣꠞꠣꠞ ꠜꠣꠋꠉꠤ ꠉꠦꠍꠦ ꠝꠣꠛꠥꠖ ꠞꠂꠘ ꠔꠣꠞꠣꠞ ꠟꠉꠦ ꠟꠉꠦ, ꠖꠤꠟ ꠎꠣꠞꠣꠞ ꠌꠥꠞꠝꠣꠞ ꠅꠁꠍꠦ ꠝꠣꠛꠥꠖꠦꠃ ꠛꠣꠌꠣꠁꠘ ꠔꠣꠞꠣꠞꠦ।
PSA 34:19 ꠢꠇ ꠙꠕꠦ ꠎꠦ ꠌꠟꠦ ꠔꠣꠞ ꠛꠃꠔ ꠝꠍꠤꠛꠔ, ꠁꠔꠣ ꠕꠣꠇꠤ ꠝꠣꠛꠥꠖꠦꠃ ꠔꠣꠞꠦ ꠇꠞꠂꠘ ꠢꠦꠚꠣꠎꠔ।
PSA 34:20 ꠘꠤꠞꠣꠙꠖ ꠞꠣꠈꠂꠘ ꠔꠣꠁꠘ ꠔꠣꠞ ꠡꠛ ꠀꠒ꠆ꠒꠤꠞꠦ, ꠜꠣꠋꠉꠣ ꠅꠁꠔ ꠘꠣꠄ ꠔ ꠁꠔꠣ ꠇꠥꠘꠥꠐꠣꠞꠦ।
PSA 34:21 ꠈꠣꠞꠣꠙ ꠇꠣꠝꠞ ꠖꠣꠄ ꠅꠄ ꠘꠣꠚꠞꠝꠣꠘꠞ ꠝꠞꠘ ꠖꠡꠣ, ꠙꠞꠦꠎꠉꠣꠞꠞꠦ ꠁꠋꠡꠣꠄ ꠎꠣꠞꠣ, ꠡꠣꠎꠣ ꠙꠣꠁꠛ ꠔꠣꠞꠣ।
PSA 34:22 ꠝꠣꠛꠥꠖꠦ ꠃꠖ꠆ꠖꠣꠞ ꠇꠞꠂꠘ ꠔꠣꠘ ꠉꠥꠟꠣꠝ ꠅꠇꠟꠞꠦ, ꠔꠣꠘ ꠀꠡꠞꠄ ꠟꠄ ꠎꠣꠞꠣ, ꠡꠣꠎꠣ ꠖꠦꠁꠘ ꠘꠣ ꠁꠔꠣ ꠇꠦꠃꠞꠞꠦ॥
PSA 35:1 ꠢꠎꠞꠔ ꠖꠣꠃꠖꠞ ꠝꠤꠎꠝꠞ। ꠀꠝꠣꠞ ꠛꠤꠞꠥꠗꠤꠔꠣ ꠇꠞꠦꠞ ꠎꠣꠞꠣ, ꠔꠥꠝꠤ ꠝꠣꠛꠥꠖꠦ ꠇꠞꠅ ꠔꠣꠞꠣꠞ ꠛꠤꠞꠥꠗꠤꠔꠣ, ꠟꠣꠠꠣꠁ ꠇꠞꠦꠞ ꠎꠣꠞꠣ ꠀꠝꠣꠞ ꠟꠉꠦ, ꠔꠥꠝꠤꠅ ꠟꠣꠠꠣꠁ ꠇꠞꠅ ꠔꠣꠞꠣꠞ ꠟꠉꠦ।
PSA 35:2 ꠎꠣꠘ ꠛꠣꠌꠣꠘꠤꠞ ꠀꠔꠤꠀꠞ ꠟꠅ ꠔꠥꠝꠣꠞ ꠀꠔꠅ, ꠀꠝꠣꠞ ꠡꠣꠁꠎ꠆ꠎꠞ ꠟꠣꠉꠤ ꠎꠟꠖꠤ ꠀꠅ ꠉ।
PSA 35:3 ꠀꠝꠣꠞꠦ ꠈꠦꠖꠣꠅꠞꠣꠞ ꠟꠣꠉꠤ ꠀꠔꠅ ꠟꠅ ꠍꠥꠟꠚꠤ-ꠇꠥꠌꠣ, ꠀꠝꠣꠞ ꠎꠣꠘꠞꠦ ꠇꠅ ꠉ, “ꠀꠝꠤꠃ ꠔꠥꠝꠣꠞ ꠛꠣꠌꠣꠘꠦꠀꠟꠣ।”
PSA 35:4 ꠀꠝꠣꠞꠦ ꠈꠥꠘ ꠇꠞꠔ ꠌꠣꠄ ꠎꠣꠞꠣ, ꠛꠦꠁꠎ꠆ꠎꠔ-ꠡꠞꠝꠤꠘ꠆ꠖꠣ ꠅꠃꠇ ꠔꠣꠞꠣ, ꠀꠝꠣꠞ ꠈꠦꠔꠤ ꠇꠞꠔ ꠌꠣꠄ ꠎꠣꠞꠣ, ꠜꠣꠉꠤꠀ ꠎꠣꠃꠇ ꠔꠣꠞꠣ ꠝꠣꠕꠣ ꠘꠥꠀꠁꠀ।
PSA 35:5 ꠗꠣꠘꠞ ꠍꠥꠍꠣꠞꠦ ꠎꠦꠟꠣ ꠔꠥꠚꠣꠘꠦ ꠘꠦꠄ ꠃꠠꠣꠁꠀ, ꠝꠣꠛꠥꠖꠞ ꠚꠤꠞꠤꠡ꠆ꠔꠣꠄ ꠅꠟꠣ ꠔꠣꠞꠣꠞꠦ ꠖꠦꠃꠇ꠆ꠇꠣ ꠈꠦꠖꠣꠁꠀ।
PSA 35:6 ꠔꠣꠞꠣꠞ ꠙꠕ ꠅꠃꠇ ꠀꠘ꠆ꠖꠣꠁꠞ ꠀꠞ ꠙꠤꠍꠟꠣ, ꠈꠦꠖꠣꠁꠀ ꠘꠦꠃꠇ꠆ꠇꠣ ꠔꠣꠞꠣꠞꠦ ꠝꠣꠛꠥꠖꠞ ꠚꠤꠞꠤꠡ꠆ꠔꠣ।
PSA 35:7 ꠝꠞꠦ ꠗꠞꠣꠞ ꠟꠣꠉꠤ ꠔꠣꠞꠣ ꠙꠣꠔꠤꠍꠦ ꠎꠣꠟ ꠟꠥꠇꠣꠁꠀ, ꠀꠝꠣꠞ ꠎꠣꠘ ꠘꠤꠛꠣꠞ ꠟꠣꠉꠤ ꠈꠥꠖꠤꠍꠦ ꠉꠣꠔ ꠈꠣꠝꠈꠣ।
PSA 35:8 ꠀꠈꠔꠣ ꠇꠞꠤ ꠔꠣꠞꠣꠞ ꠃꠙꠞꠦ ꠡꠞ꠆ꠛꠘꠣꠡ ꠟꠣꠝꠃꠇ, ꠔꠣꠞꠣꠞ ꠙꠣꠔꠣꠁꠟ ꠎꠣꠟꠅ ꠔꠣꠞꠣꠃ ꠢꠣꠝꠣꠃꠇ।
PSA 35:9 ꠔꠦꠃꠉꠤ ꠀꠝꠣꠞ ꠖꠤꠟꠦ ꠉꠣꠁꠛ ꠝꠣꠛꠥꠖꠞ ꠈꠥꠡꠤꠞ ꠉꠣꠘ, ꠔꠣꠁꠘ ꠀꠝꠣꠞ ꠎꠣꠘ ꠛꠣꠌꠣꠘꠤꠄ ꠉꠣꠁꠝꠥ ꠔꠣꠘ ꠡꠣꠘ।
PSA 35:10 ꠀꠝꠣꠞ ꠝꠘꠦ-ꠔꠘꠦ ꠇꠃꠇ, “ꠅ ꠀꠟ꠆ꠟꠣ, ꠔꠥꠝꠣꠞ ꠢꠝꠣꠘ ꠀꠞ ꠇꠦ ꠀꠍꠦ ꠎꠉꠔꠦ? ꠛꠟꠛꠣꠘꠞ ꠀꠔ ꠕꠣꠇꠤ ꠃꠖ꠆ꠖꠣꠞ ꠇꠞꠅ ꠘꠤꠞꠣꠡ꠆ꠞꠄꠞꠦ, ꠟꠥꠐꠇꠣꠞꠤꠞ ꠉꠦꠍ ꠕꠣꠇꠤ ꠔꠥꠝꠤ ꠛꠣꠌꠣꠁꠞꠣꠄ ꠖꠥꠈꠤ-ꠇꠣꠋꠉꠣꠟꠞꠦ।”
PSA 35:11 ꠁꠋꠡꠣꠈꠥꠞ ꠝꠤꠍꠣ ꠡꠣꠇ꠆ꠇꠤꠞ ꠖꠟ ꠟꠣꠉꠍꠤꠟ ꠀꠝꠣꠞ ꠛꠤꠞꠥꠖ꠆ꠖꠦ, ꠀꠝꠤ ꠎꠦꠔꠣ ꠎꠣꠘꠤ ꠘꠣ ꠅꠔꠣ ꠛꠤꠡꠄ ꠝꠞꠦ ꠎꠤꠇꠣꠁꠍꠦ।
PSA 35:12 ꠃꠙꠇꠣꠞꠞ ꠛꠖꠟꠣ ꠔꠣꠞꠣ ꠇꠞꠍꠦ ꠀꠝꠣꠞ ꠈꠦꠔꠤ, ꠇꠔ ꠇꠙꠣꠟ ꠙꠥꠠꠣ ꠀꠝꠤ, ꠢꠣꠄ-ꠢꠥꠔꠣꠡ ꠇꠞꠤ।
PSA 35:13 ꠛꠦꠝꠣꠞ-ꠀꠎꠣꠞ ꠅꠁꠟꠦ ꠔꠣꠞꠣꠞ ꠍꠟꠣꠞ ꠌꠐ ꠚꠤꠘ꠆ꠖꠤꠔꠣꠝ, ꠇꠡ꠆ꠐ ꠇꠞꠤ ꠞꠥꠎꠣ ꠞꠣꠈꠤꠀ ꠖꠤꠟꠦ-ꠎꠣꠘꠦ ꠖꠥꠀ ꠇꠞꠔꠣꠝ।
PSA 35:14 ꠜꠣꠁ-ꠛꠤꠞꠣꠖꠞ ꠖꠥꠡ꠆ꠔ ꠝꠞꠟꠦ ꠝꠣꠘꠡꠦ ꠇꠣꠘ꠆ꠖꠦ ꠎꠦꠟꠣ, ꠔꠣꠞꠣꠞ ꠟꠣꠉꠤ ꠀꠝꠤꠅ ꠔ ꠇꠣꠘ꠆ꠖꠤꠔꠣꠝ ꠅꠟꠣ, ꠝꠣ ꠝꠞꠟꠦ ꠇꠣꠘ꠆ꠖꠤ ꠇꠣꠘ꠆ꠖꠤ ꠝꠣꠕꠣ ꠎꠦꠟꠣ ꠅꠁꠎꠣꠄ ꠘꠤꠌꠣ।
PSA 35:15 ꠀꠝꠤ ꠇꠥꠘꠥ ꠃꠡ꠆ꠐꠣ ꠈꠣꠁꠟꠦ ꠈꠥꠡꠤꠞ ꠑꠦꠟꠣꠄ ꠔꠣꠞꠣ ꠎꠝꠦ, ꠅꠌꠤꠘꠣ ꠝꠣꠘꠡꠦ ꠝꠞ ꠛꠖꠘꠣꠝ ꠉꠣꠁꠔꠦ ꠀꠞ ꠝꠣꠁꠞ-ꠗꠁꠞ ꠇꠞꠔꠦ ꠘꠣ ꠕꠣꠝꠦ।
PSA 35:16 ꠛꠦꠁꠝꠣꠘꠞ ꠖꠟꠦ ꠝꠤꠟꠤ ꠀꠡꠤ-ꠔꠣꠝꠡꠣ ꠇꠞꠟ ꠝꠞꠦ, ꠖꠣꠔ ꠇꠤꠠꠤꠝꠤꠠꠤ ꠈꠣꠁꠟ ꠔꠣꠞꠣ ꠀꠝꠣꠞ ꠛꠤꠞꠥꠖ꠆ꠖꠦ।
PSA 35:17 ꠌꠣꠁꠀ ꠌꠣꠁꠀ ꠇꠔꠖꠤꠘ ꠖꠦꠈꠔꠣꠄ ꠝꠣꠛꠥꠖ ꠔꠣꠞꠣꠞ ꠁꠋꠡꠣ-ꠊꠤꠘ꠆ꠘꠣ? ꠡꠤꠋꠢꠞ ꠖꠣꠔꠅ ꠕꠣꠇꠤ ꠀꠝꠣꠞ ꠎꠣꠘꠈꠣꠘ ꠔꠥꠝꠤ ꠛꠣꠌꠣꠅ ꠘꠣ।
PSA 35:18 ꠝꠢꠣ ꠝꠎꠟꠤꠍꠅ ꠀꠝꠤ ꠀꠖꠣꠄ ꠇꠞꠝꠥ ꠡꠥꠇꠞꠤꠀ, ꠔꠥꠝꠣꠞ ꠔꠣꠞꠤꠚ ꠉꠣꠁꠝꠥ ꠀꠝꠤ ꠛꠃꠔ ꠝꠣꠘꠡꠞ ꠍꠣꠝꠘꠦ ꠖꠤꠀ।
PSA 35:19 ꠝꠤꠍꠣ ꠝꠣꠔꠞꠣ ꠖꠥꠡꠝꠘ ꠙꠣꠟꠦ ꠘꠣ ꠇꠞꠃꠇ ꠈꠥꠡꠤ-ꠛꠣꠡꠤ ꠝꠞꠦ ꠟꠁꠀ, ꠈꠣꠝꠈꠣ ꠊꠤꠘ꠆ꠘꠣꠄ ꠝꠞꠦ ꠎꠣꠞꠣ ꠌꠃꠈ ꠐꠤꠙꠣꠐꠤꠙꠤ ꠇꠞꠤꠀ,
PSA 35:20 ꠔꠣꠞꠣ ꠔ ꠡꠣꠘ꠆ꠔꠤꠞ ꠝꠣꠔ ꠝꠣꠔꠦ ꠘꠣ, ꠖꠦꠡꠞ ꠘꠤ-ꠅꠙꠞꠣꠗꠤ ꠝꠣꠘꠡꠞ ꠟꠉꠦ ꠇꠞꠦ ꠍꠟꠘꠣ।
PSA 35:21 ꠝꠥꠈ ꠜꠦꠋꠉꠣꠁꠀ ꠀꠝꠣꠞ ꠛꠣꠄ ꠔꠣꠝꠡꠣ ꠇꠞꠤ ꠇꠄ ꠔꠣꠞꠣ, “ꠇꠔ ꠝꠎꠣ, ꠇꠔ ꠝꠎꠣ, ꠘꠤꠎꠞ ꠌꠃꠈꠦ ꠖꠦꠈꠟꠣꠝ ꠀꠝꠞꠣ।”
PSA 35:22 ꠘꠤꠞꠣꠁ ꠞꠁꠅ ꠘꠣ ꠝꠣꠛꠥꠖ ꠉ ꠖꠦꠈꠞꠣꠄ ꠔ ꠢꠇꠟꠔꠣ, ꠀꠝꠣꠞꠦ ꠍꠣꠠꠤꠀ ꠝꠣꠛꠥꠖ ꠢꠞꠤꠀ ꠞꠁꠅ ꠘꠣ।
PSA 35:23 ꠎꠟꠖꠤ ꠇꠞꠤ ꠀꠉꠥꠀꠁ ꠀꠅ ꠇꠞꠅ ꠀꠝꠣꠞ ꠢꠇ ꠛꠤꠌꠣꠞ, ꠀꠝꠣꠞ ꠙꠇ꠆ꠇꠦ ꠞꠅ ꠉ ꠀꠟ꠆ꠟꠣ ꠔꠥꠝꠤꠃ ꠝꠣꠛꠥꠖ ꠀꠝꠣꠞ।
PSA 35:24 ꠀꠝꠣꠞ ꠛꠤꠌꠣꠞ ꠇꠞꠅ ꠀꠟ꠆ꠟꠣ ꠘꠤꠎꠞ ꠙꠣꠇ ꠙꠞꠦꠎꠉꠣꠞꠤꠄ, ꠅꠉ ꠀꠝꠣꠞ ꠀꠟ꠆ꠟꠣ ꠝꠣꠛꠥꠖ, ꠝꠞꠦ ꠟꠁꠀ ꠔꠣꠞꠣ ꠎꠣꠘꠥ ꠈꠥꠡꠤ-ꠚꠥꠞ꠆ꠔꠤ ꠘꠣ ꠇꠞꠦ।
PSA 35:25 ꠔꠣꠞꠣꠞ ꠖꠤꠅ ꠘꠣ ꠝꠘꠦ ꠝꠘꠦ ꠇꠁꠔꠦ, “ꠀꠝꠞꠣ ꠎꠦꠔꠣ ꠌꠣꠁꠍꠤ ꠅꠔꠣꠃ ꠔ ꠅꠁꠍꠦ।” ꠄꠅꠈꠣꠘ ꠇꠁꠔꠦ ꠖꠤꠅ ꠘꠣ ꠔꠥꠝꠤ ꠔꠣꠞꠣꠞꠦ, “ꠎꠤꠘ꠆ꠖꠣ ꠉꠤꠟꠤꠀ ꠢꠣꠞꠣꠁꠍꠤ ꠅꠉꠥꠞꠦ ꠙꠦꠐꠞ ꠜꠤꠔꠞꠦ।”
PSA 35:26 ꠝꠍꠤꠛꠔ ꠖꠦꠈꠤꠀ ꠀꠝꠣꠞ ꠇꠞꠂꠘ ꠎꠦꠔꠣꠄ ꠈꠥꠡꠤ-ꠚꠥꠞ꠆ꠔꠤ, ꠡꠞꠝꠤꠘ꠆ꠖꠣ ꠛꠘꠤꠀ ꠔꠣꠞꠣ ꠅꠃꠇ ꠘꠤꠌꠣ ꠝꠥꠈꠤ, ꠀꠝꠣꠞ ꠃꠙꠞꠦ ꠎꠦꠔꠣꠄ ꠇꠞꠦ ꠛꠠꠣꠁ-ꠛꠦꠐꠣꠉꠤꠞꠤ, ꠡꠞꠝ ꠀꠞ ꠛꠦꠁꠎ꠆ꠎꠔꠤꠔ ꠒꠥꠛꠃꠇ ꠁꠔꠣ ꠢꠇ꠆ꠇꠟꠐꠤ।
PSA 35:27 ꠙꠣꠇ-ꠙꠞꠦꠎꠉꠣꠞꠤ ꠖꠦꠈꠤꠀ ꠝꠞ ꠅꠄ ꠎꠣꠞꠣ ꠈꠥꠡ-ꠛꠣꠡ, ꠈꠥꠡꠤꠞ ꠌꠥꠐꠦ ꠔꠣꠞꠣ ꠇꠞꠃꠇ ꠀꠘꠘ꠆ꠖ-ꠃꠟ꠆ꠟꠣꠡ। ꠢꠞ-ꠢꠣꠝꠦꠡꠣ ꠇꠃꠇ ꠔꠣꠞꠣ ꠀꠟꠢꠣꠝꠖꠥꠟꠤꠟ꠆ꠟꠣ, ꠘꠤꠎꠞ ꠛꠘ꠆ꠖꠣꠞ ꠡꠣꠘ꠆ꠔꠤ ꠖꠦꠈꠤꠀ ꠈꠥꠡꠤ ꠅꠁꠘ ꠔ ꠀꠟ꠆ꠟꠣ।
PSA 35:28 ꠔꠥꠝꠣꠞ ꠢꠇ ꠛꠤꠌꠣꠞꠞ ꠉꠥꠘ ꠉꠣꠁꠝꠥ ꠀꠝꠣꠞ ꠎꠤꠚꠞꠣꠖꠤ, ꠉꠥꠘꠉꠣꠘ ꠉꠣꠁꠝꠥ ꠔꠥꠝꠣꠞ ꠖꠤꠘ-ꠞꠣꠁꠔ ꠜꠞꠤ॥
PSA 36:1 ꠄꠛꠣꠖꠔ-ꠛꠘ꠆ꠖꠦꠉꠤ ꠙꠞꠤꠌꠣꠟꠇꠞ ꠟꠣꠉꠤ: ꠝꠣꠛꠥꠖꠞ ꠛꠘ꠆ꠖꠣ ꠢꠎꠞꠔ ꠖꠣꠃꠖꠞ ꠝꠤꠎꠝꠞ। ꠘꠣꠚꠞꠝꠣꠘꠞ ꠈꠣꠞꠣꠙꠤꠞ ꠛꠦꠙꠣꠞꠦ, ꠝꠣꠛꠥꠖꠞ ꠇꠣꠟꠣꠝ ꠙꠣꠁꠍꠦ ꠀꠝꠣꠞ ꠖꠤꠟꠦ, ꠔꠣꠞꠣꠞ ꠌꠈꠥꠔ ꠀꠟ꠆ꠟꠣꠞ ꠒꠞ-ꠈꠚ ꠘꠣꠁꠞꠦ।
PSA 36:2 ꠔꠣꠞꠣ ꠘꠤꠎꠞ ꠌꠃꠈꠦ ꠖꠦꠈꠦ ꠘꠤꠎꠞ ꠛꠣꠢꠣꠖꠥꠞꠤ, ꠘꠤꠎꠞꠦ ꠊꠤꠘ꠆ꠘꠣꠄ ꠘꠣ ꠅꠙꠞꠣꠗ ꠇꠣꠝ ꠇꠞꠤ।
PSA 36:3 ꠍꠟ-ꠌꠔꠥꠞꠤ ꠈꠣꠞꠣꠙꠤꠄ ꠜꠞꠣ ꠔꠣꠞꠣꠞ ꠝꠥꠈꠞ ꠇꠕꠣ, ꠀꠈꠟ ꠈꠣꠐꠣꠁ ꠌꠟꠣ, ꠘꠦꠇ ꠇꠣꠝ ꠕꠣꠇꠤ ꠞꠄ ꠢꠞꠤꠀ।
PSA 36:4 ꠛꠤꠍꠘꠣꠔ ꠢꠥꠔꠤꠀ ꠔꠣꠞꠣ ꠇꠥ-ꠇꠣꠝꠞ ꠗꠣꠘ꠆ꠖꠣ ꠇꠞꠦ, ꠛꠖ ꠇꠣꠝ ꠘꠣ ꠍꠣꠠꠤꠀ ꠝꠘ꠆ꠖ ꠙꠕꠦ ꠌꠟꠦ।
PSA 36:5 ꠅꠉ ꠝꠣꠛꠥꠖ ꠔꠥꠝꠣꠞ ꠖꠄꠀ-ꠝꠣꠄꠀꠄ ꠀꠍꠝꠣꠘ ꠍꠁꠟꠣꠁꠍꠦ, ꠔꠥꠝꠣꠞ ꠢꠇ-ꠢꠣꠟꠣꠟꠤ ꠝꠦꠊꠞ ꠇꠣꠟꠘꠤꠔ ꠟꠣꠉꠤ ꠉꠦꠍꠦ।
PSA 36:6 ꠙꠣꠠ-ꠙꠞꠛꠔꠞ ꠟꠣꠈꠣꠘ ꠃꠌꠣ ꠙꠞꠦꠎꠉꠣꠞꠤ ꠔꠥꠝꠣꠞ, ꠉꠁꠘ ꠖꠞꠤꠀꠞ ꠟꠣꠈꠣꠘ ꠔꠥꠝꠣꠞ ꠢꠇ ꠛꠤꠌꠣꠞ, ꠝꠣꠛꠥꠖꠦꠃ ꠛꠣꠌꠣꠅ ꠔ ꠡꠛ ꠝꠣꠘꠥꠡ ꠀꠞ ꠎꠣꠘꠥꠀꠞ।
PSA 36:7 ꠅꠉ ꠀꠟ꠆ꠟꠣ ꠔꠥꠝꠣꠞ ꠝꠣꠄꠀ-ꠝꠝꠔꠣ ꠝꠢꠣ ꠝꠥꠁꠟ꠆ꠟꠛꠣꠘ, ꠀꠖꠝ ꠎꠣꠔꠤꠄ ꠀꠡꠞꠄ ꠙꠣꠄ ꠔꠥꠝꠣꠞ ꠒꠣꠈꠘꠣꠞ ꠍꠣꠄꠀꠔ।
PSA 36:8 ꠔꠥꠝꠣꠞ ꠊꠞꠞ ꠗꠘ-ꠍꠣꠝꠣꠘꠣꠄ ꠔꠣꠞꠣꠞ ꠙꠦꠐ ꠜꠞꠤ ꠎꠣꠄ, ꠔꠥꠝꠣꠞ ꠅꠝ꠆ꠞꠤꠔ ꠙꠣꠘꠤꠄ ꠔꠣꠞꠣꠞ ꠔꠤꠞꠣꠡ ꠝꠤꠐꠣꠄ।
PSA 36:9 ꠔꠥꠝꠣꠞ ꠝꠣꠎꠦ ꠀꠍꠦ ꠎꠤꠘ꠆ꠖꠦꠉꠤ-ꠙꠣꠘꠤꠞ ꠁꠘ꠆ꠖꠣꠞꠣ, ꠔꠥꠝꠣꠞ ꠘꠥꠞꠦꠃ ꠔ ꠖꠦꠈꠤ ꠘꠥꠞ ꠀꠝꠞꠣ।
PSA 36:10 ꠔꠥꠝꠣꠞꠦ ꠎꠣꠞꠣ ꠌꠤꠘꠦ ꠔꠣꠞꠣꠞꠦ ꠔꠥꠝꠤ ꠛꠤꠟꠣꠁ ꠖꠦꠅ ꠔꠥꠝꠣꠞ ꠖꠄꠀ-ꠝꠣꠄꠀ, ꠡꠞꠟ ꠖꠤꠟꠞ ꠝꠣꠘꠡꠦ ꠙꠣꠄ ꠔꠥꠝꠣꠞ ꠝꠣꠄꠀ-ꠝꠝꠔꠣ।
PSA 36:11 ꠅꠢꠋꠇꠣꠞꠤ ꠎꠘꠦ ꠎꠣꠘꠥ ꠙꠣꠅ ꠘꠣ ꠛꠣꠠꠣꠄ ꠀꠝꠣꠞ ꠛꠣꠄ, ꠘꠣꠚꠞꠝꠣꠘꠞ ꠀꠔꠦ ꠎꠣꠘꠥ ꠀꠝꠣꠞꠦ ꠘꠣ ꠈꠦꠖꠣꠄ।
PSA 36:12 ꠖꠦꠈꠞꠣꠄ ꠘꠤ ꠘꠣꠚꠞꠝꠣꠘꠤ ꠎꠦꠔꠣꠄ ꠇꠞꠍꠦ ꠁꠔꠣ ꠔ ꠟꠦꠐꠤ ꠉꠦꠍꠦ, ꠃꠑꠤꠔ ꠙꠣꠞꠦꠞ ꠘꠣ ꠔꠣꠞꠣ, ꠚꠣꠟꠣꠁ ꠖꠤꠍꠂꠘ ꠁꠔꠣꠞꠦ॥
PSA 37:1 ꠢꠎꠞꠔ ꠖꠣꠃꠖꠞ ꠝꠤꠎꠝꠞ। ꠘꠣꠚꠞꠝꠣꠘꠞ ꠃꠘ꠆ꠘꠔꠤ ꠖꠦꠈꠤꠀ ꠝꠘ ꠈꠣꠞꠣꠙ ꠇꠞꠤꠅ ꠘꠣ, ꠔꠣꠞꠣꠞ ꠜꠣꠟꠣꠁ ꠖꠦꠈꠤꠀ ꠢꠣꠞꠤ ꠇꠞꠤꠅ ꠘꠣ ꠁꠋꠡꠣ।
PSA 37:2 ꠔꠣꠞꠣ ꠔ ꠊꠣꠡꠞ ꠟꠣꠈꠣꠘ ꠎꠟꠖꠤ ꠢꠥꠇꠣꠁ ꠎꠤꠛ, ꠛꠘ꠆ꠖꠞ ꠙꠣꠔꠣ-ꠍꠣꠔꠣꠞ ꠟꠣꠈꠣꠘ ꠁꠔꠣꠞ ꠛꠦꠢꠣꠟꠔ ꠅꠁꠛ।
PSA 37:3 ꠝꠣꠛꠥꠖꠞ ꠃꠙꠞꠦ ꠜꠞꠡꠣ ꠇꠞꠤ ꠘꠦꠇ ꠇꠣꠝ ꠇꠞꠅ, ꠢꠇ-ꠢꠣꠟꠣꠟ ꠞꠁꠀ ꠢꠣꠞꠤ ꠛꠡꠔ ꠇꠞꠅ ꠖꠦꠡꠅ।
PSA 37:4 ꠈꠥꠡꠤ-ꠛꠣꠡꠤ ꠇꠞꠅ ꠔꠥꠝꠤ ꠝꠣꠛꠥꠖꠞꠦ ꠟꠁꠀ, ꠔꠣꠁꠘꠃ ꠔꠥꠝꠣꠞ ꠝꠘꠞ ꠀꠡꠣ ꠙꠥꠞꠘ ꠇꠞꠤꠛꠣ।
PSA 37:5 ꠔꠥꠝꠣꠞ ꠎꠤꠘ꠆ꠖꠦꠉꠤꠞ ꠢꠇꠟ ꠜꠣꠞ ꠝꠣꠛꠥꠖꠞ ꠀꠔꠅ ꠍꠣꠠꠅ, ꠔꠣꠁꠘꠃ ꠌꠣꠟꠣꠁꠛꠣ ꠢꠇꠟꠔꠣ, ꠘꠤꠌ꠆ꠌꠤꠔ ꠜꠞꠡꠣ ꠞꠣꠈꠅ।
PSA 37:6 ꠔꠣꠁꠘ ꠔꠥꠝꠣꠞ ꠙꠞꠦꠎꠉꠣꠞꠤꠞꠦ ꠇꠞꠛꠣ ꠃꠎꠤꠟꠣ, ꠔꠥꠝꠣꠞ ꠘꠤꠞ꠆ꠖꠥꠡꠤꠔꠣ ꠎꠣꠁꠞ ꠇꠞꠛꠣ ꠖꠥꠁꠚꠞꠞ ꠟꠣꠈꠣꠘ ꠌꠇꠌꠇꠣ।
PSA 37:7 ꠝꠣꠛꠥꠖꠞ ꠍꠣꠝꠘꠦ ꠘꠤꠞꠣꠁ ꠞꠁꠀ ꠔꠣꠘ ꠟꠣꠉꠤ ꠛꠣꠞ ꠌꠣꠁꠅ, ꠚꠘ꠆ꠖꠤꠛꠣꠎꠞ ꠃꠘ꠆ꠘꠔꠤ ꠖꠦꠈꠤꠀ ꠛꠦꠎꠣꠞ ꠘꠣ ꠅꠁꠅ।
PSA 37:8 ꠉꠥꠍꠣꠞꠦ ꠖꠝꠘ ꠇꠞꠤꠀ ꠕꠣꠝꠣꠅ ꠝꠤꠎꠣꠎ ꠖꠦꠈꠣꠘꠤ, ꠛꠦꠎꠣꠞ ꠅꠁꠅ ꠘꠣ ꠔꠥꠝꠤ, ꠈꠣꠞꠣꠙꠤꠃ ꠁꠔꠣꠞ ꠚꠟ ꠈꠣꠟꠤ।
PSA 37:9 ꠝꠣꠛꠥꠖꠞ ꠜꠞꠡꠣ ꠇꠞꠞꠣꠄ ꠖꠦꠡꠞ ꠝꠃꠞꠡꠤ-ꠝꠣꠟꠤꠇ ꠛꠘꠤꠛ, ꠘꠣꠚꠞꠝꠣꠘ ꠅꠇꠟꠞ ꠔ ꠘꠤꠌ꠆ꠌꠤꠔ ꠡꠞ꠆ꠛꠘꠣꠡ ꠅꠁꠛ।
PSA 37:10 ꠕꠥꠠꠣ ꠖꠤꠘ ꠛꠣꠖꠦꠃ ꠘꠣꠚꠞꠝꠣꠘ ꠅꠁꠛ ꠘꠤꠙꠣꠔ, ꠔꠥꠇꠣꠁꠟꠦꠅ ꠝꠤꠟꠔ ꠘꠣꠄ ꠀꠞ ꠔꠣꠞꠣꠞ ꠎꠣꠉꠣꠔ।
PSA 37:11 ꠘꠞꠝ ꠖꠤꠟꠞ ꠝꠣꠘꠡꠦ ꠙꠣꠁꠛꠣ ꠖꠦꠡꠞ ꠝꠣꠟꠤꠇꠣꠘꠣ, ꠡꠣꠄ-ꠡꠣꠘ꠆ꠔꠤꠄ ꠞꠁꠀ ꠔꠣꠞꠣ ꠎꠤꠘ꠆ꠖꠦꠉꠤ ꠇꠣꠐꠣꠁꠛꠣ।
PSA 37:12 ꠘꠣꠚꠞꠝꠣꠘꠦ ꠍꠟ-ꠌꠔꠥꠞꠤ ꠇꠞꠦ ꠙꠞꠦꠎꠉꠣꠞꠞ ꠛꠤꠙꠇ꠆ꠇꠦ, ꠖꠥꠡꠝꠘꠤ ꠇꠞꠤꠀ ꠔꠣꠞꠣ ꠖꠣꠔ ꠇꠤꠠꠤꠝꠤꠠꠤ ꠇꠞꠦ।
PSA 37:13 ꠔꠣꠞꠣꠞ ꠢꠣꠟꠔ ꠖꠦꠈꠤꠀ ꠢꠣꠞꠤ ꠝꠣꠛꠥꠖꠦ ꠔ ꠀꠡꠂꠘ, ꠘꠣꠚꠞꠝꠣꠘꠞ ꠖꠤꠘ ꠡꠦꠡ ꠁꠔꠣ ꠔꠣꠁꠘ ꠖꠦꠈꠂꠘ।
PSA 37:14 ꠖꠥꠈꠤ-ꠇꠣꠋꠉꠣꠟꠞꠦ ꠙꠣꠅꠖꠤ ꠃꠠꠤꠀ ꠈꠥꠘꠞ ꠈꠤꠀꠟꠦ, ꠘꠣꠚꠞꠝꠣꠘꠦ ꠔꠟꠥꠀꠞ ꠈꠥꠟꠤꠀ ꠔꠤꠞ-ꠗꠘꠥꠇ ꠢꠣꠎꠣꠁ ꠞꠣꠈꠦ।
PSA 37:15 ꠅꠃ ꠔꠟꠥꠀꠞ ꠔꠣꠞꠣꠞ ꠘꠤꠎꠞ ꠇꠟꠤꠎꠣꠔꠃ ꠢꠣꠝꠣꠁꠛ, ꠔꠣꠞꠣꠞ ꠔꠤꠞ-ꠗꠘꠥꠇꠅ ꠜꠣꠋꠉꠤꠀ ꠢꠣꠞꠤ ꠛꠦꠇꠣꠝꠣ ꠅꠁꠛ।
PSA 37:16 ꠘꠣꠚꠞꠝꠣꠘꠞ ꠛꠦꠡꠤ ꠗꠘ-ꠖꠃꠟꠔ ꠕꠣꠇꠤꠀ, ꠙꠞꠦꠎꠉꠣꠞꠞ ꠕꠥꠠꠣ ꠗꠘꠃ ꠛꠃꠔ ꠜꠣꠟꠣ।
PSA 37:17 ꠘꠣꠚꠞꠝꠣꠘꠞ ꠀꠔ ꠔ ꠎꠣꠁꠛꠉꠤ ꠜꠣꠋꠉꠤꠀ, ꠙꠞꠦꠎꠉꠣꠞꠞꠦ ꠛꠣꠌꠣꠁꠘ ꠘꠤꠌ꠆ꠌꠄ ꠝꠣꠛꠥꠖꠦ ꠗꠞꠤꠀ।
PSA 37:18 ꠝꠣꠛꠥꠖꠦ ꠖꠦꠈꠂꠘ ꠖꠤꠘꠖꠣꠞꠞ ꠎꠤꠘ꠆ꠖꠦꠉꠤꠞ ꠢꠣꠟꠔ, ꠌꠤꠞꠇꠣꠟ ꠎꠣꠞꠤ ꠞꠁꠛ ꠔꠣꠞꠣꠞ ꠝꠃꠞꠡꠤ ꠖꠃꠟꠔ।
PSA 37:19 ꠝꠍꠤꠛꠔꠞ ꠖꠤꠘꠅ ꠔꠣꠞꠣ ꠅꠁꠔ ꠘꠣꠄ ꠡꠞꠝꠤꠘ꠆ꠖꠣ, ꠀꠇꠣꠟ-ꠘꠤꠖꠣꠘꠞ ꠇꠣꠟꠅ ꠔꠣꠞꠣ ꠙꠦꠐ ꠜꠞꠣ ꠈꠣꠘꠤ ꠙꠣꠁꠛꠣ।
PSA 37:20 ꠘꠣꠝ-ꠘꠤꠡꠣꠘꠣ ꠝꠤꠐꠤꠎꠤꠛ ꠎꠣꠞꠣ ꠘꠣꠚꠞꠝꠣꠘ, ꠝꠣꠛꠥꠖꠞ ꠖꠥꠡꠝꠘ ꠢꠥꠇꠣꠁ ꠎꠤꠛ ꠀꠅꠞꠤ ꠚꠥꠟꠞ ꠟꠣꠈꠣꠘ, ꠖꠦꠈꠛꠣꠄ ꠔꠣꠞꠣꠞ ꠢꠇ꠆ꠇꠟꠔꠣ ꠚꠥꠠꠣꠁ ꠎꠤꠛ, ꠗꠥꠝꠣꠞ ꠟꠣꠈꠣꠘ ꠁꠔꠣ ꠛꠣꠔꠣꠡꠅ ꠝꠤꠡꠤꠛ।
PSA 37:21 ꠘꠣꠚꠞꠝꠣꠘꠦ ꠇꠞ꠆ꠎ ꠘꠤꠀ ꠚꠤꠞꠔ ꠘꠣ ꠖꠤꠟꠣꠄ, ꠙꠞꠦꠎꠉꠣꠞꠦ ꠖꠣꠘ ꠛꠤꠟꠣꠄ ꠝꠣꠄꠀ-ꠝꠝꠔꠣꠄ।
PSA 37:22 ꠝꠣꠛꠥꠖꠞ ꠞꠢꠝꠔꠤ ꠎꠘ ꠎꠣꠞꠣ ꠖꠦꠡꠞ ꠝꠣꠟꠤꠇ ꠅꠁꠛ ꠔꠣꠞꠣ, ꠔꠣꠘ ꠟꠣꠘ꠆ꠘꠔꠤ ꠎꠘꠞ ꠔ ꠝꠤꠐꠤꠎꠤꠛ ꠘꠣꠝ-ꠘꠤꠡꠣꠘꠣ।
PSA 37:23 ꠎꠣꠞꠣꠞ ꠌꠣꠟ-ꠌꠟꠘ ꠖꠦꠈꠤꠀ ꠝꠣꠛꠥꠖ ꠅꠁꠘ ꠈꠥꠡꠤ, ꠔꠣꠁꠘꠃ ꠝꠎꠛꠥꠔ ꠇꠞꠂꠘ ꠔꠣꠞꠣꠞ ꠌꠟꠣꠞ ꠉꠔꠤ।
PSA 37:24 ꠡ꠆ꠛꠄꠅꠋ ꠝꠣꠛꠥꠖꠦ ꠔꠣꠞꠣꠞ ꠀꠔꠅ ꠗꠞꠤꠀ ꠞꠣꠈꠣꠄ, ꠃꠡ꠆ꠐꠣ ꠈꠣꠁꠟꠦꠅ ꠔꠣꠞꠣ ꠙꠠꠤꠀ ꠞꠁꠔ ꠘꠣꠄ।
PSA 37:25 ꠀꠝꠤ ꠀꠉꠦ ꠎꠥꠀꠘ ꠀꠍꠟꠣꠝ ꠅꠈꠘ ꠛꠥꠠꠣ ꠅꠁꠍꠤ, ꠙꠞꠦꠎꠉꠣꠞꠞꠦ ꠍꠣꠠꠤꠀ ꠎꠣꠁꠔꠦ ꠀꠝꠤ ꠘꠣ ꠖꠦꠈꠍꠤ, ꠔꠣꠞꠣꠞ ꠀꠅꠟꠣꠖꠞꠦꠅ ꠇꠥꠘꠥꠖꠤꠘ ꠜꠤꠇ ꠇꠞꠣꠔ ꠘꠣ ꠙꠣꠁꠍꠤ।
PSA 37:26 ꠖꠄꠀ-ꠝꠣꠄꠀ ꠇꠞꠦ ꠝꠣꠘꠡꠞꠦ ꠞꠤꠘ ꠖꠦꠄ ꠢꠣꠝꠦꠡꠣ, ꠔꠣꠞꠣꠞ ꠀꠅꠟꠣꠖꠦꠅ ꠔ ꠞꠢꠝ-ꠛꠞꠇꠔ ꠙꠣꠁꠛꠣ।
PSA 37:27 ꠛꠖ ꠇꠣꠝ ꠍꠣꠠꠅ ꠘꠦꠇ ꠇꠣꠝ ꠇꠞꠅ, ꠔꠦꠃ ꠔꠥꠝꠤ ꠌꠤꠞꠇꠣꠟ ꠛꠡꠔ ꠇꠞꠛꠣꠄ ꠅꠘꠅ।
PSA 37:28 ꠝꠣꠛꠥꠖꠦ ꠔ ꠜꠣꠟꠣ ꠙꠣꠁꠘ ꠢꠇ ꠁꠘꠍꠣꠚ, ꠔꠣꠁꠘ ꠘꠤꠎꠞ ꠀꠡꠤꠇꠣꠘꠞꠦ ꠇꠞꠂꠘ ꠘꠣ ꠔ ꠔꠤꠀꠉ। ע ꠀꠁꠘ ꠘꠣꠚꠞꠝꠣꠘꠞ ꠛꠤꠘꠣꠡ ꠅꠁꠛ ꠌꠤꠞꠇꠣꠟꠞ ꠟꠣꠉꠤ, ꠔꠣꠞꠣꠞ ꠛꠋꠡ-ꠛꠥꠘꠤꠀꠖ ꠝꠤꠐꠤꠎꠤꠛ ꠖꠥꠘꠤꠀ ꠕꠣꠇꠤ।
PSA 37:29 ꠖꠦꠡꠞ ꠝꠣꠟꠤꠇꠣꠘꠣ ꠙꠣꠁꠛꠣ ꠙꠞꠦꠎꠉꠣꠞꠦ, ꠌꠤꠞꠇꠣꠟ ꠞꠁꠛꠣ ꠔꠣꠞꠣ ꠅꠃ ꠎꠣꠉꠣꠞ ꠝꠣꠎꠦ।
PSA 37:30 ꠙꠞꠦꠎꠉꠣꠞꠞ ꠝꠥꠈꠖꠤ ꠛꠣꠞ ꠅꠄ ꠉꠤꠀꠘꠞ ꠛꠥꠟꠤ, ꠢꠇ ꠛꠤꠌꠣꠞꠞ ꠝꠣꠔ ꠛꠣꠞ ꠅꠄ ꠔꠣꠞꠣꠞ ꠎꠤꠚꠞꠣꠖꠤ।
PSA 37:31 ꠀꠟ꠆ꠟꠣꠞ ꠢꠥꠇꠥꠝ ꠉꠣꠕꠣ ꠀꠍꠦ ꠔꠣꠞꠣꠞ ꠖꠤꠟꠅ, ꠙꠤꠍꠟꠤꠔ ꠘꠣꠄ ꠔꠣꠞꠣꠞ ꠙꠣꠅ ꠝꠎꠛꠥꠔ ꠞꠁꠛ।
PSA 37:32 ꠘꠣꠚꠞꠝꠣꠘꠦ ꠃꠔ ꠙꠣꠔꠤꠀ ꠞꠄ ꠙꠞꠦꠎꠉꠣꠞꠞ ꠛꠣꠄ, ꠄꠘꠞꠦ ꠈꠥꠘꠞ ꠀꠡꠣꠄ ꠢꠦ ꠡꠥꠎꠥꠉ ꠔꠥꠇꠣꠄ।
PSA 37:33 ꠝꠣꠛꠥꠖꠦ ꠔꠣꠘꠞꠦ ꠍꠣꠠꠔꠣ ꠘꠣꠄ ꠘꠣꠚꠞꠝꠣꠘꠞ ꠀꠔꠅ, ꠔꠣꠘ ꠡꠣꠎꠣ ꠅꠁꠔꠦ ꠖꠤꠔꠣ ꠘꠣꠄ ꠀꠖꠣꠟꠔꠞ ꠛꠤꠌꠣꠞꠅ।
PSA 37:34 ꠝꠣꠛꠥꠖꠞ ꠟꠣꠉꠤ ꠛꠣꠞ ꠌꠣꠅ, ꠔꠣꠘ ꠖꠦꠈꠣꠁꠟ ꠙꠕꠦ ꠌꠟꠅ, ꠔꠣꠁꠘ ꠔꠥꠝꠞꠣꠞꠦ ꠇꠞꠛꠣ ꠛꠠ, ꠖꠦꠡꠞ ꠖꠈꠟ ꠙꠣꠁꠛꠣꠄ, ꠘꠣꠚꠞꠝꠣꠘ ꠖꠟꠞ ꠛꠤꠘꠣꠡ ꠘꠤꠎꠞ ꠌꠃꠈꠦ ꠖꠦꠈꠛꠣꠄ।
PSA 37:35 ꠙꠣꠡꠣꠘ ꠘꠣꠚꠞꠝꠣꠘꠞꠦ ꠖꠦꠈꠟꠣꠝ ꠛꠃꠔ ꠛꠠ ꠁꠎ꠆ꠎꠔꠤ, ꠔꠞꠔꠣꠎꠣ ꠉꠣꠍꠞ ꠟꠣꠈꠣꠘ ꠒꠣꠟ-ꠙꠣꠟꠣ ꠔꠣꠞ ꠌꠣꠁꠞꠅꠛꠣꠄꠖꠤ।
PSA 37:36 ꠢꠤꠞꠛꠣꠞ ꠉꠦꠟꠣꠝ ꠀꠝꠤ ꠔꠣꠞꠦ ꠀꠞ ꠙꠣꠁꠟꠣꠝ ꠘꠣ, ꠔꠥꠇꠣꠁꠟꠣꠝ ꠛꠃꠔ ꠀꠝꠤ ꠈꠥꠎ-ꠈꠛꠞ ꠝꠤꠟꠟ ꠘꠣ।
PSA 37:37 ꠘꠤ-ꠅꠙꠞꠣꠗꠤꠞ ꠛꠣꠄ ꠌꠣꠅ ꠖꠦꠈꠅ ꠢꠇ ꠝꠣꠘꠡꠞ ꠛꠣꠄ, ꠐꠤꠇꠤꠀ ꠞꠄ ꠔꠣꠞ ꠀꠅꠟꠣꠖ ꠡꠣꠄ-ꠡꠣꠘ꠆ꠔꠤ ꠎꠦ ꠜꠣꠟꠣ ꠙꠣꠄ।
PSA 37:38 ꠢꠇ꠆ꠇꠟ ꠈꠣꠞꠣꠙ ꠝꠣꠘꠡꠞ ꠅꠁꠛ ꠡꠞ꠆ꠛꠘꠣꠡ ꠘꠣꠚꠞꠝꠣꠘꠞ ꠛꠋꠡ-ꠛꠥꠘꠤꠀꠖ ꠅꠁꠛ ꠛꠤꠘꠣꠡ।
PSA 37:39 ꠙꠞꠦꠎꠉꠣꠞꠞ ꠘꠣꠎꠣꠔ ꠀꠄ ꠝꠣꠛꠥꠖꠞ ꠉꠦꠍ ꠕꠣꠇꠤ, ꠔꠣꠞꠣꠞ ꠝꠍꠤꠛꠔꠞ ꠇꠣꠟꠅ ꠔꠣꠁꠘ ꠞꠂꠘ ꠛꠣꠋꠇꠣꠞ ꠛꠘꠤ।
PSA 37:40 ꠝꠣꠛꠥꠖꠦ ꠡꠣꠁꠎ꠆ꠎ ꠇꠞꠤꠀ ꠘꠤꠡ꠆ꠔꠣꠞ ꠖꠦꠁꠘ ꠔꠣꠞꠣꠞꠦ, ꠔꠣꠘ ꠀꠡꠞꠄ ꠟꠅꠀꠄ ꠘꠣꠚꠞꠝꠣꠘꠞ ꠇꠛꠎꠣ ꠕꠣꠇꠤ ꠎꠣꠘꠦ ꠛꠣꠌꠣꠁꠘ ꠄꠞꠣꠞꠦ॥
PSA 38:1 ꠢꠎꠞꠔ ꠖꠣꠃꠖꠞ ꠝꠤꠎꠝꠞ। ꠁꠀꠖꠉꠣꠞꠤ। ꠗꠣꠝꠇꠤ ꠖꠤꠅ ꠘꠣ ꠉ ꠝꠣꠛꠥꠖ ꠉꠥꠍꠣ ꠇꠞꠤꠀ, ꠡꠣꠎꠣ ꠖꠤꠅ ꠘꠣ ꠝꠞꠦ ꠞꠣꠉ ꠇꠞꠤꠀ।
PSA 38:2 ꠔꠥꠝꠣꠞ ꠔꠤꠞꠞ ꠚꠟꠣꠄ ꠔ ꠉꠣꠕꠤꠟꠤꠍꠦ ꠝꠞꠦ, ꠔꠥꠝꠣꠞ ꠀꠔꠦ ꠉ ꠝꠣꠛꠥꠖ ꠎꠣꠔꠤꠀ ꠗꠞꠍꠦ ꠀꠝꠣꠞꠦ।
PSA 38:3 ꠔꠥꠝꠣꠞ ꠉꠥꠍꠣꠞ ꠌꠥꠐꠦ ꠀꠝꠣꠞ ꠇꠣꠄꠀꠞ ꠢꠇꠟ ꠅꠋꠉ ꠛꠦꠝꠣꠞ, ꠄꠉꠥ ꠀꠒ꠆ꠒꠤꠅ ꠜꠣꠟꠣ ꠘꠣꠄ ꠔ ꠉꠥꠘꠣꠞ ꠖꠣꠄ ꠀꠝꠣꠞ।
PSA 38:4 ꠀꠝꠣꠞ ꠘꠤꠎꠞ ꠛꠖ ꠇꠣꠝꠅ ꠀꠝꠤ ꠢꠣꠛꠥꠒꠥꠛꠥ ꠈꠣꠁꠀꠞ, ꠁꠔꠣ ꠛꠠ ꠇꠑꠤꠘ ꠛꠥꠏꠣ-ꠜꠣꠞ ꠟꠣꠉꠦꠞ ꠀꠝꠣꠞ।
PSA 38:5 ꠀꠝꠣꠞ ꠛꠦꠀꠈꠟꠤꠞ ꠟꠣꠉꠤꠀ ꠎꠈꠝ ꠅꠇꠟ ꠕꠣꠇꠤꠀ, ꠙꠌꠣ ꠖꠥꠞ꠆ꠉꠘ꠆ꠖ ꠛꠣꠞ ꠅꠞ ꠙꠌꠣ ꠊꠣ ꠅꠁꠀ।
PSA 38:6 ꠀꠝꠤ ꠃꠘ꠆ꠖꠣ ꠅꠁꠀ ꠉꠥꠎꠣ ꠛꠘꠤꠉꠦꠍꠤ, ꠝꠘꠞ ꠖꠥꠈꠦ ꠢꠣꠞꠣꠖꠤꠘ ꠇꠞꠤ ꠊꠥꠞꠣꠊꠥꠞꠤ।
PSA 38:7 ꠀꠝꠣꠞ ꠇꠝꠞꠞ ꠝꠣꠎꠦ ꠇꠔ ꠎꠣꠟꠣ-ꠎꠘꠔ꠆ꠞꠘꠣ, ꠀꠝꠣꠞ ꠇꠣꠄꠀꠞ ꠇꠥꠘꠥ ꠅꠋꠉꠃ ꠘꠣꠄ ꠔ ꠜꠣꠟꠣ।
PSA 38:8 ꠌꠤꠘ꠆ꠔꠣ ꠇꠞꠔꠦ ꠇꠞꠔꠦ ꠀꠝꠤ ꠜꠣꠋꠉꠤꠀ ꠌꠥꠞꠝꠣꠞ, ꠖꠤꠟꠞ ꠎꠣꠟꠣꠄ ꠀꠝꠤ ꠢꠣꠝꠦꠡꠣ ꠇꠣꠔꠞꠣꠁꠀꠞ।
PSA 38:9 ꠝꠣꠛꠥꠖ ꠉ ꠔꠥꠝꠣꠞ ꠖꠞꠛꠣꠞꠅꠃ ꠀꠝꠣꠞ ꠖꠤꠟꠞ ꠌꠣꠅꠀ-ꠙꠣꠅꠀ, ꠀꠝꠣꠞ ꠜꠤꠔꠞꠞ ꠀꠢꠣꠎꠣꠞꠤ ꠔ ꠔꠥꠝꠣꠞ ꠉꠦꠍꠦ ꠟꠥꠇꠣꠁꠟ ꠘꠣ।
PSA 38:10 ꠀꠝꠣꠞ ꠖꠤꠟꠦ ꠒꠞꠣꠁꠀ ꠇꠣꠙꠦꠞ, ꠡꠞꠤꠟꠞ ꠛꠟ ꠉꠦꠍꠦꠉꠤ ꠍꠣꠠꠤꠀ, ꠌꠃꠈꠦ ꠖꠦꠈꠣꠞ ꠈꠦꠝꠔꠣ ꠝꠞ ꠝꠥꠐꠦꠃ ꠘꠣꠄ ꠜꠣꠟꠣ।
PSA 38:11 ꠀꠙꠘ ꠎꠘ ꠀꠞ ꠖꠥꠡ꠆ꠔ ꠅꠇꠟꠦ ꠝꠞ ꠇꠡ꠆ꠐ ꠖꠦꠈꠤꠀ ꠢꠞꠤꠀ ꠕꠣꠇꠦ, ꠀꠝꠣꠞ ꠀꠞꠤ-ꠚꠞꠤ ꠙꠞꠤꠌꠤꠔ ꠎꠘꠦꠅ ꠖꠥꠞꠁ ꠃꠛꠣꠁ ꠔꠣꠝꠡꠣ ꠖꠦꠈꠦ।
PSA 38:12 ꠀꠝꠣꠞꠦ ꠈꠥꠘ ꠇꠞꠣꠞ ꠝꠔꠟꠛ ꠎꠣꠞꠣꠞ ꠔꠣꠞꠣ ꠚꠣꠘ꠆ꠖ ꠙꠣꠔꠦ, ꠡꠞ꠆ꠛꠘꠣꠡ ꠌꠣꠄ ꠎꠣꠞꠣ ꠝꠞ ꠔꠣꠞꠣ ꠀꠝꠣꠞ ꠛꠤꠞꠥꠖ꠆ꠖꠦ ꠝꠣꠔꠦ। ꠍꠟ-ꠌꠔꠥꠞꠤꠞ ꠗꠣꠘ꠆ꠖꠣꠄ ꠔꠣꠞꠣ ꠢꠣꠞꠣ ꠖꠤꠘ ꠕꠣꠇꠦ।
PSA 38:13 ꠇꠣꠟꠥꠀꠞ ꠟꠣꠈꠣꠘ ꠔ ꠀꠝꠤ ꠇꠣꠘꠦ ꠇꠥꠘ꠆ꠔꠣ ꠢꠥꠘꠤ ꠘꠣ, ꠛꠥꠛꠣꠞ ꠟꠣꠈꠣꠘ ꠖꠡꠣ ꠀꠝꠣꠞ ꠝꠥꠈ ꠈꠥꠟꠤ ꠘꠣ।
PSA 38:14 ꠅꠟꠣꠘ ꠝꠣꠘꠥꠡ ꠅꠁꠍꠤ ꠀꠝꠤ ꠎꠦꠉꠥꠄ ꠇꠥꠘ꠆ꠔꠣ ꠢꠥꠘꠦ ꠘꠣ, ꠝꠥꠈꠦꠖꠤ ꠎꠣꠞ ꠇꠥꠘꠥ ꠍꠅꠀꠟꠞ ꠎꠥꠀꠙ ꠛꠣꠞ ꠅꠄ ꠘꠣ।
PSA 38:15 ꠝꠣꠛꠥꠖ ꠉ ꠛꠣꠞ ꠌꠣꠅꠀꠔ ꠀꠍꠤ ꠀꠝꠤ ꠔꠥꠝꠣꠞꠃ ꠀꠡꠣꠄ, ꠅꠉ ꠝꠣꠛꠥꠖ ꠄꠟꠣꠢꠤ ꠝꠞ ꠝꠤꠘꠔꠤꠞ ꠎꠥꠀꠙ ꠔꠥꠝꠤ ꠔ ꠖꠤꠛꠣꠄ।
PSA 38:16 ꠀꠝꠤ ꠔ ꠇꠁꠍꠤ, “ꠀꠝꠣꠞ ꠙꠣꠅ ꠙꠤꠍꠟꠤ ꠉꠦꠟꠦ, ꠀꠝꠣꠞꠦ ꠟꠁꠀ ꠔꠣꠞꠣ ꠎꠣꠘꠥ ꠛꠠꠣꠁ ꠇꠞꠔ ꠘꠣ ꠙꠣꠞꠦ।”
PSA 38:17 ꠙꠠꠤ ꠎꠣꠁꠀꠞ ꠙꠠꠤ ꠎꠣꠁꠀꠞ ꠀꠝꠣꠞ ꠢꠣꠟꠔ ꠅꠟꠣ, ꠀꠝꠣꠞ ꠌꠈꠥꠞ ꠍꠣꠝꠘꠦ ꠊꠥꠞꠦꠞ ꠈꠣꠟꠤ ꠖꠤꠟꠞ ꠎꠣꠟꠣ-ꠎꠘꠔ꠆ꠞꠘꠣ।
PSA 38:18 ꠀꠝꠣꠞ ꠢꠇꠟ ꠅꠙꠞꠣꠗ ꠀꠝꠤ ꠇꠞꠍꠤ ꠡ꠆ꠛꠤꠇꠣꠞ, ꠀꠝꠣꠞ ꠉꠥꠘꠣꠞ ꠛꠥꠏꠣ ꠟꠁꠀ ꠅꠡꠣꠘ꠆ꠔꠤ ꠇꠞꠤꠀꠞ।
PSA 38:19 ꠀꠝꠣꠞ ꠖꠥꠡꠝꠘ ꠅꠇꠟ ꠛꠃꠔ ꠔꠞꠔꠣꠎꠣ ꠛꠟꠛꠣꠘ, ꠔꠣꠞꠣ ꠛꠃꠔ ꠛꠤꠘꠣ ꠇꠣꠞꠘꠦ ꠝꠞꠦ ꠎꠣꠞꠣ ꠊꠤꠘ꠆ꠘꠣꠁꠘ।
PSA 38:20 ꠀꠝꠤ ꠔꠣꠞꠣꠞ ꠜꠣꠟꠣꠁ ꠇꠞꠟꠦ ꠔꠣꠞꠣ ꠇꠞꠦ ꠈꠦꠔꠤ, ꠔꠣꠞꠣ ꠝꠞꠦ ꠖꠥꠡꠤ ꠇꠄ ꠜꠣꠟꠣꠁꠞ ꠙꠕꠦ ꠌꠟꠤ ꠇꠞꠤ।
PSA 38:21 ꠅ ꠀꠝꠣꠞ ꠝꠣꠛꠥꠖ ꠀꠝꠣꠞꠦ ꠍꠣꠠꠤꠀ ꠎꠣꠁꠅ ꠘꠣ, ꠢꠞꠤꠀ ꠎꠣꠁꠅ ꠘꠣ ꠀꠝꠣ ꠕꠣꠇꠤ ꠅꠉ ꠀꠝꠣꠞ ꠀꠟ꠆ꠟꠣ।
PSA 38:22 ꠀꠝꠣꠞꠦ ꠡꠣꠁꠎ꠆ꠎ ꠇꠞꠣꠔ ꠎꠟꠖꠤ ꠀꠅ ꠔꠥꠝꠤ, ꠅ ꠀꠝꠣꠞ ꠝꠣꠛꠥꠖ ꠀꠝꠣꠞ ꠎꠣꠘ ꠛꠣꠌꠣꠘꠤꠞ ꠇꠣꠘ꠆ꠒꠣꠞꠤ॥
PSA 39:1 ꠄꠛꠣꠖꠔ-ꠛꠘ꠆ꠖꠦꠉꠤ ꠙꠞꠤꠌꠣꠟꠇ ꠎꠤꠖꠥꠔꠥꠘꠞ ꠟꠣꠉꠤ। ꠢꠎꠞꠔ ꠖꠣꠃꠖꠞ ꠝꠤꠎꠝꠞ। ꠀꠝꠤ ꠇꠁꠍꠤ, “ꠢꠥꠡꠤꠀꠞ ꠞꠁꠝꠥ ꠀꠝꠤ ꠌꠟꠣꠞ ꠙꠕꠞ ꠛꠦꠙꠣꠞꠦ, ꠉꠥꠘꠣ ꠕꠣꠇꠤ ꠢꠦꠚꠣꠎꠔ ꠇꠞꠝꠥ ꠀꠝꠣꠞ ꠎꠤꠚꠞꠣꠞꠦ, ꠘꠣꠚꠞꠝꠣꠘ ꠎꠔ ꠡꠝꠄ ꠞꠁꠛ ꠀꠝꠣꠞ ꠍꠣꠝꠘꠦ, ꠟꠣꠉꠣꠝ ꠟꠣꠉꠣꠁ ꠞꠣꠈꠝꠥ ꠔ ꠀꠝꠣꠞ ꠝꠥꠈꠞ ꠝꠣꠎꠦ।”
PSA 39:2 ꠎꠛꠣꠘ ꠛꠘ꠆ꠖ ꠇꠞꠤꠀ ꠀꠝꠤ ꠘꠤꠞꠣꠁ ꠞꠁꠟꠣꠝ, ꠜꠣꠟꠣ-ꠛꠥꠞꠣ ꠇꠥꠘꠥꠔꠣꠃ ꠘꠣ ꠝꠣꠔꠤꠟꠣꠝ, ꠄꠞꠟꠣꠉꠤ ꠝꠞ ꠝꠘꠞ ꠖꠥꠈ ꠞꠁꠟ ꠀꠞꠅ ꠛꠣꠠꠣꠔ।
PSA 39:3 ꠖꠤꠟꠞ ꠇꠡ꠆ꠐꠄ ꠌꠤꠘ꠆ꠔꠣ ꠇꠞꠣꠄ ꠀꠉꠥꠁꠘ ꠟꠣꠉꠟ ꠛꠥꠇꠅ, ꠔꠦꠃ ꠎꠤꠚꠞꠣꠖꠤ ꠇꠁꠟꠣꠝ, “ꠀꠝꠤ ꠇꠤꠔꠣ ꠇꠞꠔꠣꠝ ꠉ,
PSA 39:4 ꠀꠝꠣꠞꠦ ꠎꠣꠘꠣꠅ ꠉ ꠝꠣꠛꠥꠖ ꠀꠝꠣꠞ ꠖꠡꠣ ꠅꠁꠛ ꠇꠤꠔꠣ? ꠇꠔꠖꠤꠘ ꠛꠣꠌꠤꠝꠥ ꠀꠝꠤ ꠡꠣꠋꠉ ꠅꠁꠛ ꠀꠄꠃ ꠇꠤꠟꠣ?”
PSA 39:5 ꠄꠇ ꠝꠥꠁꠐ ꠇꠞꠍ ꠔꠥꠝꠤ ꠝꠞ ꠢꠣꠄꠀꠔꠤ, ꠔꠥꠝꠣꠞ ꠍꠣꠝꠘꠦ ꠡꠥꠁꠘ꠆ꠘ ꠎꠣꠘꠥ ꠝꠞ ꠎꠤꠘ꠆ꠖꠦꠉꠤ, ꠖꠥꠘꠤꠀꠞ ꠙꠞꠔꠦꠇ ꠝꠣꠘꠥꠡ ꠅꠁꠟ ꠄꠇꠐꠣ ꠘꠤꠡ꠆ꠛꠣꠡ ꠈꠣꠟꠤ। (ꠍꠦꠟꠣ)
PSA 39:6 ꠍꠣꠄꠀꠞ ꠝꠔ ꠇꠞꠤ ꠝꠣꠘꠥꠡ ꠇꠞꠦ ꠀꠅꠀ-ꠎꠣꠅꠀ, ꠛꠦꠇꠣꠝꠣ ꠙꠦꠞꠦꠡꠣꠘꠤ ꠇꠞꠦ ꠗꠘ-ꠖꠃꠟꠔꠞ ꠟꠣꠉꠤꠀ, ꠅꠁꠟꠦ ꠁꠔꠣ ꠇꠦ ꠈꠣꠁꠛ ꠁꠈꠣꠘ ꠎꠣꠘꠦ ꠘꠣ।
PSA 39:7 ꠝꠣꠛꠥꠖ ꠉ, ꠇꠤꠔꠣꠞ ꠀꠡꠣꠄ ꠞꠁꠔꠣꠝ ꠀꠝꠤ ꠅꠙꠦꠇ꠆ꠇꠣꠔ? ꠀꠝꠣꠞ ꠢꠇꠟ ꠀꠡꠣ ꠔ ꠔꠥꠝꠣꠞꠦ ꠙꠣꠅꠀꠔ।
PSA 39:8 ꠇꠞꠅ ꠉ ꠃꠖ꠆ꠖꠣꠞ ꠝꠞꠦ ꠢꠇꠟ ꠅꠘ꠆ꠘꠣꠄ ꠕꠣꠇꠤ, ꠛꠦꠀꠈꠟꠞ ꠀꠔꠅ ꠇꠞꠤꠅ ꠘꠣ ꠝꠞꠦ ꠛꠦꠁꠎ꠆ꠎꠔꠤ।
PSA 39:9 ꠝꠥꠈ ꠈꠥꠟꠍꠤ ꠘꠣ ꠀꠝꠤ ꠞꠁꠍꠤ ꠘꠤꠞꠣꠁ, ꠁꠔꠣ ꠇꠡ꠆ꠐ ꠔ ꠅꠁꠍꠦ ꠝꠞ ꠔꠥꠝꠣꠞ ꠁꠡꠣꠞꠣꠄ।
PSA 39:10 ꠔꠥꠝꠣꠞ ꠡꠣꠡ꠆ꠔꠤ ꠢꠞꠣꠁꠟꠣꠅ ꠀꠝꠣꠞ ꠃꠙꠞ ꠕꠣꠇꠤ, ꠔꠥꠝꠣꠞ ꠀꠔꠞ ꠀꠊꠣꠔ ꠈꠣꠁꠀ ꠝꠥꠁ ꠡꠦꠡ ꠅꠁꠉꠦꠍꠤ।
PSA 39:11 ꠉꠥꠘꠣꠞ ꠖꠣꠄꠄ ꠗꠣꠝꠇꠤ ꠖꠤꠀ ꠎꠦꠛꠟꠣ ꠝꠣꠘꠡꠞꠦ ꠡꠋꠡꠥꠗꠘ ꠇꠞꠅ ꠔꠥꠝꠤ, ꠔꠣꠞꠣꠞ ꠝꠣꠄꠀꠞ ꠗꠘ ꠙꠥꠇꠞ ꠟꠣꠈꠣꠘ ꠖꠦꠅ ꠘꠡ꠆ꠐ ꠇꠞꠤ, ꠝꠣꠘꠥꠡ ꠔ ꠅꠁꠟ ꠄꠇꠐꠣ ꠘꠤꠡ꠆ꠛꠣꠡ ꠈꠣꠟꠤ। (ꠍꠦꠟꠣ)
PSA 39:12 ꠀꠝꠣꠞ ꠚꠞꠤꠀꠖ ꠝꠣꠛꠥꠖ ꠔꠥꠝꠤ ꠢꠥꠘꠅ, ꠇꠣꠘ ꠖꠦꠅ ꠔꠥꠝꠤ ꠝꠞ ꠇꠣꠘ꠆ꠖꠘꠅ, ꠖꠦꠈꠤꠀ ꠝꠞ ꠇꠣꠘ꠆ꠖꠘ ꠘꠤꠞꠣꠁ ꠞꠁꠅ ꠘꠣ ꠔꠥꠝꠤ, ꠔꠥꠝꠣꠞ ꠊꠞꠅ ꠔ ꠀꠝꠤ ꠛꠤꠖꠦꠡꠤ, ꠀꠝꠣꠞ ꠛꠣꠚ-ꠖꠣꠖꠣꠞ ꠟꠣꠈꠣꠘ ꠀꠝꠤꠅ ꠙ꠆ꠞꠛꠣꠡꠤ।
PSA 39:13 ꠇꠠꠣ ꠘꠎꠞ ꠢꠞꠣꠁꠟꠣꠅ ꠔꠥꠝꠣꠞ ꠀꠝꠣꠞ ꠃꠙꠞ ꠕꠣꠇꠤ, ꠎꠣꠁꠛꠣꠞ ꠀꠉꠦ, ꠡꠦꠡ ꠅꠁꠛꠣꠞ ꠀꠉꠦ ꠀꠝꠤ, ꠢꠤꠞꠛꠣꠞ ꠎꠣꠘꠥ ꠝꠥꠁ ꠈꠥꠡꠤ ꠅꠁꠔꠣꠝ ꠙꠣꠞꠤ॥
PSA 40:1 ꠄꠛꠣꠖꠔ-ꠛꠘ꠆ꠖꠦꠉꠤ ꠙꠞꠤꠌꠣꠟꠇꠞ ꠟꠣꠉꠤ: ꠢꠎꠞꠔ ꠖꠣꠃꠖꠞ ꠝꠤꠎꠝꠞ। ꠍꠛꠞ ꠇꠞꠤꠀ ꠌꠣꠁ ꠞꠁꠍꠟꠣꠝ ꠀꠝꠣꠞ ꠀꠟ꠆ꠟꠣꠞ ꠟꠣꠉꠤ, ꠈꠤꠀꠟ ꠇꠞꠤ ꠔꠣꠁꠘ ꠎꠥꠀꠙ ꠖꠤꠟꠣ ꠀꠝꠣꠞ ꠚꠞꠤꠀꠖ ꠢꠥꠘꠤ।
PSA 40:2 ꠉꠟꠣꠁꠝꠣ ꠉꠣꠠꠣ ꠕꠣꠇꠤ ꠔꠥꠟꠤꠀ ꠀꠘꠟꠣ ꠝꠞꠦ, ꠚꠦꠇꠞ ꠉꠣꠔꠞ ꠝꠞꠘ ꠖꠡꠣꠔ ꠛꠣꠌꠣꠁꠟꠣ ꠀꠝꠣꠞꠦ। ꠀꠝꠣꠞ ꠙꠣꠅꠞꠦ ꠜꠞ ꠖꠦꠅꠀꠁꠟꠣ ꠙꠣꠔ꠆ꠔꠞꠞ ꠃꠙꠞ, ꠡꠇ꠆ꠔ ꠝꠣꠐꠤꠔ ꠑꠣꠁ ꠎꠥꠉꠣꠁꠟꠣ ꠀꠝꠣꠞ ꠖꠥꠁ ꠙꠣꠅꠞ।
PSA 40:3 ꠎꠥꠉꠣꠁ ꠖꠤꠟꠣ ꠀꠝꠣꠞ ꠝꠥꠈꠅ ꠘꠄꠀ ꠉꠎꠟ ꠔꠣꠘ, ꠅꠈꠘ ꠀꠝꠤ ꠉꠣꠁ ꠀꠝꠣꠞ ꠀꠟ꠆ꠟꠣꠞ ꠉꠥꠘꠉꠣꠘ। ꠖꠦꠈꠛ ꠁꠔꠣ ꠛꠃꠔ ꠎꠘꠦ, ꠖꠦꠈꠤꠀ ꠒꠞꠣꠁꠛ, ꠔꠦꠃ ꠔꠣꠞꠣ ꠀꠟ꠆ꠟꠣꠞ ꠃꠙꠞꠦ ꠁꠝꠣꠘ ꠀꠘꠤꠛ।
PSA 40:4 ꠗꠁꠘ꠆ꠘ ꠈꠣꠟꠤ ꠢꠃ ꠛꠘ꠆ꠖꠣ, ꠝꠣꠛꠥꠖꠃ ꠎꠣꠞ ꠑꠤꠇꠣꠘꠣ, ꠜꠥꠟ ꠙꠕꠦ ꠉꠤꠀ ꠎꠦꠔꠣꠄ ꠇꠞꠦ ꠛꠠꠣꠁ-ꠉꠞꠤꠝꠣ, ꠁꠔꠣꠞ ꠛꠣꠄꠖꠤ ꠢꠦ ꠔ ꠚꠤꠞꠤꠀꠅ ꠌꠣꠄ ꠘꠣ।
PSA 40:5 ꠅꠉ ꠀꠝꠣꠞ ꠝꠣꠛꠥꠖ ꠀꠟ꠆ꠟꠣ ꠉꠘꠤꠀ ꠚꠥꠠꠣꠁꠟ ꠎꠣꠁꠔ ꠘꠣꠄ, ꠔꠥꠝꠣꠞ ꠇꠥꠖꠞꠔꠤ ꠇꠣꠝꠞ ꠢꠤꠡꠣꠛ ꠀꠞꠅ ꠘꠣꠘꠣꠘ ꠌꠤꠘ꠆ꠔꠣ-ꠃꠙꠣꠄ, ꠎꠣꠘꠣꠁꠀ ꠛꠣ ꠇꠁꠀ ꠀꠝꠤ ꠚꠥꠠꠣꠘꠤꠞ ꠡꠣꠁꠖ꠆ꠖ ꠘꠣꠁ, ꠔꠥꠝꠣꠞ ꠔꠥꠟ꠆ꠟ ꠇꠦ ꠀꠍꠦ, ꠇꠦꠃ ꠘꠣꠁ ꠇꠦꠃ ꠘꠣꠁ।
PSA 40:6 ꠇꠥꠞꠛꠣꠘꠤ ꠀꠞ ꠟꠤꠟ꠆ꠟꠣ-ꠍꠖꠉꠣꠄ ꠈꠥꠡꠤ ꠅꠅ ꠘꠣ ꠔꠥꠝꠤ, ꠈꠥꠡꠤ ꠅꠅ ꠘꠣ ꠔꠥꠝꠤ ꠉ, ꠈꠥꠡꠤ ꠅꠅ ꠘꠣ ꠔꠥꠝꠤ, ꠌꠣꠅ ꠘꠣ ꠔꠥꠝꠤ ꠎꠣꠟꠣꠁꠟ ꠇꠤꠛꠣ ꠇꠚꠞꠣꠞ ꠙꠡꠥ ꠇꠥꠞꠛꠣꠘꠤ, ꠢꠥꠘꠣꠞ ꠟꠣꠈ ꠖꠥꠁ ꠇꠣꠘ ꠖꠤꠍ ꠝꠞꠦ ꠢꠥꠘꠤꠀ ꠎꠣꠘꠥ ꠝꠣꠘꠤ।
PSA 40:7 ꠔꠦꠃ ꠀꠝꠤ ꠇꠁꠟꠣꠝ ꠀꠟ꠆ꠟꠣ, ꠀꠁꠍꠤ ꠀꠝꠤ ꠅꠘꠅ, ꠟꠦꠈꠣ ꠀꠍꠦ ꠀꠝꠣꠞ ꠛꠦꠀꠙꠣꠞ ꠎꠦꠟꠣ ꠇꠤꠔꠣꠛꠅ,
PSA 40:8 ꠅꠉ ꠀꠝꠣꠞ ꠀꠟ꠆ꠟꠣ, ꠀꠝꠤ ꠈꠥꠡꠤ ꠔꠥꠝꠣꠞ ꠝꠞ꠆ꠎꠤ ꠙꠥꠞꠘꠦ, ꠢꠇ꠆ꠇꠟ ꠢꠥꠇꠥꠝ ꠉꠣꠕꠣ ꠀꠝꠣꠞ ꠖꠤꠟꠞ ꠜꠤꠔꠞꠦ।
PSA 40:9 ꠝꠢꠣ ꠎꠘ-ꠡꠝꠣꠛꠦꠡꠅ ꠀꠝꠤ ꠎꠣꠘꠣꠁꠍꠤ, ꠔꠥꠝꠣꠞ ꠢꠇꠟ ꠢꠇ꠆ꠇꠣꠘꠤ ꠇꠣꠝꠞ ꠈꠥꠡ-ꠈꠛꠞꠤ, ꠀꠝꠣꠞ ꠀꠅꠀꠎ ꠛꠘ꠆ꠖ ꠇꠞꠤ ꠘꠣ ꠁꠔꠣ ꠔ ꠎꠣꠘ, ꠔꠥꠝꠤ ꠡ꠆ꠛꠄꠅꠋ ꠡꠣꠇ꠆ꠇꠤ ꠀꠝꠣꠞ, ꠅ ꠝꠣꠛꠥꠖ ꠉ।
PSA 40:10 ꠟꠥꠇꠣꠁꠀ ꠞꠣꠈꠍꠤ ꠘꠣ ꠝꠞ ꠖꠤꠟꠞ ꠜꠤꠔꠞ, ꠔꠥꠝꠤ ꠎꠦ ꠡꠑꠤꠇ ꠢꠇ꠆ꠇꠣꠘꠤ ꠎꠣꠘꠣꠁꠍꠤ ꠈꠛꠞ, ꠔꠥꠝꠣꠞ ꠖꠦꠅꠀ ꠘꠣꠎꠣꠔ ꠀꠞ ꠢꠇ-ꠢꠣꠟꠣꠟꠤ ꠇꠁꠍꠤ ꠢꠇꠟꠞꠦ, ꠖꠄꠀ-ꠝꠣꠄꠀ ꠀꠞ ꠢꠇ ꠔꠥꠝꠤ ꠎꠣꠘꠣꠁꠍꠤ ꠝꠢꠣ ꠡꠝꠣꠛꠦꠡꠦ।
PSA 40:11 ꠅ ꠝꠣꠛꠥꠖ! ꠛꠘ꠆ꠖ ꠇꠞꠤꠅ ꠘꠣ ꠝꠞ ꠟꠣꠉꠤ ꠔꠥꠝꠣꠞ ꠞꠢꠝꠔꠞ ꠖꠥꠀꠞ, ꠔꠥꠝꠣꠞ ꠖꠄꠀ ꠀꠞ ꠢꠇ ꠅꠃꠇ ꠝꠞ ꠌꠤꠞꠇꠣꠟꠞ ꠇꠣꠘ꠆ꠒꠣꠞ।
PSA 40:12 ꠖꠦꠈꠞꠣꠄ ꠘꠤ! ꠢꠤꠡꠣꠛ ꠍꠣꠠꠣ ꠝꠍꠤꠛꠔꠦ ꠛꠦꠞꠤꠟꠤꠍꠦ ꠝꠞꠦ, ꠙꠦꠌꠣꠁꠟꠤꠍꠦ ꠀꠁꠀ ꠀꠝꠣꠞ ꠢꠇꠟ ꠅꠙꠞꠣꠗꠦ, ꠖꠦꠈꠤꠀꠞ ꠘꠣ ꠇꠥꠘ꠆ꠔꠣ ꠀꠝꠤ ꠀꠝꠣꠞ ꠌꠃꠈꠦꠖꠤ, ꠀꠝꠣꠞ ꠝꠣꠕꠣꠞ ꠌꠥꠟ ꠕꠣꠇꠤꠅ ꠁꠔꠣ ꠔ ꠛꠦꠡꠤ, ꠝꠞ ꠙꠤꠘ꠆ꠎꠤꠞꠣꠞ ꠝꠘ ꠝꠄꠘꠣꠅ ꠍꠣꠠꠤꠀ ꠉꠦꠍꠂꠘꠉꠤ।
PSA 40:13 ꠅ ꠀꠟ꠆ꠟꠣ, ꠔꠥꠝꠣꠞ ꠖꠥꠢꠣꠁ ꠖꠤꠀꠞ ꠀꠝꠣꠞ ꠎꠣꠘ ꠛꠣꠌꠣꠅ, ꠝꠣꠛꠥꠖ ꠉ, ꠀꠝꠣꠞꠦ ꠡꠣꠁꠎ꠆ꠎ ꠇꠞꠣꠔ ꠎꠟꠖꠤ ꠀꠅ।
PSA 40:14 ꠀꠝꠣꠞ ꠎꠣꠘꠞꠦ ꠎꠦꠔꠣꠄ ꠘꠤꠔꠣ ꠌꠣꠁꠞꠣ ꠇꠣꠠꠤꠀ, ꠘꠤꠌꠣ ꠅꠃꠇ ꠔꠣꠞꠣꠞ ꠝꠣꠕꠣ ꠡꠞꠝꠤꠘ꠆ꠖꠣ ꠛꠘꠤꠀ, ꠀꠝꠣꠞ ꠈꠦꠔꠤ ꠅꠁꠟꠦ ꠎꠦꠔꠣꠄ ꠇꠞꠛꠣ ꠈꠥꠡꠤ, ꠛꠦꠁꠎ꠆ꠎꠔ ꠛꠘꠤꠀ ꠔꠣꠞꠣ ꠜꠣꠉꠤ ꠎꠣꠃꠇ ꠈꠞꠦꠖꠤ।
PSA 40:15 ꠀꠝꠣꠞ ꠈꠦꠔꠤꠄ ꠎꠦꠔꠣꠄ ꠇꠁꠘ, ꠅꠁꠍꠦꠞꠦ ꠅꠁꠍꠦ, ꠝꠥꠈ ꠟꠥꠇꠣꠁꠀ ꠢꠞꠃꠇ ꠅꠔꠣ ꠘꠤꠎꠞ ꠟꠣꠎ-ꠡꠞꠝꠦ।
PSA 40:16 ꠅꠁꠟꠦ ꠈꠥꠡꠤ-ꠛꠣꠡꠤ ꠇꠞꠃꠇ ꠔꠥꠝꠣꠞ ꠀꠡꠤꠇ ꠛꠘ꠆ꠖꠣꠞ ꠖꠟꠦ, ꠔꠥꠝꠣꠞ ꠖꠦꠈꠣꠁꠟ ꠛꠣꠌꠣꠞ ꠙꠕ ꠜꠣꠟꠣ ꠙꠣꠁꠘ ꠎꠦꠔꠣ ꠎꠘꠦ, ꠢꠞ-ꠢꠣꠝꠦꠡꠣ ꠎꠙꠤ ꠎꠙꠤ ꠚꠥꠞ꠆ꠔꠤ ꠇꠞꠃꠇ ꠔꠣꠞꠣ, ꠔꠥꠝꠤꠃ ꠝꠢꠣꠘ ꠝꠃꠟꠣ, ꠔꠥꠝꠤꠃ ꠝꠢꠣꠘ ꠀꠟ꠆ꠟꠣ!
PSA 40:17 ꠖꠥꠈꠤ ꠇꠣꠋꠉꠣꠟ ꠎꠘ ꠔ ꠀꠝꠤ ꠛꠠꠁ ꠅꠜꠣꠛꠤ, ꠀꠝꠣꠞ ꠟꠣꠉꠤ ꠔ ꠌꠤꠘ꠆ꠔꠣ ꠇꠞꠂꠘ ꠝꠣꠛꠥꠖ ꠄꠟꠣꠢꠤ। ꠔꠥꠝꠤꠃ ꠝꠞ ꠡꠣꠁꠎ꠆ꠎꠇꠣꠞꠤ ꠎꠣꠘ ꠛꠣꠌꠣꠘꠤꠞ ꠑꠤꠇꠣꠘꠣ, ꠀꠝꠣꠞꠦ ꠛꠣꠌꠣꠅ ꠉ ꠝꠣꠟꠤꠇ ꠖꠦꠞꠤ ꠇꠞꠤꠅ ꠘꠣ॥
PSA 41:1 ꠄꠛꠣꠖꠔ-ꠛꠘ꠆ꠖꠦꠉꠤ ꠙꠞꠤꠌꠣꠟꠇꠞ ꠟꠣꠉꠤ: ꠢꠎꠞꠔ ꠖꠣꠃꠖꠞ ꠝꠤꠎꠝꠞ। ꠢꠃ ꠝꠣꠘꠥꠡ ꠗꠁꠘ꠆ꠘ, ꠖꠥꠈꠤ-ꠇꠣꠋꠉꠣꠟꠞ ꠇꠕꠣ ꠌꠤꠘ꠆ꠔꠣ ꠇꠞꠦ ꠎꠦ, ꠝꠍꠤꠛꠔꠞ ꠖꠤꠘꠅ ꠝꠣꠛꠥꠖꠦ ꠘꠤꠌ꠆ꠌꠤꠔ ꠃꠖ꠆ꠖꠣꠞ ꠇꠞꠛꠣ ꠔꠣꠞꠦ।
PSA 41:2 ꠝꠣꠛꠥꠖꠦ ꠔꠣꠞꠦ ꠞꠇ꠆ꠇꠣ ꠇꠞꠤꠀ ꠞꠣꠈꠛꠣ ꠛꠣꠌꠣꠁꠀ, ꠖꠦꠡꠞ ꠝꠣꠘꠡꠦ ꠔꠣꠞꠦ ꠡꠥꠇꠤꠟꠣ ꠝꠣꠘꠥꠡ ꠇꠁꠛꠣ, ꠖꠥꠡꠝꠘꠞ ꠀꠔꠅ ꠝꠣꠛꠥꠖꠦ ꠔꠣꠞꠦ ꠡꠙꠤꠀ ꠘꠣ ꠖꠤꠛꠣ।
PSA 41:3 ꠛꠦꠝꠣꠞꠦ ꠛꠤꠍꠘꠣꠔ ꠙꠠꠤ ꠉꠦꠟꠦ ꠝꠣꠛꠥꠖꠦ ꠔꠣꠞ ꠀꠍꠣꠘ ꠇꠞꠂꠘ, ꠡꠤꠚꠣ ꠇꠞꠤꠀ ꠛꠤꠍꠘꠣ ꠕꠣꠇꠤ ꠔꠣꠞꠦ ꠔꠥꠟꠤꠀ ꠀꠘꠂꠘ।
PSA 41:4 ꠀꠝꠤ ꠇꠁꠍꠤ, “ꠀꠝꠤ ꠔ ꠇꠞꠍꠤ ꠔꠥꠝꠣꠞ ꠛꠤꠞꠥꠖ꠆ꠖꠦ ꠉꠥꠘꠣ, ꠅꠉ ꠝꠣꠛꠥꠖ, ꠖꠄꠀ ꠇꠞꠤꠀ ꠇꠞꠅ ꠝꠞꠦ ꠡꠤꠚꠣ।”
PSA 41:5 ꠀꠝꠣꠞ ꠈꠦꠔꠤ ꠌꠣꠁꠀ ꠖꠥꠡꠝꠘꠦ ꠇꠄ, “ꠅꠉꠥ ꠇꠥꠘ ꠡꠝꠄ ꠝꠞꠛ? ꠇꠥꠘ ꠡꠝꠄ ꠔꠣꠞ ꠘꠣꠝ-ꠘꠤꠡꠣꠘꠣ ꠎꠝꠤꠘ ꠕꠣꠇꠤ ꠝꠥꠍꠤ ꠎꠤꠛ?”
PSA 41:6 ꠔꠣꠞꠣ ꠝꠞꠦ ꠖꠦꠈꠣꠔ ꠀꠁꠟꠦ ꠜꠣꠅꠔꠣꠛꠣꠎꠤ ꠝꠣꠔꠦ, ꠔꠣꠞꠣꠞ ꠝꠘꠅ ꠎꠝꠣꠁꠟ ꠛꠖꠘꠣꠝ ꠞꠐꠣꠄ ꠉꠤꠀ ꠛꠣꠞꠦ।
PSA 41:7 ꠀꠝꠣꠞ ꠛꠤꠞꠥꠗꠤ ꠅꠇꠟ ꠝꠤꠟꠤꠀ ꠇꠣꠘꠣ-ꠇꠣꠘꠤ ꠇꠞꠦ, ꠀꠝꠣꠞ ꠈꠦꠔꠤ ꠇꠞꠔ ꠇꠤꠟꠣ ꠅꠃ ꠗꠣꠘ꠆ꠖꠣꠄ ꠕꠣꠇꠦ।
PSA 41:8 ꠇꠄ ꠔꠣꠞꠣ, “ꠛꠃꠔ ꠛꠠ ꠈꠣꠞꠣꠙꠤꠄ ꠔꠣꠞꠦ ꠎꠣꠔꠤꠀ ꠗꠞꠍꠦ, ꠃꠑꠤꠔ ꠙꠣꠞꠔ ꠘꠣꠄ ꠀꠞ ꠎꠦꠈꠣꠘꠅ ꠢꠦ ꠢꠥꠔꠣꠁꠟ ꠀꠍꠦ।”
PSA 41:9 ꠄꠇ ꠕꠣꠟꠅ ꠛꠁꠀ ꠎꠦꠉꠤꠄ ꠈꠣꠁꠔ, ꠜꠞꠡꠣ ꠇꠞꠔꠣꠝ ꠎꠣꠞ ꠃꠙꠞꠦ, ꠅꠈꠘ ꠅꠃ ꠝꠣꠄꠀꠞ ꠖꠥꠡ꠆ꠔꠦꠅ ꠀꠝꠣꠞ ꠛꠤꠞꠥꠖ꠆ꠖꠦ ꠟꠣꠉꠤꠉꠦꠍꠦ।
PSA 41:10 ꠅꠉ ꠝꠣꠛꠥꠖ ꠞꠢꠝ ꠇꠞꠅ ꠔꠥꠝꠤ ꠘꠤꠎꠦ ꠝꠞꠦ, ꠔꠣꠞꠣꠞ ꠛꠖꠟꠣ ꠘꠤꠛꠣꠞ ꠟꠣꠉꠤ ꠔꠥꠟꠤꠟꠣꠅ ꠀꠝꠣꠞꠦ।
PSA 41:11 ꠀꠝꠣꠞ ꠃꠙꠞꠦ ꠈꠥꠡꠤ ꠔꠥꠝꠤ ꠁꠈꠣꠘ ꠀꠝꠤ ꠎꠣꠘꠤ, ꠖꠥꠡꠝꠘꠦ ꠔ ꠝꠞ ꠛꠤꠞꠥꠖ꠆ꠖꠦ ꠌꠤꠟ꠆ꠟꠣꠄ ꠘꠣ ꠀꠞ ꠎꠄꠅꠞ ꠌꠤꠟ꠆ꠟꠣꠘꠤ।
PSA 41:12 ꠔꠥꠝꠤ ꠗꠞꠤꠀ ꠞꠣꠈꠍ ꠝꠞꠦ ꠢꠇ-ꠢꠣꠟꠣꠟ ꠖꠦꠈꠤꠀ, ꠔꠥꠝꠣꠞ ꠖꠤꠖꠣꠞꠅ ꠎꠣꠉꠣ ꠖꠤꠍ ꠌꠤꠞꠇꠣꠟꠞ ꠟꠣꠉꠤꠀ।
PSA 41:13 ꠢꠇ꠆ꠇꠟ ꠙ꠆ꠞꠡꠋꠡꠣ ꠛꠘꠤ ꠁꠍꠞꠣꠁꠟꠞ ꠝꠣꠛꠥꠖ ꠀꠟ꠆ꠟꠣꠞ ꠅꠃꠇ, ꠡꠥꠞꠥ ꠕꠣꠇꠤ ꠀꠈꠦꠞ ꠙꠞ꠆ꠎꠘ꠆ꠔ ꠌꠤꠞꠇꠣꠟ ꠎꠣꠞꠤ ꠞꠃꠇ। ꠀꠝꠤꠘ ꠍꠥꠝ꠆ꠝꠣ-ꠀꠝꠤꠘ॥
PSA 70:1 ꠄꠛꠣꠖꠔ-ꠛꠘ꠆ꠖꠦꠉꠤ ꠙꠞꠤꠌꠣꠟꠇꠞ ꠟꠣꠉꠤ: ꠢꠎꠞꠔ ꠖꠣꠃꠖꠞ ꠁꠀꠖꠉꠣꠞꠤꠞ ꠝꠤꠎꠝꠞ। ꠅ ꠀꠟ꠆ꠟꠣ, ꠔꠥꠝꠣꠞ ꠖꠥꠀꠁ ꠖꠤꠀꠞ ꠀꠝꠣꠞ ꠎꠣꠘ ꠛꠣꠌꠣꠅ, ꠝꠣꠛꠥꠖ ꠉ, ꠀꠝꠣꠞꠦ ꠡꠣꠁꠎ꠆ꠎ ꠇꠞꠣꠔ ꠎꠟꠖꠤ ꠀꠅ।
PSA 70:2 ꠀꠝꠣꠞ ꠎꠣꠘꠞꠦ ꠎꠦꠔꠣꠄ ꠘꠤꠔꠣ ꠌꠣꠁꠞꠣ, ꠘꠤꠌꠣ ꠅꠃꠇ ꠔꠣꠞꠣꠞ ꠝꠣꠕꠣ ꠡꠞꠝꠤꠘ꠆ꠖꠣ ꠛꠘꠤꠀ, ꠀꠝꠣꠞ ꠈꠦꠔꠤ ꠅꠁꠟꠦ ꠎꠦꠔꠣꠄ ꠇꠞꠛꠣ ꠈꠥꠡꠤ, ꠛꠦꠁꠎ꠆ꠎꠔ ꠛꠘꠤꠀ ꠔꠣꠞꠣ ꠜꠣꠉꠤ ꠎꠣꠃꠇ ꠈꠞꠦꠖꠤ।
PSA 70:3 ꠀꠝꠣꠞ ꠈꠦꠔꠤꠄ ꠎꠦꠔꠣꠄ ꠇꠂꠘ, ꠅꠁꠍꠦꠞꠦ ꠅꠁꠍꠦ, ꠝꠥꠈ ꠟꠥꠇꠣꠁꠀ ꠢꠞꠃꠇ ꠅꠔꠣ ꠘꠤꠎꠞ ꠟꠣꠎ-ꠡꠞꠝꠦ।
PSA 70:4 ꠅꠁꠟꠦ ꠈꠥꠡꠤ-ꠛꠣꠡꠤ ꠇꠞꠃꠇ ꠔꠥꠝꠣꠞ ꠀꠡꠤꠇ ꠛꠘ꠆ꠖꠣꠞ ꠖꠟꠦ, ꠔꠥꠝꠣꠞ ꠖꠦꠈꠣꠁꠟ ꠛꠣꠌꠣꠞ ꠙꠕ ꠜꠣꠟꠣ ꠙꠣꠁꠘ ꠎꠦꠔꠣ ꠎꠘꠦ, ꠢꠞ-ꠢꠣꠝꠦꠡꠣ ꠎꠙꠤ ꠎꠙꠤ ꠚꠥꠞ꠆ꠔꠤ ꠇꠞꠃꠇ ꠔꠣꠞꠣ, ꠔꠥꠝꠤꠃ ꠝꠢꠣꠘ ꠝꠃꠟꠣ, ꠔꠥꠝꠤꠃ ꠝꠢꠣꠘ ꠀꠟ꠆ꠟꠣ!
PSA 70:5 ꠖꠥꠈꠤ ꠇꠣꠋꠉꠣꠟ ꠎꠘ ꠔ ꠀꠝꠤ ꠛꠠꠁ ꠅꠜꠣꠛꠤ, ꠀꠝꠣꠞ ꠇꠣꠍꠣꠔ ꠎꠟꠖꠤ ꠀꠅ ꠝꠣꠛꠥꠖ ꠄꠟꠣꠢꠤ। ꠔꠥꠝꠤꠃ ꠝꠞ ꠡꠣꠁꠎ꠆ꠎꠇꠣꠞꠤ ꠎꠣꠘ ꠛꠣꠌꠣꠘꠤꠞ ꠑꠤꠇꠣꠘꠣ, ꠀꠝꠣꠞꠦ ꠛꠣꠌꠣꠅ ꠉ ꠝꠣꠟꠤꠇ ꠖꠦꠞꠤ ꠇꠞꠤꠅ ꠘꠣ॥
PSA 95:1 ꠀꠅ ꠀꠝꠞꠣ ꠈꠥꠡꠤꠞ ꠉꠎꠟ ꠉꠣꠁ ꠝꠣꠛꠥꠖꠞ ꠘꠣꠝꠦ, ꠞꠇ꠆ꠇꠣꠇꠣꠞꠤ ꠐꠤꠟ꠆ꠟꠣ ꠔꠣꠁꠘ, ꠚꠥꠞ꠆ꠔꠤ ꠇꠞꠤ ꠎꠥꠞꠦ ꠎꠥꠞꠦ।
PSA 95:2 ꠌꠟꠅ ꠀꠝꠞꠣ ꠡꠥꠇꠥꠞ-ꠉꠥꠎꠣꠞ ꠇꠞꠤ ꠇꠞꠤ ꠔꠣꠘ ꠍꠣꠝꠘꠦ ꠎꠣꠁ, ꠛꠣꠎꠘꠣꠞ ꠔꠣꠟꠦ ꠔꠣꠟꠦ ꠔꠣꠘ ꠘꠣꠝꠦ ꠎꠥꠞꠦ-ꠡꠥꠞꠦ ꠉꠣꠁ।
PSA 95:3 ꠝꠣꠛꠥꠖꠃ ꠔ ꠃꠙꠞꠀꠟꠣ, ꠡꠞ꠆ꠛ ꠝꠢꠣꠘ ꠀꠟ꠆ꠟꠣꠔꠣꠟꠣ, ꠖꠥꠁ ꠎꠣꠢꠣꠘꠞ ꠛꠟ-ꠡꠇ꠆ꠔꠤꠞ ꠔꠣꠁꠘꠃ ꠛꠠ ꠛꠣꠖꠡꠣ।
PSA 95:4 ꠎꠝꠤꠘ ꠀꠞ ꠙꠣꠔꠣꠟ ꠡꠛꠃ ꠔꠣꠘ ꠀꠔꠅ, ꠙꠣꠠ-ꠙꠞꠛꠔꠞ ꠃꠌꠣ ꠐꠤꠟ꠆ꠟꠣꠅ ꠔꠣꠘꠃ ꠔ।
PSA 95:5 ꠔꠣꠁꠘꠃ ꠖꠞꠤꠀꠞ ꠝꠣꠟꠤꠇ ꠛꠣꠘꠣꠁꠍꠂꠘ ꠁꠔꠣ, ꠢꠥꠇꠘꠣ ꠎꠝꠤꠘꠅ ꠔꠣꠘ ꠖꠥꠁꠅ ꠀꠔꠦ ꠉꠠꠣ।
PSA 95:6 ꠀꠅ ꠀꠝꠞꠣ ꠍꠁꠎꠖꠣ ꠖꠤꠀ ꠔꠣꠘ ꠄꠛꠣꠖꠔ ꠇꠞꠤ, ꠀꠝꠞꠣꠞꠦ ꠙꠄꠖꠣꠇꠣꠞꠤ ꠝꠣꠛꠥꠖꠞ ꠍꠣꠝꠘꠦ ꠘꠔꠎꠣꠘꠥ ꠛꠘꠤ।
PSA 95:7 ꠔꠣꠁꠘꠃ ꠔ ꠀꠝꠞꠣꠞ ꠀꠟ꠆ꠟꠣꠔꠣꠟꠣ, ꠀꠝꠞꠣ ꠔꠣꠘ ꠝꠦꠠꠣꠞ ꠙꠣꠟ, ꠔꠣꠘ ꠎꠝꠤꠘꠞ ꠛꠘ꠆ꠖꠣ। ꠀꠢ! ꠔꠣꠘ ꠉꠟꠣꠞ ꠀꠅꠀꠎ ꠎꠥꠖꠤ ꠢꠥꠘꠔꠣꠄ ꠔꠥꠝꠞꠣ!
PSA 95:8 ꠖꠤꠟꠞꠦ ꠙꠣꠡꠣꠘ ꠇꠞꠤꠅ ꠘꠣ ꠔꠥꠝꠞꠣ ꠎꠦꠟꠣ ꠇꠞꠍꠟꠣꠄ ꠝꠦꠞꠤꠛꠣꠔ, ꠢꠃ ꠖꠤꠘ ꠇꠞꠍꠟꠣꠄ ꠎꠦꠔꠣ ꠝꠞꠥꠜꠥꠝꠤꠞ ꠝꠣꠍꠣ ꠘꠣꠝꠞ ꠎꠣꠉꠣꠔ।
PSA 95:9 ꠔꠥꠝꠞꠣꠞ ꠛꠣꠚ-ꠖꠣꠖꠣꠁꠘ꠆ꠔꠦ ꠢꠘꠅ ꠔ ꠖꠦꠈꠍꠤꠟ ꠝꠞꠦ ꠀꠎꠝꠣꠁꠀ, ꠀꠝꠣꠞ ꠇꠥꠖꠞꠔꠤ ꠟꠤꠟꠣ-ꠈꠦꠟꠣ ꠖꠦꠈꠤꠀꠅ ꠔꠣꠞꠣ ꠇꠞꠟꠣ ꠝꠞꠦ ꠙꠞꠤꠇ꠆ꠇꠣ।
PSA 95:10 ꠢꠃ ꠎꠝꠣꠘꠣꠞ ꠝꠣꠘꠡꠞ ꠎꠣꠟꠣ ꠡꠁꠟꠣꠝ ꠀꠝꠤ ꠌꠣꠟ꠆ꠟꠤꠡ ꠛꠍꠞ ꠗꠞꠤꠀ, ꠢꠦꠡꠦ ꠇꠁꠟꠣꠝ, ꠁꠔꠣꠞ ꠖꠤꠟ ꠔ ꠛꠦ-ꠙꠕꠤ ꠀꠝꠣꠞ ꠙꠕꠞꠦ ꠌꠤꠘꠟ ꠘꠣ,
PSA 95:11 ꠔꠦꠃꠉꠤ ꠀꠝꠣꠞ ꠉꠥꠍꠣꠞ ꠌꠥꠐꠦ ꠇꠁꠟꠣꠝ ꠇꠍꠝ ꠇꠞꠤꠀ, ꠝꠞ ꠖꠦꠅꠀ ꠀꠞꠣꠝꠞ ꠖꠦꠡꠅ ꠢꠣꠝꠣꠘꠤꠞ ꠡꠥꠎꠥꠉ ꠙꠣꠁꠔ ꠘꠣꠄ ꠔꠣꠞꠣ॥
PSA 96:1 ꠝꠣꠛꠥꠖꠞ ꠘꠣꠝꠦ ꠘꠄꠀ ꠉꠤꠔ ꠉꠣꠅ, ꠅ ꠢꠣꠞꠣ ꠖꠥꠘꠤꠀ, ꠝꠣꠛꠥꠖꠞ ꠉꠤꠔ ꠉꠣꠅ,
PSA 96:2 ꠝꠣꠛꠥꠖꠞ ꠘꠣꠝꠦ ꠉꠤꠔ ꠉꠣꠅ, ꠔꠣꠘ ꠔꠣꠞꠤꠚ ꠇꠞꠅ, ꠖꠤꠘꠦ ꠖꠤꠘꠦ ꠔꠣꠘ ꠖꠦꠅꠀ ꠘꠣꠎꠣꠔꠞ ꠔꠛꠟꠤꠉ ꠇꠞꠅ।
PSA 96:3 ꠢꠇꠟ ꠎꠣꠔꠤꠞꠦ ꠎꠣꠘꠣꠅ ꠔꠣꠘ ꠉꠃꠞꠛꠞ ꠇꠕꠣ, ꠢꠇꠟ ꠝꠣꠘꠡꠞꠦ ꠇꠅ ꠔꠣꠘ ꠇꠥꠖꠞꠔꠤ ꠇꠣꠝꠞ ꠝꠢꠤꠝꠣ।
PSA 96:4 ꠝꠣꠛꠥꠖꠃ ꠝꠢꠣꠘ, ꠝꠢꠣ ꠔꠣꠞꠤꠚ ꠔꠣꠘ, ꠢꠇꠟ ꠖꠦꠛ-ꠖꠦꠛꠤ ꠕꠣꠇꠤ ꠛꠠ ꠜꠄꠅꠋꠇꠞ ꠔꠣꠁꠘ,
PSA 96:5 ꠎꠣꠔꠤ ꠅꠇꠟꠞ ꠖꠦꠛ-ꠖꠦꠛꠤ ꠔ ꠛꠦꠇꠣꠝꠣ ꠙꠥꠔꠥꠟ ꠈꠣꠟꠤ, ꠝꠣꠛꠥꠖꠦꠃ ꠛꠣꠘꠣꠁꠍꠂꠘ ꠢꠇꠟ ꠀꠍꠝꠣꠘ ꠝꠘ꠆ꠒꠟꠤ।
PSA 96:6 ꠡꠣꠘ-ꠡꠃꠇꠔ ꠀꠞ ꠝꠢꠤꠝꠣ ꠔꠣꠘ ꠍꠣꠝꠘꠦ ꠞꠁꠍꠦ, ꠛꠟ-ꠡꠇ꠆ꠔꠤ ꠀꠞ ꠎꠣꠇ-ꠎꠝꠇꠦ ꠔꠣꠘ ꠊꠞ ꠢꠣꠎꠣꠁꠍꠦ।
PSA 96:7 ꠅ ꠎꠉꠔꠞ ꠈꠣꠘ꠆ꠖꠣꠘ ꠅꠇꠟ, ꠎꠣꠘꠣꠅ ꠝꠣꠛꠥꠖꠞ ꠉꠥꠘꠉꠣꠘ, ꠉꠃꠞꠛ ꠀꠞ ꠛꠟ-ꠡꠇ꠆ꠔꠤꠞ ꠇꠕꠣ ꠎꠣꠘꠣꠅ ꠔꠣꠘ,
PSA 96:8 ꠝꠣꠛꠥꠖꠞ ꠘꠣꠝꠦ ꠔꠣꠘ ꠙꠣꠅꠘꠣ ꠉꠃꠞꠛ ꠎꠣꠘꠣꠅ, ꠟꠤꠟ꠆ꠟꠣ-ꠍꠖꠉꠣ ꠀꠔꠅ ꠟꠁꠀ ꠔꠣꠘ ꠖꠞꠛꠣꠞꠅ ꠢꠣꠝꠣꠅ।
PSA 96:9 ꠙꠣꠇ-ꠍꠣꠚ ꠖꠤꠟꠦ ꠝꠣꠛꠥꠖꠞ ꠍꠣꠝꠘꠦ ꠍꠁꠎꠖꠣꠔ ꠙꠠꠅ, ꠢꠣꠞꠣ ꠖꠥꠘꠤꠀ ꠔꠣꠘ ꠍꠣꠝꠘꠦ ꠕꠞ-ꠕꠞꠣꠁꠀ ꠇꠣꠙꠤꠀ ꠃꠑꠅ।
PSA 96:10 ꠎꠣꠔꠤ ꠅꠇꠟꠞ ꠝꠣꠎꠦ ꠄꠟꠣꠘ ꠇꠞꠅ, ꠝꠣꠛꠥꠖꠃ ꠛꠣꠖꠡꠣ। ꠎꠉꠔꠞꠦ ꠛꠣꠘꠣꠁꠍꠂꠘ ꠝꠎꠛꠥꠔ, ꠇꠞꠔ ꠘꠣꠄ ꠇꠥꠘꠥ ꠟꠠꠣ-ꠌꠠꠣ, ꠔꠣꠁꠘ ꠘꠤꠌ꠆ꠌꠤꠔ ꠢꠇꠟ ꠎꠣꠔꠤꠞ ꠢꠇ ꠛꠤꠌꠣꠞ ꠇꠞꠛꠣ।
PSA 96:11 ꠀꠍꠝꠣꠘ ꠅꠇꠟ ꠚꠥꠞ꠆ꠔꠤ ꠇꠞꠃꠇ, ꠖꠥꠘꠤꠀ ꠈꠥꠡꠤ ꠅꠃꠇ, ꠖꠞꠤꠀ ꠀꠞ ꠔꠣꠞ ꠝꠣꠎꠞ ꠡꠛ ꠎꠣꠘꠖꠣꠞ ꠉꠞ꠆ꠎꠤꠀ ꠃꠑꠃꠇ,
PSA 96:12 ꠎꠝꠤꠘ ꠀꠞ ꠄꠞ ꠢꠇ꠆ꠇꠟꠔꠣ ꠈꠥꠡꠤ-ꠛꠣꠡꠤ ꠇꠞꠃꠇ, ꠛꠘ-ꠛꠣꠉꠣꠘꠞ ꠡꠛ ꠉꠣꠍ-ꠙꠣꠟꠣꠅ ꠀꠘꠘ꠆ꠖ-ꠃꠟ꠆ꠟꠣꠡ ꠇꠞꠃꠇ।
PSA 96:13 ꠝꠣꠛꠥꠖꠞ ꠍꠣꠝꠘꠦ ꠅꠟꠣꠃ ꠇꠞꠃꠇ ꠁꠔꠣ ꠢꠇꠟꠔꠣ, ꠔꠣꠁꠘ ꠔ ꠀꠁꠞꠣ ꠖꠥꠘꠤꠀꠞ ꠛꠤꠌꠣꠞ ꠇꠞꠔꠣ। ꠎꠉꠔꠞ ꠛꠤꠌꠣꠞ-ꠚꠄꠍꠣꠟꠣ ꠇꠞꠛꠣ ꠢꠇ-ꠁꠘꠍꠣꠚꠦ, ꠔꠣꠝꠣꠝ ꠎꠣꠔꠤꠞ ꠛꠤꠌꠣꠞ-ꠚꠄꠍꠣꠟꠣ ꠇꠞꠛꠣ ꠢꠇ-ꠢꠣꠟꠣꠟꠤꠄ॥
PSA 97:1 ꠝꠣꠛꠥꠖꠦ ꠛꠣꠖꠡꠣꠁ ꠇꠞꠂꠘ, ꠖꠥꠘꠤꠀꠄ ꠇꠞꠃꠇ ꠚꠥꠞ꠆ꠔꠤ, ꠖꠥꠞ-ꠖꠥꠞꠣꠘ꠆ꠔꠞ ꠖꠤꠙ ꠅꠇꠟ ꠅꠃꠇ ꠝꠢꠣ ꠈꠥꠡꠤ।
PSA 97:2 ꠔꠣꠘ ꠌꠣꠁꠞꠅꠛꠣꠄ ꠀꠍꠦ ꠔ ꠉꠁꠘ ꠀꠘ꠆ꠖꠣꠁꠞ ꠀꠞ ꠇꠣꠟꠘꠤ, ꠔꠣꠘ ꠉꠖꠤꠞ ꠜꠤꠔ ꠅꠁꠟ ꠢꠇ ꠛꠤꠌꠣꠞ ꠀꠞ ꠙꠞꠦꠎꠉꠣꠞꠤ।
PSA 97:3 ꠀꠉꠥꠁꠘ ꠎꠣꠄ ꠔꠣꠘ ꠀꠉꠦ ꠀꠉꠦ, ꠎꠣꠟꠣꠁꠀ ꠝꠣꠞꠦ ꠔꠣꠘ ꠌꠣꠁꠞꠅ ꠉꠣꠟꠣꠞ ꠖꠥꠡꠝꠘꠞꠦ।
PSA 97:4 ꠔꠣꠘ ꠎꠤꠟꠇꠤꠄ ꠚꠞ ꠅꠁꠎꠣꠄ ꠢꠣꠞꠣ ꠖꠥꠘꠤꠀ, ꠁꠔꠣ ꠖꠦꠈꠤꠀ ꠀꠡ꠆ꠔꠣ ꠎꠉꠔ ꠃꠑꠦ ꠇꠣꠙꠤꠀ।
PSA 97:5 ꠖꠤꠘ-ꠖꠥꠘꠤꠀꠞ ꠝꠣꠟꠤꠇ ꠀꠟ꠆ꠟꠣꠞ ꠍꠣꠝꠘꠦ, ꠙꠣꠠ-ꠙꠞꠛꠔ ꠅꠇꠟ ꠝꠝꠞ ꠟꠣꠈꠣꠘ ꠉꠟꠦ।
PSA 97:6 ꠀꠍꠝꠣꠘ ꠅꠇꠟꠦ ꠄꠟꠣꠘ ꠇꠞꠦ ꠔꠣꠘ ꠙꠞꠦꠎꠉꠣꠞꠤ, ꠢꠇꠟ ꠎꠣꠔꠤꠄ ꠖꠦꠈꠦ ꠔꠣꠘ ꠝꠢꠤꠝꠣꠞ ꠛꠣꠢꠣꠖꠥꠞꠤ।
PSA 97:7 ꠅꠡꠣꠠ ꠖꠦꠛ-ꠖꠦꠛꠤꠞ ꠛꠠꠣꠁ ꠇꠞꠦ ꠎꠣꠞꠣ, ꠡꠞꠝ-ꠟꠁꠎ꠆ꠎꠣ ꠙꠣꠃꠇ ꠅꠔꠣ ꠝꠥꠞ꠆ꠔꠤ ꠙꠥꠎꠣꠞꠤꠞꠣ, ꠀꠟ꠆ꠟꠣꠞ ꠍꠣꠝꠘꠦ ꠍꠁꠎꠖꠣ ꠇꠞꠃꠇ ꠅꠃ ꠖꠦꠛ-ꠖꠦꠛꠤꠞꠣ।
PSA 97:8 ꠔꠥꠝꠣꠞ ꠢꠇ ꠛꠤꠌꠣꠞꠞ ꠇꠕꠣ ꠢꠥꠘꠤꠀ ꠍꠤꠅꠘ ꠅꠁꠟ ꠈꠥꠡꠤ, ꠄꠢꠥꠖꠣ ꠖꠦꠡꠞ ꠉꠣꠃ-ꠉꠦꠞꠣꠝꠦ ꠇꠞꠦꠞ ꠔ ꠚꠥꠞ꠆ꠔꠤ।
PSA 97:9 ꠔꠥꠝꠤ ꠝꠣꠛꠥꠖ ꠔ ꠢꠣꠞꠣ ꠎꠉꠔꠞ ꠃꠙꠞꠀꠟꠣ, ꠢꠇꠟ ꠖꠦꠛ-ꠖꠦꠛꠤꠞ ꠛꠃꠔ ꠃꠙꠞꠦ ꠔꠥꠝꠣꠞ ꠑꠤꠇꠣꠘꠣ।
PSA 97:10 ꠘꠣꠚꠞꠝꠣꠘꠤꠞꠦ ꠊꠤꠘ꠆ꠘꠣꠅ ꠔꠥꠝꠞꠣ ꠝꠣꠛꠥꠖꠞ ꠀꠡꠤꠇ ꠎꠣꠞꠣ, ꠀꠟ꠆ꠟꠣꠅꠀꠟꠣꠞ ꠎꠣꠘ ꠛꠣꠌꠣꠁꠘ ꠘꠣꠚꠞꠝꠣꠘꠞ ꠀꠔ ꠕꠣꠇꠤꠀ।
PSA 97:11 ꠙꠞꠦꠎꠉꠣꠞꠞ ꠟꠣꠉꠤ ꠛꠣꠠꠦ ꠘꠥꠞꠞ ꠇꠥꠠꠤ-ꠙꠣꠔꠣ, ꠈꠣꠐꠤ ꠖꠤꠟꠞ ꠜꠤꠔꠞꠦ ꠔ ꠅꠄ ꠈꠥꠡꠤ-ꠚꠥꠞ꠆ꠔꠤ ꠖꠦꠅꠀ।
PSA 97:12 ꠙꠞꠦꠎꠉꠣꠞ ꠎꠘ ꠚꠥꠞ꠆ꠔꠤ ꠇꠞꠅ ꠝꠣꠛꠥꠖꠞ ꠘꠣꠝꠦ, ꠔꠣꠘ ꠙꠣꠇ-ꠙꠛꠤꠔ꠆ꠞꠔꠣꠞ ꠉꠥꠘꠉꠣꠘ ꠉꠣꠅ ꠢꠇꠟꠦ॥
PSA 98:1 ꠝꠣꠛꠥꠖꠞ ꠘꠣꠝꠦ ꠉꠤꠔ-ꠉꠎꠟ ꠉꠣꠅ ꠘꠄꠀ ꠘꠄꠀ, ꠔꠣꠁꠘ ꠔ ꠇꠞꠍꠂꠘ ꠔꠣꠁꠎ꠆ꠎꠥꠛꠤ ꠇꠣꠝ ꠎꠔꠔꠣ। ꠘꠤꠎꠞ ꠒꠣꠁꠘ ꠀꠔꠞ ꠇꠥꠖꠞꠔꠤ ꠛꠟ ꠖꠤꠀ, ꠇꠞꠍꠂꠘ ꠇꠔ ꠀꠌꠣꠘꠇ ꠎꠄꠅꠞ ꠟꠤꠟꠣ-ꠈꠦꠟꠣ।
PSA 98:2 ꠝꠣꠛꠥꠖ ꠔꠣꠘ ꠃꠖ꠆ꠖꠣꠞ ꠇꠣꠝ ꠎꠣꠘꠣꠁꠍꠂꠘ ꠢꠇꠟꠞꠦ, ꠔꠣꠘ ꠢꠇ ꠇꠣꠝ ꠖꠦꠈꠣꠁꠍꠂꠘ ꠎꠣꠔꠤ ꠅꠇꠟꠞ ꠌꠈꠥꠞ ꠍꠣꠝꠘꠦ।
PSA 98:3 ꠔꠣꠘ ꠖꠄꠀ-ꠝꠣꠄꠀ ꠀꠞ ꠢꠇ-ꠢꠣꠟꠣꠟꠤ, ꠁꠀꠖ ꠞꠣꠈꠍꠂꠘ ꠛꠘꠤ ꠁꠍꠞꠣꠁꠟꠞ ꠟꠣꠉꠤ, ꠖꠦꠈꠤꠍꠦ ꠎꠉꠔꠞ ꠢꠦꠡ ꠡꠤꠝꠣꠘꠣꠞ ꠝꠣꠘꠡꠦ, ꠀꠝꠞꠣꠞ ꠝꠣꠛꠥꠖꠞ ꠃꠖ꠆ꠖꠣꠞ ꠇꠞꠣ ꠇꠣꠝꠞꠦ।
PSA 98:4 ꠅꠞꠦ ꠎꠉꠔꠛꠣꠡꠤ ꠉꠣꠅ ꠈꠥꠡꠤꠞ ꠉꠣꠘ ꠝꠣꠛꠥꠖꠞ ꠘꠣꠝꠦ, ꠛꠣꠁꠖ꠆ꠖ-ꠛꠣꠎꠘꠣꠞ ꠔꠣꠟꠦ ꠔꠣꠟꠦ ꠎꠥꠞꠦ ꠎꠥꠞꠦ, ꠔꠣꠘ ꠉꠥꠘꠉꠣꠘ ꠉꠣꠅ ꠔꠥꠝꠞꠣ ꠛꠠ ꠉꠟꠣꠄ।
PSA 98:5 ꠛꠤꠘꠣ-ꠛꠦꠢꠣꠟꠣ ꠛꠣꠎꠣꠁꠀ ꠔꠣꠟꠦ ꠔꠣꠟꠦ ꠉꠣꠅ ꠉꠣꠘ, ꠝꠣꠛꠥꠖꠞ ꠔꠣꠞꠤꠚ ꠇꠞꠤ ꠉꠎꠟ-ꠉꠣꠘ ꠉꠣꠅ ꠔꠣꠘ।
PSA 98:6 ꠔꠥꠝꠞꠣ ꠎꠥꠞꠦ ꠎꠥꠞꠦ ꠌꠥꠋꠉꠣ ꠀꠞ ꠡꠤꠋꠉꠣ ꠛꠣꠎꠣꠁꠀ, ꠀꠟ꠆ꠟꠣ ꠝꠣꠟꠤꠇꠞ ꠍꠣꠝꠘꠦ ꠉꠣꠅ ꠈꠥꠡꠤ ꠇꠞꠤꠀ।
PSA 98:7 ꠔꠣꠘ ꠔꠣꠞꠤꠚꠦ ꠉꠞ꠆ꠎꠤꠀ ꠃꠑꠃꠇ ꠛꠠ ꠉꠟꠣꠄ, ꠖꠞꠤꠀ ꠀꠞ ꠔꠣꠞ ꠝꠣꠎꠞ ꠢꠇꠟꠔꠣꠄ, ꠄꠞꠟꠉꠦ ꠚꠥꠞ꠆ꠔꠤ ꠇꠞꠅ ꠎꠉꠔꠞ ꠡꠛ ꠛꠣꠡꠤꠘ꠆ꠖꠣꠄ।
PSA 98:8 ꠉꠣꠋꠉ ꠅꠇꠟꠦ ꠈꠥꠡꠤ ꠇꠞꠅ ꠀꠔꠞ ꠔꠣꠟꠤ ꠖꠤꠀ, ꠚꠥꠞ꠆ꠔꠤ ꠇꠞꠅ ꠄꠇꠟꠉꠦ ꠙꠣꠠ-ꠙꠞꠛꠔ ꠝꠤꠟꠤꠀ।
PSA 98:9 ꠝꠣꠛꠥꠖꠞ ꠍꠣꠝꠘꠦ ꠉꠣꠅ ꠈꠥꠡꠤꠄ ꠉꠟꠣ ꠚꠣꠐꠣꠁꠀ, ꠖꠥꠘꠤꠀꠞ ꠛꠤꠌꠣꠞ ꠇꠞꠣꠔ ꠡ꠆ꠛꠄꠅꠋ ꠝꠣꠛꠥꠖ ꠀꠁꠞꠣ, ꠢꠇ ꠛꠤꠌꠣꠞ ꠇꠞꠛꠣ ꠔꠣꠁꠘ ꠢꠇ-ꠢꠣꠟꠣꠟ ꠞꠁꠀ, ꠢꠇꠟ ꠎꠣꠔꠤꠞ ꠛꠤꠌꠣꠞ ꠇꠞꠛꠣ ꠢꠇ-ꠁꠘꠍꠣꠚ ꠖꠤꠀ॥
PSA 99:1 ꠝꠣꠛꠥꠖꠦ ꠛꠣꠖꠡꠣꠁ ꠇꠞꠂꠘ, ꠎꠣꠔꠤ ꠅꠇꠟ ꠇꠣꠙꠃꠇ, ꠖꠥꠁꠅ ꠇꠣꠞꠥꠛꠤꠝꠞ ꠝꠣꠎꠦ ꠔꠣꠘ ꠀꠡꠘ, ꠖꠥꠘꠤꠀꠄ ꠕꠞꠕꠞ ꠇꠞꠃꠇ।
PSA 99:2 ꠙꠛꠤꠔ꠆ꠞ ꠍꠤꠅꠘ ꠘꠉꠞꠤꠞ ꠝꠣꠎꠦ ꠝꠣꠛꠥꠖꠃ ꠝꠢꠣꠘ, ꠢꠇꠟ ꠎꠣꠔꠤꠞ ꠃꠙꠞꠦ ꠔꠣꠘ ꠁꠎ꠆ꠎꠔ-ꠡꠝ꠆ꠝꠣꠘ।
PSA 99:3 ꠔꠣꠞꠣ ꠇꠞꠃꠇ ꠔꠥꠝꠣꠞ ꠉꠥꠘꠉꠣꠘ, ꠝꠢꠣꠘ ꠀꠞ ꠜꠄꠅꠋꠇꠞ ꠔꠥꠝꠣꠞ ꠘꠣꠝ, ꠔꠣꠞꠣ ꠇꠃꠇ, ꠝꠢꠣ ꠙꠛꠤꠔ꠆ꠞ ꠔꠣꠁꠘ।
PSA 99:4 ꠅ ꠛꠟꠀꠟꠣ ꠛꠣꠖꠡꠣ, ꠢꠇ ꠛꠤꠌꠣꠞꠞꠦ ꠜꠣꠟꠣ ꠙꠣꠅ ꠔꠥꠝꠤ, ꠢꠇ-ꠢꠣꠟꠣꠟꠤ ꠉꠣꠕꠤꠍ ꠔ ꠝꠎꠛꠥꠔ ꠇꠞꠤ, ꠁꠀꠇꠥꠛꠞ ꠛꠋꠡꠔ ꠛꠅꠀꠁꠟ ꠇꠞꠍ ꠢꠇ ꠛꠤꠌꠣꠞ ꠀꠞ ꠙꠞꠦꠎꠉꠣꠞꠤ।
PSA 99:5 ꠀꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠔꠣꠞꠤꠚ ꠇꠞꠅ, ꠍꠁꠎꠖꠣ ꠇꠞꠅ ꠔꠣꠘ ꠇꠖꠝ ꠝꠥꠛꠣꠞꠇꠅ, ꠇꠅ, ꠝꠢꠣ ꠙꠛꠤꠔ꠆ꠞ ꠔꠣꠁꠘ।
PSA 99:6 ꠝꠥꠍꠣ ꠀꠞ ꠢꠣꠞꠥꠘ ꠀꠍꠟꠣ ꠔꠣꠘ ꠁꠝꠣꠝꠔꠤꠞ ꠇꠣꠝꠅ, ꠡꠣꠝꠥꠄꠟ ꠘꠛꠤꠅ ꠞꠁꠔꠣ ꠔꠣꠘ ꠖꠥꠀ-ꠝꠥꠘꠣꠎꠣꠔꠅ, ꠎꠥꠀꠙ ꠙꠣꠁꠔꠣ ꠔꠣꠞꠣ ꠒꠣꠇꠤꠟꠦ ꠝꠣꠛꠥꠖꠞ ꠖꠞꠛꠣꠞꠅ।
PSA 99:7 ꠝꠦꠊꠞ ꠈꠥꠐꠤꠔ ꠞꠁꠀ ꠔꠣꠁꠘ ꠝꠣꠔꠤꠔꠣ ꠔꠣꠞꠣꠞ ꠟꠉꠦ, ꠔꠣꠘ ꠇꠣꠟꠣꠝ ꠝꠣꠘꠤꠀ ꠔꠣꠞꠣ ꠌꠟꠔꠣ ꠔꠣꠘ ꠢꠥꠇꠥꠝꠦ।
PSA 99:8 ꠅ ꠀꠟ꠆ꠟꠣ ꠀꠝꠞꠣꠞ ꠝꠣꠛꠥꠖ, ꠔꠣꠞꠣꠞ ꠝꠤꠘꠔꠤ ꠔꠥꠝꠤ ꠢꠥꠘꠔꠣꠄ, ꠔꠣꠞꠣꠞ ꠇꠍꠥꠞꠤꠞ ꠛꠖꠟꠣ ꠖꠤꠟꠦꠅ ꠔꠥꠝꠤ ꠀꠟ꠆ꠟꠣꠄ ꠝꠣꠚꠤ ꠖꠤꠔꠣꠄ।
PSA 99:9 ꠀꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠔꠣꠞꠤꠚ ꠇꠞꠅ, ꠍꠁꠎꠖꠣ ꠇꠞꠅ ꠔꠣꠘ ꠙꠛꠤꠔ꠆ꠞ ꠙꠣꠠꠅ, ꠀꠝꠞꠣꠞ ꠝꠣꠛꠥꠖ ꠀꠟ꠆ꠟꠣ ꠔ ꠙꠣꠇ-ꠙꠛꠤꠔ꠆ꠞ॥
PSA 100:1 ꠡꠥꠇꠥꠞꠣꠘꠣ ꠉꠤꠔ ꠅꠞꠦ ꠎꠉꠔꠛꠣꠡꠤ ꠈꠥꠡꠤ-ꠛꠣꠡꠤ ꠇꠞꠅ, ꠝꠣꠛꠥꠖꠞ ꠘꠣꠝꠦ ꠎꠥꠞ ꠉꠟꠣꠄ ꠇꠞꠅ।
PSA 100:2 ꠝꠣꠛꠥꠖꠞ ꠄꠛꠣꠖꠔ ꠇꠞꠅ ꠈꠥꠡ ꠖꠤꠟꠦ, ꠈꠥꠡꠤꠞ ꠉꠎꠟ ꠉꠣꠁꠀ ꠉꠣꠁꠀ ꠀꠅ ꠔꠣꠘ ꠖꠞꠛꠣꠞꠦ।
PSA 100:3 ꠀꠟ꠆ꠟꠣꠃ ꠀꠍꠟ ꠝꠣꠛꠥꠖ, ꠝꠘꠅ ꠞꠣꠈꠤꠅ ꠔꠥꠝꠞꠣ, ꠀꠝꠞꠣꠞꠦ ꠛꠣꠘꠣꠁꠟꠣ ꠔꠣꠁꠘ, ꠔꠣꠘ ꠛꠘ꠆ꠖꠣ ꠔ ꠀꠝꠞꠣ, ꠀꠝꠞꠣ ꠔꠣꠘ ꠝꠦꠠꠣꠞ ꠙꠣꠟ, ꠔꠣꠘ ꠎꠝꠤꠘꠅ ꠈꠣꠘꠤ ꠈꠣꠅꠞꠣ।
PSA 100:4 ꠡꠥꠇꠥꠞ-ꠉꠥꠎꠣꠞ ꠇꠞꠤ ꠇꠞꠤ ꠢꠣꠝꠣꠅ ꠔꠣꠘ ꠖꠥꠀꠞꠅ, ꠔꠣꠞꠤꠚ-ꠉꠤꠔ ꠉꠣꠁꠀ ꠉꠣꠁꠀ ꠀꠅ ꠔꠣꠘ ꠃꠑꠣꠘꠅ, ꠔꠣꠘ ꠘꠣꠝꠦ ꠡꠥꠇꠞꠤꠀ ꠔꠣꠞꠤꠚ ꠀꠖꠣꠄ ꠇꠞꠅ।
PSA 100:5 ꠝꠣꠛꠥꠖꠃ ꠀꠍꠟ ꠜꠣꠟꠣ, ꠌꠤꠞꠇꠣꠟ ꠎꠣꠞꠤ ꠔꠣꠘ ꠖꠄꠀ-ꠝꠣꠄꠀ, ꠔꠣꠘ ꠢꠇ-ꠢꠣꠟꠣꠟꠤ ꠌꠣꠟꠥ ꠞꠄ ꠛꠋꠡꠞ ꠙꠞ ꠛꠋꠡ ꠗꠞꠤꠀ॥
PSA 117:1 ꠢꠇꠟ ꠎꠣꠔꠤꠄ ꠀꠟ꠆ꠟꠣꠞ ꠔꠣꠞꠤꠚ ꠇꠞꠅ, ꠖꠦꠡ ꠀꠞ ꠉꠥꠡ꠆ꠐꠤꠄ ꠔꠣꠘ ꠘꠣꠝ ꠎꠚꠅ,
PSA 117:2 ꠀꠝꠞꠣꠞ ꠛꠣꠄ ꠔ ꠀꠟ꠆ꠟꠣꠞ ꠇꠔ ꠝꠣꠄꠀ-ꠝꠝꠔꠣ, ꠔꠣꠁꠘ ꠞꠂꠘ ꠢꠇ ꠢꠣꠟꠣꠟ ꠢꠞ-ꠢꠣꠝꠦꠡꠣ, ꠀꠟꠢꠣꠝꠖꠥꠟꠤꠟ꠆ꠟꠣ!
PSA 118:1 ꠀꠟ꠆ꠟꠣꠞ ꠡꠥꠇꠞꠤꠀ ꠎꠣꠘꠣꠅ, ꠔꠣꠁꠘ ꠔ ꠜꠣꠟꠣ, ꠌꠤꠞꠇꠣꠟ ꠎꠣꠞꠤ ꠔꠣꠘ ꠖꠄꠀ-ꠝꠣꠄꠀ।
PSA 118:2 ꠛꠘꠤ ꠁꠍꠞꠣꠁꠟꠦ ꠇꠃꠇ, ꠌꠤꠞꠇꠣꠟ ꠎꠣꠞꠤ ꠔꠣꠘ ꠖꠄꠀ-ꠝꠣꠄꠀ।
PSA 118:3 ꠢꠣꠞꠥꠘꠞ ꠍꠤꠟꠍꠤꠟꠣꠄ ꠇꠃꠇ, ꠌꠤꠞꠇꠣꠟ ꠎꠣꠞꠤ ꠔꠣꠘ ꠖꠄꠀ-ꠝꠣꠄꠀ।
PSA 118:4 ꠝꠣꠛꠥꠖꠞ ꠀꠡꠤꠇꠦ ꠇꠃꠇ, ꠌꠤꠞꠇꠣꠟ ꠎꠣꠞꠤ ꠔꠣꠘ ꠖꠄꠀ-ꠝꠣꠄꠀ।
PSA 118:5 ꠝꠣꠛꠥꠖꠞꠦ ꠒꠣꠇꠤꠟꠣꠝ ꠀꠝꠤ ꠙꠠꠤꠀ ꠛꠤꠙꠖꠅ, ꠔꠣꠁꠘ ꠃꠖ꠆ꠖꠣꠞ ꠇꠞꠤ ꠝꠞꠦ ꠘꠤꠟꠣ ꠈꠥꠟꠣ ꠝꠄꠖꠣꠘꠅ।
PSA 118:6 ꠝꠣꠛꠥꠖ ꠔ ꠀꠝꠣꠞ ꠙꠇ꠆ꠇꠦ, ꠀꠝꠤ ꠒꠞꠣꠁꠔꠣꠝ ꠘꠣꠄ, ꠀꠖꠝꠦ ꠀꠝꠣꠞ ꠇꠤꠔꠣ ꠇꠞꠔ?
PSA 118:7 ꠝꠣꠛꠥꠖ ꠀꠝꠣꠞ ꠙꠇ꠆ꠇꠦ, ꠔꠣꠁꠘꠃ ꠀꠝꠣꠞ ꠡꠢꠣꠄ, ꠖꠥꠡꠝꠘꠞ ꠛꠦꠢꠣꠟ ꠖꠡꠣ ꠖꠦꠈꠣꠁꠛꠣ ꠀꠟ꠆ꠟꠣꠄ।
PSA 118:8 ꠀꠖꠝꠞ ꠃꠙꠞꠦ ꠜꠞꠡꠣ ꠇꠞꠣ ꠕꠣꠇꠤ, ꠝꠣꠛꠥꠖꠞ ꠍꠣꠄꠀꠔ ꠀꠡꠞꠄ ꠟꠅꠀ ꠜꠣꠟꠣ।
PSA 118:9 ꠛꠠꠟꠥꠇꠞ ꠃꠙꠞꠦ ꠜꠞꠡꠣ ꠇꠞꠣ ꠕꠣꠇꠤ, ꠝꠣꠛꠥꠖꠞ ꠍꠣꠄꠀꠔ ꠀꠡꠞꠄ ꠟꠅꠀ ꠜꠣꠟꠣ।
PSA 118:10 ꠢꠇꠟ ꠖꠦꠡꠦ ꠝꠤꠟꠤ ꠛꠦꠞꠤꠟꠤꠍꠤꠟ ꠀꠝꠣꠞꠦ, ꠝꠣꠛꠥꠖꠞ ꠘꠣꠝꠦ ꠀꠝꠤ ꠡꠦꠡ ꠇꠞꠤꠟꠤꠍꠤ ꠔꠣꠞꠣꠞꠦ।
PSA 118:11 ꠢꠣꠍꠣꠃ ꠔꠣꠞꠣ ꠝꠞꠦ ꠛꠦꠞꠤꠟꠤꠍꠤꠟ ꠌꠣꠁꠞꠅꠛꠣꠄ, ꠝꠣꠛꠥꠖꠞ ꠘꠣꠝꠦ ꠀꠝꠤ ꠡꠦꠡ ꠇꠞꠤꠟꠤꠍꠤ ꠔꠣꠞꠣꠞꠦ।
PSA 118:12 ꠜꠤꠋꠉꠥꠟꠞ ꠙꠣꠟꠞ ꠟꠣꠈꠣꠘ ꠀꠝꠣꠞꠦ ꠛꠦꠞꠤꠍꠤꠟ, ꠢꠥꠇꠘꠣ ꠛꠘ-ꠎꠋꠟꠣꠞ ꠟꠣꠈꠣꠘ ꠎꠟꠤꠀ ꠃꠑꠍꠤꠟ ꠔꠣꠞꠣ, ꠝꠣꠛꠥꠖꠞ ꠘꠣꠝꠦ ꠀꠝꠤ ꠡꠦꠡ ꠇꠞꠤꠟꠤꠍꠤ ꠔꠣꠞꠣꠞꠦ।
PSA 118:13 ꠎꠥꠞꠦ ꠎꠥꠞꠦ ꠗꠣꠇ꠆ꠇꠣ ꠝꠣꠞꠍꠤꠟ ꠀꠝꠤ ꠎꠣꠘꠥ ꠙꠠꠤ ꠎꠣꠁ, ꠅꠁꠟꠦ ꠝꠣꠛꠥꠖꠃ ꠀꠝꠣꠞ ꠡꠢꠣꠄ ꠅꠁꠟꠣ।
PSA 118:14 ꠝꠣꠛꠥꠖꠃ ꠀꠝꠣꠞ ꠛꠟ, ꠀꠝꠣꠞ ꠈꠥꠡꠤꠞ ꠉꠤꠔ, ꠀꠝꠣꠞꠦ ꠛꠣꠌꠣꠘꠤꠞ ꠃꠙꠣꠄ ꠔꠣꠘ ꠀꠔꠅ ꠘꠤꠌ꠆ꠌꠤꠔ।
PSA 118:15 ꠙꠞꠦꠎꠉꠣꠞꠞ ꠊꠞꠅ ꠊꠞꠅ ꠎꠥꠖ꠆ꠖꠞ ꠎꠄꠅꠞ ꠉꠣꠘ, ꠝꠣꠛꠥꠖꠞ ꠇꠥꠖꠞꠔꠤ ꠀꠔꠦ ꠇꠞꠍꠂꠘ ꠀꠎꠛ ꠇꠣꠝ।
PSA 118:16 ꠝꠣꠛꠥꠖꠞ ꠒꠣꠁꠘ ꠀꠔ ꠃꠙꠞꠦ ꠔꠥꠟꠍꠂꠘ ꠔꠣꠁꠘ, ꠝꠣꠛꠥꠖꠞ ꠇꠥꠖꠞꠔꠤ ꠀꠔꠦ ꠇꠞꠍꠂꠘ ꠀꠎꠛ ꠇꠣꠝ।
PSA 118:17 ꠀꠝꠤ ꠔ ꠝꠞꠔꠣꠝ ꠘꠣꠄ, ꠎꠤꠘ꠆ꠖꠣ ꠞꠁꠝꠥ, ꠝꠣꠛꠥꠖꠦ ꠎꠦꠔꠣ ꠇꠞꠍꠂꠘ ꠢꠇꠟꠞꠦ ꠎꠣꠘꠣꠁꠝꠥ।
PSA 118:18 ꠝꠣꠛꠥꠖꠦ ꠀꠝꠣꠞꠦ ꠇꠑꠤꠘ ꠡꠣꠎꠣ ꠖꠤꠍꠂꠘ, ꠅꠁꠟꠦ ꠝꠞꠘꠞ ꠀꠔꠅ ꠝꠞꠦ ꠘꠣꠢꠤ ꠡꠙꠤꠍꠂꠘ।
PSA 118:19 ꠀꠝꠣꠞ ꠟꠣꠉꠤ ꠈꠥꠟꠤꠀ ꠖꠦꠅ ꠀꠟ꠆ꠟꠣꠞ ꠊꠞꠞ ꠖꠥꠀꠞ, ꠜꠤꠔꠞꠦ ꠢꠣꠝꠣꠁꠀ ꠡꠥꠇꠞꠤꠀ ꠝꠣꠛꠥꠖꠞ ꠎꠣꠘꠣꠁ।
PSA 118:20 ꠁꠔꠣ ꠔ ꠡ꠆ꠛꠄꠅꠋ ꠝꠣꠛꠥꠖꠞ ꠖꠥꠀꠞ, ꠈꠣꠟꠤ ꠙꠞꠦꠎꠉꠣꠞ ꠅꠇꠟ ꠅꠘꠅ ꠢꠣꠝꠣꠄ।
PSA 118:21 ꠔꠥꠝꠣꠞ ꠡꠥꠇꠞꠤꠀ ꠎꠣꠘꠣꠁ ꠀꠝꠣꠞ ꠀꠛꠖꠣꠞ ꠢꠥꠘꠣꠄ, ꠔꠥꠝꠣꠞ ꠀꠔꠅꠃ ꠘꠤꠌ꠆ꠌꠤꠔ ꠀꠝꠣꠞꠦ ꠛꠣꠌꠣꠘꠤꠞ ꠃꠙꠣꠄ।
PSA 118:22 ꠛꠦꠇꠣꠝꠣ ꠇꠁꠀ ꠚꠣꠟꠣꠁ ꠖꠤꠍꠤꠟ ꠞꠣꠎ ꠝꠦꠡ꠆ꠔꠞꠤꠘ꠆ꠔꠦ ꠎꠦ ꠙꠣꠔ꠆ꠔꠞ, ꠅꠇꠐꠣ ꠖꠤꠀꠃ ꠁꠀꠘ ꠈꠥꠐꠤ ꠅꠁꠟ ꠔꠣꠘ ꠊꠞꠞ।
PSA 118:23 ꠝꠣꠛꠥꠖ ꠘꠤꠎꠦꠃ ꠁ ꠇꠣꠝ ꠇꠞꠣꠁꠟꠣ, ꠖꠦꠈꠤꠀ ꠔ ꠀꠝꠞꠣꠞ ꠔꠣꠁꠎ꠆ꠎꠥꠛꠤ ꠟꠣꠉꠦꠞ।
PSA 118:24 ꠁꠐꠣ ꠔ ꠢꠃ ꠖꠤꠘ ꠝꠣꠛꠥꠖꠞ ꠛꠣꠘꠣꠁꠟ ꠖꠤꠘ, ꠀꠅ ꠈꠥꠡꠤ ꠇꠞꠤ ꠚꠥꠞ꠆ꠔꠤ ꠇꠞꠤ ꠡꠛꠦ ꠅꠃ ꠖꠤꠘ।
PSA 118:25 ꠝꠤꠘꠔꠤ ꠇꠞꠤ ꠉ ꠝꠣꠛꠥꠖ ꠛꠣꠌꠣꠅ ꠀꠝꠞꠣꠞꠦ, ꠝꠤꠘꠔꠤ ꠇꠞꠤ ꠔꠥꠝꠤ ꠇꠣꠝꠤꠀꠛ ꠇꠞꠅ ꠀꠝꠞꠣꠞꠦ।
PSA 118:26 ꠝꠣꠛꠥꠖꠞ ꠘꠣꠝꠦ ꠎꠦꠁꠘ ꠀꠁꠞꠣ ꠔꠣꠘ ꠔꠣꠞꠤꠚ ꠅꠃꠇ, ꠝꠣꠛꠥꠖꠞ ꠊꠞꠅ ꠕꠣꠇꠤ ꠇꠁ ꠔꠥꠝꠞꠣꠞ ꠃꠙꠞꠦ ꠛꠞꠇꠔ ꠟꠣꠝꠃꠇ।
PSA 118:27 ꠀꠟ꠆ꠟꠣꠃ ꠔ ꠝꠣꠛꠥꠖ, ꠀꠝꠞꠣꠞꠦ ꠖꠤꠍꠂꠘ ꠘꠥꠞ, ꠁꠖꠞ ꠇꠥꠞꠛꠣꠘꠤꠞ ꠙꠡꠥ ꠖꠠꠤꠖꠤ ꠛꠣꠘ꠆ꠖꠤꠀ ꠀꠘꠅ, ꠇꠥꠞꠛꠣꠘꠤ ꠈꠣꠘꠣꠞ ꠢꠤꠋ ꠅꠇꠟꠅ ꠅꠉꠥ ꠛꠣꠘ꠆ꠖꠤꠀ ꠞꠣꠈꠅ।
PSA 118:28 ꠔꠥꠝꠤꠃ ꠀꠝꠣꠞ ꠀꠟ꠆ꠟꠣ, ꠔꠥꠝꠣꠞ ꠡꠥꠇꠞꠤꠀ ꠎꠣꠘꠣꠁ, ꠔꠥꠝꠤꠃ ꠀꠝꠣꠞ ꠀꠟ꠆ꠟꠣ, ꠔꠥꠝꠣꠞ ꠉꠥꠘꠉꠣꠘ ꠉꠣꠁ।
PSA 118:29 ꠀꠟ꠆ꠟꠣꠞ ꠡꠥꠇꠞꠤꠀ ꠎꠣꠘꠣꠅ, ꠔꠣꠁꠘꠃ ꠔ ꠜꠣꠟꠣ, ꠌꠤꠞꠇꠣꠟ ꠎꠣꠞꠤ ꠔꠣꠘ ꠖꠄꠀ-ꠝꠣꠄꠀ॥
PSA 121:1 ꠢꠎꠅ ꠎꠣꠅꠞꠣ ꠇꠣꠚꠦꠟꠣꠞ ꠇꠣꠅꠀꠟꠤ ꠀꠝꠤ ꠌꠃꠈ ꠔꠥꠟꠤꠀ ꠙꠣꠠ-ꠙꠞꠛꠔꠞ ꠛꠣꠄ ꠌꠣꠁꠝꠥ, ꠀꠝꠣꠞ ꠡꠣꠄ-ꠡꠣꠁꠎ꠆ꠎ ꠇꠥꠀꠁ ꠕꠣꠇꠤ ꠀꠁꠛ?
PSA 121:2 ꠢꠃ ꠝꠣꠛꠥꠖꠞ ꠉꠦꠍ ꠕꠣꠇꠤꠃ ꠀꠝꠣꠞ ꠡꠣꠁꠎ꠆ꠎ ꠀꠁꠛ, ꠎꠦꠁꠘ ꠀꠍꠝꠣꠘ-ꠎꠝꠤꠘ ꠙꠄꠖꠣ ꠇꠞꠍꠂꠘ।
PSA 121:3 ꠔꠥꠝꠣꠞ ꠙꠣꠅꠞꠦ ꠔꠣꠁꠘ ꠙꠤꠍꠟꠣ ꠈꠣꠁꠔꠦ ꠖꠤꠔꠣ ꠘꠣꠄ, ꠔꠥꠝꠣꠞ ꠛꠣꠌꠣꠘꠦꠀꠟꠣ ꠔ ꠊꠥꠝꠣꠁꠔꠣ ꠘꠣꠄ।
PSA 121:4 ꠝꠘꠅ ꠞꠣꠈꠤꠅ, ꠛꠘꠤ ꠁꠍꠞꠣꠁꠟꠞꠦ ꠎꠦꠁꠘ ꠛꠣꠌꠣꠁꠘ, ꠔꠣꠁꠘ ꠊꠥꠝꠣꠁꠔꠣ ꠘꠣꠄ, ꠃꠋꠉꠣꠁꠔꠣꠅ ꠘꠣꠄ।
PSA 121:5 ꠝꠣꠛꠥꠖꠃ ꠔꠥꠝꠣꠞ ꠢꠦꠚꠣꠎꠔꠇꠣꠞꠤ, ꠔꠥꠝꠣꠞ ꠀꠡꠞꠄ ꠍꠣꠄꠀ, ꠔꠥꠝꠣꠞ ꠒꠣꠁꠘ ꠀꠔꠅ ꠗꠞꠤꠀ ꠔꠣꠁꠘ ꠀꠍꠂꠘ ꠈꠣꠠꠣ।
PSA 121:6 ꠖꠤꠘꠞ ꠛꠣꠟꠣꠄ ꠡꠥꠞꠥꠎꠦ ꠀꠞ ꠞꠣꠁꠔꠞ ꠛꠣꠟꠣꠄ ꠌꠣꠘ꠆ꠖꠦ, ꠇꠥꠘꠥꠔꠣꠄꠃ ꠔꠥꠝꠣꠞ ꠈꠦꠔꠤ ꠇꠞꠔ ꠘꠣꠄ।
PSA 121:7 ꠢꠇ꠆ꠇꠟ ꠘꠝꠥꠘꠣꠞ ꠛꠤꠙꠖ ꠕꠣꠇꠤ ꠝꠣꠛꠥꠖꠦꠃ ꠛꠣꠌꠣꠁꠛꠣ, ꠔꠣꠁꠘꠃ ꠔꠥꠝꠣꠞ ꠎꠣꠘꠞ ꠢꠦꠚꠣꠎꠔ ꠇꠞꠛꠣ।
PSA 121:8 ꠔꠥꠝꠣꠞ ꠌꠟꠣ-ꠚꠤꠞꠣꠞ ꠡꠝꠄ ꠊꠞꠅ-ꠛꠣꠁꠞꠦ ꠝꠣꠛꠥꠖꠦꠃ ꠛꠣꠌꠣꠁꠛꠣ, ꠅꠈꠘ ꠕꠣꠇꠤ ꠎꠥꠉꠦ ꠎꠥꠉꠦ ꠢꠞ-ꠢꠣꠝꠦꠡꠣ॥
PSA 150:1 ꠢꠇꠟꠦ ꠝꠤꠟꠤꠀ ꠇꠅꠞꠦ ꠝꠥꠝꠤꠘ ꠀꠟꠢꠣꠝꠖꠥꠟꠤꠟ꠆ꠟꠣ, ꠖꠤꠟꠦ-ꠎꠣꠘꠦ ꠇꠅ ꠛꠘ꠆ꠖꠣ ꠀꠟꠢꠣꠝꠖꠥꠟꠤꠟ꠆ꠟꠣ! ꠀꠟ꠆ꠟꠣꠞ ꠢꠦꠞꠦꠝꠅ ꠢꠣꠝꠣꠁꠀ ꠇꠅ ꠍꠥꠛꠢꠣꠘ ꠀꠟ꠆ꠟꠣ, ꠔꠣꠘ ꠀꠞꠡꠦ-ꠀꠎꠤꠝꠅ ꠉꠣꠅ ꠍꠥꠛꠢꠣꠘ ꠀꠟ꠆ꠟꠣ!
PSA 150:2 ꠔꠣꠘ ꠟꠤꠟꠣ-ꠈꠦꠟꠣ ꠖꠦꠈꠤꠀ ꠔꠣꠞꠤꠚ ꠇꠞꠅ, ꠔꠣꠘ ꠡꠣꠘ-ꠝꠢꠤꠝꠣꠞ ꠟꠣꠉꠤꠅ ꠔꠣꠞꠤꠚ ꠇꠞꠅ!
PSA 150:3 ꠡꠤꠋꠉꠣ ꠛꠣꠎꠣꠁꠀ ꠔꠣꠘ ꠔꠣꠞꠤꠚ ꠇꠞꠅ, ꠛꠣꠡꠤ-ꠛꠦꠢꠣꠟꠣꠞ ꠡꠥꠞꠦ ꠔꠣꠘ ꠔꠣꠞꠤꠚ ꠇꠞꠅ,
PSA 150:4 ꠔꠛꠟꠣꠞ ꠔꠣꠟꠦ ꠘꠣꠌꠤ ꠘꠣꠌꠤ ꠔꠣꠞꠤꠚ ꠇꠞꠅ, ꠖꠥꠔꠣꠞꠣ ꠀꠞ ꠛꠣꠡꠤꠞ ꠡꠥꠞꠦ ꠔꠣꠞꠤꠚ ꠇꠞꠅ,
PSA 150:5 ꠝꠘ꠆ꠖꠤꠞꠣꠞ ꠏꠥꠘ-ꠏꠥꠘꠣꠘꠤꠄ ꠔꠣꠘ ꠔꠣꠞꠤꠚ ꠇꠞꠅ, ꠓꠥꠟ ꠀꠞ ꠈꠥꠟ-ꠇꠞꠔꠣꠟ ꠛꠣꠎꠣꠁꠀ ꠔꠣꠞꠤꠚ ꠇꠞꠅ।
PSA 150:6 ꠢꠇ꠆ꠇꠟ ꠎꠣꠘꠖꠣꠞꠦ ꠝꠣꠛꠥꠖꠞ ꠔꠣꠞꠤꠚ ꠇꠞꠅ, ꠀꠟꠢꠣꠝꠖꠥꠟꠤꠟ꠆ꠟꠣ! ꠔꠣꠘ ꠔꠣꠞꠤꠚ ꠇꠞꠅ! ꠈꠔꠝ॥
JON 1:1 ꠝꠣꠔ꠆ꠔꠣꠞ ꠙꠥꠀ ꠁꠃꠘꠥꠍꠞ ꠉꠦꠍꠦ ꠝꠣꠛꠥꠖꠞ ꠅꠃ ꠅꠢꠤ ꠘꠣꠎꠤꠟ ꠅꠁꠟ,
JON 1:2 “ꠔꠥꠝꠤ ꠞꠅꠀꠘꠣ ꠖꠦꠅ, ꠀꠞ ꠘꠤꠘꠜ ꠘꠣꠝꠞ ꠢꠃ ꠛꠠ ꠐꠣꠃꠘꠅ ꠎꠣꠅ, ꠉꠤꠀ ꠀꠝꠣꠞ ꠉꠎꠛꠞ ꠇꠕꠣ ꠎꠣꠘꠣꠅ। ꠔꠣꠞꠣꠞ ꠘꠣꠚꠞꠝꠣꠘꠤ ꠀꠝꠣꠞ ꠖꠞꠛꠣꠞꠅ ꠎꠣꠁꠞ ꠅꠁꠉꠦꠍꠦ।”
JON 1:3 ꠅꠁꠟꠦ ꠁꠃꠘꠥꠍꠦ ꠝꠣꠛꠥꠖꠞ ꠢꠥꠇꠥꠝꠞ ꠛꠞꠈꠦꠟꠣꠚ ꠇꠞꠤꠀ ꠜꠣꠉꠤꠀ ꠡ꠆ꠙꠦꠘ ꠖꠦꠡꠅ ꠎꠣꠅꠀꠞ ꠟꠣꠉꠤ ꠞꠅꠀꠘꠣ ꠅꠁꠉꠦꠟꠣ। ꠔꠣꠁꠘ ꠎꠣꠚꠣ ꠘꠣꠝꠞ ꠎꠣꠎꠞ ꠊꠣꠐꠅ ꠉꠤꠀ ꠡ꠆ꠙꠦꠘ ꠖꠦꠡꠅ ꠎꠣꠅꠞꠣ ꠄꠇꠈꠣꠘ ꠎꠣꠎ ꠙꠣꠁꠀ, ꠎꠣꠎꠞ ꠜꠣꠠꠣ ꠀꠖꠣꠄ ꠇꠞꠤꠀ ꠜꠤꠔꠞꠦ ꠢꠣꠝꠣꠁꠀ ꠝꠣꠛꠥꠖꠞ ꠍꠣꠝꠘꠦ ꠕꠘꠦ ꠜꠣꠉꠤꠔꠣ ꠇꠞꠤ ꠘꠣꠁꠀꠂꠘ꠆ꠔꠞ ꠟꠉꠦ ꠅꠁꠀ ꠞꠅꠀꠘꠣ ꠖꠤꠟꠣꠁꠟꠣ।
JON 1:4 ꠅꠁꠟꠦ ꠝꠣꠛꠥꠖꠦ ꠖꠞꠤꠀꠞ ꠝꠣꠎꠦ ꠄꠇ ꠛꠦꠎꠥꠁꠔꠣ ꠔꠥꠚꠣꠘ ꠍꠣꠠꠤꠟꠣ। ꠔꠥꠚꠣꠘꠞ ꠑꠦꠟꠣꠄ ꠎꠣꠎꠈꠣꠘ ꠜꠣꠋꠉꠤ ꠎꠣꠅꠀꠞ ꠖꠡꠣ ꠅꠁꠟ।
JON 1:5 ꠘꠣꠁꠀꠂꠘ꠆ꠔꠦ ꠒꠞꠣꠁꠀ ꠎꠣꠞꠎꠤꠞ ꠖꠦꠛꠔꠣꠞ ꠉꠦꠍꠦ ꠇꠣꠘ꠆ꠖꠣ-ꠇꠣꠐꠤ ꠇꠞꠣꠔ ꠟꠣꠉꠟꠣ। ꠀꠞ ꠎꠣꠎꠞ ꠜꠣꠞ ꠇꠝꠣꠘꠤꠞ ꠟꠣꠉꠤ ꠝꠣꠟ-ꠍꠣꠝꠣꠘꠣ ꠖꠞꠤꠀꠔ ꠚꠣꠟꠣꠁ ꠖꠤꠟ। ꠅꠁꠟꠦ ꠁꠃꠘꠥꠍ ꠎꠣꠎꠞ ꠔꠟꠞ ꠔꠣꠟꠣꠔ ꠟꠣꠝꠤꠀ ꠢꠥꠔꠤ ꠞꠁꠟꠣ, ꠢꠥꠔꠤꠀ ꠛꠦꠖꠥꠝ ꠊꠥꠝꠅ ꠙꠠꠟꠣ।
JON 1:6 ꠅꠃ ꠡꠝꠄ ꠎꠣꠎꠞ ꠡꠣꠞꠋ ꠁꠃꠘꠥꠍꠞ ꠉꠦꠍꠦ ꠉꠤꠀ ꠇꠁꠟꠣ, “ꠅꠂ ꠝꠤꠀ! ꠔꠥꠝꠤ ꠇꠦꠝꠘꠦ ꠊꠥꠝꠣꠁꠞꠣꠄ? ꠇꠥꠘ꠆ꠔꠣ ꠢꠥꠘꠞꠣꠄ ꠘꠣꠄ ꠘꠤ? ꠃꠑꠅ, ꠔꠥꠝꠣꠞ ꠖꠦꠛꠔꠣꠞꠦ ꠒꠣꠇꠅ। ꠅꠁꠔ ꠙꠣꠞꠦ ꠔꠣꠁꠘ ꠀꠝꠞꠣꠞ ꠛꠣꠄ ꠈꠤꠀꠟ ꠇꠞꠛꠣ, ꠀꠝꠞꠣꠞ ꠎꠣꠘ ꠛꠤꠘꠣꠡ ꠅꠁꠔ ꠘꠣꠄ।”
JON 1:7 ꠛꠣꠖꠦ ꠘꠣꠁꠀꠂꠘ꠆ꠔꠦ ꠄꠇꠦ-ꠅꠁꠘ꠆ꠘꠦ ꠇꠁꠟ, “ꠀꠅ ꠀꠝꠞꠣ ꠟꠐꠣꠞꠤ ꠝꠣꠞꠤꠀ ꠖꠦꠈꠤ, ꠇꠣꠞ ꠖꠥꠡꠦ ꠁ ꠝꠍꠤꠛꠔ ꠀꠁꠍꠦ।” ꠔꠦꠃ ꠔꠣꠞꠣ ꠟꠐꠣꠞꠤ ꠝꠣꠞꠟ ꠀꠞ ꠟꠐꠣꠞꠤꠞ ꠝꠣꠎꠦ ꠁꠃꠘꠥꠍꠞ ꠘꠣꠝ ꠃꠑꠟ।
JON 1:8 ꠅꠃ ꠔꠣꠞꠣ ꠔꠣꠘꠞꠦ ꠎꠤꠇꠣꠁꠟꠣ, “ꠇꠅ ꠌꠣꠁꠘ, ꠇꠣꠞ ꠖꠥꠡꠦ ꠀꠝꠞꠣꠞ ꠃꠙꠞꠦ ꠁ ꠝꠍꠤꠛꠔ ꠀꠁꠍꠦ? ꠔꠥꠝꠤ ꠇꠤꠔꠣ ꠇꠣꠝ ꠇꠞꠅ? ꠇꠥꠀꠁ ꠕꠣꠇꠤ ꠀꠁꠍ? ꠇꠥꠘ ꠖꠦꠡꠞ ꠝꠣꠘꠥꠡ? ꠔꠥꠝꠤ ꠇꠥꠘ ꠎꠣꠔꠞ ꠝꠣꠘꠥꠡ?”
JON 1:9 ꠁꠃꠘꠥꠍꠦ ꠎꠥꠀꠙ ꠖꠤꠟꠣ, “ꠜꠣꠁꠀꠁꠘꠞꠦ, ꠀꠝꠤ ꠄꠇꠎꠘ ꠁꠛꠞꠣꠘꠤ, ꠁꠍꠞꠣꠁꠟ ꠎꠣꠔꠤꠞ ꠝꠣꠘꠥꠡ। ꠀꠝꠤ ꠛꠦꠢꠦꠡ꠆ꠔꠞ ꠝꠣꠟꠤꠇ ꠀꠟ꠆ꠟꠣ ꠝꠣꠛꠥꠖꠞ ꠄꠛꠣꠖꠔ ꠇꠞꠤ, ꠔꠣꠁꠘꠃ ꠖꠞꠤꠀ ꠀꠞ ꠎꠝꠤꠘ ꠙꠄꠖꠣ ꠇꠞꠍꠂꠘ।”
JON 1:10 ꠔꠣꠁꠘ ꠀꠞꠅ ꠇꠁꠟꠣ, ꠝꠣꠛꠥꠖꠞ ꠍꠣꠝꠘꠦ ꠕꠘꠦ ꠜꠣꠉꠤꠛꠣꠞ ꠘꠤꠅꠔꠦ ꠔꠣꠁꠘ ꠀꠁꠀ ꠎꠣꠎꠅ ꠃꠑꠍꠂꠘ। ꠁꠈꠣꠘ ꠢꠥꠘꠤꠀ ꠔꠣꠞꠣ ꠈꠥꠛ ꠒꠞꠣꠁꠀ ꠇꠁꠟꠣ, “ꠢꠣꠄ, ꠢꠣꠄ! ꠔꠥꠝꠤ ꠁꠔꠣ ꠇꠥꠘ ꠎꠣꠔꠞ ꠇꠣꠝ ꠇꠞꠟꠣꠄ?”
JON 1:11 ꠖꠞꠤꠀꠞ ꠔꠥꠚꠣꠘ ꠎꠦꠛꠟꠣ ꠀꠞꠅ ꠛꠦꠎꠥꠁꠔꠣ ꠜꠣꠛ ꠗꠞꠟ, ꠅꠃ ꠡꠝꠄ ꠔꠣꠞꠣ ꠔꠣꠘꠞꠦ ꠎꠤꠇꠣꠁꠟ, “ꠀꠝꠞꠣ ꠔꠥꠝꠣꠞꠦ ꠇꠤꠔꠣ ꠇꠞꠟꠦ ꠖꠞꠤꠀ ꠕꠤꠞ ꠅꠁꠛ?”
JON 1:12 ꠁꠃꠘꠥꠍꠦ ꠎꠥꠀꠙ ꠖꠤꠟꠣ, “ꠀꠝꠣꠞꠦ ꠗꠞꠤꠀ ꠖꠞꠤꠀꠔ ꠚꠣꠟꠣꠁ ꠖꠦꠅ, ꠔꠦꠃ ꠖꠞꠤꠀ ꠡꠣꠘ꠆ꠔꠤ ꠅꠁꠎꠤꠛ। ꠀꠝꠤ ꠔ ꠎꠣꠘꠤ, ꠀꠝꠣꠞ ꠖꠥꠡꠦꠃ ꠀꠙꠘꠣꠁꠘ꠆ꠔꠞ ꠃꠙꠞꠦ ꠁ ꠉꠎꠛꠤ ꠔꠥꠚꠣꠘ ꠀꠁꠍꠦ।”
JON 1:13 ꠅꠁꠟꠦ ꠘꠣꠁꠀꠂꠘ꠆ꠔꠦ ꠔꠣꠘꠦ ꠘꠣ ꠚꠣꠟꠣꠁꠀ ꠎꠣꠎꠈꠣꠘ ꠇꠤꠘꠣꠞꠅ ꠜꠤꠠꠣꠘꠤꠞ ꠟꠣꠉꠤ ꠎꠣꠘ-ꠙꠞꠣꠘ ꠡꠙꠤꠀ ꠖꠣꠠ ꠛꠣꠁꠟꠣ, ꠔꠥꠚꠣꠘꠞ ꠎꠥꠞ ꠈꠣꠟꠤ ꠛꠣꠠꠔꠦꠃ ꠞꠁꠟ, ꠄꠞꠖꠣꠄ ꠔꠣꠞꠣ ꠎꠣꠎꠈꠣꠘ ꠇꠤꠘꠣꠞꠅ ꠘꠤꠔꠣ ꠙꠣꠞꠟꠣ ꠘꠣ।
JON 1:14 ꠔꠦꠃ ꠔꠣꠞꠣ ꠀꠟ꠆ꠟꠣꠞ ꠉꠦꠍꠦ ꠚꠞꠤꠀꠖ ꠇꠞꠟ, ꠇꠁꠟ “ꠅ ꠝꠣꠛꠥꠖ, ꠞꠢꠝ ꠇꠞꠅ, ꠅꠃ ꠝꠣꠘꠡꠞ ꠎꠣꠘꠞ ꠟꠣꠉꠤ ꠔꠥꠝꠤ ꠀꠝꠞꠣꠞꠦ ꠝꠣꠞꠤꠅ ꠘꠣ, ꠁ ꠘꠤ-ꠅꠙꠞꠣꠗꠤꠞ ꠎꠣꠘꠞ ꠇꠣꠞꠘꠦ ꠀꠝꠞꠣꠞꠦ ꠖꠣꠄꠁ ꠇꠞꠤꠅ ꠘꠣ। ꠅ ꠝꠣꠛꠥꠖ, ꠁꠔꠣ ꠢꠇꠟꠔꠣꠃ ꠔ ꠔꠥꠝꠣꠞ ꠝꠥꠘꠡꠣ।”
JON 1:15 ꠛꠣꠖꠦ ꠔꠣꠞꠣ ꠁꠃꠘꠥꠍ ꠘꠛꠤꠞꠦ ꠗꠞꠤꠀ ꠖꠞꠤꠀꠔ ꠚꠣꠟꠣꠁ ꠖꠤꠟ, ꠀꠞ ꠖꠞꠤꠀꠞ ꠔꠥꠚꠣꠘꠞ ꠓꠦꠃ ꠖꠝ ꠟꠁꠟꠤꠟ।
JON 1:16 ꠁ ꠢꠣꠟꠔ ꠖꠦꠈꠤꠀ ꠔꠣꠞꠣ ꠝꠣꠛꠥꠖꠞꠦ ꠈꠥꠛ ꠒꠞꠣꠁꠟꠣ। ꠔꠣꠞꠣ ꠝꠣꠛꠥꠖꠞ ꠘꠣꠝꠦ ꠙꠡꠥ-ꠇꠥꠞꠛꠣꠘꠤ ꠖꠤꠟꠣ ꠀꠞ ꠝꠣꠘ꠆ꠘꠔ ꠝꠣꠘꠟꠣ।
JON 1:17 ꠝꠣꠛꠥꠖꠦ ꠈꠥꠛ ꠛꠠ ꠄꠇ ꠝꠣꠍꠞꠦ ꠎꠥꠉꠣꠁ ꠕꠁꠍꠟꠣ ꠁꠃꠘꠥꠍꠞꠦ ꠉꠤꠟꠤꠟꠤꠛꠣꠞ ꠟꠣꠉꠤ, ꠔꠣꠁꠘ ꠔꠤꠘ ꠖꠤꠘ, ꠔꠤꠘ ꠞꠣꠁꠔ ꠢꠃ ꠝꠣꠍꠞ ꠙꠦꠐꠅ ꠞꠁꠟꠣ।
JON 2:1 ꠁꠃꠘꠥꠍꠦ ꠝꠣꠍꠞ ꠙꠦꠐꠅ ꠕꠘꠦ ꠝꠣꠛꠥꠖ ꠀꠟ꠆ꠟꠣꠞ ꠖꠞꠛꠣꠞꠅ ꠖꠥꠀ ꠇꠞꠟꠣ।
JON 2:2 ꠝꠍꠤꠛꠔꠅ ꠙꠁꠠꠣ ꠝꠃꠟꠣ ꠒꠣꠇꠤꠟꠣꠝ ꠔꠞꠦ, ꠞꠢꠝ ꠇꠞꠤꠀ ꠔꠥꠁ ꠎꠥꠀꠙ ꠖꠤꠟꠦ ꠝꠞꠦ। ꠙꠣꠔꠣꠟꠞ ꠙꠦꠐꠅ ꠛꠁꠀ ꠀꠝꠤ ꠇꠣꠘ꠆ꠖꠤꠟꠣꠝ, ꠇꠛꠥꠟ ꠇꠞꠤꠟꠣꠄ ꠀꠞꠎ ꠞꠢꠤꠝ ꠞꠢꠝꠣꠘ।
JON 2:3 ꠖꠞꠤꠀꠞ ꠝꠥꠞꠅ ꠛꠘ꠆ꠖꠥ ꠝꠞꠦ ꠚꠣꠟꠣꠁꠟꠣꠄ, ꠔꠥꠝꠣꠞ ꠙꠣꠘꠤꠞ ꠓꠦꠃꠄ ꠀꠝꠣꠄ ꠜꠣꠡꠣꠁ ꠟꠁꠀ ꠎꠣꠄ।
JON 2:4 ꠝꠤꠟꠦ ꠘꠣ ꠖꠤꠖꠣꠞ ꠔꠥꠝꠣꠞ ꠘꠣꠁ ꠇꠣꠘ꠆ꠒꠣꠞꠤ, ꠔꠣꠟ꠆ꠟꠣꠡꠤ ꠇꠞꠤꠀ ꠝꠥꠇꠣꠝ ꠎꠤꠇꠤꠞ ꠇꠞꠤ।
JON 2:5 ꠓꠦꠃꠅꠞ ꠝꠣꠎꠦꠔꠦ ꠙꠠꠤ ꠎꠣꠘ ꠗꠠꠚꠠ ꠇꠞꠦ, ꠖꠞꠤꠀꠞ ꠟꠔꠣ-ꠙꠣꠔꠣꠄ ꠙꠦꠌꠤꠟꠤꠟ ꠝꠞꠦ।
JON 2:6 ꠙꠣꠔꠣꠟꠞ ꠔꠟꠦ ꠉꠤꠀ ꠝꠤꠟꠦꠞ ꠘꠣ ꠇꠤꠘꠣꠞ, ꠈꠞꠦꠖꠤ ꠌꠣꠁꠀ ꠖꠦꠈꠤ ꠖꠥꠀꠞ ꠘꠣꠁ ꠀꠞ। ꠛꠘ꠆ꠖꠤ ꠅꠁꠀ ꠇꠣꠘ꠆ꠖꠤ ꠀꠝꠤ ꠘꠤꠞꠣꠡ ꠛꠖꠘꠦ, ꠀꠎꠣꠖ ꠇꠞꠤꠟꠣꠄ ꠝꠃꠟꠣ ꠉꠁꠘ ꠉꠣꠠꠣ ꠕꠘꠦ।
JON 2:7 ꠎꠣꠘ ꠀꠝꠣꠞ ꠎꠣꠄ ꠎꠣꠄ ꠅꠁꠟ ꠎꠈꠘ, ꠇꠣꠔꠞ ꠅꠁꠀ ꠉ ꠛꠘ꠆ꠖꠥ ꠇꠞꠤꠘꠥ ꠡꠞꠘ। ꠜꠤꠇ꠆ꠇꠣ ꠝꠣꠋꠉꠤꠟꠣꠝ ꠇꠣꠋꠉꠣꠟ ꠖꠞꠛꠣꠞꠦ ꠔꠥꠝꠣꠞ, ꠀꠞꠡꠅ ꠕꠣꠇꠤꠀ ꠖꠄꠀꠟ ꠖꠦꠈꠣꠁꠟꠣꠄ ꠖꠤꠖꠣꠞ।
JON 2:8 ꠝꠥꠞ꠆ꠔꠤꠙꠥꠎꠣ ꠇꠞꠦ ꠎꠣꠞꠣ ꠘꠣ ꠙꠣꠁꠛ ꠞꠢꠝꠔ, ꠄꠟꠣꠝꠤ ꠇꠞꠤꠀ ꠔꠣꠞꠣ ꠀꠞꠣꠁꠟ ꠇꠥꠖꠞꠔ।
JON 2:9 ꠡꠥꠇꠥꠞ-ꠉꠥꠎꠣꠞ ꠇꠞꠅ ꠁꠃꠘꠥꠍ ꠝꠣꠛꠥꠖ ꠝꠦꠢꠦꠞꠛꠣꠘ, ꠔꠥꠝꠣꠞ ꠖꠞꠛꠣꠞꠦ ꠀꠝꠤ ꠇꠞꠤꠝꠥ ꠇꠥꠞꠛꠣꠘ। ꠟꠤꠟ꠆ꠟꠣ-ꠍꠖꠉꠣ ꠖꠣꠘ-ꠈꠄꠞꠣꠔ ꠡꠙꠤꠝꠥ ꠔꠞꠦ, ꠘꠣꠎꠣꠔꠞ ꠝꠣꠟꠤꠇ ꠝꠃꠟꠣꠄ ꠛꠣꠌꠣꠅ ꠀꠝꠣꠞꠦ।
JON 2:10 ꠛꠣꠖꠦ ꠝꠣꠛꠥꠖꠦ ꠢꠃ ꠝꠣꠍꠞꠦ ꠢꠥꠇꠥꠝ ꠖꠤꠟꠣ, ꠝꠣꠍꠦ ꠁꠃꠘꠥꠍꠞꠦ ꠘꠤꠀ ꠢꠥꠇꠘꠣ ꠎꠝꠤꠘꠞ ꠃꠙꠞꠦ ꠛꠣꠁꠔ ꠇꠞꠤ ꠚꠣꠟꠣꠁ ꠖꠤꠟ।
JON 3:1 ꠛꠣꠖꠦ ꠁꠃꠘꠥꠍꠞ ꠃꠙꠞꠦ ꠖꠥꠍꠞꠣꠛꠣꠞ ꠝꠣꠛꠥꠖꠞ ꠅꠃ ꠅꠢꠤ ꠘꠣꠎꠤꠟ ꠅꠁꠟ।
JON 3:2 ꠔꠣꠁꠘ ꠇꠁꠟꠣ, “ꠔꠥꠝꠤ ꠞꠅꠀꠘꠣ ꠖꠦꠅ, ꠅꠈꠘ ꠢꠃ ꠛꠠ ꠐꠣꠃꠘ ꠘꠤꠘꠜ ꠎꠣꠅ, ꠀꠞ ꠀꠝꠤ ꠔꠥꠝꠣꠞꠦ ꠎꠦꠔꠣ ꠛꠣꠔꠣꠁ ꠖꠤꠝꠥ ꠔꠥꠝꠤ ꠅꠃꠔꠣ ꠔꠣꠞꠣꠞ ꠉꠦꠍꠦ ꠄꠟꠣꠘ ꠇꠞꠅ।”
JON 3:3 ꠝꠣꠛꠥꠖꠞ ꠢꠥꠇꠥꠝ ꠝꠣꠚꠤꠇ ꠁꠃꠘꠥꠍ ꠞꠅꠀꠘꠣ ꠅꠁꠀ ꠘꠤꠘꠜ ꠉꠦꠟꠣ। ꠘꠤꠘꠜ ꠅꠁꠟ ꠈꠥꠛ ꠛꠠ ꠐꠣꠃꠘ, ꠁ ꠐꠣꠃꠘꠞ ꠄꠇ ꠝꠣꠕꠣ ꠕꠣꠇꠤ ꠀꠞꠇ ꠝꠣꠕꠣꠔ ꠎꠣꠁꠔꠦ ꠔꠤꠘ ꠖꠤꠘ ꠟꠣꠉꠔ।
JON 3:4 ꠁꠃꠘꠥꠍ ꠢꠃ ꠐꠣꠃꠘꠅ ꠢꠣꠝꠣꠁꠀ ꠄꠇꠖꠤꠘꠞ ꠙꠕ ꠉꠦꠟꠣ, ꠉꠤꠀ ꠄꠟꠣꠘ ꠇꠞꠟꠣ, ꠇꠁꠟꠣ, “ꠅ ꠘꠤꠘꠜꠞ ꠛꠣꠡꠤꠘ꠆ꠖꠣ ꠅꠇꠟ, ꠀꠞ ꠌꠣꠟ꠆ꠟꠤꠡ ꠖꠤꠘ ꠛꠣꠖꠦ ꠘꠤꠘꠜ ꠐꠣꠃꠘ ꠃꠟꠐ-ꠙꠣꠟꠐ ꠅꠁꠎꠤꠛ।”
JON 3:5 ꠁꠈꠣꠘ ꠢꠥꠘꠤꠀ ꠘꠤꠘꠜꠞ ꠝꠣꠘꠡꠦ ꠀꠟ꠆ꠟꠣꠞ ꠃꠙꠞꠦ ꠁꠝꠣꠘ ꠀꠘꠟꠣ, ꠔꠣꠞꠣ ꠞꠥꠎꠣ ꠞꠣꠈꠣꠞ ꠟꠣꠉꠤ ꠄꠟꠣꠘ ꠇꠞꠟꠣ, ꠀꠞ ꠢꠥꠞꠥ-ꠛꠠ ꠢꠇꠟꠦ ꠖꠥꠈ ꠎꠣꠁꠞ ꠇꠞꠣꠞ ꠟꠣꠉꠤ ꠍꠟꠣꠞ ꠌꠐ ꠚꠤꠘ꠆ꠖꠤꠟꠣ।
JON 3:6 ꠁ ꠈꠛꠞ ꠉꠤꠀ ꠛꠣꠖꠡꠣꠞ ꠖꠞꠛꠣꠞꠅ ꠀꠎꠤꠟ, ꠔꠣꠁꠘꠅ ꠛꠣꠖꠡꠣꠁ ꠉꠖꠤ ꠍꠣꠠꠤꠀ ꠚꠤꠘ꠆ꠘꠞ ꠟꠦꠛꠣꠍ ꠈꠥꠟꠤꠀ, ꠍꠟꠣꠞ ꠌꠐ ꠚꠤꠘ꠆ꠖꠤꠀ ꠍꠣꠟꠤꠞ ꠝꠣꠎꠦ ꠛꠁꠟꠣ।
JON 3:7 ꠀꠞ ꠔꠣꠁꠘ ꠀꠡ꠆ꠔꠣ ꠘꠤꠘꠜ ꠐꠣꠃꠘꠅ ꠅꠃ ꠄꠟꠣꠘ ꠇꠞꠣꠁꠟꠣ, “ꠛꠣꠖꠡꠣ ꠀꠞ ꠔꠣꠘ ꠃꠎꠤꠞ-ꠘꠣꠎꠤꠞ ꠅꠇꠟꠞ ꠢꠥꠇꠥꠝ ꠅꠁꠟ: ꠝꠣꠘꠥꠡ ꠛꠣ ꠙꠡꠥ, ꠉꠞꠥ-ꠍꠣꠉꠟ ꠇꠦꠃ ꠇꠥꠘꠥꠎꠣꠔ ꠖꠣꠘꠣ-ꠙꠣꠘꠤ ꠇꠥꠘ꠆ꠔꠣꠃ ꠝꠥꠈꠅ ꠖꠤꠅ ꠘꠣ।
JON 3:8 ꠝꠣꠘꠥꠡ ꠀꠞ ꠙꠡꠥ, ꠢꠇꠟꠦ ꠝꠤꠟꠤꠀ ꠍꠟꠣꠞ ꠌꠐ ꠚꠤꠘ꠆ꠖꠤꠀ ꠖꠤꠟꠦ-ꠎꠣꠘꠦ ꠀꠟ꠆ꠟꠣꠞ ꠘꠣꠝ ꠟꠅ, ꠢꠇꠟꠦ ꠎꠣꠞꠎꠤꠞ ꠘꠣꠚꠞꠝꠣꠘꠤꠞ ꠙꠕ ꠍꠣꠠꠅ ꠀꠞ ꠎꠥꠞ-ꠎꠥꠟꠥꠝ ꠛꠣꠖ ꠖꠤꠀ ꠀꠟ꠆ꠟꠣꠞ ꠛꠣꠄ ꠚꠤꠞꠅ।
JON 3:9 ꠅꠁꠔ ꠙꠣꠞꠦ ꠀꠟ꠆ꠟꠣꠄ ꠞꠢꠝ ꠇꠞꠛꠣ, ꠉꠎꠛꠞ ꠈꠤꠀꠟ ꠛꠖꠟꠣꠁꠟꠤꠛꠣ, ꠔꠣꠘ ꠖꠣꠃ ꠖꠣꠃ ꠇꠞꠣ ꠉꠥꠍꠣ ꠅꠘꠦ ꠑꠣꠘ꠆ꠒꠣ ꠅꠁꠎꠤꠛ, ꠀꠞ ꠀꠝꠞꠣ ꠛꠤꠘꠣꠡ ꠅꠁꠔꠣꠝ ꠘꠣꠄ।”
JON 3:10 ꠀꠟ꠆ꠟꠣꠄ ꠔꠣꠞꠣꠞ ꠁ ꠢꠣꠟꠔ ꠖꠦꠈꠟꠣ, ꠔꠣꠞꠣ ꠎꠣꠞꠎꠤꠞ ꠘꠣꠚꠞꠝꠣꠘꠤꠞ ꠙꠕ ꠛꠣꠖ ꠖꠤꠀ ꠔꠃꠛꠣ ꠇꠞꠍꠂꠘ। ꠖꠦꠈꠤꠀ ꠔꠣꠁꠘꠅ ꠔꠣꠘ ꠀꠉꠞ ꠌꠤꠘ꠆ꠔꠣ ꠛꠖꠟꠣꠁꠟꠤꠟꠣ, ꠔꠣꠞꠣꠞꠦ ꠛꠤꠘꠣꠡ ꠇꠞꠣꠞ ꠇꠕꠣ ꠇꠁꠟꠦꠅ ꠅꠈꠘ ꠀꠞ ꠛꠤꠘꠣꠡ ꠇꠞꠟꠣ ꠘꠣ।
JON 4:1 ꠅꠁꠟꠦ ꠁꠃꠘꠥꠍꠦ ꠁꠔꠣꠞ ꠟꠣꠉꠤ ꠔꠦꠈ꠆ꠔ ꠅꠁꠀ ꠈꠥꠛ ꠉꠥꠍꠣ ꠇꠞꠟꠣ।
JON 4:2 ꠔꠣꠁꠘ ꠝꠣꠛꠥꠖꠞ ꠖꠞꠛꠣꠞꠅ ꠚꠞꠤꠀꠖ ꠇꠞꠟꠣ, “ꠅ ꠝꠣꠛꠥꠖ, ꠀꠝꠤ ꠖꠦꠡꠅ ꠕꠣꠇꠔꠦꠃ ꠔ ꠎꠣꠘꠔꠣꠝ ꠁꠟꠣꠈꠣꠘ ꠅꠁꠛ। ꠄꠞꠖꠣꠄ ꠀꠝꠤ ꠀꠉꠦꠃ ꠡ꠆ꠙꠦꠘ ꠖꠦꠡꠅ ꠢꠞꠤꠀ ꠎꠣꠁꠔꠣꠝꠉꠤ ꠌꠣꠁꠍꠟꠣꠝ। ꠀꠝꠤ ꠔ ꠎꠣꠘꠤ, ꠔꠥꠝꠤ ꠖꠄꠀ-ꠝꠝꠔꠣꠄ ꠜꠞꠣ ꠀꠟ꠆ꠟꠣ, ꠉꠥꠍꠣ ꠇꠞ ꠗꠤꠞ ꠉꠔꠤꠄ, ꠞꠢꠝ ꠇꠞ ꠛꠦꠢꠤꠡꠣꠛ, ꠀꠞ ꠉꠎꠛ ꠘꠣꠎꠤꠟꠞ ꠛꠦꠙꠣꠞꠦ ꠔꠥꠝꠣꠞ ꠝꠞ꠆ꠎꠤ ꠛꠖꠟꠣꠁꠟꠣꠅ।
JON 4:3 ꠅ ꠝꠣꠛꠥꠖ, ꠀꠝꠤ ꠅꠈꠘ ꠀꠞꠎ ꠇꠞꠞꠣꠝ, ꠔꠥꠝꠤ ꠀꠝꠣꠞ ꠎꠣꠘꠈꠣꠘ ꠘꠦꠅꠉꠤ, ꠀꠝꠣꠞ ꠔ ꠛꠣꠌꠣ ꠕꠣꠇꠤ ꠝꠞꠣꠃ ꠜꠣꠟꠣ।”
JON 4:4 ꠝꠣꠛꠥꠖꠦ ꠎꠥꠀꠙ ꠖꠤꠟꠣ, “ꠔꠥꠝꠣꠞ ꠉꠥꠍꠣ ꠇꠞꠣ ꠑꠤꠇ ꠅꠞ ꠘꠤ?”
JON 4:5 ꠛꠣꠖꠦ ꠁꠃꠘꠥꠍ ꠐꠣꠃꠘꠞ ꠛꠣꠞꠣ ꠉꠦꠟꠣ, ꠉꠤꠀ ꠙꠥꠛꠦꠖꠤ ꠄꠇ ꠎꠣꠉꠣꠔ ꠒꠦꠞꠣ ꠐꠣꠋꠉꠣꠁꠀ, ꠒꠦꠞꠣꠞ ꠍꠦꠛꠣꠔ ꠛꠁꠞꠁꠟꠣ। ꠀꠞ ꠐꠣꠃꠘꠞ ꠇꠤꠔꠣ ꠖꠡꠣ ꠅꠄ ꠅꠃꠔꠣ ꠖꠦꠈꠣꠞ ꠟꠣꠉꠤ ꠛꠣꠞ ꠌꠣꠅꠀꠔ ꠞꠁꠟꠣ।
JON 4:6 ꠝꠣꠛꠥꠖ ꠀꠟ꠆ꠟꠣꠄ ꠢꠘꠅ ꠄꠇ ꠉꠣꠍ ꠎꠥꠉꠣꠁꠟꠣ। ꠁ ꠉꠣꠍꠞ ꠟꠔ ꠛꠣꠠꠤꠀ ꠟꠣꠝ꠆ꠛꠣ ꠅꠁꠀ, ꠁꠃꠘꠥꠍꠞ ꠇꠡ꠆ꠐ ꠇꠝꠣꠘꠤꠞ ꠟꠣꠉꠤ ꠔꠣꠘ ꠝꠣꠕꠣꠞ ꠃꠙꠞꠦ ꠀꠞꠣꠝꠞ ꠍꠦꠛꠣ ꠖꠤꠟ। ꠀꠞ ꠁꠃꠘꠥꠍꠦꠅ ꠁ ꠉꠣꠍꠞ ꠍꠦꠛꠣ ꠙꠣꠁꠀ ꠈꠥꠛ ꠀꠟ꠆ꠟꠣꠖꠦ ꠉꠖꠉꠖ ꠇꠞꠟꠣ।
JON 4:7 ꠅꠁꠟꠦ ꠛꠣꠖꠞ ꠖꠤꠘ ꠚꠎꠞ ꠅꠇ꠆ꠔꠅ ꠀꠟ꠆ꠟꠣꠄ ꠄꠉꠥ ꠙꠥꠇ ꠎꠥꠉꠣꠁꠟꠣ। ꠙꠥꠇꠦ ꠀꠁꠀ ꠉꠣꠍꠞ ꠉꠥꠠꠤ ꠇꠣꠐꠤꠖꠤꠟ, ꠇꠣꠐꠣꠞ ꠛꠣꠖꠦ ꠁꠉꠥ ꠢꠥꠇꠣꠁꠉꠦꠟ।
JON 4:8 ꠛꠣꠖꠦ ꠎꠦꠛꠟꠣ ꠡꠥꠞꠥꠎ ꠃꠑꠟ, ꠅꠃ ꠡꠝꠄ ꠀꠟ꠆ꠟꠣꠄ ꠙꠥꠛꠣꠟꠤ ꠉꠞꠝ ꠢꠣꠅꠀ ꠎꠥꠉꠣꠁꠟꠣ। ꠞꠂꠖꠦ ꠁꠃꠘꠥꠍꠞ ꠝꠣꠕꠣꠔ ꠈꠥꠛ ꠉꠞꠝ ꠟꠣꠉꠟ, ꠔꠣꠁꠘ ꠛꠦꠃꠡ ꠅꠁꠎꠤꠛꠣꠞ ꠖꠡꠣ। ꠔꠦꠃ ꠁꠃꠘꠥꠍꠦ ꠝꠞꠘ ꠝꠣꠋꠉꠤꠟꠣ, ꠇꠁꠟꠣ, “ꠀꠝꠣꠞ ꠔ ꠛꠣꠌꠣ ꠕꠣꠇꠤ ꠝꠞꠘꠃ ꠜꠣꠟꠣ।”
JON 4:9 ꠅꠁꠟꠦ ꠀꠟ꠆ꠟꠣꠄ ꠁꠃꠘꠥꠍꠞꠦ ꠇꠁꠟꠣ, “ꠁ ꠉꠣꠍꠞ ꠟꠣꠉꠤ ꠔꠥꠝꠣꠞ ꠉꠥꠍꠣ ꠇꠞꠣ ꠇꠥꠘꠥ ꠑꠤꠇ ꠅꠞ ꠘꠤ?” ꠔꠣꠁꠘ ꠇꠁꠟꠣ, “ꠁꠔꠣꠞ ꠇꠣꠞꠘ ꠀꠍꠦ। ꠀꠝꠤ ꠉꠥꠍꠣ ꠇꠞꠤꠀꠃ ꠝꠞꠝꠥ।”
JON 4:10 ꠝꠣꠛꠥꠖꠦ ꠇꠁꠟꠣ, “ꠔꠥꠝꠤ ꠔ ꠁ ꠉꠣꠍꠞ ꠟꠣꠉꠤꠀ ꠇꠥꠘꠥ ꠇꠡ꠆ꠐ ꠇꠞꠍ ꠘꠣ, ꠀꠞ ꠁꠉꠥ ꠛꠠꠅ ꠇꠞꠍ ꠘꠣ। ꠁꠉꠥ ꠔ ꠈꠣꠟꠤ ꠄꠇ ꠞꠣꠁꠔꠦ ꠅꠁꠍꠦ, ꠀꠞ ꠄꠇ ꠞꠣꠁꠔꠦꠃ ꠝꠞꠤꠉꠦꠍꠦ, ꠔꠦꠛꠃ ꠁꠉꠥꠞ ꠟꠣꠉꠤ ꠔꠥꠝꠣꠞ ꠝꠣꠄꠀ ꠟꠣꠉꠍꠦ।
JON 4:11 ꠅꠁꠟꠦ ꠁ ꠘꠤꠘꠜ ꠐꠣꠃꠘꠅ ꠔ ꠄꠇ ꠟꠣꠈ ꠛꠤꠡ ꠀꠎꠣꠞꠞꠅ ꠛꠦꠡꠤ ꠝꠣꠘꠥꠡ ꠀꠍꠂꠘ, ꠎꠦꠞꠣ ꠘꠤꠎꠞ ꠒꠣꠁꠘ-ꠛꠣꠃ ꠇꠤꠔꠣ ꠌꠤꠘꠦ ꠘꠣ। ꠀꠞ ꠛꠃꠔ ꠢꠦꠝꠣꠘ-ꠎꠣꠘꠥꠀꠞꠅ ꠀꠍꠂꠘ, ꠔꠦ ꠅꠔ ꠛꠠ ꠐꠣꠃꠘꠞ ꠛꠣꠄ ꠀꠝꠤ ꠇꠤꠔꠣ ꠝꠣꠄꠀ-ꠝꠝꠔꠣ ꠇꠞꠔꠣꠝ ꠘꠣ ꠘꠤ?” ꠈꠔꠝ॥
MAT 1:1 ꠢꠎꠞꠔ ꠁꠍꠣ ꠀꠟ-ꠝꠍꠤ ꠅꠁꠟꠣ ꠖꠣꠃꠖ ꠘꠛꠤꠞ ꠛꠋꠡꠗꠞ, ꠀꠞ ꠖꠣꠃꠖ ꠅꠁꠟꠣ ꠢꠎꠞꠔ ꠁꠛ꠆ꠞꠣꠢꠤꠝꠞ ꠛꠋꠡꠗꠞ। ꠁꠍꠣ ꠀꠟ-ꠝꠍꠤꠞ ꠈꠣꠘ꠆ꠖꠣꠘꠞ ꠙꠞꠤꠌꠄ ꠅꠁꠟ,
MAT 1:2 ꠢꠎꠞꠔ ꠁꠛ꠆ꠞꠣꠢꠤꠝꠞ ꠙꠥꠀ ꠢꠎꠞꠔ ꠁꠍꠢꠣꠇ, ꠁꠍꠢꠣꠇꠞ ꠙꠥꠀ ꠢꠎꠞꠔ ꠁꠀꠇꠥꠛ, ꠁꠀꠇꠥꠛꠞ ꠙꠥꠀ ꠄꠢꠥꠖꠣ ꠀꠞ ꠔꠣꠘ ꠜꠣꠁꠀꠁꠘ,
MAT 1:3 ꠄꠢꠥꠖꠣꠞ ꠙꠥꠀꠂꠘ ꠚꠤꠞꠥꠎ ꠀꠞ ꠎꠣꠞꠣꠢ, ꠄꠞꠣꠞ ꠝꠣʼꠞ ꠘꠣꠝ ꠔꠣꠝꠣꠞ। ꠚꠤꠞꠥꠎꠞ ꠙꠥꠀ ꠢꠣꠍꠤꠞ, ꠢꠣꠍꠤꠞꠞ ꠙꠥꠀ ꠞꠣꠄꠀꠝ,
MAT 1:4 ꠞꠣꠄꠀꠝꠞ ꠙꠥꠀ ꠀꠝꠤꠘꠣꠖꠣꠛ, ꠀꠝꠤꠘꠣꠖꠣꠛꠞ ꠙꠥꠀ ꠘꠣꠢꠤꠡ, ꠘꠣꠢꠤꠡꠞ ꠙꠥꠀ ꠍꠦꠟꠤꠝ,
MAT 1:5 ꠍꠦꠟꠤꠝꠞ ꠙꠥꠀ ꠛꠥꠀꠎ, ꠔꠣꠘ ꠝꠣʼꠞ ꠘꠣꠝ ꠞꠣꠢꠛꠣ। ꠛꠥꠀꠎꠞ ꠙꠥꠀ ꠃꠛꠣꠄꠖ, ꠔꠣꠘ ꠝꠣ ꠅꠁꠟꠣ ꠞꠥꠔ। ꠃꠛꠣꠄꠖꠞ ꠙꠥꠀ ꠁꠀꠍ,
MAT 1:6 ꠁꠀꠍꠞ ꠙꠥꠀ ꠛꠣꠖꠡꠣ ꠖꠣꠃꠖ। ꠖꠣꠃꠖꠞ ꠙꠥꠀ ꠘꠛꠤ ꠍꠥꠟꠣꠁꠝꠣꠘ, ꠄꠘ ꠝꠣ ꠀꠍꠟꠣ ꠃꠞꠤꠀꠞ ꠠꠣꠠꠤ ꠛꠃ ꠛꠣꠔꠍꠦꠛꠣ।
MAT 1:7 ꠍꠥꠟꠣꠁꠝꠣꠘꠞ ꠙꠥꠀ ꠞꠢꠛꠤꠀꠝ, ꠞꠢꠛꠤꠀꠝꠞ ꠙꠥꠀ ꠀꠛꠤꠀ, ꠀꠛꠤꠀꠞ ꠙꠥꠀ ꠀꠍꠣ,
MAT 1:8 ꠀꠍꠣꠞ ꠙꠥꠀ ꠎꠤꠢꠥꠍꠣꠚꠐ, ꠎꠤꠢꠥꠍꠣꠚꠐꠞ ꠙꠥꠀ ꠃꠞꠣꠝ, ꠃꠞꠣꠝꠞ ꠙꠥꠀ ꠃꠎꠤꠀ,
MAT 1:9 ꠃꠎꠤꠀꠞ ꠙꠥꠀ ꠎꠥꠕꠝ, ꠎꠥꠕꠝꠞ ꠙꠥꠀ ꠀꠢꠣꠎ, ꠀꠢꠣꠎꠞ ꠙꠥꠀ ꠢꠤꠎꠇꠤꠀ,
MAT 1:10 ꠢꠤꠎꠇꠤꠀꠞ ꠙꠥꠀ ꠝꠣꠘꠡꠣ, ꠝꠣꠘꠡꠣꠞ ꠙꠥꠀ ꠀꠝꠘ, ꠀꠝꠘꠞ ꠙꠥꠀ ꠁꠃꠡꠤꠀ,
MAT 1:11 ꠁꠃꠡꠤꠀꠞ ꠙꠥꠀ ꠁꠀꠇꠥꠘꠤꠀ ꠀꠞ ꠔꠣꠞ ꠜꠣꠁꠀꠁꠘ। ꠁꠍꠞꠣꠁꠟ ꠎꠣꠔꠤꠞꠦ ꠛꠣꠛꠤꠟ ꠖꠦꠡꠅ ꠛꠘ꠆ꠖꠤ ꠇꠞꠤ ꠘꠦꠅꠀꠞ ꠛꠣꠟꠣ ꠄꠞꠣꠞ ꠎꠘꠝ ꠅꠁꠍꠤꠟ।
MAT 1:12 ꠁꠍꠞꠣꠁꠟ ꠎꠣꠔꠤꠞꠦ ꠛꠣꠛꠤꠟ ꠖꠦꠡꠅ ꠛꠘ꠆ꠖꠤ ꠇꠞꠤ ꠘꠦꠅꠀꠞ ꠛꠣꠖꠦ ꠁꠀꠇꠥꠘꠤꠀꠞ ꠙꠥꠀ ꠍꠣꠟꠔꠤꠄꠟꠞ ꠎꠘꠝ ꠅꠁꠍꠤꠟ। ꠍꠣꠟꠔꠤꠄꠟꠞ ꠙꠥꠀ ꠎꠦꠞꠛꠣꠛꠤꠟ,
MAT 1:13 ꠎꠦꠞꠛꠣꠛꠤꠟꠞ ꠙꠥꠀ ꠀꠛꠤꠢꠥꠖ, ꠀꠛꠤꠢꠥꠖꠞ ꠙꠥꠀ ꠁꠟꠤꠀꠇꠤꠝ, ꠁꠟꠤꠀꠇꠤꠝꠞ ꠙꠥꠀ ꠀꠎꠞ,
MAT 1:14 ꠀꠎꠞꠞ ꠙꠥꠀ ꠍꠣꠖꠤꠇ, ꠍꠣꠖꠤꠇꠞ ꠙꠥꠀ ꠀꠈꠤꠝ, ꠀꠈꠤꠝꠞ ꠙꠥꠀ ꠄꠟꠤꠢꠥꠖ,
MAT 1:15 ꠄꠟꠤꠢꠥꠖꠞ ꠙꠥꠀ ꠀꠟꠤ-ꠀꠎꠞ, ꠀꠟꠤ-ꠀꠎꠞꠞ ꠙꠥꠀ ꠝꠔꠤꠘ, ꠝꠔꠤꠘꠞ ꠙꠥꠀ ꠁꠀꠇꠥꠛ,
MAT 1:16 ꠁꠀꠇꠥꠛꠞ ꠙꠥꠀ ꠁꠃꠍꠥꠚ, ꠅꠃ ꠁꠃꠍꠥꠚ ꠅꠁꠟꠣ ꠛꠤꠛꠤ ꠝꠞꠤꠅꠝꠞ ꠎꠣꠝꠣꠁ। ꠛꠤꠛꠤ ꠝꠞꠤꠅꠝꠞ ꠙꠦꠐꠅ ꠢꠎꠞꠔ ꠁꠍꠣꠞ ꠎꠘꠝ ꠅꠁꠍꠤꠟ, ꠄꠘꠞꠦ ꠒꠣꠇꠣ ꠅꠄ ꠀꠟ-ꠝꠍꠤ।
MAT 1:17 ꠅꠃ ꠟꠣꠈꠣꠘ ꠢꠎꠞꠔ ꠁꠛ꠆ꠞꠣꠢꠤꠝ ꠕꠣꠇꠤ ꠖꠣꠃꠖ ꠘꠛꠤ ꠙꠞ꠆ꠎꠘ꠆ꠔ ꠌꠃꠖ꠆ꠖ ꠍꠤꠠꠤ। ꠖꠣꠃꠖ ꠘꠛꠤ ꠕꠣꠇꠤ ꠛꠣꠛꠤꠟꠅ ꠛꠘ꠆ꠖꠤ ꠇꠞꠤ ꠘꠦꠅꠀ ꠙꠞ꠆ꠎꠘ꠆ꠔ ꠌꠃꠖ꠆ꠖ ꠍꠤꠠꠤ। ꠛꠣꠛꠤꠟꠅ ꠛꠘ꠆ꠖꠤ ꠅꠀ ꠕꠣꠇꠤ ꠀꠟ-ꠝꠍꠤ ꠙꠞ꠆ꠎꠘ꠆ꠔ ꠌꠃꠖ꠆ꠖ ꠍꠤꠠꠤ।
MAT 1:18 ꠁꠍꠣ ꠀꠟ-ꠝꠍꠤꠞ ꠎꠘꠝ ꠅꠁꠍꠤꠟ ꠅꠃ ꠟꠣꠈꠣꠘ। ꠁꠃꠍꠥꠚ ꠘꠣꠝꠞ ꠄꠇꠎꠘꠞ ꠟꠉꠦ ꠛꠤꠛꠤ ꠝꠞꠤꠅꠝꠞ ꠡꠣꠖꠤ ꠑꠤꠇ ꠅꠁꠍꠤꠟ, ꠅꠁꠟꠦ ꠔꠣꠞꠣ ꠄꠇꠟꠉꠦ ꠝꠤꠟꠣ-ꠝꠤꠡꠣ ꠇꠞꠣꠞ ꠀꠉꠦꠃ ꠀꠟ꠆ꠟꠣꠞ ꠙꠣꠇ ꠞꠥꠢꠥꠞ ꠇꠥꠖꠞꠔꠤ ꠛꠟꠦ ꠝꠞꠤꠅꠝꠞ ꠙꠦꠐꠅ ꠢꠥꠞꠥꠔ꠆ꠔꠣ ꠀꠁꠟ।
MAT 1:19 ꠁꠃꠍꠥꠚ ꠀꠍꠟꠣ ꠢꠇ ꠝꠣꠘꠥꠡ, ꠝꠞꠤꠅꠝꠞ ꠙꠦꠐꠅ ꠢꠥꠞꠥꠔ꠆ꠔꠣ ꠀꠍꠦ, ꠁ ꠈꠛꠞ ꠢꠥꠘꠤꠀ ꠔꠣꠁꠘ ꠝꠞꠤꠅꠝꠞꠦ ꠝꠣꠘꠡꠞ ꠍꠣꠝꠘꠦ ꠡꠞꠝ ꠖꠤꠔꠣ ꠌꠣꠁꠟꠣ ꠘꠣ, ꠄꠞꠖꠣꠄ ꠝꠘꠦ ꠝꠘꠦ ꠑꠤꠇ ꠇꠞꠟꠣ, ꠟꠥꠇꠣꠁꠀ ꠁ ꠛꠤꠀ ꠜꠣꠋꠉꠤꠟꠤꠔꠣ।
MAT 1:20 ꠔꠣꠁꠘ ꠎꠦꠛꠟꠣ ꠅꠟꠣꠈꠣꠘ ꠌꠤꠘ꠆ꠔꠣ ꠇꠞꠞꠣ, ꠅꠃ ꠡꠝꠄ ꠝꠣꠛꠥꠖꠞ ꠄꠇ ꠚꠤꠞꠤꠡ꠆ꠔꠣꠄ ꠈꠥꠀꠛꠞ ꠝꠣꠎꠦ ꠔꠣꠘꠞꠦ ꠖꠞꠡꠘ ꠖꠤꠀ ꠇꠁꠟꠣ, “ꠅ ꠁꠃꠍꠥꠚ ꠛꠤꠘ ꠖꠣꠃꠖ, ꠔꠥꠝꠤ ꠝꠞꠤꠅꠝꠞꠦ ꠡꠣꠖꠤ ꠇꠞꠔꠦ ꠒꠞꠣꠁꠅ ꠘꠣ। ꠔꠣꠘ ꠙꠦꠐꠅ ꠎꠦ ꠢꠥꠞꠥꠔ꠆ꠔꠣ ꠀꠁꠍꠦ, ꠁꠔꠣ ꠔ ꠙꠣꠇ ꠞꠥꠢꠥꠞ ꠇꠥꠖꠞꠔꠤ ꠛꠟꠦꠃ ꠅꠁꠍꠦ। ꠔꠣꠘ ꠊꠞꠅ ꠄꠇ ꠙꠥꠀꠄ ꠎꠘꠝ ꠟꠁꠛꠣ।
MAT 1:21 ꠔꠥꠝꠤ ꠁ ꠙꠥꠀꠞ ꠘꠣꠝ ꠞꠣꠈꠤꠅ ꠁꠍꠣ। ꠇꠣꠞꠘ ꠁ ꠘꠣꠝꠞ ꠝꠣꠘꠤ ꠔꠞꠣꠘꠦꠀꠟꠣ, ꠄꠁꠘ ꠘꠤꠎꠞ ꠃꠝ꠆ꠝꠔ ꠅꠇꠟꠞꠦ ꠉꠥꠘꠣ ꠕꠣꠇꠤ ꠔꠞꠣꠁꠛꠣ।”
MAT 1:22 ꠀꠉꠞ ꠎꠝꠣꠘꠣꠞ ꠘꠛꠤꠞ ꠝꠣꠎꠖꠤ ꠝꠣꠛꠥꠖꠦ ꠎꠦꠟꠣ ꠛꠣꠔꠣꠁꠍꠟꠣ, ꠅꠈꠣꠘ ꠚꠟꠤꠛꠣꠞ ꠟꠣꠉꠤꠃ ꠁꠔꠣ ꠅꠁꠛ।
MAT 1:23 ꠝꠣꠛꠥꠖꠦ ꠛꠣꠔꠣꠁꠍꠟꠣ, “ꠢꠥꠘꠅ, ꠄꠇꠎꠘ ꠀꠛꠤꠀꠔꠤ ꠡꠔꠤ ꠘꠣꠞꠤꠞ ꠙꠦꠐꠅ ꠢꠥꠞꠥꠔ꠆ꠔꠣ ꠀꠁꠛ, ꠔꠣꠁꠘ ꠄꠇ ꠙꠥꠀꠞ ꠎꠘꠝ ꠖꠤꠛꠣ, ꠁ ꠙꠥꠀꠞꠦ ꠒꠣꠇꠣ ꠅꠁꠛ ꠁꠝ꠆ꠝꠣꠘꠥꠄꠟ।” ꠁ ꠘꠣꠝꠞ ꠝꠣꠘꠤ ꠅꠁꠟ, ꠀꠟ꠆ꠟꠣ ꠀꠝꠞꠣꠞ ꠟꠉꠦ ꠀꠍꠂꠘ।
MAT 1:24 ꠛꠣꠖꠦ ꠊꠥꠝ ꠕꠣꠇꠤ ꠃꠑꠤꠀ ꠁꠃꠍꠥꠚꠦ ꠚꠤꠞꠤꠡ꠆ꠔꠣꠞ ꠢꠥꠇꠥꠝ ꠝꠣꠚꠤꠇ ꠛꠤꠛꠤ ꠝꠞꠤꠅꠝꠞꠦ ꠡꠣꠖꠤ ꠇꠞꠟꠣ।
MAT 1:25 ꠅꠁꠟꠦ ꠅꠃ ꠙꠥꠀꠞ ꠎꠘꠝꠞ ꠀꠉ ꠙꠞ꠆ꠎꠘ꠆ꠔ ꠔꠣꠁꠘ ꠝꠞꠤꠅꠝꠞ ꠟꠉꠦ ꠇꠥꠘꠥ ꠝꠤꠟꠣ-ꠝꠤꠡꠣ ꠇꠞꠟꠣ ꠘꠣ। ꠡꠝꠄ ꠝꠔ ꠅꠃ ꠙꠥꠀꠞ ꠎꠘꠝ ꠅꠁꠟ, ꠔꠣꠁꠘ ꠅꠃ ꠙꠥꠀꠞ ꠘꠣꠝ ꠞꠣꠈꠟꠣ ꠁꠍꠣ।
MAT 2:1 ꠞꠣꠎꠣ ꠢꠦꠞꠥꠖꠞ ꠀꠝꠟꠅ ꠄꠢꠥꠖꠤꠀ ꠎꠤꠟꠣꠞ ꠛꠦꠕꠦꠟꠢꠣꠝ ꠉꠣꠃꠔ ꠢꠎꠞꠔ ꠁꠍꠣꠞ ꠎꠘꠝ ꠅꠁꠍꠤꠟ। ꠎꠘꠝꠞ ꠛꠣꠖꠦ ꠙꠥꠛꠞ ꠖꠦꠡꠞ ꠇꠄꠎꠘ ꠉꠘꠇ ꠎꠦꠞꠥꠎꠣꠟꠦꠝ ꠐꠣꠃꠘꠅ ꠀꠁꠀ ꠎꠤꠇꠣꠁꠟꠣ,
MAT 2:2 “ꠁꠢꠥꠖꠤ ꠎꠣꠔꠤꠞ ꠎꠦ ꠛꠣꠖꠡꠣꠞ ꠎꠘꠝ ꠅꠁꠍꠦ, ꠄꠁꠘ ꠇꠥꠀꠁ? ꠀꠝꠞꠣ ꠀꠍꠝꠣꠘꠞ ꠙꠥꠛꠦꠖꠤ ꠔꠣꠘ ꠎꠘꠝꠞ ꠔꠦꠞꠣ ꠖꠦꠈꠍꠤ, ꠖꠦꠈꠤꠀ ꠔꠣꠘꠞꠦ ꠜꠇ꠆ꠔꠤ ꠖꠦꠅꠀꠔ ꠀꠁꠍꠤ।”
MAT 2:3 ꠘꠄꠀ ꠛꠣꠖꠡꠣꠞ ꠇꠕꠣ ꠢꠥꠘꠤꠀ ꠞꠣꠎꠣ ꠢꠦꠞꠥꠖ ꠀꠞ ꠎꠦꠞꠥꠎꠣꠟꠦꠝꠞ ꠛꠣꠖ-ꠛꠣꠇꠤ ꠢꠇꠟ ꠝꠣꠘꠥꠡ ꠈꠥꠛ ꠌꠤꠘ꠆ꠔꠣꠔ ꠙꠠꠤꠉꠦꠟꠣ।
MAT 2:4 ꠄꠞꠟꠣꠉꠤ ꠢꠦꠞꠥꠖꠦ ꠖꠦꠡꠞ ꠛꠠ ꠁꠝꠣꠝ ꠀꠞ ꠝꠃꠟꠣꠘꠣ ꠅꠇꠟꠞꠦ ꠄꠇꠈꠣꠘꠅ ꠖꠟꠣ ꠇꠞꠤ ꠎꠤꠇꠣꠁꠟꠣ, “ꠀꠙꠘꠣꠞꠣ ꠎꠣꠘꠂꠘ ꠘꠤ, ꠀꠟ-ꠝꠍꠤ ꠇꠥꠀꠁ ꠎꠘꠝ ꠟꠁꠛꠣ?”
MAT 2:5 ꠄꠞꠣ ꠇꠁꠟꠣ, “ꠔꠣꠘ ꠎꠘꠝ ꠅꠁꠛ ꠄꠢꠥꠖꠤꠀ ꠎꠤꠟꠣꠞ ꠛꠦꠕꠦꠟꠢꠣꠝ ꠉꠣꠃꠔ। ꠀꠉꠞ ꠎꠝꠣꠘꠣꠞ ꠄꠇ ꠘꠛꠤꠞ ꠇꠤꠔꠣꠛꠅ ꠟꠦꠈꠣ ꠀꠍꠦ,
MAT 2:6 ꠅ ꠄꠢꠥꠖꠤꠀ ꠎꠤꠟꠣꠞ ꠛꠦꠕꠦꠟꠢꠣꠝ, ꠄꠢꠥꠖꠤꠀꠞ ꠘꠣꠝꠤ-ꠖꠣꠝꠤ ꠎꠣꠉꠣꠞ ꠝꠣꠎꠦ ꠔꠥꠝꠤ ꠇꠥꠘꠥꠝꠘ꠆ꠔꠦꠃ ꠢꠥꠞꠥ ꠘꠣꠄ, ꠔꠥꠝꠣꠞ ꠝꠣꠎ ꠕꠣꠇꠤꠃ ꠔ ꠅꠟꠣ ꠄꠇꠎꠘ ꠛꠣꠖꠡꠣ ꠙꠄꠖꠣ ꠅꠁꠛꠣ, ꠎꠦꠁꠘ ꠀꠝꠣꠞ ꠁꠍꠞꠣꠁꠟ ꠎꠣꠔꠤꠞꠦ ꠌꠣꠟꠣꠁꠛꠣ।”
MAT 2:7 ꠔꠦꠃ ꠢꠦꠞꠥꠖꠦ ꠢꠃ ꠉꠘꠇ ꠅꠇꠟꠞꠦ ꠘꠤꠞꠣꠟꠣꠄ ꠘꠤꠀ ꠎꠤꠇꠣꠁꠀ ꠎꠣꠘꠟꠣ, ꠑꠤꠇ ꠇꠥꠘ ꠡꠝꠄ ꠢꠃ ꠎꠘꠝꠞ ꠔꠦꠞꠣ ꠖꠦꠈꠣ ꠉꠦꠍꠤꠟ।
MAT 2:8 ꠔꠣꠁꠘ ꠅꠃ ꠉꠘꠇ ꠅꠇꠟꠞꠦ ꠇꠁꠟꠣ, “ꠀꠙꠘꠣꠞꠣ ꠛꠦꠕꠦꠟꠢꠣꠝ ꠎꠣꠃꠇ꠆ꠇꠣ, ꠉꠤꠀ ꠜꠣꠟꠣ ꠇꠞꠤ ꠅꠃ ꠢꠥꠞꠥꠔ꠆ꠔꠣꠞ ꠔꠣꠟ꠆ꠟꠣꠡ ꠇꠞꠃꠇ꠆ꠇꠣ। ꠔꠣꠘ ꠇꠥꠘꠥ ꠈꠛꠞ ꠙꠣꠁꠟꠦ ꠀꠝꠣꠞꠦ ꠎꠣꠘꠣꠁꠛꠣ, ꠔꠦꠃ ꠀꠝꠤꠅ ꠉꠤꠀ ꠔꠣꠘꠞꠦ ꠜꠇ꠆ꠔꠤ ꠖꠤꠝꠥ।”
MAT 2:9 ꠞꠣꠎꠣꠞ ꠢꠥꠇꠥꠝ ꠙꠣꠁꠀ ꠉꠘꠇ ꠅꠇꠟ ꠞꠅꠀꠘꠣ ꠖꠤꠟꠣ। ꠔꠣꠞꠣ ꠙꠥꠛꠞ ꠀꠍꠝꠣꠘꠅ ꠎꠦ ꠎꠘꠝ ꠔꠦꠞꠣ ꠖꠦꠈꠍꠤꠟꠣ, ꠅꠃ ꠔꠦꠞꠣ ꠔꠣꠞꠣꠞ ꠀꠉꠦ ꠀꠉꠦ ꠉꠦꠟ। ꠀꠞ ꠅꠃ ꠢꠥꠞꠥꠔ꠆ꠔꠣ ꠎꠦ ꠎꠣꠉꠣꠔ ꠀꠍꠟꠣ, ꠑꠤꠇ ꠅꠃ ꠎꠣꠉꠣꠔ ꠀꠁꠀ ꠔꠦꠞꠣ ꠕꠣꠝꠤꠉꠦꠟ।
MAT 2:10 ꠔꠦꠞꠣ ꠕꠣꠝꠤꠉꠦꠍꠦ ꠖꠦꠈꠤꠀ ꠉꠘꠇ ꠅꠇꠟꠞ ꠜꠤꠔꠞꠦ ꠈꠥꠡꠤꠞ ꠓꠦꠃ ꠃꠑꠟ, ꠈꠥꠡꠤꠞ ꠝꠣꠁꠞꠦ ꠔꠣꠞꠣ ꠊꠞꠞ ꠜꠤꠔꠞꠦ ꠢꠣꠝꠣꠁꠟꠣ।
MAT 2:11 ꠊꠞꠅ ꠢꠣꠝꠣꠁꠀ ꠅꠃ ꠢꠥꠞꠥꠔ꠆ꠔꠣꠞꠦ ꠔꠣꠘ ꠝꠣ ꠝꠞꠤꠅꠝꠞ ꠇꠣꠘ꠆ꠖꠣꠔ ꠖꠦꠈꠟꠣ। ꠖꠦꠈꠤꠀ ꠔꠣꠞꠣ ꠝꠣꠐꠤꠔ ꠙꠠꠤ ꠔꠣꠘꠞꠦ ꠜꠇ꠆ꠔꠤ ꠖꠤꠟꠣ, ꠀꠞ ꠔꠣꠞꠣꠞ ꠛꠦꠉ ꠈꠥꠟꠤꠀ ꠖꠣꠝꠤ ꠖꠣꠝꠤ ꠃꠙꠢꠣꠞ ꠖꠤꠟꠣ। ꠅꠃ ꠃꠙꠢꠣꠞ ꠅꠁꠟ ꠡꠥꠘꠣ, ꠟꠥꠛꠣꠘ-ꠀꠉꠞ ꠀꠞ ꠝꠥꠞꠣ-ꠀꠔꠞ।
MAT 2:12 ꠅꠁꠟꠦ ꠀꠟ꠆ꠟꠣꠄ ꠈꠥꠀꠛꠞ ꠝꠣꠎꠦ ꠔꠣꠞꠣꠞꠦ ꠢꠥꠡꠤꠀꠞ ꠇꠞꠤ ꠖꠤꠟꠣ, ꠔꠣꠞꠣ ꠎꠣꠘꠥ ꠞꠣꠎꠣ ꠢꠦꠞꠥꠖꠞ ꠉꠦꠍꠦ ꠀꠞ ꠚꠤꠞꠤꠀ ꠘꠣ ꠎꠣꠁꠘ। ꠔꠦꠃ ꠔꠣꠞꠣ ꠖꠥꠍꠞꠣ ꠙꠕꠦ ꠘꠤꠎꠞ ꠖꠦꠡꠅ ꠉꠦꠟꠣꠉꠤ।
MAT 2:13 ꠉꠘꠇ ꠅꠇꠟ ꠉꠤꠀ ꠢꠣꠞꠟꠦ ꠀꠟ꠆ꠟꠣꠞ ꠄꠇ ꠚꠤꠞꠤꠡ꠆ꠔꠣꠄ ꠈꠥꠀꠛꠞ ꠝꠣꠎꠦ ꠁꠃꠍꠥꠚꠞꠦ ꠖꠞꠡꠘ ꠖꠤꠀ ꠇꠁꠟꠣ, “ꠅ ꠁꠃꠍꠥꠚ ꠃꠑꠅ, ꠙꠥꠀ ꠀꠞ ꠔꠣꠘ ꠝꠣʼꠞꠦ ꠟꠁꠀ ꠝꠤꠡꠞ ꠖꠦꠡꠅ ꠜꠣꠉꠤꠀ ꠎꠣꠅꠉꠤ, ꠛꠣꠖꠦ ꠀꠝꠤ ꠎꠔꠖꠤꠘ ꠘꠣ ꠇꠁ, ꠅꠔꠖꠤꠘ ꠢꠘꠅꠃ ꠞꠁꠅ। ꠁ ꠙꠥꠀꠞꠦ ꠝꠣꠞꠤꠟꠤꠔ ꠇꠞꠤ ꠢꠦꠞꠥꠖꠦ ꠔꠥꠇꠣꠁꠛ।”
MAT 2:14 ꠔꠦꠃ ꠁꠃꠍꠥꠚ ꠃꠑꠤꠀ ꠅꠃ ꠞꠣꠁꠔꠃ ꠔꠣꠞꠣꠞꠦ ꠟꠁꠀ ꠝꠤꠡꠞꠅ ꠞꠅꠀꠘꠣ ꠖꠤꠟꠣ,
MAT 2:15 ꠀꠞ ꠞꠣꠎꠣ ꠢꠦꠞꠥꠖ ꠝꠞꠣꠞ ꠀꠉ ꠙꠞ꠆ꠎꠘ꠆ꠔ ꠢꠘꠅ ꠞꠁꠟꠣ। ꠁꠔꠣ ꠊꠐꠤꠍꠤꠟ, ꠎꠣꠔꠦ ꠀꠉꠞ ꠄꠇ ꠘꠛꠤꠞ ꠝꠣꠎꠖꠤ ꠝꠣꠛꠥꠖꠦ ꠎꠦꠔꠣ ꠎꠣꠘꠣꠁꠍꠟꠣ, ꠅꠔꠣ ꠙꠥꠞꠣ ꠅꠄ। ꠝꠣꠛꠥꠖꠦ ꠛꠣꠔꠣꠁꠍꠟꠣ, “ꠀꠝꠤ ꠀꠝꠣꠞ ꠙꠥꠔꠞꠦ ꠝꠤꠡꠞ ꠕꠣꠇꠤ ꠒꠣꠇꠤꠀ ꠀꠘꠟꠣꠝ।”
MAT 2:16 ꠉꠘꠇ ꠅꠇꠟꠦ ꠞꠣꠎꠣ ꠢꠦꠞꠥꠖꠞꠦ ꠐꠉꠤꠍꠂꠘ ꠇꠞꠤꠀ ꠔꠣꠁꠘ ꠈꠥꠛ ꠉꠥꠍꠣ ꠇꠞꠟꠣ। ꠄꠞꠟꠣꠉꠤ ꠉꠘꠇ ꠅꠇꠟꠞ ꠉꠦꠍ ꠕꠣꠇꠤ ꠔꠣꠁꠘ ꠎꠦ ꠡꠝꠄꠅꠞ ꠇꠕꠣ ꠢꠥꠘꠍꠟꠣ, ꠅꠃ ꠡꠝꠄ ꠝꠣꠚꠤꠇ ꠛꠦꠕꠦꠟꠢꠣꠝ ꠉꠣꠃ ꠀꠞ ꠄꠞ ꠀꠡ-ꠙꠣꠡ ꠄꠟꠣꠇꠣꠔ ꠖꠥꠁ ꠛꠍꠞ ꠛꠣ ꠔꠣꠞ ꠇꠝ ꠛꠄꠅꠡꠤ ꠎꠔ ꠙꠥꠀꠂꠘ ꠀꠍꠟꠣ, ꠁꠔꠣ ꠢꠇꠟꠞꠦ ꠝꠣꠞꠤꠟꠤꠛꠣꠞ ꠢꠥꠇꠥꠝ ꠖꠤꠟꠣ।
MAT 2:17 ꠄꠔꠦ ꠘꠛꠤ ꠁꠀꠞꠝꠤꠀꠞ ꠝꠣꠎꠖꠤ ꠝꠣꠛꠥꠖꠦ ꠎꠦꠔꠣ ꠎꠣꠘꠣꠁꠍꠟꠣ, ꠅꠔꠣ ꠚꠟꠤꠉꠦꠟ। ꠝꠣꠛꠥꠖꠦ ꠛꠣꠔꠣꠁꠍꠟꠣ,
MAT 2:18 ꠞꠣꠝꠣꠔ ꠈꠥꠛ ꠇꠣꠘ꠆ꠖꠣ-ꠇꠣꠐꠤꠞ ꠀꠅꠀꠎ ꠢꠥꠘꠣ ꠎꠣꠞ, ꠞꠣꠢꠦꠟꠣꠄ ꠔꠣꠁꠞ ꠢꠥꠞꠥꠔ꠆ꠔꠣꠁꠘ꠆ꠔꠞ ꠟꠣꠉꠤ ꠇꠣꠘ꠆ꠖꠦꠞ, ꠇꠥꠘꠥꠝꠘ꠆ꠔꠦꠃ ꠡꠣꠘ꠆ꠔꠤ ꠅꠞ ꠘꠣ, ꠔꠣꠁꠞ ꠢꠥꠞꠥꠔ꠆ꠔꠣꠁꠘ ꠡꠦꠡ ꠅꠁꠉꠦꠍꠂꠘ।
MAT 2:19 ꠛꠣꠖꠦ ꠞꠣꠎꠣ ꠢꠦꠞꠥꠖ ꠝꠞꠤꠀ ꠢꠣꠞꠟꠦ ꠝꠣꠛꠥꠖꠞ ꠄꠇ ꠚꠤꠞꠤꠡ꠆ꠔꠣ ꠀꠁꠀ, ꠝꠤꠡꠞ ꠖꠦꠡꠅ ꠁꠃꠍꠥꠚꠞꠦ ꠈꠥꠀꠛꠞ ꠝꠣꠎꠦ ꠇꠁꠟꠣ,
MAT 2:20 “ꠅ ꠁꠃꠍꠥꠚ, ꠃꠑꠅ, ꠅꠃ ꠙꠥꠀ ꠀꠞ ꠔꠣꠘ ꠝꠣʼꠞꠦ ꠟꠁꠀ ꠁꠍꠞꠣꠁꠟ ꠖꠦꠡꠅ ꠎꠣꠅꠉꠤ। ꠙꠥꠀꠞꠦ ꠎꠦꠔꠣꠄ ꠝꠣꠞꠤꠟꠤꠔꠣ ꠌꠣꠁꠍꠟꠣ, ꠁꠔꠣ ꠔ ꠝꠞꠤꠉꠦꠍꠂꠘ।”
MAT 2:21 ꠔꠦꠃ ꠁꠃꠍꠥꠚ ꠃꠑꠤꠀ ꠙꠥꠀ ꠀꠞ ꠙꠥꠀꠞ ꠝꠣʼꠞꠦ ꠟꠁꠀ ꠁꠍꠞꠣꠁꠟ ꠖꠦꠡꠞ ꠡꠤꠝꠣꠘꠣꠔ ꠀꠁꠟꠣ।
MAT 2:22 ꠀꠁꠀ ꠢꠥꠘꠟꠣ, ꠢꠃ ꠢꠦꠞꠥꠖꠞ ꠙꠥꠀ ꠀꠞ꠆ꠈꠤꠟꠣꠃꠍ ꠅꠈꠘ ꠄꠢꠥꠖꠤꠀ ꠎꠤꠟꠣꠞ ꠞꠣꠎꠣ ꠅꠁꠉꠦꠍꠦ। ꠄꠞꠟꠣꠉꠤ ꠔꠣꠁꠘ ꠢꠤꠘꠅ ꠎꠣꠁꠔꠦ ꠒꠞꠣꠁꠟꠣ। ꠛꠣꠖꠦ ꠈꠥꠀꠛꠦ ꠢꠥꠇꠥꠝ ꠙꠣꠁꠀ ꠉꠣꠟꠤꠟ ꠎꠤꠟꠣꠔ ꠉꠦꠟꠣꠉꠤ।
MAT 2:23 ꠉꠣꠟꠤꠟꠅ ꠉꠤꠀ ꠘꠣꠍꠣꠞꠔ ꠘꠣꠝꠞ ꠄꠇ ꠉꠣꠃꠔ ꠛꠡꠔ ꠇꠞꠟꠣ। ꠁꠔꠣ ꠊꠐꠤꠟ, ꠎꠣꠔꠦ ꠀꠉꠞ ꠘꠛꠤ ꠅꠇꠟꠞ ꠝꠣꠎꠖꠤ ꠎꠦꠔꠣ ꠎꠣꠘꠣꠁꠟ ꠅꠁꠍꠤꠟ, ꠅꠔꠣ ꠅꠈꠘ ꠙꠥꠞꠣ ꠅꠄ। ꠎꠣꠘꠣꠁꠟ ꠅꠁꠍꠤꠟ, “ꠔꠣꠘꠞꠦ ꠘꠣꠍꠣꠞꠔꠤ ꠇꠁꠀ ꠒꠣꠇꠣ ꠅꠁꠛ।”
MAT 3:1 ꠅꠃ ꠡꠝꠄ ꠄꠢꠥꠖꠤꠀ ꠎꠤꠟꠣꠞ ꠝꠞꠥꠜꠥꠝꠤꠔ ꠀꠁꠀ ꠄꠢꠤꠀ ꠘꠛꠤꠄ ꠔꠛꠟꠤꠉ ꠇꠞꠟꠣ,
MAT 3:2 “ꠔꠃꠛꠣ ꠇꠞꠅ, ꠖꠥꠘꠤꠀꠞ ꠝꠣꠎꠦ ꠛꠦꠢꠦꠡ꠆ꠔꠤ ꠛꠣꠖꠡꠣꠁ ꠌꠣꠟꠥ ꠅꠁꠔꠦ ꠀꠞ ꠛꠦꠡꠤ ꠖꠦꠞꠤ ꠘꠣꠄ।”
MAT 3:3 ꠅꠃ ꠄꠢꠤꠀ ꠘꠛꠤꠞ ꠛꠦꠙꠣꠞꠦꠃ ꠁꠡꠣꠄꠀ ꠘꠛꠤꠄ ꠀꠉꠦ ꠛꠣꠔꠣꠁꠍꠟꠣ, ꠝꠞꠥꠜꠥꠝꠤꠞ ꠝꠣꠎꠦ ꠄꠇꠎꠘ ꠝꠣꠘꠡꠦ ꠎꠥꠞꠦ ꠎꠥꠞꠦ ꠄꠟꠣꠘ ꠇꠞꠞꠣ, ‘ꠔꠥꠝꠞꠣ ꠝꠣꠟꠤꠇꠞ ꠙꠕ ꠍꠢꠤ ꠇꠞꠅ, ꠔꠣꠘ ꠌꠟꠣꠞ ꠞꠣꠡ꠆ꠔꠣ ꠅꠇꠟ ꠡꠤꠗꠣ ꠇꠞꠅ।’
MAT 3:4 ꠄꠢꠤꠀ ꠘꠛꠤꠄ ꠔ ꠃꠐꠞ ꠞꠥꠝꠞ ꠇꠣꠙꠠ ꠚꠤꠘ꠆ꠖꠤꠔꠣ ꠀꠞ ꠇꠝꠞꠅ ꠌꠣꠝꠠꠣꠞ ꠛꠦꠟꠐ ꠛꠣꠘ꠆ꠖꠤꠔꠣ। ꠔꠣꠁꠘ ꠙꠣꠠꠤꠀ ꠝꠃ ꠀꠞ ꠚꠞꠤꠋ ꠈꠣꠁꠔꠣ।
MAT 3:5 ꠔꠣꠘ ꠔꠛꠟꠤꠉ ꠢꠥꠘꠣꠞ ꠟꠣꠉꠤ ꠀꠡ꠆ꠔꠣ ꠄꠢꠥꠖꠤꠀ ꠎꠤꠟꠣ, ꠎꠦꠞꠥꠎꠣꠟꠦꠝ ꠐꠣꠃꠘ ꠀꠞ ꠎꠞ꠆ꠖꠣꠘ ꠉꠣꠋꠉꠞ ꠌꠣꠁꠞꠅꠛꠣꠄ ꠕꠣꠇꠤ ꠛꠃꠔ ꠝꠣꠘꠥꠡ ꠔꠣꠘ ꠉꠦꠍꠦ ꠀꠁꠟꠣ।
MAT 3:6 ꠀꠁꠀ ꠎꠣꠞꠎꠤꠞ ꠉꠥꠘꠣ ꠡ꠆ꠛꠤꠇꠣꠞ ꠇꠞꠟꠣ, ꠛꠣꠖꠦ ꠔꠣꠁꠘ ꠄꠞꠣꠞꠦ ꠎꠞ꠆ꠖꠣꠘ ꠉꠣꠋꠉꠅ ꠔꠃꠛꠣꠞ ꠉꠥꠍꠟ ꠇꠞꠣꠁꠟꠣ।
MAT 3:7 ꠔꠣꠁꠘ ꠖꠦꠈꠟꠣ, ꠔꠃꠛꠣꠞ ꠉꠥꠍꠟ ꠇꠞꠣꠞ ꠟꠣꠉꠤ ꠛꠃꠔ ꠚꠞꠤꠡꠤ ꠀꠞ ꠍꠤꠖ꠆ꠖꠦꠇꠤꠀ ꠝꠎꠛꠞ ꠝꠣꠘꠥꠡꠅ ꠔꠣꠘ ꠉꠦꠍꠦ ꠀꠁꠞꠣ। ꠅꠃ ꠔꠣꠁꠘ ꠇꠁꠟꠣ, “ꠅ ꠢꠣꠚꠞ ꠛꠣꠁꠌ꠆ꠌꠣꠁꠘ, ꠀꠍꠝꠣꠘꠤ ꠉꠎꠛ ꠀꠁꠅꠞ ꠖꠦꠈꠤꠀ ꠎꠣꠘ ꠛꠣꠌꠣꠘꠤꠞ ꠙꠕ ꠔꠥꠝꠞꠣꠞꠦ ꠇꠦꠉꠤꠄ ꠛꠣꠔꠣꠁ ꠖꠤꠟ?
MAT 3:8 ꠔꠥꠝꠞꠣ ꠎꠥꠖꠤ ꠢꠣꠍꠣꠞꠞ ꠔꠃꠛꠣ ꠇꠞꠤꠀ ꠕꠣꠇ, ꠔꠦ ꠄꠞ ꠚꠟꠅ ꠖꠦꠈꠣꠅ।
MAT 3:9 ꠝꠘꠦ ꠝꠘꠦ ꠇꠁꠅ ꠘꠣ, ꠔꠥꠝꠞꠣ ꠁꠛ꠆ꠞꠣꠢꠤꠝꠞ ꠀꠅꠟꠣꠖ। ꠢꠥꠘꠅ, ꠀꠝꠤ ꠇꠁꠞꠣꠝ, ꠀꠟ꠆ꠟꠣꠄ ꠌꠣꠁꠟꠦ ꠔ ꠅꠃ ꠙꠣꠔ꠆ꠔꠞ ꠅꠇꠟ ꠕꠣꠇꠤꠃ ꠁꠛ꠆ꠞꠣꠢꠤꠝꠞ ꠀꠅꠟꠣꠖ ꠛꠣꠘꠣꠁꠔꠣ ꠙꠣꠞꠛꠣ।
MAT 3:10 ꠉꠣꠍꠞ ꠉꠥꠠꠤꠔ ꠔ ꠇꠥꠠꠣꠟ ꠟꠣꠉꠣꠁꠟꠃ ꠀꠍꠦ। ꠎꠦ ꠉꠣꠍꠅ ꠜꠣꠟꠣ ꠚꠟ ꠗꠞꠦ ꠘꠣ, ꠁ ꠉꠣꠍ ꠇꠣꠐꠤꠀ ꠀꠉꠥꠘꠤꠔ ꠚꠣꠟꠣꠁꠟ ꠅꠁꠛ।
MAT 3:11 “ꠔꠃꠛꠣ ꠇꠞꠍ ꠉꠔꠤꠇꠦ ꠀꠝꠤ ꠔꠥꠝꠞꠣꠞꠦ ꠙꠣꠘꠤꠖꠤ ꠉꠥꠍꠟ ꠇꠞꠣꠁꠟꠣꠝ, ꠅꠁꠟꠦ ꠀꠝꠣꠞ ꠛꠣꠖꠦ ꠀꠞꠅ ꠄꠇꠎꠘ ꠀꠁꠞꠣ, ꠄꠁꠘ ꠀꠝꠣ ꠕꠘꠦꠅ ꠢꠤꠝ꠆ꠝꠔ ꠀꠟꠣ, ꠔꠣꠘ ꠙꠣꠅꠞ ꠎꠥꠔꠣ ꠛꠅꠀꠞ ꠟꠣꠈꠅ ꠀꠝꠤ ꠘꠣꠄ। ꠔꠣꠁꠘ ꠀꠁꠀ ꠔꠥꠝꠞꠣꠞꠦ ꠙꠣꠇ ꠞꠥꠢꠥ ꠀꠞ ꠀꠉꠥꠁꠘꠖꠤ ꠉꠥꠍꠟ ꠇꠞꠣꠁꠛꠣ।
MAT 3:12 ꠔꠣꠘ ꠇꠥꠟꠣ ꠔ ꠔꠣꠘ ꠀꠔꠅꠃ ꠀꠍꠦ, ꠁꠈꠣꠘ ꠖꠤꠀ ꠔꠣꠁꠘ ꠗꠣꠘ ꠃꠀꠁꠀ ꠃꠉꠣꠞꠅ ꠔꠥꠟꠛꠣ, ꠀꠞ ꠍꠥꠍꠣꠞꠦ ꠅꠃ ꠀꠉꠥꠘꠤꠔ ꠚꠣꠟꠣꠁꠀ ꠎꠣꠟꠣꠁꠛꠣ, ꠎꠦ ꠀꠉꠥꠁꠘ ꠇꠥꠘꠥ ꠡꠝꠄ ꠘꠤꠜꠔ ꠘꠣꠄ।”
MAT 3:13 ꠅꠃ ꠡꠝꠄ ꠉꠣꠟꠤꠟ ꠎꠤꠟꠣ ꠕꠣꠇꠤ ꠢꠎꠞꠔ ꠁꠍꠣꠅ ꠙꠣꠇ ꠉꠥꠍꠟ ꠇꠞꠣꠞ ꠟꠣꠉꠤ, ꠎꠞ꠆ꠖꠣꠘ ꠉꠣꠋꠉꠅ ꠄꠢꠤꠀ ꠘꠛꠤꠞ ꠉꠦꠍꠦ ꠀꠁꠟꠣ।
MAT 3:14 ꠅꠁꠟꠦ ꠄꠢꠤꠀꠄ ꠔꠣꠘꠞꠦ ꠅꠈꠣꠘ ꠇꠁꠀ ꠘꠣ ꠇꠞꠟꠣ, “ꠀꠙꠘꠦ ꠀꠁꠍꠂꠘ ꠘꠤ ꠀꠝꠣꠞ ꠉꠦꠍꠦ, ꠀꠝꠣꠞꠃ ꠎꠞꠥꠞ ꠀꠍꠤꠟ ꠀꠙꠘꠣꠞ ꠉꠦꠍꠦ ꠉꠤꠀ ꠉꠥꠍꠟ ꠇꠞꠣ!”
MAT 3:15 ꠁꠍꠣꠄ ꠎꠥꠀꠙ ꠖꠤꠟꠣ, “ꠀꠁꠌ꠆ꠍꠣ, ꠅꠈꠘ ꠅꠟꠣꠃ ꠅꠃꠇ, ꠇꠣꠞꠘ ꠀꠝꠞꠣꠞ ꠃꠌꠤꠔ ꠅꠁꠟ ꠀꠟ꠆ꠟꠣꠞ ꠝꠞ꠆ꠎꠤ ꠙꠥꠞꠘ ꠇꠞꠣ।” ꠁꠈꠣꠘ ꠢꠥꠘꠤꠀ ꠄꠢꠤꠀ ꠞꠣꠎꠤ ꠅꠁꠉꠦꠟꠣ।
MAT 3:16 ꠙꠣꠇ ꠉꠥꠍꠟ ꠇꠞꠤꠀ ꠙꠣꠘꠤ ꠕꠣꠇꠤ ꠃꠑꠔꠦꠃ ꠁꠍꠣꠄ ꠖꠦꠈꠟꠣ, ꠀꠍꠝꠣꠘ ꠖꠥꠁ ꠜꠣꠉ ꠅꠁꠉꠦꠍꠦ, ꠀꠞ ꠀꠟ꠆ꠟꠣꠞ ꠞꠥꠢꠥ ꠙꠣꠞꠅꠞ ꠍꠥꠞꠔ ꠗꠞꠤꠀ ꠔꠣꠘ ꠃꠙꠞꠦ ꠟꠣꠝꠤꠀ ꠀꠁꠞꠣ।
MAT 3:17 ꠅꠃ ꠡꠝꠄ ꠀꠍꠝꠣꠘ ꠕꠘꠦ ꠉꠣꠁꠛꠤ ꠀꠅꠀꠎ ꠅꠁꠟ, “ꠄꠁꠘꠃ ꠀꠝꠣꠞ ꠈꠣꠍ ꠝꠣꠄꠀꠞ ꠎꠘ ꠁꠛꠘꠥꠟ꠆ꠟꠣ, ꠄꠘ ꠃꠙꠞꠦ ꠀꠝꠤ ꠈꠥꠛ ꠈꠥꠡꠤ।”
MAT 4:1 ꠙꠣꠇ ꠉꠥꠍꠟ ꠇꠞꠣꠞ ꠛꠣꠖꠦ, ꠀꠟ꠆ꠟꠣꠞ ꠙꠣꠇ ꠞꠥꠢꠥꠞ ꠁꠡꠣꠞꠣꠄ ꠁꠍꠣꠞꠦ ꠝꠞꠥꠜꠥꠝꠤꠔ ꠘꠦꠅꠀ ꠅꠁꠟ, ꠎꠣꠔꠦ ꠅꠃ ꠡꠝꠄ ꠁꠛꠟꠤꠍꠦ ꠔꠣꠘꠦ ꠙꠞꠤꠇ꠆ꠇꠣ ꠇꠞꠣꠞ ꠡꠥꠎꠥꠉ ꠙꠣꠄ।
MAT 4:2 ꠝꠞꠥꠜꠥꠝꠤꠞ ꠝꠣꠎꠦ ꠔꠣꠁꠘ ꠄꠇꠟꠣꠉꠣꠞꠦ ꠌꠣꠟ꠆ꠟꠤꠡ ꠖꠤꠘ ꠌꠣꠟ꠆ꠟꠤꠡ ꠞꠣꠁꠔ ꠞꠥꠎꠣ ꠀꠍꠟꠣ। ꠄꠞꠛꠣꠖꠦ ꠔꠣꠘ ꠈꠥꠛ ꠙꠦꠐꠅ ꠜꠥꠇ ꠟꠣꠉꠟ।
MAT 4:3 ꠅꠃ ꠡꠝꠄ ꠁꠛꠟꠤꠍꠦ ꠀꠁꠀ ꠔꠣꠘꠞꠦ ꠇꠁꠟ, “ꠔꠥꠝꠤ ꠎꠥꠖꠤ ꠁꠛꠘꠥꠟ꠆ꠟꠣ, ꠀꠟ꠆ꠟꠣꠞ ꠈꠣꠍ ꠝꠣꠄꠀꠞ ꠎꠘ ꠅꠅ, ꠔꠦ ꠅꠔꠣ ꠙꠣꠔ꠆ꠔꠞꠞꠦ ꠇꠅ ꠘꠣ ꠞꠥꠐꠤ ꠅꠁꠎꠤꠔ।”
MAT 4:4 ꠁꠍꠣꠄ ꠎꠥꠀꠙ ꠖꠤꠟꠣ, “ꠀꠟ꠆ꠟꠣꠞ ꠇꠣꠟꠣꠝꠅ ꠟꠦꠈꠣ ꠀꠍꠦ, ꠈꠣꠟꠤ ꠞꠥꠐꠤ ꠈꠣꠁꠟꠦꠃ ꠝꠣꠘꠥꠡ ꠛꠣꠌꠦ ꠘꠣ, ꠛꠞꠋ ꠀꠟ꠆ꠟꠣꠞ ꠙꠞꠔꠦꠇ ꠇꠣꠟꠣꠝꠦꠃ ꠝꠣꠘꠥꠡ ꠛꠣꠌꠦ।”
MAT 4:5 ꠔꠦꠃ ꠢꠦ ꠁꠍꠣꠞꠦ ꠟꠁꠀ ꠙꠛꠤꠔ꠆ꠞ ꠐꠣꠃꠘ ꠎꠦꠞꠥꠎꠣꠟꠦꠝꠅ ꠉꠦꠟ, ꠉꠤꠀ ꠛꠣꠄꠔꠥꠟ-ꠝꠥꠇꠣꠖ꠆ꠖꠍ ꠇꠣꠛꠣ ꠊꠞꠞ ꠝꠤꠘꠣꠞꠣꠞ ꠃꠙꠞꠦ ꠔꠣꠘꠦ ꠃꠛꠣ ꠇꠞꠣꠁꠀ ꠇꠁꠟ,
MAT 4:6 “ꠔꠥꠝꠤ ꠎꠥꠖꠤ ꠀꠟ꠆ꠟꠣꠞ ꠈꠣꠍ ꠝꠣꠄꠀꠞ ꠎꠘ ꠅꠅ, ꠔꠦ ꠖꠦꠈꠤ ꠌꠣꠁꠘ, ꠅꠘ ꠕꠣꠇꠤ ꠚꠣꠟ ꠖꠤꠀ ꠟꠣꠝꠣꠔ ꠙꠠꠅ, ꠇꠤꠔꠣꠛꠅ ꠔ ꠟꠦꠈꠣ ꠀꠍꠦ, ꠀꠟ꠆ꠟꠣꠄ ꠔꠣꠘ ꠚꠤꠞꠤꠡ꠆ꠔꠣ ꠅꠇꠟꠞꠦ ꠢꠥꠇꠥꠝ ꠖꠤꠛꠣ; ꠀꠞ ꠔꠣꠞꠣ ꠘꠤꠎꠞ ꠀꠔꠖꠤ ꠔꠥꠝꠣꠞꠦ ꠗꠞꠤꠟꠤꠛꠣ, ꠎꠣꠔꠦ ꠔꠥꠝꠣꠞ ꠙꠣꠅ-ꠅ ꠇꠥꠘꠥ ꠙꠣꠔ꠆ꠔꠞꠞ ꠌꠥꠐ ꠘꠣ ꠟꠣꠉꠦ।”
MAT 4:7 ꠁꠍꠣꠄ ꠔꠣꠞꠦ ꠇꠁꠟꠣ, “ꠇꠤꠔꠣꠛꠅ ꠅꠃ ꠇꠕꠣꠅ ꠟꠦꠈꠣ ꠀꠍꠦ, ꠔꠥꠝꠤ ꠔꠥꠝꠣꠞ ꠝꠣꠛꠥꠖ ꠀꠟ꠆ꠟꠣꠞꠦ ꠙꠞꠤꠇ꠆ꠇꠣ ꠇꠞꠣꠔ ꠟꠣꠉꠤꠅ ꠘꠣ।”
MAT 4:8 ꠛꠣꠖꠦ ꠁꠛꠟꠤꠍꠦ ꠔꠣꠘꠞꠦ ꠈꠥꠛ ꠃꠌꠣ ꠄꠇ ꠙꠣꠠꠞ ꠃꠙꠞꠦ ꠟꠁꠀ ꠉꠦꠟ, ꠘꠤꠀ ꠄꠇ ꠙꠟꠇꠦ ꠖꠥꠘꠤꠀꠞ ꠔꠣꠝꠣꠝ ꠝꠥꠟ꠆ꠟꠥꠇ ꠀꠞ ꠅꠔꠣꠞ ꠢꠇꠟ ꠎꠣꠇ-ꠎꠝꠇ ꠖꠦꠈꠣꠁꠟ ꠀꠞ ꠇꠁꠟ,
MAT 4:9 “ꠔꠥꠝꠤ ꠎꠥꠖꠤ ꠀꠝꠣꠞꠦ ꠍꠁꠎꠖꠣ ꠇꠞꠤꠟꠣꠅ, ꠔꠦ ꠁ ꠢꠇ꠆ꠇꠟꠔꠣ ꠀꠝꠤ ꠔꠥꠝꠣꠞꠦ ꠖꠤꠟꠣꠁꠝꠥ।”
MAT 4:10 ꠁꠍꠣꠄ ꠎꠥꠀꠙ ꠖꠤꠟꠣ, “ꠗꠥꠞ ꠡꠄꠔꠣꠘ, ꠜꠣꠉ! ꠀꠟ꠆ꠟꠣꠞ ꠇꠣꠟꠣꠝꠅ ꠀꠍꠦ, ꠔꠥꠝꠤ ꠈꠣꠟꠤ ꠔꠥꠝꠣꠞ ꠝꠣꠛꠥꠖ ꠀꠟ꠆ꠟꠣꠞꠦꠃ ꠒꠞꠣꠁꠅ, ꠈꠣꠟꠤ ꠔꠣꠘ ꠄꠛꠣꠖꠔ ꠇꠞꠤꠅ।”
MAT 4:11 ꠅꠈꠣꠘ ꠢꠥꠘꠤꠀ ꠁꠛꠟꠤꠍ ꠔꠣꠘ ꠉꠦꠍ ꠕꠣꠇꠤ ꠢꠞꠤꠀ ꠉꠦꠟꠉꠤ, ꠀꠞ ꠀꠟ꠆ꠟꠣꠞ ꠚꠤꠞꠤꠡ꠆ꠔꠣ ꠅꠇꠟ ꠀꠁꠀ ꠔꠣꠘ ꠈꠦꠎꠝꠔ ꠇꠞꠟꠣ।
MAT 4:12 ꠛꠣꠖꠦ ꠁꠍꠣꠄ ꠈꠛꠞ ꠙꠣꠁꠟꠣ, ꠄꠢꠤꠀ ꠘꠛꠤꠞꠦ ꠀꠐꠇ ꠇꠞꠤꠀ ꠎꠦꠟꠅ ꠢꠣꠞꠣꠁꠟ ꠅꠁꠍꠦ, ꠅꠈꠣꠘ ꠢꠥꠘꠤꠀ ꠔꠣꠁꠘ ꠉꠣꠟꠤꠟ ꠎꠤꠟꠣꠔ ꠉꠦꠟꠣꠉꠤ।
MAT 4:13 ꠢꠘꠅ ꠉꠤꠀ ꠘꠣꠍꠣꠞꠔ ꠉꠣꠃ ꠍꠣꠠꠤꠀ ꠍꠛꠥꠟꠘ-ꠘꠙ꠆ꠔꠣꠟꠤ ꠄꠟꠣꠇꠣꠞ ꠀꠅꠞꠞ ꠙꠣꠞꠞ ꠇꠚꠞꠘꠣꠃꠝ ꠐꠣꠃꠘꠅ ꠉꠤꠀ ꠞꠁꠟꠣ।
MAT 4:14 ꠁꠔꠣ ꠢꠇꠟꠔꠣ ꠅꠁꠟ, ꠎꠣꠔꠦ ꠁꠡꠣꠄꠀ ꠘꠛꠤꠞ ꠝꠣꠎꠖꠤ ꠀꠟ꠆ꠟꠣꠄ ꠎꠦꠔꠣ ꠛꠣꠔꠣꠁꠍꠟꠣ, ꠅꠔꠣ ꠅꠈꠘ ꠚꠟꠤꠎꠣꠄ। ꠁꠡꠣꠄꠀ ꠘꠛꠤꠄ ꠇꠁꠍꠟꠣ,
MAT 4:15 ꠛꠤꠗꠞ꠆ꠝꠤ ꠝꠣꠘꠡꠞ ꠛꠡꠔ ꠈꠣꠘꠣ ꠉꠣꠟꠤꠟ ꠎꠤꠟꠣꠞ ꠀꠅꠞꠞ ꠙꠣꠞꠞ ꠍꠛꠥꠟꠘ-ꠘꠙ꠆ꠔꠣꠟꠤ ꠄꠟꠣꠇꠣꠞ ꠝꠣꠘꠥꠡ, ꠀꠞ ꠎꠞ꠆ꠖꠣꠘ ꠉꠣꠋꠉꠞ ꠖꠥꠍꠞꠣ ꠙꠣꠞꠞ ꠝꠣꠘꠡꠞ ꠉꠦꠍꠦ ꠀꠟ꠆ꠟꠣꠞ ꠘꠥꠞ ꠎꠣꠁꠞ ꠅꠁꠛ।
MAT 4:16 ꠎꠦꠔꠣ ꠝꠣꠘꠥꠡ ꠛꠦ-ꠙꠕꠤ ꠛꠘꠤꠀ ꠀꠘ꠆ꠖꠣꠞꠤꠞ ꠝꠣꠎꠦ ꠎꠤꠘ꠆ꠖꠦꠉꠤ ꠇꠣꠐꠣꠁꠞꠣ, ꠔꠣꠞꠣ ꠀꠟ꠆ꠟꠣꠞ ꠘꠥꠞꠞ ꠝꠢꠣ ꠞꠥꠡꠘꠤ ꠖꠦꠈꠛꠣ। ꠀꠞ ꠎꠦꠞꠣ ꠉꠁꠘ ꠀꠘ꠆ꠖꠣꠞꠤꠞ ꠝꠣꠎꠦ ꠛꠡꠔ ꠇꠞꠦ, ꠔꠣꠞꠣꠞ ꠉꠦꠍꠦꠅ ꠀꠟ꠆ꠟꠣꠞ ꠘꠥꠞ ꠎꠣꠁꠞ ꠅꠁꠛ।
MAT 4:17 ꠅꠃ ꠡꠝꠄ ꠕꠣꠇꠤ ꠁꠍꠣꠄ ꠔꠛꠟꠤꠉ ꠇꠞꠟꠣ, ꠇꠁꠟꠣ, “ꠔꠃꠛꠣ ꠇꠞꠅ, ꠇꠣꠞꠘ ꠖꠥꠘꠤꠀꠞ ꠝꠣꠎꠦ ꠛꠦꠢꠦꠡ꠆ꠔꠤ ꠛꠣꠖꠡꠣꠁ ꠌꠣꠟꠥ ꠅꠁꠔꠦ ꠀꠞ ꠛꠦꠡꠤ ꠖꠦꠞꠤ ꠅꠁꠔ ꠘꠣꠄ।”
MAT 4:18 ꠢꠎꠞꠔ ꠁꠍꠣ ꠉꠣꠟꠤꠟ ꠀꠅꠞꠞ ꠙꠣꠞꠦꠖꠤ ꠀꠐꠤꠀ ꠎꠣꠁꠞꠣ, ꠅꠃ ꠡꠝꠄ ꠖꠦꠈꠟꠣ, ꠍꠣꠁꠝꠘ ꠃꠞꠚꠦ ꠙꠤꠔꠞ ꠀꠞ ꠄꠘ ꠜꠣꠁ ꠀꠘ꠆ꠖꠞꠤꠀꠍꠦ ꠀꠅꠞꠅ ꠎꠣꠟ ꠛꠣꠁꠞꠣ, ꠄꠞꠣ ꠔ ꠎꠣꠟꠥꠀ ꠀꠍꠟꠣ।
MAT 4:19 ꠁꠍꠣꠄ ꠄꠞꠣꠞꠦ ꠇꠁꠟꠣ, “ꠀꠝꠣꠞ ꠟꠉꠦ ꠀꠅ, ꠀꠝꠤ ꠔꠥꠝꠞꠣꠞꠦ ꠝꠣꠘꠥꠡ ꠗꠞꠣꠞ ꠎꠣꠟꠥꠀ ꠛꠣꠘꠣꠁꠝꠥ।”
MAT 4:20 ꠟꠉꠦ ꠟꠉꠦ ꠄꠞꠣ ꠎꠣꠟ ꠚꠣꠟꠣꠁꠀ ꠁꠍꠣꠞ ꠟꠉꠦ ꠞꠅꠀꠘꠣ ꠅꠁꠉꠦꠟꠣ।
MAT 4:21 ꠅꠘ ꠕꠘꠦ ꠕꠥꠠꠣ ꠀꠉꠦ ꠉꠤꠀ ꠖꠦꠈꠟꠣ, ꠁꠀꠇꠥꠛ ꠀꠞ ꠢꠣꠘ꠆ꠘꠣꠘ ꠔꠣꠞꠣ ꠖꠥꠁꠅ ꠜꠣꠁꠄ ꠛꠣꠚꠞ ꠟꠉꠦ ꠘꠣꠅꠅ ꠛꠁꠀ ꠎꠣꠟ ꠎꠥꠁꠔ-ꠎꠣꠁꠔ ꠇꠞꠞꠣ। ꠄꠞꠣꠞ ꠛꠣꠚꠞ ꠘꠣꠝ ꠎꠤꠛꠥꠖꠤꠀ। ꠁꠍꠣꠄ ꠄꠞꠣꠞꠦ ꠖꠦꠈꠤꠀ ꠒꠣꠇ ꠖꠤꠟꠣ,
MAT 4:22 ꠒꠣꠇ ꠢꠥꠘꠤꠀ ꠄꠞꠣꠅ ꠔꠣꠞꠣꠞ ꠛꠣꠚꠞꠦ ꠘꠣꠅꠅ ꠕꠁꠀ ꠁꠍꠣꠞ ꠟꠉꠦ ꠀꠁꠟꠣ।
MAT 4:23 ꠛꠣꠖꠦ ꠁꠍꠣ ꠉꠣꠟꠤꠟ ꠎꠤꠟꠣꠞ ꠢꠇꠟ ꠎꠣꠉꠣꠔ ꠊꠥꠞꠤ ꠊꠥꠞꠤ, ꠢꠘꠞ ꠘꠣꠘꠣꠘ ꠝꠍꠤꠖꠅ ꠉꠤꠀ ꠘꠍꠤꠅꠔ ꠇꠞꠟꠣ, ꠀꠞ ꠛꠦꠢꠦꠡ꠆ꠔꠤ ꠛꠣꠖꠡꠣꠁꠞ ꠈꠥꠡ-ꠈꠛꠞꠤ ꠔꠛꠟꠤꠉ ꠇꠞꠟꠣ। ꠄꠞꠟꠉꠦ ꠛꠃꠔ ꠘꠝꠥꠘꠣꠞ ꠛꠦꠝꠣꠞꠤꠞꠦ ꠜꠣꠟꠣ ꠇꠞꠟꠣ।
MAT 4:24 ꠀꠡ꠆ꠔꠣ ꠡꠤꠞꠤꠀ ꠖꠦꠡꠞ ꠝꠣꠎꠦ ꠔꠣꠘ ꠈꠛꠞ ꠞꠐꠤꠉꠦꠟ। ꠄꠔꠦ ꠘꠣꠘꠣꠘ ꠘꠝꠥꠘꠣꠞ ꠛꠦꠝꠣꠞ-ꠀꠎꠣꠞ ꠀꠞ ꠎꠣꠟꠣ-ꠎꠘꠔ꠆ꠞꠘꠣꠄ ꠎꠦꠔꠣ ꠝꠣꠘꠡꠦ ꠇꠡ꠆ꠐ ꠙꠣꠁꠍꠤꠟ, ꠎꠦꠞꠣꠞꠦ ꠎꠤꠘ-ꠜꠥꠔꠦ ꠗꠞꠍꠤꠟ, ꠝꠤꠞꠉꠤ ꠀꠞ ꠅꠞ꠆ꠖꠋ ꠛꠦꠝꠣꠞꠤ ꠎꠔ ꠝꠣꠘꠥꠡ ꠀꠍꠤꠟ, ꠝꠣꠘꠡꠦ ꠅꠔꠣꠞꠦ ꠁꠍꠣꠞ ꠉꠦꠍꠦ ꠟꠁꠀ ꠀꠁꠟꠣ। ꠔꠣꠁꠘ ꠄꠞꠣ ꠢꠇꠟꠞꠦ ꠜꠣꠟꠣ ꠇꠞꠟꠣ।
MAT 4:25 ꠉꠣꠟꠤꠟ, ꠖꠤꠇꠣꠙꠟꠤ, ꠎꠦꠞꠥꠎꠣꠟꠦꠝ, ꠄꠢꠥꠖꠤꠀ ꠀꠞ ꠎꠞ꠆ꠖꠣꠘꠞ ꠅꠁꠘ꠆ꠘ ꠙꠣꠞ ꠕꠣꠇꠤ ꠛꠃꠔ ꠝꠣꠘꠥꠡ ꠁꠍꠣꠞ ꠈꠞꠦ ꠈꠞꠦ ꠞꠅꠀꠘꠣ ꠅꠁꠟꠣ।
MAT 5:1 ꠛꠃꠔ ꠝꠣꠘꠥꠡ ꠀꠁꠍꠂꠘ ꠖꠦꠈꠤꠀ ꠁꠍꠣ ꠉꠤꠀ ꠄꠇ ꠙꠣꠠꠞ ꠃꠙꠞꠦ ꠃꠑꠤꠟꠣ। ꠃꠑꠤꠀ ꠛꠅꠀꠞ ꠛꠣꠖꠦ ꠔꠣꠘ ꠡꠣꠉꠞꠤꠖ ꠅꠇꠟ ꠇꠣꠘ꠆ꠖꠣꠔ ꠀꠁꠟꠣ।
MAT 5:2 ꠡꠣꠉꠞꠤꠖ ꠅꠇꠟꠞꠦ ꠖꠦꠈꠤꠀ ꠔꠣꠁꠘ ꠅꠃ ꠔꠣꠟꠤꠝ ꠖꠤꠟꠣ, ꠇꠁꠟꠣ,
MAT 5:3 “ꠘꠦꠇ-ꠇꠙꠣꠟꠤ ꠅꠃ ꠝꠣꠘꠥꠡꠃ ꠎꠣꠞꠣ ꠖꠤꠟ ꠕꠣꠇꠤ ꠘꠤꠎꠞꠦ ꠉꠞꠤꠛ ꠝꠘꠅ ꠇꠞꠦ, ꠛꠦꠢꠦꠡ꠆ꠔꠤ ꠛꠣꠖꠡꠣꠁ ꠔ ꠔꠣꠞꠣꠃ ꠙꠣꠁꠛꠣ।
MAT 5:4 ꠔꠣꠞꠣꠃ ꠇꠙꠣꠟꠤ ꠎꠣꠞꠣꠞ ꠝꠘꠅ ꠅꠈꠘ ꠖꠥꠈ ꠀꠍꠦ, ꠔꠣꠞꠣꠃ ꠔ ꠡꠥꠈ ꠙꠣꠁꠛꠣ।
MAT 5:5 ꠔꠣꠞꠣꠃ ꠇꠙꠣꠟꠤ ꠎꠣꠞꠣꠞ ꠌꠣꠟ-ꠌꠟꠘ ꠘꠞꠝ, ꠁ ꠖꠥꠘꠤꠀ ꠔ ꠔꠣꠞꠣꠞꠃ ꠅꠁꠛ।
MAT 5:6 ꠔꠣꠞꠣꠃ ꠇꠙꠣꠟꠤ ꠎꠣꠞꠣ ꠖꠤꠟꠦ-ꠎꠣꠘꠦ ꠙꠣꠇ-ꠙꠞꠦꠎꠉꠣꠞꠤꠞ ꠟꠣꠉꠤ ꠇꠣꠘ꠆ꠖꠦ, ꠔꠣꠞꠣꠞ ꠅꠃ ꠀꠡꠣ ꠙꠥꠞꠣ ꠅꠁꠛ।
MAT 5:7 ꠔꠣꠞꠣꠃ ꠇꠙꠣꠟꠤ ꠎꠣꠞꠣ ꠝꠣꠘꠡꠞꠦ ꠖꠄꠀ ꠇꠞꠦ, ꠔꠣꠞꠣꠃ ꠔ ꠖꠄꠀ ꠙꠣꠁꠛꠣ।
MAT 5:8 ꠔꠣꠞꠣꠃ ꠇꠙꠣꠟꠤ ꠎꠣꠞꠣꠞ ꠖꠤꠟ ꠈꠣꠐꠤ, ꠇꠣꠞꠘ ꠔꠣꠞꠣꠃ ꠀꠟ꠆ꠟꠣꠞ ꠖꠤꠖꠣꠞ ꠙꠣꠁꠛꠣ।
MAT 5:9 ꠔꠣꠞꠣꠃ ꠇꠙꠣꠟꠤ ꠎꠣꠞꠣ ꠝꠣꠘꠡꠞꠦ ꠡꠣꠘ꠆ꠔꠤꠄ ꠞꠣꠈꠣꠞ ꠟꠣꠉꠤ ꠝꠦꠘꠔ ꠇꠞꠦ, ꠀꠟ꠆ꠟꠣꠄ ꠔꠣꠞꠣꠞꠦ ꠔꠣꠘ ꠀꠙꠘ ꠀꠅꠟꠣꠖ ꠇꠁꠀ ꠒꠣꠇꠤꠛꠣ।
MAT 5:10 ꠔꠣꠞꠣꠃ ꠇꠙꠣꠟꠤ ꠎꠣꠞꠣ ꠀꠟ꠆ꠟꠣꠞ ꠢꠥꠇꠥꠝ ꠝꠣꠚꠤꠇ ꠌꠟꠣꠔ ꠉꠤꠀ ꠎꠥꠟꠥꠝ-ꠝꠍꠤꠛꠔ ꠡꠁꠎ꠆ꠎ ꠇꠞꠦ, ꠛꠦꠢꠦꠡ꠆ꠔꠤ ꠛꠣꠖꠡꠣꠁ ꠔ ꠔꠣꠞꠣꠃ ꠙꠣꠁꠛꠣ।
MAT 5:11 “ꠀꠞ ꠔꠥꠝꠞꠣꠃ ꠇꠙꠣꠟꠤ ꠎꠣꠞꠣꠞꠦ ꠀꠝꠣꠞ ꠟꠣꠉꠤ ꠝꠣꠘꠡꠦ ꠊꠤꠘ꠆ꠘꠣꠄ, ꠝꠣꠘꠡꠦ ꠔꠥꠝꠞꠣꠞꠦ ꠎꠥꠟꠥꠝ ꠇꠞꠦ ꠀꠞ ꠘꠣꠘꠣꠘ ꠘꠝꠥꠘꠣꠞ ꠝꠤꠍꠣ ꠛꠖꠘꠣꠝ ꠉꠣꠄ।
MAT 5:12 ꠁꠟꠣ ꠅꠁꠟꠦ ꠝꠘꠅ ꠞꠣꠈꠤꠅ, ꠔꠥꠝꠞꠣꠞ ꠀꠉꠦ ꠎꠦ ꠘꠛꠤ ꠅꠇꠟ ꠀꠁꠍꠟꠣ, ꠁꠔꠣ ꠝꠣꠘꠡꠦ ꠅꠃ ꠘꠛꠤꠞ ꠃꠙꠞꠦꠅ ꠅꠟꠣ ꠎꠥꠟꠥꠝ ꠇꠞꠔꠣ। ꠔꠦ ꠔꠥꠝꠞꠣ ꠈꠥꠡꠤ-ꠛꠣꠡꠤ ꠀꠞ ꠚꠥꠞ꠆ꠔꠤ ꠇꠞꠤꠅ, ꠇꠣꠞꠘ ꠔꠥꠝꠞꠣꠅ ꠅꠃ ꠘꠛꠤ ꠅꠇꠟꠞ ꠟꠣꠈꠣꠘ ꠛꠦꠢꠦꠡ꠆ꠔꠅ ꠛꠃꠔ ꠛꠠ ꠙꠥꠞꠥꠡ꠆ꠇꠣꠞ ꠙꠣꠁꠛꠣꠄ।
MAT 5:13 “ꠔꠥꠝꠞꠣ ꠅꠁꠟꠣꠄ ꠖꠥꠘꠤꠀꠞ ꠘꠥꠘ, ꠅꠁꠟꠦ ꠘꠥꠘꠞ ꠉꠥꠘ ꠎꠥꠖꠤ ꠘꠡ꠆ꠐ ꠅꠁꠎꠣꠄ, ꠔꠦ ꠀꠞ ꠘꠥꠘꠔꠣ ꠇꠞꠣ ꠎꠣꠄ ꠘꠤ? ꠁ ꠘꠥꠘ ꠔ ꠀꠞ ꠇꠥꠘꠥ ꠇꠣꠝꠅ ꠟꠣꠉꠦ ꠘꠣ। ꠝꠣꠘꠡꠦ ꠁꠔꠣ ꠛꠣꠞꠦ ꠚꠣꠟꠣꠁ ꠖꠦꠁꠘ ꠀꠞ ꠁꠔꠣꠞ ꠃꠙꠞꠦꠖꠤ ꠀꠐꠂꠘ।
MAT 5:14 “ꠢꠥꠘꠅ, ꠔꠥꠝꠞꠣ ꠅꠁꠟꠣꠄ ꠖꠥꠘꠤꠀꠞ ꠛꠣꠔ꠆ꠔꠤ। ꠙꠣꠠꠞ ꠃꠙꠞꠞ ꠇꠥꠘꠥ ꠐꠣꠃꠘ ꠔ ꠟꠥꠇꠣꠁꠟ ꠞꠣꠈꠣ ꠎꠣꠄ ꠘꠣ।
MAT 5:15 ꠀꠞ ꠇꠥꠘꠥ ꠝꠣꠘꠡꠦ ꠟꠦꠝ ꠎꠣꠟꠣꠁꠀ ꠐꠥꠇꠞꠤꠞ ꠔꠟꠦ ꠕꠄ ꠘꠣ, ꠁꠇꠐꠣ ꠟꠦꠝ-ꠖꠣꠘꠤꠞ ꠃꠙꠞꠦꠃ ꠕꠄ, ꠎꠣꠔꠦ ꠊꠞꠞ ꠢꠇꠟꠦ ꠚꠞ ꠖꠦꠈꠂꠘ।
MAT 5:16 ꠅꠃ ꠟꠣꠈꠣꠘ ꠔꠥꠝꠞꠣꠞ ꠚꠞꠅ ꠝꠣꠘꠡꠞ ꠍꠣꠝꠘꠦ ꠎꠟꠃꠇ, ꠎꠣꠔꠦ ꠔꠥꠝꠞꠣꠞ ꠜꠣꠟꠣ ꠇꠣꠝ ꠖꠦꠈꠤꠀ ꠝꠣꠘꠡꠦ ꠔꠥꠝꠞꠣꠞ ꠛꠦꠢꠦꠡ꠆ꠔꠤ ꠛꠣꠚ, ꠀꠟ꠆ꠟꠣ ꠙꠣꠇꠞ ꠔꠣꠞꠤꠚ ꠇꠞꠂꠘ।
MAT 5:17 “ꠔꠥꠝꠞꠣ ꠁꠈꠣꠘ ꠝꠘꠅ ꠇꠞꠤꠅ ꠘꠣ, ꠀꠝꠤ ꠔꠃꠞꠣꠔ ꠇꠤꠔꠣꠛ ꠀꠞ ꠘꠛꠤ ꠅꠇꠟꠞ ꠍꠢꠤꠚꠣ ꠛꠣꠔꠤꠟ ꠇꠞꠣꠔ ꠀꠁꠍꠤ। ꠀꠝꠤ ꠔ ꠁꠔꠣ ꠛꠣꠔꠤꠟ ꠇꠞꠣꠔ ꠘꠣꠄ, ꠛꠞꠋ ꠙꠥꠞꠣ ꠇꠞꠣꠔ ꠀꠁꠍꠤ।
MAT 5:18 ꠀꠝꠤ ꠢꠣꠍꠣ ꠇꠕꠣ ꠇꠁꠞꠣꠝ, ꠔꠃꠞꠣꠔ ꠇꠤꠔꠣꠛꠞ ꠢꠇꠟ ꠇꠕꠣ ꠎꠔꠖꠤꠘ ꠘꠣ ꠚꠟꠤꠍꠦ, ꠅꠔ ꠖꠤꠘ ꠁ ꠇꠤꠔꠣꠛꠞ ꠄꠇꠐꠣ ꠢꠞꠚ ꠛꠣ ꠎꠦꠞ-ꠎꠛꠞꠅ ꠛꠣꠔꠤꠟ ꠅꠁꠔ ꠘꠣꠄ। ꠀꠍꠝꠣꠘ-ꠎꠝꠤꠘ ꠇ꠆ꠇꠄ ꠘꠣ ꠅꠀ ꠙꠞ꠆ꠎꠘ꠆ꠔ, ꠁꠈꠣꠘ ꠛꠣꠔꠤꠟ ꠅꠁꠔ ꠘꠣꠄ।
MAT 5:19 ꠔꠃꠞꠣꠔ ꠇꠤꠔꠣꠛꠞ ꠇꠥꠘꠥ ꠢꠥꠞꠥ-ꠝꠥꠞꠥ ꠢꠥꠇꠥꠝꠅ ꠎꠥꠖꠤ ꠇꠦꠃ ꠘꠣ ꠝꠣꠘꠦ, ꠛꠣ ꠁ ꠢꠥꠇꠥꠝ ꠘꠣ ꠝꠣꠘꠣꠞ ꠟꠣꠉꠤ ꠝꠣꠘꠡꠞꠦ ꠙꠞꠣꠝꠤꠡ ꠖꠦꠄ, ꠔꠦ ꠛꠦꠢꠦꠡ꠆ꠔꠤ ꠛꠣꠖꠡꠣꠁꠔ ꠔꠣꠞꠦꠅ ꠢꠇꠟ ꠕꠣꠇꠤ ꠢꠥꠞꠥ ꠇꠅꠀ ꠅꠁꠛ। ꠅꠁꠟꠦ ꠎꠦ ꠎꠘꠦ ꠁ ꠢꠥꠇꠥꠝ-ꠀꠢꠇꠣꠝ ꠀꠝꠟ ꠇꠞꠦ ꠀꠞ ꠝꠣꠘꠡꠞꠦꠅ ꠢꠤꠇꠣꠄ, ꠛꠦꠢꠦꠡ꠆ꠔꠤ ꠛꠣꠖꠡꠣꠁꠔ ꠔꠣꠞꠦ ꠛꠃꠔ ꠖꠣꠝ ꠖꠦꠅꠀ ꠅꠁꠛ।
MAT 5:20 ꠀꠝꠤ ꠔꠥꠝꠞꠣꠞꠦ ꠇꠁꠞꠣꠝ, ꠀꠟꠤꠝ-ꠃꠟꠣꠝꠣ ꠀꠞ ꠚꠞꠤꠡꠤ ꠅꠇꠟꠞ ꠀꠝꠟ ꠕꠣꠇꠤꠅ, ꠔꠥꠝꠞꠣꠞ ꠀꠝꠟ ꠎꠥꠖꠤ ꠀꠞꠅ ꠜꠣꠟꠣ ꠘꠣ ꠅꠄ, ꠔꠦ ꠇꠥꠘꠥꠝꠘ꠆ꠔꠦꠃ ꠛꠦꠢꠦꠡ꠆ꠔꠤ ꠛꠣꠖꠡꠣꠁꠔ ꠢꠣꠝꠣꠁꠔꠣꠄ ꠙꠣꠞꠔꠣꠄ ꠘꠣꠄ।
MAT 5:21 “ꠔꠥꠝꠞꠣ ꠢꠥꠘꠍ, ꠀꠉꠞ ꠀꠝꠟꠞ ꠝꠣꠘꠡꠞ ꠉꠦꠍꠦ ꠇꠅꠀ ꠅꠁꠍꠦ, ‘ꠈꠥꠘ ꠇꠞꠤꠅ ꠘꠣ, ꠎꠦꠉꠤꠄ ꠈꠥꠘ ꠇꠞꠛ, ꠢꠦ ꠁ ꠈꠥꠘꠞ ꠖꠣꠠꠅ ꠙꠠꠛ।’
MAT 5:22 ꠅꠁꠟꠦ ꠀꠝꠤ ꠔꠥꠝꠞꠣꠞꠦ ꠇꠁꠞꠣꠝ, ꠎꠦ ꠝꠣꠘꠡꠦ ꠔꠣꠞ ꠜꠣꠁ-ꠛꠤꠞꠣꠖꠞꠞ ꠟꠉꠦ ꠞꠣꠉ-ꠉꠥꠍꠣ ꠇꠞꠦ, ꠢꠦ ꠛꠤꠌꠣꠞꠞ ꠖꠣꠠꠅ ꠙꠠꠛ। ꠢꠦ ꠎꠥꠖꠤ ꠔꠣꠞ ꠜꠣꠁꠞꠦ ꠇꠄ, ‘ꠔꠥꠝꠤ ꠔ ꠛꠦꠀꠈꠟ’ ꠔꠦ ꠀꠞꠅ ꠛꠠ ꠛꠤꠌꠣꠞꠞ ꠖꠣꠠꠅ ꠙꠠꠛ। ꠀꠞ ꠎꠦ ꠎꠘꠦ ꠔꠣꠞ ꠜꠣꠁꠞꠦ ꠇꠄ, ‘ꠔꠥꠝꠤ ꠛꠦꠅꠇꠥꠚ,’ ꠢꠦ ꠖꠥꠎꠈꠞ ꠀꠉꠥꠁꠘꠅ ꠎꠟꠛ।
MAT 5:23 “ꠄꠞꠖꠣꠄ ꠇꠥꠞꠛꠣꠘꠤ ꠈꠣꠘꠣꠔ ꠉꠤꠀ ꠀꠟ꠆ꠟꠣꠞ ꠘꠣꠝꠦ ꠟꠤꠟ꠆ꠟꠣ-ꠍꠖꠉꠣ ꠖꠤꠛꠣꠞ ꠡꠝꠄ ꠎꠥꠖꠤ ꠔꠥꠝꠣꠞ ꠝꠘꠅ ꠅꠁꠎꠣꠄ, ꠔꠥꠝꠣꠞ ꠟꠉꠦ ꠔꠥꠝꠣꠞ ꠇꠥꠘꠥ ꠜꠣꠁꠞ ꠛꠤꠛꠣꠖ ꠀꠍꠦ,
MAT 5:24 ꠔꠦ ꠔꠥꠝꠣꠞ ꠟꠤꠟ꠆ꠟꠣ-ꠍꠖꠉꠣ ꠅꠃ ꠎꠣꠉꠣꠔ ꠕꠁꠀ, ꠀꠉꠦ ꠉꠤꠀ ꠔꠥꠝꠣꠞ ꠜꠣꠁꠞ ꠟꠉꠦ ꠝꠤꠐ-ꠝꠣꠐ ꠇꠞꠅ, ꠛꠣꠖꠦ ꠉꠤꠀ ꠔꠥꠝꠣꠞ ꠇꠥꠞꠛꠣꠘꠤ ꠖꠦꠅ।
MAT 5:25 “ꠇꠦꠃ ꠔꠥꠝꠣꠞ ꠛꠤꠞꠥꠖ꠆ꠖꠦ ꠇꠥꠘꠥ ꠝꠣꠝꠟꠣ ꠇꠞꠟꠦ ꠀꠖꠣꠟꠔꠅ ꠎꠣꠅꠀꠞ ꠀꠉꠦꠃ ꠔꠣꠞ ꠟꠉꠦ ꠎꠟꠖꠤ ꠝꠤꠐ-ꠝꠣꠐ ꠇꠞꠤꠟꠤꠅ। ꠁꠟꠣ ꠘꠣ ꠇꠞꠟꠦ, ꠢꠦ ꠔꠥꠝꠣꠞꠦ ꠢꠣꠇꠤꠝꠞ ꠀꠔꠅ ꠖꠤꠛ, ꠢꠣꠇꠤꠝꠦ ꠔꠥꠝꠣꠞꠦ ꠙꠥꠟꠤꠡꠞ ꠢꠣꠅꠟꠣ ꠇꠞꠛꠣ, ꠀꠞ ꠙꠥꠟꠤꠡꠦ ꠔꠥꠝꠣꠞꠦ ꠎꠦꠟꠅ ꠢꠣꠞꠣꠁꠛꠣ।
MAT 5:26 ꠢꠦꠡꠦ ꠔꠣꠞ ꠡꠥꠟ꠆ꠟꠀꠘꠣ ꠙꠣꠅꠘꠣ ꠀꠖꠣꠄ ꠘꠣ ꠇꠞꠣ ꠙꠞ꠆ꠎꠘ꠆ꠔ, ꠔꠥꠝꠤ ꠇꠥꠘꠥꠝꠘ꠆ꠔꠦꠃ ꠍꠣꠠꠣ ꠙꠣꠁꠔꠣꠄ ꠘꠣꠄ। ꠀꠝꠤ ꠔꠥꠝꠞꠣꠞꠦ ꠀꠍꠟ ꠇꠕꠣ ꠇꠁꠟꠣꠝ।
MAT 5:27 “ꠔꠥꠝꠞꠣ ꠢꠥꠘꠍ, ꠀꠉꠦ ꠛꠣꠔꠣꠁꠟ ꠅꠁꠍꠦ, ‘ꠎꠤꠘꠣ ꠇꠞꠤꠅ ꠘꠣ।’
MAT 5:28 ꠅꠁꠟꠦ ꠀꠝꠤ ꠔꠥꠝꠞꠣꠞꠦ ꠇꠁꠞꠣꠝ, ꠇꠥꠘꠥ ꠛꠦꠐꠣꠄ ꠎꠥꠖꠤ ꠇꠥꠘꠥ ꠛꠦꠐꠤ ꠝꠣꠘꠡꠞ ꠛꠣꠄ ꠇꠥ-ꠘꠎꠞꠦ ꠌꠣꠄ, ꠔꠦ ꠢꠦ ꠅꠃ ꠡꠝꠄ ꠝꠘꠦ ꠝꠘꠦ ꠔꠣꠁꠞ ꠟꠉꠦ ꠎꠤꠘꠣ ꠇꠞꠟ।
MAT 5:29 “ꠔꠥꠝꠣꠞ ꠒꠣꠁꠘ ꠌꠃꠈꠦ ꠎꠥꠖꠤ ꠔꠥꠝꠣꠞꠦ ꠉꠥꠘꠣꠞ ꠙꠕꠦ ꠐꠣꠘꠦ, ꠔꠦ ꠁ ꠌꠃꠈ ꠔꠥꠟꠤꠀ ꠚꠣꠟꠣꠁ ꠖꠦꠅ। ꠀꠡ꠆ꠔꠣ ꠡꠞꠤꠟ ꠟꠁꠀ ꠖꠥꠎꠈꠅ ꠎꠣꠅꠀ ꠕꠣꠇꠤ, ꠄꠇꠐꠣ ꠅꠋꠉ ꠛꠤꠘꠣꠡ ꠇꠞꠤꠟꠣꠅꠀ ꠔꠥꠝꠣꠞ ꠟꠣꠉꠤ ꠜꠣꠟꠣ।
MAT 5:30 ꠔꠥꠝꠣꠞ ꠒꠣꠁꠘ ꠀꠔꠦ ꠎꠥꠖꠤ ꠔꠥꠝꠣꠞꠦ ꠉꠥꠘꠣꠞ ꠙꠕꠦ ꠐꠣꠘꠦ, ꠁ ꠀꠔ ꠇꠣꠐꠤꠀ ꠚꠣꠟꠣꠁ ꠖꠦꠅ। ꠀꠡ꠆ꠔꠣ ꠡꠞꠤꠟ ꠟꠁꠀ ꠖꠥꠎꠈꠅ ꠎꠣꠅꠀ ꠕꠣꠇꠤ, ꠄꠇꠐꠣ ꠅꠋꠉ ꠛꠤꠘꠣꠡ ꠇꠞꠤꠟꠣꠅꠀ ꠔꠥꠝꠣꠞ ꠟꠣꠉꠤ ꠜꠣꠟꠣ।
MAT 5:31 “ꠀꠞꠅ ꠇꠅꠀ ꠅꠁꠍꠦ, ‘ꠎꠦ ꠝꠣꠘꠡꠦ ꠔꠣꠞ ꠛꠃꠞꠦ ꠔꠣꠟꠣꠇ ꠖꠦꠄ, ꠢꠦ ꠛꠃꠞꠦ ꠔꠣꠟꠣꠇ ꠘꠣꠝꠣ ꠖꠦꠃꠇ।’
MAT 5:32 ꠅꠁꠟꠦ ꠀꠝꠤ ꠔꠥꠝꠞꠣꠞꠦ ꠇꠁꠞꠣꠝ, ꠎꠦ ꠝꠣꠘꠡꠦ ꠎꠤꠘꠣ ꠍꠣꠠꠣ ꠅꠁꠘ꠆ꠘ ꠇꠥꠘꠥ ꠇꠣꠞꠘꠦ ꠘꠤꠎꠞ ꠛꠃꠞꠦ ꠔꠣꠟꠣꠇ ꠖꠦꠄ, ꠢꠦ ꠔ ꠔꠣꠞ ꠛꠃꠞꠦ ꠎꠤꠘꠣꠇꠥꠞ ꠛꠣꠘꠣꠄ। ꠀꠞ ꠔꠣꠟꠣꠇ ꠙꠣꠅꠀ ꠛꠦꠐꠤꠞꠦ ꠎꠦꠉꠤꠄ ꠛꠤꠀ ꠇꠞꠦ, ꠢꠦ-ꠅ ꠎꠤꠘꠣꠇꠥꠞ ꠛꠘꠦ।
MAT 5:33 “ꠔꠥꠝꠞꠣ ꠔ ꠎꠣꠘ, ꠀꠉꠞ ꠎꠝꠣꠘꠣꠞ ꠝꠣꠘꠡꠞ ꠉꠦꠍꠦ ꠛꠣꠔꠣꠁꠟ ꠅꠁꠍꠦ, ‘ꠝꠤꠍꠣ ꠇꠥꠘꠥ ꠇꠍꠝ ꠇꠞꠤꠅ ꠘꠣ, ꠀꠞ ꠎꠦꠇꠥꠘꠥ ꠇꠍꠝ ꠇꠞꠟꠦ ꠁꠐꠣ ꠀꠟ꠆ꠟꠣꠞ ꠘꠣꠝꠦ ꠀꠖꠣꠄ ꠇꠞꠤꠅ।’
MAT 5:34 ꠅꠁꠟꠦ ꠀꠝꠤ ꠔꠥꠝꠞꠣꠞꠦ ꠇꠁꠞꠣꠝ, ꠇꠥꠘꠥꠎꠣꠔ ꠇꠍꠝ ꠇꠞꠤꠅ ꠘꠣ। ꠛꠦꠢꠦꠡ꠆ꠔꠞ ꠘꠣꠝꠦ ꠇꠍꠝ ꠇꠞꠤꠅ ꠘꠣ, ꠁꠈꠣꠘ ꠔ ꠀꠟ꠆ꠟꠣꠞ ꠀꠞꠡ।
MAT 5:35 ꠖꠥꠘꠤꠀꠞ ꠘꠣꠝꠦ ꠇꠞꠤꠅ ꠘꠣ, ꠁꠈꠣꠘ ꠔ ꠀꠟ꠆ꠟꠣꠞ ꠇꠖꠝ ꠝꠥꠛꠣꠞꠇ ꠕꠅꠀꠞ ꠎꠣꠉꠣ। ꠎꠦꠞꠥꠎꠣꠟꠦꠝꠞ ꠘꠣꠝꠦꠅ ꠇꠍꠝ ꠇꠞꠤꠅ ꠘꠣ, ꠁꠈꠣꠘ ꠅꠁꠟ ꠝꠢꠣꠘ ꠛꠣꠖꠡꠣ ꠀꠟ꠆ꠟꠣꠞ ꠐꠣꠃꠘ।
MAT 5:36 ꠔꠥꠝꠣꠞ ꠘꠤꠎꠞ ꠝꠣꠕꠣꠞ ꠘꠣꠝꠦ ꠇꠍꠝ ꠇꠞꠤꠅ ꠘꠣ, ꠁ ꠝꠣꠕꠣꠞ ꠄꠇꠍꠣ ꠌꠥꠟꠞꠦ ꠗꠟꠣ ꠛꠣ ꠇꠣꠟꠣ ꠇꠞꠣꠞ ꠈꠦꠝꠔꠣ ꠔ ꠔꠥꠝꠣꠞ ꠘꠣꠁ।
MAT 5:37 ꠔꠥꠝꠞꠣꠞ ꠝꠣꠔꠞ ꠅꠄ ꠈꠣꠘ ꠅꠄ, ꠀꠞ ꠘꠣ ꠈꠣꠘ ꠘꠣ ꠅꠃꠇ। ꠢꠥꠘꠅ, ꠁꠔꠣꠞ ꠛꠣꠞꠦ ꠀꠞ ꠎꠔꠔꠣꠃ ꠅꠄ, ꠁꠔꠣ ꠁꠛꠟꠤꠍ ꠕꠣꠇꠤ ꠅꠄ।
MAT 5:38 “ꠔꠥꠝꠞꠣ ꠔ ꠢꠥꠘꠍ, ꠀꠉꠦ ꠛꠣꠔꠣꠁꠟ ꠅꠁꠍꠦ, ꠎꠦ ꠙꠞꠤꠝꠣꠘꠦ ꠈꠦꠔꠤ ꠅꠁꠍꠦ, ꠅꠃ ꠙꠞꠤꠝꠣꠘꠦ ꠡꠣꠎꠣ ꠖꠤꠅ, ‘ꠌꠃꠈꠞ ꠛꠖꠟꠣ ꠌꠃꠈ ꠀꠞ ꠖꠣꠔꠞ ꠛꠖꠟꠣ ꠖꠣꠔ।’
MAT 5:39 ꠅꠁꠟꠦ ꠀꠝꠤ ꠇꠁꠞꠣꠝ, ꠇꠦꠃ ꠎꠥꠖꠤ ꠔꠥꠝꠞꠣꠞ ꠟꠉꠦ ꠈꠣꠞꠣꠙ ꠛꠦꠛꠢꠣꠞ ꠇꠞꠦ, ꠔꠦ ꠔꠥꠝꠞꠣ ꠄꠞ ꠛꠖꠟꠣ ꠟꠁꠅ ꠘꠣ, ꠛꠞꠋ ꠇꠥꠘꠥ ꠝꠣꠘꠡꠦ ꠔꠥꠝꠣꠞ ꠒꠣꠁꠘ ꠉꠣꠟꠅ ꠌꠠ ꠝꠣꠞꠟꠦ, ꠔꠣꠞꠦ ꠛꠣꠃ ꠉꠣꠟꠅ ꠙꠣꠔꠤꠀ ꠖꠤꠟꠣꠁꠅ।
MAT 5:40 ꠇꠦꠃ ꠎꠥꠖꠤ ꠝꠣꠝꠟꠣ-ꠝꠇꠖ꠆ꠖꠝꠣ ꠇꠞꠤꠀ ꠔꠥꠝꠣꠞ ꠇꠥꠞ꠆ꠔꠣ ꠘꠤꠔꠉꠤ ꠌꠣꠄ, ꠔꠦ ꠔꠥꠝꠣꠞ ꠌꠣꠖ꠆ꠖꠞꠅ ꠖꠤꠟꠣꠁꠅ।
MAT 5:41 ꠇꠦꠃ ꠎꠥꠖꠤ ꠔꠥꠝꠣꠞꠦ ꠇꠄ, ꠔꠣꠞ ꠉꠣꠁꠐ ꠛꠁꠀ ꠟꠁꠀ ꠄꠇ ꠝꠣꠁꠟ ꠎꠣꠁꠔꠣꠄ, ꠔꠦ ꠔꠥꠝꠤ ꠔꠣꠞ ꠟꠉꠦ ꠖꠥꠁ ꠝꠣꠁꠟ ꠎꠣꠁꠅꠉꠤ।
MAT 5:42 ꠇꠦꠃ ꠔꠥꠝꠣꠞ ꠉꠦꠍꠦ ꠇꠥꠘ꠆ꠔꠣ ꠈꠥꠎꠤꠟꠦ ꠔꠣꠞꠦ ꠖꠤꠅ। ꠇꠦꠃ ꠀꠅꠟꠣꠔ ꠌꠣꠁꠟꠦ, ꠔꠣꠞꠦ ꠚꠤꠞꠣꠁ ꠖꠤꠅ ꠘꠣ।
MAT 5:43 “ꠔꠥꠝꠞꠣ ꠎꠣꠘ, ꠀꠉꠦ ꠔ ꠛꠣꠔꠣꠁꠟ ꠅꠁꠍꠤꠟ, ‘ꠔꠥꠝꠣꠞ ꠀꠞꠤ-ꠚꠞꠤꠞꠦ ꠝꠣꠄꠀ ꠇꠞꠤꠅ ꠀꠞ ꠖꠥꠡꠝꠘꠞꠦ ꠊꠤꠘ꠆ꠘꠣꠁꠅ।’
MAT 5:44 ꠅꠁꠟꠦ ꠀꠝꠤ ꠔꠥꠝꠞꠣꠞꠦ ꠇꠁꠞꠣꠝ, ꠔꠥꠝꠞꠣꠞ ꠖꠥꠡꠝꠘꠞꠦꠅ ꠝꠣꠄꠀ ꠇꠞꠤꠅ। ꠎꠦꠞꠣ ꠔꠥꠝꠞꠣꠞꠦ ꠎꠥꠟꠥꠝ ꠇꠞꠦ, ꠔꠣꠞꠣꠞ ꠟꠣꠉꠤ ꠖꠥꠀ ꠇꠞꠤꠅ।
MAT 5:45 ꠁꠔꠣ ꠖꠦꠈꠤꠀ ꠝꠣꠘꠡꠦ ꠛꠥꠎꠛꠣ, ꠔꠥꠝꠞꠣ ꠢꠣꠍꠣꠃ ꠔꠥꠝꠞꠣꠞ ꠛꠦꠢꠦꠡ꠆ꠔꠤ ꠛꠣꠚ ꠀꠟ꠆ꠟꠣ ꠙꠣꠇꠞ ꠝꠣꠄꠀꠞ ꠀꠅꠟꠣꠖ ꠛꠘꠤꠉꠦꠍ। ꠔꠣꠁꠘ ꠔ ꠜꠣꠟꠣ-ꠛꠥꠞꠣ ꠢꠇꠟꠞ ꠃꠙꠞꠦ ꠔꠣꠘ ꠡꠥꠞꠥꠎ ꠃꠑꠣꠁꠘ, ꠖꠤꠘꠖꠣꠞ ꠀꠞ ꠘꠣꠚꠞꠝꠣꠘ ꠢꠇꠟꠞ ꠃꠙꠞꠦꠃ ꠝꠦꠊ-ꠙꠣꠘꠤ ꠖꠦꠁꠘ।
MAT 5:46 ꠎꠣꠞꠣ ꠔꠥꠝꠞꠣꠞꠦ ꠝꠢꠛ꠆ꠛꠔ ꠇꠞꠦ, ꠔꠥꠝꠞꠣ ꠎꠥꠖꠤ ꠈꠣꠟꠤ ꠔꠣꠞꠣꠞꠦꠃ ꠝꠢꠛ꠆ꠛꠔ ꠇꠞꠅ, ꠔꠦ ꠔꠥꠝꠞꠣ ꠇꠤꠔꠣ ꠙꠥꠞꠥꠡ꠆ꠇꠣꠞ ꠙꠣꠁꠛꠣꠄ? ꠊꠥꠡꠈꠥꠞ ꠔꠡꠤꠟꠖꠣꠞ ꠅꠇꠟꠦꠅ ꠁꠟꠣ ꠇꠞꠦ ꠘꠣ ꠘꠤ?
MAT 5:47 ꠔꠥꠝꠞꠣ ꠎꠥꠖꠤ ꠈꠣꠟꠤ ꠘꠤꠎꠞ ꠜꠣꠁꠞꠦ ꠍꠣꠟꠣꠝ ꠖꠦꠅ, ꠔꠦ ꠅꠁꠘ꠆ꠘ ꠝꠣꠘꠥꠡ ꠕꠣꠇꠤ ꠛꠦꠡꠤ ꠀꠞ ꠇꠤꠔꠣ ꠇꠞꠞꠣꠄ? ꠛꠤꠗꠞ꠆ꠝꠤ ꠅꠇꠟꠦꠅ ꠁꠟꠣ ꠇꠞꠂꠘ ꠘꠣ ꠘꠤ?
MAT 5:48 ꠄꠞꠟꠣꠉꠤ ꠀꠝꠤ ꠇꠁꠞꠣꠝ, ꠔꠥꠝꠞꠣꠞ ꠛꠦꠢꠦꠡ꠆ꠔꠤ ꠛꠣꠚ ꠀꠟ꠆ꠟꠣ ꠙꠣꠇ ꠎꠦꠟꠣ ꠈꠣꠐꠤ, ꠔꠥꠝꠞꠣꠅ ꠅꠟꠣ ꠈꠣꠐꠤ ꠅꠅ।
MAT 6:1 “ꠔꠥꠝꠞꠣ ꠢꠥꠡꠤꠀꠞ ꠞꠁꠅ, ꠝꠣꠘꠡꠞꠦ ꠖꠦꠈꠣꠘꠤꠞ ꠟꠣꠉꠤ ꠄꠛꠣꠖꠔ-ꠛꠘ꠆ꠖꠦꠉꠤ ꠇꠞꠤꠅ ꠘꠣ, ꠁꠟꠣ ꠇꠞꠟꠦ ꠔꠥꠝꠞꠣꠞ ꠛꠦꠢꠦꠡ꠆ꠔꠤ ꠛꠣꠚ ꠀꠟ꠆ꠟꠣ ꠙꠣꠇꠞ ꠉꠦꠍ ꠕꠣꠇꠤ ꠇꠥꠘꠥ ꠙꠥꠞꠥꠡ꠆ꠇꠣꠞ ꠙꠣꠁꠔꠣꠄ ꠘꠣꠄ।
MAT 6:2 “ꠇꠥꠘꠥ ꠝꠣꠘꠡꠞꠦ ꠖꠣꠘ-ꠈꠄꠞꠣꠔ ꠖꠤꠟꠦ ꠜꠘ꠆ꠒ ꠅꠇꠟꠞ ꠟꠣꠈꠣꠘ ꠖꠤꠅ ꠘꠣ। ꠔꠣꠞꠣ ꠔ ꠝꠣꠘꠡꠞ ꠉꠦꠍ ꠕꠣꠇꠤ ꠔꠣꠞꠤꠚ ꠙꠣꠁꠔꠣ ꠇꠞꠤ ꠝꠍꠤꠖꠅ-ꠝꠘ꠆ꠖꠤꠞꠅ ꠀꠞ ꠙꠕꠦ-ꠊꠣꠐꠦ, ꠒꠥꠟ-ꠒꠙꠇꠤ ꠛꠣꠎꠣꠁꠀ ꠟꠤꠟ꠆ꠟꠣ-ꠎꠇꠣꠔ ꠖꠦꠁꠘ। ꠀꠝꠤ ꠔꠥꠝꠞꠣꠞꠦ ꠢꠣꠍꠣꠃ ꠇꠁꠞꠣꠝ, ꠔꠣꠞꠣꠞ ꠙꠥꠞꠥꠡ꠆ꠇꠣꠞ ꠔ ꠔꠣꠞꠣ ꠙꠣꠁꠟꠤꠍꠦ।
MAT 6:3 ꠅꠁꠟꠦ ꠔꠥꠝꠤ ꠇꠥꠘꠥ ꠖꠣꠘ-ꠈꠄꠞꠣꠔ ꠖꠤꠟꠦ, ꠔꠥꠝꠣꠞ ꠒꠣꠁꠘ ꠀꠔꠦ ꠛꠤꠟꠣꠁꠟꠦ ꠛꠣꠃ ꠀꠔꠦ ꠎꠣꠘꠥ ꠘꠣ ꠎꠣꠘꠦ।
MAT 6:4 ꠅꠃꠟꠣ ꠟꠥꠇꠣꠁꠀ ꠖꠣꠘ ꠇꠞꠤꠅ। ꠔꠦꠃ ꠔꠥꠝꠣꠞ ꠛꠦꠢꠦꠡ꠆ꠔꠤ ꠛꠣꠚ ꠀꠟ꠆ꠟꠣ, ꠎꠦꠁꠘ ꠟꠥꠇꠣꠁꠀ ꠢꠇꠟꠔꠣ ꠖꠦꠈꠂꠘ, ꠔꠣꠁꠘꠃ ꠔꠥꠝꠣꠞꠦ ꠙꠥꠞꠥꠡ꠆ꠇꠣꠞ ꠖꠤꠛꠣ।
MAT 6:5 “ꠔꠥꠝꠞꠣ ꠎꠦꠛꠟꠣ ꠖꠥꠀ ꠇꠞꠅ, ꠅꠃ ꠡꠝꠄ ꠜꠘ꠆ꠒ ꠅꠇꠟꠞ ꠜꠣꠛ ꠗꠞꠤꠅ ꠘꠣ। ꠔꠣꠞꠣ ꠝꠣꠘꠡꠞꠦ ꠖꠦꠈꠣꠘꠤꠞ ꠟꠣꠉꠤ ꠝꠍꠤꠖꠅ-ꠝꠘ꠆ꠖꠤꠞꠅ ꠀꠞ ꠙꠕꠞ ꠝꠥꠈꠅ ꠃꠛꠣꠁꠀ ꠖꠥꠀ ꠇꠞꠦ। ꠀꠝꠤ ꠔꠥꠝꠞꠣꠞꠦ ꠢꠣꠍꠣꠃ ꠇꠁꠞꠣꠝ, ꠁꠔꠣꠄ ꠔ ꠔꠣꠞꠣꠞ ꠙꠥꠞꠥꠡ꠆ꠇꠣꠞ ꠙꠣꠁꠟꠤꠍꠦ।
MAT 6:6 ꠅꠁꠟꠦ ꠔꠥꠝꠤ ꠖꠥꠀ ꠇꠞꠣꠞ ꠛꠣꠟꠣ ꠊꠞꠞ ꠖꠞꠎꠣ-ꠎꠣꠘꠣꠟꠣ ꠟꠣꠉꠣꠁꠀ ꠖꠥꠀ ꠇꠞꠤꠅ, ꠀꠞ ꠔꠥꠝꠣꠞ ꠘꠤꠞꠣꠇꠣꠞ ꠛꠣꠚ, ꠎꠦꠘꠞꠦ ꠖꠦꠈꠣ ꠘꠣ ꠉꠦꠟꠦꠅ ꠀꠎꠤꠞ ꠀꠍꠂꠘ, ꠢꠃ ꠀꠟ꠆ꠟꠣꠞ ꠉꠦꠍꠦ ꠌꠣꠁꠅ। ꠔꠣꠁꠘ ꠔ ꠉꠥꠙꠘ ꠢꠇꠟꠔꠣ ꠖꠦꠈꠂꠘ, ꠔꠣꠁꠘꠃ ꠔꠥꠝꠣꠞꠦ ꠚꠟ ꠖꠤꠛꠣ।
MAT 6:7 “ꠔꠥꠝꠞꠣ ꠎꠦꠛꠟꠣ ꠖꠥꠀ ꠇꠞꠅ, ꠅꠃ ꠡꠝꠄ ꠖꠥꠘꠤꠀꠞ ꠝꠣꠘꠡꠞ ꠟꠣꠈꠣꠘ ꠈꠣꠝꠈꠣ ꠛꠦꠞ-ꠛꠦꠞꠤ ꠇꠞꠤꠅ ꠘꠣ। ꠔꠣꠞꠣ ꠝꠘꠅ ꠇꠞꠂꠘ, ꠛꠦꠡꠤ ꠛꠦꠡꠤ ꠇꠁꠟꠦ ꠀꠟ꠆ꠟꠣꠄ ꠔꠣꠞꠣꠞ ꠖꠥꠀ ꠇꠛꠥꠟ ꠇꠞꠛꠣ।
MAT 6:8 ꠔꠥꠝꠞꠣ ꠔꠣꠞꠣꠞ ꠟꠣꠈꠣꠘ ꠅꠁꠅ ꠘꠣ, ꠔꠥꠝꠞꠣꠞ ꠛꠦꠢꠦꠡ꠆ꠔꠤ ꠛꠣꠚ ꠀꠟ꠆ꠟꠣꠞ ꠉꠦꠍꠦ ꠌꠣꠅꠀꠞ ꠀꠉꠦꠃ, ꠔꠣꠁꠘ ꠎꠣꠘꠂꠘ ꠔꠥꠝꠞꠣꠞ ꠇꠤꠔꠣ ꠖꠞꠇꠣꠞ।
MAT 6:9 ꠄꠞꠟꠣꠉꠤ ꠔꠥꠝꠞꠣ ꠅꠟꠣꠈꠣꠘ ꠖꠥꠀ ꠇꠞꠤꠅ, ꠅ ꠛꠣꠛꠣ, ꠀꠝꠞꠣꠞ ꠛꠦꠢꠦꠡ꠆ꠔꠤ ꠛꠣꠚ, ꠔꠥꠝꠣꠞ ꠘꠣꠝ ꠙꠣꠇ-ꠙꠛꠤꠔ꠆ꠞ ꠝꠣꠘꠣ ꠅꠃꠇ।
MAT 6:10 ꠖꠥꠘꠤꠀꠁꠔ ꠔꠥꠝꠣꠞ ꠛꠣꠖꠡꠣꠁ ꠎꠟꠖꠤ ꠀꠃꠇ, ꠡꠛ ꠔꠥꠝꠣꠞ ꠝꠞ꠆ꠎꠤ ꠝꠣꠚꠤꠇ ꠇꠞꠣ ꠎꠣꠃꠇ, ꠛꠦꠢꠦꠡ꠆ꠔꠅ ꠎꠦꠟꠣ ꠅꠃꠟꠣ ꠖꠥꠘꠤꠀꠁꠔ, ꠛꠦꠢꠦꠡ꠆ꠔꠅ ꠎꠦꠟꠣ ꠅꠃꠟꠣ ꠖꠥꠘꠤꠀꠁꠔ।
MAT 6:11 ꠅ ꠛꠣꠛꠣ, ꠀꠁꠎꠇꠥꠞ ꠈꠣꠘꠤ ꠀꠁꠎꠇꠥ ꠖꠦꠅ, ꠝꠣꠚ ꠇꠞꠅ ꠀꠝꠞꠣꠞ ꠢꠇꠟ ꠅꠙꠞꠣꠗ,
MAT 6:12 ꠎꠣꠞꠣ ꠀꠝꠞꠣꠞ ꠛꠤꠞꠥꠖ꠆ꠖꠦ ꠇꠞꠍꠦ ꠙꠣꠙ, ꠀꠝꠞꠣ ꠔ ꠔꠣꠞꠣꠞꠦ ꠖꠤꠟꠣꠁꠍꠤ ꠝꠣꠚ।
MAT 6:13 ꠚꠣꠟꠣꠁꠅ ꠘꠣ ꠀꠝꠞꠣꠞꠦ ꠙꠞꠤꠇ꠆ꠇꠣꠔ, ꠡꠄꠔꠣꠘꠞ ꠇꠛꠎꠣ ꠕꠣꠇꠤ ꠇꠞꠅ ꠈꠣꠟꠣꠍ॥
MAT 6:14 ꠢꠥꠘꠅ, ꠔꠥꠝꠞꠣ ꠎꠥꠖꠤ ꠀꠞꠇ ꠎꠘꠞ ꠅꠙꠞꠣꠗ ꠝꠣꠚ ꠇꠞꠅ, ꠔꠦ ꠔꠥꠝꠞꠣꠞ ꠛꠦꠢꠦꠡ꠆ꠔꠤ ꠛꠣꠚ ꠀꠟ꠆ꠟꠣꠄꠅ ꠔꠥꠝꠞꠣꠞ ꠅꠙꠞꠣꠗ ꠝꠣꠚ ꠇꠞꠤ ꠖꠤꠛꠣ।
MAT 6:15 ꠅꠁꠟꠦ ꠔꠥꠝꠞꠣ ꠎꠥꠖꠤ ꠅꠁꠘ꠆ꠘꠞꠦ ꠝꠣꠚ ꠘꠣ ꠇꠞꠅ, ꠔꠦ ꠔꠥꠝꠞꠣꠞ ꠛꠦꠢꠦꠡ꠆ꠔꠤ ꠛꠣꠚꠦ ꠔꠥꠝꠞꠣꠞꠦꠅ ꠝꠣꠚ ꠇꠞꠔꠣ ꠘꠣꠄ।
MAT 6:16 “ꠔꠥꠝꠞꠣ ꠎꠦꠛꠟꠣ ꠞꠥꠎꠣ ꠞꠣꠈꠅ, ꠅꠃ ꠡꠝꠄ ꠜꠘ꠆ꠒ ꠅꠇꠟꠞ ꠟꠣꠈꠣꠘ ꠝꠥꠈ ꠇꠣꠟꠣ ꠇꠞꠤꠅ ꠘꠣ। ꠔꠣꠞꠣ ꠞꠥꠎꠣ ꠞꠣꠈꠍꠂꠘ, ꠅꠈꠣꠘ ꠖꠦꠈꠣꠘꠤꠞ ꠟꠣꠉꠤ ꠌꠃꠈ-ꠝꠥꠈ ꠇꠣꠟꠣ ꠇꠞꠤ ꠞꠣꠈꠂꠘ। ꠀꠝꠤ ꠔꠥꠝꠞꠣꠞꠦ ꠢꠣꠍꠣꠃ ꠇꠁꠞꠣꠝ, ꠁꠔꠣꠄ ꠔ ꠔꠣꠞꠣꠞ ꠙꠥꠞꠥꠡ꠆ꠇꠣꠞ ꠙꠣꠁꠟꠤꠍꠦ।
MAT 6:17 ꠅꠁꠟꠦ ꠔꠥꠝꠤ ꠞꠥꠎꠣ ꠞꠣꠈꠟꠦ ꠝꠥꠈ-ꠀꠔ ꠗꠁꠅ, ꠝꠣꠕꠣꠔ ꠔꠦꠟ-ꠙꠣꠘꠤ ꠖꠤꠅ,
MAT 6:18 ꠎꠦꠟꠣ ꠝꠣꠘꠡꠦ ꠛꠥꠎꠔ ꠘꠣ ꠙꠣꠞꠦ, ꠔꠥꠝꠤ ꠞꠥꠎꠣ ꠞꠣꠈꠍ। ꠔꠦꠃ ꠔꠥꠝꠣꠞ ꠘꠤꠞꠣꠇꠣꠞ ꠛꠣꠚ, ꠎꠦꠘꠞꠦ ꠖꠦꠈꠣ ꠘꠣ ꠉꠦꠟꠦꠅ ꠀꠎꠤꠞ ꠀꠍꠂꠘ, ꠢꠃ ꠀꠟ꠆ꠟꠣꠄꠃ ꠁꠔꠣ ꠖꠦꠈꠛꠣ। ꠔꠣꠁꠘ ꠔ ꠉꠥꠙꠘ ꠢꠇꠟꠔꠣ ꠖꠦꠈꠂꠘ, ꠔꠣꠁꠘꠃ ꠔꠥꠝꠣꠞꠦ ꠚꠟ ꠖꠤꠛꠣ।
MAT 6:19 “ꠁ ꠎꠤꠘ꠆ꠖꠦꠉꠤꠔ ꠔꠥꠝꠞꠣ ꠘꠤꠎꠞ ꠟꠣꠉꠤ ꠅꠔ ꠗꠘ-ꠡꠝ꠆ꠙꠖ ꠎꠝꠣꠁꠅ ꠘꠣ। ꠖꠥꠘꠤꠀꠞ ꠡꠝ꠆ꠙꠖꠞ ꠝꠣꠎꠦ ꠎꠋꠉꠣꠞꠦ ꠗꠞꠦ, ꠙꠥꠇꠦ ꠈꠣꠄ ꠀꠞ ꠢꠤꠋ ꠈꠥꠖꠤꠀ ꠌꠥꠞꠦ ꠘꠦꠄ।
MAT 6:20 ꠅꠁꠟꠦ ꠛꠦꠢꠦꠡ꠆ꠔꠞ ꠝꠣꠎꠦ ꠘꠤꠎꠞ ꠟꠣꠉꠤ ꠍꠣꠝꠣꠘꠣ ꠎꠝꠣꠅ, ꠢꠤꠘꠅ ꠎꠋꠉꠣꠞꠦ ꠗꠞꠦ ꠘꠣ, ꠙꠥꠇꠦꠅ ꠈꠣꠄ ꠘꠣ ꠀꠞ ꠌꠥꠞꠤꠅ ꠅꠄ ꠘꠣ।
MAT 6:21 ꠝꠘꠅ ꠞꠣꠈꠤꠅ, ꠔꠥꠝꠣꠞ ꠗꠘ ꠎꠦꠘꠅ, ꠝꠘꠅ ꠢꠘꠅ ꠞꠄ।
MAT 6:22 “ꠎꠣꠘ ꠔ, ꠌꠃꠈ ꠅꠁꠟ ꠡꠞꠤꠟꠞ ꠛꠣꠔ꠆ꠔꠤ। ꠔꠥꠝꠣꠞ ꠌꠃꠈ ꠎꠥꠖꠤ ꠜꠣꠟꠣ ꠅꠄ, ꠔꠦ ꠔꠥꠝꠣꠞ ꠀꠡ꠆ꠔꠣ ꠡꠞꠤꠟꠅ ꠌꠇꠌꠇꠣ ꠚꠞ ꠅꠁꠛ।
MAT 6:23 ꠅꠁꠟꠦ ꠔꠥꠝꠣꠞ ꠌꠃꠈ ꠎꠥꠖꠤ ꠈꠣꠞꠣꠙ ꠅꠄ, ꠔꠦ ꠀꠡ꠆ꠔꠣ ꠡꠞꠤꠟꠃ ꠇꠣꠟꠣ ꠀꠘ꠆ꠖꠣꠁꠞ ꠅꠁꠎꠤꠛ। ꠔꠥꠝꠣꠞ ꠖꠤꠟꠞ ꠛꠣꠔ꠆ꠔꠤ ꠀꠘ꠆ꠖꠣꠁꠞ ꠅꠁꠟꠦ, ꠁ ꠀꠘ꠆ꠖꠣꠁꠞ ꠛꠠ ꠛꠦꠎꠥꠁꠔꠣ।
MAT 6:24 “ꠎꠣꠘ ꠘꠤ, ꠇꠥꠘꠥ ꠉꠥꠟꠣꠝꠦꠃ ꠖꠥꠁ ꠝꠥꠘꠤꠛꠞ ꠈꠦꠎꠝꠔ ꠇꠞꠔ ꠙꠣꠞꠦ ꠘꠣ, ꠢꠦ ꠄꠇꠎꠘꠞꠦ ꠊꠤꠘ꠆ꠘꠣꠁꠛ ꠀꠞꠇꠎꠘꠞꠦ ꠜꠣꠟꠣ ꠙꠣꠁꠛ। ꠀꠞꠘꠣꠄ ꠄꠇꠎꠘꠞ ꠛꠣꠄ ꠈꠤꠀꠟ ꠇꠞꠛ, ꠀꠞꠇꠎꠘꠞꠦ ꠄꠟꠣꠝꠤ ꠇꠞꠛ। ꠔꠦ ꠔꠥꠝꠞꠣꠅ ꠀꠟ꠆ꠟꠣ ꠙꠣꠇ ꠀꠞ ꠗꠘ-ꠍꠣꠝꠣꠘꠣ, ꠖꠥꠁꠅꠔꠣꠞ ꠈꠦꠎꠝꠔ ꠄꠇꠟꠉꠦ ꠇꠞꠔꠣꠄ ꠙꠣꠞ ꠘꠣ।
MAT 6:25 “ꠄꠞꠖꠣꠄ ꠀꠝꠤ ꠔꠥꠝꠞꠣꠞꠦ ꠇꠁꠞꠣꠝ, ꠇꠤꠟꠣ ꠈꠣꠁꠔꠣꠝ ꠀꠞ ꠇꠤꠟꠣ ꠚꠤꠘ꠆ꠖꠤꠔꠣꠝ, ꠁꠔꠣ ꠟꠁꠀ ꠌꠤꠘ꠆ꠔꠣ ꠇꠞꠤꠅ ꠘꠣ। ꠈꠣꠘꠤ ꠕꠣꠇꠤ ꠎꠣꠘ ꠛꠠ, ꠇꠣꠙꠠ-ꠌꠥꠙꠠ ꠕꠣꠇꠤ ꠡꠞꠤꠟ ꠛꠠ।
MAT 6:26 “ꠀꠍꠝꠣꠘꠞ ꠅꠃ ꠙꠣꠈꠤꠘ꠆ꠔꠞ ꠛꠣꠄ ꠌꠣꠅ, ꠔꠣꠞꠣ ꠎꠣꠟꠣꠅ ꠛꠣꠁꠘ ꠇꠞꠦ ꠘꠣ, ꠚꠡꠟꠅ ꠇꠣꠐꠦ ꠘꠣ, ꠃꠉꠣꠞꠅ ꠇꠥꠘ꠆ꠔꠣ ꠎꠝꠣꠄ ꠘꠣ, ꠈꠣꠟꠤ ꠔꠥꠝꠞꠣꠞ ꠛꠦꠢꠦꠡ꠆ꠔꠤ ꠛꠣꠚ ꠀꠟ꠆ꠟꠣꠄ ꠔꠣꠞꠣꠞ ꠈꠥꠞꠣꠇ ꠖꠦꠁꠘ। ꠔꠦ ꠔꠥꠝꠞꠣ ꠇꠥꠘꠥ ꠁꠔꠣ ꠕꠣꠇꠤ ꠀꠞꠅ ꠖꠣꠝꠤ ꠘꠣꠄ ꠘꠤ?
MAT 6:27 ꠇꠅ ꠌꠣꠁꠘ, ꠔꠥꠝꠞꠣꠞ ꠝꠣꠎꠦ ꠇꠦꠃ ꠌꠤꠘ꠆ꠔꠣ-ꠜꠣꠛꠘꠣ ꠇꠞꠤꠀ ꠔꠣꠞ ꠢꠣꠄꠀꠔꠤ ꠄꠇꠈꠣꠘ ꠊꠘ꠆ꠐꠣ ꠛꠣꠠꠣꠁꠔ ꠙꠣꠞꠛ ꠘꠤ?
MAT 6:28 “ꠚꠤꠘ꠆ꠘꠞ ꠇꠣꠙꠠꠞ ꠟꠣꠉꠤ ꠌꠤꠘ꠆ꠔꠣ ꠇꠞ ꠇꠦꠘꠦ? ꠔꠥꠝꠞꠣ ꠅꠃ ꠎꠋꠟꠤ ꠚꠥꠟꠞ ꠛꠣꠄ ꠌꠣꠁꠀ ꠖꠦꠈꠅ, ꠁꠔꠣ ꠇꠔ ꠛꠦꠡꠤ ꠡꠥꠘ꠆ꠖꠞ! ꠁꠔꠣꠄ ꠔ ꠘꠤꠎꠞ ꠡꠥꠘ꠆ꠖꠞꠞ ꠟꠣꠉꠤ ꠇꠥꠘ꠆ꠔꠣꠃ ꠇꠞꠦ ꠘꠣ, ꠇꠥꠘꠥ ꠞꠋꠉꠅ ꠡꠤꠟꠣꠁ ꠇꠞꠦ ꠘꠣ, ꠛꠣꠁꠘꠅ ꠇꠞꠦ ꠘꠣ, ꠄꠝꠘꠦꠃ ꠅꠄ।
MAT 6:29 ꠔꠦ ꠀꠝꠤ ꠇꠁꠞꠣꠝ, ꠛꠣꠖꠡꠣ ꠍꠥꠟꠣꠁꠝꠣꠘ ꠅꠔ ꠎꠣꠇ-ꠎꠝꠇꠞ ꠝꠣꠎꠦ ꠞꠁꠟꠦꠅ ꠔꠣꠘ ꠟꠦꠛꠣꠍ ꠔ ꠅꠔꠣ ꠄꠉꠥ ꠎꠋꠟꠤ ꠚꠥꠟꠞ ꠟꠣꠈꠣꠘꠅ ꠡꠥꠘ꠆ꠖꠞ ꠀꠍꠤꠟ ꠘꠣ।
MAT 6:30 ꠖꠦꠈꠞꠣꠄ ꠘꠤ, ꠎꠋꠉꠟꠞ ꠝꠣꠎꠦ ꠅꠃ ꠎꠦꠔꠣ ꠡꠥꠘ꠆ꠖꠞ ꠚꠥꠟ ꠅꠈꠘ ꠀꠍꠦ, ꠇꠣꠁꠟ ꠅꠁꠟꠦꠃ ꠝꠣꠘꠡꠦ ꠁꠔꠣ ꠖꠣꠞꠥ ꠛꠣꠘꠣꠁꠀ ꠀꠉꠥꠁꠘꠖꠤ ꠎꠣꠟꠣꠁꠛ। ꠀꠟ꠆ꠟꠣꠄ ꠎꠥꠖꠤ ꠅꠃ ꠎꠋꠉꠟꠞꠦ ꠅꠟꠣ ꠡꠥꠘ꠆ꠖꠞ ꠇꠞꠤ ꠢꠣꠎꠣꠁꠍꠂꠘ, ꠔꠦ ꠅ ꠇꠝꠎꠥꠞ ꠁꠝꠣꠘꠖꠣꠞ ꠅꠇꠟ, ꠔꠥꠝꠞꠣꠞꠦꠅ ꠔꠣꠁꠘ ꠡꠥꠘ꠆ꠖꠞ ꠇꠞꠤ ꠢꠣꠎꠣꠁꠔꠣ ꠘꠣꠄ ꠘꠤ?
MAT 6:31 ꠄꠞꠖꠣꠄ ꠇꠤꠔꠣ ꠈꠣꠁꠔꠣꠄ ꠀꠞ ꠇꠤꠔꠣ ꠚꠤꠘ꠆ꠖꠤꠔꠣꠄ, ꠁꠔꠣ ꠟꠁꠀ ꠌꠤꠘ꠆ꠔꠣ ꠇꠞꠤꠅ ꠘꠣ।
MAT 6:32 ꠁ ꠖꠥꠘꠤꠀꠞ ꠝꠣꠘꠡꠦ ꠈꠣꠟꠤ ꠅꠔꠣ ꠟꠁꠀꠃ ꠗꠣꠘ꠆ꠖꠣ ꠇꠞꠦ। ꠔꠥꠝꠞꠣꠞ ꠛꠦꠢꠦꠡ꠆ꠔꠤ ꠛꠣꠚ ꠀꠟ꠆ꠟꠣꠄ ꠔ ꠎꠣꠘꠂꠘꠃ, ꠁꠔꠣ ꠢꠇꠟꠔꠣ ꠔꠥꠝꠞꠣꠞ ꠎꠞꠥꠞ ꠀꠍꠦ।
MAT 6:33 ꠄꠞꠟꠣꠉꠤ ꠔꠥꠝꠞꠣ ꠙꠄꠟꠣꠃ ꠀꠟ꠆ꠟꠣꠞ ꠝꠞ꠆ꠎꠤ ꠎꠥꠉꠣꠁꠀ ꠌꠟꠅ, ꠔꠣꠘ ꠛꠣꠖꠡꠣꠁꠞ ꠗꠣꠘ꠆ꠖꠣꠔ ꠞꠅ। ꠔꠦꠃ ꠁꠔꠣ ꠢꠇ꠆ꠇꠟꠔꠣꠅ ꠔꠥꠝꠞꠣ ꠙꠣꠁꠛꠣꠄ।
MAT 6:34 ꠇꠣꠁꠟꠇꠥꠞ ꠌꠤꠘ꠆ꠔꠣ ꠇꠞꠤꠅ ꠘꠣ, ꠇꠣꠁꠟꠇꠥꠞ ꠛꠦꠙꠣꠞ ꠇꠣꠁꠟꠇꠥꠞ ꠃꠙꠞꠦ ꠍꠣꠠꠤ ꠖꠦꠅ। ꠖꠤꠘꠞ ꠀꠎꠣꠛ ꠖꠤꠘꠞ ꠟꠣꠉꠤ ꠎꠕꠦꠡ꠆ꠐ।
MAT 7:1 “ꠔꠥꠝꠞꠣ ꠝꠣꠘꠡꠞ ꠖꠥꠡ ꠔꠥꠇꠣꠘꠤꠔ ꠞꠁꠅ ꠘꠣ, ꠔꠦꠃ ꠔꠥꠝꠞꠣꠞ ꠖꠥꠡꠅ ꠔꠥꠇꠣꠁꠟ ꠅꠁꠔ ꠘꠣꠄ।
MAT 7:2 ꠔꠥꠝꠞꠣ ꠎꠦꠟꠣ ꠝꠣꠘꠡꠞ ꠖꠥꠡ ꠔꠥꠇꠣꠅ, ꠀꠟ꠆ꠟꠣꠄꠅ ꠅꠃꠟꠣ ꠔꠥꠝꠞꠣꠞ ꠖꠥꠡ ꠔꠥꠇꠣꠁꠛꠣ। ꠔꠥꠝꠞꠣ ꠎꠦꠟꠣ ꠙꠣꠟ꠆ꠟꠣꠖꠤ ꠝꠣꠙꠤꠛꠣꠄ, ꠔꠥꠝꠞꠣꠞ ꠟꠣꠉꠤꠅ ꠅꠟꠣ ꠝꠣꠙꠣ ꠅꠁꠛ।
MAT 7:3 “ꠔꠥꠝꠣꠞ ꠜꠣꠁꠞ ꠌꠃꠈꠞ ꠜꠤꠔꠞꠦ ꠉꠥꠠꠣ ꠀꠍꠦ ꠁꠈꠣꠘ ꠖꠦꠈꠞꠣꠄ, ꠅꠁꠟꠦ ꠘꠤꠎꠞ ꠌꠃꠈꠅ ꠉꠣꠍꠞ ꠌꠦꠟꠤ ꠀꠍꠦ ꠁꠈꠣꠘ ꠖꠦꠈꠞꠣꠄ ꠘꠣ ꠇꠦꠘꠦ?
MAT 7:4 ꠔꠥꠝꠣꠞ ꠌꠈꠥꠔ ꠌꠦꠟꠤ ꠢꠣꠝꠣꠁꠍꠦ ꠁꠈꠣꠘ ꠎꠦꠛꠟꠣ ꠖꠦꠈꠞꠣꠄ ꠘꠣ, ꠔꠦ ꠔꠥꠝꠣꠞ ꠜꠣꠁꠞꠦ ꠇꠤꠟꠣ ꠇꠁꠛꠣꠄ, ꠜꠣꠁ, ꠔꠥꠝꠣꠞ ꠌꠈꠥꠔ ꠉꠥꠠꠣ ꠢꠣꠝꠣꠁꠍꠦ, ꠀꠅ, ꠛꠣꠞ ꠇꠞꠤꠀ ꠖꠦꠁ?
MAT 7:5 ꠢꠣꠄꠞꠦ ꠜꠘ꠆ꠒ, ꠙꠄꠟꠣ ꠘꠤꠎꠞ ꠌꠃꠈ ꠕꠣꠇꠤ ꠌꠦꠟꠤ ꠛꠣꠞ ꠇꠞꠅ, ꠛꠣꠖꠦ ꠔꠥꠝꠣꠞ ꠜꠣꠁꠞ ꠌꠃꠈ ꠕꠣꠇꠤ ꠉꠥꠠꠣ ꠛꠣꠞ ꠇꠞꠣꠔ ꠟꠣꠉꠟꠦ ꠜꠣꠟꠣ ꠇꠞꠤ ꠖꠦꠈꠔꠣꠄ ꠙꠣꠞꠛꠣꠄ।
MAT 7:6 “ꠢꠥꠘꠅ, ꠇꠥꠔ꠆ꠔꠣꠞ ꠍꠣꠝꠘꠦ ꠙꠣꠇ-ꠙꠛꠤꠔ꠆ꠞ ꠇꠥꠘꠥ ꠌꠤꠎ ꠖꠤꠅ ꠘꠣ। ꠡꠥꠅꠞꠞ ꠍꠣꠝꠘꠦ ꠝꠘꠤ-ꠝꠥꠇ꠆ꠔꠣ ꠍꠤꠐꠣꠁꠅ ꠘꠣ। ꠀꠞꠘꠣꠄ ꠅꠃ ꠌꠤꠎꠞꠦ ꠔꠣꠞꠣꠞ ꠙꠣꠅꠖꠤ ꠃꠠꠤꠀ, ꠃꠟꠐꠣ ꠀꠁꠀ ꠔꠥꠝꠞꠣꠞꠦꠅ ꠢꠣꠝꠟꠣ ꠇꠞꠔꠣ ꠙꠣꠞꠂꠘ।
MAT 7:7 “ꠀꠝꠤ ꠔꠥꠝꠞꠣꠞꠦ ꠇꠁꠞꠣꠝ, ꠌꠣꠅ, ꠔꠥꠝꠞꠣꠞꠦ ꠖꠦꠅꠀ ꠅꠁꠛ। ꠔꠣꠟ꠆ꠟꠣꠡ ꠇꠞꠅ, ꠔꠦꠃ ꠙꠣꠁꠛꠣꠄ। ꠖꠥꠀꠞꠅ ꠑꠥꠇꠣ ꠖꠦꠅ, ꠔꠦꠃ ꠖꠥꠀꠞ ꠈꠥꠟꠣ ꠅꠁꠛ।
MAT 7:8 ꠎꠣꠞꠣ ꠌꠣꠄ, ꠔꠣꠞꠣꠃ ꠔ ꠙꠣꠄ। ꠎꠦ ꠔꠣꠟ꠆ꠟꠣꠡ ꠇꠞꠦ ꠢꠦ ꠙꠣꠄ। ꠎꠦ ꠖꠥꠀꠞꠅ ꠑꠥꠇꠣꠄ, ꠔꠣꠞ ꠟꠣꠉꠤ ꠖꠥꠀꠞ ꠈꠥꠟꠣ ꠅꠄ।
MAT 7:9 ꠔꠥꠝꠞꠣꠞ ꠝꠣꠎꠦ ꠁꠟꠣ ꠇꠥꠘꠥ ꠝꠣ-ꠛꠣꠚ ꠀꠍꠦ ꠘꠤ, ꠎꠣꠞ ꠙꠥꠔꠦ ꠞꠥꠐꠤ ꠌꠣꠁꠟꠦ ꠝꠣꠐꠤ ꠖꠤꠛ?
MAT 7:10 ꠝꠣꠍ ꠌꠣꠁꠟꠦ ꠢꠣꠚ ꠖꠤꠛ?
MAT 7:11 ꠔꠥꠝꠞꠣ ꠈꠣꠞꠣꠙ ꠅꠁꠀꠅ ꠎꠥꠖꠤ ꠔꠥꠝꠞꠣꠞ ꠢꠥꠞꠥꠔ꠆ꠔꠣꠁꠘꠞꠦ ꠜꠣꠟꠣ ꠜꠣꠟꠣ ꠌꠤꠎ ꠖꠤꠔꠣꠄ ꠎꠣꠘ, ꠔꠦ ꠎꠣꠞꠣ ꠛꠦꠢꠦꠡ꠆ꠔꠤ ꠛꠣꠚ ꠀꠟ꠆ꠟꠣ ꠙꠣꠇꠞ ꠉꠦꠍꠦ ꠌꠣꠁꠛ, ꠔꠣꠁꠘ ꠔ ꠘꠤꠌꠄ ꠔꠣꠞꠣꠞꠦ ꠜꠣꠟꠣ ꠜꠣꠟꠣ ꠌꠤꠎ ꠖꠣꠘ ꠇꠞꠛꠣ, ꠁꠔꠣ ꠔ ꠡ꠆ꠛꠣꠜꠣꠛꠤꠇ।
MAT 7:12 ꠢꠥꠘꠅ, ꠔꠥꠝꠞꠣ ꠝꠣꠘꠡꠞ ꠉꠦꠍ ꠕꠣꠇꠤ ꠎꠦꠟꠣꠈꠣꠘ ꠛꠦꠛꠢꠣꠞ ꠙꠣꠁꠔꠣꠄ ꠌꠣꠅ, ꠔꠥꠝꠞꠣꠅ ꠢꠇꠟꠞ ꠟꠉꠦ ꠅꠃ ꠟꠣꠈꠣꠘ ꠛꠦꠛꠢꠣꠞ ꠇꠞꠅ। ꠅꠔꠣꠃ ꠅꠁꠟ ꠔꠃꠞꠣꠔ ꠇꠤꠔꠣꠛ ꠀꠞ ꠘꠛꠤ ꠅꠇꠟꠞ ꠍꠢꠤꠚꠣꠞ ꠝꠥꠟ ꠔꠣꠟꠤꠝ।
MAT 7:13 “ꠢꠥꠘꠅ, ꠔꠥꠝꠞꠣ ꠌꠤꠙꠣ ꠖꠥꠀꠞꠦꠖꠤ ꠢꠣꠝꠣꠁꠅ, ꠇꠣꠞꠘ ꠎꠦ ꠙꠕꠦ ꠛꠤꠘꠣꠡꠞ ꠛꠣꠄ ꠐꠣꠘꠦ, ꠁ ꠙꠕ ꠝꠥꠐꠣ, ꠙꠕꠞ ꠖꠥꠀꠞꠅ ꠛꠠ, ꠛꠃꠔ ꠝꠣꠘꠥꠡ ꠅꠃ ꠖꠥꠀꠞꠦꠖꠤ ꠢꠣꠝꠣꠁꠘ।
MAT 7:14 ꠅꠁꠟꠦ ꠎꠦ ꠙꠕꠦ ꠉꠦꠟꠦ ꠎꠤꠘ꠆ꠖꠦꠉꠤ ꠝꠤꠟꠦ, ꠁ ꠙꠕꠞ ꠖꠥꠀꠞ ꠌꠤꠙꠣ, ꠙꠕꠅ ꠢꠥꠞꠥ-ꠝꠥꠞꠥ। ꠈꠥꠛ ꠇꠝ ꠝꠣꠘꠡꠦꠃ ꠁ ꠖꠥꠀꠞꠞ ꠈꠥꠎ ꠙꠣꠁꠘ।
MAT 7:15 “ꠜꠘ꠆ꠒ ꠘꠛꠤ ꠅꠇꠟ ꠕꠣꠇꠤ ꠢꠥꠡꠤꠀꠞ ꠞꠁꠅ। ꠔꠣꠞꠣ ꠔꠥꠝꠞꠣꠞ ꠉꠦꠍꠦ ꠝꠦꠠꠣꠞ ꠍꠥꠞꠔꠦ ꠀꠄ, ꠅꠁꠟꠦ ꠜꠤꠔꠞꠦ ꠜꠤꠔꠞꠦ ꠔꠣꠞꠣ ꠞꠣꠁꠇ꠆ꠇꠡ ꠛꠣꠊꠞ ꠟꠣꠈꠣꠘ।
MAT 7:16 ꠔꠣꠞꠣꠞ ꠎꠤꠘ꠆ꠖꠦꠉꠤ ꠖꠦꠈꠤꠀꠃ ꠌꠤꠘꠔꠣꠄ ꠙꠣꠞꠛꠣꠄ। ꠎꠣꠘ ꠔ, ꠉꠍꠣ-ꠇꠣꠐꠣꠞ ꠝꠣꠎꠦ ꠇꠥꠘꠥ ꠀꠋꠉꠥꠞ ꠗꠞꠦ ꠘꠤ ꠛꠣ ꠛꠘ-ꠎꠋꠟꠣꠞ ꠝꠣꠎꠦ ꠇꠥꠘꠥ ꠒꠥꠝꠥꠞ ꠚꠟ ꠗꠞꠦ ꠘꠤ?
MAT 7:17 ꠑꠤꠇ ꠅꠃ ꠟꠣꠈꠣꠘ, ꠜꠣꠟꠣ ꠉꠣꠍꠦ ꠔ ꠜꠣꠟꠣ ꠚꠟꠃ ꠗꠞꠦ ꠀꠞ ꠝꠘ꠆ꠖ ꠉꠣꠍꠦ ꠝꠘ꠆ꠖ ꠚꠟꠃ ꠗꠞꠦ।
MAT 7:18 ꠜꠣꠟꠣ ꠉꠣꠍꠦ ꠔ ꠝꠘ꠆ꠖ ꠚꠟ ꠗꠞꠦ ꠘꠣ, ꠀꠞ ꠝꠘ꠆ꠖ ꠉꠣꠍꠦ ꠜꠣꠟꠣ ꠚꠟ ꠗꠞꠦ ꠘꠣ।
MAT 7:19 ꠎꠦ ꠉꠣꠍꠦ ꠜꠣꠟꠣ ꠚꠟ ꠗꠞꠦ ꠘꠣ, ꠁꠉꠥꠞꠦ ꠇꠣꠐꠤꠀ ꠖꠣꠞꠥ ꠎꠣꠟꠣꠁꠟ ꠅꠄ।
MAT 7:20 ꠅꠟꠣꠃ ꠜꠘ꠆ꠒ ꠘꠛꠤ ꠅꠇꠟꠞ ꠎꠤꠘ꠆ꠖꠦꠉꠤꠞ ꠚꠟ ꠖꠦꠈꠟꠦꠃ ꠁꠔꠣꠞꠦ ꠌꠤꠘꠛꠣꠄ।
MAT 7:21 “ꠝꠘꠅ ꠞꠣꠈꠤꠅ, ꠀꠝꠣꠞꠦ ‘ꠢꠥꠎꠥꠞ, ꠢꠥꠎꠥꠞ!’ ꠇꠁꠟꠦꠃ ꠎꠦꠘ ꠛꠦꠢꠦꠡ꠆ꠔꠤ ꠛꠣꠖꠡꠣꠁꠔ ꠢꠣꠝꠣꠁꠎꠤꠛꠣꠄ, ꠁꠈꠣꠘ ꠑꠤꠇ ꠘꠣꠄ। ꠛꠞꠋ ꠎꠦ ꠎꠘꠦ ꠀꠝꠣꠞ ꠛꠦꠢꠦꠡ꠆ꠔꠤ ꠛꠣꠚ ꠀꠟ꠆ꠟꠣ ꠙꠣꠇꠞ ꠝꠞ꠆ꠎꠤ ꠎꠥꠉꠣꠁꠀ ꠌꠟꠦ, ꠈꠣꠟꠤ ꠢꠦ-ꠃ ꠢꠣꠝꠣꠁꠔ ꠙꠣꠞꠛ।
MAT 7:22 ꠢꠃ ꠖꠤꠘ ꠀꠁꠟꠦ ꠛꠃꠔꠦ ꠇꠁꠛꠣ, ‘ꠝꠥꠘꠤꠛ, ꠝꠥꠘꠤꠛ, ꠀꠝꠞꠣ ꠔꠥꠝꠣꠞ ꠘꠣꠝꠦ ꠉꠣꠁꠛꠤ ꠈꠛꠞ ꠇꠁꠍꠤ ꠘꠣ ꠘꠤ? ꠔꠥꠝꠣꠞ ꠘꠣꠝꠦ ꠎꠤꠘ-ꠜꠥꠔ ꠍꠣꠠꠣꠁꠍꠤ ꠘꠣ ꠘꠤ? ꠔꠥꠝꠣꠞ ꠘꠣꠝꠦ ꠛꠃꠔ ꠇꠦꠞꠣꠝꠔꠤ ꠖꠦꠈꠣꠁꠍꠤ ꠘꠣ ꠘꠤ?’
MAT 7:23 ꠅꠁꠟꠦ ꠀꠝꠤ ꠔꠣꠞꠣꠞꠦ ꠎꠥꠀꠙ ꠖꠤꠝꠥ, ‘ꠗꠥꠞ, ꠁꠛꠟꠤꠍꠞ ꠖꠟ! ꠀꠝꠤ ꠔ ꠔꠥꠝꠞꠣꠞꠦ ꠌꠤꠘꠤꠃ ꠘꠣ, ꠀꠝꠣꠞ ꠉꠦꠍ ꠕꠣꠇꠤ ꠜꠣꠉꠅ।’
MAT 7:24 “ꠎꠦ ꠝꠣꠘꠡꠦ ꠀꠝꠣꠞ ꠅꠃ ꠔꠣꠟꠤꠝ ꠢꠥꠘꠤꠀ ꠀꠝꠟ ꠇꠞꠦ, ꠢꠦ ꠀꠈꠟꠖꠣꠞ ꠝꠣꠘꠡꠞ ꠟꠣꠈꠣꠘ ꠝꠎꠛꠥꠔ ꠈꠥꠐꠤꠞ ꠃꠙꠞꠦ ꠔꠣꠞ ꠊꠞ ꠛꠣꠘꠣꠄ।
MAT 7:25 ꠛꠣꠖꠦ ꠝꠦꠊ-ꠔꠥꠚꠣꠘ ꠀꠞ ꠎꠥꠀꠞ ꠀꠁꠀ ꠅꠃ ꠊꠞꠞꠦ ꠑꠦꠟꠣ ꠖꠤꠟꠦꠅ ꠚꠣꠟꠣꠁꠔ ꠙꠣꠞꠦ ꠘꠣ, ꠇꠣꠞꠘ ꠁꠈꠣꠘ ꠔ ꠝꠎꠛꠥꠔ ꠈꠥꠐꠤꠞ ꠃꠙꠞꠦ ꠛꠣꠘꠣꠁꠟ ꠅꠁꠍꠦ।
MAT 7:26 ꠅꠁꠟꠦ ꠎꠦ ꠀꠝꠣꠞ ꠔꠣꠟꠤꠝ ꠢꠥꠘꠤꠀꠅ ꠀꠝꠟ ꠇꠞꠦ ꠘꠣ, ꠢꠦ ꠛꠦꠀꠈꠟꠞ ꠟꠣꠈꠣꠘ ꠘꠞꠝ ꠝꠣꠐꠤꠞ ꠃꠙꠞꠦ ꠊꠞ ꠛꠣꠘꠣꠄ।
MAT 7:27 ꠛꠣꠖꠦ ꠎꠦꠛꠟꠣ ꠝꠦꠊ-ꠔꠥꠚꠣꠘ ꠀꠞ ꠎꠥꠀꠞ ꠀꠁꠀ ꠅꠃ ꠊꠞꠞꠦ ꠑꠦꠟꠣ ꠖꠦꠄ, ꠅꠃ ꠡꠝꠄ ꠁꠈꠣꠘ ꠙꠠꠤꠀ ꠌꠦꠙ꠆ꠐꠣ ꠅꠁꠎꠣꠄ।”
MAT 7:28 ꠁꠍꠣꠞ ꠁꠔꠣ ꠔꠣꠟꠤꠝ ꠢꠥꠘꠤꠀ ꠝꠣꠘꠥꠡ ꠔꠣꠁꠎ꠆ꠎꠥꠛ ꠛꠘꠤꠉꠦꠟꠣ।
MAT 7:29 ꠇꠣꠞꠘ ꠔꠣꠁꠘ ꠔ ꠔꠣꠞꠣꠞ ꠝꠃꠟꠣꠘꠣ ꠅꠇꠟꠞ ꠟꠣꠈꠣꠘ ꠔꠣꠟꠤꠝ ꠘꠣ ꠖꠤꠀ, ꠈꠦꠝꠔꠣꠛꠣꠘ ꠝꠣꠘꠡꠞ ꠟꠣꠈꠣꠘ ꠔꠣꠟꠤꠝ ꠖꠤꠔꠣ।
MAT 8:1 ꠢꠎꠞꠔ ꠁꠍꠣ ꠙꠣꠠ ꠕꠣꠇꠤ ꠟꠣꠝꠤꠀ ꠀꠁꠟꠦ ꠛꠃꠔ ꠝꠣꠘꠥꠡ ꠔꠣꠘ ꠈꠞꠦ ꠈꠞꠦ ꠀꠁꠟꠣ।
MAT 8:2 ꠅꠃ ꠡꠝꠄ ꠄꠇ ꠙꠌꠣ-ꠇꠥꠡ꠆ꠑ ꠛꠦꠝꠣꠞꠤꠄ ꠔꠣꠘ ꠇꠣꠘ꠆ꠖꠣꠔ ꠀꠁꠀ ꠙꠣꠅꠔ ꠙꠠꠤꠀ ꠇꠁꠟ, “ꠢꠥꠎꠥꠞ, ꠀꠙꠘꠣꠞ ꠝꠞ꠆ꠎꠤ ꠅꠁꠟꠦ ꠀꠝꠣꠞꠦ ꠅꠃ ꠘꠣꠙꠣꠇ ꠛꠦꠝꠣꠞ ꠕꠣꠇꠤ ꠜꠣꠟꠣ ꠇꠞꠔꠣ ꠙꠣꠞꠂꠘ।”
MAT 8:3 ꠔꠦꠃ ꠔꠣꠁꠘ ꠀꠔ ꠛꠣꠠꠣꠁꠀ ꠔꠣꠞꠦ ꠍꠁꠀ ꠇꠁꠟꠣ, “ꠅꠄ ꠀꠝꠤ ꠌꠣꠁꠞꠣꠝ, ꠔꠥꠝꠤ ꠙꠣꠇ-ꠍꠣꠚ ꠅꠅ।” ꠇꠅꠀꠞ ꠟꠉꠦ ꠟꠉꠦꠃ ꠔꠣꠞ ꠛꠦꠝꠣꠞ ꠡꠤꠚꠣ ꠅꠁꠉꠦꠟ।
MAT 8:4 ꠁꠍꠣꠄ ꠔꠣꠞꠦ ꠇꠁꠟꠣ, “ꠢꠥꠘꠅ, ꠁꠔꠣ ꠇꠦꠃꠞꠞꠦ ꠢꠥꠘꠣꠁꠅ ꠘꠣ, ꠈꠣꠟꠤ ꠁꠝꠣꠝ ꠍꠣꠛꠞ ꠉꠦꠍꠦ ꠉꠤꠀ ꠖꠦꠈꠣꠅ। ꠝꠥꠍꠣ ꠘꠛꠤꠞ ꠡꠞꠤꠅꠔ ꠝꠣꠚꠤꠇ ꠙꠣꠇ-ꠍꠣꠚ ꠅꠀꠞ ꠟꠣꠉꠤ ꠎꠦꠟꠣ ꠇꠥꠞꠛꠣꠘꠤ ꠇꠞꠣ ꠎꠞꠥꠞ, ꠅꠃ ꠇꠥꠞꠛꠣꠘꠤ ꠖꠤꠟꠦꠃ ꠡꠝꠣꠎꠦ ꠎꠣꠘꠤꠟꠤꠛꠣ ꠔꠥꠝꠤ ꠜꠣꠟꠣ ꠅꠁꠉꠦꠍ।”
MAT 8:5 ꠄꠞꠛꠣꠖꠦ ꠁꠍꠣ ꠉꠤꠀ ꠇꠚꠞꠘꠣꠃꠝ ꠐꠣꠃꠘꠅ ꠢꠣꠝꠣꠁꠟꠣ। ꠢꠤꠘꠅ ꠞꠥꠝꠣꠘ ꠍꠤꠙꠣꠁꠞ ꠄꠇ ꠍꠥꠛꠦꠖꠣꠞꠦ ꠔꠣꠘ ꠉꠦꠍꠦ ꠀꠁꠀ ꠝꠤꠘꠔ-ꠇꠣꠎ꠆ꠎꠤ ꠟꠣꠉꠣꠁꠟꠣ,
MAT 8:6 “ꠢꠥꠎꠥꠞ, ꠀꠝꠣꠞ ꠉꠥꠟꠣꠝꠞ ꠅꠛꠡ ꠛꠦꠝꠣꠞ ꠅꠁꠀ ꠛꠤꠍꠘꠣꠔ ꠙꠠꠤ ꠞꠁꠍꠦ, ꠢꠦ ꠈꠥꠛ ꠇꠡ꠆ꠐ ꠇꠞꠦꠞ।”
MAT 8:7 ꠁꠍꠣꠄ ꠄꠘꠞꠦ ꠇꠁꠟꠣ, “ꠀꠁꠌ꠆ꠍꠣ, ꠀꠝꠤ ꠎꠣꠁꠝꠥꠘꠦ, ꠉꠤꠀ ꠔꠣꠞꠦ ꠜꠣꠟꠣ ꠇꠞꠝꠥ।”
MAT 8:8 ꠔꠦꠃ ꠍꠥꠛꠦꠖꠣꠞꠦ ꠇꠁꠟꠣ, “ꠢꠥꠎꠥꠞ, ꠀꠙꠘꠣꠞ ꠝꠔ ꠎꠘꠦ ꠀꠝꠣꠞ ꠛꠣꠠꠤꠔ ꠔꠡꠞꠤꠚ ꠘꠤꠔꠣ, ꠀꠝꠤ ꠔ ꠄꠞ ꠟꠣꠈ ꠘꠣꠄ। ꠀꠙꠘꠦ ꠈꠣꠟꠤ ꠝꠥꠈ-ꠈꠣꠘꠖꠤ ꠇꠁꠟꠦꠃ ꠢꠦ ꠜꠣꠟꠣ ꠅꠁꠎꠤꠛ।
MAT 8:9 ꠀꠙꠘꠦ ꠔ ꠛꠥꠎꠞꠣ, ꠀꠝꠤꠅ ꠀꠝꠣꠞ ꠇꠣꠝꠣꠘ꠆ꠒꠣꠞꠞ ꠢꠥꠇꠥꠝꠦ ꠌꠟꠤ, ꠅꠃꠟꠣ ꠀꠝꠣꠞ ꠍꠤꠙꠣꠁ ꠅꠇꠟꠅ ꠀꠝꠣꠞ ꠢꠥꠇꠥꠝꠦ ꠌꠟꠂꠘ। ꠀꠝꠤ ꠄꠞꠣ ꠄꠇꠎꠘꠞꠦ ꠀꠅ ꠇꠁꠟꠦ ꠀꠄ, ꠎꠣꠅ ꠇꠁꠟꠦ ꠎꠣꠄ। ꠀꠝꠣꠞ ꠉꠥꠟꠣꠝꠞꠦ ꠎꠥꠖꠤ ꠇꠁ, ꠅꠈꠣꠘ ꠇꠞꠅ, ꠢꠦ ꠁꠈꠣꠘ ꠇꠞꠦ, ꠔꠦ ꠀꠙꠘꠦꠅ ꠅꠟꠣ ꠝꠥꠈꠖꠤ ꠢꠥꠇꠥꠝ ꠖꠤꠟꠦꠃ ꠢꠦ ꠜꠣꠟꠣ ꠅꠁꠎꠤꠛ।”
MAT 8:10 ꠁꠈꠣꠘ ꠢꠥꠘꠤꠀ ꠁꠍꠣ ꠄꠇ꠆ꠇꠦꠞꠦ ꠔꠣꠁꠎ꠆ꠎꠥꠛ ꠅꠁꠉꠦꠟꠣ, ꠔꠣꠘ ꠈꠞꠦ ꠅꠁꠀ ꠎꠔ ꠝꠣꠘꠥꠡ ꠀꠅꠀꠔ ꠀꠍꠤꠟ, ꠄꠞꠣꠞꠦ ꠇꠁꠟꠣ, “ꠀꠝꠤ ꠔꠥꠝꠞꠣꠞꠦ ꠢꠣꠍꠣꠃ ꠇꠁꠞꠣꠝ, ꠁ ꠍꠥꠛꠦꠖꠣꠞ ꠔ ꠛꠤꠗꠞ꠆ꠝꠤ ꠞꠥꠝꠣꠘ ꠝꠣꠘꠥꠡ, ꠅꠁꠟꠦ ꠀꠝꠣꠞ ꠛꠘꠤ ꠁꠍꠞꠣꠁꠟꠞ ꠝꠣꠎꠦꠅ ꠅꠔ ꠛꠠ ꠝꠎꠛꠥꠔ ꠁꠝꠣꠘꠖꠣꠞ ꠀꠝꠤ ꠀꠞ ꠖꠦꠈꠍꠤ ꠘꠣ।
MAT 8:11 ꠢꠥꠘꠅ, ꠙꠥꠛ ꠀꠞ ꠙꠁꠌꠝꠞ ꠖꠦꠡ ꠕꠣꠇꠤ ꠛꠃꠔ ꠎꠘ ꠀꠁꠛꠣ, ꠔꠣꠞꠣ ꠢꠎꠞꠔ ꠁꠛ꠆ꠞꠣꠢꠤꠝ, ꠁꠍꠢꠣꠇ ꠀꠞ ꠁꠀꠇꠥꠛ ꠘꠛꠤꠞ ꠟꠉꠦ ꠛꠦꠢꠦꠡ꠆ꠔꠤ ꠛꠣꠖꠡꠣꠁꠔ ꠈꠣꠘꠤꠔ ꠛꠁꠛꠣ।
MAT 8:12 ꠅꠁꠟꠦ ꠛꠦꠢꠦꠡ꠆ꠔꠤ ꠛꠣꠖꠡꠣꠁꠔ ꠎꠣꠞꠣ ꠕꠣꠇꠣꠞ ꠇꠕꠣ, ꠔꠣꠞꠣꠞꠦ ꠛꠣꠞꠦ ꠀꠘ꠆ꠖꠣꠁꠞ ꠉꠣꠔꠅ ꠚꠣꠟꠣꠁ ꠖꠦꠅꠀ ꠅꠁꠛ। ꠢꠤꠘꠅ ꠔꠣꠞꠣ ꠇꠣꠘ꠆ꠖꠣ-ꠇꠣꠐꠤ ꠇꠞꠛꠣ ꠀꠞ ꠎꠣꠟꠣ-ꠎꠘꠔ꠆ꠞꠘꠣꠄ ꠖꠣꠔ ꠇꠤꠠꠤꠝꠤꠠꠤ ꠈꠣꠁꠛꠣ।”
MAT 8:13 ꠛꠣꠖꠦ ꠁꠍꠣꠄ ꠅꠃ ꠍꠥꠛꠦꠖꠣꠞꠞꠦ ꠇꠁꠟꠣ, “ꠔꠥꠝꠤ ꠎꠣꠅꠉꠤ। ꠔꠥꠝꠤ ꠎꠦꠟꠣ ꠄꠇꠤꠘ ꠇꠞꠍ, ꠅꠟꠣꠃ ꠅꠃꠇ।” ꠢꠣꠍꠣꠃ, ꠟꠉꠦ ꠟꠉꠦꠃ ꠢꠃ ꠉꠥꠟꠣꠝ ꠜꠣꠟꠣ ꠅꠁꠉꠦꠟ।
MAT 8:14 ꠄꠞꠛꠣꠖꠦ ꠢꠎꠞꠔ ꠁꠍꠣ ꠢꠎꠞꠔ ꠙꠤꠔꠞꠞ ꠛꠣꠠꠤꠔ ꠉꠦꠟꠣ, ꠉꠤꠀ ꠖꠦꠈꠟꠣ, ꠙꠤꠔꠞꠞ ꠢꠠꠤꠞ ꠈꠥꠛ ꠔꠣꠙ ꠃꠑꠍꠦ, ꠔꠣꠁꠘ ꠛꠤꠍꠘꠣꠔ ꠙꠠꠘꠅ।
MAT 8:15 ꠔꠣꠘꠦ ꠖꠦꠈꠤꠀ ꠁꠍꠣꠄ ꠔꠣꠘ ꠀꠔꠅ ꠍꠁꠟꠣ, ꠀꠞ ꠟꠉꠦ ꠟꠉꠦ ꠔꠣꠙ ꠍꠣꠠꠤ ꠖꠤꠟ। ꠛꠦꠐꠤꠄ ꠃꠑꠤꠀ ꠁꠍꠣꠞ ꠝꠦꠝꠣꠘꠖꠣꠞꠤꠔ ꠟꠣꠉꠟꠣ।
MAT 8:16 ꠅꠃ ꠖꠤꠘ ꠢꠣꠁꠘ꠆ꠎꠣ ꠛꠣꠟꠣ ꠝꠣꠘꠡꠦ ꠎꠤꠘꠞ ꠀꠍꠞ ꠀꠟꠣ ꠛꠃꠔ ꠎꠘꠞꠦ ꠁꠍꠣꠞ ꠉꠦꠍꠦ ꠟꠁꠀ ꠀꠁꠟꠣ। ꠁꠍꠣꠄ ꠔꠣꠘ ꠝꠥꠈꠞ ꠇꠕꠣꠄꠃ ꠄꠞꠣꠞ ꠎꠤꠘ ꠍꠣꠠꠣꠁꠟꠣ, ꠀꠞ ꠢꠇ꠆ꠇꠟ ꠛꠦꠝꠣꠞꠤꠞꠦ ꠜꠣꠟꠣ ꠇꠞꠟꠣ।
MAT 8:17 ꠁꠔꠣ ꠊꠐꠟ, ꠎꠣꠔꠦ ꠁꠡꠣꠄꠀ ꠘꠛꠤꠞ ꠝꠣꠎꠖꠤ ꠛꠃꠔ ꠀꠉꠦ ꠎꠦꠔꠣ ꠛꠣꠔꠣꠁꠟ ꠅꠁꠍꠤꠟ, ꠅꠔꠣ ꠅꠈꠘ ꠙꠥꠞꠣ ꠅꠄ। ꠢꠘꠅ ꠛꠣꠔꠣꠁꠟ ꠅꠁꠍꠤꠟ, ꠀꠝꠞꠣꠞ ꠢꠇꠟ ꠇꠝꠎꠥꠞꠤ ꠔꠣꠘ ꠇꠣꠘ꠆ꠖꠅ ꠘꠤꠟꠣ, ꠀꠝꠞꠣꠞ ꠛꠦꠝꠣꠞ-ꠀꠎꠣꠞ ꠢꠞꠣꠁꠟꠣ।
MAT 8:18 ꠁꠍꠣꠞ ꠌꠣꠁꠞꠅ ꠉꠣꠟꠣꠛꠣꠄ ꠜꠤꠠ ꠟꠣꠉꠤꠉꠦꠍꠦ ꠖꠦꠈꠤꠀ, ꠔꠣꠘ ꠡꠣꠉꠞꠤꠖ ꠅꠇꠟꠞꠦ ꠢꠥꠇꠥꠝ ꠖꠤꠟꠣ ꠀꠅꠞꠞ ꠢꠙꠣꠞꠅ ꠎꠣꠁꠔꠣꠉꠤ।
MAT 8:19 ꠅꠃ ꠡꠝꠄ ꠄꠇꠎꠘ ꠝꠃꠟꠣꠘꠣ ꠀꠁꠀ ꠁꠍꠣꠞꠦ ꠇꠁꠟꠣ, “ꠢꠥꠎꠥꠞ, ꠀꠙꠘꠦ ꠎꠦꠘꠅ ꠎꠣꠁꠛꠣ, ꠀꠝꠤꠅ ꠢꠘꠅ ꠎꠣꠁꠝꠥ।”
MAT 8:20 ꠁꠍꠣꠄ ꠄꠘꠞꠦ ꠇꠁꠟꠣ, “ꠢꠥꠘꠃꠇ꠆ꠇꠣ, ꠢꠤꠀꠟꠞ ꠉꠣꠔ ꠀꠍꠦ, ꠙꠣꠈꠤꠞꠅ ꠛꠣꠖꠣ ꠀꠍꠦ, ꠅꠁꠟꠦ ꠀꠝꠤ ꠛꠤꠘ-ꠀꠖꠝꠞ ꠝꠣꠕꠣ ꠕꠅꠀꠞ ꠑꠣꠁ ꠘꠣꠁ।”
MAT 8:21 ꠀꠞꠇ ꠎꠘ ꠡꠣꠉꠞꠤꠖꠦ ꠀꠁꠀ ꠇꠁꠟꠣ, “ꠢꠥꠎꠥꠞ, ꠀꠝꠣꠞꠦ ꠛꠣꠠꠤꠔ ꠎꠣꠁꠔꠦ ꠖꠦꠃꠇ꠆ꠇꠣ, ꠀꠝꠤ ꠙꠄꠟꠣ ꠉꠤꠀ ꠀꠝꠣꠞ ꠛꠣꠛꠣꠞ ꠖꠣꠚꠘ-ꠇꠣꠚꠘ ꠇꠞꠤꠀ ꠀꠁ।”
MAT 8:22 ꠔꠣꠁꠘ ꠇꠁꠟꠣ, “ꠝꠞꠣ ꠅꠇꠟꠦꠃ ꠔꠣꠞꠣꠞ ꠝꠞꠣꠞꠦ ꠝꠣꠐꠤ ꠖꠦꠃꠇ, ꠔꠥꠝꠤ ꠀꠝꠣꠞ ꠟꠉꠦ ꠌꠟꠅ।”
MAT 8:23 ꠁꠍꠣ ꠀꠅꠞꠞ ꠢꠙꠣꠞꠅ ꠎꠣꠁꠔꠣ ꠇꠞꠤ, ꠔꠣꠘ ꠡꠣꠉꠞꠤꠖ ꠅꠇꠟꠞꠦ ꠟꠁꠀ ꠄꠇ ꠘꠣꠅꠅ ꠃꠑꠟꠣ।
MAT 8:24 ꠁꠍꠣ ꠘꠣꠅꠞ ꠝꠣꠎꠦ ꠊꠥꠝꠣꠁꠞꠣ, ꠅꠃ ꠡꠝꠄ ꠀꠈꠔꠣꠃ ꠀꠅꠞꠞ ꠝꠣꠎꠦ ꠛꠠ ꠄꠇ ꠔꠥꠚꠣꠘ ꠀꠁꠟ, ꠔꠥꠚꠣꠘꠦ ꠘꠣꠅꠈꠣꠘ ꠛꠥꠠꠤꠎꠤꠛꠣꠞ ꠖꠡꠣ ꠅꠁꠉꠦꠟ।
MAT 8:25 ꠁ ꠖꠡꠣ ꠖꠦꠈꠤꠀ ꠡꠣꠉꠞꠤꠖ ꠅꠇꠟꠦ ꠁꠍꠣꠞꠦ ꠢꠎꠣꠉ ꠇꠞꠤ ꠇꠁꠟꠣ, “ꠢꠥꠎꠥꠞ, ꠀꠝꠞꠣꠞꠦ ꠛꠣꠌꠣꠃꠇ꠆ꠇꠣ, ꠀꠝꠞꠣꠘꠥ ꠝꠞꠤ ꠎꠣꠁꠞꠣꠝ।”
MAT 8:26 ꠁꠍꠣꠄ ꠎꠥꠀꠙ ꠖꠤꠟꠣ, “ꠅ ꠇꠝꠎꠥꠞ ꠁꠝꠣꠘꠖꠣꠞ ꠅꠇꠟ, ꠔꠥꠝꠞꠣ ꠒꠞꠣꠁꠞꠣꠄ ꠇꠦꠘꠦ?” ꠅꠈꠣꠘ ꠇꠁꠀ ꠔꠣꠁꠘ ꠃꠑꠤꠀ ꠔꠥꠚꠣꠘ ꠀꠞ ꠀꠅꠞꠞꠦ ꠗꠝꠇ ꠖꠤꠟꠣ, ꠔꠦꠃ ꠢꠇ꠆ꠇꠟꠔꠣ ꠕꠤꠞ ꠅꠁꠉꠦꠟ।
MAT 8:27 ꠁ ꠇꠦꠞꠣꠝꠔꠤ ꠖꠦꠈꠤꠀ ꠔꠣꠞꠣ ꠔꠣꠁꠎ꠆ꠎꠥꠛ ꠅꠁꠀ ꠇꠁꠟꠣ, “ꠄꠁꠘ ꠀꠍꠟꠦ ꠇꠦ? ꠔꠥꠚꠣꠘ ꠀꠞ ꠀꠅꠞꠦꠅ ꠖꠦꠈꠤ ꠔꠣꠘ ꠢꠥꠇꠥꠝ ꠝꠣꠘꠦ!”
MAT 8:28 ꠄꠞꠛꠣꠖꠦ ꠁꠍꠣ ꠀꠅꠞ ꠙꠣꠠꠤ ꠖꠤꠀ ꠎꠦꠞꠣꠍꠤꠘꠤ ꠅꠇꠟꠞ ꠖꠦꠡꠅ ꠀꠁꠟꠣ। ꠅꠃ ꠡꠝꠄ ꠜꠥꠔꠦ ꠗꠞꠣ ꠖꠥꠁꠎꠘ ꠝꠣꠘꠥꠡ ꠇꠛꠞꠡ꠆ꠕꠣꠘ ꠕꠣꠇꠤ ꠛꠣꠞ ꠅꠁꠀ ꠔꠣꠘ ꠉꠦꠍꠦ ꠀꠁꠟ। ꠔꠣꠞꠣ ꠅꠟꠣ ꠎꠘꠥꠘ ꠙꠣꠉꠟ ꠀꠍꠟꠣ ꠎꠦꠘ, ꠔꠣꠞꠣꠞꠦ ꠒꠞꠣꠁꠀ ꠇꠦꠃ ꠅꠃ ꠙꠕꠦꠖꠤ ꠎꠣꠁꠔ ꠙꠣꠞꠔ ꠘꠣ।
MAT 8:29 ꠔꠣꠞꠣ ꠌꠤꠟ꠆ꠟꠣꠁꠀ ꠁꠍꠣꠞꠦ ꠇꠁꠟ, “ꠅ ꠀꠟ꠆ꠟꠣꠞ ꠈꠣꠍ ꠝꠣꠄꠀꠞ ꠎꠘ ꠁꠛꠘꠥꠟ꠆ꠟꠣ, ꠀꠝꠞꠣꠞ ꠟꠉꠦ ꠀꠙꠘꠣꠞ ꠇꠤꠔꠣ ꠖꠞꠇꠣꠞ? ꠡꠝꠄ ꠅꠀꠞ ꠀꠉꠦꠃ ꠀꠙꠘꠦ ꠀꠝꠞꠣꠞꠦ ꠍꠣꠔꠣꠘꠤꠔ ꠀꠁꠌ꠆ꠍꠂꠘ ꠘꠤ?”
MAT 8:30 ꠅꠃ ꠡꠝꠄ ꠔꠣꠞꠣꠞ ꠉꠦꠍ ꠕꠣꠇꠤ ꠕꠥꠠꠣ ꠖꠥꠞꠁ ꠛꠠ ꠄꠇ ꠡꠥꠅꠞꠞ ꠙꠣꠟꠦ ꠈꠣꠅꠀꠔ ꠀꠍꠟꠣ।
MAT 8:31 ꠜꠥꠔ ꠅꠇꠟꠦ ꠁꠍꠣꠞꠦ ꠝꠤꠘꠔ ꠇꠞꠤ ꠇꠁꠟ, “ꠀꠙꠘꠦ ꠀꠝꠞꠣꠞꠦ ꠈꠦꠖꠣꠁꠔꠦ ꠌꠣꠁꠟꠦ, ꠅꠃ ꠡꠥꠅꠞꠞ ꠙꠣꠟꠞ ꠝꠣꠎꠦ ꠙꠣꠑꠣꠁ ꠖꠦꠃꠇ꠆ꠇꠣ।”
MAT 8:32 ꠁꠍꠣꠄ ꠔꠣꠞꠣꠞꠦ ꠁꠎꠣꠎꠔ ꠖꠤꠀ ꠢꠣꠞꠟꠦ ꠔꠣꠞꠣ ꠉꠤꠀ ꠅꠃ ꠡꠥꠅꠞꠞ ꠙꠣꠟꠞ ꠝꠣꠎꠦ ꠢꠣꠝꠣꠁꠉꠦꠟ। ꠀꠞ ꠡꠥꠅꠞꠞ ꠙꠣꠟꠦ ꠀꠅꠞꠞ ꠈꠣꠠꠣ ꠌꠞꠦꠖꠤ ꠈꠥꠛ ꠎꠥꠞꠦ ꠖꠃꠠꠣꠁꠀ ꠉꠤꠀ ꠙꠣꠘꠤꠞ ꠝꠣꠎꠦ ꠛꠥꠠꠤꠀ ꠝꠞꠟꠣ।
MAT 8:33 ꠁꠔꠣ ꠖꠦꠈꠤꠀ ꠡꠥꠅꠞꠞ ꠞꠣꠈꠣꠟ ꠅꠇꠟꠦ ꠖꠃꠠꠣꠁꠀ ꠉꠤꠀ ꠉꠣꠃꠞ ꠢꠇꠟ ꠝꠣꠘꠡꠞꠦ ꠈꠛꠞ ꠎꠣꠘꠣꠁꠟꠣ, ꠄꠞꠟꠉꠦ ꠅꠃ ꠜꠥꠔꠦ ꠗꠞꠣ ꠝꠣꠘꠡꠞ ꠇꠕꠣꠅ ꠇꠁꠟꠣ।
MAT 8:34 ꠁ ꠊꠐꠘꠣ ꠢꠥꠘꠤꠀ ꠉꠣꠃꠞ ꠢꠇꠟ ꠝꠣꠘꠥꠡ ꠁꠍꠣꠞ ꠟꠉꠦ ꠖꠦꠈꠣ ꠇꠞꠣꠔ ꠀꠁꠟꠣ। ꠔꠣꠘ ꠟꠉꠦ ꠖꠦꠈꠣ ꠇꠞꠤꠀ ꠔꠣꠞꠣ ꠝꠤꠘꠔ ꠇꠞꠤ ꠇꠁꠟꠣ, “ꠝꠦꠢꠦꠞꠛꠣꠘꠤ ꠇꠞꠤ ꠀꠝꠞꠣꠞ ꠖꠦꠡ ꠕꠣꠇꠤ ꠎꠣꠃꠇ꠆ꠇꠣꠉꠤ।”
MAT 9:1 ꠛꠣꠖꠦ ꠢꠎꠞꠔ ꠁꠍꠣ ꠘꠣꠅꠅ ꠇꠞꠤ ꠀꠅꠞ ꠙꠣꠠꠤ ꠖꠤꠀ ꠘꠤꠎꠞ ꠐꠣꠃꠘꠅ ꠀꠁꠟꠣ।
MAT 9:2 ꠀꠁꠀ ꠢꠣꠞꠟꠦ ꠇꠄꠎꠘ ꠝꠣꠘꠡꠦ ꠄꠇꠎꠘ ꠅꠛꠡ ꠛꠦꠝꠣꠞꠤꠞꠦ ꠙꠟꠅꠖꠤ ꠛꠁꠀ ꠟꠁꠀ ꠔꠣꠘ ꠉꠦꠍꠦ ꠀꠁꠟ। ꠔꠣꠞꠣꠞ ꠁꠝꠣꠘꠞ ꠛꠟ ꠖꠦꠈꠤꠀ ꠁꠍꠣꠄ ꠅꠃ ꠛꠦꠝꠣꠞꠤꠞꠦ ꠇꠁꠟꠣ, “ꠝꠘꠅ ꠛꠟ ꠞꠣꠈꠅ ꠞꠦ ꠙꠥꠔ, ꠔꠥꠝꠣꠞ ꠉꠥꠘꠣ ꠝꠣꠚ ꠇꠞꠣ ꠅꠁꠍꠦ।”
MAT 9:3 ꠁꠈꠣꠘ ꠢꠥꠘꠤꠀ ꠇꠄꠎꠘ ꠝꠃꠟꠣꠘꠣꠄ ꠝꠘꠦ ꠝꠘꠦ ꠇꠁꠟꠣ, “ꠁ ꠛꠦꠐꠣꠄ ꠔ ꠡꠤꠞꠤꠇꠤ ꠇꠞꠦꠞ।”
MAT 9:4 ꠁꠍꠣꠄ ꠔꠣꠞꠣꠞ ꠖꠤꠟꠞ ꠜꠣꠛ ꠛꠥꠎꠤꠀ ꠇꠁꠟꠣ, “ꠀꠙꠘꠣꠞꠣ ꠇꠦꠘꠦ ꠁꠟꠣ ꠇꠥ-ꠌꠤꠘ꠆ꠔꠣ ꠇꠞꠞꠣ?
MAT 9:5 ꠀꠝꠣꠞ ꠟꠣꠉꠤ ꠇꠥꠘꠈꠣꠘ ꠇꠅꠀ ꠡꠥꠎꠣ, ꠔꠥꠝꠣꠞ ꠉꠥꠘꠣ ꠝꠣꠚ ꠇꠞꠤ ꠖꠤꠟꠣꠁꠟꠣꠝ, ꠘꠣ ꠃꠑꠅ, ꠔꠥꠝꠣꠞ ꠛꠤꠍꠘꠣ ꠟꠁꠀ ꠛꠣꠠꠤꠔ ꠎꠣꠅꠉꠤ?
MAT 9:6 ꠔꠦ ꠅꠈꠘ ꠀꠙꠘꠣꠞꠣ ꠙꠞꠝꠣꠘ ꠖꠦꠈꠃꠇ꠆ꠇꠣ, ꠁ ꠖꠥꠘꠤꠀꠔ ꠉꠥꠘꠣ ꠝꠣꠚꠤꠞ ꠈꠦꠝꠔꠣ ꠀꠝꠤ ꠛꠤꠘ-ꠀꠖꠝꠞ ꠀꠍꠦ।” ꠅꠈꠣꠘ ꠇꠁꠀꠃ ꠔꠣꠁꠘ ꠛꠦꠝꠣꠞꠤ ꠛꠦꠐꠣꠞꠦ ꠇꠁꠟꠣ, “ꠅꠛꠣ ꠃꠑꠅ, ꠔꠥꠝꠣꠞ ꠈꠦꠔꠣ-ꠛꠣꠟꠤꠡ ꠟꠁꠀ ꠛꠣꠠꠤꠔ ꠎꠣꠅꠉꠤ।”
MAT 9:7 ꠇꠁꠔꠦꠃ ꠢꠤ ꠛꠦꠝꠣꠞꠤ ꠛꠦꠐꠣ ꠃꠑꠤꠀ ꠔꠣꠞ ꠛꠣꠠꠤꠔ ꠉꠦꠟꠉꠤ।
MAT 9:8 ꠁꠔꠣ ꠖꠦꠈꠤꠀ ꠝꠣꠘꠥꠡ ꠔꠣꠁꠎ꠆ꠎꠥꠛ ꠅꠁꠉꠦꠟꠣ, ꠀꠟ꠆ꠟꠣꠄ ꠝꠣꠘꠡꠞꠦ ꠅꠔ ꠈꠦꠝꠔꠣ ꠖꠤꠍꠂꠘ ꠇꠞꠤ ꠔꠣꠞꠣ ꠀꠟ꠆ꠟꠣꠞ ꠔꠣꠞꠤꠚ ꠇꠞꠟꠣ।
MAT 9:9 ꠁꠍꠣꠄ ꠙꠕꠦꠖꠤ ꠀꠐꠤꠀ ꠎꠣꠁꠞꠣ, ꠅꠃ ꠡꠝꠄ ꠖꠦꠈꠟꠣ, ꠝꠕꠤ ꠘꠣꠝꠞ ꠄꠇꠎꠘ ꠝꠣꠘꠥꠡ ꠈꠣꠎꠘꠣ ꠔꠥꠟꠣꠞ ꠅꠚꠤꠡꠅ ꠛꠁꠞꠁꠍꠂꠘ। ꠖꠦꠈꠤꠀ ꠔꠣꠘꠞꠦ ꠇꠁꠟꠣ, “ꠀꠅ, ꠀꠝꠣꠞ ꠃꠝ꠆ꠝꠔ ꠅꠅ।” ꠔꠦꠃ ꠝꠕꠤ ꠃꠑꠤꠀ ꠁꠍꠣꠞ ꠈꠞꠦ ꠈꠞꠦ ꠉꠦꠟꠣ।
MAT 9:10 ꠄꠞꠛꠣꠖꠦ ꠁꠍꠣꠄ ꠔꠣꠘ ꠡꠣꠉꠞꠤꠖ ꠅꠇꠟꠞꠦ ꠟꠁꠀ ꠝꠕꠤꠞ ꠛꠣꠠꠤꠔ ꠉꠤꠀ ꠈꠣꠅꠀꠔ ꠛꠁꠟꠣ। ꠔꠣꠘ ꠟꠉꠦ ꠛꠃꠔ ꠈꠣꠎꠘꠣ ꠔꠥꠟꠞꠣ ꠀꠞ ꠘꠣꠚꠞꠝꠣꠘ ꠅꠇꠟꠅ ꠈꠣꠘꠤꠔ ꠀꠍꠟꠣ।
MAT 9:11 ꠁꠔꠣ ꠖꠦꠈꠤꠀ ꠚꠞꠤꠡꠤ ꠝꠎꠛꠞ ꠝꠣꠘꠡꠦ ꠁꠍꠣꠞ ꠡꠣꠉꠞꠤꠖ ꠅꠇꠟꠞꠦ ꠇꠁꠟꠣ, “ꠔꠥꠝꠞꠣꠞ ꠝꠥꠞꠡꠤꠖꠦ ꠊꠥꠡꠈꠥꠞ ꠈꠣꠎꠘꠣ ꠔꠥꠟꠞꠣ ꠀꠞ ꠈꠛꠤꠍ ꠅꠇꠟꠞ ꠟꠉꠦ ꠈꠣꠅꠀ-ꠖꠣꠅꠀ ꠇꠞꠂꠘ ꠇꠦꠘꠦ?”
MAT 9:12 ꠁꠈꠣꠘ ꠢꠥꠘꠤꠀ ꠁꠍꠣꠄ ꠇꠁꠟꠣ, “ꠜꠣꠟꠣ ꠝꠣꠘꠡꠞ ꠟꠣꠉꠤ ꠇꠛꠤꠞꠣꠎ ꠟꠣꠉꠦ ꠘꠣ, ꠅꠁꠟꠦ ꠛꠦꠝꠣꠞꠤꠞ ꠟꠣꠉꠤ ꠔ ꠟꠣꠉꠦ।
MAT 9:13 ꠀꠟ꠆ꠟꠣꠞ ꠇꠣꠟꠣꠝꠅ ꠛꠣꠔꠣꠁꠟ ꠅꠁꠍꠦ, ‘ꠀꠝꠤ ꠇꠥꠘꠥ ꠙꠡꠥ ꠇꠥꠞꠛꠣꠘꠤ ꠘꠣꠄ, ꠈꠣꠟꠤ ꠖꠄꠀ ꠖꠦꠈꠔꠣꠝ ꠌꠣꠁ।’ ꠔꠦ ꠅꠃ ꠀꠄꠀꠔꠞ ꠝꠣꠘꠤ ꠇꠤꠔꠣ, ꠅꠈꠣꠘ ꠔꠣꠟ꠆ꠟꠣꠡ ꠇꠞꠃꠇ꠆ꠇꠣ। ꠝꠘꠅ ꠞꠣꠈꠛꠣ, ꠀꠝꠤ ꠇꠥꠘꠥ ꠙꠞꠦꠎꠉꠣꠞꠞꠦ ꠖꠣꠅꠔ ꠖꠦꠅꠀꠔ ꠀꠁꠍꠤ ꠘꠣ, ꠈꠣꠟꠤ ꠉꠥꠘꠣꠉꠣꠞ ꠅꠇꠟꠞꠦꠃ ꠖꠣꠅꠔ ꠖꠤꠔꠣꠝ ꠀꠁꠍꠤ।”
MAT 9:14 ꠄꠞꠛꠣꠖꠦ ꠄꠢꠤꠀ ꠘꠛꠤꠞ ꠃꠝ꠆ꠝꠔ ꠅꠇꠟꠦ ꠀꠁꠀ ꠁꠍꠣꠞꠦ ꠎꠤꠇꠣꠁꠟꠣ, “ꠢꠥꠎꠥꠞ, ꠀꠝꠞꠣ ꠀꠞ ꠚꠞꠤꠡꠤ ꠝꠎꠛꠞ ꠝꠣꠘꠡꠦ ꠢꠣꠝꠦꠡꠣ ꠞꠥꠎꠣ ꠞꠣꠈꠤ, ꠅꠁꠟꠦ ꠀꠙꠘꠣꠞ ꠃꠝ꠆ꠝꠔ ꠅꠇꠟꠦ ꠞꠥꠎꠣ ꠞꠣꠈꠂꠘ ꠘꠣ ꠇꠦꠘꠦ?”
MAT 9:15 ꠔꠣꠁꠘ ꠎꠥꠀꠙ ꠖꠤꠟꠣ, “ꠘꠡꠣ ꠟꠉꠦ ꠕꠣꠇꠟꠦ ꠟꠉꠞ ꠛꠂꠞꠣꠔꠤꠞꠦ ꠇꠥꠘꠥ ꠖꠥꠈ ꠖꠦꠅꠀ ꠎꠣꠄ ꠘꠤ? ꠖꠦꠈꠛꠣꠘꠦ, ꠁꠟꠣ ꠡꠝꠄ ꠀꠁꠛ, ꠎꠦꠛꠟꠣ ꠘꠡꠣꠞꠦ ꠔꠣꠞꠣꠞ ꠉꠦꠍ ꠕꠣꠇꠤ ꠢꠞꠣꠁꠟ ꠅꠁꠎꠤꠛ, ꠢꠃ ꠡꠝꠄ ꠔꠣꠞꠣ ꠞꠥꠎꠣ ꠞꠣꠈꠛꠣ।
MAT 9:16 “ꠀꠘꠣ-ꠗꠅꠀ ꠘꠄꠀ ꠇꠣꠙꠠꠞ ꠐꠥꠇꠞꠣꠖꠤ ꠇꠦꠃ ꠙꠥꠞꠣꠘ ꠇꠥꠞ꠆ꠔꠣꠔ ꠔꠣꠟꠤ ꠖꠦꠄ ꠘꠣ। ꠁꠟꠣ ꠇꠞꠟꠦ ꠗꠁꠀ ꠢꠣꠞꠟꠦ ꠙꠥꠞꠣꠘ ꠇꠣꠙꠠ ꠕꠣꠇꠤ ꠘꠄꠀ ꠔꠣꠟꠤ ꠈꠥꠍ ꠅꠁꠀ ꠍꠤꠠꠤꠎꠣꠄ, ꠀꠞ ꠍꠤꠠꠣꠈꠣꠘ ꠀꠞꠅ ꠛꠠ ꠅꠄ।
MAT 9:17 ꠙꠥꠞꠣꠘ ꠌꠣꠝꠠꠣꠞ ꠕꠟꠤꠔ ꠇꠦꠃ ꠘꠄꠀ ꠀꠋꠉꠥꠞꠞ ꠞꠡ ꠜꠞꠦ ꠘꠣ। ꠜꠞꠟꠦ ꠅꠃ ꠔꠣꠎꠣ ꠞꠡꠞ ꠚꠣꠚꠦ ꠕꠟꠤ ꠚꠣꠐꠤꠀ ꠞꠡ ꠀꠞ ꠕꠟꠤ ꠖꠥꠁꠅꠔꠣ ꠛꠞꠛꠣꠖ ꠅꠄ। ꠄꠞꠟꠣꠉꠤ ꠝꠣꠘꠡꠦ ꠔꠣꠎꠣ ꠞꠡ ꠘꠄꠀ ꠕꠟꠤꠔ ꠕꠂꠘ। ꠔꠦꠃ ꠖꠥꠁꠅꠔꠣ ꠛꠣꠌꠦ।”
MAT 9:18 ꠢꠎꠞꠔ ꠁꠍꠣꠄ ꠎꠦꠛꠟꠣ ꠅꠔꠣ ꠛꠦꠙꠣꠞꠦ ꠔꠣꠟꠤꠝ ꠖꠤꠞꠣ, ꠅꠃ ꠡꠝꠄ ꠄꠇ ꠘꠦꠔꠣ ꠀꠁꠀ ꠔꠣꠘ ꠙꠣꠅ-ꠅ ꠙꠠꠤꠀ ꠇꠁꠟꠣ, “ꠢꠥꠎꠥꠞ, ꠀꠝꠣꠞ ꠙꠥꠠꠤꠉꠥ ꠅꠃ ꠝꠣꠔ꠆ꠞ ꠝꠣꠞꠣ ꠉꠦꠍꠦ। ꠔꠦ ꠀꠙꠘꠦ ꠀꠁꠀ ꠝꠦꠢꠦꠞꠛꠣꠘꠤ ꠇꠞꠤ ꠔꠣꠁꠞꠦ ꠀꠔꠣꠁ ꠖꠤꠟꠦꠃ ꠙꠥꠠꠤꠉꠥ ꠎꠤꠘ꠆ꠖꠣ ꠅꠁꠎꠤꠛ।”
MAT 9:19 ꠔꠦꠃ ꠁꠍꠣꠄ ꠔꠣꠘ ꠡꠣꠉꠞꠤꠖ ꠅꠇꠟꠞꠦ ꠟꠁꠀ ꠄꠘ ꠟꠉꠦ ꠞꠅꠀꠘꠣ ꠖꠤꠟꠣ।
MAT 9:20 ꠎꠣꠅꠀꠞ ꠙꠕꠦ ꠄꠇ ꠛꠦꠐꠤꠄ ꠈꠞꠦꠖꠤ ꠀꠁꠀ ꠁꠍꠣꠞ ꠌꠣꠖ꠆ꠖꠞꠞ ꠇꠥꠘꠣꠔ ꠍꠁꠟ। ꠛꠣꠞꠅ ꠛꠍꠞ ꠗꠞꠤ ꠁ ꠛꠦꠐꠤꠞ ꠛꠦꠐꠤꠀꠞꠣ ꠛꠦꠝꠣꠞꠞ ꠟꠃ ꠎꠣꠁꠔ।
MAT 9:21 ꠛꠦꠐꠤꠞ ꠄꠇꠤꠘ ꠀꠍꠤꠟ, ꠔꠣꠁ ꠎꠥꠖꠤ ꠈꠣꠟꠤ ꠔꠣꠘ ꠌꠣꠖ꠆ꠖꠞꠞ ꠇꠥꠘꠣꠔ ꠍꠁꠟꠤꠔ ꠙꠣꠞꠦ, ꠔꠦ ꠛꠦꠝꠣꠞ ꠜꠣꠟꠣ ꠅꠁꠎꠤꠛ।
MAT 9:22 ꠁꠍꠣꠄ ꠐꠦꠞ ꠙꠣꠁꠀ ꠈꠞꠦꠖꠤ ꠌꠣꠁꠀ ꠅꠃ ꠛꠦꠐꠤꠞꠦ ꠇꠁꠟꠣ, “ꠒꠞꠣꠁꠅ ꠘꠣ ꠉ ꠝꠣꠁ, ꠔꠥꠝꠣꠞ ꠁꠝꠣꠘꠞ ꠛꠟꠦꠃ ꠔꠥꠝꠤ ꠜꠣꠟꠣ ꠅꠁꠟꠣꠄ।” ꠅꠈꠣꠘ ꠇꠅꠀꠞ ꠟꠉꠦ ꠟꠉꠦ ꠛꠦꠐꠤ ꠜꠣꠟꠣ ꠅꠁꠉꠦꠟ।
MAT 9:23 ꠄꠞꠛꠣꠖꠦ ꠁꠍꠣ ꠢꠃ ꠘꠦꠔꠣꠞ ꠛꠣꠠꠤꠔ ꠉꠦꠟꠣ। ꠉꠤꠀ ꠖꠦꠈꠟꠣ, ꠀꠡ꠆ꠔꠣ ꠛꠣꠠꠤꠞ ꠝꠣꠘꠡꠦ ꠢꠂ-ꠢꠥꠟ꠆ꠟꠣ ꠇꠞꠞꠣ, ꠀꠞ ꠔꠣꠞꠣꠞ ꠡꠝꠣꠎꠞ ꠞꠦꠅꠀꠎ ꠝꠣꠚꠤꠇ ꠝꠞꠣ ꠛꠣꠠꠤꠔ ꠛꠣꠡꠤ-ꠛꠣꠎꠘꠣ ꠛꠣꠎꠣꠁꠞꠣ।
MAT 9:24 ꠔꠣꠁꠘ ꠇꠁꠟꠣ, “ꠔꠥꠝꠞꠣ ꠢꠇꠟ ꠊꠞ ꠕꠣꠇꠤ ꠛꠣꠞꠦ ꠎꠣꠅ। ꠙꠥꠠꠤꠉꠥ ꠝꠞꠍꠦ ꠘꠣ, ꠔꠣꠁ ꠔ ꠊꠥꠝꠣꠞ।” ꠁꠈꠣꠘ ꠢꠥꠘꠤꠀ ꠝꠣꠘꠡꠦ ꠔꠣꠘꠞꠦ ꠟꠁꠀ ꠀꠡꠣ-ꠀꠡꠤ ꠟꠣꠉꠣꠁꠟꠣ।
MAT 9:25 ꠝꠣꠘꠡꠞꠦ ꠛꠣꠞ ꠇꠞꠤꠀ ꠢꠣꠞꠟꠦ, ꠔꠣꠁꠘ ꠉꠤꠀ ꠊꠞꠞ ꠜꠤꠔꠞꠦ ꠢꠣꠝꠣꠁꠀ ꠙꠥꠠꠤꠞ ꠀꠔꠅ ꠗꠞꠟꠣ, ꠗꠞꠔꠦꠃ ꠔꠣꠁ ꠃꠑꠤꠀ ꠛꠁꠉꠦꠟ।
MAT 9:26 ꠀꠞ ꠁ ꠊꠐꠘꠣꠞ ꠇꠕꠣ ꠅꠃ ꠄꠟꠣꠇꠣꠞ ꠢꠇꠟꠛꠣꠄ ꠞꠐꠤꠉꠦꠟ।
MAT 9:27 ꠁꠍꠣ ꠅꠃ ꠘꠦꠔꠣꠞ ꠛꠣꠠꠤ ꠕꠣꠇꠤ ꠛꠤꠖꠣꠄ ꠅꠁꠀ ꠢꠣꠞꠟꠦ ꠖꠥꠁꠎꠘ ꠀꠘ꠆ꠖꠣ ꠛꠦꠐꠣ ꠔꠣꠘ ꠈꠞꠦ ꠈꠞꠦ ꠉꠦꠟ। ꠔꠣꠞꠣ ꠎꠥꠞꠦ ꠎꠥꠞꠦ ꠇꠁꠟ, “ꠅ ꠖꠣꠃꠖꠞ ꠀꠅꠟꠣꠖ, ꠀꠝꠞꠣꠞꠦ ꠞꠢꠝ ꠇꠞꠃꠇ꠆ꠇꠣ।”
MAT 9:28 ꠛꠣꠖꠦ ꠔꠣꠁꠘ ꠀꠁꠀ ꠊꠞꠅ ꠢꠣꠝꠣꠁꠟꠦ, ꠢꠃ ꠖꠥꠁꠅ ꠀꠘ꠆ꠖꠣꠅ ꠔꠣꠘ ꠉꠦꠍꠦ ꠀꠁꠟ। ꠔꠣꠁꠘ ꠎꠤꠇꠣꠁꠟꠣ, “ꠔꠥꠝꠞꠣ ꠄꠇꠤꠘ ꠇꠞꠞꠣꠄ ꠘꠤ, ꠀꠝꠤ ꠔꠥꠝꠞꠣꠞꠦ ꠜꠣꠟꠣ ꠇꠞꠔꠣꠝ ꠙꠣꠞꠝꠥ?” ꠔꠣꠞꠣ ꠇꠁꠟ, “ꠎꠤꠅꠄ ꠢꠥꠎꠥꠞ, ꠀꠙꠘꠦꠃ ꠙꠣꠞꠛꠣ।”
MAT 9:29 ꠔꠦꠃ ꠔꠣꠁꠘ ꠄꠞꠣꠞ ꠌꠃꠈ ꠀꠔꠣꠁ ꠖꠤꠀ ꠇꠁꠟꠣ, “ꠔꠥꠝꠞꠣ ꠎꠦꠟꠣ ꠄꠇꠤꠘ ꠇꠞꠍ, ꠅꠟꠣꠃ ꠅꠃꠇ।”
MAT 9:30 ꠅꠈꠣꠘ ꠇꠁꠔꠦꠃ ꠔꠣꠞꠣꠞ ꠌꠃꠈ ꠜꠣꠟꠣ ꠅꠁꠉꠦꠟ। ꠛꠣꠖꠦ ꠁꠍꠣꠄ ꠔꠣꠞꠣꠞꠦ ꠈꠥꠛ ꠖꠠꠣꠁꠀ ꠇꠁꠟꠣ, “ꠢꠥꠘꠅ, ꠁꠔꠣ ꠇꠦꠃꠞꠞꠦ ꠢꠥꠘꠣꠁꠅ ꠘꠣ।”
MAT 9:31 ꠅꠁꠟꠦ ꠔꠣꠞꠣ ꠛꠣꠞ ꠅꠁꠀ ꠉꠤꠀ ꠀꠡ-ꠙꠣꠡ ꠢꠇꠟ ꠎꠣꠉꠣꠔ ꠔꠣꠘ ꠁ ꠈꠛꠞ ꠞꠐꠣꠁ ꠖꠤꠟ।
MAT 9:32 ꠢꠃ ꠖꠥꠁꠅ ꠀꠘ꠆ꠖꠣ ꠎꠦꠛꠟꠣ ꠜꠣꠟꠣ ꠅꠁꠀ ꠎꠣꠁꠞꠣꠉꠤ, ꠅꠃ ꠡꠝꠄ ꠝꠣꠘꠡꠦ ꠜꠥꠔꠦ ꠗꠞꠣ ꠄꠇ ꠛꠥꠛꠣ ꠛꠦꠐꠣꠞꠦ ꠁꠍꠣꠞ ꠉꠦꠍꠦ ꠟꠁꠀ ꠀꠁꠟ।
MAT 9:33 ꠔꠣꠁꠘ ꠁ ꠛꠦꠐꠣꠞ ꠜꠥꠔ ꠍꠣꠠꠣꠘꠤꠞ ꠛꠣꠖꠦ ꠔꠣꠞ ꠎꠛꠣꠘ ꠈꠥꠟꠤꠉꠦꠟ, ꠢꠦ ꠝꠣꠔ-ꠇꠕꠣ ꠝꠣꠔꠤꠟ। ꠁꠔꠣ ꠖꠦꠈꠤꠀ ꠢꠇꠟꠦ ꠔꠣꠁꠎ꠆ꠎꠥꠛ ꠅꠁꠀ ꠇꠁꠟꠣ, “ꠀꠡ꠆ꠔꠣ ꠁꠍꠞꠣꠁꠟ ꠖꠦꠡꠞ ꠝꠣꠎꠦ ꠁꠟꠣ ꠇꠣꠝ ꠔ ꠇꠥꠘꠥꠖꠤꠘ ꠖꠦꠈꠍꠤ ꠘꠣ।”
MAT 9:34 ꠅꠁꠟꠦ ꠚꠞꠤꠡꠤ ꠅꠇꠟꠦ ꠇꠁꠟꠣ, “ꠁꠉꠤꠄ ꠔ ꠜꠥꠔꠞ ꠛꠣꠖꠡꠣꠞ ꠡꠣꠁꠎ꠆ꠎꠄ ꠜꠥꠔ ꠍꠣꠠꠣꠄ।”
MAT 9:35 ꠢꠎꠞꠔ ꠁꠍꠣꠄ ꠉꠣꠃꠄ ꠉꠣꠃꠄ ꠀꠞ ꠐꠣꠃꠘꠦ ꠐꠣꠃꠘꠦ ꠉꠤꠀ ꠔꠣꠞꠣꠞ ꠝꠍꠤꠖꠅ ꠢꠣꠝꠣꠁꠀ ꠔꠣꠟꠤꠝ ꠖꠤꠟꠣ। ꠔꠣꠁꠘ ꠛꠦꠢꠦꠡ꠆ꠔꠤ ꠛꠣꠖꠡꠣꠁꠞ ꠈꠥꠡ-ꠈꠛꠞꠤ ꠔꠛꠟꠤꠉ ꠇꠞꠟꠣ, ꠀꠞ ꠢꠇꠟ ꠘꠝꠥꠘꠣꠞ ꠛꠦꠝꠣꠞꠤꠞꠦ ꠜꠣꠟꠣ ꠇꠞꠟꠣ।
MAT 9:36 ꠅꠃ ꠡꠝꠄ ꠝꠣꠘꠡꠞ ꠜꠤꠠ ꠖꠦꠈꠤꠀ ꠔꠣꠘ ꠈꠥꠛ ꠖꠥꠈ ꠟꠣꠉꠟ, ꠁꠔꠣ ꠝꠣꠘꠥꠡ ꠔ ꠀ-ꠞꠣꠈꠣꠟꠤ ꠝꠦꠠꠣꠞ ꠟꠣꠈꠣꠘ ꠛꠦꠚꠣꠘꠣ ꠟꠣꠉꠤ ꠊꠥꠞꠤꠞꠣ।
MAT 9:37 ꠔꠦꠃ ꠁꠍꠣꠄ ꠡꠣꠉꠞꠤꠖ ꠅꠇꠟꠞꠦ ꠇꠁꠟꠣ, “ꠎꠝꠤꠘꠅ ꠔ ꠚꠡꠟ ꠛꠃꠔ ꠀꠍꠦ, ꠅꠁꠟꠦ ꠇꠣꠝꠟꠣ ꠈꠥꠛ ꠇꠝ।
MAT 9:38 ꠄꠞꠟꠣꠉꠤ ꠎꠝꠤꠘꠞ ꠝꠣꠟꠤꠇꠞ ꠉꠦꠍꠦ ꠖꠥꠀ ꠇꠞꠅ, ꠔꠣꠘ ꠚꠡꠟ ꠔꠥꠟꠣꠞ ꠟꠣꠉꠤ ꠔꠣꠁꠘ ꠇꠣꠝꠟꠣ ꠙꠣꠑꠣꠁꠛꠣ।”
MAT 10:1 ꠛꠣꠖꠦ ꠁꠍꠣꠄ ꠔꠣꠘ ꠛꠣꠞꠅꠎꠘ ꠍꠣꠢꠣꠛꠤꠞꠦ ꠒꠣꠇꠣꠁꠀ ꠀꠘꠟꠣ, ꠀꠘꠤꠀ ꠎꠤꠘ-ꠜꠥꠔ ꠍꠣꠠꠣꠘꠤ, ꠀꠞ ꠢꠇꠟ ꠎꠣꠔꠞ ꠛꠦꠝꠣꠞꠤꠞꠦ ꠜꠣꠟꠣ ꠇꠞꠣꠞ ꠈꠦꠝꠔꠣ ꠖꠤꠟꠣ।
MAT 10:2 ꠅꠃ ꠛꠣꠞꠅꠎꠘ ꠍꠣꠢꠣꠛꠤ ꠅꠁꠟꠣ, ꠍꠣꠁꠝꠘ ꠃꠞꠚꠦ ꠙꠤꠔꠞ ꠀꠞ ꠔꠣꠘ ꠜꠣꠁ ꠀꠘ꠆ꠖꠞꠤꠀꠍ, ꠎꠤꠛꠥꠖꠤꠀꠞ ꠙꠥꠀꠂꠘ ꠁꠀꠇꠥꠛ ꠀꠞ ꠢꠣꠘ꠆ꠘꠣꠘ, ꠚꠤꠟꠤꠚ ꠀꠞ ꠛꠞ꠆ꠕꠟꠝꠄ,
MAT 10:3 ꠕꠥꠝꠣꠍ ꠀꠞ ꠈꠣꠎꠘꠣ ꠔꠥꠟꠞꠣ ꠝꠕꠤ, ꠀꠟꠚꠤꠞ ꠙꠥꠀ ꠁꠀꠇꠥꠛ ꠀꠞ ꠕꠖ꠆ꠖꠦ,
MAT 10:4 ꠝꠥꠇ꠆ꠔꠤꠎꠥꠖ꠆ꠖꠣ ꠍꠣꠁꠝꠘ ꠀꠞ ꠁꠢꠥꠖꠣ ꠁꠡ꠆ꠇꠣꠞꠤꠀꠔ। ꠅꠃ ꠁꠢꠥꠖꠣꠄ ꠛꠣꠖꠦ ꠛꠦꠁꠝꠣꠘꠤ ꠇꠞꠤꠀ ꠁꠍꠣꠞꠦ ꠖꠥꠡꠝꠘꠞ ꠀꠔꠅ ꠗꠞꠣꠁ ꠖꠤꠍꠤꠟ।
MAT 10:5 ꠅꠃ ꠛꠣꠞꠅꠎꠘ ꠍꠣꠢꠣꠛꠤꠞꠦ ꠁꠍꠣꠄ ꠢꠥꠇꠥꠝ ꠖꠤꠟꠣ, ꠇꠁꠟꠣ, “ꠔꠥꠝꠤꠔꠣꠁꠘ ꠔꠛꠟꠤꠉꠅ ꠎꠣꠅ, ꠅꠁꠟꠦ ꠇꠥꠘꠥ ꠛꠤꠗꠞ꠆ꠝꠤꠞ ꠉꠦꠍꠦ ꠛꠣ ꠡꠝꠞꠤꠀ ꠎꠣꠔꠤꠞ ꠇꠥꠘꠥ ꠉꠣꠃꠔ ꠎꠣꠁꠅ ꠘꠣ,
MAT 10:6 ꠈꠣꠟꠤ ꠛꠘꠤ ꠁꠍꠞꠣꠁꠟꠞ ꠀꠞꠣꠁꠟ ꠝꠦꠠꠣ ꠅꠇꠟꠞ ꠉꠦꠍꠦ ꠎꠣꠅ।
MAT 10:7 ꠎꠣꠅꠀꠞ ꠙꠕꠦ ꠔꠛꠟꠤꠉ ꠇꠞꠤ ꠇꠞꠤ ꠎꠣꠁꠅ, ꠇꠁꠅ, ꠛꠦꠢꠦꠡ꠆ꠔꠤ ꠛꠣꠖꠡꠣꠁ ꠗꠣꠞꠅ ꠀꠁꠌ꠆ꠍꠦ।
MAT 10:8 ꠀꠞ ꠔꠥꠝꠞꠣ ꠛꠦꠝꠣꠞꠤ ꠅꠇꠟꠞꠦ ꠜꠣꠟꠣ ꠇꠞꠤꠅ, ꠝꠞꠣꠞꠦ ꠎꠤꠘ꠆ꠖꠣ ꠇꠞꠤꠅ, ꠙꠌꠣ-ꠇꠥꠡ꠆ꠑ ꠛꠦꠝꠣꠞꠤꠞꠦ ꠜꠣꠟꠣ ꠇꠞꠤꠅ, ꠀꠞ ꠎꠤꠘ-ꠜꠥꠔ ꠍꠣꠠꠣꠁꠅ। ꠔꠥꠝꠞꠣ ꠎꠦꠟꠣ ꠛꠤꠘꠣ ꠐꠦꠇꠣꠄ ꠙꠣꠁꠍ, ꠅꠃꠟꠣ ꠛꠤꠘꠣ ꠐꠦꠇꠣꠄꠃ ꠖꠤꠅ।
MAT 10:9 ꠎꠣꠅꠀꠞ ꠡꠝꠄ ꠟꠉꠦ ꠇꠞꠤ ꠐꠦꠇꠣ-ꠙꠄꠡꠣꠞ ꠕꠟꠤ, ꠡꠥꠘꠣ-ꠞꠥꠙꠣ ꠛꠣ ꠄꠇꠐꠣ ꠡꠤꠇꠤꠅ ꠘꠤꠅ ꠘꠣ।
MAT 10:10 ꠔꠥꠝꠞꠣ ꠙꠕꠞ ꠟꠣꠉꠤ ꠟꠣꠑꠤ, ꠉꠣꠁꠐ-ꠛꠥꠍꠇꠤ, ꠎꠥꠔꠣ, ꠛꠣ ꠖꠥꠁꠐꠣ ꠇꠥꠞ꠆ꠔꠣꠅ ꠟꠉꠦ ꠘꠤꠅ ꠘꠣ। ꠎꠦ ꠎꠘꠦ ꠇꠣꠝ ꠇꠞꠦ, ꠢꠦ ꠈꠣꠅꠀ-ꠚꠤꠘ꠆ꠖꠣ ꠙꠣꠅꠀꠞ ꠎꠥꠇꠣ।
MAT 10:11 ꠔꠥꠝꠞꠣ ꠎꠦ ꠉꠣꠃꠔ ꠢꠣꠝꠣꠁꠛꠣꠄ, ꠅꠃ ꠉꠣꠃꠞ ꠄꠇꠎꠘ ꠎꠁꠉ꠆ꠉ ꠝꠣꠘꠡꠞꠦ ꠔꠥꠇꠣꠁꠀ ꠛꠣꠞ ꠇꠞꠤꠅ, ꠁ ꠉꠣꠃ ꠍꠣꠠꠤꠀ ꠎꠣꠅꠀꠞ ꠀꠉ ꠙꠞ꠆ꠎꠘ꠆ꠔ ꠄꠘ ꠛꠣꠠꠤꠔꠃ ꠞꠁꠅ।
MAT 10:12 ꠛꠣꠠꠤꠞ ꠜꠤꠔꠞꠦ ꠢꠣꠝꠣꠘꠤꠞ ꠛꠣꠟꠣ ꠔꠣꠞꠣꠞꠦ ꠍꠣꠟꠣꠝ ꠖꠤꠅ।
MAT 10:13 ꠁ ꠛꠣꠠꠤ ꠎꠥꠖꠤ ꠍꠣꠟꠣꠝ ꠙꠣꠅꠀꠞ ꠎꠥꠇꠣ ꠅꠄ, ꠔꠦ ꠔꠥꠝꠞꠣꠞ ꠖꠦꠅꠀ ꠅꠃ ꠡꠣꠘ꠆ꠔꠤ ꠔꠣꠞꠣ ꠙꠣꠁꠛꠣ, ꠀꠞ ꠎꠥꠇꠣ ꠘꠣ ꠅꠁꠟꠦ ꠔꠥꠝꠞꠣꠞ ꠡꠣꠘ꠆ꠔꠤ ꠔꠥꠝꠞꠣꠞ ꠉꠦꠍꠦꠃ ꠚꠤꠞꠤꠀ ꠀꠁꠛ।
MAT 10:14 ꠁ ꠎꠣꠉꠣꠞ ꠇꠦꠃ ꠎꠥꠖꠤ ꠔꠥꠝꠞꠣꠞꠦ ꠇꠛꠥꠟ ꠘꠣ ꠇꠞꠦ, ꠔꠥꠝꠞꠣꠞ ꠇꠕꠣ ꠘꠣ ꠢꠥꠘꠦ, ꠔꠦ ꠁ ꠛꠣꠠꠤ ꠛꠣ ꠉꠣꠃ ꠕꠣꠇꠤ ꠛꠣꠞꠘꠤꠞ ꠛꠣꠟꠣ ꠔꠥꠝꠞꠣꠞ ꠙꠣꠅꠞ ꠗꠥꠁꠟ ꠏꠣꠠꠤꠀ ꠚꠣꠟꠣꠁꠀ ꠀꠁꠅ।
MAT 10:15 ꠀꠝꠤ ꠔꠥꠝꠞꠣꠞꠦ ꠢꠣꠍꠣ ꠇꠕꠣ ꠇꠁꠞꠣꠝ, ꠢꠣꠡꠞꠞ ꠖꠤꠘ ꠅꠃ ꠉꠣꠃꠞ ꠖꠡꠣ ꠕꠣꠇꠤ, ꠢꠃ ꠟꠣꠘ꠆ꠘꠔꠤ ꠍꠣꠖꠥꠝ ꠀꠞ ꠀꠝꠥꠞꠣ ꠐꠣꠃꠘꠞ ꠖꠡꠣ ꠛꠃꠔ ꠜꠣꠟꠣ ꠅꠁꠛ।
MAT 10:16 “ꠢꠥꠘꠅ, ꠞꠣꠁꠇ꠆ꠇꠡ ꠛꠣꠊꠞ ꠍꠣꠝꠘꠦ ꠝꠦꠠꠣꠞ ꠟꠣꠈꠣꠘ ꠀꠝꠤ ꠔꠥꠝꠞꠣꠞꠦ ꠙꠣꠑꠣꠁꠞꠣꠝ। ꠄꠞꠟꠣꠉꠤ ꠔꠥꠝꠞꠣ ꠢꠣꠚꠞ ꠟꠣꠈꠣꠘ ꠌꠣꠟꠣꠇ-ꠌꠔꠥꠞ ꠀꠞ ꠙꠣꠞꠅ ꠙꠣꠈꠤꠞ ꠟꠣꠈꠣꠘ ꠡꠞꠟ ꠅꠅ।
MAT 10:17 ꠢꠥꠡꠤꠀꠞ ꠞꠁꠅ, ꠝꠣꠘꠡꠦ ꠔꠥꠝꠞꠣꠞꠦ ꠗꠞꠤꠀ ꠀꠖꠣꠟꠔꠅ ꠡꠝꠎꠣꠁꠛꠣ, ꠀꠞ ꠔꠣꠞꠣꠞ ꠝꠍꠤꠖꠅ ꠘꠤꠀ ꠔꠥꠝꠞꠣꠞꠦ ꠍꠤꠋꠟꠣꠖꠤ ꠝꠣꠞꠛꠣ।
MAT 10:18 ꠀꠝꠣꠞ ꠘꠣꠝ ꠟꠅꠀꠞ ꠟꠣꠉꠤ ꠔꠥꠝꠞꠣꠞꠦ ꠞꠣꠎꠣ-ꠛꠣꠖꠡꠣꠞ ꠍꠣꠝꠘꠦ ꠘꠦꠅꠀ ꠅꠁꠛ। ꠔꠥꠝꠞꠣ ꠄꠞꠣꠞ ꠍꠣꠝꠘꠦ ꠀꠞ ꠛꠤꠗꠞ꠆ꠝꠤ ꠅꠇꠟꠞ ꠉꠦꠍꠦ ꠀꠝꠣꠞ ꠛꠦꠙꠣꠞꠦ ꠡꠣꠇ꠆ꠇꠤ ꠖꠤꠛꠣꠄ।
MAT 10:19 ꠝꠣꠘꠡꠦ ꠎꠦꠛꠟꠣ ꠔꠥꠝꠞꠣꠞꠦ ꠗꠞꠣꠁ ꠖꠤꠛ, ꠅꠃ ꠡꠝꠄ ꠇꠤꠔꠣ ꠝꠣꠔꠔꠣꠄ ꠛꠣ ꠇꠤꠔꠣ ꠇꠁꠔꠣꠄ, ꠁꠔꠣ ꠟꠁꠀ ꠇꠥꠘꠥ ꠌꠤꠘ꠆ꠔꠣ ꠇꠞꠤꠅ ꠘꠣ। ꠢꠃ ꠡꠝꠄ ꠔꠥꠝꠞꠣꠞꠦ ꠁꠔꠣ ꠢꠤꠇꠣꠁ ꠖꠦꠅꠀ ꠅꠁꠛ।
MAT 10:20 ꠀꠍꠟꠦ ꠔꠥꠝꠞꠣꠞ ꠝꠥꠈꠖꠤ ꠎꠦꠘ ꠔꠥꠝꠞꠣ ꠘꠤꠎꠦ ꠝꠣꠔꠛꠣꠄ, ꠁꠈꠣꠘ ꠘꠣꠄ, ꠔꠥꠝꠞꠣꠞ ꠛꠣꠔꠥꠘꠤ ꠛꠣꠚꠞ ꠎꠦ ꠞꠥꠢꠥ ꠔꠥꠝꠞꠣꠞ ꠜꠤꠔꠞꠦ ꠀꠍꠦ, ꠢꠃ ꠞꠥꠢꠦꠃ ꠁꠔꠣꠞ ꠎꠥꠀꠙ ꠖꠤꠛꠣ।
MAT 10:21 “ꠜꠣꠁꠄ ꠜꠣꠁꠞꠦ ꠀꠞ ꠛꠣꠚꠦ ꠙꠥꠀꠞꠦ ꠈꠥꠘ ꠇꠞꠣꠘꠤꠞ ꠟꠣꠉꠤ ꠗꠞꠣꠁ ꠖꠤꠛ। ꠙꠥꠀ-ꠙꠥꠠꠤꠄꠅ ꠔꠣꠞꠣꠞ ꠝꠣ-ꠛꠣꠚꠞ ꠛꠤꠙꠇ꠆ꠇꠦ ꠉꠤꠀ ꠔꠣꠞꠣꠞꠦ ꠈꠥꠘ ꠇꠞꠣꠁꠛ।
MAT 10:22 ꠀꠝꠣꠞ ꠇꠣꠞꠘꠦ ꠢꠇꠟ ꠝꠣꠘꠡꠦ ꠔꠥꠝꠞꠣꠞꠦ ꠊꠤꠘ꠆ꠘꠣꠁꠛ, ꠅꠁꠟꠦ ꠢꠦꠡ ꠙꠞ꠆ꠎꠘ꠆ꠔ ꠎꠦ ꠐꠤꠇꠤꠀ ꠞꠁꠛ, ꠢꠦ-ꠃ ꠞꠦꠢꠣꠁ ꠙꠣꠁꠛ।
MAT 10:23 ꠇꠥꠘꠥ ꠉꠣꠃꠞ ꠝꠣꠘꠡꠦ ꠔꠥꠝꠞꠣꠞꠦ ꠎꠥꠟꠥꠝ ꠇꠞꠟꠦ, ꠁ ꠉꠣꠃ ꠍꠣꠠꠤꠀ ꠅꠁꠘ꠆ꠘ ꠉꠣꠃꠔ ꠎꠣꠁꠅꠉꠤ। ꠢꠥꠘꠅ, ꠀꠝꠤ ꠢꠣꠍꠣ ꠇꠕꠣ ꠇꠁꠞꠣꠝ, ꠁꠍꠞꠣꠁꠟ ꠖꠦꠡꠞ ꠢꠇ꠆ꠇꠟ ꠐꠣꠃꠘ ꠀꠞ ꠉꠣꠃꠔ ꠔꠥꠝꠞꠣꠞ ꠔꠛꠟꠤꠉ ꠡꠦꠡ ꠅꠀꠞ ꠀꠉꠦꠃ ꠛꠤꠘ-ꠀꠖꠝ ꠢꠤꠞꠛꠣꠞ ꠀꠁꠛꠣ।
MAT 10:24 “ꠝꠘꠅ ꠞꠣꠈꠤꠅ, ꠃꠡ꠆ꠔꠣꠖ ꠕꠣꠇꠤ ꠡꠣꠉꠞꠤꠖ ꠛꠠ ꠘꠣꠄ, ꠀꠞ ꠝꠥꠘꠤꠛ ꠕꠣꠇꠤ ꠔꠣꠞ ꠉꠥꠟꠣꠝ ꠛꠠ ꠘꠣꠄ।
MAT 10:25 ꠔꠦ ꠡꠣꠉꠞꠤꠖ ꠔꠣꠞ ꠃꠡ꠆ꠔꠣꠖꠞ ꠡꠝꠣꠘ, ꠀꠞ ꠉꠥꠟꠣꠝ ꠔꠣꠞ ꠝꠥꠘꠤꠛꠞ ꠡꠝꠣꠘ ꠅꠀꠃ ꠎꠕꠦꠡ꠆ꠐ। ꠢꠥꠘꠞꠣꠄ ꠘꠤ, ꠊꠞꠞ ꠝꠥꠘꠤꠛꠞꠦ ꠎꠦꠛꠟꠣ ꠜꠥꠔꠞ ꠛꠣꠖꠡꠣ ꠛꠦꠟ-ꠍꠛꠥꠟ ꠇꠁꠞꠣ, ꠔꠦ ꠊꠞꠞ ꠛꠣꠇꠤ ꠢꠇꠟꠞꠦ ꠔꠣꠞꠣ ꠀꠞꠅ ꠇꠔꠔꠣ ꠇꠁꠛꠣ!
MAT 10:26 “ꠅꠁꠟꠦ ꠔꠥꠝꠞꠣ ꠔꠣꠞꠣꠞꠦ ꠒꠞꠣꠁꠅ ꠘꠣ, ꠇꠣꠞꠘ ꠁꠟꠣ ꠉꠥꠙꠘ ꠇꠥꠘ꠆ꠔꠣꠃ ꠘꠣꠁ ꠎꠦꠔꠣ ꠎꠣꠁꠞ ꠅꠁꠔ ꠘꠣꠄ। ꠁꠟꠣ ꠟꠥꠇꠣꠁꠟꠅ ꠇꠥꠘ꠆ꠔꠣ ꠘꠣꠁ ꠎꠦꠔꠣ ꠇꠦꠃ ꠢꠥꠘꠔ ꠘꠣꠄ ꠛꠣ ꠎꠣꠘꠔ ꠘꠣꠄ।
MAT 10:27 ꠀꠝꠤ ꠀꠘ꠆ꠖꠣꠞꠤꠞ ꠝꠣꠎꠦ ꠎꠦꠔꠣ ꠔꠥꠝꠞꠣꠞꠦ ꠇꠁꠍꠤ, ꠔꠥꠝꠞꠣ ꠁꠔꠣ ꠚꠞꠞ ꠝꠣꠎꠦ ꠇꠁꠅ। ꠎꠦꠔꠣ ꠇꠣꠘꠦ ꠇꠣꠘꠦ ꠢꠥꠘꠍ, ꠁꠔꠣ ꠍꠣꠐꠞ ꠃꠙꠞꠦ ꠉꠤꠀ ꠎꠥꠞꠦ ꠎꠥꠞꠦ ꠄꠟꠣꠘ ꠇꠞꠤꠅ।
MAT 10:28 ꠎꠣꠞꠣ ꠝꠣꠘꠡꠞ ꠇꠣꠄꠀꠞꠦ ꠛꠤꠘꠣꠡ ꠇꠞꠔ ꠙꠣꠞꠦ, ꠅꠁꠟꠦ ꠞꠥꠢꠥꠞꠦ ꠇꠥꠘ꠆ꠔꠣ ꠇꠞꠔ ꠙꠣꠞꠦ ꠘꠣ, ꠔꠣꠞꠣꠞꠦ ꠒꠞꠣꠁꠅ ꠘꠣ। ꠎꠦꠁꠘ ꠇꠣꠄꠀ ꠀꠞ ꠞꠥꠢꠥ ꠖꠥꠁꠅꠔꠣꠞꠦ ꠖꠥꠎꠈꠅ ꠎꠣꠟꠣꠁꠔꠣ ꠙꠣꠞꠂꠘ, ꠈꠣꠟꠤ ꠔꠣꠘꠞꠦꠃ ꠒꠞꠣꠁꠅ।
MAT 10:29 ꠢꠥꠘꠅ, ꠖꠥꠁꠐꠣ ꠌꠠꠣ ꠙꠣꠈꠤ ꠈꠣꠟꠤ ꠖꠥꠁ ꠐꠦꠇꠣꠄ ꠛꠤꠇꠦ ꠘꠣ ꠘꠤ? ꠅꠁꠟꠦ ꠔꠥꠝꠞꠣꠞ ꠛꠣꠔꠥꠘꠤ ꠛꠣꠚ ꠀꠟ꠆ꠟꠣꠞ ꠢꠥꠇꠥꠝ ꠘꠣ ꠅꠁꠟꠦ ꠅꠔꠣ ꠄꠉꠥ ꠌꠠꠣ ꠙꠣꠈꠤꠅ ꠝꠣꠐꠤꠔ ꠙꠠꠦ ꠘꠣ।
MAT 10:30 ꠎꠣꠘ ꠔ, ꠔꠥꠝꠞꠣꠞ ꠝꠣꠕꠣꠞ ꠌꠥꠟꠉꠦꠍꠣꠁꠘꠅ ꠉꠘꠣ ꠀꠍꠦ।
MAT 10:31 ꠄꠞꠖꠣꠄ ꠔꠥꠝꠞꠣ ꠒꠞꠣꠁꠅ ꠘꠣ। ꠔꠥꠝꠞꠣꠞ ꠖꠣꠝ ꠔ ꠛꠃꠔ ꠌꠠꠣ ꠕꠣꠇꠤꠅ ꠛꠦꠡꠤ।
MAT 10:32 “ꠡꠝꠣꠎꠞ ꠍꠣꠝꠘꠦ ꠎꠦ ꠎꠘꠦ ꠀꠝꠣꠞꠦ ꠇꠛꠥꠟ ꠇꠞꠦ, ꠀꠝꠤꠅ ꠀꠝꠣꠞ ꠛꠦꠢꠦꠡ꠆ꠔꠤ ꠛꠣꠚ ꠀꠟ꠆ꠟꠣ ꠙꠣꠇꠞ ꠍꠣꠝꠘꠦ ꠔꠣꠞꠦ ꠇꠛꠥꠟ ꠇꠞꠝꠥ।
MAT 10:33 ꠅꠁꠟꠦ ꠎꠦ ꠝꠣꠘꠡꠦ ꠡꠝꠣꠎꠞ ꠍꠣꠝꠘꠦ ꠀꠝꠣꠞꠦ ꠅꠡ꠆ꠛꠤꠇꠣꠞ ꠇꠞꠛ, ꠀꠝꠤꠅ ꠔꠣꠞꠦ ꠀꠝꠣꠞ ꠛꠦꠢꠦꠡ꠆ꠔꠤ ꠛꠣꠚ ꠀꠟ꠆ꠟꠣꠞ ꠍꠣꠝꠘꠦ ꠅꠡ꠆ꠛꠤꠇꠣꠞ ꠇꠞꠝꠥ।
MAT 10:34 “ꠔꠥꠝꠞꠣ ꠝꠘꠅ ꠇꠞꠞꠣꠄ ꠘꠤ, ꠀꠝꠤ ꠖꠥꠘꠤꠀꠔ ꠡꠣꠘ꠆ꠔꠤ ꠖꠤꠔꠣꠝ ꠀꠁꠍꠤ? ꠘꠣ, ꠝꠥꠐꠦꠃ ꠘꠣꠄ, ꠀꠝꠤ ꠔ ꠖꠥꠘꠤꠀꠔ ꠄꠇ ꠝꠔꠜꠦꠖ ꠟꠣꠉꠣꠘꠤꠔ ꠀꠁꠍꠤ।
MAT 10:35 ꠀꠝꠤ ꠛꠣꠚꠦ-ꠙꠥꠀꠄ, ꠝꠣꠄ-ꠙꠥꠠꠤꠄ, ꠀꠞ ꠢꠠꠤꠄ-ꠛꠃꠄ ꠛꠤꠛꠣꠖ ꠟꠣꠉꠣꠘꠤꠔ ꠀꠁꠍꠤ।
MAT 10:36 ꠝꠣꠘꠡꠞ ꠘꠤꠎꠞ ꠙꠞꠤꠛꠣꠞꠞ ꠎꠘꠦꠃ ꠔꠣꠞ ꠟꠉꠦ ꠖꠥꠡꠝꠘꠤ ꠇꠞꠛ।
MAT 10:37 “ꠎꠦ ꠝꠣꠘꠡꠦ ꠀꠝꠣ ꠕꠣꠇꠤ ꠔꠣꠞ ꠝꠣ-ꠛꠣꠚꠞꠦ ꠛꠦꠡꠤ ꠝꠣꠄꠀ ꠇꠞꠦ, ꠢꠦ ꠀꠝꠣꠞ ꠃꠝ꠆ꠝꠔ ꠅꠁꠔ ꠙꠣꠞꠔ ꠘꠣꠄ। ꠀꠞ ꠎꠦ ꠎꠘꠦ ꠀꠝꠣ ꠕꠣꠇꠤ ꠔꠣꠞ ꠙꠥꠀꠞꠦ ꠛꠣ ꠔꠣꠞ ꠙꠥꠠꠤꠞꠦ ꠛꠦꠡꠤ ꠝꠣꠄꠀ ꠇꠞꠦ, ꠢꠦ-ꠅ ꠀꠝꠣꠞ ꠃꠝ꠆ꠝꠔꠞ ꠎꠥꠇꠣ ꠘꠣꠄ।
MAT 10:38 ꠎꠦ ꠎꠘꠦ ꠘꠤꠎꠞ ꠖꠥꠈ-ꠇꠡ꠆ꠐꠞ ꠍꠟꠤꠛ ꠛꠁꠀ ꠟꠁꠀ ꠀꠝꠣꠞ ꠈꠞꠦ ꠘꠣ ꠀꠄ, ꠢꠦ-ꠅ ꠀꠝꠣꠞ ꠎꠥꠇꠣ ꠘꠣꠄ।
MAT 10:39 ꠎꠦ ꠎꠘꠦ ꠔꠣꠞ ꠘꠤꠎꠞ ꠎꠣꠘ ꠛꠣꠌꠣꠁꠔ ꠌꠣꠄ, ꠢꠦ ꠔꠣꠞ ꠀꠍꠟ ꠎꠤꠘ꠆ꠖꠦꠉꠤ ꠈꠥꠀꠁꠛ। ꠅꠁꠟꠦ ꠎꠦ ꠎꠘꠦ ꠀꠝꠣꠞ ꠟꠣꠉꠤ ꠔꠣꠞ ꠎꠣꠘ ꠇꠥꠞꠛꠣꠘꠤ ꠖꠤꠟꠣꠄ, ꠢꠦ ꠀꠍꠟ ꠎꠤꠘ꠆ꠖꠦꠉꠤ ꠙꠣꠁꠛ।
MAT 10:40 “ꠎꠦ ꠎꠘꠦ ꠔꠥꠝꠞꠣꠞꠦ ꠇꠛꠥꠟ ꠇꠞꠦ, ꠢꠦ ꠀꠝꠣꠞꠦꠃ ꠇꠛꠥꠟ ꠇꠞꠦ, ꠀꠞ ꠎꠦ ꠀꠝꠣꠞꠦ ꠇꠛꠥꠟ ꠇꠞꠦ, ꠢꠦ ꠀꠍꠟꠦ ꠢꠃ ꠀꠟ꠆ꠟꠣꠞꠦꠃ ꠇꠛꠥꠟ ꠇꠞꠦ, ꠎꠦꠁꠘ ꠀꠝꠣꠞꠦ ꠙꠣꠑꠣꠁꠍꠂꠘ।
MAT 10:41 ꠇꠦꠃ ꠎꠥꠖꠤ ꠇꠥꠘꠥ ꠘꠛꠤꠞꠦ ꠘꠛꠤ ꠇꠁꠀ ꠇꠛꠥꠟ ꠇꠞꠦ, ꠔꠦ ꠅꠃ ꠘꠛꠤꠄ ꠎꠦ ꠙꠥꠞꠥꠡ꠆ꠇꠣꠞ ꠙꠣꠁꠛꠣ, ꠢꠦ-ꠅ ꠅꠃ ꠙꠥꠞꠥꠡ꠆ꠇꠣꠞ ꠙꠣꠁꠛ। ꠇꠥꠘꠥ ꠀꠟ꠆ꠟꠣꠞꠣꠁꠀ ꠝꠣꠘꠡꠞꠦ ꠇꠦꠃ ꠎꠥꠖꠤ ꠀꠟ꠆ꠟꠣꠞꠣꠁꠀ ꠇꠁꠀ ꠇꠛꠥꠟ ꠇꠞꠦ, ꠔꠦ ꠅꠃ ꠀꠟ꠆ꠟꠣꠞꠣꠁꠀ ꠝꠣꠘꠡꠦ ꠎꠦ ꠙꠥꠞꠥꠡ꠆ꠇꠣꠞ ꠙꠣꠁꠛꠣ, ꠢꠦ-ꠅ ꠅꠃ ꠙꠥꠞꠥꠡ꠆ꠇꠣꠞ ꠙꠣꠁꠛ।
MAT 10:42 ꠀꠞ ꠀꠝꠣꠞ ꠃꠝ꠆ꠝꠔ ꠎꠣꠘꠤꠀ ꠇꠦꠃ ꠎꠥꠖꠤ ꠔꠥꠝꠞꠣꠞ ꠝꠣꠎꠞ ꠄꠇ ꠘꠉꠁꠘ꠆ꠘ ꠎꠘꠞꠦꠅ ꠄꠇ ꠉꠦꠟꠣꠡ ꠙꠣꠘꠤ ꠈꠣꠅꠀꠄ, ꠔꠦ ꠢꠦ ꠇꠥꠘꠥꠝꠘ꠆ꠔꠦꠃ ꠄꠞ ꠙꠥꠞꠥꠡ꠆ꠇꠣꠞ ꠕꠣꠇꠤ ꠛꠣꠖ ꠙꠠꠔ ꠘꠣꠄ।”
MAT 11:1 ꠢꠎꠞꠔ ꠁꠍꠣꠄ ꠔꠣꠘ ꠛꠣꠞꠅꠎꠘ ꠍꠣꠢꠣꠛꠤꠞꠦ ꠅꠃ ꠔꠣꠟꠤꠝ ꠖꠤꠀ ꠢꠣꠞꠟꠦ, ꠔꠣꠁꠘ ꠉꠣꠃꠄ ꠉꠣꠃꠄ ꠉꠤꠀ ꠔꠛꠟꠤꠉ ꠀꠞ ꠔꠣꠟꠤꠝ ꠖꠦꠅꠀꠞ ꠟꠣꠉꠤ ꠞꠅꠀꠘꠣ ꠅꠁꠉꠦꠟꠣ।
MAT 11:2 ꠄꠢꠤꠀ ꠘꠛꠤꠄ ꠎꠦꠟꠅ ꠕꠣꠇꠤ ꠎꠦꠛꠟꠣ ꠀꠟ-ꠝꠍꠤꠞ ꠇꠣꠝꠞ ꠇꠕꠣ ꠢꠥꠘꠟꠣ, ꠅꠃ ꠡꠝꠄ ꠔꠣꠘ ꠇꠄꠎꠘ ꠡꠣꠉꠞꠤꠖꠞꠦ ꠙꠣꠑꠣꠁꠟꠣ ꠈꠛꠞ ꠎꠣꠘꠣꠞ ꠟꠣꠉꠤ। ꠄꠞꠣ ꠉꠤꠀ ꠁꠍꠣꠞꠦ ꠎꠤꠇꠣꠁꠟꠣ,
MAT 11:3 “ꠢꠥꠎꠥꠞꠦ ꠇꠁꠍꠂꠘ, ꠎꠦꠁꠘ ꠀꠁꠛꠣꠞ ꠇꠕꠣ ꠀꠍꠤꠟ, ꠀꠙꠘꠦꠃ ꠢꠦꠁꠘ ꠘꠤ? ꠘꠣ ꠀꠝꠞꠣ ꠀꠞ ꠇꠦꠃꠞꠞ ꠟꠣꠉꠤ ꠛꠣꠞ ꠌꠣꠁꠔꠣꠝ?”
MAT 11:4 ꠁꠍꠣꠄ ꠇꠁꠟꠣ, “ꠢꠥꠘꠅ, ꠅꠘꠅ ꠀꠁꠀ ꠔꠥꠝꠞꠣꠞ ꠘꠤꠎꠞ ꠌꠃꠈꠦ ꠎꠦꠔꠣ ꠖꠦꠈꠍ ꠀꠞ ꠢꠥꠘꠍ, ꠅꠔꠣ ꠉꠤꠀ ꠄꠢꠤꠀꠞꠦ ꠇꠅ।
MAT 11:5 ꠔꠣꠘꠞꠦ ꠇꠁꠅ, ꠀꠘ꠆ꠖꠣ ꠝꠣꠘꠡꠦ ꠌꠃꠈꠦ ꠖꠦꠈꠞꠣ, ꠟꠦꠋꠠꠣꠄꠅ ꠀꠐꠤꠞꠣ, ꠙꠌꠣ-ꠇꠥꠡ꠆ꠑ ꠛꠦꠝꠣꠞꠤ ꠜꠣꠟꠣ ꠅꠁꠞꠣ, ꠈꠣꠟꠥꠀ ꠅꠇꠟꠦ ꠢꠥꠘꠞꠣ, ꠝꠞꠣ ꠝꠣꠘꠥꠡ ꠎꠤꠔꠣ ꠅꠁꠞꠣ, ꠀꠞ ꠉꠞꠤꠛ ꠅꠇꠟꠞ ꠉꠦꠍꠦ ꠀꠟ꠆ꠟꠣꠁ ꠈꠥꠡ-ꠈꠛꠞꠤ ꠔꠛꠟꠤꠉ ꠇꠞꠣ ꠅꠞ।
MAT 11:6 ꠢꠥꠘꠅ, ꠢꠦ-ꠃ ꠘꠦꠇ-ꠇꠙꠣꠟꠤ, ꠎꠣꠞ ꠖꠤꠟꠅ ꠀꠝꠣꠞ ꠛꠦꠙꠣꠞꠦ ꠇꠥꠘꠥ ꠛꠣꠗꠣ ꠀꠄ ꠘꠣ।”
MAT 11:7 ꠄꠢꠤꠀ ꠘꠛꠤꠞ ꠡꠣꠉꠞꠤꠖ ꠅꠇꠟ ꠎꠣꠁꠞꠣꠉꠤ, ꠅꠃ ꠡꠝꠄ ꠄꠢꠤꠀꠞ ꠛꠦꠙꠣꠞꠦ ꠁꠍꠣꠄ ꠝꠣꠘꠡꠞꠦ ꠇꠁꠟꠣ, “ꠇꠤꠔꠣ ꠛꠣ, ꠝꠞꠥꠜꠥꠝꠤꠔ ꠇꠤꠔꠣ ꠖꠦꠈꠣꠔ ꠉꠦꠍꠟꠣꠄ? ꠛꠣꠔꠣꠡ ꠀꠁꠟꠦ ꠎꠦꠔꠣ ꠘꠟ-ꠈꠣꠉꠠꠣꠄ ꠟꠠꠦ, ꠅꠔꠣ ꠖꠦꠈꠣꠔ ꠉꠦꠍꠟꠣꠄ ꠘꠤ?
MAT 11:8 ꠘꠣ, ꠇꠤꠔꠣ ꠖꠦꠈꠣꠔ ꠉꠦꠍꠟꠣꠄ? ꠡꠥꠘ꠆ꠖꠞ ꠇꠣꠙꠠ ꠚꠤꠘ꠆ꠘ ꠇꠥꠘꠥ ꠝꠣꠘꠡꠞꠦ ꠘꠤ? ꠀꠍꠟꠦ, ꠎꠦꠞꠣ ꠖꠣꠝꠤ ꠖꠣꠝꠤ ꠇꠣꠙꠠ ꠚꠤꠘ꠆ꠖꠂꠘ, ꠔꠣꠞꠣ ꠔ ꠞꠣꠎꠛꠣꠠꠤꠔ ꠕꠣꠇꠂꠘ।
MAT 11:9 ꠔꠦ ꠔꠥꠝꠞꠣ ꠇꠤꠔꠣ ꠖꠦꠈꠣꠔ ꠉꠦꠍꠟꠣꠄ? ꠇꠥꠘꠥ ꠘꠛꠤꠞꠦ ꠖꠦꠈꠣꠔ ꠘꠤ? ꠢꠥꠘꠅ, ꠀꠝꠤ ꠇꠁꠞꠣꠝ, ꠄꠢꠤꠀ ꠔ ꠈꠣꠟꠤ ꠘꠛꠤ ꠘꠣꠄ, ꠘꠛꠤ ꠕꠣꠇꠤꠅ ꠛꠠ।
MAT 11:10 ꠄꠁꠘ ꠔ ꠢꠃ ꠎꠘ, ꠎꠦꠘ ꠛꠦꠙꠣꠞꠦ ꠀꠍꠝꠣꠘꠤ ꠇꠤꠔꠣꠛꠅ ꠟꠦꠈꠣ ꠀꠍꠦ, ꠢꠥꠘꠅ, ꠔꠥꠝꠣꠞ ꠀꠉꠦ ꠙꠣꠑꠣꠁꠀꠞ ꠀꠝꠤ, ꠀꠝꠣꠞ ꠙꠦꠉꠣꠝ꠆ꠛꠞ, ꠄꠁꠘ ꠉꠤꠀ ꠑꠤꠇ-ꠑꠣꠇ ꠇꠞꠛꠣ ꠔꠥꠝꠣꠞ ꠌꠟꠣꠞ ꠙꠕ।
MAT 11:11 ꠔꠦ ꠀꠝꠤ ꠔꠥꠝꠞꠣꠞꠦ ꠢꠣꠍꠣ ꠇꠕꠣ ꠇꠁꠞꠣꠝ, ꠄꠢꠤꠀ ꠕꠣꠇꠤ ꠛꠠ ꠀꠡ꠆ꠔꠣ ꠖꠥꠘꠤꠀꠔꠃ ꠇꠥꠘꠥ ꠀꠖꠝ ꠀꠍꠟꠣ ꠘꠣ। ꠅꠁꠟꠦ ꠛꠦꠢꠦꠡ꠆ꠔꠤ ꠛꠣꠖꠡꠣꠁꠞ ꠝꠣꠎꠦ ꠢꠇꠟ ꠕꠣꠇꠤ ꠢꠥꠞꠥ ꠎꠘꠅ, ꠄꠢꠤꠀ ꠕꠣꠇꠤ ꠝꠢꠣꠘ।
MAT 11:12 ꠄꠢꠤꠀ ꠘꠛꠤꠞ ꠀꠝꠟ ꠕꠣꠇꠤ ꠅꠈꠘ ꠙꠞ꠆ꠎꠘ꠆ꠔ ꠛꠦꠢꠦꠡ꠆ꠔꠤ ꠛꠣꠖꠡꠣꠁ ꠈꠥꠛ ꠝꠎꠛꠥꠔ ꠅꠁꠀ ꠀꠉꠥꠀꠞ, ꠀꠞ ꠎꠦꠞꠣ ꠁꠝꠣꠘꠦ ꠝꠎꠛꠥꠔ, ꠔꠣꠞꠣ ꠖꠤꠟꠦ-ꠎꠣꠘꠦ ꠀꠁꠀ ꠄꠞ ꠜꠤꠔꠞꠦ ꠢꠣꠝꠣꠁꠞꠣ।
MAT 11:13 ꠢꠥꠘꠅ, ꠄꠢꠤꠀ ꠘꠛꠤꠞ ꠀꠝꠟ ꠙꠞ꠆ꠎꠘ꠆ꠔ ꠢꠎꠞꠔ ꠝꠥꠍꠣꠞ ꠔꠃꠞꠣꠔ ꠇꠤꠔꠣꠛ ꠀꠞ ꠡꠛ ꠘꠛꠤꠞ ꠍꠢꠤꠚꠣꠞ ꠝꠣꠎꠦ, ꠀꠟ꠆ꠟꠣꠞ ꠛꠣꠖꠡꠣꠁ ꠀꠅꠀꠞ ꠇꠕꠣ ꠎꠣꠘꠣꠁꠟ ꠅꠁꠍꠦ।
MAT 11:14 ꠅꠈꠘ ꠎꠥꠖꠤ ꠀꠙꠘꠣꠞꠣ ꠀꠝꠣꠞ ꠝꠣꠔ ꠄꠇꠤꠘ ꠇꠞꠂꠘ, ꠔꠦ ꠢꠥꠘꠃꠇ꠆ꠇꠣ, ꠎꠦ ꠁꠟꠤꠀꠍ ꠘꠛꠤꠄ ꠢꠤꠞꠛꠣꠞ ꠀꠁꠛꠣꠞ ꠇꠕꠣ ꠀꠍꠤꠟ, ꠅꠃ ꠄꠢꠤꠀꠃ ꠅꠁꠟꠣ ꠢꠃ ꠁꠟꠤꠀꠍ।
MAT 11:15 ꠎꠣꠞ ꠇꠣꠘ ꠀꠍꠦ, ꠢꠦ ꠢꠥꠘꠃꠇ।
MAT 11:16 “ꠁ ꠎꠝꠣꠘꠣꠞ ꠝꠣꠘꠡꠞꠦ ꠀꠝꠤ ꠇꠤꠔꠣꠞ ꠟꠉꠦ ꠔꠥꠟꠘꠣ ꠇꠞꠔꠣꠝ? ꠔꠣꠞꠣ ꠔ ꠅꠝꠘ ꠢꠥꠞꠥꠔ꠆ꠔꠣꠞ ꠟꠣꠈꠣꠘ, ꠎꠦꠔꠣꠄ ꠛꠣꠎꠣꠞꠅ ꠛꠁꠀ ꠄꠇꠦ-ꠅꠁꠘ꠆ꠘꠞꠦ ꠒꠣꠇꠤꠀ ꠇꠂꠘ,
MAT 11:17 ‘ꠢꠂ, ꠀꠝꠞꠣ ꠔꠥꠝꠞꠣꠞ ꠟꠣꠉꠤ ꠛꠣꠡꠤ ꠛꠣꠎꠣꠁꠟꠣꠝ, ꠔꠥꠝꠞꠣ ꠔ ꠘꠣꠌꠟꠣꠄ ꠘꠣ, ꠀꠢꠣꠎꠣꠞꠤꠞ ꠉꠣꠘ ꠉꠣꠁꠟꠣꠝ, ꠔꠥꠝꠞꠣ ꠔ ꠇꠣꠘꠟꠣꠄ ꠘꠣ।’
MAT 11:18 ꠑꠤꠇ ꠅꠟꠣꠈꠣꠘ, ꠄꠢꠤꠀ ꠘꠛꠤꠄ ꠀꠁꠀ ꠡꠝꠣꠎꠞ ꠟꠉꠦ ꠈꠣꠅꠀ-ꠖꠣꠅꠀ ꠘꠣ ꠇꠞꠣꠄ, ꠝꠣꠘꠡꠦ ꠇꠁꠞꠣ ꠔꠣꠘꠦ ꠜꠥꠔꠦ ꠗꠞꠍꠦ।
MAT 11:19 ꠅꠁꠟꠦ ꠀꠝꠤ ꠛꠤꠘ-ꠀꠖꠝ ꠀꠁꠀ ꠈꠣꠅꠀ-ꠖꠣꠅꠀ ꠇꠞꠣꠄ ꠔꠥꠝꠞꠣ ꠇꠁꠞꠣꠄ, ‘ꠖꠦꠈꠃꠇ꠆ꠇꠣ, ꠁ ꠛꠦꠐꠣ ꠔ ꠙꠦꠐꠥꠀ, ꠝꠖꠈꠥꠞ, ꠢꠦ ꠊꠥꠡꠈꠥꠞ ꠈꠣꠎꠘꠣ ꠔꠥꠟꠞꠣ ꠀꠞ ꠘꠣꠚꠞꠝꠣꠘ ꠅꠇꠟꠞ ꠟꠉꠦ ꠖꠥꠡ꠆ꠔꠤ ꠇꠞꠦ।’ ꠔꠦ ꠀꠈꠟ ꠈꠣꠐꠣꠁꠀ ꠎꠦꠞꠣ ꠌꠟꠦ, ꠔꠣꠞꠣꠞ ꠌꠣꠟ-ꠌꠟꠘ ꠕꠣꠇꠤꠃ ꠙꠞꠝꠣꠘ ꠝꠤꠟꠦ, ꠀꠈꠟꠃ ꠅꠁꠟ ꠈꠣꠐꠤ-ꠘꠤꠈꠥꠔ ꠌꠤꠎ।”
MAT 11:20 ꠢꠎꠞꠔ ꠁꠍꠣꠄ ꠎꠦꠔꠣ ꠉꠣꠃꠀꠁꠘ꠆ꠔꠅ ꠀꠞ ꠐꠣꠃꠘꠅ ꠛꠦꠡꠤꠞ ꠜꠣꠉ ꠇꠦꠞꠣꠝꠔꠤ ꠖꠦꠈꠣꠁꠍꠟꠣ, ꠁꠔꠣꠞ ꠝꠣꠘꠡꠦ ꠔꠃꠛꠣ ꠇꠞꠍꠂꠘ ꠘꠣ। ꠄꠞꠟꠣꠉꠤ ꠔꠣꠁꠘ ꠁ ꠉꠣꠃ ꠀꠞ ꠐꠣꠃꠘꠞ ꠃꠙꠞꠦ ꠛꠦꠎꠣꠞ ꠅꠁꠀ ꠇꠁꠟꠣ,
MAT 11:21 “ꠢꠣꠄꠞꠦ ꠛꠣꠄꠔ-ꠍꠄꠖꠣ ꠀꠞ ꠈꠥꠞꠣꠍꠤꠘ ꠉꠣꠃ, ꠔꠥꠝꠞꠣ ꠔ ꠟꠣꠘ꠆ꠘꠔꠤ। ꠔꠥꠝꠞꠣꠞ ꠝꠣꠎꠦ ꠎꠦꠔꠣ ꠇꠥꠖꠞꠔꠤ ꠇꠣꠝ ꠖꠦꠈꠣꠁꠟ ꠅꠁꠍꠦ, ꠁꠔꠣ ꠎꠥꠖꠤ ꠡꠥꠞ ꠀꠞ ꠍꠤꠖꠘ ꠄꠟꠣꠇꠣꠔ ꠖꠦꠈꠣꠁꠟ ꠅꠁꠔ, ꠔꠦ ꠛꠃꠔ ꠀꠉꠦꠃ ꠔꠣꠞꠣ ꠇꠣꠔꠞ ꠅꠁꠀ ꠔꠃꠛꠣ ꠇꠞꠟ ꠅꠘꠦ।
MAT 11:22 ꠅꠁꠟꠦ ꠀꠝꠤ ꠔꠥꠝꠞꠣꠞꠦ ꠇꠁꠞꠣꠝ, ꠇꠤꠀꠝꠔꠞ ꠖꠤꠘ ꠡꠥꠞ ꠀꠞ ꠍꠤꠖꠘ ꠄꠟꠣꠇꠣꠞ ꠖꠡꠣ ꠕꠣꠇꠤꠅ, ꠔꠥꠝꠞꠣꠞ ꠖꠡꠣ ꠛꠃꠔ ꠇꠑꠤꠘ ꠅꠁꠛ।
MAT 11:23 ꠅ ꠇꠚꠞꠘꠣꠃꠝ ꠐꠣꠃꠘ, ꠢꠥꠘꠅ, ꠔꠥꠝꠤ ꠛꠥꠟꠦ ꠃꠌꠣ ꠅꠁꠀ ꠀꠍꠝꠣꠘꠅ ꠉꠤꠀ ꠟꠣꠉꠔꠣꠄ? ꠘꠣ, ꠙꠣꠞꠔꠣꠄ ꠘꠣꠄ! ꠔꠥꠝꠣꠞꠦ ꠙꠣꠔꠣꠟꠅ ꠟꠣꠝꠣꠘꠤ ꠅꠁꠛ। ꠔꠥꠝꠣꠞ ꠝꠣꠎꠦ ꠎꠦꠔꠣ ꠇꠥꠖꠞꠔꠤ ꠝꠥꠎꠦꠎꠣ ꠖꠦꠈꠣꠁꠟ ꠅꠁꠍꠦ, ꠁꠔꠣ ꠎꠥꠖꠤ ꠍꠣꠖꠥꠝ ꠐꠣꠃꠘꠅ ꠖꠦꠈꠣꠁꠟ ꠅꠁꠔ, ꠔꠦ ꠁ ꠐꠣꠃꠘ ꠅꠈꠘꠅ ꠐꠤꠇꠤꠀ ꠞꠁꠟ ꠅꠘꠦ।
MAT 11:24 ꠅꠁꠟꠦ ꠀꠝꠤ ꠔꠥꠝꠞꠣꠞꠦ ꠇꠁꠞꠣꠝ, ꠢꠣꠡꠞꠞ ꠖꠤꠘ ꠍꠣꠖꠥꠝ ꠐꠣꠃꠘꠞ ꠢꠣꠟꠔꠅ ꠔꠥꠝꠞꠣꠞ ꠕꠣꠇꠤ ꠛꠃꠔ ꠜꠣꠟꠣ ꠅꠁꠛ।”
MAT 11:25 ꠄꠞꠛꠣꠖꠦ ꠁꠍꠣꠄ ꠇꠁꠟꠣ, “ꠅ ꠀꠝꠣꠞ ꠉꠣꠁꠛꠤ ꠛꠣꠚ ꠀꠟ꠆ꠟꠣ, ꠔꠥꠝꠤ ꠔ ꠀꠍꠝꠣꠘ-ꠎꠝꠤꠘꠞ ꠝꠣꠟꠤꠇ। ꠀꠝꠤ ꠔꠥꠝꠣꠞ ꠡꠥꠇꠞꠤꠀ ꠎꠣꠘꠣꠁꠞꠣꠝ, ꠇꠣꠞꠘ ꠔꠥꠝꠤ ꠀꠈꠟꠖꠣꠞ ꠀꠞ ꠛꠥꠖ꠆ꠖꠤꠝꠣꠘ ꠅꠇꠟꠞ ꠉꠦꠍꠦ ꠁꠔꠣ ꠎꠣꠁꠞ ꠘꠣ ꠇꠞꠤꠀ, ꠛꠦꠛꠥꠎ-ꠢꠥꠞꠥꠔ꠆ꠔꠣꠞ ꠟꠣꠈꠣꠘ ꠝꠣꠘꠡꠞ ꠉꠦꠍꠦ ꠎꠣꠁꠞ ꠇꠞꠍ।
MAT 11:26 ꠛꠣꠛꠣ, ꠀꠍꠟꠦ ꠁꠔꠣ ꠢꠇꠟꠔꠣꠃ ꠔꠥꠝꠣꠞ ꠝꠞ꠆ꠎꠤ।
MAT 11:27 “ꠀꠝꠣꠞ ꠉꠣꠁꠛꠤ ꠛꠣꠛꠣꠄ ꠢꠇꠟꠔꠣꠃ ꠀꠝꠣꠞ ꠀꠔꠅ ꠡꠙꠤ ꠖꠤꠍꠂꠘ। ꠛꠣꠚ ꠍꠣꠠꠣ ꠖꠥꠍꠞꠣ ꠇꠦꠃ ꠅꠃ ꠙꠥꠔꠞꠦ ꠌꠤꠘꠦ ꠘꠣ, ꠀꠞ ꠙꠥꠔ ꠍꠣꠠꠣ ꠖꠥꠍꠞꠣ ꠇꠦꠃ ꠅꠃ ꠛꠣꠚꠞꠦ ꠌꠤꠘꠦ ꠘꠣ। ꠙꠥꠔꠦ ꠛꠣꠚꠞꠦ ꠎꠣꠞ ꠉꠦꠍꠦ ꠎꠣꠁꠞ ꠇꠞꠣꠞ ꠈꠤꠀꠟ ꠅꠄ, ꠈꠣꠟꠤ ꠢꠦ-ꠃ ꠛꠣꠚꠞ ꠙꠞꠤꠌꠄ ꠙꠣꠄ।
MAT 11:28 “ꠜꠣꠞ-ꠛꠥꠏꠣ ꠛꠁꠔꠦ ꠛꠁꠔꠦ ꠔꠥꠝꠞꠣ ꠎꠦꠞꠣ ꠢꠦꠞꠣꠘ ꠅꠁꠉꠦꠍ, ꠔꠥꠝꠞꠣ ꠢꠇꠟ ꠀꠝꠣꠞ ꠉꠦꠍꠦ ꠀꠅ, ꠀꠝꠤ ꠔꠥꠝꠞꠣꠞꠦ ꠀꠞꠣꠝ ꠖꠤꠝꠥ।
MAT 11:29 ꠀꠝꠣꠞ ꠎꠥꠀꠟ ꠔꠥꠝꠞꠣꠞ ꠇꠣꠘ꠆ꠖꠅ ꠔꠥꠟꠅ ꠀꠞ ꠀꠝꠣꠞ ꠉꠦꠍ ꠕꠣꠇꠤ ꠔꠣꠟꠤꠝ ꠟꠅ, ꠔꠦꠃ ꠔꠥꠝꠞꠣꠞ ꠀꠞꠣꠝ ꠅꠁꠛ। ꠀꠝꠣꠞ ꠎꠥꠀꠟ ꠛꠁꠀ ꠘꠦꠅꠀ ꠡꠥꠎꠣ, ꠀꠝꠣꠞ ꠖꠦꠅꠀ ꠜꠣꠞ ꠈꠥꠛ ꠙꠣꠔꠟꠣ। ꠀꠝꠣꠞ ꠝꠤꠎꠣꠎ ꠈꠥꠛ ꠘꠞꠝ ꠀꠞ ꠑꠣꠘ꠆ꠒꠣ।”
MAT 12:1 ꠄꠇ ꠎꠥꠝ꠆ꠝꠣꠛꠣꠞꠦ ꠢꠎꠞꠔ ꠁꠍꠣ ꠈꠦꠔꠞ ꠀꠁꠟꠦꠖꠤ ꠀꠐꠤꠀ ꠎꠣꠅꠀꠔ ꠀꠍꠟꠣ। ꠔꠣꠘ ꠡꠣꠉꠞꠤꠖ ꠅꠇꠟꠞ ꠙꠦꠐꠅ ꠜꠥꠇ ꠟꠣꠉꠣꠄ, ꠔꠣꠞꠣ ꠗꠣꠘꠞ ꠍꠠꠣ ꠍꠤꠠꠤ ꠍꠤꠠꠤ ꠈꠣꠅꠀꠔ ꠟꠣꠉꠟꠣ।
MAT 12:2 ꠁꠔꠣ ꠖꠦꠈꠤꠀ ꠚꠞꠤꠡꠤ ꠝꠎꠛꠞ ꠝꠣꠘꠡꠦ ꠁꠍꠣꠞꠦ ꠇꠁꠟꠣ, “ꠀꠝꠞꠣꠞ ꠡꠞꠤꠅꠔꠦ ꠇꠄ, ꠎꠥꠝ꠆ꠝꠣꠛꠣꠞꠦ ꠇꠥꠘꠥ ꠇꠣꠝ ꠇꠞꠣ ꠎꠣꠁꠎ ꠘꠣꠄ, ꠔꠦ ꠀꠙꠘꠣꠞ ꠡꠣꠉꠞꠤꠖ ꠅꠇꠟꠦ ꠗꠣꠘꠞ ꠍꠠꠣ ꠍꠤꠠꠤꠞꠣ ꠇꠦꠘꠦ?”
MAT 12:3 ꠁꠍꠣꠄ ꠎꠥꠀꠙ ꠖꠤꠟꠣ, “ꠖꠣꠃꠖ ꠘꠛꠤ ꠀꠞ ꠔꠣꠘ ꠟꠉꠞ ꠝꠣꠘꠡꠦ ꠄꠇꠛꠣꠞ ꠙꠦꠐꠞ ꠜꠥꠇꠦ ꠎꠦꠔꠣ ꠇꠞꠍꠟꠣ, ꠁꠔꠣ ꠀꠙꠘꠣꠞꠣ ꠙꠠꠍꠂꠘ ꠘꠣ ꠘꠤ?
MAT 12:4 ꠔꠣꠁꠘ ꠀꠟ꠆ꠟꠣꠞ ꠇꠣꠛꠣ ꠊꠞꠅ ꠢꠣꠝꠣꠁꠀ ꠢꠃ ꠙꠛꠤꠔ꠆ꠞ ꠞꠥꠐꠤ ꠈꠣꠁꠍꠟꠣ, ꠁ ꠞꠥꠐꠤ ꠈꠣꠅꠀ ꠔ ꠔꠣꠁꠘ ꠀꠞ ꠔꠣꠘ ꠟꠉꠞ ꠝꠣꠘꠡꠞ ꠟꠣꠉꠤ ꠘꠣꠎꠣꠁꠎ, ꠁꠔꠣ ꠈꠣꠟꠤ ꠁꠝꠣꠝ ꠍꠣꠛꠞ ꠟꠣꠉꠤ ꠎꠣꠁꠎ ꠀꠍꠤꠟ।
MAT 12:5 ꠀꠞ ꠀꠙꠘꠣꠞꠣ ꠔꠃꠞꠣꠔ ꠡꠞꠤꠚꠅ ꠙꠠꠍꠂꠘ ꠘꠣ ꠘꠤ, ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠞ ꠁꠝꠣꠝ ꠅꠇꠟꠦ ꠎꠥꠝ꠆ꠝꠣꠛꠣꠞꠦ ꠎꠥꠝ꠆ꠝꠣꠞ ꠖꠤꠘꠞ ꠘꠤꠅꠝ ꠜꠣꠋꠟꠦꠅ ꠔꠣꠞꠣꠞ ꠇꠥꠘꠥ ꠉꠥꠘꠣ ꠅꠄ ꠘꠣ।
MAT 12:6 ꠅꠁꠟꠦ ꠀꠝꠤ ꠀꠙꠘꠣꠞꠣꠞꠦ ꠇꠁꠞꠣꠝ, ꠛꠣꠄꠔꠥꠟ-ꠝꠥꠇꠣꠖ꠆ꠖꠍ ꠕꠣꠇꠤꠅ ꠖꠣꠝꠤ ꠄꠇ ꠝꠣꠘꠥꠡ ꠅꠘꠅ ꠀꠍꠂꠘ।
MAT 12:7 ꠀꠟ꠆ꠟꠣꠞ ꠇꠣꠟꠣꠝꠞ ꠅꠃ ꠀꠄꠀꠔꠞ ꠜꠦꠖ ꠎꠥꠖꠤ ꠀꠙꠘꠣꠞꠣ ꠛꠥꠎꠔꠣ, ꠎꠦ ꠀꠄꠀꠔꠅ ꠀꠍꠦ, ‘ꠀꠝꠤ ꠖꠄꠀ ꠖꠦꠈꠔꠣꠝ ꠌꠣꠁ, ꠙꠡꠥ-ꠇꠥꠞꠛꠣꠘꠤ ꠘꠣꠄ।’ ꠔꠦ ꠀꠙꠘꠣꠞꠣ ꠘꠤ-ꠅꠙꠞꠣꠗꠤꠞꠦ ꠅꠙꠞꠣꠗꠤ ꠛꠣꠘꠣꠁꠟꠣ ꠘꠣ ꠅꠘꠦ।
MAT 12:8 ꠢꠥꠘꠃꠇ꠆ꠇꠣ, ꠎꠥꠝ꠆ꠝꠣꠛꠣꠞꠞ ꠔꠣꠝꠣꠝ ꠄꠈꠔꠤꠀꠞ ꠀꠝꠤ ꠛꠤꠘ-ꠀꠖꠝꠞ ꠀꠔꠅ।”
MAT 12:9 ꠛꠣꠖꠦ ꠢꠎꠞꠔ ꠁꠍꠣ ꠁꠘ ꠕꠘꠦ ꠉꠤꠀ ꠅꠃ ꠚꠞꠤꠡꠤ ꠅꠇꠟꠞ ꠝꠍꠤꠖꠅ ꠢꠣꠝꠣꠁꠟꠣ।
MAT 12:10 ꠢꠘꠅ ꠅꠟꠣ ꠄꠇ ꠛꠦꠐꠣ ꠀꠍꠤꠟ, ꠔꠣꠞ ꠄꠇ ꠀꠔ ꠛꠦꠝꠣꠞꠦ ꠢꠥꠇꠣꠁ ꠉꠦꠍꠦ। ꠁꠍꠣꠞ ꠇꠥꠘꠥ ꠈꠥꠔ ꠛꠣꠞ ꠇꠞꠤꠀ ꠔꠣꠘꠞꠦ ꠖꠥꠡꠤ ꠛꠣꠘꠣꠘꠤꠞ ꠘꠤꠅꠔꠦ, ꠅꠃ ꠝꠍꠤꠖꠞ ꠝꠣꠘꠡꠦ ꠔꠣꠘꠞꠦ ꠎꠤꠇꠣꠁꠟ, “ꠍꠣꠛ, ꠝꠥꠍꠣꠞ ꠡꠞꠤꠅꠔ ꠝꠣꠚꠤꠇ ꠎꠥꠝ꠆ꠝꠣꠛꠣꠞꠦ ꠇꠦꠃꠞꠞ ꠛꠦꠝꠣꠞ ꠡꠤꠚꠣ ꠇꠞꠣ ꠎꠣꠁꠎ ꠘꠤ?”
MAT 12:11 ꠁꠍꠣꠄ ꠎꠥꠀꠙ ꠖꠤꠟꠣ, “ꠗꠞꠃꠇ꠆ꠇꠣ, ꠀꠙꠘꠣꠞꠣ ꠄꠇꠎꠘꠞ ꠄꠉꠥ ꠝꠦꠠꠣ ꠎꠥꠖꠤ ꠎꠥꠝ꠆ꠝꠣꠛꠣꠞꠦ ꠉꠣꠔꠞ ꠝꠣꠎꠦ ꠙꠠꠤꠎꠣꠄ, ꠔꠦ ꠅꠃ ꠖꠤꠘ ꠁ ꠝꠦꠠꠣꠞꠦ ꠉꠣꠔꠅ ꠕꠣꠇꠤ ꠔꠥꠟꠔꠣ ꠘꠣꠄ ꠘꠤ?
MAT 12:12 ꠀꠞ ꠝꠣꠘꠡꠞ ꠖꠣꠝ ꠔ ꠝꠦꠠꠣ ꠕꠣꠇꠤ ꠛꠃꠔ ꠛꠦꠡꠤ। ꠄꠞꠟꠣꠉꠤ ꠛꠥꠎꠣ ꠎꠣꠄ, ꠎꠥꠝ꠆ꠝꠣꠛꠣꠞꠦꠅ ꠘꠦꠇ ꠇꠣꠝ ꠇꠞꠣ ꠎꠣꠁꠎ ꠀꠍꠦ।”
MAT 12:13 ꠛꠣꠖꠦ ꠔꠣꠁꠘ ꠅꠃ ꠢꠥꠇꠘꠣ ꠀꠔꠀꠟꠣ ꠛꠦꠐꠣꠞꠦ ꠇꠁꠟꠣ, “ꠔꠥꠝꠣꠞ ꠀꠔꠈꠣꠘ ꠛꠣꠠꠣꠅ।” ꠢꠦ ꠔꠣꠞ ꠀꠔ ꠛꠣꠠꠣꠁꠔꠦꠃ ꠢꠥꠇꠘꠣ ꠀꠔ ꠅꠁꠘ꠆ꠘ ꠀꠔꠞ ꠟꠣꠈꠣꠘ ꠙꠥꠞꠣꠙꠥꠞ ꠜꠣꠟꠣ ꠅꠁꠉꠦꠟ।
MAT 12:14 ꠛꠣꠖꠦ ꠢꠃ ꠚꠞꠤꠡꠤ ꠅꠇꠟꠦ ꠛꠣꠞꠦ ꠉꠤꠀ ꠙꠞꠣꠝꠤꠡ ꠇꠞꠟꠣ, ꠁꠍꠣꠞꠦ ꠇꠤꠟꠣ ꠎꠣꠘꠦ ꠝꠣꠞꠣ ꠎꠣꠄ।
MAT 12:15 ꠔꠣꠞꠣꠞ ꠅꠃ ꠙꠞꠣꠝꠤꠡꠞ ꠈꠛꠞ ꠁꠍꠣꠄ ꠎꠣꠘꠤꠟꠤꠟꠣ, ꠄꠞꠟꠣꠉꠤ ꠔꠣꠁꠘ ꠢꠤꠘ ꠕꠘꠦ ꠢꠞꠤꠉꠦꠟꠣ। ꠅꠃ ꠡꠝꠄ ꠛꠃꠔ ꠝꠣꠘꠥꠡ ꠔꠣꠘ ꠈꠞꠦ ꠈꠞꠦ ꠀꠁꠟꠣ। ꠄꠞꠣꠞ ꠝꠣꠎꠦ ꠎꠔ ꠛꠦꠝꠣꠞꠤ ꠀꠍꠟꠣ, ꠔꠣꠁꠘ ꠄꠞꠣ ꠢꠇꠟꠞꠦ ꠜꠣꠟꠣ ꠇꠞꠟꠣ।
MAT 12:16 ꠔꠣꠁꠘ ꠄꠞꠣꠞꠦ ꠖꠠꠣꠁꠀ ꠇꠁꠟꠣ, “ꠈꠛꠞꠖꠣꠞ, ꠔꠥꠝꠞꠣ ꠀꠝꠣꠞ ꠙꠞꠤꠌꠄ ꠎꠣꠁꠞ ꠇꠞꠤꠅ ꠘꠣ।”
MAT 12:17 ꠁꠔꠣ ꠅꠁꠍꠤꠟ ꠎꠣꠔꠦ ꠀꠉꠞ ꠀꠝꠟꠞ ꠘꠛꠤ ꠁꠡꠣꠄꠀꠞ ꠝꠣꠎꠖꠤ ꠎꠦꠔꠣ ꠛꠣꠔꠣꠁꠟ ꠅꠁꠍꠤꠟ, ꠅꠔꠣ ꠚꠟꠤꠎꠣꠄ। ꠔꠣꠁꠘ ꠇꠁꠍꠟꠣ,
MAT 12:18 ꠢꠥꠘꠅ, ꠀꠝꠤ ꠀꠝꠣꠞ ꠅꠃ ꠉꠥꠟꠣꠝꠞꠦ ꠙꠍꠘ꠆ꠖ ꠇꠞꠍꠤ। ꠄꠁꠘꠃ ꠀꠝꠣꠞ ꠝꠣꠄꠀꠞ ꠎꠘ, ꠔꠣꠘ ꠃꠙꠞꠦ ꠀꠝꠤ ꠈꠥꠛ ꠈꠥꠡꠤ। ꠄꠘ ꠃꠙꠞꠦ ꠀꠝꠤ ꠀꠝꠣꠞ ꠞꠥꠢꠥ ꠖꠤꠝꠥ, ꠢꠇꠟ ꠎꠣꠔꠤꠞ ꠉꠦꠍꠦ ꠔꠣꠁꠘ ꠀꠝꠣꠞ ꠢꠇ ꠛꠤꠌꠣꠞꠞ ꠇꠕꠣ ꠎꠣꠘꠣꠁꠛꠣ।
MAT 12:19 ꠔꠣꠁꠘ ꠇꠥꠘꠥ ꠔꠞ꠆ꠇꠣ-ꠔꠞ꠆ꠇꠤ ꠛꠣ ꠌꠤꠟ꠆ꠟꠣ-ꠌꠤꠟ꠆ꠟꠤ ꠇꠞꠔꠣ ꠘꠣꠄ, ꠙꠕꠦ-ꠊꠣꠐꠦ ꠇꠥꠘꠥ ꠝꠣꠘꠡꠦ ꠔꠣꠘ ꠀꠅꠀꠎ ꠢꠥꠘꠔ ꠘꠣꠄ।
MAT 12:20 ꠢꠇ ꠛꠤꠌꠣꠞ ꠇꠣꠁꠝ ꠅꠀꠞ ꠀꠉ ꠙꠞ꠆ꠎꠘ꠆ꠔ, ꠔꠣꠁꠘ ꠍꠦꠌꠣ ꠘꠟ-ꠈꠣꠉꠠꠣ ꠜꠣꠋꠉꠤꠔꠣ ꠘꠣꠄ, ꠀꠞ ꠝꠤꠐ ꠝꠤꠐ ꠇꠞꠤ ꠎꠟꠞꠣ ꠟꠦꠝꠞ ꠚꠤꠔꠣꠅ ꠟꠤꠝꠣꠁꠔꠣ ꠘꠣꠄ।
MAT 12:21 ꠖꠥꠘꠤꠀꠞ ꠢꠇꠟ ꠎꠣꠔꠤꠄ ꠔꠣꠘ ꠃꠙꠞꠦꠃ ꠜꠞꠡꠣ ꠇꠞꠛꠣ।
MAT 12:22 ꠛꠣꠖꠦ ꠝꠣꠘꠡꠦ ꠎꠤꠘꠞ ꠀꠍꠞ ꠀꠟꠣ ꠄꠇ ꠛꠦꠐꠣꠞꠦ ꠁꠍꠣꠞ ꠉꠦꠍꠦ ꠟꠁꠀ ꠀꠁꠟ। ꠁ ꠛꠦꠐꠣ ꠀꠍꠤꠟ ꠀꠘ꠆ꠖꠣ ꠀꠞ ꠛꠥꠛꠣ। ꠔꠣꠁꠘ ꠅꠃ ꠛꠦꠐꠣꠞꠦ ꠜꠣꠟꠣ ꠇꠞꠟꠣ। ꠢꠦ ꠜꠣꠟꠣ ꠅꠁꠀ ꠝꠣꠔ-ꠇꠕꠣ ꠝꠣꠔꠤꠟ ꠀꠞ ꠌꠃꠈꠦꠅ ꠖꠦꠈꠟ।
MAT 12:23 ꠁꠔꠣ ꠖꠦꠈꠤꠀ ꠢꠇꠟ ꠝꠣꠘꠥꠡ ꠔꠣꠁꠎ꠆ꠎꠥꠛ ꠅꠁꠀ ꠇꠁꠟꠣ, “ꠖꠣꠃꠖ ꠘꠛꠤꠞ ꠈꠣꠘ꠆ꠖꠣꠘꠅ ꠎꠦꠁꠘ ꠎꠘꠝ ꠅꠀꠞ ꠇꠕꠣ, ꠄꠁꠘꠃ ꠢꠦꠁꠘ ꠘꠤ?”
MAT 12:24 ꠁꠈꠣꠘ ꠢꠥꠘꠤꠀ ꠚꠞꠤꠡꠤ ꠅꠇꠟꠦ ꠇꠁꠟꠣ, “ꠁꠉꠤꠄ ꠔ ꠎꠤꠘꠞ ꠛꠣꠖꠡꠣ ꠛꠦꠟ-ꠍꠛꠥꠟꠞ ꠛꠟꠦ ꠎꠤꠘ꠆ꠘꠣꠔ ꠍꠣꠠꠣꠄ।”
MAT 12:25 ꠔꠣꠞꠣꠞ ꠝꠘꠞ ꠌꠤꠘ꠆ꠔꠣ ꠛꠥꠎꠤꠀ ꠁꠍꠣꠄ ꠇꠁꠟꠣ, “ꠇꠥꠘꠥ ꠖꠦꠡꠞ ꠜꠤꠔꠞꠦ ꠖꠟꠣꠖꠟꠤ ꠟꠣꠉꠤꠉꠦꠟꠦ, ꠁ ꠖꠦꠡ ꠔ ꠛꠤꠘꠣꠡ ꠅꠁꠎꠣꠄ। ꠅꠃ ꠟꠣꠈꠣꠘ ꠇꠥꠘꠥ ꠙꠞꠤꠛꠣꠞꠞ ꠝꠣꠎꠦ ꠛꠣ ꠇꠥꠘꠥ ꠐꠣꠃꠘꠅ ꠎꠦꠛꠟꠣ ꠖꠟꠣꠖꠟꠤ ꠟꠣꠉꠤꠎꠣꠄ, ꠁꠔꠣꠅ ꠀꠞ ꠐꠤꠇꠦ ꠘꠣ।
MAT 12:26 ꠅꠃꠟꠣ ꠡꠄꠔꠣꠘꠦ ꠎꠥꠖꠤ ꠡꠄꠔꠣꠘꠞꠦ ꠈꠦꠖꠣꠁ ꠖꠦꠄ, ꠔꠦ ꠔ ꠔꠣꠞ ꠘꠤꠎꠞ ꠝꠣꠎꠦꠃ ꠖꠟꠣꠖꠟꠤ ꠟꠣꠉꠤꠉꠦꠟ। ꠔꠣꠞ ꠞꠣꠎꠔ꠆ꠔ ꠀꠞ ꠇꠤꠟꠣ ꠐꠤꠇꠛ?
MAT 12:27 ꠀꠝꠤ ꠎꠥꠖꠤ ꠛꠦꠟ-ꠍꠛꠥꠟꠞ ꠛꠟꠦ ꠎꠤꠘ꠆ꠘꠣꠔ ꠍꠣꠠꠣꠁ, ꠔꠦ ꠔꠥꠝꠞꠣꠞ ꠝꠣꠘꠡꠦ ꠇꠣꠞ ꠛꠟꠦ ꠍꠣꠠꠣꠄ? ꠔꠥꠝꠞꠣꠞ ꠝꠣꠔꠞ ꠛꠤꠌꠣꠞ ꠔꠥꠝꠞꠣꠞ ꠝꠣꠘꠡꠦꠃ ꠇꠞꠛꠣ।
MAT 12:28 ꠅꠁꠟꠦ ꠀꠝꠤ ꠎꠥꠖꠤ ꠀꠟ꠆ꠟꠣꠞ ꠞꠥꠢꠥꠞ ꠛꠟꠦ ꠎꠤꠘ꠆ꠘꠣꠔ ꠍꠣꠠꠣꠁ, ꠔꠦ ꠔ ꠀꠟ꠆ꠟꠣꠞ ꠛꠣꠖꠡꠣꠁ ꠔꠥꠝꠞꠣꠞ ꠗꠣꠞꠅ ꠀꠁꠌ꠆ꠍꠦ।
MAT 12:29 “ꠇꠥꠘꠥ ꠛꠟꠀꠟꠣ ꠝꠣꠘꠡꠞ ꠛꠣꠠꠤꠔ ꠟꠥꠐ-ꠔꠞꠣꠎ ꠇꠞꠣꠔ ꠀꠁꠀ, ꠙꠄꠟꠣ ꠛꠟꠀꠟꠣ ꠎꠘꠞꠦ ꠘꠣ ꠛꠣꠘ꠆ꠖꠤꠟꠦ, ꠇꠦꠝꠘꠦ ꠟꠥꠐ-ꠔꠞꠣꠎ ꠇꠞꠛ? ꠅꠁꠟꠦ ꠔꠣꠞꠦ ꠛꠣꠘ꠆ꠖꠤꠀ ꠢꠣꠞꠟꠦ ꠟꠥꠐ-ꠙꠣꠐ ꠇꠞꠔ ꠙꠣꠞꠛ।
MAT 12:30 “ꠇꠦꠃ ꠎꠥꠖꠤ ꠀꠝꠣꠞ ꠙꠇ꠆ꠇꠦ ꠘꠣ ꠕꠣꠇꠦ, ꠢꠦ ꠔ ꠀꠝꠣꠞ ꠛꠤꠙꠇ꠆ꠇꠦ। ꠎꠦ ꠎꠘꠦ ꠀꠝꠣꠞ ꠟꠉꠦ ꠔꠥꠇꠣꠄ ꠘꠣ, ꠢꠦ ꠔ ꠍꠤꠔ꠆ꠞꠣꠄ।
MAT 12:31 ꠀꠝꠤ ꠔꠥꠝꠞꠣꠞꠦ ꠇꠁꠞꠣꠝ, ꠝꠣꠘꠡꠞ ꠔꠣꠝꠣꠝ ꠘꠝꠥꠘꠣꠞ ꠉꠥꠘꠣ ꠀꠞ ꠇꠥꠚꠥꠞꠤꠞ ꠝꠣꠚꠤ ꠀꠍꠦ, ꠅꠁꠟꠦ ꠙꠣꠇ ꠞꠥꠢꠥꠞ ꠛꠦꠙꠣꠞꠦ ꠇꠥꠚꠥꠞꠤ ꠇꠞꠟꠦ, ꠁ ꠇꠥꠚꠥꠞꠤꠞ ꠇꠥꠘꠥ ꠝꠣꠚꠤ ꠝꠤꠟꠔ ꠘꠣꠄ।
MAT 12:32 ꠀꠝꠤ ꠛꠤꠘ-ꠀꠖꠝꠞ ꠛꠤꠞꠥꠖ꠆ꠖꠦ ꠇꠦꠃ ꠇꠥꠘ꠆ꠔꠣ ꠝꠣꠔꠤꠟꠦꠅ ꠢꠦ ꠝꠣꠚꠤ ꠙꠣꠁꠛ, ꠅꠁꠟꠦ ꠙꠣꠇ ꠞꠥꠢꠥꠞ ꠛꠤꠞꠥꠖ꠆ꠖꠦ ꠝꠣꠔꠤꠟꠦ ꠔꠣꠞ ꠇꠥꠘꠥ ꠝꠣꠚꠤ ꠘꠣꠁ, ꠁ ꠎꠤꠘ꠆ꠖꠦꠉꠤꠔꠅ ꠘꠣꠁ, ꠀꠈꠦꠞꠅ-ꠅ ꠘꠣꠁ।
MAT 12:33 “ꠝꠘꠅ ꠞꠣꠈꠛꠣ, ꠉꠣꠍ ꠜꠣꠟꠣ ꠅꠁꠟꠦ ꠔꠣꠞ ꠚꠟꠅ ꠜꠣꠟꠣ ꠅꠄ, ꠀꠞ ꠉꠣꠍ ꠛꠥꠞꠣ ꠅꠁꠟꠦ ꠔꠣꠞ ꠚꠟꠅ ꠛꠥꠞꠣ ꠅꠄ। ꠚꠟ ꠖꠤꠀꠃ ꠉꠣꠍ ꠌꠤꠘꠣ ꠎꠣꠄ।
MAT 12:34 ꠅ ꠢꠣꠚꠞ ꠛꠣꠁꠌ꠆ꠌꠣꠁꠘ, ꠔꠥꠝꠞꠣ ꠘꠤꠎꠦꠃ ꠔ ꠈꠣꠞꠣꠙ, ꠔꠦ ꠔꠥꠝꠞꠣꠞ ꠝꠥꠈ ꠕꠘꠦ ꠜꠣꠟꠣ ꠛꠥꠟꠤ ꠇꠦꠝꠘꠦ ꠛꠣꠞ ꠅꠁꠛ? ꠝꠣꠘꠡꠞ ꠖꠤꠟ ꠎꠦꠔꠣꠖꠤ ꠜꠞꠣ, ꠝꠥꠈ ꠕꠣꠇꠤ ꠔ ꠅꠔꠣꠃ ꠛꠣꠞꠅꠄ।
MAT 12:35 ꠜꠣꠟꠣ ꠝꠣꠘꠡꠞ ꠖꠤꠟꠞ ꠜꠤꠔꠞꠞ ꠜꠣꠟꠣꠁ ꠕꠘꠦ ꠜꠣꠟꠣ ꠛꠥꠟꠤ ꠛꠣꠞꠅꠄ, ꠀꠞ ꠛꠣꠖ ꠝꠣꠘꠡꠞ ꠖꠤꠟꠞ ꠛꠥꠞꠣꠁ ꠕꠘꠦ ꠛꠣꠖ ꠛꠥꠟꠤ ꠛꠣꠞꠅꠄ।
MAT 12:36 ꠅꠁꠟꠦ ꠀꠝꠤ ꠔꠥꠝꠞꠣꠞꠦ ꠇꠁꠞꠣꠝ, ꠎꠦ ꠝꠣꠘꠡꠦ ꠀꠎꠦ-ꠛꠣꠎꠦ ꠛꠦꠞ-ꠛꠦꠞꠤ ꠇꠞꠦ, ꠢꠣꠡꠞꠞ ꠝꠄꠖꠣꠘꠅ ꠔꠣꠞ ꠙꠞꠔꠦꠇ ꠝꠣꠔꠞ ꠢꠤꠡꠣꠛ ꠖꠤꠔꠦ ꠅꠁꠛ।
MAT 12:37 ꠔꠥꠝꠣꠞ ꠎꠛꠣꠘꠦꠃ ꠔꠥꠝꠣꠞꠦ ꠖꠥꠡꠤ ꠛꠣꠘꠣꠁꠛ, ꠀꠞ ꠅꠃ ꠎꠛꠣꠘꠦꠃ ꠔꠥꠝꠣꠞꠦ ꠘꠤꠞ꠆ꠖꠥꠡꠤꠅ ꠛꠣꠘꠣꠁꠛ।”
MAT 12:38 ꠛꠣꠖꠦ ꠇꠄꠎꠘ ꠝꠃꠟꠣꠘꠣ ꠀꠞ ꠚꠞꠤꠡꠤꠄ ꠁꠍꠣꠞꠦ ꠇꠁꠟꠣ, “ꠢꠥꠎꠥꠞ, ꠀꠝꠞꠣ ꠀꠙꠘꠣꠞ ꠄꠇꠈꠣꠘ ꠇꠦꠞꠣꠝꠔꠤ ꠖꠦꠈꠔꠣꠝ ꠌꠣꠁ।”
MAT 12:39 ꠁꠍꠣꠄ ꠎꠥꠀꠙ ꠖꠤꠟꠣ, “ꠁ ꠎꠝꠣꠘꠣꠞ ꠘꠣꠚꠞꠝꠣꠘ ꠀꠞ ꠛꠦꠁꠝꠣꠘ ꠅꠇꠟꠦ ꠈꠣꠟꠤ ꠇꠦꠞꠣꠝꠔꠤ ꠖꠦꠈꠔꠣ ꠌꠣꠁꠘ, ꠅꠁꠟꠦ ꠁꠃꠘꠥꠍ ꠘꠛꠤꠞ ꠇꠦꠞꠣꠝꠔꠤ ꠍꠣꠠꠣ ꠖꠥꠍꠞꠣ ꠇꠥꠘꠥ ꠇꠦꠞꠣꠝꠔꠤ ꠔꠣꠞꠣꠞꠦ ꠖꠦꠈꠣꠁꠟ ꠅꠁꠔ ꠘꠣꠄ।
MAT 12:40 ꠁꠃꠘꠥꠍ ꠘꠛꠤ ꠎꠦꠟꠣ ꠝꠣꠍꠞ ꠙꠦꠐꠅ ꠔꠤꠘ ꠖꠤꠘ, ꠔꠤꠘ ꠞꠣꠁꠔ ꠀꠍꠟꠣ, ꠀꠝꠤ ꠛꠤꠘ-ꠀꠖꠝꠅ ꠅꠃꠟꠣ ꠔꠤꠘ ꠖꠤꠘ, ꠔꠤꠘ ꠞꠣꠁꠔ ꠝꠣꠐꠤꠞ ꠔꠟꠦ ꠞꠁꠝꠥ।
MAT 12:41 ꠇꠤꠀꠝꠔꠞ ꠖꠤꠘ ꠢꠃ ꠘꠤꠘꠜ ꠐꠣꠃꠘꠞ ꠝꠥꠞ꠆ꠖꠣ ꠅꠇꠟ ꠃꠑꠤꠀ ꠢꠣꠞꠤ, ꠁ ꠎꠝꠣꠘꠣꠞ ꠝꠣꠘꠡꠞ ꠖꠥꠡ ꠎꠣꠁꠞ ꠇꠞꠛꠣ। ꠇꠣꠞꠘ ꠁꠃꠘꠥꠍ ꠘꠛꠤꠞ ꠔꠛꠟꠤꠉ ꠢꠥꠘꠤꠀ ꠔꠣꠞꠣ ꠔꠃꠛꠣ ꠇꠞꠍꠤꠟꠣ। ꠅꠁꠟꠦ ꠅꠈꠘ ꠔ ꠁꠃꠘꠥꠍ ꠕꠣꠇꠤꠅ ꠀꠞꠅ ꠝꠢꠣꠘ ꠄꠇꠎꠘ ꠁꠘꠅ ꠀꠍꠂꠘ, ꠔꠣ-ꠅ ꠝꠣꠘꠡꠦ ꠔꠃꠛꠣ ꠇꠞꠦꠞ ꠘꠣ।
MAT 12:42 ꠞꠥꠎ ꠇꠤꠀꠝꠔꠞ ꠖꠤꠘ ꠖꠃꠇꠘꠞ ꠖꠦꠡꠞ ꠞꠣꠘꠤ ꠃꠑꠤꠀ ꠀꠁꠀ ꠅꠃ ꠎꠝꠣꠘꠣꠞ ꠝꠣꠘꠡꠞ ꠖꠥꠡ ꠎꠣꠁꠞ ꠇꠞꠛꠣ। ꠇꠣꠞꠘ ꠛꠣꠖꠡꠣ ꠍꠥꠟꠣꠁꠝꠣꠘꠞ ꠀꠈꠟꠞ ꠇꠕꠣ ꠢꠥꠘꠣꠞ ꠈꠤꠀꠟꠦ ꠔꠣꠁꠘ ꠖꠥꠘꠤꠀꠞ ꠢꠦꠡ ꠝꠣꠕꠣ ꠕꠣꠇꠤ ꠀꠁꠍꠟꠣ। ꠅꠁꠟꠦ ꠅꠈꠘ ꠔ ꠍꠥꠟꠣꠁꠝꠣꠘ ꠕꠣꠇꠤꠅ ꠀꠞꠅ ꠝꠢꠣꠘ ꠄꠇꠎꠘ ꠅꠘꠅ ꠀꠍꠂꠘ।
MAT 12:43 “ꠢꠥꠘꠅ, ꠇꠥꠘꠥ ꠜꠥꠔꠦ ꠎꠦꠛꠟꠣ ꠝꠣꠘꠡꠞ ꠟꠉ ꠍꠣꠠꠤꠀ ꠎꠣꠄꠉꠤ, ꠅꠃ ꠡꠝꠄ ꠢꠦ ꠀꠞꠣꠝꠦ ꠕꠣꠇꠣꠞ ꠈꠤꠀꠟꠦ ꠢꠇꠟ ꠢꠥꠇꠘꠣ ꠎꠣꠉꠣꠔ ꠀꠡꠞꠄ ꠔꠥꠇꠣꠄ। ꠅꠁꠟꠦ ꠀꠞꠣꠝꠞ ꠎꠣꠉꠣ ꠘꠣ ꠙꠣꠁꠀ ꠛꠣꠖꠦ ꠇꠄ,
MAT 12:44 ‘ꠗꠥꠞ, ꠀꠝꠣꠞ ꠀꠉꠞ ꠊꠞꠃ ꠜꠣꠟꠣ, ꠎꠦꠉꠥꠞ ꠉꠦꠍ ꠕꠣꠇꠤ ꠀꠁꠍꠤ, ꠅꠉꠥꠞ ꠉꠦꠍꠦꠃ ꠚꠤꠞꠤꠀ ꠎꠣꠁꠉꠤ।’ ꠚꠤꠞꠤꠀ ꠀꠁꠀ ꠖꠦꠈꠦ ꠁ ꠊꠞꠈꠣꠘ ꠈꠣꠟꠤ, ꠍꠣꠚ-ꠍꠚꠣ ꠀꠞ ꠢꠣꠎꠣꠁꠟ-ꠙꠣꠠꠣꠁꠟ।
MAT 12:45 ꠖꠦꠈꠤꠀ ꠢꠦ ꠉꠤꠀ ꠔꠣꠞ ꠕꠘꠦ ꠀꠞꠅ ꠈꠣꠞꠣꠙ ꠡꠣꠔꠉꠥ ꠜꠥꠔ ꠟꠉꠦ ꠟꠁꠀ ꠀꠄ, ꠀꠁꠀ ꠅꠃ ꠊꠞꠅ ꠞꠄ। ꠄꠞꠖꠣꠄ ꠅꠃ ꠝꠣꠘꠡꠞ ꠖꠡꠣ ꠙꠄꠟꠣ ꠕꠣꠇꠤ ꠢꠦꠡꠦ ꠀꠞꠅ ꠛꠦꠡꠤ ꠈꠣꠞꠣꠙ ꠅꠄ। ꠔꠦ ꠁ ꠎꠝꠣꠘꠣꠞ ꠘꠣꠚꠞꠝꠣꠘ ꠅꠇꠟꠞ ꠖꠡꠣꠅ ꠅꠟꠣꠈꠣꠘ ꠅꠁꠛ।”
MAT 12:46 ꠁꠍꠣꠄ ꠎꠦꠛꠟꠣ ꠝꠣꠘꠡꠞ ꠟꠉꠦ ꠝꠣꠔꠤꠞꠣ, ꠅꠃ ꠡꠝꠄ ꠔꠣꠘ ꠝꠣ ꠀꠞ ꠜꠣꠁꠀꠁꠘ ꠛꠣꠞꠦ ꠀꠁꠀ, ꠔꠣꠘ ꠟꠉꠦ ꠖꠦꠈꠣ ꠇꠞꠣꠞ ꠟꠣꠉꠤ ꠛꠣꠞ ꠌꠣꠅꠀꠔ ꠀꠍꠟꠣ।
MAT 12:47 ꠔꠦꠃ ꠄꠇꠎꠘ ꠝꠣꠘꠡꠦ ꠀꠁꠀ ꠔꠣꠘꠞꠦ ꠇꠁꠟ, “ꠢꠥꠎꠥꠞ, ꠀꠙꠘꠣꠞ ꠝꠣ ꠀꠞ ꠜꠣꠁꠀꠁꠘ ꠀꠙꠘꠣꠞ ꠟꠉꠦ ꠝꠣꠔꠣꠞ ꠟꠣꠉꠤ ꠛꠣꠞꠦ ꠃꠛꠣꠁ ꠞꠁꠍꠂꠘ।”
MAT 12:48 ꠁꠈꠣꠘ ꠢꠥꠘꠤꠀ ꠁꠍꠣꠄ ꠔꠣꠞꠦ ꠇꠁꠟꠣ, “ꠀꠝꠣꠞ ꠝꠣ ꠇꠦ, ꠀꠞ ꠀꠝꠣꠞ ꠜꠣꠁꠀꠁꠘꠃ ꠛꠣ ꠇꠦ?”
MAT 12:49 ꠛꠣꠖꠦ ꠔꠣꠘ ꠡꠣꠉꠞꠤꠖ ꠅꠇꠟꠞꠦ ꠖꠦꠈꠣꠁꠀ ꠇꠁꠟꠣ, “ꠄꠞꠣꠃ ꠀꠝꠣꠞ ꠝꠣ ꠀꠞ ꠜꠣꠁꠀꠁꠘ।
MAT 12:50 ꠎꠣꠞꠣ ꠀꠝꠣꠞ ꠛꠦꠢꠦꠡ꠆ꠔꠤ ꠛꠣꠚ ꠀꠟ꠆ꠟꠣ ꠙꠣꠇꠞ ꠝꠞ꠆ꠎꠤ ꠎꠥꠉꠣꠁꠀ ꠌꠟꠂꠘ, ꠔꠣꠞꠣꠃ ꠀꠝꠣꠞ ꠝꠣ ꠀꠞ ꠜꠣꠁ-ꠛꠁꠘ।”
MAT 13:1 ꠢꠎꠞꠔ ꠁꠍꠣ ꠅꠃ ꠖꠤꠘ ꠊꠞ ꠕꠣꠇꠤ ꠛꠣꠞ ꠅꠁꠀ ꠀꠅꠞꠞ ꠙꠣꠞꠅ ꠉꠤꠀ ꠛꠁꠟꠣ।
MAT 13:2 ꠛꠁꠀ ꠢꠣꠞꠟꠦ ꠛꠃꠔ ꠝꠣꠘꠥꠡ ꠔꠣꠘ ꠉꠦꠍꠦ ꠀꠁꠀ ꠜꠤꠠ ꠟꠣꠉꠣꠁ ꠖꠤꠟꠣ, ꠜꠤꠠ ꠖꠦꠈꠤꠀ ꠔꠣꠁꠘ ꠉꠤꠀ ꠄꠇ ꠘꠣꠅꠅ ꠃꠑꠤꠀ ꠛꠁꠟꠣ ꠀꠞ ꠢꠇꠟ ꠝꠣꠘꠥꠡ ꠙꠣꠞꠅ ꠃꠛꠣꠁ ꠞꠁꠟꠣ।
MAT 13:3 ꠅꠃ ꠡꠝꠄ ꠔꠣꠁꠘ ꠇꠤꠌ꠆ꠍꠣ ꠢꠥꠘꠣꠁ ꠢꠥꠘꠣꠁ ꠘꠣꠘꠣꠘ ꠘꠝꠥꠘꠣꠞ ꠔꠣꠟꠤꠝ ꠖꠤꠟꠣ। ꠔꠣꠁꠘ ꠇꠁꠟꠣ, “ꠝꠘꠅ ꠇꠞꠅ, ꠄꠇ ꠉꠤꠞꠡ꠆ꠔꠦ ꠎꠣꠟꠣ ꠛꠣꠁꠘ ꠇꠞꠣꠔ ꠉꠦꠟ।
MAT 13:4 ꠉꠤꠀ ꠛꠣꠁꠘ ꠇꠞꠣꠞ ꠛꠣꠟꠣ ꠇꠤꠍꠥ ꠎꠣꠟꠣ ꠀꠁꠟꠞ ꠝꠣꠎꠦ ꠙꠠꠟ, ꠀꠞ ꠙꠣꠈꠤꠘ꠆ꠔꠦ ꠀꠁꠀ ꠁꠔꠣ ꠈꠣꠁꠟꠤꠟ।
MAT 13:5 ꠔꠣꠞ ꠇꠤꠍꠥ ꠎꠣꠟꠣ ꠢꠥꠇꠘꠣ-ꠡꠇ꠆ꠔ ꠝꠣꠐꠤꠞ ꠃꠙꠞꠦ ꠙꠠꠟ, ꠁ ꠎꠣꠟꠣ ꠚꠥꠐꠤꠀ ꠀꠟꠤ ꠛꠣꠞ ꠅꠁꠟꠦꠅ ꠔꠟꠦ ꠛꠦꠡꠤ ꠝꠣꠐꠤ ꠘꠣ ꠕꠣꠇꠣꠄ, ꠎꠟꠖꠤ ꠛꠣꠠꠤꠟ।
MAT 13:6 ꠛꠣꠖꠦ ꠡꠥꠞꠥꠎ ꠃꠑꠤꠀ ꠢꠣꠞꠟꠦ ꠎꠁꠞ ꠈꠣꠁꠟꠤꠟ, ꠀꠞ ꠔꠟꠞ ꠎꠠꠦ ꠞꠡ ꠘꠣ ꠙꠣꠅꠀꠄ ꠢꠥꠇꠣꠁꠀ ꠝꠞꠤꠉꠦꠟ।
MAT 13:7 ꠇꠤꠍꠥ ꠎꠣꠟꠣ ꠛꠘ-ꠎꠋꠟꠣꠞ ꠝꠣꠎꠦ ꠙꠠꠟ, ꠀꠞ ꠅꠃ ꠛꠘ-ꠎꠋꠟꠣ ꠛꠣꠠꠤꠀ ꠁꠔꠣꠞꠦ ꠎꠣꠔꠤꠀ ꠗꠞꠟ।
MAT 13:8 ꠅꠁꠟꠦ ꠇꠤꠍꠥ ꠎꠣꠟꠣ ꠜꠣꠟꠣ ꠎꠝꠤꠘꠅ ꠙꠠꠟ, ꠁ ꠎꠣꠟꠣꠄ ꠜꠣꠟꠣ ꠗꠣꠘ ꠅꠁꠟ, ꠁꠔꠣꠞ ꠇꠥꠘꠥ ꠍꠠꠣꠄ ꠔꠤꠡ, ꠇꠥꠘꠥ ꠍꠠꠣꠄ ꠡꠣꠁꠐ, ꠇꠥꠘꠥ ꠍꠠꠣꠄ ꠄꠇ-ꠡ ꠉꠥꠘ ꠛꠦꠡꠤ ꠗꠣꠘ ꠗꠞꠟ।”
MAT 13:9 ꠅꠃ ꠇꠤꠌ꠆ꠍꠣ ꠢꠥꠘꠣꠘꠤꠞ ꠛꠣꠖꠦ ꠁꠍꠣꠄ ꠇꠁꠟꠣ, “ꠎꠣꠞ ꠇꠣꠘ ꠀꠍꠦ, ꠢꠦ ꠢꠥꠘꠃꠇ।”
MAT 13:10 ꠛꠣꠖꠦ ꠔꠣꠘ ꠡꠣꠉꠞꠤꠖ ꠅꠇꠟꠦ ꠇꠁꠟꠣ, “ꠀꠙꠘꠦ ꠈꠣꠟꠤ ꠇꠤꠌ꠆ꠍꠣ ꠇꠁꠀ ꠝꠣꠘꠡꠞꠦ ꠔꠣꠟꠤꠝ ꠖꠤꠞꠣ ꠇꠦꠘꠦ?”
MAT 13:11 ꠔꠣꠁꠘ ꠇꠁꠟꠣ, “ꠛꠦꠢꠦꠡ꠆ꠔꠤ ꠛꠣꠖꠡꠣꠁꠞ ꠉꠥꠙꠘ ꠞꠢꠁꠡ꠆ꠡ ꠎꠣꠘꠣꠞ ꠡꠥꠎꠥꠉ ꠔꠥꠝꠞꠣꠞꠦ ꠖꠦꠅꠀ ꠅꠁꠍꠦ, ꠅꠁꠟꠦ ꠛꠣꠇꠤ ꠝꠣꠘꠡꠞ ꠉꠦꠍꠦ ꠁꠔꠣ ꠛꠣꠔꠥꠘꠤ ꠞꠁꠍꠦ।
MAT 13:12 ꠢꠥꠘꠅ, ꠎꠣꠞ ꠀꠍꠦ, ꠔꠣꠞꠦ ꠀꠞꠅ ꠖꠦꠅꠀ ꠅꠁꠛ, ꠔꠣꠞ ꠀꠞꠅ ꠛꠣꠠꠤꠛ। ꠅꠁꠟꠦ ꠎꠣꠞ ꠘꠣꠁ, ꠔꠣꠞ ꠎꠦꠔꠣ ꠀꠍꠦ, ꠅꠔꠣꠅ ꠇꠣꠠꠤꠀ ꠘꠦꠅꠀ ꠅꠁꠛ।
MAT 13:13 ꠄꠞꠟꠣꠉꠤ ꠀꠝꠤ ꠇꠤꠌ꠆ꠍꠣꠞ ꠝꠣꠎꠖꠤ ꠄꠞꠣꠞꠦ ꠔꠣꠟꠤꠝ ꠖꠤꠞꠣꠝ, ꠄꠞꠣ ꠔ ꠖꠦꠈꠤꠀꠅ ꠖꠦꠈꠦ ꠘꠣ, ꠢꠥꠘꠤꠀꠅ ꠢꠥꠘꠦ ꠘꠣ ꠀꠞ ꠇꠥꠘ꠆ꠔꠣ ꠛꠥꠎꠦꠅ ꠘꠣ।
MAT 13:14 ꠄꠞꠣꠞ ꠝꠣꠎꠖꠤꠀꠃ ꠁꠡꠣꠄꠀ ꠘꠛꠤꠞ ꠛꠣꠔꠣꠁꠟ ꠅꠃ ꠀꠄꠀꠔ ꠙꠥꠞꠣ ꠅꠁꠍꠦ, ꠔꠣꠁꠘ ꠇꠁꠍꠟꠣ, ꠔꠥꠝꠞꠣ ꠇꠣꠘꠦ ꠢꠥꠘꠟꠦꠅ ꠇꠥꠘ꠆ꠔꠣ ꠛꠥꠎꠔꠣꠄ ꠘꠣꠄ, ꠌꠃꠈꠦ ꠖꠦꠈꠟꠦꠅ ꠇꠥꠘ꠆ꠔꠣ ꠌꠤꠘꠔꠣꠄ ꠘꠣꠄ।
MAT 13:15 ꠁꠔꠣ ꠝꠣꠘꠡꠞ ꠖꠤꠟ ꠅꠡꠣꠠ ꠅꠁꠉꠦꠍꠦ, ꠔꠣꠞꠣꠞ ꠇꠣꠘꠅ ꠔꠣꠟꠣ ꠟꠣꠉꠤꠉꠦꠍꠦ। ꠔꠣꠞꠣ ꠎꠣꠞꠎꠤꠞ ꠌꠃꠈ ꠝꠥꠎꠤ ꠛꠁꠞꠁꠍꠦ, ꠎꠣꠔꠦ ꠌꠃꠈꠦ ꠘꠣ ꠖꠦꠈꠦ, ꠇꠣꠘꠦ ꠘꠣ ꠢꠥꠘꠦ, ꠖꠤꠟ ꠖꠤꠀ ꠘꠣ ꠛꠥꠎꠦ। ꠇꠤꠎꠣꠘꠥ ꠔꠣꠞꠣ ꠔꠃꠛꠣ ꠇꠞꠤꠀ ꠀꠝꠣꠞ ꠛꠣꠄ ꠚꠤꠞꠤꠎꠣꠁꠘ, ꠀꠞ ꠀꠝꠤ ꠔꠣꠞꠣꠞ ꠡꠤꠚꠣ ꠇꠞꠤꠟꠣꠁ।
MAT 13:16 ꠅꠁꠟꠦ ꠘꠦꠇ-ꠇꠙꠣꠟꠤ ꠔ ꠔꠥꠝꠞꠣ, ꠔꠥꠝꠞꠣꠞ ꠌꠃꠈꠦ ꠖꠦꠈꠦ, ꠀꠞ ꠇꠣꠘꠦ ꠢꠥꠘꠦ।
MAT 13:17 ꠀꠝꠤ ꠔꠥꠝꠞꠣꠞꠦ ꠢꠇ ꠇꠕꠣ ꠇꠁꠞꠣꠝ, ꠔꠥꠝꠞꠣꠞ ꠌꠃꠈꠦ ꠎꠦꠔꠣ ꠖꠦꠈꠞꠣꠄ ꠀꠞ ꠇꠣꠘꠦ ꠎꠦꠔꠣ ꠢꠥꠘꠞꠣꠄ, ꠁꠔꠣ ꠛꠃꠔ ꠘꠛꠤ ꠀꠞ ꠅꠟꠤ-ꠀꠃꠟꠤꠀꠄ ꠖꠦꠈꠣꠞ ꠀꠡꠣ ꠇꠞꠟꠦꠅ ꠖꠦꠈꠣꠞ ꠇꠙꠣꠟ ꠅꠁꠍꠦ ꠘꠣ, ꠀꠞ ꠢꠥꠘꠣꠞ ꠀꠡꠣ ꠇꠞꠟꠦꠅ ꠢꠥꠘꠣꠞ ꠇꠙꠣꠟ ꠅꠁꠍꠦ ꠘꠣ।
MAT 13:18 “ꠅꠈꠘ ꠔꠥꠝꠞꠣꠞꠦ ꠅꠃ ꠉꠤꠞꠡ꠆ꠔꠞ ꠇꠤꠌ꠆ꠍꠣꠞ ꠝꠣꠘꠤ ꠛꠥꠎꠣꠁ ꠖꠤꠞꠣꠝ,
MAT 13:19 ꠢꠥꠘꠅ, ꠀꠁꠟꠞ ꠝꠣꠎꠦ ꠙꠠꠣ ꠎꠣꠟꠣ ꠖꠤꠀ ꠅꠟꠣꠈꠣꠘ ꠝꠣꠘꠡꠞ ꠛꠦꠙꠣꠞꠦ ꠛꠥꠎꠣꠁꠟ ꠅꠁꠍꠦ, ꠎꠦ ꠝꠣꠘꠡꠦ ꠛꠦꠢꠦꠡ꠆ꠔꠤ ꠛꠣꠖꠡꠣꠁꠞ ꠇꠕꠣ ꠢꠥꠘꠤꠀꠅ ꠛꠥꠎꠦ ꠘꠣ, ꠄꠞꠟꠣꠉꠤ ꠁꠛꠟꠤꠍꠦ ꠀꠁꠀ ꠅꠃ ꠎꠘꠞ ꠖꠤꠟꠅ ꠀꠟ꠆ꠟꠣꠞ ꠎꠦ ꠇꠣꠟꠣꠝ ꠛꠣꠁꠘ ꠇꠞꠣ ꠅꠁꠍꠤꠟ, ꠅꠔꠣ ꠇꠣꠠꠤꠀ ꠘꠦꠄꠉꠤ।
MAT 13:20 ꠢꠥꠇꠘꠣ-ꠡꠇ꠆ꠔ ꠝꠣꠐꠤꠞ ꠃꠙꠞꠦ ꠙꠠꠣ ꠎꠣꠟꠣꠖꠤ ꠛꠥꠎꠣꠁꠟ ꠅꠁꠍꠦ, ꠎꠦꠞꠣ ꠁ ꠇꠣꠟꠣꠝ ꠢꠥꠘꠦ ꠀꠞ ꠈꠥꠛ ꠈꠥꠡꠤ ꠅꠁꠀ ꠇꠛꠥꠟ ꠇꠞꠦ,
MAT 13:21 ꠅꠁꠟꠦ ꠔꠣꠞꠣꠞ ꠖꠤꠟꠅ ꠜꠣꠟꠣꠝꠘ꠆ꠔꠦ ꠢꠣꠝꠣꠄ ꠘꠣ, ꠄꠞꠟꠣꠉꠤ ꠁꠔꠣ ꠕꠥꠠꠣ ꠇꠄꠖꠤꠘ ꠞꠄ, ꠛꠣꠖꠦ ꠁ ꠇꠣꠟꠣꠝꠞ ꠟꠣꠉꠤ ꠇꠥꠘꠥ ꠎꠥꠟꠥꠝ-ꠝꠍꠤꠛꠔ ꠀꠁꠟꠦꠃ ꠔꠣꠞꠣ ꠈꠞꠟꠣꠝꠤ ꠎꠣꠄ।
MAT 13:22 ꠛꠘ-ꠎꠋꠟꠣꠞ ꠝꠣꠎꠦ ꠙꠠꠣ ꠎꠣꠟꠣꠖꠤ ꠛꠥꠎꠣꠁꠟ ꠅꠁꠍꠦ, ꠎꠦꠞꠣ ꠁ ꠇꠣꠟꠣꠝ ꠢꠥꠘꠦ, ꠅꠁꠟꠦ ꠖꠥꠘꠤꠀꠛꠤ ꠌꠤꠘ꠆ꠔꠣ-ꠜꠣꠛꠘꠣ ꠀꠞ ꠗꠘ-ꠍꠣꠝꠣꠘꠣꠞ ꠝꠣꠄꠀꠄ ꠁ ꠇꠣꠟꠣꠝꠞꠦ ꠎꠣꠔꠤꠀ ꠗꠞꠤꠟꠣꠄ, ꠄꠞꠖꠣꠄ ꠇꠣꠟꠣꠝꠦ ꠇꠥꠘꠥ ꠚꠣꠄꠖꠣ ꠅꠄ ꠘꠣ।
MAT 13:23 ꠀꠞ ꠜꠣꠟꠣ ꠎꠝꠤꠘꠅ ꠙꠠꠣ ꠎꠣꠟꠣꠖꠤ ꠛꠥꠎꠣꠁꠟ ꠅꠁꠍꠦ, ꠎꠦꠞꠣ ꠁ ꠇꠣꠟꠣꠝ ꠢꠥꠘꠦ, ꠢꠥꠘꠤꠀ ꠛꠥꠎꠦ ꠀꠞ ꠀꠝꠟ ꠇꠞꠦ। ꠇꠦꠃ ꠎꠤꠘ꠆ꠖꠦꠉꠤꠔ ꠔꠤꠡ ꠉꠥꠘ, ꠇꠦꠃ ꠡꠣꠁꠐ ꠉꠥꠘ, ꠇꠦꠃ ꠄꠇ-ꠡ ꠉꠥꠘ ꠛꠦꠡꠤ ꠚꠟ ꠖꠦꠄ।”
MAT 13:24 ꠛꠣꠖꠦ ꠁꠍꠣꠄ ꠔꠣꠟꠤꠝ ꠖꠤꠛꠣꠞ ꠟꠣꠉꠤ ꠀꠞꠇ ꠇꠤꠌ꠆ꠍꠣ ꠢꠥꠘꠣꠁꠟꠣ। ꠇꠁꠟꠣ, “ꠛꠦꠢꠦꠡ꠆ꠔꠤ ꠛꠣꠖꠡꠣꠁ ꠅꠟꠣ ꠄꠇ ꠉꠤꠞꠡ꠆ꠔꠞ ꠟꠣꠈꠣꠘ, ꠎꠦꠁꠘ ꠘꠤꠎꠞ ꠎꠝꠤꠘꠅ ꠜꠣꠟꠣ ꠗꠣꠘꠞ ꠎꠣꠟꠣ ꠛꠣꠁꠘ ꠖꠤꠟꠣ।
MAT 13:25 ꠛꠣꠖꠦ ꠞꠣꠁꠔ ꠅꠁꠀ ꠢꠣꠞꠟꠦ ꠎꠦꠛꠟꠣ ꠢꠇꠟ ꠝꠣꠘꠥꠡ ꠊꠥꠝꠣꠁ ꠉꠦꠍꠂꠘ, ꠅꠃ ꠡꠝꠄ ꠔꠣꠘ ꠄꠇ ꠖꠥꠡꠝꠘꠦ ꠀꠁꠀ ꠛꠣꠁꠘ ꠖꠦꠅꠀ ꠅꠃ ꠎꠝꠤꠘꠞ ꠝꠣꠎꠦ ꠚꠥꠚꠞꠣ ꠉꠣꠍꠞ ꠛꠤꠌꠤ ꠍꠤꠐꠣꠁꠀ ꠉꠦꠟꠉꠤ।
MAT 13:26 ꠢꠦꠡꠦ ꠗꠣꠘꠞ ꠉꠣꠍ ꠎꠦꠛꠟꠣ ꠛꠠ ꠅꠁꠀ ꠍꠠꠣ ꠍꠣꠠꠟ, ꠅꠃ ꠡꠝꠄ ꠄꠞꠝꠣꠎꠦ ꠚꠥꠚꠞꠣ ꠉꠣꠍꠅ ꠖꠦꠈꠣ ꠉꠦꠟ।
MAT 13:27 ꠁꠔꠣ ꠖꠦꠈꠤꠀ ꠛꠣꠠꠤꠞ ꠌꠣꠇꠞ ꠅꠇꠟꠦ ꠔꠣꠞꠣꠞ ꠝꠥꠘꠤꠛꠞꠦ ꠇꠁꠟꠣ, ‘ꠀꠙꠘꠦ ꠎꠝꠤꠘꠅ ꠈꠣꠟꠤ ꠜꠣꠟꠣ ꠗꠣꠘ ꠛꠣꠁꠘ ꠖꠤꠍꠟꠣ ꠘꠣ ꠘꠤ? ꠅꠈꠘ ꠚꠥꠚꠞꠣ ꠉꠣꠍ ꠅꠁꠟ ꠇꠥꠀꠁ ꠕꠣꠇꠤ?’
MAT 13:28 “ꠔꠣꠁꠘ ꠇꠁꠟꠣ, ‘ꠇꠥꠘꠥ ꠖꠥꠡꠝꠘꠦ ꠁ ꠇꠣꠝ ꠇꠞꠍꠦ।’ ꠌꠣꠇꠞ ꠅꠇꠟꠦ ꠔꠣꠘꠞꠦ ꠎꠤꠇꠣꠁꠟ, ‘ꠔꠦ ꠀꠝꠞꠣ ꠉꠤꠀ ꠅꠃ ꠚꠥꠚꠞꠣ ꠉꠣꠍ ꠍꠣꠚ ꠇꠞꠤꠟꠔꠣꠝ ꠘꠤ?’
MAT 13:29 ꠝꠥꠘꠤꠛꠦ ꠇꠁꠟꠣ, ‘ꠘꠣ, ꠘꠣ, ꠔꠥꠝꠞꠣ ꠚꠥꠚꠞꠣ ꠉꠣꠍ ꠍꠣꠚ ꠇꠞꠣꠔ ꠉꠤꠀ, ꠗꠣꠘꠞ ꠉꠣꠍꠅ ꠔꠥꠟꠤꠟꠤꠛꠣꠄ।
MAT 13:30 ꠄꠞꠟꠣꠉꠤ ꠗꠣꠘ ꠖꠣꠅꠀꠞ ꠀꠉ ꠙꠞ꠆ꠎꠘ꠆ꠔ ꠁꠔꠣ ꠕꠣꠇꠃꠇ। ꠛꠣꠖꠦ ꠖꠣꠅꠀꠞ ꠛꠣꠟꠣ ꠀꠝꠤ ꠝꠣꠘꠡꠞꠦ ꠇꠁꠝꠥ, ꠙꠄꠟꠣ ꠢꠇꠟ ꠚꠥꠚꠞꠣ ꠉꠣꠍ ꠔꠥꠟꠔꠣ, ꠀꠞ ꠖꠣꠞꠥ ꠎꠣꠟꠣꠘꠤꠞ ꠟꠣꠉꠤ ꠀꠐꠤ ꠛꠣꠘ꠆ꠖꠤꠔꠣ, ꠛꠣꠖꠦ ꠗꠣꠘ ꠖꠣꠁꠀ ꠀꠝꠣꠞ ꠃꠉꠣꠞꠅ ꠔꠥꠟꠛꠣ।’ ”
MAT 13:31 ꠢꠎꠞꠔ ꠁꠍꠣꠄ ꠀꠞꠇ ꠇꠤꠌ꠆ꠍꠣ ꠢꠥꠘꠣꠁꠟꠣ। ꠇꠁꠟꠣ, “ꠛꠦꠢꠦꠡ꠆ꠔꠤ ꠛꠣꠖꠡꠣꠁ ꠅꠁꠟ ꠄꠉꠥ ꠒꠦꠋꠉꠣ ꠛꠤꠌꠤꠞ ꠟꠣꠈꠣꠘ। ꠄꠇꠎꠘ ꠝꠣꠘꠡꠦ ꠄꠉꠥ ꠒꠦꠋꠉꠣꠞ ꠛꠤꠌꠤ ꠔꠣꠞ ꠎꠝꠤꠘꠅ ꠛꠣꠁꠘ ꠖꠤꠟ।
MAT 13:32 ꠁ ꠛꠤꠌꠤ ꠔ ꠢꠇꠟ ꠎꠣꠔꠞ ꠛꠤꠌꠤ ꠕꠣꠇꠤ ꠢꠥꠞꠥ। ꠅꠁꠟꠦ ꠛꠣꠁꠘ ꠖꠦꠅꠀꠞ ꠛꠣꠖꠦ ꠁ ꠉꠣꠍ ꠢꠇ꠆ꠇꠟ ꠎꠣꠔꠞ ꠢꠣꠉ-ꠔꠞꠇꠣꠞꠤ ꠕꠣꠇꠤ ꠛꠠ ꠅꠄ, ꠀꠞ ꠙꠣꠈꠤꠘ꠆ꠔꠦ ꠀꠁꠀ ꠔꠣꠞ ꠒꠣꠟ-ꠙꠣꠟꠣꠔ ꠛꠣꠖꠣ ꠛꠣꠘꠣꠄ।”
MAT 13:33 ꠄꠞꠛꠣꠖꠦ ꠀꠞꠇ ꠇꠤꠌ꠆ꠍꠣꠞ ꠝꠣꠎꠦ ꠇꠁꠟꠣ, “ꠛꠦꠢꠦꠡ꠆ꠔꠤ ꠛꠣꠖꠡꠣꠁ ꠅꠁꠟ ꠈꠣꠝꠤꠞꠞ ꠟꠣꠈꠣꠘ। ꠄꠇꠎꠘ ꠛꠦꠐꠤ ꠝꠣꠘꠡꠦ ꠔꠤꠘ ꠛꠡ꠆ꠔꠣ ꠝꠄꠖꠣꠞ ꠝꠣꠎꠦ ꠕꠥꠠꠣ ꠈꠣꠝꠤꠞ ꠝꠤꠡꠣꠁꠟ। ꠈꠣꠝꠤꠞꠞ ꠚꠣꠚꠦ ꠢꠇꠟ ꠝꠄꠖꠣ ꠚꠥꠟꠤꠀ ꠃꠑꠟ।”
MAT 13:34 ꠢꠎꠞꠔ ꠁꠍꠣꠄ ꠇꠤꠌ꠆ꠍꠣ ꠢꠥꠘꠣꠁ ꠢꠥꠘꠣꠁ ꠢꠇꠟ ꠘꠝꠥꠘꠣꠞ ꠔꠣꠟꠤꠝ ꠖꠤꠟꠣ। ꠇꠤꠌ꠆ꠍꠣ ꠍꠣꠠꠣ ꠔꠣꠁꠘ ꠇꠥꠘꠥ ꠔꠣꠟꠤꠝ ꠖꠤꠟꠣ ꠘꠣ।
MAT 13:35 ꠁꠔꠣ ꠢꠇ꠆ꠇꠟꠔꠣ ꠅꠁꠟ, ꠎꠣꠔꠦ ꠘꠛꠤꠞ ꠝꠣꠎꠖꠤ ꠎꠦꠔꠣ ꠛꠣꠔꠣꠁꠟ ꠅꠁꠍꠤꠟ, ꠅꠔꠣ ꠅꠈꠘ ꠙꠥꠞꠣ ꠅꠄ, ꠔꠣꠟꠤꠝꠦ ꠜꠞꠣ ꠇꠤꠌ꠆ꠍꠣ ꠢꠥꠘꠣꠁ ꠢꠥꠘꠣꠁ ꠀꠝꠤ ꠝꠣꠔꠤꠝꠥ, ꠖꠥꠘꠤꠀꠞ ꠙꠄꠟꠣ ꠕꠣꠇꠤ ꠎꠔꠔꠣ ꠛꠣꠔꠥꠘꠤ ꠀꠍꠤꠟ, ꠅꠔꠣ ꠅꠈꠘ ꠈꠥꠟꠝꠥ।
MAT 13:36 ꠛꠣꠖꠦ ꠁꠍꠣꠄ ꠝꠣꠘꠡꠞꠦ ꠛꠤꠖꠣꠄ ꠖꠤꠀ ꠊꠞꠅ ꠢꠣꠝꠣꠁꠟꠣ। ꠅꠃ ꠡꠝꠄ ꠔꠣꠘ ꠡꠣꠉꠞꠤꠖ ꠅꠇꠟꠦ ꠀꠁꠀ ꠇꠁꠟꠣ, “ꠢꠥꠎꠥꠞ, ꠚꠥꠚꠞꠣ ꠉꠣꠍꠞ ꠇꠤꠌ꠆ꠍꠣꠞ ꠝꠣꠘꠤꠈꠣꠘ ꠀꠝꠞꠣꠞꠦ ꠛꠥꠎꠣꠁ ꠖꠦꠃꠇ꠆ꠇꠣ।”
MAT 13:37 ꠔꠣꠁꠘ ꠇꠁꠟꠣ, “ꠜꠣꠟꠣ ꠗꠣꠘꠞ ꠎꠣꠟꠣ ꠎꠦꠁꠘ ꠛꠣꠁꠘ ꠇꠞꠂꠘ, ꠄꠁꠘ ꠅꠁꠟꠣꠝ ꠀꠝꠤ ꠛꠤꠘ-ꠀꠖꠝ।
MAT 13:38 ꠎꠝꠤꠘ ꠅꠁꠟ ꠅꠃ ꠎꠉꠔ, ꠀꠞ ꠛꠦꠢꠦꠡ꠆ꠔꠤ ꠛꠣꠖꠡꠣꠁꠞ ꠝꠣꠘꠥꠡ ꠅꠁꠟꠣ ꠜꠣꠟꠣ ꠛꠤꠌ। ꠁꠛꠟꠤꠍꠞ ꠈꠣꠘ꠆ꠖꠣꠘ ꠅꠁꠟ ꠅꠃ ꠚꠥꠚꠞꠣ ꠉꠣꠍ।
MAT 13:39 ꠎꠦ ꠖꠥꠡꠝꠘꠦ ꠚꠥꠚꠞꠣ ꠉꠣꠍ ꠛꠣꠁꠘ ꠖꠤꠍꠤꠟ, ꠢꠦ ꠅꠁꠟ ꠁꠛꠟꠤꠍ। ꠗꠣꠘ ꠖꠣꠅꠀꠞ ꠡꠝꠄ ꠅꠁꠟ ꠇꠤꠀꠝꠔ, ꠀꠞ ꠖꠣꠅꠞꠣ ꠅꠇꠟ ꠅꠁꠟꠣ ꠀꠟ꠆ꠟꠣꠞ ꠚꠤꠞꠤꠡ꠆ꠔꠣ।
MAT 13:40 ꠚꠥꠚꠞꠣ ꠉꠣꠍ ꠀꠐꠤ ꠛꠣꠘ꠆ꠖꠤꠀ ꠎꠦꠟꠣ ꠖꠣꠞꠥ ꠎꠣꠟꠣꠘꠤ ꠅꠄ, ꠇꠤꠀꠝꠔꠞ ꠡꠝꠄ ꠑꠤꠇ ꠅꠟꠣꠃ ꠅꠁꠛ।
MAT 13:41 ꠛꠤꠘ-ꠀꠖꠝꠦ ꠔꠣꠘ ꠚꠤꠞꠤꠡ꠆ꠔꠣ ꠅꠇꠟ ꠙꠣꠑꠣꠁꠛꠣ। ꠎꠦ ꠝꠣꠘꠡꠦ ꠘꠤꠎꠦ ꠉꠥꠘꠣ ꠇꠞꠦ ꠀꠞ ꠀꠞꠇ ꠎꠘꠞꠦ ꠉꠥꠘꠣꠞ ꠙꠕꠦ ꠐꠣꠘꠦ, ꠔꠣꠞꠣ ꠢꠇꠟꠞꠦ ꠚꠤꠞꠤꠡ꠆ꠔꠣ ꠅꠇꠟꠦ ꠛꠤꠘ-ꠀꠖꠝꠞ ꠛꠣꠖꠡꠣꠁꠞ ꠝꠣꠎ ꠕꠣꠇꠤ ꠄꠇꠈꠣꠘꠅ ꠖꠟꠣ ꠇꠞꠤꠀ,
MAT 13:42 ꠖꠥꠎꠈꠞ ꠀꠉꠥꠘꠤꠔ ꠚꠣꠟꠣꠁꠛꠣ। ꠢꠤꠘꠅ ꠝꠣꠘꠡꠦ ꠇꠣꠘ꠆ꠖꠣ-ꠇꠣꠐꠤ ꠇꠞꠛꠣ ꠀꠞ ꠎꠣꠟꠣ-ꠎꠘꠔ꠆ꠞꠘꠣꠄ ꠖꠣꠔ ꠇꠤꠠꠤꠝꠤꠠꠤ ꠖꠤꠛꠣ।
MAT 13:43 ꠢꠤ ꠡꠝꠄ ꠀꠟ꠆ꠟꠣꠞꠣꠁꠀ ꠝꠣꠘꠡꠦ ꠔꠣꠞꠣꠞ ꠛꠦꠢꠦꠡ꠆ꠔꠤ ꠛꠣꠚ ꠀꠟ꠆ꠟꠣ ꠙꠣꠇꠞ ꠛꠣꠖꠡꠣꠁꠔ ꠘꠥꠞꠣꠘꠤ ꠍꠥꠞꠔꠦ ꠡꠥꠞꠥꠎꠞ ꠟꠣꠈꠣꠘ ꠏꠤꠟꠝꠤꠟ ꠇꠞꠛꠣ। ꠢꠥꠘꠣꠞ ꠟꠣꠈ ꠇꠣꠘ ꠎꠣꠞ ꠀꠍꠦ, ꠢꠦ ꠢꠥꠘꠃꠇ।
MAT 13:44 “ꠢꠥꠘꠅ, ꠛꠦꠢꠦꠡ꠆ꠔꠤ ꠛꠣꠖꠡꠣꠁ ꠅꠁꠟ, ꠝꠣꠐꠤꠞ ꠔꠟꠦ ꠟꠥꠇꠣꠁꠟ ꠇꠥꠘꠥ ꠗꠘꠞ ꠟꠣꠈꠣꠘ। ꠇꠥꠘꠥ ꠝꠣꠘꠡꠦ ꠅꠃ ꠗꠘ ꠔꠥꠇꠣꠁꠀ ꠙꠣꠁꠟ, ꠙꠣꠁꠀ ꠢꠤꠞꠛꠣꠞ ꠉꠣꠠꠤꠀ ꠕꠁ ꠖꠤꠟ। ꠁ ꠗꠘ ꠙꠣꠁꠀ ꠈꠥꠡꠤ ꠅꠁꠀ ꠢꠦ ꠔꠣꠞ ꠢꠇꠟ ꠍꠣꠝꠣꠘꠣ ꠛꠦꠌꠤꠀ, ꠅꠃ ꠎꠝꠤꠘꠈꠣꠘ ꠈꠞꠤꠖ ꠇꠞꠟ।
MAT 13:45 “ꠢꠤꠞꠛꠣꠞ, ꠛꠦꠢꠦꠡ꠆ꠔꠤ ꠛꠣꠖꠡꠣꠁ ꠅꠁꠟ ꠅꠟꠣ ꠄꠇ ꠡꠖꠣꠉꠞꠞ ꠟꠣꠈꠣꠘ, ꠁ ꠡꠖꠣꠉꠞꠦ ꠈꠣꠐꠤ ꠝꠘꠤ-ꠝꠥꠇ꠆ꠔꠣ ꠔꠥꠇꠣꠘꠤꠔ ꠀꠍꠤꠟ।
MAT 13:46 ꠢꠦ ꠄꠇꠐꠣ ꠖꠣꠝꠤ ꠝꠥꠇ꠆ꠔꠣꠞ ꠈꠛꠞ ꠙꠣꠁꠀ, ꠔꠣꠞ ꠢꠇ꠆ꠇꠟꠔꠣ ꠛꠦꠌꠤꠀ ꠅꠃ ꠝꠥꠇ꠆ꠔꠣ ꠈꠞꠤꠖ ꠇꠞꠟ।
MAT 13:47 “ꠛꠣ ꠛꠦꠢꠦꠡ꠆ꠔꠤ ꠛꠣꠖꠡꠣꠁ ꠅꠟꠣ ꠄꠇ ꠎꠣꠟꠞ ꠟꠣꠈꠣꠘ, ꠁ ꠎꠣꠟꠖꠤ ꠀꠅꠞꠅ ꠐꠣꠘ ꠖꠤꠟꠦ ꠄꠞ ꠜꠤꠔꠞꠦ ꠢꠇ꠆ꠇꠟ ꠎꠣꠔꠞ ꠝꠣꠍ ꠢꠣꠝꠣꠁꠟ।
MAT 13:48 ꠝꠣꠍꠦ ꠎꠣꠟ ꠜꠞꠤꠉꠦꠟꠦ ꠎꠣꠟꠥꠀ ꠅꠇꠟꠦ ꠁꠈꠣꠘꠞꠦ ꠐꠣꠘꠤꠀ ꠙꠣꠞꠅ ꠔꠥꠟꠟ। ꠛꠣꠖꠦ ꠔꠣꠞꠣ ꠜꠣꠟꠣ ꠜꠣꠟꠣ ꠝꠣꠍ ꠛꠣꠍꠤꠀ ꠌꠣꠋꠉꠣꠔ ꠕꠁꠟ ꠀꠞ ꠛꠣꠖ ꠉꠥꠁꠘ ꠚꠣꠟꠣꠁ ꠖꠤꠟ।
MAT 13:49 ꠔꠦ ꠢꠣꠡꠞꠞ ꠝꠄꠖꠣꠘꠅ ꠅꠃ ꠢꠣꠟꠔ ꠅꠁꠛ। ꠚꠤꠞꠤꠡ꠆ꠔꠣ ꠅꠇꠟꠦ ꠀꠁꠀ ꠀꠟ꠆ꠟꠣꠞꠣꠁꠀ ꠝꠣꠘꠡꠞ ꠖꠟ ꠕꠣꠇꠤ, ꠘꠣꠚꠞꠝꠣꠘ ꠅꠇꠟꠞꠦ ꠀꠟꠉꠣꠁꠀ ꠖꠥꠎꠈꠞ ꠀꠉꠥꠘꠤꠔ ꠚꠣꠟꠣꠁꠛꠣ।
MAT 13:50 ꠢꠤꠘꠅ ꠔꠣꠞꠣ ꠇꠣꠘ꠆ꠖꠣ-ꠇꠣꠐꠤ ꠇꠞꠛꠣ ꠀꠞ ꠎꠣꠟꠣ-ꠎꠘꠔ꠆ꠞꠘꠣꠄ ꠖꠣꠔ ꠇꠤꠠꠤꠝꠤꠠꠤ ꠖꠤꠛꠣ।”
MAT 13:51 ꠄꠞꠛꠣꠖꠦ ꠁꠍꠣꠄ ꠔꠣꠘ ꠡꠣꠉꠞꠤꠖ ꠅꠇꠟꠞꠦ ꠎꠤꠇꠣꠁꠟꠣ, “ꠔꠥꠝꠞꠣ ꠁꠔꠣ ꠢꠇꠟꠔꠣ ꠛꠥꠎꠍ ꠘꠤ?” ꠔꠣꠞꠣ ꠇꠁꠟꠣ, “ꠎꠤꠅꠄ, ꠛꠥꠎꠍꠤ।”
MAT 13:52 ꠔꠦꠃ ꠁꠍꠣꠄ ꠔꠣꠞꠣꠞꠦ ꠇꠁꠟꠣ, “ꠎꠦ ꠝꠃꠟꠣꠘꠣ ꠅꠇꠟꠦ ꠛꠦꠢꠦꠡ꠆ꠔꠤ ꠛꠣꠖꠡꠣꠁꠞ ꠔꠣꠟꠤꠝ ꠙꠣꠁꠍꠂꠘ, ꠔꠣꠞꠣ ꠅꠟꠣ ꠄꠇ ꠉꠤꠞꠡ꠆ꠔꠞ ꠟꠣꠈꠣꠘ, ꠎꠦ ꠉꠤꠞꠡ꠆ꠔꠦ ꠔꠣꠘ ꠡꠘ꠆ꠖꠥꠇ ꠕꠣꠇꠤ ꠘꠄꠀ ꠀꠞ ꠙꠥꠞꠣꠘꠣ ꠝꠣꠟ ꠛꠣꠞ ꠇꠞꠂꠘ।”
MAT 13:53 ꠢꠎꠞꠔ ꠁꠍꠣꠄ ꠇꠤꠌ꠆ꠍꠣ ꠇꠁꠀ ꠇꠁꠀ ꠔꠣꠟꠤꠝ ꠖꠤꠀ ꠢꠣꠞꠟꠦ ꠁꠘ ꠕꠘꠦ ꠉꠦꠟꠣꠉꠤ।
MAT 13:54 ꠉꠤꠀ ꠔꠣꠘ ꠘꠤꠎꠞ ꠉꠣꠃꠞ ꠝꠍꠤꠖꠅ ꠢꠣꠝꠣꠁꠀ ꠅꠀꠎ-ꠘꠍꠤꠅꠔ ꠇꠞꠟꠣ। ꠔꠣꠘ ꠛꠄꠀꠘ ꠢꠥꠘꠤꠀ ꠝꠣꠘꠡꠦ ꠔꠣꠁꠎ꠆ꠎꠥꠛ ꠅꠁꠀ ꠇꠁꠟꠣ, “ꠁ ꠛꠦꠐꠣꠄ ꠇꠦꠝꠘꠦ ꠅꠔ ꠁꠟꠤꠝ ꠀꠞ ꠇꠦꠞꠣꠝꠔꠤ ꠙꠣꠁꠟ?
MAT 13:55 ꠄ ꠇꠤꠔꠣ ꠢꠃ ꠇꠣꠑ ꠝꠦꠡ꠆ꠔꠞꠤꠞ ꠙꠥꠀ ꠘꠣꠄ ꠘꠤ? ꠔꠣꠞ ꠝꠣʼꠞ ꠘꠣꠝ ꠝꠞꠤꠅꠝ ꠘꠣꠄ ꠘꠤ? ꠢꠦ ꠁꠀꠇꠥꠛ, ꠁꠃꠍꠥꠚ, ꠍꠣꠁꠝꠘ ꠀꠞ ꠄꠢꠥꠖꠣꠞ ꠜꠣꠁ ꠘꠣꠄ ꠘꠤ?
MAT 13:56 ꠔꠣꠞ ꠛꠁꠘꠣꠁꠘ ꠔ ꠀꠝꠞꠣꠞ ꠉꠣꠃꠔꠃ ꠞꠁꠞꠣ? ꠔꠦ ꠢꠦ ꠁꠔꠣ ꠁꠟꠤꠝ ꠇꠁ ꠕꠣꠇꠤ ꠙꠣꠁꠟ?”
MAT 13:57 ꠅꠃ ꠟꠣꠈꠣꠘ ꠁꠍꠣꠞꠦ ꠟꠁꠀ ꠝꠣꠘꠡꠞ ꠖꠤꠟꠅ ꠛꠤꠔꠤꠡꠘꠣ ꠀꠁꠟ। ꠅꠃ ꠡꠝꠄ ꠁꠍꠣꠄ ꠔꠣꠞꠣꠞꠦ ꠇꠁꠟꠣ, “ꠘꠤꠎꠞ ꠛꠣꠠꠤ-ꠊꠞ ꠛꠣ ꠉꠣꠃ-ꠖꠦꠡ ꠍꠣꠠꠣ ꠀꠞ ꠢꠇꠟ ꠎꠣꠉꠣꠔꠃ ꠘꠛꠤ ꠅꠇꠟꠦ ꠡꠝ꠆ꠝꠣꠘ ꠙꠣꠁꠘ।”
MAT 13:58 ꠉꠣꠃꠞ ꠝꠣꠘꠡꠞ ꠁꠝꠣꠘ ꠘꠣꠁ ꠖꠦꠈꠤꠀ, ꠔꠣꠁꠘ ꠢꠤꠈꠣꠘꠅ ꠛꠦꠡꠤ ꠇꠦꠞꠣꠝꠔꠤ ꠖꠦꠈꠣꠁꠟꠣ ꠘꠣ।
MAT 14:1 ꠅꠃ ꠡꠝꠄ ꠉꠣꠟꠤꠟ ꠎꠤꠟꠣꠞ ꠞꠣꠎꠣ ꠢꠦꠞꠥꠖꠦ ꠁꠍꠣꠞ ꠛꠦꠙꠣꠞꠦ ꠢꠥꠘꠟꠣ,
MAT 14:2 ꠢꠥꠘꠤꠀ ꠔꠣꠘ ꠃꠎꠤꠞ-ꠘꠣꠎꠤꠞꠞꠦ ꠇꠁꠟꠣ, “ꠄꠁꠘ ꠔ ꠔꠃꠛꠣꠞ ꠉꠥꠍꠟ ꠇꠞꠣꠅꠞꠣ ꠄꠢꠤꠀ। ꠄꠁꠘ ꠝꠞꠣ ꠕꠣꠇꠤ ꠎꠤꠘ꠆ꠖꠣ ꠅꠁꠀ ꠃꠑꠣꠄ ꠅꠃ ꠇꠦꠞꠣꠝꠔꠤ ꠖꠦꠈꠣꠁꠞꠣ।”
MAT 14:3 ꠅꠃ ꠢꠦꠞꠥꠖꠦ ꠔꠣꠞ ꠜꠣꠁ ꠚꠤꠟꠤꠚꠞ ꠛꠃ ꠢꠦꠞꠥꠖꠤꠀꠞꠦ ꠢꠣꠋꠉꠣ ꠇꠞꠍꠤꠟ। ꠔꠣꠁꠞ ꠝꠘ ꠎꠥꠉꠣꠘꠤꠞ ꠟꠣꠉꠤ ꠢꠦ ꠄꠢꠤꠀ ꠘꠛꠤꠞꠦ ꠎꠦꠟꠅ ꠛꠘ꠆ꠖꠤ ꠇꠞꠤꠀ ꠕꠁꠍꠤꠟ,
MAT 14:4 ꠇꠣꠞꠘ ꠄꠢꠤꠀꠄ ꠢꠦꠞꠥꠖꠞꠦ ꠇꠁꠔꠣ, “ꠔꠣꠁꠞꠦ ꠢꠣꠋꠉꠣ ꠇꠞꠣ ꠔ ꠔꠥꠝꠣꠞ ꠑꠤꠇ ꠅꠁꠍꠦ ꠘꠣ।”
MAT 14:5 ꠄꠞꠟꠣꠉꠤ ꠢꠦ ꠄꠢꠤꠀ ꠘꠛꠤꠞꠦ ꠝꠣꠞꠤꠟꠤꠔ ꠌꠣꠁꠟ, ꠅꠁꠟꠦ ꠝꠣꠘꠡꠞ ꠒꠞꠦ ꠝꠣꠞꠔ ꠙꠣꠞꠟ ꠘꠣ, ꠝꠣꠘꠡꠦ ꠎꠣꠘꠔꠣ ꠄꠁꠘ ꠄꠇꠎꠘ ꠘꠛꠤ।
MAT 14:6 ꠛꠣꠖꠦ ꠞꠣꠎꠣ ꠢꠦꠞꠥꠖꠞ ꠎꠘꠝ ꠖꠤꠘꠞ ꠅꠘꠥꠡ꠆ꠑꠣꠘꠅ ꠢꠦꠞꠥꠖꠤꠀꠞ ꠙꠥꠠꠤꠄ ꠘꠣꠌꠤꠀ ꠞꠣꠎꠣꠞꠦ ꠈꠥꠡꠤ ꠇꠞꠟ।
MAT 14:7 ꠄꠞꠖꠣꠄ ꠞꠣꠎꠣꠄ ꠇꠍꠝ ꠈꠣꠁꠀ ꠇꠁꠟ, “ꠅꠃ ꠙꠥꠠꠤꠄ ꠎꠦꠔꠣ ꠌꠣꠁꠛ, ꠅꠔꠣ ꠖꠤꠝꠥ।”
MAT 14:8 ꠙꠥꠠꠤꠄ ꠔꠣꠁꠞ ꠝꠣʼꠞ ꠟꠉꠦ ꠙꠞꠣꠝꠤꠡ ꠇꠞꠤ ꠇꠁꠟ, “ꠔꠃꠛꠣꠞ ꠉꠥꠍꠟ ꠇꠞꠣꠅꠞꠣ ꠄꠢꠤꠀꠞ ꠇꠟ꠆ꠟꠣ ꠇꠣꠐꠤꠀ ꠄꠇꠈꠣꠘ ꠕꠣꠟꠅ ꠇꠞꠤ, ꠅꠈꠘ ꠀꠘꠤꠀ ꠀꠝꠣꠞꠦ ꠖꠦꠃꠇ꠆ꠇꠣ।”
MAT 14:9 ꠁꠈꠣꠘ ꠢꠥꠘꠤꠀ ꠞꠣꠎꠣꠞ ꠝꠘ ꠈꠥꠛ ꠛꠦꠎꠣꠞ ꠅꠁꠉꠦꠟ। ꠅꠁꠟꠦ ꠔꠣꠞ ꠟꠉꠦ ꠛꠅꠀ ꠝꠦꠝꠣꠘ-ꠝꠥꠍꠣꠚꠤꠞꠞ ꠍꠣꠝꠘꠦ ꠘꠤꠎꠦ ꠇꠍꠝ ꠇꠞꠍꠦ, ꠄꠞꠟꠣꠉꠤ ꠢꠦ ꠅꠃ ꠇꠟ꠆ꠟꠣ ꠇꠣꠐꠤꠛꠣꠞ ꠢꠥꠇꠥꠝ ꠖꠤꠟ।
MAT 14:10 ꠔꠣꠞ ꠎꠟ꠆ꠟꠣꠖ ꠙꠣꠑꠣꠁꠀ ꠎꠦꠟꠞ ꠜꠤꠔꠞꠦ ꠄꠢꠤꠀ ꠘꠛꠤꠞ ꠇꠟ꠆ꠟꠣ ꠇꠣꠐꠣꠁꠟ।
MAT 14:11 ꠛꠣꠖꠦ ꠅꠃ ꠇꠟ꠆ꠟꠣ ꠄꠇ ꠕꠣꠟꠅ ꠇꠞꠤ ꠀꠘꠤꠀ ꠅꠃ ꠙꠥꠠꠤꠞꠦ ꠖꠦꠅꠀ ꠅꠁꠟ, ꠙꠥꠠꠤꠄ ꠘꠤꠀ ꠔꠣꠁꠞ ꠝꠣʼꠞ ꠉꠦꠍꠦ ꠖꠤꠟ।
MAT 14:12 ꠄꠞꠛꠣꠖꠦ ꠄꠢꠤꠀ ꠘꠛꠤꠞ ꠃꠝ꠆ꠝꠔ ꠅꠇꠟꠦ ꠔꠣꠘ ꠟꠣꠡ ꠘꠤꠀ ꠖꠣꠚꠘ ꠇꠞꠟꠣ, ꠀꠞ ꠢꠎꠞꠔ ꠁꠍꠣꠞ ꠉꠦꠍꠦ ꠉꠤꠀ ꠅꠃ ꠈꠛꠞ ꠎꠣꠘꠣꠁꠟꠣ।
MAT 14:13 ꠄꠢꠤꠀꠞ ꠝꠃꠔꠞ ꠈꠛꠞ ꠢꠥꠘꠤꠀ ꠁꠍꠣꠄ ꠄꠇꠈꠣꠘ ꠘꠣꠅꠔ ꠃꠑꠤꠀ ꠘꠤꠞꠣꠁ ꠄꠇ ꠎꠣꠉꠣꠔ ꠉꠦꠟꠣꠉꠤ। ꠔꠣꠁꠘ ꠉꠦꠍꠂꠘꠉꠤ ꠢꠥꠘꠤꠀ, ꠘꠣꠘꠣꠘ ꠎꠣꠉꠣꠞ ꠝꠣꠘꠥꠡ ꠢꠥꠇꠘꠣ ꠛꠣꠄ ꠀꠐꠤ ꠀꠐꠤ ꠔꠣꠘ ꠈꠞꠦ ꠞꠅꠀꠘꠣ ꠅꠁꠟꠣ।
MAT 14:14 ꠔꠣꠁꠘ ꠘꠣꠅ ꠕꠘꠦ ꠟꠣꠝꠣꠞ ꠛꠣꠖꠦ ꠝꠣꠘꠡꠞ ꠜꠤꠠ ꠖꠦꠈꠤꠀ ꠔꠣꠘ ꠜꠤꠔꠞꠦ ꠖꠄꠀ ꠢꠣꠝꠣꠁꠉꠦꠟ। ꠄꠞꠖꠣꠄ ꠔꠣꠞꠣꠞ ꠝꠣꠎꠦ ꠎꠔ ꠛꠦꠝꠣꠞꠤ ꠀꠍꠟꠣ, ꠔꠣꠁꠘ ꠄꠞꠣꠞꠦ ꠜꠣꠟꠣ ꠇꠞꠟꠣ।
MAT 14:15 ꠛꠤꠀꠟꠤ ꠛꠣꠟꠣ ꠍꠣꠢꠣꠛꠤ ꠅꠇꠟ ꠇꠣꠘ꠆ꠖꠣꠔ ꠀꠁꠀ ꠇꠁꠟꠣ, “ꠢꠥꠎꠥꠞ, ꠁꠈꠣꠘ ꠔ ꠈꠥꠛ ꠘꠤꠞꠣꠁ ꠎꠣꠉꠣ, ꠀꠞ ꠛꠦꠁꠟꠅ ꠎꠣꠞꠉꠤ। ꠔꠦ ꠅꠔꠣ ꠝꠣꠘꠡꠞꠦ ꠛꠤꠖꠣꠄ ꠖꠤꠟꠣꠃꠇ꠆ꠇꠣ, ꠄꠞꠣ ꠇꠣꠘ꠆ꠖꠣ-ꠇꠣꠍꠣꠞ ꠉꠣꠃꠀꠁꠘ꠆ꠔꠅ ꠉꠤꠀ ꠔꠣꠞꠣꠞ ꠈꠣꠘꠤ-ꠈꠥꠞꠣꠇꠤ ꠟꠃꠇ।”
MAT 14:16 ꠁꠍꠣꠄ ꠇꠁꠟꠣ, “ꠘꠣ, ꠔꠣꠞꠣ ꠎꠣꠅꠀꠞ ꠖꠞꠇꠣꠞ ꠘꠣꠁ, ꠔꠥꠝꠞꠣꠃ ꠄꠞꠣꠞꠦ ꠈꠣꠘꠤ ꠖꠦꠅ।”
MAT 14:17 ꠍꠣꠢꠣꠛꠤ ꠅꠇꠟꠦ ꠇꠁꠟꠣ, “ꠀꠝꠞꠣꠞ ꠉꠦꠍꠦ ꠔ ꠈꠣꠟꠤ ꠙꠣꠌꠈꠣꠘ ꠞꠥꠐꠤ ꠀꠞ ꠖꠥꠁꠐꠣ ꠛꠤꠞꠣꠘ ꠝꠣꠍ ꠍꠣꠠꠣ ꠀꠞ ꠇꠥꠘ꠆ꠔꠣꠃ ꠘꠣꠁ।”
MAT 14:18 ꠔꠣꠁꠘ ꠇꠁꠟꠣ, “ꠅꠈꠘꠣꠁꠘ ꠀꠝꠣꠞ ꠉꠦꠍꠦ ꠀꠘꠅ।”
MAT 14:19 ꠛꠣꠖꠦ ꠔꠣꠁꠘ ꠝꠣꠘꠡꠞꠦ ꠇꠁꠟꠣ, ꠊꠣꠡꠞ ꠃꠙꠞꠦ ꠛꠁꠎꠤꠔꠣ। ꠔꠣꠁꠘ ꠢꠃ ꠙꠣꠌꠈꠣꠘ ꠞꠥꠐꠤ ꠀꠞ ꠖꠥꠁꠐꠣ ꠛꠤꠞꠣꠘ ꠝꠣꠍ ꠀꠔꠅ ꠟꠁꠟꠣ, ꠀꠞ ꠀꠍꠝꠣꠘꠦꠖꠤ ꠌꠣꠁꠀ ꠡꠥꠇꠞꠤꠀ ꠀꠖꠣꠄ ꠇꠞꠟꠣ। ꠛꠣꠖꠦ ꠅꠃ ꠞꠥꠐꠤ ꠐꠥꠇꠞꠣꠁꠀ ꠍꠣꠢꠣꠛꠤ ꠅꠇꠟꠞ ꠀꠔꠅ ꠖꠤꠟꠦ, ꠄꠞꠣ ꠛꠣꠐꠤꠀ ꠖꠤꠟꠣꠁꠟꠣ।
MAT 14:20 ꠅꠔꠣꠖꠤ ꠢꠇꠟ ꠝꠣꠘꠡꠦ ꠙꠦꠐ ꠜꠞꠤ ꠈꠣꠁꠟꠣ। ꠈꠣꠁꠀ ꠢꠣꠞꠟꠦ ꠛꠣꠠꠔꠤ ꠎꠦꠔꠣ ꠞꠁꠟ, ꠅꠈꠘꠣꠁꠘ ꠖꠟꠣ ꠇꠞꠟꠦ ꠛꠣꠞꠅ ꠐꠥꠇꠞꠤ ꠜꠞꠤꠉꠦꠟ।
MAT 14:21 ꠅꠘꠥꠝꠣꠘ ꠙꠣꠌ ꠀꠎꠣꠞ ꠛꠦꠐꠣ ꠝꠣꠘꠡꠦ ꠅꠃ ꠈꠣꠘꠣ ꠈꠣꠁꠟꠣ, ꠄꠞꠣꠞ ꠟꠉꠦ ꠛꠦꠐꠤꠘ ꠀꠞ ꠢꠥꠞꠥꠔ꠆ꠔꠣꠁꠘꠅ ꠀꠍꠟꠣ।
MAT 14:22 ꠈꠣꠘꠤꠞ ꠛꠣꠖꠦꠃ ꠔꠣꠘ ꠍꠣꠢꠣꠛꠤ ꠅꠇꠟꠞꠦ ꠢꠥꠇꠥꠝ ꠖꠤꠟꠣ, ꠔꠣꠁꠘ ꠎꠣꠁꠛꠣꠞ ꠀꠉꠦ ꠔꠣꠞꠣ ꠘꠣꠅꠅ ꠃꠑꠤꠀ ꠀꠅꠞꠞ ꠢꠙꠣꠞꠅ ꠎꠣꠁꠔꠣꠉꠤ। ꠇꠁꠀ ꠔꠣꠁꠘ ꠅꠘꠞ ꠝꠣꠘꠡꠞꠦ ꠛꠤꠖꠣꠄ ꠖꠤꠟꠣꠁꠟꠣ।
MAT 14:23 ꠄꠞꠣ ꠉꠤꠀ ꠢꠣꠞꠟꠦ ꠔꠣꠁꠘ ꠖꠥꠀ ꠇꠞꠣꠞ ꠟꠣꠉꠤ ꠙꠣꠠꠞ ꠃꠙꠞꠦ ꠃꠑꠤꠟꠣ। ꠢꠣꠁꠘ꠆ꠎꠣ ꠛꠣꠖ ꠙꠞ꠆ꠎꠘ꠆ꠔ ꠢꠘꠅ ꠄꠇꠟꠣ ꠞꠁꠟꠣ।
MAT 14:24 ꠅꠃ ꠡꠝꠄ ꠍꠣꠢꠣꠛꠤ ꠅꠇꠟꠞ ꠘꠣꠅ ꠀꠅꠞꠞ ꠝꠣꠎꠈꠣꠘꠅ ꠉꠦꠍꠦꠉꠤ, ꠀꠞ ꠃꠚꠔꠣ ꠛꠣꠔꠣꠡꠞ ꠓꠦꠃꠄ ꠘꠣꠅ ꠈꠥꠛ ꠁꠟꠇꠣꠘꠤ ꠗꠞꠟ।
MAT 14:25 ꠙꠔꠣꠛꠣꠟꠣ ꠢꠎꠞꠔ ꠁꠍꠣ ꠀꠅꠞꠞ ꠙꠣꠘꠤꠞ ꠃꠙꠞꠦꠖꠤ ꠀꠐꠤꠀ ꠍꠣꠢꠣꠛꠤ ꠅꠇꠟꠞ ꠇꠣꠘ꠆ꠖꠣꠔ ꠀꠁꠞꠣ।
MAT 14:26 ꠅꠃ ꠡꠝꠄ ꠍꠣꠢꠣꠛꠤ ꠅꠇꠟꠦ ꠔꠣꠘꠞꠦ ꠖꠦꠈꠤꠀ ꠈꠥꠛ ꠒꠞꠣꠁꠟꠣ, ꠔꠣꠞꠣ ꠜꠥꠔ ꠝꠘꠅ ꠇꠞꠤꠀ ꠜꠥꠔ, ꠜꠥꠔ ꠇꠁꠀ ꠌꠤꠟ꠆ꠟꠣꠁꠀ ꠃꠑꠟꠣ।
MAT 14:27 ꠅꠃ ꠔꠣꠁꠘ ꠇꠁꠟꠣ, “ꠒꠞꠣꠁꠅ ꠘꠣ, ꠡꠣꠅꠡ ꠇꠞꠅ, ꠁ ꠔ ꠀꠝꠤ।”
MAT 14:28 ꠔꠦꠃ ꠍꠣꠢꠣꠛꠤ ꠙꠤꠔꠞꠦ ꠇꠁꠟꠣ, “ꠢꠥꠎꠥꠞ, ꠀꠙꠘꠦꠃ ꠎꠥꠖꠤ ꠅꠁꠘ, ꠔꠦ ꠀꠝꠣꠞꠦ ꠁꠎꠣꠎꠔ ꠖꠦꠃꠇ꠆ꠇꠣ, ꠀꠝꠤꠅ ꠙꠣꠘꠤꠞ ꠃꠙꠞꠦꠖꠤ ꠀꠐꠤꠀ ꠀꠙꠘꠣꠞ ꠉꠦꠍꠦ ꠀꠁꠔꠣꠝ।”
MAT 14:29 ꠁꠍꠣꠄ ꠇꠁꠟꠣ, “ꠀꠅ।” ꠔꠦꠃ ꠙꠤꠔꠞ ꠘꠣꠅ ꠕꠣꠇꠤ ꠟꠣꠝꠤꠀ ꠙꠣꠘꠤꠞ ꠃꠙꠞꠦꠖꠤ ꠀꠐꠣ ꠗꠞꠟꠣ।
MAT 14:30 ꠅꠁꠟꠦ ꠛꠣꠔꠣꠡꠞ ꠎꠥꠞ ꠖꠦꠈꠤꠀ ꠔꠣꠁꠘ ꠒꠞꠣꠁꠉꠦꠟꠣ, ꠀꠞ ꠛꠥꠠꠤꠎꠤꠞꠣ ꠖꠦꠈꠤꠀ ꠎꠥꠞꠦ ꠎꠥꠞꠦ ꠁꠍꠣꠞꠦ ꠒꠣꠇ ꠖꠤꠟꠣ, “ꠢꠥꠎꠥꠞ, ꠢꠥꠎꠥꠞ, ꠀꠝꠣꠞꠦ ꠛꠣꠌꠣꠃꠇ꠆ꠇꠣ।”
MAT 14:31 ꠟꠉꠦ ꠟꠉꠦ ꠁꠍꠣꠄ ꠀꠔ ꠛꠣꠠꠣꠁꠀ ꠔꠣꠘꠞꠦ ꠗꠞꠤꠀ ꠇꠁꠟꠣ, “ꠅꠃꠘꠤ ꠔꠥꠝꠣꠞ ꠁꠝꠣꠘ? ꠝꠘꠅ ꠡꠘ꠆ꠖꠄ ꠀꠘꠟꠣꠄ ꠇꠦꠘꠦ?”
MAT 14:32 ꠛꠣꠖꠦ ꠁꠍꠣ ꠀꠞ ꠙꠤꠔꠞ ꠘꠣꠅꠅ ꠃꠑꠔꠦꠃ ꠛꠣꠔꠣꠡ ꠕꠣꠝꠤꠉꠦꠟ।
MAT 14:33 ꠔꠦꠃ ꠘꠣꠅꠞ ꠢꠇꠟꠦ ꠔꠣꠘꠞꠦ ꠍꠁꠎꠖꠣ ꠇꠞꠤꠀ ꠇꠁꠟꠣ, “ꠢꠥꠎꠥꠞ, ꠀꠍꠟꠦꠃ ꠀꠙꠘꠦ ꠀꠟ꠆ꠟꠣ ꠙꠣꠇꠞ ꠈꠣꠍ ꠝꠣꠄꠀꠞ ꠎꠘ, ꠁꠛꠘꠥꠟ꠆ꠟꠣ।”
MAT 14:34 ꠀꠅꠞ ꠙꠣꠠꠤ ꠖꠤꠀ ꠔꠣꠞꠣ ꠉꠤꠘꠦꠡꠞꠔ ꠄꠟꠣꠇꠣꠔ ꠀꠁꠀ ꠘꠣꠅ ꠕꠣꠇꠤ ꠟꠣꠝꠟꠣ।
MAT 14:35 ꠟꠣꠝꠔꠦꠃ ꠢꠘꠞ ꠝꠣꠘꠡꠦ ꠔꠣꠘꠞꠦ ꠖꠦꠈꠤꠀ ꠌꠣꠁꠞꠅꠛꠣꠄ ꠈꠛꠞ ꠙꠣꠑꠣꠁꠟꠣ। ꠈꠛꠞ ꠙꠣꠁꠀ ꠝꠣꠘꠡꠦ ꠢꠇꠟ ꠎꠣꠔꠞ ꠛꠦꠝꠣꠞꠤꠞꠦ ꠟꠁꠀ ꠔꠣꠘ ꠉꠦꠍꠦ ꠀꠁꠟ,
MAT 14:36 ꠔꠣꠞꠣ ꠝꠤꠘꠔ ꠇꠞꠤ ꠇꠁꠟ, ꠅꠃ ꠛꠦꠝꠣꠞꠤ ꠅꠇꠟꠦ ꠎꠣꠘꠥ ꠔꠣꠘ ꠉꠔꠞꠞ ꠌꠣꠖ꠆ꠖꠞꠞ ꠇꠥꠘꠣꠈꠣꠘꠅ ꠍꠁꠔꠣ ꠙꠣꠞꠂꠘ। ꠀꠞ ꠎꠔ ꠝꠣꠘꠡꠦ ꠍꠁꠟꠣ, ꠔꠣꠞꠣ ꠢꠇ꠆ꠇꠟꠃ ꠜꠣꠟꠣ ꠅꠁꠉꠦꠟꠣ।
MAT 15:1 ꠎꠦꠞꠥꠎꠣꠟꠦꠝ ꠐꠣꠃꠘ ꠕꠣꠇꠤ ꠇꠄꠎꠘ ꠝꠃꠟꠣꠘꠣ ꠀꠞ ꠚꠞꠤꠡꠤ ꠝꠎꠛꠞ ꠇꠤꠍꠥ ꠝꠣꠘꠥꠡ ꠁꠍꠣꠞ ꠉꠦꠍꠦ ꠀꠁꠟꠣ, ꠀꠁꠀ ꠔꠣꠘꠞꠦ ꠎꠤꠇꠣꠁꠟꠣ,
MAT 15:2 “ꠀꠙꠘꠣꠞ ꠃꠝ꠆ꠝꠔ ꠅꠇꠟꠦ ꠀꠉꠞ ꠎꠝꠣꠘꠣꠞ ꠝꠃꠟꠣꠘꠣ ꠅꠇꠟꠞ ꠛꠣꠔꠣꠁꠟ ꠞꠍꠥꠝꠔ ꠝꠣꠘꠂꠘ ꠘꠣ ꠇꠦꠘꠦ? ꠔꠣꠞꠣ ꠔ ꠅꠎꠥ ꠘꠣ ꠇꠞꠤꠀꠃ ꠈꠣꠘꠤ ꠈꠣꠁꠟꠣꠁꠘ।”
MAT 15:3 ꠁꠍꠣꠄ ꠎꠥꠀꠙ ꠖꠤꠟꠣ, “ꠅꠃ ꠝꠃꠟꠣꠘꠣ ꠅꠇꠟꠞ ꠞꠍꠥꠝꠔ ꠝꠣꠘꠣꠞ ꠟꠣꠉꠤ ꠀꠙꠘꠣꠞꠣ ꠇꠦꠘꠦ ꠀꠟ꠆ꠟꠣꠞ ꠢꠥꠇꠥꠝꠞ ꠛꠞꠈꠦꠟꠣꠚ ꠇꠞꠞꠣ?
MAT 15:4 ꠀꠟ꠆ꠟꠣꠄ ꠢꠥꠇꠥꠝ ꠖꠤꠍꠂꠘ, ‘ꠝꠣ-ꠛꠣꠚꠞꠦ ꠁꠎ꠆ꠎꠔ ꠇꠞꠤꠅ, ꠀꠞ ꠎꠦ ꠝꠣꠘꠡꠦ ꠔꠣꠞ ꠝꠣ-ꠛꠣꠚꠞ ꠛꠖꠘꠣꠝ ꠉꠣꠄ, ꠔꠣꠞꠦ ꠘꠤꠌꠄ ꠝꠣꠞꠤꠟꠤꠔꠦ ꠅꠁꠛ।’
MAT 15:5 ꠅꠁꠟꠦ ꠀꠙꠘꠣꠞꠣ ꠇꠂꠘ, ꠇꠥꠘꠥ ꠝꠣꠘꠡꠦ ꠎꠥꠖꠤ ꠔꠣꠞ ꠝꠣ-ꠛꠣꠚꠞꠦ ꠇꠁꠟꠣꠄ, ‘ꠀꠝꠣꠞ ꠎꠦꠔꠣ ꠍꠣꠝꠣꠘꠣ ꠖꠤꠀ ꠀꠙꠘꠣꠁꠘ꠆ꠔꠞ ꠈꠦꠎꠝꠔ ꠇꠞꠔꠣꠝ ꠀꠍꠤꠟ, ꠁꠔꠣ ꠀꠝꠤ ꠀꠟ꠆ꠟꠣꠞ ꠘꠣꠝꠦ ꠟꠤꠟ꠆ꠟꠣ ꠖꠤꠟꠣꠁꠍꠤ,’
MAT 15:6 ꠔꠦ ꠔꠣꠞ ꠝꠣ-ꠛꠣꠚꠞꠦ ꠀꠞ ꠇꠥꠘ꠆ꠔꠣ ꠇꠞꠣ ꠟꠣꠉꠦ ꠘꠣ। ꠅꠃ ꠟꠣꠈꠣꠘ ꠀꠙꠘꠣꠞꠣꠞ ꠛꠣꠚ-ꠖꠣꠖꠣꠞ ꠝꠘꠉꠠꠣ ꠘꠤꠅꠝ ꠖꠤꠀ ꠀꠟ꠆ꠟꠣꠞ ꠇꠣꠟꠣꠝ ꠛꠣꠔꠤꠟ ꠇꠞꠤꠟꠤꠍꠂꠘ।
MAT 15:7 ꠅ ꠜꠘ꠆ꠒ ꠅꠇꠟ! ꠢꠎꠞꠔ ꠁꠡꠣꠄꠀ ꠘꠛꠤꠄ ꠔꠥꠝꠞꠣꠞ ꠛꠦꠙꠣꠞꠦ ꠑꠤꠇꠃ ꠇꠁꠍꠂꠘ,
MAT 15:8 ꠁꠔꠣ ꠝꠣꠘꠡꠦ ꠝꠥꠈ ꠖꠤꠀ ꠈꠣꠟꠤ ꠀꠝꠣꠞꠦ ꠁꠎ꠆ꠎꠔ ꠇꠞꠦ, ꠅꠁꠟꠦ ꠔꠣꠞꠣꠞ ꠖꠤꠟ ꠀꠝꠣ ꠕꠣꠇꠤ ꠛꠃꠔ ꠖꠥꠞꠁ।
MAT 15:9 ꠔꠣꠞꠣ ꠢꠥꠖꠣꠞ ꠈꠣꠝꠈꠣ ꠀꠝꠣꠞ ꠄꠛꠣꠖꠔ ꠇꠞꠦ, ꠔꠣꠞꠣꠞ ꠔꠣꠟꠤꠝ ꠅꠇꠟ ꠔ ꠝꠣꠘꠡꠞ ꠛꠣꠘꠣꠁꠟ ꠝꠘꠉꠠꠣ ꠞꠍꠥꠝꠔ।”
MAT 15:10 ꠛꠣꠖꠦ ꠁꠍꠣꠄ ꠝꠣꠘꠡꠞꠦ ꠒꠣꠇꠤꠀ ꠇꠁꠟꠣ, “ꠀꠝꠣꠞ ꠔꠣꠟꠤꠝ ꠈꠣꠘꠣꠁꠘ ꠈꠤꠀꠟ ꠇꠞꠤ ꠢꠥꠘꠃꠇ꠆ꠇꠣ।
MAT 15:11 ꠛꠣꠁꠞꠦ ꠕꠣꠇꠤ ꠎꠦꠔꠣ ꠎꠤꠘꠤꠡ ꠝꠣꠘꠡꠞ ꠝꠥꠈꠞ ꠜꠤꠔꠞꠦ ꠢꠣꠝꠣꠄ, ꠁꠔꠣꠄ ꠔ ꠔꠣꠞꠦ ꠘꠣꠙꠣꠇ ꠛꠣꠘꠣꠄ ꠘꠣ। ꠛꠞꠋ ꠝꠣꠘꠡꠞ ꠝꠥꠈ ꠕꠣꠇꠤ ꠎꠦꠔꠣ ꠛꠣꠞꠅꠄ, ꠅꠔꠣꠄꠃ ꠔꠣꠞꠦ ꠘꠣꠙꠣꠇ ꠛꠣꠘꠣꠄ।”
MAT 15:12 ꠔꠦꠃ ꠔꠣꠘ ꠡꠣꠉꠞꠤꠖ ꠅꠇꠟꠦ ꠇꠁꠟꠣ, “ꠢꠥꠎꠥꠞ, ꠀꠙꠘꠦ ꠛꠥꠎꠍꠂꠘ ꠘꠤ, ꠚꠞꠤꠡꠤ ꠅꠇꠟꠦ ꠝꠘꠅ ꠇꠞꠞꠣ, ꠅꠃ ꠔꠣꠟꠤꠝ ꠖꠤꠀ ꠀꠙꠘꠦ ꠔꠣꠞꠣꠞꠦ ꠛꠦꠁꠎ꠆ꠎꠔ ꠇꠞꠍꠂꠘ?”
MAT 15:13 ꠔꠣꠁꠘ ꠇꠁꠟꠣ, “ꠁꠔꠣꠞ ꠝꠣꠔ ꠚꠣꠟꠣꠅ। ꠀꠝꠣꠞ ꠛꠦꠢꠦꠡ꠆ꠔꠤ ꠛꠣꠚ ꠀꠟ꠆ꠟꠣꠄ ꠎꠦ ꠉꠣꠍ ꠟꠣꠉꠣꠁꠍꠂꠘ ꠘꠣ, ꠁ ꠉꠣꠍ ꠔꠣꠘ ꠛꠣꠉꠣꠘ ꠕꠣꠇꠤ ꠢꠥꠞꠤꠀ ꠚꠣꠟꠣꠁꠟ ꠅꠁꠛ। ꠔꠣꠞꠣꠞ ꠖꠣꠄꠁꠔ꠆ꠔ ꠀꠍꠤꠟ ꠀꠘ꠆ꠖꠣ ꠝꠣꠘꠡꠞꠦ ꠙꠕ ꠖꠦꠈꠣꠁꠔ, ꠅꠁꠟꠦ ꠔꠣꠞꠣ ꠘꠤꠎꠦꠃ ꠀꠘ꠆ꠖꠣ ꠛꠘꠤꠉꠦꠍꠦ। ꠇꠥꠘꠥ ꠀꠘ꠆ꠖꠣꠄ ꠀꠞꠇ ꠀꠘ꠆ꠖꠣꠞꠦ ꠙꠕ ꠖꠦꠈꠣꠘꠤꠔ ꠉꠦꠟꠦ, ꠖꠥꠁꠅ ꠀꠘ꠆ꠖꠣꠃ ꠉꠣꠔꠅ ꠙꠠꠤ ꠝꠞꠛ।”
MAT 15:15 ꠔꠦꠃ ꠍꠣꠢꠣꠛꠤ ꠙꠤꠔꠞꠦ ꠇꠁꠟꠣ, “ꠀꠙꠘꠦ ꠎꠦꠔꠣ ꠛꠣꠔꠣꠁꠞꠣ, ꠅꠔꠣ ꠀꠝꠞꠣꠞꠦ ꠛꠥꠎꠣꠁ ꠖꠦꠃꠇ꠆ꠇꠣ।”
MAT 15:16 ꠁꠍꠣꠄ ꠇꠁꠟꠣ, “ꠔꠥꠝꠞꠣ ꠅꠈꠘꠅ ꠛꠦꠛꠥꠎ ꠞꠁꠍ ꠘꠤ?
MAT 15:17 ꠔꠥꠝꠞꠣ ꠛꠥꠎ ꠘꠣ ꠘꠤ, ꠛꠣꠁꠞꠦ ꠕꠣꠇꠤ ꠎꠦꠔꠣ ꠎꠤꠘꠤꠡ ꠝꠣꠘꠡꠞ ꠝꠥꠈꠅ ꠢꠣꠝꠣꠄ, ꠁꠔꠣ ꠔ ꠈꠣꠟꠤ ꠙꠦꠐꠅ ꠢꠣꠝꠣꠄ, ꠀꠞ ꠙꠦꠐ ꠕꠣꠇꠤ ꠢꠤꠞꠛꠣꠞ ꠛꠣꠞ ꠅꠁꠎꠣꠄ।
MAT 15:18 ꠅꠁꠟꠦ ꠝꠣꠘꠡꠞ ꠝꠥꠈ ꠕꠣꠇꠤ ꠎꠦꠔꠣ ꠛꠣꠞꠅꠄ, ꠁꠔꠣ ꠖꠤꠟꠅ ꠕꠣꠇꠤ ꠀꠄ, ꠀꠞ ꠅꠔꠣꠄꠃ ꠝꠣꠘꠡꠞꠦ ꠘꠣꠙꠣꠇ ꠛꠣꠘꠣꠄ।
MAT 15:19 ꠝꠣꠘꠡꠞ ꠖꠤꠟ ꠕꠣꠇꠤꠃ ꠔ ꠢꠇꠟ ꠘꠝꠥꠘꠣꠞ ꠇꠥ-ꠌꠤꠘ꠆ꠔꠣ ꠛꠣꠞꠅꠄ, ꠎꠦꠝꠘ ꠈꠥꠘ, ꠎꠤꠘꠣ, ꠌꠥꠞꠤ, ꠝꠤꠍꠣ ꠡꠣꠇ꠆ꠇꠤ, ꠀꠞ ꠁꠋꠡꠣ-ꠘꠤꠘ꠆ꠖꠣ ꠛꠣꠞꠅꠄ।
MAT 15:20 ꠅꠔꠣꠄꠃ ꠝꠣꠘꠡꠞꠦ ꠘꠣꠙꠣꠇ ꠛꠣꠘꠣꠄ, ꠅꠁꠟꠦ ꠅꠎꠥ ꠍꠣꠠꠣ ꠈꠣꠘꠤ ꠈꠣꠁꠟꠦ ꠇꠦꠃ ꠘꠣꠙꠣꠇ ꠅꠄ ꠘꠣ।”
MAT 15:21 ꠛꠣꠖꠦ ꠢꠎꠞꠔ ꠁꠍꠣ ꠘꠤꠎꠞ ꠖꠦꠡ ꠍꠣꠠꠤꠀ ꠡꠥꠞ ꠀꠞ ꠍꠤꠖꠘ ꠖꠦꠡꠅ ꠉꠦꠟꠣꠉꠤ।
MAT 15:22 ꠢꠘꠅ ꠉꠤꠀ ꠢꠣꠞꠟꠦ ꠇꠦꠘꠣꠘꠤ ꠎꠣꠔꠤꠞ ꠄꠇ ꠛꠤꠗꠞ꠆ꠝꠤ ꠛꠦꠐꠤ ꠔꠣꠘ ꠉꠦꠍꠦ ꠀꠁꠀ ꠎꠥꠞꠦ ꠎꠥꠞꠦ ꠇꠁꠟ, “ꠅ ꠢꠥꠎꠥꠞ, ꠖꠣꠃꠖꠞ ꠀꠅꠟꠣꠖ, ꠀꠝꠣꠞꠦ ꠞꠢꠝ ꠇꠞꠂꠘ। ꠀꠝꠣꠞ ꠙꠥꠠꠤꠉꠥꠞꠦ ꠎꠤꠘꠦ ꠗꠞꠣꠄ ꠔꠣꠁ ꠛꠠ ꠇꠡ꠆ꠐ ꠇꠞꠦꠞ।”
MAT 15:23 ꠅꠁꠟꠦ ꠁꠍꠣꠄ ꠇꠥꠘ꠆ꠔꠣ ꠝꠣꠔꠤꠟꠣ ꠘꠣ। ꠔꠦꠃ ꠔꠣꠘ ꠍꠣꠢꠣꠛꠤ ꠅꠇꠟꠦ ꠔꠣꠘꠞꠦ ꠝꠤꠘꠔ ꠇꠞꠤ ꠇꠁꠟꠣ, “ꠢꠥꠎꠥꠞ, ꠅꠃ ꠛꠦꠐꠤꠉꠥꠞꠦ ꠛꠤꠖꠣꠄ ꠖꠤꠟꠣꠃꠇ꠆ꠇꠣ, ꠔꠣꠁ ꠀꠝꠞꠣꠞ ꠈꠞꠦ ꠅꠁꠀ ꠌꠤꠟ꠆ꠟꠣꠞ।”
MAT 15:24 ꠁꠍꠣꠄ ꠇꠁꠟꠣ, “ꠀꠝꠣꠞꠦ ꠔ ꠙꠣꠑꠣꠁꠟ ꠅꠁꠍꠦ, ꠈꠣꠟꠤ ꠛꠘꠤ ꠁꠍꠞꠣꠁꠟꠞ ꠀꠞꠣꠁꠟ ꠝꠦꠠꠣ ꠅꠇꠟꠞ ꠟꠣꠉꠤ।”
MAT 15:25 ꠅꠁꠟꠦ ꠅꠃ ꠛꠦꠐꠤ ꠔꠣꠘ ꠇꠣꠘ꠆ꠖꠣꠔ ꠀꠁꠀ ꠇꠖꠝꠛꠥꠍꠤ ꠇꠞꠤꠀ ꠇꠁꠟ, “ꠢꠥꠎꠥꠞ, ꠀꠝꠣꠞꠦ ꠅꠃ ꠀꠍꠣꠘꠈꠣꠘ ꠇꠞꠃꠇ꠆ꠇꠣ।”
MAT 15:26 ꠔꠣꠁꠘ ꠇꠁꠟꠣ, “ꠘꠤꠎꠞ ꠢꠥꠞꠥꠔ꠆ꠔꠣꠞ ꠞꠤꠎꠦꠇ ꠇꠥꠔ꠆ꠔꠣꠞ ꠍꠣꠝꠘꠦ ꠖꠦꠅꠀ ꠑꠤꠇ ꠘꠣꠄ।”
MAT 15:27 ꠛꠦꠐꠤꠄ ꠇꠁꠟ, “ꠎꠤꠅꠄ ꠢꠥꠎꠥꠞ, ꠀꠙꠘꠣꠞ ꠇꠕꠣꠃ ꠑꠤꠇ, ꠅꠁꠟꠦ ꠝꠥꠘꠤꠛꠞ ꠈꠣꠘꠤ ꠕꠣꠇꠤ ꠎꠦꠔꠣ ꠉꠥꠠꠣ-ꠉꠣꠠꠣ ꠉꠣꠟꠣꠛꠣꠄ ꠙꠠꠦ, ꠁꠔꠣ ꠔ ꠇꠥꠇꠞꠦ ꠈꠣꠄ।”
MAT 15:28 ꠔꠦꠃ ꠔꠣꠁꠘ ꠛꠦꠐꠤꠞꠦ ꠇꠁꠟꠣ, “ꠀꠍꠟꠦ ꠉ ꠝꠣꠁ, ꠔꠥꠝꠣꠞ ꠁꠝꠣꠘ ꠛꠠ ꠝꠎꠛꠥꠔ। ꠀꠁꠌ꠆ꠍꠣ, ꠔꠥꠝꠤ ꠎꠦꠟꠣ ꠌꠣꠁꠞꠣꠄ, ꠅꠟꠣꠃ ꠅꠃꠇ।” ꠅꠈꠣꠘ ꠇꠅꠀꠞ ꠟꠉꠦ ꠟꠉꠦꠃ ꠙꠥꠠꠤ ꠜꠣꠟꠣ ꠅꠁꠉꠦꠟ।
MAT 15:29 ꠛꠣꠖꠦ ꠁꠍꠣ ꠢꠘ ꠕꠘꠦ ꠉꠣꠟꠤꠟ ꠀꠅꠞꠞ ꠙꠣꠞꠦꠖꠤ ꠀꠐꠤꠀ ꠉꠦꠟꠣ, ꠉꠤꠀ ꠄꠇ ꠙꠣꠠꠞ ꠃꠙꠞꠦ ꠃꠑꠤꠀ ꠛꠁꠟꠣ।
MAT 15:30 ꠛꠁꠀ ꠢꠣꠞꠟꠦ ꠝꠣꠘꠡꠦ ꠟꠥꠟꠣ-ꠟꠦꠋꠠꠣ, ꠀꠔꠥꠞ, ꠀꠘ꠆ꠖꠣ, ꠛꠥꠛꠣ, ꠅꠟꠣꠈꠣꠘ ꠀꠞꠅ ꠛꠃꠔ ꠎꠣꠔꠞ ꠛꠦꠝꠣꠞꠤꠞꠦ ꠖꠟꠦ ꠖꠟꠦ ꠔꠣꠘ ꠉꠦꠍꠦ ꠟꠁꠀ ꠀꠁꠟ। ꠀꠘꠤꠀ ꠔꠣꠘ ꠙꠣꠅꠞ ꠇꠣꠘ꠆ꠖꠣꠔ ꠕꠁꠟ, ꠔꠣꠁꠘ ꠄꠞꠣ ꠢꠇꠟꠞꠦ ꠜꠣꠟꠣ ꠇꠞꠟꠣ।
MAT 15:31 ꠝꠣꠘꠡꠦ ꠎꠦꠛꠟꠣ ꠖꠦꠈꠟꠣ, ꠟꠥꠟꠣ-ꠟꠦꠋꠠꠣ ꠜꠣꠟꠣ ꠅꠁꠎꠤꠞꠣ, ꠛꠥꠛꠣ ꠅꠇꠟꠦ ꠝꠣꠔꠤꠞꠣ, ꠀꠔꠥꠞ ꠝꠣꠘꠡꠦ ꠀꠐꠤꠞꠣ, ꠀꠘ꠆ꠖꠣꠄ ꠌꠃꠈꠦ ꠖꠦꠈꠞꠣ, ꠖꠦꠈꠤꠀ ꠔꠣꠞꠣ ꠢꠇꠟ ꠔꠣꠁꠎ꠆ꠎꠥꠛ ꠅꠁꠉꠦꠟꠣ, ꠀꠞ ꠛꠘꠤ ꠁꠍꠞꠣꠁꠟꠞ ꠝꠣꠛꠥꠖ ꠀꠟ꠆ꠟꠣꠞ ꠡꠥꠇꠞꠤꠀ ꠀꠖꠣꠄ ꠇꠞꠟꠣ।
MAT 15:32 ꠄꠞꠛꠣꠖꠦ ꠁꠍꠣꠄ ꠔꠣꠘ ꠍꠣꠢꠣꠛꠤ ꠅꠇꠟꠞꠦ ꠇꠣꠘ꠆ꠖꠣꠔ ꠀꠘꠤꠀ ꠇꠁꠟꠣ, “ꠁꠔꠣ ꠝꠣꠘꠡꠞ ꠟꠣꠉꠤ ꠀꠝꠣꠞ ꠛꠠ ꠖꠞꠖ ꠟꠣꠉꠦꠞ, ꠀꠁꠎ ꠔꠤꠘ ꠖꠤꠘ ꠗꠞꠤ ꠔꠣꠞꠣ ꠀꠝꠣꠞ ꠈꠞꠦ ꠈꠞꠦ ꠊꠥꠞꠤꠞꠣ, ꠅꠁꠟꠦ ꠔꠣꠞꠣꠞ ꠟꠉꠦ ꠈꠣꠘꠤꠞ ꠇꠥꠘ꠆ꠔꠣ ꠘꠣꠁ। ꠔꠦ ꠅꠃ ꠢꠣꠟꠔꠦ ꠄꠞꠣꠞꠦ ꠛꠤꠖꠣꠄ ꠖꠤꠔꠣꠝ ꠌꠣꠁ ꠘꠣ, ꠀꠞꠘꠣꠄ ꠁꠔꠣ ꠙꠕꠅꠃ ꠛꠦꠃꠡ ꠅꠁꠎꠤꠛꠣ।”
MAT 15:33 ꠍꠣꠢꠣꠛꠤ ꠅꠇꠟꠦ ꠇꠁꠟꠣ, “ꠢꠥꠎꠥꠞ, ꠁ ꠘꠤꠞꠣꠁ ꠝꠞꠥꠜꠥꠝꠤꠞ ꠝꠣꠎꠦ ꠅꠔ ꠝꠣꠘꠡꠞꠦ ꠈꠣꠅꠀꠘꠤꠞ ꠟꠣꠉꠤ ꠞꠥꠐꠤ ꠀꠝꠞꠣ ꠇꠥꠀꠁ ꠙꠣꠁꠝꠥ?”
MAT 15:34 ꠔꠣꠁꠘ ꠇꠁꠟꠣ, “ꠔꠥꠝꠞꠣꠞ ꠉꠦꠍꠦ ꠇꠄꠈꠣꠘ ꠀꠍꠦ?” ꠄꠞꠣ ꠇꠁꠟꠣ, “ꠡꠣꠔꠈꠣꠘ ꠞꠥꠐꠤ ꠀꠞ ꠛꠤꠞꠣꠘ ꠇꠞꠣ ꠇꠄꠐꠣ ꠢꠥꠞꠥ ꠝꠣꠍ ꠀꠍꠦ।”
MAT 15:35 ꠔꠦꠃ ꠁꠍꠣꠄ ꠝꠣꠘꠡꠞꠦ ꠝꠣꠐꠤꠔ ꠛꠅꠀꠞ ꠟꠣꠉꠤ ꠇꠁꠟꠣ।
MAT 15:36 ꠇꠁꠀ ꠔꠣꠁꠘ ꠅꠃ ꠡꠣꠔꠅꠈꠣꠘ ꠞꠥꠐꠤ ꠀꠞ ꠛꠤꠞꠣꠘ ꠝꠣꠍ ꠀꠔꠅ ꠟꠁꠀ, ꠀꠟ꠆ꠟꠣꠞ ꠡꠥꠇꠞꠤꠀ ꠀꠖꠣꠄ ꠇꠞꠤꠀ ꠅꠈꠘꠣꠁꠘ ꠐꠥꠇꠞꠣꠁꠟꠣ, ꠛꠣꠖꠦ ꠍꠣꠢꠣꠛꠤ ꠅꠇꠟꠞꠦꠖꠤ ꠛꠣꠐꠣꠁꠟꠣ।
MAT 15:37 ꠢꠇ꠆ꠇꠟ ꠝꠣꠘꠡꠦ ꠙꠦꠐ ꠜꠞꠤ ꠈꠣꠁꠟꠣ। ꠈꠣꠁꠀ ꠎꠦꠔꠣ ꠞꠁꠍꠤꠟ, ꠍꠣꠢꠣꠛꠤ ꠅꠇꠟꠦ ꠅꠔꠣ ꠖꠟꠣ ꠇꠞꠣꠞ ꠛꠣꠖꠦ ꠡꠣꠔ ꠐꠥꠇꠞꠤ ꠜꠞꠤꠉꠦꠟ।
MAT 15:38 ꠅꠘꠥꠝꠣꠘ ꠌꠣꠁꠞ ꠀꠎꠣꠞ ꠛꠦꠐꠣ ꠝꠣꠘꠡꠦ ꠅꠃ ꠈꠣꠘꠣ ꠈꠣꠁꠟꠣ, ꠄꠞꠣꠞ ꠟꠉꠦ ꠛꠦꠐꠤꠘ ꠀꠞ ꠢꠥꠞꠥꠔ꠆ꠔꠣꠁꠘꠅ ꠀꠍꠟꠣ।
MAT 15:39 ꠛꠣꠖꠦ ꠔꠣꠁꠘ ꠄꠞꠣꠞꠦ ꠛꠤꠖꠣꠄ ꠖꠤꠀ ꠘꠣꠅꠅ ꠃꠑꠤꠀ ꠝꠉꠖꠘ ꠄꠟꠣꠇꠣꠔ ꠉꠦꠟꠣꠉꠤ।
MAT 16:1 ꠛꠣꠖꠦ ꠁꠍꠣꠞꠦ ꠙꠞꠤꠇ꠆ꠇꠣ ꠇꠞꠣꠞ ꠟꠣꠉꠤ ꠚꠞꠤꠡꠤ ꠀꠞ ꠍꠤꠖ꠆ꠖꠦꠇꠤꠀ ꠝꠎꠛꠞ ꠇꠤꠍꠥ ꠝꠣꠘꠥꠡ ꠀꠁꠟꠣ, ꠀꠁꠀ ꠀꠍꠝꠣꠘꠤ ꠇꠥꠘꠥ ꠘꠤꠡꠣꠘꠣ ꠖꠦꠈꠔꠣ ꠌꠣꠁꠟꠣ।
MAT 16:2 ꠁꠍꠣꠄ ꠇꠁꠟꠣ, “ꠛꠤꠀꠟꠤ ꠛꠣꠟꠣ ꠀꠍꠝꠣꠘꠞ ꠟꠣꠟ ꠞꠋ ꠖꠦꠈꠤꠀ ꠀꠙꠘꠣꠞꠣ ꠇꠂꠘ, ꠇꠣꠁꠟꠇꠥꠞ ꠖꠤꠘ ꠔ ꠜꠣꠟꠣ ꠅꠁꠛ।
MAT 16:3 ꠀꠞ ꠛꠤꠀꠘꠤ ꠛꠣꠟꠣ ꠀꠍꠝꠣꠘꠅ ꠇꠣꠟꠘꠤ ꠖꠦꠈꠤꠀ ꠇꠂꠘ, ꠀꠁꠎ ꠝꠦꠊ-ꠔꠥꠚꠣꠘ ꠅꠁꠛ। ꠔꠦ ꠀꠍꠝꠣꠘꠞ ꠢꠣꠟꠔ ꠀꠙꠘꠣꠞꠣ ꠑꠤꠇꠃ ꠛꠥꠎꠂꠘ, ꠅꠁꠟꠦ ꠎꠝꠣꠘꠣꠞ ꠢꠣꠟꠔ ꠀꠙꠘꠣꠞꠣ ꠛꠥꠎꠂꠘ ꠘꠣ।
MAT 16:4 ꠅꠃ ꠎꠝꠣꠘꠣꠞ ꠛꠦꠁꠝꠣꠘ ꠀꠞ ꠘꠣꠚꠞꠝꠣꠘ ꠅꠇꠟꠦ ꠈꠣꠟꠤ ꠇꠦꠞꠣꠝꠔꠤ ꠖꠦꠈꠔꠣ ꠌꠣꠁꠘ, ꠅꠁꠟꠦ ꠁꠃꠘꠥꠍ ꠘꠛꠤꠞ ꠘꠤꠡꠣꠘꠣ ꠍꠣꠠꠣ ꠖꠥꠍꠞꠣ ꠇꠥꠘꠥ ꠘꠤꠡꠣꠘꠣ ꠔꠣꠞꠣꠞꠦ ꠖꠦꠈꠣꠁꠟ ꠅꠁꠔ ꠘꠣꠄ।” ꠅꠈꠣꠘ ꠇꠁꠀ ꠔꠣꠁꠘ ꠄꠞꠣꠞꠦ ꠕꠁꠀ ꠢꠞꠤꠉꠦꠟꠣ।
MAT 16:5 ꠛꠣꠖꠦ ꠀꠅꠞ ꠙꠣꠠꠤ ꠖꠤꠀ ꠎꠣꠅꠀꠞ ꠇꠣꠟꠅ ꠍꠣꠢꠣꠛꠤ ꠅꠇꠟꠦ ꠟꠉꠦ ꠇꠞꠤ ꠞꠥꠐꠤ ꠘꠤꠔꠣ ꠚꠣꠃꠞꠤꠟꠤꠟꠣ।
MAT 16:6 ꠁꠍꠣꠄ ꠔꠣꠞꠣꠞꠦ ꠇꠁꠟꠣ, “ꠔꠥꠝꠞꠣ ꠡꠣꠛꠗꠣꠘ ꠅꠅ, ꠚꠞꠤꠡꠤ ꠀꠞ ꠍꠤꠖ꠆ꠖꠦꠇꠤꠀ ꠖꠟꠞ ꠈꠣꠝꠤꠞ ꠕꠣꠇꠤ ꠢꠥꠡꠤꠀꠞ ꠞꠁꠅ।”
MAT 16:7 ꠁꠈꠣꠘ ꠢꠥꠘꠤꠀ ꠍꠣꠢꠣꠛꠤ ꠅꠇꠟꠦ ꠇꠣꠘꠣ-ꠇꠣꠘꠤ ꠇꠞꠤ ꠇꠁꠟꠣ, “ꠀꠝꠞꠣ ꠞꠥꠐꠤ ꠀꠘꠍꠤ ꠘꠣ ꠇꠞꠤ ꠝꠘꠅꠟꠄ ꠔꠣꠁꠘ ꠅꠈꠣꠘ ꠇꠁꠞꠣ।”
MAT 16:8 ꠁꠍꠣꠄ ꠔꠣꠞꠣꠞ ꠜꠣꠛ ꠛꠥꠎꠤꠟꠤꠟꠣ, ꠛꠥꠎꠤꠀ ꠇꠁꠟꠣ, “ꠢꠣꠄꠞꠦ ꠇꠝꠎꠥꠞ ꠁꠝꠣꠘꠖꠣꠞ ꠅꠇꠟ, ꠔꠥꠝꠞꠣꠞ ꠉꠦꠍꠦ ꠞꠥꠐꠤ ꠘꠣꠁ, ꠁꠈꠣꠘ ꠇꠁꠞꠣꠄ ꠇꠦꠘꠦ?
MAT 16:9 ꠔꠥꠝꠞꠣ ꠅꠈꠘꠅ ꠇꠥꠘ꠆ꠔꠣ ꠛꠥꠎꠅ ꠘꠣ ꠘꠤ, ꠇꠥꠘ꠆ꠔꠣ ꠝꠘꠅ ꠅꠞ ꠘꠣ ꠘꠤ? ꠀꠝꠤ ꠎꠦꠛꠟꠣ ꠙꠣꠌꠈꠣꠘ ꠞꠥꠐꠤꠖꠤ ꠙꠣꠌ ꠀꠎꠣꠞ ꠝꠣꠘꠡꠞꠦ ꠈꠣꠅꠀꠁꠍꠟꠣꠝ, ꠈꠣꠘꠤꠞ ꠛꠣꠖꠦ ꠔꠥꠝꠞꠣ ꠇꠔ ꠐꠥꠇꠞꠤ ꠉꠥꠠꠣ-ꠉꠣꠠꠣ ꠖꠟꠣ ꠇꠞꠍꠟꠣꠄ?
MAT 16:10 ꠀꠞ ꠢꠃ ꠎꠦ ꠡꠣꠔꠈꠣꠘ ꠞꠥꠐꠤꠖꠤ ꠌꠣꠁꠞ ꠀꠎꠣꠞ ꠝꠣꠘꠡꠦ ꠈꠣꠁꠍꠟꠣ, ꠈꠣꠁꠀ ꠢꠣꠞꠟꠦ ꠇꠔ ꠐꠥꠇꠞꠤ ꠖꠟꠣ ꠇꠞꠍꠟꠣꠄ?
MAT 16:11 ꠔꠦ ꠅꠈꠘ ꠔꠥꠝꠞꠣ ꠛꠥꠎꠅ ꠘꠣ ꠇꠦꠘꠦ, ꠀꠝꠤ ꠅꠃ ꠞꠥꠐꠤꠞ ꠛꠦꠙꠣꠞꠦ ꠇꠁꠀꠞ ꠘꠣ? ꠢꠥꠘꠅ, ꠚꠞꠤꠡꠤ ꠀꠞ ꠍꠤꠖ꠆ꠖꠦꠇꠤꠀ ꠅꠇꠟꠞ ꠈꠣꠝꠤꠞ ꠕꠣꠇꠤ ꠢꠥꠡꠤꠀꠞ ꠅꠅ।”
MAT 16:12 ꠔꠦꠃ ꠍꠣꠢꠣꠛꠤ ꠅꠇꠟꠦ ꠛꠥꠎꠟꠣ, ꠔꠣꠁꠘ ꠀꠍꠟꠦ ꠈꠣꠁꠛꠣꠞ ꠈꠣꠝꠤꠞ ꠕꠣꠇꠤ ꠢꠥꠡꠤꠀꠞꠞ ꠇꠕꠣ ꠇꠁꠞꠣ ꠘꠣ, ꠛꠞꠋ ꠚꠞꠤꠡꠤ ꠀꠞ ꠍꠤꠖ꠆ꠖꠦꠇꠤꠀ ꠅꠇꠟꠞ ꠔꠣꠟꠤꠝ ꠕꠣꠇꠤ ꠢꠥꠡꠤꠀꠞ ꠅꠁꠔꠦ ꠇꠁꠍꠂꠘ।
MAT 16:13 ꠛꠣꠖꠦ ꠔꠣꠘ ꠍꠣꠢꠣꠛꠤ ꠅꠇꠟꠞꠦ ꠟꠁꠀ ꠇꠂꠍꠞꠤꠀ-ꠚꠤꠟꠤꠙꠤ ꠐꠣꠃꠘꠞ ꠇꠣꠘ꠆ꠖꠣ-ꠇꠣꠍꠣꠔ ꠉꠦꠟꠣ। ꠙꠕꠅ ꠍꠣꠢꠣꠛꠤ ꠅꠇꠟꠞꠦ ꠎꠤꠇꠣꠁꠟꠣ, “ꠇꠅ ꠌꠣꠁꠘ, ꠝꠣꠘꠡꠦ ꠇꠤꠔꠣ ꠝꠘꠅ ꠇꠞꠂꠘ, ꠀꠝꠤ ꠛꠤꠘ-ꠀꠖꠝ ꠇꠦ?”
MAT 16:14 ꠄꠞꠣ ꠎꠥꠀꠙ ꠖꠤꠟꠣ, “ꠇꠥꠘꠥ ꠇꠥꠘꠥ ꠝꠣꠘꠡꠦ ꠇꠂꠘ, ꠀꠙꠘꠦ ꠄꠢꠤꠀ ꠘꠛꠤ। ꠇꠥꠘꠥ ꠎꠘꠦ ꠇꠂꠘ ꠁꠟꠤꠀꠍ ꠘꠛꠤ। ꠇꠦꠃ ꠇꠦꠃ ꠇꠄ ꠁꠀꠞꠝꠤꠀ ꠘꠛꠤ, ꠛꠣ ꠅꠁꠘ꠆ꠘ ꠇꠥꠘꠥ ꠘꠛꠤ।”
MAT 16:15 ꠅꠃ ꠔꠣꠁꠘ ꠇꠁꠟꠣ, “ꠅꠁꠟꠦ ꠔꠥꠝꠞꠣ ꠇꠤꠔꠣ ꠝꠘꠅ ꠇꠞꠅ, ꠀꠝꠤ ꠇꠦ?”
MAT 16:16 ꠍꠣꠢꠣꠛꠤ ꠍꠣꠁꠝꠘ-ꠙꠤꠔꠞꠦ ꠎꠥꠀꠙ ꠖꠤꠟꠣ, “ꠀꠙꠘꠦ ꠔ ꠀꠟ꠆ꠟꠣꠞ ꠅꠀꠖꠣ ꠇꠞꠣ ꠢꠃ ꠀꠟ-ꠝꠍꠤ ꠁꠛꠘꠥꠟ꠆ꠟꠣ, ꠎꠤꠘ꠆ꠖꠣ ꠀꠟ꠆ꠟꠣꠞ ꠈꠣꠍ ꠝꠣꠄꠀꠞ ꠎꠘ।”
MAT 16:17 ꠁꠍꠣꠄ ꠇꠁꠟꠣ, “ꠅ ꠍꠣꠁꠝꠘ ꠛꠤꠘ ꠁꠃꠘꠥꠍ, ꠔꠥꠝꠤ ꠛꠠ ꠘꠦꠇ-ꠇꠙꠣꠟꠤ, ꠇꠣꠞꠘ, ꠖꠥꠘꠤꠀꠞ ꠇꠥꠘꠥ ꠝꠣꠘꠡꠦ ꠔꠥꠝꠣꠞꠦ ꠁꠔꠣ ꠎꠣꠘꠣꠁꠍꠦ ꠘꠣ, ꠅꠁꠟꠦ ꠀꠝꠣꠞ ꠛꠦꠢꠦꠡ꠆ꠔꠤ ꠛꠣꠚ ꠀꠟ꠆ꠟꠣꠄꠃ ꠎꠣꠘꠣꠁ ꠖꠤꠍꠂꠘ।
MAT 16:18 ꠔꠦ ꠀꠝꠤ ꠔꠥꠝꠣꠞꠦ ꠇꠁꠞꠣꠝ, ꠔꠥꠝꠤ ꠔ ꠙꠣꠔ꠆ꠔꠞ, ꠄꠞꠟꠣꠉꠤ ꠔꠥꠝꠣꠞ ꠘꠣꠝ ꠖꠤꠍꠟꠣꠝ ꠙꠤꠔꠞ, ꠀꠞ ꠅꠃ ꠙꠣꠔ꠆ꠔꠞꠞ ꠃꠙꠞꠦꠃ ꠀꠝꠣꠞ ꠔꠞꠤꠇꠣꠞ ꠔꠣꠝꠣꠝ ꠎꠝꠣꠔ ꠉꠠꠤꠀ ꠔꠥꠟꠝꠥ। ꠖꠥꠎꠈꠤ ꠇꠥꠘꠥ ꠡꠇ꠆ꠔꠤꠄꠃ ꠄꠞ ꠟꠉꠦ ꠙꠣꠞꠔ ꠘꠣꠄ।
MAT 16:19 ꠔꠥꠝꠣꠞ ꠀꠔꠅ ꠀꠝꠤ ꠛꠦꠢꠦꠡ꠆ꠔꠤ ꠛꠣꠖꠡꠣꠁꠞ ꠌꠣꠛꠤ ꠖꠤꠝꠥ, ꠅꠃ ꠖꠥꠘꠤꠀꠔ ꠔꠥꠝꠤ ꠎꠦꠔꠣꠞꠦ ꠘꠣꠎꠣꠁꠎ ꠇꠁꠛꠣꠄ, ꠁꠔꠣ ꠀꠟ꠆ꠟꠣꠞ ꠖꠞꠛꠣꠞꠅ ꠘꠣꠎꠣꠁꠎ ꠅꠁꠎꠤꠛ, ꠀꠞ ꠔꠥꠝꠤ ꠎꠦꠔꠣꠞꠦ ꠎꠣꠁꠎ ꠇꠁꠛꠣꠄ, ꠀꠟ꠆ꠟꠣꠞ ꠖꠞꠛꠣꠞꠅ-ꠅ ꠁꠔꠣ ꠎꠣꠁꠎ ꠅꠁꠎꠤꠛ।”
MAT 16:20 ꠛꠣꠖꠦ ꠁꠍꠣꠄ ꠔꠣꠞꠣꠞꠦ ꠖꠠꠣꠁꠀ ꠇꠁꠟꠣ, “ꠀꠝꠤꠃ ꠎꠦꠘ ꠢꠃ ꠀꠟ-ꠝꠍꠤ, ꠁꠔꠣ ꠇꠦꠃꠞꠞꠦ ꠢꠥꠘꠣꠁꠅ ꠘꠣ।”
MAT 16:21 ꠅꠃ ꠡꠝꠄ ꠕꠣꠇꠤ ꠁꠍꠣꠄ ꠔꠣꠘ ꠍꠣꠢꠣꠛꠤ ꠅꠇꠟꠞꠦ ꠎꠣꠘꠣꠘꠤ ꠗꠞꠟꠣ, ꠔꠣꠁꠘ ꠎꠦꠞꠥꠎꠣꠟꠦꠝꠅ ꠎꠣꠁꠔꠦ ꠅꠁꠛ। ꠢꠘꠞ ꠝꠥꠞꠛ꠆ꠛꠤ ꠅꠇꠟꠦ, ꠛꠠ ꠁꠝꠣꠝ ꠅꠇꠟꠦ ꠀꠞ ꠝꠃꠟꠣꠘꠣ ꠅꠇꠟꠦ ꠔꠣꠘꠞꠦ ꠛꠃꠔ ꠖꠥꠈ-ꠝꠍꠤꠛꠔꠅ ꠚꠣꠟꠣꠁꠛꠣ। ꠛꠣꠖꠦ ꠔꠣꠘꠞꠦ ꠎꠣꠘꠦ ꠝꠣꠞꠣ ꠅꠁꠛ, ꠅꠁꠟꠦ ꠝꠃꠔꠞ ꠔꠤꠘ ꠖꠤꠘꠞ ꠖꠤꠘ ꠢꠤꠞꠛꠣꠞ ꠎꠤꠘ꠆ꠖꠣ ꠅꠁꠀ ꠃꠑꠛꠣ।
MAT 16:22 ꠁꠈꠣꠘ ꠢꠥꠘꠤꠀ ꠍꠣꠢꠣꠛꠤ ꠙꠤꠔꠞꠦ ꠔꠣꠘꠞꠦ ꠕꠥꠠꠣ ꠢꠞꠣꠁꠀ ꠘꠤꠀ ꠇꠁꠟꠣ, “ꠢꠥꠎꠥꠞ, ꠅꠡꠝ꠆ꠛꠛ, ꠀꠙꠘꠣꠞ ꠃꠙꠞꠦ ꠇꠥꠘꠥꠝꠘ꠆ꠔꠦꠃ ꠁꠔꠣ ꠅꠁꠔꠦ ꠙꠣꠞꠦ ꠘꠣ।”
MAT 16:23 ꠁꠍꠣꠄ ꠙꠤꠔꠞꠞ ꠛꠣꠄ ꠚꠤꠞꠤꠀ ꠇꠁꠟꠣ, “ꠗꠥꠞ ꠁꠛꠟꠤꠍ, ꠀꠝꠣꠞ ꠉꠦꠍ ꠕꠣꠇꠤ ꠜꠣꠉ! ꠔꠥꠁ ꠀꠝꠣꠞ ꠙꠕꠞ ꠎꠁꠘ꠆ꠎꠣꠟ। ꠔꠥꠁ ꠀꠟ꠆ꠟꠣꠁ ꠝꠥꠘꠡꠣꠞꠦ ꠛꠣꠖ ꠖꠤꠀ, ꠝꠣꠘꠡꠞ ꠟꠣꠈꠣꠘ ꠌꠤꠘ꠆ꠔꠣ ꠇꠞꠞꠦ।”
MAT 16:24 ꠛꠣꠖꠦ ꠔꠣꠁꠘ ꠄꠞꠣꠞꠦ ꠇꠁꠟꠣ, “ꠇꠦꠃ ꠎꠥꠖꠤ ꠀꠝꠣꠞ ꠔꠞꠤꠇꠣꠔ ꠀꠁꠔ ꠌꠣꠄ, ꠔꠦ ꠢꠦ ꠔꠣꠞ ꠘꠤꠎꠞ ꠈꠥꠡꠤꠄ ꠌꠟꠣ ꠛꠣꠖ ꠖꠦꠃꠇ, ꠔꠣꠞ ꠀꠙꠘ ꠖꠥꠈ-ꠇꠡ꠆ꠐꠞ ꠍꠟꠤꠛ ꠛꠁꠀ ꠟꠁꠀ ꠀꠝꠣꠞ ꠈꠞꠦ ꠀꠃꠇ।
MAT 16:25 ꠎꠦ ꠝꠣꠘꠡꠦ ꠔꠣꠞ ꠘꠤꠎꠞ ꠎꠣꠘ ꠛꠣꠌꠣꠁꠔ ꠌꠣꠄ, ꠢꠦ ꠔꠣꠞ ꠀꠍꠟ ꠎꠤꠘ꠆ꠖꠦꠉꠤ ꠈꠥꠀꠁꠛ। ꠅꠁꠟꠦ ꠎꠦ ꠎꠘꠦ ꠀꠝꠣꠞ ꠟꠣꠉꠤ ꠔꠣꠞ ꠎꠣꠘ ꠇꠥꠞꠛꠣꠘꠤ ꠖꠦꠄ, ꠢꠦ ꠀꠍꠟ ꠎꠤꠘ꠆ꠖꠦꠉꠤ ꠙꠣꠁꠛ।
MAT 16:26 ꠇꠥꠘꠥ ꠝꠣꠘꠡꠦ ꠀꠡ꠆ꠔꠣ ꠖꠥꠘꠤꠀ ꠙꠣꠁꠀꠅ ꠎꠥꠖꠤ ꠔꠣꠞ ꠀꠍꠟ ꠎꠤꠘ꠆ꠖꠦꠉꠤ ꠈꠥꠀꠁꠟꠣꠄ, ꠔꠦ ꠔꠣꠞ ꠇꠥꠘꠥ ꠚꠣꠄꠖꠣ ꠅꠁꠟ ꠘꠤ? ꠢꠦꠡꠦ ꠀꠍꠟ ꠎꠤꠘ꠆ꠖꠦꠉꠤ ꠙꠣꠅꠀꠞ ꠟꠣꠉꠤ ꠢꠦ ꠇꠥꠘ ꠗꠘ ꠛꠤꠟꠣꠁꠛ?
MAT 16:27 ꠀꠝꠤ ꠛꠤꠘ-ꠀꠖꠝꠦ ꠎꠦꠛꠟꠣ ꠀꠝꠣꠞ ꠚꠤꠞꠤꠡ꠆ꠔꠣ ꠅꠇꠟꠞꠦ ꠟꠉꠦ ꠟꠁꠀ ꠀꠝꠣꠞ ꠉꠣꠁꠛꠤ ꠛꠣꠚꠞ ꠇꠥꠖꠞꠔꠤ ꠝꠢꠤꠝꠣꠄ ꠎꠉꠔꠅ ꠢꠤꠞꠛꠣꠞ ꠀꠁꠝꠥ, ꠅꠃ ꠡꠝꠄ ꠙꠞꠔꠦꠇ ꠝꠣꠘꠡꠞꠦ ꠔꠣꠞ ꠀꠝꠟ ꠝꠣꠚꠤꠇ ꠚꠟ ꠖꠤꠝꠥ।
MAT 16:28 ꠢꠥꠘꠅ, ꠀꠝꠤ ꠔꠥꠝꠞꠣꠞꠦ ꠢꠣꠍꠣ ꠇꠕꠣ ꠇꠁꠞꠣꠝ, ꠅꠘꠅ ꠁꠟꠣꠈꠣꠘ ꠇꠄꠎꠘ ꠀꠎꠤꠞ ꠀꠍꠂꠘ, ꠀꠝꠤ ꠛꠤꠘ-ꠀꠖꠝ ꠛꠣꠖꠡꠣ ꠢꠣꠟꠔꠦ ꠘꠣ ꠀꠅꠀ ꠙꠞ꠆ꠎꠘ꠆ꠔ, ꠇꠥꠘꠥꠝꠘ꠆ꠔꠦꠃ ꠄꠞꠣꠞ ꠝꠃꠔ ꠅꠁꠔ ꠘꠣꠄ।”
MAT 17:1 ꠄꠞ ꠍꠄꠖꠤꠘ ꠛꠣꠖꠦ ꠢꠎꠞꠔ ꠁꠍꠣꠄ ꠈꠣꠟꠤ ꠙꠤꠔꠞ, ꠁꠀꠇꠥꠛ ꠀꠞ ꠁꠀꠇꠥꠛꠞ ꠜꠣꠁ ꠢꠣꠘ꠆ꠘꠣꠘꠞꠦ ꠟꠁꠀ ꠃꠌꠣ ꠄꠇ ꠙꠣꠠꠞ ꠃꠙꠞꠦ ꠃꠑꠟꠣ।
MAT 17:2 ꠃꠑꠤꠀ ꠢꠣꠞꠟꠦ ꠄꠞꠣꠞ ꠌꠃꠈꠞ ꠍꠣꠝꠘꠦ ꠔꠣꠘ ꠘꠤꠎꠞ ꠍꠥꠞꠔ ꠛꠖꠟꠤ ꠉꠦꠟ। ꠔꠣꠘ ꠝꠥꠈ ꠅꠁꠉꠦꠟ ꠡꠥꠞꠥꠎꠞ ꠟꠣꠈꠣꠘ ꠏꠟꠝꠟ, ꠀꠞ ꠚꠤꠘ꠆ꠘꠞ ꠟꠦꠛꠣꠍ ꠅꠁꠟ ꠗꠟꠣ ꠌꠇꠌꠇꠣ।
MAT 17:3 ꠍꠣꠢꠣꠛꠤ ꠅꠇꠟꠦ ꠖꠦꠈꠟꠣ, ꠢꠎꠞꠔ ꠝꠥꠍꠣ ꠀꠞ ꠁꠟꠤꠀꠍ ꠘꠛꠤꠄ ꠀꠁꠀ ꠔꠣꠘ ꠟꠉꠦ ꠛꠣꠔꠌꠤꠔ ꠇꠞꠞꠣ।
MAT 17:4 ꠅꠃ ꠡꠝꠄ ꠙꠤꠔꠞꠦ ꠇꠁꠟꠣ, “ꠢꠥꠎꠥꠞ, ꠀꠝꠞꠣ ꠔ ꠅꠘꠅ ꠀꠍꠤ, ꠈꠥꠛ ꠜꠣꠟꠣ ꠅꠁꠍꠦ। ꠀꠙꠘꠦ ꠌꠣꠁꠟꠦ ꠀꠝꠤ ꠔꠤꠘꠈꠣꠘ ꠒꠦꠞꠣ-ꠊꠞ ꠛꠣꠘꠣꠁꠟꠣꠁ, ꠄꠇꠈꠣꠘ ꠀꠙꠘꠣꠞ, ꠄꠇꠈꠣꠘ ꠝꠥꠍꠣ ꠘꠛꠤꠞ ꠀꠞ ꠄꠇꠈꠣꠘ ꠁꠟꠤꠀꠍ ꠘꠛꠤꠞ ꠟꠣꠉꠤ।”
MAT 17:5 ꠔꠣꠁꠘ ꠁꠍꠣꠞ ꠟꠉꠦ ꠝꠣꠔꠤꠞꠣ, ꠀꠈꠔꠣꠃ ꠗꠟꠣ ꠗꠛꠗꠛꠣ ꠝꠦꠊꠞ ꠄꠇ ꠐꠥꠇꠞꠣꠄ ꠀꠁꠀ ꠄꠞꠣꠞꠦ ꠉꠥꠞꠤꠟꠤꠟ, ꠀꠞ ꠅꠃ ꠐꠥꠇꠞꠣ ꠕꠣꠇꠤ ꠉꠣꠁꠛꠤ ꠀꠅꠀꠎ ꠀꠁꠟ, “ꠄꠁꠘꠃ ꠀꠝꠣꠞ ꠈꠣꠍ ꠝꠣꠄꠀꠞ ꠎꠘ ꠁꠛꠘꠥꠟ꠆ꠟꠣ, ꠄꠘ ꠃꠙꠞꠦ ꠀꠝꠤ ꠈꠥꠛ ꠈꠥꠡꠤ, ꠔꠥꠝꠞꠣ ꠄꠘ ꠘꠍꠤꠅꠔ ꠢꠥꠘꠅ।”
MAT 17:6 ꠁꠈꠣꠘ ꠢꠥꠘꠤꠀ ꠍꠣꠢꠣꠛꠤ ꠅꠇꠟ ꠈꠥꠛ ꠒꠞꠣꠁꠟꠣ, ꠒꠞꠣꠁꠀ ꠝꠣꠐꠤꠔ ꠙꠠꠤꠉꠦꠟꠣ।
MAT 17:7 ꠅꠃ ꠡꠝꠄ ꠁꠍꠣ ꠀꠁꠀ ꠔꠣꠞꠣꠞꠦ ꠍꠁꠀ ꠇꠁꠟꠣ, “ꠃꠑꠅ, ꠒꠞꠣꠁꠅ ꠘꠣ।”
MAT 17:8 ꠔꠦꠃ ꠔꠣꠞꠣ ꠌꠃꠈ ꠔꠥꠟꠤ ꠌꠣꠁꠟꠣ, ꠌꠣꠁꠀ ꠈꠣꠟꠤ ꠁꠍꠣ ꠍꠣꠠꠣ ꠀꠞ ꠇꠦꠃꠞꠞꠦ ꠁꠘꠅ ꠖꠦꠈꠟꠣ ꠘꠣ।
MAT 17:9 ꠙꠣꠠ ꠕꠣꠇꠤ ꠟꠣꠝꠤꠀ ꠀꠅꠀꠞ ꠛꠣꠟꠣ ꠁꠍꠣꠄ ꠄꠞꠣꠞꠦ ꠢꠥꠇꠥꠝ ꠖꠤꠟꠣ, “ꠀꠁꠎ ꠎꠦꠔꠣ ꠖꠦꠈꠟꠣꠄ, ꠀꠝꠤ ꠛꠤꠘ-ꠀꠖꠝ ꠝꠞꠣ ꠕꠣꠇꠤ ꠎꠤꠘ꠆ꠖꠣ ꠅꠁꠀ ꠃꠑꠣꠞ ꠀꠉ ꠙꠞ꠆ꠎꠘ꠆ꠔ ꠁꠔꠣ ꠀꠞ ꠇꠦꠃꠞꠞꠦ ꠢꠥꠘꠣꠁꠅ ꠘꠣ।”
MAT 17:10 ꠍꠣꠢꠣꠛꠤ ꠅꠇꠟꠦ ꠁꠍꠣꠞꠦ ꠎꠤꠇꠣꠁꠟꠣ, “ꠢꠥꠎꠥꠞ, ꠝꠃꠟꠣꠘꠣ ꠅꠇꠟꠦ ꠇꠦꠘꠦ ꠇꠂꠘ, ꠀꠟ-ꠝꠍꠤ ꠀꠁꠛꠣꠞ ꠀꠉꠦ, ꠙꠄꠟꠣ ꠁꠟꠤꠀꠍ ꠘꠛꠤꠞ ꠀꠅꠀ ꠎꠞꠥꠞ?”
MAT 17:11 ꠔꠣꠁꠘ ꠇꠁꠟꠣ, “ꠁꠈꠣꠘ ꠢꠣꠍꠣ ꠇꠕꠣ, ꠙꠄꠟꠣ ꠢꠎꠞꠔ ꠁꠟꠤꠀꠍꠦ ꠀꠁꠀ ꠢꠇ꠆ꠇꠟꠔꠣ ꠀꠉꠞ ꠢꠣꠟꠔꠅ ꠚꠤꠞꠣꠁꠀ ꠀꠘꠛꠣ।
MAT 17:12 ꠅꠁꠟꠦ ꠀꠝꠤ ꠔꠥꠝꠞꠣꠞꠦ ꠇꠁꠞꠣꠝ, ꠁꠟꠤꠀꠍ ꠘꠛꠤ ꠑꠤꠇꠃ ꠀꠁꠍꠟꠣ। ꠁ ꠖꠥꠘꠤꠀꠞ ꠝꠣꠘꠡꠦ ꠔꠣꠘꠞꠦ ꠘꠣ ꠌꠤꠘꠣꠄ, ꠔꠣꠘ ꠟꠉꠦ ꠎꠦꠔꠣ ꠝꠘꠅꠟꠄ ꠅꠔꠣ ꠇꠞꠍꠦ। ꠀꠞ ꠀꠝꠤ ꠛꠤꠘ-ꠀꠖꠝꠦꠅ ꠅꠃ ꠟꠣꠈꠣꠘ ꠖꠥꠈ-ꠝꠍꠤꠛꠔ ꠙꠥꠀꠘꠤ ꠟꠣꠉꠛ।”
MAT 17:13 ꠔꠦꠃ ꠍꠣꠢꠣꠛꠤ ꠅꠇꠟꠦ ꠛꠥꠎꠤꠟꠤꠟꠣ, ꠔꠣꠁꠘ ꠅꠈꠘ ꠄꠢꠤꠀ ꠘꠛꠤꠞ ꠇꠕꠣ ꠇꠁꠞꠣ।
MAT 17:14 ꠛꠣꠖꠦ ꠔꠣꠞꠣ ꠙꠣꠠ ꠕꠣꠇꠤ ꠟꠣꠝꠤꠀ ꠀꠁꠟꠣ। ꠅꠘꠅ ꠝꠣꠘꠡꠞ ꠜꠤꠠ ꠀꠍꠤꠟ, ꠅꠃ ꠜꠤꠠꠞ ꠝꠣꠎꠦ ꠄꠇ ꠛꠦꠐꠣ ꠀꠁꠀ ꠁꠍꠣꠞ ꠍꠣꠝꠘꠦ ꠀꠐꠥ ꠉꠣꠟꠣꠖꠤ ꠛꠁꠀ ꠇꠁꠟ,
MAT 17:15 “ꠢꠥꠎꠥꠞ, ꠀꠝꠣꠞ ꠙꠥꠀꠉꠥꠞꠦ ꠛꠣꠌꠣꠃꠇ꠆ꠇꠣ, ꠢꠦ ꠝꠤꠞꠇꠤ ꠛꠦꠝꠣꠞꠦ ꠈꠥꠛ ꠇꠡ꠆ꠐ ꠇꠞꠦꠞ। ꠅꠃ ꠛꠦꠝꠣꠞ ꠃꠑꠟꠦ ꠢꠦ ꠢꠣꠝꠦꠡꠣ ꠀꠉꠥꠘꠤꠔ ꠀꠞ ꠙꠣꠘꠤꠔ ꠙꠠꠤ ꠎꠣꠄ।
MAT 17:16 ꠀꠝꠤ ꠔꠣꠞꠦ ꠟꠁꠀ ꠀꠙꠘꠣꠞ ꠍꠣꠢꠣꠛꠤ ꠅꠇꠟꠞ ꠉꠦꠍꠦ ꠀꠁꠍꠟꠣꠝ, ꠅꠁꠟꠦ ꠔꠣꠞꠣ ꠜꠣꠟꠣ ꠇꠞꠔꠣ ꠙꠣꠞꠍꠂꠘ ꠘꠣ।”
MAT 17:17 ꠁꠍꠣꠄ ꠇꠁꠟꠣ, “ꠢꠣꠄꠞꠦ ꠛꠦꠁꠝꠣꠘ ꠀꠞ ꠘꠣꠚꠞꠝꠣꠘꠞ ꠎꠣꠔ, ꠀꠝꠤ ꠀꠞ ꠇꠔꠖꠤꠘ ꠔꠥꠝꠞꠣꠞ ꠟꠉꠦ ꠞꠁꠝꠥ, ꠔꠥꠝꠞꠣꠞ ꠎꠣꠟꠣ ꠇꠔꠖꠤꠘ ꠡꠁꠎ꠆ꠎ ꠇꠞꠝꠥ? ꠖꠦꠈꠤ, ꠔꠥꠝꠣꠞ ꠙꠥꠀꠞꠦ ꠅꠘꠅ ꠀꠘꠅ।”
MAT 17:18 ꠁꠍꠣꠄ ꠙꠥꠀꠞ ꠟꠉꠞ ꠢꠃ ꠎꠤꠘ꠆ꠘꠣꠔꠞꠦ ꠗꠣꠝꠇꠤ ꠖꠤꠟꠣ, ꠗꠣꠝꠇꠤ ꠈꠣꠁꠀ ꠎꠤꠘꠦ ꠙꠥꠀꠞꠦ ꠍꠣꠠꠤꠀ ꠉꠦꠟꠉꠤ, ꠟꠉꠦ ꠟꠉꠦ ꠢꠦ ꠜꠣꠟꠣ ꠅꠁꠉꠦꠟ।
MAT 17:19 ꠛꠣꠖꠦ ꠍꠣꠢꠣꠛꠤ ꠅꠇꠟꠦ ꠘꠤꠞꠣꠟꠣꠄ ꠁꠍꠣꠞꠦ ꠎꠤꠇꠣꠁꠟꠣ, “ꠢꠥꠎꠥꠞ, ꠀꠝꠞꠣ ꠇꠦꠘꠦ ꠅꠃ ꠎꠤꠘ꠆ꠘꠣꠔ ꠍꠣꠠꠣꠁꠔꠣꠝ ꠙꠣꠞꠟꠣꠝ ꠘꠣ?”
MAT 17:20 ꠔꠣꠁꠘ ꠇꠁꠟꠣ, “ꠔꠥꠝꠞꠣꠞ ꠁꠝꠣꠘꠞ ꠇꠝꠎꠥꠞꠤꠞ ꠟꠣꠉꠤꠃ ꠙꠣꠞꠍ ꠘꠣ। ꠀꠝꠤ ꠢꠣꠍꠣꠃ ꠇꠁꠞꠣꠝ, ꠔꠥꠝꠞꠣꠞ ꠖꠤꠟꠅ ꠎꠥꠖꠤ ꠄꠉꠥ ꠒꠦꠋꠉꠣ ꠛꠤꠌꠤ ꠙꠞꠤꠝꠣꠘ ꠁꠝꠣꠘ ꠕꠣꠇꠦ, ꠀꠞ ꠔꠥꠝꠞꠣ ꠅꠃ ꠙꠣꠠꠞꠦ ꠇꠅ, ‘ꠅꠘ ꠕꠣꠇꠤ ꠒꠥꠟꠤꠀ ꠢꠘꠅ ꠎꠣꠅꠉꠤ,’ ꠔꠦ ꠅꠃ ꠙꠣꠠꠅ ꠒꠥꠟꠤꠎꠤꠛ। ꠔꠥꠝꠞꠣꠞ ꠅꠡꠣꠁꠖ꠆ꠖ ꠇꠥꠘ꠆ꠔꠣꠃ ꠞꠁꠔ ꠘꠣꠄ।
MAT 17:21 ꠢꠥꠘꠅ, ꠖꠥꠀ ꠀꠞ ꠞꠥꠎꠣ ꠞꠣꠈꠣ ꠍꠣꠠꠣ ꠁ-ꠎꠣꠔ ꠎꠤꠘ ꠍꠣꠠꠣꠁꠟ ꠎꠣꠄ ꠘꠣ।”
MAT 17:22 ꠛꠣꠖꠦ ꠉꠣꠟꠤꠟ ꠎꠤꠟꠣꠔ ꠀꠁꠀ ꠁꠍꠣꠄ ꠔꠣꠘ ꠍꠣꠢꠣꠛꠤ ꠅꠇꠟꠞꠦ ꠇꠁꠟꠣ, “ꠀꠝꠤ ꠛꠤꠘ-ꠀꠖꠝꠞꠦ ꠝꠣꠘꠡꠞ ꠀꠔꠅ ꠗꠞꠣꠁ ꠖꠦꠅꠀ ꠅꠁꠛ।
MAT 17:23 ꠔꠣꠞꠣ ꠀꠝꠣꠞꠦ ꠎꠣꠘꠦ ꠝꠣꠞꠤꠟꠤꠛꠣ, ꠝꠞꠣꠞ ꠔꠤꠘ ꠖꠤꠘꠞ ꠖꠤꠘ ꠀꠝꠤ ꠢꠤꠞꠛꠣꠞ ꠎꠤꠘ꠆ꠖꠣ ꠅꠁꠀ ꠃꠑꠝꠥ।” ꠁꠈꠣꠘ ꠢꠥꠘꠤꠀ ꠍꠣꠢꠣꠛꠤ ꠅꠇꠟ ꠈꠥꠛ ꠛꠦꠎꠣꠞ ꠅꠁꠉꠦꠟꠣ।
MAT 17:24 ꠄꠞꠛꠣꠖꠦ ꠁꠍꠣꠄ ꠍꠣꠢꠣꠛꠤ ꠅꠇꠟꠞꠦ ꠟꠁꠀ ꠇꠚꠞꠘꠣꠃꠝ ꠐꠣꠃꠘꠅ ꠉꠦꠟꠣ, ꠅꠃ ꠡꠝꠄ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠞ ꠈꠣꠎꠘꠣ ꠔꠥꠟꠞꠣ ꠅꠇꠟꠦ ꠍꠣꠢꠣꠛꠤ ꠙꠤꠔꠞꠞꠦ ꠇꠁꠟꠣ, “ꠀꠙꠘꠣꠞꠣꠞ ꠃꠡ꠆ꠔꠣꠖꠦ ꠛꠣꠄꠔꠥꠟ-ꠝꠥꠇꠣꠖ꠆ꠖꠍ ꠇꠣꠛꠣ ꠡꠞꠤꠚꠞ ꠌꠣꠘ꠆ꠖꠣ ꠖꠦꠁꠘ ꠘꠣ ꠘꠤ?”
MAT 17:25 ꠙꠤꠔꠞꠦ ꠎꠥꠀꠙ ꠖꠤꠟꠣ, “ꠎꠤꠅꠄ, ꠖꠦꠁꠘ ꠔ।” ꠅꠈꠣꠘ ꠇꠁꠀ ꠙꠤꠔꠞ ꠊꠞꠅ ꠢꠣꠝꠣꠁꠀ ꠇꠥꠘ꠆ꠔꠣ ꠝꠣꠔꠣꠞ ꠀꠉꠦꠃ ꠁꠍꠣꠄ ꠇꠁꠟꠣ, “ꠙꠤꠔꠞ, ꠔꠥꠝꠤ ꠇꠤꠔꠣ ꠝꠘꠅ ꠇꠞꠅ? ꠖꠥꠘꠤꠀꠞ ꠛꠣꠖꠡꠣ ꠅꠇꠟꠦ ꠇꠣꠞ ꠉꠦꠍ ꠕꠣꠇꠤ ꠈꠣꠎꠘꠣ-ꠌꠣꠘ꠆ꠖꠣ ꠀꠖꠣꠄ ꠇꠞꠂꠘ? ꠘꠤꠎꠞ ꠝꠣꠘꠡꠞ ꠉꠦꠍ ꠕꠣꠇꠤ, ꠘꠣ ꠛꠣꠞꠣ ꠝꠣꠘꠡꠞ ꠉꠦꠍ ꠕꠣꠇꠤ?”
MAT 17:26 ꠙꠤꠔꠞꠦ ꠇꠁꠟꠣ, “ꠛꠣꠞꠣ ꠝꠣꠘꠡꠞ ꠉꠦꠍ ꠕꠣꠇꠤ।” ꠔꠦꠃ ꠁꠍꠣꠄ ꠇꠁꠟꠣ, “ꠔꠦ ꠔ ꠘꠤꠎꠞ ꠝꠣꠘꠥꠡ ꠁꠔꠣ ꠕꠣꠇꠤ ꠛꠣꠌꠤ ꠉꠦꠟ, ꠀꠞ ꠀꠝꠞꠣꠅ ꠀꠟ꠆ꠟꠣꠞ ꠀꠙꠘ ꠝꠣꠘꠥꠡ ꠅꠀꠄ ꠀꠟ꠆ꠟꠣꠞ ꠊꠞꠞ ꠈꠣꠎꠘꠣ ꠕꠣꠇꠤ ꠛꠣꠌꠤ ꠉꠦꠍꠤ।
MAT 17:27 ꠅꠁꠟꠦ ꠀꠝꠞꠣ ꠄꠞꠣꠞꠦ ꠛꠦꠎꠣꠞ ꠇꠞꠔꠣꠝ ꠘꠣꠄ, ꠄꠞꠟꠣꠉꠤ ꠔꠥꠝꠤ ꠀꠅꠞꠅ ꠎꠣꠅ, ꠉꠤꠀ ꠝꠣꠍ ꠝꠣꠞꠣꠞ ꠟꠣꠉꠤ ꠛꠞꠤ ꠚꠣꠟꠣꠅ, ꠛꠞꠤꠔ ꠙꠄꠟꠣ ꠎꠦ ꠝꠣꠍ ꠟꠣꠉꠛ, ꠅꠉꠥꠞ ꠝꠥꠈꠞ ꠜꠤꠔꠞꠦ ꠄꠇꠐꠣ ꠞꠥꠙꠣꠞ ꠐꠦꠇꠣ ꠙꠣꠁꠛꠣꠄ। ꠅꠃ ꠐꠦꠇꠣ ꠘꠤꠀ ꠔꠥꠝꠣꠞ ꠀꠞ ꠀꠝꠣꠞ ꠌꠣꠘ꠆ꠖꠣ ꠖꠤꠟꠣꠅ।”
MAT 18:1 ꠅꠃ ꠡꠝꠄ ꠍꠣꠢꠣꠛꠤ ꠅꠇꠟꠦ ꠢꠎꠞꠔ ꠁꠍꠣꠞ ꠇꠣꠘ꠆ꠖꠣꠔ ꠀꠁꠀ ꠎꠤꠇꠣꠁꠟꠣ, “ꠢꠥꠎꠥꠞ, ꠛꠦꠢꠦꠡ꠆ꠔꠤ ꠛꠣꠖꠡꠣꠁꠞ ꠝꠣꠎꠦ ꠢꠇ꠆ꠇꠟ ꠕꠣꠇꠤ ꠛꠠ ꠇꠦ?”
MAT 18:2 ꠔꠦꠃ ꠁꠍꠣꠄ ꠄꠇ ꠢꠥꠞꠥꠔ꠆ꠔꠣꠞꠦ ꠒꠣꠇꠤꠀ ꠀꠘꠤꠀ ꠔꠣꠞꠣꠞ ꠝꠣꠎꠦ ꠃꠛꠣ ꠇꠞꠣꠁ ꠇꠁꠟꠣ,
MAT 18:3 “ꠀꠝꠤ ꠔꠥꠝꠞꠣꠞꠦ ꠢꠣꠍꠣꠃ ꠇꠁꠞꠣꠝ, ꠔꠥꠝꠞꠣ ꠎꠥꠖꠤ ꠝꠘ ꠚꠤꠞꠣꠁꠀ ꠅꠃ ꠢꠥꠞꠥꠔ꠆ꠔꠣꠞ ꠟꠣꠈꠣꠘ ꠘꠣ ꠅꠅ, ꠔꠦ ꠇꠥꠘꠥꠝꠘ꠆ꠔꠦꠃ ꠛꠦꠢꠦꠡ꠆ꠔꠤ ꠛꠣꠖꠡꠣꠁꠔ ꠢꠣꠝꠣꠁꠔꠣꠄ ꠙꠣꠞꠔꠣꠄ ꠘꠣꠄ।
MAT 18:4 ꠎꠦ ꠎꠘꠦ ꠘꠤꠎꠞꠦ ꠅꠃ ꠢꠥꠞꠥꠔ꠆ꠔꠣꠞ ꠟꠣꠈꠣꠘ ꠢꠥꠞꠥ ꠝꠘꠅ ꠇꠞꠦ, ꠛꠦꠢꠦꠡ꠆ꠔꠤ ꠛꠣꠖꠡꠣꠁꠔ ꠢꠦ-ꠃ ꠢꠇꠟ ꠕꠣꠇꠤ ꠖꠣꠝꠤ।
MAT 18:5 ꠀꠞ ꠎꠦ ꠎꠘꠦ ꠀꠝꠣꠞ ꠟꠣꠉꠤ ꠅꠃ ꠢꠥꠞꠥꠔ꠆ꠔꠣꠞ ꠟꠣꠈꠣꠘ ꠇꠥꠘꠥ ꠍꠣꠛꠣꠟꠞꠦ ꠇꠛꠥꠟ ꠇꠞꠦ, ꠢꠦ ꠀꠝꠣꠞꠦꠃ ꠇꠛꠥꠟ ꠇꠞꠦ।
MAT 18:6 “ꠢꠥꠘꠅ, ꠀꠝꠣꠞ ꠔꠞꠤꠇꠣꠞ ꠅꠃ ꠢꠥꠞꠥ-ꠝꠥꠞꠥ ꠄꠇꠎꠘꠞꠦ ꠎꠦꠉꠤꠄ ꠉꠥꠘꠣꠞ ꠙꠕꠦ ꠐꠣꠘꠤꠀ ꠘꠦꠄ, ꠅꠉꠥꠞ ꠟꠣꠉꠤ ꠀꠞꠅ ꠜꠣꠟꠣ ꠅꠁꠟ ꠅꠘꠦ, ꠅꠉꠥꠞ ꠉꠟꠣꠔ ꠙꠣꠔ꠆ꠔꠞ ꠛꠣꠘ꠆ꠖꠤꠀ ꠖꠞꠤꠀꠔ ꠚꠣꠟꠣꠁ ꠖꠦꠅꠀ।
MAT 18:7 ꠢꠣꠄꠞꠦ ꠖꠥꠘꠤꠀ, ꠉꠥꠘꠣꠞ ꠙꠕꠦ ꠘꠦꠅꠀꠞ ꠟꠣꠉꠤ ꠔꠥꠝꠣꠞ ꠝꠣꠎꠦ ꠇꠔ ꠃꠍꠇꠣꠘꠤ ꠀꠍꠦ! ꠃꠍꠇꠣꠘꠤ ꠔ ꠀꠁꠛꠃ ꠀꠁꠛ। ꠅꠁꠟꠦ ꠟꠣꠘ꠆ꠘꠔ ꠢꠃ ꠎꠘꠞ ꠃꠙꠞꠦ, ꠎꠦꠉꠤꠄ ꠉꠥꠘꠣ ꠇꠞꠣꠘꠤꠞ ꠟꠣꠉꠤ ꠃꠍꠇꠣꠘꠤ ꠖꠦꠄ।
MAT 18:8 ꠔꠥꠝꠣꠞ ꠀꠔ ꠛꠣ ꠙꠣꠅ ꠎꠥꠖꠤ ꠔꠥꠝꠣꠞꠦ ꠉꠥꠘꠣꠞ ꠙꠕꠦ ꠐꠣꠘꠦ, ꠔꠦ ꠁ ꠀꠔ-ꠙꠣꠅ ꠇꠣꠐꠤꠀ ꠚꠣꠟꠣꠁ ꠖꠦꠅ। ꠖꠥꠁꠅ ꠀꠔ-ꠙꠣꠅ ꠟꠁꠀ ꠖꠥꠎꠈꠅ ꠎꠟꠣ ꠕꠣꠇꠤ, ꠀꠔꠥꠞ ꠅꠁꠀꠅ ꠛꠦꠢꠦꠡ꠆ꠔꠅ ꠎꠣꠅꠀ ꠔꠥꠝꠣꠞ ꠟꠣꠉꠤ ꠜꠣꠟꠣ।
MAT 18:9 ꠔꠥꠝꠣꠞ ꠌꠃꠈꠦ ꠎꠥꠖꠤ ꠔꠥꠝꠣꠞꠦ ꠉꠥꠘꠣꠞ ꠙꠕꠦ ꠐꠣꠘꠦ, ꠔꠦ ꠁ ꠌꠃꠈ ꠔꠥꠟꠤꠀ ꠚꠣꠟꠣꠁ ꠖꠦꠅ। ꠖꠥꠁꠅ ꠌꠃꠈ ꠟꠁꠀ ꠖꠥꠎꠈꠅ ꠎꠟꠣ ꠕꠣꠇꠤ, ꠇꠣꠘꠣ ꠅꠁꠀꠅ ꠀꠈꠦꠞ ꠙꠣꠅꠀ ꠔꠥꠝꠣꠞ ꠟꠣꠉꠤ ꠜꠣꠟꠣ।
MAT 18:10 “ꠢꠥꠘꠅ, ꠀꠝꠤ ꠇꠁꠞꠣꠝ, ꠔꠥꠝꠞꠣ ꠅꠃ ꠢꠥꠞꠥꠔ꠆ꠔꠣꠞ ꠟꠣꠈꠣꠘ ꠇꠥꠘꠥ ꠍꠣꠛꠣꠟꠞꠦꠅ ꠄꠟꠣꠝꠤ ꠇꠞꠤꠅ ꠘꠣ। ꠔꠣꠞꠣꠞ ꠚꠤꠞꠤꠡ꠆ꠔꠣ ꠅꠇꠟꠦ ꠛꠦꠢꠦꠡ꠆ꠔꠞ ꠝꠣꠎꠦ ꠢꠞ-ꠢꠣꠝꠦꠡꠣ ꠀꠝꠣꠞ ꠛꠦꠢꠦꠡ꠆ꠔꠤ ꠛꠣꠚ ꠀꠟ꠆ꠟꠣ ꠙꠣꠇꠞ ꠝꠥꠈ ꠖꠦꠈꠞꠣ।
MAT 18:11 ꠎꠣꠘ ꠘꠤ, ꠎꠦꠞꠣ ꠛꠦ-ꠙꠕꠦ ꠉꠦꠍꠦꠉꠤ, ꠄꠞꠣꠞꠦ ꠛꠣꠌꠣꠘꠤꠞ ꠟꠣꠉꠤꠃ ꠀꠝꠤ ꠛꠤꠘ-ꠀꠖꠝ ꠁ ꠖꠥꠘꠤꠀꠔ ꠀꠁꠍꠤ।
MAT 18:12 “ꠝꠘꠅ ꠇꠞꠅ, ꠇꠥꠘꠥ ꠝꠣꠘꠡꠞ ꠄꠇ-ꠡꠉꠥ ꠝꠦꠠꠣ ꠀꠍꠦ, ꠄꠞ ꠝꠣꠎꠞ ꠄꠉꠥ ꠝꠦꠠꠣ ꠀꠞꠣꠁ ꠉꠦꠟꠦ ꠢꠦ ꠛꠣꠇꠤ ꠘꠤꠞꠣꠘ꠆ꠘꠛ꠆ꠛꠁꠐꠣ ꠛꠘ꠆ꠖꠅ ꠕꠁꠀ, ꠢꠃ ꠀꠞꠣꠁꠟ ꠅꠉꠥ ꠔꠥꠇꠣꠘꠤꠔ ꠎꠣꠄ ꠘꠣ ꠘꠤ?
MAT 18:13 ꠀꠝꠤ ꠔꠥꠝꠞꠣꠞꠦ ꠢꠣꠍꠣꠃ ꠇꠁꠞꠣꠝ, ꠢꠦ ꠎꠥꠖꠤ ꠁꠇꠐꠣ ꠔꠥꠇꠣꠁꠀ ꠙꠣꠄ, ꠔꠦ ꠎꠦ ꠘꠤꠞꠣꠘ꠆ꠘꠛ꠆ꠛꠁꠉꠥ ꠀꠞꠍꠤꠟ ꠘꠣ, ꠅꠉꠥꠁꠘ ꠕꠁꠀ ꠎꠦꠉꠥ ꠀꠞꠤ ꠉꠦꠍꠤꠟ, ꠅꠉꠥꠞ ꠟꠣꠉꠤꠃ ꠢꠦ ꠈꠥꠛ ꠈꠥꠡꠤ-ꠛꠣꠡꠤ ꠇꠞꠦ।
MAT 18:14 ꠑꠤꠇ ꠅꠃ ꠟꠣꠈꠣꠘ, ꠔꠥꠝꠞꠣꠞ ꠛꠦꠢꠦꠡ꠆ꠔꠤ ꠛꠣꠚ ꠀꠟ꠆ꠟꠣꠄꠅ ꠌꠣꠁꠘ ꠘꠣ, ꠅꠃ ꠢꠥꠞꠥꠔ꠆ꠔꠣꠁꠘ꠆ꠔꠞ ꠝꠣꠎꠞ ꠄꠉꠥ ꠢꠥꠞꠥꠔ꠆ꠔꠣꠅ ꠛꠤꠘꠣꠡ ꠅꠃꠇ।
MAT 18:15 “ꠔꠥꠝꠣꠞ ꠇꠥꠘꠥ ꠜꠣꠁꠄ ꠎꠥꠖꠤ ꠔꠥꠝꠣꠞ ꠉꠦꠍꠦ ꠖꠥꠡ ꠇꠞꠤꠟꠣꠄ, ꠔꠦ ꠢꠦ ꠎꠦꠛꠟꠣ ꠘꠤꠞꠣꠟꠣꠄ ꠕꠣꠇꠦ, ꠅꠃ ꠡꠝꠄ ꠔꠥꠝꠤ ꠄꠇꠟꠣ ꠉꠤꠀ ꠔꠣꠞꠦ ꠛꠥꠎꠣꠁꠅ। ꠔꠥꠝꠣꠞ ꠛꠥꠎ ꠎꠥꠖꠤ ꠝꠣꠘꠤꠟꠣꠄ, ꠔꠦ ꠅꠃ ꠜꠣꠁꠞ ꠟꠉꠦ ꠔꠥꠝꠣꠞ ꠜꠣꠁꠀꠟꠤ ꠛꠣꠌꠣꠁꠟꠤꠟꠣꠄ।
MAT 18:16 ꠅꠁꠟꠦ ꠢꠦ ꠎꠥꠖꠤ ꠔꠥꠝꠣꠞ ꠛꠥꠎ ꠘꠣ ꠝꠣꠘꠦ, ꠔꠦ ꠀꠞꠅ ꠖꠥꠁ-ꠄꠇꠎꠘ ꠝꠣꠎꠞ ꠝꠣꠘꠥꠡ ꠟꠁꠀ ꠎꠣꠁꠅ। ꠉꠤꠀ ꠔꠣꠞꠣꠞ ꠍꠣꠝꠘꠦ ꠔꠣꠞꠦ ꠛꠥꠎꠣꠁꠅ। ꠔꠦꠃ ꠝꠥꠍꠣꠞ ꠡꠞꠤꠅꠔꠞ ꠅꠃ ꠢꠥꠇꠥꠝ ꠙꠥꠞꠣ ꠅꠁꠛ, ‘ꠖꠥꠁ-ꠔꠤꠘꠎꠘ ꠡꠣꠇ꠆ꠇꠤꠞ ꠇꠕꠣꠄ ꠎꠦꠇꠥꠘꠥ ꠛꠦꠙꠣꠞ ꠙꠞꠝꠣꠘ ꠅꠄ।’
MAT 18:17 ꠄꠞꠣꠞ ꠛꠥꠎꠅ ꠎꠥꠖꠤ ꠢꠦ ꠘꠣ ꠝꠣꠘꠦ, ꠔꠦ ꠔꠣꠞ ꠛꠦꠙꠣꠞꠦ ꠎꠝꠣꠔꠅ ꠘꠣꠟꠤꠡ ꠖꠦꠅ। ꠎꠝꠣꠔꠞ ꠇꠕꠣ ꠎꠥꠖꠤ ꠝꠣꠘꠤꠟꠣꠄ ꠔꠦ ꠜꠣꠟꠣ, ꠀꠞ ꠘꠣ ꠝꠣꠘꠟꠦ ꠔꠣꠞꠦ ꠛꠤꠗꠞ꠆ꠝꠤ ꠛꠣ ꠊꠥꠡꠈꠥꠞ ꠔꠡꠤꠟꠖꠣꠞ ꠝꠘꠅ ꠇꠞꠤꠀ, ꠔꠣꠞꠦ ꠔꠣꠞ ꠙꠕꠦ ꠍꠣꠠꠤ ꠖꠦꠅ।
MAT 18:18 ꠔꠦ ꠀꠝꠤ ꠔꠥꠝꠞꠣꠞꠦ ꠢꠣꠍꠣ ꠇꠕꠣ ꠇꠁꠞꠣꠝ, ꠅꠃ ꠖꠥꠘꠤꠀꠁꠔ ꠔꠥꠝꠞꠣ ꠎꠦꠔꠣꠞꠦ ꠘꠣꠎꠣꠁꠎ ꠇꠁꠛꠣꠄ, ꠁꠔꠣ ꠀꠟ꠆ꠟꠣꠞ ꠖꠞꠛꠣꠞꠅ ꠘꠣꠎꠣꠁꠎ ꠅꠁꠎꠤꠛ, ꠀꠞ ꠔꠥꠝꠞꠣ ꠎꠦꠔꠣꠞꠦ ꠎꠣꠁꠎ ꠇꠁꠛꠣꠄ, ꠀꠟ꠆ꠟꠣꠞ ꠖꠞꠛꠣꠞꠅ-ꠅ ꠁꠔꠣ ꠎꠣꠁꠎ ꠅꠁꠛ।
MAT 18:19 “ꠢꠥꠘꠅ, ꠀꠝꠤ ꠔꠥꠝꠞꠣꠞꠦ ꠀꠞꠅ ꠇꠁꠞꠣꠝ, ꠔꠥꠝꠞꠣꠞ ꠝꠣꠎꠞ ꠖꠥꠁꠎꠘ ꠎꠥꠖꠤ ꠄꠇꠝꠔ ꠅꠁꠀ ꠇꠥꠘꠥ ꠛꠦꠙꠣꠞꠦ ꠖꠥꠀ ꠇꠞꠦ, ꠔꠦ ꠀꠝꠣꠞ ꠛꠦꠢꠦꠡ꠆ꠔꠤ ꠛꠣꠚ ꠀꠟ꠆ꠟꠣꠄ ꠅꠃ ꠖꠥꠀ ꠇꠛꠥꠟ ꠇꠞꠛꠣ।
MAT 18:20 ꠀꠝꠣꠞ ꠘꠣꠝꠦ ꠎꠦ ꠎꠣꠉꠣꠔ ꠖꠥꠁ ꠛꠣ ꠔꠤꠘ ꠎꠘ ꠎꠝꠣ ꠅꠄ, ꠢꠃ ꠎꠣꠉꠣꠔ ꠀꠝꠤꠅ ꠀꠎꠤꠞ ꠕꠣꠇꠤ।”
MAT 18:21 ꠅꠃ ꠡꠝꠄ ꠙꠤꠔꠞꠦ ꠀꠁꠀ ꠁꠍꠣꠞꠦ ꠇꠁꠟꠣ, “ꠢꠥꠎꠥꠞ, ꠀꠝꠣꠞ ꠜꠣꠁꠄ ꠎꠥꠖꠤ ꠀꠝꠣꠞ ꠉꠦꠍꠦ ꠛꠣꠞ ꠛꠣꠞ ꠖꠥꠡ ꠇꠞꠦ, ꠔꠦ ꠀꠝꠤ ꠇꠔꠛꠣꠞ ꠔꠣꠞꠦ ꠝꠣꠚ ꠇꠞꠔꠣꠝ? ꠡꠣꠔ ꠛꠣꠞ ꠘꠤ?”
MAT 18:22 ꠁꠍꠣꠄ ꠇꠁꠟꠣ, “ꠈꠣꠟꠤ ꠡꠣꠔ ꠛꠣꠞ ꠘꠣꠄ, ꠀꠝꠤ ꠇꠁꠞꠣꠝ, ꠔꠣꠞꠦ ꠡꠔ꠆ꠔꠁꠞ ꠉꠥꠘ ꠡꠣꠔ ꠛꠣꠞ ꠝꠣꠚ ꠇꠞꠤꠅ।
MAT 18:23 “ꠢꠥꠘꠅ, ꠛꠦꠢꠦꠡ꠆ꠔꠤ ꠛꠣꠖꠡꠣꠁ ꠅꠟꠣ ꠄꠇ ꠛꠣꠖꠡꠣꠞ ꠟꠣꠈꠣꠘ, ꠎꠦꠁꠘ ꠔꠣꠘ ꠃꠎꠤꠞ-ꠘꠣꠎꠤꠞꠞ ꠉꠦꠍꠦ ꠢꠤꠡꠣꠛ-ꠘꠤꠇꠣꠡ ꠌꠣꠁꠟꠣ।
MAT 18:24 ꠛꠣꠖꠡꠣꠄ ꠢꠤꠡꠣꠛ ꠟꠅꠀꠔ ꠛꠁꠟꠦ ꠄꠞꠣꠞ ꠝꠣꠎꠞ ꠅꠟꠣ ꠄꠇ ꠎꠘꠞꠦ ꠔꠣꠘ ꠍꠣꠝꠘꠦ ꠀꠘꠣ ꠅꠁꠟ, ꠛꠣꠖꠡꠣꠄ ꠄꠞ ꠉꠦꠍꠦ ꠟꠣꠈ ꠟꠣꠈ ꠐꠦꠇꠣ ꠙꠣꠅꠘꠣ ꠀꠍꠟꠣ।
MAT 18:25 ꠅꠃ ꠙꠣꠅꠘꠣ ꠚꠤꠞꠔ ꠖꠤꠛꠣꠞ ꠈꠦꠝꠔꠣ ꠄꠞ ꠘꠣꠁ। ꠄꠞꠖꠣꠄ ꠛꠣꠖꠡꠣꠄ ꠢꠥꠇꠥꠝ ꠖꠤꠟꠣ, ꠢꠦ ꠡꠥꠖ꠆ꠖꠣ ꠔꠣꠞ ꠛꠃ, ꠙꠥꠀ-ꠙꠥꠠꠤꠘ ꠉꠥꠟꠣꠝ ꠢꠤꠡꠣꠛꠦ ꠛꠤꠇꠤ ꠈꠣꠁꠀ, ꠢꠇꠟ ꠡꠄ-ꠡꠝ꠆ꠙꠔ꠆ꠔꠤ ꠛꠦꠌꠤꠀ ꠔꠣꠘ ꠙꠣꠅꠘꠣ ꠀꠖꠣꠄ ꠇꠞꠣꠞ ꠟꠣꠉꠤ।
MAT 18:26 ꠅꠃ ꠢꠥꠇꠥꠝ ꠢꠥꠘꠤꠀ ꠢꠦ ꠛꠣꠖꠡꠣꠞ ꠙꠣꠅꠔ ꠗꠞꠤꠀ ꠇꠣꠘ꠆ꠖꠤꠀ ꠇꠁꠟ, ‘ꠢꠥꠎꠥꠞ, ꠀꠝꠣꠞꠦ ꠕꠥꠠꠣ ꠡꠥꠎꠥꠉ ꠖꠦꠃꠇ꠆ꠇꠣ, ꠀꠝꠤ ꠀꠙꠘꠣꠞ ꠢꠇꠟ ꠙꠣꠅꠘꠣ ꠖꠤꠟꠣꠁꠝꠥ।’
MAT 18:27 ꠅꠃ ꠔꠣꠁꠘ ꠖꠄꠀ ꠇꠞꠤꠀ ꠔꠣꠞꠦ ꠍꠣꠠꠤ ꠖꠤꠟꠣ, ꠀꠞ ꠢꠇꠟ ꠖꠦꠘꠣ ꠝꠣꠚ ꠇꠞꠤ ꠖꠤꠟꠣꠁꠟꠣ।
MAT 18:28 “ꠛꠣꠖꠦ ꠢꠦ ꠛꠣꠞꠦ ꠉꠤꠀ ꠔꠣꠞ ꠟꠉꠞ ꠀꠞꠇ ꠌꠣꠇꠞꠤꠀꠘꠞꠦ ꠙꠣꠁꠟ। ꠅꠃ ꠎꠘꠞ ꠉꠦꠍꠦ ꠢꠦ ꠄꠇ-ꠡ ꠐꠦꠇꠣ ꠙꠣꠅꠘꠣ ꠀꠍꠤꠟ। ꠙꠣꠁꠀ ꠔꠣꠞꠦ ꠉꠟꠣꠔ ꠐꠤꠙꠣ ꠝꠣꠞꠤ ꠗꠞꠤꠀ ꠇꠁꠟ, ‘ꠅꠂ, ꠔꠥꠁ ꠀꠝꠣꠞ ꠙꠣꠅꠘꠣ ꠐꠦꠇꠣ ꠖꠦ।’
MAT 18:29 ꠢꠃ ꠎꠘꠦ ꠔꠣꠞ ꠙꠣꠅ-ꠅ ꠙꠠꠤ ꠝꠤꠘꠔ ꠇꠞꠤ ꠇꠁꠟ, ‘ꠀꠝꠣꠞꠦ ꠕꠥꠠꠣ ꠡꠥꠎꠥꠉ ꠖꠦꠅ, ꠀꠝꠤ ꠔꠥꠝꠣꠞ ꠢꠇꠟ ꠙꠣꠅꠘꠣ ꠖꠤꠟꠣꠁꠝꠥ।’
MAT 18:30 ꠅꠁꠟꠦ ꠢꠦ ꠄꠞ ꠇꠕꠣ ꠝꠣꠘꠟ ꠘꠣ। ꠔꠣꠞ ꠐꠦꠇꠣ ꠘꠣ ꠖꠦꠅꠀ ꠙꠞ꠆ꠎꠘ꠆ꠔ ꠔꠣꠞꠦ ꠎꠦꠟꠅ ꠢꠣꠞꠣꠁ ꠕꠁꠟ।
MAT 18:31 “ꠁꠔꠣ ꠖꠦꠈꠤꠀ ꠔꠣꠞ ꠟꠉꠞ ꠃꠎꠤꠞ-ꠘꠣꠎꠤꠞ ꠅꠇꠟ ꠈꠥꠛ ꠛꠦꠎꠣꠞ ꠅꠁꠟꠣ। ꠔꠣꠞꠣ ꠉꠤꠀ ꠁꠔꠣ ꠛꠣꠖꠡꠣꠞꠦ ꠎꠣꠘꠣꠁꠟꠣ।
MAT 18:32 ꠛꠣꠖꠡꠣꠄ ꠢꠃ ꠌꠣꠇꠞꠤꠀꠘꠞꠦ ꠀꠘꠣꠁꠀ ꠇꠁꠟꠣ, ‘ꠢꠣꠄꠞꠦ ꠘꠣꠚꠞꠝꠣꠘ, ꠔꠥꠝꠤ ꠀꠝꠣꠞꠦ ꠝꠤꠘꠔ ꠇꠞꠣꠄ ꠀꠝꠤ ꠔꠥꠝꠣꠞ ꠢꠇꠟ ꠖꠦꠘꠣ ꠝꠣꠚ ꠇꠞꠤ ꠖꠤꠟꠣꠁꠍꠟꠣꠝ।
MAT 18:33 ꠔꠦ ꠀꠝꠤ ꠎꠦꠟꠣ ꠔꠥꠝꠣꠞꠦ ꠖꠄꠀ ꠇꠞꠍꠟꠣꠝ, ꠔꠥꠝꠤꠅ ꠅꠃꠟꠣ ꠔꠥꠝꠣꠞ ꠟꠉꠞ ꠌꠣꠇꠞꠤꠀꠘꠞꠦ ꠖꠄꠀ ꠇꠞꠣ ꠃꠌꠤꠔ ꠀꠍꠤꠟ ꠘꠣ ꠘꠤ?’
MAT 18:34 ꠛꠣꠖꠦ ꠛꠣꠖꠡꠣꠄ ꠉꠥꠍꠣ ꠇꠞꠤꠀ ꠔꠣꠞꠦ ꠎꠦꠟꠅ ꠢꠣꠞꠣꠁꠟꠣ, ꠔꠣꠘ ꠙꠣꠅꠘꠣ ꠀꠖꠣꠄ ꠅꠀꠞ ꠀꠉ ꠙꠞ꠆ꠎꠘ꠆ꠔ ꠎꠦꠟꠞ ꠎꠟ꠆ꠟꠣꠖ ꠍꠤꠙꠣꠁꠄ ꠔꠣꠞꠦ ꠇꠠꠣꠇꠠꠤ ꠡꠣꠎꠣ ꠖꠤꠟꠣ।
MAT 18:35 “ꠑꠤꠇ ꠅꠃ ꠟꠣꠈꠣꠘ, ꠔꠥꠝꠞꠣꠅ ꠎꠥꠖꠤ ꠔꠥꠝꠞꠣꠞ ꠜꠣꠁꠞꠦ ꠖꠤꠟ ꠕꠣꠇꠤ ꠝꠣꠚ ꠇꠞꠤ ꠘꠣ ꠖꠦꠅ, ꠔꠦ ꠀꠝꠣꠞ ꠛꠦꠢꠦꠡ꠆ꠔꠤ ꠛꠣꠚ ꠀꠟ꠆ꠟꠣꠄꠅ ꠔꠥꠝꠞꠣꠞꠦ ꠅꠃꠟꠣ ꠡꠣꠎꠣ ꠖꠤꠛꠣ।”
MAT 19:1 ꠅꠃ ꠔꠣꠟꠤꠝꠞ ꠛꠣꠖꠦ ꠢꠎꠞꠔ ꠁꠍꠣ ꠉꠣꠟꠤꠟ ꠎꠤꠟꠣ ꠕꠣꠇꠤ ꠎꠞ꠆ꠖꠣꠘ ꠉꠣꠋꠉꠞ ꠢꠙꠣꠞꠅ ꠄꠢꠥꠖꠤꠀ ꠎꠤꠟꠣꠞ ꠙꠥꠛ ꠄꠟꠣꠇꠣꠔ ꠀꠁꠟꠣ।
MAT 19:2 ꠅꠃ ꠡꠝꠄ ꠛꠃꠔ ꠝꠣꠘꠥꠡ ꠔꠣꠘ ꠈꠞꠦ ꠈꠞꠦ ꠀꠁꠟꠣ, ꠔꠣꠁꠘ ꠄꠞꠣ ꠢꠇꠟꠞ ꠛꠦꠝꠣꠞ ꠜꠣꠟꠣ ꠇꠞꠟꠣ।
MAT 19:3 ꠀꠞ ꠚꠞꠤꠡꠤ ꠝꠎꠛꠞ ꠇꠄꠎꠘ ꠝꠣꠘꠥꠡ ꠀꠁꠀ ꠁꠍꠣꠞꠦ ꠙꠞꠤꠇ꠆ꠇꠣ ꠇꠞꠣꠞ ꠟꠣꠉꠤ ꠎꠤꠇꠣꠁꠟꠣ, “ꠇꠃꠇ꠆ꠇꠣ ꠌꠣꠁꠘ, ꠝꠥꠍꠣ ꠘꠛꠤꠞ ꠡꠞꠤꠅꠔ ꠝꠣꠚꠤꠇ ꠇꠥꠘꠥ ꠝꠣꠘꠡꠦ ꠎꠦꠇꠥꠘꠥ ꠇꠣꠞꠘꠦ ꠔꠣꠞ ꠛꠃꠞꠦ ꠔꠣꠟꠣꠇ ꠖꠦꠅꠀ ꠎꠣꠁꠎ ꠘꠤ?”
MAT 19:4 ꠁꠍꠣꠄ ꠇꠁꠟꠣ, “ꠀꠙꠘꠣꠞꠣ ꠀꠟ꠆ꠟꠣꠞ ꠇꠣꠟꠣꠝꠅ ꠙꠣꠁꠍꠂꠘ ꠘꠣ ꠘꠤ, ꠀꠟ꠆ꠟꠣꠄ ꠙꠄꠟꠣ ꠀꠖꠝ ꠀꠞ ꠢꠣꠅꠀꠞꠦ ꠛꠦꠐꠣ ꠀꠞ ꠛꠦꠐꠤ ꠛꠣꠘꠣꠁ ꠙꠄꠖꠣ ꠇꠞꠍꠂꠘ, ꠔꠣꠁꠘ ꠇꠁꠍꠂꠘ,
MAT 19:5 ‘ꠄꠞꠟꠣꠉꠤꠃ ꠛꠦꠐꠣꠁꠘ꠆ꠔꠦ ꠔꠣꠞꠣꠞ ꠝꠣ-ꠛꠣꠚꠞꠦ ꠍꠣꠠꠤꠀ ꠛꠃꠞ ꠟꠉꠦ ꠕꠣꠇꠛꠣ, ꠔꠣꠞꠣ ꠖꠥꠁꠅꠎꠘ ꠄꠇ ꠡꠞꠤꠟ ꠅꠁꠛꠣ।’
MAT 19:6 ꠄꠞꠖꠣꠄ ꠔꠣꠞꠣ ꠖꠥꠁ ꠞꠁꠔꠣ ꠘꠣꠄ, ꠄꠇ ꠇꠣꠄꠀ ꠅꠁꠛꠣ। ꠔꠦ ꠀꠟ꠆ꠟꠣꠄ ꠎꠦꠞꠣꠞꠦ ꠎꠥꠠꠣ ꠛꠣꠘ꠆ꠖꠤꠀ ꠖꠤꠍꠂꠘ, ꠝꠣꠘꠡꠦ ꠁꠔꠣꠞꠦ ꠀꠟꠉ ꠘꠣ ꠇꠞꠃꠇ।”
MAT 19:7 ꠔꠦꠃ ꠚꠞꠤꠡꠤ ꠅꠇꠟꠦ ꠔꠣꠘꠞꠦ ꠇꠁꠟꠣ, “ꠔꠦ ꠝꠥꠍꠣ ꠘꠛꠤꠄ ꠇꠦꠘꠦ ꠛꠣꠔꠣꠁꠍꠂꠘ, ꠔꠣꠟꠣꠇ ꠘꠣꠝꠣ ꠟꠦꠈꠤꠀ ꠛꠃꠞꠦ ꠔꠣꠟꠣꠇ ꠖꠦꠅꠀ ꠎꠣꠁꠎ?”
MAT 19:8 ꠔꠣꠁꠘ ꠇꠁꠟꠣ, “ꠔꠥꠝꠞꠣꠞ ꠖꠤꠟ ꠙꠣꠡꠣꠘ ꠉꠔꠤꠇꠦꠃ ꠝꠥꠍꠣꠄ ꠁ ꠅꠘꠥꠝꠔꠤ ꠖꠤꠍꠂꠘ। ꠅꠁꠟꠦ ꠙꠄꠟꠣ ꠕꠣꠇꠤ ꠁꠟꠣ ꠘꠤꠅꠝ ꠀꠍꠤꠟ ꠘꠣ।
MAT 19:9 ꠀꠝꠤ ꠔꠥꠝꠞꠣꠞꠦ ꠇꠁꠞꠣꠝ, ꠎꠦ ꠝꠣꠘꠡꠦ ꠎꠤꠘꠣꠞ ꠖꠥꠡ ꠍꠣꠠꠣ ꠅꠁꠘ꠆ꠘ ꠎꠦꠇꠥꠘꠥ ꠇꠣꠞꠘꠦ ꠔꠣꠞ ꠛꠃꠞꠦ ꠔꠣꠟꠣꠇ ꠖꠤꠀ ꠀꠞꠇ ꠛꠦꠐꠤꠞꠦ ꠢꠣꠋꠉꠣ ꠇꠞꠦ, ꠢꠦ ꠘꠤꠎꠦꠃ ꠎꠤꠘꠣ ꠇꠞꠦ।”
MAT 19:10 ꠔꠦꠃ ꠍꠣꠢꠣꠛꠤ ꠅꠇꠟꠦ ꠔꠣꠘꠞꠦ ꠇꠁꠟꠣ, “ꠎꠣꠝꠣꠁ-ꠛꠃꠞ ꠝꠣꠎꠦꠅ ꠎꠥꠖꠤ ꠅꠟꠣ ꠊꠐꠘꠣ ꠊꠐꠦ, ꠔꠦ ꠔ ꠛꠤꠀ ꠘꠣ ꠇꠞꠣꠃ ꠜꠣꠟꠣ।”
MAT 19:11 ꠁꠍꠣꠄ ꠔꠣꠞꠣꠞꠦ ꠇꠁꠟꠣ, “ꠢꠇꠟ ꠝꠣꠘꠥꠡ ꠔ ꠁꠟꠣ ꠞꠁꠔ ꠙꠣꠞꠦ ꠘꠣ, ꠈꠣꠟꠤ ꠀꠟ꠆ꠟꠣꠄ ꠎꠦꠞꠣꠞꠦ ꠁ ꠈꠦꠝꠔꠣ ꠖꠤꠍꠂꠘ, ꠔꠣꠞꠣꠃ ꠙꠣꠞꠦ।
MAT 19:12 ꠇꠥꠘꠥ ꠇꠥꠘꠥ ꠝꠣꠘꠥꠡ ꠘꠣ-ꠝꠞ꠆ꠖ ꠢꠣꠟꠔꠦꠃ ꠖꠥꠘꠤꠀꠔ ꠎꠘꠝ ꠟꠄ, ꠄꠞꠟꠣꠉꠤ ꠔꠣꠞꠣ ꠛꠤꠀ ꠇꠞꠦ ꠘꠣ। ꠀꠞ ꠇꠥꠘꠥ ꠇꠥꠘꠥ ꠎꠘꠞꠦ ꠝꠣꠘꠡꠦꠃ ꠘꠣ-ꠝꠞ꠆ꠖ ꠛꠣꠘꠣꠁꠟꠣꠄ, ꠄꠞꠖꠣꠄ ꠔꠣꠞꠣꠅ ꠛꠤꠀ ꠇꠞꠦ ꠘꠣ। ꠢꠤꠞꠛꠣꠞ ꠇꠦꠃ ꠇꠦꠃ ꠀꠍꠦ ꠛꠤꠀ-ꠡꠣꠖꠤ ꠘꠣ ꠇꠞꠤꠀ, ꠈꠣꠟꠤ ꠛꠦꠢꠦꠡ꠆ꠔꠤ ꠛꠣꠖꠡꠣꠁꠞ ꠈꠦꠎꠝꠔꠅ ꠎꠤꠘ꠆ꠖꠦꠉꠤ ꠇꠣꠐꠣꠘꠤꠞ ꠘꠤꠅꠔ ꠇꠞꠤꠟꠣꠄ। ꠔꠦ ꠁꠈꠣꠘ ꠎꠦꠞꠣ ꠀꠝꠟ ꠇꠞꠔ ꠙꠣꠞꠦ, ꠔꠣꠞꠣ ꠀꠝꠟ ꠇꠞꠃꠇ।”
MAT 19:13 ꠛꠣꠖꠦ ꠝꠣꠘꠡꠦ ꠢꠥꠞꠥ ꠢꠥꠞꠥ ꠢꠥꠞꠥꠔ꠆ꠔꠣꠁꠘꠞꠦ ꠟꠁꠀ ꠁꠍꠣꠞ ꠉꠦꠍꠦ ꠀꠁꠟꠣ, ꠔꠣꠞꠣ ꠌꠣꠁꠟꠣ ꠔꠣꠁꠘ ꠎꠣꠘꠥ ꠢꠥꠞꠥꠔ꠆ꠔꠣꠁꠘ꠆ꠔꠞ ꠝꠣꠕꠣꠉꠥ ꠀꠔꠣꠁ ꠖꠤꠀ ꠖꠥꠀ ꠇꠞꠂꠘ। ꠅꠁꠟꠦ ꠍꠣꠢꠣꠛꠤ ꠅꠇꠟꠦ ꠄꠞꠣꠞꠦ ꠛꠇꠣ-ꠎꠇꠣ ꠇꠞꠟꠣ।
MAT 19:14 ꠁꠔꠣ ꠖꠦꠈꠤꠀ ꠔꠣꠁꠘ ꠇꠁꠟꠣ, “ꠢꠥꠞꠥꠔ꠆ꠔꠣꠁꠘꠞꠦ ꠀꠐꠇꠣꠁꠅ ꠘꠣ, ꠔꠣꠞꠣꠞꠦ ꠀꠝꠣꠞ ꠉꠦꠍꠦ ꠀꠁꠔꠦ ꠖꠦꠅ। ꠀꠟ꠆ꠟꠣꠞ ꠛꠣꠖꠡꠣꠁ ꠔ ꠄꠞꠣꠞ ꠟꠣꠈꠣꠘ ꠝꠣꠘꠡꠞ ꠟꠣꠉꠤꠃ।”
MAT 19:15 ꠢꠥꠞꠥꠔ꠆ꠔꠣꠁꠘ꠆ꠔꠞ ꠝꠣꠕꠣ ꠀꠔꠣꠁꠀ ꠖꠥꠀ ꠇꠞꠤꠀ ꠢꠣꠞꠟꠦ, ꠔꠣꠁꠘ ꠢꠤꠘ ꠕꠣꠇꠤ ꠉꠦꠟꠣꠉꠤ।
MAT 19:16 ꠛꠣꠖꠦ ꠄꠇ ꠎꠥꠀꠘ ꠛꠦꠐꠣꠄ ꠀꠁꠀ ꠔꠣꠘꠞꠦ ꠎꠤꠇꠣꠁꠟ, “ꠢꠥꠎꠥꠞ, ꠀꠈꠦꠞꠣꠔ ꠙꠣꠅꠀꠞ ꠟꠣꠉꠤ ꠀꠝꠤ ꠇꠥꠘ ꠢꠇ ꠇꠣꠝ ꠇꠞꠔꠣꠝ?”
MAT 19:17 ꠁꠍꠣꠄ ꠇꠁꠟꠣ, “ꠢꠇ ꠇꠣꠝꠞ ꠛꠦꠙꠣꠞꠦ ꠀꠝꠣꠞꠦ ꠇꠦꠘꠦ ꠎꠤꠇꠣꠁꠞꠣꠄ? ꠢꠇ ꠔ ꠈꠣꠟꠤ ꠄꠇꠎꠘꠃ ꠀꠍꠂꠘ, ꠔꠥꠝꠤ ꠀꠈꠦꠞꠣꠔ ꠙꠣꠁꠔꠦ ꠌꠣꠁꠟꠦ, ꠔꠣꠘ ꠢꠇꠟ ꠢꠥꠇꠥꠝ-ꠀꠢꠇꠣꠝ ꠀꠝꠟ ꠇꠞꠅ।”
MAT 19:18 ꠢꠃ ꠎꠥꠀꠘꠦ ꠇꠁꠟ, “ꠢꠥꠎꠥꠞ, ꠇꠥꠘ ꠇꠥꠘ ꠢꠥꠇꠥꠝ ꠝꠣꠘꠔꠣꠝ?” ꠔꠣꠁꠘ ꠇꠁꠟꠣ, “ꠈꠥꠘ ꠇꠞꠤꠅ ꠘꠣ, ꠎꠤꠘꠣ ꠇꠞꠤꠅ ꠘꠣ, ꠌꠥꠞꠤ ꠇꠞꠤꠅ ꠘꠣ, ꠝꠤꠍꠣ ꠡꠣꠇ꠆ꠇꠤ ꠖꠤꠅ ꠘꠣ,
MAT 19:19 ꠝꠣ-ꠛꠣꠚꠞꠦ ꠁꠎ꠆ꠎꠔ ꠇꠞꠤꠅ ꠀꠞ ꠀꠞꠤ-ꠚꠞꠤꠞꠦ ꠘꠤꠎꠞ ꠟꠣꠈꠣꠘ ꠝꠣꠄꠀ ꠇꠞꠤꠅ।”
MAT 19:20 ꠛꠦꠐꠣꠄ ꠇꠁꠟ, “ꠍꠣꠛ, ꠁꠔꠣ ꠔ ꠀꠝꠤ ꠄꠝꠘꠦꠃ ꠀꠝꠟ ꠇꠞꠤꠀꠞ, ꠅꠁꠟꠦ ꠀꠞ ꠇꠤꠔꠣ ꠇꠞꠔꠣꠝ ꠇꠃꠇ꠆ꠇꠣ?”
MAT 19:21 ꠔꠦꠃ ꠁꠍꠣꠄ ꠔꠣꠞꠦ ꠇꠁꠟꠣ, “ꠔꠥꠝꠤ ꠎꠥꠖꠤ ꠡꠥꠟ꠆ꠟꠀꠘꠣ ꠈꠣꠐꠤ ꠅꠁꠔꠣꠄ ꠌꠣꠅ, ꠔꠦ ꠔꠥꠝꠣꠞ ꠛꠣꠠꠤꠔ ꠎꠣꠅ, ꠉꠤꠀ ꠔꠥꠝꠣꠞ ꠢꠇꠟ ꠗꠘ-ꠍꠣꠝꠣꠘꠣ ꠛꠦꠌꠤꠀ ꠉꠞꠤꠛ-ꠖꠥꠈꠤꠞꠦ ꠛꠤꠟꠣꠁ ꠖꠦꠅ। ꠔꠦꠃ ꠔꠥꠝꠤ ꠛꠦꠢꠦꠡ꠆ꠔꠅ ꠗꠘ-ꠍꠣꠝꠣꠘꠣ ꠙꠣꠁꠛꠣꠄ। ꠄꠞꠛꠣꠖꠦ ꠀꠁꠀ ꠀꠝꠣꠞ ꠃꠝ꠆ꠝꠔ ꠅꠁꠅ।”
MAT 19:22 ꠁꠈꠣꠘ ꠢꠥꠘꠤꠀ ꠛꠦꠐꠣ ꠛꠦꠎꠣꠞ ꠅꠁꠀ ꠉꠦꠟꠉꠤ, ꠔꠣꠞ ꠔ ꠛꠃꠔ ꠗꠘ-ꠍꠣꠝꠣꠘꠣ ꠀꠍꠤꠟ।
MAT 19:23 ꠔꠦꠃ ꠁꠍꠣꠄ ꠔꠣꠘ ꠍꠣꠢꠣꠛꠤ ꠅꠇꠟꠞꠦ ꠇꠁꠟꠣ, “ꠀꠝꠤ ꠢꠣꠍꠣ ꠇꠕꠣ ꠇꠁꠞꠣꠝ, ꠗꠘꠤ ꠝꠣꠘꠥꠡ ꠀꠟ꠆ꠟꠣꠞ ꠛꠣꠖꠡꠣꠁꠔ ꠢꠣꠝꠣꠘꠤ ꠛꠠ ꠝꠡꠇꠤꠟ।
MAT 19:24 ꠢꠥꠘꠅ, ꠗꠘꠤ ꠝꠣꠘꠥꠡ ꠀꠟ꠆ꠟꠣꠞ ꠛꠣꠖꠡꠣꠁꠔ ꠢꠣꠝꠣꠘꠤꠞ ꠌꠣꠁꠔꠦ, ꠍꠥꠁꠞ ꠚꠥꠠꠦꠖꠤ ꠃꠐ ꠢꠣꠝꠣꠘꠤ ꠀꠞꠅ ꠡꠥꠎꠣ।”
MAT 19:25 ꠁꠈꠣꠘ ꠢꠥꠘꠤꠀ ꠍꠣꠢꠣꠛꠤ ꠅꠇꠟ ꠔꠣꠁꠎ꠆ꠎꠥꠛ ꠅꠁꠀ ꠇꠁꠟꠣ, “ꠔꠦ ꠇꠥꠘ ꠝꠣꠘꠥꠡ ꠘꠣꠎꠣꠔ ꠢꠣꠍꠤꠟ ꠇꠞꠛ, ꠇꠦ ꠞꠦꠢꠣꠁ ꠙꠣꠁꠛ?”
MAT 19:26 ꠔꠣꠁꠘ ꠄꠞꠣꠞ ꠛꠣꠄ ꠌꠣꠁꠀ ꠇꠁꠟꠣ, “ꠝꠣꠘꠡꠞ ꠟꠣꠉꠤ ꠅꠡꠝ꠆ꠛꠛ ꠅꠁꠔ ꠙꠣꠞꠦ, ꠅꠁꠟꠦ ꠀꠟ꠆ꠟꠣꠞ ꠘꠎꠞꠅ ꠁꠔꠣ ꠔ ꠝꠣꠝꠥꠟꠤ। ꠔꠣꠁꠘ ꠢꠇꠟꠔꠣꠃ ꠙꠣꠞꠂꠘ।”
MAT 19:27 ꠅꠃ ꠡꠝꠄ ꠙꠤꠔꠞꠦ ꠎꠤꠇꠣꠁꠟꠣ, “ꠢꠥꠎꠥꠞ, ꠀꠝꠞꠣ ꠔ ꠢꠇ꠆ꠇꠟꠔꠣ ꠚꠣꠟꠣꠁ ꠕꠁꠀ ꠀꠙꠘꠣꠞ ꠈꠞꠦ ꠀꠁꠍꠤ। ꠔꠦ ꠀꠝꠞꠣ ꠇꠤꠔꠣ ꠙꠣꠁꠝꠥ?”
MAT 19:28 ꠁꠍꠣꠄ ꠇꠁꠟꠣ, “ꠀꠝꠤ ꠔꠥꠝꠞꠣꠞꠦ ꠢꠣꠍꠣ ꠇꠕꠣ ꠇꠁꠞꠣꠝ, ꠔꠥꠝꠞꠣ ꠎꠣꠞꠣ ꠀꠝꠣꠞ ꠃꠝ꠆ꠝꠔ ꠅꠁꠍ, ꠀꠝꠤ ꠛꠤꠘ-ꠀꠖꠝ ꠎꠤꠘ꠆ꠖꠣ ꠅꠁꠀ ꠎꠦꠛꠟꠣ ꠀꠟ꠆ꠟꠣꠞ ꠛꠣꠖꠡꠣꠁꠞ ꠉꠖꠤꠔ ꠛꠁꠝꠥ, ꠅꠃ ꠡꠝꠄ ꠔꠥꠝꠞꠣꠅ ꠀꠝꠣꠞ ꠟꠉꠦ ꠅꠁꠀ ꠛꠣꠞꠅꠐꠣ ꠔꠈ꠆ꠔꠅ ꠛꠁꠛꠣꠄ, ꠛꠁꠀ ꠛꠘꠤ ꠁꠍꠞꠣꠁꠟꠞ ꠛꠣꠞꠅ ꠉꠥꠡ꠆ꠐꠤꠞ ꠛꠤꠌꠣꠞ ꠇꠞꠛꠣꠄ।
MAT 19:29 ꠢꠥꠘꠅ, ꠎꠦ ꠝꠣꠘꠡꠦ ꠀꠝꠣꠞ ꠟꠣꠉꠤ ꠘꠤꠎꠞ ꠛꠣꠠꠤ-ꠊꠞ, ꠝꠣ-ꠛꠣꠚ, ꠜꠣꠁ-ꠛꠁꠘ, ꠙꠥꠀ-ꠙꠥꠠꠤ, ꠀꠞ ꠎꠝꠤ-ꠝꠤꠞꠣꠡ ꠚꠣꠟꠣꠁꠀ ꠀꠁꠍꠦ, ꠢꠦ ꠅꠃ ꠖꠥꠘꠤꠀꠔ ꠁꠔꠣꠞ ꠄꠇ-ꠡ ꠉꠥꠘ ꠛꠦꠡꠤ ꠙꠣꠁꠛ, ꠄꠞꠟꠉꠦ ꠀꠈꠦꠞꠅ ꠙꠣꠁꠛ।
MAT 19:30 ꠅꠁꠟꠦ ꠅꠈꠘ ꠎꠦꠞꠣ ꠀꠉꠞ ꠇꠣꠔꠣꠞꠅ ꠀꠍꠦ, ꠄꠞꠣꠞ ꠛꠃꠔ ꠎꠘ ꠈꠞꠦ ꠙꠠꠤꠎꠤꠛ, ꠀꠞ ꠈꠞꠞ ꠇꠣꠔꠣꠞꠞ ꠛꠃꠔ ꠎꠘ ꠀꠉꠦ ꠀꠁꠛ।”
MAT 20:1 ꠢꠎꠞꠔ ꠁꠍꠣꠄ ꠀꠞꠅ ꠇꠁꠟꠣ, “ꠛꠦꠢꠦꠡ꠆ꠔꠤ ꠛꠣꠖꠡꠣꠁ ꠔ ꠅꠟꠣ ꠄꠇ ꠉꠤꠞꠡ꠆ꠔꠞ ꠟꠣꠈꠣꠘ। ꠁ ꠉꠤꠞꠡ꠆ꠔꠦ ꠔꠣꠘ ꠈꠦꠔꠞ ꠇꠣꠝꠞ ꠟꠣꠉꠤ ꠈꠥꠛ ꠛꠤꠀꠘꠦ ꠃꠑꠤꠀ ꠇꠣꠝꠟꠣ ꠔꠥꠇꠣꠘꠤꠔ ꠉꠦꠟꠣ।
MAT 20:2 ꠉꠤꠀ ꠇꠣꠝꠟꠣ ꠌꠣꠁꠀ ꠔꠣꠞꠣꠞꠦ ꠄꠇ-ꠡ ꠐꠦꠇꠣ ꠞꠥꠎ ꠚꠥꠠꠣꠁꠀ ꠔꠣꠘ ꠀꠋꠉꠥꠞ ꠛꠣꠉꠣꠘꠅ ꠇꠣꠝꠅ ꠟꠣꠉꠣꠁꠟꠣ।
MAT 20:3 ꠇꠤꠍꠥ ꠛꠦꠁꠟ ꠅꠁꠀ ꠢꠣꠞꠟꠦ ꠔꠣꠁꠘ ꠢꠤꠞꠛꠣꠞ ꠛꠣꠞ ꠅꠁꠟꠣ, ꠛꠣꠞ ꠅꠁꠀ ꠖꠦꠈꠟꠣ ꠀꠞꠅ ꠇꠄꠎꠘ ꠇꠣꠝꠟꠣ ꠛꠦꠇꠣꠞ ꠃꠛꠣꠁ ꠞꠁꠍꠂꠘ।
MAT 20:4 ꠖꠦꠈꠤꠀ ꠇꠁꠟꠣ, ‘ꠔꠥꠝꠞꠣꠅ ꠉꠤꠀ ꠀꠝꠣꠞ ꠛꠣꠉꠣꠘꠅ ꠇꠣꠝꠅ ꠟꠣꠉꠅ, ꠀꠝꠤ ꠔꠥꠝꠞꠣꠞꠦ ꠃꠌꠤꠔ ꠐꠦꠇꠣ ꠖꠤꠝꠥ।’
MAT 20:5 ꠔꠦꠃ ꠔꠣꠞꠣ ꠉꠤꠀ ꠇꠣꠝꠅ ꠟꠣꠉꠟꠣ। ꠅꠟꠣꠈꠣꠘ ꠛꠦꠁꠟ ꠖꠥꠁꠚꠞꠤ ꠛꠣꠟꠣ ꠀꠞ ꠎꠥꠢꠞꠞ ꠛꠣꠖꠦ ꠉꠤꠞꠡ꠆ꠔ ꠢꠤꠞꠛꠣꠞ ꠛꠣꠞ ꠅꠁꠀ ꠉꠤꠀ ꠀꠞꠅ ꠇꠣꠝꠟꠣꠁꠘ ꠀꠘꠤꠀ ꠇꠣꠝꠅ ꠟꠣꠉꠣꠁꠟꠣ।
MAT 20:6 ꠢꠦꠡꠦ ꠛꠤꠀꠟꠤ ꠛꠣꠟꠣ ꠔꠣꠁꠘ ꠛꠣꠞꠦ ꠉꠤꠀ, ꠀꠞꠅ ꠇꠣꠝꠟꠣꠁꠘ ꠃꠛꠣꠁ ꠞꠁꠍꠂꠘ ꠖꠦꠈꠤꠀ ꠇꠁꠟꠣ, ‘ꠔꠥꠝꠞꠣ ꠢꠣꠞꠣꠖꠤꠘ ꠗꠞꠤ ꠁꠘꠅ ꠃꠛꠣꠁ ꠞꠁꠍ ꠇꠦꠘꠦ?’
MAT 20:7 ꠄꠞꠣ ꠇꠁꠟꠣ, ‘ꠍꠣꠛ, ꠀꠝꠞꠣ ꠇꠥꠘꠥ ꠇꠣꠝ ꠙꠣꠁꠍꠤ ꠘꠣ।’ ꠉꠤꠞꠡ꠆ꠔꠦ ꠇꠁꠟꠣ, ‘ꠔꠥꠝꠞꠣꠅ ꠉꠤꠀ ꠀꠝꠣꠞ ꠛꠣꠉꠣꠘꠅ ꠇꠣꠝꠅ ꠟꠣꠉꠅ।’
MAT 20:8 “ꠢꠣꠁꠘ꠆ꠎꠣ ꠛꠣꠟꠣ ꠉꠤꠞꠡ꠆ꠔꠦ ꠔꠣꠘ ꠘꠤꠎꠞ ꠌꠣꠇꠞꠞꠦ ꠇꠁꠟꠣ, ‘ꠅꠛꠣ, ꠛꠣꠉꠣꠘꠞ ꠅꠃ ꠇꠣꠝꠟꠣꠁꠘ꠆ꠔꠞꠦ ꠀꠘꠤꠀ, ꠡꠦꠡꠞ ꠎꠘ ꠕꠣꠇꠤ ꠙꠄꠟꠣ ꠎꠘ ꠙꠞ꠆ꠎꠘ꠆ꠔ ꠢꠇꠟꠞ ꠞꠥꠎ ꠖꠤꠟꠣꠅ।’
MAT 20:9 ꠛꠤꠀꠟꠤ ꠛꠣꠟꠣ ꠎꠦꠞꠣ ꠇꠣꠝꠅ ꠟꠣꠉꠍꠤꠟ, ꠔꠣꠞꠣ ꠄꠇ-ꠡ ꠇꠞꠤ ꠙꠣꠁꠟ।
MAT 20:10 ꠁꠔꠣ ꠖꠦꠈꠤꠀ ꠙꠄꠟꠣ ꠎꠣꠞꠣ ꠇꠣꠝꠅ ꠟꠣꠉꠍꠤꠟ, ꠔꠣꠞꠣ ꠝꠘꠅ ꠇꠞꠟ ꠔꠣꠞꠣ ꠀꠞꠅ ꠛꠦꠡꠤ ꠐꠦꠇꠣ ꠙꠣꠁꠛ, ꠅꠁꠟꠦ ꠉꠤꠞꠡ꠆ꠔꠦ ꠄꠞꠣ ꠢꠇꠟꠞꠦ ꠄꠇ ꠢꠝꠣꠘ ꠞꠥꠎ ꠖꠤꠟꠣ।
MAT 20:11 ꠄꠞꠖꠣꠄ ꠙꠄꠟꠣ ꠖꠟ ꠅꠃ ꠉꠤꠞꠡ꠆ꠔꠞ ꠃꠙꠞꠦ ꠛꠦꠎꠣꠞ ꠅꠁꠀ ꠇꠁꠟꠣ,
MAT 20:12 ‘ꠀꠝꠞꠣ ꠢꠣꠞꠣ ꠖꠤꠘ ꠗꠞꠤ ꠞꠂꠖꠦ ꠎꠟꠤ-ꠙꠥꠠꠤ ꠇꠣꠝ ꠇꠞꠤꠀ ꠄꠇ-ꠡ ꠐꠦꠇꠣ ꠙꠣꠁꠟꠣꠝ। ꠅꠁꠟꠦ ꠔꠣꠞꠣ ꠢꠦꠡꠦ ꠀꠁꠀ ꠕꠥꠠꠣ ꠡꠝꠄ ꠇꠣꠝ ꠇꠞꠣꠄꠅ, ꠀꠙꠘꠦ ꠔꠣꠞꠣꠞꠦ ꠀꠝꠞꠣꠞ ꠢꠝꠣꠘ ꠐꠦꠇꠣ ꠖꠤꠟꠣ।’
MAT 20:13 “ꠔꠦꠃ ꠉꠤꠞꠡ꠆ꠔꠦ ꠔꠣꠞꠣꠞ ꠄꠇꠎꠘꠞꠦ ꠇꠁꠟꠣ, ‘ꠅꠛꠣ, ꠀꠝꠤ ꠅꠁꠘ꠆ꠘꠣꠄ ꠇꠥꠘ꠆ꠔꠣ ꠇꠞꠍꠤ ꠘꠤ, ꠔꠥꠝꠤ ꠘꠤꠎꠦꠃ ꠔ ꠄꠇ-ꠡ ꠐꠦꠇꠣꠄ ꠇꠣꠝ ꠇꠞꠔꠦ ꠞꠣꠎꠤ ꠅꠁꠍ ꠘꠣ ꠘꠤ?
MAT 20:14 ꠅꠈꠘ ꠔꠥꠝꠣꠞ ꠙꠣꠅꠘꠣ ꠟꠁꠀ ꠔꠥꠝꠤ ꠎꠣꠅ। ꠀꠝꠤ ꠀꠝꠣꠞ ꠘꠤꠎꠞ ꠁꠌ꠆ꠍꠣꠄ ꠢꠇꠟꠞꠦ ꠄꠇ ꠢꠝꠣꠘ ꠖꠤꠍꠤ।
MAT 20:15 ꠀꠝꠣꠞ ꠘꠤꠎꠞ ꠍꠣꠝꠣꠘꠣ, ꠘꠤꠎꠞ ꠁꠌ꠆ꠍꠣꠝꠔ ꠈꠞꠌ ꠇꠞꠣꠞ ꠅꠗꠤꠇꠣꠞ ꠘꠣꠁ ꠘꠤ? ꠀꠝꠤ ꠔꠣꠞꠣꠞꠦ ꠖꠄꠀ ꠇꠞꠣꠄ ꠔꠥꠝꠣꠞ ꠌꠈꠥꠔ ꠎꠟꠦꠞ ꠘꠤ?’ ”
MAT 20:16 ꠅꠃ ꠇꠤꠌ꠆ꠍꠣ ꠢꠥꠘꠣꠘꠤꠞ ꠛꠣꠖꠦ ꠁꠍꠣꠄ ꠇꠁꠟꠣ, “ꠛꠥꠎꠍ ꠘꠤ, ꠎꠦꠞꠣ ꠈꠞꠞ ꠇꠣꠔꠣꠞꠅ ꠀꠍꠦ ꠔꠣꠞꠣ ꠀꠉꠦ ꠀꠁꠛ, ꠀꠞ ꠀꠉꠞ ꠇꠣꠔꠣꠞꠞ ꠔꠣꠞꠣ ꠈꠞꠦ ꠎꠣꠁꠛ।”
MAT 20:17 ꠛꠣꠖꠦ ꠔꠣꠁꠘ ꠎꠦꠛꠟꠣ ꠎꠦꠞꠥꠎꠣꠟꠦꠝ ꠝꠥꠈꠣ ꠞꠅꠀꠘꠣ ꠅꠁꠎꠤꠔꠣ, ꠅꠃ ꠡꠝꠄ ꠔꠣꠘ ꠛꠣꠞꠅꠎꠘ ꠍꠣꠢꠣꠛꠤꠞꠦ ꠀꠟꠉꠣ ꠢꠞꠣꠁꠀ ꠘꠤꠀ ꠇꠁꠟꠣ,
MAT 20:18 “ꠢꠥꠘꠅ, ꠀꠝꠞꠣ ꠅꠈꠘ ꠎꠦꠞꠥꠎꠣꠟꠦꠝ ꠎꠣꠁꠞꠣꠝ। ꠢꠘꠅ ꠀꠝꠤ ꠛꠤꠘ-ꠀꠖꠝꠞꠦ ꠗꠞꠤꠀ ꠛꠠ ꠁꠝꠣꠝ ꠀꠞ ꠝꠃꠟꠣꠘꠣ ꠅꠇꠟꠞ ꠀꠔꠅ ꠡꠙꠤ ꠖꠦꠅꠀ ꠅꠁꠛ। ꠔꠣꠞꠣ ꠛꠤꠌꠣꠞ ꠇꠞꠤꠀ ꠀꠝꠣꠞꠦ ꠎꠣꠘꠦ ꠝꠣꠞꠣꠞ ꠞꠣꠄ ꠖꠤꠛꠣ।
MAT 20:19 ꠀꠝꠣꠞꠦ ꠜꠤꠘ-ꠖꠦꠡꠤ ꠅꠇꠟꠞ ꠀꠔꠅ ꠡꠝꠎꠣꠁꠛꠣ। ꠔꠣꠞꠣ ꠀꠝꠣꠞꠦ ꠑꠣꠐ꠆ꠐꠣ-ꠝꠡꠇꠞꠣ ꠇꠞꠤꠀ, ꠛꠦꠎꠥꠁꠔꠣ ꠌꠣꠛꠥꠇ ꠝꠣꠞꠤꠀ, ꠟꠣꠇꠠꠤꠞ ꠍꠟꠤꠛꠅ ꠟꠐꠇꠣꠁꠀ ꠎꠣꠘꠦ ꠝꠣꠞꠤꠟꠤꠛꠣ। ꠝꠃꠔꠞ ꠔꠤꠘ ꠖꠤꠘꠞ ꠖꠤꠘ ꠀꠝꠤ ꠢꠤꠞꠛꠣꠞ ꠎꠤꠘ꠆ꠖꠣ ꠅꠁꠀ ꠃꠑꠝꠥ।”
MAT 20:20 ꠛꠣꠖꠦ ꠎꠤꠛꠥꠖꠤꠀꠞ ꠖꠥꠁꠅ ꠙꠥꠀꠞꠦ ꠟꠁꠀ ꠔꠣꠞꠣꠞ ꠝꠣʼꠄ ꠁꠍꠣꠞ ꠉꠦꠍꠦ ꠀꠁꠟꠣ। ꠀꠁꠀ ꠇꠥꠘ꠆ꠔꠣ ꠌꠣꠅꠀꠞ ꠀꠡꠣꠄ ꠔꠣꠘ ꠙꠣꠅ-ꠅ ꠙꠠꠟꠣ।
MAT 20:21 ꠁꠍꠣꠄ ꠛꠦꠐꠤꠞꠦ ꠎꠤꠇꠣꠁꠟꠣ, “ꠀꠙꠘꠦ ꠇꠤꠔꠣ ꠌꠣꠁꠘ?” ꠛꠦꠐꠤꠄ ꠇꠁꠟꠣ, “ꠢꠥꠎꠥꠞ, ꠀꠝꠣꠞ ꠄꠉꠥ ꠙꠥꠀꠞꠦ ꠀꠙꠘꠣꠞ ꠞꠣꠎꠔ꠆ꠔꠞ ꠒꠣꠁꠘꠞ ꠉꠖꠤ, ꠀꠞ ꠀꠞꠅꠉꠥꠞꠦ ꠛꠣꠃꠞ ꠉꠖꠤꠈꠣꠘꠅ ꠛꠁꠛꠣꠞ ꠡꠥꠎꠥꠉ ꠖꠤꠛꠣ ꠘꠤ?”
MAT 20:22 ꠁꠍꠣꠄ ꠔꠣꠞꠣꠞꠦ ꠎꠥꠀꠙ ꠖꠤꠟꠣ, “ꠔꠥꠝꠞꠣ ꠔ ꠛꠥꠎꠞꠣꠄ ꠘꠣ, ꠔꠥꠝꠞꠣ ꠇꠤꠔꠣ ꠌꠣꠁꠞꠣꠄ। ꠀꠝꠤ ꠎꠦ ꠖꠥꠈ-ꠝꠍꠤꠛꠔꠞ ꠙꠤꠀꠟꠣꠖꠤ ꠈꠣꠁꠝꠥ, ꠁꠔꠣ ꠇꠥꠘꠥ ꠔꠥꠝꠞꠣ ꠈꠣꠁꠔꠣꠄ ꠙꠣꠞꠛꠣꠄ ꠘꠤ?” ꠔꠣꠞꠣ ꠇꠁꠟꠣ, “ꠎꠤꠅꠄ, ꠙꠣꠞꠝꠥ।”
MAT 20:23 ꠔꠣꠁꠘ ꠇꠁꠟꠣ, “ꠀꠁꠌ꠆ꠍꠣ, ꠀꠝꠤ ꠎꠦ ꠙꠤꠀꠟꠣꠖꠤ ꠈꠣꠁꠝꠥ ꠔꠥꠝꠞꠣꠅ ꠅꠃ ꠙꠤꠀꠟꠣꠖꠤ ꠈꠣꠁꠛꠣꠄ, ꠅꠁꠟꠦ ꠀꠝꠣꠞ ꠒꠣꠁꠘꠦ ꠛꠣ ꠛꠣꠃꠄ ꠛꠅꠀꠘꠤꠞ ꠄꠈꠔꠤꠀꠞ ꠔ ꠀꠝꠣꠞ ꠀꠔꠅ ꠘꠣꠄ। ꠀꠝꠣꠞ ꠛꠦꠢꠦꠡ꠆ꠔꠤ ꠛꠣꠚ ꠀꠟ꠆ꠟꠣꠄ ꠎꠣꠞꠣꠞ ꠟꠣꠉꠤ ꠁ ꠉꠖꠤ ꠑꠤꠇ ꠇꠞꠍꠂꠘ, ꠈꠣꠟꠤ ꠔꠣꠞꠣꠃ ꠙꠣꠁꠛꠣ।”
MAT 20:24 ꠎꠤꠛꠥꠖꠤꠀꠞ ꠖꠥꠁꠅ ꠙꠥꠀꠞ ꠀꠞꠎꠤ ꠢꠥꠘꠤꠀ, ꠛꠣꠇꠤ ꠖꠡꠅꠎꠘ ꠍꠣꠢꠣꠛꠤ ꠄꠞꠣꠞ ꠃꠙꠞꠦ ꠈꠥꠛ ꠛꠤꠞꠇ꠆ꠔ ꠅꠁꠟꠣ।
MAT 20:25 ꠔꠦꠃ ꠁꠍꠣꠄ ꠄꠞꠣ ꠢꠇꠟꠞꠦ ꠇꠣꠘ꠆ꠖꠣꠔ ꠀꠘꠤꠀ ꠇꠁꠟꠣ, “ꠔꠥꠝꠞꠣ ꠔ ꠎꠣꠘ, ꠛꠤꠗꠞ꠆ꠝꠤ ꠎꠣꠔꠤꠞ ꠞꠣꠎꠣ ꠅꠇꠟ ꠔꠣꠞꠣꠞ ꠙ꠆ꠞꠎꠣꠞ ꠃꠙꠞꠦ ꠢꠥꠇꠥꠝ ꠎꠣꠞꠤ ꠇꠞꠦ, ꠀꠞ ꠔꠣꠞꠣꠞ ꠎꠝꠤꠖꠣꠞ ꠅꠇꠟꠦ ꠉꠥꠟꠣꠝꠞ ꠃꠙꠞꠦ ꠛꠦꠐꠣꠉꠤꠞꠤ ꠇꠞꠦ।
MAT 20:26 ꠅꠁꠟꠦ ꠔꠥꠝꠞꠣꠞ ꠝꠣꠎꠦ ꠔ ꠁꠟꠣ ꠅꠀ ꠑꠤꠇ ꠘꠣꠄ। ꠔꠥꠝꠞꠣꠞ ꠇꠦꠃ ꠖꠣꠝꠤ ꠛꠘꠔꠦ ꠌꠣꠁꠟꠦ, ꠢꠦ ꠔꠥꠝꠞꠣꠞ ꠈꠦꠎꠝꠔ ꠇꠞꠃꠇ।
MAT 20:27 ꠀꠞ ꠇꠦꠃ ꠛꠠ ꠅꠁꠔꠦ ꠌꠣꠁꠟꠦ, ꠢꠦ ꠢꠇꠟꠞ ꠉꠥꠟꠣꠝꠤ ꠇꠞꠃꠇ।
MAT 20:28 ꠝꠘꠅ ꠞꠣꠈꠤꠅ, ꠀꠝꠤ ꠛꠤꠘ-ꠀꠖꠝꠦꠅ ꠈꠦꠎꠝꠔ ꠙꠣꠅꠀꠔ ꠀꠁꠍꠤ ꠘꠣ, ꠀꠁꠍꠤ ꠔ ꠈꠦꠎꠝꠔ ꠇꠞꠣꠔ। ꠀꠞ ꠛꠃꠔ ꠝꠣꠘꠡꠞ ꠎꠣꠘ ꠛꠣꠌꠣꠘꠤꠞ ꠟꠣꠉꠤ, ꠘꠤꠎꠞ ꠎꠣꠘ ꠛꠤꠟꠣꠁ ꠖꠦꠅꠀꠔ ꠀꠁꠍꠤ।”
MAT 20:29 ꠢꠎꠞꠔ ꠁꠍꠣꠄ ꠔꠣꠘ ꠍꠣꠢꠣꠛꠤ ꠅꠇꠟꠞꠦ ꠟꠁꠀ ꠎꠤꠞꠤꠢꠅ ꠐꠣꠃꠘ ꠕꠣꠇꠤ ꠞꠅꠀꠘꠣ ꠅꠁꠉꠦꠟꠣ, ꠅꠃ ꠡꠝꠄ ꠛꠃꠔ ꠝꠣꠘꠥꠡ ꠔꠣꠘ ꠈꠞꠦ ꠈꠞꠦ ꠉꠦꠟꠣ।
MAT 20:30 ꠎꠣꠅꠀꠞ ꠡꠝꠄ ꠙꠕꠞ ꠇꠣꠘ꠆ꠖꠣꠔ ꠖꠥꠁ ꠀꠘ꠆ꠖꠣ ꠛꠦꠐꠣ ꠛꠅꠀꠔ ꠀꠍꠤꠟ। ꠔꠣꠁꠘ ꠅꠃ ꠙꠕꠦꠖꠤ ꠎꠣꠁꠞꠣ ꠢꠥꠘꠤꠀ ꠔꠣꠞꠣ ꠎꠥꠞꠦ ꠎꠥꠞꠦ ꠌꠤꠟ꠆ꠟꠣꠁꠀ ꠇꠁꠟ, “ꠅ ꠢꠥꠎꠥꠞ, ꠅ ꠖꠣꠃꠖ ꠘꠛꠤꠞ ꠀꠅꠟꠣꠖ, ꠀꠝꠞꠣꠞꠦ ꠞꠢꠝ ꠇꠞꠂꠘ।”
MAT 20:31 ꠌꠤꠟ꠆ꠟꠣꠘꠤ ꠢꠥꠘꠤꠀ ꠅꠘꠞ ꠝꠣꠘꠡꠦ ꠔꠣꠞꠣꠞꠦ ꠗꠝꠇ ꠖꠤꠟꠣ। ꠅꠁꠟꠦ ꠔꠣꠞꠣ ꠀꠞꠅ ꠎꠥꠞꠦ ꠎꠥꠞꠦ ꠌꠤꠟ꠆ꠟꠣꠁꠀ ꠇꠁꠟ, “ꠅ ꠢꠥꠎꠥꠞ, ꠅ ꠖꠣꠃꠖ ꠘꠛꠤꠞ ꠀꠅꠟꠣꠖ, ꠀꠝꠞꠣꠞꠦ ꠞꠢꠝ ꠇꠞꠂꠘ।”
MAT 20:32 ꠄꠞꠣꠞ ꠌꠤꠟ꠆ꠟꠣꠘꠤ ꠢꠥꠘꠤꠀ ꠔꠣꠁꠘ ꠃꠛꠣꠁ ꠉꠦꠟꠣ, ꠃꠛꠣꠁꠀ ꠅꠃ ꠖꠥꠁꠅ ꠀꠘ꠆ꠖꠣꠞꠦ ꠇꠣꠘ꠆ꠖꠣꠔ ꠀꠘꠣꠁꠀ ꠎꠤꠇꠣꠁꠟꠣ, “ꠇꠤꠔꠣ ꠛꠣ, ꠇꠤꠔꠣ ꠌꠣꠅ? ꠀꠝꠤ ꠔꠥꠝꠞꠣꠞꠦ ꠇꠤꠔꠣ ꠇꠞꠔꠣꠝ?”
MAT 20:33 ꠔꠣꠞꠣ ꠇꠁꠟ, “ꠢꠥꠎꠥꠞ, ꠀꠝꠞꠣꠞ ꠌꠃꠈ ꠉꠥꠁꠘ ꠜꠣꠟꠣ ꠇꠞꠤ ꠖꠦꠃꠇ꠆ꠇꠣ।”
MAT 20:34 ꠁꠈꠣꠘ ꠢꠥꠘꠤꠀ ꠔꠣꠘ ꠖꠞꠖ ꠢꠣꠝꠣꠁ ꠉꠦꠟ। ꠔꠣꠁꠘ ꠔꠣꠞꠣꠞ ꠌꠃꠈ ꠀꠔꠣꠁ ꠖꠤꠟꠣ, ꠟꠉꠦ ꠟꠉꠦꠃ ꠔꠣꠞꠣꠞ ꠌꠃꠈ ꠜꠣꠟꠣ ꠅꠁꠉꠦꠟ। ꠛꠣꠖꠦ ꠔꠣꠞꠣꠅ ꠔꠣꠘ ꠈꠞꠦ ꠈꠞꠦ ꠞꠅꠀꠘꠣ ꠅꠁꠟ।
MAT 21:1 ꠢꠎꠞꠔ ꠁꠍꠣꠄ ꠔꠣꠘ ꠍꠣꠢꠣꠛꠤ ꠅꠇꠟꠞꠦ ꠟꠁꠀ ꠎꠦꠞꠥꠎꠣꠟꠦꠝꠞ ꠇꠣꠍꠣꠔ, ꠎꠄꠔꠥꠘ ꠙꠣꠠꠞ ꠟꠉꠦ ꠛꠣꠄꠔ-ꠚꠣꠁꠎ꠆ꠎꠣ ꠉꠣꠃꠔ ꠀꠁꠀ ꠀꠎꠤꠟꠣ। ꠅꠘꠅ ꠀꠁꠀ ꠔꠣꠘ ꠖꠥꠁꠎꠘ ꠍꠣꠢꠣꠛꠤꠞꠦ ꠇꠁꠟꠣ,
MAT 21:2 “ꠔꠥꠝꠞꠣ ꠅꠃ ꠍꠣꠝꠘꠞ ꠉꠣꠃꠔ ꠎꠣꠅ। ꠉꠣꠃꠔ ꠢꠣꠝꠣꠁꠔꠦꠃ ꠖꠦꠈꠛꠣꠄ ꠄꠉꠥ ꠉꠣꠗꠣ ꠛꠣꠘ꠆ꠖꠣ ꠀꠍꠦ, ꠟꠉꠦ ꠔꠣꠞ ꠛꠣꠁꠌ꠆ꠌꠣꠅ ꠛꠣꠘ꠆ꠖꠣ। ꠅꠉꠥꠁꠘ꠆ꠔꠞ ꠉꠟꠣꠞ ꠖꠠꠤ ꠈꠥꠟꠤꠀ ꠅꠘꠅ ꠟꠁꠀ ꠀꠁꠅ।
MAT 21:3 ꠇꠦꠃ ꠇꠥꠘ꠆ꠔꠣ ꠎꠤꠇꠣꠁꠟꠦ ꠇꠁꠅ, ꠢꠥꠎꠥꠞꠞ ꠖꠞꠇꠣꠞ ꠀꠍꠦ, ꠄꠞꠖꠣꠄ ꠘꠤꠞꠣꠝ। ꠔꠦꠃ ꠢꠦ ꠟꠉꠦ ꠟꠉꠦ ꠞꠣꠎꠤ ꠅꠁꠎꠤꠛ।”
MAT 21:4 ꠁꠔꠣ ꠅꠁꠟ ꠎꠣꠔꠦ ꠀꠉꠞ ꠎꠝꠣꠘꠣꠞ ꠢꠃ ꠘꠛꠤꠞ ꠝꠣꠎꠖꠤ ꠎꠦꠔꠣ ꠛꠣꠔꠣꠁꠟ ꠅꠁꠍꠦ, ꠅꠔꠣ ꠅꠈꠘ ꠚꠟꠤꠎꠣꠄ।
MAT 21:5 ꠔꠣꠁꠘ ꠇꠁꠍꠟꠣ, “ꠍꠤꠅꠘ-ꠇꠁꠘꠣ ꠎꠦꠞꠥꠎꠣꠟꠦꠝꠞꠦ ꠔꠥꠝꠞꠣ ꠇꠁꠅ, ꠔꠥꠝꠣꠞ ꠛꠣꠖꠡꠣ ꠔꠥꠝꠣꠞ ꠉꠦꠍꠦ ꠀꠁꠞꠣ। ꠔꠣꠁꠘ ꠈꠥꠛ ꠘꠞꠝ ꠝꠤꠎꠣꠎꠤ। ꠔꠣꠁꠘ ꠉꠣꠗꠣ ꠌꠠꠤꠀ, ꠉꠣꠗꠤꠞ ꠛꠣꠁꠌ꠆ꠌꠣ ꠌꠠꠤꠀ ꠀꠁꠞꠣ।”
MAT 21:6 ꠔꠦꠃ ꠁꠍꠣꠄ ꠎꠦꠟꠣ ꠢꠤꠇꠣꠁ ꠖꠤꠍꠟꠣ, ꠖꠥꠁꠅ ꠍꠣꠢꠣꠛꠤꠄ ꠉꠤꠀ ꠅꠟꠣ ꠇꠞꠟꠣ।
MAT 21:7 ꠅꠃ ꠉꠣꠗꠣ ꠀꠞ ꠔꠣꠞ ꠛꠣꠁꠌ꠆ꠌꠣ ꠀꠘꠣꠞ ꠛꠣꠖꠦ ꠍꠣꠢꠣꠛꠤ ꠅꠇꠟꠦ ꠘꠤꠎꠞ ꠉꠔꠞꠞ ꠌꠣꠖ꠆ꠖꠞ ꠈꠥꠟꠤꠀ ꠉꠣꠗꠣꠞ ꠙꠤꠑꠤꠔ ꠛꠤꠍꠣꠁ ꠖꠤꠟꠣ, ꠔꠦꠃ ꠁꠍꠣ ꠄꠞ ꠃꠙꠞꠦ ꠍꠅꠀꠞ ꠅꠁꠟꠣ।
MAT 21:8 ꠀꠞꠅ ꠛꠃꠔ ꠝꠣꠘꠡꠦ ꠔꠣꠞꠣꠞ ꠉꠔꠞꠞ ꠌꠣꠖ꠆ꠖꠞ ꠈꠥꠟꠤꠀ ꠙꠕꠞ ꠝꠣꠎꠦ ꠛꠤꠍꠣꠁ ꠖꠤꠟꠣ, ꠀꠞ ꠛꠃꠔꠦ ꠡꠥꠘ꠆ꠖꠞ ꠡꠥꠘ꠆ꠖꠞ ꠉꠣꠍꠞ ꠙꠣꠔꠣꠁꠘ ꠍꠤꠠꠤꠀ ꠀꠘꠤꠀ ꠙꠕꠅ ꠛꠤꠍꠣꠁꠟꠣ।
MAT 21:9 ꠁꠍꠣꠞ ꠀꠉꠦ-ꠈꠞꠦ ꠀꠞꠅ ꠛꠃꠔ ꠝꠣꠘꠥꠡ ꠎꠣꠅꠀꠔ ꠀꠍꠤꠟ, ꠄꠞꠣ ꠎꠥꠞꠦ ꠎꠥꠞꠦ ꠝꠤꠍꠤꠟ ꠖꠤꠟꠣ, “ꠛꠣꠖꠡꠣ ꠖꠣꠃꠖꠞ ꠀꠅꠟꠣꠖ, ꠝꠣꠞꠢꠣꠛꠣ! ꠝꠣꠛꠥꠖꠞ ꠘꠣꠝꠦ ꠎꠦꠁꠘ ꠀꠁꠞꠣ, ꠔꠣꠘ ꠔꠣꠞꠤꠚ ꠅꠃꠇ। ꠛꠦꠢꠦꠡ꠆ꠔꠅ-ꠅ ꠝꠣꠞꠢꠣꠛꠣ!”
MAT 21:10 ꠢꠎꠞꠔ ꠁꠍꠣ ꠎꠦꠞꠥꠎꠣꠟꠦꠝ ꠀꠁꠀ ꠢꠣꠞꠟꠦ ꠀꠡ꠆ꠔꠣ ꠐꠣꠃꠘꠅ ꠃꠟꠁꠡ꠆ꠔꠟ ꠟꠣꠉꠤꠉꠦꠟ। ꠢꠇꠟꠦ ꠎꠤꠇꠣꠁꠟꠣ, “ꠅꠛꠣ, ꠄꠁꠘ ꠇꠦ?”
MAT 21:11 ꠝꠣꠘꠡꠦ ꠇꠁꠟꠣ, “ꠄꠁꠘ ꠔ ꠢꠃ ꠁꠍꠣ ꠘꠛꠤ, ꠄꠘ ꠛꠣꠠꠤ ꠉꠣꠟꠤꠟꠞ ꠘꠣꠍꠣꠞꠔ ꠉꠣꠃꠔ।”
MAT 21:12 ꠛꠣꠖꠦ ꠎꠦꠞꠥꠎꠣꠟꠦꠝ ꠀꠁꠀ ꠔꠣꠁꠘ ꠙꠛꠤꠔ꠆ꠞ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠅ ꠢꠣꠝꠣꠁꠟꠣ। ꠢꠘꠅ ꠇꠣꠛꠣ ꠊꠞꠞ ꠡꠤꠝꠣꠘꠣꠔ ꠎꠦꠞꠣ ꠈꠞꠤꠖ-ꠛꠤꠇꠤꠞ ꠇꠣꠞꠛꠣꠞꠤ ꠀꠍꠤꠟ, ꠁꠔꠣꠞꠦ ꠈꠦꠖꠣꠁ ꠖꠤꠟꠣ। ꠔꠣꠁꠘ ꠐꠦꠇꠣꠞ ꠛꠣꠐ꠆ꠐꠣꠞ ꠇꠣꠞꠛꠣꠞꠤ ꠅꠇꠟꠞ ꠇꠦꠡ ꠛꠣꠇ꠆ꠡ, ꠀꠞ ꠒꠥꠙꠤ-ꠙꠣꠞꠅ ꠛꠦꠌꠞꠣ ꠅꠇꠟꠞ ꠀꠡꠘ ꠃꠟꠐꠣꠁꠀ ꠚꠣꠟꠣꠁ ꠖꠤꠟꠣ।
MAT 21:13 ꠔꠣꠁꠘ ꠇꠁꠟꠣ, “ꠀꠟ꠆ꠟꠣꠞ ꠇꠣꠟꠣꠝꠅ ꠛꠣꠔꠣꠁꠟ ꠅꠁꠍꠦ, ꠀꠝꠣꠞ ꠊꠞ ꠅꠁꠛ ꠄꠛꠣꠖꠔꠞ ꠊꠞ, ꠅꠁꠟꠦ ꠔꠥꠝꠞꠣ ꠁꠈꠣꠘꠞꠦ ꠒꠣꠇꠣꠁꠔꠞ ꠀꠒ꠆ꠒꠣꠈꠣꠘꠣ ꠛꠣꠘꠣꠁꠟꠤꠍ।”
MAT 21:14 ꠄꠞꠛꠣꠖꠦ ꠀꠘ꠆ꠖꠣ, ꠟꠥꠟꠣ-ꠟꠦꠋꠠꠣ ꠝꠣꠘꠥꠡ ꠅꠇꠟ ꠁꠍꠣꠞ ꠉꠦꠍꠦ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠅ ꠀꠁꠟꠣ, ꠔꠣꠁꠘ ꠄꠞꠣ ꠢꠇꠟꠞꠦ ꠜꠣꠟꠣ ꠇꠞꠟꠣ।
MAT 21:15 ꠢꠎꠞꠔ ꠁꠍꠣꠄ ꠎꠦ ꠇꠥꠖꠞꠔꠤ ꠝꠥꠎꠦꠎꠣ ꠇꠣꠝ ꠇꠞꠍꠟꠣ, ꠛꠠ ꠁꠝꠣꠝ ꠀꠞ ꠝꠃꠟꠣꠘꠣ ꠅꠇꠟꠦ ꠁꠔꠣ ꠖꠦꠈꠟꠣ। ꠔꠣꠞꠣ ꠢꠥꠘꠟꠣ, ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠞ ꠜꠤꠔꠞꠦ ꠢꠥꠞꠥꠔ꠆ꠔꠣꠁꠘ꠆ꠔꠦ ꠇꠁꠞꠣ, “ꠝꠣꠞꠢꠣꠛꠣ, ꠖꠣꠃꠖꠞ ꠀꠅꠟꠣꠖ, ꠝꠣꠞꠢꠣꠛꠣ।” ꠁꠈꠣꠘ ꠢꠥꠘꠤꠀ ꠔꠣꠞꠣ ꠎꠟꠤ-ꠙꠥꠠꠤ ꠃꠑꠟꠣ।
MAT 21:16 ꠔꠣꠞꠣ ꠁꠍꠣꠞꠦ ꠇꠁꠟꠣ, “ꠅꠃ ꠢꠥꠞꠥꠔ꠆ꠔꠣꠁꠘ꠆ꠔꠦ ꠇꠤꠔꠣ ꠌꠤꠟ꠆ꠟꠣꠁꠞꠣ, ꠁꠔꠣ ꠔꠥꠝꠤ ꠢꠥꠘꠞꠣꠄ ꠘꠣ ꠘꠤ?” ꠔꠣꠁꠘ ꠇꠁꠟꠣ, “ꠅꠄ, ꠢꠥꠘꠤꠀꠞ ꠔ। ꠀꠟ꠆ꠟꠣꠞ ꠇꠣꠟꠣꠝꠅ ꠙꠠꠍꠂꠘ ꠘꠣ ꠘꠤ, ‘ꠘꠣꠛꠣꠟꠤꠇ ꠢꠥꠞꠥꠔ꠆ꠔꠣꠁꠘ꠆ꠔꠞ ꠝꠥꠈ ꠕꠣꠇꠤ ꠔꠥꠝꠤ ꠔꠥꠝꠣꠞ ꠔꠣꠞꠤꠚ ꠀꠖꠣꠄ ꠇꠞꠍ’?”
MAT 21:17 ꠛꠣꠖꠦ ꠢꠎꠞꠔ ꠁꠍꠣ ꠔꠣꠞꠣꠞ ꠉꠦꠍ ꠕꠣꠇꠤ ꠉꠦꠟꠣꠉꠤ, ꠉꠤꠀ ꠐꠣꠃꠘꠞ ꠛꠣꠞꠦ ꠛꠣꠄꠔ-ꠀꠘꠤꠀ ꠉꠣꠃꠔ ꠞꠣꠁꠔ ꠞꠁꠟꠣ।
MAT 21:18 ꠛꠣꠖꠞ ꠖꠤꠘ ꠛꠤꠀꠘꠦ ꠛꠣꠄꠔ-ꠀꠘꠤꠀ ꠕꠣꠇꠤ ꠎꠦꠞꠥꠎꠣꠟꠦꠝ ꠐꠣꠃꠘꠅ ꠀꠅꠀꠞ ꠡꠝꠄ ꠔꠣꠘ ꠙꠦꠐꠅ ꠜꠥꠇ ꠟꠣꠉꠟ।
MAT 21:19 ꠅꠃ ꠔꠣꠁꠘ ꠙꠕꠞ ꠇꠣꠘ꠆ꠖꠣꠔ ꠄꠉꠥ ꠒꠥꠝꠥꠞ ꠉꠣꠍ ꠖꠦꠈꠤꠀ, ꠅꠉꠥꠞ ꠚꠟ ꠈꠣꠅꠀꠞ ꠈꠤꠀꠟꠦ ꠉꠣꠍꠞ ꠗꠣꠞꠅ ꠉꠦꠟꠣ। ꠉꠤꠀ ꠖꠦꠈꠟꠣ, ꠉꠣꠍꠞ ꠝꠣꠎꠦ ꠈꠣꠟꠤ ꠙꠣꠔꠣ, ꠇꠥꠘꠥ ꠚꠟ ꠘꠣꠁ। ꠔꠣꠁꠘ ꠅꠃ ꠉꠣꠍꠞꠦ ꠇꠁꠟꠣ, “ꠔꠥꠝꠣꠞ ꠝꠣꠎꠦ ꠎꠣꠘꠥ ꠀꠞ ꠇꠥꠘꠥꠖꠤꠘ ꠚꠟ ꠘꠣ ꠗꠞꠦ।” ꠅꠈꠣꠘ ꠇꠅꠀꠞ ꠟꠉꠦ ꠟꠉꠦꠃ ꠉꠣꠍꠐꠣ ꠢꠥꠇꠣꠁꠀ ꠝꠞꠤꠉꠦꠟ।
MAT 21:20 ꠍꠣꠢꠣꠛꠤ ꠅꠇꠟꠦ ꠁꠔꠣ ꠖꠦꠈꠤꠀ ꠔꠣꠁꠎ꠆ꠎꠥꠛ ꠅꠁꠀ ꠇꠁꠟꠣ, “ꠉꠣꠍꠐꠣ ꠅꠔ ꠎꠟꠖꠤ ꠢꠥꠇꠣꠁ ꠉꠦꠟ ꠇꠤꠟꠣ?”
MAT 21:21 ꠁꠍꠣꠄ ꠎꠥꠀꠙ ꠖꠤꠟꠣ, “ꠀꠝꠤ ꠔꠥꠝꠞꠣꠞꠦ ꠢꠣꠍꠣꠃ ꠇꠁꠞꠣꠝ, ꠔꠥꠝꠞꠣ ꠎꠥꠖꠤ ꠖꠤꠟꠞ ꠝꠣꠎꠦ ꠡꠘ꠆ꠖꠄ ꠘꠣ ꠇꠞꠤꠀ, ꠙꠥꠞꠣꠙꠥꠞ ꠁꠝꠣꠘꠦ ꠝꠎꠛꠥꠔ ꠕꠣꠇ, ꠔꠦ ꠀꠝꠤ ꠅꠃ ꠒꠥꠝꠥꠞ ꠉꠣꠍꠞꠦ ꠎꠦꠔꠣ ꠇꠞꠍꠤ, ꠔꠥꠝꠞꠣꠅ ꠅꠟꠣ ꠙꠣꠞꠛꠣꠄ। ꠈꠣꠟꠤ ꠁꠈꠣꠘ ꠘꠣꠄ, ꠔꠥꠝꠞꠣ ꠎꠥꠖꠤ ꠅꠃ ꠙꠣꠠꠞꠦ ꠇꠅ, ‘ꠃꠠꠤꠀ ꠉꠤꠀ ꠖꠞꠤꠀꠔ ꠙꠠꠅ,’ ꠔꠦ ꠅꠟꠣꠃ ꠅꠁꠛ।
MAT 21:22 ꠔꠥꠝꠞꠣ ꠎꠥꠖꠤ ꠈꠣꠟꠤꠍ ꠘꠤꠅꠔꠦ ꠄꠇꠤꠘ ꠇꠞꠤꠀ ꠖꠥꠀ ꠇꠞꠅ, ꠔꠦ ꠔꠥꠝꠞꠣ ꠎꠦꠔꠣ ꠌꠣꠁꠛꠣꠄ, ꠅꠔꠣꠃ ꠙꠣꠁꠛꠣꠄ।”
MAT 21:23 ꠛꠣꠖꠦ ꠢꠎꠞꠔ ꠁꠍꠣ ꠢꠤꠞꠛꠣꠞ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠅ ꠀꠁꠀ ꠅꠀꠎ-ꠘꠍꠤꠅꠔ ꠇꠞꠣꠔ ꠀꠍꠟꠣ। ꠅꠃ ꠡꠝꠄ ꠛꠠ ꠁꠝꠣꠝ ꠀꠞ ꠝꠥꠞꠛ꠆ꠛꠤ ꠅꠇꠟ ꠀꠁꠀ ꠔꠣꠘꠞꠦ ꠎꠤꠇꠣꠁꠟꠣ, “ꠀꠁꠌ꠆ꠍꠣ, ꠇꠅ ꠌꠣꠁꠘ, ꠔꠥꠝꠤ ꠇꠥꠘ ꠄꠈꠔꠤꠀꠞꠦ ꠁꠔꠣ ꠇꠞꠞꠣꠄ? ꠇꠦ ꠔꠥꠝꠣꠞꠦ ꠁ ꠈꠦꠝꠔꠣ ꠖꠤꠍꠦ?”
MAT 21:24 ꠁꠍꠣꠄ ꠎꠥꠀꠙ ꠖꠤꠟꠣ, “ꠀꠝꠤꠅ ꠀꠙꠘꠣꠞꠣꠞꠦ ꠄꠇꠈꠣꠘ ꠍꠅꠀꠟ ꠇꠞꠤꠀꠞ, ꠀꠙꠘꠣꠞꠣ ꠄꠞ ꠎꠥꠀꠙ ꠖꠤꠟꠣꠁꠟꠦ ꠀꠝꠤꠅ ꠇꠁꠝꠥ, ꠇꠥꠘ ꠄꠈꠔꠤꠀꠞꠦ ꠀꠝꠤ ꠁꠔꠣ ꠇꠞꠞꠣꠝ।
MAT 21:25 ꠀꠙꠘꠣꠞꠣ ꠇꠃꠇ꠆ꠇꠣ ꠌꠣꠁꠘ, ꠢꠎꠞꠔ ꠄꠢꠤꠀꠄ ꠔꠞꠤꠇꠣꠞ ꠉꠥꠍꠟ ꠖꠦꠅꠀꠞ ꠄꠈꠔꠤꠀꠞ ꠇꠣꠞ ꠉꠦꠍ ꠕꠣꠇꠤ ꠙꠣꠁꠍꠟꠣ? ꠝꠣꠘꠡꠞ ꠉꠦꠍ ꠕꠣꠇꠤ, ꠘꠣ ꠀꠟ꠆ꠟꠣꠞ ꠉꠦꠍ ꠕꠣꠇꠤ?” ꠁꠈꠣꠘ ꠢꠥꠘꠤꠀ ꠔꠣꠞꠣ ꠇꠣꠘꠦ ꠇꠣꠘꠦ ꠝꠣꠔꠤꠟꠣ, “ꠀꠝꠞꠣ ꠎꠥꠖꠤ ꠇꠁ, ꠀꠟ꠆ꠟꠣꠞ ꠉꠦꠍ ꠕꠣꠇꠤ, ꠔꠦ ꠢꠦ ꠇꠁꠛ, ꠔꠣꠁꠟꠦ ꠔꠥꠝꠞꠣ ꠔꠣꠘ ꠃꠙꠞꠦ ꠁꠝꠣꠘ ꠀꠘꠟꠣꠄ ꠘꠣ ꠇꠦꠘꠦ?
MAT 21:26 ꠀꠞ ꠎꠥꠖꠤ ꠇꠁ, ꠝꠣꠘꠡꠞ ꠉꠦꠍ ꠕꠣꠇꠤ, ꠔꠦ ꠝꠣꠘꠡꠦ ꠀꠝꠞꠣꠞꠦ ꠝꠣꠞꠛꠣ, ꠇꠣꠞꠘ ꠝꠣꠘꠡꠦ ꠔ ꠄꠢꠤꠀꠞꠦ ꠘꠛꠤ ꠇꠁꠀ ꠝꠣꠘꠂꠘ।”
MAT 21:27 ꠄꠞꠟꠣꠉꠤꠃ ꠔꠣꠞꠣ ꠎꠥꠀꠙ ꠖꠤꠟꠣ, “ꠀꠝꠞꠣ ꠁꠈꠣꠘ ꠎꠣꠘꠤ ꠘꠣ।” ꠁꠍꠣꠄ ꠇꠁꠟꠣ, “ꠔꠦ ꠀꠝꠤꠅ ꠇꠁꠔꠣꠝ ꠘꠣꠄ, ꠇꠥꠘ ꠈꠦꠝꠔꠣꠄ ꠀꠝꠤ ꠁꠔꠣ ꠇꠞꠞꠣꠝ।”
MAT 21:28 ꠄꠞꠛꠣꠖꠦ ꠁꠍꠣꠄ ꠇꠁꠟꠣ, “ꠀꠁꠌ꠆ꠍꠣ, ꠀꠙꠘꠣꠞꠣ ꠇꠤꠔꠣ ꠝꠘꠅ ꠇꠞꠂꠘ? ꠗꠞꠃꠇ꠆ꠇꠣ, ꠄꠇ ꠛꠦꠐꠣꠞ ꠖꠥꠁ ꠙꠥꠀ ꠀꠍꠤꠟ। ꠛꠦꠐꠣꠄ ꠔꠣꠞ ꠛꠠ ꠙꠥꠀꠞꠦ ꠇꠁꠟ, ‘ꠔꠥꠝꠤ ꠀꠁꠎ ꠀꠋꠉꠥꠞꠞ ꠛꠣꠉꠣꠘꠅ ꠇꠣꠝꠅ ꠎꠣꠅ।’
MAT 21:29 ꠙꠥꠀꠄ ꠙꠄꠟꠣ ꠇꠁꠟ, ‘ꠀꠝꠤ ꠙꠣꠞꠔꠣꠝ ꠘꠣꠄ।’ ꠅꠁꠟꠦ ꠛꠣꠖꠦ ꠔꠣꠞ ꠝꠘ ꠛꠖꠟꠣꠁꠀ ꠇꠣꠝꠅ ꠉꠦꠟ।
MAT 21:30 ꠛꠣꠖꠦ ꠛꠦꠐꠣꠄ ꠔꠣꠞ ꠢꠥꠞꠥ ꠙꠥꠀꠞ ꠉꠦꠍꠦ ꠉꠦꠟ, ꠉꠤꠀ ꠅꠃ ꠇꠣꠝꠞ ꠇꠕꠣ ꠇꠁꠟ। ꠢꠦ ꠎꠥꠀꠙ ꠖꠤꠟ, ‘ꠀꠁꠌ꠆ꠍꠣ ꠀꠝꠤ ꠎꠣꠁꠝꠥꠘꠦ,’ ꠅꠁꠟꠦ ꠛꠣꠖꠦ ꠉꠦꠟ ꠘꠣ।
MAT 21:31 ꠔꠦ ꠇꠃꠇ꠆ꠇꠣ ꠌꠣꠁꠘ, ꠅꠃ ꠖꠥꠁꠅ ꠙꠥꠀꠞ ꠝꠣꠎꠦ ꠇꠦ ꠛꠣꠚꠞ ꠢꠥꠇꠥꠝ ꠝꠣꠘꠟ?” ꠔꠣꠞꠣ ꠇꠁꠟꠣ, “ꠛꠠ ꠙꠥꠀꠄ।” ꠔꠦꠃ ꠁꠍꠣꠄ ꠇꠁꠟꠣ, “ꠀꠝꠤ ꠀꠙꠘꠣꠁꠘ꠆ꠔꠞꠦ ꠢꠣꠍꠣ ꠇꠕꠣ ꠇꠁꠞꠣꠝ, ꠊꠥꠡꠈꠥꠞ ꠔꠡꠤꠟꠖꠣꠞ ꠀꠞ ꠍꠤꠟꠣꠘ ꠛꠦꠐꠤꠘ ꠀꠙꠘꠣꠁꠘ꠆ꠔꠞ ꠀꠉꠦ ꠅꠁꠀ ꠀꠟ꠆ꠟꠣꠞ ꠛꠣꠖꠡꠣꠁꠔ ꠢꠣꠝꠣꠁꠎꠤꠞꠣ।
MAT 21:32 ꠇꠣꠞꠘ ꠄꠢꠤꠀ ꠘꠛꠤꠄ ꠢꠇ ꠙꠕ ꠛꠣꠔꠣꠁꠀ ꠖꠦꠅꠀꠔ ꠀꠁꠍꠟꠣ, ꠔꠣ-ꠅ ꠀꠙꠘꠣꠞꠣ ꠔꠣꠘ ꠇꠕꠣꠄ ꠁꠝꠣꠘ ꠀꠘꠍꠂꠘ ꠘꠣ। ꠅꠁꠟꠦ ꠊꠥꠡꠈꠥꠞ ꠔꠡꠤꠟꠖꠣꠞ ꠀꠞ ꠍꠤꠟꠣꠘ ꠛꠦꠐꠤꠘ꠆ꠔꠦ ꠁꠝꠣꠘ ꠀꠘꠟꠣ। ꠅꠔꠣ ꠖꠦꠈꠣꠞ ꠛꠣꠖꠦꠅ ꠀꠙꠘꠣꠞꠣ ꠁꠝꠣꠘ ꠀꠘꠍꠂꠘ ꠘꠣ, ꠔꠃꠛꠣꠅ ꠇꠞꠍꠂꠘ ꠘꠣ।”
MAT 21:33 ꠛꠣꠖꠦ ꠢꠎꠞꠔ ꠁꠍꠣꠄ ꠇꠁꠟꠣ, “ꠀꠙꠘꠣꠞꠣ ꠅꠈꠘ ꠀꠞꠇ ꠇꠤꠌ꠆ꠍꠣ ꠢꠥꠘꠃꠇ꠆ꠇꠣ। ꠄꠇꠎꠘ ꠉꠤꠞꠡ꠆ꠔꠦ ꠀꠋꠉꠥꠞꠞ ꠛꠣꠉꠣꠘ ꠇꠞꠤꠀ ꠌꠣꠁꠞꠅꠛꠣꠄ ꠛꠦꠠꠣ ꠖꠤꠟ। ꠛꠣꠖꠦ ꠌꠇꠤꠖꠣꠞꠞ ꠟꠣꠉꠤ ꠃꠌꠣ ꠇꠞꠤ ꠄꠇꠈꠣꠘ ꠐꠋ-ꠊꠞ ꠛꠣꠘꠣꠁꠟ ꠀꠞ ꠀꠋꠉꠥꠞꠞ ꠞꠡ ꠛꠣꠞ ꠇꠞꠣꠞ ꠟꠣꠉꠤ ꠉꠣꠔ ꠈꠥꠖꠤꠟ। ꠢꠦꠡꠦ ꠈꠦꠔ ꠛꠣꠉꠤ ꠖꠤꠀ ꠉꠤꠞꠡ꠆ꠔ ꠛꠤꠖꠦꠡ ꠉꠦꠟꠉꠤ।
MAT 21:34 ꠀꠋꠉꠥꠞ ꠙꠣꠇꠤꠀ ꠢꠣꠞꠟꠦ ꠉꠤꠞꠡ꠆ꠔꠦ ꠔꠣꠞ ꠛꠣꠐ ꠘꠤꠛꠣꠞ ꠟꠣꠉꠤ, ꠛꠣꠉꠤꠖꠣꠞ ꠅꠇꠟꠞ ꠉꠦꠍꠦ ꠔꠣꠞ ꠌꠣꠇꠞ ꠅꠇꠟ ꠙꠣꠑꠣꠁꠟ।
MAT 21:35 ꠅꠁꠟꠦ ꠛꠣꠉꠤꠖꠣꠞꠦ ꠉꠤꠞꠡ꠆ꠔꠞ ꠄꠇ ꠌꠣꠇꠞꠞꠦ ꠗꠞꠤꠀ ꠈꠥꠛ ꠝꠣꠁꠞ-ꠗꠁꠞ ꠇꠞꠟ, ꠖꠥꠍꠞꠣ ꠌꠣꠇꠞꠞꠦ ꠙꠣꠔ꠆ꠔꠞꠖꠤ ꠝꠣꠞꠤꠀ ꠎꠈꠝ ꠇꠞꠟ ꠀꠞ ꠀꠞꠇ ꠌꠣꠇꠞꠞꠦ ꠎꠣꠘꠦ ꠝꠣꠞꠤꠟꠤꠟ।
MAT 21:36 ꠛꠣꠖꠦ ꠔꠣꠁꠘ ꠀꠞꠅ ꠛꠦꠡ ꠇꠞꠤ ꠄꠇ ꠖꠟ ꠌꠣꠇꠞ ꠙꠣꠑꠣꠁꠟꠣ, ꠅꠁꠟꠦ ꠛꠣꠉꠤꠖꠣꠞ ꠅꠇꠟꠦ ꠔꠣꠞꠣꠞ ꠟꠉꠦꠅ ꠅꠃꠟꠣ ꠛꠦꠛꠢꠣꠞ ꠇꠞꠟ।
MAT 21:37 ꠢꠦꠡ-ꠝꠦꠡ ꠉꠤꠞꠡ꠆ꠔꠦ ꠔꠣꠘ ꠘꠤꠎꠞ ꠙꠥꠀꠞꠦ ꠔꠣꠞꠣꠞ ꠉꠦꠍꠦ ꠙꠣꠑꠣꠁꠟꠣ, ꠝꠘꠅ ꠇꠞꠟꠣ, ꠔꠣꠞꠣ ꠔꠣꠘ ꠙꠥꠀꠞꠦ ꠖꠣꠝ ꠖꠤꠛ।
MAT 21:38 ꠅꠁꠟꠦ ꠛꠣꠉꠤꠖꠣꠞ ꠅꠇꠟꠦ ꠙꠥꠀꠞꠦ ꠖꠦꠈꠤꠀ, ꠄꠇꠦ-ꠅꠁꠘ꠆ꠘꠦ ꠙꠞꠣꠝꠤꠡ ꠇꠞꠤ ꠇꠁꠟ, ꠅꠃ ꠙꠥꠀꠃ ꠔ ꠛꠣꠖꠦ ꠁ ꠡꠝ꠆ꠙꠔ꠆ꠔꠤꠞ ꠝꠣꠟꠤꠇ ꠅꠁꠛ। ꠔꠦ ꠀꠅ, ꠅꠉꠥꠞꠦ ꠝꠣꠞꠤꠟꠣꠁ, ꠔꠦꠃ ꠀꠝꠞꠣꠃ ꠁꠔꠣꠞ ꠝꠣꠟꠤꠇ ꠛꠘꠤꠎꠤꠝꠥ।
MAT 21:39 ꠇꠁꠀꠃ ꠔꠣꠞꠣ ꠙꠥꠀꠞꠦ ꠗꠞꠤꠀ ꠀꠋꠉꠥꠞ ꠛꠣꠉꠣꠘꠞ ꠛꠣꠞꠦ ꠘꠤꠀ ꠎꠣꠘꠦ ꠝꠣꠞꠤꠟꠤꠟ।
MAT 21:40 ꠅꠈꠘ ꠇꠃꠇ꠆ꠇꠣ ꠌꠣꠁꠘ, ꠛꠣꠉꠣꠘꠞ ꠝꠣꠟꠤꠇ ꠎꠦꠛꠟꠣ ꠀꠁꠛꠣ, ꠀꠁꠀ ꠅꠃ ꠛꠣꠉꠤꠖꠣꠞ ꠅꠇꠟꠞꠦ ꠇꠤꠔꠣ ꠇꠞꠛꠣ?”
MAT 21:41 ꠔꠣꠞꠣ ꠇꠁꠟꠣ, “ꠔꠣꠁꠘ ꠀꠁꠀ ꠔ ꠅꠃ ꠘꠣꠚꠞꠝꠣꠘ ꠅꠇꠟꠞꠦ ꠈꠥꠘ ꠇꠞꠛꠣ ꠀꠞ ꠡꠝꠄ ꠝꠔ ꠎꠦꠞꠣ ꠚꠡꠟꠞ ꠛꠣꠐ ꠖꠤꠛ, ꠔꠣꠞꠣꠞ ꠉꠦꠍꠦ ꠈꠦꠔ ꠛꠣꠉꠤ ꠖꠤꠛꠣ।”
MAT 21:42 ꠢꠎꠞꠔ ꠁꠍꠣꠄ ꠇꠁꠟꠣ, “ꠀꠙꠘꠣꠞꠣ ꠀꠟ꠆ꠟꠣꠞ ꠇꠣꠟꠣꠝꠅ ꠙꠠꠍꠂꠘ ꠘꠣ ꠘꠤ, ꠞꠣꠎ ꠝꠦꠡ꠆ꠔꠁꠞ ꠅꠇꠟꠦ ꠎꠦ ꠙꠣꠔ꠆ꠔꠞꠞꠦ ꠛꠦꠇꠣꠝꠣ ꠇꠁꠀ ꠚꠣꠟꠣꠁ ꠖꠤꠍꠤꠟ, ꠅꠇꠐꠣ ꠖꠤꠀꠃ ꠊꠞꠞ ꠁꠀꠘ ꠈꠥꠐꠤ ꠅꠁꠟ। ꠝꠣꠛꠥꠖꠦ ꠘꠤꠎꠦꠃ ꠁꠔꠣ ꠅꠀꠁꠟꠣ, ꠁꠔꠣ ꠖꠦꠈꠤꠀ ꠔ ꠀꠝꠞꠣꠞ ꠔꠣꠁꠎ꠆ꠎꠥꠛꠤ ꠟꠣꠉꠦꠞ।
MAT 21:43 ꠄꠞꠟꠣꠉꠤ ꠇꠁꠞꠣꠝ, ꠀꠟ꠆ꠟꠣꠞ ꠛꠣꠖꠡꠣꠁ ꠀꠙꠘꠣꠞꠣꠞ ꠉꠦꠍ ꠕꠣꠇꠤ ꠇꠣꠠꠤꠀ ꠘꠦꠅꠀ ꠅꠁꠛ। ꠀꠞ ꠎꠦꠞꠣꠞ ꠎꠤꠘ꠆ꠖꠦꠉꠤꠔ ꠅꠃ ꠛꠣꠖꠡꠣꠁꠞ ꠚꠟ ꠖꠦꠈꠣ ꠎꠣꠁꠛ, ꠔꠣꠞꠣꠞꠦꠃ ꠅꠃ ꠛꠣꠖꠡꠣꠁ ꠖꠦꠅꠀ ꠅꠁꠛ।
MAT 21:44 ꠢꠥꠘꠅ, ꠅꠃ ꠙꠣꠔ꠆ꠔꠞꠞ ꠃꠙꠞꠦ ꠎꠦ ꠎꠘ ꠙꠠꠛ, ꠢꠦ ꠐꠥꠇꠞꠣ ꠐꠥꠇꠞꠣ ꠅꠁꠎꠤꠛ। ꠀꠞ ꠅꠃ ꠙꠣꠔ꠆ꠔꠞꠅ ꠎꠣꠞ ꠃꠙꠞꠦ ꠙꠠꠛ, ꠢꠦ-ꠅ ꠌꠥꠞꠝꠣꠞ ꠅꠁꠎꠤꠛ।”
MAT 21:45 ꠁꠍꠣꠞ ꠅꠃ ꠔꠣꠟꠤꠝ ꠢꠥꠘꠤꠀ ꠛꠠ ꠁꠝꠣꠝ ꠀꠞ ꠚꠞꠤꠡꠤ ꠅꠇꠟꠦ ꠛꠥꠎꠤꠟꠤꠟꠣ, ꠔꠣꠁꠘ ꠁꠔꠣ ꠔꠣꠞꠣꠞ ꠛꠤꠙꠇ꠆ꠇꠦꠃ ꠇꠁꠞꠣ।
MAT 21:46 ꠄꠞꠖꠣꠄ ꠔꠣꠞꠣ ꠁꠍꠣꠞꠦ ꠗꠞꠤꠟꠤꠔ ꠌꠣꠁꠟ। ꠅꠁꠟꠦ ꠝꠣꠘꠡꠞꠦ ꠒꠞꠣꠁꠀ ꠔꠣꠘꠞꠦ ꠇꠥꠘ꠆ꠔꠣ ꠇꠞꠟ ꠘꠣ। ꠝꠣꠘꠡꠦ ꠔ ꠢꠎꠞꠔ ꠁꠍꠣꠞꠦ ꠘꠛꠤ ꠢꠤꠡꠣꠛꠦ ꠝꠣꠘꠔꠣ।
MAT 22:1 ꠢꠎꠞꠔ ꠁꠍꠣꠄ ꠢꠤꠞꠛꠣꠞ ꠔꠣꠞꠣꠞꠦ ꠀꠞꠅ ꠇꠤꠌ꠆ꠍꠣ ꠢꠥꠘꠣꠁꠟꠣ। ꠔꠣꠁꠘ ꠇꠁꠟꠣ,
MAT 22:2 “ꠛꠦꠢꠦꠡ꠆ꠔꠤ ꠛꠣꠖꠡꠣꠁ ꠅꠟꠣ ꠄꠇ ꠛꠣꠖꠡꠣꠞ ꠟꠣꠈꠣꠘ, ꠎꠦ ꠛꠣꠖꠡꠣꠄ ꠔꠣꠘ ꠙꠥꠀꠞ ꠛꠤꠀꠞ ꠈꠣꠘꠤꠞ ꠛꠦꠛꠡ꠆ꠔꠣ ꠇꠞꠟꠣ।
MAT 22:3 ꠀꠞ ꠖꠣꠅꠔꠤ ꠝꠦꠝꠣꠘ ꠅꠇꠟꠞꠦ ꠀꠘꠣꠞ ꠟꠣꠉꠤ ꠔꠣꠘ ꠇꠄꠎꠘ ꠌꠣꠇꠞꠞꠦ ꠙꠣꠑꠣꠁꠟꠣ, ꠅꠁꠟꠦ ꠔꠣꠞꠣ ꠇꠦꠃ ꠀꠁꠟ ꠘꠣ।
MAT 22:4 ꠛꠣꠖꠦ ꠔꠣꠘ ꠀꠞꠅ ꠌꠣꠇꠞꠞꠦ ꠅꠈꠣꠘ ꠢꠤꠇꠣꠁ ꠖꠤꠀ ꠙꠣꠑꠣꠁꠟꠣ, ꠇꠁꠟꠣ, ‘ꠔꠥꠝꠞꠣ ꠉꠤꠀ ꠝꠦꠝꠣꠘ ꠅꠇꠟꠞꠦ ꠇꠁꠅ, ꠀꠝꠤ ꠀꠝꠣꠞ ꠔꠣꠎꠣ ꠛꠤꠍꠣꠟ ꠀꠞ ꠒꠦꠇꠣꠁꠘ ꠎꠛ ꠇꠞꠤꠀ ꠈꠣꠘꠤ ꠎꠥꠁꠔ ꠇꠞꠍꠤ। ꠅꠈꠘ ꠈꠣꠘꠤ ꠔꠤꠀꠞ ꠅꠁꠉꠦꠍꠦ, ꠀꠙꠘꠣꠞꠣ ꠀꠁꠀ ꠈꠣꠁꠟꠣꠃꠇ꠆ꠇꠣ।’
MAT 22:5 “ꠖꠣꠅꠔꠤ ꠅꠇꠟꠦ ꠄꠞꠣꠞ ꠇꠕꠣꠅ ꠘꠣ ꠢꠥꠘꠤꠀ, ꠇꠦꠃ ꠔꠣꠞ ꠘꠤꠎꠞ ꠈꠣꠝꠣꠞꠅ ꠀꠞ ꠇꠦꠃ ꠔꠣꠞ ꠖꠥꠇꠣꠘꠅ ꠉꠦꠟꠉꠤ।
MAT 22:6 ꠀꠞ ꠛꠣꠇꠤ ꠝꠣꠘꠡꠦ ꠅꠃ ꠌꠣꠇꠞ ꠅꠇꠟꠞꠦ ꠗꠞꠤꠀ ꠛꠦꠁꠎ꠆ꠎꠔ ꠇꠞꠤꠀ ꠈꠥꠘ ꠇꠞꠤꠟ꠆ꠟ।
MAT 22:7 ꠛꠣꠖꠡꠣꠄ ꠁꠔꠣ ꠢꠥꠘꠤꠀ ꠉꠥꠍꠣꠄ ꠀꠉꠥꠁꠘ ꠅꠁꠉꠦꠟꠣ। ꠔꠣꠁꠘ ꠘꠤꠎꠞ ꠍꠤꠙꠣꠁ ꠖꠟ ꠙꠣꠑꠣꠁꠀ ꠢꠃ ꠈꠥꠘꠤ ꠅꠇꠟꠞꠦ ꠛꠤꠘꠣꠡ ꠇꠞꠟꠣ, ꠔꠣꠞꠣꠞ ꠀꠡ꠆ꠔꠣ ꠐꠣꠃꠘ ꠀꠉꠥꠁꠘꠖꠤ ꠎꠣꠟꠣꠁꠟꠤꠟꠣ।
MAT 22:8 ꠛꠣꠖꠦ ꠔꠣꠘ ꠌꠣꠇꠞ ꠅꠇꠟꠞꠦ ꠇꠁꠟꠣ, ‘ꠈꠣꠘꠤ ꠔ ꠔꠤꠀꠞ ꠅꠁꠉꠦꠍꠦ, ꠅꠁꠟꠦ ꠎꠦꠔꠣꠞꠦ ꠖꠣꠅꠔ ꠖꠤꠍꠟꠣꠝ, ꠁꠔꠣ ꠔ ꠁ ꠖꠣꠅꠔꠞ ꠎꠥꠇꠣ ꠘꠣꠄ।
MAT 22:9 ꠔꠦ ꠢꠥꠘꠅ, ꠔꠥꠝꠞꠣ ꠅꠈꠘ ꠞꠣꠡ꠆ꠔꠣꠞ ꠝꠥꠠꠣꠄ ꠝꠥꠠꠣꠄ ꠎꠣꠅ, ꠉꠤꠀ ꠎꠔ ꠝꠣꠘꠡꠞꠦ ꠙꠣꠁꠛꠣꠄ, ꠔꠣꠞꠣ ꠢꠇ꠆ꠇꠟꠞꠦ ꠛꠤꠀꠞ ꠀꠡꠞꠅ ꠟꠁꠀ ꠀꠅ।’
MAT 22:10 ꠛꠣꠖꠡꠣꠞ ꠢꠥꠇꠥꠝ ꠙꠣꠁꠀ ꠔꠣꠞꠣ ꠛꠣꠞ ꠅꠁꠀ ꠉꠤꠀ ꠛꠣꠖ-ꠜꠣꠟꠣ ꠎꠔ ꠎꠘꠞꠦ ꠙꠣꠁꠟ, ꠢꠇꠟꠞꠦ ꠀꠘꠟ। ꠄꠞꠟꠣꠉꠤ ꠝꠦꠝꠣꠘꠦ ꠀꠡ꠆ꠔꠣ ꠛꠤꠀ ꠛꠣꠠꠤ ꠜꠞꠤ ꠉꠦꠟ।
MAT 22:11 “ꠄꠞꠛꠣꠖꠦ ꠛꠣꠖꠡꠣꠄ ꠝꠦꠝꠣꠘꠞ ꠟꠉꠦ ꠖꠦꠈꠣ ꠇꠞꠣꠔ ꠀꠁꠟꠣ, ꠀꠁꠀ ꠝꠎꠟꠤꠍꠞ ꠜꠤꠔꠞꠦ ꠢꠣꠝꠣꠁꠀ ꠖꠦꠈꠂꠘ, ꠄꠇ ꠛꠦꠐꠣꠄ ꠡꠣꠗꠣꠞꠘ ꠇꠣꠙꠠ ꠚꠤꠘ꠆ꠖꠤꠀ ꠈꠣꠘꠤꠔ ꠀꠁꠌ꠆ꠍꠦ।
MAT 22:12 ꠔꠣꠁꠘ ꠄꠞꠦ ꠎꠤꠇꠣꠁꠟꠣ, ‘ꠅꠛꠣ, ꠛꠤꠀ ꠛꠣꠠꠤꠞ ꠎꠥꠇꠣ ꠇꠣꠙꠠ ꠘꠣ ꠚꠤꠘ꠆ꠖꠤꠀ ꠁꠘꠅ ꠢꠣꠝꠣꠁꠟꠦ ꠇꠤꠟꠣ?’ ꠅꠁꠟꠦ ꠢꠦ ꠇꠥꠘꠥ ꠎꠥꠀꠙ ꠖꠤꠔ ꠙꠣꠞꠟ ꠘꠣ।
MAT 22:13 ꠔꠦꠃ ꠛꠣꠖꠡꠣꠄ ꠔꠣꠘ ꠉꠥꠟꠣꠝ ꠅꠇꠟꠞꠦ ꠢꠥꠇꠥꠝ ꠖꠤꠟꠣ, ‘ꠅꠉꠥꠞ ꠀꠔ-ꠙꠣꠅ ꠛꠣꠘ꠆ꠖꠤꠀ ꠛꠣꠞꠦ ꠘꠤꠀ ꠀꠘ꠆ꠖꠣꠁꠞ ꠉꠣꠔꠅ ꠚꠣꠟꠣꠁ ꠖꠦꠅ।’ ꠢꠘꠅ ꠝꠣꠘꠡꠦ ꠇꠣꠘ꠆ꠖꠣ-ꠇꠣꠐꠤ ꠇꠞꠛꠣ ꠀꠞ ꠎꠣꠟꠣ-ꠎꠘꠔ꠆ꠞꠘꠣꠄ ꠖꠣꠔ ꠇꠤꠠꠤꠝꠤꠠꠤ ꠈꠣꠁꠛꠣ।”
MAT 22:14 ꠇꠤꠌ꠆ꠍꠣꠞ ꠛꠣꠖꠦ ꠁꠍꠣꠄ ꠇꠁꠟꠣ, “ꠄꠞꠟꠣꠉꠤꠃ ꠀꠝꠤ ꠇꠁꠞꠣꠝ, ꠖꠣꠅꠔ ꠙꠣꠁꠍꠂꠘ ꠛꠃꠔꠦ, ꠅꠁꠟꠦ ꠙꠍꠘ꠆ꠖ ꠅꠁꠍꠂꠘ ꠇꠝ।”
MAT 22:15 ꠅꠈꠣꠘ ꠢꠥꠘꠤꠀ ꠚꠞꠤꠡꠤ ꠖꠟꠞ ꠝꠣꠘꠥꠡ ꠁꠍꠣꠞ ꠉꠦꠍ ꠕꠣꠇꠤ ꠢꠞꠤꠀ ꠉꠦꠟꠣꠉꠤ, ꠉꠤꠀ ꠙꠞꠣꠝꠤꠡ ꠇꠞꠟꠣ ꠔꠣꠘꠞꠦ ꠇꠤꠟꠣ ꠇꠕꠣꠞ ꠚꠣꠘ꠆ꠖꠅ ꠚꠣꠟꠣꠁꠟ ꠎꠣꠄ।
MAT 22:16 ꠔꠦꠃ ꠔꠣꠞꠣ ꠘꠤꠎꠞ ꠇꠄꠎꠘ ꠡꠣꠉꠞꠤꠖ ꠀꠞ ꠞꠣꠎꠣ ꠢꠦꠞꠥꠖꠞ ꠖꠟꠞ ꠇꠤꠍꠥ ꠝꠣꠘꠡꠞꠦ ꠁꠍꠣꠞ ꠉꠦꠍꠦ ꠙꠣꠑꠣꠁꠟꠣ। ꠅꠔꠣꠄ ꠀꠁꠀ ꠇꠁꠟꠣ, “ꠢꠥꠎꠥꠞ, ꠀꠝꠞꠣ ꠔ ꠎꠣꠘꠤ, ꠀꠙꠘꠦ ꠄꠇꠎꠘ ꠢꠇ ꠝꠣꠘꠥꠡ। ꠢꠇ-ꠢꠣꠟꠣꠟ ꠙꠕꠦ ꠝꠣꠘꠡꠞꠦ ꠀꠟ꠆ꠟꠣꠞ ꠞꠣꠡ꠆ꠔꠣ ꠛꠣꠔꠣꠁ ꠖꠤꠞꠣ। ꠇꠦ ꠇꠤꠔꠣ ꠝꠘꠅ ꠇꠞꠦ ꠛꠣ ꠘꠣ ꠇꠞꠦ, ꠁꠔꠣꠄ ꠀꠙꠘꠣꠞ ꠇꠥꠘ꠆ꠔꠣꠃ ꠎꠣꠄ ꠀꠄ ꠘꠣ, ꠀꠙꠘꠦ ꠔ ꠝꠥꠈ ꠌꠣꠁꠀ ꠇꠥꠘ꠆ꠔꠣ ꠇꠞꠂꠘ ꠘꠣ।
MAT 22:17 ꠔꠦ ꠀꠝꠞꠣꠞꠦ ꠛꠣꠔꠣꠁ ꠖꠦꠃꠇ꠆ꠇꠣ, ꠢꠎꠞꠔ ꠝꠥꠍꠣꠞ ꠡꠞꠤꠅꠔ ꠝꠣꠚꠤꠇ ꠞꠥꠝꠣꠘ ꠛꠣꠖꠡꠣꠞꠦ ꠈꠣꠎꠘꠣ ꠖꠦꠅꠀ ꠎꠣꠁꠎ ꠘꠤ? ꠀꠝꠞꠣ ꠔꠣꠘꠞꠦ ꠈꠣꠎꠘꠣ ꠖꠤꠔꠣꠝ ꠘꠤ, ꠘꠣ ꠖꠤꠔꠣꠝ ꠘꠣ?”
MAT 22:18 ꠁꠔꠣꠞ ꠇꠥ-ꠙꠞꠣꠝꠤꠡ ꠔꠣꠁꠘ ꠛꠥꠎꠤꠟꠤꠟꠣ, ꠛꠥꠎꠤꠀ ꠇꠁꠟꠣ, “ꠅ ꠜꠘ꠆ꠒ ꠅꠇꠟ, ꠔꠥꠝꠞꠣ ꠇꠦꠘꠦ ꠀꠝꠣꠞꠦ ꠙꠞꠤꠇ꠆ꠇꠣ ꠇꠞꠞꠣꠄ?
MAT 22:19 ꠎꠦ ꠐꠦꠇꠣꠖꠤ ꠈꠣꠎꠘꠣ ꠖꠦꠁꠘ, ꠅꠔꠣ ꠄꠉꠥ ꠐꠦꠇꠣ ꠀꠝꠣꠞꠦ ꠖꠦꠈꠣꠅ।” ꠅꠃ ꠔꠣꠞꠣ ꠄꠇꠐꠣ ꠖꠤꠘꠣꠞ ꠀꠘꠤꠀ ꠁꠍꠣꠞ ꠀꠔꠅ ꠖꠤꠟꠣ।
MAT 22:20 ꠔꠣꠁꠘ ꠎꠤꠇꠣꠁꠟꠣ, “ꠁ ꠙꠄꠡꠣꠞ ꠃꠙꠞꠦ ꠇꠣꠞ ꠘꠣꠝ ꠀꠞ ꠍꠛꠤ?”
MAT 22:21 ꠔꠣꠞꠣ ꠇꠁꠟꠣ, “ꠞꠥꠝꠣꠘ ꠛꠣꠖꠡꠣꠞ।” ꠔꠣꠁꠘ ꠇꠁꠟꠣ, “ꠔꠦ ꠢꠥꠘꠅ, ꠛꠣꠖꠡꠣꠞ ꠎꠦꠔꠣ ꠁꠔꠣ ꠛꠣꠖꠡꠣꠞꠦ ꠖꠦꠅ, ꠀꠞ ꠀꠟ꠆ꠟꠣꠞ ꠎꠦꠔꠣ ꠁꠔꠣ ꠀꠟ꠆ꠟꠣꠞꠦ ꠖꠦꠅ।”
MAT 22:22 ꠁꠈꠣꠘ ꠢꠥꠘꠤꠀ ꠔꠣꠞꠣ ꠔꠣꠁꠎ꠆ꠎꠥꠛ ꠛꠘꠤꠀ ꠔꠣꠘ ꠉꠦꠍ ꠕꠣꠇꠤ ꠉꠦꠟꠣꠉꠤ।
MAT 22:23 ꠅꠃ ꠖꠤꠘ ꠍꠤꠖ꠆ꠖꠦꠇꠤꠀ ꠝꠎꠛꠞ ꠇꠄꠎꠘ ꠝꠣꠘꠥꠡ ꠁꠍꠣꠞ ꠇꠣꠘ꠆ꠖꠣꠔ ꠀꠁꠟꠣ। ꠄꠞꠣ ꠄꠇꠤꠘ ꠇꠞꠂꠘ, ꠝꠃꠔꠞ ꠛꠣꠖꠦ ꠇꠥꠘꠥ ꠝꠣꠘꠥꠡ ꠀꠞ ꠎꠤꠘ꠆ꠖꠣ ꠅꠁꠀ ꠃꠑꠂꠘ ꠘꠣ। ꠄꠞꠖꠣꠄ ꠔꠣꠞꠣ ꠁꠍꠣꠞꠦ ꠚꠣꠘ꠆ꠖꠅ ꠚꠣꠟꠣꠁꠛꠣꠞ ꠟꠣꠉꠤ ꠎꠤꠇꠣꠁꠟꠣ,
MAT 22:24 “ꠢꠥꠎꠥꠞ, ꠢꠎꠞꠔ ꠝꠥꠍꠣꠄ ꠇꠁꠍꠂꠘ, ꠇꠦꠃ ꠎꠥꠖꠤ ꠔꠣꠞ ꠛꠃꠞꠦ ꠘꠤꠀꠅꠟꠣꠖꠤ ꠢꠣꠟꠔꠦ ꠕꠁꠀ ꠝꠣꠞꠣ ꠎꠣꠄ, ꠔꠦ ꠔꠣꠞ ꠜꠣꠁꠄ ꠅꠃ ꠠꠣꠠꠤ ꠛꠦꠐꠤꠞꠦ ꠛꠤꠀ ꠇꠞꠤꠀ ꠔꠣꠞ ꠜꠣꠁꠞ ꠛꠋꠡ ꠛꠣꠌꠣꠁꠔꠦ ꠅꠁꠛ।
MAT 22:25 ꠔꠦ ꠀꠝꠞꠣꠞ ꠅꠘꠅ ꠄꠇ ꠙꠞꠤꠛꠣꠞꠅ ꠡꠣꠔ ꠜꠣꠁ ꠀꠍꠤꠟ। ꠛꠠ ꠎꠘꠦ ꠛꠤꠀ ꠇꠞꠤꠀ ꠘꠤꠀꠅꠟꠣꠖꠤ ꠢꠣꠟꠔꠦ ꠝꠣꠞꠣ ꠉꠦꠟ।
MAT 22:26 ꠛꠣꠖꠦ ꠖꠥꠍꠞꠣ ꠜꠣꠁꠄ ꠔꠣꠞ ꠅꠃ ꠠꠣꠠꠤ ꠜꠣꠛꠤꠞꠦ ꠛꠤꠀ ꠇꠞꠤ ꠝꠣꠞꠣ ꠉꠦꠟ। ꠅꠃ ꠘꠝꠥꠘꠣꠄ ꠔꠤꠍꠞꠣ ꠜꠣꠁ ꠕꠣꠇꠤ ꠡꠥꠞꠥ ꠇꠞꠤꠀ ꠡꠣꠔꠅ ꠜꠣꠁꠄ ꠅꠃ ꠛꠦꠐꠤꠞꠦ ꠛꠤꠀ ꠇꠞꠟ।
MAT 22:27 ꠢꠦꠡꠦ ꠅꠃ ꠛꠦꠐꠤꠅ ꠝꠣꠞꠣ ꠉꠦꠟ।
MAT 22:28 ꠔꠦ ꠇꠃꠇ꠆ꠇꠣ ꠌꠣꠁꠘ, ꠝꠞꠘ ꠛꠣꠖꠦ ꠎꠦꠛꠟꠣ ꠔꠣꠞꠣ ꠎꠤꠘ꠆ꠖꠣ ꠅꠁꠀ ꠃꠑꠛꠣ, ꠅꠃ ꠡꠝꠄ ꠁ ꠛꠦꠐꠤ, ꠄꠞꠣ ꠇꠥꠘ ꠜꠣꠁꠞ ꠛꠃ ꠅꠁꠛ? ꠔꠣꠞꠣ ꠢꠇꠟꠦꠃ ꠔ ꠁ ꠛꠦꠐꠤꠞꠦ ꠛꠤꠀ ꠇꠞꠍꠤꠟ।”
MAT 22:29 ꠔꠣꠁꠘ ꠎꠥꠀꠙ ꠖꠤꠟꠣ, “ꠀꠙꠘꠣꠞꠣ ꠔ ꠀꠟ꠆ꠟꠣꠞ ꠇꠣꠟꠣꠝ ꠎꠣꠘꠂꠘ ꠘꠣ, ꠀꠟ꠆ꠟꠣꠞ ꠇꠥꠖꠞꠔꠤ ꠛꠦꠙꠣꠞꠅ ꠛꠥꠎꠂꠘ ꠘꠣ। ꠄꠞꠖꠣꠄ ꠀꠙꠘꠣꠞꠣ ꠁ ꠜꠥꠟ ꠇꠞꠞꠣ।
MAT 22:30 ꠢꠥꠘꠃꠇ꠆ꠇꠣ, ꠝꠥꠞ꠆ꠖꠣ ꠅꠇꠟ ꠎꠦꠛꠟꠣ ꠎꠤꠘ꠆ꠖꠣ ꠅꠁꠀ ꠃꠑꠛꠣ, ꠅꠃ ꠡꠝꠄ ꠔꠣꠞꠣ ꠛꠤꠀ-ꠡꠣꠖꠤ ꠇꠞꠔꠣ ꠘꠣꠄ, ꠇꠦꠃ ꠔꠣꠞꠣꠞꠦ ꠛꠤꠀ ꠖꠤꠔ-ꠅ ꠘꠣꠄ। ꠄꠞꠣ ꠔ ꠚꠤꠞꠤꠡ꠆ꠔꠣꠞ ꠟꠣꠈꠣꠘ ꠛꠘꠤꠎꠤꠛꠣ।
MAT 22:31 ꠝꠥꠞ꠆ꠖꠣ ꠅꠇꠟ ꠎꠤꠘ꠆ꠖꠣ ꠅꠀꠞ ꠛꠦꠙꠣꠞꠦ ꠀꠟ꠆ꠟꠣꠄ ꠇꠤꠔꠣ ꠛꠣꠔꠣꠁꠍꠂꠘ, ꠁꠔꠣ ꠀꠙꠘꠣꠞꠣ ꠇꠤꠔꠣꠛꠅ ꠙꠠꠍꠂꠘ ꠘꠣ ꠘꠤ?
MAT 22:32 ꠇꠤꠔꠣꠛꠅ ꠟꠦꠈꠣ ꠀꠍꠦ, ‘ꠀꠝꠤ ꠁꠛ꠆ꠞꠣꠢꠤꠝꠞ ꠀꠟ꠆ꠟꠣ, ꠁꠍꠢꠣꠇꠞ ꠀꠟ꠆ꠟꠣ ꠀꠞ ꠁꠀꠇꠥꠛꠞ ꠀꠟ꠆ꠟꠣ।’ ꠅꠈꠣꠘ ꠕꠣꠇꠤ ꠛꠥꠎꠣ ꠎꠣꠄ, ꠅꠃ ꠘꠛꠤ ꠅꠇꠟꠞ ꠃꠚꠣꠔ ꠅꠁꠟꠦꠅ ꠄꠞꠣ ꠔ ꠀꠟ꠆ꠟꠣꠞ ꠌꠈꠥꠔ ꠅꠈꠘꠅ ꠎꠤꠘ꠆ꠖꠣ ꠀꠍꠂꠘ। ꠀꠟ꠆ꠟꠣ ꠔ ꠝꠥꠞ꠆ꠖꠣ ꠅꠇꠟꠞ ꠝꠣꠛꠥꠖ ꠘꠣꠄ, ꠔꠣꠁꠘ ꠎꠤꠘ꠆ꠖꠣ ꠅꠇꠟꠞ ꠝꠣꠛꠥꠖ।”
MAT 22:33 ꠁ ꠔꠣꠟꠤꠝ ꠢꠥꠘꠤꠀ ꠔꠣꠞꠣ ꠔꠣꠁꠎ꠆ꠎꠥꠛ ꠅꠁꠉꠦꠟꠣ।
MAT 22:34 ꠚꠞꠤꠡꠤ ꠅꠇꠟꠦ ꠎꠦꠛꠟꠣ ꠢꠥꠘꠟꠣ, ꠍꠤꠖ꠆ꠖꠦꠇꠤꠀ ꠝꠎꠛꠞ ꠝꠣꠘꠡꠦ ꠁꠍꠣꠞ ꠝꠣꠔꠞ ꠇꠥꠘꠥ ꠎꠥꠀꠙ ꠖꠤꠔꠣ ꠙꠣꠞꠍꠂꠘ ꠘꠣ, ꠔꠦꠃ ꠔꠣꠞꠣ ꠢꠇꠟ ꠄꠇꠈꠣꠘꠅ ꠅꠁꠟꠣ।
MAT 22:35 ꠔꠣꠞꠣꠞ ꠖꠟꠞ ꠄꠇꠎꠘ ꠝꠃꠟꠣꠘꠣ ꠀꠁꠀ ꠁꠍꠣꠞꠦ ꠙꠞꠤꠇ꠆ꠇꠣ ꠇꠞꠣꠞ ꠟꠣꠉꠤ ꠎꠤꠇꠣꠁꠟꠣ,
MAT 22:36 “ꠢꠥꠎꠥꠞ, ꠝꠥꠍꠣꠞ ꠡꠞꠤꠅꠔꠞ ꠝꠣꠎꠦ ꠢꠇꠟ ꠕꠣꠇꠤ ꠛꠠ ꠢꠥꠇꠥꠝ ꠇꠥꠘꠐꠣ?”
MAT 22:37 ꠁꠍꠣꠄ ꠎꠥꠀꠙ ꠖꠤꠟꠣ, “ꠢꠇꠟ ꠕꠣꠇꠤ ꠛꠠ ꠢꠥꠇꠥꠝ ꠅꠁꠟ, ‘ꠔꠥꠝꠞꠣꠞ ꠀꠡ꠆ꠔꠣ ꠖꠤꠟ, ꠀꠡ꠆ꠔꠣ ꠎꠣꠘ, ꠀꠡ꠆ꠔꠣ ꠝꠘ ꠀꠞ ꠢꠇꠟ ꠡꠇ꠆ꠔꠤ ꠖꠤꠀ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞꠦ ꠝꠢꠛ꠆ꠛꠔ ꠇꠞꠤꠅ।’
MAT 22:39 ꠖꠥꠍꠞꠣ ꠢꠥꠇꠥꠝꠅ ꠅꠃ ꠟꠣꠈꠣꠘ, ‘ꠔꠥꠝꠞꠣꠞ ꠀꠞꠤ-ꠚꠞꠤꠞꠦ ꠘꠤꠎꠞ ꠟꠣꠈꠣꠘ ꠝꠣꠄꠀ ꠇꠞꠤꠅ।’
MAT 22:40 ꠅꠃ ꠖꠥꠁꠅ ꠢꠥꠇꠥꠝꠞ ꠃꠙꠞꠦ ꠀꠡ꠆ꠔꠣ ꠔꠃꠞꠣꠔ ꠡꠞꠤꠚ ꠀꠞ ꠀꠍꠝꠣꠘꠤ ꠇꠤꠔꠣꠛ ꠅꠇꠟ ꠘꠤꠞꠜꠞ ꠇꠞꠦ।”
MAT 22:41 ꠚꠞꠤꠡꠤ ꠅꠇꠟ ꠄꠇꠈꠣꠘꠅ ꠖꠟꠣ ꠞꠁꠍꠂꠘ, ꠅꠃ ꠡꠝꠄ ꠁꠍꠣꠄ ꠔꠣꠞꠣꠞꠦ ꠎꠤꠇꠣꠁꠟꠣ,
MAT 22:42 “ꠀꠟ-ꠝꠍꠤꠞ ꠛꠦꠙꠣꠞꠦ ꠀꠙꠘꠣꠞꠣ ꠇꠤꠔꠣ ꠎꠣꠘꠂꠘ? ꠔꠣꠁꠘ ꠇꠣꠞ ꠀꠅꠟꠣꠖ?” ꠔꠣꠞꠣ ꠇꠁꠟ, “ꠖꠣꠃꠖ ꠘꠛꠤꠞ ꠀꠅꠟꠣꠖ।”
MAT 22:43 ꠔꠦꠃ ꠁꠍꠣꠄ ꠔꠣꠞꠣꠞꠦ ꠇꠁꠟꠣ, “ꠔꠦ ꠙꠣꠇ ꠞꠥꠢꠥꠞ ꠛꠟꠦ ꠖꠣꠃꠖ ꠘꠛꠤꠄ ꠇꠤꠟꠣ ꠀꠟ-ꠝꠍꠤꠞꠦ ꠔꠣꠘ ꠘꠤꠎꠞ ꠝꠥꠘꠤꠛ ꠇꠁꠍꠂꠘ? ꠖꠣꠃꠖꠦ ꠔ ꠇꠁꠍꠂꠘ,
MAT 22:44 ꠝꠣꠛꠥꠖꠦ ꠀꠝꠣꠞ ꠝꠥꠘꠤꠛꠞꠦ ꠇꠁꠟꠣ, ‘ꠀꠝꠤ ꠎꠔ ꠡꠝꠄ ꠔꠥꠝꠣꠞ ꠖꠥꠡꠝꠘ ꠅꠇꠟꠞꠦ ꠔꠥꠝꠣꠞ ꠙꠣꠅꠞ ꠔꠟꠣꠔ ꠘꠣ ꠚꠣꠟꠣꠁ, ꠅꠔ ꠡꠝꠄ ꠔꠥꠝꠤ ꠀꠝꠣꠞ ꠒꠣꠁꠘꠞ ꠔꠈ꠆ꠔꠅ ꠛꠅ।’
MAT 22:45 ꠖꠣꠃꠖꠦ ꠎꠦꠛꠟꠣ ꠘꠤꠎꠦꠃ ꠀꠟ-ꠝꠍꠤꠞꠦ ꠔꠣꠘ ꠝꠥꠘꠤꠛ ꠇꠁꠍꠂꠘ, ꠔꠦ ꠀꠟ-ꠝꠍꠤ ꠇꠦꠝꠘꠦ ꠖꠣꠃꠖꠞ ꠀꠅꠟꠣꠖ ꠅꠁꠛꠣ?”
MAT 22:46 ꠔꠣꠞꠣ ꠄꠞ ꠇꠥꠘꠥ ꠎꠥꠀꠙ ꠖꠤꠔꠣ ꠙꠣꠞꠟꠣ ꠘꠣ, ꠀꠞ ꠅꠃ ꠖꠤꠘ ꠕꠣꠇꠤ ꠇꠦꠃ ꠔꠣꠘꠞꠦ ꠇꠥꠘ꠆ꠔꠣ ꠎꠤꠇꠣꠘꠤꠞꠅ ꠡꠣꠅꠡ ꠙꠣꠁꠟ ꠘꠣ।
MAT 23:1 ꠢꠎꠞꠔ ꠁꠍꠣꠄ ꠔꠣꠘ ꠟꠉꠞ ꠝꠣꠘꠡꠞꠦ ꠀꠞ ꠍꠣꠢꠣꠛꠤ ꠅꠇꠟꠞꠦ ꠇꠁꠟꠣ,
MAT 23:2 “ꠝꠥꠍꠣ ꠘꠛꠤꠞ ꠡꠞꠤꠅꠔ ꠔꠣꠟꠤꠝ ꠖꠤꠛꠣꠞ ꠄꠈꠔꠤꠀꠞ ꠔ ꠝꠃꠟꠣꠘꠣ ꠀꠞ ꠚꠞꠤꠡꠤ ꠅꠇꠟꠞ ꠀꠔꠅ।
MAT 23:3 ꠄꠞꠟꠣꠉꠤ ꠔꠣꠞꠣ ꠎꠦꠔꠣ ꠇꠂꠘ, ꠅꠔꠣ ꠝꠣꠘꠤꠅ, ꠀꠞ ꠎꠦꠔꠣ ꠀꠝꠟ ꠇꠞꠣꠞ ꠢꠥꠇꠥꠝ ꠖꠦꠁꠘ, ꠅꠔꠣ ꠀꠝꠟ ꠇꠞꠤꠅ। ꠅꠁꠟꠦ ꠔꠣꠞꠣ ꠘꠤꠎꠦ ꠎꠦꠔꠣ ꠇꠞꠂꠘ, ꠔꠥꠝꠞꠣ ꠁꠔꠣ ꠇꠞꠤꠅ ꠘꠣ। ꠇꠣꠞꠘ, ꠔꠣꠞꠣ ꠝꠥꠈ ꠖꠤꠀ ꠎꠦꠟꠣ ꠇꠂꠘ, ꠁꠟꠣ ꠇꠣꠝ ꠇꠞꠂꠘ ꠘꠣ।
MAT 23:4 ꠔꠣꠞꠣ ꠀꠝ ꠝꠣꠘꠡꠞ ꠇꠣꠘ꠆ꠖꠅ ꠛꠠ ꠛꠠ ꠉꠣꠁꠐ ꠔꠥꠟꠤꠀ ꠖꠦꠁꠘ, ꠅꠁꠟꠦ ꠡꠣꠁꠎ꠆ꠎꠞ ꠟꠣꠉꠤ ꠔꠣꠞꠣ ꠄꠇꠐꠣ ꠀꠋꠉꠥꠟꠅ ꠟꠣꠠꠣꠁꠘ ꠘꠣ।
MAT 23:5 ꠔꠣꠞꠣ ꠈꠣꠟꠤ ꠝꠣꠘꠡꠞꠦ ꠖꠦꠈꠣꠘꠤꠞ ꠟꠣꠉꠤ ꠢꠇꠟꠔꠣ ꠇꠞꠂꠘ। ꠀꠟ꠆ꠟꠣꠞ ꠇꠣꠟꠣꠝꠞ ꠀꠄꠀꠔ ꠖꠤꠀ ꠛꠠ ꠛꠠ ꠔꠣꠛꠤꠎ ꠛꠣꠘ꠆ꠖꠂꠘ ꠀꠞ ꠘꠤꠎꠞ ꠙꠞꠦꠎꠉꠣꠞꠤ ꠖꠦꠈꠣꠘꠤꠞ ꠟꠣꠉꠤ ꠟꠣꠝ꠆ꠛꠣ ꠟꠣꠝ꠆ꠛꠣ ꠙꠣꠃꠉꠠꠤ ꠛꠣꠘ꠆ꠖꠂꠘ।
MAT 23:6 ꠔꠣꠞꠣ ꠈꠣꠘꠤꠞ ꠝꠎꠟꠤꠍꠅ ꠜꠣꠟꠣ ꠜꠣꠟꠣ ꠎꠣꠉꠣ ꠔꠥꠇꠣꠁꠘ ꠀꠞ ꠝꠍꠤꠖꠅ ꠢꠣꠝꠣꠁꠀ ꠍꠣꠝꠘꠞ ꠇꠣꠔꠣꠞꠅ ꠛꠁꠔꠣ ꠌꠣꠁꠘ।
MAT 23:7 ꠛꠣꠎꠣꠞ-ꠀꠐꠅ ꠉꠤꠀ ꠍꠣꠟꠣꠝ ꠙꠣꠁꠔꠦ ꠈꠥꠛ ꠙꠍꠘ꠆ꠖ ꠇꠞꠂꠘ, ꠀꠞ ꠌꠣꠁꠘ ꠝꠣꠘꠡꠦ ꠔꠣꠞꠣꠞꠦ ꠢꠥꠎꠥꠞ ꠢꠥꠎꠥꠞ ꠇꠞꠃꠇ।
MAT 23:8 “ꠅꠁꠟꠦ ꠔꠥꠝꠞꠣꠞꠦ ꠇꠦꠃ ꠢꠥꠎꠥꠞ ꠢꠥꠎꠥꠞ ꠇꠞꠃꠇ, ꠁꠔꠣ ꠀꠡꠣ ꠇꠞꠤꠅ ꠘꠣ। ꠔꠥꠝꠞꠣꠞ ꠀꠍꠟ ꠢꠥꠎꠥꠞ ꠔ ꠈꠣꠟꠤ ꠄꠇꠎꠘꠃ ꠀꠍꠂꠘ, ꠔꠥꠝꠞꠣ ꠈꠣꠟꠤ ꠜꠣꠁ ꠜꠣꠁ ꠞꠁꠅ।
MAT 23:9 ꠁ ꠖꠥꠘꠤꠀꠔ ꠇꠦꠃꠞꠞꠦ ꠛꠣꠛꠣ ꠇꠁꠀ ꠒꠣꠇꠤꠅ ꠘꠣ, ꠇꠣꠞꠘ ꠔꠥꠝꠞꠣꠞ ꠛꠣꠔꠥꠘꠤ ꠛꠣꠚ ꠔ ꠄꠇꠎꠘꠃ, ꠔꠣꠁꠘ ꠛꠦꠢꠦꠡ꠆ꠔꠅ ꠀꠍꠂꠘ।
MAT 23:10 ꠇꠦꠃ ꠔꠥꠝꠞꠣꠞꠦ ꠘꠦꠔꠣ ꠇꠁꠀ ꠒꠣꠇꠃꠇ, ꠁꠔꠣ ꠀꠡꠣ ꠇꠞꠤꠅ ꠘꠣ। ꠔꠥꠝꠞꠣꠞ ꠘꠦꠔꠣ ꠔ ꠄꠇꠎꠘꠃ, ꠔꠣꠁꠘ ꠅꠁꠟꠣ ꠀꠟ-ꠝꠍꠤ।
MAT 23:11 “ꠔꠥꠝꠞꠣꠞ ꠝꠣꠎꠦ ꠎꠦꠁꠘ ꠢꠇꠟ ꠕꠣꠇꠤ ꠛꠠ, ꠄꠁꠘ ꠔꠥꠝꠞꠣꠞ ꠈꠦꠎꠝꠔ ꠇꠞꠃꠇ।
MAT 23:12 ꠎꠦ ꠎꠘꠦ ꠘꠤꠎꠞꠦ ꠛꠠ ꠝꠘꠅ ꠇꠞꠦ, ꠔꠣꠞꠦ ꠢꠥꠞꠥ ꠇꠞꠣ ꠅꠁꠛ। ꠀꠞ ꠎꠦ ꠘꠤꠎꠞꠦ ꠢꠥꠞꠥ ꠝꠘꠅ ꠇꠞꠦ, ꠔꠣꠞꠦ ꠛꠠ ꠇꠞꠣ ꠅꠁꠛ।
MAT 23:13 “ꠢꠣꠄꠞꠦ ꠝꠃꠟꠣꠘꠣ ꠀꠞ ꠚꠞꠤꠡꠤꠞ ꠖꠟ, ꠀꠚꠍꠥꠍ ꠔꠥꠝꠞꠣꠞ ꠟꠣꠉꠤ, ꠔꠥꠝꠞꠣ ꠜꠘ꠆ꠒ! ꠔꠥꠝꠞꠣ ꠝꠣꠘꠡꠞ ꠍꠣꠝꠘꠦ ꠛꠦꠢꠦꠡ꠆ꠔꠤ ꠛꠣꠖꠡꠣꠁꠞ ꠖꠥꠀꠞ ꠛꠘ꠆ꠖ ꠇꠞꠤ ꠕꠁꠍ। ꠔꠥꠝꠞꠣ ꠘꠤꠎꠦꠅ ꠅꠘꠅ ꠢꠣꠝꠣꠁꠞꠣꠄ ꠘꠣ, ꠝꠣꠘꠡꠞꠦꠅ ꠢꠣꠝꠣꠁꠔꠦ ꠖꠤꠞꠣꠄ ꠘꠣ।
MAT 23:14 ꠢꠣꠄꠞꠦ ꠜꠘ꠆ꠒ ꠝꠃꠟꠣꠘꠣ ꠀꠞ ꠚꠞꠤꠡꠤꠞ ꠖꠟ, ꠝꠣꠘꠡꠞꠦ ꠖꠦꠈꠣꠘꠤꠞ ꠟꠣꠉꠤ ꠔꠥꠝꠞꠣ ꠟꠣꠝ꠆ꠛꠣ ꠟꠣꠝ꠆ꠛꠣ ꠖꠥꠀ ꠇꠞꠅ, ꠢꠤꠞꠛꠣꠞ ꠠꠣꠠꠤ ꠛꠦꠐꠤꠘ꠆ꠔꠞ ꠎꠣꠉꠣ-ꠝꠤꠞꠣꠡꠅ ꠖꠈꠟ ꠇꠞꠅ। ꠄꠞꠟꠣꠉꠤ ꠔꠥꠝꠞꠣꠞ ꠇꠑꠤꠘ ꠡꠣꠎꠣ ꠅꠁꠛ।
MAT 23:15 ꠢꠣꠄꠞꠦ ꠜꠘ꠆ꠒ ꠝꠃꠟꠣꠘꠣ ꠀꠞ ꠚꠞꠤꠡꠤꠞ ꠖꠟ! ꠄꠇꠎꠘ ꠝꠣꠘꠡꠞꠦ ꠔꠥꠝꠞꠣꠞ ꠖꠟꠅ ꠘꠤꠛꠣꠞ ꠟꠣꠉꠤ ꠡꠣꠔ ꠡꠝꠥꠖ꠆ꠞ ꠔꠦꠞꠅ ꠘꠖꠤ ꠙꠣꠞ ꠅꠁꠀ ꠔꠥꠝꠞꠣ ꠖꠃꠠꠣꠅ। ꠅꠁꠟꠦ ꠢꠦ ꠔꠥꠝꠞꠣꠞ ꠖꠟꠅ ꠢꠣꠝꠣꠁꠀ ꠢꠣꠞꠟꠦ, ꠔꠣꠞꠦ ꠔꠥꠝꠞꠣ ꠕꠣꠇꠤ ꠀꠞꠅ ꠛꠠ ꠖꠥꠎꠈꠤ ꠛꠣꠘꠣꠅ।
MAT 23:16 “ꠢꠣꠄꠞꠦ ꠀꠘ꠆ꠖꠣ ꠙꠕ ꠖꠦꠈꠣꠅꠞꠣ! ꠔꠥꠝꠞꠣ ꠘꠤꠎꠦ ꠀꠘ꠆ꠖꠣ ꠅꠁꠀ ꠅꠁꠘ꠆ꠘꠞꠦ ꠇꠤꠟꠣ ꠙꠕ ꠖꠦꠈꠣꠅ? ꠔꠥꠝꠞꠣ ꠔ ꠇꠅ, ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠞ ꠘꠣꠝꠦ ꠇꠍꠝ ꠈꠣꠁꠟꠦ ꠇꠥꠘ꠆ꠔꠣ ꠅꠄ ꠘꠣ, ꠅꠁꠟꠦ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠞ ꠡꠥꠘꠣꠞ ꠘꠣꠝꠦ ꠇꠍꠝ ꠈꠣꠁꠟꠦ ꠝꠣꠘꠔꠦ ꠅꠁꠛ।
MAT 23:17 ꠢꠣꠄꠞꠦ ꠀꠘ꠆ꠖꠣ ꠛꠦꠀꠈꠟꠞ ꠖꠟ, ꠇꠥꠘꠈꠣꠘ ꠛꠠ? ꠛꠣꠄꠔꠥꠟ-ꠝꠥꠇꠣꠖ꠆ꠖꠍ, ꠘꠣ ꠡꠥꠘꠣ? ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠦꠃ ꠔ ꠅꠃ ꠡꠥꠘꠣꠞꠦ ꠙꠣꠇ-ꠙꠛꠤꠔ꠆ꠞ ꠇꠞꠦ।
MAT 23:18 ꠢꠤꠞꠛꠣꠞ ꠔꠥꠝꠞꠣ ꠇꠅ, ꠇꠥꠞꠛꠣꠘꠤ ꠈꠣꠘꠣꠞ ꠘꠣꠝꠦ ꠇꠦꠃ ꠇꠍꠝ ꠇꠞꠟꠦ ꠇꠥꠘ꠆ꠔꠣ ꠅꠄ ꠘꠣ, ꠅꠁꠟꠦ ꠇꠥꠞꠛꠣꠘꠤꠞ ꠌꠤꠎꠞ ꠘꠣꠝꠦ ꠇꠍꠝ ꠇꠞꠟꠦ ꠝꠣꠘꠔꠦ ꠅꠁꠛ।
MAT 23:19 ꠅ ꠀꠘ꠆ꠖꠣ ꠅꠇꠟ, ꠇꠥꠘꠈꠣꠘ ꠛꠠ? ꠇꠥꠞꠛꠣꠘꠤ ꠈꠣꠘꠣ, ꠘꠣ ꠇꠥꠞꠛꠣꠘꠤꠞ ꠌꠤꠎ? ꠅꠃ ꠇꠥꠞꠛꠣꠘꠤ ꠈꠣꠘꠣꠄꠃ ꠅꠃ ꠌꠤꠎꠞꠦ ꠙꠣꠇ-ꠙꠛꠤꠔ꠆ꠞ ꠇꠞꠦ ꠘꠣ ꠘꠤ?
MAT 23:20 ꠄꠞꠟꠣꠉꠤ ꠎꠦ ꠎꠘꠦ ꠇꠥꠞꠛꠣꠘꠤ ꠈꠣꠘꠣꠞ ꠘꠣꠝꠦ ꠇꠍꠝ ꠇꠞꠦ, ꠢꠦ ꠇꠥꠞꠛꠣꠘꠤ ꠈꠣꠘꠣ ꠀꠞ ꠇꠥꠞꠛꠣꠘꠤꠞ ꠌꠤꠎ, ꠁ ꠖꠥꠁꠅꠔꠣꠞ ꠘꠣꠝꠦꠃ ꠇꠍꠝ ꠇꠞꠦ।
MAT 23:21 ꠅꠟꠣꠃ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠞ ꠘꠣꠝꠦ ꠎꠦ ꠎꠘꠦ ꠇꠍꠝ ꠇꠞꠦ, ꠢꠦ-ꠅ ꠛꠣꠄꠔꠥꠟ-ꠝꠥꠇꠣꠖ꠆ꠖꠍ ꠀꠞ ꠄꠞ ꠜꠤꠔꠞꠦ ꠎꠦꠁꠘ ꠕꠣꠇꠂꠘ, ꠔꠣꠘ ꠘꠣꠝꠦꠃ ꠇꠍꠝ ꠇꠞꠦ।
MAT 23:22 ꠎꠦ ꠎꠘꠦ ꠛꠦꠢꠦꠡ꠆ꠔꠞ ꠘꠣꠝꠦ ꠇꠍꠝ ꠇꠞꠦ, ꠢꠦ ꠀꠟ꠆ꠟꠣꠞ ꠀꠞꠡ ꠀꠞ ꠀꠞꠡꠅ ꠎꠦꠁꠘ ꠀꠍꠂꠘ, ꠔꠣꠘ ꠘꠣꠝꠦꠃ ꠇꠍꠝ ꠇꠞꠦ।
MAT 23:23 “ꠢꠣꠄꠞꠦ ꠜꠘ꠆ꠒ ꠝꠃꠟꠣꠘꠣ ꠀꠞ ꠚꠞꠤꠡꠤꠞ ꠖꠟ! ꠔꠥꠝꠞꠣ ꠉꠥꠀꠝꠥꠞꠤ, ꠙꠖꠤꠘꠣ ꠙꠣꠔꠣ, ꠀꠞ ꠎꠤꠞꠣꠞ ꠖꠡ ꠛꠣꠐꠞ ꠄꠇ ꠛꠣꠐ ꠀꠟ꠆ꠟꠣꠞ ꠅꠀꠡ꠆ꠔꠦ ꠎꠇꠣꠔ ꠖꠤꠞꠣꠄ, ꠅꠁꠟꠦ ꠝꠥꠍꠣ ꠘꠛꠤꠞ ꠡꠞꠤꠅꠔꠞ ꠢꠥꠇꠥꠝ ꠝꠣꠚꠤꠇ ꠀꠞꠅ ꠎꠞꠥꠞꠤ ꠛꠦꠙꠣꠞ, ꠝꠣꠘꠤ ꠢꠇ ꠁꠘꠍꠣꠚ, ꠖꠄꠀ ꠀꠞ ꠀꠟ꠆ꠟꠣꠞ ꠝꠢꠛ꠆ꠛꠔ ꠔꠥꠝꠞꠣ ꠛꠣꠖ ꠖꠤꠟꠣꠁꠍ। ꠔꠦ ꠙꠄꠟꠣ ꠢꠥꠇꠥꠝ ꠀꠝꠟ ꠇꠞꠣꠞ ꠟꠉꠦ ꠟꠉꠦ ꠛꠣꠖꠞꠔꠣꠅ ꠀꠝꠟ ꠇꠞꠣ ꠎꠞꠥꠞ।
MAT 23:24 ꠔꠥꠝꠞꠣ ꠘꠤꠎꠦꠃ ꠀꠘ꠆ꠖꠣ, ꠅꠕꠌ ꠀꠞꠇ ꠎꠘꠞꠦ ꠙꠕ ꠖꠦꠈꠣꠁꠞꠣꠄ। ꠔꠥꠝꠞꠣ ꠄꠉꠥ ꠝꠡꠣꠅ ꠍꠣꠇꠤꠀ ꠔꠥꠟꠅ, ꠅꠁꠟꠦ ꠃꠐꠞꠦ ꠉꠤꠟꠤꠟꠣꠅ।
MAT 23:25 “ꠢꠣꠄꠞꠦ ꠜꠘ꠆ꠒ ꠝꠃꠟꠣꠘꠣ ꠀꠞ ꠚꠞꠤꠡꠤꠞ ꠖꠟ! ꠔꠥꠝꠞꠣ ꠔ ꠛꠣꠡꠘ-ꠛꠞ꠆ꠔꠘꠞ ꠛꠣꠞꠉꠣꠟꠣ ꠜꠣꠟꠣ ꠇꠞꠤ ꠍꠣꠚ ꠇꠞꠅ, ꠅꠁꠟꠦ ꠁꠔꠣꠞ ꠜꠤꠔꠞ ꠉꠣꠟꠣ ꠎꠥꠟꠥꠝ ꠀꠞ ꠟꠥꠜ-ꠟꠣꠟꠌꠦ ꠜꠞꠣ।
MAT 23:26 ꠢꠣꠄꠞꠦ ꠀꠘ꠆ꠖꠣ ꠚꠞꠤꠡꠤꠞ ꠖꠟ, ꠔꠥꠝꠞꠣ ꠙꠄꠟꠣ ꠅꠔꠣꠞ ꠜꠤꠔꠞ ꠍꠣꠚ ꠇꠞꠅ, ꠔꠦꠃ ꠛꠣꠞꠉꠣꠟꠣ ꠄꠝꠘꠦꠃ ꠍꠣꠚ ꠅꠁꠛ।
MAT 23:27 “ꠢꠣꠄꠞꠦ ꠜꠘ꠆ꠒ ꠝꠃꠟꠣꠘꠣ ꠀꠞ ꠚꠞꠤꠡꠤꠞ ꠖꠟ! ꠔꠥꠝꠞꠣ ꠅꠁꠟꠣꠄ ꠌꠥꠘ-ꠇꠣꠝ ꠇꠞꠣ ꠇꠄꠛꠞꠞ ꠟꠣꠈꠣꠘ, ꠄꠞ ꠛꠣꠞꠉꠣꠟꠣ ꠌꠇꠌꠇꠣ ꠅꠁꠟꠦꠅ ꠜꠤꠔꠞꠦ ꠔ ꠈꠣꠟꠤ ꠝꠞꠣ ꠝꠣꠘꠡꠞ ꠀꠒ꠆ꠒꠤ-ꠉꠥꠒ꠆ꠒꠤ ꠀꠞ ꠈꠣꠍꠞꠣꠄ ꠜꠞꠣ।
MAT 23:28 ꠑꠤꠇ ꠅꠃ ꠟꠣꠈꠣꠘ, ꠝꠣꠘꠡꠦ ꠝꠘꠦ ꠇꠞꠂꠘ ꠔꠥꠝꠞꠣ ꠈꠥꠛ ꠙꠞꠦꠎꠉꠣꠞ, ꠀꠍꠟꠦ ꠔꠥꠝꠞꠣꠞ ꠖꠤꠟ ꠔ ꠜꠘ꠆ꠒꠣꠝꠤ ꠀꠞ ꠘꠣꠚꠞꠝꠣꠘꠤꠄ ꠜꠞꠣ।
MAT 23:29 “ꠢꠣꠄꠞꠦ ꠜꠘ꠆ꠒ ꠝꠃꠟꠣꠘꠣ ꠀꠞ ꠚꠞꠤꠡꠤꠞ ꠖꠟ! ꠔꠥꠝꠞꠣ ꠘꠛꠤ ꠅꠇꠟꠞ ꠞꠅꠎꠣꠞꠦ ꠡꠥꠘ꠆ꠖꠞ ꠇꠞꠤ ꠙꠣꠇ꠆ꠇꠣ ꠇꠞꠅ, ꠀꠞ ꠅꠟꠤ-ꠀꠃꠟꠤꠀꠞ ꠝꠣꠎꠣꠞꠞꠦ ꠌꠇꠌꠇꠣ ꠇꠞꠤ ꠢꠣꠎꠣꠅ।
MAT 23:30 ꠀꠞ ꠔꠥꠝꠞꠣ ꠇꠅ, ‘ꠁꠡ, ꠀꠝꠞꠣ ꠎꠥꠖꠤ ꠀꠝꠞꠣꠞ ꠛꠣꠚ-ꠖꠣꠖꠣꠞ ꠎꠝꠣꠘꠣꠔ ꠖꠥꠘꠤꠀꠔ ꠀꠁꠔꠣꠝ, ꠔꠦ ꠘꠛꠤ ꠅꠇꠟꠞꠦ ꠎꠣꠘꠦ ꠝꠣꠞꠣꠞ ꠇꠣꠟꠅ ꠛꠣꠚ-ꠖꠣꠖꠣꠞ ꠟꠉꠦ ꠉꠦꠟꠣꠝ ꠘꠣ ꠅꠘꠦ।’
MAT 23:31 ꠅꠃ ꠝꠣꠔꠦ ꠔꠥꠝꠞꠣ ꠙꠞꠝꠣꠘ ꠖꠤꠞꠣꠄ, ꠘꠛꠤ ꠅꠇꠟꠞꠦ ꠎꠦꠔꠣꠄ ꠎꠣꠘꠦ ꠝꠣꠞꠍꠟꠣ, ꠅꠔꠣꠞ ꠛꠋꠡꠗꠞꠃ ꠔꠥꠝꠞꠣ।
MAT 23:32 ꠔꠦ ꠔꠥꠝꠞꠣꠞ ꠛꠣꠚ-ꠖꠣꠖꠣꠁꠘ꠆ꠔꠦ ꠎꠦꠔꠣ ꠡꠥꠞꠥ ꠇꠞꠤꠀ ꠉꠦꠍꠂꠘ, ꠔꠥꠝꠞꠣ ꠅꠔꠣꠞ ꠛꠣꠇꠤ ꠉꠣꠟꠣ ꠙꠥꠞꠣ ꠇꠞꠞꠣꠄ।
MAT 23:33 “ꠅ ꠢꠣꠚꠞ ꠛꠣꠁꠌ꠆ꠌꠣꠁꠘ, ꠖꠥꠎꠈꠞ ꠀꠎꠣꠛ ꠕꠣꠇꠤ ꠔꠥꠝꠞꠣ ꠇꠤꠟꠣ ꠛꠣꠌꠔꠣꠄ?
MAT 23:34 ꠄꠞꠟꠣꠉꠤ ꠀꠝꠤ ꠔꠥꠝꠞꠣꠞ ꠉꠦꠍꠦ ꠘꠛꠤ-ꠞꠍꠥꠟ, ꠀꠞ ꠀꠟꠤꠝ-ꠃꠟꠣꠝꠣ ꠙꠣꠑꠣꠁꠀꠞ। ꠄꠞꠣꠞ ꠝꠣꠎꠞ ꠇꠄꠎꠘꠞꠦ ꠔꠥꠝꠞꠣ ꠎꠣꠘꠦ ꠝꠣꠞꠤꠟꠤꠛꠣꠄ, ꠇꠄꠎꠘꠞꠦ ꠖꠥꠈ-ꠇꠡ꠆ꠐꠞ ꠍꠟꠤꠛꠅ ꠟꠐꠇꠣꠁꠀ ꠝꠣꠞꠛꠣꠄ। ꠀꠞ ꠇꠄꠎꠘꠞꠦ ꠔꠥꠝꠞꠣꠞ ꠝꠍꠤꠖꠅ ꠢꠣꠞꠣꠁꠀ ꠌꠣꠛꠥꠇ ꠝꠣꠞꠤꠀ, ꠄꠇ ꠉꠣꠃ ꠕꠣꠇꠤ ꠀꠞꠇ ꠉꠣꠃꠔ ꠈꠦꠖꠣꠁꠀ ꠘꠤꠛꠣꠄ।
MAT 23:35 ꠄꠞꠖꠣꠄꠃ ꠘꠤꠞ꠆ꠖꠥꠡꠤ ꠢꠃ ꠢꠣꠛꠤꠟꠞ ꠈꠥꠘ ꠕꠣꠇꠤ ꠡꠥꠞꠥ ꠇꠞꠤꠀ ꠛꠣꠞꠣꠈꠤꠀꠞ ꠙꠥꠔ ꠎꠣꠇꠣꠞꠤꠀꠞ ꠈꠥꠘ ꠙꠞ꠆ꠎꠘ꠆ꠔ, ꠖꠥꠘꠤꠀꠔ ꠎꠔ ꠈꠥꠘ ꠅꠁꠍꠦ, ꠁꠔꠣ ꠢꠇꠟ ꠈꠥꠘꠞ ꠖꠣꠄꠁ ꠅꠁꠛꠣꠄ ꠔꠥꠝꠞꠣ। ꠅꠃ ꠎꠣꠇꠣꠞꠤꠀꠞꠦ ꠔ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠞ ꠜꠤꠔꠞꠞ ꠇꠥꠞꠛꠣꠘꠤ ꠈꠣꠘꠣ ꠀꠞ ꠢꠦꠞꠦꠝ ꠡꠞꠤꠚ ꠅꠃ ꠖꠥꠁ ꠎꠣꠉꠣꠞ ꠝꠣꠎꠈꠣꠘꠅ ꠈꠥꠘ ꠇꠞꠣ ꠅꠁꠍꠤꠟ।
MAT 23:36 ꠀꠝꠤ ꠔꠥꠝꠞꠣꠞꠦ ꠢꠣꠍꠣ ꠇꠕꠣ ꠇꠁꠞꠣꠝ, ꠅꠃ ꠔꠣꠝꠣꠝ ꠈꠥꠘꠞ ꠖꠣꠄꠁ ꠅꠁꠛꠣꠄ ꠁ ꠎꠝꠣꠘꠣꠞ ꠝꠣꠘꠥꠡ।
MAT 23:37 “ꠎꠦꠞꠥꠎꠣꠟꠦꠝ! ꠢꠣꠄꠞꠦ ꠎꠦꠞꠥꠎꠣꠟꠦꠝ ꠐꠣꠃꠘ! ꠔꠥꠝꠤ ꠘꠛꠤ ꠅꠇꠟꠞꠦ ꠎꠣꠘꠦ ꠝꠣꠞꠅ, ꠔꠥꠝꠣꠞ ꠉꠦꠍꠦ ꠎꠣꠞꠣꠞꠦ ꠙꠣꠑꠣꠁꠟ ꠅꠄ, ꠔꠥꠝꠤ ꠔꠣꠞꠣꠞꠦ ꠙꠣꠔ꠆ꠔꠞ ꠝꠣꠞꠅ। ꠝꠥꠞꠉꠤꠄ ꠎꠦꠟꠣ ꠔꠣꠁꠞ ꠛꠣꠁꠌ꠆ꠌꠣꠞꠦ ꠒꠣꠈꠘꠣꠞ ꠔꠟꠦ ꠀꠡꠞꠄ ꠖꠦꠄ, ꠀꠝꠤꠅ ꠅꠃꠟꠣ ꠔꠥꠝꠣꠞ ꠝꠣꠘꠡꠞꠦ ꠀꠡꠞꠄ ꠖꠤꠔꠣꠝ ꠌꠣꠁꠍꠤ, ꠅꠁꠟꠦ ꠔꠣꠞꠣ ꠢꠥꠘꠟꠣ ꠘꠣ।
MAT 23:38 ꠅ ꠎꠦꠞꠥꠎꠣꠟꠦꠝꠞ ꠛꠣꠡꠤꠘ꠆ꠖꠣ ꠅꠇꠟ, ꠔꠥꠝꠞꠣꠞ ꠌꠈꠥꠞ ꠍꠣꠝꠘꠦꠃ ꠔꠥꠝꠞꠣꠞ ꠛꠡꠔ ꠈꠣꠘꠣ ꠈꠣꠟꠤ ꠛꠣꠠꠤ ꠅꠁꠛ।
MAT 23:39 ꠀꠝꠤ ꠔꠥꠝꠞꠣꠞꠦ ꠇꠁꠞꠣꠝ, ꠎꠔꠖꠤꠘ ꠔꠥꠝꠞꠣ ꠁꠈꠣꠘ ꠘꠣ ꠇꠁꠛꠣꠄ, ‘ꠝꠥꠛꠣꠞꠇ ꠔꠣꠁꠘꠃ, ꠀꠟ꠆ꠟꠣꠞ ꠘꠣꠝ ꠟꠁꠀ ꠎꠦꠁꠘ ꠀꠁꠞꠣ,’ ꠅꠔ ꠖꠤꠘ ꠔꠥꠝꠞꠣ ꠀꠞ ꠀꠝꠣꠞꠦ ꠖꠦꠈꠔꠣꠄ ꠘꠣꠄ।”
MAT 24:1 ꠢꠎꠞꠔ ꠁꠍꠣ ꠛꠣꠄꠔꠥꠟ-ꠝꠥꠇꠣꠖ꠆ꠖꠍ ꠕꠣꠇꠤ ꠛꠣꠞ ꠅꠁꠀ ꠎꠣꠁꠞꠣꠉꠤ, ꠅꠃ ꠡꠝꠄ ꠔꠣꠘ ꠍꠣꠢꠣꠛꠤ ꠅꠇꠟ ꠔꠣꠘ ꠉꠦꠍꠦ ꠀꠁꠟꠣ, ꠔꠣꠘꠞꠦ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠞ ꠡꠥꠘ꠆ꠖꠞ ꠡꠥꠘ꠆ꠖꠞ ꠖꠟꠣꠘ ꠖꠦꠈꠣꠘꠤꠞ ꠟꠣꠉꠤ।
MAT 24:2 ꠔꠣꠁꠘ ꠇꠁꠟꠣ, “ꠀꠝꠤ ꠔꠥꠝꠞꠣꠞꠦ ꠢꠇ ꠇꠕꠣ ꠇꠁꠞꠣꠝ, ꠔꠥꠝꠞꠣ ꠅꠃ ꠎꠦꠔꠣ ꠛꠠ ꠛꠠ ꠖꠟꠣꠘ ꠖꠦꠈꠞꠣꠄ, ꠁꠔꠣꠞ ꠖꠥꠁ ꠁꠐ ꠄꠇꠈꠣꠘꠅ ꠞꠁꠔ ꠘꠣꠄ, ꠢꠇꠟꠔꠣ ꠝꠣꠐꠤꠔ ꠝꠤꠡꠤꠎꠤꠛ।”
MAT 24:3 ꠛꠣꠖꠦ ꠔꠣꠁꠘ ꠎꠦꠛꠟꠣ ꠎꠄꠔꠥꠘ ꠙꠣꠠꠞ ꠃꠙꠞꠦ ꠛꠅꠀꠔ ꠀꠍꠟꠣ, ꠅꠃ ꠡꠝꠄ ꠍꠣꠢꠣꠛꠤ ꠅꠇꠟꠦ ꠀꠁꠀ ꠔꠣꠘꠞꠦ ꠘꠤꠞꠣꠟꠣꠄ ꠎꠤꠇꠣꠁꠟꠣ, “ꠢꠥꠎꠥꠞ, ꠀꠝꠞꠣꠞꠦ ꠇꠁꠛꠣ ꠘꠤ, ꠁꠔꠣ ꠇꠥꠘ ꠡꠝꠄ ꠅꠁꠛ? ꠇꠥꠘ ꠀꠟꠣꠝꠔ ꠖꠦꠈꠤꠀ ꠀꠝꠞꠣ ꠛꠥꠎꠝꠥ, ꠀꠙꠘꠣꠞ ꠀꠅꠀꠞ ꠡꠝꠄ ꠀꠞ ꠇꠤꠀꠝꠔꠞꠅ ꠡꠝꠄ ꠀꠁꠌ꠆ꠍꠦ?”
MAT 24:4 ꠁꠍꠣꠄ ꠇꠁꠟꠣ, “ꠖꠦꠈꠤꠅ, ꠇꠦꠃ ꠎꠣꠘꠥ ꠔꠥꠝꠞꠣꠞꠦ ꠘꠣ ꠐꠉꠦ।
MAT 24:5 ꠛꠃꠔ ꠎꠘꠦ ꠀꠝꠣꠞ ꠘꠣꠝ ꠗꠞꠤꠀ ꠀꠁꠛ, ꠀꠁꠀ ꠇꠁꠛ, ꠀꠝꠤꠃ ꠀꠟ-ꠝꠍꠤ, ꠇꠁꠀ ꠛꠃꠔꠞꠦ ꠐꠉꠤꠛ।
MAT 24:6 ꠢꠥꠘꠅ, ꠎꠥꠖ꠆ꠖꠞ ꠀꠅꠀꠎ ꠀꠞ ꠟꠣꠠꠣꠁꠞ ꠈꠛꠞ ꠔꠥꠝꠞꠣ ꠙꠣꠁꠛꠣꠄ, ꠅꠁꠟꠦ ꠁꠔꠣꠄ ꠒꠞꠣꠁꠅ ꠘꠣ। ꠁꠔꠣ ꠘꠤꠌꠄ ꠊꠐꠛ, ꠊꠐꠟꠦꠅ ꠁꠔꠣ ꠔ ꠡꠦꠡ ꠘꠣꠄ।
MAT 24:7 ꠄꠇ ꠎꠣꠔꠤꠄ ꠀꠞꠇ ꠎꠣꠔꠤꠞ ꠟꠉꠦ, ꠄꠇ ꠖꠦꠡꠦ ꠀꠞꠇ ꠖꠦꠡꠞ ꠟꠉꠦ ꠟꠣꠠꠣꠁ ꠇꠞꠛ। ꠛꠃꠔ ꠎꠣꠉꠣꠔ ꠜꠂꠍꠣꠟ ꠀꠞ ꠘꠤꠖꠣꠘ ꠖꠦꠈꠣ ꠖꠤꠛ।
MAT 24:8 ꠅꠁꠟꠦ ꠁꠔꠣ ꠔ ꠈꠣꠟꠤ ꠝꠍꠤꠛꠔꠞ ꠡꠥꠞꠥ।
MAT 24:9 “ꠅꠃ ꠡꠝꠄ ꠀꠁꠟꠦ ꠝꠣꠘꠡꠦ ꠔꠥꠝꠞꠣꠞꠦ ꠎꠥꠟꠥꠝ ꠇꠞꠣꠞ ꠟꠣꠉꠤ ꠗꠞꠣꠁ ꠖꠤꠛ ꠀꠞ ꠈꠥꠘ ꠇꠞꠣꠁꠛ। ꠀꠝꠣꠞ ꠟꠣꠉꠤ ꠢꠇꠟ ꠎꠣꠔꠤꠄ ꠔꠥꠝꠞꠣꠞꠦ ꠊꠤꠘ꠆ꠘꠣꠁꠛ।
MAT 24:10 ꠔꠦꠃ ꠛꠃꠔ ꠎꠘ ꠙꠤꠍꠟꠤꠎꠤꠛ, ꠄꠇꠦ-ꠅꠁꠘ꠆ꠘꠞꠦ ꠊꠤꠘ꠆ꠘꠣꠁꠛ ꠀꠞ ꠗꠞꠣꠁ ꠖꠤꠛ।
MAT 24:11 ꠛꠃꠔ ꠜꠘ꠆ꠒ ꠘꠛꠤ ꠀꠁꠀ ꠝꠣꠘꠡꠞꠦ ꠐꠉꠤꠛꠣ।
MAT 24:12 ꠘꠣꠚꠞꠝꠣꠘꠤꠞ ꠙꠞꠤꠝꠣꠘ ꠛꠣꠠꠤꠎꠤꠛ, ꠄꠞꠟꠣꠉꠤ ꠛꠃꠔ ꠝꠣꠘꠡꠞ ꠝꠣꠄꠀ-ꠝꠝꠔꠣ ꠇꠝꠤꠎꠤꠛ।
MAT 24:13 ꠅꠁꠟꠦ ꠢꠦꠡ ꠙꠞ꠆ꠎꠘ꠆ꠔ ꠎꠦꠞꠣ ꠐꠤꠇꠤꠀ ꠞꠁꠛꠣ, ꠄꠞꠣꠃ ꠞꠦꠢꠣꠁ ꠙꠣꠁꠛꠣ।
MAT 24:14 ꠢꠇꠟ ꠎꠣꠔꠤꠞ ꠉꠦꠍꠦ ꠡꠣꠇ꠆ꠇꠤ ꠢꠤꠡꠣꠛꠦ ꠛꠦꠢꠦꠡ꠆ꠔꠤ ꠛꠣꠖꠡꠣꠁꠞ ꠈꠥꠡ-ꠈꠛꠞꠤ ꠔꠛꠟꠤꠉ ꠇꠞꠣ ꠅꠁꠛ, ꠄꠞꠛꠣꠖꠦꠃ ꠇꠤꠀꠝꠔ ꠀꠁꠛ।
MAT 24:15 “ꠢꠎꠞꠔ ꠖꠣꠘꠤꠀꠟ ꠘꠛꠤꠞ ꠝꠥꠈ ꠕꠣꠇꠤ ꠎꠦ ꠛꠦꠎꠥꠁꠔꠣ ꠘꠚꠞꠔꠤ ꠎꠤꠘꠤꠡꠞ ꠇꠕꠣ ꠎꠣꠘꠣꠁꠟ ꠅꠁꠍꠦ, ꠔꠥꠝꠞꠣ ꠅꠃ ꠙꠣꠇ ꠎꠣꠉꠣꠔ ꠁ ꠎꠤꠘꠤꠡ ꠖꠦꠈꠛꠣꠄ। ꠎꠦ ꠎꠘꠦ ꠔꠤꠟꠣꠅꠔ ꠇꠞꠦꠞ, ꠢꠦ ꠛꠥꠎꠃꠇ।
MAT 24:16 ꠅꠃ ꠡꠝꠄ ꠎꠦꠞꠣ ꠄꠢꠥꠖꠤꠀ ꠎꠤꠟꠣꠔ ꠕꠣꠇꠛꠣ, ꠔꠣꠞꠣ ꠙꠣꠠꠦꠖꠤ ꠉꠤꠀ ꠜꠣꠉꠃꠇ।
MAT 24:17 ꠢꠤꠖꠤꠘ ꠇꠦꠃ ꠎꠥꠖꠤ ꠊꠞꠞ ꠌꠣꠟꠞ ꠃꠙꠞꠦ ꠕꠣꠇꠦ, ꠢꠦ ꠔꠣꠞ ꠊꠞꠞ ꠝꠣꠟ-ꠍꠣꠝꠣꠘꠣ ꠘꠤꠛꠣꠞ ꠟꠣꠉꠤ, ꠟꠣꠝꠣꠔ ꠟꠣꠝꠤꠀ ꠊꠞꠞ ꠜꠤꠔꠞꠦ ꠘꠣ ꠢꠣꠝꠣꠃꠇ।
MAT 24:18 ꠎꠦꠞꠣ ꠛꠘ꠆ꠖꠞ ꠝꠣꠎꠦ ꠀꠍꠦ, ꠔꠣꠞꠣꠞ ꠉꠔꠞꠞ ꠌꠣꠖ꠆ꠖꠞ ꠘꠤꠛꠣꠞ ꠟꠣꠉꠤ ꠛꠣꠠꠤꠔ ꠘꠣ ꠀꠃꠇ।
MAT 24:19 ꠅꠃ ꠡꠝꠄ ꠎꠦꠔꠣ ꠛꠦꠐꠤꠘ꠆ꠔꠞ ꠙꠦꠐꠅ ꠢꠥꠞꠥꠔ꠆ꠔꠣ, ꠀꠞ ꠎꠦꠞꠣ ꠢꠥꠞꠥꠔ꠆ꠔꠣꠞꠦ ꠛꠥꠇꠥꠞ ꠖꠥꠗ ꠈꠣꠅꠀꠁꠞꠣ, ꠔꠣꠞꠣꠞ ꠛꠠ ꠝꠍꠤꠛꠔ ꠅꠁꠛ।
MAT 24:20 ꠔꠥꠝꠞꠣ ꠖꠥꠀ ꠇꠞꠅ, ꠡꠤꠔꠞ ꠖꠤꠘꠅ ꠛꠣ ꠎꠥꠝ꠆ꠝꠣꠛꠣꠞꠦ ꠎꠣꠘꠥ ꠔꠥꠝꠞꠣꠞ ꠜꠣꠉꠤꠀ ꠎꠣꠅꠀ ꠘꠣ ꠟꠣꠉꠦ।
MAT 24:21 ꠅꠃ ꠡꠝꠄ ꠅꠔ ꠛꠦꠎꠥꠁꠔꠣ ꠇꠡ꠆ꠐ ꠅꠁꠛ, ꠎꠦꠔꠣ ꠖꠥꠘꠤꠀꠞ ꠙꠄꠟꠣ ꠕꠣꠇꠤ ꠀꠁꠎ ꠙꠞ꠆ꠎꠘ꠆ꠔ ꠇꠥꠘꠥꠖꠤꠘ ꠅꠁꠍꠦ ꠘꠣ, ꠀꠞ ꠅꠁꠔ-ꠅ ꠘꠣꠄ।
MAT 24:22 ꠝꠣꠛꠥꠖꠦ ꠎꠥꠖꠤ ꠁ ꠡꠝꠄꠞꠦ ꠇꠝꠣꠁꠀ ꠘꠣ ꠖꠤꠔꠣ, ꠔꠦ ꠇꠦꠃ ꠎꠤꠘ꠆ꠖꠣ ꠞꠁꠟ ꠘꠣ ꠅꠘꠦ। ꠅꠁꠟꠦ ꠀꠟ꠆ꠟꠣꠄ ꠔꠣꠘ ꠙꠍꠘ꠆ꠖ ꠇꠞꠣ ꠛꠘ꠆ꠖꠣ ꠅꠇꠟꠞ ꠟꠣꠉꠤ ꠁ ꠡꠝꠄ ꠇꠝꠣꠁꠀ ꠖꠤꠛꠣ।
MAT 24:23 “ꠢꠤ ꠡꠝꠄ ꠇꠦꠃ ꠎꠥꠖꠤ ꠔꠥꠝꠞꠣꠞꠦ ꠇꠄ, ‘ꠢꠥꠘꠍ ꠘꠤ, ꠀꠟ-ꠝꠍꠤ ꠛꠥꠟꠦ ꠅꠘꠅ ꠀꠁꠍꠂꠘ’ ꠛꠣ ‘ꠢꠘꠅ ꠀꠁꠍꠂꠘ’ ꠔꠦ ꠔꠥꠝꠞꠣ ꠄꠇꠤꠘ ꠇꠞꠤꠅ ꠘꠣ।
MAT 24:24 ꠇꠣꠞꠘ ꠀꠟ-ꠝꠍꠤ ꠘꠣꠝ ꠟꠁꠀ ꠛꠃꠔ ꠜꠘ꠆ꠒ ꠀꠁꠛꠣ, ꠘꠛꠤ ꠢꠣꠎꠤꠀꠅ ꠛꠃꠔ ꠜꠘ꠆ꠒ ꠀꠁꠛꠣ। ꠁꠔꠣꠄ ꠛꠃꠔ ꠛꠠ ꠛꠠ ꠀꠌꠣꠘꠇ ꠇꠦꠞꠣꠝꠔꠤ ꠇꠣꠝ ꠖꠦꠈꠣꠁꠛꠣ। ꠔꠣꠞꠣ ꠌꠣꠁꠛꠣ, ꠡꠥꠎꠥꠉ ꠙꠣꠁꠟꠦ ꠀꠟ꠆ꠟꠣꠞ ꠙꠍꠘ꠆ꠖ ꠇꠞꠣ ꠛꠘ꠆ꠖꠣꠞꠦ ꠗꠥꠇꠣ ꠖꠤꠀ ꠛꠦ-ꠙꠕꠦ ꠘꠤꠔꠣꠉꠤ।
MAT 24:25 ꠖꠦꠈꠤꠅ, ꠀꠝꠤ ꠁꠔꠣ ꠢꠇ꠆ꠇꠟꠔꠣ ꠔꠥꠝꠞꠣꠞꠦ ꠀꠉꠦꠃ ꠎꠣꠘꠣꠁ ꠖꠤꠟꠣꠝ।
MAT 24:26 “ꠢꠥꠘꠅ, ꠇꠦꠃ ꠎꠥꠖꠤ ꠔꠥꠝꠞꠣꠞꠦ ꠇꠄ, ‘ꠀꠟ-ꠝꠍꠤ ꠛꠥꠟꠦ ꠝꠞꠥꠜꠥꠝꠤꠔ ꠀꠍꠂꠘ,’ ꠔꠦ ꠔꠥꠝꠞꠣ ꠎꠣꠁꠅ ꠘꠣ। ꠎꠥꠖꠤ ꠇꠄ, ‘ꠔꠣꠁꠘ ꠊꠞꠞ ꠜꠤꠔꠞꠦ ꠀꠍꠂꠘ,’ ꠔꠦ ꠄꠇꠤꠘ ꠇꠞꠤꠅ ꠘꠣ।
MAT 24:27 ꠝꠦꠊꠞ ꠎꠤꠟꠇꠤꠞ ꠟꠉꠦ ꠙꠥꠛꠦ-ꠙꠁꠌꠝꠦ ꠢꠇꠟꠛꠣꠄ ꠎꠦꠟꠣ ꠚꠞ ꠅꠁꠎꠣꠄ, ꠀꠝꠤ ꠛꠤꠘ-ꠀꠖꠝ ꠀꠁꠟꠦꠅ ꠅꠟꠣ ꠅꠁꠛ।
MAT 24:28 ꠢꠥꠘꠅ, ꠟꠣꠡ ꠎꠦꠘꠅ ꠕꠣꠇꠦ, ꠢꠇꠥꠘ ꠄꠝꠘꠦꠃ ꠢꠘꠅ ꠖꠟꠣ ꠅꠄ।
MAT 24:29 “ꠅꠃ ꠝꠍꠤꠛꠔꠞ ꠡꠝꠄ ꠡꠦꠡ ꠅꠀꠞ ꠛꠣꠖꠦꠃ, ‘ꠡꠥꠞꠥꠎ ꠀꠘ꠆ꠖꠣꠁꠞ ꠅꠁꠎꠤꠛ, ꠌꠣꠘ꠆ꠖꠦ ꠀꠞ ꠚꠞ ꠖꠤꠔ ꠘꠣꠄ। ꠔꠦꠞꠣ ꠅꠇꠟ ꠀꠍꠝꠣꠘ ꠕꠣꠇꠤ ꠙꠠꠤꠎꠤꠛ, ꠀꠍꠝꠣꠘꠞ ꠇꠥꠘꠥ ꠡꠇ꠆ꠔꠤꠀꠟꠣ ꠌꠤꠎꠃ ꠑꠤꠇ-ꠑꠣꠇ ꠞꠁꠔ ꠘꠣꠄ।’
MAT 24:30 ꠅꠃ ꠡꠝꠄ ꠀꠍꠝꠣꠘꠞ ꠝꠣꠎꠦ ꠀꠝꠤ ꠛꠤꠘ-ꠀꠖꠝꠞ ꠘꠤꠡꠣꠘꠣ ꠖꠦꠈꠣ ꠎꠣꠁꠛ। ꠖꠥꠘꠤꠀꠞ ꠢꠇꠟ ꠝꠣꠘꠡꠦ ꠀꠢꠣꠎꠣꠞꠤ ꠇꠞꠛꠣ। ꠔꠣꠞꠣ ꠖꠦꠈꠛꠣ, ꠀꠟ꠆ꠟꠣꠞ ꠇꠥꠖꠞꠔꠤ ꠡꠇ꠆ꠔꠤ ꠀꠞ ꠘꠥꠞꠞ ꠝꠢꠤꠝꠣꠄ, ‘ꠝꠦꠊꠞ ꠈꠥꠐꠤꠔ ꠅꠁꠀ ꠛꠤꠘ-ꠀꠖꠝ ꠖꠥꠘꠤꠀꠔ ꠀꠁꠞꠣ।’
MAT 24:31 ꠅꠃ ꠡꠝꠄ ꠎꠥꠞꠦ ꠎꠥꠞꠦ ꠡꠤꠋꠉꠣꠞ ꠀꠅꠀꠎ ꠅꠁꠛ, ꠄꠞ ꠟꠉꠦ ꠟꠉꠦꠃ ꠖꠥꠘꠤꠀꠞ ꠄꠇ ꠝꠣꠕꠣ ꠕꠣꠇꠤ ꠀꠞꠇ ꠝꠣꠕꠣꠔ ꠔꠣꠁꠘ ꠚꠤꠞꠤꠡ꠆ꠔꠣ ꠅꠇꠟꠞꠦ ꠙꠣꠑꠣꠁꠛꠣ, ꠄꠞꠣ ꠀꠟ꠆ꠟꠣꠞ ꠙꠍꠘ꠆ꠖ ꠇꠞꠣ ꠛꠘ꠆ꠖꠣ ꠅꠇꠟꠞꠦ ꠌꠣꠁꠞꠅꠛꠣꠄ ꠕꠘꠦ ꠖꠟꠣ ꠇꠞꠛꠣ।
MAT 24:32 “ꠅꠃ ꠒꠥꠝꠥꠞ ꠉꠣꠍꠞ ꠛꠣꠄ ꠌꠣꠁꠀ ꠔꠣꠟꠤꠝ ꠟꠅ। ꠉꠣꠍꠞ ꠒꠣꠟ-ꠙꠣꠟꠣ ꠘꠞꠝ ꠅꠁꠀ ꠎꠦꠛꠟꠣ ꠘꠄꠀ ꠇꠥꠠꠤ ꠛꠣꠞꠅꠄ, ꠅꠃ ꠡꠝꠄ ꠔꠥꠝꠞꠣ ꠛꠥꠎꠤꠟꠣꠅ ꠉꠞꠝꠞ ꠖꠤꠘ ꠀꠁꠌ꠆ꠍꠦ।
MAT 24:33 ꠔꠦ ꠅꠃ ꠟꠣꠈꠣꠘ ꠔꠥꠝꠞꠣ ꠎꠦꠛꠟꠣ ꠖꠦꠈꠛꠣꠄ ꠁꠔꠣ ꠢꠇꠟꠔꠣ ꠊꠐꠦꠞ, ꠖꠦꠈꠤꠀ ꠛꠥꠎꠤꠟꠤꠅ, ꠛꠤꠘ-ꠀꠖꠝꠅ ꠗꠣꠞꠅ ꠀꠁꠌ꠆ꠍꠂꠘ। ꠈꠣꠟꠤ ꠗꠣꠞꠅ ꠘꠣꠄ, ꠔꠣꠁꠘ ꠀꠁꠀ ꠖꠥꠀꠞꠅ ꠑꠥꠇꠣꠁꠞꠣ।
MAT 24:34 ꠀꠝꠤ ꠔꠥꠝꠞꠣꠞꠦ ꠢꠣꠍꠣ ꠇꠕꠣ ꠇꠁꠞꠣꠝ, ꠁꠔꠣ ꠘꠣ ꠊꠐꠣ ꠙꠞ꠆ꠎꠘ꠆ꠔ ꠁ ꠎꠝꠣꠘꠣꠞ ꠝꠣꠘꠥꠡ ꠚꠥꠠꠣꠁꠔꠣ ꠘꠣꠄ।
MAT 24:35 ꠀꠍꠝꠣꠘ-ꠎꠝꠤꠘ ꠢꠇꠟꠔꠣ ꠛꠤꠘꠣꠡ ꠅꠁꠎꠤꠛ, ꠅꠁꠟꠦ ꠀꠝꠣꠞ ꠇꠣꠟꠣꠝ ꠢꠣꠝꠦꠡꠣ ꠎꠣꠞꠤ ꠞꠁꠛ।
MAT 24:36 “ꠢꠃ ꠖꠤꠘ ꠀꠞ ꠢꠤ ꠡꠝꠄꠅꠞ ꠛꠦꠙꠣꠞꠦ ꠈꠣꠟꠤ ꠀꠝꠣꠞ ꠉꠣꠁꠛꠤ ꠛꠣꠚ ꠀꠟ꠆ꠟꠣ ꠍꠣꠠꠣ ꠀꠞ ꠇꠦꠃ ꠎꠣꠘꠂꠘ ꠘꠣ। ꠀꠍꠝꠣꠘꠤ ꠚꠤꠞꠤꠡ꠆ꠔꠣ ꠛꠣ ꠁꠛꠘꠥꠟ꠆ꠟꠣꠄꠅ ꠎꠣꠘꠂꠘ ꠘꠣ।
MAT 24:37 ꠘꠥꠢ ꠘꠛꠤꠞ ꠀꠝꠟꠅ ꠎꠦ ꠢꠣꠟꠔ ꠅꠁꠍꠤꠟ, ꠀꠝꠤ ꠛꠤꠘ-ꠀꠖꠝ ꠖꠥꠍꠞꠣꠛꠣꠞ ꠀꠅꠀꠞ ꠡꠝꠄ ꠑꠤꠇ ꠅꠟꠣꠈꠣꠘꠃ ꠅꠁꠛ।
MAT 24:38 ꠛꠁꠘ꠆ꠘꠣ ꠡꠥꠞꠥ ꠅꠀꠞ ꠀꠉꠦ ꠘꠥꠢ ꠘꠛꠤ ꠎꠣꠎꠅ ꠃꠑꠣꠞ ꠀꠉ ꠙꠞ꠆ꠎꠘ꠆ꠔ ꠝꠣꠘꠡꠦ ꠈꠣꠅꠀ-ꠖꠣꠅꠀ ꠇꠞꠍꠦ, ꠄꠇꠦ-ꠅꠁꠘ꠆ꠘꠞꠦ ꠛꠤꠀ-ꠡꠣꠖꠤ ꠇꠞꠍꠦ।
MAT 24:39 ꠘꠥꠢ ꠘꠛꠤꠞ ꠛꠁꠘ꠆ꠘꠣꠞ ꠙꠣꠘꠤꠄ ꠁꠔꠣꠞꠦ ꠜꠣꠡꠣꠁꠀ ꠘꠦꠅꠀꠞ ꠀꠉ ꠙꠞ꠆ꠎꠘ꠆ꠔ ꠔꠣꠞꠣ ꠇꠥꠘ꠆ꠔꠣꠃ ꠐꠦꠞ ꠙꠣꠁꠟꠣ ꠘꠣ। ꠀꠝꠤ ꠛꠤꠘ-ꠀꠖꠝ ꠀꠁꠛꠣꠞ ꠡꠝꠄꠅ ꠑꠤꠇ ꠅꠟꠣꠈꠣꠘ ꠅꠁꠛ।
MAT 24:40 ꠅꠃ ꠡꠝꠄ ꠖꠥꠁꠎꠘ ꠝꠣꠘꠥꠡ ꠄꠇꠟꠉꠦ ꠛꠘ꠆ꠖꠅ ꠕꠣꠇꠟꠦ, ꠄꠇꠎꠘꠞꠦ ꠘꠦꠅꠀ ꠅꠁꠛ ꠀꠞ ꠖꠥꠍꠞꠣ ꠎꠘꠞꠦ ꠛꠣꠖ ꠖꠦꠅꠀ ꠅꠁꠛ।
MAT 24:41 ꠖꠥꠁ ꠛꠦꠐꠤꠄ ꠄꠇꠟꠉꠦ ꠛꠣꠞꠣ-ꠜꠣꠘꠣꠔ ꠕꠣꠇꠟꠦꠅ, ꠄꠞꠣꠞ ꠄꠇꠎꠘꠞꠦ ꠘꠦꠅꠀ ꠅꠁꠛ, ꠀꠞꠇ ꠎꠘ ꠛꠣꠖ ꠙꠠꠤꠎꠤꠛ।
MAT 24:42 ꠄꠞꠟꠣꠉꠤ ꠇꠁꠞꠣꠝ, ꠔꠥꠝꠞꠣ ꠢꠥꠡꠤꠀꠞ ꠞꠁꠅ, ꠔꠥꠝꠞꠣꠞ ꠝꠣꠟꠤꠇ ꠇꠥꠘꠖꠤꠘ ꠀꠁꠛꠣ, ꠁꠔꠣ ꠔ ꠔꠥꠝꠞꠣ ꠎꠣꠘ ꠘꠣ।
MAT 24:43 ꠅꠁꠟꠦ ꠁꠈꠣꠘ ꠝꠘꠅ ꠞꠣꠈꠤꠅ, ꠌꠥꠞ ꠇꠥꠘ ꠡꠝꠄ ꠀꠁꠛ, ꠁꠈꠣꠘ ꠎꠥꠖꠤ ꠉꠤꠞꠡ꠆ꠔꠦ ꠎꠣꠘꠔ, ꠔꠦ ꠔ ꠢꠦ ꠢꠎꠣꠉ ꠞꠁꠟ ꠅꠘꠦ ꠀꠞ ꠌꠥꠞꠞꠦ ꠊꠞꠅ ꠢꠣꠝꠣꠁꠔꠦ ꠖꠤꠟ ꠘꠣ ꠅꠘꠦ।
MAT 24:44 ꠄꠞꠟꠣꠉꠤ ꠔꠥꠝꠞꠣꠅ ꠢꠣꠝꠦꠡꠣ ꠔꠤꠀꠞ ꠞꠁꠅ, ꠎꠦ ꠡꠝꠄꠅꠞ ꠇꠕꠣ ꠔꠥꠝꠞꠣ ꠌꠤꠘ꠆ꠔꠣꠅ ꠇꠞꠔꠣꠄ ꠘꠣꠄ, ꠢꠃ ꠡꠝꠄ ꠛꠤꠘ-ꠀꠖꠝ ꠀꠁꠛꠣ।
MAT 24:45 “ꠁꠟꠣ ꠢꠇ-ꠢꠣꠟꠣꠟꠤ ꠀꠞ ꠀꠈꠟꠖꠣꠞ ꠌꠣꠇꠞ ꠇꠦ ꠀꠍꠦ, ꠎꠣꠞ ꠀꠔꠅ ꠔꠣꠞ ꠝꠥꠘꠤꠛꠦ ꠖꠣꠄꠁꠔ꠆ꠔ ꠖꠤꠟꠣ ꠢꠦ ꠅꠇ꠆ꠔꠞ ꠇꠣꠟꠅ ꠅꠁꠘ꠆ꠘ ꠌꠣꠇꠞ ꠅꠇꠟꠞꠦ ꠈꠣꠘꠤ ꠛꠣꠐꠤꠀ ꠖꠤꠛ।
MAT 24:46 ꠇꠙꠣꠟꠤ ꠔ ꠢꠃ ꠌꠣꠇꠞ, ꠎꠣꠞꠦ ꠔꠣꠞ ꠝꠥꠘꠤꠛꠦ ꠀꠁꠀ ꠢꠇ-ꠢꠣꠟꠣꠟ ꠙꠣꠁꠛꠣ।
MAT 24:47 ꠀꠝꠤ ꠔꠥꠝꠞꠣꠞꠦ ꠢꠣꠍꠣ ꠇꠕꠣ ꠇꠁꠞꠣꠝ, ꠝꠥꠘꠤꠛꠦ ꠅꠃ ꠌꠣꠇꠞꠞ ꠀꠔꠅꠃ ꠔꠣꠘ ꠘꠤꠎꠞ ꠢꠇꠟ ꠗꠘ-ꠍꠣꠝꠣꠘꠣꠞ ꠜꠣꠞ ꠖꠤꠛꠣ।
MAT 24:48 ꠅꠁꠟꠦ ꠗꠞꠅ, ꠢꠃ ꠌꠣꠇꠞꠦ ꠝꠘꠦ ꠝꠘꠦ ꠇꠁꠟ, ꠀꠝꠣꠞ ꠝꠥꠘꠤꠛ ꠀꠁꠔꠦ ꠔ ꠛꠃꠔ ꠖꠦꠞꠤ ꠀꠍꠦ,
MAT 24:49 ꠀꠞ ꠅꠃ ꠚꠣꠇꠦ ꠢꠦ ꠢꠇ꠆ꠇꠟ ꠌꠣꠇꠞ-ꠛꠣꠇꠞꠞꠦ ꠝꠣꠁꠞ-ꠗꠁꠞ ꠇꠞꠟ, ꠀꠞ ꠝꠖꠈꠥꠞꠞ ꠟꠉꠦ ꠈꠣꠘꠣ-ꠖꠣꠘꠣ ꠇꠞꠤꠀ ꠝꠖ ꠈꠣꠁꠟ।
MAT 24:50 ꠛꠣꠖꠦ ꠎꠦ ꠖꠤꠘ ꠀꠞ ꠎꠦ ꠅꠇ꠆ꠔꠞ ꠇꠕꠣ ꠢꠦ ꠌꠤꠘ꠆ꠔꠣꠃ ꠇꠞꠔ ꠘꠣꠄ, ꠢꠃ ꠖꠤꠘ ꠀꠞ ꠢꠃ ꠅꠇ꠆ꠔꠅ ꠔꠣꠞ ꠝꠥꠘꠤꠛ ꠀꠁꠀ ꠀꠎꠤꠞ ꠅꠁꠛꠣ।
MAT 24:51 ꠔꠣꠁꠘ ꠀꠁꠀ ꠔꠣꠞꠦ ꠇꠣꠐꠤꠀ ꠐꠥꠇꠞꠣꠁꠀ ꠜꠘ꠆ꠒ ꠅꠇꠟꠞ ꠟꠉꠦ ꠝꠤꠡꠣꠁꠛꠣ। ꠢꠤꠘꠅ ꠝꠣꠘꠡꠦ ꠇꠣꠘ꠆ꠖꠣ-ꠇꠣꠐꠤ ꠇꠞꠛꠣ, ꠀꠞ ꠎꠣꠟꠣ-ꠎꠘꠔ꠆ꠞꠘꠣꠄ ꠖꠣꠔ ꠇꠤꠠꠤꠝꠤꠠꠤ ꠖꠤꠛꠣ।”
MAT 25:1 ꠄꠞꠛꠣꠖꠦ ꠁꠍꠣꠄ ꠇꠁꠟꠣ, “ꠛꠦꠢꠦꠡ꠆ꠔꠤ ꠛꠣꠖꠡꠣꠁ ꠅꠁꠟ ꠅꠟꠣ ꠖꠡꠉꠥ ꠙꠥꠠꠤꠞ ꠟꠣꠈꠣꠘ, ꠎꠦꠔꠣ ꠙꠥꠠꠤꠘ꠆ꠔꠦ ꠛꠤꠀꠞ ꠖꠣꠝꠣꠘ꠆ꠖꠞꠦ ꠀꠉꠥꠀꠁꠀ ꠀꠘꠣꠞ ꠟꠣꠉꠤ ꠟꠦꠝ-ꠟꠦꠝꠐꠘ ꠟꠁꠀ ꠛꠣꠞ ꠅꠁꠟ।
MAT 25:2 ꠄꠞꠣꠞ ꠝꠣꠎꠦ ꠙꠣꠌ ꠎꠘ ꠀꠍꠤꠟ ꠀꠈꠟꠖꠣꠞ ꠀꠞ ꠙꠣꠌ ꠎꠘ ꠀꠍꠤꠟ ꠛꠦꠀꠈꠟ।
MAT 25:3 ꠛꠦꠀꠈꠟ ꠙꠥꠠꠤꠘ꠆ꠔꠦ ꠈꠣꠟꠤ ꠟꠦꠝ ꠟꠁꠀ ꠛꠣꠞ ꠅꠁꠟ, ꠟꠦꠝꠞ ꠇꠥꠘꠥ ꠔꠦꠟ ꠘꠤꠟ ꠘꠣ।
MAT 25:4 ꠅꠁꠟꠦ ꠀꠈꠟꠖꠣꠞ ꠙꠥꠠꠤꠘ꠆ꠔꠦ ꠟꠦꠝꠞ ꠟꠉꠦ ꠚꠤꠚꠣꠔ ꠇꠞꠤ ꠔꠦꠟꠅ ꠘꠤꠟ।
MAT 25:5 ꠖꠣꠝꠣꠘ꠆ꠖ ꠀꠁꠔꠦ ꠖꠦꠞꠤ ꠅꠀꠄ ꠔꠣꠞꠣ ꠢꠇꠟꠃ ꠃꠋꠉꠣꠁꠔꠦ ꠃꠋꠉꠣꠁꠔꠦ ꠊꠥꠝꠣꠁ ꠉꠦꠟ।
MAT 25:6 “ꠛꠣꠖꠦ ꠀꠗꠣ-ꠞꠣꠁꠔꠇꠥꠞ ꠛꠣꠟꠣ ꠌꠤꠟ꠆ꠟꠣꠘꠤ ꠢꠥꠘꠣ ꠉꠦꠟ, ‘ꠖꠣꠝꠣꠘ꠆ꠖ ꠀꠁꠌ꠆ꠍꠂꠘ, ꠖꠣꠝꠣꠘ꠆ꠖ ꠀꠁꠌ꠆ꠍꠂꠘ, ꠎꠟꠖꠤ ꠛꠣꠞꠅ।’
MAT 25:7 ꠌꠤꠟ꠆ꠟꠣꠘꠤ ꠢꠥꠘꠤꠀ ꠅꠃ ꠙꠥꠠꠤꠘ ꠃꠑꠤꠀ ꠟꠦꠝ-ꠟꠦꠝꠐꠘ ꠑꠤꠇ ꠇꠞꠣꠔ ꠟꠣꠉꠟꠣ।
MAT 25:8 ꠢꠃ ꠛꠦꠀꠈꠟ ꠙꠥꠠꠤꠘ꠆ꠔꠦ ꠀꠈꠟꠖꠣꠞ ꠙꠥꠠꠤꠘꠞꠦ ꠇꠁꠟꠣ, ‘ꠀꠝꠞꠣꠞꠦ ꠕꠥꠠꠣ ꠔꠦꠟ ꠖꠦꠅ ꠘꠣ, ꠀꠝꠞꠣꠞ ꠟꠦꠝ ꠟꠤꠝꠤꠀꠞꠉꠤ।’
MAT 25:9 ꠔꠣꠞꠣ ꠇꠁꠟꠣ, ‘ꠀꠝꠞꠣꠞ ꠉꠦꠍꠦ ꠎꠦꠔꠣ ꠔꠦꠟ ꠀꠍꠦ, ꠁꠔꠣ ꠔ ꠀꠝꠞꠣꠞꠃ ꠟꠣꠉꠛ। ꠔꠦ ꠔꠥꠝꠞꠣ ꠖꠥꠇꠣꠘ ꠕꠣꠇꠤ ꠔꠦꠟ ꠀꠘꠣꠁꠟꠣꠅ।’
MAT 25:10 ꠅꠃ ꠛꠦꠀꠈꠟ ꠙꠥꠠꠤꠘ ꠔꠦꠟ ꠀꠘꠣꠔ ꠉꠤꠀ ꠢꠣꠞꠟꠦꠃ ꠖꠣꠝꠣꠘ꠆ꠖ ꠀꠁꠟ꠆ꠟꠣ। ꠅꠃ ꠡꠝꠄ ꠀꠈꠟꠖꠣꠞ ꠅꠃ ꠙꠥꠠꠤꠘ ꠎꠥꠁꠔ ꠀꠍꠟꠣ, ꠔꠣꠞꠣ ꠖꠣꠝꠣꠘ꠆ꠖꠞꠦ ꠟꠁꠀ ꠛꠤꠀ ꠛꠣꠠꠤꠔ ꠢꠣꠝꠣꠁꠟ। ꠔꠣꠞꠣ ꠢꠣꠝꠣꠘꠤꠞ ꠛꠣꠖꠦꠃ ꠖꠥꠀꠞ ꠛꠘ꠆ꠖ ꠇꠞꠣ ꠅꠁꠟ।
MAT 25:11 ꠛꠣꠖꠦ ꠅꠃ ꠛꠦꠀꠈꠟ ꠙꠥꠠꠤꠘ꠆ꠔꠦ ꠀꠁꠀ ꠖꠥꠀꠞ ꠛꠘ꠆ꠖ ꠖꠦꠈꠤꠀ ꠇꠁꠟꠣ, ‘ꠢꠥꠘꠞꠣ ꠘꠤ, ꠖꠥꠀꠞꠈꠣꠘ ꠈꠥꠟꠃꠇ꠆ꠇꠣ।’
MAT 25:12 ꠖꠣꠝꠣꠘ꠆ꠖꠦ ꠎꠥꠀꠙ ꠖꠤꠟꠣ, ‘ꠀꠝꠤ ꠢꠣꠍꠣꠃ ꠇꠁꠞꠣꠝ, ꠀꠝꠤ ꠔ ꠔꠥꠝꠞꠣꠞꠦ ꠌꠤꠘꠤ ꠘꠣ।’ ”
MAT 25:13 ꠅꠃ ꠇꠤꠌ꠆ꠍꠣꠞ ꠛꠣꠖꠦ ꠁꠍꠣꠄ ꠇꠁꠟꠣ, “ꠄꠞꠖꠣꠄ ꠔꠥꠝꠞꠣ ꠢꠥꠡꠤꠀꠞ ꠞꠁꠅ, ꠢꠤ ꠖꠤꠘ ꠀꠞ ꠢꠤ ꠡꠝꠄꠅꠞ ꠇꠕꠣ ꠔ ꠇꠦꠃꠞꠞ ꠎꠣꠘꠣ ꠘꠣꠁ।”
MAT 25:14 ꠔꠣꠁꠘ ꠀꠞꠅ ꠇꠁꠟꠣ, “ꠛꠦꠢꠦꠡ꠆ꠔꠤ ꠛꠣꠖꠡꠣꠁ ꠅꠟꠣ ꠄꠇꠎꠘ ꠝꠣꠘꠡꠞ ꠟꠣꠈꠣꠘ, ꠄꠁꠘ ꠛꠤꠖꠦꠡ ꠎꠣꠅꠀꠞ ꠛꠣꠟꠣ ꠔꠣꠘ ꠌꠣꠇꠞ ꠅꠇꠟꠞ ꠀꠔꠅ ꠀꠡ꠆ꠔꠣ ꠡꠝ꠆ꠙꠔ꠆ꠔꠤꠞ ꠜꠣꠞ ꠡꠝꠎꠣꠁ ꠖꠤꠟꠣ।
MAT 25:15 ꠄꠞꠣꠞ ꠎꠁꠉ꠆ꠉꠔꠣ ꠝꠣꠚꠤꠇ ꠔꠣꠁꠘ ꠄꠇꠎꠘꠞꠦ ꠙꠣꠌ ꠀꠎꠣꠞ ꠐꠦꠇꠣ, ꠖꠥꠍꠞꠣ ꠎꠘꠞꠦ ꠖꠥꠁ ꠀꠎꠣꠞ ꠀꠞ ꠀꠞꠇ ꠎꠘꠞꠦ ꠄꠇ ꠀꠎꠣꠞ ꠐꠦꠇꠣ ꠖꠤꠟꠣ।
MAT 25:16 ꠙꠣꠌ ꠀꠎꠣꠞ ꠐꠦꠇꠣ ꠎꠦ ꠙꠣꠁꠍꠤꠟ, ꠢꠦ ꠅꠃ ꠐꠦꠇꠣꠖꠤ ꠇꠣꠞꠛꠣꠞ ꠇꠞꠤꠀ ꠀꠞꠅ ꠙꠣꠌ ꠀꠎꠣꠞ ꠟꠣꠜ ꠇꠞꠟ।
MAT 25:17 ꠖꠥꠁ ꠀꠎꠣꠞ ꠐꠦꠇꠣ ꠎꠦ ꠙꠣꠁꠍꠤꠟ, ꠢꠦ-ꠅ ꠀꠞꠅ ꠖꠥꠁ ꠀꠎꠣꠞ ꠟꠣꠜ ꠇꠞꠟ।
MAT 25:18 ꠅꠁꠟꠦ ꠄꠇ ꠀꠎꠣꠞ ꠐꠦꠇꠣ ꠎꠦ ꠙꠣꠁꠍꠤꠟ, ꠢꠦ ꠔꠣꠞ ꠝꠣꠟꠤꠇꠞ ꠁ ꠐꠦꠇꠣ ꠇꠣꠝꠅ ꠘꠣ ꠟꠣꠉꠣꠁꠀ ꠉꠣꠔ ꠈꠥꠖꠤꠀ ꠝꠣꠐꠤꠞ ꠔꠟꠦ ꠕꠁꠟ।
MAT 25:19 “ꠛꠃꠔ ꠖꠤꠘ ꠛꠣꠖꠦ ꠢꠃ ꠝꠣꠟꠤꠇ ꠖꠦꠡꠅ ꠀꠁꠀ ꠔꠣꠞꠣꠞ ꠢꠤꠡꠣꠛ-ꠘꠤꠇꠣꠡ ꠌꠣꠁꠟꠣ।
MAT 25:20 ꠔꠦꠃ ꠙꠣꠌ ꠀꠎꠣꠞ ꠐꠦꠇꠣ ꠎꠦ ꠙꠣꠁꠍꠤꠟ, ꠢꠦ ꠀꠞꠅ ꠙꠣꠌ ꠀꠎꠣꠞ ꠟꠁꠀ ꠀꠁꠀ ꠝꠣꠟꠤꠇꠞꠦ ꠇꠁꠟ, ‘ꠍꠣꠛ, ꠀꠙꠘꠦ ꠀꠝꠣꠞꠦ ꠙꠣꠌ ꠀꠎꠣꠞ ꠐꠦꠇꠣ ꠖꠤꠍꠟꠣ, ꠅꠃ ꠐꠦꠇꠣꠖꠤ ꠀꠝꠤ ꠀꠞꠅ ꠙꠣꠌ ꠀꠎꠣꠞ ꠟꠣꠜ ꠇꠞꠍꠤ।’
MAT 25:21 ꠁꠈꠣꠘ ꠢꠥꠘꠤꠀ ꠝꠣꠟꠤꠇꠦ ꠇꠁꠟꠣ, ‘ꠡꠣꠛ꠆ꠛꠣꠡ, ꠔꠥꠝꠤ ꠈꠥꠛ ꠢꠇ-ꠢꠣꠟꠣꠟꠤ ꠝꠣꠘꠥꠡ। ꠔꠥꠝꠤ ꠢꠥꠞꠥ-ꠝꠥꠞꠥ ꠛꠦꠙꠣꠞꠦꠃ ꠢꠇ-ꠢꠣꠟꠣꠟ ꠞꠁꠍ, ꠄꠞꠟꠣꠉꠤ ꠀꠝꠤ ꠔꠥꠝꠣꠞꠦ ꠀꠞꠅ ꠛꠃꠔ ꠛꠠ ꠖꠣꠄꠁꠔ꠆ꠔ ꠖꠤꠝꠥ। ꠀꠅ, ꠀꠝꠣꠞ ꠈꠥꠡꠤꠞ ꠜꠣꠉꠤ ꠅꠅ।’
MAT 25:22 ꠛꠣꠖꠦ ꠖꠥꠁ ꠀꠎꠣꠞ ꠐꠦꠇꠣ ꠎꠦ ꠙꠣꠁꠍꠤꠟ, ꠢꠦ ꠀꠁꠀ ꠇꠁꠟ, ‘ꠍꠣꠛ, ꠀꠙꠘꠦ ꠀꠝꠣꠞꠦ ꠖꠥꠁ ꠀꠎꠣꠞ ꠐꠦꠇꠣ ꠖꠤꠍꠟꠣ। ꠀꠝꠤ ꠔ ꠀꠞꠅ ꠖꠥꠁ ꠀꠎꠣꠞ ꠟꠣꠜ ꠇꠞꠍꠤ।’
MAT 25:23 ꠔꠦꠃ ꠝꠣꠟꠤꠇꠦ ꠇꠁꠟꠣ, ‘ꠡꠣꠛ꠆ꠛꠣꠡ, ꠔꠥꠝꠤ ꠈꠥꠛ ꠢꠇ-ꠢꠣꠟꠣꠟꠤ ꠝꠣꠘꠥꠡ। ꠔꠥꠝꠤ ꠕꠥꠠꠣ ꠛꠦꠙꠣꠞꠦꠃ ꠢꠇ-ꠢꠣꠟꠣꠟ ꠞꠁꠍ, ꠄꠞꠟꠣꠉꠤ ꠀꠝꠤ ꠔꠥꠝꠣꠞꠦ ꠀꠞꠅ ꠛꠃꠔ ꠛꠠ ꠖꠣꠄꠁꠔ꠆ꠔ ꠖꠤꠝꠥ। ꠀꠅ, ꠀꠝꠣꠞ ꠈꠥꠡꠤꠞ ꠜꠣꠉꠤ ꠅꠅ।’
MAT 25:24 ꠅꠁꠟꠦ ꠄꠇ ꠀꠎꠣꠞ ꠐꠦꠇꠣ ꠎꠣꠞꠦ ꠖꠤꠍꠟꠣ, ꠢꠦ ꠀꠁꠀ ꠇꠁꠟ, ‘ꠍꠣꠛ, ꠀꠝꠤ ꠎꠣꠘꠤ ꠀꠙꠘꠦ ꠈꠥꠛ ꠇꠠꠣ ꠝꠣꠘꠥꠡ। ꠀꠙꠘꠦ ꠈꠦꠔ ꠘꠣ ꠇꠞꠤꠀꠅ ꠗꠣꠘ ꠇꠣꠐꠂꠘ ꠀꠞ ꠛꠣꠁꠘ ꠘꠣ ꠖꠤꠟꠦꠅ ꠀꠟꠤ ꠢꠥꠞꠂꠘ।
MAT 25:25 ꠄꠞꠖꠣꠄ ꠀꠝꠤ ꠒꠞꠣꠁꠀ ꠀꠙꠘꠣꠞ ꠐꠦꠇꠣ ꠝꠣꠐꠤꠞ ꠔꠟꠦ ꠟꠥꠇꠣꠁꠀ ꠕꠁꠍꠟꠣꠝ। ꠅꠃ ꠘꠦꠃꠇ꠆ꠇꠣ ꠀꠙꠘꠣꠞ ꠐꠦꠇꠣ।’
MAT 25:26 ꠝꠣꠟꠤꠇꠦ ꠇꠁꠟꠣ, ‘ꠢꠣꠄꠞꠦ ꠈꠛꠤꠍ, ꠔꠥꠁꠘ ꠔ ꠇꠥꠠꠤꠀ। ꠔꠥꠁ ꠎꠥꠖꠤ ꠁꠈꠣꠘ ꠝꠘꠅ ꠇꠞꠟꠦ, ꠀꠝꠤ ꠈꠦꠔ ꠘꠣ ꠇꠞꠟꠦꠅ ꠗꠣꠘ ꠇꠣꠐꠤ ꠀꠞ ꠛꠣꠁꠘ ꠘꠣ ꠖꠤꠟꠦꠅ ꠀꠟꠤ ꠢꠥꠞꠤ,
MAT 25:27 ꠔꠦ ꠀꠝꠣꠞ ꠐꠦꠇꠣ ꠔꠥꠁ ꠛꠦꠙꠣꠞꠤꠞ ꠉꠦꠍꠦ ꠖꠤꠟꠦ ꠘꠣ ꠇꠦꠘꠦ? ꠔꠦ ꠔ ꠀꠝꠤ ꠀꠁꠀ ꠝꠥꠟ ꠐꠦꠇꠣꠞ ꠟꠉꠦ ꠇꠤꠍꠥ ꠟꠣꠜ ꠙꠣꠁꠟꠣꠝ ꠅꠘꠦ।’
MAT 25:28 ꠛꠣꠖꠦ ꠔꠣꠁꠘ ꠅꠁꠘ꠆ꠘ ꠌꠣꠇꠞ ꠅꠇꠟꠞꠦ ꠇꠁꠟꠣ, ‘ꠔꠥꠝꠞꠣ ꠅꠉꠥꠞ ꠉꠦꠍ ꠕꠣꠇꠤ ꠅꠃ ꠐꠦꠇꠣ ꠘꠤꠀ, ꠖꠡ ꠀꠎꠣꠞ ꠎꠣꠞ ꠉꠦꠍꠦ ꠀꠍꠦ ꠔꠣꠞꠦ ꠖꠦꠅ।
MAT 25:29 ꠢꠥꠘꠅ, ꠎꠣꠞ ꠀꠍꠦ ꠔꠣꠞꠦ ꠀꠞꠅ ꠖꠦꠅꠀ ꠅꠁꠛ, ꠔꠣꠞ ꠀꠞꠅ ꠛꠣꠠꠤꠛ। ꠅꠁꠟꠦ ꠎꠣꠞ ꠘꠣꠁ, ꠔꠣꠞ ꠎꠦꠔꠣ ꠀꠍꠦ ꠅꠔꠣꠅ ꠇꠣꠠꠤꠀ ꠘꠦꠅꠀ ꠅꠁꠛ।
MAT 25:30 ꠅꠃ ꠛꠎ꠆ꠎꠣꠔ ꠌꠣꠇꠞꠞꠦ ꠘꠤꠀ ꠔꠥꠝꠞꠣ ꠀꠘ꠆ꠖꠣꠁꠞ ꠉꠣꠔꠅ ꠚꠣꠟꠣꠁ ꠖꠦꠅ। ꠢꠃ ꠉꠣꠔꠅ ꠝꠣꠘꠡꠦ ꠇꠣꠘ꠆ꠖꠣ-ꠇꠣꠐꠤ ꠇꠞꠛ ꠀꠞ ꠎꠣꠟꠣ-ꠎꠘꠔ꠆ꠞꠘꠣꠄ ꠖꠣꠔ ꠇꠤꠠꠤꠝꠤꠠꠤ ꠖꠤꠛ।’
MAT 25:31 “ꠛꠤꠘ-ꠀꠖꠝꠦ ꠎꠦꠛꠟꠣ ꠚꠤꠞꠤꠡ꠆ꠔꠣ ꠅꠇꠟꠞꠦ ꠟꠁꠀ ꠘꠤꠎꠞ ꠝꠢꠤꠝꠣꠄ ꠢꠤꠞꠛꠣꠞ ꠀꠁꠛꠣ, ꠀꠁꠀ ꠘꠤꠎꠞ ꠛꠣꠖꠡꠣꠁꠞ ꠉꠖꠤꠔ ꠛꠁꠛꠣ।
MAT 25:32 ꠅꠃ ꠡꠝꠄ ꠖꠥꠘꠤꠀꠞ ꠔꠣꠝꠣꠝ ꠎꠣꠔꠤꠞ ꠝꠣꠘꠡꠞꠦ ꠔꠣꠘ ꠍꠣꠝꠘꠦ ꠀꠘꠣ ꠅꠁꠛ। ꠞꠣꠈꠣꠟꠦ ꠎꠦꠟꠣ ꠝꠦꠠꠣ ꠀꠞ ꠍꠣꠉꠟꠞꠦ ꠀꠟꠣꠖꠣ ꠇꠞꠦ, ꠔꠣꠁꠘꠅ ꠅꠃꠟꠣ ꠢꠇꠟ ꠝꠣꠘꠡꠞꠦ ꠀꠟꠉꠣꠁꠀ ꠖꠥꠁ ꠜꠣꠉ ꠇꠞꠛꠣ।
MAT 25:33 ꠔꠣꠘ ꠒꠣꠁꠘ ꠉꠣꠟꠣꠛꠣꠄ ꠝꠦꠠꠣ ꠀꠞ ꠛꠣꠃ ꠉꠣꠟꠣꠛꠣꠄ ꠍꠣꠉꠟꠞꠦ ꠞꠣꠈꠛꠣ।
MAT 25:34 “ꠄꠞꠛꠣꠖꠦ ꠛꠣꠖꠡꠣꠄ ꠔꠣꠘ ꠒꠣꠁꠘ ꠉꠣꠟꠣꠞ ꠝꠣꠘꠡꠞꠦ ꠇꠁꠛꠣ, ‘ꠔꠥꠝꠞꠣ ꠎꠣꠞꠣ ꠀꠝꠣꠞ ꠛꠣꠔꠥꠘꠤ ꠛꠣꠚꠞ ꠞꠢꠝ ꠙꠣꠁꠍ, ꠔꠥꠝꠞꠣ ꠀꠅ। ꠀꠞ ꠖꠥꠘꠤꠀꠞ ꠙꠄꠟꠣ ꠕꠣꠇꠤ ꠔꠥꠝꠞꠣꠞ ꠟꠣꠉꠤ ꠎꠦ ꠛꠣꠖꠡꠣꠁ ꠔꠤꠀꠞ ꠇꠞꠤ ꠞꠣꠈꠣ ꠅꠁꠍꠦ, ꠅꠃ ꠛꠣꠖꠡꠣꠁꠞ ꠖꠈꠟ ꠡꠝꠎꠤꠀ ꠘꠦꠅ।
MAT 25:35 ꠝꠘꠅ ꠀꠍꠦ ꠘꠤ, ꠀꠝꠣꠞ ꠎꠦꠛꠟꠣ ꠙꠦꠐꠅ ꠜꠥꠇ ꠟꠣꠉꠍꠤꠟ, ꠔꠥꠝꠞꠣ ꠀꠝꠣꠞꠦ ꠈꠣꠘꠤ ꠖꠤꠍꠟꠣꠄ, ꠙꠤꠀꠍꠞ ꠡꠝꠄ ꠙꠣꠘꠤ ꠖꠤꠍꠟꠣꠄ, ꠀꠞ ꠝꠥꠍꠣꠚꠤꠞ ꠢꠣꠟꠔꠦ ꠀꠝꠣꠞꠦ ꠀꠡꠞꠄ ꠖꠤꠍꠟꠣꠄ।
MAT 25:36 ꠀꠝꠤ ꠎꠦꠛꠟꠣ ꠃꠖꠟꠣ ꠀꠍꠟꠣꠝ, ꠔꠥꠝꠞꠣ ꠇꠣꠙꠠ ꠖꠤꠍꠟꠣꠄ, ꠛꠦꠝꠣꠞꠞ ꠡꠝꠄ ꠈꠦꠎꠝꠔ ꠇꠞꠍꠟꠣꠄ, ꠀꠞ ꠎꠦꠟ ꠈꠣꠘꠣꠔ ꠀꠝꠣꠞꠦ ꠖꠦꠈꠣꠔ ꠉꠦꠍꠟꠣꠄ।’
MAT 25:37 “ꠅꠃ ꠡꠝꠄ ꠢꠃ ꠀꠟ꠆ꠟꠣꠅꠀꠟꠣ ꠝꠣꠘꠡꠦ ꠇꠁꠛꠣ, ‘ꠝꠣꠟꠤꠇ, ꠀꠙꠘꠣꠞ ꠜꠥꠇ ꠟꠣꠉꠣꠄ ꠀꠝꠞꠣ ꠇꠥꠘ ꠡꠝꠄ ꠀꠙꠘꠣꠞꠦ ꠈꠣꠅꠀꠁꠟꠣꠝ? ꠇꠥꠘ ꠡꠝꠄ ꠀꠙꠘꠣꠞꠦ ꠙꠣꠘꠤ ꠖꠤꠟꠣꠝ?
MAT 25:38 ꠀꠞ ꠇꠥꠘ ꠡꠝꠄ ꠝꠥꠍꠣꠚꠤꠞ ꠢꠣꠟꠔꠦ ꠀꠙꠘꠣꠞꠦ ꠀꠡꠞꠄ ꠖꠤꠟꠣꠝ, ꠈꠣꠟꠤ ꠉꠣ ꠖꠦꠈꠤꠀ ꠇꠥꠘ ꠡꠝꠄ ꠇꠣꠙꠠ ꠖꠤꠟꠣꠝ?
MAT 25:39 ꠀꠞ ꠇꠥꠘ ꠡꠝꠄꠃ ꠛꠣ ꠛꠦꠝꠣꠞꠤ ꠢꠣꠟꠔꠅ ꠀꠙꠘꠣꠞ ꠈꠦꠎꠝꠔ ꠇꠞꠟꠣꠝ, ꠛꠣ ꠎꠦꠟ ꠈꠣꠘꠣꠔ ꠖꠦꠈꠣꠔ ꠉꠦꠟꠣꠝ?’
MAT 25:40 ꠅꠃ ꠡꠝꠄ ꠛꠣꠖꠡꠣꠄ ꠔꠣꠞꠣꠞꠦ ꠇꠁꠛꠣ, ‘ꠀꠝꠤ ꠢꠇ ꠇꠕꠣ ꠇꠁꠞꠣꠝ, ꠀꠝꠣꠞ ꠅꠃ ꠢꠥꠞꠥ-ꠝꠥꠞꠥ ꠄꠇꠎꠘ ꠝꠣꠘꠡꠞ ꠟꠣꠉꠤ ꠔꠥꠝꠞꠣ ꠎꠦꠛꠟꠣ ꠁꠔꠣ ꠇꠞꠍ, ꠄꠞ ꠝꠣꠘꠤ ꠀꠝꠣꠞꠦꠃ ꠇꠞꠍ।’
MAT 25:41 “ꠛꠣꠖꠦ ꠛꠣꠖꠡꠣꠄ ꠔꠣꠘ ꠛꠣꠃ ꠉꠣꠟꠣꠞ ꠝꠣꠘꠡꠞꠦ ꠇꠁꠛꠣ, ‘ꠅ ꠟꠣꠘ꠆ꠘꠔꠤꠞ ꠖꠟ, ꠀꠝꠣꠞ ꠍꠣꠝꠘ ꠕꠣꠇꠤ ꠜꠣꠉꠅ। ꠁꠛꠟꠤꠍ-ꠡꠄꠔꠣꠘ ꠀꠞ ꠔꠣꠞ ꠌꠣꠝꠌꠣ ꠎꠤꠘ꠆ꠘꠣꠔ ꠅꠇꠟꠞ ꠟꠣꠉꠤ ꠖꠥꠎꠈꠞ ꠎꠦ ꠀꠉꠥꠁꠘ ꠔꠤꠀꠞ ꠇꠞꠣ ꠅꠁꠍꠦ, ꠢꠘꠅ ꠎꠣꠅ।
MAT 25:42 ꠀꠝꠣꠞ ꠙꠦꠐꠅ ꠜꠥꠇꠞ ꠇꠣꠟꠅ ꠔꠥꠝꠞꠣ ꠀꠝꠣꠞꠦ ꠈꠣꠅꠀꠁꠍ ꠘꠣ, ꠙꠤꠀꠍꠞ ꠡꠝꠄ ꠙꠣꠘꠤ ꠖꠤꠍ ꠘꠣ।
MAT 25:43 ꠀꠝꠣꠞ ꠝꠥꠍꠣꠚꠤꠞ ꠢꠣꠟꠔꠅ ꠞꠁꠛꠣꠞ ꠀꠡꠞꠄ ꠖꠤꠍ ꠘꠣ, ꠀꠝꠤ ꠎꠦꠛꠟꠣ ꠃꠖꠟꠣ ꠀꠍꠟꠣꠝ, ꠇꠣꠙꠠ ꠖꠤꠍ ꠘꠣ, ꠛꠦꠝꠣꠞꠞ ꠡꠝꠄ ꠌꠣꠁꠍ ꠘꠣ, ꠀꠝꠣꠞꠦ ꠖꠦꠈꠣꠞ ꠟꠣꠉꠤ ꠎꠦꠟꠈꠣꠘꠣꠔꠅ ꠉꠦꠍ ꠘꠣ।’
MAT 25:44 “ꠅꠃ ꠡꠝꠄ ꠔꠣꠞꠣ ꠇꠁꠛꠣ, ‘ꠢꠥꠎꠥꠞ, ꠀꠝꠞꠣ ꠇꠥꠘ ꠡꠝꠄ ꠁꠔꠣ ꠇꠞꠟꠣꠝ? ꠀꠙꠘꠣꠞꠦ ꠜꠥꠇꠣꠡꠤ, ꠙꠤꠀꠍꠤ, ꠝꠥꠍꠣꠚꠤꠞ, ꠃꠖꠟꠣ ꠉꠔꠞ, ꠛꠦꠝꠣꠞꠤ ꠀꠞ ꠎꠦꠟ ꠈꠣꠘꠣꠔ ꠖꠦꠈꠤꠀꠅ ꠡꠣꠁꠎ꠆ꠎ ꠇꠞꠟꠣꠝ ꠘꠣ?’
MAT 25:45 ꠛꠣꠖꠡꠣꠄ ꠔꠣꠞꠣꠞꠦ ꠇꠁꠛꠣ, ‘ꠀꠝꠤ ꠢꠇ ꠇꠕꠣ ꠇꠁꠞꠣꠝ, ꠀꠝꠣꠞ ꠅꠃ ꠢꠥꠞꠥ-ꠝꠥꠞꠥ ꠄꠇꠎꠘ ꠝꠣꠘꠡꠞ ꠟꠣꠉꠤꠃ ꠔꠥꠝꠞꠣ ꠎꠦꠛꠟꠣ ꠁꠔꠣ ꠇꠞꠍ ꠘꠣ, ꠄꠞ ꠝꠣꠘꠤ ꠀꠝꠣꠞꠦꠃ ꠇꠞꠍ ꠘꠣ।’ ”
MAT 25:46 ꠢꠦꠡꠦ ꠁꠍꠣꠄ ꠇꠁꠟꠣ, “ꠅꠃ ꠘꠣꠚꠞꠝꠣꠘ ꠅꠇꠟꠦ ꠀꠈꠦꠞꠣꠔꠅ ꠌꠤꠞꠇꠣꠟ ꠡꠣꠎꠣ ꠙꠣꠁꠛꠣ, ꠅꠁꠟꠦ ꠀꠟ꠆ꠟꠣꠅꠀꠟꠣ ꠝꠣꠘꠡꠦ ꠀꠈꠦꠞꠤ ꠎꠤꠘ꠆ꠖꠦꠉꠤ ꠙꠣꠁꠛꠣ।”
MAT 26:1 ꠅꠃ ꠛꠄꠀꠘ ꠡꠦꠡ ꠅꠁꠀ ꠢꠣꠞꠟꠦ, ꠁꠍꠣꠄ ꠔꠣꠘ ꠍꠣꠢꠣꠛꠤ ꠅꠇꠟꠞꠦ ꠇꠁꠟꠣ,
MAT 26:2 “ꠔꠥꠝꠞꠣꠞ ꠔ ꠎꠣꠘꠣ ꠀꠍꠦ, ꠀꠞ ꠖꠥꠁ ꠖꠤꠘ ꠛꠣꠖꠦꠃ ꠀꠎꠣꠖꠤ ꠁꠖ। ꠁꠖꠞ ꠡꠝꠄ ꠀꠝꠤ ꠛꠤꠘ-ꠀꠖꠝꠞꠦ ꠍꠟꠤꠛꠅ ꠟꠐꠇꠣꠁꠀ ꠝꠣꠞꠣꠞ ꠟꠣꠉꠤ ꠗꠞꠣꠁ ꠖꠦꠅꠀ ꠅꠁꠛ।”
MAT 26:3 ꠅꠃ ꠡꠝꠄ ꠛꠠ ꠁꠝꠣꠝ ꠀꠞ ꠝꠥꠞꠛ꠆ꠛꠤ ꠅꠇꠟ ꠀꠁꠀ, ꠔꠣꠞꠣꠞ ꠙꠞꠗꠣꠘ ꠁꠝꠣꠝ ꠇꠣꠄꠀꠚꠣꠞ ꠛꠣꠠꠤꠔ ꠖꠟꠣ ꠅꠁꠟꠣ।
MAT 26:4 ꠖꠟꠣ ꠅꠁꠀ ꠅꠃ ꠙꠞꠣꠝꠤꠡ ꠇꠞꠟꠣ, ꠁꠍꠣꠞꠦ ꠇꠤꠟꠣ ꠟꠥꠇꠣꠁꠀ ꠀꠐꠇ ꠇꠞꠤꠀ ꠎꠣꠘꠦ ꠝꠣꠞꠣ ꠎꠣꠄ।
MAT 26:5 ꠅꠁꠟꠦ ꠔꠣꠞꠣ ꠇꠁꠟꠣ, “ꠁꠖꠞ ꠡꠝꠄ ꠔꠣꠞꠦ ꠗꠞꠔꠣꠝ ꠘꠣꠄ। ꠗꠞꠟꠦ ꠝꠣꠘꠡꠦ ꠉꠘ꠆ꠒꠉꠥꠟ ꠟꠣꠉꠣꠁ ꠖꠤꠔ ꠙꠣꠞꠦ।”
MAT 26:6 ꠁꠍꠣ ꠎꠦꠛꠟꠣ ꠛꠣꠄꠔ-ꠀꠘꠤꠀ ꠉꠣꠃꠞ ꠙꠌꠣ-ꠇꠥꠡ꠆ꠑ ꠛꠦꠝꠣꠞꠤ ꠍꠣꠁꠝꠘꠞ ꠛꠣꠠꠤꠔ ꠀꠍꠟꠣ,
MAT 26:7 ꠅꠃ ꠡꠝꠄ ꠄꠇ ꠛꠦꠐꠤ ꠝꠣꠘꠥꠡ ꠔꠣꠘ ꠉꠦꠍꠦ ꠀꠁꠟꠣ। ꠛꠦꠐꠤꠄ ꠌꠤꠘꠞ ꠄꠇ ꠛꠂꠀꠝꠅ ꠇꠞꠤ ꠈꠥꠛ ꠖꠣꠝꠤ ꠈꠣꠐꠤ ꠀꠔꠞ ꠀꠘꠍꠤꠟꠣ। ꠁꠍꠣ ꠈꠣꠅꠀꠔ ꠛꠁꠀ ꠢꠣꠞꠟꠦ ꠛꠦꠐꠤꠄ ꠢꠇꠟ ꠀꠔꠞ ꠔꠣꠘ ꠝꠣꠕꠣꠔ ꠓꠣꠟꠤ ꠖꠤꠟꠣ।
MAT 26:8 ꠁꠔꠣ ꠖꠦꠈꠤꠀ ꠍꠣꠢꠣꠛꠤ ꠅꠇꠟ ꠛꠤꠞꠇ꠆ꠔ ꠅꠁꠀ ꠇꠁꠟꠣ, “ꠅꠃ ꠀꠔꠞ ꠚꠥꠐꠣꠁꠘ ꠇꠦꠘꠦ ꠛꠞꠛꠣꠖ ꠇꠞꠣ ꠅꠁꠟ?
MAT 26:9 ꠁ ꠚꠥꠐꠤꠘ ꠛꠦꠌꠤꠟꠦ ꠔ ꠛꠃꠔ ꠐꠦꠇꠣ ꠙꠣꠁꠀ ꠉꠞꠤꠛ ꠅꠇꠟꠞꠦ ꠛꠤꠟꠣꠁ ꠖꠦꠅꠀ ꠉꠦꠟ ꠅꠘꠦ।”
MAT 26:10 ꠁꠈꠣꠘ ꠛꠥꠎꠤꠀ ꠁꠍꠣꠄ ꠇꠁꠟꠣ, “ꠔꠥꠝꠞꠣ ꠁ ꠛꠦꠐꠤꠉꠥꠞꠦ ꠖꠥꠈ ꠖꠤꠞꠣꠄ ꠇꠦꠘꠦ? ꠔꠣꠁꠘ ꠔ ꠀꠝꠣꠞ ꠟꠣꠉꠤ ꠑꠤꠇ ꠇꠣꠝꠃ ꠇꠞꠍꠂꠘ।
MAT 26:11 ꠉꠞꠤꠛ ꠅꠇꠟ ꠔ ꠢꠣꠝꠦꠡꠣꠃ ꠔꠥꠝꠞꠣꠞ ꠟꠉꠦ ꠞꠁꠛꠣ। ꠅꠁꠟꠦ ꠀꠝꠣꠞꠦ ꠔ ꠢꠣꠝꠦꠡꠣ ꠙꠣꠁꠔꠣꠄ ꠘꠣꠄ।
MAT 26:12 ꠄꠁꠘ ꠀꠁꠀ ꠀꠝꠣꠞ ꠉꠔꠞꠅ ꠀꠔꠞ ꠝꠣꠈꠣꠁꠀ, ꠖꠣꠚꠘ-ꠇꠣꠚꠘꠞ ꠟꠣꠉꠤ ꠀꠝꠣꠞꠦ ꠎꠥꠁꠔ ꠇꠞꠍꠂꠘ।
MAT 26:13 ꠀꠝꠤ ꠔꠥꠝꠞꠣꠞꠦ ꠢꠣꠍꠣ ꠇꠕꠣ ꠇꠁꠞꠣꠝ, ꠖꠥꠘꠤꠀꠞ ꠎꠦꠇꠥꠘꠥ ꠎꠣꠉꠣꠔ ꠀꠟ꠆ꠟꠣꠞ ꠈꠥꠡ-ꠈꠛꠞꠤ ꠔꠛꠟꠤꠉ ꠇꠞꠣꠞ ꠡꠝꠄ, ꠅꠃ ꠛꠦꠌꠣꠠꠤꠞꠦ ꠝꠘꠅ ꠇꠞꠣꠞ ꠟꠣꠉꠤ, ꠔꠣꠘ ꠁ ꠘꠦꠇ ꠇꠣꠝꠞ ꠇꠕꠣꠈꠣꠘꠅ ꠇꠅꠀ ꠎꠣꠁꠛ।”
MAT 26:14 ꠛꠣꠖꠦ ꠔꠣꠘ ꠛꠣꠞꠅꠎꠘ ꠍꠣꠢꠣꠛꠤꠞ ꠝꠣꠎꠞ ꠄꠇꠎꠘ, ꠄꠘ ꠘꠣꠝ ꠁꠢꠥꠖꠣ ꠁꠡ꠆ꠇꠣꠞꠤꠀꠔ, ꠄꠁꠘ ꠛꠠ ꠁꠝꠣꠝ ꠅꠇꠟꠞ ꠉꠦꠍꠦ ꠉꠤꠀ ꠇꠁꠟꠣ,
MAT 26:15 “ꠁꠍꠣꠞꠦ ꠀꠙꠘꠣꠞꠣꠞ ꠀꠔꠅ ꠗꠞꠣꠁꠀ ꠖꠤꠟꠦ ꠀꠝꠣꠞꠦ ꠇꠤꠔꠣ ꠖꠤꠛꠣ?” ꠔꠦꠃ ꠛꠠ ꠁꠝꠣꠝ ꠅꠇꠟꠦ ꠔꠣꠞꠦ ꠞꠥꠙꠣꠞ ꠔꠤꠡ ꠐꠦꠇꠣ ꠖꠤꠟꠣ।
MAT 26:16 ꠄꠞꠛꠣꠖ ꠕꠣꠇꠤꠃ ꠁꠢꠥꠖꠣꠄ ꠁꠍꠣꠞꠦ ꠗꠞꠣꠁꠀ ꠖꠦꠅꠀꠞ ꠡꠥꠎꠥꠉ ꠔꠥꠇꠣꠘꠤꠔ ꠞꠁꠟ।
MAT 26:17 ꠈꠣꠝꠤꠞ ꠍꠣꠠꠣ ꠞꠥꠐꠤ ꠈꠣꠅꠀꠞ ꠁꠖꠞ ꠙꠄꠟꠣ ꠖꠤꠘ, ꠍꠣꠢꠣꠛꠤ ꠅꠇꠟꠦ ꠀꠁꠀ ꠁꠍꠣꠞꠦ ꠎꠤꠇꠣꠁꠟꠣ, “ꠢꠥꠎꠥꠞ, ꠀꠝꠞꠣ ꠇꠥꠘ ꠎꠣꠉꠣꠔ ꠉꠤꠀ ꠀꠙꠘꠣꠞ ꠟꠣꠉꠤ ꠀꠎꠣꠖꠤ ꠁꠖꠞ ꠈꠣꠘꠣ ꠔꠤꠀꠞ ꠇꠞꠔꠣꠝ?”
MAT 26:18 ꠔꠣꠁꠘ ꠎꠥꠀꠙ ꠖꠤꠟꠣ, “ꠔꠥꠝꠞꠣ ꠐꠣꠃꠘꠅ ꠎꠣꠅ। ꠉꠤꠀ ꠅꠝꠥꠇ ꠝꠣꠘꠡꠞꠦ ꠇꠁꠅ, ‘ꠢꠥꠎꠥꠞꠦ ꠇꠁꠍꠂꠘ, ꠀꠝꠣꠞ ꠡꠝꠄ ꠊꠘꠣꠁꠀ ꠀꠁꠌ꠆ꠍꠦ, ꠔꠦ ꠀꠝꠤ ꠀꠝꠣꠞ ꠍꠣꠢꠣꠛꠤ ꠅꠇꠟꠞꠦ ꠟꠁꠀ ꠔꠥꠝꠣꠞ ꠛꠣꠠꠤꠔ ꠁꠖ ꠇꠞꠝꠥ।’ ”
MAT 26:19 ꠁꠍꠣꠞ ꠢꠥꠇꠥꠝ ꠝꠣꠚꠤꠇ ꠍꠣꠢꠣꠛꠤ ꠅꠇꠟꠦ ꠉꠤꠀ ꠀꠎꠣꠖꠤ ꠁꠖꠞ ꠈꠣꠘꠤ ꠔꠤꠀꠞ ꠇꠞꠟꠣ।
MAT 26:20 ꠛꠣꠖꠦ ꠢꠣꠁꠘ꠆ꠎꠣ ꠛꠣꠟꠣ ꠁꠍꠣꠄ ꠔꠣꠘ ꠛꠣꠞꠅꠎꠘ ꠍꠣꠢꠣꠛꠤꠞꠦ ꠟꠁꠀ ꠈꠣꠘꠤꠔ ꠛꠁꠟꠣ।
MAT 26:21 ꠛꠁꠀ ꠇꠁꠟꠣ, “ꠀꠝꠤ ꠔꠥꠝꠞꠣꠞꠦ ꠢꠣꠍꠣ ꠇꠕꠣ ꠇꠁꠞꠣꠝ, ꠔꠥꠝꠞꠣꠞ ꠝꠣꠎꠞ ꠄꠇ ꠎꠘꠦꠃ ꠔ ꠀꠝꠣꠞꠦ ꠖꠥꠡꠝꠘꠞ ꠀꠔꠅ ꠗꠞꠣꠁ ꠖꠤꠛ।”
MAT 26:22 ꠁꠈꠣꠘ ꠢꠥꠘꠤꠀ ꠔꠣꠞꠣ ꠈꠥꠛ ꠛꠦꠎꠣꠞ ꠅꠁꠉꠦꠟꠣ। ꠄꠞꠟꠣꠉꠤ ꠔꠣꠞꠣ ꠄꠇ ꠄꠇ ꠇꠞꠤ ꠎꠤꠇꠣꠁꠟꠣ, “ꠢꠥꠎꠥꠞ, ꠁ ꠎꠘ ꠇꠤꠔꠣ ꠀꠝꠤ ꠘꠤ?”
MAT 26:23 ꠔꠣꠁꠘ ꠇꠁꠟꠣ, “ꠅꠈꠘ ꠎꠦ ꠎꠘꠦ ꠀꠝꠣꠞ ꠟꠉꠦ ꠅꠁꠀ ꠕꠣꠟꠅ ꠀꠔ ꠢꠣꠞꠣꠞ, ꠢꠦ-ꠃ ꠀꠝꠣꠞꠦ ꠗꠞꠣꠁꠀ ꠖꠤꠛ।
MAT 26:24 ꠀꠝꠤ ꠛꠤꠘ-ꠀꠖꠝꠞ ꠝꠃꠔꠞ ꠛꠦꠙꠣꠞꠦ ꠀꠍꠝꠣꠘꠤ ꠇꠤꠔꠣꠛꠅ ꠎꠦꠟꠣ ꠟꠦꠈꠣ ꠀꠍꠦ, ꠀꠝꠣꠞ ꠝꠃꠔ ꠔ ꠅꠃꠟꠣꠃ ꠅꠁꠛ। ꠅꠁꠟꠦ ꠀꠚꠍꠥꠍ ꠢꠃ ꠎꠘꠞ ꠟꠣꠉꠤ, ꠎꠦꠉꠤꠄ ꠀꠝꠣꠞꠦ ꠗꠞꠣꠁꠀ ꠖꠤꠛ। ꠖꠥꠘꠤꠀꠔ ꠔꠣꠞ ꠎꠘꠝ ꠘꠣ ꠅꠀꠃ, ꠔꠣꠞ ꠟꠣꠉꠤ ꠛꠃꠔ ꠜꠣꠟꠣ ꠀꠍꠤꠟ।”
MAT 26:25 ꠎꠦ ꠁꠢꠥꠖꠣꠄ ꠁꠍꠣꠞꠦ ꠗꠞꠣꠁ ꠖꠤꠔ ꠌꠣꠞ, ꠢꠦ ꠔꠣꠘꠞꠦ ꠎꠤꠇꠣꠁꠟ, “ꠢꠥꠎꠥꠞ, ꠢꠤ ꠎꠘ ꠇꠤꠔꠣ ꠀꠝꠤ ꠘꠤ?” ꠁꠍꠣꠄ ꠔꠣꠞꠦ ꠇꠁꠟꠣ, “ꠔꠥꠝꠤ ꠑꠤꠇꠃ ꠇꠁꠞꠣꠄ।”
MAT 26:26 ꠔꠣꠞꠣ ꠈꠣꠘꠣ ꠈꠣꠁꠞꠣ, ꠅꠃ ꠡꠝꠄ ꠁꠍꠣꠄ ꠞꠥꠐꠤ ꠀꠔꠅ ꠟꠁꠀ ꠀꠟ꠆ꠟꠣꠞ ꠡꠥꠇꠞꠤꠀ ꠀꠖꠣꠄ ꠇꠞꠟꠣ। ꠔꠣꠁꠘ ꠞꠥꠐꠤ ꠍꠤꠠꠤꠀ ꠐꠥꠇꠞꠣ ꠐꠥꠇꠞꠣ ꠇꠞꠤ ꠍꠣꠢꠣꠛꠤ ꠅꠇꠟꠞꠦ ꠖꠤꠟꠣ। ꠖꠤꠀ ꠇꠁꠟꠣ, “ꠅꠃ ꠘꠦꠅ, ꠈꠣꠅ, ꠝꠘꠅ ꠇꠞꠅ ꠁꠔꠣ ꠀꠝꠣꠞ ꠇꠣꠄꠀ।”
MAT 26:27 ꠛꠣꠖꠦ ꠔꠣꠁꠘ ꠡꠞꠛꠔꠞ ꠙꠤꠀꠟꠣ ꠟꠁꠀ ꠀꠟ꠆ꠟꠣꠞ ꠡꠥꠇꠞꠤꠀ ꠎꠣꠘꠣꠁꠟꠣ, ꠀꠞ ꠄꠞꠣꠞꠦ ꠖꠤꠀ ꠇꠁꠟꠣ, “ꠔꠥꠝꠞꠣ ꠢꠇꠟꠦ ꠅꠃ ꠙꠤꠀꠟꠣ ꠕꠣꠇꠤ ꠀꠋꠉꠥꠞꠞ ꠡꠞꠛꠔ ꠈꠣꠅ।
MAT 26:28 ꠝꠘꠅ ꠇꠞꠤꠅ, ꠁꠔꠣ ꠀꠝꠣꠞ ꠟꠃ। ꠅꠃ ꠟꠃꠞ ꠎꠞꠤꠀꠄ ꠀꠖꠝ ꠎꠣꠔꠤꠞ ꠛꠃꠔꠞ ꠉꠥꠘꠣ ꠝꠣꠚꠤ ꠅꠁꠛ। ꠀꠟ꠆ꠟꠣꠞ ꠟꠉꠦ ꠝꠣꠘꠡꠞ ꠝꠤꠟꠘꠞ ꠃꠍꠤꠟ꠆ꠟꠣ ꠅꠁꠟ ꠅꠃ ꠟꠃ।
MAT 26:29 ꠀꠝꠤ ꠢꠣꠍꠣ ꠇꠕꠣ ꠇꠁꠀꠞ, ꠀꠝꠤ ꠀꠝꠣꠞ ꠉꠣꠁꠛꠤ ꠛꠣꠚꠞ ꠛꠣꠖꠡꠣꠁꠔ ꠖꠣꠈꠤꠟ ꠅꠁꠀ ꠢꠣꠞꠤ, ꠔꠥꠝꠞꠣꠞꠦ ꠟꠉꠦ ꠟꠁꠀ ꠎꠔꠖꠤꠘ ꠘꠄꠀ ꠢꠣꠟꠔꠦ ꠀꠋꠉꠥꠞꠞ ꠡꠞꠛꠔ ꠘꠣ ꠈꠣꠁꠍꠤ, ꠅꠔ ꠖꠤꠘ ꠁ ꠡꠞꠛꠔ ꠀꠞ ꠈꠣꠁꠔꠣꠝ ꠘꠣꠄ।”
MAT 26:30 ꠢꠦꠡꠦ ꠔꠣꠞꠣ ꠢꠇꠟꠦ ꠝꠤꠟꠤ ꠄꠇ ꠉꠎꠟ ꠉꠣꠁꠀ, ꠊꠞ ꠕꠣꠇꠤ ꠛꠣꠞ ꠅꠁꠀ ꠎꠄꠔꠥꠘ ꠙꠣꠠꠅ ꠉꠦꠟꠣꠉꠤ।
MAT 26:31 ꠛꠣꠖꠦ ꠁꠍꠣꠄ ꠔꠣꠘ ꠍꠣꠢꠣꠛꠤ ꠅꠇꠟꠞꠦ ꠇꠁꠟꠣ, “ꠢꠥꠘꠅ, ꠀꠁꠎ ꠞꠣꠁꠔ ꠔꠥꠝꠞꠣ ꠢꠇꠟꠦꠃ ꠔ ꠀꠝꠣꠞꠦ ꠚꠣꠟꠣꠁꠀ ꠜꠣꠉꠤꠛꠣꠄ। ꠀꠟ꠆ꠟꠣꠞ ꠇꠣꠟꠣꠝꠅ ꠀꠍꠦ, ‘ꠀꠝꠤ ꠝꠦꠠꠣꠞ ꠙꠣꠟꠞ ꠞꠣꠈꠣꠟꠞꠦ ꠝꠣꠞꠝꠥ, ꠔꠦꠃ ꠙꠣꠟꠞ ꠝꠦꠠꠣꠁꠘ ꠌꠣꠁꠞꠅꠛꠣꠄ ꠍꠤꠔ꠆ꠞꠤꠎꠤꠛꠣ।’
MAT 26:32 ꠅꠁꠟꠦ ꠀꠝꠣꠞꠦ ꠝꠥꠞ꠆ꠖꠣ ꠕꠣꠇꠤ ꠎꠤꠘ꠆ꠖꠣ ꠇꠞꠣꠞ ꠛꠣꠖꠦ, ꠔꠥꠝꠞꠣꠞ ꠀꠉꠦꠃ ꠀꠝꠤ ꠉꠣꠟꠤꠟ ꠎꠤꠟꠣꠔ ꠎꠣꠁꠝꠥꠉꠤ।”
MAT 26:33 ꠔꠦꠃ ꠍꠣꠢꠣꠛꠤ ꠙꠤꠔꠞꠦ ꠔꠣꠘꠞꠦ ꠇꠁꠟꠣ, “ꠢꠥꠎꠥꠞ, ꠢꠇꠟ ꠜꠣꠉꠤ ꠉꠦꠟꠦꠅ ꠀꠝꠤ ꠜꠣꠉꠤꠔꠣꠝ ꠘꠣꠄ।”
MAT 26:34 ꠁꠍꠣꠄ ꠇꠁꠟꠣ, “ꠔꠦ ꠢꠥꠘꠅ, ꠀꠝꠤ ꠔꠥꠝꠣꠞꠦ ꠢꠣꠍꠣ ꠇꠕꠣ ꠇꠁꠞꠣꠝ, ꠀꠁꠎ ꠙꠔꠣꠛꠣꠟꠣ ꠝꠥꠞꠉꠣꠄ ꠛꠣꠋ ꠖꠤꠛꠣꠞ ꠀꠉꠦꠃ ꠔꠥꠝꠤ ꠔꠤꠘꠛꠣꠞ ꠇꠁꠛꠣꠄ, ꠔꠥꠝꠤ ꠀꠝꠣꠞꠦ ꠌꠤꠘꠅ ꠘꠣ।”
MAT 26:35 ꠅꠁꠟꠦ ꠙꠤꠔꠞꠦ ꠇꠁꠟꠣ, “ꠢꠥꠎꠥꠞ, ꠅꠃ ꠇꠤꠔꠣ ꠇꠂꠘ, ꠀꠙꠘꠣꠞ ꠟꠉꠦ ꠎꠥꠖꠤ ꠀꠝꠣꠞ ꠝꠞꠘꠅ ꠅꠄ, ꠔꠣ-ꠅ ꠀꠝꠤ ꠇꠥꠘꠥꠝꠘ꠆ꠔꠦꠃ ꠀꠙꠘꠣꠞꠦ ꠅꠡ꠆ꠛꠤꠇꠣꠞ ꠇꠞꠔꠣꠝ ꠘꠣꠄ।” ꠢꠇꠟ ꠍꠣꠢꠣꠛꠤꠄ ꠅꠃ ꠄꠇꠟꠣꠈꠣꠘ ꠇꠁꠟꠣ।
MAT 26:36 ꠛꠣꠖꠦ ꠢꠎꠞꠔ ꠁꠍꠣꠄ ꠔꠣꠘ ꠍꠣꠢꠣꠛꠤ ꠅꠇꠟꠞꠦ ꠟꠁꠀ ꠉꠦꠔꠡꠤꠝꠣꠘꠤ ꠘꠣꠝꠞ ꠄꠇ ꠛꠣꠉꠣꠘꠅ ꠀꠁꠟꠣ। ꠀꠁꠀ ꠄꠞꠣꠞꠦ ꠇꠁꠟꠣ, “ꠔꠥꠝꠞꠣ ꠅꠘꠅ ꠛꠅ, ꠀꠝꠤ ꠢꠉꠣꠟꠣꠔ ꠉꠤꠀ ꠖꠥꠀ ꠇꠞꠝꠥ।”
MAT 26:37 ꠅꠈꠣꠘ ꠇꠁꠀ ꠔꠣꠁꠘ ꠙꠤꠔꠞ ꠀꠞ ꠎꠤꠛꠥꠖꠤꠀꠞ ꠖꠥꠁ ꠙꠥꠀꠞꠦ ꠔꠣꠘ ꠟꠉꠦ ꠘꠤꠟꠣ। ꠀꠡ꠆ꠔꠦ ꠀꠡ꠆ꠔꠦ ꠔꠣꠘ ꠖꠤꠟꠞ ꠝꠣꠎꠦ ꠖꠥꠈ ꠀꠞ ꠢꠣꠄ-ꠢꠥꠔꠣꠡ ꠛꠣꠠꠤꠟ।
MAT 26:38 ꠔꠣꠁꠘ ꠄꠞꠣꠞꠦ ꠇꠁꠟꠣ, “ꠜꠣꠁꠀꠁꠘꠞꠦ, ꠖꠥꠈꠦ ꠀꠝꠣꠞ ꠇꠁꠟꠎꠣ ꠚꠣꠐꠤꠎꠣꠞ। ꠔꠥꠝꠞꠣ ꠅꠘꠅ ꠛꠁꠞꠅ ꠀꠞ ꠀꠝꠣꠞ ꠟꠉꠦ ꠢꠎꠣꠉ ꠞꠁꠅ।”
MAT 26:39 ꠅꠈꠣꠘ ꠇꠁꠀ ꠕꠥꠠꠣ ꠢꠞꠤꠀ ꠉꠤꠀ ꠔꠣꠁꠘ ꠝꠣꠐꠤꠔ ꠍꠁꠎꠖꠣꠔ ꠙꠠꠤꠀ ꠇꠁꠟꠣ, “ꠅ ꠀꠝꠣꠞ ꠛꠦꠢꠦꠡ꠆ꠔꠤ ꠀꠛ꠆ꠛꠣ, ꠀꠝꠣꠞ ꠃꠙꠞꠦ ꠅꠃ ꠎꠦ ꠎꠥꠟꠥꠝ-ꠝꠍꠤꠛꠔ ꠀꠁꠅꠞ, ꠖꠥꠍꠞꠣ ꠇꠥꠘꠥ ꠃꠙꠣꠄ ꠕꠣꠇꠟꠦ ꠁꠈꠣꠘꠔꠣ ꠢꠞꠣꠁꠟꠣꠅ। ꠅꠁꠟꠦ ꠁꠔꠣ ꠀꠝꠣꠞ ꠁꠌ꠆ꠍꠣꠄ ꠘꠣꠄ, ꠔꠥꠝꠣꠞ ꠝꠞ꠆ꠎꠤ ꠝꠣꠚꠤꠇꠃ ꠅꠃꠇ।”
MAT 26:40 ꠍꠁꠎꠖꠣ ꠕꠣꠇꠤ ꠃꠑꠤꠀ ꠔꠣꠁꠘ ꠍꠣꠢꠣꠛꠤ ꠅꠇꠟꠞ ꠉꠦꠍꠦ ꠀꠁꠀ ꠖꠦꠈꠟꠣ, ꠄꠞꠣ ꠊꠥꠝꠣꠁ ꠉꠦꠍꠂꠘ। ꠅꠃ ꠔꠣꠁꠘ ꠙꠤꠔꠞꠞꠦ ꠢꠎꠣꠉ ꠇꠞꠤ ꠇꠁꠟꠣ, “ꠔꠥꠝꠞꠣ ꠄꠇꠈꠣꠘ ꠊꠘ꠆ꠐꠣꠅ ꠢꠎꠣꠉ ꠞꠁꠔꠣꠄ ꠙꠣꠞꠟꠣꠄ ꠘꠣ ꠘꠤ?
MAT 26:41 ꠢꠎꠣꠉ ꠞꠅ ꠖꠥꠀ ꠇꠞꠣꠞ ꠟꠣꠉꠤ, ꠀꠞ ꠖꠥꠀ ꠇꠞꠅ ꠙꠞꠤꠇ꠆ꠇꠣ ꠕꠣꠇꠤ ꠛꠣꠌꠣꠞ ꠟꠣꠉꠤ। ꠔꠥꠝꠞꠣꠞ ꠖꠤꠟꠞ ꠝꠣꠎꠦ ꠘꠤꠌꠄ ꠈꠤꠀꠟ ꠀꠍꠦ, ꠅꠁꠟꠦ ꠇꠣꠄꠀ ꠔ ꠇꠝꠎꠥꠞ।”
MAT 26:42 ꠛꠣꠖꠦ ꠔꠣꠁꠘ ꠖꠥꠍꠞꠣꠛꠣꠞ ꠉꠤꠀ ꠖꠥꠀ ꠇꠞꠟꠣ, “ꠅ ꠀꠝꠣꠞ ꠛꠦꠢꠦꠡ꠆ꠔꠤ ꠀꠛ꠆ꠛꠣ, ꠅꠃ ꠎꠥꠟꠥꠝ-ꠝꠍꠤꠛꠔ ꠀꠝꠤ ꠡꠁꠎ꠆ꠎ ꠘꠣ ꠇꠞꠟꠦ, ꠎꠥꠖꠤ ꠖꠥꠍꠞꠣ ꠇꠥꠘꠥ ꠙꠕ ꠘꠣ ꠕꠣꠇꠦ, ꠔꠣꠁꠟꠦ ꠔꠥꠝꠣꠞ ꠝꠞ꠆ꠎꠤ ꠝꠣꠚꠤꠇꠃ ꠅꠃꠇ।”
MAT 26:43 ꠛꠣꠖꠦ ꠔꠣꠁꠘ ꠢꠤꠞꠛꠣꠞ ꠀꠁꠀ ꠖꠦꠈꠟꠣ, ꠄꠞꠣ ꠊꠥꠝꠣꠁ ꠉꠦꠍꠂꠘ, ꠊꠥꠝꠦ ꠔꠣꠞꠣꠞ ꠌꠃꠈ ꠚꠣꠟꠣꠁ ꠖꠦꠞ।
MAT 26:44 ꠖꠦꠈꠤꠀ ꠔꠣꠞꠣꠞꠦ ꠕꠁꠀ ꠔꠣꠁꠘ ꠔꠤꠍꠞꠣ ꠛꠣꠞ ꠉꠤꠀ ꠄꠇꠁ ꠖꠥꠀ ꠇꠞꠟꠣ।
MAT 26:45 ꠄꠞꠛꠣꠖꠦ ꠔꠣꠁꠘ ꠍꠣꠢꠣꠛꠤ ꠅꠇꠟꠞ ꠉꠦꠍꠦ ꠀꠁꠀ ꠇꠁꠟꠣ, “ꠔꠥꠝꠞꠣ ꠖꠦꠈꠤ ꠅꠈꠘꠅ ꠀꠞꠣꠝꠦ ꠊꠥꠝꠣꠁꠞꠣꠄ। ꠢꠥꠘꠅ, ꠡꠝꠄ ꠀꠁꠌ꠆ꠍꠦ, ꠀꠝꠤ ꠛꠤꠘ-ꠀꠖꠝꠞꠦ ꠉꠥꠘꠣꠉꠣꠞ ꠅꠇꠟꠞ ꠀꠔꠅ ꠡꠝꠎꠣꠁ ꠖꠦꠅꠀ ꠅꠁꠛ।
MAT 26:46 ꠃꠑꠅ, ꠀꠝꠞꠣ ꠞꠅꠀꠘꠣ ꠖꠦꠁ। ꠀꠝꠣꠞꠦ ꠎꠦꠉꠤꠄ ꠖꠥꠡꠝꠘꠞ ꠀꠔꠅ ꠗꠞꠣꠁ ꠖꠤꠛ, ꠢꠦ ꠀꠁꠀ ꠀꠎꠤꠉꠦꠍꠦ।”
MAT 26:47 ꠔꠣꠁꠘ ꠄꠞꠣꠞ ꠟꠉꠦ ꠝꠣꠔꠅ ꠞꠁꠍꠂꠘ, ꠅꠃ ꠡꠝꠄ ꠁꠢꠥꠖꠣ ꠢꠘꠅ ꠀꠁꠟ। ꠢꠦ ꠀꠍꠤꠟ ꠛꠣꠞꠅꠎꠘ ꠍꠣꠢꠣꠛꠤꠞ ꠝꠣꠎꠞ ꠄꠇꠎꠘ। ꠔꠣꠞ ꠟꠉꠦ ꠅꠁꠀ ꠀꠞꠅ ꠛꠃꠔꠦ ꠟꠣꠑꠤ-ꠍꠐꠣ, ꠔꠟꠥꠀꠞ ꠟꠁꠀ ꠀꠁꠟ। ꠛꠠ ꠁꠝꠣꠝ ꠀꠞ ꠝꠥꠞꠛ꠆ꠛꠤ ꠅꠇꠟꠦ ꠄꠞꠣꠞꠦ ꠙꠣꠑꠣꠁꠍꠂꠘ।
MAT 26:48 ꠔꠣꠘꠞꠦ ꠎꠦꠉꠤꠄ ꠗꠞꠣꠁꠀ ꠖꠤꠔ, ꠅꠃ ꠁꠢꠥꠖꠣꠄ ꠔꠣꠞ ꠟꠉꠞ ꠄꠞꠣꠞꠦ ꠀꠉꠦ ꠢꠤꠇꠣꠁꠀ ꠖꠤꠍꠤꠟ, “ꠀꠝꠤ ꠉꠤꠀ ꠎꠣꠞ ꠉꠣꠟꠅ ꠢꠥꠋꠉꠣ ꠖꠤꠝꠥ, ꠢꠦ-ꠃ ꠢꠃ ꠎꠘ। ꠔꠥꠝꠞꠣ ꠄꠞꠦ ꠀꠐꠇ ꠇꠞꠤꠅ।”
MAT 26:49 ꠄꠞꠟꠣꠉꠤ ꠁꠢꠥꠖꠣꠄ ꠡꠥꠎꠣ-ꠡꠥꠎꠤ ꠁꠍꠣꠞ ꠉꠦꠍꠦ ꠉꠤꠀ ꠇꠁꠟ, “ꠢꠥꠎꠥꠞ, ꠀꠍꠍꠣꠟꠣꠝꠥ ꠀꠟꠣꠁꠇꠥꠝ।” ꠇꠁꠀ ꠢꠦ ꠔꠣꠘꠞꠦ ꠢꠥꠋꠉꠣ ꠖꠤꠟ।
MAT 26:50 ꠁꠍꠣꠄ ꠔꠣꠞꠦ ꠇꠁꠟꠣ, “ꠜꠣꠁꠞꠦ, ꠎꠦꠔꠣ ꠇꠞꠣꠔ ꠀꠁꠍ, ꠇꠞꠤꠟꠣꠅ।” ꠟꠉꠦ ꠟꠉꠦꠃ ꠔꠣꠞꠣ ꠀꠁꠀ ꠁꠍꠣꠞꠦ ꠗꠞꠤꠟꠤꠟ।
MAT 26:51 ꠅꠃ ꠡꠝꠄ ꠁꠍꠣꠞ ꠟꠉꠞ ꠄꠇꠎꠘꠦ ꠘꠤꠎꠞ ꠔꠟꠥꠀꠞ ꠛꠣꠞ ꠇꠞꠤꠀ ꠙꠞꠗꠣꠘ ꠁꠝꠣꠝꠞ ꠉꠥꠟꠣꠝꠞꠦ ꠍꠦꠖ ꠝꠣꠞꠟꠣ, ꠍꠦꠖꠞ ꠟꠉꠦ ꠔꠣꠞ ꠄꠇ ꠇꠣꠘ ꠇꠣꠐꠤꠀ ꠙꠠꠤꠉꠦꠟ।
MAT 26:52 ꠔꠦꠃ ꠁꠍꠣꠄ ꠄꠘꠞꠦ ꠇꠁꠟꠣ, “ꠔꠥꠝꠣꠞ ꠔꠟꠥꠀꠞ ꠛꠦꠉꠅ ꠢꠣꠞꠣꠁꠟꠣꠅ। ꠔꠟꠥꠀꠞꠖꠤ ꠎꠣꠞꠣ ꠈꠦꠟꠣꠄ, ꠔꠟꠥꠀꠞꠞ ꠔꠟꠦꠃ ꠔꠣꠞꠣꠞ ꠎꠣꠘ ꠎꠣꠄ।
MAT 26:53 ꠔꠥꠝꠤ ꠁꠈꠣꠘ ꠌꠤꠘ꠆ꠔꠣ ꠇꠞꠅ ꠘꠣ ꠘꠤ, ꠀꠝꠤ ꠀꠝꠣꠞ ꠛꠣꠔꠥꠘꠤ ꠛꠣꠚꠞ ꠖꠞꠛꠣꠞꠅ ꠀꠞꠎ ꠇꠞꠟꠦ, ꠔꠣꠁꠘ ꠇꠁꠄꠇ ꠀꠎꠣꠞ ꠚꠤꠞꠤꠡ꠆ꠔꠣ ꠙꠣꠑꠣꠁꠔꠣ ꠘꠣꠄ ꠘꠤ?
MAT 26:54 ꠅꠁꠟꠦ ꠀꠝꠤ ꠁꠟꠣ ꠇꠞꠟꠦ ꠇꠤꠔꠣꠛꠞ ꠇꠕꠣ ꠇꠤꠟꠣ ꠚꠟꠤꠛ? ꠇꠤꠔꠣꠛꠅ ꠎꠔꠔꠣ ꠛꠣꠔꠣꠁꠟ ꠅꠁꠍꠦ, ꠁꠔꠣ ꠔ ꠊꠐꠛꠃ।”
MAT 26:55 ꠛꠣꠖꠦ ꠔꠣꠁꠘ ꠅꠔꠣ ꠝꠣꠘꠡꠞꠦ ꠇꠁꠟꠣ, “ꠇꠤꠔꠣ ꠛꠣ, ꠀꠝꠤ ꠇꠥꠘꠥ ꠌꠥꠞ-ꠒꠣꠇꠣꠁꠔ ꠘꠤ, ꠔꠥꠝꠞꠣ ꠖꠦꠈꠤ ꠟꠣꠑꠤ-ꠍꠐꠣ, ꠔꠟꠥꠀꠞ ꠟꠁꠀ ꠀꠝꠣꠞꠦ ꠗꠞꠣꠔ ꠀꠁꠍ। ꠀꠝꠤ ꠔ ꠙꠞꠔꠦꠇ ꠖꠤꠘ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠅ ꠛꠁꠀ ꠔꠣꠟꠤꠝ ꠖꠤꠔꠣꠝ। ꠅꠃ ꠡꠝꠄ ꠔ ꠔꠥꠝꠞꠣ ꠀꠝꠣꠞꠦ ꠗꠞꠟꠣꠄ ꠘꠣ।
MAT 26:56 ꠀꠍꠟꠦ ꠁꠔꠣ ꠢꠇ꠆ꠇꠟꠔꠣ ꠊꠐꠦꠞ, ꠎꠣꠔꠦ ꠀꠍꠝꠣꠘꠤ ꠇꠤꠔꠣꠛꠅ ꠘꠛꠤ ꠅꠇꠟꠦ ꠎꠦꠟꠣ ꠛꠣꠔꠣꠁꠍꠂꠘ, ꠅꠔꠣ ꠙꠥꠞꠣ ꠅꠄ।” ꠅꠃ ꠡꠝꠄ ꠍꠣꠢꠣꠛꠤ ꠅꠇꠟꠦ ꠁꠍꠣꠞꠦ ꠕꠁꠀ ꠜꠣꠉꠤ ꠉꠦꠟꠣ।
MAT 26:57 ꠢꠎꠞꠔ ꠁꠍꠣꠞꠦ ꠗꠞꠤꠀ ꠢꠣꠞꠤ ꠅꠃ ꠝꠣꠘꠡꠦ ꠙꠞꠗꠣꠘ ꠁꠝꠣꠝ ꠇꠣꠄꠀꠚꠣꠞ ꠉꠦꠍꠦ ꠟꠁꠀ ꠉꠦꠟ। ꠢꠘꠅ ꠝꠃꠟꠣꠘꠣ ꠀꠞ ꠝꠥꠞꠛ꠆ꠛꠤ ꠅꠇꠟ ꠄꠇꠈꠣꠘꠅ ꠖꠟꠣ ꠅꠁꠟꠣ।
MAT 26:58 ꠍꠣꠢꠣꠛꠤ ꠙꠤꠔꠞ ꠁꠍꠣꠞ ꠉꠦꠍ ꠕꠘꠦ ꠖꠥꠞꠁ ꠢꠞꠤ ꠢꠞꠤ ꠞꠁꠀ ꠔꠣꠘ ꠈꠞꠦ ꠈꠞꠦ ꠙꠞꠗꠣꠘ ꠁꠝꠣꠝꠞ ꠛꠣꠠꠤꠞ ꠃꠑꠣꠘꠞ ꠇꠣꠘ꠆ꠖꠣꠔ ꠉꠦꠟꠣ। ꠉꠤꠀ ꠢꠦꠡ-ꠝꠦꠡ ꠇꠤꠔꠣ ꠅꠄ, ꠅꠈꠣꠘ ꠖꠦꠈꠣꠞ ꠟꠣꠉꠤ ꠃꠑꠣꠘꠞ ꠜꠤꠔꠞꠦ ꠢꠣꠝꠣꠁꠀ, ꠢꠘꠞ ꠙꠣꠞꠣꠖꠣꠞ ꠅꠇꠟꠞ ꠟꠉꠦ ꠛꠁꠟꠣ।
MAT 26:59 ꠢꠎꠞꠔ ꠁꠍꠣꠞꠦ ꠎꠣꠘꠦ ꠝꠣꠞꠤꠟꠤꠛꠣꠞ ꠟꠣꠉꠤ ꠛꠠ ꠁꠝꠣꠝ ꠅꠇꠟꠦ ꠀꠞ ꠝꠎꠟꠤꠍꠞ ꠢꠇꠟ ꠝꠣꠘꠡꠦ ꠁꠍꠣꠞ ꠛꠤꠙꠇ꠆ꠇꠦ ꠇꠥꠘꠥ ꠘꠣꠟꠤꠡ ꠔꠥꠇꠣꠁꠟꠣ,
MAT 26:60 ꠅꠁꠟꠦ ꠙꠣꠁꠟꠣ ꠘꠣ। ꠝꠎꠟꠤꠍꠅ ꠁꠍꠣꠞ ꠛꠤꠙꠇ꠆ꠇꠦ ꠛꠃꠔꠦ ꠝꠤꠍꠣ ꠡꠣꠇ꠆ꠇꠤ ꠖꠤꠟꠦꠅ, ꠔꠣꠞꠣꠞ ꠡꠣꠇ꠆ꠇꠤꠞ ꠝꠤꠟ ꠅꠁꠟ ꠘꠣ। ꠛꠣꠖꠦ ꠖꠥꠁꠎꠘ ꠝꠣꠘꠡꠦ ꠀꠁꠀ ꠔꠣꠘ ꠛꠤꠞꠥꠖ꠆ꠖꠦ ꠝꠤꠍꠣ ꠡꠣꠇ꠆ꠇꠤ ꠖꠤꠀ ꠇꠁꠟ,
MAT 26:61 “ꠀꠝꠞꠣ ꠢꠥꠘꠍꠤ, ꠢꠦ ꠇꠁꠍꠦ, ꠀꠟ꠆ꠟꠣꠞ ꠇꠣꠛꠣ ꠡꠞꠤꠚ, ꠝꠣꠘꠤ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠞꠦ ꠢꠦ ꠜꠣꠋꠉꠤꠟꠤꠛ, ꠀꠞ ꠔꠤꠘ ꠖꠤꠘꠞ ꠜꠤꠔꠞꠦ ꠢꠤꠞꠛꠣꠞ ꠛꠣꠘꠣꠁꠛ।”
MAT 26:62 ꠔꠦꠃ ꠙꠞꠗꠣꠘ ꠁꠝꠣꠝ ꠃꠛꠣꠁꠀ ꠢꠇꠟꠞ ꠍꠣꠝꠘꠦ ꠁꠍꠣꠞꠦ ꠎꠤꠇꠣꠁꠟꠣ, “ꠅꠛꠣ, ꠔꠥꠝꠤ ꠇꠥꠘꠥ ꠝꠣꠔꠞ ꠎꠥꠀꠙ ꠖꠤꠔꠣꠄ ꠘꠣ ꠘꠤ? ꠁꠔꠣ ꠝꠣꠘꠡꠦ ꠔꠥꠝꠣꠞ ꠛꠦꠙꠣꠞꠦ ꠇꠤꠔꠣ ꠡꠣꠇ꠆ꠇꠤ ꠖꠤꠞꠣ, ꠢꠥꠘꠞꠣꠄ ꠘꠤ?”
MAT 26:63 ꠅꠁꠟꠦ ꠔꠣꠁꠘ ꠇꠥꠘꠥ ꠎꠥꠀꠙ ꠘꠣ ꠖꠤꠀ ꠘꠤꠞꠣꠁ ꠞꠁꠟꠣ। ꠙꠞꠗꠣꠘ ꠁꠝꠣꠝꠦ ꠔꠣꠘꠞꠦ ꠢꠤꠞꠛꠣꠞ ꠇꠁꠟꠣ, “ꠔꠥꠝꠤ ꠎꠤꠘ꠆ꠖꠣ ꠀꠟ꠆ꠟꠣꠞ ꠇꠍꠝ ꠈꠣꠁꠀ ꠇꠅ ꠌꠣꠁꠘ, ꠔꠥꠝꠤ ꠇꠤꠔꠣ ꠀꠟ꠆ꠟꠣꠞ ꠅꠀꠖꠣ ꠇꠞꠣ ꠢꠃ ꠀꠟ-ꠝꠍꠤ ꠘꠤ, ꠔꠥꠝꠤꠃ ꠀꠟ꠆ꠟꠣꠞ ꠈꠣꠍ ꠝꠣꠄꠀꠞ ꠎꠘ ꠁꠛꠘꠥꠟ꠆ꠟꠣ ꠘꠤ?”
MAT 26:64 ꠔꠣꠁꠘ ꠎꠥꠀꠙ ꠖꠤꠟꠣ, “ꠀꠙꠘꠣꠞꠣꠃ ꠔ ꠇꠁꠞꠣ। ꠅꠁꠟꠦ ꠀꠝꠤ ꠇꠁꠞꠣꠝ, ꠀꠙꠘꠣꠞꠣ ꠖꠦꠈꠛꠣꠘꠦ, ꠀꠝꠤ ꠛꠤꠘ-ꠀꠖꠝ ꠀꠞꠡꠦ-ꠀꠎꠤꠝꠅ ꠀꠟ꠆ꠟꠣ ꠞꠣꠛ꠆ꠛꠥꠟ ꠀꠟꠣꠝꠤꠘꠞ ꠒꠣꠁꠘꠞ ꠔꠈ꠆ꠔꠅ ꠛꠅꠀꠔ ꠀꠍꠤ। ꠀꠞꠅ ꠖꠦꠈꠛꠣ, ꠀꠝꠤ ꠛꠦꠢꠦꠡ꠆ꠔꠤ ꠝꠦꠊꠞ ꠈꠥꠐꠤꠔ ꠅꠁꠀ ꠖꠥꠘꠤꠀꠔ ꠀꠁꠀꠞ।”
MAT 26:65 ꠁꠈꠣꠘ ꠢꠥꠘꠤꠀꠃ ꠙꠞꠗꠣꠘ ꠁꠝꠣꠝꠦ ꠘꠤꠎꠞ ꠚꠤꠘ꠆ꠘꠞ ꠇꠣꠙꠠ ꠍꠤꠠꠤꠀ ꠇꠁꠟꠣ, “ꠢꠦ ꠔ ꠡꠤꠞꠤꠇꠤ ꠇꠞꠟ, ꠔꠦ ꠀꠞ ꠇꠥꠘꠥ ꠡꠣꠇ꠆ꠇꠤꠞ ꠎꠞꠥꠞ ꠀꠍꠦ ꠘꠤ? ꠀꠙꠘꠣꠞꠣ ꠘꠤꠎꠞ ꠇꠣꠘꠦꠃ ꠔ ꠢꠥꠘꠟꠣ, ꠢꠦ ꠡꠤꠞꠤꠇꠤ ꠇꠞꠟ।
MAT 26:66 ꠔꠦ ꠅꠈꠘ ꠀꠙꠘꠣꠞꠣ ꠇꠤꠔꠣ ꠞꠣꠄ ꠖꠤꠛꠣ?” ꠔꠣꠞꠣ ꠇꠁꠟꠣ, “ꠄꠞꠦ ꠔ ꠝꠣꠞꠤꠟꠣꠅꠀ ꠖꠞꠇꠣꠞ।”
MAT 26:67 ꠅꠃ ꠡꠝꠄ ꠔꠣꠞꠣ ꠔꠣꠘ ꠝꠥꠈꠅ ꠍꠦꠚ ꠖꠤꠟ, ꠀꠞ ꠔꠣꠘꠞꠦ ꠌꠠ-ꠔꠣꠛꠠ ꠝꠣꠞꠟ। ꠇꠦꠃ ꠇꠦꠃ ꠊꠥꠡꠤ ꠝꠣꠞꠤꠀ ꠇꠁꠟ,
MAT 26:68 “ꠢꠂ ꠀꠟ-ꠝꠍꠤ, ꠉꠣꠁꠛꠤ ꠇꠅ ꠌꠣꠁꠘ, ꠔꠞꠦ ꠇꠦꠉꠤꠄ ꠝꠣꠞꠟ?”
MAT 26:69 ꠙꠤꠔꠞ ꠃꠑꠣꠘꠅ ꠛꠅꠀꠔ ꠀꠍꠟꠣ, ꠅꠃ ꠡꠝꠄ ꠄꠇ ꠛꠣꠘ꠆ꠖꠤ ꠛꠦꠐꠤ ꠔꠣꠘ ꠇꠣꠘ꠆ꠖꠣꠔ ꠀꠁꠀ ꠇꠁꠟ, “ꠉꠣꠟꠤꠟꠞ ꠅꠃ ꠁꠍꠣꠞ ꠟꠉꠦ ꠔ ꠀꠙꠘꠦꠅ ꠀꠍꠟꠣ।”
MAT 26:70 ꠅꠁꠟꠦ ꠙꠤꠔꠞꠦ ꠢꠇꠟꠞ ꠍꠣꠝꠘꠦ ꠅꠡ꠆ꠛꠤꠇꠣꠞ ꠇꠞꠤꠀ ꠇꠁꠟꠣ, “ꠘꠣ ꠉ, ꠔꠥꠝꠤ ꠁꠔꠣ ꠇꠤꠔꠣ ꠝꠣꠔꠅ? ꠁꠔꠣ ꠇꠥꠘ꠆ꠔꠣꠃ ꠀꠝꠤ ꠎꠣꠘꠤ ꠘꠣ।”
MAT 26:71 ꠅꠈꠣꠘ ꠇꠁꠀ ꠙꠤꠔꠞ ꠉꠦꠁꠐꠞ ꠗꠣꠞꠅ ꠉꠦꠟꠣꠉꠤ। ꠔꠣꠘꠞꠦ ꠖꠦꠈꠤꠀ ꠀꠞꠇ ꠛꠣꠘ꠆ꠖꠤ ꠛꠦꠐꠤꠄ ꠇꠁꠟ, “ꠅꠃ ꠛꠦꠐꠣꠅ ꠔ ꠘꠣꠍꠣꠞꠔ ꠉꠣꠃꠞ ꠁꠍꠣꠞ ꠟꠉꠦ ꠀꠍꠤꠟ।”
MAT 26:72 ꠅꠁꠟꠦ ꠙꠤꠔꠞꠦ ꠢꠤꠞꠛꠣꠞ ꠇꠍꠝ ꠇꠞꠤ ꠇꠁꠟꠣ, “ꠘꠣ, ꠘꠣ, ꠀꠝꠤ ꠔꠣꠞꠦ ꠌꠤꠘꠤꠃ ꠘꠣ।”
MAT 26:73 ꠅꠃ ꠡꠝꠄ ꠔꠣꠘ ꠇꠣꠘ꠆ꠖꠣꠔ ꠎꠦꠞꠣ ꠃꠛꠣ ꠀꠍꠤꠟ, ꠕꠥꠠꠣ ꠛꠣꠖꠦ ꠔꠣꠞꠣ ꠇꠁꠟꠣ, “ꠅꠛꠣ, ꠔꠥꠝꠤꠅ ꠘꠤꠌ꠆ꠌꠄ ꠄꠞꠣꠞ ꠟꠉꠞ, ꠔꠥꠝꠣꠞ ꠝꠣꠔ-ꠇꠕꠣꠄꠃ ꠔ ꠛꠥꠎꠣ ꠎꠣꠞ।”
MAT 26:74 ꠔꠦꠃ ꠙꠤꠔꠞꠦ ꠇꠁꠟꠣ, “ꠀꠟ꠆ꠟꠣꠞ ꠉꠎꠛ ꠙꠠꠃꠇ, ꠀꠝꠤ ꠇꠍꠝ ꠈꠣꠁꠀ ꠇꠁꠀꠞ, ꠀꠝꠤ ꠝꠥꠐꠦꠃ ꠔꠣꠞꠦ ꠌꠤꠘꠤ ꠘꠣ।”
MAT 26:75 ꠅꠈꠣꠘ ꠇꠁꠔꠦꠃ ꠝꠥꠞꠉꠣꠄ ꠛꠣꠋ ꠖꠤꠟꠣꠁꠟ। ꠛꠣꠋ ꠢꠥꠘꠔꠦꠃ ꠙꠤꠔꠞꠞ ꠝꠘꠅ ꠅꠁꠉꠦꠟ, ꠁꠍꠣꠄ ꠀꠉꠦ ꠇꠁꠍꠟꠣ, “ꠝꠥꠞꠉꠣꠄ ꠛꠣꠋ ꠖꠤꠛꠣꠞ ꠀꠉꠦꠃ ꠔꠥꠝꠤ ꠔꠤꠘꠛꠣꠞ ꠇꠁꠛꠣꠄ, ꠔꠥꠝꠤ ꠀꠝꠣꠞꠦ ꠌꠤꠘꠅ ꠘꠣ।” ꠄꠞꠟꠣꠉꠤ ꠔꠣꠁꠘ ꠛꠣꠞꠦ ꠉꠤꠀ ꠀꠃ-ꠀꠃ ꠇꠞꠤ ꠇꠣꠘ꠆ꠖꠘ ꠗꠞꠟꠣ।
MAT 27:1 ꠛꠤꠀꠘꠦ ꠃꠑꠤꠀ ꠛꠠ ꠁꠝꠣꠝ ꠀꠞ ꠝꠥꠞꠛ꠆ꠛꠤ ꠅꠇꠟꠦ ꠢꠎꠞꠔ ꠁꠍꠣꠞꠦ ꠎꠣꠘꠦ ꠝꠣꠞꠣꠞ ꠙꠞꠣꠝꠤꠡ ꠇꠞꠟꠣ।
MAT 27:2 ꠔꠣꠞꠣ ꠔꠣꠘꠞꠦ ꠛꠣꠘ꠆ꠖꠤꠀ ꠞꠥꠝꠣꠘ ꠢꠣꠇꠤꠝ ꠙꠤꠟꠣꠔꠞ ꠉꠦꠍꠦ ꠟꠁꠀ ꠉꠦꠟꠣ।
MAT 27:3 ꠎꠦ ꠎꠘꠦ ꠢꠎꠞꠔ ꠁꠍꠣꠞꠦ ꠖꠥꠡꠝꠘꠞ ꠀꠔꠅ ꠗꠞꠣꠁ ꠖꠤꠍꠤꠟ, ꠢꠃ ꠁꠢꠥꠖꠣꠄ ꠎꠦꠛꠟꠣ ꠖꠦꠈꠟ ꠛꠤꠌꠣꠞꠅ ꠔꠣꠘꠞꠦ ꠖꠥꠡꠤ ꠡꠣꠁꠛꠡ꠆ꠔ ꠇꠞꠣ ꠅꠁꠍꠦ, ꠅꠃ ꠔꠣꠞ ꠜꠤꠔꠞꠦ ꠈꠥꠛ ꠖꠥꠈ ꠢꠣꠝꠣꠁꠟ। ꠢꠦ ꠛꠠ ꠁꠝꠣꠝ ꠀꠞ ꠝꠥꠞꠛ꠆ꠛꠤ ꠅꠇꠟꠞ ꠉꠦꠍꠦ ꠢꠃ ꠞꠥꠙꠣꠞ ꠔꠤꠡ ꠐꠦꠇꠣ ꠟꠁꠀ ꠀꠁꠀ ꠇꠁꠟ,
MAT 27:4 “ꠀꠝꠤ ꠔ ꠄꠇꠎꠘ ꠘꠤ-ꠅꠙꠞꠣꠗꠤ ꠝꠣꠘꠡꠞꠦ ꠎꠣꠘꠦ ꠝꠣꠞꠤꠟꠤꠛꠣꠞ ꠟꠣꠉꠤ ꠗꠞꠣꠁ ꠖꠤꠀ ꠉꠥꠘꠣ ꠇꠞꠍꠤ।” ꠁꠈꠣꠘ ꠢꠥꠘꠤꠀ ꠔꠣꠞꠣ ꠇꠁꠟꠣ, “ꠔꠦꠃ ꠀꠝꠞꠣꠞ ꠇꠤꠔꠣ ꠅꠁꠟ? ꠁꠔꠣ ꠔ ꠔꠥꠝꠣꠞ ꠛꠦꠙꠣꠞ।”
MAT 27:5 ꠅꠃ ꠡꠝꠄ ꠁꠢꠥꠖꠣꠄ ꠢꠃ ꠔꠤꠡ ꠐꠦꠇꠣ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠅ ꠁꠐꠣ ꠝꠣꠞꠤ ꠚꠣꠟꠣꠁꠀ ꠉꠦꠟꠉꠤ, ꠉꠤꠀ ꠘꠤꠎꠦ ꠘꠤꠎꠦꠃ ꠚꠣꠡ ꠟꠣꠉꠤꠀ ꠝꠞꠤꠉꠦꠟ।
MAT 27:6 ꠛꠠ ꠁꠝꠣꠝ ꠅꠇꠟꠦ ꠁ ꠐꠦꠇꠣ ꠀꠔꠅ ꠟꠁꠀ ꠇꠁꠟꠣ, “ꠁꠉꠥꠁꠘ ꠔ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠞ ꠔꠢꠛꠤꠟꠅ ꠞꠣꠈꠣ ꠑꠤꠇ ꠘꠣꠄ, ꠇꠣꠞꠘ ꠁꠔꠣ ꠅꠁꠟ ꠟꠃꠞ ꠖꠣꠝ।”
MAT 27:7 ꠛꠣꠖꠦ ꠔꠣꠞꠣ ꠙꠞꠣꠝꠤꠡ ꠇꠞꠤꠀ ꠅꠃ ꠐꠦꠇꠣꠖꠤ ꠝꠥꠍꠣꠚꠤꠞ ꠝꠣꠘꠡꠞ ꠇꠛꠞꠡ꠆ꠕꠣꠘꠞ ꠟꠣꠉꠤ ꠄꠇ ꠇꠥꠝꠣꠞꠞ ꠉꠦꠍ ꠕꠣꠇꠤ ꠎꠣꠉꠣ ꠟꠁꠟꠣ।
MAT 27:8 ꠄꠞꠟꠣꠉꠤ ꠅꠃ ꠎꠣꠉꠣꠞꠦ ꠅꠈꠘꠅ ‘ꠟꠃꠞ ꠎꠣꠉꠣ’ ꠇꠅꠀ ꠅꠄ।
MAT 27:9 ꠁꠔꠣ ꠅꠀꠄ, ꠁꠀꠞꠝꠤꠀ ꠘꠛꠤꠞ ꠝꠣꠎꠖꠤ ꠎꠦꠔꠣ ꠛꠣꠔꠣꠁꠟ ꠅꠁꠍꠤꠟ, ꠅꠔꠣ ꠚꠟꠤꠉꠦꠟ। ꠔꠣꠁꠘ ꠇꠁꠍꠟꠣ, “ꠔꠣꠞꠣ ꠎꠦ ꠔꠤꠡ ꠐꠦꠇꠣ ꠘꠤꠟ, ꠁꠇꠐꠣ ꠅꠁꠟ ꠔꠣꠘ ꠖꠣꠝ। ꠛꠘꠤ ꠁꠍꠞꠣꠁꠟꠦ ꠔꠣꠘ ꠅꠃ ꠖꠣꠝ ꠡꠣꠁꠛꠡ꠆ꠔ ꠇꠞꠍꠤꠟ।
MAT 27:10 ꠀꠟ꠆ꠟꠣꠄ ꠀꠝꠣꠞꠦ ꠎꠦꠟꠣ ꠢꠥꠇꠥꠝ ꠖꠤꠍꠂꠘ, ꠅꠟꠣꠃ ꠔꠣꠞꠣ ꠇꠥꠝꠣꠞꠞ ꠎꠣꠉꠣ ꠟꠅꠀꠞ ꠟꠣꠉꠤ ꠐꠦꠇꠣ ꠉꠥꠁꠘ ꠖꠤꠟ।”
MAT 27:11 ꠢꠎꠞꠔ ꠁꠍꠣꠞꠦ ꠞꠥꠝꠣꠘ ꠙꠞꠗꠣꠘ ꠢꠣꠇꠤꠝ ꠙꠤꠟꠣꠔꠞ ꠀꠖꠣꠟꠔꠅ ꠀꠎꠤꠞ ꠇꠞꠣ ꠅꠁꠟ। ꠢꠣꠇꠤꠝꠦ ꠔꠣꠘꠞꠦ ꠎꠤꠇꠣꠁꠟꠣ, “ꠇꠤꠔꠣ ꠛꠣ, ꠔꠥꠝꠤ ꠁꠢꠥꠖꠤ ꠅꠇꠟꠞ ꠛꠣꠖꠡꠣ ꠘꠤ?” ꠔꠣꠁꠘ ꠇꠁꠟꠣ, “ꠎꠤꠅꠄ, ꠀꠙꠘꠦ ꠑꠤꠇꠃ ꠇꠁꠞꠣ।”
MAT 27:12 ꠛꠠ ꠁꠝꠣꠝ ꠀꠞ ꠝꠥꠞꠛ꠆ꠛꠤ ꠅꠇꠟꠦ ꠔꠣꠘ ꠘꠣꠝꠦ ꠛꠃꠔ ꠘꠣꠟꠤꠡ ꠖꠤꠟꠣ। ꠅꠁꠟꠦ ꠁꠍꠣꠄ ꠇꠥꠘꠥ ꠎꠥꠀꠙ ꠖꠤꠟꠣ ꠘꠣ।
MAT 27:13 ꠅꠃ ꠡꠝꠄ ꠙꠤꠟꠣꠔꠦ ꠎꠤꠇꠣꠁꠟꠣ, “ꠔꠥꠝꠤ ꠇꠥꠘꠥ ꠎꠥꠀꠙ ꠖꠤꠔꠣꠄ ꠘꠣ ꠘꠤ? ꠖꠦꠈꠞꠣꠄ ꠘꠤ, ꠔꠣꠞꠣ ꠔꠥꠝꠣꠞ ꠛꠤꠞꠥꠖ꠆ꠖꠦ ꠇꠔ ꠘꠣꠟꠤꠡ ꠖꠤꠞꠣ।”
MAT 27:14 ꠅꠁꠟꠦ ꠁꠍꠣꠄ ꠁꠔꠣꠞ ꠄꠇꠈꠣꠘꠅ ꠎꠥꠀꠙ ꠘꠣ ꠖꠦꠅꠀꠄ ꠙꠤꠟꠣꠔ ꠈꠥꠛ ꠔꠣꠁꠎ꠆ꠎꠥꠛ ꠅꠁꠉꠦꠟꠣ।
MAT 27:15 ꠖꠦꠡꠞ ꠙꠞꠗꠣꠘ ꠢꠣꠇꠤꠝꠞ ꠘꠤꠅꠝ ꠀꠍꠤꠟ, ꠀꠎꠣꠖꠤ ꠁꠖꠞ ꠡꠝꠄ ꠝꠣꠘꠡꠞ ꠙꠍꠘ꠆ꠖ ꠝꠣꠚꠤꠇ ꠄꠇꠎꠘ ꠀꠎꠔꠤꠞꠦ ꠈꠣꠟꠣꠍ ꠖꠤꠔꠣ।
MAT 27:16 ꠅꠃ ꠡꠝꠄ ꠁꠍꠣ-ꠛꠣꠞꠣꠛ꠆ꠛꠣ ꠘꠣꠝꠞ ꠄꠇ ꠘꠣꠝꠇꠞꠣ ꠀꠎꠔꠤ ꠎꠦꠟꠅ ꠀꠍꠤꠟ।
MAT 27:17 ꠢꠇꠟ ꠝꠣꠘꠥꠡ ꠄꠇꠈꠣꠘꠅ ꠖꠟꠣ ꠅꠀꠞ ꠛꠣꠖꠦ ꠢꠣꠇꠤꠝ ꠙꠤꠟꠣꠔꠦ ꠔꠣꠞꠣꠞꠦ ꠎꠤꠇꠣꠁꠟꠣ, “ꠔꠥꠝꠞꠣ ꠇꠤꠔꠣ ꠇꠅ? ꠀꠝꠤ ꠇꠣꠞꠦ ꠍꠣꠠꠔꠣꠝ, ꠁꠍꠣ-ꠛꠣꠞꠣꠛ꠆ꠛꠣꠞꠦ, ꠘꠣ ꠢꠃ ꠁꠍꠣꠞꠦ, ꠎꠣꠞꠦ ꠀꠟ-ꠝꠍꠤ ꠇꠅꠀ ꠅꠄ?”
MAT 27:18 ꠙꠤꠟꠣꠔꠦ ꠎꠣꠘꠔꠣ, ꠛꠠ ꠁꠝꠣꠝ ꠅꠇꠟꠦ ꠁꠋꠡꠣ ꠇꠞꠤꠀ ꠢꠎꠞꠔ ꠁꠍꠣꠞꠦ ꠘꠤꠀ ꠔꠣꠘ ꠀꠔꠅ ꠖꠤꠍꠂꠘ।
MAT 27:19 ꠙꠤꠟꠣꠔ ꠎꠦꠛꠟꠣ ꠢꠣꠇꠤꠝꠞ ꠀꠡꠘꠅ ꠛꠅꠀꠔ, ꠅꠃ ꠡꠝꠄ ꠔꠣꠘ ꠛꠤꠛꠤꠄ ꠈꠛꠞ ꠙꠣꠑꠣꠁꠀ ꠎꠣꠘꠣꠁꠟꠣ, “ꠅꠃ ꠘꠤꠅꠙꠞꠣꠗ ꠝꠣꠘꠡꠞꠦ ꠔꠥꠝꠤ ꠇꠥꠘ꠆ꠔꠣ ꠇꠞꠤꠅ ꠘꠣ, ꠔꠣꠘ ꠛꠦꠙꠣꠞꠦ ꠀꠝꠤ ꠀꠁꠎ ꠄꠇꠐꠣ ꠈꠥꠀꠛ ꠖꠦꠈꠤꠀ ꠛꠠ ꠖꠥꠈ ꠟꠣꠉꠍꠦ।”
MAT 27:20 ꠅꠁꠟꠦ ꠛꠠ ꠁꠝꠣꠝ ꠀꠞ ꠝꠥꠞꠛ꠆ꠛꠤ ꠅꠇꠟꠦ ꠝꠣꠘꠡꠞꠦ ꠃꠍꠇꠣꠁꠀ ꠖꠤꠟꠣ, ꠔꠣꠞꠣ ꠎꠣꠘꠥ ꠛꠣꠞꠣꠛ꠆ꠛꠣꠞ ꠝꠥꠇ꠆ꠔꠤ ꠌꠣꠁꠘ ꠀꠞ ꠁꠍꠣꠞꠦ ꠎꠣꠘꠦ ꠝꠣꠞꠤꠟꠤꠛꠣꠞ ꠟꠣꠉꠤ ꠇꠂꠘ।
MAT 27:21 ꠛꠣꠖꠦ ꠙꠞꠗꠣꠘ ꠢꠣꠇꠤꠝ ꠙꠤꠟꠣꠔꠦ ꠅꠘꠞ ꠝꠣꠘꠡꠞꠦ ꠎꠤꠇꠣꠁꠟꠣ, “ꠅꠃ ꠖꠥꠁꠅꠎꠘꠞ ꠝꠣꠎꠦ ꠀꠝꠤ ꠇꠣꠞꠦ ꠍꠣꠠꠔꠣꠝ?” ꠔꠣꠞꠣ ꠇꠁꠟꠣ, “ꠛꠣꠞꠣꠛ꠆ꠛꠣꠞꠦ।”
MAT 27:22 ꠔꠦꠃ ꠙꠤꠟꠣꠔꠦ ꠔꠣꠞꠣꠞꠦ ꠎꠤꠇꠣꠁꠟꠣ, “ꠔꠦ ꠔꠥꠝꠞꠣ ꠎꠣꠞꠦ ꠀꠟ-ꠝꠍꠤ ꠇꠅ, ꠢꠃ ꠁꠍꠣꠞꠦ ꠇꠤꠔꠣ ꠇꠞꠔꠣꠝ?” ꠔꠣꠞꠣ ꠢꠇꠟꠦ ꠌꠤꠟ꠆ꠟꠣꠘꠤ ꠟꠣꠉꠣꠁꠟ, “ꠔꠣꠞꠦ ꠍꠟꠤꠛꠅ ꠉꠣꠕꠤꠀ ꠝꠣꠞꠅ।”
MAT 27:23 ꠔꠣꠁꠘ ꠇꠁꠟꠣ, “ꠇꠦꠘꠦ, ꠢꠦ ꠇꠤꠔꠣ ꠖꠥꠡ ꠇꠞꠍꠦ?” ꠅꠁꠟꠦ ꠝꠣꠘꠡꠦ ꠀꠞꠅ ꠎꠥꠞꠦ ꠎꠥꠞꠦ ꠝꠤꠍꠤꠟ ꠟꠣꠉꠣꠁꠟ, “ꠍꠟꠤꠛꠅ ꠖꠦꠅ, ꠍꠟꠤꠛꠅ ꠖꠦꠅ।”
MAT 27:24 ꠙꠤꠟꠣꠔꠦ ꠎꠦꠛꠟꠣ ꠖꠦꠈꠟꠣ, ꠔꠣꠁꠘ ꠇꠥꠘꠥꠝꠘ꠆ꠔꠦꠃ ꠁꠍꠣꠞꠦ ꠛꠣꠌꠣꠁꠔꠣ ꠙꠣꠞꠞꠣ ꠘꠣ, ꠛꠞꠋ ꠉꠘ꠆ꠒꠉꠥꠟ ꠀꠞꠅ ꠛꠣꠠꠦꠞ। ꠅꠃ ꠔꠣꠁꠘ ꠙꠣꠘꠤ ꠖꠤꠀ ꠢꠇꠟꠞ ꠍꠣꠝꠘꠦ ꠔꠣꠘ ꠀꠔ ꠗꠁꠀ ꠇꠁꠟꠣ, “ꠁ ꠝꠣꠘꠡꠞ ꠟꠃꠞ ꠖꠣꠄꠁ ꠀꠝꠤ ꠘꠣꠄ, ꠔꠥꠝꠞꠣꠃ ꠄꠞ ꠎꠥꠀꠙ ꠖꠤꠛꠣꠄ।”
MAT 27:25 ꠔꠦꠃ ꠢꠇꠟ ꠝꠣꠘꠡꠦ ꠇꠁꠟꠣ, “ꠑꠤꠇ ꠀꠍꠦ, ꠀꠝꠞꠣ ꠀꠞ ꠀꠝꠞꠣꠞ ꠀꠅꠟꠣꠖ ꠅꠇꠟ ꠁ ꠟꠃꠞ ꠖꠣꠄꠁ ꠅꠁꠝꠥ।”
MAT 27:26 ꠔꠦꠃ ꠙꠤꠟꠣꠔꠦ ꠔꠣꠞꠣꠞꠦ ꠈꠥꠡꠤ ꠇꠞꠔꠣ ꠇꠞꠤ ꠛꠣꠞꠣꠛ꠆ꠛꠣꠞꠦ ꠈꠣꠟꠣꠍ ꠖꠤꠟꠣꠁꠟꠣ। ꠀꠞ ꠁꠍꠣꠞꠦ ꠛꠦꠡ ꠇꠞꠤ ꠌꠣꠛꠥꠇ ꠝꠣꠞꠤꠀ, ꠍꠟꠤꠛꠅ ꠖꠦꠅꠀꠞ ꠢꠥꠇꠥꠝ ꠖꠤꠟꠣ। (ꠍꠟꠤꠛ ꠅꠁꠟ ꠟꠣꠇꠠꠤꠖꠤ ꠛꠣꠘꠣꠁꠟ ꠝꠣꠘꠡꠞꠦ ꠟꠐꠇꠣꠁꠀ ꠝꠣꠞꠣꠞ ꠄꠇ ꠎꠤꠘꠤꠡ।)
MAT 27:27 ꠛꠣꠖꠦ ꠙꠤꠟꠣꠔꠞ ꠍꠤꠙꠣꠁ ꠅꠇꠟꠦ ꠁꠍꠣꠞꠦ ꠗꠞꠤꠀ ꠔꠣꠞꠣꠞ ꠇꠦꠝ꠆ꠙꠞ ꠜꠤꠔꠞꠦ ꠟꠁꠀ ꠉꠦꠟ। ꠢꠘꠅ ꠀꠡ꠆ꠔꠣ ꠍꠤꠙꠣꠁ ꠖꠟ ꠖꠤꠀ ꠔꠣꠘꠞꠦ ꠛꠦꠞ ꠇꠞꠤ ꠞꠣꠈꠟ।
MAT 27:28 ꠔꠣꠞꠣ ꠔꠣꠘ ꠚꠤꠘ꠆ꠘꠞ ꠇꠣꠙꠠ-ꠌꠥꠙꠠ ꠈꠥꠟꠤꠀ, ꠟꠣꠟ-ꠛꠣꠁꠋꠉꠘꠤ ꠞꠋꠉꠞ ꠛꠣꠖꠡꠣꠁ ꠟꠦꠛꠣꠍ ꠚꠤꠘ꠆ꠖꠣꠁꠟ।
MAT 27:29 ꠀꠞ ꠉꠍꠣ-ꠇꠣꠐꠣ ꠖꠤꠀ ꠞꠣꠎ-ꠝꠥꠇꠥꠐ ꠛꠣꠘꠣꠁꠀ ꠔꠣꠘ ꠝꠣꠕꠣꠔ ꠖꠤꠟ। ꠔꠣꠘ ꠒꠣꠁꠘ ꠀꠔꠅ ꠖꠤꠟ ꠄꠇꠐꠣ ꠞꠣꠎ-ꠟꠣꠑꠤ। ꠔꠣꠘꠦ ꠁꠎ꠆ꠎꠔ ꠖꠦꠈꠣꠘꠤꠞ ꠜꠣꠘ ꠇꠞꠤꠀ ꠔꠣꠘ ꠍꠣꠝꠘꠦ ꠀꠐꠥ ꠉꠣꠠꠤꠀ ꠛꠁꠀ ꠇꠁꠟ, “ꠁꠢꠥꠖꠤꠞ ꠛꠣꠖꠡꠣ, ꠝꠣꠞꠢꠣꠛꠣ।”
MAT 27:30 ꠅꠃ ꠡꠝꠄ ꠔꠣꠞꠣ ꠔꠣꠘ ꠃꠙꠞꠦ ꠍꠦꠚ ꠖꠤꠟ ꠀꠞ ꠅꠃ ꠟꠣꠑꠤ ꠖꠤꠀ ꠛꠣꠞꠦ ꠛꠣꠞꠦ ꠔꠣꠘ ꠝꠣꠕꠣꠔ ꠝꠣꠞꠟ।
MAT 27:31 ꠅꠃ ꠟꠣꠈꠣꠘ ꠑꠣꠐ꠆ꠐꠣ-ꠝꠡꠇꠞꠣ ꠀꠞ ꠛꠦꠔ꠆ꠔꠝꠤꠎꠤ ꠇꠞꠣꠞ ꠛꠣꠖꠦ ꠔꠣꠘ ꠚꠤꠘ꠆ꠘꠞ ꠛꠣꠁꠋꠉꠘꠤ ꠟꠦꠛꠣꠍ ꠈꠥꠟꠤꠀ, ꠔꠣꠘ ꠘꠤꠎꠞ ꠇꠣꠙꠠ ꠚꠤꠘ꠆ꠖꠣꠁꠟ। ꠔꠣꠘꠞꠦ ꠍꠟꠤꠛꠅ ꠘꠤꠀ ꠎꠣꠘꠦ ꠝꠣꠞꠤꠟꠤꠔꠣ ꠇꠞꠤ ꠞꠅꠀꠘꠣ ꠖꠤꠟ।
MAT 27:32 ꠍꠤꠙꠣꠁ ꠖꠟꠦ ꠁꠍꠣꠞꠦ ꠟꠁꠀ ꠎꠣꠁꠞꠣ, ꠅꠃ ꠡꠝꠄ ꠔꠣꠞꠣ ꠇꠥꠞꠤꠘꠤ ꠄꠟꠣꠇꠣꠞ ꠍꠣꠁꠝꠘ ꠘꠣꠝꠞ ꠄꠇꠎꠘ ꠝꠣꠘꠡꠞꠦ ꠖꠦꠈꠟ। ꠍꠤꠙꠣꠁ ꠅꠇꠟꠦ ꠎꠥꠞ ꠇꠞꠤꠀ ꠄꠘꠦꠖꠤ ꠢꠃ ꠍꠟꠤꠛ ꠛꠅꠀꠁꠀ ꠘꠦꠅꠀꠁꠟ।
MAT 27:33 ꠔꠣꠞꠣ ꠁꠍꠣꠞꠦ ꠟꠁꠀ ꠉꠟꠉꠣꠕꠣ, ꠝꠣꠘꠤ ꠇꠟ꠆ꠟꠣꠞ ꠌꠣꠠ ꠘꠣꠝꠞ ꠎꠣꠉꠣꠔ ꠉꠦꠟ।
MAT 27:34 ꠢꠘꠅ ꠘꠤꠀ ꠢꠣꠞꠤ ꠝꠥꠞꠣ ꠘꠣꠝꠞ ꠅꠡꠥꠗ ꠙꠥꠞꠣꠁꠟ ꠀꠋꠉꠥꠞꠞ ꠡꠞꠛꠔ ꠔꠣꠘ ꠝꠥꠈꠅ ꠖꠤꠟ, ꠅꠁꠟꠦ ꠔꠣꠁꠘ ꠁꠔꠣ ꠈꠣꠁꠟꠣ ꠘꠣ।
MAT 27:35 ꠛꠣꠖꠦ ꠔꠣꠞꠣ ꠁꠍꠣꠞꠦ ꠘꠤꠀ ꠅꠃ ꠍꠟꠤꠛꠅ ꠉꠣꠕꠤꠟ। ꠍꠤꠙꠣꠁ ꠅꠇꠟꠦ ꠔꠣꠘ ꠇꠣꠙꠠ-ꠌꠥꠙꠠ ꠛꠣꠐꠤꠀ ꠘꠦꠅꠀꠞ ꠟꠣꠉꠤ ꠟꠐꠣꠞꠤ ꠝꠣꠞꠤꠀ ꠜꠣꠁꠉ꠆ꠉ ꠙꠞꠤꠇ꠆ꠇꠣ ꠇꠞꠟ।
MAT 27:36 ꠀꠞ ꠔꠣꠞꠣ ꠅꠘꠅ ꠛꠁꠀ ꠔꠣꠘꠞꠦ ꠙꠣꠞꠣ ꠖꠤꠟ।
MAT 27:37 ꠍꠟꠤꠛꠅ ꠔꠣꠘ ꠝꠣꠕꠣꠞ ꠃꠙꠞꠦ ꠅꠙꠞꠣꠗ-ꠘꠣꠝꠣꠞ ꠝꠣꠎꠦ ꠟꠦꠈꠟ, “ꠄꠘ ꠘꠣꠝ ꠁꠍꠣ, ꠁꠢꠥꠖꠤꠞ ꠛꠣꠖꠡꠣ।”
MAT 27:38 ꠖꠥꠁꠎꠘ ꠒꠣꠇꠣꠁꠔꠞꠦꠅ ꠔꠣꠘ ꠟꠉꠦ ꠟꠐꠇꠣꠁꠟ ꠅꠁꠟ, ꠄꠇꠎꠘ ꠒꠣꠁꠘ ꠉꠣꠟꠣꠔ, ꠅꠁꠘ꠆ꠘꠎꠘ ꠛꠣꠃ ꠉꠣꠟꠣꠔ।
MAT 27:39 ꠙꠕꠦꠖꠤ ꠎꠦꠞꠣ ꠎꠣꠅꠀꠔ ꠀꠍꠤꠟ ꠔꠣꠞꠣ ꠝꠣꠕꠣ ꠟꠣꠠꠣꠁꠀ ꠁꠍꠣꠞꠦ ꠍꠤꠠꠣꠁꠀ ꠇꠁꠟ,
MAT 27:40 “ꠅꠂ ꠝꠤꠀ, ꠔꠥꠝꠤ ꠛꠥꠟꠦ ꠛꠣꠄꠔꠥꠟ-ꠝꠥꠇꠣꠖ꠆ꠖꠍ ꠇꠣꠛꠣ ꠊꠞ ꠜꠣꠋꠉꠤꠀ ꠔꠤꠘ ꠖꠤꠘꠞ ꠝꠣꠎꠦ ꠢꠤꠞꠛꠣꠞ ꠛꠣꠘꠣꠁꠟꠤꠛꠣꠄ! ꠔꠦ ꠅꠈꠘ ꠘꠤꠎꠞ ꠎꠣꠘ ꠛꠣꠌꠣꠅ ꠘꠣ। ꠔꠥꠝꠤ ꠛꠥꠟꠦ ꠀꠟ꠆ꠟꠣꠞ ꠈꠣꠍ ꠝꠣꠄꠀꠞ ꠎꠘ ꠁꠛꠘꠥꠟ꠆ꠟꠣ, ꠔꠦ ꠍꠟꠤꠛ ꠕꠣꠇꠤ ꠟꠣꠝꠤꠀ ꠀꠅ ꠘꠣ।”
MAT 27:41 ꠛꠠ ꠁꠝꠣꠝ, ꠝꠃꠟꠣꠘꠣ ꠀꠞ ꠝꠥꠞꠛ꠆ꠛꠤ ꠅꠇꠟꠦꠅ ꠔꠣꠘꠞꠦ ꠍꠤꠠꠣꠁꠀ ꠇꠁꠟꠣ,
MAT 27:42 “ꠢꠦ ꠛꠥꠟꠦ ꠝꠣꠘꠡꠞ ꠎꠣꠘ ꠛꠣꠌꠣꠁꠔ, ꠅꠈꠘ ꠔ ꠘꠤꠎꠞ ꠎꠣꠘꠃ ꠛꠣꠌꠣꠁꠔ ꠙꠣꠞꠦꠞ ꠘꠣ। ꠢꠤꠞꠛꠣꠞ ꠛꠘꠤ ꠁꠍꠞꠣꠁꠟꠞ ꠛꠣꠖꠡꠣꠅ ꠛꠥꠟꠦ ꠢꠦ! ꠔꠦ ꠅꠈꠘ ꠙꠣꠞꠟꠦ ꠍꠟꠤꠛ ꠕꠣꠇꠤ ꠟꠣꠝꠤꠀ ꠀꠃꠇ, ꠔꠦꠃ ꠀꠝꠞꠣꠅ ꠅꠔꠣ ꠖꠦꠈꠤꠀ ꠔꠣꠞ ꠃꠙꠞꠦ ꠁꠝꠣꠘ ꠀꠘꠝꠥ।
MAT 27:43 ꠢꠦ ꠔ ꠀꠟ꠆ꠟꠣꠞ ꠃꠙꠞꠦ ꠜꠞꠡꠣ ꠇꠞꠦ। ꠅꠈꠘ ꠀꠟ꠆ꠟꠣ ꠎꠥꠖꠤ ꠔꠣꠞ ꠃꠙꠞꠦ ꠈꠥꠡꠤ ꠕꠣꠇꠂꠘ, ꠔꠦ ꠔꠣꠞꠦ ꠛꠣꠌꠣꠃꠇ꠆ꠇꠣ। ꠢꠦ ꠔ ꠖꠣꠛꠤ ꠇꠞꠔ, ꠢꠦ ꠁꠛꠘꠥꠟ꠆ꠟꠣ, ꠀꠟ꠆ꠟꠣ ꠙꠣꠇꠞ ꠈꠣꠍ ꠝꠣꠄꠀꠞ ꠎꠘ।”
MAT 27:44 ꠔꠣꠘ ꠒꠣꠁꠘꠦ-ꠛꠣꠃꠄ ꠎꠦ ꠖꠥꠁ ꠒꠣꠇꠣꠁꠔꠞꠦ ꠍꠟꠤꠛꠅ ꠟꠐꠇꠣꠁꠟ ꠅꠁꠍꠤꠟ, ꠔꠣꠞꠣꠅ ꠔꠣꠘꠞꠦ ꠅꠔꠣ ꠇꠁꠀ ꠍꠤꠠꠣꠁꠟ।
MAT 27:45 ꠅꠃ ꠖꠤꠘ ꠖꠥꠁꠚꠞ ꠕꠣꠇꠤ ꠎꠥꠢꠞꠞ ꠛꠣꠖ ꠙꠞ꠆ꠎꠘ꠆ꠔ ꠔꠤꠘ ꠊꠘ꠆ꠐꠣ ꠀꠡ꠆ꠔꠣ ꠖꠦꠡ ꠀꠘ꠆ꠖꠣꠁꠞ ꠅꠁꠉꠦꠟ।
MAT 27:46 ꠀꠞ ꠁꠍꠣꠄ ꠈꠥꠛ ꠎꠥꠞꠦ ꠎꠥꠞꠦ ꠇꠁꠟꠣ, “ꠄꠟꠥꠁ, ꠄꠟꠥꠁ, ꠟꠣꠝꠣ ꠡꠣꠛꠣꠇ꠆ꠔꠣꠘꠤ?” ꠝꠣꠘꠤ, “ꠅ ꠀꠝꠣꠞ ꠀꠟ꠆ꠟꠣ, ꠀꠝꠣꠞ ꠝꠃꠟꠣ, ꠔꠥꠝꠤ ꠇꠦꠘꠦ ꠀꠝꠣꠞ ꠟꠉ ꠍꠣꠠꠤ ꠖꠤꠟꠣꠄ?”
MAT 27:47 ꠅꠃ ꠡꠝꠄ ꠔꠣꠘ ꠗꠣꠞꠅ ꠎꠣꠞꠣ ꠃꠛꠣ ꠀꠍꠤꠟ, ꠔꠣꠞꠣ ꠁꠈꠣꠘ ꠢꠥꠘꠤꠀ ꠇꠁꠟꠣ, “ꠢꠥꠘꠅ, ꠢꠥꠘꠅ, ꠢꠦ ꠢꠎꠞꠔ ꠁꠟꠤꠀꠍꠞꠦ ꠒꠣꠇꠦꠞ।”
MAT 27:48 ꠔꠣꠞꠣ ꠄꠇꠎꠘꠦ ꠖꠃꠠꠣꠁꠀ ꠉꠤꠀ ꠄꠇꠈꠣꠘ ꠔꠦꠘꠣ ꠀꠘꠤꠀ ꠐꠦꠋꠉꠣ ꠀꠋꠉꠥꠞꠞ ꠡꠞꠛꠔꠞ ꠝꠣꠎꠦ ꠜꠤꠎꠣꠁꠀ, ꠄꠇ ꠟꠣꠑꠤꠞ ꠝꠣꠕꠣꠔ ꠛꠣꠘ꠆ꠖꠤꠀ ꠃꠌꠣ ꠇꠞꠤ ꠔꠣꠘꠞꠦ ꠈꠣꠁꠔꠦ ꠖꠤꠟ।
MAT 27:49 ꠛꠣꠇꠤ ꠢꠇꠟꠦ ꠇꠁꠟ, “ꠀꠁꠌ꠆ꠍꠣ, ꠖꠦꠈꠤ ꠘꠣ, ꠁꠟꠤꠀꠍ ꠘꠛꠤ ꠔꠣꠞꠦ ꠛꠣꠌꠣꠘꠤꠔ ꠀꠁꠘ ꠘꠤ।”
MAT 27:50 ꠢꠦꠡꠦ ꠁꠍꠣꠄ ꠢꠤꠞꠛꠣꠞ ꠎꠥꠞꠦ ꠀꠅꠀꠎ ꠇꠞꠤꠀ ꠀꠈꠦꠞꠤ ꠖꠝ ꠚꠣꠟꠣꠁꠀ ꠁꠘ꠆ꠔꠦꠇꠣꠟ ꠇꠞꠟꠣ।
MAT 27:51 ꠟꠉꠦ ꠟꠉꠦ ꠛꠣꠄꠔꠥꠟ-ꠝꠥꠇꠣꠖ꠆ꠖꠍ ꠝꠣꠘꠤ ꠇꠣꠛꠣ ꠊꠞꠞ ꠢꠦꠞꠦꠝ ꠡꠞꠤꠚꠞ ꠙꠞ꠆ꠖꠣꠈꠣꠘ, ꠃꠙꠞꠦ ꠕꠣꠇꠤ ꠔꠟ ꠙꠞ꠆ꠎꠘ꠆ꠔ ꠍꠤꠠꠤꠀ ꠖꠥꠁ ꠐꠥꠇꠞꠣ ꠅꠁꠉꠦꠟ। ꠀꠞ ꠜꠂꠍꠣꠟꠞ ꠟꠉꠦ ꠛꠠ ꠛꠠ ꠙꠣꠔ꠆ꠔꠞ ꠅꠇꠟ ꠚꠣꠐꠤ ꠉꠦꠟ।
MAT 27:52 ꠛꠃꠔ ꠇꠄꠛꠞꠞ ꠝꠥꠈ ꠈꠥꠟꠤꠉꠦꠟ, ꠀꠞ ꠀꠟ꠆ꠟꠣꠞ ꠝꠣꠄꠀꠞ ꠎꠦ ꠛꠘ꠆ꠖꠣ ꠅꠇꠟ ꠝꠣꠞꠣ ꠉꠦꠍꠟꠣ, ꠄꠞꠣ ꠛꠃꠔ ꠎꠘ ꠎꠤꠘ꠆ꠖꠣ ꠅꠁꠀ ꠃꠑꠟꠣ।
MAT 27:53 ꠔꠣꠞꠣ ꠇꠄꠛꠞ ꠕꠣꠇꠤ ꠛꠣꠞ ꠅꠁꠀ ꠀꠁꠟꠣ। ꠁꠍꠣ ꠝꠥꠞ꠆ꠖꠣ ꠕꠣꠇꠤ ꠎꠤꠘ꠆ꠖꠣ ꠅꠁꠀ ꠢꠣꠞꠟꠦ, ꠔꠣꠞꠣ ꠙꠛꠤꠔ꠆ꠞ ꠐꠣꠃꠘꠅ ꠉꠤꠀ ꠢꠣꠝꠣꠁꠟꠣ, ꠀꠞ ꠛꠃꠔ ꠎꠘꠞꠦ ꠖꠦꠈꠣ ꠖꠤꠟꠣ।
MAT 27:54 ꠙꠞꠗꠣꠘ ꠍꠤꠙꠣꠁꠞ ꠟꠉꠦ ꠀꠞꠅ ꠎꠦꠔꠣ ꠍꠤꠙꠣꠁ ꠅꠇꠟꠦ ꠁꠍꠣꠞꠦ ꠙꠣꠞꠣ ꠖꠦꠅꠀꠔ ꠀꠍꠟꠣ, ꠔꠣꠞꠣ ꠅꠃ ꠜꠂꠍꠣꠟ ꠀꠞ ꠢꠇꠟ ꠢꠣꠟꠔ ꠖꠦꠈꠤꠀ ꠈꠥꠛ ꠒꠞꠣꠁꠀ ꠇꠁꠟꠣ, “ꠘꠤꠌ꠆ꠌꠄ, ꠄꠁꠘꠃ ꠀꠍꠟꠣ ꠀꠟ꠆ꠟꠣꠞ ꠈꠣꠍ ꠝꠣꠄꠀꠞ ꠎꠘ, ꠁꠛꠘꠥꠟ꠆ꠟꠣ।”
MAT 27:55 ꠉꠣꠟꠤꠟ ꠎꠤꠟꠣ ꠕꠣꠇꠤ ꠎꠦꠔꠣ ꠛꠦꠐꠤꠘ꠆ꠔꠦ ꠁꠍꠣꠞ ꠈꠦꠎꠝꠔ ꠇꠞꠣꠞ ꠟꠣꠉꠤ ꠔꠣꠘ ꠟꠉꠦ ꠅꠁꠀ ꠀꠁꠍꠟꠣ, ꠔꠣꠞꠣꠅ ꠖꠥꠞꠁ ꠃꠛꠣꠁꠀ ꠁꠔꠣ ꠖꠦꠈꠟꠣ।
MAT 27:56 ꠄꠞꠣꠞ ꠝꠣꠎꠦ ꠀꠍꠟꠣ ꠝꠉꠖꠤꠟꠤꠘꠤ ꠝꠞꠤꠅꠝ, ꠁꠃꠍꠤ ꠀꠞ ꠁꠀꠇꠥꠛꠞ ꠝꠣ ꠝꠞꠤꠅꠝ, ꠀꠞ ꠎꠤꠛꠥꠖꠤꠀꠞ ꠛꠃ।
MAT 27:57 ꠅꠃ ꠖꠤꠘ ꠢꠣꠁꠘ꠆ꠎꠣ ꠛꠣꠟꠣ ꠀꠞꠤꠝꠣꠕꠤꠀ ꠉꠣꠃꠞ ꠁꠃꠍꠥꠚ ꠘꠣꠝꠞ ꠄꠇꠎꠘ ꠗꠘꠤ ꠝꠣꠘꠥꠡ ꠢꠘꠅ ꠀꠁꠟꠣ। ꠔꠣꠁꠘ ꠁꠍꠣꠞ ꠄꠇ ꠡꠣꠉꠞꠤꠖ ꠀꠍꠟꠣ।
MAT 27:58 ꠔꠣꠁꠘ ꠢꠣꠇꠤꠝ ꠙꠤꠟꠣꠔꠞ ꠉꠦꠍꠦ ꠀꠁꠀ, ꠢꠎꠞꠔ ꠁꠍꠣꠞ ꠟꠣꠡ ꠘꠤꠔꠣ ꠌꠣꠁꠟꠣ। ꠔꠦꠃ ꠙꠤꠟꠣꠔꠦ ꠔꠣꠘꠞꠦ ꠟꠣꠡ ꠘꠦꠅꠀꠞ ꠁꠎꠣꠎꠔ ꠖꠤꠟꠣ।
MAT 27:59 ꠁꠃꠍꠥꠚꠦ ꠁꠍꠣꠞ ꠟꠣꠡ ꠍꠟꠤꠛ ꠕꠣꠇꠤ ꠟꠣꠝꠣꠁꠀ ꠇꠣꠚꠘ ꠚꠤꠘ꠆ꠖꠣꠁꠟꠣ।
MAT 27:60 ꠔꠣꠁꠘ ꠙꠣꠠ ꠇꠣꠐꠤꠀ ꠘꠤꠎꠞ ꠟꠣꠉꠤ ꠎꠦ ꠇꠄꠛꠞ ꠈꠥꠖꠤꠍꠟꠣ, ꠅꠃ ꠇꠄꠛꠞꠞ ꠝꠣꠎꠦ ꠁꠍꠣꠞꠦ ꠖꠣꠚꠘ ꠇꠞꠟꠣ। ꠛꠣꠖꠦ ꠛꠠ ꠄꠇ ꠙꠣꠔ꠆ꠔꠞ ꠑꠦꠟꠤꠀ ꠀꠘꠤꠀ ꠇꠄꠛꠞꠞ ꠝꠥꠈꠅ ꠖꠤꠀ ꠉꠦꠟꠣꠉꠤ।
MAT 27:61 ꠅꠁꠟꠦ ꠝꠉꠖꠤꠟꠤꠘꠤ ꠝꠞꠤꠅꠝ ꠀꠞ ꠀꠞꠇ ꠝꠞꠤꠅꠝ ꠅꠃ ꠇꠄꠛꠞꠞ ꠗꠣꠞꠅ ꠛꠁ ꠞꠁꠟꠣ।
MAT 27:62 ꠛꠣꠖꠞ ꠖꠤꠘ ꠎꠥꠝ꠆ꠝꠣꠛꠣꠞꠦ ꠛꠠ ꠁꠝꠣꠝ ꠀꠞ ꠚꠞꠤꠡꠤ ꠅꠇꠟ ꠀꠁꠀ ꠢꠣꠇꠤꠝ ꠙꠤꠟꠣꠔꠞ ꠉꠦꠍꠦ ꠇꠁꠟꠣ,
MAT 27:63 “ꠢꠥꠎꠥꠞ, ꠀꠝꠞꠣꠞ ꠝꠘꠅ ꠀꠍꠦ, ꠅꠃ ꠐꠉꠦ ꠎꠤꠘ꠆ꠖꠣ ꠕꠣꠇꠔꠦ ꠇꠁꠍꠤꠟ, ꠢꠦ ꠛꠥꠟꠦ ꠝꠞꠣꠞ ꠔꠤꠘ ꠖꠤꠘ ꠛꠣꠖꠦ ꠢꠤꠞꠛꠣꠞ ꠎꠤꠘ꠆ꠖꠣ ꠅꠁꠀ ꠃꠑꠛ।
MAT 27:64 ꠄꠞꠟꠣꠉꠤ ꠀꠙꠘꠦ ꠢꠥꠇꠥꠝ ꠖꠦꠃꠇ꠆ꠇꠣ, ꠇꠄꠛꠞꠐꠣ ꠎꠣꠘꠥ ꠔꠤꠘ ꠖꠤꠘ ꠙꠞ꠆ꠎꠘ꠆ꠔ ꠇꠠꠣ ꠙꠣꠞꠣ ꠖꠤꠀ ꠞꠣꠈꠣ ꠅꠄ। ꠀꠞꠘꠣꠄ ꠔꠣꠞ ꠃꠝ꠆ꠝꠔ ꠅꠇꠟꠦ ꠔꠣꠞ ꠟꠣꠡ ꠌꠥꠞꠤ ꠇꠞꠤ ꠘꠤꠀ ꠝꠣꠘꠡꠞꠦ ꠇꠁꠔ ꠙꠣꠞꠦ, ꠔꠣꠁꠘ ꠔ ꠎꠤꠘ꠆ꠖꠣ ꠅꠁꠉꠦꠍꠂꠘ। ꠔꠣꠁꠟꠦ ꠀꠉꠦ ꠎꠦꠔꠣ ꠇꠁꠀ ꠗꠥꠇꠣ ꠖꠤꠍꠦ, ꠅꠈꠘ ꠀꠞꠅ ꠛꠦꠡꠤ ꠗꠥꠇꠣ ꠖꠤꠛ।”
MAT 27:65 ꠙꠤꠟꠣꠔꠦ ꠇꠁꠟꠣ, “ꠔꠥꠝꠞꠣ ꠙꠣꠞꠣꠖꠣꠞ ꠅꠇꠟꠞꠦ ꠘꠦꠅ, ꠘꠤꠀ ꠎꠦꠟꠣ ꠙꠣꠞ, ꠅꠟꠣ ꠙꠣꠞꠣ ꠖꠦꠅꠀꠞ ꠛꠦꠛꠡ꠆ꠔꠣ ꠇꠞꠅ।”
MAT 27:66 ꠅꠃ ꠔꠣꠞꠣ ꠉꠤꠀ ꠇꠄꠛꠞꠞ ꠝꠥꠈꠅ ꠎꠦ ꠙꠣꠔ꠆ꠔꠞ ꠀꠍꠤꠟ, ꠅꠃ ꠙꠣꠔ꠆ꠔꠞꠞ ꠃꠙꠞꠦ ꠡꠤꠟ-ꠌꠣꠙ꠆ꠙꠠ ꠝꠣꠞꠤ ꠕꠁꠟꠣ ꠀꠞ ꠇꠠꠣꠇꠠꠤ ꠙꠣꠞꠣ ꠖꠦꠅꠀꠞ ꠛꠦꠛꠡ꠆ꠔꠣ ꠇꠞꠟꠣ।
MAT 28:1 ꠎꠥꠝ꠆ꠝꠣꠛꠣꠞ ꠡꠦꠡ ꠅꠁꠀ ꠢꠣꠙ꠆ꠔꠣꠞ ꠙꠄꠟꠣ ꠖꠤꠘ ꠚꠎꠞ ꠅꠇ꠆ꠔꠅ, ꠝꠉꠖꠤꠟꠤꠘꠤ ꠝꠞꠤꠅꠝ ꠀꠞ ꠅꠁꠘ꠆ꠘ ꠝꠞꠤꠅꠝꠦ ꠢꠎꠞꠔ ꠁꠍꠣꠞ ꠇꠄꠛꠞ ꠖꠦꠈꠣꠔ ꠉꠦꠟꠣ।
MAT 28:2 ꠅꠃ ꠡꠝꠄ ꠀꠈꠔꠣꠃ ꠛꠠ ꠄꠇ ꠜꠂꠍꠣꠟ ꠅꠁꠟ ꠀꠞ ꠀꠍꠝꠣꠘ ꠕꠣꠇꠤ ꠀꠟ꠆ꠟꠣꠞ ꠄꠇ ꠚꠤꠞꠤꠡ꠆ꠔꠣ ꠟꠣꠝꠤꠀ ꠀꠁꠟꠣ। ꠀꠁꠀ ꠔꠣꠁꠘ ꠇꠄꠛꠞꠞ ꠝꠥꠈꠞ ꠙꠣꠔ꠆ꠔꠞꠐꠣ ꠢꠞꠣꠁꠀ, ꠄꠞ ꠃꠙꠞꠦ ꠛꠁꠟꠣ।
MAT 28:3 ꠔꠣꠘ ꠍꠥꠞꠔ ꠀꠍꠤꠟ ꠈꠥꠛ ꠘꠥꠞꠣꠘꠤ ꠀꠞ ꠚꠤꠘ꠆ꠘꠞ ꠇꠣꠙꠠ ꠀꠍꠤꠟ ꠗꠟꠣ ꠌꠇꠌꠇꠣ।
MAT 28:4 ꠔꠣꠘꠞꠦ ꠖꠦꠈꠤꠀ ꠙꠣꠞꠣꠖꠣꠞ ꠅꠇꠟꠦ ꠒꠞꠣꠁꠀ ꠇꠣꠙꠣ ꠗꠞꠟꠣ ꠀꠞ ꠔꠣꠞꠣ ꠛꠦꠃꠡ ꠅꠁꠀ ꠙꠠꠤ ꠞꠁꠟꠣ।
MAT 28:5 ꠚꠤꠞꠤꠡ꠆ꠔꠣꠄ ꠅꠃ ꠛꠦꠐꠤꠘ꠆ꠔꠞꠦ ꠇꠁꠟꠣ, “ꠒꠞꠣꠁꠅ ꠘꠣ ꠉ। ꠀꠝꠤ ꠎꠣꠘꠤ, ꠍꠟꠤꠛꠅ ꠟꠐꠇꠣꠁꠀ ꠎꠣꠞꠦ ꠎꠣꠘꠦ ꠝꠣꠞꠣ ꠅꠁꠍꠦ, ꠔꠥꠝꠞꠣ ꠢꠃ ꠁꠍꠣꠞꠦꠃ ꠔꠥꠇꠣꠁꠞꠣꠄ।
MAT 28:6 ꠅꠁꠟꠦ ꠔꠣꠁꠘ ꠔ ꠁꠘꠅ ꠘꠣꠄ। ꠔꠣꠁꠘ ꠎꠦꠟꠣ ꠇꠁꠍꠟꠣ, ꠅꠟꠣꠃ ꠎꠤꠘ꠆ꠖꠣ ꠅꠁꠀ ꠃꠑꠤ ꠉꠦꠍꠂꠘ। ꠀꠅ, ꠔꠣꠘꠞꠦ ꠎꠦ ꠎꠣꠉꠣꠔ ꠢꠥꠔꠣꠁꠀ ꠞꠣꠈꠣ ꠅꠁꠍꠤꠟ, ꠅꠈꠣꠘ ꠀꠁꠀ ꠖꠦꠈꠅ।
MAT 28:7 ꠀꠞ ꠔꠥꠝꠞꠣ ꠎꠟꠖꠤ ꠎꠣꠅ, ꠉꠤꠀ ꠔꠣꠘ ꠍꠣꠢꠣꠛꠤ ꠅꠇꠟꠞꠦ ꠇꠅ, ꠔꠣꠁꠘ ꠝꠥꠞ꠆ꠖꠣ ꠕꠣꠇꠤ ꠎꠤꠘ꠆ꠖꠣ ꠅꠁꠀ ꠔꠣꠞꠣꠞ ꠀꠉꠦ ꠅꠁꠀ ꠉꠣꠟꠤꠟꠅ ꠎꠣꠁꠞꠣꠉꠤ। ꠢꠘꠅꠃ ꠔꠣꠘ ꠟꠉꠦ ꠔꠣꠞꠣꠞ ꠖꠦꠈꠣ ꠅꠁꠛ। ꠢꠥꠘꠅ, ꠀꠝꠤ ꠀꠉꠦꠃ ꠔꠥꠝꠞꠣꠞꠦ ꠁꠈꠣꠘ ꠎꠣꠘꠣꠁ ꠖꠤꠟꠣꠝ।”
MAT 28:8 ꠛꠦꠐꠤꠘ꠆ꠔꠦ ꠎꠥꠖꠤꠅ ꠒꠞꠣꠁꠍꠟꠣ, ꠔꠦꠛꠃ ꠔꠣꠞꠣ ꠈꠥꠡꠤꠞ ꠌꠥꠐꠦ ꠔꠣꠘ ꠍꠣꠢꠣꠛꠤ ꠅꠇꠟꠞꠦ ꠁ ꠈꠛꠞ ꠎꠣꠘꠣꠘꠤꠞ ꠟꠣꠉꠤ ꠖꠃꠠꠣꠁꠀ ꠞꠅꠀꠘꠣ ꠅꠁꠟꠣ।
MAT 28:9 ꠅꠃ ꠡꠝꠄ ꠀꠈꠔꠣꠃ ꠢꠎꠞꠔ ꠁꠍꠣ ꠀꠁꠀ ꠄꠞꠣꠞꠦ ꠍꠣꠟꠣꠝ ꠖꠤꠟꠣ। ꠟꠉꠦ ꠟꠉꠦ ꠔꠣꠞꠣ ꠔꠣꠘ ꠍꠣꠝꠘꠦ ꠀꠁꠀ ꠙꠣꠅꠔ ꠗꠞꠤꠀ ꠇꠖꠝꠛꠥꠍꠤ ꠇꠞꠟꠣ।
MAT 28:10 ꠁꠍꠣꠄ ꠔꠣꠞꠣꠞꠦ ꠇꠁꠟꠣ, “ꠒꠞꠣꠁꠅ ꠘꠣ ꠉ। ꠔꠥꠝꠞꠣ ꠉꠤꠀ ꠀꠝꠣꠞ ꠜꠣꠁꠀꠁꠘꠞꠦ ꠇꠅ, ꠔꠣꠞꠣ ꠉꠣꠟꠤꠟꠅ ꠎꠣꠁꠔꠣꠉꠤ। ꠢꠘꠅ ꠔꠣꠞꠣꠞ ꠟꠉꠦ ꠀꠝꠣꠞ ꠖꠦꠈꠣ ꠅꠁꠛ।”
MAT 28:11 ꠁꠍꠣꠞ ꠟꠉꠞ ꠛꠣꠔꠌꠤꠔ ꠡꠦꠡ ꠇꠞꠤꠀ ꠔꠣꠞꠣ ꠎꠦꠛꠟꠣ ꠎꠣꠁꠞꠣꠉꠤ, ꠅꠃ ꠡꠝꠄ ꠢꠃ ꠙꠣꠞꠣꠖꠣꠞꠞ ꠇꠄꠎꠘꠦ ꠐꠣꠃꠘꠅ ꠉꠤꠀ ꠛꠠ ꠁꠝꠣꠝ ꠅꠇꠟꠞꠦ ꠁꠔꠣ ꠢꠇ꠆ꠇꠟꠔꠣ ꠎꠣꠘꠣꠁꠟꠣ।
MAT 28:12 ꠔꠦꠃ ꠛꠠ ꠁꠝꠣꠝ ꠀꠞ ꠝꠥꠞꠛ꠆ꠛꠤ ꠅꠇꠟ ꠄꠇꠈꠣꠘꠅ ꠖꠟꠣ ꠅꠁꠀ ꠙꠞꠣꠝꠤꠡ ꠇꠞꠟꠣ, ꠅꠃ ꠙꠣꠞꠣꠖꠣꠞ ꠍꠤꠙꠣꠁ ꠅꠇꠟꠞꠦ ꠛꠃꠔ ꠐꠦꠇꠣ ꠖꠤꠛꠣꠞ ꠟꠣꠉꠤ।
MAT 28:13 ꠔꠣꠞꠣ ꠍꠤꠙꠣꠁ ꠅꠇꠟꠞꠦ ꠇꠁꠟꠣ, “ꠔꠥꠝꠞꠣ ꠇꠁꠅ, ‘ꠀꠝꠞꠣ ꠎꠦꠛꠟꠣ ꠊꠥꠝꠅ ꠀꠍꠟꠣꠝ, ꠅꠃ ꠡꠝꠄ ꠡꠣꠉꠞꠤꠖ ꠅꠇꠟꠦ ꠀꠁꠀ ꠔꠣꠘ ꠟꠣꠡ ꠌꠥꠞꠤ ꠇꠞꠤ ꠘꠤꠍꠂꠘꠉꠤ।’
MAT 28:14 ꠁꠈꠣꠘ ꠎꠥꠖꠤ ꠖꠦꠡꠞ ꠙꠞꠗꠣꠘ ꠢꠣꠇꠤꠝ ꠍꠣꠛꠦ ꠢꠥꠘꠤꠟꠣꠁꠘ, ꠔꠦ ꠀꠝꠞꠣ ꠔꠣꠘꠞꠦ ꠛꠥꠎ ꠖꠤꠝꠥ, ꠔꠣꠘ ꠀꠔ ꠕꠣꠇꠤ ꠔꠥꠝꠞꠣꠞꠦ ꠛꠣꠌꠣꠁꠝꠥ।”
MAT 28:15 ꠔꠦꠃ ꠙꠣꠞꠣꠖꠣꠞ ꠅꠇꠟꠦ ꠅꠃ ꠐꠦꠇꠣ ꠘꠤꠟꠣ, ꠀꠞ ꠔꠣꠞꠣꠞꠦ ꠎꠦꠟꠣ ꠢꠤꠇꠣꠁꠟ ꠅꠁꠍꠤꠟ, ꠅꠟꠣ ꠇꠁꠟꠣ। ꠅꠈꠘ ꠙꠞ꠆ꠎꠘ꠆ꠔ ꠁ ꠝꠤꠍꠣ ꠇꠕꠣ ꠁꠢꠥꠖꠤ ꠡꠝꠣꠎꠅ ꠞꠐꠣꠁꠟ ꠀꠍꠦ।
MAT 28:16 ꠁꠍꠣꠄ ꠔꠣꠘ ꠍꠣꠢꠣꠛꠤ ꠅꠇꠟꠞꠦ ꠉꠣꠟꠤꠟꠞ ꠎꠦ ꠙꠣꠠꠅ ꠎꠣꠅꠀꠞ ꠇꠕꠣ ꠇꠁꠍꠟꠣ, ꠢꠃ ꠄꠉꠣꠞꠅ ꠎꠘ ꠍꠣꠢꠣꠛꠤ ꠅꠃ ꠙꠣꠠꠅ ꠀꠁꠟꠣ।
MAT 28:17 ꠀꠁꠀ ꠁꠍꠣꠞꠦ ꠖꠦꠈꠤꠀ ꠔꠣꠞꠣ ꠍꠁꠎꠖꠣ ꠇꠞꠟꠣ, ꠄꠞꠝꠣꠎꠦ ꠇꠄꠎꠘꠞ ꠜꠤꠔꠞꠦ ꠡꠘ꠆ꠖꠄ ꠀꠍꠤꠟ।
MAT 28:18 ꠅꠃ ꠡꠝꠄ ꠁꠍꠣ ꠔꠣꠞꠣꠞ ꠇꠣꠘ꠆ꠖꠣꠔ ꠀꠁꠀ ꠇꠁꠟꠣ, “ꠛꠦꠢꠦꠡ꠆ꠔ ꠀꠞ ꠖꠥꠘꠤꠀꠞ ꠢꠇ꠆ꠇꠟ ꠈꠦꠝꠔꠣ ꠀꠝꠣꠞꠦ ꠖꠦꠅꠀ ꠅꠁꠍꠦ।
MAT 28:19 ꠄꠞꠟꠣꠉꠤ ꠔꠥꠝꠞꠣ ꠉꠤꠀ ꠔꠣꠝꠣꠝ ꠎꠣꠔꠤꠞ ꠝꠣꠘꠡꠞꠦ ꠀꠝꠣꠞ ꠃꠝ꠆ꠝꠔ ꠛꠣꠘꠣꠅ। ꠛꠦꠢꠦꠡ꠆ꠔꠤ ꠛꠣꠛꠣ ꠀꠟ꠆ꠟꠣ ꠙꠣꠇ, ꠔꠣꠘ ꠈꠣꠍ ꠝꠣꠄꠀꠞ ꠎꠘ ꠁꠛꠘꠥꠟ꠆ꠟꠣ, ꠀꠞ ꠙꠣꠇ ꠞꠥꠢꠥꠞ ꠘꠣꠝꠦ ꠝꠣꠘꠡꠞꠦ ꠔꠞꠤꠇꠣꠞ ꠉꠥꠍꠟ ꠇꠞꠣꠅ।
MAT 28:20 ꠀꠝꠤ ꠔꠥꠝꠞꠣꠞꠦ ꠎꠦꠔꠣ ꠢꠥꠇꠥꠝ ꠖꠤꠍꠤ, ꠅꠔꠣ ꠀꠝꠟ ꠇꠞꠣꠞ ꠟꠣꠉꠤ ꠔꠣꠞꠣꠞꠦ ꠔꠣꠟꠤꠝ ꠖꠦꠅ। ꠝꠘꠅ ꠞꠣꠈꠤꠅ, ꠇꠤꠀꠝꠔꠞ ꠀꠉ ꠙꠞ꠆ꠎꠘ꠆ꠔ ꠡꠛ ꠡꠝꠄ ꠀꠝꠤ ꠔꠥꠝꠞꠣꠞ ꠟꠉꠦ ꠟꠉꠦ ꠀꠍꠤ।” ꠀꠝꠤꠘ॥
MAR 1:1 ꠀꠟ꠆ꠟꠣ ꠙꠣꠇꠞ ꠈꠣꠍ ꠝꠣꠄꠀꠞ ꠎꠘ ꠁꠛꠘꠥꠟ꠆ꠟꠣ ꠢꠎꠞꠔ ꠁꠍꠣ ꠀꠟ-ꠝꠍꠤꠞ ꠁꠘ꠆ꠎꠤꠟ, ꠝꠣꠘꠤ ꠈꠥꠡ-ꠈꠛꠞꠤ ꠛꠄꠀꠘꠤꠞ ꠡꠥꠞꠥ।
MAR 1:2 ꠛꠃꠔ ꠖꠤꠘ ꠀꠉꠦ, ꠢꠎꠞꠔ ꠁꠡꠣꠄꠀ ꠘꠛꠤꠞ ꠇꠤꠔꠣꠛꠅ ꠀꠟ꠆ꠟꠣ ꠙꠣꠇꠦ ꠛꠣꠔꠣꠁꠍꠂꠘ, ꠢꠥꠘꠅ, ꠀꠝꠤ ꠔꠥꠝꠣꠞ ꠀꠉꠦ ꠀꠝꠣꠞ ꠙꠦꠉꠣꠝ꠆ꠛꠞꠞꠦ ꠛꠦꠎꠤꠀꠞ, ꠄꠁꠘ ꠔꠥꠝꠣꠞ ꠙꠕ ꠍꠢꠤ ꠇꠞꠛꠣ।
MAR 1:3 ꠝꠞꠥꠜꠥꠝꠤꠞ ꠝꠣꠎꠦ ꠎꠥꠞꠦ ꠎꠥꠞꠦ ꠄꠇꠎꠘꠦ ꠄꠟꠣꠘ ꠇꠞꠞꠣ, ꠔꠥꠝꠞꠣ ꠝꠣꠟꠤꠇꠞ ꠙꠕ ꠍꠢꠤ ꠇꠞꠅ, ꠔꠣꠘ ꠌꠟꠣꠞ ꠞꠣꠡ꠆ꠔꠣ ꠅꠇꠟ ꠡꠤꠗꠣ ꠇꠞꠅ।
MAR 1:4 ꠅꠃ ꠀꠄꠀꠔ ꠝꠣꠚꠤꠇ ꠢꠎꠞꠔ ꠄꠢꠤꠀ ꠘꠛꠤꠄ ꠝꠞꠥꠜꠥꠝꠤꠔ ꠉꠤꠀ ꠔꠛꠟꠤꠉ ꠇꠞꠔꠣ ꠀꠞ ꠔꠃꠛꠣꠞ ꠉꠥꠍꠟ ꠇꠞꠣꠁꠔꠣ। ꠔꠣꠁꠘ ꠄꠟꠣꠘ ꠇꠞꠔꠣ, ꠉꠥꠘꠣꠞ ꠝꠣꠚꠤꠞ ꠟꠣꠉꠤ ꠔꠃꠛꠣ ꠇꠞꠅ, ꠔꠞꠤꠇꠣꠛꠘ꠆ꠖꠤ ꠟꠅ।
MAR 1:5 ꠔꠦꠃ ꠀꠡ꠆ꠔꠣ ꠄꠢꠥꠖꠤꠀ ꠎꠤꠟꠣ ꠀꠞ ꠎꠦꠞꠥꠎꠣꠟꠦꠝ ꠐꠣꠃꠘꠞ ꠢꠇꠟ ꠝꠣꠘꠥꠡ ꠛꠣꠞ ꠅꠁꠀ ꠄꠢꠤꠀꠞ ꠉꠦꠍꠦ ꠀꠁꠀ, ꠎꠣꠞꠎꠤꠞ ꠉꠥꠘꠣꠞ ꠟꠣꠉꠤ ꠔꠃꠛꠣ ꠇꠞꠟꠣ, ꠀꠞ ꠄꠢꠤꠀꠄ ꠔꠣꠞꠣꠞꠦ ꠎꠞ꠆ꠖꠣꠘ ꠉꠣꠋꠉꠞ ꠙꠣꠘꠤꠔ ꠔꠃꠛꠣꠞ ꠉꠥꠍꠟ ꠇꠞꠣꠁꠔꠣ।
MAR 1:6 ꠄꠢꠤꠀ ꠘꠛꠤꠄ ꠃꠐꠞ ꠞꠥꠝꠞ ꠇꠣꠙꠠ ꠚꠤꠘ꠆ꠖꠤꠔꠣ ꠀꠞ ꠇꠝꠞꠅ ꠌꠣꠝꠠꠣꠞ ꠛꠦꠟꠐ ꠛꠣꠘ꠆ꠖꠤꠔꠣ। ꠔꠣꠁꠘ ꠙꠣꠠꠤꠀ ꠝꠃ ꠀꠞ ꠚꠞꠤꠋ ꠈꠣꠁꠔꠣ।
MAR 1:7 ꠔꠣꠁꠘ ꠝꠣꠘꠡꠞꠦ ꠇꠁꠔꠣ, “ꠀꠝꠣꠞ ꠛꠣꠖꠦ ꠀꠞꠅ ꠄꠇꠎꠘꠦ ꠔꠡꠞꠤꠚ ꠀꠘꠞꠣ, ꠄꠁꠘ ꠀꠝꠣ ꠕꠘꠦꠅ ꠢꠤꠝ꠆ꠝꠔ ꠀꠟꠣ। ꠃꠘ꠆ꠖꠣ ꠅꠁꠀ ꠔꠣꠘ ꠙꠣꠅꠞ ꠎꠥꠔꠣꠞ ꠚꠤꠔꠣ ꠈꠥꠟꠣꠞ ꠟꠣꠈꠅ ꠀꠝꠤ ꠘꠣꠄ।
MAR 1:8 ꠀꠝꠤ ꠔꠥꠝꠞꠣꠞꠦ ꠙꠣꠘꠤꠖꠤ ꠔꠃꠛꠣꠞ ꠉꠥꠍꠟ ꠇꠞꠣꠁꠟꠣꠝ, ꠅꠁꠟꠦ ꠔꠣꠁꠘ ꠔꠥꠝꠞꠣꠞꠦ ꠙꠣꠇ ꠞꠥꠢꠥ ꠖꠤꠀ ꠉꠥꠍꠟ ꠇꠞꠣꠁꠛꠣ।”
MAR 1:9 ꠅꠃ ꠡꠝꠄ ꠢꠎꠞꠔ ꠁꠍꠣ ꠉꠣꠟꠤꠟ ꠎꠤꠟꠣꠞ ꠘꠣꠍꠣꠞꠔ ꠉꠣꠃ ꠕꠘꠦ ꠄꠢꠤꠀꠞ ꠉꠦꠍꠦ ꠀꠁꠀ, ꠎꠞ꠆ꠖꠣꠘ ꠉꠣꠋꠉꠅ ꠔꠞꠤꠇꠣꠛꠘ꠆ꠖꠤ ꠟꠁꠟꠣ।
MAR 1:10 ꠀꠞ ꠙꠣꠘꠤꠔ ꠛꠥꠠ ꠖꠤꠀ ꠃꠑꠔꠦꠃ ꠁꠍꠣꠄ ꠟꠉꠦ ꠟꠉꠦ ꠖꠦꠈꠟꠣ ꠀꠍꠝꠣꠘ ꠖꠥꠁ ꠜꠣꠉ ꠅꠁꠉꠦꠍꠦ, ꠀꠟ꠆ꠟꠣꠞ ꠞꠥꠢꠥ ꠙꠣꠞꠅꠞ ꠍꠥꠞꠔ ꠗꠞꠤꠀ ꠔꠣꠘ ꠃꠙꠞꠦ ꠟꠣꠝꠤꠀ ꠀꠁꠞꠣ।
MAR 1:11 ꠅꠃ ꠡꠝꠄ ꠀꠍꠝꠣꠘ ꠕꠘꠦ ꠀꠅꠀꠎ ꠅꠁꠟ, “ꠅ ꠙꠥꠔ, ꠔꠥꠝꠤꠃ ꠀꠝꠣꠞ ꠈꠣꠍ ꠝꠣꠄꠀꠞ ꠎꠘ, ꠔꠥꠝꠣꠞ ꠃꠙꠞꠦ ꠀꠝꠤ ꠈꠥꠛ ꠈꠥꠡꠤ।”
MAR 1:12 ꠄꠞꠛꠣꠖꠦꠃ ꠀꠟ꠆ꠟꠣꠁ ꠙꠣꠇ ꠞꠥꠢꠥꠞ ꠔꠣꠉꠤꠖꠦ ꠔꠣꠘꠞꠦ ꠝꠞꠥꠜꠥꠝꠤꠔ ꠛꠦꠎꠣ ꠅꠁꠟ।
MAR 1:13 ꠅꠃ ꠝꠞꠥꠜꠥꠝꠤꠔ ꠡꠄꠔꠣꠘꠦ ꠌꠣꠟ꠆ꠟꠤꠡ ꠖꠤꠘ ꠗꠞꠤ ꠁꠍꠣꠞꠦ ꠟꠣꠟꠌ ꠖꠦꠈꠣꠁꠀ ꠉꠥꠘꠣ ꠇꠞꠣꠁꠔ ꠌꠣꠁꠟ। ꠢꠤꠘꠅ ꠎꠋꠟꠤ ꠎꠣꠘꠥꠀꠞꠞ ꠟꠉꠦ ꠔꠣꠁꠘ ꠞꠁꠟꠣ ꠀꠞ ꠀꠟ꠆ꠟꠣꠞ ꠚꠤꠞꠤꠡ꠆ꠔꠣ ꠅꠇꠟꠦ ꠔꠣꠘ ꠈꠦꠎꠝꠔ ꠇꠞꠔꠣ।
MAR 1:14 ꠢꠎꠞꠔ ꠄꠢꠤꠀ ꠎꠦꠟꠈꠣꠘꠣꠔ ꠛꠘ꠆ꠖꠤ ꠅꠀꠞ ꠛꠣꠖꠦ ꠁꠍꠣ ꠉꠣꠟꠤꠟ ꠎꠤꠟꠣꠔ ꠀꠁꠀ ꠀꠟ꠆ꠟꠣꠞ ꠛꠣꠔꠣꠁꠟ ꠅꠃ ꠈꠥꠡ-ꠈꠛꠞꠤ ꠔꠛꠟꠤꠉ ꠇꠞꠟꠣ,
MAR 1:15 “ꠡꠝꠄ ꠙꠥꠞꠣ ꠅꠁꠉꠦꠍꠦ, ꠀꠟ꠆ꠟꠣꠞ ꠛꠣꠖꠡꠣꠁ ꠘꠎꠖꠤꠇ ꠀꠁꠌ꠆ꠍꠦ। ꠀꠙꠘꠣꠞꠣ ꠔꠃꠛꠣ ꠇꠞꠃꠇ꠆ꠇꠣ ꠀꠞ ꠅꠃ ꠈꠥꠡ-ꠈꠛꠞꠤꠞ ꠃꠙꠞꠦ ꠁꠝꠣꠘ ꠀꠘꠃꠇ꠆ꠇꠣ।”
MAR 1:16 ꠛꠣꠖꠦ ꠔꠣꠁꠘ ꠉꠣꠟꠤꠟ ꠀꠅꠞꠞ ꠙꠣꠞꠦꠖꠤ ꠀꠐꠤꠀ ꠎꠣꠁꠞꠣ, ꠅꠃ ꠡꠝꠄ ꠖꠦꠈꠟꠣ, ꠍꠣꠁꠝꠘ ꠀꠞ ꠔꠣꠘ ꠜꠣꠁ ꠀꠘ꠆ꠖꠞꠤꠀꠍꠦ ꠀꠅꠞꠅ ꠎꠣꠟ ꠛꠣꠁꠞꠣ। ꠄꠞꠣ ꠔ ꠝꠣꠁꠝꠟ ꠀꠍꠟꠣ।
MAR 1:17 ꠁꠍꠣꠄ ꠄꠞꠣꠞꠦ ꠇꠁꠟꠣ, “ꠀꠝꠣꠞ ꠟꠉꠦ ꠀꠅ, ꠀꠝꠤ ꠔꠥꠝꠞꠣꠞꠦ ꠝꠣꠘꠥꠡ ꠗꠞꠣꠞ ꠎꠣꠟꠥꠀ ꠛꠣꠘꠣꠁꠝꠥ।”
MAR 1:18 ꠟꠉꠦ ꠟꠉꠦ ꠄꠞꠣ ꠎꠣꠟꠞ ꠟꠉ ꠍꠣꠠꠤꠀ ꠁꠍꠣꠞ ꠟꠉꠦ ꠟꠉ ꠗꠞꠟꠣ।
MAR 1:19 ꠅꠘ ꠕꠘꠦ ꠕꠥꠠꠣ ꠀꠉꠦ ꠉꠤꠀ ꠔꠣꠁꠘ ꠖꠦꠈꠟꠣ, ꠁꠀꠇꠥꠛ ꠀꠞ ꠢꠣꠘ꠆ꠘꠣꠘ ꠖꠥꠁꠅ ꠜꠣꠁꠄ ꠘꠣꠅꠅ ꠛꠁꠀ ꠎꠣꠟ ꠎꠥꠁꠔ-ꠎꠣꠁꠔ ꠇꠞꠞꠣ, ꠄꠞꠣꠞ ꠛꠣꠚꠞ ꠘꠣꠝ ꠎꠤꠛꠥꠖꠤꠀ।
MAR 1:20 ꠁꠍꠣꠄ ꠄꠞꠣꠞꠦ ꠖꠦꠈꠤꠀꠃ ꠒꠣꠇ ꠖꠤꠟꠣ, ꠒꠣꠇ ꠢꠥꠘꠤꠀ ꠄꠞꠣꠅ ꠘꠤꠎꠞ ꠛꠣꠚ ꠎꠤꠛꠥꠖꠤꠀꠞꠦ ꠇꠣꠝꠟꠣꠁꠘ꠆ꠔꠞ ꠟꠉꠦ ꠘꠣꠅꠅ ꠕꠁꠀ ꠁꠍꠣꠞ ꠟꠉ ꠗꠞꠟꠣ।
MAR 1:21 ꠛꠣꠖꠦ ꠄꠞꠣ ꠢꠇꠟꠦ ꠝꠤꠟꠤꠀ ꠇꠚꠞꠘꠣꠃꠝ ꠐꠣꠃꠘꠅ ꠉꠦꠟꠣ, ꠀꠞ ꠁꠢꠥꠖꠤꠞ ꠎꠥꠝ꠆ꠝꠣꠛꠣꠞꠦ ꠔꠣꠞꠣꠞ ꠝꠍꠤꠖꠅ ꠢꠣꠝꠣꠁꠀ ꠁꠍꠣꠄ ꠔꠣꠟꠤꠝ ꠖꠤꠟꠣ। ꠢꠎꠞꠔ ꠝꠥꠍꠣꠞ ꠞꠦꠅꠀꠎ ꠝꠣꠚꠤꠇ ꠁꠢꠥꠖꠤꠞ ꠎꠥꠝ꠆ꠝꠣꠛꠣꠞ ꠅꠁꠟ ꠡꠥꠇ꠆ꠞꠛꠣꠞ ꠡꠥꠞꠥꠎ ꠒꠥꠛꠣ ꠕꠣꠇꠤ ꠡꠘꠤꠛꠣꠞꠞ ꠡꠥꠞꠥꠎ ꠒꠥꠛꠣ ꠙꠞ꠆ꠎꠘ꠆ꠔ। ꠁ ꠖꠤꠘ ꠇꠥꠘꠥꠎꠣꠔ ꠇꠣꠝ ꠇꠞꠣ ꠢꠣꠞꠣꠝ।
MAR 1:22 ꠔꠣꠘ ꠔꠣꠟꠤꠝ ꠢꠥꠘꠤꠀ ꠝꠣꠘꠥꠡ ꠔꠣꠁꠎ꠆ꠎꠥꠛ ꠛꠘꠤꠉꠦꠟꠣ, ꠔꠣꠁꠘ ꠔ ꠔꠣꠞꠣꠞ ꠀꠟꠤꠝ-ꠃꠟꠣꠝꠣꠞ ꠟꠣꠈꠣꠘ ꠛꠄꠀꠘ ꠇꠞꠞꠣ ꠘꠣ, ꠔꠣꠁꠘ ꠈꠦꠝꠔꠣꠀꠟꠣ ꠝꠣꠘꠡꠞ ꠟꠣꠈꠣꠘ ꠔꠣꠟꠤꠝ ꠖꠤꠞꠣ।
MAR 1:23 ꠅꠃ ꠡꠝꠄ ꠎꠤꠘꠞ ꠀꠍꠞ ꠀꠟꠣ ꠄꠇ ꠛꠦꠐꠣꠅ ꠅꠃ ꠝꠍꠤꠖꠞ ꠜꠤꠔꠞꠦ ꠀꠍꠤꠟ।
MAR 1:24 ꠢꠦ ꠌꠤꠟ꠆ꠟꠣꠁꠀ ꠇꠁꠟ, “ꠅ ꠘꠣꠍꠣꠞꠔꠞ ꠁꠍꠣ, ꠀꠝꠞꠣꠞ ꠟꠉꠦ ꠀꠙꠘꠣꠞ ꠇꠥꠘꠥ ꠎꠣꠄ-ꠎꠞꠥꠞ ꠀꠍꠦ ꠘꠤ? ꠀꠙꠘꠦ ꠇꠤꠔꠣ ꠀꠝꠞꠣꠞꠦ ꠛꠤꠘꠣꠡ ꠇꠞꠣꠔ ꠀꠁꠍꠂꠘ ꠘꠤ? ꠀꠝꠤ ꠔ ꠀꠙꠘꠣꠞꠦ ꠌꠤꠘꠤ, ꠀꠙꠘꠦꠃ ꠀꠟ꠆ꠟꠣꠞ ꠢꠃ ꠙꠣꠇ ꠎꠘ।”
MAR 1:25 ꠁꠈꠣꠘ ꠢꠥꠘꠤꠀ ꠁꠍꠣꠄ ꠔꠣꠞꠦ ꠗꠣꠝꠇꠤ ꠖꠤꠟꠣ, “ꠌꠥꠙ, ꠅꠈꠘꠃ ꠄꠞꠦ ꠍꠣꠠꠤꠀ ꠎꠣ।”
MAR 1:26 ꠅꠃ ꠢꠤ ꠎꠤꠘꠦ ꠛꠦꠐꠣꠞꠦ ꠝꠥꠞꠣꠘꠤ ꠝꠣꠞꠤꠀ ꠎꠥꠞꠦ ꠌꠤꠇ ꠖꠤꠀ ꠍꠣꠠꠤꠀ ꠉꠦꠟꠉꠤ।
MAR 1:27 ꠁꠔꠣ ꠖꠦꠈꠤꠀ ꠢꠇꠟꠦ ꠔꠣꠁꠎ꠆ꠎꠥꠛ ꠅꠁꠀ ꠄꠇꠦ-ꠅꠁꠘ꠆ꠘꠦ ꠇꠁꠟ, “ꠖꠦꠈꠞꠣꠄ ꠘꠤ! ꠀꠌꠣꠘꠇ ꠇꠣꠞꠛꠣꠞ! ꠁꠔꠣ ꠇꠥꠘ ꠎꠣꠔꠞ ꠘꠄꠀ ꠔꠣꠟꠤꠝ? ꠔꠣꠘ ꠈꠦꠝꠔꠣ ꠈꠣꠐꠣꠁꠀ ꠎꠤꠘ꠆ꠘꠣꠔꠞꠦ ꠢꠥꠇꠥꠝ ꠖꠦꠁꠘ, ꠀꠞ ꠔꠣꠞꠣꠅ ꠝꠣꠘꠦ।”
MAR 1:28 ꠄꠞꠖꠣꠄ ꠁꠍꠣꠞ ꠘꠣꠝ ꠀꠡ꠆ꠔꠣ ꠉꠣꠟꠤꠟ ꠎꠤꠟꠣꠞ ꠌꠣꠁꠞꠅꠛꠣꠄ ꠈꠥꠛ ꠎꠟꠖꠤ ꠃꠠꠤ ꠉꠦꠟ।
MAR 1:29 ꠝꠍꠤꠖ ꠕꠣꠇꠤ ꠛꠣꠞ ꠅꠁꠀ ꠔꠣꠁꠘ-ꠔꠣꠁꠘ ꠁꠀꠇꠥꠛ ꠀꠞ ꠢꠣꠘ꠆ꠘꠣꠘꠞ ꠟꠉꠦ ꠅꠁꠀ ꠍꠣꠁꠝꠘ ꠀꠞ ꠀꠘ꠆ꠖꠞꠤꠀꠍꠞ ꠛꠣꠠꠤꠔ ꠉꠦꠟꠣ।
MAR 1:30 ꠍꠣꠁꠝꠘꠞ ꠢꠠꠤꠞ ꠈꠥꠛ ꠔꠣꠙ ꠅꠁꠍꠤꠟ, ꠔꠣꠁꠘ ꠛꠤꠍꠘꠣꠔ ꠙꠠꠘꠅ ꠀꠍꠟꠣ। ꠁꠍꠣꠄ ꠔꠡꠞꠤꠚ ꠀꠘꠔꠦꠃ ꠔꠣꠘꠞꠦ ꠛꠦꠝꠣꠞꠤꠞ ꠇꠕꠣ ꠎꠣꠘꠣꠁꠟ ꠅꠁꠟ।
MAR 1:31 ꠛꠦꠝꠣꠞ ꠢꠥꠘꠤꠀ ꠔꠣꠁꠘ ꠅꠃ ꠛꠦꠐꠤꠞ ꠀꠔꠅ ꠗꠞꠤ ꠔꠥꠟꠟꠣ, ꠀꠞ ꠟꠉꠦ ꠟꠉꠦ ꠔꠣꠙꠦ ꠍꠣꠠꠤ ꠖꠤꠟ, ꠛꠦꠐꠤ ꠃꠑꠤꠀ ꠉꠤꠀ ꠄꠞꠣꠞ ꠝꠦꠝꠣꠘꠖꠣꠞꠤ ꠇꠞꠣꠔ ꠟꠣꠉꠟꠣ।
MAR 1:32 ꠅꠃ ꠎꠥꠝ꠆ꠝꠣꠞ ꠖꠤꠘ ꠡꠦꠡꠦ ꠢꠣꠁꠘ꠆ꠎꠣ ꠛꠣꠟꠣ, ꠡꠥꠞꠥꠎ ꠒꠥꠛꠣꠞ ꠛꠣꠖꠦ ꠝꠣꠘꠡꠦ ꠢꠇꠟ ꠛꠦꠝꠣꠞꠤꠞꠦ ꠀꠞ ꠎꠤꠘꠞ ꠀꠍꠞ ꠀꠟꠣ ꠝꠣꠘꠡꠞꠦ ꠁꠍꠣꠞ ꠉꠦꠍꠦ ꠟꠁꠀ ꠀꠁꠟ।
MAR 1:33 ꠀꠡ꠆ꠔꠣ ꠐꠣꠃꠘꠞ ꠝꠣꠘꠥꠡ ꠀꠁꠀ ꠅꠃ ꠛꠣꠠꠤꠞ ꠃꠑꠣꠘꠅ ꠖꠟꠣ ꠅꠁꠉꠦꠟ।
MAR 1:34 ꠔꠦꠃ ꠁꠍꠣꠄ ꠘꠣꠘꠣꠘ ꠘꠝꠥꠘꠣꠞ ꠛꠃꠔ ꠛꠦꠝꠣꠞꠤꠞ ꠡꠤꠚꠣ ꠇꠞꠟꠣ ꠀꠞ ꠛꠃꠔꠞ ꠟꠉ ꠕꠘꠦ ꠎꠤꠘ꠆ꠘꠣꠔ ꠍꠣꠠꠣꠁꠟꠣ। ꠅꠁꠟꠦ ꠎꠤꠘ꠆ꠘꠣꠔꠦ ꠔꠣꠘ ꠙꠞꠤꠌꠄ ꠎꠣꠘꠣꠁ ꠖꠤꠛꠣ ꠇꠞꠤ, ꠔꠣꠁꠘ ꠁꠔꠣꠞꠦ ꠇꠥꠘꠥ ꠝꠣꠔ ꠝꠣꠔꠣꠞ ꠡꠥꠎꠥꠉ ꠖꠤꠟꠣ ꠘꠣ।
MAR 1:35 ꠛꠣꠖꠦ ꠙꠔꠣꠛꠣꠟꠣ ꠃꠑꠤꠀ ꠔꠣꠁꠘ ꠘꠤꠞꠣꠁ ꠎꠣꠉꠣꠔ ꠉꠤꠀ ꠖꠥꠀ ꠇꠞꠣꠔ ꠛꠁꠟꠣ।
MAR 1:36 ꠔꠦꠃ ꠍꠣꠁꠝꠘ ꠀꠞ ꠔꠣꠘ ꠟꠉꠞ ꠢꠇꠟꠦ ꠁꠍꠣꠞꠦ ꠔꠣꠟ꠆ꠟꠣꠡ ꠇꠞꠣꠔ ꠛꠣꠞ ꠅꠁꠟꠣ।
MAR 1:37 ꠛꠣꠞ ꠅꠁꠀ ꠔꠣꠘꠞꠦ ꠙꠣꠁꠀ ꠇꠁꠟꠣ, “ꠢꠥꠎꠥꠞ, ꠢꠇ꠆ꠇꠟ ꠝꠣꠘꠡꠦ ꠀꠙꠘꠣꠞ ꠔꠣꠟ꠆ꠟꠣꠡ ꠇꠞꠦꠞ।”
MAR 1:38 ꠁꠍꠣꠄ ꠇꠁꠟꠣ, “ꠀꠅ, ꠀꠝꠞꠣ ꠅꠃ ꠇꠣꠘ꠆ꠖꠣ-ꠇꠣꠍꠣꠞ ꠉꠣꠃꠀꠁꠘ꠆ꠔꠅ ꠉꠤꠀ ꠔꠛꠟꠤꠉ ꠇꠞꠤ। ꠄꠞꠟꠣꠉꠤꠃ ꠔ ꠀꠝꠤ ꠀꠁꠍꠤ।”
MAR 1:39 ꠛꠣꠖꠦ ꠔꠣꠁꠘ ꠢꠣꠞꠣ ꠉꠣꠟꠤꠟ ꠎꠤꠟꠣꠞ ꠝꠍꠤꠖꠣꠁꠘ꠆ꠔꠅ ꠉꠤꠀ ꠔꠛꠟꠤꠉ ꠇꠞꠟꠣ ꠀꠞ ꠎꠤꠘ꠆ꠘꠣꠔ ꠍꠣꠠꠣꠁꠟꠣ।
MAR 1:40 ꠄꠇꠖꠤꠘ ꠄꠇ ꠙꠌꠣ-ꠇꠥꠡ꠆ꠑ ꠛꠦꠝꠣꠞꠤꠄ ꠢꠎꠞꠔ ꠁꠍꠣꠞ ꠇꠣꠘ꠆ꠖꠣꠔ ꠀꠁꠀ ꠔꠣꠘ ꠙꠣꠅꠔ ꠙꠠꠤꠀ ꠝꠤꠘꠔ ꠇꠞꠤꠀ ꠇꠁꠟ, “ꠢꠥꠎꠥꠞ, ꠀꠙꠘꠣꠞ ꠝꠞ꠆ꠎꠤ ꠅꠁꠟꠦ ꠀꠝꠣꠞꠦ ꠡꠤꠚꠣ ꠇꠞꠤꠀ ꠙꠣꠇ-ꠍꠣꠚ ꠇꠞꠃꠇ꠆ꠇꠣ।”
MAR 1:41 ꠛꠦꠐꠣꠞ ꠛꠣꠄ ꠔꠣꠘ ꠈꠥꠛ ꠖꠄꠀ ꠢꠣꠝꠣꠁꠟ। ꠔꠣꠁꠘ ꠘꠤꠎꠞ ꠀꠔ ꠛꠣꠠꠣꠁꠀ ꠔꠣꠞꠦ ꠍꠁꠀ ꠇꠁꠟꠣ, “ꠅꠄ ꠀꠝꠤ ꠌꠣꠁꠞꠣꠝ, ꠔꠥꠝꠤ ꠙꠣꠇ-ꠍꠣꠚ ꠅꠅ।”
MAR 1:42 ꠇꠅꠀꠞ ꠟꠉꠦ ꠟꠉꠦ ꠔꠣꠞ ꠛꠦꠝꠣꠞ ꠜꠣꠟꠣ ꠅꠁꠀ ꠢꠦ ꠙꠣꠇ-ꠍꠣꠚ ꠅꠁꠉꠦꠟ।
MAR 1:43 ꠁꠍꠣꠄ ꠅꠃ ꠡꠝꠄꠃ ꠔꠣꠞꠦ ꠛꠤꠖꠣꠄ ꠖꠤꠟꠣ ꠀꠞ ꠖꠠꠣꠁꠀ ꠇꠁꠟꠣ,
MAR 1:44 “ꠢꠥꠘꠅ, ꠁꠔꠣ ꠈꠛꠞ ꠇꠦꠃꠞꠞꠦ ꠢꠥꠘꠣꠁꠅ ꠘꠣ। ꠈꠣꠟꠤ ꠁꠝꠣꠝ ꠍꠣꠛꠞ ꠉꠦꠍꠦ ꠉꠤꠀ ꠖꠦꠈꠣꠅ ꠀꠞ ꠙꠣꠇ-ꠍꠣꠚ ꠅꠀꠞ ꠟꠣꠉꠤ ꠢꠎꠞꠔ ꠝꠥꠍꠣꠞ ꠇꠤꠔꠣꠛꠞ ꠢꠥꠇꠥꠝ ꠝꠣꠚꠤꠇ, ꠇꠥꠞꠛꠣꠘꠤ ꠀꠖꠣꠄ ꠇꠞꠅ। ꠔꠦꠃ ꠡꠝꠣꠎꠦꠅ ꠎꠣꠘꠤꠟꠤꠛ, ꠔꠥꠝꠤ ꠜꠣꠟꠣ ꠅꠁꠉꠦꠍ।”
MAR 1:45 ꠅꠁꠟꠦ ꠢꠦ ꠛꠣꠞꠦ ꠉꠤꠀꠃ ꠁꠔꠣ ꠢꠇ꠆ꠇꠟ ꠛꠣꠄ ꠞꠐꠣꠁ ꠖꠤꠟ। ꠄꠞꠖꠣꠄ ꠁꠍꠣ ꠀꠞ ꠈꠥꠟꠣ-ꠝꠦꠟꠣ ꠇꠥꠘꠥ ꠉꠣꠃꠔ ꠎꠣꠁꠔꠣ ꠙꠣꠞꠟꠣ ꠘꠣ। ꠔꠣꠁꠘ ꠛꠣꠞꠣ ꠘꠤꠞꠣꠁ ꠎꠣꠉꠣꠔ ꠉꠤꠀ ꠞꠅꠀ ꠟꠣꠉꠟ, ꠅꠘꠅ-ꠅ ꠌꠣꠁꠞꠅꠛꠣꠄ ꠕꠘꠦ ꠝꠣꠘꠥꠡ ꠔꠣꠘ ꠉꠦꠍꠦ ꠀꠁꠟꠣ।
MAR 2:1 ꠇꠄꠖꠤꠘ ꠛꠣꠖꠦ ꠢꠎꠞꠔ ꠁꠍꠣ ꠢꠤꠞꠛꠣꠞ ꠇꠚꠞꠘꠣꠃꠝ ꠐꠣꠃꠘꠅ ꠚꠤꠞꠤꠀ ꠀꠁꠟꠦ ꠝꠣꠘꠡꠦ ꠢꠥꠘꠤꠟꠤꠟꠣ ꠔꠣꠁꠘ ꠊꠞꠅ ꠀꠍꠂꠘ।
MAR 2:2 ꠔꠦꠃ ꠅꠔ ꠝꠣꠘꠥꠡ ꠁꠘꠅ ꠎꠝꠣ ꠅꠁꠟꠣ, ꠊꠞꠅ ꠔ ꠖꠥꠞꠞ ꠇꠕꠣ, ꠊꠞꠞ ꠛꠣꠞꠦꠅ ꠀꠞ ꠎꠣꠉꠣ ꠞꠁꠟ ꠘꠣ। ꠔꠣꠁꠘ ꠄꠞꠣ ꠢꠇꠟꠞ ꠉꠦꠍꠦ ꠀꠟ꠆ꠟꠣꠞ ꠇꠣꠟꠣꠝ ꠔꠛꠟꠤꠉ ꠇꠞꠣꠔ ꠀꠍꠟꠣ।
MAR 2:3 ꠅꠃ ꠡꠝꠄ ꠌꠣꠁꠞ ꠎꠘ ꠝꠣꠘꠡꠦ ꠄꠇꠎꠘ ꠅꠞ꠆ꠖꠋ ꠛꠦꠝꠣꠞꠤꠞꠦ ꠛꠁꠀ ꠟꠁꠀ ꠁꠍꠣꠞ ꠉꠦꠍꠦ ꠀꠁꠟ, ꠄꠞꠣꠞ ꠟꠉꠦ ꠀꠞꠅ ꠝꠣꠘꠥꠡ ꠀꠍꠟꠣ।
MAR 2:4 ꠅꠁꠟꠦ ꠜꠤꠠꠞ ꠟꠣꠉꠤ ꠔꠣꠞꠦ ꠁꠍꠣꠞ ꠉꠦꠍꠦ ꠟꠁꠀ ꠎꠣꠁꠔꠣ ꠙꠣꠞꠟꠣ ꠘꠣ। ꠄꠞꠖꠣꠄ ꠔꠣꠁꠘ ꠎꠦ ꠎꠣꠉꠣꠔ ꠛꠅꠀꠔ ꠀꠍꠟꠣ, ꠑꠤꠇ ꠔꠣꠞ ꠃꠙꠞꠞ ꠌꠣꠟ ꠚꠥꠠ ꠇꠞꠤꠀ ꠙꠟꠅ ꠡꠥꠖ꠆ꠖꠣ ꠅꠃ ꠛꠦꠝꠣꠞꠤꠞꠦ ꠟꠣꠝꠣꠔ ꠟꠣꠝꠣꠁ ꠖꠤꠟ।
MAR 2:5 ꠔꠣꠞꠣꠞ ꠁꠝꠣꠘꠞ ꠛꠟ ꠖꠦꠈꠤꠀ ꠔꠣꠁꠘ ꠅꠃ ꠅꠞ꠆ꠖꠋ ꠛꠦꠝꠣꠞꠤꠞꠦ ꠇꠁꠟꠣ, “ꠛꠣꠛꠣ, ꠔꠥꠝꠣꠞ ꠔꠣꠝꠣꠝ ꠉꠥꠘꠣ ꠝꠣꠚ ꠇꠞꠤ ꠖꠤꠟꠣꠁꠟꠣꠝ।”
MAR 2:6 ꠅꠁꠟꠦ ꠢꠤꠈꠣꠘꠅ ꠇꠄꠎꠘ ꠝꠃꠟꠣꠘꠣ ꠛꠅꠀꠔ ꠀꠍꠟꠣ। ꠔꠣꠁꠘ-ꠔꠣꠁꠘ ꠝꠘꠦ ꠝꠘꠦ ꠇꠁꠟꠣ,
MAR 2:7 “ꠁ ꠝꠣꠘꠡꠦ ꠁꠟꠣꠈꠣꠘ ꠝꠣꠔꠦꠞ ꠇꠦꠘꠦ? ꠢꠦ ꠔ ꠡꠤꠞꠤꠇꠤ ꠇꠞꠦꠞ। ꠄꠇꠝꠣꠔ꠆ꠞ ꠀꠟ꠆ꠟꠣ ꠍꠣꠠꠣ ꠀꠞ ꠇꠦ ꠉꠥꠘꠣ ꠝꠣꠚ ꠇꠞꠔ ꠙꠣꠞꠦ?”
MAR 2:8 ꠔꠣꠘꠞꠦ ꠟꠁꠀ ꠝꠃꠟꠣꠘꠣ ꠅꠇꠟꠦ ꠎꠦ ꠅꠟꠣꠈꠣꠘ ꠌꠤꠘ꠆ꠔꠣ ꠇꠞꠞꠣ, ꠁꠍꠣꠄ ꠔꠣꠘ ꠉꠣꠁꠛꠤ ꠛꠟꠦ ꠁꠈꠣꠘ ꠛꠥꠎꠤꠟꠤꠟꠣ, ꠛꠥꠎꠤꠀ ꠄꠞꠣꠞꠦ ꠇꠁꠟꠣ, “ꠀꠙꠘꠣꠞꠣ ꠇꠦꠘꠦ ꠝꠘꠦ ꠝꠘꠦ ꠁꠟꠣ ꠌꠤꠘ꠆ꠔꠣ ꠇꠞꠞꠣ?
MAR 2:9 ꠁ ꠅꠞ꠆ꠖꠋ ꠛꠦꠝꠣꠞꠤꠞꠦ ꠇꠥꠘꠈꠣꠘ ꠇꠅꠀ ꠀꠝꠣꠞ ꠟꠣꠉꠤ ꠡꠥꠎꠣ, ꠔꠥꠝꠣꠞ ꠉꠥꠘꠣ ꠝꠣꠚ ꠇꠞꠣ ꠅꠁꠟ, ꠘꠣ, ꠃꠑꠅ ꠔꠥꠝꠣꠞ ꠙꠟꠅ ꠟꠁꠀ ꠀꠐꠤꠀ ꠎꠣꠅꠉꠤ?
MAR 2:10 ꠔꠦ ꠅꠈꠘ ꠀꠙꠘꠣꠞꠣ ꠙꠞꠝꠣꠘ ꠖꠦꠈꠃꠇ꠆ꠇꠣ, ꠁ ꠖꠥꠘꠤꠀꠔ ꠉꠥꠘꠣ ꠝꠣꠚ ꠇꠞꠣꠞ ꠈꠦꠝꠔꠣ ꠀꠝꠤ ꠛꠤꠘ-ꠀꠖꠝꠞ ꠀꠍꠦ,” ꠅꠈꠣꠘ ꠇꠁꠀꠃ ꠔꠣꠁꠘ ꠛꠦꠝꠣꠞꠤ ꠛꠦꠐꠣꠞꠦ ꠇꠁꠟꠣ,
MAR 2:11 “ꠀꠝꠤ ꠔꠥꠝꠣꠞꠦ ꠇꠁꠀꠞ, ꠃꠑꠅ, ꠔꠥꠝꠣꠞ ꠙꠟꠅ ꠟꠁꠀ ꠔꠥꠝꠣꠞ ꠛꠣꠠꠤꠔ ꠎꠣꠅ।”
MAR 2:12 ꠔꠦꠃ ꠟꠉꠦ ꠟꠉꠦ ꠅꠃ ꠛꠦꠝꠣꠞꠤ ꠛꠦꠐꠣ ꠃꠑꠤꠀ ꠔꠣꠞ ꠙꠟꠅ ꠟꠁꠀ ꠢꠇꠟꠞ ꠍꠣꠝꠘꠦꠃ ꠛꠣꠞ ꠅꠁꠀ ꠉꠦꠟ। ꠁꠈꠣꠘ ꠖꠦꠈꠤꠀ ꠢꠇꠟꠦ ꠔꠣꠁꠎ꠆ꠎꠥꠛ ꠅꠁꠀ ꠇꠁꠟꠣ, “ꠍꠥꠛꠢꠣꠘ ꠀꠟ꠆ꠟꠣ, ꠎꠤꠘ꠆ꠖꠦꠉꠤꠄ ꠇꠥꠘꠥꠖꠤꠘ ꠁꠟꠣꠈꠣꠘ ꠇꠣꠝ ꠖꠦꠈꠍꠤ ꠘꠣ।”
MAR 2:13 ꠛꠣꠖꠦ ꠢꠎꠞꠔ ꠁꠍꠣ ꠢꠤꠞꠛꠣꠞ ꠛꠣꠞ ꠅꠁꠀ ꠉꠣꠟꠤꠟ ꠀꠅꠞꠞ ꠗꠣꠞꠅ ꠉꠦꠟꠣ, ꠔꠦꠃ ꠢꠇ꠆ꠇꠟ ꠝꠣꠘꠥꠡ ꠔꠣꠘ ꠇꠣꠘ꠆ꠖꠣꠔ ꠀꠁꠟ, ꠔꠣꠁꠘ ꠔꠣꠞꠣꠞꠦ ꠔꠣꠟꠤꠝ ꠖꠦꠅꠀꠔ ꠟꠣꠉꠟꠣ।
MAR 2:14 ꠔꠣꠟꠤꠝ ꠖꠤꠀ ꠙꠕꠦꠖꠤ ꠎꠣꠁꠔꠦ ꠎꠣꠁꠔꠦ ꠖꠦꠈꠟꠣ, ꠀꠟꠚꠤꠞ ꠙꠥꠀ ꠟꠦꠛꠤ ꠈꠣꠎꠘꠣ ꠔꠥꠟꠣꠞ ꠅꠚꠤꠡꠅ ꠛꠁ ꠞꠁꠍꠂꠘ। ꠖꠦꠈꠤꠀ ꠔꠣꠘꠞꠦ ꠇꠁꠟꠣ, “ꠀꠅ ꠀꠝꠣꠞ ꠃꠝ꠆ꠝꠔ ꠅꠅ।” ꠔꠦꠃ ꠟꠦꠛꠤ ꠃꠑꠤꠀ ꠁꠍꠣꠞ ꠟꠉꠦ ꠟꠉꠦ ꠉꠦꠟꠣ।
MAR 2:15 ꠛꠣꠖꠦ ꠔꠣꠁꠘ ꠟꠦꠛꠤꠞ ꠛꠣꠠꠤꠔ ꠉꠤꠀ ꠈꠣꠅꠀꠔ ꠛꠁꠟꠣ। ꠛꠃꠔ ꠈꠣꠎꠘꠣ ꠔꠥꠟꠞꠣ ꠀꠞ ꠉꠥꠘꠣꠉꠣꠞ ꠝꠣꠘꠥꠡꠅ ꠁꠍꠣ ꠀꠞ ꠔꠣꠘ ꠃꠝ꠆ꠝꠔ ꠅꠇꠟꠞ ꠟꠉꠦ ꠈꠣꠘꠤꠔ ꠀꠍꠟꠣ। ꠅꠃ ꠡꠝꠄ ꠛꠃꠔ ꠝꠣꠘꠥꠡ ꠔꠣꠘ ꠈꠞꠦ ꠈꠞꠦ ꠊꠥꠞꠣꠔ ꠀꠍꠤꠟ।
MAR 2:16 ꠅꠁꠟꠦ ꠔꠣꠁꠘ ꠉꠥꠘꠣꠉꠣꠞ ꠅꠇꠟꠞ ꠟꠉꠦ ꠛꠁꠀ ꠈꠣꠘꠤ ꠈꠣꠁꠞꠣ ꠖꠦꠈꠤꠀ ꠚꠞꠤꠡꠤ ꠝꠎꠛꠞ ꠝꠃꠟꠣꠘꠣ ꠅꠇꠟꠦ ꠔꠣꠘ ꠃꠝ꠆ꠝꠔ ꠅꠇꠟꠞꠦ ꠇꠁꠟꠣ, “ꠄꠁꠘ ꠊꠥꠡꠈꠥꠞ ꠈꠣꠎꠘꠣ ꠔꠥꠟꠞꠣ ꠀꠞ ꠈꠛꠤꠍ ꠅꠇꠟꠞ ꠟꠉꠦ ꠈꠣꠅꠀ-ꠖꠣꠅꠀ ꠇꠞꠂꠘ ꠇꠦꠘꠦ?”
MAR 2:17 ꠁꠈꠣꠘ ꠢꠥꠘꠤꠀ ꠁꠍꠣꠄ ꠅꠃ ꠝꠃꠟꠣꠘꠣ ꠅꠇꠟꠞꠦ ꠇꠁꠟꠣ, “ꠜꠣꠟꠣ ꠝꠣꠘꠡꠞ ꠇꠛꠤꠞꠣꠎ ꠟꠣꠉꠦ ꠘꠣ, ꠅꠁꠟꠦ ꠛꠦꠝꠣꠞꠤꠞ ꠔ ꠟꠣꠉꠦ। ꠀꠝꠤ ꠙꠞꠦꠎꠉꠣꠞꠞ ꠉꠦꠍꠦ ꠀꠁꠍꠤ ꠘꠣ, ꠉꠥꠘꠣꠉꠣꠞ ꠅꠇꠟꠞꠦꠃ ꠖꠣꠅꠔ ꠖꠤꠔꠣꠝ ꠀꠁꠍꠤ।”
MAR 2:18 ꠄꠇꠛꠣꠞ ꠢꠎꠞꠔ ꠄꠢꠤꠀꠞ ꠃꠝ꠆ꠝꠔ ꠀꠞ ꠚꠞꠤꠡꠤ ꠅꠇꠟ ꠞꠥꠎꠣ ꠀꠍꠟꠣ, ꠁꠔꠣ ꠖꠦꠈꠤꠀ ꠇꠤꠍꠥ ꠝꠣꠘꠡꠦ ꠁꠍꠣꠞ ꠉꠦꠍꠦ ꠀꠁꠀ ꠇꠁꠟꠣ, “ꠄꠢꠤꠀ ꠘꠛꠤꠞ ꠃꠝ꠆ꠝꠔ ꠀꠞ ꠚꠞꠤꠡꠤ ꠅꠇꠟꠦ ꠞꠥꠎꠣ ꠞꠣꠈꠂꠘ, ꠅꠁꠟꠦ ꠀꠙꠘꠣꠞ ꠃꠝ꠆ꠝꠔ ꠅꠇꠟꠦ ꠞꠥꠎꠣ ꠞꠣꠈꠂꠘ ꠘꠣ ꠇꠦꠘꠦ?”
MAR 2:19 ꠁꠍꠣꠄ ꠔꠣꠞꠣꠞꠦ ꠇꠁꠟꠣ, “ꠘꠡꠣ ꠟꠉꠦ ꠕꠣꠇꠔꠦ ꠇꠤꠔꠣ ꠛꠂꠞꠣꠔꠤ ꠅꠇꠟꠦ ꠞꠥꠎꠣ ꠞꠣꠈꠔ ꠙꠣꠞꠦ ꠘꠤ? ꠘꠣ, ꠇꠦꠃ ꠞꠥꠎꠣ ꠞꠄ ꠘꠣ, ꠎꠔꠖꠤꠘ ꠘꠡꠣ ꠟꠉꠦ ꠕꠣꠇꠂꠘ, ꠅꠔ ꠖꠤꠘ ꠔꠣꠞꠣ ꠞꠥꠎꠣ ꠞꠣꠈꠔ ꠙꠣꠞꠦ ꠘꠣ।
MAR 2:20 ꠅꠁꠟꠦ ꠅꠟꠣ ꠅꠇ꠆ꠔ ꠀꠁꠛ, ꠎꠦꠛꠟꠣ ꠘꠡꠣꠞꠦ ꠔꠣꠞꠣꠞ ꠉꠦꠍ ꠕꠘꠦ ꠢꠞꠣꠁꠟ ꠅꠁꠎꠤꠛ, ꠅꠃ ꠡꠝꠄ ꠔꠣꠞꠣ ꠞꠥꠎꠣ ꠞꠣꠈꠛꠣ।
MAR 2:21 ꠙꠥꠞꠣꠘ ꠇꠣꠙꠠꠞ ꠝꠣꠎꠦ ꠇꠦꠃ ꠘꠄꠀ ꠇꠣꠙꠠ ꠎꠥꠠꠣ ꠖꠦꠄ ꠘꠣ। ꠎꠥꠠꠣ ꠖꠤꠟꠦ ꠅꠃ ꠇꠣꠙꠠ ꠗꠁꠀ ꠢꠣꠞꠟꠦ ꠈꠥꠍ ꠅꠁꠀ ꠍꠤꠠꠤꠀ ꠁ ꠚꠥꠠ ꠀꠞꠅ ꠛꠠ ꠅꠁꠎꠣꠄ।
MAR 2:22 ꠙꠥꠞꠣꠘ ꠌꠣꠝꠠꠣꠞ ꠕꠟꠤꠔ ꠇꠦꠃ ꠔꠣꠎꠣ ꠀꠋꠉꠥꠞꠞ ꠞꠡ ꠜꠞꠦ ꠘꠣ। ꠜꠞꠟꠦ ꠅꠃ ꠔꠣꠎꠣ ꠞꠡꠞ ꠚꠣꠚꠦ ꠕꠟꠤ ꠚꠣꠐꠤꠀ ꠞꠡ ꠀꠞ ꠕꠟꠤ ꠖꠥꠁꠅꠔꠣ ꠛꠞꠛꠣꠖ ꠅꠄ। ꠔꠣꠎꠣ ꠞꠡ ꠘꠄꠀ ꠕꠟꠤꠔ ꠕꠁꠔꠦ ꠅꠄ।”
MAR 2:23 ꠄꠇ ꠎꠥꠝ꠆ꠝꠣꠛꠣꠞꠦ ꠢꠎꠞꠔ ꠁꠍꠣ ꠈꠦꠔꠞ ꠀꠁꠟꠦꠖꠤ ꠀꠐꠤꠀ ꠎꠣꠅꠀꠔ ꠀꠍꠟꠣ। ꠀꠐꠤ ꠀꠐꠤ ꠔꠣꠘ ꠃꠝ꠆ꠝꠔ ꠅꠇꠟꠦ ꠗꠣꠘꠞ ꠍꠠꠣ ꠍꠤꠠꠣꠔ ꠟꠣꠉꠟꠣ।
MAR 2:24 ꠁꠔꠣ ꠖꠦꠈꠤꠀ ꠚꠞꠤꠡꠤ ꠖꠟꠦ ꠁꠍꠣꠞꠦ ꠇꠁꠟꠣ, “ꠀꠝꠞꠣꠞ ꠝꠥꠍꠣ ꠘꠛꠤꠞ ꠡꠞꠤꠅꠔ ꠝꠣꠚꠤꠇ ꠔ ꠎꠥꠝ꠆ꠝꠣꠛꠣꠞꠦ ꠇꠥꠘꠥꠎꠣꠔ ꠇꠣꠝ ꠇꠞꠣ ꠎꠣꠁꠎ ꠘꠣꠄ, ꠔꠦ ꠔꠣꠞꠣ ꠁ ꠗꠣꠘꠞ ꠍꠠꠣ ꠍꠤꠠꠤꠞꠣ ꠇꠤꠔꠣꠞ ꠟꠣꠉꠤ?”
MAR 2:25 ꠁꠍꠣꠄ ꠎꠥꠀꠙ ꠖꠤꠟꠣ, “ꠖꠣꠃꠖ ꠘꠛꠤ ꠀꠞ ꠔꠣꠘ ꠟꠉꠞ ꠢꠇꠟꠦ ꠄꠇꠛꠣꠞ ꠙꠦꠐꠞ ꠜꠥꠇꠦ ꠎꠦꠔꠣ ꠇꠞꠍꠟꠣ, ꠁꠔꠣ ꠇꠤꠔꠣ ꠔꠥꠝꠤꠔꠣꠁꠘ ꠇꠥꠘꠥ ꠡꠝꠄ ꠙꠠꠍ ꠘꠣ ꠘꠤ?
MAR 2:26 ꠔꠣꠁꠘ ꠔ ꠙꠞꠗꠣꠘ ꠁꠝꠣꠝ ꠀꠛꠤꠀꠕꠞꠞ ꠀꠝꠟꠅ ꠀꠟ꠆ꠟꠣꠞ ꠊꠞꠅ ꠢꠣꠝꠣꠁꠀ, ꠎꠦ ꠙꠛꠤꠔ꠆ꠞ ꠞꠥꠐꠤ ꠁꠝꠣꠝ ꠍꠣꠛ ꠛꠣꠖꠦ ꠀꠞ ꠇꠦꠃ ꠈꠣꠅꠀ ꠎꠣꠁꠎ ꠘꠣꠄ, ꠅꠃ ꠞꠥꠐꠤ ꠈꠣꠁꠍꠟꠣ ꠀꠞ ꠔꠣꠘ ꠟꠉꠞ ꠝꠣꠘꠡꠞꠦꠅ ꠖꠤꠍꠟꠣ।”
MAR 2:27 ꠁꠍꠣꠄ ꠔꠣꠞꠣꠞꠦ ꠀꠞꠅ ꠇꠁꠟꠣ, “ꠎꠥꠝ꠆ꠝꠣꠛꠣꠞꠞ ꠜꠣꠟꠣꠁꠞ ꠟꠣꠉꠤ ꠔ ꠝꠣꠘꠡꠞꠦ ꠛꠣꠘꠣꠁꠟ ꠅꠁꠍꠦ ꠘꠣ, ꠅꠁꠟꠦ ꠝꠣꠘꠡꠞ ꠜꠣꠟꠣꠁꠞ ꠟꠣꠉꠤꠃ ꠎꠥꠝ꠆ꠝꠣꠛꠣꠞ ꠛꠣꠘꠣꠁꠟ ꠅꠁꠍꠦ।
MAR 2:28 ꠢꠥꠘꠅ, ꠎꠥꠝ꠆ꠝꠣꠛꠣꠞꠞ ꠔꠣꠝꠣꠝ ꠄꠈꠔꠤꠀꠞ ꠀꠝꠤ ꠛꠤꠘ-ꠀꠖꠝꠞ ꠀꠔꠅ ꠀꠍꠦ।”
MAR 3:1 ꠢꠎꠞꠔ ꠁꠍꠣ ꠢꠤꠞꠛꠣꠞ ꠝꠍꠤꠖꠅ ꠉꠤꠀ ꠢꠣꠝꠣꠁꠟꠣ, ꠢꠘꠅ ꠅꠟꠣ ꠄꠇ ꠛꠦꠐꠣ ꠀꠍꠤꠟ, ꠔꠣꠞ ꠄꠇ ꠀꠔ ꠛꠦꠝꠣꠞꠦ ꠢꠥꠇꠣꠁ ꠉꠦꠍꠦ।
MAR 3:2 ꠔꠣꠁꠘ ꠎꠥꠝ꠆ꠝꠣꠛꠣꠞꠦ ꠅꠃ ꠛꠦꠐꠣꠞꠦ ꠜꠣꠟꠣ ꠇꠞꠂꠘ ꠇꠤ ꠘꠣ ꠖꠦꠈꠣꠞ ꠟꠣꠉꠤ ꠚꠞꠤꠡꠤ ꠝꠎꠛꠞ ꠇꠄꠎꠘ ꠝꠣꠘꠡꠦ ꠔꠣꠘ ꠛꠣꠄ ꠈꠥꠛ ꠈꠤꠀꠟ ꠞꠣꠈꠟꠣ, ꠔꠣꠞꠣ ꠌꠣꠁꠟꠣ ꠔꠣꠘ ꠇꠥꠘꠥ ꠈꠥꠔ ꠛꠣꠞ ꠇꠞꠤꠀ ꠚꠣꠘ꠆ꠖꠅ ꠚꠣꠟꠣꠁꠔꠣ।
MAR 3:3 ꠁꠍꠣꠄ ꠅꠃ ꠢꠥꠇꠘꠣ ꠀꠔꠀꠟꠣ ꠛꠦꠐꠣꠞꠦ ꠇꠁꠟꠣ, “ꠅꠛꠣ, ꠢꠇꠟꠞ ꠍꠣꠝꠘꠦ ꠀꠁꠀ ꠃꠛꠣꠅ ꠌꠣꠁꠘ।”
MAR 3:4 ꠛꠦꠐꠣ ꠀꠁꠀ ꠢꠣꠞꠟꠦ ꠔꠣꠁꠘ ꠢꠇꠟ ꠝꠣꠘꠡꠞꠦ ꠎꠤꠇꠣꠁꠟꠣ, “ꠍꠣꠛ ꠅꠇꠟ, ꠎꠥꠝ꠆ꠝꠣꠛꠣꠞꠦ ꠇꠤꠔꠣ ꠇꠞꠣ ꠎꠞꠥꠞ, ꠘꠦꠇ ꠇꠣꠝ, ꠘꠣ ꠛꠖ ꠇꠣꠝ? ꠎꠣꠘꠞ ꠢꠦꠚꠣꠎꠔ ꠇꠞꠣ, ꠘꠣ ꠎꠣꠘꠦ ꠝꠣꠞꠣ?” ꠁꠈꠣꠘ ꠢꠥꠘꠤꠀ ꠔꠣꠞꠣ ꠝꠥꠈ ꠛꠘ꠆ꠖ ꠇꠞꠤ ꠛꠁꠞꠁꠟꠣ।
MAR 3:5 ꠔꠣꠞꠣꠞ ꠝꠘꠞ ꠁ ꠙꠣꠡꠣꠘ ꠢꠣꠟꠔ ꠖꠦꠈꠤꠀ, ꠁꠍꠣꠞ ꠖꠤꠟꠅ ꠈꠥꠛ ꠖꠥꠈ ꠢꠣꠝꠣꠁꠟ। ꠔꠣꠁꠘ ꠔꠣꠞꠣꠞ ꠛꠣꠄ ꠌꠣꠁꠀ ꠉꠥꠍꠣ ꠇꠞꠤ ꠢꠃ ꠛꠦꠝꠣꠞꠤ ꠛꠦꠐꠣꠞꠦ ꠇꠁꠟꠣ, “ꠔꠥꠝꠣꠞ ꠀꠔꠈꠣꠘ ꠛꠣꠠꠣꠅ।” ꠢꠦ ꠔꠣꠞ ꠀꠔ ꠛꠣꠠꠣꠁꠔꠦꠃ ꠀꠉꠞ ꠟꠣꠈꠣꠘ ꠙꠥꠞꠣ ꠜꠣꠟꠣ ꠅꠁꠉꠦꠟ।
MAR 3:6 ꠁꠈꠣꠘ ꠖꠦꠈꠤꠀꠃ ꠚꠞꠤꠡꠤ ꠅꠇꠟ ꠟꠉꠦ ꠟꠉꠦ ꠛꠣꠞ ꠅꠁꠉꠦꠟꠣ, ꠉꠤꠀ ꠞꠣꠎꠣ ꠢꠦꠞꠥꠖꠞ ꠝꠣꠘꠡꠞ ꠟꠉꠦ ꠝꠤꠟꠤꠀ ꠁꠍꠣꠞꠦ ꠎꠣꠘꠦ ꠝꠣꠞꠤꠟꠤꠛꠣꠞ ꠙꠞꠣꠝꠤꠡ ꠇꠞꠟꠣ।
MAR 3:7 ꠛꠣꠖꠦ ꠁꠍꠣꠄ ꠔꠣꠘ ꠡꠣꠉꠞꠤꠖ ꠅꠇꠟꠞꠦ ꠟꠁꠀ ꠀꠅꠞꠞ ꠙꠣꠞꠅ ꠉꠦꠟꠣꠉꠤ, ꠢꠘꠅ-ꠅ ꠛꠃꠔ ꠝꠣꠘꠥꠡ ꠔꠣꠘ ꠈꠞꠦ ꠈꠞꠦ ꠉꠦꠟꠣ। ꠔꠣꠘ ꠘꠣꠘꠣꠘ ꠝꠥꠎꠦꠎꠣ ꠀꠞ ꠇꠦꠞꠣꠝꠔꠤꠞ ꠈꠛꠞ ꠙꠣꠁꠀ, ꠄꠢꠥꠖꠤꠀ ꠎꠤꠟꠣ, ꠉꠣꠟꠤꠟ, ꠎꠦꠞꠥꠎꠣꠟꠦꠝ, ꠁꠖꠥꠝ, ꠎꠞ꠆ꠖꠣꠘ ꠉꠣꠋꠉꠞ ꠢꠙꠣꠞ, ꠡꠥꠞ ꠀꠞ ꠍꠤꠖꠘ ꠄꠟꠣꠇꠣ ꠕꠣꠇꠤ ꠅꠃ ꠝꠣꠘꠥꠡ ꠅꠇꠟ ꠀꠁꠍꠟꠣ।
MAR 3:9 ꠝꠣꠘꠡꠞ ꠜꠤꠠ ꠖꠦꠈꠤꠀ ꠔꠣꠁꠘ ꠡꠣꠉꠞꠤꠖ ꠅꠇꠟꠞꠦ ꠇꠁꠟꠣ, “ꠔꠥꠝꠞꠣ ꠀꠝꠣꠞ ꠟꠣꠉꠤ ꠄꠇꠈꠣꠘ ꠘꠣꠅ ꠎꠥꠁꠔ ꠇꠞꠅ, ꠀꠞꠘꠣꠄ ꠝꠣꠘꠡꠦ ꠑꠦꠟꠣ-ꠗꠣꠇ꠆ꠇꠣ ꠈꠣꠁꠀ ꠀꠝꠣꠞ ꠃꠙꠞꠦ ꠀꠁꠀ ꠙꠠꠤꠎꠤꠛꠣ।”
MAR 3:10 ꠔꠣꠁꠘ ꠛꠃꠔ ꠛꠦꠝꠣꠞꠤꠞꠦ ꠡꠤꠚꠣ ꠇꠞꠣꠄ ꠛꠦꠝꠣꠞꠤ ꠝꠣꠘꠡꠦ ꠔꠣꠘꠦ ꠍꠁꠔꠣ ꠇꠞꠤ ꠑꠦꠟꠤꠀ ꠗꠣꠇ꠆ꠇꠣꠁꠀ ꠀꠁꠀ ꠔꠣꠘ ꠃꠙꠞꠦ ꠙꠠꠤꠎꠤꠔꠣ।
MAR 3:11 ꠀꠞ ꠎꠤꠘ-ꠜꠥꠔ ꠅꠇꠟꠦ ꠔꠣꠘꠦ ꠖꠦꠈꠟꠦꠃ ꠔꠣꠘ ꠍꠣꠝꠘꠦ ꠝꠣꠐꠤꠔ ꠙꠠꠤꠀ ꠍꠁꠎꠖꠣ ꠇꠞꠤꠀ ꠌꠤꠟ꠆ꠟꠣꠁꠀ ꠇꠁꠔ, “ꠀꠙꠘꠦꠃ ꠀꠟ꠆ꠟꠣꠞ ꠈꠣꠍ ꠝꠣꠄꠀꠞ ꠎꠘ ꠁꠛꠘꠥꠟ꠆ꠟꠣ।”
MAR 3:12 ꠅꠁꠟꠦ ꠁꠍꠣꠄ ꠔꠣꠞꠣꠞꠦ ꠈꠥꠛ ꠇꠠꠣꠇꠠꠤ ꠢꠥꠇꠥꠝ ꠖꠤꠔꠣ, “ꠈꠛꠞꠖꠣꠞ! ꠔꠥꠝꠞꠣ ꠀꠝꠣꠞ ꠙꠞꠤꠌꠄ ꠎꠣꠁꠞ ꠇꠞꠤꠅ ꠘꠣ।”
MAR 3:13 ꠛꠣꠖꠦ ꠢꠎꠞꠔ ꠁꠍꠣ ꠙꠣꠠꠞ ꠃꠙꠞꠦ ꠉꠦꠟꠣꠉꠤ, ꠉꠤꠀ ꠔꠣꠘ ꠙꠍꠘ꠆ꠖ ꠇꠞꠣ ꠇꠤꠍꠥ ꠡꠣꠉꠞꠤꠖꠞꠦ ꠔꠣꠘ ꠇꠣꠘ꠆ꠖꠣꠔ ꠒꠣꠇꠣꠁꠀ ꠘꠤꠟꠣ।
MAR 3:14 ꠄꠞꠣ ꠀꠁꠀ ꠢꠣꠞꠟꠦ ꠄꠞꠣꠞ ꠝꠣꠎ ꠕꠘꠦ ꠛꠣꠞꠅꠎꠘꠞꠦ ꠔꠣꠁꠘ ꠀꠟꠉ ꠇꠞꠟꠣ, ꠄꠞꠣ ꠎꠣꠘꠥ ꠔꠣꠘ ꠟꠉꠦ ꠟꠉꠦ ꠞꠂꠘ, ꠀꠞ ꠎꠤꠘ-ꠜꠥꠔ ꠍꠣꠠꠣꠘꠤꠞ ꠈꠦꠝꠔꠣ ꠖꠤꠀ ꠄꠞꠣꠞꠦ ꠔꠛꠟꠤꠉ ꠇꠣꠝꠅ ꠛꠦꠎꠤꠔꠣ ꠙꠣꠞꠂꠘ। ꠅꠃ ꠛꠣꠞꠅꠎꠘ ꠅꠁꠟꠣ ꠔꠣꠘ ꠍꠣꠢꠣꠛꠤ।
MAR 3:16 ꠔꠣꠁꠘ ꠍꠣꠁꠝꠘꠞ ꠘꠄꠀ ꠘꠣꠝ ꠞꠣꠈꠟꠣ ꠙꠤꠔꠞ।
MAR 3:17 ꠎꠤꠛꠥꠖꠤꠀꠞ ꠖꠥꠁ ꠙꠥꠀ ꠁꠀꠇꠥꠛ ꠀꠞ ꠢꠣꠘ꠆ꠘꠣꠘ, ꠔꠣꠁꠘ ꠄꠞꠣꠞ ꠘꠄꠀ ꠘꠣꠝ ꠖꠤꠟꠣ ꠛꠥꠘꠦꠞꠉꠡ, ꠝꠣꠘꠤ ꠝꠦꠊꠞ ꠒꠣꠇꠞ ꠙꠥꠀ।
MAR 3:18 ꠀꠘ꠆ꠖꠞꠤꠀꠍ, ꠚꠤꠟꠤꠚ, ꠛꠞ꠆ꠕꠟꠝꠄ, ꠝꠕꠤ, ꠕꠥꠝꠣꠍ, ꠀꠟꠚꠤꠞ ꠙꠥꠀ ꠁꠀꠇꠥꠛ, ꠕꠖ꠆ꠖꠦ, ꠝꠥꠇ꠆ꠔꠤꠎꠥꠖ꠆ꠖꠣ ꠍꠣꠁꠝꠘ,
MAR 3:19 ꠀꠞ ꠁꠢꠥꠖꠣ ꠁꠡ꠆ꠇꠣꠞꠤꠀꠔ, ꠅꠃ ꠁꠢꠥꠖꠣꠄ ꠛꠣꠖꠦ ꠛꠦꠁꠝꠣꠘꠤ ꠇꠞꠤꠀ ꠁꠍꠣꠞꠦ ꠖꠥꠡꠝꠘꠞ ꠀꠔꠅ ꠗꠞꠣꠁꠀ ꠖꠤꠍꠤꠟ।
MAR 3:20 ꠢꠎꠞꠔ ꠁꠍꠣ ꠄꠇ ꠛꠣꠠꠤꠔ ꠉꠦꠟꠣ। ꠅꠘꠅ ꠀꠁꠀꠅ ꠅꠔ ꠛꠦꠡꠤ ꠝꠣꠘꠡꠦ ꠜꠤꠠ ꠛꠣꠘ꠆ꠖꠤꠟꠣ, ꠜꠤꠠꠞ ꠟꠣꠉꠤ ꠁꠍꠣꠄ ꠀꠞ ꠍꠣꠢꠣꠛꠤ ꠅꠇꠟꠦꠅ ꠈꠣꠘꠣ ꠈꠣꠁꠔꠣ ꠙꠣꠞꠟꠣ ꠘꠣ।
MAR 3:21 ꠔꠣꠘ ꠜꠣꠁ-ꠛꠤꠞꠣꠖꠞꠦ ꠁ ꠈꠛꠞ ꠢꠥꠘꠤꠀ ꠔꠣꠘꠞꠦ ꠅꠘ ꠕꠣꠇꠤ ꠛꠣꠞ ꠇꠞꠤ ꠘꠦꠅꠀꠔ ꠀꠁꠟꠣ, ꠄꠞꠣ ꠇꠁꠟꠣ, “ꠔꠣꠞ ꠔ ꠝꠣꠕꠣ ꠈꠣꠞꠣꠙ ꠅꠁꠉꠦꠍꠦ।”
MAR 3:22 ꠎꠦꠞꠥꠎꠣꠟꠦꠝ ꠕꠣꠇꠤ ꠇꠄꠎꠘ ꠝꠃꠟꠣꠘꠣ ꠀꠁꠍꠟꠣ, ꠔꠣꠞꠣ ꠇꠁꠟꠣ, “ꠎꠤꠘꠞ ꠛꠣꠖꠡꠣ ꠛꠦꠟ-ꠍꠛꠥꠟꠦ ꠔꠣꠞꠦ ꠀꠍꠞ ꠇꠞꠍꠦ। ꠅꠃ ꠛꠦꠟ-ꠍꠛꠥꠟꠞ ꠛꠟꠦ ꠢꠦ ꠎꠤꠘ-ꠜꠥꠔ ꠍꠣꠠꠣꠄ।”
MAR 3:23 ꠁꠈꠣꠘ ꠢꠥꠘꠤꠀ ꠁꠍꠣꠄ ꠅꠃ ꠝꠃꠟꠣꠘꠣ ꠅꠇꠟꠞꠦ ꠗꠣꠞꠅ ꠀꠘꠣꠁꠀ ꠇꠤꠌ꠆ꠍꠣ ꠖꠤꠀ ꠇꠁꠟꠣ, “ꠡꠄꠔꠣꠘꠦ ꠇꠤꠟꠣ ꠡꠄꠔꠣꠘꠞꠦ ꠈꠦꠖꠣꠄ?
MAR 3:24 ꠇꠥꠘꠥ ꠖꠦꠡꠞ ꠜꠤꠔꠞꠦ ꠖꠟꠣꠖꠟꠤ ꠟꠣꠉꠤꠉꠦꠟꠦ ꠁ ꠖꠦꠡ ꠔ ꠀꠞ ꠐꠤꠇꠦ ꠘꠣ।
MAR 3:25 ꠅꠃꠟꠣ ꠇꠥꠘꠥ ꠙꠞꠤꠛꠣꠞꠞ ꠝꠣꠎꠦꠅ ꠎꠦꠛꠟꠣ ꠖꠟꠣꠖꠟꠤ ꠟꠣꠉꠤꠎꠣꠄ, ꠅꠃ ꠙꠞꠤꠛꠣꠞꠅ ꠀꠞ ꠐꠤꠇꠦ ꠘꠣ।
MAR 3:26 ꠔꠦ ꠡꠄꠔꠣꠘꠦꠅ ꠎꠥꠖꠤ ꠘꠤꠎꠞ ꠝꠣꠎꠦ ꠖꠟꠣꠖꠟꠤ ꠟꠣꠉꠣꠁ ꠖꠦꠄ, ꠢꠦ-ꠅ ꠔ ꠐꠤꠇꠔ ꠘꠣꠄ, ꠛꠤꠘꠣꠡ ꠅꠁꠎꠤꠛ।
MAR 3:27 ꠀꠍꠟ ꠢꠣꠍꠣ ꠇꠕꠣ ꠅꠁꠟ, ꠇꠥꠘꠥ ꠒꠣꠇꠣꠁꠔ ꠒꠣꠇꠣꠔꠤꠔ ꠀꠁꠀ ꠙꠄꠟꠣ ꠅꠃ ꠛꠣꠠꠤꠞ ꠛꠟꠀꠟꠣ ꠝꠥꠟ ꠉꠤꠞꠡ꠆ꠔꠞꠦ ꠘꠣ ꠛꠣꠘ꠆ꠖꠤꠟꠦ, ꠢꠦ ꠟꠥꠐ-ꠔꠞꠣꠎ ꠇꠞꠔ ꠙꠣꠞꠔ ꠘꠣꠄ। ꠅꠁꠟꠦ ꠔꠣꠞꠦ ꠛꠣꠘ꠆ꠖꠤꠀ ꠢꠣꠞꠟꠦ ꠟꠥꠐ-ꠔꠞꠣꠎ ꠇꠞꠔ ꠙꠣꠞꠛ।
MAR 3:28 ꠢꠥꠘꠃꠇ꠆ꠇꠣ, ꠀꠝꠤ ꠢꠣꠍꠣ ꠇꠕꠣ ꠇꠁꠞꠣꠝ, ꠝꠣꠘꠡꠞ ꠔꠣꠝꠣꠝ ꠘꠝꠥꠘꠣꠞ ꠉꠥꠘꠣ ꠀꠞ ꠇꠥꠚꠥꠞꠤꠞ ꠝꠣꠚꠤ ꠀꠍꠦ,
MAR 3:29 ꠅꠁꠟꠦ ꠙꠣꠇ ꠞꠥꠢꠥꠞ ꠛꠦꠙꠣꠞꠦ ꠇꠥꠚꠥꠞꠤ ꠇꠞꠟꠦ, ꠇꠥꠘꠥꠝꠘ꠆ꠔꠦꠃ ꠁ ꠉꠥꠘꠣꠞ ꠝꠣꠚꠤ ꠝꠤꠟꠔ ꠘꠣꠄ। ꠁ ꠉꠥꠘꠣ ꠞꠥꠎ ꠢꠣꠡꠞ ꠙꠞ꠆ꠎꠘ꠆ꠔ ꠎꠣꠞꠤ ꠞꠁꠛ।”
MAR 3:30 ꠁꠍꠣꠞ ꠃꠙꠞꠦ ꠎꠤꠘꠦ ꠀꠍꠞ ꠇꠞꠍꠦ, ꠝꠃꠟꠣꠘꠣ ꠅꠇꠟꠦ ꠅꠃ ꠇꠕꠣ ꠇꠅꠀꠄ ꠔꠣꠁꠘ ꠔꠣꠞꠣꠞꠦ ꠅꠃꠟꠣ ꠎꠥꠀꠙ ꠖꠤꠟꠣ।
MAR 3:31 ꠅꠃ ꠡꠝꠄ ꠢꠎꠞꠔ ꠁꠍꠣꠞ ꠝꠣ ꠀꠞ ꠜꠣꠁꠀꠁꠘ ꠀꠁꠀ ꠛꠣꠞꠦ ꠕꠘꠦ ꠔꠣꠘ ꠉꠦꠍꠦ ꠈꠛꠞ ꠙꠣꠑꠣꠁꠟꠣ।
MAR 3:32 ꠅꠁꠟꠦ ꠌꠣꠁꠞꠅ ꠉꠣꠟꠣꠛꠣꠄ ꠝꠣꠘꠡꠞ ꠜꠤꠠ ꠟꠣꠉꠣꠁꠟ ꠀꠍꠤꠟ, ꠝꠣꠘꠡꠦ ꠔꠣꠘꠞꠦ ꠇꠁꠟꠣ, “ꠢꠥꠎꠥꠞ, ꠀꠙꠘꠣꠞ ꠀꠝ꠆ꠝꠣ ꠀꠞ ꠜꠣꠁꠀꠁꠘ ꠀꠁꠀ ꠛꠣꠞꠦ ꠀꠙꠘꠣꠞ ꠔꠣꠟ꠆ꠟꠣꠡ ꠇꠞꠞꠣ।”
MAR 3:33 ꠔꠣꠁꠘ ꠇꠁꠟꠣ, “ꠀꠝꠣꠞ ꠝꠣ ꠀꠞ ꠜꠣꠁꠀꠁꠘ ꠇꠦ?”
MAR 3:34 ꠇꠁꠀ ꠔꠣꠁꠘ ꠌꠣꠁꠞꠅ ꠉꠣꠟꠣꠞ ꠝꠣꠘꠡꠞ ꠛꠣꠄ ꠌꠣꠁꠀ ꠇꠁꠟꠣ, “ꠢꠥꠘꠅ, ꠄꠞꠣꠃ ꠔ ꠀꠝꠣꠞ ꠝꠣ ꠀꠞ ꠜꠣꠁꠀꠁꠘ।
MAR 3:35 ꠎꠦꠞꠣ ꠀꠟ꠆ꠟꠣꠞ ꠝꠞ꠆ꠎꠤ ꠎꠥꠉꠣꠁꠀ ꠌꠟꠂꠘ, ꠔꠣꠞꠣꠃ ꠔ ꠀꠝꠣꠞ ꠝꠣ, ꠀꠞ ꠜꠣꠁ-ꠛꠁꠘ।”
MAR 4:1 ꠢꠎꠞꠔ ꠁꠍꠣ ꠢꠤꠞꠛꠣꠞ ꠉꠣꠟꠤꠟ ꠀꠅꠞꠞ ꠙꠣꠞꠅ ꠀꠁꠀ ꠝꠣꠘꠡꠞꠦ ꠔꠣꠟꠤꠝ ꠖꠤꠔꠣ ꠟꠣꠉꠟꠣ। ꠔꠣꠘ ꠌꠣꠁꠞꠅ ꠉꠣꠟꠣꠛꠣꠄ ꠛꠃꠔ ꠝꠣꠘꠡꠦ ꠜꠤꠠ ꠛꠣꠘ꠆ꠖꠤꠟ꠆ꠟꠣ, ꠄꠞꠖꠣꠄ ꠔꠣꠁꠘ ꠄꠇ ꠘꠣꠅꠔ ꠃꠑꠤꠀ ꠛꠁꠟꠣ, ꠀꠞ ꠝꠣꠘꠡꠦ ꠙꠣꠞꠅ ꠕꠘꠦ ꠔꠣꠘ ꠛꠄꠀꠘ ꠢꠥꠘꠟꠣ।
MAR 4:2 ꠔꠣꠁꠘ ꠇꠤꠌ꠆ꠍꠣ ꠢꠥꠘꠣꠁ ꠢꠥꠘꠣꠁ ꠝꠣꠘꠡꠞꠦ ꠔꠣꠟꠤꠝ ꠖꠦꠅꠀꠔ ꠀꠍꠟꠣ, ꠄꠞꠝꠣꠎꠦ ꠔꠣꠁꠘ ꠇꠁꠟꠣ,
MAR 4:3 “ꠗꠞꠃꠇ꠆ꠇꠣ, ꠄꠇ ꠉꠤꠞꠡ꠆ꠔꠦ ꠎꠣꠟꠣ ꠛꠣꠁꠘ ꠇꠞꠣꠔ ꠉꠦꠟ।
MAR 4:4 ꠉꠤꠀ ꠛꠣꠁꠘ ꠇꠞꠣꠞ ꠡꠝꠄ ꠇꠤꠍꠥ ꠎꠣꠟꠣ ꠙꠕꠞ ꠇꠣꠘ꠆ꠖꠣꠔ ꠙꠠꠟ, ꠀꠞ ꠙꠣꠈꠤꠘ꠆ꠔꠦ ꠀꠁꠀ ꠁꠔꠣ ꠈꠣꠁꠟꠤꠟ।
MAR 4:5 ꠇꠤꠍꠥ ꠎꠣꠟꠣ ꠙꠣꠔ꠆ꠔꠞ ꠀꠟꠣ ꠝꠣꠐꠤꠔ ꠙꠠꠟ, ꠁꠔꠣꠞ ꠔꠟꠦ ꠛꠦꠡꠤ ꠝꠣꠐꠤ ꠀꠍꠤꠟ ꠘꠣ, ꠄꠞꠖꠣꠄ ꠔꠟꠦꠖꠤ ꠛꠟ ꠘꠣ ꠇꠞꠤꠀꠃ ꠎꠟꠖꠤ ꠇꠞꠤ ꠚꠥꠐꠤꠉꠦꠟ।
MAR 4:6 ꠛꠣꠖꠦ ꠡꠥꠞꠥꠎ ꠃꠑꠤꠀ ꠢꠣꠞꠟꠦ ꠎꠁꠞ ꠈꠣꠁꠟꠤꠟ, ꠀꠞ ꠔꠟꠞ ꠎꠠꠦ ꠞꠡ ꠘꠣ ꠙꠣꠅꠀꠄ ꠢꠥꠇꠣꠁꠀ ꠝꠞꠤꠉꠦꠟ।
MAR 4:7 ꠇꠤꠍꠥ ꠎꠣꠟꠣ ꠎꠋꠟꠣꠞ ꠝꠣꠎꠦ ꠙꠠꠟ, ꠔꠦꠃ ꠎꠋꠟꠣ ꠛꠠ ꠅꠁꠀ ꠁꠔꠣꠞꠦ ꠎꠣꠔꠤꠀ ꠗꠞꠟ, ꠄꠞꠖꠣꠄ ꠇꠥꠘꠥ ꠍꠠꠣ ꠍꠣꠠꠟ ꠘꠣ।
MAR 4:8 ꠅꠁꠟꠦ ꠇꠤꠍꠥ ꠎꠣꠟꠣ ꠜꠣꠟꠣ ꠎꠝꠤꠘꠅ ꠙꠠꠟ, ꠁꠔꠣꠄ ꠀꠟꠤ ꠛꠣꠞ ꠅꠁꠀ ꠛꠠ ꠅꠁꠀ ꠍꠠꠣ ꠍꠣꠠꠟ, ꠇꠥꠘꠥ ꠍꠠꠣꠄ ꠔꠤꠡ, ꠇꠥꠘꠥ ꠍꠠꠣꠄ ꠡꠣꠁꠐ, ꠇꠥꠘꠥ ꠍꠠꠣꠄ ꠄꠇ-ꠡ ꠉꠥꠘ ꠛꠦꠡꠤ ꠗꠣꠘ ꠗꠞꠟ।”
MAR 4:9 ꠢꠦꠡꠦ ꠁꠍꠣꠄ ꠇꠁꠟꠣ, “ꠢꠥꠘꠣꠞ ꠟꠣꠈ ꠇꠣꠘ ꠎꠣꠞ ꠀꠍꠦ, ꠢꠦ ꠢꠥꠘꠃꠇ।”
MAR 4:10 ꠛꠣꠖꠦ ꠜꠤꠠ ꠇꠝꠤꠀ ꠢꠣꠞꠟꠦ ꠔꠣꠘ ꠟꠉꠞ ꠝꠣꠘꠡꠦ ꠀꠞ ꠛꠣꠞꠅꠎꠘ ꠍꠣꠢꠣꠛꠤꠄ ꠔꠣꠘꠞꠦ ꠎꠤꠇꠣꠁꠟꠣ, “ꠢꠥꠎꠥꠞ, ꠁ ꠇꠤꠌ꠆ꠍꠣꠞ ꠝꠥꠟ ꠝꠣꠘꠤ ꠇꠤꠔꠣ?”
MAR 4:11 ꠁꠍꠣꠄ ꠎꠥꠀꠙ ꠖꠤꠟꠣ, “ꠀꠟ꠆ꠟꠣꠞ ꠛꠣꠖꠡꠣꠁꠞ ꠉꠥꠙꠘ ꠞꠢꠁꠡ꠆ꠡ ꠎꠣꠘꠣꠞ ꠡꠥꠎꠥꠉ ꠔꠥꠝꠞꠣꠞꠦ ꠖꠦꠅꠀ ꠅꠁꠍꠦ, ꠅꠁꠟꠦ ꠛꠣꠁꠞꠣ ꠝꠣꠘꠡꠞ ꠉꠦꠍꠦ ꠇꠤꠌ꠆ꠍꠣꠞ ꠝꠣꠎꠖꠤ ꠇꠅꠀ ꠅꠁꠍꠦ।
MAR 4:12 ꠄꠞ ꠇꠣꠞꠘ ꠅꠁꠟ, ꠀꠟ꠆ꠟꠣꠞ ꠇꠣꠟꠣꠝꠞ ꠅꠃ ꠀꠄꠀꠔ ꠚꠟꠤꠔꠦ ꠅꠁꠛ, ꠔꠣꠞꠣ ꠌꠣꠁꠀ ꠕꠣꠇꠟꠦꠅ ꠇꠥꠘ꠆ꠔꠣꠃ ꠖꠦꠈꠔ ꠘꠣꠄ, ꠢꠥꠘꠟꠦꠅ ꠇꠥꠘ꠆ꠔꠣ ꠛꠥꠎꠔ ꠘꠣꠄ। ꠇꠤꠎꠣꠘꠥ ꠔꠣꠞꠣ ꠎꠥꠖꠤ ꠀꠟ꠆ꠟꠣꠞ ꠛꠣꠄ ꠚꠤꠞꠤꠎꠣꠁꠘ, ꠀꠞ ꠝꠣꠚꠤ ꠙꠣꠁꠟꠣꠁꠘ।”
MAR 4:13 ꠛꠣꠖꠦ ꠁꠍꠣꠄ ꠔꠣꠞꠣꠞꠦ ꠇꠁꠟꠣ, “ꠔꠥꠝꠞꠣ ꠅꠃ ꠇꠤꠌ꠆ꠍꠣꠞ ꠝꠣꠘꠤ ꠈꠣꠘꠅ ꠛꠥꠎꠟꠣꠄ ꠘꠣ ꠘꠤ? ꠔꠦ ꠛꠣꠇꠤ ꠇꠤꠌ꠆ꠍꠣꠞ ꠝꠣꠘꠤ ꠇꠤꠟꠣ ꠛꠥꠎꠛꠣꠄ?
MAR 4:14 ꠢꠥꠘꠅ, ꠉꠤꠞꠡ꠆ꠔꠦ ꠎꠦ ꠎꠣꠟꠣ ꠛꠣꠁꠘ ꠇꠞꠦꠞ, ꠁ ꠎꠣꠟꠣ ꠅꠁꠟꠉꠤ ꠀꠟ꠆ꠟꠣꠞ ꠇꠣꠟꠣꠝ।
MAR 4:15 ꠙꠕꠞ ꠇꠣꠘ꠆ꠖꠣꠔ ꠙꠠꠣ ꠎꠣꠟꠣ ꠖꠤꠀ ꠔꠣꠞꠣꠞ ꠛꠦꠙꠣꠞꠦ ꠛꠥꠎꠣꠁꠟ ꠅꠁꠍꠦ, ꠎꠦꠞꠣ ꠁ ꠇꠣꠟꠣꠝ ꠢꠥꠘꠦ, ꠅꠁꠟꠦ ꠟꠉꠦ ꠟꠉꠦ ꠁꠛꠟꠤꠍ ꠀꠁꠀ ꠔꠣꠞꠣꠞ ꠖꠤꠟ ꠕꠣꠇꠤ ꠁ ꠇꠣꠟꠣꠝꠞꠦ ꠇꠣꠠꠤꠀ ꠘꠦꠄꠉꠤ।
MAR 4:16 ꠙꠣꠔ꠆ꠔꠞꠞ ꠃꠙꠞꠦ ꠙꠠꠣ ꠎꠣꠟꠣꠖꠤ ꠛꠥꠎꠣꠁꠟ ꠅꠁꠍꠦ, ꠎꠦꠞꠣ ꠁ ꠇꠣꠟꠣꠝ ꠢꠥꠘꠦ ꠀꠞ ꠈꠥꠛ ꠈꠥꠡꠤ ꠅꠁꠀ ꠟꠉꠦ ꠟꠉꠦ ꠇꠛꠥꠟ ꠇꠞꠤꠟꠣꠄ,
MAR 4:17 ꠅꠁꠟꠦ ꠔꠣꠞꠣꠞ ꠖꠤꠟꠅ ꠜꠣꠟꠣꠝꠘ꠆ꠔꠦ ꠢꠣꠝꠣꠄ ꠘꠣ ꠇꠞꠤꠀ, ꠁꠔꠣ ꠈꠣꠟꠤ ꠕꠥꠠꠣ ꠇꠄꠖꠤꠘ ꠇꠣꠁꠝ ꠞꠄ, ꠛꠣꠖꠦ ꠁ ꠇꠣꠟꠣꠝꠞ ꠟꠣꠉꠤ ꠇꠥꠘꠥ ꠎꠥꠟꠥꠝ-ꠝꠍꠤꠛꠔ ꠀꠎꠤꠞ ꠅꠁꠟꠦ ꠔꠣꠞꠣ ꠙꠤꠍꠟꠣꠁ ꠎꠣꠄ।
MAR 4:18 ꠎꠋꠟꠣꠞ ꠝꠣꠎꠦ ꠙꠠꠣ ꠎꠣꠟꠣꠞ ꠝꠣꠘꠤ ꠅꠁꠟ, ꠎꠦꠞꠣ ꠁ ꠇꠣꠟꠣꠝ ꠢꠥꠘꠦ,
MAR 4:19 ꠅꠁꠟꠦ ꠎꠉꠔꠞ ꠌꠤꠘ꠆ꠔꠣ-ꠜꠣꠛꠘꠣ, ꠗꠘ-ꠍꠣꠝꠣꠘꠣꠞ ꠝꠣꠄꠀ ꠀꠞ ꠖꠥꠘꠤꠀꠛꠤ ꠟꠣꠟꠌꠦ ꠁ ꠇꠣꠟꠣꠝꠞꠦ ꠎꠣꠔꠤꠀ ꠗꠞꠤꠟꠣꠄ, ꠄꠞꠖꠣꠄ ꠇꠣꠟꠣꠝꠦ ꠇꠥꠘꠥ ꠀꠝꠟ ꠇꠞꠦ ꠘꠣ।
MAR 4:20 ꠀꠞ ꠜꠣꠟꠣ ꠎꠝꠤꠘꠅ ꠙꠠꠣ ꠎꠣꠟꠣꠞ ꠝꠣꠘꠤ ꠅꠁꠟ, ꠎꠦꠞꠣ ꠁ ꠇꠣꠟꠣꠝ ꠢꠥꠘꠦ, ꠇꠛꠥꠟ ꠇꠞꠦ ꠀꠞ ꠜꠣꠟꠣ ꠚꠟ ꠗꠞꠦ, ꠇꠦꠃ ꠔꠤꠡ, ꠇꠦꠃ ꠡꠣꠁꠐ, ꠇꠦꠃ ꠄꠇ-ꠡ ꠉꠥꠘ ꠚꠟ ꠗꠞꠦ।”
MAR 4:21 ꠁꠍꠣꠄ ꠀꠞꠅ ꠇꠁꠟꠣ, “ꠇꠥꠘꠥ ꠝꠣꠘꠡꠦ ꠟꠦꠝ ꠎꠣꠟꠣꠁꠀ ꠐꠥꠇꠞꠤꠞ ꠔꠟꠦ ꠛꠣ ꠌꠇꠤꠞ ꠔꠟꠦ ꠕꠄ ꠘꠤ? ꠟꠦꠝ ꠎꠣꠟꠣꠁꠀ ꠉꠣꠍꠣꠞ ꠃꠙꠞꠦ ꠕꠂꠘ ꠘꠣ ꠘꠤ?
MAR 4:22 ꠔꠦ ꠁꠟꠣ ꠟꠥꠇꠣꠁꠟ ꠇꠥꠘ꠆ꠔꠣꠃ ꠘꠣꠁ, ꠎꠦꠔꠣ ꠛꠣꠞ ꠅꠁꠔ ꠘꠣꠄ। ꠀꠞ ꠁꠟꠣ ꠇꠥꠘꠥ ꠛꠣꠔꠥꠘꠤ ꠛꠦꠙꠣꠞꠅ ꠘꠣꠁ, ꠎꠦꠔꠣ ꠎꠣꠁꠞ ꠅꠁꠔ ꠘꠣꠄ।
MAR 4:23 ꠢꠥꠘꠣꠞ ꠟꠣꠈ ꠇꠣꠘ ꠎꠣꠞ ꠀꠍꠦ, ꠢꠦ ꠢꠥꠘꠃꠇ।”
MAR 4:24 ꠛꠣꠖꠦ ꠔꠣꠁꠘ ꠇꠁꠟꠣ, “ꠔꠥꠝꠞꠣ ꠈꠤꠀꠟ ꠇꠞꠤꠀ ꠢꠥꠘꠅ, ꠔꠥꠝꠞꠣ ꠎꠦꠟꠣ ꠝꠣꠙꠤꠀ ꠖꠦꠅ, ꠔꠥꠝꠞꠣꠞ ꠟꠣꠉꠤ ꠅꠃꠟꠣ ꠝꠣꠙꠣ ꠅꠁꠛ। ꠗꠞꠤꠟꠣꠅ, ꠔꠥꠝꠞꠣꠞ ꠟꠣꠉꠤ ꠀꠞꠅ ꠛꠦꠡ ꠇꠞꠤ ꠝꠣꠙꠣ ꠅꠁꠛ।
MAR 4:25 ꠎꠣꠞ ꠀꠍꠦ ꠔꠣꠞꠦ ꠀꠞꠅ ꠖꠦꠅꠀ ꠅꠁꠛ, ꠅꠁꠟꠦ ꠎꠣꠞ ꠘꠣꠁ, ꠔꠣꠞ ꠎꠦꠔꠣ ꠀꠍꠦ ꠄꠅꠔꠣ ꠘꠦꠅꠀ ꠅꠁꠎꠤꠛ।”
MAR 4:26 ꠔꠣꠁꠘ ꠀꠞꠇꠛꠣꠞ ꠇꠁꠟꠣ, “ꠢꠥꠘꠅ, ꠀꠟ꠆ꠟꠣꠞ ꠛꠣꠖꠡꠣꠁ ꠅꠁꠟ ꠅꠃ ꠟꠣꠈꠣꠘ। ꠗꠞꠤꠟꠣꠅ, ꠄꠇ ꠉꠤꠞꠡ꠆ꠔꠦ ꠔꠣꠞ ꠎꠝꠤꠘꠅ ꠎꠣꠟꠣ ꠛꠣꠁꠘ ꠇꠞꠟ।
MAR 4:27 ꠛꠣꠖꠦ ꠢꠦ ꠞꠣꠁꠔ ꠅꠁꠟꠦ ꠊꠥꠝꠣꠁꠟ ꠀꠞ ꠖꠤꠘꠞ ꠛꠣꠟꠣ ꠊꠥꠞꠣꠊꠥꠞꠤ ꠇꠞꠟ। ꠅꠁꠟꠦ ꠎꠣꠟꠣ ꠚꠥꠐꠤꠀ ꠇꠦꠝꠘꠦ ꠉꠣꠍ ꠅꠁꠟ, ꠢꠦ ꠔ ꠇꠥꠘ꠆ꠔꠣ ꠎꠣꠘꠦ ꠘꠣ।
MAR 4:28 ꠎꠝꠤꠘꠦ ꠘꠤꠎꠦ ꠘꠤꠎꠦꠃ ꠁꠔꠣ ꠚꠟꠣꠁꠟ, ꠙꠄꠟꠣ ꠌꠦꠞꠣ, ꠛꠣꠖꠦ ꠍꠠꠣ ꠀꠞ ꠍꠠꠣꠞ ꠝꠣꠎꠦ ꠙꠥꠡ꠆ꠐ ꠗꠣꠘ ꠗꠞꠟ।
MAR 4:29 ꠗꠣꠘ ꠙꠣꠇꠤꠀ ꠢꠣꠞꠟꠦ ꠢꠦ ꠛꠥꠎꠤꠟꠣꠄ ꠖꠣꠅꠀꠞ ꠡꠝꠄ ꠅꠁꠉꠦꠍꠦ, ꠔꠦꠃ ꠇꠣꠌꠤ ꠟꠣꠉꠣꠁꠀ ꠖꠣꠄ।”
MAR 4:30 ꠢꠎꠞꠔ ꠁꠍꠣꠄ ꠇꠁꠟꠣ, “ꠀꠟ꠆ꠟꠣꠞ ꠛꠣꠖꠡꠣꠁꠞꠦ ꠀꠝꠞꠣ ꠇꠤꠔꠣꠞ ꠟꠉꠦ ꠔꠥꠟꠘꠣ ꠇꠞꠔꠣꠝ? ꠇꠤꠔꠣꠖꠤ ꠛꠥꠎꠣꠁꠔꠣꠝ?
MAR 4:31 ꠀꠁꠌ꠆ꠍꠣ, ꠝꠘꠦ ꠇꠞꠅ, ꠀꠟ꠆ꠟꠣꠞ ꠛꠣꠖꠡꠣꠁ ꠅꠁꠟ ꠄꠉꠥ ꠒꠦꠋꠉꠣ ꠛꠤꠌꠤꠞ ꠟꠣꠈꠣꠘ। ꠁ ꠛꠤꠌꠤ ꠛꠣꠁꠘ ꠇꠞꠣꠞ ꠛꠣꠟꠣ ꠖꠦꠈꠣ ꠎꠣꠄ, ꠢꠇꠟ ꠎꠣꠔꠞ ꠛꠤꠌꠤ ꠕꠘꠦ ꠁꠐꠣ ꠢꠥꠞꠥ-ꠝꠥꠞꠥ।
MAR 4:32 ꠅꠁꠟꠦ ꠛꠣꠁꠘ ꠇꠞꠣꠞ ꠛꠣꠖꠦ ꠁꠐꠣ ꠢꠇ꠆ꠇꠟ ꠎꠣꠔꠞ ꠢꠣꠉ ꠕꠘꠦꠅ ꠛꠠ ꠛꠠ ꠙꠣꠔꠣ ꠀꠞ ꠉꠣꠍ ꠅꠄ। ꠀꠞ ꠝꠥꠐꠣ ꠝꠥꠐꠣ ꠒꠣꠟ ꠛꠣꠞꠅꠄ, ꠁ ꠒꠣꠟꠞ ꠍꠣꠄꠀꠔ ꠙꠣꠈꠤꠘ꠆ꠔꠦ ꠀꠁꠀ ꠀꠡꠞꠄ ꠟꠂꠘ।”
MAR 4:33 ꠅꠃ ꠟꠣꠈꠣꠘ ꠛꠃꠔ ꠘꠝꠥꠘꠣꠞ ꠇꠤꠌ꠆ꠍꠣ ꠇꠁꠔꠣ, ꠀꠞ ꠎꠦ ꠎꠦꠟꠣ ꠛꠥꠎꠔ ꠙꠣꠞꠦ, ꠔꠣꠞ ꠛꠥꠎ ꠝꠣꠚꠤꠇ ꠔꠣꠞꠦ ꠀꠟ꠆ꠟꠣꠞ ꠇꠣꠟꠣꠝ ꠢꠥꠘꠣꠁꠔꠣ।
MAR 4:34 ꠇꠤꠌ꠆ꠍꠣ ꠍꠣꠠꠣ ꠔꠣꠞꠣꠞꠦ ꠇꠥꠘꠥ ꠔꠣꠟꠤꠝ ꠖꠤꠔꠣ ꠘꠣ। ꠅꠁꠟꠦ ꠈꠣꠟꠤ ꠍꠣꠢꠣꠛꠤ ꠅꠇꠟ ꠎꠦꠛꠟꠣ ꠔꠣꠘ ꠟꠉꠦ ꠞꠁꠔꠣ, ꠅꠃ ꠡꠝꠄ ꠔꠣꠁꠘ ꠢꠇꠟ ꠜꠦꠖ ꠜꠣꠋꠉꠤꠀ ꠛꠥꠎꠣꠁꠔꠣ।
MAR 4:35 ꠅꠃ ꠖꠤꠘ ꠢꠣꠁꠘ꠆ꠎꠣ ꠛꠣꠟꠣ ꠢꠎꠞꠔ ꠁꠍꠣꠄ ꠔꠣꠘ ꠍꠣꠢꠣꠛꠤ ꠅꠇꠟꠞꠦ ꠇꠁꠟꠣ, “ꠀꠅ, ꠀꠝꠞꠣ ꠀꠅꠞꠞ ꠢꠙꠣꠞꠅ ꠎꠣꠁꠔꠣꠝ।”
MAR 4:36 ꠔꠦꠃ ꠍꠣꠢꠣꠛꠤ ꠅꠇꠟꠦ ꠝꠣꠘꠡꠞ ꠉꠦꠍ ꠕꠣꠇꠤ ꠛꠤꠖꠣꠄ ꠟꠁꠀ, ꠁꠍꠣ ꠎꠦ ꠘꠣꠅꠅ ꠛꠅꠀꠔ ꠀꠍꠟꠣ ꠅꠃ ꠘꠣꠅꠅ ꠃꠑꠤꠀ ꠞꠅꠀꠘꠣ ꠖꠤꠟꠣꠁꠟꠣ, ꠄꠞꠟꠉꠦ ꠀꠞꠅ ꠘꠣꠅꠀꠁꠘꠅ ꠀꠍꠤꠟ।
MAR 4:37 ꠘꠣꠅ ꠌꠟꠦꠞ, ꠅꠃ ꠡꠝꠄ ꠀꠈꠔꠣꠃ ꠈꠥꠛ ꠛꠠ ꠄꠇ ꠔꠥꠚꠣꠘ ꠀꠁꠟ, ꠔꠥꠚꠣꠘꠞ ꠖꠣꠄ ꠀꠚꠣꠟꠞ ꠙꠣꠘꠤ ꠢꠣꠝꠣꠁꠀ ꠘꠣꠅ ꠛꠥꠠꠤꠎꠤꠛꠣꠞ ꠖꠡꠣ।
MAR 4:38 ꠁꠍꠣ ꠘꠣꠅꠞ ꠈꠞ ꠉꠣꠟꠣꠔ ꠄꠇ ꠛꠣꠟꠤꠡꠅ ꠢꠤꠔꠣꠘ ꠖꠤꠀ ꠊꠥꠝꠅ ꠀꠍꠟꠣ। ꠍꠣꠢꠣꠛꠤ ꠅꠇꠟꠦ ꠔꠣꠘꠞꠦ ꠢꠎꠣꠉ ꠇꠞꠤꠀ ꠇꠁꠟꠣ, “ꠢꠥꠎꠥꠞ, ꠀꠙꠘꠦ ꠈꠤꠀꠟ ꠇꠞꠞꠣ ꠘꠣ ꠘꠤ, ꠀꠝꠞꠣ ꠔ ꠝꠞꠤ ꠎꠣꠁꠀꠞ।”
MAR 4:39 ꠔꠣꠁꠘ ꠃꠑꠤꠀ ꠔꠥꠚꠣꠘꠞꠦ ꠗꠝꠇ ꠖꠤꠟꠣ ꠀꠞ ꠀꠅꠞꠞꠦ ꠇꠁꠟꠣ, “ꠖꠝ ꠟꠅ, ꠕꠤꠞ ꠅꠅ।” ꠇꠅꠀꠞ ꠟꠉꠦ ꠟꠉꠦ ꠔꠥꠚꠣꠘ ꠛꠘ꠆ꠖ ꠅꠁꠉꠦꠟ, ꠀꠞ ꠢꠇ꠆ꠇꠟꠔꠣ ꠕꠤꠞ ꠅꠁꠟ।
MAR 4:40 ꠛꠣꠖꠦ ꠔꠣꠁꠘ ꠍꠣꠢꠣꠛꠤ ꠅꠇꠟꠞꠦ ꠇꠁꠟꠣ, “ꠔꠥꠝꠞꠣ ꠅꠔ ꠒꠞꠣꠟꠥꠇ ꠇꠦꠘꠦ? ꠔꠥꠝꠞꠣ ꠅꠈꠘꠅ ꠁꠝꠣꠘ ꠀꠘꠍ ꠘꠣ ꠘꠤ?”
MAR 4:41 ꠁꠔꠣ ꠖꠦꠈꠤꠀ ꠍꠣꠢꠣꠛꠤ ꠅꠇꠟꠦ ꠈꠥꠛ ꠒꠞꠣꠁꠟꠣ, ꠀꠞ ꠄꠇꠦ-ꠅꠁꠘ꠆ꠘꠦ ꠇꠁꠟꠣ, “ꠄꠁꠘ ꠀꠍꠟꠦ ꠇꠦ? ꠙꠣꠘꠤꠄ ꠀꠞ ꠛꠣꠔꠣꠡꠦꠅ ꠖꠦꠈꠤ ꠔꠣꠘ ꠢꠥꠇꠥꠝ ꠝꠣꠘꠦ।”
MAR 5:1 ꠢꠎꠞꠔ ꠁꠍꠣꠄ ꠔꠣꠘ ꠍꠣꠢꠣꠛꠤ ꠅꠇꠟꠞꠦ ꠟꠁꠀ ꠉꠣꠟꠤꠟ ꠀꠅꠞ ꠙꠣꠠꠤ ꠖꠤꠀ ꠎꠦꠞꠣꠍꠤꠘꠤ ꠅꠇꠟꠞ ꠖꠦꠡꠅ ꠀꠁꠟꠣ।
MAR 5:2 ꠔꠣꠁꠘ ꠘꠣꠅ ꠕꠣꠇꠤ ꠟꠣꠝꠔꠦꠃ ꠜꠥꠔꠦ ꠗꠞꠣ ꠄꠇ ꠛꠦꠐꠣ, ꠇꠛꠞꠡ꠆ꠕꠣꠘ ꠕꠣꠇꠤ ꠛꠣꠞ ꠅꠁꠀ ꠔꠣꠘ ꠍꠣꠝꠘꠦ ꠀꠁꠟ।
MAR 5:3 ꠢꠦ ꠇꠄꠛꠞꠞ ꠝꠣꠎꠦ ꠞꠁꠔ, ꠇꠥꠘꠥ ꠝꠣꠘꠡꠦ ꠟꠥꠀꠞ ꠎꠤꠘꠎꠥꠞꠖꠤ ꠛꠣꠘ꠆ꠖꠤꠀꠅ ꠔꠣꠞꠦ ꠀꠐꠇꠣꠁꠔꠣ ꠙꠣꠞꠔꠣ ꠘꠣ।
MAR 5:4 ꠔꠣꠞ ꠀꠔ-ꠙꠣꠅ ꠛꠃꠔ ꠛꠣꠞ ꠎꠤꠘꠎꠥꠞꠖꠤ ꠛꠣꠘ꠆ꠖꠤꠟꠦꠅ ꠢꠦ ꠁꠔꠣ ꠍꠤꠠꠤꠀ, ꠙꠣꠅꠞ ꠛꠦꠠꠤꠅ ꠜꠣꠋꠉꠤꠟꠤꠔ। ꠔꠣꠞꠦ ꠇꠦꠃ ꠡꠣꠝꠟꠣꠁꠔꠣ ꠙꠣꠞꠔꠣ ꠘꠣ।
MAR 5:5 ꠢꠦ ꠙꠣꠠꠞ ꠐꠤꠟ꠆ꠟꠣꠄ ꠐꠤꠟ꠆ꠟꠣꠄ, ꠇꠄꠛꠞꠦ ꠇꠄꠛꠞꠦ ꠢꠣꠞꠣ ꠖꠤꠘ-ꠞꠣꠁꠔ ꠊꠥꠞꠔ ꠀꠞ ꠌꠤꠟ꠆ꠟꠣꠁꠔ, ꠙꠣꠔ꠆ꠔꠞ ꠖꠤꠀ ꠔꠣꠞ ꠘꠤꠎꠞ ꠡꠞꠤꠟꠅ ꠝꠣꠞꠔ।
MAR 5:6 ꠁꠍꠣꠞꠦ ꠢꠦ ꠖꠥꠞꠁ ꠕꠣꠇꠤ ꠖꠦꠈꠤꠀꠃ ꠖꠃꠠꠣꠁꠀ ꠀꠁꠀ ꠔꠣꠘ ꠙꠣꠅꠔ ꠙꠠꠤꠀ ꠍꠁꠎꠖꠣ ꠇꠞꠟ,
MAR 5:7 ꠀꠞ ꠌꠤꠟ꠆ꠟꠣꠁꠀ ꠇꠁꠟ, “ꠅ ꠁꠍꠣ, ꠀꠟ꠆ꠟꠣꠔꠣꠟꠣꠞ ꠈꠣꠍ ꠝꠣꠄꠀꠞ ꠎꠘ ꠁꠛꠘꠥꠟ꠆ꠟꠣ, ꠀꠙꠘꠦ ꠇꠦꠘꠦ ꠀꠝꠣꠞ ꠉꠦꠍꠦ ꠀꠁꠍꠂꠘ? ꠀꠝꠤ ꠀꠟ꠆ꠟꠣꠞ ꠇꠍꠝ ꠈꠣꠁꠀ ꠇꠁꠀꠞ, ꠀꠙꠘꠦ ꠀꠝꠣꠞꠦ ꠍꠣꠔꠣꠁꠘ ꠘꠣ ꠎꠣꠘꠥ।”
MAR 5:8 ꠁꠍꠣꠄ ꠀꠉꠦ ꠅꠃ ꠜꠥꠔꠞꠦ ꠇꠁꠍꠟꠣ, “ꠔꠥꠁ ꠅꠃ ꠛꠦꠐꠣꠞꠦ ꠍꠣꠠꠤꠀ ꠛꠣꠞ ꠅꠁꠀ ꠎꠣ,” ꠄꠞꠖꠣꠄ ꠢꠦ ꠁꠍꠣꠞꠦ ꠅꠃ ꠝꠤꠘꠔꠤ ꠇꠞꠟ।
MAR 5:9 ꠔꠣꠁꠘ ꠅꠃ ꠜꠥꠔꠞꠦ ꠎꠤꠇꠣꠁꠟꠣ, “ꠔꠞ ꠘꠣꠝ ꠇꠤꠔꠣ?” ꠢꠦ ꠇꠁꠟ, “ꠀꠝꠣꠞ ꠘꠣꠝ ꠚꠃꠎ, ꠇꠣꠞꠘ ꠀꠝꠞꠣ ꠛꠃꠔ ꠎꠘ ꠀꠍꠤ।”
MAR 5:10 ꠅꠈꠣꠘ ꠇꠁꠀ ꠢꠦ ꠁꠍꠣꠞ ꠉꠦꠍꠦ ꠛꠣꠞꠦ ꠛꠣꠞꠦ ꠝꠤꠘꠔ ꠇꠞꠤ ꠇꠁꠟ, “ꠀꠙꠘꠦ ꠀꠝꠞꠣꠞꠦ ꠁ ꠄꠟꠣꠇꠣ ꠕꠣꠇꠤ ꠈꠦꠖꠣꠁꠘ ꠘꠣ ꠎꠣꠘꠥ।”
MAR 5:11 ꠅꠃ ꠡꠝꠄ ꠢꠘꠅ ꠙꠣꠠꠞ ꠉꠣꠟꠣꠔ ꠛꠠ ꠄꠇ ꠡꠥꠅꠞꠞ ꠙꠣꠟꠦ ꠈꠣꠅꠀꠔ ꠀꠍꠤꠟ।
MAR 5:12 ꠜꠥꠔꠞ ꠙꠣꠟꠦ ꠁꠍꠣꠞꠦ ꠝꠤꠘꠔ ꠇꠞꠤ ꠇꠁꠟ, “ꠢꠥꠎꠥꠞ, ꠀꠝꠞꠣꠞꠦ ꠅꠃ ꠡꠥꠅꠞꠞ ꠙꠣꠟꠞ ꠝꠣꠎꠦ ꠙꠣꠑꠣꠁ ꠖꠦꠃꠇ꠆ꠇꠣ, ꠀꠝꠞꠣ ꠉꠤꠀ ꠅꠔꠣꠞ ꠜꠤꠔꠞꠦ ꠢꠣꠝꠣꠁ।”
MAR 5:13 ꠁꠍꠣꠄ ꠁꠎꠣꠎꠔ ꠖꠤꠀ ꠢꠣꠞꠟꠦ ꠔꠣꠞꠣ ꠉꠤꠀ ꠅꠃ ꠡꠥꠅꠞꠞ ꠙꠣꠟꠞ ꠝꠣꠎꠦ ꠢꠣꠝꠣꠁ ꠉꠦꠟ। ꠔꠦꠃ ꠡꠥꠅꠞꠞ ꠙꠣꠟꠦ ꠙꠣꠠꠞ ꠐꠤꠟ꠆ꠟꠣꠞ ꠙꠦꠐꠦꠖꠤ ꠈꠥꠛ ꠎꠥꠞꠦ ꠖꠃꠠꠣꠁꠀ ꠉꠤꠀ ꠀꠅꠞꠞ ꠝꠣꠎꠦ ꠛꠥꠠꠤꠀ ꠝꠞꠟꠣ। ꠁ ꠙꠣꠟꠅ ꠅꠘꠥꠝꠣꠘ ꠖꠥꠁ ꠀꠎꠣꠞ ꠡꠥꠅꠞ ꠀꠍꠤꠟ।
MAR 5:14 ꠁꠔꠣ ꠖꠦꠈꠤꠀ ꠡꠥꠅꠞꠞ ꠞꠣꠈꠣꠟ ꠅꠇꠟꠦ ꠖꠃꠠꠣꠁꠀ ꠉꠤꠀ ꠉꠣꠃꠔ ꠀꠞ ꠇꠣꠘ꠆ꠖꠣ-ꠇꠣꠍꠣꠞ ꠢꠇꠟꠞꠦ ꠈꠛꠞ ꠎꠣꠘꠣꠁꠟꠣ। ꠈꠛꠞ ꠢꠥꠘꠤꠀ ꠝꠣꠘꠡꠦ ꠁꠔꠣ ꠖꠦꠈꠣꠔ ꠀꠁꠟꠣ।
MAR 5:15 ꠔꠣꠞꠣ ꠁꠍꠣꠞ ꠇꠣꠘ꠆ꠖꠣꠔ ꠀꠁꠀ ꠖꠦꠈꠟꠣ, ꠜꠥꠔꠞ ꠚꠃꠎꠦ ꠎꠦ ꠛꠦꠐꠣꠞꠦ ꠗꠞꠍꠤꠟ, ꠁ ꠛꠦꠐꠣ ꠜꠣꠟꠣ ꠅꠁꠀ ꠇꠣꠙꠠ-ꠌꠥꠙꠠ ꠚꠤꠘ꠆ꠖꠤꠀ ꠛꠁꠞꠁꠍꠦ। ꠁꠔꠣ ꠖꠦꠈꠤꠀ ꠔꠣꠞꠣꠞ ꠝꠘꠅ ꠒꠞ ꠢꠣꠝꠣꠁꠉꠦꠟ।
MAR 5:16 ꠔꠦꠃ ꠎꠦꠞꠣ ꠅꠃ ꠊꠐꠘꠣ ꠖꠦꠈꠍꠤꠟ, ꠔꠣꠞꠣ ꠢꠃ ꠜꠥꠔꠦ ꠗꠞꠣ ꠛꠦꠐꠣꠞ ꠇꠕꠣ ꠀꠞ ꠡꠥꠅꠞꠞ ꠊꠐꠘꠣ ꠄꠞꠣꠞꠦ ꠎꠣꠘꠣꠁꠟ।
MAR 5:17 ꠄꠞꠖꠣꠄ ꠝꠣꠘꠡꠦ ꠢꠎꠞꠔ ꠁꠍꠣꠞꠦ ꠝꠤꠘꠔ ꠇꠞꠤ ꠇꠁꠟꠣ, “ꠝꠦꠢꠦꠞꠛꠣꠘꠤ ꠇꠞꠤ ꠀꠝꠞꠣꠞ ꠄꠟꠣꠇꠣ ꠕꠣꠇꠤ ꠔꠡꠞꠤꠚ ꠘꠦꠃꠇ꠆ꠇꠣꠉꠤ।”
MAR 5:18 ꠔꠣꠁꠘ ꠎꠦꠛꠟꠣ ꠘꠣꠅꠔ ꠃꠑꠤꠎꠤꠞꠣ, ꠅꠃ ꠡꠝꠄ ꠜꠥꠔꠦ ꠗꠞꠣ ꠛꠦꠐꠣꠅ ꠔꠣꠘ ꠟꠉꠦ ꠅꠁꠀ ꠎꠣꠁꠔ ꠇꠞꠤ ꠝꠤꠘꠔ ꠟꠣꠉꠣꠁꠟ।
MAR 5:19 ꠅꠁꠟꠦ ꠁꠍꠣꠄ ꠔꠣꠞꠦ ꠅꠈꠣꠘ ꠇꠁꠀ ꠛꠤꠖꠣꠄ ꠇꠞꠤ ꠖꠤꠟꠣ, “ꠔꠥꠝꠤ ꠔꠥꠝꠣꠞ ꠛꠣꠠꠤꠔ ꠎꠣꠅ, ꠉꠤꠀ ꠛꠣꠠꠤꠞ ꠝꠣꠘꠡꠞꠦ ꠖꠦꠈꠣꠅ, ꠝꠣꠛꠥꠖꠦ ꠔꠥꠝꠣꠞꠦ ꠇꠔ ꠝꠦꠢꠦꠞꠛꠣꠘꠤ ꠀꠞ ꠛꠠ ꠔꠣꠁꠎ꠆ꠎꠥꠛꠤ ꠇꠣꠝ ꠇꠞꠍꠂꠘ।”
MAR 5:20 ꠔꠣꠘ ꠇꠕꠣ ꠢꠥꠘꠤꠀ ꠛꠦꠐꠣ ꠉꠦꠟꠉꠤ ꠀꠞ ꠀꠡ꠆ꠔꠣ ꠖꠤꠇꠣꠙꠟꠤ ꠄꠟꠣꠇꠣꠞ ꠝꠣꠘꠡꠞꠦ ꠇꠁꠟ, ꠁꠍꠣꠄ ꠔꠣꠞ ꠟꠣꠉꠤ ꠇꠔ ꠛꠠ ꠇꠣꠝ ꠇꠞꠍꠂꠘ। ꠁꠈꠣꠘ ꠢꠥꠘꠤꠀ ꠔꠣꠞꠣꠅ ꠔꠣꠁꠎ꠆ꠎꠥꠛ ꠅꠁꠉꠦꠟꠣ।
MAR 5:21 ꠢꠎꠞꠔ ꠁꠍꠣ ꠘꠣꠅꠔ ꠇꠞꠤꠀ ꠢꠤꠞꠛꠣꠞ ꠀꠅꠞꠞ ꠢꠙꠣꠞꠅ ꠉꠤꠀ ꠢꠣꠞꠟꠦ, ꠌꠣꠁꠞꠅꠛꠣꠄ ꠕꠘꠦ ꠝꠣꠘꠡꠦ ꠀꠁꠀ ꠅꠃ ꠀꠅꠞꠞ ꠙꠣꠞꠅꠃ ꠜꠤꠠ ꠟꠣꠉꠣꠁ ꠖꠤꠟꠣ।
MAR 5:22 ꠅꠃ ꠡꠝꠄ ꠝꠍꠤꠖ ꠇꠝꠤꠐꠤꠞ ꠎꠣꠄꠁꠞ ꠘꠣꠝꠞ ꠄꠇ ꠘꠦꠔꠣ ꠀꠁꠀ ꠁꠍꠣꠞꠦ ꠖꠦꠈꠤꠀ ꠔꠣꠘ ꠙꠣꠅꠔ ꠙꠠꠤꠀ,
MAR 5:23 ꠈꠥꠛ ꠝꠤꠘꠔ ꠇꠞꠤ ꠇꠁꠟꠣ, “ꠢꠥꠎꠥꠞ, ꠀꠝꠣꠞ ꠙꠥꠠꠤꠉꠥ ꠝꠞꠣꠞ ꠙꠕꠤ ꠅꠁꠉꠦꠍꠦ। ꠀꠙꠘꠦ ꠔꠡꠞꠤꠚ ꠀꠘꠤꠀ ꠀꠝꠣꠞ ꠙꠥꠠꠤꠉꠥꠞꠦ ꠀꠔꠣꠁ ꠖꠤꠟꠦꠃ ꠔꠣꠁ ꠜꠣꠟꠣ ꠅꠁꠎꠤꠛ।”
MAR 5:24 ꠔꠦꠃ ꠔꠣꠁꠘ ꠅꠃ ꠘꠦꠔꠣꠞ ꠛꠣꠠꠤꠔ ꠞꠅꠀꠘꠣ ꠖꠤꠟꠣꠁꠟꠣ। ꠔꠣꠘ ꠌꠣꠁꠞꠅ ꠉꠣꠟꠣꠛꠣꠄ ꠜꠤꠠ ꠛꠣꠘ꠆ꠖꠤꠀ ꠑꠦꠟꠣ-ꠑꠦꠟꠤ ꠇꠞꠤꠀ ꠀꠞꠅ ꠛꠃꠔ ꠝꠣꠘꠥꠡ ꠔꠣꠘ ꠟꠉꠦ ꠅꠁꠀ ꠎꠣꠁꠞꠣ।
MAR 5:25 ꠅꠃ ꠜꠤꠠꠞ ꠝꠣꠎꠦ ꠄꠇꠎꠘ ꠛꠦꠐꠤ ꠝꠣꠘꠥꠡ ꠀꠍꠟꠣ, ꠛꠣꠞꠅ ꠛꠞꠍ ꠗꠞꠤ ꠔꠣꠘ ꠛꠦꠐꠤꠀꠞꠣ ꠛꠦꠝꠣꠞꠞ ꠟꠃ ꠎꠣꠁꠔ।
MAR 5:26 ꠛꠃꠔ ꠒꠣꠇ꠆ꠔꠞ ꠇꠛꠤꠞꠣꠎ ꠖꠦꠈꠣꠁꠀ ꠇꠡ꠆ꠐ ꠇꠞꠤ ꠘꠤꠅꠝ-ꠇꠣꠘꠥꠘ ꠝꠣꠘꠤꠀ, ꠢꠇꠟ ꠐꠦꠇꠣ-ꠙꠄꠡꠣ ꠈꠥꠀꠁꠀꠅ ꠇꠥꠘꠥ ꠚꠣꠄꠖꠣ ꠅꠁꠍꠦ ꠘꠣ। ꠖꠤꠘꠦ ꠖꠤꠘꠦ ꠛꠦꠝꠣꠞ ꠀꠞꠅ ꠛꠣꠠꠤꠍꠦ।
MAR 5:27 ꠁꠍꠣꠞ ꠛꠦꠙꠣꠞꠦ ꠢꠥꠘꠤꠀ ꠛꠦꠐꠤꠄ ꠅꠃ ꠜꠤꠠꠞ ꠝꠣꠎꠦ ꠑꠤꠇ ꠔꠣꠘ ꠈꠞꠦꠖꠤ ꠀꠁꠀ, ꠔꠣꠘ ꠚꠤꠘ꠆ꠘꠞ ꠌꠣꠖ꠆ꠖꠞ ꠈꠣꠘꠞ ꠄꠇ ꠇꠥꠘꠣꠔ ꠍꠁꠟ।
MAR 5:28 ꠔꠣꠁ ꠄꠇꠤꠘ ꠇꠞꠍꠤꠟ ꠎꠦꠘ, ꠁꠍꠣꠞ ꠚꠤꠘ꠆ꠘꠞ ꠇꠥꠘꠥ ꠇꠣꠙꠠꠞ ꠝꠣꠎꠦ ꠍꠁꠔꠦ ꠙꠣꠞꠟꠦꠃ ꠛꠦꠝꠣꠞ ꠡꠤꠚꠣ ꠅꠁꠎꠤꠛ।
MAR 5:29 ꠢꠣꠍꠣꠃ, ꠁꠍꠣꠞ ꠌꠣꠖ꠆ꠖꠞꠞ ꠇꠥꠘꠣꠔ ꠍꠁꠔꠦꠃ, ꠛꠦꠐꠤꠞ ꠟꠃ ꠎꠣꠅꠀ ꠄꠇ꠆ꠇꠦꠞꠦ ꠇꠝꠤꠉꠦꠟ। ꠛꠦꠐꠤꠄ ꠘꠤꠎꠞ ꠡꠞꠤꠟꠞ ꠢꠣꠟꠔ ꠛꠥꠎꠤꠟꠤꠟ, ꠛꠦꠝꠣꠞ ꠇꠝꠤꠉꠦꠍꠦ।
MAR 5:30 ꠁꠍꠣꠄꠅ ꠐꠦꠞ ꠙꠣꠁꠟꠣ, ꠔꠣꠘ ꠡꠞꠤꠟ ꠝꠥꠛꠣꠞꠇ ꠕꠣꠇꠤ ꠛꠟ ꠛꠣꠞ ꠅꠁꠍꠦ। ꠅꠃ ꠔꠣꠁꠘ ꠜꠤꠠꠞ ꠝꠣꠎꠦ ꠌꠣꠁꠞꠅꠛꠣꠄ ꠌꠣꠁꠀ ꠎꠤꠇꠣꠁꠟꠣ, “ꠀꠝꠣꠞ ꠇꠣꠙꠠꠅ ꠇꠦ ꠍꠁꠟ?”
MAR 5:31 ꠔꠣꠘ ꠡꠣꠉꠞꠤꠖ ꠅꠇꠟꠦ ꠇꠁꠟꠣ, “ꠢꠥꠎꠥꠞ, ꠀꠙꠘꠦ ꠔ ꠖꠦꠈꠞꠣ, ꠝꠣꠘꠡꠦ ꠇꠤꠟꠣ ꠌꠣꠁꠞꠅꠛꠣꠄ ꠑꠦꠟꠣ-ꠑꠦꠟꠤ ꠇꠞꠞꠣ, ꠔꠦ ꠀꠞ ꠇꠦꠘꠦ ꠎꠤꠇꠣꠁꠞꠣ, ꠇꠦ ꠀꠙꠘꠣꠞꠦ ꠍꠁꠟ?”
MAR 5:32 ꠅꠁꠟꠦ ꠁꠍꠣꠄ ꠌꠣꠁꠞꠅꠛꠣꠄ ꠌꠃꠈꠖꠤ ꠔꠣꠟ꠆ꠟꠣꠡꠤꠔ ꠞꠁꠟꠣ, ꠇꠦ ꠔꠣꠘꠦ ꠍꠁꠟ।
MAR 5:33 ꠔꠦꠃ ꠛꠦꠝꠣꠞ ꠡꠤꠚꠣ ꠅꠀ ꠛꠦꠐꠤꠄ ꠘꠤꠎꠞ ꠢꠣꠟꠔ ꠛꠥꠎꠤꠀ ꠒꠞꠣꠁꠀ ꠇꠣꠙꠤ ꠇꠣꠙꠤ ꠔꠣꠘ ꠍꠣꠝꠘꠦ ꠀꠁꠀ ꠙꠣꠅꠔ ꠙꠠꠟ, ꠀꠞ ꠢꠇꠟꠔꠣ ꠈꠥꠟꠤꠀ ꠇꠁꠟ।
MAR 5:34 ꠁꠍꠣꠄ ꠛꠦꠐꠤꠞꠦ ꠇꠁꠟꠣ, “ꠝꠣꠁ ꠉ, ꠔꠥꠝꠣꠞ ꠁꠝꠣꠘꠦ ꠔꠥꠝꠤ ꠛꠣꠌꠟꠣꠄ। ꠅꠈꠘ ꠡꠣꠘ꠆ꠔꠤꠄ ꠛꠣꠠꠤꠔ ꠎꠣꠅ, ꠀꠞ ꠁ ꠛꠦꠝꠣꠞ ꠕꠣꠇꠤ ꠢꠦꠚꠣꠎꠔ ꠞꠅ।”
MAR 5:35 ꠔꠣꠁꠘ ꠅꠔꠣ ꠝꠣꠔꠅ ꠞꠁꠍꠂꠘ, ꠅꠃ ꠡꠝꠄ ꠝꠍꠤꠖꠞ ꠢꠃ ꠘꠦꠔꠣꠞ ꠛꠣꠠꠤ ꠕꠣꠇꠤ ꠈꠛꠞꠤꠀ ꠀꠁꠀ ꠘꠦꠔꠣꠞꠦ ꠇꠁꠟ, “ꠍꠣꠛ, ꠀꠙꠘꠣꠞ ꠙꠥꠠꠤ ꠔ ꠀꠞ ꠘꠣꠁ, ꠖꠥꠘꠤꠀ ꠍꠣꠠꠤꠀ ꠉꠦꠍꠂꠘꠉꠤ। ꠔꠦ ꠢꠥꠎꠥꠞꠞꠦ ꠀꠞ ꠔꠇꠟꠤꠚ ꠖꠤꠛꠣꠞ ꠇꠣꠝ ꠘꠣꠁ।”
MAR 5:36 ꠅꠁꠟꠦ ꠁꠈꠣꠘ ꠢꠥꠘꠤꠀ ꠁꠍꠣꠄ ꠢꠃ ꠘꠦꠔꠣꠞꠦ ꠇꠁꠟꠣ, “ꠒꠞꠣꠁꠛꠣ ꠘꠣ, ꠈꠣꠟꠤ ꠄꠇꠤꠘ ꠇꠞꠃꠇ꠆ꠇꠣ।”
MAR 5:37 ꠇꠁꠀ ꠔꠣꠘ ꠍꠣꠢꠣꠛꠤ ꠙꠤꠔꠞ, ꠁꠀꠇꠥꠛ, ꠀꠞ ꠁꠀꠇꠥꠛꠞ ꠜꠣꠁ ꠢꠣꠘ꠆ꠘꠣꠘ, ꠈꠣꠟꠤ ꠅꠃ ꠔꠤꠘꠎꠘ ꠛꠣꠖꠦ ꠀꠞ ꠇꠦꠃꠞꠞꠦ ꠔꠣꠘ ꠟꠉꠦ ꠘꠤꠟꠣ ꠘꠣ।
MAR 5:38 ꠄꠞꠣꠞꠦ ꠟꠁꠀ ꠔꠣꠁꠘ ꠢꠃ ꠘꠦꠔꠣꠞ ꠛꠣꠠꠤꠔ ꠀꠁꠀ ꠖꠦꠈꠟꠣ, ꠝꠣꠘꠡꠦ ꠇꠣꠘ꠆ꠖꠣ-ꠇꠣꠐꠤ, ꠛꠤꠟꠣꠙ ꠀꠞ ꠝꠣꠔ꠆ꠔꠝ ꠇꠞꠞꠣ।
MAR 5:39 ꠔꠣꠁꠘ ꠜꠤꠔꠞꠦ ꠉꠤꠀ ꠝꠣꠘꠡꠞꠦ ꠇꠁꠟꠣ, “ꠔꠥꠝꠞꠣ ꠁ ꠇꠣꠘ꠆ꠖꠣ-ꠇꠣꠐꠤ ꠀꠞ ꠝꠣꠔ꠆ꠔꠝ ꠇꠞꠞꠣꠄ ꠇꠦꠘꠦ? ꠁ ꠙꠥꠠꠤ ꠔ ꠝꠞꠍꠦ ꠘꠣ, ꠈꠣꠟꠤ ꠊꠥꠝꠣꠁꠍꠦ।”
MAR 5:40 ꠁꠈꠣꠘ ꠢꠥꠘꠤꠀ ꠝꠣꠘꠡꠦ ꠔꠣꠘꠞꠦ ꠍꠤꠠꠣꠁꠟꠣ। ꠔꠦꠃ ꠔꠣꠁꠘ ꠝꠥꠞ꠆ꠖꠣꠞ ꠇꠥꠑꠣ ꠕꠣꠇꠤ ꠢꠇꠟꠞꠦ ꠛꠣꠞ ꠇꠞꠤ ꠖꠤꠀ, ꠈꠣꠟꠤ ꠙꠥꠠꠤꠞ ꠝꠣ-ꠛꠣꠚ ꠀꠞ ꠍꠣꠢꠣꠛꠤ ꠅꠇꠟꠞꠦ ꠟꠁꠀ ꠇꠥꠑꠣꠔ ꠢꠣꠝꠣꠁꠟꠣ।
MAR 5:41 ꠔꠣꠁꠘ ꠙꠥꠠꠤꠞ ꠀꠔꠅ ꠗꠞꠤꠀ ꠇꠁꠟꠣ, “ꠐꠣꠟꠤꠕꠣ ꠇꠥꠝ,” ꠝꠣꠘꠤ, “ꠅ ꠙꠥꠠꠤ, ꠔꠥꠝꠣꠞꠦ ꠇꠁꠀꠞ, ꠃꠑꠅ।”
MAR 5:42 ꠢꠣꠍꠣꠃ, ꠝꠥꠞ꠆ꠖꠣ ꠙꠥꠠꠤ ꠟꠉꠦ ꠟꠉꠦ ꠃꠑꠤꠀ ꠀꠐꠣ ꠗꠞꠟ, ꠙꠥꠠꠤꠞ ꠛꠄꠅꠡ ꠀꠍꠤꠟ ꠛꠣꠞꠅ ꠛꠍꠞ। ꠁꠔꠣ ꠖꠦꠈꠤꠀ ꠄꠞꠣ ꠀꠌꠣꠘꠇ ꠔꠣꠁꠎ꠆ꠎꠥꠛ ꠅꠁꠉꠦꠟꠣ।
MAR 5:43 ꠁꠍꠣꠄ ꠄꠞꠣꠞꠦ ꠢꠥꠇꠥꠝ ꠖꠤꠟꠣ, ꠁꠔꠣ ꠇꠦꠃꠞꠞꠦ ꠢꠥꠘꠣꠁꠅ ꠘꠣ। ꠀꠞ ꠅꠃ ꠙꠥꠠꠤꠞꠦ ꠅꠈꠘ ꠈꠣꠁꠛꠣꠞ ꠇꠥꠘ꠆ꠔꠣ ꠖꠦꠅ।
MAR 6:1 ꠢꠎꠞꠔ ꠁꠍꠣ ꠢꠘ ꠕꠘꠦ ꠘꠤꠎꠞ ꠉꠣꠃ ꠘꠣꠍꠣꠞꠔꠅ ꠔꠡꠞꠤꠚ ꠀꠘꠟꠣ। ꠔꠣꠘ ꠍꠣꠢꠣꠛꠤ ꠅꠇꠟꠅ ꠟꠉꠦ ꠀꠍꠟꠣ।
MAR 6:2 ꠎꠥꠝ꠆ꠝꠣꠛꠣꠞꠦ ꠔꠣꠁꠘ ꠝꠍꠤꠖꠅ ꠉꠤꠀ ꠔꠣꠟꠤꠝ ꠖꠤꠟꠣ। ꠛꠃꠔ ꠝꠣꠘꠡꠦ ꠔꠣꠘ ꠔꠣꠟꠤꠝ ꠢꠥꠘꠟꠣ, ꠢꠥꠘꠤꠀ ꠔꠣꠁꠎ꠆ꠎꠥꠛ ꠅꠁꠀ ꠇꠁꠟꠣ, “ꠁ ꠛꠦꠐꠣꠄ ꠁꠔꠣ ꠔꠣꠟꠤꠝ ꠇꠥꠀꠁ ꠕꠣꠇꠤ ꠙꠣꠁꠟ? ꠢꠦ ꠇꠦꠝꠘꠦ ꠁꠔꠣ ꠁꠟꠤꠝ ꠢꠣꠍꠤꠟ ꠇꠞꠍꠦ, ꠀꠞ ꠎꠦꠔꠣ ꠝꠥꠎꠦꠎꠣ ꠅꠇꠟ ꠖꠦꠈꠣꠞ, ꠁꠔꠣꠞ ꠜꠦꠖ ꠇꠤꠔꠣ?
MAR 6:3 ꠄ ꠔ ꠢꠃ ꠝꠞꠤꠅꠝꠞ ꠙꠥꠀ ꠇꠣꠑ-ꠝꠦꠡ꠆ꠔꠁꠞ ꠘꠣꠄ ꠘꠤ? ꠢꠦ ꠁꠀꠇꠥꠛ, ꠁꠃꠍꠤ, ꠄꠢꠥꠖꠣ ꠀꠞ ꠍꠣꠁꠝꠘꠞ ꠜꠣꠁ ꠘꠣꠄ ꠘꠤ? ꠔꠣꠞ ꠛꠘꠤꠘ ꠔ ꠀꠝꠞꠣꠞ ꠉꠣꠃꠔꠃ ꠞꠁꠞꠣ।” ꠁꠍꠣꠞ ꠛꠦꠙꠣꠞ ꠟꠁꠀ ꠝꠣꠘꠡꠞ ꠖꠤꠟꠞ ꠝꠣꠎꠦ ꠛꠤꠔꠤꠡꠘꠣ ꠖꠦꠈꠣ ꠖꠤꠟ।
MAR 6:4 ꠔꠦꠃ ꠁꠍꠣꠄ ꠔꠣꠞꠣꠞꠦ ꠇꠁꠟꠣ, “ꠎꠦꠇꠥꠘꠥ ꠘꠛꠤꠃ ꠘꠤꠎꠞ ꠉꠣꠃ, ꠘꠤꠎꠞ ꠖꠦꠡ, ꠘꠤꠎꠞ ꠛꠣꠠꠤ, ꠈꠦꠡ-ꠇꠥꠐꠥꠝꠞ ꠛꠣꠁꠞꠣꠈꠣꠘꠅ ꠁꠎ꠆ꠎꠔ ꠙꠣꠁꠘ।”
MAR 6:5 ꠛꠣꠖꠦ ꠔꠣꠁꠘ ꠇꠄꠎꠘ ꠛꠦꠝꠣꠞꠤꠞꠦ ꠀꠔꠣꠁ ꠖꠤꠀ ꠛꠦꠝꠣꠞ ꠡꠤꠚꠣ ꠇꠞꠟꠣ। ꠅꠁꠟꠦ ꠢꠤꠘꠅ ꠀꠞ ꠇꠥꠘꠥ ꠝꠥꠎꠦꠎꠣ ꠎꠣꠁꠞ ꠇꠞꠣꠞ ꠃꠙꠣꠄ ꠅꠁꠟ ꠘꠣ।
MAR 6:6 ꠝꠣꠘꠡꠦ ꠔꠣꠘ ꠃꠙꠞꠦ ꠁꠝꠣꠘ ꠘꠣ ꠀꠘꠣꠄ ꠔꠣꠁꠘ ꠈꠥꠛ ꠔꠣꠁꠎ꠆ꠎꠥꠛ ꠅꠁꠉꠦꠟꠣ। ꠛꠣꠖꠦ ꠔꠣꠁꠘ ꠉꠣꠃꠄ ꠉꠣꠃꠄ ꠌꠣꠁꠞꠅꠛꠣꠄ ꠍꠚꠞ ꠇꠞꠤꠀ ꠝꠣꠘꠡꠞꠦ ꠔꠣꠟꠤꠝ ꠖꠤꠟꠣ।
MAR 6:7 ꠁꠍꠣꠄ ꠔꠣꠘ ꠛꠣꠞꠅꠎꠘ ꠍꠣꠢꠣꠛꠤꠞꠦ ꠘꠤꠎꠞ ꠗꠣꠞꠅ ꠀꠘꠤꠀ, ꠎꠤꠘ-ꠜꠥꠔꠞ ꠃꠙꠞꠦ ꠈꠦꠝꠔꠣ ꠖꠤꠀ, ꠖꠥꠁꠎꠘ ꠖꠥꠁꠎꠘ ꠇꠞꠤ ꠔꠛꠟꠤꠉ ꠇꠣꠝꠅ ꠙꠣꠑꠣꠁꠟꠣ।
MAR 6:8 ꠍꠚꠞꠞ ꠡꠝꠄ ꠈꠣꠟꠤ ꠀꠔꠞ ꠟꠣꠑꠤ ꠍꠣꠠꠣ ꠀꠞ ꠇꠥꠘ꠆ꠔꠣꠃ ꠄꠞꠣꠞꠦ ꠟꠉꠦ ꠘꠤꠔꠦ ꠖꠤꠟꠣ ꠘꠣ। ꠈꠣꠘꠤ-ꠈꠥꠞꠣꠇꠤ, ꠛꠦꠉ ꠛꠣ ꠇꠝꠞꠞ ꠕꠟꠤꠔ ꠛꠣꠘ꠆ꠖꠤꠀ ꠇꠥꠘꠥ ꠙꠄꠡꠣ-ꠇꠠꠤ ꠘꠤꠔꠦꠅ ꠘꠣ ꠇꠞꠟꠣ।
MAR 6:9 ꠔꠣꠁꠘ ꠇꠁꠟꠣ, “ꠙꠣꠅꠔ ꠎꠥꠔꠣ ꠚꠤꠘ꠆ꠖꠤꠔꠣꠄ ꠙꠣꠞꠛꠣꠄ, ꠅꠁꠟꠦ ꠚꠤꠘ꠆ꠘꠞ ꠄꠇ ꠇꠣꠙꠠ ꠛꠣꠖꠦ ꠀꠞ ꠇꠥꠘꠥ ꠇꠣꠙꠠ-ꠌꠥꠙꠠ ꠘꠤꠅ ꠘꠣ।”
MAR 6:10 ꠀꠞ ꠢꠥꠇꠥꠝ ꠖꠤꠟꠣ, “ꠔꠥꠝꠞꠣ ꠉꠤꠀ ꠙꠄꠟꠣ ꠎꠦ ꠛꠣꠠꠤꠔ ꠢꠣꠝꠣꠁꠛꠣꠄ, ꠁ ꠉꠣꠃ ꠍꠣꠠꠤꠀ ꠎꠣꠅꠀꠞ ꠀꠉ ꠙꠞ꠆ꠎꠘ꠆ꠔ ꠅꠃ ꠛꠣꠠꠤꠔꠃ ꠞꠁꠅ।
MAR 6:11 ꠇꠥꠘꠥ ꠎꠣꠉꠣꠞ ꠝꠣꠘꠡꠦ ꠎꠥꠖꠤ ꠔꠥꠝꠞꠣꠞꠦ ꠇꠛꠥꠟ ꠘꠣ ꠇꠞꠦ, ꠀꠞ ꠔꠥꠝꠞꠣꠞ ꠛꠄꠀꠘ ꠘꠣ ꠢꠥꠘꠦ, ꠔꠦ ꠢꠘ ꠕꠣꠇꠤ ꠛꠣꠞꠘꠤꠞ ꠛꠣꠟꠣ ꠔꠥꠝꠞꠣꠞ ꠙꠣꠅꠞ ꠗꠥꠁꠟ ꠏꠣꠠꠤꠀ ꠚꠣꠟꠣꠁꠅ, ꠅꠃ ꠗꠥꠁꠟ ꠔꠣꠞꠣꠞ ꠘꠣꠚꠞꠝꠣꠘꠤꠞ ꠡꠣꠇ꠆ꠇꠤ ꠞꠁꠛ।”
MAR 6:12 ꠔꠦꠃ ꠍꠣꠢꠣꠛꠤ ꠅꠇꠟꠦ ꠉꠤꠀ ꠔꠛꠟꠤꠉ ꠇꠞꠟꠣ, ꠝꠣꠘꠡꠞꠦ ꠔꠣꠉꠤꠖ ꠖꠤꠟꠣ ꠔꠃꠛꠣ ꠇꠞꠣꠞ ꠟꠣꠉꠤ।
MAR 6:13 ꠄꠞꠣ ꠛꠃꠔ ꠜꠥꠔ ꠍꠣꠠꠣꠁꠟꠣ, ꠀꠞ ꠛꠃꠔ ꠛꠦꠝꠣꠞꠤ ꠝꠣꠘꠡꠞ ꠝꠣꠕꠣꠔ ꠔꠦꠟ ꠝꠣꠈꠣꠁꠀ ꠛꠦꠝꠣꠞꠞꠦ ꠡꠤꠚꠣ ꠇꠞꠟꠣ।
MAR 6:14 ꠢꠎꠞꠔ ꠁꠍꠣꠞ ꠡꠥꠘꠣꠝ ꠌꠣꠁꠞꠅꠛꠣꠄ ꠞꠐꠤ ꠎꠣꠅꠀꠄ ꠞꠣꠎꠣ ꠢꠦꠞꠥꠖꠞ ꠇꠣꠘꠅ-ꠅ ꠉꠤꠀ ꠀꠎꠤꠟ। ꠇꠥꠘꠥ ꠇꠥꠘꠥ ꠝꠣꠘꠡꠦ ꠇꠁꠟꠣ, ꠔꠣꠁꠘ ꠅꠁꠟꠣ ꠄꠢꠤꠀ ꠘꠛꠤ, ꠄꠁꠘ ꠢꠤꠞꠛꠣꠞ ꠎꠤꠘ꠆ꠖꠣ ꠅꠁꠀ ꠃꠑꠤꠀ ꠀꠁꠍꠂꠘ ꠇꠞꠤꠃ ꠅꠃ ꠇꠦꠞꠣꠝꠔꠤ ꠖꠦꠈꠣꠁꠞꠣ।
MAR 6:15 ꠇꠦꠃ ꠇꠁꠟ, ꠄꠁꠘ ꠅꠁꠟꠣ ꠢꠎꠞꠔ ꠁꠟꠤꠀꠍ ꠘꠛꠤ। ꠀꠞ ꠇꠦꠃ ꠇꠦꠃ ꠇꠁꠟ, ꠄꠁꠘ ꠙꠥꠞꠣꠘꠣ ꠎꠝꠣꠘꠣꠞ ꠇꠥꠘꠥ ꠘꠛꠤꠞ ꠟꠣꠈꠣꠘ ꠘꠄꠀ ꠄꠇ ꠘꠛꠤ।
MAR 6:16 ꠁꠔꠣ ꠢꠥꠘꠤꠀ ꠢꠦꠞꠥꠖꠦ ꠇꠁꠟ, “ꠄꠁꠘ ꠔ ꠢꠃ ꠄꠢꠤꠀ, ꠎꠦꠘ ꠇꠟ꠆ꠟꠣ ꠀꠝꠤ ꠇꠣꠐꠣꠁꠍꠟꠣꠝ। ꠔꠣꠁꠘ ꠢꠤꠞꠛꠣꠞ ꠎꠤꠘ꠆ꠖꠣ ꠅꠁꠀ ꠃꠑꠍꠂꠘ।”
MAR 6:17 ꠄꠞ ꠀꠉꠦ ꠢꠦꠞꠥꠖꠦ ꠔꠣꠞ ꠜꠣꠛꠤ ꠢꠦꠞꠥꠖꠤꠀꠞ ꠝꠘ ꠎꠥꠉꠣꠘꠤꠞ ꠟꠣꠉꠤ, ꠄꠢꠤꠀ ꠘꠛꠤꠞꠦ ꠀꠐꠇ ꠇꠞꠣꠁꠀ ꠎꠦꠟꠅ ꠢꠣꠞꠣꠁ ꠕꠁꠍꠤꠟ। ꠢꠦ ꠔꠣꠞ ꠜꠣꠁ ꠚꠤꠟꠤꠚꠞ ꠛꠃꠞꠦ ꠢꠣꠋꠉꠣ ꠇꠞꠣꠄ ꠘꠛꠤꠄ ꠔꠣꠞꠦ ꠢꠣꠝꠦꠡꠣ ꠇꠁꠔꠣ, “ꠀꠙꠘ ꠜꠣꠁꠞ ꠛꠃꠞꠦ ꠘꠤꠀ ꠢꠣꠋꠉꠣ ꠇꠞꠣ ꠔꠥꠝꠣꠞ ꠎꠣꠁꠎ ꠅꠁꠍꠦ ꠘꠣ।”
MAR 6:19 ꠄꠞꠖꠣꠄ ꠄꠢꠤꠀ ꠘꠛꠤꠞ ꠛꠣꠄ ꠢꠦꠞꠥꠖꠤꠀꠞ ꠈꠥꠛ ꠉꠥꠍꠣ ꠀꠍꠤꠟ। ꠔꠣꠁ ꠄꠘꠞꠦ ꠎꠣꠘꠦ ꠝꠣꠞꠤꠟꠤꠛꠣꠞ ꠘꠤꠅꠔ ꠇꠞꠟ, ꠅꠁꠟꠦ ꠙꠣꠞꠟ ꠘꠣ।
MAR 6:20 ꠢꠦꠞꠥꠖꠦ ꠄꠘꠞꠦ ꠒꠞꠣꠁꠔ ꠀꠞ ꠎꠣꠘꠔ, ꠄꠁꠘ ꠄꠇꠎꠘ ꠙꠣꠇ-ꠙꠞꠦꠎꠉꠣꠞ ꠇꠣꠝꠤꠟ ꠝꠣꠘꠥꠡ, ꠄꠞꠖꠣꠄ ꠢꠣꠝꠦꠡꠣ ꠄꠘꠞꠦ ꠔꠣꠁꠞ ꠀꠔ ꠕꠣꠇꠤ ꠛꠣꠌꠣꠁꠔ। ꠄꠘ ꠘꠍꠤꠅꠔ ꠢꠥꠘꠔꠦ ꠔꠣꠞ ꠜꠤꠔꠞꠦ ꠗꠠꠚꠠ ꠇꠞꠟꠦꠅ ꠢꠦ ꠁꠔꠣ ꠈꠥꠛ ꠙꠍꠘ꠆ꠖ ꠇꠞꠔ।
MAR 6:21 ꠢꠦꠡꠦ ꠔꠣꠁ ꠄꠇ ꠡꠥꠎꠥꠉ ꠙꠣꠁꠟ, ꠢꠦꠞꠥꠖꠞ ꠎꠘꠝ ꠖꠤꠘꠞ ꠅꠘꠥꠡ꠆ꠑꠣꠘꠅ ꠔꠣꠞ ꠃꠎꠤꠞ-ꠘꠣꠎꠤꠞ, ꠍꠤꠙꠣꠁꠞ ꠅꠚꠤꠡꠣꠞ ꠅꠇꠟ, ꠀꠞ ꠉꠣꠟꠤꠟ ꠎꠤꠟꠣꠞ ꠉꠁꠘ꠆ꠘ-ꠝꠣꠁꠘ꠆ꠘ ꠢꠇꠟ ꠝꠣꠘꠡꠞ ꠟꠣꠉꠤ ꠈꠣꠘꠤ ꠎꠥꠁꠔ ꠇꠞꠣ ꠅꠁꠟ।
MAR 6:22 ꠅꠃ ꠅꠘꠥꠡ꠆ꠑꠣꠘꠅ ꠢꠦꠞꠥꠖꠤꠀꠞ ꠙꠥꠠꠤꠄ ꠀꠁꠀ ꠘꠣꠌ ꠖꠦꠈꠣꠁꠀ ꠢꠇꠟ ꠝꠦꠝꠣꠘ ꠀꠞ ꠢꠦꠞꠥꠖꠞꠦ ꠈꠥꠡꠤ ꠇꠞꠟ। ꠈꠥꠡꠤ ꠅꠁꠀ ꠢꠦꠞꠥꠖ ꠞꠣꠎꠣꠄ ꠙꠥꠠꠤꠞꠦ ꠇꠁꠟ, “ꠅ ꠝꠣ, ꠔꠥꠝꠤ ꠀꠝꠣꠞ ꠉꠦꠍꠦ ꠇꠤꠔꠣ ꠌꠣꠅ? ꠎꠦꠔꠣ ꠌꠣꠁꠛꠣꠄ, ꠅꠔꠣꠃ ꠙꠣꠁꠛꠣꠄ।”
MAR 6:23 ꠢꠦ ꠇꠍꠝ ꠈꠣꠁꠀ ꠇꠁꠟ, “ꠔꠥꠝꠤ ꠀꠝꠣꠞ ꠉꠦꠍꠦ ꠎꠦꠔꠣ ꠌꠣꠁꠛꠣꠄ, ꠅꠔꠣꠃ ꠖꠤꠝꠥ। ꠀꠝꠣꠞ ꠞꠣꠁꠎ꠆ꠎꠞ ꠅꠞ꠆ꠗꠦꠇ ꠌꠣꠁꠟꠦꠅ ꠖꠤꠟꠣꠁꠝꠥ।”
MAR 6:24 ꠅꠃ ꠙꠥꠠꠤꠄ ꠔꠣꠁꠞ ꠝꠣʼꠞ ꠉꠦꠍꠦ ꠉꠤꠀ ꠎꠤꠇꠣꠁꠟ, “ꠝꠣꠁ ꠉ, ꠀꠝꠤ ꠇꠤꠔꠣ ꠌꠣꠁꠔꠣꠝ?” ꠝꠣ ꠢꠦꠞꠥꠖꠤꠀꠄ ꠢꠤꠇꠣꠁ ꠖꠤꠟ, “ꠔꠥꠝꠤ ꠢꠃ ꠄꠢꠤꠀꠞ ꠇꠟ꠆ꠟꠣ ꠌꠣꠁꠅ।”
MAR 6:25 ꠙꠥꠠꠤꠄ ꠎꠟꠖꠤ ꠇꠞꠤ ꠀꠁꠀ ꠞꠣꠎꠣꠞꠦ ꠇꠁꠟ, “ꠀꠝꠤ ꠌꠣꠁꠞꠣꠝ, ꠀꠙꠘꠦ ꠢꠃ ꠄꠢꠤꠀꠞ ꠇꠟ꠆ꠟꠣ ꠇꠣꠐꠤꠀ ꠄꠇ ꠕꠣꠟꠅ ꠇꠞꠤ ꠀꠝꠣꠞꠦ ꠖꠦꠃꠇ꠆ꠇꠣ।”
MAR 6:26 ꠁꠈꠣꠘ ꠢꠥꠘꠤꠀ ꠞꠣꠎꠣ ꠈꠥꠛ ꠛꠦꠎꠣꠞ ꠅꠁꠉꠦꠟ, ꠅꠁꠟꠦ ꠅꠘꠥꠡ꠆ꠑꠣꠘꠞ ꠝꠦꠝꠣꠘ ꠅꠇꠟꠞ ꠍꠣꠝꠘꠦ ꠇꠍꠝ ꠇꠞꠣꠄ ꠅꠃ ꠙꠥꠠꠤꠞꠦ ꠘꠣ ꠇꠞꠣꠞ ꠇꠥꠘꠥ ꠃꠙꠣꠄ ꠀꠍꠤꠟ ꠘꠣ।
MAR 6:27 ꠔꠦꠃ ꠟꠉꠦ ꠟꠉꠦ ꠞꠣꠎꠣꠄ ꠎꠟ꠆ꠟꠣꠖꠞꠦ ꠢꠥꠇꠥꠝ ꠖꠤꠟ ꠄꠢꠤꠀꠞ ꠝꠣꠕꠣ ꠇꠣꠐꠤꠀ ꠀꠘꠣꠞ ꠟꠣꠉꠤ। ꠎꠟ꠆ꠟꠣꠖꠦ ꠉꠤꠀ ꠎꠦꠟ ꠈꠣꠘꠣꠔ ꠛꠘ꠆ꠖꠤ ꠢꠎꠞꠔ ꠄꠢꠤꠀꠞ ꠝꠣꠕꠣ ꠇꠣꠐꠤꠀ ꠄꠇ ꠕꠣꠟꠅ ꠇꠞꠤ ꠟꠁꠀ ꠀꠁꠟ। ꠞꠣꠎꠣꠄ ꠁ ꠕꠣꠟ ꠅꠃ ꠙꠥꠠꠤꠞ ꠀꠔꠅ ꠖꠤꠟꠦ, ꠔꠣꠁ ꠘꠤꠀ ꠔꠣꠁꠞ ꠝꠣʼꠞ ꠉꠦꠍꠦ ꠖꠤꠟ।
MAR 6:29 ꠄꠢꠤꠀ ꠘꠛꠤꠞ ꠡꠣꠉꠞꠤꠖ ꠅꠇꠟꠦ ꠁ ꠈꠛꠞ ꠢꠥꠘꠤꠀ ꠎꠦꠟ ꠕꠘꠦ ꠔꠣꠘ ꠟꠣꠡ ꠘꠤꠀ ꠖꠣꠚꠘ ꠇꠞꠟꠣ।
MAR 6:30 ꠢꠎꠞꠔ ꠁꠍꠣꠞ ꠛꠣꠞꠅꠎꠘ ꠍꠣꠢꠣꠛꠤꠄ ꠔꠛꠟꠤꠉ ꠕꠘꠦ ꠚꠤꠞꠤꠀ ꠀꠁꠀ ꠔꠣꠘꠞꠦ ꠎꠣꠘꠣꠁꠟꠣ, ꠔꠛꠟꠤꠉꠅ ꠉꠤꠀ ꠇꠤꠔꠣ ꠇꠤꠔꠣ ꠇꠞꠍꠂꠘ, ꠇꠤꠟꠣꠈꠣꠘ ꠔꠣꠟꠤꠝ ꠖꠤꠍꠂꠘ।
MAR 6:31 ꠅꠃ ꠡꠝꠄ ꠛꠃꠔ ꠝꠣꠘꠥꠡ ꠁꠍꠣꠞ ꠉꠦꠍꠦ ꠀꠅꠀ-ꠎꠣꠅꠀꠔ ꠕꠣꠇꠣꠄ ꠍꠣꠢꠣꠛꠤ ꠅꠇꠟꠦ ꠇꠥꠘꠥ ꠈꠣꠘꠣ-ꠙꠤꠘꠣꠞꠅ ꠡꠥꠎꠥꠉ ꠙꠣꠁꠟꠣ ꠘꠣ। ꠄꠞꠖꠣꠄ ꠔꠣꠁꠘ ꠍꠣꠢꠣꠛꠤ ꠅꠇꠟꠞꠦ ꠇꠁꠟꠣ, “ꠔꠥꠝꠞꠣ ꠀꠝꠣꠞ ꠟꠉꠦ ꠇꠥꠘꠥ ꠘꠤꠞꠣꠁ ꠎꠣꠉꠣꠔ ꠀꠁꠀ ꠕꠥꠠꠣ ꠎꠤꠞꠣꠅ।”
MAR 6:32 ꠇꠁꠀ ꠘꠣꠅꠔ ꠃꠑꠤꠀ ꠄꠇ ꠘꠤꠞꠣꠁ ꠎꠣꠉꠣꠔ ꠞꠅꠀꠘꠣ ꠅꠁꠟꠣ।
MAR 6:33 ꠄꠞꠣꠞꠦ ꠎꠣꠅꠀꠔ ꠖꠦꠈꠤꠀ ꠛꠃꠔ ꠝꠣꠘꠡꠦ ꠌꠤꠘꠤꠟꠤꠟꠣ, ꠔꠦꠃ ꠄꠞꠣ ꠙꠃꠍꠣꠞ ꠀꠉꠦꠃ ꠀꠡ-ꠙꠣꠡꠞ ꠉꠣꠃꠀꠁꠘ ꠕꠣꠇꠤ ꠝꠣꠘꠥꠡ ꠖꠃꠠꠣꠁꠀ ꠉꠤꠀ ꠢꠘꠅ ꠙꠃꠍꠤꠉꠦꠟꠣ।
MAR 6:34 ꠁꠍꠣ ꠘꠣꠅ ꠕꠣꠇꠤ ꠟꠣꠝꠤꠀꠃ ꠖꠦꠈꠟꠣ, ꠛꠃꠔ ꠝꠣꠘꠡꠦ ꠔꠣꠘ ꠛꠣꠞ ꠌꠣꠁꠞꠣ। ꠖꠦꠈꠤꠀ ꠄꠞꠣꠞ ꠛꠣꠄ ꠔꠣꠘ ꠛꠠ ꠖꠞꠖ ꠢꠣꠝꠣꠁꠟ। ꠄꠞꠣ ꠀꠍꠤꠟ ꠀ-ꠞꠣꠈꠣꠟꠤ ꠝꠦꠠꠣꠞ ꠟꠣꠈꠣꠘ। ꠅꠃ ꠁꠍꠣꠄ ꠄꠞꠣꠞꠦ ꠛꠃꠔ ꠟꠣꠈꠣꠘ ꠔꠣꠟꠤꠝ ꠖꠤꠟꠣ।
MAR 6:35 ꠢꠣꠁꠘ꠆ꠎꠣ ꠅꠁꠀ ꠢꠣꠞꠟꠦ ꠔꠣꠘ ꠍꠣꠢꠣꠛꠤ ꠅꠇꠟꠦ ꠇꠁꠟꠣ, “ꠢꠥꠎꠥꠞ, ꠁꠈꠣꠘ ꠈꠥꠛ ꠘꠤꠞꠣꠁ ꠎꠣꠉꠣ, ꠀꠞ ꠢꠣꠁꠘ꠆ꠎꠣꠅ ꠅꠁꠉꠦꠍꠦ,
MAR 6:36 ꠔꠦ ꠅꠔꠣ ꠝꠣꠘꠡꠞꠦ ꠛꠤꠖꠣꠄ ꠖꠤꠟꠣꠃꠇ꠆ꠇꠣ, ꠄꠞꠣ ꠇꠣꠘ꠆ꠖꠣ-ꠇꠣꠍꠣꠞ ꠅꠔꠣ ꠉꠣꠃꠀꠁꠘ꠆ꠔꠅ ꠉꠤꠀ ꠔꠣꠞꠣꠞ ꠈꠣꠘꠤ-ꠈꠥꠞꠣꠇꠤ ꠟꠃꠇ।”
MAR 6:37 ꠁꠍꠣꠄ ꠇꠁꠟꠣ, “ꠔꠥꠝꠞꠣꠃ ꠄꠞꠣꠞ ꠈꠣꠘꠤꠞ ꠁꠘ꠆ꠔꠦꠎꠣꠝ ꠇꠞꠅ।” ꠍꠣꠢꠣꠛꠤ ꠅꠇꠟꠦ ꠎꠥꠀꠙ ꠖꠤꠟꠣ, “ꠀꠝꠞꠣ ꠇꠤꠔꠣ ꠖꠥꠁ-ꠡ ꠖꠤꠘꠣꠞꠞ ꠈꠣꠘꠤ ꠟꠁꠀ ꠀꠘꠤꠀ ꠄꠞꠣꠞꠦ ꠈꠣꠅꠀꠁꠔꠣꠝ ꠘꠤ?” ꠖꠥꠁ-ꠡ ꠖꠤꠘꠣꠞ ꠔ ꠙꠁꠘ꠆ꠌꠣꠡ ꠀꠎꠣꠞ ꠐꠦꠇꠣꠞ ꠢꠝꠣꠘ।
MAR 6:38 ꠔꠣꠁꠘ ꠇꠁꠟꠣ, “ꠔꠥꠝꠞꠣ ꠌꠣꠁꠀ ꠖꠦꠈꠅ, ꠔꠥꠝꠞꠣꠞ ꠉꠦꠍꠦ ꠇꠤ ꠙꠞꠤꠝꠣꠘ ꠞꠥꠐꠤ ꠀꠍꠦ।” ꠔꠣꠞꠣ ꠖꠦꠈꠤꠀ ꠇꠁꠟꠣ, “ꠍꠣꠛ, ꠙꠣꠌꠈꠣꠘ ꠞꠥꠐꠤ ꠀꠞ ꠖꠥꠁꠐꠣ ꠛꠤꠞꠣꠘ ꠝꠣꠍ ꠀꠍꠦ।”
MAR 6:39 ꠔꠣꠁꠘ ꠍꠣꠢꠣꠛꠤ ꠅꠇꠟꠞꠦ ꠢꠥꠇꠥꠝ ꠖꠤꠟꠣ, “ꠔꠥꠝꠞꠣ ꠅꠃ ꠊꠣꠡꠞ ꠃꠙꠞꠦ ꠟꠣꠁꠘ ꠗꠞꠣꠁꠀ ꠝꠣꠘꠡꠞꠦ ꠛꠅꠀꠁ ꠖꠦꠅ।”
MAR 6:40 ꠔꠦꠃ ꠝꠣꠘꠡꠦ ꠄꠇ-ꠡ ꠎꠘ ꠇꠞꠤ ꠇꠣꠔꠣꠞ ꠛꠣꠘ꠆ꠖꠤꠀ ꠙꠁꠘ꠆ꠌꠣꠡ ꠇꠣꠔꠣꠞ ꠛꠁꠟꠣ।
MAR 6:41 ꠁꠍꠣꠄ ꠢꠃ ꠙꠣꠌꠈꠣꠘ ꠞꠥꠐꠤ ꠀꠞ ꠖꠥꠁꠐꠣ ꠛꠤꠞꠣꠘ ꠝꠣꠍ ꠀꠔꠅ ꠟꠁꠀ ꠀꠟ꠆ꠟꠣꠞ ꠀꠞꠡꠞ ꠛꠣꠄ ꠌꠣꠁꠀ ꠡꠥꠇꠞꠤꠀ ꠀꠖꠣꠄ ꠇꠞꠤꠀ, ꠝꠣꠘꠡꠞꠦ ꠛꠣꠐꠤꠀ ꠖꠤꠛꠣꠞ ꠟꠣꠉꠤ ꠅꠃ ꠞꠥꠐꠤ ꠐꠥꠇꠞꠣ ꠐꠥꠇꠞꠣ ꠇꠞꠤ ꠍꠣꠢꠣꠛꠤ ꠅꠇꠟꠞ ꠀꠔꠅ ꠖꠤꠟꠣ। ꠅꠃ ꠟꠣꠈꠣꠘ ꠝꠣꠍ ꠖꠥꠁꠐꠣꠅ ꠛꠣꠐꠤꠀ ꠖꠤꠟꠣ।
MAR 6:42 ꠢꠇꠟ ꠝꠣꠘꠡꠦ ꠙꠦꠐ ꠜꠞꠤ ꠈꠣꠁꠟꠣ।
MAR 6:43 ꠈꠣꠁꠀ ꠢꠣꠞꠟꠦ ꠛꠣꠠꠔꠤ ꠞꠥꠐꠤ ꠀꠞ ꠝꠣꠍꠞ ꠐꠥꠇꠞꠣꠁꠘ ꠘꠤꠀ ꠛꠣꠞꠅꠐꠣ ꠐꠥꠇꠞꠤ ꠜꠞꠟꠣ।
MAR 6:44 ꠁ ꠖꠟꠞ ꠝꠣꠎꠦ ꠈꠣꠟꠤ ꠛꠦꠐꠣ ꠝꠣꠘꠥꠡꠃ ꠙꠣꠌ ꠀꠎꠣꠞ ꠎꠘꠦ ꠛꠁꠀ ꠈꠣꠁꠟꠣ।
MAR 6:45 ꠈꠣꠘꠤꠞ ꠛꠣꠖꠦꠃ ꠢꠎꠞꠔ ꠁꠍꠣꠄ ꠍꠣꠢꠣꠛꠤ ꠅꠇꠟꠞꠦ ꠔꠣꠉꠖꠣ ꠖꠤꠟꠣ, ꠔꠣꠞꠣ ꠘꠣꠅꠔ ꠇꠞꠤ ꠀꠅꠞꠞ ꠢꠙꠣꠞꠅ ꠛꠣꠄꠔ-ꠍꠄꠖꠣ ꠉꠣꠃꠔ ꠎꠣꠅꠀꠞ ꠟꠣꠉꠤ, ꠔꠣꠁꠘ ꠅꠘꠞ ꠝꠣꠘꠡꠞꠦꠅ ꠛꠤꠖꠣꠄ ꠖꠤꠟꠣ।
MAR 6:46 ꠝꠣꠘꠥꠡ ꠛꠤꠖꠣꠄ ꠅꠁꠀ ꠢꠣꠞꠟꠦ ꠔꠣꠁꠘ ꠖꠥꠀ ꠇꠞꠣꠞ ꠟꠣꠉꠤ ꠙꠣꠠꠞ ꠃꠙꠞꠦ ꠃꠑꠤꠟꠣ।
MAR 6:47 ꠞꠣꠁꠔꠞ ꠛꠣꠟꠣ ꠍꠣꠢꠣꠛꠤ ꠅꠇꠟꠞ ꠘꠣꠅ ꠀꠅꠞꠞ ꠝꠣꠎꠈꠣꠘꠅ ꠀꠍꠤꠟ, ꠅꠁꠟꠦ ꠁꠍꠣ ꠄꠇꠟꠣ ꠢꠥꠇꠘꠣꠔ ꠀꠍꠟꠣ।
MAR 6:48 ꠔꠣꠁꠘ ꠖꠦꠈꠟꠣ, ꠃꠚꠔꠣ ꠛꠣꠔꠣꠡꠞ ꠝꠣꠎꠦ ꠄꠞꠣ ꠈꠥꠛ ꠇꠡ꠆ꠐ ꠇꠞꠤ ꠖꠣꠠ ꠛꠣꠁꠞꠣ। ꠙꠔꠣꠛꠣꠟꠣ ꠁꠍꠣꠄ ꠅꠃ ꠀꠅꠞꠞ ꠙꠣꠘꠤꠞ ꠃꠙꠞꠦꠖꠤ ꠀꠐꠤꠀ, ꠍꠣꠢꠣꠛꠤ ꠅꠇꠟꠞ ꠉꠣꠟꠣꠛꠣꠄ ꠔꠣꠞꠣꠞꠦ ꠙꠣꠞ ꠅꠁꠀ ꠀꠉꠦꠖꠤ ꠎꠣꠁꠞꠣ।
MAR 6:49 ꠔꠣꠘꠞꠦ ꠀꠅꠞꠞ ꠙꠣꠘꠤꠞ ꠃꠙꠞꠦꠖꠤ ꠀꠐꠤꠀ ꠎꠣꠅꠀꠔ ꠖꠦꠈꠤꠀ, ꠜꠥꠔ ꠝꠘꠅ ꠇꠞꠤꠀ ꠒꠞꠣꠁꠀ ꠄꠞꠣ ꠢꠇꠟꠦ ꠌꠤꠇ-ꠌꠤꠟ꠆ꠟꠣꠘꠤ ꠟꠣꠉꠣꠁꠟꠣ। ꠅꠃ ꠔꠣꠁꠘ ꠇꠁꠟꠣ, “ꠒꠞꠣꠁꠅ ꠘꠣ, ꠢꠤꠝ꠆ꠝꠔ ꠇꠞꠅ, ꠁ ꠔ ꠀꠝꠤ।”
MAR 6:51 ꠔꠣꠁꠘ ꠀꠁꠀ ꠍꠣꠢꠣꠛꠤ ꠅꠇꠟꠞ ꠘꠣꠅꠔ ꠃꠑꠔꠦꠃ ꠃꠚꠔꠣ ꠛꠣꠔꠣꠡ ꠖꠝ ꠟꠁꠟꠤꠟ। ꠁꠔꠣ ꠖꠦꠈꠤꠀ ꠄꠞꠣ ꠀꠌꠣꠘꠇ ꠔꠣꠁꠎ꠆ꠎꠥꠛ ꠛꠘꠤꠉꠦꠟꠣ।
MAR 6:52 ꠅꠁꠟꠦ ꠀꠉꠞ ꠢꠃ ꠞꠥꠐꠤ-ꠝꠣꠍꠞ ꠉꠣꠁꠛꠤ ꠈꠣꠘꠤꠞ ꠜꠦꠖ ꠄꠞꠣ ꠛꠥꠎꠟꠣ ꠘꠣ। ꠄꠞꠣꠞ ꠖꠤꠟꠞ ꠖꠥꠀꠞ ꠔ ꠛꠘ꠆ꠖ ꠀꠍꠤꠟ।
MAR 6:53 ꠀꠅꠞ ꠙꠣꠠꠤ ꠖꠦꠅꠀꠞ ꠛꠣꠖꠦ ꠄꠞꠣ ꠉꠤꠘꠦꠡꠞꠔ ꠄꠟꠣꠇꠣꠔ ꠀꠁꠀ ꠘꠣꠅ ꠜꠤꠠꠣꠁꠟꠣ।
MAR 6:54 ꠘꠣꠅ ꠕꠣꠇꠤ ꠟꠣꠝꠔꠦꠃ ꠔꠣꠘꠦ ꠖꠦꠈꠤꠀ ꠝꠣꠘꠡꠦ ꠌꠤꠘꠤꠟꠤꠟꠣ, ꠀꠞ ꠌꠣꠁꠞꠅꠛꠣꠄ ꠖꠃꠠꠣ-ꠖꠃꠠꠤ ꠟꠣꠉꠣꠁꠟꠣ। ꠖꠃꠠꠣꠁꠀ ꠔꠣꠞꠣ ꠎꠣꠞꠎꠤꠞ ꠛꠦꠝꠣꠞꠤ ꠅꠇꠟꠞꠦ ꠙꠟꠅꠖꠤ ꠛꠁꠀ ꠀꠘꠤꠀ, ꠔꠣꠁꠘ ꠎꠦ ꠎꠣꠉꠣꠔ ꠀꠍꠟꠣ ꠅꠃ ꠎꠣꠉꠣꠔ ꠟꠁꠀ ꠀꠁꠟ।
MAR 6:56 ꠐꠣꠃꠘꠅ ꠛꠣ ꠉꠣꠃꠔ, ꠅꠟ꠆ꠟꠤꠄ-ꠉꠟ꠆ꠟꠤꠄ ꠔꠣꠁꠘ ꠎꠦꠘꠅꠃ ꠔꠡꠞꠤꠚ ꠘꠤꠔꠣ, ꠅꠘꠅꠃ ꠝꠣꠘꠡꠦ ꠛꠦꠝꠣꠞꠤ ꠅꠇꠟꠞꠦ ꠀꠘꠤꠀ ꠛꠣꠎꠣꠞꠅ ꠖꠟꠣ ꠇꠞꠔꠣ। ꠀꠞ ꠔꠣꠘꠞꠦ ꠝꠤꠘꠔ-ꠇꠣꠎ꠆ꠎꠤ ꠇꠞꠤꠀ ꠇꠁꠔꠣ, ꠛꠦꠝꠣꠞꠤ ꠅꠇꠟꠦ ꠎꠣꠘꠥ ꠔꠣꠘ ꠌꠣꠖ꠆ꠖꠞꠞ ꠇꠥꠘꠣꠈꠣꠘꠅ ꠍꠁꠔꠣ ꠙꠣꠞꠂꠘ। ꠀꠞ ꠎꠦꠞꠣ ꠍꠁꠔꠣ, ꠢꠣꠍꠣꠃ ꠄꠞꠣꠞ ꠛꠦꠝꠣꠞ ꠡꠤꠚꠣ ꠅꠁꠎꠤꠔ।
MAR 7:1 ꠛꠣꠖꠦ ꠎꠦꠞꠥꠎꠣꠟꠦꠝ ꠕꠣꠇꠤ ꠇꠄꠎꠘ ꠝꠃꠟꠣꠘꠣ ꠀꠞ ꠚꠞꠤꠡꠤ ꠝꠎꠛꠞ ꠇꠤꠍꠥ ꠝꠣꠘꠥꠡ ꠢꠎꠞꠔ ꠁꠍꠣꠞ ꠉꠦꠍꠦ ꠀꠁꠟꠣ।
MAR 7:2 ꠀꠁꠀ ꠖꠦꠈꠟꠣ, ꠁꠍꠣꠞ ꠇꠄꠎꠘ ꠃꠝ꠆ꠝꠔꠦ ꠀꠔ ꠘꠣ ꠗꠁꠀ ꠄꠝꠘꠦꠃ ꠈꠣꠘꠤꠔ ꠛꠁꠉꠦꠍꠂꠘ।
MAR 7:3 ꠀꠍꠟꠦ ꠀꠉꠞ ꠎꠝꠣꠘꠣꠞ ꠝꠃꠟꠣꠘꠣ ꠅꠇꠟꠞ ꠛꠣꠔꠣꠁꠟ ꠞꠍꠥꠝꠔ ꠝꠣꠚꠤꠇ, ꠢꠇ꠆ꠇꠟ ꠁꠢꠥꠖꠤ ꠀꠞ ꠚꠞꠤꠡꠤ ꠅꠇꠟꠦꠅ ꠅꠎꠥ ꠘꠣ ꠇꠞꠤꠀ ꠇꠥꠘꠥ ꠈꠣꠘꠤ ꠈꠣꠁꠘ ꠘꠣ।
MAR 7:4 ꠛꠣꠎꠣꠞ-ꠀꠐ ꠕꠣꠇꠤ ꠇꠥꠘꠥ ꠎꠤꠘꠤꠡ ꠀꠘꠟꠦ ꠙꠣꠇ-ꠍꠣꠚ ꠘꠣ ꠇꠞꠤꠀ ꠝꠥꠈꠅ ꠖꠦꠁꠘ ꠘꠣ, ꠕꠣꠟ-ꠛꠣꠡꠘ ꠗꠁꠀ ꠍꠣꠚ-ꠍꠥꠔꠞꠣ ꠇꠞꠣ, ꠅꠃ ꠟꠣꠈꠣꠘ ꠛꠃꠔ ꠞꠤꠔꠤ-ꠞꠦꠅꠀꠎ ꠔꠣꠞꠣ ꠝꠣꠘꠦ।
MAR 7:5 ꠄꠞꠖꠣꠄ ꠅꠃ ꠝꠃꠟꠣꠘꠣ ꠀꠞ ꠚꠞꠤꠡꠤ ꠅꠇꠟꠦ ꠁꠍꠣꠞꠦ ꠎꠤꠇꠣꠁꠟꠣ, “ꠀꠙꠘꠣꠞ ꠃꠝ꠆ꠝꠔ ꠅꠇꠟꠦ ꠀꠉꠞ ꠎꠝꠣꠘꠣꠞ ꠝꠃꠟꠣꠘꠣ ꠅꠇꠟꠞ ꠛꠣꠔꠣꠁꠟ ꠞꠍꠥꠝꠔ ꠇꠦꠘꠦ ꠝꠣꠘꠂꠘ ꠘꠣ? ꠔꠣꠞꠣ ꠔ ꠘꠣꠙꠣꠇ ꠀꠔꠦ ꠈꠣꠘꠤ ꠈꠣꠁꠘ।”
MAR 7:6 ꠔꠣꠁꠘ ꠎꠥꠀꠙ ꠖꠤꠟꠣ, “ꠀꠙꠘꠣꠞꠣ ꠔ ꠜꠘ꠆ꠒ! ꠢꠎꠞꠔ ꠁꠡꠣꠄꠀ ꠘꠛꠤꠄ ꠀꠙꠘꠣꠁꠘ꠆ꠔꠞ ꠛꠦꠙꠣꠞꠦ ꠑꠤꠇꠃ ꠇꠁꠍꠂꠘ, ꠁꠔꠣ ꠝꠣꠘꠡꠦ ꠝꠥꠈ ꠖꠤꠀ ꠈꠣꠟꠤ ꠀꠝꠣꠞꠦ ꠁꠎ꠆ꠎꠔ ꠇꠞꠦ, ꠅꠁꠟꠦ ꠔꠣꠞꠣꠞ ꠖꠤꠟ ꠀꠝꠣ ꠕꠘꠦ ꠛꠃꠔ ꠖꠥꠞꠁ।
MAR 7:7 ꠔꠣꠞꠣ ꠢꠥꠖꠣꠞ ꠈꠣꠝꠈꠣ ꠀꠝꠣꠞ ꠄꠛꠣꠖꠔ ꠇꠞꠦ, ꠔꠣꠞꠣꠞ ꠔꠣꠟꠤꠝ ꠅꠇꠟ ꠔ ꠝꠣꠘꠡꠞ ꠛꠣꠘꠣꠁꠟ ꠝꠘꠉꠠꠣ ꠡꠞꠤꠅꠔ।
MAR 7:8 ꠔꠦ ꠀꠙꠘꠣꠞꠣ ꠔ ꠀꠟ꠆ꠟꠣꠞ ꠖꠦꠅꠀ ꠢꠥꠇꠥꠝ-ꠀꠢꠇꠣꠝ ꠛꠣꠖ ꠖꠤꠀ, ꠝꠣꠘꠡꠞ ꠛꠣꠘꠣꠁꠟ ꠞꠍꠥꠝꠔ ꠀꠝꠟ ꠇꠞꠞꠣ।”
MAR 7:9 ꠁꠍꠣꠄ ꠔꠣꠞꠣꠞꠦ ꠀꠞꠅ ꠇꠁꠟꠣ, “ꠀꠟ꠆ꠟꠣꠞ ꠖꠦꠅꠀ ꠢꠥꠇꠥꠝ ꠛꠣꠖ ꠖꠤꠀ, ꠘꠤꠎꠞ ꠝꠘꠉꠠꠣ ꠞꠍꠥꠝꠔ ꠇꠣꠁꠝ ꠇꠞꠣꠞ ꠗꠣꠘ꠆ꠖꠣ ꠔ ꠀꠙꠘꠣꠞꠣ ꠈꠥꠛ ꠜꠣꠟꠣ ꠇꠞꠤꠃ ꠎꠣꠘꠂꠘ।
MAR 7:10 ꠎꠦꠟꠣ ꠢꠎꠞꠔ ꠝꠥꠍꠣꠄ ꠇꠁꠍꠂꠘ, ꠝꠣ-ꠛꠣꠛꠣꠞꠦ ꠁꠎ꠆ꠎꠔ ꠇꠞꠤꠅ, ꠎꠦ ꠝꠣꠘꠡꠦ ꠀꠙꠘ ꠝꠣ-ꠛꠣꠚꠞ ꠛꠖꠘꠣꠝ ꠉꠣꠄ, ꠔꠣꠞꠦ ꠎꠣꠘꠦ ꠝꠣꠞꠣ ꠅꠁꠛ।
MAR 7:11 ꠅꠁꠟꠦ ꠀꠙꠘꠣꠞꠣ ꠝꠣꠘꠡꠞꠦ ꠔꠣꠟꠤꠝ ꠖꠤꠞꠣ, ꠇꠥꠘꠥ ꠝꠣꠘꠡꠦ ꠎꠥꠖꠤ ꠔꠣꠞ ꠝꠣ-ꠛꠣꠚꠞꠦ ꠇꠁꠟꠣꠄ, ꠀꠝꠣꠞ ꠎꠦꠔꠣ ꠍꠣꠝꠣꠘꠣ ꠖꠤꠀ ꠀꠙꠘꠣꠁꠘ꠆ꠔꠞ ꠈꠦꠎꠝꠔ ꠇꠞꠔꠣꠝ ꠀꠍꠤꠟ, ꠁꠔꠣ ꠀꠟ꠆ꠟꠣꠞ ꠘꠣꠝꠦ ꠟꠤꠟ꠆ꠟꠣ ꠖꠤꠟꠣꠁꠍꠤ,
MAR 7:12 ꠔꠦ ꠔꠣꠞ ꠝꠣ-ꠛꠣꠚꠞ ꠟꠣꠉꠤ ꠀꠞ ꠇꠥꠘ꠆ꠔꠣꠃ ꠇꠞꠣ ꠟꠣꠉꠦ ꠘꠣ।
MAR 7:13 ꠅꠃ ꠟꠣꠈꠣꠘ ꠀꠙꠘꠣꠞꠣꠞ ꠛꠣꠚ-ꠖꠣꠖꠣꠞ ꠝꠘꠉꠠꠣ ꠘꠤꠅꠝ ꠖꠤꠀ ꠀꠟ꠆ꠟꠣꠞ ꠇꠣꠟꠣꠝ ꠛꠣꠔꠤꠟ ꠇꠞꠤꠟꠤꠍꠂꠘ। ꠁꠈꠣꠘ ꠛꠣꠖꠦꠅ ꠀꠙꠘꠣꠞꠣ ꠅꠃꠟꠣ ꠀꠞꠅ ꠛꠃꠔ ꠇꠣꠝ ꠇꠞꠞꠣ।”
MAR 7:14 ꠛꠣꠖꠦ ꠁꠍꠣꠄ ꠝꠣꠘꠡꠞꠦ ꠔꠣꠘ ꠇꠣꠘ꠆ꠖꠣꠔ ꠘꠤꠀ ꠇꠁꠟꠣ, “ꠀꠙꠘꠣꠞꠣ ꠢꠇꠟꠦ ꠀꠝꠣꠞ ꠇꠕꠣ ꠈꠤꠀꠟ ꠇꠞꠤ ꠢꠥꠘꠃꠇ꠆ꠇꠣ ꠀꠞ ꠛꠥꠎꠃꠇ꠆ꠇꠣ।
MAR 7:15 ꠛꠣꠁꠞꠦ ꠕꠣꠇꠤ ꠎꠦꠔꠣ ꠎꠤꠘꠤꠡ ꠝꠣꠘꠡꠞ ꠜꠤꠔꠞꠦ ꠢꠣꠝꠣꠄ, ꠁꠔꠣꠄ ꠔ ꠔꠣꠞꠦ ꠘꠣꠙꠣꠇ ꠛꠣꠘꠣꠄ ꠘꠣ। ꠛꠞꠋ ꠝꠣꠘꠡꠞ ꠜꠤꠔꠞꠦ ꠕꠣꠇꠤ ꠎꠦꠔꠣ ꠛꠣꠞꠅꠄ, ꠅꠔꠣꠄꠃ ꠔꠣꠞꠦ ꠘꠣꠙꠣꠇ ꠛꠣꠘꠣꠄ।”
MAR 7:17 ꠛꠄꠀꠘ ꠛꠣꠖꠦ ꠔꠣꠁꠘ ꠝꠣꠘꠡꠞ ꠉꠦꠍ ꠕꠣꠇꠤ ꠢꠞꠤꠀ ꠉꠤꠀ ꠊꠞꠅ ꠢꠣꠝꠣꠁꠟꠣ, ꠔꠦꠃ ꠍꠣꠢꠣꠛꠤ ꠅꠇꠟꠦ ꠔꠣꠘꠞꠦ ꠄꠞ ꠝꠣꠘꠤ ꠎꠤꠇꠣꠁꠟꠣ।
MAR 7:18 ꠁꠍꠣꠄ ꠇꠁꠟꠣ, “ꠔꠥꠝꠞꠣ ꠇꠤꠔꠣ ꠅꠃꠟꠣꠃ ꠛꠦꠀꠇ꠆ꠇꠟ ꠘꠤ? ꠔꠥꠝꠞꠣ ꠛꠥꠎ ꠘꠣ ꠘꠤ, ꠛꠣꠞꠦ ꠕꠣꠇꠤ ꠎꠦꠔꠣ ꠎꠤꠘꠤꠡ ꠝꠣꠘꠡꠞ ꠜꠤꠔꠞꠦ ꠢꠣꠝꠣꠄ, ꠁꠔꠣꠄ ꠝꠣꠘꠡꠞꠦ ꠘꠣꠙꠣꠇ ꠇꠞꠔ ꠙꠣꠞꠦ ꠘꠣ।
MAR 7:19 ꠁꠔꠣ ꠔ ꠔꠣꠞ ꠖꠤꠟꠞ ꠜꠤꠔꠞꠦ ꠢꠣꠝꠣꠄ ꠘꠣ, ꠈꠣꠟꠤ ꠙꠦꠐꠞ ꠝꠣꠎꠦ ꠢꠣꠝꠣꠄ, ꠀꠞ ꠙꠦꠐ ꠕꠣꠇꠤ ꠢꠤꠞꠛꠣꠞ ꠛꠣꠞ ꠅꠁ ꠎꠣꠄ।” ꠁꠍꠣꠄ ꠅꠃ ꠔꠣꠟꠤꠝ ꠖꠤꠀ ꠛꠥꠎꠣꠁꠟꠣ, ꠇꠥꠘꠥꠎꠣꠔ ꠈꠣꠘꠤꠃ ꠘꠣꠙꠣꠇ ꠘꠣꠄ।
MAR 7:20 ꠔꠣꠁꠘ ꠇꠁꠟꠣ, “ꠝꠣꠘꠡꠞ ꠜꠤꠔꠞꠦ ꠕꠣꠇꠤ ꠎꠦꠔꠣ ꠛꠣꠞꠅꠄ, ꠅꠔꠣꠄꠃ ꠝꠣꠘꠡꠞꠦ ꠘꠣꠙꠣꠇ ꠇꠞꠦ।
MAR 7:21 ꠝꠣꠘꠡꠞ ꠖꠤꠟ ꠕꠣꠇꠤꠃ ꠔ ꠢꠇꠟ ꠘꠝꠥꠘꠣꠞ ꠇꠥ-ꠌꠤꠘ꠆ꠔꠣ ꠀꠄ; ꠎꠤꠘꠣ, ꠌꠥꠞꠤ, ꠈꠥꠘ,
MAR 7:22 ꠟꠥꠜ-ꠟꠣꠟꠌ, ꠙꠞꠞ ꠈꠦꠔꠤ ꠇꠞꠣꠞ ꠗꠣꠘ꠆ꠖꠣ, ꠍꠟ-ꠌꠔꠥꠞꠤ, ꠛꠖꠝꠣꠁꠡꠤ, ꠛꠖ-ꠘꠎꠞ, ꠁꠋꠡꠣ-ꠘꠤꠘ꠆ꠖꠣ, ꠛꠠꠣꠁ-ꠛꠦꠐꠣꠉꠤꠞꠤ ꠀꠞ ꠡꠄꠔꠣꠘꠤ ꠛꠣꠞꠅꠄ।
MAR 7:23 ꠅꠃ ꠔꠣꠝꠣꠝ ꠘꠣꠚꠞꠝꠣꠘꠤ ꠝꠣꠘꠡꠞ ꠖꠤꠟ ꠕꠣꠇꠤ ꠛꠣꠞ ꠅꠁꠀ ꠔꠣꠞꠣꠞꠦ ꠘꠣꠙꠣꠇ ꠛꠣꠘꠣꠄ।”
MAR 7:24 ꠛꠣꠖꠦ ꠁꠍꠣ ꠅꠃ ꠄꠟꠣꠇꠣ ꠕꠘꠦ ꠡꠤꠞꠤꠀ ꠖꠦꠡꠞ ꠡꠥꠞ ꠐꠣꠃꠘꠞ ꠇꠣꠘ꠆ꠖꠣꠔ ꠔꠡꠞꠤꠚ ꠘꠤꠟꠣꠉꠤ। ꠅꠘꠅ ꠀꠁꠀ ꠔꠣꠁꠘ ꠄꠇ ꠊꠞꠞ ꠜꠤꠔꠞꠦ ꠟꠥꠇꠣꠁ ꠞꠁꠟꠣ, ꠌꠣꠁꠟꠣ ꠝꠣꠘꠡꠦ ꠎꠣꠘꠥ ꠘꠣ ꠎꠣꠘꠂꠘ ꠔꠣꠁꠘ ꠀꠁꠍꠂꠘ ꠇꠞꠤ। ꠅꠁꠟꠦ ꠔꠣꠘ ꠈꠛꠞ ꠞꠐꠤ ꠉꠦꠟ।
MAR 7:25 ꠢꠘꠅ ꠄꠇ ꠛꠦꠐꠤ ꠝꠣꠘꠡꠞ ꠙꠥꠠꠤꠞꠦ ꠜꠥꠔꠦ ꠗꠞꠣꠄ, ꠁꠍꠣꠄ ꠔꠡꠞꠤꠚ ꠀꠘꠍꠂꠘ ꠢꠥꠘꠤꠀ ꠅꠃ ꠛꠦꠐꠤꠄ, ꠎꠟꠖꠤ ꠇꠞꠤ ꠀꠁꠀ ꠔꠣꠘ ꠙꠣꠅꠔ ꠙꠠꠟ।
MAR 7:26 ꠁ ꠛꠦꠐꠤꠞ ꠛꠣꠠꠤ ꠡꠤꠞꠤꠀ ꠖꠦꠡꠞ ꠚꠂꠘꠤꠇꠤꠀ ꠄꠟꠣꠇꠣꠔ, ꠅꠁꠟꠦ ꠝꠣꠔꠤꠔ ꠁꠃꠘꠣꠘꠤ ꠜꠣꠡꠣꠄ। ꠔꠣꠁ ꠁꠍꠣꠞ ꠉꠦꠍꠦ ꠝꠤꠘꠔ-ꠇꠣꠎ꠆ꠎꠤ ꠇꠞꠤꠀ ꠇꠁꠟ, “ꠢꠥꠎꠥꠞ, ꠜꠥꠔꠞ ꠇꠛꠎꠣ ꠕꠣꠇꠤ ꠀꠝꠣꠞ ꠙꠥꠠꠤꠉꠥꠞꠦ ꠛꠣꠌꠣꠃꠇ꠆ꠇꠣ।”
MAR 7:27 ꠁꠍꠣꠄ ꠇꠁꠟꠣ, “ꠀꠉꠦ ꠘꠤꠎꠞ ꠢꠥꠞꠥꠔ꠆ꠔꠣꠁꠘ꠆ꠔꠦ ꠙꠦꠐ ꠜꠞꠤ ꠈꠣꠃꠇ꠆ꠇꠣ, ꠘꠤꠎꠞ ꠍꠣꠛꠣꠟꠞ ꠈꠣꠘꠤ ꠇꠥꠇꠞꠞ ꠍꠣꠝꠘꠦ ꠚꠣꠟꠣꠘꠤ ꠑꠤꠇ ꠘꠣꠄ।”
MAR 7:28 ꠛꠦꠐꠤꠄ ꠇꠁꠟ, “ꠎꠤꠅꠄ ꠢꠥꠎꠥꠞ, ꠀꠙꠘꠣꠞ ꠇꠕꠣꠃ ꠑꠤꠇ, ꠅꠁꠟꠦ ꠘꠤꠎꠞ ꠍꠣꠛꠣꠟꠞ ꠈꠣꠘꠤꠞ ꠎꠦꠔꠣ ꠉꠥꠠꠣ-ꠉꠣꠠꠣ ꠉꠣꠟꠣꠛꠣꠄ ꠙꠠꠦ, ꠁꠔꠣ ꠔ ꠇꠥꠇꠞꠦ ꠈꠣꠄ।”
MAR 7:29 ꠔꠣꠁꠘ ꠇꠁꠟꠣ, “ꠔꠥꠝꠤ ꠔ ꠈꠣꠐꠤ ꠝꠣꠔꠃ ꠝꠣꠔꠍ। ꠔꠦ ꠎꠣꠅ, ꠉꠤꠀ ꠖꠦꠈꠅ, ꠜꠥꠔꠦ ꠔꠥꠝꠣꠞ ꠙꠥꠠꠤꠞꠦ ꠍꠣꠠꠤꠀ ꠉꠦꠍꠦꠉꠤ।”
MAR 7:30 ꠢꠣꠍꠣꠃ ꠛꠦꠐꠤꠄ ꠛꠣꠠꠤꠔ ꠉꠤꠀ ꠖꠦꠈꠟ, ꠔꠣꠁꠞ ꠙꠥꠠꠤ ꠜꠣꠟꠣ ꠅꠁꠀ ꠛꠤꠍꠘꠣꠔ ꠢꠥꠔꠤꠞꠁꠍꠦ।
MAR 7:31 ꠛꠣꠖꠦ ꠁꠍꠣꠄ ꠡꠥꠞ ꠄꠟꠣꠇꠣ ꠕꠘꠦ ꠍꠤꠖꠘ ꠐꠣꠃꠘ ꠅꠁꠀ, ꠉꠣꠟꠤꠟ ꠀꠅꠞꠞ ꠢꠙꠣꠞꠅ ꠖꠤꠇꠣꠙꠟꠤ ꠄꠟꠣꠇꠣꠔ ꠀꠁꠟꠣ।
MAR 7:32 ꠅꠘꠅ ꠀꠁꠀ ꠢꠣꠞꠟꠦ ꠝꠣꠘꠡꠦ ꠄꠇ ꠈꠣꠟꠥꠀ ꠔꠥꠔꠟꠣ ꠛꠦꠐꠣꠞꠦ ꠔꠣꠘ ꠉꠦꠍꠦ ꠀꠘꠤꠀ ꠝꠤꠘꠔ ꠟꠣꠉꠣꠁꠟꠣ, ꠔꠣꠞꠦ ꠀꠔꠣꠁ ꠖꠤꠛꠣꠞ ꠟꠣꠉꠤ।
MAR 7:33 ꠔꠣꠁꠘ ꠄꠞꠦ ꠝꠣꠘꠡꠞ ꠜꠤꠠ ꠕꠘꠦ ꠛꠣꠞꠦ ꠘꠤꠞꠣꠁ ꠎꠣꠉꠣꠔ ꠘꠤꠀ, ꠔꠣꠞ ꠖꠥꠁꠅ ꠇꠣꠘꠅ ꠔꠣꠘ ꠀꠔꠞ ꠀꠋꠉꠥꠁꠟ ꠢꠣꠞꠣꠁꠟꠣ, ꠔꠣꠘ ꠝꠥꠈꠞ ꠍꠦꠚ ꠟꠣꠉꠣꠁꠀ ꠔꠣꠞ ꠎꠤꠚꠞꠣ ꠀꠔꠣꠁ ꠖꠤꠟꠣ।
MAR 7:34 ꠀꠞ ꠃꠙꠞꠦ ꠀꠍꠝꠣꠘꠦꠖꠤ ꠌꠣꠁꠀ ꠟꠣꠝ꠆ꠛꠣ ꠇꠞꠤ ꠡꠣꠡ ꠚꠣꠟꠣꠁꠀ ꠇꠁꠟꠣ, “ꠁꠚꠚꠣꠔꠣ,” ꠝꠣꠘꠤ, “ꠈꠥꠟꠤ ꠎꠣꠃꠇ।”
MAR 7:35 ꠟꠉꠦ ꠟꠉꠦꠃ ꠛꠦꠐꠣꠞ ꠇꠣꠘ ꠈꠥꠟꠤꠉꠦꠟ। ꠔꠥꠔꠟꠣꠝꠤ ꠍꠣꠠꠤ ꠉꠦꠟ, ꠢꠦ ꠙꠞꠤꠡ꠆ꠇꠣꠞ ꠝꠣꠔꠣ ꠗꠞꠟ।
MAR 7:36 ꠢꠦꠡꠦ ꠔꠣꠁꠘ ꠄꠞꠣꠞꠦ ꠢꠥꠇꠥꠝ ꠖꠤꠟꠣ, “ꠈꠛꠞꠖꠣꠞ, ꠔꠥꠝꠞꠣ ꠁꠔꠣ ꠇꠦꠃꠞꠞꠦ ꠢꠥꠘꠣꠁꠅ ꠘꠣ।” ꠅꠁꠟꠦ ꠔꠣꠁꠘ ꠎꠔ ꠛꠦꠡꠤ ꠘꠣ ꠇꠞꠟꠣ, ꠔꠣꠞꠣ ꠅꠔ ꠛꠦꠡ ꠇꠞꠤ ꠁꠔꠣ ꠞꠐꠣꠁꠟ।
MAR 7:37 ꠔꠣꠞꠣ ꠀꠌꠣꠘꠇ ꠔꠣꠁꠎ꠆ꠎꠥꠛ ꠅꠁꠀ ꠇꠁꠟꠣ, “ꠄꠁꠘ ꠔ ꠢꠇꠟ ꠇꠣꠝꠃ ꠈꠥꠛ ꠘꠤꠈꠥꠔ ꠇꠞꠤ ꠇꠞꠂꠘ। ꠖꠦꠈꠞꠣꠄ ꠘꠤ, ꠔꠣꠁꠘ ꠈꠣꠟꠥꠀꠞꠦ ꠢꠥꠘꠣꠞ ꠡꠇ꠆ꠔꠤ, ꠀꠞ ꠛꠥꠛꠣꠞꠦ ꠝꠣꠔꠤꠛꠣꠞ ꠔꠣꠇ꠆ꠇꠔ ꠖꠤꠍꠂꠘ।”
MAR 8:1 ꠛꠣꠖꠦ ꠀꠞꠇꠛꠣꠞ ꠛꠃꠔ ꠝꠣꠘꠥꠡ ꠀꠁꠀ ꠔꠣꠘ ꠉꠦꠍꠦ ꠖꠟꠣ ꠅꠁꠟꠣ। ꠄꠞꠣꠞ ꠉꠦꠍꠦ ꠇꠥꠘꠥ ꠈꠣꠘꠤ-ꠈꠥꠞꠣꠇꠤ ꠘꠣ ꠕꠣꠇꠣꠄ, ꠁꠍꠣꠄ ꠔꠣꠘ ꠍꠣꠢꠣꠛꠤ ꠅꠇꠟꠞꠦ ꠗꠣꠞꠅ ꠘꠤꠀ ꠇꠁꠟꠣ,
MAR 8:2 “ꠁꠔꠣ ꠝꠣꠘꠡꠞ ꠟꠣꠉꠤ ꠀꠝꠣꠞ ꠛꠠ ꠖꠞꠖ ꠟꠣꠉꠦꠞ, ꠀꠁꠎ ꠔꠤꠘ ꠖꠤꠘ ꠗꠞꠤ ꠔꠣꠞꠣ ꠀꠝꠣꠞ ꠟꠉꠦ ꠟꠉꠦ ꠀꠍꠂꠘ, ꠅꠁꠟꠦ ꠅꠈꠘ ꠔꠣꠞꠣꠞ ꠈꠣꠘꠤꠞ ꠇꠥꠘ꠆ꠔꠣ ꠘꠣꠁ।
MAR 8:3 ꠅꠃ ꠢꠣꠟꠔꠦ ꠄꠞꠣꠞꠦ ꠛꠤꠖꠣꠄ ꠇꠞꠤ ꠛꠣꠠꠤꠔ ꠙꠣꠑꠣꠁ ꠖꠤꠟꠦ, ꠁꠔꠣ ꠙꠕꠅꠃ ꠛꠦꠃꠡ ꠅꠁꠎꠤꠛꠣ, ꠄꠞꠣ ꠇꠦꠃ ꠇꠦꠃ ꠔ ꠛꠃꠔ ꠖꠥꠞꠁ ꠕꠣꠇꠤ ꠀꠁꠍꠦ।”
MAR 8:4 ꠍꠣꠢꠣꠛꠤ ꠅꠇꠟꠦ ꠇꠁꠟꠣ, “ꠢꠥꠎꠥꠞ, ꠁ ꠘꠤꠞꠣꠁ-ꠝꠞꠥꠜꠥꠝꠤꠞ ꠝꠣꠎꠦ ꠇꠦ ꠇꠥꠀꠁ ꠕꠣꠇꠤ ꠅꠔ ꠞꠥꠐꠤ ꠎꠥꠉꠣꠁꠀ ꠄꠞꠣꠞꠦ ꠈꠣꠅꠀꠁꠛ?”
MAR 8:5 ꠔꠣꠁꠘ ꠇꠁꠟꠣ, “ꠔꠥꠝꠞꠣꠞ ꠉꠦꠍꠦ ꠞꠥꠐꠤ ꠇꠄꠈꠣꠘ ꠀꠍꠦ?” ꠄꠞꠣ ꠇꠁꠟꠣ, “ꠍꠣꠛ, ꠡꠣꠔꠈꠣꠘ ꠀꠍꠦ।”
MAR 8:6 ꠔꠣꠁꠘ ꠝꠣꠘꠡꠞꠦ ꠇꠁꠟꠣ, “ꠀꠙꠘꠣꠞꠣ ꠈꠣꠘꠤꠞ ꠟꠣꠉꠤ ꠝꠣꠐꠤꠔ ꠛꠁꠎꠣꠁꠘ।” ꠇꠁꠀ ꠞꠥꠐꠤ ꠡꠣꠔꠅꠈꠣꠘ ꠘꠤꠀ ꠀꠟ꠆ꠟꠣ ꠙꠣꠇꠞ ꠡꠥꠇꠞꠤꠀ ꠀꠖꠣꠄ ꠇꠞꠤ ꠅꠈꠘꠣꠁꠘ ꠍꠤꠠꠤꠟꠣ, ꠀꠞ ꠍꠣꠢꠣꠛꠤ ꠅꠇꠟꠞꠦ ꠖꠤꠀ ꠛꠣꠐꠤꠀ ꠖꠦꠅꠀꠁꠟꠣ।
MAR 8:7 ꠍꠣꠢꠣꠛꠤ ꠅꠇꠟꠞ ꠉꠦꠍꠦ ꠢꠥꠞꠥ ꠢꠥꠞꠥ ꠇꠄꠐꠣ ꠛꠤꠞꠣꠘ ꠝꠣꠍꠅ ꠀꠍꠤꠟ, ꠔꠣꠁꠘ ꠅꠃ ꠝꠣꠍꠞ ꠟꠣꠉꠤ ꠡꠥꠇꠞꠤꠀ ꠀꠖꠣꠄ ꠇꠞꠟꠣ, ꠀꠞ ꠄꠞꠣꠞꠦ ꠇꠁꠟꠣ ꠝꠣꠘꠡꠞꠦ ꠛꠣꠐꠤꠀ ꠖꠤꠔꠣ।
MAR 8:8 ꠢꠇꠟ ꠝꠣꠘꠡꠦ ꠙꠦꠐ ꠜꠞꠤ ꠈꠣꠁꠟꠣ। ꠈꠣꠘꠤꠞ ꠛꠣꠖꠦ ꠎꠦꠔꠣ ꠞꠁꠍꠤꠟ, ꠍꠣꠢꠣꠛꠤ ꠅꠇꠟꠦ ꠅꠔꠣ ꠖꠟꠣ ꠇꠞꠤꠀ ꠢꠣꠞꠟꠦ ꠡꠣꠔ ꠐꠥꠇꠞꠤ ꠜꠞꠤꠉꠦꠟ।
MAR 8:9 ꠁ ꠖꠟꠞ ꠝꠣꠎꠦ ꠈꠣꠟꠤ ꠛꠦꠐꠣ ꠝꠣꠘꠥꠡꠃ ꠅꠘꠥꠝꠣꠘ ꠌꠣꠁꠞ ꠀꠎꠣꠞ ꠎꠘꠦ ꠈꠣꠁꠟꠣ। ꠛꠣꠖꠦ ꠔꠣꠁꠘ ꠄꠞꠣꠞꠦ ꠛꠤꠖꠣꠄ ꠖꠤꠀ,
MAR 8:10 ꠍꠣꠢꠣꠛꠤ ꠅꠇꠟꠞꠦ ꠟꠁꠀ ꠘꠣꠅꠔ ꠇꠞꠤ ꠖꠣꠟꠝꠣꠘꠥꠕꠣ ꠎꠤꠟꠣꠔ ꠉꠦꠟꠣꠉꠤ।
MAR 8:11 ꠅꠘꠅ ꠀꠁꠀ ꠢꠣꠞꠟꠦ ꠚꠞꠤꠡꠤ ꠅꠇꠟꠦ ꠔꠣꠘ ꠟꠉꠦ ꠔꠞ꠆ꠇꠣ-ꠔꠞ꠆ꠇꠤ ꠟꠣꠉꠣꠁꠟꠣ, ꠀꠞ ꠔꠣꠘꠞꠦ ꠎꠣꠌꠣꠁ ꠇꠞꠣꠞ ꠟꠣꠉꠤ ꠔꠣꠞꠣ ꠀꠍꠝꠣꠘꠤ ꠇꠥꠘꠥ ꠝꠥꠎꠦꠎꠣ ꠖꠦꠈꠔꠣ ꠌꠣꠁꠟꠣ।
MAR 8:12 ꠁꠈꠣꠘ ꠢꠥꠘꠤꠀ ꠁꠍꠣꠄ ꠟꠣꠝ꠆ꠛꠣ ꠇꠞꠤ ꠡꠣꠡ ꠚꠣꠟꠣꠁꠀ ꠇꠁꠟꠣ, “ꠁ ꠎꠝꠣꠘꠣꠞ ꠝꠣꠘꠡꠦ ꠈꠣꠟꠤ ꠝꠥꠎꠦꠎꠣ ꠔꠥꠇꠣꠁꠘ ꠇꠦꠘꠦ? ꠀꠝꠤ ꠢꠇ ꠇꠕꠣ ꠇꠁꠀꠞ, ꠄꠞꠣꠞꠦ ꠇꠥꠘꠥꠎꠣꠔ ꠝꠥꠎꠦꠎꠣ ꠖꠦꠈꠣꠁꠟ ꠅꠁꠔ ꠘꠣꠄ।”
MAR 8:13 ꠇꠁꠀ ꠔꠣꠁꠘ ꠄꠞꠣꠞ ꠉꠦꠍ ꠕꠣꠇꠤ ꠢꠞꠤꠉꠦꠟꠣ, ꠀꠞ ꠘꠣꠅꠔ ꠃꠑꠤꠀ ꠢꠤꠞꠛꠣꠞ ꠀꠅꠞꠞ ꠢꠙꠣꠞꠅ ꠉꠦꠟꠣꠉꠤ।
MAR 8:14 ꠍꠣꠢꠣꠛꠤ ꠅꠇꠟꠦ ꠟꠉꠦ ꠇꠞꠤ ꠞꠥꠐꠤ ꠘꠤꠔꠦ ꠚꠣꠃꠞꠤꠟꠤꠟꠣ। ꠘꠣꠅꠞ ꠝꠣꠎꠦ ꠄꠞꠣꠞ ꠟꠉꠦ ꠈꠣꠟꠤ ꠄꠇꠈꠣꠘ ꠞꠥꠐꠤ ꠀꠍꠤꠟ।
MAR 8:15 ꠅꠃ ꠡꠝꠄ ꠁꠍꠣꠄ ꠇꠁꠟꠣ, “ꠔꠥꠝꠤꠔꠣꠁꠘ ꠢꠥꠡꠤꠀꠞ ꠅꠅ, ꠞꠣꠎꠣ ꠢꠦꠞꠥꠖ ꠀꠞ ꠚꠞꠤꠡꠤ ꠝꠎꠛꠞ ꠈꠣꠝꠤꠞ ꠕꠣꠇꠤ ꠢꠥꠡꠤꠀꠞ ꠞꠁꠅ।”
MAR 8:16 ꠁꠈꠣꠘ ꠢꠥꠘꠤꠀ ꠍꠣꠢꠣꠛꠤ ꠅꠇꠟꠦ ꠇꠣꠘꠣ-ꠇꠣꠘꠤ ꠇꠞꠤ ꠇꠁꠟꠣ, “ꠀꠝꠞꠣ ꠟꠉꠦ ꠇꠞꠤ ꠞꠥꠐꠤ ꠘꠣ ꠀꠘꠣꠄ ꠔꠣꠁꠘ ꠝꠘꠅꠟꠄ ꠅꠈꠣꠘ ꠇꠁꠞꠣ।”
MAR 8:17 ꠅꠁꠟꠦ ꠍꠣꠢꠣꠛꠤ ꠅꠇꠟꠦ ꠇꠤꠔꠣ ꠝꠣꠔꠤꠞꠣ, ꠁꠍꠣꠄ ꠁꠈꠣꠘ ꠛꠥꠎꠤꠀ ꠔꠣꠁꠘ ꠄꠞꠣꠞꠦ ꠇꠁꠟꠣ, “ꠔꠥꠝꠤꠔꠣꠁꠘ ꠇꠦꠘꠦ ꠇꠁꠞꠣꠄ, ꠞꠥꠐꠤ ꠀꠘꠍ ꠘꠣ ꠇꠞꠤ ꠀꠝꠤ ꠁꠈꠣꠘ ꠇꠁꠍꠤ? ꠔꠥꠝꠞꠣ ꠇꠤꠔꠣ ꠅꠈꠘꠅ ꠇꠥꠘ꠆ꠔꠣ ꠎꠣꠘ ꠘꠣ ꠘꠤ, ꠇꠥꠘ꠆ꠔꠣꠃ ꠛꠥꠎ ꠘꠣ ꠘꠤ? ꠔꠥꠝꠞꠣꠞ ꠖꠤꠟ ꠙꠣꠡꠣꠘ ꠅꠁꠉꠦꠍꠦ ꠘꠤ?
MAR 8:18 ꠔꠥꠝꠞꠣꠞ ꠌꠃꠈ ꠕꠣꠇꠔꠦꠅ ꠖꠦꠈꠞꠣꠄ ꠘꠣ ꠘꠤ? ꠇꠣꠘ ꠕꠣꠇꠔꠦꠅ ꠢꠥꠘꠞꠣꠄ ꠘꠣ ꠘꠤ? ꠔꠥꠝꠞꠣꠞ ꠝꠘꠅ ꠙꠠꠦꠞ ꠘꠣ ꠘꠤ,
MAR 8:19 ꠎꠦꠛꠟꠣ ꠀꠝꠤ ꠙꠣꠌ ꠀꠎꠣꠞ ꠝꠣꠘꠡꠞ ꠟꠣꠉꠤ ꠈꠣꠟꠤ ꠙꠣꠌꠈꠣꠘ ꠞꠥꠐꠤ ꠍꠤꠠꠤꠍꠟꠣꠝ, ꠅꠃ ꠝꠣꠘꠡꠦ ꠈꠣꠁꠀ ꠢꠣꠞꠟꠦ ꠔꠥꠝꠞꠣ ꠇꠔ ꠐꠥꠇꠞꠤ ꠉꠥꠠꠣ-ꠉꠣꠠꠣ ꠖꠟꠣ ꠇꠞꠍꠟꠣꠄ?” ꠄꠞꠣ ꠇꠁꠟꠣ, “ꠢꠥꠎꠥꠞ, ꠛꠣꠞꠅ ꠐꠥꠇꠞꠤ।”
MAR 8:20 ꠔꠣꠁꠘ ꠢꠤꠞꠛꠣꠞ ꠇꠁꠟꠣ, “ꠀꠁꠌ꠆ꠍꠣ, ꠀꠝꠤ ꠎꠦꠛꠟꠣ ꠌꠣꠁꠞ ꠀꠎꠣꠞ ꠝꠣꠘꠡꠞ ꠟꠣꠉꠤ ꠡꠣꠔꠈꠣꠘ ꠞꠥꠐꠤ ꠍꠤꠠꠤꠍꠟꠣꠝ, ꠝꠣꠘꠡꠦ ꠈꠣꠁꠀ ꠢꠣꠞꠟꠦ ꠔꠥꠝꠞꠣ ꠇꠄ ꠐꠥꠇꠞꠤ ꠖꠟꠣ ꠇꠞꠍꠟꠣꠄ?” ꠄꠞꠣ ꠇꠁꠟꠣ, “ꠡꠣꠔ ꠐꠥꠇꠞꠤ।”
MAR 8:21 ꠅꠃ ꠔꠣꠁꠘ ꠇꠁꠟꠣ, “ꠄꠞꠛꠣꠖꠦꠅ ꠔꠥꠝꠞꠣ ꠛꠥꠎꠟꠣꠄ ꠘꠣ ꠘꠤ?”
MAR 8:22 ꠛꠣꠖꠦ ꠁꠍꠣꠄ ꠔꠣꠘ ꠍꠣꠢꠣꠛꠤ ꠅꠇꠟꠞꠦ ꠟꠁꠀ ꠛꠣꠄꠔ-ꠍꠄꠖꠣ ꠉꠣꠃꠔ ꠀꠁꠟꠣ, ꠀꠁꠀ ꠢꠣꠞꠟꠦ ꠝꠣꠘꠡꠦ ꠄꠇ ꠀꠘ꠆ꠖꠣ ꠛꠦꠐꠣꠞꠦ ꠔꠣꠘ ꠉꠦꠍꠦ ꠀꠘꠤꠀ ꠇꠁꠟ ꠛꠦꠐꠣꠉꠥꠞꠦ ꠀꠔꠣꠁ ꠖꠤꠛꠣꠞ ꠟꠣꠉꠤ।
MAR 8:23 ꠁꠍꠣꠄ ꠅꠃ ꠛꠦꠐꠣꠞ ꠀꠔꠅ ꠗꠞꠤ ꠉꠣꠃꠞ ꠛꠣꠞꠦ ꠟꠁꠀ ꠉꠦꠟꠣ। ꠉꠤꠀ ꠔꠣꠘ ꠝꠥꠈꠞ ꠍꠦꠚ ꠛꠦꠐꠣꠞ ꠌꠈꠥꠔ ꠟꠣꠉꠣꠁꠀ ꠔꠣꠞ ꠉꠔꠞꠅ ꠀꠔ ꠖꠤꠀ ꠇꠁꠟꠣ, “ꠅꠛꠣ, ꠔꠥꠝꠤ ꠇꠥꠘ꠆ꠔꠣ ꠖꠦꠈꠞꠣꠄ ꠘꠤ?”
MAR 8:24 ꠛꠦꠐꠣꠄ ꠌꠃꠈ ꠈꠥꠟꠤꠀ ꠌꠣꠁꠀ ꠇꠁꠟ, “ꠎꠤꠅꠄ ꠢꠥꠎꠥꠞ, ꠀꠝꠤ ꠔ ꠝꠣꠘꠥꠡ ꠖꠦꠈꠞꠣꠝ, ꠅꠁꠟꠦ ꠁꠔꠣꠞꠦ ꠉꠣꠍꠞ ꠟꠣꠈꠣꠘ ꠟꠣꠉꠦꠞ, ꠄꠞꠣ ꠀꠐꠣ-ꠃꠐꠤ ꠇꠞꠦꠞ।”
MAR 8:25 ꠔꠦꠃ ꠁꠍꠣꠄ ꠀꠞꠇꠛꠣꠞ ꠔꠣꠞ ꠌꠈꠥꠞ ꠃꠙꠞꠦ ꠀꠔꠣꠁ ꠖꠤꠟꠦ, ꠢꠦ ꠜꠣꠟꠣ ꠇꠞꠤ ꠌꠣꠁꠟ ꠀꠞ ꠢꠇ꠆ꠇꠟꠔꠣ ꠙꠞꠤꠡ꠆ꠇꠣꠞ ꠖꠦꠈꠟ।
MAR 8:26 ꠁꠍꠣꠄ ꠔꠣꠞꠦ ꠔꠣꠞ ꠛꠣꠠꠤꠔ ꠙꠣꠑꠣꠁ ꠖꠤꠀ ꠇꠁꠟꠣ, “ꠢꠥꠘꠅ, ꠛꠣꠄꠔ-ꠍꠄꠖꠣ ꠉꠣꠃꠔ ꠀꠞ ꠎꠣꠁꠅ ꠘꠣ।”
MAR 8:27 ꠛꠣꠖꠦ ꠔꠣꠁꠘ ꠀꠞ ꠍꠣꠢꠣꠛꠤ ꠅꠇꠟ ꠇꠂꠍꠞꠤꠀ-ꠚꠤꠟꠤꠙꠤ ꠐꠣꠃꠘꠞ ꠇꠣꠘ꠆ꠖꠣ-ꠇꠣꠍꠣꠞ ꠉꠣꠃꠀꠁꠘ꠆ꠔꠅ ꠉꠦꠟꠣ। ꠙꠕꠅ ꠔꠣꠘ ꠍꠣꠢꠣꠛꠤ ꠅꠇꠟꠞꠦ ꠎꠤꠇꠣꠁꠟꠣ, “ꠇꠅ ꠌꠣꠁꠘ, ꠝꠣꠘꠡꠦ ꠀꠝꠣꠞ ꠛꠦꠙꠣꠞꠦ ꠇꠤꠔꠣ ꠝꠘꠅ ꠇꠞꠂꠘ, ꠀꠝꠤ ꠇꠦ?”
MAR 8:28 ꠄꠞꠣ ꠎꠥꠀꠙ ꠖꠤꠟꠣ, “ꠇꠦꠃ ꠇꠄ, ꠀꠙꠘꠦ ꠢꠎꠞꠔ ꠄꠢꠤꠀ। ꠇꠦꠃ ꠇꠄ ꠁꠟꠤꠀꠍ ꠘꠛꠤ। ꠇꠦꠃ ꠇꠦꠃ ꠇꠂꠘ, ꠀꠙꠘꠦ ꠅꠁꠘ꠆ꠘ ꠇꠥꠘꠥ ꠘꠛꠤ।”
MAR 8:29 ꠅꠃ ꠔꠣꠁꠘ ꠇꠁꠟꠣ, “ꠅꠁꠟꠦ ꠔꠥꠝꠞꠣ ꠇꠤꠔꠣ ꠝꠘꠅ ꠇꠞ, ꠀꠝꠤ ꠇꠦ?” ꠍꠣꠢꠣꠛꠤ ꠙꠤꠔꠞꠦ ꠎꠥꠀꠙ ꠖꠤꠟꠣ, “ꠀꠙꠘꠦꠃ ꠀꠟ꠆ꠟꠣꠞ ꠅꠀꠖꠣ ꠇꠞꠣ ꠢꠃ ꠀꠟ-ꠝꠍꠤ।”
MAR 8:30 ꠔꠣꠁꠘ ꠄꠞꠣꠞꠦ ꠢꠥꠡꠤꠀꠞ ꠇꠞꠤ ꠇꠁꠟꠣ, “ꠔꠥꠝꠞꠣ ꠀꠝꠣꠞ ꠛꠦꠙꠣꠞꠦ ꠇꠦꠃꠞꠞꠦ ꠢꠥꠘꠣꠁꠅ ꠘꠣ।”
MAR 8:31 ꠛꠣꠖꠦ ꠔꠣꠘ ꠍꠣꠢꠣꠛꠤ ꠅꠇꠟꠞꠦ ꠅꠃ ꠛꠄꠀꠘ ꠢꠥꠘꠣꠁꠟꠣ, “ꠀꠝꠤ ꠛꠤꠘ-ꠀꠖꠝꠦ ꠛꠃꠔ ꠖꠥꠈ-ꠝꠍꠤꠛꠔ ꠙꠥꠀꠘꠤ ꠟꠣꠉꠛ। ꠝꠥꠞꠛ꠆ꠛꠤ ꠅꠇꠟꠦ, ꠛꠠ ꠁꠝꠣꠝ ꠅꠇꠟꠦ, ꠀꠞ ꠝꠃꠟꠣꠘꠣ ꠅꠇꠟꠦꠅ ꠀꠝꠣꠞꠦ ꠝꠣꠘꠔꠣ ꠘꠣꠄ। ꠀꠝꠣꠞꠦ ꠎꠣꠘꠦ ꠝꠣꠞꠣ ꠅꠁꠛ, ꠅꠁꠟꠦ ꠝꠃꠔꠞ ꠔꠤꠘ ꠖꠤꠘ ꠛꠣꠖꠦ ꠢꠤꠞꠛꠣꠞ ꠎꠤꠘ꠆ꠖꠣ ꠅꠁꠀ ꠃꠑꠣ ꠟꠣꠉꠛ।”
MAR 8:32 ꠔꠣꠁꠘ ꠈꠥꠛ ꠈꠥꠟꠣ-ꠝꠦꠟꠣ ꠇꠞꠤ ꠁꠔꠣ ꠇꠁꠟꠣ। ꠄꠞꠖꠣꠄ ꠙꠤꠔꠞꠦ ꠔꠣꠘꠞꠦ ꠀꠟꠉꠣ ꠢꠞꠣꠁꠀ ꠘꠤꠀ ꠇꠁꠟꠣ, “ꠢꠥꠎꠥꠞ, ꠡꠣꠛꠗꠣꠘ, ꠁꠟꠣ ꠝꠣꠔ ꠝꠣꠔꠂꠘ ꠘꠣ ꠎꠣꠘꠥ।”
MAR 8:33 ꠁꠍꠣꠄ ꠍꠣꠢꠣꠛꠤ ꠅꠇꠟꠞ ꠛꠣꠄ ꠝꠥꠈ ꠚꠤꠞꠣꠁꠀ ꠙꠤꠔꠞꠞꠦ ꠗꠣꠝꠇꠤ ꠖꠤꠀ ꠇꠁꠟꠣ, “ꠗꠥꠞ ꠁꠛꠟꠤꠍ, ꠀꠝꠣꠞ ꠉꠦꠍ ꠕꠣꠇꠤ ꠜꠣꠉ! ꠔꠥꠁ ꠀꠟ꠆ꠟꠣꠁ ꠝꠥꠘꠡꠣꠞꠦ ꠛꠣꠖ ꠖꠤꠀ, ꠝꠣꠘꠡꠞ ꠟꠣꠈꠣꠘ ꠌꠤꠘ꠆ꠔꠣ ꠇꠞꠞꠦ।”
MAR 8:34 ꠛꠣꠖꠦ ꠔꠣꠘ ꠍꠣꠢꠣꠛꠤ ꠀꠞ ꠀꠝ ꠝꠣꠘꠡꠞꠦꠅ ꠔꠣꠘ ꠗꠣꠞꠅ ꠘꠤꠀ ꠇꠁꠟꠣ, “ꠢꠥꠘꠅ, ꠀꠝꠣꠞ ꠔꠞꠤꠇꠣꠄ ꠇꠦꠃ ꠎꠤꠘ꠆ꠖꠦꠉꠤ ꠇꠣꠐꠣꠁꠔꠦ ꠌꠣꠁꠟꠦ, ꠢꠦ ꠔꠣꠞ ꠘꠤꠎꠞ ꠈꠥꠡꠤꠄ ꠌꠟꠣ ꠛꠣꠖ ꠖꠦꠃꠇ। ꠔꠣꠞ ꠀꠙꠘ ꠖꠥꠈ-ꠇꠡ꠆ꠐꠞ ꠍꠟꠤꠛ ꠛꠁꠀ ꠟꠁꠀ ꠀꠝꠣꠞ ꠈꠞꠦ ꠀꠃꠇ।
MAR 8:35 ꠎꠦ ꠎꠘꠦ ꠔꠣꠞ ꠘꠤꠎꠞ ꠡ꠆ꠛꠣꠗꠤꠘꠦ ꠌꠟꠔ ꠌꠣꠄ, ꠢꠦ ꠔꠣꠞ ꠢꠣꠍꠣꠞꠞ ꠎꠤꠘ꠆ꠖꠦꠉꠤ ꠈꠥꠀꠁꠟꠤꠛ। ꠅꠁꠟꠦ ꠎꠦ ꠎꠘꠦ ꠀꠝꠣꠞ ꠟꠣꠉꠤ ꠀꠞ ꠀꠟ꠆ꠟꠣꠞ ꠖꠦꠅꠀ ꠈꠥꠡ-ꠈꠛꠞꠤꠞ ꠟꠣꠉꠤ ꠔꠣꠞ ꠎꠣꠘ ꠛꠤꠟꠣꠄ, ꠢꠦ ꠔꠣꠞ ꠢꠣꠍꠣꠞꠞ ꠎꠤꠘ꠆ꠖꠦꠉꠤ ꠛꠣꠌꠣꠁꠛ।
MAR 8:36 ꠇꠦꠃ ꠎꠥꠖꠤ ꠀꠡ꠆ꠔꠣ ꠖꠥꠘꠤꠀꠞ ꠝꠣꠟꠤꠇ ꠛꠘꠤꠀꠅ ꠔꠣꠞ ꠢꠣꠍꠣꠞꠞ ꠎꠤꠘ꠆ꠖꠦꠉꠤ, ꠝꠣꠘꠤ ꠀꠈꠦꠞ ꠈꠥꠀꠁꠟꠣꠄ, ꠔꠦ ꠔꠣꠞ ꠇꠥꠘꠥ ꠚꠣꠄꠖꠣ ꠅꠁꠟ ꠘꠤ?
MAR 8:37 ꠢꠦꠡꠦ ꠢꠣꠍꠣꠞꠞ ꠎꠤꠘ꠆ꠖꠦꠉꠤ ꠙꠣꠅꠀꠞ ꠟꠣꠉꠤ ꠢꠦ ꠇꠥꠘ ꠗꠘ ꠛꠤꠟꠣꠁꠛ?
MAR 8:38 ꠢꠥꠘꠃꠇ꠆ꠇꠣ, ꠁ ꠎꠝꠣꠘꠣꠞ ꠛꠦꠁꠝꠣꠘ ꠀꠞ ꠉꠥꠘꠣꠉꠣꠞ ꠅꠇꠟꠞ ꠝꠣꠎꠦ, ꠇꠦꠃ ꠎꠥꠖꠤ ꠀꠝꠣꠞ ꠟꠣꠉꠤ ꠛꠣ ꠀꠝꠣꠞ ꠔꠣꠟꠤꠝꠞ ꠟꠣꠉꠤꠀ ꠝꠥꠈ ꠟꠥꠇꠣꠄ, ꠔꠦ ꠀꠝꠤ ꠛꠤꠘ-ꠀꠖꠝ ꠎꠦꠛꠟꠣ ꠙꠛꠤꠔ꠆ꠞ ꠚꠤꠞꠤꠡ꠆ꠔꠣ ꠅꠇꠟꠞꠦ ꠟꠉꠦ ꠟꠁꠀ, ꠀꠝꠣꠞ ꠉꠣꠁꠛꠤ ꠛꠣꠚꠞ ꠡꠣꠘ-ꠔꠎꠟ꠆ꠟꠤꠄ ꠎꠉꠔꠅ ꠢꠤꠞꠛꠣꠞ ꠀꠁꠝꠥ, ꠅꠃ ꠡꠝꠄ ꠀꠝꠤꠅ ꠄꠞꠣꠞꠦ ꠖꠦꠈꠟꠦ ꠝꠥꠈ ꠟꠥꠇꠣꠁꠝꠥ।”
MAR 9:1 ꠢꠎꠞꠔ ꠁꠍꠣꠄ ꠔꠣꠘ ꠍꠣꠢꠣꠛꠤ ꠅꠇꠟꠞꠦ ꠇꠁꠟꠣ, “ꠀꠝꠤ ꠔꠥꠝꠞꠣꠞꠦ ꠢꠣꠍꠣꠃ ꠇꠁꠞꠣꠝ, ꠁꠘꠅ ꠁꠟꠣꠈꠣꠘ ꠇꠄꠎꠘ ꠀꠎꠤꠞ ꠀꠍꠂꠘ, ꠎꠦꠞꠣ ꠀꠟ꠆ꠟꠣꠞ ꠛꠣꠖꠡꠣꠁꠞ ꠡꠣꠘ-ꠔꠎꠟ꠆ꠟꠤꠞꠦ ꠘꠤꠎꠞ ꠌꠃꠈꠦ ꠘꠣ ꠖꠦꠈꠣꠞ ꠀꠉꠦ ꠝꠃꠔ ꠅꠁꠔ ꠘꠣꠄ।”
MAR 9:2 ꠁꠈꠣꠘ ꠇꠅꠀꠞ ꠍꠄꠖꠤꠘ ꠛꠣꠖꠦ ꠔꠣꠁꠘ ꠈꠣꠟꠤ ꠢꠎꠞꠔ ꠙꠤꠔꠞ, ꠁꠀꠇꠥꠛ ꠀꠞ ꠢꠣꠘ꠆ꠘꠣꠘꠞꠦ ꠟꠁꠀ ꠃꠌꠣ ꠄꠇ ꠙꠣꠠꠞ ꠃꠙꠞꠦ ꠃꠑꠤꠟꠣ। ꠅꠃ ꠔꠤꠘꠅ ꠎꠘꠞ ꠌꠃꠈꠞ ꠍꠣꠝꠘꠦ ꠔꠣꠘ ꠘꠤꠎꠞ ꠍꠥꠞꠔ ꠛꠖꠟꠤ ꠉꠦꠟ।
MAR 9:3 ꠔꠣꠘ ꠚꠤꠘ꠆ꠘꠞ ꠟꠦꠛꠣꠍ ꠅꠔ ꠛꠦꠡꠤ ꠗꠟꠣ ꠌꠇꠌꠇꠣ ꠅꠁꠟ ꠎꠦꠘ, ꠖꠥꠘꠤꠀꠞ ꠇꠥꠘꠥ ꠗꠥꠙꠣꠄꠃ ꠁꠟꠣ ꠌꠇꠌꠇꠣ ꠇꠞꠤ ꠗꠅꠀꠞ ꠔꠣꠇ꠆ꠇꠔ ꠘꠣꠁ।
MAR 9:4 ꠍꠣꠢꠣꠛꠤ ꠅꠇꠟꠦ ꠢꠎꠞꠔ ꠝꠥꠍꠣ ꠀꠞ ꠁꠟꠤꠀꠍ ꠘꠛꠤꠞꠦ ꠖꠦꠈꠟꠣ, ꠄꠞꠣ ꠀꠁꠀ ꠢꠎꠞꠔ ꠁꠍꠣꠞ ꠟꠉꠦ ꠛꠣꠔꠌꠤꠔ ꠇꠞꠞꠣ।
MAR 9:5 ꠔꠦꠃ ꠙꠤꠔꠞꠦ ꠇꠁꠟꠣ, “ꠢꠥꠎꠥꠞ, ꠀꠝꠞꠣ ꠔ ꠅꠘꠅ ꠀꠍꠤ, ꠈꠥꠛ ꠜꠣꠟꠣ ꠅꠁꠍꠦ। ꠀꠝꠞꠣ ꠔꠤꠘꠈꠣꠘ ꠒꠦꠞꠣ-ꠊꠞ ꠔꠤꠀꠞ ꠇꠞꠤꠟꠣꠁ, ꠄꠇꠈꠣꠘ ꠀꠙꠘꠣꠞ ꠟꠣꠉꠤ, ꠄꠇꠈꠣꠘ ꠢꠎꠞꠔ ꠝꠥꠍꠣ ꠀꠞ ꠄꠇꠈꠣꠘ ꠁꠟꠤꠀꠍ ꠘꠛꠤꠞ ꠟꠣꠉꠤ।”
MAR 9:6 ꠄꠞꠣ ꠈꠥꠛ ꠛꠦꠡꠤ ꠒꠞꠣꠁ ꠉꠦꠍꠟꠣ, ꠄꠞꠖꠣꠄ ꠇꠤꠔꠣ ꠝꠣꠔꠤꠔꠣ ꠇꠥꠘꠥ ꠔꠣꠟ ꠙꠣꠁꠟꠣ ꠘꠣ।
MAR 9:7 ꠅꠃ ꠡꠝꠄ ꠉꠣꠁꠛꠤ ꠄꠇ ꠝꠦꠊꠞ ꠐꠥꠇꠞꠣꠄ ꠀꠁꠀ ꠄꠞꠣꠞꠦ ꠉꠥꠞꠤꠟꠤꠟ, ꠀꠞ ꠅꠃ ꠐꠥꠇꠞꠣ ꠕꠣꠇꠤ ꠉꠣꠁꠛꠤ ꠀꠅꠀꠎ ꠅꠁꠟ, “ꠄꠁꠘꠃ ꠀꠝꠣꠞ ꠈꠣꠍ ꠝꠣꠄꠀꠞ ꠎꠘ, ꠔꠥꠝꠞꠣ ꠄꠘ ꠘꠍꠤꠅꠔ ꠢꠥꠘꠅ।”
MAR 9:8 ꠑꠤꠇ ꠅꠃ ꠡꠝꠄ ꠔꠣꠞꠣ ꠌꠣꠁꠞꠅꠛꠣꠄ ꠌꠣꠁꠀ ꠈꠣꠟꠤ ꠁꠍꠣ ꠍꠣꠠꠣ ꠀꠞ ꠇꠦꠃꠞꠞꠦ ꠁꠘꠅ ꠖꠦꠈꠟꠣ ꠘꠣ।
MAR 9:9 ꠛꠣꠖꠦ ꠙꠣꠠ ꠕꠣꠇꠤ ꠟꠣꠝꠤꠀ ꠀꠁꠛꠣꠞ ꠛꠣꠟꠣ ꠁꠍꠣꠄ ꠄꠞꠣꠞꠦ ꠢꠥꠇꠥꠝ ꠖꠤꠟꠣ, “ꠀꠁꠎ ꠎꠦꠔꠣ ꠖꠦꠈꠟꠣꠄ, ꠀꠝꠤ ꠛꠤꠘ-ꠀꠖꠝ ꠝꠞꠣ ꠕꠣꠇꠤ ꠎꠤꠘ꠆ꠖꠣ ꠅꠁꠀ ꠃꠑꠣꠞ ꠀꠉ ꠙꠞ꠆ꠎꠘ꠆ꠔ ꠁꠔꠣ ꠀꠞ ꠇꠦꠃꠞꠞꠦ ꠢꠥꠘꠣꠁꠅ ꠘꠣ।”
MAR 9:10 ꠄꠞꠣ ꠔꠣꠘ ꠢꠥꠇꠥꠝ ꠝꠣꠘꠟꠣ, ꠅꠁꠟꠦ ꠝꠞꠣ ꠕꠣꠇꠤ ꠎꠤꠘ꠆ꠖꠣ ꠅꠀꠞ ꠜꠦꠖ ꠇꠤꠔꠣ ꠅꠈꠣꠘ ꠘꠣ ꠛꠥꠎꠣꠄ, ꠔꠣꠞꠣ ꠄꠇꠦ-ꠅꠁꠘ꠆ꠘꠦ ꠎꠤꠇꠣꠁꠟꠣ।
MAR 9:11 ꠛꠣꠖꠦ ꠁꠍꠣꠞ ꠉꠦꠍꠦ ꠀꠞꠎ ꠇꠞꠟꠣ, “ꠢꠥꠎꠥꠞ, ꠝꠃꠟꠣꠘꠣ ꠅꠇꠟꠦ ꠇꠦꠘꠦ ꠇꠂꠘ, ꠢꠎꠞꠔ ꠁꠟꠤꠀꠍ ꠘꠛꠤꠄ ꠙꠄꠟꠣ ꠔꠡꠞꠤꠚ ꠀꠘꠣ ꠎꠞꠥꠞ?”
MAR 9:12 ꠔꠣꠁꠘ ꠇꠁꠟꠣ, “ꠁꠈꠣꠘ ꠢꠣꠍꠣ ꠇꠕꠣ, ꠙꠄꠟꠣ ꠢꠎꠞꠔ ꠁꠟꠤꠀꠍꠦ ꠀꠁꠀ ꠢꠇ꠆ꠇꠟꠔꠣ ꠀꠉꠞ ꠢꠣꠟꠔꠅ ꠚꠤꠞꠣꠁ ꠀꠘꠛꠣ। ꠅꠁꠟꠦ ꠛꠤꠘ-ꠀꠖꠝꠞ ꠛꠦꠙꠣꠞꠦ ꠀꠟ꠆ꠟꠣꠞ ꠇꠣꠟꠣꠝꠅ ꠇꠦꠘꠦ ꠟꠦꠈꠣ ꠅꠁꠍꠦ, ꠔꠣꠁꠘ ꠈꠥꠛ ꠖꠥꠈ-ꠝꠍꠤꠛꠔ ꠙꠥꠀꠘꠤ ꠟꠣꠉꠛ, ꠝꠣꠘꠡꠦ ꠔꠣꠘꠞꠦ ꠇꠛꠥꠟ ꠇꠞꠔꠣ ꠘꠣꠄ?
MAR 9:13 ꠀꠝꠤ ꠔꠥꠝꠞꠣꠞꠦ ꠇꠁꠀꠞ, ꠁꠟꠤꠀꠍ ꠘꠛꠤꠞ ꠛꠦꠙꠣꠞꠦ ꠙꠣꠇ ꠇꠤꠔꠣꠛꠅ ꠎꠦꠟꠣ ꠟꠦꠈꠣ ꠀꠍꠦ, ꠅꠟꠣꠈꠣꠘꠃ ꠔꠣꠁꠘ ꠀꠁꠍꠟꠣ। ꠝꠣꠘꠡꠦꠅ ꠔꠣꠘ ꠟꠉꠦ ꠎꠦꠔꠣ ꠝꠘꠅꠟꠄ ꠅꠔꠣ ꠇꠞꠍꠦ।”
MAR 9:14 ꠁꠍꠣꠄ ꠅꠃ ꠔꠤꠘꠅ ꠎꠘꠞꠦ ꠟꠁꠀ ꠙꠣꠠ ꠕꠘꠦ ꠟꠣꠝꠤꠀ ꠛꠣꠇꠤ ꠍꠣꠢꠣꠛꠤ ꠅꠇꠟꠞ ꠉꠦꠍꠦ ꠀꠁꠀ ꠖꠦꠈꠟꠣ, ꠛꠃꠔ ꠝꠣꠘꠥꠡ ꠀꠁꠀ ꠌꠣꠁꠞꠅꠛꠣꠄ ꠖꠟꠣ ꠅꠁꠍꠂꠘ, ꠀꠞ ꠇꠄꠎꠘ ꠝꠃꠟꠣꠘꠣꠄ ꠄꠞꠣꠞ ꠟꠉꠦ ꠔꠞ꠆ꠇꠣ-ꠔꠞ꠆ꠇꠤ ꠇꠞꠞꠣ।
MAR 9:15 ꠁꠍꠣꠞꠦ ꠖꠦꠈꠤꠀꠃ ꠝꠣꠘꠥꠡ ꠔꠣꠁꠎ꠆ꠎꠥꠛ ꠅꠁꠀ, ꠖꠃꠠꠣꠁꠀ ꠀꠁꠀ ꠔꠣꠘꠞꠦ ꠍꠣꠟꠣꠝ ꠇꠞꠟꠣ।
MAR 9:16 ꠔꠣꠁꠘ ꠅꠃ ꠝꠃꠟꠣꠘꠣ ꠅꠇꠟꠞꠦ ꠎꠤꠇꠣꠁꠟꠣ, “ꠀꠙꠘꠣꠞꠣ ꠇꠤꠔꠣ ꠟꠁꠀ ꠄꠞꠣꠞ ꠟꠉꠦ ꠔꠞ꠆ꠇ ꠇꠞꠞꠣ?”
MAR 9:17 ꠜꠤꠠꠞ ꠝꠣꠎ ꠕꠣꠇꠤ ꠄꠇꠎꠘꠦ ꠇꠁꠟ, “ꠍꠣꠛ, ꠀꠝꠣꠞ ꠙꠥꠀꠉꠥꠞꠦ ꠟꠁꠀ ꠀꠙꠘꠣꠞ ꠉꠦꠍꠦ ꠀꠁꠍꠟꠣꠝ, ꠅꠉꠥꠞꠦ ꠛꠥꠛꠣ ꠎꠤꠘꠦ ꠀꠍꠞ ꠇꠞꠍꠦ।
MAR 9:18 ꠅꠃ ꠎꠤꠘꠦ ꠔꠣꠞꠦ ꠎꠦꠛꠟꠣꠃ ꠗꠞꠦ, ꠔꠣꠞꠦ ꠀꠍꠣꠠ ꠝꠣꠞꠤꠀ ꠝꠣꠐꠤꠔ ꠚꠣꠟꠣꠄ। ꠔꠣꠞ ꠝꠥꠈ ꠕꠣꠇꠤ ꠚꠦꠘꠣ ꠛꠣꠞꠅꠄ, ꠖꠣꠔꠅ ꠇꠛꠐ ꠟꠣꠉꠤꠀ ꠒꠣꠐ꠆ꠐꠣ ꠅꠁꠎꠣꠄ। ꠀꠝꠤ ꠔꠣꠞꠦ ꠟꠁꠀ ꠀꠙꠘꠣꠞ ꠍꠣꠢꠣꠛꠤ ꠅꠇꠟꠞ ꠉꠦꠍꠦ ꠀꠁꠍꠟꠣꠝ, ꠅꠁꠟꠦ ꠄꠞꠣ ꠙꠣꠞꠍꠂꠘ ꠘꠣ।”
MAR 9:19 ꠔꠦꠃ ꠁꠍꠣꠄ ꠇꠁꠟꠣ, “ꠢꠣꠄꠞꠦ ꠛꠦꠁꠝꠣꠘ ꠅꠇꠟ! ꠀꠝꠤ ꠀꠞ ꠇꠔꠖꠤꠘ ꠔꠥꠝꠞꠣꠞ ꠟꠉꠦ ꠞꠁꠝꠥ, ꠔꠥꠝꠞꠣꠞ ꠎꠣꠟꠣ ꠇꠔꠖꠤꠘ ꠡꠁꠎ꠆ꠎ ꠇꠞꠝꠥ? ꠀꠁꠌ꠆ꠍꠣ, ꠙꠥꠀꠞꠦ ꠅꠘꠅ ꠀꠘꠅ।”
MAR 9:20 ꠝꠣꠘꠡꠦ ꠙꠥꠀꠞꠦ ꠔꠣꠘ ꠉꠦꠍꠦ ꠀꠘꠟꠣ। ꠔꠣꠘꠦ ꠖꠦꠈꠤꠀꠃ ꠎꠤꠘꠦ ꠔꠣꠞꠦ ꠈꠥꠛ ꠎꠣꠔꠤꠀ ꠗꠞꠟ। ꠙꠥꠀꠄ ꠝꠣꠐꠤꠔ ꠙꠠꠤꠀ ꠝꠥꠈꠞ ꠚꠦꠘꠣ ꠛꠣꠞ ꠇꠞꠤ ꠉꠠꠣꠉꠠꠤ ꠟꠣꠉꠣꠁꠟ।
MAR 9:21 ꠁꠍꠣꠄ ꠔꠣꠞ ꠛꠣꠚꠞꠦ ꠎꠤꠇꠣꠁꠟꠣ, “ꠔꠣꠞ ꠁ ꠖꠡꠣ ꠇꠔꠖꠤꠘ ꠕꠣꠇꠤ?” ꠛꠦꠐꠣꠄ ꠇꠁꠟ, “ꠢꠥꠞꠥꠝꠣꠘ ꠕꠣꠇꠤꠃ।
MAR 9:22 ꠀꠞ ꠁ ꠎꠤꠘꠦ ꠔꠣꠞꠦ ꠝꠣꠞꠤꠟꠤꠔ ꠇꠞꠤ ꠛꠃꠔ ꠛꠣꠞ ꠔꠣꠞꠦ ꠀꠉꠥꠘꠤꠔ ꠀꠞ ꠙꠣꠘꠤꠔ ꠚꠣꠟꠣꠁꠍꠦ। ꠅꠈꠘ ꠀꠙꠘꠦ ꠎꠥꠖꠤ ꠙꠣꠞꠂꠘ, ꠔꠦ ꠀꠝꠞꠣꠞꠦ ꠖꠄꠀ ꠇꠞꠃꠇ꠆ꠇꠣ।”
MAR 9:23 ꠁꠍꠣꠄ ꠇꠁꠟꠣ, “ꠎꠥꠖꠤ ꠙꠣꠞꠂꠘ, ꠁ ꠇꠕꠣꠞ ꠝꠣꠘꠤ ꠇꠤꠔꠣ? ꠎꠦ ꠄꠇꠤꠘ ꠇꠞꠦ ꠔꠣꠞ ꠟꠣꠉꠤ ꠢꠇ꠆ꠇꠟꠔꠣꠃ ꠅꠄ।”
MAR 9:24 ꠅꠃ ꠛꠦꠐꠣꠄ ꠎꠥꠞꠦ ꠎꠥꠞꠦ ꠇꠁꠟ, “ꠢꠥꠎꠥꠞ, ꠀꠝꠤ ꠄꠇꠤꠘ ꠇꠞꠍꠤ। ꠀꠝꠣꠞ ꠁꠝꠣꠘꠞ ꠇꠝꠎꠥꠞꠤ ꠢꠞꠣꠁ ꠖꠦꠃꠇ꠆ꠇꠣ।”
MAR 9:25 ꠀꠞꠅ ꠛꠃꠔ ꠝꠣꠘꠥꠡ ꠖꠃꠠꠣꠁꠀ ꠔꠣꠘ ꠉꠦꠍꠦ ꠀꠁꠞꠣ ꠖꠦꠈꠤꠀ, ꠔꠣꠁꠘ ꠎꠤꠘꠞꠦ ꠗꠣꠝꠇꠤ ꠝꠣꠞꠤ ꠇꠁꠟꠣ, “ꠅꠂ ꠈꠣꠟꠥꠀ ꠀꠞ ꠛꠥꠛꠣ ꠎꠤꠘ, ꠀꠝꠤ ꠢꠥꠇꠥꠝ ꠖꠤꠀꠞ, ꠄꠞ ꠉꠦꠍ ꠕꠣꠇꠤ ꠛꠣꠞ ꠅꠁ ꠎꠣ। ꠔꠣꠞꠦ ꠀꠞ ꠇꠥꠘꠥꠖꠤꠘ ꠗꠞꠤꠍ ꠘꠣ।”
MAR 9:26 ꠁꠈꠣꠘ ꠢꠥꠘꠤꠀ ꠎꠤꠘꠦ ꠔꠣꠞꠦ ꠈꠥꠛ ꠎꠥꠞꠦ ꠌꠤꠇ ꠖꠤꠀ ꠎꠣꠔꠣ ꠝꠣꠞꠤ ꠍꠣꠠꠤꠀ ꠉꠦꠟꠉꠤ। ꠔꠦꠃ ꠁ ꠙꠥꠀ ꠝꠥꠞ꠆ꠖꠣꠞ ꠟꠣꠈꠣꠘ ꠝꠣꠐꠤꠔ ꠙꠠꠤ ꠞꠁꠍꠦ ꠖꠦꠈꠤꠀ ꠝꠣꠘꠡꠦ ꠇꠁꠟꠣ, “ꠄ ꠔ ꠝꠣꠞꠣ ꠉꠦꠍꠦ।”
MAR 9:27 ꠅꠁꠟꠦ ꠁꠍꠣꠄ ꠔꠣꠞꠦ ꠀꠔꠅ ꠗꠞꠤ ꠔꠥꠟꠔꠦꠃ ꠢꠦ ꠃꠛꠣꠁ ꠉꠦꠟ।
MAR 9:28 ꠛꠣꠖꠦ ꠔꠣꠁꠘ ꠊꠞꠅ ꠢꠣꠝꠣꠁꠀ ꠢꠣꠞꠟꠦ ꠍꠣꠢꠣꠛꠤ ꠅꠇꠟꠦ ꠔꠣꠘꠞꠦ ꠘꠤꠞꠣꠟꠣꠄ ꠎꠤꠇꠣꠁꠟꠣ, “ꠢꠥꠎꠥꠞ, ꠀꠝꠞꠣ ꠙꠣꠞꠟꠣꠝ ꠘꠣ ꠇꠦꠘꠦ?”
MAR 9:29 ꠔꠣꠁꠘ ꠎꠥꠀꠙ ꠖꠤꠟꠣ, “ꠖꠥꠀ ꠘꠣ ꠇꠞꠟꠦ ꠀꠞ ꠇꠥꠘꠥꠝꠘ꠆ꠔꠦꠃ ꠁ ꠟꠣꠈꠣꠘ ꠎꠤꠘ ꠍꠣꠠꠣꠁꠟ ꠎꠣꠄ ꠘꠣ।”
MAR 9:30 ꠛꠣꠖꠦ ꠢꠇꠟꠦ ꠝꠤꠟꠤ ꠁ ꠎꠣꠉꠣ ꠍꠣꠠꠤꠀ ꠉꠣꠟꠤꠟ ꠎꠤꠟꠣꠞ ꠝꠣꠎꠦꠖꠤ ꠞꠅꠀꠘꠣ ꠅꠁꠟꠣ। ꠌꠣꠁꠟꠣ, ꠝꠣꠘꠡꠦ ꠎꠣꠘꠥ ꠁꠔꠣ ꠘꠣ ꠎꠣꠘꠂꠘ।
MAR 9:31 ꠅꠃ ꠡꠝꠄ ꠔ ꠔꠣꠘ ꠍꠣꠢꠣꠛꠤ ꠅꠇꠟꠞꠦ ꠔꠣꠟꠤꠝ ꠖꠦꠅꠀꠔ ꠀꠍꠟꠣ, ꠔꠣꠁꠘ ꠇꠁꠟꠣ, “ꠀꠝꠤ ꠛꠤꠘ-ꠀꠖꠝꠞꠦ ꠝꠣꠘꠡꠞ ꠀꠔꠅ ꠗꠞꠣꠁ ꠖꠦꠅꠀ ꠅꠁꠛ, ꠎꠣꠘꠦ ꠝꠣꠞꠣ ꠅꠁꠛ, ꠀꠞ ꠝꠃꠔꠞ ꠔꠤꠘ ꠖꠤꠘ ꠛꠣꠖꠦ ꠢꠤꠞꠛꠣꠞ ꠎꠤꠘ꠆ꠖꠣ ꠅꠁꠀ ꠃꠑꠝꠥ।”
MAR 9:32 ꠍꠣꠢꠣꠛꠤ ꠅꠇꠟꠦ ꠔꠣꠘ ꠁ ꠔꠣꠟꠤꠝꠞ ꠇꠥꠘꠥ ꠜꠦꠖ ꠛꠥꠎꠟꠣ ꠘꠣ, ꠀꠞ ꠔꠣꠘ ꠉꠦꠍꠦ ꠎꠤꠇꠣꠘꠤꠞꠅ ꠡꠣꠅꠡ ꠙꠣꠁꠟꠣ ꠘꠣ।
MAR 9:33 ꠛꠣꠖꠦ ꠁꠍꠣꠄ ꠔꠣꠘ ꠍꠣꠢꠣꠛꠤ ꠅꠇꠟꠞꠦ ꠟꠁꠀ ꠇꠚꠞꠘꠣꠃꠝ ꠐꠣꠃꠘꠅ ꠀꠁꠟꠣ। ꠀꠁꠀ ꠊꠞꠅ ꠢꠣꠝꠣꠁꠀ ꠄꠞꠣꠞꠦ ꠎꠤꠇꠣꠁꠟꠣ, “ꠙꠕꠅ ꠔꠥꠝꠞꠣ ꠇꠤꠔꠣ ꠟꠁꠀ ꠔꠞ꠆ꠇ ꠇꠞꠟꠣꠄ?”
MAR 9:34 ꠄꠞꠣ ꠝꠥꠈ ꠛꠘ꠆ꠖ ꠇꠞꠤ ꠛꠁꠞꠁꠟꠣ। ꠀꠍꠟꠦ ꠙꠕꠅ ꠔꠣꠞꠣ ꠔꠞ꠆ꠇ ꠇꠞꠍꠟꠣ, ꠔꠣꠞꠣꠞ ꠝꠣꠎꠦ ꠇꠦ ꠢꠇꠟ ꠕꠣꠇꠤ ꠖꠣꠝꠤ ꠝꠣꠘꠥꠡ।
MAR 9:35 ꠁꠍꠣ ꠛꠁꠉꠦꠟꠣ, ꠛꠁꠀ ꠄꠞꠣ ꠛꠣꠞꠅꠎꠘꠞꠦ ꠔꠣꠘ ꠗꠣꠞꠅ ꠘꠤꠀ ꠇꠁꠟꠣ, “ꠇꠦꠃ ꠎꠥꠖꠤ ꠖꠣꠝꠤ ꠝꠣꠘꠥꠡ ꠅꠁꠔ ꠌꠣꠄ, ꠔꠦ ꠢꠦ ꠢꠇꠟꠞ ꠈꠞꠦ ꠞꠁꠔꠦ ꠅꠁꠛ। ꠀꠞ ꠢꠇꠟꠞ ꠈꠦꠎꠝꠔ ꠇꠞꠣ ꠟꠣꠉꠛ।”
MAR 9:36 ꠛꠣꠖꠦ ꠄꠇ ꠢꠥꠞꠥꠔ꠆ꠔꠣꠞꠦ ꠀꠘꠤꠀ ꠄꠞꠣꠞ ꠍꠣꠝꠘꠦ ꠃꠛꠣ ꠇꠞꠣꠁꠟꠣ। ꠔꠣꠞꠦ ꠇꠥꠟꠅ ꠟꠁꠀ ꠇꠁꠟꠣ,
MAR 9:37 “ꠎꠦ ꠎꠘꠦ ꠀꠝꠣꠞ ꠟꠣꠉꠤ ꠅꠃ ꠢꠥꠞꠥꠔ꠆ꠔꠣꠞ ꠟꠣꠈꠣꠘ ꠇꠥꠘꠥ ꠍꠣꠛꠣꠟꠞꠦ ꠇꠛꠥꠟ ꠇꠞꠦ, ꠢꠦ ꠀꠝꠣꠞꠦꠃ ꠇꠛꠥꠟ ꠇꠞꠦ। ꠀꠞ ꠀꠝꠣꠞꠦ ꠎꠦ ꠇꠛꠥꠟ ꠇꠞꠦ, ꠢꠦ ꠈꠣꠟꠤ ꠀꠝꠣꠞꠦ ꠘꠣꠄ, ꠀꠝꠣꠞꠦ ꠎꠦꠁꠘ ꠛꠦꠎꠤꠍꠂꠘ ꠔꠣꠘꠞꠦꠅ ꠇꠛꠥꠟ ꠇꠞꠟ।”
MAR 9:38 ꠔꠣꠘ ꠍꠣꠢꠣꠛꠤ ꠢꠣꠘ꠆ꠘꠣꠘꠦ ꠇꠁꠟꠣ, “ꠢꠥꠎꠥꠞ, ꠀꠝꠞꠣ ꠄꠇ ꠛꠦꠐꠣꠞꠦ ꠖꠦꠈꠍꠤ, ꠢꠦ ꠀꠙꠘꠣꠞ ꠘꠣꠝ ꠟꠁꠀ ꠎꠤꠘ꠆ꠘꠣꠔ ꠍꠣꠠꠣꠄ। ꠖꠦꠈꠤꠀ ꠀꠝꠞꠣ ꠔꠣꠞꠦ ꠘꠤꠡꠦꠗ ꠇꠞꠍꠤ, ꠢꠦ ꠔ ꠀꠝꠞꠣꠞ ꠔꠞꠤꠇꠣꠞ ꠝꠣꠘꠥꠡ ꠘꠣꠄ।”
MAR 9:39 ꠔꠣꠁꠘ ꠇꠁꠟꠣ, “ꠄꠞꠦ ꠘꠤꠡꠦꠗ ꠇꠞꠤꠅ ꠘꠣ। ꠀꠝꠣꠞ ꠘꠣꠝ ꠟꠁꠀ ꠇꠦꠃ ꠇꠦꠞꠣꠝꠔꠤ ꠖꠦꠈꠣꠘꠤꠞ ꠛꠣꠖꠦ, ꠢꠦ ꠅꠔ ꠎꠟꠖꠤ ꠀꠝꠣꠞ ꠉꠤꠛꠔ ꠉꠣꠁꠔ ꠙꠣꠞꠔ ꠘꠣꠄ।
MAR 9:40 ꠎꠦꠞꠣ ꠀꠝꠞꠣꠞ ꠛꠤꠙꠇ꠆ꠇꠦ ꠘꠣꠄ, ꠔꠣꠞꠣ ꠔ ꠀꠝꠞꠣꠞ ꠙꠇ꠆ꠇꠦ।
MAR 9:41 ꠢꠥꠘꠅ, ꠀꠝꠤ ꠢꠣꠍꠣ ꠇꠕꠣ ꠇꠁꠀꠞ, ꠀꠟ-ꠝꠍꠤꠞ ꠔꠞꠤꠇꠣꠞ ꠝꠣꠘꠥꠡ ꠅꠀꠞ ꠈꠣꠔꠤꠞꠦ, ꠇꠦꠃ ꠎꠥꠖꠤ ꠔꠥꠝꠞꠣꠞꠦ ꠄꠇ ꠉꠦꠟꠣꠡ ꠙꠣꠘꠤ ꠈꠣꠅꠀꠄ, ꠔꠦ ꠢꠦ ꠄꠞ ꠙꠥꠞꠥꠡ꠆ꠇꠣꠞ ꠙꠣꠁꠛꠃ ꠙꠣꠁꠛ।
MAR 9:42 “ꠀꠞ ꠀꠝꠣꠞ ꠔꠞꠤꠇꠣꠞ ꠅꠃ ꠢꠥꠞꠥ-ꠝꠥꠞꠥ ꠄꠇꠎꠘꠞꠦ ꠎꠥꠖꠤ ꠇꠦꠃ ꠔꠣꠞ ꠁꠝꠣꠘꠞ ꠙꠕꠦ ꠛꠣꠗꠣ ꠖꠦꠄ, ꠔꠦ ꠄꠞ ꠌꠣꠁꠔꠦ ꠔꠣꠞ ꠟꠣꠉꠤ ꠀꠞꠅ ꠜꠣꠟꠣ ꠅꠁꠛ, ꠔꠣꠞ ꠉꠟꠣꠔ ꠙꠣꠔ꠆ꠔꠞ ꠛꠣꠘ꠆ꠖꠤꠀ ꠖꠞꠤꠀꠔ ꠚꠣꠟꠣꠁ ꠖꠦꠅꠀ।
MAR 9:43 ꠔꠥꠝꠣꠞ ꠀꠔ ꠎꠥꠖꠤ ꠔꠥꠝꠣꠞ ꠞꠤꠙꠥ ꠅꠁꠎꠣꠄ, ꠔꠦ ꠀꠔ ꠇꠣꠐꠤꠀ ꠚꠣꠟꠣꠁ ꠖꠦꠅ।
MAR 9:44 ꠖꠥꠁꠅ ꠀꠔ ꠟꠁꠀ ꠎꠣꠢꠣꠘ꠆ꠘꠣꠝꠤ ꠅꠀ ꠕꠣꠇꠤ, ꠄꠇ ꠀꠔ ꠟꠁꠀ ꠎꠣꠘ꠆ꠘꠣꠔꠅ ꠎꠣꠅꠀ ꠔꠥꠝꠣꠞ ꠟꠣꠉꠤ ꠜꠣꠟꠣ। ꠎꠣꠢꠣꠘ꠆ꠘꠣꠝꠞ ꠀꠉꠥꠁꠘ ꠔ ꠇꠥꠘꠥꠖꠤꠘ ꠘꠤꠜꠦ ꠘꠣ।
MAR 9:45 ꠔꠥꠝꠣꠞ ꠙꠣꠅ ꠎꠥꠖꠤ ꠔꠥꠝꠣꠞ ꠞꠤꠙꠥ ꠅꠁꠎꠣꠄ, ꠔꠦ ꠙꠣꠅ ꠇꠣꠐꠤꠀ ꠚꠣꠟꠣꠁ ꠖꠦꠅ। ꠖꠥꠁꠅ ꠙꠣꠅ ꠟꠁꠀ ꠎꠣꠢꠣꠘ꠆ꠘꠣꠝꠅ ꠎꠟꠣ ꠕꠣꠇꠤ, ꠟꠦꠋꠠꠣ ꠅꠁꠀ ꠎꠣꠘ꠆ꠘꠣꠔꠅ ꠎꠣꠅꠀ ꠔꠥꠝꠣꠞ ꠟꠣꠉꠤ ꠜꠣꠟꠣ।
MAR 9:46 ꠔꠥꠝꠣꠞ ꠌꠃꠈ ꠎꠥꠖꠤ ꠔꠥꠝꠣꠞ ꠞꠤꠙꠥ ꠅꠁꠎꠣꠄ, ꠔꠦ ꠌꠃꠈ ꠔꠥꠟꠤꠀ ꠚꠣꠟꠣꠁ ꠖꠦꠅ। ꠖꠥꠁꠅ ꠌꠃꠈ ꠟꠁꠀ ꠎꠣꠢꠣꠘ꠆ꠘꠣꠝꠅ ꠎꠟꠣ ꠕꠣꠇꠤ, ꠇꠣꠘꠣ ꠅꠁꠀ ꠀꠟ꠆ꠟꠣꠞ ꠛꠣꠖꠡꠣꠁꠔ ꠖꠣꠈꠤꠟ ꠅꠀ ꠔꠥꠝꠣꠞ ꠟꠣꠉꠤ ꠜꠣꠟꠣ।
MAR 9:48 ꠁ ꠎꠣꠢꠣꠘ꠆ꠘꠣꠝꠞ ꠛꠤꠌ꠆ꠍꠥ ꠅꠇꠟ ꠝꠞꠦ ꠘꠣ, ꠀꠞ ꠢꠤꠘꠞ ꠀꠉꠥꠁꠘꠅ ꠇꠥꠘꠥꠖꠤꠘ ꠘꠤꠜꠦ ꠘꠣ।
MAR 9:49 “ꠢꠥꠘꠅ, ꠙꠞꠔꠦꠇ ꠝꠣꠘꠥꠡꠃ ꠀꠉꠥꠘꠤꠔ ꠘꠥꠘꠔꠣ ꠅꠁꠛ।
MAR 9:50 ꠘꠥꠘ ꠔ ꠜꠣꠟꠣ ꠎꠤꠘꠤꠡ, ꠅꠁꠟꠦ ꠘꠥꠘꠦ ꠎꠥꠖꠤ ꠔꠣꠞ ꠘꠥꠘꠔꠣ ꠉꠥꠘ ꠈꠥꠀꠁꠟꠣꠄ, ꠔꠦ ꠔꠣꠞꠦ ꠀꠞ ꠘꠥꠘꠔꠣ ꠛꠣꠘꠣꠁꠟ ꠎꠣꠁꠛ ꠘꠤ? ꠔꠥꠝꠞꠣ ꠎꠣꠞꠎꠤꠞ ꠖꠤꠟꠞ ꠝꠣꠎꠦ ꠁ ꠘꠥꠘ ꠇꠣꠁꠝ ꠞꠣꠈꠅ, ꠀꠞ ꠄꠇꠦ-ꠅꠁꠘ꠆ꠘꠦ ꠡꠣꠘ꠆ꠔꠤꠄ ꠛꠡꠔ ꠇꠞꠅ।”
MAR 10:1 ꠇꠚꠞꠘꠣꠃꠝ ꠕꠣꠇꠤ ꠢꠎꠞꠔ ꠁꠍꠣ ꠄꠢꠥꠖꠤꠀ ꠎꠤꠟꠣꠔ ꠀꠁꠟꠣ, ꠀꠞ ꠎꠞ꠆ꠖꠣꠘ ꠉꠣꠋꠉꠞ ꠢꠙꠣꠞꠅ ꠉꠦꠟꠣ। ꠅꠘꠅ ꠀꠁꠟꠦ ꠢꠤꠞꠛꠣꠞ ꠛꠃꠔ ꠝꠣꠘꠥꠡ ꠀꠁꠀ ꠔꠣꠘ ꠉꠦꠍꠦ ꠖꠟꠣ ꠅꠁꠟꠣ। ꠔꠣꠁꠘꠅ ꠔꠣꠘ ꠞꠦꠅꠀꠎ ꠝꠣꠚꠤꠇ ꠄꠞꠣꠞꠦ ꠔꠣꠟꠤꠝ ꠖꠤꠟꠣ।
MAR 10:2 ꠅꠃ ꠡꠝꠄ ꠔꠣꠘꠞꠦ ꠙꠞꠤꠇ꠆ꠇꠣ ꠇꠞꠣꠞ ꠘꠤꠅꠔꠦ ꠚꠞꠤꠡꠤ ꠝꠎꠛꠞ ꠇꠄꠎꠘꠦ ꠀꠁꠀ ꠎꠤꠇꠣꠁꠟ, “ꠍꠣꠛ, ꠇꠃꠇ꠆ꠇꠣ ꠌꠣꠁꠘ, ꠛꠃꠞꠦ ꠔꠣꠟꠣꠇ ꠖꠦꠅꠀ ꠎꠣꠁꠎ ꠀꠍꠦ ꠘꠤ?”
MAR 10:3 ꠔꠣꠁꠘ ꠎꠥꠀꠙ ꠖꠤꠟꠣ, “ꠢꠎꠞꠔ ꠝꠥꠍꠣꠄ ꠀꠙꠘꠣꠁꠘ꠆ꠔꠞꠦ ꠇꠤꠔꠣ ꠛꠣꠔꠣꠁꠍꠂꠘ?”
MAR 10:4 ꠔꠣꠞꠣ ꠇꠁꠟꠣ, “ꠔꠣꠁꠘ ꠇꠁꠍꠂꠘ, ꠔꠣꠟꠣꠇ ꠘꠣꠝꠣ ꠟꠦꠈꠤꠀ ꠢꠣꠞꠤ ꠛꠃ ꠔꠣꠟꠣꠇ ꠖꠦꠅꠀ ꠎꠣꠁꠎ ꠀꠍꠦ।”
MAR 10:5 ꠁꠍꠣꠄ ꠇꠁꠟꠣ, “ꠔꠥꠝꠞꠣꠞ ꠖꠤꠟ ꠙꠣꠡꠣꠘ, ꠄꠞꠟꠣꠉꠤꠃ ꠝꠥꠍꠣ ꠘꠛꠤꠄ ꠁ ꠝꠥꠍꠟꠣ ꠟꠦꠈꠍꠂꠘ।
MAR 10:6 ꠅꠁꠟꠦ ꠄꠅꠈꠣꠘ ꠔ ꠟꠦꠈꠣ ꠀꠍꠦ, ꠀꠟ꠆ꠟꠣꠄ ꠙꠄꠟꠣ ꠀꠖꠝ ꠀꠞ ꠢꠣꠅꠀꠞꠦ ꠝꠞ꠆ꠖ ꠀꠞ ꠀꠅꠞꠔ ꠛꠣꠘꠣꠁ ꠙꠄꠖꠣ ꠇꠞꠍꠂꠘ।
MAR 10:7 ꠄꠞꠖꠣꠄ ꠝꠣꠘꠡꠦꠅ ꠔꠣꠞꠣꠞ ꠝꠣ-ꠛꠣꠚꠞꠦ ꠕꠁꠀ ꠛꠃꠞ ꠟꠉꠦ ꠀꠡꠤꠇ ꠅꠁꠛꠣ।
MAR 10:8 ꠎꠣꠝꠣꠁ ꠀꠞ ꠛꠃ ꠄꠇ ꠇꠣꠄꠀ ꠅꠁꠛꠣ। ꠔꠣꠞꠣ ꠖꠥꠁ ꠞꠁꠔꠣ ꠘꠣꠄ, ꠄꠇ ꠅꠁꠛꠣ।
MAR 10:9 ꠔꠦ ꠀꠟ꠆ꠟꠣꠄ ꠎꠦꠔꠣ ꠎꠥꠠꠣ ꠟꠣꠉꠣꠁꠍꠂꠘ, ꠝꠣꠘꠡꠦ ꠁꠔꠣꠞꠦ ꠀꠟꠉ ꠘꠣ ꠇꠞꠃꠇ।”
MAR 10:10 ꠛꠣꠖꠦ ꠍꠣꠢꠣꠛꠤ ꠅꠇꠟꠦ ꠊꠞꠅ ꠢꠣꠝꠣꠁꠀ, ꠢꠤꠞꠛꠣꠞ ꠔꠣꠘꠞꠦ ꠅꠃ ꠝꠥꠍꠟꠣ ꠎꠤꠇꠣꠁꠟꠣ।
MAR 10:11 ꠔꠦꠃ ꠁꠍꠣꠄ ꠇꠁꠟꠣ, “ꠎꠦ ꠝꠣꠘꠡꠦ ꠔꠣꠞ ꠛꠃꠞꠦ ꠔꠣꠟꠣꠇ ꠖꠤꠀ ꠀꠞꠇ ꠛꠦꠐꠤꠞꠦ ꠘꠤꠇꠣ ꠇꠞꠦ, ꠢꠦ ꠔ ꠅꠃ ꠛꠃꠞ ꠟꠉꠦ ꠎꠤꠘꠣ ꠇꠞꠦ।
MAR 10:12 ꠅꠃꠟꠣ ꠛꠃꠄꠅ ꠎꠥꠖꠤ ꠘꠤꠎꠞ ꠎꠣꠝꠣꠁꠞꠦ ꠔꠣꠟꠣꠇ ꠖꠤꠀ ꠀꠞꠇ ꠛꠦꠐꠣꠞ ꠉꠦꠍꠦ ꠘꠤꠇꠣ ꠛꠄ, ꠔꠦ ꠔꠣꠁꠅ ꠎꠤꠘꠣ ꠇꠞꠦ।”
MAR 10:13 ꠛꠣꠖꠦ ꠝꠣꠘꠡꠦ ꠢꠥꠞꠥ ꠢꠥꠞꠥ ꠢꠥꠞꠥꠔ꠆ꠔꠣꠁꠘ꠆ꠔꠞꠦ ꠟꠁꠀ ꠁꠍꠣꠞ ꠉꠦꠍꠦ ꠀꠁꠟꠣ ꠔꠣꠞꠣꠞꠦ ꠀꠔꠣꠁ ꠖꠤꠛꠣꠞ ꠟꠣꠉꠤ। ꠅꠁꠟꠦ ꠍꠣꠢꠣꠛꠤ ꠅꠇꠟꠦ ꠄꠞꠣꠞꠦ ꠛꠇꠣ-ꠎꠇꠣ ꠇꠞꠟꠣ।
MAR 10:14 ꠁꠔꠣ ꠖꠦꠈꠤꠀ ꠁꠍꠣ ꠘꠣꠞꠣꠎ ꠅꠁꠀ ꠔꠣꠞꠣꠞꠦ ꠇꠁꠟꠣ, “ꠢꠥꠞꠥꠔ꠆ꠔꠣꠁꠘ꠆ꠔꠞꠦ ꠀꠝꠣꠞ ꠉꠦꠍꠦ ꠀꠁꠔꠦ ꠝꠣꠘꠣ ꠇꠞꠤꠅ ꠘꠣ, ꠀꠟ꠆ꠟꠣꠞ ꠛꠣꠖꠡꠣꠁ ꠔ ꠄꠞꠣꠞ ꠟꠣꠈꠣꠘ ꠝꠣꠘꠡꠞ ꠟꠣꠉꠤꠃ।
MAR 10:15 ꠀꠝꠤ ꠢꠇ ꠇꠕꠣ ꠇꠁꠞꠣꠝ, ꠢꠥꠞꠥ ꠢꠥꠞꠥꠔ꠆ꠔꠣꠁꠘ꠆ꠔꠦ ꠎꠦꠟꠣ ꠛꠠꠞ ꠡꠣꠡꠘ ꠝꠣꠘꠂꠘ, ꠀꠟ꠆ꠟꠣꠞ ꠡꠣꠡꠘꠞꠦ ꠅꠃ ꠟꠣꠈꠣꠘ ꠘꠣ ꠝꠣꠘꠟꠦ, ꠝꠣꠘꠥꠡ ꠇꠥꠘꠥꠝꠘ꠆ꠔꠦꠃ ꠀꠟ꠆ꠟꠣꠞ ꠛꠣꠖꠡꠣꠁꠔ ꠢꠣꠝꠣꠁꠔ ꠙꠣꠞꠔ ꠘꠣꠄ।”
MAR 10:16 ꠛꠣꠖꠦ ꠔꠣꠁꠘ ꠔꠣꠞꠣꠞꠦ ꠇꠥꠟꠅ ꠟꠁꠀ ꠔꠣꠞꠣꠞ ꠝꠣꠕꠣꠔ ꠀꠔ ꠞꠣꠈꠤꠀ ꠖꠥꠀ ꠇꠞꠟꠣ।
MAR 10:17 ꠢꠎꠞꠔ ꠁꠍꠣ ꠎꠦꠛꠟꠣ ꠛꠣꠞ ꠅꠁꠀ ꠞꠅꠀꠘꠣ ꠅꠁꠟꠣ, ꠅꠃ ꠡꠝꠄ ꠄꠇ ꠛꠦꠐꠣ ꠖꠃꠠꠣꠁꠀ ꠀꠁꠀ ꠀꠐꠥ ꠉꠣꠠꠤꠀ ꠔꠣꠘ ꠍꠣꠝꠘꠦ ꠛꠁꠀ ꠇꠁꠟ, “ꠃꠡ꠆ꠔꠣꠖ, ꠀꠙꠘꠦ ꠔ ꠝꠦꠢꠦꠞꠛꠣꠘ। ꠔꠦ ꠀꠝꠣꠞꠦ ꠛꠣꠔꠣꠁ ꠖꠦꠃꠇ꠆ꠇꠣ, ꠀꠈꠦꠞ ꠙꠣꠅꠀꠞ ꠟꠣꠉꠤ ꠀꠝꠤ ꠇꠤꠔꠣ ꠇꠞꠔꠣꠝ?”
MAR 10:18 ꠔꠣꠁꠘ ꠇꠁꠟꠣ, “ꠀꠝꠣꠞꠦ ꠇꠦꠘꠦ ꠝꠦꠢꠦꠞꠛꠣꠘ ꠇꠁꠞꠣꠄ? ꠄꠇ ꠀꠟ꠆ꠟꠣ ꠍꠣꠠꠣ ꠀꠞ ꠇꠦꠃ ꠝꠦꠢꠦꠞꠛꠣꠘ ꠘꠣꠄ।
MAR 10:19 ꠔꠥꠝꠤ ꠔ ꠔꠃꠞꠣꠔ ꠇꠤꠔꠣꠛꠞ ꠢꠥꠇꠥꠝ ꠎꠣꠘ। ꠈꠥꠘ ꠇꠞꠤꠅ ꠘꠣ, ꠎꠤꠘꠣ ꠇꠞꠤꠅ ꠘꠣ, ꠌꠥꠞꠤ ꠇꠞꠤꠅ ꠘꠣ, ꠝꠤꠍꠣ ꠡꠣꠇ꠆ꠇꠤ ꠖꠤꠅ ꠘꠣ, ꠐꠉꠣ-ꠐꠉꠤ ꠇꠞꠤꠅ ꠘꠣ, ꠝꠣ-ꠛꠣꠚꠞꠦ ꠁꠎ꠆ꠎꠔ ꠇꠞꠤꠅ।”
MAR 10:20 ꠛꠦꠐꠣꠄ ꠇꠁꠟ, “ꠍꠣꠛ, ꠀꠝꠤ ꠔ ꠢꠥꠞꠥꠝꠣꠘ ꠕꠘꠦꠃ ꠁꠔꠣ ꠀꠝꠟ ꠇꠞꠤꠀꠞ।”
MAR 10:21 ꠔꠦꠃ ꠁꠍꠣꠄ ꠝꠣꠄꠀꠞ ꠘꠎꠞꠦ ꠔꠣꠞ ꠛꠣꠄ ꠌꠣꠁꠀ ꠇꠁꠟꠣ, “ꠈꠣꠟꠤ ꠄꠇꠈꠣꠘ ꠎꠤꠘꠤꠡ ꠔꠥꠝꠣꠞ ꠛꠣꠇꠤ ꠞꠁꠍꠦ। ꠔꠥꠝꠤ ꠎꠣꠅ, ꠉꠤꠀ ꠔꠥꠝꠣꠞ ꠢꠇꠟ ꠗꠘ-ꠍꠣꠝꠣꠘꠣ ꠛꠦꠌꠤꠀ ꠉꠞꠤꠛ ꠅꠇꠟꠞꠦ ꠛꠤꠟꠣꠁ ꠖꠦꠅ। ꠔꠦꠃ ꠔꠥꠝꠤ ꠛꠦꠢꠦꠡ꠆ꠔꠅ ꠔꠥꠝꠣꠞ ꠍꠣꠝꠣꠘꠣ ꠇꠣꠝꠣꠁꠛꠣꠄ। ꠛꠣꠖꠦ ꠀꠁꠀ ꠀꠝꠣꠞ ꠃꠝ꠆ꠝꠔ ꠅꠁꠅ।”
MAR 10:22 ꠁꠈꠣꠘ ꠢꠥꠘꠤꠀ ꠛꠦꠐꠣꠞ ꠝꠥꠈ ꠇꠣꠟꠣ ꠅꠁꠉꠦꠟ। ꠔꠣꠞ ꠛꠃꠔ ꠗꠘ-ꠍꠣꠝꠣꠘꠣ ꠀꠍꠤꠟ ꠇꠞꠤ ꠝꠘꠅ ꠖꠥꠈ ꠟꠁꠀ ꠉꠦꠟꠉꠤ।
MAR 10:23 ꠔꠦꠃ ꠁꠍꠣꠄ ꠌꠣꠁꠞꠅꠛꠣꠄ ꠌꠣꠁꠀ ꠔꠣꠘ ꠍꠣꠢꠣꠛꠤ ꠅꠇꠟꠞꠦ ꠇꠁꠟꠣ, “ꠗꠘꠤ ꠝꠣꠘꠥꠡ ꠀꠟ꠆ꠟꠣꠞ ꠛꠣꠖꠡꠣꠁꠔ ꠢꠣꠝꠣꠘꠤ ꠛꠠ ꠝꠡꠇꠤꠟ।”
MAR 10:24 ꠁꠈꠣꠘ ꠢꠥꠘꠤꠀ ꠄꠞꠣ ꠔꠣꠁꠎ꠆ꠎꠥꠛ ꠅꠁꠉꠦꠟꠣ। ꠁꠍꠣꠄ ꠢꠤꠞꠛꠣꠞ ꠇꠁꠟꠣ, “ꠛꠣꠛꠣ ꠅꠇꠟ, ꠖꠦꠈꠞꠣꠄ ꠘꠤ, ꠖꠥꠘꠤꠀꠛꠤ ꠗꠘ-ꠍꠣꠝꠣꠘꠣꠞ ꠃꠙꠞꠦ ꠎꠦꠞꠣ ꠜꠞꠡꠣ ꠇꠞꠦ, ꠀꠟ꠆ꠟꠣꠞ ꠛꠣꠖꠡꠣꠁꠔ ꠢꠣꠝꠣꠘꠤ ꠔꠣꠞꠣꠞ ꠟꠣꠉꠤ ꠛꠃꠔ ꠝꠡꠇꠤꠟ।
MAR 10:25 ꠗꠘꠤ ꠝꠣꠘꠥꠡ ꠀꠟ꠆ꠟꠣꠞ ꠛꠣꠖꠡꠣꠁꠔ ꠢꠣꠝꠣꠘꠤꠞ ꠌꠣꠁꠔꠦ, ꠍꠥꠁꠞ ꠚꠥꠠꠦꠖꠤ ꠃꠐ ꠢꠣꠝꠣꠘꠤ ꠀꠞꠅ ꠡꠥꠎꠣ।”
MAR 10:26 ꠁꠈꠣꠘ ꠢꠥꠘꠤꠀ ꠍꠣꠢꠣꠛꠤ ꠅꠇꠟ ꠀꠞꠅ ꠔꠣꠁꠎ꠆ꠎꠥꠛ ꠅꠁꠀ ꠄꠇꠦ-ꠅꠁꠘ꠆ꠘꠦ ꠇꠁꠟꠣ, “ꠔꠦ ꠇꠥꠘ ꠝꠣꠘꠡꠦ ꠘꠣꠎꠣꠔ ꠢꠣꠍꠤꠟ ꠇꠞꠛ, ꠇꠦ ꠞꠦꠢꠣꠁ ꠙꠣꠁꠛ?”
MAR 10:27 ꠁꠍꠣꠄ ꠄꠞꠣꠞ ꠛꠣꠄ ꠌꠣꠁꠀ ꠇꠁꠟꠣ, “ꠝꠣꠘꠡꠞ ꠟꠣꠉꠤ ꠅꠡꠝ꠆ꠛꠛ ꠅꠁꠔ ꠙꠣꠞꠦ, ꠅꠁꠟꠦ ꠀꠟ꠆ꠟꠣꠞ ꠘꠎꠞꠅ ꠁꠔꠣ ꠔ ꠝꠣꠝꠥꠟꠤ। ꠔꠣꠁꠘ ꠢꠇꠟꠔꠣꠃ ꠙꠣꠞꠂꠘ।”
MAR 10:28 ꠍꠣꠢꠣꠛꠤ ꠙꠤꠔꠞꠦ ꠇꠁꠟꠣ, “ꠢꠥꠎꠥꠞ, ꠀꠝꠞꠣ ꠔ ꠢꠇꠟꠔꠣ ꠚꠣꠟꠣꠁ ꠕꠁꠀ ꠀꠙꠘꠣꠞ ꠈꠞꠦ ꠀꠁꠍꠤ।”
MAR 10:29 ꠔꠣꠁꠘ ꠇꠁꠟꠣ, “ꠀꠝꠤ ꠔꠥꠝꠞꠣꠞꠦ ꠢꠇ ꠇꠕꠣ ꠇꠁꠞꠣꠝ, ꠎꠦ ꠝꠣꠘꠡꠦ ꠀꠝꠣꠞ ꠟꠣꠉꠤ ꠀꠞ ꠀꠟ꠆ꠟꠣꠞ ꠛꠣꠔꠣꠁꠟ ꠈꠥꠡ-ꠈꠛꠞꠤꠞ ꠟꠣꠉꠤ ꠘꠤꠎꠞ ꠛꠣꠠꠤ-ꠊꠞ, ꠝꠣ-ꠛꠣꠚ, ꠜꠣꠁ-ꠛꠁꠘ, ꠙꠥꠀ-ꠙꠥꠠꠤ, ꠎꠝꠤ-ꠝꠤꠞꠣꠡ ꠍꠣꠠꠤ ꠖꠤꠍꠦ,
MAR 10:30 ꠢꠦ ꠅꠃ ꠖꠥꠘꠤꠀꠔ ꠁꠔꠣꠞ ꠄꠇ-ꠡ ꠉꠥꠘ ꠛꠦꠡꠤ ꠛꠣꠠꠤ-ꠊꠞ, ꠝꠣ-ꠛꠣꠚ, ꠜꠣꠁ-ꠛꠁꠘ, ꠙꠥꠀ-ꠙꠥꠠꠤ, ꠎꠝꠤ-ꠝꠤꠞꠣꠡ ꠙꠣꠁꠛ। ꠁꠔꠣꠞ ꠟꠉꠦ ꠢꠦ ꠎꠥꠟꠥꠝ-ꠔꠇꠟꠤꠚꠅ ꠙꠣꠁꠛ। ꠛꠣꠖꠞ ꠎꠤꠘ꠆ꠖꠦꠉꠤꠔ ꠢꠦ ꠀꠈꠦꠞꠅ ꠙꠣꠁꠛ।
MAR 10:31 ꠅꠁꠟꠦ ꠎꠦꠞꠣ ꠙꠄꠟꠣ ꠇꠣꠔꠣꠞꠅ ꠀꠍꠂꠘ, ꠄꠞꠣꠞ ꠝꠣꠎꠦ ꠛꠃꠔ ꠎꠘ ꠈꠞꠦ ꠙꠠꠤꠎꠤꠛꠣ, ꠀꠞ ꠎꠦꠞꠣ ꠈꠞꠞ ꠇꠣꠔꠣꠞꠅ ꠀꠍꠂꠘ, ꠔꠣꠞꠣꠞ ꠛꠃꠔ ꠎꠘ ꠙꠄꠟꠣ ꠇꠣꠔꠣꠞꠅ ꠀꠁꠛꠣ।”
MAR 10:32 ꠢꠎꠞꠔ ꠁꠍꠣꠄ ꠍꠣꠢꠣꠛꠤ ꠅꠇꠟꠞꠦ ꠟꠁꠀ ꠎꠦꠞꠥꠎꠣꠟꠦꠝꠅ ꠎꠣꠁꠞꠣ। ꠔꠣꠁꠘ ꠀꠉꠦ ꠅꠁꠀ ꠀꠐꠤꠞꠣ, ꠀꠞ ꠍꠣꠢꠣꠛꠤ ꠅꠇꠟ ꠒꠞꠣꠁ ꠒꠞꠣꠁ ꠈꠞꠦ ꠈꠞꠦ ꠎꠣꠁꠞꠣ। ꠀꠞꠅ ꠎꠦꠞꠣ ꠔꠣꠘ ꠈꠞꠦ ꠅꠁꠀ ꠎꠣꠁꠞꠣ ꠔꠣꠞꠣꠞ ꠎꠣꠘꠅ-ꠅ ꠒꠞ ꠀꠍꠤꠟ। ꠁꠍꠣꠄ ꠔꠣꠘ ꠛꠣꠞꠅꠎꠘ ꠍꠣꠢꠣꠛꠤꠞꠦ ꠀꠟꠉꠣ ꠢꠞꠣꠁꠀ ꠘꠤꠀ ꠢꠤꠞꠛꠣꠞ ꠇꠁꠟꠣ, ꠔꠣꠘ ꠇꠥꠘ ꠖꠡꠣ ꠊꠐꠤꠛ।
MAR 10:33 ꠔꠣꠁꠘ ꠇꠁꠟꠣ, “ꠢꠥꠘꠅ, ꠀꠝꠞꠣ ꠅꠈꠘ ꠎꠦꠞꠥꠎꠣꠟꠦꠝ ꠎꠣꠁꠞꠣꠝ। ꠢꠘꠅ ꠀꠝꠤ ꠛꠤꠘ-ꠀꠖꠝꠞꠦ ꠗꠞꠤꠀ ꠛꠠ ꠁꠝꠣꠝ ꠀꠞ ꠝꠃꠟꠣꠘꠣ ꠅꠇꠟꠞ ꠀꠔꠅ ꠡꠙꠤ ꠖꠦꠅꠀ ꠅꠁꠛ। ꠔꠣꠞꠣ ꠛꠤꠌꠣꠞ ꠇꠞꠤꠀ ꠀꠝꠣꠞꠦ ꠎꠣꠘꠦ ꠝꠣꠞꠣꠞ ꠞꠣꠄ ꠖꠤꠛꠣ। ꠀꠝꠣꠞꠦ ꠛꠤꠗꠞ꠆ꠝꠤ ꠎꠣꠔꠤꠞ ꠀꠔꠅ ꠡꠝꠎꠣꠁ ꠖꠤꠛꠣ।
MAR 10:34 ꠅꠃ ꠛꠤꠗꠞ꠆ꠝꠤ ꠅꠇꠟꠦ ꠑꠣꠐ꠆ꠐꠣ-ꠝꠡꠇꠞꠣ ꠇꠞꠤꠀ, ꠡꠞꠤꠟꠅ ꠍꠦꠚ ꠍꠤꠐꠣꠁꠀ, ꠛꠦꠎꠥꠁꠔꠣ ꠌꠣꠛꠥꠇ ꠝꠣꠞꠛꠣ, ꠀꠞ ꠎꠣꠘꠦ ꠝꠣꠞꠤꠟꠤꠛꠣ। ꠝꠃꠔꠞ ꠔꠤꠘ ꠖꠤꠘ ꠛꠣꠖꠦ ꠢꠤꠞꠛꠣꠞ ꠎꠤꠘ꠆ꠖꠣ ꠅꠁꠀ ꠃꠑꠝꠥ।”
MAR 10:35 ꠛꠣꠖꠦ ꠎꠤꠛꠥꠖꠤꠀꠞ ꠖꠥꠁ ꠙꠥꠔ ꠁꠀꠇꠥꠛ ꠀꠞ ꠢꠣꠘ꠆ꠘꠣꠘ ꠘꠣꠝꠞ ꠖꠥꠁꠅ ꠍꠣꠢꠣꠛꠤ ꠢꠎꠞꠔ ꠁꠍꠣꠞ ꠉꠦꠍꠦ ꠀꠁꠀ ꠇꠁꠟꠣ, “ꠢꠥꠎꠥꠞ, ꠀꠝꠞꠣ ꠄꠇꠈꠣꠘ ꠀꠞꠎꠤ ꠟꠁꠀ ꠀꠁꠍꠤ, ꠝꠘꠅ ꠇꠞꠞꠣꠝ, ꠀꠙꠘꠦ ꠀꠝꠞꠣꠞ ꠀꠞꠎꠤꠈꠣꠘ ꠞꠣꠈꠛꠣ।”
MAR 10:36 ꠔꠣꠁꠘ ꠇꠁꠟꠣ, “ꠀꠝꠤ ꠔꠥꠝꠞꠣꠞ ꠟꠣꠉꠤ ꠇꠤꠔꠣ ꠇꠞꠔꠣꠝ, ꠔꠥꠝꠞꠣ ꠇꠤꠔꠣ ꠌꠣꠁꠞꠣꠄ?”
MAR 10:37 ꠄꠞꠣ ꠇꠁꠟꠣ, “ꠀꠙꠘꠦ ꠎꠦꠛꠟꠣ ꠙꠥꠞꠣꠙꠥꠞ ꠖꠣꠙꠐꠞ ꠟꠉꠦ ꠞꠣꠎ-ꠉꠖꠤꠔ ꠛꠁꠛꠣ, ꠅꠃ ꠡꠝꠄ ꠀꠝꠞꠣ ꠄꠇꠎꠘꠞꠦ ꠀꠙꠘꠣꠞ ꠒꠣꠁꠘꠞ ꠉꠖꠤ, ꠅꠁꠘ꠆ꠘ ꠎꠘꠞꠦ ꠛꠣꠃꠅꠞ ꠉꠖꠤꠈꠣꠘ ꠖꠤꠛꠣ।”
MAR 10:38 ꠁꠍꠣꠄ ꠇꠁꠟꠣ, “ꠔꠥꠝꠞꠣ ꠔ ꠛꠥꠎꠞꠣꠄ ꠘꠣ ꠔꠥꠝꠞꠣ ꠇꠤꠔꠣ ꠌꠣꠁꠞꠣꠄ। ꠀꠝꠤ ꠎꠦ ꠔꠇꠟꠤꠚꠞ ꠙꠤꠀꠟꠣꠖꠤ ꠈꠣꠁꠝꠥ, ꠁꠔꠣ ꠇꠥꠘꠥ ꠔꠥꠝꠞꠣ ꠈꠣꠁꠔꠣꠄ ꠙꠣꠞꠛꠣꠄ ꠘꠤ? ꠀꠝꠤ ꠎꠦ ꠔꠇꠟꠤꠚꠞ ꠉꠥꠍꠟ ꠇꠞꠝꠥ, ꠔꠥꠝꠞꠣ ꠁꠔꠣ ꠙꠣꠞꠛꠣꠄ ꠘꠤ?”
MAR 10:39 ꠔꠣꠞꠣ ꠇꠁꠟꠣ, “ꠎꠤꠅꠄ ꠙꠣꠞꠝꠥ।” ꠔꠣꠁꠘ ꠇꠁꠟꠣ, “ꠀꠁꠌ꠆ꠍꠣ, ꠀꠝꠤ ꠎꠦ ꠙꠤꠀꠟꠣꠖꠤ ꠈꠣꠁꠝꠥ, ꠔꠥꠝꠞꠣꠅ ꠅꠉꠥꠖꠤ ꠈꠣꠁꠛꠣꠄ। ꠀꠝꠤ ꠎꠦ ꠉꠥꠍꠟ ꠇꠞꠝꠥ, ꠔꠥꠝꠞꠣꠅ ꠅꠃꠟꠣ ꠇꠞꠛꠣꠄ।
MAR 10:40 ꠅꠁꠟꠦ ꠀꠝꠣꠞ ꠒꠣꠁꠘ ꠛꠣ ꠛꠣꠃ ꠉꠣꠟꠣꠔ ꠛꠅꠀꠘꠤꠞ ꠄꠈꠔꠤꠀꠞ ꠀꠝꠣꠞ ꠀꠔꠅ ꠘꠣꠄ। ꠁ ꠉꠖꠤ ꠅꠇꠟ ꠎꠦꠞꠣꠞ ꠟꠣꠉꠤ ꠎꠥꠁꠔ ꠇꠞꠣ ꠅꠁꠍꠦ, ꠈꠣꠟꠤ ꠔꠣꠞꠣꠃ ꠙꠣꠁꠛꠣ।”
MAR 10:41 ꠛꠣꠇꠤ ꠖꠡꠎꠘ ꠍꠣꠢꠣꠛꠤꠄ ꠁꠀꠇꠥꠛ ꠀꠞ ꠢꠣꠘ꠆ꠘꠣꠘꠞ ꠁ ꠀꠞꠎꠤ ꠢꠥꠘꠤꠀ ꠈꠥꠛ ꠛꠤꠞꠇ꠆ꠔ ꠅꠁꠟꠣ।
MAR 10:42 ꠔꠦꠃ ꠁꠍꠣꠄ ꠄꠞꠣ ꠢꠇꠟꠞꠦ ꠄꠇꠈꠣꠘꠅ ꠖꠟꠣ ꠇꠞꠤꠀ ꠇꠁꠟꠣ, “ꠔꠥꠝꠞꠣ ꠔ ꠎꠣꠘ, ꠛꠤꠗꠞ꠆ꠝꠤ ꠎꠣꠔꠤꠞ ꠞꠣꠎꠣ ꠅꠇꠟ ꠔꠣꠞꠣꠞ ꠙ꠆ꠞꠎꠣꠞ ꠝꠥꠘꠤꠛ ꠅꠄ। ꠔꠣꠞꠣꠞ ꠎꠝꠤꠖꠣꠞ ꠅꠇꠟꠦ ꠘꠤꠎꠞ ꠉꠥꠟꠣꠝꠞ ꠃꠙꠞꠦ ꠛꠦꠐꠣꠉꠤꠞꠤ ꠇꠞꠦ।
MAR 10:43 ꠅꠁꠟꠦ ꠔꠥꠝꠞꠣꠞ ꠝꠣꠎꠦ ꠁꠟꠣ ꠅꠀ ꠑꠤꠇ ꠘꠣꠄ। ꠔꠥꠝꠞꠣꠞ ꠇꠦꠃ ꠖꠣꠝꠤ ꠛꠘꠔꠦ ꠌꠣꠁꠟꠦ, ꠢꠦ ꠔꠥꠝꠞꠣꠞ ꠈꠦꠎꠝꠔ ꠇꠞꠃꠇ।
MAR 10:44 ꠀꠞ ꠇꠦꠃ ꠛꠠ ꠅꠁꠔꠦ ꠌꠣꠁꠟꠦ, ꠢꠦ ꠢꠇꠟꠞ ꠉꠥꠟꠣꠝꠤ ꠇꠞꠃꠇ।
MAR 10:45 ꠝꠘꠅ ꠞꠣꠈꠤꠅ, ꠀꠝꠤ ꠛꠤꠘ-ꠀꠖꠝꠦꠅ ꠈꠦꠎꠝꠔ ꠙꠣꠅꠀꠔ ꠀꠁꠍꠤ ꠘꠣ, ꠀꠁꠍꠤ ꠔ ꠈꠦꠎꠝꠔ ꠇꠞꠣꠔ। ꠀꠞ ꠛꠃꠔ ꠝꠣꠘꠡꠞ ꠎꠣꠘ ꠛꠣꠌꠣꠘꠤꠞ ꠟꠣꠉꠤ ꠘꠤꠎꠞ ꠎꠣꠘ ꠛꠤꠟꠣꠁ ꠖꠦꠅꠀꠔ ꠀꠁꠍꠤ।”
MAR 10:46 ꠢꠎꠞꠔ ꠁꠍꠣꠄ ꠔꠣꠘ ꠍꠣꠢꠣꠛꠤ ꠅꠇꠟ ꠟꠁꠀ ꠎꠤꠞꠤꠢꠅ ꠐꠣꠃꠘꠅ ꠀꠁꠟꠣ। ꠛꠣꠖꠦ ꠄꠞꠣꠞꠦ ꠀꠞ ꠀꠞꠅ ꠛꠃꠔ ꠝꠣꠘꠡꠞꠦ ꠟꠁꠀ ꠐꠣꠃꠘ ꠕꠣꠇꠤ ꠛꠣꠞꠘꠤꠞ ꠛꠣꠟꠣ, ꠔꠤꠝꠄꠅꠞ ꠙꠥꠀ ꠛꠞꠔꠤꠝꠄ ꠘꠣꠝꠞ ꠄꠇ ꠀꠘ꠆ꠖꠣ ꠛꠦꠐꠣꠄ ꠙꠕꠞ ꠗꠣꠞꠅ ꠛꠁꠀ ꠜꠤꠇ ꠇꠞꠣꠔ ꠀꠍꠤꠟ।
MAR 10:47 ꠄꠁꠘꠃ ꠘꠣꠍꠣꠞꠔ ꠉꠣꠃꠞ ꠁꠍꠣ, ꠁꠈꠣꠘ ꠢꠥꠘꠤꠀ ꠛꠦꠐꠣꠄ ꠎꠥꠞꠦ ꠌꠤꠟ꠆ꠟꠣꠁ ꠌꠤꠟ꠆ꠟꠣꠁ ꠇꠁꠟ, “ꠅ ꠁꠍꠣ, ꠢꠎꠞꠔ ꠖꠣꠃꠖꠞ ꠀꠅꠟꠣꠖ, ꠀꠝꠣꠞꠦ ꠞꠢꠝ ꠇꠞꠂꠘ।”
MAR 10:48 ꠌꠤꠟ꠆ꠟꠣꠘꠤ ꠢꠥꠘꠤꠀ ꠛꠃꠔꠦ ꠇꠁꠟꠣ, “ꠌꠥꠙ, ꠌꠤꠟ꠆ꠟꠣꠁꠍ ꠘꠣ।” ꠅꠁꠟꠦ ꠢꠦ ꠀꠞꠅ ꠎꠥꠞꠦ ꠌꠤꠟ꠆ꠟꠣꠁꠀ ꠇꠁꠟ, “ꠖꠣꠃꠖꠞ ꠀꠅꠟꠣꠖ, ꠀꠝꠣꠞꠦ ꠞꠢꠝ ꠇꠞꠂꠘ।”
MAR 10:49 ꠔꠣꠞ ꠌꠤꠟ꠆ꠟꠣꠘꠤ ꠢꠥꠘꠤꠀ ꠁꠍꠣꠄ ꠖꠝ ꠟꠁꠀ ꠇꠁꠟꠣ, “ꠄꠞꠦ ꠅꠘꠅ ꠀꠘꠅ।” ꠝꠣꠘꠡꠦ ꠅꠃ ꠀꠘ꠆ꠖꠣ ꠛꠦꠐꠣꠞꠦ ꠇꠁꠟꠣ, “ꠒꠞꠣꠁꠅ ꠘꠣ, ꠀꠅ। ꠢꠥꠎꠥꠞꠦ ꠔꠥꠝꠣꠞꠦ ꠒꠣꠇꠤꠞꠣ।”
MAR 10:50 ꠔꠦꠃ ꠛꠦꠐꠣꠄ ꠔꠣꠞ ꠡꠞꠤꠟꠞ ꠌꠣꠖ꠆ꠖꠞ ꠈꠥꠟꠤꠀ, ꠚꠣꠟꠖꠤ ꠃꠑꠤꠀ ꠔꠣꠘ ꠇꠣꠘ꠆ꠖꠣꠔ ꠉꠦꠟ।
MAR 10:51 ꠁꠍꠣꠄ ꠔꠣꠞꠦ ꠎꠤꠇꠣꠁꠟꠣ, “ꠔꠥꠝꠤ ꠇꠤꠔꠣ ꠌꠣꠅ ꠛꠣ? ꠀꠝꠤ ꠔꠥꠝꠣꠞꠦ ꠇꠤꠔꠣ ꠇꠞꠔꠣꠝ?” ꠛꠦꠐꠣꠄ ꠇꠁꠟ, “ꠢꠥꠎꠥꠞ, ꠀꠝꠤ ꠌꠃꠈꠦ ꠖꠦꠈꠔꠣꠝ ꠌꠣꠁ।”
MAR 10:52 ꠔꠣꠁꠘ ꠇꠁꠟꠣ, “ꠀꠁꠌ꠆ꠍꠣ ꠎꠣꠅ, ꠔꠥꠝꠣꠞ ꠁꠝꠣꠘꠞ ꠛꠟꠦꠃ ꠔꠥꠝꠤ ꠜꠣꠟꠣ ꠅꠁꠟꠣꠄ।” ꠇꠁꠔꠦꠃ ꠔꠣꠞ ꠖꠦꠈꠣꠞ ꠡꠇ꠆ꠔꠤ ꠀꠁꠟ ꠀꠞ ꠁꠍꠣꠞ ꠈꠞꠦ ꠈꠞꠦ ꠞꠅꠀꠘꠣ ꠅꠁꠟ।
MAR 11:1 ꠢꠎꠞꠔ ꠁꠍꠣꠄ ꠔꠣꠘ ꠍꠣꠢꠣꠛꠤꠞꠦ ꠟꠁꠀ ꠎꠦꠞꠥꠎꠣꠟꠦꠝꠞ ꠇꠣꠍꠣꠔ, ꠎꠄꠔꠥꠘ ꠙꠣꠠꠞ ꠟꠉꠦ ꠛꠣꠄꠔ-ꠀꠘꠤꠀ ꠀꠞ ꠛꠣꠄꠔ-ꠚꠣꠁꠎ꠆ꠎꠣ ꠉꠣꠃꠔ ꠀꠁꠀ ꠀꠎꠤꠟꠣ। ꠅꠘꠅ ꠀꠁꠀ ꠔꠣꠁꠘ ꠖꠥꠁꠎꠘ ꠍꠣꠢꠣꠛꠤꠞꠦ ꠇꠁꠟꠣ,
MAR 11:2 “ꠔꠥꠝꠞꠣ ꠖꠥꠁꠅꠎꠘ ꠍꠣꠝꠘꠞ ꠅꠃ ꠉꠣꠃꠔ ꠎꠣꠅ। ꠉꠤꠀ ꠉꠣꠃꠔ ꠢꠣꠝꠣꠁꠔꠦꠃ ꠖꠦꠈꠛꠣꠄ ꠄꠉꠥ ꠉꠣꠗꠣꠞ ꠛꠣꠁꠌ꠆ꠌꠣ ꠛꠣꠘ꠆ꠖꠣ ꠀꠍꠦ। ꠄꠞ ꠃꠙꠞꠦ ꠇꠦꠃ ꠇꠥꠘꠥꠖꠤꠘ ꠍꠅꠀꠞ ꠅꠁꠍꠦ ꠘꠣ। ꠅꠉꠥꠞ ꠉꠟꠣꠞ ꠖꠠꠤ ꠈꠥꠟꠤꠀ ꠅꠘꠅ ꠟꠁꠀ ꠀꠁꠅ।
MAR 11:3 ꠇꠦꠃ ꠎꠤꠇꠣꠁꠟꠦ ꠇꠁꠅ, ꠢꠥꠎꠥꠞꠞ ꠖꠞꠇꠣꠞ ꠀꠍꠦ, ꠄꠞꠖꠣꠄ ꠘꠤꠞꠣꠝ। ꠔꠣꠁꠘ ꠎꠟꠖꠤ ꠇꠞꠤ ꠚꠤꠞꠔ ꠖꠤꠟꠣꠁꠛꠣ।”
MAR 11:4 ꠔꠣꠘ ꠢꠥꠇꠥꠝ ꠝꠣꠚꠤꠇ ꠄꠞꠣ ꠉꠦꠟꠣ। ꠉꠤꠀ ꠖꠦꠈꠟꠣ, ꠢꠣꠍꠣꠃ ꠙꠕꠞ ꠇꠣꠘ꠆ꠖꠣꠔ ꠄꠇ ꠛꠣꠠꠤꠞ ꠃꠑꠣꠘꠅ ꠉꠣꠗꠣꠞ ꠛꠣꠁꠌ꠆ꠌꠣ ꠛꠣꠘ꠆ꠖꠣ ꠀꠍꠦ। ꠖꠦꠈꠤꠀ ꠄꠞꠣ ꠔꠣꠞ ꠛꠣꠘ꠆ꠖ ꠈꠥꠟꠤꠔꠣ ꠌꠣꠁꠟꠣ,
MAR 11:5 ꠅꠃ ꠡꠝꠄ ꠢꠘꠅ ꠃꠛꠣ ꠇꠄꠎꠘ ꠝꠣꠘꠡꠦ ꠎꠤꠇꠣꠁꠟꠣ, “ꠅꠛꠣ, ꠔꠥꠝꠞꠣ ꠁ ꠛꠣꠁꠌ꠆ꠌꠣꠞ ꠖꠠꠤ ꠈꠥꠟꠞꠣꠄ ꠇꠦꠘꠦ?”
MAR 11:6 ꠔꠦꠃ ꠁꠍꠣꠄ ꠎꠦꠟꠣ ꠢꠤꠇꠣꠁ ꠖꠤꠍꠟꠣ, ꠄꠞꠣ ꠅꠃꠟꠣꠃ ꠎꠥꠀꠙ ꠖꠤꠟꠣ। ꠁꠈꠣꠘ ꠢꠥꠘꠤꠀ ꠝꠣꠘꠡꠦ ꠀꠞ ꠇꠥꠘ꠆ꠔꠣ ꠇꠁꠟꠣ ꠘꠣ।
MAR 11:7 ꠉꠣꠗꠣꠞ ꠛꠣꠁꠌ꠆ꠌꠣ ꠟꠁꠀ ꠁꠍꠣꠞ ꠉꠦꠍꠦ ꠀꠁꠀ ꠢꠣꠞꠟꠦ, ꠝꠣꠘꠡꠦ ꠘꠤꠎꠞ ꠉꠔꠞꠞ ꠌꠣꠖ꠆ꠖꠞ ꠈꠥꠟꠤꠀ ꠉꠣꠗꠣꠞ ꠙꠤꠑꠤꠔ ꠛꠤꠍꠣꠁꠟꠣ। ꠛꠣꠖꠦ ꠔꠣꠁꠘ ꠄꠞ ꠃꠙꠞꠦ ꠌꠠꠤꠟꠣ।
MAR 11:8 ꠀꠞꠅ ꠛꠃꠔ ꠝꠣꠘꠡꠦ ꠔꠣꠞꠣꠞ ꠉꠔꠞꠞ ꠌꠣꠖ꠆ꠖꠞ ꠈꠥꠟꠤꠀ ꠙꠕꠞ ꠝꠣꠎꠦ ꠛꠤꠍꠣꠁ ꠖꠤꠟꠣ, ꠀꠞ ꠛꠃꠔꠦ ꠉꠣꠍꠞ ꠙꠣꠔꠣꠁꠘ ꠍꠤꠠꠤꠀ ꠀꠘꠤꠀ ꠙꠕꠅ ꠛꠤꠍꠣꠁꠟꠣ।
MAR 11:9 ꠁꠍꠣꠞ ꠟꠉꠦ ꠅꠁꠀ ꠀꠉꠦ-ꠈꠞꠦ ꠎꠦꠞꠣ ꠎꠣꠅꠀꠔ ꠀꠍꠤꠟ, ꠄꠞꠣ ꠎꠥꠞꠦ ꠎꠥꠞꠦ ꠄꠟꠣꠘ ꠖꠤꠟꠣ, “ꠝꠣꠞꠢꠣꠛꠣ! ꠝꠣꠛꠥꠖꠞ ꠘꠣꠝꠦ ꠎꠦꠁꠘ ꠔꠡꠞꠤꠚ ꠀꠘꠞꠣ, ꠔꠣꠘ ꠔꠣꠞꠤꠚ ꠅꠃꠇ।
MAR 11:10 ꠀꠝꠞꠣꠞ ꠝꠥꠟ ꠝꠥꠞꠛ꠆ꠛꠤ ꠖꠣꠃꠖꠞ ꠛꠣꠖꠡꠣꠁ ꠇꠣꠁꠝ ꠅꠞ, ꠀꠟꠢꠣꠝꠖꠥꠟꠤꠟ꠆ꠟꠣ! ꠛꠦꠢꠦꠡ꠆ꠔꠅ-ꠅ ꠝꠣꠞꠢꠣꠛꠣ!”
MAR 11:11 ꠎꠦꠞꠥꠎꠣꠟꠦꠝ ꠀꠁꠀ ꠔꠣꠁꠘ ꠙꠛꠤꠔ꠆ꠞ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠅ ꠢꠣꠝꠣꠁꠟꠣ ꠀꠞ ꠌꠣꠁꠞꠅꠛꠣꠄ ꠌꠣꠁꠀ ꠢꠇꠟꠔꠣ ꠖꠦꠈꠟꠣ। ꠛꠣꠖꠦ ꠢꠣꠁꠘ꠆ꠎꠣ ꠅꠁꠎꠣꠅꠀꠄ ꠔꠣꠘ ꠛꠣꠞꠅꠎꠘ ꠍꠣꠢꠣꠛꠤꠞꠦ ꠟꠁꠀ ꠛꠣꠄꠔ-ꠀꠘꠤꠀꠔ ꠉꠦꠟꠣꠉꠤ।
MAR 11:12 ꠛꠣꠖꠞ ꠖꠤꠘ ꠛꠣꠄꠔ-ꠀꠘꠤꠀ ꠕꠣꠇꠤ ꠛꠤꠖꠣꠄ ꠅꠀꠞ ꠡꠝꠄ ꠔꠣꠘ ꠙꠦꠐꠅ ꠜꠥꠇ ꠟꠣꠉꠟ।
MAR 11:13 ꠅꠃ ꠔꠣꠁꠘ ꠖꠥꠞꠁ ꠕꠣꠇꠤ ꠙꠣꠔꠣꠄ ꠜꠞꠣ ꠄꠉꠥ ꠒꠥꠝꠥꠞ ꠉꠣꠍ ꠖꠦꠈꠤꠀ, ꠅꠉꠥꠞ ꠚꠟ ꠈꠣꠁꠛꠣꠞ ꠘꠤꠅꠔꠦ ꠉꠣꠍꠞ ꠗꠣꠞꠅ ꠉꠦꠟꠣ। ꠅꠃ ꠡꠝꠄ ꠒꠥꠝꠥꠞ ꠉꠣꠍꠅ ꠚꠟ ꠗꠞꠣꠞ ꠖꠤꠘ ꠘꠣꠄ। ꠔꠣꠁꠘ ꠉꠤꠀ ꠖꠦꠈꠟꠣ, ꠉꠣꠍꠞ ꠝꠣꠎꠦ ꠈꠣꠟꠤ ꠙꠣꠔꠣ, ꠇꠥꠘꠥ ꠚꠟ ꠘꠣꠁ।
MAR 11:14 ꠔꠣꠁꠘ ꠅꠃ ꠉꠣꠍꠞꠦ ꠇꠁꠟꠣ, “ꠀꠞ ꠇꠥꠘꠥꠖꠤꠘ ꠇꠦꠃ ꠎꠣꠘꠥ ꠔꠥꠝꠣꠞ ꠚꠟ ꠘꠣ ꠈꠣꠄ।” ꠔꠣꠘ ꠁ ꠛꠥꠟꠤ ꠍꠣꠢꠣꠛꠤ ꠅꠇꠟꠦ ꠢꠥꠘꠤꠟꠤꠟꠣ।
MAR 11:15 ꠛꠣꠖꠦ ꠎꠦꠞꠥꠎꠣꠟꠦꠝ ꠀꠁꠀ ꠔꠣꠁꠘ ꠙꠛꠤꠔ꠆ꠞ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠅ ꠢꠣꠝꠣꠁꠟꠣ। ꠀꠞ ꠇꠣꠛꠣ ꠊꠞꠞ ꠡꠤꠝꠣꠘꠣꠔ ꠎꠔ ꠈꠞꠤꠖ-ꠛꠤꠇꠤꠞ ꠇꠣꠞꠛꠣꠞꠤ ꠀꠍꠤꠟ, ꠁꠔꠣꠞꠦ ꠈꠦꠖꠣꠁ ꠖꠤꠟꠣ। ꠔꠣꠁꠘ ꠐꠦꠇꠣꠞ ꠛꠣꠐ꠆ꠐꠣꠞ ꠇꠣꠞꠛꠣꠞꠤ ꠅꠇꠟꠞ ꠇꠦꠡ ꠛꠣꠇ꠆ꠡ, ꠀꠞ ꠙꠣꠞꠅ ꠛꠦꠌꠞꠣ ꠅꠇꠟꠞ ꠀꠡꠘ ꠃꠟꠐꠣꠁꠀ ꠚꠣꠟꠣꠁ ꠖꠤꠟꠣ।
MAR 11:16 ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠞ ꠃꠑꠣꠘꠦꠖꠤ ꠇꠥꠘꠥꠎꠣꠔ ꠝꠣꠟ-ꠍꠣꠝꠣꠘꠣ ꠟꠁꠀ ꠌꠟꠣꠌꠟ ꠇꠞꠔꠦ ꠘꠤꠡꠦꠗ ꠖꠤꠟꠣ।
MAR 11:17 ꠔꠣꠁꠘ ꠔꠣꠟꠤꠝ ꠖꠤꠟꠣ, “ꠀꠟ꠆ꠟꠣꠞ ꠇꠣꠟꠣꠝꠅ ꠛꠣꠔꠣꠁꠟ ꠅꠁꠍꠦ ꠘꠣ ꠘꠤ, ꠀꠝꠣꠞ ꠊꠞꠞꠦ ꠖꠥꠘꠤꠀꠞ ꠔꠣꠝꠣꠝ ꠎꠣꠔꠤꠞ ꠄꠛꠣꠖꠔ ꠈꠣꠘꠣ ꠇꠁꠀ ꠒꠣꠇꠣ ꠅꠁꠛ? ꠅꠁꠟꠦ ꠔꠥꠝꠞꠣ ꠁ ꠊꠞꠞꠦ ꠒꠣꠇꠣꠁꠔꠞ ꠀꠒ꠆ꠒꠣꠈꠣꠘꠣ ꠛꠣꠘꠣꠁꠟꠤꠍ।”
MAR 11:18 ꠁꠈꠣꠘ ꠢꠥꠘꠤꠀ ꠛꠠ ꠁꠝꠣꠝ ꠀꠞ ꠝꠃꠟꠣꠘꠣ ꠅꠇꠟꠦ ꠔꠣꠘꠞꠦ ꠎꠣꠘꠦ ꠝꠣꠞꠤꠟꠤꠛꠣꠞ ꠗꠣꠘ꠆ꠖꠣꠔ ꠟꠣꠉꠟꠣ। ꠅꠁꠟꠦ ꠔꠣꠞꠣ ꠁꠍꠣꠞꠦ ꠈꠥꠛ ꠒꠞꠣꠁꠔꠣ, ꠇꠣꠞꠘ ꠔꠣꠘ ꠔꠣꠟꠤꠝ ꠢꠥꠘꠤꠀ ꠝꠣꠘꠡꠞ ꠝꠣꠎꠦ ꠀꠌꠣꠘꠇ ꠄꠡꠇꠤ ꠙꠄꠖꠣ ꠅꠁꠍꠤꠟ।
MAR 11:19 ꠢꠣꠁꠘ꠆ꠎꠣ ꠛꠣꠟꠣ ꠔꠣꠁꠘ ꠍꠣꠢꠣꠛꠤ ꠅꠇꠟꠞꠦ ꠟꠁꠀ ꠐꠣꠃꠘꠞ ꠛꠣꠞꠦ ꠉꠦꠟꠣꠉꠤ।
MAR 11:20 ꠛꠤꠀꠘꠦ ꠍꠣꠢꠣꠛꠤ ꠅꠇꠟꠦ ꠙꠕꠦꠖꠤ ꠀꠐꠤꠀ ꠀꠅꠀꠞ ꠛꠣꠟꠣ ꠖꠦꠈꠟꠣ, ꠅꠃ ꠒꠥꠝꠥꠞ ꠉꠣꠍ ꠄꠇ꠆ꠇꠦꠞꠦ ꠎꠠꠦ-ꠚꠠꠦ ꠢꠥꠇꠣꠁꠀ ꠝꠞꠤꠉꠦꠍꠦ।
MAR 11:21 ꠖꠦꠈꠤꠀ ꠍꠣꠢꠣꠛꠤ ꠙꠤꠔꠞꠞ ꠝꠘꠅ ꠅꠁꠉꠦꠟ। ꠅꠃ ꠔꠣꠁꠘ ꠇꠁꠟꠣ, “ꠢꠥꠎꠥꠞ, ꠀꠙꠘꠦ ꠎꠦ ꠉꠣꠍꠞꠦ ꠛꠖ꠆ꠖꠥꠀ ꠖꠤꠍꠟꠣ, ꠖꠦꠈꠃꠇ꠆ꠇꠣ, ꠁꠉꠥ ꠝꠞꠤꠉꠦꠍꠦ।”
MAR 11:22 ꠔꠣꠁꠘ ꠄꠞꠣꠞꠦ ꠇꠁꠟꠣ, “ꠀꠟ꠆ꠟꠣꠞ ꠃꠙꠞꠦ ꠄꠇꠤꠘ ꠞꠣꠈꠅ।
MAR 11:23 ꠀꠝꠤ ꠔꠥꠝꠞꠣꠞꠦ ꠢꠣꠍꠣꠃ ꠇꠁꠞꠣꠝ, ꠇꠥꠘꠥ ꠝꠣꠘꠡꠦ ꠔꠣꠞ ꠖꠤꠟꠞ ꠝꠣꠎꠦ ꠡꠘ꠆ꠖꠄ ꠘꠣ ꠇꠞꠤꠀ, ꠙꠥꠞꠣꠙꠥꠞ ꠁꠝꠣꠘꠦ ꠎꠥꠖꠤ ꠅꠃ ꠙꠣꠠꠞꠦ ꠇꠄ, ‘ꠎꠣꠅ, ꠃꠠꠤꠀ ꠉꠤꠀ ꠖꠞꠤꠀꠔ ꠙꠠꠅ,’ ꠔꠦ ꠢꠦ ꠎꠦꠟꠣ ꠇꠁꠛ ꠔꠣꠞ ꠟꠣꠉꠤ ꠅꠟꠣ ꠇꠞꠣ ꠅꠁꠛ।
MAR 11:24 ꠄꠞꠖꠣꠄ ꠀꠝꠤ ꠔꠥꠝꠞꠣꠞꠦ ꠇꠁꠞꠣꠝ, ꠖꠥꠀ ꠇꠞꠣꠞ ꠡꠝꠄ ꠔꠥꠝꠞꠣ ꠎꠦꠔꠣ ꠝꠣꠋꠉ, ꠄꠇꠤꠘ ꠇꠞꠤꠅ ꠔꠥꠝꠞꠣ ꠁꠔꠣ ꠙꠣꠁꠟꠤꠍ। ꠔꠦꠃ ꠢꠣꠍꠣꠃ ꠁꠔꠣ ꠙꠣꠁꠛꠣꠄ।
MAR 11:25 ꠔꠥꠝꠞꠣ ꠎꠦꠛꠟꠣꠃ ꠖꠥꠀ ꠇꠞꠣꠔ ꠃꠛꠣꠅ, ꠅꠃ ꠡꠝꠄ ꠇꠦꠃꠞꠞ ꠛꠤꠞꠥꠖ꠆ꠖꠦ ꠔꠥꠝꠞꠣꠞ ꠇꠥꠘꠥ ꠘꠣꠟꠤꠡ ꠕꠣꠇꠟꠦ, ꠔꠣꠞꠦ ꠝꠣꠚ ꠇꠞꠤ ꠖꠤꠅ। ꠔꠦꠃ ꠔꠥꠝꠞꠣꠞ ꠛꠦꠢꠦꠡ꠆ꠔꠤ ꠛꠣꠚ ꠀꠟ꠆ꠟꠣꠄꠅ ꠔꠥꠝꠞꠣꠞ ꠔꠣꠝꠣꠝ ꠉꠥꠘꠣ ꠝꠣꠚ ꠇꠞꠤ ꠖꠤꠛꠣ।”
MAR 11:27 ꠛꠣꠖꠦ ꠢꠎꠞꠔ ꠁꠍꠣꠄ ꠔꠣꠘ ꠍꠣꠢꠣꠛꠤ ꠅꠇꠟꠞꠦ ꠟꠁꠀ ꠢꠤꠞꠛꠣꠞ ꠎꠦꠞꠥꠎꠣꠟꠦꠝ ꠀꠁꠟꠣ। ꠔꠣꠁꠘ ꠇꠣꠛꠣ ꠊꠞꠞ ꠃꠑꠣꠘꠅ ꠀꠐꠤꠞꠣ, ꠅꠃ ꠡꠝꠄ ꠛꠠ ꠁꠝꠣꠝ ꠅꠇꠟꠦ, ꠝꠥꠞꠛ꠆ꠛꠤ ꠀꠞ ꠝꠃꠟꠣꠘꠣ ꠅꠇꠟꠦ ꠔꠣꠘ ꠗꠣꠞꠅ ꠀꠁꠀ ꠎꠤꠇꠣꠁꠟꠣ,
MAR 11:28 “ꠔꠥꠝꠤ ꠇꠥꠘ ꠄꠈꠔꠤꠀꠞꠦ ꠁꠔꠣ ꠇꠞꠞꠣꠄ? ꠇꠦ ꠔꠥꠝꠣꠞꠦ ꠁ ꠈꠦꠝꠔꠣ ꠖꠤꠍꠦ?”
MAR 11:29 ꠔꠣꠁꠘ ꠇꠁꠟꠣ, “ꠀꠝꠤ ꠀꠙꠘꠣꠞꠣꠞꠦ ꠄꠇꠈꠣꠘ ꠍꠅꠀꠟ ꠇꠞꠝꠥ। ꠀꠙꠘꠣꠞꠣ ꠄꠞ ꠎꠥꠀꠙ ꠖꠤꠟꠣꠁꠟꠦ, ꠀꠝꠤꠅ ꠇꠁꠝꠥ, ꠇꠣꠞ ꠄꠈꠔꠤꠀꠞꠦ ꠀꠝꠤ ꠁꠔꠣ ꠇꠞꠤꠀꠞ।
MAR 11:30 ꠀꠁꠌ꠆ꠍꠣ ꠇꠃꠇ꠆ꠇꠣ ꠌꠣꠁꠘ, ꠢꠎꠞꠔ ꠄꠢꠤꠀꠄ ꠔꠞꠤꠇꠣꠞ ꠉꠥꠍꠟ ꠖꠦꠅꠀꠞ ꠄꠈꠔꠤꠀꠞ ꠇꠣꠞ ꠉꠦꠍ ꠕꠣꠇꠤ ꠙꠣꠁꠍꠟꠣ, ꠀꠟ꠆ꠟꠣꠞ ꠉꠦꠍ ꠕꠣꠇꠤ, ꠘꠣ ꠝꠣꠘꠡꠞ ꠉꠦꠍ ꠕꠣꠇꠤ?”
MAR 11:31 ꠁꠈꠣꠘ ꠢꠥꠘꠤꠀ ꠔꠣꠞꠣ ꠇꠣꠘꠦ ꠇꠣꠘꠦ ꠝꠣꠔꠤꠟꠣ, “ꠀꠝꠞꠣ ꠎꠥꠖꠤ ꠇꠁ ꠀꠟ꠆ꠟꠣꠞ ꠉꠦꠍ ꠕꠣꠇꠤ, ꠔꠦ ꠔꠣꠁꠘ ꠇꠁꠛꠣ, ꠔꠥꠝꠞꠣ ꠔꠣꠘ ꠃꠙꠞꠦ ꠁꠝꠣꠘ ꠀꠘꠟꠣꠄ ꠘꠣ ꠇꠦꠘꠦ?
MAR 11:32 ꠀꠞ ꠎꠥꠖꠤ ꠇꠁ ꠝꠣꠘꠡꠞ ꠉꠦꠍ ꠕꠣꠇꠤ, ꠔꠦ ꠔ?” ꠔꠣꠞꠣ ꠝꠣꠘꠡꠞꠦ ꠈꠥꠛ ꠒꠞꠣꠁꠔꠣ, ꠇꠣꠞꠘ ꠢꠇꠟ ꠝꠣꠘꠡꠦꠃ ꠝꠣꠘꠔꠣ, ꠢꠎꠞꠔ ꠄꠢꠤꠀ ꠄꠇꠎꠘ ꠘꠛꠤ।
MAR 11:33 ꠄꠞꠖꠣꠄ ꠔꠣꠞꠣ ꠎꠥꠀꠙ ꠖꠤꠟꠣ, “ꠀꠝꠞꠣ ꠁꠈꠣꠘ ꠎꠣꠘꠤ ꠘꠣ।” ꠔꠦꠃ ꠁꠍꠣꠄꠅ ꠇꠁꠟꠣ, “ꠔꠦ ꠀꠝꠤꠅ ꠀꠙꠘꠣꠞꠣꠞꠦ ꠇꠁꠔꠣꠝ ꠘꠣꠄ, ꠇꠣꠞ ꠄꠈꠔꠤꠀꠞꠦ ꠀꠝꠤ ꠁꠔꠣ ꠇꠞꠤꠀꠞ।”
MAR 12:1 ꠔꠦꠃ ꠢꠎꠞꠔ ꠁꠍꠣꠄ ꠢꠃ ꠝꠃꠟꠣꠘꠣ ꠅꠇꠟꠞꠦ ꠇꠤꠌ꠆ꠍꠣ ꠢꠥꠘꠣꠁꠀ ꠛꠥꠎꠣꠁꠟꠣ, “ꠄꠇꠎꠘ ꠝꠣꠘꠡꠦ ꠀꠋꠉꠥꠞ ꠈꠦꠔ ꠇꠞꠤꠀ ꠔꠣꠞ ꠌꠣꠁꠞꠅꠛꠣꠄ ꠛꠦꠠꠣ ꠖꠤꠟꠣ। ꠛꠣꠖꠦ ꠀꠋꠉꠥꠞꠞ ꠞꠡ ꠛꠣꠞ ꠇꠞꠣꠞ ꠟꠣꠉꠤ ꠄꠇ ꠉꠣꠔ ꠈꠥꠖꠤꠟꠣ ꠀꠞ ꠌꠇꠤꠖꠣꠞꠞ ꠟꠣꠉꠤ ꠃꠌꠣ ꠇꠞꠤ ꠄꠇꠈꠣꠘ ꠐꠋ-ꠊꠞ ꠛꠣꠘꠣꠁꠟꠣ। ꠢꠦꠡꠦ ꠝꠣꠘꠡꠞ ꠉꠦꠍꠦ ꠈꠦꠔ ꠛꠣꠉꠤ ꠖꠤꠀ ꠝꠣꠟꠤꠇ ꠛꠤꠖꠦꠡ ꠉꠦꠟꠣꠉꠤ।
MAR 12:2 ꠀꠋꠉꠥꠞ ꠙꠣꠇꠤꠀ ꠢꠣꠞꠟꠦ ꠝꠣꠟꠤꠇꠦ ꠔꠣꠘ ꠄꠇ ꠉꠥꠟꠣꠝꠞꠦ ꠛꠣꠉꠤꠖꠣꠞꠞ ꠉꠦꠍꠦ ꠙꠣꠑꠣꠁꠟꠣ, ꠔꠣꠘ ꠛꠣꠐ ꠀꠘꠣꠞ ꠟꠣꠉꠤ।
MAR 12:3 ꠅꠁꠟꠦ ꠛꠣꠉꠤꠖꠣꠞ ꠅꠇꠟꠦ ꠁ ꠉꠥꠟꠣꠝꠞꠦ ꠗꠞꠤ ꠝꠣꠁꠞ-ꠗꠁꠞ ꠇꠞꠤ, ꠈꠣꠟꠤ ꠀꠔꠦ ꠛꠤꠖꠣꠄ ꠇꠞꠤ ꠖꠤꠟ।
MAR 12:4 ꠔꠦꠃ ꠝꠣꠟꠤꠇꠦ ꠔꠣꠘ ꠀꠞꠅ ꠄꠇ ꠉꠥꠟꠣꠝꠞꠦ ꠙꠣꠑꠣꠁꠟꠣ। ꠛꠣꠉꠤꠖꠣꠞ ꠅꠇꠟꠦ ꠔꠣꠞꠦꠅ ꠉꠣꠟꠣ-ꠉꠣꠟꠤ ꠇꠞꠤꠀ ꠝꠣꠞꠤꠀ ꠔꠣꠞ ꠝꠣꠕꠣ ꠚꠣꠐꠣꠁꠟꠤꠟ।
MAR 12:5 ꠄꠞꠛꠣꠖꠦ ꠔꠣꠁꠘ ꠀꠞꠅ ꠄꠇꠎꠘꠞꠦ ꠙꠣꠑꠣꠁꠟꠣ। ꠄꠘꠞꠦ ꠔꠣꠞꠣ ꠎꠣꠘꠦ ꠝꠣꠞꠤꠟꠤꠟ। ꠅꠟꠣꠈꠣꠘ ꠇꠞꠤ ꠔꠣꠁꠘ ꠀꠞꠅ ꠛꠃꠔ ꠎꠘꠞꠦ ꠙꠣꠑꠣꠁꠟꠣ। ꠄꠞꠣꠞ ꠝꠣꠎꠞ ꠇꠄꠎꠘꠞꠦ ꠔꠣꠞꠣ ꠝꠣꠁꠞ-ꠗꠁꠞ ꠇꠞꠟ, ꠀꠞ ꠇꠄꠎꠘꠞꠦ ꠎꠣꠘꠦ ꠝꠣꠞꠤꠟꠤꠟ।
MAR 12:6 ꠢꠦꠡꠦ ꠝꠣꠟꠤꠇꠞ ꠈꠣꠟꠤ ꠄꠇꠎꠘ ꠝꠣꠘꠥꠡ ꠛꠣꠇꠤ ꠞꠁꠍꠤꠟ, ꠢꠦ ꠅꠁꠟ ꠔꠣꠘ ꠝꠣꠄꠀꠞ ꠙꠥꠔ। ꠢꠦꠡ-ꠝꠦꠡ ꠔꠣꠁꠘ ꠅꠃ ꠙꠥꠀꠞꠦꠃ ꠔꠣꠞꠣꠞ ꠉꠦꠍꠦ ꠙꠣꠑꠣꠁꠟꠣ, ꠝꠘꠅ ꠇꠞꠟꠣ, ꠀꠝꠣꠞ ꠙꠥꠀꠞꠦ ꠔꠣꠞꠣ ꠁꠎ꠆ꠎꠔ ꠖꠤꠛ।
MAR 12:7 ꠅꠁꠟꠦ ꠛꠣꠉꠤꠖꠣꠞ ꠅꠇꠟꠦ ꠄꠇꠦ-ꠅꠁꠘ꠆ꠘꠦ ꠙꠞꠣꠝꠤꠡ ꠇꠞꠤ ꠇꠁꠟ, ‘ꠅꠃ ꠙꠥꠀꠃ ꠔ ꠛꠣꠖꠦ ꠁ ꠡꠝ꠆ꠙꠔ꠆ꠔꠤꠞ ꠝꠣꠟꠤꠇ ꠅꠁꠛ। ꠔꠦ ꠀꠅ, ꠄꠞꠦꠅ ꠀꠝꠞꠣ ꠝꠣꠞꠤꠟꠣꠁ, ꠔꠦꠃ ꠀꠝꠞꠣꠃ ꠁꠔꠣꠞ ꠝꠣꠟꠤꠇ ꠛꠘꠤꠎꠤꠝꠥ।’
MAR 12:8 ꠇꠁꠀꠃ ꠔꠣꠞꠣ ꠙꠥꠀꠞꠦ ꠗꠞꠤꠀ ꠎꠣꠘꠦ ꠝꠣꠞꠤꠀ, ꠀꠋꠉꠥꠞ ꠈꠦꠔꠞ ꠛꠣꠞꠦ ꠘꠤꠀ ꠚꠣꠟꠣꠁ ꠖꠤꠟ।
MAR 12:9 “ꠔꠦ ꠅꠈꠘ ꠇꠃꠇ꠆ꠇꠣ ꠌꠣꠁꠘ, ꠈꠦꠔꠞ ꠝꠣꠟꠤꠇꠦ ꠇꠤꠔꠣ ꠇꠞꠛꠣ? ꠔꠣꠁꠘ ꠀꠁꠀ ꠔ ꠅꠃ ꠛꠣꠉꠤꠖꠣꠞ ꠅꠇꠟꠞꠦ ꠝꠣꠞꠤꠟꠤꠛꠣ ꠀꠞ ꠈꠦꠔ ꠅꠁꠘ꠆ꠘ ꠝꠣꠘꠡꠞ ꠉꠦꠍꠦ ꠛꠣꠉꠤ ꠖꠤꠛꠣ।
MAR 12:10 ꠀꠙꠘꠣꠞꠣ ꠀꠟ꠆ꠟꠣꠞ ꠇꠣꠟꠣꠝꠅ ꠙꠠꠍꠂꠘ ꠘꠣ ꠘꠤ, ꠞꠣꠎ ꠝꠦꠡ꠆ꠔꠁꠞ ꠅꠇꠟꠦ ꠎꠦ ꠙꠣꠔ꠆ꠔꠞꠞꠦ ꠛꠦꠇꠣꠝꠣ ꠇꠁꠀ ꠚꠣꠟꠣꠁ ꠖꠤꠍꠤꠟ, ꠅꠇꠐꠣ ꠖꠤꠀꠃ ꠊꠞꠞ ꠁꠀꠘ ꠈꠥꠐꠤ ꠅꠁꠟ।
MAR 12:11 ꠝꠣꠛꠥꠖꠦ ꠘꠤꠎꠦꠃ ꠁꠔꠣ ꠅꠀꠁꠟꠣ, ꠁꠔꠣ ꠖꠦꠈꠤꠀ ꠔ ꠀꠝꠞꠣꠞ ꠔꠣꠁꠎ꠆ꠎꠥꠛꠤ ꠟꠣꠉꠦꠞ।”
MAR 12:12 ꠁꠔꠣ ꠢꠥꠘꠤꠀ ꠔꠣꠞꠣ ꠁꠍꠣꠞꠦ ꠗꠞꠤꠟꠤꠔ ꠌꠣꠁꠟ। ꠔꠣꠞꠣ ꠛꠥꠎꠤꠟꠤꠟ, ꠔꠣꠁꠘ ꠁ ꠇꠤꠌ꠆ꠍꠣ ꠔꠣꠞꠣꠞ ꠛꠤꠙꠇ꠆ꠇꠦꠃ ꠇꠁꠞꠣ। ꠅꠁꠟꠦ ꠝꠣꠘꠡꠞꠦ ꠒꠞꠣꠁꠀ ꠔꠣꠘꠞꠦ ꠍꠣꠠꠤꠀ ꠉꠦꠟꠉꠤ।
MAR 12:13 ꠛꠣꠖꠦ ꠅꠃ ꠝꠥꠞꠛ꠆ꠛꠤ ꠀꠞ ꠝꠃꠟꠣꠘꠣ ꠅꠇꠟꠦ ꠁꠍꠣꠞꠦ ꠚꠣꠘ꠆ꠖꠅ ꠚꠣꠟꠣꠘꠤꠞ ꠟꠣꠉꠤ, ꠚꠞꠤꠡꠤ ꠀꠞ ꠞꠣꠎꠣ ꠢꠦꠞꠥꠖꠞ ꠖꠟꠞ ꠇꠄꠎꠘ ꠝꠣꠘꠡꠞꠦ ꠔꠣꠘ ꠉꠦꠍꠦ ꠙꠣꠑꠣꠁꠟ।
MAR 12:14 ꠔꠣꠞꠣ ꠀꠁꠀ ꠇꠁꠟ, “ꠢꠥꠎꠥꠞ, ꠀꠝꠞꠣ ꠔ ꠎꠣꠘꠤ, ꠀꠙꠘꠦ ꠄꠇꠎꠘ ꠢꠇ ꠝꠣꠘꠥꠡ। ꠝꠣꠘꠡꠦ ꠇꠤꠔꠣ ꠝꠘꠅ ꠇꠞꠦ ꠛꠣ ꠘꠣ ꠇꠞꠦ, ꠁꠔꠣꠄ ꠀꠙꠘꠣꠞ ꠇꠥꠘ꠆ꠔꠣꠃ ꠎꠣꠄ ꠀꠄ ꠘꠣ, ꠀꠙꠘꠦ ꠔ ꠇꠦꠃꠞꠞ ꠝꠥꠈꠞ ꠛꠣꠄ ꠌꠣꠁꠀ ꠇꠥꠘ꠆ꠔꠣ ꠇꠞꠂꠘ ꠘꠣ। ꠢꠇ-ꠢꠣꠟꠣꠟ ꠘꠤꠅꠝꠦ ꠝꠣꠘꠡꠞꠦ ꠀꠟ꠆ꠟꠣꠞ ꠞꠣꠡ꠆ꠔꠣ ꠛꠣꠔꠣꠁ ꠖꠤꠞꠣ। ꠔꠦ ꠀꠝꠞꠣꠞꠦ ꠛꠣꠔꠣꠁ ꠖꠦꠃꠇ꠆ꠇꠣ, ꠢꠎꠞꠔ ꠝꠥꠍꠣꠞ ꠡꠞꠤꠅꠔ ꠝꠣꠚꠤꠇ ꠞꠥꠝꠣꠘ ꠛꠣꠖꠡꠣꠞꠦ ꠈꠣꠎꠘꠣ ꠖꠦꠅꠀ ꠎꠣꠁꠎ ꠘꠤ?
MAR 12:15 ꠀꠝꠞꠣ ꠔꠣꠘꠞꠦ ꠈꠣꠎꠘꠣ ꠖꠤꠔꠣꠝ ꠘꠤ, ꠘꠣ ꠖꠤꠔꠣꠝ ꠘꠣ?” ꠔꠣꠁꠘ ꠔꠣꠞꠣꠞ ꠜꠘ꠆ꠒꠣꠝꠤ ꠛꠥꠎꠤꠟꠤꠟꠣ, ꠛꠥꠎꠤꠀ ꠇꠁꠟꠣ, “ꠔꠥꠝꠞꠣ ꠇꠦꠘꠦ ꠀꠝꠣꠞꠦ ꠙꠞꠤꠇ꠆ꠇꠣ ꠇꠞꠞꠣꠄ? ꠖꠦꠈꠤ, ꠄꠇꠐꠣ ꠖꠤꠘꠣꠞ ꠀꠘꠤꠀ ꠀꠝꠣꠞꠦ ꠖꠦꠈꠣꠅ।”
MAR 12:16 ꠔꠣꠞꠣ ꠖꠤꠘꠣꠞ ꠟꠁꠀ ꠔꠣꠘ ꠉꠦꠍꠦ ꠀꠁꠟꠦ, ꠔꠣꠁꠘ ꠎꠤꠇꠣꠁꠟꠣ, “ꠁ ꠙꠄꠡꠣꠞ ꠃꠙꠞꠦ ꠇꠣꠞ ꠘꠣꠝ ꠀꠞ ꠍꠛꠤ?” ꠔꠣꠞꠣ ꠇꠁꠟꠣ, “ꠞꠥꠝꠣꠘ ꠛꠣꠖꠡꠣꠞ।”
MAR 12:17 ꠔꠣꠁꠘ ꠇꠁꠟꠣ, “ꠔꠦ ꠢꠥꠘꠅ, ꠛꠣꠖꠡꠣꠞ ꠎꠦꠔꠣ ꠁꠔꠣ ꠛꠣꠖꠡꠣꠞꠦ ꠖꠦꠅ, ꠀꠞ ꠀꠟ꠆ꠟꠣꠞ ꠎꠦꠔꠣ ꠁꠔꠣ ꠀꠟ꠆ꠟꠣꠞꠦ ꠖꠦꠅ।” ꠁꠈꠣꠘ ꠢꠥꠘꠤꠀ ꠔꠣꠞꠣ ꠀꠝ꠆ꠝꠇ ꠛꠘꠤꠉꠦꠟꠣ।
MAR 12:18 ꠛꠣꠖꠦ ꠍꠤꠖ꠆ꠖꠦꠇꠤꠀ ꠝꠎꠛꠞ ꠇꠄꠎꠘ ꠝꠣꠘꠥꠡ ꠁꠍꠣꠞ ꠇꠣꠘ꠆ꠖꠣꠔ ꠀꠁꠟꠣ। ꠄꠞꠣ ꠄꠇꠤꠘ ꠇꠞꠂꠘ, ꠝꠃꠔꠞ ꠛꠣꠖꠦ ꠇꠥꠘꠥ ꠝꠣꠘꠥꠡ ꠀꠞ ꠎꠤꠘ꠆ꠖꠣ ꠅꠁꠀ ꠃꠑꠂꠘ ꠘꠣ। ꠄꠞꠖꠣꠄ ꠔꠣꠞꠣ ꠁꠍꠣꠞꠦ ꠎꠤꠇꠣꠁꠟꠣ,
MAR 12:19 “ꠢꠥꠎꠥꠞ, ꠢꠎꠞꠔ ꠝꠥꠍꠣꠄ ꠀꠝꠞꠣꠞ ꠟꠣꠉꠤ ꠅꠃ ꠝꠥꠍꠟꠣ ꠟꠦꠈꠤꠀ ꠉꠦꠍꠂꠘ, ꠇꠥꠘꠥ ꠝꠣꠘꠡꠦ ꠛꠤꠀ ꠇꠞꠤꠀ, ꠔꠣꠞ ꠛꠃꠞꠦ ꠘꠤꠀꠅꠟꠣꠖꠤ ꠢꠣꠟꠔꠦ ꠕꠁꠀ ꠢꠦ ꠎꠥꠖꠤ ꠝꠣꠞꠣ ꠎꠣꠄ, ꠔꠦ ꠔꠣꠞ ꠜꠣꠁꠄ ꠅꠃ ꠛꠦꠐꠤꠞꠦ ꠛꠤꠀ ꠇꠞꠤꠀ ꠔꠣꠞ ꠜꠣꠁꠞ ꠛꠋꠡ ꠛꠣꠌꠣꠁꠔꠦ ꠅꠁꠛ।
MAR 12:20 ꠔꠦ ꠗꠞꠃꠇ꠆ꠇꠣ, ꠄꠇ ꠙꠞꠤꠛꠣꠞꠅ ꠡꠣꠔ ꠜꠣꠁ ꠀꠍꠤꠟ। ꠛꠠ ꠎꠘꠦ ꠛꠤꠀ ꠇꠞꠤꠀ ꠘꠤꠀꠅꠟꠣꠖꠤ ꠢꠣꠟꠔꠦ ꠝꠣꠞꠣ ꠉꠦꠟ।
MAR 12:21 ꠛꠣꠖꠦ ꠖꠥꠍꠞꠣ ꠜꠣꠁꠄ ꠔꠣꠞ ꠅꠃ ꠠꠣꠠꠤ ꠜꠣꠛꠤꠞꠦ ꠛꠤꠀ ꠇꠞꠟ। ꠅꠁꠟꠦ ꠢꠦ-ꠅ ꠘꠤꠀꠅꠟꠣꠖꠤ ꠞꠁꠀ ꠝꠣꠞꠣ ꠉꠦꠟ। ꠛꠣꠖꠦ ꠔꠤꠘ ꠘꠝ꠆ꠛꠞ ꠜꠣꠁꠄ ꠛꠤꠀ ꠇꠞꠤꠀ ꠢꠦ-ꠅ ꠅꠃꠟꠣ ꠝꠣꠞꠣ ꠉꠦꠟ।
MAR 12:22 ꠅꠃ ꠘꠝꠥꠘꠣꠄ ꠔꠣꠞꠣ ꠡꠣꠔꠅ ꠜꠣꠁꠞ ꠇꠦꠃꠞꠞꠃ ꠢꠥꠞꠥꠔ꠆ꠔꠣ ꠅꠁꠟ ꠘꠣ। ꠢꠦꠡꠦ ꠅꠃ ꠛꠦꠐꠤꠅ ꠝꠣꠞꠣ ꠉꠦꠟ।
MAR 12:23 ꠔꠦ ꠝꠞꠘ ꠛꠣꠖꠦ ꠎꠦꠛꠟꠣ ꠝꠣꠘꠥꠡ ꠎꠤꠘ꠆ꠖꠣ ꠅꠁꠀ ꠃꠑꠛꠣ, ꠅꠃ ꠡꠝꠄ ꠁ ꠛꠦꠐꠤ, ꠄꠞꠣ ꠇꠥꠘ ꠜꠣꠁꠞ ꠛꠃ ꠅꠁꠛ? ꠔꠣꠞꠣ ꠢꠇꠟꠦꠃ ꠔ ꠁ ꠛꠦꠐꠤꠞꠦ ꠛꠤꠀ ꠇꠞꠍꠤꠟ।”
MAR 12:24 ꠔꠣꠁꠘ ꠎꠥꠀꠙ ꠖꠤꠟꠣ, “ꠀꠙꠘꠣꠞꠣ ꠔ ꠀꠟ꠆ꠟꠣꠞ ꠇꠣꠟꠣꠝꠅ ꠎꠣꠘꠂꠘ ꠘꠣ, ꠀꠟ꠆ꠟꠣꠞ ꠇꠥꠖꠞꠔꠤ ꠔꠣꠇ꠆ꠇꠔꠅ ꠛꠥꠎꠂꠘ ꠘꠣ। ꠄꠞꠖꠣꠄ ꠀꠙꠘꠣꠞꠣ ꠁ ꠜꠥꠟ ꠇꠞꠞꠣ।
MAR 12:25 ꠢꠥꠘꠃꠇ꠆ꠇꠣ, ꠝꠥꠞ꠆ꠖꠣ ꠅꠇꠟ ꠎꠦꠛꠟꠣ ꠎꠤꠘ꠆ꠖꠣ ꠅꠁꠀ ꠃꠑꠛꠣ, ꠅꠃ ꠡꠝꠄ ꠔꠣꠞꠣ ꠛꠤꠀ-ꠡꠣꠖꠤ ꠇꠞꠔꠣ ꠘꠣꠄ, ꠇꠦꠃ ꠔꠣꠞꠣꠞꠦ ꠛꠤꠀ ꠖꠤꠔ-ꠅ ꠘꠣꠄ। ꠄꠞꠣ ꠔ ꠚꠤꠞꠤꠡ꠆ꠔꠣꠞ ꠟꠣꠈꠣꠘ ꠛꠘꠤꠎꠤꠛꠣ।
MAR 12:26 ꠔꠃꠞꠣꠔ ꠇꠤꠔꠣꠛꠅ ꠔꠥꠞ ꠙꠣꠠꠞ ꠎꠋꠟꠣ ꠎꠟꠣꠞ ꠛꠄꠀꠘꠤꠞ ꠝꠣꠎꠦ, ꠝꠥꠞ꠆ꠖꠣ ꠅꠇꠟ ꠎꠤꠘ꠆ꠖꠣ ꠅꠀꠞ ꠛꠦꠙꠣꠞꠦ ꠇꠤꠔꠣ ꠟꠦꠈꠣ ꠀꠍꠦ, ꠁꠔꠣ ꠀꠙꠘꠣꠞꠣ ꠙꠠꠍꠂꠘ ꠘꠣ ꠘꠤ? ꠀꠟ꠆ꠟꠣꠄ ꠝꠥꠍꠣ ꠘꠛꠤꠞꠦ ꠇꠁꠟꠣ, ‘ꠀꠝꠤꠃ ꠁꠛ꠆ꠞꠣꠢꠤꠝ, ꠁꠍꠢꠣꠇ ꠀꠞ ꠁꠀꠇꠥꠛꠞ ꠀꠟ꠆ꠟꠣ’।
MAR 12:27 ꠔꠦ ꠀꠟ꠆ꠟꠣ ꠔ ꠝꠥꠞ꠆ꠖꠣ ꠅꠇꠟꠞ ꠀꠟ꠆ꠟꠣ ꠘꠣꠄ, ꠔꠣꠁꠘ ꠎꠤꠘ꠆ꠖꠣ ꠅꠇꠟꠞ ꠀꠟ꠆ꠟꠣ। ꠀꠙꠘꠣꠞꠣ ꠔ ꠛꠃꠔ ꠛꠠ ꠜꠥꠟ ꠇꠞꠍꠂꠘ।”
MAR 12:28 ꠅꠃ ꠡꠝꠄ ꠄꠇꠎꠘ ꠝꠃꠟꠣꠘꠣ ꠀꠁꠀ ꠄꠞꠣꠞ ꠔꠞ꠆ꠇꠣ-ꠔꠞ꠆ꠇꠤ ꠢꠥꠘꠟꠣ। ꠀꠞ ꠁꠍꠣꠄ ꠎꠦꠘ ꠑꠤꠇ ꠎꠥꠀꠙ ꠖꠤꠍꠂꠘ ꠁꠈꠣꠘ ꠛꠥꠎꠤꠀ ꠄꠁꠘ ꠎꠤꠇꠣꠁꠟꠣ, “ꠇꠃꠇ꠆ꠇꠣ ꠌꠣꠁꠘ, ꠔꠃꠞꠣꠔ ꠡꠞꠤꠚꠞ ꠝꠣꠎꠦ ꠢꠇꠟ ꠕꠣꠇꠤ ꠛꠠ ꠢꠥꠇꠥꠝ ꠇꠥꠘꠐꠣ?”
MAR 12:29 ꠁꠍꠣꠄ ꠎꠥꠀꠙ ꠖꠤꠟꠣ, “ꠢꠇꠟ ꠕꠣꠇꠤ ꠛꠠ ꠢꠥꠇꠥꠝ ꠅꠁꠟ, ꠅ ꠛꠘꠤ ꠁꠍꠞꠣꠁꠟ, ꠀꠝꠞꠣꠞ ꠝꠣꠛꠥꠖ ꠀꠟ꠆ꠟꠣ ꠄꠇ।
MAR 12:30 ꠔꠥꠝꠞꠣꠞ ꠀꠡ꠆ꠔꠣ ꠖꠤꠟ, ꠎꠣꠘ, ꠝꠘ ꠀꠞ ꠢꠇꠟ ꠡꠇ꠆ꠔꠤ ꠖꠤꠀ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞꠦ ꠝꠢꠛ꠆ꠛꠔ ꠇꠞꠤꠅ।
MAR 12:31 ꠖꠥꠍꠞꠣ ꠢꠥꠇꠥꠝ ꠅꠁꠟ, ꠔꠥꠝꠞꠣꠞ ꠀꠞꠤ-ꠚꠞꠤꠞꠦ ꠘꠤꠎꠞ ꠟꠣꠈꠣꠘ ꠝꠣꠄꠀ ꠇꠞꠤꠅ। ꠅꠃ ꠖꠥꠁꠅ ꠢꠥꠇꠥꠝ ꠕꠣꠇꠤ ꠛꠠ ꠀꠞ ꠇꠥꠘꠥ ꠢꠥꠇꠥꠝ ꠘꠣꠄ।”
MAR 12:32 ꠁꠈꠣꠘ ꠢꠥꠘꠤꠀ ꠢꠤ ꠝꠃꠟꠣꠘꠣꠄ ꠇꠁꠟꠣ, “ꠢꠥꠎꠥꠞ, ꠝꠣꠞꠢꠣꠛꠣ! ꠀꠙꠘꠦ ꠔ ꠑꠤꠇꠃ ꠇꠁꠍꠂꠘ, ꠀꠟ꠆ꠟꠣ ꠄꠇ, ꠔꠣꠁꠘ ꠍꠣꠠꠣ ꠀꠞ ꠇꠥꠘꠥ ꠝꠣꠛꠥꠖ ꠘꠣꠁ।
MAR 12:33 ꠀꠞ ꠀꠡ꠆ꠔꠣ ꠖꠤꠟ, ꠛꠤꠛꠦꠇ-ꠛꠥꠖ꠆ꠖꠤ, ꠢꠇꠟ ꠡꠇ꠆ꠔꠤ ꠖꠤꠀ ꠔꠣꠘꠞꠦ ꠝꠢꠛ꠆ꠛꠔ ꠇꠞꠣ, ꠀꠞꠤ-ꠚꠞꠤꠞꠦ ꠘꠤꠎꠞ ꠟꠣꠈꠣꠘ ꠝꠣꠄꠀ ꠇꠞꠣ ꠅꠁꠟ, ꠢꠇꠟ ꠘꠝꠥꠘꠣꠞ ꠙꠡꠥ ꠇꠥꠞꠛꠣꠘꠤ ꠀꠞ ꠟꠤꠟ꠆ꠟꠣ-ꠍꠖꠉꠣ ꠕꠣꠇꠤꠅ ꠎꠞꠥꠞꠤ।”
MAR 12:34 ꠁꠍꠣꠄ ꠎꠦꠛꠟꠣ ꠖꠦꠈꠟꠣ, ꠅꠃ ꠝꠃꠟꠣꠘꠣꠄ ꠈꠥꠛ ꠡꠥꠘ꠆ꠖꠞ ꠇꠞꠤ ꠎꠥꠀꠙ ꠖꠤꠍꠂꠘ, ꠅꠃ ꠔꠣꠁꠘ ꠇꠁꠟꠣ, “ꠀꠟ꠆ꠟꠣꠞ ꠛꠣꠖꠡꠣꠁ ꠕꠣꠇꠤ ꠀꠙꠘꠦ ꠔ ꠛꠦꠡꠤ ꠖꠥꠞꠁ ꠘꠣꠄ।” ꠄꠞꠛꠣꠖꠦ ꠕꠘꠦ ꠁꠍꠣꠞꠦ ꠇꠥꠘꠥ ꠍꠅꠀꠟ ꠇꠞꠣꠞ ꠡꠣꠅꠡ ꠀꠞ ꠇꠦꠃꠞꠞ ꠅꠁꠟ ꠘꠣ।
MAR 12:35 ꠁꠍꠣꠄ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠅ ꠔꠣꠟꠤꠝ ꠖꠦꠅꠀꠞ ꠡꠝꠄ ꠎꠤꠇꠣꠁꠟꠣ, “ꠝꠃꠟꠣꠘꠣ ꠅꠇꠟꠦ ꠇꠦꠝꠘꠦ ꠇꠂꠘ, ꠀꠟ-ꠝꠍꠤ ꠅꠁꠟꠣ ꠢꠎꠞꠔ ꠖꠣꠃꠖꠞ ꠀꠅꠟꠣꠖ?
MAR 12:36 ꠖꠣꠃꠖꠦ ꠔ ꠙꠣꠇ ꠞꠥꠢꠥꠞ ꠛꠟꠦ ꠇꠁꠍꠂꠘ, ꠝꠣꠛꠥꠖꠦ ꠀꠝꠣꠞ ꠝꠥꠘꠤꠛꠞꠦ ꠇꠁꠟꠣ, ꠀꠝꠤ ꠎꠔ ꠡꠝꠄ ꠔꠥꠝꠣꠞ ꠖꠥꠡꠝꠘ ꠅꠇꠟꠞꠦ ꠔꠥꠝꠣꠞ ꠙꠣꠅꠞ ꠔꠟꠣꠔ ꠘꠣ ꠚꠣꠟꠣꠁ, ꠅꠔ ꠡꠝꠄ ꠔꠥꠝꠤ ꠀꠝꠣꠞ ꠒꠣꠁꠘꠞ ꠔꠈ꠆ꠔꠅ ꠛꠅ।
MAR 12:37 ꠖꠣꠃꠖꠦ ꠎꠦꠛꠟꠣ ꠘꠤꠎꠦꠃ ꠀꠟ-ꠝꠍꠤꠞꠦ ꠔꠣꠘ ꠝꠥꠘꠤꠛ ꠇꠁꠍꠂꠘ, ꠔꠦ ꠀꠟ-ꠝꠍꠤ ꠇꠦꠝꠘꠦ ꠖꠣꠃꠖꠞ ꠀꠅꠟꠣꠖ ꠅꠁꠛꠣ?” ꠛꠃꠔ ꠝꠣꠘꠡꠦ ꠈꠥꠡꠤ ꠅꠁꠀ ꠁꠍꠣꠞ ꠛꠄꠀꠘ ꠢꠥꠘꠣꠔ ꠀꠍꠤꠟ।
MAR 12:38 ꠛꠄꠀꠘꠞ ꠝꠣꠎꠦ ꠔꠣꠁꠘ ꠇꠁꠟꠣ, “ꠝꠃꠟꠣꠘꠣ ꠅꠇꠟꠞ ꠛꠦꠙꠣꠞꠦ ꠢꠥꠡꠤꠀꠞ ꠞꠁꠅ। ꠔꠣꠞꠣ ꠈꠣꠟꠤ ꠟꠣꠝ꠆ꠛꠣ ꠟꠣꠝ꠆ꠛꠣ ꠎꠥꠛ꠆ꠛꠣ ꠚꠤꠘ꠆ꠖꠤꠀ ꠛꠣꠎꠣꠞ-ꠀꠐꠅ ꠊꠥꠞꠣ-ꠚꠤꠞꠣ ꠇꠞꠂꠘ ꠀꠞ ꠁꠎ꠆ꠎꠔ ꠙꠣꠁꠔꠣ ꠌꠣꠁꠘ।
MAR 12:39 ꠔꠣꠞꠣꠞ ꠡꠈ ꠅꠁꠟ ꠇꠥꠘꠥ ꠝꠎꠟꠤꠍꠅ ꠉꠦꠟꠦ ꠖꠣꠝꠤ ꠎꠣꠉꠣꠔ ꠛꠅꠀ, ꠈꠣꠘꠤꠞ ꠡꠝꠄ ꠍꠣꠝꠘꠞ ꠇꠣꠔꠣꠞꠅ ꠛꠁꠀ ꠈꠣꠅꠀ।
MAR 12:40 ꠄꠇꠛꠣꠄ ꠔꠣꠞꠣ ꠟꠣꠝ꠆ꠛꠣ ꠟꠣꠝ꠆ꠛꠣ ꠖꠥꠀ ꠇꠞꠤꠀ ꠝꠣꠘꠡꠞ ꠝꠘ ꠉꠟꠣꠁꠘ, ꠀꠞꠇꠛꠣꠄ ꠠꠣꠠꠤ ꠛꠦꠐꠤꠘ꠆ꠔꠞ ꠎꠝꠤ-ꠝꠤꠞꠣꠡ ꠖꠈꠟ ꠇꠞꠤ ꠘꠦꠁꠘ। ꠢꠣꠡꠞꠞ ꠝꠄꠖꠣꠘꠅ ꠄꠞꠣꠞ ꠢꠇꠟ ꠕꠣꠇꠤ ꠛꠠ ꠝꠍꠤꠛꠔ ꠅꠁꠛ।”
MAR 12:41 ꠛꠣꠖꠦ ꠔꠣꠁꠘ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠞ ꠟꠤꠟ꠆ꠟꠣꠞ ꠒꠦꠉꠞ ꠇꠣꠘ꠆ꠖꠣꠔ ꠛꠁꠀ ꠖꠦꠈꠟꠣ, ꠝꠣꠘꠡꠦ ꠀꠁꠀ ꠇꠦꠝꠘꠦ ꠟꠤꠟ꠆ꠟꠣ-ꠍꠖꠉꠣ ꠖꠤꠞꠣ। ꠔꠣꠁꠘ ꠖꠦꠈꠟꠣ, ꠛꠃꠔ ꠗꠘꠤ ꠝꠣꠘꠡꠦ ꠛꠦꠡ ꠇꠞꠤ ꠐꠦꠇꠣ-ꠙꠄꠡꠣ ꠖꠣꠘ ꠇꠞꠞꠣ।
MAR 12:42 ꠛꠣꠖꠦ ꠄꠇ ꠉꠞꠤꠛ ꠠꠣꠠꠤ ꠛꠦꠐꠤꠄ ꠀꠁꠀ ꠈꠣꠟꠤ ꠖꠥꠁꠐꠣ ꠙꠄꠡꠣ ꠖꠣꠘ ꠇꠞꠟ।
MAR 12:43 ꠖꠦꠈꠤꠀ ꠔꠣꠘ ꠍꠣꠢꠣꠛꠤ ꠅꠇꠟꠞꠦ ꠇꠁꠟꠣ, “ꠀꠝꠤ ꠔꠥꠝꠞꠣꠞꠦ ꠢꠇ ꠇꠕꠣ ꠇꠁꠞꠣꠝ, ꠢꠇꠟ ꠝꠣꠘꠥꠡ ꠕꠘꠦ ꠅꠃ ꠛꠦꠐꠤꠄ ꠛꠦꠡꠤ ꠖꠣꠘ ꠇꠞꠟ।
MAR 12:44 ꠢꠇꠟ ꠝꠣꠘꠡꠦ ꠔꠣꠞꠣꠞ ꠛꠃꠔ ꠗꠘ-ꠍꠣꠝꠣꠘ ꠕꠣꠇꠤ ꠇꠤꠍꠥ ꠅꠋꠡ ꠖꠣꠘ ꠇꠞꠍꠦ, ꠅꠁꠟꠦ ꠁ ꠛꠦꠐꠤ ꠅꠜꠣꠛꠤ ꠅꠁꠟꠦꠅ, ꠛꠦꠐꠤꠄ ꠘꠤꠎꠞ ꠟꠣꠉꠤ ꠇꠥꠘ꠆ꠔꠣ ꠘꠣ ꠞꠣꠈꠤꠀ, ꠢꠇꠟꠔꠣꠃ ꠖꠣꠘ ꠇꠞꠤ ꠖꠤꠟ।”
MAR 13:1 ꠢꠎꠞꠔ ꠁꠍꠣ ꠛꠣꠄꠔꠥꠟ-ꠝꠥꠇꠣꠖ꠆ꠖꠍ ꠕꠣꠇꠤ ꠛꠣꠞ ꠅꠁꠀ ꠎꠣꠅꠀꠞ ꠛꠣꠟꠣ ꠔꠣꠘ ꠄꠇꠎꠘ ꠍꠣꠢꠣꠛꠤꠄ ꠇꠁꠟꠣ, “ꠢꠥꠎꠥꠞ, ꠅꠃ ꠖꠦꠈꠃꠇ꠆ꠇꠣ, ꠇꠔ ꠛꠠ ꠛꠠ ꠙꠣꠔ꠆ꠔꠞꠞ ꠅꠀꠟ ꠀꠞ ꠡꠥꠘ꠆ꠖꠞ ꠡꠥꠘ꠆ꠖꠞ ꠖꠟꠣꠘ।”
MAR 13:2 ꠔꠣꠁꠘ ꠇꠁꠟꠣ, “ꠔꠥꠝꠤ ꠅꠃ ꠎꠦꠔꠣ ꠛꠠ ꠛꠠ ꠖꠟꠣꠘ ꠖꠦꠈꠞꠣꠄ, ꠁꠔꠣꠞ ꠖꠥꠁ ꠙꠣꠔ꠆ꠔꠞ ꠄꠇꠈꠣꠘꠅ ꠟꠣꠉꠣꠁꠟ ꠞꠁꠔ ꠘꠣꠄ, ꠢꠇꠟꠔꠣ ꠜꠣꠋꠉꠣ ꠅꠁꠎꠤꠛ।”
MAR 13:3 ꠛꠣꠖꠦ ꠔꠣꠁꠘ ꠎꠦꠛꠟꠣ ꠎꠄꠔꠥꠘ ꠙꠣꠠꠞ ꠃꠙꠞꠦ ꠛꠣꠄꠔꠥꠟ-ꠝꠥꠇꠣꠖ꠆ꠖꠍ ꠇꠣꠛꠣ ꠡꠞꠤꠚ ꠝꠥꠈꠣ ꠛꠅꠀꠔ ꠀꠍꠟꠣ, ꠅꠃ ꠡꠝꠄ ꠍꠣꠢꠣꠛꠤ ꠙꠤꠔꠞ, ꠁꠀꠇꠥꠛ, ꠢꠣꠘ꠆ꠘꠣꠘ ꠀꠞ ꠀꠘ꠆ꠖꠞꠤꠀꠍꠦ ꠔꠣꠘꠞꠦ ꠘꠤꠞꠣꠟꠣꠄ ꠎꠤꠇꠣꠁꠟꠣ,
MAR 13:4 “ꠢꠥꠎꠥꠞ, ꠀꠝꠞꠣꠞꠦ ꠎꠣꠘꠣꠃꠇ꠆ꠇꠣ, ꠁꠔꠣ ꠇꠥꠘ ꠡꠝꠄ ꠅꠁꠛ? ꠇꠥꠘ ꠀꠟꠣꠝꠔ ꠖꠦꠈꠤꠀ ꠀꠝꠞꠣ ꠛꠥꠎꠝꠥ, ꠁꠔꠣ ꠛꠤꠘꠣꠡ ꠅꠀꠞ ꠡꠝꠄ ꠀꠁꠌ꠆ꠍꠦ?”
MAR 13:5 ꠔꠣꠁꠘ ꠇꠁꠟꠣ, “ꠖꠦꠈꠤꠅ, ꠇꠦꠃ ꠎꠣꠘꠥ ꠔꠥꠝꠞꠣꠞꠦ ꠘꠣ ꠐꠉꠦ।
MAR 13:6 ꠛꠃꠔ ꠎꠘꠦ ꠀꠝꠣꠞ ꠘꠣꠝ ꠗꠞꠤꠀ ꠀꠁꠀ ꠇꠁꠛ, ꠀꠝꠤꠃ ꠢꠦꠁꠘ, ꠇꠁꠀ ꠛꠃꠔꠞꠦ ꠐꠉꠤꠛ।
MAR 13:7 ꠅꠁꠟꠦ ꠎꠥꠖ꠆ꠖꠞ ꠀꠅꠀꠎ ꠀꠞ ꠟꠣꠠꠣꠁꠞ ꠈꠛꠞ ꠢꠥꠘꠤꠀ ꠔꠥꠝꠞꠣ ꠒꠞꠣꠁꠅ ꠘꠣ। ꠁꠔꠣ ꠘꠤꠌꠄ ꠊꠐꠛ, ꠊꠐꠟꠦꠅ ꠁꠔꠣ ꠔ ꠡꠦꠡ ꠘꠣꠄ।
MAR 13:8 ꠄꠇ ꠎꠣꠔꠤꠄ ꠀꠞꠇ ꠎꠣꠔꠤꠞ ꠟꠉꠦ, ꠄꠇ ꠖꠦꠡꠦ ꠀꠞꠇ ꠖꠦꠡꠞ ꠟꠉꠦ ꠟꠣꠠꠣꠁ ꠇꠞꠛ। ꠛꠃꠔ ꠎꠣꠉꠣꠔ ꠜꠂꠍꠣꠟ ꠀꠞ ꠘꠤꠖꠣꠘ ꠖꠦꠈꠣ ꠖꠤꠛ। ꠅꠁꠟꠦ ꠁꠔꠣ ꠔ ꠈꠣꠟꠤ ꠝꠍꠤꠛꠔꠞ ꠡꠥꠞꠥ।
MAR 13:9 “ꠔꠥꠝꠞꠣ ꠘꠤꠎꠞ ꠛꠦꠙꠣꠞꠦ ꠢꠥꠡꠤꠀꠞ ꠞꠁꠅ। ꠝꠣꠘꠡꠦ ꠔꠥꠝꠞꠣꠞꠦ ꠗꠞꠤꠀ ꠛꠤꠌꠣꠞꠞ ꠀꠖꠣꠟꠔꠅ ꠡꠝꠎꠣꠁꠛ। ꠝꠍꠤꠖꠞ ꠜꠤꠔꠞꠦ ꠔꠥꠝꠞꠣꠞꠦ ꠍꠤꠋꠟꠣꠖꠤ ꠝꠣꠞꠣ ꠅꠁꠛ। ꠀꠝꠣꠞ ꠟꠣꠉꠤ ꠔꠥꠝꠞꠣꠞꠦ ꠖꠦꠡꠞ ꠞꠣꠎꠣ-ꠛꠣꠖꠡꠣꠞ ꠍꠣꠝꠘꠦ ꠘꠦꠅꠀ ꠅꠁꠛ। ꠔꠥꠝꠞꠣ ꠄꠞꠣꠞ ꠍꠣꠝꠘꠦ ꠀꠝꠣꠞ ꠛꠦꠙꠣꠞꠦ ꠡꠣꠇ꠆ꠇꠤ ꠖꠤꠛꠣꠄ।
MAR 13:10 ꠙꠄꠟꠣ ꠖꠥꠘꠤꠀꠞ ꠔꠣꠝꠣꠝ ꠎꠣꠔꠤꠞ ꠉꠦꠍꠦ ꠀꠟ꠆ꠟꠣꠞ ꠖꠦꠅꠀ ꠈꠥꠡ-ꠈꠛꠞꠤ ꠔꠛꠟꠤꠉ ꠇꠞꠣ ꠎꠞꠥꠞ।
MAR 13:11 ꠔꠥꠝꠞꠣꠞꠦ ꠗꠞꠤꠀ ꠎꠦꠛꠟꠣ ꠛꠤꠌꠣꠞꠅ ꠘꠦꠅꠀ ꠅꠁꠛ, ꠅꠃ ꠡꠝꠄ ꠇꠤꠔꠣ ꠎꠥꠀꠙ ꠖꠤꠔꠣꠄ, ꠁꠔꠣ ꠟꠁꠀ ꠀꠉꠦ ꠇꠥꠘꠥ ꠌꠤꠘ꠆ꠔꠣ ꠇꠞꠤꠅ ꠘꠣ। ꠢꠃ ꠡꠝꠄ ꠔꠥꠝꠞꠣꠞꠦ ꠎꠦꠔꠣ ꠢꠤꠇꠣꠁꠀ ꠖꠦꠅꠀ ꠅꠁꠛ, ꠔꠥꠝꠞꠣ ꠅꠔꠣꠃ ꠇꠁꠅ। ꠀꠍꠟꠦ ꠔꠥꠝꠞꠣ ꠔ ꠢꠤꠘꠅ ꠝꠣꠔꠔꠣꠄ ꠘꠣꠄ, ꠙꠣꠇ ꠞꠥꠢꠦꠃ ꠝꠣꠔꠤꠛꠣ।
MAR 13:12 ꠜꠣꠁꠄ ꠜꠣꠁꠞꠦ, ꠛꠣꠚꠦ ꠙꠥꠀꠞꠦ ꠎꠣꠘꠦ ꠝꠣꠞꠣꠞ ꠟꠣꠉꠤ ꠗꠞꠣꠁ ꠖꠤꠛ। ꠙꠥꠀ-ꠙꠥꠠꠤꠄ ꠀꠙꠘ ꠝꠣ-ꠛꠣꠚꠞ ꠛꠤꠞꠥꠖ꠆ꠖꠦ ꠉꠤꠀ, ꠝꠣ-ꠛꠣꠚꠞꠦ ꠈꠥꠘ ꠇꠞꠣꠁꠛ।
MAR 13:13 ꠀꠞ ꠀꠝꠣꠞ ꠟꠣꠉꠤ ꠢꠇꠟꠦ ꠔꠥꠝꠞꠣꠞꠦ ꠊꠤꠘ꠆ꠘꠣꠁꠛ, ꠅꠁꠟꠦ ꠢꠦꠡ ꠙꠞ꠆ꠎꠘ꠆ꠔ ꠎꠦ ꠐꠤꠇꠤꠀ ꠞꠁꠛ, ꠢꠦ ꠞꠦꠢꠣꠁ ꠙꠣꠁꠛ।
MAR 13:14 “ꠎꠦ ꠔꠤꠟꠣꠅꠔ ꠇꠞꠦꠞ ꠢꠦ ꠛꠥꠎꠃꠇ, ꠛꠦꠎꠥꠁꠔꠣ ꠝꠍꠤꠛꠔꠞ ꠊꠤꠘ꠆ꠘꠣꠞ ꠁ ꠌꠤꠎ ꠎꠦ ꠎꠣꠉꠣꠔ ꠀꠅꠀꠞ ꠇꠕꠣ ꠘꠣꠄ, ꠁ ꠌꠤꠎꠞꠦ ꠎꠦꠛꠟꠣ ꠅꠘꠅ ꠖꠦꠈꠛꠣꠄ, ꠅꠃ ꠡꠝꠄ ꠎꠦꠞꠣ ꠄꠢꠥꠖꠤꠀ ꠎꠤꠟꠣꠔ ꠀꠍꠂꠘ, ꠔꠣꠞꠣ ꠜꠣꠉꠤꠀ ꠙꠣꠠꠤꠀ ꠄꠟꠣꠇꠣꠔ ꠎꠣꠃꠇ।
MAR 13:15 ꠍꠣꠔꠞ ꠃꠙꠞꠦ ꠎꠦꠞꠣ ꠞꠁꠛꠣ, ꠔꠣꠞꠣ ꠟꠣꠝꠣꠔ ꠟꠣꠝꠤꠀ ꠇꠥꠘ꠆ꠔꠣ ꠘꠦꠅꠀꠞ ꠟꠣꠉꠤ ꠊꠞꠞ ꠜꠤꠔꠞꠦ ꠀꠞ ꠘꠣ ꠢꠣꠝꠣꠃꠇ।
MAR 13:16 ꠈꠦꠔꠞ ꠝꠣꠎꠦ ꠎꠦꠞꠣ ꠞꠁꠛꠣ, ꠔꠣꠞꠣꠞ ꠉꠔꠞꠞ ꠌꠣꠖ꠆ꠖꠞ ꠘꠦꠅꠀꠞ ꠟꠣꠉꠤ ꠛꠣꠠꠤꠔ ꠘꠣ ꠀꠃꠇ।
MAR 13:17 ꠅꠃ ꠡꠝꠄ ꠎꠦꠔꠣ ꠛꠦꠐꠤꠘ꠆ꠔꠞ ꠢꠥꠞꠥꠔ꠆ꠔꠣ ꠅꠁꠔꠣ, ꠀꠞ ꠎꠦꠞꠣ ꠢꠥꠞꠥꠔ꠆ꠔꠣꠞꠦ ꠛꠥꠇꠥꠞ ꠖꠥꠗ ꠈꠣꠅꠀꠁꠞꠣ, ꠔꠣꠞꠣꠞ ꠛꠠ ꠎꠛꠞ ꠝꠍꠤꠛꠔ ꠅꠁꠛ।
MAR 13:18 ꠔꠥꠝꠞꠣ ꠖꠥꠀ ꠇꠞꠅ, ꠁꠔꠣ ꠎꠣꠘꠥ ꠡꠤꠔꠞ ꠖꠤꠘꠅ ꠘꠣ ꠅꠄ।
MAR 13:19 ꠅꠃ ꠡꠝꠄ ꠔ ꠅꠔ ꠛꠦꠎꠥꠁꠔꠣ ꠇꠡ꠆ꠐ ꠅꠁꠛ, ꠎꠦꠔꠣ ꠖꠥꠘꠤꠀꠞ ꠙꠄꠟꠣ ꠕꠘꠦ ꠀꠁꠎ ꠙꠞ꠆ꠎꠘ꠆ꠔ ꠇꠥꠘꠥꠖꠤꠘ ꠅꠁꠍꠦ ꠘꠣ, ꠀꠞ ꠇꠥꠘꠥꠖꠤꠘ ꠅꠁꠔ-ꠅ ꠘꠣꠄ।
MAR 13:20 ꠝꠣꠛꠥꠖꠦ ꠎꠥꠖꠤ ꠁ ꠡꠝꠄꠞꠦ ꠇꠝꠣꠁꠀ ꠘꠣ ꠖꠤꠔꠣ, ꠔꠦ ꠇꠦꠃ ꠎꠤꠘ꠆ꠖꠣ ꠞꠁꠟ ꠘꠣ ꠅꠘꠦ। ꠅꠁꠟꠦ ꠀꠟ꠆ꠟꠣꠄ ꠔꠣꠘ ꠙꠍꠘ꠆ꠖ ꠇꠞꠣ ꠛꠘ꠆ꠖꠣ ꠅꠇꠟꠞ ꠟꠣꠉꠤ ꠁ ꠡꠝꠄ ꠇꠝꠣꠁ ꠖꠤꠍꠂꠘ।
MAR 13:21 ꠢꠤ ꠡꠝꠄ ꠇꠦꠃ ꠎꠥꠖꠤ ꠔꠥꠝꠞꠣꠞꠦ ꠇꠄ, ‘ꠢꠥꠘꠍ ꠘꠤ, ꠀꠟ-ꠝꠍꠤ ꠅꠘꠅ ꠀꠁꠍꠂꠘ’, ꠛꠣ ‘ꠖꠦꠈꠅ, ꠅꠃꠘꠥ ꠔꠣꠁꠘ’, ꠔꠦ ꠔꠥꠝꠞꠣ ꠁꠔꠣ ꠄꠇꠤꠘ ꠇꠞꠤꠅ ꠘꠣ।
MAR 13:22 ꠇꠣꠞꠘ ꠛꠃꠔ ꠜꠘ꠆ꠒꠄ ꠀꠁꠀ ꠇꠁꠛ, ꠀꠝꠤꠃ ꠀꠟ-ꠝꠍꠤ, ꠀꠞ ꠛꠃꠔ ꠜꠘ꠆ꠒ ꠘꠛꠤꠅ ꠀꠁꠛꠣ। ꠡꠝ꠆ꠛꠛ ꠅꠁꠟꠦ ꠔꠣꠞꠣ ꠀꠟ꠆ꠟꠣꠞ ꠙꠍꠘ꠆ꠖ ꠇꠞꠣ ꠛꠘ꠆ꠖꠣ ꠅꠇꠟꠞꠦꠅ ꠗꠥꠇꠣ ꠖꠤꠀ ꠛꠦ-ꠙꠕꠦ ꠘꠤꠔꠣ ꠇꠞꠤ ꠛꠃꠔ ꠇꠦꠞꠣꠝꠔꠤ-ꠝꠥꠎꠦꠎꠣ ꠖꠦꠈꠣꠁꠛꠣ।
MAR 13:23 ꠅꠁꠟꠦ ꠔꠥꠝꠞꠣ ꠢꠥꠡꠤꠀꠞ ꠞꠁꠅ, ꠀꠝꠤ ꠔ ꠔꠥꠝꠞꠣꠞꠦ ꠀꠉꠦꠃ ꠁꠔꠣ ꠢꠣꠟ-ꠢꠇꠤꠇꠔ ꠎꠣꠘꠣꠁ ꠖꠤꠟꠣꠝ।
MAR 13:24 “ꠅꠃ ꠝꠍꠤꠛꠔꠞ ꠡꠝꠄ ꠙꠣꠞꠘꠤꠞ ꠛꠣꠖꠦ, ꠡꠥꠞꠥꠎ ꠀꠘ꠆ꠖꠣꠁꠞ ꠅꠁꠎꠤꠛ, ꠌꠣꠘ꠆ꠖꠦ ꠀꠞ ꠚꠞ ꠖꠤꠔ ꠘꠣꠄ।
MAR 13:25 ꠔꠦꠞꠣ ꠅꠇꠟ ꠀꠍꠝꠣꠘ ꠕꠣꠇꠤ ꠈꠥꠟꠤꠀ ꠙꠠꠤꠎꠤꠛ, ꠀꠍꠝꠣꠘꠞ ꠇꠥꠘꠥ ꠡꠇ꠆ꠔꠤꠀꠟꠣ ꠌꠤꠎꠃ ꠑꠤꠇ-ꠑꠣꠇ ꠞꠁꠔ ꠘꠣꠄ।
MAR 13:26 ꠅꠃ ꠡꠝꠄ ꠝꠣꠘꠡꠦ ꠖꠦꠈꠛꠣ, ꠛꠤꠘ-ꠀꠖꠝꠦ ꠀꠟ꠆ꠟꠣꠞ ꠇꠥꠖꠞꠔꠤ ꠎꠣꠟꠣꠟ ꠀꠞ ꠡꠣꠘ-ꠔꠎꠟ꠆ꠟꠤꠄ, ꠝꠦꠊꠞ ꠐꠥꠇꠞꠣꠔ ꠅꠁꠀ ꠖꠥꠘꠤꠀꠔ ꠔꠡꠞꠤꠚ ꠀꠘꠞꠣ।
MAR 13:27 ꠔꠣꠁꠘ ꠚꠤꠞꠤꠡ꠆ꠔꠣ ꠅꠇꠟꠞꠦ ꠖꠥꠘꠤꠀꠞ ꠄꠇ ꠝꠣꠕꠣ ꠕꠣꠇꠤ ꠀꠞꠇ ꠝꠣꠕꠣꠔ ꠙꠣꠑꠣꠁꠀ, ꠀꠟ꠆ꠟꠣꠞ ꠙꠍꠘ꠆ꠖ ꠇꠞꠣ ꠛꠘ꠆ꠖꠣ ꠅꠇꠟꠞꠦ ꠌꠣꠁꠞꠅꠛꠣꠄ ꠕꠘꠦ ꠖꠟꠣ ꠇꠞꠛꠣ।
MAR 13:28 “ꠒꠥꠝꠥꠞ ꠉꠣꠍꠞ ꠛꠣꠄ ꠌꠣꠁꠀ ꠁꠟꠤꠝ ꠇꠣꠝꠣꠁ ꠇꠞꠅ। ꠉꠣꠍꠞ ꠒꠣꠟ-ꠙꠣꠟꠣ ꠘꠞꠝ ꠅꠁꠀ ꠎꠦꠛꠟꠣ ꠘꠄꠀ ꠇꠥꠠꠤ ꠛꠣꠞꠅꠄ, ꠅꠃ ꠡꠝꠄ ꠔꠥꠝꠞꠣ ꠛꠥꠎꠤꠟꠣꠅ ꠉꠞꠝꠞ ꠖꠤꠘ ꠀꠁꠌ꠆ꠍꠦ।
MAR 13:29 ꠔꠦ ꠅꠃ ꠟꠣꠈꠣꠘ ꠔꠥꠝꠞꠣ ꠎꠦꠛꠟꠣ ꠖꠦꠈꠛꠣꠄ ꠁꠔꠣ ꠢꠇꠟꠔꠣ ꠊꠐꠦꠞ, ꠖꠦꠈꠤꠀ ꠛꠥꠎꠤꠟꠤꠅ, ꠛꠤꠘ-ꠀꠖꠝꠅ ꠗꠣꠞꠅ ꠀꠁꠌ꠆ꠍꠂꠘ। ꠈꠣꠟꠤ ꠗꠣꠞꠅ ꠘꠣꠄ, ꠔꠣꠁꠘ ꠀꠁꠀ ꠖꠥꠀꠞꠅ ꠑꠥꠇꠣꠁꠞꠣ।
MAR 13:30 ꠀꠝꠤ ꠔꠥꠝꠞꠣꠞꠦ ꠢꠇ ꠇꠕꠣ ꠇꠁꠞꠣꠝ, ꠁꠔꠣ ꠘꠣ ꠊꠐꠣ ꠙꠞ꠆ꠎꠘ꠆ꠔ ꠁ ꠎꠝꠣꠘꠣꠞ ꠝꠣꠘꠥꠡ ꠚꠥꠠꠣꠁꠔꠣ ꠘꠣꠄ।
MAR 13:31 ꠀꠍꠝꠣꠘ-ꠎꠝꠤꠘ ꠢꠇꠟꠔꠣ ꠛꠤꠘꠣꠡ ꠅꠁꠎꠤꠛ, ꠅꠁꠟꠦ ꠀꠝꠣꠞ ꠇꠣꠟꠣꠝ ꠢꠣꠝꠦꠡꠣ ꠇꠣꠁꠝ ꠞꠁꠛ।
MAR 13:32 “ꠢꠃ ꠖꠤꠘ ꠀꠞ ꠢꠤ ꠡꠝꠄꠅꠞ ꠛꠦꠙꠣꠞꠦ ꠈꠣꠟꠤ ꠀꠝꠣꠞ ꠉꠣꠁꠛꠤ ꠛꠣꠚ ꠛꠣꠖꠦ ꠀꠞ ꠇꠦꠃ ꠎꠣꠘꠂꠘ ꠘꠣ। ꠀꠍꠝꠣꠘꠤ ꠚꠤꠞꠤꠡ꠆ꠔꠣ ꠛꠣ ꠈꠣꠍ ꠝꠣꠄꠀꠞ ꠎꠘꠦꠅ ꠎꠣꠘꠂꠘ ꠘꠣ।
MAR 13:33 ꠔꠥꠝꠞꠣ ꠢꠥꠡꠤꠀꠞ ꠅꠅ, ꠈꠤꠀꠟ ꠇꠞꠤ ꠌꠟꠅ ꠀꠞ ꠖꠥꠀ ꠇꠞꠅ। ꠢꠤ ꠖꠤꠘ ꠇꠥꠘ ꠡꠝꠄ ꠀꠁꠛ, ꠔꠥꠝꠞꠣ ꠇꠦꠃ ꠔ ꠎꠣꠘ ꠘꠣ।
MAR 13:34 ꠅꠟꠣ ꠄꠇ ꠝꠣꠘꠡꠞ ꠟꠣꠈꠣꠘ ꠢꠤ ꠖꠤꠘ ꠀꠁꠛ, ꠎꠦꠁꠘ ꠛꠤꠖꠦꠡ ꠎꠣꠅꠀꠞ ꠡꠝꠄ ꠔꠣꠘ ꠉꠥꠟꠣꠝ ꠅꠇꠟꠞ ꠀꠔꠅ ꠢꠇꠟꠔꠣ ꠡꠝꠎꠣꠁ ꠖꠤꠀ ꠎꠣꠞꠎꠤꠞ ꠇꠣꠝ ꠛꠥꠎꠣꠁ ꠖꠤꠟꠣ। ꠀꠞ ꠌꠇꠤꠖꠣꠞꠞꠦ ꠇꠁꠟꠣ ꠢꠎꠣꠉ ꠞꠁꠔ।
MAR 13:35 ꠔꠥꠝꠞꠣꠅ ꠅꠃꠟꠣ ꠢꠎꠣꠉ ꠞꠁꠅ। ꠛꠣꠠꠤꠞ ꠝꠣꠟꠤꠇ ꠇꠥꠘ ꠡꠝꠄ ꠀꠁꠛꠣ, ꠢꠣꠁꠘ꠆ꠎꠣ ꠛꠣꠟꠣ, ꠝꠣꠎ ꠞꠣꠁꠔꠦ, ꠙꠔꠣꠛꠣꠟꠣ ꠘꠣ ꠚꠎꠞꠦ ꠀꠁꠛꠣ, ꠁꠈꠣꠘ ꠔ ꠔꠥꠝꠞꠣ ꠇꠦꠃ ꠎꠣꠘ ꠘꠣ।
MAR 13:36 ꠔꠣꠁꠘ ꠀꠈꠔꠣ ꠀꠁꠟꠦ ꠎꠣꠘꠥ ꠘꠣ ꠖꠦꠈꠂꠘ, ꠔꠥꠝꠞꠣ ꠊꠥꠝꠣꠁ ꠞꠁꠍ।
MAR 13:37 ꠀꠝꠤ ꠔꠥꠝꠞꠣꠞꠦ ꠎꠦꠟꠣ ꠇꠁꠟꠣꠝ, ꠢꠇꠟꠞꠦꠃ ꠅꠃꠟꠣ ꠇꠁꠞꠣꠝ, ꠢꠎꠣꠉ ꠞꠅ।”
MAR 14:1 ꠀꠎꠣꠖꠤ ꠁꠖ ꠀꠞ ꠈꠣꠝꠤꠞ ꠍꠣꠠꠣ ꠞꠥꠐꠤꠞ ꠁꠖꠞ ꠈꠣꠟꠤ ꠖꠥꠁ ꠖꠤꠘ ꠛꠣꠇꠤ ꠞꠁꠍꠦ। ꠛꠠ ꠁꠝꠣꠝ ꠀꠞ ꠝꠃꠟꠣꠘꠣ ꠅꠇꠟꠦ, ꠢꠎꠞꠔ ꠁꠍꠣꠞꠦ ꠝꠣꠘꠡꠞ ꠀꠚꠞꠈꠦ ꠗꠞꠤꠀ ꠎꠣꠘꠦ ꠝꠣꠞꠤꠟꠤꠛꠣꠞ ꠗꠣꠘ꠆ꠖꠣ ꠟꠣꠉꠣꠁꠟꠣ।
MAR 14:2 ꠔꠣꠞꠣ ꠇꠁꠟꠣ, “ꠁꠖꠞ ꠡꠝꠄ ꠔꠣꠞꠦ ꠗꠞꠔꠣꠝ ꠘꠣꠄ। ꠗꠞꠟꠦ ꠝꠣꠘꠡꠦ ꠉꠘ꠆ꠒꠉꠥꠟ ꠟꠣꠉꠣꠁ ꠖꠤꠔ ꠙꠣꠞꠦ।”
MAR 14:3 ꠁꠍꠣ ꠅꠃ ꠡꠝꠄ ꠛꠣꠄꠔ-ꠀꠘꠤꠀ ꠉꠣꠃꠞ ꠙꠌꠣ-ꠇꠥꠡ꠆ꠑ ꠛꠦꠝꠣꠞꠤ ꠍꠣꠁꠝꠘꠞ ꠛꠣꠠꠤꠔ ꠀꠍꠟꠣ। ꠅꠘꠅ ꠛꠁꠀ ꠔꠣꠁꠘ ꠈꠣꠘꠣ ꠈꠣꠁꠞꠣ, ꠀꠈꠔꠣꠃ ꠄꠇ ꠛꠦꠐꠤ ꠝꠣꠘꠡꠦ ꠌꠤꠘꠞ ꠄꠇ ꠛꠥꠔꠟꠅ ꠇꠞꠤ ꠈꠥꠛ ꠖꠣꠝꠤ ꠈꠣꠐꠤ ꠀꠔꠞ ꠟꠁꠀ ꠀꠁꠀ, ꠛꠥꠔꠟ ꠜꠣꠋꠉꠤꠀ ꠢꠇꠟ ꠀꠔꠞ ꠔꠣꠘ ꠝꠣꠕꠣꠔ ꠓꠣꠟꠤ ꠖꠤꠟ।
MAR 14:4 ꠁꠔꠣ ꠖꠦꠈꠤꠀ ꠢꠤꠘꠅ ꠀꠎꠤꠞ ꠇꠥꠘꠥ ꠇꠥꠘꠥ ꠎꠘꠦ ꠘꠣ-ꠈꠥꠡ ꠅꠁꠀ ꠄꠇꠦ-ꠅꠁꠘ꠆ꠘꠦ ꠇꠁꠟ, “ꠁ ꠀꠔꠞ ꠚꠥꠐꠣꠁꠘ ꠇꠦꠘꠦ ꠛꠞꠛꠣꠖ ꠇꠞꠣ ꠅꠁꠟ?
MAR 14:5 ꠁ ꠚꠥꠐꠤꠘ ꠛꠦꠌꠤꠟꠦ ꠔ ꠔꠤꠘ-ꠡ ꠖꠤꠘꠣꠞ ꠙꠣꠁꠀ ꠉꠞꠤꠛ ꠅꠇꠟꠞꠦ ꠛꠤꠟꠣꠁ ꠖꠦꠅꠀ ꠉꠦꠟ ꠅꠘꠦ।” ꠅꠔꠣꠞ ꠟꠣꠉꠤ ꠔꠣꠞꠣ ꠛꠦꠐꠤꠞꠦ ꠛꠇꠣ-ꠎꠇꠣ ꠇꠞꠟꠣ।
MAR 14:6 ꠅꠁꠟꠦ ꠁꠍꠣꠄ ꠇꠁꠟꠣ, “ꠅꠁꠍꠦ, ꠔꠣꠘꠞꠦ ꠀꠞ ꠇꠥꠘ꠆ꠔꠣ ꠇꠁꠅ ꠘꠣ। ꠔꠣꠁꠘ ꠔ ꠀꠝꠣꠞ ꠟꠣꠉꠤ ꠈꠥꠛ ꠡꠥꠘ꠆ꠖꠞ ꠇꠣꠝ ꠇꠞꠍꠂꠘ।
MAR 14:7 ꠉꠞꠤꠛ ꠅꠇꠟ ꠔ ꠢꠣꠝꠦꠡꠣꠃ ꠔꠥꠝꠞꠣꠞ ꠟꠉꠦ ꠞꠁꠛꠣ। ꠔꠥꠝꠞꠣꠞ ꠎꠦꠛꠟꠣ ꠝꠘꠦ ꠌꠣꠄ ꠔꠣꠞꠣꠞꠦ ꠡꠣꠁꠎ꠆ꠎ ꠇꠞꠔꠣꠄ ꠙꠣꠞꠛꠣꠄ। ꠅꠁꠟꠦ ꠀꠝꠣꠞꠦ ꠔ ꠢꠣꠝꠦꠡꠣ ꠙꠣꠁꠔꠣꠄ ꠘꠣꠄ।
MAR 14:8 ꠛꠦꠌꠣꠠꠤꠄ ꠎꠦꠈꠣꠘ ꠙꠣꠞꠍꠂꠘ ꠅꠈꠣꠘꠃ ꠇꠞꠍꠂꠘ। ꠄꠁꠘ ꠀꠁꠀ ꠀꠝꠣꠞ ꠉꠔꠞꠅ ꠀꠔꠞ ꠓꠣꠟꠤꠀ, ꠖꠣꠚꠘ-ꠇꠣꠚꠘꠞ ꠟꠣꠉꠤ ꠀꠝꠣꠞꠦ ꠀꠉꠦꠃ ꠎꠥꠁꠔ ꠇꠞꠍꠂꠘ।
MAR 14:9 ꠀꠝꠤ ꠔꠥꠝꠞꠣꠞꠦ ꠢꠇ ꠇꠕꠣ ꠇꠁꠀꠞ, ꠖꠥꠘꠤꠀꠞ ꠎꠦꠇꠥꠘꠥ ꠎꠣꠉꠣꠔ ꠀꠟ꠆ꠟꠣꠞ ꠈꠥꠡ-ꠈꠛꠞꠤ ꠔꠛꠟꠤꠉ ꠇꠞꠣꠞ ꠡꠝꠄ, ꠅꠃ ꠛꠦꠌꠣꠠꠤꠞꠦ ꠝꠘꠅ ꠇꠞꠣꠞ ꠟꠣꠉꠤ, ꠔꠣꠘ ꠁ ꠇꠣꠝꠞ ꠇꠕꠣ ꠈꠣꠘꠅ ꠇꠅꠀ ꠎꠣꠁꠛ।”
MAR 14:10 ꠛꠣꠖꠦ ꠔꠣꠘ ꠛꠣꠞꠅꠎꠘ ꠍꠣꠢꠣꠛꠤꠞ ꠝꠣꠎꠞ ꠄꠇꠎꠘ, ꠄꠘ ꠘꠣꠝ ꠁꠢꠥꠖꠣ ꠁꠡ꠆ꠇꠣꠞꠤꠀꠔ, ꠄꠁꠘ ꠁꠍꠣꠞꠦ ꠗꠞꠣꠁꠀ ꠖꠦꠅꠀꠞ ꠟꠣꠉꠤ ꠛꠠ ꠁꠝꠣꠝ ꠅꠇꠟꠞ ꠉꠦꠍꠦ ꠉꠦꠟꠣ।
MAR 14:11 ꠁꠝꠣꠝ ꠅꠇꠟꠦ ꠢꠥꠘꠤꠀ ꠈꠥꠛ ꠈꠥꠡꠤ ꠅꠁꠀ ꠇꠁꠟꠣ, “ꠔꠣꠞꠦ ꠗꠞꠣꠁꠀ ꠖꠤꠟꠦ ꠔꠥꠝꠣꠞꠦ ꠐꠦꠇꠣ ꠖꠤꠝꠥ।” ꠔꠦꠃ ꠁꠢꠥꠖꠣꠄ ꠔꠣꠘꠞꠦ ꠗꠞꠣꠁ ꠖꠦꠅꠀꠞ ꠡꠥꠎꠥꠉ ꠔꠥꠇꠣꠘꠤꠔ ꠞꠁꠟ।
MAR 14:12 ꠈꠣꠝꠤꠞ ꠍꠣꠠꠣ ꠞꠥꠐꠤꠞ ꠁꠖꠞ ꠙꠄꠟꠣ ꠖꠤꠘ, ꠀꠎꠣꠖꠤ ꠁꠖꠞ ꠟꠣꠉꠤ ꠝꠦꠠꠣ-ꠛꠣꠁꠌ꠆ꠌꠣ ꠎꠛ ꠇꠞꠣ ꠅꠁꠔ। ꠄꠞꠖꠣꠄ ꠍꠣꠢꠣꠛꠤ ꠅꠇꠟꠦ ꠁꠍꠣꠞꠦ ꠎꠤꠇꠣꠁꠟꠣ, “ꠢꠥꠎꠥꠞ, ꠀꠝꠞꠣ ꠇꠥꠘ ꠎꠣꠉꠣꠔ ꠉꠤꠀ ꠀꠙꠘꠣꠞ ꠟꠣꠉꠤ ꠁꠖꠞ ꠈꠣꠘꠣ ꠔꠤꠀꠞ ꠇꠞꠔꠣꠝ?”
MAR 14:13 ꠅꠃ ꠁꠍꠣꠄ ꠔꠣꠘ ꠖꠥꠁꠎꠘ ꠍꠣꠢꠣꠛꠤꠞꠦ ꠇꠁꠟꠣ, “ꠔꠥꠝꠞꠣ ꠐꠣꠃꠘꠅ ꠎꠣꠅ। ꠉꠤꠀ ꠖꠦꠈꠛꠣꠄ ꠢꠘꠅ ꠄꠇ ꠛꠦꠐꠣ ꠝꠣꠘꠡꠦ ꠈꠂꠟꠣꠖꠤ ꠙꠣꠘꠤ ꠜꠞꠤꠀ ꠘꠤꠞꠣ। ꠔꠥꠝꠞꠣ ꠔꠣꠘ ꠈꠞꠦ ꠈꠞꠦ ꠎꠣꠁꠅ।
MAR 14:14 ꠔꠣꠁꠘ ꠎꠦ ꠛꠣꠠꠤꠔ ꠉꠤꠀ ꠢꠣꠝꠣꠁꠛꠣ, ꠢꠃ ꠛꠣꠠꠤꠞ ꠝꠣꠟꠤꠇꠞꠦ ꠔꠥꠝꠞꠣ ꠇꠁꠅ, ‘ꠍꠣꠛ, ꠝꠥꠞꠡꠤꠖꠦ ꠇꠁꠍꠂꠘ, ꠍꠣꠢꠣꠛꠤ ꠅꠇꠟꠞꠦ ꠟꠁꠀ ꠀꠝꠤ ꠎꠦꠈꠣꠘꠅ ꠀꠎꠣꠖꠤ ꠁꠖꠞ ꠈꠣꠘꠣ ꠈꠣꠁꠔꠣꠝ, ꠢꠃ ꠝꠥꠍꠣꠚꠤꠞꠈꠣꠘꠣ ꠈꠣꠘ ꠖꠦꠈꠣꠁ ꠖꠦꠃꠇ꠆ꠇꠣ।’
MAR 14:15 ꠔꠣꠁꠘ ꠔꠥꠝꠞꠣꠞꠦ ꠃꠙꠞ ꠔꠣꠟꠣꠔ ꠢꠣꠎꠣꠁꠟ-ꠙꠣꠠꠣꠁꠟ ꠄꠇ ꠛꠠ ꠇꠥꠑꠣ ꠖꠦꠈꠣꠁ ꠖꠤꠛꠣ। ꠔꠥꠝꠞꠣ ꠅꠘꠅ ꠢꠇꠟꠔꠣ ꠔꠤꠀꠞ ꠇꠞꠤꠅ।”
MAR 14:16 ꠔꠦꠃ ꠍꠣꠢꠣꠛꠤ ꠅꠇꠟ ꠉꠤꠀ ꠐꠣꠃꠘꠅ ꠢꠣꠝꠣꠁꠟꠣ। ꠢꠣꠝꠣꠁꠀ ꠁꠍꠣꠄ ꠎꠦꠟꠣꠈꠣꠘ ꠇꠁꠍꠟꠣ, ꠑꠤꠇ ꠅꠃ ꠟꠣꠈꠣꠘ ꠢꠇꠟꠔꠣ ꠙꠣꠁꠟꠣ ꠀꠞ ꠁꠖꠞ ꠈꠣꠘꠣ ꠔꠤꠀꠞ ꠇꠞꠟꠣ।
MAR 14:17 ꠢꠣꠁꠘ꠆ꠎꠣ ꠛꠣꠟꠣ ꠁꠍꠣꠄ ꠔꠣꠘ ꠛꠣꠞꠅꠎꠘ ꠍꠣꠢꠣꠛꠤꠞꠦ ꠟꠁꠀ ꠅꠘꠅ ꠀꠁꠟꠣ।
MAR 14:18 ꠀꠁꠀ ꠈꠣꠘꠤ ꠈꠣꠅꠀꠞ ꠡꠝꠄ ꠔꠣꠁꠘ ꠇꠁꠟꠣ, “ꠀꠝꠤ ꠔꠥꠝꠞꠣꠞꠦ ꠢꠇ ꠇꠕꠣ ꠇꠁꠞꠣꠝ, ꠔꠥꠝꠞꠣꠞ ꠝꠣꠎꠞ ꠄꠇ ꠎꠘꠦꠃ ꠛꠦꠁꠝꠣꠘꠤ ꠇꠞꠤꠀ ꠀꠝꠣꠞꠦ ꠗꠞꠣꠁ ꠖꠤꠛ, ꠢꠦ ꠅꠈꠘ ꠀꠝꠣꠞ ꠟꠉꠦ ꠛꠁꠀ ꠈꠣꠞ।”
MAR 14:19 ꠁꠈꠣꠘ ꠢꠥꠘꠤꠀ ꠔꠣꠞꠣ ꠈꠥꠛ ꠛꠦꠎꠣꠞ ꠅꠁꠉꠦꠟꠣ। ꠀꠞ ꠄꠇ ꠄꠇ ꠇꠞꠤ ꠎꠤꠇꠣꠁꠟꠣ, “ꠢꠥꠎꠥꠞ, ꠁ ꠎꠘ ꠇꠤꠔꠣ ꠀꠝꠤ ꠘꠤ?”
MAR 14:20 ꠔꠣꠁꠘ ꠇꠁꠟꠣ, “ꠢꠦ ꠅꠃ ꠛꠣꠞꠅꠎꠘꠞ ꠝꠣꠎꠞꠃ ꠄꠇꠎꠘ। ꠢꠦ ꠅꠈꠘ ꠀꠝꠣꠞ ꠟꠉꠦ ꠕꠣꠟꠅ ꠀꠔ ꠢꠣꠞꠣꠞ।
MAR 14:21 ꠛꠤꠘ-ꠀꠖꠝꠞ ꠝꠃꠔꠞ ꠛꠦꠙꠣꠞꠦ ꠀꠍꠝꠣꠘꠤ ꠇꠤꠔꠣꠛꠅ ꠎꠦꠟꠣ ꠟꠦꠈꠣ ꠀꠍꠦ, ꠔꠣꠘ ꠝꠃꠔ ꠔ ꠅꠃꠟꠣꠃ ꠅꠁꠛ, ꠅꠁꠟꠦ ꠀꠚꠍꠥꠍ ꠢꠃ ꠝꠣꠘꠡꠞ ꠟꠣꠉꠤ, ꠎꠦ ꠔꠣꠘꠞꠦ ꠗꠞꠣꠁꠀ ꠖꠤꠛ। ꠖꠥꠘꠤꠀꠔ ꠔꠣꠞ ꠎꠘꠝ ꠘꠣ ꠅꠀꠃ, ꠔꠣꠞ ꠟꠣꠉꠤ ꠛꠃꠔ ꠜꠣꠟꠣ ꠀꠍꠤꠟ।”
MAR 14:22 ꠈꠣꠘꠣꠔ ꠞꠁꠍꠂꠘ, ꠅꠃ ꠡꠝꠄ ꠁꠍꠣꠄ ꠞꠥꠐꠤ ꠀꠔꠅ ꠟꠁꠀ ꠀꠟ꠆ꠟꠣꠞ ꠡꠥꠇꠞꠤꠀ ꠀꠖꠣꠄ ꠇꠞꠤꠀ, ꠍꠤꠠꠤꠀ ꠐꠥꠇꠞꠣ ꠐꠥꠇꠞꠣ ꠇꠞꠤ ꠍꠣꠢꠣꠛꠤ ꠅꠇꠟꠞ ꠀꠔꠅ ꠖꠤꠀ ꠇꠁꠟꠣ, “ꠅꠃ ꠘꠦꠅ, ꠝꠘꠅ ꠇꠞꠅ ꠁꠔꠣ ꠀꠝꠣꠞ ꠡꠞꠤꠟ।”
MAR 14:23 ꠛꠣꠖꠦ ꠔꠣꠁꠘ ꠀꠋꠉꠥꠞꠞ ꠡꠞꠛꠔꠞ ꠙꠤꠀꠟꠣ ꠟꠁꠀ ꠀꠟ꠆ꠟꠣꠞ ꠡꠥꠇꠞꠤꠀ ꠎꠣꠘꠣꠁꠀ ꠄꠞꠣꠞꠦ ꠖꠤꠟꠣ। ꠄꠞꠣ ꠢꠇꠟꠦ ꠅꠃ ꠙꠤꠀꠟꠣ ꠕꠣꠇꠤ ꠡꠞꠛꠔ ꠈꠣꠁꠟꠣ।
MAR 14:24 ꠁꠍꠣꠄ ꠇꠁꠟꠣ, “ꠈꠣꠅ, ꠝꠘꠅ ꠇꠞꠅ ꠁꠔꠣ ꠀꠝꠣꠞ ꠟꠃ। ꠅꠃ ꠟꠃꠞ ꠎꠞꠤꠀꠄ ꠀꠖꠝ ꠎꠣꠔꠤꠞ ꠛꠃꠔꠞ ꠛꠣꠌꠤꠛꠣꠞ ꠟꠣꠉꠤ ꠘꠄꠀ ꠃꠍꠤꠟ꠆ꠟꠣ ꠇꠣꠁꠝ ꠇꠞꠣ ꠅꠁꠛ।
MAR 14:25 ꠀꠝꠤ ꠢꠣꠍꠣ ꠇꠕꠣ ꠇꠁꠞꠣꠝ, ꠎꠦꠁ ꠙꠞ꠆ꠎꠘ꠆ꠔ ꠀꠟ꠆ꠟꠣꠞ ꠛꠣꠖꠡꠣꠁꠔ ꠖꠣꠈꠤꠟ ꠅꠁꠀ ꠀꠝꠤ ꠀꠋꠉꠥꠞꠞ ꠡꠞꠛꠔ ꠘꠣ ꠈꠣꠁꠍꠤ, ꠅꠔ ꠖꠤꠘ ꠁ ꠟꠣꠈꠣꠘ ꠡꠞꠛꠔ ꠀꠞ ꠈꠣꠁꠔꠣꠝ ꠘꠣꠄ।”
MAR 14:26 ꠢꠦꠡꠦ ꠢꠇꠟꠦ ꠝꠤꠟꠤ ꠄꠇ ꠉꠎꠟ ꠉꠣꠁꠀ, ꠊꠞ ꠕꠣꠇꠤ ꠛꠣꠞ ꠅꠁꠀ ꠎꠄꠔꠥꠘ ꠙꠣꠠꠅ ꠉꠦꠟꠣꠉꠤ।
MAR 14:27 ꠙꠣꠠꠅ ꠉꠤꠀ ꠁꠍꠣꠄ ꠔꠣꠘ ꠍꠣꠢꠣꠛꠤ ꠅꠇꠟꠞꠦ ꠇꠁꠟꠣ, “ꠔꠥꠝꠞꠣ ꠢꠇꠟꠦꠃ ꠔ ꠀꠝꠣꠞꠦ ꠚꠣꠟꠣꠁꠀ ꠜꠣꠉꠤꠛꠣꠄ। ꠀꠟ꠆ꠟꠣꠞ ꠇꠣꠟꠣꠝꠅ ꠀꠍꠦ, ‘ꠀꠝꠤ ꠙꠣꠟꠞ ꠞꠣꠈꠣꠟꠞꠦ ꠝꠣꠞꠤꠟꠤꠝꠥ, ꠔꠦꠃ ꠙꠣꠟꠞ ꠝꠦꠠꠣꠁꠘ ꠌꠣꠁꠞꠅꠛꠣꠄ ꠍꠤꠔ꠆ꠞꠤꠎꠤꠛꠣ।’
MAR 14:28 ꠅꠁꠟꠦ ꠀꠝꠣꠞꠦ ꠝꠥꠞ꠆ꠖꠣ ꠕꠣꠇꠤ ꠎꠤꠘ꠆ꠖꠣ ꠇꠞꠣꠞ ꠛꠣꠖꠦ, ꠔꠥꠝꠞꠣꠞ ꠀꠉꠦꠃ ꠀꠝꠤ ꠉꠣꠟꠤꠟꠅ ꠎꠣꠁꠝꠥꠉꠤ।”
MAR 14:29 ꠙꠤꠔꠞꠦ ꠔꠣꠘꠞꠦ ꠇꠁꠟꠣ, “ꠢꠥꠎꠥꠞ, ꠢꠇꠟ ꠜꠣꠉꠤ ꠉꠦꠟꠦꠅ ꠀꠝꠤ ꠜꠣꠉꠤꠔꠣꠝ ꠘꠣꠄ।”
MAR 14:30 ꠁꠍꠣꠄ ꠇꠁꠟꠣ, “ꠔꠦ ꠢꠥꠘꠅ, ꠀꠝꠤ ꠔꠥꠝꠣꠞꠦ ꠇꠁꠞꠣꠝ, ꠀꠁꠎ ꠙꠔꠣꠛꠣꠟꠣ ꠝꠥꠞꠉꠣꠄ ꠖꠥꠁꠛꠣꠞ ꠛꠣꠋ ꠖꠤꠛꠣꠞ ꠀꠉꠦꠃ, ꠔꠥꠝꠤ ꠔꠤꠘꠛꠣꠞ ꠇꠁꠛꠣꠄ, ꠔꠥꠝꠤ ꠀꠝꠣꠞꠦ ꠌꠤꠘ ꠘꠣ।”
MAR 14:31 ꠅꠁꠟꠦ ꠙꠤꠔꠞꠦ ꠀꠞꠅ ꠛꠠ ꠉꠟꠣꠄ ꠇꠁꠟꠣ, “ꠢꠥꠎꠥꠞ ꠅꠃ ꠇꠤꠔꠣ ꠇꠂꠘ, ꠀꠙꠘꠣꠞ ꠟꠉꠦ ꠎꠥꠖꠤ ꠀꠝꠣꠞ ꠝꠞꠘꠅ ꠅꠄ, ꠔꠣ-ꠅ ꠀꠝꠤ ꠇꠥꠘꠥꠝꠘ꠆ꠔꠦꠃ ꠇꠁꠔꠣꠝ ꠘꠣꠄ ꠀꠝꠤ ꠀꠙꠘꠣꠞꠦ ꠌꠤꠘꠤ ꠘꠣ।” ꠢꠇꠟ ꠍꠣꠢꠣꠛꠤꠄꠅ ꠅꠃ ꠟꠣꠈꠣꠘ ꠇꠁꠟꠣ।
MAR 14:32 ꠛꠣꠖꠦ ꠢꠎꠞꠔ ꠁꠍꠣꠄ ꠔꠣꠘ ꠍꠣꠢꠣꠛꠤ ꠅꠇꠟꠞꠦ ꠟꠁꠀ ꠉꠦꠔꠡꠤꠝꠣꠘꠤ ꠘꠣꠝꠞ ꠄꠇ ꠛꠣꠉꠣꠘꠅ ꠀꠁꠟꠣ। ꠀꠁꠀ ꠔꠣꠁꠘ ꠄꠞꠣꠞꠦ ꠇꠁꠟꠣ, “ꠀꠝꠤ ꠎꠔ ꠡꠝꠄ ꠗꠞꠤ ꠖꠥꠀ ꠇꠞꠝꠥ, ꠅꠔ ꠡꠝꠄ ꠔꠥꠝꠞꠣ ꠅꠘꠅ ꠛꠅꠀꠔ ꠞꠁꠅ।”
MAR 14:33 ꠅꠈꠣꠘ ꠇꠁꠀ ꠔꠣꠁꠘ ꠙꠤꠔꠞ, ꠁꠀꠇꠥꠛ ꠀꠞ ꠢꠣꠘ꠆ꠘꠣꠘꠞꠦ ꠔꠣꠘ ꠟꠉꠦ ꠞꠣꠈꠟꠣ, ꠝꠘꠞ ꠖꠥꠈ ꠀꠞ ꠎꠣꠟꠣꠄ ꠔꠣꠁꠘ ꠛꠠ ꠔꠇꠟꠤꠚ ꠙꠣꠁꠟꠣ।
MAR 14:34 ꠔꠣꠁꠘ ꠄꠞꠣꠞꠦ ꠇꠁꠟꠣ, “ꠖꠥꠈꠦ ꠀꠝꠣꠞ ꠎꠣꠘ ꠛꠣꠞ ꠅꠁ ꠎꠣꠞꠉꠤ। ꠔꠥꠝꠞꠣ ꠢꠇꠟ ꠅꠘꠅ ꠞꠅ ꠀꠞ ꠢꠎꠣꠉ ꠕꠣꠇꠅ।”
MAR 14:35 ꠇꠁꠀ ꠕꠥꠠꠣ ꠢꠞꠤꠀ ꠉꠤꠀ ꠔꠣꠁꠘ ꠝꠣꠐꠤꠔ ꠍꠁꠎꠖꠣꠔ ꠙꠠꠤꠀ ꠀꠞꠎ ꠇꠞꠟꠣ, ꠡꠝ꠆ꠛꠛ ꠅꠁꠟꠦ ꠁ ꠝꠍꠤꠛꠔꠞ ꠅꠇ꠆ꠔꠈꠣꠘ ꠢꠞꠤꠎꠤꠛꠣꠞ ꠟꠣꠉꠤ।
MAR 14:36 ꠔꠣꠁꠘ ꠇꠁꠟꠣ, “ꠅ ꠀꠛ꠆ꠛꠣ, ꠀꠝꠣꠞ ꠅꠟꠤ, ꠔꠥꠝꠤ ꠔ ꠢꠇꠟꠔꠣꠃ ꠇꠞꠔꠣꠄ ꠙꠣꠞ। ꠔꠥꠝꠤ ꠀꠝꠣꠞ ꠃꠙꠞ ꠕꠣꠇꠤ ꠀꠘꠦꠅꠀꠟꠣ ꠅꠃ ꠝꠍꠤꠛꠔ ꠈꠣꠘ ꠢꠞꠣꠁꠟꠣꠅ। ꠅꠁꠟꠦ ꠁꠔꠣ ꠀꠝꠣꠞ ꠁꠌ꠆ꠍꠣꠄ ꠘꠣꠄ, ꠔꠥꠝꠣꠞ ꠝꠞ꠆ꠎꠤ ꠝꠣꠚꠤꠇꠃ ꠅꠃꠇ।”
MAR 14:37 ꠍꠁꠎꠖꠣ ꠕꠣꠇꠤ ꠃꠑꠤꠀ ꠔꠣꠁꠘ ꠍꠣꠢꠣꠛꠤ ꠅꠇꠟꠞ ꠉꠦꠍꠦ ꠀꠁꠀ ꠖꠦꠈꠟꠣ, ꠄꠞꠣ ꠊꠥꠝꠣꠁ ꠉꠦꠍꠂꠘ। ꠅꠃ ꠔꠣꠁꠘ ꠙꠤꠔꠞꠞꠦ ꠢꠎꠣꠉ ꠇꠞꠤ ꠇꠁꠟꠣ, “ꠍꠣꠁꠝꠘ, ꠔꠥꠝꠤ ꠊꠥꠝꠣꠁ ꠉꠦꠟꠣꠄ ꠘꠤ? ꠄꠇꠈꠣꠘ ꠊꠘ꠆ꠐꠣꠅ ꠢꠎꠣꠉ ꠞꠁꠔꠣꠄ ꠙꠣꠞꠟꠣꠄ ꠘꠣ ꠘꠤ?
MAR 14:38 ꠢꠎꠣꠉ ꠞꠅ, ꠙꠞꠤꠇ꠆ꠇꠣ ꠕꠣꠇꠤ ꠛꠣꠌꠔꠣꠄ ꠇꠞꠤ ꠖꠥꠀ ꠇꠞꠅ। ꠖꠤꠟꠞ ꠝꠣꠎꠦ ꠘꠤꠌꠄ ꠈꠤꠀꠟ ꠀꠍꠦ, ꠅꠁꠟꠦ ꠇꠣꠄꠀ ꠔ ꠇꠝꠎꠥꠞ।”
MAR 14:39 ꠛꠣꠖꠦ ꠔꠣꠁꠘ ꠢꠤꠞꠛꠣꠞ ꠉꠤꠀ ꠢꠃ ꠄꠇꠁ ꠖꠥꠀ ꠇꠞꠟꠣ।
MAR 14:40 ꠚꠤꠞꠤꠀ ꠀꠁꠀ ꠖꠦꠈꠟꠣ, ꠄꠞꠣ ꠢꠤꠞꠛꠣꠞ ꠊꠥꠝꠣꠁ ꠉꠦꠍꠂꠘ, ꠊꠥꠝꠦ ꠔꠣꠞꠣꠞ ꠌꠃꠈ ꠚꠣꠟꠣꠁ ꠖꠦꠞ। ꠔꠣꠞꠣ ꠁꠍꠣꠞꠦ ꠇꠤꠔꠣ ꠎꠥꠀꠙ ꠖꠤꠔꠣ, ꠇꠥꠘ꠆ꠔꠣ ꠛꠥꠎꠟꠣ ꠘꠣ।
MAR 14:41 ꠔꠤꠘ ꠘꠝ꠆ꠛꠞ ꠛꠣꠞ ꠔꠣꠁꠘ ꠀꠁꠀ ꠄꠞꠣꠞꠦ ꠇꠁꠟꠣ, “ꠔꠥꠝꠞꠣ ꠖꠦꠈꠤ ꠅꠈꠘꠅ ꠀꠞꠣꠝꠦ ꠊꠥꠝꠣꠁꠞꠣꠄ। ꠀꠁꠌ꠆ꠍꠣ ꠅꠁꠍꠦ, ꠡꠝꠄ ꠀꠁꠌ꠆ꠍꠦ ꠔ। ꠖꠦꠈꠞꠣꠄ ꠘꠤ, ꠛꠤꠘ-ꠀꠖꠝꠞꠦ ꠉꠥꠘꠣꠉꠣꠞ ꠅꠇꠟꠞ ꠀꠔꠅ ꠡꠝꠎꠣꠁ ꠖꠦꠅꠀ ꠅꠞ।
MAR 14:42 ꠃꠑꠅ, ꠀꠝꠞꠣ ꠞꠅꠀꠘꠣ ꠖꠦꠁ। ꠀꠝꠣꠞꠦ ꠎꠦꠉꠤꠄ ꠖꠥꠡꠝꠘꠞ ꠀꠔꠅ ꠗꠞꠣꠁ ꠖꠤꠛ, ꠢꠦ ꠀꠁꠀ ꠀꠎꠤꠉꠦꠍꠦ।”
MAR 14:43 ꠔꠣꠁꠘ ꠄꠞꠣꠞ ꠟꠉꠦ ꠝꠣꠔꠅ ꠞꠁꠍꠂꠘ, ꠅꠃ ꠡꠝꠄ ꠁꠢꠥꠖꠣ ꠢꠘꠅ ꠀꠁꠟ। ꠢꠦ ꠀꠍꠤꠟ ꠛꠣꠞꠅꠎꠘ ꠍꠣꠢꠣꠛꠤꠞ ꠝꠣꠎꠞ ꠄꠇꠎꠘ। ꠔꠣꠞ ꠟꠉꠦ ꠅꠁꠀ ꠀꠞꠅ ꠛꠃꠔꠦ ꠟꠣꠑꠤ-ꠍꠐꠣ-ꠔꠟꠥꠀꠞ ꠟꠁꠀ ꠀꠁꠟ। ꠛꠠ ꠁꠝꠣꠝ, ꠝꠃꠟꠣꠘꠣ ꠀꠞ ꠝꠥꠞꠛ꠆ꠛꠤ ꠅꠇꠟꠦ ꠄꠞꠣꠞꠦ ꠙꠣꠑꠣꠁꠍꠂꠘ।
MAR 14:44 ꠔꠣꠘꠞꠦ ꠎꠦꠉꠤꠄ ꠗꠞꠣꠁꠀ ꠖꠤꠔ, ꠢꠦ ꠔꠣꠞ ꠟꠉꠞ ꠄꠞꠣꠞꠦ ꠀꠉꠦ ꠢꠤꠇꠣꠁꠀ ꠖꠤꠍꠤꠟ, “ꠀꠝꠤ ꠉꠤꠀ ꠎꠦꠘ ꠉꠣꠟꠅ ꠢꠥꠋꠉꠣ ꠖꠤꠝꠥ, ꠄꠁꠘꠃ ꠢꠃ ꠎꠘ। ꠔꠥꠝꠞꠣ ꠄꠘꠞꠦ ꠛꠘ꠆ꠖꠤ ꠇꠞꠤꠀ ꠈꠥꠛ ꠡꠣꠛꠗꠣꠘꠦ ꠟꠁꠀ ꠎꠣꠁꠅ।”
MAR 14:45 ꠔꠦꠃ ꠁꠢꠥꠖꠣꠄ ꠡꠥꠎꠣ-ꠡꠥꠎꠤ ꠁꠍꠣꠞ ꠉꠦꠍꠦ ꠉꠤꠀ ꠇꠁꠟ, “ꠢꠥꠎꠥꠞ!” ꠇꠁꠀ ꠢꠦ ꠔꠣꠘꠞꠦ ꠢꠥꠋꠉꠣ ꠖꠤꠟ।
MAR 14:46 ꠟꠉꠦ ꠟꠉꠦ ꠔꠣꠞꠣ ꠀꠁꠀ ꠁꠍꠣꠞꠦ ꠗꠞꠤꠟꠤꠟ।
MAR 14:47 ꠔꠣꠘ ꠇꠣꠘ꠆ꠖꠣꠔ ꠎꠦꠞꠣ ꠃꠛꠣꠔ ꠀꠍꠟꠣ, ꠄꠞꠣ ꠄꠇꠎꠘꠦ ꠘꠤꠎꠞ ꠔꠟꠥꠀꠞ ꠛꠣꠞ ꠇꠞꠤꠀ ꠙꠞꠗꠣꠘ ꠁꠝꠣꠝꠞ ꠉꠥꠟꠣꠝꠞꠦ ꠍꠦꠖ ꠝꠣꠞꠟꠣ, ꠍꠦꠖꠞ ꠟꠉꠦ ꠔꠣꠞ ꠄꠇ ꠇꠣꠘ ꠇꠣꠐꠤꠀ ꠙꠠꠤꠉꠦꠟ।
MAR 14:48 ꠁꠍꠣꠄ ꠅꠔꠣ ꠝꠣꠘꠡꠞꠦ ꠇꠁꠟꠣ, “ꠇꠤꠔꠣ ꠛꠣ, ꠀꠝꠤ ꠇꠥꠘꠥ ꠌꠥꠞ-ꠒꠣꠇꠣꠁꠔ ꠘꠤ, ꠔꠥꠝꠞꠣ ꠖꠦꠈꠤ ꠟꠣꠑꠤ-ꠍꠐꠣ-ꠔꠟꠥꠀꠞ ꠟꠁꠀ ꠀꠝꠣꠞꠦ ꠗꠞꠣꠔ ꠀꠁꠍ?
MAR 14:49 ꠀꠝꠤ ꠔ ꠙꠞꠔꠦꠇ ꠖꠤꠘ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠅ ꠉꠤꠀ ꠔꠥꠝꠞꠣꠞ ꠍꠣꠝꠘꠦꠃ ꠔꠣꠟꠤꠝ ꠖꠤꠔꠣꠝ। ꠅꠃ ꠡꠝꠄ ꠔ ꠔꠥꠝꠞꠣ ꠀꠝꠣꠞꠦ ꠗꠞꠟꠣꠄ ꠘꠣ। ꠘꠤꠌꠄ ꠀꠟ꠆ꠟꠣꠞ ꠇꠣꠟꠣꠝꠞ ꠀꠄꠀꠔ ꠔ ꠚꠟꠤꠔꠦ ꠅꠁꠛ।”
MAR 14:50 ꠔꠣꠘꠞꠦ ꠛꠘ꠆ꠖꠤ ꠇꠞꠔꠦꠃ ꠔꠣꠘ ꠢꠇꠟ ꠍꠣꠢꠣꠛꠤ ꠔꠣꠘꠦ ꠕꠁꠀ ꠜꠣꠉꠤ ꠉꠦꠟꠣ।
MAR 14:51 ꠈꠣꠟꠤ ꠄꠇꠎꠘ ꠎꠥꠀꠘꠦ ꠄꠇꠈꠣꠘ ꠟꠋꠉꠤ ꠚꠤꠘ꠆ꠖꠤꠀ ꠔꠣꠘ ꠈꠞꠦ ꠈꠞꠦ ꠉꠦꠟ। ꠅꠁꠟꠦ ꠝꠣꠘꠡꠦ ꠎꠦꠛꠟꠣ ꠔꠣꠞꠦꠅ ꠗꠞꠔꠣ ꠌꠣꠁꠟꠣ,
MAR 14:52 ꠢꠦ ꠔꠣꠞ ꠟꠋꠉꠤ ꠚꠣꠟꠣꠁꠀ ꠟꠦꠝꠐꠣ ꠅꠁꠀ ꠖꠃꠠꠣꠁꠀ ꠜꠣꠉꠤꠟ।
MAR 14:53 ꠅꠃ ꠝꠣꠘꠡꠦ ꠢꠎꠞꠔ ꠁꠍꠣꠞꠦ ꠗꠞꠤꠀ ꠢꠣꠞꠤ ꠙꠞꠗꠣꠘ ꠁꠝꠣꠝꠞ ꠉꠦꠍꠦ ꠟꠁꠀ ꠉꠦꠟ। ꠢꠘꠅ ꠛꠠ ꠁꠝꠣꠝ ꠅꠇꠟ, ꠝꠥꠞꠛ꠆ꠛꠤ ꠀꠞ ꠝꠃꠟꠣꠘꠣ ꠅꠇꠟꠅ ꠄꠇꠈꠣꠘꠅ ꠖꠟꠣ ꠅꠁꠟꠣ।
MAR 14:54 ꠍꠣꠢꠣꠛꠤ ꠙꠤꠔꠞ ꠁꠍꠣꠞ ꠉꠦꠍ ꠕꠘꠦ ꠖꠥꠞꠁ ꠢꠞꠤ ꠢꠞꠤ ꠞꠁꠀ ꠔꠣꠘ ꠈꠞꠦ ꠈꠞꠦ ꠉꠤꠀ ꠙꠞꠗꠣꠘ ꠁꠝꠣꠝꠞ ꠛꠣꠠꠤꠞ ꠃꠑꠣꠘꠅ ꠉꠦꠟꠣ। ꠉꠤꠀ ꠢꠘꠅ ꠙꠣꠞꠣꠖꠣꠞ ꠅꠇꠟꠞ ꠟꠉꠦ ꠝꠤꠟꠤꠀ ꠀꠉꠥꠁꠘ ꠔꠣꠛꠣꠘꠤꠔ ꠛꠁꠟꠣ।
MAR 14:55 ꠛꠠ ꠁꠝꠣꠝ ꠅꠇꠟꠦ ꠀꠞ ꠚꠔꠥꠀ ꠇꠝꠤꠐꠤꠞ ꠢꠇꠟ ꠝꠣꠘꠡꠦ ꠁꠍꠣꠞꠦ ꠎꠣꠘꠦ ꠝꠣꠞꠣꠞ ꠟꠣꠉꠤ ꠇꠥꠘꠥ ꠘꠣꠟꠤꠡ ꠔꠥꠇꠣꠁꠟꠣ, ꠅꠁꠟꠦ ꠙꠣꠁꠟꠣ ꠘꠣ।
MAR 14:56 ꠝꠎꠟꠤꠍꠅ ꠁꠍꠣꠞ ꠛꠤꠞꠥꠖ꠆ꠖꠦ ꠛꠃꠔꠦ ꠝꠤꠍꠣ ꠡꠣꠇ꠆ꠇꠤ ꠖꠤꠟꠦꠅ, ꠔꠣꠞꠣꠞ ꠡꠣꠇ꠆ꠇꠤꠞ ꠝꠤꠟ ꠅꠁꠟ ꠘꠣ।
MAR 14:57 ꠔꠦꠃ ꠀꠞꠅ ꠇꠄꠎꠘꠦ ꠔꠣꠘ ꠛꠤꠞꠥꠖ꠆ꠖꠦ ꠅꠃ ꠝꠤꠍꠣ ꠡꠣꠇ꠆ꠇꠤ ꠖꠤꠟ। ꠔꠣꠞꠣ ꠇꠁꠟ,
MAR 14:58 “ꠀꠝꠞꠣ ꠢꠥꠘꠍꠤ, ꠢꠦ ꠇꠁꠍꠦ, ꠝꠣꠘꠡꠞ ꠀꠔꠞ ꠛꠣꠘꠣꠁꠟ ꠎꠦꠞꠥꠎꠣꠟꠦꠝꠞ ꠅꠃ ꠇꠣꠛꠣ ꠡꠞꠤꠚ, ꠀꠝꠤ ꠜꠣꠋꠉꠤꠟꠤꠝꠥ, ꠀꠞ ꠔꠤꠘ ꠖꠤꠘꠞ ꠝꠣꠎꠦ ꠇꠥꠘꠥ ꠝꠣꠘꠡꠞ ꠀꠔ ꠘꠣ ꠟꠣꠉꠣꠁꠀ ꠀꠝꠤ ꠀꠞꠇꠈꠣꠘ ꠛꠣꠘꠣꠁꠝꠥ।”
MAR 14:59 ꠅꠁꠟꠦ ꠄꠞꠣꠞ ꠡꠣꠇ꠆ꠇꠤꠅ ꠝꠤꠟꠟ ꠘꠣ।
MAR 14:60 ꠢꠦꠡꠦ ꠙꠞꠗꠣꠘ ꠁꠝꠣꠝ ꠃꠛꠣꠁꠀ ꠢꠇꠟꠞ ꠍꠣꠝꠘꠦ ꠁꠍꠣꠞꠦ ꠎꠤꠇꠣꠁꠟꠣ, “ꠅꠛꠣ, ꠔꠥꠝꠤ ꠇꠥꠘꠥ ꠝꠣꠔꠞ ꠎꠥꠀꠙ ꠖꠤꠔꠣꠄ ꠘꠣ ꠘꠤ? ꠁꠔꠣ ꠝꠣꠘꠡꠦ ꠔꠥꠝꠣꠞ ꠛꠦꠙꠣꠞꠦ ꠇꠤꠔꠣ ꠡꠣꠇ꠆ꠇꠤ ꠖꠤꠞꠣ, ꠢꠥꠘꠞꠣꠄ ꠘꠤ?”
MAR 14:61 ꠅꠁꠟꠦ ꠔꠣꠁꠘ ꠇꠥꠘꠥ ꠎꠥꠀꠙ ꠘꠣ ꠖꠤꠀ ꠘꠤꠞꠣꠁ ꠞꠁꠟꠣ। ꠙꠞꠗꠣꠘ ꠁꠝꠣꠝꠦ ꠔꠣꠘꠞꠦ ꠢꠤꠞꠛꠣꠞ ꠎꠤꠇꠣꠁꠟꠣ, “ꠔꠥꠝꠤ ꠇꠤꠔꠣ ꠀꠟ꠆ꠟꠣꠔꠣꠟꠣꠞ ꠅꠀꠖꠣ ꠇꠞꠣ ꠢꠃ ꠀꠟ-ꠝꠍꠤ ꠘꠤ, ꠔꠣꠘ ꠈꠣꠍ ꠝꠣꠄꠀꠞ ꠎꠘ ꠁꠛꠘꠥꠟ꠆ꠟꠣ ꠘꠤ?”
MAR 14:62 ꠔꠣꠁꠘ ꠎꠥꠀꠙ ꠖꠤꠟꠣ, “ꠎꠤꠅꠄ, ꠀꠝꠤꠃ ꠢꠦꠁꠘ। ꠀꠙꠘꠣꠞꠣ ꠖꠦꠈꠛꠣ, ꠀꠝꠤ ꠛꠤꠘ-ꠀꠖꠝ ꠀꠞꠡꠦ-ꠀꠎꠤꠝꠅ ꠀꠟ꠆ꠟꠣ ꠞꠣꠛ꠆ꠛꠥꠟ ꠀꠟꠣꠝꠤꠘꠞ ꠒꠣꠁꠘꠞ ꠔꠈ꠆ꠔꠅ ꠛꠅꠀꠔ ꠀꠍꠤ। ꠀꠞ ꠖꠦꠈꠛꠣ, ꠀꠝꠤ ꠛꠦꠢꠦꠡ꠆ꠔꠤ ꠝꠦꠊꠞ ꠈꠥꠐꠤꠔ ꠅꠁꠀ ꠖꠥꠘꠤꠀꠔ ꠔꠡꠞꠤꠚ ꠀꠘꠤꠀꠞ।”
MAR 14:63 ꠁꠈꠣꠘ ꠢꠥꠘꠤꠀꠃ ꠙꠞꠗꠣꠘ ꠁꠝꠣꠝꠦ ꠘꠤꠎꠞ ꠚꠤꠘ꠆ꠘꠞ ꠇꠣꠙꠠ ꠍꠤꠠꠤꠀ ꠇꠁꠟꠣ, “ꠀꠞ ꠇꠥꠘꠥ ꠡꠣꠇ꠆ꠇꠤꠞ ꠎꠞꠥꠞ ꠀꠍꠦ ꠘꠤ?
MAR 14:64 ꠀꠙꠘꠣꠞꠣ ꠘꠤꠎꠞ ꠇꠣꠘꠦꠃ ꠔ ꠢꠥꠘꠟꠣ, ꠢꠦ ꠡꠤꠞꠤꠇꠤ ꠇꠞꠟ। ꠔꠦ ꠅꠈꠘ ꠀꠙꠘꠣꠞꠣ ꠇꠤꠔꠣ ꠞꠣꠄ ꠖꠤꠛꠣ?” ꠅꠃ ꠔꠣꠞꠣ ꠢꠇꠟꠦ ꠔꠣꠘꠦ ꠖꠥꠡꠤ ꠡꠣꠁꠛꠡ꠆ꠔ ꠇꠞꠤꠀ, ꠎꠣꠘꠦ ꠝꠣꠞꠤꠟꠤꠛꠣꠞ ꠢꠥꠇꠥꠝ ꠖꠤꠟ।
MAR 14:65 ꠇꠦꠃ ꠇꠦꠃ ꠔꠣꠘ ꠃꠙꠞꠦ ꠍꠦꠚ ꠖꠤꠟ। ꠔꠣꠘ ꠝꠥꠈ ꠛꠣꠘ꠆ꠖꠤꠀ ꠊꠥꠡꠤ ꠝꠣꠞꠤꠀ ꠇꠁꠟ, “ꠢꠂ, ꠔꠥꠁꠘ ꠛꠥꠟꠦ ꠘꠛꠤ, ꠔꠦ ꠅꠈꠘ ꠅꠢꠤ ꠇꠍ ꠘꠣ।” ꠛꠣꠖꠦ ꠍꠤꠙꠣꠁ ꠅꠇꠟꠦꠅ ꠔꠣꠘꠦ ꠘꠤꠀ ꠝꠣꠁꠞ-ꠗꠁꠞ ꠇꠞꠟ।
MAR 14:66 ꠙꠤꠔꠞ ꠎꠦꠛꠟꠣ ꠟꠣꠝꠣꠔ ꠃꠑꠣꠘꠅ ꠀꠍꠟꠣ, ꠅꠃ ꠡꠝꠄ ꠙꠞꠗꠣꠘ ꠁꠝꠣꠝꠞ ꠄꠇ ꠛꠣꠘ꠆ꠖꠤ ꠛꠦꠐꠤ ꠔꠣꠘ ꠇꠣꠘ꠆ꠖꠣꠔ ꠉꠦꠟ।
MAR 14:67 ꠉꠤꠀ ꠔꠣꠘꠞꠦ ꠀꠉꠥꠁꠘ ꠔꠣꠛꠣꠘꠤꠔ ꠖꠦꠈꠤꠀ, ꠜꠣꠟꠣ ꠇꠞꠤ ꠔꠣꠘ ꠛꠣꠄ ꠌꠣꠁꠀ ꠢꠣꠞꠤ ꠇꠁꠟ, “ꠀꠙꠘꠦꠅ ꠔ ꠅꠃ ꠘꠣꠍꠣꠞꠔꠞ ꠁꠍꠣꠞ ꠟꠉꠦ ꠀꠍꠟꠣ।”
MAR 14:68 ꠙꠤꠔꠞꠦ ꠅꠡ꠆ꠛꠤꠇꠣꠞ ꠇꠞꠤꠀ ꠇꠁꠟꠣ, “ꠘꠣ ꠉ, ꠔꠥꠝꠤ ꠅꠃ ꠇꠤꠔꠣ ꠇꠁꠞꠣꠄ? ꠀꠝꠤ ꠁꠔꠣ ꠇꠥꠘ꠆ꠔꠣꠃ ꠎꠣꠘꠤ ꠘꠣ, ꠛꠥꠎꠤꠅ ꠘꠣ।” ꠅꠈꠣꠘ ꠇꠁꠀ ꠙꠤꠔꠞ ꠉꠦꠁꠐꠞ ꠗꠣꠞꠅ ꠉꠦꠟꠣ, ꠀꠞ ꠅꠃ ꠡꠝꠄ ꠝꠥꠞꠉꠣꠄ ꠛꠣꠋ ꠖꠤꠟꠣꠁꠟ।
MAR 14:69 ꠛꠣꠘ꠆ꠖꠤ ꠛꠦꠐꠤꠄ ꠎꠦꠛꠟꠣ ꠖꠦꠈꠟ, ꠙꠤꠔꠞ ꠅꠘꠅ ꠉꠤꠀ ꠃꠛꠣꠁꠍꠂꠘ, ꠅꠃ ꠔꠣꠘ ꠇꠣꠍꠣꠔ ꠃꠛꠣ ꠝꠣꠘꠡꠞꠦ ꠉꠤꠀ ꠔꠣꠁ ꠇꠁꠟ, “ꠅꠃ ꠛꠦꠐꠣꠅ ꠄꠞꠣꠞ ꠟꠉꠞ ꠄꠇꠎꠘ।”
MAR 14:70 ꠙꠤꠔꠞꠦ ꠢꠤꠞꠛꠣꠞ ꠘꠣ ꠇꠞꠟꠣ। ꠅꠁꠟꠦ ꠔꠣꠘ ꠇꠣꠘ꠆ꠖꠣꠔ ꠎꠦꠞꠣ ꠃꠛꠣ ꠀꠍꠤꠟ, ꠕꠥꠠꠣ ꠛꠣꠖꠦ ꠔꠣꠞꠣ ꠇꠁꠟꠣ, “ꠔꠥꠝꠤ ꠘꠤꠌ꠆ꠌꠄ ꠄꠞꠣꠞ ꠟꠉꠞ, ꠔꠥꠝꠣꠞ ꠛꠣꠠꠤꠅ ꠔ ꠉꠣꠟꠤꠟ ꠎꠤꠟꠣꠔ।”
MAR 14:71 ꠙꠤꠔꠞꠦ ꠇꠁꠟꠣ, “ꠀꠟ꠆ꠟꠣꠞ ꠉꠎꠛ ꠙꠠꠃꠇ, ꠀꠝꠤ ꠇꠍꠝ ꠈꠣꠁꠀ ꠇꠁꠀꠞ, ꠔꠥꠝꠞꠣ ꠅꠃ ꠎꠣꠞ ꠇꠕꠣ ꠇꠁꠞꠣꠄ, ꠔꠣꠞꠦ ꠀꠝꠤ ꠌꠤꠘꠤꠅ ꠘꠣ।”
MAR 14:72 ꠅꠈꠣꠘ ꠇꠁꠔꠦꠃ ꠝꠥꠞꠉꠣꠄ ꠖꠥꠀꠞꠣ ꠛꠣꠋ ꠖꠤꠟ। ꠛꠣꠋ ꠢꠥꠘꠤꠀꠃ ꠙꠤꠔꠞꠞ ꠝꠘꠅ ꠅꠁꠉꠦꠟ, ꠁꠍꠣꠄ ꠇꠁꠍꠟꠣ, “ꠝꠥꠞꠉꠣꠄ ꠖꠥꠁꠛꠣꠞ ꠛꠣꠋ ꠖꠤꠛꠣꠞ ꠀꠉꠦꠃ ꠔꠥꠝꠤ ꠔꠤꠘꠛꠣꠞ ꠇꠁꠛꠣꠄ, ꠔꠥꠝꠤ ꠀꠝꠣꠞꠦ ꠌꠤꠘ ꠘꠣ।” ꠅꠈꠣꠘ ꠝꠘꠅ ꠅꠁꠔꠦꠃ ꠔꠣꠁꠘ ꠀꠃ ꠀꠃ ꠇꠞꠤ ꠇꠣꠘ꠆ꠖꠘ ꠗꠞꠟꠣ।
MAR 15:1 ꠛꠠ ꠁꠝꠣꠝ ꠅꠇꠟꠦ ꠍꠛꠞꠦ ꠃꠑꠤꠀ ꠝꠥꠞꠛ꠆ꠛꠤ ꠅꠇꠟ, ꠝꠃꠟꠣꠘꠣ ꠀꠞ ꠚꠔꠥꠀ ꠇꠝꠤꠐꠤꠞ ꠢꠇꠟꠞ ꠟꠉꠦ ꠙꠞꠣꠝꠤꠡ ꠇꠞꠤꠀ, ꠢꠎꠞꠔ ꠁꠍꠣꠞꠦ ꠛꠣꠘ꠆ꠖꠤꠀ ꠞꠥꠝꠣꠘ ꠢꠣꠇꠤꠝ ꠙꠤꠟꠣꠔꠞ ꠉꠦꠍꠦ ꠟꠁꠀ ꠉꠦꠟꠣ।
MAR 15:2 ꠉꠤꠀ ꠢꠣꠞꠟꠦ ꠢꠣꠇꠤꠝ ꠙꠤꠟꠣꠔꠦ ꠁꠍꠣꠞꠦ ꠎꠤꠇꠣꠁꠟꠣ, “ꠔꠥꠝꠤ ꠇꠤꠔꠣ ꠁꠢꠥꠖꠤ ꠅꠇꠟꠞ ꠛꠣꠖꠡꠣ ꠘꠤ?” ꠔꠣꠁꠘ ꠇꠁꠟꠣ, “ꠀꠙꠘꠦ ꠑꠤꠇ ꠇꠕꠣꠃ ꠇꠁꠞꠣ।”
MAR 15:3 ꠛꠠ ꠁꠝꠣꠝ ꠅꠇꠟꠦ ꠔꠣꠘ ꠘꠣꠝꠦ ꠛꠃꠔ ꠘꠣꠟꠤꠡ ꠖꠤꠟꠣ।
MAR 15:4 ꠙꠤꠟꠣꠔꠦ ꠢꠤꠞꠛꠣꠞ ꠇꠁꠟꠣ, “ꠔꠥꠝꠤ ꠇꠥꠘ꠆ꠔꠣ ꠎꠥꠀꠙ ꠖꠤꠔꠣꠄ ꠘꠣ ꠘꠤ? ꠖꠦꠈꠞꠣꠄ ꠘꠤ, ꠔꠣꠞꠣ ꠔꠥꠝꠣꠞ ꠛꠤꠞꠥꠖ꠆ꠖꠦ ꠇꠔ ꠘꠣꠟꠤꠡ ꠖꠦꠞ।”
MAR 15:5 ꠅꠁꠟꠦ ꠁꠍꠣꠄ ꠇꠥꠘꠥ ꠎꠥꠀꠙ ꠘꠣ ꠖꠦꠅꠀꠄ ꠙꠤꠟꠣꠔ ꠔꠣꠁꠎ꠆ꠎꠥꠛ ꠅꠁꠉꠦꠟꠣ।
MAR 15:6 ꠀꠎꠣꠖꠤ ꠁꠖꠞ ꠡꠝꠄ ꠢꠣꠇꠤꠝꠦ ꠖꠦꠡꠞ ꠝꠣꠘꠡꠞ ꠙꠍꠘ꠆ꠖ ꠝꠣꠚꠤꠇ, ꠄꠇꠎꠘ ꠀꠎꠔꠤꠞꠦ ꠈꠣꠟꠣꠍ ꠖꠤꠔꠣ।
MAR 15:7 ꠅꠃ ꠡꠝꠄ ꠛꠣꠞꠣꠛ꠆ꠛꠣ ꠘꠣꠝꠞ ꠄꠇꠎꠘ ꠝꠣꠘꠥꠡ ꠎꠦꠟꠅ ꠀꠍꠤꠟ। ꠡꠋꠉ꠆ꠞꠣꠝꠞ ꠡꠝꠄ ꠢꠦ ꠚꠃꠎꠞ ꠟꠉꠦ ꠞꠁꠀ ꠝꠣꠘꠥꠡ ꠈꠥꠘ ꠇꠞꠍꠤꠟ।
MAR 15:8 ꠝꠣꠘꠡꠦ ꠙꠤꠟꠣꠔꠞ ꠉꠦꠍꠦ ꠀꠁꠀ ꠖꠣꠛꠤ ꠎꠣꠘꠣꠁꠟꠣ, “ꠀꠙꠘꠦ ꠀꠙꠘꠣꠞ ꠘꠤꠎꠞ ꠞꠦꠅꠀꠎ ꠝꠣꠚꠤꠇ ꠇꠣꠝ ꠇꠞꠃꠇ꠆ꠇꠣ।”
MAR 15:9 ꠔꠣꠁꠘ ꠎꠤꠇꠣꠁꠟꠣ, “ꠔꠥꠝꠞꠣ ꠌꠣꠁꠞꠣꠄ ꠘꠤ, ꠀꠝꠤ ꠁꠢꠥꠖꠤ ꠅꠇꠟꠞ ꠛꠣꠖꠡꠣꠞꠦ ꠍꠣꠠꠤ ꠖꠤꠔꠣꠝ?”
MAR 15:10 ꠙꠤꠟꠣꠔꠦ ꠎꠣꠘꠔꠣ, ꠛꠠ ꠁꠝꠣꠝ ꠅꠇꠟꠦ ꠁꠋꠡꠣ ꠇꠞꠤꠀ ꠁꠍꠣꠞꠦ ꠘꠤꠀ ꠔꠣꠘ ꠀꠔꠅ ꠖꠤꠍꠂꠘ।
MAR 15:11 ꠛꠠ ꠁꠝꠣꠝ ꠅꠇꠟꠦ ꠝꠣꠘꠡꠞꠦ ꠃꠍꠇꠣꠁꠀ ꠖꠤꠟꠣ, ꠝꠣꠘꠡꠦ ꠁꠍꠣꠞ ꠝꠥꠇ꠆ꠔꠤ ꠘꠣ ꠌꠣꠁꠀ ꠛꠣꠞꠣꠛ꠆ꠛꠣꠞ ꠝꠥꠇ꠆ꠔꠤ ꠌꠣꠁꠘ।
MAR 15:12 ꠄꠞꠖꠣꠄ ꠙꠤꠟꠣꠔꠦ ꠢꠤꠞꠛꠣꠞ ꠝꠣꠘꠡꠞꠦ ꠎꠤꠇꠣꠁꠟꠣ, “ꠔꠦ ꠔꠥꠝꠞꠣ ꠎꠣꠞꠦ ꠁꠢꠥꠖꠤꠞ ꠛꠣꠖꠡꠣ ꠇꠅ, ꠔꠣꠞꠦ ꠀꠝꠤ ꠇꠤꠔꠣ ꠇꠞꠔꠣꠝ?”
MAR 15:13 ꠔꠣꠞꠣ ꠢꠇꠟꠦ ꠌꠤꠟ꠆ꠟꠣꠘꠤ ꠟꠣꠉꠣꠁꠟ, “ꠔꠣꠞꠦ ꠍꠟꠤꠛꠅ ꠖꠦꠅ।”
MAR 15:14 ꠔꠣꠁꠘ ꠇꠁꠟꠣ, “ꠇꠦꠘꠦ, ꠢꠦ ꠇꠤꠔꠣ ꠖꠥꠡ ꠇꠞꠍꠦ?” ꠅꠁꠟꠦ ꠝꠣꠘꠡꠦ ꠀꠞꠅ ꠎꠥꠞꠦ ꠎꠥꠞꠦ ꠌꠤꠟ꠆ꠟꠣꠁꠀ ꠇꠁꠟ, “ꠍꠟꠤꠛꠅ ꠖꠦꠅ।”
MAR 15:15 ꠔꠦꠃ ꠙꠤꠟꠣꠔꠦ ꠔꠣꠞꠣꠞꠦ ꠈꠥꠡꠤ ꠇꠞꠔꠣ ꠇꠞꠤ ꠛꠣꠞꠣꠛ꠆ꠛꠣꠞꠦ ꠈꠣꠟꠣꠍ ꠖꠤꠟꠣꠁꠟꠣ, ꠀꠞ ꠁꠍꠣꠞꠦ ꠛꠦꠡ ꠇꠞꠤ ꠌꠣꠛꠥꠇ ꠝꠣꠞꠤꠀ, ꠍꠟꠤꠛꠅ ꠟꠐꠇꠣꠁꠀ ꠎꠣꠘꠦ ꠝꠣꠞꠣꠞ ꠢꠥꠇꠥꠝ ꠖꠤꠟꠣ। (ꠍꠟꠤꠛ ꠅꠁꠟ ꠟꠣꠇꠠꠤꠖꠤ ꠛꠣꠘꠣꠁꠟ ꠝꠣꠘꠡꠞꠦ ꠟꠐꠇꠣꠁꠀ ꠝꠣꠞꠣꠞ ꠄꠇ ꠎꠤꠘꠤꠡ।)
MAR 15:16 ꠛꠣꠖꠦ ꠍꠤꠙꠣꠁ ꠅꠇꠟꠦ ꠁꠍꠣꠞꠦ ꠗꠞꠤꠀ ꠙꠞꠗꠣꠘ ꠢꠣꠇꠤꠝꠞ ꠛꠣꠠꠤꠞ ꠜꠤꠔꠞꠦ ꠟꠁꠀ ꠉꠦꠟꠣ। ꠢꠘꠅ ꠔꠣꠞꠣ ꠀꠞꠅ ꠍꠤꠙꠣꠁ ꠅꠇꠟ ꠖꠟꠣ ꠇꠞꠟꠣ।
MAR 15:17 ꠔꠣꠞꠣ ꠁꠍꠣꠞꠦ ꠛꠣꠁꠋꠉꠘꠤ ꠞꠋꠉꠞ ꠛꠣꠖꠡꠣꠁ ꠟꠦꠛꠣꠍ ꠚꠤꠘ꠆ꠖꠣꠁꠟꠣ, ꠀꠞ ꠉꠍꠣ-ꠇꠣꠐꠣ ꠖꠤꠀ ꠝꠥꠇꠥꠐ ꠛꠣꠘꠣꠁꠀ ꠔꠣꠘ ꠝꠣꠕꠣꠔ ꠖꠤꠟꠣ।
MAR 15:18 ꠛꠣꠖꠦ ꠔꠣꠞꠣ ꠝꠡꠇꠞꠣ ꠇꠞꠤ ꠝꠤꠍꠤꠟ ꠖꠤꠟ, “ꠁꠢꠥꠖꠤꠞ ꠛꠣꠖꠡꠣ, ꠝꠣꠞꠢꠣꠛꠣ।”
MAR 15:19 ꠀꠞ ꠄꠇ ꠟꠣꠑꠤ ꠀꠘꠤꠀ ꠛꠣꠞꠦ ꠛꠣꠞꠦ ꠔꠣꠘ ꠝꠣꠕꠣꠔ ꠝꠣꠞꠟ, ꠉꠔꠞꠅ ꠍꠦꠚ ꠖꠤꠟ, ꠔꠣꠘꠦ ꠁꠎ꠆ꠎꠔ ꠖꠦꠈꠣꠘꠤꠞ ꠜꠣꠘ ꠇꠞꠤꠀ ꠔꠣꠘ ꠍꠣꠝꠘꠦ ꠀꠐꠥ ꠉꠣꠠꠤꠀ ꠛꠁꠟ।
MAR 15:20 ꠅꠃ ꠟꠣꠈꠣꠘ ꠑꠣꠐ꠆ꠐꠣ-ꠝꠡꠇꠞꠣ ꠀꠞ ꠛꠦꠔ꠆ꠔꠝꠤꠎꠤ ꠇꠞꠣꠞ ꠛꠣꠖꠦ ꠔꠣꠘ ꠚꠤꠘ꠆ꠘꠞ ꠛꠣꠁꠋꠉꠘꠤ ꠟꠦꠛꠣꠍ ꠈꠥꠟꠤꠀ, ꠔꠣꠘ ꠘꠤꠎꠞ ꠇꠣꠙꠠ ꠚꠤꠘ꠆ꠖꠣꠁꠟ ꠀꠞ ꠍꠟꠤꠛꠅ ꠘꠤꠀ ꠎꠣꠘꠦ ꠝꠣꠞꠤꠟꠤꠔ ꠇꠞꠤ ꠞꠅꠀꠘꠣ ꠖꠤꠟ।
MAR 15:21 ꠔꠣꠞꠣ ꠟꠁꠀ ꠎꠣꠁꠞꠣ ꠅꠃ ꠡꠝꠄ ꠇꠥꠞꠤꠘꠤ ꠄꠟꠣꠇꠣꠞ ꠍꠤꠇꠘ꠆ꠖꠞ ꠀꠞ ꠞꠃꠚꠞ ꠛꠣꠚ, ꠍꠣꠁꠝꠘ ꠘꠣꠝꠞ ꠄꠇꠎꠘ ꠝꠣꠘꠥꠡ ꠉꠣꠃ ꠕꠣꠇꠤ ꠅꠃ ꠙꠕꠦꠖꠤ ꠀꠐꠤꠀ ꠎꠣꠅꠀꠔ ꠀꠍꠟꠣ। ꠍꠤꠙꠣꠁ ꠅꠇꠟꠦ ꠎꠥꠞ ꠇꠞꠤꠀ ꠄꠘꠦꠖꠤ ꠢꠃ ꠍꠟꠤꠛ ꠛꠅꠀꠁꠀ ꠘꠤꠟꠣ।
MAR 15:22 ꠔꠣꠞꠣ ꠁꠍꠣꠞꠦ ꠉꠟꠉꠣꠕꠣ, ꠝꠣꠘꠤ ꠇꠟ꠆ꠟꠣꠞ ꠌꠣꠠ ꠘꠣꠝꠞ ꠎꠣꠉꠣꠔ ꠟꠁꠀ ꠉꠦꠟꠣ।
MAR 15:23 ꠢꠘꠅ ꠘꠤꠀ ꠔꠣꠘꠞꠦ ꠝꠥꠞꠣ ꠘꠣꠝꠞ ꠅꠡꠥꠗ ꠙꠥꠞꠣꠁꠟ ꠀꠋꠉꠥꠞꠞ ꠡꠞꠛꠔ ꠈꠣꠁꠔꠦ ꠖꠤꠟꠣ, ꠅꠁꠟꠦ ꠔꠣꠁꠘ ꠁꠔꠣ ꠈꠣꠁꠟꠣ ꠘꠣ।
MAR 15:24 ꠛꠣꠖꠦ ꠔꠣꠞꠣ ꠔꠣꠘꠞꠦ ꠍꠟꠤꠛꠅ, ꠝꠣꠘꠤ ꠉꠣꠍꠅ ꠟꠐꠇꠣꠁꠟ। ꠍꠤꠙꠣꠁ ꠅꠇꠟꠦ ꠔꠣꠘ ꠇꠣꠙꠠ-ꠌꠥꠙꠠ ꠛꠣꠐꠤꠀ ꠘꠦꠅꠀꠞ ꠟꠣꠉꠤ ꠟꠐꠣꠞꠤ ꠝꠣꠞꠤꠀ ꠜꠣꠁꠉ꠆ꠉ ꠙꠞꠤꠇ꠆ꠇꠣ ꠇꠞꠟ।
MAR 15:25 ꠛꠤꠀꠘꠦ ꠘꠄꠐꠣꠞ ꠡꠝꠄ ꠔꠣꠞꠣ ꠔꠣꠘꠞꠦ ꠎꠣꠘꠦ ꠝꠣꠞꠣꠞ ꠟꠣꠉꠤ ꠍꠟꠤꠛꠅ ꠉꠣꠕꠤꠟ।
MAR 15:26 ꠀꠞ ꠔꠣꠘ ꠅꠙꠞꠣꠗ-ꠘꠣꠝꠣꠞ ꠝꠣꠎꠦ ꠟꠦꠈꠟ, “ꠁꠢꠥꠖꠤꠞ ꠛꠣꠖꠡꠣ।”
MAR 15:27 ꠔꠣꠞꠣ ꠖꠥꠁꠎꠘ ꠒꠣꠇꠣꠁꠔꠞꠦꠅ ꠔꠣꠘ ꠟꠉꠦ ꠍꠟꠤꠛꠅ ꠟꠐꠇꠣꠁꠟ, ꠄꠇꠎꠘ ꠒꠣꠁꠘ ꠉꠣꠟꠣꠔ, ꠅꠁꠘ꠆ꠘꠎꠘ ꠛꠣꠃ ꠉꠣꠟꠣꠔ।
MAR 15:28 ꠄꠞꠖꠣꠄ ꠀꠟ꠆ꠟꠣꠞ ꠇꠣꠟꠣꠝꠞ ꠅꠃ ꠀꠄꠀꠔꠅ ꠚꠟꠤꠉꠦꠟ, “ꠔꠣꠘꠞꠦ ꠘꠣꠚꠞꠝꠣꠘ ꠅꠇꠟꠞ ꠟꠉꠦ ꠉꠘꠣ ꠅꠁꠍꠦ।”
MAR 15:29 ꠢꠃ ꠙꠕꠦꠖꠤ ꠎꠦꠞꠣ ꠎꠣꠅꠀꠔ ꠀꠍꠤꠟ ꠔꠣꠞꠣ ꠝꠣꠕꠣ ꠟꠣꠠꠣꠁꠀ ꠁꠍꠣꠞꠦ ꠍꠤꠠꠣꠁꠀ ꠇꠁꠟ, “ꠅꠂ ꠝꠤꠀ, ꠔꠥꠝꠤ ꠛꠥꠟꠦ ꠇꠣꠛꠣ ꠊꠞ ꠜꠣꠋꠉꠤꠀ ꠔꠤꠘ ꠖꠤꠘꠞ ꠝꠣꠎꠦ ꠢꠤꠞꠛꠣꠞ ꠛꠣꠘꠣꠁꠔꠣꠄ ꠙꠣꠞꠛꠣꠄ!
MAR 15:30 ꠔꠦ ꠅꠈꠘ ꠍꠟꠤꠛ ꠕꠣꠇꠤ ꠟꠣꠝꠤꠀ ꠀꠁꠀ ꠘꠤꠎꠞ ꠎꠣꠘ ꠛꠣꠌꠣꠅ ꠘꠣ।”
MAR 15:31 ꠛꠠ ꠁꠝꠣꠝ ꠀꠞ ꠝꠃꠟꠣꠘꠣ ꠅꠇꠟꠦꠅ ꠔꠣꠘꠞꠦ ꠍꠤꠠꠣꠁꠀ ꠝꠣꠔꠣ-ꠝꠣꠔꠤ ꠇꠞꠟꠣ, “ꠢꠦ ꠔ ꠝꠣꠘꠡꠞ ꠎꠣꠘ ꠛꠣꠌꠣꠁꠔ, ꠅꠈꠘ ꠘꠤꠎꠞ ꠎꠣꠘ ꠛꠣꠌꠣꠁꠔ ꠙꠣꠞꠦꠞ ꠘꠣ।
MAR 15:32 ꠢꠦ ꠛꠥꠟꠦ ꠅꠀꠖꠣ ꠇꠞꠣ ꠢꠃ ꠀꠟ-ꠝꠍꠤ, ꠛꠘꠤ ꠁꠍꠞꠣꠁꠟꠞ ꠛꠣꠖꠡꠣ! ꠔꠦ ꠙꠣꠞꠟꠦ ꠅꠈꠘ ꠍꠟꠤꠛ ꠕꠣꠇꠤ ꠟꠣꠝꠤꠀ ꠀꠃꠇ, ꠔꠦꠃ ꠀꠝꠞꠣꠅ ꠅꠔꠣ ꠖꠦꠈꠤꠀ ꠁꠝꠣꠘ ꠀꠘꠝꠥ।” ꠔꠣꠘ ꠒꠣꠁꠘꠦ-ꠛꠣꠃꠄ ꠎꠦꠞꠣꠞꠦ ꠍꠟꠤꠛꠅ ꠟꠐꠇꠣꠁꠟ ꠅꠁꠍꠤꠟ, ꠔꠣꠞꠣꠅ ꠔꠣꠘꠞꠦ ꠍꠤꠠꠣꠁꠟ।
MAR 15:33 ꠛꠣꠖꠦ ꠛꠦꠁꠟ ꠖꠥꠁꠚꠞ ꠕꠣꠇꠤ ꠎꠥꠢꠞꠞ ꠛꠣꠖ ꠙꠞ꠆ꠎꠘ꠆ꠔ ꠔꠤꠘ ꠊꠘ꠆ꠐꠣ ꠀꠡ꠆ꠔꠣ ꠖꠦꠡ ꠀꠘ꠆ꠖꠣꠁꠞ ꠅꠁꠉꠦꠟ।
MAR 15:34 ꠄꠞꠛꠣꠖꠦꠃ ꠔꠣꠁꠘ ꠈꠥꠛ ꠎꠥꠞꠦ ꠎꠥꠞꠦ ꠇꠁꠟꠣ, “ꠄꠟꠥꠁ, ꠄꠟꠥꠁ, ꠟꠣꠝꠣ ꠍꠣꠛꠣꠇ꠆ꠔꠣꠘꠤ,” ꠝꠣꠘꠤ, “ꠅ ꠀꠝꠣꠞ ꠀꠟ꠆ꠟꠣ, ꠀꠝꠣꠞ ꠝꠃꠟꠣ, ꠔꠥꠝꠤ ꠇꠦꠘꠦ ꠀꠝꠣꠞ ꠟꠉ ꠍꠣꠠꠤ ꠖꠤꠟꠣꠄ?”
MAR 15:35 ꠅꠃ ꠡꠝꠄ ꠎꠦꠞꠣ ꠔꠣꠘ ꠗꠣꠞꠅ ꠃꠛꠣ ꠀꠍꠤꠟ, ꠔꠣꠞꠣ ꠁꠈꠣꠘ ꠢꠥꠘꠤꠀ ꠇꠁꠟꠣ, “ꠢꠥꠘꠅ, ꠢꠥꠘꠅ, ꠢꠦ ꠢꠎꠞꠔ ꠁꠟꠤꠀꠍ ꠘꠛꠤꠞꠦ ꠒꠣꠇꠦꠞ।”
MAR 15:36 ꠅꠈꠣꠘ ꠢꠥꠘꠤꠀ ꠄꠇꠎꠘ ꠝꠣꠘꠡꠦ ꠖꠃꠠꠣꠁꠀ ꠉꠤꠀ ꠄꠇꠈꠣꠘ ꠔꠦꠘꠣ ꠀꠘꠤꠀ ꠐꠦꠋꠉꠣ ꠀꠋꠉꠥꠞꠞ ꠡꠞꠛꠔꠞ ꠝꠣꠎꠦ ꠜꠤꠎꠣꠁꠀ, ꠄꠇ ꠟꠣꠑꠤꠞ ꠝꠣꠕꠣꠔ ꠛꠣꠘ꠆ꠖꠤꠀ ꠃꠌꠣ ꠇꠞꠤ ꠔꠣꠘꠞꠦ ꠈꠣꠁꠔꠦ ꠖꠤꠟ। ꠢꠦ ꠇꠁꠟ, “ꠅꠃꠇ, ꠖꠦꠈꠤ ꠘꠣ ꠁꠟꠤꠀꠍꠦ ꠔꠣꠞꠦ ꠟꠣꠝꠣꠁꠀ ꠘꠦꠅꠀꠔ ꠀꠁꠘ ꠘꠤ।”
MAR 15:37 ꠢꠦꠡꠦ ꠁꠍꠣꠄ ꠎꠥꠞꠦ ꠀꠅꠀꠎ ꠇꠞꠤꠀ ꠀꠈꠦꠞꠤ ꠖꠝ ꠚꠣꠟꠣꠁꠀ ꠁꠘ꠆ꠔꠦꠇꠣꠟ ꠇꠞꠟꠣ।
MAR 15:38 ꠟꠉꠦ ꠟꠉꠦ ꠎꠦꠞꠥꠎꠣꠟꠦꠝꠅ ꠇꠣꠛꠣ ꠊꠞꠞ ꠢꠦꠞꠦꠝ ꠡꠞꠤꠚꠞ ꠙꠞ꠆ꠖꠣꠈꠣꠘ, ꠃꠙꠞꠦ ꠕꠣꠇꠤ ꠔꠟ ꠙꠞ꠆ꠎꠘ꠆ꠔ ꠍꠤꠠꠤꠀ ꠖꠥꠁ ꠐꠥꠇꠞꠣ ꠅꠁꠉꠦꠟ।
MAR 15:39 ꠍꠤꠙꠣꠁꠞ ꠎꠦ ꠅꠚꠤꠡꠣꠞ ꠢꠘꠅ ꠙꠣꠞꠣ ꠖꠦꠅꠀꠔ ꠀꠍꠟꠣ, ꠄꠁꠘ ꠁꠍꠣꠞ ꠝꠃꠔꠞ ꠁ ꠢꠣꠟꠔ ꠖꠦꠈꠤꠀ ꠇꠁꠟꠣ, “ꠘꠤꠌ꠆ꠌꠄ, ꠄꠁꠘꠃ ꠀꠍꠟꠣ ꠀꠟ꠆ꠟꠣꠞ ꠈꠣꠍ ꠝꠣꠄꠀꠞ ꠎꠘ ꠁꠛꠘꠥꠟ꠆ꠟꠣ।”
MAR 15:40 ꠇꠄꠎꠘ ꠛꠦꠐꠤ ꠝꠣꠘꠡꠦꠅ ꠖꠥꠞꠁ ꠃꠛꠣꠁꠀ ꠁꠔꠣ ꠖꠦꠈꠟꠣ, ꠄꠞꠣꠞ ꠝꠣꠎꠦ ꠀꠍꠟꠣ ꠝꠉꠖꠤꠟꠤꠘꠤ ꠝꠞꠤꠅꠝ, ꠁꠃꠍꠤ ꠀꠞ ꠢꠥꠞꠥ ꠁꠀꠇꠥꠛꠞ ꠝꠣ ꠝꠞꠤꠅꠝ, ꠀꠞ ꠛꠤꠛꠤ ꠍꠣꠟꠥꠝꠤ।
MAR 15:41 ꠁꠍꠣ ꠎꠦꠛꠟꠣ ꠉꠣꠟꠤꠟꠅ ꠀꠍꠟꠣ, ꠅꠃ ꠡꠝꠄ ꠅꠃ ꠛꠦꠐꠤꠘ ꠢꠣꠝꠦꠡꠣ ꠔꠣꠘ ꠟꠉꠦ ꠟꠉꠦ ꠞꠁꠔꠣ ꠀꠞ ꠔꠣꠘ ꠈꠦꠎꠝꠔ ꠇꠞꠔꠣ। ꠀꠞꠅ ꠛꠃꠔ ꠛꠦꠐꠤ ꠝꠣꠘꠥꠡ, ꠎꠦꠞꠣ ꠔꠣꠘ ꠟꠉꠦ ꠅꠁꠀ ꠎꠦꠞꠥꠎꠣꠟꠦꠝꠅ ꠀꠁꠍꠟꠣ, ꠔꠣꠞꠣꠅ ꠁꠔꠣ ꠖꠦꠈꠟꠣ।
MAR 15:42 ꠁ ꠖꠤꠘ ꠀꠍꠤꠟ ꠁꠘ꠆ꠔꠦꠎꠣꠝꠞ ꠖꠤꠘ, ꠝꠣꠘꠤ ꠁꠢꠥꠖꠤꠞ ꠎꠥꠝ꠆ꠝꠣꠛꠣꠞꠞ ꠀꠉꠞ ꠖꠤꠘ, ꠅꠃ ꠖꠤꠘ ꠡꠥꠞꠥꠎ ꠒꠥꠛꠣꠞ ꠛꠣꠖꠦ ꠕꠘꠦ ꠇꠥꠘꠥꠎꠣꠔ ꠇꠣꠝ ꠇꠞꠣ ꠢꠣꠞꠣꠝ ꠀꠍꠤꠟ।
MAR 15:43 ꠄꠞꠖꠣꠄ ꠅꠃ ꠛꠤꠀꠟꠤ ꠛꠣꠟꠣ ꠚꠔꠥꠀ ꠇꠝꠤꠐꠤꠞ ꠁꠎ꠆ꠎꠔꠤ ꠝꠘꠔ꠆ꠞꠤ, ꠀꠞꠤꠝꠣꠕꠤꠀ ꠉꠣꠃꠞ ꠁꠃꠍꠥꠚ ꠘꠣꠝꠞ ꠄꠇꠎꠘ ꠝꠣꠘꠡꠦ, ꠡꠣꠅꠡ ꠇꠞꠤꠀ ꠢꠣꠇꠤꠝ ꠙꠤꠟꠣꠔꠞ ꠉꠦꠍꠦ ꠀꠁꠀ, ꠢꠎꠞꠔ ꠁꠍꠣꠞ ꠟꠣꠡ ꠘꠤꠔꠣ ꠌꠣꠁꠟꠣ। ꠀꠟ꠆ꠟꠣꠞ ꠛꠣꠖꠡꠣꠁ ꠇꠣꠁꠝ ꠅꠀꠞ ꠟꠣꠉꠤ ꠄꠁꠘ ꠛꠣꠞ ꠌꠣꠅꠀꠔ ꠀꠍꠟꠣ।
MAR 15:44 ꠙꠤꠟꠣꠔꠦ ꠢꠥꠘꠤꠀ ꠈꠥꠛ ꠔꠣꠁꠎ꠆ꠎꠥꠛ ꠅꠁꠉꠦꠟꠣ ꠎꠦꠘ, ꠁꠍꠣꠄ ꠅꠔ ꠎꠟꠖꠤ ꠇꠞꠤ ꠁꠘ꠆ꠔꠦꠇꠣꠟ ꠚꠞꠝꠣꠁꠍꠂꠘ। ꠄꠞꠖꠣꠄ ꠔꠣꠁꠘ ꠍꠤꠙꠣꠁꠞ ꠍꠥꠛꠦꠖꠣꠞꠞꠦ ꠀꠘꠤꠀ ꠎꠤꠇꠣꠁꠟꠣ, ꠢꠣꠍꠣꠃ ꠁꠍꠣꠞ ꠞꠥꠢꠥ ꠛꠣꠞ ꠅꠁ ꠉꠦꠍꠦ ꠘꠤ।
MAR 15:45 ꠍꠥꠛꠦꠖꠣꠞꠦ ꠎꠦꠛꠟꠣ ꠇꠁꠟꠣ, “ꠎꠤꠅꠄ, ꠔꠣꠁꠘ ꠝꠣꠞꠣ ꠉꠦꠍꠂꠘ”, ꠅꠃ ꠙꠤꠟꠣꠔꠦ ꠁꠍꠣꠞ ꠟꠣꠡ ꠁꠃꠍꠥꠚꠞ ꠎꠤꠝ꠆ꠝꠣꠄ ꠡꠝꠎꠣꠁ ꠖꠤꠟꠣ।
MAR 15:46 ꠁꠃꠍꠥꠚꠦ ꠉꠤꠀ ꠇꠣꠚꠘꠞ ꠇꠣꠙꠠ ꠈꠞꠤꠖ ꠇꠞꠤ ꠀꠘꠤꠀ, ꠁꠍꠣꠞ ꠟꠣꠡ ꠍꠟꠤꠛ ꠕꠣꠇꠤ ꠟꠣꠝꠣꠁꠀ, ꠇꠣꠚꠘ ꠚꠤꠘ꠆ꠖꠣꠁꠀ, ꠙꠣꠔ꠆ꠔꠞ ꠇꠣꠐꠤꠀ ꠛꠣꠘꠣꠁꠟ ꠄꠇ ꠇꠄꠛꠞꠞ ꠝꠣꠎꠦ ꠔꠣꠘꠞꠦ ꠖꠣꠚꠘ ꠇꠞꠟꠣ, ꠁ ꠟꠣꠈꠣꠘ ꠇꠄꠛꠞꠅ ꠝꠣꠐꠤ ꠖꠦꠅꠀ ꠟꠣꠉꠦ ꠘꠣ। ꠄꠞꠖꠣꠄ ꠔꠣꠞꠣ ꠛꠠ ꠄꠇ ꠙꠣꠔ꠆ꠔꠞ ꠉꠠꠤꠀꠁꠀ ꠀꠘꠤꠀ ꠇꠄꠛꠞꠞ ꠝꠥꠈꠅ ꠖꠤꠟꠣ।
MAR 15:47 ꠅꠃ ꠡꠝꠄ ꠝꠉꠖꠤꠟꠤꠘꠤ ꠝꠞꠤꠅꠝ ꠀꠞ ꠁꠃꠍꠤꠞ ꠝꠣ ꠝꠞꠤꠅꠝꠦ ꠖꠦꠈꠟꠣ, ꠔꠣꠘꠞꠦ ꠇꠥꠘ ꠎꠣꠉꠣꠔ ꠖꠣꠚꠘ ꠇꠞꠍꠂꠘ।
MAR 16:1 ꠔꠣꠞꠣꠞ ꠎꠥꠝ꠆ꠝꠣꠞ ꠖꠤꠘ ꠡꠦꠡ ꠅꠁꠀ ꠢꠣꠞꠟꠦ ꠝꠉꠖꠤꠟꠤꠘꠤ ꠝꠞꠤꠅꠝ, ꠁꠀꠇꠥꠛꠞ ꠝꠣ ꠝꠞꠤꠅꠝ ꠀꠞ ꠛꠤꠛꠤ ꠍꠣꠟꠥꠝꠤꠄ, ꠢꠎꠞꠔ ꠁꠍꠣꠞ ꠟꠣꠡꠅ ꠝꠣꠈꠣꠘꠤꠞ ꠟꠣꠉꠤ ꠈꠥꠡꠛꠄ ꠀꠟꠣ ꠝꠡꠟꠣ ꠟꠁꠀ ꠀꠘꠣꠁꠟꠣ।
MAR 16:2 ꠢꠣꠙ꠆ꠔꠣꠞ ꠙꠄꠟꠣ ꠖꠤꠘ ꠛꠤꠀꠘꠦ, ꠝꠣꠘꠤ ꠞꠛꠤꠛꠣꠞꠦ ꠚꠎꠞꠦ ꠡꠥꠞꠥꠎ ꠃꠑꠣꠞ ꠟꠉꠦ ꠟꠉꠦꠃ ꠄꠞꠣ ꠔꠣꠘ ꠇꠄꠛꠞꠞ ꠇꠣꠍꠣꠔ ꠉꠦꠟꠣ।
MAR 16:3 ꠅꠃ ꠡꠝꠄ ꠔꠣꠞꠣ ꠄꠇꠦ-ꠅꠁꠘ꠆ꠘꠦ ꠎꠤꠇꠣꠁꠟꠣ, “ꠇꠄꠛꠞꠞ ꠝꠥꠈꠞ ꠅꠃ ꠙꠣꠔ꠆ꠔꠞ ꠇꠦ ꠢꠞꠣꠁꠛꠣ?”
MAR 16:4 ꠝꠣꠔꠤ ꠝꠣꠔꠤ ꠔꠣꠞꠣ ꠌꠣꠁꠀ ꠖꠦꠈꠟꠣ, ꠁ ꠙꠣꠔ꠆ꠔꠞ ꠢꠞꠣꠁꠟ ꠅꠁꠉꠦꠍꠦ। ꠙꠣꠔ꠆ꠔꠞꠐꠣ ꠀꠍꠤꠟ ꠈꠥꠛ ꠛꠠ।
MAR 16:5 ꠛꠣꠖꠦ ꠔꠣꠞꠣ ꠇꠄꠛꠞꠅ ꠢꠣꠝꠣꠁꠀ ꠖꠦꠈꠟꠣ, ꠄꠇ ꠎꠥꠀꠘ ꠛꠦꠐꠣꠄ ꠗꠟꠣ ꠇꠣꠙꠠ ꠚꠤꠘ꠆ꠖꠤꠀ ꠒꠣꠁꠘ ꠉꠣꠟꠣꠔ ꠛꠁ ꠞꠁꠍꠂꠘ। ꠄꠘꠦ ꠖꠦꠈꠤꠀ ꠔꠣꠞꠣ ꠈꠥꠛ ꠔꠣꠁꠎ꠆ꠎꠥꠛ ꠅꠁꠉꠦꠟꠣ।
MAR 16:6 ꠅꠃ ꠢꠦꠁꠘ ꠇꠁꠟꠣ, “ꠔꠣꠁꠎ꠆ꠎꠥꠛ ꠅꠁꠅ ꠘꠣ ꠉ। ꠔꠥꠝꠤꠔꠣꠁꠘ ꠔ ꠘꠣꠍꠣꠞꠔ ꠉꠣꠃꠞ ꠁꠍꠣꠞꠦꠃ ꠔꠣꠟ꠆ꠟꠣꠡ ꠇꠞꠞꠣꠄ, ꠎꠦꠘꠞꠦ ꠍꠟꠤꠛꠅ ꠉꠣꠕꠤꠀ ꠎꠣꠘꠦ ꠝꠣꠞꠣ ꠅꠁꠍꠦ? ꠔꠣꠁꠘ ꠅꠈꠘ ꠁꠘꠅ ꠘꠣꠄ, ꠔꠣꠘꠞꠦ ꠎꠤꠘ꠆ꠖꠣ ꠇꠞꠣ ꠅꠁꠍꠦ। ꠖꠦꠈꠤ ꠎꠣꠅ, ꠅꠃ ꠎꠣꠉꠣꠔꠃ ꠔꠣꠘꠞꠦ ꠖꠣꠚꠘ ꠇꠞꠣ ꠅꠁꠍꠤꠟ।
MAR 16:7 ꠔꠦ ꠔꠥꠝꠤꠔꠣꠁꠘ ꠅꠈꠘ ꠎꠣꠅ, ꠉꠤꠀ ꠔꠣꠘ ꠍꠣꠢꠣꠛꠤ ꠅꠇꠟꠞꠦ ꠀꠞ ꠙꠤꠔꠞꠞꠦꠅ ꠇꠅ, ꠔꠣꠁꠘ ꠀꠉꠦ ꠎꠦꠟꠣꠈꠣꠘ ꠇꠁꠍꠟꠣ, ꠅꠃꠟꠣ ꠔꠥꠝꠞꠣꠞ ꠀꠉꠦ ꠉꠣꠟꠤꠟꠅ ꠎꠣꠁꠞꠣ। ꠔꠥꠝꠞꠣ ꠢꠘꠅ ꠉꠦꠟꠦ ꠔꠣꠘ ꠖꠞꠡꠘ ꠙꠣꠁꠛꠣꠄ।”
MAR 16:8 ꠁꠈꠣꠘ ꠢꠥꠘꠤꠀ ꠛꠦꠐꠤꠘ꠆ꠔꠦ ꠇꠄꠛꠞ ꠕꠣꠇꠤ ꠛꠣꠞ ꠅꠁꠀ ꠖꠃꠠꠣꠁꠀ ꠜꠣꠉꠤꠟꠣ। ꠔꠣꠞꠣ ꠔꠣꠁꠎ꠆ꠎꠥꠛ ꠛꠘꠤꠉꠦꠟꠣ, ꠒꠞꠞ ꠌꠥꠐꠦ ꠇꠦꠃꠞꠞꠦ ꠇꠥꠘ꠆ꠔꠣ ꠇꠁꠟꠣ ꠘꠣ।
MAR 16:9 ꠢꠣꠙ꠆ꠔꠣꠞ ꠙꠄꠟꠣ ꠖꠤꠘ ꠚꠎꠞ ꠅꠇ꠆ꠔꠅ ꠁꠍꠣ ꠝꠥꠞ꠆ꠖꠣ ꠕꠣꠇꠤ ꠎꠤꠘ꠆ꠖꠣ ꠅꠁꠀ ꠃꠑꠟꠣ, ꠀꠞ ꠙꠄꠟꠣꠃ ꠝꠉꠖꠤꠟꠤꠘꠤ ꠝꠞꠤꠅꠝꠞꠦ ꠖꠞꠡꠘ ꠖꠤꠟꠣ। ꠅꠃ ꠝꠞꠤꠅꠝꠞ ꠟꠉ ꠕꠣꠇꠤ ꠔꠣꠁꠘ ꠡꠣꠔꠉꠥ ꠎꠤꠘ꠆ꠘꠣꠔ ꠍꠣꠠꠣꠁꠍꠟꠣ।
MAR 16:10 ꠔꠣꠘ ꠖꠞꠡꠘ ꠙꠣꠁꠀꠃ ꠝꠞꠤꠅꠝꠦ ꠉꠤꠀ ꠁꠍꠣꠞ ꠟꠉꠞ ꠢꠇꠟꠞꠦ ꠈꠛꠞ ꠎꠣꠘꠣꠁꠟꠣ। ꠅꠃ ꠡꠝꠄ ꠔꠣꠞꠣ ꠇꠣꠘ꠆ꠖꠣ-ꠇꠣꠐꠤ ꠀꠞ ꠀꠢꠣꠎꠣꠞꠤ ꠇꠞꠣꠔ ꠀꠍꠤꠟ।
MAR 16:11 ꠅꠁꠟꠦ ꠔꠣꠁꠘ ꠎꠤꠘ꠆ꠖꠣ ꠅꠁꠍꠂꠘ ꠀꠞ ꠝꠞꠤꠅꠝꠞꠦ ꠖꠞꠡꠘꠅ ꠖꠤꠍꠂꠘ, ꠁꠔꠣ ꠔꠣꠞꠣ ꠇꠦꠃ ꠄꠇꠤꠘ ꠇꠞꠟꠣ ꠘꠣ।
MAR 16:12 ꠛꠣꠖꠦ ꠔꠣꠘ ꠖꠥꠁꠎꠘ ꠃꠝ꠆ꠝꠔꠦ ꠀꠐꠤ ꠀꠐꠤ ꠉꠣꠃ ꠛꠣꠄꠖꠤ ꠞꠅꠀꠘꠣ ꠅꠁꠟꠣ, ꠅꠃ ꠡꠝꠄ ꠁꠍꠣꠄ ꠔꠣꠘ ꠍꠥꠞꠔ ꠛꠖꠟꠣꠁꠀ ꠔꠣꠞꠣꠞꠦ ꠖꠞꠡꠘ ꠖꠤꠟꠣ।
MAR 16:13 ꠔꠣꠞꠣ ꠉꠤꠀ ꠛꠣꠇꠤ ꠢꠇꠟꠞꠦ ꠅꠃ ꠈꠛꠞ ꠎꠣꠘꠣꠁꠟꠣ। ꠅꠁꠟꠦ ꠔꠣꠞꠣꠞ ꠇꠕꠣꠅ ꠄꠞꠣ ꠄꠇꠤꠘ ꠇꠞꠟꠣ ꠘꠣ।
MAR 16:14 ꠢꠦꠡꠦ ꠢꠎꠞꠔ ꠁꠍꠣꠄ ꠔꠣꠘ ꠄꠉꠣꠞꠅ ꠎꠘ ꠍꠣꠢꠣꠛꠤꠞꠦ ꠖꠞꠡꠘ ꠖꠤꠟꠣ। ꠅꠃ ꠡꠝꠄ ꠄꠞꠣ ꠈꠣꠅꠀꠔ ꠀꠍꠟꠣ। ꠝꠥꠞ꠆ꠖꠣ ꠕꠣꠇꠤ ꠎꠤꠘ꠆ꠖꠣ ꠅꠀꠞ ꠛꠣꠖꠦ ꠎꠦꠞꠣ ꠔꠣꠘꠞꠦ ꠖꠦꠈꠍꠤꠟ, ꠔꠣꠞꠣꠞ ꠇꠕꠣ ꠄꠇꠤꠘ ꠘꠣ ꠇꠞꠣꠄ, ꠄꠞꠣꠞ ꠁꠝꠣꠘꠞ ꠇꠝꠎꠥꠞꠤ ꠀꠞ ꠖꠤꠟꠞ ꠘꠣ-ꠢꠥꠝꠣꠞꠤꠞ ꠟꠣꠉꠤ ꠔꠣꠁꠘ ꠄꠞꠣꠞꠦ ꠗꠝꠇꠣꠁꠟꠣ।
MAR 16:15 ꠀꠞ ꠅꠃ ꠍꠣꠢꠣꠛꠤ ꠅꠇꠟꠞꠦ ꠇꠁꠟꠣ, “ꠔꠥꠝꠞꠣ ꠖꠥꠘꠤꠀꠞ ꠔꠣꠝꠣꠝ ꠎꠣꠉꠣꠔ ꠎꠣꠅ, ꠉꠤꠀ ꠢꠇꠟ ꠝꠣꠘꠡꠞ ꠉꠦꠍꠦ ꠀꠟ꠆ꠟꠣꠞ ꠛꠣꠔꠣꠁꠟ ꠈꠥꠡ-ꠈꠛꠞꠤ ꠔꠛꠟꠤꠉ ꠇꠞꠅ।
MAR 16:16 ꠎꠦ ꠝꠣꠘꠡꠦ ꠁꠝꠣꠘ ꠀꠘꠤꠀ ꠔꠃꠛꠣꠞ ꠉꠥꠍꠟ ꠇꠞꠦ, ꠢꠦ-ꠃ ꠞꠦꠢꠣꠁ ꠙꠣꠁꠛ। ꠎꠦ ꠝꠣꠘꠡꠦ ꠁꠝꠣꠘ ꠀꠘꠔ ꠘꠣꠄ, ꠢꠦ ꠀꠟ꠆ꠟꠣꠞ ꠖꠞꠛꠣꠞꠅ ꠖꠥꠡꠤ ꠛꠘꠤꠀ ꠡꠣꠎꠣ ꠙꠣꠁꠛ।
MAR 16:17 ꠎꠦꠞꠣ ꠁꠝꠣꠘ ꠀꠘꠛ, ꠄꠞꠣꠞ ꠝꠣꠎꠦ ꠅꠃ ꠘꠤꠡꠣꠘꠣ ꠖꠦꠈꠣ ꠎꠣꠁꠛ: ꠀꠝꠣꠞ ꠘꠣꠝꠦ ꠔꠣꠞꠣ ꠎꠤꠘ꠆ꠘꠣꠔ ꠍꠣꠠꠣꠁꠛ, ꠘꠄꠀ ꠘꠄꠀ ꠜꠣꠡꠣꠄ ꠉꠣꠁꠛꠤ ꠛꠥꠟꠤ ꠝꠣꠔꠤꠛ।
MAR 16:18 ꠔꠣꠞꠣ ꠎꠣꠔꠤ ꠢꠣꠚꠞꠦ ꠀꠔꠅ ꠟꠁꠛꠣ, ꠛꠦꠎꠥꠁꠔꠣ ꠛꠤꠡꠣꠇ꠆ꠔ ꠇꠥꠘ꠆ꠔꠣ ꠈꠣꠁꠟꠦꠅ ꠔꠣꠞꠣꠞ ꠇꠥꠘꠥ ꠈꠦꠔꠤ ꠅꠁꠔ ꠘꠣꠄ। ꠀꠞ ꠇꠥꠘꠥ ꠛꠦꠝꠣꠞꠤꠞꠦ ꠀꠔꠣꠁꠀ ꠖꠤꠟꠦ ꠛꠦꠝꠣꠞ ꠡꠤꠚꠣ ꠅꠁꠎꠤꠛ।”
MAR 16:19 ꠍꠣꠢꠣꠛꠤ ꠅꠇꠟꠞ ꠟꠉꠦ ꠛꠣꠔꠌꠤꠔ ꠇꠞꠣꠞ ꠛꠣꠖꠦ ꠢꠎꠞꠔ ꠁꠍꠣꠞꠦ ꠀꠞꠡꠦ-ꠀꠎꠤꠝꠅ ꠔꠥꠟꠤꠀ ꠘꠦꠅꠀ ꠅꠁꠟ। ꠢꠘꠅ ꠔꠣꠁꠘ ꠀꠟ꠆ꠟꠣ ꠙꠣꠇꠞ ꠒꠣꠁꠘꠞ ꠔꠈ꠆ꠔꠅ ꠔꠡꠞꠤꠚ ꠞꠣꠈꠍꠂꠘ।
MAR 16:20 ꠛꠣꠖꠦ ꠍꠣꠢꠣꠛꠤ ꠅꠇꠟꠦ ꠢꠇꠟ ꠎꠣꠉꠣꠔ ꠉꠤꠀ ꠔꠛꠟꠤꠉ ꠇꠞꠟꠣ। ꠢꠎꠞꠔ ꠁꠍꠣꠄ ꠄꠞꠣꠞ ꠝꠣꠎꠖꠤ ꠇꠣꠝ ꠇꠞꠟꠣ, ꠀꠞ ꠄꠞꠣꠞꠦ ꠇꠦꠞꠣꠝꠔꠤ ꠇꠣꠝꠞ ꠔꠣꠇ꠆ꠇꠔ ꠖꠤꠀ ꠙꠞꠝꠣꠘ ꠖꠦꠈꠣꠁꠟꠣ, ꠄꠞꠣ ꠎꠦꠔꠣ ꠔꠛꠟꠤꠉ ꠇꠞꠞꠣ, ꠁꠔꠣ ꠢꠣꠍꠣ। ꠀꠝꠤꠘ॥
LUK 1:1 ꠝꠢꠣꠝꠣꠁꠘ꠆ꠘ ꠕꠤꠅꠚꠤꠟꠣꠍ, ꠀꠙꠘꠣꠞ ꠔ ꠎꠣꠘꠣ ꠀꠍꠦ, ꠀꠝꠞꠣꠞ ꠝꠣꠎꠦ ꠎꠦꠔꠣ ꠎꠦꠔꠣ ꠊꠐꠤꠍꠦ, ꠁꠔꠣ ꠎꠦꠞꠣ ꠙꠄꠟꠣ ꠕꠣꠇꠤꠃ ꠘꠤꠎꠞ ꠌꠃꠈꠦ ꠖꠦꠈꠍꠂꠘ ꠀꠞ ꠔꠛꠟꠤꠉꠅ ꠇꠞꠍꠂꠘ, ꠄꠞꠣꠞ ꠝꠥꠈꠞ ꠇꠕꠣ ꠢꠥꠘꠤꠀ ꠜꠣꠟꠣꠝꠘ꠆ꠔꠦ ꠡꠝꠎꠤꠀ ꠢꠣꠞꠤ, ꠛꠃꠔ ꠝꠥꠝꠤꠘꠦ ꠟꠦꠈꠣꠔ ꠟꠣꠉꠍꠂꠘ।
LUK 1:3 ꠄꠞꠟꠣꠉꠤ ꠅꠈꠘ ꠀꠝꠤꠅ ꠀꠖꠤ-ꠅꠘ꠆ꠔ ꠢꠇ꠆ꠇꠟꠔꠣ ꠔꠣꠟ꠆ꠟꠣꠡ ꠇꠞꠤꠀ, ꠄꠇ ꠄꠇ ꠇꠞꠤ ꠟꠦꠈꠤꠀ ꠀꠙꠘꠣꠞꠦ ꠎꠣꠘꠣꠘꠤ ꠈꠣꠘ ꠜꠣꠟꠣ ꠝꠘꠅ ꠇꠞꠟꠣꠝ।
LUK 1:4 ꠅꠈꠣꠘ ꠕꠣꠇꠤ ꠀꠙꠘꠦ ꠡꠝꠎꠤꠔꠣ ꠙꠣꠞꠛꠣ, ꠀꠙꠘꠦ ꠀꠉꠦ ꠎꠦꠔꠣ ꠔꠣꠟꠤꠝ ꠢꠥꠘꠍꠂꠘ, ꠁꠔꠣ ꠄꠇ꠆ꠇꠦꠛꠣꠞꠦ ꠑꠤꠇ।
LUK 1:5 ꠞꠣꠎꠣ ꠢꠦꠞꠥꠖꠦ ꠎꠦꠛꠟꠣ ꠄꠢꠥꠖꠤꠀ ꠎꠤꠟꠣ ꠌꠣꠟꠣꠁꠞꠣ, ꠅꠃ ꠡꠝꠄ ꠎꠦꠞꠥꠎꠣꠟꠦꠝ ꠐꠣꠃꠘꠅ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠞ ꠁꠝꠣꠝ ꠅꠇꠟꠞ ꠝꠣꠎꠞ ꠄꠇꠎꠘꠞ ꠘꠣꠝ ꠀꠍꠤꠟ ꠎꠣꠇꠣꠞꠤꠀ। ꠔꠣꠁꠘ ꠛꠘꠤ ꠁꠍꠞꠣꠁꠟꠞ ꠝꠥꠟ ꠁꠝꠣꠝ ꠢꠣꠞꠥꠘꠞ ꠈꠣꠘ꠆ꠖꠣꠘꠞ ꠀꠛꠤꠀ ꠖꠟꠞ ꠝꠣꠘꠥꠡ। ꠔꠣꠘ ꠛꠤꠛꠤꠞ ꠘꠣꠝ ꠄꠟꠤꠍꠣꠛꠦꠔ, ꠄꠁꠘꠅ ꠢꠣꠞꠥꠘꠞ ꠛꠋꠡꠞ ꠝꠣꠘꠥꠡ।
LUK 1:6 ꠄꠞꠣ ꠖꠥꠁꠅꠎꠘꠃ ꠀꠟ꠆ꠟꠣꠞ ꠘꠎꠞꠅ ꠇꠣꠝꠤꠟ ꠖꠤꠘꠖꠣꠞ ꠀꠍꠟꠣ। ꠝꠣꠛꠥꠖꠞ ꠢꠇꠟ ꠢꠥꠇꠥꠝ-ꠀꠢꠇꠣꠝ ꠡꠥꠟ꠆ꠟꠀꠘꠣ ꠀꠖꠣꠄ ꠇꠞꠔꠣ।
LUK 1:7 ꠅꠁꠟꠦ ꠄꠞꠣ ꠀꠍꠟꠣ ꠘꠤꠀꠅꠟꠣꠖꠤ, ꠛꠤꠛꠤ ꠄꠟꠤꠍꠣꠛꠦꠔ ꠅꠁꠟꠣ ꠀꠐꠇꠥꠞꠣ ꠛꠦꠝꠣꠞꠤ। ꠅꠃ ꠢꠣꠟꠔꠦ ꠖꠥꠁꠅꠎꠘ ꠝꠥꠞꠛ꠆ꠛꠤ ꠅꠁꠉꠦꠍꠂꠘ।
LUK 1:8 ꠄꠞꠝꠣꠎꠦ ꠅꠁꠘ꠆ꠘ ꠖꠟꠞ ꠁꠝꠣꠝꠔꠤꠞ ꠖꠤꠘ ꠡꠦꠡ ꠅꠁꠀ ꠔꠣꠘ ꠘꠤꠎꠞ ꠖꠟꠞ ꠁꠝꠣꠝꠔꠤꠞ ꠛꠣꠞꠤ ꠀꠁꠟ, ꠔꠦꠃ ꠎꠣꠇꠣꠞꠤꠀ ꠀꠟ꠆ꠟꠣꠞ ꠊꠞꠅ ꠁꠝꠣꠝꠔꠤꠔ ꠀꠍꠟꠣ।
LUK 1:9 ꠁꠝꠣꠝꠔꠤ ꠇꠣꠝꠞ ꠘꠤꠅꠝ ꠝꠣꠚꠤꠇ ꠟꠐꠣꠞꠤ ꠝꠣꠞꠤꠀ ꠔꠣꠘꠦ ꠙꠍꠘ꠆ꠖ ꠇꠞꠣ ꠅꠁꠟ, ꠎꠣꠔꠦ ꠔꠣꠁꠘ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠞ ꠙꠛꠤꠔ꠆ꠞ ꠢꠦꠞꠦꠝ ꠡꠞꠤꠚꠅ ꠢꠣꠝꠣꠁꠀ ꠀꠉꠞ-ꠈꠥꠡꠛꠄ ꠎꠣꠟꠣꠁꠘ।
LUK 1:10 ꠔꠣꠁꠘ ꠜꠤꠔꠞꠦ ꠅꠔꠣ ꠎꠣꠟꠣꠁꠞꠣ, ꠀꠞ ꠛꠣꠞꠦ ꠛꠃꠔ ꠝꠣꠘꠡꠦ ꠖꠥꠀ-ꠖꠥꠞꠥꠖ ꠇꠞꠞꠣ।
LUK 1:11 ꠀꠈꠔꠣꠃ ꠀꠉꠞ-ꠈꠥꠡꠛꠄ ꠎꠣꠟꠣꠘꠤꠞ ꠐꠦꠛꠥꠟꠞ ꠒꠣꠁꠘꠦꠖꠤ ꠀꠟ꠆ꠟꠣꠞ ꠄꠇꠎꠘ ꠚꠤꠞꠤꠡ꠆ꠔꠣꠄ ꠔꠣꠘꠞꠦ ꠖꠞꠡꠘ ꠖꠤꠟꠣ।
LUK 1:12 ꠚꠤꠞꠤꠡ꠆ꠔꠣꠞꠦ ꠖꠦꠈꠤꠀꠃ ꠔꠣꠘ ꠖꠤꠟ ꠇꠣꠙꠤꠉꠦꠟ, ꠎꠣꠘꠅ ꠒꠞ ꠀꠁꠟ।
LUK 1:13 ꠚꠤꠞꠤꠡ꠆ꠔꠣꠄ ꠇꠁꠟꠣ, “ꠅ ꠎꠣꠇꠣꠞꠤꠀ, ꠒꠞꠣꠁꠅ ꠘꠣ। ꠢꠥꠘꠅ, ꠀꠟ꠆ꠟꠣꠞ ꠖꠞꠛꠣꠞꠅ ꠔꠥꠝꠣꠞ ꠖꠥꠀ ꠇꠛꠥꠟ ꠅꠁꠍꠦ। ꠔꠥꠝꠣꠞ ꠛꠤꠛꠤ ꠄꠟꠤꠍꠣꠛꠦꠔꠞ ꠊꠞꠅ ꠄꠇ ꠙꠥꠀ ꠅꠁꠛꠣ, ꠔꠥꠝꠤ ꠄꠘ ꠘꠣꠝ ꠞꠣꠈꠤꠅ ꠄꠢꠤꠀ।
LUK 1:14 ꠅꠃ ꠙꠥꠔꠦ ꠔꠥꠝꠣꠞ ꠎꠤꠘ꠆ꠖꠦꠉꠤꠔ ꠛꠃꠔ ꠈꠥꠡꠤ ꠛꠣꠠꠣꠁꠛꠣ, ꠔꠣꠁꠘ ꠎꠘꠝ ꠟꠅꠀꠄ ꠀꠞꠅ ꠛꠃꠔ ꠎꠘ ꠈꠥꠡꠤ ꠅꠁꠛꠣ।
LUK 1:15 ꠄꠁꠘ ꠔ ꠝꠣꠛꠥꠖꠞ ꠘꠎꠞꠅ ꠛꠃꠔ ꠛꠠ ꠁꠎ꠆ꠎꠔꠤ ꠅꠁꠛꠣ। ꠎꠤꠘ꠆ꠖꠦꠉꠤꠄ ꠇꠥꠘꠥꠖꠤꠘꠃ ꠀꠋꠉꠥꠞꠞ ꠡꠞꠣꠛ ꠛꠣ ꠇꠥꠘꠥꠎꠣꠔ ꠘꠤꠡꠣ ꠈꠣꠁꠔꠣ ꠘꠣꠄ। ꠔꠣꠘ ꠝꠣʼꠞ ꠙꠦꠐꠅ ꠕꠣꠇꠔꠦꠃ ꠙꠣꠇ ꠞꠥꠢꠦ ꠇꠣꠝꠤꠟ ꠅꠁꠛꠣ।
LUK 1:16 ꠀꠞ ꠛꠘꠤ ꠁꠍꠞꠣꠁꠟꠞ ꠛꠃꠔ ꠝꠣꠘꠡꠞꠦ ꠔꠣꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠛꠣꠄ ꠚꠤꠞꠣꠁꠀ ꠀꠘꠛꠣ।
LUK 1:17 ꠔꠣꠁꠘ ꠁꠟꠤꠀꠍ ꠘꠛꠤꠞ ꠟꠣꠈꠣꠘ ꠢꠤꠝ꠆ꠝꠔ ꠀꠞ ꠔꠣꠇ꠆ꠇꠔꠦ ꠝꠣꠟꠤꠇꠞ ꠀꠉꠦ ꠅꠁꠀ ꠀꠁꠛꠣ। ꠀꠁꠀ ꠛꠣꠚ ꠅꠇꠟꠞ ꠖꠤꠟꠞꠦ ꠀꠅꠟꠣꠖꠞ ꠛꠣꠄ, ꠀꠞ ꠘꠣꠚꠞꠝꠣꠘ ꠅꠇꠟꠞ ꠖꠤꠟꠞꠦ ꠙꠞꠦꠎꠉꠣꠞꠤꠞ ꠛꠣꠄ ꠚꠤꠞꠣꠁꠛꠣ। ꠅꠃ ꠟꠣꠈꠣꠘ ꠝꠣꠛꠥꠖꠞ ꠟꠣꠉꠤ ꠄꠇ ꠖꠟ ꠛꠘ꠆ꠖꠣꠞꠦ ꠔꠣꠁꠘ ꠙꠥꠞꠣꠙꠥꠞ ꠔꠤꠀꠞ ꠇꠞꠛꠣ।”
LUK 1:18 ꠁꠔꠣ ꠢꠥꠘꠤꠀ ꠎꠣꠇꠣꠞꠤꠀꠄ ꠚꠤꠞꠤꠡ꠆ꠔꠣꠞꠦ ꠇꠁꠟꠣ, “ꠄꠞ ꠙꠞꠝꠣꠘ ꠇꠤꠔꠣ, ꠀꠝꠤ ꠇꠦꠝꠘꠦ ꠄꠇꠤꠘ ꠇꠞꠔꠣꠝ? ꠀꠝꠤ ꠔ ꠛꠥꠠꠣ ꠅꠁꠉꠦꠍꠤ, ꠀꠝꠣꠞ ꠛꠃꠅ ꠄꠇ꠆ꠇꠦꠞꠦ ꠝꠥꠞꠛ꠆ꠛꠤ ꠅꠁꠉꠦꠍꠂꠘ।”
LUK 1:19 ꠚꠤꠞꠤꠡ꠆ꠔꠣꠄ ꠇꠁꠟꠣ, “ꠀꠝꠤ ꠎꠤꠛꠞꠣꠁꠟ, ꠀꠝꠤ ꠀꠟ꠆ꠟꠣꠞ ꠍꠣꠝꠘꠦ ꠀꠎꠤꠞ ꠕꠣꠇꠤ। ꠔꠥꠝꠣꠞ ꠟꠉꠦ ꠛꠣꠔꠌꠤꠔ ꠇꠞꠤꠀ, ꠅꠃ ꠈꠥꠡ-ꠈꠛꠞꠤ ꠔꠥꠝꠣꠞꠦ ꠎꠣꠘꠣꠘꠤꠞ ꠟꠣꠉꠤꠃ ꠀꠟ꠆ꠟꠣꠄ ꠀꠝꠣꠞꠦ ꠛꠦꠎꠤꠍꠂꠘ।
LUK 1:20 ꠖꠦꠈꠤꠅ, ꠀꠝꠣꠞ ꠇꠕꠣ ꠡꠝꠄ ꠝꠔ ꠚꠟꠤꠛ। ꠅꠁꠟꠦ ꠀꠝꠣꠞ ꠝꠣꠔ ꠄꠇꠤꠘ ꠘꠣ ꠇꠞꠣꠄ, ꠁꠈꠣꠘ ꠚꠟꠤꠛꠣꠞ ꠀꠉ ꠙꠞ꠆ꠎꠘ꠆ꠔ ꠔꠥꠝꠤ ꠛꠥꠛꠣ ꠛꠘꠤꠎꠤꠛꠣꠄ, ꠇꠥꠘ꠆ꠔꠣ ꠝꠣꠔꠔꠣꠄ ꠙꠣꠞꠔꠣꠄ ꠘꠣꠄ।”
LUK 1:21 ꠁꠛꠣꠄ ꠝꠣꠘꠡꠦ ꠎꠣꠇꠣꠞꠤꠀꠞ ꠟꠣꠉꠤ ꠛꠣꠞ ꠌꠣꠁꠞꠣ। ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠞ ꠜꠤꠔꠞꠞ ꠅꠃ ꠙꠣꠇ ꠎꠣꠉꠣꠔ ꠔꠣꠘ ꠖꠦꠞꠤ ꠅꠞ ꠖꠦꠈꠤꠀ, ꠔꠣꠞꠣ ꠢꠇꠟ ꠌꠤꠘ꠆ꠔꠣꠔ ꠙꠠꠤꠉꠦꠟꠣ।
LUK 1:22 ꠛꠣꠖꠦ ꠎꠣꠇꠣꠞꠤꠀ ꠛꠣꠞ ꠅꠁꠀ ꠀꠁꠟꠣ, ꠅꠁꠟꠦ ꠔꠣꠁꠘ ꠇꠥꠘ꠆ꠔꠣꠃ ꠝꠣꠔꠔꠣ ꠙꠣꠞꠟꠣ ꠘꠣ। ꠔꠣꠁꠘ ꠛꠥꠛꠣ ꠅꠁꠉꠦꠟꠣ ꠀꠞ ꠁꠡꠣꠞꠣ-ꠀꠡꠣꠞꠣꠄ ꠛꠥꠎꠣꠁꠟꠣ। ꠁ ꠢꠣꠟꠔ ꠖꠦꠈꠤꠀ ꠝꠣꠘꠡꠦ ꠛꠥꠎꠤꠟꠤꠟꠣ, ꠙꠣꠇ ꠎꠣꠉꠣꠞ ꠜꠤꠔꠞꠦ ꠔꠣꠁꠘ ꠇꠥꠘꠥ ꠖꠞꠡꠘ ꠙꠣꠁꠍꠂꠘ।
LUK 1:23 ꠁꠝꠣꠝꠔꠤ ꠇꠣꠝꠞ ꠛꠣꠞꠤ ꠡꠦꠡ ꠅꠁꠀ ꠢꠣꠞꠟꠦ, ꠔꠣꠁꠘ ꠘꠤꠎꠞ ꠛꠣꠠꠤꠔ ꠉꠦꠟꠣꠉꠤ।
LUK 1:24 ꠄꠞꠛꠣꠖꠦ ꠔꠣꠘ ꠛꠤꠛꠤ ꠄꠟꠤꠍꠣꠛꠦꠔꠞ ꠙꠦꠐꠅ ꠢꠥꠞꠥꠔ꠆ꠔꠣ ꠀꠁꠟ, ꠄꠞꠖꠣꠄ ꠄꠟꠤꠍꠣꠛꠦꠔ ꠙꠣꠌ ꠝꠣꠡ ꠛꠣꠠꠤꠞ ꠛꠣꠞꠦ ꠛꠣꠞ ꠅꠁꠟꠣ ꠘꠣ।
LUK 1:25 ꠔꠣꠁꠘ ꠇꠁꠟꠣ, “ꠁꠔꠣ ꠔ ꠀꠟ꠆ꠟꠣꠁ ꠟꠤꠟꠣ-ꠈꠦꠟꠣ। ꠝꠣꠘꠡꠞ ꠉꠦꠍꠦ ꠀꠝꠤ ꠎꠦ ꠈꠥꠐꠣꠞ ꠜꠣꠉꠤ ꠅꠁꠍꠤ, ꠅꠃ ꠈꠥꠐꠣꠞ ꠡꠞꠝ ꠢꠞꠣꠘꠤꠞ ꠟꠣꠉꠤ ꠔꠣꠁꠘ ꠀꠝꠣꠞ ꠛꠣꠄ ꠈꠤꠀꠟ ꠇꠞꠍꠂꠘ।”
LUK 1:26 ꠄꠟꠤꠍꠣꠛꠦꠔꠞ ꠙꠦꠐꠅ ꠎꠦꠛꠟꠣ ꠍꠄ ꠝꠣꠡꠞ ꠢꠥꠞꠥꠔ꠆ꠔꠣ, ꠅꠃ ꠡꠝꠄ ꠉꠣꠟꠤꠟ ꠎꠤꠟꠣꠞ ꠘꠣꠍꠣꠞꠔ ꠉꠣꠃꠔ ꠄꠇꠎꠘ ꠀꠛꠤꠀꠔꠤ ꠡꠔꠤ ꠘꠣꠞꠤ ꠀꠍꠟꠣ, ꠄꠘ ꠘꠣꠝ ꠛꠤꠛꠤ ꠝꠞꠤꠅꠝ। ꠀꠟ꠆ꠟꠣꠄ ꠎꠤꠛꠞꠣꠁꠟ ꠚꠤꠞꠤꠡ꠆ꠔꠣꠞꠦ ꠔꠣꠘ ꠉꠦꠍꠦ ꠛꠦꠎꠤꠟꠣ। ꠔꠣꠘ ꠛꠤꠀ ꠑꠤꠇ ꠅꠁꠍꠤꠟ, ꠛꠣꠖꠡꠣ ꠖꠣꠃꠖꠞ ꠈꠣꠘ꠆ꠖꠣꠘꠞ ꠁꠃꠍꠥꠚ ꠘꠣꠝꠞ ꠄꠇꠎꠘꠞ ꠟꠉꠦ।
LUK 1:28 ꠚꠤꠞꠤꠡ꠆ꠔꠣꠄ ꠀꠁꠀ ꠛꠤꠛꠤ ꠝꠞꠤꠅꠝꠞꠦ ꠇꠁꠟꠣ, “ꠀꠍꠍꠣꠟꠣꠝꠥ ꠀꠟꠣꠁꠇꠥꠝ; ꠀꠟ꠆ꠟꠣ ꠙꠣꠇꠦ ꠀꠙꠘꠣꠞꠦ ꠞꠢꠝꠔ ꠇꠞꠍꠂꠘ, ꠔꠣꠁꠘ ꠀꠙꠘꠣꠞ ꠟꠉꠦ ꠀꠍꠂꠘ।”
LUK 1:29 ꠁꠈꠣꠘ ꠢꠥꠘꠤꠀ ꠝꠞꠤꠅꠝꠞ ꠝꠘ ꠙꠦꠞꠦꠡꠣꠘ ꠅꠁꠉꠦꠟ। ꠔꠣꠁꠘ ꠝꠘꠦ ꠝꠘꠦ ꠇꠁꠟꠣ, ꠁ ꠍꠣꠟꠣꠝꠞ ꠝꠣꠘꠤ ꠇꠤꠔꠣ?
LUK 1:30 ꠚꠤꠞꠤꠡ꠆ꠔꠣꠄ ꠇꠁꠟꠣ, “ꠅ ꠝꠞꠤꠅꠝ, ꠀꠙꠘꠦ ꠒꠞꠣꠁꠛꠣ ꠘꠣ, ꠀꠟ꠆ꠟꠣꠄ ꠀꠙꠘꠣꠞꠦ ꠞꠢꠝꠔ ꠇꠞꠍꠂꠘ।
LUK 1:31 ꠢꠥꠘꠃꠇ꠆ꠇꠣ, ꠀꠙꠘꠣꠞ ꠊꠞꠅ ꠄꠇ ꠙꠥꠀ ꠙꠄꠖꠣ ꠅꠁꠛꠣ, ꠀꠙꠘꠦ ꠄꠘ ꠘꠣꠝ ꠞꠣꠈꠛꠣ, ꠁꠍꠣ।
LUK 1:32 ꠔꠣꠁꠘ ꠛꠃꠔ ꠛꠠ ꠁꠎ꠆ꠎꠔꠤ ꠅꠁꠛꠣ। ꠔꠣꠘꠞꠦ ꠇꠅꠀ ꠅꠁꠛ ꠁꠛꠘꠥꠟ꠆ꠟꠣ, ꠀꠟ꠆ꠟꠣꠔꠣꠟꠣꠞ ꠈꠣꠍ ꠝꠣꠄꠀꠞ ꠎꠘ। ꠀꠟ꠆ꠟꠣ ꠝꠣꠛꠥꠖꠦ ꠔꠣꠘ ꠈꠣꠘ꠆ꠖꠣꠘꠞ ꠝꠥꠞꠛ꠆ꠛꠤ ꠛꠣꠖꠡꠣ ꠖꠣꠃꠖꠞ ꠉꠖꠤ ꠔꠣꠘꠞꠦ ꠖꠤꠛꠣ।
LUK 1:33 ꠔꠣꠁꠘ ꠖꠥꠘꠤꠀ ꠀꠈꠦꠞꠣꠔꠅ ꠛꠘꠤ ꠁꠍꠞꠣꠁꠟꠞ ꠃꠙꠞꠦ ꠛꠣꠖꠡꠣꠁ ꠇꠞꠛꠣ, ꠔꠣꠘ ꠛꠣꠖꠡꠣꠁ ꠇꠥꠘꠥꠖꠤꠘꠃ ꠚꠥꠠꠣꠁꠔ ꠘꠣꠄ।”
LUK 1:34 ꠔꠦꠃ ꠛꠤꠛꠤ ꠝꠞꠤꠅꠝꠦ ꠚꠤꠞꠤꠡ꠆ꠔꠣꠞꠦ ꠇꠁꠟꠣ, “ꠁꠔꠣ ꠇꠤꠟꠣꠘ ꠅꠁꠛ? ꠀꠝꠣꠞ ꠔ ꠛꠤꠀ-ꠡꠣꠖꠤꠃ ꠅꠁꠍꠦ ꠘꠣ।”
LUK 1:35 ꠚꠤꠞꠤꠡ꠆ꠔꠣꠄ ꠇꠁꠟꠣ, “ꠙꠣꠇ ꠞꠥꠢꠥ ꠀꠙꠘꠣꠞ ꠃꠙꠞꠦ ꠘꠣꠎꠤꠟ ꠅꠁꠛꠣ, ꠀꠞ ꠀꠟ꠆ꠟꠣꠞ ꠇꠥꠖꠞꠔꠤ ꠍꠣꠄꠀ ꠀꠙꠘꠣꠞ ꠃꠙꠞꠦ ꠀꠁꠛ। ꠄꠞꠖꠣꠄꠃ ꠀꠙꠘꠣꠞ ꠊꠞꠅ ꠎꠦ ꠙꠣꠇ ꠀꠅꠟꠣꠖꠦ ꠎꠘꠝ ꠟꠁꠛꠣ, ꠔꠣꠘꠞꠦ ꠁꠛꠘꠥꠟ꠆ꠟꠣ, ꠝꠣꠘꠤ ꠀꠟ꠆ꠟꠣꠞ ꠈꠣꠍ ꠝꠣꠄꠀꠞ ꠎꠘ ꠇꠁꠀ ꠒꠣꠇꠣ ꠅꠁꠛ।
LUK 1:36 ꠢꠥꠘꠃꠇ꠆ꠇꠣ, ꠀꠙꠘꠣꠞ ꠇꠥꠐꠥꠝ ꠛꠤꠛꠤ ꠄꠟꠤꠍꠣꠛꠦꠔꠞ ꠛꠦꠙꠣꠞꠦ ꠝꠣꠘꠡꠦ ꠇꠁꠔꠣ ꠘꠣ ꠘꠤ, ꠔꠣꠘ ꠇꠥꠘꠥ ꠢꠥꠞꠥꠔ꠆ꠔꠣꠃ ꠅꠁꠔꠣ ꠘꠣꠄ? ꠅꠁꠟꠦ ꠅꠈꠘ ꠔ ꠅꠃ ꠝꠥꠞꠛ꠆ꠛꠤ ꠛꠄꠅꠡꠅ ꠔꠣꠘ ꠙꠦꠐꠅ-ꠅ ꠍꠄ ꠝꠣꠡꠞ ꠙꠥꠀ ꠀꠍꠦ।
LUK 1:37 ꠔꠦ ꠀꠟ꠆ꠟꠣꠄ ꠙꠣꠞꠂꠘ ꠘꠣ, ꠁꠟꠣ ꠇꠥꠘ꠆ꠔꠣꠃ ꠘꠣꠁ।”
LUK 1:38 ꠝꠞꠤꠅꠝꠦ ꠇꠁꠟꠣ, “ꠀꠝꠤ ꠔ ꠀꠟ꠆ꠟꠣꠞ ꠛꠣꠘ꠆ꠖꠤ; ꠀꠙꠘꠣꠞ ꠇꠕꠣꠝꠔꠃ ꠢꠇꠟꠔꠣ ꠚꠟꠃꠇ।” ꠛꠣꠖꠦ ꠚꠤꠞꠤꠡ꠆ꠔꠣ ꠔꠣꠘ ꠉꠦꠍ ꠕꠣꠇꠤ ꠛꠤꠖꠣꠄ ꠅꠁꠉꠦꠟꠣ।
LUK 1:39 ꠄꠞꠛꠣꠖꠦ ꠛꠤꠛꠤ ꠝꠞꠤꠅꠝ ꠃꠠꠣ-ꠔꠣꠠꠣ ꠇꠞꠤ, ꠄꠢꠥꠖꠤꠀ ꠎꠤꠟꠣꠞ ꠄꠇ ꠙꠣꠠꠤꠀ ꠉꠣꠃꠔ ꠉꠦꠟꠣ।
LUK 1:40 ꠉꠤꠀ ꠢꠘꠅ ꠁꠝꠣꠝ ꠎꠣꠇꠣꠞꠤꠀꠞ ꠛꠣꠠꠤꠔ ꠢꠣꠝꠣꠁꠀ, ꠔꠣꠘ ꠛꠤꠛꠤ ꠄꠟꠤꠍꠣꠛꠦꠔꠞꠦ ꠍꠣꠟꠣꠝ ꠇꠞꠟꠣ।
LUK 1:41 ꠄꠟꠤꠍꠣꠛꠦꠔꠦ ꠝꠞꠤꠅꠝꠞ ꠀꠅꠀꠎ ꠢꠥꠘꠣꠞ ꠟꠉꠦ ꠟꠉꠦꠃ, ꠔꠣꠘ ꠙꠦꠐꠞ ꠢꠥꠞꠥꠔ꠆ꠔꠣ ꠀꠈꠔꠣ ꠟꠠꠤꠀ ꠃꠑꠤꠟꠣ। ꠔꠣꠁꠘ ꠙꠣꠇ ꠞꠥꠢꠦ ꠇꠣꠝꠤꠟ ꠅꠁꠀ,
LUK 1:42 ꠎꠥꠞꠦ ꠎꠥꠞꠦ ꠇꠁꠟꠣ, “ꠖꠥꠘꠤꠀꠞ ꠔꠣꠝꠣꠝ ꠛꠦꠐꠤꠘ꠆ꠔꠞ ꠝꠣꠎꠦ ꠔꠥꠝꠤꠃ ꠇꠙꠣꠟꠤ, ꠔꠥꠝꠣꠞ ꠙꠦꠐꠞ ꠍꠣꠛꠣꠟꠅ ꠇꠙꠣꠟꠤ।
LUK 1:43 ꠀꠝꠣꠞ ꠝꠥꠘꠤꠛꠞ ꠝꠣ ꠀꠝꠣꠞ ꠊꠞꠅ ꠔꠡꠞꠤꠚ ꠀꠘꠍꠂꠘ, ꠀꠝꠣꠞ ꠅꠔ ꠛꠠ ꠇꠙꠣꠟ ꠇꠤꠟꠣ ꠅꠁꠟ?
LUK 1:44 ꠀꠝꠤ ꠔꠥꠝꠣꠞ ꠀꠅꠀꠎ ꠢꠥꠘꠣꠞ ꠟꠉꠦ ꠟꠉꠦꠃ, ꠀꠝꠣꠞ ꠙꠦꠐꠞ ꠉꠦꠖꠣꠄꠅ ꠈꠥꠡꠤꠄ ꠟꠠꠤꠀ ꠃꠑꠤꠍꠂꠘ।
LUK 1:45 ꠔꠥꠝꠤ ꠔ ꠇꠙꠣꠟꠤ ꠛꠦꠐꠤ, ꠇꠣꠞꠘ ꠝꠣꠛꠥꠖꠦ ꠔꠥꠝꠣꠞꠦ ꠎꠦꠔꠣ ꠎꠣꠘꠣꠁꠍꠂꠘ, ꠔꠥꠝꠤ ꠖꠤꠟꠦ-ꠎꠣꠘꠦ ꠁꠔꠣ ꠄꠇꠤꠘ ꠇꠞꠍ।”
LUK 1:46 ꠅꠃ ꠛꠤꠛꠤ ꠝꠞꠤꠅꠝꠦ ꠇꠁꠟꠣ, “ꠀꠝꠣꠞ ꠇꠟꠛꠦ ꠔꠣꠞꠤꠚ ꠇꠞꠦꠞ ꠀꠝꠣꠞ ꠝꠣꠛꠥꠖꠞ,
LUK 1:47 ꠛꠦꠢꠦꠡ꠆ꠔꠤ ꠈꠥꠡꠤꠄ ꠜꠞꠤꠉꠦꠍꠦ ꠀꠝꠣꠞ ꠅꠘ꠆ꠔꠞ, ꠔꠞꠣꠅꠞꠣ ꠌꠣꠘ꠆ꠖ ꠀꠁꠍꠂꠘ, ꠅꠜꠣꠉꠤꠘꠤꠞ ꠊꠞ।
LUK 1:48 ꠌꠃꠈ ꠔꠥꠟꠤꠀ ꠌꠣꠁꠍꠂꠘ ꠖꠄꠀꠟ, ꠇꠣꠋꠉꠣꠟ ꠛꠣꠘ꠆ꠖꠤꠞ ꠛꠣꠄ, ꠄꠞꠖꠣꠄꠃ ꠔꠣꠝꠣꠝ ꠎꠣꠔꠤꠄ ꠡꠣꠛꠣꠡ ꠡꠣꠛꠣꠡ ꠉꠣꠄ, ꠛꠠ ꠇꠙꠣꠟꠤ ꠇꠁꠛꠣ ꠝꠞꠦ, ꠎꠥꠉ-ꠎꠥꠉꠣꠘ꠆ꠔꠞ।
LUK 1:49 ꠡꠇ꠆ꠔꠤꠝꠣꠘꠦ ꠇꠞꠟꠣ ꠝꠞꠦ ꠅꠔ ꠛꠠ ꠇꠣꠝ, ꠀꠝꠣꠞ ꠟꠣꠉꠤ ꠅꠁꠍꠂꠘ ꠔꠣꠁꠘ ꠇꠥꠖꠞꠔꠤ ꠀꠍꠣꠘ, ꠔꠣꠁꠘꠃ ꠔ ꠍꠥꠛꠢꠣꠘ ꠀꠟ꠆ꠟꠣ, ꠙꠣꠇ-ꠙꠛꠤꠔ꠆ꠞ ꠔꠣꠁꠘ।
LUK 1:50 ꠎꠦꠞꠣ ꠔꠣꠘꠦ ꠔꠣꠎꠤꠝ ꠇꠞꠤ ꠞꠂꠘ ꠒꠞꠣꠁꠀ, ꠞꠢꠝ ꠇꠞꠂꠘ ꠔꠣꠁꠘ ꠁꠔꠣꠞꠦ ꠘꠤꠎꠞ ꠎꠣꠘꠤꠀ, ꠅꠀꠞꠤꠡꠦ ꠅꠀꠞꠤꠡꠦ ꠞꠢꠝ, ꠔꠣꠁꠘꠃ ꠛꠤꠟꠣꠁꠘ।
LUK 1:51 ꠔꠣꠘꠃ ꠇꠥꠖꠞꠔꠤ ꠀꠔꠦ ꠇꠞꠍꠂꠘ ꠝꠢꠣ ꠇꠣꠝ, ꠝꠘꠞ ꠉꠞꠤꠝꠣꠄ ꠎꠦꠔꠣꠄ ꠇꠞꠦ ꠛꠠꠣꠁ ꠡꠣꠘ, ꠁꠔꠣꠞꠦ ꠈꠦꠖꠣꠁꠀ ꠖꠤꠀ, ꠛꠂꠔꠟ ꠛꠣꠘꠣꠁꠍꠂꠘ।
LUK 1:52 ꠞꠣꠎꠣ-ꠛꠣꠖꠡꠣꠁꠘ ꠢꠇꠤꠞ ꠅꠁꠟꠣ ꠉꠖꠤ ꠈꠥꠀꠁꠀ, ꠢꠇꠤꠞ ꠅꠇꠟ ꠛꠣꠖꠡꠣ ꠅꠁꠟꠣ ꠞꠢꠝꠔ ꠙꠣꠁꠀ, ꠃꠌꠣ-ꠘꠤꠌꠣ ꠢꠇꠤꠞ-ꠛꠣꠖꠡꠣ, ꠔꠣꠁꠘꠃ ꠛꠣꠘꠣꠁꠍꠂꠘ।
LUK 1:53 ꠃꠙꠣꠡꠤ ꠇꠣꠋꠉꠣꠟꠞꠦ ꠖꠤꠟꠣ ꠜꠣꠟꠣ ꠜꠣꠟꠣ ꠈꠣꠘꠤ, ꠜꠥꠇꠣꠡꠤꠞ ꠙꠦꠐꠅ ꠉꠦꠟ ꠖꠣꠝꠤ ꠖꠣꠘꠣ-ꠙꠣꠘꠤ, ꠗꠘꠤ ꠎꠘꠞꠦ ꠈꠣꠟꠤ ꠀꠔꠦ, ꠈꠦꠖꠣꠁꠀ ꠖꠤꠍꠂꠘ।
LUK 1:54 ꠔꠣꠁꠘ ꠎꠦꠟꠣ ꠅꠀꠖꠣ ꠇꠞꠍꠟꠣ ꠝꠄ-ꠝꠥꠞꠛ꠆ꠛꠤꠞ ꠟꠉꠦ, ꠅꠟꠣꠃ ꠔ ꠀꠍꠣꠘ ꠇꠞꠍꠂꠘ ꠛꠘꠤ ꠁꠍꠞꠣꠁꠟꠞꠦ, ꠛꠘꠤ ꠁꠍꠞꠣꠁꠟ ꠅꠁꠟꠣ ꠀꠟ꠆ꠟꠣꠞ ꠀꠙꠘ ꠉꠥꠟꠣꠝ।
LUK 1:55 ꠁꠛ꠆ꠞꠣꠢꠤꠝꠞꠦ ꠁꠀꠖ ꠞꠣꠈꠍꠂꠘ ꠞꠢꠝ-ꠛꠞꠇꠔ ꠖꠤꠛꠣ, ꠟꠉꠦ ꠔꠣꠘ ꠈꠣꠘ꠆ꠖꠣꠘꠦꠅ ꠅꠃ ꠖꠄꠀ ꠙꠣꠁꠛꠣ, ꠌꠤꠞꠇꠣꠟꠤꠘ ꠅꠃ ꠅꠀꠖꠣ ꠝꠘꠅ ꠞꠣꠈꠤꠍꠂꠘ॥”
LUK 1:56 ꠛꠤꠛꠤ ꠝꠞꠤꠅꠝ ꠔꠣꠘ ꠇꠥꠐꠥꠝ ꠄꠟꠤꠍꠣꠛꠦꠔꠞ ꠉꠦꠍꠦ ꠔꠤꠘ ꠝꠣꠡ ꠞꠁꠟꠣ, ꠢꠦꠡꠦ ꠔꠣꠘ ꠘꠤꠎꠞ ꠛꠣꠠꠤꠔ ꠉꠦꠟꠣꠉꠤ।
LUK 1:57 ꠛꠣꠖꠦ ꠝꠤꠀꠖ ꠙꠥꠞꠣ ꠅꠁꠀ ꠢꠣꠞꠟꠦ ꠄꠟꠤꠍꠣꠛꠦꠔꠞ ꠊꠞꠅ ꠄꠇ ꠙꠥꠀ ꠅꠁꠟꠣ।
LUK 1:58 ꠝꠣꠛꠥꠖꠦ ꠔꠣꠘꠞꠦ ꠅꠔ ꠛꠠ ꠞꠢꠝ ꠇꠞꠍꠂꠘ ꠢꠥꠘꠤꠀ, ꠀꠞꠤ-ꠚꠞꠤ ꠀꠞ ꠈꠦꠡ-ꠇꠥꠐꠥꠝ ꠅꠇꠟ ꠀꠁꠀ ꠔꠣꠘ ꠟꠉꠦ ꠈꠥꠡꠤ-ꠛꠣꠡꠤ ꠇꠞꠟꠣ।
LUK 1:59 ꠁꠢꠥꠖꠤ ꠅꠇꠟꠞ ꠞꠦꠅꠀꠎ ꠝꠣꠚꠤꠇ ꠎꠘꠝꠞ ꠀꠐ ꠖꠤꠘꠞ ꠖꠤꠘ, ꠙꠥꠀꠞ ꠝꠍꠟꠝꠣꠘꠤ ꠀꠞ ꠀꠇꠤꠇꠣ ꠇꠞꠣꠘꠤꠞ ꠟꠣꠉꠤ ꠔꠣꠞꠣ ꠢꠇꠟ ꠖꠟꠣ ꠅꠁꠟꠣ। ꠔꠣꠞꠣ ꠌꠣꠁꠟꠣ, ꠛꠣꠚꠞ ꠘꠣꠝꠞ ꠟꠣꠈꠣꠘ ꠙꠥꠀꠞ ꠘꠣꠝꠅ ꠅꠃꠇ।
LUK 1:60 ꠅꠁꠟꠦ ꠝꠣʼꠄ ꠁꠈꠣꠘ ꠝꠣꠘꠟꠣ ꠘꠣ, ꠔꠣꠁꠘ ꠇꠁꠟꠣ, “ꠘꠣ, ꠄꠞ ꠘꠣꠝ ꠅꠁꠛ ꠄꠢꠤꠀ।”
LUK 1:61 ꠔꠣꠞꠣ ꠇꠁꠟꠣ, “ꠔꠥꠝꠣꠞ ꠈꠦꠡ-ꠇꠥꠐꠥꠝꠞ ꠝꠣꠎꠦ ꠔ ꠁꠟꠣ ꠘꠣꠝ ꠇꠦꠃꠞꠞ ꠘꠣꠁ।”
LUK 1:62 ꠔꠦꠃ ꠔꠣꠞꠣ ꠁꠡꠣꠞꠣꠄ ꠙꠥꠀꠞ ꠛꠣꠚꠞꠦ ꠎꠤꠇꠣꠁꠟꠣ, ꠔꠣꠁꠘ ꠇꠥꠘ ꠘꠣꠝ ꠙꠍꠘ꠆ꠖ ꠇꠞꠂꠘ।
LUK 1:63 ꠎꠣꠇꠣꠞꠤꠀꠄ ꠔꠣꠞꠣꠞ ꠉꠦꠍ ꠕꠣꠇꠤ ꠈꠣꠔꠣ-ꠇꠟꠝ ꠘꠤꠀ ꠟꠦꠈꠟꠣ, “ꠔꠣꠞ ꠘꠣꠝ ꠄꠢꠤꠀ।” ꠅꠃ ꠔꠣꠞꠣ ꠢꠇꠟ ꠔꠣꠁꠎ꠆ꠎꠥꠛ ꠅꠁꠉꠦꠟꠣ।
LUK 1:64 ꠀꠞ ꠟꠉꠦ ꠟꠉꠦꠃ ꠎꠣꠇꠣꠞꠤꠀꠞ ꠎꠛꠣꠘ ꠈꠥꠟꠤꠉꠦꠟ, ꠔꠣꠁꠘ ꠝꠣꠔ-ꠇꠕꠣ ꠝꠣꠔꠤꠟꠣ ꠀꠞ ꠀꠟ꠆ꠟꠣꠞ ꠡꠥꠇꠞꠤꠀ ꠀꠖꠣꠄ ꠇꠞꠟꠣ।
LUK 1:65 ꠁꠔꠣ ꠖꠦꠈꠤꠀ ꠀꠞꠤ-ꠚꠞꠤ ꠢꠇꠟꠦ ꠒꠞꠣꠁꠉꠦꠟꠣ। ꠄꠢꠥꠖꠤꠀ ꠎꠤꠟꠣꠞ ꠙꠣꠠꠤꠀ ꠅꠘ꠆ꠌꠟꠞ ꠢꠇꠟ ꠝꠣꠘꠡꠞ ꠝꠥꠈꠦ ꠝꠥꠈꠦ ꠅꠃ ꠈꠛꠞ ꠞꠐꠤꠉꠦꠟ।
LUK 1:66 ꠎꠔ ꠝꠣꠘꠡꠦ ꠁ ꠊꠐꠘꠣ ꠢꠥꠘꠍꠤꠟ, ꠔꠣꠞꠣ ꠢꠇꠟꠦꠃ ꠝꠘꠦ ꠝꠘꠦ ꠌꠤꠘ꠆ꠔꠣ ꠇꠞꠤ ꠇꠁꠟ, ꠛꠠ ꠅꠁꠀ ꠢꠣꠞꠟꠦ ꠁ ꠙꠥꠀ ꠇꠤꠔꠣ ꠅꠁꠛ। ꠇꠣꠞꠘ ꠝꠣꠛꠥꠖꠞ ꠇꠥꠖꠞꠔꠤ ꠀꠔ ꠔꠣꠘ ꠃꠙꠞꠦ ꠀꠍꠤꠟ।
LUK 1:67 ꠛꠣꠖꠦ ꠙꠥꠀꠞ ꠛꠣꠚ ꠎꠣꠇꠣꠞꠤꠀ, ꠙꠣꠇ ꠞꠥꠢꠦ ꠇꠣꠝꠤꠟ ꠅꠁꠀ ꠅꠃ ꠉꠣꠁꠛꠤ ꠈꠛꠞ ꠇꠁꠟꠣ,
LUK 1:68 “ꠡꠥꠇꠞꠤꠀ ꠎꠣꠘꠣꠁ ꠀꠝꠤ ꠛꠘ꠆ꠖꠣꠄ ꠀꠟ꠆ꠟꠣ ꠝꠣꠛꠥꠖꠞ, ꠀꠍꠣꠘ ꠇꠞꠍꠂꠘ ꠔꠣꠁꠘ ꠘꠤꠎꠦ ꠀꠙꠘ ꠁꠍꠞꠣꠁꠟꠞ, ꠈꠤꠀꠟ ꠇꠞꠤ ꠇꠞꠟꠣ ꠀꠎꠣꠖ ꠘꠤꠎꠞ ꠉꠥꠟꠣꠝ ꠖꠟ।
LUK 1:69 ꠀꠝꠞꠣꠞ ꠟꠣꠉꠤ ꠙꠍꠘ꠆ꠖ ꠇꠞꠟꠣ ꠖꠣꠃꠖ ꠈꠣꠘ꠆ꠖꠣꠘꠞꠦ, ꠛꠟ-ꠔꠣꠇ꠆ꠇꠔꠤ ꠇꠣꠘ꠆ꠒꠣꠞꠤꠞꠦ ꠀꠘꠟꠣ ꠅꠈꠣꠘ ꠕꠘꠦ, ꠖꠦꠈꠣꠁꠟꠣꠄ ꠖꠄꠀꠟ ꠝꠞꠦ ꠘꠣꠎꠣꠔ ꠇꠞꠞꠣ ꠎꠘ।
LUK 1:70 ꠘꠛꠤ ꠅꠇꠟꠦ ꠎꠛꠣꠘꠖꠤ ꠇꠁꠍꠟꠣ ꠛꠃꠔ ꠀꠉꠦ, ꠔꠣꠁꠘꠃ ꠇꠅꠀꠁꠍꠟꠣ ꠁꠔꠣ ꠘꠛꠤ ꠅꠇꠟꠞ ꠝꠥꠈꠦ, ꠔꠣꠇ꠆ꠇꠔꠤ ꠇꠣꠘ꠆ꠒꠣꠞꠤꠃ ꠅꠁꠛꠣ ꠖꠣꠃꠖ ꠇꠥꠟꠞ ꠛꠟ।
LUK 1:71 ꠖꠥꠡꠝꠘ ꠅꠇꠟꠞ ꠇꠛꠎꠣ ꠕꠣꠇꠤ ꠔꠣꠁꠘ ꠛꠣꠌꠣꠁꠟꠣ, ꠊꠤꠘ-ꠁꠋꠡꠣ ꠇꠞꠞꠣ ꠕꠣꠇꠤ ꠅꠈꠘ ꠚꠣꠘꠣ ꠖꠤꠟꠣ, ꠀꠝꠞꠣꠞꠦ ꠛꠣꠌꠣꠁꠟꠣ ꠀꠁꠀ ꠖꠄꠀꠟ ꠝꠃꠟꠣꠞ ꠎꠘ।
LUK 1:72 ꠛꠣꠌꠣꠁꠟꠣ ꠀꠝꠞꠣꠞꠦ ꠈꠣꠟꠤ ꠝꠄ-ꠝꠥꠞꠛ꠆ꠛꠤꠞ ꠈꠣꠔꠤꠞꠦ, ꠇꠍꠝ ꠇꠞꠣ ꠙꠣꠇ ꠅꠀꠖꠣ ꠙꠥꠞꠣꠘꠤꠞ ꠘꠤꠅꠔꠦ, ꠝꠄ-ꠝꠥꠞꠛ꠆ꠛꠤꠞꠦ ꠎꠛꠣꠘ ꠖꠦꠅꠀꠄ ꠀꠝꠞꠣ ꠛꠣꠌꠤꠟꠣꠝ।
LUK 1:73 ꠇꠍꠝ ꠇꠞꠤ ꠅꠀꠖꠣ ꠇꠞꠍꠟꠣ ꠖꠄꠀꠟ ꠀꠟ꠆ꠟꠣꠄ, ꠁꠛ꠆ꠞꠣꠢꠤꠝꠞꠦ ꠎꠣꠘꠣꠁꠟꠣ ꠔꠣꠁꠘ ꠘꠣꠎꠣꠔꠞ ꠃꠙꠣꠄ, ꠁꠛ꠆ꠞꠣꠢꠤꠝ ꠘꠛꠤꠃ ꠅꠁꠟꠣ ꠀꠝꠞꠣꠞ ꠀꠍꠟ ꠛꠣꠚ।
LUK 1:74 ꠀꠝꠞꠣꠞꠦ ꠛꠣꠌꠣꠁꠔꠣ ꠇꠞꠤ ꠝꠃꠟꠣꠞ ꠅꠃ ꠇꠍꠝ, ꠖꠥꠡꠝꠘ ꠕꠣꠇꠤ ꠛꠣꠌꠣꠞ ꠟꠣꠉꠤ ꠛꠣꠔꠣꠁ ꠖꠤꠟꠣ ꠘꠤꠅꠝ, ꠎꠤꠘ꠆ꠖꠣ ꠎꠥꠖꠤꠘ ꠀꠍꠤ ꠀꠝꠞꠣ ꠘꠤꠌꠤꠘ꠆ꠔꠣ ꠞꠁꠔꠣꠝ। ꠒꠞ-ꠈꠚ ꠍꠣꠠꠣ ꠀꠝꠞꠣ ꠎꠣꠘꠥ ꠇꠞꠤ ꠄꠛꠣꠖꠔ, ꠙꠞꠦꠎꠉꠣꠞ ꠀꠞ ꠍꠢꠤ ꠙꠕꠦ ꠕꠣꠇꠤ ꠘꠤꠞꠣꠙꠖ, ꠔꠣꠘ ꠍꠣꠝꠘꠦ ꠞꠁꠀ ꠎꠣꠔꠦ ꠇꠞꠤ ꠔꠣꠘ ꠈꠦꠎꠝꠔ।
LUK 1:76 ꠅꠞꠦ ꠀꠝꠣꠞ ꠝꠣꠄꠀꠞ ꠙꠥꠔ ꠄꠢꠤꠀ ꠛꠣꠛꠣꠎꠤ, ꠔꠥꠝꠣꠞꠦ ꠔ ꠒꠣꠇꠣ ꠅꠁꠛ ꠀꠟ꠆ꠟꠣꠔꠣꠟꠣꠞ ꠘꠛꠤ, ꠝꠥꠘꠤꠛꠞ ꠀꠉꠦ ꠞꠁꠀ ꠍꠢꠤ ꠇꠞꠛꠣꠄ ꠙꠕ।
LUK 1:77 ꠛꠣꠔꠣꠁ ꠖꠤꠛꠣꠄ ꠔꠥꠝꠤ ꠔꠣꠘ ꠛꠘ꠆ꠖꠣ ꠅꠇꠟꠞꠦ, ꠉꠥꠘꠣ ꠝꠣꠚꠤꠞ ꠙꠕ ꠌꠤꠘꠛꠣ ꠔꠥꠝꠣꠞ ꠔꠣꠟꠤꠝꠦ, ꠛꠣꠔꠣꠁꠀ ꠖꠤꠛꠣꠄ ꠛꠣꠛꠣ ꠘꠣꠎꠣꠔ ꠙꠣꠅꠀꠞ ꠙꠕ।
LUK 1:78 ꠀꠝꠞꠣꠞ ꠀꠟ꠆ꠟꠣꠞ ꠞꠢꠝ ꠀꠞ ꠢꠃ ꠝꠢꠛ꠆ꠛꠔꠦ, ꠛꠦꠢꠦꠡ꠆ꠔꠤ ꠘꠥꠞꠞ ꠄꠇ ꠡꠥꠞꠥꠎ ꠀꠁꠛꠣ ꠃꠙꠞꠦꠔꠦ, ꠀꠝꠞꠣꠞ ꠃꠙꠞꠦ ꠀꠁꠀ ꠢꠣꠞꠤ ꠞꠣꠈꠤꠛꠣ ꠘꠎꠞ।
LUK 1:79 ꠝꠃꠔ ꠀꠞ ꠀꠘ꠆ꠖꠣꠞꠤꠞ ꠉꠣꠔꠅ ꠎꠦꠞꠣ ꠇꠣꠐꠣꠄ ꠖꠤꠘ, ꠘꠥꠞꠞ ꠙꠕ ꠖꠦꠈꠛꠣ ꠔꠣꠞꠣ ꠇꠞꠤꠀ ꠄꠇꠤꠘ, ꠀꠝꠞꠣꠞꠦꠅ ꠡꠣꠘ꠆ꠔꠤꠞ ꠙꠕꠦ ꠌꠣꠟꠣꠁꠛꠣ ꠅꠃ ꠎꠘ। ꠅꠃ ꠢꠥꠎꠥꠞ ꠘꠣꠎꠤꠟ ꠅꠁꠀ ꠖꠦꠈꠣꠁꠛꠣ ꠇꠥꠖꠞꠔ, ꠔꠣꠁꠘꠃ ꠢꠃ ꠅꠀꠖꠣ ꠇꠞꠣ ꠀꠟ꠆ꠟꠣꠁ ꠞꠢꠝꠔ॥”
LUK 1:80 ꠛꠣꠖꠦ ꠄꠢꠤꠀ ꠀꠡ꠆ꠔꠦ ꠀꠡ꠆ꠔꠦ ꠛꠠ ꠅꠁꠟꠣ, ꠟꠉꠦ ꠅꠁꠀ ꠔꠣꠘ ꠞꠥꠢꠣꠘꠤ ꠛꠟꠅ ꠛꠣꠠꠤꠟ। ꠛꠘꠤ ꠁꠍꠞꠣꠁꠟꠞ ꠍꠣꠝꠘꠦ ꠈꠥꠟꠣ-ꠝꠦꠟꠣ ꠎꠣꠁꠞ ꠅꠁꠛꠣꠞ ꠀꠉ ꠙꠞ꠆ꠎꠘ꠆ꠔ, ꠔꠣꠁꠘ ꠝꠞꠥꠜꠥꠝꠤꠞ ꠝꠣꠎꠦ ꠖꠤꠘ ꠇꠣꠐꠣꠁꠟꠣ।
LUK 2:1 ꠅꠃ ꠡꠝꠄ ꠞꠥꠝꠣꠘ ꠛꠣꠖꠡꠣ ꠀꠉꠡ꠆ꠔ ꠇꠂꠍꠞꠦ ꠢꠥꠇꠥꠝ ꠖꠤꠟꠣ, ꠔꠣꠘ ꠀꠡ꠆ꠔꠣ ꠛꠣꠖꠡꠣꠁꠞ ꠢꠇꠟ ꠙ꠆ꠞꠎꠣꠄ ꠎꠣꠞꠎꠤꠞ ꠘꠣꠝ ꠟꠦꠈꠣꠘꠤꠞ ꠟꠣꠉꠤ।
LUK 2:2 ꠡꠤꠞꠤꠀꠞ ꠢꠣꠇꠤꠝ ꠇꠥꠞꠤꠘꠤꠀꠍꠞ ꠀꠝꠟꠅ, ꠅꠃ ꠙꠄꠟꠣ ꠛꠣꠞ ꠝꠣꠘꠥꠡ ꠉꠘꠣꠞ ꠟꠣꠉꠤ ꠘꠣꠝ ꠟꠦꠈꠣꠁꠟ ꠅꠁꠟ।
LUK 2:3 ꠔꠦꠃ ꠘꠣꠝ ꠟꠦꠈꠣꠘꠤꠞ ꠟꠣꠉꠤ ꠢꠇꠟ ꠝꠣꠘꠥꠡ ꠎꠣꠞꠎꠤꠞ ꠛꠥꠘꠤꠀꠖꠤ ꠉꠣꠃꠔ ꠉꠦꠟꠣ।
LUK 2:4 ꠅꠃ ꠟꠣꠈꠣꠘ ꠁꠃꠍꠥꠚꠅ ꠘꠣꠝ ꠟꠦꠈꠣꠘꠤꠞ ꠟꠣꠉꠤ ꠉꠣꠟꠤꠟ ꠎꠤꠟꠣꠞ ꠘꠣꠍꠣꠞꠔ ꠉꠣꠃ ꠕꠣꠇꠤ ꠛꠣꠖꠡꠣ ꠖꠣꠃꠖꠞ ꠉꠣꠃꠔ ꠀꠁꠟꠣ। ꠔꠣꠁꠘ ꠔ ꠖꠣꠃꠖꠞ ꠈꠣꠘ꠆ꠖꠣꠘꠞ ꠝꠣꠘꠥꠡ। ꠉꠣꠃꠞ ꠘꠣꠝ ꠛꠦꠕꠦꠟꠢꠣꠝ, ꠁꠐꠣ ꠄꠢꠥꠖꠤꠀ ꠎꠤꠟꠣꠔ।
LUK 2:5 ꠛꠤꠛꠤ ꠝꠞꠤꠅꠝꠅ ꠅꠃ ꠁꠃꠍꠥꠚꠞ ꠟꠉꠦ ꠅꠁꠀ ꠘꠣꠝ ꠟꠦꠈꠣꠘꠤꠔ ꠉꠦꠟꠣ। ꠅꠃ ꠁꠃꠍꠥꠚꠞ ꠟꠉꠦꠃ ꠔꠣꠘ ꠡꠣꠖꠤ ꠑꠤꠇ ꠅꠁꠍꠤꠟ, ꠀꠞ ꠔꠣꠘ ꠙꠦꠐꠅ ꠅꠃ ꠡꠝꠄ ꠢꠥꠞꠥꠔ꠆ꠔꠣ ꠀꠍꠤꠟ।
LUK 2:6 ꠛꠦꠕꠦꠟꠢꠣꠝꠅ ꠕꠣꠇꠔꠦꠃ ꠝꠞꠤꠅꠝꠞ ꠢꠥꠞꠥꠔ꠆ꠔꠣ ꠅꠁꠛꠣꠞ ꠛꠤꠡꠦ ꠗꠞꠟ।
LUK 2:7 ꠀꠞ ꠔꠣꠘ ꠙꠄꠟꠣ ꠙꠥꠀꠞ ꠎꠘꠝ ꠅꠁꠟ। ꠅꠁꠟꠦ ꠢꠤꠘꠅ ꠇꠥꠘꠥ ꠝꠦꠝꠣꠘ ꠈꠣꠘꠣꠔ ꠕꠣꠇꠣꠞ ꠎꠣꠉꠣ ꠝꠤꠟꠟ ꠘꠣ, ꠄꠞꠖꠣꠄ ꠝꠞꠤꠅꠝꠦ ꠅꠃ ꠢꠥꠞꠥꠔ꠆ꠔꠣꠞꠦ ꠔꠦꠘꠣꠖꠤ ꠛꠦꠞꠣꠁꠀ ꠉꠥꠀꠟ ꠊꠞꠞ ꠈꠦꠞꠞ ꠉꠣꠝꠟꠣꠔ ꠢꠥꠔꠣꠁ ꠕꠁꠟꠣ।
LUK 2:8 ꠅꠃ ꠛꠦꠕꠦꠟꠢꠣꠝ ꠉꠣꠃꠞ ꠇꠣꠘ꠆ꠖꠣꠔ ꠛꠘ꠆ꠖꠞ ꠝꠣꠎꠦ, ꠝꠦꠠꠣꠞ ꠞꠣꠈꠣꠟ ꠅꠇꠟꠦ ꠞꠣꠁꠔꠇꠥꠞ ꠛꠣꠟꠣ ꠔꠣꠞꠣꠞ ꠝꠦꠠꠣ ꠙꠣꠞꠣ ꠖꠦꠅꠀꠔ ꠀꠍꠤꠟ।
LUK 2:9 ꠀꠈꠔꠣꠃ ꠀꠟ꠆ꠟꠣꠞ ꠄꠇ ꠚꠤꠞꠤꠡ꠆ꠔꠣ ꠔꠣꠞꠣꠞ ꠍꠣꠝꠘꠦ ꠀꠁꠀ ꠖꠞꠡꠘ ꠖꠤꠟꠣ, ꠀꠞ ꠝꠣꠛꠥꠖꠞ ꠘꠥꠞꠞ ꠔꠦꠎꠦ ꠌꠣꠁꠞꠅꠛꠣꠄ ꠚꠞ ꠅꠁꠉꠦꠟ। ꠁꠔꠣ ꠖꠦꠈꠤꠀ ꠞꠣꠈꠣꠟ ꠅꠇꠟ ꠒꠞꠞ ꠌꠥꠐꠦ ꠛꠦꠖꠤꠡꠣ ꠛꠘꠤꠉꠦꠟꠣ।
LUK 2:10 ꠅꠁꠟꠦ ꠚꠤꠞꠤꠡ꠆ꠔꠣꠄ ꠔꠣꠞꠣꠞꠦ ꠇꠁꠟꠣ, “ꠔꠥꠝꠞꠣ ꠒꠞꠣꠁꠅ ꠘꠣ। ꠀꠝꠤ ꠔꠥꠝꠞꠣꠞ ꠟꠣꠉꠤ ꠈꠥꠛ ꠈꠥꠡꠤꠞ ꠈꠛꠞ ꠟꠁꠀ ꠀꠁꠍꠤ। ꠁ ꠈꠥꠡ-ꠈꠛꠞꠤ ꠖꠥꠘꠤꠀꠞ ꠔꠣꠝꠣꠝ ꠝꠣꠘꠡꠞ ꠟꠣꠉꠤ।
LUK 2:11 ꠢꠥꠘꠅ, ꠔꠥꠝꠞꠣꠞ ꠔꠞꠣꠘꠦꠀꠟꠣ ꠀꠁꠎ ꠖꠣꠃꠖꠞ ꠉꠣꠃꠔ ꠎꠘꠝ ꠟꠁꠍꠂꠘ। ꠔꠣꠁꠘꠃ ꠀꠟ-ꠝꠍꠤ, ꠔꠣꠁꠘꠃ ꠝꠣꠟꠤꠇ।
LUK 2:12 ꠔꠥꠝꠞꠣ ꠉꠤꠀ ꠄꠞ ꠙꠞꠝꠣꠘ ꠖꠦꠈꠛꠣꠄ, ꠖꠦꠈꠛꠣꠄ ꠄꠇ ꠇꠣꠌꠣ ꠢꠥꠞꠥꠔ꠆ꠔꠣꠞꠦ ꠔꠦꠘꠣꠖꠤ ꠛꠦꠞꠣꠁꠀ, ꠉꠥꠀꠟ ꠊꠞꠞ ꠈꠦꠞꠞ ꠉꠣꠝꠟꠣꠔ ꠢꠥꠔꠣꠁꠀ ꠕꠅꠀ ꠅꠁꠍꠦ।”
LUK 2:13 ꠅꠃ ꠡꠝꠄ ꠀꠈꠔꠣꠃ ꠢꠃ ꠚꠤꠞꠤꠡ꠆ꠔꠣꠞ ꠟꠉꠦ ꠀꠞꠅ ꠛꠃꠔ ꠚꠤꠞꠤꠡ꠆ꠔꠣꠞꠦ ꠖꠦꠈꠣ ꠉꠦꠟ। ꠄꠞꠣ ꠀꠟ꠆ꠟꠣꠞ ꠎꠤꠇꠤꠞ-ꠀꠎꠇꠣꠞ ꠇꠞꠤ ꠇꠞꠤ ꠇꠁꠟꠣ,
LUK 2:14 “ꠀꠍꠝꠣꠘꠅ ꠀꠟ꠆ꠟꠣꠞ ꠟꠤꠟꠣ-ꠈꠦꠟꠣ ꠖꠦꠈꠣ ꠎꠣꠃꠇ, ꠖꠥꠘꠤꠀꠞ ꠛꠥꠇꠥꠔ ꠔꠣꠘ ꠙꠤꠀꠞꠣ ꠛꠘ꠆ꠖꠣꠞ ꠡꠣꠘ꠆ꠔꠤ ꠅꠃꠇ।”
LUK 2:15 ꠛꠣꠖꠦ ꠚꠤꠞꠤꠡ꠆ꠔꠣ ꠅꠇꠟ ꠔꠣꠞꠣꠞ ꠉꠦꠍ ꠕꠣꠇꠤ ꠀꠍꠝꠣꠘꠅ ꠉꠤꠀ ꠢꠣꠞꠟꠦ, ꠞꠣꠈꠣꠟ ꠅꠇꠟꠦ ꠄꠇꠦ-ꠅꠁꠘ꠆ꠘꠞꠦ ꠇꠁꠟ, “ꠀꠅ, ꠀꠝꠞꠣ ꠛꠦꠕꠦꠟꠢꠣꠝꠅ ꠎꠣꠁ। ꠝꠣꠛꠥꠖꠦ ꠀꠝꠞꠣꠞꠦ ꠎꠦ ꠈꠛꠞ ꠎꠣꠘꠣꠁꠟꠣ, ꠅꠔꠣ ꠖꠦꠈꠤꠀ ꠀꠁ।”
LUK 2:16 ꠝꠣꠔꠤ ꠝꠣꠔꠤ ꠔꠣꠞꠣ ꠎꠟꠖꠤ ꠇꠞꠤ ꠉꠦꠟꠣ, ꠉꠤꠀ ꠝꠞꠤꠅꠝ, ꠁꠃꠍꠥꠚ ꠀꠞ ꠈꠦꠞꠞ ꠉꠣꠝꠟꠣꠔ ꠢꠥꠔꠣꠁꠟ ꠅꠃ ꠢꠥꠞꠥꠔ꠆ꠔꠣꠞꠦ ꠙꠣꠁꠟꠣ।
LUK 2:17 ꠙꠣꠁꠀ ꠅꠃ ꠢꠥꠞꠥꠔ꠆ꠔꠣꠞ ꠛꠦꠙꠣꠞꠦ ꠔꠣꠞꠣꠞꠦ ꠎꠦ ꠈꠛꠞ ꠎꠣꠘꠣꠁꠟ ꠅꠁꠍꠤꠟ, ꠁꠔꠣ ꠔꠣꠞꠣ ꠢꠇꠟꠞꠦ ꠇꠁꠟꠣ।
LUK 2:18 ꠔꠣꠞꠣꠞ ꠝꠣꠔ ꠢꠥꠘꠤꠀ ꠢꠇꠟꠦꠃ ꠔꠣꠁꠎ꠆ꠎꠥꠛ ꠅꠁꠉꠦꠟꠣ।
LUK 2:19 ꠅꠁꠟꠦ ꠝꠞꠤꠅꠝꠦ ꠢꠇꠟꠔꠣ ꠖꠤꠟꠞ ꠝꠣꠎꠦ ꠉꠣꠕꠤꠀ ꠞꠣꠈꠟꠣ, ꠀꠞ ꠝꠘꠦ ꠝꠘꠦ ꠌꠤꠘ꠆ꠔꠣꠔ ꠞꠁꠟꠣ।
LUK 2:20 ꠚꠤꠞꠤꠡ꠆ꠔꠣ ꠅꠇꠟꠦ ꠞꠣꠈꠣꠟ ꠅꠇꠟꠞꠦ ꠎꠦꠟꠣ ꠇꠁꠍꠟꠣ, ꠄꠞꠣ ꠁꠔꠣ ꠖꠦꠈꠤꠀ ꠢꠥꠘꠤꠀ ꠀꠟ꠆ꠟꠣꠞ ꠎꠤꠇꠤꠞ ꠔꠣꠞꠤꠚ ꠇꠞꠤ ꠇꠞꠤ ꠚꠤꠞꠔ ꠉꠦꠟꠣꠉꠤ।
LUK 2:21 ꠛꠣꠖꠦ ꠎꠘꠝꠞ ꠀꠐ ꠖꠤꠘꠞ ꠖꠤꠘ ꠀꠇꠤꠇꠣ ꠀꠞ ꠝꠍꠟꠝꠣꠘꠤ ꠇꠞꠣꠘꠤꠞ ꠛꠣꠟꠣ, ꠔꠣꠘ ꠘꠣꠝ ꠞꠣꠈꠣ ꠅꠁꠟ ꠁꠍꠣ। ꠝꠣʼꠞ ꠙꠦꠐꠅ ꠀꠁꠛꠣꠞ ꠀꠉꠦꠃ ꠚꠤꠞꠤꠡ꠆ꠔꠣꠄ ꠅꠃ ꠘꠣꠝ ꠕꠁꠍꠟꠣ।
LUK 2:22 ꠄꠞꠝꠣꠎꠦ ꠝꠥꠍꠣ ꠘꠛꠤꠞ ꠡꠞꠤꠅꠔ ꠝꠣꠚꠤꠇ ꠔꠣꠞꠣꠞ ꠙꠣꠇ-ꠍꠣꠚ ꠅꠀꠞ ꠡꠝꠄ ꠅꠁꠟ। ꠔꠦꠃ ꠁꠍꠣꠞꠦ ꠝꠣꠛꠥꠖꠞ ꠀꠔꠅ ꠡꠙꠤꠀ ꠖꠤꠛꠣꠞ ꠘꠤꠅꠔꠦ, ꠁꠃꠍꠥꠚ ꠀꠞ ꠝꠞꠤꠅꠝꠦ ꠔꠣꠘꠦ ꠟꠁꠀ ꠎꠦꠞꠥꠎꠣꠟꠦꠝ ꠐꠣꠃꠘꠅ ꠀꠁꠟꠣ।
LUK 2:23 ꠝꠣꠛꠥꠖꠞ ꠡꠞꠤꠅꠔꠞ ꠢꠥꠇꠥꠝ ꠀꠍꠤꠟ, ꠙꠞꠔꠦꠇ ꠎꠣꠘꠖꠣꠞꠞ ꠙꠄꠟꠣ ꠙꠥꠀꠞꠦ ꠀꠟ꠆ꠟꠣꠞ ꠘꠣꠝꠦ ꠡꠙꠤꠀ ꠖꠤꠔꠦ ꠅꠁꠛ।
LUK 2:24 ꠄꠞꠟꠉꠦ, ꠄꠇ ꠎꠥꠠꠣ ꠒꠥꠙꠤ ꠙꠣꠈꠤ ꠛꠣ ꠙꠣꠞꠅꠞ ꠖꠥꠁꠐꠣ ꠛꠣꠁꠌ꠆ꠌꠣ ꠇꠥꠞꠛꠣꠘꠤ ꠖꠤꠔꠦ ꠅꠁꠛ, ꠡꠞꠤꠅꠔꠞ ꠅꠃ ꠢꠥꠇꠥꠝ ꠝꠣꠚꠤꠇ ꠔꠣꠞꠣ ꠇꠥꠞꠛꠣꠘꠤ ꠖꠦꠅꠀꠔ ꠀꠁꠟꠣ।
LUK 2:25 ꠅꠃ ꠡꠝꠄ ꠎꠦꠞꠥꠎꠣꠟꠦꠝ ꠐꠣꠃꠘꠅ ꠍꠣꠝꠣꠃꠘ ꠘꠣꠝꠞ ꠄꠇꠎꠘ ꠀꠟ꠆ꠟꠣꠞꠣꠁꠀ ꠛꠥꠎꠥꠞ꠆ꠉ ꠀꠍꠟꠣ, ꠔꠣꠁꠘ ꠙꠣꠇ ꠞꠥꠢꠦ ꠇꠣꠝꠤꠟ। ꠔꠣꠁꠘ ꠝꠘꠦ ꠝꠘꠦ ꠛꠣꠞ ꠌꠣꠅꠀꠔ ꠀꠍꠟꠣ, ꠀꠟ꠆ꠟꠣꠄ ꠇꠥꠘ ꠡꠝꠄ ꠛꠘꠤ ꠁꠍꠞꠣꠁꠟꠞꠦ ꠡꠣꠘ꠆ꠔꠤ ꠖꠤꠛꠣ।
LUK 2:26 ꠙꠣꠇ ꠞꠥꠢꠥ ꠔꠣꠘ ꠟꠉꠦ ꠀꠍꠟꠣ, ꠅꠃ ꠞꠥꠢꠦ ꠔꠣꠘꠞꠦ ꠛꠣꠔꠣꠁꠍꠟꠣ, ꠔꠣꠘ ꠝꠃꠔꠞ ꠀꠉꠦꠃ ꠀꠟ꠆ꠟꠣꠞ ꠅꠀꠖꠣ ꠇꠞꠣ ꠀꠟ-ꠝꠍꠤꠞꠦ ꠔꠣꠁꠘ ꠖꠦꠈꠛꠣ।
LUK 2:27 ꠙꠣꠇ ꠞꠥꠢꠥꠞ ꠁꠡꠣꠞꠣꠄ ꠍꠣꠝꠣꠃꠘ ꠅꠃ ꠖꠤꠘ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠅ ꠀꠎꠤꠞ ꠅꠁꠟꠣ। ꠁꠍꠣꠞ ꠝꠣ-ꠛꠣꠚꠦꠅ ꠡꠞꠤꠅꠔꠞ ꠢꠥꠇꠥꠝ ꠀꠖꠣꠄ ꠇꠞꠣꠞ ꠘꠤꠅꠔꠦ, ꠉꠦꠖꠣ ꠁꠍꠣꠞꠦ ꠟꠁꠀ ꠅꠘꠅ ꠀꠁꠟꠣ।
LUK 2:28 ꠅꠃ ꠇꠣꠝꠤꠟ ꠛꠥꠎꠥꠞ꠆ꠉ ꠍꠣꠝꠣꠃꠘꠦ ꠁꠍꠣꠞꠦ ꠇꠥꠟꠅ ꠟꠁꠀ ꠀꠟ꠆ꠟꠣꠞ ꠡꠥꠇꠞꠤꠀ ꠀꠖꠣꠄ ꠇꠞꠟꠣ। ꠔꠣꠁꠘ ꠇꠁꠟꠣ,
LUK 2:29 “ꠅ ꠝꠣꠟꠤꠇ, ꠔꠥꠝꠣꠞ ꠎꠛꠣꠘ ꠝꠣꠚꠤꠇ ꠔꠥꠝꠣꠞ ꠁ ꠉꠥꠟꠣꠝꠞꠦ ꠅꠈꠘ ꠡꠣꠘ꠆ꠔꠤꠄ ꠛꠤꠖꠣꠄ ꠖꠦꠅ।
LUK 2:30 ꠀꠖꠝ ꠎꠣꠔꠤꠞꠦ ꠔꠞꠣꠘꠤꠞ ꠟꠣꠉꠤ, ꠔꠣꠝꠣꠝ ꠝꠣꠘꠡꠞ ꠌꠃꠈꠞ ꠍꠣꠝꠘꠦ, ꠔꠥꠝꠤ ꠎꠦ ꠃꠍꠤꠟ꠆ꠟꠣ ꠇꠣꠁꠝ ꠇꠞꠍ ꠢꠃ ꠀꠟ-ꠝꠍꠤꠞꠦ ꠀꠝꠣꠞ ꠘꠤꠎ ꠌꠃꠈꠦ ꠖꠦꠈꠤꠀ ꠉꠦꠟꠣꠝ।
LUK 2:32 ꠔꠥꠝꠣꠞ ꠈꠣꠍ ꠙ꠆ꠞꠎꠣ ꠛꠘꠤ ꠁꠍꠞꠣꠁꠟꠞ ꠉꠃꠞꠛ ꠔ ꠄꠁꠘꠃ, ꠛꠣꠖ-ꠛꠣꠇꠤ ꠔꠣꠝꠣꠝ ꠎꠣꠔꠤꠞꠦꠅ ꠙꠕ ꠖꠦꠈꠣꠘꠤꠞ ꠘꠥꠞ।”
LUK 2:33 ꠍꠣꠝꠣꠃꠘꠦ ꠁꠍꠣꠞ ꠛꠦꠙꠣꠞꠦ ꠅꠃ ꠎꠦꠔꠣ ꠇꠁꠟꠣ, ꠁꠔꠣ ꠢꠥꠘꠤꠀ ꠁꠍꠣꠞ ꠝꠣ-ꠛꠣꠚ ꠔꠣꠁꠎ꠆ꠎꠥꠛ ꠅꠁꠉꠦꠟꠣ।
LUK 2:34 ꠍꠣꠝꠣꠃꠘꠦ ꠔꠣꠞꠣꠞꠦ ꠖꠥꠀ ꠖꠤꠟꠣ, ꠔꠣꠁꠘ ꠁꠍꠣꠞ ꠝꠣ ꠝꠞꠤꠅꠝꠞꠦ ꠇꠁꠟꠣ, “ꠢꠥꠘꠅ, ꠀꠟ꠆ꠟꠣ ꠙꠣꠇꠞ ꠈꠤꠀꠟ ꠅꠁꠟ, ꠅꠃ ꠢꠥꠞꠥꠔ꠆ꠔꠣꠞ ꠖꠞꠥꠘ ꠛꠘꠤ ꠁꠍꠞꠣꠁꠟꠞ ꠛꠃꠔ ꠎꠘꠦ ꠘꠣꠎꠣꠔ ꠢꠣꠍꠤꠟ ꠇꠞꠛꠣ, ꠀꠞ ꠛꠃꠔ ꠎꠘ ꠟꠣꠘ꠆ꠘꠔꠤ ꠅꠁꠛꠣ। ꠔꠣꠁꠘ ꠅꠃ ꠟꠣꠈꠣꠘ ꠄꠇ ꠘꠤꠡꠣꠘꠣ, ꠔꠣꠘ ꠛꠤꠙꠇ꠆ꠇꠦ ꠛꠃꠔꠦꠃ ꠝꠣꠔꠤꠛ।
LUK 2:35 ꠅꠔꠣ ꠕꠣꠇꠤ ꠔꠣꠞꠣꠞ ꠖꠤꠟꠞ ꠢꠣꠟ-ꠢꠇꠤꠇꠔ ꠛꠥꠎꠣ ꠎꠣꠁꠛ। ꠀꠞ ꠢꠥꠘꠅ, ꠔꠟꠥꠀꠞꠦ ꠇꠣꠐꠤꠟꠦ ꠎꠦꠟꠣ ꠅꠄ, ꠔꠥꠝꠣꠞ ꠖꠤꠟꠅ-ꠅ ꠅꠟꠣ ꠖꠥꠈꠞ ꠍꠦꠟ ꠢꠣꠝꠣꠁꠛ।”
LUK 2:36 ꠅꠃ ꠡꠝꠄ ꠢꠣꠘ꠆ꠘꠣ ꠘꠣꠝꠞ ꠄꠇꠎꠘ ꠛꠦꠐꠤ ꠝꠣꠘꠥꠡꠅ ꠀꠍꠟꠣ, ꠔꠣꠁꠘ ꠀꠟ꠆ꠟꠣꠞ ꠘꠛꠤ। ꠔꠣꠘ ꠛꠣꠚꠞ ꠘꠣꠝ ꠙꠣꠘꠥꠄꠟ, ꠀꠞ ꠈꠣꠘ꠆ꠖꠣꠘꠞ ꠘꠣꠝ ꠀꠡꠤꠞ। ꠔꠣꠘ ꠛꠃꠔ ꠛꠄꠅꠡ ꠅꠁꠉꠦꠍꠦ, ꠡꠣꠔ ꠛꠍꠞ ꠎꠣꠝꠣꠁꠞ ꠊꠞ ꠇꠞꠤꠀ ꠢꠣꠞꠤ,
LUK 2:37 ꠌꠃꠞꠣꠡꠤ ꠛꠍꠞ ꠙꠞ꠆ꠎꠘ꠆ꠔ ꠠꠣꠠꠤ ꠢꠣꠟꠔꠦ ꠀꠍꠟꠣ। ꠔꠣꠁꠘ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠞ ꠜꠤꠔꠞꠦ ꠞꠥꠎꠣ ꠞꠣꠈꠔꠣ ꠀꠞ ꠖꠥꠀ ꠇꠞꠔꠣ। ꠄꠛꠣꠖꠔ-ꠛꠘ꠆ꠖꠦꠉꠤꠞ ꠝꠣꠎꠦ ꠞꠣꠁꠔ-ꠖꠤꠘ ꠇꠣꠐꠣꠁꠔꠣ, ꠛꠣꠞꠦ ꠛꠣꠞ ꠅꠁꠔꠣ ꠘꠣ।
LUK 2:38 ꠑꠤꠇ ꠅꠃ ꠡꠝꠄ ꠔꠣꠁꠘꠅ ꠅꠘꠅ ꠀꠁꠀ ꠀꠟ꠆ꠟꠣꠞ ꠡꠥꠇꠞꠤꠀ ꠀꠖꠣꠄ ꠇꠞꠟꠣ। ꠀꠞ ꠎꠦꠞꠣꠞ ꠖꠤꠟꠅ ꠅꠃ ꠀꠡꠣ ꠀꠍꠤꠟ, ꠀꠟ꠆ꠟꠣ ꠙꠣꠇꠦ ꠎꠦꠞꠥꠎꠣꠟꠦꠝꠞꠦ ꠀꠎꠣꠖ ꠇꠞꠛꠣ, ꠔꠣꠞꠣꠞ ꠟꠉꠦꠅ ꠔꠣꠁꠘ ꠁꠍꠣꠞ ꠛꠦꠙꠣꠞꠦ ꠛꠣꠔꠌꠤꠔ ꠇꠞꠟꠣ।
LUK 2:39 ꠝꠞꠤꠅꠝ ꠀꠞ ꠁꠃꠍꠥꠚꠦ ꠝꠣꠛꠥꠖꠞ ꠡꠞꠤꠅꠔ ꠝꠣꠚꠤꠇ ꠢꠇꠟ ꠇꠣꠝ ꠡꠦꠡ ꠇꠞꠤꠀ ꠢꠣꠞꠟꠦ, ꠔꠣꠞꠣꠞ ꠛꠡꠔ ꠛꠣꠠꠤ ꠉꠣꠟꠤꠟ ꠎꠤꠟꠣꠞ ꠘꠣꠍꠣꠞꠔ ꠉꠣꠃꠔ ꠉꠦꠟꠣꠉꠤ।
LUK 2:40 ꠘꠣꠛꠣꠟꠤꠇ ꠁꠍꠣꠞ ꠛꠄꠅꠡ ꠛꠣꠠꠤꠟ, ꠄꠞꠟꠉꠦ ꠔꠣꠁꠘ ꠡꠞꠤꠟꠞ ꠛꠟ ꠀꠞ ꠁꠟꠤꠝ-ꠀꠈꠟꠦꠅ ꠝꠎꠛꠥꠔ ꠅꠁꠟꠣ। ꠀꠟ꠆ꠟꠣꠞ ꠞꠢꠝꠔ ꠔ ꠔꠣꠘ ꠟꠉꠦ ꠀꠍꠤꠟ।
LUK 2:41 ꠁꠢꠥꠖꠤ ꠅꠇꠟꠞ ꠀꠎꠣꠖꠤ ꠁꠖꠞ ꠡꠝꠄ ꠀꠁꠟꠦ ꠁꠍꠣꠞ ꠝꠣ-ꠛꠣꠚ ꠙꠞꠔꠤ ꠛꠍꠞꠃ ꠎꠦꠞꠥꠎꠣꠟꠦꠝꠅ ꠎꠣꠁꠔꠣ।
LUK 2:42 ꠁꠍꠣꠞ ꠛꠄꠅꠡ ꠎꠦꠛꠟꠣ ꠛꠣꠞꠅ ꠛꠍꠞ, ꠅꠃ ꠡꠝꠄꠅ ꠢꠃ ꠞꠦꠅꠀꠎ ꠝꠣꠚꠤꠇ ꠔꠣꠞꠣ ꠎꠦꠞꠥꠎꠣꠟꠦꠝꠅ ꠀꠁꠟꠣ।
LUK 2:43 ꠁꠖ ꠡꠦꠡ ꠅꠁꠀ ꠢꠣꠞꠟꠦ ꠔꠣꠞꠣ ꠛꠣꠠꠤꠔ ꠞꠅꠀꠘꠣ ꠖꠤꠟꠣ, ꠅꠁꠟꠦ ꠁꠍꠣ ꠅꠃ ꠡꠝꠄ ꠁ ꠖꠟꠞ ꠟꠉꠦ ꠘꠣ ꠉꠤꠀ ꠎꠦꠞꠥꠎꠣꠟꠦꠝꠅ ꠞꠁꠉꠦꠟꠣ। ꠔꠣꠘ ꠝꠣ-ꠛꠣꠚꠦ ꠁꠈꠣꠘ ꠐꠦꠞ ꠙꠣꠁꠟꠣ ꠘꠣ।
LUK 2:44 ꠁꠍꠣꠅ ꠖꠟꠞ ꠜꠤꠔꠞꠦ ꠀꠍꠂꠘ ꠝꠘꠅ ꠇꠞꠤꠀ ꠔꠣꠞꠣ ꠄꠇꠖꠤꠘꠞ ꠙꠕ ꠀꠉꠥꠀꠁ ꠉꠦꠟꠣ। ꠉꠤꠀ ꠔꠣꠞꠣꠞ ꠈꠦꠡ-ꠇꠥꠐꠥꠝ ꠀꠞ ꠟꠉꠞ ꠝꠣꠘꠡꠞ ꠉꠦꠍꠦ ꠔꠣꠟ꠆ꠟꠣꠡ ꠇꠞꠤꠀ ꠔꠣꠘꠞꠦ ꠙꠣꠁꠟꠣ ꠘꠣ।
LUK 2:45 ꠘꠣ ꠙꠣꠁꠀ ꠔꠣꠘꠞꠦ ꠔꠥꠇꠣꠁ ꠔꠥꠇꠣꠁ ꠢꠤꠞꠛꠣꠞ ꠎꠦꠞꠥꠎꠣꠟꠦꠝꠅ ꠀꠁꠟꠣ।
LUK 2:46 ꠔꠤꠘ ꠖꠤꠘ ꠔꠣꠟ꠆ꠟꠣꠡ ꠇꠞꠤꠀ ꠔꠣꠘꠞꠦ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠅ ꠙꠣꠁꠟꠣ। ꠔꠣꠞꠣ ꠖꠦꠈꠟꠣ, ꠔꠣꠁꠘ ꠝꠃꠟꠣꠘꠣ ꠅꠇꠟꠞ ꠟꠉꠦ ꠛꠁꠀ ꠔꠣꠞꠣꠞ ꠛꠄꠀꠘ ꠢꠥꠘꠞꠣ, ꠀꠞ ꠘꠣꠘꠣꠘ ꠝꠥꠍꠟꠣ ꠎꠤꠇꠣꠁꠞꠣ।
LUK 2:47 ꠀꠞ ꠎꠔ ꠝꠣꠘꠡꠦ ꠔꠣꠘ ꠝꠣꠔ ꠢꠥꠘꠟꠣ, ꠔꠣꠞꠣ ꠢꠇꠟꠦꠃ ꠔꠣꠘ ꠀꠈꠟꠖꠣꠞꠤ ꠛꠣꠔꠌꠤꠔ ꠢꠥꠘꠤꠀ ꠔꠣꠁꠎ꠆ꠎꠥꠛ ꠛꠘꠤꠉꠦꠟꠣ।
LUK 2:48 ꠔꠣꠘ ꠝꠣ-ꠛꠣꠚꠦꠅ ꠔꠣꠘꠞꠦ ꠖꠦꠈꠤꠀ ꠄꠇ꠆ꠇꠦꠞꠦ ꠌꠝꠇꠤꠉꠦꠟꠣ। ꠝꠣʼꠄ ꠔꠣꠘꠞꠦ ꠎꠤꠇꠣꠁꠟꠣ, “ꠙꠥꠔꠞꠦ, ꠔꠥꠝꠤ ꠀꠝꠞꠣꠞ ꠟꠉꠦ ꠁꠔꠣ ꠇꠞꠟꠣꠄ ꠇꠦꠘꠦ? ꠀꠝꠤ ꠀꠞ ꠔꠥꠝꠣꠞ ꠛꠣꠚꠦ ꠇꠔ ꠙꠦꠞꠦꠡꠣꠘ ꠅꠁꠀ ꠔꠥꠝꠣꠞꠦ ꠔꠥꠇꠣꠁꠞꠣꠝ।”
LUK 2:49 ꠁꠍꠣꠄ ꠎꠥꠀꠙ ꠖꠤꠟꠣ, “ꠔꠥꠝꠤꠔꠣꠁꠘ ꠇꠦꠘꠦ ꠀꠝꠣꠞꠦ ꠔꠥꠇꠣꠁꠞꠣꠄ? ꠎꠣꠘ ꠘꠣ ꠘꠤ, ꠀꠝꠤ ꠔ ꠀꠝꠣꠞ ꠉꠣꠁꠛꠤ ꠛꠣꠚꠞ ꠊꠞꠅꠃ ꠞꠁꠔꠦ ꠅꠁꠛ?”
LUK 2:50 ꠔꠣꠘ ꠝꠣ-ꠛꠣꠚꠦ ꠁ ꠝꠣꠔꠞ ꠇꠥꠘꠥ ꠜꠦꠖ ꠛꠥꠎꠟꠣ ꠘꠣ।
LUK 2:51 ꠛꠣꠖꠦ ꠔꠣꠁꠘ ꠛꠣꠞ ꠅꠁꠀ ꠝꠣ-ꠛꠣꠚꠞ ꠟꠉꠦ ꠅꠁꠀ ꠘꠣꠍꠣꠞꠔꠅ ꠉꠦꠟꠣ, ꠀꠞ ꠔꠣꠞꠣꠞ ꠇꠕꠣꠝꠔ ꠌꠟꠟꠣ। ꠅꠁꠟꠦ ꠔꠣꠘ ꠝꠣʼꠄ ꠁꠔꠣ ꠢꠇ꠆ꠇꠟꠔꠣ ꠖꠤꠟꠅ ꠉꠣꠕꠤꠀ ꠞꠣꠈꠟꠣ।
LUK 2:52 ꠄꠞꠝꠣꠎꠦ ꠀꠟ꠆ꠟꠣꠞ ꠝꠢꠛ꠆ꠛꠔ, ꠝꠣꠘꠡꠞ ꠝꠣꠄꠀ, ꠛꠄꠅꠡ ꠀꠞ ꠁꠟꠤꠝ-ꠀꠈꠟꠦ ꠔꠣꠁꠘ ꠀꠡ꠆ꠔꠦ ꠀꠡ꠆ꠔꠦ ꠛꠠ ꠅꠁꠟꠣ।
LUK 3:1 ꠞꠥꠝꠣꠘ ꠛꠣꠖꠡꠣ ꠔꠤꠛꠤꠞꠤꠅ ꠇꠂꠍꠞꠞ ꠛꠣꠖꠡꠣꠁꠞ ꠙꠘꠞ ꠛꠍꠞ ꠌꠟꠦꠞ। ꠅꠃ ꠡꠝꠄ ꠙꠘ꠆ꠔꠤꠅ ꠙꠤꠟꠣꠔ ꠀꠍꠟꠣ ꠔꠣꠘ ꠅꠗꠤꠘꠞ ꠄꠢꠥꠖꠤꠀ ꠎꠤꠟꠣꠞ ꠢꠣꠇꠤꠝ, ꠀꠞ ꠢꠦꠞꠥꠖ ꠀꠍꠟꠣ ꠉꠣꠟꠤꠟ ꠎꠤꠟꠣꠞ ꠞꠣꠎꠣ, ꠢꠦꠞꠥꠖꠞ ꠜꠣꠁ ꠚꠤꠟꠤꠚ ꠀꠍꠟꠣ ꠎꠤꠔꠥꠞꠤꠀ ꠀꠞ ꠔꠣꠈꠥꠘꠤꠔꠤ ꠎꠤꠟꠣꠞ ꠞꠣꠎꠣ, ꠀꠞ ꠟꠥꠍꠣꠘꠤꠀꠍ ꠀꠍꠟꠣ ꠀꠛꠤꠟꠤꠘꠤ ꠎꠤꠟꠣꠞ ꠞꠣꠎꠣ। ꠄꠞꠣ ꠢꠇꠟꠃ ꠀꠍꠟꠣ ꠞꠥꠝꠣꠘ ꠛꠣꠖꠡꠣꠞ ꠅꠗꠤꠘꠦ।
LUK 3:2 ꠅꠃ ꠀꠝꠟꠞ ꠁꠢꠥꠖꠤ ꠎꠣꠔꠤꠞ ꠙꠞꠗꠣꠘ ꠁꠝꠣꠝ ꠀꠍꠟꠣ, ꠁꠝꠣꠝ ꠢꠣꠘꠘ ꠀꠞ ꠇꠣꠄꠀꠚꠣ। ꠑꠤꠇ ꠅꠃ ꠡꠝꠄ ꠎꠣꠇꠣꠞꠤꠀꠞ ꠙꠥꠔ ꠄꠢꠤꠀꠞ ꠉꠦꠍꠦ ꠝꠞꠥꠜꠥꠝꠤ ꠄꠟꠣꠇꠣꠔ ꠀꠟ꠆ꠟꠣꠄ ꠔꠣꠘ ꠇꠣꠟꠣꠝ ꠘꠣꠎꠤꠟ ꠇꠞꠟꠣ।
LUK 3:3 ꠔꠦꠃ ꠄꠢꠤꠀ ꠘꠛꠤꠄ ꠎꠞ꠆ꠖꠣꠘ ꠉꠣꠋꠉꠞ ꠇꠣꠘ꠆ꠖꠣ-ꠇꠣꠍꠣꠞ ꠢꠇꠟ ꠈꠣꠘꠅ ꠉꠤꠀ ꠔꠛꠟꠤꠉ ꠇꠞꠟꠣ। ꠇꠁꠟꠣ, ꠉꠥꠘꠣ ꠕꠣꠇꠤ ꠝꠣꠚꠤ ꠙꠣꠅꠀꠞ ꠟꠣꠉꠤ ꠔꠃꠛꠣ ꠇꠞꠤꠀ ꠔꠞꠤꠇꠣꠞ ꠉꠥꠍꠟ ꠇꠞꠣ ꠎꠞꠥꠞ।
LUK 3:4 ꠄꠢꠤꠀ ꠘꠛꠤꠞ ꠛꠦꠙꠣꠞꠦ ꠁꠡꠣꠄꠀ ꠘꠛꠤꠞ ꠇꠤꠔꠣꠛꠅ ꠎꠦꠟꠣ ꠟꠦꠈꠣ ꠀꠍꠤꠟ, ꠔꠣꠁꠘ ꠅꠃꠟꠣ ꠇꠞꠟꠣ। ꠟꠦꠈꠣ ꠀꠍꠦ, ꠝꠞꠥꠜꠥꠝꠤꠞ ꠝꠣꠎꠦ ꠄꠇꠎꠘꠦ ꠄꠟꠣꠘ ꠇꠞꠞꠣ, ꠔꠥꠝꠞꠣ ꠝꠣꠟꠤꠇꠞ ꠙꠕ ꠍꠢꠤ ꠇꠞꠅ, ꠔꠣꠘ ꠌꠟꠣꠞ ꠞꠣꠡ꠆ꠔꠣ ꠅꠇꠟ ꠡꠤꠗꠣ ꠇꠞꠅ।
LUK 3:5 ꠙꠣꠠꠤꠀ ꠢꠇ꠆ꠇꠟ ꠘꠤꠌꠣ ꠎꠣꠉꠣ ꠜꠞꠣꠐ ꠅꠁꠛ, ꠃꠌꠣ-ꠘꠤꠌꠣ ꠐꠤꠟ꠆ꠟꠣꠁꠘ ꠢꠝꠣꠘ ꠇꠞꠣ ꠅꠁꠛ। ꠔꠦꠠꠣ-ꠛꠦꠇꠣ ꠢꠇꠟ ꠙꠕ ꠡꠥꠎꠣ ꠅꠁꠛ, ꠉꠣꠔ-ꠉꠣꠠꠣ ꠢꠇꠟꠔꠣ ꠢꠝꠣꠘ ꠇꠞꠣ ꠅꠁꠛ।
LUK 3:6 ꠀꠞ ꠖꠥꠘꠤꠀꠞ ꠝꠣꠘꠡꠞꠦ ꠔꠞꠣꠘꠤꠞ ꠟꠣꠉꠤ ꠀꠟ꠆ꠟꠣꠄ ꠘꠣꠎꠣꠔꠞ ꠎꠦ ꠃꠍꠤꠟ꠆ꠟꠣ ꠇꠞꠍꠂꠘ ꠔꠣꠝꠣꠝ ꠝꠣꠘꠡꠦꠃ ꠁꠔꠣ ꠖꠦꠈꠛꠣ।
LUK 3:7 ꠄꠢꠤꠀ ꠘꠛꠤꠞ ꠔꠛꠟꠤꠉ ꠢꠥꠘꠤꠀ ꠔꠃꠛꠣꠞ ꠉꠥꠍꠟ ꠇꠞꠣꠞ ꠘꠤꠅꠔꠦ ꠎꠦꠞꠣ ꠀꠁꠟ, ꠔꠣꠁꠘ ꠄꠞꠣꠞꠦ ꠇꠁꠟꠣ, “ꠅ ꠢꠣꠚꠞ ꠛꠣꠁꠌ꠆ꠌꠣꠁꠘ, ꠀꠍꠝꠣꠘꠤ ꠉꠎꠛ ꠀꠁꠅꠞ ꠖꠦꠈꠤꠀ ꠎꠣꠘ ꠛꠣꠌꠣꠘꠤꠞ ꠙꠕ ꠔꠥꠝꠞꠣꠞꠦ ꠇꠦꠉꠤꠄ ꠛꠣꠔꠣꠁ ꠖꠤꠟ?
LUK 3:8 ꠢꠣꠍꠣꠃ ꠎꠥꠖꠤ ꠔꠥꠝꠞꠣ ꠔꠃꠛꠣ ꠇꠞꠤꠀ ꠕꠣꠇꠅ, ꠔꠦ ꠄꠞ ꠚꠟꠅ ꠖꠦꠈꠣꠅ। ꠝꠘꠦ ꠝꠘꠦ ꠇꠁꠅ ꠘꠣ, ꠔꠥꠝꠞꠣ ꠁꠛ꠆ꠞꠣꠢꠤꠝꠞ ꠀꠅꠟꠣꠖ। ꠢꠥꠘꠅ, ꠀꠝꠤ ꠇꠁꠞꠣꠝ, ꠀꠟ꠆ꠟꠣꠄ ꠌꠣꠁꠟꠦ ꠔ ꠅꠃ ꠙꠣꠔ꠆ꠔꠞ ꠅꠇꠟ ꠕꠣꠇꠤꠃ ꠁꠛ꠆ꠞꠣꠢꠤꠝꠞ ꠀꠅꠟꠣꠖ ꠛꠣꠘꠣꠁꠔꠣ ꠙꠣꠞꠛꠣ।
LUK 3:9 ꠉꠣꠍꠞ ꠉꠥꠠꠤꠔ ꠔ ꠇꠥꠠꠣꠟ ꠟꠣꠉꠣꠁꠟꠃ ꠀꠍꠦ। ꠎꠦ ꠉꠣꠍꠅ ꠜꠣꠟꠣ ꠚꠟ ꠗꠞꠦ ꠘꠣ, ꠁ ꠉꠣꠍ ꠇꠣꠐꠤꠀ ꠀꠉꠥꠘꠤꠔ ꠚꠣꠟꠣꠁꠟ ꠅꠁꠛ।”
LUK 3:10 ꠁꠔꠣ ꠢꠥꠘꠤꠀ ꠝꠣꠘꠡꠦ ꠄꠢꠤꠀꠞꠦ ꠎꠤꠇꠣꠁꠟꠣ, “ꠔꠦ ꠀꠝꠞꠣ ꠇꠤꠔꠣ ꠇꠞꠔꠣꠝ?”
LUK 3:11 ꠔꠣꠁꠘ ꠇꠁꠟꠣ, “ꠇꠦꠃꠞꠞ ꠎꠥꠖꠤ ꠖꠥꠁꠐꠣ ꠇꠥꠞ꠆ꠔꠣ ꠕꠣꠇꠦ, ꠔꠦ ꠎꠣꠞ ꠘꠣꠁ ꠔꠣꠞꠦ ꠄꠇꠐꠣ ꠖꠦꠃꠇ। ꠎꠣꠞ ꠊꠞꠅ ꠗꠣꠘ-ꠌꠣꠃꠟ ꠀꠍꠦ, ꠢꠦ-ꠅ ꠅꠃꠟꠣ ꠛꠤꠟꠣꠃꠇ।”
LUK 3:12 ꠈꠣꠎꠘꠣ ꠔꠥꠟꠞꠣ ꠇꠄꠎꠘ ꠔꠡꠤꠟꠖꠣꠞꠦ ꠔꠃꠛꠣꠞ ꠉꠥꠍꠟ ꠇꠞꠣꠔ ꠀꠁꠀ ꠎꠤꠇꠣꠁꠟꠣ, “ꠝꠥꠞꠡꠤꠖ, ꠀꠝꠞꠣ ꠇꠤꠔꠣ ꠇꠞꠔꠣꠝ?”
LUK 3:13 ꠔꠣꠁꠘ ꠇꠁꠟꠣ, “ꠘꠤꠅꠝ ꠕꠣꠇꠤ ꠛꠦꠡꠤ ꠐꠦꠇꠣ ꠀꠖꠣꠄ ꠇꠞꠤꠅ ꠘꠣ।”
LUK 3:14 ꠇꠄꠎꠘ ꠍꠤꠙꠣꠁꠄꠅ ꠎꠤꠇꠣꠁꠟꠣ, “ꠢꠥꠎꠥꠞ, ꠔꠦ ꠀꠝꠞꠣ ꠇꠤꠔꠣ ꠇꠞꠔꠣꠝ?” ꠔꠣꠁꠘ ꠇꠁꠟꠣ, “ꠇꠦꠃꠞꠞꠦ ꠎꠥꠞ-ꠎꠥꠟꠥꠝ ꠇꠞꠤꠀ ꠛꠣ ꠚꠣꠘ꠆ꠖꠅ ꠚꠣꠟꠣꠁꠀ ꠇꠥꠘ꠆ꠔꠣ ꠀꠖꠣꠄ ꠇꠞꠤꠅ ꠘꠣ। ꠎꠣꠞꠎꠤꠞ ꠛꠦꠔꠘꠦ ꠈꠥꠡꠤ ꠞꠁꠅ।”
LUK 3:15 ꠝꠣꠘꠡꠦ ꠝꠘꠦ ꠝꠘꠦ ꠀꠟ-ꠝꠍꠤꠞ ꠟꠣꠉꠤ ꠛꠣꠞ ꠌꠣꠅꠀꠔ ꠀꠍꠤꠟ, ꠄꠢꠤꠀꠞꠦ ꠖꠦꠈꠤꠀ ꠔꠣꠞꠣ ꠈꠥꠛ ꠀꠡꠣ ꠇꠞꠟ, ꠄꠁꠘꠃ ꠝꠘꠅꠟꠄ ꠀꠟ-ꠝꠍꠤ।
LUK 3:16 ꠅꠁꠟꠦ ꠄꠢꠤꠀꠄ ꠔꠣꠞꠣꠞꠦ ꠇꠁꠟꠣ, “ꠀꠝꠤ ꠈꠣꠟꠤ ꠙꠣꠘꠤꠖꠤ ꠔꠃꠛꠣꠞ ꠉꠥꠍꠟ ꠇꠞꠣꠁꠀꠞ, ꠔꠦ ꠀꠝꠣꠞ ꠛꠣꠖꠦ ꠎꠦꠁꠘ ꠔꠡꠞꠤꠚ ꠀꠘꠞꠣ, ꠔꠣꠁꠘ ꠀꠝꠣ ꠕꠣꠇꠤꠅ ꠔꠣꠇ꠆ꠇꠔ ꠀꠟꠣ। ꠔꠣꠘ ꠙꠣꠅꠞ ꠎꠥꠔꠣꠞ ꠚꠤꠔꠣ ꠉꠦꠍꠣ ꠈꠥꠟꠣꠞ ꠎꠥꠇꠣꠅ ꠀꠝꠤ ꠘꠣꠄ। ꠔꠣꠁꠘ ꠀꠁꠟꠦ ꠙꠣꠇ ꠞꠥꠢꠥ ꠀꠞ ꠀꠉꠥꠁꠘ ꠖꠤꠀ ꠔꠥꠝꠞꠣꠞꠦ ꠉꠥꠍꠟ ꠇꠞꠣꠁꠛꠣ।
LUK 3:17 ꠔꠣꠘ ꠇꠥꠟꠣ ꠔ ꠔꠣꠘ ꠀꠔꠅꠃ ꠀꠍꠦ, ꠝꠣꠠꠣ ꠖꠦꠅꠀ ꠗꠣꠘ ꠅꠃ ꠇꠥꠟꠣꠖꠤ ꠃꠀꠁꠀ ꠢꠣꠞꠤ ꠗꠣꠘ ꠘꠤꠀ ꠃꠉꠣꠞꠅ ꠔꠥꠟꠛꠣ, ꠀꠞ ꠍꠥꠍꠣꠞꠦ ꠅꠝꠘ ꠀꠉꠥꠘꠤꠔ ꠚꠣꠟꠣꠁ ꠎꠣꠟꠣꠁꠛꠣ, ꠎꠦ ꠀꠉꠥꠁꠘ ꠇꠥꠘꠥꠖꠤꠘ ꠘꠤꠜꠦ ꠘꠣ।”
LUK 3:18 ꠅꠃ ꠟꠣꠈꠣꠘ ꠀꠞꠅ ꠛꠃꠔ ꠘꠍꠤꠅꠔ ꠇꠞꠤꠀ ꠄꠢꠤꠀꠄ ꠝꠣꠘꠡꠞ ꠉꠦꠍꠦ ꠈꠥꠡ-ꠈꠛꠞꠤ ꠔꠛꠟꠤꠉ ꠇꠞꠟꠣ।
LUK 3:19 ꠅꠁꠟꠦ ꠞꠣꠎꠣ ꠢꠦꠞꠥꠖꠦ ꠛꠃꠔ ꠘꠝꠥꠘꠣꠞ ꠈꠣꠞꠣꠙ ꠇꠣꠝ ꠇꠞꠣꠄ, ꠀꠞ ꠔꠣꠞ ꠜꠣꠁꠞ ꠛꠃ ꠢꠦꠞꠥꠖꠤꠀꠞꠦ ꠢꠣꠋꠉꠣ ꠇꠞꠣꠄ, ꠄꠢꠤꠀꠄ ꠔꠣꠞꠦ ꠖꠥꠡꠤ ꠡꠣꠁꠛꠡ꠆ꠔ ꠇꠞꠟꠣ।
LUK 3:20 ꠄꠞꠖꠣꠄ ꠢꠦ ꠔꠣꠞ ꠢꠇꠟ ꠇꠥ-ꠇꠣꠝꠞ ꠟꠉꠦ ꠄꠅꠈꠣꠘꠅ ꠛꠣꠠꠣꠁꠟ, ꠢꠦ ꠘꠛꠤ ꠄꠢꠤꠀꠞꠦ ꠎꠦꠟꠅ ꠢꠣꠞꠣꠁꠟꠤꠟ।
LUK 3:21 ꠄꠢꠤꠀ ꠘꠛꠤ ꠎꠦꠟꠅ ꠢꠣꠝꠣꠘꠤꠞ ꠀꠉꠦ, ꠔꠣꠘ ꠉꠦꠍꠦ ꠀꠁꠀ ꠎꠦꠛꠟꠣ ꠛꠃꠔ ꠝꠣꠘꠡꠦ ꠔꠃꠛꠣꠞ ꠉꠥꠍꠟ ꠇꠞꠞꠣ, ꠅꠃ ꠡꠝꠄ ꠁꠍꠣꠅ ꠅꠘꠅ ꠀꠁꠀ ꠔꠣꠞꠣꠞ ꠟꠉꠦ ꠉꠥꠍꠟ ꠇꠞꠟꠣ। ꠉꠥꠍꠟꠞ ꠛꠣꠖꠦ ꠁꠍꠣꠄ ꠎꠦꠛꠟꠣ ꠖꠥꠀ ꠇꠞꠞꠣ, ꠀꠈꠔꠣꠃ ꠀꠟ꠆ꠟꠣꠞ ꠀꠞꠡꠞ ꠖꠥꠀꠞ ꠈꠥꠟꠤꠉꠦꠟ,
LUK 3:22 ꠀꠞ ꠙꠣꠇ ꠞꠥꠢꠥ ꠙꠣꠞꠅꠞ ꠍꠥꠞꠔ ꠗꠞꠤꠀ ꠔꠣꠘ ꠃꠙꠞꠦ ꠘꠣꠎꠤꠟ ꠅꠁꠟꠣ। ꠟꠉꠦ ꠟꠉꠦ ꠛꠦꠢꠦꠡ꠆ꠔꠤ ꠅꠃ ꠀꠅꠀꠎꠅ ꠢꠥꠘꠣ ꠉꠦꠟ, “ꠔꠥꠝꠤꠃ ꠀꠝꠣꠞ ꠈꠣꠍ ꠝꠣꠄꠀꠞ ꠎꠘ, ꠔꠥꠝꠣꠞ ꠃꠙꠞꠦ ꠀꠝꠤ ꠈꠥꠛ ꠈꠥꠡꠤ।”
LUK 3:23 ꠅꠘꠥꠝꠣꠘ ꠔꠤꠡ ꠛꠍꠞ ꠛꠄꠅꠡꠞ ꠇꠣꠟꠅ ꠁꠍꠣꠄ ꠔꠛꠟꠤꠉ ꠇꠣꠝ ꠡꠥꠞꠥ ꠇꠞꠟꠣ। ꠝꠣꠘꠡꠦ ꠎꠣꠘꠔꠣ ꠔꠣꠁꠘ ꠁꠃꠍꠥꠚꠞ ꠙꠥꠀ। ꠁꠃꠍꠥꠚꠞ ꠝꠄ-ꠝꠥꠞꠛ꠆ꠛꠤ ꠅꠁꠟꠣ,
LUK 3:24 ꠀꠟꠤ, ꠝꠣꠔ꠆ꠕꠣꠔ, ꠟꠦꠛꠤ, ꠝꠣꠟꠇꠤ, ꠁꠀꠘ꠆ꠘꠣꠁ, ꠁꠃꠍꠥꠚ,
LUK 3:25 ꠝꠣꠔ꠆ꠕꠣꠔꠤꠀ, ꠀꠝꠥꠎ, ꠘꠣꠃꠝ, ꠁꠍꠟꠤ, ꠘꠣꠉ꠆ꠉꠣꠁ,
LUK 3:26 ꠝꠣꠢꠣꠔ, ꠝꠣꠔ꠆ꠕꠣꠔꠤꠀ, ꠡꠤꠝꠤꠅ, ꠁꠃꠡꠦꠈ, ꠁꠅꠖꠣ,
LUK 3:27 ꠁꠃꠢꠣꠘ꠆ꠘꠣꠘ, ꠞꠤꠡꠣ, ꠎꠦꠞꠛꠣꠛꠤꠟ, ꠍꠣꠟꠔꠤꠄꠟ, ꠘꠤꠞꠤ,
LUK 3:28 ꠝꠣꠟꠇꠤ, ꠀꠖ꠆ꠖꠤ, ꠇꠣꠍꠣꠝ, ꠁꠟꠝꠣꠖꠣꠝ, ꠁꠄꠞ,
LUK 3:29 ꠁꠃꠍꠣ, ꠄꠟꠤꠄꠎꠦꠞ, ꠁꠃꠞꠤꠝ, ꠝꠣꠔ꠆ꠕꠣꠔ, ꠟꠦꠛꠤ,
LUK 3:30 ꠡꠤꠝꠤꠅꠘ, ꠄꠢꠥꠖꠣ, ꠁꠃꠍꠥꠚ, ꠁꠃꠘꠣꠘ, ꠁꠟꠤꠀꠇꠤꠝ,
LUK 3:31 ꠝꠣꠟꠤꠀ, ꠝꠣꠘ꠆ꠘꠣ, ꠝꠣꠔ꠆ꠕꠣꠔꠣ, ꠘꠣꠕꠣꠘ, ꠖꠣꠃꠖ ꠘꠛꠤ,
LUK 3:32 ꠁꠀꠍ, ꠃꠛꠣꠄꠖ, ꠛꠥꠀꠎ, ꠍꠦꠟꠤꠝ, ꠘꠣꠢꠤꠡ,
LUK 3:33 ꠀꠝꠤꠘꠣꠖꠣꠛ, ꠀꠖꠝꠤꠘ, ꠀꠞꠘꠤ, ꠢꠣꠍꠤꠞ, ꠚꠤꠞꠥꠎ, ꠄꠢꠥꠖꠣ,
LUK 3:34 ꠁꠀꠇꠥꠛ ꠘꠛꠤ, ꠁꠍꠢꠣꠇ ꠘꠛꠤ, ꠁꠛ꠆ꠞꠣꠢꠤꠝ ꠘꠛꠤ, ꠔꠣꠞꠦꠈ, ꠘꠣꠢꠥꠞ,
LUK 3:35 ꠍꠣꠞꠥꠎ, ꠞꠣꠃ, ꠚꠣꠟꠦꠎ, ꠀꠛꠦꠞ, ꠡꠣꠟꠦꠈ,
LUK 3:36 ꠇꠤꠘꠣꠘ, ꠀꠞ꠆ꠚꠣꠇꠍꠣꠖ, ꠡꠣꠝ, ꠘꠥꠢ ꠘꠛꠤ, ꠟꠣꠝꠣꠇ,
LUK 3:37 ꠝꠣꠔꠥꠡꠣꠟꠣꠈ, ꠁꠖ꠆ꠞꠤꠍ ꠘꠛꠤ, ꠁꠀꠞꠦꠖ, ꠝꠣꠢꠟꠣꠁꠟ, ꠇꠦꠘꠣꠘ,
LUK 3:38 ꠁꠘꠥꠡ, ꠡꠤꠡ ꠘꠛꠤ, ꠀꠖꠝ, ꠀꠟ꠆ꠟꠣ ꠙꠣꠇ।
LUK 4:1 ꠁꠍꠣ ꠙꠣꠇ ꠞꠥꠢꠦ ꠇꠣꠝꠤꠟ ꠅꠁꠀ, ꠎꠞ꠆ꠖꠣꠘ ꠉꠣꠋꠉꠅ ꠕꠣꠇꠤ ꠃꠑꠤꠀ ꠝꠞꠥꠜꠥꠝꠤꠔ ꠉꠦꠟꠣꠉꠤ। ꠉꠤꠀ ꠙꠣꠇ ꠞꠥꠢꠥꠞ ꠁꠡꠣꠞꠣꠄ ꠄꠇꠟꠣꠉꠣ ꠌꠣꠟ꠆ꠟꠤꠡ ꠖꠤꠘ ꠝꠞꠥꠜꠥꠝꠤꠔ ꠊꠥꠞꠤꠟꠣ।
LUK 4:2 ꠀꠞ ꠁꠛꠟꠤꠍ ꠀꠁꠀ ꠔꠣꠘꠞꠦ ꠙꠞꠤꠇ꠆ꠇꠣ ꠌꠣꠟꠣꠁꠟ। ꠅꠃ ꠌꠣꠟ꠆ꠟꠤꠡ ꠖꠤꠘ ꠄꠇꠟꠣꠉꠣꠞꠦ ꠞꠥꠎꠣ ꠀꠍꠟꠣ, ꠇꠥꠘꠥꠎꠣꠔ ꠈꠣꠘꠣ ꠈꠣꠁꠍꠂꠘ ꠘꠣ। ꠄꠞꠛꠣꠖꠦ ꠔꠣꠘ ꠙꠦꠐꠅ ꠜꠥꠇ ꠟꠣꠉꠟ।
LUK 4:3 ꠔꠦꠃ ꠁꠛꠟꠤꠍꠦ ꠔꠣꠘꠞꠦ ꠇꠁꠟ, “ꠔꠥꠝꠤ ꠎꠥꠖꠤ ꠁꠛꠘꠥꠟ꠆ꠟꠣ, ꠀꠟ꠆ꠟꠣꠞ ꠈꠣꠍ ꠝꠣꠄꠀꠞ ꠎꠘ ꠅꠅ, ꠔꠦ ꠅꠃ ꠙꠣꠔ꠆ꠔꠞꠞꠦ ꠇꠅ ꠘꠣ ꠞꠥꠐꠤ ꠅꠁꠎꠤꠔ।”
LUK 4:4 ꠁꠍꠣꠄ ꠎꠥꠀꠙ ꠖꠤꠟꠣ, “ꠀꠟ꠆ꠟꠣꠞ ꠇꠣꠟꠣꠝꠅ ꠛꠣꠔꠣꠁꠟ ꠅꠁꠍꠦ, ꠈꠣꠟꠤ ꠞꠥꠐꠤ ꠈꠣꠁꠟꠦꠃ ꠝꠣꠘꠥꠡ ꠛꠣꠌꠦ ꠘꠣ।”
LUK 4:5 ꠛꠣꠖꠦ ꠁꠛꠟꠤꠍꠦ ꠔꠣꠘꠞꠦ ꠈꠥꠛ ꠃꠌꠣ ꠄꠇ ꠎꠣꠉꠣꠔ ꠟꠁꠀ ꠉꠦꠟ, ꠘꠤꠀ ꠢꠣꠞꠤ ꠄꠇ ꠙꠟꠇꠦ ꠖꠥꠘꠤꠀꠞ ꠔꠣꠝꠣꠝ ꠝꠥꠟ꠆ꠟꠥꠇ ꠔꠣꠘꠞꠦ ꠖꠦꠈꠣꠁꠟ ꠀꠞ ꠇꠁꠟ,
LUK 4:6 “ꠁ ꠔꠣꠝꠣꠝ ꠝꠥꠟ꠆ꠟꠥꠇꠞ ꠛꠣꠖꠡꠣꠁ ꠀꠞ ꠎꠣꠇ-ꠎꠝꠇ ꠀꠝꠤ ꠔꠥꠝꠣꠞꠦ ꠖꠤꠟꠣꠁꠝꠥ। ꠁꠔꠣ ꠢꠇ꠆ꠇꠟꠔꠣꠞ ꠝꠣꠟꠤꠇꠣꠘꠣ ꠀꠝꠣꠞꠦ ꠖꠦꠅꠀ ꠅꠁꠍꠦ। ꠀꠝꠤ ꠎꠣꠞꠦ ꠈꠥꠡꠤ ꠔꠣꠞꠦ ꠖꠤꠔꠣꠝ ꠙꠣꠞꠤ;
LUK 4:7 ꠈꠣꠟꠤ ꠔꠥꠝꠤ ꠀꠝꠣꠞꠦ ꠍꠁꠎꠖꠣ ꠇꠞꠤꠟꠣꠅ, ꠔꠦꠃ ꠁ ꠢꠇ꠆ꠇꠟꠔꠣ ꠔꠥꠝꠣꠞ ꠅꠁꠎꠤꠛ।”
LUK 4:8 ꠁꠍꠣꠄ ꠔꠣꠞꠦ ꠇꠁꠟꠣ, “ꠀꠟ꠆ꠟꠣꠞ ꠇꠣꠟꠣꠝꠅ ꠀꠍꠦ, ꠔꠥꠝꠤ ꠈꠣꠟꠤ ꠀꠙꠘ ꠝꠣꠛꠥꠖ ꠀꠟ꠆ꠟꠣꠞꠦ ꠍꠁꠎꠖꠣ ꠇꠞꠛꠣꠄ, ꠈꠣꠟꠤ ꠔꠣꠘ ꠄꠛꠣꠖꠔ ꠇꠞꠛꠣꠄ।”
LUK 4:9 ꠔꠦꠃ ꠢꠦ ꠁꠍꠣꠞꠦ ꠟꠁꠀ ꠎꠦꠞꠥꠎꠣꠟꠦꠝ ꠐꠣꠃꠘꠅ ꠉꠦꠟ, ꠉꠤꠀ ꠙꠛꠤꠔ꠆ꠞ ꠇꠣꠛꠣ ꠊꠞ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠞ ꠝꠤꠘꠣꠞꠣꠞ ꠃꠙꠞꠦ ꠔꠣꠘꠦ ꠃꠛꠣ ꠇꠞꠤꠀ ꠇꠁꠟ, “ꠔꠥꠝꠤ ꠎꠥꠖꠤ ꠁꠛꠘꠥꠟ꠆ꠟꠣ, ꠀꠟ꠆ꠟꠣꠞ ꠈꠣꠍ ꠝꠣꠄꠀꠞ ꠎꠘ ꠅꠅ, ꠔꠦ ꠖꠦꠈꠤ ꠌꠣꠁꠘ, ꠅꠘ ꠕꠣꠇꠤ ꠚꠣꠟ ꠖꠤꠀ ꠟꠣꠝꠣꠔ ꠙꠠꠅ।
LUK 4:10 ꠇꠤꠔꠣꠛꠅ ꠔ ꠟꠦꠈꠣ ꠀꠍꠦ, ꠀꠟ꠆ꠟꠣꠄ ꠔꠣꠘ ꠚꠤꠞꠤꠡ꠆ꠔꠣ ꠅꠇꠟꠞꠦ ꠢꠥꠇꠥꠝ ꠖꠤꠛꠣ, ꠀꠞ ꠔꠣꠞꠣ ꠔꠥꠝꠣꠞꠦ ꠛꠣꠌꠣꠁꠛꠣ।
LUK 4:11 ꠔꠣꠞꠣ ꠘꠤꠎꠞ ꠀꠔꠖꠤ ꠔꠥꠝꠣꠞꠦ ꠗꠞꠤꠟꠤꠛꠣ, ꠎꠣꠔꠦ ꠔꠥꠝꠣꠞ ꠙꠣꠅꠔ ꠇꠥꠘꠥ ꠙꠣꠔ꠆ꠔꠞꠞ ꠌꠥꠐ ꠘꠣ ꠟꠣꠉꠦ।”
LUK 4:12 ꠁꠍꠣꠄ ꠔꠣꠞꠦ ꠇꠁꠟꠣ, “ꠇꠤꠔꠣꠛꠅ ꠟꠦꠈꠣ ꠀꠍꠦ, ꠔꠥꠝꠤ ꠔꠥꠝꠣꠞ ꠝꠣꠛꠥꠖ ꠀꠟ꠆ꠟꠣꠞꠦ ꠙꠞꠤꠇ꠆ꠇꠣ ꠇꠞꠣꠔ ꠟꠣꠉꠤꠅ ꠘꠣ।”
LUK 4:13 ꠁꠛꠟꠤꠍꠦ ꠔꠣꠞ ꠢꠇꠟ ꠘꠝꠥꠘꠣꠞ ꠙꠞꠤꠇ꠆ꠇꠣ ꠡꠦꠡ ꠇꠞꠤꠀ, ꠀꠙꠣꠔꠔ ꠔꠣꠘ ꠉꠦꠍ ꠕꠣꠇꠤ ꠢꠞꠤꠀ ꠉꠦꠟꠉꠤ।
LUK 4:14 ꠛꠣꠖꠦ ꠙꠣꠇ ꠞꠥꠢꠥꠞ ꠇꠥꠖꠞꠔꠦ ꠁꠍꠣ ꠉꠣꠟꠤꠟ ꠄꠟꠣꠇꠣꠔ ꠉꠦꠟꠣ, ꠉꠤꠀ ꠢꠣꠞꠟꠦ ꠔꠣꠘ ꠘꠣꠝ ꠌꠣꠁꠞꠅꠛꠣꠄ ꠞꠐꠤꠉꠦꠟ।
LUK 4:15 ꠔꠣꠁꠘ ꠢꠘꠞ ꠝꠍꠤꠖꠅ ꠝꠍꠤꠖꠅ ꠉꠤꠀ ꠛꠄꠀꠘ-ꠔꠣꠟꠤꠝ ꠖꠤꠟꠣ, ꠔꠦꠃ ꠢꠇꠟ ꠝꠣꠘꠡꠦ ꠔꠣꠘ ꠔꠣꠞꠤꠚ ꠇꠞꠟ।
LUK 4:16 ꠀꠞ ꠁꠍꠣ ꠢꠃ ꠘꠣꠍꠣꠞꠔ ꠉꠣꠃꠔ ꠀꠁꠟꠣ, ꠎꠦ ꠉꠣꠃꠔ ꠔꠣꠁꠘ ꠢꠥꠞꠥ ꠕꠣꠇꠤ ꠛꠠ ꠅꠁꠍꠂꠘ। ꠅꠘꠅ ꠀꠁꠀ ꠔꠣꠁꠘ ꠘꠤꠎꠞ ꠘꠤꠅꠝ ꠝꠣꠚꠤꠇ ꠎꠥꠝ꠆ꠝꠣꠛꠣꠞꠦ ꠝꠍꠤꠖꠅ ꠉꠤꠀ ꠈꠥꠔꠛꠣ ꠙꠠꠣꠔ ꠃꠛꠣꠁꠟꠣ।
LUK 4:17 ꠁꠡꠣꠄꠀ ꠘꠛꠤꠞ ꠍꠢꠤꠚꠣꠈꠣꠘ ꠔꠣꠘ ꠀꠔꠅ ꠖꠦꠅꠀ ꠅꠁꠟ। ꠔꠣꠁꠘ ꠇꠤꠔꠣꠛ ꠈꠥꠟꠤꠀ ꠅꠃ ꠀꠄꠀꠔ ꠛꠣꠞ ꠇꠞꠟꠣ, ꠎꠦ ꠀꠄꠀꠔꠅ ꠟꠦꠈꠣ ꠀꠍꠦ,
LUK 4:18 ꠀꠝꠣꠞ ꠖꠤꠟꠅ ꠝꠣꠛꠥꠖꠞ ꠞꠥꠢꠥ ꠛꠡꠔ ꠇꠞꠂꠘ, ꠔꠣꠁꠘꠃ ꠀꠝꠣꠞꠦ ꠈꠦꠟꠣꠚꠔꠤ ꠖꠤꠀ ꠛꠦꠎꠤꠍꠂꠘ, ꠉꠞꠤꠛ ꠅꠇꠟꠞ ꠉꠦꠍꠦ ꠈꠥꠡ-ꠈꠛꠞꠤ ꠎꠣꠘꠣꠘꠤꠞ ꠟꠣꠉꠤ। ꠀꠞ ꠛꠘ꠆ꠖꠤ ꠅꠇꠟꠞ ꠉꠦꠍꠦ ꠀꠎꠣꠖꠤꠞ ꠇꠕꠣ, ꠀꠘ꠆ꠖꠣ ꠅꠇꠟꠞ ꠉꠦꠍꠦ ꠌꠃꠈꠦ ꠖꠦꠈꠣꠞ ꠇꠕꠣ, ꠎꠦꠞꠣꠞ ꠃꠙꠞꠦ ꠎꠥꠟꠥꠝ ꠅꠞ ꠔꠣꠞꠣꠞꠦ ꠛꠣꠌꠣꠘꠤꠞ ꠇꠕꠣ ꠄꠟꠣꠘ ꠇꠞꠣꠞ ꠟꠣꠉꠤ ꠛꠦꠎꠤꠍꠂꠘ।
LUK 4:19 ꠀꠞ ꠅꠃ ꠇꠕꠣ ꠄꠟꠣꠘ ꠇꠞꠣꠞ ꠟꠣꠉꠤꠅ ꠛꠦꠎꠤꠍꠂꠘ, ꠅꠈꠘ ꠝꠣꠛꠥꠖꠞ ꠞꠢꠝꠔ ꠖꠦꠈꠣꠘꠤꠞ ꠡꠝꠄ ꠅꠁꠉꠦꠍꠦ।
LUK 4:20 ꠈꠥꠔꠛꠣ ꠔꠤꠟꠣꠅꠔ ꠇꠞꠤꠀ ꠢꠣꠞꠟꠦ, ꠔꠣꠁꠘ ꠇꠤꠔꠣꠛꠈꠣꠘ ꠀꠐꠣꠁꠀ ꠝꠍꠤꠖꠞ ꠝꠔꠟ꠆ꠟꠤꠞ ꠀꠔꠅ ꠖꠤꠀ ꠛꠁꠟꠣ, ꠝꠍꠤꠖꠞ ꠢꠇꠟ ꠝꠣꠘꠡꠦ ꠔꠣꠘ ꠛꠣꠄ ꠗꠤꠀꠘ ꠗꠞꠤ ꠌꠣꠁ ꠞꠁꠍꠦ।
LUK 4:21 ꠔꠣꠁꠘ ꠇꠁꠟꠣ, “ꠀꠍꠝꠣꠘꠤ ꠇꠤꠔꠣꠛꠞ ꠁ ꠀꠄꠀꠔ ꠈꠣꠘꠣꠁꠘ, ꠀꠁꠎ ꠀꠙꠘꠣꠞꠣ ꠢꠥꠘꠣꠞ ꠟꠉꠦ ꠟꠉꠦꠃ ꠚꠟꠤꠉꠦꠟ।”
LUK 4:22 ꠢꠇꠟ ꠝꠣꠘꠡꠦ ꠔꠣꠘ ꠔꠣꠞꠤꠚ ꠇꠞꠟ, ꠔꠣꠘ ꠝꠥꠈ ꠕꠣꠇꠤ ꠅꠔ ꠡꠥꠘ꠆ꠖꠞ ꠛꠄꠀꠘ ꠢꠥꠘꠤꠀ ꠔꠣꠁꠎ꠆ꠎꠥꠛ ꠅꠁꠉꠦꠟ। ꠔꠣꠞꠣ ꠇꠁꠟ, “ꠄꠁꠘ ꠁꠃꠍꠥꠚꠞ ꠙꠥꠀ ꠘꠣꠄ ꠘꠤ ꠛꠣ?”
LUK 4:23 ꠄꠞꠝꠣꠎꠦ ꠁꠍꠣꠄ ꠔꠣꠞꠣꠞꠦ ꠇꠁꠟꠣ, “ꠀꠙꠘꠣꠞꠣ ꠘꠤꠌꠄ ꠀꠝꠣꠞꠦ ꠅꠃ ꠍꠤꠟ꠆ꠟꠦꠈ ꠢꠥꠘꠣꠁꠛꠣ, ‘ꠒꠣꠇ꠆ꠔꠞ ꠍꠣꠛ, ꠘꠤꠎꠞ ꠛꠦꠝꠣꠞ ꠡꠤꠚꠣ ꠇꠞꠅ। ꠇꠚꠞꠘꠣꠃꠝꠅ ꠛꠥꠟꠦ ꠛꠃꠔ ꠇꠦꠞꠣꠝꠔꠤ-ꠝꠥꠎꠦꠎꠣ ꠖꠦꠈꠣꠁꠍ, ꠔꠦ ꠅꠈꠘ ꠘꠤꠎꠞ ꠉꠣꠃꠔꠅ ꠅꠔꠣ ꠖꠦꠈꠣꠅ ꠘꠣ।’
LUK 4:24 ꠢꠥꠘꠃꠇ꠆ꠇꠣ, ꠀꠝꠤ ꠀꠙꠘꠣꠁꠘ꠆ꠔꠞꠦ ꠢꠇ ꠇꠕꠣ ꠇꠁꠞꠣꠝ, ꠇꠥꠘꠥ ꠘꠛꠤꠞꠦꠃ ꠔꠣꠘ ꠘꠤꠎꠞ ꠉꠣꠃꠞ ꠝꠣꠘꠡꠦ ꠝꠣꠘꠂꠘ ꠘꠣ।
LUK 4:25 ꠀꠞ ꠁꠈꠣꠘꠅ ꠢꠣꠍꠣ ꠇꠕꠣ, ꠁꠟꠤꠀꠍ ꠘꠛꠤꠞ ꠎꠝꠣꠘꠣꠔ ꠄꠇꠟꠣꠉꠣ ꠡꠣꠠꠦ ꠔꠤꠘ ꠛꠍꠞ ꠇꠥꠘꠥ ꠝꠦꠊ ꠅꠁꠍꠤꠟ ꠘꠣ, ꠀꠡ꠆ꠔꠣ ꠖꠦꠡꠅ ꠛꠦꠎꠥꠁꠔꠣ ꠘꠤꠖꠣꠘ ꠀꠍꠤꠟ। ꠢꠃ ꠡꠝꠄ ꠔ ꠁꠍꠞꠣꠁꠟ ꠖꠦꠡꠅ ꠛꠃꠔ ꠠꠣꠠꠤ ꠛꠦꠐꠤꠘ ꠀꠍꠟꠣ,
LUK 4:26 ꠅꠁꠟꠦ ꠁꠟꠤꠀꠍ ꠘꠛꠤꠞꠦ ꠄꠞꠣ ꠇꠦꠃꠞꠞ ꠉꠦꠍꠦ ꠘꠣ ꠛꠦꠎꠤꠀ, ꠈꠣꠟꠤ ꠍꠤꠖꠘ ꠖꠦꠡꠞ ꠍꠣꠞꠤꠚꠔ ꠉꠣꠃꠞ ꠄꠇ ꠠꠣꠠꠤ ꠛꠦꠐꠤꠞ ꠉꠦꠍꠦ ꠛꠦꠎꠣ ꠅꠁꠍꠤꠟ।
LUK 4:27 ꠀꠞ ꠀꠟꠤꠀꠡꠣ ꠘꠛꠤꠞ ꠀꠝꠟꠅ ꠁꠍꠞꠣꠁꠟ ꠖꠦꠡꠅ ꠛꠃꠔ ꠙꠌꠣ-ꠇꠥꠡ꠆ꠑ ꠛꠦꠝꠣꠞꠤ ꠀꠍꠟꠣ, ꠅꠁꠟꠦ ꠄꠞꠣ ꠇꠦꠃꠞꠞꠦ ꠜꠣꠟꠣ ꠘꠣ ꠇꠞꠤꠀ, ꠈꠣꠟꠤ ꠡꠤꠞꠤꠀ ꠖꠦꠡꠞ ꠘꠣꠝꠣꠘꠞꠦ ꠜꠣꠟꠣ ꠇꠞꠣ ꠅꠁꠍꠤꠟ।”
LUK 4:28 ꠁꠈꠣꠘ ꠢꠥꠘꠤꠀꠃ ꠝꠍꠤꠖꠞ ꠡꠛ ꠝꠣꠘꠥꠡ ꠉꠥꠍꠣꠄ ꠀꠉꠥꠁꠘ ꠅꠁꠉꠦꠟꠣ।
LUK 4:29 ꠔꠣꠞꠣ ꠃꠑꠤꠀ ꠔꠣꠘꠞꠦ ꠑꠦꠟꠤꠀ ꠈꠦꠖꠣꠁꠀ ꠉꠣꠃꠞ ꠛꠣꠞꠦ ꠟꠁꠀ ꠉꠦꠟ, ꠉꠤꠀ ꠉꠣꠃꠞ ꠇꠥꠘꠣꠞ ꠈꠣꠠꠣ ꠐꠤꠟ꠆ꠟꠣꠞ ꠃꠙꠞꠦ ꠘꠤꠀ, ꠗꠣꠇ꠆ꠇꠣꠖꠤ ꠔꠟꠦ ꠚꠣꠟꠣꠁꠔ ꠌꠣꠁꠟ।
LUK 4:30 ꠅꠁꠟꠦ ꠜꠤꠠꠞ ꠝꠣꠎ ꠕꠘꠦ ꠔꠣꠁꠘ ꠀꠐꠤꠀ ꠢꠞꠤꠀ ꠉꠦꠟꠣꠉꠤ।
LUK 4:31 ꠛꠣꠖꠦ ꠁꠍꠣ ꠉꠣꠟꠤꠟ ꠄꠟꠣꠇꠣꠞ ꠇꠚꠞꠘꠣꠃꠝ ꠐꠣꠃꠘꠅ ꠉꠦꠟꠣ, ꠉꠤꠀ ꠎꠥꠝ꠆ꠝꠣꠛꠣꠞꠦ ꠝꠣꠘꠡꠞꠦ ꠅꠀꠎ-ꠘꠍꠤꠅꠔ ꠇꠞꠟꠣ।
LUK 4:32 ꠔꠣꠘ ꠅꠀꠎ ꠢꠥꠘꠤꠀ ꠝꠣꠘꠥꠡ ꠔꠣꠁꠎ꠆ꠎꠥꠛ ꠅꠁꠉꠦꠟꠣ, ꠔꠣꠁꠘ ꠔ ꠙꠥꠞꠣ ꠢꠤꠝ꠆ꠝꠔ ꠀꠟꠣ ꠎꠘꠞ ꠟꠣꠈꠣꠘ ꠔꠣꠟꠤꠝ ꠖꠤꠔꠣ।
LUK 4:33 ꠢꠃ ꠝꠍꠤꠖꠅ ꠎꠤꠘꠞ ꠀꠍꠞ ꠀꠟꠣ ꠄꠇ ꠛꠦꠐꠣ ꠀꠍꠤꠟ। ꠢꠦ ꠎꠥꠞꠦ ꠎꠥꠞꠦ ꠌꠤꠟ꠆ꠟꠣꠁꠀ ꠇꠁꠟ,
LUK 4:34 “ꠅ ꠘꠣꠍꠣꠞꠔꠞ ꠁꠍꠣ, ꠀꠝꠞꠣꠞ ꠉꠦꠍꠦ ꠇꠦꠘꠦ ꠀꠁꠍꠂꠘ? ꠀꠝꠞꠣꠞꠦ ꠛꠤꠘꠣꠡ ꠇꠞꠣꠔ ꠀꠁꠍꠂꠘ ꠘꠤ? ꠀꠝꠤ ꠎꠣꠘꠤ ꠀꠙꠘꠦ ꠇꠦ, ꠀꠙꠘꠦꠃ ꠀꠟ꠆ꠟꠣꠞ ꠢꠃ ꠙꠣꠇ-ꠙꠛꠤꠔ꠆ꠞ ꠎꠘ।”
LUK 4:35 ꠁꠍꠣꠄ ꠔꠣꠞꠦ ꠗꠣꠝꠇꠤ ꠖꠤꠀ ꠇꠁꠟꠣ, “ꠌꠥꠙ, ꠄꠞ ꠜꠤꠔꠞꠦ ꠕꠣꠇꠤ ꠛꠣꠞ ꠅꠁ ꠎꠣ।” ꠎꠤꠘꠦ ꠟꠉꠦ ꠟꠉꠦꠃ ꠔꠣꠞꠦ ꠀꠍꠣꠠ ꠝꠣꠞꠤ ꠢꠇꠟꠞ ꠝꠣꠎꠈꠣꠘꠅ ꠚꠣꠟꠣꠁꠀ, ꠇꠥꠘꠥꠎꠣꠔ ꠈꠦꠔꠤ ꠘꠣ ꠇꠞꠤꠀ ꠍꠣꠠꠤꠀ ꠉꠦꠟꠉꠤ।
LUK 4:36 ꠁꠔꠣ ꠖꠦꠈꠤꠀ ꠝꠣꠘꠥꠡ ꠔꠣꠁꠎ꠆ꠎꠥꠛ ꠛꠘꠤꠀ ꠝꠣꠔꠣ-ꠝꠣꠔꠤ ꠟꠣꠉꠣꠁꠟꠣ, “ꠁꠔꠣ ꠇꠤꠔꠣ ꠖꠦꠈꠟꠣꠝ? ꠔꠣꠁꠘ ꠢꠤꠝ꠆ꠝꠔ ꠀꠞ ꠈꠦꠝꠔꠣ ꠈꠣꠐꠣꠁꠀ ꠎꠤꠘ ꠅꠇꠟꠞꠦ ꠢꠥꠇꠥꠝ ꠖꠦꠁꠘ, ꠔꠣꠞꠣꠅ ꠖꠦꠈꠤ ꠛꠣꠞ ꠅꠁꠀ ꠎꠣꠄꠉꠤ।”
LUK 4:37 ꠛꠣꠖꠦ ꠢꠤꠘꠞ ꠢꠇ꠆ꠇꠟ ꠎꠣꠉꠣꠔ ꠁꠍꠣꠞ ꠇꠦꠞꠣꠝꠔꠤꠞ ꠈꠛꠞ ꠞꠐꠤꠉꠦꠟ।
LUK 4:38 ꠝꠍꠤꠖ ꠕꠣꠇꠤ ꠛꠣꠞ ꠅꠁꠀ ꠔꠣꠁꠘ ꠍꠣꠁꠝꠘꠞ ꠛꠣꠠꠤꠔ ꠉꠦꠟꠣ। ꠍꠣꠁꠝꠘꠞ ꠢꠠꠤꠞ ꠈꠥꠛ ꠛꠦꠡꠤ ꠔꠣꠙ ꠃꠑꠍꠤꠟ, ꠄꠞꠖꠣꠄ ꠢꠇꠟꠦ ꠁꠍꠣꠞꠦ ꠈꠥꠛ ꠝꠤꠘꠔ ꠇꠞꠟꠣ।
LUK 4:39 ꠔꠣꠁꠘ ꠍꠣꠁꠝꠘꠞ ꠢꠠꠤꠞ ꠇꠣꠘ꠆ꠖꠣꠔ ꠃꠛꠣꠁꠀ ꠔꠣꠙꠞꠦ ꠗꠝꠇ ꠖꠤꠟꠣ। ꠗꠝꠇꠞ ꠟꠉꠦ ꠟꠉꠦꠃ ꠔꠣꠙꠦ ꠍꠣꠠꠤꠖꠤꠟ। ꠛꠦꠐꠤꠄ ꠃꠑꠤꠀ ꠔꠣꠞꠣꠞ ꠝꠦꠝꠣꠘꠖꠣꠞꠤꠔ ꠟꠣꠉꠟꠣ।
LUK 4:40 ꠢꠣꠁꠘ꠆ꠎꠣ ꠛꠣꠟꠣ ꠝꠣꠘꠡꠦ ꠛꠃꠔ ꠎꠣꠔꠞ ꠛꠦꠝꠣꠞꠤꠞꠦ ꠟꠁꠀ ꠁꠍꠣꠞ ꠉꠦꠍꠦ ꠀꠁꠟꠣ। ꠁꠍꠣꠄ ꠔꠣꠞꠣ ꠢꠇꠟꠞ ꠉꠔꠞꠅ ꠀꠔꠣꠁ ꠖꠤꠀ ꠛꠦꠝꠣꠞ ꠜꠣꠟꠣ ꠇꠞꠟꠣ।
LUK 4:41 ꠎꠤꠘꠞ ꠀꠍꠞ ꠀꠟꠣꠅ ꠛꠃꠔ ꠛꠦꠝꠣꠞꠤ ꠀꠍꠟꠣ, ꠔꠣꠞꠣꠅ ꠜꠣꠟꠣ ꠅꠁꠟꠣ। ꠎꠤꠘ ꠅꠇꠟꠦ ꠎꠥꠞꠦ ꠎꠥꠞꠦ ꠌꠤꠟ꠆ꠟꠣꠁꠀ ꠇꠁꠟꠣ, “ꠀꠙꠘꠦꠃ ꠁꠛꠘꠥꠟ꠆ꠟꠣ, ꠀꠟ꠆ꠟꠣꠞ ꠈꠣꠍ ꠝꠣꠄꠀꠞ ꠎꠘ।” ꠅꠁꠟꠦ ꠔꠣꠁꠘ ꠁꠔꠣꠞꠦ ꠗꠣꠝꠇꠤ ꠖꠤꠀ ꠝꠥꠈ ꠛꠘ꠆ꠖ ꠇꠞꠟꠣ। ꠔꠣꠞꠣꠞ ꠔ ꠎꠣꠘꠣ ꠀꠍꠤꠟ, ꠔꠣꠁꠘꠃ ꠀꠟ꠆ꠟꠣꠞ ꠅꠀꠖꠣ ꠇꠞꠣ ꠢꠃ ꠀꠟ-ꠝꠍꠤ।
LUK 4:42 ꠛꠤꠀꠘꠦ ꠃꠑꠤꠀ ꠢꠣꠞꠤ, ꠁꠍꠣ ꠢꠤ ꠉꠣꠃ ꠍꠣꠠꠤꠀ ꠄꠇ ꠘꠤꠞꠣꠁ ꠎꠣꠉꠣꠔ ꠀꠁꠟꠣ। ꠝꠣꠘꠡꠦ ꠔꠣꠘꠞꠦ ꠔꠥꠇꠣꠁ ꠔꠥꠇꠣꠁ ꠔꠣꠘ ꠗꠣꠞꠅ ꠀꠁꠟ, ꠀꠁꠀ ꠝꠤꠘꠔ-ꠇꠣꠎ꠆ꠎꠤ ꠇꠞꠟ ꠎꠣꠔꠦ ꠔꠣꠁꠘ ꠔꠣꠞꠣꠞ ꠉꠦꠍꠦ ꠞꠂꠘ।
LUK 4:43 ꠅꠁꠟꠦ ꠔꠣꠁꠘ ꠎꠥꠀꠙ ꠖꠤꠟꠣ, “ꠀꠝꠤ ꠀꠞꠅ ꠛꠃꠔ ꠎꠣꠉꠣꠔ ꠉꠤꠀ ꠀꠟ꠆ꠟꠣꠞ ꠛꠣꠖꠡꠣꠁꠞ ꠈꠥꠡ-ꠈꠛꠞꠤ ꠔꠛꠟꠤꠉ ꠇꠞꠣ ꠎꠞꠥꠞ, ꠅꠃ ꠇꠣꠝꠞ ꠟꠣꠉꠤꠃ ꠀꠟ꠆ꠟꠣꠄ ꠀꠝꠣꠞꠦ ꠛꠦꠎꠤꠍꠂꠘ।”
LUK 4:44 ꠛꠣꠖꠦ ꠔꠣꠁꠘ ꠀꠡ꠆ꠔꠣ ꠁꠢꠥꠖꠤ ꠖꠦꠡꠞ ꠝꠍꠤꠖꠣꠁꠘ꠆ꠔꠅ ꠉꠤꠀ ꠔꠛꠟꠤꠉ ꠇꠞꠟꠣ।
LUK 5:1 ꠄꠇ ꠖꠤꠘ ꠁꠍꠣ ꠉꠣꠟꠤꠟ ꠀꠅꠞꠞ ꠙꠣꠞꠅ ꠃꠛꠣ ꠀꠍꠟꠣ, ꠅꠃ ꠡꠝꠄ ꠛꠃꠔ ꠝꠣꠘꠥꠡ ꠀꠟ꠆ꠟꠣꠞ ꠇꠣꠟꠣꠝ ꠢꠥꠘꠣꠞ ꠟꠣꠉꠤ ꠔꠣꠘ ꠇꠣꠘ꠆ꠖꠣꠔ ꠀꠁꠀ ꠑꠦꠟꠣꠑꠦꠟꠤ ꠟꠣꠉꠣꠁꠟꠣ।
LUK 5:2 ꠁꠍꠣꠄ ꠖꠦꠈꠟꠣ, ꠀꠅꠞꠞ ꠇꠤꠘꠣꠞꠅ ꠖꠥꠈꠣꠘ ꠎꠣꠟꠥꠀ ꠘꠣꠅ ꠟꠣꠉꠣꠁꠟ। ꠘꠣꠅ ꠕꠣꠇꠤ ꠟꠣꠝꠤꠀ ꠎꠣꠟꠥꠀ ꠅꠇꠟꠦ ꠔꠣꠞꠣꠞ ꠎꠣꠟ ꠗꠁꠞꠣ।
LUK 5:3 ꠁꠍꠣ ꠉꠤꠀ ꠍꠣꠁꠝꠘ ꠘꠣꠝꠞ ꠄꠇ ꠎꠣꠟꠥꠀꠞ ꠘꠣꠅꠅ ꠃꠑꠤꠀ ꠔꠣꠞꠦ ꠇꠁꠟꠣ, ꠘꠣꠅꠈꠣꠘ ꠜꠣꠡꠣꠁꠀ ꠇꠤꠍꠥ ꠙꠣꠘꠤꠔ ꠘꠤꠛꠣꠞ ꠟꠣꠉꠤ। ꠇꠁꠀ ꠔꠣꠁꠘ ꠘꠣꠅꠅ ꠛꠁꠀ ꠝꠣꠘꠡꠞꠦ ꠅꠀꠎ-ꠘꠍꠤꠅꠔ ꠇꠞꠣꠔ ꠟꠣꠉꠟꠣ।
LUK 5:4 ꠘꠍꠤꠅꠔ ꠛꠣꠖꠦ ꠔꠣꠁꠘ ꠎꠣꠟꠥꠀ ꠍꠣꠁꠝꠘꠞꠦ ꠇꠁꠟꠣ, “ꠘꠣꠅꠈꠣꠘ ꠉꠁꠘ ꠙꠣꠘꠤꠔ ꠘꠦꠅ ꠀꠞ ꠎꠣꠟ ꠚꠣꠟꠣꠅ।”
LUK 5:5 ꠍꠣꠁꠝꠘꠦ ꠇꠁꠟꠣ, “ꠢꠥꠎꠥꠞ, ꠀꠡ꠆ꠔꠣ ꠞꠣꠁꠔ ꠇꠡ꠆ꠐ ꠇꠞꠤꠀꠅ ꠇꠥꠘꠥ ꠝꠣꠍ ꠙꠣꠁꠍꠤ ꠘꠣ, ꠔꠣ-ꠅ ꠀꠙꠘꠣꠞ ꠇꠕꠣꠄ ꠎꠣꠟ ꠚꠣꠟꠣꠁꠞꠣꠝ।”
LUK 5:6 ꠎꠣꠟ ꠚꠣꠟꠣꠘꠤꠞ ꠛꠣꠖꠦ ꠅꠔ ꠛꠦꠡꠤ ꠝꠣꠍ ꠎꠣꠟꠅ ꠢꠣꠝꠣꠁꠟꠣ, ꠝꠣꠍꠞ ꠑꠦꠟꠣꠄ ꠎꠣꠟ ꠚꠣꠞꠤꠎꠤꠛꠣꠞ ꠖꠡꠣ।
LUK 5:7 ꠅꠃ ꠔꠣꠞꠣ ꠡꠣꠁꠎ꠆ꠎꠞ ꠟꠣꠉꠤ ꠟꠉꠞ ꠘꠣꠅꠞ ꠎꠣꠟꠥꠀꠞꠦ ꠒꠣꠇ ꠖꠤꠟꠣ। ꠔꠣꠞꠣ ꠀꠁꠀ ꠝꠣꠍ ꠗꠞꠤꠀ ꠘꠣꠅ ꠜꠞꠤꠟꠤꠟꠣ, ꠎꠣꠟꠅ ꠅꠔ ꠝꠣꠍ ꠢꠣꠝꠣꠁꠍꠤꠟ ꠎꠦꠘ, ꠝꠣꠍꠞ ꠜꠣꠞꠦ ꠖꠥꠁꠅ ꠘꠣꠅ ꠒꠥꠛꠥꠒꠥꠛꠥ ꠅꠁꠉꠦꠟ।
LUK 5:8 ꠁꠔꠣ ꠖꠦꠈꠤꠀ, ꠍꠣꠁꠝꠘ-ꠙꠤꠔꠞꠦ ꠁꠍꠣꠞ ꠙꠣꠅ-ꠅ ꠙꠠꠤꠀ ꠇꠁꠟꠣ, “ꠢꠥꠎꠥꠞ, ꠀꠝꠤ ꠔ ꠉꠥꠘꠣꠉꠣꠞ ꠝꠣꠘꠥꠡ, ꠀꠝꠣꠞ ꠉꠦꠍ ꠕꠣꠇꠤ ꠔꠡꠞꠤꠚ ꠈꠣꠘ ꠘꠦꠃꠇ꠆ꠇꠣꠉꠤ।”
LUK 5:9 ꠇꠣꠞꠘ, ꠅꠔ ꠝꠣꠍ ꠖꠦꠈꠤꠀ ꠍꠣꠁꠝꠘ-ꠙꠤꠔꠞ ꠀꠞ ꠔꠣꠘ ꠟꠉꠞ ꠢꠇ꠆ꠇꠟꠦ ꠔꠣꠁꠎ꠆ꠎꠥꠛ ꠛꠘꠤꠉꠦꠟꠣ।
LUK 5:10 ꠍꠣꠁꠝꠘꠞ ꠟꠉꠞ ꠎꠣꠟꠥꠀ ꠎꠤꠛꠥꠖꠤꠀꠞ ꠖꠥꠁꠅ ꠙꠥꠀ ꠁꠀꠇꠥꠛ ꠀꠞ ꠢꠣꠘ꠆ꠘꠣꠘꠦꠅ ꠁꠔꠣ ꠖꠦꠈꠤꠀ ꠔꠣꠁꠎ꠆ꠎꠥꠛ ꠅꠁꠟꠣ। ꠔꠦꠃ ꠁꠍꠣꠄ ꠍꠣꠁꠝꠘꠞꠦ ꠇꠁꠟꠣ, “ꠒꠞꠣꠁꠅ ꠘꠣ, ꠅꠈꠘ ꠕꠣꠇꠤ ꠀꠞ ꠝꠣꠍ ꠘꠣꠄ, ꠔꠥꠝꠤ ꠀꠟ꠆ꠟꠣꠞ ꠘꠣꠝꠦ ꠝꠣꠘꠥꠡ ꠗꠞꠛꠣꠄ।”
LUK 5:11 ꠛꠣꠖꠦ ꠔꠣꠞꠣ ꠘꠣꠅ ꠟꠁꠀ ꠇꠤꠘꠣꠞꠣꠔ ꠀꠁꠟꠣ, ꠀꠞ ꠢꠇ꠆ꠇꠟꠔꠣ ꠕꠁꠀ ꠁꠍꠣꠞ ꠟꠉꠦ ꠞꠅꠀꠘꠣ ꠅꠁꠉꠦꠟꠣ।
LUK 5:12 ꠄꠇꠛꠣꠞ ꠁꠍꠣ ꠄꠇ ꠉꠣꠃꠔ ꠉꠦꠟꠣ। ꠢꠃ ꠉꠣꠃꠞ ꠄꠇ ꠛꠦꠐꠣꠞ ꠀꠡ꠆ꠔꠣ ꠉꠔꠞ ꠎꠥꠠꠤ ꠘꠣꠙꠣꠇ ꠙꠌꠣ-ꠇꠥꠡ꠆ꠑ ꠛꠦꠝꠣꠞ ꠀꠍꠤꠟ। ꠁꠍꠣꠞꠦ ꠖꠦꠈꠤꠀꠃ ꠢꠦ ꠔꠣꠘ ꠙꠣꠅ-ꠅ ꠙꠠꠤꠀ ꠝꠤꠘꠔ-ꠇꠣꠎ꠆ꠎꠤ ꠟꠣꠉꠣꠁꠟ, “ꠢꠥꠎꠥꠞ, ꠀꠙꠘꠣꠞ ꠝꠘꠦ ꠌꠣꠁꠟꠦ ꠔ ꠀꠝꠣꠞꠦ ꠅꠃ ꠘꠣꠙꠣꠇ ꠛꠦꠝꠣꠞ ꠕꠣꠇꠤ ꠜꠣꠟꠣ ꠇꠞꠔꠣ ꠙꠣꠞꠛꠣ।”
LUK 5:13 ꠁꠍꠣꠄ ꠀꠔ ꠛꠣꠠꠣꠁꠀ ꠔꠣꠞꠦ ꠍꠁꠀ ꠇꠁꠟꠣ, “ꠅꠄ, ꠀꠝꠤꠅ ꠌꠣꠁꠞꠣꠝ, ꠔꠥꠝꠤ ꠙꠣꠇ-ꠍꠣꠚ ꠅꠅ।” ꠇꠅꠀꠞ ꠟꠉꠦ ꠟꠉꠦꠃ ꠔꠣꠞ ꠛꠦꠝꠣꠞ ꠇꠝꠤꠉꠦꠟ।
LUK 5:14 ꠜꠣꠟꠣ ꠅꠁꠀ ꠢꠣꠞꠟꠦ ꠁꠍꠣꠄ ꠔꠣꠞꠦ ꠢꠥꠇꠥꠝ ꠖꠤꠟꠣ, “ꠁꠔꠣ ꠀꠞ ꠇꠦꠃꠞꠞꠦ ꠢꠥꠘꠣꠁꠅ ꠘꠣ, ꠔꠥꠝꠤ ꠉꠤꠀ ꠈꠣꠟꠤ ꠁꠝꠣꠝ ꠍꠣꠛꠞꠦ ꠖꠦꠈꠣꠅ। ꠝꠥꠍꠣ ꠘꠛꠤꠞ ꠡꠞꠤꠅꠔ ꠝꠣꠚꠤꠇ ꠙꠣꠇ-ꠍꠣꠚ ꠅꠀꠞ ꠟꠣꠉꠤ ꠎꠦꠟꠣ ꠇꠥꠞꠛꠣꠘꠤ ꠇꠞꠣ ꠎꠞꠥꠞ, ꠅꠃ ꠇꠥꠞꠛꠣꠘꠤ ꠖꠤꠟꠦꠃ ꠝꠣꠘꠡꠦ ꠎꠣꠘꠤꠟꠤꠛꠣ, ꠔꠥꠝꠤ ꠜꠣꠟꠣ ꠅꠁꠍ।”
LUK 5:15 ꠅꠁꠟꠦ ꠁꠍꠣꠞ ꠈꠛꠞ ꠌꠣꠁꠞꠅꠛꠣꠄ ꠞꠐꠤꠉꠦꠟ। ꠄꠞꠖꠣꠄ ꠔꠣꠘ ꠝꠥꠈꠞ ꠛꠥꠟꠤ ꠢꠥꠘꠣꠞ ꠟꠣꠉꠤ ꠀꠞ ꠛꠦꠝꠣꠞꠤ ꠅꠇꠟ ꠜꠣꠟꠣ ꠅꠀꠞ ꠘꠤꠅꠔꠦ, ꠛꠃꠔ ꠝꠣꠘꠥꠡ ꠔꠣꠘ ꠉꠦꠍꠦ ꠀꠁꠟꠣ।
LUK 5:16 ꠅꠁꠟꠦ ꠔꠣꠁꠘ ꠇꠥꠘꠥ ꠘꠣ ꠇꠥꠘꠥ ꠘꠤꠞꠣꠁ ꠎꠣꠉꠣꠔ ꠉꠤꠀ ꠢꠣꠝꠦꠡꠣ ꠖꠥꠀ ꠇꠞꠔꠣ।
LUK 5:17 ꠄꠇꠖꠤꠘ ꠁꠍꠣ ꠔꠣꠟꠤꠝ ꠖꠦꠅꠀꠔ ꠀꠍꠟꠣ, ꠅꠃ ꠝꠎꠟꠤꠍꠅ ꠀꠟꠤꠝ ꠅꠇꠟ ꠀꠞ ꠚꠞꠤꠡꠤ ꠝꠎꠛꠞ ꠛꠃꠔ ꠝꠥꠟ꠆ꠟꠣꠁꠘ ꠛꠅꠀꠔ ꠀꠍꠟꠣ। ꠔꠣꠞꠣ ꠎꠦꠞꠥꠎꠣꠟꠦꠝ ꠐꠣꠃꠘ, ꠉꠣꠟꠤꠟ ꠀꠞ ꠄꠢꠥꠖꠤꠀ ꠎꠤꠟꠣꠞ ꠘꠣꠘꠣꠘ ꠉꠣꠃꠀꠁꠘ ꠕꠣꠇꠤ ꠀꠁꠍꠂꠘ। ꠁꠍꠣꠞ ꠝꠣꠎꠦ ꠝꠣꠛꠥꠖꠞ ꠇꠥꠖꠞꠔꠤ ꠛꠟ ꠀꠍꠤꠟ, ꠅꠃ ꠛꠟꠦꠃ ꠛꠦꠝꠣꠞꠤ ꠅꠇꠟꠞꠦ ꠡꠤꠚꠣ ꠇꠞꠔꠣ।
LUK 5:18 ꠄꠞꠝꠣꠎꠦ ꠇꠄꠎꠘ ꠝꠣꠘꠡꠦ ꠄꠇꠎꠘ ꠅꠛꠡ ꠛꠦꠝꠣꠞꠤꠞꠦ ꠙꠟꠅꠖꠤ ꠛꠁꠀ ꠟꠁꠀ ꠀꠁꠟꠣ। ꠔꠣꠞꠣ ꠌꠣꠁꠟꠣ ꠔꠣꠞꠦ ꠘꠤꠀ ꠊꠞꠞ ꠜꠤꠔꠞꠦ ꠁꠍꠣꠞ ꠍꠣꠝꠘꠦ ꠕꠁꠔꠣ।
LUK 5:19 ꠅꠁꠟꠦ ꠜꠤꠠꠞ ꠟꠣꠉꠤ ꠊꠞꠅ ꠢꠣꠝꠣꠘꠤꠞ ꠙꠕ ꠙꠣꠁꠟꠣ ꠘꠣ। ꠅꠃ ꠔꠣꠞꠣ ꠌꠣꠟꠞ ꠃꠙꠞꠦ ꠃꠑꠤꠀ, ꠌꠣꠟꠞ ꠍꠣꠘꠤ ꠈꠥꠟꠤꠀ ꠙꠟꠅ ꠡꠥꠖ꠆ꠖꠣ ꠛꠦꠝꠣꠞꠤꠞꠦ ꠁꠍꠣꠞ ꠍꠣꠝꠘꠦ ꠝꠣꠘꠡꠞ ꠝꠣꠎꠈꠣꠘꠅ ꠟꠣꠝꠣꠁ ꠖꠤꠟꠣ।
LUK 5:20 ꠔꠣꠞꠣꠞ ꠁꠝꠣꠘꠞ ꠛꠟ ꠖꠦꠈꠤꠀ ꠁꠍꠣꠄ ꠇꠁꠟꠣ, “ꠜꠣꠁꠞꠦ, ꠔꠥꠝꠣꠞ ꠉꠥꠘꠣ ꠝꠣꠚ ꠇꠞꠤ ꠖꠤꠟꠣꠝ।”
LUK 5:21 ꠁꠈꠣꠘ ꠢꠥꠘꠤꠀ ꠀꠟꠤꠝ ꠅꠇꠟꠦ ꠀꠞ ꠚꠞꠤꠡꠤ ꠖꠟꠞ ꠝꠥꠟ꠆ꠟꠣꠁꠘ꠆ꠔꠦ ꠝꠘꠦ ꠝꠘꠦ ꠇꠁꠟꠣ, “ꠁ ꠝꠣꠘꠥꠡꠉꠥ ꠇꠦꠉꠥ, ꠢꠦ ꠅꠟꠣ ꠡꠤꠞꠤꠇꠤ ꠇꠞꠦꠞ? ꠈꠣꠟꠤ ꠀꠟ꠆ꠟꠣ ꠍꠣꠠꠣ ꠀꠞ ꠇꠦꠃ ꠉꠥꠘꠣ ꠝꠣꠚ ꠇꠞꠔ ꠙꠣꠞꠦ ꠘꠤ?”
LUK 5:22 ꠔꠣꠞꠣꠞ ꠖꠤꠟꠞ ꠌꠤꠘ꠆ꠔꠣ ꠁꠍꠣꠄ ꠛꠥꠎꠤꠟꠤꠟꠣ, ꠛꠥꠎꠤꠀ ꠇꠁꠟꠣ, “ꠀꠙꠘꠣꠞꠣ ꠇꠦꠘꠦ ꠁꠟꠣ ꠌꠤꠘ꠆ꠔꠣ ꠇꠞꠞꠣ?
LUK 5:23 ꠀꠝꠤ ꠇꠥꠘꠈꠣꠘ ꠇꠅꠀ ꠡꠥꠎꠣ, ꠔꠥꠝꠣꠞ ꠉꠥꠘꠣ ꠝꠣꠚ ꠇꠞꠤ ꠖꠤꠟꠣꠝ? ꠛꠣ ꠔꠥꠝꠤ ꠃꠑꠤꠀ ꠀꠐꠤꠀ ꠔꠥꠝꠣꠞ ꠛꠤꠍꠘꠣ ꠟꠁꠀ ꠛꠣꠠꠤꠔ ꠎꠣꠅꠉꠤ? ꠇꠥꠘꠈꠣꠘ ꠡꠥꠎꠣ?
LUK 5:24 ꠔꠦ ꠅꠈꠘ ꠀꠙꠘꠣꠞꠣ ꠙꠞꠝꠣꠘ ꠖꠦꠈꠃꠇ꠆ꠇꠣ, ꠁ ꠖꠥꠘꠤꠀꠔ ꠉꠥꠘꠣ ꠝꠣꠚꠤꠞ ꠈꠦꠝꠔꠣ ꠀꠝꠤ ꠛꠤꠘ-ꠀꠖꠝꠞ ꠀꠍꠦ।” ꠅꠈꠣꠘ ꠇꠁꠀꠃ ꠔꠣꠁꠘ ꠛꠦꠝꠣꠞꠤ ꠛꠦꠐꠣꠞꠦ ꠇꠁꠟꠣ, “ꠅꠛꠣ, ꠀꠝꠤ ꠔꠥꠝꠣꠞꠦ ꠇꠁꠞꠣꠝ, ꠃꠑꠅ, ꠔꠥꠝꠣꠞ ꠈꠦꠔꠣ-ꠛꠣꠟꠤꠡ ꠟꠁꠀ ꠛꠣꠠꠤꠔ ꠎꠣꠅꠉꠤ।”
LUK 5:25 ꠇꠁꠔꠦꠃ ꠢꠤ ꠛꠦꠝꠣꠞꠤ ꠛꠦꠐꠣ ꠢꠇꠟꠞ ꠍꠣꠝꠘꠦ ꠃꠛꠣꠁꠀ, ꠔꠣꠞ ꠈꠦꠔꠣ-ꠛꠣꠟꠤꠡ ꠟꠁꠀ ꠀꠟ꠆ꠟꠣꠞ ꠔꠣꠞꠤꠚ ꠇꠞꠤ ꠇꠞꠤ ꠘꠤꠎꠞ ꠛꠣꠠꠤꠔ ꠉꠦꠟꠉꠤ।
LUK 5:26 ꠁꠔꠣ ꠖꠦꠈꠤꠀ ꠢꠇꠟ ꠔꠣꠁꠎ꠆ꠎꠥꠛ ꠛꠘꠤꠀ, ꠀꠟ꠆ꠟꠣꠞ ꠔꠣꠞꠤꠚ ꠇꠞꠤ ꠒꠞꠣꠁ ꠒꠞꠣꠁ ꠇꠁꠟꠣ, “ꠀꠁꠎ ꠁꠔꠣ ꠇꠤꠎꠣꠔ ꠇꠦꠞꠣꠝꠔꠤ ꠇꠣꠝ ꠖꠦꠈꠟꠣꠝ।”
LUK 5:27 ꠛꠣꠖꠦ ꠁꠍꠣ ꠛꠣꠞꠦ ꠉꠦꠟꠣ, ꠉꠤꠀ ꠔꠡꠤꠟ ꠅꠚꠤꠡꠅ ꠟꠦꠛꠤ ꠘꠣꠝꠞ ꠄꠇ ꠈꠣꠎꠘꠣ ꠔꠥꠟꠞꠣꠞꠦ ꠛꠅꠀꠔ ꠖꠦꠈꠟꠣ। ꠖꠦꠈꠤꠀ ꠔꠣꠞꠦ ꠇꠁꠟꠣ, “ꠀꠅ, ꠀꠝꠣꠞ ꠃꠝ꠆ꠝꠔ ꠅꠅ।”
LUK 5:28 ꠖꠣꠅꠔ ꠢꠥꠘꠤꠀꠃ ꠟꠦꠛꠤꠄ ꠔꠣꠘ ꠢꠇꠟꠔꠣ ꠚꠣꠟꠣꠁꠀ ꠁꠍꠣꠞ ꠟꠉꠦ ꠅꠁꠀ ꠞꠅꠀꠘꠣ ꠖꠤꠟꠣꠁꠟꠣ।
LUK 5:29 ꠛꠣꠖꠦ ꠟꠦꠛꠤꠄ ꠔꠣꠘ ꠘꠤꠎꠞ ꠛꠣꠠꠤꠔ ꠁꠍꠣꠞ ꠟꠣꠉꠤ ꠛꠠ ꠄꠇ ꠈꠣꠅꠀ-ꠖꠣꠅꠀꠞ ꠛꠦꠛꠡ꠆ꠔꠣ ꠇꠞꠟꠣ। ꠔꠣꠞꠣꠞ ꠟꠉꠦ ꠛꠃꠔ ꠊꠥꠡꠈꠥꠞ ꠈꠣꠎꠘꠣ ꠔꠥꠟꠞꠣ ꠀꠞ ꠀꠞꠅ ꠝꠣꠘꠥꠡ ꠈꠣꠅꠀꠔ ꠛꠁꠟꠣ।
LUK 5:30 ꠔꠦꠃ ꠚꠞꠤꠡꠤ ꠀꠞ ꠔꠣꠞꠣꠞ ꠖꠟꠞ ꠀꠟꠤꠝ ꠅꠇꠟꠦ ꠘꠣ-ꠈꠥꠡ ꠅꠁꠀ ꠁꠍꠣꠞ ꠡꠣꠉꠞꠤꠖ ꠅꠇꠟꠞꠦ ꠇꠁꠟꠣ, “ꠔꠥꠝꠞꠣ ꠈꠣꠎꠘꠣ ꠔꠥꠟꠞꠣ ꠐꠉꠛꠣꠎ ꠀꠞ ꠘꠣꠚꠞꠝꠣꠘ ꠅꠇꠟꠞ ꠛꠣꠠꠤꠔ ꠈꠣꠘꠣ-ꠙꠤꠘꠣ ꠈꠣꠅ ꠇꠦꠘꠦ?”
LUK 5:31 ꠁꠍꠣꠄ ꠔꠣꠞꠣꠞꠦ ꠎꠥꠀꠙ ꠖꠤꠟꠣ, “ꠜꠣꠟꠣ ꠝꠣꠘꠡꠞ ꠟꠣꠉꠤ ꠔ ꠒꠣꠇ꠆ꠔꠞꠞ ꠎꠞꠥꠞ ꠘꠣꠁ, ꠅꠁꠟꠦ ꠛꠦꠝꠣꠞꠤ ꠅꠇꠟꠞ ꠟꠣꠉꠤ ꠎꠞꠥꠞ ꠀꠍꠦ।
LUK 5:32 ꠔꠦ ꠀꠝꠤꠅ ꠙꠞꠦꠎꠉꠣꠞ ꠅꠇꠟꠞꠦ ꠖꠣꠅꠔ ꠖꠦꠅꠀꠔ ꠀꠁꠍꠤ ꠘꠣ, ꠈꠣꠟꠤ ꠉꠥꠘꠣꠉꠣꠞ ꠅꠇꠟꠞꠦ ꠖꠣꠅꠔ ꠖꠦꠅꠀꠔ ꠀꠁꠍꠤ, ꠎꠣꠔꠦ ꠔꠣꠞꠣ ꠔꠃꠛꠣ ꠇꠞꠂꠘ।”
LUK 5:33 ꠛꠣꠖꠦ ꠢꠃ ꠀꠟꠤꠝ ꠀꠞ ꠚꠞꠤꠡꠤ ꠅꠇꠟꠦ ꠇꠁꠟꠣ, “ꠄꠢꠤꠀꠞ ꠡꠤꠡꠤꠅ ꠅꠇꠟꠦ ꠢꠣꠝꠦꠡꠣ ꠞꠥꠎꠣ ꠞꠣꠈꠂꠘ, ꠖꠥꠀ ꠇꠞꠂꠘ, ꠀꠞ ꠚꠞꠤꠡꠤꠞ ꠡꠤꠡꠤꠅ ꠅꠇꠟꠦꠅ ꠅꠟꠣ ꠇꠞꠂꠘ, ꠔꠦ ꠀꠙꠘꠣꠞ ꠡꠤꠡꠤꠅ ꠅꠇꠟꠦ ꠇꠥꠘꠥ ꠡꠝꠄꠃ ꠈꠣꠘꠤ ꠛꠣꠖ ꠖꠦꠁꠘ ꠘꠣ ꠇꠦꠘꠦ?”
LUK 5:34 ꠁꠍꠣꠄ ꠎꠥꠀꠙ ꠖꠤꠟꠣ, “ꠘꠡꠣ ꠟꠉꠦ ꠕꠣꠇꠟꠦ ꠟꠉꠞ ꠛꠂꠞꠣꠔꠤꠞꠦ ꠇꠥꠘꠥ ꠃꠙꠣꠡ ꠞꠣꠈꠣ ꠎꠣꠄ ꠘꠤ?
LUK 5:35 ꠅꠁꠟꠦ ꠅꠝꠘ ꠄꠇ ꠖꠤꠘ ꠀꠁꠛ, ꠎꠦꠛꠟꠣ ꠘꠡꠣꠞꠦ ꠔꠣꠞꠣꠞ ꠉꠦꠍ ꠕꠣꠇꠤ ꠘꠦꠅꠀ ꠅꠁꠎꠤꠛ। ꠢꠃ ꠡꠝꠄ ꠔꠣꠞꠣ ꠞꠥꠎꠣ ꠞꠣꠈꠛꠣ।”
LUK 5:36 ꠁꠍꠣꠄ ꠔꠣꠞꠣꠞꠦ ꠔꠣꠟꠤꠝ ꠖꠤꠛꠣꠞ ꠟꠣꠉꠤ ꠅꠃ ꠝꠤꠍꠣꠟ ꠢꠥꠘꠣꠁꠟꠣ, ꠇꠁꠟꠣ, “ꠘꠄꠀ ꠇꠥꠞ꠆ꠔꠣꠞ ꠐꠥꠇꠞꠣ ꠍꠤꠠꠤꠀ, ꠇꠦꠃ ꠙꠥꠞꠣꠘ ꠇꠥꠞ꠆ꠔꠣꠔ ꠔꠣꠟꠤ ꠖꠦꠄ ꠘꠣ। ꠁꠟꠣ ꠇꠞꠟꠦ ꠔ ꠘꠄꠀꠐꠣꠅ ꠘꠡ꠆ꠐ ꠅꠁꠛ, ꠀꠞ ꠘꠄꠀ ꠇꠣꠙꠠꠞ ꠔꠣꠟꠤ ꠔ ꠙꠥꠞꠣꠘ ꠇꠣꠙꠠꠞ ꠟꠉꠦ ꠝꠤꠟꠔ-ꠅ ꠘꠣꠄ।
LUK 5:37 ꠙꠥꠞꠣꠘ ꠌꠣꠝꠠꠣꠞ ꠕꠟꠤꠔ ꠇꠦꠃ ꠔꠣꠎꠣ ꠀꠋꠉꠥꠞꠞ ꠞꠡ ꠜꠞꠦ ꠘꠣ। ꠜꠞꠟꠦ ꠅꠃ ꠔꠣꠎꠣ ꠞꠡꠞ ꠚꠣꠚꠦ ꠕꠟꠤ ꠚꠣꠐꠤꠀ ꠞꠡ ꠀꠞ ꠕꠟꠤ ꠖꠥꠁꠅꠔꠣ ꠛꠞꠛꠣꠖ ꠅꠄ।
LUK 5:38 ꠔꠣꠎꠣ ꠞꠡ ꠘꠄꠀ ꠕꠟꠤꠔ ꠕꠁꠔꠦ ꠅꠄ।
LUK 5:39 ꠀꠞ ꠀꠋꠉꠥꠞꠞ ꠙꠥꠞꠣꠘ ꠞꠡ ꠈꠣꠁꠀ ꠢꠣꠞꠤ ꠇꠥꠘꠥ ꠝꠣꠘꠡꠦ ꠘꠄꠀ ꠞꠡ ꠈꠣꠁꠔ ꠌꠣꠄ ꠘꠣ। ꠔꠣꠞꠣ ꠇꠂꠘ, ꠙꠥꠞꠣꠘꠔꠣꠃ ꠝꠎꠣ।”
LUK 6:1 ꠄꠇ ꠎꠥꠝ꠆ꠝꠣꠛꠣꠞꠦ ꠁꠍꠣ ꠉꠝ ꠈꠦꠔꠞ ꠀꠁꠟꠦꠖꠤ ꠀꠐꠤꠀ ꠎꠣꠁꠞꠣ। ꠅꠃ ꠡꠝꠄ ꠔꠣꠘ ꠡꠣꠉꠞꠤꠖ ꠅꠇꠟꠦ ꠉꠝꠞ ꠍꠠꠣ ꠍꠤꠠꠤꠀ ꠀꠔꠅ ꠊꠡꠤ ꠊꠡꠤ ꠈꠣꠁꠞꠣ।
LUK 6:2 ꠁꠔꠣ ꠖꠦꠈꠤꠀ ꠚꠞꠤꠡꠤ ꠝꠎꠛꠞ ꠇꠄꠎꠘꠦ ꠇꠁꠟꠣ, “ꠝꠥꠍꠣ ꠘꠛꠤꠞ ꠡꠞꠤꠅꠔ ꠝꠣꠚꠤꠇ ꠔ ꠎꠥꠝ꠆ꠝꠣꠛꠣꠞꠦ ꠎꠦꠇꠥꠘꠥ ꠇꠣꠝ ꠇꠞꠣ ꠢꠣꠞꠣꠝ, ꠔꠦ ꠔꠥꠝꠞꠣ ꠁ ꠍꠠꠣ ꠍꠤꠠꠤꠞꠣꠄ ꠇꠦꠘꠦ?”
LUK 6:3 ꠁꠍꠣꠄ ꠎꠥꠀꠙ ꠖꠤꠟꠣ, “ꠔꠦ ꠖꠣꠃꠖ ꠘꠛꠤ ꠀꠞ ꠔꠣꠘ ꠟꠉꠞ ꠢꠇꠟꠞ ꠎꠦꠛꠟꠣ ꠙꠦꠐꠅ ꠜꠥꠇ ꠟꠣꠉꠍꠤꠟ, ꠢꠤ ꠡꠝꠄ ꠔꠣꠞꠣ ꠇꠤꠔꠣ ꠇꠞꠍꠟꠣ, ꠁꠔꠣ ꠀꠙꠘꠣꠞꠣ ꠙꠠꠍꠂꠘ ꠘꠣ ꠘꠤ?
LUK 6:4 ꠔꠣꠁꠘ ꠘꠤꠎꠦ ꠀꠟ꠆ꠟꠣꠞ ꠊꠞꠅ ꠢꠣꠝꠣꠁꠀ ꠙꠛꠤꠔ꠆ꠞ ꠞꠥꠐꠤ ꠈꠣꠁꠍꠟꠣ, ꠀꠞ ꠔꠣꠘ ꠟꠉꠞ ꠅꠇꠟꠞꠦꠅ ꠈꠣꠅꠀꠁꠍꠟꠣ। ꠀꠍꠟꠦ ꠈꠣꠟꠤ ꠁꠝꠣꠝ ꠅꠇꠟ ꠍꠣꠠꠣ ꠀꠞ ꠇꠦꠃ ꠁ ꠞꠥꠐꠤ ꠈꠣꠅꠀ ꠎꠣꠁꠎ ꠀꠍꠤꠟ ꠘꠣ।”
LUK 6:5 ꠛꠣꠖꠦ ꠁꠍꠣꠄ ꠔꠣꠞꠣꠞꠦ ꠇꠁꠟꠣ, “ꠢꠥꠘꠅ, ꠀꠝꠤ ꠛꠤꠘ-ꠀꠖꠝꠃ ꠎꠥꠝ꠆ꠝꠣꠛꠣꠞꠞ ꠝꠣꠟꠤꠇ।”
LUK 6:6 ꠀꠞꠇ ꠎꠥꠝ꠆ꠝꠣꠛꠣꠞꠦ ꠁꠍꠣ ꠝꠍꠤꠖꠅ ꠉꠤꠀ ꠅꠀꠎ-ꠘꠍꠤꠅꠔ ꠇꠞꠣꠔ ꠀꠍꠟꠣ। ꠢꠘꠅ ꠄꠇ ꠛꠦꠝꠣꠞꠤ ꠛꠦꠐꠣ ꠀꠍꠤꠟ, ꠔꠣꠞ ꠒꠣꠁꠘꠞ ꠀꠔ ꠛꠦꠝꠣꠞꠦ ꠢꠥꠇꠣꠁ ꠉꠦꠍꠦ।
LUK 6:7 ꠝꠃꠟꠣꠘꠣ ꠀꠞ ꠚꠞꠤꠡꠤ ꠖꠟꠞ ꠝꠣꠘꠡꠦ ꠁꠍꠣꠞꠦ ꠚꠣꠘ꠆ꠖꠅ ꠚꠣꠟꠣꠁꠔꠣ ꠇꠞꠤ ꠜꠣꠘꠣ ꠔꠥꠇꠣꠘꠤꠔ ꠀꠍꠟꠣ। ꠔꠣꠞꠣ ꠖꠦꠈꠔꠣ ꠌꠣꠁꠟꠣ, ꠎꠥꠝ꠆ꠝꠣꠞ ꠖꠤꠘ ꠔꠣꠁꠘ ꠇꠦꠃꠞꠞꠦ ꠜꠣꠟꠣ ꠇꠞꠂꠘ ꠘꠤ, ꠇꠞꠟꠦ ꠔꠣꠘꠞꠦ ꠖꠥꠡꠤ ꠛꠣꠘꠣꠁꠔꠣ ꠙꠣꠞꠛꠣ।
LUK 6:8 ꠁꠍꠣꠄꠅ ꠔꠣꠞꠣꠞ ꠖꠤꠟꠞ ꠇꠥ-ꠝꠔꠟꠛ ꠛꠥꠎꠤꠟꠤꠟꠣ। ꠛꠥꠎꠤꠀ ꠔꠣꠁꠘ ꠢꠥꠇꠘꠣ ꠀꠔꠀꠟꠣ ꠛꠦꠐꠣꠞꠦ ꠇꠁꠟꠣ, “ꠅꠛꠣ, ꠔꠥꠝꠤ ꠀꠁꠀ ꠢꠇꠟꠞ ꠍꠣꠝꠘꠦ ꠃꠛꠣꠅ ꠌꠣꠁꠘ।” ꠔꠦꠃ ꠛꠦꠐꠣ ꠀꠁꠀ ꠃꠛꠣꠁꠟ।
LUK 6:9 ꠁꠍꠣꠄ ꠔꠣꠞꠣꠞꠦ ꠎꠤꠇꠣꠁꠟꠣ, “ꠀꠝꠤ ꠀꠙꠘꠣꠁꠘ꠆ꠔꠞꠦ ꠄꠇꠈꠣꠘ ꠇꠕꠣ ꠎꠤꠇꠣꠁꠞꠣꠝ, ꠎꠥꠝ꠆ꠝꠣꠛꠣꠞꠦ ꠇꠥꠘ ꠇꠣꠝ ꠇꠞꠣ ꠎꠣꠁꠎ, ꠜꠣꠟꠣ ꠇꠣꠝ ꠘꠣ ꠛꠣꠖ ꠇꠣꠝ? ꠎꠣꠘ ꠛꠣꠌꠣꠘꠤ, ꠘꠣ ꠎꠣꠘꠞ ꠛꠤꠘꠣꠡ ꠇꠞꠣ?”
LUK 6:10 ꠛꠣꠖꠦ ꠔꠣꠁꠘ ꠌꠣꠁꠞꠅ ꠉꠣꠟꠣꠞ ꠢꠇꠟꠞ ꠛꠣꠄ ꠌꠣꠁꠀ ꠢꠃ ꠛꠦꠐꠣꠞꠦ ꠇꠁꠟꠣ, “ꠔꠥꠝꠣꠞ ꠀꠔꠈꠣꠘ ꠛꠣꠠꠣꠅ।” ꠛꠦꠐꠣꠄ ꠔꠣꠞ ꠀꠔ ꠛꠣꠠꠣꠁꠟ, ꠀꠞ ꠙꠥꠞꠣꠙꠥꠞ ꠜꠣꠟꠣ ꠅꠁꠉꠦꠟ।
LUK 6:11 ꠁꠔꠣ ꠖꠦꠈꠤꠀ ꠢꠃ ꠝꠥꠟ꠆ꠟꠣ ꠅꠇꠟꠞ ꠈꠥꠛ ꠉꠥꠍꠣ ꠃꠑꠟ। ꠔꠣꠞꠣ ꠙꠞꠣꠝꠤꠡ ꠌꠣꠟꠣꠁꠟꠣ, ꠁꠍꠣꠞꠦ ꠇꠦꠝꠘꠦ ꠕꠣꠝꠣꠁꠟ ꠎꠣꠄ।
LUK 6:12 ꠛꠣꠖꠦ ꠁꠍꠣ ꠖꠥꠀ ꠇꠞꠣꠞ ꠟꠣꠉꠤ ꠄꠇ ꠙꠣꠠꠅ ꠃꠑꠤꠟꠣ, ꠀꠞ ꠀꠡ꠆ꠔꠣ ꠞꠣꠁꠔ ꠀꠟ꠆ꠟꠣꠞ ꠉꠦꠍꠦ ꠖꠥꠀ ꠇꠞꠟꠣ।
LUK 6:13 ꠛꠤꠀꠘꠤ ꠛꠣꠟꠣ ꠔꠣꠘ ꠡꠣꠉꠞꠤꠖ ꠅꠇꠟꠞꠦ ꠒꠣꠇꠤꠀ ꠇꠣꠘ꠆ꠖꠣꠔ ꠀꠘꠟꠣ, ꠄꠞꠣꠞ ꠝꠣꠎꠞ ꠛꠣꠞꠅ ꠎꠘꠞꠦ ꠙꠍꠘ꠆ꠖ ꠇꠞꠤꠀ, ꠔꠣꠘ ꠈꠣꠍ ꠍꠣꠢꠣꠛꠤ ꠛꠣꠘꠣꠁꠟꠣ।
LUK 6:14 ꠅꠃ ꠛꠣꠞꠅꠎꠘ ꠅꠁꠟꠣ, ꠍꠣꠁꠝꠘ—ꠁꠍꠣꠄ ꠄꠘ ꠘꠄꠀ ꠘꠣꠝ ꠖꠤꠟꠣ ꠙꠤꠔꠞ, ꠍꠣꠁꠝꠘꠞ ꠜꠣꠁ ꠀꠘ꠆ꠖꠞꠤꠀꠍ, ꠁꠀꠇꠥꠛ, ꠢꠣꠘ꠆ꠘꠣꠘ, ꠚꠤꠟꠤꠚ, ꠛꠞ꠆ꠕꠟꠝꠄ,
LUK 6:15 ꠝꠕꠤ, ꠕꠥꠝꠣꠍ, ꠀꠟꠚꠤꠞ ꠙꠥꠀ ꠁꠀꠇꠥꠛ, ꠝꠥꠇ꠆ꠔꠤꠎꠥꠖ꠆ꠖꠣ ꠍꠣꠁꠝꠘ,
LUK 6:16 ꠁꠀꠇꠥꠛꠞ ꠙꠥꠀ ꠁꠢꠥꠖꠣ, ꠀꠞ ꠁꠢꠥꠖꠣ ꠁꠡ꠆ꠇꠣꠞꠤꠀꠔ—ꠅꠃ ꠁꠢꠥꠖꠣꠄ ꠛꠣꠖꠦ ꠛꠦꠁꠝꠣꠘꠤ ꠇꠞꠍꠤꠟ।
LUK 6:17 ꠄꠞꠝꠣꠎꠦ ꠁꠍꠣꠄ ꠔꠣꠘ ꠍꠣꠢꠣꠛꠤ ꠅꠇꠟꠞꠦ ꠟꠁꠀ ꠃꠙꠞꠦ ꠕꠣꠇꠤ ꠟꠣꠝꠤꠀ ꠙꠣꠠꠞ ꠙꠦꠐꠅ ꠢꠝꠣꠘ ꠄꠇ ꠎꠣꠉꠣꠔ ꠀꠁꠀ ꠃꠛꠣꠁꠟꠣ। ꠢꠤꠘꠅ ꠔꠣꠘ ꠛꠃꠔ ꠃꠝ꠆ꠝꠔ ꠖꠟꠣ ꠅꠁꠍꠟꠣ, ꠎꠦꠞꠥꠎꠣꠟꠦꠝ ꠐꠣꠃꠘ ꠀꠞ ꠄꠢꠥꠖꠤꠀ ꠎꠤꠟꠣ ꠕꠣꠇꠤ, ꠖꠞꠤꠀꠞ ꠙꠣꠞꠞ ꠡꠥꠞ ꠀꠞ ꠍꠤꠖꠘ ꠄꠟꠣꠇꠣ ꠕꠣꠇꠤꠅ ꠖꠟ ꠛꠣꠘ꠆ꠖꠤ ꠛꠣꠘ꠆ꠖꠤ ꠝꠣꠘꠥꠡ ꠀꠁꠍꠟꠣ।
LUK 6:18 ꠔꠣꠞꠣ ꠔꠣꠘ ꠛꠄꠀꠘ ꠢꠥꠘꠣꠞ ꠈꠤꠀꠟꠦ ꠀꠞ ꠛꠦꠝꠣꠞ ꠕꠣꠇꠤ ꠡꠤꠚꠣ ꠅꠀꠞ ꠘꠤꠅꠔꠦ ꠀꠁꠟꠣ। ꠀꠞ ꠎꠣꠞꠣꠞ ꠃꠙꠞꠦ ꠎꠤꠘꠞ ꠀꠍꠞ ꠀꠍꠤꠟ, ꠔꠣꠞꠣꠅ ꠜꠣꠟꠣ ꠅꠁꠟꠣ।
LUK 6:19 ꠢꠇꠟ ꠝꠣꠘꠡꠦꠃ ꠔꠣꠘꠞꠦ ꠀꠔ ꠖꠤꠀ ꠍꠁꠔ ꠌꠣꠁꠟ, ꠇꠣꠞꠘ ꠔꠣꠘ ꠜꠤꠔꠞ ꠕꠣꠇꠤ ꠇꠥꠖꠞꠔꠤ ꠡꠇ꠆ꠔꠤ ꠛꠣꠞꠘꠤꠄ, ꠄꠞꠣ ꠢꠇꠟꠞ ꠛꠦꠝꠣꠞ ꠇꠝꠍꠤꠟ।
LUK 6:20 ꠔꠦꠃ ꠁꠍꠣꠄ ꠀꠙꠘ ꠡꠣꠉꠞꠤꠖ ꠅꠇꠟꠞ ꠛꠣꠄ ꠌꠣꠁꠀ ꠇꠁꠟꠣ, “ꠔꠥꠝꠞꠣ ꠎꠦꠞꠣ ꠉꠞꠤꠛ ꠔꠥꠝꠞꠣꠃ ꠇꠙꠣꠟꠤ, ꠀꠟ꠆ꠟꠣꠞ ꠛꠣꠖꠡꠣꠁ ꠔ ꠔꠥꠝꠞꠣꠞ ꠟꠣꠉꠤꠃ।
LUK 6:21 ꠔꠥꠝꠞꠣ ꠎꠔ ꠎꠘꠞ ꠙꠦꠐꠅ ꠜꠥꠇ ꠀꠍꠦ, ꠔꠥꠝꠞꠣꠃ ꠇꠙꠣꠟꠤ, ꠔꠥꠝꠞꠣ ꠙꠦꠐ ꠜꠞꠤꠀ ꠈꠣꠁꠛꠣꠄ। ꠔꠥꠝꠞꠣ ꠎꠦꠞꠣ ꠇꠣꠘ꠆ꠖꠤꠞꠣꠄ ꠔꠥꠝꠞꠣꠃ ꠇꠙꠣꠟꠤ, ꠛꠣꠖꠦ ꠔ ꠀꠡꠤꠛꠣꠄ।
LUK 6:22 “ꠔꠥꠝꠞꠣꠃ ꠇꠙꠣꠟꠤ, ꠎꠦꠛꠟꠣ ꠛꠤꠘ-ꠀꠖꠝꠞ ꠖꠣꠄ ꠝꠣꠘꠡꠦ ꠔꠥꠝꠞꠣꠞꠦ ꠊꠤꠘ꠆ꠘꠣꠄ, ꠉꠣꠃ ꠕꠣꠇꠤ ꠛꠣꠍꠤꠀ ꠄꠇꠊꠞꠤ ꠇꠞꠦ, ꠛꠖꠘꠣꠝ ꠉꠣꠄ, ꠀꠞ ꠔꠥꠝꠞꠣꠞ ꠘꠣꠝ ꠢꠥꠘꠟꠦ ꠝꠥꠈꠞ ꠕꠥ ꠚꠣꠟꠣꠄ।
LUK 6:23 ꠁꠟꠣ ꠇꠞꠟꠦ ꠔꠥꠝꠞꠣ ꠈꠥꠡꠤ ꠅꠁꠅ, ꠚꠥꠞ꠆ꠔꠤꠄ ꠘꠣꠌꠤꠅ, ꠇꠣꠞꠘ ꠛꠦꠢꠦꠡ꠆ꠔꠅ ꠔꠥꠝꠞꠣ ꠛꠃꠔ ꠛꠠ ꠙꠥꠞꠥꠡ꠆ꠇꠣꠞ ꠙꠣꠁꠛꠣꠄ। ꠎꠣꠘ ꠘꠤ, ꠅꠃ ꠘꠣꠚꠞꠝꠣꠘ ꠅꠇꠟꠞ ꠛꠣꠚ-ꠖꠣꠖꠣꠁꠘ꠆ꠔꠦꠅ ꠀꠟ꠆ꠟꠣꠞ ꠘꠛꠤ ꠅꠇꠟꠞ ꠃꠙꠞꠦ ꠅꠟꠣ ꠎꠥꠟꠥꠝ ꠇꠞꠔꠣ।
LUK 6:24 “ꠢꠣꠄꠞꠦ ꠗꠘꠤ ꠅꠇꠟ, ꠔꠥꠝꠞꠣꠞ ꠡꠥꠈ ꠔ ꠖꠥꠘꠤꠀꠔꠃ ꠇꠣꠝꠣꠁꠟꠤꠞꠣꠄ।
LUK 6:25 ꠢꠣꠄꠞꠦ ꠙꠦꠐ ꠜꠞꠤꠀ ꠈꠣꠅꠞꠣ ꠅꠇꠟ, ꠔꠥꠝꠞꠣꠅ ꠜꠥꠇꠦ ꠍꠐꠚꠐ ꠇꠞꠛꠣꠄ। ꠢꠣꠄꠞꠦ ꠢꠣꠄ ꠎꠦꠞꠣ ꠅꠈꠘ ꠀꠡꠤꠞꠣꠄ, ꠔꠥꠝꠞꠣ ꠇꠣꠘ꠆ꠖꠣ-ꠇꠣꠐꠤ ꠀꠞ ꠀꠢꠣꠎꠣꠞꠤ ꠇꠞꠛꠣꠄ।
LUK 6:26 ꠢꠣꠄꠞꠦ ꠢꠣꠄ, ꠝꠣꠘꠡꠦ ꠎꠦꠛꠟꠣ ꠔꠥꠝꠞꠣꠞ ꠡꠥꠘꠣꠝ ꠉꠣꠄ, ꠎꠣꠘ ꠘꠤ, ꠅꠔꠣ ꠝꠣꠘꠡꠞ ꠛꠣꠚ-ꠖꠣꠖꠣꠁꠘ꠆ꠔꠦꠅ ꠀꠉꠞ ꠀꠝꠟꠞ ꠜꠘ꠆ꠒ ꠘꠛꠤ ꠅꠇꠟꠞ ꠅꠟꠣ ꠡꠥꠘꠣꠝ ꠉꠣꠁꠔ।
LUK 6:27 “ꠔꠥꠝꠞꠣ ꠎꠔꠎꠘ ꠀꠝꠣꠞ ꠔꠞꠤꠇꠣꠄ ꠌꠟꠔꠣꠄ ꠌꠣꠅ, ꠀꠝꠤ ꠔꠥꠝꠞꠣꠞꠦ ꠇꠁꠞꠣꠝ, ꠔꠥꠝꠞꠣ ꠎꠣꠞꠎꠤꠞ ꠖꠥꠡꠝꠘꠞꠦꠅ ꠝꠢꠛ꠆ꠛꠔ ꠇꠞꠤꠅ। ꠎꠦꠞꠣ ꠔꠥꠝꠞꠣꠞꠦ ꠊꠤꠘ꠆ꠘꠣꠄ, ꠔꠥꠝꠞꠣ ꠔꠣꠞꠣꠞ ꠜꠣꠟꠣꠁ ꠇꠞꠤꠅ।
LUK 6:28 ꠎꠦꠞꠣ ꠔꠥꠝꠞꠣꠞ ꠟꠣꠉꠤ ꠟꠣꠘ꠆ꠘꠔ ꠝꠣꠋꠉꠦ, ꠔꠥꠝꠞꠣ ꠔꠣꠞꠣꠞ ꠟꠣꠉꠤ ꠞꠢꠝꠔ ꠌꠣꠁꠅ। ꠀꠞ ꠎꠦꠞꠣ ꠔꠥꠝꠞꠣꠞ ꠛꠖꠘꠣꠝ ꠇꠞꠦ, ꠔꠥꠝꠞꠣ ꠔꠣꠞꠣꠞ ꠟꠣꠉꠤ ꠖꠥꠀ ꠇꠞꠤꠅ।
LUK 6:29 ꠎꠦ ꠔꠥꠝꠣꠞ ꠄꠇ ꠉꠣꠟꠅ ꠌꠠ ꠝꠣꠞꠦ, ꠔꠣꠞꠦ ꠀꠞꠇ ꠉꠣꠟ ꠙꠣꠔꠤꠀ ꠖꠤꠅ। ꠎꠦ ꠔꠥꠝꠣꠞ ꠌꠣꠖ꠆ꠖꠞ ꠇꠣꠠꠤꠀ ꠘꠤꠔ ꠌꠣꠄ, ꠔꠣꠞꠦ ꠇꠥꠞ꠆ꠔꠣꠅ ꠈꠥꠟꠤꠀ ꠖꠤꠅ।
LUK 6:30 ꠎꠣꠞꠣ ꠔꠥꠝꠣꠞ ꠉꠦꠍꠦ ꠌꠣꠄ, ꠔꠣꠞꠣꠞꠦ ꠖꠤꠅ। ꠇꠦꠃ ꠔꠥꠝꠣꠞ ꠇꠥꠘꠥ ꠌꠤꠎ ꠘꠤꠟꠦꠉꠤ, ꠔꠣꠞ ꠉꠦꠍꠦ ꠀꠞ ꠚꠤꠞꠔ ꠌꠣꠁꠅ ꠘꠣ।
LUK 6:31 ꠢꠥꠘꠅ, ꠔꠥꠝꠞꠣ ꠝꠣꠘꠡꠞ ꠉꠦꠍ ꠕꠣꠇꠤ ꠎꠦꠟꠣꠈꠣꠘ ꠛꠦꠛꠢꠣꠞ ꠙꠣꠁꠔꠣꠄ ꠌꠣꠅ, ꠔꠥꠝꠞꠣꠅ ꠢꠇꠟꠞ ꠟꠉꠦ ꠅꠃ ꠟꠣꠈꠣꠘ ꠛꠦꠛꠢꠣꠞ ꠇꠞꠅ।
LUK 6:32 “ꠎꠣꠞꠣ ꠔꠥꠝꠞꠣꠞꠦ ꠝꠣꠄꠀ ꠇꠞꠦ, ꠔꠥꠝꠞꠣ ꠎꠥꠖꠤ ꠈꠣꠟꠤ ꠔꠣꠞꠣꠞꠦꠃ ꠝꠣꠄꠀ ꠇꠞ, ꠔꠦ ꠔꠥꠝꠞꠣ ꠛꠣꠢꠛꠣ ꠙꠣꠁꠔꠣꠄ ꠇꠤꠟꠣ? ꠁꠟꠣ ꠔ ꠘꠣꠚꠞꠝꠣꠘ ꠅꠇꠟꠦꠅ ꠄꠇꠦ-ꠅꠁꠘ꠆ꠘꠞꠦ ꠝꠣꠄꠀ ꠇꠞꠦ।
LUK 6:33 ꠀꠞ ꠎꠣꠞꠣ ꠔꠥꠝꠞꠣꠞ ꠜꠣꠟꠣꠁ ꠇꠞꠦ, ꠔꠥꠝꠞꠣ ꠎꠥꠖꠤ ꠈꠣꠟꠤ ꠔꠣꠞꠣꠞ ꠜꠣꠟꠣꠁ ꠇꠞ, ꠔꠦ ꠛꠣꠢꠛꠣ ꠙꠣꠁꠛꠣꠄ ꠇꠤꠟꠣ? ꠘꠣꠚꠞꠝꠣꠘ ꠅꠇꠟꠦꠅ ꠔ ꠁꠟꠣ ꠇꠞꠦ।
LUK 6:34 ꠎꠦ ꠝꠣꠘꠡꠞ ꠉꠦꠍ ꠕꠣꠇꠤ ꠔꠥꠝꠞꠣ ꠇꠞꠎ ꠙꠣꠁꠛꠣꠞ ꠀꠡꠣ ꠀꠍꠦ, ꠔꠥꠝꠞꠣ ꠎꠥꠖꠤ ꠈꠣꠟꠤ ꠔꠣꠞꠦꠃ ꠇꠞꠎ ꠖꠦꠅ, ꠔꠦ ꠇꠤꠟꠣ ꠛꠣꠢꠛꠣ ꠙꠣꠁꠛꠣꠄ? ꠘꠣꠚꠞꠝꠣꠘ ꠅꠇꠟꠦꠅ ꠄꠇꠦ-ꠅꠁꠘ꠆ꠘꠞꠦ ꠁꠟꠣ ꠇꠞꠎ ꠖꠦꠄ, ꠢꠦ ꠀꠡꠣ ꠇꠞꠦ ꠛꠤꠙꠖꠅ ꠙꠠꠟꠦ ꠢꠦ-ꠅ ꠢꠘ ꠕꠣꠇꠤ ꠇꠞꠎ ꠙꠣꠁꠛ।
LUK 6:35 ꠔꠦ ꠀꠝꠤ ꠔꠥꠝꠞꠣꠞꠦ ꠇꠁꠞꠣꠝ, ꠔꠥꠝꠞꠣ ꠎꠣꠞꠎꠤꠞ ꠖꠥꠡꠝꠘꠞꠦꠅ ꠝꠣꠄꠀ ꠇꠞꠤꠅ, ꠔꠣꠞꠣꠞ ꠜꠣꠟꠣꠁ ꠇꠞꠤꠅ। ꠛꠖꠟꠣ ꠙꠣꠅꠀꠞ ꠀꠡꠣ ꠘꠣ ꠇꠞꠤꠀ ꠇꠞꠎ ꠖꠤꠅ, ꠔꠦꠃ ꠔꠥꠝꠞꠣꠞ ꠟꠣꠉꠤ ꠛꠠ ꠛꠈꠡꠤꠡ ꠀꠍꠦ। ꠔꠥꠝꠞꠣ ꠀꠟ꠆ꠟꠣ ꠙꠣꠇꠞ ꠀꠅꠟꠣꠖ ꠛꠘꠛꠣꠄ। ꠔꠣꠁꠘ ꠔ ꠘꠤꠝꠇ-ꠢꠣꠞꠣꠝ ꠀꠞ ꠈꠣꠞꠣꠙ ꠝꠣꠘꠡꠞꠦꠅ ꠖꠄꠀ ꠇꠞꠂꠘ।
LUK 6:36 ꠔꠥꠝꠞꠣꠞ ꠘꠤꠞꠣꠇꠣꠞ ꠛꠣꠚ ꠎꠦꠟꠣ ꠖꠄꠀꠟ, ꠔꠥꠝꠞꠣꠅ ꠅꠟꠣꠘ ꠖꠄꠀꠟ ꠅꠅ।
LUK 6:37 “ꠝꠣꠘꠡꠞ ꠛꠤꠌꠣꠞ ꠇꠞꠤꠅ ꠘꠣ, ꠔꠦꠃ ꠔꠥꠝꠞꠣꠅ ꠛꠤꠌꠣꠞꠞ ꠖꠣꠠꠅ ꠙꠠꠔꠣꠄ ꠘꠣꠄ। ꠇꠦꠃꠞꠞꠦ ꠖꠥꠡꠤ ꠡꠣꠁꠛꠡ꠆ꠔ ꠇꠞꠤꠅ ꠘꠣ, ꠔꠦꠃ ꠔꠥꠝꠞꠣꠅ ꠖꠥꠡꠤ ꠅꠁꠔꠣꠄ ꠘꠣꠄ। ꠝꠣꠚ ꠇꠞꠤꠀ ꠖꠤꠅ, ꠔꠦꠃ ꠔꠥꠝꠞꠣꠅ ꠝꠣꠚꠤ ꠙꠣꠁꠛꠣꠄ।
LUK 6:38 ꠖꠣꠘ-ꠈꠄꠞꠣꠔ ꠖꠦꠅ, ꠔꠦꠃ ꠔꠥꠝꠞꠣꠞꠦꠅ ꠖꠦꠅꠀ ꠅꠁꠛ। ꠝꠣꠘꠡꠦ ꠎꠣꠔꠣꠁ ꠎꠣꠔꠣꠁ ꠜꠞꠤꠀ ꠀꠘꠤꠀ ꠔꠥꠝꠞꠣꠞ ꠉꠣꠐꠤꠔ ꠛꠣꠘ꠆ꠖꠤꠀ ꠖꠤꠛꠣ। ꠔꠥꠝꠞꠣ ꠎꠦꠟꠣ ꠝꠣꠙꠤꠀ ꠖꠤꠛꠣꠄ, ꠔꠥꠝꠞꠣꠞ ꠟꠣꠉꠤꠅ ꠅꠟꠣ ꠝꠣꠙꠣ ꠅꠁꠛ।”
LUK 6:39 ꠛꠣꠖꠦ ꠁꠍꠣꠄ ꠔꠣꠞꠣꠞꠦ ꠅꠃ ꠇꠤꠌ꠆ꠍꠣ ꠢꠥꠘꠣꠁꠟꠣ, “ꠄꠇ ꠀꠘ꠆ꠖꠣꠄ ꠇꠥꠘꠥ ꠀꠞꠇ ꠀꠘ꠆ꠖꠣꠞꠦ ꠙꠕ ꠖꠦꠈꠣꠁꠔ ꠙꠣꠞꠦ ꠘꠤ? ꠔꠦ ꠖꠥꠁꠅꠎꠘꠃ ꠉꠣꠔꠅ ꠙꠠꠔ ꠘꠣꠄ ꠘꠤ?
LUK 6:40 ꠡꠣꠉꠞꠤꠖ ꠃꠡ꠆ꠔꠣꠖ ꠕꠣꠇꠤ ꠛꠠ ꠘꠣꠄ, ꠅꠁꠟꠦ ꠎꠦ ꠡꠣꠉꠞꠤꠖꠦ ꠙꠥꠞꠣꠙꠥꠞ ꠔꠣꠟꠤꠝ ꠟꠄ, ꠢꠦ-ꠅ ꠃꠡ꠆ꠔꠣꠖꠞ ꠟꠣꠈꠣꠘ ꠛꠘꠤꠎꠣꠄ।
LUK 6:41 ꠔꠥꠝꠣꠞ ꠜꠣꠁꠞ ꠌꠈꠥꠔ ꠉꠥꠠꠣ ꠢꠣꠝꠣꠁꠍꠦ ꠅꠈꠣꠘꠃ ꠖꠦꠈꠞꠣꠄ, ꠅꠁꠟꠦ ꠘꠤꠎꠞ ꠌꠃꠈꠅ ꠉꠣꠍꠞ ꠌꠦꠟꠤ ꠀꠍꠦ ꠁꠔꠣ ꠖꠦꠈꠞꠣꠄ ꠘꠣ?
LUK 6:42 ꠔꠥꠝꠣꠞ ꠌꠈꠥꠔ ꠌꠦꠟꠤ ꠢꠣꠝꠣꠁꠍꠦ ꠁꠈꠣꠘ ꠘꠣ ꠌꠣꠁꠀ ꠔꠥꠝꠣꠞ ꠜꠣꠁꠞꠦ ꠇꠤꠟꠣ ꠇꠁꠛꠣꠄ, ‘ꠜꠣꠁꠍꠣꠛ, ꠔꠥꠝꠣꠞ ꠌꠃꠈꠅ ꠎꠦ ꠉꠥꠠꠣ ꠙꠠꠍꠦ, ꠀꠅ, ꠅꠉꠥ ꠛꠣꠞ ꠇꠞꠤꠀ ꠖꠦꠁ।’ ꠔꠥꠝꠣꠞ ꠘꠤꠎꠞ ꠌꠈꠥꠞ ꠌꠦꠟꠤꠃ ꠔ ꠖꠦꠈꠞꠣꠄ ꠘꠣ। ꠅ ꠜꠘ꠆ꠒ, ꠙꠄꠟꠣ ꠔꠥꠝꠣꠞ ꠘꠤꠎꠞ ꠌꠃꠈ ꠕꠣꠇꠤ ꠌꠦꠟꠤ ꠢꠞꠣꠅ, ꠔꠦꠃ ꠜꠣꠁꠞ ꠌꠃꠈ ꠕꠣꠇꠤ ꠉꠥꠠꠣ ꠛꠣꠞ ꠇꠞꠣꠔ ꠟꠣꠉꠟꠦ ꠜꠣꠟꠣ ꠇꠞꠤ ꠖꠦꠈꠔꠣꠄ ꠙꠣꠞꠛꠣꠄ।
LUK 6:43 ꠜꠣꠟꠣ ꠉꠣꠍꠦ ꠔ ꠝꠘ꠆ꠖ ꠚꠟ ꠗꠞꠦ ꠘꠣ, ꠀꠞ ꠝꠘ꠆ꠖ ꠉꠣꠍꠦ ꠜꠣꠟꠣ ꠚꠟ ꠗꠞꠦ ꠘꠣ।
LUK 6:44 ꠚꠟ ꠖꠦꠈꠤꠀ ꠉꠣꠍ ꠌꠤꠘꠣ ꠎꠣꠄ। ꠝꠣꠘꠡꠦ ꠔ ꠞꠤꠚꠥꠎꠤ ꠟꠔ ꠕꠣꠇꠤ ꠛꠞꠁ ꠙꠣꠠꠦ ꠘꠣ, ꠛꠣ ꠍꠥꠔꠞꠣ ꠉꠣꠍ ꠕꠣꠇꠤ ꠀꠋꠉꠥꠞ ꠙꠣꠠꠦ ꠘꠣ।
LUK 6:45 ꠜꠣꠟꠣ ꠝꠣꠘꠡꠞ ꠖꠤꠟꠞ ꠘꠦꠇ ꠜꠣꠘ꠆ꠒꠣꠞ ꠕꠣꠇꠤ ꠜꠣꠟꠣꠁ ꠛꠣꠞꠅꠄ, ꠀꠞ ꠛꠖ ꠝꠣꠘꠡꠞ ꠛꠖ ꠖꠤꠟ ꠕꠣꠇꠤ ꠛꠖꠃ ꠛꠣꠞꠅꠄ। ꠝꠣꠘꠡꠞ ꠖꠤꠟꠞ ꠜꠣꠘ꠆ꠒꠣꠞꠅ ꠎꠦꠔꠣ ꠎꠝꠣ ꠀꠍꠦ, ꠅꠔꠣ ꠕꠣꠇꠤꠃ ꠔ ꠎꠛꠣꠘꠞ ꠛꠥꠟꠤ ꠛꠣꠞꠅꠄ।
LUK 6:46 “ꠔꠥꠝꠞꠣ ꠇꠦꠘꠦ ꠀꠝꠣꠞꠦ ꠈꠣꠟꠤ ꠢꠥꠎꠥꠞ ꠢꠥꠎꠥꠞ ꠇꠁꠞꠣꠄ, ꠅꠕꠌ ꠀꠝꠤ ꠎꠦꠔꠣ ꠇꠁ, ꠁꠔꠣ ꠝꠣꠘꠅ ꠘꠣ?
LUK 6:47 ꠀꠝꠣꠞ ꠇꠣꠘ꠆ꠖꠣꠔ ꠀꠁꠀ ꠀꠝꠣꠞ ꠛꠄꠀꠘ ꠢꠥꠘꠤꠀ ꠎꠦ ꠎꠘꠦ ꠀꠝꠟ ꠇꠞꠦ, ꠢꠦ ꠇꠣꠞ ꠟꠣꠈꠣꠘ, ꠀꠝꠤ ꠔꠥꠝꠞꠣꠞꠦ ꠇꠁꠞꠣꠝ।
LUK 6:48 ꠢꠦ ꠅꠃ ꠝꠣꠘꠡꠞ ꠟꠣꠈꠣꠘ, ꠎꠦ ꠊꠞ ꠛꠣꠘꠣꠘꠤꠞ ꠘꠤꠅꠔꠦ ꠉꠁꠘ ꠇꠞꠤ ꠝꠣꠐꠤ ꠈꠥꠖꠤꠀ ꠝꠎꠛꠥꠔ ꠇꠞꠤ ꠊꠞꠞ ꠈꠥꠐꠤ ꠛꠣꠘꠣꠁꠟ, ꠛꠣꠖꠦ ꠛꠁꠘ꠆ꠘꠣ ꠀꠁꠟ ꠀꠞ ꠙꠣꠘꠤꠞ ꠚꠥꠔꠦ ꠅꠃ ꠊꠞꠞꠦ ꠑꠦꠟꠤꠟ, ꠅꠁꠟꠦ ꠁꠈꠣꠘ ꠟꠠꠣꠁꠔ ꠙꠣꠞꠟ ꠘꠣ, ꠁꠈꠣꠘ ꠔ ꠝꠎꠛꠥꠔ ꠇꠞꠤ ꠛꠣꠘꠣꠁꠟ।
LUK 6:49 ꠀꠞ ꠀꠝꠣꠞ ꠛꠄꠀꠘ ꠢꠥꠘꠤꠀ ꠎꠦ ꠎꠘꠦ ꠀꠝꠟ ꠘꠣ ꠇꠞꠦ, ꠢꠦ ꠅꠃ ꠟꠣꠈꠣꠘ ꠝꠣꠘꠥꠡ, ꠎꠦꠉꠤꠄ ꠉꠣꠔ ꠘꠣ ꠈꠥꠖꠤꠀ ꠈꠣꠟꠤ ꠘꠞꠝ ꠝꠣꠐꠤꠞ ꠃꠙꠞꠦ ꠊꠞ ꠛꠣꠘꠣꠁꠟ, ꠛꠣꠖꠦ ꠛꠣꠘꠞ ꠚꠥꠔꠞ ꠗꠣꠇ꠆ꠇꠣꠄ ꠔꠣꠞ ꠊꠞ ꠙꠠꠤꠀ ꠜꠣꠋꠉꠤꠀ ꠌꠥꠞꠝꠣꠞ ꠅꠁꠉꠦꠟ।”
LUK 7:1 ꠁꠍꠣꠄ ꠔꠣꠘ ꠛꠄꠀꠘ ꠡꠦꠡ ꠇꠞꠤꠀ ꠝꠣꠘꠡꠞ ꠉꠦꠍ ꠕꠣꠇꠤ ꠛꠤꠖꠣꠄ ꠟꠁꠀ ꠇꠚꠞꠘꠣꠃꠝ ꠐꠣꠃꠘꠅ ꠉꠦꠟꠣꠉꠤ।
LUK 7:2 ꠢꠤꠘꠅ ꠞꠥꠝꠣꠘ ꠍꠤꠙꠣꠁꠞ ꠄꠇ ꠍꠥꠛꠦꠖꠣꠞꠞ ꠉꠥꠟꠣꠝ ꠛꠦꠝꠣꠞ ꠙꠠꠤꠀ ꠝꠞꠣꠞ ꠙꠕꠤ ꠅꠁꠉꠦꠍꠤꠟ, ꠍꠥꠛꠦꠖꠣꠞ ꠍꠣꠛꠦ ꠁ ꠉꠥꠟꠣꠝꠞꠦ ꠈꠥꠛ ꠝꠣꠄꠀ ꠇꠞꠔꠣ।
LUK 7:3 ꠔꠣꠁꠘ ꠁꠍꠣꠞ ꠈꠛꠞ ꠢꠥꠘꠤꠀ ꠇꠄꠎꠘ ꠁꠢꠥꠖꠤ ꠝꠥꠞꠛ꠆ꠛꠤꠞꠦ ꠁꠍꠣꠞ ꠉꠦꠍꠦ ꠙꠣꠑꠣꠁꠟꠣ, ꠔꠣꠘ ꠉꠥꠟꠣꠝꠞꠦ ꠜꠣꠟꠣ ꠇꠞꠔꠣ ꠡꠥꠙꠣꠞꠤꠡꠞ ꠟꠣꠉꠤ।
LUK 7:4 ꠝꠥꠞꠛ꠆ꠛꠤ ꠅꠇꠟ ꠀꠁꠀ ꠁꠍꠣꠞꠦ ꠝꠤꠘꠔ-ꠇꠣꠎ꠆ꠎꠤ ꠇꠞꠤ ꠇꠁꠟꠣ, “ꠍꠣꠛ, ꠎꠦ ꠎꠘꠦ ꠀꠝꠞꠣꠞꠦ ꠀꠙꠘꠣꠞ ꠉꠦꠍꠦ ꠙꠣꠑꠣꠁꠍꠂꠘ ꠔꠣꠘ ꠉꠥꠟꠣꠝꠞ ꠟꠣꠉꠤ ꠝꠤꠘꠔ ꠇꠞꠔꠣꠝ, ꠄꠁꠘ ꠀꠍꠟꠦꠅ ꠖꠄꠀ ꠙꠣꠅꠀꠞ ꠟꠣꠈ।
LUK 7:5 ꠔꠣꠁꠘ ꠛꠤꠖꠦꠡꠤ ꠅꠁꠟꠦꠅ ꠀꠝꠞꠣꠞ ꠁꠢꠥꠖꠤ ꠎꠣꠔꠤꠞꠦ ꠈꠥꠛ ꠝꠣꠄꠀ ꠇꠞꠂꠘ। ꠀꠝꠞꠣꠞ ꠝꠍꠤꠖ ꠈꠣꠘꠅ ꠔꠣꠁꠘ ꠛꠣꠘꠣꠁ ꠖꠤꠍꠂꠘ।”
LUK 7:6 ꠁꠍꠣ ꠔꠣꠞꠣꠞ ꠟꠉꠦ ꠅꠁꠀ ꠞꠅꠀꠘꠣ ꠖꠤꠟꠣ, ꠔꠣꠁꠘ ꠍꠥꠛꠦꠖꠣꠞꠞ ꠛꠣꠠꠤꠞ ꠇꠣꠘ꠆ꠖꠣꠔ ꠀꠁꠔꠦꠃ ꠍꠥꠛꠦꠖꠣꠞꠦ ꠘꠤꠎꠞ ꠖꠥꠡ꠆ꠔ ꠅꠇꠟꠞꠦ ꠙꠣꠑꠣꠁꠀ ꠎꠣꠘꠣꠁꠟꠣ, “ꠢꠥꠎꠥꠞꠦ ꠀꠞ ꠇꠡ꠆ꠐ ꠇꠞꠂꠘ ꠘꠣ ꠎꠣꠘꠥ, ꠀꠙꠘꠣꠞ ꠝꠔ ꠎꠘꠦ ꠀꠝꠣꠞ ꠛꠣꠠꠤꠔ ꠔꠡꠞꠤꠚ ꠀꠘꠞꠣ, ꠀꠝꠤ ꠔ ꠁꠔꠣꠞ ꠟꠣꠈ ꠘꠣꠄ।
LUK 7:7 ꠀꠙꠘꠣꠞ ꠍꠣꠝꠘꠦ ꠃꠛꠣꠘꠤꠞ ꠎꠁꠉ꠆ꠉ-ꠅ ꠀꠝꠤ ꠘꠣꠄ, ꠄꠞꠖꠣꠄ ꠀꠝꠤ ꠀꠁꠞꠣꠝ ꠘꠣ। ꠔꠦ ꠀꠙꠘꠦ ꠈꠣꠟꠤ ꠎꠛꠣꠘꠖꠤ ꠇꠁꠟꠦꠃ, ꠀꠝꠣꠞ ꠉꠥꠟꠣꠝꠞ ꠛꠦꠝꠣꠞ ꠡꠤꠚꠣ ꠅꠁꠎꠤꠛ।
LUK 7:8 ꠀꠙꠘꠦ ꠔ ꠛꠥꠎꠞꠣ, ꠀꠝꠤ ꠀꠝꠣꠞ ꠇꠣꠝꠣꠘ꠆ꠒꠣꠞꠞ ꠢꠥꠇꠥꠝꠦ ꠌꠟꠤ, ꠅꠃꠟꠣ ꠀꠝꠣꠞ ꠍꠤꠙꠣꠁ ꠅꠇꠟꠅ ꠀꠝꠣꠞ ꠢꠥꠇꠥꠝꠦ ꠌꠟꠂꠘ। ꠀꠝꠤ ꠄꠞꠣ ꠄꠇꠎꠘꠞꠦ ꠀꠅ ꠇꠁꠟꠦ ꠀꠄ, ꠎꠣꠅ ꠇꠁꠟꠦ ꠎꠣꠄ, ꠀꠝꠣꠞ ꠉꠥꠟꠣꠝꠞꠦ ꠅꠃ ꠇꠣꠝ ꠇꠞꠅ ꠇꠁꠟꠦ, ꠢꠦ ꠇꠞꠦ। ꠔꠦ ꠀꠙꠘꠦꠅ ꠅꠟꠣ ꠈꠣꠟꠤ ꠝꠥꠈꠖꠤ ꠇꠁꠟꠦꠃ, ꠢꠇ꠆ꠇꠟꠔꠣꠄ ꠝꠣꠘꠛ।”
LUK 7:9 ꠁꠈꠣꠘ ꠢꠥꠘꠤꠀ ꠁꠍꠣ ꠄꠇ꠆ꠇꠦꠞꠦ ꠔꠣꠁꠎ꠆ꠎꠥꠛ ꠛꠘꠤꠉꠦꠟꠣ, ꠖꠟꠦ ꠖꠟꠦ ꠎꠔ ꠝꠣꠘꠥꠡ ꠔꠣꠘ ꠈꠞꠦ ꠅꠁꠀ ꠀꠅꠀꠔ ꠀꠍꠤꠟ, ꠄꠞꠣꠞ ꠛꠣꠄ ꠚꠤꠞꠤꠀ ꠇꠁꠟꠣ, “ꠀꠝꠤ ꠔꠥꠝꠞꠣꠞꠦ ꠇꠁꠞꠣꠝ, ꠁ ꠍꠥꠛꠦꠖꠣꠞ ꠔ ꠛꠤꠗꠞ꠆ꠝꠤ ꠞꠥꠝꠣꠘ ꠝꠣꠘꠥꠡ, ꠅꠁꠟꠦ ꠀꠝꠣꠞ ꠛꠘꠤ ꠁꠍꠞꠣꠁꠟꠞ ꠝꠣꠎꠦꠅ ꠔ ꠅꠔ ꠝꠎꠛꠥꠔ ꠁꠝꠣꠘꠖꠣꠞ ꠀꠝꠤ ꠇꠥꠘꠥꠈꠣꠘꠅ ꠖꠦꠈꠍꠤ ꠘꠣ।”
LUK 7:10 ꠢꠣꠍꠣꠃ ꠍꠥꠛꠦꠖꠣꠞꠦ ꠎꠣꠞꠣꠞꠦ ꠙꠣꠑꠣꠁꠍꠟꠣ, ꠔꠣꠞꠣ ꠊꠞꠅ ꠀꠁꠀ ꠖꠦꠈꠟꠣ, ꠢꠤ ꠉꠥꠟꠣꠝꠞ ꠛꠦꠝꠣꠞ ꠇꠝꠤꠉꠦꠍꠦ।
LUK 7:11 ꠕꠥꠠꠣ ꠇꠄ ꠖꠤꠘ ꠛꠣꠖꠦ ꠁꠍꠣꠄ ꠔꠣꠘ ꠡꠣꠉꠞꠤꠖ ꠅꠇꠟ ꠀꠞ ꠀꠞꠅ ꠛꠃꠔ ꠝꠣꠘꠥꠡ ꠟꠁꠀ ꠘꠣꠄꠁꠘ ꠘꠣꠝꠞ ꠄꠇ ꠉꠣꠃꠔ ꠀꠁꠟꠣ।
LUK 7:12 ꠔꠣꠁꠘ ꠎꠦꠛꠟꠣ ꠢꠃ ꠉꠣꠃꠔ ꠀꠁꠀ ꠢꠣꠝꠣꠁꠞꠣ, ꠅꠃ ꠡꠝꠄ ꠝꠣꠘꠡꠦ ꠈꠞꠣꠞꠅ ꠇꠞꠤ ꠄꠇ ꠝꠁꠅꠔ ꠟꠁꠀ ꠎꠣꠁꠞꠣ। ꠁ ꠝꠁꠅꠔ ꠀꠍꠤꠟ ꠄꠇ ꠠꠣꠠꠤ ꠛꠦꠐꠤꠞ ꠄꠇꠝꠣꠔ꠆ꠞ ꠙꠥꠀ। ꠉꠣꠃꠞ ꠛꠃꠔ ꠝꠣꠘꠥꠡ ꠅꠃ ꠈꠞꠣꠞꠞ ꠟꠉꠦ ꠀꠍꠟꠣ।
LUK 7:13 ꠅꠃ ꠠꠣꠠꠤ ꠛꠦꠐꠤꠞꠦ ꠖꠦꠈꠤꠀ ꠁꠍꠣꠞ ꠖꠤꠟꠅ ꠖꠄꠀ ꠢꠣꠝꠣꠁꠟ, ꠔꠣꠁꠘ ꠇꠁꠟꠣ, “ꠅꠉ, ꠇꠣꠘ꠆ꠖꠤꠅ ꠘꠣ।”
LUK 7:14 ꠇꠁꠀ ꠔꠣꠁꠘ ꠈꠞꠣꠞꠞ ꠇꠣꠘ꠆ꠖꠣꠔ ꠉꠤꠀ ꠈꠞꠣꠞꠅ ꠍꠁꠟꠣ, ꠔꠦꠃ ꠝꠁꠅꠔ ꠛꠁꠀ ꠘꠦꠅꠞꠣ ꠛꠦꠐꠣꠁꠘ ꠃꠛꠣꠁ ꠉꠦꠟꠣ। ꠁꠍꠣꠄ ꠇꠁꠟꠣ, “ꠅ ꠛꠦꠐꠣ, ꠀꠝꠤ ꠇꠁꠞꠣꠝ, ꠔꠥꠝꠤ ꠃꠑꠅ।”
LUK 7:15 ꠔꠦꠃ ꠢꠤ ꠝꠥꠞ꠆ꠖꠣ ꠛꠦꠐꠣ ꠃꠑꠤꠀ ꠛꠁꠉꠦꠟ, ꠛꠁꠀ ꠝꠣꠔ-ꠇꠕꠣ ꠝꠣꠔꠤꠟ। ꠁꠍꠣꠄ ꠔꠣꠞꠦ ꠔꠣꠞ ꠝꠣʼꠞ ꠀꠔꠅ ꠡꠝꠎꠣꠁ ꠖꠤꠟꠣ।
LUK 7:16 ꠁꠔꠣ ꠖꠦꠈꠤꠀ ꠢꠇꠟꠞ ꠜꠤꠔꠞꠦ ꠒꠞ ꠢꠣꠝꠣꠁꠉꠦꠟ। ꠔꠣꠞꠣ ꠇꠁꠟꠣ, “ꠍꠥꠛꠢꠣꠘ ꠀꠟ꠆ꠟꠣ, ꠄꠇꠎꠘ ꠝꠢꠣꠘ ꠘꠛꠤꠄ ꠀꠝꠞꠣꠞ ꠝꠣꠎꠦ ꠔꠡꠞꠤꠚ ꠀꠘꠍꠂꠘ, ꠀꠟ꠆ꠟꠣꠄ ꠝꠦꠢꠦꠞꠛꠣꠘꠤ ꠇꠞꠤꠀ ꠔꠣꠘ ꠛꠘ꠆ꠖꠣ ꠅꠇꠟꠞ ꠛꠣꠄ ꠌꠃꠈ ꠚꠤꠞꠣꠁꠍꠂꠘ।”
LUK 7:17 ꠁꠍꠣꠞ ꠅꠃ ꠇꠦꠞꠣꠝꠔꠤꠞ ꠇꠕꠣ ꠀꠡ꠆ꠔꠣ ꠄꠢꠥꠖꠤꠀ ꠎꠤꠟꠣꠔ ꠀꠞ ꠀꠡ-ꠙꠣꠡ ꠢꠇ꠆ꠇꠟ ꠎꠣꠉꠣꠔ ꠝꠣꠡꠥꠞ ꠅꠁꠉꠦꠟ।
LUK 7:18 ꠄꠢꠤꠀ ꠘꠛꠤꠞ ꠡꠣꠉꠞꠤꠖ ꠅꠇꠟ ꠉꠤꠀ ꠅꠃ ꠢꠇ꠆ꠇꠟꠔꠣ ꠄꠢꠤꠀꠞꠦ ꠎꠣꠘꠣꠁꠟꠣ।
LUK 7:19 ꠅꠃ ꠄꠢꠤꠀꠄ ꠔꠣꠘ ꠖꠥꠁꠎꠘ ꠡꠣꠉꠞꠤꠖꠞꠦ ꠁꠍꠣꠞ ꠉꠦꠍꠦ ꠙꠣꠑꠣꠁꠟꠣ। ꠔꠣꠞꠣ ꠀꠁꠀ ꠁꠍꠣꠞꠦ ꠇꠁꠔꠣ, “ꠢꠥꠎꠥꠞꠦ ꠇꠁꠍꠂꠘ ꠀꠝꠞꠣ ꠎꠣꠘꠤꠀ ꠎꠣꠁꠔꠣꠝ, ꠎꠦꠁꠘ ꠔꠡꠞꠤꠚ ꠀꠘꠣꠞ ꠇꠕꠣ, ꠀꠙꠘꠦꠃ ꠢꠦꠁꠘ ꠘꠤ? ꠘꠣ ꠀꠝꠞꠣ ꠀꠞ ꠇꠦꠃꠞꠞ ꠟꠣꠉꠤ ꠛꠣꠞ ꠌꠣꠁꠔꠣꠝ?”
LUK 7:20 ꠔꠦꠃ ꠖꠥꠁꠅ ꠡꠣꠉꠞꠤꠖ ꠀꠁꠀ ꠁꠍꠣꠞꠦ ꠇꠁꠟꠣ, “ꠄꠢꠤꠀ ꠘꠛꠤꠄ ꠀꠝꠞꠣꠞꠦ ꠙꠣꠑꠣꠁꠍꠂꠘ, ꠀꠙꠘꠣꠞꠦ ꠎꠤꠇꠣꠁꠔꠣꠝ, ꠎꠦꠁꠘ ꠔꠡꠞꠤꠚ ꠀꠘꠣꠞ ꠇꠕꠣ, ꠀꠙꠘꠦꠃ ꠢꠦꠁꠘ ꠘꠤ? ꠘꠣ ꠀꠝꠞꠣ ꠀꠞ ꠇꠦꠃꠞꠞ ꠟꠣꠉꠤ ꠛꠣꠞ ꠌꠣꠁꠔꠣꠝ?”
LUK 7:21 ꠑꠤꠇ ꠅꠃ ꠡꠝꠄ ꠁꠍꠣꠄ ꠛꠃꠔ ꠝꠣꠘꠡꠞꠦ ꠛꠦꠝꠣꠞ-ꠀꠎꠣꠞ ꠀꠞ ꠎꠤꠘ-ꠜꠥꠔꠞ ꠀꠍꠞ ꠕꠣꠇꠤ ꠜꠣꠟꠣ ꠇꠞꠟꠣ। ꠛꠃꠔ ꠀꠘ꠆ꠖꠣꠞꠦꠅ ꠖꠦꠈꠣꠞ ꠈꠦꠝꠔꠣ ꠖꠤꠟꠣ।
LUK 7:22 ꠅꠔꠣ ꠇꠞꠤꠀ ꠢꠣꠞꠟꠦ ꠄꠢꠤꠀꠞ ꠖꠥꠁꠅ ꠡꠣꠉꠞꠤꠖꠞꠦ ꠁꠍꠣꠄ ꠇꠁꠟꠣ, “ꠔꠥꠝꠞꠣ ꠎꠣꠅꠉꠤ, ꠔꠥꠝꠞꠣ ꠅꠘꠅ ꠀꠁꠀ ꠘꠤꠎꠞ ꠌꠃꠈꠦ ꠎꠦꠔꠣ ꠖꠦꠈꠟꠣꠄ ꠀꠞ ꠢꠥꠘꠟꠣꠄ, ꠅꠔꠣ ꠉꠤꠀ ꠄꠢꠤꠀꠞꠦ ꠎꠣꠘꠣꠅ। ꠔꠣꠘꠞꠦ ꠇꠁꠅ, ꠀꠘ꠆ꠖꠣꠄꠅ ꠌꠃꠈꠦ ꠖꠦꠈꠞꠣ, ꠟꠦꠋꠠꠣ ꠅꠇꠟꠦ ꠀꠐꠤꠞꠣ, ꠙꠌꠣ-ꠇꠥꠡ꠆ꠑ ꠛꠦꠝꠣꠞꠤ ꠜꠣꠟꠣ ꠅꠁꠞꠣ, ꠈꠣꠟꠥꠀꠄꠅ ꠢꠥꠘꠞꠣ, ꠝꠥꠞ꠆ꠖꠣ ꠝꠣꠘꠥꠡ ꠎꠤꠘ꠆ꠖꠣ ꠅꠁꠞꠣ, ꠀꠞ ꠉꠞꠤꠛ ꠅꠇꠟꠞ ꠉꠦꠍꠦꠅ ꠀꠟ꠆ꠟꠣꠁ ꠈꠥꠡ-ꠈꠛꠞꠤ ꠔꠛꠟꠤꠉ ꠇꠞꠣ ꠅꠞ।
LUK 7:23 ꠀꠞ ꠄꠞꠣꠃ ꠇꠙꠣꠟꠤ ꠝꠣꠘꠥꠡ, ꠀꠝꠣꠞ ꠛꠦꠙꠣꠞꠦ ꠎꠦꠞꠣꠞ ꠖꠤꠟꠅ ꠇꠥꠘꠥ ꠛꠣꠗꠣ ꠘꠣ ꠙꠣꠄ।”
LUK 7:24 ꠄꠢꠤꠀꠞ ꠡꠣꠉꠞꠤꠖ ꠅꠇꠟ ꠉꠤꠀ ꠢꠣꠞꠟꠦ, ꠄꠢꠤꠀꠞ ꠛꠦꠙꠣꠞꠦ ꠁꠍꠣꠄ ꠝꠣꠘꠡꠞꠦ ꠇꠁꠟꠣ, “ꠔꠥꠝꠞꠣ ꠝꠞꠥꠜꠥꠝꠤꠔ ꠇꠤꠔꠣ ꠖꠦꠈꠣꠔ ꠉꠦꠍꠟꠣꠄ? ꠛꠣꠔꠣꠡꠦ ꠟꠠꠦ-ꠍꠠꠦ ꠅꠔꠣ ꠈꠣꠉꠠꠣ-ꠛꠘ ꠖꠦꠈꠣꠔ ꠉꠦꠍꠟꠣꠄ ꠘꠤ?
LUK 7:25 ꠘꠣ, ꠇꠤꠔꠣ ꠖꠦꠈꠣꠔ ꠉꠦꠍꠟꠣꠄ? ꠡꠥꠘ꠆ꠖꠞ ꠇꠣꠙꠠ ꠚꠤꠘ꠆ꠘ ꠇꠥꠘꠥ ꠝꠣꠘꠡꠞꠦ ꠘꠤ? ꠎꠦꠞꠣ ꠖꠣꠝꠤ ꠖꠣꠝꠤ ꠇꠣꠙꠠ ꠚꠤꠘ꠆ꠖꠤꠀ ꠎꠣꠇ-ꠎꠝꠇ ꠇꠞꠦ, ꠀꠞ ꠡꠥꠈꠤꠞ꠆ꠔꠣ ꠖꠤꠘ ꠇꠣꠐꠣꠄ, ꠔꠣꠞꠣ ꠔ ꠞꠣꠎꠛꠣꠠꠤꠔ ꠕꠣꠇꠂꠘ।
LUK 7:26 ꠔꠦ ꠔꠥꠝꠞꠣ ꠇꠤꠔꠣ ꠖꠦꠈꠣꠔ ꠉꠦꠍꠟꠣꠄ? ꠇꠥꠘꠥ ꠘꠛꠤꠞꠦ ꠖꠦꠈꠣꠔ ꠉꠦꠍꠟꠣꠄ ꠘꠤ? ꠅꠄ, ꠢꠣꠍꠣꠃ ꠀꠝꠤ ꠔꠥꠝꠞꠣꠞꠦ ꠇꠁꠞꠣꠝ, ꠁ ꠄꠢꠤꠀ ꠔ ꠈꠣꠟꠤ ꠘꠛꠤ ꠘꠣꠄ, ꠘꠛꠤ ꠕꠣꠇꠤꠅ ꠛꠠ ꠎꠘ।
LUK 7:27 ꠄꠁꠘ ꠔ ꠢꠃ ꠎꠘ, ꠎꠦꠘ ꠇꠕꠣ ꠀꠍꠝꠣꠘꠤ ꠇꠤꠔꠣꠛꠅ ꠟꠦꠈꠣ ꠀꠍꠦ, ꠢꠥꠘꠅ, ꠔꠥꠝꠣꠞ ꠀꠉꠦ ꠛꠦꠎꠤꠀꠞ ꠀꠝꠤ ꠀꠝꠣꠞ ꠙꠦꠉꠣꠝ꠆ꠛꠞ, ꠄꠁꠘ ꠉꠤꠀ ꠑꠤꠇ-ꠑꠣꠇ ꠇꠞꠛꠣ ꠔꠥꠝꠣꠞ ꠌꠟꠣꠞ ꠙꠕ।
LUK 7:28 ꠔꠦ ꠀꠝꠤ ꠔꠥꠝꠞꠣꠞꠦ ꠇꠁꠞꠣꠝ, ꠀꠡ꠆ꠔꠣ ꠖꠥꠘꠤꠀꠞ ꠇꠥꠘꠥ ꠀꠖꠝꠃ ꠄꠢꠤꠀ ꠕꠣꠇꠤ ꠛꠠ ꠘꠣꠄ। ꠅꠁꠟꠦ ꠀꠟ꠆ꠟꠣꠞ ꠛꠣꠖꠡꠣꠁꠞ ꠢꠇꠟ ꠕꠣꠇꠤ ꠢꠥꠞꠥ ꠎꠘꠅ, ꠄꠢꠤꠀ ꠕꠣꠇꠤ ꠝꠢꠣꠘ।”
LUK 7:29 ꠡꠝꠣꠎꠞ ꠢꠇꠟ ꠗꠞꠘꠞ ꠀꠝ ꠝꠣꠘꠡꠦ ꠀꠞ ꠊꠥꠡꠈꠥꠞ ꠈꠣꠎꠘꠣ ꠔꠥꠟꠞꠣ ꠅꠇꠟꠦꠅ ꠄꠢꠤꠀꠞ ꠔꠛꠟꠤꠉ ꠢꠥꠘꠟꠣ, ꠔꠣꠞꠣ ꠔꠃꠛꠣꠞ ꠉꠥꠍꠟ ꠇꠞꠤꠀ ꠀꠟ꠆ꠟꠣ ꠙꠣꠇꠞꠦ ꠢꠇ-ꠁꠘꠍꠣꠚꠇꠣꠞꠤ ꠢꠤꠡꠣꠛꠦ ꠝꠣꠘꠟꠣ।
LUK 7:30 ꠅꠁꠟꠦ ꠚꠞꠤꠡꠤ ꠖꠟꠞ ꠝꠣꠘꠡꠦ ꠀꠞ ꠝꠃꠟꠣꠘꠣ ꠅꠇꠟꠦ ꠄꠢꠤꠀꠞ ꠉꠦꠍꠦ ꠔꠃꠛꠣꠞ ꠉꠥꠍꠟ ꠘꠣ ꠇꠞꠤꠀ, ꠔꠣꠞꠣꠞ ꠛꠦꠙꠣꠞꠦ ꠀꠟ꠆ꠟꠣ ꠙꠣꠇꠞ ꠎꠦ ꠈꠤꠀꠟ ꠀꠍꠤꠟ, ꠁꠐꠣꠞꠦ ꠇꠥꠘꠥ ꠖꠣꠝ ꠖꠤꠟ ꠘꠣ।
LUK 7:31 ꠔꠦꠃ ꠁꠍꠣꠄ ꠢꠤꠞꠛꠣꠞ ꠇꠁꠟꠣ, “ꠇꠅ ꠌꠣꠁꠘ, ꠅꠈꠘ ꠁ ꠎꠝꠣꠘꠣꠞ ꠝꠣꠘꠡꠞꠦ ꠀꠝꠤ ꠇꠤꠔꠣꠞ ꠟꠉꠦ ꠔꠥꠟꠘꠣ ꠇꠞꠔꠣꠝ? ꠔꠣꠞꠣ ꠇꠣꠞ ꠟꠣꠈꠣꠘ?
LUK 7:32 ꠔꠣꠞꠣ ꠔ ꠅꠝꠘ ꠢꠥꠞꠥꠔ꠆ꠔꠣꠞ ꠟꠣꠈꠣꠘ, ꠎꠦꠔꠣꠄ ꠛꠣꠎꠣꠞꠅ ꠛꠁꠀ ꠄꠇꠦ-ꠅꠁꠘ꠆ꠘꠞꠦ ꠒꠣꠇꠤꠀ ꠇꠄ, ꠛꠣꠡꠤ ꠔ ꠛꠣꠎꠣꠁꠟꠣꠝ ꠖꠥꠡ꠆ꠔ ꠔꠥꠝꠞꠣꠞ ꠟꠣꠉꠤꠀ, ꠔꠥꠝꠞꠣ ꠇꠦꠃ ꠘꠣꠌꠤꠟꠣꠄ ꠘꠣ ꠛꠣꠡꠤ ꠢꠥꠘꠤꠀ। ꠝꠣꠔ꠆ꠔꠝꠞ ꠎꠣꠞꠤ-ꠉꠣꠘ ꠉꠣꠁꠟꠣꠝ ꠀꠝꠞꠣ ꠡꠛꠦ, ꠇꠣꠘ꠆ꠖꠤꠟꠣꠄ ꠘꠣ ꠔꠥꠝꠞꠣ ꠇꠦꠃ ꠝꠣꠔ꠆ꠔꠝꠞ ꠡꠥꠞꠦ।
LUK 7:33 ꠔꠦ ꠄꠢꠤꠀ ꠘꠛꠤ ꠀꠁꠀ ꠢꠣꠞꠤ ꠜꠣꠔ-ꠞꠥꠐꠤ ꠀꠞ ꠀꠋꠉꠥꠞꠞ ꠡꠞꠛꠔ ꠘꠣ ꠈꠣꠅꠀꠄ, ꠔꠥꠝꠞꠣ ꠇꠁꠟꠣꠄ ꠔꠣꠘꠞꠦ ꠜꠥꠔꠦ ꠗꠞꠤꠟꠤꠍꠦ।
LUK 7:34 ꠀꠞ ꠛꠤꠘ-ꠀꠖꠝ ꠀꠁꠀ ꠈꠣꠘꠣ-ꠙꠤꠘꠣ ꠇꠞꠞꠣ ꠖꠦꠈꠤꠀ ꠔꠥꠝꠞꠣ ꠇꠁꠞꠣꠄ, ꠖꠦꠈꠞꠣꠄ ꠘꠤ, ꠁ ꠛꠦꠐꠣ ꠔ ꠙꠦꠐꠥꠀ ꠀꠞ ꠝꠖꠈꠥꠞ। ꠢꠦ ꠊꠥꠡꠈꠥꠞ ꠈꠣꠎꠘꠣ ꠔꠥꠟꠞꠣ ꠀꠞ ꠘꠣꠚꠞꠝꠣꠘ ꠝꠣꠘꠡꠞ ꠟꠉꠦ ꠖꠥꠡ꠆ꠔꠤ ꠇꠞꠦ।
LUK 7:35 ꠔꠣ-ꠅ ꠀꠈꠟ ꠈꠣꠐꠣꠁꠀ ꠎꠦꠞꠣ ꠌꠟꠦ, ꠔꠣꠞꠣꠞ ꠌꠣꠟ-ꠌꠟꠘ ꠕꠣꠇꠤꠃ ꠙꠞꠝꠣꠘ ꠝꠤꠟꠦ, ꠀꠈꠟꠃ ꠅꠁꠟ ꠈꠣꠐꠤ-ꠘꠤꠈꠥꠔ ꠌꠤꠎ।”
LUK 7:36 ꠚꠞꠤꠡꠤ ꠖꠟꠞ ꠄꠇꠎꠘ ꠝꠣꠘꠡꠦ ꠁꠍꠣꠞꠦ ꠔꠣꠘ ꠛꠣꠠꠤꠔ ꠈꠣꠘꠤꠞ ꠖꠣꠅꠔ ꠖꠤꠟꠣ, ꠁꠍꠣ ꠅꠃ ꠛꠣꠠꠤꠔ ꠉꠤꠀ ꠈꠣꠘꠤꠔ ꠛꠁꠟꠣ।
LUK 7:37 ꠅꠁꠟꠦ ꠅꠃ ꠉꠣꠃꠔ ꠄꠇ ꠈꠛꠤꠍ ꠛꠦꠐꠤ ꠀꠍꠤꠟ। ꠁꠍꠣ ꠅꠘꠅ ꠖꠣꠅꠔꠅ ꠀꠁꠍꠂꠘ ꠢꠥꠘꠤꠀ ꠢꠃ ꠈꠛꠤꠍ ꠛꠦꠐꠤꠄ ꠖꠣꠝꠤ ꠄꠇ ꠙꠣꠔ꠆ꠔꠞꠞ ꠛꠂꠀꠝꠅ ꠇꠞꠤ ꠀꠔꠞ ꠟꠁꠀ ꠅꠘꠅ ꠀꠁꠟ।
LUK 7:38 ꠀꠁꠀ ꠁꠍꠣꠞ ꠙꠤꠍꠘ ꠉꠣꠟꠣꠛꠣꠄ ꠔꠣꠘ ꠙꠣꠅꠞ ꠇꠣꠘ꠆ꠖꠣꠔ ꠃꠛꠣꠁꠀ, ꠇꠣꠘ꠆ꠖꠤꠀ ꠌꠃꠈꠞ ꠙꠣꠘꠤꠖꠤ ꠔꠣꠘ ꠙꠣꠅꠞ ꠙꠣꠔꠣ ꠜꠤꠎꠣꠁꠟꠤꠟ। ꠛꠣꠖꠦ ꠔꠣꠁꠞ ꠝꠣꠕꠣꠞ ꠌꠥꠟꠖꠤ ꠙꠣꠅ ꠚꠥꠍꠤꠀ ꠖꠤꠟ, ꠙꠣꠅꠞ ꠝꠣꠎꠦ ꠢꠥꠋꠉꠣ ꠖꠤꠔꠦ ꠖꠤꠔꠦ ꠀꠔꠞ ꠝꠣꠈꠣꠁꠟ।
LUK 7:39 ꠁꠔꠣ ꠖꠦꠈꠤꠀ ꠁꠍꠣꠞꠦ ꠎꠦꠁꠘ ꠖꠣꠅꠔ ꠖꠤꠍꠟꠣ, ꠄꠁꠘ ꠝꠘꠦ ꠝꠘꠦ ꠇꠁꠟꠣ, “ꠁ ꠛꠦꠐꠣ ꠇꠥꠘꠥ ꠘꠛꠤ ꠅꠁꠟꠦ ꠔ ꠄꠝꠘꠦꠃ ꠛꠥꠎꠟ ꠅꠘꠦ ꠁ ꠛꠦꠐꠤ ꠇꠦꠉꠥ, ꠁꠉꠥ ꠇꠔ ꠛꠠ ꠈꠛꠤꠍ ꠉꠥꠘꠣꠉꠣꠞ ꠛꠦꠐꠤ।”
LUK 7:40 ꠁꠍꠣꠄ ꠔꠣꠞꠦ ꠇꠁꠟꠣ, “ꠍꠣꠁꠝꠘ, ꠔꠥꠝꠣꠞ ꠟꠉꠦ ꠀꠝꠣꠞ ꠇꠤꠍꠥ ꠇꠕꠣ ꠀꠍꠦ।” ꠍꠣꠁꠝꠘꠦ ꠇꠁꠟꠣ, “ꠇꠃꠇ꠆ꠇꠣ ꠢꠥꠎꠥꠞ।”
LUK 7:41 ꠁꠍꠣꠄ ꠔꠣꠘꠞꠦ ꠇꠁꠟꠣ, “ꠝꠘꠦ ꠇꠞꠅ, ꠄꠇ ꠝꠣꠎꠘꠞ ꠉꠦꠍ ꠕꠣꠇꠤ ꠖꠥꠁꠎꠘ ꠝꠣꠘꠡꠦ ꠇꠤꠍꠥ ꠐꠦꠇꠣ ꠇꠞꠎ ꠘꠤꠍꠤꠟ, ꠄꠇꠎꠘꠦ ꠙꠣꠌ-ꠡ, ꠀꠞꠇ ꠎꠘꠦ ꠙꠁꠘ꠆ꠌꠣꠡ ꠖꠤꠘꠣꠞ।
LUK 7:42 ꠔꠣꠞꠣꠞ ꠇꠦꠃꠞꠞꠃ ꠔꠣꠇ꠆ꠇꠔ ꠀꠍꠤꠟ ꠘꠣ ꠁ ꠐꠦꠇꠣ ꠚꠤꠞꠔ ꠖꠦꠅꠀ, ꠔꠦꠃ ꠝꠣꠎꠘꠦ ꠄꠞꠣ ꠖꠥꠁꠅꠎꠘꠞꠦ ꠝꠣꠚ ꠇꠞꠤ ꠖꠤꠟꠣꠁꠟꠣ। ꠅꠈꠘ ꠇꠅ ꠌꠣꠁꠘ, ꠄꠞꠣ ꠇꠥꠘ ꠎꠘꠦ ꠝꠣꠎꠘꠞꠦ ꠛꠦꠡꠤ ꠜꠣꠟꠣ ꠙꠣꠁꠛ?”
LUK 7:43 ꠍꠣꠁꠝꠘꠦ ꠇꠁꠟꠣ, “ꠀꠝꠣꠞ ꠝꠘꠦ ꠇꠄ, ꠎꠣꠞ ꠛꠦꠡꠤ ꠐꠦꠇꠣ ꠝꠣꠚ ꠖꠦꠅꠀ ꠅꠁꠍꠦ।” ꠁꠍꠣꠄ ꠇꠁꠟꠣ, “ꠔꠥꠝꠤ ꠑꠤꠇꠃ ꠇꠁꠍ।”
LUK 7:44 ꠔꠦꠃ ꠁꠍꠣꠄ ꠅꠃ ꠛꠦꠐꠤꠞ ꠛꠣꠄ ꠌꠣꠁꠀ ꠇꠁꠟꠣ, “ꠍꠣꠁꠝꠘ, ꠅꠃ ꠛꠦꠐꠤꠉꠥꠞ ꠛꠣꠄ ꠈꠤꠀꠟ ꠇꠞꠅ ꠀꠞ ꠢꠥꠘꠅ, ꠀꠝꠤ ꠔꠥꠝꠣꠞ ꠊꠞꠅ ꠀꠁꠀ ꠢꠣꠞꠟꠦ ꠔꠥꠝꠤ ꠔ ꠀꠝꠣꠞꠦ ꠙꠣꠅ ꠗꠅꠀꠞꠅ ꠙꠣꠘꠤ ꠖꠤꠍ ꠘꠣ, ꠅꠁꠟꠦ ꠔꠣꠁꠞ ꠌꠃꠈꠞ ꠙꠣꠘꠤꠖꠤ ꠀꠝꠣꠞ ꠙꠣꠅ ꠜꠤꠎꠣꠁꠀ, ꠝꠣꠕꠣꠞ ꠌꠥꠟꠖꠤ ꠚꠥꠍꠤꠀ ꠖꠤꠍꠦ।
LUK 7:45 ꠔꠥꠝꠤ ꠔ ꠀꠝꠣꠞ ꠟꠉꠦ ꠀꠁꠘ꠆ꠎꠣ ꠇꠞꠤ ꠗꠞꠤꠀ ꠢꠥꠋꠉꠣ ꠖꠤꠍ ꠘꠣ, ꠅꠁꠟꠦ ꠖꠦꠈꠞꠣꠄ ꠘꠤ ꠀꠝꠤ ꠔꠥꠝꠣꠞ ꠛꠣꠠꠤꠔ ꠢꠣꠝꠣꠘꠤꠞ ꠛꠣꠖ ꠅꠘꠦꠃ ꠔꠣꠁ ꠀꠝꠣꠞ ꠙꠣꠅꠔ ꠢꠥꠋꠉꠣ ꠖꠦꠅꠀꠔꠃ ꠀꠍꠦ।
LUK 7:46 ꠔꠥꠝꠤ ꠇꠥꠘꠥꠎꠣꠔ ꠔꠣꠎꠤꠝ ꠇꠞꠤ ꠀꠝꠣꠞꠦ ꠀꠉꠥꠀꠁ ꠀꠘꠍ ꠘꠤ? ꠅꠁꠟꠦ ꠔꠣꠁ ꠀꠝꠣꠞ ꠙꠣꠅꠔ ꠀꠔꠞ ꠓꠣꠟꠤꠀ ꠔꠣꠎꠤꠝ ꠇꠞꠍꠦ।
LUK 7:47 ꠔꠦ ꠀꠝꠤ ꠔꠥꠝꠣꠞꠦ ꠇꠁꠞꠣꠝ, ꠔꠣꠁ ꠛꠦꠡꠤ ꠝꠣꠄꠀ ꠇꠞꠍꠦ ꠇꠞꠤ ꠛꠥꠎꠣ ꠎꠣꠞ, ꠔꠣꠁ ꠛꠠ ꠉꠥꠘꠣꠉꠣꠞ ꠅꠁꠟꠦꠅ ꠉꠥꠘꠣꠞ ꠝꠣꠚꠤ ꠙꠣꠁꠍꠦ। ꠎꠣꠞ ꠕꠥꠠꠣ ꠉꠥꠘꠣ ꠝꠣꠚ ꠇꠞꠣ ꠅꠄ, ꠢꠦ ꠕꠥꠠꠣ ꠝꠣꠄꠀ ꠇꠞꠦ।”
LUK 7:48 ꠛꠣꠖꠦ ꠁꠍꠣꠄ ꠛꠦꠐꠤꠞꠦ ꠇꠁꠟꠣ, “ꠅꠉ, ꠔꠥꠝꠣꠞ ꠔꠣꠝꠣꠝ ꠉꠥꠘꠣ ꠝꠣꠚ ꠇꠞꠣ ꠅꠁꠍꠦ।”
LUK 7:49 ꠎꠣꠞꠣ ꠁꠍꠣꠞ ꠟꠉꠦ ꠈꠣꠘꠤꠔ ꠛꠁꠍꠟꠣ ꠔꠣꠞꠣ ꠝꠘꠦ ꠝꠘꠦ ꠇꠁꠟꠣ, “ꠄꠁꠘ ꠇꠦ, ꠎꠦꠁꠘ ꠉꠥꠘꠣꠅ ꠝꠣꠚ ꠇꠞꠤꠟꠣꠁꠘ?”
LUK 7:50 ꠁꠍꠣꠄ ꠢꠤ ꠛꠦꠐꠤꠞꠦ ꠇꠁꠟꠣ, “ꠅ ꠛꠦꠐꠤ, ꠔꠥꠝꠣꠞ ꠁꠝꠣꠘꠞ ꠛꠟꠦꠃ ꠔꠥꠝꠤ ꠘꠣꠎꠣꠔ ꠙꠣꠁꠟꠣꠄ, ꠅꠈꠘ ꠡꠣꠘ꠆ꠔꠤ ꠅꠁꠀ ꠛꠣꠠꠤꠔ ꠎꠣꠅ।”
LUK 8:1 ꠛꠣꠖꠦ ꠁꠍꠣꠄ ꠅꠃ ꠛꠣꠞꠅꠎꠘ ꠍꠣꠢꠣꠛꠤꠞꠦ ꠟꠁꠀ ꠉꠣꠃꠄ ꠉꠣꠃꠄ, ꠐꠣꠃꠘꠦ ꠐꠣꠃꠘꠦ ꠊꠥꠞꠤꠀ ꠀꠟ꠆ꠟꠣꠞ ꠛꠣꠖꠡꠣꠁꠞ ꠔꠛꠟꠤꠉ ꠇꠞꠣꠔ ꠞꠁꠟꠣ।
LUK 8:2 ꠔꠣꠞꠣꠞ ꠟꠉꠦ ꠇꠄꠎꠘ ꠛꠦꠐꠤꠘꠅ ꠀꠍꠟꠣ। ꠅꠃ ꠛꠦꠐꠤꠘ ꠎꠤꠘꠞ ꠀꠍꠞ ꠀꠞ ꠛꠃꠔ ꠎꠣꠔꠞ ꠛꠦꠝꠣꠞ ꠕꠣꠇꠤ ꠜꠣꠟꠣ ꠅꠁꠀ ꠔꠣꠘ ꠟꠉ ꠗꠞꠍꠟꠣ। ꠄꠞꠣꠞ ꠘꠣꠝ ꠅꠁꠟ: ꠝꠉꠖꠤꠟꠤꠘꠤ ꠝꠞꠤꠅꠝ, ꠄꠘ ꠉꠦꠍ ꠕꠣꠇꠤ ꠡꠣꠔꠉꠥ ꠎꠤꠘ ꠍꠣꠠꠣꠁꠟ ꠅꠁꠍꠤꠟ;
LUK 8:3 ꠞꠣꠎꠣ ꠢꠦꠞꠥꠖꠞ ꠃꠎꠤꠞ ꠇꠥꠎꠣꠁꠞ ꠛꠃ ꠍꠥꠢꠣꠘ꠆ꠘꠣ; ꠍꠥꠍꠣꠘ꠆ꠘꠣ; ꠀꠞ ꠀꠞꠅ ꠛꠃꠔ ꠛꠦꠐꠤꠘ ꠀꠍꠟꠣ। ꠅꠃ ꠛꠦꠐꠤꠘ꠆ꠔꠦ ꠔꠣꠞꠣꠞ ꠘꠤꠎꠞ ꠍꠣꠝꠣꠘꠣ ꠖꠤꠀ ꠁꠍꠣ ꠀꠞ ꠔꠣꠘ ꠡꠣꠉꠞꠤꠖ ꠅꠇꠟꠞ ꠈꠞꠌ-ꠙꠣꠔꠤ ꠌꠣꠟꠣꠁꠔꠣ।
LUK 8:4 ꠛꠣꠖꠦ ꠎꠦꠛꠟꠣ ꠘꠣꠘꠣꠘ ꠎꠣꠉꠣ ꠕꠣꠇꠤ ꠛꠃꠔ ꠝꠣꠘꠥꠡ ꠀꠁꠀ ꠁꠍꠣꠞ ꠉꠦꠍꠦ ꠖꠟꠣ ꠅꠁꠟꠣ, ꠅꠃ ꠡꠝꠄ ꠔꠣꠁꠘ ꠄꠇ ꠇꠤꠌ꠆ꠍꠣ ꠢꠥꠘꠣꠁꠟꠣ।
LUK 8:5 ꠔꠣꠁꠘ ꠇꠁꠟꠣ, “ꠄꠇ ꠉꠤꠞꠡ꠆ꠔꠦ ꠗꠣꠘꠞ ꠎꠣꠟꠣ ꠛꠣꠁꠘ ꠖꠦꠅꠀꠔ ꠉꠦꠟ। ꠉꠤꠀ ꠛꠣꠁꠘ ꠖꠦꠅꠀꠞ ꠛꠣꠟꠣ ꠇꠤꠍꠥ ꠎꠣꠟꠣ ꠀꠁꠟꠞ ꠝꠣꠎꠦ ꠙꠠꠤꠉꠦꠟ, ꠝꠣꠘꠡꠦ ꠙꠣꠅꠖꠤ ꠃꠠꠤꠀ ꠁ ꠎꠣꠟꠣ ꠘꠡ꠆ꠐ ꠇꠞꠤꠟ꠆ꠟ, ꠀꠞ ꠙꠣꠈꠤꠘ꠆ꠔꠦꠅ ꠀꠁꠀ ꠈꠣꠁꠟꠤꠟ।
LUK 8:6 ꠉꠤꠞꠡ꠆ꠔꠞ ꠇꠤꠍꠥ ꠎꠣꠟꠣ ꠢꠥꠇꠘꠣ-ꠡꠇ꠆ꠔ ꠝꠣꠐꠤꠞ ꠃꠙꠞꠦ ꠙꠠꠟ, ꠁꠔꠣꠄ ꠀꠟꠤ ꠛꠣꠞ ꠅꠁꠟꠦꠅ ꠢꠦꠡꠦ ꠞꠡ ꠘꠣ ꠙꠣꠁꠀ ꠢꠥꠇꠣꠁꠀ ꠝꠞꠤꠉꠦꠟ।
LUK 8:7 ꠇꠤꠍꠥ ꠎꠣꠟꠣ ꠛꠘ-ꠎꠋꠟꠣꠞ ꠝꠣꠎꠦ ꠙꠠꠟ, ꠁ ꠎꠣꠟꠣꠄ ꠀꠟꠤ ꠚꠥꠐꠟꠦꠅ ꠁꠔꠣꠞꠦ ꠛꠘ-ꠎꠋꠟꠣꠄ ꠎꠣꠔꠤꠀ ꠗꠞꠟ।
LUK 8:8 ꠅꠁꠟꠦ ꠇꠤꠍꠥ ꠎꠣꠟꠣ ꠜꠣꠟꠣ ꠎꠝꠤꠘꠅ ꠙꠠꠟ, ꠁ ꠎꠣꠟꠣꠄ ꠜꠣꠟꠣ ꠗꠣꠘ ꠅꠁꠟ, ꠀꠞ ꠄꠇ-ꠡ ꠉꠥꠘ ꠛꠦꠡꠤ ꠗꠣꠘ ꠗꠞꠟ।” ꠅꠃ ꠇꠤꠌ꠆ꠍꠣ ꠇꠁꠀꠃ ꠔꠣꠁꠘ ꠎꠥꠞꠦ ꠎꠥꠞꠦ ꠇꠁꠟꠣ, “ꠎꠣꠞ ꠇꠣꠘ ꠀꠍꠦ, ꠢꠦ ꠢꠥꠘꠃꠇ।”
LUK 8:9 ꠡꠣꠉꠞꠤꠖ ꠅꠇꠟꠦ ꠀꠞꠎ ꠇꠞꠟꠣ, “ꠢꠥꠎꠥꠞ, ꠁ ꠇꠤꠌ꠆ꠍꠣꠞ ꠝꠣꠘꠤ ꠇꠤꠔꠣ?”
LUK 8:10 ꠔꠣꠁꠘ ꠇꠁꠟꠣ, “ꠀꠟ꠆ꠟꠣꠞ ꠛꠣꠖꠡꠣꠁꠞ ꠉꠥꠙꠘ ꠞꠢꠁꠡ꠆ꠡ ꠎꠣꠘꠣꠞ ꠡꠥꠎꠥꠉ ꠈꠣꠟꠤ ꠔꠥꠝꠞꠣꠞꠦ ꠖꠦꠅꠀ ꠅꠁꠍꠦ, ꠅꠁꠟꠦ ꠛꠣꠇꠤ ꠝꠣꠘꠡꠞ ꠉꠦꠍꠦ ꠔ ꠁꠔꠣ ꠇꠤꠌ꠆ꠍꠣꠞ ꠟꠣꠈꠣꠘ ꠇꠁꠞꠣꠝ, ꠎꠣꠔꠦ ꠔꠣꠞꠣ ꠖꠦꠈꠤꠀꠅ ꠘꠣ ꠖꠦꠈꠦ, ꠢꠥꠘꠤꠀꠅ ꠘꠣ ꠛꠥꠎꠦ।
LUK 8:11 “ꠔꠦ ꠁ ꠇꠤꠌ꠆ꠍꠣꠞ ꠝꠣꠘꠤ ꠅꠁꠟ, ꠁ ꠗꠣꠘꠞ ꠎꠣꠟꠣ ꠅꠁꠟ ꠀꠟ꠆ꠟꠣꠞ ꠇꠣꠟꠣꠝ।
LUK 8:12 ꠀꠁꠟꠞ ꠝꠣꠎꠦ ꠙꠠꠣ ꠎꠣꠟꠣꠖꠤ ꠛꠥꠎꠣꠁꠟ ꠅꠁꠍꠦ, ꠎꠦꠞꠣ ꠀꠟ꠆ꠟꠣꠞ ꠇꠣꠟꠣꠝ ꠢꠥꠘꠦ, ꠛꠣꠖꠦ ꠁꠛꠟꠤꠍꠦ ꠀꠁꠀ ꠔꠣꠞꠣꠞ ꠖꠤꠟ ꠕꠣꠇꠤ ꠁꠔꠣ ꠇꠣꠠꠤꠀ ꠘꠦꠄꠉꠤ। ꠁꠛꠟꠤꠍꠦ ꠌꠣꠄ ꠘꠣ ꠝꠣꠘꠡꠦ ꠁꠝꠣꠘ ꠀꠘꠤꠀ ꠘꠣꠎꠣꠔ ꠢꠣꠍꠤꠟ ꠇꠞꠃꠇ।
LUK 8:13 ꠀꠞ ꠢꠥꠇꠘꠣ-ꠡꠇ꠆ꠔ ꠝꠣꠐꠤꠞ ꠃꠙꠞꠦ ꠙꠠꠣ ꠎꠣꠟꠣꠖꠤ ꠛꠥꠎꠣꠁꠟ ꠅꠁꠍꠦ, ꠎꠣꠞꠣ ꠁ ꠇꠣꠟꠣꠝ ꠛꠦꠡ ꠈꠥꠡꠤ ꠅꠁꠀ ꠢꠥꠘꠦ, ꠅꠁꠟꠦ ꠇꠣꠟꠣꠝꠦ ꠔꠣꠞꠣꠞ ꠖꠤꠟꠅ ꠜꠣꠟꠣꠝꠘ꠆ꠔꠦ ꠎꠠ ꠇꠞꠦ ꠘꠣ। ꠄꠞꠖꠣꠄ ꠁ ꠁꠝꠣꠘ ꠕꠥꠠꠣ ꠇꠄꠖꠤꠘ ꠐꠤꠇꠦ, ꠇꠥꠘꠥ ꠙꠞꠤꠇ꠆ꠇꠣꠔ ꠙꠠꠟꠦꠃ ꠔꠣꠞꠣꠞ ꠁꠝꠣꠘ ꠈꠥꠀꠁꠟꠣꠄ।
LUK 8:14 ꠛꠘ-ꠎꠋꠟꠣꠔ ꠙꠠꠣ ꠎꠣꠟꠣꠖꠤ ꠛꠥꠎꠣꠁꠟ ꠅꠁꠍꠦ, ꠎꠦꠞꠣ ꠁꠝꠣꠘꠞ ꠖꠣꠅꠔ ꠢꠥꠘꠦ, ꠅꠁꠟꠦ ꠖꠥꠘꠤꠀꠛꠤ ꠗꠣꠘ꠆ꠖꠣꠔ ꠙꠠꠤꠀ ꠗꠘ-ꠍꠣꠝꠣꠘꠣꠞ ꠟꠣꠟꠌ, ꠀꠞ ꠀꠞꠣꠝ-ꠀꠄꠄꠡꠞ ꠛꠣꠄ ꠌꠣꠁꠀ ꠁꠔꠣ ꠚꠣꠃꠞꠤꠟꠣꠄ। ꠄꠞꠖꠣꠄ ꠔꠣꠞꠣꠞ ꠎꠤꠘ꠆ꠖꠦꠉꠤꠔ ꠇꠥꠘꠥ ꠜꠣꠟꠣ ꠚꠟ ꠗꠞꠦ ꠘꠣ।
LUK 8:15 ꠜꠣꠟꠣ ꠎꠝꠤꠘꠅ ꠙꠠꠣ ꠎꠣꠟꠣꠖꠤ ꠛꠥꠎꠣꠁꠟ ꠅꠁꠍꠦ, ꠎꠦꠞꠣ ꠢꠇ ꠀꠞ ꠍꠢꠤ ꠖꠤꠟꠦ ꠀꠟ꠆ꠟꠣꠞ ꠇꠣꠟꠣꠝ ꠢꠥꠘꠦ, ꠢꠥꠘꠤꠀ ꠘꠤꠎꠞ ꠖꠤꠟꠅ ꠜꠣꠟꠣꠝꠘ꠆ꠔꠦ ꠉꠣꠕꠤꠀ ꠞꠣꠈꠦ, ꠀꠞ ꠁꠝꠣꠘꠦ ꠝꠎꠛꠥꠔ ꠞꠁꠀ ꠎꠤꠘ꠆ꠖꠦꠉꠤꠔ ꠜꠣꠟꠣ ꠚꠟ ꠗꠞꠦ।
LUK 8:16 “ꠇꠥꠘꠥ ꠝꠣꠘꠡꠦ ꠟꠦꠝ ꠎꠣꠟꠣꠁꠀ ꠢꠣꠞꠤ ꠌꠇꠤꠞ ꠔꠟꠦ ꠕꠄ ꠘꠤ ꠛꠣ ꠐꠥꠇꠞꠤꠖꠤ ꠉꠥꠞꠤꠟꠣꠄ ꠘꠤ? ꠘꠤꠌꠄ ꠘꠣ, ꠔꠣꠞꠣ ꠉꠣꠍꠣꠞ ꠃꠙꠞꠦ ꠕꠄ, ꠎꠣꠔꠦ ꠊꠞꠞ ꠜꠤꠔꠞꠦ ꠚꠞ ꠖꠦꠈꠣ ꠎꠣꠄ।
LUK 8:17 ꠔꠦ ꠁꠟꠣ ꠉꠣꠁꠛꠤ ꠇꠥꠘ꠆ꠔꠣꠃ ꠘꠣꠁ ꠎꠦꠔꠣ ꠎꠣꠁꠞ ꠅꠁꠔ ꠘꠣꠄ। ꠁꠟꠣ ꠟꠥꠇꠣꠁꠟꠅ ꠇꠥꠘ꠆ꠔꠣ ꠘꠣꠁ ꠎꠦꠔꠣ ꠇꠦꠃ ꠢꠥꠘꠔ ꠘꠣꠄ ꠛꠣ ꠎꠣꠘꠔ ꠘꠣꠄ।
LUK 8:18 ꠄꠞꠖꠣꠄ ꠔꠥꠝꠞꠣ ꠇꠤꠟꠣ ꠢꠥꠘꠞꠣꠄ ꠈꠤꠀꠟ ꠇꠞꠤꠅ, ꠎꠣꠞ ꠀꠍꠦ ꠔꠣꠞꠦ ꠀꠞꠅ ꠖꠦꠅꠀ ꠅꠁꠛ, ꠀꠞ ꠎꠣꠞ ꠘꠣꠁ, ꠔꠣꠞ ꠎꠦꠔꠣ ꠀꠍꠦ ꠛꠟꠤꠀ ꠢꠦ ꠝꠘꠦ ꠇꠞꠦꠞ, ꠅꠔꠣꠅ ꠘꠦꠅꠀ ꠅꠁꠎꠤꠛ।”
LUK 8:19 ꠄꠞꠝꠣꠎꠦ ꠁꠍꠣꠞ ꠝꠣ ꠀꠞ ꠜꠣꠁꠀꠁꠘ ꠔꠣꠘ ꠉꠦꠍꠦ ꠀꠁꠀ ꠀꠎꠤꠟꠣ, ꠅꠁꠟꠦ ꠜꠤꠠꠞ ꠟꠣꠉꠤ ꠔꠣꠞꠣ ꠇꠣꠍꠣꠔ ꠀꠁꠔꠣ ꠙꠣꠞꠟꠣ ꠘꠣ।
LUK 8:20 ꠔꠦꠃ ꠄꠇꠎꠘ ꠝꠣꠘꠡꠦ ꠀꠁꠀ ꠁꠍꠣꠞꠦ ꠇꠁꠟꠣ, “ꠀꠙꠘꠣꠞ ꠝꠣ ꠀꠞ ꠜꠣꠁꠀꠁꠘ ꠀꠙꠘꠣꠞ ꠟꠉꠦ ꠖꠦꠈꠣ ꠇꠞꠣꠔ ꠀꠁꠀ ꠛꠣꠞꠦ ꠃꠛꠣꠁ ꠞꠁꠍꠂꠘ।”
LUK 8:21 ꠁꠍꠣꠄ ꠎꠥꠀꠙ ꠖꠤꠟꠣ, “ꠀꠝꠣꠞ ꠝꠣ-ꠜꠣꠁ ꠔ ꠄꠞꠣꠃ, ꠎꠦꠞꠣ ꠀꠟ꠆ꠟꠣꠞ ꠇꠣꠟꠣꠝ ꠢꠥꠘꠂꠘ ꠀꠞ ꠀꠝꠟ ꠇꠞꠂꠘ।”
LUK 8:22 ꠄꠇꠖꠤꠘ ꠁꠍꠣ ꠀꠞ ꠔꠣꠘ ꠍꠣꠢꠣꠛꠤ ꠅꠇꠟ ꠉꠤꠀ ꠘꠣꠅꠅ ꠃꠑꠟꠣ, ꠃꠑꠤꠀ ꠔꠣꠁꠘ ꠍꠣꠢꠣꠛꠤ ꠅꠇꠟꠞꠦ ꠇꠁꠟꠣ, “ꠀꠅ, ꠀꠝꠞꠣ ꠀꠅꠞꠞ ꠢꠙꠣꠞꠅ ꠎꠣꠁ।” ꠔꠦꠃ ꠍꠣꠢꠣꠛꠤ ꠅꠇꠟꠦ ꠘꠣꠅ ꠜꠣꠡꠣꠁꠟꠣ।
LUK 8:23 ꠘꠣꠅ ꠌꠟꠔꠤꠞ ꠝꠣꠎꠦ ꠁꠍꠣ ꠊꠥꠝꠣꠁ ꠉꠦꠟꠣ। ꠀꠈꠔꠣꠃ ꠀꠅꠞꠞ ꠝꠣꠎꠦ ꠅꠝꠘ ꠔꠥꠚꠣꠘ ꠀꠁꠟ, ꠔꠥꠚꠣꠘꠦ ꠘꠣꠅꠔ ꠙꠣꠘꠤ ꠢꠣꠝꠣꠁꠀ ꠜꠞꠤꠎꠣꠞ, ꠔꠣꠞꠣ ꠖꠦꠈꠟꠣ ꠛꠠ ꠝꠍꠤꠛꠔ ꠀꠁꠍꠦ।
LUK 8:24 ꠍꠣꠢꠣꠛꠤ ꠅꠇꠟ ꠁꠍꠣꠞ ꠗꠣꠞꠅ ꠉꠤꠀ ꠔꠣꠘꠦ ꠢꠎꠣꠉ ꠇꠞꠤꠀ ꠇꠁꠟꠣ, “ꠢꠥꠎꠥꠞ, ꠢꠥꠎꠥꠞ, ꠀꠝꠞꠣꠘꠥ ꠝꠞꠤꠎꠤꠞꠣꠝ।” ꠁꠍꠣ ꠃꠑꠤꠀ ꠙꠣꠘꠤꠞ ꠓꠦꠃ ꠀꠞ ꠛꠣꠔꠣꠡꠞꠦ ꠗꠣꠝꠇꠤ ꠖꠤꠟꠣ। ꠟꠉꠦ ꠟꠉꠦꠃ ꠓꠦꠃ ꠀꠞ ꠔꠥꠚꠣꠘ ꠕꠣꠝꠤꠀ ꠢꠇꠟꠔꠣ ꠕꠤꠞ ꠅꠁꠉꠦꠟ।
LUK 8:25 ꠁꠍꠣꠄ ꠔꠣꠞꠣꠞꠦ ꠇꠁꠟꠣ, “ꠅꠃ ꠅꠔꠣ ꠘꠤ ꠔꠥꠝꠞꠣꠞ ꠁꠝꠣꠘ?” ꠔꠣꠞꠣ ꠒꠞꠣꠁꠀ ꠔꠣꠁꠎ꠆ꠎꠥꠛ ꠅꠁꠀ ꠄꠇꠦ-ꠅꠁꠘ꠆ꠘꠞꠦ ꠇꠁꠟꠣ, “ꠄꠁꠘ ꠀꠍꠟꠦ ꠇꠦ, ꠖꠦꠈꠞꠣꠄ ꠘꠤ ꠛꠣꠔꠣꠡꠦ ꠀꠞ ꠙꠣꠘꠤꠄꠅ ꠔꠣꠘ ꠢꠥꠇꠥꠝ ꠝꠣꠘꠦ?”
LUK 8:26 ꠁꠍꠣꠄ ꠔꠣꠘ ꠍꠣꠢꠣꠛꠤ ꠅꠇꠟ ꠟꠁꠀ ꠉꠣꠟꠤꠟ ꠀꠅꠞ ꠙꠣꠞ ꠅꠁꠀ ꠎꠦꠞꠣꠍꠤꠘꠤ ꠄꠟꠣꠇꠣꠔ ꠉꠦꠟꠣ।
LUK 8:27 ꠉꠤꠀ ꠢꠣꠞꠤ ꠔꠣꠁꠘ ꠘꠣꠅ ꠕꠣꠇꠤ ꠟꠣꠝꠟꠣ, ꠅꠃ ꠡꠝꠄ ꠢꠃ ꠉꠣꠃꠞ ꠎꠤꠘꠞ ꠀꠍꠞ ꠀꠟꠣ ꠄꠇ ꠛꠦꠐꠣ ꠔꠣꠘ ꠉꠦꠍꠦ ꠀꠁꠟ। ꠎꠤꠘꠞ ꠙꠣꠟꠦ ꠀꠍꠞ ꠇꠞꠣꠄ ꠢꠦ ꠛꠃꠔ ꠖꠤꠘ ꠗꠞꠤ ꠟꠦꠝꠐꠣ ꠀꠞ ꠇꠥꠘꠥ ꠛꠣꠠꠤ-ꠊꠞꠅ ꠞꠁꠔ ꠘꠣ, ꠈꠣꠟꠤ ꠇꠛꠞꠡ꠆ꠕꠣꠘꠅ ꠞꠁꠔ।
LUK 8:28 ꠁꠍꠣꠞꠦ ꠖꠦꠈꠤꠀꠃ ꠢꠦ ꠌꠤꠟ꠆ꠟꠣꠁꠀ ꠃꠑꠟ, ꠔꠣꠘ ꠍꠣꠝꠘꠦ ꠙꠠꠤꠀ ꠎꠥꠞꠦ ꠎꠥꠞꠦ ꠇꠁꠟ, “ꠅ ꠀꠟ꠆ꠟꠣꠞ ꠈꠣꠍ ꠝꠣꠄꠀꠞ ꠎꠘ, ꠀꠙꠘꠦ ꠇꠦꠘꠦ ꠀꠝꠣꠞ ꠁꠘꠅ ꠔꠡꠞꠤꠚ ꠀꠘꠟꠣ? ꠝꠦꠢꠦꠞꠛꠣꠘꠤ ꠇꠞꠤ ꠀꠝꠣꠞꠦ ꠍꠣꠔꠣꠁꠘ ꠘꠣ ꠎꠣꠘꠥ।”
LUK 8:29 ꠁꠈꠣꠘ ꠇꠅꠀꠞ ꠇꠣꠞꠘ ꠅꠁꠟ, ꠁꠍꠣꠄ ꠢꠤ ꠎꠤꠘꠞꠦ ꠢꠥꠇꠥꠝ ꠖꠤꠍꠟꠣ ꠅꠃ ꠛꠦꠐꠣꠞꠦ ꠍꠣꠠꠤꠀ ꠎꠣꠅꠀꠞ ꠟꠣꠉꠤ। ꠁ ꠎꠤꠘꠦ ꠔꠣꠞꠦ ꠛꠃꠔ ꠖꠤꠘ ꠕꠣꠇꠤ ꠀꠍꠞ ꠇꠞꠍꠤꠟ, ꠛꠦꠐꠣꠞꠦ ꠒꠣꠘ꠆ꠒꠣ-ꠛꠦꠠꠤ ꠀꠞ ꠡꠤꠇꠟꠖꠤ ꠛꠣꠘ꠆ꠖꠤꠀ ꠞꠣꠈꠟꠦꠅ, ꠢꠦ ꠁꠔꠣ ꠍꠤꠠꠤꠟꠤꠔ, ꠢꠃ ꠎꠤꠘꠦ ꠔꠣꠞꠦ ꠘꠤꠞꠣꠁ ꠎꠣꠉꠣꠔ ꠘꠤꠔꠉꠤ।
LUK 8:30 ꠁꠍꠣꠄ ꠔꠣꠞꠦ ꠎꠤꠇꠣꠁꠟꠣ, “ꠔꠞ ꠘꠣꠝ ꠇꠤꠔꠣ?” ꠢꠦ ꠇꠁꠟ, “ꠚꠃꠎ ꠙꠣꠟ” ꠇꠣꠞꠘ ꠔꠣꠞꠣ ꠛꠃꠔ ꠎꠤꠘ ꠄꠇꠟꠉꠦ ꠀꠍꠤꠟ।
LUK 8:31 ꠔꠦꠃ ꠢꠤ ꠚꠃꠎ ꠙꠣꠟꠦ ꠁꠍꠣꠞꠦ ꠝꠤꠘꠔ-ꠇꠣꠎ꠆ꠎꠤ ꠇꠞꠤꠀ ꠇꠁꠟꠣ, ꠔꠣꠁꠘ ꠎꠣꠘꠥ ꠔꠣꠞꠣꠞꠦ ꠞꠡꠣꠔꠟꠦ ꠘꠣ ꠉꠣꠠꠂꠘ।
LUK 8:32 ꠢꠤꠘꠅ ꠙꠣꠠꠞ ꠄꠇ ꠉꠣꠟꠣꠔ ꠛꠠ ꠄꠇ ꠡꠥꠅꠞꠞ ꠙꠣꠟ ꠀꠍꠤꠟ। ꠚꠃꠎ ꠙꠣꠟꠦ ꠔꠣꠘꠞꠦ ꠝꠤꠘꠔ ꠇꠞꠤꠀ ꠇꠁꠟꠣ, ꠔꠣꠞꠣꠞꠦ ꠢꠃ ꠡꠥꠅꠞꠞ ꠜꠤꠔꠞꠦ ꠢꠣꠝꠣꠘꠤꠞ ꠁꠎꠣꠎꠔ ꠖꠤꠔꠣ। ꠔꠣꠁꠘ ꠁꠎꠣꠎꠔ ꠖꠤꠟꠣ।
LUK 8:33 ꠅꠃ ꠔꠣꠞꠣ ꠢꠤ ꠛꠦꠐꠣꠞꠦ ꠍꠣꠠꠤꠀ ꠡꠥꠅꠞꠞ ꠜꠤꠔꠞꠦ ꠉꠤꠀ ꠢꠣꠝꠣꠁꠟ, ꠄꠔꠦ ꠡꠥꠅꠞꠞ ꠙꠣꠟ ꠙꠣꠠꠞ ꠓꠣꠟꠦꠖꠤ ꠖꠃꠠꠤꠀ ꠉꠤꠀ ꠀꠅꠞꠞ ꠙꠣꠘꠤꠔ ꠛꠥꠠꠤꠀ ꠝꠞꠟꠣ।
LUK 8:34 ꠁꠔꠣ ꠖꠦꠈꠤꠀ ꠡꠥꠅꠞꠞ ꠞꠣꠈꠣꠟ ꠅꠇꠟ ꠖꠃꠠꠤꠀ ꠉꠤꠀ ꠐꠣꠃꠘꠅ ꠀꠞ ꠉꠣꠃꠄ ꠉꠣꠃꠄ ꠈꠛꠞ ꠖꠤꠟ।
LUK 8:35 ꠈꠛꠞ ꠙꠣꠁꠀ ꠌꠣꠁꠞꠅꠛꠣꠄ ꠕꠘꠦ ꠝꠣꠘꠥꠡ ꠀꠁꠟꠣ, ꠀꠁꠀ ꠖꠦꠈꠟꠣ, ꠎꠦ ꠛꠦꠐꠣꠞ ꠟꠉ ꠕꠣꠇꠤ ꠚꠃꠎ ꠙꠣꠟ ꠛꠣꠞ ꠅꠁꠀ ꠉꠦꠍꠂꠘ, ꠢꠦ ꠙꠥꠞꠣꠙꠥꠞ ꠜꠣꠟꠣ ꠅꠁꠀ ꠇꠣꠙꠠ-ꠌꠥꠙꠠ ꠚꠤꠘ꠆ꠖꠤꠀ ꠁꠍꠣꠞ ꠙꠣꠅꠞ ꠇꠣꠘ꠆ꠖꠣꠔ ꠛꠁꠞꠁꠍꠦ। ꠖꠦꠈꠤꠀ ꠔꠣꠞꠣ ꠌꠝꠇꠤ ꠉꠦꠟꠣ।
LUK 8:36 ꠀꠞ ꠅꠃ ꠊꠐꠘꠣ ꠊꠐꠤꠔꠦ ꠎꠦꠞꠣ ꠖꠦꠈꠍꠤꠟ, ꠔꠣꠞꠣ ꠢꠇꠟ ꠝꠣꠘꠡꠞꠦ ꠢꠥꠘꠣꠁꠟꠣ, ꠁ ꠛꠦꠐꠣ ꠇꠤꠟꠣ ꠜꠣꠟꠣ ꠅꠁꠍꠦ।
LUK 8:37 ꠢꠥꠘꠤꠀ ꠎꠦꠞꠣꠍꠤꠘꠤ ꠄꠟꠣꠇꠣꠞ ꠢꠇꠟ ꠝꠣꠘꠥꠡ ꠒꠞꠣꠁꠉꠦꠟꠣ। ꠒꠞꠞ ꠌꠥꠐꠦ ꠔꠣꠞꠣ ꠁꠍꠣꠞꠦ ꠝꠤꠘꠔ-ꠇꠣꠎ꠆ꠎꠤ ꠇꠞꠤꠀ ꠇꠁꠟꠣ, ꠔꠣꠁꠘ ꠔꠣꠞꠣꠞ ꠉꠦꠍ ꠕꠣꠇꠤ ꠔꠡꠞꠤꠚ ꠘꠤꠔꠣꠉꠤ। ꠔꠦꠃ ꠁꠍꠣ ꠘꠣꠅꠅ ꠃꠑꠤꠀ ꠢꠤꠞꠛꠣꠞ ꠉꠣꠟꠤꠟꠅ ꠀꠁꠟꠣ।
LUK 8:38 ꠅꠁꠟꠦ ꠎꠦ ꠛꠦꠐꠣꠞꠦ ꠎꠤꠘꠦ ꠗꠞꠍꠤꠟ, ꠢꠦ ꠀꠞꠎ ꠇꠞꠟ ꠔꠣꠘ ꠟꠉꠦ ꠞꠁꠛꠣꠞ ꠟꠣꠉꠤ। ꠁꠍꠣꠄ ꠔꠣꠞꠦ ꠅꠈꠣꠘ ꠇꠁꠀ ꠛꠣꠠꠤꠔ ꠙꠣꠑꠣꠁ ꠖꠤꠟꠣ,
LUK 8:39 ꠇꠁꠟꠣ, “ꠔꠥꠝꠤ ꠔꠥꠝꠣꠞ ꠛꠣꠠꠤꠔ ꠎꠣꠅ, ꠀꠞ ꠀꠟ꠆ꠟꠣꠄ ꠔꠥꠝꠣꠞ ꠟꠣꠉꠤ ꠎꠦ ꠇꠥꠖꠞꠔꠤ ꠇꠣꠝ ꠇꠞꠍꠂꠘ, ꠅꠔꠣ ꠉꠤꠀ ꠇꠅ।” ꠔꠦꠃ ꠢꠦ ꠉꠦꠟꠉꠤ, ꠉꠤꠀ ꠐꠣꠃꠘꠞ ꠢꠇꠟ ꠝꠣꠘꠡꠞꠦ ꠎꠣꠘꠣꠁꠟ, ꠁꠍꠣꠄ ꠔꠣꠞ ꠟꠣꠉꠤ ꠅꠔ ꠛꠠ ꠇꠣꠝ ꠇꠞꠍꠂꠘ।
LUK 8:40 ꠁꠍꠣ ꠉꠣꠟꠤꠟꠅ ꠀꠁꠀ ꠢꠣꠞꠟꠦ ꠢꠤꠘꠞ ꠝꠣꠘꠡꠦ ꠈꠥꠡꠤ ꠅꠁꠀ ꠔꠣꠘꠞꠦ ꠇꠛꠥꠟ ꠇꠞꠟꠣ, ꠔꠣꠞꠣ ꠔꠣꠘ ꠟꠣꠉꠤ ꠛꠣꠞ ꠌꠣꠅꠀꠔ ꠀꠍꠤꠟ।
LUK 8:41 ꠅꠃ ꠡꠝꠄ ꠎꠣꠄꠁꠞ ꠘꠣꠝꠦ ꠝꠍꠤꠖ ꠇꠝꠤꠐꠤꠞ ꠄꠇ ꠝꠔꠟ꠆ꠟꠤ ꠀꠁꠀ ꠁꠍꠣꠞ ꠙꠣꠅ-ꠅ ꠙꠠꠤꠀ ꠝꠤꠘꠔ ꠟꠣꠉꠣꠁꠟꠣ, ꠢꠥꠎꠥꠞꠞꠦ ꠔꠣꠘ ꠛꠣꠠꠤꠔ ꠘꠤꠛꠣꠞ ꠟꠣꠉꠤ।
LUK 8:42 ꠇꠣꠞꠘ ꠔꠣꠘ ꠄꠇꠝꠣꠔ꠆ꠞ ꠙꠥꠠꠤ ꠍꠞꠈꠣꠔꠅ ꠀꠍꠤꠟ, ꠙꠥꠠꠤꠞ ꠛꠄꠅꠡ ꠛꠣꠞꠅ ꠛꠍꠞ। ꠁꠍꠣ ꠎꠦꠛꠟꠣ ꠅꠃ ꠛꠣꠠꠤꠔ ꠎꠣꠁꠛꠣꠞ ꠟꠣꠉꠤ ꠞꠅꠀꠘꠣ ꠖꠤꠟꠣ, ꠝꠣꠘꠡꠦ ꠀꠁꠀ ꠔꠣꠘ ꠌꠣꠁꠞꠅꠛꠣꠄ ꠜꠤꠠ ꠇꠞꠤꠀ ꠑꠦꠟꠣꠑꠦꠟꠤ ꠟꠣꠉꠣꠁꠟꠣ।
LUK 8:43 ꠜꠤꠠꠞ ꠝꠣꠎꠦ ꠄꠇ ꠛꠦꠐꠤ ꠝꠣꠘꠥꠡꠅ ꠀꠍꠟꠣ, ꠄꠁꠘ ꠛꠣꠞꠅ ꠛꠍꠞ ꠗꠞꠤꠀ ꠝꠣꠡꠤꠇ ꠛꠦꠝꠣꠞꠤ। ꠔꠣꠘ ꠢꠇꠟ ꠗꠘ-ꠍꠣꠝꠣꠘꠣ ꠒꠣꠇ꠆ꠔꠞꠞ ꠔꠟꠦ ꠈꠥꠀꠁꠀꠅ ꠜꠣꠟꠣ ꠅꠁꠔꠣ ꠙꠣꠞꠍꠂꠘ ꠘꠣ।
LUK 8:44 ꠔꠣꠁꠘ ꠁꠍꠣꠞ ꠈꠞꠦꠖꠤ ꠀꠁꠀ ꠁꠍꠣꠞ ꠌꠣꠖ꠆ꠖꠞꠞ ꠇꠥꠘꠣꠔ ꠍꠅꠀꠞ ꠟꠉꠦ ꠟꠉꠦꠃ ꠔꠣꠘ ꠛꠦꠝꠣꠞ ꠇꠝꠤꠉꠦꠟ।
LUK 8:45 ꠔꠦꠃ ꠁꠍꠣꠄ ꠎꠤꠇꠣꠁꠟꠣ, “ꠀꠝꠣꠞꠦ ꠇꠦ ꠍꠁꠟ?” ꠇꠦꠃ ꠡ꠆ꠛꠤꠇꠣꠞ ꠘꠣ ꠇꠞꠣꠄ ꠙꠤꠔꠞ ꠀꠞ ꠔꠣꠘ ꠟꠉꠞ ꠝꠣꠘꠡꠦ ꠁꠍꠣꠞꠦ ꠇꠁꠟꠣ, “ꠢꠥꠎꠥꠞ, ꠀꠙꠘꠣꠞ ꠌꠣꠁꠞꠅꠛꠣꠄ ꠇꠔ ꠝꠣꠘꠡꠦ ꠑꠦꠟꠣꠑꠦꠟꠤ ꠇꠞꠤꠀ ꠀꠙꠘꠣꠞ ꠉꠣ’ꠔ ꠟꠣꠉꠦꠞ।”
LUK 8:46 ꠅꠁꠟꠦ ꠁꠍꠣꠄ ꠇꠁꠟꠣ, “ꠇꠦꠃ ꠀꠝꠣꠞꠦ ꠍꠁꠍꠦ, ꠇꠣꠞꠘ ꠀꠝꠤ ꠛꠥꠎꠞꠣꠝ, ꠀꠝꠣꠞ ꠜꠤꠔꠞ ꠕꠣꠇꠤ ꠉꠣꠁꠛꠤ ꠛꠟ ꠛꠣꠞ ꠅꠁꠍꠦ।”
LUK 8:47 ꠅꠃ ꠛꠦꠐꠤꠄ ꠎꠦꠛꠟꠣ ꠖꠦꠈꠟ ꠗꠞꠣ ꠙꠠꠤꠉꠦꠍꠦ, ꠔꠣꠁ ꠇꠣꠙꠤ ꠇꠣꠙꠤ ꠁꠍꠣꠞ ꠍꠣꠝꠘꠦ ꠀꠁꠀ ꠔꠣꠘ ꠙꠣꠅ-ꠅ ꠙꠠꠤꠀ ꠢꠇꠟꠞ ꠍꠣꠝꠘꠦꠃ ꠇꠁꠟ, ꠇꠦꠘꠦ ꠔꠣꠁ ꠁꠍꠣꠞꠦ ꠍꠁꠍꠤꠟ ꠀꠞ ꠇꠤꠟꠣꠘ ꠟꠉꠦ ꠟꠉꠦꠃ ꠜꠣꠟꠣ ꠅꠁꠉꠦꠍꠦ।
LUK 8:48 ꠁꠍꠣꠄ ꠛꠦꠐꠤꠞꠦ ꠇꠁꠟꠣ, “ꠝꠣꠁ ꠉ, ꠔꠥꠝꠤ ꠄꠇꠤꠘ ꠇꠞꠍ ꠇꠞꠤ ꠜꠣꠟꠣ ꠅꠁꠍ। ꠅꠈꠘ ꠡꠣꠘ꠆ꠔꠤꠄ ꠛꠣꠠꠤꠔ ꠎꠣꠅ।”
LUK 8:49 ꠁꠍꠣꠄ ꠅꠔꠣ ꠝꠣꠔꠤꠞꠣ, ꠅꠝꠘ ꠡꠝꠄ ꠝꠍꠤꠖꠞ ꠝꠔꠟ꠆ꠟꠤꠞ ꠛꠣꠠꠤ ꠕꠣꠇꠤ ꠈꠛꠞꠤꠀ ꠀꠁꠀ ꠔꠣꠘꠞꠦ ꠇꠁꠟ, “ꠍꠣꠛ, ꠀꠙꠘꠣꠞ ꠙꠥꠠꠤ ꠖꠥꠘꠤꠀ ꠕꠣꠇꠤ ꠉꠦꠍꠂꠘꠉꠤ, ꠔꠦ ꠢꠥꠎꠥꠞꠞꠦ ꠀꠞ ꠇꠡ꠆ꠐ ꠖꠤꠛꠣꠞ ꠇꠣꠝ ꠘꠣꠁ।”
LUK 8:50 ꠁꠈꠣꠘ ꠢꠥꠘꠤꠀ ꠁꠍꠣꠄ ꠇꠁꠟꠣ, “ꠒꠞꠣꠁꠅ ꠘꠣ, ꠈꠣꠟꠤ ꠄꠇꠤꠘ ꠇꠞꠅ। ꠖꠦꠈꠛꠣꠄꠘꠦ, ꠔꠣꠁ ꠜꠣꠟꠣ ꠅꠁꠎꠤꠛ।”
LUK 8:51 ꠁꠍꠣ ꠢꠃ ꠛꠣꠠꠤꠔ ꠉꠦꠟꠣ, ꠉꠤꠀ ꠙꠤꠔꠞ, ꠢꠣꠘ꠆ꠘꠣꠘ, ꠁꠀꠇꠥꠛ ꠀꠞ ꠙꠥꠠꠤꠞ ꠝꠣ-ꠛꠣꠚ ꠍꠣꠠꠣ ꠅꠁꠘ꠆ꠘ ꠇꠦꠃꠞꠞꠦ ꠊꠞꠞ ꠜꠤꠔꠞꠦ ꠢꠣꠝꠣꠁꠔꠦ ꠖꠤꠟꠣ ꠘꠣ।
LUK 8:52 ꠢꠇꠟꠦ ꠎꠦꠛꠟꠣ ꠙꠥꠠꠤꠞ ꠟꠣꠉꠤ ꠇꠣꠘ꠆ꠖꠣ-ꠇꠣꠐꠤ ꠀꠞ ꠀꠢꠣꠎꠣꠞꠤ ꠇꠞꠞꠣ, ꠅꠃ ꠡꠝꠄ ꠁꠍꠣꠄ ꠇꠁꠟꠣ, “ꠇꠣꠘ꠆ꠖꠤꠅ ꠘꠣ ꠞꠦ, ꠔꠣꠁ ꠔ ꠝꠞꠍꠦ ꠘꠣ, ꠊꠥꠝꠣꠞ।”
LUK 8:53 ꠁꠈꠣꠘ ꠢꠥꠘꠤꠀ ꠔꠣꠞꠣ ꠔꠣꠘꠞꠦ ꠍꠤꠠꠣꠁꠟꠣ। ꠔꠣꠞꠣ ꠢꠇꠟꠦꠃ ꠎꠣꠘꠔ ꠙꠥꠠꠤ ꠝꠞꠤꠉꠦꠍꠦ।
LUK 8:54 ꠔꠦꠃ ꠁꠍꠣꠄ ꠙꠥꠠꠤꠞ ꠀꠔꠅ ꠗꠞꠤꠀ ꠒꠣꠇ ꠖꠤꠟꠣ, “ꠝꠣꠁ ꠉ, ꠃꠑꠅ।”
LUK 8:55 ꠟꠉꠦ ꠟꠉꠦꠃ ꠙꠥꠠꠤꠞ ꠎꠣꠘ ꠚꠤꠞꠔ ꠀꠁꠟ। ꠔꠣꠁ ꠃꠑꠤꠀ ꠛꠁꠉꠦꠟ। ꠁꠍꠣꠄ ꠇꠁꠟꠣ, ꠙꠥꠠꠤꠞꠦ ꠇꠥꠘ꠆ꠔꠣ ꠈꠣꠁꠛꠣꠞ ꠖꠤꠔꠣ।
LUK 8:56 ꠙꠥꠠꠤꠞ ꠝꠣ-ꠛꠣꠚ ꠄꠇ꠆ꠇꠦꠞꠦ ꠔꠣꠁꠎ꠆ꠎꠥꠛ ꠛꠘꠤꠉꠦꠟꠣ। ꠛꠣꠖꠦ ꠁꠍꠣꠄ ꠇꠁꠟꠣ, “ꠢꠥꠘꠅ, ꠁꠔꠣ ꠇꠦꠃꠞꠞꠦ ꠢꠥꠘꠣꠁꠅ ꠘꠣ।”
LUK 9:1 ꠛꠣꠖꠦ ꠁꠍꠣꠄ ꠢꠃ ꠛꠣꠞꠅꠎꠘ ꠍꠣꠢꠣꠛꠤꠞꠦ ꠄꠇꠈꠣꠘꠅ ꠖꠟꠣ ꠇꠞꠟꠣ, ꠔꠣꠞꠣꠞꠦ ꠢꠇꠟ ꠎꠣꠔꠞ ꠎꠤꠘ-ꠜꠥꠔ ꠍꠣꠠꠣꠘꠤ, ꠛꠦꠝꠣꠞꠤꠞꠦ ꠜꠣꠟꠣ ꠇꠞꠣꠞ ꠁꠎꠣꠎꠔ ꠀꠞ ꠈꠦꠝꠔꠣ ꠖꠤꠟꠣ।
LUK 9:2 ꠛꠣꠖꠦ ꠔꠣꠁꠘ ꠀꠟ꠆ꠟꠣꠞ ꠛꠣꠖꠡꠣꠁꠞ ꠔꠛꠟꠤꠉ ꠀꠞ ꠛꠦꠝꠣꠞꠤꠘ꠆ꠔꠞꠦ ꠡꠤꠚꠣ ꠇꠞꠣꠔ ꠄꠞꠣꠞꠦ ꠙꠣꠑꠣꠁꠟꠣ।
LUK 9:3 ꠔꠣꠁꠘ ꠇꠁꠟꠣ, “ꠔꠥꠝꠞꠣ ꠙꠕꠞ ꠟꠣꠉꠤ ꠟꠣꠑꠤ, ꠉꠣꠁꠐ-ꠛꠥꠍꠇꠤ, ꠈꠣꠘꠤ-ꠈꠥꠞꠣꠇꠤ, ꠐꠦꠇꠣ-ꠙꠄꠡꠣ, ꠛꠣ ꠖꠥꠁꠐꠣ ꠇꠥꠞ꠆ꠔꠣꠅ ꠟꠉꠦ ꠘꠤꠅ ꠘꠣ।
LUK 9:4 ꠇꠥꠘꠥ ꠉꠣꠃꠔ ꠉꠦꠟꠦ ꠔꠥꠝꠞꠣ ꠎꠦ ꠛꠣꠠꠤꠔ ꠢꠣꠝꠣꠁꠛꠣꠄ, ꠅꠃ ꠛꠣꠠꠤꠔꠃ ꠞꠁꠅ, ꠀꠞ ꠅꠘ ꠕꠣꠇꠤ ꠢꠤꠞꠛꠣꠞ ꠛꠤꠖꠣꠄ ꠅꠁꠅ।
LUK 9:5 ꠝꠣꠘꠡꠦ ꠎꠥꠖꠤ ꠔꠥꠝꠞꠣꠞꠦ ꠎꠣꠉꠣ ꠘꠣ ꠖꠦꠁꠘ, ꠔꠦ ꠢꠘ ꠕꠣꠇꠤ ꠛꠣꠞ ꠅꠁꠛꠣꠞ ꠀꠉꠦ ꠔꠥꠝꠞꠣꠞ ꠙꠣꠅꠞ ꠗꠥꠁꠟ ꠚꠥꠍꠤꠀ ꠚꠣꠟꠣꠁꠅ, ꠅꠃ ꠗꠥꠁꠟꠦꠃ ꠔꠣꠞꠣꠞ ꠛꠤꠙꠇ꠆ꠇꠦ ꠡꠣꠇ꠆ꠇꠤ ꠖꠤꠛ।”
LUK 9:6 ꠍꠣꠢꠣꠛꠤ ꠅꠇꠟ ꠞꠅꠀꠘꠣ ꠅꠁꠀ ꠉꠣꠃꠄ ꠉꠣꠃꠄ ꠉꠤꠀ, ꠀꠟ꠆ꠟꠣꠞ ꠈꠥꠡ-ꠈꠛꠞꠤ ꠔꠛꠟꠤꠉ ꠀꠞ ꠛꠦꠝꠣꠞꠤꠘ꠆ꠔꠞꠦ ꠡꠤꠚꠣ ꠇꠞꠣꠔ ꠟꠣꠉꠟꠣ।
LUK 9:7 ꠞꠣꠎꠣ ꠢꠦꠞꠥꠖꠦ ꠁꠍꠣꠞ ꠅꠃ ꠇꠣꠝ-ꠇꠣꠎꠞ ꠈꠛꠞ ꠢꠥꠘꠤꠀ ꠈꠥꠛ ꠊꠣꠛꠠꠤ ꠉꠦꠟꠣ। ꠇꠥꠘꠥ ꠇꠥꠘꠥ ꠝꠣꠘꠡꠦ ꠔꠣꠘꠞꠦ ꠇꠁꠟꠣ, ꠄꠢꠤꠀ ꠘꠛꠤ ꠢꠤꠞꠛꠣꠞ ꠎꠤꠘ꠆ꠖꠣ ꠅꠁꠀ ꠃꠑꠤ ꠉꠦꠍꠂꠘ।
LUK 9:8 ꠀꠞ ꠇꠥꠘꠥ ꠇꠥꠘꠥ ꠎꠘꠦ ꠇꠁꠟꠣ, ꠁꠟꠤꠀꠍ ꠘꠛꠤꠄ ꠖꠞꠡꠘ ꠖꠤꠍꠂꠘ। ꠢꠤꠞꠛꠣꠞ ꠇꠦꠃ ꠇꠦꠃ ꠇꠁꠟ, ꠙꠥꠞꠣꠘꠣ ꠎꠝꠣꠘꠣꠞ ꠇꠥꠘꠥ ꠘꠛꠤ ꠎꠤꠘ꠆ꠖꠣ ꠅꠁꠀ ꠀꠁꠍꠂꠘ।
LUK 9:9 ꠔꠦꠃ ꠢꠦꠞꠥꠖꠦ ꠇꠁꠟꠣ, “ꠀꠝꠤ ꠘꠤꠎꠦꠃ ꠔ ꠄꠢꠤꠀꠞ ꠝꠣꠕꠣ ꠇꠣꠐꠣꠁꠍꠤ, ꠔꠦ ꠅꠃ ꠎꠦꠔꠣ ꠢꠥꠘꠞꠣꠝ, ꠄꠁꠘ ꠀꠍꠟꠦ ꠇꠦ?” ꠄꠞꠖꠣꠄ ꠢꠦꠞꠥꠖꠦ ꠁꠍꠣꠞꠦ ꠖꠦꠈꠣꠞ ꠈꠤꠀꠟ ꠅꠁꠟ।
LUK 9:10 ꠁꠍꠣꠄ ꠎꠦ ꠛꠣꠞꠅꠎꠘ ꠍꠣꠢꠣꠛꠤꠞꠦ ꠔꠛꠟꠤꠉꠅ ꠙꠣꠑꠣꠁꠍꠟꠣ, ꠔꠣꠞꠣ ꠚꠤꠞꠤꠀ ꠀꠁꠟꠣ। ꠀꠁꠀ ꠔꠣꠘꠞꠦ ꠎꠣꠘꠣꠁꠟꠣ, ꠔꠛꠟꠤꠉꠤ ꠍꠚꠞꠅ ꠇꠤꠔꠣ ꠇꠤꠔꠣ ꠇꠞꠍꠂꠘ, ꠅꠃ ꠔꠣꠁꠘ ꠄꠞꠣꠞꠦ ꠟꠁꠀ ꠈꠥꠛ ꠘꠤꠞꠤꠛꠤꠟꠤ ꠢꠣꠟꠔꠦ ꠛꠣꠄꠔ-ꠍꠄꠖꠣ ꠘꠣꠝꠞ ꠄꠇ ꠉꠣꠃꠔ ꠉꠦꠟꠣ।
LUK 9:11 ꠅꠁꠟꠦ ꠝꠣꠘꠡꠦ ꠁ ꠈꠛꠞ ꠢꠥꠘꠤꠀ ꠖꠟꠦ ꠖꠟꠦ ꠁꠍꠣꠞ ꠈꠞꠦ ꠅꠁꠀ ꠞꠅꠀꠘꠣ ꠖꠤꠟꠣꠁꠟꠣ। ꠔꠣꠁꠘ ꠄꠞꠣꠞꠦ ꠈꠥꠡꠤ ꠝꠘꠦ ꠇꠛꠥꠟ ꠇꠞꠟꠣ। ꠔꠣꠞꠣꠞ ꠉꠦꠍꠦ ꠀꠟ꠆ꠟꠣꠞ ꠛꠣꠖꠡꠣꠁꠞ ꠛꠄꠀꠘꠤ ꠔꠛꠟꠤꠉ ꠇꠞꠟꠣ, ꠀꠞ ꠎꠦꠔꠣ ꠛꠦꠝꠣꠞꠤꠞ ꠛꠦꠝꠣꠞ ꠡꠤꠚꠣ ꠅꠀ ꠎꠞꠥꠞ ꠀꠍꠤꠟ, ꠔꠣꠁꠘ ꠄꠞꠣꠞꠦ ꠡꠤꠚꠣ ꠇꠞꠟꠣ।
LUK 9:12 ꠢꠣꠁꠘ꠆ꠎꠣ ꠛꠣꠟꠣ ꠢꠃ ꠛꠣꠞꠅꠎꠘ ꠍꠣꠢꠣꠛꠤ ꠀꠁꠀ ꠁꠍꠣꠞꠦ ꠇꠁꠟꠣ, “ꠢꠥꠎꠥꠞ, ꠀꠝꠞꠣ ꠎꠦ ꠎꠣꠉꠣꠔ ꠀꠍꠤ, ꠁꠈꠣꠘ ꠈꠥꠛ ꠘꠤꠞꠤꠛꠤꠟꠤ ꠎꠣꠉꠣ। ꠔꠦ ꠅꠔꠣ ꠝꠣꠘꠡꠞꠦ ꠛꠤꠖꠣꠄ ꠖꠤꠟꠣꠃꠇ꠆ꠇꠣ, ꠔꠣꠞꠣ ꠇꠣꠘ꠆ꠖꠣ-ꠇꠣꠍꠣꠞ ꠉꠣꠃꠔ ꠉꠤꠀ ꠞꠣꠁꠔꠇꠥꠞ ꠕꠣꠇꠣ-ꠈꠣꠅꠀꠞ ꠛꠦꠛꠡ꠆ꠔꠣ ꠇꠞꠃꠇ।”
LUK 9:13 ꠁꠍꠣꠄ ꠎꠥꠀꠙ ꠖꠤꠟꠣ, “ꠔꠥꠝꠞꠣ ꠔꠣꠞꠣꠞꠦ ꠈꠣꠘꠣ ꠈꠣꠅꠀꠅ।” ꠔꠣꠞꠣ ꠇꠁꠟꠣ, “ꠀꠝꠞꠣꠞ ꠉꠦꠍꠦ ꠔ ꠈꠣꠟꠤ ꠙꠣꠌꠈꠣꠘ ꠞꠥꠐꠤ, ꠖꠥꠁꠐꠣ ꠛꠤꠞꠣꠘ ꠝꠣꠍ ꠀꠍꠦ, ꠀꠞ ꠇꠥꠘ꠆ꠔꠣ ꠘꠣꠁ। ꠔꠦ ꠀꠝꠞꠣ ꠛꠣꠎꠣꠞꠅ ꠉꠤꠀ ꠄꠞꠣꠞ ꠟꠣꠉꠤ ꠈꠣꠘꠣ ꠟꠁꠀ ꠀꠘꠔꠣꠝ ꠘꠤ?”
LUK 9:14 ꠁꠍꠣꠄ ꠇꠁꠟꠣ, “ꠄꠞꠣꠞꠦ ꠙꠁꠘ꠆ꠌꠣꠡ-ꠎꠘ, ꠙꠁꠘ꠆ꠌꠣꠡ-ꠎꠘ ꠇꠞꠤ ꠛꠅꠀꠁ ꠖꠦꠅ।” ꠁꠘꠅ ꠈꠣꠟꠤ ꠛꠦꠐꠣ ꠝꠣꠘꠥꠡꠃ ꠀꠍꠟꠣ ꠙꠣꠌ ꠀꠎꠣꠞꠞ ꠟꠣꠈꠣꠘ।
LUK 9:15 ꠔꠦꠃ ꠍꠣꠢꠣꠛꠤ ꠅꠇꠟꠦ ꠔꠣꠞꠣꠞꠦ ꠛꠅꠀꠁꠟꠣ।
LUK 9:16 ꠁꠍꠣꠄ ꠅꠃ ꠙꠣꠌꠅꠈꠣꠘ ꠞꠥꠐꠤ ꠀꠞ ꠖꠥꠁꠅ ꠝꠣꠍ ꠟꠁꠀ ꠀꠍꠝꠣꠘꠞ ꠛꠣꠄ ꠌꠣꠁꠀ ꠀꠟ꠆ꠟꠣꠞ ꠡꠥꠇꠞꠤꠀ ꠀꠖꠣꠄ ꠇꠞꠟꠣ। ꠛꠣꠖꠦ ꠞꠥꠐꠤ ꠀꠞ ꠝꠣꠍ ꠐꠥꠇꠞꠣ ꠐꠥꠇꠞꠣ ꠇꠞꠤ ꠜꠣꠋꠉꠤꠀ, ꠍꠣꠢꠣꠛꠤ ꠅꠇꠟꠞ ꠀꠔꠅ ꠖꠤꠀ ꠇꠁꠟꠣ ꠛꠣꠐꠤꠀ ꠖꠤꠟꠣꠁꠔꠣ।
LUK 9:17 ꠅꠃ ꠈꠣꠘꠣꠄ ꠢꠇꠟ ꠝꠣꠘꠡꠦ ꠙꠦꠐ ꠜꠞꠤꠀ ꠈꠣꠁꠟꠣ। ꠈꠣꠁꠀ ꠢꠣꠞꠟꠦ ꠎꠦꠔꠣ ꠉꠥꠠꠣ-ꠉꠣꠠꠣ ꠞꠁꠍꠤꠟ ꠅꠔꠣ ꠖꠟꠣ ꠇꠞꠟꠦ ꠛꠣꠞꠅ ꠐꠥꠇꠞꠤ ꠜꠞꠤꠉꠦꠟ।
LUK 9:18 ꠄꠇꠖꠤꠘ ꠁꠍꠣ ꠄꠇ ꠘꠤꠞꠣꠁ ꠎꠣꠉꠣꠔ ꠖꠥꠀ ꠇꠞꠣꠔ ꠛꠁꠞꠣ, ꠈꠣꠟꠤ ꠍꠣꠢꠣꠛꠤ ꠅꠇꠟ ꠔꠣꠘ ꠟꠉꠦ ꠀꠍꠟꠣ। ꠔꠣꠁꠘ ꠄꠞꠣꠞꠦ ꠎꠤꠇꠣꠁꠟꠣ, “ꠇꠅ ꠌꠣꠁꠘ, ꠝꠣꠘꠡꠦ ꠇꠤꠔꠣ ꠝꠘꠅ ꠇꠞꠂꠘ, ꠀꠝꠤ ꠇꠦ?”
LUK 9:19 ꠔꠣꠞꠣ ꠎꠥꠀꠙ ꠖꠤꠟꠣ, “ꠇꠥꠘꠥ ꠇꠥꠘꠥ ꠝꠣꠘꠡꠦ ꠇꠂꠘ, ꠀꠙꠘꠦ ꠄꠢꠤꠀ ꠘꠛꠤ। ꠇꠥꠘꠥ ꠎꠘꠦ ꠇꠂꠘ ꠁꠟꠤꠀꠍ ꠘꠛꠤ, ꠀꠞ ꠇꠦꠃ ꠇꠦꠃ ꠇꠄ ꠛꠃꠔ ꠀꠉꠞ ꠎꠝꠣꠘꠣꠞ ꠇꠥꠘꠥ ꠘꠛꠤ ꠢꠤꠞꠛꠣꠞ ꠎꠤꠘ꠆ꠖꠣ ꠅꠁꠀ ꠃꠑꠤꠍꠂꠘ।”
LUK 9:20 ꠁꠍꠣꠄ ꠄꠞꠣꠞꠦ ꠎꠤꠇꠣꠁꠟꠣ, “ꠅꠁꠟꠦ ꠔꠥꠝꠞꠣ ꠇꠤꠔꠣ ꠝꠘꠅ ꠇꠞ, ꠀꠝꠤ ꠇꠦ?” ꠍꠣꠢꠣꠛꠤ ꠙꠤꠔꠞꠦ ꠇꠁꠟꠣ, “ꠀꠙꠘꠦꠃ ꠀꠟ꠆ꠟꠣꠞ ꠅꠀꠖꠣ ꠇꠞꠣ ꠢꠃ ꠀꠟ-ꠝꠍꠤ।”
LUK 9:21 ꠁꠍꠣꠄ ꠔꠣꠞꠣꠞꠦ ꠇꠁꠟꠣ, “ꠈꠛꠞꠖꠣꠞ! ꠁꠔꠣ ꠀꠞ ꠇꠦꠃꠞꠞꠦ ꠢꠥꠘꠣꠁꠅ ꠘꠣ।”
LUK 9:22 ꠛꠣꠖꠦ ꠔꠣꠁꠘ ꠇꠁꠟꠣ, “ꠀꠝꠤ ꠛꠤꠘ-ꠀꠖꠝꠦ ꠛꠃꠔ ꠇꠡ꠆ꠐ ꠡꠁꠎ꠆ꠎ ꠇꠞꠣ ꠟꠣꠉꠛ। ꠡꠝꠣꠎꠞ ꠝꠥꠞꠛ꠆ꠛꠤ ꠅꠇꠟꠦ, ꠛꠠ ꠁꠝꠣꠝ, ꠀꠞ ꠝꠃꠟꠣꠘꠣ ꠅꠇꠟꠦ ꠀꠝꠣꠞꠦ ꠄꠟꠣ ꠇꠞꠛꠣ। ꠀꠝꠣꠞꠦ ꠎꠣꠘꠦ ꠝꠣꠞꠣ ꠅꠁꠛ, ꠅꠁꠟꠦ ꠝꠃꠔꠞ ꠔꠤꠘ ꠖꠤꠘꠞ ꠖꠤꠘ ꠀꠝꠣꠞ ꠢꠤꠞꠛꠣꠞ ꠎꠤꠘ꠆ꠖꠣ ꠅꠁꠀ ꠃꠑꠣ ꠎꠞꠥꠞ।”
LUK 9:23 ꠔꠣꠁꠘ ꠄꠞꠣ ꠢꠇꠟꠞꠦ ꠇꠁꠟꠣ, “ꠀꠝꠣꠞ ꠔꠞꠤꠇꠣꠄ ꠇꠦꠃ ꠎꠤꠘ꠆ꠖꠦꠉꠤ ꠇꠣꠐꠣꠁꠔꠦ ꠌꠣꠁꠟꠦ, ꠢꠦ ꠔꠣꠞ ꠘꠤꠎꠞ ꠈꠥꠡꠤꠄ ꠌꠟꠣ ꠛꠣꠖ ꠖꠦꠃꠇ। ꠔꠣꠞ ꠀꠙꠘ ꠖꠥꠈ-ꠇꠡ꠆ꠐꠞ ꠍꠟꠤꠛ ꠙꠞꠔꠦꠇ ꠖꠤꠘ ꠛꠁꠀ ꠟꠁꠀ ꠀꠝꠣꠞ ꠈꠞꠦ ꠈꠞꠦ ꠀꠃꠇ।
LUK 9:24 ꠎꠦ ꠝꠣꠘꠡꠦ ꠘꠤꠎꠞ ꠎꠣꠘ ꠛꠣꠌꠣꠁꠔ ꠌꠣꠄ, ꠢꠦ ꠔꠣꠞ ꠢꠣꠍꠣꠞꠞ ꠎꠤꠘ꠆ꠖꠦꠉꠤ ꠈꠥꠀꠁꠛ। ꠅꠁꠟꠦ ꠎꠦ ꠎꠘꠦ ꠀꠝꠣꠞ ꠟꠣꠉꠤ ꠘꠤꠎꠞ ꠎꠣꠘ ꠇꠥꠞꠛꠣꠘꠤ ꠖꠦꠄ, ꠢꠦ ꠢꠣꠍꠣꠞꠞ ꠎꠤꠘ꠆ꠖꠦꠉꠤ ꠙꠣꠁꠛ।
LUK 9:25 ꠇꠥꠘꠥ ꠝꠣꠘꠥꠡ ꠎꠥꠖꠤ ꠀꠡ꠆ꠔꠣ ꠖꠥꠘꠤꠀꠞ ꠝꠣꠟꠤꠇ ꠛꠘꠤꠀꠅ ꠔꠣꠞ ꠢꠣꠍꠣꠞꠞ ꠎꠤꠘ꠆ꠖꠦꠉꠤ ꠝꠣꠘꠤ ꠀꠈꠦꠞ ꠈꠥꠀꠁꠟꠣꠄ, ꠔꠦ ꠔꠣꠞ ꠇꠥꠘꠥ ꠚꠣꠄꠖꠣ ꠅꠁꠟ ꠘꠤ?
LUK 9:26 ꠢꠥꠘꠃꠇ꠆ꠇꠣ, ꠇꠦꠃ ꠎꠥꠖꠤ ꠀꠝꠣꠞ ꠟꠣꠉꠤ ꠛꠣ ꠀꠝꠣꠞ ꠔꠣꠟꠤꠝꠞ ꠟꠣꠉꠤꠀ ꠝꠥꠈ ꠟꠥꠇꠣꠄ, ꠔꠦ ꠀꠝꠤ ꠛꠤꠘ-ꠀꠖꠝ ꠎꠦꠛꠟꠣ ꠀꠝꠣꠞ ꠘꠤꠎꠞ, ꠀꠞ ꠙꠛꠤꠔ꠆ꠞ ꠚꠤꠞꠤꠡ꠆ꠔꠣ ꠅꠇꠟꠞ, ꠀꠞ ꠉꠣꠁꠛꠤ ꠛꠣꠚꠞ ꠡꠣꠘ-ꠔꠎꠟ꠆ꠟꠤꠄ ꠖꠥꠘꠤꠀꠔ ꠢꠤꠞꠛꠣꠞ ꠀꠁꠝꠥ, ꠅꠃ ꠡꠝꠄ ꠀꠝꠤꠅ ꠄꠞꠣꠞꠦ ꠖꠦꠈꠟꠦ ꠝꠥꠈ ꠟꠥꠇꠣꠁꠝꠥ।
LUK 9:27 ꠀꠝꠤ ꠔꠥꠝꠞꠣꠞꠦ ꠢꠣꠍꠣ ꠇꠕꠣ ꠇꠁꠞꠣꠝ, ꠅꠃ ꠝꠎꠟꠤꠍꠅ ꠅꠃꠟꠣ ꠇꠄꠎꠘ ꠝꠣꠘꠥꠡ ꠀꠎꠤꠞ ꠀꠍꠂꠘ, ꠀꠟ꠆ꠟꠣꠞ ꠛꠣꠖꠡꠣꠁ ꠘꠣ ꠖꠦꠈꠤꠀ ꠄꠞꠣꠞ ꠝꠃꠔ ꠅꠁꠔ ꠘꠣꠄ।”
LUK 9:28 ꠅꠃ ꠔꠣꠟꠤꠝꠞ ꠄꠇꠖ ꠢꠣꠙ꠆ꠔꠣ ꠛꠣꠖꠦ, ꠁꠍꠣ ꠖꠥꠀ ꠇꠞꠣꠞ ꠟꠣꠉꠤ ꠔꠣꠘ ꠍꠣꠢꠣꠛꠤ ꠙꠤꠔꠞ, ꠢꠣꠘ꠆ꠘꠣꠘ, ꠀꠞ ꠁꠀꠇꠥꠛꠞꠦ ꠟꠁꠀ ꠄꠇ ꠐꠤꠟ꠆ꠟꠣꠞ ꠃꠙꠞꠦ ꠃꠑꠟꠣ।
LUK 9:29 ꠔꠣꠁꠘ ꠖꠥꠀ ꠇꠞꠞꠣ, ꠅꠝꠘ ꠡꠝꠄ ꠀꠈꠔꠣꠃ ꠔꠣꠘ ꠝꠥꠈꠞ ꠞꠋꠉ ꠛꠖꠟꠤꠉꠦꠟ, ꠔꠣꠘ ꠚꠤꠘ꠆ꠘꠞ ꠇꠣꠙꠠ-ꠌꠥꠙꠠ ꠗꠟꠣ ꠌꠇꠌꠇꠣ ꠅꠁꠉꠦꠟ।
LUK 9:30 ꠅꠃ ꠡꠝꠄ ꠖꠦꠈꠣ ꠉꠦꠟ, ꠖꠥꠁꠎꠘ ꠝꠣꠘꠡꠦ ꠀꠁꠀ ꠔꠣꠘ ꠟꠉꠦ ꠛꠣꠔꠌꠤꠔ ꠇꠞꠞꠣ, ꠄꠞꠣꠞ ꠄꠇꠎꠘ ꠅꠁꠟꠣ ꠝꠥꠍꠣ ꠘꠛꠤ, ꠖꠥꠍꠞꠣ ꠎꠘ ꠁꠟꠤꠀꠍ ꠘꠛꠤ।
LUK 9:31 ꠔꠣꠞꠣ ꠀꠟ꠆ꠟꠣꠁ ꠎꠣꠟꠣꠟ ꠀꠞ ꠡꠣꠘꠦ ꠖꠦꠈꠣ ꠖꠤꠟꠣ। ꠎꠦꠞꠥꠎꠣꠟꠦꠝ ꠍꠚꠞꠞ ꠇꠣꠟꠅ ꠁꠍꠣ ꠎꠦꠘ ꠀꠟ꠆ꠟꠣꠞ ꠝꠞ꠆ꠎꠤ ꠝꠣꠚꠤꠇ ꠝꠃꠔꠞ ꠝꠥꠈꠣꠝꠥꠈꠤ ꠅꠁꠞꠣ, ꠅꠃ ꠛꠦꠙꠣꠞꠦꠃ ꠔꠣꠞꠣ ꠛꠣꠔꠌꠤꠔ ꠇꠞꠟꠣ।
LUK 9:32 ꠍꠣꠢꠣꠛꠤ ꠙꠤꠔꠞ ꠀꠞ ꠔꠣꠘ ꠟꠉꠞ ꠅꠇꠟ ꠛꠦꠝꠣꠟꠥꠝ ꠊꠥꠝꠅ ꠀꠍꠟꠣ। ꠀꠈꠔꠣꠃ ꠊꠥꠝ ꠜꠣꠋꠉꠤ ꠎꠣꠅꠀꠄ ꠔꠣꠞꠣ ꠁꠍꠣꠞ ꠎꠣꠟꠣꠟ-ꠡꠣꠘ ꠖꠦꠈꠟꠣ, ꠀꠞ ꠔꠣꠘ ꠇꠣꠘ꠆ꠖꠣꠔ ꠃꠛꠣ ꠅꠃ ꠖꠥꠁꠅ ꠎꠘꠞꠦꠅ ꠖꠦꠈꠟꠣ।
LUK 9:33 ꠢꠃ ꠖꠥꠁꠅꠎꠘ ꠎꠦꠛꠟꠣ ꠁꠍꠣꠞ ꠉꠦꠍ ꠕꠣꠇꠤ ꠞꠅꠀꠘꠣ ꠖꠤꠟꠣꠁꠞꠣ, ꠅꠃ ꠡꠝꠄ ꠙꠤꠔꠞꠦ ꠇꠁꠟꠣ, “ꠢꠥꠎꠥꠞ, ꠀꠝꠞꠣꠅ ꠔ ꠅꠘꠅ ꠀꠍꠤ, ꠈꠥꠛ ꠜꠣꠟꠣ ꠅꠁꠍꠦ, ꠔꠦ ꠄꠇ ꠇꠣꠝ ꠇꠞꠤꠟꠣꠁ, ꠀꠝꠞꠣ ꠅꠘꠅ ꠔꠤꠘꠈꠣꠘ ꠒꠦꠞꠣ-ꠊꠞ ꠛꠣꠘꠣꠁꠟꠣꠁ, ꠄꠇꠈꠣꠘ ꠀꠙꠘꠣꠞ, ꠄꠇꠈꠣꠘ ꠁꠟꠤꠀꠍ ꠘꠛꠤ, ꠀꠞ ꠄꠇꠈꠣꠘ ꠝꠥꠍꠣ ꠘꠛꠤꠞ ꠟꠣꠉꠤ।” ꠙꠤꠔꠞꠦ ꠎꠦꠘ ꠇꠤꠔꠣ ꠇꠁꠞꠣ, ꠁꠔꠣ ꠔꠣꠁꠘ ꠘꠤꠎꠦꠃ ꠛꠥꠎꠟꠣ ꠘꠣ।
LUK 9:34 ꠙꠤꠔꠞꠦ ꠅꠔꠣ ꠝꠣꠔꠤꠞꠣ, ꠅꠃ ꠡꠝꠄ ꠀꠈꠔꠣꠃ ꠝꠦꠊꠞ ꠇꠣꠟꠘꠤ ꠀꠁꠀ ꠔꠣꠞꠣꠞꠦ ꠉꠥꠞꠤꠟꠤꠟ। ꠔꠣꠞꠣ ꠇꠣꠟꠘꠤꠞ ꠀꠅꠠꠦ ꠢꠣꠝꠣꠘꠤꠞ ꠛꠣꠖꠦ ꠍꠣꠢꠣꠛꠤ ꠅꠇꠟ ꠒꠞꠣꠁꠉꠦꠟꠣ।
LUK 9:35 ꠀꠞ ꠇꠣꠟꠘꠤꠞ ꠜꠤꠔꠞ ꠕꠣꠇꠤ ꠅꠃ ꠀꠅꠀꠎ ꠀꠁꠟ, “ꠄꠁꠘꠃ ꠀꠝꠣꠞ ꠈꠣꠍ ꠝꠣꠄꠀꠞ ꠎꠘ, ꠔꠥꠝꠞꠣ ꠄꠘ ꠇꠕꠣ ꠝꠣꠘꠅ।”
LUK 9:36 ꠁ ꠀꠅꠀꠎꠞ ꠛꠣꠖꠦꠃ ꠖꠦꠈꠣ ꠉꠦꠟ, ꠁꠍꠣ ꠢꠘꠅ ꠄꠇꠟꠣ ꠃꠛꠣꠁ ꠞꠁꠍꠂꠘ। ꠍꠣꠢꠣꠛꠤ ꠅꠇꠟ ꠘꠤꠞꠣꠁ ꠅꠁꠉꠦꠟꠣ, ꠔꠣꠞꠣ ꠎꠦꠔꠣ ꠖꠦꠈꠍꠤꠟꠣ ꠅꠃ ꠡꠝꠄ ꠁꠔꠣ ꠀꠞ ꠇꠦꠃꠞꠞꠦ ꠢꠥꠘꠣꠁꠟꠣ ꠘꠣ।
LUK 9:37 ꠛꠣꠖꠞ ꠖꠤꠘ ꠁꠍꠣ ꠀꠞ ꠍꠣꠢꠣꠛꠤ ꠅꠇꠟ ꠙꠣꠠꠞ ꠐꠤꠟ꠆ꠟꠣ ꠕꠣꠇꠤ ꠟꠣꠝꠤꠀ ꠀꠁꠟꠦ, ꠛꠃꠔ ꠝꠣꠘꠥꠡ ꠔꠣꠘ ꠟꠉꠦ ꠖꠦꠈꠣ ꠇꠞꠣꠔ ꠀꠁꠀ ꠜꠤꠠ ꠛꠣꠘ꠆ꠖꠤꠟ꠆ꠟꠣ।
LUK 9:38 ꠅꠃ ꠜꠤꠠꠞ ꠝꠣꠎꠞ ꠄꠇꠎꠘꠦ ꠌꠤꠟ꠆ꠟꠣꠁꠀ ꠇꠁꠟ, “ꠢꠥꠎꠥꠞ, ꠀꠝꠣꠞ ꠙꠥꠀꠉꠥꠞ ꠛꠣꠄ ꠈꠤꠀꠟ ꠇꠞꠃꠇ꠆ꠇꠣ, ꠅꠉꠥ ꠀꠝꠣꠞ ꠄꠇꠝꠣꠔ꠆ꠞ ꠀꠅꠟꠣꠖ।
LUK 9:39 ꠔꠣꠞꠦ ꠄꠇꠐꠣ ꠎꠤꠘꠦ ꠗꠞꠦ, ꠁꠉꠤꠄ ꠔꠣꠞꠦ ꠍꠣꠠꠔ ꠌꠣꠄ ꠘꠣ, ꠢꠦ ꠀꠈꠔꠣꠃ ꠌꠤꠇ ꠖꠤꠀ ꠃꠑꠦ ꠀꠞ ꠝꠣꠐꠤꠔ ꠙꠠꠤꠀ ꠍꠣꠐꠤꠀꠄ। ꠔꠣꠞ ꠝꠥꠈꠦꠖꠤ ꠚꠦꠘꠣ ꠛꠣꠞꠅꠄ, ꠢꠦꠡꠦ ꠔꠣꠞꠦ ꠀꠍꠣꠠꠤꠀ ꠀꠗ-ꠝꠞꠣ ꠇꠞꠤ ꠚꠣꠟꠣꠁ ꠕꠁꠀ ꠎꠣꠄ।
LUK 9:40 ꠀꠝꠤ ꠀꠙꠘꠣꠞ ꠍꠣꠢꠣꠛꠤ ꠅꠇꠟꠞ ꠉꠦꠍꠦ ꠝꠤꠘꠔ-ꠇꠣꠎ꠆ꠎꠤ ꠇꠞꠍꠟꠣꠝ ꠅꠉꠥꠔꠣꠞꠦ ꠈꠦꠖꠣꠁꠛꠣꠞ ꠟꠣꠉꠤ, ꠅꠁꠟꠦ ꠔꠣꠞꠣ ꠙꠣꠞꠍꠂꠘ ꠘꠣ।”
LUK 9:41 ꠁꠍꠣꠄ ꠇꠁꠟꠣ, “ꠅ ꠛꠦꠁꠝꠣꠘ ꠀꠞ ꠘꠣꠚꠞꠝꠣꠘꠞ ꠎꠣꠔ, ꠀꠝꠤ ꠀꠞ ꠇꠔꠖꠤꠘ ꠔꠥꠝꠞꠣꠞ ꠟꠉꠦ ꠞꠁꠝꠥ, ꠔꠥꠝꠞꠣꠞ ꠍꠣꠔꠣꠘꠤ ꠡꠁꠎ꠆ꠎ ꠇꠞꠝꠥ? ꠖꠦꠈꠤ ꠌꠣꠁꠘ, ꠔꠥꠝꠣꠞ ꠙꠥꠀꠞꠦ ꠅꠘꠅ ꠀꠘꠅ।”
LUK 9:42 ꠛꠦꠐꠣꠄ ꠙꠥꠀꠞꠦ ꠟꠁꠀ ꠀꠉꠥꠀꠞ, ꠅꠃ ꠡꠝꠄ ꠎꠤꠘ꠆ꠘꠣꠔꠦ ꠔꠣꠞꠦ ꠝꠣꠐꠤꠔ ꠚꠣꠟꠣꠁꠀ ꠎꠣꠔꠤꠀ ꠗꠞꠟ, ꠢꠦ ꠢꠥꠔꠤꠀ ꠍꠣꠐꠤꠀꠘꠤ ꠟꠣꠉꠣꠁꠟ। ꠔꠦꠃ ꠁꠍꠣꠄ ꠎꠤꠘ꠆ꠘꠣꠔꠞꠦ ꠗꠣꠝꠇꠤ ꠖꠤꠟꠣ, ꠔꠣꠁꠘ ꠅꠃ ꠙꠥꠀꠞꠦ ꠜꠣꠟꠣ ꠇꠞꠤꠀ ꠔꠣꠞ ꠛꠣꠚꠞ ꠀꠔꠅ ꠡꠝꠎꠣꠁ ꠖꠤꠟꠣ।
LUK 9:43 ꠀꠟ꠆ꠟꠣꠞ ꠇꠥꠖꠞꠔꠤ ꠟꠤꠟꠣ-ꠈꠦꠟꠣ ꠖꠦꠈꠤꠀ ꠢꠇꠟ ꠝꠣꠘꠥꠡ ꠔꠣꠁꠎ꠆ꠎꠥꠛ ꠅꠁꠉꠦꠟꠣ। ꠁꠍꠣꠞ ꠇꠦꠞꠣꠝꠔꠤ ꠇꠣꠝ-ꠇꠣꠎ ꠖꠦꠈꠤꠀ ꠢꠇ꠆ꠇꠟꠦ ꠔꠣꠁꠎ꠆ꠎꠥꠛ ꠛꠘꠤꠀ ꠌꠤꠘ꠆ꠔꠣ ꠇꠞꠞꠣ, ꠅꠃ ꠡꠝꠄ ꠔꠣꠁꠘ ꠍꠣꠢꠣꠛꠤ ꠅꠇꠟꠞꠦ ꠇꠁꠟꠣ,
LUK 9:44 “ꠀꠝꠣꠞ ꠇꠕꠣ ꠈꠣꠘꠣꠁꠘ ꠔꠥꠝꠞꠣ ꠝꠘ ꠖꠤꠀ ꠢꠥꠘꠅ, ꠀꠝꠤ ꠛꠤꠘ-ꠀꠖꠝꠞꠦ ꠔ ꠝꠣꠘꠡꠞ ꠀꠔꠅ ꠗꠞꠣꠁ ꠖꠦꠅꠀ ꠅꠁꠛ।”
LUK 9:45 ꠍꠣꠢꠣꠛꠤ ꠅꠇꠟꠦ ꠁ ꠝꠣꠔꠞ ꠇꠥꠘꠥ ꠝꠣꠘꠤ ꠛꠥꠎꠟꠣ ꠘꠣ। ꠀꠟ꠆ꠟꠣꠄ ꠔꠣꠞꠣꠞ ꠉꠦꠍꠦ ꠁꠈꠣꠘ ꠉꠣꠁꠛ ꠞꠣꠈꠟꠣ, ꠎꠣꠔꠦ ꠔꠣꠞꠣ ꠘꠣ ꠛꠥꠎꠂꠘ। ꠀꠞ ꠅꠃ ꠛꠦꠙꠣꠞꠦ ꠁꠍꠣꠞꠦꠅ ꠇꠥꠘ꠆ꠔꠣ ꠎꠤꠇꠣꠁꠔꠦ ꠔꠣꠞꠣꠞ ꠡꠣꠅꠡ ꠅꠁꠟ ꠘꠣ।
LUK 9:46 ꠍꠣꠢꠣꠛꠤ ꠅꠇꠟꠞ ꠝꠣꠎꠦ ꠇꠦ ꠢꠇꠟ ꠕꠣꠇꠤ ꠛꠠ, ꠅꠔꠣ ꠟꠁꠀ ꠔꠣꠞꠣ ꠔꠞ꠆ꠇꠣ-ꠔꠞ꠆ꠇꠤ ꠇꠞꠞꠣ,
LUK 9:47 ꠄꠞꠝꠣꠎꠦ ꠁꠍꠣꠄ ꠔꠣꠞꠣꠞ ꠖꠤꠟꠞ ꠜꠣꠛ ꠛꠥꠎꠤꠟꠤꠟꠣ। ꠔꠣꠁꠘ ꠄꠇ ꠘꠣꠛꠣꠟꠤꠇ ꠢꠥꠞꠥꠔ꠆ꠔꠣꠞꠦ ꠇꠣꠘ꠆ꠖꠣꠔ ꠀꠘꠤꠀ ꠇꠁꠟꠣ,
LUK 9:48 “ꠎꠦ ꠎꠘꠦ ꠀꠝꠣꠞ ꠟꠣꠉꠤ ꠅꠃ ꠢꠥꠞꠥꠔ꠆ꠔꠣꠞ ꠟꠣꠈꠣꠘ ꠇꠥꠘꠥ ꠍꠣꠛꠣꠟꠞꠦ ꠇꠛꠥꠟ ꠇꠞꠦ, ꠢꠦ ꠀꠝꠣꠞꠦꠃ ꠇꠛꠥꠟ ꠇꠞꠦ। ꠀꠞ ꠀꠝꠣꠞꠦ ꠎꠦ ꠇꠛꠥꠟ ꠇꠞꠦ, ꠢꠦ ꠈꠣꠟꠤ ꠀꠝꠣꠞꠦ ꠘꠣꠄ, ꠀꠝꠣꠞꠦ ꠎꠦꠁꠘ ꠛꠦꠎꠤꠍꠂꠘ ꠔꠣꠘꠞꠦꠅ ꠇꠛꠥꠟ ꠇꠞꠟ। ꠔꠥꠝꠞꠣꠞ ꠝꠣꠎꠦ ꠎꠦ ꠎꠘ ꠢꠇꠟ ꠕꠣꠇꠤ ꠢꠥꠞꠥ, ꠢꠦ-ꠃ ꠢꠇꠟ ꠕꠣꠇꠤ ꠛꠠ।”
LUK 9:49 ꠛꠣꠖꠦ ꠍꠣꠢꠣꠛꠤ ꠢꠣꠘ꠆ꠘꠣꠘꠦ ꠇꠁꠟꠣ, “ꠢꠥꠎꠥꠞ, ꠀꠝꠞꠣ ꠖꠦꠈꠟꠣꠝ ꠀꠙꠘꠣꠞ ꠘꠣꠝ ꠟꠁꠀ ꠄꠇꠎꠘꠦ ꠜꠥꠔ ꠍꠣꠠꠣꠞ। ꠖꠦꠈꠤꠀ ꠀꠝꠞꠣ ꠔꠣꠞꠦ ꠝꠣꠘꠣ ꠇꠞꠍꠤ, ꠢꠦ ꠔ ꠀꠝꠞꠣꠞ ꠔꠞꠤꠇꠣꠞ ꠘꠣꠄ।”
LUK 9:50 ꠁꠍꠣꠄ ꠔꠣꠘꠞꠦ ꠇꠁꠟꠣ, “ꠀꠞ ꠝꠣꠘꠣ ꠇꠞꠤꠅ ꠘꠣ, ꠎꠦ ꠔꠥꠝꠞꠣꠞ ꠛꠤꠙꠇ꠆ꠇꠦ ꠘꠣꠄ, ꠢꠦ ꠔ ꠙꠇ꠆ꠇꠦꠃ ꠀꠍꠦ।”
LUK 9:51 ꠁꠍꠣꠄ ꠛꠦꠢꠦꠡ꠆ꠔꠅ ꠔꠡꠞꠤꠚ ꠘꠤꠛꠣꠞ ꠖꠤꠘ ꠊꠘꠣꠁꠀ ꠀꠁꠟ, ꠅꠃ ꠔꠣꠁꠘ ꠎꠦꠞꠥꠎꠣꠟꠦꠝꠅ ꠎꠣꠁꠔꠣ ꠇꠞꠤ ꠘꠤꠅꠔ ꠇꠞꠟꠣ।
LUK 9:52 ꠔꠣꠘ ꠀꠉꠦ ꠅꠁꠀ ꠈꠛꠞꠤꠀ ꠅꠇꠟ ꠙꠣꠑꠣꠁꠟꠣ। ꠔꠣꠞꠣ ꠀꠉꠦ ꠉꠤꠀ ꠢꠇꠟꠔꠣ ꠎꠥꠁꠔ-ꠎꠣꠁꠔ ꠇꠞꠣꠞ ꠈꠤꠀꠟꠦ ꠡꠝꠞꠤꠀ ꠎꠣꠔꠤꠞ ꠄꠇ ꠉꠣꠃꠔ ꠉꠤꠀ ꠢꠣꠝꠣꠁꠟꠣ।
LUK 9:53 ꠅꠁꠟꠦ ꠢꠤ ꠉꠣꠃꠞ ꠝꠣꠘꠡꠦ ꠎꠦꠛꠟꠣ ꠢꠥꠘꠟꠣ, ꠁꠍꠣ ꠎꠦꠞꠥꠎꠣꠟꠦꠝ ꠎꠣꠁꠔꠣ, ꠢꠥꠘꠤꠀ ꠔꠣꠞꠣ ꠔꠣꠘꠞꠦ ꠀꠡꠞꠄ ꠖꠤꠟ ꠘꠣ।
LUK 9:54 ꠄꠞꠖꠣꠄ ꠔꠣꠘ ꠍꠣꠢꠣꠛꠤ ꠁꠀꠇꠥꠛ ꠀꠞ ꠢꠣꠘ꠆ꠘꠣꠘꠦ ꠇꠁꠟꠣ, “ꠢꠥꠎꠥꠞ, ꠁꠟꠤꠀꠍ ꠘꠛꠤꠞ ꠟꠣꠈꠣꠘ ꠀꠝꠞꠣꠅ ꠅꠈꠘ ꠀꠞꠎ ꠇꠞꠔꠣꠝ ꠘꠤ, ꠀꠍꠝꠣꠘꠤ ꠀꠉꠥꠁꠘ ꠟꠣꠝꠤꠀ ꠅꠔꠣꠞꠦ ꠛꠤꠘꠣꠡ ꠇꠞꠤꠟꠣꠃꠇ?”
LUK 9:55 ꠁꠍꠣꠄ ꠔꠣꠞꠣꠞ ꠛꠣꠄ ꠚꠤꠞꠤꠀ ꠗꠣꠝꠇꠤ ꠖꠤꠀ ꠇꠁꠟꠣ, “ꠔꠥꠝꠞꠣ ꠎꠣꠘ ꠘꠣ ꠘꠤ ꠔꠥꠝꠞꠣ ꠇꠥꠘ ꠟꠣꠈꠣꠘ ꠞꠥꠢꠥꠞ ꠉꠠꠣ? ꠀꠝꠣꠞꠦ ꠇꠥꠘꠥ ꠛꠦꠎꠣ ꠅꠁꠍꠦ ꠘꠤ ꠝꠣꠘꠡꠞ ꠛꠤꠘꠣꠡ ꠇꠞꠔꠣꠝ? ꠀꠝꠣꠞꠦ ꠔ ꠛꠦꠎꠣ ꠅꠁꠍꠦ ꠝꠣꠘꠡꠞ ꠎꠣꠘ ꠛꠣꠌꠣꠁꠔꠣꠝ।”
LUK 9:56 ꠅꠈꠣꠘ ꠇꠁꠀ ꠄꠞꠣ ꠀꠞꠇ ꠉꠣꠃꠔ ꠉꠦꠟꠣꠉꠤ।
LUK 9:57 ꠔꠣꠞꠣ ꠎꠦꠛꠟꠣ ꠙꠕꠦꠖꠤ ꠎꠣꠁꠞꠣ, ꠅꠃ ꠡꠝꠄ ꠄꠇ ꠛꠦꠐꠣ ꠀꠁꠀ ꠁꠍꠣꠞꠦ ꠇꠁꠟ, “ꠍꠣꠛ, ꠀꠙꠘꠦ ꠎꠦꠈꠣꠘꠅ ꠎꠣꠁꠛꠣ, ꠀꠝꠤꠅ ꠀꠙꠘꠣꠞ ꠟꠉꠦ ꠢꠘꠅ ꠎꠣꠁꠝꠥ।”
LUK 9:58 ꠁꠍꠣꠄ ꠔꠣꠞꠦ ꠇꠁꠟꠣ, “ꠛꠣꠛꠣꠞꠦ, ꠢꠤꠀꠟꠞ ꠉꠣꠔ ꠀꠍꠦ, ꠙꠣꠈꠤꠘ꠆ꠔꠞ ꠛꠣꠖꠣ ꠀꠍꠦ, ꠅꠁꠟꠦ ꠀꠝꠤ ꠛꠤꠘ-ꠀꠖꠝꠞ ꠝꠣꠕꠣ ꠉꠥꠎꠣꠞ ꠇꠥꠘꠥ ꠑꠣꠁ ꠘꠣꠁ।”
LUK 9:59 ꠛꠣꠖꠦ ꠁꠍꠣꠄ ꠀꠞꠇ ꠎꠘꠞꠦ ꠖꠦꠈꠟꠣ, ꠖꠦꠈꠤꠀ ꠔꠣꠞꠦ ꠇꠁꠟꠣ, “ꠅꠛꠣ, ꠀꠝꠣꠞ ꠟꠉꠦ ꠌꠟꠅ।” ꠢꠦ ꠎꠥꠀꠙ ꠖꠤꠟ, “ꠢꠥꠎꠥꠞ, ꠀꠝꠣꠞ ꠛꠣꠚꠞ ꠝꠃꠔꠞ ꠛꠣꠖꠦ ꠔꠣꠘꠞꠦ ꠝꠣꠐꠤ ꠖꠤꠀ ꠢꠣꠞꠟꠦ ꠀꠝꠤ ꠀꠁꠝꠥ।”
LUK 9:60 ꠁꠍꠣꠄ ꠔꠣꠞꠦ ꠇꠁꠟꠣ, “ꠝꠞꠣ ꠅꠇꠟꠦ ꠔꠣꠞꠣꠞ ꠝꠞꠣꠞꠦ ꠝꠣꠐꠤ ꠖꠦꠃꠇ, ꠔꠥꠝꠤ ꠀꠁꠀ ꠀꠟ꠆ꠟꠣꠞ ꠛꠣꠖꠡꠣꠁꠞ ꠖꠣꠅꠔ ꠖꠦꠅ।”
LUK 9:61 ꠀꠞꠅ ꠄꠇꠎꠘꠦ ꠇꠁꠟ, “ꠢꠥꠎꠥꠞ, ꠀꠝꠤ ꠀꠙꠘꠣꠞ ꠟꠉꠦ ꠎꠣꠁꠝꠥ, ꠔꠦ ꠀꠝꠣꠞ ꠛꠣꠠꠤꠔ ꠉꠤꠀ ꠛꠤꠖꠣꠄ ꠟꠁꠀ ꠀꠁ।”
LUK 9:62 ꠁꠍꠣꠄ ꠔꠣꠞꠦ ꠇꠁꠟꠣ, “ꠟꠣꠋꠉꠟꠞ ꠈꠥꠐꠤꠔ ꠗꠞꠤꠀ ꠎꠦꠉꠥꠄ ꠈꠞꠦꠖꠤ ꠚꠤꠞꠤꠀ ꠌꠣꠄ, ꠢꠦ ꠀꠟ꠆ꠟꠣꠞ ꠛꠣꠖꠡꠣꠁꠞ ꠟꠣꠈ ꠘꠣꠄ।”
LUK 10:1 ꠛꠣꠖꠦ ꠢꠎꠞꠔ ꠁꠍꠣꠄ ꠀꠞꠅ ꠡꠔ꠆ꠔꠁꠞꠎꠘ ꠡꠣꠉꠞꠤꠖꠞꠦ ꠔꠛꠟꠤꠉꠅ ꠙꠣꠑꠣꠁꠔꠣ ꠇꠞꠤ ꠙꠍꠘ꠆ꠖ ꠇꠞꠟꠣ। ꠔꠣꠁꠘ ꠘꠤꠎꠦ ꠎꠦꠔꠣ ꠐꠣꠃꠘ ꠛꠣ ꠉꠣꠃꠀꠁꠘ꠆ꠔꠅ ꠎꠣꠅꠀꠞ ꠁꠞꠣꠖꠣ ꠇꠞꠍꠤꠟꠣ, ꠢꠘꠅ ꠎꠣꠁꠛꠣꠞ ꠀꠉꠦ ꠄꠞꠣꠞꠦ ꠖꠥꠁꠎꠘ ꠖꠥꠁꠎꠘ ꠇꠞꠤꠀ ꠙꠣꠑꠣꠁꠟꠣ।
LUK 10:2 ꠙꠣꠑꠣꠘꠤꠞ ꠛꠣꠟꠣ ꠄꠞꠣꠞꠦ ꠇꠁꠟꠣ, “ꠢꠥꠘꠅ, ꠎꠝꠤꠘꠅ ꠔ ꠚꠡꠟ ꠛꠃꠔ ꠀꠍꠦ, ꠅꠁꠟꠦ ꠇꠣꠝꠟꠣ ꠈꠥꠛ ꠇꠝ। ꠄꠞꠟꠣꠉꠤ ꠎꠝꠤꠘꠞ ꠝꠣꠟꠤꠇꠞ ꠉꠦꠍꠦ ꠖꠥꠀ ꠇꠞꠅ, ꠔꠣꠘ ꠚꠡꠟ ꠔꠥꠟꠣꠞ ꠟꠣꠉꠤ ꠔꠣꠁꠘ ꠇꠣꠝꠟꠣ ꠙꠣꠑꠣꠁꠛꠣ।
LUK 10:3 ꠔꠥꠝꠞꠣ ꠅꠈꠘ ꠞꠅꠀꠘꠣ ꠅꠁꠎꠣꠅ। ꠈꠤꠀꠟ ꠞꠣꠈꠤꠅ, ꠛꠣꠊꠞ ꠙꠣꠟꠞ ꠝꠣꠎꠦ ꠝꠦꠠꠣ-ꠛꠣꠁꠌ꠆ꠌꠣꠞ ꠟꠣꠈꠣꠘ ꠀꠝꠤ ꠔꠥꠝꠞꠣꠞꠦ ꠙꠣꠑꠣꠁꠟꠣꠝ।
LUK 10:4 ꠔꠥꠝꠞꠣ ꠎꠣꠅꠀꠞ ꠇꠣꠟꠅ ꠐꠦꠇꠣꠞ ꠕꠟꠤ, ꠉꠣꠁꠐ-ꠛꠥꠍꠇꠤ, ꠙꠣꠅꠞ ꠎꠥꠔꠣ ꠁꠔꠣ ꠇꠥꠘ꠆ꠔꠣꠃ ꠟꠉꠦ ꠘꠤꠅ ꠘꠣ, ꠀꠞ ꠙꠕꠞ ꠝꠣꠎꠦ ꠇꠦꠃꠞꠞꠦ ꠍꠣꠟꠣꠝꠅ ꠇꠞꠤꠅ ꠘꠣ।
LUK 10:5 ꠎꠦ ꠛꠣꠠꠤꠔ ꠉꠤꠀ ꠢꠣꠝꠣꠁꠛꠣꠄ, ꠢꠣꠝꠣꠁꠀꠃ ꠇꠁꠅ, ꠀꠍꠍꠣꠟꠣꠝꠥ ꠀꠟꠣꠁꠇꠥꠝ।
LUK 10:6 ꠍꠣꠟꠣꠝ ꠟꠅꠀꠞ ꠎꠥꠇꠣ ꠇꠦꠃ ꠢꠤꠘꠅ ꠕꠣꠇꠟꠦ, ꠔꠥꠝꠞꠣꠞ ꠍꠣꠟꠣꠝ ꠔꠣꠞ ꠃꠙꠞꠦ ꠛꠞ꠆ꠔꠤꠛ, ꠀꠞ ꠁꠟꠣ ꠇꠦꠃ ꠘꠣ ꠕꠣꠇꠟꠦ, ꠔꠥꠝꠞꠣꠞ ꠍꠣꠟꠣꠝ ꠔꠥꠝꠞꠣꠞ ꠉꠦꠍꠦꠃ ꠚꠤꠞꠔ ꠀꠁꠛ।
LUK 10:7 ꠙꠄꠟꠣ ꠎꠦ ꠛꠣꠠꠤꠔ ꠢꠣꠝꠣꠁꠛꠣꠄ, ꠢꠃ ꠛꠣꠠꠤꠔꠃ ꠞꠁꠅ। ꠁ ꠛꠣꠠꠤ ꠍꠣꠠꠤꠀ ꠖꠥꠍꠞꠣ ꠛꠣꠠꠤꠔ ꠎꠣꠁꠅ ꠘꠣ। ꠔꠣꠞꠣ ꠎꠦꠔꠣ ꠖꠦꠁꠘ ꠅꠔꠣ ꠈꠣꠁꠅ, ꠇꠣꠞꠘ ꠇꠣꠝꠟꠣꠄ ꠔꠣꠞ ꠛꠦꠔꠘ ꠙꠣꠅꠀꠞ ꠎꠁꠉ꠆ꠉ।
LUK 10:8 “ꠎꠦꠛꠟꠣ ꠇꠥꠘꠥ ꠉꠣꠃꠔ ꠎꠣꠁꠛꠣꠄ, ꠢꠤꠘꠞ ꠝꠣꠘꠡꠦ ꠔꠥꠝꠞꠣꠞꠦ ꠇꠛꠥꠟ ꠇꠞꠤꠀ, ꠔꠣꠞꠣ ꠎꠦꠔꠣ ꠈꠣꠁꠔꠦ ꠖꠦꠁꠘ, ꠅꠔꠣꠃ ꠈꠣꠁꠅ।
LUK 10:9 ꠔꠣꠞꠣꠞ ꠛꠦꠝꠣꠞꠤ ꠅꠇꠟꠞ ꠛꠦꠝꠣꠞ ꠜꠣꠟꠣ ꠇꠞꠤꠅ। ꠔꠣꠞꠣꠞꠦ ꠇꠁꠅ, ꠀꠟ꠆ꠟꠣꠞ ꠛꠣꠖꠡꠣꠁ ꠔ ꠔꠥꠝꠞꠣꠞ ꠗꠣꠞꠅ ꠀꠁꠌ꠆ꠍꠦ।
LUK 10:10 ꠅꠁꠟꠦ ꠇꠥꠘꠥ ꠉꠣꠃꠔ ꠉꠦꠟꠦ ꠢꠘꠞ ꠝꠣꠘꠡꠦ ꠎꠥꠖꠤ ꠔꠥꠝꠞꠣꠞꠦ ꠇꠛꠥꠟ ꠘꠣ ꠇꠞꠂꠘ, ꠔꠦ ꠉꠣꠃꠔ ꠀꠐꠤ ꠀꠐꠤ ꠅꠈꠣꠘ ꠇꠁꠅ,
LUK 10:11 ꠢꠛꠣ, ꠔꠥꠝꠞꠣꠞ ꠉꠣꠃꠞ ꠎꠦ ꠗꠥꠁꠟ ꠀꠝꠞꠣꠞ ꠙꠣꠅꠔ ꠟꠣꠉꠍꠦ, ꠁꠔꠣ ꠀꠝꠞꠣ ꠚꠥꠍꠤꠀ ꠚꠣꠟꠣꠁ ꠖꠤꠞꠣꠝ, ꠅꠃ ꠗꠥꠁꠟꠦꠃ ꠔꠥꠝꠞꠣꠞ ꠛꠤꠙꠇ꠆ꠇꠦ ꠡꠣꠇ꠆ꠇꠤ ꠖꠤꠛ। ꠅꠁꠟꠦ ꠝꠘꠅ ꠞꠣꠈꠤꠅ, ꠀꠟ꠆ꠟꠣꠞ ꠛꠣꠖꠡꠣꠁ ꠇꠣꠘ꠆ꠖꠣꠔ ꠀꠁꠌ꠆ꠍꠦ।
LUK 10:12 ꠀꠝꠤ ꠔꠥꠝꠞꠣꠞꠦ ꠇꠁꠞꠣꠝ, ꠇꠤꠀꠝꠔꠞ ꠖꠤꠘ ꠟꠣꠘ꠆ꠘꠔꠤ ꠍꠣꠖꠥꠝ ꠐꠣꠃꠘꠞ ꠖꠡꠣ ꠕꠣꠇꠤ, ꠢꠤ ꠉꠣꠃꠞ ꠖꠡꠣ ꠀꠞꠅ ꠇꠑꠤꠘ ꠅꠁꠛ।
LUK 10:13 “ꠢꠣꠄꠞꠦ ꠛꠣꠄꠔ-ꠍꠄꠖꠣ ꠀꠞ ꠈꠥꠞꠣꠍꠤꠘ ꠉꠣꠃ, ꠔꠥꠝꠞꠣ ꠔ ꠟꠣꠘ꠆ꠘꠔꠤ। ꠔꠥꠝꠞꠣꠞ ꠝꠣꠎꠦ ꠎꠦꠔꠣ ꠇꠥꠖꠞꠔꠤ ꠇꠣꠝ ꠖꠦꠈꠣꠁꠟ ꠅꠁꠍꠦ, ꠁꠔꠣ ꠡꠥꠞ ꠀꠞ ꠍꠤꠖꠘ ꠄꠟꠣꠇꠣꠔ ꠖꠦꠈꠣꠁꠟ ꠅꠁꠟꠦ, ꠔꠣꠞꠣ ꠇꠣꠔꠞ ꠅꠁꠀ ꠔꠃꠛꠣ ꠇꠞꠟ ꠅꠘꠦ।
LUK 10:14 ꠀꠍꠟꠦ ꠇꠤꠀꠝꠔꠞ ꠖꠤꠘ ꠡꠥꠞ ꠀꠞ ꠍꠤꠖꠘ ꠄꠟꠣꠇꠣꠞ ꠖꠡꠣ ꠕꠣꠇꠤꠅ, ꠔꠥꠝꠞꠣꠞ ꠖꠡꠣ ꠛꠃꠔ ꠇꠑꠤꠘ ꠅꠁꠛ।
LUK 10:15 ꠀꠞ ꠅ ꠇꠚꠞꠘꠣꠃꠝ ꠐꠣꠃꠘ, ꠔꠥꠝꠤ ꠛꠥꠟꠦ ꠃꠌꠣ ꠅꠁꠀ ꠀꠍꠝꠣꠘꠅ ꠉꠤꠀ ꠟꠣꠉꠔꠣꠄ? ꠘꠣ, ꠙꠣꠞꠔꠣꠄ ꠘꠣꠄ! ꠔꠥꠝꠣꠞꠦ ꠙꠣꠔꠣꠟꠅ ꠟꠣꠝꠣꠁꠟ ꠅꠁꠛ।
LUK 10:16 “ꠔꠥꠝꠞꠣ ꠝꠘꠅ ꠞꠣꠈꠤꠅ, ꠎꠦꠞꠣ ꠔꠥꠝꠞꠣꠞ ꠇꠕꠣ ꠝꠣꠘꠦ, ꠔꠣꠞꠣ ꠀꠍꠟꠦ ꠀꠝꠣꠞ ꠇꠕꠣꠃ ꠝꠣꠘꠦ। ꠀꠞ ꠎꠦꠞꠣ ꠔꠥꠝꠞꠣꠞꠦ ꠝꠣꠘꠦ ꠘꠣ, ꠔꠣꠞꠣ ꠀꠝꠣꠞꠦꠅ ꠝꠣꠘꠦ ꠘꠣ। ꠎꠦꠞꠣ ꠀꠝꠣꠞꠦ ꠝꠣꠘꠦ ꠘꠣ, ꠔꠣꠞꠣ ꠀꠍꠟꠦ ꠢꠃ ꠀꠟ꠆ꠟꠣꠞꠦꠅ ꠝꠣꠘꠦ ꠘꠣ, ꠎꠦꠁꠘ ꠀꠝꠣꠞꠦ ꠛꠦꠎꠤꠍꠂꠘ।”
LUK 10:17 ꠛꠣꠖꠦ ꠢꠤ ꠡꠔ꠆ꠔꠁꠞꠎꠘ ꠡꠣꠉꠞꠤꠖꠦ ꠔꠛꠟꠤꠉ ꠇꠞꠤꠀ ꠈꠥꠛ ꠈꠥꠡ ꠝꠤꠎꠣꠎꠦ ꠚꠤꠞꠔ ꠀꠁꠟꠣ। ꠀꠁꠀ ꠇꠁꠟꠣ, “ꠢꠥꠎꠥꠞ, ꠀꠙꠘꠣꠞ ꠘꠣꠝ ꠢꠥꠘꠟꠦ ꠎꠤꠘ-ꠜꠥꠔꠦꠅ ꠀꠝꠞꠣꠞ ꠇꠕꠣ ꠝꠣꠘꠦ।”
LUK 10:18 ꠁꠍꠣꠄ ꠔꠣꠞꠣꠞꠦ ꠇꠁꠟꠣ, “ꠢꠥꠘꠅ, ꠀꠝꠤ ꠖꠦꠈꠍꠤ, ꠁꠛꠟꠤꠍ-ꠡꠄꠔꠣꠘ ꠝꠦꠊꠞ ꠎꠤꠟꠇꠤꠞ ꠟꠣꠈꠣꠘ ꠛꠦꠢꠦꠡ꠆ꠔ ꠕꠣꠇꠤ ꠙꠠꠤꠎꠣꠞ।
LUK 10:19 ꠔꠦ ꠀꠝꠤ ꠔꠥꠝꠞꠣꠞꠦ ꠢꠣꠚ-ꠛꠤꠌ꠆ꠍꠥꠞ ꠃꠙꠞꠦꠖꠤ ꠀꠐꠣꠞ ꠈꠦꠝꠔꠣ ꠖꠤꠍꠤ, ꠀꠞ ꠔꠥꠝꠞꠣꠞ ꠖꠥꠡꠝꠘ, ꠁꠛꠟꠤꠍꠞ ꠢꠇꠟ ꠡꠇ꠆ꠔꠤꠞ ꠃꠙꠞꠦ ꠔꠥꠝꠞꠣꠞꠦ ꠈꠦꠝꠔꠣ ꠖꠤꠍꠤ। ꠇꠥꠘꠥꠎꠣꠔ ꠇꠥꠘ꠆ꠔꠣꠄꠃ ꠔꠥꠝꠞꠣꠞ ꠈꠦꠔꠤ ꠇꠞꠔ ꠙꠣꠞꠔ ꠘꠣꠄ।
LUK 10:20 ꠀꠞ ꠎꠤꠘ-ꠜꠥꠔꠦ ꠔꠥꠝꠞꠣꠞ ꠇꠕꠣ ꠢꠥꠘꠦꠞ ꠖꠦꠈꠤꠀ ꠈꠥꠡꠤ ꠘꠣ ꠅꠁꠀ, ꠛꠞꠋ ꠛꠦꠢꠦꠡ꠆ꠔꠤ ꠈꠣꠔꠣꠔ ꠔꠥꠝꠞꠣꠞ ꠘꠣꠝ ꠟꠦꠈꠣ ꠅꠁꠍꠦ ꠇꠞꠤꠃ ꠈꠥꠡꠤ ꠇꠞꠅ।”
LUK 10:21 ꠅꠃ ꠡꠝꠄ ꠁꠍꠣꠅ ꠙꠣꠇ ꠞꠥꠢꠥꠞ ꠛꠟꠦ ꠈꠥꠡꠤ ꠅꠁꠀ ꠇꠁꠟꠣ, “ꠅ ꠉꠣꠁꠛꠤ ꠛꠣꠛꠣ, ꠔꠥꠝꠤꠃ ꠔ ꠀꠍꠝꠣꠘ-ꠎꠝꠤꠘꠞ ꠝꠣꠟꠤꠇ। ꠀꠝꠤ ꠔꠥꠝꠣꠞ ꠡꠥꠇꠞꠤꠀ ꠀꠖꠣꠄ ꠇꠞꠞꠣꠝ, ꠇꠣꠞꠘ ꠔꠥꠝꠤ ꠀꠈꠟꠖꠣꠞ-ꠛꠥꠖ꠆ꠖꠤꠝꠣꠘ ꠅꠇꠟꠞ ꠉꠦꠍꠦ ꠁꠔꠣ ꠎꠣꠁꠞ ꠘꠣ ꠇꠞꠤꠀ, ꠛꠦꠛꠥꠎ-ꠢꠥꠞꠥꠔ꠆ꠔꠣꠞ ꠟꠣꠈꠣꠘ ꠝꠣꠘꠡꠞ ꠉꠦꠍꠦ ꠎꠣꠁꠞ ꠇꠞꠍ। ꠛꠣꠛꠣ, ꠀꠍꠟꠦ ꠔ ꠁꠔꠣ ꠢꠇꠟꠔꠣꠃ ꠔꠥꠝꠣꠞ ꠝꠞ꠆ꠎꠤ।
LUK 10:22 ꠀꠝꠣꠞ ꠉꠣꠁꠛꠤ ꠛꠣꠛꠣꠄ ꠢꠇꠟꠔꠣꠃ ꠀꠝꠣꠞ ꠀꠔꠅ ꠡꠙꠤ ꠖꠤꠍꠂꠘ। ꠛꠣꠚ ꠍꠣꠠꠣ ꠖꠥꠍꠞꠣ ꠇꠦꠃ ꠎꠣꠘꠦ ꠘꠣ ꠅꠃ ꠙꠥꠔ ꠇꠦ, ꠀꠞ ꠙꠥꠔ ꠍꠣꠠꠣ ꠖꠥꠍꠞꠣ ꠇꠦꠃ ꠎꠣꠘꠦ ꠘꠣ ꠅꠃ ꠛꠣꠚ ꠇꠦ। ꠙꠥꠔꠦ ꠛꠣꠚꠞꠦ ꠎꠣꠞ ꠉꠦꠍꠦ ꠎꠣꠁꠞ ꠇꠞꠣꠞ ꠈꠤꠀꠟ ꠅꠄ, ꠈꠣꠟꠤ ꠢꠦ-ꠃ ꠛꠣꠚꠞ ꠙꠞꠤꠌꠄ ꠙꠣꠄ।”
LUK 10:23 ꠛꠣꠖꠦ ꠔꠣꠁꠘ ꠡꠣꠉꠞꠤꠖ ꠅꠇꠟꠞ ꠛꠣꠄ ꠚꠤꠞꠤꠀ ꠇꠣꠘꠦ ꠇꠣꠘꠦ ꠇꠁꠟꠣ, “ꠔꠥꠝꠞꠣ ꠎꠦꠔꠣ ꠎꠦꠔꠣ ꠖꠦꠈꠍ, ꠁꠔꠣ ꠖꠦꠈꠣꠞ ꠡꠥꠎꠥꠉ ꠎꠣꠞ ꠅꠄ, ꠢꠦ-ꠃ ꠘꠦꠇ-ꠇꠙꠣꠟꠤ।
LUK 10:24 ꠀꠝꠤ ꠔꠥꠝꠞꠣꠞꠦ ꠇꠁꠞꠣꠝ, ꠔꠥꠝꠞꠣ ꠎꠦꠔꠣ ꠖꠦꠈꠞꠣꠄ, ꠁꠔꠣ ꠛꠃꠔ ꠘꠛꠤꠄ ꠀꠞ ꠞꠣꠎꠣ-ꠛꠣꠖꠡꠣꠄ ꠖꠦꠈꠣꠞ ꠀꠡꠣ ꠇꠞꠟꠦꠅ, ꠖꠦꠈꠣꠞ ꠇꠙꠣꠟ ꠅꠁꠍꠦ ꠘꠣ। ꠔꠥꠝꠞꠣ ꠎꠦꠔꠣ ꠢꠥꠘꠞꠣꠄ, ꠁꠔꠣ ꠔꠣꠞꠣ ꠢꠥꠘꠔꠦ ꠌꠣꠁꠟꠦꠅ ꠢꠥꠘꠣꠞ ꠇꠙꠣꠟ ꠅꠁꠍꠦ ꠘꠣ।”
LUK 10:25 ꠄꠇꠛꠣꠞ ꠄꠇ ꠀꠟꠤꠝ ꠍꠣꠛ ꠁꠍꠣꠞ ꠉꠦꠍꠦ ꠀꠁꠟꠣ। ꠀꠁꠀ ꠔꠣꠘꠞꠦ ꠙꠞꠤꠇ꠆ꠇꠣ ꠇꠞꠣꠞ ꠟꠣꠉꠤ ꠎꠤꠇꠣꠁꠟꠣ, “ꠢꠥꠎꠥꠞ, ꠇꠤꠔꠣ ꠇꠣꠝ ꠇꠞꠟꠦ ꠀꠝꠤ ꠛꠦꠢꠦꠡ꠆ꠔ ꠙꠣꠁꠝꠥ?”
LUK 10:26 ꠁꠍꠣꠄ ꠇꠁꠟꠣ, “ꠝꠥꠍꠣ ꠘꠛꠤꠞ ꠇꠤꠔꠣꠛꠅ ꠇꠤꠔꠣ ꠟꠦꠈꠣ ꠀꠍꠦ? ꠀꠙꠘꠦ ꠇꠤꠔꠣ ꠙꠣꠁꠍꠂꠘ?”
LUK 10:27 ꠀꠟꠤꠝꠦ ꠎꠥꠀꠙ ꠖꠤꠟꠣ, “ꠟꠦꠈꠣ ꠀꠍꠦ, ꠔꠥꠝꠤ ꠔꠥꠝꠣꠞ ꠀꠡ꠆ꠔꠣ ꠖꠤꠟ ꠖꠤꠀ, ꠎꠣꠘ ꠖꠤꠀ, ꠢꠇꠟ ꠛꠟ-ꠡꠇ꠆ꠔꠤ ꠖꠤꠀ, ꠔꠥꠝꠣꠞ ꠡꠥꠟ꠆ꠟꠀꠘꠣ ꠝꠘ ꠖꠤꠀ, ꠔꠥꠝꠣꠞ ꠝꠣꠛꠥꠖ ꠀꠟ꠆ꠟꠣꠞꠦ ꠝꠢꠛ꠆ꠛꠔ ꠇꠞꠛꠣꠄ। ꠀꠞ, ꠔꠥꠝꠣꠞ ꠀꠞꠤ-ꠚꠞꠤꠞꠦ ꠘꠤꠎꠞ ꠟꠣꠈꠣꠘ ꠝꠣꠄꠀ ꠇꠞꠛꠣꠄ।”
LUK 10:28 ꠁꠍꠣꠄ ꠔꠣꠘꠞꠦ ꠇꠁꠟꠣ, “ꠀꠙꠘꠦ ꠑꠤꠇ ꠇꠕꠣ ꠇꠁꠍꠂꠘ। ꠔꠦ ꠀꠙꠘꠦꠅ ꠅꠃꠟꠣ ꠇꠞꠃꠇ꠆ꠇꠣ, ꠔꠦꠃ ꠛꠦꠢꠦꠡ꠆ꠔ ꠙꠣꠁꠛꠣ।”
LUK 10:29 ꠅꠃ ꠀꠟꠤꠝꠦ ꠘꠤꠎꠞ ꠖꠣꠝ ꠛꠣꠠꠣꠘꠤꠞ ꠟꠣꠉꠤ ꠁꠍꠣꠞꠦ ꠇꠁꠟꠣ, “ꠀꠁꠌ꠆ꠍꠣ, ꠔꠦ ꠀꠝꠣꠞ ꠀꠞꠤ-ꠚꠞꠤ ꠇꠦ?”
LUK 10:30 ꠁꠍꠣꠄ ꠇꠁꠟꠣ, “ꠢꠥꠘꠃꠇ꠆ꠇꠣ, ꠄꠇꠎꠘ ꠝꠣꠘꠥꠡ ꠎꠦꠞꠥꠎꠣꠟꠦꠝ ꠕꠣꠇꠤ ꠎꠤꠞꠤꠢꠅ ꠐꠣꠃꠘꠅ ꠎꠣꠅꠀꠔ ꠀꠍꠤꠟ। ꠙꠕꠅ ꠒꠣꠇꠣꠁꠔꠦ ꠙꠣꠁꠀ ꠔꠣꠞ ꠇꠣꠙꠠ-ꠌꠥꠙꠠ ꠢꠇꠟꠔꠣ ꠇꠣꠠꠤꠀ ꠘꠤꠀ, ꠔꠣꠞꠦ ꠝꠣꠞꠤꠀ ꠀꠗ-ꠝꠞꠣ ꠇꠞꠤ ꠚꠣꠟꠣꠁ ꠕꠁꠀ ꠉꠦꠟꠉꠤ।
LUK 10:31 ꠛꠣꠖꠦ ꠄꠇ ꠁꠝꠣꠝ ꠍꠣꠛ ꠅꠃ ꠙꠕꠦꠖꠤ ꠎꠣꠁꠞꠣ, ꠔꠣꠁꠘ ꠅꠃ ꠛꠦꠐꠣꠞꠦ ꠖꠦꠈꠤꠀ ꠉꠣꠟꠣꠛꠣꠄ ꠢꠞꠤꠀ ꠉꠦꠟꠣꠉꠤ।
LUK 10:32 ꠅꠃ ꠟꠣꠈꠣꠘ ꠟꠦꠛꠤꠞ ꠈꠣꠘ꠆ꠖꠣꠘꠞ ꠄꠇ ꠈꠣꠖꠤꠝ ꠍꠣꠛꠅ ꠅꠃ ꠙꠕꠦꠖꠤ ꠀꠁꠟꠣ, ꠔꠣꠁꠘꠅ ꠄꠞꠦ ꠖꠦꠈꠤꠀ ꠉꠣꠟꠣꠛꠣꠄ ꠉꠦꠟꠣꠉꠤ।
LUK 10:33 ꠢꠦꠡꠦ ꠡꠝꠞꠤꠀ ꠎꠣꠔꠤꠞ ꠄꠇ ꠛꠦꠐꠣ ꠅꠃ ꠙꠕꠦꠖꠤ ꠀꠁꠟ, ꠢꠦ ꠛꠤꠗꠞ꠆ꠝꠤ ꠎꠣꠔꠤꠞ ꠅꠁꠟꠦꠅ ꠄꠞ ꠢꠣꠟꠔ ꠖꠦꠈꠤꠀ ꠔꠣꠞ ꠖꠤꠟꠅ ꠖꠞꠖ ꠢꠣꠝꠣꠁꠟ।
LUK 10:34 ꠅꠃ ꠢꠦ ꠄꠞ ꠎꠈꠝꠞ ꠃꠙꠞꠦ ꠔꠦꠟ ꠀꠞ ꠀꠋꠉꠥꠞꠞ ꠞꠡ ꠝꠣꠟꠤꠡ ꠇꠞꠤꠀ ꠙꠐ꠆ꠐꠤ ꠛꠣꠘ꠆ꠖꠤꠀ ꠖꠤꠟ। ꠛꠣꠖꠦ ꠔꠣꠞ ꠘꠤꠎꠞ ꠉꠣꠗꠣꠞ ꠃꠙꠞꠦ ꠔꠥꠟꠤꠀ, ꠄꠇ ꠝꠥꠍꠣꠚꠤꠞ ꠈꠣꠘꠣꠔ ꠘꠤꠀ ꠔꠣꠞ ꠎꠔꠘ ꠇꠞꠟ।
LUK 10:35 ꠛꠣꠖꠞ ꠖꠤꠘ ꠅꠃ ꠡꠝꠞꠤꠅ ꠛꠦꠐꠣꠄ ꠝꠥꠍꠣꠚꠤꠞ ꠈꠣꠘꠣꠞ ꠝꠣꠟꠤꠇꠞ ꠀꠔꠅ ꠖꠥꠁꠐꠣ ꠖꠤꠘꠣꠞ ꠖꠤꠀ ꠇꠁꠟ, ꠅꠃ ꠝꠣꠘꠥꠡꠉꠥꠞ ꠎꠔꠘ ꠇꠞꠛꠣ। ꠄꠞ ꠛꠦꠡꠤ ꠈꠞꠌ ꠅꠁꠟꠦꠅ, ꠀꠝꠤ ꠀꠁꠀ ꠖꠤꠝꠥ।
LUK 10:36 “ꠔꠦ ꠀꠟꠤꠝ ꠍꠣꠛ, ꠀꠙꠘꠣꠞ ꠇꠤꠔꠣ ꠝꠘꠅ ꠅꠄ, ꠅꠃ ꠔꠤꠘꠎꠘꠞ ꠝꠣꠎꠦ ꠇꠥꠘ ꠎꠘ, ꠒꠣꠇꠣꠁꠔꠞ ꠀꠔꠅ ꠙꠤꠐꠣ ꠈꠣꠅꠞꠣ ꠛꠦꠐꠣꠞ ꠀꠞꠤ-ꠚꠞꠤ?”
LUK 10:37 ꠀꠟꠤꠝꠦ ꠇꠁꠟꠣ, “ꠎꠦ ꠝꠣꠘꠡꠦ ꠔꠣꠞꠦ ꠖꠞꠖ ꠇꠞꠟ ꠢꠦ-ꠃ ꠔ।” ꠔꠦꠃ ꠁꠍꠣꠄ ꠇꠁꠟꠣ, “ꠔꠦ ꠀꠙꠘꠦꠅ ꠉꠤꠀ ꠅꠃꠟꠣ ꠇꠞꠃꠇ꠆ꠇꠣ।”
LUK 10:38 ꠛꠣꠖꠦ ꠁꠍꠣ ꠀꠞ ꠔꠣꠘ ꠍꠣꠢꠣꠛꠤ ꠅꠇꠟ ꠀꠐꠤ ꠀꠐꠤ ꠄꠇ ꠉꠣꠃꠔ ꠉꠦꠟꠣ। ꠢꠃ ꠉꠣꠃꠞ ꠄꠇ ꠛꠦꠐꠤ ꠝꠣꠘꠡꠦ ꠈꠥꠡꠤ ꠅꠁꠀ ꠁꠍꠣꠞꠦ ꠔꠣꠘ ꠛꠣꠠꠤꠔ ꠘꠤꠀ ꠝꠦꠝꠣꠘꠖꠣꠞꠤ ꠇꠞꠟꠣ। ꠅꠃ ꠛꠦꠐꠤꠞ ꠘꠣꠝ ꠝꠣꠞꠕꠣ।
LUK 10:39 ꠛꠦꠐꠤꠞ ꠄꠇ ꠛꠁꠘꠞ ꠘꠣꠝ ꠅꠁꠟ ꠝꠞꠤꠅꠝ, ꠄꠁꠘ ꠢꠥꠎꠥꠞꠞ ꠙꠣꠅꠞ ꠇꠣꠘ꠆ꠖꠣꠔ ꠛꠁꠀ ꠘꠍꠤꠅꠔ ꠢꠥꠘꠞꠣ।
LUK 10:40 ꠀꠞ ꠝꠣꠞꠕꠣ ꠉꠤꠀ ꠞꠣꠘ꠆ꠖꠣ-ꠛꠣꠠꠣ ꠀꠞ ꠈꠣꠔꠤꠞ-ꠎꠔꠘ ꠇꠞꠣꠔ ꠙꠦꠞꠦꠡꠣꠘꠤꠔ ꠞꠁꠟꠣ। ꠄꠞꠝꠣꠎꠦ ꠝꠣꠞꠕꠣ ꠀꠁꠀ ꠢꠥꠎꠥꠞ ꠁꠍꠣꠞꠦ ꠇꠁꠟꠣ, “ꠢꠥꠎꠥꠞ, ꠖꠦꠈꠞꠣ ꠘꠤ ꠀꠝꠣꠞ ꠛꠁꠘꠦ ꠢꠇ꠆ꠇꠟ ꠇꠣꠝ-ꠇꠣꠎ ꠄꠇꠟꠣ ꠀꠝꠣꠞ ꠃꠙꠞꠦ ꠕꠁꠀ ꠅꠘꠅ ꠀꠁꠍꠦ? ꠔꠦ ꠀꠙꠘꠦ ꠇꠃꠇ꠆ꠇꠣ, ꠀꠝꠣꠞꠦ ꠡꠣꠁꠎ꠆ꠎ ꠇꠞꠔ।”
LUK 10:41 ꠢꠥꠎꠥꠞꠦ ꠇꠁꠟꠣ, “ꠝꠣꠞꠕꠣ, ꠔꠥꠝꠤ ꠛꠃꠔ ꠛꠦꠙꠣꠞꠦ ꠌꠤꠘ꠆ꠔꠣ ꠇꠞꠤꠀ ꠙꠦꠞꠦꠡꠣꠘ ꠅꠁꠉꠦꠍ।
LUK 10:42 ꠢꠥꠘꠅ, ꠀꠍꠟꠦ ꠄꠇꠐꠣ ꠛꠦꠙꠣꠞꠃ ꠈꠣꠟꠤ ꠎꠞꠥꠞ ꠀꠍꠦ। ꠔꠥꠝꠣꠞ ꠛꠁꠘ ꠝꠞꠤꠅꠝꠦ ꠢꠃ ꠎꠞꠥꠞꠤ ꠛꠦꠙꠣꠞꠞꠦ ꠙꠍꠘ꠆ꠖ ꠇꠞꠍꠦ। ꠁꠔꠣ ꠔ ꠔꠣꠁꠞ ꠉꠦꠍ ꠕꠣꠇꠤ ꠇꠣꠠꠤꠀ ꠘꠦꠅꠀ ꠎꠣꠁꠔ ꠘꠣꠄ।”
LUK 11:1 ꠄꠇꠖꠤꠘ ꠢꠥꠎꠥꠞ ꠁꠍꠣꠄ ꠇꠥꠘꠥ ꠄꠇ ꠎꠣꠉꠣꠔ ꠖꠥꠀ ꠇꠞꠣꠔ ꠀꠍꠟꠣ। ꠖꠥꠀ ꠡꠦꠡ ꠅꠁꠀ ꠢꠣꠞꠟꠦ ꠔꠣꠘ ꠄꠇ ꠍꠣꠢꠣꠛꠤꠄ ꠇꠁꠟꠣ, “ꠢꠥꠎꠥꠞ, ꠄꠢꠤꠀ ꠘꠛꠤꠄ ꠔ ꠔꠣꠘ ꠍꠣꠢꠣꠛꠤꠞꠦ ꠖꠥꠀ ꠇꠞꠣ ꠢꠤꠇꠣꠁꠔꠣ, ꠔꠦ ꠀꠙꠘꠦꠅ ꠀꠝꠞꠣꠞꠦ ꠖꠥꠀ ꠇꠞꠣ ꠢꠤꠇꠣꠃꠇ꠆ꠇꠣ।”
LUK 11:2 ꠁꠍꠣꠄ ꠄꠞꠣꠞꠦ ꠇꠁꠟꠣ, “ꠖꠥꠀ ꠇꠞꠣꠞ ꠡꠝꠄ ꠔꠥꠝꠞꠣ ꠅꠃꠟꠣ ꠇꠁꠅ, ꠅ ꠀꠍꠝꠣꠘꠤ ꠛꠣꠛꠣ, ꠔꠥꠝꠣꠞ ꠘꠣꠝ ꠙꠛꠤꠔ꠆ꠞ ꠇꠁꠀ ꠝꠣꠘꠣ ꠅꠃꠇ, ꠖꠥꠘꠤꠀꠔ ꠔꠥꠝꠣꠞ ꠛꠣꠖꠡꠣꠁ ꠇꠣꠁꠝ ꠅꠃꠇ।
LUK 11:3 ꠀꠝꠞꠣꠞ ꠙꠞꠔꠦꠇ ꠖꠤꠘꠞ ꠞꠤꠎꠦꠇ ꠙꠞꠔꠤꠖꠤꠘ ꠎꠥꠉꠣꠁ ꠖꠤꠅ;
LUK 11:4 ꠛꠣꠛꠣ, ꠀꠝꠞꠣꠞ ꠔꠣꠝꠣꠝ ꠉꠥꠘꠣꠞꠦ ꠝꠣꠚ ꠇꠞꠤꠀ ꠖꠤꠟꠣꠅ, ꠎꠦꠟꠣ ꠀꠝꠞꠣꠅ ꠝꠣꠚꠤ ꠖꠤꠟꠣꠁꠍꠤ ꠀꠝꠞꠣꠞ ꠅꠙꠞꠣꠗꠤ ꠅꠇꠟꠞꠦ; ꠀꠞ ꠙꠞꠤꠇ꠆ꠇꠣ ꠕꠣꠇꠤ ꠢꠦꠚꠣꠎꠔ ꠇꠞꠅ ꠀꠝꠞꠣꠞꠦ।”
LUK 11:5 ꠛꠣꠖꠦ ꠁꠍꠣꠄ ꠔꠣꠞꠣꠞꠦ ꠇꠁꠟꠣ, “ꠗꠞꠤꠟꠣꠅ, ꠀꠗꠣ ꠞꠣꠁꠔꠇꠥꠞ ꠛꠣꠟꠣ ꠔꠥꠝꠞꠣꠞ ꠇꠥꠘꠥ ꠖꠥꠡ꠆ꠔꠞ ꠛꠣꠠꠤꠔ ꠉꠤꠀ ꠇꠁꠟꠣꠄ, ꠖꠥꠡ꠆ꠔ, ꠀꠝꠣꠞꠦ ꠔꠤꠘꠈꠣꠘ ꠞꠥꠐꠤ ꠇꠞꠎ ꠖꠦꠅ।
LUK 11:6 ꠀꠝꠣꠞ ꠄꠇ ꠛꠘ꠆ꠖꠥ ꠙꠕꠦꠖꠤ ꠎꠣꠅꠀꠞ ꠛꠣꠟꠣ ꠀꠈꠔꠣꠃ ꠀꠝꠣꠞ ꠛꠣꠠꠤꠔ ꠃꠑꠍꠂꠘ। ꠅꠈꠘ ꠔꠣꠘꠦ ꠇꠤꠔꠣ ꠈꠣꠅꠀꠁꠔꠣꠝ, ꠀꠝꠣꠞ ꠊꠞꠅ ꠔ ꠇꠥꠘ꠆ꠔꠣ ꠘꠣꠁ।
LUK 11:7 ꠔꠦꠃ ꠖꠥꠡ꠆ꠔꠦ ꠊꠞꠅ ꠕꠘꠦ ꠎꠥꠀꠙ ꠖꠤꠟꠣ, ꠀꠝꠤ ꠖꠞꠎꠣ ꠛꠘ꠆ꠖ ꠇꠞꠤꠀ ꠀꠝꠣꠞ ꠢꠥꠞꠥꠔ꠆ꠔꠣꠁꠘ ꠟꠁꠀ ꠢꠥꠔꠤꠞꠁꠍꠤ, ꠀꠝꠣꠞꠦ ꠇꠡ꠆ꠐ ꠖꠤꠅ ꠘꠣ। ꠅꠈꠘ ꠃꠑꠤꠀ ꠇꠥꠘ꠆ꠔꠣ ꠖꠤꠔꠣꠝ ꠙꠣꠞꠔꠣꠝ ꠘꠣꠄ।
LUK 11:8 ꠅꠁꠟꠦ ꠀꠝꠤ ꠇꠁꠞꠣꠝ, ꠅꠃ ꠖꠥꠡ꠆ꠔꠦ ꠃꠑꠤꠀ ꠛꠘ꠆ꠖꠥ ꠢꠤꠡꠣꠛꠦ ꠇꠥꠘ꠆ꠔꠣ ꠖꠤꠔꠦ ꠘꠣ ꠌꠣꠁꠟꠦꠅ, ꠔꠥꠝꠤ ꠛꠣꠞ ꠛꠣꠞ ꠝꠤꠘꠔ ꠇꠞꠟꠦ ꠢꠦ ꠃꠑꠛꠃ। ꠃꠑꠤꠀ ꠔꠥꠝꠤ ꠎꠦꠔꠣ ꠌꠣꠁꠞꠣꠄ, ꠁꠔꠣ ꠑꠤꠇꠃ ꠖꠤꠛ।
LUK 11:9 “ꠔꠦ ꠀꠝꠤ ꠔꠥꠝꠞꠣꠞꠦ ꠇꠁꠞꠣꠝ, ꠔꠥꠝꠞꠣ ꠌꠣꠅ, ꠔꠦꠃ ꠖꠦꠅꠀ ꠅꠁꠛ। ꠔꠣꠟ꠆ꠟꠣꠡ ꠇꠞꠅ, ꠔꠦꠃ ꠙꠣꠁꠛꠣꠄ। ꠖꠥꠀꠞꠅ ꠑꠥꠇꠣ ꠖꠦꠅ, ꠔꠥꠝꠞꠣꠞ ꠟꠣꠉꠤ ꠖꠥꠀꠞ ꠈꠥꠟꠣ ꠅꠁꠛ।
LUK 11:10 ꠎꠣꠞꠣ ꠌꠣꠄ, ꠔꠣꠞꠣꠃ ꠔ ꠙꠣꠄ। ꠎꠦ ꠔꠣꠟ꠆ꠟꠣꠡ ꠇꠞꠦ ꠢꠦ ꠙꠣꠄ। ꠎꠦ ꠖꠥꠀꠞꠅ ꠑꠥꠇꠣ ꠖꠦꠄ, ꠔꠣꠞ ꠟꠣꠉꠤ ꠖꠥꠀꠞ ꠈꠥꠟꠣ ꠅꠄ।
LUK 11:11 ꠔꠥꠝꠞꠣꠞ ꠝꠣꠎꠦ ꠁꠟꠣ ꠇꠥꠘꠥ ꠛꠣꠚ ꠀꠍꠦ ꠘꠤ, ꠎꠣꠞ ꠙꠥꠔꠦ ꠞꠥꠐꠤ ꠌꠣꠁꠟꠦ ꠔꠣꠞꠦ ꠝꠣꠐꠤ ꠖꠤꠛ, ꠝꠣꠍ ꠌꠣꠁꠟꠦ ꠢꠣꠚ ꠖꠤꠛ,
LUK 11:12 ꠛꠣ ꠄꠘ꠆ꠒꠣ ꠌꠣꠁꠟꠦ ꠛꠤꠍꠣ ꠖꠤꠛ?
LUK 11:13 ꠔꠦ ꠔꠥꠝꠞꠣ ꠘꠣꠚꠞꠝꠣꠘ ꠅꠁꠀꠅ ꠎꠥꠖꠤ ꠔꠥꠝꠞꠣꠞ ꠢꠥꠞꠥꠔ꠆ꠔꠣꠁꠘꠞꠦ ꠜꠣꠟꠣ ꠜꠣꠟꠣ ꠌꠤꠎ ꠖꠤꠔꠣꠄ ꠎꠣꠘ, ꠔꠦ ꠎꠣꠞꠣ ꠛꠦꠢꠦꠡ꠆ꠔꠤ ꠛꠣꠚꠞ ꠉꠦꠍꠦ ꠌꠣꠁꠛ, ꠔꠣꠁꠘ ꠘꠤꠌꠄ ꠔꠣꠞꠣꠞꠦ ꠙꠣꠇ ꠞꠥꠢꠥ ꠖꠣꠘ ꠇꠞꠛꠣꠃ।”
LUK 11:14 ꠄꠇꠖꠤꠘ ꠄꠇ ꠛꠦꠐꠣꠞ ꠟꠉ ꠕꠣꠇꠤꠀ ꠁꠍꠣꠄ ꠄꠇ ꠛꠥꠛꠣ ꠎꠤꠘ꠆ꠘꠣꠔ ꠍꠣꠠꠣꠁꠟꠣ। ꠎꠤꠘ꠆ꠘꠣꠔꠦ ꠍꠣꠠꠣꠞ ꠛꠣꠖꠦ ꠢꠤ ꠛꠦꠐꠣꠞ ꠎꠛꠣꠘ ꠈꠥꠟꠤꠉꠦꠟ, ꠝꠣꠔ-ꠇꠕꠣ ꠝꠣꠔꠤꠟ। ꠁꠔꠣ ꠖꠦꠈꠤꠀ ꠝꠣꠘꠥꠡ ꠔꠣꠁꠎ꠆ꠎꠥꠛ ꠛꠘꠤꠉꠦꠟꠣ।
LUK 11:15 ꠅꠁꠟꠦ ꠇꠥꠘꠥ ꠇꠥꠘꠥ ꠝꠣꠘꠡꠦ ꠇꠁꠟ, “ꠁ ꠛꠦꠐꠣꠄ ꠎꠤꠘꠞ ꠛꠣꠖꠡꠣ ꠛꠦꠟ-ꠍꠛꠥꠟꠞ ꠛꠟꠦ ꠎꠤꠘ ꠍꠣꠠꠣꠄ।”
LUK 11:16 ꠀꠞꠅ ꠇꠁꠄꠇ ꠎꠘꠦ ꠔꠣꠘꠞꠦ ꠙꠞꠤꠇ꠆ꠇꠣ ꠇꠞꠣꠞ ꠘꠤꠅꠔꠦ, ꠔꠣꠘ ꠀꠔꠞ ꠇꠥꠘꠥ ꠇꠦꠞꠣꠝꠔꠤ ꠖꠦꠈꠔ ꠌꠣꠁꠟ।
LUK 11:17 ꠁꠍꠣꠄ ꠔꠣꠞꠣꠞ ꠖꠤꠟꠞ ꠜꠣꠛ ꠛꠥꠎꠤꠟꠤꠟꠣ। ꠛꠥꠎꠤꠀ ꠇꠁꠟꠣ, “ꠇꠥꠘꠥ ꠞꠣꠁꠎ꠆ꠎ ꠘꠤꠎꠦ ꠘꠤꠎꠦ ꠜꠣꠉ ꠅꠁꠉꠦꠟꠦ, ꠁ ꠞꠣꠁꠎ꠆ꠎ ꠛꠤꠘꠣꠡ ꠅꠁꠎꠣꠄ। ꠅꠃꠟꠣ ꠇꠥꠘꠥ ꠙꠞꠤꠛꠣꠞꠅ ꠎꠦꠛꠟꠣ ꠛꠤꠛꠣꠖ ꠟꠣꠉꠤꠎꠣꠄ, ꠁ ꠙꠞꠤꠛꠣꠞꠅ ꠀꠞ ꠐꠤꠇꠦ ꠘꠣ।
LUK 11:18 ꠔꠦ ꠎꠤꠘ꠆ꠘꠣꠔ ꠎꠥꠖꠤ ꠔꠣꠞ ꠘꠤꠎꠞ ꠛꠤꠙꠇ꠆ꠇꠦ ꠟꠣꠉꠤꠎꠣꠄ, ꠔꠣꠁꠟꠦ ꠔꠣꠞ ꠞꠣꠁꠎ꠆ꠎ ꠇꠦꠝꠘꠦ ꠐꠤꠇꠛ? ꠔꠥꠝꠞꠣ ꠔ ꠇꠁꠞꠣꠄ, ꠀꠝꠤ ꠛꠦꠟ-ꠍꠛꠥꠟꠞ ꠛꠟꠦ ꠎꠤꠘ꠆ꠘꠣꠔ ꠍꠣꠠꠣꠁ।
LUK 11:19 ꠈꠥꠛ ꠜꠣꠟꠣ ꠇꠕꠣ, ꠀꠝꠤ ꠎꠥꠖꠤ ꠛꠦꠟ-ꠍꠛꠥꠟꠞ ꠛꠟꠦ ꠎꠤꠘ꠆ꠘꠣꠔ ꠍꠣꠠꠣꠁ, ꠔꠦ ꠔꠥꠝꠞꠣꠞ ꠝꠣꠘꠡꠦ ꠇꠤꠔꠣꠖꠤ ꠍꠣꠠꠣꠄ? ꠔꠥꠝꠞꠣꠞ ꠝꠣꠔꠞ ꠛꠤꠌꠣꠞ ꠔꠥꠝꠞꠣꠞ ꠝꠣꠘꠡꠦꠃ ꠇꠞꠛ।
LUK 11:20 ꠅꠁꠟꠦ ꠀꠝꠤ ꠎꠥꠖꠤ ꠀꠟ꠆ꠟꠣꠁ ꠇꠥꠖꠞꠔꠦ ꠎꠤꠘ꠆ꠘꠣꠔ ꠍꠣꠠꠣꠁ, ꠔꠦ ꠔ ꠀꠟ꠆ꠟꠣꠞ ꠛꠣꠖꠡꠣꠁ ꠔꠥꠝꠞꠣꠞ ꠘꠎꠖꠤꠇ ꠀꠁꠌ꠆ꠍꠦ।
LUK 11:21 “ꠢꠥꠘꠅ, ꠇꠥꠘꠥ ꠛꠟꠀꠟꠣ ꠝꠣꠘꠡꠦ ꠅꠡꠔ꠆ꠞ-ꠡꠡꠔ꠆ꠞ ꠟꠁꠀ ꠔꠣꠞ ꠛꠣꠠꠤ ꠙꠣꠢꠣꠞꠣ ꠖꠤꠟꠦ, ꠔꠣꠞ ꠍꠣꠝꠣꠘꠣ ꠘꠤꠞꠣꠙꠖ ꠕꠣꠇꠦ।
LUK 11:22 ꠅꠁꠟꠦ ꠔꠣꠞ ꠕꠣꠇꠤ ꠎꠛꠞꠖꠡ꠆ꠔ ꠀꠞꠇ ꠎꠘ ꠀꠁꠀ ꠢꠣꠝꠟꠣ ꠇꠞꠤꠀ ꠔꠣꠞꠦ ꠀꠞꠣꠁꠟꠤꠟꠦ, ꠢꠦ ꠎꠦꠔꠣ ꠅꠡꠔ꠆ꠞ-ꠡꠡꠔ꠆ꠞꠞ ꠛꠠꠣꠁ ꠇꠞꠍꠤꠟ, ꠁ ꠅꠡꠔ꠆ꠞꠅ ꠇꠣꠠꠤꠀ ꠘꠤꠛꠉꠤ। ꠔꠣꠞ ꠢꠇꠟ ꠝꠣꠟ-ꠍꠣꠝꠣꠘꠣꠅ ꠟꠥꠐꠤꠀ ꠘꠤꠀ ꠛꠣꠐꠤꠟꠤꠛ।
LUK 11:23 “ꠔꠦ ꠎꠦ ꠎꠘ ꠀꠝꠣꠞ ꠙꠇ꠆ꠇꠦ ꠘꠣꠄ, ꠢꠦ ꠔ ꠀꠝꠣꠞ ꠛꠤꠙꠇ꠆ꠇ। ꠎꠦ ꠀꠝꠣꠞ ꠅꠁꠀ ꠇꠣꠝ ꠘꠣ ꠇꠞꠦ, ꠢꠦ ꠔ ꠀꠝꠣꠞ ꠛꠤꠞꠥꠖ꠆ꠖꠦ ꠇꠣꠝ ꠇꠞꠦ।
LUK 11:24 “ꠇꠥꠘꠥ ꠎꠤꠘꠦ ꠎꠦꠛꠟꠣ ꠄꠇ ꠛꠦꠝꠣꠞꠤꠞ ꠟꠉ ꠍꠣꠠꠤꠀ ꠎꠣꠄꠉꠤ, ꠉꠤꠀ ꠛꠡꠔ ꠇꠞꠣꠞ ꠟꠣꠉꠤ ꠝꠞꠥꠜꠥꠝꠤꠔ ꠊꠥꠞꠣꠊꠥꠞꠤ ꠇꠞꠦ। ꠛꠣꠖꠦ ꠇꠥꠘꠥꠈꠣꠘꠅ ꠞꠁꠛꠣꠞ ꠎꠣꠉꠣ ꠘꠣ ꠙꠣꠁꠀ ꠝꠘꠦ ꠝꠘꠦ ꠇꠄ, ꠖꠥꠞ! ꠀꠝꠤ ꠎꠦꠘ ꠕꠣꠇꠤ ꠀꠁꠍꠤ ꠅꠘꠅꠃ ꠢꠤꠞꠛꠣꠞ ꠎꠣꠁꠉꠤ।
LUK 11:25 ꠚꠤꠞꠔ ꠀꠁꠀ ꠢꠣꠞꠤ ꠖꠦꠈꠦ, ꠢꠤ ꠎꠣꠉꠣ ꠡꠥꠘ꠆ꠖꠞ ꠇꠞꠤ ꠢꠣꠎꠣꠁ-ꠙꠣꠠꠣꠁ ꠕꠅꠀ।
LUK 11:26 ꠅꠃ ꠢꠦ ꠉꠤꠀ ꠔꠣꠞ ꠕꠣꠇꠤ ꠀꠞꠅ ꠛꠖ ꠡꠣꠔꠉꠥ ꠎꠤꠘ ꠟꠉꠦ ꠇꠞꠤ ꠀꠘꠦ। ꠀꠘꠤꠀ ꠅꠘꠅ ꠢꠣꠝꠣꠁꠀ ꠛꠣꠡꠣ ꠛꠣꠘꠣꠄ। ꠄꠞꠖꠣꠄ ꠅꠃ ꠛꠦꠝꠣꠞꠤꠞ ꠖꠡꠣ ꠙꠄꠟꠣ ꠕꠣꠇꠤ ꠢꠦꠡꠦ ꠀꠞꠅ ꠈꠣꠞꠣꠙ ꠅꠄ।”
LUK 11:27 ꠁꠍꠣꠄ ꠅꠔꠣ ꠛꠄꠀꠘ ꠇꠞꠞꠣ, ꠀꠈꠔꠣꠃ ꠜꠤꠠꠞ ꠝꠣꠎ ꠕꠣꠇꠤ ꠄꠇ ꠛꠦꠐꠤꠄ ꠎꠥꠞꠦ ꠎꠥꠞꠦ ꠇꠁꠟ, “ꠢꠥꠎꠥꠞ, ꠎꠦ ꠝꠣʼꠄ ꠀꠙꠘꠣꠞꠦ ꠙꠦꠐꠅ ꠟꠁꠍꠂꠘ ꠀꠞ ꠖꠥꠗ ꠈꠣꠅꠀꠁꠍꠂꠘ, ꠄꠁꠘ ꠛꠠ ꠇꠙꠣꠟꠤ ꠝꠣ।”
LUK 11:28 ꠁꠍꠣꠄ ꠇꠁꠟꠣ, “ꠁꠈꠣꠘ ꠢꠣꠍꠣ ꠇꠕꠣ, ꠅꠁꠟꠦ ꠄꠞ ꠌꠣꠁꠔꠦꠅ ꠛꠠ ꠇꠙꠣꠟꠤ ꠔꠣꠞꠣ, ꠎꠣꠞꠣ ꠀꠟ꠆ꠟꠣꠞ ꠇꠣꠟꠣꠝ ꠢꠥꠘꠦ, ꠢꠥꠘꠤꠀ ꠅꠟꠣ ꠀꠝꠟ ꠇꠞꠦ।”
LUK 11:29 ꠛꠣꠖꠦ ꠀꠞꠅ ꠛꠃꠔ ꠝꠣꠘꠥꠡ ꠢꠎꠞꠔ ꠁꠍꠣꠞ ꠉꠦꠍꠦ ꠀꠁꠟꠣ। ꠔꠣꠁꠘ ꠄꠞꠣꠞꠦ ꠇꠁꠟꠣ, “ꠁ ꠎꠝꠣꠘꠣꠞ ꠝꠣꠘꠥꠡ ꠔ ꠘꠣꠚꠞꠝꠣꠘ। ꠔꠣꠞꠣ ꠈꠣꠟꠤ ꠇꠦꠞꠣꠝꠔꠤ ꠔꠥꠇꠣꠄ, ꠅꠁꠟꠦ ꠁꠃꠘꠥꠍ ꠘꠛꠤꠞ ꠀꠟꠣꠝꠔ ꠍꠣꠠꠣ ꠖꠥꠍꠞꠣ ꠇꠥꠘꠥ ꠇꠦꠞꠣꠝꠔꠤ ꠔꠣꠞꠣꠞꠦ ꠖꠦꠈꠣꠁꠟ ꠅꠁꠔ ꠘꠣꠄ।
LUK 11:30 ꠁꠃꠘꠥꠍ ꠘꠛꠤ ꠘꠤꠎꠦ ꠘꠤꠎꠦꠃ ꠎꠦꠟꠣ ꠘꠤꠘꠜ ꠐꠣꠃꠘꠞ ꠝꠣꠘꠡꠞ ꠉꠦꠍꠦ ꠄꠇ ꠀꠟꠣꠝꠔ ꠅꠁꠍꠟꠣ, ꠛꠤꠘ-ꠀꠖꠝꠅ ꠅꠃꠟꠣ ꠁ ꠎꠝꠣꠘꠣꠞ ꠝꠣꠘꠡꠞ ꠉꠦꠍꠦ ꠘꠤꠎꠦꠃ ꠀꠟꠣꠝꠔ ꠅꠁꠛꠣ।
LUK 11:31 ꠞꠥꠎ ꠇꠤꠀꠝꠔꠞ ꠖꠤꠘ ꠖꠃꠇꠘꠞ ꠖꠦꠡꠞ ꠞꠣꠘꠤ ꠃꠑꠤꠀ ꠅꠃ ꠎꠝꠣꠘꠣꠞ ꠝꠣꠘꠡꠞ ꠖꠥꠡ ꠎꠣꠁꠞ ꠇꠞꠛꠣ। ꠇꠣꠞꠘ ꠛꠣꠖꠡꠣ ꠍꠥꠟꠣꠁꠝꠣꠘꠞ ꠀꠈꠟꠞ ꠇꠕꠣ ꠢꠥꠘꠣꠞ ꠘꠤꠅꠔꠦ ꠔꠣꠁꠘ ꠖꠥꠘꠤꠀꠞ ꠢꠦꠡ ꠝꠣꠕꠣ ꠕꠣꠇꠤ ꠀꠁꠍꠟꠣ। ꠅꠁꠟꠦ ꠅꠈꠘ ꠔ ꠍꠥꠟꠣꠁꠝꠣꠘ ꠕꠣꠇꠤꠅ ꠀꠞꠅ ꠝꠢꠣꠘ ꠄꠇꠎꠘ ꠅꠘꠅ ꠀꠍꠂꠘ।
LUK 11:32 ꠇꠤꠀꠝꠔꠞ ꠖꠤꠘ ꠘꠤꠘꠜ ꠐꠣꠃꠘꠞ ꠝꠥꠞ꠆ꠖꠣ ꠅꠇꠟ ꠃꠑꠤꠀ ꠁ ꠎꠝꠣꠘꠣꠞ ꠝꠣꠘꠡꠞ ꠖꠥꠡ ꠎꠣꠁꠞ ꠇꠞꠛꠣ। ꠇꠣꠞꠘ ꠁꠃꠘꠥꠍ ꠘꠛꠤꠞ ꠔꠛꠟꠤꠉ ꠢꠥꠘꠤꠀ ꠔꠣꠞꠣ ꠔꠃꠛꠣ ꠇꠞꠍꠤꠟꠣ। ꠅꠁꠟꠦ ꠅꠈꠘ ꠔ ꠁꠃꠘꠥꠍ ꠕꠣꠇꠤꠅ ꠀꠞꠅ ꠝꠢꠣꠘ ꠄꠇꠎꠘ ꠁꠘꠅ ꠀꠍꠂꠘ, ꠔꠣ-ꠅ ꠝꠣꠘꠡꠦ ꠔꠃꠛꠣ ꠇꠞꠦꠞ ꠘꠣ।
LUK 11:33 “ꠇꠥꠘꠥ ꠝꠣꠘꠡꠦ ꠔ ꠟꠦꠝ ꠎꠣꠟꠣꠁꠀ ꠢꠣꠞꠤ ꠌꠇꠤꠞ ꠔꠟꠦ ꠛꠣ ꠐꠥꠇꠞꠤꠞ ꠔꠟꠦ ꠕꠄ ꠘꠣ, ꠛꠞꠋ ꠉꠣꠍꠣꠞ ꠃꠙꠞꠦꠃ ꠕꠄ, ꠎꠣꠔꠦ ꠊꠞꠞ ꠝꠣꠘꠡꠦ ꠚꠞ ꠖꠦꠈꠦ।
LUK 11:34 ꠔꠥꠝꠣꠞ ꠌꠃꠈꠃ ꠅꠁꠟ ꠔꠥꠝꠣꠞ ꠇꠣꠄꠀꠞ ꠛꠣꠔ꠆ꠔꠤ। ꠌꠃꠈ ꠎꠥꠖꠤ ꠜꠣꠟꠣ ꠅꠄ, ꠔꠦ ꠔꠥꠝꠣꠞ ꠀꠡ꠆ꠔꠣ ꠡꠞꠤꠟꠅ ꠚꠞ ꠅꠁꠛ। ꠀꠞ ꠌꠃꠈ ꠈꠣꠞꠣꠙ ꠅꠁꠟꠦ, ꠔꠥꠝꠣꠞ ꠡꠞꠤꠟꠅ ꠀꠘ꠆ꠖꠣꠞꠤꠔ ꠞꠁꠛ।
LUK 11:35 ꠔꠦ ꠈꠤꠀꠟ ꠞꠣꠈꠤꠅ, ꠔꠥꠝꠣꠞ ꠖꠤꠟꠅ ꠎꠦ ꠘꠥꠞ ꠀꠍꠦ, ꠁꠔꠣ ꠀꠘ꠆ꠖꠣꠁꠞ ꠅꠁꠎꠣꠞ ꠇꠤ ꠘꠣ?
LUK 11:36 ꠔꠥꠝꠣꠞ ꠀꠡ꠆ꠔꠣ ꠡꠞꠤꠟꠅ ꠎꠥꠖꠤ ꠚꠞ ꠕꠣꠇꠦ, ꠇꠥꠘꠥ ꠅꠋꠉ ꠀꠘ꠆ꠖꠣꠁꠞ ꠘꠣ ꠕꠣꠇꠦ, ꠔꠦ ꠟꠦꠝꠦ ꠎꠦꠟꠣ ꠔꠣꠞ ꠘꠤꠎꠞ ꠔꠦꠎꠦ ꠔꠥꠝꠣꠞꠦ ꠚꠞ ꠖꠦꠄ, ꠅꠃꠟꠣ ꠁ ꠘꠥꠞꠦꠅ ꠔꠥꠝꠣꠞ ꠀꠡ꠆ꠔꠣ ꠡꠞꠤꠟꠞꠦ ꠚꠞ ꠇꠞꠤꠟꠤꠛ।”
LUK 11:37 ꠁꠍꠣꠄ ꠛꠄꠀꠘ ꠇꠞꠞꠣ ꠅꠃ ꠡꠝꠄ ꠚꠞꠤꠡꠤ ꠖꠟꠞ ꠄꠇꠎꠘꠦ ꠔꠣꠘꠞꠦ ꠈꠣꠁꠛꠣꠞ ꠖꠣꠅꠔ ꠖꠤꠟꠣ। ꠔꠣꠁꠘ ꠉꠤꠀ ꠄꠘ ꠊꠞꠞ ꠜꠤꠔꠞꠦ ꠈꠣꠘꠤꠔ ꠛꠁꠟꠣ।
LUK 11:38 ꠚꠞꠤꠡꠤꠄ ꠖꠦꠈꠟꠣ, ꠈꠣꠅꠀꠔ ꠛꠁꠛꠣꠞ ꠇꠣꠟꠅ ꠁꠍꠣꠄ ꠁꠢꠥꠖꠤ ꠘꠤꠅꠝ ꠝꠣꠚꠤꠇ ꠀꠔ ꠗꠁꠍꠁꠘ ꠘꠣ, ꠅꠃ ꠔꠣꠁꠘ ꠔꠣꠁꠎ꠆ꠎꠥꠛ ꠛꠘꠤꠉꠦꠟꠣ।
LUK 11:39 ꠔꠦꠃ ꠁꠍꠣꠄ ꠔꠣꠘꠞꠦ ꠇꠁꠟꠣ, “ꠢꠥꠘꠃꠇ꠆ꠇꠣ, ꠀꠙꠘꠣꠞꠣ ꠚꠞꠤꠡꠤ ꠅꠇꠟꠦ ꠔ ꠛꠣꠡꠘ-ꠛꠞ꠆ꠔꠘꠞ ꠛꠣꠁꠞ ꠉꠣꠟꠣ ꠈꠥꠛ ꠡꠥꠘ꠆ꠖꠞ ꠇꠞꠂꠘ, ꠅꠁꠟꠦ ꠀꠙꠘꠣꠞꠣꠞ ꠜꠤꠔꠞꠦ ꠔ ꠘꠣꠚꠞꠝꠣꠘꠤ ꠀꠞ ꠟꠣꠟꠌꠦ ꠜꠞꠣ।
LUK 11:40 ꠅ ꠛꠦꠀꠈꠟꠞ ꠖꠟ, ꠎꠦꠁꠘ ꠛꠣꠞꠉꠣꠟꠣ ꠛꠣꠘꠣꠁꠍꠂꠘ, ꠔꠣꠁꠘꠃ ꠇꠤꠔꠣ ꠜꠤꠔꠞ ꠉꠣꠟꠣꠅ ꠛꠣꠘꠣꠁꠍꠂꠘ ꠘꠣ ꠘꠤ?
LUK 11:41 ꠄꠞꠟꠣꠉꠤ ꠀꠙꠘꠣꠞꠣꠞ ꠜꠤꠔꠞꠦ ꠎꠦꠔꠣ ꠀꠍꠦ, ꠅꠔꠣ ꠀꠉꠦ ꠀꠟ꠆ꠟꠣꠞ ꠅꠀꠡ꠆ꠔꠦ ꠟꠤꠟ꠆ꠟꠣ-ꠍꠖꠉꠣ ꠖꠦꠃꠇ꠆ꠇꠣ। ꠔꠦꠃ ꠖꠦꠈꠛꠣꠘꠦ, ꠀꠙꠘꠣꠞꠣꠞ ꠢꠇꠟꠔꠣꠃ ꠙꠣꠇ-ꠍꠣꠚ ꠅꠁꠎꠤꠛ।
LUK 11:42 “ꠢꠣꠄꠞꠦ ꠚꠞꠤꠡꠤ ꠅꠇꠟ, ꠟꠣꠘ꠆ꠘꠔ ꠔꠥꠝꠞꠣꠞꠦ, ꠔꠥꠝꠞꠣ ꠈꠣꠟꠤ ꠔꠦꠎꠙꠣꠔꠣ, ꠙꠖꠤꠘꠣ ꠙꠣꠔꠣ ꠀꠞ ꠢꠇ꠆ꠇꠟ ꠢꠣꠉ-ꠔꠞꠇꠣꠞꠤꠞ ꠖꠡ ꠛꠣꠐꠞ ꠄꠇ ꠛꠣꠐ ꠀꠟ꠆ꠟꠣꠞ ꠘꠣꠝꠦ ꠎꠇꠣꠔ ꠖꠦꠅ, ꠅꠁꠟꠦ ꠀꠟ꠆ꠟꠣꠞ ꠝꠢꠛ꠆ꠛꠔ ꠀꠞ ꠢꠇ ꠁꠘꠍꠣꠚꠞ ꠛꠣꠄ ꠔꠥꠝꠞꠣꠞ ꠇꠥꠘꠥ ꠈꠤꠀꠟꠃ ꠘꠣꠁ। ꠀꠍꠟꠦ ꠅꠃ ꠙꠄꠟꠣꠔꠣ ꠝꠣꠘꠣꠞ ꠟꠉꠦ ꠟꠉꠦ ꠛꠣꠖꠞꠔꠣꠅ ꠀꠝꠟ ꠇꠞꠣ ꠚꠞꠎ।
LUK 11:43 ꠅ ꠟꠣꠘ꠆ꠘꠔꠤ ꠚꠞꠤꠡꠤ ꠅꠇꠟ! ꠝꠍꠤꠖꠅ ꠢꠣꠝꠣꠁꠀ ꠍꠣꠝꠘꠞ ꠇꠣꠔꠣꠞꠅ ꠛꠅꠀ, ꠀꠞ ꠛꠣꠎꠣꠞ-ꠀꠐꠅ ꠉꠤꠀ ꠍꠣꠟꠣꠝ ꠙꠣꠁꠔꠦ ꠔꠥꠝꠞꠣ ꠈꠥꠛ ꠙꠍꠘ꠆ꠖ ꠇꠞꠅ।
LUK 11:44 ꠟꠣꠘ꠆ꠘꠔ ꠔꠥꠝꠞꠣꠞ ꠃꠙꠞꠦ, ꠔꠥꠝꠞꠣ ꠅꠁꠟꠣꠄ ꠅꠌꠤꠘꠣ ꠇꠄꠛꠞꠞ ꠟꠣꠈꠣꠘ। ꠝꠣꠘꠡꠦ ꠘꠣ ꠌꠤꠘꠤꠀ ꠄꠞ ꠃꠙꠞꠦꠖꠤ ꠀꠐꠣ-ꠚꠤꠞꠣ ꠇꠞꠦ।”
LUK 11:45 ꠁꠈꠣꠘ ꠢꠥꠘꠤꠀ ꠄꠇꠎꠘ ꠀꠟꠤꠝꠦ ꠁꠍꠣꠞꠦ ꠇꠁꠟꠣ, “ꠢꠥꠎꠥꠞ, ꠅꠈꠣꠘ ꠇꠁꠀ ꠔ ꠀꠙꠘꠦ ꠀꠝꠞꠣꠞꠦꠅ ꠛꠦꠁꠎ꠆ꠎꠔ ꠇꠞꠞꠣ।”
LUK 11:46 ꠁꠍꠣꠄ ꠇꠁꠟꠣ, “ꠘꠤꠌꠄ, ꠀꠙꠘꠣꠞꠣꠅ ꠟꠣꠘ꠆ꠘꠔꠤ, ꠀꠙꠘꠣꠞꠣ ꠝꠣꠘꠡꠞ ꠇꠣꠘ꠆ꠖꠅ ꠜꠣꠞ ꠛꠥꠏꠣꠁ ꠇꠞꠤꠀ ꠖꠦꠁꠘ, ꠅꠁꠟꠦ ꠔꠣꠞꠣꠞ ꠀꠍꠣꠘꠞ ꠟꠣꠉꠤ ꠀꠋꠉꠥꠟꠐꠣꠅ ꠟꠣꠠꠂꠘ ꠘꠣ।
LUK 11:47 “ꠢꠣꠄꠞꠦ ꠟꠣꠘ꠆ꠘꠔꠤ ꠅꠇꠟ, ꠔꠥꠝꠞꠣ ꠘꠛꠤ ꠅꠇꠟꠞ ꠞꠅꠎꠣꠞꠦ ꠡꠥꠘ꠆ꠖꠞ ꠇꠞꠤꠀ ꠙꠣꠇ꠆ꠇꠣ ꠇꠞꠅ, ꠅꠁꠟꠦ ꠔꠥꠝꠞꠣꠞ ꠝꠄ-ꠝꠥꠞꠛ꠆ꠛꠤꠄꠃ ꠔ ꠄꠞꠣꠞꠦ ꠎꠣꠘꠦ ꠝꠣꠞꠍꠟꠣ।
LUK 11:48 ꠅꠔꠣ ꠖꠦꠈꠤꠀꠃ ꠛꠥꠎꠣ ꠎꠣꠄ, ꠔꠥꠝꠞꠣ ꠔꠥꠝꠞꠣꠞ ꠝꠄ-ꠝꠥꠞꠛ꠆ꠛꠤꠞ ꠇꠣꠝꠞ ꠡꠣꠇ꠆ꠇꠤ ꠅꠁꠞꠣꠄ, ꠔꠥꠝꠞꠣꠅ ꠅꠟꠣ ꠅꠁꠞꠣꠄ। ꠔꠣꠞꠣ ꠘꠛꠤ ꠅꠇꠟꠞꠦ ꠎꠣꠘꠦ ꠝꠣꠞꠍꠤꠟ, ꠀꠞ ꠔꠥꠝꠞꠣ ꠢꠃ ꠘꠛꠤꠞ ꠞꠅꠎꠣꠞꠦ ꠙꠣꠇ꠆ꠇꠣ ꠇꠞꠞꠣꠄ।
LUK 11:49 ꠄꠞꠖꠣꠄ ꠀꠟ꠆ꠟꠣ ꠙꠣꠇꠦꠅ ꠔꠣꠘ ꠘꠤꠎꠞ ꠝꠞ꠆ꠎꠤꠄ ꠇꠁꠟꠣ, ꠀꠝꠤ ꠔꠣꠞꠣꠞ ꠉꠦꠍꠦ ꠀꠝꠣꠞ ꠘꠛꠤ-ꠞꠍꠥꠟ ꠛꠦꠎꠤꠝꠥ, ꠄꠞꠣꠞ ꠇꠦꠃꠞꠞꠦ ꠔꠣꠞꠣ ꠎꠥꠟꠥꠝ ꠇꠞꠛ, ꠀꠞ ꠇꠦꠃꠞꠞꠦ ꠎꠣꠘꠦ ꠝꠣꠞꠛ।
LUK 11:50 ꠄꠔꠦ ꠖꠥꠘꠤꠀꠞ ꠙꠄꠟꠣ ꠕꠣꠇꠤ ꠅꠈꠘ ꠙꠞ꠆ꠎꠘ꠆ꠔ ꠎꠔ ꠘꠛꠤꠞꠦ ꠎꠣꠘꠦ ꠝꠣꠞꠣ ꠅꠁꠍꠦ, ꠄꠞꠣ ꠢꠇ꠆ꠇꠟꠞ ꠖꠣꠄꠁ ꠅꠁꠛꠣ ꠅꠃ ꠎꠝꠣꠘꠣꠞ ꠝꠣꠘꠥꠡ।
LUK 11:51 ꠢꠥꠘꠃꠇ꠆ꠇꠣ, ꠀꠝꠤ ꠀꠙꠘꠣꠁꠘ꠆ꠔꠞꠦ ꠇꠁꠞꠣꠝ, ꠙꠄꠟꠣ ꠀꠖꠝꠞ ꠙꠥꠔ ꠢꠣꠛꠤꠟꠞ ꠈꠥꠘ ꠕꠣꠇꠤ ꠡꠥꠞꠥ ꠇꠞꠤꠀ, ꠘꠛꠤ ꠎꠣꠇꠣꠞꠤꠀꠞ ꠈꠥꠘ ꠙꠞ꠆ꠎꠘ꠆ꠔ ꠢꠇꠟ ꠟꠃꠞ ꠡꠣꠎꠣ ꠅꠃ ꠎꠝꠣꠘꠣꠞ ꠝꠣꠘꠡꠞ ꠉꠦꠍ ꠕꠣꠇꠤ ꠀꠖꠣꠄ ꠇꠞꠣ ꠅꠁꠛ। ꠘꠛꠤ ꠎꠣꠇꠣꠞꠤꠀꠞꠦ ꠔ ꠎꠦꠞꠥꠎꠣꠟꠦꠝꠞ ꠙꠛꠤꠔ꠆ꠞ ꠇꠣꠛꠣ ꠡꠞꠤꠚꠞ ꠇꠥꠞꠛꠣꠘꠤ ꠈꠣꠘꠣ ꠀꠞ ꠢꠦꠞꠦꠝ ꠡꠞꠤꠚꠞ ꠝꠣꠎꠈꠣꠘꠅ ꠈꠥꠘ ꠇꠞꠣ ꠅꠁꠍꠦ।
LUK 11:52 ꠢꠣꠄꠞꠦ ꠟꠣꠘ꠆ꠘꠔꠤ ꠀꠟꠤꠝ ꠅꠇꠟ, ꠔꠥꠝꠞꠣ ꠝꠣꠘꠡꠞꠦꠅ ꠀꠟ꠆ꠟꠣꠞ ꠙꠕ ꠌꠤꠘꠣꠁꠞꠣꠄ ꠘꠣ, ꠘꠤꠎꠦꠅ ꠀꠟ꠆ꠟꠣꠞ ꠛꠣꠖꠡꠣꠁꠔ ꠢꠣꠝꠣꠁꠞꠣꠄ ꠘꠣ, ꠀꠞ ꠎꠦꠞꠣ ꠢꠣꠝꠣꠁꠔ ꠌꠣꠞ, ꠔꠣꠞꠣꠞꠦꠅ ꠛꠣꠗꠣ ꠖꠤꠞꠣꠄ।”
LUK 11:53 ꠛꠄꠀꠘ ꠛꠣꠖꠦ ꠁꠍꠣ ꠁꠈꠣꠘ ꠕꠣꠇꠤ ꠞꠅꠀꠘꠣ ꠖꠤꠟꠣꠁꠟꠣ। ꠔꠦꠃ ꠀꠟꠤꠝ ꠀꠞ ꠚꠞꠤꠡꠤ ꠅꠇꠟꠦ ꠝꠤꠎꠣꠎ ꠉꠞꠝ ꠇꠞꠤꠀ ꠁꠍꠣꠞꠦ ꠚꠣꠘ꠆ꠖꠅ ꠚꠣꠟꠣꠁꠔꠣ ꠇꠞꠤ ꠈꠥꠌꠣꠁ-ꠚꠣꠠꠣꠁ ꠝꠣꠔꠤꠟꠣ। ꠘꠣꠘꠣꠘ ꠘꠝꠥꠘꠣꠞ ꠍꠅꠀꠟ ꠇꠞꠤꠀ ꠔꠣꠘꠞꠦ ꠀꠐꠇꠣꠘꠤꠞ ꠡꠥꠎꠥꠉ ꠔꠥꠇꠣꠁꠟꠣ।
LUK 12:1 ꠅꠃ ꠡꠝꠄ ꠀꠎꠣꠞ ꠀꠎꠣꠞ ꠝꠣꠘꠥꠡ ꠖꠟꠣ ꠅꠁꠉꠦꠟꠣ, ꠔꠣꠞꠣ ꠑꠦꠟꠣꠑꠦꠟꠤ ꠇꠞꠤ ꠄꠇꠦ-ꠅꠁꠘ꠆ꠘꠞ ꠃꠙꠞꠦ ꠙꠠꠟꠣ। ꠁꠍꠣꠄ ꠙꠄꠟꠣ ꠔꠣꠘ ꠍꠣꠢꠣꠛꠤ ꠅꠇꠟꠞꠦ ꠇꠁꠟꠣ, “ꠔꠥꠝꠞꠣ ꠚꠞꠤꠡꠤ ꠝꠎꠛꠞ ꠈꠣꠝꠤꠞ ꠕꠣꠇꠤ ꠢꠥꠡꠤꠀꠞ ꠞꠁꠅ, ꠅꠃ ꠈꠣꠝꠤꠞ ꠅꠁꠟ ꠔꠣꠞꠣꠞ ꠜꠘ꠆ꠒꠣꠝꠤ।
LUK 12:2 ꠑꠤꠇ ꠅꠃ ꠈꠣꠝꠤꠞꠞ ꠟꠣꠈꠣꠘ, ꠁꠟꠣ ꠟꠥꠇꠣꠁꠟ ꠇꠥꠘ꠆ꠔꠣꠃ ꠘꠣꠁ, ꠎꠦꠔꠣ ꠎꠣꠁꠞ ꠅꠁꠔ ꠘꠣꠄ। ꠁꠟꠣ ꠉꠥꠙꠘ ꠇꠥꠘ꠆ꠔꠣꠃ ꠘꠣꠁ, ꠎꠦꠔꠣ ꠎꠣꠘꠣ ꠎꠣꠁꠔ ꠘꠣꠄ।
LUK 12:3 ꠔꠥꠝꠞꠣ ꠀꠘ꠆ꠖꠣꠁꠞ ꠊꠞꠅ ꠎꠦꠔꠣ ꠝꠣꠔꠤꠍ, ꠝꠣꠘꠡꠦ ꠁꠔꠣ ꠚꠞꠞ ꠝꠣꠎꠦ ꠢꠥꠘꠛ। ꠊꠞꠞ ꠜꠤꠔꠞꠦ ꠇꠣꠘꠦ ꠇꠣꠘꠦ ꠎꠦꠔꠣ ꠇꠁꠍ, ꠁꠔꠣ ꠌꠣꠟꠞ ꠃꠙꠞꠦ ꠞꠐꠣꠁꠟ ꠅꠁꠛ।
LUK 12:4 “ꠅ ꠀꠝꠣꠞ ꠖꠥꠡ꠆ꠔ ꠅꠇꠟ, ꠀꠝꠤ ꠔꠥꠝꠞꠣꠞꠦ ꠇꠁꠀꠞ, ꠎꠣꠞꠣ ꠈꠣꠟꠤ ꠡꠞꠤꠟꠞꠦ ꠛꠤꠘꠣꠡ ꠇꠞꠣ ꠍꠣꠠꠣ ꠀꠞ ꠇꠥꠘ꠆ꠔꠣꠃ ꠇꠞꠔ ꠙꠣꠞꠦ ꠘꠣ, ꠔꠣꠞꠣꠞꠦ ꠒꠞꠣꠁꠅ ꠘꠣ।
LUK 12:5 ꠔꠦ ꠇꠣꠞꠦ ꠒꠞꠣꠁꠔꠣꠄ ꠄꠅꠈꠣꠘꠅ ꠇꠁꠞꠣꠝ, ꠝꠣꠞꠣꠞ ꠛꠣꠖꠦ ꠖꠥꠎꠈꠅ ꠢꠣꠞꠣꠘꠤꠞ ꠈꠦꠝꠔꠣꠅ ꠎꠣꠘ ꠀꠍꠦ, ꠈꠣꠟꠤ ꠔꠣꠘꠞꠦꠃ ꠒꠞꠣꠁꠅ। ꠀꠝꠤ ꠢꠤꠞꠛꠣꠞ ꠇꠁꠞꠣꠝ, ꠔꠥꠝꠞꠣ ꠈꠣꠟꠤ ꠔꠣꠘꠦꠃ ꠒꠞꠣꠁꠅ।
LUK 12:6 ꠝꠣꠔ꠆ꠞ ꠖꠥꠁ ꠀꠘꠣꠄ ꠙꠣꠌꠉꠥ ꠌꠠꠣ ꠙꠣꠈꠤ ꠝꠤꠟꠦ ꠘꠣ ꠘꠤ? ꠀꠟ꠆ꠟꠣꠄ ꠔ ꠅꠃ ꠌꠠꠣꠞ ꠇꠕꠣꠅ ꠚꠣꠃꠞꠂꠘ ꠘꠣ।
LUK 12:7 ꠀꠞ ꠇꠤꠔꠣ ꠇꠁꠔꠣꠝ, ꠔꠥꠝꠞꠣꠞ ꠝꠣꠕꠣꠞ ꠌꠥꠟꠞ ꠢꠤꠡꠣꠛꠅ ꠔꠣꠘ ꠉꠦꠍꠦ ꠀꠍꠦ। ꠔꠥꠝꠞꠣ ꠒꠞꠣꠁꠅ ꠘꠣ, ꠛꠃꠔ ꠌꠠꠣ ꠙꠣꠈꠤ ꠕꠘꠦꠅ ꠔꠥꠝꠞꠣꠞ ꠖꠣꠝ ꠔꠣꠘ ꠉꠦꠍꠦ ꠛꠦꠡꠤ।
LUK 12:8 “ꠢꠥꠘꠅ, ꠀꠝꠤ ꠔꠥꠝꠞꠣꠞꠦ ꠇꠁꠞꠣꠝ, ꠎꠦ ꠝꠣꠘꠡꠦ ꠡꠝꠣꠎꠞ ꠍꠣꠝꠘꠦ ꠀꠝꠣꠞꠦ ꠇꠛꠥꠟ ꠇꠞꠦ, ꠀꠝꠤ ꠛꠤꠘ-ꠀꠖꠝꠦꠅ ꠀꠟ꠆ꠟꠣꠞ ꠚꠤꠞꠤꠡ꠆ꠔꠣ ꠅꠇꠟꠞ ꠍꠣꠝꠘꠦ ꠔꠣꠞꠦ ꠇꠛꠥꠟ ꠇꠞꠝꠥ।
LUK 12:9 ꠅꠁꠟꠦ ꠎꠦ ꠝꠣꠘꠡꠦ ꠡꠝꠣꠎꠞ ꠍꠣꠝꠘꠦ ꠀꠝꠣꠞꠦ ꠅꠡ꠆ꠛꠤꠇꠣꠞ ꠇꠞꠛ, ꠀꠝꠤꠅ ꠔꠣꠞꠦ ꠀꠟ꠆ꠟꠣꠞ ꠚꠤꠞꠤꠡ꠆ꠔꠣ ꠅꠇꠟꠞ ꠍꠣꠝꠘꠦ ꠅꠡ꠆ꠛꠤꠇꠣꠞ ꠇꠞꠝꠥ।
LUK 12:10 ꠀꠝꠤ ꠛꠤꠘ-ꠀꠖꠝꠞ ꠛꠤꠞꠥꠖ꠆ꠖꠦ ꠇꠦꠃ ꠇꠥꠘ꠆ꠔꠣ ꠝꠣꠔꠤꠟꠦꠅ ꠝꠣꠚꠤ ꠙꠣꠁꠛ। ꠅꠁꠟꠦ ꠇꠦꠃ ꠎꠥꠖꠤ ꠙꠣꠇ ꠞꠥꠢꠥꠞ ꠛꠤꠞꠥꠖ꠆ꠖꠦ ꠇꠥꠚꠥꠞꠤ ꠇꠞꠦ, ꠔꠦ ꠔꠣꠞ ꠇꠥꠘꠥ ꠝꠣꠚꠤ ꠘꠣꠁ।
LUK 12:11 “ꠝꠣꠘꠡꠦ ꠎꠦꠛꠟꠣ ꠔꠥꠝꠞꠣꠞꠦ ꠝꠍꠤꠖꠞ ꠙꠣꠁꠘ꠆ꠌꠣꠁꠔꠅ, ꠛꠤꠌꠣꠞꠤ ꠅꠇꠟꠞ ꠍꠣꠝꠘꠦ, ꠛꠣ ꠕꠣꠘꠣꠔ ꠘꠤꠛ, ꠅꠃ ꠡꠝꠄ ꠇꠤꠔꠣ ꠎꠥꠀꠙ ꠖꠤꠔꠣꠄ ꠛꠣ ꠇꠤꠔꠣ ꠇꠁꠔꠣꠄ, ꠁꠔꠣ ꠟꠁꠀ ꠇꠥꠘꠥ ꠌꠤꠘ꠆ꠔꠣ ꠇꠞꠤꠅ ꠘꠣ।
LUK 12:12 ꠇꠤꠔꠣ ꠝꠣꠔꠤꠔꠣꠄ ꠁꠔꠣ ꠙꠣꠇ ꠞꠥꠢꠦ ꠔꠥꠝꠞꠣꠞꠦ ꠢꠃ ꠡꠝꠄ ꠛꠣꠔꠣꠁ ꠖꠤꠛꠣ।”
LUK 12:13 ꠜꠤꠠꠞ ꠝꠣꠎ ꠕꠣꠇꠤ ꠄꠇꠎꠘꠦ ꠁꠍꠣꠞꠦ ꠇꠁꠟ, “ꠢꠥꠎꠥꠞ, ꠀꠙꠘꠦ ꠀꠝꠣꠞ ꠜꠣꠁꠞꠦ ꠇꠃꠇ꠆ꠇꠣ, ꠀꠝꠣꠞ ꠛꠣꠛꠣꠄ ꠎꠦꠔꠣ ꠗꠘ-ꠍꠣꠝꠣꠘꠣ ꠕꠁꠀ ꠉꠦꠍꠂꠘ, ꠅꠔꠣ ꠛꠣꠐ-ꠛꠣꠐꠥꠞꠣ ꠇꠞꠤꠀ ꠖꠤꠔꠣ।”
LUK 12:14 ꠁꠍꠣꠄ ꠔꠣꠞꠦ ꠇꠁꠟꠣ, “ꠅꠛꠣ, ꠔꠥꠝꠞꠣꠞ ꠛꠤꠌꠣꠞ ꠇꠞꠔꠣꠝ ꠀꠞ ꠗꠘ-ꠍꠣꠝꠣꠘꠣ ꠛꠣꠐꠤꠔꠣꠝ, ꠁꠔꠣ ꠄꠈꠔꠤꠀꠞ ꠀꠝꠣꠞꠦ ꠇꠦꠉꠥꠄ ꠖꠤꠍꠦ?”
LUK 12:15 ꠔꠣꠁꠘ ꠝꠣꠘꠡꠞꠦ ꠇꠁꠟꠣ, “ꠈꠛꠞꠖꠣꠞ! ꠢꠇ꠆ꠇꠟ ꠘꠝꠥꠘꠣꠞ ꠟꠥꠜ-ꠟꠣꠟꠌ ꠕꠘꠦ ꠘꠤꠎꠞꠦ ꠛꠣꠌꠣꠅ। ꠇꠣꠞꠘ ꠗꠘ-ꠍꠣꠝꠣꠘꠣ ꠛꠣꠁꠀ ꠉꠦꠟꠦꠅ ꠁꠔꠣꠄ ꠝꠣꠘꠡꠞ ꠎꠣꠘ ꠛꠣꠌꠣꠄ ꠘꠣ।”
LUK 12:16 ꠛꠣꠖꠦ ꠁꠍꠣꠄ ꠔꠣꠞꠣꠞꠦ ꠅꠃ ꠇꠤꠌ꠆ꠍꠣ ꠢꠥꠘꠣꠁꠟꠣ, ꠇꠁꠟꠣ, “ꠄꠇ ꠗꠘꠤ ꠛꠦꠐꠣꠞ ꠎꠝꠤꠘꠅ ꠛꠃꠔ ꠗꠣꠘ ꠚꠟꠤꠍꠤꠟ।
LUK 12:17 ꠗꠣꠘ ꠖꠦꠈꠤꠀ ꠢꠦ ꠝꠘꠦ ꠝꠘꠦ ꠇꠁꠟ, ꠅꠔ ꠗꠣꠘ ꠅꠈꠘ ꠇꠤꠔꠣ ꠇꠞꠔꠣꠝ? ꠀꠝꠣꠞ ꠔ ꠕꠁꠛꠣꠞꠃ ꠎꠣꠉꠣ ꠘꠣꠁ।
LUK 12:18 ꠔꠦ ꠀꠝꠤ ꠄꠇ ꠇꠣꠝ ꠇꠞꠤ, ꠀꠝꠣꠞ ꠃꠉꠣꠞ ꠜꠣꠋꠉꠤꠀ ꠛꠠ ꠇꠞꠤ ꠇꠄꠐꠣ ꠃꠉꠣꠞ ꠛꠣꠘꠣꠁꠟꠣꠁ। ꠔꠦꠃ ꠀꠝꠣꠞ ꠢꠇꠟ ꠗꠣꠘ ꠀꠞ ꠝꠣꠟ-ꠍꠣꠝꠣꠘꠣ ꠎꠣꠉꠣ ꠅꠁꠛ।
LUK 12:19 ꠢꠦꠡꠦ ꠀꠝꠣꠞ ꠎꠣꠘꠞꠦ ꠇꠁꠝꠥ, ꠅ ꠎꠣꠘ, ꠛꠃꠔ ꠛꠍꠞꠞ ꠝꠣꠟ-ꠍꠣꠝꠣꠘꠣ ꠀꠞ ꠈꠣꠘꠤ-ꠈꠥꠞꠣꠇꠤꠞ ꠟꠣꠉꠤ ꠘꠤꠌꠤꠘ꠆ꠔꠣ ꠅꠁꠉꠦꠍ। ꠅꠈꠘ ꠀꠞꠣꠝ-ꠀꠄꠄꠡꠦ ꠔꠥꠝꠤ ꠈꠣꠁꠀ ꠚꠤꠘ꠆ꠖꠤꠀ ꠚꠥꠞ꠆ꠔꠤ ꠇꠞꠅ।
LUK 12:20 ꠅꠁꠟꠦ ꠀꠟ꠆ꠟꠣꠄ ꠔꠣꠞꠦ ꠇꠁꠟꠣ, ꠅꠞꠦ ꠛꠦꠀꠈꠟ, ꠔꠞ ꠎꠣꠘ ꠔ ꠀꠁꠎ ꠞꠣꠁꠔꠃ ꠇꠛꠎ ꠇꠞꠣ ꠅꠁꠛ। ꠔꠦ ꠔꠥꠁ ꠎꠦꠔꠣ ꠎꠝꠣꠁꠍꠍ, ꠁꠔꠣ ꠇꠦꠉꠥꠄ ꠈꠣꠁꠛ?”
LUK 12:21 ꠢꠦꠡꠦ ꠁꠍꠣꠄ ꠇꠁꠟꠣ, “ꠎꠦ ꠝꠣꠘꠡꠦ ꠈꠣꠟꠤ ꠖꠥꠘꠤꠀꠛꠤ ꠗꠘ-ꠍꠣꠝꠣꠘꠣ ꠖꠟꠣ ꠇꠞꠦ, ꠅꠁꠟꠦ ꠀꠈꠦꠞꠞ ꠗꠘ ꠘꠣ ꠎꠝꠣꠄ, ꠔꠣꠞ ꠢꠣꠟꠔ ꠅꠃꠟꠣꠃ ꠅꠄ।”
LUK 12:22 ꠛꠣꠖꠦ ꠁꠍꠣꠄ ꠔꠣꠘ ꠡꠣꠉꠞꠤꠖ ꠅꠇꠟꠞꠦ ꠇꠁꠟꠣ, “ꠄꠞꠖꠣꠄꠃ ꠀꠝꠤ ꠔꠥꠝꠞꠣꠞꠦ ꠇꠁꠞꠣꠝ, ꠇꠤꠔꠣ ꠈꠣꠁꠀ ꠛꠣꠌꠔꠣꠝ, ꠀꠞ ꠇꠤꠔꠣ ꠚꠤꠘ꠆ꠖꠤꠔꠣꠝ, ꠁꠔꠣ ꠟꠁꠀ ꠔꠥꠝꠞꠣ ꠌꠤꠘ꠆ꠔꠣ ꠇꠞꠤꠅ ꠘꠣ।
LUK 12:23 ꠎꠣꠘ ꠕꠣꠇꠤ ꠔ ꠈꠣꠘꠤ ꠛꠠ ꠘꠣꠄ, ꠀꠞ ꠡꠞꠤꠟ ꠕꠣꠇꠤ ꠇꠣꠙꠠ ꠛꠠ ꠘꠣꠄ।
LUK 12:24 ꠅꠃ ꠇꠣꠃꠀꠉꠥꠁꠘ꠆ꠔꠞ ꠛꠣꠄ ꠈꠤꠀꠟ ꠇꠞꠅ, ꠔꠣꠞꠣ ꠔ ꠈꠦꠔꠅ ꠇꠞꠦ ꠘꠣ, ꠚꠡꠟꠅ ꠇꠣꠐꠦ ꠘꠣ। ꠔꠣꠞꠣꠞ ꠃꠉꠣꠞꠅ ꠘꠣꠁ, ꠜꠣꠘ꠆ꠒꠣꠞꠅ ꠘꠣꠁ। ꠀꠟ꠆ꠟꠣꠄ ꠔꠣꠞꠣꠞ ꠞꠤꠎꠦꠇ ꠎꠥꠉꠣꠁꠀ ꠖꠦꠁꠘ। ꠔꠦ ꠔꠥꠝꠞꠣ ꠔ ꠅꠃ ꠇꠣꠃꠀ ꠕꠣꠇꠤ ꠛꠃꠔ ꠖꠣꠝꠤ।
LUK 12:25 ꠇꠅ ꠌꠣꠁꠘ, ꠔꠥꠝꠞꠣꠞ ꠝꠣꠎꠦ ꠇꠦꠃ ꠌꠤꠘ꠆ꠔꠣ-ꠜꠣꠛꠘꠣ ꠇꠞꠤꠀ ꠔꠣꠞ ꠢꠣꠄꠀꠔꠤ ꠄꠇꠈꠣꠘ ꠊꠘ꠆ꠐꠣꠅ ꠛꠣꠠꠣꠁꠔ ꠙꠣꠞꠛ ꠘꠤ?
LUK 12:26 ꠀꠞ ꠅꠃ ꠢꠥꠞꠥ ꠇꠣꠝꠈꠣꠘꠃ ꠎꠦꠛꠟꠣ ꠙꠣꠞ ꠘꠣ, ꠔꠦ ꠇꠦꠘꠦ ꠛꠣꠠꠔꠤ ꠌꠤꠘ꠆ꠔꠣ ꠇꠞ?
LUK 12:27 “ꠔꠥꠝꠞꠣ ꠅꠃ ꠎꠋꠟꠤ ꠚꠥꠟꠞ ꠛꠣꠄ ꠌꠣꠅ, ꠁꠔꠣ ꠇꠔ ꠡꠥꠘ꠆ꠖꠞ! ꠁꠔꠣꠄ ꠔ ꠘꠤꠎꠞ ꠡꠥꠘ꠆ꠖꠞꠞ ꠟꠣꠉꠤ ꠇꠥꠘ꠆ꠔꠣꠃ ꠇꠞꠦ ꠘꠣ, ꠇꠥꠘꠥ ꠞꠋ ꠡꠤꠟꠣꠁꠅ ꠇꠞꠦ ꠘꠣ, ꠛꠣꠁꠘꠅ ꠇꠞꠦ ꠘꠣ, ꠄꠝꠘꠦꠃ ꠅꠄ। ꠔꠦ ꠀꠝꠤ ꠇꠁꠀꠞ, ꠛꠣꠖꠡꠣ ꠍꠥꠟꠣꠁꠝꠣꠘ ꠅꠔ ꠎꠣꠇ-ꠎꠝꠇꠞ ꠝꠣꠎꠦ ꠞꠁꠟꠦꠅ ꠔꠣꠘ ꠟꠦꠛꠣꠍ ꠔ ꠅꠔꠣ ꠄꠉꠥ ꠎꠋꠟꠤ ꠚꠥꠟꠞ ꠟꠣꠈꠣꠘꠅ ꠡꠥꠘ꠆ꠖꠞ ꠀꠍꠤꠟ ꠘꠣ।
LUK 12:28 ꠖꠦꠈꠞꠣꠄ ꠘꠤ, ꠎꠋꠉꠟꠞ ꠝꠣꠎꠦ ꠅꠃ ꠎꠔ ꠡꠥꠘ꠆ꠖꠞ ꠚꠥꠟ ꠅꠈꠘ ꠀꠍꠦ, ꠇꠣꠁꠟ ꠅꠁꠟꠦꠃ ꠝꠣꠘꠡꠦ ꠁꠔꠣ ꠖꠣꠞꠥ ꠛꠣꠘꠣꠁꠀ ꠀꠉꠥꠁꠘꠖꠤ ꠎꠣꠟꠣꠁꠛ। ꠀꠟ꠆ꠟꠣꠄ ꠎꠥꠖꠤ ꠅꠃ ꠎꠋꠉꠟꠞꠦ ꠅꠟꠣ ꠡꠥꠘ꠆ꠖꠞ ꠇꠞꠤ ꠢꠣꠎꠣꠁꠍꠂꠘ, ꠔꠦ ꠅ ꠇꠝꠎꠥꠞ ꠁꠝꠣꠘꠖꠣꠞ ꠅꠇꠟ, ꠔꠥꠝꠞꠣꠞꠦꠅ ꠔꠣꠁꠘ ꠡꠥꠘ꠆ꠖꠞ ꠇꠞꠤ ꠢꠣꠎꠣꠁꠔꠣ ꠘꠣꠄ ꠘꠤ?
LUK 12:29 ꠔꠦ ꠇꠤꠟꠣ ꠈꠣꠁꠔꠣꠝ, ꠇꠤꠟꠣ ꠌꠟꠔꠣꠝ, ꠁꠔꠣ ꠛꠦꠙꠣꠞꠦ ꠌꠤꠘ꠆ꠔꠣ ꠇꠞꠤꠅ ꠘꠣ, ꠛꠣ ꠅꠡ꠆ꠕꠤꠞ ꠅꠁꠅ ꠘꠣ।
LUK 12:30 ꠁ ꠖꠥꠘꠤꠀꠞ ꠝꠣꠘꠡꠦ ꠈꠣꠟꠤ ꠅꠔꠣ ꠟꠁꠀꠃ ꠗꠣꠘ꠆ꠖꠣ ꠇꠞꠦ। ꠅꠁꠟꠦ ꠔꠥꠝꠞꠣꠞ ꠛꠣꠔꠥꠘꠤ ꠛꠣꠚꠦ ꠔ ꠄꠝꠘꠦꠃ ꠎꠣꠘꠂꠘ, ꠔꠥꠝꠞꠣꠞ ꠇꠤꠔꠣ ꠇꠤꠔꠣ ꠟꠣꠉꠛ।
LUK 12:31 ꠄꠞꠖꠣꠄꠃ ꠔꠥꠝꠞꠣ ꠁꠔꠣ ꠛꠣꠖ ꠖꠤꠀ, ꠈꠣꠟꠤ ꠀꠟ꠆ꠟꠣꠞ ꠛꠣꠖꠡꠣꠁꠞ ꠗꠣꠘ꠆ꠖꠣꠔ ꠞꠅ, ꠔꠦꠃ ꠁꠔꠣ ꠢꠇ꠆ꠇꠟꠔꠣꠃ ꠔꠣꠁꠘ ꠎꠥꠉꠣꠁꠛꠣ।
LUK 12:32 “ꠔꠥꠝꠞꠣꠃ ꠀꠝꠣꠞ ꠝꠦꠠꠣꠞ ꠙꠣꠟ, ꠔꠥꠝꠞꠣꠞ ꠖꠟ ꠢꠥꠞꠥ-ꠝꠥꠞꠥ ꠅꠁꠟꠦꠅ ꠒꠞꠣꠁꠅ ꠘꠣ, ꠔꠥꠝꠞꠣꠞ ꠛꠣꠔꠥꠘꠤ ꠛꠣꠚꠞ ꠝꠞ꠆ꠎꠤ ꠅꠁꠟ, ꠔꠥꠝꠞꠣ ꠔꠣꠘ ꠛꠣꠖꠡꠣꠁꠞ ꠜꠤꠔꠞꠅ ꠢꠣꠝꠣꠅ।
LUK 12:33 ꠔꠥꠝꠞꠣꠞ ꠎꠔꠔꠣ ꠀꠍꠦ, ꠢꠇ꠆ꠇꠟꠔꠣ ꠛꠦꠌꠤꠀ ꠉꠞꠤꠛ ꠅꠇꠟꠞꠦ ꠛꠤꠟꠣꠁ ꠖꠦꠅ, ꠀꠞ ꠘꠤꠎꠞ ꠟꠣꠉꠤ ꠈꠣꠟꠤ ꠅꠃꠟꠣ ꠄꠇ ꠇꠥꠕꠤ-ꠛꠦꠉ ꠔꠤꠀꠞ ꠇꠞꠅ, ꠎꠦ ꠇꠥꠕꠤ ꠇꠥꠘꠥꠖꠤꠘ ꠙꠥꠞꠣꠘ ꠅꠄ ꠘꠣ। ꠅꠃ ꠛꠦꠢꠦꠡ꠆ꠔꠅ ꠍꠣꠝꠣꠘꠣ ꠎꠝꠣ ꠇꠞꠅ, ꠎꠦꠈꠣꠘꠅ ꠍꠣꠝꠣꠘꠣ ꠇ꠆ꠇꠄ ꠅꠄ ꠘꠣ, ꠌꠥꠞꠦꠅ ꠘꠦꠄ ꠘꠣ, ꠙꠥꠇꠦꠅ ꠈꠣꠄ ꠘꠣ।
LUK 12:34 ꠇꠣꠞꠘ ꠔꠥꠝꠞꠣꠞ ꠗꠘ ꠎꠦꠘꠅ ꠞꠄ, ꠝꠘꠅ ꠢꠘꠅ ꠞꠁꠛ।
LUK 12:35 “ꠔꠥꠝꠞꠣ ꠇꠣꠙꠠ-ꠌꠥꠙꠠ ꠚꠤꠘ꠆ꠖꠤꠀ ꠀꠞ ꠛꠣꠔ꠆ꠔꠤ ꠎꠣꠟꠣꠁꠀ ꠔꠤꠀꠞ ꠞꠁꠅ।
LUK 12:36 ꠔꠥꠝꠞꠣ ꠅꠃ ꠎꠣꠔ ꠇꠣꠝꠟꠣꠞ ꠟꠣꠈꠣꠘ ꠅꠅ, ꠎꠣꠞꠣ ꠔꠣꠞꠣꠞ ꠝꠥꠘꠤꠛꠞ ꠟꠣꠉꠤ ꠛꠣꠞ ꠌꠣꠄ, ꠔꠣꠁꠘ ꠛꠤꠀꠞ ꠖꠣꠅꠔ ꠕꠣꠇꠤ ꠚꠤꠞꠔ ꠀꠁꠀ ꠖꠥꠀꠞꠅ ꠑꠥꠇꠣ ꠖꠤꠟꠦꠃ, ꠟꠉꠦ ꠟꠉꠦ ꠖꠥꠀꠞ ꠈꠥꠟꠔ ꠙꠣꠞꠦ।
LUK 12:37 ꠢꠃ ꠉꠥꠟꠣꠝ ꠅꠇꠟꠃ ꠇꠙꠣꠟꠤ, ꠎꠦꠞꠣꠞꠦ ꠔꠣꠞꠣꠞ ꠝꠥꠘꠤꠛꠦ ꠀꠁꠀ ꠢꠎꠣꠉ ꠙꠣꠁꠛꠣ। ꠀꠝꠤ ꠢꠣꠍꠣ ꠇꠕꠣ ꠇꠁꠞꠣꠝ, ꠝꠥꠘꠤꠛꠦ ꠀꠁꠀ ꠢꠣꠞꠤ ꠔꠣꠘ ꠘꠤꠎꠞ ꠇꠝꠞꠅ ꠉꠣꠝꠍꠣ ꠛꠣꠘ꠆ꠖꠤꠀ ꠔꠣꠞꠣꠞꠦ ꠈꠣꠘꠤꠔ ꠛꠅꠀꠁꠛꠣ, ꠀꠞ ꠘꠤꠎꠞ ꠀꠔꠦ ꠛꠣꠠꠤꠀ ꠈꠣꠅꠀꠁꠛꠣ।
LUK 12:38 ꠔꠣꠞꠣꠃ ꠛꠠ ꠇꠙꠣꠟꠤ, ꠎꠦꠞꠣꠞꠦ ꠔꠣꠞꠣꠞ ꠝꠥꠘꠤꠛꠦ ꠀꠗꠣ ꠞꠣꠁꠔ ꠛꠣ ꠢꠦꠡ ꠞꠣꠁꠔꠦ ꠀꠁꠀ ꠒꠣꠇ ꠖꠤꠟꠦꠃ ꠢꠎꠣꠉ ꠙꠣꠁꠛꠣ।
LUK 12:39 ꠝꠘꠅ ꠞꠣꠈꠤꠅ, ꠌꠥꠞ ꠇꠥꠘ ꠡꠝꠄ ꠀꠁꠛ, ꠉꠤꠞꠡ꠆ꠔꠦ ꠁꠈꠣꠘ ꠎꠣꠘꠟꠦ ꠔ ꠢꠦ ꠢꠎꠣꠉ ꠞꠁꠟ ꠅꠘꠦ, ꠔꠣꠞ ꠊꠞꠅ ꠢꠤꠋ ꠇꠣꠐꠔꠦ ꠖꠤꠟ ꠘꠣ ꠅꠘꠦ।
LUK 12:40 ꠔꠥꠝꠞꠣꠅ ꠅꠟꠣ ꠔꠤꠀꠞ ꠞꠁꠅ, ꠇꠣꠞꠘ ꠎꠦ ꠅꠇ꠆ꠔꠞ ꠇꠕꠣ ꠔꠥꠝꠞꠣ ꠌꠤꠘ꠆ꠔꠣꠃ ꠇꠞꠔꠣꠄ ꠘꠣꠄ, ꠢꠃ ꠡꠝꠄꠃ ꠛꠤꠘ-ꠀꠖꠝꠦ ꠔꠡꠞꠤꠚ ꠀꠘꠛꠣ।”
LUK 12:41 ꠔꠦꠃ ꠍꠣꠢꠣꠛꠤ ꠙꠤꠔꠞꠦ ꠇꠁꠟꠣ, “ꠢꠥꠎꠥꠞ, ꠁ ꠘꠍꠤꠅꠔ ꠈꠣꠟꠤ ꠀꠝꠞꠣꠞ ꠟꠣꠉꠤ, ꠘꠣ ꠢꠇꠟ ꠝꠣꠘꠡꠞ ꠟꠣꠉꠤ?”
LUK 12:42 ꠢꠥꠎꠥꠞꠦ ꠎꠥꠀꠙ ꠖꠤꠟꠣ, “ꠀꠈꠟꠖꠣꠞ ꠀꠞ ꠢꠇ-ꠢꠣꠟꠣꠟꠤ ꠅꠃ ꠎꠘ ꠇꠦ, ꠎꠣꠞ ꠀꠔꠅ ꠝꠣꠟꠤꠇꠦ ꠔꠣꠘ ꠉꠥꠟꠣꠝ-ꠛꠣꠘ꠆ꠖꠤꠞꠦ ꠖꠦꠈꠣ-ꠢꠥꠘꠣꠞ ꠜꠣꠞ ꠖꠤꠛꠣ, ꠢꠦ ꠅꠇ꠆ꠔꠞ ꠇꠣꠟꠅ ꠔꠣꠞꠣꠞ ꠈꠣꠘꠤ ꠛꠣꠐꠤꠀ ꠖꠤꠛ?
LUK 12:43 ꠢꠃ ꠉꠥꠟꠣꠝꠃ ꠇꠙꠣꠟꠤ, ꠎꠣꠞꠦ ꠔꠣꠞ ꠝꠥꠘꠤꠛꠦ ꠀꠁꠀ ꠅꠃ ꠟꠣꠈꠣꠘ ꠇꠣꠝ ꠇꠞꠣꠔ ꠖꠦꠈꠛꠣ।
LUK 12:44 ꠀꠝꠤ ꠔꠥꠝꠞꠣꠞꠦ ꠢꠣꠍꠣ ꠇꠕꠣ ꠇꠁꠞꠣꠝ, ꠢꠃ ꠝꠥꠘꠤꠛꠦ ꠔꠣꠞꠦ ꠔꠣꠘ ꠘꠤꠎꠞ ꠢꠇꠟ ꠗꠘ-ꠍꠣꠝꠣꠘꠣ ꠔꠖꠣꠞꠇꠤꠞ ꠄꠈꠔꠤꠀꠞ ꠖꠤꠛꠣ।
LUK 12:45 ꠅꠁꠟꠦ ꠗꠞꠤꠟꠣꠅ, ꠢꠃ ꠉꠥꠟꠣꠝꠦ ꠝꠘꠦ ꠝꠘꠦ ꠇꠁꠟ, ꠀꠝꠣꠞ ꠝꠥꠘꠤꠛ ꠀꠁꠔꠦ ꠔ ꠛꠃꠔ ꠖꠦꠞꠤ ꠀꠍꠦ, ꠀꠞ ꠅꠃ ꠚꠣꠇꠦ ꠢꠦ ꠢꠇ꠆ꠇꠟ ꠛꠣꠘ꠆ꠖꠤ-ꠉꠥꠟꠣꠝꠞꠦ ꠝꠣꠁꠞ-ꠗꠁꠞ ꠇꠞꠟ, ꠈꠣꠁꠀ-ꠖꠣꠁꠀ ꠚꠥꠞ꠆ꠔꠤ ꠇꠞꠤꠀ, ꠝꠖ ꠈꠣꠁꠀ ꠐꠣꠟ ꠅꠁꠀ ꠙꠠꠤ ꠞꠁꠟ।
LUK 12:46 ꠛꠣꠖꠦ ꠎꠦ ꠖꠤꠘ ꠀꠞ ꠎꠦ ꠅꠇ꠆ꠔꠞ ꠇꠕꠣ ꠢꠦ ꠌꠤꠘ꠆ꠔꠣꠃ ꠇꠞꠔ ꠘꠣꠄ, ꠢꠃ ꠖꠤꠘ ꠀꠞ ꠢꠃ ꠅꠇ꠆ꠔꠅ ꠔꠣꠞ ꠝꠥꠘꠤꠛ ꠀꠁꠀ ꠀꠎꠤꠞ ꠅꠁꠛꠣ। ꠔꠣꠁꠘ ꠔꠣꠞꠦ ꠄꠇ ꠍꠦꠖꠦ ꠖꠥꠁ ꠐꠥꠇꠞꠣ ꠇꠞꠤꠀ ꠘꠣꠚꠞꠝꠣꠘ ꠅꠇꠟꠞ ꠇꠣꠔꠣꠞꠅ ꠝꠤꠡꠣꠁꠛꠣ।
LUK 12:47 “ꠀꠞ ꠎꠦ ꠉꠥꠟꠣꠝꠦ ꠔꠣꠞ ꠝꠥꠘꠤꠛꠞ ꠝꠞ꠆ꠎꠤꠞꠦ ꠛꠥꠎꠤꠀꠅ ꠔꠤꠀꠞ ꠅꠁꠍꠦ ꠘꠣ, ꠔꠣꠘ ꠢꠥꠇꠥꠝ ꠝꠣꠚꠤꠇ ꠇꠣꠝ ꠇꠞꠍꠦ ꠘꠣ, ꠔꠣꠞꠦ ꠛꠦꠎꠥꠁꠔꠣ ꠝꠣꠁꠞ ꠝꠣꠞꠣ ꠅꠁꠛ।
LUK 12:48 ꠅꠁꠟꠦ ꠘꠣ ꠎꠣꠘꠤꠀ ꠎꠥꠖꠤ ꠢꠦ ꠡꠣꠎꠣ ꠙꠣꠁꠛꠣꠞ ꠇꠣꠝ ꠇꠞꠤꠟꠣꠄ, ꠔꠦ ꠔꠣꠞ ꠡꠣꠎꠣ ꠇꠝ ꠅꠁꠛ। ꠎꠣꠞꠦ ꠛꠦꠡꠤ ꠖꠦꠅꠀ ꠅꠁꠍꠦ, ꠔꠣꠞ ꠉꠦꠍ ꠕꠘꠦ ꠛꠦꠡꠤ ꠌꠣꠅꠀ ꠅꠁꠛ, ꠀꠞ ꠎꠣꠞ ꠉꠦꠍꠦ ꠛꠦꠡꠤ ꠙꠞꠤꠝꠣꠘꠦ ꠕꠅꠀ ꠅꠁꠍꠦ, ꠔꠣꠞ ꠉꠦꠍꠦꠃ ꠛꠦꠡꠤ ꠖꠣꠛꠤ ꠇꠞꠣ ꠅꠁꠛ।
LUK 12:49 “ꠀꠝꠤ ꠔ ꠖꠥꠘꠤꠀꠔ ꠀꠉꠥꠁꠘ ꠟꠣꠉꠣꠘꠤꠔ ꠀꠁꠍꠤ। ꠅꠈꠘ ꠎꠥꠖꠤ ꠁ ꠀꠉꠥꠁꠘꠈꠣꠘ ꠎꠟꠤꠎꠤꠔ, ꠔꠦ ꠛꠠ ꠜꠣꠟꠣ ꠅꠁꠟ ꠅꠘꠦ।
LUK 12:50 ꠀꠝꠤ ꠔ ꠄꠇ ꠈꠣꠍ ꠉꠥꠍꠟ ꠇꠞꠣꠃ ꠟꠣꠉꠛ। ꠔꠦ ꠀꠝꠣꠞ ꠖꠥꠈ-ꠇꠡ꠆ꠐꠞ ꠁ ꠉꠥꠍꠟ ꠎꠔꠖꠤꠘ ꠘꠣ ꠅꠁꠍꠦ, ꠅꠔ ꠖꠤꠘ ꠀꠝꠣꠞ ꠙꠦꠞꠦꠡꠣꠘꠤꠞ ꠇꠥꠘꠥ ꠡꠤꠝꠣ ꠘꠣꠁ।
LUK 12:51 ꠔꠥꠝꠞꠣ ꠝꠘꠅ ꠇꠞꠞꠣꠄ ꠘꠤ, ꠀꠝꠤ ꠖꠥꠘꠤꠀꠔ ꠡꠣꠘ꠆ꠔꠤ ꠖꠤꠔꠣꠝ ꠀꠁꠍꠤ? ꠘꠣ, ꠝꠥꠐꠦꠃ ꠘꠣꠄ, ꠀꠝꠤ ꠇꠁꠞꠣꠝ, ꠀꠝꠤ ꠔ ꠖꠥꠘꠤꠀꠔ ꠄꠇ ꠝꠔꠜꠦꠖ ꠟꠣꠉꠣꠘꠤꠔ ꠀꠁꠍꠤ।
LUK 12:52 ꠅꠈꠘ ꠕꠣꠇꠤ ꠄꠇ ꠊꠞꠞ ꠙꠣꠌꠎꠘ ꠎꠣꠞꠎꠤꠞ ꠀꠟꠉ ꠅꠁꠎꠤꠛ। ꠔꠤꠘꠎꠘ ꠖꠥꠁꠎꠘꠞ ꠛꠤꠙꠇ꠆ꠇꠦ, ꠀꠞ ꠖꠥꠁꠎꠘ ꠔꠤꠘꠎꠘꠞ ꠛꠤꠙꠇ꠆ꠇꠦ ꠟꠣꠉꠛ।
LUK 12:53 ꠛꠣꠚꠦ ꠙꠥꠀꠞ ꠛꠤꠙꠇ꠆ꠇꠦ ꠀꠞ ꠙꠥꠀ ꠛꠣꠚꠞ ꠛꠤꠙꠇ꠆ꠇꠦ। ꠝꠣ ꠙꠥꠠꠤꠞ ꠛꠤꠙꠇ꠆ꠇꠦ ꠀꠞ ꠙꠥꠠꠤꠄ ꠝꠣʼꠞ ꠛꠤꠙꠇ꠆ꠇꠦ। ꠢꠠꠤ ꠛꠃꠞ ꠛꠤꠙꠇ꠆ꠇꠦ ꠀꠞ ꠛꠃꠄ ꠢꠠꠤꠞ ꠛꠤꠙꠇ꠆ꠇꠦ ꠟꠣꠉꠛ।”
LUK 12:54 ꠛꠣꠖꠦ ꠁꠍꠣꠄ ꠝꠣꠘꠡꠞꠦ ꠇꠁꠟꠣ, “ꠔꠥꠝꠞꠣ ꠔ ꠙꠁꠌꠝꠦꠖꠤ ꠇꠣꠟꠘꠤ ꠖꠦꠈꠟꠦꠃ ꠇꠅ, ꠝꠦꠊ ꠀꠁꠅꠞ। ꠀꠞ ꠢꠣꠍꠣꠃ ꠝꠦꠊ ꠀꠄ।
LUK 12:55 ꠢꠤꠞꠛꠣꠞ ꠖꠇ꠆ꠇꠤꠘꠣ ꠛꠣꠔꠣꠡ ꠌꠣꠟꠥ ꠅꠁꠟꠦ ꠔꠥꠝꠞꠣ ꠇꠅ, ꠈꠞꠣ ꠅꠁꠛ, ꠀꠞ ꠅꠟꠣꠃ ꠅꠄ।
LUK 12:56 ꠅ ꠜꠘ꠆ꠒ ꠅꠇꠟ! ꠔꠥꠝꠞꠣ ꠀꠍꠝꠣꠘ ꠀꠞ ꠎꠝꠤꠘꠞ ꠍꠥꠞꠔ ꠛꠥꠎꠔꠣꠄ ꠙꠣꠞ, ꠔꠦ ꠀꠈꠦꠞꠤ ꠎꠝꠣꠘꠣꠞ ꠢꠣꠟ-ꠢꠇꠤꠇꠔ ꠇꠦꠘꠦ ꠛꠥꠎ ꠘꠣ?
LUK 12:57 “ꠇꠥꠘꠈꠣꠘ ꠑꠤꠇ, ꠁꠔꠣ ꠔꠥꠝꠞꠣ ꠘꠤꠎꠦ ꠘꠤꠎꠦꠃ ꠛꠤꠌꠣꠞ ꠇꠞ ꠘꠣ ꠇꠦꠘꠦ?
LUK 12:58 ꠇꠥꠘꠥ ꠘꠣꠟꠤꠡ ꠟꠁꠀ ꠢꠣꠇꠤꠝꠞ ꠍꠣꠝꠘꠦ ꠎꠣꠁꠛꠣꠞ ꠀꠉꠦ, ꠛꠤꠙꠇ꠆ꠇꠞ ꠟꠉꠦ ꠙꠕꠅ ꠛꠁꠀꠃ ꠝꠤꠐ-ꠝꠣꠐ ꠇꠞꠣꠞ ꠌꠦꠡ꠆ꠐꠣ ꠇꠞꠤꠅ। ꠀꠞꠘꠣꠄ ꠢꠦ ꠔꠥꠝꠣꠞꠦ ꠗꠞꠤꠀ ꠢꠣꠇꠤꠝꠞ ꠍꠣꠝꠘꠦ ꠘꠤꠛ, ꠢꠣꠇꠤꠝꠦ ꠙꠥꠟꠤꠡꠞ ꠀꠔꠅ ꠖꠤꠛ, ꠀꠞ ꠙꠥꠟꠤꠡꠦ ꠘꠤꠀ ꠎꠦꠟꠅ ꠢꠣꠞꠣꠁꠛ।
LUK 12:59 ꠢꠦꠡꠦ ꠡꠦꠡ ꠙꠄꠡꠣꠐꠣ ꠀꠖꠣꠄ ꠘꠣ ꠇꠞꠣ ꠙꠞ꠆ꠎꠘ꠆ꠔ, ꠇꠥꠘꠥꠝꠘ꠆ꠔꠦꠃ ꠎꠦꠟ ꠕꠣꠇꠤ ꠍꠣꠠꠣ ꠙꠣꠁꠔꠣꠄ ꠘꠣꠄ, ꠁꠔꠣ ꠀꠝꠤ ꠔꠥꠝꠞꠣꠞꠦ ꠇꠁꠞꠣꠝ।”
LUK 13:1 ꠢꠎꠞꠔ ꠁꠍꠣꠄ ꠛꠄꠀꠘ ꠇꠞꠞꠣ, ꠅꠃ ꠡꠝꠄ ꠢꠘꠞ ꠇꠄꠎꠘ ꠝꠣꠘꠡꠦ ꠔꠣꠘꠞꠦ ꠇꠁꠟꠣ, “ꠢꠥꠎꠥꠞ, ꠉꠣꠟꠤꠟ ꠎꠤꠟꠣꠞ ꠇꠤꠍꠥ ꠝꠣꠘꠡꠦ ꠀꠟ꠆ꠟꠣꠞ ꠙꠣꠇ ꠎꠣꠉꠣꠔ ꠉꠤꠀ ꠙꠡꠥ ꠇꠥꠞꠛꠣꠘꠤ ꠖꠦꠅꠀꠔ ꠀꠍꠟꠣ, ꠅꠃ ꠡꠝꠄ ꠢꠣꠇꠤꠝ ꠙꠤꠟꠣꠔꠦ ꠔꠣꠞꠣꠞꠦ ꠢꠃ ꠙꠣꠇ ꠎꠣꠉꠣꠔ ꠎꠣꠘꠦ ꠝꠣꠞꠤꠀ, ꠔꠣꠞꠣꠞ ꠟꠃ ꠀꠞ ꠇꠥꠞꠛꠣꠘꠤꠞ ꠟꠃ ꠄꠇꠟꠉꠦ ꠝꠤꠡꠣꠁꠍꠂꠘ।”
LUK 13:2 ꠁꠈꠣꠘ ꠢꠥꠘꠤꠀ ꠁꠍꠣꠄ ꠇꠁꠟꠣ, “ꠅꠃ ꠇꠥꠞꠛꠣꠘꠤ ꠖꠦꠅꠞꠣꠞ ꠝꠃꠔ ꠅꠟꠣ ꠅꠀꠄ, ꠔꠥꠝꠞꠣ ꠝꠘꠅ ꠇꠞꠞꠣꠄ ꠘꠤ, ꠉꠣꠟꠤꠟꠞ ꠅꠁꠘ꠆ꠘ ꠝꠣꠘꠥꠡ ꠕꠣꠇꠤ ꠄꠞꠣ ꠛꠦꠡꠤ ꠉꠥꠘꠣꠉꠣꠞ ꠀꠍꠤꠟ?
LUK 13:3 ꠀꠝꠤ ꠔꠥꠝꠞꠣꠞꠦ ꠇꠁꠞꠣꠝ, ꠘꠣ, ꠁꠟꠣ ꠘꠣꠄ, ꠅꠁꠟꠦ ꠔꠥꠝꠞꠣ ꠎꠥꠖꠤ ꠉꠥꠘꠣ ꠕꠣꠇꠤ ꠔꠃꠛꠣ ꠘꠣ ꠇꠞ, ꠔꠦ ꠔꠥꠝꠞꠣꠅ ꠅꠟꠣ ꠛꠤꠘꠣꠡ ꠅꠁꠛꠣꠄ।
LUK 13:4 ꠢꠥꠘꠅ, ꠎꠦꠞꠥꠎꠣꠟꠦꠝꠞ ꠍꠤꠟꠥꠀ ꠄꠟꠣꠇꠣꠞ ꠢꠃ ꠃꠌꠣ ꠝꠤꠘꠣꠞꠣ ꠜꠣꠋꠉꠣꠄ ꠎꠦ ꠀꠑꠣꠞ ꠎꠘ ꠝꠣꠞꠣ ꠉꠦꠍꠤꠟ, ꠔꠣꠞꠣꠞ ꠛꠦꠙꠣꠞꠦ ꠇꠤꠔꠣ ꠝꠘꠅ ꠇꠞ? ꠎꠦꠞꠥꠎꠣꠟꠦꠝꠞ ꠛꠣꠇꠤ ꠝꠣꠘꠥꠡ ꠕꠣꠇꠤ ꠄꠞꠣ ꠛꠦꠡꠤ ꠉꠥꠘꠣꠉꠣꠞ ꠘꠤ?
LUK 13:5 ꠀꠝꠤ ꠔꠥꠝꠞꠣꠞꠦ ꠇꠁꠞꠣꠝ, ꠘꠣ, ꠁꠈꠣꠘ ꠑꠤꠇ ꠘꠣꠄ, ꠅꠁꠟꠦ ꠔꠥꠝꠞꠣ ꠎꠥꠖꠤ ꠉꠥꠘꠣ ꠕꠣꠇꠤ ꠔꠃꠛꠣ ꠘꠣ ꠇꠞ, ꠔꠦ ꠔꠥꠝꠞꠣꠅ ꠅꠟꠣ ꠛꠤꠘꠣꠡ ꠅꠁꠛꠣꠄ।”
LUK 13:6 ꠛꠣꠖꠦ ꠔꠣꠁꠘ ꠅꠃ ꠇꠤꠌ꠆ꠍꠣ ꠢꠥꠘꠣꠁꠟꠣ, “ꠄꠇ ꠉꠤꠞꠡ꠆ꠔꠦ ꠔꠣꠘ ꠛꠣꠉꠣꠘꠅ ꠒꠥꠝꠥꠞꠞ ꠄꠇꠐꠣ ꠉꠣꠍ ꠟꠣꠉꠣꠁꠟꠣ। ꠡꠝꠄ ꠀꠁꠟꠦ ꠄꠁꠘ ꠀꠁꠀ ꠉꠣꠍꠅ ꠚꠟ ꠔꠥꠇꠣꠁꠟꠣ, ꠅꠁꠟꠦ ꠇꠥꠘꠥ ꠚꠟ ꠙꠣꠁꠟꠣ ꠘꠣ।
LUK 13:7 ꠘꠣ ꠙꠣꠁꠀ ꠛꠣꠉꠣꠘꠞ ꠝꠣꠟꠤꠞꠦ ꠇꠁꠟꠣ, ꠢꠥꠘꠅ, ꠀꠁꠎ ꠔꠤꠘ ꠛꠍꠞ ꠗꠞꠤ ꠅꠃ ꠒꠥꠝꠥꠞ ꠉꠣꠍꠅ ꠚꠟ ꠔꠥꠇꠣꠁꠞꠣꠝ, ꠅꠁꠟꠦ ꠇꠥꠘ꠆ꠔꠣꠃ ꠙꠣꠁꠞꠣꠝ ꠘꠣ। ꠔꠦ ꠔꠥꠝꠤ ꠉꠣꠍꠉꠥ ꠇꠣꠐꠤꠟꠣꠅ, ꠁꠉꠥꠄ ꠈꠣꠝꠈꠣ ꠎꠝꠤꠘꠞ ꠞꠡ ꠐꠣꠘꠦꠞ।
LUK 13:8 ꠝꠣꠟꠤꠄ ꠇꠁꠟ, ꠍꠣꠛ, ꠁ ꠛꠍꠞꠈꠣꠘꠅ ꠕꠣꠇꠃꠇ। ꠀꠝꠤ ꠅꠉꠥꠞ ꠌꠣꠁꠞꠅ ꠉꠣꠟꠣꠞ ꠝꠣꠐꠤ ꠈꠥꠠꠤꠀ ꠡꠣꠞ ꠖꠤꠝꠥ।
LUK 13:9 ꠍꠣꠝꠘꠞ ꠛꠍꠞ ꠎꠥꠖꠤ ꠚꠟ ꠗꠞꠤꠟꠣꠄ, ꠔꠦ ꠔ ꠜꠣꠟꠣ, ꠘꠣꠁꠟꠦ ꠇꠣꠐꠤꠟꠤꠝꠥ।”
LUK 13:10 ꠄꠇ ꠎꠥꠝ꠆ꠝꠣꠛꠣꠞꠦ ꠁꠍꠣ ꠝꠍꠤꠖꠞ ꠜꠤꠔꠞꠦ ꠘꠍꠤꠅꠔ ꠇꠞꠣꠔ ꠀꠍꠟꠣ।
LUK 13:11 ꠢꠘꠅ ꠄꠇ ꠛꠦꠐꠤ ꠝꠣꠘꠥꠡ ꠀꠍꠤꠟ, ꠁ ꠛꠦꠐꠤꠞ ꠃꠙꠞꠦ ꠀꠑꠣꠞ ꠛꠍꠞ ꠗꠞꠤ ꠀꠔꠡꠤ-ꠖꠦꠅꠄ ꠀꠍꠞ ꠇꠞꠍꠤꠟ। ꠖꠦꠅꠄ ꠛꠦꠐꠤꠞꠦ ꠉꠥꠎꠣ ꠛꠣꠘꠣꠁꠟꠤꠍꠤꠟ, ꠛꠦꠐꠤ ꠡꠤꠗꠣ ꠅꠁꠀ ꠃꠛꠣꠁꠔ ꠙꠣꠞꠔ ꠘꠣ।
LUK 13:12 ꠁꠍꠣꠄ ꠛꠦꠐꠤꠞꠦ ꠒꠣꠇꠖꠤ ꠇꠣꠘ꠆ꠖꠣꠔ ꠀꠘꠤꠀ ꠇꠁꠟꠣ, “ꠝꠣꠁ ꠉ, ꠔꠥꠝꠤ ꠅꠈꠘ ꠁ ꠛꠦꠝꠣꠞ ꠕꠣꠇꠤ ꠞꠦꠢꠣꠁ ꠙꠣꠁꠍ।”
LUK 13:13 ꠅꠈꠣꠘ ꠇꠁꠀꠃ ꠔꠣꠁꠘ ꠛꠦꠐꠤꠞꠦ ꠀꠔꠣꠁ ꠖꠤꠟꠣ। ꠟꠉꠦ ꠟꠉꠦꠃ ꠛꠦꠐꠤ ꠡꠤꠗꠣ ꠅꠁꠀ ꠃꠛꠣꠁꠟ, ꠀꠞ ꠀꠟ꠆ꠟꠣꠞ ꠡꠥꠇꠥꠞ-ꠉꠥꠎꠣꠞ ꠇꠞꠟ।
LUK 13:14 ꠅꠁꠟꠦ ꠎꠥꠝ꠆ꠝꠣꠞ ꠖꠤꠘ ꠔꠣꠁꠘ ꠁ ꠛꠦꠐꠤꠞꠦ ꠜꠣꠟꠣ ꠇꠞꠣꠄ, ꠝꠍꠤꠖꠞ ꠝꠔꠟ꠆ꠟꠤꠄ ꠉꠥꠍꠣ ꠇꠞꠤꠀ ꠇꠁꠟꠣ, “ꠇꠣꠝ ꠇꠞꠣꠞ ꠟꠣꠉꠤ ꠔ ꠛꠣꠇꠤ ꠍꠄꠖꠤꠘꠃ ꠀꠔꠅ ꠀꠍꠦ। ꠔꠥꠝꠞꠣ ꠎꠥꠝ꠆ꠝꠣꠞ ꠖꠤꠘ ꠘꠣ ꠀꠁꠀ ꠅꠁꠘ꠆ꠘ ꠎꠦꠇꠥꠘꠥ ꠖꠤꠘ ꠀꠁꠀ ꠜꠣꠟꠣ ꠅꠁꠅ।”
LUK 13:15 ꠔꠦꠃ ꠁꠍꠣꠄ ꠢꠤ ꠝꠔꠟ꠆ꠟꠤꠞꠦ ꠇꠁꠟꠣ, “ꠅ ꠜꠘ꠆ꠒ ꠅꠇꠟ! ꠎꠥꠝ꠆ꠝꠣꠞ ꠖꠤꠘ ꠀꠙꠘꠣꠞꠣꠞ ꠉꠞꠥ-ꠉꠣꠗꠣꠞꠦ ꠉꠥꠀꠟꠣꠞ ꠛꠣꠞꠦ ꠘꠤꠀ ꠙꠣꠘꠤ ꠈꠣꠛꠣꠁꠘ ꠘꠣ ꠘꠤ?
LUK 13:16 ꠀꠁꠎ ꠀꠑꠣꠞ ꠛꠍꠞ ꠗꠞꠤ ꠁꠛ꠆ꠞꠣꠢꠤꠝꠞ ꠅꠃ ꠀꠅꠟꠣꠖꠞꠦ ꠡꠄꠔꠣꠘꠦ ꠛꠣꠘ꠆ꠖꠤꠀ ꠞꠣꠈꠍꠤꠟ। ꠅꠈꠘ ꠎꠥꠝ꠆ꠝꠣꠛꠣꠞꠦ ꠁ ꠛꠦꠐꠤꠞꠦ ꠀꠎꠣꠖ ꠇꠞꠣ ꠎꠣꠁꠎ ꠅꠁꠍꠦ ꠘꠣ ꠘꠤ?”
LUK 13:17 ꠁꠈꠣꠘ ꠢꠥꠘꠤꠀ ꠎꠦꠞꠣ ꠔꠣꠘ ꠛꠤꠙꠇ꠆ꠇꠦ ꠀꠍꠤꠟ ꠔꠣꠞꠣ ꠢꠇꠟꠦꠃ ꠡꠞꠝꠤꠘ꠆ꠖꠣ ꠅꠁꠟ। ꠅꠁꠟꠦ ꠛꠣꠇꠤ ꠝꠥꠍꠟ꠆ꠟꠤ ꠅꠇꠟꠦ ꠔꠣꠘ ꠢꠇꠟ ꠇꠦꠞꠣꠝꠔꠤ ꠖꠦꠈꠤꠀ ꠈꠥꠡꠤ ꠅꠁꠟꠣ।
LUK 13:18 ꠛꠣꠖꠦ ꠁꠍꠣꠄ ꠇꠁꠟꠣ, “ꠀꠟ꠆ꠟꠣꠞ ꠛꠣꠖꠡꠣꠁꠞꠦ ꠀꠝꠤ ꠇꠤꠔꠣꠞ ꠟꠉꠦ ꠔꠥꠟꠘꠣ ꠇꠞꠔꠣꠝ?
LUK 13:19 ꠝꠘꠅ ꠇꠞꠃꠇ꠆ꠇꠣ, ꠀꠟ꠆ꠟꠣꠞ ꠛꠣꠖꠡꠣꠁ ꠅꠁꠟꠉꠤ ꠄꠉꠥ ꠒꠦꠋꠉꠣ ꠛꠤꠌꠤꠞ ꠟꠣꠈꠣꠘ, ꠇꠥꠘꠥ ꠉꠤꠞꠡ꠆ꠔꠦ ꠔꠣꠞ ꠎꠝꠤꠘꠅ ꠘꠤꠀ ꠅꠃ ꠛꠤꠌꠤ ꠛꠣꠁꠘ ꠖꠤꠟ, ꠛꠣꠖꠦ ꠁꠐꠣ ꠛꠠ ꠅꠁꠀ ꠉꠣꠍ ꠅꠁꠉꠦꠟ, ꠀꠞ ꠙꠣꠈꠤꠘ꠆ꠔꠦ ꠀꠁꠀ ꠉꠣꠍꠞ ꠒꠣꠟꠅ ꠛꠣꠖꠣ ꠛꠣꠘꠣꠁꠟ।”
LUK 13:20 ꠔꠣꠁꠘ ꠢꠤꠞꠛꠣꠞ ꠇꠁꠟꠣ, “ꠀꠟ꠆ꠟꠣꠞ ꠛꠣꠖꠡꠣꠁꠞ ꠔꠥꠟꠘꠣ ꠀꠝꠤ ꠇꠤꠔꠣꠞ ꠟꠉꠦ ꠇꠞꠔꠣꠝ?
LUK 13:21 ꠗꠞꠃꠇ꠆ꠇꠣ, ꠀꠟ꠆ꠟꠣꠞ ꠛꠣꠖꠡꠣꠁ ꠅꠁꠟꠉꠤ ꠈꠣꠝꠤꠞꠞ ꠟꠣꠈꠣꠘ, ꠇꠥꠘꠥ ꠄꠇ ꠛꠦꠐꠤꠄ ꠕꠥꠠꠣ ꠈꠣꠝꠤꠞ ꠘꠤꠀ ꠄꠇ ꠝꠘ ꠝꠄꠖꠣꠞ ꠟꠉꠦ ꠝꠣꠈꠤꠟ, ꠀꠞ ꠈꠣꠝꠤꠞꠞ ꠚꠣꠚꠦ ꠢꠇꠟ ꠝꠄꠖꠣ ꠚꠥꠟꠤꠀ ꠃꠑꠤꠟ।”
LUK 13:22 ꠢꠎꠞꠔ ꠁꠍꠣꠄ ꠀꠐꠤ ꠀꠐꠤ ꠉꠣꠃꠄ ꠉꠣꠃꠄ ꠀꠞ ꠐꠣꠃꠘꠦ ꠐꠣꠃꠘꠦ ꠉꠤꠀ ꠔꠛꠟꠤꠉ ꠇꠞꠤꠀ ꠎꠦꠞꠥꠎꠣꠟꠦꠝꠞ ꠛꠣꠄ ꠀꠉꠥꠀꠁꠟꠣ।
LUK 13:23 ꠄꠞꠝꠣꠎꠦ ꠄꠇꠎꠘ ꠝꠣꠘꠡꠦ ꠔꠣꠘꠦ ꠎꠤꠇꠣꠁꠟ, “ꠢꠥꠎꠥꠞ, ꠎꠦꠞꠣ ꠘꠣꠎꠣꠔ ꠙꠣꠁꠛꠣ, ꠄꠞꠣ ꠙꠞꠤꠝꠣꠘꠦ ꠈꠥꠛ ꠇꠝ ꠘꠤ?” ꠅꠃ ꠁꠍꠣꠄ ꠝꠣꠘꠡꠞꠦ ꠇꠁꠟꠣ,
LUK 13:24 “ꠌꠤꠙꠣ ꠖꠥꠀꠞꠦꠖꠤ ꠢꠣꠝꠣꠘꠤꠞ ꠟꠣꠉꠤ ꠖꠤꠟꠦ-ꠎꠣꠘꠦ ꠚꠤꠇꠤꠞ ꠇꠞꠅ। ꠢꠥꠘꠅ, ꠀꠝꠤ ꠔꠥꠝꠞꠣꠞꠦ ꠇꠁꠞꠣꠝ, ꠛꠃꠔ ꠎꠘ ꠁꠘꠅ ꠢꠣꠝꠣꠁꠔꠦ ꠌꠣꠁꠟꠦꠅ, ꠢꠣꠝꠣꠁꠔ ꠙꠣꠞꠔ ꠘꠣꠄ।
LUK 13:25 ꠊꠞꠞ ꠝꠣꠟꠤꠇꠦ ꠎꠦꠛꠟꠣ ꠖꠥꠀꠞ ꠛꠘ꠆ꠖ ꠇꠞꠤꠟꠤꠛꠣ, ꠔꠥꠝꠞꠣ ꠛꠣꠞꠦ ꠃꠛꠣꠁꠀ ꠖꠥꠀꠞꠅ ꠑꠥꠇꠣꠁꠔꠦ ꠑꠥꠇꠣꠁꠔꠦ ꠇꠁꠛꠣꠄ, ‘ꠢꠥꠎꠥꠞ, ꠀꠝꠞꠣꠞꠦ ꠖꠥꠀꠞꠈꠣꠘ ꠈꠥꠟꠤꠀ ꠖꠦꠃꠇ꠆ꠇꠣ।’ ꠅꠁꠟꠦ ꠔꠣꠁꠘ ꠎꠥꠀꠙ ꠖꠤꠛꠣ, ‘ꠔꠥꠝꠞꠣ ꠇꠥꠀꠁ ꠕꠣꠇꠤ ꠀꠁꠍ, ꠀꠝꠤ ꠔ ꠌꠤꠘꠤꠃ ꠘꠣ।’
LUK 13:26 ꠔꠦꠃ ꠔꠥꠝꠞꠣ ꠇꠁꠛꠣꠄ, ‘ꠀꠝꠞꠣ ꠀꠙꠘꠣꠞ ꠟꠉꠦ ꠈꠣꠁꠍꠤ-ꠛꠁꠍꠤ, ꠀꠙꠘꠦ ꠔ ꠀꠝꠞꠣꠞ ꠙꠕꠅ-ꠊꠣꠐꠅ ꠀꠁꠀ ꠀꠝꠞꠣꠞꠦ ꠘꠍꠤꠅꠔ ꠇꠞꠔꠣ।’
LUK 13:27 ꠅꠁꠟꠦ ꠔꠣꠁꠘ ꠇꠁꠛꠣ, ‘ꠢꠣꠄꠞꠦ ꠘꠣꠚꠞꠝꠣꠘ ꠅꠇꠟ, ꠀꠝꠣꠞ ꠉꠦꠍ ꠕꠣꠇꠤ ꠜꠣꠉꠅ। ꠔꠥꠝꠞꠣ ꠇꠥꠀꠁ ꠕꠣꠇꠤ ꠀꠁꠍ, ꠀꠝꠤ ꠔ ꠌꠤꠘꠤꠃ ꠘꠣ।’
LUK 13:28 “ꠔꠥꠝꠞꠣ ꠖꠦꠈꠛꠣꠄ ꠁꠛ꠆ꠞꠣꠢꠤꠝ, ꠁꠍꠢꠣꠇ, ꠁꠀꠇꠥꠛ ꠀꠞ ꠔꠣꠝꠣꠝ ꠘꠛꠤ ꠅꠇꠟ ꠀꠟ꠆ꠟꠣꠞ ꠛꠣꠖꠡꠣꠁꠔ ꠖꠣꠈꠤꠟ ꠅꠁꠍꠂꠘ, ꠅꠁꠟꠦ ꠔꠥꠝꠞꠣꠞꠦ ꠢꠞꠣꠁꠀ ꠚꠣꠟꠣꠘꠤ ꠅꠁꠍꠦ। ꠔꠥꠝꠞꠣꠞ ꠝꠣꠎꠦ ꠇꠦꠃ ꠇꠣꠘ꠆ꠖꠣ-ꠇꠣꠐꠤ ꠇꠞꠛꠣꠄ ꠀꠞ ꠇꠦꠃ ꠖꠣꠔ ꠇꠤꠠꠤꠝꠤꠠꠤ ꠈꠣꠁꠛꠣꠄ।
LUK 13:29 ꠀꠞꠅ ꠖꠦꠈꠛꠣꠄ, ꠖꠥꠘꠤꠀꠞ ꠌꠣꠁꠞꠅꠛꠣꠄ ꠕꠣꠇꠤ ꠝꠣꠘꠥꠡ ꠀꠁꠀ ꠀꠟ꠆ꠟꠣꠞ ꠛꠣꠖꠡꠣꠁꠔ ꠖꠣꠈꠤꠟ ꠅꠁꠀ ꠈꠣꠘꠣ-ꠖꠣꠘꠣ ꠈꠣꠁꠞꠣ।
LUK 13:30 ꠔꠦ ꠎꠦꠞꠣ ꠅꠈꠘ ꠈꠞꠞ ꠇꠣꠔꠣꠞꠅ ꠀꠍꠦ, ꠔꠣꠞꠣ ꠇꠦꠃ ꠇꠦꠃ ꠀꠉꠦ ꠀꠁꠛ, ꠅꠁꠟꠦ ꠅꠈꠘ ꠎꠦꠞꠣ ꠀꠉꠞ ꠇꠣꠔꠣꠞꠅ ꠀꠍꠦ ꠔꠣꠞꠣ ꠇꠦꠃ ꠇꠦꠃ ꠈꠞꠦ ꠎꠣꠁꠛꠉꠤ।”
LUK 13:31 ꠔꠣꠁꠘ ꠅꠔꠣ ꠝꠣꠔꠤꠞꠣ, ꠄꠞꠝꠣꠎꠦ ꠀꠈꠔꠣꠃ ꠚꠞꠤꠡꠤ ꠖꠟꠞ ꠇꠄꠎꠘ ꠀꠁꠀ ꠁꠍꠣꠞꠦ ꠇꠁꠟꠣ, “ꠀꠙꠘꠦ ꠁꠘ ꠕꠣꠇꠤ ꠢꠞꠤꠀ ꠎꠣꠁꠘꠉꠤ, ꠇꠣꠞꠘ ꠞꠣꠎꠣ ꠢꠦꠞꠥꠖꠦ ꠀꠙꠘꠣꠞꠦ ꠝꠣꠞꠤꠟꠤꠔꠣ ꠌꠣꠁꠞꠣ।”
LUK 13:32 ꠁꠍꠣꠄ ꠔꠣꠞꠣꠞꠦ ꠇꠁꠟꠣ, “ꠀꠙꠘꠣꠞꠣ ꠉꠤꠀ ꠢꠃ ꠢꠤꠀꠟꠞ ꠍꠣꠅꠞꠦ ꠇꠃꠇ꠆ꠇꠣ, ꠀꠁꠎ ꠀꠞ ꠇꠣꠁꠟ ꠀꠝꠤ ꠎꠤꠘ꠆ꠘꠣꠔ ꠍꠣꠠꠣꠁꠝꠥ, ꠛꠦꠝꠣꠞꠤ ꠅꠇꠟꠞ ꠡꠤꠚꠣ ꠇꠞꠝꠥ, ꠙꠞꠥ ꠖꠤꠘ ꠀꠝꠣꠞ ꠇꠣꠝ ꠡꠦꠡ ꠅꠁꠛ।
LUK 13:33 ꠔꠦ ꠎꠦꠟꠣꠃ ꠅꠃꠇ, ꠀꠁꠎ, ꠇꠣꠁꠟ ꠀꠞ ꠙꠞꠥ, ꠅꠃ ꠔꠤꠘ ꠖꠤꠘ ꠀꠝꠣꠞ ꠌꠟꠣꠃ ꠟꠣꠉꠛ। ꠀꠝꠤ ꠔ ꠎꠣꠘꠤꠃ, ꠎꠦꠞꠥꠎꠣꠟꠦꠝꠞ ꠛꠣꠞꠦ ꠇꠥꠘꠥ ꠘꠛꠤꠞꠦ ꠎꠣꠘꠦ ꠝꠣꠞꠣ ꠅꠄ ꠘꠣ।
LUK 13:34 “ꠎꠦꠞꠥꠎꠣꠟꠦꠝ! ꠢꠣꠄꠞꠦ ꠎꠦꠞꠥꠎꠣꠟꠦꠝ! ꠔꠥꠝꠤ ꠘꠛꠤ ꠅꠇꠟꠞꠦ ꠎꠣꠘꠦ ꠝꠣꠞ। ꠔꠥꠝꠣꠞ ꠉꠦꠍꠦ ꠎꠣꠞꠣꠞꠦ ꠛꠦꠎꠣ ꠅꠁꠍꠦ, ꠔꠥꠝꠤ ꠔꠣꠞꠣꠞꠦ ꠙꠣꠔ꠆ꠔꠞ ꠝꠣꠞꠍ। ꠝꠥꠞꠉꠤꠄ ꠎꠦꠟꠣ ꠔꠣꠁꠞ ꠍꠣꠅꠞꠦ ꠒꠣꠈꠘꠣꠞ ꠔꠟꠦ ꠀꠡꠞꠄ ꠖꠦꠄ, ꠀꠝꠤ ꠅꠃꠟꠣ ꠔꠥꠝꠣꠞ ꠝꠣꠘꠡꠞꠦ ꠀꠡꠞꠄ ꠖꠤꠔꠣꠝ ꠌꠣꠁꠍꠤ, ꠅꠁꠟꠦ ꠔꠥꠝꠤ ꠞꠣꠎꠤ ꠅꠁꠟꠣꠄ ꠘꠣ।
LUK 13:35 ꠔꠦ ꠢꠥꠘꠅ, ꠔꠥꠝꠣꠞ ꠛꠣꠠꠤ ꠈꠣꠟꠤ-ꠛꠣꠠꠤ ꠅꠁꠛ। ꠀꠝꠤ ꠔꠥꠝꠞꠣꠞꠦ ꠇꠁꠞꠣꠝ, ꠎꠔꠖꠤꠘ ꠔꠥꠝꠞꠣ ꠘꠣ ꠇꠁꠛꠣꠄ, ꠀꠟ꠆ꠟꠣꠞ ꠘꠣꠝ ꠟꠁꠀ ꠎꠦꠁꠘ ꠀꠁꠞꠣ ꠔꠣꠁꠘꠃ ꠝꠥꠛꠣꠞꠇ, ꠅꠔ ꠖꠤꠘ ꠔꠥꠝꠞꠣ ꠀꠞ ꠀꠝꠣꠞꠦ ꠖꠦꠈꠔꠣꠄ ꠘꠣꠄ।”
LUK 14:1 ꠢꠎꠞꠔ ꠁꠍꠣ ꠚꠞꠤꠡꠤ ꠖꠟꠞ ꠄꠇ ꠝꠥꠞꠛ꠆ꠛꠤꠞ ꠛꠣꠠꠤꠔ ꠇꠥꠘꠥ ꠄꠇ ꠎꠥꠝ꠆ꠝꠣꠛꠣꠞꠦ ꠖꠣꠅꠔꠅ ꠉꠦꠟꠣ, ꠉꠤꠀ ꠢꠣꠞꠟꠦ ꠔꠣꠞꠣ ꠔꠣꠘ ꠛꠣꠄ ꠈꠥꠛ ꠜꠣꠟꠣ ꠇꠞꠤ ꠌꠃꠈ ꠞꠣꠈꠟ।
LUK 14:2 ꠀꠈꠔꠣꠃ ꠔꠣꠘ ꠍꠣꠝꠘꠦ ꠄꠇ ꠛꠦꠝꠣꠞꠤ ꠛꠦꠐꠣ ꠀꠁꠟ, ꠔꠣꠞ ꠀꠡ꠆ꠔꠣ ꠡꠞꠤꠟ ꠛꠦꠝꠣꠞꠦ ꠚꠥꠟꠤꠉꠦꠍꠤꠟ।
LUK 14:3 ꠔꠦꠃ ꠁꠍꠣꠄ ꠢꠘꠞ ꠀꠟꠤꠝ ꠀꠞ ꠚꠞꠤꠡꠤ ꠅꠇꠟꠞꠦ ꠎꠤꠇꠣꠁꠟꠣ, “ꠝꠥꠍꠣ ꠘꠛꠤꠞ ꠡꠞꠤꠅꠔ ꠝꠣꠚꠤꠇ ꠎꠥꠝ꠆ꠝꠣꠛꠣꠞꠦ ꠇꠥꠘꠥ ꠝꠣꠘꠡꠞ ꠛꠦꠝꠣꠞ ꠡꠤꠚꠣ ꠇꠞꠣ ꠎꠣꠁꠎ ꠘꠤ?”
LUK 14:4 ꠁꠈꠣꠘ ꠢꠥꠘꠤꠀ ꠔꠣꠞꠣ ꠢꠇꠟ ꠘꠤꠞꠣꠁ ꠞꠁꠟꠣ, ꠀꠞ ꠁꠍꠣꠄ ꠢꠤ ꠛꠦꠝꠣꠞꠤꠞꠦ ꠡꠤꠚꠣ ꠇꠞꠤꠀ ꠛꠤꠖꠣꠄ ꠖꠤꠟꠣꠁꠟꠣ।
LUK 14:5 ꠛꠣꠖꠦ ꠔꠣꠞꠣꠞꠦ ꠇꠁꠟꠣ, “ꠔꠥꠝꠞꠣꠞ ꠝꠣꠎꠦ ꠁꠟꠣ ꠇꠥꠘꠥ ꠎꠘ ꠀꠍꠦ ꠘꠤ, ꠎꠣꠞ ꠇꠥꠘꠥ ꠢꠥꠞꠥꠔ꠆ꠔꠣ ꠛꠣ ꠉꠞꠥ-ꠍꠣꠉꠟ ꠎꠥꠝ꠆ꠝꠣꠞ ꠖꠤꠘ ꠙꠣꠘꠤꠔ ꠙꠠꠤꠉꠦꠟꠦ, ꠢꠦ ꠁꠉꠥꠞꠦ ꠙꠣꠘꠤ ꠕꠣꠇꠤ ꠔꠥꠟꠦ ꠘꠣ?”
LUK 14:6 ꠁꠈꠣꠘ ꠢꠥꠘꠤꠀ ꠔꠣꠞꠣ ꠇꠥꠘꠥ ꠎꠥꠀꠙ ꠖꠤꠔꠣ ꠙꠣꠞꠟꠣ ꠘꠣ।
LUK 14:7 ꠀꠞ ꠎꠦ ꠝꠦꠝꠣꠘ ꠅꠇꠟ ꠖꠣꠅꠔꠅ ꠀꠁꠍꠂꠘ, ꠔꠣꠞꠣ ꠢꠇꠟꠦ ꠜꠣꠟꠣ ꠜꠣꠟꠣ ꠎꠣꠉꠣ ꠔꠥꠇꠣꠁ ꠛꠁꠞꠣ ꠖꠦꠈꠤꠀ, ꠁꠍꠣꠄ ꠔꠣꠞꠣꠞꠦ ꠅꠃ ꠔꠣꠟꠤꠝ ꠖꠤꠟꠣ,
LUK 14:8 “ꠇꠥꠘꠥ ꠝꠣꠘꠡꠦ ꠔꠥꠝꠣꠞꠦ ꠛꠤꠀꠞ ꠖꠣꠅꠔ ꠖꠤꠟꠦ, ꠔꠥꠝꠤ ꠝꠎꠟꠤꠍꠅ ꠢꠣꠝꠣꠁꠀ ꠖꠣꠝꠤ ꠎꠣꠉꠣꠔ ꠛꠅꠀ ꠑꠤꠇ ꠘꠣꠄ। ꠇꠣꠞꠘ ꠝꠣꠟꠤꠇꠦ ꠇꠤꠛꠣꠘ ꠔꠥꠝꠣꠞ ꠕꠣꠇꠤ ꠀꠞꠅ ꠁꠎ꠆ꠎꠔꠤ ꠇꠦꠃꠞꠞꠦ ꠖꠣꠅꠔ ꠖꠤꠍꠂꠘ।
LUK 14:9 ꠔꠦ ꠅꠁꠟꠦ ꠎꠦꠁꠘ ꠔꠥꠝꠣꠞꠦ ꠖꠣꠅꠔ ꠖꠤꠍꠂꠘ ꠔꠣꠁꠘ ꠀꠁꠀ ꠇꠁꠛꠣ, ꠅꠃ ꠍꠤꠐ ꠕꠣꠇꠤ ꠃꠑꠤꠀ ꠀꠝꠣꠞ ꠖꠣꠝꠤ ꠝꠦꠝꠣꠘꠞꠦ ꠛꠁꠛꠣꠞ ꠖꠦꠁꠘ। ꠔꠦꠃ ꠔꠥꠝꠤ ꠡꠞꠝꠤꠘ꠆ꠖꠣ ꠅꠁꠀ ꠄꠝꠘꠦꠃ ꠢꠇꠟ ꠕꠣꠇꠤ ꠘꠤꠌꠣ ꠎꠣꠉꠣꠔ ꠉꠤꠀ ꠛꠁꠛꠣꠄ।
LUK 14:10 ꠄꠞꠖꠣꠄ ꠔꠥꠝꠤ ꠇꠥꠘꠥ ꠖꠣꠅꠔꠅ ꠉꠦꠟꠦ ꠙꠄꠟꠣ ꠘꠤꠌꠣ ꠎꠣꠉꠣꠔ ꠉꠤꠀ ꠛꠁꠅ। ꠔꠦꠃ ꠎꠣꠞ ꠛꠣꠠꠤꠔ ꠖꠣꠅꠔꠅ ꠉꠦꠍ ꠔꠣꠁꠘ ꠀꠁꠀ ꠇꠁꠛꠣ, ꠜꠣꠁꠍꠣꠛ, ꠁꠘꠅ ꠇꠦꠘꠦ ꠛꠁꠍꠂꠘ, ꠜꠣꠟꠣ ꠎꠣꠉꠣꠔ ꠔꠡꠞꠤꠚ ꠀꠘꠃꠇ꠆ꠇꠣ। ꠄꠔꠦ ꠀꠞꠅ ꠝꠦꠝꠣꠘ ꠅꠇꠟꠞ ꠍꠣꠝꠘꠦ ꠔꠥꠝꠣꠞ ꠁꠎ꠆ꠎꠔ ꠛꠣꠠꠛ।
LUK 14:11 ꠀꠍꠟꠦ ꠎꠦ ꠘꠤꠎꠞꠦ ꠛꠠ ꠝꠘꠅ ꠇꠞꠦ, ꠔꠣꠞꠦ ꠢꠥꠞꠥ ꠇꠞꠣ ꠅꠁꠛ। ꠀꠞ ꠎꠦ ꠘꠤꠎꠞꠦ ꠢꠥꠞꠥ ꠝꠘꠅ ꠇꠞꠦ, ꠔꠣꠞꠦ ꠛꠠ ꠇꠞꠣ ꠅꠁꠛ।”
LUK 14:12 ꠎꠦ ꠝꠃꠟꠣꠘꠣꠄ ꠢꠎꠞꠔ ꠁꠍꠣꠞꠦ ꠖꠣꠅꠔ ꠖꠤꠍꠟꠣ, ꠁꠍꠣꠄ ꠄꠘꠞꠦ ꠇꠁꠟꠣ, “ꠖꠤꠘꠞ ꠛꠣ ꠞꠣꠁꠔꠇꠥꠞ ꠈꠣꠘꠤꠞ ꠟꠣꠉꠤ ꠔꠥꠝꠤ ꠇꠥꠘꠥ ꠅꠘꠥꠡ꠆ꠑꠣꠘ ꠇꠞꠟꠦ, ꠔꠥꠝꠣꠞ ꠛꠘ꠆ꠖꠥ-ꠛꠣꠘ꠆ꠖꠛ, ꠜꠣꠁ-ꠛꠤꠞꠣꠖꠞ, ꠈꠦꠡ-ꠇꠥꠐꠥꠝ, ꠀꠞ ꠗꠣꠞꠅ ꠇꠣꠍꠞ ꠗꠘꠤ ꠝꠣꠘꠡꠞꠦ ꠖꠣꠅꠔ ꠖꠤꠅ ꠘꠣ। ꠔꠣꠞꠣꠞꠦ ꠈꠣꠅꠀꠁꠟꠦ ꠛꠣꠖꠦ ꠔꠣꠞꠣꠅ ꠔꠥꠝꠣꠞꠦ ꠈꠣꠅꠀꠁꠀ ꠛꠖꠟꠣ ꠖꠤꠟꠣꠁꠛꠣ।
LUK 14:13 ꠄꠞꠟꠣꠉꠤ ꠔꠥꠝꠤ ꠇꠥꠘꠥ ꠝꠦꠝꠣꠘꠖꠣꠞꠤ ꠇꠞꠔꠦ ꠌꠣꠁꠟꠦ, ꠈꠣꠟꠤ ꠉꠞꠤꠛ ꠝꠣꠘꠥꠡ, ꠀꠔꠥꠞ, ꠀꠘ꠆ꠖꠣ, ꠟꠥꠟꠣ-ꠟꠦꠋꠠꠣꠞꠦ ꠖꠣꠅꠔ ꠖꠤꠅ।
LUK 14:14 ꠄꠞꠣ ꠔ ꠚꠤꠞꠤꠀ ꠔꠥꠝꠣꠞꠦ ꠈꠣꠅꠀꠁꠔ ꠙꠣꠞꠔ ꠘꠣꠄ। ꠄꠔꠦ ꠇꠤꠀꠝꠔꠞ ꠖꠤꠘ ꠔꠥꠝꠤ ꠙꠞꠦꠎꠉꠣꠞ ꠅꠇꠟꠞ ꠟꠉꠦ ꠁꠔꠣꠞ ꠛꠖꠟꠣ ꠙꠣꠁꠛꠣꠄ।”
LUK 14:15 ꠁꠔꠣ ꠢꠥꠘꠤꠀ ꠢꠃ ꠈꠣꠘꠤꠞ ꠝꠎꠟꠤꠍꠞ ꠄꠇꠎꠘꠦ ꠇꠁꠟꠣ, “ꠝꠥꠛꠣꠞꠇ ꠢꠃ ꠛꠘ꠆ꠖꠣ, ꠎꠦꠁꠘ ꠀꠟ꠆ꠟꠣꠞ ꠛꠣꠖꠡꠣꠁꠔ ꠛꠁꠀ ꠈꠣꠘꠣ-ꠙꠤꠘꠣ ꠈꠣꠁꠛꠣ।”
LUK 14:16 ꠔꠦꠃ ꠁꠍꠣꠄ ꠇꠁꠟꠣ, “ꠇꠥꠘꠥ ꠄꠇꠎꠘ ꠝꠣꠘꠡꠦ ꠈꠥꠛ ꠛꠠ ꠄꠇ ꠝꠦꠎꠛꠣꠘꠤ ꠇꠞꠤꠀ, ꠛꠃꠔ ꠝꠣꠘꠡꠞꠦ ꠖꠣꠅꠔ ꠖꠤꠟꠣ।
LUK 14:17 ꠈꠣꠅꠀꠞ ꠡꠝꠄ ꠅꠁꠟꠦ ꠔꠣꠘ ꠉꠥꠟꠣꠝꠞꠦꠖꠤ ꠇꠅꠀꠁꠟꠣ, ‘ꠀꠙꠘꠣꠞꠣ ꠀꠁꠃꠇ꠆ꠇꠣ, ꠈꠣꠘꠣ ꠔꠤꠀꠞ ꠅꠁꠉꠦꠍꠦ।’
LUK 14:18 ꠅꠁꠟꠦ ꠢꠇꠟ ꠖꠣꠅꠔꠤꠄ ꠄꠇ ꠄꠇꠐꠣ ꠃꠎꠞ ꠖꠦꠈꠣꠁꠟ। ꠙꠄꠟꠣ ꠎꠘꠦ ꠇꠁꠟ, ‘ꠀꠝꠤ ꠕꠥꠠꠣ ꠎꠝꠤꠘ ꠈꠞꠤꠖ ꠇꠞꠍꠤ, ꠅꠈꠘ ꠖꠦꠈꠣꠔ ꠎꠣꠁꠔꠣꠝ, ꠔꠦ ꠢꠘꠅ ꠘꠣ ꠉꠦꠟꠦ ꠅꠁꠔ ꠘꠣꠄ, ꠄꠞꠟꠣꠉꠤ ꠀꠝꠣꠞꠦ ꠝꠣꠚ ꠇꠞꠃꠇ꠆ꠇꠣ।’
LUK 14:19 ꠖꠥꠍꠞꠣ ꠎꠘꠦ ꠇꠁꠟ, ‘ꠀꠝꠤ ꠀꠟꠞ ꠟꠣꠉꠤ ꠙꠣꠌ ꠎꠥꠠꠣ ꠛꠤꠍꠣꠟ ꠟꠁꠍꠤ। ꠅꠈꠘ ꠉꠤꠀ ꠖꠦꠈꠔꠣꠝ, ꠁꠔꠣꠄ ꠀꠟ ꠛꠣꠁꠘ ꠇꠤ ꠘꠣ, ꠀꠝꠣꠞꠦ ꠝꠣꠚ ꠇꠞꠃꠇ꠆ꠇꠣ।’
LUK 14:20 ꠀꠞꠇ ꠎꠘꠦ ꠇꠁꠟ, ‘ꠀꠝꠤ ꠔ ꠘꠄꠀ ꠛꠤꠀ ꠇꠞꠍꠤ। ꠅꠈꠘ ꠎꠣꠁꠔꠣꠝ ꠙꠣꠞꠔꠣꠝ ꠘꠣꠄ।’
LUK 14:21 ꠢꠤ ꠉꠥꠟꠣꠝꠦ ꠀꠁꠀ ꠔꠣꠞ ꠝꠣꠟꠤꠇꠞꠦ ꠢꠇꠟꠔꠣ ꠎꠣꠘꠣꠁꠟ। ꠁꠔꠣ ꠢꠥꠘꠤꠀ ꠝꠣꠟꠤꠇꠦ ꠉꠥꠍꠣ ꠇꠞꠤꠀ ꠇꠁꠟꠣ, ‘ꠔꠥꠁ ꠎꠟꠖꠤ ꠇꠞꠤ ꠐꠣꠃꠘꠞ ꠅꠟ꠆ꠟꠤꠄ-ꠉꠟ꠆ꠟꠤꠄ ꠎꠣ, ꠉꠤꠀ ꠉꠞꠤꠛ, ꠀꠔꠥꠞ, ꠀꠘ꠆ꠖꠣ, ꠟꠥꠟꠣ-ꠟꠦꠋꠠꠣꠞꠦ ꠀꠘꠉꠤ।’
LUK 14:22 ꠔꠦꠃ ꠢꠦ ꠅꠟꠣ ꠇꠞꠤꠀ ꠢꠣꠞꠤ ꠛꠣꠖꠦ ꠀꠁꠀ ꠇꠁꠟ, ‘ꠢꠥꠎꠥꠞ, ꠀꠙꠘꠣꠞ ꠢꠥꠇꠥꠝꠦ ꠢꠇꠟꠔꠣ ꠇꠞꠣ ꠅꠁꠍꠦ, ꠅꠁꠟꠦ ꠅꠈꠘꠅ ꠎꠣꠉꠣ ꠈꠣꠟꠤ ꠞꠁꠍꠦ।’
LUK 14:23 ꠅꠃ ꠔꠣꠁꠘ ꠇꠁꠟꠣ, ‘ꠔꠦ ꠐꠣꠃꠘꠞ ꠛꠣꠞꠦ ꠙꠕꠅ-ꠊꠣꠐꠅ, ꠀꠞ ꠌꠤꠙꠣꠄ-ꠌꠣꠙꠣꠄ ꠎꠣ, ꠉꠤꠀ ꠝꠤꠘꠔ-ꠇꠣꠎ꠆ꠎꠤ ꠇꠞꠤ ꠝꠣꠘꠡꠞꠦ ꠀꠘ। ꠝꠣꠘꠥꠡ ꠀꠁꠀ ꠝꠎꠟꠤꠍ ꠜꠞꠤ ꠎꠣꠃꠇ꠆ꠇꠣ।
LUK 14:24 ꠀꠞ ꠔꠥꠝꠞꠣ ꠈꠤꠀꠟ ꠇꠞꠤ ꠢꠥꠘꠅ, ꠀꠉꠦ ꠎꠦꠔꠣꠞꠦ ꠖꠣꠅꠔ ꠖꠤꠍꠟꠣꠝ, ꠁꠔꠣ ꠇꠥꠘꠥꠉꠤꠄ ꠎꠣꠘꠥ ꠀꠝꠣꠞ ꠈꠣꠘꠤ ꠘꠣ ꠙꠣꠁꠘ।’ ”
LUK 14:25 ꠛꠣꠖꠦ ꠢꠎꠞꠔ ꠁꠍꠣꠞ ꠟꠉꠦ ꠅꠁꠀ ꠛꠃꠔ ꠝꠣꠘꠥꠡ ꠀꠐꠣꠔ ꠀꠍꠟꠣ। ꠅꠃ ꠡꠝꠄ ꠔꠣꠁꠘ ꠄꠞꠣꠞ ꠛꠣꠄ ꠌꠣꠁꠀ ꠇꠁꠟꠣ,
LUK 14:26 “ꠇꠦꠃ ꠎꠥꠖꠤ ꠀꠝꠣꠞ ꠔꠞꠤꠇꠣꠔ ꠀꠁꠔ ꠌꠣꠄ, ꠔꠦ ꠔꠣꠞ ꠘꠤꠎꠞ ꠝꠣ-ꠛꠣꠚ, ꠛꠃ-ꠛꠣꠁꠌ꠆ꠌꠣ, ꠜꠣꠁ-ꠛꠤꠞꠣꠖꠞ, ꠀꠞ ꠘꠤꠎꠞ ꠎꠣꠘꠞꠦꠅ ꠀꠝꠣꠞ ꠕꠣꠇꠤ ꠢꠥꠞꠥ ꠝꠘꠦ ꠇꠞꠔꠦ ꠅꠁꠛ। ꠀꠞꠘꠣꠄ ꠢꠦ ꠀꠝꠣꠞ ꠃꠝ꠆ꠝꠔ ꠅꠁꠔ ꠙꠣꠞꠔ ꠘꠣꠄ।
LUK 14:27 ꠎꠦ ꠝꠣꠘꠡꠦ ꠘꠤꠎꠞ ꠖꠥꠈ-ꠇꠡ꠆ꠐꠞ ꠍꠟꠤꠛ ꠇꠣꠘ꠆ꠖꠅ ꠟꠁꠀ ꠀꠝꠣꠞ ꠈꠞꠦ ꠈꠞꠦ ꠞꠄ ꠘꠣ, ꠢꠦ ꠀꠝꠣꠞ ꠃꠝ꠆ꠝꠔ ꠅꠁꠔ ꠙꠣꠞꠦ ꠘꠣ।
LUK 14:28 “ꠔꠥꠝꠞꠣꠞ ꠇꠦꠃ ꠎꠥꠖꠤ ꠃꠌꠣ ꠇꠥꠘꠥ ꠖꠟꠣꠘ ꠛꠣꠘꠣꠁꠔ ꠌꠣꠄ, ꠔꠦ ꠢꠦ ꠙꠄꠟꠣ ꠔꠣꠞ ꠈꠞꠌꠞ ꠢꠤꠡꠣꠛ ꠝꠤꠟꠣꠁꠀ ꠖꠦꠈꠦ, ꠖꠟꠣꠘꠞ ꠇꠣꠝ ꠡꠦꠡ ꠇꠞꠣꠞ ꠟꠣꠉꠤ ꠔꠣꠞ ꠐꠦꠇꠣ ꠀꠍꠦ ꠇꠤ ꠘꠣ।
LUK 14:29 ꠘꠣ ꠅꠁꠟꠦ, ꠁꠀꠘ ꠖꠤꠀ ꠢꠣꠞꠤ ꠇꠣꠝ ꠡꠦꠡ ꠇꠞꠔꠦ ꠘꠣ ꠙꠣꠞꠟꠦ, ꠝꠣꠘꠡꠦ ꠑꠣꠐ꠆ꠐꠣ ꠇꠞꠛꠣ,
LUK 14:30 ꠔꠣꠞꠣ ꠇꠁꠛꠣ, ꠛꠦꠐꠣꠄ ꠖꠟꠣꠘ ꠔꠥꠟꠤꠀ ꠅꠈꠘ ꠡꠦꠡ ꠇꠞꠔ ꠙꠣꠞꠦꠞ ꠘꠣ।
LUK 14:31 “ꠀꠞ ꠎꠥꠖꠤ ꠄꠇ ꠞꠣꠎꠣ ꠀꠞꠇ ꠞꠣꠎꠣꠞ ꠛꠤꠙꠇ꠆ꠇꠦ ꠎꠥꠖ꠆ꠖ ꠇꠞꠣꠔ ꠟꠣꠉꠂꠘ, ꠔꠦ ꠙꠄꠟꠣ ꠛꠁꠀ ꠙꠞꠣꠝꠤꠡ ꠇꠞꠛꠣ, ꠔꠣꠁꠘ ꠇꠁꠛꠣ, ꠛꠤꠡ ꠀꠎꠣꠞ ꠚꠃꠎ ꠟꠁꠀ ꠎꠦꠞꠣ ꠀꠝꠣꠞ ꠛꠤꠙꠇ꠆ꠇꠦ ꠀꠁꠞꠣ, ꠀꠝꠤ ꠖꠡ ꠀꠎꠣꠞ ꠚꠃꠎ ꠟꠁꠀ ꠄꠞ ꠝꠥꠇꠣꠛꠤꠟꠣ ꠇꠞꠔꠣꠝ ꠙꠣꠞꠝꠥ ꠘꠤ?
LUK 14:32 ꠎꠥꠖꠤ ꠘꠣ ꠙꠣꠞꠂꠘ, ꠔꠦ ꠢꠣꠝꠟꠣ ꠇꠞꠞꠣ ꠞꠣꠎꠣ ꠖꠥꠞꠁ ꠕꠣꠇꠔꠦꠃ ꠀꠙꠥꠡꠞ ꠟꠣꠉꠤ ꠇꠄꠎꠘ ꠔꠤꠀꠁꠔ ꠙꠣꠑꠣꠁꠛꠣ।
LUK 14:33 ꠑꠤꠇ ꠅꠃꠟꠣ, ꠔꠥꠝꠞꠣꠞ ꠝꠣꠎꠦ ꠇꠦꠃ ꠎꠥꠖꠤ ꠔꠣꠞ ꠢꠇ꠆ꠇꠟꠔꠣꠞ ꠝꠣꠄꠀ ꠍꠣꠠꠔ ꠘꠣ ꠙꠣꠞꠦ, ꠔꠦ ꠢꠦ ꠀꠝꠣꠞ ꠃꠝ꠆ꠝꠔ ꠅꠁꠔ ꠙꠣꠞꠔ ꠘꠣꠄ।
LUK 14:34 “ꠘꠥꠘ ꠔ ꠜꠣꠟꠣ ꠎꠤꠘꠤꠡ, ꠅꠁꠟꠦ ꠘꠥꠘꠞ ꠎꠥꠖꠤ ꠡ꠆ꠛꠣꠖ ꠘꠡ꠆ꠐ ꠅꠁꠎꠣꠄ, ꠔꠦ ꠀꠞ ꠘꠥꠘꠔꠣ ꠇꠞꠣ ꠎꠣꠄ ꠘꠤ?
LUK 14:35 ꠁꠔꠣꠖꠤ ꠡꠣꠞꠅ ꠛꠣꠘꠣꠁꠟ ꠎꠣꠄ ꠘꠣ, ꠎꠝꠤꠘꠅ ꠖꠦꠅꠀ ꠎꠣꠄ ꠘꠣ, ꠄꠞꠟꠣꠉꠤ ꠝꠣꠘꠡꠦ ꠁꠔꠣ ꠛꠣꠞꠦ ꠚꠣꠟꠣꠁ ꠖꠦꠁꠘ। ꠢꠥꠘꠣꠞ ꠝꠔ ꠇꠣꠘ ꠎꠣꠞ ꠀꠍꠦ, ꠢꠦ ꠢꠥꠘꠃꠇ।”
LUK 15:1 ꠢꠎꠞꠔ ꠁꠍꠣꠞ ꠛꠄꠀꠘ ꠢꠥꠘꠣꠞ ꠟꠣꠉꠤ ꠛꠃꠔ ꠊꠥꠡꠈꠥꠞ ꠈꠣꠎꠘꠣ ꠔꠥꠟꠞꠣ ꠀꠞ ꠛꠦ-ꠡꠞꠤꠅꠔꠤ ꠀꠝ ꠝꠣꠘꠥꠡ ꠔꠣꠘ ꠉꠦꠍꠦ ꠖꠟꠣ ꠅꠁꠟꠣ।
LUK 15:2 ꠁꠔꠣ ꠖꠦꠈꠤꠀ ꠚꠞꠤꠡꠤ ꠖꠟꠞ ꠝꠣꠘꠡꠦ ꠀꠞ ꠝꠃꠟꠣꠘꠣ ꠅꠇꠟꠦ ꠇꠣꠘꠣ-ꠇꠣꠘꠤ ꠇꠞꠤ ꠇꠁꠟꠣ, “ꠁ ꠝꠣꠘꠥꠡꠉꠥ ꠈꠣꠟꠤ ꠘꠣꠚꠞꠝꠣꠘ ꠅꠇꠟꠞ ꠟꠉꠦ ꠃꠑꠣ-ꠛꠅꠀ ꠀꠞ ꠈꠣꠘꠣ-ꠙꠤꠘꠣ ꠈꠣꠄ।”
LUK 15:3 ꠔꠦꠃ ꠁꠍꠣꠄ ꠔꠣꠞꠣꠞꠦ ꠅꠃ ꠇꠤꠌ꠆ꠍꠣꠁꠘ ꠢꠥꠘꠣꠁꠟꠣ। ꠔꠣꠁꠘ ꠇꠁꠟꠣ,
LUK 15:4 “ꠝꠘꠅ ꠇꠞꠃꠇ꠆ꠇꠣ, ꠀꠙꠘꠣꠞꠣ ꠇꠥꠘꠥ ꠄꠇꠎꠘꠞ ꠄꠇ-ꠡꠐꠣ ꠝꠦꠠꠣ ꠀꠍꠦ। ꠄꠞꠝꠣꠎꠞ ꠄꠉꠥ ꠝꠦꠠꠣ ꠀꠞꠣꠁ ꠉꠦꠟꠦ, ꠢꠦ ꠛꠣꠇꠤ ꠘꠤꠞꠣꠘ꠆ꠘꠛ꠆ꠛꠁꠐꠣ ꠛꠘ꠆ꠖꠅ ꠕꠁꠀ ꠢꠃ ꠀꠞꠣꠁꠟ ꠅꠉꠥ ꠔꠥꠇꠣꠘꠤꠔ ꠎꠣꠄ ꠘꠣ ꠘꠤ?
LUK 15:5 ꠉꠤꠀ ꠅꠉꠥ ꠔꠥꠇꠣꠁꠀ ꠙꠣꠁꠟꠦ, ꠈꠥꠡꠤꠄ ꠁꠐꠣꠞꠦ ꠇꠣꠘ꠆ꠖꠅ ꠇꠞꠤ ꠀꠘꠦ।
LUK 15:6 ꠛꠣꠖꠦ ꠛꠣꠠꠤꠔ ꠉꠤꠀ ꠛꠘ꠆ꠖꠥ-ꠛꠣꠘ꠆ꠖꠛ ꠀꠞ ꠀꠞꠤ-ꠚꠞꠤꠞꠦ ꠇꠄ, ‘ꠀꠅ, ꠀꠝꠣꠞ ꠟꠉꠦ ꠚꠥꠞ꠆ꠔꠤ ꠇꠞꠅ। ꠀꠝꠣꠞ ꠀꠞꠣꠁꠟ ꠝꠦꠠꠣꠉꠥ ꠔꠥꠇꠣꠁꠀ ꠙꠣꠁꠟꠤꠍꠤ।’
LUK 15:7 ꠀꠝꠤ ꠀꠙꠘꠣꠞꠣꠞꠦ ꠇꠁꠞꠣꠝ, ꠄꠇ꠆ꠇꠦꠞꠦ ꠅꠃ ꠟꠣꠈꠣꠘꠃ, ꠎꠣꠞꠣ ꠉꠥꠘꠣ ꠕꠣꠇꠤ ꠔꠃꠛꠣ ꠇꠞꠣꠞ ꠎꠞꠥꠞ ꠝꠘꠅ ꠇꠞꠦ ꠘꠣ, ꠁꠟꠣ ꠘꠤꠞꠣꠘ꠆ꠘꠛ꠆ꠛꠁ ꠎꠘ ꠙꠞꠦꠎꠉꠣꠞ ꠕꠣꠇꠤ ꠄꠇꠎꠘ ꠉꠥꠘꠣꠉꠣꠞꠦ ꠝꠘ ꠛꠖꠟꠣꠁꠀ ꠔꠃꠛꠣ ꠇꠞꠟꠦ, ꠛꠦꠢꠦꠡ꠆ꠔꠅ ꠀꠞꠅ ꠛꠦꠡꠤ ꠈꠥꠡꠤ-ꠛꠣꠡꠤ ꠅꠄ।
LUK 15:8 “ꠛꠣ ꠗꠞꠃꠇ꠆ꠇꠣ, ꠇꠥꠘꠥ ꠄꠇ ꠛꠦꠐꠤꠞ ꠉꠦꠍꠦ ꠞꠥꠙꠣꠞ ꠖꠡꠐꠣ ꠐꠦꠇꠣ ꠀꠍꠤꠟ। ꠄꠞ ꠕꠣꠇꠤ ꠄꠉꠥ ꠐꠦꠇꠣ ꠎꠥꠖꠤ ꠀꠞꠣꠁꠎꠣꠄ, ꠔꠦ ꠛꠦꠐꠤꠄ ꠢꠤ ꠐꠦꠇꠣꠞ ꠟꠣꠉꠤ ꠟꠦꠝ ꠎꠣꠟꠣꠁꠀ ꠢꠥꠞꠥꠁꠘꠖꠤ ꠢꠥꠞꠤꠀ ꠀꠡ꠆ꠔꠣ ꠊꠞ ꠔꠥꠇꠣꠄ ꠘꠣ ꠘꠤ?
LUK 15:9 ꠛꠣꠖꠦ ꠔꠥꠇꠣꠁꠀ ꠙꠣꠁꠟꠤꠟꠦ ꠛꠘ꠆ꠖꠥ-ꠛꠣꠘ꠆ꠖꠛ ꠀꠞ ꠀꠞꠤ-ꠚꠞꠤꠞꠦ ꠒꠣꠇꠤꠀ ꠇꠄ, ‘ꠀꠅ ꠘꠣ, ꠀꠝꠣꠞ ꠟꠉꠦ ꠈꠥꠡꠤꠔ ꠡꠣꠝꠤꠟ ꠅꠅ। ꠀꠝꠣꠞ ꠀꠞꠣꠁꠟ ꠐꠦꠇꠣꠉꠥ ꠔꠥꠇꠣꠁꠀ ꠙꠣꠁꠟꠤꠍꠤ।’
LUK 15:10 ꠀꠝꠤ ꠀꠙꠘꠣꠞꠣꠞꠦ ꠇꠁꠞꠣꠝ, ꠄꠇ꠆ꠇꠦꠞꠦ ꠅꠃ ꠟꠣꠈꠣꠘꠃ, ꠄꠇꠎꠘ ꠉꠥꠘꠣꠉꠣꠞ ꠝꠣꠘꠡꠦ ꠝꠘ ꠛꠖꠟꠣꠁꠀ ꠔꠃꠛꠣ ꠇꠞꠟꠦ, ꠀꠟ꠆ꠟꠣꠞ ꠚꠤꠞꠤꠡ꠆ꠔꠣ ꠅꠇꠟꠦ ꠅꠃꠟꠣ ꠈꠥꠡꠤ ꠇꠞꠂꠘ।”
LUK 15:11 ꠛꠣꠖꠦ ꠁꠍꠣꠄ ꠇꠁꠟꠣ, “ꠄꠇ ꠉꠤꠞꠡ꠆ꠔꠞ ꠖꠥꠁ ꠙꠥꠀ ꠀꠍꠤꠟ।
LUK 15:12 ꠄꠇꠖꠤꠘ ꠢꠥꠞꠥ ꠙꠥꠀꠄ ꠔꠣꠞ ꠛꠣꠚꠞꠦ ꠇꠁꠟ, ꠛꠣꠛꠣ, ꠀꠝꠤ ꠛꠣꠛꠣꠁꠔꠤ ꠎꠝꠤ-ꠎꠝꠣ ꠀꠞ ꠗꠘ-ꠍꠣꠝꠣꠘꠣ ꠎꠦꠔꠣ ꠙꠣꠁꠔꠣꠝ, ꠀꠝꠣꠞ ꠅꠃ ꠛꠣꠐꠈꠣꠘ ꠅꠈꠘꠃ ꠀꠟꠉꠣꠁꠀ ꠖꠤꠟꠣꠃꠇ꠆ꠇꠣ। ꠅꠃ ꠛꠣꠚꠦ ꠔꠣꠘ ꠍꠣꠝꠣꠘꠣ ꠖꠥꠁꠅ ꠙꠥꠀꠞ ꠘꠣꠝꠦ ꠛꠣꠐꠤꠀ ꠖꠤꠟꠣꠁꠟꠣ।
LUK 15:13 ꠄꠞ ꠇꠄꠖꠤꠘ ꠛꠣꠖꠦ ꠢꠥꠞꠥ ꠙꠥꠀꠄ ꠔꠣꠞ ꠢꠇ꠆ꠇꠟ ꠍꠣꠝꠣꠘꠣ ꠛꠦꠌꠤꠀ ꠛꠤꠖꠦꠡ ꠉꠦꠟꠉꠤ। ꠛꠤꠖꠦꠡ ꠉꠤꠀ ꠛꠣꠖ ꠙꠕꠦ ꠌꠟꠤꠀ ꠔꠣꠞ ꠐꠦꠇꠣ-ꠙꠄꠡꠣ ꠢꠇ꠆ꠇꠟꠔꠣ ꠈꠥꠀꠁꠟꠤꠟ।
LUK 15:14 ꠢꠇꠟꠔꠣ ꠈꠥꠀꠁꠀ ꠢꠣꠞꠟꠦ ꠢꠃ ꠖꠦꠡꠞ ꠢꠇꠟ ꠎꠣꠉꠣꠔ ꠈꠥꠛ ꠘꠤꠖꠣꠘ ꠖꠦꠈꠣ ꠖꠤꠟ ꠄꠞꠖꠣꠄ ꠢꠦ ꠈꠥꠛ ꠇꠡ꠆ꠐꠔ ꠙꠠꠟ।
LUK 15:15 ꠢꠦ ꠢꠃ ꠖꠦꠡꠞ ꠄꠇ ꠉꠤꠞꠡ꠆ꠔꠞ ꠛꠣꠠꠤꠔ ꠉꠤꠀ ꠌꠣꠇꠞꠤ ꠌꠣꠁꠟ। ꠝꠣꠟꠤꠇꠦ ꠔꠣꠞꠦ ꠌꠣꠇꠞꠤ ꠖꠤꠀ ꠡꠥꠅꠞꠞ ꠙꠣꠟ ꠞꠣꠈꠣꠞ ꠟꠣꠉꠤ ꠛꠘ꠆ꠖꠅ ꠙꠣꠑꠣꠁꠟ।
LUK 15:16 ꠛꠘ꠆ꠖꠅ ꠉꠤꠀ ꠡꠥꠅꠞꠦ ꠎꠦꠔꠣ ꠈꠣꠄ, ꠢꠦ-ꠅ ꠅꠔꠣ ꠈꠣꠁꠀ ꠙꠦꠐꠞ ꠜꠥꠇ ꠝꠤꠐꠣꠁꠔ ꠌꠣꠁꠟ, ꠅꠁꠟꠦ ꠅꠔꠣꠅ ꠇꠦꠃ ꠔꠣꠞꠦ ꠖꠤꠔ ꠘꠣ।
LUK 15:17 “ꠛꠣꠖꠦ ꠀꠈꠔꠣ ꠄꠇꠖꠤꠘ ꠔꠣꠞ ꠢꠥꠡ ꠅꠁꠟ। ꠢꠦ ꠝꠘꠦ ꠝꠘꠦ ꠇꠁꠟ, ꠀꠝꠣꠞ ꠛꠣꠛꠣꠞ ꠛꠣꠠꠤꠔ ꠔ ꠛꠃꠔ ꠌꠣꠇꠞ-ꠛꠣꠇꠞꠦ ꠙꠦꠐ ꠜꠞꠤ ꠜꠣꠔ ꠈꠣꠁꠞꠣ। ꠔꠦ ꠀꠝꠤ ꠅꠘꠅ ꠃꠙꠣꠡꠦ ꠝꠞꠞꠣꠝ ꠇꠦꠘꠦ?
LUK 15:18 ꠀꠝꠤ ꠉꠤꠀ ꠀꠝꠣꠞ ꠛꠣꠛꠣꠞꠦ ꠇꠁꠝꠥ, ꠛꠣꠛꠣ, ꠀꠝꠤ ꠔ ꠀꠟ꠆ꠟꠣꠞ ꠉꠦꠍꠦ ꠀꠞ ꠔꠥꠝꠣꠞ ꠉꠦꠍꠦꠅ ꠘꠣꠚꠞꠝꠣꠘ ꠛꠘꠤꠉꠦꠍꠤ।
LUK 15:19 ꠔꠥꠝꠣꠞ ꠙꠥꠀ ꠇꠁꠀ ꠀꠝꠤ ꠀꠞ ꠙꠞꠤꠌꠄ ꠖꠤꠛꠣꠞ ꠟꠣꠈ ꠘꠣꠄ। ꠈꠣꠟꠤ ꠔꠥꠝꠣꠞ ꠌꠣꠇꠞꠞ ꠟꠣꠈꠣꠘ ꠀꠝꠣꠞꠦ ꠄꠇꠎꠞꠣ ꠀꠡꠞꠄ ꠖꠦꠅ।
LUK 15:20 ꠅꠈꠣꠘ ꠇꠁꠀ ꠢꠦ ꠔꠣꠞ ꠛꠣꠠꠤꠔ ꠞꠅꠀꠘꠣ ꠖꠤꠟꠣꠁꠟ। ꠛꠣꠠꠤꠞ ꠇꠣꠘ꠆ꠖꠣꠔ ꠀꠁꠔꠦꠃ ꠔꠣꠞ ꠛꠣꠚꠦ ꠔꠣꠞꠦ ꠖꠦꠈꠤꠟꠤꠟꠣ। ꠖꠦꠈꠤꠀ ꠔꠣꠘ ꠖꠤꠟ ꠉꠟꠤ ꠉꠦꠟ। ꠔꠣꠁꠘ ꠖꠃꠠꠤꠀ ꠉꠤꠀ ꠔꠣꠞꠦ ꠀꠁꠘ꠆ꠎꠣ ꠇꠞꠤ ꠗꠞꠤꠀ ꠢꠥꠋꠉꠣ ꠖꠤꠟꠣ।
LUK 15:21 ꠔꠦꠃ ꠙꠥꠀꠄ ꠇꠁꠟ, ‘ꠛꠣꠛꠣ, ꠀꠝꠤ ꠔ ꠔꠥꠝꠣꠞ ꠙꠥꠀ ꠇꠁꠀ ꠙꠞꠤꠌꠄ ꠖꠤꠛꠣꠞ ꠟꠣꠈ ꠞꠁꠍꠤ ꠘꠣ। ꠀꠝꠤ ꠀꠟ꠆ꠟꠣꠞ ꠉꠦꠍꠦ ꠀꠞ ꠔꠥꠝꠣꠞ ꠉꠦꠍꠦꠅ ꠘꠣꠚꠞꠝꠣꠘ ꠛꠘꠤꠉꠦꠍꠤ।’
LUK 15:22 ꠅꠁꠟꠦ ꠛꠣꠚꠦ ꠟꠉꠦ ꠟꠉꠦ ꠇꠣꠝꠟꠣꠁꠘ꠆ꠔꠞꠦ ꠇꠁꠟꠣ, ‘ꠢꠂ, ꠎꠟꠖꠤ ꠇꠞꠤ ꠊꠞ ꠕꠣꠇꠤ ꠜꠣꠟꠣ ꠎꠥꠛ꠆ꠛꠣꠐꠣ ꠀꠘꠤꠀ ꠀꠝꠣꠞ ꠙꠥꠀꠉꠥꠞꠦ ꠚꠤꠘ꠆ꠖꠣꠅ। ꠔꠣꠞ ꠀꠔꠅ ꠀꠋꠐꠤ ꠀꠞ ꠙꠣꠅꠔ ꠎꠥꠔꠣ ꠚꠤꠘ꠆ꠖꠣꠁ ꠖꠦꠅ।
LUK 15:23 ꠀꠞ ꠢꠥꠘꠅ, ꠙꠣꠟꠅ ꠕꠣꠇꠤ ꠔꠣꠎꠣ ꠒꠦꠇꠣ-ꠛꠣꠍꠥꠞꠉꠥ ꠀꠘꠤꠀ ꠎꠛ ꠇꠞꠅ। ꠀꠅ, ꠀꠝꠞꠣ ꠢꠇꠟꠦ ꠝꠤꠟꠤꠀ ꠈꠥꠡꠤ-ꠛꠣꠡꠤ ꠇꠞꠤ ꠈꠣꠘꠣ ꠈꠣꠁ।
LUK 15:24 ꠀꠝꠣꠞ ꠁ ꠙꠥꠀꠉꠥ ꠔ ꠝꠞꠤꠉꠦꠍꠤꠟ, ꠅꠈꠘ ꠢꠤꠞꠛꠣꠞ ꠎꠤꠘ꠆ꠖꠣ ꠅꠁꠍꠦ। ꠅꠉꠥ ꠘꠣꠁ ꠅꠁꠉꠦꠍꠤꠟ, ꠅꠈꠘ ꠚꠤꠞꠔ ꠙꠣꠁꠍꠤ।’ ꠔꠦꠃ ꠢꠇꠟꠦ ꠝꠤꠟꠤꠀ ꠈꠥꠡꠤ-ꠛꠣꠡꠤꠔ ꠟꠣꠉꠟꠣ।
LUK 15:25 “ꠅꠃ ꠡꠝꠄ ꠛꠦꠐꠣꠞ ꠛꠠ ꠙꠥꠀ ꠛꠘ꠆ꠖꠅ ꠀꠍꠤꠟ। ꠢꠦ ꠛꠣꠠꠤꠞ ꠇꠣꠘ꠆ꠖꠣꠔ ꠀꠁꠀ ꠘꠣꠌ-ꠉꠣꠘ ꠀꠞ ꠒꠥꠟ-ꠒꠙꠇꠤꠞ ꠀꠅꠀꠎ ꠢꠥꠘꠤꠀ,
LUK 15:26 ꠔꠣꠞꠣꠞ ꠄꠇ ꠌꠣꠇꠞꠞꠦ ꠎꠤꠇꠣꠁꠟ, ‘ꠇꠤꠔꠣꠞꠦ, ꠁꠔꠣ ꠇꠤꠔꠣ ꠅꠞ?’
LUK 15:27 ꠌꠣꠇꠞꠦ ꠇꠁꠟ, ‘ꠍꠣꠛ, ꠀꠙꠘꠣꠞ ꠢꠥꠞꠥ ꠜꠣꠁ ꠛꠣꠠꠤꠔ ꠀꠁꠍꠂꠘ। ꠀꠙꠘꠣꠞ ꠀꠛ꠆ꠛꠣꠄ ꠔꠣꠘꠞꠦ ꠍꠢꠤ-ꠍꠣꠟꠣꠝꠔꠦ ꠙꠣꠁꠀ, ꠔꠣꠎꠣ ꠅꠃ ꠒꠦꠇꠣ-ꠛꠣꠍꠥꠞ ꠎꠛ ꠇꠞꠍꠂꠘ।’
LUK 15:28 ꠁꠈꠣꠘ ꠢꠥꠘꠤꠀ ꠛꠠ ꠙꠥꠀꠄ ꠉꠥꠍꠣ ꠇꠞꠤꠀ ꠛꠣꠠꠤꠞ ꠜꠤꠔꠞꠦ ꠀꠁꠔ ꠌꠣꠁꠟ ꠘꠣ। ꠔꠦꠃ ꠔꠣꠞ ꠛꠣꠚ ꠛꠣꠞ ꠅꠁꠀ ꠀꠁꠀ ꠔꠣꠞꠦ ꠝꠤꠘꠔ-ꠇꠣꠎ꠆ꠎꠤ ꠇꠞꠟꠣ।
LUK 15:29 ꠢꠦ ꠔꠣꠞ ꠛꠣꠚꠞꠦ ꠇꠁꠟ, ‘ꠖꠦꠈꠃꠇ꠆ꠇꠣ, ꠀꠝꠤ ꠅꠔ ꠖꠤꠘ ꠗꠞꠤꠀ ꠀꠙꠘꠣꠞ ꠈꠦꠎꠝꠔ ꠇꠞꠞꠣꠝ, ꠇꠥꠘꠥꠖꠤꠘꠃ ꠀꠙꠘꠣꠞ ꠢꠥꠇꠥꠝ ꠃꠟ꠆ꠐꠣꠁꠍꠤ ꠘꠣ। ꠅꠁꠟꠦ ꠀꠝꠣꠞ ꠛꠘ꠆ꠖꠥ-ꠛꠣꠘ꠆ꠖꠛ ꠟꠁꠀ ꠈꠥꠡꠤ ꠇꠞꠣꠞ ꠟꠣꠉꠤ ꠄꠉꠥ ꠛꠇꠞꠤꠞ ꠛꠣꠁꠌ꠆ꠌꠣꠅ ꠇꠥꠘꠥꠖꠤꠘ ꠖꠤꠍꠂꠘ ꠘꠣ।
LUK 15:30 ꠀꠞ ꠀꠙꠘꠣꠞ ꠎꠦ ꠙꠥꠀꠄ ꠘꠐꠤ ꠛꠦꠐꠤꠘ꠆ꠔꠞ ꠔꠟꠦ ꠢꠇꠟ ꠍꠣꠝꠣꠘꠣ ꠈꠥꠀꠁꠍꠦ, ꠢꠦ ꠀꠁꠔꠦꠃ ꠔꠣꠎꠣ ꠒꠦꠇꠣ-ꠛꠣꠍꠥꠞꠉꠥ ꠀꠘꠤꠀ ꠎꠛ ꠇꠞꠤꠟꠣꠁꠟꠣ!’
LUK 15:31 ꠛꠣꠚꠦ ꠇꠁꠟꠣ, ‘ꠙꠥꠔꠞꠦ, ꠔꠥꠝꠤ ꠔ ꠢꠣꠝꠦꠡꠣꠃ ꠀꠝꠣꠞ ꠟꠉꠦ ꠀꠍ। ꠀꠝꠣꠞ ꠎꠦꠔꠣ ꠍꠣꠝꠣꠘꠣ ꠞꠁꠍꠦ, ꠁꠔꠣ ꠢꠇ꠆ꠇꠟꠔꠣꠃ ꠔ ꠔꠥꠝꠣꠞ।
LUK 15:32 ꠅꠈꠘ ꠀꠝꠞꠣ ꠢꠇꠟꠦ ꠖꠤꠟ ꠍꠣꠚ ꠇꠞꠤꠀ ꠈꠥꠡꠤ-ꠛꠣꠡꠤ ꠇꠞꠣ ꠎꠞꠥꠞ। ꠔꠥꠝꠣꠞ ꠁ ꠜꠣꠁ ꠔ ꠝꠞꠤꠃ ꠉꠦꠍꠤꠟ, ꠅꠈꠘ ꠢꠤꠞꠛꠣꠞ ꠎꠤꠘ꠆ꠖꠣ ꠅꠁꠍꠦ। ꠅꠉꠥ ꠄꠇ꠆ꠇꠦꠞꠦ ꠘꠣꠁ ꠅꠁꠉꠦꠍꠤꠟ, ꠅꠈꠘ ꠚꠤꠞꠔ ꠙꠣꠁꠍꠤ।’ ”
LUK 16:1 ꠛꠣꠖꠦ ꠢꠎꠞꠔ ꠁꠍꠣꠄ ꠔꠣꠘ ꠡꠣꠉꠞꠤꠖ ꠅꠇꠟꠞꠦ ꠇꠁꠟꠣ, “ꠢꠥꠘꠅ, ꠇꠥꠘꠥ ꠄꠇ ꠎꠝꠤꠖꠣꠞꠞ ꠄꠇ ꠝꠦꠘꠦꠎꠣꠞ ꠀꠍꠤꠟ। ꠅꠃ ꠝꠦꠘꠦꠎꠣꠞꠞ ꠛꠖꠘꠣꠝ ꠛꠣꠞ ꠅꠁꠟ, ꠢꠦ ꠛꠥꠟꠦ ꠔꠣꠞ ꠝꠥꠘꠤꠛꠞ ꠗꠘ-ꠍꠣꠝꠣꠘꠣ ꠛꠤꠘꠣꠡ ꠇꠞꠤꠟꠣꠞ।
LUK 16:2 ꠛꠖꠘꠣꠝ ꠢꠥꠘꠤꠀ ꠝꠥꠘꠤꠛꠦ ꠔꠣꠞꠦ ꠀꠘꠣꠁꠀ ꠇꠁꠟꠣ, ꠔꠥꠝꠣꠞ ꠘꠣꠝꠦ ꠁꠔꠣ ꠇꠤꠔꠣ ꠢꠥꠘꠞꠣꠝ? ꠔꠥꠝꠣꠞ ꠢꠤꠡꠣꠛ-ꠘꠤꠇꠣꠡ ꠢꠇꠟꠔꠣ ꠡꠝꠎꠣꠁ ꠖꠦꠅ। ꠔꠥꠝꠣꠞꠦ ꠀꠞ ꠌꠣꠇꠞꠤꠔ ꠞꠣꠈꠔꠣꠝ ꠘꠣꠄ।
LUK 16:3 ꠁꠈꠣꠘ ꠢꠥꠘꠤꠀ ꠝꠦꠘꠦꠎꠣꠞꠦ ꠝꠘꠦ ꠝꠘꠦ ꠇꠁꠟ, ꠅꠈꠘ ꠀꠝꠤ ꠇꠤꠔꠣ ꠇꠞꠔꠣꠝ? ꠝꠥꠘꠤꠛꠦ ꠔ ꠀꠝꠣꠞꠦ ꠛꠤꠖꠣꠄ ꠖꠤꠟꠣꠁꠞꠣ। ꠀꠝꠤ ꠔ ꠝꠣꠐꠤ ꠇꠣꠝꠅ ꠇꠞꠔꠣꠝ ꠙꠣꠞꠔꠣꠝ ꠘꠣꠄ, ꠜꠤꠇ ꠇꠞꠔꠦꠅ ꠡꠞꠝ ꠟꠣꠉꠦ। ꠅꠈꠘ ꠈꠣꠁꠝꠥ ꠇꠤꠟꠣ?
LUK 16:4 ꠀꠁꠌ꠆ꠍꠣ, ꠄꠇ ꠇꠣꠝ ꠇꠞꠤ, ꠎꠣꠔꠦ ꠀꠝꠣꠞ ꠝꠦꠘꠦꠎꠣꠞꠤ ꠉꠦꠟꠦꠉꠤꠅ ꠝꠣꠘꠡꠞ ꠊꠞꠅ ꠀꠡꠞꠄ ꠙꠣꠁ।
LUK 16:5 ꠅꠃ ꠢꠦ ꠇꠤꠔꠣ ꠇꠞꠟ, ꠎꠣꠞꠣꠞ ꠉꠦꠍꠦ ꠔꠣꠞ ꠝꠥꠘꠤꠛꠞ ꠙꠣꠅꠘꠣ ꠀꠍꠤꠟ, ꠄꠇ ꠄꠇ ꠇꠞꠤ ꠄꠞꠣꠞꠦ ꠀꠘꠣꠁꠟ। ꠀꠘꠣꠁꠀ ꠙꠄꠟꠣ ꠎꠘꠞꠦ ꠇꠁꠟ, ꠔꠥꠝꠣꠞ ꠉꠦꠍꠦ ꠀꠝꠣꠞ ꠝꠥꠘꠤꠛꠞ ꠇꠔ ꠙꠣꠅꠘꠣ ꠀꠍꠦ?
LUK 16:6 ꠢꠦꠁꠘ ꠇꠁꠟꠣ, ꠄꠇ-ꠡ ꠝꠘ ꠔꠦꠟ। ꠝꠦꠘꠦꠎꠣꠞꠦ ꠇꠁꠟ, ꠎꠟꠖꠤ ꠇꠞꠤ ꠔꠥꠝꠣꠞ ꠈꠣꠔꠣ ꠛꠣꠞ ꠇꠞꠅ, ꠀꠞ ꠄꠇ-ꠡꠞ ꠛꠖꠟꠣ ꠙꠁꠘ꠆ꠌꠣꠡ ꠝꠘ ꠟꠦꠈꠤꠟꠣꠅ।
LUK 16:7 ꠛꠣꠖꠦ ꠝꠦꠘꠦꠎꠣꠞꠦ ꠖꠥꠍꠞꠣ ꠎꠘꠞꠦ ꠎꠤꠇꠣꠁꠟ, ꠔꠥꠝꠣꠞ ꠉꠦꠍꠦ ꠇꠔ ꠙꠣꠁꠘ? ꠢꠦꠁꠘ ꠇꠁꠟꠣ, ꠄꠇ-ꠡ ꠚꠥꠞꠣꠞ ꠉꠝ। ꠝꠦꠘꠦꠎꠣꠞꠦ ꠇꠁꠟ, ꠔꠥꠝꠣꠞ ꠢꠤꠡꠣꠛꠅ ꠀꠡꠤ ꠚꠥꠞꠣꠞ ꠟꠦꠈꠤꠟꠣꠅ।
LUK 16:8 ꠁꠔꠣ ꠢꠥꠘꠤꠀ ꠢꠤ ꠎꠝꠤꠖꠣꠞꠦ ꠅꠃ ꠛꠦꠁꠝꠣꠘ ꠝꠦꠘꠦꠎꠣꠞꠞ ꠔꠣꠞꠤꠚ ꠇꠞꠟꠣ। ꠔꠣꠁꠘ ꠇꠁꠟꠣ, ꠢꠦ ꠗꠣꠘ꠆ꠖꠣꠛꠣꠎ ꠅꠁꠟꠦꠅ ꠛꠃꠔ ꠛꠠ ꠛꠥꠖ꠆ꠖꠤꠝꠣꠘꠞ ꠇꠣꠝ ꠇꠞꠍꠦ। ꠔꠦ ꠇꠤꠔꠣ ꠝꠘꠅ ꠇꠞꠅ, ꠁꠔꠣꠄ ꠛꠥꠎꠣ ꠎꠣꠄ ꠘꠣ ꠘꠤ, ꠀꠟ꠆ꠟꠣꠞꠣꠁꠀ ꠝꠣꠘꠡꠞ ꠀꠈꠟ ꠕꠣꠇꠤꠅ, ꠁ ꠎꠝꠣꠘꠣꠞ ꠖꠥꠘꠤꠀꠛꠤ ꠝꠣꠘꠡꠞ ꠙꠦꠌ-ꠙꠣꠁꠌ꠆ꠍꠣ ꠛꠦꠡꠤ।
LUK 16:9 ꠢꠥꠘꠅ, ꠀꠝꠤ ꠇꠤꠔꠣ ꠇꠁꠞꠣꠝ, ꠔꠥꠝꠞꠣꠅ ꠘꠣꠚꠞꠝꠣꠘ ꠅꠃ ꠎꠉꠔꠞ ꠍꠣꠝꠣꠘꠣ ꠖꠤꠀ ꠝꠣꠘꠡꠞ ꠟꠉꠦ ꠖꠥꠡ꠆ꠔꠤ ꠙꠣꠔꠣꠅ, ꠎꠣꠔꠦ ꠁ ꠍꠣꠝꠣꠘꠣ ꠚꠥꠠꠣꠁꠉꠦꠟꠦꠅ ꠔꠥꠝꠞꠣꠞꠦ ꠛꠦꠢꠦꠡ꠆ꠔꠞ ꠛꠣꠉꠣꠘꠅ ꠚꠥꠟꠞ ꠝꠣꠟꠣ ꠖꠦꠅꠀ ꠅꠄ।
LUK 16:10 “ꠎꠦ ꠝꠣꠘꠥꠡ ꠡꠣꠝꠣꠁꠘ꠆ꠘ ꠛꠦꠙꠣꠞꠦ ꠢꠇ-ꠢꠣꠟꠣꠟ ꠞꠄ, ꠢꠦ ꠛꠠ ꠛꠦꠙꠣꠞꠦꠅ ꠢꠇ-ꠢꠣꠟꠣꠟ ꠞꠄ। ꠅꠁꠟꠦ ꠎꠦ ꠎꠘꠦ ꠡꠣꠝꠣꠁꠘ꠆ꠘ ꠛꠦꠙꠣꠞꠦ ꠛꠦꠁꠝꠣꠘꠤ ꠇꠞꠦ, ꠢꠦ ꠛꠠ ꠛꠦꠙꠣꠞꠦꠅ ꠛꠦꠁꠝꠣꠘꠤ ꠇꠞꠦ।
LUK 16:11 ꠔꠦ ꠔꠥꠝꠞꠣ ꠎꠥꠖꠤ ꠖꠥꠘꠤꠀꠛꠤ ꠗꠘ-ꠍꠣꠝꠣꠘꠣꠞ ꠛꠦꠙꠣꠞꠦ ꠢꠇ ꠘꠣ ꠞꠅ, ꠔꠣꠁꠟꠦ ꠇꠦ ꠔꠥꠝꠞꠣꠞꠦ ꠛꠤꠡ꠆ꠛꠣꠡ ꠇꠞꠤꠀ ꠀꠍꠟ ꠗꠘ ꠖꠤꠛ?
LUK 16:12 ꠙꠞꠞ ꠍꠣꠝꠣꠘꠣ ꠎꠥꠖꠤ ꠔꠥꠝꠞꠣ ꠑꠤꠇ-ꠑꠣꠇ ꠝꠔ ꠛꠦꠛꠢꠣꠞ ꠇꠞꠔꠣꠄ ꠘꠣ ꠙꠣꠞ, ꠔꠦ ꠇꠦ ꠔꠥꠝꠞꠣꠞ ꠘꠤꠎꠞ ꠍꠣꠝꠣꠘꠣ ꠔꠥꠝꠞꠣꠞ ꠀꠔꠅ ꠖꠤꠛ?
LUK 16:13 ꠇꠥꠘꠥ ꠉꠥꠟꠣꠝꠦ ꠄꠇꠟꠉꠦ ꠖꠥꠁ ꠝꠥꠘꠤꠛꠞ ꠉꠥꠟꠣꠝꠤ ꠇꠞꠔ ꠙꠣꠞꠦ ꠘꠣ। ꠔꠦ ꠅꠁꠟꠦ ꠢꠦ ꠄꠇꠎꠘꠞꠦ ꠁꠋꠡꠣꠁꠛ, ꠀꠞꠇ ꠎꠘꠞꠦ ꠝꠣꠄꠀ ꠇꠞꠛ। ꠄꠇꠎꠘꠞꠦ ꠁꠎ꠆ꠎꠔ ꠖꠤꠛ ꠀꠞ ꠀꠞꠇ ꠎꠘꠞꠦ ꠄꠟꠣꠝꠤ ꠇꠞꠛ। ꠔꠥꠝꠞꠣꠅ ꠅꠃꠟꠣ, ꠀꠟ꠆ꠟꠣꠔꠣꠟꠣ ꠀꠞ ꠗꠘ-ꠍꠣꠝꠣꠘꠣ ꠖꠥꠁꠅꠔꠣꠞ ꠉꠥꠟꠣꠝꠤ ꠄꠇꠟꠉꠦ ꠇꠞꠔꠣꠄ ꠙꠣꠞꠔꠣꠄ ꠘꠣꠄ।”
LUK 16:14 ꠁꠈꠣꠘ ꠢꠥꠘꠤꠀ ꠚꠞꠤꠡꠤ ꠝꠎꠛꠞ ꠝꠣꠘꠡꠦ ꠁꠍꠣꠞꠦ ꠟꠁꠀ ꠓꠋ-ꠔꠣꠝꠣꠡꠣ ꠟꠣꠉꠣꠁꠟꠣ, ꠔꠣꠞꠣ ꠔ ꠐꠦꠇꠣ-ꠙꠄꠡꠣꠞꠦ ꠈꠥꠛ ꠝꠣꠄꠀ ꠇꠞꠔꠣ।
LUK 16:15 ꠁꠍꠣꠄ ꠔꠣꠞꠣꠞꠦ ꠇꠁꠟꠣ, “ꠔꠥꠝꠞꠣꠃ ꠔ ꠝꠣꠘꠡꠞ ꠍꠣꠝꠘꠦ ꠘꠤꠎꠞ ꠙꠞꠦꠎꠉꠣꠞꠤ ꠖꠦꠈꠣꠅ, ꠅꠁꠟꠦ ꠀꠟ꠆ꠟꠣꠄ ꠔꠥꠝꠞꠣꠞ ꠖꠤꠟꠞ ꠈꠛꠞ ꠎꠣꠘꠂꠘ। ꠝꠣꠘꠡꠞ ꠉꠦꠍꠦ ꠎꠦꠔꠣ ꠈꠥꠛ ꠖꠣꠝꠤ, ꠀꠟ꠆ꠟꠣꠄ ꠁꠔꠣꠞꠦ ꠊꠤꠘ꠆ꠘꠣꠁꠘ।
LUK 16:16 ꠢꠥꠘꠅ, ꠄꠢꠤꠀ ꠘꠛꠤꠞ ꠡꠝꠄ ꠙꠞ꠆ꠎꠘ꠆ꠔ ꠝꠥꠍꠣꠞ ꠡꠞꠤꠅꠔ, ꠀꠞ ꠘꠛꠤ ꠅꠇꠟꠞ ꠍꠢꠤꠚꠣ ꠎꠣꠞꠤ ꠀꠍꠤꠟ। ꠅꠁꠟꠦ ꠅꠈꠘ ꠀꠟ꠆ꠟꠣꠞ ꠛꠣꠖꠡꠣꠁꠞ ꠈꠥꠡ-ꠈꠛꠞꠤ ꠔꠛꠟꠤꠉ ꠇꠞꠣ ꠅꠞ, ꠀꠞ ꠝꠣꠘꠡꠦꠅ ꠖꠤꠟꠦ-ꠎꠣꠘꠦ ꠅꠘꠅ ꠖꠣꠈꠤꠟ ꠅꠁꠔꠣ ꠌꠣꠁꠞꠣ।
LUK 16:17 ꠁ ꠡꠞꠤꠅꠔꠞ ꠄꠇꠐꠣ ꠢꠞꠚ ꠛꠣꠔꠤꠟ ꠅꠀꠞ ꠌꠣꠁꠔꠦ, ꠀꠍꠝꠣꠘ-ꠎꠝꠤꠘ ꠛꠤꠘꠣꠡ ꠅꠀꠈꠣꠘ ꠛꠃꠔ ꠡꠥꠎꠣ।
LUK 16:18 ꠔꠦ ꠢꠥꠘꠅ, ꠎꠦ ꠛꠦꠐꠣꠄ ꠘꠤꠎꠞ ꠛꠃꠞꠦ ꠔꠣꠟꠣꠇ ꠖꠤꠀ ꠀꠞꠇ ꠛꠦꠐꠤꠞꠦ ꠢꠣꠋꠉꠣ ꠇꠞꠦ, ꠢꠦ ꠎꠤꠘꠣꠇꠥꠞ। ꠅꠃꠟꠣ ꠔꠣꠟꠣꠇ ꠙꠣꠅꠀ ꠇꠥꠘꠥ ꠛꠦꠐꠤꠞꠦ ꠎꠦꠉꠤꠄ ꠛꠤꠀ ꠇꠞꠦ, ꠢꠦ-ꠅ ꠎꠤꠘꠣꠇꠥꠞ।”
LUK 16:19 “ꠄꠇ ꠗꠘꠤ ꠛꠦꠐꠣ ꠀꠍꠤꠟ, ꠢꠦ ꠞꠣꠎꠣ-ꠛꠣꠖꠡꠣ ꠅꠇꠟꠞ ꠟꠣꠈꠣꠘ ꠖꠣꠝꠤ ꠖꠣꠝꠤ ꠇꠣꠙꠠ-ꠌꠥꠙꠠ ꠚꠤꠘꠔ, ꠀꠞ ꠢꠣꠝꠦꠡꠣ ꠎꠣꠇ-ꠎꠝꠇ ꠇꠞꠤꠀ ꠚꠥꠞ꠆ꠔꠤ-ꠀꠝꠥꠖ ꠇꠞꠔ।
LUK 16:20 ꠝꠣꠘꠡꠦ ꠟꠣꠍꠣꠞ ꠘꠣꠝꠞ ꠄꠇ ꠢꠇꠤꠞ ꠛꠦꠐꠣꠞꠦ ꠢꠣꠝꠦꠡꠣ ꠅꠃ ꠗꠘꠤꠞ ꠖꠥꠀꠞꠞ ꠍꠣꠝꠘꠦ ꠛꠅꠀꠁꠀ ꠕꠁꠔꠣ, ꠔꠣꠞ ꠀꠡ꠆ꠔꠣ ꠉꠔꠞꠅ ꠙꠌꠣ-ꠊꠣ ꠀꠍꠤꠟ,
LUK 16:21 ꠀꠞ ꠙꠕꠞ ꠇꠥꠔ꠆ꠔꠣꠁꠘ꠆ꠔꠦ ꠀꠁꠀ ꠔꠣꠞ ꠊꠣ ꠎꠤꠚꠞꠣꠖꠤ ꠟꠦꠁꠔꠣ। ꠅꠃ ꠗꠘꠤꠄ ꠜꠣꠔ ꠈꠣꠁꠀ ꠢꠣꠞꠤ ꠀꠒ꠆ꠒꠤ-ꠉꠥꠒ꠆ꠒꠤ ꠉꠥꠠꠣ-ꠉꠣꠠꠣ ꠎꠦꠔꠣ ꠔꠟꠦ ꠚꠣꠟꠣꠁꠔꠣ, ꠅꠔꠣ ꠈꠣꠅꠀꠞ ꠟꠣꠉꠤ ꠔꠣꠞ ꠈꠥꠛ ꠁꠌ꠆ꠍꠣ ꠀꠍꠤꠟ।
LUK 16:22 ꠄꠇꠖꠤꠘ ꠅꠃ ꠢꠇꠤꠞ ꠛꠦꠐꠣ ꠝꠞꠤꠉꠦꠟ, ꠝꠞꠣꠞ ꠛꠣꠖꠦ ꠀꠟ꠆ꠟꠣꠞ ꠚꠤꠞꠤꠡ꠆ꠔꠣ ꠅꠇꠟꠦ ꠔꠣꠞꠦ ꠁꠛ꠆ꠞꠣꠢꠤꠝ ꠘꠛꠤꠞ ꠇꠥꠟꠅ ꠘꠤꠀ ꠛꠅꠀꠁꠟꠣ। ꠄꠞꠝꠣꠎꠦ ꠢꠃ ꠗꠘꠤ ꠛꠦꠐꠣꠅ ꠝꠞꠤꠉꠦꠟ, ꠔꠣꠞꠦ ꠖꠣꠚꠘ ꠇꠞꠣ ꠅꠁꠟ।
LUK 16:23 ꠛꠣꠖꠦ ꠢꠦ ꠖꠥꠎꠈꠞ ꠀꠎꠣꠛ ꠕꠣꠇꠤ ꠀꠈꠔꠣ ꠃꠙꠞꠦꠖꠤ ꠌꠣꠁꠀ ꠖꠦꠈꠟ, ꠖꠥꠞꠁ ꠛꠦꠢꠦꠡ꠆ꠔꠞ ꠝꠣꠎꠦ ꠁꠛ꠆ꠞꠣꠢꠤꠝ ꠘꠛꠤ ꠛꠁ ꠞꠁꠍꠂꠘ, ꠔꠣꠘ ꠇꠥꠟꠅ ꠢꠃ ꠟꠣꠍꠣꠞ।
LUK 16:24 ꠖꠦꠈꠤꠀꠃ ꠢꠦ ꠌꠤꠟ꠆ꠟꠣꠁꠀ ꠇꠁꠟ, ꠛꠣꠛꠣ ꠁꠛ꠆ꠞꠣꠢꠤꠝ! ꠀꠝꠣꠞꠦ ꠞꠢꠝ ꠇꠞꠃꠇ꠆ꠇꠣ। ꠟꠣꠍꠣꠞꠞꠦ ꠀꠝꠣꠞ ꠉꠦꠍꠦ ꠙꠣꠑꠣꠃꠇ꠆ꠇꠣ, ꠢꠦ ꠔꠣꠞ ꠀꠋꠉꠥꠟꠤꠞ ꠀꠉꠣꠈꠣꠘ ꠙꠣꠘꠤꠔ ꠛꠥꠠꠣꠁꠀ ꠀꠝꠣꠞ ꠎꠤꠚꠞꠣꠞꠦ ꠑꠣꠘ꠆ꠒꠣ ꠇꠞꠃꠇ। ꠖꠥꠎꠈꠞ ꠁ ꠀꠉꠥꠘꠤꠔ ꠀꠝꠣꠞ ꠛꠠ ꠀꠎꠣꠛ ꠅꠞ।
LUK 16:25 ꠁꠛ꠆ꠞꠣꠢꠤꠝꠦ ꠇꠁꠟꠣ, ꠛꠣꠛꠣꠞꠦ, ꠝꠘꠅ ꠇꠞꠤꠀ ꠖꠦꠈꠅ, ꠔꠥꠝꠣꠞ ꠡꠥꠈ ꠔꠥꠝꠤ ꠖꠥꠘꠤꠀꠔꠃ ꠇꠣꠝꠣꠁꠟꠤꠍ, ꠀꠞ ꠟꠣꠍꠣꠞꠦ ꠛꠃꠔ ꠇꠡ꠆ꠐ ꠇꠞꠍꠦ। ꠅꠈꠘ ꠁꠘꠅ ꠀꠁꠀ ꠢꠦ ꠀꠞꠣꠝꠦ ꠀꠍꠦ, ꠀꠞ ꠔꠥꠝꠤ ꠀꠎꠣꠛꠅ ꠀꠍ।
LUK 16:26 ꠢꠥꠘꠅ, ꠁꠔꠣ ꠍꠣꠠꠣꠅ ꠔꠥꠝꠞꠣꠞ ꠀꠞ ꠀꠝꠞꠣꠞ ꠝꠣꠎꠦ ꠅꠈꠘ ꠛꠃꠔ ꠛꠠ ꠚꠣꠇ ꠞꠣꠈꠣ ꠅꠁꠍꠦ। ꠁꠘꠞ ꠇꠦꠃ ꠁꠌ꠆ꠍꠣ ꠇꠞꠟꠦꠅ ꠔꠥꠝꠞꠣꠞ ꠉꠦꠍꠦ ꠎꠣꠁꠔ ꠙꠣꠞꠔ ꠘꠣꠄ, ꠀꠞ ꠔꠥꠝꠞꠣꠅ ꠇꠦꠃ ꠁꠌ꠆ꠍꠣ ꠇꠞꠟꠦ ꠁꠘꠅ ꠀꠁꠔꠣꠄ ꠙꠣꠞꠔꠣꠄ ꠘꠣꠄ।
LUK 16:27 ꠅꠃ ꠢꠤ ꠗꠘꠤ ꠛꠦꠐꠣꠄ ꠇꠁꠟ, ꠛꠣꠛꠣ, ꠔꠦ ꠖꠄꠀ ꠇꠞꠤ ꠟꠣꠍꠣꠞꠞꠦ ꠀꠝꠣꠞ ꠛꠣꠛꠣꠞ ꠛꠣꠠꠤꠈꠣꠘꠅ ꠙꠣꠑꠣꠃꠇ꠆ꠇꠣ।
LUK 16:28 ꠢꠘꠅ ꠀꠝꠣꠞ ꠀꠞꠅ ꠙꠣꠌꠉꠥ ꠜꠣꠁ ꠞꠁꠍꠂꠘ। ꠢꠦ ꠉꠤꠀ ꠀꠝꠣꠞ ꠜꠣꠁꠀꠁꠘꠞꠦ ꠢꠥꠡꠤꠀꠞ ꠇꠞꠃꠇ, ꠔꠣꠞꠣ ꠎꠣꠘꠥ ꠁ ꠖꠥꠎꠈꠞ ꠀꠎꠣꠛ ꠕꠣꠇꠤ ꠛꠣꠌꠂꠘ।
LUK 16:29 ꠁꠛ꠆ꠞꠣꠢꠤꠝꠦ ꠎꠥꠀꠙ ꠖꠤꠟꠣ, ꠔꠣꠞꠣꠞ ꠉꠦꠍꠦ ꠔ ꠢꠎꠞꠔ ꠝꠥꠍꠣ ꠀꠞ ꠘꠛꠤ ꠅꠇꠟꠞ ꠃꠍꠤꠟ꠆ꠟꠣꠄ ꠛꠃꠔ ꠇꠤꠔꠣꠛ ꠛꠦꠎꠣ ꠅꠁꠍꠦ, ꠔꠣꠞꠣ ꠅꠃ ꠔꠣꠟꠤꠝ ꠢꠥꠘꠃꠇ।
LUK 16:30 ꠢꠃ ꠗꠘꠤꠄ ꠇꠁꠟ, ꠘꠣ, ꠘꠣ, ꠛꠣꠛꠣ ꠁꠛ꠆ꠞꠣꠢꠤꠝ! ꠝꠥꠞ꠆ꠖꠣ ꠕꠣꠇꠤ ꠇꠦꠃ ꠎꠤꠘ꠆ꠖꠣ ꠅꠁꠀ ꠔꠣꠞꠣꠞ ꠉꠦꠍꠦ ꠉꠦꠟꠦꠃ, ꠔꠣꠞꠣ ꠔꠃꠛꠣ ꠇꠞꠛꠣ।
LUK 16:31 ꠁꠛ꠆ꠞꠣꠢꠤꠝꠦ ꠇꠁꠟꠣ, ꠔꠣꠞꠣ ꠎꠥꠖꠤ ꠢꠎꠞꠔ ꠝꠥꠍꠣ ꠀꠞ ꠘꠛꠤ ꠅꠇꠟꠞ ꠇꠕꠣ ꠘꠣ ꠢꠥꠘꠦ, ꠔꠦ ꠝꠥꠞ꠆ꠖꠣ ꠕꠣꠇꠤ ꠎꠤꠘ꠆ꠖꠣ ꠅꠁꠀ ꠉꠦꠟꠦꠅ ꠔꠣꠞꠣ ꠝꠣꠘꠔ ꠘꠣꠄ।”
LUK 17:1 ꠢꠎꠞꠔ ꠁꠍꠣꠄ ꠔꠣꠘ ꠡꠣꠉꠞꠤꠖ ꠅꠇꠟꠞꠦ ꠇꠁꠟꠣ, “ꠉꠥꠘꠣꠞ ꠙꠕꠦ ꠘꠦꠅꠀꠞ ꠟꠣꠉꠤ ꠃꠍꠇꠣꠘꠤ ꠀꠁꠛꠃ ꠀꠁꠛ। ꠅꠁꠟꠦ ꠟꠣꠘ꠆ꠘꠔ ꠢꠃ ꠎꠘꠞ ꠃꠙꠞꠦ, ꠎꠦꠉꠤꠄ ꠉꠥꠘꠣ ꠇꠞꠣꠞ ꠟꠣꠉꠤ ꠃꠍꠇꠣꠘꠤ ꠖꠦꠄ।
LUK 17:2 ꠅꠃ ꠛꠦꠛꠥꠎ ꠅꠇꠟꠞ ꠄꠇꠎꠘꠞꠦꠅ ꠎꠦꠉꠤꠄ ꠉꠥꠘꠣꠞ ꠙꠕꠦ ꠐꠣꠘꠤꠀ ꠘꠦꠄ, ꠅꠉꠥꠞ ꠟꠣꠉꠤ ꠀꠞꠅ ꠜꠣꠟꠣ ꠅꠁꠟ ꠅꠘꠦ, ꠅꠉꠥꠞ ꠉꠟꠣꠔ ꠙꠣꠔ꠆ꠔꠞ ꠛꠣꠘ꠆ꠖꠤꠀ ꠖꠞꠤꠀꠔ ꠚꠣꠟꠣꠁ ꠖꠦꠅꠀ।
LUK 17:3 ꠔꠥꠝꠞꠣꠅ ꠎꠣꠞꠎꠤꠞ ꠛꠦꠙꠣꠞꠦ ꠢꠥꠡꠤꠀꠞ ꠞꠁꠅ। ꠔꠥꠝꠣꠞ ꠇꠥꠘꠥ ꠜꠣꠁꠄ ꠔꠥꠝꠣꠞ ꠉꠦꠍꠦ ꠖꠥꠡ ꠇꠞꠟꠦ ꠔꠣꠞꠦ ꠛꠥꠎꠣꠁꠅ। ꠢꠦ ꠖꠤꠟ ꠛꠖꠟꠣꠁꠀ ꠝꠣꠚ ꠌꠣꠁꠟꠦ ꠔꠣꠞꠦ ꠝꠣꠚꠤ ꠖꠤꠅ।
LUK 17:4 ꠢꠦ ꠖꠤꠘꠞ ꠝꠣꠎꠦ ꠡꠣꠔꠛꠣꠞ ꠖꠥꠡ ꠇꠞꠤꠀ, ꠡꠣꠔꠛꠣꠞ ꠀꠁꠀ ꠔꠥꠝꠣꠞ ꠉꠦꠍꠦ ꠝꠣꠚ ꠌꠣꠁꠟꠦ, ꠔꠣꠞꠦ ꠝꠣꠚ ꠇꠞꠤ ꠖꠤꠅ।”
LUK 17:5 ꠍꠣꠢꠣꠛꠤ ꠅꠇꠟꠦ ꠢꠎꠞꠔ ꠁꠍꠣꠞ ꠉꠦꠍꠦ ꠀꠛꠖꠣꠞ ꠇꠞꠟꠣ, “ꠢꠥꠎꠥꠞ, ꠀꠝꠞꠣꠞ ꠁꠝꠣꠘꠤ ꠛꠟ ꠛꠣꠠꠣꠁ ꠖꠦꠃꠇ꠆ꠇꠣ।”
LUK 17:6 ꠔꠣꠁꠘ ꠇꠁꠟꠣ, “ꠔꠥꠝꠞꠣꠞ ꠖꠤꠟꠅ ꠎꠥꠖꠤ ꠄꠉꠥ ꠒꠦꠋꠉꠣꠞ ꠛꠤꠌꠤꠞ ꠙꠞꠤꠝꠣꠘ ꠁꠝꠣꠘ ꠕꠣꠇꠦ, ꠀꠞ ꠔꠥꠝꠞꠣ ꠅꠃ ꠢꠦꠅꠞꠣ ꠉꠣꠍꠞꠦ ꠇꠅ, ꠎꠠ ꠡꠥꠖ꠆ꠖꠣ ꠢꠥꠞꠤꠀ ꠉꠤꠀ ꠖꠞꠤꠀꠔ ꠉꠣꠠꠤꠎꠣꠅ, ꠔꠦ ꠢꠦ ꠔꠥꠝꠞꠣꠞ ꠇꠕꠣ ꠢꠥꠘꠛ।
LUK 17:7 “ꠔꠥꠝꠞꠣꠞ ꠝꠣꠎꠦ ꠁꠟꠣ ꠇꠥꠘꠥ ꠉꠤꠞꠡ꠆ꠔ ꠀꠍꠦ ꠘꠤ, ꠎꠣꠞ ꠇꠣꠝꠟꠣꠄ ꠀꠟ ꠛꠣꠁꠀ ꠛꠣ ꠉꠞꠥ ꠞꠣꠈꠤꠀ ꠛꠘ꠆ꠖꠅ ꠕꠣꠇꠤ ꠛꠣꠠꠤꠔ ꠀꠁꠔꠦꠃ, ꠢꠦ ꠔꠣꠞ ꠇꠣꠝꠟꠣꠞꠦ ꠇꠄ, ꠔꠥꠝꠤ ꠎꠟꠖꠤ ꠀꠁꠀ ꠈꠣꠘꠣ ꠈꠣꠅ?
LUK 17:8 ꠘꠣ, ꠇꠦꠃ ꠁꠟꠣ ꠇꠄ ꠘꠣ। ꠛꠞꠋ ꠅꠃꠟꠣ ꠇꠄ, ꠅꠛꠣ, ꠔꠥꠁ ꠀꠝꠣꠞ ꠈꠣꠘꠣ ꠎꠥꠁꠔ ꠇꠞ। ꠀꠝꠤ ꠎꠔ ꠡꠝꠄ ꠈꠣꠘꠣ ꠈꠣꠁ, ꠔꠥꠁ ꠅꠘꠅ ꠃꠛꠣꠁꠀ ꠜꠣꠟꠣꠝꠘ꠆ꠔꠦ ꠀꠝꠣꠞꠦ ꠛꠣꠔꠣꠡ ꠖꠦ। ꠛꠣꠖꠦ ꠔꠥꠁ ꠈꠣꠁꠍ।
LUK 17:9 ꠀꠞ ꠢꠃ ꠉꠥꠟꠣꠝꠦ ꠔꠣꠘ ꠢꠥꠇꠥꠝ ꠝꠣꠘꠍꠦ ꠇꠞꠤ ꠔꠣꠁꠘ ꠔꠣꠞꠦ ꠇꠥꠘꠥ ꠗꠁꠘ꠆ꠘꠛꠣꠖ ꠖꠦꠁꠘ ꠘꠤ? ꠘꠤꠌꠄ ꠘꠣ।
LUK 17:10 ꠅꠃ ꠟꠣꠈꠣꠘ ꠔꠥꠝꠞꠣꠅ ꠢꠇꠟ ꠢꠥꠇꠥꠝ-ꠀꠢꠇꠣꠝ ꠀꠖꠣꠄ ꠇꠞꠟꠦꠅ ꠇꠁꠅ, ꠝꠣꠟꠤꠇ, ꠀꠝꠞꠣ ꠔ ꠔꠥꠝꠣꠞ ꠘꠣ-ꠟꠣꠄꠇ ꠉꠥꠟꠣꠝ। ꠀꠝꠞꠣ ꠎꠦꠔꠣ ꠇꠣꠝ ꠇꠞꠣ ꠎꠞꠥꠞ ꠀꠍꠤꠟ, ꠈꠣꠟꠤ ꠅꠔꠣꠃ ꠇꠥꠘꠥ ꠞꠇꠝꠦ ꠀꠖꠣꠄ ꠇꠞꠍꠤ।”
LUK 17:11 ꠢꠎꠞꠔ ꠁꠍꠣ ꠎꠦꠞꠥꠎꠣꠟꠦꠝ ꠐꠣꠃꠘꠅ ꠎꠣꠅꠀꠞ ꠛꠣꠟꠣ ꠡꠝꠞꠤꠀ ꠀꠞ ꠉꠣꠟꠤꠟ ꠎꠤꠟꠣꠞ ꠝꠣꠎꠦꠖꠤ ꠀꠐꠤꠀ ꠎꠣꠁꠞꠣ।
LUK 17:12 ꠅꠃ ꠡꠝꠄ ꠄꠇ ꠉꠣꠃꠔ ꠢꠣꠝꠣꠘꠤꠞ ꠙꠕꠞ ꠝꠥꠈꠅ ꠖꠡꠎꠘ ꠙꠌꠣ-ꠇꠥꠡ꠆ꠑ ꠛꠦꠝꠣꠞꠤꠄ ꠔꠣꠘꠞꠦ ꠖꠦꠈꠣꠔ ꠀꠁꠟꠣ। ꠔꠣꠞꠣ ꠖꠥꠞꠁ ꠃꠛꠣꠁꠀ ꠎꠥꠞꠦ ꠎꠥꠞꠦ ꠇꠁꠟꠣ,
LUK 17:13 “ꠅ ꠢꠥꠎꠥꠞ ꠁꠍꠣ, ꠀꠝꠞꠣꠞꠦ ꠞꠢꠝ ꠇꠞꠃꠇ꠆ꠇꠣ।”
LUK 17:14 ꠔꠣꠞꠣꠞꠦ ꠖꠦꠈꠤꠀ ꠔꠣꠁꠘ ꠇꠁꠟꠣ, “ꠎꠣꠅ, ꠁꠝꠣꠝ ꠍꠣꠛ ꠅꠇꠟꠞꠦ ꠉꠤꠀ ꠔꠥꠝꠞꠣꠞ ꠢꠣꠟꠔ ꠖꠦꠈꠣꠅ।” ꠙꠕꠦꠖꠤ ꠎꠣꠁꠔꠦ ꠎꠣꠁꠔꠦ ꠔꠣꠞꠣ ꠢꠇꠟꠞ ꠛꠦꠝꠣꠞ ꠇꠝꠤꠉꠦꠟ।
LUK 17:15 ꠔꠣꠞꠣꠞ ꠝꠣꠎꠦ ꠄꠇꠎꠘꠦ ꠎꠦꠛꠟꠣ ꠖꠦꠈꠟ, ꠢꠦ ꠜꠣꠟꠣ ꠅꠁꠉꠦꠍꠦ, ꠖꠦꠈꠤꠀꠃ ꠎꠥꠞꠦ ꠎꠥꠞꠦ ꠀꠟ꠆ꠟꠣꠞ ꠔꠣꠞꠤꠚ ꠇꠞꠤ ꠇꠞꠤ ꠢꠦ ꠚꠤꠞꠤꠀ ꠀꠁꠟ।
LUK 17:16 ꠀꠁꠀ ꠁꠍꠣꠞ ꠙꠣꠅꠔ ꠙꠠꠤꠀ ꠔꠣꠘꠞꠦ ꠡꠥꠇꠞꠤꠀ ꠎꠣꠘꠣꠁꠟ। ꠢꠦ ꠅꠁꠟ ꠡꠝꠞꠤꠀ ꠎꠣꠔꠤꠞ ꠝꠣꠘꠥꠡ।
LUK 17:17 ꠔꠦꠃ ꠁꠍꠣꠄ ꠇꠁꠟꠣ, “ꠖꠡꠅ ꠎꠘꠞꠦꠃ ꠇꠥꠘꠥ ꠜꠣꠟꠣ ꠇꠞꠣ ꠅꠁꠍꠦ ꠘꠣ ꠘꠤ? ꠔꠦ ꠛꠣꠇꠤ ꠘꠄꠎꠘ ꠇꠥꠀꠁ?
LUK 17:18 ꠀꠟ꠆ꠟꠣꠞ ꠔꠣꠞꠤꠚ ꠇꠞꠣꠞ ꠟꠣꠉꠤ ꠅꠃ ꠛꠤꠖꠦꠡꠤ ꠛꠦꠐꠣ ꠍꠣꠠꠣ ꠀꠞ ꠇꠦꠃ ꠚꠤꠞꠤꠀ ꠀꠁꠟ ꠘꠣ ꠘꠤ?”
LUK 17:19 ꠛꠣꠖꠦ ꠁꠍꠣꠄ ꠔꠣꠞꠦ ꠇꠁꠟꠣ, “ꠜꠣꠁ, ꠔꠥꠝꠣꠞ ꠁꠝꠣꠘꠞ ꠛꠟꠦꠃ ꠔꠥꠝꠤ ꠜꠣꠟꠣ ꠅꠁꠍ। ꠅꠈꠘ ꠍꠢꠤ-ꠍꠣꠟꠣꠝꠔꠦ ꠎꠣꠅ।”
LUK 17:20 ꠚꠞꠤꠡꠤ ꠝꠎꠛꠞ ꠇꠄꠎꠘ ꠀꠁꠀ ꠢꠎꠞꠔ ꠁꠍꠣꠞꠦ ꠎꠤꠇꠣꠁꠟꠣ, ꠀꠟ꠆ꠟꠣꠄ ꠇꠥꠘ ꠡꠝꠄ ꠔꠣꠘ ꠛꠣꠖꠡꠣꠁ ꠌꠣꠟꠥ ꠇꠞꠛꠣ। ꠔꠣꠁꠘ ꠇꠁꠟꠣ, “ꠀꠟ꠆ꠟꠣꠞ ꠛꠣꠖꠡꠣꠁ ꠔ ꠇꠦꠃꠞꠞꠦ ꠎꠣꠘꠣꠁ-ꠢꠥꠘꠣꠁ ꠀꠄ ꠘꠣ।
LUK 17:21 ꠇꠦꠃ ꠇꠅꠀꠞ ꠡꠣꠁꠖ꠆ꠖ ꠘꠣꠁ, ꠀꠟ꠆ꠟꠣꠞ ꠛꠣꠖꠡꠣꠁ ꠅꠘꠅ ꠛꠣ ꠢꠘꠅ ꠖꠦꠈꠍꠤ। ꠢꠥꠘꠃꠇ꠆ꠇꠣ, ꠀꠟ꠆ꠟꠣꠞ ꠛꠣꠖꠡꠣꠁ ꠔ ꠅꠈꠘꠃ ꠀꠙꠘꠣꠞꠣꠞ ꠝꠣꠎꠦ ꠌꠣꠟꠥ ꠀꠍꠦ।”
LUK 17:22 ꠛꠣꠖꠦ ꠔꠣꠘ ꠡꠣꠉꠞꠤꠖ ꠅꠇꠟꠞꠦ ꠇꠁꠟꠣ, “ꠅꠝꠘ ꠄꠇ ꠡꠝꠄ ꠀꠁꠛ, ꠎꠦꠛꠟꠣ ꠔꠥꠝꠞꠣ ꠀꠝꠤ ꠛꠤꠘ-ꠀꠖꠝꠞ ꠄꠇꠈꠣꠘ ꠖꠤꠘ ꠖꠦꠈꠔꠣꠄ ꠌꠣꠁꠛꠣꠄ, ꠅꠁꠟꠦ ꠙꠣꠞꠔꠣꠄ ꠘꠣꠄ।
LUK 17:23 ꠝꠣꠘꠡꠦ ꠔꠥꠝꠞꠣꠞꠦ ꠇꠁꠛꠣ, ꠅꠘꠅ ꠖꠦꠈꠅ, ꠢꠘꠅ ꠖꠦꠈꠅ। ꠅꠁꠟꠦ ꠔꠥꠝꠞꠣ ꠔꠣꠞꠣꠞ ꠇꠕꠣꠄ ꠖꠃꠠꠤꠅ ꠘꠣ, ꠇꠥꠘꠥꠈꠣꠘꠅ ꠎꠣꠁꠅ ꠘꠣ।
LUK 17:24 ꠢꠥꠘꠅ, ꠝꠦꠊꠞ ꠎꠤꠟꠇꠤꠞ ꠟꠉꠦ ꠀꠍꠝꠣꠘꠞ ꠄꠇ ꠝꠣꠕꠣ ꠕꠣꠇꠤ ꠀꠞꠇ ꠝꠣꠕꠣ ꠎꠦꠛꠟꠣ ꠚꠞ ꠅꠄ, ꠅꠃ ꠡꠝꠄ ꠔ ꠢꠇꠟꠦ ꠖꠦꠈꠦ। ꠔꠦ ꠀꠝꠤ ꠛꠤꠘ-ꠀꠖꠝ ꠎꠦꠛꠟꠣ ꠀꠁꠝꠥ ꠢꠃ ꠡꠝꠄꠅ ꠅꠟꠣ ꠢꠇꠟꠦ ꠖꠦꠈꠛ।
LUK 17:25 ꠅꠁꠟꠦꠅ ꠙꠄꠟꠣ ꠁ ꠎꠝꠣꠘꠣꠞ ꠝꠣꠘꠡꠞ ꠀꠔꠅ ꠀꠝꠤ ꠛꠃꠔ ꠇꠡ꠆ꠐ ꠙꠣꠁꠔꠣꠝ ꠅꠁꠛ, ꠔꠣꠞꠣ ꠀꠝꠣꠞꠦ ꠖꠥꠞ ꠖꠥꠞ ꠇꠞꠛꠣ।
LUK 17:26 “ꠎꠦꠟꠣ ꠘꠥꠢ ꠘꠛꠤꠞ ꠀꠝꠟꠅ ꠅꠁꠍꠤꠟ, ꠀꠝꠤ ꠛꠤꠘ-ꠀꠖꠝꠞ ꠎꠝꠣꠘꠣꠔꠅ ꠅꠟꠣ ꠅꠁꠛ।
LUK 17:27 ꠘꠥꠢ ꠘꠛꠤ ꠎꠣꠎꠅ ꠃꠑꠣꠞ ꠀꠉ ꠙꠞ꠆ꠎꠘ꠆ꠔ ꠝꠣꠘꠡꠦ ꠈꠣꠘꠣ-ꠙꠤꠘꠣ, ꠛꠤꠀ-ꠡꠣꠖꠤ ꠀꠞ ꠊꠞ-ꠡꠋꠡꠣꠞ ꠇꠞꠔꠣ, ꠘꠥꠢ ꠘꠛꠤꠞ ꠛꠁꠘ꠆ꠘꠣ ꠀꠁꠀ ꠁꠔꠣꠞꠦ ꠘꠤꠙꠣꠔ ꠇꠞꠟ।
LUK 17:28 ꠅꠃꠟꠣ ꠟꠥꠔ ꠘꠛꠤꠞ ꠀꠝꠟꠅ-ꠅ ꠝꠣꠘꠡꠦ ꠈꠣꠘꠣ-ꠙꠤꠘꠣ, ꠈꠞꠤꠖ-ꠛꠤꠇꠤ, ꠈꠦꠔ-ꠉꠤꠞꠡ꠆ꠔꠤ ꠀꠞ ꠛꠣꠠꠤ-ꠊꠞ ꠛꠣꠘꠣꠘꠤꠔ ꠛꠦꠡ꠆ꠔ ꠀꠍꠟꠣ।
LUK 17:29 ꠅꠁꠟꠦ ꠟꠥꠔ ꠘꠛꠤ ꠎꠦꠖꠤꠘ ꠍꠣꠖꠥꠝ ꠐꠣꠃꠘ ꠍꠣꠠꠤꠀ ꠛꠤꠖꠣꠄ ꠅꠁꠉꠦꠟꠣ, ꠢꠃ ꠖꠤꠘꠃ ꠀꠍꠝꠣꠘ ꠕꠣꠇꠤ ꠀꠉꠥꠁꠘ ꠀꠞ ꠉꠘ꠆ꠖꠇꠞ ꠉꠎꠛ ꠟꠣꠝꠤꠀ ꠁꠔꠣ ꠢꠇ꠆ꠇꠟꠐꠤꠞꠦ ꠘꠤꠙꠣꠔ ꠇꠞꠟ।
LUK 17:30 ꠑꠤꠇ ꠅꠃꠟꠣ, ꠀꠝꠤ ꠛꠤꠘ-ꠀꠖꠝ ꠎꠦꠖꠤꠘ ꠎꠣꠁꠞꠣ ꠅꠁꠝꠥ, ꠢꠃ ꠖꠤꠘꠅ ꠅꠟꠣ ꠀꠈꠔꠣ ꠀꠁꠛ।
LUK 17:31 “ꠢꠤꠖꠤꠘ ꠇꠦꠃ ꠎꠥꠖꠤ ꠊꠞꠞ ꠌꠣꠟꠞ ꠃꠙꠞꠦ ꠕꠣꠇꠦ, ꠔꠦ ꠔꠣꠞ ꠊꠞꠞ ꠝꠣꠟ-ꠍꠣꠝꠣꠘꠣ ꠘꠤꠛꠣꠞ ꠟꠣꠉꠤ, ꠟꠣꠝꠣꠔ ꠟꠣꠝꠤꠀ ꠊꠞꠞ ꠜꠤꠔꠞꠦ ꠘꠣ ꠢꠣꠝꠣꠃꠇ। ꠅꠃ ꠟꠣꠈꠣꠘ ꠇꠦꠃ ꠎꠥꠖꠤ ꠛꠘ꠆ꠖꠅ ꠕꠣꠇꠦ, ꠢꠦ-ꠅ ꠀꠞ ꠛꠣꠠꠤꠔ ꠘꠣ ꠀꠃꠇ।
LUK 17:32 ꠟꠥꠔ ꠘꠛꠤꠞ ꠛꠤꠛꠤꠞ ꠊꠐꠘꠣ ꠁꠀꠖ ꠇꠞꠅ।
LUK 17:33 ꠝꠘꠅ ꠞꠣꠈꠤꠅ, ꠎꠦ ꠎꠘꠦ ꠎꠣꠘ ꠛꠣꠌꠣꠁꠔ ꠌꠣꠄ, ꠢꠦ ꠘꠤꠎꠞ ꠎꠤꠘ꠆ꠖꠦꠉꠤ ꠈꠥꠀꠁꠛ, ꠅꠁꠟꠦ ꠎꠦ ꠎꠘꠦ ꠎꠣꠘ ꠡꠙꠤꠀ ꠖꠦꠄ, ꠢꠦ ꠎꠤꠘ꠆ꠖꠦꠉꠤ ꠙꠣꠁꠛ।
LUK 17:34 ꠢꠤ ꠞꠣꠁꠔ ꠄꠇꠁ ꠛꠤꠍꠘꠣꠔ ꠖꠥꠁꠎꠘ ꠢꠥꠔꠤꠟꠦꠅ, ꠄꠇꠎꠘꠞꠦ ꠘꠦꠅꠀ ꠅꠁꠛ, ꠖꠥꠍꠞꠣ ꠎꠘ ꠛꠣꠖ ꠙꠠꠤꠎꠤꠛ।
LUK 17:35 ꠖꠥꠁ ꠛꠦꠐꠤꠄ ꠄꠇꠟꠉꠦ ꠛꠣꠞꠣ-ꠜꠣꠘꠣꠔ ꠕꠣꠇꠟꠦꠅ, ꠄꠞꠣꠞ ꠄꠇꠎꠘꠞꠦ ꠘꠦꠅꠀ ꠅꠁꠛ, ꠀꠞꠇ ꠎꠘ ꠛꠣꠖ ꠙꠠꠤꠎꠤꠛ।”
LUK 17:37 ꠍꠣꠢꠣꠛꠤ ꠅꠇꠟꠦ ꠇꠁꠟꠣ, “ꠢꠥꠎꠥꠞ, ꠁꠔꠣ ꠇꠥꠀꠁ ꠅꠁꠛ?” ꠔꠣꠁꠘ ꠎꠥꠀꠙ ꠖꠤꠟꠣ, “ꠝꠞꠣ ꠟꠣꠡ ꠎꠦꠈꠣꠘꠅ, ꠢꠇꠥꠘꠅ ꠢꠘꠅ ꠖꠟꠣ ꠅꠄ।”
LUK 18:1 ꠝꠥꠘꠣꠎꠣꠔꠞ ꠛꠦꠙꠣꠞꠦ ꠡꠣꠉꠞꠤꠖ ꠅꠇꠟ ꠘꠤꠞꠣꠡ ꠘꠣ ꠅꠁꠀ ꠢꠣꠝꠦꠡꠣ ꠎꠣꠔꠦ ꠝꠥꠘꠣꠎꠣꠔ ꠇꠞꠂꠘ, ꠅꠈꠣꠘ ꠛꠥꠎꠣꠘꠤꠞ ꠟꠣꠉꠤ ꠁꠍꠣꠄ ꠄꠇ ꠇꠤꠌ꠆ꠍꠣ ꠢꠥꠘꠣꠁꠟꠣ।
LUK 18:2 ꠇꠁꠟꠣ, “ꠇꠥꠘꠥ ꠄꠇ ꠐꠣꠃꠘꠅ ꠄꠇꠎꠘ ꠢꠣꠇꠤꠝ ꠀꠍꠟꠣ। ꠄꠁꠘ ꠀꠟ꠆ꠟꠣꠞꠦꠅ ꠒꠞꠣꠁꠔꠣ ꠘꠣ, ꠇꠥꠘꠥ ꠝꠣꠘꠡꠞꠦꠅ ꠔꠅꠀꠇ꠆ꠇꠣ ꠇꠞꠔꠣ ꠘꠣ।
LUK 18:3 ꠢꠃ ꠐꠣꠃꠘꠅ ꠄꠇ ꠠꠣꠠꠤ ꠛꠦꠐꠤ ꠀꠍꠤꠟ। ꠅꠃ ꠛꠦꠐꠤꠄ ꠀꠁꠀ ꠢꠣꠝꠦꠡꠣ ꠔꠣꠘꠞꠦ ꠇꠁꠔ, ꠢꠣꠇꠤꠝ ꠍꠣꠛ, ꠀꠝꠣꠞꠦ ꠖꠥꠡꠝꠘꠞ ꠀꠔ ꠕꠣꠇꠤ ꠛꠣꠌꠣꠃꠇ꠆ꠇꠣ, ꠖꠄꠀ ꠇꠞꠤ ꠅꠃ ꠘꠤꠀꠎ꠆ꠎ ꠛꠤꠌꠣꠞꠈꠣꠘ ꠇꠞꠃꠇ꠆ꠇꠣ।
LUK 18:4 ꠁ ꠢꠣꠇꠤꠝꠦ ꠇꠄꠖꠤꠘ ꠇꠥꠘ꠆ꠔꠣ ꠇꠁꠟꠣ ꠘꠣ। ꠛꠣꠖꠦ ꠝꠘꠦ ꠝꠘꠦ ꠇꠁꠟꠣ, ꠀꠝꠤ ꠔ ꠀꠟ꠆ꠟꠣꠞꠦ ꠒꠞꠣꠁ ꠘꠣ, ꠝꠣꠘꠡꠞꠦꠅ ꠔꠅꠀꠇ꠆ꠇꠣ ꠇꠞꠤ ꠘꠣ,
LUK 18:5 ꠅꠁꠟꠦ ꠁ ꠠꠣꠠꠤꠄ ꠀꠁꠀ ꠔ ꠢꠣꠝꠦꠡꠣ ꠍꠣꠔꠣꠄ, ꠅꠈꠘ ꠅꠉꠥꠞ ꠘꠤꠀꠎ꠆ꠎ ꠛꠤꠌꠣꠞꠈꠣꠘ ꠇꠞꠤꠟꠣꠁ। ꠘꠣꠁꠟꠦ ꠔꠣꠁ ꠀꠁꠀ ꠛꠣꠞ ꠛꠣꠞ ꠍꠣꠔꠣꠁꠛ।”
LUK 18:6 ꠛꠣꠖꠦ ꠢꠥꠎꠥꠞꠦ ꠇꠁꠟꠣ, “ꠖꠦꠈꠟꠣꠄ ꠘꠤ, ꠅꠃ ꠘꠣꠚꠞꠝꠣꠘ ꠢꠣꠇꠤꠝꠦ ꠇꠤꠔꠣ ꠇꠞꠍꠦ?
LUK 18:7 ꠔꠦ ꠎꠦꠞꠣ ꠢꠣꠝꠦꠡꠣ ꠖꠤꠘꠦ-ꠞꠣꠁꠔꠦ ꠀꠟ꠆ꠟꠣꠞ ꠉꠦꠍꠦ ꠇꠣꠘ꠆ꠖꠦ, ꠀꠟ꠆ꠟꠣꠄ ꠇꠤꠔꠣ ꠔꠣꠘ ꠁ ꠝꠣꠄꠀꠞ ꠛꠘ꠆ꠖꠣ ꠅꠇꠟꠞ ꠢꠇ ꠚꠞꠤꠀꠖ ꠢꠥꠘꠔꠣ ꠘꠣꠄ ꠘꠤ? ꠔꠣꠁꠘ ꠢꠥꠘꠔꠦ ꠇꠥꠘꠥ ꠀꠞ ꠖꠦꠞꠤ ꠇꠞꠛꠣ ꠘꠤ?
LUK 18:8 ꠀꠝꠤ ꠇꠁꠞꠣꠝ, ꠔꠣꠁꠘ ꠎꠟꠖꠤ ꠇꠞꠤꠃ ꠄꠞꠣꠞ ꠢꠇ ꠚꠞꠤꠀꠖ ꠢꠥꠘꠛꠣ। ꠅꠁꠟꠦ ꠀꠝꠤ ꠛꠤꠘ-ꠀꠖꠝ ꠖꠥꠍꠞꠣꠛꠣꠞ ꠎꠦꠛꠟꠣ ꠁ ꠖꠥꠘꠤꠀꠔ ꠀꠁꠝꠥ, ꠢꠃ ꠡꠝꠄ ꠖꠥꠘꠤꠀꠔ ꠇꠥꠘꠥ ꠁꠝꠣꠘ ꠙꠣꠁꠝꠥ ꠘꠤ?”
LUK 18:9 ꠎꠦꠔꠣ ꠝꠣꠘꠡꠦ ꠘꠤꠎꠞꠦ ꠈꠥꠛ ꠙꠞꠦꠎꠉꠣꠞ, ꠀꠞ ꠛꠣꠖ-ꠛꠣꠇꠤ ꠢꠇꠟ ꠝꠣꠘꠡꠞꠦ ꠢꠥꠞꠥ ꠝꠘꠅ ꠇꠞꠔ, ꠢꠎꠞꠔ ꠁꠍꠣꠄ ꠔꠣꠞꠣꠞꠦ ꠅꠃ ꠇꠤꠌ꠆ꠍꠣ ꠢꠥꠘꠣꠁꠟꠣ।
LUK 18:10 ꠇꠁꠟꠣ, “ꠖꠥꠁꠎꠘ ꠝꠣꠘꠥꠡ ꠖꠥꠀ ꠇꠞꠣꠞ ꠟꠣꠉꠤ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠅ ꠉꠦꠟ। ꠄꠞꠣꠞ ꠄꠇꠎꠘ ꠚꠞꠤꠡꠤ ꠖꠟꠞ ꠀꠞ ꠖꠥꠍꠞꠣ ꠎꠘ ꠊꠥꠡꠈꠥꠞ ꠈꠣꠎꠘꠣ ꠔꠥꠟꠞꠣ।
LUK 18:11 ꠚꠞꠤꠡꠤ ꠛꠦꠐꠣꠄ ꠀꠟꠉꠣ ꠃꠛꠣꠁꠀ ꠅꠃꠟꠣ ꠖꠥꠀ ꠇꠞꠟ, ꠅ ꠀꠟ꠆ꠟꠣ, ꠀꠝꠤ ꠔꠥꠝꠣꠞ ꠡꠥꠇꠞꠤꠀ ꠀꠖꠣꠄ ꠇꠞꠞꠣꠝ, ꠀꠝꠤ ꠔ ꠡꠝꠣꠎꠞ ꠝꠣꠘꠡꠞ ꠟꠣꠈꠣꠘ ꠘꠣꠚꠞꠝꠣꠘ, ꠎꠣꠟꠤꠝ, ꠀꠞ ꠎꠤꠘꠣꠇꠥꠞ ꠘꠣꠄ, ꠛꠣ ꠅꠃ ꠊꠥꠡꠈꠥꠞ ꠈꠣꠎꠘꠣ ꠔꠥꠟꠞꠣꠞ ꠟꠣꠈꠣꠘꠅ ꠘꠣꠄ।
LUK 18:12 ꠀꠝꠤ ꠢꠣꠙ꠆ꠔꠣꠔ ꠖꠥꠁꠖꠤꠘ ꠞꠥꠎꠣ ꠞꠣꠈꠤ, ꠀꠞ ꠀꠝꠣꠞ ꠢꠇ꠆ꠇꠟ ꠞꠥꠎꠤꠞ ꠖꠡ ꠛꠣꠐꠞ ꠄꠇ ꠛꠣꠐ ꠔꠥꠝꠣꠞ ꠘꠣꠝꠦ ꠎꠇꠣꠔ ꠖꠦꠁ।
LUK 18:13 ꠅꠁꠟꠦ ꠅꠃ ꠈꠣꠎꠘꠣ ꠔꠥꠟꠞꠣ ꠛꠦꠐꠣꠄ ꠖꠥꠞꠁ ꠃꠛꠣꠁ ꠞꠁꠟ, ꠀꠟ꠆ꠟꠣꠞ ꠀꠞꠡꠞ ꠛꠣꠄ ꠌꠃꠈ ꠔꠥꠟꠣꠞ ꠡꠣꠅꠡꠅ ꠔꠣꠞ ꠅꠁꠟ ꠘꠣ। ꠢꠦ ꠛꠥꠇꠥꠔ ꠝꠣꠞꠤ ꠝꠣꠞꠤ ꠇꠣꠘ꠆ꠖꠤ ꠇꠣꠘ꠆ꠖꠤ ꠇꠁꠟ, ꠅ ꠀꠟ꠆ꠟꠣ, ꠀꠝꠤ ꠛꠠ ꠉꠥꠘꠣꠉꠣꠞ, ꠀꠝꠣꠞꠦ ꠞꠢꠝ ꠇꠞꠅ।
LUK 18:14 “ꠀꠝꠤ ꠔꠥꠝꠞꠣꠞꠦ ꠇꠁꠞꠣꠝ, ꠅꠃ ꠈꠣꠎꠘꠣ ꠔꠥꠟꠞꠣ ꠛꠦꠐꠣꠃ ꠙꠞꠦꠎꠉꠣꠞ ꠛꠘꠤꠀ ꠔꠣꠞ ꠊꠞꠅ ꠉꠦꠟ, ꠢꠤ ꠚꠞꠤꠡꠤ ꠘꠣꠄ। ꠀꠍꠟꠦ ꠎꠦ ꠘꠤꠎꠞꠦ ꠛꠠ ꠝꠘꠅ ꠇꠞꠦ, ꠔꠣꠞꠦ ꠢꠥꠞꠥ ꠇꠞꠣ ꠅꠁꠛ। ꠀꠞ ꠎꠦ ꠘꠤꠎꠞꠦ ꠢꠥꠞꠥ ꠝꠘꠅ ꠇꠞꠦ, ꠔꠣꠞꠦ ꠛꠠ ꠇꠞꠣ ꠅꠁꠛ।”
LUK 18:15 ꠝꠣꠘꠡꠦ ꠔꠣꠞꠣꠞ ꠢꠥꠞꠥ ꠢꠥꠞꠥꠔ꠆ꠔꠣꠁꠘꠞꠦ ꠟꠁꠀ ꠁꠍꠣꠞ ꠉꠦꠍꠦ ꠀꠁꠟ, ꠔꠣꠁꠘ ꠎꠣꠘꠥ ꠢꠥꠞꠥꠔ꠆ꠔꠣꠁꠘꠞꠦ ꠀꠔꠣꠁ ꠖꠤꠀ ꠖꠥꠀ ꠇꠞꠂꠘ। ꠁꠔꠣ ꠖꠦꠈꠤꠀ ꠍꠣꠢꠣꠛꠤ ꠅꠇꠟꠦ ꠝꠣꠘꠡꠞ ꠃꠙꠞꠦ ꠛꠤꠞꠇ꠆ꠔ ꠅꠁꠀ ꠘꠣ ꠇꠞꠟꠣ।
LUK 18:16 ꠅꠁꠟꠦ ꠁꠍꠣꠄ ꠢꠥꠞꠥꠔ꠆ꠔꠣꠁꠘꠞꠦ ꠔꠣꠘ ꠇꠣꠘ꠆ꠖꠣꠔ ꠘꠤꠟꠣ, ꠘꠤꠀ ꠇꠁꠟꠣ, “ꠢꠥꠞꠥꠔ꠆ꠔꠣꠁꠘꠞꠦ ꠀꠝꠣꠞ ꠇꠣꠘ꠆ꠖꠣꠔ ꠀꠁꠛꠣꠞ ꠖꠦꠅ, ꠔꠣꠞꠣꠞꠦ ꠛꠣꠗꠣ ꠖꠤꠅ ꠘꠣ। ꠀꠟ꠆ꠟꠣꠞ ꠛꠣꠖꠡꠣꠁ ꠔ ꠅꠃ ꠘꠝꠥꠘꠣꠞ ꠝꠣꠘꠡꠞ ꠟꠣꠉꠤꠃ।
LUK 18:17 ꠀꠝꠤ ꠢꠇ ꠇꠕꠣ ꠇꠁꠀꠞ, ꠢꠥꠞꠥ ꠢꠥꠞꠥꠔ꠆ꠔꠣ ꠛꠘꠤꠀ ꠀꠟ꠆ꠟꠣꠞ ꠡꠣꠡꠘ ꠘꠣ ꠝꠣꠘꠟꠦ, ꠇꠥꠘꠥ ꠎꠘꠃ ꠀꠟ꠆ꠟꠣꠞ ꠛꠣꠖꠡꠣꠁꠔ ꠢꠣꠝꠣꠁꠔ ꠙꠣꠞꠔ ꠘꠣꠄ।”
LUK 18:18 ꠢꠎꠞꠔ ꠁꠍꠣꠞ ꠉꠦꠍꠦ ꠙꠣꠁꠘ꠆ꠌꠣꠁꠔꠞ ꠄꠇ ꠝꠥꠞꠛ꠆ꠛꠤ ꠀꠁꠟꠣ, ꠀꠁꠀ ꠇꠁꠟꠣ, “ꠅ ꠢꠇ ꠃꠡ꠆ꠔꠣꠖ, ꠀꠝꠣꠞꠦ ꠛꠣꠔꠣꠁ ꠖꠦꠃꠇ꠆ꠇꠣ, ꠇꠤꠔꠣ ꠇꠞꠟꠦ ꠀꠝꠤ ꠀꠈꠦꠞ ꠙꠣꠁꠝꠥ?”
LUK 18:19 ꠁꠍꠣꠄ ꠇꠁꠟꠣ, “ꠀꠝꠣꠞꠦ ꠇꠦꠘꠦ ꠢꠇ ꠇꠁꠞꠣ? ꠈꠣꠟꠤ ꠄꠇ ꠀꠟ꠆ꠟꠣ ꠛꠣꠖꠦ ꠀꠞ ꠇꠦꠃ ꠢꠇ ꠘꠣꠄ।
LUK 18:20 ꠀꠙꠘꠦ ꠔ ꠡꠞꠤꠅꠔꠞ ꠢꠥꠇꠥꠝ-ꠀꠢꠇꠣꠝ ꠎꠣꠘꠂꠘ, ꠎꠤꠘꠣ ꠇꠞꠤꠅ ꠘꠣ। ꠈꠥꠘ ꠇꠞꠤꠅ ꠘꠣ। ꠌꠥꠞꠤ ꠇꠞꠤꠅ ꠘꠣ। ꠝꠤꠍꠣ ꠇꠥꠘꠥ ꠡꠣꠇ꠆ꠇꠤ ꠖꠤꠅ ꠘꠣ। ꠔꠥꠝꠣꠞ ꠝꠣ-ꠛꠣꠚꠞꠦ ꠁꠎ꠆ꠎꠔ ꠇꠞꠤꠅ।”
LUK 18:21 ꠢꠤ ꠝꠥꠞꠛ꠆ꠛꠤꠄ ꠇꠁꠟꠣ, “ꠢꠥꠎꠥꠞ, ꠁ ꠢꠇ꠆ꠇꠟꠔꠣ ꠔ ꠢꠥꠞꠥꠝꠣꠘ ꠕꠘꠦꠃ ꠀꠖꠣꠄ ꠇꠞꠞꠣꠝ।”
LUK 18:22 ꠁꠈꠣꠘ ꠢꠥꠘꠤꠀ ꠁꠍꠣꠄ ꠇꠁꠟꠣ, “ꠅꠈꠘ ꠈꠣꠟꠤ ꠄꠇꠈꠣꠘ ꠇꠣꠝ ꠛꠣꠇꠤ ꠀꠍꠦ, ꠀꠙꠘꠣꠞ ꠢꠇꠟ ꠗꠘ-ꠍꠣꠝꠣꠘꠣ ꠛꠦꠌꠤꠀ ꠉꠞꠤꠛ ꠅꠇꠟꠞꠦ ꠟꠤꠟ꠆ꠟꠣ ꠖꠤꠟꠣꠃꠇ꠆ꠇꠣ। ꠔꠦꠃ ꠀꠙꠘꠦ ꠛꠦꠢꠦꠡ꠆ꠔꠅ ꠗꠘ ꠙꠣꠁꠛꠣ। ꠛꠣꠖꠦ ꠀꠁꠀ ꠀꠝꠣꠞ ꠃꠝ꠆ꠝꠔ ꠅꠃꠇ꠆ꠇꠣ।”
LUK 18:23 ꠁꠈꠣꠘ ꠢꠥꠘꠤꠀ ꠢꠤ ꠝꠥꠞꠛ꠆ꠛꠤ ꠈꠥꠛ ꠛꠦꠎꠣꠞ ꠅꠁꠉꠦꠟꠣ, ꠔꠣꠁꠘ ꠀꠍꠟꠦ ꠛꠃꠔ ꠛꠠ ꠗꠘꠤ ꠀꠍꠟꠣ।
LUK 18:24 ꠔꠣꠁꠘ ꠛꠦꠎꠣꠞ ꠅꠁꠉꠦꠍꠂꠘ ꠖꠦꠈꠤꠀ ꠁꠍꠣꠄ ꠇꠁꠟꠣ, “ꠗꠘꠤ ꠝꠣꠘꠥꠡ ꠀꠟ꠆ꠟꠣꠞ ꠛꠣꠖꠡꠣꠁꠔ ꠢꠣꠝꠣꠘꠤ ꠛꠠ ꠝꠡꠇꠤꠟ।
LUK 18:25 ꠗꠘꠤ ꠝꠣꠘꠥꠡ ꠀꠟ꠆ꠟꠣꠞ ꠛꠣꠖꠡꠣꠁꠔ ꠢꠣꠝꠣꠘꠤꠞ ꠌꠣꠁꠔꠦ, ꠍꠥꠁꠞ ꠘꠣʼ ꠛꠣꠄꠖꠤ ꠃꠐ ꠢꠣꠝꠣꠘꠤ ꠀꠞꠅ ꠡꠥꠎꠣ।”
LUK 18:26 ꠁꠈꠣꠘ ꠎꠣꠞꠣ ꠢꠥꠘꠟꠣ, ꠔꠣꠞꠣ ꠀꠞꠎ ꠇꠞꠟꠣ, “ꠔꠦ ꠀꠞ ꠇꠦꠉꠤꠄ ꠞꠦꠢꠣꠁ ꠙꠣꠁꠛ?”
LUK 18:27 ꠔꠣꠁꠘ ꠇꠁꠟꠣ, “ꠝꠣꠘꠡꠞ ꠉꠦꠍꠦ ꠎꠦꠔꠣ ꠅꠡꠝ꠆ꠛꠛ, ꠀꠟ꠆ꠟꠣꠞ ꠉꠦꠍꠦ ꠔ ꠁꠔꠣ ꠡꠝ꠆ꠛꠛ।”
LUK 18:28 ꠅꠃ ꠡꠝꠄ ꠙꠤꠔꠞꠦ ꠇꠁꠟꠣ, “ꠢꠥꠎꠥꠞ, ꠀꠝꠞꠣ ꠔ ꠢꠇꠟꠔꠣ ꠚꠣꠟꠣꠁ ꠕꠁꠀ ꠀꠙꠘꠣꠞ ꠃꠝ꠆ꠝꠔ ꠅꠁꠍꠤ।”
LUK 18:29 ꠔꠦꠃ ꠁꠍꠣꠄ ꠍꠣꠢꠣꠛꠤ ꠅꠇꠟꠞꠦ ꠇꠁꠟꠣ, “ꠀꠝꠤ ꠔꠥꠝꠞꠣꠞꠦ ꠢꠣꠍꠣ ꠇꠕꠣ ꠇꠁꠞꠣꠝ, ꠀꠟ꠆ꠟꠣꠞ ꠛꠣꠖꠡꠣꠁꠞ ꠟꠣꠉꠤ ꠎꠦꠞꠣ ꠘꠤꠎꠞ ꠛꠣꠠꠤ-ꠊꠞ, ꠝꠣ-ꠛꠣꠚ, ꠛꠃ, ꠙꠥꠀ-ꠙꠥꠠꠤ, ꠜꠣꠁ-ꠛꠤꠞꠣꠖꠞ ꠚꠣꠟꠣꠁꠀ ꠀꠁꠍꠦ,
LUK 18:30 ꠔꠣꠞꠣ ꠅꠃ ꠖꠥꠘꠤꠀꠔꠃ ꠄꠞ ꠛꠃꠔ ꠛꠦꠡꠤ ꠙꠣꠁꠛꠣ, ꠀꠞ ꠛꠣꠖꠞ ꠎꠤꠘ꠆ꠖꠦꠉꠤꠔ ꠀꠈꠦꠞꠅ ꠙꠣꠁꠛꠣ।”
LUK 18:31 ꠛꠣꠖꠦ ꠁꠍꠣꠄ ꠔꠣꠘ ꠛꠣꠞꠅꠎꠘ ꠍꠣꠢꠣꠛꠤꠞꠦ ꠗꠣꠞꠅ ꠛꠅꠀꠁꠟꠣ। ꠛꠅꠀꠁꠀ ꠇꠁꠟꠣ, “ꠢꠥꠘꠅ, ꠀꠝꠞꠣ ꠅꠈꠘ ꠎꠦꠞꠥꠎꠣꠟꠦꠝꠅ ꠎꠣꠁꠞꠣꠝ, ꠔꠦ ꠀꠝꠤ ꠛꠤꠘ-ꠀꠖꠝꠞ ꠛꠦꠙꠣꠞꠦ ꠘꠛꠤ ꠅꠇꠟꠦ ꠎꠔꠔꠣ ꠟꠦꠈꠤꠀ ꠉꠦꠍꠂꠘ, ꠁꠔꠣ ꠅꠈꠘ ꠙꠥꠞꠣ ꠅꠁꠛ।
LUK 18:32 ꠀꠝꠣꠞꠦ ꠛꠤꠗꠞ꠆ꠝꠤ ꠎꠣꠔꠤꠞ ꠀꠔꠅ ꠡꠙꠤ ꠖꠦꠅꠀ ꠅꠁꠛ। ꠝꠣꠘꠡꠦ ꠟꠁꠀ ꠓꠋ-ꠔꠣꠝꠣꠡꠣ ꠇꠞꠛꠣ, ꠛꠦꠁꠎ꠆ꠎꠔ ꠇꠞꠛꠣ, ꠀꠞ ꠕꠥꠕꠥ ꠇꠞꠤ ꠝꠥꠈꠅ ꠍꠦꠚ ꠖꠤꠛꠣ।
LUK 18:33 ꠀꠝꠣꠞꠦ ꠌꠣꠛꠥꠇ ꠝꠣꠞꠛꠣ ꠛꠣꠖꠦ ꠎꠣꠘꠦ ꠝꠣꠞꠛꠣ। ꠝꠃꠔꠞ ꠔꠤꠘ ꠖꠤꠘꠞ ꠖꠤꠘ ꠀꠝꠤ ꠢꠤꠞꠛꠣꠞ ꠎꠤꠘ꠆ꠖꠣ ꠅꠁꠀ ꠃꠑꠝꠥ।”
LUK 18:34 ꠅꠁꠟꠦ ꠔꠣꠘ ꠍꠣꠢꠣꠛꠤ ꠅꠇꠟꠦ ꠅꠃ ꠝꠣꠔꠞ ꠇꠥꠘꠥ ꠜꠦꠖ ꠛꠥꠎꠟꠣ ꠘꠣ। ꠔꠣꠁꠘ ꠇꠤꠔꠣ ꠇꠁꠞꠣ ꠔꠣꠞꠣ ꠡꠝꠎꠤꠔꠣ ꠙꠣꠞꠟꠣ ꠘꠣ, ꠇꠣꠞꠘ ꠔꠣꠞꠣꠞ ꠉꠦꠍꠦ ꠉꠥꠙꠘ ꠞꠣꠈꠣ ꠅꠁꠍꠤꠟ।
LUK 18:35 ꠁꠍꠣ ꠎꠦꠛꠟꠣ ꠎꠤꠞꠤꠢꠅ ꠐꠣꠃꠘꠞ ꠇꠣꠘ꠆ꠖꠣꠔ ꠀꠁꠟꠣ, ꠅꠃ ꠡꠝꠄ ꠄꠇ ꠀꠘ꠆ꠖꠣ ꠛꠦꠐꠣꠄ ꠙꠕꠞ ꠇꠣꠘ꠆ꠖꠣꠔ ꠛꠁꠀ ꠜꠤꠇ ꠇꠞꠣꠔ ꠀꠍꠤꠟ।
LUK 18:36 ꠀꠈꠔꠣꠃ ꠛꠃꠔ ꠝꠣꠘꠡꠞ ꠙꠣꠅꠞ ꠔꠣꠟꠤ ꠢꠥꠘꠤꠀ ꠛꠦꠐꠣꠄ ꠎꠤꠇꠣꠁꠟ, “ꠇꠤꠔꠣ ꠛꠣ, ꠇꠤꠔꠣ ꠅꠞ?”
LUK 18:37 ꠝꠣꠘꠡꠦ ꠇꠁꠟꠣ, “ꠘꠣꠍꠣꠞꠔꠞ ꠁꠍꠣꠄ ꠅꠃ ꠙꠕꠦꠖꠤ ꠔꠡꠞꠤꠚ ꠘꠤꠞꠣ।”
LUK 18:38 ꠅꠃ ꠢꠦ ꠌꠤꠟ꠆ꠟꠣꠁꠀ ꠃꠑꠟ, “ꠅ ꠖꠣꠃꠖꠞ ꠀꠅꠟꠣꠖ ꠁꠍꠣ, ꠀꠝꠣꠞꠦ ꠖꠄꠀ ꠇꠞꠃꠇ꠆ꠇꠣ।”
LUK 18:39 ꠌꠤꠟ꠆ꠟꠣꠘꠤ ꠢꠥꠘꠤꠀ ꠜꠤꠠꠞ ꠍꠣꠝꠘꠞ ꠇꠣꠔꠣꠞꠞ ꠝꠣꠘꠡꠦ ꠔꠣꠞꠦ ꠗꠝꠇ ꠖꠤꠟꠣ, “ꠌꠥꠙ ꠇꠞꠅ, ꠘꠤꠞꠣꠁ ꠞꠅ।” ꠅꠁꠟꠦ ꠢꠦ ꠀꠞꠅ ꠎꠥꠞꠦ ꠌꠤꠟ꠆ꠟꠣꠁꠀ ꠇꠁꠟ, “ꠅ ꠖꠣꠃꠖꠞ ꠀꠅꠟꠣꠖ, ꠀꠝꠣꠞꠦ ꠞꠢꠝ ꠇꠞꠃꠇ꠆ꠇꠣ।”
LUK 18:40 ꠔꠦꠃ ꠁꠍꠣ ꠃꠛꠣꠁ ꠉꠦꠟꠣ। ꠃꠛꠣꠁꠀ ꠀꠘ꠆ꠖꠣ ꠛꠦꠐꠣꠞꠦ ꠔꠣꠘ ꠇꠣꠘ꠆ꠖꠣꠔ ꠀꠘꠣꠁꠟꠣ। ꠛꠦꠐꠣ ꠗꠣꠞꠅ ꠀꠁꠀ ꠢꠣꠞꠟꠦ ꠔꠣꠁꠘ ꠎꠤꠇꠣꠁꠟꠣ,
LUK 18:41 “ꠇꠤꠔꠣ ꠛꠣ, ꠔꠥꠝꠣꠞꠦ ꠇꠤꠔꠣ ꠇꠞꠔꠣꠝ?” ꠛꠦꠐꠣꠄ ꠇꠁꠟ, “ꠢꠥꠎꠥꠞ, ꠀꠝꠤ ꠈꠣꠟꠤ ꠌꠃꠈꠦ ꠖꠦꠈꠔꠣꠝ ꠌꠣꠁ।”
LUK 18:42 ꠁꠍꠣꠄ ꠔꠣꠞꠦ ꠇꠁꠟꠣ, “ꠀꠁꠌ꠆ꠍꠣ ꠔꠦ ꠖꠦꠈꠅ। ꠔꠥꠝꠣꠞ ꠁꠝꠣꠘꠞ ꠛꠟꠦꠃ ꠔꠥꠝꠤ ꠜꠣꠟꠣ ꠅꠁꠟꠣꠄ।”
LUK 18:43 ꠟꠉꠦ ꠟꠉꠦꠃ ꠛꠦꠐꠣꠞ ꠌꠃꠈ ꠈꠥꠟꠤꠉꠦꠟ, ꠖꠦꠈꠣꠞ ꠡꠇ꠆ꠔꠤ ꠙꠣꠁꠟ। ꠛꠦꠐꠣꠄ ꠀꠟ꠆ꠟꠣꠞ ꠡꠥꠇꠞꠤꠀ ꠀꠖꠣꠄ ꠇꠞꠤ ꠇꠞꠤ ꠔꠣꠘ ꠈꠞꠦ ꠅꠁꠀ ꠞꠅꠀꠘꠣ ꠖꠤꠟꠣꠁꠟ। ꠁꠔꠣ ꠖꠦꠈꠤꠀ ꠢꠇꠟ ꠝꠣꠘꠡꠦ ꠀꠟ꠆ꠟꠣꠞ ꠔꠣꠞꠤꠚ ꠇꠞꠟꠣ।
LUK 19:1 ꠢꠎꠞꠔ ꠁꠍꠣ ꠎꠤꠞꠤꠢꠅ ꠐꠣꠃꠘꠞ ꠝꠣꠎꠦꠖꠤ ꠀꠐꠤꠀ ꠎꠣꠁꠞꠣ,
LUK 19:2 ꠢꠘꠅ ꠎꠣꠇꠤꠞ ꠘꠣꠝꠞ ꠛꠠ ꠄꠇ ꠗꠘꠤ ꠝꠣꠘꠥꠡ ꠀꠍꠟꠣ। ꠄꠁꠘ ꠅꠁꠟꠣ ꠈꠣꠎꠘꠣ ꠔꠥꠟꠞꠣ ꠅꠇꠟꠞ ꠙꠞꠗꠣꠘ।
LUK 19:3 ꠁꠍꠣꠞꠦ ꠖꠦꠈꠣꠞ ꠟꠣꠉꠤ ꠔꠣꠘ ꠈꠥꠛ ꠈꠣꠁꠡ ꠀꠍꠤꠟ, ꠅꠁꠟꠦ ꠔꠣꠁꠘ ꠛꠣꠐ꠆ꠐꠤ ꠝꠣꠘꠥꠡ, ꠄꠞꠖꠣꠄ ꠅꠔ ꠜꠤꠠꠞ ꠝꠣꠎꠦ ꠖꠦꠈꠣꠞ ꠃꠙꠣꠄ ꠅꠁꠟ ꠘꠣ।
LUK 19:4 ꠅꠃ ꠖꠃꠠꠤꠀ ꠀꠉꠦꠖꠤ ꠉꠦꠟꠣ, ꠉꠤꠀ ꠁꠍꠣ ꠎꠦ ꠙꠕꠦꠖꠤ ꠀꠁꠞꠣ ꠅꠃ ꠙꠕꠞ ꠇꠣꠘ꠆ꠖꠣꠞ ꠄꠇ ꠒꠥꠝꠥꠞ ꠉꠣꠍꠅ ꠃꠑꠟꠣ।
LUK 19:5 ꠁꠍꠣ ꠎꠦꠛꠟꠣ ꠢꠃ ꠒꠥꠝꠥꠞ ꠉꠣꠍꠞ ꠔꠟꠦ ꠀꠁꠟꠣ, ꠔꠣꠁꠘ ꠃꠙꠞꠦꠖꠤ ꠌꠣꠁꠀ ꠎꠣꠇꠤꠞꠞꠦ ꠒꠣꠇ ꠖꠤꠟꠣ, “ꠎꠣꠇꠤꠞ, ꠎꠟꠖꠤ ꠟꠣꠝꠤꠀ ꠀꠅ। ꠀꠝꠤ ꠀꠁꠎ ꠔꠥꠝꠣꠞ ꠛꠣꠠꠤꠔ ꠞꠁꠔꠦ ꠅꠁꠛ।”
LUK 19:6 ꠎꠣꠇꠤꠞ ꠟꠉꠦ ꠟꠉꠦꠃ ꠟꠣꠝꠤꠀ ꠀꠁꠟꠣ। ꠔꠣꠁꠘ ꠈꠥꠡꠤ ꠅꠁꠀ ꠁꠍꠣꠞꠦ ꠔꠣꠎꠤꠝ ꠇꠞꠤꠀ ꠔꠣꠘ ꠛꠣꠠꠤꠔ ꠘꠤꠟꠣ।
LUK 19:7 ꠁꠔꠣ ꠖꠦꠈꠤꠀ ꠢꠇꠟꠦ ꠇꠣꠘꠣ-ꠇꠣꠘꠤ ꠇꠞꠤ ꠇꠁꠟꠣ, “ꠔꠣꠁꠘ ꠇꠦꠘꠦ ꠄꠇ ꠘꠣꠚꠞꠝꠣꠘ ꠛꠦꠐꠣꠞ ꠛꠣꠠꠤꠔ ꠞꠣꠁꠔ ꠇꠣꠐꠣꠘꠤꠔ ꠉꠦꠟꠣ?”
LUK 19:8 ꠎꠣꠇꠤꠞꠦ ꠢꠇꠟꠞ ꠍꠣꠝꠘꠦ ꠃꠛꠣꠁꠀ ꠇꠁꠟꠣ, “ꠢꠥꠎꠥꠞ ꠖꠦꠈꠃꠇ꠆ꠇꠣ, ꠀꠝꠤ ꠅꠈꠘꠃ ꠀꠝꠣꠞ ꠗꠘ-ꠍꠣꠝꠣꠘꠣꠞ ꠅꠞ꠆ꠗꠦꠇ ꠉꠞꠤꠛꠞꠦ ꠟꠤꠟ꠆ꠟꠣ ꠖꠤꠟꠣꠁꠞꠣꠝ। ꠀꠞ ꠎꠦꠞꠣꠞ ꠢꠇ ꠐꠉꠤꠀ ꠀꠘꠍꠤ, ꠔꠣꠞꠣꠞꠦ ꠌꠣꠁꠞ ꠅꠔꠈꠣꠘ ꠚꠤꠞꠔ ꠖꠤꠟꠣꠁꠝꠥ।”
LUK 19:9 ꠔꠦꠃ ꠁꠍꠣꠄ ꠇꠁꠟꠣ, “ꠀꠁꠎ ꠕꠣꠇꠤ ꠁ ꠛꠣꠠꠤꠔ ꠘꠣꠎꠣꠔ ꠀꠁꠍꠦ। ꠄꠁꠘꠅ ꠔ ꠁꠛ꠆ꠞꠣꠢꠤꠝꠞ ꠈꠣꠘ꠆ꠖꠣꠘꠞ ꠄꠇꠎꠘ।
LUK 19:10 ꠅꠃ ꠟꠣꠈꠣꠘ ꠛꠦ-ꠙꠕꠤ ꠅꠇꠟꠞꠦ ꠔꠥꠇꠣꠁꠀ ꠛꠣꠞ ꠇꠞꠤꠀ, ꠔꠣꠞꠣꠞꠦ ꠛꠣꠌꠣꠘꠤꠞ ꠟꠣꠉꠤꠃ ꠔ ꠀꠝꠤ ꠛꠤꠘ-ꠀꠖꠝ ꠁ ꠖꠥꠘꠤꠀꠔ ꠀꠁꠍꠤ।”
LUK 19:11 ꠢꠎꠞꠔ ꠁꠍꠣꠄ ꠔꠣꠞꠣꠞ ꠟꠉꠦ ꠅꠔꠣ ꠝꠣꠔꠤꠞꠣ, ꠅꠃ ꠡꠝꠄ ꠔꠣꠁꠘ ꠎꠦꠞꠥꠎꠣꠟꠦꠝ ꠕꠣꠇꠤ ꠕꠥꠠꠣ ꠖꠥꠞꠁ ꠞꠁꠍꠂꠘ। ꠔꠣꠞꠣ ꠝꠘꠅ ꠇꠞꠟꠣ, ꠎꠦꠞꠥꠎꠣꠟꠦꠝ ꠙꠃꠍꠤꠀꠃ ꠔꠣꠁꠘ ꠀꠟ꠆ꠟꠣꠞ ꠛꠣꠖꠡꠣꠁ ꠎꠣꠁꠞ ꠇꠞꠤꠟꠤꠛꠣ। ꠄꠞꠟꠣꠉꠤ ꠁꠍꠣꠄ ꠔꠣꠞꠣꠞꠦ ꠅꠃ ꠇꠤꠌ꠆ꠍꠣ ꠢꠥꠘꠣꠁꠟꠣ,
LUK 19:12 “ꠘꠛꠣꠛ ꠙꠞꠤꠛꠣꠞꠞ ꠄꠇꠎꠘ ꠛꠦꠐꠣ ꠝꠣꠘꠥꠡ ꠛꠃꠔ ꠖꠥꠞꠁ ꠄꠇ ꠖꠦꠡꠅ ꠍꠚꠞꠅ ꠉꠦꠟꠣ। ꠔꠣꠘ ꠈꠤꠀꠟ ꠀꠍꠤꠟ ꠢꠘꠅ ꠉꠤꠀ ꠞꠣꠎꠣ ꠅꠁꠀ ꠚꠤꠞꠔ ꠀꠁꠛꠣ।
LUK 19:13 ꠎꠣꠁꠛꠣꠞ ꠀꠉꠦ ꠔꠣꠘ ꠖꠡꠎꠘ ꠉꠥꠟꠣꠝꠞꠦ ꠀꠘꠤꠀ ꠙꠞꠔꠦꠇ ꠎꠘꠞꠦ ꠄꠇꠐꠣ ꠇꠞꠤ ꠡꠥꠘꠣꠞ ꠝꠢꠞ ꠖꠤꠀ ꠇꠁꠟꠣ, ‘ꠀꠝꠤ ꠀꠁꠛꠣꠞ ꠀꠉ ꠙꠞ꠆ꠎꠘ꠆ꠔ ꠅꠉꠥꠁꠘꠖꠤ ꠔꠥꠝꠞꠣ ꠇꠣꠄ-ꠇꠣꠞꠛꠣꠞ ꠇꠞꠅ।’
LUK 19:14 “ꠅꠁꠟꠦ ꠔꠣꠘ ꠙ꠆ꠞꠎꠣ ꠅꠇꠟꠦ ꠔꠣꠘꠞꠦ ꠙꠍꠘ꠆ꠖ ꠇꠞꠔꠣ ꠘꠣ। ꠄꠞꠟꠣꠉꠤ ꠔꠣꠞꠣ ꠔꠣꠘ ꠈꠞꠦ ꠅꠁꠀ ꠉꠥꠁꠀ ꠙꠣꠑꠣꠁꠀ ꠢꠃ ꠛꠣꠖꠡꠣꠞꠦ ꠎꠣꠘꠣꠁꠟꠣ, ‘ꠀꠝꠞꠣ ꠌꠣꠁ ꠘꠣ, ꠄꠁꠘ ꠀꠝꠞꠣꠞ ꠞꠣꠎꠣ ꠅꠃꠇ꠆ꠇꠣ।’
LUK 19:15 ꠅꠁꠟꠦꠅ ꠔꠣꠁꠘ ꠞꠣꠎꠣ ꠛꠘꠤꠀ ꠚꠤꠞꠔ ꠀꠁꠟꠣ। ꠀꠁꠀ ꠢꠃ ꠎꠦ ꠖꠡꠎꠘ ꠉꠥꠟꠣꠝꠞꠦ ꠔꠣꠁꠘ ꠝꠢꠞ ꠖꠤꠍꠟꠣ, ꠔꠣꠞꠣꠞꠦ ꠀꠘꠣꠁꠀ ꠎꠤꠇꠣꠁꠟꠣ, ꠇꠣꠄ-ꠇꠣꠞꠛꠣꠞ ꠇꠞꠤꠀ ꠔꠣꠞꠣ ꠇꠦ ꠇꠔ ꠟꠣꠜ ꠇꠞꠍꠂꠘ।
LUK 19:16 ꠙꠄꠟꠣ ꠎꠘꠦ ꠀꠁꠀ ꠇꠁꠟ, ‘ꠢꠥꠎꠥꠞ, ꠀꠙꠘꠣꠞ ꠄꠇ ꠝꠢꠞꠖꠤ ꠀꠝꠤ ꠖꠡ ꠝꠢꠞ ꠞꠥꠎꠤ ꠇꠞꠍꠤ।’
LUK 19:17 ꠞꠣꠎꠣꠄ ꠔꠣꠞꠦ ꠇꠁꠟꠣ, ‘ꠜꠣꠟꠣ ꠇꠞꠍ! ꠔꠥꠝꠤ ꠔ ꠜꠣꠟꠣ ꠉꠥꠟꠣꠝ, ꠔꠥꠝꠤ ꠈꠥꠛ ꠡꠣꠝꠣꠁꠘ꠆ꠘ ꠛꠦꠙꠣꠞꠦꠅ ꠢꠇ ꠀꠍ। ꠔꠦ ꠔꠥꠝꠤ ꠅꠃ ꠖꠡ ꠙꠞꠉꠘꠣꠞ ꠃꠙꠞꠦ ꠎꠝꠤꠖꠣꠞꠤ ꠇꠞꠅ।’
LUK 19:18 ꠖꠥꠍꠞꠣ ꠎꠘꠦ ꠇꠁꠟ, ‘ꠢꠥꠎꠥꠞ, ꠀꠙꠘꠣꠞ ꠝꠢꠞꠖꠤ ꠀꠝꠤ ꠙꠣꠌ ꠝꠢꠞ ꠞꠥꠎꠤ ꠇꠞꠍꠤ।
LUK 19:19 ꠔꠣꠁꠘ ꠇꠁꠟꠣ, ‘ꠔꠥꠝꠤꠅ ꠙꠣꠌ ꠙꠞꠉꠘꠣꠞ ꠃꠙꠞꠦ ꠎꠝꠤꠖꠣꠞꠤ ꠇꠞꠅ।’
LUK 19:20 ꠛꠣꠖꠦ ꠀꠞꠇ ꠎꠘꠦ ꠇꠁꠟ, ‘ꠢꠥꠎꠥꠞ, ꠅꠃ ꠘꠦꠃꠇ꠆ꠇꠣ, ꠀꠙꠘꠣꠞ ꠢꠤ ꠝꠢꠞ। ꠀꠝꠤ ꠀꠙꠘꠣꠞꠦ ꠒꠞꠣꠁꠀ ꠀꠙꠘꠣꠞ ꠝꠢꠞ ꠞꠥꠝꠣꠟꠅ ꠛꠣꠘ꠆ꠖꠤꠀ ꠕꠁ ꠖꠤꠍꠤ।
LUK 19:21 ꠀꠙꠘꠦ ꠔ ꠇꠠꠣ ꠝꠤꠎꠣꠎꠞ ꠝꠣꠘꠥꠡ। ꠎꠝꠣ ꠘꠣ ꠇꠞꠤꠀꠅ ꠀꠖꠣꠄ ꠇꠞꠂꠘ, ꠈꠦꠔ ꠘꠣ ꠇꠞꠤꠀꠅ ꠚꠡꠟ ꠇꠣꠐꠂꠘ।’
LUK 19:22 “ꠔꠦꠃ ꠞꠣꠎꠣꠄ ꠇꠁꠟꠣ, ‘ꠅ ꠈꠛꠤꠍ ꠉꠥꠟꠣꠝ! ꠔꠞ ꠝꠥꠈꠞ ꠇꠕꠣꠄ ꠀꠝꠤ ꠔꠞ ꠛꠤꠌꠣꠞ ꠇꠞꠝꠥ। ꠔꠥꠁ ꠔ ꠎꠣꠘꠍꠃ ꠀꠝꠤ ꠇꠠꠣ ꠝꠤꠎꠣꠎꠞ ꠝꠣꠘꠥꠡ, ꠎꠝꠣ ꠘꠣ ꠇꠞꠤꠀꠅ ꠀꠖꠣꠄ ꠇꠞꠤ, ꠈꠦꠔ ꠘꠣ ꠇꠞꠤꠀꠅ ꠚꠡꠟ ꠇꠣꠐꠤ!
LUK 19:23 ꠔꠦ ꠀꠝꠣꠞ ꠝꠢꠞ ꠔꠥꠁ ꠛꠦꠙꠣꠞꠤꠞ ꠉꠦꠍꠦ ꠕꠁꠟꠦ ꠘꠣ ꠇꠦꠘꠦ? ꠔꠦ ꠔ ꠀꠝꠤ ꠀꠁꠀ ꠝꠥꠟ ꠝꠢꠞꠞ ꠟꠉꠦ ꠇꠤꠍꠥ ꠟꠣꠜꠅ ꠙꠣꠁꠟꠣꠝ ꠅꠘꠦ।’
LUK 19:24 ꠞꠣꠎꠣꠄ ꠔꠣꠘ ꠃꠎꠤꠞ-ꠘꠣꠎꠤꠞꠞꠦ ꠇꠁꠟꠣ, ‘ꠅꠉꠥꠞ ꠉꠦꠍ ꠕꠣꠇꠤ ꠅꠃ ꠝꠢꠞ ꠚꠤꠞꠔ ꠀꠘꠅ, ꠀꠞ ꠎꠣꠞ ꠖꠡ ꠝꠢꠞ ꠀꠍꠦ ꠔꠣꠞꠦ ꠖꠦꠅ।’
LUK 19:25 ꠔꠦꠃ ꠢꠇꠟꠦ ꠇꠁꠟꠣ, ‘ꠢꠥꠎꠥꠞ, ꠔꠣꠞ ꠔ ꠄꠝꠘꠦꠃ ꠖꠡ ꠝꠢꠞ ꠀꠍꠦ।’
LUK 19:26 ꠞꠣꠎꠣꠄ ꠇꠁꠟꠣ, ‘ꠀꠝꠤ ꠔꠥꠝꠞꠣꠞꠦ ꠇꠁꠞꠣꠝ, ꠎꠣꠞ ꠀꠍꠦ ꠔꠣꠞꠦ ꠀꠞꠅ ꠖꠦꠅꠀ ꠅꠁꠛ। ꠎꠣꠞ ꠘꠣꠁ, ꠔꠣꠞ ꠎꠦꠔꠣ ꠀꠍꠦ ꠅꠔꠣꠅ ꠇꠣꠠꠤꠀ ꠘꠦꠅꠀ ꠅꠁꠛ।
LUK 19:27 ꠀꠞ ꠀꠝꠣꠞ ꠎꠦꠔꠣ ꠖꠥꠡꠝꠘꠦ ꠌꠣꠁꠍꠂꠘ ꠘꠣ ꠀꠝꠤ ꠞꠣꠎꠣ ꠅꠁꠔꠣꠝ, ꠅꠔꠣꠞꠦ ꠅꠘꠅ ꠗꠞꠤꠀ ꠀꠘꠤꠀ ꠀꠝꠣꠞ ꠍꠣꠝꠘꠦ ꠝꠣꠞꠤꠟꠣꠅ।’ ”
LUK 19:28 ꠅꠈꠣꠘ ꠇꠁꠀ ꠢꠣꠞꠤ ꠁꠍꠣꠄ ꠔꠣꠞꠣꠞ ꠀꠉꠦ ꠅꠁꠀ ꠎꠦꠞꠥꠎꠣꠟꠦꠝꠞ ꠛꠣꠄ ꠔꠡꠞꠤꠚ ꠘꠤꠟꠣ।
LUK 19:29 ꠔꠣꠁꠘ ꠎꠄꠔꠥꠘ ꠙꠣꠠꠞ ꠇꠣꠘ꠆ꠖꠣꠔ ꠛꠣꠄꠔ-ꠚꠣꠁꠎ꠆ꠎꠣ ꠀꠞ ꠛꠣꠄꠔ-ꠀꠘꠤꠀ ꠉꠣꠃꠞ ꠉꠣꠟꠣꠔ ꠀꠁꠀ ꠢꠣꠞꠟꠦ, ꠔꠣꠘ ꠖꠥꠁꠎꠘ ꠍꠣꠢꠣꠛꠤꠞꠦ ꠅꠈꠣꠘ ꠇꠁꠀ ꠙꠣꠑꠣꠁꠟꠣ, “ꠔꠥꠝꠞꠣ ꠅꠃ ꠍꠣꠝꠘꠞ ꠉꠣꠃꠔ ꠎꠣꠅ।
LUK 19:30 ꠉꠣꠃꠔ ꠢꠣꠝꠣꠁꠀꠃ ꠖꠦꠈꠛꠣꠄ, ꠄꠉꠥ ꠉꠣꠗꠣꠞ ꠛꠣꠁꠌ꠆ꠌꠣ ꠛꠣꠘ꠆ꠖꠣ ꠀꠍꠦ। ꠅꠉꠥꠞ ꠃꠙꠞꠦ ꠇꠦꠃ ꠇꠥꠘꠥꠖꠤꠘ ꠌꠠꠍꠦ ꠘꠣ। ꠔꠥꠝꠞꠣ ꠅꠉꠥꠞ ꠛꠣꠘ ꠈꠥꠟꠤꠀ ꠅꠘꠅ ꠟꠁꠀ ꠀꠁꠅ।
LUK 19:31 ꠇꠦꠃ ꠎꠥꠖꠤ ꠎꠤꠇꠣꠄ, ‘ꠁꠉꠥꠞ ꠛꠣꠘ ꠈꠥꠟ ꠇꠦꠘꠦ ꠛꠣ? ꠔꠦ ꠇꠁꠅ, ꠢꠥꠎꠥꠞꠞ ꠉꠞꠎ ꠀꠍꠦ।’ ”
LUK 19:32 ꠎꠦ ꠍꠣꠢꠣꠛꠤ ꠅꠇꠟꠞꠦ ꠙꠣꠑꠣꠁꠍꠟꠣ, ꠔꠣꠞꠣ ꠉꠤꠀ ꠔꠣꠘ ꠇꠕꠣꠝꠔ ꠢꠇꠟꠔꠣ ꠙꠣꠁꠟꠣ।
LUK 19:33 ꠔꠣꠞꠣ ꠎꠦꠛꠟꠣ ꠉꠣꠗꠣꠞ ꠛꠣꠁꠌ꠆ꠌꠣꠞ ꠛꠣꠘ ꠈꠥꠟꠞꠣ, ꠅꠃ ꠡꠝꠄ ꠝꠣꠟꠤꠇꠦ ꠎꠤꠇꠣꠁꠟꠣ, “ꠅꠛꠣ, ꠖꠠꠤ ꠈꠥꠟꠞꠣꠄ ꠇꠦꠘꠦ?”
LUK 19:34 ꠔꠣꠞꠣ ꠇꠁꠟꠣ, “ꠢꠥꠎꠥꠞꠞ ꠉꠞꠎ ꠀꠍꠦ ꠇꠞꠤ ꠈꠥꠟꠞꠣꠝ।”
LUK 19:35 ꠛꠣꠖꠦ ꠉꠣꠗꠣꠞ ꠛꠣꠁꠌ꠆ꠌꠣ ꠟꠁꠀ ꠁꠍꠣꠞ ꠇꠣꠘ꠆ꠖꠣꠔ ꠀꠁꠀ, ꠄꠞꠣꠞ ꠉꠔꠞꠞ ꠌꠣꠖ꠆ꠖꠞꠖꠤ ꠉꠣꠗꠣꠞ ꠙꠤꠑꠤꠔ ꠉꠖꠤ ꠛꠣꠘꠣꠁꠀ ꠁꠍꠣꠞꠦ ꠛꠅꠀꠁꠟꠣ।
LUK 19:36 ꠔꠣꠁꠘ ꠎꠦꠛꠟꠣ ꠉꠣꠗꠣ ꠌꠠꠤꠀ ꠙꠕꠦꠖꠤ ꠞꠅꠀꠘꠣ ꠖꠤꠟꠣ, ꠙꠕꠞ ꠝꠣꠎꠦ ꠝꠣꠘꠡꠦ ꠔꠣꠞꠣꠞ ꠎꠣꠞꠎꠤꠞ ꠌꠣꠖ꠆ꠖꠞ ꠛꠤꠍꠣꠁ ꠖꠤꠟꠣ।
LUK 19:37 ꠁꠍꠣ ꠎꠦꠞꠥꠎꠣꠟꠦꠝꠞ ꠇꠣꠘ꠆ꠖꠣꠔ ꠎꠄꠔꠥꠘ ꠙꠣꠠ ꠕꠘꠦ ꠟꠣꠝꠣꠞ ꠙꠕꠅ ꠀꠁꠀ ꠀꠎꠤꠟꠣ, ꠅꠃ ꠡꠝꠄ ꠔꠣꠘ ꠃꠝ꠆ꠝꠔ ꠅꠇꠟꠅ ꠟꠉꠦ ꠀꠍꠟꠣ, ꠄꠞꠣ ꠔꠣꠘ ꠎꠦꠔꠣ ꠇꠦꠞꠣꠝꠔꠤ ꠇꠣꠝ ꠖꠦꠈꠍꠤꠟꠣ, ꠅꠔꠣꠞ ꠟꠣꠉꠤ ꠔꠣꠞꠣ ꠈꠥꠡꠤꠄ ꠎꠥꠞꠦ ꠎꠥꠞꠦ ꠌꠤꠟ꠆ꠟꠣꠁꠀ ꠀꠟ꠆ꠟꠣꠞ ꠔꠣꠞꠤꠚ ꠇꠞꠤꠀ ꠇꠁꠟꠣ,
LUK 19:38 “ꠝꠥꠛꠣꠞꠇ ꠢꠃ ꠛꠣꠖꠡꠣ, ꠎꠦꠁꠘ ꠝꠣꠛꠥꠖꠞ ꠘꠣꠝꠦ ꠔꠡꠞꠤꠚ ꠀꠘꠞꠣ। ꠛꠦꠢꠦꠡ꠆ꠔꠅ ꠡꠣꠘ꠆ꠔꠤ, ꠀꠟ꠆ꠟꠣꠞ ꠀꠞꠡꠅ ꠉꠃꠞꠛ!”
LUK 19:39 ꠜꠤꠠꠞ ꠝꠣꠎꠦ ꠚꠞꠤꠡꠤ ꠖꠟꠞ ꠇꠄꠎꠘꠦ ꠁꠍꠣꠞꠦ ꠇꠁꠟꠣ, “ꠢꠥꠎꠥꠞ, ꠀꠙꠘꠣꠞ ꠃꠝ꠆ꠝꠔ ꠅꠇꠟꠞꠦ ꠗꠝꠇ ꠖꠦꠃꠇ꠆ꠇꠣ।”
LUK 19:40 ꠁꠍꠣꠄ ꠇꠁꠟꠣ, “ꠀꠝꠤ ꠀꠙꠘꠣꠞꠣꠞꠦ ꠇꠁꠞꠣꠝ, ꠄꠞꠣꠞ ꠝꠥꠈ ꠛꠘ꠆ꠖ ꠇꠞꠤꠟ꠆ꠟꠦꠅ, ꠙꠣꠔ꠆ꠔꠞ ꠅꠇꠟꠦ ꠌꠤꠟ꠆ꠟꠣꠁꠀ ꠃꠑꠛ।”
LUK 19:41 ꠔꠣꠁꠘ ꠎꠦꠛꠟꠣ ꠎꠦꠞꠥꠎꠣꠟꠦꠝꠞ ꠇꠣꠘ꠆ꠖꠣꠔ ꠀꠁꠟꠣ, ꠅꠃ ꠡꠝꠄ ꠎꠦꠞꠥꠎꠣꠟꠦꠝ ꠐꠣꠃꠘ ꠖꠦꠈꠤꠀ ꠇꠣꠘ꠆ꠖꠤ ꠖꠤꠟꠣ।
LUK 19:42 ꠔꠣꠁꠘ ꠇꠁꠟꠣ, “ꠢꠣꠄꠞꠦ ꠢꠣꠄ! ꠀꠁꠎ ꠎꠥꠖꠤ ꠔꠥꠝꠤ ꠛꠥꠎꠔꠣꠄ, ꠡꠣꠘ꠆ꠔꠤ ꠇꠤꠟꠣ ꠇꠣꠁꠝ ꠅꠄ! ꠅꠁꠟꠦ ꠅꠈꠘ ꠁꠔꠣ ꠔꠥꠝꠣꠞ ꠌꠈꠥꠞ ꠀꠅꠠꠦ ꠞꠁꠍꠦ।
LUK 19:43 ꠔꠥꠝꠣꠞ ꠃꠙꠞꠦ ꠁꠟꠣ ꠡꠝꠄ ꠀꠎꠤꠞ ꠅꠁꠛ, ꠎꠦꠛꠟꠣ ꠖꠥꠡꠝꠘ ꠅꠇꠟꠦ ꠖꠦꠅꠀꠟꠞ ꠌꠣꠁꠞꠅ ꠉꠣꠟꠣꠛꠣꠄ ꠝꠣꠐꠤꠞ ꠐꠦꠇꠤ ꠛꠣꠘ꠆ꠖꠤꠛ। ꠔꠥꠝꠣꠞꠦ ꠛꠦꠞꠤꠟꠤꠛ, ꠀꠞ ꠢꠇ꠆ꠇꠟꠛꠣꠄ ꠀꠐꠇ ꠇꠞꠛ।
LUK 19:44 ꠔꠣꠞꠣ ꠔꠥꠝꠣꠞꠦ ꠀꠞ ꠔꠥꠝꠣꠞ ꠙꠦꠐꠞ ꠀꠅꠟꠣꠖ ꠅꠇꠟꠞꠦ ꠝꠣꠐꠤꠞ ꠟꠉꠦ ꠝꠤꠡꠣꠁꠛ। ꠔꠥꠝꠣꠞ ꠄꠇ ꠙꠣꠔ꠆ꠔꠞꠞ ꠃꠙꠞꠦ ꠀꠞꠇ ꠙꠣꠔ꠆ꠔꠞ ꠞꠁꠔ ꠘꠣꠄ। ꠇꠣꠞꠘ ꠀꠟ꠆ꠟꠣꠄ ꠔꠥꠝꠣꠞꠦ ꠛꠣꠌꠣꠁꠔꠣ ꠇꠞꠤ ꠎꠦ ꠡꠥꠎꠥꠉ ꠖꠤꠍꠂꠘ, ꠔꠥꠝꠤ ꠁ ꠡꠝꠄ-ꠡꠥꠎꠥꠉꠞꠦ ꠌꠤꠘꠟꠣꠄ ꠘꠣ।”
LUK 19:45 ꠛꠣꠖꠦ ꠔꠣꠁꠘ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠅ ꠢꠣꠝꠣꠁꠟꠣ। ꠢꠣꠝꠣꠁꠀ ꠢꠘꠅ ꠎꠦꠔꠣꠄ ꠛꠦꠛꠡꠣ ꠇꠞꠣꠔ ꠀꠍꠟꠣ, ꠅꠔꠣ ꠢꠇ꠆ꠇꠟꠐꠤꠞꠦ ꠈꠦꠖꠣꠁ ꠖꠤꠟꠣ।
LUK 19:46 ꠔꠣꠁꠘ ꠇꠁꠟꠣ, “ꠙꠣꠇ ꠇꠣꠟꠣꠝꠅ ꠟꠦꠈꠣ ꠀꠍꠦ, ꠀꠝꠣꠞ ꠊꠞ ꠅꠁꠛ ꠝꠥꠘꠣꠎꠣꠔꠞ ꠊꠞ, ꠅꠁꠟꠦ ꠔꠥꠝꠞꠣ ꠁꠈꠣꠘꠞꠦ ꠒꠣꠇꠣꠁꠔꠞ ꠀꠒ꠆ꠒꠣꠈꠣꠘꠣ ꠛꠣꠘꠣꠁꠟꠤꠍ।”
LUK 19:47 ꠢꠎꠞꠔ ꠁꠍꠣ ꠙꠞꠔꠦꠇ ꠖꠤꠘ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠅ ꠉꠤꠀ ꠘꠍꠤꠅꠔ ꠇꠞꠔꠣ। ꠅꠃ ꠡꠝꠄ ꠛꠠ ꠁꠝꠣꠝ, ꠝꠃꠟꠣꠘꠣ ꠀꠞ ꠡꠝꠣꠎꠞ ꠝꠥꠞꠛ꠆ꠛꠤ ꠅꠇꠟꠦ ꠔꠣꠘꠞꠦ ꠝꠣꠞꠤꠟꠤꠔꠣ ꠌꠣꠁꠟꠣ।
LUK 19:48 ꠅꠁꠟꠦ ꠇꠤꠟꠣ ꠔꠣꠘꠞꠦ ꠝꠣꠞꠣ ꠎꠣꠄ, ꠄꠞ ꠇꠥꠘꠥ ꠚꠘ꠆ꠖꠤ ꠔꠣꠞꠣ ꠙꠣꠁꠟ ꠘꠣ। ꠇꠣꠞꠘ ꠢꠇꠟ ꠝꠣꠘꠡꠦ ꠀꠡꠤꠇ ꠅꠁꠀ ꠖꠤꠟꠦ-ꠎꠣꠘꠦ ꠔꠣꠘ ꠛꠄꠀꠘ ꠢꠥꠘꠔꠣ।
LUK 20:1 ꠅꠃ ꠍꠚꠞꠞ ꠇꠣꠟꠅ ꠄꠇꠖꠤꠘ ꠢꠎꠞꠔ ꠁꠍꠣ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠞ ꠝꠣꠎꠦ, ꠝꠣꠘꠡꠞ ꠉꠦꠍꠦ ꠀꠟ꠆ꠟꠣꠁ ꠈꠥꠡ-ꠈꠛꠞꠤ ꠔꠛꠟꠤꠉ ꠇꠞꠣꠔ ꠀꠍꠟꠣ। ꠀꠈꠔꠣꠃ ꠛꠠ ꠁꠝꠣꠝ ꠀꠞ ꠀꠟꠤꠝ ꠅꠇꠟ ꠔꠣꠞꠣꠞ ꠝꠥꠞꠛ꠆ꠛꠤ ꠅꠇꠟꠞꠦ ꠟꠁꠀ ꠀꠁꠀ ꠇꠁꠟꠣ,
LUK 20:2 “ꠀꠁꠌ꠆ꠍꠣ ꠇꠅ ꠌꠣꠁꠘ, ꠔꠥꠝꠤ ꠇꠥꠘ ꠈꠦꠝꠔꠣꠄ ꠁꠔꠣ ꠇꠣꠝ ꠇꠞꠞꠣꠄ, ꠔꠥꠝꠣꠞꠦ ꠁꠔꠣꠞ ꠄꠈꠔꠤꠀꠞ ꠇꠦꠉꠤꠄ ꠖꠤꠍꠦ?”
LUK 20:3 ꠁꠍꠣꠄ ꠎꠥꠀꠙ ꠖꠤꠟꠣ, “ꠔꠦ ꠀꠝꠤꠅ ꠀꠙꠘꠣꠁꠘ꠆ꠔꠞꠦ ꠎꠤꠇꠣꠁꠞꠣꠝ, ꠇꠃꠇ꠆ꠇꠣ ꠌꠣꠁꠘ,
LUK 20:4 ꠄꠢꠤꠀ ꠘꠛꠤꠄ ꠔꠃꠛꠣꠞ ꠉꠥꠍꠟ ꠇꠞꠣꠘꠤꠞ ꠈꠦꠝꠔꠣ ꠙꠣꠁꠍꠟꠣ, ꠝꠣꠘꠡꠞ ꠉꠦꠍ ꠕꠣꠇꠤ ꠘꠣ ꠀꠟ꠆ꠟꠣꠞ ꠉꠦꠍ ꠕꠣꠇꠤ?”
LUK 20:5 ꠅꠃ ꠔꠣꠞꠣ ꠄꠇꠦ-ꠅꠁꠘ꠆ꠘꠦ ꠎꠥꠇ꠆ꠔꠤ-ꠙꠞꠣꠝꠤꠡ ꠇꠞꠟ, “ꠎꠥꠖꠤ ꠇꠁ ꠀꠟ꠆ꠟꠣꠞ ꠉꠦꠍ ꠕꠣꠇꠤ, ꠔꠦ ꠢꠦ ꠇꠁꠛ, ꠔꠣꠁꠟꠦ ꠔꠣꠘ ꠃꠙꠞꠦ ꠁꠝꠣꠘ ꠀꠘꠟꠣꠄ ꠘꠣ ꠇꠦꠘꠦ?
LUK 20:6 ꠀꠞ ꠎꠥꠖꠤ ꠇꠁ ꠝꠣꠘꠡꠞ ꠉꠦꠍ ꠕꠣꠇꠤ, ꠔꠦ ꠝꠣꠘꠡꠦ ꠀꠝꠞꠣꠞꠦ ꠙꠣꠔ꠆ꠔꠞꠖꠤ ꠝꠣꠞꠛꠣ। ꠄꠢꠤꠀꠞꠦ ꠔ ꠔꠣꠞꠣ ꠀꠟ꠆ꠟꠣꠞ ꠘꠛꠤ ꠇꠁꠀ ꠝꠣꠘꠂꠘ।”
LUK 20:7 ꠅꠃ ꠔꠣꠞꠣ ꠇꠁꠟ, “ꠁ ꠈꠦꠝꠔꠣ ꠇꠥꠀꠁ ꠕꠣꠇꠤ ꠙꠣꠁꠍꠟꠣ, ꠀꠝꠞꠣ ꠎꠣꠘꠤ ꠘꠣ।”
LUK 20:8 ꠁꠍꠣꠄ ꠔꠣꠞꠣꠞꠦ ꠇꠁꠟꠣ, “ꠔꠦ ꠀꠝꠤꠅ ꠇꠁꠔꠣꠝ ꠘꠣꠄ, ꠇꠥꠘ ꠈꠦꠝꠔꠣꠄ ꠁꠔꠣ ꠇꠞꠞꠣꠝ।”
LUK 20:9 ꠛꠣꠖꠦ ꠁꠍꠣꠄ ꠝꠣꠘꠡꠞꠦ ꠅꠃ ꠇꠤꠌ꠆ꠍꠣ ꠢꠥꠘꠣꠁꠟꠣ, “ꠄꠇ ꠉꠤꠞꠡ꠆ꠔꠦ ꠀꠋꠉꠥꠞꠞ ꠛꠣꠉꠣꠘ ꠇꠞꠟꠣ, ꠛꠣꠖꠦ ꠔꠣꠘ ꠛꠣꠉꠣꠘꠞꠦ ꠈꠦꠔꠣꠟ ꠅꠇꠟꠞ ꠉꠦꠍꠦ ꠛꠣꠉꠤ ꠖꠤꠀ ꠛꠃꠔ ꠖꠤꠘꠞ ꠟꠣꠉꠤ ꠛꠤꠖꠦꠡ ꠉꠦꠟꠣꠉꠤ।
LUK 20:10 ꠀꠋꠉꠥꠞ ꠙꠣꠇꠣꠞ ꠡꠝꠄ ꠅꠁꠟꠦ ꠝꠣꠟꠤꠇꠦ ꠔꠣꠘ ꠛꠣꠐ ꠘꠤꠛꠣꠞ ꠟꠣꠉꠤ ꠄꠇ ꠉꠥꠟꠣꠝꠞꠦ ꠙꠣꠑꠣꠁꠟꠣ। ꠅꠁꠟꠦ ꠈꠦꠔꠣꠟ ꠅꠇꠟꠦ ꠔꠣꠞꠦ ꠝꠣꠁꠞ-ꠗꠁꠞ ꠇꠞꠤꠀ ꠈꠣꠟꠤ ꠀꠔꠦ ꠚꠤꠞꠣꠁ ꠖꠤꠟ।
LUK 20:11 ꠛꠣꠖꠦ ꠔꠣꠁꠘ ꠀꠞꠇ ꠉꠥꠟꠣꠝꠞꠦ ꠙꠣꠑꠣꠁꠟꠣ। ꠔꠣꠞꠣ ꠁ ꠉꠥꠟꠣꠝꠞꠦꠅ ꠝꠣꠁꠞ-ꠗꠁꠞ ꠇꠞꠤ ꠛꠦꠁꠎ꠆ꠎꠔ ꠇꠞꠤꠀ ꠈꠣꠟꠤ ꠀꠔꠦ ꠚꠤꠞꠣꠁ ꠖꠤꠟ।
LUK 20:12 ꠛꠣꠖꠦ ꠔꠤꠘ ꠘꠝ꠆ꠛꠞ ꠉꠥꠟꠣꠝꠞꠦ ꠙꠣꠑꠣꠁꠟꠦ, ꠔꠣꠞꠣ ꠄꠅ ꠉꠥꠟꠣꠝꠞꠦ ꠝꠣꠞꠤꠀ ꠎꠈꠝ ꠇꠞꠤꠀ ꠛꠣꠞꠦ ꠚꠣꠟꠣꠁ ꠖꠤꠟ।
LUK 20:13 ꠔꠦꠃ ꠛꠣꠉꠣꠘꠞ ꠝꠣꠟꠤꠇꠦ ꠇꠁꠟꠣ, ‘ꠀꠝꠤ ꠇꠤꠔꠣ ꠇꠞꠔꠣꠝ? ꠅꠈꠘ ꠀꠝꠤ ꠀꠝꠣꠞ ꠝꠣꠄꠀꠞ ꠙꠥꠔꠞꠦ ꠙꠣꠑꠣꠁꠝꠥ, ꠔꠦꠃ ꠔꠣꠞꠣ ꠝꠣꠘꠔ ꠙꠣꠞꠦ।’
LUK 20:14 ꠅꠁꠟꠦ ꠝꠣꠟꠤꠇꠞ ꠙꠥꠀꠞꠦ ꠖꠦꠈꠤꠀ ꠈꠦꠔꠣꠟ ꠅꠇꠟꠦ ꠇꠁꠟ, ꠅꠃ ꠙꠥꠀꠃ ꠔ ꠔꠣꠞ ꠛꠣꠚꠞ ꠢꠇꠟꠔꠣꠞ ꠝꠣꠟꠤꠇ ꠅꠁꠛ। ꠀꠅ, ꠄꠞꠦ ꠝꠣꠞꠤꠀ ꠚꠣꠟꠣꠁ ꠖꠦꠁ। ꠔꠦꠃ ꠝꠣꠟꠤꠇꠞ ꠢꠇꠟꠔꠣ ꠀꠝꠞꠣ ꠙꠣꠁꠟꠤꠝꠥ।
LUK 20:15 ꠅꠈꠣꠘ ꠇꠁꠀ ꠢꠣꠞꠤ ꠔꠣꠞꠦ ꠛꠣꠉꠣꠘꠞ ꠛꠣꠞꠦ ꠘꠤꠀ ꠈꠥꠘ ꠇꠞꠤꠟꠣꠁꠟ। “ꠅꠈꠘ ꠇꠃꠇ꠆ꠇꠣ ꠌꠣꠁꠘ, ꠛꠣꠉꠣꠘꠞ ꠝꠣꠟꠤꠇꠦ ꠁ ꠛꠣꠉꠤꠖꠣꠞ ꠅꠇꠟꠞꠦ ꠇꠤꠔꠣ ꠇꠞꠛꠣ?
LUK 20:16 ꠔꠣꠁꠘ ꠀꠁꠀ ꠔꠣꠞꠣꠞꠦ ꠘꠤꠙꠣꠔ ꠇꠞꠤꠟꠤꠛꠣ ꠘꠣ ꠘꠤ? ꠀꠞ ꠔꠣꠘ ꠛꠣꠉꠣꠘ ꠖꠥꠍꠞꠣ ꠝꠣꠘꠡꠞ ꠉꠦꠍꠦ ꠖꠤꠛꠣ ꠘꠣ ꠘꠤ?” ꠁꠔꠣ ꠢꠥꠘꠤꠀ ꠔꠣꠞꠣ ꠇꠁꠟꠣ, “ꠘꠣꠃꠎꠥꠛꠤꠟ꠆ꠟꠣ! ꠀꠟ꠆ꠟꠣꠄ ꠚꠣꠘꠣ ꠖꠦꠃꠇ!”
LUK 20:17 ꠔꠦꠃ ꠁꠍꠣꠄ ꠔꠣꠞꠣꠞ ꠛꠣꠄ ꠌꠣꠁꠀ ꠇꠁꠟꠣ, “ꠔꠦ ꠀꠟ꠆ꠟꠣꠞ ꠇꠣꠟꠣꠝꠅ ꠇꠦꠘꠦ ꠁꠟꠣ ꠟꠦꠈꠣ ꠀꠍꠦ, ꠞꠣꠎ ꠝꠦꠡ꠆ꠔꠁꠞ ꠅꠇꠟꠦ ꠎꠦ ꠙꠣꠔ꠆ꠔꠞꠞꠦ ꠛꠦꠇꠣꠝꠣ ꠇꠁꠀ ꠚꠣꠟꠣꠁ ꠖꠤꠍꠤꠟ, ꠅꠇꠐꠣ ꠖꠤꠀꠃ ꠊꠞꠞ ꠁꠀꠘ ꠈꠥꠐꠤ ꠅꠁꠟ।
LUK 20:18 ꠁ ꠙꠣꠔ꠆ꠔꠞꠞ ꠃꠙꠞꠦ ꠇꠦꠃ ꠙꠠꠟꠦ, ꠁ ꠎꠘ ꠜꠣꠋꠉꠤꠀ ꠐꠥꠇꠞꠣ ꠐꠥꠇꠞꠣ ꠅꠁꠎꠤꠛ, ꠀꠞ ꠁ ꠙꠣꠔ꠆ꠔꠞꠅ ꠇꠦꠃꠞꠞ ꠃꠙꠞꠦ ꠙꠠꠟꠦ, ꠢꠦ-ꠅ ꠎꠘ ꠌꠥꠞꠝꠣꠞ ꠅꠁꠎꠤꠛ।”
LUK 20:19 ꠅꠈꠣꠘ ꠢꠥꠘꠤꠀꠃ ꠝꠃꠟꠣꠘꠣ ꠀꠞ ꠛꠠ ꠁꠝꠣꠝ ꠅꠇꠟꠦ ꠁꠍꠣꠞꠦ ꠗꠞꠤꠟꠔꠣ ꠌꠣꠁꠟꠣ। ꠔꠣꠞꠣ ꠛꠥꠎꠤꠟꠤꠟꠣ, ꠁꠍꠣꠄ ꠁ ꠇꠤꠌ꠆ꠍꠣ ꠔꠣꠞꠣꠞ ꠘꠤꠅꠔꠦꠃ ꠇꠁꠞꠣ। ꠅꠁꠟꠦ ꠝꠣꠘꠡꠞꠦ ꠒꠞꠣꠁꠀ ꠔꠣꠞꠣ ꠇꠥꠘ꠆ꠔꠣ ꠇꠞꠟꠣ ꠘꠣ।
LUK 20:20 ꠄꠞꠟꠣꠉꠤ ꠔꠣꠞꠣ ꠁꠍꠣꠞꠦ ꠌꠃꠈꠦ ꠌꠃꠈꠦ ꠞꠣꠈꠟꠣ, ꠔꠣꠘ ꠈꠞꠦ ꠇꠄꠎꠘ ꠉꠥꠁꠀ ꠟꠣꠉꠣꠁꠟꠣ। ꠉꠥꠁꠀ ꠅꠇꠟꠦ ꠝꠥꠝꠤꠘꠤ ꠛꠦꠡ ꠗꠞꠤꠀ ꠌꠟꠟꠦꠅ, ꠔꠣꠞꠣꠞ ꠘꠤꠅꠔ ꠅꠁꠟ ꠁꠍꠣꠞꠦ ꠇꠕꠣꠞ ꠚꠣꠘ꠆ꠖꠅ ꠚꠣꠟꠣꠁꠔꠣ, ꠎꠣꠔꠦ ꠔꠣꠘꠦ ꠖꠦꠡꠞ ꠙꠞꠗꠣꠘ ꠢꠣꠇꠤꠝꠞ ꠀꠖꠣꠟꠔꠅ ꠌꠣꠟꠣꠘ ꠇꠞꠣꠁꠟ ꠎꠣꠄ।
LUK 20:21 ꠅꠃ ꠉꠥꠁꠀ ꠅꠇꠟꠦ ꠁꠍꠣꠞꠦ ꠇꠁꠟꠣ, “ꠢꠥꠎꠥꠞ, ꠀꠙꠘꠦ ꠔ ꠢꠇꠟꠞꠦ ꠢꠝꠣꠘ ꠌꠃꠈꠦ ꠖꠦꠈꠂꠘ। ꠀꠙꠘꠦ ꠢꠇ ꠝꠣꠔ ꠝꠣꠔꠂꠘ, ꠢꠇ ꠔꠣꠟꠤꠝ ꠖꠦꠁꠘ। ꠇꠦꠃꠞꠞꠦ ꠔꠅꠀꠇ꠆ꠇꠣ ꠘꠣ ꠇꠞꠤꠀ, ꠝꠣꠘꠡꠞꠦ ꠀꠟ꠆ꠟꠣꠞ ꠢꠇ ꠙꠕ ꠖꠦꠈꠣꠁꠘ।
LUK 20:22 ꠔꠦ ꠇꠃꠇ꠆ꠇꠣ ꠌꠣꠁꠘ, ꠞꠥꠝꠣꠘ ꠛꠣꠖꠡꠣ ꠇꠂꠍꠞꠞꠦ ꠈꠣꠎꠘꠣ ꠖꠦꠅꠀ ꠎꠣꠁꠎ ꠘꠤ, ꠘꠣ ꠘꠣꠎꠣꠁꠎ?”
LUK 20:23 ꠁꠍꠣꠄ ꠔꠣꠞꠣꠞ ꠇꠥ-ꠝꠔꠟꠛ ꠛꠥꠎꠤꠟꠤꠟꠣ। ꠛꠥꠎꠤꠀ ꠇꠁꠟꠣ,
LUK 20:24 “ꠖꠦꠈꠤ, ꠀꠝꠣꠞꠦ ꠄꠇꠐꠣ ꠖꠤꠘꠣꠞ ꠖꠦꠈꠣꠅ।” ꠖꠤꠘꠣꠞ ꠖꠦꠈꠤꠀ ꠇꠁꠟꠣ, “ꠁꠉꠥꠞ ꠃꠙꠞꠦ ꠇꠣꠞ ꠍꠛꠤ ꠀꠞ ꠘꠣꠝ ꠀꠍꠦ?” ꠔꠣꠞꠣ ꠇꠁꠟꠣ, “ꠛꠣꠖꠡꠣ ꠇꠂꠍꠞꠞ।”
LUK 20:25 ꠁꠍꠣꠄ ꠇꠁꠟꠣ, “ꠔꠦ ꠇꠂꠍꠞꠞꠔꠣ ꠇꠂꠍꠞꠞꠦ ꠖꠦꠅ, ꠀꠞ ꠀꠟ꠆ꠟꠣꠞꠔꠣ ꠀꠟ꠆ꠟꠣꠞꠦ ꠖꠦꠅ।”
LUK 20:26 ꠔꠣꠘ ꠎꠥꠀꠙ ꠢꠥꠘꠤꠀ ꠔꠣꠞꠣ ꠔꠣꠁꠎ꠆ꠎꠥꠛ ꠛꠘꠤꠀ ꠘꠤꠞꠣꠁ ꠅꠁꠉꠦꠟꠣ। ꠉꠥꠁꠀ ꠅꠇꠟꠦ ꠝꠣꠘꠡꠞ ꠍꠣꠝꠘꠦ ꠔꠣꠘꠞꠦ ꠇꠕꠣꠞ ꠚꠣꠘ꠆ꠖꠅ ꠚꠣꠟꠣꠁꠔ ꠙꠣꠞꠟ ꠘꠣ।
LUK 20:27 ꠛꠣꠖꠦ ꠍꠤꠖ꠆ꠖꠦꠇꠤꠀ ꠝꠎꠛꠞ ꠇꠤꠍꠥ ꠝꠣꠘꠥꠡ ꠁꠍꠣꠞ ꠉꠦꠍꠦ ꠀꠁꠟꠣ। ꠅꠃ ꠝꠎꠛꠞ ꠝꠣꠘꠡꠦ ꠝꠘꠅ ꠇꠞꠂꠘ, ꠝꠞꠣꠞ ꠛꠣꠖꠦ ꠇꠥꠘꠥ ꠎꠣꠘꠖꠣꠞꠃ ꠀꠞ ꠎꠤꠘ꠆ꠖꠣ ꠅꠁꠔꠣ ꠘꠣꠄ।
LUK 20:28 ꠔꠣꠞꠣ ꠁꠍꠣꠞꠦ ꠎꠤꠇꠣꠁꠟꠣ, “ꠢꠥꠎꠥꠞ, ꠝꠥꠍꠣ ꠘꠛꠤꠄ ꠀꠝꠞꠣꠞ ꠟꠣꠉꠤ ꠅꠃ ꠘꠤꠅꠝ ꠟꠦꠈꠤꠀ ꠉꠦꠍꠂꠘ, ꠇꠥꠘꠥ ꠝꠣꠘꠡꠦ ꠔꠣꠞ ꠛꠃ ꠕꠁꠀ ꠘꠤꠀꠅꠟꠣꠖꠤ ꠢꠣꠟꠔꠦ ꠝꠞꠤꠉꠦꠟꠦ, ꠔꠣꠞ ꠜꠣꠁꠄ ꠅꠃ ꠛꠃꠞꠦ ꠛꠤꠀ ꠇꠞꠤꠀ ꠝꠞꠣ ꠜꠣꠁꠞ ꠅꠀꠞꠤꠡ ꠙꠄꠖꠣ ꠇꠞꠛ।
LUK 20:29 ꠅꠈꠘ ꠝꠘꠅ ꠇꠞꠃꠇ꠆ꠇꠣ, ꠄꠇ ꠊꠞꠅ ꠡꠣꠔ ꠜꠣꠁ ꠀꠍꠤꠟ। ꠙꠄꠟꠣ ꠎꠘꠦ ꠛꠤꠀ ꠇꠞꠤꠀ ꠘꠤꠀꠅꠟꠣꠖꠤ ꠢꠣꠟꠔꠦ ꠝꠞꠤꠉꠦꠟ।
LUK 20:30 ꠛꠣꠖꠦ ꠖꠥꠁ ꠘꠝ꠆ꠛꠞ ꠀꠞ ꠔꠤꠘ ꠘꠝ꠆ꠛꠞ ꠜꠣꠁꠄ ꠅꠃ ꠛꠦꠐꠤꠞꠦ ꠛꠤꠀ ꠇꠞꠟ। ꠅꠃ ꠟꠣꠈꠣꠘ ꠔꠣꠞꠣ ꠡꠣꠔꠅ ꠜꠣꠁꠄꠃ ꠅꠃ ꠛꠦꠐꠤꠞꠦ ꠛꠤꠀ ꠇꠞꠤꠀ ꠘꠤꠀꠅꠟꠣꠖꠤ ꠢꠣꠟꠔꠦ ꠝꠞꠤꠉꠦꠟ।
LUK 20:32 ꠢꠦꠡꠦ ꠅꠃ ꠛꠦꠐꠤꠅ ꠝꠞꠤꠉꠦꠟ।
LUK 20:33 ꠔꠦ ꠇꠤꠀꠝꠔꠞ ꠖꠤꠘ ꠁ ꠛꠦꠐꠤ ꠇꠣꠞ ꠛꠃ ꠅꠁꠛ? ꠡꠣꠔꠅ ꠎꠘꠦꠃ ꠔ ꠁ ꠛꠦꠐꠤꠞꠦ ꠛꠤꠀ ꠇꠞꠍꠤꠟ।”
LUK 20:34 ꠁꠍꠣꠄ ꠇꠁꠟꠣ, “ꠁ ꠖꠥꠘꠤꠀꠞ ꠝꠣꠘꠡꠦ ꠛꠤꠀ-ꠡꠣꠖꠤ ꠇꠞꠂꠘ, ꠀꠞ ꠛꠤꠀ-ꠡꠣꠖꠤ ꠖꠦꠁꠘ।
LUK 20:35 ꠅꠁꠟꠦ ꠝꠃꠔꠞ ꠛꠣꠖꠦ ꠎꠤꠘ꠆ꠖꠣ ꠅꠁꠀ ꠎꠦꠞꠣ ꠀꠈꠦꠞꠣꠔꠅ ꠇꠣꠝꠤꠀꠛꠤꠞ ꠟꠣꠈ ꠅꠁꠎꠣꠄ, ꠔꠣꠞꠣ ꠀꠞ ꠛꠤꠀ-ꠡꠣꠖꠤ ꠇꠞꠔꠣ ꠘꠣꠄ, ꠛꠣ ꠛꠤꠀ-ꠡꠣꠖꠤ ꠛꠁꠔꠣꠅ ꠘꠣꠄ।
LUK 20:36 ꠔꠣꠞꠣꠞ ꠇꠥꠘꠥ ꠝꠃꠔꠅ ꠅꠁꠔ ꠘꠣꠄ, ꠔꠣꠞꠣ ꠚꠤꠞꠤꠡ꠆ꠔꠣꠞ ꠟꠣꠈꠣꠘ ꠅꠁꠎꠤꠛꠣ। ꠝꠃꠔꠞ ꠛꠣꠖꠦ ꠀꠈꠦꠞ ꠙꠣꠅꠀꠄ ꠔꠣꠞꠣ ꠀꠟ꠆ꠟꠣ ꠙꠣꠇꠞ ꠀꠅꠟꠣꠖ ꠛꠘꠤꠎꠤꠛꠣ।
LUK 20:37 ꠔꠥꠞ ꠙꠣꠠꠞ ꠎꠣꠟꠣꠁꠟ ꠎꠋꠟꠣꠞ ꠛꠄꠀꠘꠤꠞ ꠝꠣꠎꠦ ꠝꠥꠍꠣ ꠘꠛꠤꠄ ꠛꠥꠎꠣꠁꠍꠂꠘ, ꠝꠥꠞ꠆ꠖꠣ ꠅꠇꠟ ꠔ ꠎꠤꠘ꠆ꠖꠣ ꠅꠁꠀ ꠃꠑꠂꠘ, ꠄꠞꠟꠣꠉꠤꠃ ꠛꠃꠔ ꠀꠉꠦ ꠎꠦ ꠘꠛꠤ ꠅꠇꠟ ꠝꠣꠞꠣ ꠉꠦꠍꠂꠘ ꠝꠥꠍꠣꠄ ꠝꠣꠛꠥꠖꠞꠦ ꠢꠃ ꠘꠛꠤ ꠅꠇꠟꠞ ꠀꠟ꠆ꠟꠣ ꠇꠁꠀ ꠒꠣꠇꠤꠟꠣ। ꠔꠣꠁꠘ ꠝꠣꠛꠥꠖꠞꠦ ꠇꠁꠟꠣ, ꠁꠛ꠆ꠞꠣꠢꠤꠝꠞ ꠀꠟ꠆ꠟꠣ, ꠁꠍꠢꠣꠇꠞ ꠀꠟ꠆ꠟꠣ ꠀꠞ ꠁꠀꠇꠥꠛꠞ ꠀꠟ꠆ꠟꠣ।
LUK 20:38 ꠔꠦ ꠀꠟ꠆ꠟꠣ ꠔ ꠝꠥꠞ꠆ꠖꠣ ꠅꠇꠟꠞ ꠀꠟ꠆ꠟꠣ ꠘꠣꠄ, ꠔꠣꠁꠘ ꠎꠤꠘ꠆ꠖꠣ ꠅꠇꠟꠞ ꠀꠟ꠆ꠟꠣ। ꠔꠣꠘ ꠘꠎꠞꠅ ꠢꠇ꠆ꠇꠟ ꠝꠣꠘꠥꠡꠃ ꠎꠤꠘ꠆ꠖꠣ ꠀꠍꠂꠘ।”
LUK 20:39 ꠔꠦꠃ ꠇꠄꠎꠘ ꠀꠟꠤꠝꠦ ꠇꠁꠟꠣ, “ꠢꠥꠎꠥꠞ, ꠀꠙꠘꠦ ꠔ ꠈꠣꠐꠤ ꠝꠣꠔ ꠝꠣꠔꠍꠂꠘ।”
LUK 20:40 ꠢꠦꠡꠦ ꠔꠣꠞꠣ ꠁꠍꠣꠞꠦ ꠀꠞ ꠇꠥꠘꠥ ꠍꠅꠀꠟ ꠇꠞꠣꠞ ꠡꠣꠅꠡ ꠙꠣꠁꠟ ꠘꠣ।
LUK 20:41 ꠄꠞꠝꠣꠎꠦ ꠁꠍꠣꠄ ꠅꠃ ꠀꠟꠤꠝ ꠅꠇꠟꠞꠦ ꠎꠤꠇꠣꠁꠟꠣ, “ꠝꠣꠘꠡꠦ ꠇꠦꠘꠦ ꠀꠟ-ꠝꠍꠤꠞꠦ ꠖꠣꠃꠖ ꠘꠛꠤꠞ ꠀꠅꠟꠣꠖ ꠇꠂꠘ?
LUK 20:42 ꠎꠛꠥꠞ ꠡꠞꠤꠚꠞ ꠝꠣꠎꠦ ꠖꠣꠃꠖꠦ ꠘꠤꠎꠦꠃ ꠔ ꠅꠈꠣꠘ ꠇꠁꠞꠣ, ꠝꠣꠛꠥꠖꠦ ꠀꠝꠣꠞ ꠝꠥꠘꠤꠛꠞꠦ ꠇꠁꠟꠣ, ꠎꠔꠖꠤꠘ ꠔꠥꠝꠣꠞ ꠖꠥꠡꠝꠘ ꠅꠇꠟꠞꠦ ꠔꠥꠝꠣꠞ ꠙꠣꠅꠞ ꠔꠟꠦ ꠘꠣ ꠚꠣꠟꠣꠁ, ꠅꠔ ꠖꠤꠘ ꠔꠥꠝꠤ ꠀꠝꠣꠞ ꠒꠣꠁꠘ ꠉꠣꠟꠣꠔ ꠛꠁꠞꠅ।
LUK 20:44 ꠖꠣꠃꠖꠦ ꠔ ꠀꠟ-ꠝꠍꠤꠞꠦ ꠔꠣꠘ ꠝꠥꠘꠤꠛ ꠇꠁꠀ ꠒꠣꠇꠤꠟꠣ, ꠔꠦ ꠀꠟ-ꠝꠍꠤ ꠇꠦꠝꠘꠦ ꠖꠣꠃꠖꠞ ꠀꠅꠟꠣꠖ ꠅꠁꠛꠣ?”
LUK 20:45 ꠝꠣꠘꠡꠦ ꠁꠍꠣꠞ ꠛꠄꠀꠘ ꠢꠥꠘꠞꠣ, ꠅꠃ ꠡꠝꠄ ꠔꠣꠁꠘ ꠡꠣꠉꠞꠤꠖ ꠅꠇꠟꠞꠦ ꠇꠁꠟꠣ,
LUK 20:46 “ꠀꠟꠤꠝ ꠅꠇꠟꠞ ꠛꠦꠙꠣꠞꠦ ꠢꠥꠡꠤꠀꠞ ꠅꠅ। ꠔꠣꠞꠣ ꠟꠣꠝ꠆ꠛꠣ ꠟꠣꠝ꠆ꠛꠣ ꠎꠥꠛ꠆ꠛꠣ ꠚꠤꠘ꠆ꠖꠤꠀ ꠊꠥꠞꠤꠔꠦ ꠈꠥꠛ ꠜꠣꠟꠣ ꠙꠣꠁꠘ। ꠛꠣꠎꠣꠞ-ꠀꠐꠅ ꠉꠤꠀ ꠍꠣꠟꠣꠝ ꠙꠣꠁꠔꠦ ꠙꠍꠘ꠆ꠖ ꠇꠞꠂꠘ। ꠝꠍꠤꠖꠅ ꠉꠤꠀ ꠍꠣꠝꠘꠞ ꠇꠣꠔꠣꠞꠅ ꠛꠁꠔꠦ ꠀꠞ ꠝꠎꠟꠤꠍꠅ ꠉꠤꠀ ꠖꠣꠝꠤ ꠎꠣꠉꠣꠔ ꠛꠁꠔꠦ ꠙꠍꠘ꠆ꠖ ꠇꠞꠂꠘ।
LUK 20:47 ꠔꠣꠞꠣ ꠝꠣꠘꠡꠞꠦ ꠖꠦꠈꠣꠘꠤꠞ ꠟꠣꠉꠤ ꠟꠣꠝ꠆ꠛꠣ ꠟꠣꠝ꠆ꠛꠣ ꠖꠥꠀ ꠇꠞꠂꠘ। ꠢꠤꠞꠛꠣꠞ ꠠꠣꠠꠤ ꠛꠦꠐꠤꠘ꠆ꠔꠞ ꠊꠞ-ꠛꠣꠠꠤ ꠖꠈꠟ ꠇꠞꠂꠘ। ꠇꠤꠀꠝꠔꠞ ꠖꠤꠘ ꠄꠞꠣꠞ ꠛꠠ ꠇꠑꠤꠘ ꠡꠣꠎꠣ ꠅꠁꠛ।”
LUK 21:1 ꠢꠎꠞꠔ ꠁꠍꠣꠄ ꠌꠣꠁꠀ ꠖꠦꠈꠟꠣ, ꠗꠘꠤ ꠅꠇꠟꠦ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠞ ꠟꠤꠟ꠆ꠟꠣꠞ ꠒꠦꠉꠞ ꠝꠣꠎꠦ ꠖꠣꠘ-ꠈꠄꠞꠣꠔ ꠖꠤꠞꠣ।
LUK 21:2 ꠄꠞꠝꠣꠎꠦ ꠖꠦꠈꠟꠣ, ꠈꠥꠛ ꠉꠞꠤꠛ ꠄꠇ ꠠꠣꠠꠤ ꠛꠦꠐꠤꠄꠅ ꠀꠁꠀ ꠒꠦꠉꠞ ꠝꠣꠎꠦ ꠖꠥꠁꠐꠣ ꠙꠄꠡꠣ ꠖꠣꠘ ꠇꠞꠟ।
LUK 21:3 ꠖꠦꠈꠤꠀ ꠔꠣꠘ ꠍꠣꠢꠣꠛꠤ ꠅꠇꠟꠞꠦ ꠇꠁꠟꠣ, “ꠀꠝꠤ ꠔꠥꠝꠞꠣꠞꠦ ꠢꠣꠍꠣ ꠇꠕꠣ ꠇꠁꠞꠣꠝ, ꠅꠃ ꠉꠞꠤꠛ ꠠꠣꠠꠤ ꠛꠦꠐꠤꠄ ꠢꠇꠟ ꠕꠣꠇꠤ ꠛꠦꠡꠤ ꠖꠣꠘ ꠇꠞꠍꠦ।
LUK 21:4 ꠇꠣꠞꠘ ꠛꠣꠇꠤ ꠢꠇꠟꠦ ꠈꠞꠌ ꠇꠞꠣꠞ ꠛꠣꠖꠦ ꠎꠦꠔꠣ ꠖꠦꠠꠤꠀ ꠞꠁꠍꠦ, ꠅꠘ ꠕꠣꠇꠤ ꠕꠥꠠꠣ ꠅꠋꠡ ꠒꠦꠉꠞ ꠝꠣꠎꠦ ꠖꠣꠘ ꠇꠞꠍꠦ। ꠅꠁꠟꠦ ꠁ ꠛꠦꠐꠤꠄ ꠘꠤꠎꠞ ꠅꠜꠣꠛ-ꠅꠘꠐꠘ ꠕꠣꠇꠟꠦꠅ, ꠔꠣꠁꠞ ꠇꠣꠝꠣꠁꠟ ꠢꠇ꠆ꠇꠟꠔꠣꠃ ꠖꠣꠘ ꠇꠞꠤꠟꠤꠍꠦ।”
LUK 21:5 ꠇꠄꠎꠘ ꠍꠣꠢꠣꠛꠤꠄ ꠛꠣꠄꠔꠥꠟ-ꠝꠥꠇꠣꠖ꠆ꠖꠍ ꠇꠣꠛꠣ ꠡꠞꠤꠚꠞ ꠛꠦꠙꠣꠞꠦ ꠝꠣꠔꠤꠟꠣ, ꠇꠁꠟꠣ, “ꠖꠦꠈꠞꠣ ꠘꠤ, ꠅꠔ ꠡꠥꠘ꠆ꠖꠞ ꠡꠥꠘ꠆ꠖꠞ ꠙꠣꠔ꠆ꠔꠞꠖꠤ ꠀꠞ ꠖꠣꠘ-ꠈꠄꠞꠣꠔꠖꠤ ꠊꠞꠈꠣꠘꠞꠦ ꠢꠣꠎꠣꠁꠟ ꠅꠁꠍꠦ।”
LUK 21:6 ꠁꠍꠣꠄ ꠔꠣꠞꠣꠞꠦ ꠇꠁꠟꠣ, “ꠔꠥꠝꠞꠣ ꠅꠃ ꠎꠔꠔꠣ ꠖꠦꠈꠞꠣꠄ, ꠅꠟꠣ ꠄꠇ ꠖꠤꠘ ꠀꠁꠛ, ꠎꠦꠛꠟꠣ ꠁꠔꠣ ꠄꠇ ꠙꠣꠔ꠆ꠔꠞꠞ ꠃꠙꠞꠦ ꠀꠞꠇ ꠙꠣꠔ꠆ꠔꠞ ꠞꠁꠔ ꠘꠣꠄ। ꠢꠇꠟꠔꠣ ꠝꠣꠐꠤꠞ ꠟꠉꠦ ꠝꠤꠡꠤꠎꠤꠛ।”
LUK 21:7 ꠍꠣꠢꠣꠛꠤ ꠅꠇꠟꠦ ꠔꠣꠘꠞꠦ ꠎꠤꠇꠣꠁꠟꠣ, “ꠢꠥꠎꠥꠞ, ꠁꠔꠣ ꠇꠥꠘ ꠎꠝꠣꠘꠣꠔ ꠅꠁꠛ? ꠇꠥꠘ ꠀꠟꠣꠝꠔ ꠖꠦꠈꠟꠦ ꠛꠥꠎꠣ ꠎꠣꠁꠛ, ꠢꠤ ꠡꠝꠄ ꠅꠁꠉꠦꠍꠦ?”
LUK 21:8 ꠔꠣꠁꠘ ꠇꠁꠟꠣ, “ꠢꠥꠡꠤꠀꠞ ꠞꠁꠅ, ꠇꠦꠃ ꠎꠣꠘꠥ ꠔꠥꠝꠞꠣꠞꠦ ꠛꠦ-ꠙꠕꠦ ꠘꠣ ꠘꠦꠄ। ꠛꠃꠔ ꠎꠘꠦ ꠀꠝꠣꠞ ꠘꠣꠝ ꠗꠞꠤ ꠀꠁꠀ ꠇꠁꠛ, ꠡꠝꠄ ꠅꠁꠉꠦꠍꠦ, ꠀꠝꠤꠃ ꠀꠟ-ꠝꠍꠤ। ꠅꠁꠟꠦ ꠔꠥꠝꠞꠣ ꠁꠔꠣꠞ ꠈꠞꠦ ꠎꠣꠁꠅ ꠘꠣ।
LUK 21:9 ꠔꠥꠝꠞꠣ ꠎꠦꠛꠟꠣ ꠎꠥꠖ꠆ꠖ ꠀꠞ ꠉꠘ꠆ꠒꠉꠥꠟꠞ ꠈꠛꠞ ꠢꠥꠘꠛꠣꠄ, ꠒꠞꠣꠁꠅ ꠘꠣ। ꠇꠣꠞꠘ ꠙꠄꠟꠣ ꠁꠔꠣ ꠅꠁꠛꠃ ꠅꠁꠛ, ꠅꠁꠟꠦ ꠁꠔꠣ ꠔ ꠡꠦꠡ ꠘꠣꠄ।”
LUK 21:10 ꠛꠣꠖꠦ ꠔꠣꠁꠘ ꠇꠁꠟꠣ, “ꠎꠣꠔꠤꠄ ꠎꠣꠔꠤꠞ ꠛꠤꠙꠇ꠆ꠇꠦ, ꠞꠣꠎꠣꠄ ꠞꠣꠎꠣꠞ ꠛꠤꠙꠇ꠆ꠇꠦ ꠎꠥꠖ꠆ꠖ ꠇꠞꠛ।
LUK 21:11 ꠛꠠ ꠛꠠ ꠜꠂꠍꠣꠟ ꠅꠁꠛ, ꠎꠣꠉꠣꠄ ꠎꠣꠉꠣꠄ ꠘꠤꠖꠣꠘ ꠀꠞ ꠛꠦꠎꠥꠁꠔꠣ ꠛꠦꠝꠣꠞ-ꠀꠎꠣꠞꠦ ꠝꠣꠘꠥꠡ ꠝꠞꠛꠣ। ꠀꠍꠝꠣꠘꠅ-ꠅ ꠈꠥꠛ ꠒꠞ-ꠈꠚꠞ ꠘꠤꠡꠣꠘꠣ ꠀꠞ ꠀꠎꠛ ꠀꠎꠛ ꠇꠥꠖꠞꠔꠤ ꠟꠤꠟꠣ ꠎꠣꠁꠞ ꠅꠁꠛ।
LUK 21:12 “ꠅꠁꠟꠦ ꠁꠔꠣ ꠊꠐꠣꠞ ꠀꠉꠦ ꠝꠣꠘꠡꠦ ꠔꠥꠝꠞꠣꠞꠦ ꠈꠦꠖꠣꠁꠛ, ꠗꠞꠛ। ꠛꠤꠌꠣꠞꠞ ꠟꠣꠉꠤ ꠝꠎꠟꠤꠍꠞ ꠍꠣꠝꠘꠦ ꠀꠎꠤꠞ ꠇꠞꠛ, ꠎꠦꠟꠅ ꠢꠣꠞꠣꠁꠛ। ꠀꠝꠣꠞ ꠘꠣꠝꠞ ꠟꠣꠉꠤ ꠔꠥꠝꠞꠣꠞꠦ ꠞꠣꠎꠣ-ꠛꠣꠖꠡꠣ ꠀꠞ ꠢꠣꠇꠤꠝ ꠅꠇꠟꠞ ꠍꠣꠝꠘꠦ ꠘꠦꠅꠀ ꠅꠁꠛ।
LUK 21:13 ꠔꠦꠃ ꠀꠝꠣꠞ ꠘꠣꠝꠦ ꠔꠛꠟꠤꠉ ꠇꠞꠣꠞ ꠟꠣꠉꠤ ꠔꠥꠝꠞꠣ ꠡꠥꠎꠥꠉ ꠙꠣꠁꠛꠣꠄ।
LUK 21:14 ꠅꠁꠟꠦ ꠔꠥꠝꠞꠣ ꠝꠘꠅ ꠞꠣꠈꠤꠅ, ꠇꠤꠔꠣ ꠎꠥꠀꠙ ꠖꠤꠔꠣꠄ, ꠁꠔꠣ ꠀꠉꠦ ꠌꠤꠘ꠆ꠔꠣ ꠇꠞꠣꠞ ꠇꠥꠘꠥ ꠎꠞꠥꠞ ꠘꠣꠄ।
LUK 21:15 ꠇꠣꠞꠘ ꠀꠝꠤ ꠔꠥꠝꠞꠣꠞꠦ ꠅꠃꠟꠣ ꠎꠛꠣꠘ ꠀꠞ ꠢꠦꠇꠝꠔ ꠎꠥꠉꠣꠁꠀ ꠖꠤꠝꠥ, ꠔꠥꠝꠞꠣꠞ ꠛꠤꠙꠇ꠆ꠇ ꠅꠇꠟꠦ ꠁꠔꠣ ꠚꠤꠞꠣꠁꠔ ꠙꠣꠞꠔ ꠘꠣꠄ, ꠄꠞ ꠎꠥꠀꠙ ꠖꠤꠛꠣꠞꠅ ꠔꠣꠇ꠆ꠇꠔ ꠅꠁꠔ ꠘꠣꠄ।
LUK 21:16 ꠔꠥꠝꠞꠣꠞ ꠝꠣ-ꠛꠣꠚ, ꠜꠣꠁ-ꠛꠤꠞꠣꠖꠞ, ꠈꠦꠡ-ꠇꠥꠐꠥꠝ ꠀꠞ ꠖꠥꠡ꠆ꠔ ꠅꠇꠟꠦꠅ ꠔꠥꠝꠞꠣꠞꠦ ꠗꠞꠣꠁꠀ ꠖꠤꠛꠣ। ꠔꠣꠞꠣ ꠔꠥꠝꠞꠣꠞ ꠇꠥꠘꠥ ꠇꠥꠘꠥ ꠎꠘꠞꠦ ꠎꠣꠘꠦ ꠝꠣꠞꠣꠁꠟꠤꠛꠣ।
LUK 21:17 ꠀꠞ ꠀꠝꠣꠞ ꠘꠣꠝꠞ ꠟꠣꠉꠤ ꠔꠥꠝꠞꠣꠞꠦ ꠢꠇ꠆ꠇꠟꠦ ꠊꠤꠘ꠆ꠘꠣꠁꠛ।
LUK 21:18 ꠅꠁꠟꠦꠅ ꠇꠥꠘꠥꠝꠘ꠆ꠔꠦꠃ ꠔꠥꠝꠞꠣꠞ ꠝꠣꠕꠣꠞ ꠄꠇꠍꠣ ꠌꠥꠟꠞꠅ ꠈꠦꠔꠤ ꠅꠁꠔ ꠘꠣꠄ।
LUK 21:19 ꠔꠥꠝꠞꠣ ꠁꠝꠣꠘꠦ ꠝꠎꠛꠥꠔ ꠞꠁꠟꠦ, ꠘꠤꠎꠞ ꠢꠣꠍꠣꠞꠞ ꠎꠤꠘ꠆ꠖꠦꠉꠤ ꠢꠣꠍꠤꠟ ꠇꠞꠛꠣꠄ।
LUK 21:20 “ꠔꠥꠝꠞꠣ ꠖꠦꠈꠛꠣꠄ, ꠍꠤꠙꠣꠁ ꠅꠇꠟꠦ ꠀꠁꠀ ꠌꠣꠁꠞꠅꠛꠣꠄ ꠕꠘꠦ ꠎꠦꠞꠥꠎꠣꠟꠦꠝꠞꠦ ꠊꠦꠞꠣꠅ ꠇꠞꠤꠟꠤꠞꠣ, ꠔꠦꠃ ꠛꠥꠎꠤꠟꠤꠅ, ꠎꠦꠞꠥꠎꠣꠟꠦꠝꠞ ꠛꠤꠘꠣꠡ ꠀꠁꠌ꠆ꠍꠦ।
LUK 21:21 ꠢꠤ ꠡꠝꠄ ꠎꠣꠞꠣ ꠄꠢꠥꠖꠤꠀ ꠎꠤꠟꠣꠔ ꠕꠣꠇꠛꠣ, ꠔꠣꠞꠣ ꠙꠣꠠꠦꠖꠤ ꠉꠤꠀ ꠜꠣꠉꠃꠇ। ꠎꠣꠞꠣ ꠅꠃ ꠎꠦꠞꠥꠎꠣꠟꠦꠝꠅ ꠕꠣꠇꠛꠣ, ꠔꠣꠞꠣ ꠐꠣꠃꠘꠞ ꠛꠣꠞꠦ ꠎꠣꠃꠇ। ꠎꠣꠞꠣ ꠉꠣꠃ-ꠉꠦꠞꠣꠝꠅ ꠕꠣꠇꠛꠣ, ꠔꠣꠞꠣ ꠎꠣꠘꠥ ꠇꠥꠘꠥꠝꠘ꠆ꠔꠦꠃ ꠐꠣꠃꠘꠅ ꠘꠣ ꠀꠁꠘ।
LUK 21:22 ꠇꠣꠞꠘ ꠁ ꠅꠇ꠆ꠔ ꠅꠁꠟ ꠀꠟ꠆ꠟꠣꠁ ꠉꠎꠛꠞ ꠅꠇ꠆ꠔ, ꠀꠟ꠆ꠟꠣꠞ ꠇꠣꠟꠣꠝꠞ ꠀꠄꠀꠔ ꠅꠇꠟ ꠙꠥꠞꠣ ꠅꠁꠛꠣꠞ ꠅꠇ꠆ꠔ।
LUK 21:23 ꠁꠡ! ꠁ ꠡꠝꠄ ꠎꠦꠔꠣ ꠛꠦꠐꠤꠘ꠆ꠔꠞ ꠙꠦꠐꠅ ꠢꠥꠞꠥꠔ꠆ꠔꠣ ꠕꠣꠇꠛꠣ, ꠎꠦꠞꠣ ꠢꠥꠞꠥꠔ꠆ꠔꠣꠞꠦ ꠛꠥꠇꠥꠞ ꠖꠥꠗ ꠈꠣꠅꠀꠁꠛꠣ, ꠄꠞꠣꠞ ꠛꠃꠔ ꠇꠡ꠆ꠐ ꠅꠁꠛ! ꠖꠦꠡꠞ ꠃꠙꠞꠦ ꠛꠦꠎꠥꠁꠔꠣ ꠖꠥꠞ꠆ꠉꠔꠤ, ꠀꠞ ꠁꠢꠥꠖꠤ ꠅꠇꠟꠞ ꠃꠙꠞꠦ ꠉꠎꠛ ꠘꠣꠎꠤꠟ ꠅꠁꠛ।
LUK 21:24 ꠔꠟꠥꠀꠞꠞ ꠔꠟꠦ ꠔꠣꠞꠣ ꠎꠣꠘ ꠈꠥꠀꠁꠛꠣ, ꠛꠘ꠆ꠖꠤ ꠅꠁꠀ ꠢꠇ꠆ꠇꠟ ꠎꠣꠔꠤꠞ ꠝꠣꠎꠦ ꠎꠣꠁꠛꠣ। ꠅꠃ ꠛꠤꠗꠞ꠆ꠝꠤ ꠎꠣꠔꠤꠞ ꠈꠦꠝꠔꠣꠞ ꠡꠝꠄ ꠙꠥꠞꠣ ꠅꠀꠞ ꠀꠉ ꠙꠞ꠆ꠎꠘ꠆ꠔ, ꠁ ꠎꠦꠞꠥꠎꠣꠟꠦꠝ ꠔꠣꠞꠣꠞ ꠙꠣꠅꠞ ꠔꠟꠦ ꠞꠁꠛ।
LUK 21:25 “ꠌꠣꠘ-ꠡꠥꠞꠥꠎ ꠀꠞ ꠀꠍꠝꠣꠘꠞ ꠔꠦꠞꠣꠞ ꠝꠣꠎꠦ ꠘꠣꠘꠣꠘ ꠀꠟꠣꠝꠔ ꠖꠦꠈꠣ ꠎꠣꠁꠛ। ꠖꠥꠘꠤꠀꠞ ꠢꠇꠟ ꠖꠦꠡꠞ ꠝꠣꠘꠡꠞ ꠇꠡ꠆ꠐ ꠅꠁꠛ। ꠖꠞꠤꠀꠄ ꠃꠔꠣꠟ-ꠙꠣꠔꠣꠟ ꠇꠞꠛ। ꠓꠦꠃꠞ ꠀꠅꠀꠎꠦ ꠝꠣꠘꠥꠡ ꠛꠦꠖꠤꠡꠣ ꠟꠣꠉꠛꠣ।
LUK 21:26 ꠖꠥꠘꠤꠀꠔ ꠇꠥꠘ ꠖꠡꠣ ꠊꠐꠤꠛ ꠅꠔꠣ ꠌꠤꠘ꠆ꠔꠣ ꠇꠞꠤꠀ ꠒꠞꠞ ꠌꠥꠐꠦ ꠝꠣꠘꠥꠡ ꠛꠦꠃꠡ ꠅꠁꠎꠤꠛ, ꠀꠍꠝꠣꠘꠤ ꠌꠣꠘ-ꠡꠥꠞꠥꠎ, ꠔꠦꠞꠣ ꠢꠇ꠆ꠇꠟꠔꠣ ꠀꠃꠟꠣ-ꠎꠣꠃꠟꠣ ꠅꠁꠎꠤꠛ।
LUK 21:27 ꠅꠃ ꠡꠝꠄ ꠖꠦꠈꠛꠣꠄ, ꠀꠝꠤ ꠛꠤꠘ-ꠀꠖꠝꠦ ꠀꠟ꠆ꠟꠣꠞ ꠇꠥꠖꠞꠔꠤ ꠡꠇ꠆ꠔꠤ ꠀꠞ ꠘꠥꠞꠞ ꠝꠢꠤꠝꠣꠄ ꠝꠦꠊꠞ ꠈꠥꠐꠤꠔ ꠅꠁꠀ ꠖꠥꠘꠤꠀꠔ ꠔꠡꠞꠤꠚ ꠀꠘꠤꠀꠞ।
LUK 21:28 ꠁꠔꠣ ꠢꠣꠟ-ꠢꠇꠤꠇꠔ ꠖꠦꠈꠟꠦ ꠔꠥꠝꠞꠣ ꠝꠎꠛꠥꠔ ꠅꠁꠅ, ꠝꠣꠕꠣ ꠃꠌꠣ ꠇꠞꠤꠅ, ꠛꠥꠎꠤꠟꠤꠅ ꠔꠥꠝꠞꠣꠞ ꠘꠣꠎꠣꠔ ꠗꠣꠞꠅ ꠀꠁꠌ꠆ꠍꠦ।”
LUK 21:29 ꠁꠍꠣꠄ ꠔꠣꠞꠣꠞꠦ ꠅꠃ ꠝꠤꠍꠣꠟ ꠢꠥꠘꠣꠁꠟꠣ, ꠇꠁꠟꠣ, “ꠔꠥꠝꠞꠣ ꠒꠥꠝꠥꠞ ꠉꠣꠍ ꠀꠞ ꠅꠁꠘ꠆ꠘ ꠉꠣꠍꠣꠁꠘ꠆ꠔꠞ ꠛꠣꠄ ꠖꠦꠈꠅ,
LUK 21:30 ꠁꠔꠣꠞ ꠘꠄꠀ ꠇꠥꠠꠤ-ꠙꠣꠔꠣ ꠛꠣꠞꠘꠤ ꠖꠦꠈꠟꠦꠃ ꠔꠥꠝꠞꠣ ꠛꠥꠎꠤꠟꠣꠅ, ꠉꠞꠝꠞ ꠖꠤꠘ ꠀꠁꠌ꠆ꠍꠦ।
LUK 21:31 ꠅꠃꠟꠣ ꠔꠥꠝꠞꠣ ꠎꠦꠛꠟꠣ ꠖꠦꠈꠛꠣꠄ, ꠁꠔꠣ ꠢꠣꠟ-ꠢꠇꠤꠇꠔ ꠊꠐꠦꠞ, ꠔꠦ ꠛꠥꠎꠤꠟꠤꠅ ꠀꠟ꠆ꠟꠣꠞ ꠛꠣꠖꠡꠣꠁ ꠘꠎꠖꠤꠇ ꠀꠁꠌ꠆ꠍꠦ।
LUK 21:32 ꠀꠝꠤ ꠔꠥꠝꠞꠣꠞꠦ ꠢꠣꠍꠣꠃ ꠇꠁꠞꠣꠝ, ꠁꠔꠣ ꠢꠇ꠆ꠇꠟꠔꠣ ꠘꠣ ꠊꠐꠣꠞ ꠀꠉꠦ, ꠁ ꠎꠝꠣꠘꠣꠞ ꠝꠣꠘꠥꠡ ꠇ꠆ꠇꠄ ꠅꠁꠔꠣ ꠘꠣꠄ।
LUK 21:33 ꠀꠍꠝꠣꠘ-ꠎꠝꠤꠘ ꠇ꠆ꠇꠄ ꠅꠁꠎꠤꠛ, ꠅꠁꠟꠦ ꠀꠝꠣꠞ ꠇꠣꠟꠣꠝ ꠇꠥꠘꠥꠖꠤꠘꠅ ꠇ꠆ꠇꠄ ꠅꠁꠔ ꠘꠣꠄ।
LUK 21:34 “ꠔꠥꠝꠞꠣ ꠘꠤꠎꠦ ꠢꠥꠡꠤꠀꠞ ꠞꠁꠅ, ꠎꠣꠔꠦ ꠝꠎꠣꠞ ꠝꠎꠣꠞ ꠈꠣꠘꠤ, ꠝꠖ ꠈꠣꠁꠀ ꠐꠣꠟ ꠅꠀ ꠀꠞ ꠞꠥꠎꠤ-ꠞꠥꠎꠉꠣꠞꠞ ꠘꠦꠡꠣꠄ ꠀꠃꠟꠣ-ꠎꠣꠃꠟꠣ ꠘꠣ ꠅꠅ, ꠀꠞꠘꠣꠄ ꠢꠃ ꠖꠤꠘ ꠀꠁꠀ ꠀꠈꠔꠣꠃ ꠔꠥꠝꠞꠣꠞꠦ ꠚꠣꠘ꠆ꠖꠅ ꠢꠣꠞꠣꠁꠔ ꠙꠣꠞꠦ।
LUK 21:35 ꠖꠥꠘꠤꠀꠞ ꠔꠣꠝꠣꠝ ꠝꠣꠘꠡꠞ ꠃꠙꠞꠦꠃ ꠢꠤ ꠖꠤꠘ ꠀꠎꠤꠞ ꠅꠁꠛ।
LUK 21:36 ꠅꠁꠟꠦ ꠔꠥꠝꠞꠣ ꠢꠣꠝꠦꠡꠣ ꠢꠎꠣꠉ ꠞꠁꠅ, ꠀꠞ ꠖꠥꠀ ꠇꠞꠤꠅ, ꠎꠣꠔꠦ ꠅꠃ ꠎꠦꠔꠣ ꠎꠣꠁꠞ ꠅꠁꠛ ꠅꠔꠣ ꠙꠣꠞ ꠅꠁꠀ ꠢꠣꠞꠤ ꠀꠝꠣꠞ ꠍꠣꠝꠘꠦ ꠃꠛꠣꠘꠤꠞ ꠛꠟ ꠙꠣꠅ।”
LUK 21:37 ꠁꠍꠣꠄ ꠙꠞꠔꠦꠇ ꠖꠤꠘ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠅ ꠀꠁꠀ ꠘꠍꠤꠅꠔ ꠇꠞꠔꠣ। ꠛꠣꠖꠦ ꠞꠣꠁꠔ ꠅꠁꠟꠦ ꠔꠣꠁꠘ ꠛꠣꠞ ꠅꠁꠀ ꠎꠄꠔꠥꠘ ꠙꠣꠠꠅ ꠎꠣꠁꠔꠣꠉꠤ।
LUK 21:38 ꠢꠇꠟ ꠝꠣꠘꠡꠦ ꠔꠣꠘ ꠛꠄꠀꠘ ꠢꠥꠘꠣꠞ ꠘꠤꠅꠔꠦ ꠛꠤꠀꠘ-ꠍꠛꠞꠦ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠅ ꠀꠁꠔꠣ।
LUK 22:1 ꠁꠢꠥꠖꠤ ꠅꠇꠟꠞ ꠈꠣꠝꠤꠞ ꠍꠣꠠꠣ ꠞꠥꠐꠤꠞ ꠁꠖ ꠇꠣꠍꠣꠔ ꠀꠁꠟ, ꠅꠃ ꠁꠖꠞ ꠘꠣꠝ ꠀꠎꠣꠖꠤ ꠁꠖ।
LUK 22:2 ꠁꠛꠣꠄ ꠝꠃꠟꠣꠘꠣ ꠀꠞ ꠛꠠ ꠁꠝꠣꠝ ꠅꠇꠟꠦ ꠙꠞꠣꠝꠤꠡ ꠇꠞꠟꠣ, ꠢꠎꠞꠔ ꠁꠍꠣꠞꠦ ꠀꠝ ꠝꠣꠘꠡꠞ ꠉꠦꠍ ꠕꠣꠇꠤ ꠟꠥꠇꠣꠁꠀ ꠇꠤꠟꠣ ꠎꠣꠘꠦ ꠝꠣꠞꠔꠣ। ꠔꠣꠞꠣ ꠀꠝ ꠝꠣꠘꠡꠞꠦ ꠈꠥꠛ ꠒꠞꠣꠁꠔꠣ।
LUK 22:3 ꠅꠃ ꠡꠝꠄ ꠔꠣꠘ ꠛꠣꠞꠅꠎꠘ ꠍꠣꠢꠣꠛꠤꠞ ꠝꠣꠎꠞ ꠄꠇꠎꠘ, ꠄꠘ ꠘꠣꠝ ꠁꠢꠥꠖꠣ ꠁꠡ꠆ꠇꠣꠞꠤꠀꠔ, ꠄꠘ ꠜꠤꠔꠞꠦ ꠡꠄꠔꠣꠘ ꠢꠣꠝꠣꠁꠟ।
LUK 22:4 ꠄꠁꠘ ꠁꠍꠣꠞꠦ ꠗꠞꠣꠁꠀ ꠖꠦꠅꠀꠞ ꠟꠣꠉꠤ ꠟꠥꠇꠣꠁꠀ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠅ ꠉꠦꠟꠣ। ꠉꠤꠀ ꠢꠘꠞ ꠖꠣꠞꠉꠣ ꠀꠞ ꠛꠠ ꠁꠝꠣꠝ ꠅꠇꠟꠞ ꠟꠉꠦ ꠙꠞꠣꠝꠤꠡ ꠇꠞꠟꠣ, ꠇꠥꠘ ꠘꠝꠥꠘꠣꠄ ꠁꠍꠣꠞꠦ ꠔꠣꠞꠣꠞ ꠀꠔꠅ ꠗꠞꠣꠁ ꠖꠦꠅꠀ ꠎꠣꠄ।
LUK 22:5 ꠔꠦꠃ ꠁꠝꠣꠝ ꠅꠇꠟ ꠈꠥꠛ ꠈꠥꠡꠤ ꠅꠁꠀ ꠅꠀꠖꠣ ꠇꠞꠟꠣ, ꠔꠣꠘꠞꠦ ꠗꠞꠣꠁꠀ ꠖꠤꠟꠦ ꠔꠣꠞꠦ ꠛꠈꠡꠤꠡ ꠖꠤꠛꠣ।
LUK 22:6 ꠄꠔꠦ ꠁꠢꠥꠖꠣꠅ ꠞꠣꠎꠤ ꠅꠁꠀ ꠝꠣꠘꠡꠞ ꠀꠚꠞꠈꠦ, ꠔꠣꠘꠞꠦ ꠗꠞꠣꠁ ꠖꠦꠅꠀꠞ ꠡꠥꠎꠥꠉ ꠔꠥꠇꠣꠘꠤꠔ ꠞꠁꠟ।
LUK 22:7 ꠛꠣꠖꠦ ꠀꠎꠣꠖꠤ ꠁꠖ ꠀꠁꠟ, ꠅꠃ ꠁꠖꠞ ꠖꠤꠘ ꠝꠦꠠꠣ-ꠛꠣꠁꠌ꠆ꠌꠣ ꠇꠥꠞꠛꠣꠘꠤ ꠖꠦꠅꠀ ꠅꠄ।
LUK 22:8 ꠔꠦꠃ ꠁꠍꠣꠄ ꠍꠣꠢꠣꠛꠤ ꠙꠤꠔꠞ ꠀꠞ ꠢꠣꠘ꠆ꠘꠣꠘꠞꠦ ꠢꠥꠇꠥꠝ ꠖꠤꠟꠣ, “ꠔꠥꠝꠞꠣ ꠉꠤꠀ ꠀꠝꠞꠣꠞ ꠟꠣꠉꠤ ꠁꠖꠞ ꠈꠣꠘꠤ ꠔꠤꠀꠞ ꠇꠞꠅ, ꠀꠝꠞꠣ ꠢꠇꠟ ꠀꠁꠀ ꠄꠇꠟꠉꠦ ꠈꠣꠁꠝꠥ।”
LUK 22:9 ꠄꠞꠣ ꠎꠤꠇꠣꠁꠟꠣ, “ꠢꠥꠎꠥꠞ, ꠀꠙꠘꠣꠞ ꠈꠤꠀꠟ ꠇꠤꠔꠣ, ꠀꠝꠞꠣ ꠇꠥꠘꠣꠘꠅ ꠉꠤꠀ ꠈꠣꠘꠣ ꠔꠤꠀꠞ ꠇꠞꠔꠣꠝ?”
LUK 22:10 ꠔꠣꠁꠘ ꠇꠁꠟꠣ, “ꠢꠥꠘꠅ, ꠐꠣꠃꠘꠅ ꠢꠣꠝꠣꠁꠀ ꠢꠣꠞꠟꠦ ꠔꠥꠝꠞꠣ ꠖꠦꠈꠛꠣꠄ, ꠄꠇ ꠛꠦꠐꠣꠄ ꠙꠣꠘꠤꠞ ꠈꠂꠟꠣ ꠜꠞꠤꠀ ꠟꠁꠀ ꠎꠣꠁꠞꠣ। ꠔꠥꠝꠞꠣ ꠄꠘ ꠈꠞꠦ ꠈꠞꠦ ꠎꠣꠁꠅ, ꠉꠤꠀ ꠄꠁꠘ ꠎꠦ ꠊꠞꠅ ꠢꠣꠝꠣꠁꠛꠣ,
LUK 22:11 ꠢꠃ ꠊꠞꠞ ꠝꠣꠟꠤꠇꠞꠦ ꠇꠁꠅ, ‘ꠢꠥꠎꠥꠞꠦ ꠎꠤꠇꠣꠁꠍꠂꠘ, ꠔꠣꠘ ꠍꠣꠢꠣꠛꠤ ꠅꠇꠟꠞꠦ ꠟꠁꠀ ꠀꠎꠣꠖꠤ ꠁꠖꠞ ꠈꠣꠘꠤ ꠎꠦ ꠊꠞꠅ ꠈꠣꠁꠔꠣ, ꠁ ꠝꠥꠍꠣꠚꠤꠞ ꠈꠣꠘꠣ ꠇꠥꠀꠁ?’
LUK 22:12 ꠢꠦ ꠔꠥꠝꠞꠣꠞꠦ ꠃꠙꠞꠞ ꠔꠣꠟꠣꠔ ꠢꠣꠎꠣꠁꠟ-ꠙꠣꠠꠣꠁꠟ ꠛꠠ ꠄꠇ ꠇꠥꠑꠣ ꠖꠦꠈꠣꠁꠀ ꠖꠤꠛ। ꠢꠘꠅ ꠉꠤꠀ ꠔꠥꠝꠞꠣ ꠞꠣꠘ꠆ꠖꠣ-ꠛꠣꠠꠣ ꠇꠞꠤꠅ।”
LUK 22:13 ꠢꠣꠍꠣꠃ ꠔꠣꠞꠣ ꠉꠤꠀ ꠔꠣꠘ ꠇꠕꠣ ꠝꠣꠚꠤꠇ ꠢꠇꠟꠔꠣ ꠙꠣꠁꠟꠣ, ꠙꠣꠁꠀ ꠀꠎꠣꠖꠤ ꠁꠖꠞ ꠈꠣꠘꠤꠅ ꠔꠤꠀꠞ ꠇꠞꠟꠣ।
LUK 22:14 ꠛꠣꠖꠦ ꠡꠝꠄ ꠀꠁꠟꠦ ꠁꠍꠣꠄ ꠔꠣꠘ ꠛꠣꠞꠅꠎꠘ ꠍꠣꠢꠣꠛꠤ ꠟꠁꠀ ꠈꠣꠘꠤꠔ ꠛꠁꠟꠣ।
LUK 22:15 ꠛꠁꠀ ꠇꠁꠟꠣ, “ꠀꠝꠣꠞ ꠛꠠ ꠈꠤꠀꠟ ꠀꠍꠤꠟ ꠝꠍꠤꠛꠔꠞ ꠝꠥꠈꠣꠝꠥꠈꠤ ꠅꠁꠛꠣꠞ ꠀꠉꠦ, ꠀꠈꠦꠞꠤ ꠁꠖꠞ ꠈꠣꠘꠤ ꠈꠣꠘ ꠔꠥꠝꠞꠣꠞꠦ ꠟꠁꠀ ꠈꠣꠁꠔꠣꠝ।
LUK 22:16 ꠀꠝꠤ ꠔꠥꠝꠞꠣꠞꠦ ꠇꠁꠞꠣꠝ, ꠀꠟ꠆ꠟꠣꠞ ꠛꠣꠖꠡꠣꠁꠞ ꠀꠍꠟ ꠝꠞ꠆ꠎꠤ-ꠝꠥꠘꠡꠣ ꠙꠥꠞꠣꠙꠥꠞ ꠢꠣꠍꠤꠟ ꠘꠣ ꠅꠀ ꠙꠞ꠆ꠎꠘ꠆ꠔ, ꠀꠝꠤ ꠀꠞ ꠇꠥꠘꠥ ꠁꠖꠞ ꠈꠣꠘꠤ ꠈꠣꠁꠔꠣꠝ ꠘꠣꠄ।”
LUK 22:17 ꠛꠣꠖꠦ ꠔꠣꠁꠘ ꠡꠞꠛꠔꠞ ꠙꠤꠀꠟꠣ ꠟꠁꠀ ꠀꠟ꠆ꠟꠣꠞ ꠡꠥꠇꠞꠤꠀ ꠎꠣꠘꠣꠁꠀ ꠇꠁꠟꠣ, “ꠅꠃ ꠚꠥꠐꠣꠁꠘ ꠔꠥꠝꠞꠣ ꠛꠣꠐꠤꠀ ꠈꠣꠁꠟꠣꠅ।
LUK 22:18 ꠀꠞ ꠢꠥꠘꠅ, ꠀꠝꠤ ꠔꠥꠝꠞꠣꠞꠦ ꠇꠁꠞꠣꠝ, ꠀꠟ꠆ꠟꠣꠞ ꠛꠣꠖꠡꠣꠁ ꠘꠣ ꠀꠅꠀ ꠙꠞ꠆ꠎꠘ꠆ꠔ, ꠀꠝꠤ ꠀꠞ ꠀꠋꠉꠥꠞꠞ ꠇꠥꠘꠥ ꠡꠞꠛꠔ ꠈꠣꠁꠔꠣꠝ ꠘꠣꠄ।”
LUK 22:19 ꠄꠞꠛꠣꠖꠦ ꠞꠥꠐꠤ ꠀꠔꠅ ꠟꠁꠀ ꠀꠟ꠆ꠟꠣꠞ ꠡꠥꠇꠞꠤꠀ ꠎꠣꠘꠣꠁꠟꠣ। ꠞꠥꠐꠤ ꠐꠥꠇꠞꠣꠁꠀ ꠍꠣꠢꠣꠛꠤ ꠅꠇꠟꠞꠦ ꠖꠤꠟꠣ, ꠇꠁꠟꠣ, “ꠝꠘꠅ ꠇꠞꠤꠅ ꠁꠐꠣ ꠀꠝꠣꠞ ꠇꠣꠄꠀ, ꠅꠃ ꠇꠣꠄꠀ ꠀꠝꠤ ꠔꠥꠝꠞꠣꠞ ꠟꠣꠉꠤ ꠡꠙꠤ ꠖꠤꠝꠥ। ꠀꠝꠣꠞꠦ ꠝꠘꠅ ꠇꠞꠣꠞ ꠟꠣꠉꠤ ꠔꠥꠝꠤꠔꠣꠁꠘꠅ ꠅꠟꠣ ꠇꠞꠤꠅ।”
LUK 22:20 ꠈꠣꠅꠀꠞ ꠛꠣꠖꠦ ꠡꠞꠛꠔꠞ ꠙꠤꠀꠟꠣ ꠀꠔꠅ ꠟꠁꠀ ꠇꠁꠟꠣ, “ꠀꠝꠣꠞ ꠟꠃꠞ ꠎꠞꠤꠀꠄ ꠀꠟ꠆ꠟꠣꠞ ꠟꠉꠦ ꠝꠣꠘꠡꠞ ꠝꠤꠟꠘꠞ ꠎꠦ ꠘꠄꠀ ꠃꠍꠤꠟ꠆ꠟꠣ ꠘꠣꠎꠤꠟ ꠅꠞ, ꠅꠃ ꠙꠤꠀꠟꠣ ꠅꠁꠟ ꠄꠞ ꠘꠤꠡꠣꠘꠣ। ꠀꠝꠣꠞ ꠅꠃ ꠟꠃ ꠔꠥꠝꠞꠣꠞ ꠘꠣꠎꠣꠔꠞ ꠟꠣꠉꠤ ꠖꠤꠝꠥ।
LUK 22:21 ꠔꠦ ꠖꠦꠈꠞꠣꠄ ꠘꠤ! ꠀꠝꠣꠞꠦ ꠎꠦꠉꠤꠄ ꠗꠞꠣꠁꠀ ꠖꠤꠛ, ꠢꠦ ꠅꠈꠘ ꠀꠝꠣꠞ ꠟꠉꠦ ꠅꠃ ꠖꠡ꠆ꠔꠣꠞꠈꠣꠘꠣꠔ ꠛꠁꠀ ꠈꠣꠞ।
LUK 22:22 ꠀꠟ꠆ꠟꠣꠄ ꠎꠦꠟꠣ ꠢꠥꠇꠥꠝ ꠇꠞꠍꠂꠘ, ꠀꠝꠤ ꠛꠤꠘ-ꠀꠖꠝꠞ ꠝꠃꠔ ꠔ ꠅꠟꠣꠃ ꠅꠁꠛ। ꠢꠣꠄꠞꠦ ꠢꠣꠄ! ꠟꠣꠘ꠆ꠘꠔꠤ ꠢꠃ ꠀꠖꠝ, ꠎꠦꠉꠤꠄ ꠀꠝꠣꠞꠦ ꠗꠞꠣꠁꠀ ꠖꠤꠛ।”
LUK 22:23 ꠍꠣꠢꠣꠛꠤ ꠅꠇꠟꠦ ꠄꠇꠦ-ꠅꠁꠘ꠆ꠘꠞꠦ ꠎꠤꠇꠣꠁꠟꠣ, “ꠔꠦ ꠀꠝꠞꠣꠞ ꠝꠣꠎꠞ ꠇꠥꠘ ꠝꠣꠘꠡꠦ ꠁꠟꠣ ꠇꠣꠝ ꠇꠞꠛ?”
LUK 22:24 ꠅꠃ ꠡꠝꠄ ꠍꠣꠢꠣꠛꠤ ꠅꠇꠟꠞ ꠝꠣꠎꠦ ꠇꠥꠘ ꠎꠘ ꠢꠇꠟ ꠕꠣꠇꠤ ꠛꠠ, ꠅꠔꠣ ꠟꠁꠀ ꠔꠣꠞꠣꠞ ꠝꠣꠎꠦ ꠔꠞ꠆ꠇꠣ-ꠔꠞ꠆ꠇꠤ ꠟꠣꠉꠤꠉꠦꠟ।
LUK 22:25 ꠔꠦꠃ ꠁꠍꠣꠄ ꠔꠣꠞꠣꠞꠦ ꠇꠁꠟꠣ, “ꠛꠤꠗꠞ꠆ꠝꠤ ꠖꠦꠡꠞ ꠞꠣꠎꠣ ꠅꠇꠟꠦ ꠔꠣꠞꠣꠞ ꠙ꠆ꠞꠎꠣꠞ ꠃꠙꠞꠦ ꠝꠥꠘꠤꠛꠉꠤꠞꠤ ꠖꠦꠈꠣꠁꠘ। ꠔꠣꠞꠣꠞ ꠎꠝꠤꠖꠣꠞꠞꠦ ꠇꠅꠀ ꠅꠄ ꠎꠘꠉꠘꠞ ꠖꠥꠡ꠆ꠔ।
LUK 22:26 ꠅꠁꠟꠦ ꠔꠥꠝꠞꠣ ꠁꠟꠣꠘ ꠅꠁꠅ ꠘꠣ। ꠔꠥꠝꠞꠣꠞ ꠝꠣꠎꠦ ꠎꠦꠁꠘ ꠢꠇꠟ ꠕꠣꠇꠤ ꠛꠠ, ꠄꠁꠘ ꠢꠇꠟꠞ ꠢꠥꠞꠥ ꠅꠃꠇ। ꠀꠞ ꠎꠦꠁꠘ ꠘꠦꠔꠣ, ꠄꠁꠘ ꠈꠣꠖꠤꠝꠖꠣꠞꠞ ꠟꠣꠈꠣꠘ ꠅꠃꠇ।
LUK 22:27 ꠇꠅ ꠌꠣꠁꠘ ꠇꠥꠘ ꠎꠘ ꠛꠠ? ꠎꠦꠁꠘ ꠈꠣꠘꠣ ꠈꠣꠁꠘ, ꠘꠣ ꠎꠦ ꠈꠣꠖꠤꠝꠖꠣꠞꠤ ꠇꠞꠦ? ꠎꠦꠁꠘ ꠈꠣꠘꠣ ꠈꠣꠁꠘ ꠄꠁꠘꠃ ꠘꠣꠄ ꠘꠤ? ꠔꠦ ꠀꠝꠤ ꠘꠤꠎꠦꠃ ꠔ ꠔꠥꠝꠞꠣꠞ ꠈꠣꠖꠤꠝꠖꠣꠞꠤ ꠇꠞꠤꠀꠞ।
LUK 22:28 “ꠢꠥꠘꠅ, ꠀꠝꠣꠞ ꠢꠇꠟ ꠛꠣꠟꠣ-ꠝꠍꠤꠛꠔꠅ ꠔꠥꠝꠞꠣ ꠀꠝꠣꠞ ꠟꠉꠦ ꠟꠉꠦ ꠀꠍꠟꠣꠄ।
LUK 22:29 ꠀꠞ ꠀꠝꠣꠞ ꠛꠣꠔꠥꠘꠤ ꠛꠣꠚꠦ ꠀꠝꠣꠞꠦ ꠎꠦꠟꠣ ꠉꠖꠤ ꠀꠞ ꠈꠦꠝꠔꠣ ꠖꠣꠘ ꠇꠞꠍꠂꠘ, ꠀꠝꠤꠅ ꠅꠃꠟꠣ ꠔꠥꠝꠞꠣꠞꠦ ꠈꠦꠝꠔꠣ ꠖꠣꠘ ꠇꠞꠞꠣꠝ।
LUK 22:30 ꠅꠃ ꠈꠦꠝꠔꠣ ꠙꠣꠁꠀ, ꠔꠥꠝꠞꠣꠅ ꠀꠝꠣꠞ ꠛꠣꠖꠡꠣꠁꠔ ꠖꠣꠈꠤꠟ ꠅꠁꠀ ꠀꠝꠣꠞ ꠟꠉꠦ ꠛꠁꠀ ꠈꠣꠘꠣ-ꠙꠤꠘꠣ ꠈꠣꠁꠛꠣꠄ, ꠀꠝꠣꠞ ꠟꠉꠦ ꠉꠖꠤꠔ ꠛꠁꠀ ꠛꠘꠤ ꠁꠍꠞꠣꠁꠟꠞ ꠛꠣꠞꠅ ꠉꠥꠡ꠆ꠐꠤꠞ ꠛꠤꠌꠣꠞ-ꠀꠖꠣꠟꠔ ꠇꠞꠛꠣꠄ।
LUK 22:31 “ꠍꠣꠁꠝꠘ, ꠍꠣꠁꠝꠘ, ꠢꠥꠘꠅ, ꠗꠣꠘ-ꠌꠣꠃꠟ ꠎꠦꠟꠣ ꠌꠣꠁꠘꠖꠤ ꠌꠣꠘꠤꠀꠁꠘ, ꠡꠄꠔꠣꠘꠦꠅ ꠔꠥꠝꠞꠣꠞꠦ ꠅꠟꠣ ꠌꠣꠘꠤꠀꠁꠔ ꠌꠣꠁꠍꠦ।
LUK 22:32 ꠅꠁꠟꠦ ꠔꠥꠝꠣꠞ ꠟꠣꠉꠤ ꠀꠝꠤ ꠀꠞꠎ ꠇꠞꠍꠤ, ꠔꠥꠝꠣꠞ ꠁꠝꠣꠘ ꠎꠣꠘꠥ ꠇꠝꠎꠥꠞ ꠘꠣ ꠅꠄ। ꠔꠦ ꠔꠥꠝꠤ ꠄꠇꠛꠣꠞ ꠉꠦꠟꠦꠉꠤꠅ ꠔꠃꠛꠣ ꠇꠞꠤꠀ ꠎꠦꠛꠟꠣ ꠚꠤꠞꠔ ꠀꠁꠛꠣꠄ, ꠅꠃ ꠡꠝꠄ ꠔꠥꠝꠣꠞ ꠅꠃ ꠜꠣꠁꠀꠁꠘ꠆ꠔꠞ ꠁꠝꠣꠘꠤ ꠛꠟꠅ ꠝꠎꠛꠥꠔ ꠇꠞꠤꠅ।”
LUK 22:33 ꠙꠤꠔꠞꠦ ꠇꠁꠟꠣ, “ꠢꠥꠎꠥꠞ, ꠀꠝꠤ ꠔ ꠀꠙꠘꠣꠞ ꠟꠉꠦ ꠅꠁꠀ ꠎꠦꠟꠅ ꠎꠣꠁꠔꠦ, ꠛꠣ ꠎꠣꠘ ꠖꠤꠔꠦꠅ ꠔꠤꠀꠞ ꠀꠍꠤ।”
LUK 22:34 ꠔꠣꠁꠘ ꠇꠁꠟꠣ, “ꠙꠤꠔꠞ, ꠀꠝꠤ ꠔꠥꠝꠣꠞꠦ ꠇꠁꠞꠣꠝ, ꠀꠁꠎ ꠙꠔꠣꠛꠣꠟꠣ ꠝꠥꠞꠉꠣꠄ ꠛꠣꠋ ꠖꠤꠛꠣꠞ ꠀꠉꠦꠃ, ꠔꠥꠝꠤ ꠔꠤꠘ-ꠔꠤꠘꠛꠣꠞ ꠇꠁꠛꠣꠄ, ꠔꠥꠝꠤ ꠀꠝꠣꠞꠦ ꠌꠤꠘꠅ ꠘꠣ।”
LUK 22:35 ꠛꠣꠖꠦ ꠔꠣꠘ ꠍꠣꠢꠣꠛꠤ ꠅꠇꠟꠞꠦ ꠎꠤꠇꠣꠁꠟꠣ, “ꠇꠅ ꠌꠣꠁꠘ, ꠀꠝꠤ ꠎꠦꠛꠟꠣ ꠔꠥꠝꠞꠣꠞꠦ ꠐꠦꠇꠣꠞ ꠕꠟꠤ, ꠉꠣꠁꠐ-ꠛꠥꠍꠇꠤ ꠁꠔꠣ ꠇꠥꠘ꠆ꠔꠣ ꠘꠣ ꠖꠤꠀ ꠈꠣꠟꠤ ꠙꠣꠅꠄ ꠙꠣꠑꠣꠁꠍꠟꠣꠝ, ꠢꠤ ꠡꠝꠄ ꠔꠥꠝꠞꠣꠞ ꠇꠥꠘ꠆ꠔꠣꠞ ꠅꠜꠣꠛ ꠅꠁꠍꠤꠟ ꠘꠤ?” ꠔꠣꠞꠣ ꠇꠁꠟꠣ, “ꠎꠤ ꠘꠣ, ꠇꠥꠘꠥ ꠅꠜꠣꠛ ꠅꠁꠍꠦ ꠘꠣ।”
LUK 22:36 ꠁꠍꠣꠄ ꠇꠁꠟꠣ, “ꠔꠦ ꠅꠈꠘ ꠀꠝꠤ ꠇꠁ, ꠅꠈꠘ ꠎꠣꠞ ꠐꠦꠇꠣꠞ ꠕꠟꠤ ꠛꠣ ꠉꠣꠁꠐ-ꠛꠥꠍꠇꠤ ꠀꠍꠦ, ꠢꠦ ꠅꠔꠣ ꠟꠉꠦ ꠞꠣꠈꠃꠇ। ꠎꠣꠞ ꠔꠟꠥꠀꠞ ꠘꠣꠁ, ꠢꠦ ꠔꠣꠞ ꠌꠣꠖ꠆ꠖꠞ ꠛꠦꠌꠤꠀ ꠔꠟꠥꠀꠞ ꠈꠞꠤꠖ ꠇꠞꠃꠇ।
LUK 22:37 ꠙꠣꠇ ꠇꠣꠟꠣꠝꠞ ꠀꠄꠀꠔꠅ ꠔ ꠟꠦꠈꠣ ꠀꠍꠦ, ꠔꠣꠘꠞꠦ ꠘꠣꠚꠞꠝꠣꠘ ꠅꠇꠟꠞ ꠇꠣꠔꠣꠞꠅ ꠝꠤꠟꠣꠁꠟ ꠅꠁꠛ। ꠁ ꠀꠄꠀꠔ ꠔ ꠀꠝꠣꠞ ꠃꠙꠞ ꠖꠤꠀꠃ ꠚꠟꠤꠛ। ꠀꠝꠣꠞ ꠛꠦꠙꠣꠞꠦ ꠎꠔꠔꠣ ꠟꠦꠈꠣ ꠀꠍꠦ, ꠁꠔꠣ ꠢꠇ꠆ꠇꠟꠔꠣ ꠅꠈꠘ ꠚꠟꠤꠎꠣꠞ।”
LUK 22:38 ꠔꠦꠃ ꠍꠣꠢꠣꠛꠤ ꠅꠇꠟꠦ ꠇꠁꠟꠣ, “ꠢꠥꠎꠥꠞ ꠖꠦꠈꠃꠇ꠆ꠇꠣ, ꠁꠘꠅ ꠖꠥꠈꠣꠘ ꠔꠟꠥꠀꠞ ꠀꠍꠦ।” ꠔꠣꠁꠘ ꠇꠁꠟꠣ, “ꠅꠔꠣꠃ ꠔ ꠛꠃꠔ।”
LUK 22:39 ꠈꠣꠘꠣ-ꠙꠤꠘꠣꠞ ꠛꠣꠖꠦ ꠁꠍꠣ ꠛꠣꠞ ꠅꠁꠀ ꠛꠞꠣꠛꠞꠇꠥꠞ ꠟꠣꠈꠣꠘ ꠢꠃ ꠎꠄꠔꠥꠘ ꠙꠣꠠꠅ ꠉꠦꠟꠣ, ꠍꠣꠢꠣꠛꠤ ꠅꠇꠟꠅ ꠔꠣꠘ ꠈꠞꠦ ꠈꠞꠦ ꠉꠦꠟꠣ।
LUK 22:40 ꠢꠘꠅ ꠉꠤꠀ ꠢꠣꠞꠟꠦ ꠁꠍꠣꠄ ꠔꠣꠞꠣꠞꠦ ꠇꠁꠟꠣ, “ꠔꠥꠝꠞꠣ ꠖꠥꠀ ꠇꠞꠅ, ꠎꠣꠔꠦ ꠇꠥꠘꠥ ꠙꠞꠤꠇ꠆ꠇꠣꠔ ꠘꠣ ꠙꠠ।”
LUK 22:41 ꠇꠁꠀ ꠢꠣꠞꠤ ꠍꠣꠢꠣꠛꠤ ꠅꠇꠟꠞ ꠉꠦꠍ ꠕꠣꠇꠤ ꠌꠣꠁꠞ ꠘꠟ ꠙꠞꠤꠝꠣꠘ ꠖꠥꠞꠁ ꠉꠤꠀ, ꠎꠣꠘꠥ ꠙꠣꠔꠤꠀ ꠖꠥꠀ ꠇꠞꠣꠔ ꠛꠁꠟꠣ।
LUK 22:42 ꠔꠣꠁꠘ ꠇꠁꠟꠣ, “ꠛꠦꠢꠦꠡ꠆ꠔꠤ ꠛꠣꠛꠣ, ꠔꠥꠝꠣꠞ ꠁꠌ꠆ꠍꠣ ꠅꠁꠟꠦ ꠝꠍꠤꠛꠔꠞ ꠁ ꠙꠤꠀꠟꠣꠐꠣ ꠀꠝꠣꠞ ꠉꠦꠍ ꠕꠘꠦ ꠢꠞꠣꠁꠟꠣꠅ। ꠅꠁꠟꠦ ꠀꠝꠣꠞ ꠁꠌ꠆ꠍꠣꠄ ꠘꠣꠄ, ꠔꠥꠝꠣꠞ ꠁꠌ꠆ꠍꠣꠄꠃ ꠅꠃꠇ।”
LUK 22:43 ꠔꠦꠃ ꠛꠦꠢꠦꠡ꠆ꠔ ꠕꠣꠇꠤ ꠄꠇ ꠚꠤꠞꠤꠡ꠆ꠔꠣ ꠀꠁꠀ ꠁꠍꠣꠞꠦ ꠖꠞꠡꠘ ꠖꠤꠀ ꠔꠣꠘ ꠛꠟ ꠛꠣꠠꠣꠁꠟꠣ।
LUK 22:44 ꠛꠣꠖꠦ ꠔꠣꠁꠘ ꠝꠘꠞ ꠖꠥꠈꠦ ꠙꠦꠞꠦꠡꠣꠘ ꠛꠘꠤꠀ ꠀꠞꠅ ꠇꠣꠔꠞ ꠅꠁꠀ ꠖꠥꠀ ꠇꠞꠟꠣ। ꠄꠞꠟꠣꠉꠤ ꠔꠣꠘ ꠉꠔꠞꠞ ꠊꠣꠝ ꠟꠃꠞ ꠚꠥꠐꠣꠞ ꠟꠣꠈꠣꠘ ꠝꠣꠐꠤꠔ ꠙꠠꠔ ꠟꠣꠉꠟ।
LUK 22:45 ꠖꠥꠀ ꠡꠦꠡ ꠇꠞꠤꠀ ꠍꠣꠢꠣꠛꠤ ꠅꠇꠟꠞ ꠇꠣꠘ꠆ꠖꠣꠔ ꠀꠁꠀ ꠖꠦꠈꠟꠣ, ꠝꠘꠞ ꠖꠥꠈꠦ ꠇꠣꠔꠞ ꠅꠁꠀ ꠔꠣꠞꠣ ꠊꠥꠝꠣꠁ ꠉꠦꠍꠂꠘ।
LUK 22:46 ꠖꠦꠈꠤꠀ ꠔꠣꠞꠣꠞꠦ ꠇꠁꠟꠣ, “ꠊꠥꠝꠣꠁꠞꠣꠄ ꠇꠦꠘꠦ? ꠃꠑꠤꠀ ꠖꠥꠀ ꠇꠞꠅ, ꠎꠣꠔꠦ ꠙꠞꠤꠇ꠆ꠇꠣꠔ ꠘꠣ ꠙꠠ।”
LUK 22:47 ꠁꠍꠣ ꠝꠣꠔꠅ ꠞꠁꠍꠂꠘ, ꠅꠃ ꠡꠝꠄ ꠀꠈꠔꠣꠃ ꠢꠤꠈꠣꠘꠅ ꠛꠃꠔ ꠝꠣꠘꠥꠡ ꠀꠁꠟꠣ। ꠄꠞꠣꠞ ꠢꠇ꠆ꠇꠟꠞ ꠀꠉꠦ ꠀꠍꠤꠟ ꠁꠢꠥꠖꠣ, ꠢꠦ ꠁꠍꠣꠞ ꠛꠣꠞꠅꠎꠘ ꠍꠣꠢꠣꠛꠤꠞ ꠝꠣꠎꠞ ꠄꠇꠎꠘ। ꠁꠢꠥꠖꠣꠄ ꠔꠣꠘꠞꠦ ꠢꠥꠋꠉꠣ ꠖꠤꠛꠣꠞ ꠟꠣꠉꠤ ꠇꠣꠘ꠆ꠖꠣꠔ ꠀꠁꠟ।
LUK 22:48 ꠁꠍꠣꠄ ꠔꠣꠞꠦ ꠇꠁꠟꠣ, “ꠁꠢꠥꠖꠣ, ꠀꠝꠤ ꠛꠤꠘ-ꠀꠖꠝꠞꠦ ꠢꠥꠋꠉꠣ ꠖꠤꠀ ꠗꠞꠣꠁ ꠖꠤꠞꠣꠄ ꠘꠤ?”
LUK 22:49 ꠅꠃ ꠡꠝꠄ ꠁꠍꠣꠞ ꠇꠣꠘ꠆ꠖꠣꠔ ꠎꠦꠞꠣ ꠀꠍꠟꠣ, ꠔꠣꠞꠣ ꠛꠥꠎꠤꠟꠤꠟꠣ ꠇꠤꠔꠣ ꠅꠞ। ꠛꠥꠎꠤꠀ ꠇꠁꠟꠣ, “ꠢꠥꠎꠥꠞ, ꠅꠔꠣꠞꠦ ꠀꠝꠞꠣꠞ ꠔꠟꠥꠀꠞꠖꠤ ꠝꠣꠞꠔꠣꠝ ꠘꠤ?”
LUK 22:50 ꠇꠁꠀꠃ ꠄꠇ ꠍꠣꠢꠣꠛꠤꠄ ꠔꠟꠥꠀꠞꠖꠤ ꠍꠦꠖ ꠝꠣꠞꠤ ꠙꠞꠗꠣꠘ ꠁꠝꠣꠝꠞ ꠉꠥꠟꠣꠝꠞ ꠒꠣꠁꠘꠞ ꠇꠣꠘ ꠇꠣꠐꠤꠟꠤꠟꠣ।
LUK 22:51 ꠅꠁꠟꠦ ꠁꠍꠣꠄ ꠇꠁꠟꠣ, “ꠛꠣꠖ ꠖꠦꠅ, ꠀꠞ ꠝꠣꠞꠤꠅ ꠘꠣ।” ꠅꠈꠣꠘ ꠇꠁꠀ ꠔꠣꠁꠘ ꠢꠤ ꠉꠥꠟꠣꠝꠞ ꠇꠣꠘ ꠀꠔꠣꠁ ꠖꠤꠀ ꠔꠣꠞꠦ ꠜꠣꠟꠣ ꠇꠞꠤꠟ꠆ꠟꠣ।
LUK 22:52 ꠢꠎꠞꠔ ꠁꠍꠣꠞꠦ ꠀꠐꠇ ꠇꠞꠣꠔ ꠎꠔ ꠛꠠ ꠁꠝꠣꠝ, ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠞ ꠖꠣꠞꠉꠣ, ꠀꠞ ꠝꠥꠞꠛ꠆ꠛꠤ ꠅꠇꠟ ꠀꠁꠍꠟꠣ, ꠁꠍꠣꠄ ꠔꠣꠞꠣꠞꠦ ꠎꠤꠇꠣꠁꠟꠣ, “ꠝꠣꠘꠡꠦ ꠌꠥꠞ-ꠒꠣꠇꠣꠁꠔ ꠗꠞꠔꠦ ꠎꠦꠟꠣ ꠟꠣꠑꠤ-ꠍꠥꠟꠚꠤ ꠟꠁꠀ ꠎꠣꠁꠘ, ꠔꠥꠝꠞꠣ ꠀꠝꠣꠞꠦ ꠗꠞꠣꠔ ꠅꠃꠟꠣ ꠀꠁꠍ ꠘꠤ?
LUK 22:53 ꠀꠝꠤ ꠔ ꠙꠞꠔꠦꠇ ꠖꠤꠘꠃ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠅ ꠔꠥꠝꠞꠣꠞ ꠍꠣꠝꠘꠦ ꠀꠍꠟꠣꠝ, ꠢꠤ ꠡꠝꠄ ꠀꠝꠣꠞꠦ ꠗꠞꠟꠣꠄ ꠘꠣ ꠇꠦꠘꠦ? ꠅ, ꠅꠈꠘ ꠘꠤꠌꠄ ꠔꠥꠝꠞꠣꠞ ꠡꠝꠄ, ꠀꠘ꠆ꠖꠣꠁꠞꠞ ꠞꠣꠎꠔ꠆ꠔ ꠌꠣꠟꠥ ꠅꠁꠍꠦ।”
LUK 22:54 ꠖꠥꠡꠝꠘꠞ ꠖꠟꠦ ꠁꠍꠣꠞꠦ ꠀꠐꠇ ꠇꠞꠤꠀ ꠙꠞꠗꠣꠘ ꠁꠝꠣꠝꠞ ꠛꠣꠠꠤꠔ ꠟꠁꠀ ꠉꠦꠟꠣꠉꠤ। ꠍꠣꠢꠣꠛꠤ ꠙꠤꠔꠞ ꠖꠥꠞꠁ ꠢꠞꠤ ꠢꠞꠤ ꠁꠍꠣꠞ ꠈꠞꠦ ꠅꠁꠀ ꠉꠦꠟꠣ।
LUK 22:55 ꠃꠑꠣꠘꠞ ꠝꠣꠎꠦ ꠛꠣꠇ꠆ꠇꠣ ꠝꠣꠘꠡꠦ ꠀꠉꠥꠁꠘ ꠗꠞꠣꠁꠀ ꠔꠣꠛꠣꠘꠤꠔ ꠟꠣꠉꠟꠣ, ꠙꠤꠔꠞꠅ ꠅꠘꠅ ꠀꠁꠀ ꠡꠞꠤꠇ ꠅꠁꠟꠣ।
LUK 22:56 ꠅꠃ ꠡꠝꠄ ꠄꠇ ꠛꠣꠘ꠆ꠖꠤ ꠛꠦꠐꠤꠄ ꠀꠉꠥꠘꠤꠞ ꠚꠞꠞ ꠝꠣꠎꠦ ꠙꠤꠔꠞꠞꠦ ꠖꠦꠈꠤꠀ ꠜꠣꠟꠣ ꠇꠞꠤ ꠌꠣꠁꠀ ꠇꠁꠟ, “ꠅꠃ ꠛꠦꠐꠣꠅ ꠢꠉꠥꠞ ꠟꠉꠦ ꠀꠍꠤꠟ।”
LUK 22:57 ꠙꠤꠔꠞꠦ ꠇꠁꠟꠣ, “ꠘꠣ ꠛꠦꠐꠤ, ꠀꠝꠤ ꠄꠞꠦ ꠌꠤꠘꠤꠃ ꠘꠣ।”
LUK 22:58 ꠕꠥꠠꠣ ꠛꠣꠖꠦ ꠀꠞꠇ ꠎꠘꠦ ꠙꠤꠔꠞꠞꠦ ꠖꠦꠈꠤꠀ ꠇꠁꠟ, “ꠔꠥꠝꠤꠅ ꠅꠔꠣꠞ ꠟꠉꠞ ꠄꠇꠎꠘ।” ꠔꠣꠁꠘ ꠇꠁꠟꠣ, “ꠘꠣ ꠛꠣ, ꠀꠝꠤ ꠘꠣꠄ।”
LUK 22:59 ꠀꠞꠅ ꠄꠇꠖ ꠊꠘ꠆ꠐꠣ ꠛꠣꠖꠦ ꠀꠞꠇ ꠎꠘꠦ ꠛꠠ ꠉꠟꠣꠄ ꠇꠁꠟ, “ꠅꠄ, ꠅꠄ, ꠅꠉꠥꠅ ꠄꠞ ꠟꠉꠦ ꠀꠍꠤꠟ, ꠄꠅ ꠔ ꠉꠣꠟꠤꠟꠞ ꠝꠣꠘꠥꠡ।”
LUK 22:60 ꠔꠣꠁꠘ ꠇꠁꠟꠣ, “ꠖꠥꠞ ꠛꠦꠐꠣ! ꠔꠥꠝꠤ ꠁꠔꠣ ꠇꠤꠔꠣ ꠝꠣꠔꠅ, ꠇꠥꠘ꠆ꠔꠣ ꠛꠥꠎꠤ ꠘꠣ।” ꠙꠤꠔꠞꠦ ꠅꠔꠣ ꠇꠁꠞꠣ, ꠄꠞꠝꠣꠎꠦ ꠀꠈꠔꠣꠃ ꠝꠥꠞꠉꠣꠄ ꠛꠣꠋ ꠖꠤꠟꠣꠁꠟ।
LUK 22:61 ꠔꠦꠃ ꠁꠍꠣꠄ ꠝꠥꠈ ꠚꠤꠞꠣꠁꠀ ꠙꠤꠔꠞꠞ ꠛꠣꠄ ꠌꠣꠁꠟꠣ। ꠌꠣꠁꠔꠦꠃ ꠙꠤꠔꠞꠞ ꠝꠘꠅ ꠅꠁꠉꠦꠟꠉꠤ, ꠢꠥꠎꠥꠞꠦ ꠔ ꠀꠉꠦꠃ ꠇꠁꠍꠟꠣ, “ꠀꠁꠎ ꠙꠔꠣꠛꠣꠟꠣ ꠝꠥꠞꠉꠣꠄ ꠛꠣꠋ ꠖꠤꠛꠣꠞ ꠀꠉꠦꠃ, ꠔꠥꠝꠤ ꠔꠤꠘꠛꠣꠞ ꠇꠁꠛꠣꠄ, ꠔꠥꠝꠤ ꠀꠝꠣꠞꠦ ꠌꠤꠘ ꠘꠣ।”
LUK 22:62 ꠔꠦꠃ ꠙꠤꠔꠞ ꠛꠣꠞꠦ ꠉꠤꠀ ꠈꠥꠛ ꠇꠣꠘ꠆ꠖꠘ ꠇꠣꠘ꠆ꠖꠤꠟꠣ।
LUK 22:63 ꠢꠎꠞꠔ ꠁꠍꠣꠞꠦ ꠗꠞꠤꠀ ꠀꠘꠤꠀ ꠙꠣꠞꠣꠖꠣꠞ ꠅꠇꠟꠦ ꠔꠣꠘꠞꠦ ꠑꠣꠐ꠆ꠐꠣ-ꠝꠡꠇꠞꠣ ꠀꠞ ꠝꠣꠁꠞ-ꠗꠁꠞ ꠇꠞꠟ।
LUK 22:64 ꠔꠣꠘ ꠌꠃꠈ ꠛꠣꠘ꠆ꠖꠤꠀ ꠇꠁꠟ, “ꠢꠂ, ꠔꠥꠁ ꠛꠥꠟꠦ ꠘꠛꠤ, ꠔꠦ ꠅꠈꠘ ꠉꠣꠁꠛꠤ ꠇꠅ ꠌꠣꠁꠘ, ꠔꠞꠦ ꠇꠦꠉꠤꠄ ꠝꠣꠞꠟ?”
LUK 22:65 ꠅꠃꠟꠣ ꠀꠞꠅ ꠛꠃꠔꠔꠣ ꠇꠁꠀ ꠔꠣꠘꠞꠦ ꠛꠦꠁꠎ꠆ꠎꠔ ꠇꠞꠟ।
LUK 22:66 ꠞꠣꠁꠔ ꠙꠥꠀꠘꠤꠞ ꠛꠣꠖꠦ ꠖꠦꠡꠞ ꠚꠔꠥꠀ ꠇꠝꠤꠐꠤꠞ ꠝꠥꠞꠛ꠆ꠛꠤꠀꠘ, ꠛꠠ ꠁꠝꠣꠝ ꠀꠞ ꠀꠟꠤꠝ ꠅꠇꠟ ꠖꠟꠣ ꠅꠁꠟꠣ, ꠀꠞ ꠁꠍꠣꠞꠦ ꠔꠣꠞꠣꠞ ꠍꠣꠝꠘꠦ ꠀꠘꠣꠁꠀ ꠇꠁꠟꠣ,
LUK 22:67 “ꠔꠥꠝꠤ ꠎꠥꠖꠤ ꠀꠟ꠆ꠟꠣꠞ ꠅꠀꠖꠣ ꠇꠞꠣ ꠢꠃ ꠀꠟ-ꠝꠍꠤ ꠅꠅ, ꠔꠦ ꠀꠝꠞꠣꠞꠦ ꠇꠅ।” ꠁꠍꠣꠄ ꠇꠁꠟꠣ, “ꠀꠝꠤ ꠇꠁꠟꠦꠅ ꠔ ꠔꠥꠝꠤꠔꠣꠁꠘ ꠄꠇꠤꠘ ꠇꠞꠔꠣꠄ ꠘꠣꠄ।
LUK 22:68 ꠇꠥꠘ꠆ꠔꠣ ꠎꠤꠇꠣꠁꠟꠦꠅ ꠎꠥꠀꠙ ꠖꠤꠔꠣꠄ ꠘꠣꠄ।
LUK 22:69 ꠅꠁꠟꠦ ꠀꠝꠤ ꠛꠤꠘ-ꠀꠖꠝ ꠅꠈꠘ ꠕꠣꠇꠤꠃ ꠀꠞꠡꠦ-ꠀꠎꠤꠝꠅ ꠀꠟ꠆ꠟꠣꠞ ꠒꠣꠁꠘꠞ ꠇꠥꠞꠍꠤꠔ ꠛꠁꠝꠥ।”
LUK 22:70 ꠔꠦꠃ ꠢꠇ꠆ꠇꠟꠦ ꠎꠤꠇꠣꠁꠟ, “ꠔꠦ ꠔꠥꠝꠤꠃ ꠇꠤꠔꠣ ꠀꠟ꠆ꠟꠣꠞ ꠈꠣꠍ ꠝꠣꠄꠀꠞ ꠎꠘ ꠁꠛꠘꠥꠟ꠆ꠟꠣ ꠘꠤ?” ꠔꠣꠁꠘ ꠇꠁꠟꠣ, “ꠅꠄ, ꠔꠥꠝꠤꠔꠣꠁꠘꠃ ꠔ ꠇꠁꠞꠣꠄ, ꠀꠝꠤꠃ ꠢꠦꠁꠘ।”
LUK 22:71 ꠔꠦꠃ ꠔꠣꠞꠣ ꠢꠇ꠆ꠇꠟꠦ ꠇꠁꠟ, “ꠔꠦ ꠀꠞ ꠡꠣꠄ-ꠡꠣꠇ꠆ꠇꠤꠖꠤ ꠇꠤꠔꠣ ꠇꠞꠔꠣꠄ? ꠀꠝꠞꠣ ꠘꠤꠎꠞ ꠇꠣꠘꠦꠃ ꠔ ꠔꠣꠞ ꠎꠛꠣꠘꠛꠘ꠆ꠖꠤ ꠢꠥꠘꠟꠣꠝ।”
LUK 23:1 ꠔꠣꠞꠣ ꠢꠇꠟꠦ ꠄꠇꠟꠉꠦ ꠖꠟ ꠛꠣꠘ꠆ꠖꠤꠀ ꠁꠍꠣꠞꠦ ꠟꠁꠀ ꠞꠥꠝꠣꠘ ꠢꠣꠇꠤꠝ ꠙꠤꠟꠣꠔꠞ ꠉꠦꠍꠦ ꠉꠦꠟꠣ।
LUK 23:2 ꠉꠤꠀ ꠁꠍꠣꠞ ꠛꠤꠙꠇ꠆ꠇꠦ ꠘꠣꠟꠤꠡ ꠖꠤꠟꠣ। ꠔꠣꠞꠣ ꠇꠁꠟꠣ, “ꠀꠝꠞꠣ ꠖꠦꠈꠍꠤ, ꠅꠃ ꠛꠦꠐꠣꠄ ꠀꠝꠞꠣꠞ ꠖꠦꠡꠞ ꠝꠣꠘꠡꠞꠦ ꠛꠤꠉꠠꠣꠁ ꠖꠦꠞ, ꠢꠦ ꠝꠣꠘꠡꠞꠦ ꠘꠤꠡꠦꠗ ꠇꠞꠦ ꠀꠝꠞꠣꠞ ꠛꠣꠖꠡꠣ ꠇꠂꠍꠞꠞꠦ ꠈꠣꠎꠘꠣ ꠖꠤꠔꠣ ꠘꠣ। ꠢꠦ ꠘꠤꠎꠦꠃ ꠛꠥꠟꠦ ꠀꠟ-ꠝꠍꠤ ꠘꠣꠝꠞ ꠄꠇ ꠛꠣꠖꠡꠣ।”
LUK 23:3 ꠙꠤꠟꠣꠔꠦ ꠁꠍꠣꠞꠦ ꠎꠤꠇꠣꠁꠟꠣ, “ꠔꠥꠝꠤ ꠇꠤꠔꠣ ꠁꠢꠥꠖꠤ ꠅꠇꠟꠞ ꠛꠣꠖꠡꠣ ꠘꠤ?” ꠔꠣꠁꠘ ꠎꠥꠀꠙ ꠖꠤꠟꠣ, “ꠀꠙꠘꠦ ꠎꠦꠟꠣ ꠇꠂꠘ, ꠅꠟꠣꠃ।”
LUK 23:4 ꠔꠦꠃ ꠙꠤꠟꠣꠔꠦ ꠛꠠ ꠁꠝꠣꠝ ꠀꠞ ꠢꠇꠟ ꠝꠣꠘꠡꠞꠦ ꠇꠁꠟꠣ, “ꠀꠝꠤ ꠔ ꠁ ꠀꠡꠣꠝꠤꠞ ꠇꠥꠘꠥ ꠖꠥꠡꠃ ꠙꠣꠁꠞꠣꠝ ꠘꠣ।”
LUK 23:5 ꠅꠁꠟꠦ ꠔꠣꠞꠣ ꠎꠤꠖ ꠇꠞꠤꠀ ꠇꠁꠟ, “ꠁ ꠛꠦꠐꠣꠄ ꠉꠣꠟꠤꠟ ꠎꠤꠟꠣ ꠕꠣꠇꠤ ꠀꠞꠝ꠆ꠛ ꠇꠞꠤꠀ ꠀꠡ꠆ꠔꠣ ꠄꠢꠥꠖꠤꠀ ꠎꠤꠟꠣꠞ ꠝꠣꠘꠡꠞꠦ ꠛꠤꠉꠠꠣꠁꠀ, ꠅꠈꠘ ꠀꠝꠞꠣꠞ ꠅꠘꠅ ꠀꠁꠀꠅ ꠢꠇ꠆ꠇꠟꠞꠦ ꠛꠤꠉꠠꠣꠁꠟꠣꠞ।”
LUK 23:6 ꠁꠈꠣꠘ ꠢꠥꠘꠤꠀ ꠙꠤꠟꠣꠔꠦ ꠎꠤꠇꠣꠁꠟꠣ, “ꠢꠦ ꠇꠤꠔꠣ ꠉꠣꠟꠤꠟꠞ ꠝꠣꠘꠥꠡ ꠘꠤ?”
LUK 23:7 ꠢꠣꠇꠤꠝꠦ ꠎꠦꠛꠟꠣ ꠢꠥꠘꠟꠣ, ꠁꠍꠣꠞ ꠛꠣꠠꠤ ꠅꠁꠟ ꠞꠣꠎꠣ ꠢꠦꠞꠥꠖꠞ ꠅꠗꠤꠘꠞ ꠉꠣꠟꠤꠟ ꠎꠤꠟꠣꠔ, ꠢꠥꠘꠤꠀ ꠔꠣꠁꠘ ꠁꠍꠣꠞꠦ ꠢꠦꠞꠥꠖꠞ ꠉꠦꠍꠦ ꠙꠣꠑꠣꠁ ꠖꠤꠟꠣ, ꠇꠣꠞꠘ ꠢꠦꠞꠥꠖꠅ ꠅꠃ ꠡꠝꠄ ꠎꠦꠞꠥꠎꠣꠟꠦꠝꠅ ꠀꠍꠟꠣ।
LUK 23:8 ꠁꠍꠣꠞꠦ ꠖꠦꠈꠤꠀ ꠢꠦꠞꠥꠖ ꠈꠥꠛ ꠈꠥꠡꠤ ꠅꠁꠟꠣ। ꠔꠣꠁꠘ ꠛꠃꠔ ꠖꠤꠘ ꠗꠞꠤ ꠁꠍꠣꠞꠦ ꠖꠦꠈꠔꠣ ꠌꠣꠁꠞꠣ। ꠀꠉꠦ ꠔꠣꠁꠘ ꠁꠍꠣꠞ ꠛꠦꠙꠣꠞꠦ ꠛꠃꠔꠔꠣ ꠢꠥꠘꠍꠤꠟꠣ, ꠄꠞꠟꠣꠉꠤ ꠔꠣꠘ ꠝꠘꠞ ꠀꠡꠣ ꠀꠍꠤꠟ, ꠁꠍꠣꠄ ꠔꠣꠘꠞꠦ ꠇꠥꠘꠥ ꠇꠦꠞꠣꠝꠔꠤ-ꠝꠥꠎꠦꠎꠣ ꠖꠦꠈꠣꠁꠛꠣ।
LUK 23:9 ꠔꠣꠁꠘ ꠁꠍꠣꠞꠦ ꠛꠃꠔ ꠘꠝꠥꠘꠣꠞ ꠙ꠆ꠞꠡꠘ ꠇꠞꠟꠣ, ꠅꠁꠟꠦ ꠁꠍꠣꠄ ꠁꠔꠣꠞ ꠇꠥꠘꠥ ꠎꠥꠀꠙ ꠖꠤꠟꠣ ꠘꠣ।
LUK 23:10 ꠀꠖꠣꠟꠔꠅ ꠃꠛꠣꠁꠀꠅ ꠛꠠ ꠁꠝꠣꠝ ꠀꠞ ꠝꠃꠟꠣꠘꠣ ꠅꠇꠟꠦ ꠈꠥꠛ ꠉꠞꠝ ꠅꠁꠀ ꠁꠍꠣꠞ ꠛꠤꠙꠇ꠆ꠇꠦ ꠘꠣꠟꠤꠡ ꠢꠥꠘꠣꠘꠤꠔ ꠞꠁꠟꠣ।
LUK 23:11 ꠄꠞꠟꠉꠦ ꠢꠦꠞꠥꠖꠦ ꠀꠞ ꠔꠣꠘ ꠍꠤꠙꠣꠁ ꠅꠇꠟꠦꠅ ꠁꠍꠣꠞꠦ ꠑꠣꠐ꠆ꠐꠣ-ꠝꠡꠇꠞꠣ, ꠛꠦꠁꠎ꠆ꠎꠔꠤ ꠇꠞꠟꠣ, ꠢꠦꠡ-ꠝꠦꠡ ꠔꠣꠘꠞꠦ ꠛꠣꠖꠡꠣꠁ ꠌꠇꠌꠇꠣ ꠟꠦꠛꠣꠍ ꠚꠤꠘ꠆ꠖꠣꠁꠀ ꠢꠣꠇꠤꠝ ꠙꠤꠟꠣꠔꠞ ꠉꠦꠍꠦ ꠚꠤꠞꠔ ꠙꠣꠑꠣꠁ ꠖꠤꠟꠣ।
LUK 23:12 ꠄꠞ ꠀꠉꠦ ꠞꠣꠎꠣ ꠢꠦꠞꠥꠖ ꠀꠞ ꠢꠣꠇꠤꠝ ꠙꠤꠟꠣꠔꠞ ꠝꠣꠎꠦ ꠖꠥꠡꠝꠘꠤ ꠀꠍꠤꠟ, ꠅꠁꠟꠦ ꠅꠃ ꠖꠤꠘ ꠕꠣꠇꠤꠃ ꠔꠣꠞꠣꠞ ꠝꠣꠎꠦ ꠖꠥꠡ꠆ꠔꠤ ꠅꠁꠉꠦꠟ।
LUK 23:13 ꠛꠣꠖꠦ ꠙꠤꠟꠣꠔꠦ ꠛꠠ ꠁꠝꠣꠝ, ꠝꠥꠞꠛ꠆ꠛꠤ ꠅꠇꠟ, ꠀꠞ ꠀꠝ ꠝꠣꠘꠡꠞꠦ ꠄꠇꠈꠣꠘꠅ ꠖꠟꠣ ꠇꠞꠤꠀ,
LUK 23:14 ꠇꠁꠟꠣ, “ꠅꠃ ꠀꠡꠣꠝꠤꠞꠦ ꠔꠥꠝꠞꠣ ꠗꠞꠤꠀ ꠀꠘꠤꠀ ꠀꠝꠣꠞ ꠉꠦꠍꠦ ꠘꠣꠟꠤꠡ ꠖꠤꠟꠣꠄ, ꠢꠦ ꠢꠇ꠆ꠇꠟ ꠝꠣꠘꠡꠞꠦ ꠛꠤꠉꠠꠣꠁꠟꠣꠞ, ꠅꠁꠟꠦ ꠀꠝꠤ ꠔ ꠔꠥꠝꠞꠣꠞ ꠍꠣꠝꠘꠦꠃ ꠔꠣꠞꠦ ꠎꠦꠞꠣ ꠇꠞꠟꠣꠝ, ꠔꠦ ꠔꠥꠝꠞꠣ ꠎꠦꠟꠣ ꠘꠣꠟꠤꠡ ꠖꠤꠍ, ꠔꠣꠞ ꠝꠣꠎꠦ ꠔ ꠁꠟꠣ ꠇꠥꠘꠥ ꠖꠥꠡꠃ ꠙꠣꠁꠟꠣꠝ ꠘꠣ।
LUK 23:15 ꠀꠞ ꠞꠣꠎꠣ ꠢꠦꠞꠥꠖꠦꠅ ꠘꠤꠌꠄ ꠔꠣꠞ ꠇꠥꠘꠥ ꠖꠥꠡ ꠙꠣꠁꠍꠂꠘ ꠘꠣ, ꠄꠞꠟꠣꠉꠤꠃ ꠔꠣꠁꠘ ꠔꠣꠞꠦ ꠀꠝꠣꠞ ꠉꠦꠍꠦ ꠚꠤꠞꠔ ꠙꠣꠑꠣꠁꠍꠂꠘ। ꠀꠝꠤ ꠖꠦꠈꠞꠣꠝ, ꠝꠃꠔꠞ ꠡꠣꠎꠣꠞ ꠎꠥꠇꠣ ꠇꠥꠘꠥ ꠖꠥꠡꠃ ꠢꠦ ꠇꠞꠍꠦ ꠘꠣ।
LUK 23:16 ꠔꠦ ꠀꠝꠤ ꠔꠣꠞꠦ ꠍꠤꠋꠟꠣꠖꠤ ꠝꠣꠞꠤꠀ ꠍꠣꠠꠤ ꠖꠤꠝꠥ।”
LUK 23:17 ꠀꠍꠟꠦ ꠢꠣꠇꠤꠝ ꠙꠤꠟꠣꠔꠞ ꠞꠦꠅꠀꠎꠅ ꠀꠍꠤꠟ, ꠔꠣꠁꠘ ꠀꠎꠣꠖꠤ ꠁꠖꠞ ꠅꠇ꠆ꠔꠅ ꠄꠇꠎꠘ ꠇꠄꠅꠖꠤꠞꠦ ꠈꠣꠟꠣꠍ ꠖꠤꠔꠣ।
LUK 23:18 ꠅꠁꠟꠦ ꠝꠣꠘꠡꠦ ꠄꠇꠟꠉꠦ ꠌꠤꠟ꠆ꠟꠣꠁꠀ ꠇꠁꠟ, “ꠘꠣ, ꠘꠣ, ꠅꠉꠥꠞꠦ ꠝꠣꠞꠤꠟꠣꠅ। ꠛꠣꠞꠣꠛ꠆ꠛꠣꠞꠦ ꠍꠣꠠꠤ ꠖꠦꠅ।”
LUK 23:19 ꠅꠃ ꠛꠣꠞꠣꠛ꠆ꠛꠣꠞꠦ ꠀꠉꠦ ꠎꠦꠟꠅ ꠢꠣꠞꠣꠁꠟ ꠅꠁꠍꠤꠟ, ꠢꠦ ꠎꠦꠞꠥꠎꠣꠟꠦꠝ ꠐꠣꠃꠘꠅ ꠈꠥꠘ ꠀꠞ ꠡꠘꠔ꠆ꠞꠣꠡ ꠇꠞꠍꠤꠟ।
LUK 23:20 ꠅꠁꠟꠦ ꠙꠤꠟꠣꠔꠦ ꠁꠍꠣꠞꠦ ꠍꠣꠠꠤ ꠖꠦꠅꠀꠞ ꠘꠤꠅꠔꠦ ꠢꠤꠞꠛꠣꠞ ꠔꠣꠞꠣꠞ ꠟꠉꠦ ꠛꠣꠔꠌꠤꠔ ꠇꠞꠟꠣ।
LUK 23:21 ꠔꠣ-ꠅ ꠔꠣꠞꠣ ꠄꠇꠟꠉꠦ ꠌꠤꠟ꠆ꠟꠣꠁꠀ ꠃꠑꠟ, “ꠅꠉꠥꠞꠦ ꠍꠟꠤꠛꠅ ꠖꠦꠅ, ꠍꠟꠤꠛꠅ ꠖꠦꠅ।” (ꠍꠟꠤꠛ ꠅꠁꠟ ꠟꠣꠇꠠꠤꠖꠤ ꠛꠣꠘꠣꠁꠟ ꠝꠣꠘꠡꠞꠦ ꠟꠐꠇꠣꠁꠀ ꠝꠣꠞꠣꠞ ꠄꠇ ꠎꠤꠘꠤꠡ।)
LUK 23:22 ꠙꠤꠟꠣꠔꠦ ꠔꠤꠘ-ꠔꠤꠘꠛꠣꠞ ꠔꠣꠞꠣꠞꠦ ꠎꠤꠇꠣꠁꠟꠣ, “ꠇꠦꠘꠦ? ꠁ ꠀꠡꠣꠝꠤꠄ ꠇꠤꠔꠣ ꠖꠥꠡ ꠇꠞꠍꠦ? ꠝꠃꠔꠞ ꠡꠣꠎꠣꠞ ꠎꠥꠇꠣ ꠔꠣꠞ ꠇꠥꠘꠥ ꠖꠥꠡꠃ ꠀꠝꠤ ꠙꠣꠁꠞꠣꠝ ꠘꠣ। ꠀꠝꠤ ꠈꠣꠟꠤ ꠍꠤꠋꠟꠣꠖꠤ ꠝꠣꠞꠤꠀ ꠔꠣꠞꠦ ꠍꠣꠠꠤ ꠖꠤꠝꠥ।”
LUK 23:23 ꠅꠁꠟꠦ ꠔꠣꠞꠣ ꠝꠣꠁꠞꠝꠥꠈꠤ ꠅꠁꠀ, ꠌꠤꠟ꠆ꠟꠣꠁꠀ, ꠝꠤꠍꠤꠟ ꠟꠣꠉꠣꠁꠟꠣ, “ꠅꠉꠥꠞꠦ ꠍꠟꠤꠛꠅ ꠟꠐꠇꠣꠅ, ꠍꠟꠤꠛꠅ ꠟꠐꠇꠣꠅ।” ꠌꠤꠟ꠆ꠟꠣꠘꠤꠞ ꠌꠥꠐꠦ ꠔꠣꠞꠣꠞ ꠖꠣꠛꠤ ꠙꠥꠞꠣ ꠅꠁꠟ।
LUK 23:24 ꠔꠣꠞꠣꠞ ꠖꠣꠛꠤ ꠝꠣꠚꠤꠇꠃ ꠙꠤꠟꠣꠔꠦ ꠞꠣꠄ ꠖꠤꠟꠣꠁꠟꠣ।
LUK 23:25 ꠔꠣꠁꠘ ꠢꠎꠞꠔ ꠁꠍꠣꠞꠦ ꠔꠣꠞꠣꠞ ꠛꠖ ꠈꠣꠁꠡ ꠝꠣꠚꠤꠇ ꠔꠣꠞꠣꠞ ꠀꠔꠅ ꠍꠣꠠꠤ ꠖꠤꠟꠣ ꠀꠞ ꠢꠃ ꠈꠥꠘꠤ-ꠡꠘꠔ꠆ꠞꠣꠡꠤꠞꠦ ꠈꠣꠟꠣꠍ ꠖꠤꠟꠣꠁꠟꠣ।
LUK 23:26 ꠢꠣꠇꠤꠝꠞ ꠞꠣꠄ ꠙꠣꠁꠀ ꠍꠤꠙꠣꠁ ꠅꠇꠟꠦ ꠁꠍꠣꠞꠦ ꠎꠣꠘꠦ ꠝꠣꠞꠤꠟꠤꠔꠣ ꠇꠞꠤ ꠁꠍꠣꠞꠦ ꠟꠁꠀ ꠎꠣꠁꠞꠣ। ꠅꠃ ꠡꠝꠄ ꠍꠣꠁꠝꠘ ꠘꠣꠝꠞ ꠇꠥꠞꠤꠘꠤ ꠄꠟꠣꠇꠣꠞ ꠄꠇꠎꠘ ꠝꠣꠘꠥꠡ ꠉꠣꠃ ꠕꠣꠇꠤ ꠐꠣꠃꠘꠅ ꠀꠅꠀꠔ ꠀꠍꠤꠟ। ꠔꠣꠞꠣ ꠅꠃ ꠛꠦꠐꠣꠞꠦ ꠗꠞꠤꠀ ꠟꠣꠇꠠꠤꠖꠤ ꠛꠣꠘꠣꠁꠟ ꠍꠟꠤꠛ ꠔꠣꠞ ꠇꠣꠘ꠆ꠖꠅ ꠔꠥꠟꠤꠀ ꠖꠤꠀ ꠇꠁꠟ, ꠢꠦ ꠅꠉꠥ ꠟꠁꠀ ꠁꠍꠣꠞ ꠈꠞꠦ ꠈꠞꠦ ꠎꠣꠁꠔ।
LUK 23:27 ꠁꠍꠣꠞ ꠈꠞꠦ ꠈꠞꠦ ꠛꠃꠔ ꠝꠣꠘꠥꠡ ꠀꠍꠤꠟ, ꠄꠞꠣꠞ ꠟꠉꠦ ꠛꠃꠔ ꠛꠦꠐꠤꠘꠅ ꠀꠍꠟꠣ। ꠔꠣꠞꠣ ꠔꠣꠘ ꠟꠣꠉꠤ ꠛꠤꠟꠣꠙ ꠀꠞ ꠀꠢꠣꠎꠣꠞꠤ ꠇꠞꠤꠀ ꠛꠥꠇꠥꠔ ꠕꠣꠛꠣꠁꠀ ꠇꠣꠘ꠆ꠖꠘ ꠟꠣꠉꠣꠁꠟꠣ।
LUK 23:28 ꠅꠁꠟꠦ ꠁꠍꠣꠄ ꠔꠣꠞꠣꠞ ꠛꠣꠄ ꠌꠣꠁꠀ ꠇꠁꠟꠣ, “ꠅ ꠎꠦꠞꠥꠎꠣꠟꠦꠝꠞ ꠝꠣꠁ ꠅꠇꠟ, ꠀꠝꠣꠞ ꠟꠣꠉꠤ ꠇꠣꠘ꠆ꠖꠤꠅ ꠘꠣ। ꠔꠥꠝꠞꠣ ꠘꠤꠎꠞ ꠟꠣꠉꠤ ꠀꠞ ꠘꠤꠎꠞ ꠙꠥꠀ-ꠙꠥꠠꠤꠞ ꠟꠣꠉꠤ ꠇꠣꠘ꠆ꠖꠅ।
LUK 23:29 ꠢꠥꠘꠅ, ꠅꠝꠘ ꠄꠇ ꠖꠤꠘ ꠀꠁꠛ, ꠎꠦꠛꠟꠣ ꠝꠣꠘꠡꠦ ꠇꠁꠛꠣ ꠀꠐꠇꠥꠞꠣ ꠛꠦꠐꠤꠘꠃ ꠛꠠ ꠇꠙꠣꠟꠤ। ꠎꠦꠞꠣꠞ ꠇꠥꠘꠥ ꠢꠥꠞꠥꠔ꠆ꠔꠣꠃ ꠅꠁꠍꠦ ꠘꠣ, ꠛꠥꠇꠞ ꠖꠥꠗꠅ ꠇꠥꠘꠥꠖꠤꠘ ꠈꠣꠅꠀꠁꠍꠦ ꠘꠣ, ꠔꠣꠞꠣꠃ ꠇꠙꠣꠟꠤ।
LUK 23:30 ꠢꠤ ꠡꠝꠄ ꠝꠣꠘꠡꠦ ꠛꠠ ꠛꠠ ꠙꠣꠠꠞꠦ ꠇꠁꠛ, ꠔꠥꠝꠞꠣ ꠀꠁꠀ ꠀꠝꠞꠣꠞ ꠃꠙꠞꠦ ꠙꠠꠅ। ꠙꠣꠠꠞ ꠐꠤꠟ꠆ꠟꠣ ꠅꠇꠟꠞꠦ ꠇꠁꠛ, ꠀꠝꠞꠣꠞꠦ ꠟꠥꠇꠣꠁꠀ ꠞꠣꠈꠅ।
LUK 23:31 ꠔꠥꠝꠞꠣ ꠖꠦꠈꠞꠣꠄ ꠘꠣ ꠘꠤ, ꠔꠣꠎꠣ ꠉꠣꠍꠞꠦꠃ ꠁꠔꠣꠄ ꠅꠃ ꠢꠣꠟꠔ ꠇꠞꠞꠣ, ꠔꠦ ꠢꠥꠇꠘꠣ ꠉꠣꠍꠞ ꠇꠥꠘ ꠖꠡꠣ ꠅꠁꠛ।”
LUK 23:32 ꠢꠎꠞꠔ ꠁꠍꠣꠞ ꠟꠉꠦ ꠇꠞꠤ ꠝꠣꠞꠣꠞ ꠟꠣꠉꠤ ꠍꠤꠙꠣꠁ ꠅꠇꠟꠦ ꠖꠥꠁꠎꠘ ꠖꠣꠉꠤ ꠀꠡꠣꠝꠤꠞꠦ ꠟꠁꠀ ꠀꠁꠟ।
LUK 23:33 ꠛꠣꠖꠦ ꠝꠣꠕꠣꠞ-ꠈꠥꠟꠤ ꠘꠣꠝꠞ ꠎꠣꠉꠣꠔ ꠀꠘꠤꠀ, ꠔꠣꠞꠣ ꠁꠍꠣꠞꠦ ꠀꠞ ꠢꠃ ꠖꠥꠁꠅ ꠖꠣꠉꠤ ꠀꠡꠣꠝꠤꠞꠦ ꠉꠣꠍꠞ ꠐꠥꠇꠞꠣꠖꠤ ꠛꠣꠘꠣꠁꠟ ꠍꠟꠤꠛꠅ ꠟꠐꠇꠣꠁꠟ, ꠄꠇꠎꠘꠞꠦ ꠔꠣꠘ ꠒꠣꠁꠘ ꠉꠣꠟꠣꠔ, ꠀꠞꠇ ꠎꠘꠞꠦ ꠛꠣꠃ ꠉꠣꠟꠣꠔ ꠟꠐꠇꠣꠁꠟ।
LUK 23:34 ꠅꠃ ꠡꠝꠄ ꠁꠍꠣꠄ ꠇꠁꠟꠣ, “ꠛꠣꠛꠣ, ꠄꠞꠣꠞꠦ ꠝꠣꠚ ꠇꠞꠤ ꠖꠤꠟꠣꠅ। ꠔꠣꠞꠣ ꠔ ꠛꠥꠎꠦꠞ ꠘꠣ ꠔꠣꠞꠣ ꠁꠔꠣ ꠇꠤꠔꠣ ꠇꠞꠦꠞ।” ꠛꠣꠖꠦ ꠔꠣꠞꠣ ꠔꠣꠘ ꠇꠣꠙꠠ-ꠌꠥꠙꠠ ꠘꠤꠔꠣ ꠇꠞꠤ ꠟꠐꠣꠞꠤ ꠝꠣꠞꠤꠀ ꠛꠣꠐꠣ-ꠛꠣꠐꠤ ꠇꠞꠟꠣ।
LUK 23:35 ꠛꠃꠔ ꠝꠣꠘꠡꠦ ꠃꠛꠣꠁꠀ ꠁꠔꠣ ꠖꠦꠈꠟꠣ, ꠅꠁꠟꠦ ꠔꠣꠞꠣꠞ ꠝꠥꠞꠛ꠆ꠛꠤ ꠅꠇꠟꠦ ꠁꠍꠣꠞꠦ ꠐꠤꠐꠇꠣꠞꠤ ꠝꠣꠞꠤꠀ ꠇꠁꠟꠣ, “ꠢꠦ ꠔ ꠛꠃꠔ ꠝꠣꠘꠡꠞ ꠎꠣꠘ ꠛꠣꠌꠣꠁꠔ, ꠢꠦ ꠎꠥꠖꠤ ꠢꠣꠍꠣꠃ ꠀꠟ꠆ꠟꠣꠞ ꠅꠀꠖꠣ ꠇꠞꠣ ꠢꠃ ꠀꠟ-ꠝꠍꠤ ꠅꠄ, ꠔꠦ ꠅꠈꠘ ꠔꠣꠞ ꠘꠤꠎꠞ ꠎꠣꠘꠅ ꠛꠣꠌꠣꠃꠇ।”
LUK 23:36 ꠞꠥꠝꠣꠘ ꠍꠤꠙꠣꠁ ꠅꠇꠟꠦꠅ ꠔꠣꠘꠞꠦ ꠟꠁꠀ ꠝꠡꠇꠣꠞꠤ ꠇꠞꠟ, ꠔꠣꠞꠣ ꠐꠦꠋꠉꠣ ꠀꠋꠉꠥꠞꠞ ꠡꠞꠛꠔ ꠟꠁꠀ ꠔꠣꠘ ꠇꠣꠘ꠆ꠖꠣꠔ ꠉꠤꠀ ꠇꠁꠟꠣ,
LUK 23:37 “ꠔꠥꠝꠤ ꠎꠥꠖꠤ ꠁꠢꠥꠖꠤ ꠅꠇꠟꠞ ꠢꠣꠍꠣꠞꠞ ꠛꠣꠖꠡꠣ ꠅꠅ, ꠔꠦ ꠅꠈꠘ ꠘꠤꠎꠞ ꠎꠣꠘ ꠛꠣꠌꠣꠅ ꠘꠣ।”
LUK 23:38 ꠔꠣꠘ ꠝꠣꠕꠣꠞ ꠃꠙꠞꠦ ꠄꠇꠈꠣꠘ ꠡꠣꠁꠘꠛꠞ꠆ꠒ ꠟꠣꠉꠣꠁꠟ ꠅꠁꠟ, ꠢꠘꠅ ꠟꠦꠈꠣ ꠀꠍꠤꠟ, “ꠢꠦ ꠁꠢꠥꠖꠤꠞ ꠛꠣꠖꠡꠣ।”
LUK 23:39 ꠅꠃ ꠡꠝꠄ ꠔꠣꠘ ꠟꠉꠦ ꠀꠞꠅ ꠎꠦ ꠖꠥꠁꠎꠘ ꠀꠡꠣꠝꠤꠞꠦ ꠍꠟꠤꠛꠅ ꠟꠐꠇꠣꠁꠟ ꠅꠁꠍꠤꠟ, ꠅꠔꠣ ꠄꠇꠎꠘꠦ ꠔꠣꠘꠞꠦ ꠐꠤꠐꠇꠣꠞꠤ ꠝꠣꠞꠤꠀ ꠇꠁꠟ, “ꠔꠥꠝꠤ ꠛꠥꠟꠦ ꠢꠃ ꠀꠟ-ꠝꠍꠤ? ꠔꠦ ꠅꠈꠘ ꠀꠝꠞꠣꠞꠦ ꠀꠞ ꠔꠥꠝꠣꠞꠦꠅ ꠛꠣꠌꠣꠅ ꠘꠣ।”
LUK 23:40 ꠅꠈꠣꠘ ꠢꠥꠘꠤꠀ ꠖꠥꠍꠞꠣ ꠎꠘꠦ ꠄꠞꠦ ꠗꠣꠝꠇꠤ ꠖꠤꠀ ꠇꠁꠟ, “ꠔꠥꠝꠤ ꠇꠤꠔꠣ ꠀꠟ꠆ꠟꠣꠞꠦꠅ ꠒꠞꠣꠅ ꠘꠣ ꠘꠤ? ꠔꠥꠝꠤꠅ ꠔ ꠅꠃ ꠢꠝꠣꠘ ꠡꠣꠎꠣ ꠙꠣꠁꠞꠣꠄ।
LUK 23:41 ꠀꠞ ꠀꠝꠞꠣ ꠔ ꠙꠣꠁꠞꠣꠝ ꠀꠝꠞꠣꠞ ꠃꠌꠤꠔ ꠡꠣꠎꠣ, ꠀꠝꠞꠣ ꠎꠦꠟꠣꠘ ꠇꠣꠝ ꠇꠞꠍꠤ ꠅꠃꠟꠣꠘ ꠙꠣꠁꠞꠣꠝ। ꠅꠁꠟꠦ ꠄꠁꠘ ꠔ ꠇꠥꠘꠥ ꠖꠥꠡꠃ ꠇꠞꠍꠂꠘ ꠘꠣ।”
LUK 23:42 ꠛꠣꠖꠦ ꠢꠦ ꠇꠁꠟ, “ꠅ ꠁꠍꠣ, ꠀꠙꠘꠦ ꠚꠤꠞꠤꠀ ꠀꠁꠀ ꠎꠦꠛꠟꠣ ꠘꠤꠎꠦ ꠛꠣꠖꠡꠣꠁ ꠇꠞꠛꠣ, ꠅꠃ ꠡꠝꠄ ꠈꠣꠘꠅ ꠀꠝꠣꠞꠦ ꠁꠀꠖ ꠞꠣꠈꠂꠘ ꠎꠣꠘꠥ।”
LUK 23:43 ꠔꠣꠁꠘ ꠇꠁꠟꠣ, “ꠀꠝꠤ ꠔꠥꠝꠣꠞꠦ ꠢꠇ ꠇꠕꠣ ꠇꠁꠞꠣꠝ, ꠔꠥꠝꠤ ꠀꠁꠎ ꠕꠣꠇꠤꠃ ꠀꠝꠣꠞ ꠟꠉꠦ ꠀꠞꠡꠦ-ꠀꠎꠤꠝꠅ ꠕꠣꠇꠛꠣꠄ।”
LUK 23:44 ꠅꠃ ꠡꠝꠄ ꠛꠦꠁꠟ ꠅꠘꠥꠝꠣꠘ ꠖꠥꠁꠚꠞ, ꠄꠞꠛꠣꠖ ꠕꠣꠇꠤ ꠎꠥꠢꠞꠞ ꠛꠣꠖ ꠙꠞ꠆ꠎꠘ꠆ꠔ ꠔꠤꠘ ꠊꠘ꠆ꠐꠣ ꠗꠞꠤ ꠀꠡ꠆ꠔꠣ ꠖꠦꠡ ꠀꠘ꠆ꠖꠣꠁꠞ ꠅꠁꠉꠦꠟ।
LUK 23:45 ꠡꠥꠞꠥꠎꠞ ꠚꠞ ꠘꠤꠜꠤꠉꠦꠟ। ꠄꠞꠝꠣꠎꠦ ꠎꠦꠞꠥꠎꠣꠟꠦꠝꠅ ꠇꠣꠛꠣ ꠊꠞꠞ ꠙꠛꠤꠔ꠆ꠞ ꠢꠦꠞꠦꠝ ꠡꠞꠤꠚꠞ ꠙꠞ꠆ꠖꠣꠈꠣꠘ, ꠃꠙꠞꠦ ꠕꠣꠇꠤ ꠔꠟ ꠙꠞ꠆ꠎꠘ꠆ꠔ ꠍꠤꠠꠤꠀ ꠖꠥꠁ ꠐꠥꠇꠞꠣ ꠅꠁꠉꠦꠟ।
LUK 23:46 ꠢꠦꠡꠦ ꠁꠍꠣꠄ ꠎꠥꠞꠦ ꠀꠅꠀꠎ ꠇꠞꠤꠀ ꠇꠁꠟꠣ, “ꠛꠣꠛꠣ, ꠀꠝꠣꠞ ꠞꠥꠢꠥ ꠔꠥꠝꠣꠞ ꠀꠔꠅ ꠡꠙꠤꠀ ꠖꠤꠟꠣꠁꠟꠣꠝ।” ꠅꠈꠣꠘ ꠇꠁꠀꠃ ꠀꠈꠦꠞꠤ ꠖꠝ ꠚꠣꠟꠣꠁꠀ ꠁꠘ꠆ꠔꠦꠇꠣꠟ ꠇꠞꠟꠣ।
LUK 23:47 ꠞꠥꠝꠣꠘ ꠍꠤꠙꠣꠁꠞ ꠎꠦ ꠛꠠ ꠅꠚꠤꠡꠣꠞ ꠢꠘꠅ ꠙꠣꠞꠣ ꠖꠦꠅꠀꠔ ꠀꠍꠟꠣ, ꠄꠁꠘ ꠁꠍꠣꠞ ꠝꠃꠔꠞ ꠁ ꠢꠣꠟꠔ ꠖꠦꠈꠤꠀ ꠀꠟ꠆ꠟꠣꠞ ꠔꠣꠞꠤꠚ ꠇꠞꠤꠀ ꠇꠁꠟꠣ, “ꠘꠤꠌ꠆ꠌꠄ, ꠁ ꠛꠦꠌꠣꠠꠣ ꠈꠣꠐꠤ ꠖꠤꠘꠖꠣꠞ ꠝꠣꠘꠥꠡ ꠀꠍꠟꠣ।”
LUK 23:48 ꠀꠞ ꠁꠔꠣ ꠖꠦꠈꠣꠞ ꠟꠣꠉꠤ ꠎꠔ ꠝꠣꠘꠥꠡ ꠖꠟꠣ ꠅꠁꠍꠟꠣ, ꠔꠣꠞꠣꠅ ꠁ ꠢꠣꠟꠔ ꠖꠦꠈꠤꠀ ꠛꠥꠇꠥꠔ ꠝꠣꠞꠤ ꠝꠣꠞꠤ ꠀꠢꠣꠎꠣꠞꠤ ꠇꠞꠤꠀ ꠚꠤꠞꠤꠀ ꠉꠦꠟꠣ।
LUK 23:49 ꠁꠍꠣꠞ ꠙꠞꠤꠌꠤꠔ ꠎꠘ ꠅꠇꠟꠦ, ꠀꠞ ꠉꠣꠟꠤꠟ ꠎꠤꠟꠣ ꠕꠣꠇꠤ ꠎꠦꠔꠣ ꠛꠦꠐꠤꠘ ꠔꠣꠘ ꠟꠉꠦ ꠅꠁꠀ ꠀꠁꠍꠟꠣ, ꠔꠣꠞꠣ ꠢꠇ꠆ꠇꠟꠦ ꠖꠥꠞꠁ ꠃꠛꠣꠁꠀ ꠁꠔꠣ ꠖꠦꠈꠟꠣ।
LUK 23:50 ꠖꠦꠡꠞ ꠚꠔꠥꠀ ꠇꠝꠤꠐꠤꠞ ꠄꠇꠎꠘ ꠁꠎ꠆ꠎꠔꠤ ꠝꠦꠝ꠆ꠛꠣꠞ ꠀꠍꠟꠣ, ꠄꠘ ꠘꠣꠝ ꠁꠃꠍꠥꠚ, ꠄꠘ ꠛꠣꠠꠤ ꠀꠞꠤꠝꠣꠕꠤꠀ ꠉꠣꠃꠔ। ꠄꠁꠘ ꠔ ꠙꠞꠦꠎꠉꠣꠞ ꠀꠞ ꠢꠇ ꠝꠣꠘꠥꠡ, ꠁꠍꠣꠞꠦ ꠎꠣꠘꠦ ꠝꠣꠞꠣꠞ ꠅꠃ ꠇꠥ-ꠗꠣꠘ꠆ꠖꠣꠔ ꠔꠣꠁꠘ ꠔꠣꠞꠣꠞ ꠟꠉꠦ ꠞꠣꠎꠤ ꠅꠁꠟꠣ ꠘꠣ। ꠔꠣꠁꠘ ꠀꠟ꠆ꠟꠣꠞ ꠛꠣꠖꠡꠣꠁꠞ ꠟꠣꠉꠤ ꠛꠣꠞ ꠌꠣꠅꠀꠔ ꠀꠍꠟꠣ।
LUK 23:52 ꠅꠃ ꠁꠃꠍꠥꠚ ꠢꠣꠇꠤꠝ ꠙꠤꠟꠣꠔꠞ ꠉꠦꠍꠦ ꠉꠦꠟꠣ, ꠉꠤꠀ ꠁꠍꠣꠞ ꠟꠣꠡ ꠘꠤꠔꠣ ꠌꠣꠁꠟꠣ।
LUK 23:53 ꠛꠣꠖꠦ ꠢꠎꠞꠔ ꠁꠍꠣꠞ ꠟꠣꠡ ꠍꠟꠤꠛ ꠕꠣꠇꠤ ꠟꠣꠝꠣꠁꠀ, ꠇꠣꠚꠘ ꠚꠤꠘ꠆ꠖꠣꠁꠟꠣ, ꠀꠞ ꠙꠣꠔ꠆ꠔꠞ ꠈꠥꠖꠤꠀ ꠛꠣꠘꠣꠁꠟ ꠅꠃꠟꠣ ꠄꠇ ꠇꠄꠛꠞꠞ ꠝꠣꠎꠦ ꠖꠣꠚꠘ ꠇꠞꠟꠣ, ꠁ ꠇꠄꠛꠞꠅ ꠇꠥꠘꠥꠖꠤꠘ ꠀꠞ ꠇꠦꠃꠞꠞꠦ ꠖꠣꠚꠘ ꠇꠞꠣ ꠅꠁꠍꠦ ꠘꠣ।
LUK 23:54 ꠁ ꠖꠤꠘ ꠀꠍꠤꠟ ꠁꠢꠥꠖꠤꠞ ꠎꠥꠝ꠆ꠝꠣꠞ ꠀꠉꠞ ꠖꠤꠘ, ꠕꠥꠠꠣ ꠛꠣꠖꠦꠃ ꠎꠥꠝ꠆ꠝꠣꠛꠣꠞ ꠡꠥꠞꠥ ꠅꠁꠎꠤꠛ।
LUK 23:55 ꠀꠞ ꠎꠦꠔꠣ ꠛꠦꠐꠤꠘ ꠉꠣꠟꠤꠟ ꠕꠣꠇꠤ ꠁꠍꠣꠞ ꠟꠉꠦ ꠅꠁꠀ ꠀꠁꠍꠟꠣ, ꠔꠣꠞꠣ ꠁꠃꠍꠥꠚꠞ ꠈꠞꠦ ꠈꠞꠦ ꠉꠤꠀ ꠢꠃ ꠇꠄꠛꠞ ꠖꠦꠈꠟꠣ, ꠀꠞ ꠇꠤꠟꠣꠈꠣꠘ ꠔꠣꠘ ꠟꠣꠡ ꠖꠣꠚꠘ ꠇꠞꠣ ꠅꠁꠟ ꠄꠅꠔꠣ ꠖꠦꠈꠟꠣ।
LUK 23:56 ꠛꠣꠖꠦ ꠔꠣꠞꠣ ꠚꠤꠞꠤꠀ ꠉꠤꠀ ꠢꠣꠞꠤ ꠀꠔꠞ-ꠉꠥꠟꠣꠙ ꠀꠞ ꠌꠘ꠆ꠖꠘ-ꠝꠟꠝ ꠛꠣꠘꠣꠁꠟꠣ, ꠢꠦꠡꠦ ꠡꠞꠤꠅꠔꠞ ꠢꠥꠇꠥꠝ ꠝꠣꠚꠤꠇ ꠎꠥꠝ꠆ꠝꠣꠞ ꠖꠤꠘ ꠎꠤꠞꠣꠁꠟꠣ।
LUK 24:1 ꠅꠃ ꠛꠦꠐꠤꠘ꠆ꠔꠦ ꠎꠦꠔꠣ ꠀꠔꠞ-ꠉꠥꠟꠣꠙ ꠔꠤꠀꠞ ꠇꠞꠍꠟꠣ, ꠢꠣꠙ꠆ꠔꠣꠞ ꠙꠄꠟꠣ ꠖꠤꠘ ꠈꠥꠛ ꠍꠛꠞꠦ ꠔꠣꠞꠣ ꠅꠔꠣ ꠟꠁꠀ, ꠁꠍꠣꠞ ꠇꠄꠛꠞꠞ ꠇꠣꠘ꠆ꠖꠣꠔ ꠀꠁꠟꠣ।
LUK 24:2 ꠀꠁꠀ ꠖꠦꠈꠟꠣ, ꠇꠄꠛꠞꠞ ꠝꠥꠈꠞ ꠙꠣꠔ꠆ꠔꠞꠈꠣꠘ ꠢꠞꠣꠁꠟ ꠅꠁꠉꠦꠍꠦ।
LUK 24:3 ꠖꠦꠈꠤꠀ ꠔꠣꠞꠣ ꠇꠄꠛꠞꠞ ꠜꠤꠔꠞꠦ ꠢꠣꠝꠣꠁꠀ ꠖꠦꠈꠂꠘ, ꠁꠍꠣꠞ ꠟꠣꠡ ꠔ ꠇꠄꠛꠞꠅ ꠘꠣꠁ।
LUK 24:4 ꠔꠦꠃ ꠔꠣꠞꠣ ꠌꠤꠘ꠆ꠔꠣꠔ ꠙꠠꠤꠉꠦꠟꠣ। ꠅꠃ ꠡꠝꠄ ꠗꠟꠣ ꠌꠇꠌꠇꠣ ꠇꠣꠙꠠ ꠚꠤꠘ꠆ꠘ ꠖꠥꠁꠎꠘ ꠀꠁꠀ ꠔꠣꠞꠣꠞ ꠇꠣꠘ꠆ꠖꠣꠔ ꠃꠛꠣꠁꠟꠣ।
LUK 24:5 ꠄꠞꠣꠞꠦ ꠖꠦꠈꠤꠀ ꠛꠦꠐꠤꠘ꠆ꠔꠦ ꠒꠞꠣꠁꠀ ꠝꠣꠕꠣ ꠘꠥꠀꠁꠟꠤꠟꠣ। ꠅꠃ ꠖꠥꠁꠅꠎꠘꠦ ꠔꠣꠞꠣꠞꠦ ꠇꠁꠟꠣ, “ꠅꠉ, ꠔꠥꠝꠤꠔꠣꠁꠘ ꠎꠤꠘ꠆ꠖꠣꠞꠦ ꠇꠦꠘꠦ ꠝꠥꠞ꠆ꠖꠣ ꠅꠇꠟꠞ ꠝꠣꠎꠦ ꠀꠁꠀ ꠔꠥꠇꠣꠁꠞꠣꠄ?
LUK 24:6 ꠔꠣꠁꠘ ꠔ ꠅꠘꠅ ꠘꠣꠁ, ꠔꠣꠁꠘ ꠎꠤꠘ꠆ꠖꠣ ꠅꠁꠉꠦꠍꠂꠘ। ꠔꠣꠁꠘ ꠉꠣꠟꠤꠟꠅ ꠕꠣꠇꠔꠦ ꠔꠥꠝꠞꠣꠞ ꠉꠦꠍꠦ ꠇꠤꠔꠣ ꠇꠁꠍꠟꠣ, ꠝꠘꠅ ꠇꠞꠤꠀ ꠖꠦꠈꠅ।
LUK 24:7 ꠔꠣꠁꠘ ꠇꠁꠍꠟꠣ ꠘꠣ ꠘꠤ, ꠛꠤꠘ-ꠀꠖꠝꠞꠦ ꠘꠣꠚꠞꠝꠣꠘ ꠝꠣꠘꠡꠞ ꠀꠔꠅ ꠗꠞꠣꠁ ꠖꠦꠅꠀ ꠅꠁꠛ। ꠔꠣꠘꠞꠦ ꠍꠟꠤꠛꠅ ꠟꠐꠇꠣꠁꠀ ꠎꠣꠘꠦ ꠝꠣꠞꠣ ꠅꠁꠛ, ꠅꠁꠟꠦ ꠝꠃꠔꠞ ꠔꠤꠘ ꠖꠤꠘꠞ ꠖꠤꠘ ꠢꠤꠞꠛꠣꠞ ꠎꠤꠘ꠆ꠖꠣ ꠅꠁꠀ ꠃꠑꠛꠣ?”
LUK 24:8 ꠅꠈꠣꠘ ꠢꠥꠘꠔꠦꠃ ꠁꠍꠣꠞ ꠀꠉꠞ ꠇꠕꠣ ꠅꠇꠟ ꠔꠣꠞꠣꠞ ꠝꠘꠅ ꠅꠁꠉꠦꠟ।
LUK 24:9 ꠔꠣꠞꠣ ꠇꠛꠞꠡ꠆ꠕꠣꠘ ꠕꠣꠇꠤ ꠚꠤꠞꠤꠀ ꠉꠤꠀ, ꠢꠃ ꠄꠉꠣꠞꠅ ꠎꠘ ꠍꠣꠢꠣꠛꠤꠞꠦ ꠀꠞ ꠛꠣꠇꠤ ꠢꠇꠟꠞ ꠉꠦꠍꠦ ꠈꠛꠞ ꠎꠣꠘꠣꠁꠟꠣ।
LUK 24:10 ꠝꠉꠖꠤꠟꠤꠘꠤ ꠝꠞꠤꠅꠝ, ꠁꠃꠢꠣꠘ꠆ꠘꠣ, ꠁꠀꠇꠥꠛꠞ ꠝꠣ ꠝꠞꠤꠅꠝ ꠀꠞ ꠔꠣꠞꠣꠞ ꠟꠉꠦ ꠎꠦꠔꠣ ꠛꠦꠐꠤꠘ ꠀꠍꠟꠣ, ꠄꠞꠣ ꠢꠇꠟꠦ ꠉꠤꠀ ꠁ ꠈꠛꠞ ꠇꠁꠟꠣ।
LUK 24:11 ꠅꠁꠟꠦ ꠎꠦꠞꠣ ꠁꠔꠣ ꠢꠥꠘꠟꠣ, ꠄꠞꠣ ꠝꠘꠅ ꠇꠞꠟꠣ ꠁꠔꠣ ꠘꠤꠌꠄ ꠛꠣꠎꠦ ꠝꠣꠔ, ꠁꠔꠣ ꠛꠦꠐꠤꠘ꠆ꠔꠞ ꠝꠣꠔ ꠔꠣꠞꠣ ꠄꠇꠤꠘ ꠇꠞꠟꠣ ꠘꠣ।
LUK 24:12 ꠅꠁꠟꠦ ꠙꠤꠔꠞ ꠖꠃꠠꠣꠁꠀ ꠇꠄꠛꠞꠞ ꠇꠣꠘ꠆ꠖꠣꠔ ꠉꠦꠟꠣ। ꠉꠤꠀ ꠃꠘ꠆ꠖꠣ ꠅꠁꠀ ꠖꠦꠈꠟꠣ, ꠈꠣꠟꠤ ꠇꠣꠚꠘꠈꠣꠘ ꠙꠠꠤ ꠞꠁꠍꠦ। ꠁꠔꠣ ꠖꠦꠈꠤꠀ ꠔꠣꠁꠘ ꠔꠣꠁꠎ꠆ꠎꠥꠛ ꠛꠘꠤꠀ ꠚꠤꠞꠔ ꠀꠁꠟꠣ।
LUK 24:13 ꠅꠃ ꠖꠤꠘꠃ ꠖꠥꠁꠎꠘ ꠡꠣꠉꠞꠤꠖ ꠎꠦꠞꠥꠎꠣꠟꠦꠝ ꠕꠣꠇꠤ ꠡꠣꠔ ꠝꠣꠁꠟ ꠖꠥꠞꠁ ꠁꠝꠥꠀꠍ ꠘꠣꠝꠞ ꠄꠇ ꠉꠣꠃꠔ ꠎꠣꠅꠀꠔ ꠀꠍꠟꠣ।
LUK 24:14 ꠙꠕꠅ ꠔꠣꠞꠣ ꠅꠔꠣ ꠛꠦꠙꠣꠞ ꠅꠇꠟ ꠟꠁꠀꠃ ꠝꠣꠔꠤ ꠝꠣꠔꠤ ꠎꠣꠁꠞꠣ।
LUK 24:15 ꠔꠣꠞꠣ ꠝꠣꠔꠅ ꠞꠁꠍꠂꠘ ꠅꠃ ꠡꠝꠄ ꠀꠈꠔꠣꠃ ꠁꠍꠣ ꠘꠤꠎꠦ ꠔꠣꠞꠣꠞ ꠇꠣꠘ꠆ꠖꠣꠔ ꠀꠁꠀ ꠄꠇꠟꠉꠦ ꠀꠐꠣ ꠗꠞꠟꠣ।
LUK 24:16 ꠅꠁꠟꠦ ꠔꠣꠞꠣꠞ ꠌꠈꠥꠔ ꠍꠣꠐꠣ ꠟꠣꠉꠤ ꠉꠦꠍꠤꠟ, ꠔꠣꠞꠣ ꠁꠍꠣꠞꠦ ꠖꠦꠈꠤꠀꠅ ꠌꠤꠘꠟꠣ ꠘꠣ।
LUK 24:17 ꠁꠍꠣꠄ ꠔꠣꠞꠣꠞꠦ ꠎꠤꠇꠣꠁꠟꠣ, “ꠀꠐꠤ ꠀꠐꠤ ꠀꠙꠘꠣꠞꠣ ꠁꠔꠣ ꠇꠤꠔꠣꠞ ꠛꠣꠔꠌꠤꠔ ꠇꠞꠞꠣ?” ꠁꠈꠣꠘ ꠢꠥꠘꠤꠀ ꠄꠞꠣ ꠝꠥꠈ ꠛꠦꠎꠣꠞ ꠇꠞꠤ ꠃꠛꠣꠁ ꠉꠦꠟꠣ।
LUK 24:18 ꠄꠞꠝꠣꠎꠦ ꠇꠤꠟꠤꠅꠚꠣꠍ ꠘꠣꠝꠦ ꠄꠇꠎꠘꠦ ꠁꠍꠣꠞꠦ ꠇꠁꠟꠣ, “ꠀꠙꠘꠦꠃ ꠄꠇꠝꠣꠔ꠆ꠞ ꠎꠘ, ꠎꠦꠁꠘ ꠢꠥꠘꠍꠂꠘ ꠘꠣ ꠁ ꠇꠄꠖꠤꠘꠦ ꠎꠦꠞꠥꠎꠣꠟꠦꠝꠅ ꠇꠤꠔꠣ ꠊꠐꠤꠍꠦ?”
LUK 24:19 ꠁꠍꠣꠄ ꠔꠣꠞꠣꠞꠦ ꠎꠤꠇꠣꠁꠟꠣ, “ꠇꠤꠔꠣ ꠊꠐꠤꠍꠦ ꠛꠣ?” ꠔꠣꠞꠣ ꠇꠁꠟꠣ, “ꠘꠣꠍꠣꠞꠔꠞ ꠁꠍꠣꠞꠦ ꠟꠁꠀ ꠎꠔꠔꠣ ꠊꠐꠤꠍꠦ। ꠔꠣꠁꠘ ꠔ ꠀꠟ꠆ꠟꠣꠞ ꠘꠛꠤ, ꠔꠣꠘ ꠝꠥꠈꠞ ꠎꠛꠣꠘ ꠀꠞ ꠇꠣꠝꠦ-ꠇꠣꠎꠦ ꠀꠟ꠆ꠟꠣꠞ ꠘꠎꠞꠅ ꠀꠞ ꠢꠇꠟ ꠝꠣꠘꠡꠞ ꠌꠈꠥꠔꠅ ꠈꠥꠛ ꠔꠣꠇ꠆ꠇꠔꠤ ꠀꠞ ꠝꠞꠔꠥꠛꠣꠀꠟꠣ ꠘꠛꠤ ꠀꠍꠟꠣ।
LUK 24:20 ꠀꠝꠞꠣꠞ ꠛꠠ ꠁꠝꠣꠝ ꠀꠞ ꠝꠥꠞꠛ꠆ꠛꠤ ꠅꠇꠟꠦ ꠔꠣꠘꠞꠦ ꠎꠣꠘꠦ ꠝꠣꠞꠣꠞ ꠟꠣꠉꠤ ꠞꠥꠝꠣꠘ ꠅꠇꠟꠞ ꠀꠔꠅ ꠗꠞꠣꠁꠀ ꠖꠤꠟꠣꠁꠟꠣ, ꠔꠣꠞꠣ ꠔꠣꠘꠞꠦ ꠘꠤꠀ ꠍꠟꠤꠛꠞ ꠃꠙꠞꠦ ꠎꠣꠘꠦ ꠝꠣꠞꠤꠟꠤꠍꠦ।
LUK 24:21 ꠅꠁꠟꠦ ꠀꠝꠞꠣꠞ ꠀꠡꠣ ꠀꠍꠤꠟ, ꠔꠣꠁꠘ ꠛꠘꠤ ꠁꠍꠞꠣꠁꠟꠞꠦ ꠀꠎꠣꠖ ꠇꠞꠛꠣ। ꠀꠁꠎ ꠔꠤꠘ ꠖꠤꠘ ꠅꠁꠟ ꠁ ꠊꠐꠘꠣ ꠊꠐꠤꠍꠦ।
LUK 24:22 ꠀꠞ ꠀꠝꠞꠣꠞ ꠟꠉꠞ ꠇꠄꠎꠘ ꠛꠦꠐꠤ ꠝꠣꠘꠡꠦ ꠀꠁꠀ ꠀꠝꠞꠣꠞꠦ ꠔꠣꠁꠎ꠆ꠎꠥꠛ ꠛꠣꠘꠣꠁꠟꠤꠍꠂꠘ। ꠔꠣꠞꠣ ꠈꠥꠛ ꠍꠛꠞꠦ ꠁꠍꠣꠞ ꠇꠄꠛꠞꠅ ꠉꠦꠍꠟꠣ,
LUK 24:23 ꠉꠤꠀ ꠖꠦꠈꠍꠂꠘ, ꠔꠣꠘ ꠟꠣꠡ ꠘꠣꠁ। ꠔꠣꠞꠣ ꠚꠤꠞꠔ ꠀꠁꠀ ꠇꠁꠟꠣ, ꠔꠣꠞꠣ ꠚꠤꠞꠤꠡ꠆ꠔꠣꠞ ꠖꠞꠡꠘ ꠙꠣꠁꠍꠂꠘ, ꠀꠞ ꠚꠤꠞꠤꠡ꠆ꠔꠣ ꠅꠇꠟꠦ ꠔꠣꠞꠣꠞꠦ ꠇꠁꠍꠂꠘ, ꠁꠍꠣ ꠎꠤꠘ꠆ꠖꠣ ꠀꠍꠂꠘ।
LUK 24:24 ꠛꠣꠖꠦ ꠀꠝꠞꠣꠞ ꠟꠉꠦ ꠎꠣꠞꠣ ꠀꠍꠟꠣ, ꠔꠣꠞꠣꠞ ꠝꠣꠎꠦꠅ ꠇꠦꠃ ꠇꠦꠃ ꠇꠄꠛꠞꠅ ꠉꠤꠀ ꠖꠦꠈꠟꠣ, ꠛꠦꠐꠤꠘ꠆ꠔꠞ ꠇꠕꠣꠃ ꠢꠣꠍꠣ, ꠁꠍꠣꠞ ꠟꠣꠡ ꠇꠄꠛꠞꠅ ꠘꠣꠁ।”
LUK 24:25 ꠢꠇꠟꠔꠣ ꠢꠥꠘꠤꠀ ꠁꠍꠣꠄ ꠔꠣꠞꠣꠞꠦ ꠇꠁꠟꠣ, “ꠀꠙꠘꠣꠞꠣ ꠔ ꠇꠥꠘ꠆ꠔꠣꠃ ꠛꠥꠎꠂꠘ ꠘꠣ। ꠀꠙꠘꠣꠁꠘ꠆ꠔꠞ ꠖꠤꠟ ꠅꠟꠣ ꠅꠡꠣꠠ ꠛꠘꠤꠉꠦꠍꠦ ꠘꠤ? ꠀꠟ꠆ꠟꠣꠞ ꠘꠛꠤ ꠅꠇꠟꠦ ꠎꠦꠔꠣ ꠛꠣꠔꠣꠁꠀ ꠉꠦꠍꠂꠘ, ꠅꠔꠣꠞꠦꠅ ꠀꠙꠘꠣꠞꠣ ꠄꠇꠤꠘ ꠇꠞꠞꠣ ꠘꠣ।
LUK 24:26 ꠘꠛꠤ ꠅꠇꠟꠦ ꠇꠁꠍꠂꠘ ꠘꠣ ꠘꠤ, ꠀꠟ꠆ꠟꠣꠞ ꠅꠀꠖꠣ ꠇꠞꠣ ꠀꠟ-ꠝꠍꠤꠄ ꠖꠥꠈ-ꠝꠍꠤꠛꠔ ꠡꠁꠎ꠆ꠎ ꠇꠞꠤꠀ ꠢꠣꠞꠤ ꠔꠣꠘ ꠎꠣꠟꠣꠟ ꠀꠞ ꠉꠃꠞꠛ ꠢꠣꠍꠤꠟ ꠇꠞꠛꠣ?”
LUK 24:27 ꠛꠣꠖꠦ ꠔꠣꠁꠘ ꠝꠥꠍꠣ ꠘꠛꠤꠞ ꠔꠃꠞꠣꠔ ꠇꠤꠔꠣꠛ ꠕꠣꠇꠤ ꠡꠥꠞꠥ ꠇꠞꠤꠀ, ꠢꠇ꠆ꠇꠟ ꠘꠛꠤꠞ ꠇꠤꠔꠣꠛꠞ ꠝꠣꠎꠦ ꠔꠣꠘ ꠛꠦꠙꠣꠞꠦ ꠎꠔꠔꠣ ꠟꠦꠈꠣ ꠀꠍꠦ, ꠅꠔꠣ ꠔꠣꠞꠣꠞꠦ ꠛꠥꠎꠣꠁꠟꠣ।
LUK 24:28 ꠀꠞ ꠎꠦ ꠉꠣꠃꠔ ꠎꠣꠁꠔꠣ ꠇꠞꠤ ꠔꠣꠞꠣ ꠞꠅꠀꠘꠣ ꠖꠤꠍꠟꠣ, ꠢꠃ ꠉꠣꠃꠞ ꠇꠣꠘ꠆ꠖꠣꠔ ꠀꠁꠟꠦ ꠁꠍꠣꠄ ꠀꠞꠅ ꠖꠥꠞꠁ ꠎꠣꠅꠀꠞ ꠜꠣꠛ ꠖꠦꠈꠣꠁꠟꠣ।
LUK 24:29 ꠅꠁꠟꠦ ꠔꠣꠞꠣ ꠈꠥꠛ ꠝꠤꠘꠔ-ꠇꠣꠎ꠆ꠎꠤ ꠇꠞꠤꠀ ꠔꠣꠘꠞꠦ ꠇꠁꠟꠣ, “ꠅꠈꠘ ꠔ ꠛꠦꠁꠟ ꠉꠦꠍꠦꠉꠤ, ꠢꠣꠁꠘ꠆ꠎꠣ ꠅꠁꠎꠣꠞ, ꠔꠦ ꠞꠣꠁꠔꠈꠣꠘ ꠀꠙꠘꠦ ꠀꠝꠞꠣꠞ ꠉꠦꠍꠦ ꠞꠁ ꠎꠣꠃꠇ꠆ꠇꠣ।” ꠅꠃ ꠔꠣꠁꠘ ꠞꠅꠀꠞ ꠟꠣꠉꠤ ꠛꠣꠠꠤꠔ ꠢꠣꠝꠣꠁꠟꠣ।
LUK 24:30 ꠛꠣꠖꠦ ꠎꠦꠛꠟꠣ ꠈꠣꠘꠤꠔ ꠛꠁꠟꠣ, ꠅꠃ ꠡꠝꠄ ꠁꠍꠣꠄ ꠞꠥꠐꠤ ꠟꠁꠀ ꠐꠥꠇꠞꠣꠁꠀ ꠀꠟ꠆ꠟꠣꠞ ꠡꠥꠇꠞꠤꠀ ꠀꠖꠣꠄ ꠇꠞꠤꠀ ꠔꠣꠞꠣꠞꠦ ꠖꠤꠟꠣ।
LUK 24:31 ꠔꠦꠃ ꠔꠣꠞꠣꠞ ꠌꠃꠈ ꠈꠥꠟꠤꠉꠦꠟ, ꠔꠣꠞꠣ ꠁꠍꠣꠞꠦ ꠌꠤꠘꠤꠟꠤꠟꠣ। ꠌꠤꠘꠣꠞ ꠟꠉꠦ ꠟꠉꠦꠃ ꠔꠣꠁꠘ ꠄꠞꠣꠞ ꠉꠦꠍ ꠕꠣꠇꠤ ꠀꠃꠠꠤ ꠖꠤꠟꠣꠁꠟꠣ।
LUK 24:32 ꠛꠣꠖꠦ ꠔꠣꠞꠣ ꠄꠇꠦ-ꠅꠁꠘ꠆ꠘꠞꠦ ꠇꠁꠟꠣ, “ꠙꠕꠅ ꠎꠦꠛꠟꠣ ꠔꠣꠁꠘ ꠀꠝꠞꠣꠞ ꠟꠉꠦ ꠛꠣꠔꠌꠤꠔ ꠇꠞꠍꠟꠣ, ꠀꠝꠞꠣꠞꠦ ꠀꠟ꠆ꠟꠣꠞ ꠇꠣꠟꠣꠝ ꠛꠥꠎꠣꠁꠀ ꠖꠤꠍꠟꠣ, ꠢꠃ ꠡꠝꠄ ꠀꠝꠞꠣꠞ ꠖꠤꠟꠞ ꠝꠣꠎꠦ ꠄꠇ ꠄꠡꠇꠤ ꠙꠄꠖꠣ ꠅꠁꠍꠤꠟ ꠘꠣ ꠘꠤ?”
LUK 24:33 ꠟꠉꠦ ꠟꠉꠦ ꠔꠣꠞꠣ ꠖꠥꠁꠅꠎꠘ ꠛꠣꠞ ꠅꠁꠀ ꠎꠦꠞꠥꠎꠣꠟꠦꠝ ꠀꠁꠟꠣ। ꠀꠁꠀ ꠢꠃ ꠄꠉꠣꠞꠅ ꠎꠘ ꠍꠣꠢꠣꠛꠤ ꠀꠞ ꠛꠣꠇꠤ ꠢꠇ꠆ꠇꠟꠞꠦ ꠄꠇꠈꠣꠘꠅ ꠛꠅꠀꠔ ꠙꠣꠁꠟꠣ।
LUK 24:34 ꠔꠣꠞꠣ ꠅꠘꠅ ꠛꠁꠀ ꠅꠔꠣ ꠝꠣꠔꠤꠞꠣ, ꠢꠎꠞꠔ ꠁꠍꠣ ꠀꠍꠟꠦꠃ ꠎꠤꠘ꠆ꠖꠣ ꠅꠁꠉꠦꠍꠂꠘ, ꠎꠤꠘ꠆ꠖꠣ ꠅꠁꠀ ꠍꠣꠁꠝꠘ-ꠙꠤꠔꠞꠞꠦ ꠖꠦꠈꠣ ꠖꠤꠍꠂꠘ।
LUK 24:35 ꠅꠃ ꠡꠝꠄ ꠢꠃ ꠖꠥꠁꠅꠎꠘꠦꠅ ꠄꠞꠣꠞꠦ ꠇꠁꠟꠣ, ꠙꠕꠞ ꠝꠣꠎꠦ ꠔꠣꠞꠣ ꠇꠤꠟꠣ ꠁꠍꠣꠞ ꠖꠦꠈꠣ ꠙꠣꠁꠟꠣ, ꠞꠥꠐꠤ ꠐꠥꠇꠞꠣꠁꠛꠣꠞ ꠡꠝꠄ ꠇꠤꠟꠣ ꠔꠣꠘꠞꠦ ꠌꠤꠘꠟꠣ, ꠁꠔꠣ ꠢꠇꠟꠔꠣ ꠎꠣꠘꠣꠁꠟꠣ।
LUK 24:36 ꠍꠣꠢꠣꠛꠤ ꠅꠇꠟꠦ ꠔ ꠅꠔꠣ ꠟꠁꠀ ꠛꠣꠔꠌꠤꠔ ꠇꠞꠞꠣ, ꠅꠃ ꠡꠝꠄ ꠀꠈꠔꠣꠃ ꠁꠍꠣ ꠘꠤꠎꠦ ꠅꠘꠅ ꠀꠁꠀ ꠔꠣꠞꠣꠞ ꠝꠣꠎꠈꠣꠘꠅ ꠃꠛꠣꠁꠀ ꠇꠁꠟꠣ, “ꠀꠍꠍꠣꠟꠣꠝꠥ ꠀꠟꠣꠁꠇꠥꠝ।”
LUK 24:37 ꠔꠣꠘꠦ ꠖꠦꠈꠤꠀ ꠔꠣꠞꠣ ꠈꠥꠛ ꠒꠞꠣꠁꠉꠦꠟꠣ, ꠝꠘꠅ ꠇꠞꠟꠣ ꠜꠥꠔ ꠀꠁꠍꠦ।
LUK 24:38 ꠁꠍꠣꠄ ꠔꠣꠞꠣꠞꠦ ꠇꠁꠟꠣ, “ꠔꠥꠝꠞꠣ ꠅꠔ ꠅꠡ꠆ꠕꠤꠞ ꠅꠁꠉꠦꠟꠣꠄ ꠇꠦꠘꠦ? ꠇꠦꠘꠦ ꠔꠥꠝꠞꠣꠞ ꠖꠤꠟꠅ ꠡꠘ꠆ꠖꠄ ꠢꠣꠝꠣꠁꠟ?
LUK 24:39 ꠀꠝꠣꠞ ꠀꠔ-ꠙꠣꠅ ꠜꠣꠟꠣꠝꠘ꠆ꠔꠦ ꠖꠦꠈꠅ, ꠖꠦꠈꠅ ꠘꠣ, ꠁ ꠔ ꠀꠝꠤ। ꠀꠝꠣꠞꠦ ꠀꠔꠣꠁꠀ ꠖꠦꠈꠅ, ꠜꠥꠔꠞ ꠔ ꠀꠝꠣꠞ ꠟꠣꠈꠣꠘ ꠀꠒ꠆ꠒꠤ-ꠝꠣꠋꠡ ꠘꠣꠁ।”
LUK 24:40 ꠅꠈꠣꠘ ꠇꠁꠀ ꠔꠣꠁꠘ ꠘꠤꠎꠞ ꠀꠔ-ꠙꠣꠅ ꠔꠣꠞꠣꠞꠦ ꠖꠦꠈꠣꠁꠟꠣ।
LUK 24:41 ꠅꠁꠟꠦ ꠔꠣꠞꠣ ꠔꠣꠘꠦ ꠖꠦꠈꠤꠀ ꠅꠔ ꠛꠦꠡꠤ ꠈꠥꠡꠤ ꠅꠁꠟꠣ, ꠈꠥꠡꠤꠞ ꠌꠥꠐꠦ ꠛꠦꠖꠤꠡꠣ ꠛꠘꠤꠉꠦꠟꠣ, ꠇꠥꠘ꠆ꠔꠣ ꠛꠤꠡ꠆ꠛꠣꠡ ꠇꠞꠔꠣ ꠙꠣꠞꠟꠣ ꠘꠣ। ꠔꠦꠃ ꠁꠍꠣꠄ ꠔꠣꠞꠣꠞꠦ ꠇꠁꠟꠣ, “ꠁꠘꠅ ꠈꠣꠁꠛꠣꠞ ꠇꠥꠘ꠆ꠔꠣ ꠀꠍꠦ ꠘꠤ?”
LUK 24:42 ꠔꠣꠞꠣ ꠄꠇ ꠐꠥꠇꠞꠣ ꠛꠤꠞꠣꠘ ꠝꠣꠍ ꠔꠣꠘꠞꠦ ꠖꠤꠟꠣ।
LUK 24:43 ꠅꠃ ꠝꠣꠍ ꠔꠣꠁꠘ ꠢꠇꠟꠞ ꠍꠣꠝꠘꠦ ꠈꠣꠁꠟꠣ।
LUK 24:44 ꠈꠣꠁꠀ ꠄꠞꠣꠞꠦ ꠇꠁꠟꠣ, “ꠀꠝꠤ ꠎꠦꠛꠟꠣ ꠔꠥꠝꠞꠣꠞ ꠟꠉꠦ ꠀꠍꠟꠣꠝ, ꠢꠃ ꠡꠝꠄ ꠔꠥꠝꠞꠣꠞꠦ ꠇꠁꠍꠟꠣꠝ ꠘꠣ ꠘꠤ, ꠝꠥꠍꠣ ꠘꠛꠤꠞ ꠔꠃꠞꠣꠔ ꠡꠞꠤꠚ, ꠘꠛꠤ ꠅꠇꠟꠞ ꠍꠢꠤꠚꠣ, ꠀꠞ ꠎꠛꠥꠞ ꠡꠞꠤꠚꠞ ꠝꠣꠎꠦ ꠎꠦꠔꠣ ꠟꠦꠈꠣ ꠀꠍꠦ, ꠁꠔꠣ ꠢꠇꠟꠔꠣ ꠘꠤꠌ꠆ꠌꠤꠔ ꠚꠟꠤꠛ।”
LUK 24:45 ꠅꠈꠣꠘ ꠇꠁꠀ ꠢꠣꠞꠤ, ꠔꠣꠁꠘ ꠍꠣꠢꠣꠛꠤ ꠅꠇꠟꠞ ꠖꠤꠟꠞ ꠖꠥꠀꠞ ꠈꠥꠟꠤ ꠖꠤꠟꠣ, ꠎꠣꠔꠦ ꠀꠟ꠆ꠟꠣꠞ ꠇꠣꠟꠣꠝꠞ ꠝꠣꠘꠤ ꠄꠞꠣ ꠛꠥꠎꠔꠣ ꠙꠣꠞꠂꠘ।
LUK 24:46 ꠔꠣꠁꠘ ꠇꠁꠟꠣ, “ꠀꠟ꠆ꠟꠣꠞ ꠇꠣꠟꠣꠝꠅ ꠟꠦꠈꠣ ꠀꠍꠦ, ꠀꠟ-ꠝꠍꠤꠄ ꠛꠃꠔ ꠇꠑꠤꠘ ꠖꠥꠈ-ꠔꠇꠟꠤꠚ ꠙꠣꠁꠛꠣ, ꠝꠃꠔꠞ ꠔꠤꠘ ꠖꠤꠘꠞ ꠖꠤꠘ ꠔꠣꠁꠘ ꠝꠥꠞ꠆ꠖꠣ ꠕꠣꠇꠤ ꠎꠤꠘ꠆ꠖꠣ ꠅꠁꠎꠤꠛꠣ।
LUK 24:47 ꠎꠦꠇꠥꠘꠥ ꠝꠣꠘꠡꠦ ꠔꠣꠘ ꠘꠣꠝꠦ ꠔꠃꠛꠣ ꠇꠞꠟꠦ, ꠉꠥꠘꠣꠞ ꠝꠣꠚꠤ ꠝꠣꠉꠤꠟꠦ ꠝꠣꠚꠤ ꠙꠣꠁꠛ, ꠅꠃ ꠛꠄꠀꠘꠤ ꠎꠦꠞꠥꠎꠣꠟꠦꠝ ꠕꠣꠇꠤ ꠡꠥꠞꠥ ꠅꠁꠀ ꠀꠡ꠆ꠔꠣ ꠖꠥꠘꠤꠀꠞ ꠢꠇꠟ ꠎꠣꠔꠤꠞ ꠇꠣꠘꠅ ꠙꠃꠍꠣꠘꠤ ꠟꠣꠉꠛ।
LUK 24:48 ꠔꠥꠝꠞꠣꠃ ꠁ ꠢꠇ꠆ꠇꠟꠔꠣꠞ ꠡꠣꠇ꠆ꠇꠤ।
LUK 24:49 ꠀꠞ ꠢꠥꠘꠅ, ꠀꠝꠣꠞ ꠛꠣꠔꠥꠘꠤ ꠛꠣꠚꠦ ꠎꠦꠔꠣ ꠖꠣꠘ ꠇꠞꠣꠞ ꠅꠀꠖꠣ ꠇꠞꠍꠂꠘ, ꠀꠝꠤ ꠁꠔꠣ ꠔꠥꠝꠞꠣꠞ ꠉꠦꠍꠦ ꠛꠦꠎꠤꠝꠥ। ꠅꠁꠟꠦ ꠛꠦꠢꠦꠡ꠆ꠔ ꠕꠣꠇꠤ ꠛꠟ-ꠔꠣꠇ꠆ꠇꠔ ꠘꠣ ꠙꠣꠅꠀ ꠙꠞ꠆ꠎꠘ꠆ꠔ, ꠔꠥꠝꠞꠣ ꠅꠃ ꠎꠦꠞꠥꠎꠣꠟꠦꠝꠅ ꠞꠁꠅ।”
LUK 24:50 ꠛꠣꠖꠦ ꠁꠍꠣꠄ ꠍꠣꠢꠣꠛꠤ ꠅꠇꠟꠞꠦ ꠟꠁꠀ ꠛꠣꠄꠔ-ꠀꠘꠤꠀ ꠉꠣꠃꠞ ꠝꠥꠈꠅ ꠉꠦꠟꠣ, ꠉꠤꠀ ꠔꠣꠁꠘ ꠀꠔ ꠔꠥꠟꠤꠀ ꠔꠣꠞꠣꠞꠦ ꠖꠥꠀ ꠖꠤꠟꠣ।
LUK 24:51 ꠀꠞ ꠅꠃ ꠖꠥꠀꠞ ꠢꠣꠟꠔꠦꠃ ꠔꠣꠁꠘ ꠔꠣꠞꠣꠞ ꠉꠦꠍ ꠕꠘꠦ ꠀꠟꠉ ꠅꠁꠉꠦꠟꠣ, ꠔꠣꠘꠞꠦ ꠛꠦꠢꠦꠡ꠆ꠔꠅ ꠔꠥꠟꠤꠀ ꠘꠦꠅꠀ ꠅꠁꠟ।
LUK 24:52 ꠔꠣꠞꠣ ꠢꠇꠟꠦ ꠔꠣꠘꠞꠦ ꠍꠁꠎꠖꠣ ꠇꠞꠤꠀ, ꠈꠥꠛ ꠈꠥꠡꠤ ꠅꠁꠀ ꠎꠦꠞꠥꠎꠣꠟꠦꠝꠅ ꠚꠤꠞꠔ ꠀꠁꠟꠣ।
LUK 24:53 ꠀꠞ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠞ ꠝꠣꠎꠦ ꠢꠣꠝꠦꠡꠣ ꠀꠟ꠆ꠟꠣꠞ ꠢꠣꠝꠖ-ꠔꠣꠞꠤꠚ ꠇꠞꠣꠔ ꠞꠁꠟꠣ। ꠀꠝꠤꠘ॥
JOH 1:1 ꠙꠄꠟꠣꠃ ꠇꠣꠟꠣꠝ ꠀꠍꠟꠣ, ꠇꠣꠟꠣꠝ ꠀꠟ꠆ꠟꠣꠞ ꠟꠉꠦ ꠀꠍꠟꠣ ꠀꠞ ꠅꠃ ꠇꠣꠟꠣꠝ ꠘꠤꠎꠦꠃ ꠀꠟ꠆ꠟꠣ ꠀꠍꠟꠣ।
JOH 1:2 ꠢꠇꠟ ꠙꠄꠟꠣ ꠅꠃ ꠇꠣꠟꠣꠝ ꠀꠟ꠆ꠟꠣꠞ ꠟꠉꠦ ꠀꠍꠟꠣ।
JOH 1:3 ꠅꠃ ꠇꠣꠟꠣꠝꠞ ꠝꠣꠎꠖꠤ ꠢꠇ꠆ꠇꠟꠔꠣ ꠙꠄꠖꠣ ꠇꠞꠣ ꠅꠁꠍꠤꠟ, ꠎꠔꠔꠣ ꠙꠄꠖꠣ ꠇꠞꠣ ꠅꠁꠍꠦ, ꠄꠞ ꠇꠥꠘꠥꠔꠣꠃ ꠔꠣꠘꠞꠦ ꠍꠣꠠꠣ ꠙꠄꠖꠣ ꠅꠁꠍꠦ ꠘꠣ।
JOH 1:4 ꠔꠣꠘ ꠝꠣꠎꠦ ꠎꠤꠘ꠆ꠖꠦꠉꠤ ꠀꠍꠤꠟ, ꠢꠃ ꠎꠤꠘ꠆ꠖꠦꠉꠤꠃ ꠅꠁꠟ ꠝꠣꠘꠡꠞ ꠘꠥꠞ।
JOH 1:5 ꠅꠃ ꠘꠥꠞ ꠀꠘ꠆ꠖꠣꠞꠤꠞ ꠝꠣꠎꠦ ꠎꠟꠦꠞ, ꠅꠁꠟꠦ ꠀꠘ꠆ꠖꠣꠁꠞꠦ ꠁ ꠘꠥꠞꠞꠦ ꠇꠛꠎꠣ ꠇꠞꠔ ꠙꠣꠞꠍꠦ ꠘꠣ।
JOH 1:6 ꠀꠟ꠆ꠟꠣꠄ ꠄꠢꠤꠀ ꠘꠣꠝꠞ ꠄꠇꠎꠘ ꠝꠣꠘꠡꠞꠦ ꠖꠥꠘꠤꠀꠔ ꠙꠣꠑꠣꠁꠟꠣ।
JOH 1:7 ꠅꠃ ꠘꠥꠞꠞ ꠛꠦꠙꠣꠞꠦ ꠡꠣꠇ꠆ꠇꠤ ꠖꠤꠛꠣꠞ ꠟꠣꠉꠤ ꠔꠣꠘꠞꠦ ꠙꠣꠑꠣꠁꠟ ꠅꠁꠟ, ꠎꠣꠔꠦ ꠔꠣꠘ ꠎꠛꠣꠘꠛꠘ꠆ꠖꠤ ꠢꠥꠘꠤꠀ ꠝꠣꠘꠡꠦ ꠁꠝꠣꠘ ꠀꠘꠦ।
JOH 1:8 ꠔꠣꠁꠘ ꠘꠤꠎꠦ ꠢꠤ ꠘꠥꠞ ꠀꠍꠟꠣ ꠘꠣ, ꠅꠁꠟꠦ ꠘꠥꠞꠞ ꠛꠦꠙꠣꠞꠦ ꠡꠣꠇ꠆ꠇꠤ ꠖꠤꠛꠣꠞ ꠟꠣꠉꠤ ꠖꠥꠘꠤꠀꠔ ꠀꠁꠍꠟꠣ।
JOH 1:9 ꠀꠍꠟ ꠘꠥꠞ ꠅꠁꠟꠣ ꠢꠃ ꠎꠘ, ꠎꠦꠁꠘ ꠢꠇ꠆ꠇꠟ ꠝꠣꠘꠡꠞꠦ ꠘꠥꠞ ꠖꠣꠘ ꠇꠞꠂꠘ, ꠔꠣꠁꠘ ꠖꠥꠘꠤꠀꠔ ꠔꠡꠞꠤꠚ ꠀꠘꠞꠣ।
JOH 1:10 ꠅꠃ ꠖꠥꠘꠤꠀꠔ ꠔꠣꠁꠘ ꠀꠍꠟꠣ, ꠖꠥꠘꠤꠀ ꠔꠣꠘ ꠃꠍꠤꠟ꠆ꠟꠣꠄ ꠙꠄꠖꠣ ꠅꠁꠍꠦ, ꠔꠣ-ꠅ ꠖꠥꠘꠤꠀꠞ ꠝꠣꠘꠡꠦ ꠔꠣꠘꠞꠦ ꠌꠤꠘꠟ ꠘꠣ।
JOH 1:11 ꠔꠣꠁꠘ ꠘꠤꠎꠞ ꠎꠝꠤꠘꠅ ꠀꠁꠟꠣ, ꠔꠣꠘ ꠘꠤꠎꠞ ꠝꠣꠘꠡꠦꠃ ꠔꠣꠘꠞꠦ ꠇꠛꠥꠟ ꠇꠞꠟ ꠘꠣ।
JOH 1:12 ꠅꠁꠟꠦ ꠎꠔ ꠎꠘꠦ ꠔꠣꠘ ꠃꠙꠞꠦ ꠁꠝꠣꠘ ꠀꠘꠤꠀ ꠔꠣꠘꠞꠦ ꠇꠛꠥꠟ ꠇꠞꠟꠣ, ꠄꠞꠣ ꠙꠞꠔꠦꠇ ꠎꠘꠞꠦ ꠔꠣꠁꠘ ꠀꠟ꠆ꠟꠣꠞ ꠈꠣꠍ ꠀꠅꠟꠣꠖ, ꠝꠣꠘꠤ ꠝꠣꠄꠀꠞ ꠎꠘ ꠛꠘꠣꠞ ꠄꠈꠔꠤꠀꠞ ꠖꠤꠟꠣ।
JOH 1:13 ꠀꠍꠟꠦ ꠅꠃ ꠎꠘ ꠅꠇꠟꠞ ꠎꠘꠝ ꠔ ꠝꠣꠘꠡꠞ ꠟꠃ ꠕꠣꠇꠤ ꠅꠁꠍꠦ ꠘꠣ, ꠡꠞꠤꠟꠞ ꠈꠣꠁꠡ ꠛꠣ ꠝꠣꠘꠡꠞ ꠁꠌ꠆ꠍꠣꠄꠅ ꠅꠁꠍꠦ ꠘꠣ, ꠁꠐꠣ ꠈꠣꠟꠤ ꠀꠟ꠆ꠟꠣ ꠕꠣꠇꠤꠃ ꠅꠁꠍꠦ।
JOH 1:14 ꠅꠃ ꠇꠣꠟꠣꠝꠃ ꠝꠣꠘꠥꠡ ꠍꠥꠞꠔꠦ ꠎꠘꠝ ꠟꠁꠟꠣ ꠀꠞ ꠀꠝꠞꠣꠞ ꠝꠣꠎꠦ ꠛꠡꠔꠤ ꠇꠞꠟꠣ। ꠛꠣꠚꠞ ꠈꠣꠍ ꠀꠅꠟꠣꠖ ꠢꠤꠡꠣꠛꠦ ꠔꠣꠁꠘ ꠎꠦ ꠎꠣꠟꠣꠟ ꠀꠞ ꠝꠢꠤꠝꠣ ꠙꠣꠁꠍꠂꠘ, ꠢꠃ ꠎꠣꠟꠣꠟ ꠀꠞ ꠝꠢꠤꠝꠣ ꠀꠝꠞꠣ ꠖꠦꠈꠍꠤ। ꠔꠣꠁꠘ ꠔ ꠢꠇ ꠀꠞ ꠞꠢꠝꠔꠦ ꠡꠥꠟ꠆ꠟꠀꠘꠣ ꠇꠣꠝꠤꠟ।
JOH 1:15 ꠄꠢꠤꠀ ꠘꠛꠤꠄ ꠔꠣꠘ ꠛꠦꠙꠣꠞꠦ ꠛꠠ ꠉꠟꠣꠄ ꠡꠣꠇ꠆ꠇꠤ ꠖꠤꠟꠣ, ꠇꠁꠟꠣ, “ꠄꠁꠘꠃ ꠔ ꠢꠃ ꠎꠘ, ꠎꠦꠘ ꠛꠦꠙꠣꠞꠦ ꠀꠝꠤ ꠀꠉꠦ ꠇꠁꠍꠟꠣꠝ, ꠀꠝꠣꠞ ꠛꠣꠖꠦ ꠄꠇꠎꠘꠦ ꠔꠡꠞꠤꠚ ꠀꠘꠞꠣ, ꠔꠣꠁꠘ ꠀꠝꠣ ꠕꠣꠇꠤꠅ ꠝꠢꠣꠘ, ꠀꠝꠣꠞ ꠛꠃꠔ ꠀꠉ ꠕꠣꠇꠤꠃ ꠔ ꠔꠣꠁꠘ ꠀꠍꠂꠘ।”
JOH 1:16 ꠔꠣꠁꠘ ꠡꠥꠟ꠆ꠟꠀꠘꠣ ꠇꠣꠝꠤꠟ ꠅꠀꠄ ꠀꠝꠞꠣ ꠢꠇꠟꠦ ꠞꠢꠝꠔꠞ ꠃꠙꠞꠦꠖꠤ ꠀꠞꠅ ꠞꠢꠝꠔ ꠙꠣꠁꠍꠤ।
JOH 1:17 ꠝꠥꠍꠣ ꠘꠛꠤꠞ ꠝꠣꠞꠚꠔꠦ ꠀꠟ꠆ꠟꠣꠄ ꠡꠞꠤꠅꠔ ꠖꠣꠘ ꠇꠞꠍꠤꠟꠣ, ꠅꠁꠟꠦ ꠁꠍꠣ ꠀꠟ-ꠝꠍꠤꠞ ꠝꠣꠞꠚꠔꠦ ꠢꠇ ꠀꠞ ꠞꠢꠝꠔ ꠀꠁꠍꠦ।
JOH 1:18 ꠀꠟ꠆ꠟꠣꠞꠦ ꠔ ꠇꠦꠃ ꠇꠥꠘꠥꠖꠤꠘ ꠖꠦꠈꠍꠦ ꠘꠣ। ꠔꠣꠘ ꠟꠉꠦ ꠞꠅꠞꠣ ꠢꠃ ꠄꠇꠝꠣꠔ꠆ꠞ ꠙꠥꠔ, ꠝꠣꠘꠤ ꠔꠣꠘ ꠈꠣꠍ ꠝꠣꠄꠀꠞ ꠎꠘ, ꠎꠦꠁꠘ ꠡ꠆ꠛꠄꠅꠋ ꠝꠃꠟꠣ, ꠔꠣꠁꠘꠃ ꠀꠟ꠆ꠟꠣꠞꠦ ꠎꠣꠁꠞ ꠇꠞꠍꠂꠘ।
JOH 1:19 ꠁꠢꠥꠖꠤ ꠘꠦꠔꠣ ꠅꠇꠟꠦ ꠎꠦꠞꠥꠎꠣꠟꠦꠝ ꠐꠣꠃꠘ ꠕꠣꠇꠤ ꠎꠦꠛꠟꠣ ꠇꠄꠎꠘ ꠁꠝꠣꠝ ꠀꠞ ꠟꠦꠛꠤ ꠡꠝꠣꠎꠞ ꠇꠤꠍꠥ ꠝꠣꠘꠡꠞꠦ ꠄꠢꠤꠀ ꠘꠛꠤꠞ ꠉꠦꠍꠦ ꠙꠣꠑꠣꠁꠟꠣ, ꠅꠃ ꠡꠝꠄ ꠄꠢꠤꠀꠄ ꠄꠞꠣꠞ ꠉꠦꠍꠦ ꠡꠣꠇ꠆ꠇꠤ ꠖꠤꠟꠣ। ꠔꠣꠞꠣ ꠎꠦꠛꠟꠣ ꠎꠤꠇꠣꠁꠟꠣ, “ꠍꠣꠛ, ꠀꠙꠘꠦ ꠀꠍꠟꠦ ꠇꠦ?”
JOH 1:20 ꠄꠢꠤꠀ ꠘꠛꠤꠄ ꠇꠥꠘ꠆ꠔꠣ ꠘꠣ ꠟꠥꠇꠣꠁꠀ ꠡ꠆ꠛꠤꠇꠣꠞ ꠅꠁꠀ ꠇꠁꠟꠣ, “ꠀꠝꠤ ꠔ ꠀꠟ-ꠝꠍꠤ ꠘꠣꠄ।”
JOH 1:21 ꠔꠦꠃ ꠔꠣꠞꠣ ꠔꠣꠘꠞꠦ ꠎꠤꠇꠣꠁꠟꠣ, “ꠔꠦ ꠀꠙꠘꠦ ꠇꠦ? ꠀꠙꠘꠦ ꠁꠟꠤꠀꠍ ꠘꠛꠤ ꠘꠤ?” ꠔꠣꠁꠘ ꠇꠁꠟꠣ, “ꠘꠣ, ꠀꠝꠤ ꠁꠟꠤꠀꠍ ꠘꠣꠄ।” ꠅꠃ ꠔꠣꠞꠣ ꠎꠤꠇꠣꠁꠟꠣ, “ꠔꠦ ꠀꠙꠘꠦ ꠇꠤꠔꠣ ꠀꠉꠞ ꠎꠝꠣꠘꠣꠞ ꠢꠃ ꠘꠛꠤ ꠘꠤ?” ꠔꠣꠁꠘ ꠎꠥꠀꠙ ꠖꠤꠟꠣ, “ꠎꠤ ꠘꠣ।”
JOH 1:22 ꠔꠣꠞꠣ ꠢꠤꠞꠛꠣꠞ ꠔꠣꠘꠞꠦ ꠎꠤꠇꠣꠁꠟꠣ, “ꠔꠣꠁꠟꠦ ꠀꠙꠘꠦ ꠇꠦ? ꠀꠝꠞꠣꠞꠦ ꠎꠦꠞꠣ ꠙꠣꠑꠣꠁꠍꠂꠘ, ꠀꠝꠞꠣ ꠚꠤꠞꠤꠀ ꠉꠤꠀ ꠇꠤꠔꠣ ꠇꠁꠔꠣꠝ, ꠀꠙꠘꠣꠞ ꠘꠤꠎꠞ ꠙꠞꠤꠌꠄ ꠇꠤꠔꠣ?”
JOH 1:23 ꠄꠢꠤꠀꠄ ꠎꠥꠀꠙ ꠖꠤꠟꠣ, “ꠀꠝꠤ ꠅꠁꠟꠣꠝ ꠢꠃ ꠀꠅꠀꠎ, ꠎꠦꠘ ꠛꠦꠙꠣꠞꠦ ꠢꠎꠞꠔ ꠁꠡꠣꠄꠀ ꠘꠛꠤꠄ ꠛꠣꠔꠣꠁ ꠉꠦꠍꠂꠘ, ꠝꠞꠥꠜꠥꠝꠤꠞ ꠝꠣꠎꠦ ꠎꠥꠞꠦ ꠎꠥꠞꠦ ꠄꠇꠎꠘꠦ ꠄꠟꠣꠘ ꠇꠞꠞꠣ, ꠔꠥꠝꠞꠣ ꠝꠣꠟꠤꠇꠞ ꠙꠕ ꠍꠢꠤ ꠇꠞꠅ।”
JOH 1:24 ꠄꠢꠤꠀ ꠘꠛꠤꠞ ꠉꠦꠍꠦ ꠎꠦꠞꠣꠞꠦ ꠙꠣꠑꠣꠁꠟ ꠅꠁꠍꠤꠟ, ꠄꠞꠣ ꠀꠍꠟꠣ ꠚꠞꠤꠡꠤ ꠡꠝꠣꠎꠞ ꠝꠣꠘꠥꠡ।
JOH 1:25 ꠔꠣꠞꠣ ꠔꠣꠘꠞꠦ ꠎꠤꠇꠣꠁꠟꠣ, “ꠀꠙꠘꠦ ꠎꠦꠛꠟꠣ ꠀꠟ-ꠝꠍꠤꠅ ꠘꠣꠄ, ꠁꠟꠤꠀꠍ ꠘꠛꠤꠅ ꠘꠣꠄ ꠛꠣ ꠀꠉꠞ ꠎꠝꠣꠘꠣꠞ ꠢꠃ ꠘꠛꠤꠅ ꠘꠣꠄ, ꠔꠦ ꠀꠙꠘꠦ ꠇꠦꠘꠦ ꠝꠣꠘꠡꠞꠦ ꠔꠃꠛꠣꠞ ꠉꠥꠍꠟ ꠖꠤꠞꠣ?”
JOH 1:26 ꠄꠢꠤꠀ ꠘꠛꠤꠄ ꠔꠣꠞꠣꠞꠦ ꠎꠥꠀꠙ ꠖꠤꠟꠣ, “ꠀꠝꠤ ꠔ ꠝꠣꠘꠡꠞꠦ ꠙꠣꠘꠤ ꠖꠤꠀ ꠔꠃꠛꠣꠞ ꠉꠥꠍꠟ ꠇꠞꠣꠁꠞꠣꠝ, ꠅꠁꠟꠦ ꠀꠙꠘꠣꠞꠣꠞ ꠝꠣꠎꠦ ꠅꠃꠟꠣ ꠄꠇ ꠛꠥꠎꠥꠞ꠆ꠉ ꠎꠘ ꠀꠍꠂꠘ, ꠎꠦꠘꠞꠦ ꠀꠙꠘꠣꠞꠣ ꠌꠤꠘꠂꠘ ꠘꠣ।
JOH 1:27 ꠁ ꠛꠥꠎꠥꠞ꠆ꠉ ꠢꠃ ꠎꠘ, ꠎꠦꠁꠘ ꠀꠝꠣꠞ ꠛꠣꠖꠦ ꠔꠡꠞꠤꠚ ꠀꠘꠣꠞ ꠇꠕꠣ ꠀꠍꠤꠟ। ꠔꠣꠘ ꠙꠣꠅꠞ ꠎꠥꠔꠣꠞ ꠚꠤꠔꠣꠉꠦꠍꠣ ꠈꠥꠟꠣꠞ ꠟꠣꠈꠅ ꠀꠝꠤ ꠘꠣꠄ।”
JOH 1:28 ꠎꠞ꠆ꠖꠣꠘ ꠉꠣꠋꠉꠞ ꠀꠞꠇ ꠙꠣꠞꠅ ꠛꠣꠄꠔ-ꠀꠘꠤꠀ ꠉꠣꠃꠔ, ꠄꠢꠤꠀ ꠘꠛꠤ ꠎꠦ ꠎꠣꠉꠣꠔ ꠔꠃꠛꠣꠞ ꠉꠥꠍꠟ ꠇꠞꠣꠘꠤꠔ ꠀꠍꠟꠣ, ꠢꠃ ꠎꠣꠉꠣꠔ ꠅꠃ ꠍꠅꠀꠟ-ꠎꠥꠀꠙ ꠅꠁꠟ।
JOH 1:29 ꠛꠣꠖꠞ ꠖꠤꠘ ꠄꠢꠤꠀ ꠘꠛꠤꠄ ꠖꠦꠈꠟꠣ ꠢꠥꠎꠥꠞ ꠁꠍꠣ ꠔꠣꠘ ꠉꠦꠍꠦ ꠀꠁꠞꠣ, ꠖꠦꠈꠤꠀ ꠇꠁꠟꠣ, “ꠅꠃ ꠖꠦꠈꠞꠣꠄ ꠘꠤ ꠀꠟ꠆ꠟꠣꠁ ꠝꠦꠠꠣ-ꠛꠣꠁꠌ꠆ꠌꠣ, ꠎꠦꠘ ꠃꠍꠤꠟ꠆ꠟꠣꠄ ꠢꠇ꠆ꠇꠟ ꠝꠣꠘꠡꠞ ꠉꠥꠘꠣꠞ ꠝꠣꠚꠤ ꠅꠄ।
JOH 1:30 ꠄꠁꠘ ꠅꠁꠟꠣ ꠢꠃ ꠎꠘ, ꠎꠦꠘ ꠛꠦꠙꠣꠞꠦ ꠀꠝꠤ ꠀꠉꠦ ꠇꠁꠍꠟꠣꠝ, ꠀꠝꠣꠞ ꠛꠣꠖꠦ ꠄꠇꠎꠘꠦ ꠔꠡꠞꠤꠚ ꠀꠘꠞꠣ, ꠀꠍꠟꠦ ꠔꠣꠁꠘ ꠀꠝꠣꠞ ꠀꠉ ꠕꠣꠇꠤꠃ ꠀꠍꠂꠘ, ꠀꠞ ꠔꠣꠁꠘ ꠀꠝꠣ ꠕꠣꠇꠤꠅ ꠁꠎ꠆ꠎꠔꠤ ꠎꠘ।
JOH 1:31 ꠀꠉꠦ ꠔ ꠀꠝꠤ ꠔꠣꠘꠞꠦ ꠌꠤꠘꠔꠣꠝ ꠘꠣ, ꠅꠁꠟꠦ ꠛꠘꠤ ꠁꠍꠞꠣꠁꠟꠞ ꠝꠣꠎꠦ ꠔꠣꠁꠘ ꠎꠣꠔꠦ ꠙꠞꠤꠌꠤꠔꠤ ꠙꠣꠁꠘ, ꠅꠔꠣꠞ ꠟꠣꠉꠤ ꠀꠝꠤ ꠀꠉꠦ ꠀꠁꠀ ꠝꠣꠘꠡꠞꠦ ꠙꠣꠘꠤꠖꠤ ꠔꠃꠛꠣꠞ ꠉꠥꠍꠟ ꠇꠞꠣꠁꠞꠣꠝ।”
JOH 1:32 ꠛꠣꠖꠦ ꠄꠢꠤꠀ ꠘꠛꠤꠄ ꠅꠃ ꠡꠣꠇ꠆ꠇꠤ ꠖꠤꠟꠣ, ꠇꠁꠟꠣ, “ꠀꠝꠤ ꠖꠦꠈꠟꠣꠝ ꠇꠂꠔꠞꠞ ꠍꠥꠞꠔꠦ ꠙꠣꠇ ꠞꠥꠢꠥ ꠀꠍꠝꠣꠘ ꠕꠣꠇꠤ ꠟꠣꠝꠤꠀ ꠀꠁꠟꠣ, ꠀꠁꠀ ꠄꠘ ꠃꠙꠞꠦ ꠀꠎꠤꠟꠣ।
JOH 1:33 ꠀꠝꠤ ꠔ ꠔꠣꠘꠞꠦ ꠌꠤꠘꠔꠣꠝ ꠘꠣ, ꠅꠁꠟꠦ ꠔꠃꠛꠣꠞ ꠉꠥꠍꠟ ꠇꠞꠣꠘꠤꠞ ꠟꠣꠉꠤ ꠎꠦꠁꠘ ꠀꠝꠣꠞꠦ ꠛꠦꠎꠤꠍꠂꠘ, ꠔꠣꠁꠘ ꠀꠝꠣꠞꠦ ꠛꠣꠔꠣꠁ ꠖꠤꠍꠂꠘ ꠎꠦꠘ, ꠀꠟ꠆ꠟꠣꠁ ꠙꠣꠇ ꠞꠥꠢꠥꠞꠦ ꠎꠣꠞ ꠃꠙꠞꠦ ꠟꠣꠝꠤꠀ ꠀꠁꠔꠦ ꠖꠦꠈꠛꠣꠄ, ꠄꠁꠘꠃ ꠢꠃ ꠎꠘ, ꠎꠦꠁꠘ ꠝꠣꠘꠡꠞꠦ ꠙꠣꠇ ꠞꠥꠢꠥꠖꠤ ꠔꠞꠤꠇꠣꠛꠘ꠆ꠖꠤ ꠖꠤꠛꠣ।
JOH 1:34 ꠔꠦ ꠀꠝꠤ ꠁꠔꠣ ꠖꠦꠈꠟꠣꠝ, ꠖꠦꠈꠤꠀ ꠢꠣꠞꠤ ꠡꠣꠇ꠆ꠇꠤ ꠖꠤꠞꠣꠝ, ꠄꠁꠘꠃ ꠁꠛꠘꠥꠟ꠆ꠟꠣ, ꠀꠟ꠆ꠟꠣꠞ ꠈꠣꠍ ꠝꠣꠄꠀꠞ ꠎꠘ।”
JOH 1:35 ꠛꠣꠖꠞ ꠖꠤꠘ ꠄꠢꠤꠀ ꠘꠛꠤ ꠀꠞ ꠔꠣꠘ ꠖꠥꠁꠎꠘ ꠃꠝ꠆ꠝꠔ ꠢꠤꠞꠛꠣꠞ ꠢꠃ ꠎꠣꠉꠣꠔ ꠀꠁꠟꠣ।
JOH 1:36 ꠅꠃ ꠡꠝꠄ ꠢꠎꠞꠔ ꠁꠍꠣ ꠀꠐꠤꠀ ꠎꠣꠁꠞꠣ, ꠔꠣꠘꠞꠦ ꠖꠦꠈꠤꠀ ꠄꠢꠤꠀꠄ ꠇꠁꠟꠣ, “ꠅꠃ ꠖꠦꠈꠞꠣꠄ ꠘꠤ ꠀꠟ꠆ꠟꠣꠁ ꠝꠦꠠꠣ-ꠛꠣꠁꠌ꠆ꠌꠣ।”
JOH 1:37 ꠄꠢꠤꠀ ꠘꠛꠤꠞ ꠅꠃ ꠇꠕꠣ ꠢꠥꠘꠤꠀ ꠢꠃ ꠖꠥꠁꠅꠎꠘ ꠁꠍꠣꠞ ꠈꠞꠦ ꠈꠞꠦ ꠞꠅꠀꠘꠣ ꠅꠁꠉꠦꠟꠣ।
JOH 1:38 ꠁꠍꠣꠄ ꠈꠞꠦꠖꠤ ꠚꠤꠞꠤꠀ ꠄꠞꠣꠞꠦ ꠖꠦꠈꠟꠣ, ꠖꠦꠈꠤꠀ ꠇꠁꠟꠣ, “ꠇꠤꠔꠣ ꠛꠣ, ꠔꠥꠝꠞꠣ ꠇꠤꠔꠣ ꠌꠣꠅ?” ꠔꠣꠞꠣ ꠎꠥꠀꠙ ꠖꠤꠟꠣ, “ꠞꠛ꠆ꠛꠤ, (ꠝꠣꠘꠤ ꠃꠡ꠆ꠔꠣꠖ), ꠀꠙꠘꠦ ꠇꠥꠀꠁ ꠕꠣꠇꠂꠘ?”
JOH 1:39 ꠁꠍꠣꠄ ꠔꠣꠞꠣꠞꠦ ꠇꠁꠟꠣ, “ꠀꠅ ꠘꠣ, ꠀꠁꠀ ꠖꠦꠈꠤꠀ ꠎꠣꠅ।” ꠔꠦꠃ ꠔꠣꠞꠣ ꠔꠣꠘ ꠟꠉꠦ ꠉꠦꠟꠣ, ꠉꠤꠀ ꠖꠦꠈꠟꠣ ꠔꠣꠁꠘ ꠇꠥꠘ ꠎꠣꠉꠣꠔ ꠕꠣꠇꠂꠘ, ꠀꠞ ꠔꠣꠞꠣꠅ ꠀꠡ꠆ꠔꠣ ꠖꠤꠘ ꠔꠣꠘ ꠟꠉꠦ ꠞꠁꠟꠣ। ꠅꠃ ꠡꠝꠄ ꠀꠍꠞꠞ ꠅꠇ꠆ꠔ ꠀꠁꠌ꠆ꠍꠦ।
JOH 1:40 ꠄꠢꠤꠀ ꠘꠛꠤꠞ ꠇꠕꠣ ꠢꠥꠘꠤꠀ ꠎꠦ ꠖꠥꠁꠎꠘ ꠁꠍꠣꠞ ꠈꠞꠦ ꠈꠞꠦ ꠉꠦꠍꠟꠣ, ꠄꠞꠣꠞ ꠄꠇꠎꠘꠞ ꠘꠣꠝ ꠅꠁꠟ ꠀꠘ꠆ꠖꠞꠤꠀꠍ, ꠄꠘ ꠜꠣꠁꠞ ꠘꠣꠝ ꠍꠣꠁꠝꠘ-ꠙꠤꠔꠞ।
JOH 1:41 ꠅꠃ ꠀꠘ꠆ꠖꠞꠤꠀꠍꠦ ꠙꠄꠟꠣ ꠔꠣꠘ ꠜꠣꠁ ꠍꠣꠁꠝꠘꠞꠦ ꠔꠥꠇꠣꠁꠀ ꠛꠣꠞ ꠇꠞꠤꠀ ꠇꠁꠟꠣ, “ꠜꠣꠁꠍꠣꠛ ꠢꠥꠘꠍ ꠘꠤ, ꠀꠝꠞꠣ ꠔ ꠀꠟ-ꠝꠍꠤꠞꠦ ꠖꠦꠈꠍꠤ।” ꠀꠟ-ꠝꠍꠤꠞ ꠝꠣꠘꠤ ꠅꠁꠟ ꠀꠟ꠆ꠟꠣꠞ ꠈꠦꠟꠣꠚꠔꠤ ꠙꠣꠅꠀ ꠎꠘ।
JOH 1:42 ꠀꠘ꠆ꠖꠞꠤꠀꠍꠦ ꠍꠣꠁꠝꠘꠞꠦ ꠟꠁꠀ ꠁꠍꠣꠞ ꠉꠦꠍꠦ ꠀꠁꠟꠣ। ꠁꠍꠣꠄ ꠍꠣꠁꠝꠘꠞ ꠛꠣꠄ ꠌꠣꠁꠀ ꠇꠁꠟꠣ, “ꠔꠥꠝꠤ ꠔ ꠍꠣꠁꠝꠘ ꠛꠤꠘ ꠁꠃꠢꠣꠘ꠆ꠘꠣ, ꠅꠁꠟꠦ ꠅꠈꠘ ꠕꠣꠇꠤ ꠔꠥꠝꠣꠞꠦ ꠇꠂꠚꠣ ꠘꠣꠝꠦ ꠒꠣꠇꠣ ꠅꠁꠛ।” ꠇꠂꠚꠣ ꠝꠣꠘꠤ ꠙꠤꠔꠞ, ꠛꠣ ꠙꠣꠔ꠆ꠔꠞ।
JOH 1:43 ꠛꠣꠖꠞ ꠖꠤꠘ ꠁꠍꠣꠄ ꠘꠤꠅꠔ ꠇꠞꠟꠣ, ꠉꠣꠟꠤꠟ ꠎꠤꠟꠣꠔ ꠎꠣꠁꠔꠣꠉꠤ। ꠅꠃ ꠡꠝꠄ ꠔꠣꠁꠘ ꠚꠤꠟꠤꠚꠞꠦ ꠖꠦꠈꠟꠣ, ꠖꠦꠈꠤꠀ ꠇꠁꠟꠣ, “ꠅ ꠚꠤꠟꠤꠚ ꠀꠅ, ꠀꠁꠀ ꠀꠝꠣꠞ ꠃꠝ꠆ꠝꠔ ꠅꠅ।”
JOH 1:44 ꠚꠤꠟꠤꠚ ꠀꠍꠟꠣ ꠛꠣꠄꠔ-ꠍꠄꠖꠣ ꠉꠣꠃꠞ ꠝꠣꠘꠥꠡ। ꠀꠘ꠆ꠖꠞꠤꠀꠍ ꠀꠞ ꠙꠤꠔꠞꠞ ꠛꠣꠠꠤꠅ ꠀꠍꠤꠟ ꠅꠃ ꠉꠣꠃꠔ।
JOH 1:45 ꠚꠤꠟꠤꠚꠦ ꠘꠕꠘꠦꠟꠞꠦ ꠔꠥꠇꠣꠁꠀ ꠛꠣꠞ ꠇꠞꠤꠀ ꠇꠁꠟꠣ, “ꠝꠥꠍꠣ ꠘꠛꠤꠞ ꠔꠃꠞꠣꠔ ꠇꠤꠔꠣꠛꠅ ꠀꠞ ꠀꠍꠝꠣꠘꠤ ꠘꠛꠤ ꠅꠇꠟꠞ ꠍꠢꠤꠚꠣꠔ ꠎꠦꠘ ꠇꠕꠣ ꠟꠦꠈꠣ ꠀꠍꠦ, ꠀꠝꠞꠣ ꠔ ꠔꠣꠘꠞꠦ ꠖꠦꠈꠍꠤ। ꠔꠣꠁꠘ ꠔ ꠘꠣꠍꠣꠞꠔ ꠉꠣꠃꠞ ꠁꠍꠣ, ꠔꠣꠘ ꠛꠣꠚꠞ ꠘꠣꠝ ꠁꠃꠍꠥꠚ।”
JOH 1:46 ꠁꠈꠣꠘ ꠢꠥꠘꠤꠀ ꠘꠕꠘꠦꠟꠦ ꠚꠤꠟꠤꠚꠞꠦ ꠇꠁꠟꠣ, “ꠗꠥꠔ! ꠘꠣꠍꠣꠞꠔ ꠕꠣꠇꠤ ꠜꠣꠟꠣ ꠇꠥꠘ꠆ꠔꠣ ꠛꠣꠞꠅꠄ ꠘꠤ?” ꠚꠤꠟꠤꠚꠦ ꠇꠁꠟꠣ, “ꠔꠦ ꠀꠁꠀ ꠖꠦꠈꠅ।”
JOH 1:47 ꠁꠍꠣꠄ ꠖꠦꠈꠟꠣ, ꠘꠕꠘꠦꠟ ꠔꠣꠘ ꠉꠦꠍꠦ ꠀꠁꠞꠣ, ꠖꠦꠈꠤꠀ ꠇꠁꠟꠣ, “ꠅꠃ ꠖꠦꠈꠞꠣꠄ ꠘꠤ ꠄꠇꠎꠘ ꠈꠣꠐꠤ ꠛꠘꠤ ꠁꠍꠞꠣꠁꠟꠤ। ꠔꠣꠞ ꠝꠣꠎꠦ ꠇꠥꠘꠥ ꠗꠥꠘ꠆ꠖꠥꠞ-ꠝꠥꠘ꠆ꠖꠥꠞ ꠘꠣꠁ।”
JOH 1:48 ꠔꠦꠃ ꠘꠕꠘꠦꠟꠦ ꠁꠍꠣꠞꠦ ꠎꠤꠇꠣꠁꠟꠣ, “ꠀꠙꠘꠦ ꠀꠝꠣꠞꠦ ꠇꠦꠝꠘꠦ ꠌꠤꠘꠟꠣ?” ꠁꠍꠣꠄ ꠎꠥꠀꠙ ꠖꠤꠟꠣ, “ꠢꠥꠘꠅ, ꠔꠥꠝꠣꠞꠦ ꠒꠣꠇꠤꠛꠣꠞ ꠀꠉꠦ ꠔꠥꠝꠤ ꠎꠦꠛꠟꠣ ꠢꠃ ꠒꠥꠝꠥꠞ ꠉꠣꠍꠞ ꠔꠟꠦ ꠀꠍꠟꠣꠄ, ꠢꠃ ꠡꠝꠄ ꠀꠝꠤ ꠔꠥꠝꠣꠞꠦ ꠖꠦꠈꠍꠤ।”
JOH 1:49 ꠁꠈꠣꠘ ꠢꠥꠘꠤꠀ ꠘꠕꠘꠦꠟꠦ ꠁꠍꠣꠞꠦ ꠇꠁꠟꠣ, “ꠢꠥꠎꠥꠞ, ꠀꠙꠘꠦꠃ ꠔ ꠁꠛꠘꠥꠟ꠆ꠟꠣ, ꠀꠟ꠆ꠟꠣꠞ ꠈꠣꠍ ꠝꠣꠄꠀꠞ ꠎꠘ। ꠀꠙꠘꠦꠃ ꠛꠘꠤ ꠁꠍꠞꠣꠁꠟꠞ ꠛꠣꠖꠡꠣ।”
JOH 1:50 ꠁꠍꠣꠄ ꠔꠣꠘꠞꠦ ꠇꠁꠟꠣ, “ꠔꠥꠝꠣꠞꠦ ꠢꠃ ꠒꠥꠝꠥꠞ ꠉꠣꠍꠞ ꠔꠟꠦ ꠖꠦꠈꠍꠤ ꠅꠈꠣꠘ ꠇꠅꠀꠄ ꠔꠥꠝꠤ ꠁꠝꠣꠘ ꠀꠘꠟꠣꠄ ꠘꠤ? ꠢꠥꠘꠅ, ꠄꠞ ꠕꠣꠇꠤꠅ ꠀꠞꠅ ꠛꠃꠔ ꠛꠠ ꠛꠠ ꠇꠦꠞꠣꠝꠔꠤ ꠔꠥꠝꠤ ꠖꠦꠈꠛꠣꠄꠘꠦ।”
JOH 1:51 ꠛꠣꠖꠦ ꠁꠍꠣꠄ ꠇꠁꠟꠣ, “ꠀꠝꠤ ꠔꠥꠝꠞꠣꠞꠦ ꠢꠇ ꠇꠕꠣ ꠇꠁꠞꠣꠝ, ꠔꠥꠝꠞꠣ ꠖꠦꠈꠛꠣꠄ ꠛꠦꠢꠦꠡ꠆ꠔ ꠈꠥꠟꠤꠉꠦꠍꠦ, ꠀꠞ ꠀꠟ꠆ꠟꠣꠞ ꠚꠤꠞꠤꠡ꠆ꠔꠣ ꠅꠇꠟ ꠀꠝꠤ ꠛꠤꠘ-ꠀꠖꠝꠞ ꠃꠙꠞꠦ ꠃꠑꠣ-ꠟꠣꠝꠣ ꠇꠞꠞꠣ।”
JOH 2:1 ꠄꠞ ꠖꠥꠁꠖꠤꠘ ꠛꠣꠖꠦ ꠉꠣꠟꠤꠟ ꠎꠤꠟꠣꠞ ꠇꠣꠘ꠆ꠘꠣ ꠉꠣꠃꠔ ꠄꠇ ꠛꠤꠀ ꠀꠍꠤꠟ। ꠢꠎꠞꠔ ꠁꠍꠣꠞ ꠝꠣ ꠅꠃ ꠛꠤꠀꠔ ꠀꠍꠟꠣ।
JOH 2:2 ꠅꠃ ꠛꠤꠀꠔ ꠁꠍꠣ ꠀꠞ ꠔꠣꠘ ꠍꠣꠢꠣꠛꠤ ꠅꠇꠟꠦꠅ ꠖꠣꠅꠔ ꠙꠣꠁꠍꠟꠣ।
JOH 2:3 ꠛꠤꠀꠞ ꠅꠘꠥꠡ꠆ꠑꠣꠘꠅ ꠎꠦꠛꠟꠣ ꠀꠋꠉꠥꠞꠞ ꠡꠞꠛꠔ ꠚꠥꠠꠣꠁ ꠉꠦꠟ, ꠅꠃ ꠡꠝꠄ ꠁꠍꠣꠞ ꠝꠣʼꠄ ꠁꠍꠣꠞꠦ ꠇꠁꠟꠣ, “ꠄꠞꠣꠞ ꠀꠋꠉꠥꠞꠞ ꠡꠞꠛꠔ ꠡꠦꠡ ꠅꠁꠉꠦꠍꠦ।”
JOH 2:4 ꠁꠍꠣꠄ ꠔꠣꠘ ꠝꠣʼꠞꠦ ꠇꠁꠟꠣ, “ꠝꠣꠁ ꠉ, ꠁꠔꠣ ꠔ ꠀꠝꠣꠞ ꠛꠤꠡꠄ ꠘꠣꠄ। ꠅꠈꠘꠅ ꠀꠝꠣꠞ ꠡꠝꠄ ꠅꠁꠍꠦ ꠘꠣ।”
JOH 2:5 ꠅꠁꠟꠦ ꠔꠣꠘ ꠝꠣʼꠄ ꠈꠣꠖꠤꠝꠖꠣꠞ ꠅꠇꠟꠞꠦ ꠇꠁꠟꠣ, “ꠅꠛꠣ, ꠔꠣꠁꠘ ꠎꠦꠔꠣ ꠇꠂꠘ, ꠅꠔꠣꠃ ꠇꠞꠅ।”
JOH 2:6 ꠁꠢꠥꠖꠤꠞ ꠡꠞꠤꠅꠔ ꠝꠣꠚꠤꠇ ꠅꠎꠥ ꠇꠞꠣꠞ ꠟꠣꠉꠤ ꠢꠤꠘꠅ ꠙꠣꠔ꠆ꠔꠞꠞ ꠍꠄꠐꠣ ꠉꠣꠝꠟꠣ ꠀꠍꠤꠟ। ꠁꠔꠣ ꠄꠇꠅꠐꠣꠔ ꠅꠘꠥꠝꠣꠘ ꠖꠥꠁ-ꠔꠤꠘ ꠝꠘ ꠙꠣꠘꠤ ꠗꠞꠔ।
JOH 2:7 ꠁꠍꠣꠄ ꠈꠣꠖꠤꠝꠖꠣꠞ ꠅꠇꠟꠞꠦ ꠇꠁꠟꠣ, “ꠅꠃ ꠉꠣꠝꠟꠣꠁꠘ꠆ꠔꠅ ꠙꠣꠘꠤ ꠜꠞꠅ।” ꠔꠦꠃ ꠔꠣꠞꠣ ꠁꠉꠥꠁꠘ ꠐꠦꠙꠦ ꠐꠦꠙꠦ ꠜꠞꠤ ꠖꠤꠟ।
JOH 2:8 ꠛꠣꠖꠦ ꠔꠣꠁꠘ ꠇꠁꠟꠣ, “ꠅꠘ ꠕꠣꠇꠤ ꠕꠥꠠꠣ ꠙꠣꠘꠤ ꠘꠤꠀ ꠙꠞꠗꠣꠘ ꠛꠣꠛꠥꠞ꠆ꠌꠤꠞꠦ ꠖꠦꠅ।” ꠔꠦꠃ ꠔꠣꠞꠣ ꠅꠟꠣꠃ ꠇꠞꠟ।
JOH 2:9 ꠛꠣꠛꠥꠞ꠆ꠌꠤꠄ ꠅꠃ ꠙꠣꠘꠤ ꠈꠣꠁꠀ ꠖꠦꠈꠟꠣ, ꠁꠔꠣ ꠔ ꠀꠋꠉꠥꠞꠞ ꠡꠞꠛꠔ। ꠅꠁꠟꠦ ꠁ ꠡꠞꠛꠔ ꠇꠥꠀꠁ ꠕꠣꠇꠤ ꠀꠁꠟ, ꠁꠈꠣꠘ ꠔꠣꠁꠘ ꠎꠣꠘꠔꠣ ꠘꠣ। ꠈꠣꠟꠤ ꠈꠣꠖꠤꠝꠖꠣꠞ ꠅꠇꠟꠦ ꠎꠣꠘꠔ। ꠄꠞꠟꠣꠉꠤ ꠛꠣꠛꠥꠞ꠆ꠌꠤꠄ ꠛꠤꠀꠞ ꠘꠡꠣꠞꠦ ꠒꠣꠇꠤꠀ ꠇꠁꠟꠣ,
JOH 2:10 “ꠙꠄꠟꠣ ꠢꠇꠟꠦꠃ ꠝꠣꠘꠡꠞꠦ ꠈꠣꠐꠤ ꠡꠞꠛꠔ ꠈꠣꠁꠔꠦ ꠖꠦꠄ। ꠝꠣꠘꠡꠦ ꠁꠌ꠆ꠍꠣꠝꠔ ꠈꠣꠅꠀꠞ ꠛꠣꠖꠦ ꠎꠦꠛꠟꠣ ꠡꠦꠡ ꠅꠁꠎꠣꠄ, ꠅꠃ ꠡꠝꠄ ꠎꠦ ꠡꠞꠛꠔ ꠖꠦꠄ, ꠁꠔꠣ ꠙꠄꠟꠣ ꠕꠣꠇꠤ ꠇꠤꠍꠥ ꠜꠦꠎꠣꠟ ꠕꠣꠇꠦ। ꠅꠁꠟꠦ ꠔꠥꠝꠤ ꠈꠣꠐꠤ ꠡꠞꠛꠔ ꠅꠈꠘꠅ ꠞꠣꠈꠍ।”
JOH 2:11 ꠢꠎꠞꠔ ꠁꠍꠣꠄ ꠉꠣꠟꠤꠟ ꠎꠤꠟꠣꠞ ꠇꠣꠘ꠆ꠘꠣ ꠉꠣꠃꠔ ꠘꠤꠡꠣꠘꠣ ꠢꠤꠡꠣꠛꠦ ꠅꠃ ꠙꠄꠟꠣ ꠇꠦꠞꠣꠝꠔꠤ ꠖꠦꠈꠣꠁꠀ ꠘꠤꠎꠞ ꠝꠢꠤꠝꠣ ꠎꠣꠁꠞ ꠇꠞꠟꠣ। ꠁꠔꠣ ꠖꠦꠈꠤꠀ ꠍꠣꠢꠣꠛꠤ ꠅꠇꠟꠦ ꠔꠣꠘ ꠃꠙꠞꠦ ꠁꠝꠣꠘ ꠀꠘꠟꠣ।
JOH 2:12 ꠄꠞꠛꠣꠖꠦ ꠁꠍꠣꠄ ꠔꠣꠘ ꠝꠣ, ꠜꠣꠁꠀꠁꠘ ꠀꠞ ꠍꠣꠢꠣꠛꠤ ꠅꠇꠟꠞꠦ ꠟꠁꠀ ꠇꠚꠞꠘꠣꠃꠝ ꠐꠣꠃꠘꠅ ꠉꠦꠟꠣ, ꠉꠤꠀ ꠇꠄꠖꠤꠘ ꠢꠘꠅ ꠞꠁꠟꠣ।
JOH 2:13 ꠁꠢꠥꠖꠤꠞ ꠀꠎꠣꠖꠤ ꠁꠖ ꠊꠘꠣꠁ ꠉꠦꠟꠦ ꠁꠍꠣ ꠎꠦꠞꠥꠎꠣꠟꠦꠝ ꠐꠣꠃꠘꠅ ꠀꠁꠟꠣ।
JOH 2:14 ꠎꠦꠞꠥꠎꠣꠟꠦꠝꠅ ꠀꠁꠀ ꠔꠣꠁꠘ ꠖꠦꠈꠟꠣ, ꠙꠛꠤꠔ꠆ꠞ ꠛꠣꠄꠔꠥꠟ-ꠝꠥꠇꠣꠖ꠆ꠖꠍ ꠇꠣꠛꠣ ꠊꠞꠞ ꠡꠤꠝꠣꠘꠣꠔ ꠇꠥꠞꠛꠣꠘꠤꠞ ꠉꠞꠥ, ꠝꠦꠠꠣ ꠀꠞ ꠙꠣꠞꠅ ꠛꠦꠌꠣ-ꠇꠤꠘꠣ ꠌꠟꠦꠞ, ꠀꠞ ꠐꠦꠇꠣꠞ ꠛꠣꠐ꠆ꠐꠣꠞ ꠇꠣꠞꠛꠣꠞꠤ ꠅꠇꠟꠅ ꠛꠁ ꠞꠁꠍꠂꠘ।
JOH 2:15 ꠁꠔꠣ ꠖꠦꠈꠤꠀ ꠔꠣꠁꠘ ꠖꠠꠤ ꠖꠤꠀ ꠄꠇꠐꠣ ꠌꠣꠛꠥꠇ ꠛꠣꠘꠣꠁꠟꠣ, ꠀꠞ ꠌꠣꠛꠥꠇ ꠖꠤꠀ ꠢꠇꠟ ꠉꠞꠥ-ꠝꠦꠠꠣ ꠀꠞ ꠝꠣꠘꠡꠞꠦ ꠁꠘ ꠕꠘꠦ ꠈꠦꠖꠣꠁ ꠖꠤꠟꠣ। ꠀꠞ ꠐꠦꠇꠣꠞ ꠛꠣꠐ꠆ꠐꠣꠞ ꠇꠣꠞꠛꠣꠞꠤ ꠅꠇꠟꠞ ꠐꠦꠇꠣ-ꠙꠄꠡꠣ ꠍꠤꠔ꠆ꠞꠣꠁꠀ, ꠔꠣꠞꠣꠞ ꠇꠦꠡ ꠛꠣꠇ꠆ꠡ ꠃꠟꠐꠣꠁꠀ ꠚꠣꠟꠣꠁꠟꠣ।
JOH 2:16 ꠙꠣꠞꠅ ꠛꠦꠌꠞꠣ ꠅꠇꠟꠞꠦ ꠁꠍꠣꠄ ꠇꠁꠟꠣ, “ꠁꠘ ꠕꠘꠦ ꠢꠇ꠆ꠇꠟꠔꠣ ꠢꠞꠣꠅ। ꠀꠝꠣꠞ ꠛꠣꠚꠞ ꠊꠞꠞꠦ ꠛꠣꠎꠣꠞ ꠛꠣꠘꠣꠁꠅ ꠘꠣ।”
JOH 2:17 ꠅꠃ ꠡꠝꠄ ꠙꠣꠇ ꠇꠤꠔꠣꠛꠞ ꠅꠃ ꠇꠕꠣ ꠍꠣꠢꠣꠛꠤ ꠅꠇꠟꠞ ꠝꠘꠅ ꠅꠁꠉꠦꠟ, “ꠔꠥꠝꠣꠞ ꠊꠞꠞ ꠟꠣꠉꠤ ꠀꠝꠣꠞ ꠎꠦ ꠝꠢꠛ꠆ꠛꠔ, ꠅꠃ ꠝꠢꠛ꠆ꠛꠔꠦꠃ ꠀꠝꠣꠞ ꠖꠤꠟꠞ ꠝꠣꠎꠦ ꠀꠉꠥꠘꠤꠞ ꠟꠣꠈꠣꠘ ꠎꠟꠦꠞ।”
JOH 2:18 ꠁꠍꠣꠞ ꠁ ꠇꠣꠝꠞ ꠟꠣꠉꠤ ꠁꠢꠥꠖꠤ ꠘꠦꠔꠣ ꠅꠇꠟꠦ ꠔꠣꠘꠞꠦ ꠎꠤꠇꠣꠁꠟꠣ, “ꠁꠔꠣ ꠇꠞꠣꠞ ꠅꠗꠤꠇꠣꠞ ꠎꠦ ꠔꠥꠝꠣꠞ ꠀꠍꠦ, ꠔꠣꠞ ꠙꠞꠝꠣꠘ ꠢꠤꠡꠣꠛꠦ ꠔꠥꠝꠤ ꠇꠥꠘ ꠇꠦꠞꠣꠝꠔꠤ ꠖꠦꠈꠣꠁꠛꠣꠄ?”
JOH 2:19 ꠔꠣꠁꠘ ꠎꠥꠀꠙ ꠖꠤꠟꠣ, “ꠀꠙꠘꠣꠞꠣ ꠅꠃ ꠇꠣꠛꠣ ꠊꠞ ꠜꠣꠋꠉꠤꠟꠣꠃꠇ꠆ꠇꠣ, ꠀꠝꠤ ꠔꠤꠘ ꠖꠤꠘꠞ ꠜꠤꠔꠞꠦ ꠢꠤꠞꠛꠣꠞ ꠔꠥꠟꠝꠥ।”
JOH 2:20 ꠁꠈꠣꠘ ꠢꠥꠘꠤꠀ ꠔꠣꠞꠣ ꠇꠁꠟꠣ, “ꠁ ꠄꠛꠣꠖꠔ ꠈꠣꠘꠣ ꠛꠣꠘꠣꠁꠔꠦ ꠍꠄꠌꠣꠟ꠆ꠟꠤꠡ ꠛꠍꠞ ꠟꠣꠉꠍꠤꠟ, ꠀꠞ ꠔꠥꠝꠤ ꠇꠤꠔꠣ ꠔꠤꠘ ꠖꠤꠘꠞ ꠜꠤꠔꠞꠦ ꠛꠣꠘꠣꠁꠟꠤꠛꠣꠄ ꠘꠤ?”
JOH 2:21 ꠅꠁꠟꠦ ꠁꠍꠣꠄ ꠁꠘꠅ ꠀꠟ꠆ꠟꠣꠞ ꠊꠞ ꠛꠟꠔꠦ ꠘꠤꠎꠞ ꠡꠞꠤꠟꠞ ꠇꠕꠣꠃ ꠇꠁꠍꠂꠘ।
JOH 2:22 ꠄꠞꠟꠣꠉꠤ ꠁꠍꠣ ꠝꠞꠣ ꠕꠣꠇꠤ ꠎꠤꠘ꠆ꠖꠣ ꠅꠀꠞ ꠛꠣꠖꠦ ꠍꠣꠢꠣꠛꠤ ꠅꠇꠟꠞ ꠝꠘꠅ ꠅꠁꠍꠤꠟ, ꠔꠣꠁꠘ ꠅꠃ ꠇꠕꠣꠃ ꠇꠁꠍꠟꠣ। ꠔꠦꠃ ꠍꠣꠢꠣꠛꠤ ꠅꠇꠟꠦ ꠙꠣꠇ ꠇꠤꠔꠣꠛꠞ ꠇꠕꠣ ꠀꠞ ꠁꠍꠣꠄ ꠎꠦꠔꠣ ꠇꠁꠍꠟꠣ, ꠅꠔꠣ ꠄꠇꠤꠘ ꠇꠞꠟꠣ।
JOH 2:23 ꠀꠎꠣꠖꠤ ꠁꠖꠞ ꠡꠝꠄ ꠁꠍꠣꠄ ꠎꠦꠞꠥꠎꠣꠟꠦꠝ ꠞꠁꠀ ꠎꠦꠔꠣ ꠇꠦꠞꠣꠝꠔꠤ ꠇꠣꠝ ꠇꠞꠍꠤꠟꠣ, ꠁꠔꠣ ꠖꠦꠈꠤꠀ ꠛꠃꠔ ꠝꠣꠘꠡꠦ ꠔꠣꠘ ꠃꠙꠞꠦ ꠁꠝꠣꠘ ꠀꠘꠟ।
JOH 2:24 ꠅꠁꠟꠦ ꠁꠍꠣꠄ ꠘꠤꠎꠞꠦ ꠔꠣꠞꠣꠞ ꠉꠦꠍꠦ ꠗꠞꠣ ꠖꠤꠟꠣ ꠘꠣ, ꠇꠣꠞꠘ ꠔꠣꠁꠘ ꠢꠇꠟ ꠝꠣꠘꠡꠞꠦ ꠌꠤꠘꠔꠣ।
JOH 2:25 ꠝꠣꠘꠡꠞ ꠛꠦꠙꠣꠞꠦ ꠔꠣꠘ ꠇꠥꠘꠥ ꠡꠣꠇ꠆ꠇꠤꠞ ꠎꠞꠥꠞ ꠀꠍꠤꠟ ꠘꠣ, ꠔꠣꠁꠘ ꠄꠞꠣꠞ ꠖꠤꠟꠞ ꠈꠛꠞ ꠎꠣꠘꠔꠣ।
JOH 3:1 ꠚꠞꠤꠡꠤ ꠅꠇꠟꠞ ꠝꠣꠎꠦ ꠘꠤꠇꠖꠤꠝ ꠘꠣꠝꠦ ꠁꠢꠥꠖꠤ ꠅꠇꠟꠞ ꠄꠇꠎꠘ ꠘꠦꠔꠣ ꠀꠍꠟꠣ।
JOH 3:2 ꠄꠇꠖꠤꠘ ꠞꠣꠁꠔ ꠔꠣꠁꠘ ꠀꠁꠀ ꠁꠍꠣꠞꠦ ꠇꠁꠟꠣ, “ꠢꠥꠎꠥꠞ, ꠀꠝꠞꠣ ꠎꠣꠘꠤ, ꠀꠙꠘꠦ ꠄꠇꠎꠘ ꠃꠡ꠆ꠔꠣꠖ ꠢꠤꠡꠣꠛꠦ ꠀꠟ꠆ꠟꠣꠞ ꠉꠦꠍ ꠕꠣꠇꠤ ꠀꠁꠍꠂꠘ। ꠀꠙꠘꠦ ꠎꠦꠔꠣ ꠇꠦꠞꠣꠝꠔꠤ ꠇꠣꠝ ꠇꠞꠞꠣ, ꠀꠟ꠆ꠟꠣ ꠟꠉꠦ ꠘꠣ ꠕꠣꠇꠟꠦ ꠇꠦꠃ ꠁꠔꠣ ꠇꠞꠔ ꠙꠣꠞꠦ ꠘꠣ।”
JOH 3:3 ꠔꠣꠁꠘ ꠘꠤꠇꠖꠤꠝꠞꠦ ꠇꠁꠟꠣ, “ꠀꠝꠤ ꠀꠙꠘꠣꠞꠦ ꠢꠣꠍꠣꠃ ꠇꠁꠞꠣꠝ, ꠘꠄꠀ ꠇꠞꠤ ꠎꠘꠝ ꠘꠣ ꠟꠁꠟꠦ ꠇꠦꠃ ꠀꠟ꠆ꠟꠣꠞ ꠛꠣꠖꠡꠣꠁ ꠖꠦꠈꠦ ꠘꠣ।”
JOH 3:4 ꠔꠦꠃ ꠘꠤꠇꠖꠤꠝꠦ ꠔꠣꠘꠞꠦ ꠇꠁꠟꠣ, “ꠝꠣꠘꠥꠡ ꠛꠥꠠꠣ ꠅꠁꠉꠦꠟꠦ ꠢꠤꠞꠛꠣꠞ ꠎꠘꠝ ꠟꠄ ꠇꠤꠟꠣ? ꠖꠥꠍꠞꠣꠛꠣꠞ ꠝꠣʼꠞ ꠙꠦꠐꠅ ꠢꠣꠝꠣꠁꠀ ꠎꠘꠝ ꠟꠄ ꠘꠤ?”
JOH 3:5 ꠁꠍꠣꠄ ꠎꠥꠀꠙ ꠖꠤꠟꠣ, “ꠀꠝꠤ ꠀꠙꠘꠣꠞꠦ ꠢꠣꠍꠣꠃ ꠇꠁꠞꠣꠝ, ꠙꠣꠘꠤ ꠀꠞ ꠙꠣꠇ ꠞꠥꠢꠥ ꠕꠣꠇꠤ ꠎꠘꠝ ꠘꠣ ꠅꠁꠟꠦ ꠇꠦꠃ ꠀꠟ꠆ꠟꠣꠞ ꠛꠣꠖꠡꠣꠁꠔ ꠢꠣꠝꠣꠁꠔ ꠙꠣꠞꠦ ꠘꠣ।
JOH 3:6 ꠞꠇ꠆ꠔ-ꠝꠣꠋꠡ ꠕꠣꠇꠤ ꠎꠦꠔꠣꠞ ꠎꠘꠝ ꠅꠄ, ꠁꠔꠣ ꠔ ꠈꠣꠟꠤ ꠞꠇ꠆ꠔ-ꠝꠣꠋꠡ। ꠀꠞ ꠙꠣꠇ ꠞꠥꠢꠥ ꠕꠣꠇꠤ ꠎꠦꠔꠣꠞ ꠎꠘꠝ, ꠁꠔꠣ ꠞꠥꠢꠥ।
JOH 3:7 ꠀꠝꠤ ꠎꠦ ꠀꠙꠘꠣꠞꠦ ꠇꠁꠟꠣꠝ, ꠘꠄꠀ ꠇꠞꠤ ꠎꠘꠝ ꠟꠅꠀ ꠎꠞꠥꠞ, ꠄꠔꠦ ꠔꠣꠁꠎ꠆ꠎꠥꠛ ꠅꠁꠛꠣ ꠘꠣ।
JOH 3:8 ꠛꠣꠔꠣꠡ ꠔꠣꠞ ꠎꠦꠛꠣꠄ ꠁꠌ꠆ꠍꠣ ꠅꠛꠣꠄ ꠎꠣꠄ, ꠀꠞ ꠀꠙꠘꠦ ꠔꠣꠞ ꠀꠅꠀꠎ ꠢꠥꠘꠂꠘ, ꠅꠁꠟꠦ ꠇꠁ ꠕꠣꠇꠤ ꠀꠄ ꠀꠞ ꠇꠁ ꠎꠣꠄ, ꠁꠈꠣꠘ ꠎꠣꠘꠂꠘ ꠘꠣ। ꠔꠦ ꠙꠣꠇ ꠞꠥꠢꠥ ꠕꠣꠇꠤ ꠎꠦꠞꠣꠞ ꠎꠘꠝ ꠅꠁꠍꠦ, ꠔꠣꠞꠣꠞ ꠛꠦꠟꠣꠄꠅ ꠅꠟꠣꠈꠣꠘ ꠅꠄ।”
JOH 3:9 ꠘꠤꠇꠖꠤꠝꠦ ꠁꠍꠣꠞꠦ ꠎꠤꠇꠣꠁꠟꠣ, “ꠁꠇꠐꠣ ꠇꠤꠟꠣ ꠅꠁꠔ ꠙꠣꠞꠦ?”
JOH 3:10 ꠁꠍꠣꠄ ꠎꠥꠀꠙ ꠖꠤꠟꠣ, “ꠀꠙꠘꠦ ꠛꠘꠤ ꠁꠍꠞꠣꠁꠟꠞ ꠃꠡ꠆ꠔꠣꠖ ꠅꠁꠀꠅ ꠁꠔꠣ ꠛꠥꠎꠂꠘ ꠘꠣ ꠘꠤ?
JOH 3:11 ꠀꠙꠘꠣꠞꠦ ꠢꠣꠍꠣꠃ ꠇꠁꠞꠣꠝ, ꠀꠝꠞꠣ ꠎꠦꠔꠣ ꠎꠣꠘꠤ ꠅꠈꠣꠘꠃ ꠇꠁ, ꠀꠞ ꠎꠦꠔꠣ ꠖꠦꠈꠍꠤ ꠅꠃ ꠛꠦꠙꠣꠞꠦ ꠡꠣꠇ꠆ꠇꠤ ꠖꠦꠁ। ꠅꠁꠟꠦ ꠀꠙꠘꠣꠞꠣ ꠀꠝꠞꠣꠞ ꠡꠣꠇ꠆ꠇꠤ ꠝꠣꠘꠂꠘ ꠘꠣ।
JOH 3:12 ꠀꠝꠤ ꠀꠙꠘꠣꠞꠣꠞꠦ ꠖꠥꠘꠤꠀꠛꠤ ꠛꠦꠙꠣꠞꠦ ꠇꠁꠟꠦ ꠎꠦꠛꠟꠣ ꠄꠇꠤꠘ ꠇꠞꠂꠘ ꠘꠣ, ꠔꠦ ꠛꠦꠢꠦꠡ꠆ꠔꠤ ꠛꠦꠙꠣꠞ ꠇꠁꠟꠦ ꠇꠤꠟꠣ ꠄꠇꠤꠘ ꠇꠞꠛꠣ?
JOH 3:13 ꠎꠦꠁꠘ ꠛꠦꠢꠦꠡ꠆ꠔꠅ ꠕꠣꠇꠂꠘ ꠀꠞ ꠛꠦꠢꠦꠡ꠆ꠔ ꠕꠣꠇꠤ ꠀꠁꠍꠂꠘ, ꠢꠃ ꠛꠤꠘ-ꠀꠖꠝ ꠍꠣꠠꠣ ꠀꠞ ꠇꠦꠃ ꠛꠦꠢꠦꠡ꠆ꠔꠅ ꠃꠑꠍꠂꠘ ꠘꠣ।
JOH 3:14 “ꠝꠞꠥꠜꠥꠝꠤꠞ ꠝꠣꠎꠦ ꠝꠥꠍꠣ ꠘꠛꠤꠄ ꠎꠦꠟꠣ ꠢꠣꠚꠞꠦ ꠃꠌꠣꠔ ꠔꠥꠟꠍꠤꠟꠣ, ꠅꠟꠣ ꠀꠝꠤ ꠛꠤꠘ-ꠀꠖꠝꠞꠦꠅ ꠃꠌꠣꠔ ꠔꠥꠟꠣ ꠅꠁꠛ।
JOH 3:15 ꠎꠣꠔꠦ ꠎꠦ ꠎꠘꠦ ꠀꠝꠣꠞ ꠃꠙꠞꠦ ꠁꠝꠣꠘ ꠀꠘꠦ, ꠢꠦ ꠀꠈꠦꠞꠤ ꠎꠤꠘ꠆ꠖꠦꠉꠤ ꠢꠣꠍꠤꠟ ꠇꠞꠦ।
JOH 3:16 ꠀꠟ꠆ꠟꠣ ꠙꠣꠇꠦ ꠖꠥꠘꠤꠀꠞ ꠝꠣꠘꠡꠞꠦ ꠅꠔ ꠛꠦꠡꠤ ꠝꠣꠄꠀ ꠇꠞꠟꠣ, ꠁ ꠝꠣꠄꠀꠞ ꠈꠣꠔꠤꠞꠦ ꠔꠣꠘ ꠈꠣꠍ ꠝꠣꠄꠀꠞ ꠎꠘꠞꠦ ꠖꠣꠘ ꠇꠞꠟꠣ। ꠎꠦ ꠝꠣꠘꠡꠦ ꠅꠃ ꠝꠣꠄꠀꠞ ꠎꠘꠞ ꠃꠙꠞꠦ ꠁꠝꠣꠘ ꠀꠘꠦ, ꠢꠦ ꠛꠤꠘꠣꠡ ꠅꠄ ꠘꠣ, ꠛꠞꠋ ꠀꠈꠦꠞꠤ ꠎꠤꠘ꠆ꠖꠦꠉꠤ ꠢꠣꠍꠤꠟ ꠇꠞꠦ।
JOH 3:17 “ꠀꠟ꠆ꠟꠣꠄ ꠝꠣꠘꠡꠞꠦ ꠖꠥꠡꠤ ꠙꠞꠝꠣꠘ ꠇꠞꠣꠞ ꠟꠣꠉꠤ ꠔꠣꠘ ꠝꠣꠄꠀꠞ ꠎꠘꠞꠦ ꠖꠥꠘꠤꠀꠔ ꠙꠣꠑꠣꠁꠍꠂꠘ ꠘꠣ। ꠅꠃ ꠝꠣꠄꠀꠞ ꠎꠘꠞ ꠈꠣꠔꠤꠞꠦ ꠝꠣꠘꠡꠦ ꠎꠣꠔꠦ ꠘꠣꠎꠣꠔ ꠙꠣꠄ, ꠄꠞꠟꠣꠉꠤꠃ ꠙꠣꠑꠣꠁꠍꠂꠘ।
JOH 3:18 ꠎꠦ ꠎꠘꠦ ꠅꠃ ꠝꠣꠄꠀꠞ ꠎꠘꠞ ꠃꠙꠞꠦ ꠁꠝꠣꠘ ꠀꠘꠦ, ꠔꠣꠞ ꠇꠥꠘꠥ ꠛꠤꠌꠣꠞ ꠅꠄ ꠘꠣ, ꠅꠁꠟꠦ ꠎꠦ ꠁꠝꠣꠘ ꠀꠘꠦ ꠘꠣ, ꠔꠣꠞꠦ ꠀꠉꠦꠃ ꠖꠥꠡꠤ ꠡꠣꠁꠛꠡ꠆ꠔ ꠇꠞꠣ ꠅꠁꠉꠦꠍꠦ। ꠇꠣꠞꠘ ꠀꠟ꠆ꠟꠣꠞ ꠄꠇꠝꠣꠔ꠆ꠞ ꠝꠣꠄꠀꠞ ꠎꠘ ꠁꠛꠘꠥꠟ꠆ꠟꠣꠞ ꠃꠙꠞꠦ ꠢꠦ ꠁꠝꠣꠘ ꠀꠘꠍꠦ ꠘꠣ।
JOH 3:19 ꠔꠣꠞꠦ ꠖꠥꠡꠤ ꠡꠣꠁꠛꠡ꠆ꠔ ꠇꠞꠣ ꠅꠁꠍꠦ, ꠇꠣꠞꠘ ꠖꠥꠘꠤꠀꠔ ꠘꠥꠞ ꠎꠣꠁꠞ ꠅꠁꠍꠦ। ꠅꠁꠟꠦ ꠝꠣꠘꠡꠞ ꠛꠖ ꠇꠣꠝꠞ ꠟꠣꠉꠤ ꠘꠥꠞ ꠕꠣꠇꠤ ꠀꠘ꠆ꠖꠣꠁꠞꠞꠦ ꠛꠦꠡꠤ ꠜꠣꠟꠣ ꠙꠣꠁꠍꠦ।
JOH 3:20 ꠎꠦ ꠝꠣꠘꠡꠦ ꠛꠖ ꠇꠣꠝ ꠇꠞꠦ, ꠢꠦ ꠘꠥꠞꠞꠦ ꠊꠤꠘ꠆ꠘꠣꠄ, ꠔꠣꠞ ꠛꠖ ꠇꠣꠝ ꠅꠇꠟ ꠎꠣꠁꠞ ꠅꠁꠎꠤꠛ ꠇꠞꠤ ꠢꠦ ꠘꠥꠞꠞ ꠉꠦꠍꠦ ꠀꠄ ꠘꠣ।
JOH 3:21 ꠅꠁꠟꠦ ꠎꠦ ꠎꠘ ꠢꠇ-ꠢꠣꠟꠣꠟꠤꠞ ꠙꠕꠦ ꠌꠟꠦ, ꠢꠦ ꠘꠥꠞꠞ ꠉꠦꠍꠦ ꠀꠄ, ꠎꠣꠔꠦ ꠔꠣꠞ ꠢꠇꠟ ꠇꠣꠝ ꠀꠟ꠆ꠟꠣꠞ ꠝꠥꠘꠡꠣ ꠝꠣꠚꠤꠇ ꠅꠁꠍꠦ ꠇꠞꠤ ꠙꠞꠝꠣꠘ ꠅꠄ।”
JOH 3:22 ꠄꠞꠛꠣꠖꠦ ꠢꠎꠞꠔ ꠁꠍꠣ ꠀꠞ ꠍꠣꠢꠣꠛꠤ ꠅꠇꠟ ꠄꠢꠥꠖꠤꠀ ꠄꠟꠣꠇꠣꠔ ꠀꠁꠟꠣ। ꠢꠤꠘꠅ ꠔꠣꠁꠘ ꠍꠣꠢꠣꠛꠤ ꠅꠇꠟꠞ ꠟꠉꠦ ꠇꠤꠍꠥ ꠖꠤꠘ ꠇꠣꠐꠣꠁꠟꠣ ꠀꠞ ꠝꠣꠘꠡꠞꠦ ꠔꠃꠛꠣꠞ ꠉꠥꠍꠟ ꠇꠞꠣꠁꠟꠣ।
JOH 3:23 ꠅꠃ ꠡꠝꠄ ꠍꠣꠟꠤꠝ ꠘꠣꠝꠞ ꠄꠇ ꠉꠣꠃꠞ ꠇꠣꠘ꠆ꠖꠣꠔ ꠅꠂꠘꠥꠘ ꠘꠣꠝꠞ ꠄꠇ ꠎꠣꠉꠣꠔ ꠄꠢꠤꠀꠄꠅ ꠔꠃꠛꠣꠞ ꠉꠥꠍꠟ ꠇꠞꠣꠘꠤꠔ ꠀꠍꠟꠣ। ꠢꠃ ꠎꠣꠉꠣꠔ ꠛꠃꠔ ꠙꠣꠘꠤ ꠕꠣꠇꠣꠄ ꠖꠟꠦ ꠖꠟꠦ ꠝꠣꠘꠥꠡ ꠀꠁꠀ ꠔꠃꠛꠣꠞ ꠉꠥꠍꠟ ꠟꠁꠟꠣ।
JOH 3:24 ꠄꠢꠤꠀ ꠘꠛꠤꠞꠦ ꠅꠃ ꠡꠝꠄꠅ ꠎꠦꠟꠅ ꠛꠘ꠆ꠖꠤ ꠇꠞꠣ ꠅꠁꠍꠦ ꠘꠣ।
JOH 3:25 ꠅꠃ ꠡꠝꠄ ꠡꠞꠤꠅꠔ ꠝꠣꠚꠤꠇ ꠙꠣꠇ-ꠍꠣꠚ ꠅꠀꠞ ꠛꠦꠙꠣꠞ ꠟꠁꠀ, ꠄꠢꠤꠀ ꠘꠛꠤꠞ ꠃꠝ꠆ꠝꠔ ꠅꠇꠟꠦ ꠁꠢꠥꠖꠤꠞ ꠄꠇ ꠀꠟꠤꠝꠞ ꠟꠉꠦ ꠔꠞ꠆ꠇ ꠟꠣꠉꠣꠁ ꠖꠤꠟꠣ।
JOH 3:26 ꠛꠣꠖꠦ ꠔꠣꠁꠘ-ꠔꠣꠁꠘ ꠢꠎꠞꠔ ꠄꠢꠤꠀꠞ ꠉꠦꠍꠦ ꠀꠁꠀ ꠇꠁꠟꠣ, “ꠢꠥꠎꠥꠞ, ꠎꠦꠁꠘ ꠎꠞ꠆ꠖꠣꠘ ꠉꠣꠋꠉꠞ ꠢꠙꠣꠞꠅ ꠀꠙꠘꠣꠞ ꠟꠉꠦ ꠀꠍꠟꠣ, ꠀꠞ ꠎꠣꠞ ꠛꠦꠙꠣꠞꠦ ꠀꠙꠘꠦ ꠡꠣꠇ꠆ꠇꠤ ꠖꠤꠍꠟꠣ, ꠖꠦꠈꠞꠣ ꠘꠤ, ꠢꠇꠟ ꠝꠣꠘꠥꠡ ꠔꠣꠘ ꠉꠦꠍꠦ ꠎꠣꠁꠞꠣꠉꠤ ꠀꠞ ꠔꠣꠁꠘ ꠄꠞꠣꠞꠦ ꠔꠃꠛꠣꠞ ꠉꠥꠍꠟ ꠖꠤꠞꠣ।”
JOH 3:27 ꠁꠈꠣꠘ ꠢꠥꠘꠤꠀ ꠄꠢꠤꠀꠄ ꠇꠁꠟꠣ, “ꠛꠦꠢꠦꠡ꠆ꠔ ꠕꠣꠇꠤ ꠖꠦꠅꠀ ꠘꠣ ꠅꠁꠟꠦ ꠇꠦꠃ ꠇꠥꠘ꠆ꠔꠣ ꠙꠣꠄ ꠘꠣ।
JOH 3:28 ꠔꠥꠝꠞꠣꠃ ꠔ ꠢꠥꠘꠍ, ꠀꠝꠤ ꠇꠁꠍꠤ, ꠀꠝꠤ ꠀꠟ-ꠝꠍꠤ ꠘꠣꠄ, ꠅꠁꠟꠦ ꠔꠣꠘ ꠀꠉꠦ ꠀꠝꠣꠞꠦ ꠙꠣꠑꠣꠘꠤ ꠅꠁꠍꠦ।
JOH 3:29 ꠎꠣꠞ ꠉꠦꠍꠦ ꠇꠁꠘꠣꠞꠦ ꠛꠤꠀ ꠖꠦꠅꠀ ꠅꠄ, ꠄꠁꠘꠃ ꠘꠡꠣ। ꠘꠡꠣꠞ ꠖꠥꠡ꠆ꠔꠦ ꠈꠣꠟꠤ ꠃꠛꠣꠁꠀ ꠘꠡꠣꠞ ꠝꠣꠔ ꠢꠥꠘꠂꠘ ꠀꠞ ꠔꠣꠘ ꠉꠟꠣꠞ ꠀꠅꠀꠎ ꠢꠥꠘꠤꠀ ꠈꠥꠡꠤ ꠅꠁꠘ। ꠅꠃ ꠟꠣꠈꠣꠘ ꠀꠝꠣꠞ ꠈꠥꠡꠤꠅ ꠀꠁꠎ ꠙꠥꠞꠣ ꠅꠁꠟ।
JOH 3:30 ꠔꠣꠘꠞꠦ ꠛꠠ ꠅꠁꠔꠦ ꠅꠁꠛ ꠀꠞ ꠀꠝꠤ ꠢꠞꠤ ꠎꠣꠁꠔꠣꠝ ꠅꠁꠛ।”
JOH 3:31 ꠎꠦꠁꠘ ꠃꠙꠞ ꠕꠣꠇꠤ ꠀꠁꠘ, ꠄꠁꠘ ꠢꠇꠟꠞ ꠃꠙꠞꠦ। ꠅꠁꠟꠦ ꠎꠦ ꠖꠥꠘꠤꠀ ꠕꠣꠇꠤ ꠀꠄ, ꠢꠦ ꠔ ꠖꠥꠘꠤꠀꠞ, ꠢꠦ ꠖꠥꠘꠤꠀꠛꠤ ꠝꠣꠔꠃ ꠝꠣꠔꠦ। ꠎꠦꠁꠘ ꠛꠦꠢꠦꠡ꠆ꠔ ꠕꠣꠇꠤ ꠀꠁꠘ, ꠔꠣꠘ ꠀꠡꠘ ꠢꠇꠟꠞ ꠃꠙꠞꠦ।
JOH 3:32 ꠔꠣꠁꠘ ꠢꠘꠅ ꠎꠦꠔꠣ ꠖꠦꠈꠍꠂꠘ ꠀꠞ ꠢꠥꠘꠍꠂꠘ, ꠅꠔꠣꠞ ꠡꠣꠇ꠆ꠇꠤꠃ ꠖꠦꠁꠘ। ꠇꠦꠃ ꠔꠣꠘ ꠡꠣꠇ꠆ꠇꠤ ꠝꠣꠘꠦ ꠘꠣ।
JOH 3:33 ꠅꠁꠟꠦ ꠎꠦ ꠎꠘꠦ ꠔꠣꠘ ꠡꠣꠇ꠆ꠇꠤ ꠇꠛꠥꠟ ꠇꠞꠍꠦ, ꠢꠦ ꠅꠈꠣꠘ ꠖꠤꠀꠃ ꠙꠞꠝꠣꠘ ꠇꠞꠦ, ꠀꠟ꠆ꠟꠣꠞ ꠇꠣꠟꠣꠝꠃ ꠢꠣꠍꠣ।
JOH 3:34 ꠀꠟ꠆ꠟꠣꠄ ꠎꠦꠘꠞꠦ ꠙꠣꠑꠣꠁꠍꠂꠘ, ꠔꠣꠁꠘ ꠀꠟ꠆ꠟꠣꠞ ꠇꠣꠟꠣꠝꠃ ꠛꠣꠔꠣꠁꠘ, ꠇꠣꠞꠘ ꠀꠟ꠆ꠟꠣꠄ ꠔꠣꠘꠞꠦ ꠙꠥꠞꠣꠙꠥꠞ ꠇꠞꠤꠀ ꠙꠣꠇ ꠞꠥꠢꠥ ꠖꠣꠘ ꠇꠞꠂꠘ।
JOH 3:35 ꠛꠣꠚꠦ ꠔꠣꠘ ꠙꠥꠔꠞꠦ, ꠝꠣꠘꠤ ꠔꠣꠘ ꠈꠣꠍ ꠝꠣꠄꠀꠞ ꠎꠘꠞꠦ ꠝꠣꠄꠀ ꠇꠞꠂꠘ ꠀꠞ ꠔꠣꠘ ꠀꠔꠅꠃ ꠢꠇꠟꠔꠣ ꠖꠤꠍꠂꠘ।
JOH 3:36 ꠎꠦ ꠝꠣꠘꠡꠦ ꠀꠟ꠆ꠟꠣꠞ ꠈꠣꠍ ꠝꠣꠄꠀꠞ ꠎꠘꠞ ꠃꠙꠞꠦ ꠁꠝꠣꠘ ꠀꠘꠍꠦ, ꠢꠦ ꠀꠈꠦꠞꠤ ꠎꠤꠘ꠆ꠖꠦꠉꠤ ꠙꠣꠁꠟꠤꠍꠦ। ꠅꠁꠟꠦ ꠎꠦ ꠔꠣꠘꠞꠦ ꠝꠣꠘꠦ ꠘꠣ, ꠢꠦ ꠇꠥꠘꠥꠝꠘ꠆ꠔꠦꠃ ꠀꠈꠦꠞ ꠙꠣꠁꠔ ꠘꠣꠄ ꠛꠞꠋ ꠔꠣꠞ ꠃꠙꠞꠦ ꠀꠟ꠆ꠟꠣꠞ ꠉꠎꠛ ꠙꠠꠛ।
JOH 4:1 ꠚꠞꠤꠡꠤ ꠅꠇꠟꠦ ꠢꠥꠘꠟꠣ, ꠢꠎꠞꠔ ꠁꠍꠣꠄ ꠄꠢꠤꠀ ꠘꠛꠤ ꠕꠣꠇꠤ ꠛꠦꠡꠤ ꠝꠣꠘꠡꠞꠦ ꠔꠣꠘ ꠃꠝ꠆ꠝꠔ ꠛꠣꠘꠣꠁꠍꠂꠘ, ꠀꠞ ꠔꠃꠛꠣꠞ ꠉꠥꠍꠟ ꠇꠞꠣꠁꠞꠣ।
JOH 4:2 ꠅꠁꠟꠦ ꠁꠍꠣꠄ ꠘꠤꠎꠦ ꠔꠃꠛꠣꠞ ꠉꠥꠍꠟ ꠇꠞꠣꠁꠞꠣ ꠘꠣ, ꠔꠣꠘ ꠃꠝ꠆ꠝꠔ ꠅꠇꠟꠦꠃ ꠇꠞꠣꠁꠞꠣ।
JOH 4:3 ꠢꠎꠞꠔ ꠁꠍꠣꠄ ꠁ ꠈꠛꠞ ꠙꠣꠁꠀ, ꠄꠢꠥꠖꠤꠀ ꠎꠤꠟꠣ ꠍꠣꠠꠤꠀ ꠢꠤꠞꠛꠣꠞ ꠉꠣꠟꠤꠟ ꠎꠤꠟꠣꠔ ꠎꠣꠅꠀꠞ ꠟꠣꠉꠤ ꠞꠅꠀꠘꠣ ꠅꠁꠟꠣ।
JOH 4:4 ꠎꠣꠅꠀꠞ ꠇꠣꠟꠅ ꠔꠣꠘꠞꠦ ꠡꠝꠞꠤꠀꠞ ꠝꠣꠎꠖꠤ ꠎꠣꠅꠀ ꠟꠣꠉꠍꠤꠟ।
JOH 4:5 ꠙꠕꠅ ꠔꠣꠁꠘ ꠡꠝꠞꠤꠀꠞ ꠡꠥꠈꠣꠞ ꠘꠣꠝꠞ ꠄꠇ ꠉꠣꠃꠞ ꠗꠣꠞꠅ ꠀꠁꠟꠣ। ꠢꠎꠞꠔ ꠁꠀꠇꠥꠛꠦ ꠔꠣꠘ ꠙꠥꠀ ꠁꠃꠍꠥꠚꠞꠦ ꠎꠦ ꠎꠝꠤꠘ ꠖꠣꠘ ꠇꠞꠍꠟꠣ, ꠅꠃ ꠎꠝꠤꠘꠈꠣꠘ ꠀꠍꠤꠟ ꠢꠃ ꠉꠣꠃꠞ ꠗꠣꠞꠅ।
JOH 4:6 ꠁ ꠎꠝꠤꠘꠅ ꠢꠎꠞꠔ ꠁꠀꠇꠥꠛꠞ ꠇꠥꠀ ꠀꠍꠤꠟ। ꠁꠍꠣ ꠀꠐꠔꠦ ꠀꠐꠔꠦ ꠢꠦꠞꠣꠘ ꠅꠁꠀ ꠅꠃ ꠇꠥꠀꠞ ꠇꠣꠍꠣꠔ ꠎꠤꠞꠣꠁꠟꠣ। ꠅꠃ ꠡꠝꠄ ꠅꠘꠥꠝꠣꠘ ꠖꠥꠁꠚꠞ ꠅꠁꠉꠦꠍꠦ।
JOH 4:7 ꠄꠞꠝꠣꠎꠦ ꠡꠝꠞꠤꠀ ꠎꠣꠔꠤꠞ ꠄꠇ ꠛꠦꠐꠤꠄ ꠙꠣꠘꠤ ꠔꠥꠟꠣꠔ ꠀꠁꠟ, ꠀꠞ ꠇꠥꠀꠞ ꠇꠣꠍꠣꠔ ꠁꠍꠣ ꠄꠇꠟꠣ ꠀꠍꠟꠣ, ꠇꠣꠞꠘ ꠔꠣꠘ ꠍꠣꠢꠣꠛꠤ ꠅꠇꠟ ꠈꠣꠘꠤ-ꠙꠣꠘꠤ ꠟꠅꠀꠞ ꠟꠣꠉꠤ ꠛꠣꠎꠣꠞꠅ ꠉꠦꠍꠟꠣꠉꠤ। ꠁꠍꠣꠄ ꠔꠣꠁꠞꠦ ꠇꠁꠟꠣ, “ꠅ ꠝꠣꠁ, ꠀꠝꠣꠞꠦ ꠕꠥꠠꠣ ꠙꠣꠘꠤ ꠈꠣꠅꠀꠃꠇ꠆ꠇꠣ।”
JOH 4:9 ꠛꠦꠐꠤꠄ ꠇꠁꠟ, “ꠀꠝꠤ ꠔ ꠡꠝꠞꠤꠀ ꠎꠣꠔꠤꠞ ꠝꠣꠘꠥꠡ। ꠀꠙꠘꠦ ꠄꠇꠎꠘ ꠁꠢꠥꠖꠤ ꠅꠁꠀ ꠀꠝꠣꠞ ꠉꠦꠍꠦ ꠙꠣꠘꠤ ꠌꠣꠁꠞꠣ ꠇꠤꠟꠣ?” ꠛꠦꠐꠤꠄ ꠁꠈꠣꠘ ꠇꠁꠟ, ꠇꠣꠞꠘ ꠡꠝꠞꠤꠀ ꠎꠣꠔꠤꠞ ꠟꠉꠦ ꠁꠢꠥꠖꠤ ꠝꠣꠘꠡꠞ ꠇꠥꠘꠥꠎꠣꠔ ꠝꠤꠟ-ꠝꠤꠡ ꠛꠣ ꠌꠟꠣ-ꠚꠤꠞꠣ ꠀꠍꠤꠟ ꠘꠣ।
JOH 4:10 ꠁꠍꠣꠄ ꠔꠣꠁꠞꠦ ꠇꠁꠟꠣ, “ꠔꠥꠝꠤ ꠎꠥꠖꠤ ꠎꠣꠘꠔꠣꠄ ꠀꠟ꠆ꠟꠣꠞ ꠖꠣꠘ ꠇꠤꠔꠣ, ꠀꠞ ꠇꠦ ꠔꠥꠝꠣꠞ ꠉꠦꠍꠦ ꠙꠣꠘꠤ ꠌꠣꠁꠞꠣ, ꠔꠦ ꠔꠥꠝꠤ ꠘꠤꠎꠦꠃ ꠔꠣꠘ ꠉꠦꠍꠦ ꠙꠣꠘꠤ ꠌꠣꠁꠟꠣꠄ ꠅꠘꠦ, ꠀꠞ ꠔꠣꠁꠘ ꠔꠥꠝꠣꠞꠦ ꠎꠤꠘ꠆ꠖꠣ ꠙꠣꠘꠤ ꠖꠤꠟꠣ ꠅꠘꠦ।”
JOH 4:11 ꠛꠦꠐꠤꠄ ꠇꠁꠟ, “ꠍꠣꠛ, ꠀꠙꠘꠣꠞ ꠉꠦꠍꠦ ꠔ ꠙꠣꠘꠤ ꠔꠥꠟꠣꠞ ꠇꠥꠘ꠆ꠔꠣ ꠘꠣꠁ, ꠀꠞ ꠁ ꠇꠥꠀꠅ ꠉꠁꠘ। ꠔꠦ ꠎꠤꠘ꠆ꠖꠣ ꠙꠣꠘꠤ ꠇꠥꠀꠁ ꠕꠣꠇꠤ ꠙꠣꠁꠟꠣ?
JOH 4:12 ꠀꠙꠘꠦ ꠇꠥꠘꠥ ꠀꠝꠞꠣꠞ ꠝꠥꠟ ꠝꠥꠞꠛ꠆ꠛꠤ ꠁꠀꠇꠥꠛ ꠘꠛꠤ ꠕꠣꠇꠤ ꠛꠠ ꠘꠤ? ꠔꠣꠁꠘꠃ ꠀꠝꠞꠣꠞ ꠟꠣꠉꠤ ꠁ ꠇꠥꠀ ꠈꠥꠖꠤꠍꠟꠣ। ꠔꠣꠁꠘ ꠀꠞ ꠔꠣꠘ ꠙꠥꠀꠂꠘ꠆ꠔꠦꠅ ꠅꠃ ꠇꠥꠀꠞ ꠙꠣꠘꠤ ꠈꠣꠁꠔꠣ, ꠀꠞ ꠔꠣꠘ ꠙꠡꠥꠞ ꠙꠣꠟꠞꠦꠅ ꠈꠣꠅꠀꠁꠔꠣ।”
JOH 4:13 ꠔꠦꠃ ꠁꠍꠣꠄ ꠇꠁꠟꠣ, “ꠎꠦ ꠎꠘꠦ ꠁ ꠇꠥꠀꠞ ꠙꠣꠘꠤ ꠈꠣꠁꠛ, ꠔꠣꠞ ꠢꠤꠞꠛꠣꠞ ꠙꠤꠀꠍ ꠟꠣꠉꠛ।
JOH 4:14 ꠅꠁꠟꠦ ꠀꠝꠣꠞ ꠖꠦꠅꠀ ꠙꠣꠘꠤ ꠎꠦ ꠈꠣꠁꠛ, ꠔꠣꠞ ꠇꠥꠘꠥ ꠡꠝꠄꠃ ꠙꠤꠀꠍ ꠟꠣꠉꠔ ꠘꠣꠄ। ꠛꠞꠋ ꠁ ꠙꠣꠘꠤ ꠔꠣꠞ ꠖꠤꠟꠞ ꠝꠣꠎꠦ ꠏꠞꠘꠣꠞ ꠟꠣꠈꠣꠘ ꠃꠕꠟꠤꠀ ꠃꠑꠛ ꠀꠞ ꠀꠈꠦꠞꠤ ꠎꠤꠘ꠆ꠖꠦꠉꠤ ꠖꠣꠘ ꠇꠞꠛ।”
JOH 4:15 ꠔꠦꠃ ꠛꠦꠐꠤꠄ ꠁꠍꠣꠞꠦ ꠇꠁꠟ, “ꠢꠥꠎꠥꠞ, ꠔꠦ ꠀꠝꠣꠞꠦꠅ ꠢꠃ ꠙꠣꠘꠤ ꠖꠦꠃꠇ꠆ꠇꠣ, ꠎꠣꠔꠦ ꠀꠝꠣꠞ ꠙꠤꠀꠍ ꠘꠣ ꠟꠣꠉꠦ, ꠀꠞ ꠙꠣꠘꠤꠞ ꠟꠣꠉꠤ ꠁꠘꠅ ꠀꠅꠀ ꠘꠣ ꠟꠣꠉꠦ।”
JOH 4:16 ꠁꠍꠣꠄ ꠛꠦꠐꠤꠞꠦ ꠇꠁꠟꠣ, “ꠔꠦ ꠎꠣꠅ, ꠔꠥꠝꠣꠞ ꠎꠣꠝꠣꠁꠞꠦ ꠅꠘꠅ ꠟꠁꠀ ꠀꠅ।”
JOH 4:17 ꠛꠦꠐꠤꠄ ꠇꠁꠟ, “ꠍꠣꠛ, ꠀꠝꠣꠞ ꠔ ꠇꠥꠘꠥ ꠎꠣꠝꠣꠁ ꠘꠣꠁ।” ꠁꠍꠣꠄ ꠇꠁꠟꠣ, “ꠔꠥꠝꠤ ꠑꠤꠇꠃ ꠇꠁꠍ, ꠔꠥꠝꠣꠞ ꠎꠣꠝꠣꠁ ꠘꠣꠁ।
JOH 4:18 ꠇꠣꠞꠘ ꠄꠞ ꠀꠉꠦ ꠔ ꠔꠥꠝꠣꠞ ꠙꠣꠌ ꠎꠘ ꠎꠣꠝꠣꠁ ꠅꠁꠉꠦꠍꠂꠘ, ꠀꠞ ꠅꠈꠘ ꠎꠦ ꠔꠥꠝꠣꠞ ꠟꠉꠦ ꠀꠍꠦ, ꠢꠦ ꠔꠥꠝꠣꠞ ꠎꠣꠝꠣꠁ ꠘꠣꠄ। ꠔꠥꠝꠤ ꠢꠣꠍꠣ ꠇꠕꠣꠃ ꠇꠁꠟꠣꠄ।”
JOH 4:19 ꠁꠈꠣꠘ ꠢꠥꠘꠤꠀ ꠛꠦꠐꠤꠄ ꠁꠍꠣꠞꠦ ꠇꠁꠟ, “ꠢꠥꠎꠥꠞ, ꠅꠈꠘ ꠀꠝꠤ ꠛꠥꠎꠟꠣꠝ, ꠀꠙꠘꠦ ꠄꠇꠎꠘ ꠘꠛꠤ।
JOH 4:20 ꠀꠝꠞꠣꠞ ꠛꠣꠚ-ꠖꠣꠖꠣꠁꠘ꠆ꠔꠦ ꠅꠃ ꠙꠣꠠꠞ ꠃꠙꠞꠦꠃ ꠄꠛꠣꠖꠔ ꠇꠞꠔꠣ, ꠅꠁꠟꠦ ꠀꠙꠘꠣꠞꠣ ꠇꠂꠘ, ꠎꠦꠞꠥꠎꠣꠟꠦꠝꠅꠃ ꠝꠣꠘꠡꠞ ꠄꠛꠣꠖꠔ ꠇꠞꠣ ꠃꠌꠤꠔ।”
JOH 4:21 ꠁꠍꠣꠄ ꠔꠣꠘꠞꠦ ꠇꠁꠟꠣ, “ꠢꠥꠘꠅ, ꠀꠝꠣꠞ ꠝꠣꠔꠈꠣꠘ ꠄꠇꠤꠘ ꠇꠞꠅ। ꠖꠦꠈꠤꠅ, ꠅꠃꠟꠣ ꠡꠝꠄ ꠀꠁꠛ ꠎꠦꠛꠟꠣ ꠔꠥꠝꠞꠣ ꠁ ꠙꠣꠠꠞ ꠃꠙꠞꠦ, ꠛꠣ ꠎꠦꠞꠥꠎꠣꠟꠦꠝꠞ ꠇꠥꠘꠥꠈꠣꠘꠅ, ꠉꠣꠁꠛꠤ ꠛꠣꠚ ꠀꠟ꠆ꠟꠣꠞ ꠄꠛꠣꠖꠔ ꠇꠞꠔꠣꠄ ꠘꠣꠄ।
JOH 4:22 ꠔꠥꠝꠞꠣ ꠎꠣꠞꠦ ꠌꠤꠘꠅ ꠘꠣ, ꠔꠣꠞ ꠄꠛꠣꠖꠔ ꠇꠞꠅ, ꠅꠁꠟꠦ ꠀꠝꠞꠣ ꠎꠣꠘ ꠄꠛꠣꠖꠔ ꠇꠞꠤ, ꠔꠣꠘꠞꠦ ꠀꠝꠞꠣ ꠌꠤꠘꠤ। ꠎꠣꠘ ꠘꠤ, ꠘꠣꠎꠣꠔꠞ ꠙꠕ ꠔ ꠁꠢꠥꠖꠤ ꠅꠇꠟꠞ ꠝꠣꠎꠖꠤꠃ ꠀꠁꠍꠦ।
JOH 4:23 ꠢꠥꠘꠅ, ꠅꠟꠣ ꠡꠝꠄ ꠀꠁꠛ, ꠛꠞꠋ ꠅꠈꠘꠃ ꠀꠁꠌ꠆ꠍꠦ, ꠎꠦꠛꠟꠣ ꠀꠍꠟ ꠄꠛꠣꠖꠔꠇꠣꠞꠤ ꠅꠇꠟꠦ ꠢꠇ꠆ꠇꠣꠘꠤ ꠞꠥꠢꠦ ꠉꠣꠁꠛꠤ ꠛꠣꠚ ꠀꠟ꠆ꠟꠣꠞ ꠄꠛꠣꠖꠔ ꠇꠞꠛꠣ। ꠉꠣꠁꠛꠤ ꠛꠣꠚꠦꠅ ꠅꠟꠣꠈꠣꠘ ꠄꠛꠣꠖꠔꠇꠣꠞꠤꠞ ꠔꠣꠟ꠆ꠟꠣꠡ ꠇꠞꠂꠘ।
JOH 4:24 ꠀꠟ꠆ꠟꠣꠔꠣꠟꠣ ꠅꠁꠟꠣꠉꠤ ꠞꠥꠢꠥ, ꠄꠞꠟꠣꠉꠤ ꠎꠣꠞꠣ ꠔꠣꠘ ꠄꠛꠣꠖꠔ ꠇꠞꠛꠣ, ꠔꠣꠞꠣ ꠢꠇ꠆ꠇꠣꠘꠤ ꠞꠥꠢꠦ ꠔꠣꠘ ꠄꠛꠣꠖꠔ ꠇꠞꠣ ꠟꠣꠉꠛ।”
JOH 4:25 ꠛꠣꠖꠦ ꠅꠃ ꠛꠦꠐꠤꠄ ꠇꠁꠟ, “ꠀꠝꠤ ꠎꠣꠘꠤ, ꠀꠟ-ꠝꠍꠤ ꠀꠁꠞꠣ। ꠔꠣꠁꠘ ꠀꠁꠀ ꠢꠇꠟꠔꠣ ꠀꠝꠞꠣꠞꠦ ꠎꠣꠘꠣꠁꠛꠣ।”
JOH 4:26 ꠁꠍꠣꠄ ꠅꠃ ꠛꠦꠐꠤꠞꠦ ꠇꠁꠟꠣ, “ꠀꠝꠤꠃ ꠢꠦꠁꠘ, ꠎꠦꠁꠘ ꠅꠈꠘ ꠔꠥꠝꠣꠞ ꠟꠉꠦ ꠝꠣꠔꠤꠞꠣ।”
JOH 4:27 ꠅꠃ ꠡꠝꠄ ꠍꠣꠢꠣꠛꠤ ꠅꠇꠟꠦ ꠀꠁꠀ ꠖꠦꠈꠟꠣ, ꠁꠍꠣꠄ ꠄꠇ ꠛꠦꠐꠤꠞ ꠟꠉꠦ ꠝꠣꠔꠤꠞꠣ, ꠖꠦꠈꠤꠀ ꠔꠣꠞꠣ ꠔꠣꠁꠎ꠆ꠎꠥꠛ ꠅꠁꠉꠦꠟꠣ। ꠔꠣ-ꠅ ꠔꠣꠞꠣ ꠇꠦꠃ ꠎꠤꠇꠣꠁꠟꠣ ꠘꠣ, ꠀꠙꠘꠦ ꠇꠤꠔꠣ ꠌꠣꠁꠞꠣ ꠛꠣ ꠄꠘ ꠟꠉꠦ ꠝꠣꠔꠤꠞꠣ ꠇꠦꠘꠦ।
JOH 4:28 ꠛꠣꠖꠦ ꠛꠦꠐꠤꠄ ꠔꠣꠁꠞ ꠙꠣꠘꠤꠞ ꠈꠂꠟꠣ ꠕꠁꠀ ꠉꠣꠃꠞ ꠝꠣꠘꠡꠞꠦ ꠉꠤꠀ ꠇꠁꠟ,
JOH 4:29 “ꠔꠥꠝꠞꠣ ꠀꠁꠀ ꠄꠇꠎꠘꠞꠦ ꠖꠦꠈꠤ ꠎꠣꠅ। ꠀꠝꠣꠞ ꠎꠤꠘ꠆ꠖꠦꠉꠤꠔ ꠎꠦꠔꠣ ꠇꠞꠍꠤ, ꠁꠔꠣ ꠢꠇꠟꠔꠣꠃ ꠔꠣꠁꠘ ꠇꠁꠟꠤꠍꠂꠘ। ꠔꠦ ꠔꠣꠁꠘꠃ ꠇꠤꠔꠣ ꠢꠃ ꠀꠟ-ꠝꠍꠤ ꠘꠤ?”
JOH 4:30 ꠁꠔꠣ ꠢꠥꠘꠤꠀ ꠉꠣꠃꠞ ꠝꠣꠘꠥꠡ ꠛꠣꠞ ꠅꠁꠀ ꠁꠍꠣꠞ ꠉꠦꠍꠦ ꠀꠅꠀ ꠗꠞꠟꠣ।
JOH 4:31 ꠛꠣꠖꠦ ꠔꠣꠘ ꠍꠣꠢꠣꠛꠤ ꠅꠇꠟꠦ ꠔꠣꠘꠞꠦ ꠅꠘꠥꠞꠥꠗ ꠇꠞꠤ ꠇꠁꠟꠣ, “ꠢꠥꠎꠥꠞ, ꠇꠥꠘ꠆ꠔꠣ ꠈꠣꠃꠇ꠆ꠇꠣ।”
JOH 4:32 ꠔꠣꠁꠘ ꠇꠁꠟꠣ, “ꠀꠝꠣꠞ ꠉꠦꠍꠦ ꠁꠟꠣ ꠈꠣꠘꠤ ꠀꠍꠦ, ꠎꠦ ꠈꠣꠘꠤꠞ ꠛꠦꠙꠣꠞꠦ ꠔꠥꠝꠞꠣ ꠎꠣꠘ ꠘꠣ।”
JOH 4:33 ꠁꠈꠣꠘ ꠢꠥꠘꠤꠀ ꠍꠣꠢꠣꠛꠤ ꠅꠇꠟꠦ ꠄꠇꠦ-ꠅꠁꠘ꠆ꠘꠦ ꠎꠤꠇꠣꠁꠟꠣ, “ꠔꠦ ꠔꠣꠘꠞꠦ ꠇꠦꠃ ꠇꠥꠘꠥ ꠈꠣꠘꠤ ꠀꠘꠤꠀ ꠖꠤꠍꠦ ꠘꠣ ꠇꠤꠔꠣ?”
JOH 4:34 ꠔꠦꠃ ꠁꠍꠣꠄ ꠔꠣꠞꠣꠞꠦ ꠇꠁꠟꠣ, “ꠎꠦꠁꠘ ꠀꠝꠣꠞꠦ ꠛꠦꠎꠤꠍꠂꠘ, ꠔꠣꠘ ꠝꠞ꠆ꠎꠤ ꠝꠣꠚꠤꠇ ꠔꠣꠘ ꠇꠣꠝ ꠙꠥꠞꠣ ꠇꠞꠣꠃ ꠀꠝꠣꠞ ꠈꠣꠘꠤ।
JOH 4:35 “ꠔꠥꠝꠞꠣ ꠇꠅ ꠘꠣ ꠘꠤ, ‘ꠀꠞ ꠌꠣꠁꠞ ꠝꠣꠡ ꠛꠣꠖꠦꠃ ꠚꠡꠟ ꠇꠣꠐꠣꠞ ꠡꠝꠄ ꠀꠁꠛ’? ꠅꠁꠟꠦ ꠀꠝꠤ ꠔꠥꠝꠞꠣꠞꠦ ꠇꠁꠞꠣꠝ, ꠜꠣꠟꠣ ꠇꠞꠤ ꠄꠇꠛꠣꠞ ꠈꠦꠔꠦꠖꠤ ꠌꠣꠁꠀ ꠖꠦꠈꠅ, ꠚꠡꠟ ꠙꠣꠇꠤꠀ ꠇꠣꠐꠣꠞ ꠎꠥꠇꠣ ꠅꠁꠉꠦꠍꠦ।
JOH 4:36 ꠚꠡꠟ ꠇꠣꠐꠞꠣꠄ ꠅꠈꠘꠃ ꠛꠦꠔꠘ ꠙꠣꠁꠞꠣ ꠀꠞ ꠀꠈꠦꠞꠞ ꠟꠣꠉꠤ ꠚꠡꠟ ꠖꠟꠣ ꠇꠞꠞꠣ। ꠄꠞꠟꠣꠉꠤ ꠎꠦꠁꠘ ꠎꠣꠟꠣ ꠛꠣꠁꠘ ꠖꠦꠁꠘ ꠀꠞ ꠎꠦꠁꠘ ꠚꠡꠟ ꠇꠣꠐꠂꠘ, ꠖꠥꠁꠅꠎꠘꠃ ꠢꠝꠣꠘ ꠈꠥꠡꠤ ꠅꠁꠘ।
JOH 4:37 ꠄꠔꠦ ꠅꠃ ꠍꠤꠟ꠆ꠟꠦꠈꠞ ꠙꠞꠝꠣꠘ ꠅꠄ, ‘ꠄꠇꠎꠘꠦ ꠛꠣꠁꠘ ꠖꠦꠁꠘ, ꠀꠞꠇ ꠎꠘꠦ ꠇꠣꠐꠂꠘ।’
JOH 4:38 ꠀꠝꠤꠅ ꠔꠥꠝꠞꠣꠞꠦ ꠅꠟꠣ ꠚꠡꠟ ꠇꠣꠐꠣꠔ ꠙꠣꠑꠣꠁꠍꠤ, ꠎꠦ ꠚꠡꠟꠞ ꠟꠣꠉꠤ ꠔꠥꠝꠞꠣ ꠝꠦꠘꠔ ꠇꠞꠍ ꠘꠣ। ꠅꠁꠘ꠆ꠘ ꠝꠣꠘꠡꠦ ꠝꠦꠘꠔ ꠇꠞꠍꠦ ꠀꠞ ꠔꠥꠝꠞꠣ ꠅꠃ ꠝꠦꠘꠔꠞ ꠚꠡꠟ ꠇꠣꠐꠤꠍ।”
JOH 4:39 ꠎꠦ ꠛꠦꠐꠤꠞ ꠎꠤꠘ꠆ꠖꠦꠉꠤꠞ ꠢꠇꠟꠔꠣ ꠁꠍꠣꠄ ꠇꠁꠟꠤꠍꠂꠘ, ꠅꠃ ꠛꠦꠐꠤꠞ ꠡꠣꠇ꠆ꠇꠤ ꠢꠥꠘꠤꠀ ꠢꠃ ꠉꠣꠃꠞ ꠛꠃꠔ ꠡꠝꠞꠤꠀ ꠝꠣꠘꠡꠦ ꠁꠍꠣꠞ ꠃꠙꠞꠦ ꠁꠝꠣꠘ ꠀꠘꠟꠣ।
JOH 4:40 ꠔꠣꠞꠣ ꠁꠍꠣꠞꠦ ꠉꠤꠀ ꠝꠤꠘꠔ ꠇꠞꠤ ꠇꠁꠟꠣ, ꠔꠣꠞꠣꠞ ꠅꠈꠣꠘꠅ ꠞꠁꠛꠣꠞ ꠟꠣꠉꠤ। ꠄꠞꠖꠣꠄ ꠔꠣꠁꠘ ꠖꠥꠁ ꠖꠤꠘ ꠢꠘꠅ ꠞꠁꠟꠣ।
JOH 4:41 ꠅꠃ ꠡꠝꠄ ꠔꠣꠘ ꠔꠣꠟꠤꠝ ꠢꠥꠘꠤꠀ ꠀꠞꠅ ꠛꠃꠔ ꠝꠣꠘꠡꠦ ꠁꠝꠣꠘ ꠀꠘꠟꠣ।
JOH 4:42 ꠀꠞ ꠉꠣꠃꠞ ꠝꠣꠘꠡꠦ ꠅꠃ ꠛꠦꠐꠤꠞꠦ ꠇꠁꠟꠣ, “ꠔꠥꠝꠣꠞ ꠇꠕꠣꠄ ꠀꠝꠞꠣ ꠁꠝꠣꠘ ꠀꠘꠍꠤ ꠘꠣ, ꠀꠝꠞꠣ ꠘꠤꠎꠦꠃ ꠔꠣꠘ ꠝꠣꠔ ꠢꠥꠘꠤꠀ ꠛꠥꠎꠔꠣꠝ ꠙꠣꠞꠍꠤ, ꠄꠁꠘꠃ ꠎꠉꠔꠞ ꠀꠍꠟ ꠔꠞꠣꠘꠦꠀꠟꠣ।”
JOH 4:43 ꠡꠝꠞꠤꠀꠔ ꠖꠥꠁꠖꠤꠘ ꠞꠁꠀ ꠢꠣꠞꠤ ꠢꠎꠞꠔ ꠁꠍꠣ ꠘꠤꠎꠞ ꠛꠣꠠꠤ ꠉꠣꠟꠤꠟ ꠎꠤꠟꠣꠔ ꠉꠦꠟꠣꠉꠤ।
JOH 4:44 ꠎꠥꠖꠤꠅ ꠔꠣꠁꠘ ꠀꠉꠦ ꠇꠁꠍꠟꠣ, ꠇꠥꠘꠥ ꠘꠛꠤꠞꠦꠃ ꠘꠤꠎꠞ ꠖꠦꠡꠅ ꠖꠣꠝ ꠖꠦꠅꠀ ꠅꠄ ꠘꠣ,
JOH 4:45 ꠔꠦꠛꠃ ꠅꠃ ꠡꠝꠄ ꠔꠣꠞꠣ ꠔꠣꠘꠞꠦ ꠇꠛꠥꠟ ꠇꠞꠟꠣ। ꠇꠣꠞꠘ ꠁꠖꠞ ꠡꠝꠄ ꠁꠍꠣꠄ ꠎꠦꠞꠥꠎꠣꠟꠦꠝꠅ ꠎꠦꠔꠣ ꠇꠦꠞꠣꠝꠔꠤ ꠖꠦꠈꠣꠁꠍꠟꠣ, ꠉꠣꠟꠤꠟꠞ ꠝꠣꠘꠥꠡ ꠢꠘꠅ ꠕꠣꠇꠣꠄ ꠔꠣꠞꠣ ꠁꠔꠣ ꠖꠦꠈꠍꠟꠣ ꠇꠞꠤ ꠔꠣꠁꠘ ꠉꠣꠟꠤꠟꠅ ꠀꠁꠟꠦ ꠔꠣꠞꠣ ꠇꠛꠥꠟ ꠇꠞꠟꠣ।
JOH 4:46 ꠛꠣꠖꠦ ꠁꠍꠣ ꠢꠤꠞꠛꠣꠞ ꠉꠣꠟꠤꠟꠞ ꠇꠣꠘ꠆ꠘꠣ ꠉꠣꠃꠔ ꠉꠦꠟꠣ। ꠅꠘꠅꠃ ꠔꠣꠁꠘ ꠙꠣꠘꠤꠞꠦ ꠀꠋꠉꠥꠞꠞ ꠡꠞꠛꠔ ꠛꠣꠘꠣꠁꠍꠟꠣ। ꠇꠚꠞꠘꠣꠃꠝ ꠐꠣꠃꠘꠅ ꠄꠇ ꠡꠞꠇꠣꠞꠤ ꠅꠚꠤꠡꠣꠞꠞ ꠙꠥꠀ ꠈꠥꠛ ꠛꠦꠝꠣꠞ ꠀꠍꠤꠟ।
JOH 4:47 ꠢꠎꠞꠔ ꠁꠍꠣ ꠄꠢꠥꠖꠤꠀ ꠕꠣꠇꠤ ꠉꠣꠟꠤꠟ ꠀꠁꠍꠂꠘ ꠢꠥꠘꠤꠀ, ꠅꠃ ꠅꠚꠤꠡꠣꠞ ꠔꠣꠘ ꠉꠦꠍꠦ ꠉꠤꠀ ꠝꠤꠘꠔ ꠇꠞꠟꠣ, ꠔꠣꠁꠘ ꠎꠣꠘꠥ ꠇꠚꠞꠘꠣꠃꠝ ꠉꠤꠀ ꠄꠘ ꠙꠥꠀꠉꠥꠞꠦ ꠜꠣꠟꠣ ꠇꠞꠂꠘ। ꠅꠃ ꠡꠝꠄ ꠔꠣꠘ ꠙꠥꠀ ꠝꠞꠣꠞ ꠙꠕꠤ ꠅꠁꠉꠦꠍꠤꠟ।
JOH 4:48 ꠁꠍꠣꠄ ꠅꠃ ꠅꠚꠤꠡꠣꠞꠞꠦ ꠇꠁꠟꠣ, “ꠇꠥꠘꠥ ꠘꠤꠡꠣꠘꠣ ꠛꠣ ꠇꠦꠞꠣꠝꠔꠤ ꠇꠣꠝ ꠘꠣ ꠖꠦꠈꠟꠦ ꠀꠙꠘꠣꠞꠣ ꠇꠥꠘꠥꠝꠘ꠆ꠔꠦꠃ ꠁꠝꠣꠘ ꠀꠘꠔꠣ ꠘꠣꠄ।”
JOH 4:49 ꠔꠦꠃ ꠅꠚꠤꠡꠣꠞꠦ ꠇꠁꠟꠣ, “ꠢꠥꠎꠥꠞ, ꠖꠄꠀ ꠇꠞꠤ ꠎꠟꠖꠤ ꠀꠃꠇ꠆ꠇꠣ, ꠙꠥꠀꠉꠥꠞ ꠎꠣꠘ ꠕꠣꠇꠔꠦ ꠀꠃꠇ꠆ꠇꠣ।”
JOH 4:50 ꠁꠍꠣꠄ ꠔꠣꠘꠞꠦ ꠇꠁꠟꠣ, “ꠀꠙꠘꠦ ꠎꠣꠃꠇ꠆ꠇꠣꠉꠤ, ꠀꠙꠘꠣꠞ ꠙꠥꠀ ꠜꠣꠟꠣ ꠅꠁꠉꠦꠍꠦ।” ꠁꠍꠣꠞ ꠇꠕꠣ ꠄꠇꠤꠘ ꠇꠞꠤꠀ ꠄꠁꠘ ꠉꠦꠟꠣꠉꠤ।
JOH 4:51 ꠢꠣꠍꠣꠃ, ꠢꠃ ꠅꠚꠤꠡꠣꠞ ꠛꠣꠠꠤꠔ ꠎꠣꠅꠀꠞ ꠙꠕꠦ ꠔꠣꠘ ꠉꠥꠟꠣꠝ ꠅꠇꠟꠦ ꠀꠁꠀ ꠈꠛꠞ ꠇꠁꠟ, “ꠍꠣꠛ, ꠀꠙꠘꠣꠞ ꠙꠥꠀꠞ ꠛꠦꠝꠣꠞ ꠇꠝꠤꠉꠦꠍꠦ।”
JOH 4:52 ꠔꠣꠁꠘ ꠄꠞꠣꠞꠦ ꠎꠤꠇꠣꠁꠟꠣ, “ꠢꠦ ꠇꠥꠘ ꠡꠝꠄ ꠜꠣꠟꠣ ꠅꠁꠍꠦ?” ꠔꠣꠞꠣ ꠇꠁꠟꠣ, “ꠇꠣꠁꠟ ꠖꠥꠁꠚꠞ ꠕꠣꠇꠤ ꠔꠣꠘ ꠔꠣꠙ ꠍꠣꠠꠤ ꠖꠤꠍꠦ।”
JOH 4:53 ꠔꠦꠃ ꠅꠚꠤꠡꠣꠞꠞ ꠝꠘꠅ ꠅꠁꠟ, ꠑꠤꠇ ꠖꠥꠁꠚꠞꠤ ꠛꠣꠟꠣ ꠁꠍꠣꠄ ꠔꠣꠘꠞꠦ ꠇꠁꠍꠟꠣ, “ꠀꠙꠘꠦ ꠎꠣꠃꠇ꠆ꠇꠣꠉꠤ, ꠀꠙꠘꠣꠞ ꠙꠥꠀ ꠜꠣꠟꠣ ꠅꠁꠉꠦꠍꠦ।” ꠄꠞꠟꠣꠉꠤ ꠅꠃ ꠅꠚꠤꠡꠣꠞ ꠀꠞ ꠔꠣꠘ ꠙꠞꠤꠛꠣꠞꠞ ꠢꠇꠟꠦ ꠁꠍꠣꠞ ꠃꠙꠞꠦ ꠁꠝꠣꠘ ꠀꠘꠟꠣ।
JOH 4:54 ꠢꠎꠞꠔ ꠁꠍꠣ ꠄꠢꠥꠖꠤꠀ ꠕꠘꠦ ꠉꠣꠟꠤꠟꠅ ꠀꠅꠀꠞ ꠛꠣꠖꠦ ꠅꠃ ꠖꠥꠍꠞꠣ ꠇꠦꠞꠣꠝꠔꠤ ꠘꠤꠡꠣꠘꠣ ꠖꠦꠈꠣꠁꠟꠣ।
JOH 5:1 ꠁꠔꠣꠞ ꠛꠣꠖꠦ ꠁꠢꠥꠖꠤ ꠅꠇꠟꠞ ꠁꠖꠞ ꠡꠝꠄ ꠀꠁꠟꠦ ꠁꠍꠣ ꠎꠦꠞꠥꠎꠣꠟꠦꠝꠅ ꠉꠦꠟꠣꠉꠤ।
JOH 5:2 ꠎꠦꠞꠥꠎꠣꠟꠦꠝꠅ ꠝꠦꠠꠣ-ꠖꠞꠎꠣꠞ ꠇꠣꠘ꠆ꠖꠣꠔ ꠄꠇꠐꠣ ꠙꠥꠞꠇꠤ ꠀꠍꠤꠟ, ꠅꠃ ꠙꠥꠞꠇꠤꠔ ꠍꠤꠠꠤ ꠛꠣꠘ꠆ꠖꠣ ꠙꠣꠌꠈꠣꠘ ꠊꠣꠐ ꠀꠍꠤꠟ, ꠙꠣꠌꠅ ꠊꠣꠐꠞ ꠃꠙꠞꠦ ꠙꠣꠌꠈꠣꠘ ꠍꠣꠃꠘꠤ। ꠁꠛꠞꠣꠘꠤ ꠜꠣꠡꠣꠄ ꠁ ꠙꠥꠞꠇꠤꠞ ꠘꠣꠝ ꠛꠣꠄꠔ-ꠍꠖꠣ।
JOH 5:3 ꠅꠃ ꠊꠣꠐꠅ ꠛꠃꠔ ꠎꠣꠔꠞ ꠛꠦꠝꠣꠞꠤ ꠙꠠꠤ ꠞꠁꠔ। ꠟꠥꠟꠣ-ꠟꠦꠋꠠꠣ, ꠀꠘ꠆ꠖꠣ, ꠀꠞ ꠛꠦꠝꠣꠞꠦ ꠎꠦꠞꠣꠞ ꠡꠞꠤꠟ ꠄꠇ꠆ꠇꠦꠛꠣꠞꠦ ꠢꠥꠇꠣꠁ ꠉꠦꠍꠦ, ꠔꠣꠞꠣꠅ ꠅꠘꠅ ꠞꠁꠔ।
JOH 5:4 ꠝꠣꠎꠦ ꠝꠣꠎꠦ ꠄꠇꠎꠘ ꠚꠤꠞꠤꠡ꠆ꠔꠣ ꠀꠁꠀ ꠅꠃ ꠙꠥꠞꠇꠤꠞ ꠙꠣꠘꠤ ꠟꠣꠠꠣꠁꠔꠣ, ꠟꠣꠠꠣꠘꠤꠞ ꠛꠣꠖꠦꠃ ꠙꠄꠟꠣ ꠎꠦ ꠎꠘ ꠙꠣꠘꠤꠔ ꠟꠣꠝꠔ, ꠔꠣꠞ ꠎꠔ ꠛꠠ ꠛꠦꠝꠣꠞ ꠅꠃꠇ ꠜꠣꠟꠣ ꠅꠁꠎꠤꠔ। ꠄꠞꠖꠣꠄ ꠅꠃ ꠛꠦꠝꠣꠞꠤ ꠅꠇꠟꠦ ꠙꠣꠘꠤ ꠟꠣꠠꠣꠘꠤꠞ ꠀꠡꠣꠄ ꠅꠘꠅ ꠙꠠꠤ ꠞꠁꠔ।
JOH 5:5 ꠄꠞꠣꠞ ꠝꠣꠎꠦ ꠅꠟꠣ ꠄꠇꠎꠘ ꠛꠦꠝꠣꠞꠤ ꠀꠍꠤꠟ, ꠎꠦ ꠛꠦꠐꠣ ꠀꠐꠔꠤꠡ ꠛꠍꠞ ꠕꠣꠇꠤ ꠛꠦꠝꠣꠞ।
JOH 5:6 ꠛꠃꠔ ꠖꠤꠘ ꠕꠣꠇꠤ ꠢꠦ ꠅꠘꠅ ꠙꠠꠤ ꠞꠁꠍꠦ ꠢꠥꠘꠤꠀ ꠁꠍꠣꠄ ꠔꠣꠞꠦ ꠎꠤꠇꠣꠁꠟꠣ, “ꠇꠤꠔꠣ ꠛꠣ, ꠔꠥꠝꠣꠞ ꠁꠌ꠆ꠍꠣ ꠘꠤ ꠔꠥꠝꠤ ꠜꠣꠟꠣ ꠅꠁꠎꠤꠔꠣꠄ?”
JOH 5:7 ꠛꠦꠐꠣꠄ ꠇꠁꠟ, “ꠢꠥꠎꠥꠞ, ꠀꠝꠣꠞ ꠔ ꠁꠟꠣ ꠇꠦꠃ ꠘꠣꠁ, ꠎꠦꠁꠘ ꠙꠣꠘꠤ ꠟꠣꠠꠣꠘꠤꠞ ꠟꠉꠦ ꠟꠉꠦꠃ ꠀꠝꠣꠞꠦ ꠙꠥꠞꠇꠤꠔ ꠟꠣꠝꠣꠁꠔ। ꠀꠝꠤ ꠟꠣꠝꠔꠦ ꠟꠣꠝꠔꠦ ꠀꠞꠇ ꠎꠘ ꠉꠤꠀ ꠟꠣꠝꠤ ꠎꠣꠄ।”
JOH 5:8 ꠁꠍꠣꠄ ꠄꠞꠦ ꠇꠁꠟꠣ, “ꠔꠦ ꠃꠑꠅ, ꠔꠥꠝꠣꠞ ꠛꠤꠍꠘꠣ ꠟꠁꠀ ꠀꠐꠣ-ꠌꠟꠣ ꠇꠞꠅ।”
JOH 5:9 ꠟꠉꠦ ꠟꠉꠦꠃ ꠅꠃ ꠛꠦꠝꠣꠞꠤ ꠜꠣꠟꠣ ꠅꠁꠉꠦꠟ, ꠀꠞ ꠔꠣꠞ ꠛꠤꠍꠘꠣ ꠔꠥꠟꠤꠀ ꠌꠟꠣ-ꠚꠤꠞꠣ ꠇꠞꠟ। ꠢꠤ ꠖꠤꠘ ꠀꠍꠤꠟ ꠎꠥꠝ꠆ꠝꠣꠛꠣꠞ, ꠎꠥꠝ꠆ꠝꠣꠛꠣꠞꠦ ꠇꠥꠘꠥꠎꠣꠔ ꠇꠣꠝ ꠇꠞꠣ ꠎꠣꠁꠎ ꠘꠣꠄ।
JOH 5:10 ꠄꠞꠖꠣꠄ ꠁꠢꠥꠖꠤ ꠘꠦꠔꠣ ꠅꠇꠟꠦ ꠅꠃ ꠛꠦꠐꠣꠞꠦ ꠇꠁꠟꠣ, “ꠀꠁꠎ ꠔ ꠎꠥꠝ꠆ꠝꠣꠛꠣꠞ, ꠔꠦ ꠀꠁꠎ ꠔꠥꠝꠣꠞ ꠛꠤꠍꠘꠣ ꠔꠥꠟꠤꠀ ꠘꠦꠅꠀ ꠎꠣꠁꠎ ꠘꠣꠄ।”
JOH 5:11 ꠅꠁꠟꠦ ꠢꠦ ꠇꠁꠟ, “ꠎꠦꠁꠘ ꠀꠝꠣꠞꠦ ꠜꠣꠟꠣ ꠇꠞꠍꠂꠘ, ꠔꠣꠁꠘꠃ ꠀꠝꠣꠞꠦ ꠇꠁꠟꠣ, ꠃꠑꠅ, ꠔꠥꠝꠣꠞ ꠛꠤꠍꠘꠣ ꠟꠁꠀ ꠀꠐꠣ-ꠌꠟꠣ ꠇꠞꠅ।”
JOH 5:12 ꠔꠦꠃ ꠘꠦꠔꠣ ꠅꠇꠟꠦ ꠛꠦꠐꠣꠞꠦ ꠎꠤꠇꠣꠁꠟꠣ, “ꠅꠃ ꠝꠣꠘꠥꠡꠉꠥ ꠇꠦꠉꠥ, ꠎꠦꠉꠤꠄ ꠔꠥꠝꠣꠞꠦ ꠇꠁꠍꠦ, ꠛꠤꠍꠘꠣ ꠟꠁꠀ ꠌꠟꠣ-ꠚꠤꠞꠣ ꠇꠞꠔꠣꠄ?”
JOH 5:13 ꠅꠁꠟꠦ ꠅꠃ ꠛꠦꠐꠣꠄ ꠔ ꠎꠣꠘꠔ ꠘꠣ, ꠔꠣꠁꠘ ꠇꠦ, ꠢꠤ ꠎꠣꠉꠣꠔ ꠛꠃꠔ ꠝꠣꠘꠡꠦ ꠜꠤꠠ ꠇꠞꠤꠟꠤꠍꠂꠘ ꠖꠦꠈꠤꠀ, ꠁꠍꠣ ꠢꠤꠘ ꠕꠘꠦ ꠉꠦꠍꠟꠣꠉꠤ।
JOH 5:14 ꠛꠣꠖꠦ ꠁꠍꠣꠄ ꠅꠃ ꠛꠦꠐꠣꠞꠦ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠅ ꠙꠣꠁꠀ ꠇꠁꠟꠣ, “ꠢꠥꠘꠅ, ꠔꠥꠝꠤ ꠔ ꠛꠦꠝꠣꠞ ꠕꠣꠇꠤ ꠜꠣꠟꠣ ꠅꠁꠉꠦꠍ। ꠔꠦ ꠀꠞ ꠇꠥꠘꠥ ꠉꠥꠘꠣ ꠇꠞꠤꠅ ꠘꠣ, ꠎꠣꠔꠦ ꠔꠥꠝꠣꠞ ꠡꠞ꠆ꠛꠘꠣꠡ ꠘꠣ ꠅꠄ।”
JOH 5:15 ꠔꠦꠃ ꠅꠃ ꠛꠦꠐꠣꠄ ꠉꠤꠀ ꠁꠢꠥꠖꠤ ꠘꠦꠔꠣ ꠅꠇꠟꠞꠦ ꠇꠁꠟ, ꠔꠣꠞꠦ ꠎꠦꠁꠘ ꠜꠣꠟꠣ ꠇꠞꠍꠂꠘ ꠄꠘ ꠘꠣꠝ ꠁꠍꠣ।
JOH 5:16 ꠁꠍꠣꠄ ꠎꠥꠝ꠆ꠝꠣꠛꠣꠞꠦ ꠛꠦꠝꠣꠞꠤꠞꠦ ꠜꠣꠟꠣ ꠇꠞꠣꠄ ꠁꠢꠥꠖꠤ ꠘꠦꠔꠣ ꠅꠇꠟꠦ ꠔꠣꠘꠞꠦ ꠝꠣꠞꠤꠟꠤꠔꠣ ꠌꠣꠁꠟꠣ।
JOH 5:17 ꠅꠁꠟꠦ ꠁꠍꠣꠄ ꠔꠣꠞꠣꠞꠦ ꠇꠁꠟꠣ, “ꠢꠥꠘꠅ, ꠀꠝꠣꠞ ꠉꠣꠁꠛꠤ ꠛꠣꠚꠦ ꠢꠣꠝꠦꠡꠣ ꠇꠣꠝ ꠇꠞꠞꠣ ꠀꠞ ꠀꠝꠤꠅ ꠇꠞꠞꠣꠝ।”
JOH 5:18 ꠁꠈꠣꠘ ꠢꠥꠘꠤꠀ ꠔꠣꠞꠣ ꠔꠣꠘꠞꠦ ꠎꠣꠘꠦ ꠝꠣꠞꠣꠞ ꠟꠣꠉꠤ ꠀꠞꠅ ꠉꠞꠝ ꠅꠁꠀ ꠙꠕ ꠔꠥꠇꠣꠘꠤꠔ ꠞꠁꠟꠣ। ꠔꠣꠞꠣ ꠝꠘꠅ ꠇꠞꠍꠤꠟ, ꠔꠣꠁꠘ ꠈꠣꠟꠤ ꠎꠥꠝ꠆ꠝꠣꠛꠣꠞꠞ ꠘꠤꠅꠝ ꠜꠣꠋꠉꠤꠍꠂꠘ ꠘꠣ, ꠔꠣꠁꠘ ꠀꠟ꠆ꠟꠣ ꠙꠣꠇꠞꠦ ꠛꠣꠚ ꠒꠣꠇꠤꠀ ꠡꠤꠞꠤꠇꠤꠅ ꠇꠞꠍꠂꠘ।
JOH 5:19 ꠄꠞꠟꠣꠉꠤ ꠔꠣꠁꠘ ꠅꠃ ꠘꠦꠔꠣ ꠅꠇꠟꠞꠦ ꠇꠁꠟꠣ, “ꠀꠝꠤ ꠘꠤꠌ꠆ꠌꠤꠔ ꠢꠇ ꠇꠕꠣ ꠇꠁꠞꠣꠝ, ꠙꠥꠔꠦ ꠔ ꠘꠤꠎꠦ ꠘꠤꠎꠦ ꠇꠥꠘ꠆ꠔꠣ ꠇꠞꠔꠣ ꠙꠣꠞꠂꠘ ꠘꠣ, ꠅꠁꠟꠦ ꠔꠣꠘ ꠛꠣꠚꠞꠦ ꠎꠦꠔꠣ ꠇꠣꠝ ꠇꠞꠣꠔ ꠖꠦꠈꠂꠘ, ꠔꠣꠁꠘ ꠈꠣꠟꠤ ꠅꠔꠣꠃ ꠇꠞꠂꠘ, ꠛꠣꠚꠦ ꠎꠦꠔꠣ ꠇꠞꠂꠘ, ꠙꠥꠔꠦꠅ ꠔ ꠅꠔꠣ ꠇꠞꠂꠘ।
JOH 5:20 ꠛꠣꠚꠦ ꠔꠣꠘ ꠙꠥꠔꠞꠦ ꠝꠣꠄꠀ ꠇꠞꠂꠘ ꠀꠞ ꠔꠣꠁꠘ ꠘꠤꠎꠦ ꠎꠦ ꠇꠣꠝ ꠇꠞꠂꠘ, ꠁꠔꠣ ꠢꠇꠟꠔꠣꠃ ꠙꠥꠔꠞꠦ ꠖꠦꠈꠣꠁꠘ। ꠀꠞ ꠁꠔꠣ ꠕꠣꠇꠤ ꠀꠞꠅ ꠛꠠ ꠛꠠ ꠇꠥꠖꠞꠔꠤ ꠇꠣꠝ ꠙꠥꠔꠞꠦ ꠖꠦꠈꠣꠁꠛꠣ, ꠎꠦꠔꠣ ꠖꠦꠈꠤꠀ ꠀꠙꠘꠣꠞꠣ ꠔꠣꠁꠎ꠆ꠎꠥꠛ ꠅꠁꠎꠤꠛꠣ।
JOH 5:21 ꠛꠣꠚꠦ ꠎꠦꠟꠣ ꠝꠥꠞ꠆ꠖꠣꠞꠦ ꠎꠤꠘ꠆ꠖꠣ ꠇꠞꠤ ꠔꠥꠟꠂꠘ, ꠙꠥꠔꠦꠅ ꠅꠃꠟꠣ ꠎꠦꠞꠣꠞꠦ ꠁꠌ꠆ꠍꠣ ꠎꠤꠘ꠆ꠖꠦꠉꠤ ꠖꠣꠘ ꠇꠞꠂꠘ।
JOH 5:22 ꠛꠣꠚꠦ ꠇꠦꠃꠞꠞ ꠛꠤꠌꠣꠞꠅ ꠇꠞꠂꠘ ꠘꠣ, ꠔꠣꠘ ꠢꠇꠟ ꠛꠤꠌꠣꠞꠞ ꠜꠣꠞ ꠙꠥꠔꠞ ꠀꠔꠅ ꠖꠤꠍꠂꠘ,
JOH 5:23 ꠎꠣꠔꠦ ꠛꠣꠚꠞꠦ ꠎꠦꠟꠣ ꠢꠇꠟꠦ ꠁꠎ꠆ꠎꠔ ꠇꠞꠦ, ꠅꠃꠟꠣ ꠙꠥꠔꠞꠦꠅ ꠁꠎ꠆ꠎꠔ ꠇꠞꠦ। ꠙꠥꠔꠞꠦ ꠎꠦ ꠁꠎ꠆ꠎꠔ ꠇꠞꠦ ꠘꠣ, ꠢꠦ ꠀꠍꠟꠦ ꠢꠃ ꠛꠣꠚꠞꠦꠅ ꠁꠎ꠆ꠎꠔ ꠇꠞꠦ ꠘꠣ, ꠎꠦꠁꠘ ꠁ ꠙꠥꠔꠞꠦ ꠛꠦꠎꠤꠍꠂꠘ।
JOH 5:24 “ꠀꠝꠤ ꠀꠙꠘꠣꠞꠣꠞꠦ ꠢꠣꠍꠣ ꠇꠕꠣ ꠇꠁꠞꠣꠝ, ꠎꠦ ꠎꠘꠦ ꠀꠝꠣꠞ ꠇꠣꠟꠣꠝ ꠢꠥꠘꠦ ꠀꠞ ꠎꠦꠁꠘ ꠀꠝꠣꠞꠦ ꠙꠣꠑꠣꠁꠍꠂꠘ ꠔꠣꠘ ꠃꠙꠞꠦ ꠁꠝꠣꠘ ꠀꠘꠦ, ꠢꠦ ꠔ ꠀꠈꠦꠞꠤ ꠎꠤꠘ꠆ꠖꠦꠉꠤ ꠙꠣꠁꠟꠤꠍꠦ। ꠔꠣꠞꠦ ꠀꠞ ꠖꠥꠡꠤ ꠡꠣꠁꠛꠡ꠆ꠔ ꠇꠞꠣ ꠅꠁꠔ ꠘꠣꠄ। ꠢꠦ ꠔ ꠝꠃꠔ ꠕꠣꠇꠤ ꠎꠤꠘ꠆ꠖꠦꠉꠤꠔ ꠙꠣꠠꠤ ꠖꠤꠟꠣꠁꠍꠦ।
JOH 5:25 ꠀꠞ ꠀꠝꠤ ꠢꠣꠍꠣꠃ ꠇꠁꠞꠣꠝ, ꠁꠟꠣ ꠄꠇ ꠎꠝꠣꠘꠣ ꠀꠁꠛ, ꠛꠞꠋ ꠅꠈꠘꠃ ꠀꠁꠌ꠆ꠍꠦ, ꠎꠦꠛꠟꠣ ꠝꠥꠞ꠆ꠖꠣ ꠅꠇꠟꠦ ꠀꠝꠤ ꠁꠛꠘꠥꠟ꠆ꠟꠣꠞ ꠉꠟꠣꠞ ꠀꠅꠀꠎ ꠢꠥꠘꠛꠣ, ꠀꠞ ꠎꠣꠞꠣ ꠢꠥꠘꠛꠣ ꠔꠣꠞꠣ ꠎꠤꠘ꠆ꠖꠣ ꠅꠁꠛꠣ।
JOH 5:26 ꠁꠔꠣꠞ ꠇꠣꠞꠘ ꠅꠁꠟ, ꠛꠣꠚ ꠘꠤꠎꠦ ꠎꠦꠟꠣ ꠎꠤꠘ꠆ꠖꠦꠉꠤꠞ ꠝꠣꠟꠤꠇ, ꠔꠣꠘ ꠙꠥꠔꠞꠦꠅ ꠅꠃꠟꠣ ꠎꠤꠘ꠆ꠖꠦꠉꠤꠞ ꠝꠣꠟꠤꠇꠣꠘꠣ ꠖꠤꠍꠂꠘ।
JOH 5:27 ꠛꠣꠚꠦ ꠙꠥꠔꠞꠦ ꠝꠣꠘꠡꠞ ꠛꠤꠌꠣꠞ ꠇꠞꠣꠞ ꠄꠈꠔꠤꠀꠞ ꠖꠤꠍꠂꠘ, ꠇꠣꠞꠘ ꠄꠁꠘꠃ ꠔ ꠛꠤꠘ-ꠀꠖꠝ।
JOH 5:28 ꠔꠦ ꠁꠔꠣ ꠢꠥꠘꠤꠀ ꠀꠙꠘꠣꠞꠣ ꠔꠣꠁꠎ꠆ꠎꠥꠛ ꠅꠁꠛꠣ ꠘꠣ, ꠎꠣꠘꠂꠘ ꠘꠤ, ꠅꠃꠟꠣ ꠡꠝꠄ ꠀꠁꠅꠞ, ꠎꠦꠛꠟꠣ ꠀꠟ꠆ꠟꠣꠞ ꠙꠥꠔꠞ ꠉꠟꠣꠞ ꠀꠅꠀꠎ ꠢꠥꠘꠤꠀ ꠝꠥꠞ꠆ꠖꠣ ꠅꠇꠟ ꠇꠄꠛꠞ ꠕꠣꠇꠤ ꠛꠣꠞ ꠅꠁꠀ ꠀꠁꠛꠣ।
JOH 5:29 ꠀꠞ ꠎꠦꠞꠣ ꠘꠦꠇ ꠇꠣꠝ ꠇꠞꠍꠂꠘ, ꠔꠣꠞꠣ ꠛꠦꠢꠦꠡ꠆ꠔꠤ ꠎꠤꠘ꠆ꠖꠦꠉꠤ ꠙꠣꠅꠀꠞ ꠟꠣꠉꠤ ꠃꠑꠛꠣ, ꠅꠁꠟꠦ ꠎꠦꠞꠣ ꠘꠣꠚꠞꠝꠣꠘꠤꠞ ꠝꠣꠎꠦ ꠎꠤꠘ꠆ꠖꠦꠉꠤ ꠇꠣꠐꠣꠁꠍꠦ, ꠔꠣꠞꠣ ꠃꠑꠛꠣ ꠡꠣꠎꠣ ꠙꠣꠅꠀꠞ ꠟꠣꠉꠤ।
JOH 5:30 “ꠀꠝꠤ ꠔ ꠘꠤꠎꠦ ꠘꠤꠎꠦ ꠇꠥꠘ꠆ꠔꠣ ꠇꠞꠔꠣꠝ ꠙꠣꠞꠤ ꠘꠣ, ꠀꠝꠤ ꠎꠦꠟꠣ ꠢꠥꠘꠤ ꠅꠟꠣ ꠛꠤꠌꠣꠞ ꠇꠞꠤ। ꠀꠝꠤ ꠢꠇ ꠛꠤꠌꠣꠞ ꠇꠞꠤ, ꠇꠣꠞꠘ ꠀꠝꠤ ꠀꠝꠣꠞ ꠘꠤꠎꠞ ꠁꠌ꠆ꠍꠣꠄ ꠇꠣꠝ ꠇꠞꠔꠣꠝ ꠌꠣꠁ ꠘꠣ, ꠈꠣꠟꠤ ꠎꠦꠁꠘ ꠀꠝꠣꠞꠦ ꠙꠣꠑꠣꠁꠍꠂꠘ ꠔꠣꠘ ꠝꠞ꠆ꠎꠤ ꠙꠥꠞꠣ ꠇꠞꠔꠣꠝ ꠌꠣꠁ।
JOH 5:31 “ꠀꠝꠤ ꠎꠥꠖꠤ ꠘꠤꠎꠞ ꠛꠦꠙꠣꠞꠦ ꠘꠤꠎꠦ ꠡꠣꠇ꠆ꠇꠤ ꠖꠦꠁ, ꠔꠦ ꠁ ꠡꠣꠇ꠆ꠇꠤ ꠡꠑꠤꠇ ꠘꠣꠄ।
JOH 5:32 ꠅꠁꠟꠦ ꠖꠥꠍꠞꠣ ꠎꠘꠦꠅ ꠀꠝꠣꠞ ꠛꠦꠙꠣꠞꠦ ꠡꠣꠇ꠆ꠇꠤ ꠖꠤꠞꠣ, ꠀꠞ ꠀꠝꠤ ꠎꠣꠘꠤ, ꠔꠣꠁꠘ ꠎꠦ ꠡꠣꠇ꠆ꠇꠤ ꠖꠤꠞꠣ, ꠁꠔꠣ ꠢꠣꠍꠣ।
JOH 5:33 ꠀꠙꠘꠣꠞꠣ ꠔ ꠄꠢꠤꠀ ꠘꠛꠤꠞ ꠉꠦꠍꠦ ꠈꠛꠞꠤꠀ ꠙꠣꠑꠣꠁꠀ ꠎꠤꠇꠣꠁꠍꠂꠘ, ꠔꠣꠁꠘꠅ ꠢꠇꠞ ꠙꠇ꠆ꠇꠦ ꠡꠣꠇ꠆ꠇꠤ ꠖꠤꠍꠂꠘ।
JOH 5:34 ꠀꠞ ꠀꠝꠤ ꠇꠥꠘꠥ ꠝꠣꠘꠡꠞ ꠡꠣꠇ꠆ꠇꠤꠞ ꠃꠙꠞꠦ ꠜꠞꠡꠣ ꠇꠞꠤ ꠘꠣ, ꠅꠁꠟꠦ ꠀꠙꠘꠣꠞꠣ ꠎꠣꠔꠦ ꠘꠣꠎꠣꠔ ꠙꠣꠁꠀ ꠎꠣꠘ ꠛꠣꠌꠣꠁꠔꠣ ꠙꠣꠞꠂꠘ, ꠄꠞꠖꠣꠄ ꠁꠔꠣ ꠇꠁꠞꠣꠝ।
JOH 5:35 ꠢꠎꠞꠔ ꠄꠢꠤꠀꠃ ꠀꠍꠟꠣ ꠢꠃ ꠎꠣꠟꠣꠁꠟ ꠝꠥꠡꠣꠟ, ꠎꠦ ꠝꠥꠡꠣꠟꠦ ꠚꠞ ꠖꠤꠍꠤꠟ। ꠀꠙꠘꠣꠞꠣꠅ ꠕꠥꠠꠣ ꠇꠄꠖꠤꠘ ꠅꠃ ꠝꠥꠡꠣꠟꠞ ꠚꠞꠞ ꠝꠣꠎꠦ ꠈꠥꠡꠤ ꠇꠞꠔꠦ ꠞꠣꠎꠤ ꠅꠁꠍꠟꠣ।
JOH 5:36 “ꠅꠁꠟꠦ ꠄꠢꠤꠀ ꠘꠛꠤꠞ ꠡꠣꠇ꠆ꠇꠤ ꠕꠘꠦꠅ ꠀꠞꠅ ꠛꠠ ꠡꠣꠇ꠆ꠇꠤ ꠀꠝꠣꠞ ꠀꠍꠦ, ꠇꠣꠞꠘ ꠀꠝꠣꠞ ꠉꠣꠁꠛꠤ ꠛꠣꠚꠦ ꠎꠦ ꠇꠣꠝꠞ ꠟꠣꠉꠤ ꠀꠝꠣꠞꠦ ꠙꠣꠑꠣꠁꠍꠂꠘ, ꠀꠝꠤ ꠅꠔꠣꠃ ꠇꠞꠞꠣꠝ। ꠀꠞ ꠅꠃ ꠇꠣꠝꠞ ꠡꠣꠇ꠆ꠇꠤꠄꠃ ꠛꠥꠎꠣ ꠎꠣꠄ, ꠀꠝꠣꠞꠦ ꠀꠝꠣꠞ ꠉꠣꠁꠛꠤ ꠛꠣꠚꠦ ꠛꠦꠎꠤꠍꠂꠘ।
JOH 5:37 ꠔꠣꠁꠘꠃ ꠔ ꠢꠃ ꠛꠣꠛꠣ, ꠎꠦꠁꠘ ꠀꠝꠣꠞꠦ ꠙꠣꠑꠣꠁꠍꠂꠘ, ꠔꠣꠁꠘ ꠘꠤꠎꠦꠅ ꠀꠝꠣꠞ ꠛꠦꠙꠣꠞꠦ ꠡꠣꠇ꠆ꠇꠤ ꠖꠤꠍꠂꠘ। ꠀꠙꠘꠣꠞꠣ ꠇꠥꠘꠥ ꠡꠝꠄ ꠔꠣꠘ ꠉꠟꠣꠞ ꠀꠅꠀꠎ ꠢꠥꠘꠍꠂꠘ ꠘꠣ, ꠀꠞ ꠔꠣꠘꠞꠦ ꠖꠦꠈꠍꠂꠘꠅ ꠘꠣ।
JOH 5:38 ꠄꠍꠣꠠꠣ ꠔꠣꠘ ꠇꠣꠟꠣꠝ ꠔ ꠀꠙꠘꠣꠞꠣꠞ ꠖꠤꠟꠅ ꠞꠄ ꠘꠣ, ꠇꠣꠞꠘ ꠔꠣꠁꠘ ꠎꠣꠞꠦ ꠙꠣꠑꠣꠁꠍꠂꠘ, ꠄꠘ ꠃꠙꠞꠦ ꠀꠙꠘꠣꠞꠣ ꠁꠝꠣꠘ ꠀꠘꠂꠘ ꠘꠣ।
JOH 5:39 “ꠀꠙꠘꠣꠞꠣ ꠔ ꠈꠥꠛ ꠝꠘ ꠖꠤꠀ ꠀꠍꠝꠣꠘꠤ ꠇꠤꠔꠣꠛ ꠔꠤꠟꠣꠅꠔ ꠇꠞꠂꠘ, ꠝꠘꠅ ꠇꠞꠂꠘ ꠁꠔꠣ ꠔꠤꠟꠣꠅꠔ ꠇꠞꠟꠦ ꠀꠈꠦꠞꠤ ꠎꠤꠘ꠆ꠖꠦꠉꠤ ꠙꠣꠁꠛꠣ। ꠅꠁꠟꠦ ꠅꠃ ꠇꠤꠔꠣꠛꠦꠃ ꠔ ꠀꠝꠣꠞ ꠛꠦꠙꠣꠞꠦ ꠡꠣꠇ꠆ꠇꠤ ꠖꠦꠄ।
JOH 5:40 ꠄꠞꠛꠣꠖꠦꠅ ꠀꠙꠘꠣꠞꠣ ꠎꠤꠘ꠆ꠖꠦꠉꠤ ꠙꠣꠅꠀꠞ ꠟꠣꠉꠤ ꠀꠝꠣꠞ ꠉꠦꠍꠦ ꠀꠁꠔꠣ ꠌꠣꠁꠘ ꠘꠣ।
JOH 5:41 “ꠀꠝꠤ ꠔ ꠝꠣꠘꠡꠞ ꠉꠦꠍ ꠕꠣꠇꠤ ꠔꠣꠞꠤꠚ ꠙꠣꠅꠀꠞ ꠀꠡꠣꠄ ꠀꠁꠍꠤ ꠘꠣ,
JOH 5:42 ꠅꠁꠟꠦ ꠀꠝꠤ ꠎꠣꠘꠤ, ꠀꠟ꠆ꠟꠣꠞ ꠛꠣꠄ ꠀꠙꠘꠣꠞꠣꠞ ꠇꠥꠘꠥ ꠝꠢꠛ꠆ꠛꠔ ꠘꠣꠁ, ꠀꠝꠤ ꠔ ꠀꠙꠘꠣꠞꠣꠞꠦ ꠌꠤꠘꠤ।
JOH 5:43 ꠀꠝꠤ ꠀꠝꠣꠞ ꠉꠣꠁꠛꠤ ꠛꠣꠚꠞ ꠘꠣꠝ ꠟꠁꠀ ꠀꠁꠍꠤ, ꠔꠣ-ꠅ ꠀꠙꠘꠣꠞꠣ ꠀꠝꠣꠞꠦ ꠄꠇꠤꠘ ꠇꠞꠞꠣ ꠘꠣ। ꠅꠁꠟꠦ ꠖꠥꠍꠞꠣ ꠇꠦꠃ ꠎꠥꠖꠤ ꠔꠣꠞ ꠘꠤꠎꠞ ꠘꠣꠝꠦ ꠀꠄ, ꠔꠦ ꠔꠣꠞꠦ ꠀꠙꠘꠣꠞꠣ ꠄꠇꠤꠘ ꠇꠞꠛꠣ।
JOH 5:44 ꠀꠙꠘꠣꠞꠣ ꠄꠇꠦ-ꠅꠁꠘ꠆ꠘꠞ ꠉꠦꠍ ꠕꠣꠇꠤ ꠔꠣꠞꠤꠚ ꠙꠣꠁꠔꠣ ꠌꠣꠁꠘ, ꠅꠁꠟꠦ ꠎꠦ ꠔꠣꠞꠤꠚ ꠀꠟ꠆ꠟꠣꠞ ꠉꠦꠍ ꠕꠘꠦ ꠙꠣꠅꠀ ꠎꠣꠄ, ꠁꠔꠣꠞ ꠟꠣꠉꠤ ꠇꠥꠘꠥ ꠌꠦꠡ꠆ꠐꠣ ꠇꠞꠂꠘ ꠘꠣ। ꠔꠦ ꠀꠙꠘꠣꠞꠣ ꠇꠦꠝꠘꠦ ꠄꠇꠤꠘ ꠇꠞꠛꠣ?
JOH 5:45 ꠀꠙꠘꠣꠞꠣ ꠝꠘꠅ ꠇꠞꠛꠣ ꠘꠣ, ꠀꠝꠤ ꠀꠝꠣꠞ ꠛꠣꠛꠣꠞ ꠉꠦꠍꠦ ꠀꠙꠘꠣꠁꠘ꠆ꠔꠞꠦ ꠖꠥꠡꠤ ꠛꠣꠘꠣꠁꠝꠥ। ꠅꠁꠟꠦ ꠎꠦ ꠝꠥꠍꠣ ꠘꠛꠤꠞ ꠃꠙꠞꠦ ꠀꠙꠘꠣꠞꠣ ꠜꠞꠡꠣ ꠇꠞꠤ ꠀꠍꠂꠘ, ꠢꠃ ꠝꠥꠍꠣꠄꠃ ꠀꠙꠘꠣꠁꠘ꠆ꠔꠞꠦ ꠖꠥꠡꠤ ꠇꠁꠞꠣ।
JOH 5:46 ꠀꠙꠘꠣꠞꠣ ꠎꠥꠖꠤ ꠝꠥꠍꠣ ꠘꠛꠤꠞꠦ ꠄꠇꠤꠘ ꠇꠞꠔꠣ, ꠔꠦ ꠀꠝꠣꠞꠦꠅ ꠄꠇꠤꠘ ꠇꠞꠟꠣ ꠅꠘꠦ, ꠁ ꠝꠥꠍꠣ ꠘꠛꠤꠄ ꠔ ꠀꠝꠣꠞ ꠛꠦꠙꠣꠞꠦꠃ ꠟꠦꠈꠍꠂꠘ।
JOH 5:47 ꠅꠁꠟꠦ ꠀꠙꠘꠣꠞꠣ ꠎꠦꠛꠟꠣ ꠔꠣꠘ ꠟꠦꠈꠣꠞꠦꠃ ꠄꠇꠤꠘ ꠇꠞꠂꠘ ꠘꠣ, ꠔꠦ ꠀꠝꠣꠞ ꠝꠥꠈꠞ ꠇꠕꠣꠞꠦ ꠇꠤꠟꠣ ꠄꠇꠤꠘ ꠇꠞꠛꠣ?”
JOH 6:1 ꠄꠞꠛꠣꠖꠦ ꠢꠎꠞꠔ ꠁꠍꠣ ꠉꠣꠟꠤꠟ ꠀꠅꠞꠞ ꠢꠙꠣꠞꠅ ꠉꠦꠟꠣꠉꠤ, ꠅꠃ ꠀꠅꠞꠞ ꠀꠞꠇ ꠘꠣꠝ ꠔꠤꠛꠤꠞꠤꠀ ꠀꠅꠞ।
JOH 6:2 ꠛꠃꠔ ꠝꠣꠘꠥꠡ ꠔꠣꠘ ꠈꠞꠦ ꠅꠁꠀ ꠎꠣꠅꠀꠔ ꠀꠍꠟꠣ, ꠔꠣꠞꠣ ꠔ ꠖꠦꠈꠍꠤꠟꠣ, ꠛꠦꠝꠣꠞꠤ ꠅꠇꠟꠞ ꠃꠙꠞꠦ ꠔꠣꠁꠘ ꠇꠤꠟꠣ ꠇꠦꠞꠣꠝꠔꠤ ꠇꠣꠝ ꠇꠞꠍꠂꠘ।
JOH 6:3 ꠢꠘꠅ ꠉꠤꠀ ꠢꠣꠞꠤ ꠔꠣꠘ ꠍꠣꠢꠣꠛꠤ ꠅꠇꠟꠞꠦ ꠟꠁꠀ ꠄꠇ ꠙꠣꠠꠞ ꠃꠙꠞꠦ ꠛꠁꠟꠣ।
JOH 6:4 ꠅꠃ ꠡꠝꠄ ꠁꠢꠥꠖꠤ ꠅꠇꠟꠞ ꠀꠎꠣꠖꠤ ꠁꠖ ꠊꠘꠣꠁ ꠀꠁꠍꠦ।
JOH 6:5 ꠁꠍꠣꠄ ꠌꠣꠁꠀ ꠖꠦꠈꠟꠣ, ꠛꠃꠔ ꠝꠣꠘꠥꠡ ꠔꠣꠘ ꠉꠦꠍꠦ ꠃꠑꠤꠀ ꠀꠁꠞꠣ, ꠅꠃ ꠔꠣꠘ ꠍꠣꠢꠣꠛꠤ ꠚꠤꠟꠤꠚꠞꠦ ꠇꠁꠟꠣ, “ꠁꠔꠣ ꠝꠣꠘꠡꠞꠦ ꠈꠣꠅꠀꠘꠤꠞ ꠟꠣꠉꠤ ꠀꠝꠞꠣ ꠞꠥꠐꠤ ꠙꠣꠁꠝꠥ ꠇꠥꠘ ꠎꠣꠉꠣꠔ?”
JOH 6:6 ꠀꠍꠟꠦ ꠚꠤꠟꠤꠚꠞꠦ ꠙꠞꠤꠇ꠆ꠇꠣ ꠇꠞꠣꠞ ꠟꠣꠉꠤ ꠔꠣꠁꠘ ꠁꠈꠣꠘ ꠎꠤꠇꠣꠁꠟꠣ, ꠅꠁꠟꠦ ꠇꠤꠟꠣ ꠇꠤꠔꠣ ꠇꠞꠛꠣ, ꠁꠈꠣꠘ ꠔꠣꠁꠘ ꠀꠉꠦꠃ ꠎꠣꠘꠔꠣ।
JOH 6:7 ꠚꠤꠟꠤꠚꠦ ꠎꠥꠀꠙ ꠖꠤꠟꠣ, “ꠄꠞꠣꠞꠦ ꠕꠥꠠꠣ ꠕꠥꠠꠣ ꠈꠣꠘꠤ ꠖꠤꠟꠦꠅ ꠖꠥꠁ-ꠡ ꠖꠤꠘꠣꠞꠞ ꠞꠥꠐꠤꠄ ꠇꠥꠟꠣꠁꠔ ꠘꠣꠄ।”
JOH 6:8 ꠢꠘꠅ ꠀꠘ꠆ꠖꠞꠤꠀꠍ ꠘꠣꠝꠦ ꠢꠎꠞꠔ ꠁꠍꠣꠞ ꠄꠇ ꠍꠣꠢꠣꠛꠤ ꠀꠍꠟꠣ। ꠔꠣꠁꠘ ꠅꠁꠟꠣ ꠍꠣꠁꠝꠘ-ꠙꠤꠔꠞꠞ ꠜꠣꠁ।
JOH 6:9 ꠔꠣꠁꠘ ꠁꠍꠣꠞꠦ ꠇꠁꠟꠣ, “ꠢꠥꠎꠥꠞ, ꠅꠘꠅ ꠢꠥꠞꠥ ꠄꠇ ꠙꠥꠀꠞ ꠉꠦꠍꠦ ꠙꠣꠌꠈꠣꠘ ꠀꠐꠣꠞ ꠞꠥꠐꠤ ꠀꠞ ꠖꠥꠁꠐꠣ ꠛꠤꠞꠣꠘ ꠝꠣꠍ ꠀꠍꠦ, ꠅꠁꠟꠦ ꠅꠔ ꠝꠣꠘꠡꠞ ꠝꠣꠎꠦ ꠁꠔꠣꠄ ꠇꠤꠔꠣ ꠅꠁꠛ?”
JOH 6:10 ꠁꠍꠣꠄ ꠢꠥꠇꠥꠝ ꠖꠤꠟꠣ, “ꠔꠥꠝꠞꠣ ꠅꠔꠣ ꠝꠣꠘꠡꠞꠦ ꠊꠣꠡꠞ ꠃꠙꠞꠦ ꠛꠅꠀꠁ ꠖꠦꠅ।” ꠔꠦꠃ ꠔꠣꠞꠣ ꠊꠣꠡꠞ ꠃꠙꠞꠦ ꠛꠁꠉꠦꠟꠣ। ꠁꠘꠅ ꠈꠣꠟꠤ ꠛꠦꠐꠣ ꠝꠣꠘꠥꠡꠃ ꠀꠍꠟꠣ ꠅꠘꠥꠝꠣꠘ ꠙꠣꠌ ꠀꠎꠣꠞ ꠎꠘ।
JOH 6:11 ꠛꠣꠖꠦ ꠔꠣꠁꠘ ꠅꠃ ꠙꠣꠌꠈꠣꠘ ꠞꠥꠐꠤ ꠀꠔꠅ ꠟꠁꠀ ꠀꠟ꠆ꠟꠣꠞ ꠡꠥꠇꠞꠤꠀ ꠀꠖꠣꠄ ꠇꠞꠤꠀ ꠄꠞꠣꠞꠦ ꠛꠣꠐꠤꠀ ꠖꠤꠟꠣ। ꠅꠃꠟꠣ ꠛꠤꠞꠣꠘ ꠝꠣꠍꠅ ꠛꠣꠐꠤꠀ ꠖꠤꠟꠣ। ꠎꠦ ꠎꠔ ꠌꠣꠁꠟ, ꠢꠦ ꠅꠔꠈꠣꠘ ꠙꠣꠁꠟ।
JOH 6:12 ꠢꠇꠟ ꠝꠣꠘꠡꠦ ꠙꠦꠐ ꠜꠞꠤ ꠈꠣꠁꠟ। ꠈꠣꠁꠀ ꠢꠣꠞꠟꠦ ꠁꠍꠣꠄ ꠔꠣꠘ ꠍꠣꠢꠣꠛꠤ ꠅꠇꠟꠞꠦ ꠇꠁꠟꠣ, “ꠈꠣꠘꠤꠞ ꠛꠣꠖꠦ ꠎꠦꠔꠣ ꠞꠁꠍꠦ, ꠔꠥꠝꠞꠣ ꠅꠔꠣ ꠄꠇꠈꠣꠘꠅ ꠖꠟꠣ ꠇꠞꠅ, ꠇꠥꠘ꠆ꠔꠣ ꠚꠣꠟꠣꠁꠅ ꠘꠣ।”
JOH 6:13 ꠄꠞꠣ ꠅꠃ ꠙꠣꠌꠈꠣꠘ ꠞꠥꠐꠤꠞ ꠛꠣꠠꠔꠤ ꠐꠥꠇꠞꠣꠁꠘ ꠖꠟꠣ ꠇꠞꠤꠀ ꠛꠣꠞꠅ ꠐꠥꠇꠞꠤ ꠜꠞꠟꠣ।
JOH 6:14 ꠢꠎꠞꠔ ꠁꠍꠣꠞ ꠁ ꠇꠦꠞꠣꠝꠔꠤ ꠖꠦꠈꠤꠀ ꠝꠣꠘꠡꠦ ꠝꠣꠔꠣ-ꠝꠣꠔꠤ ꠟꠣꠉꠣꠁꠟꠣ, “ꠘꠤꠌ꠆ꠌꠄ ꠄꠁꠘꠃ ꠢꠃ ꠘꠛꠤ, ꠎꠦꠁꠘ ꠖꠥꠘꠤꠀꠔ ꠔꠡꠞꠤꠚ ꠀꠘꠣꠞ ꠇꠕꠣ।”
JOH 6:15 ꠔꠦꠃ ꠁꠍꠣꠄ ꠛꠥꠎꠤꠟꠤꠟꠣ, ꠝꠣꠘꠡꠦ ꠎꠥꠞ ꠇꠞꠤꠀ ꠔꠣꠘꠞꠦ ꠔꠣꠞꠣꠞ ꠛꠣꠖꠡꠣ ꠛꠣꠘꠣꠘꠤꠞ ꠟꠣꠉꠤ ꠗꠞꠔ ꠌꠣꠞ। ꠅꠈꠣꠘ ꠛꠥꠎꠤꠀ ꠔꠣꠁꠘ ꠢꠤꠞꠛꠣꠞ ꠄꠇꠟꠣꠃ ꠙꠣꠠꠞ ꠃꠙꠞꠦ ꠉꠦꠟꠣꠉꠤ।
JOH 6:16 ꠢꠣꠁꠘ꠆ꠎꠣ ꠛꠣꠟꠣ ꠁꠍꠣꠞ ꠍꠣꠢꠣꠛꠤ ꠅꠇꠟ ꠀꠅꠞꠞ ꠙꠣꠞꠅ ꠉꠦꠟꠣ।
JOH 6:17 ꠀꠞ ꠇꠚꠞꠘꠣꠃꠝ ꠐꠣꠃꠘꠅ ꠎꠣꠁꠔꠣ ꠇꠞꠤ ꠘꠣꠅ ꠟꠁꠀ ꠀꠅꠞ ꠙꠣꠠꠤ ꠖꠦꠅꠀꠔ ꠟꠣꠉꠟꠣ। ꠁ ꠡꠝꠄ ꠀꠘ꠆ꠖꠣꠁꠞ ꠅꠁꠉꠦꠍꠤꠟ ꠀꠞ ꠁꠍꠣꠅ ꠔꠣꠞꠣꠞ ꠟꠉꠦ ꠀꠍꠟꠣ ꠘꠣ।
JOH 6:18 ꠀꠅꠞꠞ ꠝꠣꠎꠈꠣꠘꠅ ꠎꠣꠁꠔꠦꠃ ꠈꠥꠛ ꠔꠥꠚꠣꠘꠤ ꠛꠣꠔꠣꠡ ꠀꠞ ꠛꠠ ꠛꠠ ꠓꠦꠃ ꠡꠥꠞꠥ ꠅꠁꠟ।
JOH 6:19 ꠅꠘꠥꠝꠣꠘ ꠔꠤꠘ-ꠌꠣꠁꠞ ꠝꠣꠁꠟ ꠘꠣꠅ ꠛꠣꠁꠀ ꠎꠣꠅꠀꠞ ꠛꠣꠖꠦ ꠔꠣꠞꠣ ꠖꠦꠈꠟꠣ, ꠢꠎꠞꠔ ꠁꠍꠣ ꠙꠣꠘꠤꠞ ꠃꠙꠞꠦꠖꠤ ꠀꠐꠤꠀ ꠔꠣꠞꠣꠞ ꠉꠦꠍꠦ ꠀꠁꠞꠣ। ꠁꠔꠣ ꠖꠦꠈꠤꠀ ꠍꠣꠢꠣꠛꠤ ꠅꠇꠟꠦ ꠈꠥꠛ ꠒꠞꠣꠁꠉꠦꠟꠣ।
JOH 6:20 ꠅꠃ ꠡꠝꠄ ꠁꠍꠣꠄ ꠔꠣꠞꠣꠞꠦ ꠇꠁꠟꠣ, “ꠒꠞꠣꠁꠅ ꠘꠣ, ꠁ ꠔ ꠀꠝꠤ।”
JOH 6:21 ꠍꠣꠢꠣꠛꠤ ꠅꠇꠟꠦ ꠔꠣꠘꠞꠦ ꠘꠣꠅꠅ ꠔꠥꠟꠔꠣ ꠌꠣꠁꠟꠣ, ꠀꠞ ꠔꠣꠞꠣ ꠎꠦ ꠎꠣꠉꠣꠔ ꠎꠣꠅꠀꠞ ꠇꠕꠣ, ꠟꠉꠦ ꠟꠉꠦ ꠘꠣꠅ ꠉꠤꠀ ꠢꠘꠅ ꠙꠃꠍꠤ ꠉꠦꠟ।
JOH 6:22 ꠀꠅꠞꠞ ꠢꠙꠣꠞꠅ ꠎꠦꠔꠣ ꠝꠣꠘꠥꠡ ꠃꠛꠣ ꠀꠍꠟꠣ, ꠛꠣꠖꠞ ꠖꠤꠘ ꠔꠣꠞꠣ ꠛꠥꠎꠟꠣ, ꠀꠉꠞ ꠖꠤꠘ ꠁꠘꠅ ꠄꠇꠈꠣꠘ ꠘꠣꠅ ꠍꠣꠠꠣ ꠖꠥꠍꠞꠣ ꠇꠥꠘꠥ ꠘꠣꠅ ꠀꠍꠤꠟ ꠘꠣ। ꠔꠣꠞꠣ ꠄꠅꠈꠣꠘꠅ ꠛꠥꠎꠟꠣ, ꠁꠍꠣ ꠔꠣꠘ ꠍꠣꠢꠣꠛꠤ ꠅꠇꠟꠞ ꠟꠉꠦ ꠘꠣꠅꠅ ꠃꠑꠍꠂꠘ ꠘꠣ, ꠛꠞꠋ ꠔꠣꠞꠣ ꠄꠇꠟꠣꠃ ꠀꠅꠞ ꠙꠣꠞ ꠅꠁꠍꠂꠘ।
JOH 6:23 ꠅꠁꠟꠦ ꠎꠦ ꠎꠣꠉꠣꠔ ꠁꠍꠣꠄ ꠀꠟ꠆ꠟꠣꠞ ꠡꠥꠇꠞꠤꠀ ꠀꠖꠣꠄ ꠇꠞꠤꠀ ꠢꠣꠞꠤ ꠝꠣꠘꠡꠞꠦ ꠞꠥꠐꠤ ꠈꠣꠅꠀꠁꠍꠟꠣ, ꠅꠃ ꠎꠣꠉꠣꠞ ꠉꠦꠍꠦ ꠔꠤꠛꠤꠞꠤꠀ ꠐꠣꠃꠘ ꠕꠣꠇꠤ ꠇꠄꠈꠣꠘ ꠘꠣꠅ ꠀꠁꠟ।
JOH 6:24 ꠝꠣꠘꠡꠦ ꠎꠦꠛꠟꠣ ꠖꠦꠈꠟꠣ, ꠁꠍꠣ ꠛꠣ ꠔꠣꠘ ꠍꠣꠢꠣꠛꠤ ꠅꠇꠟ ꠇꠦꠃ ꠁ ꠎꠣꠉꠣꠔ ꠘꠣꠁ, ꠅꠃ ꠔꠣꠞꠣ ꠅꠔꠣ ꠘꠣꠅꠀꠁꠘ꠆ꠔꠅ ꠃꠑꠤꠀ ꠁꠍꠣꠞ ꠔꠣꠟ꠆ꠟꠣꠡꠦ ꠇꠚꠞꠘꠣꠃꠝ ꠐꠣꠃꠘꠅ ꠉꠦꠟꠣꠉꠤ।
JOH 6:25 ꠢꠘꠅ ꠉꠤꠀ ꠔꠣꠞꠣ ꠁꠍꠣꠞꠦ ꠙꠣꠁꠀ ꠇꠁꠟꠣ, “ꠢꠥꠎꠥꠞ, ꠀꠙꠘꠦ ꠁꠘꠅ ꠇꠥꠘ ꠡꠝꠄ ꠀꠁꠟꠣ?”
JOH 6:26 ꠔꠣꠁꠘ ꠎꠥꠀꠙ ꠖꠤꠟꠣ, “ꠀꠝꠤ ꠔꠥꠝꠞꠣꠞꠦ ꠢꠣꠍꠣ ꠇꠕꠣ ꠇꠁꠞꠣꠝ, ꠔꠥꠝꠞꠣ ꠀꠝꠣꠞ ꠇꠦꠞꠣꠝꠔꠤ ꠘꠤꠡꠣꠘꠣꠞ ꠝꠣꠘꠤ ꠛꠥꠎꠤꠀ ꠀꠝꠣꠞꠦ ꠔꠥꠇꠣꠁꠞꠣꠄ ꠘꠣ, ꠛꠞꠋ ꠙꠦꠐ ꠜꠞꠤ ꠞꠥꠐꠤ ꠈꠣꠁꠍ ꠇꠞꠤꠃ ꠔꠥꠇꠣꠁꠞꠣꠄ।
JOH 6:27 ꠅꠈꠘ ꠢꠥꠘꠅ, ꠖꠥꠘꠤꠀꠛꠤ ꠎꠦ ꠈꠣꠘꠤ ꠘꠡ꠆ꠐ ꠅꠁꠎꠣꠄ, ꠔꠣꠞ ꠈꠞꠦ ꠊꠥꠞꠤꠀ ꠟꠣꠜ ꠇꠤꠔꠣ? ꠎꠦ ꠈꠣꠘꠤ ꠇꠥꠘꠥꠖꠤꠘ ꠘꠡ꠆ꠐ ꠅꠄ ꠘꠣ, ꠛꠞꠋ ꠀꠈꠦꠞꠤ ꠎꠤꠘ꠆ꠖꠦꠉꠤ ꠖꠣꠘ ꠇꠞꠦ, ꠔꠣꠞ ꠈꠞꠦ ꠅꠁꠀ ꠊꠥꠞꠅ। ꠁ ꠈꠣꠘꠤ ꠔ ꠀꠝꠤ ꠛꠤꠘ-ꠀꠖꠝꠦ ꠔꠥꠝꠞꠣꠞꠦ ꠖꠤꠝꠥ। ꠅꠃ ꠄꠈꠔꠤꠀꠞ ꠈꠣꠟꠤ ꠀꠝꠣꠞ ꠀꠍꠦ, ꠀꠝꠣꠞ ꠉꠣꠁꠛꠤ ꠛꠣꠚ ꠀꠟ꠆ꠟꠣꠄꠃ ꠁꠔꠣꠞ ꠙꠞꠝꠣꠘ ꠖꠦꠈꠣꠁꠍꠂꠘ।”
JOH 6:28 ꠁꠈꠣꠘ ꠢꠥꠘꠤꠀ ꠔꠣꠞꠣ ꠁꠍꠣꠞꠦ ꠎꠤꠇꠣꠁꠟꠣ, “ꠔꠦ ꠀꠟ꠆ꠟꠣꠞ ꠇꠣꠝ ꠇꠞꠣꠞ ꠟꠣꠉꠤ ꠀꠝꠞꠣ ꠇꠤꠔꠣ ꠇꠞꠔꠣꠝ?”
JOH 6:29 ꠔꠣꠁꠘ ꠇꠁꠟꠣ, “ꠀꠟ꠆ꠟꠣꠄ ꠎꠣꠞꠦ ꠙꠣꠑꠣꠁꠍꠂꠘ, ꠔꠣꠘ ꠃꠙꠞꠦ ꠁꠝꠣꠘ ꠀꠘꠣꠃ ꠅꠁꠟ ꠀꠟ꠆ꠟꠣꠞ ꠇꠣꠝ।”
JOH 6:30 ꠄꠞꠛꠣꠖꠦ ꠔꠣꠞꠣ ꠔꠣꠘꠞꠦ ꠎꠤꠇꠣꠁꠟ, “ꠔꠦ ꠀꠙꠘꠦ ꠅꠝꠘ ꠇꠤꠔꠣ ꠘꠤꠡꠣꠘꠣ ꠖꠦꠈꠣꠁꠛꠣ, ꠎꠦꠔꠣ ꠖꠦꠈꠤꠀ ꠀꠝꠞꠣ ꠀꠙꠘꠣꠞ ꠃꠙꠞꠦ ꠁꠝꠣꠘ ꠀꠘꠝꠥ? ꠀꠙꠘꠦ ꠇꠥꠘ ꠇꠣꠝ ꠇꠞꠛꠣ?
JOH 6:31 ꠀꠝꠞꠣꠞ ꠛꠣꠚ-ꠖꠣꠖꠣꠄ ꠔ ꠝꠞꠥꠜꠥꠝꠤꠔ ꠝꠣꠘ꠆ꠘꠣ ꠈꠣꠁꠍꠟꠣ। ꠙꠣꠇ ꠇꠤꠔꠣꠛꠅ ꠟꠦꠈꠣ ꠀꠍꠦ, ꠀꠟ꠆ꠟꠣꠄ ꠔꠣꠞꠣꠞꠦ ꠛꠦꠢꠦꠡ꠆ꠔꠤ ꠈꠣꠘꠤ ꠈꠣꠅꠀꠁꠟꠣ।”
JOH 6:32 ꠁꠍꠣꠄ ꠎꠥꠀꠙ ꠖꠤꠟꠣ, “ꠀꠝꠤ ꠔꠥꠝꠞꠣꠞꠦ ꠢꠇ ꠇꠕꠣ ꠇꠁꠞꠣꠝ, ꠛꠦꠢꠦꠡ꠆ꠔꠤ ꠎꠦ ꠞꠥꠐꠤ ꠔꠥꠝꠞꠣ ꠙꠣꠁꠍꠟꠣꠄ, ꠁꠔꠣ ꠔ ꠝꠥꠍꠣ ꠘꠛꠤꠄ ꠖꠤꠍꠂꠘ ꠘꠣ, ꠛꠞꠋ ꠀꠝꠣꠞ ꠉꠣꠁꠛꠤ ꠛꠣꠚꠦꠃ ꠔꠥꠝꠞꠣꠞꠦ ꠀꠍꠟ ꠛꠦꠢꠦꠡ꠆ꠔꠤ ꠞꠥꠐꠤ ꠖꠣꠘ ꠇꠞꠂꠘ।
JOH 6:33 ꠀꠞ ꠀꠟ꠆ꠟꠣꠞ ꠖꠦꠅꠀ ꠢꠃ ꠞꠥꠐꠤ ꠅꠁꠟꠣ ꠅꠃ ꠎꠘ, ꠎꠦꠁꠘ ꠛꠦꠢꠦꠡ꠆ꠔ ꠕꠣꠇꠤ ꠟꠣꠝꠤꠀ ꠀꠁꠀ ꠢꠣꠞꠣ ꠎꠉꠔꠞꠦ ꠎꠤꠘ꠆ꠖꠦꠉꠤ ꠖꠦꠁꠘ।”
JOH 6:34 ꠔꠦꠃ ꠔꠣꠞꠣ ꠇꠁꠟ, “ꠢꠥꠎꠥꠞ, ꠔꠦ ꠅꠃ ꠞꠥꠐꠤꠃ ꠀꠝꠞꠣꠞꠦ ꠢꠞ-ꠢꠣꠝꠦꠡꠣ ꠖꠦꠃꠇ꠆ꠇꠣ।”
JOH 6:35 ꠁꠍꠣꠄ ꠇꠁꠟꠣ, “ꠀꠝꠤꠃ ꠢꠃ ꠎꠤꠘ꠆ꠖꠦꠉꠤ-ꠞꠥꠐꠤ। ꠎꠦ ꠎꠘ ꠀꠝꠣꠞ ꠉꠦꠍꠦ ꠀꠄ, ꠔꠣꠞ ꠇꠥꠘꠥ ꠡꠝꠄ ꠜꠥꠇ ꠟꠣꠉꠦ ꠘꠣ, ꠀꠞ ꠎꠦ ꠀꠝꠣꠞ ꠃꠙꠞꠦ ꠁꠝꠣꠘ ꠀꠘꠦ, ꠔꠣꠞ ꠇꠥꠘꠥ ꠡꠝꠄ ꠙꠤꠀꠍꠦꠅ ꠗꠞꠦ ꠘꠣ।
JOH 6:36 ꠀꠝꠤ ꠔ ꠔꠥꠝꠞꠣꠞꠦ ꠝꠥꠈꠖꠤ ꠇꠁꠍꠤꠅ, ꠀꠞ ꠔꠥꠝꠞꠣ ꠀꠝꠣꠞꠦ ꠖꠦꠈꠤꠀꠅ ꠁꠝꠣꠘ ꠀꠘꠟꠣꠄ ꠘꠣ।
JOH 6:37 ꠀꠝꠣꠞ ꠉꠣꠁꠛꠤ ꠛꠣꠚꠦ ꠎꠦꠞꠣꠞꠦ ꠀꠝꠣꠞ ꠀꠔꠅ ꠖꠦꠁꠘ, ꠔꠣꠞꠣ ꠢꠇꠟꠃ ꠀꠝꠣꠞ ꠉꠦꠍꠦ ꠀꠁꠛ। ꠎꠦ ꠎꠘ ꠀꠝꠣꠞ ꠉꠦꠍꠦ ꠀꠄ, ꠀꠝꠤ ꠇꠥꠘꠥꠝꠘ꠆ꠔꠦꠃ ꠔꠣꠞꠦ ꠛꠣꠞꠦ ꠚꠣꠟꠣꠁꠔꠣꠝ ꠘꠣꠄ।
JOH 6:38 ꠀꠝꠤ ꠇꠥꠘꠥ ꠀꠝꠣꠞ ꠝꠞ꠆ꠎꠤ ꠝꠣꠚꠤꠇ ꠇꠣꠝ ꠇꠞꠣꠔ ꠀꠁꠍꠤ ꠘꠤ? ꠘꠣ, ꠛꠞꠋ ꠎꠦꠁꠘ ꠀꠝꠣꠞꠦ ꠙꠣꠑꠣꠁꠍꠂꠘ, ꠔꠣꠘ ꠝꠞ꠆ꠎꠤ ꠎꠥꠉꠣꠁꠀ ꠇꠣꠝ ꠇꠞꠣꠞ ꠟꠣꠉꠤꠃ ꠀꠝꠤ ꠛꠦꠢꠦꠡ꠆ꠔ ꠕꠣꠇꠤ ꠟꠣꠝꠤꠀ ꠀꠁꠍꠤ।
JOH 6:39 ꠢꠥꠘꠅ, ꠎꠦ ꠛꠣꠚꠦ ꠀꠝꠣꠞꠦ ꠙꠣꠑꠣꠁꠍꠂꠘ, ꠔꠣꠘ ꠝꠥꠘꠡꠣ ꠅꠁꠟ, ꠔꠣꠁꠘ ꠎꠦꠞꠣꠞꠦ ꠀꠝꠣꠞ ꠀꠔꠅ ꠖꠤꠍꠂꠘ, ꠀꠝꠤ ꠎꠣꠘꠥ ꠄꠞꠣ ꠄꠇꠎꠘꠞꠦꠅ ꠘꠣ ꠀꠞꠣꠁ ꠛꠞꠋ ꠞꠥꠎ ꠢꠣꠡꠞꠅ ꠄꠞꠣꠞꠦ ꠎꠤꠘ꠆ꠖꠣ ꠢꠣꠟꠔꠦ ꠔꠥꠟꠤ।
JOH 6:40 ꠀꠝꠣꠞ ꠛꠣꠚꠞ ꠝꠥꠘꠡꠣ ꠅꠁꠟ, ꠎꠣꠞꠣ ꠔꠣꠘ ꠙꠥꠔꠞꠦ ꠖꠦꠈꠤꠀ ꠔꠣꠘ ꠃꠙꠞꠦ ꠁꠝꠣꠘ ꠀꠘꠦ, ꠔꠣꠞꠣ ꠎꠣꠘꠥ ꠀꠈꠦꠞ ꠙꠣꠄ। ꠀꠞ ꠀꠝꠤꠃ ꠔꠣꠞꠣꠞꠦ ꠞꠥꠎ ꠢꠣꠡꠞꠅ ꠎꠤꠘ꠆ꠖꠣ ꠇꠞꠤ ꠔꠥꠟꠝꠥ।”
JOH 6:41 ꠁꠈꠣꠘ ꠢꠥꠘꠤꠀ ꠁꠢꠥꠖꠤ ꠘꠦꠔꠣ ꠅꠇꠟꠦ ꠁꠍꠣꠞꠦ ꠟꠁꠀ ꠇꠣꠘꠣ-ꠊꠥꠡꠣ ꠟꠣꠉꠣꠁꠟꠣ। ꠇꠣꠞꠘ ꠔꠣꠁꠘ ꠀꠉꠦ ꠇꠁꠍꠟꠣ, “ꠛꠦꠢꠦꠡ꠆ꠔ ꠕꠣꠇꠤ ꠎꠦ ꠞꠥꠐꠤ ꠟꠣꠝꠤꠀ ꠀꠁꠍꠦ, ꠀꠝꠤꠃ ꠢꠃ ꠞꠥꠐꠤ।”
JOH 6:42 ꠄꠞꠟꠣꠉꠤ ꠔꠣꠞꠣ ꠘꠤꠎꠦ ꠘꠤꠎꠦ ꠇꠁꠟꠣ, “ꠅꠉꠥ ꠔ ꠁꠃꠍꠥꠚꠞ ꠙꠥꠀ ꠁꠍꠣ ꠘꠣꠄ ꠘꠤ ꠛꠣ? ꠀꠝꠞꠣ ꠔ ꠔꠣꠞ ꠝꠣ-ꠛꠣꠚꠞꠦꠅ ꠌꠤꠘꠤ। ꠔꠦ ꠢꠦ ꠇꠦꠝꠘꠦ ꠇꠄ, ꠢꠦ ꠛꠥꠟꠦ ꠛꠦꠢꠦꠡ꠆ꠔ ꠕꠣꠇꠤ ꠟꠣꠝꠤꠀ ꠀꠁꠍꠦ?”
JOH 6:43 ꠁꠍꠣꠄ ꠔꠣꠞꠣꠞꠦ ꠇꠁꠟꠣ, “ꠔꠥꠝꠞꠣ ꠘꠤꠎꠞ ꠝꠣꠎꠦ ꠇꠣꠘꠣ-ꠊꠥꠡꠣ ꠇꠞꠤꠅ ꠘꠣ।
JOH 6:44 ꠀꠝꠣꠞ ꠎꠦ ꠉꠣꠁꠛꠤ ꠛꠣꠚꠦ ꠀꠝꠣꠞꠦ ꠙꠣꠑꠣꠁꠍꠂꠘ, ꠔꠣꠁꠘ ꠀꠡꠤꠇ ꠘꠣ ꠛꠣꠘꠣꠁꠟꠦ ꠇꠥꠘꠥ ꠝꠣꠘꠥꠡꠃ ꠀꠝꠣꠞ ꠉꠦꠍꠦ ꠀꠁꠔ ꠙꠣꠞꠦ ꠘꠣ। ꠀꠞ ꠀꠝꠤꠃ ꠔꠣꠞꠦ ꠞꠥꠎ ꠢꠣꠡꠞꠅ ꠎꠤꠘ꠆ꠖꠣ ꠢꠣꠟꠔꠦ ꠔꠥꠟꠝꠥ।
JOH 6:45 ꠎꠣꠘ ꠘꠤ, ꠘꠛꠤ ꠅꠇꠟꠞ ꠇꠤꠔꠣꠛꠅ ꠟꠦꠈꠣ ꠀꠍꠦ, ‘ꠔꠣꠞꠣ ꠢꠇꠟꠦ ꠀꠟ꠆ꠟꠣꠞ ꠉꠦꠍ ꠕꠣꠇꠤ ꠔꠣꠟꠤꠝ ꠟꠁꠛꠣ।’ ꠀꠞ ꠎꠦ ꠎꠘꠦ ꠉꠣꠁꠛꠤ ꠛꠣꠚꠞ ꠉꠦꠍ ꠕꠣꠇꠤ ꠔꠣꠟꠤꠝ ꠙꠣꠁꠍꠦ, ꠢꠃ ꠎꠘꠃ ꠀꠝꠣꠞ ꠉꠦꠍꠦ ꠀꠄ।
JOH 6:46 “ꠅꠃ ꠛꠣꠚꠞꠦ ꠔ ꠇꠥꠘꠥ ꠝꠣꠘꠡꠦ ꠖꠦꠈꠍꠦ ꠘꠣ, ꠈꠣꠟꠤ ꠀꠟ꠆ꠟꠣꠞ ꠉꠦꠍ ꠕꠣꠇꠤ ꠎꠦꠁꠘ ꠀꠁꠍꠂꠘ, ꠔꠣꠁꠘꠃ ꠁ ꠛꠣꠚꠞꠦ ꠖꠦꠈꠍꠂꠘ।
JOH 6:47 ꠀꠝꠤ ꠔꠥꠝꠞꠣꠞꠦ ꠘꠤꠌ꠆ꠌꠤꠔ ꠢꠣꠍꠣ ꠇꠕꠣ ꠇꠁꠞꠣꠝ, ꠎꠦ ꠎꠘꠦ ꠀꠝꠣꠞ ꠃꠙꠞꠦ ꠁꠝꠣꠘ ꠀꠘꠍꠦ, ꠢꠦ ꠟꠉꠦ ꠟꠉꠦꠃ ꠀꠈꠦꠞ ꠙꠣꠁꠟꠤꠍꠦ।
JOH 6:48 ꠀꠝꠤꠃ ꠎꠤꠘ꠆ꠖꠦꠉꠤ-ꠞꠥꠐꠤ।
JOH 6:49 ꠔꠥꠝꠞꠣꠞ ꠛꠣꠚ-ꠖꠣꠖꠣꠁꠘ꠆ꠔꠦ ꠔ ꠝꠞꠥꠜꠥꠝꠤꠔ ꠝꠣꠘ꠆ꠘꠣ ꠈꠣꠁꠍꠟꠣ, ꠔꠣ-ꠅ ꠔꠣꠞꠣꠞ ꠝꠃꠔ ꠅꠁꠍꠦ।
JOH 6:50 ꠅꠁꠟꠦ ꠁꠈꠣꠘ ꠅꠁꠟ ꠢꠃ ꠞꠥꠐꠤ, ꠎꠦ ꠞꠥꠐꠤ ꠛꠦꠢꠦꠡ꠆ꠔ ꠕꠣꠇꠤ ꠟꠣꠝꠤꠀ ꠀꠁꠍꠦ, ꠎꠣꠔꠦ ꠅꠃ ꠞꠥꠐꠤ ꠈꠣꠁꠀ ꠝꠣꠘꠥꠡ ꠝꠞꠘ ꠕꠣꠇꠤ ꠞꠦꠢꠣꠁ ꠙꠣꠄ।
JOH 6:51 ꠢꠥꠘꠅ, ꠀꠝꠤꠃ ꠅꠁꠟꠣꠝ ꠢꠃ ꠎꠤꠘ꠆ꠖꠣ ꠞꠥꠐꠤ, ꠎꠦ ꠞꠥꠐꠤ ꠛꠦꠢꠦꠡ꠆ꠔ ꠕꠣꠇꠤ ꠟꠣꠝꠤꠀ ꠀꠁꠍꠦ। ꠎꠦ ꠎꠘꠦ ꠁ ꠞꠥꠐꠤ ꠈꠣꠁꠛ, ꠢꠦ ꠌꠤꠞꠇꠣꠟꠤꠘ ꠎꠤꠘ꠆ꠖꠦꠉꠤ ꠙꠣꠁꠛ। ꠀꠝꠣꠞ ꠇꠣꠄꠀꠃ ꠅꠁꠟ ꠅꠃ ꠞꠥꠐꠤ। ꠝꠣꠘꠡꠞꠦ ꠌꠤꠞꠇꠣꠟꠤꠘ ꠎꠤꠘ꠆ꠖꠦꠉꠤ ꠖꠤꠛꠣꠞ ꠘꠤꠅꠔꠦ ꠀꠝꠤ ꠀꠝꠣꠞ ꠖꠦꠢ-ꠇꠣꠄꠀ ꠛꠤꠟꠣꠁ ꠖꠤꠝꠥ।”
JOH 6:52 ꠁꠈꠣꠘ ꠢꠥꠘꠤꠀ ꠁꠢꠥꠖꠤ ꠘꠦꠔꠣ ꠅꠇꠟꠞ ꠝꠣꠎꠦ ꠔꠞ꠆ꠇꠣ-ꠔꠞ꠆ꠇꠤ ꠟꠣꠉꠤꠉꠦꠟ। ꠔꠣꠞꠣ ꠄꠇꠦ-ꠅꠁꠘ꠆ꠘꠦ ꠇꠁꠟ, “ꠁ ꠛꠦꠐꠣꠄ ꠇꠦꠝꠘꠦ ꠔꠣꠞ ꠡꠞꠤꠟꠞ ꠉꠥꠡ꠆ꠔ ꠀꠝꠞꠣꠞꠦ ꠈꠣꠅꠀꠁꠛ?”
JOH 6:53 ꠁꠍꠣꠄ ꠇꠁꠟꠣ, “ꠔꠦ ꠢꠥꠘꠅ, ꠀꠝꠤ ꠘꠤꠌ꠆ꠌꠤꠔ ꠢꠇ ꠇꠕꠣ ꠇꠁꠞꠣꠝ, ꠔꠥꠝꠞꠣ ꠀꠝꠤ ꠛꠤꠘ-ꠀꠖꠝꠞ ꠟꠃ ꠀꠞ ꠉꠥꠡ꠆ꠔ ꠘꠣ ꠈꠣꠁꠟꠦ ꠔ ꠔꠥꠝꠞꠣꠞ ꠝꠣꠎꠦ ꠎꠤꠘ꠆ꠖꠦꠉꠤꠃ ꠘꠣꠁ।
JOH 6:54 ꠇꠦꠃ ꠎꠥꠖꠤ ꠀꠝꠣꠞ ꠟꠃ ꠀꠞ ꠉꠥꠡ꠆ꠔ ꠈꠣꠄ, ꠔꠦ ꠢꠦ ꠀꠈꠦꠞꠤ ꠎꠤꠘ꠆ꠖꠦꠉꠤ ꠙꠣꠁꠟꠤꠍꠦ, ꠀꠞ ꠞꠥꠎ ꠢꠣꠡꠞꠞ ꠖꠤꠘꠅ ꠀꠝꠤ ꠔꠣꠞꠦ ꠎꠤꠘ꠆ꠖꠣ ꠇꠞꠤ ꠔꠥꠟꠝꠥ।
JOH 6:55 ꠀꠝꠣꠞ ꠉꠥꠡ꠆ꠔꠃ ꠅꠁꠟ ꠀꠍꠟ ꠈꠣꠘꠤ ꠀꠞ ꠀꠝꠣꠞ ꠟꠃ-ꠃ ꠅꠁꠟ ꠀꠍꠟ ꠙꠣꠘꠤ।
JOH 6:56 ꠎꠦ ꠎꠘꠦ ꠀꠝꠣꠞ ꠟꠃ ꠀꠞ ꠉꠥꠡ꠆ꠔ ꠈꠣꠄ, ꠢꠦ ꠀꠝꠣꠞ ꠜꠤꠔꠞꠦ ꠕꠣꠇꠦ ꠀꠞ ꠀꠝꠤꠅ ꠔꠣꠞ ꠜꠤꠔꠞꠦ ꠕꠣꠇꠤ।
JOH 6:57 ꠎꠦꠟꠣ ꠀꠝꠣꠞ ꠉꠣꠁꠛꠤ ꠎꠤꠘ꠆ꠖꠣ ꠛꠣꠚꠦ ꠀꠝꠣꠞꠦ ꠙꠣꠑꠣꠁꠍꠂꠘ, ꠄꠞꠟꠣꠉꠤꠃ ꠀꠝꠤꠅ ꠎꠤꠘ꠆ꠖꠣ ꠀꠍꠤ। ꠅꠃꠟꠣ ꠎꠦ ꠎꠘꠦ ꠀꠝꠣꠞꠦ ꠈꠣꠄ, ꠢꠦ-ꠅ ꠀꠝꠣꠞ ꠟꠣꠉꠤ ꠎꠤꠘ꠆ꠖꠣ ꠞꠁꠛ।
JOH 6:58 ꠖꠦꠈꠞꠣꠄ ꠘꠤ, ꠅꠃ ꠞꠥꠐꠤ ꠔ ꠛꠦꠢꠦꠡ꠆ꠔ ꠕꠣꠇꠤ ꠟꠣꠝꠤꠀ ꠀꠁꠍꠦ। ꠎꠦ ꠞꠥꠐꠤ ꠈꠣꠁꠀ ꠔꠥꠝꠞꠣꠞ ꠛꠣꠚ-ꠖꠣꠖꠣꠁꠘ ꠝꠣꠞꠣ ꠉꠦꠍꠂꠘ, ꠁ ꠞꠥꠐꠤ ꠔ ꠀꠝꠣꠞ ꠟꠣꠈꠣꠘ ꠘꠣꠄ। ꠀꠝꠣꠞ ꠅꠃ ꠞꠥꠐꠤ ꠎꠦ ꠎꠘꠦ ꠈꠣꠁꠛ, ꠢꠦ ꠌꠤꠞꠇꠣꠟ ꠎꠤꠘ꠆ꠖꠣ ꠞꠁꠛ।”
JOH 6:59 ꠢꠎꠞꠔ ꠁꠍꠣꠄ ꠇꠚꠞꠘꠣꠃꠝ ꠐꠣꠃꠘꠞ ꠝꠍꠤꠖꠅ ꠔꠣꠟꠤꠝ ꠖꠦꠅꠀꠞ ꠡꠝꠄ ꠁꠔꠣ ꠢꠇꠟꠔꠣ ꠇꠁꠟꠣ।
JOH 6:60 ꠔꠣꠟꠤꠝ ꠢꠥꠘꠤꠀ ꠢꠣꠞꠤ ꠔꠣꠘ ꠃꠝ꠆ꠝꠔꠞ ꠝꠣꠎꠞ ꠛꠃꠔꠦ ꠇꠁꠟꠣ, “ꠁꠔꠣ ꠔ ꠛꠠ ꠉꠞꠝ ꠔꠣꠟꠤꠝ। ꠁꠔꠣ ꠇꠦꠉꠤꠄ ꠝꠣꠘꠛ?”
JOH 6:61 ꠅꠁꠟꠦ ꠁꠍꠣꠄ ꠔꠣꠘ ꠉꠣꠁꠛꠤ ꠛꠟꠦ ꠛꠥꠎꠤꠟꠤꠟꠣ, ꠇꠤꠔꠣ ꠟꠁꠀ ꠄꠞꠣ ꠇꠣꠘꠣ-ꠊꠥꠡꠣ ꠇꠞꠞꠣ। ꠛꠥꠎꠤꠀ ꠄꠞꠣꠞꠦ ꠇꠁꠟꠣ, “ꠅꠃ ꠔꠣꠟꠤꠝ ꠢꠥꠘꠤꠀ ꠔꠥꠝꠞꠣ ꠊꠣꠛꠠꠤ ꠉꠦꠟꠣꠄ ꠘꠤ?
JOH 6:62 ꠔꠦ ꠀꠝꠤ ꠛꠤꠘ-ꠀꠖꠝ ꠀꠉꠦ ꠎꠦ ꠎꠣꠉꠣꠔ ꠀꠍꠟꠣꠝ, ꠀꠝꠣꠞꠦ ꠎꠦꠛꠟꠣ ꠢꠘꠅ ꠃꠑꠤ ꠎꠣꠅꠀꠔ ꠖꠦꠈꠛꠣꠄ, ꠅꠃ ꠡꠝꠄ ꠔꠥꠝꠞꠣ ꠇꠤꠔꠣ ꠇꠁꠛꠣꠄ?
JOH 6:63 ꠔꠥꠝꠞꠣ ꠛꠥꠎꠞꠣꠄ ꠘꠤ, ꠝꠣꠘꠡꠞ ꠡꠞꠤꠟ ꠔ ꠛꠦꠇꠣꠝꠣ, ꠀꠍꠟꠦ ꠞꠥꠢꠥ ꠅꠁꠟꠉꠤ ꠎꠤꠘ꠆ꠖꠦꠉꠤ। ꠀꠝꠤ ꠔꠥꠝꠞꠣꠞꠦ ꠎꠦ ꠛꠄꠀꠘꠤ ꠇꠁꠟꠣꠝ, ꠁꠔꠣ ꠅꠁꠟꠉꠤ ꠝꠣꠘꠡꠞ ꠞꠥꠢꠥ ꠀꠞ ꠎꠤꠘ꠆ꠖꠦꠉꠤꠞ ꠛꠦꠙꠣꠞ।
JOH 6:64 ꠅꠁꠟꠦ ꠔꠥꠝꠞꠣꠞ ꠝꠣꠎꠦ ꠇꠦꠃ ꠇꠦꠃ ꠅꠈꠘꠅ ꠀꠝꠣꠞ ꠃꠙꠞꠦ ꠁꠝꠣꠘ ꠀꠘꠍꠦ ꠘꠣ।” ꠇꠦ ꠔꠣꠘ ꠃꠙꠞꠦ ꠁꠝꠣꠘ ꠀꠘꠍꠦ ꠘꠣ, ꠀꠞ ꠇꠦ ꠔꠣꠘꠞꠦ ꠖꠥꠡꠝꠘꠞ ꠀꠔꠅ ꠗꠞꠣꠁ ꠖꠤꠛ, ꠁꠍꠣꠄ ꠙꠄꠟꠣ ꠕꠣꠇꠤꠃ ꠁꠔꠣ ꠎꠣꠘꠔꠣ।
JOH 6:65 ꠅꠃ ꠔꠣꠁꠘ ꠇꠁꠟꠣ, “ꠅꠃ ꠇꠣꠞꠘꠦ ꠀꠝꠤ ꠔꠥꠝꠞꠣꠞꠦ ꠇꠁꠍꠤ, ꠉꠣꠁꠛꠤ ꠛꠣꠚꠦ ꠛꠟ ꠘꠣ ꠖꠤꠟꠦ, ꠇꠥꠘꠥꠎꠘꠃ ꠀꠝꠣꠞ ꠉꠦꠍꠦ ꠀꠁꠔ ꠙꠣꠞꠦ ꠘꠣ।”
JOH 6:66 ꠁꠍꠣꠞ ꠁꠔꠣ ꠔꠣꠟꠤꠝ ꠢꠥꠘꠤꠀ ꠔꠣꠘ ꠛꠃꠔ ꠃꠝ꠆ꠝꠔ ꠚꠤꠞꠤꠀ ꠉꠦꠟꠣꠉꠤ, ꠔꠣꠞꠣ ꠔꠣꠘ ꠟꠉꠦ ꠌꠟꠣ-ꠚꠤꠞꠣ ꠛꠣꠖ ꠖꠤꠟꠣꠁꠟꠣ।
JOH 6:67 ꠄꠞꠟꠣꠉꠤ ꠁꠍꠣꠄ ꠔꠣꠘ ꠛꠣꠞꠅꠎꠘ ꠍꠣꠢꠣꠛꠤꠞꠦ ꠎꠤꠇꠣꠁꠟꠣ, “ꠇꠤꠔꠣ ꠛꠣ, ꠔꠥꠝꠤꠔꠣꠁꠘꠅ ꠎꠣꠁꠔꠣꠄꠉꠤ ꠘꠤ?”
JOH 6:68 ꠍꠣꠁꠝꠘ-ꠙꠤꠔꠞꠦ ꠎꠥꠀꠙ ꠖꠤꠟꠣ, “ꠢꠥꠎꠥꠞ, ꠀꠝꠞꠣ ꠀꠞ ꠇꠣꠞ ꠉꠦꠍꠦ ꠎꠣꠁꠔꠣꠝ? ꠀꠈꠦꠞꠤ ꠎꠤꠘ꠆ꠖꠦꠉꠣꠘꠤꠞ ꠔꠣꠟꠤꠝ ꠔ ꠈꠣꠟꠤ ꠀꠙꠘꠣꠞ ꠉꠦꠍꠦꠃ ꠀꠍꠦ।
JOH 6:69 ꠀꠝꠞꠣ ꠔ ꠎꠣꠘꠍꠤ ꠀꠞ ꠀꠙꠘꠣꠞ ꠃꠙꠞꠦ ꠁꠝꠣꠘꠅ ꠀꠘꠍꠤ, ꠀꠙꠘꠦꠃ ꠀꠟ꠆ꠟꠣꠞ ꠅꠀꠖꠣ ꠇꠞꠣ ꠢꠃ ꠙꠛꠤꠔ꠆ꠞ ꠎꠘ।”
JOH 6:70 ꠔꠦꠃ ꠁꠍꠣꠄ ꠄꠞꠣꠞꠦ ꠇꠁꠟꠣ, “ꠀꠝꠤ ꠔ ꠔꠥꠝꠞꠣ ꠛꠣꠞꠅ ꠎꠘꠞꠦ ꠙꠍꠘ꠆ꠖ ꠇꠞꠍꠤ, ꠅꠁꠟꠦ ꠔꠥꠝꠞꠣꠞ ꠝꠣꠎꠦꠃ ꠄꠇꠎꠘ ꠡꠄꠔꠣꠘ ꠀꠍꠦ।”
JOH 6:71 ꠁꠘꠅ ꠔꠣꠁꠘ ꠍꠣꠁꠝꠘ ꠁꠡ꠆ꠇꠣꠞꠤꠀꠔꠞ ꠙꠥꠀ ꠁꠢꠥꠖꠣꠞ ꠛꠦꠙꠣꠞꠦ ꠇꠁꠟꠣ, ꠅꠃ ꠁꠢꠥꠖꠣꠄ ꠛꠣꠖꠦ ꠔꠣꠘꠦ ꠗꠞꠣꠁ ꠖꠤꠛ। ꠢꠦ ꠀꠍꠤꠟ ꠅꠃ ꠛꠣꠞꠅꠎꠘ ꠍꠣꠢꠣꠛꠤꠞ ꠝꠣꠎꠞ ꠄꠇꠎꠘ।
JOH 7:1 ꠄꠞꠛꠣꠖ ꠕꠣꠇꠤ ꠢꠎꠞꠔ ꠁꠍꠣ ꠉꠣꠟꠤꠟ ꠎꠤꠟꠣꠞ ꠜꠤꠔꠞꠦꠃ ꠌꠟꠣ-ꠚꠤꠞꠣ ꠇꠞꠟꠣ। ꠁꠢꠥꠖꠤ ꠘꠦꠔꠣ ꠅꠇꠟꠦ ꠔꠣꠘꠞꠦ ꠎꠣꠘꠦ ꠝꠣꠞꠤꠟꠤꠔ ꠌꠣꠁꠍꠤꠟ, ꠄꠞꠟꠣꠉꠤ ꠔꠣꠁꠘ ꠀꠞ ꠄꠢꠥꠖꠤꠀ ꠎꠤꠟꠣꠔ ꠎꠣꠁꠔꠣ ꠌꠣꠁꠟꠣ ꠘꠣ।
JOH 7:2 ꠅꠃ ꠡꠝꠄ ꠁꠢꠥꠖꠤ ꠅꠇꠟꠞ ꠒꠦꠞꠣ-ꠊꠞꠞ ꠁꠖꠞ ꠖꠤꠘ ꠊꠘꠣꠁ ꠀꠁꠍꠤꠟ।
JOH 7:3 ꠄꠞꠟꠣꠉꠤ ꠁꠍꠣꠞ ꠜꠣꠁꠀꠁꠘ꠆ꠔꠦ ꠔꠣꠘꠞꠦ ꠇꠁꠟꠣ, “ꠔꠥꠝꠤ ꠁꠘ ꠕꠘꠦ ꠄꠢꠥꠖꠤꠀ ꠎꠤꠟꠣꠔ ꠎꠣꠅꠉꠤ, ꠔꠦꠃ ꠔꠥꠝꠤ ꠎꠦꠔꠣ ꠇꠣꠝ ꠇꠞꠍ, ꠅꠔꠣ ꠔꠥꠝꠣꠞ ꠃꠝ꠆ꠝꠔ ꠅꠇꠟꠦꠅ ꠖꠦꠈꠛꠣ।
JOH 7:4 ꠇꠦꠃ ꠎꠥꠖꠤ ꠘꠤꠎꠞꠦ ꠝꠣꠘꠡꠞ ꠉꠦꠍꠦ ꠎꠣꠁꠞ ꠇꠞꠔ ꠌꠣꠄ, ꠔꠦ ꠢꠦ ꠟꠥꠇꠣꠁꠀ ꠇꠥꠘ꠆ꠔꠣ ꠇꠞꠦ ꠘꠣ। ꠔꠥꠝꠤꠅ ꠎꠦꠛꠟꠣ ꠅꠝꠘ ꠇꠣꠝ ꠇꠞꠞꠣꠄ, ꠔꠦ ꠘꠤꠎꠞꠦ ꠝꠣꠘꠡꠞ ꠉꠦꠍꠦ ꠎꠣꠁꠞ ꠇꠞꠅ।”
JOH 7:5 ꠀꠍꠟꠦ ꠁꠍꠣꠞ ꠜꠣꠁꠀꠁꠘ꠆ꠔꠦꠅ ꠔꠣꠘ ꠃꠙꠞꠦ ꠁꠝꠣꠘ ꠀꠘꠍꠂꠘ ꠘꠣ।
JOH 7:6 ꠁꠍꠣꠄ ꠔꠣꠞꠣꠞꠦ ꠇꠁꠟꠣ, “ꠀꠝꠣꠞ ꠡꠝꠄ ꠅꠈꠘꠅ ꠅꠁꠍꠦ ꠘꠣ, ꠅꠁꠟꠦ ꠔꠥꠝꠞꠣꠞ ꠔ ꠡꠝꠄ ꠅꠡꠝꠄ ꠇꠥꠘ꠆ꠔꠣ ꠘꠣꠁ।
JOH 7:7 ꠖꠥꠘꠤꠀꠞ ꠝꠣꠘꠡꠦ ꠔꠥꠝꠞꠣꠞꠦ ꠊꠤꠘ꠆ꠘꠣꠁꠔ ꠘꠣꠄ, ꠅꠁꠟꠦ ꠀꠝꠣꠞꠦ ꠊꠤꠘ ꠇꠞꠦ। ꠀꠝꠤ ꠔ ꠔꠣꠞꠣꠞ ꠛꠦꠙꠣꠞꠦ ꠇꠁꠀꠞ, ꠔꠣꠞꠣꠞ ꠢꠇꠟ ꠇꠣꠝꠃ ꠈꠣꠞꠣꠙ।
JOH 7:8 ꠔꠦ ꠔꠥꠝꠞꠣ ꠎꠣꠅꠉꠤ, ꠉꠤꠀ ꠁꠖ ꠇꠞꠅ। ꠀꠝꠣꠞ ꠡꠝꠄ ꠅꠈꠘꠅ ꠙꠥꠞꠣ ꠅꠁꠍꠦ ꠘꠣ, ꠄꠞꠟꠣꠉꠤ ꠀꠝꠤ ꠅꠈꠘ ꠎꠣꠁꠔꠣꠝ ꠘꠣꠄ।”
JOH 7:9 ꠅꠈꠣꠘ ꠇꠁꠀ ꠔꠣꠁꠘ ꠉꠣꠟꠤꠟ ꠎꠤꠟꠣꠔ ꠞꠁꠉꠦꠟꠣ।
JOH 7:10 ꠔꠣꠘ ꠜꠣꠁꠀꠁꠘ ꠁꠖꠞ ꠝꠣꠢꠚꠤꠟꠅ ꠉꠤꠀ ꠢꠣꠞꠟꠦ ꠔꠣꠁꠘꠅ ꠉꠦꠟꠣ, ꠅꠁꠟꠦ ꠈꠥꠟꠣ-ꠝꠦꠟꠣ ꠘꠣ ꠉꠤꠀ ꠟꠥꠇꠣꠁꠀ ꠉꠦꠟꠣ।
JOH 7:11 ꠁꠖꠞ ꠇꠣꠟꠅ ꠁꠢꠥꠖꠤ ꠘꠦꠔꠣ ꠅꠇꠟꠦ ꠔꠣꠘ ꠔꠣꠟ꠆ꠟꠣꠡ ꠇꠞꠣꠔ ꠞꠁꠟꠣ, ꠀꠞ ꠇꠁꠟꠣ, “ꠢꠃ ꠝꠣꠘꠥꠡꠐꠣ ꠇꠥꠀꠁ।”
JOH 7:12 ꠜꠤꠠꠞ ꠝꠣꠎꠦ ꠁꠍꠣꠞ ꠛꠦꠙꠣꠞꠦ ꠝꠣꠘꠡꠦ ꠝꠣꠔꠣ-ꠝꠣꠔꠤ ꠇꠞꠟꠣ। ꠇꠦꠃ ꠇꠦꠃ ꠇꠁꠟ, “ꠄꠁꠘ ꠔ ꠛꠠ ꠜꠣꠟꠣ ꠝꠣꠘꠥꠡ।” ꠀꠞ ꠇꠦꠃ ꠇꠦꠃ ꠇꠁꠟ, “ꠘꠣ, ꠘꠣ, ꠢꠦ ꠔ ꠝꠣꠘꠡꠞꠦ ꠛꠦ-ꠙꠕꠤ ꠛꠣꠘꠣꠁꠟꠣꠞ।”
JOH 7:13 ꠅꠁꠟꠦ ꠁꠢꠥꠖꠤ ꠘꠦꠔꠣ ꠅꠇꠟꠞꠦ ꠒꠞꠣꠁꠀ, ꠝꠥꠈ ꠈꠥꠟꠤꠀ ꠔꠣꠘ ꠛꠦꠙꠣꠞꠦ ꠇꠦꠃ ꠇꠥꠘ꠆ꠔꠣ ꠝꠣꠔꠤꠟ ꠘꠣ।
JOH 7:14 ꠅꠃ ꠁꠖꠞ ꠝꠣꠎꠣꠝꠣꠎꠤ ꠡꠝꠄ ꠢꠎꠞꠔ ꠁꠍꠣ ꠛꠣꠄꠔꠥꠟ-ꠝꠥꠇꠣꠖ꠆ꠖꠍ ꠇꠣꠛꠣ ꠡꠞꠤꠚꠅ ꠉꠤꠀ ꠔꠣꠟꠤꠝ ꠖꠤꠟꠣ।
JOH 7:15 ꠔꠣꠘ ꠔꠣꠟꠤꠝ ꠢꠥꠘꠤꠀ ꠔꠣꠁꠎ꠆ꠎꠥꠛ ꠅꠁꠀ ꠁꠢꠥꠖꠤ ꠘꠦꠔꠣ ꠅꠇꠟꠦ ꠇꠁꠟꠣ, “ꠁ ꠝꠣꠘꠡꠦ ꠝꠣꠖ꠆ꠞꠣꠡꠣꠔ ꠘꠣ ꠙꠠꠤꠀ ꠅꠔ ꠁꠟꠤꠝ ꠙꠣꠁꠟ ꠇꠤꠟꠣ?”
JOH 7:16 ꠁꠍꠣꠄ ꠎꠥꠀꠙ ꠖꠤꠟꠣ, “ꠀꠝꠤ ꠎꠦ ꠔꠣꠟꠤꠝ ꠖꠦꠁ, ꠁꠔꠣ ꠀꠝꠣꠞ ꠘꠤꠎꠞ ꠘꠣꠄ, ꠎꠦꠁꠘ ꠀꠝꠣꠞꠦ ꠛꠦꠎꠤꠍꠂꠘ, ꠁꠔꠣ ꠔ ꠔꠣꠘꠃ ꠔꠣꠟꠤꠝ।
JOH 7:17 ꠇꠦꠃ ꠎꠥꠖꠤ ꠔꠣꠘ ꠝꠞ꠆ꠎꠤ ꠎꠥꠉꠣꠁꠀ ꠌꠟꠔ ꠌꠣꠄ, ꠔꠦ ꠢꠦ ꠛꠥꠎꠛ, ꠁ ꠔꠣꠟꠤꠝ ꠀꠟ꠆ꠟꠣꠞ ꠉꠦꠍ ꠕꠣꠇꠤ ꠀꠁꠍꠦ, ꠘꠣ ꠀꠝꠣꠞ ꠝꠥꠈ ꠕꠣꠇꠤ ꠖꠤꠞꠣꠝ।
JOH 7:18 ꠎꠦ ꠎꠘꠦ ꠘꠤꠎꠞ ꠝꠘ ꠕꠣꠇꠤ ꠝꠣꠔꠦ, ꠢꠦ ꠈꠣꠟꠤ ꠘꠤꠎꠞ ꠔꠣꠞꠤꠚ ꠙꠣꠁꠔ ꠌꠣꠄ। ꠅꠁꠟꠦ ꠎꠦ ꠎꠘꠦ ꠔꠣꠞ ꠙꠣꠑꠣꠘꠦꠀꠟꠣ ꠝꠣꠟꠤꠇꠞ ꠔꠣꠞꠤꠚ ꠇꠞꠣꠞ ꠌꠦꠡ꠆ꠐꠣ ꠇꠞꠦ, ꠢꠦ ꠢꠣꠝꠦꠡꠣ ꠢꠇ-ꠢꠣꠟꠣꠟ ꠕꠣꠇꠦ, ꠔꠣꠞ ꠝꠘꠅ ꠇꠥꠘꠥ ꠗꠥꠇꠣꠛꠣꠎꠤ ꠘꠣꠁ।
JOH 7:19 “ꠔꠥꠝꠞꠣ ꠇꠥꠘꠥ ꠝꠥꠍꠣ ꠘꠛꠤꠞ ꠡꠞꠤꠅꠔ ꠙꠣꠁꠍ ꠘꠣ ꠘꠤ? ꠅꠁꠟꠦ ꠔꠥꠝꠞꠣ ꠄꠇꠎꠘꠦꠅ ꠔ ꠡꠞꠤꠅꠔꠞ ꠢꠥꠇꠥꠝ-ꠀꠢꠇꠣꠝ ꠝꠣꠘꠞꠣꠄ ꠘꠣ। ꠔꠦ ꠔꠥꠝꠞꠣ ꠇꠦꠘꠦ ꠀꠝꠣꠞꠦ ꠝꠣꠞꠤꠟꠤꠔꠣꠄ ꠌꠣꠁꠞꠣꠄ?”
JOH 7:20 ꠔꠦꠃ ꠔꠣꠞꠣ ꠇꠁꠟꠣ, “ꠔꠥꠝꠣꠞꠦ ꠜꠥꠔꠦ ꠙꠣꠁꠍꠦ, ꠔꠥꠝꠣꠞꠦ ꠇꠦ ꠝꠣꠞꠔ ꠌꠣꠞ?”
JOH 7:21 ꠁꠍꠣꠄ ꠔꠣꠞꠣꠞꠦ ꠇꠁꠟꠣ, “ꠀꠝꠤ ꠈꠣꠟꠤ ꠄꠇꠈꠣꠘ ꠇꠣꠝ ꠇꠞꠟꠣꠝ, ꠀꠞ ꠔꠥꠝꠞꠣ ꠔꠣꠁꠎ꠆ꠎꠥꠛ ꠅꠁꠉꠦꠟꠣꠄ।
JOH 7:22 ꠢꠎꠞꠔ ꠝꠥꠍꠣꠄ ꠔ ꠔꠥꠝꠞꠣꠞꠦ ꠝꠍꠟꠝꠣꠘꠤ ꠇꠣꠝ ꠇꠞꠣꠘꠤꠞ ꠘꠤꠅꠝ ꠖꠤꠍꠟꠣ, ꠀꠞ ꠎꠥꠝ꠆ꠝꠣꠛꠣꠞꠦꠅ ꠔꠥꠝꠞꠣ ꠅꠃ ꠇꠣꠝ ꠇꠞꠣꠅ। ꠀꠍꠟꠦ, ꠁ ꠘꠤꠅꠝ ꠝꠥꠍꠣ ꠘꠛꠤꠞ ꠉꠦꠍ ꠕꠣꠇꠤ ꠀꠁꠍꠦ ꠘꠣ, ꠛꠞꠋ ꠀꠉꠞ ꠝꠄ-ꠝꠥꠞꠛ꠆ꠛꠤꠞ ꠉꠦꠍ ꠕꠣꠇꠤꠃ ꠀꠁꠍꠦ।
JOH 7:23 ꠑꠤꠇ ꠀꠍꠦ, ꠝꠥꠍꠣ ꠘꠛꠤꠞ ꠘꠤꠅꠝ ꠌꠣꠟꠥ ꠞꠣꠈꠣꠞ ꠟꠣꠉꠤ ꠎꠥꠝ꠆ꠝꠣꠛꠣꠞꠦꠅ ꠎꠥꠖꠤ ꠝꠍꠟꠝꠣꠘꠤ ꠇꠣꠝ ꠇꠞꠣꠁꠟ ꠎꠣꠄ, ꠔꠦ ꠀꠝꠤ ꠎꠥꠝ꠆ꠝꠣꠛꠣꠞꠦ ꠄꠇꠎꠘ ꠛꠦꠝꠣꠞꠤꠞꠦ ꠜꠣꠟꠣ ꠇꠞꠍꠤ ꠖꠦꠈꠤꠀ ꠀꠝꠣꠞ ꠃꠙꠞꠦ ꠉꠥꠍꠣ ꠇꠞꠞꠣꠄ ꠇꠦꠘꠦ?
JOH 7:24 ꠢꠇ-ꠁꠘꠍꠣꠚ ꠇꠞꠅ, ꠈꠣꠟꠤ ꠛꠣꠞꠉꠣꠟꠣ ꠖꠦꠈꠤꠀ ꠛꠤꠌꠣꠞ ꠇꠞꠤꠅ ꠘꠣ।”
JOH 7:25 ꠅꠃ ꠡꠝꠄ ꠎꠦꠞꠥꠎꠣꠟꠦꠝ ꠐꠣꠃꠘꠞ ꠇꠤꠍꠥ ꠝꠣꠘꠡꠦ ꠇꠁꠟ, “ꠘꠦꠔꠣ ꠅꠇꠟꠦ ꠎꠣꠞꠦ ꠝꠣꠞꠤꠟꠔꠣ ꠌꠣꠁꠞꠣ, ꠅꠉꠥ ꠇꠤꠔꠣ ꠢꠃ ꠝꠣꠘꠥꠡ ꠘꠣꠄ ꠘꠤ?
JOH 7:26 ꠔꠦ ꠢꠦ ꠔ ꠖꠦꠈꠤ ꠈꠥꠟꠣ-ꠝꠦꠟꠣ ꠝꠣꠔꠦꠞ, ꠔꠣ-ꠅ ꠔꠣꠞꠣ ꠖꠦꠈꠤ ꠇꠥꠘ꠆ꠔꠣ ꠇꠁꠞꠣ ꠘꠣ। ꠔꠣꠁꠟꠦ ꠔꠣꠞꠣ ꠇꠤꠔꠣ ꠢꠣꠍꠣ ꠇꠕꠣ ꠛꠥꠎꠤꠟꠤꠍꠂꠘ ꠘꠤ, ꠅꠃ ꠝꠣꠘꠥꠡꠃ ꠀꠟ-ꠝꠍꠤ?
JOH 7:27 ꠀꠞ ꠀꠝꠞꠣ ꠔ ꠎꠣꠘꠤ, ꠅꠉꠥ ꠇꠥꠀꠁ ꠕꠣꠇꠤ ꠀꠁꠍꠦ। ꠅꠁꠟꠦ ꠀꠟ-ꠝꠍꠤ ꠎꠦꠛꠟꠣ ꠀꠁꠛꠣ, ꠅꠃ ꠡꠝꠄ ꠇꠦꠃ ꠎꠣꠘꠔ ꠘꠣꠄ, ꠔꠣꠁꠘ ꠇꠥꠀꠁ ꠕꠣꠇꠤ ꠀꠁꠍꠂꠘ।”
JOH 7:28 ꠄꠞꠛꠣꠖꠦ ꠁꠍꠣꠄ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠅ ꠔꠣꠟꠤꠝ ꠖꠦꠅꠀꠞ ꠡꠝꠄ ꠎꠥꠞꠦ ꠎꠥꠞꠦ ꠛꠄꠀꠘ ꠇꠞꠟꠣ, “ꠀꠙꠘꠣꠞꠣ ꠀꠝꠣꠞꠦꠅ ꠌꠤꠘꠂꠘ, ꠀꠞ ꠀꠝꠤ ꠇꠥꠀꠁ ꠕꠣꠇꠤ ꠀꠁꠍꠤ ꠁꠈꠣꠘꠅ ꠎꠣꠘꠂꠘ। ꠢꠥꠘꠃꠇ꠆ꠇꠣ, ꠀꠝꠤ ꠘꠤꠎ ꠕꠣꠇꠤ ꠀꠁꠍꠤ ꠘꠣ, ꠢꠇ ꠀꠟ꠆ꠟꠣ ꠙꠣꠇꠦꠃ ꠀꠝꠣꠞꠦ ꠙꠣꠑꠣꠁꠍꠂꠘ।
JOH 7:29 ꠀꠙꠘꠣꠞꠣ ꠔꠣꠘꠞꠦ ꠌꠤꠘꠂꠘ ꠘꠣ, ꠅꠁꠟꠦ ꠀꠝꠤ ꠌꠤꠘꠤ। ꠇꠣꠞꠘ ꠀꠝꠤ ꠔꠣꠘ ꠉꠦꠍ ꠕꠣꠇꠤꠃ ꠀꠁꠍꠤ ꠀꠞ ꠔꠣꠁꠘꠃ ꠀꠝꠣꠞꠦ ꠙꠣꠑꠣꠁꠍꠂꠘ।”
JOH 7:30 ꠁꠈꠣꠘ ꠢꠥꠘꠤꠀ ꠝꠣꠘꠡꠦ ꠁꠍꠣꠞꠦ ꠗꠞꠤꠟꠤꠔ ꠌꠣꠁꠟ, ꠅꠁꠟꠦ ꠔꠣꠘ ꠡꠝꠄ ꠙꠥꠞꠣ ꠅꠁꠍꠦ ꠘꠣ ꠉꠔꠤꠇꠦ ꠇꠦꠃ ꠔꠣꠘ ꠉꠔꠞꠅ ꠀꠔ ꠔꠥꠟꠟ ꠘꠣ।
JOH 7:31 ꠀꠞ ꠄꠞꠣꠞ ꠝꠣꠎꠞ ꠛꠃꠔꠦ ꠔꠣꠘ ꠃꠙꠞꠦ ꠁꠝꠣꠘ ꠀꠘꠤꠀ ꠇꠁꠟ, “ꠄꠁꠘ ꠔ ꠛꠃꠔ ꠇꠦꠞꠣꠝꠔꠤ ꠖꠦꠈꠣꠁꠍꠂꠘ, ꠀꠟ-ꠝꠍꠤ ꠀꠁꠀ ꠇꠥꠘꠥ ꠄꠞ ꠌꠣꠁꠔꠦ ꠛꠦꠡꠤ ꠇꠦꠞꠣꠝꠔꠤ ꠖꠦꠈꠣꠁꠛꠣ ꠘꠤ?”
JOH 7:32 ꠁꠔꠣ ꠟꠁꠀ ꠝꠣꠘꠡꠦ ꠇꠣꠘꠣ-ꠇꠣꠘꠤ ꠇꠞꠞꠣ, ꠁꠈꠣꠘ ꠚꠞꠤꠡꠤ ꠅꠇꠟꠦ ꠢꠥꠘꠟꠣ। ꠢꠥꠘꠤꠀ ꠛꠠ ꠁꠝꠣꠝ ꠀꠞ ꠚꠞꠤꠡꠤ ꠅꠇꠟꠦ ꠁꠍꠣꠞꠦ ꠗꠞꠣꠞ ꠟꠣꠉꠤ ꠇꠄꠎꠘ ꠙꠣꠞꠣꠖꠣꠞ-ꠍꠤꠙꠣꠁ ꠙꠣꠑꠣꠁꠟꠣ।
JOH 7:33 ꠁꠍꠣꠄ ꠇꠁꠟꠣ, “ꠢꠥꠘꠅ, ꠀꠝꠤ ꠀꠞ ꠛꠦꠡꠤ ꠖꠤꠘ ꠔꠥꠝꠞꠣꠞ ꠝꠣꠎꠦ ꠘꠣꠄ। ꠀꠝꠤ ꠔ ꠔꠣꠘ ꠉꠦꠍꠦ ꠎꠣꠁꠝꠥꠉꠤ, ꠎꠦꠁꠘ ꠀꠝꠣꠞꠦ ꠙꠣꠑꠣꠁꠍꠂꠘ।
JOH 7:34 ꠔꠥꠝꠞꠣ ꠀꠝꠣꠞꠦ ꠔꠥꠇꠣꠁꠀ ꠙꠣꠁꠔꠣꠄ ꠘꠣꠄ, ꠀꠞ ꠀꠝꠤ ꠎꠦ ꠎꠣꠉꠣꠔ ꠞꠁꠝꠥ, ꠔꠥꠝꠞꠣ ꠇꠦꠃ ꠢꠤꠘꠅ ꠀꠁꠔꠣꠄꠅ ꠙꠣꠞꠔꠣꠄ ꠘꠣꠄ।”
JOH 7:35 ꠢꠎꠞꠔ ꠁꠍꠣꠞ ꠁꠔꠣ ꠝꠣꠔ ꠢꠥꠘꠤꠀ ꠁꠢꠥꠖꠤ ꠘꠦꠔꠣ ꠅꠇꠟꠦ ꠄꠇꠦ-ꠅꠁꠘ꠆ꠘꠦ ꠎꠤꠇꠣꠁꠟꠣ, “ꠢꠦ ꠇꠥꠀꠁ ꠎꠣꠁꠛꠉꠤ, ꠎꠦꠈꠣꠘꠅ ꠀꠝꠞꠣ ꠔꠣꠞꠦ ꠔꠥꠇꠣꠁꠀ ꠙꠣꠁꠔꠣꠝ ꠘꠣꠄ? ꠢꠦ ꠇꠤꠔꠣ ꠁꠃꠘꠣꠘꠤ ꠅꠇꠟꠞ ꠖꠦꠡꠅ ꠎꠦꠔꠣ ꠁꠢꠥꠖꠤ ꠀꠍꠂꠘ, ꠢꠘꠅ ꠞꠁꠀ ꠁꠃꠘꠣꠘꠤ ꠅꠔꠣꠞꠦꠅ ꠔꠣꠟꠤꠝ ꠖꠤꠛ ꠘꠤ?
JOH 7:36 ꠢꠦ ꠔ ꠇꠁꠟ, ꠔꠥꠝꠞꠣ ꠀꠝꠣꠞꠦ ꠔꠥꠇꠣꠁꠀ ꠙꠣꠁꠔꠣꠄ ꠘꠣꠄ, ꠀꠞ ꠀꠝꠤ ꠎꠦꠈꠣꠘꠅ ꠎꠣꠁꠝꠥ, ꠔꠥꠝꠞꠣ ꠢꠤꠘꠅ ꠀꠁꠔꠣꠄ ꠙꠣꠞꠔꠣꠄ ꠘꠣꠄ। ꠔꠣꠞ ꠁ ꠝꠣꠔꠞ ꠝꠣꠘꠤ ꠇꠤꠔꠣ?”
JOH 7:37 ꠁꠖꠞ ꠀꠈꠦꠞꠤ ꠖꠤꠘ ꠢꠎꠞꠔ ꠁꠍꠣ ꠃꠛꠣꠁꠀ ꠎꠥꠞꠦ ꠎꠥꠞꠦ ꠛꠄꠀꠘ ꠇꠞꠟꠣ, “ꠇꠥꠘꠥ ꠝꠣꠘꠡꠞ ꠙꠤꠀꠍꠦ ꠗꠞꠟꠦ, ꠢꠦ ꠀꠝꠣꠞ ꠉꠦꠍꠦ ꠀꠁꠀ ꠙꠣꠘꠤ ꠈꠣꠃꠇ।
JOH 7:38 ꠎꠦ ꠎꠘꠦ ꠀꠝꠣꠞ ꠃꠙꠞꠦ ꠁꠝꠣꠘ ꠀꠘꠦ, ꠙꠣꠇ ꠇꠤꠔꠣꠛꠞ ꠀꠄꠀꠔ ꠝꠣꠚꠤꠇ ꠔꠣꠞ ꠖꠤꠟ ꠕꠣꠇꠤ ꠎꠤꠘ꠆ꠖꠣ ꠙꠣꠘꠤꠞ ꠉꠣꠋ ꠛꠣꠞ ꠅꠁꠛ।”
JOH 7:39 ꠁꠍꠣꠞ ꠃꠙꠞꠦ ꠁꠝꠣꠘ ꠀꠘꠤꠀ ꠎꠦꠞꠣ ꠙꠣꠇ ꠞꠥꠢꠥꠞꠦ ꠙꠣꠁꠛꠣ, ꠢꠃ ꠙꠣꠇ ꠞꠥꠢꠥꠞ ꠛꠦꠙꠣꠞꠦ ꠔꠣꠁꠘ ꠅꠃ ꠇꠕꠣ ꠇꠁꠟꠣ। ꠔꠣꠞꠣꠞ ꠉꠦꠍꠦ ꠙꠣꠇ ꠞꠥꠢꠥꠞꠦ ꠅꠈꠘꠅ ꠖꠦꠅꠀ ꠅꠁꠍꠦ ꠘꠣ, ꠇꠣꠞꠘ ꠁꠍꠣꠄ ꠔꠣꠘ ꠝꠢꠤꠝꠣ ꠅꠈꠘꠅ ꠢꠣꠍꠤꠟ ꠇꠞꠍꠂꠘ ꠘꠣ।
JOH 7:40 ꠁꠔꠣ ꠢꠥꠘꠤꠀ ꠇꠤꠍꠥ ꠝꠣꠘꠡꠦ ꠇꠁꠟ, “ꠀꠍꠟꠦ ꠄꠁꠘꠃ ꠢꠃ ꠅꠀꠖꠣ ꠇꠞꠣ ꠘꠛꠤ।”
JOH 7:41 ꠀꠞ ꠇꠄꠎꠘꠦ ꠇꠁꠟ, “ꠄꠁꠘꠃ ꠀꠟ-ꠝꠍꠤ।” ꠅꠁꠟꠦ ꠇꠦꠃ ꠇꠦꠃ ꠇꠁꠟ, “ꠀꠟ-ꠝꠍꠤ ꠇꠥꠘꠥ ꠉꠣꠟꠤꠟ ꠎꠤꠟꠣ ꠕꠣꠇꠤ ꠀꠁꠛꠣ ꠘꠤ?
JOH 7:42 ꠙꠣꠇ ꠇꠤꠔꠣꠛꠦ ꠔ ꠛꠣꠔꠣꠄ, ꠀꠟ-ꠝꠍꠤꠄ ꠎꠘꠝ ꠟꠁꠛꠣ ꠖꠣꠃꠖ ꠘꠛꠤꠞ ꠛꠋꠡꠔ, ꠖꠣꠃꠖ ꠘꠛꠤꠞ ꠛꠦꠕꠦꠟꠢꠣꠝ ꠉꠣꠃꠔ।”
JOH 7:43 ꠅꠃ ꠟꠣꠈꠣꠘ ꠁꠍꠣꠞꠦ ꠟꠁꠀ ꠝꠣꠘꠡꠞ ꠝꠣꠎꠦ ꠖꠟꠣꠖꠟꠤ ꠟꠣꠉꠤꠉꠦꠟ।
JOH 7:44 ꠄꠞꠝꠣꠎꠦ ꠇꠄꠎꠘꠦ ꠔꠣꠘꠞꠦ ꠗꠞꠤꠟꠤꠔ ꠌꠣꠁꠟ, ꠅꠁꠟꠦ ꠇꠦꠃ ꠔꠣꠘ ꠉꠔꠞꠅ ꠀꠔ ꠔꠥꠟꠟ ꠘꠣ।
JOH 7:45 ꠁꠍꠣꠞꠦ ꠗꠞꠣꠞ ꠟꠣꠉꠤ ꠎꠦ ꠙꠣꠞꠣꠖꠣꠞ-ꠍꠤꠙꠣꠁ ꠅꠇꠟꠞꠦ ꠙꠣꠑꠣꠘꠤ ꠅꠁꠍꠤꠟ, ꠔꠣꠞꠣ ꠚꠤꠞꠔ ꠀꠁꠟꠦ ꠛꠠ ꠁꠝꠣꠝ ꠀꠞ ꠚꠞꠤꠡꠤ ꠅꠇꠟꠦ ꠎꠤꠇꠣꠁꠟꠣ, “ꠔꠣꠞꠦ ꠗꠞꠤꠀ ꠀꠘꠟꠣꠄ ꠘꠣ ꠇꠦꠘꠦ?”
JOH 7:46 ꠄꠞꠣ ꠇꠁꠟꠣ, “ꠁ ꠝꠣꠘꠡꠦ ꠎꠦꠟꠣ ꠝꠣꠔ ꠝꠣꠔꠦ, ꠁꠟꠣ ꠝꠣꠔ ꠇꠦꠃ ꠇꠥꠘꠥꠖꠤꠘ ꠝꠣꠔꠤꠍꠦ ꠘꠣ।”
JOH 7:47 ꠔꠦꠃ ꠚꠞꠤꠡꠤ ꠅꠇꠟꠦ ꠍꠤꠙꠣꠁ ꠅꠇꠟꠞꠦ ꠇꠁꠟꠣ, “ꠢꠦ ꠔꠥꠝꠞꠣꠞꠦꠅ ꠐꠉꠤꠟꠤꠟ ꠘꠤ?
JOH 7:48 ꠖꠦꠈꠍ ꠘꠤ, ꠘꠦꠔꠣ ꠛꠣ ꠚꠞꠤꠡꠤ ꠡꠝꠣꠎꠞ ꠇꠦꠃ ꠔꠣꠞ ꠃꠙꠞꠦ ꠁꠝꠣꠘ ꠀꠘꠍꠦ ꠘꠤ?
JOH 7:49 ꠈꠣꠟꠤ ꠅꠃ ꠎꠦꠔꠣꠄ ꠡꠞꠤꠅꠔꠞ ꠇꠥꠘ꠆ꠔꠣꠃ ꠎꠣꠘꠂꠘ ꠘꠣ, ꠅꠔꠣꠃ ꠔ। ꠁꠔꠣꠞ ꠃꠙꠞꠦ ꠟꠣꠘ꠆ꠘꠔ ꠀꠍꠦ।”
JOH 7:50 ꠚꠞꠤꠡꠤ ꠅꠇꠟꠞ ꠝꠣꠎꠦ ꠄꠇꠎꠘꠞ ꠘꠣꠝ ꠀꠍꠤꠟ ꠝꠃꠟꠣꠘꠣ ꠘꠤꠇꠖꠤꠝ, ꠄꠁꠘ ꠀꠉꠦ ꠁꠍꠣꠞ ꠉꠦꠍꠦ ꠉꠦꠍꠟꠣ।
JOH 7:51 ꠘꠤꠇꠖꠤꠝꠦ ꠇꠁꠟꠣ, “ꠇꠦꠃꠞꠞ ꠝꠥꠈꠞ ꠇꠕꠣ ꠘꠣ ꠢꠥꠘꠤꠀ ꠛꠣ ꠔꠣꠞ ꠅꠙꠞꠣꠗ ꠘꠣ ꠎꠣꠘꠤꠀ, ꠔꠣꠞꠦ ꠡꠣꠎꠣ ꠖꠦꠅꠀꠞ ꠘꠤꠅꠝ ꠇꠥꠘꠥ ꠀꠝꠞꠣꠞ ꠡꠞꠤꠅꠔꠅ ꠀꠍꠦ ꠘꠤ?”
JOH 7:52 ꠁꠈꠣꠘ ꠢꠥꠘꠤꠀ ꠚꠞꠤꠡꠤ ꠅꠇꠟꠦ ꠘꠤꠇꠖꠤꠝꠞꠦ ꠇꠁꠟꠣ, “ꠔꠥꠝꠤꠅ ꠇꠤꠔꠣ ꠉꠣꠟꠤꠟ ꠎꠤꠟꠣꠞ ꠝꠣꠘꠥꠡ ꠘꠤ? ꠙꠣꠇ ꠇꠤꠔꠣꠛꠅ ꠌꠣꠁꠀ ꠖꠦꠈꠅ ꠘꠣ, ꠉꠣꠟꠤꠟꠅ ꠇꠥꠘꠥ ꠘꠛꠤꠞ ꠎꠘꠝ ꠅꠄ ꠘꠣ।”
JOH 8:1 ꠛꠣꠖꠦ ꠢꠇꠟ ꠝꠣꠘꠥꠡ ꠎꠣꠞꠎꠤꠞ ꠛꠣꠠꠤꠔ ꠉꠦꠟꠣꠉꠤ, ꠀꠞ ꠢꠎꠞꠔ ꠁꠍꠣ ꠄꠇꠟꠣ ꠎꠄꠔꠥꠘ ꠙꠣꠠꠅ ꠉꠤꠀ ꠃꠑꠟꠣ।
JOH 8:2 ꠛꠣꠖꠞ ꠖꠤꠘ ꠚꠎꠞ ꠅꠇ꠆ꠔꠅ ꠁꠍꠣ ꠢꠤꠞꠛꠣꠞ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠅ ꠉꠦꠟꠣ, ꠉꠤꠀ ꠢꠣꠞꠟꠦ ꠢꠇꠟ ꠝꠣꠘꠥꠡ ꠔꠣꠘ ꠉꠦꠍꠦ ꠀꠁꠟ। ꠔꠣꠁꠘ ꠅꠘꠅ ꠛꠁꠀ ꠔꠣꠞꠣꠞꠦ ꠔꠣꠟꠤꠝ ꠖꠤꠟꠣ।
JOH 8:3 ꠅꠃ ꠡꠝꠄ ꠝꠃꠟꠣꠘꠣ ꠀꠞ ꠚꠞꠤꠡꠤ ꠡꠝꠣꠎꠞ ꠝꠣꠘꠡꠦ ꠄꠇ ꠎꠤꠘꠣꠇꠥꠞ ꠛꠦꠐꠤꠞꠦ ꠟꠁꠀ ꠔꠣꠘ ꠉꠦꠍꠦ ꠀꠁꠟ। ꠀꠁꠀ ꠛꠦꠐꠤꠞꠦ ꠝꠎꠟꠤꠍꠞ ꠝꠣꠎꠈꠣꠘꠅ ꠃꠛꠣ ꠇꠞꠣꠁꠀ ꠇꠁꠟ,
JOH 8:4 “ꠢꠥꠎꠥꠞ, ꠅꠃ ꠛꠦꠐꠤ ꠅꠉꠥ ꠎꠤꠘꠣꠞ ꠇꠣꠝꠅ ꠗꠞꠣ ꠈꠣꠁꠍꠦ।
JOH 8:5 ꠔꠦ ꠔꠃꠞꠣꠔ ꠡꠞꠤꠚꠞ ꠝꠣꠎꠦ ꠔ ꠝꠥꠍꠣ ꠘꠛꠤꠄ ꠎꠤꠘꠣꠇꠥꠞ ꠛꠦꠐꠤꠘ꠆ꠔꠞꠦ ꠙꠣꠔ꠆ꠔꠞ ꠝꠣꠞꠤꠀ ꠝꠣꠞꠤꠟꠤꠛꠣꠞ ꠢꠥꠇꠥꠝ ꠖꠤꠍꠂꠘ। ꠅꠈꠘ ꠀꠙꠘꠦ ꠇꠤꠔꠣ ꠇꠂꠘ?”
JOH 8:6 ꠔꠣꠞꠣ ꠁꠍꠣꠞꠦ ꠙꠞꠤꠇ꠆ꠇꠣ ꠇꠞꠣꠞ ꠘꠤꠅꠔꠦꠃ ꠁꠟꠣ ꠇꠁꠟꠣ, ꠎꠣꠔꠦ ꠔꠣꠘꠞꠦ ꠖꠥꠡꠤ ꠛꠣꠘꠣꠘꠤꠞ ꠟꠣꠉꠤ ꠇꠥꠘꠥ ꠈꠥꠔ ꠙꠣꠁꠘ। ꠔꠦꠃ ꠁꠍꠣꠄꠅ ꠝꠣꠕꠣ ꠘꠤꠌꠣ ꠇꠞꠤ ꠀꠋꠉꠥꠟ ꠖꠤꠀ ꠝꠣꠐꠤꠔ ꠟꠦꠈꠣꠔ ꠟꠣꠉꠟꠣ।
JOH 8:7 ꠅꠁꠟꠦ ꠔꠣꠞꠣ ꠎꠦꠛꠟꠣ ꠛꠣꠞ ꠛꠣꠞ ꠔꠣꠘꠞꠦ ꠎꠤꠇꠣꠁꠞꠣ, ꠅꠃ ꠡꠝꠄ ꠔꠣꠁꠘ ꠝꠣꠕꠣ ꠔꠥꠟꠤꠀ ꠇꠁꠟꠣ, “ꠀꠙꠘꠣꠁꠘ꠆ꠔꠞ ꠝꠣꠎꠦ ꠎꠦ ꠎꠘꠦ ꠇꠥꠘꠥꠖꠤꠘ ꠉꠥꠘꠣ ꠇꠞꠍꠂꠘ ꠘꠣ, ꠄꠁꠘ ꠙꠄꠟꠣ ꠅꠃ ꠛꠦꠐꠤꠞꠦ ꠙꠣꠔ꠆ꠔꠞ ꠝꠣꠞꠃꠇ꠆ꠇꠣ।”
JOH 8:8 ꠅꠈꠣꠘ ꠇꠁꠀ ꠔꠣꠁꠘ ꠢꠤꠞꠛꠣꠞ ꠝꠣꠕꠣ ꠘꠤꠌꠣ ꠇꠞꠤ ꠝꠣꠐꠤꠔ ꠟꠦꠈꠣꠔ ꠟꠣꠉꠟꠣ।
JOH 8:9 ꠁꠈꠣꠘ ꠢꠥꠘꠤꠀ ꠘꠦꠔꠣ ꠅꠇꠟꠞ ꠝꠣꠎꠦ ꠛꠥꠠꠣ ꠕꠣꠇꠤ ꠡꠥꠞꠥ ꠇꠞꠤꠀ ꠄꠇꠦ ꠄꠇꠦ ꠢꠇꠟꠃ ꠉꠦꠟꠣꠉꠤ। ꠈꠣꠟꠤ ꠁꠍꠣ ꠀꠞ ꠢꠃ ꠛꠦꠐꠤ ꠍꠣꠠꠣ ꠖꠥꠍꠞꠣ ꠇꠦꠃ ꠞꠁꠟ ꠘꠣ।
JOH 8:10 ꠔꠦꠃ ꠁꠍꠣꠄ ꠝꠣꠕꠣ ꠔꠥꠟꠤꠀ ꠅꠃ ꠛꠦꠐꠤꠞꠦ ꠎꠤꠇꠣꠁꠟꠣ, “ꠇꠤꠔꠣ ꠉ ꠝꠣꠁ, ꠁꠔꠣ ꠝꠣꠘꠥꠡ ꠇꠥꠀꠁ? ꠇꠦꠃ ꠔꠥꠝꠣꠞꠦ ꠡꠣꠎꠣꠞ ꠎꠥꠇꠣ ꠝꠘꠅ ꠇꠞꠟ ꠘꠣ ꠘꠤ?”
JOH 8:11 ꠛꠦꠐꠤꠄ ꠇꠁꠟ, “ꠎꠤ ꠘꠣ ꠢꠥꠎꠥꠞ, ꠔꠣꠞꠣ ꠇꠦꠃ ꠔ ꠡꠣꠎꠣ ꠖꠤꠍꠂꠘ ꠘꠣ।” ꠅꠃ ꠡꠝꠄ ꠁꠍꠣꠄ ꠇꠁꠟꠣ, “ꠔꠦ ꠀꠝꠤꠅ ꠔꠥꠝꠣꠞꠦ ꠇꠥꠘꠥ ꠡꠣꠎꠣ ꠖꠤꠔꠣꠝ ꠘꠣꠄ। ꠅꠈꠘ ꠎꠣꠅꠉꠤ, ꠉꠥꠘꠣꠞ ꠙꠕꠦ ꠀꠞ ꠎꠤꠘ꠆ꠖꠦꠉꠤ ꠇꠣꠐꠣꠁꠅ ꠘꠣ।”
JOH 8:12 ꠛꠣꠖꠦ ꠢꠎꠞꠔ ꠁꠍꠣꠄ ꠝꠣꠘꠡꠞꠦ ꠇꠁꠟꠣ, “ꠀꠝꠤꠃ ꠖꠥꠘꠤꠀꠞ ꠘꠥꠞ। ꠎꠦ ꠎꠘ ꠀꠝꠣꠞ ꠙꠕꠦ ꠀꠄ, ꠢꠦ ꠇꠥꠘꠥ ꠡꠝꠄ ꠀꠘ꠆ꠖꠣꠞꠤꠔ ꠙꠣꠅ ꠚꠣꠟꠣꠁꠔ ꠘꠣꠄ, ꠛꠞꠋ ꠘꠥꠞꠞ ꠎꠤꠘ꠆ꠖꠦꠉꠤ ꠙꠣꠁꠛ।”
JOH 8:13 ꠁꠈꠣꠘ ꠢꠥꠘꠤꠀ ꠚꠞꠤꠡꠤ ꠅꠇꠟꠦ ꠇꠁꠟꠣ, “ꠔꠥꠝꠣꠞ ꠡꠣꠇ꠆ꠇꠤ ꠟꠅꠀ ꠎꠣꠁꠔ ꠘꠣꠄ, ꠔꠥꠝꠤ ꠔꠥꠝꠣꠞ ꠘꠤꠎꠞ ꠙꠇ꠆ꠇꠦ ꠡꠣꠇ꠆ꠇꠤ ꠖꠤꠞꠣꠄ।”
JOH 8:14 ꠔꠦꠃ ꠁꠍꠣꠄ ꠎꠥꠀꠙ ꠖꠤꠟꠣ, “ꠀꠝꠤ ꠀꠝꠣꠞ ꠘꠤꠎꠞ ꠙꠇ꠆ꠇꠦ ꠡꠣꠇ꠆ꠇꠤ ꠖꠤꠟꠦꠅ ꠀꠝꠣꠞ ꠡꠣꠇ꠆ꠇꠤ ꠔ ꠢꠣꠍꠣ। ꠇꠣꠞꠘ ꠀꠝꠤ ꠇꠥꠀꠁ ꠕꠣꠇꠤ ꠀꠁꠍꠤ ꠀꠞ ꠇꠥꠀꠁ ꠎꠣꠁꠞꠣꠝ, ꠁꠔꠣ ꠔ ꠔꠥꠝꠞꠣ ꠎꠣꠘ ꠘꠣ, ꠈꠣꠟꠤ ꠀꠝꠤꠃ ꠎꠣꠘꠤ।
JOH 8:15 ꠔꠥꠝꠞꠣ ꠔ ꠖꠥꠘꠤꠀꠛꠤ ꠝꠣꠘꠡꠞ ꠟꠣꠈꠣꠘ ꠛꠤꠌꠣꠞ ꠇꠞ, ꠅꠁꠟꠦ ꠀꠝꠤ ꠇꠦꠃꠞꠞ ꠛꠤꠌꠣꠞ ꠇꠞꠤ ꠘꠣ।
JOH 8:16 ꠀꠝꠤ ꠇꠦꠃꠞꠞ ꠛꠤꠌꠣꠞ ꠇꠞꠟꠦꠅ ꠢꠇ ꠛꠤꠌꠣꠞ ꠇꠞꠝꠥ, ꠇꠣꠞꠘ ꠀꠝꠤ ꠄꠇꠟꠣ ꠘꠣꠄ, ꠀꠝꠣꠞ ꠟꠉꠦ ꠀꠝꠣꠞ ꠉꠣꠁꠛꠤ ꠛꠣꠚꠅ ꠀꠍꠂꠘ, ꠅꠃ ꠛꠣꠚꠦ ꠀꠝꠣꠞꠦ ꠛꠦꠎꠤꠍꠂꠘ।
JOH 8:17 ꠔꠥꠝꠞꠣꠞ ꠡꠞꠤꠅꠔꠞ ꠝꠣꠎꠦ ꠟꠦꠈꠣ ꠀꠍꠦ, ꠖꠥꠁꠎꠘꠦ ꠎꠥꠖꠤ ꠄꠇ ꠢꠝꠣꠘ ꠡꠣꠇ꠆ꠇꠤ ꠖꠦꠄ, ꠔꠦ ꠁ ꠡꠣꠇ꠆ꠇꠤ ꠢꠣꠍꠣ।
JOH 8:18 ꠅꠟꠣꠈꠣꠘ ꠀꠝꠤꠅ ꠀꠝꠣꠞ ꠙꠇ꠆ꠇꠦ ꠡꠣꠇ꠆ꠇꠤ ꠖꠦꠁ, ꠀꠞ ꠎꠦ ꠛꠣꠚꠦ ꠀꠝꠣꠞꠦ ꠙꠣꠑꠣꠁꠍꠂꠘ, ꠔꠣꠁꠘꠅ ꠀꠝꠣꠞ ꠙꠇ꠆ꠇꠦ ꠡꠣꠇ꠆ꠇꠤ ꠖꠦꠁꠘ।”
JOH 8:19 ꠚꠞꠤꠡꠤ ꠅꠇꠟꠦ ꠔꠣꠘꠞꠦ ꠇꠁꠟꠣ, “ꠔꠥꠝꠣꠞ ꠛꠣꠚ ꠇꠥꠀꠁ?” ꠁꠍꠣꠄ ꠎꠥꠀꠙ ꠖꠤꠟꠣ, “ꠔꠥꠝꠞꠣ ꠀꠝꠣꠞꠦꠅ ꠌꠤꠘ ꠘꠣ, ꠀꠞ ꠀꠝꠣꠞ ꠛꠣꠚꠞꠦꠅ ꠌꠤꠘ ꠘꠣ। ꠀꠝꠣꠞꠦ ꠌꠤꠘꠟꠦ ꠀꠝꠣꠞ ꠛꠣꠚꠞꠦꠅ ꠌꠤꠘꠟꠣꠄ ꠅꠘꠦ।”
JOH 8:20 ꠙꠛꠤꠔ꠆ꠞ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠞ ꠖꠣꠘ-ꠛꠣꠇ꠆ꠡꠞ ꠉꠦꠍꠦ ꠃꠛꠣꠁꠀ ꠢꠎꠞꠔ ꠁꠍꠣꠄ ꠅꠃ ꠔꠣꠟꠤꠝ ꠖꠤꠟꠣ। ꠅꠁꠟꠦ ꠔꠣꠘ ꠡꠝꠄ ꠙꠥꠞꠣ ꠘꠣ ꠅꠀꠄ ꠇꠦꠃ ꠔꠣꠘꠞꠦ ꠗꠞꠟ ꠘꠣ।
JOH 8:21 ꠢꠎꠞꠔ ꠁꠍꠣꠄ ꠚꠞꠤꠡꠤ ꠅꠇꠟꠞꠦ ꠢꠤꠞꠛꠣꠞ ꠇꠁꠟꠣ, “ꠀꠝꠤ ꠔ ꠎꠣꠁꠀꠞꠉꠤ। ꠉꠤꠀ ꠢꠣꠞꠟꠦ ꠔꠥꠝꠞꠣ ꠀꠝꠣꠞꠦ ꠔꠥꠇꠣꠁꠛꠣꠄ, ꠅꠁꠟꠦ ꠀꠞ ꠙꠣꠁꠔꠣꠄ ꠘꠣꠄ, ꠀꠝꠤ ꠎꠦꠘꠅ ꠎꠣꠁꠞꠣꠝ, ꠔꠥꠝꠞꠣ ꠢꠤꠘꠅ ꠀꠁꠔꠣꠄꠅ ꠙꠣꠞꠔꠣꠄ ꠘꠣꠄ, ꠔꠥꠝꠞꠣ ꠘꠤꠎꠞ ꠉꠥꠘꠣꠞ ꠝꠣꠎꠦꠃ ꠝꠞꠛꠣꠄ।”
JOH 8:22 ꠁꠢꠥꠖꠤ ꠘꠦꠔꠣ ꠅꠇꠟꠦ ꠇꠁꠟꠣ, “ꠢꠦ ꠇꠦꠘꠦ ꠇꠁꠟ, ꠀꠝꠤ ꠎꠦꠘꠅ ꠎꠣꠁꠞꠣꠝ, ꠔꠥꠝꠞꠣ ꠢꠤꠘꠅ ꠀꠁꠔꠣꠄ ꠙꠣꠞꠔꠣꠄ ꠘꠣꠄ? ꠢꠦ ꠇꠤꠔꠣ ꠘꠤꠎꠦ ꠘꠤꠎꠦ ꠝꠞꠤꠎꠤꠔ ꠘꠤ?”
JOH 8:23 ꠁꠍꠣꠄ ꠇꠁꠟꠣ, “ꠀꠝꠤ ꠀꠁꠍꠤ ꠃꠙꠞꠦ ꠕꠣꠇꠤ, ꠀꠞ ꠔꠥꠝꠞꠣ ꠔꠟꠦ ꠕꠣꠇꠤ। ꠔꠥꠝꠞꠣ ꠁ ꠎꠉꠔꠞ, ꠅꠁꠟꠦ ꠀꠝꠤ ꠔ ꠁ ꠎꠉꠔꠞ ꠘꠣꠄ।
JOH 8:24 ꠄꠞꠟꠣꠉꠤ ꠀꠝꠤ ꠇꠁꠞꠣꠝ, ꠔꠥꠝꠞꠣ ꠘꠤꠎꠞ ꠉꠥꠘꠣꠞ ꠝꠣꠎꠦꠃ ꠝꠞꠛꠣꠄ। ꠔꠥꠝꠞꠣ ꠎꠥꠖꠤ ꠄꠇꠤꠘ ꠘꠣ ꠇꠞ, ꠀꠝꠤꠃ ꠢꠦꠁꠘ, ꠔꠦ ꠉꠥꠘꠣꠉꠣꠞ ꠢꠣꠟꠔꠦꠃ ꠝꠞꠛꠣꠄ।”
JOH 8:25 ꠁꠈꠣꠘ ꠢꠥꠘꠤꠀ ꠘꠦꠔꠣ ꠅꠇꠟꠦ ꠔꠣꠘꠞꠦ ꠇꠁꠟꠣ, “ꠔꠥꠝꠤ ꠇꠦ?” ꠔꠣꠁꠘ ꠎꠥꠀꠙ ꠖꠤꠟꠣ, “ꠙꠄꠟꠣ ꠕꠣꠇꠤ ꠀꠝꠤ ꠎꠦꠟꠣ ꠇꠁꠞꠣꠝ, ꠀꠝꠤꠃ ꠢꠦꠁꠘ।
JOH 8:26 ꠔꠥꠝꠞꠣꠞ ꠛꠦꠙꠣꠞꠦ ꠝꠣꠔꠣꠞ ꠀꠞ ꠛꠤꠌꠣꠞ ꠇꠞꠣꠞ ꠛꠃꠔꠔꠣ ꠀꠍꠦ। ꠢꠥꠘꠅ, ꠎꠦꠁꠘ ꠀꠝꠣꠞꠦ ꠙꠣꠑꠣꠁꠍꠂꠘ ꠔꠣꠘ ꠝꠣꠎꠦ ꠔ ꠝꠤꠍꠣ ꠇꠥꠘ꠆ꠔꠣ ꠘꠣꠁ। ꠀꠝꠤ ꠔꠣꠘ ꠉꠦꠍ ꠕꠣꠇꠤ ꠎꠦꠔꠣ ꠢꠥꠘꠤ, ꠅꠔꠣꠃ ꠁ ꠖꠥꠘꠤꠀꠞꠦ ꠎꠣꠘꠣꠁ।”
JOH 8:27 ꠁꠍꠣꠄ ꠎꠦꠘ ꠔꠣꠘ ꠉꠣꠁꠛꠤ ꠛꠣꠚꠞ ꠇꠕꠣ ꠇꠁꠞꠣ, ꠔꠣꠞꠣ ꠁꠔꠣ ꠛꠥꠎꠟꠣ ꠘꠣ।
JOH 8:28 ꠄꠞꠖꠣꠄ ꠁꠍꠣꠄ ꠇꠁꠟꠣ, “ꠔꠥꠝꠞꠣ ꠎꠦꠛꠟꠣ ꠀꠝꠤ ꠛꠤꠘ-ꠀꠖꠝꠞꠦ ꠃꠙꠞꠦ ꠔꠥꠟꠛꠣꠄ, ꠅꠃ ꠡꠝꠄ ꠛꠥꠎꠛꠣꠄ ꠀꠝꠤꠃ ꠢꠦꠁꠘ। ꠀꠞ ꠄꠅꠈꠣꠘ ꠛꠥꠎꠛꠣꠄ, ꠀꠝꠤ ꠘꠤꠎꠦ ꠘꠤꠎꠦ ꠇꠥꠘ꠆ꠔꠣ ꠇꠞꠤ ꠘꠣ, ꠀꠝꠣꠞ ꠉꠣꠁꠛꠤ ꠛꠣꠚꠦ ꠀꠝꠣꠞꠦ ꠎꠦ ꠔꠣꠟꠤꠝ ꠖꠤꠍꠂꠘ, ꠅꠃ ꠔꠣꠟꠤꠝꠃ ꠀꠝꠤ ꠛꠣꠔꠣꠁ।
JOH 8:29 ꠎꠦꠁꠘ ꠀꠝꠣꠞꠦ ꠙꠣꠑꠣꠁꠍꠂꠘ, ꠔꠣꠁꠘ ꠘꠤꠎꠦ ꠀꠝꠣꠞ ꠟꠉꠦ ꠀꠍꠂꠘ। ꠔꠣꠁꠘ ꠀꠝꠣꠞ ꠟꠉ ꠍꠣꠠꠍꠂꠘ ꠘꠣ, ꠀꠝꠤ ꠔ ꠢꠣꠝꠦꠡꠣ ꠅꠃ ꠇꠣꠝꠃ ꠇꠞꠤ, ꠎꠦ ꠇꠣꠝ ꠇꠞꠟꠦ ꠔꠣꠁꠘ ꠈꠥꠡꠤ ꠅꠁꠘ।”
JOH 8:30 ꠁꠍꠣꠞ ꠁ ꠛꠄꠀꠘ ꠢꠥꠘꠤꠀ ꠛꠃꠔ ꠝꠣꠘꠡꠦ ꠔꠣꠘ ꠃꠙꠞꠦ ꠁꠝꠣꠘ ꠀꠘꠟꠣ।
JOH 8:31 ꠄꠞꠣꠞ ꠝꠣꠎꠦ ꠎꠦꠔꠣ ꠁꠢꠥꠖꠤ ꠅꠇꠟꠦ ꠔꠣꠘ ꠃꠙꠞꠦ ꠁꠝꠣꠘ ꠀꠘꠍꠤꠟꠣ, ꠔꠣꠁꠘ ꠄꠞꠣꠞꠦ ꠇꠁꠟꠣ, “ꠔꠥꠝꠞꠣ ꠎꠥꠖꠤ ꠀꠝꠣꠞ ꠇꠕꠣꠝꠔ ꠌꠟ, ꠔꠦ ꠔꠥꠝꠞꠣ ꠀꠝꠣꠞ ꠢꠣꠍꠣꠞꠞ ꠃꠝ꠆ꠝꠔ।
JOH 8:32 ꠔꠥꠝꠞꠣ ꠢꠇ ꠌꠤꠘꠛꠣꠄ ꠀꠞ ꠅꠃ ꠢꠇꠦꠃ ꠔꠥꠝꠞꠣꠞꠦ ꠀꠎꠣꠖ ꠇꠞꠛꠣ।”
JOH 8:33 ꠁꠈꠣꠘ ꠢꠥꠘꠤꠀ ꠔꠣꠞꠣ ꠇꠁꠟꠣ, “ꠀꠝꠞꠣ ꠔ ꠢꠎꠞꠔ ꠁꠛ꠆ꠞꠣꠢꠤꠝꠞ ꠛꠋꠡꠞ ꠝꠣꠘꠥꠡ, ꠀꠝꠞꠣ ꠇꠥꠘꠥ ꠡꠝꠄꠅ ꠇꠦꠃꠞꠞ ꠉꠥꠟꠣꠝ ꠀꠍꠟꠣꠝ ꠘꠣ। ꠔꠦ ꠔꠥꠝꠤ ꠇꠤꠟꠣ ꠇꠁꠞꠣꠄ, ꠀꠝꠞꠣꠞꠦ ꠀꠎꠣꠖ ꠇꠞꠣ ꠅꠁꠛ?”
JOH 8:34 ꠢꠎꠞꠔ ꠁꠍꠣꠄ ꠇꠁꠟꠣ, “ꠀꠝꠤ ꠔꠥꠝꠞꠣꠞꠦ ꠢꠇ ꠇꠕꠣ ꠇꠁꠞꠣꠝ, ꠎꠦꠞꠣ ꠉꠥꠘꠣꠞ ꠝꠣꠎꠦ ꠎꠤꠘ꠆ꠖꠦꠉꠤ ꠇꠣꠐꠣꠄ, ꠔꠣꠞꠣ ꠉꠥꠘꠣꠞ ꠉꠥꠟꠣꠝ।
JOH 8:35 ꠇꠥꠘꠥ ꠉꠥꠟꠣꠝ ꠌꠤꠞꠇꠣꠟ ꠔꠣꠞ ꠝꠥꠘꠤꠛꠞ ꠛꠣꠠꠤꠔ ꠕꠣꠇꠦ ꠘꠣ, ꠅꠁꠟꠦ ꠙꠥꠔ ꠔ ꠌꠤꠞꠇꠣꠟ ꠕꠣꠇꠦ।
JOH 8:36 ꠄꠞꠟꠣꠉꠤ ꠙꠥꠔꠦ ꠎꠥꠖꠤ ꠔꠥꠝꠞꠣꠞꠦ ꠀꠎꠣꠖ ꠇꠞꠂꠘ, ꠔꠦ ꠔꠥꠝꠞꠣ ꠢꠣꠍꠣꠞꠞ ꠀꠎꠣꠖ ꠅꠁꠛꠣꠄ।
JOH 8:37 ꠀꠝꠤ ꠎꠣꠘꠤ, ꠔꠥꠝꠞꠣ ꠁꠛ꠆ꠞꠣꠢꠤꠝ ꠘꠛꠤꠞ ꠛꠋꠡꠞ ꠝꠣꠘꠥꠡ, ꠔꠦꠛꠃ ꠀꠝꠣꠞꠦ ꠝꠣꠞꠤꠟꠤꠔꠣꠄ ꠌꠣꠁꠞꠣꠄ, ꠇꠣꠞꠘ ꠀꠝꠣꠞ ꠘꠍꠤꠅꠔ ꠔꠥꠝꠞꠣꠞ ꠜꠤꠔꠞꠦ ꠢꠣꠝꠣꠄ ꠘꠣ।
JOH 8:38 ꠀꠝꠤ ꠀꠝꠣꠞ ꠉꠣꠁꠛꠤ ꠛꠣꠚꠞ ꠉꠦꠍꠦ ꠎꠦꠔꠣ ꠖꠦꠈꠍꠤ ꠅꠔꠣ ꠇꠁꠞꠣꠝ, ꠀꠞ ꠔꠥꠝꠞꠣ ꠘꠤꠎꠞ ꠛꠣꠚꠞ ꠉꠦꠍ ꠕꠣꠇꠤ ꠎꠦꠔꠣ ꠢꠤꠇꠍ ꠅꠔꠣꠃ ꠇꠞꠞꠣꠄ।”
JOH 8:39 ꠅꠃ ꠡꠝꠄ ꠔꠣꠞꠣ ꠁꠍꠣꠞꠦ ꠇꠁꠟꠣ, “ꠢꠥꠘꠅ, ꠢꠎꠞꠔ ꠁꠛ꠆ꠞꠣꠢꠤꠝꠃ ꠀꠝꠞꠣꠞ ꠛꠣꠚ।” ꠔꠣꠁꠘ ꠇꠁꠟꠣ, “ꠔꠥꠝꠞꠣ ꠎꠥꠖꠤ ꠁꠛ꠆ꠞꠣꠢꠤꠝ ꠘꠛꠤꠞ ꠀꠅꠟꠣꠖ ꠅꠁꠔꠣꠄ, ꠔꠦ ꠁꠛ꠆ꠞꠣꠢꠤꠝꠞ ꠟꠣꠈꠣꠘ ꠇꠣꠝ ꠇꠞꠟꠣꠄ ꠅꠘꠦ।
JOH 8:40 ꠀꠝꠤ ꠀꠟ꠆ꠟꠣꠞ ꠉꠦꠍ ꠕꠣꠇꠤ ꠎꠦ ꠢꠇ ꠇꠣꠟꠣꠝ ꠙꠣꠁꠍꠤ, ꠅꠔꠣꠃ ꠔꠥꠝꠞꠣꠞꠦ ꠇꠁꠞꠣꠝ। ꠔꠦꠛꠃ ꠔꠥꠝꠞꠣ ꠀꠝꠣꠞꠦ ꠝꠣꠞꠤꠟꠤꠔꠣꠄ ꠌꠣꠁꠞꠣꠄ, ꠅꠁꠟꠦ ꠁꠛ꠆ꠞꠣꠢꠤꠝꠦ ꠔ ꠁꠟꠣ ꠇꠞꠍꠂꠘ ꠘꠣ।
JOH 8:41 ꠔꠥꠝꠞꠣꠞ ꠘꠤꠎꠞ ꠛꠣꠚꠦ ꠎꠦꠔꠣ ꠇꠞꠦ, ꠔꠥꠝꠞꠣꠅ ꠅꠔꠣ ꠇꠞꠞꠣꠄ।” ꠅꠃ ꠔꠣꠞꠣ ꠁꠍꠣꠞꠦ ꠇꠁꠟꠣ, “ꠀꠝꠞꠣ ꠔ ꠚꠥꠋꠉꠣ ꠙꠥꠀ ꠘꠣꠄ। ꠀꠝꠞꠣꠞ ꠄꠇꠎꠘꠃ ꠛꠣꠚ ꠀꠍꠂꠘ, ꠄꠁꠘ ꠅꠁꠟꠣ ꠀꠟ꠆ꠟꠣ।”
JOH 8:42 ꠁꠍꠣꠄ ꠔꠣꠞꠣꠞꠦ ꠇꠁꠟꠣ, “ꠀꠍꠟꠦꠃ ꠀꠟ꠆ꠟꠣ ꠎꠥꠖꠤ ꠔꠥꠝꠞꠣꠞ ꠉꠣꠁꠛꠤ ꠛꠣꠚ ꠅꠁꠔꠣ, ꠔꠦ ꠀꠝꠣꠞ ꠛꠣꠄ ꠔꠥꠝꠞꠣꠞ ꠝꠣꠄꠀ ꠕꠣꠇꠟ ꠅꠘꠦ। ꠇꠣꠞꠘ ꠀꠝꠤ ꠀꠟ꠆ꠟꠣꠞ ꠉꠦꠍ ꠕꠣꠇꠤ ꠀꠁꠍꠤ ꠀꠞ ꠅꠈꠘ ꠔꠥꠝꠞꠣꠞ ꠝꠣꠎꠦ ꠀꠍꠤ। ꠀꠝꠤ ꠘꠤꠎꠦ ꠀꠁꠍꠤ ꠘꠣ, ꠔꠣꠁꠘꠃ ꠀꠝꠣꠞꠦ ꠙꠣꠑꠣꠁꠍꠂꠘ।
JOH 8:43 ꠔꠥꠝꠞꠣ ꠀꠝꠣꠞ ꠇꠕꠣ ꠛꠥꠎꠞꠣꠄ ꠘꠣ, ꠇꠣꠞꠘ ꠔꠥꠝꠞꠣ ꠀꠝꠣꠞ ꠇꠕꠣ ꠡꠁꠎ꠆ꠎ ꠇꠞꠔꠣꠄ ꠙꠣꠞ ꠘꠣ।
JOH 8:44 ꠁꠛꠟꠤꠍꠃ ꠔꠥꠝꠞꠣꠞ ꠛꠣꠚ ꠀꠞ ꠔꠥꠝꠞꠣ ꠔꠣꠞ ꠀꠅꠟꠣꠖ, ꠄꠞꠖꠣꠄ ꠔꠥꠝꠞꠣ ꠔꠣꠞ ꠈꠣꠁꠡ ꠙꠥꠞꠣ ꠇꠞꠔꠣꠄ ꠌꠣꠁꠞꠣꠄ। ꠁꠛꠟꠤꠍ ꠔ ꠙꠄꠟꠣ ꠕꠣꠇꠤꠃ ꠈꠥꠘꠤ। ꠢꠦ ꠇꠥꠘꠥꠖꠤꠘ ꠢꠇꠞ ꠝꠣꠎꠦ ꠛꠡꠔ ꠇꠞꠍꠦ ꠘꠣ, ꠇꠣꠞꠘ ꠔꠣꠞ ꠝꠣꠎꠦ ꠇꠥꠘꠥ ꠢꠇ ꠘꠣꠁ। ꠢꠦ ꠎꠦꠛꠟꠣ ꠝꠤꠍꠣ ꠝꠣꠔꠦ, ꠅꠃ ꠡꠝꠄ ꠢꠦ ꠘꠤꠎ ꠕꠣꠇꠤꠃ ꠝꠣꠔꠦ। ꠇꠣꠞꠘ ꠢꠦ ꠛꠦꠁꠝꠣꠘ, ꠀꠞ ꠢꠇꠟ ꠛꠦꠁꠝꠣꠘꠤ ꠔꠣꠞ ꠝꠣꠎ ꠕꠣꠇꠤꠃ ꠙꠄꠖꠣ ꠅꠁꠍꠦ।
JOH 8:45 ꠀꠝꠤ ꠢꠇ ꠝꠣꠔ ꠝꠣꠔꠤꠀꠞ ꠄꠞꠟꠣꠉꠤ ꠔꠥꠝꠞꠣ ꠀꠝꠣꠞꠦ ꠄꠇꠤꠘ ꠇꠞꠞꠣꠄ ꠘꠣ।
JOH 8:46 ꠔꠥꠝꠞꠣꠞ ꠝꠣꠎꠦ ꠇꠦꠃ ꠀꠝꠣꠞꠦ ꠉꠥꠘꠣꠉꠣꠞ ꠙꠞꠝꠣꠘ ꠇꠞꠔ ꠙꠣꠞꠛ ꠘꠤ? ꠀꠝꠤ ꠎꠥꠖꠤ ꠢꠇ ꠝꠣꠔ ꠝꠣꠔꠤ, ꠔꠦ ꠀꠝꠣꠞꠦ ꠄꠇꠤꠘ ꠇꠞꠞꠣꠄ ꠘꠣ ꠇꠦꠘꠦ?
JOH 8:47 ꠎꠦ ꠝꠣꠘꠥꠡ ꠀꠟ꠆ꠟꠣꠞ ꠛꠘ꠆ꠖꠣ, ꠢꠦ ꠀꠟ꠆ꠟꠣꠞ ꠇꠣꠟꠣꠝ ꠢꠥꠘꠦ। ꠔꠥꠝꠞꠣ ꠀꠟ꠆ꠟꠣꠞ ꠘꠣꠄ ꠉꠔꠤꠇꠦ ꠀꠟ꠆ꠟꠣꠞ ꠇꠣꠟꠣꠝ ꠢꠥꠘ ꠘꠣ।”
JOH 8:48 ꠅꠃ ꠡꠝꠄ ꠔꠣꠞꠣ ꠁꠍꠣꠞꠦ ꠇꠁꠟꠣ, “ꠀꠝꠞꠣ ꠔ ꠑꠤꠇ ꠇꠕꠣ ꠇꠁꠍꠤ, ꠔꠥꠁ ꠡꠝꠞꠤꠀ ꠎꠣꠔꠞ ꠝꠣꠘꠥꠡ, ꠔꠞꠦ ꠜꠥꠔꠦ ꠗꠞꠍꠦ।”
JOH 8:49 ꠔꠣꠁꠘ ꠇꠁꠟꠣ, “ꠘꠣ, ꠀꠝꠣꠞꠦ ꠜꠥꠔꠦ ꠗꠞꠍꠦ ꠘꠣ। ꠀꠝꠤ ꠀꠝꠣꠞ ꠛꠣꠚꠞꠦ ꠁꠎ꠆ꠎꠔ ꠇꠞꠤ, ꠅꠁꠟꠦ ꠔꠥꠝꠞꠣ ꠀꠝꠣꠞꠦ ꠛꠦꠁꠎ꠆ꠎꠔ ꠇꠞꠞꠣꠄ।
JOH 8:50 ꠀꠝꠤ ꠘꠤꠎꠦ ꠇꠥꠘꠥ ꠁꠎ꠆ꠎꠔ ꠙꠣꠁꠔꠣꠝ ꠇꠞꠤ ꠇꠣꠝ ꠇꠞꠤ ꠘꠣ। ꠅꠁꠟꠦ ꠄꠇꠎꠘ ꠀꠍꠂꠘ ꠎꠦꠁꠘ ꠀꠝꠣꠞ ꠁꠎ꠆ꠎꠔꠞ ꠟꠣꠉꠤ ꠇꠣꠝ ꠇꠞꠂꠘ, ꠔꠣꠁꠘꠃ ꠀꠝꠣꠞ ꠛꠤꠌꠣꠞꠇ।
JOH 8:51 ꠀꠝꠤ ꠔꠥꠝꠞꠣꠞꠦ ꠢꠇ ꠇꠕꠣ ꠇꠁꠞꠣꠝ, ꠇꠦꠃ ꠎꠥꠖꠤ ꠀꠝꠣꠞ ꠇꠕꠣ ꠝꠣꠘꠦ, ꠢꠦ ꠇꠥꠘꠥ ꠡꠝꠄꠃ ꠝꠞꠔ ꠘꠣꠄ।”
JOH 8:52 ꠔꠣꠞꠣ ꠔꠣꠘꠞꠦ ꠇꠁꠟꠣ, “ꠅꠈꠘ ꠀꠝꠞꠣ ꠛꠥꠎꠟꠣꠝ, ꠔꠞꠦ ꠑꠤꠇꠃ ꠜꠥꠔꠦ ꠗꠞꠍꠦ। ꠁꠛ꠆ꠞꠣꠢꠤꠝ ꠘꠛꠤ ꠛꠣ ꠀꠞꠅ ꠘꠛꠤ ꠅꠇꠟ ꠔ ꠝꠣꠞꠣ ꠉꠦꠍꠂꠘ, ꠀꠞ ꠔꠥꠁ ꠇꠁꠞꠦ, ꠇꠦꠃ ꠎꠥꠖꠤ ꠀꠝꠣꠞ ꠇꠕꠣ ꠝꠣꠘꠦ, ꠢꠦ ꠇꠥꠘꠥ ꠡꠝꠄꠅ ꠝꠞꠔ ꠘꠣꠄ।
JOH 8:53 ꠔꠥꠁ ꠇꠥꠘꠥ ꠛꠣꠛꠣ ꠁꠛ꠆ꠞꠣꠢꠤꠝ ꠕꠣꠇꠤꠅ ꠛꠠ ꠘꠤ? ꠔꠣꠁꠘ ꠘꠤꠎꠦ ꠀꠞ ꠛꠣꠇꠤ ꠔꠣꠝꠣꠝ ꠘꠛꠤ ꠅꠇꠟꠃ ꠝꠣꠞꠣ ꠉꠦꠍꠂꠘ। ꠔꠦ ꠔꠥꠁ ꠘꠤꠎꠞꠦ ꠇꠤꠔꠣ ꠝꠘꠅ ꠇꠞꠍ?”
JOH 8:54 ꠁꠍꠣꠄ ꠎꠥꠀꠙ ꠖꠤꠟꠣ, “ꠀꠝꠤ ꠎꠥꠖꠤ ꠘꠤꠎꠞ ꠔꠣꠞꠤꠚ ꠘꠤꠎꠦꠃ ꠇꠞꠤ, ꠔꠦ ꠄꠞ ꠇꠥꠘꠥ ꠖꠣꠝ ꠘꠣꠁ। ꠀꠝꠣꠞ ꠉꠣꠁꠛꠤ ꠛꠣꠚ, ꠎꠣꠘꠞꠦ ꠔꠥꠝꠞꠣꠞ ꠀꠟ꠆ꠟꠣ ꠇꠁꠀ ꠖꠣꠛꠤ ꠇꠞꠅ, ꠔꠣꠁꠘꠃ ꠀꠝꠣꠞꠦ ꠁꠎ꠆ꠎꠔ ꠖꠣꠘ ꠇꠞꠂꠘ।
JOH 8:55 ꠔꠥꠝꠞꠣ ꠔꠣꠘꠞꠦ ꠌꠤꠘꠍ ꠘꠣ, ꠅꠁꠟꠦ ꠀꠝꠤ ꠔꠣꠘꠞꠦ ꠌꠤꠘꠤ। ꠀꠝꠤ ꠎꠥꠖꠤ ꠇꠁ ꠀꠝꠤ ꠔꠣꠘꠞꠦ ꠌꠤꠘꠤ ꠘꠣ, ꠔꠦ ꠔ ꠔꠥꠝꠞꠣꠞ ꠟꠣꠈꠣꠘ ꠀꠝꠤꠅ ꠛꠦꠁꠝꠣꠘ ꠅꠁꠝꠥ। ꠀꠝꠤ ꠔꠣꠘꠞꠦ ꠌꠤꠘꠤ ꠀꠞ ꠔꠣꠘ ꠢꠥꠇꠥꠝ-ꠀꠢꠇꠣꠝ ꠝꠣꠘꠤꠀ ꠌꠟꠤ।
JOH 8:56 ꠔꠥꠝꠞꠣꠞ ꠛꠣꠚ ꠁꠛ꠆ꠞꠣꠢꠤꠝ ꠘꠛꠤꠄ ꠀꠝꠣꠞ ꠖꠤꠘ ꠖꠦꠈꠣꠞ ꠀꠡꠣꠄ ꠈꠥꠡꠤ ꠇꠞꠍꠂꠘ। ꠔꠣꠁꠘ ꠁꠔꠣ ꠖꠦꠈꠍꠂꠘ ꠀꠞ ꠈꠥꠡꠤꠅ ꠅꠁꠍꠂꠘ।”
JOH 8:57 ꠁꠢꠥꠖꠤ ꠘꠦꠔꠣ ꠅꠇꠟꠦ ꠔꠣꠘꠞꠦ ꠇꠁꠟꠣ, “ꠔꠥꠝꠣꠞ ꠛꠄꠅꠡ ꠔ ꠅꠈꠘꠅ ꠙꠁꠘ꠆ꠌꠣꠡ ꠛꠍꠞ ꠅꠁꠍꠦ ꠘꠣ, ꠔꠦ ꠔꠥꠝꠤ ꠁꠛ꠆ꠞꠣꠢꠤꠝ ꠘꠛꠤꠞꠦ ꠖꠦꠈꠟꠣꠄ ꠇꠤꠟꠣ?”
JOH 8:58 ꠁꠍꠣꠄ ꠇꠁꠟꠣ, “ꠀꠝꠤ ꠔꠥꠝꠞꠣꠞꠦ ꠢꠇ ꠇꠕꠣ ꠇꠁꠞꠣꠝ, ꠁꠛ꠆ꠞꠣꠢꠤꠝ ꠘꠛꠤꠞ ꠎꠘꠝꠞ ꠀꠉ ꠕꠣꠇꠤꠃ ꠀꠝꠤ ꠀꠍꠤ।”
JOH 8:59 ꠁꠈꠣꠘ ꠢꠥꠘꠤꠀ ꠘꠦꠔꠣ ꠅꠇꠟꠦ ꠔꠣꠘꠞꠦ ꠝꠣꠞꠣꠞ ꠟꠣꠉꠤ ꠙꠣꠔ꠆ꠔꠞ ꠔꠥꠇꠣꠁꠀ ꠟꠁꠟꠣ। ꠅꠁꠟꠦ ꠢꠎꠞꠔ ꠁꠍꠣꠄ ꠀꠃꠠꠤ ꠖꠤꠀ ꠛꠣꠄꠔꠥꠟ-ꠝꠥꠇꠣꠖ꠆ꠖꠍ ꠕꠣꠇꠤ ꠛꠣꠞ ꠅꠁꠀ ꠉꠦꠟꠣꠉꠤ।
JOH 9:1 ꠢꠎꠞꠔ ꠁꠍꠣ ꠙꠕꠦꠖꠤ ꠀꠐꠤꠀ ꠎꠣꠅꠀꠞ ꠡꠝꠄ ꠄꠇ ꠀꠘ꠆ꠖꠣ ꠛꠦꠐꠣꠞꠦ ꠙꠣꠁꠟꠣ। ꠢꠦ ꠎꠘꠝ ꠕꠣꠇꠤꠃ ꠀꠘ꠆ꠖꠣ ꠀꠍꠤꠟ।
JOH 9:2 ꠄꠞꠦ ꠖꠦꠈꠤꠀ ꠔꠣꠘ ꠍꠣꠢꠣꠛꠤ ꠅꠇꠟꠦ ꠔꠣꠘꠞꠦ ꠎꠤꠇꠣꠁꠟꠣ, “ꠢꠥꠎꠥꠞ, ꠅꠃ ꠝꠣꠘꠥꠡꠉꠥ ꠇꠣꠞ ꠉꠥꠘꠣꠄ ꠀꠘ꠆ꠖꠣ ꠅꠁꠀ ꠎꠘꠝꠤꠍꠦ? ꠔꠣꠞ ꠘꠤꠎꠞ ꠉꠥꠘꠣꠞ ꠟꠣꠉꠤ, ꠘꠣ ꠔꠣꠞ ꠝꠣ-ꠛꠣꠚꠞ?”
JOH 9:3 ꠔꠣꠁꠘ ꠎꠥꠀꠙ ꠖꠤꠟꠣ, “ꠔꠣꠞ ꠘꠤꠎꠞ ꠟꠣꠉꠤꠅ ꠘꠣꠄ, ꠀꠞ ꠔꠣꠞ ꠝꠣ-ꠛꠣꠚꠞ ꠉꠥꠘꠣꠞ ꠟꠣꠉꠤꠅ ꠘꠣꠄ। ꠔꠣꠞ ꠝꠣꠎꠖꠤ ꠀꠟ꠆ꠟꠣꠞ ꠟꠤꠟꠣ-ꠈꠦꠟꠣ ꠎꠣꠁꠞ ꠅꠀꠞ ꠟꠣꠉꠤꠃ ꠁꠟꠣ ꠅꠁꠍꠦ।
JOH 9:4 ꠢꠥꠘꠅ, ꠎꠦꠁꠘ ꠀꠝꠣꠞꠦ ꠛꠦꠎꠤꠍꠂꠘ, ꠡꠝꠄ ꠕꠣꠇꠔꠦ ꠕꠣꠇꠔꠦ ꠔꠣꠘ ꠇꠣꠝ ꠇꠞꠣ ꠀꠝꠞꠣꠞ ꠎꠞꠥꠞ। ꠞꠣꠁꠔ ꠊꠘꠣꠁꠀ ꠀꠞ, ꠢꠤ ꠡꠝꠄ ꠇꠦꠃ ꠇꠣꠝ ꠇꠞꠣꠞ ꠃꠙꠣꠄ ꠘꠣꠁ।
JOH 9:5 ꠛꠥꠎꠞꠣꠄ ꠘꠤ, ꠀꠝꠤ ꠎꠔꠖꠤꠘ ꠖꠥꠘꠤꠀꠔ ꠀꠍꠤ, ꠅꠔꠖꠤꠘ ꠀꠝꠤꠃ ꠖꠥꠘꠤꠀꠞ ꠘꠥꠞ।”
JOH 9:6 ꠅꠈꠣꠘ ꠇꠁꠀꠃ ꠔꠣꠁꠘ ꠝꠣꠐꠤꠔ ꠍꠦꠚ ꠚꠣꠟꠣꠁꠀ ꠚꠦꠇ ꠛꠣꠘꠣꠁꠟꠣ, ꠛꠣꠖꠦ ꠅꠃ ꠚꠦꠇ ꠀꠘ꠆ꠖꠣ ꠛꠦꠐꠣꠞ ꠌꠈꠥꠔ ꠟꠣꠉꠣꠁꠀ ꠇꠁꠟꠣ,
JOH 9:7 “ꠎꠣꠅ ꠛꠣ, ꠍꠤꠟꠥꠀꠞ ꠙꠥꠞꠇꠤꠔ ꠉꠤꠀ ꠗꠁꠟꠣꠅ।” ꠍꠤꠟꠥꠀ ꠝꠣꠘꠤ ꠙꠣꠑꠣꠘꠤ। ꠢꠦ ꠉꠤꠀ ꠌꠃꠈ ꠗꠁꠟ ꠀꠞ ꠜꠣꠟꠣ ꠅꠁꠀ ꠀꠁꠟ।
JOH 9:8 ꠁꠈꠣꠘ ꠖꠦꠈꠤꠀ ꠀꠞꠤ-ꠚꠞꠤ ꠀꠞ ꠎꠔ ꠝꠣꠘꠡꠦ ꠔꠣꠞꠦ ꠀꠉꠦ ꠜꠤꠇ ꠇꠞꠣꠔ ꠖꠦꠈꠍꠤꠟꠣ ꠄꠞꠣ ꠇꠁꠟꠣ, “ꠅꠉꠥ ꠇꠤꠔꠣ ꠢꠃ ꠛꠦꠐꠣ ꠘꠣꠄ ꠘꠤ, ꠎꠦꠉꠤꠄ ꠅꠘꠅ ꠛꠁꠀ ꠜꠤꠇ ꠇꠞꠔ?”
JOH 9:9 ꠇꠦꠃ ꠇꠦꠃ ꠇꠁꠟ, “ꠅꠄ, ꠢꠦ ꠔ ꠅꠃ ꠛꠦꠐꠣꠃ।” ꠀꠞ ꠇꠦꠃ ꠇꠦꠃ ꠇꠁꠟ, “ꠖꠦꠈꠔꠦ ꠎꠥꠖꠤꠅ ꠔꠣꠞ ꠟꠣꠈꠣꠘ, ꠅꠁꠟꠦ ꠢꠦ ꠘꠣꠄ।” ꠔꠦꠃ ꠢꠦ ꠘꠤꠎꠦ ꠇꠁꠟ, “ꠎꠤꠅꠄ, ꠀꠝꠤꠃ ꠢꠃ ꠎꠘ।”
JOH 9:10 ꠅꠃ ꠔꠣꠞꠣ ꠄꠞꠦ ꠎꠤꠇꠣꠁꠟꠣ, “ꠇꠅ ꠌꠣꠁꠘ, ꠔꠥꠝꠣꠞ ꠌꠃꠈ ꠜꠣꠟꠣ ꠅꠁꠟ ꠇꠤꠟꠣ?”
JOH 9:11 ꠢꠦ ꠇꠁꠟ, “ꠁꠍꠣ ꠘꠣꠝꠞ ꠅꠃ ꠝꠣꠘꠡꠦ ꠚꠦꠇ ꠛꠣꠘꠣꠁꠀ ꠀꠝꠣꠞ ꠌꠈꠥꠔ ꠟꠣꠉꠣꠁꠀ ꠇꠁꠟꠣ, ꠎꠣꠅ ꠛꠣ, ꠍꠤꠟꠥꠀꠞ ꠙꠥꠇꠞꠤꠞ ꠝꠣꠎꠦ ꠗꠁꠀ ꠀꠅꠉꠤ। ꠀꠝꠤ ꠉꠤꠀ ꠗꠁꠟꠣꠝ ꠀꠞ ꠜꠣꠟꠣ ꠅꠁꠉꠦꠟꠣꠝ।”
JOH 9:12 ꠔꠣꠞꠣ ꠇꠁꠟꠣ, “ꠅꠃ ꠝꠣꠘꠥꠡꠉꠥ ꠇꠥꠀꠁ?” ꠢꠦ ꠇꠁꠟ, “ꠀꠝꠤ ꠎꠣꠘꠤ ꠘꠣ।”
JOH 9:13 ꠅꠃ ꠎꠦ ꠛꠦꠐꠣ ꠀꠘ꠆ꠖꠣ ꠀꠍꠤꠟ, ꠝꠣꠘꠡꠦ ꠔꠣꠞꠦ ꠗꠞꠤꠀ ꠚꠞꠤꠡꠤ ꠅꠇꠟꠞ ꠉꠦꠍꠦ ꠟꠁꠀ ꠉꠦꠟꠣ।
JOH 9:14 ꠇꠣꠞꠘ ꠁꠍꠣꠄ ꠎꠦꠖꠤꠘ ꠚꠦꠇ ꠟꠣꠉꠣꠁꠀ ꠔꠣꠞ ꠌꠃꠈ ꠜꠣꠟꠣ ꠇꠞꠍꠟꠣ, ꠁ ꠖꠤꠘ ꠀꠍꠤꠟ ꠔꠣꠞꠣꠞ ꠎꠥꠝ꠆ꠝꠣꠛꠣꠞ।
JOH 9:15 ꠄꠞꠟꠣꠉꠤ ꠚꠞꠤꠡꠤ ꠅꠇꠟꠦ ꠢꠤꠞꠛꠣꠞ ꠔꠣꠞꠦ ꠎꠤꠇꠣꠁꠟꠣ, “ꠔꠥꠝꠣꠞ ꠌꠃꠈ ꠜꠣꠟꠣ ꠅꠁꠟ ꠇꠤꠟꠣ?” ꠢꠦ ꠇꠁꠟ, “ꠢꠃ ꠎꠘꠦ ꠀꠝꠣꠞ ꠌꠈꠥꠔ ꠚꠦꠇ ꠟꠣꠉꠣꠁꠀ ꠖꠤꠟꠣ, ꠀꠞ ꠀꠝꠤ ꠉꠤꠀ ꠗꠁꠀꠃ ꠌꠃꠈꠦ ꠖꠦꠈꠟꠣꠝ।”
JOH 9:16 ꠅꠃ ꠡꠝꠄ ꠇꠄꠎꠘ ꠚꠞꠤꠡꠤꠄ ꠇꠁꠟꠣ, “ꠁ ꠝꠣꠘꠥꠡꠉꠥ ꠔ ꠀꠟ꠆ꠟꠣꠞ ꠉꠦꠍ ꠕꠣꠇꠤ ꠀꠁꠍꠦ ꠘꠣ। ꠖꠦꠈꠞꠣꠄ ꠘꠤ, ꠢꠦ ꠎꠥꠝ꠆ꠝꠣꠛꠣꠞꠅ ꠝꠣꠘꠦ ꠘꠣ।” ꠅꠁꠟꠦ ꠇꠦꠃ ꠇꠦꠃ ꠇꠁꠟꠣ, “ꠉꠥꠘꠣꠉꠣꠞ ꠝꠣꠘꠡꠦ ꠁꠟꠣꠈꠣꠘ ꠇꠦꠞꠣꠝꠔꠤ ꠇꠣꠝ ꠇꠞꠛ ꠇꠤꠟꠣ?” ꠅꠔꠣ ꠟꠁꠀ ꠔꠣꠞꠣꠞ ꠝꠣꠎꠦ ꠖꠟꠣꠖꠟꠤ ꠟꠣꠉꠤꠉꠦꠟ।
JOH 9:17 ꠔꠣꠞꠣ ꠢꠤꠞꠛꠣꠞ ꠅꠃ ꠝꠣꠘꠡꠞꠦ ꠎꠤꠇꠣꠁꠟꠣ, “ꠑꠤꠇ ꠀꠍꠦ, ꠢꠦ ꠔ ꠔꠥꠝꠣꠞ ꠌꠃꠈ ꠜꠣꠟꠣ ꠇꠞꠍꠦ, ꠄꠞꠟꠣꠉꠤ ꠔꠥꠝꠤ ꠔꠣꠞ ꠛꠦꠙꠣꠞꠦ ꠇꠤꠔꠣ ꠇꠅ।” ꠢꠦ ꠇꠁꠟ, “ꠔꠣꠁꠘ ꠄꠇꠎꠘ ꠘꠛꠤ।”
JOH 9:18 ꠅꠁꠟꠦ ꠅꠃ ꠛꠦꠐꠣ ꠎꠦꠘ ꠀꠉꠦ ꠀꠘ꠆ꠖꠣ ꠀꠍꠤꠟ ꠀꠞ ꠅꠈꠘ ꠌꠃꠈꠦ ꠖꠦꠈꠦꠞ, ꠁꠢꠥꠖꠤ ꠘꠦꠔꠣ ꠅꠇꠟꠦ ꠔꠣꠞ ꠝꠣ-ꠛꠣꠚꠞꠦ ꠘꠣ ꠎꠤꠇꠣꠘꠤ ꠙꠞ꠆ꠎꠘ꠆ꠔ ꠁꠔꠣ ꠄꠇꠤꠘ ꠇꠞꠟꠣ ꠘꠣ।
JOH 9:19 ꠔꠣꠞꠣ ꠔꠣꠞ ꠝꠣ-ꠛꠣꠚꠞꠦ ꠎꠤꠇꠣꠁꠟꠣ, “ꠖꠦꠈꠅ ꠌꠣꠁꠘ, ꠅꠉꠥ ꠔꠥꠝꠞꠣꠞ ꠢꠃ ꠀꠘ꠆ꠖꠣ ꠙꠥꠀ ꠘꠤ, ꠎꠦꠉꠥꠞꠦ ꠔꠥꠝꠞꠣ ꠎꠘꠝꠞ ꠀꠘ꠆ꠖꠣ ꠇꠅ? ꠔꠦ ꠢꠦ ꠅꠈꠘ ꠌꠃꠈꠦ ꠖꠦꠈꠦꠞ ꠇꠤꠟꠣ?”
JOH 9:20 ꠔꠣꠞ ꠝꠣ-ꠛꠣꠚꠦ ꠇꠁꠟꠣ, “ꠎꠤꠅꠄ, ꠢꠦ ꠀꠝꠞꠣꠞꠃ ꠙꠥꠀ ꠀꠞ ꠢꠦ ꠀꠘ꠆ꠖꠣ ꠅꠁꠀ ꠎꠘꠝꠤꠍꠤꠟ।
JOH 9:21 ꠅꠁꠟꠦ ꠅꠈꠘ ꠇꠤꠟꠣ ꠌꠃꠈꠦ ꠖꠦꠈꠦꠞ, ꠁꠈꠣꠘ ꠀꠝꠞꠣ ꠎꠣꠘꠤ ꠘꠣ। ꠀꠞ ꠇꠦ ꠔꠣꠞ ꠌꠃꠈ ꠜꠣꠟꠣ ꠇꠞꠍꠂꠘ, ꠔꠣ-ꠅ ꠇꠁꠔꠣꠝ ꠙꠣꠞꠤ ꠘꠣ। ꠢꠦ ꠔ ꠛꠠ ꠅꠁꠉꠦꠍꠦ, ꠔꠣꠞꠦꠃ ꠎꠤꠇꠣꠃꠇ꠆ꠇꠣ, ꠔꠣꠞ ꠛꠦꠙꠣꠞ ꠢꠦ ꠇꠃꠇ।”
JOH 9:22 ꠔꠣꠞ ꠝꠣ-ꠛꠣꠚꠦ ꠁꠢꠥꠖꠤ ꠘꠦꠔꠣ ꠅꠇꠟꠞ ꠒꠞꠦ ꠅꠟꠣ ꠝꠣꠔꠤꠟꠣ, ꠇꠣꠞꠘ ꠁꠢꠥꠖꠤ ꠘꠦꠔꠣ ꠅꠇꠟꠦ ꠀꠉ ꠕꠣꠇꠤꠃ ꠀꠁꠘ ꠇꠞꠍꠤꠟꠣ, ꠇꠦꠃ ꠎꠥꠖꠤ ꠁꠍꠣꠞꠦ ꠀꠟ-ꠝꠍꠤ ꠇꠁꠀ ꠇꠛꠥꠟ ꠇꠞꠦ, ꠔꠦ ꠔꠣꠞꠦ ꠡꠝꠣꠎ ꠕꠣꠇꠤ ꠛꠣꠞ ꠇꠞꠤ ꠖꠦꠅꠀ ꠅꠁꠛ।
JOH 9:23 ꠄꠞꠟꠣꠉꠤꠃ ꠔꠣꠞ ꠝꠣ-ꠛꠣꠚꠦ ꠇꠁꠟꠣ, “ꠢꠦ ꠛꠠ ꠅꠁꠉꠦꠍꠦ, ꠔꠣꠞꠦꠃ ꠎꠤꠇꠣꠃꠇ꠆ꠇꠣ।”
JOH 9:24 ꠘꠦꠔꠣ ꠅꠇꠟꠦ ꠖꠥꠍꠞꠣꠛꠣꠞ ꠔꠣꠞꠦ ꠀꠘꠤꠀ ꠎꠤꠇꠣꠁꠟꠣ, “ꠔꠥꠝꠤ ꠀꠟ꠆ꠟꠣꠞ ꠘꠣꠝꠦ ꠢꠣꠍꠣ ꠝꠣꠔ ꠝꠣꠔꠅ। ꠀꠝꠞꠣ ꠔ ꠎꠣꠘꠤ ꠁ ꠝꠣꠘꠥꠡꠐꠣ ꠉꠥꠘꠣꠉꠣꠞ।”
JOH 9:25 ꠢꠦ ꠎꠥꠀꠙ ꠖꠤꠟ, “ꠔꠣꠁꠘ ꠉꠥꠘꠣꠉꠣꠞ ꠘꠣ ꠇꠤꠔꠣ, ꠁꠈꠣꠘ ꠀꠝꠤ ꠎꠣꠘꠤ ꠘꠣ। ꠈꠣꠟꠤ ꠅꠈꠣꠘ ꠎꠣꠘꠤ, ꠀꠝꠤ ꠀꠉꠦ ꠀꠘ꠆ꠖꠣ ꠀꠍꠟꠣꠝ, ꠅꠈꠘ ꠌꠃꠈꠦ ꠖꠦꠈꠤꠀꠞ।”
JOH 9:26 ꠘꠦꠔꠣ ꠅꠇꠟꠦ ꠇꠁꠟꠣ, “ꠇꠅ ꠌꠣꠁꠘ, ꠢꠦ ꠔꠥꠝꠣꠞꠦ ꠇꠤꠔꠣ ꠇꠞꠍꠦ? ꠔꠥꠝꠣꠞ ꠌꠃꠈ ꠇꠤꠟꠣ ꠜꠣꠟꠣ ꠇꠞꠟ?”
JOH 9:27 ꠅꠃ ꠛꠦꠐꠣꠄ ꠎꠥꠀꠙ ꠖꠤꠟ, “ꠀꠝꠤ ꠔ ꠀꠉꠦꠃ ꠇꠁꠟꠣꠝ, ꠅꠁꠟꠦ ꠀꠙꠘꠣꠞꠣ ꠢꠥꠘꠟꠣ ꠘꠣ। ꠔꠦ ꠅꠈꠘ ꠇꠦꠘꠦ ꠀꠞ ꠢꠥꠘꠔꠣ ꠌꠣꠁꠞꠣ? ꠀꠙꠘꠣꠞꠣꠅ ꠔꠣꠘ ꠃꠝ꠆ꠝꠔ ꠅꠁꠔꠣ ꠌꠣꠁꠞꠣ ꠘꠤ?”
JOH 9:28 ꠁꠈꠣꠘ ꠢꠥꠘꠤꠀ ꠔꠣꠞꠣ ꠛꠦꠐꠣꠞꠦ ꠈꠥꠛ ꠉꠣꠟꠣ-ꠉꠣꠟꠤ ꠇꠞꠤꠀ ꠇꠁꠟꠣ, “ꠢꠂ, ꠔꠥꠁ ꠉꠤꠀ ꠅꠉꠥꠞ ꠃꠝ꠆ꠝꠔ ꠅꠁꠍꠔ, ꠅꠁꠟꠦ ꠀꠝꠞꠣ ꠅꠁꠟꠣꠝ ꠝꠥꠍꠣ ꠘꠛꠤꠞ ꠃꠝ꠆ꠝꠔ।
JOH 9:29 ꠀꠝꠞꠣ ꠎꠣꠘꠤ, ꠀꠟ꠆ꠟꠣꠄ ꠘꠤꠎꠦ ꠝꠥꠍꠣ ꠘꠛꠤꠞ ꠟꠉꠦ ꠛꠣꠔꠌꠤꠔ ꠇꠞꠍꠂꠘ, ꠅꠁꠟꠦ ꠁ ꠛꠦꠐꠣ ꠇꠥꠀꠁ ꠕꠣꠇꠤ ꠀꠁꠍꠦ, ꠁꠔꠣ ꠔ ꠀꠝꠞꠣ ꠎꠣꠘꠤꠃ ꠘꠣ।”
JOH 9:30 ꠔꠦꠃ ꠛꠦꠐꠣꠄ ꠇꠁꠟ, “ꠇꠤ ꠔꠣꠁꠎ꠆ꠎꠥꠛꠤ! ꠀꠙꠘꠣꠞꠣ ꠎꠣꠘꠂꠘ ꠘꠣ ꠔꠣꠁꠘ ꠇꠥꠀꠁ ꠕꠣꠇꠤ ꠀꠁꠍꠂꠘ, ꠅꠕꠌ ꠔꠣꠁꠘꠃ ꠀꠝꠣꠞ ꠌꠃꠈ ꠜꠣꠟꠣ ꠇꠞꠟꠣ।
JOH 9:31 ꠀꠝꠞꠣ ꠎꠣꠘꠤ, ꠘꠣꠚꠞꠝꠣꠘ ꠅꠇꠟꠞ ꠇꠕꠣ ꠀꠟ꠆ꠟꠣꠄ ꠢꠥꠘꠂꠘ ꠘꠣ। ꠅꠁꠟꠦ ꠇꠦꠃ ꠎꠥꠖꠤ ꠀꠟ꠆ꠟꠣꠞ ꠀꠡꠤꠇ ꠛꠘꠤꠀ ꠔꠣꠘ ꠝꠞ꠆ꠎꠤ ꠎꠥꠉꠣꠁꠀ ꠌꠟꠦ, ꠔꠦ ꠀꠟ꠆ꠟꠣꠄ ꠔꠣꠞ ꠚꠞꠤꠀꠖ ꠢꠥꠘꠂꠘ।
JOH 9:32 ꠀꠞ ꠀꠁꠎ ꠙꠞ꠆ꠎꠘ꠆ꠔ ꠁꠟꠣ ꠢꠥꠘꠣ ꠉꠦꠍꠦ ꠘꠣ ꠎꠦꠘ, ꠎꠘꠝ ꠕꠣꠇꠤ ꠀꠘ꠆ꠖꠣ ꠇꠥꠘꠥ ꠝꠣꠘꠡꠞ ꠌꠃꠈ ꠇꠦꠃ ꠜꠣꠟꠣ ꠇꠞꠍꠦ।
JOH 9:33 ꠔꠣꠁꠘ ꠎꠥꠖꠤ ꠀꠟ꠆ꠟꠣꠞ ꠉꠦꠍ ꠕꠣꠇꠤ ꠘꠣ ꠀꠁꠔꠣ, ꠔꠦ ꠁꠟꠣ ꠇꠞꠔꠣ ꠙꠣꠞꠟꠣ ꠘꠣ ꠅꠘꠦ।”
JOH 9:34 ꠘꠦꠔꠣ ꠅꠇꠟꠦ ꠔꠣꠞꠦ ꠇꠁꠟꠣ, “ꠔꠞ ꠎꠘꠝ ꠅꠁꠍꠦ ꠘꠣꠚꠞꠝꠣꠘꠤꠞ ꠝꠣꠎꠦ, ꠀꠞ ꠔꠥꠁ ꠀꠝꠞꠣꠞꠦ ꠔꠣꠟꠤꠝ ꠖꠤꠞꠦ ꠘꠤ?” ꠅꠈꠣꠘ ꠇꠁꠀ ꠔꠣꠞꠣ ꠔꠣꠞꠦ ꠡꠝꠣꠎ ꠕꠣꠇꠤ ꠄꠇꠊꠞꠤ ꠇꠞꠟꠣ।
JOH 9:35 ꠁꠍꠣꠄ ꠢꠥꠘꠟꠣ, ꠘꠦꠔꠣ ꠅꠇꠟꠦ ꠅꠃ ꠛꠦꠐꠣꠞꠦ ꠄꠇꠊꠞꠤ ꠇꠞꠍꠂꠘ। ꠔꠣꠁꠘ ꠅꠃ ꠛꠦꠐꠣꠞꠦ ꠔꠥꠇꠣꠁꠀ ꠛꠣꠞ ꠇꠞꠤꠀ ꠇꠁꠟꠣ, “ꠅꠛꠣ, ꠔꠥꠝꠤ ꠇꠤꠔꠣ ꠛꠤꠘ-ꠀꠖꠝꠞ ꠃꠙꠞꠦ ꠁꠝꠣꠘ ꠀꠘꠍ ꠘꠤ?”
JOH 9:36 ꠢꠦ ꠇꠁꠟ, “ꠢꠥꠎꠥꠞ, ꠔꠣꠁꠘ ꠇꠦ? ꠀꠝꠣꠞꠦ ꠇꠃꠇ꠆ꠇꠣ, ꠀꠝꠤ ꠎꠣꠔꠦ ꠔꠣꠘ ꠃꠙꠞꠦ ꠁꠝꠣꠘ ꠀꠘꠔꠣꠝ ꠙꠣꠞꠤ।”
JOH 9:37 ꠁꠍꠣꠄ ꠔꠣꠞꠦ ꠇꠁꠟꠣ, “ꠔꠥꠝꠤ ꠔꠣꠘꠞꠦ ꠖꠦꠈꠍ, ꠀꠞ ꠔꠣꠁꠘꠃ ꠔꠥꠝꠣꠞ ꠟꠉꠦ ꠝꠣꠔꠤꠞꠣ।”
JOH 9:38 ꠅꠃ ꠛꠦꠐꠣꠄ ꠇꠁꠟ, “ꠢꠥꠎꠥꠞ, ꠀꠝꠤ ꠁꠝꠣꠘ ꠀꠘꠟꠣꠝ।” ꠅꠈꠣꠘ ꠇꠁꠀꠃ ꠢꠦ ꠢꠎꠞꠔ ꠁꠍꠣꠞꠦ ꠍꠁꠎꠖꠣ ꠇꠞꠟ।
JOH 9:39 ꠁꠍꠣꠄ ꠇꠁꠟꠣ, “ꠢꠥꠘꠅ, ꠀꠝꠤ ꠀꠁꠍꠤ ꠁ ꠖꠥꠘꠤꠀꠔ ꠛꠤꠌꠣꠞ ꠇꠞꠣꠞ ꠟꠣꠉꠤ, ꠎꠦꠞꠣ ꠀꠘ꠆ꠖꠣ ꠀꠍꠂꠘ ꠔꠣꠞꠣ ꠎꠣꠘꠥ ꠜꠣꠟꠣ ꠅꠁꠘ, ꠀꠞ ꠜꠣꠟꠣ ꠅꠇꠟ ꠀꠘ꠆ꠖꠣ ꠅꠁꠘ।”
JOH 9:40 ꠅꠃ ꠡꠝꠄ ꠇꠄꠎꠘ ꠚꠞꠤꠡꠤꠅ ꠁꠍꠣꠞ ꠇꠣꠘ꠆ꠖꠣꠔ ꠀꠍꠟꠣ। ꠁꠈꠣꠘ ꠢꠥꠘꠤꠀ ꠔꠣꠞꠣ ꠇꠁꠟꠣ, “ꠔꠦ ꠀꠙꠘꠦ ꠇꠤꠔꠣ ꠇꠁꠔꠣ ꠌꠣꠁꠞꠣ, ꠀꠝꠞꠣ ꠀꠘ꠆ꠖꠣ ꠘꠤ?”
JOH 9:41 ꠁꠍꠣꠄ ꠇꠁꠟꠣ, “ꠔꠥꠝꠞꠣ ꠎꠥꠖꠤ ꠀꠘ꠆ꠖꠣ ꠅꠁꠔꠣꠄ, ꠔꠦ ꠔꠥꠝꠞꠣ ꠇꠥꠘꠥ ꠖꠥꠡꠤ ꠅꠁꠟꠣꠄ ꠘꠣ ꠅꠘꠦ। ꠅꠁꠟꠦ ꠔꠥꠝꠞꠣꠃ ꠇꠁꠞꠣꠄ ꠀꠘ꠆ꠖꠣ ꠘꠣꠄ, ꠄꠞꠟꠣꠉꠤꠃ ꠔꠥꠝꠞꠣꠞ ꠝꠣꠎꠦ ꠖꠥꠡ ꠀꠍꠦ।”
JOH 10:1 ꠢꠎꠞꠔ ꠁꠍꠣꠄ ꠀꠞꠅ ꠇꠁꠟꠣ, “ꠀꠝꠤ ꠔꠥꠝꠞꠣꠞꠦ ꠘꠤꠌ꠆ꠌꠤꠔ ꠢꠣꠍꠣ ꠇꠕꠣ ꠇꠁꠞꠣꠝ, ꠎꠦ ꠝꠣꠘꠥꠡ ꠝꠦꠠꠣꠞ ꠉꠥꠀꠟ-ꠊꠞꠞ ꠖꠥꠀꠞꠦꠖꠤ ꠘꠣ ꠢꠣꠝꠣꠁꠀ, ꠅꠁꠘ꠆ꠘ ꠙꠕꠦ ꠢꠣꠝꠣꠄ, ꠢꠦ ꠔ ꠌꠥꠞ-ꠒꠣꠇꠣꠁꠔ।
JOH 10:2 ꠅꠁꠟꠦ ꠎꠦ ꠎꠘ ꠖꠥꠀꠞꠦꠖꠤ ꠢꠣꠝꠣꠄ, ꠢꠦ-ꠃ ꠝꠦꠠꠣꠞ ꠞꠣꠈꠣꠟ।
JOH 10:3 ꠉꠥꠀꠟ-ꠊꠞꠞ ꠌꠇꠤꠖꠣꠞꠦ ꠞꠣꠈꠣꠟꠞꠦ ꠖꠥꠀꠞ ꠈꠥꠟꠤꠀ ꠖꠦꠄ। ꠝꠦꠠꠣꠁꠘ꠆ꠔꠦꠅ ꠞꠣꠈꠣꠟꠞ ꠒꠣꠇ ꠢꠥꠘꠂꠘ ꠀꠞ ꠞꠣꠈꠣꠟꠦ ꠔꠣꠞꠣꠞ ꠘꠣꠝ ꠗꠞꠤ ꠒꠣꠇꠤ ꠒꠣꠇꠤ ꠛꠣꠞ ꠇꠞꠤ ꠘꠦꠄ।
JOH 10:4 ꠊꠞ ꠕꠣꠇꠤ ꠘꠤꠎꠞ ꠝꠦꠠꠣꠁꠘ꠆ꠔꠞꠦ ꠛꠣꠞ ꠇꠞꠤꠀ ꠢꠣꠞꠟꠦ, ꠞꠣꠈꠣꠟ ꠔꠣꠞꠣꠞ ꠀꠉꠦ ꠀꠉꠦ ꠎꠣꠄ, ꠀꠞ ꠔꠣꠞ ꠝꠦꠠꠣꠁꠘ ꠎꠣꠄ ꠈꠞꠦ ꠈꠞꠦ, ꠇꠣꠞꠘ ꠔꠣꠞ ꠉꠟꠣꠞ ꠀꠅꠀꠎ ꠔꠣꠞꠣ ꠌꠤꠘꠦ।
JOH 10:5 ꠔꠣꠞꠣ ꠇꠥꠘꠥꠛꠣꠟꠣ ꠅꠌꠤꠘꠣ ꠇꠥꠘꠥ ꠞꠣꠈꠣꠟꠞ ꠟꠉꠦ ꠎꠣꠁꠔ ꠘꠣꠄ ꠛꠞꠋ ꠔꠣꠞ ꠉꠦꠍ ꠕꠣꠇꠤ ꠜꠣꠉꠤꠛ, ꠇꠣꠞꠘ ꠅꠌꠤꠘꠣ ꠇꠥꠘꠥ ꠞꠣꠈꠣꠟꠞ ꠉꠟꠣꠞ ꠀꠅꠀꠎ ꠔꠣꠞꠣ ꠌꠤꠘꠦ ꠘꠣ।”
JOH 10:6 ꠁꠍꠣꠄ ꠚꠞꠤꠡꠤ ꠅꠇꠟꠞꠦ ꠢꠤꠇꠣꠘꠤꠞ ꠟꠣꠉꠤ ꠅꠃ ꠃꠖꠣꠢꠞꠘ ꠖꠤꠟꠣ, ꠅꠁꠟꠦ ꠔꠣꠁꠘ ꠇꠤꠔꠣ ꠛꠥꠎꠣꠁꠞꠣ, ꠔꠣꠞꠣ ꠡꠝꠎꠤꠔꠣ ꠙꠣꠞꠟꠣ ꠘꠣ।
JOH 10:7 ꠄꠞꠟꠣꠉꠤ ꠔꠣꠁꠘ ꠢꠤꠞꠛꠣꠞ ꠇꠁꠟꠣ, “ꠀꠝꠤ ꠔꠥꠝꠞꠣꠞꠦ ꠘꠤꠌ꠆ꠌꠤꠔ ꠢꠇ ꠇꠕꠣ ꠇꠁꠞꠣꠝ, ꠝꠦꠠꠣꠞ ꠙꠣꠟꠞ ꠟꠣꠉꠤ ꠀꠝꠤꠃ ꠖꠥꠀꠞ।
JOH 10:8 ꠀꠝꠣꠞ ꠀꠉꠦ ꠞꠣꠈꠣꠟꠞ ꠜꠣꠛ ꠗꠞꠤꠀ ꠎꠦꠔꠣ ꠀꠁꠍꠟꠣ, ꠁꠉꠥꠁꠘ ꠔ ꠌꠥꠞ-ꠒꠣꠇꠣꠁꠔ ꠀꠍꠟꠣ, ꠝꠦꠠꠣꠁꠘ꠆ꠔꠦꠅ ꠔꠣꠞꠣꠞ ꠇꠕꠣ ꠢꠥꠘꠍꠂꠘ ꠘꠣ।
JOH 10:9 ꠀꠝꠤꠃ ꠖꠥꠀꠞ। ꠀꠝꠣꠞ ꠝꠣꠎꠖꠤ ꠎꠦ ꠢꠣꠝꠣꠁꠛ, ꠢꠦ ꠔꠣꠞ ꠎꠣꠘ ꠛꠣꠌꠣꠁꠛ। ꠢꠦ ꠜꠤꠔꠞꠦ ꠀꠅꠀ-ꠎꠣꠅꠀ ꠇꠞꠛ ꠀꠞ ꠀꠐꠤꠀ-ꠌꠞꠤꠀ ꠈꠣꠁꠛ।
JOH 10:10 ꠌꠥꠞꠦ ꠔ ꠈꠣꠟꠤ ꠌꠥꠞꠤ, ꠈꠥꠘ-ꠈꠣꠞꠣꠙꠤ ꠀꠞ ꠛꠤꠘꠣꠡ ꠇꠞꠣꠞ ꠘꠤꠅꠔꠦꠃ ꠀꠄ। ꠅꠁꠟꠦ ꠀꠝꠤ ꠀꠁꠍꠤ ꠎꠣꠔꠦ ꠔꠣꠞꠣ ꠎꠤꠘ꠆ꠖꠦꠉꠤ ꠙꠣꠄ, ꠀꠞ ꠅꠃ ꠎꠤꠘ꠆ꠖꠦꠉꠤ ꠙꠥꠞꠣꠙꠥꠞ ꠜꠥꠉ ꠇꠞꠦ।
JOH 10:11 “ꠀꠝꠤꠃ ꠀꠍꠟ ꠞꠣꠈꠣꠟ। ꠀꠍꠟ ꠞꠣꠈꠣꠟꠦ ꠔꠣꠞ ꠝꠦꠠꠣꠞ ꠟꠣꠉꠤ ꠘꠤꠎꠞ ꠎꠣꠘ ꠛꠤꠟꠣꠁ ꠖꠦꠄ।
JOH 10:12 ꠈꠣꠟꠤ ꠛꠦꠔꠘꠞ ꠟꠣꠉꠤ ꠎꠦ ꠎꠘꠦ ꠞꠣꠈꠣꠟꠤ ꠇꠞꠦ, ꠢꠦ ꠈꠣꠐꠤ ꠞꠣꠈꠣꠟ ꠘꠣꠄ ꠀꠞ ꠁ ꠝꠦꠠꠣꠁꠘꠅ ꠔꠣꠞ ꠘꠤꠎꠞ ꠘꠣꠄ। ꠛꠣꠊ ꠀꠅꠀꠔ ꠖꠦꠈꠟꠦꠃ ꠢꠦ ꠝꠦꠠꠣꠁꠘ ꠚꠣꠟꠣꠁꠀ ꠘꠤꠎꠞ ꠎꠣꠘ ꠛꠣꠌꠣꠄ।
JOH 10:13 ꠇꠣꠞꠘ ꠢꠦ ꠈꠣꠟꠤ ꠛꠦꠔꠘꠞ ꠀꠡꠣꠄ ꠞꠣꠈꠣꠟꠤ ꠇꠞꠦ, ꠝꠦꠠꠣꠁꠘ꠆ꠔꠞ ꠇꠕꠣ ꠌꠤꠘ꠆ꠔꠣꠅ ꠇꠞꠦ ꠘꠣ। ꠜꠣꠉꠦ ꠀꠁꠀ ꠝꠦꠠꠣꠁꠘ ꠗꠞꠤꠀ ꠘꠦꠄꠉꠤ, ꠔꠦꠃ ꠔꠣꠞꠣ ꠙꠣꠟ ꠜꠣꠋꠉꠤꠀ ꠍꠤꠔ꠆ꠞꠤ ꠎꠣꠄ।
JOH 10:14 ꠔꠦ ꠀꠝꠤꠃ ꠜꠣꠟꠣ ꠞꠣꠈꠣꠟ। ꠀꠝꠣꠞ ꠉꠣꠁꠛꠤ ꠛꠣꠚꠦ ꠀꠝꠣꠞꠦ ꠌꠤꠘꠂꠘ, ꠀꠞ ꠀꠝꠤꠅ ꠀꠝꠣꠞ ꠛꠣꠚꠞꠦ ꠌꠤꠘꠤ। ꠑꠤꠇ ꠅꠃꠟꠣ, ꠀꠝꠤ ꠀꠝꠣꠞ ꠝꠦꠠꠣꠁꠘ꠆ꠔꠞꠦꠅ ꠌꠤꠘꠤ, ꠀꠞ ꠀꠝꠣꠞ ꠝꠦꠠꠣꠁꠘ꠆ꠔꠦꠅ ꠀꠝꠣꠞꠦ ꠌꠤꠘꠂꠘ। ꠀꠝꠤ ꠀꠝꠣꠞ ꠝꠦꠠꠣ ꠙꠣꠟꠞ ꠟꠣꠉꠤ ꠘꠤꠎꠞ ꠎꠣꠘ ꠖꠤꠟꠣꠁꠞꠣꠝ।
JOH 10:16 ꠀꠝꠣꠞ ꠔ ꠀꠞꠅ ꠝꠦꠠꠣꠁꠘ ꠀꠍꠂꠘ, ꠎꠦꠔꠣ ꠁ ꠉꠥꠀꠟ-ꠊꠞꠅ ꠘꠣꠁ, ꠔꠣꠞꠣꠞꠦꠅ ꠀꠝꠤ ꠀꠘꠔꠦ ꠅꠁꠛ। ꠔꠣꠞꠣ ꠘꠤꠌ꠆ꠌꠄ ꠀꠝꠣꠞ ꠒꠣꠇ ꠢꠥꠘꠛꠣ, ꠔꠦꠃ ꠈꠣꠟꠤ ꠄꠇꠎꠘ ꠞꠣꠈꠣꠟ ꠀꠞ ꠄꠇꠐꠣ ꠙꠣꠟ ꠅꠁꠛ।
JOH 10:17 “ꠛꠣꠚꠦ ꠀꠝꠣꠞꠦ ꠝꠣꠄꠀ ꠇꠞꠂꠘ, ꠇꠣꠞꠘ ꠀꠝꠤ ꠀꠝꠣꠞ ꠎꠣꠘ ꠛꠤꠟꠣꠁꠝꠥ ꠎꠣꠔꠦ ꠢꠤꠞꠛꠣꠞ ꠚꠤꠞꠔ ꠘꠦꠁ।
JOH 10:18 ꠀꠝꠣꠞ ꠎꠣꠘ ꠇꠦꠃ ꠀꠝꠣꠞ ꠉꠦꠍ ꠕꠣꠇꠤ ꠇꠣꠠꠤꠀ ꠘꠤꠔ ꠘꠣꠄ, ꠅꠁꠟꠦ ꠀꠝꠤ ꠘꠤꠎꠦꠃ ꠎꠣꠘ ꠛꠤꠟꠣꠁꠝꠥ। ꠝꠘꠅ ꠞꠣꠈꠤꠅ, ꠎꠣꠘ ꠖꠦꠅꠀꠞ ꠈꠦꠝꠔꠣ ꠎꠦꠟꠣ ꠀꠝꠣꠞ ꠀꠍꠦ, ꠅꠃꠟꠣ ꠚꠤꠞꠔ ꠘꠦꠅꠀꠞ ꠈꠦꠝꠔꠣꠅ ꠀꠍꠦ। ꠁ ꠖꠣꠄꠁꠔ꠆ꠔ ꠀꠝꠤ ꠀꠝꠣꠞ ꠉꠣꠁꠛꠤ ꠛꠣꠚꠞ ꠉꠦꠍ ꠕꠣꠇꠤ ꠙꠣꠁꠍꠤ।”
JOH 10:19 ꠢꠎꠞꠔ ꠁꠍꠣꠞ ꠁꠔꠣ ꠝꠣꠔ-ꠇꠕꠣ ꠢꠥꠘꠤꠀ ꠁꠢꠥꠖꠤ ꠘꠦꠔꠣ ꠅꠇꠟꠞ ꠝꠣꠎꠦ ꠢꠤꠞꠛꠣꠞ ꠖꠟꠣꠖꠟꠤ ꠟꠣꠉꠤꠉꠦꠟ।
JOH 10:20 ꠔꠣꠞꠣꠞ ꠝꠣꠎꠞ ꠛꠃꠔꠦ ꠇꠁꠟ, “ꠅꠉꠥꠞꠦ ꠜꠥꠔꠦ ꠗꠞꠍꠦ, ꠢꠦ ꠙꠣꠉꠟ, ꠔꠥꠝꠞꠣ ꠅꠉꠥꠞ ꠝꠣꠔ ꠢꠥꠘꠞꠣꠄ ꠇꠦꠘꠦ?”
JOH 10:21 ꠀꠞ ꠛꠃꠔꠦ ꠇꠁꠟ, “ꠜꠥꠔꠦ ꠗꠞꠣ ꠝꠣꠘꠡꠞ ꠝꠣꠔ ꠔ ꠁꠟꠣ ꠘꠣꠄ। ꠜꠥꠔꠦ ꠇꠥꠘꠥ ꠀꠘ꠆ꠖꠣꠞ ꠌꠃꠈ ꠜꠣꠟꠣ ꠇꠞꠦ ꠘꠤ?”
JOH 10:22 ꠛꠣꠖꠦ ꠎꠦꠞꠥꠎꠣꠟꠦꠝ ꠇꠣꠛꠣ ꠊꠞꠞ ꠖꠈꠟ ꠙꠣꠅꠀꠞ ꠁꠖꠞ ꠡꠝꠄ ꠀꠁꠀ ꠀꠎꠤꠟ। ꠅꠃ ꠡꠝꠄ ꠀꠍꠤꠟ ꠡꠤꠔꠞ ꠖꠤꠘ।
JOH 10:23 ꠢꠎꠞꠔ ꠁꠍꠣ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠞ ꠛꠣꠖꠡꠣ ꠍꠥꠟꠣꠁꠝꠣꠘꠞ ꠛꠣꠞꠤꠘ꠆ꠖꠣꠔ ꠀꠐꠣ-ꠃꠐꠤ ꠇꠞꠞꠣ।
JOH 10:24 ꠄꠞꠝꠣꠎꠦ ꠁꠢꠥꠖꠤ ꠘꠦꠔꠣ ꠅꠇꠟ ꠁꠍꠣꠞ ꠌꠣꠁꠞꠅꠛꠣꠄ ꠖꠟꠣ ꠅꠁꠀ ꠇꠁꠟꠣ, “ꠀꠞ ꠇꠔꠖꠤꠘ ꠔꠥꠝꠤ ꠀꠝꠞꠣꠞꠦ ꠟꠐꠇꠣꠁꠀ ꠞꠣꠈꠔꠣꠄ? ꠔꠥꠝꠤ ꠎꠥꠖꠤ ꠢꠣꠍꠣꠞꠞ ꠀꠟ-ꠝꠍꠤ ꠅꠅ, ꠔꠦ ꠙꠞꠤꠡ꠆ꠇꠣꠞ ꠇꠞꠤ ꠀꠝꠞꠣꠞꠦ ꠇꠅ।”
JOH 10:25 ꠔꠦꠃ ꠁꠍꠣꠄ ꠎꠥꠀꠙ ꠖꠤꠟꠣ, “ꠀꠝꠤ ꠔ ꠇꠁꠟꠣꠝ, ꠅꠁꠟꠦ ꠀꠙꠘꠣꠞꠣ ꠄꠇꠤꠘ ꠇꠞꠞꠣ ꠘꠣ, ꠀꠞ ꠀꠝꠣꠞ ꠉꠣꠁꠛꠤ ꠛꠣꠚꠞ ꠘꠣꠝꠦ ꠀꠝꠤ ꠎꠦ ꠇꠣꠝ ꠇꠞꠤ, ꠁꠔꠣꠄꠅ ꠀꠝꠣꠞ ꠛꠦꠙꠣꠞꠦ ꠡꠣꠇ꠆ꠇꠤ ꠖꠦꠞ,
JOH 10:26 ꠔꠣ-ꠅ ꠀꠙꠘꠣꠞꠣ ꠄꠇꠤꠘ ꠇꠞꠞꠣ ꠘꠣ, ꠇꠣꠞꠘ ꠀꠙꠘꠣꠞꠣ ꠀꠝꠣꠞ ꠙꠣꠟꠞ ꠝꠦꠠꠣ ꠘꠣꠄ।
JOH 10:27 ꠀꠝꠣꠞ ꠝꠦꠠꠣꠁꠘ꠆ꠔꠦ ꠀꠝꠣꠞ ꠒꠣꠇ ꠢꠥꠘꠂꠘ। ꠀꠝꠤ ꠔ ꠔꠣꠞꠣꠞꠦ ꠌꠤꠘꠤ ꠀꠞ ꠔꠣꠞꠣꠅ ꠀꠝꠣꠞ ꠈꠞꠦ ꠈꠞꠦ ꠞꠂꠘ।
JOH 10:28 ꠀꠝꠤ ꠔꠣꠞꠣꠞꠦ ꠀꠈꠦꠞꠤ ꠎꠤꠘ꠆ꠖꠦꠉꠤ ꠖꠣꠘ ꠇꠞꠤ, ꠔꠣꠞꠣ ꠇꠥꠘꠥ ꠡꠝꠄ ꠛꠤꠘꠣꠡ ꠅꠁꠔꠣ ꠘꠣꠄ। ꠇꠦꠃ ꠀꠝꠣꠞ ꠉꠦꠍ ꠕꠘꠦ ꠔꠣꠞꠣꠞꠦ ꠇꠣꠠꠤꠀ ꠘꠤꠔ ꠘꠣꠄ।
JOH 10:29 ꠀꠝꠣꠞ ꠎꠦ ꠉꠣꠁꠛꠤ ꠛꠣꠚꠦ ꠔꠣꠞꠣꠞꠦ ꠀꠝꠣꠞ ꠀꠔꠅ ꠖꠤꠍꠂꠘ, ꠔꠣꠁꠘ ꠢꠇꠟ ꠕꠣꠇꠤ ꠝꠢꠣꠘ। ꠔꠣꠘ ꠀꠔ ꠕꠣꠇꠤ ꠇꠦꠃ ꠇꠥꠘ꠆ꠔꠣ ꠇꠣꠠꠤꠀ ꠘꠤꠔ ꠙꠣꠞꠦ ꠘꠣ।
JOH 10:30 ꠀꠝꠤ ꠀꠞ ꠛꠣꠛꠣ, ꠀꠝꠞꠣ ꠄꠇ।”
JOH 10:31 ꠔꠦꠃ ꠁꠢꠥꠖꠤ ꠘꠦꠔꠣ ꠅꠇꠟꠦ ꠢꠤꠞꠛꠣꠞ ꠙꠣꠔ꠆ꠔꠞ ꠟꠁꠟꠣ ꠔꠣꠘꠞꠦ ꠝꠣꠞꠣꠞ ꠟꠣꠉꠤ।
JOH 10:32 ꠁꠍꠣꠄ ꠔꠣꠞꠣꠞꠦ ꠇꠁꠟꠣ, “ꠉꠣꠁꠛꠤ ꠛꠣꠚꠞ ꠢꠥꠇꠥꠝ ꠝꠣꠚꠤꠇ ꠛꠃꠔ ꠜꠣꠟꠣ ꠜꠣꠟꠣ ꠇꠣꠝ ꠀꠝꠤ ꠀꠙꠘꠣꠁꠘ꠆ꠔꠞꠦ ꠖꠦꠈꠣꠁꠍꠤ। ꠁꠔꠣꠞ ꠝꠣꠎꠦ ꠇꠥꠘ ꠇꠣꠝꠞ ꠟꠣꠉꠤ ꠀꠙꠘꠣꠞꠣ ꠀꠝꠣꠞꠦ ꠙꠣꠔ꠆ꠔꠞ ꠝꠣꠞꠔꠣ ꠌꠣꠁꠞꠣ?”
JOH 10:33 ꠔꠣꠞꠣ ꠇꠁꠟꠣ, “ꠜꠣꠟꠣ ꠇꠥꠘꠥ ꠇꠣꠝꠞ ꠟꠣꠉꠤ ꠀꠝꠞꠣ ꠔꠞꠦ ꠙꠣꠔ꠆ꠔꠞ ꠝꠣꠞꠤꠀꠞ ꠘꠣ, ꠔꠥꠁ ꠔ ꠡꠤꠞꠤꠇꠤ ꠇꠞꠞꠦ, ꠄꠞꠟꠣꠉꠤꠃ ꠙꠣꠔ꠆ꠔꠞ ꠝꠣꠞꠝꠥ। ꠝꠣꠘꠥꠡ ꠅꠁꠀ ꠔꠥꠁ ꠘꠤꠎꠞꠦ ꠀꠟ꠆ꠟꠣ ꠢꠤꠡꠣꠛꠦ ꠖꠣꠛꠤ ꠇꠞꠞꠦ।”
JOH 10:34 ꠔꠣꠁꠘ ꠇꠁꠟꠣ, “ꠀꠙꠘꠣꠞꠣꠞ ꠡꠞꠤꠅꠔꠅ ꠟꠦꠈꠣ ꠀꠍꠦ ꠘꠣ ꠘꠤ, ‘ꠀꠝꠤ ꠇꠁꠟꠣꠝ, ꠔꠥꠝꠞꠣꠃ ꠄꠟꠣꠢꠤ’?
JOH 10:35 ꠔꠦ ꠀꠟ꠆ꠟꠣꠞ ꠇꠣꠟꠣꠝ ꠎꠦꠞꠣꠞ ꠉꠦꠍꠦ ꠘꠣꠎꠤꠟ ꠅꠁꠍꠤꠟ, ꠄꠞꠣꠞꠦ ꠔ ꠔꠣꠁꠘ ꠘꠤꠎꠦꠃ ꠀꠟ꠆ꠟꠣꠞ ꠟꠣꠈꠣꠘ ꠇꠁꠀ ꠒꠣꠇꠤꠍꠂꠘ। ꠀꠞ ꠙꠣꠇ ꠇꠤꠔꠣꠛꠞ ꠇꠕꠣ ꠔ ꠛꠣꠖ ꠖꠦꠅꠀ ꠎꠣꠄ ꠘꠣ।
JOH 10:36 ꠔꠦ ꠉꠣꠁꠛꠤ ꠛꠣꠚꠦ ꠎꠣꠘꠞꠦ ꠘꠤꠎꠞ ꠟꠣꠉꠤ ꠛꠣꠍꠤꠀ ꠙꠍꠘ꠆ꠖ ꠇꠞꠟꠣ ꠀꠞ ꠖꠥꠘꠤꠀꠔ ꠙꠣꠑꠣꠁꠟꠣ, ꠅꠃ ꠀꠝꠤ ꠎꠦꠛꠟꠣ ꠇꠁꠟꠣꠝ, ꠀꠝꠤ ꠁꠛꠘꠥꠟ꠆ꠟꠣ, ꠔꠦ ꠀꠙꠘꠣꠞꠣ ꠇꠤꠟꠣ ꠇꠁꠞꠣ, ꠔꠥꠁ ꠡꠤꠞꠤꠇꠤ ꠇꠞꠞꠦ?
JOH 10:37 ꠀꠝꠤ ꠎꠥꠖꠤ ꠀꠝꠣꠞ ꠉꠣꠁꠛꠤ ꠛꠣꠚꠞ ꠇꠣꠝ ꠘꠣ ꠇꠞꠤ, ꠔꠦ ꠀꠙꠘꠣꠞꠣ ꠀꠝꠣꠞ ꠃꠙꠞꠦ ꠁꠝꠣꠘ ꠀꠘꠛꠣ ꠘꠣ।
JOH 10:38 ꠅꠁꠟꠦ ꠀꠝꠤ ꠎꠥꠖꠤ ꠀꠝꠣꠞ ꠛꠣꠚꠞ ꠢꠇꠟ ꠇꠣꠝ ꠇꠞꠤꠀ ꠕꠣꠇꠤ, ꠔꠦ ꠀꠝꠣꠞ ꠃꠙꠞꠦ ꠁꠝꠣꠘ ꠘꠣ ꠀꠘꠟꠦꠅ ꠁꠔꠣ ꠄꠇꠤꠘ ꠇꠞꠃꠇ꠆ꠇꠣ। ꠔꠦꠃ ꠀꠙꠘꠣꠞꠣ ꠎꠣꠘꠛꠣ, ꠉꠣꠁꠛꠤ ꠛꠣꠚ ꠀꠝꠣꠞ ꠝꠣꠎꠦꠃ ꠀꠍꠂꠘ, ꠀꠞ ꠀꠝꠤꠅ ꠔꠣꠘ ꠝꠣꠎꠦ ꠀꠍꠤ।”
JOH 10:39 ꠅꠃ ꠡꠝꠄ ꠢꠤꠞꠛꠣꠞ ꠔꠣꠞꠣ ꠁꠍꠣꠞꠦ ꠗꠞꠣꠞ ꠌꠦꠡ꠆ꠐꠣ ꠇꠞꠟꠣ, ꠅꠁꠟꠦ ꠔꠣꠁꠘ ꠁꠘ ꠕꠘꠦ ꠉꠣꠁꠛ ꠅꠁꠉꠦꠟꠣ।
JOH 10:40 ꠛꠣꠖꠦ ꠔꠣꠁꠘ ꠢꠤꠞꠛꠣꠞ ꠎꠞ꠆ꠖꠣꠘ ꠉꠣꠋꠉꠞ ꠢꠙꠣꠞꠅ ꠉꠤꠀ ꠞꠁꠟꠣ। ꠀꠉꠦ ꠅꠃ ꠎꠣꠉꠣꠔ ꠢꠎꠞꠔ ꠄꠢꠤꠀꠄ ꠝꠣꠘꠡꠞꠦ ꠔꠃꠛꠣꠞ ꠉꠥꠍꠟ ꠖꠤꠔꠣ।
JOH 10:41 ꠢꠘꠅ ꠛꠃꠔ ꠝꠣꠘꠥꠡ ꠔꠣꠘ ꠉꠦꠍꠦ ꠀꠁꠟ ꠀꠞ ꠝꠣꠔꠣ-ꠝꠣꠔꠤ ꠇꠞꠟ, “ꠄꠢꠤꠀ ꠘꠛꠤꠄ ꠔ ꠇꠥꠘꠥ ꠇꠦꠞꠣꠝꠔꠤ ꠘꠤꠡꠣꠘꠣ ꠖꠦꠈꠣꠁꠍꠂꠘ ꠘꠣ, ꠅꠁꠟꠦ ꠔꠣꠁꠘ ꠢꠎꠞꠔ ꠁꠍꠣꠞ ꠛꠦꠙꠣꠞꠦ ꠎꠔꠔꠣ ꠇꠁꠍꠟꠣ, ꠁꠔꠣ ꠙꠥꠞꠣꠙꠥꠞ ꠢꠣꠍꠣ।”
JOH 10:42 ꠅꠈꠣꠘ ꠛꠥꠎꠤꠀ ꠢꠘꠞ ꠛꠃꠔ ꠝꠣꠘꠡꠦ ꠢꠎꠞꠔ ꠁꠍꠣꠞ ꠃꠙꠞꠦ ꠁꠝꠣꠘ ꠀꠘꠟꠣ।
JOH 11:1 ꠟꠣꠍꠣꠞ ꠘꠣꠝꠦ ꠄꠇꠎꠘ ꠝꠣꠘꠥꠡ ꠛꠦꠝꠣꠞ ꠀꠍꠟꠣ। ꠔꠣꠘ ꠛꠣꠠꠤ ꠛꠣꠄꠔ-ꠀꠘꠤꠀ ꠉꠣꠃꠔ, ꠝꠞꠤꠅꠝ ꠀꠞ ꠝꠣꠞꠕꠣ ꠘꠣꠝꠞ ꠔꠣꠘ ꠖꠥꠁ ꠛꠁꠘꠅ ꠅꠃ ꠉꠣꠃꠔ ꠞꠁꠔꠣ।
JOH 11:2 ꠇꠄꠖꠤꠘ ꠛꠣꠖꠦ ꠅꠃ ꠝꠞꠤꠅꠝꠦꠃ ꠁꠍꠣꠞ ꠙꠣꠅ-ꠅ ꠈꠥꠡꠛꠄ ꠀꠟꠣ ꠀꠔꠞ ꠝꠣꠈꠣꠁꠀ, ꠘꠤꠎꠞ ꠝꠣꠕꠣꠞ ꠌꠥꠟꠖꠤ ꠙꠣꠅ ꠚꠥꠍꠣꠁ ꠖꠤꠛꠣ। ꠅꠃ ꠝꠞꠤꠅꠝꠞ ꠜꠣꠁ ꠅꠁꠟꠣ ꠛꠦꠝꠣꠞꠤ ꠟꠣꠍꠣꠞ।
JOH 11:3 ꠄꠞꠟꠣꠉꠤ ꠔꠣꠘ ꠛꠁꠘꠣꠁꠘ꠆ꠔꠦ ꠅꠈꠣꠘ ꠇꠁꠀ ꠢꠎꠞꠔ ꠁꠍꠣꠞ ꠉꠦꠍꠦ ꠈꠛꠞ ꠙꠣꠑꠣꠁꠟꠣ, “ꠢꠥꠎꠥꠞ, ꠀꠙꠘꠣꠞ ꠝꠣꠄꠀꠞ ꠝꠣꠘꠥꠡ ꠈꠥꠛ ꠛꠦꠝꠣꠞ।”
JOH 11:4 ꠈꠛꠞ ꠙꠣꠁꠀ ꠁꠍꠣꠄ ꠇꠁꠟꠣ, “ꠁ ꠛꠦꠝꠣꠞ ꠔ ꠔꠣꠞ ꠝꠃꠔꠞ ꠟꠣꠉꠤ ꠅꠁꠍꠦ ꠘꠣ, ꠛꠞꠋ ꠀꠟ꠆ꠟꠣꠞ ꠝꠢꠤꠝꠣ ꠎꠣꠁꠞꠞ ꠟꠣꠉꠤꠃ ꠅꠁꠍꠦ, ꠎꠣꠔꠦ ꠄꠞ ꠝꠣꠎꠖꠤ ꠀꠝꠤ ꠁꠛꠘꠥꠟ꠆ꠟꠣꠞ ꠝꠢꠤꠝꠣꠅ ꠎꠣꠁꠞ ꠅꠄ।”
JOH 11:5 ꠢꠎꠞꠔ ꠁꠍꠣꠄ ꠛꠤꠛꠤ ꠝꠣꠞꠕꠣ, ꠔꠣꠘ ꠛꠁꠘ ꠀꠞ ꠟꠣꠍꠣꠞꠞꠦ ꠈꠥꠛ ꠝꠣꠄꠀ ꠇꠞꠔꠣ।
JOH 11:6 ꠟꠣꠍꠣꠞꠞ ꠛꠦꠝꠣꠞꠞ ꠇꠕꠣ ꠢꠥꠘꠣꠞ ꠛꠣꠖꠦꠅ ꠁꠍꠣ ꠎꠦ ꠎꠣꠉꠣꠔ ꠀꠍꠟꠣ, ꠢꠘꠅ ꠀꠞꠅ ꠖꠥꠁꠖꠤꠘ ꠞꠁꠟꠣ।
JOH 11:7 ꠛꠣꠖꠦ ꠔꠣꠘ ꠍꠣꠢꠣꠛꠤ ꠅꠇꠟꠞꠦ ꠇꠁꠟꠣ, “ꠀꠅ, ꠀꠝꠞꠣ ꠢꠤꠞꠛꠣꠞ ꠄꠢꠥꠖꠤꠀ ꠎꠤꠟꠣꠔ ꠎꠣꠁ।”
JOH 11:8 ꠍꠣꠢꠣꠛꠤ ꠅꠇꠟꠦ ꠇꠁꠟꠣ, “ꠢꠥꠎꠥꠞ, ꠅꠃ ꠇꠄꠖꠤꠘ ꠀꠉꠦ ꠢꠘꠞ ꠝꠣꠘꠡꠦ ꠀꠙꠘꠣꠞꠦ ꠙꠣꠔ꠆ꠔꠞ ꠝꠣꠞꠔꠣ ꠌꠣꠁꠟꠣ, ꠅꠈꠘ ꠀꠙꠘꠦ ꠢꠤꠞꠛꠣꠞ ꠢꠘꠅ ꠎꠣꠁꠔꠣ ꠘꠤ?”
JOH 11:9 ꠔꠣꠁꠘ ꠇꠁꠟꠣ, “ꠖꠤꠘꠞ ꠛꠦꠟꠣ ꠔ ꠛꠣꠞꠅ ꠊꠘ꠆ꠐꠣ ꠀꠍꠦ, ꠇꠦꠃ ꠎꠥꠖꠤ ꠖꠤꠘꠞ ꠛꠦꠟꠣ ꠌꠟꠣ-ꠚꠤꠞꠣ ꠇꠞꠦ, ꠢꠦ ꠃꠡ꠆ꠐꠣ ꠈꠣꠄ ꠘꠣ, ꠇꠣꠞꠘ ꠢꠦ ꠅꠃ ꠖꠥꠘꠤꠀꠞ ꠚꠞ ꠖꠦꠈꠦ।
JOH 11:10 ꠀꠞ ꠇꠦꠃ ꠎꠥꠖꠤ ꠞꠣꠁꠔꠞ ꠛꠦꠟꠣ ꠌꠟꠣ-ꠚꠤꠞꠣ ꠇꠞꠦ, ꠢꠦ ꠃꠡ꠆ꠐꠣ ꠈꠣꠄ, ꠇꠣꠞꠘ ꠔꠣꠞ ꠝꠣꠎꠦ ꠇꠥꠘꠥ ꠚꠞ ꠘꠣꠁ।”
JOH 11:11 ꠅꠈꠣꠘ ꠇꠁꠀ ꠢꠣꠞꠤ ꠔꠣꠘ ꠍꠣꠢꠣꠛꠤ ꠅꠇꠟꠞꠦ ꠇꠁꠟꠣ, “ꠢꠥꠘꠅ, ꠀꠝꠞꠣꠞ ꠖꠥꠡ꠆ꠔ ꠟꠣꠍꠣꠞ ꠊꠥꠝꠣꠁ ꠉꠦꠍꠦꠉꠤ, ꠀꠝꠤ ꠔꠣꠞꠦ ꠢꠎꠣꠉ ꠇꠞꠣꠔ ꠎꠣꠁꠀꠞ।”
JOH 11:12 ꠁꠈꠣꠘ ꠢꠥꠘꠤꠀ ꠍꠣꠢꠣꠛꠤ ꠅꠇꠟꠦ ꠇꠁꠟꠣ, “ꠢꠥꠎꠥꠞ, ꠢꠦ ꠎꠥꠖꠤ ꠊꠥꠝꠅ ꠕꠣꠇꠦ, ꠔꠦ ꠔ ꠜꠣꠟꠣ ꠅꠁꠎꠤꠛ।”
JOH 11:13 ꠁꠍꠣꠄ ꠟꠣꠍꠣꠞꠞ ꠝꠃꠔꠞ ꠇꠕꠣ ꠇꠁꠍꠟꠣ, ꠅꠁꠟꠦ ꠔꠣꠞꠣ ꠝꠘꠅ ꠇꠞꠟꠣ, ꠔꠣꠁꠘ ꠄꠝꠘꠦ ꠊꠥꠝꠞ ꠇꠕꠣ ꠇꠁꠍꠂꠘ।
JOH 11:14 ꠔꠦꠃ ꠁꠍꠣꠄ ꠙꠞꠤꠡ꠆ꠇꠣꠞ ꠇꠞꠤ ꠇꠁꠟꠣ, “ꠟꠣꠍꠣꠞ ꠝꠣꠞꠣ ꠉꠦꠍꠦ।
JOH 11:15 ꠅꠁꠟꠦ ꠀꠝꠤ ꠔꠥꠝꠞꠣꠞ ꠇꠕꠣ ꠝꠘꠅ ꠇꠞꠤꠀ ꠈꠥꠡꠤ ꠅꠁꠍꠤ, ꠀꠝꠤ ꠢꠤꠘꠅ ꠀꠍꠟꠣꠝ ꠘꠣ, ꠎꠣꠔꠦ ꠔꠥꠝꠞꠣ ꠄꠇꠤꠘ ꠇꠞꠔꠣꠄ ꠙꠣꠞ। ꠅꠈꠘ ꠀꠅ, ꠀꠝꠞꠣ ꠟꠣꠍꠣꠞꠞ ꠉꠦꠍꠦ ꠎꠣꠁ।”
JOH 11:16 ꠔꠦꠃ ꠔꠣꠘ ꠍꠣꠢꠣꠛꠤ ꠕꠥꠝꠣꠍꠦ ꠟꠉꠞ ꠍꠣꠢꠣꠛꠤ ꠅꠇꠟꠞꠦ ꠇꠁꠟꠣ, “ꠀꠅ ꠘꠣ, ꠀꠝꠞꠣꠅ ꠎꠣꠁ, ꠎꠣꠔꠦ ꠔꠣꠘ ꠟꠉꠦ ꠝꠞꠔꠣꠝ ꠙꠣꠞꠤ।” ꠅꠃ ꠕꠥꠝꠣꠍꠞꠦ ꠎꠝꠎ ꠇꠁꠀ ꠒꠣꠇꠣ ꠅꠄ।
JOH 11:17 ꠢꠘꠅ ꠉꠤꠀ ꠢꠣꠞꠟꠦ ꠢꠎꠞꠔ ꠁꠍꠣꠄ ꠢꠥꠘꠟꠣ, ꠔꠣꠁꠘ ꠎꠣꠅꠀꠞ ꠌꠣꠁꠞ ꠖꠤꠘ ꠀꠉꠦꠃ ꠟꠣꠍꠣꠞꠞꠦ ꠖꠣꠚꠘ ꠇꠞꠣ ꠅꠁꠉꠦꠍꠦ।
JOH 11:18 ꠎꠦꠞꠥꠎꠣꠟꠦꠝ ꠐꠣꠃꠘ ꠕꠣꠇꠤ ꠅꠃ ꠛꠣꠄꠔ-ꠀꠘꠤꠀ ꠉꠣꠃ ꠅꠘꠥꠝꠣꠘ ꠖꠥꠁ ꠝꠣꠁꠟ ꠖꠥꠞꠁ ꠀꠍꠤꠟ।
JOH 11:19 ꠟꠣꠍꠣꠞꠞ ꠝꠃꠔꠞ ꠛꠣꠖꠦ ꠔꠣꠘ ꠛꠁꠘ ꠛꠤꠛꠤ ꠝꠣꠞꠕꠣ ꠀꠞ ꠝꠞꠤꠅꠝꠞꠦ ꠛꠥꠎ ꠖꠦꠅꠀꠞ ꠟꠣꠉꠤ ꠁꠢꠥꠖꠤ ꠡꠝꠣꠎꠞ ꠛꠃꠔ ꠝꠣꠘꠥꠡ ꠀꠁꠟꠣ।
JOH 11:20 ꠄꠞꠝꠣꠎꠦ ꠢꠎꠞꠔ ꠁꠍꠣꠄ ꠔꠡꠞꠤꠚ ꠀꠘꠞꠣ ꠢꠥꠘꠤꠀ ꠛꠤꠛꠤ ꠝꠣꠞꠕꠣ ꠔꠣꠘ ꠟꠉꠦ ꠖꠦꠈꠣ ꠇꠞꠣꠔ ꠉꠦꠟꠣ, ꠅꠁꠟꠦ ꠝꠞꠤꠅꠝ ꠊꠞꠅ ꠛꠁ ꠞꠁꠟꠣ।
JOH 11:21 ꠛꠤꠛꠤ ꠝꠣꠞꠕꠣꠄ ꠁꠍꠣꠞꠦ ꠇꠁꠟꠣ, “ꠢꠥꠎꠥꠞ, ꠀꠙꠘꠦ ꠎꠥꠖꠤ ꠅꠘꠅ ꠞꠁꠔꠣ, ꠔꠦ ꠀꠝꠣꠞ ꠜꠣꠁꠉꠥ ꠝꠞꠟ ꠘꠣ ꠅꠘꠦ।
JOH 11:22 ꠅꠁꠟꠦ ꠄꠞꠛꠣꠖꠦꠅ ꠀꠝꠤ ꠎꠣꠘꠤ, ꠀꠙꠘꠦ ꠀꠟ꠆ꠟꠣꠞ ꠉꠦꠍꠦ ꠎꠦꠔꠣ ꠌꠣꠁꠛꠣ, ꠔꠣꠁꠘ ꠀꠙꠘꠣꠞꠦ ꠅꠔꠣ ꠖꠤꠛꠣ।”
JOH 11:23 ꠁꠍꠣꠄ ꠇꠁꠟꠣ, “ꠢꠥꠘꠅ, ꠔꠥꠝꠣꠞ ꠜꠣꠁ ꠢꠤꠞꠛꠣꠞ ꠎꠤꠘ꠆ꠖꠣ ꠅꠁꠀ ꠃꠑꠛ।”
JOH 11:24 ꠔꠦꠃ ꠝꠣꠞꠕꠣꠄ ꠇꠁꠟꠣ, “ꠎꠤꠅꠄ, ꠀꠝꠤ ꠎꠣꠘꠤ ꠇꠤꠀꠝꠔꠞ ꠖꠤꠘ ꠎꠦꠛꠟꠣ ꠝꠥꠞ꠆ꠖꠣ ꠅꠇꠟ ꠎꠤꠘ꠆ꠖꠣ ꠅꠁꠛꠣ, ꠅꠃ ꠡꠝꠄ ꠢꠦ-ꠅ ꠎꠤꠘ꠆ꠖꠣ ꠅꠁꠀ ꠃꠑꠛ।”
JOH 11:25 ꠁꠍꠣꠄ ꠝꠣꠞꠕꠣꠞꠦ ꠇꠁꠟꠣ, “ꠀꠝꠤꠃ ꠔ ꠇꠤꠀꠝꠔ ꠀꠞ ꠎꠤꠘ꠆ꠖꠦꠉꠤ। ꠎꠦ ꠎꠘꠦ ꠀꠝꠣꠞ ꠃꠙꠞꠦ ꠁꠝꠣꠘ ꠀꠘꠦ ꠢꠦ ꠝꠞꠟꠦꠅ ꠎꠤꠘ꠆ꠖꠣ ꠅꠁꠛ।
JOH 11:26 ꠀꠞ ꠎꠦ ꠎꠘꠦ ꠀꠍꠟ ꠎꠤꠘ꠆ꠖꠣ ꠅꠁꠀ ꠀꠝꠣꠞ ꠃꠙꠞꠦ ꠁꠝꠣꠘ ꠀꠘꠦ, ꠢꠦ ꠇꠥꠘꠥꠖꠤꠘꠅ ꠝꠞꠔ ꠘꠣꠄ। ꠔꠥꠝꠤ ꠁꠈꠣꠘ ꠄꠇꠤꠘ ꠇꠞ ꠘꠤ?”
JOH 11:27 ꠝꠣꠞꠕꠣꠄ ꠇꠁꠟꠣ, “ꠎꠤꠅꠄ ꠢꠥꠎꠥꠞ, ꠀꠝꠤ ꠁꠝꠣꠘ ꠀꠘꠍꠤ, ꠀꠟ꠆ꠟꠣꠞ ꠅꠀꠖꠣ ꠇꠞꠣ ꠎꠦ ꠎꠘꠦ ꠖꠥꠘꠤꠀꠔ ꠔꠡꠞꠤꠚ ꠀꠘꠣꠞ ꠇꠕꠣ, ꠀꠙꠘꠦꠃ ꠢꠃ ꠀꠟ-ꠝꠍꠤ ꠁꠛꠘꠥꠟ꠆ꠟꠣ, ꠀꠟ꠆ꠟꠣꠞ ꠈꠣꠍ ꠝꠣꠄꠀꠞ ꠎꠘ।”
JOH 11:28 ꠅꠈꠣꠘ ꠇꠁꠀ ꠝꠣꠞꠕꠣꠄ ꠉꠤꠀ ꠔꠣꠘ ꠛꠁꠘ ꠝꠞꠤꠅꠝꠞꠦ ꠌꠥꠙꠔꠦ ꠒꠣꠇꠤꠀ ꠘꠤꠀ ꠇꠁꠟꠣ, “ꠢꠥꠘꠅ, ꠢꠥꠎꠥꠞ ꠅꠘꠅ ꠀꠍꠂꠘ, ꠔꠣꠁꠘ ꠔꠥꠝꠣꠞꠦ ꠒꠣꠇꠤꠞꠣ।”
JOH 11:29 ꠔꠦꠃ ꠝꠞꠤꠅꠝ ꠎꠟꠖꠤ ꠇꠞꠤ ꠁꠍꠣꠞ ꠇꠣꠘ꠆ꠖꠣꠔ ꠉꠦꠟꠣ।
JOH 11:30 ꠁꠍꠣ ꠅꠃ ꠡꠝꠄꠅ ꠉꠣꠃꠞ ꠜꠤꠔꠞꠦ ꠢꠣꠝꠣꠁꠍꠂꠘ ꠘꠣ, ꠝꠣꠞꠕꠣꠄ ꠔꠣꠘ ꠟꠉꠦ ꠎꠦꠘꠅ ꠖꠦꠈꠣ ꠇꠞꠍꠟꠣ, ꠔꠣꠁꠘ ꠢꠘꠅꠃ ꠃꠛꠣꠁ ꠞꠁꠍꠟꠣ।
JOH 11:31 ꠀꠞ ꠊꠞꠞ ꠜꠤꠔꠞꠦ ꠎꠦꠔꠣ ꠁꠢꠥꠖꠤ ꠅꠇꠟꠦ ꠝꠞꠤꠅꠝꠞꠦ ꠛꠥꠎ ꠖꠦꠅꠀꠔ ꠀꠍꠟꠣ, ꠝꠞꠤꠅꠝꠦ ꠀꠈꠔꠣꠃ ꠛꠣꠞꠦ ꠎꠣꠅꠀꠔ ꠖꠦꠈꠤꠀ ꠔꠣꠞꠣ ꠔꠣꠘ ꠈꠞꠦ ꠈꠞꠦ ꠉꠦꠟꠣ। ꠔꠣꠞꠣ ꠝꠘꠅ ꠇꠞꠟ, ꠝꠞꠤꠅꠝ ꠇꠄꠛꠞꠞ ꠉꠦꠍꠦ ꠇꠣꠘ꠆ꠖꠣ-ꠇꠣꠐꠤ ꠇꠞꠣꠔ ꠎꠣꠁꠞꠣ।
JOH 11:32 ꠁꠍꠣ ꠎꠦ ꠎꠣꠉꠣꠔ ꠀꠍꠟꠣ, ꠝꠞꠤꠅꠝꠅ ꠢꠘꠅ ꠉꠦꠟꠣ ꠀꠞ ꠁꠍꠣꠞꠦ ꠖꠦꠈꠤꠀ ꠔꠣꠘ ꠙꠣꠅ-ꠅ ꠙꠠꠤꠀ ꠇꠁꠟꠣ, “ꠢꠥꠎꠥꠞ, ꠀꠙꠘꠦ ꠎꠥꠖꠤ ꠅꠘꠅ ꠕꠣꠇꠔꠣ, ꠔꠦ ꠀꠝꠣꠞ ꠜꠣꠁꠉꠥ ꠝꠞꠟ ꠘꠣ ꠅꠘꠦ।”
JOH 11:33 ꠝꠞꠤꠅꠝ ꠀꠞ ꠔꠣꠘ ꠟꠉꠞ ꠁꠢꠥꠖꠤ ꠅꠇꠟꠞ ꠇꠣꠘ꠆ꠖꠘ-ꠀꠢꠣꠎꠣꠞꠤ ꠖꠦꠈꠤꠀ ꠢꠎꠞꠔ ꠁꠍꠣꠞ ꠖꠤꠟꠞ ꠞꠥꠢꠥ ꠉꠞꠝ ꠅꠁꠉꠦꠟ, ꠔꠣꠁꠘ ꠇꠣꠔꠞ ꠅꠁꠉꠦꠟꠣ।
JOH 11:34 ꠔꠣꠁꠘ ꠄꠞꠣꠞꠦ ꠎꠤꠇꠣꠁꠟꠣ, “ꠟꠣꠍꠣꠞꠞꠦ ꠇꠥꠀꠁ ꠖꠣꠚꠘ ꠇꠞꠍ?” ꠔꠣꠞꠣ ꠇꠁꠟꠣ, “ꠢꠥꠎꠥꠞ ꠀꠃꠇ꠆ꠇꠣ, ꠖꠦꠈꠤ ꠎꠣꠃꠇ꠆ꠇꠣ।”
JOH 11:35 ꠅꠃ ꠡꠝꠄ ꠁꠍꠣꠄ ꠇꠣꠘ꠆ꠖꠤ ꠖꠤꠟꠣ।
JOH 11:36 ꠔꠣꠘ ꠇꠣꠘ꠆ꠖꠘ ꠖꠦꠈꠤꠀ ꠢꠘꠞ ꠄꠞꠣ ꠇꠁꠟꠣ, “ꠖꠦꠈꠞꠣꠄ ꠘꠤ, ꠔꠣꠁꠘ ꠟꠣꠍꠣꠞꠞꠦ ꠇꠔ ꠝꠣꠄꠀ ꠇꠞꠔꠣ!”
JOH 11:37 ꠅꠁꠟꠦ ꠇꠥꠘꠥ ꠇꠥꠘꠥ ꠎꠘꠦ ꠇꠁꠟꠣ, “ꠎꠦꠁꠘ ꠀꠘ꠆ꠖꠣꠞ ꠌꠃꠈ ꠜꠣꠟꠣ ꠇꠞꠍꠂꠘ, ꠔꠣꠁꠘ ꠁꠟꠣ ꠇꠥꠘ꠆ꠔꠣ ꠇꠞꠔꠣ ꠙꠣꠞꠟꠣ ꠅꠘꠦ ꠘꠣ ꠘꠤ, ꠎꠣꠔꠦ ꠟꠣꠍꠣꠞꠉꠥ ꠘꠣ ꠝꠞꠦ?”
JOH 11:38 ꠁꠔꠣ ꠢꠥꠘꠤꠀ ꠢꠎꠞꠔ ꠁꠍꠣꠞ ꠖꠤꠟꠞ ꠞꠥꠢꠥ ꠢꠤꠞꠛꠣꠞ ꠉꠞꠝ ꠅꠁꠉꠦꠟ, ꠔꠣꠁꠘ ꠟꠣꠍꠣꠞꠞ ꠇꠄꠛꠞꠞ ꠗꠣꠞꠅ ꠉꠦꠟꠣ। ꠁ ꠇꠄꠛꠞ ꠀꠍꠤꠟ ꠉꠥꠢꠣꠞ ꠟꠣꠈꠣꠘ ꠄꠇ ꠉꠣꠔꠅ ꠀꠞ ꠇꠄꠛꠞꠞ ꠝꠥꠈꠅ ꠄꠇ ꠙꠣꠔ꠆ꠔꠞ ꠖꠦꠅꠀ ꠀꠍꠤꠟ।
JOH 11:39 ꠔꠣꠁꠘ ꠝꠣꠘꠡꠞꠦ ꠇꠁꠟꠣ, “ꠙꠣꠔ꠆ꠔꠞꠐꠣ ꠢꠞꠣꠅ।” ꠟꠣꠍꠣꠞꠞ ꠛꠁꠘ ꠝꠣꠞꠕꠣꠄ ꠇꠁꠟꠣ, “ꠢꠥꠎꠥꠞ, ꠅꠈꠘ ꠔ ꠟꠣꠡ ꠙꠌꠤꠀ ꠉꠘ꠆ꠖ ꠛꠣꠞ ꠅꠁꠉꠦꠍꠦ, ꠔꠣꠁꠘ ꠌꠣꠁꠞ ꠖꠤꠘ ꠀꠉꠦ ꠝꠣꠞꠣ ꠉꠦꠍꠂꠘ।”
JOH 11:40 ꠁꠍꠣꠄ ꠄꠘꠞꠦ ꠇꠁꠟꠣ, “ꠀꠝꠤ ꠔ ꠔꠥꠝꠣꠞꠦ ꠇꠁꠍꠤ, ꠔꠥꠝꠤ ꠎꠥꠖꠤ ꠄꠇꠤꠘ ꠇꠞ, ꠔꠦ ꠀꠟ꠆ꠟꠣꠞ ꠇꠥꠖꠞꠔꠤ ꠝꠢꠤꠝꠣ ꠖꠦꠈꠛꠣꠄ।”
JOH 11:41 ꠔꠦꠃ ꠝꠣꠘꠡꠦ ꠇꠄꠛꠞꠞ ꠝꠥꠈꠞ ꠙꠣꠔ꠆ꠔꠞꠐꠣ ꠢꠞꠣꠁꠟꠣ। ꠁꠍꠣꠄ ꠀꠍꠝꠣꠘꠞ ꠛꠣꠄ ꠌꠣꠁꠀ ꠖꠥꠀ ꠇꠞꠟꠣ, “ꠅ ꠉꠣꠁꠛꠤ ꠛꠣꠛꠣ, ꠔꠥꠝꠤ ꠀꠝꠣꠞ ꠇꠕꠣ ꠢꠥꠘꠍ, ꠄꠞꠟꠣꠉꠤ ꠀꠝꠤ ꠔꠥꠝꠣꠞ ꠡꠥꠇꠞꠤꠀ ꠀꠖꠣꠄ ꠇꠞꠤ।
JOH 11:42 ꠀꠝꠤ ꠎꠣꠘꠤ, ꠔꠥꠝꠤ ꠢꠣꠝꠦꠡꠣ ꠀꠝꠣꠞ ꠇꠕꠣ ꠢꠥꠘ। ꠅꠁꠟꠦ ꠀꠝꠣꠞ ꠌꠣꠁꠞꠅꠛꠣꠄ ꠎꠦꠔꠣ ꠝꠣꠘꠥꠡ ꠀꠍꠂꠘ, ꠔꠣꠞꠣ ꠎꠣꠔꠦ ꠄꠇꠤꠘ ꠇꠞꠂꠘ, ꠔꠥꠝꠤ ꠀꠝꠣꠞꠦ ꠙꠣꠑꠣꠁꠍ, ꠄꠞꠖꠣꠄꠃ ꠅꠈꠣꠘ ꠇꠁꠟꠣꠝ।”
JOH 11:43 ꠅꠈꠣꠘ ꠇꠁꠀ ꠔꠣꠁꠘ ꠎꠥꠞꠦ ꠒꠣꠇ ꠖꠤꠀ ꠇꠁꠟꠣ, “ꠟꠣꠍꠣꠞ, ꠛꠣꠞ ꠅꠁꠀ ꠀꠅ।”
JOH 11:44 ꠔꠦꠃ ꠝꠥꠞ꠆ꠖꠣ ꠟꠣꠍꠣꠞ ꠇꠄꠛꠞ ꠕꠣꠇꠤ ꠛꠣꠞ ꠅꠁꠀ ꠀꠁꠟꠣ। ꠔꠣꠘ ꠀꠔ-ꠙꠣꠅ ꠇꠣꠚꠘꠖꠤ ꠙꠦꠌꠣꠁꠟ ꠀꠍꠤꠟ, ꠀꠞ ꠝꠥꠈ ꠀꠍꠤꠟ ꠞꠥꠝꠣꠟ ꠖꠤꠀ ꠛꠣꠘ꠆ꠖꠣ। ꠁꠍꠣꠄ ꠝꠣꠘꠡꠞꠦ ꠇꠁꠟꠣ, “ꠔꠣꠞ ꠛꠣꠘ꠆ꠖ ꠈꠥꠟꠅ ꠀꠞ ꠔꠣꠞꠦ ꠎꠣꠁꠔꠦ ꠖꠦꠅ।”
JOH 11:45 ꠛꠤꠛꠤ ꠝꠞꠤꠅꠝꠞ ꠉꠦꠍꠦ ꠎꠦꠔꠣ ꠁꠢꠥꠖꠤ ꠝꠣꠘꠥꠡ ꠀꠁꠍꠟꠣ, ꠢꠎꠞꠔ ꠁꠍꠣꠞ ꠅꠃ ꠇꠦꠞꠣꠝꠔꠤ ꠇꠣꠝ ꠖꠦꠈꠤꠀ ꠄꠞꠣꠞ ꠝꠣꠎꠞ ꠛꠃꠔꠦ ꠔꠣꠘ ꠃꠙꠞꠦ ꠁꠝꠣꠘ ꠀꠘꠟꠣ।
JOH 11:46 ꠅꠁꠟꠦ ꠇꠦꠃ ꠇꠦꠃ ꠚꠞꠤꠡꠤ ꠅꠇꠟꠞ ꠉꠦꠍꠦ ꠉꠤꠀ ꠁꠍꠣꠞ ꠅꠃ ꠇꠣꠝꠞ ꠇꠕꠣ ꠎꠣꠘꠣꠁꠟ।
JOH 11:47 ꠁꠔꠣ ꠢꠥꠘꠤꠀ ꠛꠠ ꠁꠝꠣꠝ ꠅꠇꠟꠦ ꠀꠞ ꠚꠞꠤꠡꠤ ꠖꠟꠞ ꠝꠣꠘꠡꠦ ꠖꠦꠡꠞ ꠚꠔꠥꠀ ꠇꠝꠤꠐꠤꠞꠦ ꠟꠁꠀ ꠄꠇꠈꠣꠘꠅ ꠛꠁꠟꠣ, ꠛꠁꠀ ꠇꠁꠟꠣ, “ꠀꠝꠞꠣ ꠅꠈꠘ ꠇꠤꠔꠣ ꠇꠞꠔꠣꠝ? ꠁ ꠛꠦꠐꠣꠄ ꠔ ꠛꠃꠔ ꠇꠦꠞꠣꠝꠔꠤ ꠇꠣꠝ ꠖꠦꠈꠣꠞ।
JOH 11:48 ꠀꠝꠞꠣ ꠎꠥꠖꠤ ꠔꠣꠞꠦ ꠄꠝꠘꠦ ꠌꠟꠔꠦ ꠖꠦꠁ, ꠔꠦ ꠢꠇꠟ ꠝꠣꠘꠡꠦ ꠔꠣꠞ ꠃꠙꠞꠦ ꠁꠝꠣꠘ ꠀꠘꠛ, ꠀꠞ ꠁꠔꠣ ꠢꠥꠘꠤꠀ ꠞꠥꠝꠣꠘ ꠡꠞꠇꠣꠞꠞ ꠝꠣꠘꠡꠦ ꠀꠝꠞꠣꠞ ꠑꠤꠇꠣꠘꠣ ꠀꠞ ꠀꠝꠞꠣꠞ ꠎꠣꠔꠤꠞꠦꠅ ꠛꠤꠘꠣꠡ ꠇꠞꠛꠣ।”
JOH 11:49 ꠅꠃ ꠝꠎꠟꠤꠍꠞ ꠝꠣꠎꠦ ꠅꠃ ꠛꠍꠞꠞ ꠙꠞꠗꠣꠘ ꠁꠝꠣꠝ, ꠇꠣꠄꠀꠚꠣ ꠘꠣꠝꠞ ꠄꠇꠎꠘ ꠀꠍꠟꠣ। ꠔꠣꠁꠘ ꠄꠞꠣꠞꠦ ꠇꠁꠟꠣ, “ꠔꠥꠝꠞꠣ ꠔ ꠇꠥꠘ꠆ꠔꠣꠃ ꠎꠣꠘ ꠘꠣ।
JOH 11:50 ꠛꠥꠎ ꠘꠣ ꠘꠤ, ꠀꠡ꠆ꠔꠣ ꠎꠣꠔꠤ ꠛꠤꠘꠣꠡ ꠅꠀꠞ ꠌꠣꠁꠔꠦ, ꠢꠇꠟꠞ ꠛꠖꠟꠣ ꠄꠇꠎꠘꠞ ꠝꠞꠘ ꠀꠞꠅ ꠜꠣꠟꠣ।”
JOH 11:51 ꠁꠝꠣꠝ ꠇꠣꠄꠀꠚꠣꠄ ꠀꠍꠟꠦ ꠘꠤꠎꠞ ꠝꠘ ꠕꠣꠇꠤ ꠅꠃ ꠇꠕꠣ ꠇꠁꠍꠂꠘ ꠘꠣ, ꠔꠣꠁꠘ ꠅꠃ ꠛꠍꠞꠞ ꠙꠞꠗꠣꠘ ꠁꠝꠣꠝ ꠅꠀꠄ ꠉꠣꠁꠛꠤ ꠛꠥꠟꠤ ꠔꠣꠘ ꠝꠥꠈ ꠕꠣꠇꠤ ꠛꠣꠞ ꠅꠁꠍꠦ ꠎꠦ, ꠁꠢꠥꠖꠤ ꠎꠣꠔꠤꠞꠦ ꠛꠣꠌꠣꠘꠤꠞ ꠟꠣꠉꠤ ꠁꠍꠣꠞ ꠝꠞꠘ ꠅꠁꠛ।
JOH 11:52 ꠈꠣꠟꠤ ꠁꠢꠥꠖꠤ ꠎꠣꠔꠤꠞ ꠟꠣꠉꠤ ꠘꠣꠄ, ꠀꠟ꠆ꠟꠣꠞ ꠎꠔ ꠛꠘ꠆ꠖꠣꠁꠘ ꠌꠣꠁꠞꠅꠛꠣꠄ ꠍꠤꠔ꠆ꠞꠤꠀ ꠀꠍꠂꠘ, ꠔꠣꠞꠣꠞꠦ ꠖꠟꠣ ꠇꠞꠤꠀ ꠄꠇꠈꠣꠘꠅ ꠇꠞꠣꠞ ꠟꠣꠉꠤꠅ ꠔꠣꠁꠘ ꠎꠣꠘ ꠛꠤꠟꠣꠁ ꠖꠤꠛꠣ।
JOH 11:53 ꠢꠃ ꠖꠤꠘ ꠕꠣꠇꠤ ꠔꠣꠞꠣ ꠁꠍꠣꠞꠦ ꠝꠣꠞꠣꠞ ꠙꠣꠄꠔꠣꠞꠣ ꠇꠞꠣꠔ ꠟꠣꠉꠟꠣ।
JOH 11:54 ꠄꠞꠟꠣꠉꠤ ꠁꠍꠣꠄ ꠔꠣꠞꠣꠞ ꠝꠣꠎꠦ ꠈꠥꠟꠣ-ꠝꠦꠟꠣ ꠌꠟꠣ-ꠚꠤꠞꠣ ꠛꠣꠖ ꠖꠤꠟꠣꠁꠟꠣ, ꠀꠞ ꠅꠃ ꠎꠣꠉꠣ ꠍꠣꠠꠤꠀ ꠝꠞꠥꠜꠥꠝꠤꠞ ꠇꠣꠘ꠆ꠖꠣꠔ ꠀꠚꠞꠣꠁꠝ ꠘꠣꠝꠞ ꠄꠇ ꠉꠣꠃꠔ ꠉꠤꠀ ꠔꠣꠘ ꠍꠣꠢꠣꠛꠤ ꠅꠇꠟꠞꠦ ꠟꠁꠀ ꠞꠁꠟꠣ।
JOH 11:55 ꠅꠃ ꠡꠝꠄ ꠁꠢꠥꠖꠤ ꠅꠇꠟꠞ ꠀꠎꠣꠖꠤ ꠁꠖ ꠊꠘꠣꠁ ꠀꠁꠍꠤꠟ। ꠁꠖꠞ ꠀꠉꠦ ꠘꠤꠎꠞꠦ ꠙꠣꠇ-ꠍꠣꠚ ꠇꠞꠣꠞ ꠟꠣꠉꠤ ꠛꠃꠔ ꠝꠣꠘꠥꠡ ꠉꠣꠃ ꠕꠣꠇꠤ ꠎꠦꠞꠥꠎꠣꠟꠦꠝ ꠐꠣꠃꠘꠅ ꠉꠦꠟꠣ।
JOH 11:56 ꠢꠤꠘꠅ ꠉꠤꠀ ꠔꠣꠞꠣ ꠢꠎꠞꠔ ꠁꠍꠣꠞꠦ ꠔꠥꠇꠣꠁꠟꠣ। ꠔꠣꠞꠣ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠅ ꠃꠛꠣꠁꠀ ꠄꠇꠦ-ꠅꠁꠘ꠆ꠘꠦ ꠎꠤꠇꠣꠁꠟꠣ, “ꠇꠤꠔꠣ ꠝꠘꠅ ꠇꠞꠂꠘ, ꠔꠣꠁꠘ ꠁ ꠁꠖꠅ ꠀꠁꠔꠣ ꠘꠣꠄ ꠘꠤ?”
JOH 11:57 ꠛꠠ ꠁꠝꠣꠝ ꠀꠞ ꠚꠞꠤꠡꠤ ꠅꠇꠟꠦ ꠢꠥꠇꠥꠝ ꠖꠤꠍꠟꠣ, ꠇꠦꠃ ꠎꠥꠖꠤ ꠁꠍꠣꠞ ꠈꠥꠎ ꠙꠣꠄ, ꠔꠦ ꠔꠣꠞꠣꠞꠦ ꠎꠣꠘꠣꠘꠤꠞ ꠟꠣꠉꠤ, ꠎꠣꠔꠦ ꠔꠣꠞꠣ ꠁꠍꠣꠞꠦ ꠗꠞꠔꠣ ꠙꠣꠞꠂꠘ।
JOH 12:1 ꠀꠎꠣꠖꠤ ꠁꠖꠞ ꠍꠄꠖꠤꠘ ꠀꠉꠦ, ꠢꠎꠞꠔ ꠁꠍꠣ ꠢꠃ ꠟꠣꠍꠣꠞꠞ ꠉꠣꠃ ꠛꠣꠄꠔ-ꠀꠘꠤꠀꠔ ꠀꠁꠟꠣ, ꠎꠦ ꠟꠣꠍꠣꠞꠞꠦ ꠔꠣꠁꠘ ꠝꠞꠣ ꠕꠣꠇꠤ ꠎꠤꠘ꠆ꠖꠣ ꠇꠞꠍꠟꠣ।
JOH 12:2 ꠁꠘꠅ ꠔꠣꠞꠣ ꠢꠎꠞꠔ ꠁꠍꠣꠞ ꠟꠣꠉꠤ ꠈꠣꠘꠤꠞ ꠝꠦꠎꠛꠣꠘꠤ ꠎꠥꠁꠔ ꠇꠞꠟꠣ। ꠁꠍꠣꠞ ꠟꠉꠦ ꠈꠣꠅꠀꠔ ꠎꠦꠞꠣ ꠛꠁꠍꠤꠟ, ꠄꠞꠣꠞ ꠟꠉꠦ ꠟꠣꠍꠣꠞꠅ ꠀꠍꠟꠣ ꠀꠞ ꠛꠤꠛꠤ ꠝꠣꠞꠕꠣꠄ ꠈꠣꠖꠤꠝꠖꠣꠞꠤ ꠇꠞꠟꠣ।
JOH 12:3 ꠅꠃ ꠡꠝꠄ ꠟꠣꠍꠣꠞꠞ ꠛꠁꠘ ꠝꠞꠤꠅꠝꠦ ꠀꠗꠣ ꠡꠦꠞ ꠈꠥꠛ ꠖꠣꠝꠤ ꠈꠣꠐꠤ ꠀꠔꠞ ꠟꠁꠀ ꠀꠁꠟꠣ, ꠀꠁꠀ ꠅꠃ ꠀꠔꠞ ꠁꠍꠣꠞ ꠙꠣꠅ-ꠅ ꠓꠣꠟꠤꠀ ꠘꠤꠎꠞ ꠝꠣꠕꠣꠞ ꠌꠥꠟꠖꠤ ꠙꠣꠅ ꠚꠥꠍꠤꠀ ꠖꠤꠟꠣ। ꠀꠔꠞꠞ ꠈꠥꠡꠛꠄꠄ ꠀꠡ꠆ꠔꠣ ꠊꠞ ꠜꠞꠤꠉꠦꠟ।
JOH 12:4 ꠁꠢꠥꠖꠣ ꠁꠡ꠆ꠇꠣꠞꠤꠀꠔ ꠘꠣꠝꠦ ꠁꠍꠣꠞ ꠄꠇ ꠍꠣꠢꠣꠛꠤ, ꠎꠦꠁꠘ ꠔꠣꠘꠞꠦ ꠖꠥꠡꠝꠘꠞ ꠀꠔꠅ ꠗꠞꠣꠁ ꠖꠤꠛꠣ, ꠄꠁꠘ ꠇꠁꠟꠣ,
JOH 12:5 “ꠁꠡ, ꠁ ꠀꠔꠞ ꠚꠥꠐꠤꠘ ꠛꠦꠌꠤꠟꠦ ꠔ ꠔꠤꠘ-ꠡ ꠖꠤꠘꠣꠞ ꠙꠣꠁꠀ ꠉꠞꠤꠛ ꠅꠇꠟꠞꠦ ꠛꠤꠟꠣꠁ ꠖꠦꠅꠀ ꠉꠦꠟ ꠅꠘꠦ।”
JOH 12:6 ꠀꠍꠟꠦ ꠁꠢꠥꠖꠣꠄ ꠉꠞꠤꠛ ꠅꠇꠟꠞ ꠇꠕꠣ ꠌꠤꠘ꠆ꠔꠣ ꠇꠞꠤꠀ ꠁꠈꠣꠘ ꠇꠁꠍꠦ ꠘꠣ। ꠢꠦ ꠀꠍꠤꠟ ꠌꠥꠞ। ꠐꠦꠇꠣꠞ ꠕꠟꠤ ꠔꠣꠞ ꠉꠦꠍꠦ ꠕꠣꠇꠔ, ꠀꠞ ꠎꠝꠣ ꠐꠦꠇꠣ ꠕꠣꠇꠤ ꠢꠦ ꠌꠥꠞꠤ ꠇꠞꠔ, ꠄꠞꠟꠣꠉꠤ ꠅꠟꠣ ꠇꠁꠍꠦ।
JOH 12:7 ꠁꠍꠣꠄ ꠇꠁꠟꠣ, “ꠔꠥꠝꠞꠣ ꠁ ꠛꠦꠐꠤꠉꠥꠞ ꠝꠘꠅ ꠖꠥꠈ ꠖꠤꠅ ꠘꠣ। ꠀꠝꠣꠞ ꠖꠣꠚꠘ-ꠇꠣꠚꠘꠞ ꠟꠣꠉꠤ ꠔꠣꠁꠘ ꠁ ꠚꠥꠐꠣꠁꠘ ꠕꠁꠍꠟꠣ।
JOH 12:8 ꠉꠞꠤꠛ ꠅꠇꠟ ꠔ ꠢꠣꠝꠦꠡꠣꠃ ꠔꠥꠝꠞꠣꠞ ꠝꠣꠎꠦ ꠀꠍꠂꠘ, ꠅꠁꠟꠦ ꠀꠝꠣꠞꠦ ꠢꠣꠝꠦꠡꠣ ꠙꠣꠁꠔꠣꠄ ꠘꠣꠄ।”
JOH 12:9 ꠢꠎꠞꠔ ꠁꠍꠣ ꠛꠣꠄꠔ-ꠀꠘꠤꠀꠔ ꠀꠁꠍꠂꠘ ꠢꠥꠘꠤꠀ, ꠁꠢꠥꠖꠤ ꠎꠣꠔꠤꠞ ꠛꠃꠔ ꠝꠣꠘꠥꠡ ꠅꠘꠅ ꠀꠁꠟꠣ। ꠔꠣꠞꠣ ꠈꠣꠟꠤ ꠁꠍꠣꠞ ꠟꠣꠉꠤ ꠘꠣꠄ, ꠢꠃ ꠎꠦ ꠟꠣꠍꠣꠞꠞꠦ ꠁꠍꠣꠄ ꠝꠞꠣ ꠕꠣꠇꠤ ꠎꠤꠘ꠆ꠖꠣ ꠇꠞꠍꠟꠣ, ꠔꠣꠞꠦꠅ ꠖꠦꠈꠣꠔ ꠀꠁꠟꠣ।
JOH 12:10 ꠅꠃ ꠡꠝꠄ ꠛꠠ ꠁꠝꠣꠝ ꠅꠇꠟꠦ ꠘꠤꠅꠔ ꠇꠞꠟꠣ ꠟꠣꠍꠣꠞꠞꠦꠅ ꠝꠣꠞꠤꠟꠤꠔꠣ।
JOH 12:11 ꠇꠣꠞꠘ ꠟꠣꠍꠣꠞꠞ ꠟꠣꠉꠤ ꠛꠃꠔ ꠁꠢꠥꠖꠤ ꠝꠣꠘꠡꠦ ꠘꠦꠔꠣ ꠅꠇꠟꠞ ꠟꠉ ꠍꠣꠠꠤꠀ, ꠁꠍꠣꠞ ꠃꠙꠞꠦ ꠁꠝꠣꠘ ꠀꠘꠍꠤꠟꠣ।
JOH 12:12 ꠁꠖꠞ ꠘꠤꠅꠔꠦ ꠖꠟꠦ ꠖꠟꠦ ꠎꠔ ꠝꠣꠘꠥꠡ ꠀꠁꠍꠂꠘ, ꠔꠣꠞꠣ ꠛꠣꠖꠞ ꠖꠤꠘ ꠢꠥꠘꠟꠣ, ꠢꠎꠞꠔ ꠁꠍꠣꠄ ꠎꠦꠞꠥꠎꠣꠟꠦꠝꠅ ꠔꠡꠞꠤꠚ ꠀꠘꠞꠣ।
JOH 12:13 ꠅꠃ ꠔꠣꠞꠣ ꠈꠦꠎꠥꠞꠞ ꠈꠦꠍꠝꠣ ꠒꠣꠟ ꠟꠁꠀ ꠔꠣꠘꠞꠦ ꠀꠉꠥꠀꠁꠀ ꠀꠘꠣꠔ ꠉꠦꠟꠣ ꠀꠞ ꠝꠤꠍꠤꠟ ꠖꠤꠀ ꠇꠁꠟꠣ, “ꠝꠣꠞꠢꠣꠛꠣ! ꠝꠣꠛꠥꠖꠞ ꠘꠣꠝꠦ ꠎꠦꠁꠘ ꠔꠡꠞꠤꠚ ꠀꠘꠞꠣ, ꠔꠣꠘ ꠔꠣꠞꠤꠚ ꠅꠃꠇ, ꠔꠣꠁꠘꠃ ꠁꠍꠞꠣꠁꠟꠞ ꠛꠣꠖꠡꠣ!”
JOH 12:14 ꠀꠟ꠆ꠟꠣꠞ ꠇꠣꠟꠣꠝꠞ ꠀꠄꠀꠔ ꠝꠣꠚꠤꠇ ꠢꠎꠞꠔ ꠁꠍꠣꠄ ꠄꠇꠐꠣ ꠉꠣꠗꠣ ꠖꠦꠈꠤꠀ ꠔꠣꠞ ꠃꠙꠞꠦ ꠍꠅꠀꠞ ꠅꠁꠟꠣ। ꠇꠤꠔꠣꠛꠅ ꠟꠦꠈꠣ ꠀꠍꠦ,
JOH 12:15 “ꠅ ꠍꠤꠅꠘ-ꠇꠁꠘꠣ ꠎꠦꠞꠥꠎꠣꠟꠦꠝ, ꠒꠞꠣꠁꠅ ꠘꠣ। ꠌꠣꠁꠀ ꠖꠦꠈꠅ, ꠉꠣꠗꠣꠞ ꠛꠣꠁꠌ꠆ꠌꠣ ꠌꠠꠤꠀ ꠔꠥꠝꠣꠞ ꠛꠣꠖꠡꠣ ꠀꠁꠞꠣ।”
JOH 12:16 ꠍꠣꠢꠣꠛꠤ ꠅꠇꠟꠦ ꠙꠄꠟꠣ ꠁꠔꠣꠞ ꠇꠥꠘꠥ ꠝꠣꠘꠤ ꠛꠥꠎꠟꠣ ꠘꠣ। ꠛꠣꠖꠦ ꠢꠎꠞꠔ ꠁꠍꠣꠞ ꠇꠥꠖꠞꠔꠤ ꠝꠢꠤꠝꠣ ꠎꠣꠁꠞ ꠅꠁꠀ ꠢꠣꠞꠟꠦ, ꠙꠣꠇ ꠇꠤꠔꠣꠛꠞ ꠇꠕꠣ ꠔꠣꠞꠣꠞ ꠝꠘꠅ ꠅꠁꠟ, ꠅꠃ ꠀꠄꠀꠔꠅ ꠔꠣꠘ ꠛꠦꠙꠣꠞꠦꠃ ꠟꠦꠈꠣ ꠀꠍꠤꠟ, ꠀꠞ ꠝꠣꠘꠡꠦ ꠔꠣꠘ ꠟꠣꠉꠤꠃ ꠅꠔꠔꠣ ꠇꠞꠍꠦ।
JOH 12:17 ꠇꠄꠛꠞ ꠕꠣꠇꠤ ꠟꠣꠍꠣꠞꠞꠦ ꠒꠣꠇꠤꠀ ꠎꠤꠘ꠆ꠖꠣ ꠇꠞꠤ ꠔꠥꠟꠣꠞ ꠡꠝꠄ ꠎꠦꠔꠣ ꠝꠣꠘꠥꠡ ꠁꠍꠣꠞ ꠟꠉꠦ ꠀꠍꠟꠣ, ꠔꠣꠞꠣꠅ ꠅꠃ ꠛꠦꠙꠣꠞꠦ ꠢꠣꠝꠦꠡꠣ ꠝꠣꠔ-ꠇꠕꠣ ꠝꠣꠔꠤꠔꠣ।
JOH 12:18 ꠄꠞꠟꠣꠉꠤ ꠝꠣꠘꠡꠦ ꠔꠣꠘ ꠅꠃ ꠇꠦꠞꠣꠝꠔꠤ ꠇꠣꠝꠞ ꠈꠛꠞ ꠢꠥꠘꠤꠀ ꠔꠣꠘꠞꠦ ꠀꠉꠥꠀꠁꠀ ꠀꠘꠣꠔ ꠉꠦꠍꠟꠣ।
JOH 12:19 ꠁꠔꠣ ꠖꠦꠈꠤꠀ ꠚꠞꠤꠡꠤ ꠅꠇꠟꠦ ꠄꠇꠦ-ꠅꠁꠘ꠆ꠘꠦ ꠇꠁꠟ, “ꠀꠝꠞꠣꠞ ꠔ ꠇꠥꠘꠥ ꠟꠣꠜ ꠅꠞ ꠘꠣ। ꠖꠦꠈꠞꠣꠄ ꠘꠤ, ꠀꠡ꠆ꠔꠣ ꠖꠥꠘꠤꠀꠃ ꠔꠣꠞ ꠈꠞꠦ ꠉꠦꠍꠦꠉꠤ।”
JOH 12:20 ꠀꠎꠣꠖꠤ ꠁꠖꠅ ꠎꠦꠞꠣ ꠄꠛꠣꠖꠔ ꠇꠞꠣꠔ ꠀꠁꠍꠟꠣ, ꠔꠣꠞꠣꠞ ꠝꠣꠎꠦ ꠇꠄꠎꠘ ꠁꠃꠘꠣꠘꠤ ꠝꠣꠘꠥꠡꠅ ꠀꠍꠟꠣ।
JOH 12:21 ꠔꠣꠞꠣ ꠉꠣꠟꠤꠟ ꠎꠤꠟꠣꠞ ꠛꠣꠄꠔ-ꠍꠄꠖꠣ ꠉꠣꠃꠞ ꠚꠤꠟꠤꠚꠞꠦ ꠀꠁꠀ ꠝꠤꠘꠔ ꠇꠞꠟꠣ, “ꠍꠣꠛ, ꠀꠝꠞꠣ ꠢꠥꠎꠥꠞ ꠁꠍꠣꠞꠦ ꠖꠦꠈꠔꠣꠝ ꠌꠣꠁ।”
JOH 12:22 ꠚꠤꠟꠤꠚꠦ ꠁꠈꠣꠘ ꠀꠘ꠆ꠖꠞꠤꠀꠍꠞꠦ ꠇꠁꠟꠣ। ꠛꠣꠖꠦ ꠀꠘ꠆ꠖꠞꠤꠀꠍ ꠀꠞ ꠚꠤꠟꠤꠚꠦ ꠉꠤꠀ ꠁꠍꠣꠞꠦ ꠎꠣꠘꠣꠁꠟꠣ।
JOH 12:23 ꠁꠍꠣꠄ ꠔꠣꠞꠣꠞꠦ ꠇꠁꠟꠣ, “ꠀꠝꠤ ꠛꠤꠘ-ꠀꠖꠝꠞ ꠝꠢꠤꠝꠣ ꠎꠣꠁꠞ ꠅꠀꠞ ꠡꠝꠄ ꠀꠁꠌ꠆ꠍꠦ।
JOH 12:24 ꠀꠝꠤ ꠔꠥꠝꠞꠣꠞꠦ ꠢꠣꠍꠣꠃ ꠇꠁꠞꠣꠝ, ꠗꠣꠘꠞ ꠛꠤꠌ ꠝꠣꠐꠤꠔ ꠙꠠꠤꠀ ꠎꠥꠖꠤ ꠘꠣ ꠝꠞꠦ, ꠔꠦ ꠄꠇꠐꠣꠃ ꠕꠣꠇꠦ, ꠀꠞ ꠝꠣꠐꠤꠔ ꠝꠞꠟꠦ ꠛꠃꠔ ꠚꠡꠟ ꠚꠟꠦ।
JOH 12:25 ꠅꠟꠣ ꠎꠦ ꠎꠘꠦ ꠘꠤꠎꠞ ꠎꠣꠘꠞꠦ ꠛꠦꠡꠤ ꠝꠣꠄꠀ ꠇꠞꠦ, ꠢꠦ ꠔꠣꠞ ꠀꠍꠟ ꠎꠤꠘ꠆ꠖꠦꠉꠤ ꠈꠥꠀꠁꠟꠣꠄ, ꠅꠁꠟꠦ ꠎꠦ ꠎꠘꠦ ꠁ ꠖꠥꠘꠤꠀꠔ ꠘꠤꠎꠞ ꠎꠣꠘꠞꠦ ꠔꠥꠌ꠆ꠍ ꠝꠘꠅ ꠇꠞꠦ, ꠢꠦ ꠔꠣꠞ ꠀꠍꠟ ꠎꠤꠘ꠆ꠖꠦꠉꠤ, ꠝꠣꠘꠤ ꠀꠈꠦꠞꠣꠔꠞ ꠟꠣꠉꠤ ꠎꠣꠘ ꠛꠣꠌꠣꠄ।
JOH 12:26 ꠇꠦꠃ ꠎꠥꠖꠤ ꠀꠝꠣꠞ ꠈꠦꠎꠝꠔ ꠇꠞꠔ ꠌꠣꠄ, ꠔꠦ ꠀꠝꠣꠞ ꠙꠕꠦ ꠌꠟꠃꠇ। ꠔꠦꠃ ꠀꠝꠤ ꠎꠦꠈꠣꠘꠅ ꠞꠁꠝꠥ ꠀꠝꠣꠞ ꠈꠦꠎꠝꠔꠇꠣꠞꠤꠅ ꠅꠘꠅ ꠞꠁꠛ। ꠎꠦ ꠎꠘꠦ ꠀꠝꠣꠞ ꠈꠦꠎꠝꠔ ꠇꠞꠦ, ꠀꠝꠣꠞ ꠉꠣꠁꠛꠤ ꠛꠣꠚꠦ ꠔꠣꠞꠦ ꠁꠎ꠆ꠎꠔ ꠖꠤꠛꠣ।
JOH 12:27 “ꠀꠝꠣꠞ ꠝꠘ ꠅꠈꠘ ꠙꠦꠞꠦꠡꠣꠘ ꠅꠁꠉꠦꠍꠦ। ꠔꠦ ꠀꠝꠤ ꠅꠈꠣꠘ ꠇꠁꠔꠣꠝ ꠘꠤ, ꠛꠣꠛꠣ, ꠎꠦ ꠡꠝꠄ ꠀꠁꠀ ꠀꠎꠤꠍꠦ, ꠅꠃ ꠡꠝꠄꠅꠞ ꠀꠔ ꠕꠣꠇꠤ ꠀꠝꠣꠞꠦ ꠛꠣꠌꠣꠅ? ꠅꠁꠟꠦ ꠅꠔꠣꠞ ꠟꠣꠉꠤꠃ ꠔ ꠀꠝꠤ ꠅꠃ ꠡꠝꠄ ꠙꠞ꠆ꠎꠘ꠆ꠔ ꠀꠁꠍꠤ।
JOH 12:28 ꠛꠣꠛꠣ, ꠔꠥꠝꠤ ꠔꠥꠝꠣꠞ ꠝꠢꠤꠝꠣ ꠎꠣꠁꠞ ꠇꠞꠅ।” ꠅꠃ ꠡꠝꠄ ꠀꠍꠝꠣꠘ ꠕꠣꠇꠤ ꠉꠣꠁꠛꠤ ꠀꠅꠀꠎ ꠀꠁꠟ, “ꠀꠝꠤ ꠀꠝꠣꠞ ꠝꠢꠤꠝꠣ ꠎꠣꠁꠞ ꠇꠞꠍꠤ ꠀꠞ ꠢꠤꠞꠛꠣꠞ ꠎꠣꠁꠞ ꠇꠞꠝꠥ।”
JOH 12:29 ꠁ ꠀꠅꠀꠎ ꠢꠥꠘꠤꠀ ꠢꠤꠘꠅ ꠎꠔ ꠝꠣꠘꠥꠡ ꠀꠍꠟꠣ, ꠔꠣꠞꠣ ꠇꠁꠟꠣ, “ꠁꠔꠣ ꠔ ꠝꠦꠊꠞ ꠒꠣꠇ।” ꠇꠦꠃ ꠇꠦꠃ ꠇꠁꠟ, “ꠇꠥꠘꠥ ꠚꠤꠞꠤꠡ꠆ꠔꠣꠄ ꠔꠣꠘ ꠟꠉꠦ ꠛꠣꠔꠌꠤꠔ ꠇꠞꠍꠂꠘ।”
JOH 12:30 ꠁꠈꠣꠘ ꠢꠥꠘꠤꠀ ꠁꠍꠣꠄ ꠇꠁꠟꠣ, “ꠁ ꠀꠅꠀꠎ ꠔ ꠀꠝꠣꠞ ꠟꠣꠉꠤ ꠀꠁꠍꠦ ꠘꠣ, ꠀꠙꠘꠣꠞꠣꠞ ꠟꠣꠉꠤꠃ ꠀꠁꠍꠦ।
JOH 12:31 ꠁ ꠎꠉꠔꠞ ꠝꠣꠘꠡꠞ ꠛꠤꠌꠣꠞꠞ ꠡꠝꠄ ꠀꠁꠌ꠆ꠍꠦ, ꠖꠥꠘꠤꠀꠞ ꠝꠥꠘꠤꠛ ꠁꠛꠟꠤꠍꠞ ꠀꠔ ꠕꠣꠇꠤ ꠅꠈꠘ ꠈꠦꠝꠔꠣ ꠇꠣꠠꠤꠀ ꠘꠦꠅꠀ ꠅꠁꠛ।
JOH 12:32 ꠀꠝꠣꠞꠦ ꠎꠦꠛꠟꠣ ꠎꠝꠤꠘ ꠕꠣꠇꠤ ꠃꠙꠞꠦ ꠔꠥꠟꠣ ꠅꠁꠛ, ꠅꠃ ꠡꠝꠄ ꠀꠝꠤ ꠢꠇꠟꠞꠦ ꠀꠝꠣꠞ ꠉꠦꠍꠦ ꠐꠣꠘꠤꠀ ꠔꠥꠟꠝꠥ।”
JOH 12:33 ꠔꠣꠘ ꠇꠤꠟꠣꠈꠣꠘ ꠝꠃꠔ ꠅꠁꠛ, ꠅꠈꠣꠘ ꠛꠥꠎꠣꠘꠤꠞ ꠟꠣꠉꠤ ꠔꠣꠁꠘ ꠁꠔꠣ ꠇꠁꠟꠣ।
JOH 12:34 ꠅꠃ ꠡꠝꠄ ꠝꠣꠘꠡꠦ ꠁꠍꠣꠞꠦ ꠇꠁꠟꠣ, “ꠀꠝꠞꠣ ꠙꠣꠇ ꠇꠤꠔꠣꠛ ꠕꠣꠇꠤ ꠢꠥꠘꠍꠤ ꠀꠟ-ꠝꠍꠤ ꠌꠤꠞꠇꠣꠟ ꠞꠁꠛꠣ। ꠔꠦ ꠀꠙꠘꠦ ꠇꠤꠟꠣ ꠇꠁꠞꠣ, ꠛꠤꠘ-ꠀꠖꠝꠞꠦ ꠃꠌꠣꠔ ꠔꠥꠟꠣ ꠅꠁꠛ? ꠔꠣꠁꠟꠦ ꠁ ꠛꠤꠘ-ꠀꠖꠝ ꠇꠦ?”
JOH 12:35 ꠔꠣꠁꠘ ꠎꠥꠀꠙ ꠖꠤꠟꠣ, “ꠀꠞ ꠇꠤꠍꠥ ꠡꠝꠄ ꠘꠥꠞ ꠀꠙꠘꠣꠞꠣꠞ ꠟꠉꠦ ꠀꠍꠦ, ꠘꠥꠞ ꠕꠣꠇꠔꠦ ꠕꠣꠇꠔꠦꠃ ꠀꠐꠣ ꠗꠞꠃꠇ꠆ꠇꠣ, ꠎꠦꠟꠣ ꠀꠘ꠆ꠖꠣꠁꠞꠦ ꠀꠁꠀ ꠀꠙꠘꠣꠁꠘ꠆ꠔꠞꠦ ꠘꠣ ꠛꠦꠞꠦ। ꠎꠦ ꠎꠘ ꠀꠘ꠆ꠖꠣꠁꠞ ꠙꠕꠦ ꠀꠐꠦ, ꠢꠦ ꠎꠣꠘꠦ ꠘꠣ ꠢꠦ ꠇꠥꠀꠁ ꠎꠣꠞ।
JOH 12:36 ꠘꠥꠞ ꠀꠙꠘꠣꠞꠣꠞ ꠟꠉꠦ ꠕꠣꠇꠔꠦ ꠕꠣꠇꠔꠦꠃ ꠘꠥꠞꠞ ꠃꠙꠞꠦ ꠁꠝꠣꠘ ꠀꠘꠃꠇ꠆ꠇꠣ, ꠎꠣꠔꠦ ꠀꠙꠘꠣꠞꠣꠅ ꠅꠃ ꠘꠥꠞꠞ ꠝꠣꠘꠥꠡ ꠅꠁꠔꠣ ꠙꠣꠞꠂꠘ।” ꠄꠞꠛꠣꠖꠦ ꠁꠍꠣ ꠁꠘ ꠕꠘꠦ ꠢꠞꠤꠀ ꠉꠤꠀ, ꠄꠞꠣꠞ ꠌꠃꠈ ꠕꠣꠇꠤ ꠘꠤꠎꠞꠦ ꠟꠥꠇꠣꠁꠟꠤꠟꠣ।
JOH 12:37 ꠢꠎꠞꠔ ꠁꠍꠣꠄ ꠝꠣꠘꠡꠞ ꠍꠣꠝꠘꠦ ꠅꠔ ꠛꠦꠡꠤ ꠇꠦꠞꠣꠝꠔꠤ ꠘꠤꠡꠣꠘꠣ ꠖꠦꠈꠣꠘꠤꠞ ꠛꠣꠖꠦꠅ ꠔꠣꠞꠣ ꠔꠣꠘ ꠃꠙꠞꠦ ꠁꠝꠣꠘ ꠀꠘꠟ ꠘꠣ।
JOH 12:38 ꠁꠔꠣ ꠢꠇ꠆ꠇꠟꠔꠣ ꠊꠐꠤꠍꠤꠟ ꠎꠣꠔꠦ ꠀꠉꠞ ꠎꠝꠣꠘꠣꠞ ꠘꠛꠤ ꠁꠡꠣꠄꠀꠞ ꠇꠕꠣ ꠙꠥꠞꠣ ꠅꠄ, ꠔꠣꠁꠘ ꠛꠣꠔꠣꠁꠍꠟꠣ, ꠝꠣꠛꠥꠖ ꠉ, ꠀꠝꠞꠣꠞ ꠔꠛꠟꠤꠉꠞ ꠃꠙꠞꠦ ꠇꠦ ꠄꠇꠤꠘ ꠇꠞꠍꠦ? ꠔꠥꠝꠣꠞ ꠇꠥꠖꠞꠔꠤ ꠀꠔ ꠇꠣꠞ ꠉꠦꠍꠦꠃ ꠛꠣ ꠎꠣꠁꠞ ꠅꠁꠍꠦ?
JOH 12:39 ꠄꠞꠟꠣꠉꠤꠃ ꠔ ꠁꠔꠣ ꠝꠣꠘꠡꠦ ꠁꠝꠣꠘ ꠀꠘꠍꠦ ꠘꠣ, ꠇꠣꠞꠘ ꠁꠡꠣꠄꠀ ꠘꠛꠤꠄ ꠄꠅꠈꠣꠘ ꠇꠁꠍꠟꠣ,
JOH 12:40 ꠀꠟ꠆ꠟꠣꠄ ꠔꠣꠞꠣꠞ ꠌꠃꠈ ꠀꠘ꠆ꠖꠣ ꠛꠣꠘꠣꠁꠟꠤꠍꠂꠘ, ꠔꠣꠞꠣꠞ ꠖꠤꠟ ꠙꠣꠡꠣꠘ ꠛꠣꠘꠣꠁꠟꠤꠍꠂꠘ, ꠎꠣꠔꠦ ꠌꠃꠈꠖꠤ ꠘꠣ ꠖꠦꠈꠦ ꠀꠞ ꠖꠤꠟꠖꠤ ꠘꠣ ꠛꠥꠎꠦ। ꠀꠞꠘꠣꠄ ꠇꠤꠎꠣꠘꠥ ꠔꠣꠞꠣ ꠔꠃꠛꠣ ꠇꠞꠤꠟꠣꠁꠘ, ꠀꠟ꠆ꠟꠣꠞ ꠛꠣꠄ ꠚꠤꠞꠤꠎꠣꠁꠘ, ꠀꠞ ꠀꠝꠤ ꠔꠣꠞꠣꠞꠦ ꠡꠤꠚꠣ ꠇꠞꠤꠟꠣꠁ।
JOH 12:41 ꠁꠡꠣꠄꠀ ꠘꠛꠤꠄ ꠁꠍꠣꠞ ꠝꠢꠤꠝꠣ ꠖꠦꠈꠍꠟꠣ ꠉꠔꠤꠇꠦ, ꠔꠣꠘ ꠛꠦꠙꠣꠞꠦ ꠅꠃ ꠇꠕꠣ ꠇꠁꠍꠟꠣ।
JOH 12:42 ꠔꠦꠛꠃ ꠁꠢꠥꠖꠤ ꠘꠦꠔꠣ ꠅꠇꠟꠞ ꠝꠣꠎ ꠕꠣꠇꠤ ꠛꠃꠔꠦ ꠔꠣꠘ ꠃꠙꠞꠦ ꠁꠝꠣꠘ ꠀꠘꠟꠣ, ꠅꠁꠟꠦ ꠚꠞꠤꠡꠤ ꠅꠇꠟꠦ ꠔꠣꠞꠣꠞꠦ ꠡꠝꠣꠎ ꠕꠣꠇꠤ ꠛꠣꠞ ꠇꠞꠤ ꠖꠤꠟꠣꠁꠛ, ꠅꠈꠣꠘ ꠒꠞꠣꠁꠀ ꠔꠣꠞꠣ ꠡ꠆ꠛꠤꠇꠣꠞ ꠇꠞꠟꠣ ꠘꠣ।
JOH 12:43 ꠔꠣꠞꠣ ꠀꠟ꠆ꠟꠣꠞ ꠔꠣꠞꠤꠚ ꠕꠣꠇꠤ ꠝꠣꠘꠡꠞ ꠔꠣꠞꠤꠚ ꠙꠣꠁꠔꠦ ꠛꠦꠡꠤ ꠙꠍꠘ꠆ꠖ ꠇꠞꠔꠣ।
JOH 12:44 ꠛꠣꠖꠦ ꠁꠍꠣꠄ ꠎꠥꠞꠦ ꠎꠥꠞꠦ ꠇꠁꠟꠣ, “ꠎꠦ ꠎꠘꠦ ꠀꠝꠣꠞ ꠃꠙꠞꠦ ꠁꠝꠣꠘ ꠀꠘꠦ, ꠢꠦ ꠈꠣꠟꠤ ꠀꠝꠣꠞ ꠃꠙꠞꠦ ꠘꠣꠄ, ꠎꠦꠁꠘ ꠀꠝꠣꠞꠦ ꠙꠣꠑꠣꠁꠍꠂꠘ ꠔꠣꠘ ꠃꠙꠞꠦꠅ ꠁꠝꠣꠘ ꠀꠘꠦ।
JOH 12:45 ꠎꠦ ꠎꠘꠦ ꠀꠝꠣꠞꠦ ꠖꠦꠈꠦ, ꠢꠦ ꠀꠍꠟꠦ ꠔꠣꠘꠞꠦꠃ ꠖꠦꠈꠦ, ꠎꠦꠁꠘ ꠀꠝꠣꠞꠦ ꠙꠣꠑꠣꠁꠍꠂꠘ।
JOH 12:46 ꠀꠝꠤ ꠁ ꠖꠥꠘꠤꠀꠔ ꠘꠥꠞ ꠢꠤꠡꠣꠛꠦ ꠀꠁꠍꠤ, ꠎꠣꠔꠦ ꠀꠝꠣꠞ ꠃꠙꠞꠦ ꠎꠦ ꠁꠝꠣꠘ ꠀꠘꠦ, ꠢꠦ ꠀꠞ ꠀꠘ꠆ꠖꠣꠞꠤꠔ ꠘꠣ ꠞꠄ।
JOH 12:47 ꠇꠦꠃ ꠎꠥꠖꠤ ꠀꠝꠣꠞ ꠇꠕꠣ ꠢꠥꠘꠤꠀ, ꠅꠃ ꠝꠣꠚꠤꠇ ꠀꠝꠟ ꠘꠣ ꠇꠞꠦ, ꠔꠦ ꠀꠝꠤ ꠘꠤꠎꠦ ꠔꠣꠞ ꠛꠤꠌꠣꠞ ꠇꠞꠤ ꠘꠣ, ꠇꠣꠞꠘ ꠀꠝꠤ ꠝꠣꠘꠡꠞꠦ ꠖꠥꠡꠤ ꠡꠣꠁꠛꠡ꠆ꠔ ꠇꠞꠣꠔ ꠀꠁꠍꠤ ꠘꠣ, ꠛꠞꠋ ꠝꠣꠘꠡꠞꠦ ꠔꠞꠣꠘꠤꠔ ꠀꠁꠍꠤ।
JOH 12:48 ꠎꠦ ꠎꠘꠦ ꠀꠝꠣꠞꠦ ꠝꠣꠘꠦ ꠘꠣ ꠀꠞ ꠀꠝꠣꠞ ꠇꠕꠣ ꠢꠥꠘꠦ ꠘꠣ, ꠔꠣꠞ ꠛꠤꠌꠣꠞꠞ ꠟꠣꠉꠤ ꠔ ꠄꠇꠎꠘ ꠀꠍꠂꠘ। ꠀꠝꠤ ꠔꠣꠞꠦ ꠎꠦ ꠇꠕꠣ ꠇꠁꠍꠤ, ꠅꠃ ꠇꠕꠣꠄꠃ ꠇꠤꠀꠝꠔꠞ ꠖꠤꠘ ꠔꠣꠞꠦ ꠖꠥꠡꠤ ꠡꠣꠁꠛꠡ꠆ꠔ ꠇꠞꠛ।
JOH 12:49 ꠀꠝꠤ ꠔ ꠘꠤꠎꠦ ꠕꠣꠇꠤ ꠇꠥꠘ꠆ꠔꠣ ꠇꠁꠍꠤ ꠘꠣ, ꠈꠣꠟꠤ ꠀꠝꠣꠞ ꠎꠦ ꠉꠣꠁꠛꠤ ꠛꠣꠚꠦ ꠀꠝꠣꠞꠦ ꠛꠦꠎꠤꠍꠂꠘ, ꠔꠣꠁꠘ ꠘꠤꠎꠦꠃ ꠢꠥꠇꠥꠝ ꠖꠤꠍꠂꠘ, ꠀꠝꠤ ꠇꠤꠔꠣ ꠇꠤꠔꠣ ꠇꠁꠔꠣꠝ।
JOH 12:50 ꠀꠝꠤ ꠎꠣꠘꠤ, ꠔꠣꠘ ꠢꠥꠇꠥꠝ ꠝꠣꠘꠣꠃ ꠅꠁꠟ ꠀꠈꠦꠞꠤ ꠎꠤꠘ꠆ꠖꠦꠉꠤ। ꠄꠞꠟꠣꠉꠤ ꠀꠝꠤ ꠎꠦꠔꠣ ꠇꠁ, ꠁꠔꠣ ꠀꠝꠣꠞ ꠉꠣꠁꠛꠤ ꠛꠣꠚꠞ ꠢꠥꠇꠥꠝꠦꠃ ꠇꠁ।”
JOH 13:1 ꠀꠎꠣꠖꠤ ꠁꠖꠞ ꠕꠥꠠꠣ ꠀꠉꠞ ꠊꠐꠘꠣ। ꠁꠍꠣꠄ ꠛꠥꠎꠤꠟꠤꠟꠣ, ꠔꠣꠁꠘ ꠁ ꠖꠥꠘꠤꠀ ꠍꠣꠠꠤꠀ ꠔꠣꠘ ꠉꠣꠁꠛꠤ ꠛꠣꠚꠞ ꠉꠦꠍꠦ ꠎꠣꠁꠛꠣꠞ ꠡꠝꠄ ꠀꠁꠌ꠆ꠍꠦ। ꠖꠥꠘꠤꠀꠔ ꠎꠦꠞꠣ ꠔꠣꠘ ꠀꠙꠘ ꠝꠣꠘꠥꠡ ꠀꠍꠟꠣ, ꠔꠣꠞꠣꠞꠦ ꠔꠣꠁꠘ ꠈꠥꠛ ꠝꠣꠄꠀ ꠇꠞꠔꠣ ꠀꠞ ꠢꠦꠡ ꠙꠞ꠆ꠎꠘ꠆ꠔ ꠅꠟꠣ ꠝꠣꠄꠀ ꠇꠞꠤꠀꠃ ꠉꠦꠍꠂꠘ।
JOH 13:2 ꠞꠣꠁꠔꠇꠥꠞ ꠈꠣꠘꠤꠔ ꠛꠁꠛꠣꠞ ꠀꠉꠞ ꠇꠕꠣ, ꠢꠎꠞꠔ ꠁꠍꠣꠞꠦ ꠖꠥꠡꠝꠘꠞ ꠀꠔꠅ ꠗꠞꠣꠁ ꠖꠤꠛꠣꠞ ꠟꠣꠉꠤ, ꠁꠛꠟꠤꠍꠦ ꠀꠁꠀ ꠍꠣꠁꠝꠘ ꠁꠡ꠆ꠇꠣꠞꠤꠀꠔꠞ ꠙꠥꠀ ꠁꠢꠥꠖꠣꠞ ꠝꠘꠅ ꠈꠣꠁꠡ ꠎꠣꠉꠣꠁ ꠖꠤꠟ।
JOH 13:3 ꠁꠍꠣꠄ ꠎꠣꠘꠔꠣ, ꠔꠣꠘ ꠉꠣꠁꠛꠤ ꠛꠣꠚ ꠀꠟ꠆ꠟꠣꠄ ꠔꠣꠘ ꠀꠔꠅ ꠢꠇꠟꠔꠣ ꠡꠙꠤ ꠖꠤꠍꠂꠘ, ꠔꠣꠁꠘ ꠀꠟ꠆ꠟꠣꠞ ꠉꠦꠍ ꠕꠣꠇꠤ ꠀꠁꠍꠂꠘ ꠀꠞ ꠔꠣꠘ ꠉꠦꠍꠦꠃ ꠚꠤꠞꠤꠀ ꠎꠣꠁꠞꠣ।
JOH 13:4 ꠄꠞꠟꠣꠉꠤ ꠔꠣꠁꠘ ꠈꠣꠅꠀ ꠕꠣꠇꠤ ꠃꠑꠟꠣ ꠀꠞ ꠚꠤꠘ꠆ꠘꠞ ꠙꠣꠁꠘ꠆ꠎꠣꠛꠤ ꠈꠥꠟꠤꠀ ꠄꠇꠈꠣꠘ ꠉꠣꠝꠍꠣ ꠇꠝꠞꠅ ꠛꠣꠘ꠆ꠖꠤꠟꠣ।
JOH 13:5 ꠛꠣꠖꠦ ꠔꠣꠁꠘ ꠉꠣꠝꠟꠣꠞ ꠝꠣꠎꠦ ꠙꠣꠘꠤ ꠟꠁꠀ ꠍꠣꠢꠣꠛꠤ ꠅꠇꠟꠞ ꠙꠣꠅ ꠗꠅꠀꠁ ꠖꠤꠟꠣ, ꠀꠞ ꠇꠝꠞꠞ ꠉꠣꠝꠍꠣꠖꠤ ꠙꠣꠅ ꠚꠥꠍꠤꠀ ꠖꠦꠅꠀꠔ ꠟꠣꠉꠟꠣ।
JOH 13:6 ꠅꠃ ꠟꠣꠈꠣꠘ ꠔꠣꠁꠘ ꠎꠦꠛꠟꠣ ꠍꠣꠁꠝꠘ-ꠙꠤꠔꠞꠞ ꠉꠦꠍꠦ ꠀꠁꠟꠣ, ꠙꠤꠔꠞꠦ ꠇꠁꠟꠣ, “ꠢꠥꠎꠥꠞ, ꠁꠔꠣ ꠇꠤꠔꠣ ꠇꠞꠂꠘ, ꠀꠙꠘꠦ ꠀꠝꠣꠞ ꠙꠣꠅ ꠗꠅꠀꠁꠀ ꠖꠤꠔꠣ ꠘꠤ?”
JOH 13:7 ꠔꠣꠁꠘ ꠇꠁꠟꠣ, “ꠀꠝꠤ ꠎꠦꠔꠣ ꠇꠞꠤꠀꠞ, ꠅꠈꠘ ꠔꠥꠝꠤ ꠁꠔꠣꠞ ꠝꠣꠘꠤ ꠛꠥꠎꠔꠣꠄ ꠘꠣꠄ, ꠛꠣꠖꠦ ꠛꠥꠎꠛꠣꠄ।”
JOH 13:8 ꠅꠃ ꠙꠤꠔꠞꠦ ꠔꠣꠘꠞꠦ ꠇꠁꠟꠣ, “ꠎꠤ ꠘꠣ, ꠀꠙꠘꠦ ꠇꠥꠘꠥꠝꠘ꠆ꠔꠦꠃ ꠀꠝꠣꠞ ꠙꠣꠅ ꠗꠅꠀꠁ ꠖꠤꠛꠣ ꠘꠣ।” ꠁꠍꠣꠄ ꠇꠁꠟꠣ, “ꠀꠝꠤ ꠎꠥꠖꠤ ꠔꠥꠝꠣꠞ ꠙꠣꠅ ꠗꠁꠀ ꠘꠣ ꠖꠦꠁ, ꠔꠦ ꠔꠥꠝꠣꠞ ꠟꠉꠦ ꠀꠝꠣꠞ ꠇꠥꠘꠥ ꠈꠣꠔꠤꠞ ꠘꠣꠁ।”
JOH 13:9 ꠔꠦꠃ ꠍꠣꠁꠝꠘ-ꠙꠤꠔꠞꠦ ꠇꠁꠟꠣ, “ꠢꠥꠎꠥꠞ, ꠔꠦ ꠈꠣꠟꠤ ꠙꠣꠅ ꠘꠣꠄ, ꠀꠝꠣꠞ ꠝꠣꠕꠣ ꠀꠞ ꠀꠔꠅ ꠗꠅꠀꠁꠀ ꠖꠦꠃꠇ꠆ꠇꠣ”।
JOH 13:10 ꠔꠣꠁꠘ ꠇꠁꠟꠣ, “ꠎꠦ ꠝꠣꠘꠡꠦ ꠉꠥꠍꠟ ꠇꠞꠍꠦ, ꠔꠣꠞ ꠙꠣꠅ ꠍꠣꠠꠣ ꠀꠞ ꠇꠥꠘ꠆ꠔꠣ ꠗꠅꠀꠞ ꠎꠞꠥꠞ ꠘꠣꠄ, ꠔꠣꠞ ꠔ ꠢꠇꠟꠔꠣ ꠙꠞꠤꠡ꠆ꠇꠣꠞ ꠀꠍꠦ। ꠔꠥꠝꠞꠣꠅ ꠘꠤꠌ꠆ꠌꠄ ꠙꠞꠤꠡ꠆ꠇꠣꠞ ꠀꠍ, ꠅꠁꠟꠦ ꠢꠇꠟ ꠘꠣꠄ।”
JOH 13:11 ꠀꠍꠟꠦ ꠖꠥꠡꠝꠘꠞ ꠀꠔꠅ ꠇꠦ ꠔꠣꠘꠞꠦ ꠗꠞꠣꠁ ꠖꠤꠛ, ꠁꠈꠣꠘ ꠔꠣꠁꠘ ꠎꠣꠘꠔꠣ। ꠄꠞꠖꠣꠄ ꠔꠣꠁꠘ ꠇꠁꠟꠣ, “ꠔꠥꠝꠞꠣ ꠢꠇꠟ ꠙꠞꠤꠡ꠆ꠇꠣꠞ ꠘꠣꠄ।”
JOH 13:12 ꠍꠣꠢꠣꠛꠤ ꠅꠇꠟꠞ ꠙꠣꠅ ꠗꠅꠀꠁꠀ ꠢꠣꠞꠟꠦ ꠁꠍꠣꠄ ꠔꠣꠘ ꠙꠣꠁꠘ꠆ꠎꠣꠛꠤ ꠚꠤꠘ꠆ꠖꠤꠀ ꠢꠤꠞꠛꠣꠞ ꠛꠁꠟꠣ ꠀꠞ ꠔꠣꠞꠣꠞꠦ ꠇꠁꠟꠣ, “ꠀꠝꠤ ꠇꠤꠔꠣ ꠇꠞꠟꠣꠝ, ꠔꠥꠝꠞꠣ ꠁꠔꠣ ꠛꠥꠎꠍ ꠘꠤ?
JOH 13:13 ꠔꠥꠝꠞꠣ ꠀꠝꠣꠞꠦ ꠃꠡ꠆ꠔꠣꠖ ꠀꠞ ꠝꠣꠟꠤꠇ ꠇꠁꠀ ꠒꠣꠇ, ꠁꠈꠣꠘ ꠑꠤꠇꠃ, ꠀꠝꠤꠃ ꠔꠥꠝꠞꠣꠞ ꠃꠡ꠆ꠔꠣꠖ ꠀꠞ ꠝꠣꠟꠤꠇ।
JOH 13:14 ꠀꠞ ꠀꠝꠤ ꠔꠥꠝꠞꠣꠞ ꠃꠡ꠆ꠔꠣꠖ ꠀꠞ ꠝꠣꠟꠤꠇ ꠅꠁꠀꠅ ꠎꠦꠛꠟꠣ ꠔꠥꠝꠞꠣꠞ ꠙꠣꠅ ꠗꠅꠀꠁꠀ ꠖꠤꠟꠣꠝ, ꠔꠦ ꠔꠥꠝꠞꠣꠅ ꠅꠟꠣ ꠄꠇꠦ-ꠅꠁꠘ꠆ꠘꠞ ꠙꠣꠅ ꠗꠅꠀꠁ ꠖꠦꠅꠀ ꠎꠞꠥꠞ।
JOH 13:15 ꠀꠝꠤ ꠁꠟꠣ ꠇꠞꠤꠀ ꠖꠦꠈꠣꠁꠟꠣꠝ, ꠎꠣꠔꠦ ꠀꠝꠤ ꠎꠦꠟꠣ ꠇꠞꠟꠣꠝ ꠔꠥꠝꠞꠣꠅ ꠅꠟꠣ ꠇꠞꠅ।
JOH 13:16 ꠀꠝꠤ ꠔꠥꠝꠞꠣꠞꠦ ꠢꠣꠍꠣꠃ ꠇꠁꠞꠣꠝ, ꠉꠥꠟꠣꠝ ꠔꠣꠞ ꠝꠥꠘꠤꠛ ꠕꠣꠇꠤ ꠛꠠ ꠘꠣꠄ। ꠀꠞ ꠎꠣꠞꠦ ꠙꠣꠑꠣꠘꠤ ꠅꠁꠍꠦ, ꠢꠦ ꠔꠣꠞ ꠙꠣꠑꠣꠅꠞꠣ ꠕꠣꠇꠤ ꠛꠠ ꠘꠣꠄ।
JOH 13:17 ꠁꠔꠣ ꠎꠣꠘꠤꠀ ꠎꠥꠖꠤ ꠀꠝꠟ ꠇꠞ, ꠔꠦ ꠔꠥꠝꠞꠣ ꠗꠁꠘ꠆ꠘ।
JOH 13:18 “ꠀꠝꠤ ꠔꠥꠝꠞꠣ ꠢꠇꠟꠞ ꠛꠦꠙꠣꠞꠦ ꠇꠁꠞꠣꠝ ꠘꠣ। ꠀꠝꠤ ꠎꠦꠞꠣꠞꠦ ꠙꠍꠘ꠆ꠖ ꠇꠞꠍꠤ ꠔꠣꠞꠣꠞꠦ ꠔ ꠌꠤꠘꠤ। ꠢꠥꠘꠅ, ꠀꠟ꠆ꠟꠣꠞ ꠇꠣꠟꠣꠝꠞ ꠀꠄꠀꠔ ꠔ ꠚꠟꠤꠔꠦ ꠅꠁꠛ, ꠟꠦꠈꠣ ꠀꠍꠦ, ‘ꠀꠝꠣꠞ ꠟꠉꠦ ꠛꠁꠀ ꠎꠦꠉꠥꠄ ꠈꠣꠅꠀ-ꠖꠣꠅꠀ ꠇꠞꠦ, ꠢꠉꠥꠄ ꠀꠝꠣꠞ ꠃꠙꠞꠦ ꠙꠣꠅ ꠔꠥꠟꠍꠦ।’
JOH 13:19 ꠁꠔꠣ ꠊꠐꠣꠞ ꠀꠉꠦꠃ ꠀꠝꠤ ꠔꠥꠝꠞꠣꠞꠦ ꠎꠣꠘꠣꠁ ꠖꠤꠟꠣꠝ, ꠔꠦꠃ ꠊꠐꠣꠞ ꠛꠣꠖꠦ ꠔꠥꠝꠞꠣ ꠛꠥꠎꠛꠣꠄ, ꠀꠝꠤꠃ ꠢꠦꠁꠘ।
JOH 13:20 ꠀꠝꠤ ꠔꠥꠝꠞꠣꠞꠦ ꠢꠣꠍꠣꠃ ꠇꠁꠞꠣꠝ, ꠀꠝꠤ ꠎꠣꠞꠦ ꠙꠣꠑꠣꠁ, ꠔꠣꠞꠦ ꠎꠦ ꠎꠘꠦ ꠇꠛꠥꠟ ꠇꠞꠦ, ꠢꠦ ꠀꠍꠟꠦ ꠀꠝꠣꠞꠦꠃ ꠇꠛꠥꠟ ꠇꠞꠦ। ꠀꠞ ꠎꠦ ꠎꠘꠦ ꠀꠝꠣꠞꠦ ꠇꠛꠥꠟ ꠇꠞꠦ, ꠢꠦ ꠔꠣꠘꠞꠦꠃ ꠇꠛꠥꠟ ꠇꠞꠦ, ꠎꠦꠁꠘ ꠀꠝꠣꠞꠦ ꠙꠣꠑꠣꠁꠍꠂꠘ।”
JOH 13:21 ꠅꠈꠣꠘ ꠇꠁꠀ ꠢꠣꠞꠟꠦ ꠢꠎꠞꠔ ꠁꠍꠣꠞ ꠖꠤꠟ ꠙꠦꠞꠦꠡꠣꠘ ꠅꠁꠉꠦꠟ। ꠔꠣꠁꠘ ꠈꠥꠟꠤꠀ ꠇꠁꠟꠣ, “ꠀꠝꠤ ꠢꠇ ꠇꠕꠣ ꠇꠁꠞꠣꠝ, ꠔꠥꠝꠞꠣꠞ ꠝꠣꠎꠞ ꠄꠇꠎꠘꠦꠃ ꠀꠝꠣꠞꠦ ꠖꠥꠡꠝꠘꠞ ꠀꠔꠅ ꠗꠞꠣꠁ ꠖꠤꠛ।”
JOH 13:22 ꠔꠣꠁꠘ ꠇꠣꠞ ꠇꠕꠣ ꠇꠁꠞꠣ, ꠍꠣꠢꠣꠛꠤ ꠅꠇꠟꠦ ꠁꠈꠣꠘ ꠘꠣ ꠛꠥꠎꠣꠄ ꠄꠇꠦ-ꠅꠁꠘ꠆ꠘꠞ ꠛꠣꠄ ꠌꠣꠁ ꠞꠁꠟꠣ।
JOH 13:23 ꠄꠞꠣꠞ ꠝꠣꠎꠞ ꠎꠦ ꠍꠣꠢꠣꠛꠤꠞꠦ ꠁꠍꠣꠄ ꠝꠣꠄꠀ ꠇꠞꠔꠣ, ꠄꠁꠘ ꠁꠍꠣꠞ ꠇꠥꠟꠅ ꠄꠟꠣꠁꠘ ꠖꠤꠀ ꠛꠅꠀꠔ ꠀꠍꠟꠣ।
JOH 13:24 ꠍꠣꠁꠝꠘ-ꠙꠤꠔꠞꠦ ꠄꠘꠞꠦ ꠁꠡꠣꠞꠣ ꠖꠤꠀ ꠇꠁꠟꠣ, ꠔꠥꠝꠤ ꠎꠤꠇꠣꠅ, ꠔꠣꠁꠘ ꠇꠣꠞ ꠇꠕꠣ ꠇꠁꠞꠣ।
JOH 13:25 ꠔꠦꠃ ꠅꠃ ꠍꠣꠢꠣꠛꠤꠄ ꠁꠍꠣꠞ ꠛꠣꠄ ꠎꠥꠇꠤꠀ ꠇꠁꠟꠣ, “ꠢꠥꠎꠥꠞ, ꠇꠦ ꠅꠃ ꠎꠘ?”
JOH 13:26 ꠁꠍꠣꠄ ꠎꠥꠀꠙ ꠖꠤꠟꠣ, “ꠅꠃ ꠞꠥꠐꠤꠞ ꠐꠥꠇꠞꠣ ꠛꠃꠟꠅ ꠜꠤꠎꠣꠁꠀ ꠎꠣꠞꠦ ꠖꠤꠝꠥ, ꠢꠦ-ꠃ ꠅꠃ ꠎꠘ।” ꠀꠞ ꠅꠃ ꠞꠥꠐꠤ ꠔꠣꠁꠘ ꠍꠣꠁꠝꠘ ꠁꠡ꠆ꠇꠣꠞꠤꠀꠔꠞ ꠙꠥꠀ ꠁꠢꠥꠖꠣꠞꠦ ꠖꠤꠟꠣ।
JOH 13:27 ꠞꠥꠐꠤꠞ ꠐꠥꠇꠞꠣ ꠟꠅꠀꠞ ꠟꠉꠦ ꠟꠉꠦꠃ ꠁꠛꠟꠤꠍ ꠁꠢꠥꠖꠣꠞ ꠜꠤꠔꠞꠦ ꠢꠣꠝꠣꠁꠟ। ꠁꠍꠣꠄ ꠔꠣꠞꠦ ꠇꠁꠟꠣ, “ꠎꠦꠔꠣ ꠇꠞꠔꠣꠄ ꠌꠣꠅ, ꠎꠟꠖꠤ ꠇꠞꠤꠟꠣꠅ।”
JOH 13:28 ꠁꠍꠣꠞ ꠟꠉꠦ ꠎꠣꠞꠣ ꠈꠣꠅꠀꠔ ꠛꠁꠍꠟꠣ, ꠔꠣꠞꠣ ꠇꠦꠃ ꠛꠥꠎꠟꠣ ꠘꠣ, ꠔꠣꠁꠘ ꠁꠢꠥꠖꠣꠞꠦ ꠇꠦꠘꠦ ꠁꠈꠣꠘ ꠇꠁꠍꠂꠘ।
JOH 13:29 ꠇꠦꠃ ꠇꠦꠃ ꠝꠘꠅ ꠇꠞꠟ, ꠁꠖꠞ ꠛꠣꠎꠣꠞ ꠇꠞꠣꠞ ꠟꠣꠉꠤ ꠁꠍꠣꠄ ꠁꠢꠥꠖꠣꠞꠦ ꠅꠈꠣꠘ ꠇꠁꠍꠂꠘ ꠛꠣ ꠉꠞꠤꠛ ꠅꠇꠟꠞꠦ ꠇꠥꠘ꠆ꠔꠣ ꠖꠦꠅꠀꠞ ꠇꠕꠣ ꠇꠁꠍꠂꠘ, ꠇꠣꠞꠘ ꠐꠦꠇꠣꠞ ꠕꠟꠤ ꠔ ꠁꠢꠥꠖꠣꠞ ꠉꠦꠍꠦꠃ ꠕꠣꠇꠔ।
JOH 13:30 ꠞꠥꠐꠤꠞ ꠐꠥꠇꠞꠣ ꠟꠅꠀꠞ ꠟꠉꠦ ꠟꠉꠦ ꠁꠢꠥꠖꠣ ꠛꠣꠞ ꠅꠁꠀ ꠉꠦꠟꠉꠤ। ꠁ ꠡꠝꠄ ꠞꠣꠁꠔ ꠀꠍꠤꠟ।
JOH 13:31 ꠁꠢꠥꠖꠣ ꠛꠣꠞꠦ ꠉꠤꠀ ꠢꠣꠞꠟꠦ ꠁꠍꠣꠄ ꠇꠁꠟꠣ, “ꠛꠤꠘ-ꠀꠖꠝꠞ ꠝꠢꠤꠝꠣ ꠎꠣꠁꠞ ꠇꠞꠣꠞ ꠡꠝꠄ ꠀꠁꠌ꠆ꠍꠦ, ꠔꠣꠘ ꠝꠣꠎꠖꠤ ꠀꠟ꠆ꠟꠣꠞ ꠝꠢꠤꠝꠣ ꠎꠣꠁꠞ ꠅꠁꠛ।
JOH 13:32 ꠀꠞ ꠀꠟ꠆ꠟꠣꠞ ꠝꠢꠤꠝꠣ ꠎꠦꠛꠟꠣ ꠔꠣꠘ ꠝꠣꠎꠖꠤ ꠎꠣꠁꠞ ꠅꠁꠛ, ꠅꠃ ꠡꠝꠄ ꠀꠟ꠆ꠟꠣꠄꠅ ꠘꠤꠎꠞ ꠝꠣꠎꠦ ꠛꠤꠘ-ꠀꠖꠝꠞ ꠝꠢꠤꠝꠣ ꠎꠣꠁꠞ ꠇꠞꠛꠣ, ꠁꠔꠣ ꠔꠣꠁꠘ ꠈꠥꠛ ꠎꠟꠖꠤꠃ ꠇꠞꠛꠣ।
JOH 13:33 ꠅ ꠀꠅꠟꠣꠖ ꠅꠇꠟ, ꠀꠝꠤ ꠀꠞ ꠛꠦꠡꠤ ꠖꠤꠘ ꠔꠥꠝꠞꠣꠞ ꠉꠦꠍꠦ ꠞꠁꠔꠣꠝ ꠘꠣꠄ। ꠔꠦ ꠁꠢꠥꠖꠤ ꠘꠦꠔꠣ ꠅꠇꠟꠞꠦ ꠀꠉꠦ ꠎꠦꠟꠣ ꠇꠁꠍꠟꠣꠝ, ꠔꠥꠝꠞꠣ ꠀꠝꠣꠞꠦ ꠔꠣꠟ꠆ꠟꠣꠡ ꠇꠞꠛꠣꠄ, ꠅꠁꠟꠦ ꠀꠝꠤ ꠎꠦꠈꠣꠘꠅ ꠎꠣꠁꠝꠥ ꠔꠥꠝꠞꠣ ꠢꠤꠘꠅ ꠎꠣꠁꠔꠣꠄ ꠙꠣꠞꠔꠣꠄ ꠘꠣꠄ, ꠅꠈꠘ ꠅꠃ ꠇꠕꠣ ꠔꠥꠝꠞꠣꠞꠦꠅ ꠇꠁꠞꠣꠝ।
JOH 13:34 ꠀꠝꠤ ꠔꠥꠝꠞꠣꠞꠦ ꠄꠇꠈꠣꠘ ꠘꠄꠀ ꠢꠥꠇꠥꠝ ꠖꠤꠞꠣꠝ, ꠔꠥꠝꠞꠣ ꠄꠇꠦ-ꠅꠁꠘ꠆ꠘꠞꠦ ꠝꠣꠄꠀ ꠇꠞꠤꠅ। ꠀꠝꠤ ꠎꠦꠟꠣ ꠔꠥꠝꠞꠣꠞꠦ ꠝꠣꠄꠀ ꠇꠞꠍꠤ, ꠔꠥꠝꠞꠣꠅ ꠅꠟꠣ ꠄꠇꠦ-ꠅꠁꠘ꠆ꠘꠞꠦ ꠝꠣꠄꠀ ꠇꠞꠤꠅ।
JOH 13:35 ꠔꠥꠝꠞꠣ ꠎꠥꠖꠤ ꠄꠇꠦ-ꠅꠁꠘ꠆ꠘꠞꠦ ꠝꠣꠄꠀ ꠇꠞ, ꠔꠦ ꠢꠇꠟꠦ ꠛꠥꠎꠛ ꠔꠥꠝꠞꠣ ꠀꠝꠣꠞ ꠃꠝ꠆ꠝꠔ।”
JOH 13:36 ꠍꠣꠁꠝꠘ-ꠙꠤꠔꠞꠦ ꠁꠍꠣꠞꠦ ꠇꠁꠟꠣ, “ꠢꠥꠎꠥꠞ, ꠀꠙꠘꠦ ꠇꠥꠀꠁ ꠎꠣꠁꠞꠣ?” ꠔꠣꠁꠘ ꠇꠁꠟꠣ, “ꠀꠝꠤ ꠎꠦꠘꠅ ꠎꠣꠁꠞꠣꠝ, ꠔꠥꠝꠞꠣ ꠅꠈꠘ ꠀꠝꠣꠞ ꠟꠉꠦ ꠢꠤꠘꠅ ꠀꠁꠔꠣꠄ ꠙꠣꠞꠔꠣꠄ ꠘꠣꠄ, ꠅꠁꠟꠦ ꠛꠣꠖꠦ ꠀꠁꠛꠣꠄ।”
JOH 13:37 ꠙꠤꠔꠞꠦ ꠇꠁꠟꠣ, “ꠅꠈꠘ ꠇꠦꠘꠦ ꠎꠣꠁꠔꠣꠝ ꠙꠣꠞꠔꠣꠝ ꠘꠣꠄ? ꠀꠙꠘꠣꠞ ꠟꠣꠉꠤ ꠀꠝꠤ ꠀꠝꠣꠞ ꠎꠣꠘꠅ ꠛꠤꠟꠣꠁ ꠖꠤꠝꠥ।”
JOH 13:38 ꠅꠃ ꠡꠝꠄ ꠁꠍꠣꠄ ꠇꠁꠟꠣ, “ꠀꠝꠣꠞ ꠟꠣꠉꠤ ꠢꠣꠍꠣꠃ ꠔꠥꠝꠣꠞ ꠎꠣꠘ ꠖꠤꠛꠣꠄ ꠘꠤ? ꠔꠦ ꠢꠣꠍꠣ ꠇꠕꠣ ꠀꠝꠤ ꠔꠥꠝꠣꠞꠦ ꠇꠁꠞꠣꠝ, ꠝꠥꠞꠉꠣꠄ ꠛꠣꠋ ꠖꠤꠛꠣꠞ ꠀꠉꠦꠃ, ꠔꠥꠝꠤ ꠔꠤꠘꠛꠣꠞ ꠇꠁꠛꠣꠄ, ꠔꠥꠝꠤ ꠀꠝꠣꠞꠦ ꠌꠤꠘ ꠘꠣ।”
JOH 14:1 ꠢꠎꠞꠔ ꠁꠍꠣꠄ ꠇꠁꠟꠣ, “ꠔꠥꠝꠞꠣ ꠀꠞ ꠙꠦꠞꠦꠡꠣꠘ ꠅꠁꠅ ꠘꠣ। ꠀꠟ꠆ꠟꠣꠞ ꠃꠙꠞꠦ ꠔ ꠔꠥꠝꠞꠣꠞ ꠄꠇꠤꠘ ꠀꠍꠦ, ꠔꠦ ꠀꠝꠣꠞ ꠃꠙꠞꠦꠅ ꠄꠇꠤꠘ ꠞꠣꠈꠅ।
JOH 14:2 ꠀꠝꠣꠞ ꠛꠣꠚꠞ ꠛꠣꠠꠤꠔ ꠞꠅꠀꠞ ꠛꠃꠔ ꠎꠣꠉꠣ ꠀꠍꠦ, ꠘꠣ ꠕꠣꠇꠟꠦ ꠀꠝꠤ ꠇꠁꠟꠣꠝ ꠅꠘꠦ। ꠀꠝꠤ ꠔ ꠔꠥꠝꠞꠣꠞ ꠟꠣꠉꠤ ꠎꠣꠉꠣ ꠑꠤꠇ ꠇꠞꠣꠔ ꠎꠣꠁꠞꠣꠝ।
JOH 14:3 ꠎꠣꠉꠣ ꠑꠤꠇ ꠇꠞꠤꠀ ꠢꠤꠞꠛꠣꠞ ꠀꠁꠝꠥ, ꠀꠁꠀ ꠔꠥꠝꠞꠣꠞꠦ ꠀꠝꠣꠞ ꠉꠦꠍꠦ ꠘꠤꠝꠥ। ꠔꠦꠃ ꠀꠝꠤ ꠎꠦꠘꠅ ꠞꠁꠝꠥ, ꠔꠥꠝꠞꠣꠅ ꠢꠘꠅ ꠞꠁꠛꠣꠄ।
JOH 14:4 ꠀꠞ ꠀꠝꠤ ꠇꠥꠀꠁ ꠎꠣꠁꠞꠣꠝ, ꠁ ꠙꠕ ꠔ ꠔꠥꠝꠞꠣꠞ ꠌꠤꠘꠣ ꠀꠍꠦ।”
JOH 14:5 ꠅꠃ ꠡꠝꠄ ꠍꠣꠢꠣꠛꠤ ꠕꠥꠝꠣꠍꠦ ꠁꠍꠣꠞꠦ ꠇꠁꠟꠣ, “ꠢꠥꠎꠥꠞ, ꠀꠙꠘꠦ ꠇꠥꠀꠁ ꠎꠣꠁꠞꠣ, ꠅꠈꠣꠘꠃ ꠀꠝꠞꠣ ꠎꠣꠘꠤ ꠘꠣ, ꠔꠦ ꠙꠕ ꠇꠤꠟꠣ ꠌꠤꠘꠝꠥ?”
JOH 14:6 ꠁꠍꠣꠄ ꠇꠁꠟꠣ, “ꠀꠝꠤꠃ ꠙꠕ, ꠀꠝꠤꠃ ꠢꠇ ꠀꠞ ꠀꠝꠤꠃ ꠎꠤꠘ꠆ꠖꠦꠉꠤ। ꠀꠝꠣꠞ ꠃꠍꠤꠟ꠆ꠟꠣ ꠍꠣꠠꠣ ꠇꠥꠘꠥ ꠝꠣꠘꠥꠡꠃ ꠉꠣꠁꠛꠤ ꠛꠣꠚꠞ ꠉꠦꠍꠦ ꠎꠣꠁꠔ ꠙꠣꠞꠦ ꠘꠣ।
JOH 14:7 ꠔꠥꠝꠞꠣ ꠀꠝꠣꠞꠦ ꠌꠤꠘꠟꠦ ꠀꠝꠣꠞ ꠉꠣꠁꠛꠤ ꠛꠣꠚꠞꠦꠅ ꠌꠤꠘꠟꠣꠄ ꠅꠘꠦ। ꠔꠦ ꠅꠈꠘ ꠔꠥꠝꠞꠣ ꠔꠣꠘꠦ ꠌꠤꠘꠍ ꠀꠞ ꠖꠦꠈꠍ-ꠅ।”
JOH 14:8 ꠚꠤꠟꠤꠚꠦ ꠇꠁꠟꠣ, “ꠢꠥꠎꠥꠞ, ꠅꠃ ꠉꠣꠁꠛꠤ ꠛꠣꠚ ꠀꠝꠞꠣꠞꠦ ꠖꠦꠈꠣꠃꠇ꠆ꠇꠣ, ꠔꠦꠃ ꠀꠝꠞꠣ ꠡꠣꠘ꠆ꠔꠤ ꠅꠁꠝꠥ।”
JOH 14:9 ꠁꠍꠣꠄ ꠇꠁꠟꠣ, “ꠚꠤꠟꠤꠚ, ꠅꠔ ꠖꠤꠘ ꠕꠣꠇꠤ ꠀꠝꠤ ꠔꠥꠝꠞꠣꠞ ꠟꠉꠦ ꠟꠉꠦ ꠀꠍꠤ, ꠄꠞꠛꠣꠖꠦꠅ ꠔꠥꠝꠤ ꠀꠝꠣꠞꠦ ꠌꠤꠘꠟꠣꠄ ꠘꠣ ꠘꠤ? ꠎꠦ ꠎꠘꠦ ꠀꠝꠣꠞꠦ ꠖꠦꠈꠍꠦ, ꠢꠦ ꠀꠝꠣꠞ ꠉꠣꠁꠛꠤ ꠛꠣꠚꠞꠦꠅ ꠖꠦꠈꠍꠦ। ꠔꠦ ꠔꠥꠝꠤ ꠇꠤꠟꠣꠘ ꠇꠁꠟꠣꠄ, ꠉꠣꠁꠛꠤ ꠛꠣꠚꠞꠦ ꠖꠦꠈꠣꠃꠇ꠆ꠇꠣ?
JOH 14:10 ꠔꠥꠝꠤ ꠄꠇꠤꠘ ꠇꠞ ꠘꠣ ꠘꠤ, ꠀꠝꠤ ꠉꠣꠁꠛꠤ ꠛꠣꠚꠞ ꠝꠣꠎꠦ ꠀꠍꠤ, ꠀꠞ ꠉꠣꠁꠛꠤ ꠛꠣꠚꠅ ꠀꠝꠣꠞ ꠝꠣꠎꠦ ꠀꠍꠂꠘ? ꠀꠝꠤ ꠔꠥꠝꠞꠣꠞꠦ ꠎꠦꠔꠣ ꠇꠁ, ꠁꠔꠣ ꠀꠝꠣꠞ ꠘꠤꠎꠞ ꠝꠥꠈꠞ ꠛꠥꠟꠤ ꠘꠣꠄ, ꠎꠦ ꠉꠣꠁꠛꠤ ꠛꠣꠚ ꠀꠝꠣꠞ ꠜꠤꠔꠞꠦ ꠀꠍꠂꠘ, ꠔꠣꠁꠘꠃ ꠔꠣꠘ ꠘꠤꠎꠞ ꠇꠣꠝ ꠌꠣꠟꠣꠁꠞꠣ।
JOH 14:11 ꠀꠝꠣꠞ ꠇꠕꠣ ꠄꠇꠤꠘ ꠇꠞꠅ, ꠀꠝꠤ ꠀꠝꠣꠞ ꠛꠣꠚꠞ ꠝꠣꠎꠦ ꠀꠍꠤ, ꠀꠞ ꠔꠣꠁꠘ ꠀꠝꠣꠞ ꠝꠣꠎꠦ ꠀꠍꠂꠘ। ꠀꠞꠘꠣꠄ ꠅꠘ꠆ꠔꠔ ꠀꠝꠣꠞ ꠅꠔꠣ ꠇꠦꠞꠣꠝꠔꠤ ꠇꠣꠝ ꠖꠦꠈꠤꠀ ꠀꠝꠣꠞꠦ ꠄꠇꠤꠘ ꠇꠞꠅ।
JOH 14:12 “ꠀꠝꠤ ꠔꠥꠝꠞꠣꠞꠦ ꠢꠣꠍꠣꠃ ꠇꠁꠞꠣꠝ, ꠇꠦꠃ ꠎꠥꠖꠤ ꠀꠝꠣꠞ ꠃꠙꠞꠦ ꠁꠝꠣꠘ ꠀꠘꠦ, ꠔꠦ ꠀꠝꠤ ꠎꠦꠔꠣ ꠇꠣꠝ ꠇꠞꠤ, ꠢꠦ-ꠅ ꠅꠔꠣ ꠇꠞꠛ। ꠀꠞ ꠀꠝꠤ ꠀꠝꠣꠞ ꠛꠣꠚꠞ ꠉꠦꠍꠦ ꠎꠣꠁꠀꠞꠉꠤ ꠇꠞꠤ ꠢꠦ ꠀꠞꠅ ꠛꠠ ꠛꠠ ꠇꠣꠝ ꠇꠞꠛ।
JOH 14:13 ꠔꠥꠝꠞꠣ ꠀꠝꠣꠞ ꠘꠣꠝꠦ ꠎꠦꠔꠣ ꠌꠣꠁꠛꠣꠄ, ꠀꠝꠤ ꠁꠔꠣ ꠙꠥꠞꠣ ꠇꠞꠝꠥ ꠎꠣꠔꠦ ꠛꠣꠚꠞ ꠝꠢꠤꠝꠣ ꠙꠥꠔꠞ ꠝꠣꠎꠖꠤ ꠎꠣꠁꠞ ꠅꠄ।
JOH 14:14 ꠀꠝꠣꠞ ꠘꠣꠝ ꠟꠁꠀ ꠀꠝꠣꠞ ꠉꠦꠍꠦ ꠇꠥꠘ꠆ꠔꠣ ꠌꠣꠁꠟꠦ, ꠀꠝꠤ ꠖꠤꠝꠥ।
JOH 14:15 “ꠔꠥꠝꠞꠣ ꠎꠥꠖꠤ ꠀꠝꠣꠞꠦ ꠝꠣꠄꠀ ꠇꠞ, ꠔꠦ ꠀꠝꠣꠞ ꠢꠇꠟ ꠢꠥꠇꠥꠝ-ꠀꠢꠇꠣꠝ ꠀꠝꠟ ꠇꠞꠤꠅ।
JOH 14:16 ꠀꠝꠤ ꠉꠣꠁꠛꠤ ꠛꠣꠚꠞ ꠉꠦꠍꠦ ꠌꠣꠁꠝꠥ, ꠀꠞ ꠔꠣꠁꠘ ꠔꠥꠝꠞꠣꠞ ꠟꠣꠉꠤ ꠀꠞꠇ ꠡꠣꠁꠎ꠆ꠎꠉꠤꠞ ꠙꠣꠑꠣꠁꠛꠣ, ꠄꠁꠘ ꠌꠤꠞꠇꠣꠟ ꠞꠁꠛꠣ।
JOH 14:17 ꠅꠃ ꠡꠣꠁꠎ꠆ꠎꠉꠤꠞ ꠅꠁꠟꠣ ꠢꠇ ꠞꠥꠢꠥ। ꠁ ꠖꠥꠘꠤꠀꠞ ꠝꠣꠘꠡꠦ ꠅꠃ ꠢꠇ ꠞꠥꠢꠥꠞꠦ ꠇꠛꠥꠟ ꠇꠞꠦ ꠘꠣ, ꠇꠣꠞꠘ ꠔꠣꠞꠣ ꠄꠞꠦ ꠖꠦꠈꠦꠅ ꠘꠣ, ꠌꠤꠘꠦꠅ ꠘꠣ। ꠅꠁꠟꠦ ꠔꠥꠝꠞꠣ ꠄꠘꠦ ꠌꠤꠘ, ꠄꠁꠘ ꠔ ꠔꠥꠝꠞꠣꠞ ꠟꠉꠦ ꠟꠉꠦ ꠞꠂꠘ ꠀꠞ ꠍꠣꠝꠘꠦꠖꠤ ꠔꠥꠝꠞꠣꠞ ꠖꠤꠟꠞ ꠝꠣꠎꠦ ꠛꠡꠔ ꠇꠞꠛꠣ।
JOH 14:18 “ꠀꠝꠤ ꠔꠥꠝꠞꠣꠞꠦ ꠄꠔꠤꠝ ꠢꠣꠟꠔꠦ ꠚꠣꠟꠣꠁꠀ ꠎꠣꠁꠔꠣꠝ ꠘꠣꠄ, ꠀꠝꠤ ꠢꠤꠞꠛꠣꠞ ꠔꠥꠝꠞꠣꠞ ꠉꠦꠍꠦ ꠀꠁꠝꠥ।
JOH 14:19 ꠕꠥꠠꠣ ꠛꠣꠖꠦ ꠖꠥꠘꠤꠀꠞ ꠝꠣꠘꠡꠦ ꠀꠝꠣꠞꠦ ꠀꠞ ꠖꠦꠈꠔ ꠘꠣꠄ, ꠅꠁꠟꠦ ꠔꠥꠝꠞꠣ ꠖꠦꠈꠛꠣꠄ। ꠀꠝꠤ ꠎꠤꠘ꠆ꠖꠣ ꠀꠍꠤ ꠉꠔꠤꠇꠦ ꠔꠥꠝꠞꠣꠅ ꠎꠤꠘ꠆ꠖꠣ ꠞꠁꠛꠣꠄ।
JOH 14:20 ꠀꠝꠤ ꠎꠤꠘ꠆ꠖꠣ ꠅꠁꠀ ꠃꠑꠤꠀ ꠢꠣꠞꠟꠦ ꠔꠥꠝꠞꠣ ꠛꠥꠎꠛꠣꠄ, ꠀꠝꠤ ꠀꠝꠣꠞ ꠉꠣꠁꠛꠤ ꠛꠣꠚꠞ ꠝꠣꠎꠦ ꠀꠍꠤ ꠀꠞ ꠔꠥꠝꠞꠣ ꠀꠝꠣꠞ ꠝꠣꠎꠦ ꠀꠍ, ꠀꠝꠤ ꠔꠥꠝꠞꠣꠞ ꠝꠣꠎꠦ ꠀꠍꠤ।
JOH 14:21 ꠎꠦ ꠎꠘꠦ ꠀꠝꠣꠞ ꠢꠥꠇꠥꠝ-ꠀꠢꠇꠣꠝ ꠌꠤꠘꠦ ꠀꠞ ꠀꠝꠟ ꠇꠞꠦ, ꠢꠦ-ꠃ ꠀꠝꠣꠞꠦ ꠝꠣꠄꠀ ꠇꠞꠦ। ꠀꠞ ꠎꠦ ꠎꠘꠦ ꠀꠝꠣꠞꠦ ꠝꠣꠄꠀ ꠇꠞꠦ, ꠀꠝꠣꠞ ꠉꠣꠁꠛꠤ ꠛꠣꠚ ꠀꠟ꠆ꠟꠣꠄꠅ ꠔꠣꠞꠦ ꠝꠣꠄꠀ ꠇꠞꠛꠣ। ꠀꠝꠤꠅ ꠔꠣꠞꠦ ꠝꠣꠄꠀ ꠇꠞꠝꠥ, ꠀꠞ ꠀꠝꠣꠞ ꠘꠤꠎꠞꠦ ꠔꠣꠞ ꠉꠦꠍꠦ ꠎꠣꠁꠞ ꠇꠞꠝꠥ।”
JOH 14:22 ꠍꠣꠢꠣꠛꠤ ꠅꠇꠟꠞ ꠝꠣꠎꠦ ꠁꠢꠥꠖꠣ ꠁꠡ꠆ꠇꠣꠞꠤꠀꠔ ꠍꠣꠠꠣ ꠀꠞꠇ ꠍꠣꠢꠣꠛꠤꠞ ꠘꠣꠝ ꠀꠍꠤꠟ ꠁꠢꠥꠖꠣ, ꠄꠁꠘ ꠇꠁꠟꠣ, “ꠢꠥꠎꠥꠞ, ꠖꠥꠘꠤꠀꠞ ꠢꠇꠟ ꠝꠣꠘꠡꠞ ꠉꠦꠍꠦ ꠎꠣꠁꠞ ꠘꠣ ꠇꠞꠤꠀ, ꠈꠣꠟꠤ ꠀꠝꠞꠣꠞ ꠉꠦꠍꠦꠃ ꠀꠙꠘꠣꠞꠦ ꠇꠦꠘꠦ ꠎꠣꠁꠞ ꠇꠞꠛꠣ?”
JOH 14:23 ꠁꠍꠣꠄ ꠎꠥꠀꠙ ꠖꠤꠟꠣ, “ꠇꠦꠃ ꠎꠥꠖꠤ ꠀꠝꠣꠞꠦ ꠝꠣꠄꠀ ꠇꠞꠦ, ꠔꠦ ꠢꠦ ꠀꠝꠣꠞ ꠇꠕꠣ ꠝꠣꠘꠛ। ꠀꠝꠣꠞ ꠉꠣꠁꠛꠤ ꠛꠣꠚꠦ ꠔꠣꠞꠦ ꠝꠣꠄꠀ ꠇꠞꠛꠣ, ꠀꠝꠞꠣ ꠔꠣꠞ ꠉꠦꠍꠦ ꠀꠁꠝꠥ, ꠀꠁꠀ ꠔꠣꠞ ꠟꠉꠦ ꠛꠡꠔ ꠇꠞꠝꠥ।
JOH 14:24 ꠅꠁꠟꠦ ꠎꠦ ꠎꠘꠦ ꠀꠝꠣꠞꠦ ꠝꠣꠄꠀ ꠇꠞꠦ ꠘꠣ, ꠢꠦ ꠇꠥꠘꠥꠝꠘ꠆ꠔꠦꠃ ꠀꠝꠣꠞ ꠇꠕꠣꠄ ꠌꠟꠦ ꠘꠣ। ꠀꠝꠤ ꠔꠥꠝꠞꠣꠞꠦ ꠎꠦꠔꠣ ꠇꠁꠟꠣꠝ, ꠁꠔꠣ ꠀꠝꠣꠞ ꠝꠥꠈꠞ ꠇꠕꠣ ꠘꠣꠄ, ꠎꠦꠁꠘ ꠀꠝꠣꠞꠦ ꠛꠦꠎꠤꠍꠂꠘ ꠢꠃ ꠛꠣꠚꠞ ꠇꠕꠣ।
JOH 14:25 “ꠀꠝꠤ ꠔꠥꠝꠞꠣꠞ ꠟꠉꠦ ꠕꠣꠇꠔꠦ ꠕꠣꠇꠔꠦꠃ ꠁꠔꠣ ꠇꠁꠟꠣꠝ।
JOH 14:26 ꠅꠃ ꠡꠣꠁꠎ꠆ꠎꠉꠤꠞ ꠙꠣꠇ ꠞꠥꠢꠥ, ꠎꠣꠘꠞꠦ ꠀꠝꠣꠞ ꠛꠣꠚꠦ ꠀꠝꠣꠞ ꠘꠣꠝꠦ ꠙꠣꠑꠣꠁꠛꠣ, ꠔꠣꠁꠘꠃ ꠢꠇꠟ ꠛꠦꠙꠣꠞꠦ ꠔꠥꠝꠞꠣꠞꠦ ꠔꠣꠟꠤꠝ ꠖꠤꠛꠣ, ꠀꠞ ꠀꠝꠤ ꠔꠥꠝꠞꠣꠞꠦ ꠎꠦꠔꠣ ꠇꠁꠍꠤ ꠅꠔꠣ ꠁꠀꠖ ꠇꠞꠣꠁ ꠖꠤꠛꠣ।
JOH 14:27 “ꠀꠝꠤ ꠔꠥꠝꠞꠣꠞ ꠟꠣꠉꠤ ꠡꠣꠘ꠆ꠔꠤ ꠞꠣꠈꠤꠀ ꠎꠣꠁꠀꠞ, ꠀꠝꠣꠞ ꠡꠣꠘ꠆ꠔꠤꠃ ꠀꠝꠤ ꠔꠥꠝꠞꠣꠞꠦ ꠖꠤꠀ ꠎꠣꠁꠀꠞꠉꠤ। ꠁ ꠖꠥꠘꠤꠀꠄ ꠎꠦꠝꠘꠦ ꠡꠣꠘ꠆ꠔꠤ ꠖꠦꠄ, ꠀꠝꠤ ꠁꠟꠣ ꠖꠦꠁ ꠘꠣ। ꠔꠥꠝꠞꠣꠞ ꠖꠤꠟꠅ ꠎꠣꠘꠥ ꠇꠥꠘꠥ ꠙꠦꠞꠦꠡꠣꠘꠤ ꠛꠣ ꠒꠞ-ꠈꠚ ꠘꠣ ꠀꠄ।
JOH 14:28 ꠀꠝꠤ ꠔ ꠀꠉꠦꠃ ꠔꠥꠝꠞꠣꠞꠦ ꠇꠁꠍꠤ, ꠀꠝꠤ ꠎꠣꠁꠀꠞꠉꠤ, ꠀꠞ ꠢꠤꠞꠛꠣꠞ ꠔꠥꠝꠞꠣꠞ ꠉꠦꠍꠦ ꠀꠁꠝꠥ। ꠔꠥꠝꠞꠣ ꠎꠥꠖꠤ ꠀꠝꠣꠞꠦ ꠝꠣꠄꠀ ꠇꠞꠔꠣꠄ, ꠔꠦ ꠀꠝꠤ ꠀꠝꠣꠞ ꠛꠣꠚꠞ ꠉꠦꠍꠦ ꠎꠣꠁꠀꠞ ꠇꠞꠤ ꠈꠥꠡꠤ ꠅꠁꠟꠣꠄ ꠅꠘꠦ, ꠇꠣꠞꠘ ꠁ ꠛꠣꠚ ꠔ ꠀꠝꠣꠞ ꠕꠣꠇꠤꠅ ꠝꠢꠣꠘ।
JOH 14:29 ꠁꠔꠣ ꠊꠐꠣꠞ ꠀꠉꠦꠃ ꠔꠥꠝꠞꠣꠞꠦ ꠎꠣꠘꠣꠁ ꠖꠤꠟꠣꠝ, ꠎꠣꠔꠦ ꠊꠐꠤꠀ ꠢꠣꠞꠟꠦ ꠔꠥꠝꠞꠣ ꠄꠇꠤꠘ ꠇꠞꠔꠣꠄ ꠙꠣꠞ।
JOH 14:30 ꠀꠝꠤ ꠔꠥꠝꠞꠣꠞ ꠟꠉꠦ ꠀꠞ ꠛꠦꠡꠤ ꠡꠝꠄ ꠝꠣꠔꠔꠣꠝ ꠘꠣꠄ, ꠇꠣꠞꠘ ꠖꠥꠘꠤꠀꠞ ꠝꠥꠘꠤꠛ ꠁꠛꠟꠤꠍ ꠀꠁꠅꠞ। ꠀꠝꠣꠞ ꠃꠙꠞꠦ ꠔꠣꠞ ꠇꠥꠘꠥ ꠈꠦꠝꠔꠣ ꠘꠣꠁ।
JOH 14:31 ꠅꠁꠟꠦ ꠀꠝꠤ ꠀꠝꠣꠞ ꠛꠣꠚꠞ ꠢꠥꠇꠥꠝ ꠝꠣꠘꠤꠀ ꠁꠔꠣ ꠢꠇꠟꠔꠣ ꠇꠞꠤ, ꠎꠣꠔꠦ ꠖꠥꠘꠤꠀꠞ ꠝꠣꠘꠡꠦ ꠛꠥꠎꠂꠘ, ꠀꠝꠤ ꠀꠝꠣꠞ ꠛꠣꠚꠞꠦ ꠝꠣꠄꠀ ꠇꠞꠤ। ꠔꠦ ꠀꠅ, ꠀꠝꠞꠣ ꠅꠈꠘ ꠁ ꠎꠣꠉꠣ ꠕꠣꠇꠤ ꠎꠣꠁꠉꠤ।”
JOH 15:1 ꠢꠎꠞꠔ ꠁꠍꠣꠄ ꠇꠁꠟꠣ, “ꠀꠝꠤꠃ ꠀꠍꠟ ꠀꠋꠉꠥꠞ ꠉꠣꠍ ꠀꠞ ꠀꠝꠣꠞ ꠛꠣꠛꠣ ꠉꠤꠞꠡ꠆ꠔ।
JOH 15:2 ꠀꠝꠣꠞ ꠎꠦꠔꠣ ꠒꠣꠟꠣꠁꠘ꠆ꠔꠅ ꠚꠟ ꠗꠞꠦ ꠘꠣ, ꠔꠣꠁꠘ ꠁꠔꠣꠞꠦ ꠇꠣꠐꠤꠀ ꠚꠣꠟꠣꠁ ꠖꠦꠁꠘ। ꠀꠞ ꠎꠦꠔꠣ ꠒꠣꠟꠣꠁꠘ꠆ꠔꠅ ꠚꠟ ꠗꠞꠦ, ꠔꠣꠁꠘ ꠁꠔꠣꠞꠦ ꠍꠣꠐꠤꠀ ꠍꠣꠚ-ꠍꠥꠔꠞꠣ ꠇꠞꠤ ꠞꠣꠈꠂꠘ, ꠎꠣꠔꠦ ꠀꠞꠅ ꠛꠦꠡꠤ ꠚꠟ ꠗꠞꠦ।
JOH 15:3 ꠔꠦ ꠀꠝꠤ ꠔꠥꠝꠞꠣꠞꠦ ꠎꠦ ꠇꠣꠟꠣꠝ ꠔꠣꠟꠤꠝ ꠖꠤꠍꠤ, ꠄꠞꠟꠣꠉꠤ ꠔ ꠔꠥꠝꠞꠣ ꠀꠉ ꠕꠣꠇꠤꠃ ꠍꠣꠐꠣ ꠅꠁꠀ ꠍꠣꠚ-ꠍꠥꠔꠞꠣ ꠅꠁꠍ।
JOH 15:4 ꠔꠥꠝꠞꠣ ꠀꠝꠣꠞ ꠝꠣꠎꠦ ꠞꠅ, ꠀꠝꠤꠅ ꠔꠥꠝꠞꠣꠞ ꠖꠤꠟꠅ ꠞꠁꠝꠥ। ꠀꠋꠉꠥꠞ ꠉꠣꠍꠞ ꠟꠉꠦ ꠒꠣꠟ ꠎꠥꠖꠤ ꠟꠣꠉꠣꠁꠟ ꠘꠣ ꠕꠣꠇꠦ, ꠔꠦ ꠒꠣꠟꠦ ꠎꠦꠟꠣ ꠘꠤꠎꠦ ꠘꠤꠎꠦ ꠚꠟ ꠗꠞꠣꠁꠔ ꠙꠣꠞꠦ ꠘꠣ, ꠅꠃꠟꠣ ꠔꠥꠝꠞꠣꠅ ꠀꠝꠣꠞ ꠝꠣꠎꠦ ꠘꠣ ꠞꠁꠟꠦ ꠘꠤꠎꠦ ꠘꠤꠎꠦ ꠚꠟꠀꠟꠣ ꠅꠁꠔꠣꠄ ꠙꠣꠞ ꠘꠣ।
JOH 15:5 ꠀꠝꠤꠃ ꠀꠋꠉꠥꠞ ꠉꠣꠍ, ꠀꠞ ꠔꠥꠝꠞꠣ ꠅꠁꠟꠣꠄ ꠒꠣꠟ-ꠙꠣꠟꠣ। ꠎꠦ ꠎꠘ ꠀꠝꠣꠞ ꠟꠉꠦ ꠟꠣꠉꠣꠁꠟ ꠕꠣꠇꠦ, ꠀꠝꠤꠅ ꠔꠣꠞ ꠟꠉꠦ ꠟꠣꠉꠣꠁꠟ ꠞꠁ, ꠔꠦꠃ ꠔꠣꠞ ꠎꠤꠘ꠆ꠖꠦꠉꠤꠔ ꠛꠃꠔ ꠚꠟ ꠗꠞꠦ। ꠀꠞ, ꠀꠝꠣꠞꠦ ꠍꠣꠠꠣ ꠔ ꠔꠥꠝꠞꠣ ꠇꠥꠘ꠆ꠔꠣꠃ ꠇꠞꠔꠣꠄ ꠙꠣꠞ ꠘꠣ।
JOH 15:6 “ꠀꠝꠣꠞ ꠟꠉꠦ ꠇꠦꠃ ꠟꠣꠉꠣꠁꠟ ꠘꠣ ꠞꠁꠟꠦ, ꠔꠣꠞꠦ ꠇꠣꠐꠣ ꠒꠣꠟꠞ ꠟꠣꠈꠣꠘ ꠚꠣꠟꠣꠁ ꠖꠦꠅꠀ ꠅꠄ ꠀꠞ ꠞꠂꠖꠦ ꠢꠥꠇꠣꠁ ꠎꠣꠄ। ꠛꠣꠖꠦ ꠢꠥꠇꠘꠣ ꠒꠣꠟꠣꠁꠘ ꠔꠥꠛꠣꠁꠀ ꠀꠉꠥꠁꠘꠅ ꠖꠦꠁꠘ, ꠔꠦꠃ ꠁꠔꠣ ꠎꠟꠤ-ꠙꠥꠠꠤ ꠎꠣꠄ।
JOH 15:7 ꠔꠥꠝꠞꠣ ꠎꠥꠖꠤ ꠀꠝꠣꠞ ꠟꠉꠦ ꠟꠣꠉꠣꠁꠟ ꠕꠣꠇ ꠀꠞ ꠀꠝꠣꠞ ꠇꠣꠟꠣꠝ ꠈꠣꠘꠣꠁꠘ ꠔꠥꠝꠞꠣꠞ ꠖꠤꠟꠅ ꠕꠣꠇꠦ, ꠔꠦ ꠔꠥꠝꠞꠣꠞ ꠎꠦꠔꠣ ꠁꠌ꠆ꠍꠣ ꠅꠔꠣꠃ ꠌꠣꠁꠅ, ꠁꠔꠣ ꠔꠥꠝꠞꠣꠞꠦ ꠖꠦꠅꠀ ꠅꠁꠛ।
JOH 15:8 ꠔꠥꠝꠞꠣꠞ ꠎꠤꠘ꠆ꠖꠦꠉꠤꠔ ꠎꠥꠖꠤ ꠛꠃꠔ ꠚꠟ ꠗꠞꠦ, ꠀꠞ ꠅꠟꠣꠈꠣꠘ ꠔꠥꠝꠞꠣ ꠘꠤꠎꠞꠦ ꠀꠝꠣꠞ ꠃꠝ꠆ꠝꠔ ꠢꠤꠡꠣꠛꠦ ꠙꠞꠝꠣꠘ ꠇꠞꠤꠟꠣꠅ, ꠔꠦ ꠀꠝꠣꠞ ꠉꠣꠁꠛꠤ ꠛꠣꠚꠞ ꠔꠣꠞꠤꠚ ꠅꠁꠛ।
JOH 15:9 ꠛꠣꠚꠦ ꠀꠝꠣꠞꠦ ꠎꠦꠟꠣ ꠝꠣꠄꠀ ꠇꠞꠍꠂꠘ, ꠀꠝꠤꠅ ꠅꠃꠟꠣ ꠔꠥꠝꠞꠣꠞꠦ ꠝꠣꠄꠀ ꠇꠞꠍꠤ। ꠔꠥꠝꠞꠣ ꠀꠝꠣꠞ ꠝꠣꠄꠀꠞ ꠝꠣꠎꠦ ꠞꠅ।
JOH 15:10 ꠀꠝꠤ ꠀꠝꠣꠞ ꠛꠣꠚꠞ ꠢꠇꠟ ꠢꠥꠇꠥꠝ-ꠀꠢꠇꠣꠝ ꠝꠣꠘꠤꠀ ꠎꠦꠟꠣ ꠔꠣꠘ ꠝꠣꠄꠀꠞ ꠝꠣꠎꠦ ꠞꠁꠍꠤ, ꠔꠥꠝꠞꠣꠅ ꠅꠃꠟꠣ ꠀꠝꠣꠞ ꠢꠥꠇꠥꠝ-ꠀꠢꠇꠣꠝ ꠝꠣꠘꠟꠦ ꠀꠝꠣꠞ ꠝꠣꠄꠀꠞ ꠝꠣꠎꠦ ꠞꠁꠛꠣꠄ।
JOH 15:11 “ꠀꠝꠤ ꠔꠥꠝꠞꠣꠞꠦ ꠁꠔꠣ ꠇꠁꠟꠣꠝ, ꠎꠣꠔꠦ ꠀꠝꠣꠞ ꠈꠥꠡꠤ ꠔꠥꠝꠞꠣꠞ ꠖꠤꠟꠅ ꠕꠣꠇꠦ ꠀꠞ ꠔꠥꠝꠞꠣꠞ ꠈꠥꠡꠤ ꠙꠥꠞꠣ ꠅꠄ।
JOH 15:12 ꠀꠝꠣꠞ ꠢꠥꠇꠥꠝ ꠅꠁꠟ, ꠀꠝꠤ ꠎꠦꠟꠣ ꠔꠥꠝꠞꠣꠞꠦ ꠝꠣꠄꠀ ꠇꠞꠍꠤ, ꠔꠥꠝꠞꠣꠅ ꠅꠃꠟꠣ ꠄꠇꠦ-ꠅꠁꠘ꠆ꠘꠞꠦ ꠝꠣꠄꠀ ꠇꠞꠅ।
JOH 15:13 ꠇꠦꠃ ꠎꠥꠖꠤ ꠘꠤꠎꠞ ꠖꠥꠡ꠆ꠔꠞ ꠟꠣꠉꠤ ꠎꠣꠘ ꠛꠤꠟꠣꠁ ꠖꠦꠄ, ꠔꠦ ꠔꠣꠞ ꠕꠣꠇꠤ ꠀꠞ ꠛꠦꠡꠤ ꠝꠣꠄꠀ ꠇꠣꠞ ꠀꠍꠦ?
JOH 15:14 ꠀꠝꠣꠞ ꠖꠦꠅꠀ ꠢꠥꠇꠥꠝ ꠎꠥꠖꠤ ꠔꠥꠝꠞꠣ ꠀꠝꠟ ꠇꠞ, ꠔꠦ ꠔꠥꠝꠞꠣ ꠀꠝꠣꠞ ꠖꠥꠡ꠆ꠔ।
JOH 15:15 ꠀꠝꠤ ꠔꠥꠝꠞꠣꠞꠦ ꠀꠞ ꠉꠥꠟꠣꠝ ꠇꠁꠞꠣꠝ ꠘꠣ, ꠇꠣꠞꠘ ꠝꠥꠘꠤꠛꠦ ꠇꠤꠔꠣ ꠇꠞꠂꠘ ꠉꠥꠟꠣꠝꠦ ꠔ ꠁꠔꠣ ꠎꠣꠘꠦ ꠘꠣ, ꠛꠞꠋ ꠀꠝꠤ ꠔꠥꠝꠞꠣꠞꠦ ꠖꠥꠡ꠆ꠔ ꠇꠁꠍꠤ, ꠇꠣꠞꠘ ꠉꠣꠁꠛꠤ ꠛꠣꠚꠞ ꠉꠦꠍ ꠕꠣꠇꠤ ꠀꠝꠤ ꠎꠔꠔꠣ ꠢꠥꠘꠍꠤ, ꠢꠇꠟꠔꠣꠃ ꠔꠥꠝꠞꠣꠞꠦ ꠎꠣꠘꠣꠁꠍꠤ।
JOH 15:16 “ꠀꠝꠣꠞꠦ ꠔ ꠔꠥꠝꠞꠣ ꠙꠍꠘ꠆ꠖ ꠇꠞꠍ ꠘꠣ, ꠛꠞꠋ ꠀꠝꠤꠃ ꠔꠥꠝꠞꠣꠞꠦ ꠙꠍꠘ꠆ꠖ ꠇꠞꠍꠤ ꠀꠞ ꠇꠣꠝꠅ ꠟꠣꠉꠣꠁꠍꠤ, ꠎꠣꠔꠦ ꠔꠥꠝꠞꠣꠞ ꠎꠤꠘ꠆ꠖꠦꠉꠤ ꠚꠟꠀꠟꠣ ꠅꠄ ꠀꠞ ꠅꠃ ꠚꠟ ꠐꠤꠇꠤꠀ ꠞꠄ। ꠔꠦꠃ ꠀꠝꠣꠞ ꠘꠣꠝꠦ ꠉꠣꠁꠛꠤ ꠛꠣꠚꠞ ꠉꠦꠍꠦ ꠎꠦꠔꠣ ꠌꠣꠁꠛꠣꠄ, ꠔꠣꠁꠘ ꠔꠥꠝꠞꠣꠞꠦ ꠖꠤꠛꠣ।
JOH 15:17 ꠀꠝꠤ ꠔꠥꠝꠞꠣꠞꠦ ꠅꠃ ꠢꠥꠇꠥꠝ ꠖꠤꠀꠞ, ꠔꠥꠝꠞꠣ ꠄꠇꠦ-ꠅꠁꠘ꠆ꠘꠞꠦ ꠝꠣꠄꠀ ꠇꠞꠅ।
JOH 15:18 “ꠖꠥꠘꠤꠀꠞ ꠝꠣꠘꠡꠦ ꠔꠥꠝꠞꠣꠞꠦ ꠊꠤꠘ꠆ꠘꠣꠁꠘ, ꠅꠁꠟꠦ ꠝꠘꠅ ꠞꠣꠈꠤꠅ, ꠄꠞ ꠀꠉꠦ ꠔꠣꠞꠣ ꠀꠝꠣꠞꠦꠃ ꠊꠤꠘ꠆ꠘꠣꠁꠍꠦ।
JOH 15:19 ꠔꠥꠝꠞꠣ ꠎꠥꠖꠤ ꠅꠃ ꠖꠥꠘꠤꠀꠞ ꠅꠁꠔꠣꠄ, ꠔꠦ ꠔꠣꠞꠣ ꠔꠥꠝꠞꠣꠞꠦ ꠘꠤꠎꠞ ꠢꠤꠡꠣꠛꠦ ꠜꠣꠟꠣ ꠙꠣꠁꠟ ꠅꠘꠦ। ꠔꠥꠝꠞꠣ ꠔ ꠁ ꠖꠥꠘꠤꠀꠞ ꠘꠣꠄ, ꠀꠝꠤ ꠔꠥꠝꠞꠣꠞꠦ ꠖꠥꠘꠤꠀꠞ ꠝꠣꠎ ꠕꠣꠇꠤ ꠙꠍꠘ꠆ꠖ ꠇꠞꠍꠤ ꠉꠔꠤꠇꠦ ꠔꠣꠞꠣ ꠔꠥꠝꠞꠣꠞꠦ ꠊꠤꠘ꠆ꠘꠣꠄ।
JOH 15:20 ꠀꠝꠣꠞ ꠇꠕꠣꠈꠣꠘ ꠝꠘꠅ ꠞꠣꠈꠤꠅ, ꠉꠥꠟꠣꠝ ꠔꠣꠞ ꠝꠥꠘꠤꠛ ꠕꠣꠇꠤ ꠛꠠ ꠘꠣꠄ। ꠄꠞꠟꠣꠉꠤ ꠝꠣꠘꠡꠦ ꠎꠥꠖꠤ ꠀꠝꠣꠞꠦ ꠎꠥꠟꠥꠝ ꠇꠞꠦ, ꠔꠦ ꠔꠥꠝꠞꠣꠞꠦꠅ ꠅꠟꠣ ꠇꠞꠛ। ꠔꠣꠞꠣ ꠀꠝꠣꠞ ꠇꠕꠣ ꠝꠣꠘꠟꠦ ꠔꠥꠝꠞꠣꠞ ꠇꠕꠣꠅ ꠝꠣꠘꠟ ꠅꠘꠦ।
JOH 15:21 ꠀꠝꠣꠞ ꠇꠣꠞꠘꠦꠃ ꠔꠣꠞꠣ ꠔꠥꠝꠞꠣꠞ ꠟꠉꠦ ꠅꠟꠣ ꠇꠞꠛ, ꠇꠣꠞꠘ ꠀꠝꠣꠞꠦ ꠎꠦꠁꠘ ꠛꠦꠎꠤꠍꠂꠘ, ꠄꠘꠞꠦ ꠔꠣꠞꠣ ꠌꠤꠘꠦ ꠘꠣ।
JOH 15:22 “ꠀꠝꠤ ꠎꠥꠖꠤ ꠘꠣ ꠀꠁꠔꠣꠝ ꠀꠞ ꠔꠣꠞꠣꠞ ꠉꠦꠍꠦ ꠘꠍꠤꠅꠔ ꠘꠣ ꠇꠞꠔꠣꠝ, ꠔꠦ ꠔꠣꠞꠣ ꠉꠥꠘꠣꠉꠣꠞ ꠅꠁꠟ ꠘꠣ ꠅꠘꠦ, ꠅꠁꠟꠦ ꠅꠈꠘ ꠔ ꠔꠣꠞꠣꠞ ꠇꠥꠘꠥ ꠅꠎꠥꠀꠔ ꠘꠣꠁ।
JOH 15:23 ꠎꠦ ꠎꠘꠦ ꠀꠝꠣꠞꠦ ꠊꠤꠘ꠆ꠘꠣꠄ, ꠢꠦ ꠀꠝꠣꠞ ꠉꠣꠁꠛꠤ ꠛꠣꠚꠞꠦꠅ ꠊꠤꠘ꠆ꠘꠣꠄ।
JOH 15:24 ꠢꠥꠘꠅ, ꠎꠦꠔꠣ ꠇꠦꠞꠣꠝꠔꠤ ꠇꠦꠃ ꠇꠥꠘꠥꠖꠤꠘ ꠖꠦꠈꠣꠁꠍꠦ ꠘꠣ, ꠅꠔꠣ ꠇꠦꠞꠣꠝꠔꠤ ꠎꠥꠖꠤ ꠀꠝꠤ ꠘꠣ ꠖꠦꠈꠣꠁꠔꠣꠝ, ꠔꠦ ꠔꠣꠞꠣ ꠉꠥꠘꠣꠉꠣꠞ ꠅꠁꠟ ꠘꠣ ꠅꠘꠦ। ꠅꠁꠟꠦ ꠔꠣꠞꠣ ꠔ ꠀꠝꠣꠞꠦ ꠀꠞ ꠀꠝꠣꠞ ꠉꠣꠁꠛꠤ ꠛꠣꠚꠞꠦ ꠖꠦꠈꠍꠦ, ꠖꠦꠈꠤꠀꠅ ꠊꠤꠘ꠆ꠘꠣꠁꠍꠦ।
JOH 15:25 ꠁꠔꠣ ꠅꠁꠟ, ꠎꠣꠔꠦ ꠔꠣꠞꠣꠞ ꠇꠤꠔꠣꠛꠞ ꠅꠃ ꠇꠕꠣ ꠚꠟꠦ, ꠇꠤꠔꠣꠛꠅ ꠀꠍꠦ, ꠔꠣꠞꠣ ꠛꠤꠘꠣ ꠇꠣꠞꠘꠦ ꠀꠝꠣꠞꠦ ꠊꠤꠘ꠆ꠘꠣꠁꠍꠦ।
JOH 15:26 “ꠀꠝꠤ ꠀꠝꠣꠞ ꠉꠣꠁꠛꠤ ꠛꠣꠚꠞ ꠉꠦꠍ ꠕꠣꠇꠤ ꠎꠦ ꠡꠣꠁꠎ꠆ꠎꠉꠤꠞ ꠞꠥꠢꠥꠞꠦ ꠔꠥꠝꠞꠣꠞ ꠉꠦꠍꠦ ꠙꠣꠑꠣꠁꠝꠥ, ꠔꠣꠁꠘ ꠀꠁꠀ ꠀꠝꠣꠞ ꠛꠦꠙꠣꠞꠦ ꠡꠣꠇ꠆ꠇꠤ ꠖꠤꠛꠣ। ꠔꠣꠁꠘ ꠅꠁꠟꠣ ꠢꠇ ꠞꠥꠢꠥ, ꠔꠣꠁꠘ ꠉꠣꠁꠛꠤ ꠛꠣꠚꠞ ꠉꠦꠍ ꠕꠣꠇꠤ ꠀꠁꠛꠣ।
JOH 15:27 ꠀꠞ ꠔꠥꠝꠞꠣꠅ ꠀꠝꠣꠞ ꠛꠦꠙꠣꠞꠦ ꠡꠣꠇ꠆ꠇꠤ ꠖꠤꠛꠣꠄ, ꠔꠥꠝꠞꠣ ꠔ ꠙꠄꠟꠣ ꠕꠣꠇꠤꠃ ꠀꠝꠣꠞ ꠟꠉꠦ ꠟꠉꠦ ꠀꠍ।”
JOH 16:1 ꠢꠎꠞꠔ ꠁꠍꠣꠄ ꠀꠞꠅ ꠇꠁꠟꠣ, “ꠀꠝꠤ ꠁꠔꠣ ꠎꠣꠘꠣꠁ ꠖꠤꠟꠣꠝ, ꠎꠣꠔꠦ ꠔꠥꠝꠞꠣ ꠈꠞꠟꠣꠝꠤ ꠘꠣ ꠎꠣꠅ।
JOH 16:2 ꠝꠣꠘꠡꠦ ꠔꠥꠝꠞꠣꠞꠦ ꠡꠝꠣꠎ ꠕꠣꠇꠤ ꠛꠣꠞ ꠇꠞꠤ ꠖꠤꠛꠣ। ꠅꠟꠣ ꠡꠝꠄ ꠀꠁꠛ, ꠎꠣꠞꠣ ꠔꠥꠝꠞꠣꠞꠦ ꠈꠥꠘ ꠇꠞꠛ, ꠔꠣꠞꠣ ꠝꠘꠅ ꠇꠞꠛ ꠁꠔꠣ ꠀꠟ꠆ꠟꠣꠞ ꠄꠛꠣꠖꠔ ꠇꠞꠦꠞ।
JOH 16:3 ꠔꠣꠞꠣ ꠁꠔꠣ ꠇꠞꠛ, ꠇꠣꠞꠘ ꠔꠣꠞꠣ ꠉꠣꠁꠛꠤ ꠛꠣꠚꠞꠦꠅ ꠌꠤꠘꠍꠦ ꠘꠣ, ꠀꠝꠣꠞꠦꠅ ꠌꠤꠘꠍꠦ ꠘꠣ।
JOH 16:4 ꠀꠝꠤ ꠁꠔꠣ ꠀꠉꠦꠃ ꠇꠁꠀ ꠞꠣꠈꠟꠣꠝ, ꠎꠣꠔꠦ ꠡꠝꠄ ꠀꠁꠟꠦ ꠝꠘꠅ ꠅꠄ, ꠀꠝꠤ ꠔꠥꠝꠞꠣꠞꠦ ꠅꠔꠣ ꠇꠁꠍꠟꠣꠝ। ꠀꠝꠤ ꠙꠄꠟꠣ ꠕꠣꠇꠤ ꠁꠔꠣ ꠇꠁꠍꠤ ꠘꠣ, ꠇꠣꠞꠘ ꠀꠝꠤ ꠔ ꠔꠥꠝꠞꠣꠞ ꠟꠉꠦ ꠟꠉꠦꠃ ꠀꠍꠟꠣꠝ।
JOH 16:5 “ꠢꠥꠘꠅ, ꠀꠝꠣꠞꠦ ꠎꠦꠁꠘ ꠙꠣꠑꠣꠁꠍꠂꠘ, ꠀꠝꠤ ꠅꠈꠘ ꠔꠣꠘ ꠉꠦꠍꠦ ꠎꠣꠁꠀꠞꠉꠤ, ꠔꠣ-ꠅ ꠔꠥꠝꠞꠣ ꠇꠦꠃ ꠀꠝꠣꠞꠦ ꠎꠤꠇꠣꠁꠞꠣꠄ ꠘꠣ, ꠀꠝꠤ ꠇꠁ ꠎꠣꠁꠞꠣꠝ।
JOH 16:6 ꠛꠞꠋ ꠀꠝꠤ ꠔꠥꠝꠞꠣꠞꠦ ꠁꠔꠣ ꠇꠁꠍꠤ, ꠄꠞꠟꠣꠉꠤ ꠔꠥꠝꠞꠣꠞ ꠝꠘꠅ ꠈꠥꠛ ꠖꠥꠈ ꠀꠁꠍꠦ।
JOH 16:7 ꠔꠦꠛꠃ ꠀꠝꠤ ꠢꠇ ꠇꠕꠣ ꠇꠁꠞꠣꠝ, ꠀꠝꠣꠞ ꠎꠣꠅꠀꠈꠣꠘ ꠔꠥꠝꠞꠣꠞ ꠟꠣꠉꠤ ꠜꠣꠟꠣ, ꠀꠝꠤ ꠘꠣ ꠉꠦꠟꠦ ꠔ ꠢꠃ ꠡꠣꠁꠎ꠆ꠎꠉꠤꠞ ꠞꠥꠢꠥ ꠀꠁꠔꠣ ꠘꠣꠄ। ꠀꠝꠤ ꠉꠦꠟꠦꠉꠤ ꠔꠣꠘꠞꠦ ꠔꠥꠝꠞꠣꠞ ꠉꠦꠍꠦ ꠙꠣꠑꠣꠁꠝꠥ।
JOH 16:8 ꠔꠣꠁꠘ ꠀꠁꠀ ꠉꠥꠘꠣꠞ ꠛꠦꠙꠣꠞꠦ, ꠀꠟ꠆ꠟꠣꠞ ꠝꠞ꠆ꠎꠤ ꠝꠣꠚꠤꠇ ꠌꠟꠣꠞ ꠛꠦꠙꠣꠞꠦ ꠀꠞ ꠀꠟ꠆ꠟꠣꠞ ꠛꠤꠌꠣꠞꠞ ꠛꠦꠙꠣꠞꠦ ꠝꠣꠘꠡꠞꠦ ꠢꠎꠣꠉ ꠇꠞꠛꠣ।
JOH 16:9 ꠔꠣꠁꠘ ꠉꠥꠘꠣꠞ ꠛꠦꠙꠣꠞꠦ ꠢꠎꠣꠉ ꠇꠞꠛꠣ, ꠇꠣꠞꠘ ꠝꠣꠘꠡꠦ ꠀꠝꠣꠞ ꠃꠙꠞꠦ ꠁꠝꠣꠘ ꠀꠘꠦ ꠘꠣ।
JOH 16:10 ꠀꠟ꠆ꠟꠣꠞ ꠝꠞ꠆ꠎꠤ ꠝꠣꠚꠤꠇ ꠌꠟꠣꠞ ꠛꠦꠙꠣꠞꠦ ꠢꠎꠣꠉ ꠇꠞꠛꠣ, ꠇꠣꠞꠘ ꠀꠝꠤ ꠀꠝꠣꠞ ꠉꠣꠁꠛꠤ ꠛꠣꠚꠞ ꠉꠦꠍꠦ ꠎꠣꠁꠀꠞꠉꠤ, ꠔꠥꠝꠞꠣ ꠀꠝꠣꠞꠦ ꠀꠞ ꠖꠦꠈꠔꠣꠄ ꠘꠣꠄ।
JOH 16:11 ꠛꠤꠌꠣꠞꠞ ꠛꠦꠙꠣꠞꠦ ꠢꠎꠣꠉ ꠇꠞꠛꠣ, ꠇꠣꠞꠘ ꠖꠥꠘꠤꠀꠞ ꠝꠥꠘꠤꠛ ꠁꠛꠟꠤꠍꠞ ꠛꠤꠌꠣꠞ ꠅꠁꠉꠦꠍꠦ।
JOH 16:12 “ꠔꠥꠝꠞꠣꠞꠦ ꠀꠞꠅ ꠛꠃꠔꠔꠣ ꠇꠅꠀꠞ ꠀꠍꠦ, ꠅꠁꠟꠦ ꠅꠈꠘ ꠁꠔꠣ ꠇꠁꠟꠦ ꠡꠁꠎ꠆ꠎ ꠇꠞꠔꠣꠄ ꠙꠣꠞꠔꠣꠄ ꠘꠣꠄ।
JOH 16:13 ꠢꠃ ꠢꠇ ꠞꠥꠢꠥ ꠀꠁꠀ ꠢꠣꠞꠤ ꠙꠕ ꠖꠦꠈꠣꠁꠀ ꠔꠥꠝꠞꠣꠞꠦ ꠙꠥꠞꠣꠙꠥꠞ ꠢꠇꠈꠣꠘ ꠎꠣꠘꠣꠁꠛꠣ। ꠔꠣꠁꠘ ꠔ ꠘꠤꠎ ꠕꠣꠇꠤ ꠇꠥꠘ꠆ꠔꠣ ꠇꠁꠔꠣ ꠘꠣꠄ, ꠈꠣꠟꠤ ꠎꠦꠔꠣ ꠢꠥꠘꠂꠘ, ꠅꠔꠣꠃ ꠇꠁꠛꠣ। ꠀꠞ ꠎꠦꠔꠣ ꠊꠐꠛ, ꠅꠔꠣꠃ ꠎꠣꠘꠣꠁꠛꠣ।
JOH 16:14 ꠀꠝꠤ ꠎꠦꠔꠣ ꠇꠁ, ꠔꠣꠁꠘ ꠀꠁꠀ ꠅꠔꠣꠃ ꠔꠥꠝꠞꠣꠞ ꠉꠦꠍꠦ ꠎꠣꠁꠞ ꠇꠞꠛꠣ। ꠅꠟꠣꠈꠣꠘ ꠔꠣꠁꠘ ꠀꠝꠣꠞ ꠝꠢꠤꠝꠣ ꠎꠣꠁꠞ ꠇꠞꠛꠣ।
JOH 16:15 ꠉꠣꠁꠛꠤ ꠛꠣꠚꠞ ꠎꠦꠔꠣ ꠀꠍꠦ, ꠁꠔꠣ ꠢꠇꠟꠔꠣꠃ ꠀꠝꠣꠞ। ꠄꠞꠟꠣꠉꠤ ꠀꠝꠤ ꠇꠁꠞꠣꠝ, ꠀꠝꠤ ꠎꠦꠔꠣ ꠇꠁ, ꠔꠣꠁꠘ ꠅꠔꠣꠃ ꠔꠥꠝꠞꠣꠞ ꠉꠦꠍꠦ ꠎꠣꠁꠞ ꠇꠞꠛꠣ।”
JOH 16:16 ꠢꠎꠞꠔ ꠁꠍꠣꠄ ꠇꠁꠟꠣ, “ꠕꠥꠠꠣ ꠛꠣꠖꠦ ꠔꠥꠝꠞꠣ ꠀꠞ ꠀꠝꠣꠞꠦ ꠖꠦꠈꠔꠣꠄ ꠘꠣꠄ, ꠢꠤꠞꠛꠣꠞ ꠕꠥꠠꠣ ꠛꠣꠖꠦ ꠖꠦꠈꠛꠣꠄ।”
JOH 16:17 ꠁꠈꠣꠘ ꠢꠥꠘꠤꠀ ꠇꠄꠎꠘ ꠍꠣꠢꠣꠛꠤꠄ ꠝꠣꠔꠣ-ꠝꠣꠔꠤ ꠇꠞꠟꠣ, “ꠔꠣꠁꠘ ꠁꠔꠣ ꠇꠤꠔꠣ ꠝꠣꠔꠂꠘ, ‘ꠕꠥꠠꠣ ꠛꠣꠖꠦ ꠔꠥꠝꠞꠣ ꠀꠞ ꠀꠝꠣꠞꠦ ꠖꠦꠈꠔꠣꠄ ꠘꠣꠄ, ꠢꠤꠞꠛꠣꠞ ꠕꠥꠠꠣ ꠛꠣꠖꠦ ꠖꠦꠈꠛꠣꠄ’, ꠔꠣꠁꠘ ꠢꠤꠞꠛꠣꠞ ꠇꠁꠞꠣ, ‘ꠀꠝꠤ ꠛꠣꠚꠞ ꠉꠦꠍꠦ ꠎꠣꠁꠞꠣꠝꠉꠤ।’
JOH 16:18 ꠔꠦ ꠔꠣꠁꠘ ꠎꠦ ꠕꠥꠠꠣ ꠡꠝꠄꠅꠞ ꠇꠕꠣ ꠇꠁꠞꠣ, ꠁꠈꠣꠘ ꠇꠤꠔꠣ? ꠔꠣꠁꠘ ꠇꠤꠔꠣ ꠝꠣꠔꠤꠞꠣ, ꠀꠝꠞꠣ ꠔ ꠛꠥꠎꠞꠣꠝ ꠘꠣ।”
JOH 16:19 ꠢꠎꠞꠔ ꠁꠍꠣꠄ ꠛꠥꠎꠤꠟꠤꠟꠣ, ꠔꠣꠘ ꠍꠣꠢꠣꠛꠤ ꠅꠇꠟꠦ ꠅꠃ ꠛꠦꠙꠣꠞꠦ ꠔꠣꠘꠞꠦ ꠇꠥꠘ꠆ꠔꠣ ꠎꠤꠇꠣꠁꠔꠣ ꠌꠣꠁꠞꠣ, ꠛꠥꠎꠤꠀ ꠔꠣꠁꠘ ꠇꠁꠟꠣ, “ꠀꠝꠤ ꠎꠦ ꠇꠁꠍꠤ, ‘ꠕꠥꠠꠣ ꠛꠣꠖꠦ ꠔꠥꠝꠞꠣ ꠀꠞ ꠀꠝꠣꠞꠦ ꠖꠦꠈꠔꠣꠄ ꠘꠣꠄ, ꠢꠤꠞꠛꠣꠞ ꠕꠥꠠꠣ ꠛꠣꠖꠦ ꠖꠦꠈꠛꠣꠄ’ ꠅꠔꠣ ꠟꠁꠀ ꠔꠥꠝꠞꠣ ꠝꠣꠔꠣ-ꠝꠣꠔꠤ ꠇꠞꠞꠣꠄ ꠘꠤ?
JOH 16:20 ꠢꠥꠘꠅ, ꠀꠝꠤ ꠔꠥꠝꠞꠣꠞꠦ ꠢꠣꠍꠣꠃ ꠇꠁꠞꠣꠝ, ꠔꠥꠝꠞꠣ ꠇꠣꠘ꠆ꠖꠤꠛꠣꠄ ꠀꠞ ꠀꠢꠣꠎꠣꠞꠤ ꠇꠞꠛꠣꠄ, ꠅꠁꠟꠦ ꠁ ꠖꠥꠘꠤꠀꠞ ꠝꠣꠘꠡꠦ ꠈꠥꠡꠤ ꠇꠞꠛꠣ। ꠔꠥꠝꠞꠣ ꠅꠈꠘ ꠖꠥꠈ-ꠇꠡ꠆ꠐ ꠇꠞꠛꠣꠄ, ꠅꠁꠟꠦ ꠛꠣꠖꠦ ꠁ ꠖꠥꠈ ꠞꠁꠔ ꠘꠣꠄ, ꠄꠞ ꠛꠖꠟꠣ ꠈꠥꠡꠤ ꠇꠞꠛꠣꠄ।
JOH 16:21 ꠛꠣꠁꠌ꠆ꠌꠣ ꠅꠀꠞ ꠡꠝꠄ ꠛꠦꠐꠤꠘ꠆ꠔꠞ ꠈꠥꠛ ꠇꠡ꠆ꠐ ꠅꠄ, ꠅꠁꠟꠦ ꠅꠁꠀ ꠢꠣꠞꠟꠦ ꠘꠄꠀ ꠀꠅꠟꠣꠖꠞ ꠚꠥꠞ꠆ꠔꠤꠄ ꠝꠘ ꠜꠞꠤ ꠎꠣꠄ, ꠢꠤ ꠇꠡ꠆ꠐꠞ ꠇꠕꠣ ꠀꠞ ꠝꠘꠅ ꠕꠣꠇꠦ ꠘꠣ।
JOH 16:22 ꠅꠃ ꠟꠣꠈꠣꠘ ꠔꠥꠝꠞꠣꠅ ꠅꠈꠘ ꠖꠥꠈ-ꠇꠡ꠆ꠐ ꠇꠞꠞꠣꠄ, ꠅꠁꠟꠦ ꠢꠤꠞꠛꠣꠞ ꠎꠦꠛꠟꠣ ꠔꠥꠝꠞꠣꠞ ꠟꠉꠦ ꠀꠝꠣꠞ ꠖꠦꠈꠣ ꠅꠁꠛ, ꠢꠃ ꠡꠝꠄ ꠈꠥꠡꠤꠄ ꠔꠥꠝꠞꠣꠞ ꠖꠤꠟ ꠜꠞꠤꠎꠤꠛ, ꠁ ꠈꠥꠡꠤ ꠇꠦꠃ ꠇꠣꠠꠤꠀ ꠘꠤꠔ ꠙꠣꠞꠔ ꠘꠣꠄ।
JOH 16:23 “ꠢꠤ ꠡꠝꠄ ꠔꠥꠝꠞꠣ ꠀꠝꠣꠞ ꠉꠦꠍꠦ ꠇꠥꠘ꠆ꠔꠣ ꠌꠣꠁꠔꠣꠄ ꠘꠣꠄ। ꠀꠝꠤ ꠔꠥꠝꠞꠣꠞꠦ ꠢꠣꠍꠣ ꠇꠁꠞꠣꠝ, ꠔꠥꠝꠞꠣ ꠀꠝꠣꠞ ꠘꠣꠝꠦ ꠀꠝꠣꠞ ꠉꠣꠁꠛꠤ ꠛꠣꠚꠞ ꠉꠦꠍꠦ ꠎꠦꠔꠣ ꠌꠣꠁꠛꠣꠄ, ꠔꠣꠁꠘ ꠔꠥꠝꠞꠣꠞꠦ ꠖꠤꠛꠣ।
JOH 16:24 ꠅꠈꠘꠅ ꠔ ꠔꠥꠝꠞꠣ ꠀꠝꠣꠞ ꠘꠣꠝꠦ ꠇꠥꠘ꠆ꠔꠣ ꠌꠣꠁꠍ ꠘꠣ। ꠌꠣꠅ, ꠔꠦꠃ ꠙꠣꠁꠛꠣꠄ, ꠎꠣꠔꠦ ꠔꠥꠝꠞꠣꠞ ꠈꠥꠡꠤ ꠙꠥꠞꠣ ꠅꠄ।
JOH 16:25 “ꠀꠝꠤ ꠔꠥꠝꠞꠣꠞꠦ ꠃꠖꠣꠢꠞꠘ ꠖꠤꠀ ꠅꠃ ꠔꠣꠟꠤꠝ ꠖꠤꠟꠣꠝ। ꠅꠁꠟꠦ ꠅꠟꠣꠈꠣꠘ ꠡꠝꠄ ꠀꠁꠛ, ꠎꠦꠛꠟꠣ ꠀꠝꠤ ꠇꠥꠘꠥ ꠃꠖꠣꠢꠞꠘ ꠍꠣꠠꠣ, ꠀꠝꠣꠞ ꠉꠣꠁꠛꠤ ꠛꠣꠚꠞ ꠛꠦꠙꠣꠞꠦ ꠈꠥꠟꠣ-ꠝꠦꠟꠣ ꠛꠥꠎꠣꠁꠝꠥ।
JOH 16:26 ꠢꠃ ꠖꠤꠘꠃ ꠔꠥꠝꠞꠣ ꠀꠝꠣꠞ ꠘꠣꠝꠦ ꠌꠣꠁꠛꠣꠄ। ꠀꠝꠤ ꠔ ꠁꠈꠣꠘ ꠇꠁꠞꠣꠝ ꠘꠣ, ꠀꠝꠤ ꠔꠥꠝꠞꠣꠞ ꠅꠁꠀ ꠉꠣꠁꠛꠤ ꠛꠣꠚꠞ ꠉꠦꠍꠦ ꠝꠤꠘꠔ ꠇꠞꠝꠥ।
JOH 16:27 ꠔꠣꠁꠘ ꠘꠤꠎꠦꠃ ꠔꠥꠝꠞꠣꠞꠦ ꠝꠣꠄꠀ ꠇꠞꠂꠘ, ꠇꠣꠞꠘ ꠔꠥꠝꠞꠣ ꠀꠝꠣꠞꠦ ꠝꠣꠄꠀ ꠇꠞꠍ ꠀꠞ ꠄꠇꠤꠘ ꠇꠞꠍ ꠎꠦ, ꠀꠝꠤ ꠀꠟ꠆ꠟꠣꠞ ꠉꠦꠍ ꠕꠣꠇꠤ ꠀꠁꠍꠤ।
JOH 16:28 ꠀꠍꠟꠦ, ꠀꠝꠤ ꠀꠝꠣꠞ ꠉꠣꠁꠛꠤ ꠛꠣꠚ ꠀꠟ꠆ꠟꠣꠞ ꠉꠦꠍ ꠕꠣꠇꠤ ꠅꠃ ꠖꠥꠘꠤꠀꠔ ꠀꠁꠍꠤ ꠀꠞ ꠖꠥꠘꠤꠀ ꠍꠣꠠꠤꠀ ꠔꠣꠘ ꠉꠦꠍꠦꠃ ꠎꠣꠁꠞꠣꠝ।”
JOH 16:29 ꠅꠃ ꠡꠝꠄ ꠍꠣꠢꠣꠛꠤ ꠅꠇꠟꠦ ꠔꠣꠘꠞꠦ ꠇꠁꠟꠣ, “ꠢꠥꠎꠥꠞ ꠖꠦꠈꠃꠇ꠆ꠇꠣ, ꠅꠈꠘ ꠔ ꠀꠙꠘꠦ ꠈꠥꠟꠣ-ꠝꠦꠟꠣꠃ ꠝꠣꠔꠤꠞꠣ, ꠇꠥꠘꠥ ꠃꠖꠣꠢꠞꠘ ꠖꠤꠞꠣ ꠘꠣ।
JOH 16:30 ꠅꠈꠘ ꠀꠝꠞꠣ ꠛꠥꠎꠟꠣꠝ, ꠀꠙꠘꠣꠞ ꠅꠎꠣꠘꠣ ꠇꠥꠘ꠆ꠔꠣ ꠘꠣꠁ, ꠀꠞ ꠀꠙꠘꠣꠞꠦ ꠇꠦꠃ ꠇꠥꠘ꠆ꠔꠣ ꠎꠤꠇꠣꠘꠤꠞꠅ ꠘꠣꠁ। ꠉꠔꠤꠇꠦꠃ ꠀꠝꠞꠣ ꠄꠇꠤꠘ ꠇꠞꠟꠣꠝ, ꠀꠙꠘꠦ ꠀꠟ꠆ꠟꠣꠞ ꠉꠦꠍ ꠕꠣꠇꠤꠃ ꠀꠁꠍꠂꠘ।”
JOH 16:31 ꠁꠍꠣꠄ ꠔꠣꠞꠣꠞꠦ ꠇꠁꠟꠣ, “ꠅꠈꠘ ꠄꠇꠤꠘ ꠅꠁꠍꠦ ꠘꠤ?
JOH 16:32 ꠢꠥꠘꠅ, ꠅꠟꠣ ꠡꠝꠄ ꠀꠁꠅꠞ, ꠄꠝꠘꠇꠤ ꠀꠁꠌ꠆ꠍꠦ, ꠎꠦꠛꠟꠣ ꠔꠥꠝꠞꠣ ꠖꠟ ꠍꠣꠠꠤꠀ ꠀꠝꠣꠞꠦ ꠕꠁꠀ ꠎꠣꠞꠎꠤꠞ ꠎꠣꠉꠣꠔ ꠜꠣꠉꠤꠛꠣꠄ। ꠅꠁꠟꠦ ꠀꠝꠤ ꠔ ꠄꠇꠟꠣ ꠘꠣꠄ, ꠀꠝꠣꠞ ꠉꠣꠁꠛꠤ ꠛꠣꠚ ꠀꠝꠣꠞ ꠟꠉꠦ ꠟꠉꠦ ꠀꠍꠂꠘ।
JOH 16:33 ꠀꠝꠤ ꠔꠥꠝꠞꠣꠞꠦ ꠁꠔꠣ ꠇꠁꠟꠣꠝ, ꠎꠣꠔꠦ ꠔꠥꠝꠞꠣ ꠀꠝꠣꠞ ꠟꠉꠦ ꠝꠤꠡꠤꠀ ꠀꠍ ꠉꠔꠤꠇꠦ ꠝꠘꠅ ꠡꠣꠘ꠆ꠔꠤ ꠙꠣꠅ। ꠁ ꠖꠥꠘꠤꠀꠔ ꠔꠥꠝꠞꠣ ꠖꠥꠈ-ꠝꠍꠤꠛꠔꠅ ꠀꠍ, ꠔꠣ-ꠅ ꠝꠘꠅꠛꠟ ꠞꠣꠈꠤꠅ, ꠀꠝꠤꠃ ꠖꠥꠘꠤꠀꠞꠦ ꠎꠄ ꠇꠞꠍꠤ।”
JOH 17:1 ꠅꠈꠣꠘ ꠇꠁꠀ ꠢꠣꠞꠤ ꠢꠎꠞꠔ ꠁꠍꠣꠄ ꠀꠍꠝꠣꠘꠞ ꠛꠣꠄ ꠌꠣꠁꠀ ꠖꠥꠀ ꠇꠞꠟꠣ, “ꠛꠣꠛꠣ, ꠡꠝꠄ ꠅꠁꠉꠦꠍꠦ। ꠔꠥꠝꠤ ꠔꠥꠝꠣꠞ ꠙꠥꠔꠞ ꠝꠢꠤꠝꠣ ꠎꠣꠁꠞ ꠇꠞꠅ, ꠎꠣꠔꠦ ꠙꠥꠔꠦꠅ ꠔꠥꠝꠣꠞ ꠝꠢꠤꠝꠣ ꠎꠣꠁꠞ ꠇꠞꠔꠣ ꠙꠣꠞꠂꠘ।
JOH 17:2 ꠔꠥꠝꠤ ꠔꠣꠘꠞꠦ ꠢꠇꠟ ꠝꠣꠘꠡꠞ ꠃꠙꠞꠦ ꠈꠦꠝꠔꠣ ꠖꠤꠍ, ꠎꠣꠔꠦ ꠔꠥꠝꠤ ꠎꠦꠞꠣꠞꠦ ꠔꠣꠘ ꠀꠔꠅ ꠡꠙꠤꠍ, ꠄꠞꠣꠞꠦ ꠔꠣꠁꠘ ꠀꠈꠦꠞꠤ ꠎꠤꠘ꠆ꠖꠦꠉꠤ ꠖꠦꠁꠘ।
JOH 17:3 ꠄꠇꠝꠣꠔ꠆ꠞ ꠢꠇ ꠀꠟ꠆ꠟꠣꠞꠦ ꠝꠣꠘꠤ ꠔꠥꠝꠣꠞꠦ ꠀꠞ ꠔꠥꠝꠤ ꠎꠦꠘꠞꠦ ꠙꠣꠑꠣꠁꠍ, ꠢꠃ ꠁꠍꠣ ꠀꠟ-ꠝꠍꠤꠞꠦ ꠌꠤꠘꠣꠃ ꠅꠁꠟ ꠀꠈꠦꠞꠤ ꠎꠤꠘ꠆ꠖꠦꠉꠤ।
JOH 17:4 ꠔꠥꠝꠤ ꠀꠝꠣꠞꠦ ꠎꠦ ꠇꠣꠝ ꠖꠤꠍ, ꠁ ꠇꠣꠝ ꠀꠖꠣꠄ ꠇꠞꠤꠀ ꠖꠥꠘꠤꠀꠔ ꠔꠥꠝꠣꠞ ꠝꠢꠤꠝꠣ ꠎꠣꠁꠞ ꠇꠞꠍꠤ।
JOH 17:5 ꠔꠦ ꠛꠣꠛꠣ, ꠖꠥꠘꠤꠀ ꠙꠄꠖꠣ ꠇꠞꠣꠞ ꠀꠉꠦ ꠔꠥꠝꠣꠞ ꠖꠞꠛꠣꠞꠅ ꠀꠝꠣꠞ ꠎꠦ ꠝꠢꠤꠝꠣ ꠀꠍꠤꠟ, ꠔꠥꠝꠣꠞ ꠉꠦꠍꠞ ꠅꠃ ꠝꠢꠤꠝꠣ ꠅꠈꠘ ꠀꠝꠣꠞꠦ ꠢꠤꠞꠛꠣꠞ ꠖꠦꠅ।
JOH 17:6 “ꠁ ꠖꠥꠘꠤꠀꠞ ꠝꠣꠎꠞ ꠎꠦꠞꠣꠞꠦ ꠀꠝꠣꠞ ꠀꠔꠅ ꠡꠙꠤꠍ, ꠀꠝꠤ ꠄꠞꠣꠞ ꠉꠦꠍꠦ ꠔꠥꠝꠣꠞꠦ ꠎꠣꠁꠞ ꠇꠞꠍꠤ। ꠔꠣꠞꠣ ꠔ ꠔꠥꠝꠣꠞꠃ ꠀꠍꠟꠣ, ꠔꠥꠝꠤꠃ ꠔꠣꠞꠣꠞꠦ ꠀꠝꠣꠞ ꠀꠔꠅ ꠡꠙꠤꠍ। ꠔꠣꠞꠣ ꠔꠥꠝꠣꠞ ꠢꠥꠇꠥꠝ ꠝꠣꠘꠤꠀ ꠌꠟꠍꠦ।
JOH 17:7 ꠔꠣꠞꠣ ꠅꠈꠘ ꠛꠥꠎꠍꠦ, ꠔꠥꠝꠤ ꠎꠦꠔꠣ ꠀꠝꠣꠞꠦ ꠖꠤꠍ, ꠁꠔꠣ ꠔ ꠔꠥꠝꠣꠞ ꠉꠦꠍ ꠕꠣꠇꠤꠃ ꠀꠁꠍꠦ।
JOH 17:8 ꠇꠣꠞꠘ ꠅꠁꠟ, ꠔꠥꠝꠤ ꠎꠦꠔꠣ ꠔꠛꠟꠤꠉ ꠇꠞꠣꠞ ꠢꠥꠇꠥꠝ ꠖꠤꠍ, ꠀꠝꠤ ꠅꠔꠣ ꠎꠣꠘꠣꠁꠍꠤ। ꠀꠞ ꠔꠣꠞꠣꠅ ꠁꠔꠣꠞꠦ ꠇꠛꠥꠟ ꠇꠞꠤꠀ ꠀꠍꠟꠈꠣꠘ ꠛꠥꠎꠤꠟꠤꠍꠦ ꠎꠦꠘ, ꠀꠝꠤ ꠔꠥꠝꠣꠞ ꠉꠦꠍ ꠕꠣꠇꠤꠃ ꠀꠁꠍꠤ। ꠔꠣꠞꠣ ꠄꠇꠤꠘꠅ ꠇꠞꠍꠦ, ꠔꠥꠝꠤꠃ ꠀꠝꠣꠞꠦ ꠙꠣꠑꠣꠁꠍ।
JOH 17:9 ꠔꠦ ꠀꠝꠤ ꠔ ꠢꠇꠟꠞ ꠟꠣꠉꠤ ꠝꠤꠘꠔ ꠇꠞꠤꠀꠞ ꠘꠣ, ꠈꠣꠟꠤ ꠔꠥꠝꠤ ꠎꠣꠞꠣꠞꠦ ꠀꠝꠣꠞ ꠀꠔꠅ ꠖꠤꠍ, ꠄꠞꠣꠞ ꠟꠣꠉꠤꠃ ꠝꠤꠘꠔ ꠇꠞꠞꠣꠝ, ꠔꠣꠞꠣ ꠔ ꠔꠥꠝꠣꠞꠃ।
JOH 17:10 ꠀꠝꠣꠞ ꠎꠔꠔꠣ ꠀꠍꠦ ꠢꠇ꠆ꠇꠟꠔꠣꠃ ꠔꠥꠝꠣꠞ, ꠀꠞ ꠔꠥꠝꠣꠞ ꠢꠇ꠆ꠇꠟꠔꠣꠃ ꠀꠝꠣꠞ। ꠄꠞꠣꠞ ꠝꠣꠎꠖꠤꠃ ꠀꠝꠣꠞ ꠝꠢꠤꠝꠣ ꠎꠣꠁꠞ ꠅꠞ।
JOH 17:11 “ꠅ ꠙꠛꠤꠔ꠆ꠞ ꠛꠣꠛꠣ, ꠁ ꠖꠥꠘꠤꠀꠔ ꠀꠝꠤ ꠀꠞ ꠛꠦꠡꠤ ꠡꠝꠄ ꠘꠣꠄ, ꠅꠁꠟꠦ ꠔꠣꠞꠣ ꠁ ꠖꠥꠘꠤꠀꠔ ꠀꠍꠂꠘ, ꠀꠝꠤ ꠔ ꠔꠥꠝꠣꠞ ꠉꠦꠍꠦ ꠀꠁꠞꠣꠝ। ꠔꠥꠝꠤ ꠀꠝꠣꠞꠦ ꠔꠥꠝꠣꠞ ꠎꠦ ꠘꠣꠝ ꠖꠤꠍ, ꠅꠃ ꠘꠣꠝꠞ ꠛꠟꠦ ꠄꠞꠣꠞꠦ ꠛꠣꠌꠣꠅ, ꠎꠣꠔꠦ ꠀꠝꠞꠣ ꠎꠦꠟꠣ ꠄꠇ, ꠔꠣꠞꠣꠅ ꠅꠟꠣ ꠄꠇ ꠅꠁꠔꠣ ꠙꠣꠞꠂꠘ।
JOH 17:12 ꠀꠝꠤ ꠎꠔꠖꠤꠘ ꠔꠣꠞꠣꠞ ꠟꠉꠦ ꠀꠍꠟꠣꠝ, ꠅꠔꠖꠤꠘ ꠔꠥꠝꠣꠞ ꠖꠦꠅꠀ ꠅꠃ ꠘꠣꠝꠞ ꠉꠥꠘꠦ ꠔꠣꠞꠣꠞꠦ ꠛꠣꠌꠣꠁꠍꠤ। ꠔꠣꠞꠣꠞꠦ ꠙꠣꠞꠣ ꠖꠤꠀ ꠞꠣꠈꠍꠤ, ꠔꠣꠞꠣ ꠇꠦꠃ ꠛꠤꠘꠣꠡ ꠅꠁꠍꠦ ꠘꠣ। ꠈꠣꠟꠤ ꠎꠣꠞ ꠛꠤꠘꠣꠡ ꠅꠀꠞ ꠇꠕꠣ, ꠢꠦ-ꠃ ꠛꠤꠘꠣꠡ ꠅꠁꠍꠦ, ꠎꠣꠔꠦ ꠀꠟ꠆ꠟꠣꠞ ꠇꠣꠟꠣꠝꠞ ꠇꠕꠣ ꠚꠟꠦ।
JOH 17:13 “ꠔꠦ ꠅꠈꠘ ꠀꠝꠤ ꠔꠥꠝꠣꠞ ꠉꠦꠍꠦ ꠀꠁꠞꠣꠝ, ꠖꠥꠘꠤꠀꠔ ꠞꠁꠔꠦꠃ ꠁꠔꠣ ꠔꠣꠞꠣꠞꠦ ꠎꠣꠘꠣꠁ ꠖꠤꠟꠣꠝ, ꠎꠣꠔꠦ ꠀꠝꠣꠞ ꠈꠥꠡꠤꠄ ꠔꠣꠞꠣꠞ ꠖꠤꠟ ꠜꠞꠤ ꠎꠣꠄ।
JOH 17:14 ꠔꠥꠝꠤ ꠀꠝꠣꠞꠦ ꠎꠦꠔꠣ ꠎꠣꠘꠣꠁꠍ, ꠀꠝꠤꠅ ꠔꠣꠞꠣꠞꠦ ꠅꠔꠣ ꠎꠣꠘꠣꠁꠍꠤ। ꠀꠝꠤ ꠎꠦꠟꠣ ꠁ ꠖꠥꠘꠤꠀꠞ ꠘꠣꠄ, ꠔꠣꠞꠣꠅ ꠅꠟꠣ ꠁ ꠖꠥꠘꠤꠀꠞ ꠘꠣꠄ, ꠄꠞꠟꠣꠉꠤ ꠖꠥꠘꠤꠀꠞ ꠝꠣꠘꠡꠦ ꠔꠣꠞꠣꠞꠦ ꠊꠤꠘ꠆ꠘꠣꠁꠍꠦ।
JOH 17:15 ꠀꠝꠤ ꠔꠥꠝꠣꠞ ꠉꠦꠍꠦ ꠀꠛꠖꠣꠞ ꠇꠞꠞꠣꠝ ꠘꠣ, ꠔꠥꠝꠤ ꠔꠣꠞꠣꠞꠦ ꠖꠥꠘꠤꠀ ꠕꠣꠇꠤ ꠘꠤꠔꠣꠄꠉꠤ, ꠛꠞꠋ ꠅꠃ ꠀꠛꠖꠣꠞ ꠇꠞꠞꠣꠝ, ꠔꠥꠝꠤ ꠔꠣꠞꠣꠞꠦ ꠁꠛꠟꠤꠍꠞ ꠀꠔ ꠕꠣꠇꠤ ꠢꠦꠚꠣꠎꠔ ꠇꠞꠅ।
JOH 17:16 ꠀꠝꠤ ꠎꠦꠟꠣ ꠅꠃ ꠖꠥꠘꠤꠀꠞ ꠘꠣꠄ, ꠅꠃꠟꠣ ꠔꠣꠞꠣꠅ ꠁ ꠖꠥꠘꠤꠀꠞ ꠘꠣꠄ।
JOH 17:17 ꠔꠥꠝꠤ ꠔꠣꠞꠣꠞꠦ ꠔꠥꠝꠣꠞ ꠢꠇ ꠖꠤꠀ ꠈꠣꠍ ꠢꠤꠡꠣꠛꠦ ꠞꠣꠈꠅ। ꠔꠥꠝꠣꠞ ꠇꠣꠟꠣꠝꠃ ꠅꠁꠟ ꠅꠃ ꠢꠇ।
JOH 17:18 ꠔꠥꠝꠤ ꠎꠦꠟꠣ ꠀꠝꠣꠞꠦ ꠖꠥꠘꠤꠀꠔ ꠙꠣꠑꠣꠁꠍ, ꠅꠃꠟꠣ ꠀꠝꠤꠅ ꠔꠣꠞꠣꠞꠦ ꠖꠥꠘꠤꠀꠞ ꠝꠣꠎꠦ ꠙꠣꠑꠣꠁꠍꠤ।
JOH 17:19 ꠀꠝꠤ ꠔꠣꠞꠣꠞ ꠟꠣꠉꠤ ꠘꠤꠎꠞꠦ ꠈꠣꠍ ꠇꠞꠤ ꠞꠣꠈꠍꠤ, ꠎꠣꠔꠦ ꠔꠣꠞꠣꠞꠦꠅ ꠢꠇ ꠖꠤꠀ ꠈꠣꠍ ꠢꠤꠡꠣꠛꠦ ꠞꠣꠈꠣ ꠅꠄ।
JOH 17:20 “ꠔꠦ ꠀꠝꠤ ꠈꠣꠟꠤ ꠄꠞꠣꠞ ꠟꠣꠉꠤ ꠝꠤꠘꠔ ꠇꠞꠤꠀꠞ ꠘꠣ, ꠔꠣꠞꠣꠞ ꠟꠣꠉꠤꠅ ꠝꠤꠘꠔ ꠇꠞꠞꠣꠝ, ꠎꠦꠞꠣ ꠄꠞꠣꠞ ꠇꠕꠣ ꠢꠥꠘꠤꠀ ꠀꠝꠣꠞ ꠃꠙꠞꠦ ꠁꠝꠣꠘ ꠀꠘꠛ।
JOH 17:21 ꠀꠝꠤ ꠝꠤꠘꠔ ꠇꠞꠤꠀꠞ ꠔꠣꠞꠣ ꠢꠇꠟ ꠎꠣꠘꠥ ꠄꠇ ꠅꠄ। ꠛꠣꠛꠣ, ꠔꠥꠝꠤ ꠎꠦꠟꠣ ꠀꠝꠣꠞ ꠟꠉꠦ ꠀꠍ ꠀꠞ ꠀꠝꠤꠅ ꠎꠦꠟꠣ ꠔꠥꠝꠣꠞ ꠟꠉꠦ ꠀꠍꠤ, ꠅꠃꠟꠣ ꠔꠣꠞꠣꠅ ꠎꠣꠘꠥ ꠀꠝꠞꠣꠞ ꠟꠉꠦ ꠝꠤꠟꠤꠀ ꠞꠂꠘ। ꠔꠦꠃ ꠖꠥꠘꠤꠀꠞ ꠝꠣꠘꠡꠦ ꠄꠇꠤꠘ ꠇꠞꠛꠣ, ꠔꠥꠝꠤꠃ ꠀꠝꠣꠞꠦ ꠙꠣꠑꠣꠁꠍ।
JOH 17:22 ꠔꠥꠝꠤ ꠀꠝꠣꠞꠦ ꠎꠦ ꠝꠢꠤꠝꠣ ꠖꠣꠘ ꠇꠞꠍ, ꠀꠝꠤ ꠁꠔꠣ ꠔꠣꠞꠣꠞꠦ ꠖꠣꠘ ꠇꠞꠍꠤ, ꠎꠣꠔꠦ ꠀꠝꠞꠣ ꠎꠦꠟꠣ ꠄꠇ, ꠅꠃꠟꠣ ꠔꠣꠞꠣꠅ ꠄꠇ ꠅꠁꠔꠣ ꠙꠣꠞꠂꠘ।
JOH 17:23 ꠔꠥꠝꠤ ꠎꠦꠟꠣ ꠀꠝꠣꠞ ꠝꠣꠎꠦ ꠀꠍ, ꠅꠟꠣ ꠀꠝꠤꠅ ꠔꠣꠞꠣꠞ ꠝꠣꠎꠦ ꠀꠍꠤ। ꠅꠃ ꠟꠣꠈꠣꠘ ꠔꠣꠞꠣ ꠎꠣꠘꠥ ꠙꠥꠞꠣꠙꠥꠞ ꠄꠇ ꠅꠁꠔꠣ ꠙꠣꠞꠂꠘ। ꠔꠦꠃ ꠖꠥꠘꠤꠀꠞ ꠝꠣꠘꠡꠦ ꠛꠥꠎꠛ, ꠔꠥꠝꠤꠃ ꠀꠝꠣꠞꠦ ꠙꠣꠑꠣꠁꠍ, ꠀꠞ ꠔꠥꠝꠤ ꠀꠝꠣꠞꠦ ꠎꠦꠟꠣ ꠝꠣꠄꠀ ꠇꠞ, ꠅꠃꠟꠣ ꠔꠣꠞꠣꠞꠦꠅ ꠝꠣꠄꠀ ꠇꠞꠅ।
JOH 17:24 ꠛꠣꠛꠣ, ꠀꠝꠤ ꠌꠣꠁꠞꠣꠝ, ꠔꠥꠝꠤ ꠎꠦꠞꠣꠞꠦ ꠀꠝꠣꠞ ꠀꠔꠅ ꠡꠙꠤꠍ, ꠀꠝꠤ ꠎꠦꠈꠣꠘꠅ ꠀꠍꠤ, ꠔꠣꠞꠣꠅ ꠎꠣꠘꠥ ꠀꠝꠣꠞ ꠟꠉꠦ ꠢꠘꠅ ꠞꠂꠘ ꠀꠞ ꠀꠝꠣꠞ ꠝꠢꠤꠝꠣ ꠖꠦꠈꠂꠘ। ꠁ ꠝꠢꠤꠝꠣ ꠔ ꠔꠥꠝꠤꠃ ꠀꠝꠣꠞꠦ ꠖꠣꠘ ꠇꠞꠍ, ꠇꠣꠞꠘ ꠖꠥꠘꠤꠀ ꠙꠄꠖꠣ ꠇꠞꠣꠞ ꠀꠉ ꠕꠣꠇꠤꠃ ꠔꠥꠝꠤ ꠀꠝꠣꠞꠦ ꠝꠣꠄꠀ ꠇꠞꠍ।
JOH 17:25 “ꠅ ꠢꠇ ꠁꠘꠍꠣꠚꠇꠣꠞꠤ ꠛꠣꠛꠣ, ꠖꠥꠘꠤꠀꠞ ꠝꠣꠘꠡꠦ ꠔꠥꠝꠣꠞꠦ ꠌꠤꠘꠦ ꠘꠣ, ꠅꠁꠟꠦ ꠀꠝꠤ ꠔ ꠌꠤꠘꠤ। ꠀꠞ ꠔꠥꠝꠤꠃ ꠎꠦꠘ ꠀꠝꠣꠞꠦ ꠙꠣꠑꠣꠁꠍ, ꠁꠈꠣꠘ ꠄꠞꠣ ꠛꠥꠎꠤꠟꠤꠍꠦ।
JOH 17:26 ꠄꠞꠣꠞ ꠉꠦꠍꠦ ꠀꠝꠤ ꠔꠥꠝꠣꠞ ꠘꠣꠝ ꠎꠣꠁꠞ ꠇꠞꠍꠤ, ꠀꠉꠦꠖꠤ ꠀꠞꠅ ꠇꠞꠝꠥ, ꠎꠣꠔꠦ ꠔꠥꠝꠤ ꠀꠝꠣꠞꠦ ꠎꠦꠟꠣ ꠝꠣꠄꠀ ꠇꠞ, ꠅꠟꠣ ꠝꠣꠄꠀ ꠔꠣꠞꠣꠞ ꠜꠤꠔꠞꠦꠅ ꠕꠣꠇꠦ ꠀꠞ ꠀꠝꠤ ꠔꠣꠞꠣꠞ ꠟꠉꠦ ꠝꠤꠡꠤꠀ ꠕꠣꠇꠤ।”
JOH 18:1 ꠅꠃ ꠝꠥꠘꠣꠎꠣꠔꠞ ꠛꠣꠖꠦ ꠢꠎꠞꠔ ꠁꠍꠣꠄ ꠔꠣꠘ ꠍꠣꠢꠣꠛꠤ ꠅꠇꠟꠞꠦ ꠟꠁꠀ ꠇꠤꠖ꠆ꠞꠥꠘ ꠘꠣꠝꠞ ꠄꠇ ꠙꠣꠠꠤꠀ ꠈꠣꠟ ꠙꠣꠞ ꠅꠁꠀ ꠉꠦꠟꠣ। ꠉꠤꠀ ꠔꠣꠞꠣꠞꠦ ꠟꠁꠀ ꠄꠇ ꠛꠣꠉꠣꠘꠞ ꠜꠤꠔꠞꠦ ꠢꠣꠝꠣꠁꠟꠣ।
JOH 18:2 ꠛꠦꠁꠝꠣꠘ ꠁꠢꠥꠖꠣꠄ ꠁ ꠎꠣꠉꠣ ꠌꠤꠘꠔ, ꠇꠣꠞꠘ ꠁꠍꠣꠄ ꠀꠉꠦ ꠛꠃꠔ ꠛꠣꠞ ꠍꠣꠢꠣꠛꠤ ꠅꠇꠟꠞꠦ ꠟꠁꠀ ꠅꠘꠅ ꠛꠁꠍꠂꠘ।
JOH 18:3 ꠄꠞꠝꠣꠎꠦ ꠛꠠ ꠁꠝꠣꠝ ꠀꠞ ꠚꠞꠤꠡꠤ ꠅꠇꠟꠦ ꠅꠃ ꠁꠢꠥꠖꠣꠞ ꠟꠉꠦ ꠄꠇ ꠖꠟ ꠍꠤꠙꠣꠁ ꠀꠞ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠞ ꠇꠄꠎꠘ ꠙꠥꠟꠤꠡ ꠙꠣꠑꠣꠁꠟꠣ। ꠁꠢꠥꠖꠣꠄ ꠔꠣꠞꠣꠞꠦ ꠟꠁꠀ ꠅꠘꠅ ꠀꠁꠟ, ꠅꠃ ꠡꠝꠄ ꠔꠣꠞꠣꠞ ꠀꠔꠅ ꠟꠦꠝ, ꠝꠥꠡꠣꠟ, ꠀꠞ ꠅꠡꠔ꠆ꠞ-ꠡꠡꠔ꠆ꠞ ꠀꠍꠤꠟ।
JOH 18:4 ꠁꠍꠣꠄ ꠀꠉ ꠕꠣꠇꠤꠃ ꠢꠇꠟꠔꠣ ꠎꠣꠘꠔꠣ, ꠔꠣꠘ ꠃꠙꠞꠦ ꠇꠤꠔꠣ ꠊꠐꠛ। ꠄꠞꠟꠣꠉꠤ ꠔꠣꠁꠘ ꠀꠉꠥꠀꠁꠀ ꠀꠁꠀ ꠔꠣꠞꠣꠞꠦ ꠎꠤꠇꠣꠁꠟꠣ, “ꠀꠙꠘꠣꠞꠣ ꠇꠣꠞꠦ ꠔꠥꠇꠣꠁꠞꠣ?”
JOH 18:5 ꠔꠣꠞꠣ ꠇꠁꠟꠣ, “ꠘꠣꠍꠣꠞꠔ ꠉꠣꠃꠞ ꠁꠍꠣꠞꠦ।” ꠔꠣꠁꠘ ꠇꠁꠟꠣ, “ꠀꠝꠤꠃ ꠢꠦꠁꠘ।” ꠅꠃ ꠡꠝꠄ ꠛꠦꠁꠝꠣꠘ ꠁꠢꠥꠖꠣꠅ ꠔꠣꠞꠣꠞ ꠟꠉꠦ ꠀꠍꠤꠟ।
JOH 18:6 ꠁꠍꠣꠄ ꠎꠦꠛꠟꠣ ꠇꠁꠟꠣ, “ꠀꠝꠤꠃ ꠢꠦꠁꠘ,” ꠁꠈꠣꠘ ꠢꠥꠘꠤꠀꠃ ꠔꠣꠞꠣ ꠈꠞꠦꠖꠤ ꠉꠤꠀ ꠝꠣꠐꠤꠔ ꠙꠠꠤꠉꠦꠟꠣ।
JOH 18:7 ꠔꠣꠁꠘ ꠢꠤꠞꠛꠣꠞ ꠔꠣꠞꠣꠞꠦ ꠎꠤꠇꠣꠁꠟꠣ, “ꠀꠙꠘꠣꠞꠣ ꠇꠣꠞꠦ ꠌꠣꠁꠞꠣ?” ꠔꠣꠞꠣ ꠇꠁꠟꠣ, “ꠘꠣꠍꠣꠞꠔ ꠉꠣꠃꠞ ꠁꠍꠣꠞꠦ।”
JOH 18:8 ꠔꠣꠁꠘ ꠇꠁꠟꠣ, “ꠀꠝꠤ ꠔ ꠇꠁꠟꠣꠝ, ꠀꠝꠤꠃ ꠢꠦꠁꠘ। ꠀꠙꠘꠣꠞꠣ ꠎꠥꠖꠤ ꠀꠝꠣꠞꠦꠃ ꠔꠥꠇꠣꠘꠤꠔ ꠀꠁꠘ, ꠔꠦ ꠀꠝꠣꠞ ꠟꠉꠞ ꠄꠞꠣꠞꠦ ꠍꠣꠠꠤ ꠖꠦꠃꠇ꠆ꠇꠣ।”
JOH 18:9 ꠀꠍꠟꠦ ꠁꠟꠣ ꠊꠐꠟ, ꠎꠣꠔꠦ ꠁꠍꠣꠄ ꠀꠉꠦ ꠎꠦꠔꠣ ꠇꠁꠍꠟꠣ ꠅꠔꠣ ꠙꠥꠞꠣ ꠅꠄ। ꠔꠣꠁꠘ ꠇꠁꠍꠟꠣ, “ꠛꠣꠛꠣ, ꠔꠥꠝꠤ ꠎꠦꠞꠣꠞꠦ ꠀꠝꠣꠞ ꠀꠔꠅ ꠡꠙꠤꠍ, ꠄꠞꠣ ꠄꠇꠎꠘꠞꠦꠅ ꠀꠝꠤ ꠈꠥꠀꠁꠍꠤ ꠘꠣ।”
JOH 18:10 ꠅꠃ ꠡꠝꠄ ꠍꠣꠁꠝꠘ-ꠙꠤꠔꠞꠞ ꠟꠉꠦ ꠄꠇꠈꠣꠘ ꠔꠟꠥꠀꠞ ꠀꠍꠤꠟ, ꠅꠈꠣꠘ ꠛꠣꠞ ꠇꠞꠤꠀ, ꠔꠣꠁꠘ ꠙꠞꠗꠣꠘ ꠁꠝꠣꠝꠞ ꠉꠥꠟꠣꠝꠞ ꠒꠣꠁꠘ ꠇꠣꠘ ꠇꠣꠐꠤꠟꠤꠟꠣ। ꠁ ꠉꠥꠟꠣꠝꠞ ꠘꠣꠝ ꠀꠍꠤꠟ ꠝꠣꠟꠇꠥꠍ।
JOH 18:11 ꠄꠞꠟꠣꠉꠤ ꠁꠍꠣꠄ ꠙꠤꠔꠞꠞꠦ ꠇꠁꠟꠣ, “ꠔꠥꠝꠣꠞ ꠔꠟꠥꠀꠞ ꠈꠣꠙꠅ ꠢꠣꠞꠣꠅ। ꠉꠣꠁꠛꠤ ꠛꠣꠚꠦ ꠀꠝꠣꠞꠦ ꠎꠦ ꠝꠍꠤꠛꠔꠞ ꠙꠤꠀꠟꠣ ꠖꠤꠍꠂꠘ, ꠁꠇꠐꠣꠞ ꠡ꠆ꠛꠣꠖ ꠀꠝꠤ ꠟꠁꠔꠣꠝ ꠘꠣ ꠘꠤ?”
JOH 18:12 ꠅꠃ ꠡꠝꠄ ꠍꠤꠙꠣꠁ ꠅꠇꠟꠦ, ꠙꠞꠗꠣꠘ ꠍꠤꠙꠣꠁꠄ ꠀꠞ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠞ ꠙꠥꠟꠤꠡ ꠅꠇꠟꠦ ꠁꠍꠣꠞꠦ ꠗꠞꠤꠀ ꠛꠣꠘ꠆ꠖꠤꠟꠤꠟ।
JOH 18:13 ꠛꠣꠘ꠆ꠖꠤꠀ ꠙꠄꠟꠣ ꠔꠣꠞꠣ ꠢꠣꠘꠘꠞ ꠉꠦꠍꠦ ꠟꠁꠀ ꠉꠦꠟ। ꠁ ꠢꠣꠘꠘ ꠀꠍꠟꠣ ꠢꠃ ꠛꠍꠞꠞ ꠙꠞꠗꠣꠘ ꠁꠝꠣꠝ ꠇꠣꠄꠀꠚꠣꠞ ꠢꠃꠞ।
JOH 18:14 ꠅꠃ ꠇꠣꠄꠀꠚꠣꠄ ꠀꠉꠦ ꠁꠢꠥꠖꠤ ꠘꠦꠔꠣ ꠅꠇꠟꠞꠦ ꠇꠁꠍꠟꠣ, “ꠀꠡ꠆ꠔꠣ ꠎꠣꠔꠤ ꠛꠤꠘꠣꠡ ꠅꠀꠞ ꠌꠣꠁꠔꠦ, ꠢꠇꠟꠞ ꠛꠖꠟꠣ ꠄꠇꠎꠘꠞ ꠝꠞꠘ ꠀꠞꠅ ꠜꠣꠟꠣ।”
JOH 18:15 ꠅꠃ ꠡꠝꠄ ꠙꠤꠔꠞ ꠀꠞ ꠀꠞꠇ ꠎꠘ ꠍꠣꠢꠣꠛꠤ ꠁꠍꠣꠞ ꠈꠞꠦ ꠈꠞꠦ ꠉꠦꠟꠣ। ꠅꠃ ꠍꠣꠢꠣꠛꠤꠞꠦ ꠙꠞꠗꠣꠘ ꠁꠝꠣꠝꠦ ꠌꠤꠘꠔꠣ। ꠄꠁꠘ ꠁꠍꠣꠞ ꠟꠉꠦ ꠅꠁꠀ ꠙꠞꠗꠣꠘ ꠁꠝꠣꠝꠞ ꠛꠣꠠꠤꠞ ꠃꠑꠣꠘꠅ ꠢꠣꠝꠣꠁꠟꠣ।
JOH 18:16 ꠅꠁꠟꠦ ꠙꠤꠔꠞ ꠛꠣꠁꠞꠦ ꠉꠦꠁꠐꠞ ꠉꠦꠍꠦ ꠃꠛꠣꠁ ꠞꠁꠟꠣ। ꠔꠦꠃ ꠙꠞꠗꠣꠘ ꠁꠝꠣꠝꠞ ꠙꠞꠤꠌꠤꠔ ꠁꠍꠣꠞ ꠅꠃ ꠍꠣꠢꠣꠛꠤ ꠛꠣꠞꠦ ꠉꠤꠀ ꠙꠣꠞꠣꠖꠣꠞ ꠛꠦꠐꠤꠞꠦ ꠇꠁꠀ ꠙꠤꠔꠞꠞꠦ ꠜꠤꠔꠞꠦ ꠀꠘꠣꠁꠟꠣ।
JOH 18:17 ꠅꠃ ꠛꠦꠐꠤꠄ ꠙꠤꠔꠞꠞꠦ ꠇꠁꠟ, “ꠔꠥꠝꠤꠅ ꠄꠘ ꠝꠥꠞꠤꠖ ꠘꠤ?” ꠙꠤꠔꠞꠦ ꠇꠁꠟꠣ, “ꠘꠣ, ꠘꠣ, ꠀꠝꠤ ꠘꠣꠄ।”
JOH 18:18 ꠅꠃ ꠡꠝꠄ ꠈꠥꠛ ꠡꠤꠔ ꠙꠠꠍꠤꠟ, ꠄꠞꠖꠣꠄ ꠍꠤꠙꠣꠁ ꠀꠞ ꠉꠥꠟꠣꠝ ꠅꠇꠟꠦ ꠃꠑꠣꠘꠅ ꠀꠋꠞꠣꠖꠤ ꠀꠉꠥꠁꠘ ꠗꠞꠣꠁꠀ ꠀꠉꠥꠁꠘ ꠔꠣꠛꠣꠘꠤꠔ ꠟꠣꠉꠟꠣ। ꠙꠤꠔꠞꠦꠅ ꠔꠣꠞꠣꠞ ꠗꠣꠞꠅ ꠃꠛꠣꠁꠀ ꠀꠉꠥꠁꠘ ꠔꠣꠛꠣꠁꠟꠣ।
JOH 18:19 ꠅꠃ ꠡꠝꠄ ꠙꠞꠗꠣꠘ ꠁꠝꠣꠝꠦ ꠁꠍꠣꠞꠦ ꠔꠣꠘ ꠃꠝ꠆ꠝꠔ ꠀꠞ ꠔꠣꠘ ꠔꠣꠟꠤꠝꠞ ꠛꠦꠙꠣꠞꠦ ꠎꠤꠇꠣꠁꠟꠣ।
JOH 18:20 ꠁꠍꠣꠄ ꠎꠥꠀꠙ ꠖꠤꠟꠣ, “ꠀꠝꠤ ꠝꠣꠘꠡꠞ ꠍꠣꠝꠘꠦ ꠈꠥꠟꠣ-ꠝꠦꠟꠣ ꠝꠣꠔꠤꠍꠤ। ꠁꠢꠥꠖꠤ ꠅꠇꠟ ꠎꠦꠈꠣꠘꠅ ꠎꠝꠣ ꠅꠁꠘ, ꠅꠔꠣ ꠝꠍꠤꠖꠅ ꠀꠞ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠅ ꠢꠣꠝꠦꠡꠣ ꠔꠣꠟꠤꠝ ꠖꠤꠍꠤ। ꠀꠝꠤ ꠔ ꠟꠥꠇꠣꠁꠀ ꠇꠥꠘ꠆ꠔꠣ ꠇꠁꠍꠤ ꠘꠣ।
JOH 18:21 ꠔꠦ ꠀꠝꠣꠞꠦ ꠀꠞ ꠇꠦꠘꠦ ꠎꠤꠇꠣꠁꠞꠣ? ꠀꠝꠣꠞ ꠔꠣꠟꠤꠝ ꠎꠦꠞꠣ ꠢꠥꠘꠍꠦ, ꠔꠣꠞꠣꠞꠦꠃ ꠎꠤꠇꠣꠃꠇ꠆ꠇꠣ। ꠀꠝꠤ ꠎꠦ ꠔꠣꠟꠤꠝ ꠖꠤꠍꠤ, ꠁꠔꠣ ꠔꠣꠞꠣꠞ ꠎꠣꠘꠣ ꠀꠍꠦ।”
JOH 18:22 ꠁꠍꠣꠞ ꠁ ꠎꠥꠀꠙ ꠢꠥꠘꠤꠀ, ꠇꠣꠘ꠆ꠖꠣꠔ ꠎꠦ ꠍꠤꠙꠣꠁ ꠅꠇꠟ ꠃꠛꠣ ꠀꠍꠟꠣ, ꠄꠞꠣ ꠄꠇꠎꠘꠦ ꠔꠣꠘꠞꠦ ꠌꠠ ꠝꠣꠞꠤꠀ ꠇꠁꠟ, “ꠔꠥꠁ ꠙꠞꠗꠣꠘ ꠁꠝꠣꠝꠞꠦ ꠅꠟꠣ ꠎꠥꠀꠙ ꠖꠤꠞꠦ ꠘꠤ?”
JOH 18:23 ꠔꠣꠁꠘ ꠇꠁꠟꠣ, “ꠀꠝꠤ ꠎꠥꠖꠤ ꠛꠣꠖ ꠇꠥꠘ꠆ꠔꠣ ꠇꠁꠀ ꠕꠣꠇꠤ ꠔꠦ ꠇꠃꠇ꠆ꠇꠣ, ꠀꠞ ꠜꠣꠟꠣ ꠝꠣꠔ ꠝꠣꠔꠤꠟꠦ ꠀꠝꠣꠞꠦ ꠝꠣꠞꠞꠣ ꠇꠦꠘꠦ?”
JOH 18:24 ꠅꠃ ꠡꠝꠄ ꠢꠣꠘꠘꠦ ꠛꠣꠘ꠆ꠖꠣ ꠢꠣꠟꠔꠦ ꠁꠍꠣꠞꠦ ꠙꠞꠗꠣꠘ ꠁꠝꠣꠝ ꠇꠣꠄꠀꠚꠣꠞ ꠉꠦꠍꠦ ꠙꠣꠑꠣꠁ ꠖꠤꠟꠣ।
JOH 18:25 ꠍꠣꠢꠣꠛꠤ ꠍꠣꠁꠝꠘ-ꠙꠤꠔꠞꠦ ꠎꠦꠛꠟꠣ ꠀꠉꠥꠁꠘ ꠔꠣꠛꠣꠁꠞꠣ, ꠅꠃ ꠡꠝꠄ ꠝꠣꠘꠡꠦ ꠔꠣꠘꠞꠦ ꠇꠁꠟ, “ꠔꠥꠝꠤꠅ ꠔꠣꠞ ꠟꠉꠞ ꠄꠇꠎꠘ ꠍꠣꠢꠣꠛꠤ ꠘꠤ?” ꠙꠤꠔꠞꠦ ꠖꠥꠍꠞꠣꠛꠣꠞ ꠅꠡ꠆ꠛꠤꠇꠣꠞ ꠇꠞꠤ ꠇꠁꠟꠣ, “ꠘꠣ, ꠘꠣ, ꠀꠝꠤ ꠘꠣꠄ।”
JOH 18:26 ꠙꠤꠔꠞꠦ ꠎꠣꠞ ꠇꠣꠘ ꠇꠣꠐꠤꠍꠟꠣ, ꠔꠣꠞ ꠄꠇ ꠇꠥꠐꠥꠝ ꠀꠍꠤꠟ ꠙꠞꠗꠣꠘ ꠁꠝꠣꠝꠞ ꠉꠥꠟꠣꠝ। ꠢꠦ ꠇꠁꠟ, “ꠀꠝꠤ ꠛꠣꠉꠣꠘꠞ ꠜꠤꠔꠞꠦ ꠅꠉꠥꠞ ꠟꠉꠦ ꠔꠥꠝꠣꠞꠦꠅ ꠖꠦꠈꠟꠣꠝ ꠘꠣ ꠘꠤ?”
JOH 18:27 ꠙꠤꠔꠞꠦ ꠢꠤꠞꠛꠣꠞ ꠅꠡ꠆ꠛꠤꠇꠣꠞ ꠇꠞꠟꠣ, ꠀꠞ ꠟꠉꠦ ꠟꠉꠦꠃ ꠝꠥꠞꠉꠣꠄ ꠛꠣꠋ ꠖꠤꠟꠣꠁꠟ।
JOH 18:28 ꠁꠢꠥꠖꠤ ꠘꠦꠔꠣ ꠅꠇꠟꠦ ꠛꠤꠀꠘꠦ ꠁꠍꠣꠞꠦ ꠇꠣꠄꠀꠚꠣꠞ ꠉꠦꠍ ꠕꠣꠇꠤ, ꠞꠥꠝꠣꠘ ꠛꠣꠖꠡꠣꠞ ꠙꠞꠗꠣꠘ ꠢꠣꠇꠤꠝ ꠙꠤꠟꠣꠔꠞ ꠐꠋꠉꠤꠔ ꠟꠁꠀ ꠉꠦꠟꠣ। ꠅꠁꠟꠦ ꠔꠣꠞꠣ ꠛꠣꠠꠤꠞ ꠜꠤꠔꠞꠦ ꠢꠣꠝꠣꠁꠟꠣ ꠘꠣ, ꠎꠣꠔꠦ ꠛꠦ-ꠖꠤꠘ ꠢꠣꠇꠤꠝꠞ ꠛꠣꠠꠤꠔ ꠢꠣꠝꠣꠁꠀ ꠘꠣꠙꠣꠇ ꠘꠣ ꠅꠁꠘ, ꠛꠞꠋ ꠙꠣꠇ-ꠍꠣꠚ ꠞꠁꠀ ꠀꠎꠣꠖꠤ ꠁꠖꠞ ꠈꠣꠘꠤ ꠈꠣꠁꠔꠣ ꠙꠣꠞꠂꠘ।
JOH 18:29 ꠄꠞꠟꠣꠉꠤ ꠞꠥꠝꠣꠘ ꠢꠣꠇꠤꠝ ꠙꠤꠟꠣꠔ ꠛꠣꠞꠦ ꠀꠁꠀ ꠎꠤꠇꠣꠁꠟꠣ, “ꠁ ꠛꠦꠐꠣꠞ ꠛꠤꠞꠥꠖ꠆ꠖꠦ ꠔꠥꠝꠞꠣꠞ ꠘꠣꠟꠤꠡ ꠇꠤꠔꠣ?”
JOH 18:30 ꠔꠣꠞꠣ ꠇꠁꠟꠣ, “ꠢꠦ ꠅꠙꠞꠣꠗ ꠘꠣ ꠇꠞꠟꠦ ꠔ ꠀꠙꠘꠣꠞ ꠉꠦꠍꠦ ꠀꠘꠟꠣꠝ ꠘꠣ ꠅꠘꠦ।”
JOH 18:31 ꠙꠤꠟꠣꠔꠦ ꠔꠣꠞꠣꠞꠦ ꠇꠁꠟꠣ, “ꠔꠥꠝꠞꠣ ꠔꠣꠞꠦ ꠟꠁꠀ ꠎꠣꠅꠉꠤ, ꠉꠤꠀ ꠔꠥꠝꠞꠣꠞ ꠡꠞꠤꠅꠔ ꠝꠣꠚꠤꠇ ꠛꠤꠌꠣꠞ ꠇꠞꠤꠟꠣꠅ।” ꠁꠈꠣꠘ ꠢꠥꠘꠤꠀ ꠔꠣꠞꠣ ꠙꠤꠟꠣꠔꠞꠦ ꠇꠁꠟꠣ, “ꠇꠥꠘꠥ ꠝꠣꠘꠡꠞꠦ ꠎꠣꠘꠦ ꠝꠣꠞꠣꠞ ꠝꠔ ꠡꠣꠎꠣ ꠖꠦꠅꠀꠞ ꠈꠦꠝꠔꠣ ꠀꠝꠞꠣꠞ ꠀꠔꠅ ꠘꠣꠁ, ꠈꠣꠟꠤ ꠞꠥꠝꠣꠘ ꠅꠇꠟꠞ ꠀꠔꠅ ꠀꠍꠦ।”
JOH 18:32 ꠘꠤꠎꠞ ꠝꠃꠔ ꠇꠤꠟꠣꠘ ꠅꠁꠛ, ꠁꠍꠣꠄ ꠁꠈꠣꠘ ꠀꠉꠦꠃ ꠇꠁꠍꠂꠘ। ꠔꠦ ꠁꠔꠣ ꠅꠁꠟ, ꠎꠣꠔꠦ ꠔꠣꠘ ꠅꠃ ꠇꠕꠣ ꠚꠟꠦ।
JOH 18:33 ꠔꠦꠃ ꠙꠤꠟꠣꠔ ꠢꠤꠞꠛꠣꠞ ꠐꠋꠉꠤꠞ ꠜꠤꠔꠞꠦ ꠢꠣꠝꠣꠁꠟꠣ ꠀꠞ ꠁꠍꠣꠞꠦ ꠒꠣꠇ ꠖꠤꠀ ꠇꠁꠟꠣ, “ꠅꠛꠣ, ꠔꠥꠝꠤ ꠇꠤꠔꠣ ꠁꠢꠥꠖꠤ ꠅꠇꠟꠞ ꠛꠣꠖꠡꠣ ꠘꠤ?”
JOH 18:34 ꠔꠣꠁꠘ ꠎꠥꠀꠙ ꠖꠤꠟꠣ, “ꠀꠙꠘꠦ ꠘꠤꠎꠦ ꠅꠃ ꠇꠕꠣ ꠇꠁꠞꠣ, ꠘꠣ ꠝꠣꠘꠡꠦ ꠀꠝꠣꠞ ꠛꠦꠙꠣꠞꠦ ꠀꠙꠘꠣꠞꠦ ꠇꠁꠍꠦ?”
JOH 18:35 ꠙꠤꠟꠣꠔꠦ ꠎꠥꠀꠙ ꠖꠤꠟꠣ, “ꠀꠝꠤ ꠇꠤꠔꠣ ꠁꠢꠥꠖꠤ ꠘꠤ? ꠔꠥꠝꠣꠞ ꠘꠤꠎꠞ ꠎꠣꠔꠤꠞ ꠝꠣꠘꠡꠦ ꠀꠞ ꠛꠠ ꠁꠝꠣꠝ ꠅꠇꠟꠦ ꠔꠥꠝꠣꠞꠦ ꠀꠝꠣꠞ ꠀꠔꠅ ꠖꠤꠍꠦ। ꠇꠅ, ꠔꠥꠝꠤ ꠇꠤꠔꠣ ꠇꠞꠍ?”
JOH 18:36 ꠁꠍꠣꠄ ꠇꠁꠟꠣ, “ꠀꠝꠣꠞ ꠛꠣꠖꠡꠣꠁ ꠁ ꠖꠥꠘꠤꠀꠞ ꠘꠣꠄ। ꠀꠝꠣꠞ ꠛꠣꠖꠡꠣꠁ ꠎꠥꠖꠤ ꠅꠃ ꠖꠥꠘꠤꠀꠞ ꠅꠁꠔ, ꠔꠦ ꠁꠢꠥꠖꠤ ꠘꠦꠔꠣ ꠅꠇꠟꠞ ꠀꠔꠅ ꠀꠝꠤ ꠘꠣ ꠙꠠꠣꠞ ꠟꠣꠉꠤ ꠀꠝꠣꠞ ꠝꠣꠘꠡꠦ ꠟꠣꠠꠣꠁ ꠇꠞꠟ ꠅꠘꠦ, ꠅꠁꠟꠦ ꠀꠝꠣꠞ ꠛꠣꠖꠡꠣꠁ ꠔ ꠁꠘꠞ ꠘꠣꠄ।”
JOH 18:37 ꠁꠈꠣꠘ ꠢꠥꠘꠤꠀ ꠙꠤꠟꠣꠔꠦ ꠁꠍꠣꠞꠦ ꠎꠤꠇꠣꠁꠟꠣ, “ꠔꠣꠁꠟꠦ ꠔꠥꠝꠤ ꠇꠤꠔꠣ ꠛꠣꠖꠡꠣ ꠘꠤ?” ꠁꠍꠣꠄ ꠇꠁꠟꠣ, “ꠀꠙꠘꠦꠃ ꠔ ꠇꠁꠞꠣ, ꠀꠝꠤ ꠛꠣꠖꠡꠣ। ꠢꠥꠘꠃꠇ꠆ꠇꠣ, ꠢꠇꠞ ꠙꠇ꠆ꠇꠦ ꠡꠣꠇ꠆ꠇꠤ ꠖꠦꠅꠀꠞ ꠟꠣꠉꠤ ꠀꠝꠤ ꠖꠥꠘꠤꠀꠔ ꠀꠁꠍꠤ। ꠎꠣꠞꠣ ꠢꠇꠞ ꠟꠉꠦ ꠀꠍꠦ, ꠔꠣꠞꠣ ꠀꠝꠣꠞ ꠇꠕꠣ ꠢꠥꠘꠦ।”
JOH 18:38 ꠙꠤꠟꠣꠔꠦ ꠔꠣꠘꠞꠦ ꠇꠁꠟꠣ, “ꠔꠦ ꠢꠇꠈꠣꠘ ꠇꠤꠔꠣ?” ꠅꠈꠣꠘ ꠇꠁꠀ ꠔꠣꠁꠘ ꠢꠤꠞꠛꠣꠞ ꠛꠣꠞꠦ ꠉꠤꠀ ꠁꠢꠥꠖꠤ ꠘꠦꠔꠣ ꠅꠇꠟꠞꠦ ꠇꠁꠟꠣ, “ꠀꠝꠤ ꠔ ꠄꠞ ꠇꠥꠘꠥ ꠖꠥꠡ ꠙꠣꠁꠍꠤ ꠘꠣ।
JOH 18:39 ꠅꠁꠟꠦ ꠔꠥꠝꠞꠣꠞ ꠔ ꠄꠇꠐꠣ ꠞꠦꠅꠀꠎ ꠀꠍꠦ, ꠀꠎꠣꠖꠤ ꠁꠖꠞ ꠡꠝꠄ ꠀꠝꠤ ꠄꠇꠎꠘ ꠇꠄꠅꠖꠤꠞꠦ ꠈꠣꠟꠣꠍ ꠖꠦꠁ। ꠔꠦ ꠔꠥꠝꠞꠣ ꠌꠣꠅ ꠘꠤ, ꠀꠝꠤ ꠁꠢꠥꠖꠤꠞ ꠅꠃ ꠛꠣꠖꠡꠣꠞꠦ ꠍꠣꠠꠤ ꠖꠤꠔꠣꠝ?”
JOH 18:40 ꠁꠈꠣꠘ ꠢꠥꠘꠤꠀ ꠔꠣꠞꠣ ꠌꠤꠟ꠆ꠟꠣꠁꠀ ꠇꠁꠟ, “ꠘꠣ, ꠘꠣ, ꠄꠞꠦ ꠘꠣ, ꠛꠣꠞꠣꠛ꠆ꠛꠣꠞꠦ ꠍꠣꠠꠤ ꠖꠦꠃꠇ꠆ꠇꠣ।” ꠅꠃ ꠛꠣꠞꠣꠛ꠆ꠛꠣ ꠀꠍꠤꠟ ꠄꠇ ꠒꠣꠇꠣꠁꠔ।
JOH 19:1 ꠛꠣꠖꠦ ꠞꠥꠝꠣꠘ ꠢꠣꠇꠤꠝ ꠙꠤꠟꠣꠔꠦ ꠁꠍꠣꠞꠦ ꠌꠣꠛꠥꠇ ꠝꠣꠞꠣꠞ ꠢꠥꠇꠥꠝ ꠖꠤꠟꠣ।
JOH 19:2 ꠀꠞ ꠍꠤꠙꠣꠁ ꠅꠇꠟꠦ ꠉꠍꠣ-ꠇꠣꠐꠣ ꠖꠤꠀ ꠄꠇ ꠝꠥꠇꠥꠐ ꠛꠣꠘꠣꠁꠀ ꠔꠣꠘ ꠝꠣꠕꠣꠔ ꠖꠤꠟ, ꠀꠞ ꠛꠣꠁꠋꠉꠘꠤ ꠞꠋꠉꠞ ꠛꠣꠖꠡꠣꠁ ꠟꠦꠛꠣꠍ ꠚꠤꠘ꠆ꠖꠣꠁꠟ।
JOH 19:3 ꠛꠣꠖꠦ ꠔꠣꠞꠣ ꠔꠣꠘ ꠍꠣꠝꠘꠦ ꠀꠁꠀ ꠇꠁꠟ, “ꠅ ꠁꠢꠥꠖꠤꠞ ꠛꠣꠖꠡꠣ, ꠝꠣꠞꠢꠣꠛꠣ!” ꠅꠈꠣꠘ ꠇꠁꠀ ꠇꠁꠀ ꠔꠣꠞꠣ ꠔꠣꠘ ꠉꠣꠟꠅ ꠌꠠꠣꠁꠟ।
JOH 19:4 ꠔꠦꠃ ꠙꠤꠟꠣꠔ ꠢꠤꠞꠛꠣꠞ ꠛꠣꠞꠦ ꠀꠁꠀ ꠇꠁꠟꠣ, “ꠢꠥꠘꠅ, ꠀꠝꠤ ꠄꠞꠦ ꠔꠥꠝꠞꠣꠞ ꠉꠦꠍꠦ ꠛꠣꠞ ꠇꠞꠤꠀ ꠀꠘꠤꠀꠞ, ꠔꠦꠃ ꠔꠥꠝꠞꠣ ꠛꠥꠎꠛꠣꠄ, ꠀꠝꠤ ꠄꠞ ꠇꠥꠘꠥ ꠖꠥꠡꠃ ꠙꠣꠁꠞꠣꠝ ꠘꠣ।”
JOH 19:5 ꠢꠃ ꠉꠍꠣ-ꠇꠣꠐꠣꠞ ꠝꠥꠇꠥꠐ ꠀꠞ ꠛꠣꠁꠋꠉꠘꠤ ꠟꠦꠛꠣꠍ ꠚꠤꠘ꠆ꠖꠣ ꠢꠣꠟꠔꠦ ꠁꠍꠣ ꠛꠣꠞ ꠅꠁꠀ ꠀꠁꠟꠣ, ꠀꠞ ꠙꠤꠟꠣꠔꠦ ꠇꠁꠟꠣ, “ꠅꠃ ꠖꠦꠈꠅ, ꠢꠃ ꠝꠣꠘꠥꠡ।”
JOH 19:6 ꠁꠍꠣꠞꠦ ꠖꠦꠈꠤꠀ ꠛꠠ ꠁꠝꠣꠝ ꠀꠞ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠞ ꠙꠥꠟꠤꠡ ꠅꠇꠟꠦ ꠌꠤꠟ꠆ꠟꠣꠁꠀ ꠇꠁꠟꠣ, “ꠔꠣꠞꠦ ꠍꠟꠤꠛꠅ ꠖꠦꠅ, ꠍꠟꠤꠛꠅ ꠖꠦꠅ।” ꠙꠤꠟꠣꠔꠦ ꠇꠁꠟꠣ, “ꠀꠝꠤ ꠔ ꠔꠣꠞ ꠇꠥꠘꠥ ꠖꠥꠡ ꠙꠣꠁꠍꠤ ꠘꠣ, ꠔꠦ ꠔꠥꠝꠞꠣꠃ ꠔꠣꠞꠦ ꠘꠤꠀ ꠍꠟꠤꠛꠅ ꠉꠣꠕꠤꠟꠣꠅ।” (ꠁ ꠍꠟꠤꠛ ꠅꠁꠟ ꠟꠣꠇꠠꠤꠖꠤ ꠛꠣꠘꠣꠁꠟ, ꠝꠣꠘꠡꠞꠦ ꠟꠐꠇꠣꠁꠀ ꠝꠣꠞꠣꠞ ꠄꠇ ꠎꠤꠘꠤꠡ।)
JOH 19:7 ꠁꠢꠥꠖꠤ ꠘꠦꠔꠣ ꠅꠇꠟꠦ ꠙꠤꠟꠣꠔꠞꠦ ꠇꠁꠟꠣ, “ꠀꠝꠞꠣꠞ ꠡꠞꠤꠅꠔ ꠝꠣꠚꠤꠇ ꠔꠣꠞ ꠝꠞꠘ ꠅꠀ ꠃꠌꠤꠔ, ꠇꠣꠞꠘ ꠢꠦ ꠘꠤꠎꠞꠦ ꠀꠟ꠆ꠟꠣꠞ ꠈꠣꠍ ꠝꠣꠄꠀꠞ ꠎꠘ, ꠁꠛꠘꠥꠟ꠆ꠟꠣ ꠇꠁꠍꠦ।”
JOH 19:8 ꠁꠈꠣꠘ ꠢꠥꠘꠤꠀ ꠙꠤꠟꠣꠔꠦ ꠀꠞꠅ ꠛꠦꠡꠤ ꠒꠞꠣꠁꠉꠦꠟꠣ।
JOH 19:9 ꠔꠣꠁꠘ ꠢꠤꠞꠛꠣꠞ ꠐꠋꠉꠤ-ꠊꠞꠞ ꠜꠤꠔꠞꠦ ꠢꠣꠝꠣꠁꠀ ꠁꠍꠣꠞꠦ ꠎꠤꠇꠣꠁꠟꠣ, “ꠔꠥꠝꠤ ꠇꠥꠀꠁ ꠕꠣꠇꠤ ꠀꠁꠍ?” ꠅꠁꠟꠦ ꠁꠍꠣꠄ ꠇꠥꠘꠥ ꠎꠥꠀꠙ ꠖꠤꠟꠣ ꠘꠣ।
JOH 19:10 ꠄꠞꠖꠣꠄ ꠙꠤꠟꠣꠔꠦ ꠁꠍꠣꠞꠦ ꠇꠁꠟꠣ, “ꠔꠥꠝꠤ ꠀꠝꠣꠞ ꠝꠣꠔꠞ ꠇꠥꠘꠥ ꠎꠥꠀꠙ ꠖꠤꠔꠣꠄ ꠘꠣ ꠘꠤ? ꠔꠥꠝꠤ ꠎꠣꠘ ꠘꠤ, ꠔꠥꠝꠣꠞꠦ ꠈꠣꠟꠣꠍ ꠖꠤꠛꠣꠞ ꠛꠣ ꠍꠟꠤꠛꠞ ꠃꠙꠞꠦ ꠟꠐꠇꠣꠁꠀ ꠝꠣꠞꠣꠞ ꠈꠦꠝꠔꠣ ꠀꠝꠣꠞ ꠀꠍꠦ?”
JOH 19:11 ꠔꠦꠃ ꠁꠍꠣꠄ ꠇꠁꠟꠣ, “ꠃꠙꠞꠦ ꠕꠣꠇꠤ ꠀꠙꠘꠣꠞꠦ ꠈꠦꠝꠔꠣ ꠘꠣ ꠖꠦꠅꠀ ꠅꠁꠟꠦ, ꠀꠝꠣꠞ ꠃꠙꠞꠦ ꠀꠙꠘꠣꠞ ꠇꠥꠘꠥ ꠈꠦꠝꠔꠣꠃ ꠕꠣꠇꠔ ꠘꠣ। ꠄꠞꠟꠣꠉꠤ ꠎꠦ ꠝꠣꠘꠡꠦ ꠀꠝꠣꠞꠦ ꠀꠙꠘꠣꠞ ꠀꠔꠅ ꠗꠞꠣꠁ ꠖꠤꠍꠦ, ꠢꠦ-ꠃ ꠛꠠ ꠉꠥꠘꠣꠉꠣꠞ।”
JOH 19:12 ꠁꠈꠣꠘ ꠢꠥꠘꠤꠀ ꠙꠤꠟꠣꠔꠦ ꠁꠍꠣꠞꠦ ꠈꠣꠟꠣꠍ ꠖꠤꠟꠣꠁꠔꠣ ꠌꠣꠁꠟꠣ, ꠅꠁꠟꠦ ꠁꠢꠥꠖꠤ ꠘꠦꠔꠣ ꠅꠇꠟꠦ ꠌꠤꠟ꠆ꠟꠣꠁꠀ ꠇꠁꠟꠣ, “ꠀꠙꠘꠦ ꠎꠥꠖꠤ ꠄꠞꠦ ꠈꠣꠟꠣꠍ ꠖꠤꠟꠣꠁꠘ, ꠔꠦ ꠀꠙꠘꠦ ꠞꠥꠝꠣꠘ ꠛꠣꠖꠡꠣꠞ ꠖꠥꠡ꠆ꠔ ꠘꠣꠄ। ꠎꠦ ꠝꠣꠘꠡꠦ ꠘꠤꠎꠞꠦ ꠛꠣꠖꠡꠣ ꠇꠁꠀ ꠖꠣꠛꠤ ꠇꠞꠦ, ꠢꠦ ꠔ ꠞꠥꠝꠣꠘ ꠛꠣꠖꠡꠣꠞ ꠖꠥꠡꠝꠘ।”
JOH 19:13 ꠁꠈꠣꠘ ꠢꠥꠘꠤꠀ ꠙꠤꠟꠣꠔꠦ ꠁꠍꠣꠞꠦ ꠛꠣꠞ ꠇꠞꠤ ꠀꠘꠟꠣ ꠀꠞ ꠙꠣꠔ꠆ꠔꠞꠖꠤ-ꠛꠣꠘ꠆ꠖꠣ ꠘꠣꠝꠞ ꠄꠇ ꠃꠑꠣꠘꠅ ꠛꠤꠌꠣꠞꠞ ꠀꠡꠘꠅ ꠛꠁꠟꠣ। ꠁꠛꠞꠣꠘꠤ ꠜꠣꠡꠣꠄ ꠁ ꠃꠑꠣꠘꠞꠦ ꠉꠣꠛ꠆ꠛꠣꠕꠣ ꠇꠅꠀ ꠅꠄ।
JOH 19:14 ꠁ ꠖꠤꠘ ꠀꠍꠤꠟ ꠀꠎꠣꠖꠤ ꠁꠖꠞ ꠀꠄꠅꠎꠘꠞ ꠖꠤꠘ। ꠅꠃ ꠡꠝꠄ ꠛꠦꠁꠟ ꠅꠘꠥꠝꠣꠘ ꠖꠥꠁꠚꠞ ꠅꠁꠉꠦꠍꠦ। ꠙꠤꠟꠣꠔꠦ ꠁꠢꠥꠖꠤ ꠘꠦꠔꠣ ꠅꠇꠟꠞꠦ ꠇꠁꠟꠣ, “ꠅꠃ ꠖꠦꠈꠅ, ꠔꠥꠝꠞꠣꠞ ꠛꠣꠖꠡꠣ।”
JOH 19:15 ꠁꠍꠣꠞꠦ ꠖꠦꠈꠤꠀ ꠔꠣꠞꠣ ꠌꠤꠟ꠆ꠟꠣꠁꠀ ꠇꠁꠟ, “ꠅꠉꠥꠞꠦ ꠢꠞꠣꠅ, ꠢꠞꠣꠅ, ꠔꠣꠞꠦ ꠍꠟꠤꠛꠅ ꠖꠦꠅ।” ꠙꠤꠟꠣꠔꠦ ꠇꠁꠟꠣ, “ꠔꠥꠝꠞꠣꠞ ꠛꠣꠖꠡꠣꠞꠦ ꠀꠝꠤ ꠍꠟꠤꠛꠅ ꠖꠤꠟꠣꠁꠔꠣꠝ ꠘꠤ?” ꠛꠠ ꠁꠝꠣꠝ ꠅꠇꠟꠦ ꠇꠁꠟꠣ, “ꠈꠣꠟꠤ ꠞꠥꠝꠣꠘ ꠛꠣꠖꠡꠣ ꠍꠣꠠꠣ, ꠀꠝꠞꠣꠞ ꠀꠞ ꠇꠥꠘꠥ ꠛꠣꠖꠡꠣ ꠘꠣꠁ।”
JOH 19:16 ꠔꠦꠃ ꠢꠣꠇꠤꠝ ꠙꠤꠟꠣꠔꠦ ꠍꠟꠤꠛꠞ ꠃꠙꠞꠦ ꠟꠐꠇꠣꠁꠀ ꠝꠣꠞꠣꠞ ꠟꠣꠉꠤ ꠁꠍꠣꠞꠦ ꠔꠣꠞꠣꠞ ꠀꠔꠅ ꠡꠝꠎꠣꠁ ꠖꠤꠟꠣ, ꠀꠞ ꠍꠤꠙꠣꠁ ꠅꠇꠟꠦ ꠔꠣꠘꠞꠦ ꠟꠁꠀ ꠉꠦꠟꠣ।
JOH 19:17 ꠛꠣꠖꠦ ꠁꠍꠣꠄ ꠔꠣꠘ ꠍꠟꠤꠛ ꠘꠤꠎꠦ ꠛꠁꠀ ꠇꠟ꠆ꠟꠣꠞ ꠌꠣꠠ ꠘꠣꠝꠞ ꠎꠣꠉꠣꠔ ꠉꠦꠟꠣ। ꠁꠛꠞꠣꠘꠤ ꠜꠣꠡꠣꠄ ꠁ ꠎꠣꠉꠣꠞ ꠘꠣꠝ ꠉꠟꠉꠣꠕꠣ।
JOH 19:18 ꠢꠤꠘꠅ ꠘꠤꠀ ꠔꠣꠞꠣ ꠔꠣꠘꠞꠦ ꠍꠟꠤꠛꠅ ꠟꠐꠇꠣꠁꠟ। ꠁꠍꠣꠞꠦ ꠝꠣꠎꠈꠣꠘꠅ, ꠀꠞ ꠔꠣꠘ ꠖꠥꠁ ꠉꠣꠟꠣꠞ ꠖꠥꠁꠅ ꠍꠟꠤꠛꠅ ꠅꠁꠘ꠆ꠘ ꠖꠥꠁꠎꠘꠞꠦ ꠟꠐꠇꠣꠁꠟ।
JOH 19:19 ꠀꠞ ꠙꠤꠟꠣꠔꠦ ꠄꠇꠈꠣꠘ ꠅꠙꠞꠣꠗ-ꠘꠣꠝꠣ ꠟꠦꠈꠤꠀ ꠁꠍꠣꠞ ꠍꠟꠤꠛꠞ ꠃꠙꠞꠦ ꠟꠣꠉꠣꠁꠟꠣ। ꠁꠈꠣꠘꠅ ꠟꠦꠈꠣ ꠀꠍꠤꠟ, “ꠘꠣꠍꠣꠞꠔ ꠉꠣꠃꠞ ꠁꠍꠣ, ꠁꠢꠥꠖꠤꠞ ꠛꠣꠖꠡꠣ।”
JOH 19:20 ꠎꠦ ꠎꠣꠉꠣꠔ ꠔꠣꠘꠞꠦ ꠍꠟꠤꠛꠅ ꠟꠐꠇꠣꠁꠟ ꠅꠁꠍꠤꠟ, ꠅꠃ ꠎꠣꠉꠣ ꠐꠣꠃꠘꠞ ꠇꠣꠘ꠆ꠖꠣꠔ ꠀꠍꠤꠟ ꠉꠔꠤꠇꠦ ꠛꠃꠔ ꠁꠢꠥꠖꠤꠄ ꠅꠃ ꠅꠙꠞꠣꠗ-ꠘꠣꠝꠣ ꠙꠠꠟ। ꠁꠈꠣꠘ ꠁꠛꠞꠣꠘꠤ, ꠁꠃꠘꠣꠘꠤ ꠀꠞ ꠞꠥꠝꠣꠘ ꠜꠣꠡꠣꠄ ꠟꠦꠈꠣ ꠀꠍꠤꠟ।
JOH 19:21 ꠁꠢꠥꠖꠤꠞ ꠛꠠ ꠁꠝꠣꠝ ꠅꠇꠟꠦ ꠢꠣꠇꠤꠝ ꠙꠤꠟꠣꠔꠞꠦ ꠇꠁꠟꠣ, “ꠁꠢꠥꠖꠤꠞ ꠛꠣꠖꠡꠣ ꠘꠣ ꠟꠦꠈꠤꠀ, ꠀꠙꠘꠦ ꠅꠟꠣ ꠟꠦꠈꠃꠇ꠆ꠇꠣ, ꠢꠦ ꠇꠁꠔ, ꠀꠝꠤ ꠁꠢꠥꠖꠤꠞ ꠛꠣꠖꠡꠣ।”
JOH 19:22 ꠙꠤꠟꠣꠔꠦ ꠇꠁꠟꠣ, “ꠀꠝꠤ ꠎꠦꠔꠣ ꠟꠦꠈꠍꠤ, ꠟꠦꠈꠍꠤꠃ।”
JOH 19:23 ꠁꠍꠣꠞꠦ ꠍꠟꠤꠛꠅ ꠟꠐꠇꠣꠘꠤꠞ ꠛꠣꠖꠦ ꠍꠤꠙꠣꠁ ꠅꠇꠟꠦ ꠔꠣꠘ ꠇꠣꠙꠠ-ꠌꠥꠙꠠ ꠌꠣꠁꠞ ꠛꠣꠐ ꠇꠞꠤ ꠛꠣꠐꠤꠀ ꠘꠤꠟꠣ। ꠛꠣꠖꠦ ꠔꠣꠘ ꠇꠥꠞ꠆ꠔꠣꠐꠣꠅ ꠘꠤꠟꠣ। ꠁ ꠀꠡ꠆ꠔꠣ ꠇꠥꠞ꠆ꠔꠣꠞ ꠉꠟꠣ ꠕꠣꠇꠤ ꠛꠣꠁꠘ ꠇꠞꠣ, ꠇꠥꠘꠥ ꠡꠤꠟꠣꠁ ꠀꠍꠤꠟ ꠘꠣ।
JOH 19:24 ꠄꠞꠟꠣꠉꠤ ꠍꠤꠙꠣꠁ ꠅꠇꠟꠦ ꠄꠇꠦ-ꠅꠁꠘ꠆ꠘꠦ ꠇꠁꠟ, “ꠁꠇꠐꠣ ꠘꠣ ꠍꠤꠠꠤꠀ ꠛꠞꠋ ꠟꠐꠣꠞꠤ ꠝꠣꠞꠤ ꠖꠦꠈꠤ, ꠇꠣꠞ ꠜꠣꠁꠉ꠆ꠉꠔ ꠙꠠꠦ।” ꠁꠔꠣ ꠊꠐꠍꠤꠟ, ꠎꠣꠔꠦ ꠀꠍꠝꠣꠘꠤ ꠇꠤꠔꠣꠛꠞ ꠇꠕꠣ ꠚꠟꠦ, ꠇꠤꠔꠣꠛꠅ ꠟꠦꠈꠣ ꠀꠍꠦ, ꠔꠣꠞꠣ ꠘꠤꠎꠞ ꠝꠣꠎꠦ ꠀꠝꠣꠞ ꠇꠣꠙꠠ-ꠌꠥꠙꠠ ꠛꠣꠐꠣ-ꠛꠣꠐꠤ ꠇꠞꠍꠦ, ꠀꠝꠣꠞ ꠇꠥꠞ꠆ꠔꠣꠞ ꠟꠣꠉꠤ ꠔꠣꠞꠣ ꠟꠐꠣꠞꠤ ꠝꠣꠞꠍꠦ।
JOH 19:25 ꠀꠞ ꠢꠣꠍꠣꠃ ꠔꠣꠞꠣ ꠅꠟꠣ ꠇꠞꠟ। ꠢꠎꠞꠔ ꠁꠍꠣꠞ ꠍꠟꠤꠛꠞ ꠇꠣꠘ꠆ꠖꠣꠔ ꠔꠣꠘ ꠝꠣ, ꠈꠣꠟꠣ, ꠇꠥꠟꠥꠚꠣꠞ ꠛꠃ ꠝꠞꠤꠅꠝ ꠀꠞ ꠝꠉꠖꠤꠟꠤꠘꠤ ꠝꠞꠤꠅꠝ ꠃꠛꠣ ꠀꠍꠟꠣ।
JOH 19:26 ꠁꠍꠣꠄ ꠖꠦꠈꠟꠣ, ꠔꠣꠘ ꠝꠣ ꠀꠞ ꠝꠣꠄꠀꠞ ꠢꠃ ꠍꠣꠢꠣꠛꠤ ꠗꠣꠞꠅ ꠃꠛꠣꠁ ꠞꠁꠍꠂꠘ। ꠖꠦꠈꠤꠀ ꠙꠄꠟꠣ ꠔꠣꠘ ꠝꠣʼꠞꠦ ꠇꠁꠟꠣ, “ꠝꠣꠁ ꠉ, ꠅꠃꠘꠥ ꠔꠥꠝꠣꠞ ꠙꠥꠀ।”
JOH 19:27 ꠀꠞ ꠍꠣꠢꠣꠛꠤꠞꠦ ꠇꠁꠟꠣ, “ꠜꠣꠁ, ꠅꠃꠘꠥ ꠔꠥꠝꠣꠞ ꠝꠣ।” ꠅꠃ ꠡꠝꠄ ꠕꠣꠇꠤ ꠁ ꠍꠣꠢꠣꠛꠤꠄ ꠁꠍꠣꠞ ꠝꠣʼꠞꠦ ꠔꠣꠘ ꠘꠤꠎꠞ ꠊꠞꠅ ꠟꠁꠀ ꠉꠦꠟꠣꠉꠤ।
JOH 19:28 ꠄꠞꠛꠣꠖꠦ ꠢꠇ꠆ꠇꠟꠔꠣ ꠡꠦꠡ ꠅꠁꠉꠦꠍꠦ ꠎꠣꠘꠤꠀ, ꠀꠟ-ꠎꠛꠥꠞ ꠇꠤꠔꠣꠛꠞ ꠀꠄꠀꠔ ꠎꠣꠔꠦ ꠚꠟꠦ, ꠅꠔꠣꠞ ꠟꠣꠉꠤ ꠁꠍꠣꠄ ꠇꠁꠟꠣ, “ꠀꠝꠣꠞ ꠙꠤꠀꠍꠦ ꠗꠞꠍꠦ।”
JOH 19:29 ꠅꠃ ꠡꠝꠄ ꠢꠤꠘꠅ ꠄꠇ ꠎꠉ ꠐꠦꠋꠉꠣ ꠀꠋꠉꠥꠞꠞ ꠡꠞꠛꠔ ꠀꠍꠤꠟ। ꠔꠣꠞꠣ ꠄꠇꠈꠣꠘ ꠔꠦꠘꠣ ꠀꠘꠤꠀ ꠅꠃ ꠡꠞꠛꠔꠞ ꠝꠣꠎꠦ ꠜꠤꠎꠣꠁꠀ, ꠄꠍꠥꠛ ꠉꠣꠍꠞ ꠒꠦꠐꠣꠞ ꠝꠣꠕꠣꠔ ꠟꠣꠉꠣꠁꠀ ꠃꠌꠣ ꠇꠞꠤ ꠔꠣꠘ ꠝꠥꠈꠞ ꠉꠦꠍꠦ ꠖꠤꠟ।
JOH 19:30 ꠁ ꠡꠞꠛꠔ ꠈꠣꠁꠀ ꠢꠣꠞꠟꠦ ꠔꠣꠁꠘ ꠇꠁꠟꠣ, “ꠡꠦꠡ ꠅꠁꠉꠦꠍꠦ।” ꠅꠈꠣꠘ ꠇꠁꠀ, ꠔꠣꠁꠘ ꠝꠣꠕꠣ ꠘꠥꠀꠁꠀ ꠀꠈꠦꠞꠤ ꠖꠝ ꠚꠣꠟꠣꠁꠟꠣ।
JOH 19:31 ꠀꠎꠣꠖꠤ ꠁꠖꠞ ꠀꠉꠞ ꠖꠤꠘ ꠢꠎꠞꠔ ꠁꠍꠣꠄ ꠁꠘ꠆ꠔꠦꠇꠣꠟ ꠇꠞꠟꠣ। ꠛꠣꠖꠞ ꠖꠤꠘ ꠀꠍꠤꠟ ꠈꠣꠍ ꠙꠛꠤꠔ꠆ꠞ ꠄꠇ ꠎꠥꠝ꠆ꠝꠣꠛꠣꠞ। ꠄꠞꠟꠣꠉꠤ ꠁꠢꠥꠖꠤ ꠘꠦꠔꠣ ꠅꠇꠟꠦ ꠌꠣꠁꠟꠣ, ꠁ ꠖꠤꠘ ꠎꠣꠘꠥ ꠇꠥꠘꠥ ꠟꠣꠡ ꠍꠟꠤꠛꠞ ꠃꠙꠞꠦ ꠘꠣ ꠕꠣꠇꠦ। ꠅꠃ ꠔꠣꠞꠣ ꠢꠣꠇꠤꠝ ꠙꠤꠟꠣꠔꠞ ꠉꠦꠍꠦ ꠌꠣꠁꠟꠣ, ꠎꠣꠔꠦ ꠍꠟꠤꠛꠅ ꠎꠦꠞꠣ ꠀꠍꠦ, ꠔꠣꠞꠣ ꠎꠟꠖꠤ ꠝꠞꠣꠞ ꠟꠣꠉꠤ ꠔꠣꠞꠣꠞ ꠙꠣꠅ ꠜꠣꠋꠉꠤꠀ ꠍꠟꠤꠛ ꠕꠣꠇꠤ ꠟꠣꠝꠣꠘꠤ ꠅꠄ।
JOH 19:32 ꠔꠦꠃ ꠁꠍꠣꠞ ꠟꠉꠦ ꠎꠦꠞꠣꠞꠦ ꠍꠟꠤꠛꠅ ꠟꠐꠇꠣꠁꠟ ꠅꠁꠍꠤꠟ, ꠍꠤꠙꠣꠁ ꠅꠇꠟꠦ ꠄꠞꠣ ꠖꠥꠁꠅꠎꠘꠞ ꠙꠣꠅ ꠜꠣꠋꠉꠤ ꠖꠤꠟ।
JOH 19:33 ꠔꠣꠞꠣ ꠁꠍꠣꠞ ꠉꠦꠍꠦ ꠀꠁꠀ ꠖꠦꠈꠟ, ꠔꠣꠁꠘ ꠝꠣꠞꠣ ꠉꠦꠍꠂꠘ, ꠄꠞꠟꠣꠉꠤ ꠔꠣꠘ ꠙꠣꠅ ꠜꠣꠋꠟ ꠘꠣ।
JOH 19:34 ꠅꠁꠟꠦ ꠄꠇ ꠍꠤꠙꠣꠁꠄ ꠍꠥꠟꠚꠤ ꠖꠤꠀ ꠔꠣꠘ ꠙꠣꠔ꠆ꠔꠤ-ꠀꠠꠞ ꠝꠣꠎꠦꠖꠤ ꠚꠣꠠ ꠝꠣꠞꠟ, ꠚꠣꠠꠞ ꠟꠉꠦ ꠟꠃ ꠀꠞ ꠙꠣꠘꠤ ꠛꠣꠞ ꠅꠁꠀ ꠀꠁꠟ।
JOH 19:35 ꠎꠦ ꠎꠘꠦ ꠘꠤꠎꠞ ꠌꠃꠈꠦ ꠁ ꠊꠐꠘꠣ ꠖꠦꠈꠍꠂꠘ, ꠔꠣꠁꠘꠃ ꠡꠣꠇ꠆ꠇꠤ ꠖꠤꠍꠂꠘ ꠀꠞ ꠔꠣꠘ ꠡꠣꠇ꠆ꠇꠤ ꠢꠣꠍꠣ। ꠔꠣꠁꠘ ꠎꠣꠘꠂꠘ, ꠔꠣꠁꠘ ꠎꠦꠔꠣ ꠇꠁꠞꠣ ꠁꠔꠣ ꠢꠣꠍꠣ, ꠎꠣꠔꠦ ꠔꠥꠝꠞꠣꠅ ꠄꠇꠤꠘ ꠇꠞ।
JOH 19:36 ꠁꠔꠣ ꠅꠁꠍꠤꠟ ꠎꠣꠔꠦ ꠙꠣꠇ ꠇꠤꠔꠣꠛꠞ ꠅꠃ ꠇꠕꠣ ꠙꠥꠞꠣ ꠅꠄ, ꠇꠤꠔꠣꠛꠅ ꠀꠍꠦ, ‘ꠔꠣꠘ ꠄꠇꠐꠣ ꠀꠒ꠆ꠒꠤꠅ ꠜꠣꠋꠉꠣ ꠅꠁꠔ ꠘꠣꠄ।’
JOH 19:37 ꠄꠅꠈꠣꠘ ꠀꠍꠦ, ‘ꠎꠣꠞꠣ ꠔꠣꠘꠞꠦ ꠉꠣꠕꠤꠍꠦ, ꠔꠣꠞꠣ ꠔꠣꠘ ꠛꠣꠄ ꠌꠣꠁ ꠞꠁꠛ।’
JOH 19:38 ꠁꠔꠣ ꠊꠐꠘꠣꠞ ꠛꠣꠖꠦ ꠀꠞꠤꠝꠣꠕꠤꠀ ꠉꠣꠃꠞ ꠁꠃꠍꠥꠚꠦ ꠁꠍꠣꠞ ꠟꠣꠡ ꠘꠤꠔꠣ ꠇꠞꠤ ꠢꠣꠇꠤꠝ ꠙꠤꠟꠣꠔꠞ ꠅꠘꠥꠝꠔꠤ ꠌꠣꠁꠟꠣ। ꠁꠃꠍꠥꠚ ꠀꠍꠟꠣ ꠁꠍꠣꠞ ꠄꠇꠎꠘ ꠟꠥꠇꠣꠁꠟ ꠃꠝ꠆ꠝꠔ, ꠇꠣꠞꠘ ꠔꠣꠁꠘ ꠁꠢꠥꠖꠤ ꠘꠦꠔꠣ ꠅꠇꠟꠞꠦ ꠒꠞꠣꠁꠔꠣ। ꠙꠤꠟꠣꠔꠞ ꠅꠘꠥꠝꠔꠤ ꠙꠣꠁꠀ ꠔꠣꠁꠘ ꠁꠍꠣꠞ ꠟꠣꠡ ꠘꠤꠟꠣ।
JOH 19:39 ꠀꠉꠦ ꠞꠣꠁꠔꠞ ꠛꠣꠟꠣ ꠎꠦꠁꠘ ꠁꠍꠣꠞ ꠉꠦꠍꠦ ꠀꠁꠍꠟꠣ, ꠢꠃ ꠘꠤꠇꠖꠤꠝꠦꠅ ꠝꠥꠞꠣ-ꠀꠔꠞ ꠀꠞ ꠅꠉꠥꠞꠥ ꠝꠤꠡꠣꠁꠀ ꠅꠘꠥꠝꠣꠘ ꠄꠇ ꠝꠘ ꠈꠥꠡꠛꠄ ꠝꠡꠟꠣ ꠟꠁꠀ ꠀꠁꠟꠣ।
JOH 19:40 ꠀꠞ ꠁꠍꠣꠞ ꠟꠣꠡ ꠘꠤꠀ ꠁꠢꠥꠖꠤ ꠅꠇꠟꠞ ꠘꠤꠅꠝ ꠝꠣꠚꠤꠇ ꠅꠃ ꠈꠥꠡꠛꠄ ꠀꠟꠣ ꠝꠡꠟꠣ ꠝꠣꠈꠣꠁꠀ ꠇꠣꠚꠘ ꠚꠤꠘ꠆ꠖꠣꠁꠟꠣ।
JOH 19:41 ꠁꠍꠣꠞꠦ ꠎꠦꠈꠣꠘꠅ ꠍꠟꠤꠛꠅ ꠉꠣꠕꠣ ꠅꠁꠍꠤꠟ, ꠢꠘꠅ ꠄꠇ ꠛꠣꠉꠣꠘꠞ ꠜꠤꠔꠞꠦ ꠙꠣꠠꠞ ꠉꠥꠢꠣꠞ ꠝꠣꠎꠦ ꠘꠄꠀ ꠄꠇꠐꠣ ꠇꠄꠛꠞ ꠈꠥꠖꠤꠀ ꠞꠣꠈꠣ ꠀꠍꠤꠟ। ꠁ ꠇꠄꠛꠞꠅ ꠇꠦꠃꠞꠞꠦ ꠖꠣꠚꠘ ꠇꠞꠣ ꠅꠁꠍꠦ ꠘꠣ।
JOH 19:42 ꠅꠃ ꠖꠤꠘ ꠁꠢꠥꠖꠤ ꠅꠇꠟꠞ ꠁꠖꠞ ꠀꠉꠞ ꠖꠤꠘ ꠅꠀꠄ ꠀꠞ ꠇꠄꠛꠞꠐꠣꠅ ꠇꠣꠘ꠆ꠖꠣꠔ ꠕꠣꠇꠣꠄ, ꠔꠣꠞꠣ ꠔꠣꠠꠣ-ꠃꠠꠣ ꠇꠞꠤ ꠁꠍꠣꠞꠦ ꠅꠘꠅꠃ ꠖꠣꠚꠘ ꠇꠞꠟꠣ।
JOH 20:1 ꠢꠣꠙ꠆ꠔꠣꠞ ꠙꠄꠟꠣ ꠖꠤꠘ ꠚꠎꠞ ꠅꠇ꠆ꠔꠅ ꠀꠘ꠆ꠖꠣꠁꠞ ꠞꠁꠔꠦꠃ ꠝꠉꠖꠤꠟꠤꠘꠤ ꠝꠞꠤꠅꠝ ꠢꠎꠞꠔ ꠁꠍꠣꠞ ꠇꠄꠛꠞꠞ ꠇꠣꠘ꠆ꠖꠣꠔ ꠉꠦꠟꠣ। ꠉꠤꠀ ꠖꠦꠈꠟꠣ, ꠇꠄꠛꠞꠞ ꠝꠥꠈ ꠕꠣꠇꠤ ꠙꠣꠔ꠆ꠔꠞꠐꠣ ꠢꠞꠣꠁꠟ ꠅꠁꠉꠦꠍꠦ।
JOH 20:2 ꠖꠦꠈꠤꠀ ꠔꠣꠁꠘ ꠍꠣꠁꠝꠘ-ꠙꠤꠔꠞ ꠀꠞ ꠎꠦ ꠍꠣꠢꠣꠛꠤꠞꠦ ꠁꠍꠣꠄ ꠈꠥꠛ ꠝꠣꠄꠀ ꠇꠞꠔꠣ, ꠄꠞꠣꠞ ꠉꠦꠍꠦ ꠖꠃꠠꠣꠁꠀ ꠉꠤꠀ ꠇꠁꠟꠣ, “ꠢꠥꠘꠍꠂꠘ ꠘꠤ, ꠢꠥꠎꠥꠞꠞ ꠟꠣꠡ ꠝꠣꠘꠡꠦ ꠇꠄꠛꠞ ꠕꠣꠇꠤ ꠔꠥꠟꠤꠀ ꠘꠤꠍꠂꠘꠉꠤ। ꠘꠤꠀ ꠇꠁ ꠞꠣꠈꠍꠂꠘ ꠀꠝꠞꠣ ꠎꠣꠘꠤ ꠘꠣ।”
JOH 20:3 ꠈꠛꠞ ꠙꠣꠁꠀ ꠙꠤꠔꠞ ꠀꠞ ꠅꠃ ꠍꠣꠢꠣꠛꠤ ꠇꠄꠛꠞꠞ ꠛꠣꠄ ꠞꠅꠀꠘꠣ ꠅꠁꠟꠣ।
JOH 20:4 ꠖꠥꠁꠅꠎꠘꠦ ꠄꠇꠟꠉꠦ ꠖꠃꠠꠣꠁꠞꠣ। ꠙꠤꠔꠞꠞꠦ ꠈꠞꠦ ꠚꠣꠟꠣꠁꠀ ꠢꠃ ꠍꠣꠢꠣꠛꠤ ꠀꠉꠦ ꠇꠄꠛꠞꠞ ꠇꠣꠘ꠆ꠖꠣꠔ ꠉꠦꠟꠣ।
JOH 20:5 ꠉꠤꠀ ꠃꠘ꠆ꠖꠣ ꠅꠁꠀ ꠖꠦꠈꠟꠣ, ꠇꠄꠛꠞꠞ ꠜꠤꠔꠞꠦ ꠇꠣꠚꠘ ꠙꠠꠤ ꠞꠁꠍꠦ, ꠅꠁꠟꠦ ꠔꠣꠁꠘ ꠇꠄꠛꠞꠞ ꠜꠤꠔꠞꠦ ꠢꠣꠝꠣꠁꠟꠣ ꠘꠣ।
JOH 20:6 ꠙꠤꠔꠞꠅ ꠔꠣꠘ ꠈꠞꠦ ꠈꠞꠦ ꠀꠁꠟꠣ, ꠀꠁꠀ ꠇꠄꠛꠞꠞ ꠜꠤꠔꠞꠦ ꠢꠣꠝꠣꠁꠀ ꠖꠦꠈꠟꠣ, ꠈꠣꠟꠤ ꠇꠣꠚꠘꠈꠣꠘ ꠙꠠꠤ ꠞꠁꠍꠦ।
JOH 20:7 ꠎꠦ ꠇꠣꠚꠘꠞ ꠐꠥꠇꠞꠣ ꠖꠤꠀ ꠔꠣꠘ ꠝꠣꠕꠣ ꠛꠣꠘ꠆ꠖꠣ ꠅꠁꠍꠤꠟ, ꠁꠈꠣꠘ ꠅꠁꠘ꠆ꠘ ꠐꠥꠇꠞꠣꠞ ꠟꠉꠦ ꠘꠣꠄ, ꠀꠟꠉꠣ ꠙꠠꠤ ꠞꠁꠍꠦ।
JOH 20:8 ꠎꠦ ꠍꠣꠢꠣꠛꠤ ꠙꠄꠟꠣ ꠇꠄꠛꠞꠞ ꠇꠣꠘ꠆ꠖꠣꠔ ꠉꠦꠍꠟꠣ, ꠛꠣꠖꠦ ꠔꠣꠁꠘꠅ ꠜꠤꠔꠞꠦ ꠢꠣꠝꠣꠁꠟꠣ, ꠢꠣꠝꠣꠁꠀ ꠢꠇꠟꠔꠣ ꠖꠦꠈꠤꠀ ꠄꠇꠤꠘ ꠇꠞꠟꠣ।
JOH 20:9 ꠁꠍꠣꠞ ꠔ ꠝꠥꠞ꠆ꠖꠣ ꠕꠣꠇꠤ ꠎꠤꠘ꠆ꠖꠣ ꠅꠀ ꠎꠞꠥꠞ, ꠙꠣꠇ ꠇꠤꠔꠣꠛꠞ ꠅꠃ ꠔꠣꠟꠤꠝꠞ ꠝꠣꠘꠤ ꠀꠉꠦ ꠔ ꠄꠞꠣ ꠇꠦꠃ ꠛꠥꠎꠍꠂꠘ ꠘꠣ।
JOH 20:10 ꠄꠞꠛꠣꠖꠦ ꠍꠣꠢꠣꠛꠤ ꠅꠇꠟ ꠎꠣꠞꠎꠤꠞ ꠛꠣꠠꠤꠔ ꠉꠦꠟꠣꠉꠤ,
JOH 20:11 ꠅꠁꠟꠦ ꠝꠞꠤꠅꠝꠦ ꠇꠄꠛꠞꠞ ꠇꠣꠘ꠆ꠖꠣꠔ ꠃꠛꠣꠁꠀ ꠇꠣꠘ꠆ꠖꠘ ꠟꠣꠉꠣꠁꠟꠣ। ꠔꠣꠁꠘ ꠇꠣꠘ꠆ꠖꠤ ꠇꠣꠘ꠆ꠖꠤ ꠃꠘ꠆ꠖꠣ ꠅꠁꠀ ꠇꠄꠛꠞꠞ ꠜꠤꠔꠞꠦꠖꠤ ꠌꠣꠁꠀ ꠖꠦꠈꠟꠣ,
JOH 20:12 ꠁꠍꠣꠞ ꠟꠣꠡ ꠎꠦꠘꠅ ꠢꠥꠔꠣꠁꠀ ꠞꠣꠈꠣ ꠅꠁꠍꠤꠟ, ꠢꠘꠅ ꠗꠟꠣ ꠇꠣꠙꠠ ꠚꠤꠘ꠆ꠘ ꠖꠥꠁꠎꠘ ꠚꠤꠞꠤꠡ꠆ꠔꠣ ꠛꠁ ꠞꠁꠍꠂꠘ, ꠄꠇꠎꠘ ꠢꠤꠔꠣꠘꠦꠖꠤ, ꠀꠞꠇ ꠎꠘ ꠙꠣꠅ ꠉꠣꠟꠣꠛꠣꠄ।
JOH 20:13 ꠚꠤꠞꠤꠡ꠆ꠔꠣ ꠅꠇꠟꠦ ꠝꠞꠤꠅꠝꠞꠦ ꠇꠁꠟꠣ, “ꠔꠥꠝꠤ ꠇꠣꠘ꠆ꠖꠤꠞꠣꠄ ꠇꠦꠘꠦ ꠉ?” ꠔꠣꠁꠘ ꠇꠁꠟꠣ, “ꠝꠣꠘꠡꠦ ꠀꠝꠣꠞ ꠝꠣꠟꠤꠇꠞ ꠟꠣꠡ ꠔꠥꠟꠤꠀ ꠘꠤꠍꠂꠘꠉꠤ, ꠘꠤꠀ ꠇꠁ ꠕꠁꠍꠂꠘ ꠎꠣꠘꠤ ꠘꠣ।”
JOH 20:14 ꠅꠈꠣꠘ ꠇꠁꠀ ꠔꠣꠁꠘ ꠈꠞꠦꠖꠤ ꠌꠣꠁꠔꠦꠃ ꠖꠦꠈꠟꠣ, ꠢꠎꠞꠔ ꠁꠍꠣ ꠃꠛꠣꠁ ꠞꠁꠍꠂꠘ। ꠅꠁꠟꠦ ꠔꠣꠁꠘꠃ ꠎꠦ ꠁꠍꠣ, ꠝꠞꠤꠅꠝꠦ ꠁꠈꠣꠘ ꠛꠥꠎꠟꠣ ꠘꠣ।
JOH 20:15 ꠁꠍꠣꠄ ꠝꠞꠤꠅꠝꠞꠦ ꠇꠁꠟꠣ, “ꠅꠉ, ꠔꠥꠝꠤ ꠇꠣꠘ꠆ꠖꠅ ꠇꠦꠘꠦ? ꠇꠣꠞꠦ ꠔꠥꠇꠣꠁꠞꠣꠄ?” ꠁꠍꠣꠞꠦ ꠛꠣꠉꠣꠘꠞ ꠝꠣꠟꠤ ꠝꠘꠅ ꠇꠞꠤꠀ ꠔꠣꠁꠘ ꠇꠁꠟꠣ, “ꠖꠦꠈꠃꠇ꠆ꠇꠣ, ꠀꠙꠘꠦ ꠎꠥꠖꠤ ꠔꠣꠘ ꠟꠣꠡ ꠘꠤꠀ ꠕꠣꠇꠂꠘ, ꠔꠦ ꠇꠥꠀꠁ ꠘꠤꠍꠂꠘ, ꠇꠃꠇ꠆ꠇꠣ। ꠀꠝꠤ ꠔꠣꠘ ꠟꠣꠡ ꠘꠤꠝꠥ।”
JOH 20:16 ꠁꠍꠣꠄ ꠇꠁꠟꠣ, “ꠝꠞꠤꠅꠝ।” ꠔꠦꠃ ꠝꠞꠤꠅꠝ ꠚꠤꠞꠤꠀ ꠃꠛꠣꠁꠀ ꠁꠛꠞꠣꠘꠤ ꠜꠣꠡꠣꠄ ꠔꠣꠘꠞꠦ ꠇꠁꠟꠣ, “ꠞꠣꠛ꠆ꠛꠥꠘꠤ” ꠝꠣꠘꠤ ꠃꠡ꠆ꠔꠣꠖ।
JOH 20:17 ꠁꠍꠣꠄ ꠔꠣꠘꠞꠦ ꠇꠁꠟꠣ, “ꠀꠝꠣꠞꠦ ꠗꠞꠤꠀ ꠞꠣꠈꠤꠅ ꠘꠣ, ꠀꠝꠤ ꠔ ꠅꠈꠘꠅ ꠉꠣꠁꠛꠤ ꠛꠣꠚꠞ ꠉꠦꠍꠦ ꠃꠙꠞꠦ ꠉꠦꠍꠤ ꠘꠣ। ꠔꠥꠝꠤ ꠛꠞꠋ ꠀꠝꠣꠞ ꠜꠣꠁꠀꠁꠘꠞꠦ ꠉꠤꠀ ꠇꠅ, ꠎꠦꠁꠘ ꠀꠝꠣꠞ ꠀꠞ ꠔꠥꠝꠞꠣꠞ ꠉꠣꠁꠛꠤ ꠛꠣꠚ, ꠀꠝꠣꠞ ꠀꠞ ꠔꠥꠝꠞꠣꠞ ꠀꠟ꠆ꠟꠣ, ꠀꠝꠤ ꠃꠙꠞꠦ ꠔꠣꠘ ꠉꠦꠍꠦꠃ ꠎꠣꠁꠞꠣꠝ।”
JOH 20:18 ꠔꠦꠃ ꠝꠉꠖꠤꠟꠤꠘꠤ ꠝꠞꠤꠅꠝꠦ ꠍꠣꠢꠣꠛꠤ ꠅꠇꠟꠞꠦ ꠉꠤꠀ ꠇꠁꠟꠣ, ꠁꠍꠣꠞ ꠟꠉꠦ ꠔꠣꠘ ꠖꠦꠈꠣ ꠅꠁꠍꠦ ꠀꠞ ꠁꠍꠣꠄꠃ ꠔꠣꠘꠞꠦ ꠁꠔꠣ ꠢꠇꠟꠔꠣ ꠇꠁꠍꠂꠘ।
JOH 20:19 ꠢꠃ ꠖꠤꠘ, ꠝꠣꠘꠤ ꠢꠣꠙ꠆ꠔꠣꠞ ꠙꠄꠟꠣ ꠖꠤꠘ ꠢꠣꠁꠘ꠆ꠎꠣ ꠛꠣꠟꠣ ꠍꠣꠢꠣꠛꠤ ꠅꠇꠟ ꠄꠇꠈꠣꠘꠅ ꠖꠟꠣ ꠅꠁꠟꠣ। ꠅꠁꠟꠦ ꠁꠢꠥꠖꠤ ꠘꠦꠔꠣ ꠅꠇꠟꠞ ꠒꠞꠦ ꠊꠞꠞ ꠖꠥꠀꠞ-ꠈꠤꠠꠇꠤ ꠢꠇꠟꠔꠣ ꠛꠘ꠆ꠖ ꠀꠍꠤꠟ। ꠄꠞꠝꠣꠎꠦ ꠀꠈꠔꠣꠃ ꠢꠎꠞꠔ ꠁꠍꠣ ꠀꠁꠀ ꠄꠞꠣꠞ ꠝꠣꠎꠈꠣꠘꠅ ꠃꠛꠣꠁꠀ ꠇꠁꠟꠣ, “ꠀꠍꠍꠣꠟꠣꠝꠥ ꠀꠟꠣꠁꠇꠥꠝ।”
JOH 20:20 ꠅꠈꠣꠘ ꠇꠁꠀ ꠢꠣꠞꠤ ꠔꠣꠁꠘ ꠘꠤꠎꠞ ꠖꠥꠁꠅ ꠀꠔ ꠀꠞ ꠙꠣꠔ꠆ꠔꠤ-ꠀꠠꠞ ꠎꠈꠝꠞ ꠖꠣꠉ ꠄꠞꠣꠞꠦ ꠖꠦꠈꠣꠁꠟꠣ। ꠢꠥꠎꠥꠞꠞꠦ ꠖꠦꠈꠤꠀ ꠍꠣꠢꠣꠛꠤ ꠅꠇꠟ ꠈꠥꠛ ꠈꠥꠡꠤ ꠅꠁꠟꠣ।
JOH 20:21 ꠛꠣꠖꠦ ꠁꠍꠣꠄ ꠢꠤꠞꠛꠣꠞ ꠄꠞꠣꠞꠦ ꠇꠁꠟꠣ, “ꠀꠍꠍꠣꠟꠣꠝꠥ ꠀꠟꠣꠁꠇꠥꠝ। ꠢꠥꠘꠅ, ꠀꠝꠣꠞ ꠉꠣꠁꠛꠤ ꠛꠣꠚꠦ ꠎꠦꠟꠣ ꠀꠝꠣꠞꠦ ꠙꠣꠑꠣꠁꠍꠂꠘ, ꠀꠝꠤꠅ ꠅꠃꠟꠣ ꠔꠥꠝꠞꠣꠞꠦ ꠙꠣꠑꠣꠁꠞꠣꠝ।”
JOH 20:22 ꠅꠈꠣꠘ ꠇꠁꠀ ꠔꠣꠁꠘ ꠍꠣꠢꠣꠛꠤ ꠅꠇꠟꠞ ꠃꠙꠞꠦ ꠚꠥ ꠖꠤꠀ ꠇꠁꠟꠣ, “ꠀꠟ꠆ꠟꠣꠞ ꠙꠣꠇ ꠞꠥꠢꠥꠞꠦ ꠇꠛꠥꠟ ꠇꠞꠅ।
JOH 20:23 ꠢꠥꠘꠅ, ꠔꠥꠝꠞꠣ ꠎꠥꠖꠤ ꠇꠦꠃꠞꠦ ꠝꠣꠚ ꠇꠞꠤ ꠖꠦꠅ, ꠔꠦ ꠔꠣꠞ ꠉꠥꠘꠣ ꠝꠣꠚ ꠇꠞꠣ ꠅꠁꠛ, ꠀꠞ ꠎꠥꠖꠤ ꠝꠣꠚ ꠘꠣ ꠇꠞ, ꠔꠦ ꠔꠣꠞ ꠉꠥꠘꠣꠞ ꠝꠣꠚꠤ ꠝꠤꠟꠔ ꠘꠣꠄ।”
JOH 20:24 ꠢꠎꠞꠔ ꠁꠍꠣ ꠎꠦꠛꠟꠣ ꠍꠣꠢꠣꠛꠤ ꠅꠇꠟꠞ ꠍꠣꠝꠘꠦ ꠀꠁꠟꠣ, ꠅꠃ ꠡꠝꠄ ꠛꠣꠞꠅꠎꠘ ꠍꠣꠢꠣꠛꠤꠞ ꠝꠣꠎꠞ ꠕꠥꠝꠣꠍ ꠘꠣꠝꠞ ꠄꠇꠎꠘ ꠍꠣꠢꠣꠛꠤ ꠁꠘꠅ ꠀꠍꠟꠣ ꠘꠣ। ꠅꠃ ꠕꠥꠝꠣꠍꠞꠦ ꠎꠝꠎ ꠇꠁꠀ ꠒꠣꠇꠣ ꠅꠁꠔ।
JOH 20:25 ꠄꠞꠟꠣꠉꠤ ꠛꠣꠇꠤ ꠍꠣꠢꠣꠛꠤ ꠅꠇꠟꠦ ꠕꠥꠝꠣꠍꠞꠦ ꠇꠁꠟꠣ, “ꠀꠝꠞꠣ ꠔ ꠢꠥꠎꠥꠞꠞꠦ ꠖꠦꠈꠍꠤ।” ꠕꠥꠝꠣꠍꠦ ꠇꠁꠟꠣ, “ꠢꠥꠘꠃꠇ꠆ꠇꠣ, ꠀꠝꠤ ꠀꠝꠣꠞ ꠘꠤꠎꠞ ꠌꠃꠈꠦ ꠎꠥꠖꠤ ꠔꠣꠘ ꠖꠥꠁꠅ ꠀꠔꠞ ꠙꠦꠞꠦꠉꠞ ꠖꠣꠉ ꠘꠣ ꠖꠦꠈꠤ, ꠅꠃ ꠎꠈꠝꠅ ꠀꠋꠉꠥꠟ ꠘꠣ ꠟꠣꠉꠣꠁ, ꠀꠞ ꠔꠣꠘ ꠙꠣꠔ꠆ꠔꠤ-ꠀꠠꠞ ꠎꠈꠝꠅ ꠀꠔ ꠘꠣ ꠖꠦꠁ, ꠔꠦ ꠇꠥꠘꠥꠝꠘ꠆ꠔꠦꠃ ꠀꠝꠤ ꠁꠔꠣ ꠄꠇꠤꠘ ꠇꠞꠔꠣꠝ ꠘꠣꠄ।”
JOH 20:26 ꠄꠞ ꠄꠇ ꠢꠣꠙ꠆ꠔꠣ ꠛꠣꠖꠦ ꠢꠤꠞꠛꠣꠞ ꠍꠣꠢꠣꠛꠤ ꠅꠇꠟ ꠅꠃ ꠊꠞꠅ ꠖꠟꠣ ꠅꠁꠟꠣ, ꠄꠞꠣꠞ ꠟꠉꠦ ꠕꠥꠝꠣꠍꠅ ꠀꠍꠟꠣ। ꠅꠃ ꠡꠝꠄ ꠊꠞꠞ ꠢꠇꠟ ꠖꠥꠀꠞ-ꠈꠤꠠꠇꠤ ꠛꠘ꠆ꠖ ꠕꠣꠇꠟꠦꠅ ꠀꠈꠔꠣꠃ ꠁꠍꠣ ꠀꠁꠀ ꠔꠣꠞꠣꠞ ꠝꠣꠎꠈꠣꠘꠅ ꠃꠛꠣꠁꠀ ꠇꠁꠟꠣ, “ꠀꠍꠍꠣꠟꠣꠝꠥ ꠀꠟꠣꠁꠇꠥꠝ।”
JOH 20:27 ꠛꠣꠖꠦ ꠔꠣꠁꠘ ꠕꠥꠝꠣꠍꠞꠦ ꠇꠁꠟꠣ, “ꠔꠥꠝꠣꠞ ꠀꠋꠉꠥꠟ ꠟꠣꠉꠣꠁꠀ ꠀꠝꠣꠞ ꠖꠥꠁꠅ ꠀꠔ ꠖꠦꠈꠅ, ꠀꠞ ꠔꠥꠝꠣꠞ ꠀꠔ ꠛꠣꠠꠣꠁꠀ ꠀꠝꠣꠞ ꠙꠣꠔ꠆ꠔꠤ-ꠀꠠꠞ ꠎꠈꠝꠅ ꠢꠣꠞꠣꠅ, ꠄꠇꠤꠘ ꠇꠞꠅ, ꠡꠘ꠆ꠖꠄ ꠇꠞꠤꠅ ꠘꠣ।”
JOH 20:28 ꠔꠦꠃ ꠕꠥꠝꠣꠍꠦ ꠇꠁꠟꠣ, “ꠝꠣꠟꠤꠇ ꠀꠝꠣꠞ, ꠀꠟ꠆ꠟꠣ ꠀꠝꠣꠞ।”
JOH 20:29 ꠁꠍꠣꠄ ꠔꠣꠘꠞꠦ ꠇꠁꠟꠣ, “ꠕꠥꠝꠣꠍ, ꠀꠝꠣꠞꠦ ꠖꠦꠈꠍ ꠇꠞꠤ ꠔꠥꠝꠤ ꠁꠝꠣꠘ ꠀꠘꠟꠣꠄ ꠘꠤ? ꠢꠥꠘꠅ, ꠗꠁꠘ꠆ꠘ ꠔꠣꠞꠣ, ꠎꠦꠞꠣ ꠘꠣ ꠖꠦꠈꠤꠀꠅ ꠀꠝꠣꠞ ꠃꠙꠞꠦ ꠁꠝꠣꠘ ꠀꠘꠦ।”
JOH 20:30 ꠢꠎꠞꠔ ꠁꠍꠣꠄ ꠍꠣꠢꠣꠛꠤ ꠅꠇꠟꠞ ꠍꠣꠝꠘꠦ ꠀꠞꠅ ꠛꠃꠔ ꠇꠦꠞꠣꠝꠔꠤ ꠘꠤꠡꠣꠘꠣ ꠖꠦꠈꠣꠁꠍꠂꠘ, ꠁꠔꠣ ꠢꠇꠟꠔꠣ ꠔ ꠅꠃ ꠇꠤꠔꠣꠛꠅ ꠟꠦꠈꠣ ꠅꠁꠍꠦ ꠘꠣ।
JOH 20:31 ꠈꠣꠟꠤ ꠅꠃ ꠊꠐꠘꠣ ꠅꠇꠟ ꠟꠦꠈꠣ ꠅꠁꠍꠦ, ꠎꠣꠔꠦ ꠅꠔꠣ ꠔꠤꠟꠣꠅꠔ ꠇꠞꠤꠀ ꠔꠥꠝꠞꠣ ꠁꠝꠣꠘ ꠀꠘ, ꠢꠎꠞꠔ ꠁꠍꠣꠃ ꠀꠟ꠆ꠟꠣ ꠙꠣꠇꠞ ꠅꠀꠖꠣ ꠇꠞꠣ ꠢꠃ ꠀꠟ-ꠝꠍꠤ, ꠔꠣꠁꠘꠃ ꠁꠛꠘꠥꠟ꠆ꠟꠣ, ꠀꠟ꠆ꠟꠣꠞ ꠈꠣꠍ ꠝꠣꠄꠀꠞ ꠎꠘ, ꠀꠞ ꠁꠝꠣꠘ ꠀꠘꠤꠀ ꠎꠣꠔꠦ ꠔꠣꠘ ꠃꠍꠤꠟ꠆ꠟꠣꠄ ꠔꠥꠝꠞꠣ ꠀꠈꠦꠞꠤ ꠎꠤꠘ꠆ꠖꠦꠉꠤ ꠢꠣꠍꠤꠟ ꠇꠞ।
JOH 21:1 ꠄꠞꠛꠣꠖꠦ ꠔꠤꠛꠤꠞꠤꠀ ꠘꠣꠝꠞ ꠀꠅꠞꠞ ꠙꠣꠞꠅ ꠢꠎꠞꠔ ꠁꠍꠣꠄ ꠍꠣꠢꠣꠛꠤ ꠅꠇꠟꠞꠦ ꠢꠤꠞꠛꠣꠞ ꠖꠦꠈꠣ ꠖꠤꠟꠣ। ꠊꠐꠘꠣ ꠅꠃ ꠟꠣꠈꠣꠘ ꠅꠁꠟ।
JOH 21:2 ꠍꠣꠁꠝꠘ-ꠙꠤꠔꠞ, ꠕꠥꠝꠣꠍ ꠎꠣꠞꠦ ꠎꠝꠎ ꠇꠅꠀ ꠅꠁꠔ, ꠀꠞ ꠉꠣꠟꠤꠟ ꠎꠤꠟꠣꠞ ꠇꠣꠘ꠆ꠘꠣ ꠉꠣꠃꠞ ꠘꠕꠘꠦꠟ, ꠎꠤꠛꠥꠖꠤꠀꠞ ꠙꠥꠀꠂꠘ ꠡꠢ ꠀꠞꠅ ꠖꠥꠁꠎꠘ ꠍꠣꠢꠣꠛꠤ ꠄꠇꠟꠉꠦ ꠀꠍꠟꠣ।
JOH 21:3 ꠍꠣꠢꠣꠛꠤ ꠍꠣꠁꠝꠘ-ꠙꠤꠔꠞꠦ ꠟꠉꠞ ꠄꠞꠣꠞꠦ ꠇꠁꠟꠣ, “ꠀꠝꠤ ꠝꠣꠍ ꠝꠣꠞꠣꠔ ꠎꠣꠁꠀꠞꠉꠤ।” ꠔꠣꠞꠣ ꠇꠁꠟꠣ, “ꠀꠝꠞꠣꠅ ꠔꠥꠝꠣꠞ ꠟꠉꠦ ꠎꠣꠁꠝꠥ।” ꠔꠦꠃ ꠔꠣꠞꠣ ꠘꠣꠅ ꠟꠁꠀ ꠝꠣꠍ ꠝꠣꠞꠣꠔ ꠛꠣꠞ ꠅꠁꠟꠣ, ꠅꠁꠟꠦ ꠁ ꠞꠣꠁꠔ ꠇꠥꠘꠥ ꠝꠣꠍ ꠙꠣꠁꠟꠣ ꠘꠣ।
JOH 21:4 ꠚꠎꠞ ꠅꠇ꠆ꠔꠅ ꠁꠍꠣ ꠀꠁꠀ ꠀꠅꠞꠞ ꠙꠣꠞꠅ ꠃꠛꠣꠁꠟꠣ। ꠅꠁꠟꠦ ꠔꠣꠁꠘꠃ ꠎꠦ ꠁꠍꠣ, ꠄꠞꠣ ꠁꠈꠣꠘ ꠛꠥꠎꠟꠣ ꠘꠣ।
JOH 21:5 ꠔꠣꠁꠘ ꠍꠣꠢꠣꠛꠤ ꠅꠇꠟꠞꠦ ꠇꠁꠟꠣ, “ꠅ ꠛꠦꠐꠣꠁꠘ, ꠔꠥꠝꠞꠣ ꠇꠥꠘꠥ ꠝꠣꠍ ꠙꠣꠁꠍ ꠘꠣ ꠘꠤ?” ꠔꠣꠞꠣ ꠇꠁꠟꠣ, “ꠎꠤ ꠘꠣ, ꠙꠣꠁꠍꠤ ꠘꠣ।”
JOH 21:6 ꠁꠍꠣꠄ ꠔꠣꠞꠣꠞꠦ ꠇꠁꠟꠣ, “ꠔꠦ ꠘꠣꠅꠞ ꠒꠣꠁꠘ ꠉꠣꠟꠣꠛꠣꠄ ꠎꠣꠟ ꠚꠣꠟꠣꠅ, ꠔꠦꠃ ꠙꠣꠁꠛꠣꠄꠘꠦ।” ꠔꠣꠘ ꠇꠕꠣꠝꠔ ꠔꠣꠞꠣ ꠎꠣꠟ ꠚꠣꠟꠣꠁꠟꠣ ꠀꠞ ꠎꠣꠟꠅ ꠅꠔ ꠝꠣꠍ ꠢꠣꠝꠣꠁꠟꠣ, ꠁꠈꠣꠘ ꠐꠣꠘꠤꠀ ꠔꠥꠟꠔꠣ ꠙꠣꠞꠟꠣ ꠘꠣ।
JOH 21:7 ꠎꠦ ꠍꠣꠢꠣꠛꠤꠞꠦ ꠁꠍꠣꠄ ꠝꠣꠄꠀ ꠇꠞꠔꠣ, ꠔꠣꠁꠘ ꠙꠤꠔꠞꠞꠦ ꠇꠁꠟꠣ, “ꠄꠁꠘ ꠔ ꠝꠣꠟꠤꠇ।” ꠁ ꠡꠝꠄ ꠍꠣꠁꠝꠘ-ꠙꠤꠔꠞꠞ ꠉꠔꠞꠅ ꠇꠣꠙꠠ ꠀꠍꠤꠟ ꠘꠣ। “ꠄꠁꠘ ꠔ ꠝꠣꠟꠤꠇ” ꠅꠈꠣꠘ ꠢꠥꠘꠤꠀꠃ ꠔꠣꠁꠘ ꠇꠣꠙꠠ ꠚꠤꠘ꠆ꠖꠤꠀ ꠚꠣꠟꠖꠤ ꠙꠣꠘꠤꠔ ꠙꠠꠟꠣ।
JOH 21:8 ꠅꠁꠟꠦ ꠛꠣꠇꠤ ꠍꠣꠢꠣꠛꠤ ꠅꠇꠟꠦ ꠝꠣꠍꠦ ꠜꠞꠣ ꠎꠣꠟꠈꠣꠘ ꠐꠣꠘꠤ ꠐꠣꠘꠤ ꠘꠣꠅ ꠟꠁꠀ ꠙꠣꠞꠅ ꠀꠎꠤꠟꠣ। ꠇꠣꠞꠘ ꠔꠣꠞꠣ ꠙꠣꠞ ꠕꠣꠇꠤ ꠛꠦꠡꠤ ꠖꠥꠞꠁ ꠘꠣꠄ, ꠅꠘꠥꠝꠣꠘ ꠖꠥꠁ-ꠡ ꠀꠔ ꠖꠥꠞꠁ ꠀꠍꠟꠣ।
JOH 21:9 ꠔꠣꠞꠣ ꠙꠣꠞꠅ ꠃꠑꠤꠀ ꠖꠦꠈꠟꠣ ꠀꠋꠞꠣꠞ ꠀꠉꠥꠁꠘ, ꠅꠃ ꠀꠉꠥꠁꠘꠞ ꠃꠙꠞꠦ ꠝꠣꠍ ꠀꠞ ꠞꠥꠐꠤ।
JOH 21:10 ꠁꠍꠣꠄ ꠔꠣꠞꠣꠞꠦ ꠇꠁꠟꠣ, “ꠅꠈꠘ ꠎꠦꠔꠣ ꠝꠣꠍ ꠝꠣꠞꠍ, ꠅꠘ ꠕꠘꠦ ꠇꠄꠐꠣ ꠀꠘꠅ।”
JOH 21:11 ꠍꠣꠁꠝꠘ-ꠙꠤꠔꠞꠦ ꠘꠣꠅ ꠕꠣꠇꠤ ꠎꠣꠟꠈꠣꠘ ꠙꠣꠞꠅ ꠐꠣꠘꠤꠀ ꠔꠥꠟꠟꠣ। ꠎꠣꠟꠞ ꠜꠤꠔꠞꠦ ꠄꠇ-ꠡ ꠔꠦꠙ꠆ꠙꠣꠘ꠆ꠘꠐꠣ ꠛꠠ ꠝꠣꠍ ꠀꠍꠤꠟ, ꠔꠦꠛꠃ ꠎꠣꠟ ꠚꠣꠠꠟ ꠘꠣ।
JOH 21:12 ꠁꠍꠣꠄ ꠔꠣꠞꠣꠞꠦ ꠇꠁꠟꠣ, “ꠀꠅ, ꠈꠣꠅ ꠀꠁꠀ।” ꠅꠁꠟꠦ ꠇꠥꠘꠥ ꠍꠣꠢꠣꠛꠤꠄ ꠎꠤꠇꠣꠘꠤꠞ ꠡꠣꠅꠡ ꠅꠁꠟ ꠘꠣ “ꠀꠙꠘꠦ ꠇꠦ?” ꠇꠣꠞꠘ ꠔꠣꠞꠣ ꠎꠣꠘꠔꠣ, ꠔꠣꠁꠘꠃ ꠝꠣꠟꠤꠇ।
JOH 21:13 ꠛꠣꠖꠦ ꠔꠣꠁꠘ ꠀꠁꠀ ꠔꠣꠞꠣꠞꠦ ꠞꠥꠐꠤ ꠈꠣꠁꠔꠦ ꠖꠤꠟꠣ, ꠅꠃꠟꠣ ꠛꠤꠞꠣꠘ ꠝꠣꠍꠅ ꠖꠤꠟꠣ।
JOH 21:14 ꠝꠥꠞ꠆ꠖꠣ ꠕꠣꠇꠤ ꠎꠤꠘ꠆ꠖꠣ ꠅꠀꠞ ꠛꠣꠖꠦ, ꠅꠃ ꠔꠤꠘ ꠘꠝ꠆ꠛꠞ ꠛꠣꠞ ꠔꠣꠁꠘ ꠍꠣꠢꠣꠛꠤ ꠅꠇꠟꠞꠦ ꠖꠦꠈꠣ ꠖꠤꠟꠣ।
JOH 21:15 ꠔꠣꠞꠣꠞ ꠈꠣꠅꠀ-ꠖꠣꠅꠀꠞ ꠛꠣꠖꠦ ꠁꠍꠣꠄ ꠍꠣꠁꠝꠘ-ꠙꠤꠔꠞꠞꠦ ꠎꠤꠇꠣꠁꠟꠣ, “ꠅ ꠍꠣꠁꠝꠘ ꠛꠤꠘ ꠁꠃꠢꠣꠘ꠆ꠘꠣ, ꠄꠞꠣ ꠎꠦꠟꠣ ꠀꠝꠣꠞꠦ ꠝꠣꠄꠀ ꠇꠞꠂꠘ, ꠔꠥꠝꠤ ꠀꠝꠣꠞꠦ ꠄꠞ ꠕꠣꠇꠤ ꠛꠦꠡꠤ ꠝꠣꠄꠀ ꠇꠞꠅ ꠘꠤ?” ꠔꠣꠁꠘ ꠇꠁꠟꠣ, “ꠎꠤꠅꠄ ꠝꠣꠟꠤꠇ, ꠀꠙꠘꠦ ꠔ ꠎꠣꠘꠂꠘ, ꠀꠝꠤ ꠀꠙꠘꠣꠞꠦ ꠇꠔ ꠝꠣꠄꠀ ꠇꠞꠤ।” ꠔꠦꠃ ꠁꠍꠣꠄ ꠇꠁꠟꠣ, “ꠔꠦ ꠀꠝꠣꠞ ꠝꠦꠠꠣ-ꠛꠣꠁꠌ꠆ꠌꠣꠞ ꠞꠣꠈꠣꠟꠤ ꠇꠞꠅ।”
JOH 21:16 ꠁꠍꠣꠄ ꠢꠤꠞꠛꠣꠞ ꠔꠣꠘꠞꠦ ꠎꠤꠇꠣꠁꠟꠣ, “ꠍꠣꠁꠝꠘ ꠛꠤꠘ ꠁꠃꠢꠣꠘ꠆ꠘꠣ, ꠔꠥꠝꠤ ꠀꠝꠣꠞꠦ ꠝꠣꠄꠀ ꠇꠞ ꠘꠤ?” ꠙꠤꠔꠞꠦ ꠇꠁꠟꠣ, “ꠎꠤꠅꠄ ꠝꠣꠟꠤꠇ, ꠀꠙꠘꠦ ꠔ ꠎꠣꠘꠂꠘ, ꠀꠝꠤ ꠀꠙꠘꠣꠞꠦ ꠇꠔ ꠝꠣꠄꠀ ꠇꠞꠤ।” ꠁꠍꠣꠄ ꠇꠁꠟꠣ, “ꠔꠦ ꠀꠝꠣꠞ ꠝꠦꠠꠣꠞ ꠙꠣꠟ ꠖꠦꠈꠣ-ꠢꠥꠘꠣ ꠇꠞꠅ।”
JOH 21:17 ꠛꠣꠖꠦ ꠔꠣꠁꠘ ꠔꠤꠍꠞꠣ ꠛꠣꠞ ꠎꠤꠇꠣꠁꠟꠣ, “ꠅ ꠍꠣꠁꠝꠘ ꠛꠤꠘ ꠁꠃꠢꠣꠘ꠆ꠘꠣ, ꠢꠣꠍꠣꠃ ꠀꠝꠤ ꠔꠥꠝꠣꠞ ꠝꠣꠄꠀꠞ ꠝꠣꠘꠥꠡ ꠘꠤ?” ꠁꠍꠣꠄ ꠔꠤꠍꠞꠣ ꠛꠣꠞ ꠎꠤꠇꠣꠘꠤꠄ ꠙꠤꠔꠞ ꠝꠘꠦ ꠝꠘꠦ ꠇꠤꠍꠥ ꠖꠥꠈꠤꠔ ꠅꠁꠀ ꠇꠁꠟꠣ, “ꠝꠣꠟꠤꠇ, ꠀꠙꠘꠦ ꠔ ꠢꠇꠟꠔꠣꠃ ꠎꠣꠘꠂꠘ, ꠀꠙꠘꠦ ꠎꠣꠘꠂꠘꠃ ꠀꠙꠘꠦ ꠀꠝꠣꠞ ꠈꠥꠛ ꠝꠣꠄꠀꠞ ꠎꠘ।” ꠔꠦꠃ ꠁꠍꠣꠄ ꠇꠁꠟꠣ, “ꠔꠦ ꠀꠝꠣꠞ ꠝꠦꠠꠣ ꠙꠣꠟꠞ ꠞꠣꠈꠣꠟꠤ ꠇꠞꠅ।
JOH 21:18 ꠀꠝꠤ ꠔꠥꠝꠣꠞꠦ ꠢꠣꠍꠣꠃ ꠇꠁꠞꠣꠝ, ꠔꠥꠝꠣꠞ ꠎꠥꠀꠘꠇꠤꠞ ꠡꠝꠄ ꠔꠥꠝꠤ ꠘꠤꠎꠦꠃ ꠔꠥꠝꠣꠞ ꠇꠝꠞ ꠛꠣꠘ꠆ꠖꠤꠀ ꠎꠦꠘꠅ ꠈꠥꠡꠤ ꠅꠘꠅ ꠎꠣꠁꠔꠣꠄ। ꠅꠁꠟꠦ ꠛꠥꠠꠣꠇꠤꠞ ꠡꠝꠄ ꠔꠥꠝꠣꠞ ꠀꠔ ꠛꠣꠠꠣꠁ ꠖꠤꠛꠣꠄ, ꠀꠞ ꠅꠁꠘ꠆ꠘ ꠎꠘꠦ ꠔꠥꠝꠣꠞꠦ ꠛꠣꠘ꠆ꠖꠤꠀ, ꠔꠥꠝꠤ ꠎꠦꠘꠅ ꠎꠣꠁꠔꠣꠄ ꠌꠣꠅ ꠘꠣ, ꠢꠘꠅ ꠟꠁꠀ ꠎꠣꠁꠛ।”
JOH 21:19 ꠀꠟ꠆ꠟꠣꠞ ꠉꠃꠞꠛ ꠎꠣꠁꠞ ꠅꠀꠞ ꠟꠣꠉꠤ ꠙꠤꠔꠞꠞ ꠝꠃꠔ ꠇꠤꠟꠣꠘ ꠅꠁꠛ, ꠅꠈꠣꠘ ꠛꠥꠎꠣꠘꠤꠔ ꠉꠤꠀ ꠁꠍꠣꠄ ꠅꠃ ꠇꠕꠣ ꠇꠁꠟꠣ। ꠛꠣꠖꠦ ꠔꠣꠁꠘ ꠙꠤꠔꠞꠞꠦ ꠇꠁꠟꠣ, “ꠀꠅ, ꠀꠝꠣꠞ ꠟꠉꠦ ꠕꠣꠇꠅ।”
JOH 21:20 ꠅꠃ ꠡꠝꠄ ꠙꠤꠔꠞꠦ ꠈꠞꠦꠖꠤ ꠌꠣꠁꠀ ꠖꠦꠈꠟꠣ, ꠁꠍꠣꠞ ꠢꠃ ꠝꠣꠄꠀꠞ ꠍꠣꠢꠣꠛꠤ ꠈꠞꠦ ꠈꠞꠦ ꠀꠁꠞꠣ। ꠅꠃ ꠍꠣꠢꠣꠛꠤꠄ ꠇꠄꠖꠤꠘ ꠀꠉꠦ ꠈꠣꠘꠤꠔ ꠛꠁꠀ ꠁꠍꠣꠞ ꠛꠣꠄ ꠎꠥꠇꠤꠀ ꠇꠁꠍꠟꠣ, “ꠢꠥꠎꠥꠞ, ꠀꠙꠘꠣꠞꠦ ꠖꠥꠡꠝꠘꠞ ꠀꠔꠅ ꠎꠦ ꠗꠞꠣꠁ ꠖꠤꠛ, ꠢꠦ ꠇꠦ?”
JOH 21:21 ꠙꠤꠔꠞꠦ ꠄꠘꠞꠦ ꠖꠦꠈꠤꠀ ꠁꠍꠣꠞꠦ ꠇꠁꠟꠣ, “ꠢꠥꠎꠥꠞ, ꠄꠘ ꠇꠤꠔꠣ ꠅꠁꠛ?”
JOH 21:22 ꠁꠍꠣꠄ ꠙꠤꠔꠞꠞꠦ ꠇꠁꠟꠣ, “ꠀꠝꠤ ꠎꠥꠖꠤ ꠌꠣꠁ, ꠀꠝꠤ ꠖꠥꠍꠞꠣꠛꠣꠞ ꠖꠥꠘꠤꠀꠔ ꠘꠣ ꠀꠅꠀ ꠙꠞ꠆ꠎꠘ꠆ꠔ ꠢꠦ ꠅꠘꠅ ꠞꠃꠇ, ꠔꠦ ꠔꠥꠝꠣꠞ ꠇꠤꠔꠣ? ꠔꠥꠝꠤ ꠀꠝꠣꠞ ꠟꠉꠦ ꠕꠣꠇꠅ।”
JOH 21:23 ꠄꠞꠟꠣꠉꠤ ꠃꠝ꠆ꠝꠔ ꠅꠇꠟꠞ ꠝꠣꠎꠦ ꠈꠛꠞ ꠞꠐꠤ ꠉꠦꠟ, ꠅꠃ ꠍꠣꠢꠣꠛꠤ ꠝꠞꠔꠣ ꠘꠣꠄ। ꠅꠁꠟꠦ ꠁꠍꠣꠄ ꠙꠤꠔꠞꠞꠦ ꠁꠈꠣꠘ ꠇꠁꠍꠂꠘ ꠘꠣ। ꠛꠞꠋ ꠔꠣꠁꠘ ꠇꠁꠍꠟꠣ, “ꠀꠝꠤ ꠎꠥꠖꠤ ꠌꠣꠁ, ꠀꠝꠤ ꠢꠤꠞꠛꠣꠞ ꠔꠡꠞꠤꠚ ꠘꠣ ꠀꠘꠣ ꠙꠞ꠆ꠎꠘ꠆ꠔ ꠢꠦ ꠅꠘꠅ ꠕꠣꠇꠃꠇ, ꠔꠦ ꠔꠥꠝꠣꠞ ꠇꠤꠔꠣ?”
JOH 21:24 ꠅꠃ ꠍꠣꠢꠣꠛꠤꠄ ꠁꠔꠣ ꠢꠇꠟ ꠛꠦꠙꠣꠞꠦ ꠡꠣꠇ꠆ꠇꠤ ꠖꠤꠍꠂꠘ ꠀꠞ ꠟꠦꠈꠍꠂꠘ। ꠀꠝꠞꠣ ꠎꠣꠘꠤ, ꠔꠣꠘ ꠡꠣꠇ꠆ꠇꠤ ꠢꠣꠍꠣ।
JOH 21:25 ꠢꠎꠞꠔ ꠁꠍꠣꠄ ꠀꠞꠅ ꠛꠃꠔ ꠇꠣꠝ ꠇꠞꠍꠂꠘ। ꠁꠔꠣ ꠎꠥꠖꠤ ꠄꠇ ꠄꠇ ꠇꠞꠤ ꠟꠦꠈꠣ ꠅꠁꠔ, ꠔꠦ ꠅꠔ ꠇꠤꠔꠣꠛ ꠅꠁꠔ, ꠁꠔꠣ ꠀꠡ꠆ꠔꠣ ꠖꠥꠘꠤꠀꠁꠄ ꠗꠞꠟ ꠘꠣ ꠅꠘꠦ॥
ACT 1:1 ꠝꠢꠣꠝꠣꠁꠘ꠆ꠘ ꠕꠤꠅꠚꠤꠟꠣꠍ, ꠢꠎꠞꠔ ꠁꠍꠣꠞꠦ ꠛꠦꠢꠦꠡ꠆ꠔꠅ ꠔꠥꠟꠤꠀ ꠘꠦꠅꠀꠞ ꠀꠉ ꠙꠞ꠆ꠎꠘ꠆ꠔ ꠔꠣꠁꠘ ꠎꠦꠔꠣ ꠔꠣꠟꠤꠝ ꠖꠤꠍꠂꠘ ꠀꠞ ꠎꠦꠔꠣ ꠎꠦꠔꠣ ꠇꠞꠍꠂꠘ ꠁ ꠢꠇꠟꠔꠣꠃ ꠀꠝꠤ ꠀꠉꠞ ꠇꠤꠔꠣꠛꠅ ꠟꠦꠈꠍꠤ।
ACT 1:2 ꠎꠦ ꠍꠣꠢꠣꠛꠤ ꠅꠇꠟꠞꠦ ꠔꠣꠁꠘ ꠛꠣꠍꠤꠀ ꠟꠁꠍꠟꠣ, ꠔꠣꠘꠞꠦ ꠔꠥꠟꠤꠀ ꠘꠦꠅꠀꠞ ꠀꠉꠦ ꠙꠣꠇ ꠞꠥꠢꠥ ꠖꠤꠀ ꠄꠞꠣꠞ ꠉꠦꠍꠦ ꠅꠍꠤꠅꠔ ꠇꠞꠣꠁ ꠉꠦꠍꠂꠘ।
ACT 1:3 ꠔꠣꠘ ꠔꠇꠟꠤꠚ ꠇꠣꠁꠝꠞ ꠛꠣꠖꠦ ꠔꠣꠁꠘ ꠎꠦꠘ ꠎꠤꠘ꠆ꠖꠣ ꠀꠍꠂꠘ ꠁꠐꠣꠞ ꠛꠃꠔ ꠇꠤꠍꠤꠝꠞ ꠀꠟꠣꠝꠔ ꠖꠦꠈꠣꠁꠍꠂꠘ। ꠌꠣꠟ꠆ꠟꠤꠡ ꠖꠤꠘ ꠗꠞꠤ ꠔꠣꠁꠘ ꠍꠣꠢꠣꠛꠤ ꠅꠇꠟꠞꠦ ꠖꠦꠈꠣ ꠖꠤꠀ ꠀꠟ꠆ꠟꠣꠞ ꠛꠣꠖꠡꠣꠁꠞ ꠛꠤꠡꠄꠄ ꠛꠣꠔꠌꠤꠔ ꠇꠞꠍꠂꠘ।
ACT 1:4 ꠁꠍꠣꠄ ꠔꠣꠞꠣ ꠢꠇ꠆ꠇꠟꠞ ꠟꠉꠦ ꠄꠇꠈꠣꠘꠅ ꠡꠞꠤꠇ ꠅꠁꠀ ꠅꠃ ꠢꠥꠇꠥꠝ ꠖꠤꠟꠣ, “ꠔꠥꠝꠞꠣ ꠎꠦꠞꠥꠎꠣꠟꠦꠝ ꠕꠣꠇꠤ ꠎꠣꠁꠅ ꠘꠣ, ꠀꠝꠣꠞ ꠉꠣꠁꠛꠤ ꠛꠣꠚꠞ ꠅꠀꠖꠣ ꠇꠞꠣ ꠎꠦ ꠖꠣꠘꠞ ꠇꠕꠣ ꠔꠥꠝꠞꠣ ꠀꠉꠦ ꠀꠝꠣꠞ ꠉꠦꠍꠦ ꠢꠥꠘꠍ, ꠄꠞꠟꠣꠉꠤ ꠅꠘꠅ ꠛꠣꠞ ꠌꠣꠅ।
ACT 1:5 ꠢꠎꠞꠔ ꠄꠢꠤꠀꠄ ꠔ ꠙꠣꠘꠤꠞ ꠝꠣꠎꠦ ꠔꠃꠛꠣꠞ ꠉꠥꠍꠟ ꠇꠞꠣꠁꠔꠣ, ꠅꠁꠟꠦ ꠛꠦꠡ ꠖꠦꠞꠤ ꠅꠁꠔ ꠘꠣꠄ ꠀꠟ꠆ꠟꠣꠄ ꠔꠥꠝꠞꠣꠞꠦ ꠙꠣꠇ ꠞꠥꠢꠥ ꠖꠤꠀ ꠉꠥꠍꠟ ꠇꠞꠣꠁꠛꠣ।”
ACT 1:6 ꠔꠣꠞꠣ ꠢꠇ꠆ꠇꠟ ꠄꠇꠈꠣꠘꠅ ꠖꠟꠣ ꠅꠁꠀ ꠁꠍꠣꠞꠦ ꠎꠤꠇꠣꠁꠟꠣ, “ꠢꠥꠎꠥꠞ, ꠁ ꠡꠝꠄ ꠇꠤꠔꠣ ꠛꠘꠤ ꠁꠍꠞꠣꠁꠟ ꠅꠇꠟꠞ ꠀꠔꠅ ꠞꠣꠁꠎ꠆ꠎ ꠚꠤꠞꠔ ꠀꠘꠛꠣ ꠘꠤ?”
ACT 1:7 ꠁꠍꠣꠄ ꠎꠥꠀꠙ ꠖꠤꠟꠣ, “ꠎꠦ ꠅꠇ꠆ꠔ ꠛꠣ ꠎꠝꠣꠘꠣ ꠀꠝꠣꠞ ꠉꠣꠁꠛꠤ ꠛꠣꠚꠦ ꠔꠣꠘ ꠘꠤꠎꠞ ꠄꠈꠔꠤꠀꠞꠅ ꠞꠣꠈꠍꠂꠘ, ꠁꠔꠣ ꠔꠥꠝꠞꠣ ꠎꠣꠘꠣꠞ ꠉꠞꠎ ꠘꠣꠁ।
ACT 1:8 ꠅꠁꠟꠦ ꠙꠣꠇ ꠞꠥꠢꠥ ꠔꠥꠝꠞꠣꠞ ꠃꠙꠞꠦ ꠇꠣꠁꠝ ꠅꠁꠀ ꠢꠣꠞꠟꠦ ꠔꠥꠝꠞꠣ ꠉꠣꠁꠛꠤ ꠛꠟ ꠙꠣꠁꠛꠣꠄ, ꠅꠃ ꠛꠟꠦ ꠎꠦꠞꠥꠎꠣꠟꠦꠝ, ꠀꠡ꠆ꠔꠣ ꠄꠢꠥꠖꠤꠀ ꠀꠞ ꠡꠝꠞꠤꠀ ꠄꠟꠣꠇꠣ, ꠀꠞ ꠖꠥꠘꠤꠀꠞ ꠢꠦꠡ ꠡꠤꠝꠣꠘꠣ ꠙꠞ꠆ꠎꠘ꠆ꠔ ꠀꠝꠣꠞ ꠡꠣꠇ꠆ꠇꠤ ꠅꠁꠛꠣꠄ।”
ACT 1:9 ꠅꠃ ꠝꠣꠔꠞ ꠛꠣꠖꠦꠃ ꠍꠣꠢꠣꠛꠤ ꠅꠇꠟꠞ ꠌꠃꠈꠞ ꠍꠣꠝꠘꠦ ꠁꠍꠣꠞꠦ ꠔꠥꠟꠤꠀ ꠘꠦꠅꠀ ꠅꠁꠟ, ꠀꠞ ꠔꠣꠁꠘ ꠝꠦꠊꠞ ꠐꠥꠇꠞꠣꠞ ꠀꠅꠠ ꠅꠁꠉꠦꠟꠣ।
ACT 1:10 ꠁꠍꠣ ꠎꠦꠛꠟꠣ ꠀꠍꠝꠣꠘꠅ ꠃꠑꠤꠞꠣ ꠁ ꠡꠝꠄ ꠍꠣꠢꠣꠛꠤ ꠅꠇꠟꠦ ꠌꠃꠈ ꠘꠣ ꠚꠤꠞꠣꠁꠀ ꠀꠍꠝꠣꠘꠞ ꠛꠣꠄ ꠌꠣꠁꠞꠂꠟꠣ, ꠅꠃ ꠡꠝꠄ ꠗꠟꠣ ꠇꠣꠙꠠ ꠚꠤꠘ꠆ꠖꠣ ꠖꠥꠁꠎꠘ ꠛꠦꠐꠣ ꠝꠣꠘꠥꠡ ꠔꠣꠞꠣꠞ ꠇꠣꠘ꠆ꠖꠣꠔ ꠃꠛꠣꠁꠀ
ACT 1:11 ꠇꠁꠟꠣ, “ꠅ ꠉꠣꠟꠤꠟꠞ ꠝꠣꠘꠥꠡ ꠅꠇꠟ, ꠁꠈꠣꠘꠅ ꠃꠛꠣꠁꠀ ꠀꠍꠝꠣꠘꠞ ꠛꠣꠄ ꠌꠣꠁꠞꠤꠍ ꠇꠦꠘꠦ? ꠎꠣꠞꠦ ꠔꠥꠝꠞꠣꠞ ꠉꠦꠍ ꠕꠣꠇꠤ ꠔꠥꠟꠤꠀ ꠘꠦꠅꠀ ꠅꠁꠟ, ꠅꠃ ꠁꠍꠣꠞꠦ ꠎꠦꠟꠣꠈꠣꠘ ꠔꠥꠝꠞꠣ ꠛꠦꠢꠦꠡ꠆ꠔꠅ ꠎꠣꠁꠔꠦ ꠖꠦꠈꠟꠣꠄ, ꠅꠃ ꠟꠣꠈꠣꠘ ꠔꠣꠁꠘ ꠚꠤꠞꠤꠀꠅ ꠀꠁꠛꠣ।”
ACT 1:12 ꠅꠃ ꠍꠣꠢꠣꠛꠤ ꠅꠇꠟ ꠎꠄꠔꠥꠘ ꠘꠣꠝꠞ ꠙꠣꠠꠅ ꠕꠣꠇꠤ ꠎꠦꠞꠥꠎꠣꠟꠦꠝꠅ ꠚꠤꠞꠤꠀ ꠀꠁꠟꠣ। ꠁ ꠙꠣꠠ ꠎꠦꠞꠥꠎꠣꠟꠦꠝ ꠐꠣꠃꠘ ꠕꠘꠦ ꠕꠥꠠꠣ ꠖꠥꠞꠁ।
ACT 1:13 ꠐꠣꠃꠘꠅ ꠚꠤꠞꠤꠀ ꠔꠣꠞꠣ ꠎꠦ ꠊꠞꠞ ꠃꠙꠞꠞ ꠔꠣꠟꠣꠔ ꠞꠁꠔꠣ ꠢꠃ ꠊꠞꠅ ꠉꠦꠟꠣ। ꠔꠣꠞꠣ ꠅꠁꠟꠣ ꠙꠤꠔꠞ, ꠢꠣꠘ꠆ꠘꠣꠘ, ꠁꠀꠇꠥꠛ, ꠀꠘ꠆ꠖꠞꠤꠀꠍ, ꠚꠤꠟꠤꠚ, ꠕꠥꠝꠣꠍ, ꠛꠞ꠆ꠕꠟꠝꠄ ꠀꠞ ꠝꠕꠤ, ꠀꠟꠚꠤꠞ ꠙꠥꠀ ꠁꠀꠇꠥꠛ, ꠝꠥꠇ꠆ꠔꠤꠎꠥꠖ꠆ꠖꠣ ꠍꠣꠁꠝꠘ, ꠀꠞ ꠁꠀꠇꠥꠛꠞ ꠙꠥꠀ ꠁꠢꠥꠖꠣ।
ACT 1:14 ꠊꠞꠅ ꠢꠣꠝꠣꠁꠀ ꠢꠇꠟꠦ ꠝꠤꠟꠤꠀ ꠈꠣꠍ ꠖꠤꠟꠦ ꠖꠥꠀ ꠇꠞꠣꠔ ꠞꠁꠟꠣ, ꠄꠞꠣꠞ ꠟꠉꠦ ꠀꠍꠟꠣ ꠁꠝꠣꠘꠖꠣꠞ ꠛꠦꠐꠤꠘ, ꠁꠍꠣꠞ ꠝꠣ ꠝꠞꠤꠅꠝ ꠀꠞ ꠔꠣꠘ ꠜꠣꠁꠀꠁꠘ।
ACT 1:15 ꠢꠃ ꠡꠝꠄ ꠄꠇꠖꠤꠘ ꠙꠤꠔꠞꠦ ꠅꠘꠥꠝꠣꠘ ꠄꠇ-ꠡ ꠛꠤꠡꠎꠘ ꠝꠥꠝꠤꠘ ꠅꠇꠟꠞ ꠝꠣꠎꠦ ꠃꠛꠣꠁꠀ ꠇꠁꠟꠣ,
ACT 1:16 “ꠜꠣꠁ ꠅꠇꠟ, ꠁꠍꠣꠞꠦ ꠎꠦꠞꠣ ꠗꠞꠣꠔ ꠀꠁꠍꠤꠟ ꠔꠣꠞꠣꠞꠦ ꠙꠕ ꠌꠤꠘꠣꠁꠀ ꠘꠤꠍꠤꠟ ꠁꠢꠥꠖꠣ, ꠔꠣꠞ ꠛꠦꠙꠣꠞꠦ ꠛꠃꠔ ꠀꠉꠦ ꠖꠣꠃꠖ ꠘꠛꠤꠞ ꠝꠥꠈꠅ ꠙꠣꠇ ꠞꠥꠢꠦ ꠎꠦꠔꠣ ꠇꠁꠍꠟꠣ, ꠙꠣꠇ ꠇꠣꠟꠣꠝꠞ ꠁ ꠇꠕꠣ ꠙꠥꠞꠣ ꠅꠀꠞ ꠖꠞꠇꠣꠞ ꠀꠍꠤꠟ।
ACT 1:17 ꠢꠦ ꠔ ꠀꠝꠞꠣꠞꠃ ꠄꠇꠎꠘ ꠀꠍꠤꠟ, ꠀꠞ ꠀꠝꠞꠣꠞ ꠟꠉꠦ ꠔꠞꠤꠇꠣꠞ ꠈꠦꠎꠝꠔꠞ ꠟꠣꠉꠤ ꠔꠣꠞꠦꠅ ꠍꠣꠢꠣꠛꠤ ꠢꠤꠡꠣꠛꠦ ꠙꠍꠘ꠆ꠖ ꠇꠞꠣ ꠅꠁꠍꠤꠟ।”
ACT 1:18 ꠅꠃ ꠘꠣꠙꠣꠇꠤ ꠇꠣꠝꠞ ꠐꠦꠇꠣ ꠖꠤꠀ ꠢꠦ ꠄꠇꠎꠞꠣ ꠎꠝꠤ ꠟꠁꠍꠤꠟ, ꠀꠞ ꠅꠃ ꠎꠝꠤꠘꠅ ꠃꠚꠁꠔ ꠅꠁꠀ ꠙꠠꠤꠀ ꠔꠣꠞ ꠙꠦꠐ ꠚꠣꠐꠤꠀ ꠀꠔ-ꠜꠠ ꠛꠣꠞ ꠅꠁꠟ।
ACT 1:19 ꠎꠦꠞꠥꠎꠣꠟꠦꠝꠞ ꠢꠇꠟ ꠝꠣꠘꠡꠦ ꠁꠔꠣ ꠢꠥꠘꠍꠤꠟ, ꠄꠞꠟꠣꠉꠤ ꠢꠇꠟꠦ ꠅꠃ ꠎꠝꠤꠘꠞꠦ ꠒꠣꠇꠂꠘ ꠀꠇꠦꠟꠖꠣꠝꠣ ꠛꠣ ꠟꠃꠞ ꠎꠝꠤꠘ। ꠙꠤꠔꠞꠦ ꠀꠞꠅ ꠇꠁꠟꠣ,
ACT 1:20 “ꠅꠃ ꠇꠕꠣ ꠙꠛꠤꠔ꠆ꠞ ꠎꠛꠥꠞ ꠡꠞꠤꠚꠅ ꠀꠍꠦ: ꠔꠣꠞ ꠛꠡꠔ ꠈꠣꠘꠣ ꠈꠣꠟꠤ ꠞꠃꠇ, ꠢꠘꠅ ꠞꠅꠀꠞ ꠇꠦꠃ ꠘꠣ ꠕꠣꠇꠃꠇ। ꠔꠣꠞ ꠉꠖꠤ ꠀꠞꠇ ꠎꠘꠦ ꠙꠣꠃꠇ।
ACT 1:21 ꠄꠞꠟꠣꠉꠤ ꠄꠢꠤꠀꠄ ꠎꠦꠛꠟꠣ ꠔꠃꠛꠣꠞ ꠉꠥꠍꠟ ꠇꠞꠣꠁꠔꠣ ꠢꠃ ꠡꠝꠄ ꠕꠣꠇꠤ, ꠁꠍꠣꠞꠦ ꠀꠝꠞꠣꠞ ꠉꠦꠍ ꠕꠘꠦ ꠔꠥꠟꠤꠀ ꠘꠦꠅꠀꠞ ꠀꠉ ꠙꠞ꠆ꠎꠘ꠆ꠔ, ꠎꠔꠖꠤꠘ ꠁꠍꠣ ꠀꠝꠞꠣꠞ ꠟꠉꠦ ꠌꠟꠣ-ꠚꠤꠞꠣ ꠇꠞꠍꠤꠟꠣ, ꠅꠔꠖꠤꠘ ꠎꠦꠞꠣ ꠀꠝꠞꠣꠞ ꠖꠟꠅ ꠀꠍꠤꠟ, ꠄꠞꠣꠞ ꠝꠣꠎ ꠕꠘꠦ ꠁꠍꠣ ꠎꠦꠘ ꠝꠥꠞ꠆ꠖꠣ ꠕꠣꠇꠤ ꠎꠤꠘ꠆ꠖꠣ ꠅꠁꠀ ꠃꠑꠍꠂꠘ, ꠄꠞ ꠡꠣꠇ꠆ꠇꠤ ꠢꠤꠡꠣꠛꠦ ꠅꠁꠘ꠆ꠘ ꠀꠞꠇ ꠎꠘꠞꠦ ꠀꠝꠞꠣ ꠍꠣꠢꠣꠛꠤ ꠅꠇꠟꠞ ꠖꠟꠅ ꠢꠣꠞꠣꠘꠤ ꠟꠣꠉꠛ।”
ACT 1:23 ꠔꠦꠃ ꠔꠣꠞꠣ ꠅꠃ ꠖꠥꠁꠎꠘꠞꠦ ꠃꠛꠣ ꠇꠞꠣꠁꠟꠣ, ꠁꠃꠍꠥꠚ ꠛꠣꠞ꠆ꠡꠣꠛ꠆ꠛꠣ, ꠔꠣꠘ ꠀꠞꠇ ꠘꠣꠝ ꠁꠃꠍꠔꠥꠍ; ꠀꠞ ꠝꠣꠔꠤꠀꠍ।
ACT 1:24 ꠛꠣꠖꠦ ꠔꠣꠞꠣ ꠖꠥꠀ ꠇꠞꠟꠣ, “ꠅ ꠝꠣꠛꠥꠖ, ꠔꠥꠝꠤ ꠢꠇꠟꠞ ꠖꠤꠟꠞ ꠈꠛꠞ ꠎꠣꠘ, ꠁꠢꠥꠖꠣꠄ ꠔ ꠔꠣꠞ ꠘꠤꠎꠞ ꠎꠣꠉꠣꠔ ꠎꠣꠅꠀꠞ ꠟꠣꠉꠤ ꠈꠦꠎꠝꠔ ꠀꠞ ꠍꠣꠢꠣꠛꠤ ꠙꠖꠞ ꠇꠣꠝ ꠛꠣꠖ ꠖꠤꠟꠣꠁꠍꠦ, ꠁꠢꠥꠖꠣꠞ ꠛꠖꠟꠣ ꠁ ꠖꠥꠁꠎꠘꠞ ꠝꠣꠎꠦ ꠔꠥꠝꠤ ꠇꠣꠞꠦ ꠙꠍꠘ꠆ꠖ ꠇꠞꠅ ꠀꠝꠞꠣꠞꠦ ꠌꠤꠘꠣꠁꠀ ꠖꠦꠅ।”
ACT 1:26 ꠢꠦꠡꠦ ꠔꠣꠞꠣ ꠖꠥꠁꠎꠘꠞ ꠘꠣꠝꠦ ꠟꠐꠣꠞꠤ ꠝꠣꠞꠟꠦ ꠝꠣꠔꠤꠀꠍꠞ ꠘꠣꠝ ꠃꠑꠟ; ꠔꠦꠃ ꠝꠣꠔꠤꠀꠍ ꠅꠃ ꠄꠉꠣꠞꠅ ꠎꠘ ꠍꠣꠢꠣꠛꠤꠞ ꠟꠉꠦ ꠎꠥꠉ ꠅꠁꠟꠣ।
ACT 2:1 ꠙꠘ꠆ꠌꠣꠁꠡꠣ ꠁꠖꠞ ꠖꠤꠘ ꠔꠣꠞꠣ ꠢꠇꠟ ꠄꠇ ꠎꠣꠉꠣꠔ ꠖꠟꠣ ꠀꠍꠟꠣ।
ACT 2:2 ꠅꠃ ꠡꠝꠄ ꠀꠍꠝꠣꠘ ꠕꠣꠇꠤ ꠔꠥꠚꠣꠘꠞ ꠟꠣꠈꠣꠘ ꠄꠇ ꠀꠅꠀꠎ ꠅꠁꠟ, ꠔꠣꠞꠣ ꠎꠦ ꠊꠞꠅ ꠛꠅꠀꠔ ꠀꠍꠟꠣ ꠁ ꠀꠅꠀꠎꠦ ꠀꠡ꠆ꠔꠣ ꠊꠞ ꠜꠞꠤꠉꠦꠟ।
ACT 2:3 ꠔꠣꠞꠣ ꠖꠦꠈꠟꠣ, ꠀꠉꠥꠁꠘꠞ ꠟꠥꠇ꠆ꠇꠣꠞ ꠟꠣꠈꠣꠘ ꠇꠤꠔꠣꠞ ꠐꠥꠇꠞꠣꠁꠘ ꠀꠁꠍꠦ, ꠀꠞ ꠁ ꠟꠥꠇ꠆ꠇꠣꠁꠘ ꠔꠣꠞꠣ ꠢꠇꠟꠞ ꠃꠙꠞꠦ ꠀꠁꠀ ꠛꠁꠟ।
ACT 2:4 ꠔꠦꠃ ꠔꠣꠞꠣ ꠢꠇꠟꠦ ꠙꠣꠇ ꠞꠥꠢꠦ ꠇꠣꠝꠤꠟ ꠅꠁꠟꠣ, ꠀꠞ ꠞꠥꠢꠥꠞ ꠉꠣꠁꠛꠤ ꠛꠟꠦ ꠔꠣꠞꠣ ꠀꠟꠉ ꠀꠟꠉ ꠜꠣꠡꠣꠄ ꠝꠣꠔꠔꠣ ꠟꠣꠉꠟꠣ।
ACT 2:5 ꠁ ꠡꠝꠄ ꠖꠥꠘꠤꠀꠞ ꠢꠇ꠆ꠇꠟ ꠖꠦꠡꠞ ꠙꠞꠦꠎꠉꠣꠞ ꠁꠢꠥꠖꠤ ꠅꠇꠟ ꠎꠦꠞꠥꠎꠣꠟꠦꠝꠅ ꠀꠍꠟꠣ।
ACT 2:6 ꠁ ꠀꠅꠀꠎꠞ ꠟꠉꠦ ꠟꠉꠦꠃ ꠔꠣꠞꠣ ꠀꠁꠀ ꠜꠤꠠ ꠇꠞꠤꠟ꠆ꠟꠣ ꠀꠞ ꠛꠦꠀꠈꠟ ꠅꠁꠉꠦꠟꠣ, ꠇꠣꠞꠘ ꠄꠞꠣꠞꠦ ꠎꠣꠞꠎꠤꠞ ꠘꠤꠎꠞ ꠜꠣꠡꠣꠄ ꠝꠣꠔ-ꠇꠕꠣ ꠝꠣꠔꠔꠦ ꠖꠦꠈꠟꠣ।
ACT 2:7 ꠖꠦꠈꠤꠀ ꠔꠣꠞꠣ ꠔꠣꠁꠎ꠆ꠎꠥꠛ ꠅꠁꠀ ꠝꠣꠔꠣ-ꠝꠣꠔꠤ ꠇꠞꠟꠣ, “ꠅꠃ ꠎꠦꠞꠣ ꠝꠣꠔꠞꠣ ꠄꠞꠣ ꠢꠇꠟꠃ ꠇꠤꠔꠣ ꠉꠣꠟꠤꠟꠞ ꠝꠣꠘꠥꠡ ꠘꠣꠄ ꠘꠤ?
ACT 2:8 ꠎꠥꠖꠤ ꠅꠄ ꠔꠦ ꠀꠝꠞꠣ ꠇꠤꠟꠣ ꠎꠣꠞꠎꠤꠞ ꠘꠤꠎꠞ ꠜꠣꠡꠣꠞ ꠛꠥꠟꠤ ꠄꠞꠣꠞ ꠉꠦꠍ ꠕꠣꠇꠤ ꠢꠥꠘꠞꠣꠝ?
ACT 2:9 ꠀꠝꠞꠣ ꠔ ꠙꠣꠞ꠆ꠕꠤꠅ, ꠝꠣꠖꠤꠅ, ꠁꠟꠣꠝꠤꠅ, ꠀꠞ ꠝꠦꠡꠙꠔꠣꠝꠤꠀꠞ ꠛꠣꠡꠤꠘ꠆ꠖꠣ, ꠄꠢꠥꠖꠤꠀ, ꠇꠣꠙ꠆ꠙꠣꠖꠇꠤꠀ, ꠙꠘ꠆ꠔ, ꠀꠍꠤꠀ,
ACT 2:10 ꠚꠞꠥꠉꠤꠀ, ꠙꠣꠝꠚꠥꠟꠤꠀ ꠀꠞ ꠝꠤꠡꠞ ꠖꠦꠡꠞ ꠝꠣꠘꠡꠦꠅ; ꠟꠤꠛꠤꠀꠞ ꠇꠥꠞꠤꠘꠤ ꠄꠟꠣꠇꠣꠞ ꠝꠣꠘꠡꠦ, ꠁꠘꠅ ꠊꠥꠞꠣꠔ ꠀꠁꠍꠂꠘ ꠅꠃꠟꠣ ꠞꠥꠝꠣꠘ ꠅꠇꠟꠦ,
ACT 2:11 ꠎꠦꠞꠣ ꠁꠢꠥꠖꠤ ꠎꠣꠔꠤ ꠛꠣ ꠁꠢꠥꠖꠤ ꠗꠞ꠆ꠝꠞ ꠝꠣꠘꠥꠡ, ꠀꠞ ꠇ꠆ꠞꠤꠔꠤꠅ, ꠀꠞꠛꠤ, ꠀꠝꠞꠣ ꠢꠇꠟꠦꠃ ꠔ ꠎꠣꠞꠎꠤꠞ ꠘꠤꠎꠞ ꠜꠣꠡꠣꠄ ꠀꠟ꠆ꠟꠣꠞ ꠇꠥꠖꠞꠔꠤ ꠇꠣꠝꠞ ꠇꠕꠣ ꠄꠞꠣꠞ ꠝꠥꠈ ꠕꠣꠇꠤ ꠢꠥꠘꠞꠣꠝ!”
ACT 2:12 ꠅꠃ ꠟꠣꠈꠣꠘ ꠔꠣꠞꠣ ꠔꠣꠁꠎ꠆ꠎꠥꠛ ꠀꠞ ꠛꠦꠀꠈꠟ ꠛꠘꠤꠀ ꠄꠇꠦ-ꠅꠁꠘ꠆ꠘꠦ ꠎꠤꠇꠣꠁꠟꠣ, “ꠄꠞ ꠝꠣꠘꠤ ꠇꠤꠔꠣ?”
ACT 2:13 ꠀꠞ ꠛꠣꠇꠤ ꠅꠇꠟꠦ ꠑꠣꠐ꠆ꠐꠣ ꠇꠞꠤꠀ ꠇꠁꠟ, “ꠄꠞꠣ ꠔ ꠝꠖ ꠈꠣꠁꠀ ꠝꠣꠔꠟꠣꠝꠤ ꠇꠞꠦꠞ!”
ACT 2:14 ꠁꠔꠣ ꠢꠥꠘꠤꠀ ꠙꠤꠔꠞꠦ ꠅꠃ ꠄꠉꠣꠞꠅ ꠎꠘ ꠍꠣꠢꠣꠛꠤꠞ ꠟꠉꠦ ꠃꠛꠣꠁꠀ ꠎꠥꠞꠦ ꠎꠥꠞꠦ ꠔꠣꠞꠣꠞꠦ ꠇꠁꠟꠣ, “ꠅ ꠁꠢꠥꠖꠤ ꠅꠇꠟ ꠀꠞ ꠎꠦꠞꠥꠎꠣꠟꠦꠝꠞ ꠛꠣꠡꠤꠘ꠆ꠖꠣ ꠅꠇꠟ, ꠀꠙꠘꠣꠞꠣ ꠎꠣꠘꠤꠀ ꠞꠣꠈꠃꠇ꠆ꠇꠣ ꠀꠞ ꠝꠘ ꠖꠤꠀ ꠀꠝꠣꠞ ꠛꠄꠀꠘ ꠢꠥꠘꠃꠇ꠆ꠇꠣ।
ACT 2:15 ꠀꠙꠘꠣꠞꠣ ꠝꠘꠅ ꠇꠞꠞꠣ ꠄꠞꠣ ꠝꠣꠔꠣꠟ ꠅꠁꠉꠦꠍꠦ, ꠘꠣ, ꠀꠍꠟꠦ ꠑꠤꠇ ꠘꠣꠄ, ꠅꠈꠘ ꠔ ꠈꠣꠟꠤ ꠡꠇꠣꠟ ꠘꠄꠐꠣ ꠛꠣꠎꠦꠞ।
ACT 2:16 ꠁꠐꠣ ꠔ ꠅꠃ ꠊꠐꠘꠣ ꠎꠣꠞ ꠛꠦꠙꠣꠞꠦ ꠘꠛꠤ ꠎꠥꠄꠟꠦ ꠇꠁꠍꠟꠣ:
ACT 2:17 ꠀꠟ꠆ꠟꠣꠄ ꠚꠞꠝꠣꠁꠞꠣ, ꠀꠈꠦꠞꠤ ꠎꠝꠣꠘꠣꠔ ꠅꠃꠟꠣ ꠊꠐꠛ, ꠀꠝꠤ ꠀꠝꠣꠞ ꠞꠥꠢꠥ ꠢꠇ꠆ꠇꠟꠞ ꠝꠣꠎꠦ ꠛꠦꠎꠤꠝꠥ; ꠔꠦꠃ ꠔꠥꠝꠞꠣꠞ ꠙꠥꠀ-ꠙꠥꠠꠤꠘ꠆ꠔꠦ ꠘꠛꠤꠞ ꠟꠣꠈꠣꠘ ꠛꠣꠔꠥꠘꠤ ꠝꠣꠔ ꠝꠣꠔꠛꠣ, ꠔꠥꠝꠞꠣꠞ ꠎꠥꠀꠘ ꠅꠇꠟꠦ ꠉꠣꠁꠛꠤ ꠀꠟꠣꠝꠔꠞ ꠖꠦꠈꠣ ꠙꠣꠁꠛꠣ, ꠝꠥꠞꠛ꠆ꠛꠤ ꠅꠇꠟꠦ ꠈꠥꠀꠛ ꠖꠦꠈꠛꠣ।
ACT 2:18 ꠅꠃ ꠡꠝꠄ ꠀꠝꠣꠞ ꠛꠘ꠆ꠖꠣ-ꠛꠣꠘ꠆ꠖꠤꠞ ꠃꠙꠞꠦ ꠀꠝꠣꠞ ꠞꠥꠢꠥ ꠛꠦꠎꠤꠝꠥ, ꠔꠣꠞꠣ ꠘꠛꠤꠞ ꠟꠣꠈꠣꠘ ꠅꠢꠤ ꠇꠁꠛꠣ।
ACT 2:19 ꠀꠝꠤ ꠃꠙꠞꠦ ꠀꠍꠝꠣꠘꠅ ꠛꠃꠔ ꠇꠦꠞꠣꠝꠔꠤ ꠖꠦꠈꠣꠁꠝꠥ, ꠀꠞ ꠔꠟꠦ ꠖꠥꠘꠤꠀꠔ ꠛꠃꠔ ꠘꠤꠡꠣꠘꠣ ꠊꠐꠣꠁꠝꠥ, ꠟꠃ, ꠀꠉꠥꠁꠘ ꠀꠞ ꠇꠣꠟꠣ-ꠗꠥꠝꠣ ꠖꠦꠈꠣꠁꠝꠥ।
ACT 2:20 ꠝꠣꠛꠥꠖꠞ ꠁ ꠝꠢꠣꠘ ꠀꠞ ꠈꠣꠍ ꠖꠤꠘ ꠀꠁꠛꠣꠞ ꠀꠉꠦ, ꠡꠥꠞꠥꠎ ꠀꠘ꠆ꠖꠣꠁꠞ ꠅꠁꠎꠤꠛ, ꠌꠣꠘ꠆ꠖ ꠟꠃꠞ ꠟꠣꠈꠣꠘ ꠅꠁꠎꠤꠛ।
ACT 2:21 ꠀꠞ ꠅꠃꠟꠣꠘ ꠅꠁꠛ, ꠎꠦꠇꠥꠘꠥ ꠝꠣꠘꠡꠦ ꠝꠣꠛꠥꠖꠞ ꠘꠣꠝꠦ ꠒꠣꠇꠤꠟꠦ, ꠢꠦ ꠘꠣꠎꠣꠔ ꠢꠣꠍꠤꠟ ꠇꠞꠛ।
ACT 2:22 ꠅ ꠛꠘꠤ ꠁꠍꠞꠣꠁꠟ ꠅꠇꠟ, ꠢꠥꠘꠃꠇ꠆ꠇꠣ, ꠘꠣꠍꠣꠞꠔꠞ ꠁꠍꠣꠞ ꠝꠣꠎꠖꠤꠀ ꠀꠟ꠆ꠟꠣꠄ ꠔꠣꠘ ꠇꠥꠖꠞꠔꠤ ꠀꠞ ꠇꠦꠞꠣꠝꠔꠤ ꠇꠣꠝ ꠇꠞꠣꠁꠀ, ꠀꠙꠘꠣꠁꠘ꠆ꠔꠞ ꠉꠦꠍꠦ ꠙꠞꠝꠣꠘ ꠇꠞꠍꠂꠘ, ꠔꠣꠁꠘꠃ ꠁꠍꠣꠞꠦ ꠙꠣꠑꠣꠁꠍꠟꠣ, ꠀꠞ ꠁꠔꠣ ꠔ ꠀꠙꠘꠣꠞꠣꠅ ꠎꠣꠘꠂꠘ।
ACT 2:23 ꠀꠟ꠆ꠟꠣ, ꠎꠦꠁꠘ ꠀꠉꠦꠃ ꠎꠣꠘꠂꠘ ꠀꠞ ꠚꠄꠍꠣꠟꠣꠅ ꠇꠞꠤꠀ ꠞꠣꠈꠍꠂꠘ, ꠁꠍꠣꠞꠦ ꠀꠙꠘꠣꠁꠘ꠆ꠔꠞ ꠀꠔꠅ ꠡꠙꠤꠛꠣ। ꠀꠞ ꠀꠙꠘꠣꠞꠣ ꠛꠦ-ꠖꠤꠘ ꠅꠇꠟꠞ ꠀꠔꠣꠘꠦ ꠔꠣꠘꠞꠦ ꠖꠥꠈ-ꠇꠡ꠆ꠐꠞ ꠍꠟꠤꠛꠅ ꠖꠤꠀ ꠎꠣꠘꠦ ꠝꠣꠞꠍꠂꠘ।
ACT 2:24 ꠅꠁꠟꠦ ꠀꠟ꠆ꠟꠣꠄ ꠝꠃꠔꠞ ꠀꠎꠣꠛ ꠕꠣꠇꠤ ꠔꠣꠘꠞꠦ ꠈꠣꠟꠣꠍ ꠇꠞꠤꠀ ꠎꠤꠘ꠆ꠖꠣ ꠇꠞꠍꠂꠘ, ꠇꠣꠞꠘ ꠝꠃꠔꠞ ꠈꠦꠝꠔꠣ ꠀꠍꠤꠟ ꠘꠣ ꠔꠣꠘꠞꠦ ꠇꠛꠎꠣ ꠇꠞꠣꠞ।
ACT 2:25 ꠖꠣꠃꠖꠦꠅ ꠔꠣꠘ ꠇꠕꠣ ꠇꠁꠍꠂꠘ: ꠀꠝꠤ ꠢꠣꠝꠦꠡꠣ ꠝꠥꠘꠤꠛꠞꠦ ꠀꠝꠣꠞ ꠍꠣꠝꠘꠦ ꠖꠦꠈꠔꠣꠝ, ꠔꠣꠁꠘ ꠀꠝꠣꠞ ꠒꠣꠁꠘ ꠉꠣꠟꠣꠔ ꠀꠍꠂꠘ, ꠀꠝꠤ ꠎꠣꠘꠥ ꠅꠡ꠆ꠕꠤꠞ ꠘꠣ ꠅꠁ।
ACT 2:26 ꠄꠞꠟꠣꠉꠤ ꠀꠝꠣꠞ ꠖꠤꠟ ꠈꠥꠡꠤ ꠅꠄ, ꠀꠝꠣꠞ ꠝꠥꠈ ꠕꠣꠇꠤ ꠚꠥꠞ꠆ꠔꠤ ꠛꠣꠞꠅꠄ, ꠀꠝꠣꠞ ꠇꠣꠄꠀ ꠅꠃ ꠀꠡꠣꠄ ꠎꠤꠔꠣ ꠞꠁꠛ,
ACT 2:27 ꠇꠣꠞꠘ ꠔꠥꠝꠤ ꠀꠝꠣꠞ ꠎꠣꠘꠞꠦ ꠙꠣꠔꠣꠟꠅ ꠚꠣꠟꠣꠁꠀ ꠕꠁꠔꠣꠄ ꠘꠣꠄ, ꠔꠥꠝꠣꠞ ꠙꠣꠇ ꠛꠘ꠆ꠖꠣꠞ ꠡꠞꠤꠟꠞꠦ ꠙꠌꠣ-ꠉꠟꠣ ꠅꠁꠔꠦ ꠖꠤꠔꠣꠄ ꠘꠣꠄ।
ACT 2:28 ꠔꠥꠝꠤ ꠀꠝꠣꠞꠦ ꠎꠤꠘ꠆ꠖꠦꠉꠤꠞ ꠙꠕ ꠎꠣꠘꠣꠁꠍ। ꠔꠥꠝꠣꠞ ꠖꠤꠖꠣꠞꠞ ꠝꠣꠎꠦ ꠀꠍꠦ ꠙꠥꠞꠣꠙꠥꠞ ꠚꠥꠞ꠆ꠔꠤ।
ACT 2:29 ꠜꠣꠁ ꠅꠇꠟ, ꠅꠃ ꠝꠢꠣꠘ-ꠛꠣꠚ ꠖꠣꠃꠖꠞ ꠛꠦꠙꠣꠞꠦ ꠀꠝꠤ ꠀꠙꠘꠣꠞꠣꠞꠦ ꠈꠥꠟꠣ-ꠈꠥꠟꠤ ꠇꠁꠞꠣꠝ, ꠔꠣꠁꠘ ꠝꠣꠞꠣ ꠉꠦꠍꠂꠘ, ꠔꠣꠘꠞꠦ ꠖꠣꠚꠘ ꠇꠞꠣ ꠅꠁꠍꠦ, ꠀꠞ ꠔꠣꠘ ꠇꠄꠛꠞ ꠀꠁꠎꠅ ꠅꠈꠣꠘꠅ ꠀꠍꠦ।
ACT 2:30 ꠔꠣꠁꠘ ꠄꠇꠎꠘ ꠘꠛꠤ ꠀꠍꠟꠣ ꠀꠞ ꠔꠣꠁꠘ ꠎꠣꠘꠔꠣ, ꠀꠟ꠆ꠟꠣꠄ ꠇꠍꠝ ꠇꠞꠤꠀ ꠁ ꠅꠀꠖꠣ ꠇꠞꠍꠂꠘ ꠎꠦꠘ, ꠔꠣꠘꠃ ꠅꠀꠞꠤꠡꠞ ꠄꠇꠎꠘꠞꠦ ꠔꠣꠘ ꠉꠖꠤꠔ ꠛꠅꠀꠁꠛꠣ।
ACT 2:31 ꠄꠞꠟꠣꠉꠤ ꠀꠉ ꠕꠘꠦ ꠖꠦꠈꠤꠀꠃ ꠔꠣꠁꠘ ꠀꠟ꠆ꠟꠣꠞ ꠅꠀꠖꠣ ꠇꠞꠣ ꠛꠣꠖꠡꠣ, ꠝꠣꠘꠤ ꠀꠟ-ꠝꠍꠤꠞ ꠝꠥꠞ꠆ꠖꠣ ꠕꠣꠇꠤ ꠎꠤꠘ꠆ꠖꠣ ꠅꠁꠀ ꠃꠑꠣꠞ ꠛꠦꠙꠣꠞꠦ ꠅꠃ ꠇꠕꠣ ꠇꠁꠍꠟꠣ, ꠄꠘꠞꠦ ꠙꠣꠔꠣꠟꠅ ꠚꠣꠟꠣꠁꠀ ꠕꠅꠀ ꠅꠁꠔ ꠘꠣꠄ, ꠄꠘ ꠇꠣꠄꠀꠅ ꠙꠌꠔ ꠘꠣꠄ।
ACT 2:32 ꠀꠟ꠆ꠟꠣꠄ ꠅꠃ ꠁꠍꠣꠞꠦꠃ ꠎꠤꠘ꠆ꠖꠣ ꠇꠞꠤꠀ ꠔꠥꠟꠍꠤꠟꠣ, ꠀꠝꠞꠣ ꠢꠇ꠆ꠇꠟ ꠄꠞ ꠡꠣꠇ꠆ꠇꠤ।
ACT 2:33 ꠀꠟ꠆ꠟꠣꠞ ꠒꠣꠁꠘꠞ ꠔꠈ꠆ꠔꠅ ꠛꠁꠛꠣꠞ ꠔꠣꠇ꠆ꠇꠔ ꠔꠣꠘꠞꠦꠃ ꠖꠦꠅꠀ ꠅꠁꠍꠦ, ꠉꠣꠁꠛꠤ ꠛꠣꠚꠞ ꠅꠀꠖꠣ ꠇꠞꠣ ꠙꠣꠇ ꠞꠥꠢꠥ ꠔꠣꠁꠘꠃ ꠙꠣꠁꠍꠟꠣ, ꠀꠞ ꠅꠈꠘ ꠀꠙꠘꠣꠞꠣ ꠎꠦꠔꠣ ꠖꠦꠈꠞꠣ ꠀꠞ ꠢꠥꠘꠞꠣ ꠁꠔꠣ ꠔꠣꠁꠘꠃ ꠇꠞꠍꠂꠘ।
ACT 2:34 ꠖꠣꠃꠖ ꠔ ꠘꠤꠎꠦ ꠛꠦꠢꠦꠡ꠆ꠔꠅ ꠢꠣꠝꠣꠁꠍꠂꠘ ꠘꠣ, ꠅꠁꠟꠦ ꠔꠣꠁꠘ ꠇꠁꠍꠂꠘ: ꠝꠣꠛꠥꠖꠦ ꠀꠝꠣꠞ ꠝꠥꠘꠤꠛꠞꠦ ꠇꠁꠟꠣ, ꠔꠥꠝꠤ ꠀꠝꠣꠞ ꠒꠣꠁꠘ ꠉꠣꠟꠣꠔ ꠛꠅ,
ACT 2:35 ꠀꠝꠤ ꠔꠥꠝꠣꠞ ꠖꠥꠡꠝꠘ ꠅꠇꠟꠞꠦ ꠔꠥꠝꠣꠞ ꠙꠣꠅꠞ ꠔꠟꠣꠔ ꠚꠣꠟꠣꠘꠤ ꠙꠞ꠆ꠎꠘ꠆ꠔ ꠛꠅ।
ACT 2:36 ꠄꠞꠟꠣꠉꠤ ꠢꠇ꠆ꠇꠟ ꠛꠘꠤ ꠁꠍꠞꠣꠁꠟꠦ ꠅꠃ ꠇꠕꠣ ꠜꠣꠟꠣ ꠇꠞꠤ ꠎꠣꠘꠃꠇ꠆ꠇꠣ, ꠀꠙꠘꠣꠞꠣ ꠎꠦꠘꠞꠦ ꠍꠟꠤꠛꠅ ꠉꠣꠕꠤꠍꠟꠣ, ꠀꠟ꠆ꠟꠣꠄ ꠅꠃ ꠁꠍꠣꠞꠦꠃ ꠝꠣꠟꠤꠇ ꠀꠞ ꠀꠟ-ꠝꠍꠤ ꠖꠥꠁꠅ ꠔꠈ꠆ꠔ ꠖꠤꠍꠂꠘ।”
ACT 2:37 ꠁꠔꠣ ꠢꠥꠘꠤꠀ ꠝꠣꠘꠡꠞ ꠖꠤꠟꠅ ꠍꠦꠟ ꠢꠣꠝꠣꠁꠟ, ꠔꠣꠞꠣ ꠙꠤꠔꠞ ꠀꠞ ꠍꠣꠢꠣꠛꠤ ꠅꠇꠟꠞꠦ ꠎꠤꠇꠣꠁꠟ, “ꠜꠣꠁꠀꠁꠘꠞꠦ, ꠀꠝꠞꠣ ꠇꠤꠔꠣ ꠇꠞꠔꠣꠝ?”
ACT 2:38 ꠙꠤꠔꠞꠦ ꠎꠥꠀꠙ ꠖꠤꠟꠣ, “ꠝꠘ ꠚꠤꠞꠣꠃꠇ꠆ꠇꠣ, ꠀꠙꠘꠣꠞꠣ ꠢꠇꠟꠦ ꠉꠥꠘꠣꠞ ꠝꠣꠚꠤꠞ ꠟꠣꠉꠤ ꠁꠍꠣ ꠀꠟ-ꠝꠍꠤꠞ ꠘꠣꠝꠦ ꠔꠃꠛꠣꠞ ꠉꠥꠍꠟ ꠇꠞꠃꠇ꠆ꠇꠣ, ꠔꠦꠃ ꠀꠙꠘꠣꠞꠣ ꠖꠣꠘ ꠢꠤꠡꠣꠛꠦ ꠙꠣꠇ ꠞꠥꠢꠥ ꠙꠣꠁꠛꠣ।
ACT 2:39 ꠁ ꠅꠀꠖꠣ ꠀꠙꠘꠣꠁꠘ꠆ꠔꠞ ꠟꠣꠉꠤ, ꠀꠙꠘꠣꠁꠘ꠆ꠔꠞ ꠀꠅꠟꠣꠖꠞ ꠟꠣꠉꠤ, ꠎꠦꠞꠣ ꠖꠥꠞꠁ ꠀꠍꠦ ꠔꠣꠞꠣꠞ ꠟꠣꠉꠤ, ꠎꠔ ꠝꠣꠘꠡꠞꠦ ꠀꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠔꠣꠘ ꠈꠣꠍ ꠛꠘ꠆ꠖꠣ ꠅꠁꠛꠣꠞ ꠟꠣꠉꠤ ꠖꠣꠅꠔ ꠖꠤꠛꠣ ꠔꠣꠞꠣ ꠢꠇ꠆ꠇꠟꠞ ꠟꠣꠉꠤ।”
ACT 2:40 ꠀꠞꠅ ꠛꠃꠔꠔꠣ ꠇꠁꠀ ꠙꠤꠔꠞꠦ ꠢꠥꠡꠤꠀꠞ ꠀꠞ ꠝꠤꠘꠔ ꠇꠞꠤ ꠇꠁꠟꠣ, “ꠁ ꠎꠝꠣꠘꠣꠞ ꠘꠣꠚꠞꠝꠣꠘ ꠅꠇꠟꠞ ꠉꠦꠍ ꠕꠣꠇꠤ ꠀꠙꠘꠣꠁꠘ꠆ꠔꠞ ꠎꠣꠘ ꠛꠣꠌꠣꠃꠇ꠆ꠇꠣ।”
ACT 2:41 ꠔꠣꠘ ꠛꠄꠀꠘ ꠢꠥꠘꠤꠀ ꠎꠦꠞꠣ ꠁꠝꠣꠘ ꠀꠘꠟꠣ ꠔꠣꠞꠣ ꠔꠃꠛꠣꠞ ꠉꠥꠍꠟ ꠇꠞꠟꠣ, ꠅꠘꠥꠝꠣꠘ ꠔꠤꠘ ꠀꠎꠣꠞ ꠝꠣꠘꠥꠡ ꠁ ꠖꠤꠘ ꠃꠝ꠆ꠝꠔ ꠅꠇꠟꠞ ꠟꠉꠦ ꠡꠞꠤꠇ ꠅꠁꠟꠣ।
ACT 2:42 ꠔꠣꠞꠣ ꠍꠣꠢꠣꠛꠤ ꠅꠇꠟꠞ ꠔꠣꠟꠤꠝ ꠢꠥꠘꠣ, ꠔꠣꠞꠣꠞ ꠟꠉꠦ ꠡꠞꠤꠇ ꠅꠁꠀ ꠀꠟ-ꠝꠍꠤꠞ ꠝꠦꠎꠛꠣꠘꠤ ꠈꠣꠅꠀ, ꠀꠞ ꠖꠥꠀ ꠇꠞꠣꠔ ꠢꠣꠝꠦꠡꠣ ꠇꠣꠁꠝ ꠞꠁꠔꠣ।
ACT 2:43 ꠔꠦꠃ ꠢꠇꠟꠦ ꠒꠞꠣꠁꠔ ꠇꠣꠞꠘ ꠍꠣꠢꠣꠛꠤ ꠅꠇꠟꠦ ꠛꠃꠔ ꠇꠦꠞꠣꠝꠔꠤ ꠀꠞ ꠝꠥꠎꠦꠎꠣ ꠇꠣꠝ ꠖꠦꠈꠣꠁꠔꠣ।
ACT 2:44 ꠢꠇ꠆ꠇꠟ ꠁꠝꠣꠘꠖꠣꠞ ꠅꠇꠟ ꠄꠇꠈꠣꠘꠅ ꠞꠁꠔꠣ ꠀꠞ ꠎꠣꠞꠎꠤꠞ ꠖꠞꠇꠣꠞꠤ ꠍꠣꠝꠣꠘꠣ ꠅꠘ ꠕꠣꠇꠤ ꠘꠤꠔꠣ।
ACT 2:45 ꠔꠣꠞꠣꠞ ꠎꠝꠤ-ꠎꠝꠣ ꠗꠘ-ꠖꠃꠟꠔ ꠛꠦꠌꠤꠀ ꠎꠣꠞ ꠎꠦꠟꠣ ꠖꠞꠇꠣꠞ ꠅꠃꠟꠣ ꠛꠣꠐꠤꠀ ꠖꠤꠔꠣ।
ACT 2:46 ꠔꠣꠞꠣ ꠙꠞꠔꠦꠇ ꠖꠤꠘ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠅ ꠄꠇꠈꠣꠘꠅ ꠝꠤꠟꠔꠣ, ꠀꠞ ꠈꠥꠡꠤ ꠅꠁꠀ ꠄꠇꠟꠉꠦ ꠡꠞꠟ ꠝꠘꠦ ꠊꠞꠅ ꠊꠞꠅ ꠉꠤꠀ ꠈꠣꠘꠣ-ꠙꠤꠘꠣ ꠇꠞꠔꠣ।
ACT 2:47 ꠔꠣꠞꠣ ꠀꠟ꠆ꠟꠣꠞ ꠔꠣꠞꠤꠚ ꠇꠞꠣꠔ ꠞꠁꠔꠣ ꠀꠞ ꠢꠇ꠆ꠇꠟ ꠝꠣꠘꠡꠞ ꠝꠢꠛ꠆ꠛꠔꠞ ꠝꠣꠘꠥꠡ ꠅꠁꠟꠣ। ꠎꠦꠞꠣ ꠘꠣꠎꠣꠔ ꠢꠣꠍꠤꠟ ꠇꠞꠔꠣ, ꠀꠟ꠆ꠟꠣꠄ ꠔꠣꠞꠣꠞꠦꠅ ꠀꠘꠤꠀ ꠖꠤꠘꠦ ꠖꠤꠘꠦ ꠄꠞꠣꠞ ꠟꠉꠦ ꠡꠞꠤꠇ ꠇꠞꠔꠣ।
ACT 3:1 ꠄꠇꠖꠤꠘ ꠀꠍꠞ ꠅꠇ꠆ꠔꠞ ꠘꠝꠣꠎꠞ ꠟꠣꠉꠤ ꠙꠤꠔꠞ ꠀꠞ ꠢꠣꠘ꠆ꠘꠣꠘ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠅ ꠎꠣꠅꠀꠔ ꠀꠍꠟꠣ;
ACT 3:2 ꠝꠣꠘꠡꠦ ꠙꠞꠔꠦꠇ ꠖꠤꠘ ꠄꠇꠎꠘ ꠝꠣꠘꠡꠞꠦ ꠛꠁꠀ ꠀꠘꠤꠀ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠞ ‘ꠡꠥꠘ꠆ꠖꠞ’ ꠘꠣꠝꠞ ꠉꠦꠁꠐꠞ ꠉꠦꠍꠦ ꠕꠁꠔꠣ, ꠢꠦ ꠎꠘꠝꠉꠔ ꠟꠦꠋꠠꠣ-ꠀꠔꠥꠞ ꠀꠍꠤꠟ, ꠎꠦꠞꠣ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠅ ꠎꠣꠁꠘ ꠔꠣꠞꠣꠞ ꠉꠦꠍꠦ ꠜꠤꠇ ꠌꠣꠅꠀꠞ ꠟꠣꠉꠤ ꠔꠣꠞꠦ ꠢꠤꠈꠣꠘꠅ ꠕꠅꠀ ꠅꠁꠔ।
ACT 3:3 ꠙꠤꠔꠞ ꠀꠞ ꠢꠣꠘ꠆ꠘꠣꠘꠞꠦ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠅ ꠢꠣꠝꠣꠘꠤꠔ ꠖꠦꠈꠤꠀ ꠢꠦ ꠔꠣꠞꠣꠞ ꠉꠦꠍꠦ ꠝꠤꠘꠔ-ꠇꠣꠎ꠆ꠎꠤ ꠇꠞꠤ ꠜꠤꠇ ꠈꠥꠎꠤꠟ।
ACT 3:4 ꠙꠤꠔꠞ ꠀꠞ ꠢꠣꠘ꠆ꠘꠣꠘ ꠔꠣꠞ ꠛꠣꠄ ꠗꠤꠀꠘ ꠗꠞꠤ ꠌꠣꠁꠀ ꠇꠁꠟꠣ, “ꠀꠝꠞꠣꠞ ꠛꠣꠄ ꠌꠣꠅ।”
ACT 3:5 ꠔꠦꠃ ꠢꠦ ꠔꠣꠞꠣꠞ ꠉꠦꠍ ꠕꠣꠇꠤ ꠇꠥꠘ꠆ꠔꠣ ꠙꠣꠅꠀꠞ ꠟꠣꠟꠌꠦ ꠗꠤꠀꠘ ꠗꠞꠤ ꠌꠣꠁꠞꠂꠟ।
ACT 3:6 ꠙꠤꠔꠞꠦ ꠔꠣꠞꠦ ꠇꠁꠟꠣ, “ꠀꠝꠞꠣꠞ ꠉꠦꠍꠦ ꠔ ꠡꠥꠘꠣ-ꠞꠥꠙꠣ ꠇꠥꠘ꠆ꠔꠣ ꠘꠣꠁ ꠞꠦꠛꠣ, ꠅꠁꠟꠦ ꠎꠦꠔꠣ ꠀꠍꠦ ꠔꠥꠝꠣꠞꠦ ꠖꠣꠘ ꠇꠞꠞꠣꠝ। ꠘꠣꠍꠣꠞꠔꠞ ꠁꠍꠣ ꠀꠟ-ꠝꠍꠤꠞ ꠘꠣꠝꠦ ꠀꠐꠤꠀ ꠎꠣꠅ।”
ACT 3:7 ꠇꠁꠀ ꠢꠣꠞꠤ ꠔꠣꠁꠘ ꠄꠞ ꠒꠣꠁꠘ ꠀꠔꠅ ꠗꠞꠤꠀ ꠃꠌꠣ ꠇꠞꠟꠣ, ꠀꠞ ꠟꠉꠦ ꠟꠉꠦꠃ ꠔꠣꠞ ꠙꠣꠅ ꠀꠞ ꠉꠥꠍꠤꠔ ꠛꠟ ꠀꠁꠟ।
ACT 3:8 ꠢꠦ ꠚꠣꠟꠖꠤ ꠃꠑꠤꠀ ꠃꠛꠣꠁꠟ ꠀꠞ ꠀꠐꠣ ꠡꠥꠞꠥ ꠇꠞꠟ, ꠀꠐꠤ ꠀꠐꠤ ꠚꠣꠟꠣꠁ ꠚꠣꠟꠣꠁ ꠀꠟ꠆ꠟꠣꠞ ꠔꠣꠞꠤꠚ ꠇꠞꠔꠦ ꠇꠞꠔꠦ ꠄꠞꠣꠞ ꠟꠉꠦ ꠅꠁꠀ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠅ ꠢꠣꠝꠣꠁꠉꠦꠟ।
ACT 3:9 ꠢꠇ꠆ꠇꠟ ꠝꠣꠘꠡꠦ ꠔꠣꠞꠦ ꠀꠐꠣꠔ ꠀꠞ ꠀꠟ꠆ꠟꠣꠞ ꠔꠣꠞꠤꠚ ꠇꠞꠣꠔ ꠖꠦꠈꠤꠀ
ACT 3:10 ꠄꠞꠦ ꠌꠤꠘꠤꠟꠤꠟ, ꠁꠉꠥ ꠖꠦꠈꠤ ꠅꠃ ꠝꠣꠘꠥꠡ, ꠎꠦꠉꠥꠄ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠞ ꠡꠥꠘ꠆ꠖꠞ ꠘꠣꠝꠞ ꠉꠦꠁꠐꠅ ꠛꠁꠀ ꠜꠤꠇ ꠇꠞꠔ! ꠔꠣꠞ ꠢꠣꠟꠔ ꠖꠦꠈꠤꠀ ꠝꠣꠘꠥꠡ ꠀꠌꠣꠘꠇ ꠔꠣꠁꠎ꠆ꠎꠥꠛ ꠅꠁꠉꠦꠟ।
ACT 3:11 ꠅꠁꠟꠦ ꠟꠦꠋꠠꠣ ꠢꠇꠤꠞꠦ ꠙꠤꠔꠞ ꠀꠞ ꠢꠣꠘ꠆ꠘꠣꠘꠞ ꠈꠞꠦ ꠅꠁꠀ ꠊꠥꠞꠣꠄ, ꠝꠣꠘꠡꠦ ꠙꠤꠔꠞꠞ ꠁ ꠇꠣꠝꠦ ꠔꠣꠁꠎ꠆ꠎꠥꠛ ꠅꠁꠀ ꠖꠃꠠꠤꠀ ꠍꠥꠟꠣꠁꠝꠣꠘ ꠘꠣꠝꠞ ꠛꠣꠞꠤꠘ꠆ꠖꠣꠔ ꠔꠣꠘ ꠉꠦꠍꠦ ꠀꠁꠟ।
ACT 3:12 ꠁꠔꠣ ꠖꠦꠈꠤꠀ ꠙꠤꠔꠞꠦ ꠝꠣꠘꠡꠞꠦ ꠇꠁꠟꠣ, “ꠅ ꠛꠘꠤ ꠁꠍꠞꠣꠁꠟ ꠅꠇꠟ, ꠄꠞꠦ ꠖꠦꠈꠤꠀ ꠀꠙꠘꠣꠞꠣ ꠔꠣꠁꠎ꠆ꠎꠥꠛ ꠅꠁꠉꠦꠟꠣ ꠇꠦꠘꠦ? ꠀꠝꠞꠣꠞ ꠘꠤꠎꠞ ꠙꠤꠞꠣꠇꠤ ꠛꠣ ꠙꠞꠦꠎꠉꠣꠞꠤꠞ ꠉꠥꠘꠦ ꠔꠣꠞꠦ ꠌꠟꠣꠞ ꠡꠇ꠆ꠔꠤ ꠖꠤꠍꠤ ꠝꠘꠦ ꠇꠞꠤꠀ, ꠇꠦꠘꠦ ꠀꠝꠞꠣꠞ ꠛꠣꠄ ꠗꠤꠀꠘ ꠗꠞꠤ ꠌꠣꠁꠞꠂꠍ?
ACT 3:13 ꠁꠛ꠆ꠞꠣꠢꠤꠝ, ꠁꠍꠢꠣꠇ ꠀꠞ ꠁꠀꠇꠥꠛꠞ ꠀꠟ꠆ꠟꠣ, ꠀꠝꠞꠣꠞ ꠛꠣꠚ-ꠖꠣꠖꠣ ꠅꠇꠟꠞ ꠀꠟ꠆ꠟꠣ, ꠔꠣꠘ ꠀꠙꠘ ꠛꠘ꠆ꠖꠣ ꠁꠍꠣꠞ ꠝꠢꠤꠝꠣ ꠎꠣꠁꠞ ꠇꠞꠍꠂꠘ, ꠎꠦꠘꠞꠦ ꠀꠙꠘꠣꠞꠣ ꠖꠥꠡꠝꠘꠞ ꠀꠔꠅ ꠡꠙꠤ ꠖꠤꠍꠟꠣ। ꠀꠞ ꠢꠣꠇꠤꠝ ꠙꠤꠟꠣꠔꠦ ꠎꠦꠛꠟꠣ ꠔꠣꠘꠞꠦ ꠍꠣꠠꠤ ꠖꠤꠔꠣ ꠇꠞꠤ ꠘꠤꠅꠔ ꠇꠞꠍꠟꠣ, ꠁ ꠡꠝꠄ ꠀꠙꠘꠣꠞꠣ ꠁꠍꠣꠞꠦ ꠖꠥꠞꠁ ꠢꠞꠣꠁ ꠖꠤꠍꠂꠘ।
ACT 3:14 ꠀꠙꠘꠣꠞꠣ ꠅꠃ ꠙꠣꠇ-ꠙꠞꠦꠎꠉꠣꠞ ꠝꠣꠘꠡꠞꠦ ꠢꠞꠣꠁ ꠖꠤꠀ ꠄꠇꠎꠘ ꠈꠥꠘꠤꠞꠦ ꠍꠣꠠꠣꠘꠤꠞ ꠟꠣꠉꠤ ꠡꠥꠙꠣꠞꠤꠡ ꠖꠤꠍꠂꠘ।
ACT 3:15 ꠎꠦꠁꠘ ꠎꠤꠘ꠆ꠖꠦꠉꠤ ꠖꠣꠘ ꠇꠞꠂꠘ ꠔꠣꠘꠞꠦ ꠀꠙꠘꠣꠞꠣ ꠎꠣꠘꠦ ꠝꠣꠞꠤꠟꠤꠍꠂꠘ, ꠅꠁꠟꠦ ꠀꠟ꠆ꠟꠣꠄ ꠔꠣꠘꠞꠦ ꠝꠥꠞ꠆ꠖꠣ ꠕꠣꠇꠤ ꠎꠤꠘ꠆ꠖꠣ ꠇꠞꠍꠂꠘ, ꠀꠝꠞꠣ ꠄꠞ ꠡꠣꠇ꠆ꠇꠤ।
ACT 3:16 ꠀꠞ ꠔꠣꠘ ꠃꠙꠞꠦ ꠁꠝꠣꠘ ꠀꠘꠣꠄ, ꠅꠃ ꠎꠦ ꠛꠦꠐꠣꠞꠦ ꠀꠙꠘꠣꠞꠣ ꠌꠤꠘꠞꠣ ꠀꠞ ꠖꠦꠈꠞꠣ, ꠢꠃ ꠁꠍꠣꠞ ꠘꠣꠝꠃ ꠔꠣꠞꠦ ꠛꠟꠀꠟꠣ ꠇꠞꠍꠦ। ꠁꠍꠣꠞ ꠝꠣꠎꠦꠖꠤ ꠎꠦꠔꠣ ꠁꠝꠣꠘ ꠙꠄꠖꠣ ꠅꠄ, ꠅꠃ ꠁꠝꠣꠘꠞ ꠛꠟꠦꠃ ꠀꠙꠘꠣꠞꠣ ꠢꠇꠟꠞ ꠍꠣꠝꠘꠦ ꠔꠣꠞꠦ ꠜꠣꠟꠣ ꠇꠞꠣ ꠅꠁꠍꠦ।
ACT 3:17 “ꠅ ꠜꠣꠁ ꠅꠇꠟ, ꠀꠝꠤ ꠅꠈꠘ ꠎꠣꠘꠤ ꠀꠙꠘꠣꠁꠘ꠆ꠔꠞ ꠝꠥꠞꠛ꠆ꠛꠤ-ꠡꠣꠟꠤꠡ ꠅꠇꠟꠞ ꠟꠣꠈꠣꠘ ꠀꠙꠘꠣꠞꠣꠅ ꠘꠣ-ꠛꠥꠎꠤꠀ ꠁ ꠇꠣꠝ ꠇꠞꠤꠟꠤꠍꠂꠘ।
ACT 3:18 ꠅꠁꠟꠦ ꠀꠟ꠆ꠟꠣꠄ ꠔꠣꠘ ꠔꠣꠝꠣꠝ ꠘꠛꠤ ꠅꠇꠟꠞ ꠝꠣꠎꠖꠤ ꠀꠟ-ꠝꠍꠤꠞ ꠔꠇꠟꠤꠚꠞ ꠛꠦꠙꠣꠞꠦ ꠀꠉꠦ ꠎꠔꠔꠣ ꠎꠣꠘꠣꠁꠍꠂꠘ, ꠁ ꠢꠇ꠆ꠇꠟꠔꠣ ꠅꠃ ꠟꠣꠈꠣꠘ ꠇꠞꠤ ꠙꠥꠞꠣ ꠇꠞꠍꠂꠘ।
ACT 3:19 ꠄꠞꠟꠣꠉꠤ ꠀꠙꠘꠣꠞꠣ ꠝꠘ ꠚꠤꠞꠣꠃꠇ꠆ꠇꠣ ꠀꠞ ꠀꠟ꠆ꠟꠣꠞ ꠝꠥꠈꠤ ꠅꠃꠇ꠆ꠇꠣ, ꠎꠣꠔꠦ ꠀꠙꠘꠣꠁꠘ꠆ꠔꠞ ꠉꠥꠘꠣ ꠅꠇꠟ ꠚꠥꠍꠤꠀ ꠍꠣꠚ ꠇꠞꠣ ꠅꠄ।
ACT 3:20 ꠔꠦ ꠅꠃ ꠟꠣꠈꠣꠘ ꠅꠇ꠆ꠔ ꠀꠁꠛ, ꠎꠦꠛꠟꠣ ꠝꠣꠛꠥꠖꠦ ꠢꠃ ꠁꠍꠣꠞꠦ ꠝꠣꠘꠤ ꠔꠣꠘ ꠙꠍꠘ꠆ꠖ ꠇꠞꠣ ꠀꠟ-ꠝꠍꠤꠞꠦ ꠛꠦꠎꠤꠀ ꠀꠙꠘꠣꠁꠘ꠆ꠔꠞꠦ ꠔꠞꠔꠣꠎꠣ ꠇꠞꠛꠣ।
ACT 3:21 ꠀꠟ꠆ꠟꠣꠄ ꠢꠇꠟꠔꠣꠞꠦ ꠀꠉꠞ ꠢꠣꠟꠔꠅ ꠚꠤꠞꠣꠁꠛꠣ, ꠁꠔꠣ ꠛꠃꠔ ꠖꠤꠘ ꠀꠉꠦꠃ ꠙꠣꠇ ꠘꠛꠤ ꠅꠇꠟꠞ ꠎꠛꠣꠘ ꠖꠤꠀ ꠇꠁꠍꠂꠘ। ꠎꠔꠖꠤꠘ ꠔꠣꠘ ꠁ ꠅꠀꠖꠣ ꠙꠥꠞꠣ ꠘꠣ ꠇꠞꠛꠣ, ꠅꠔ ꠖꠤꠘ ꠁꠍꠣꠅ ꠛꠦꠢꠦꠡ꠆ꠔꠞ ꠝꠣꠎꠦ ꠞꠁꠛꠣ।
ACT 3:22 ꠝꠥꠍꠣꠄ ꠔ ꠇꠁꠍꠟꠣ, ‘ꠝꠣꠛꠥꠖ ꠀꠟ꠆ꠟꠣꠄ ꠔꠥꠝꠞꠣꠞ ꠟꠣꠉꠤ ꠔꠥꠝꠞꠣꠞ ꠘꠤꠎꠞ ꠝꠣꠘꠥꠡ ꠅꠇꠟ ꠕꠣꠇꠤ ꠀꠝꠣꠞ ꠟꠣꠈꠣꠘ ꠄꠇ ꠘꠛꠤ ꠙꠄꠖꠣ ꠇꠞꠛꠣ, ꠔꠣꠁꠘ ꠔꠥꠝꠞꠣꠞꠦ ꠎꠦꠔꠣ ꠇꠁꠛꠣ, ꠔꠥꠝꠞꠣ ꠁ ꠢꠇꠟꠔꠣꠃ ꠀꠝꠟ ꠇꠞꠤꠅ।
ACT 3:23 ꠎꠦꠉꠥꠄ ꠔꠣꠘ ꠇꠕꠣ ꠢꠥꠘꠔ ꠘꠣꠄ, ꠀꠟ꠆ꠟꠣꠄ ꠄꠞꠦ ꠘꠤꠎꠞ ꠛꠘ꠆ꠖꠣꠞ ꠈꠣꠔꠣ ꠕꠣꠇꠤ ꠚꠥꠍꠤꠀ ꠚꠣꠟꠣꠁ ꠖꠤꠛꠣ।’
ACT 3:24 ꠀꠞ [ꠛꠣꠖꠡꠣ ꠖꠣꠃꠖꠞ ꠀꠝꠟꠞ] ꠡꠣꠝꠥꠄꠟ ꠘꠛꠤ ꠕꠣꠇꠤ ꠡꠥꠞꠥ ꠇꠞꠤ ꠎꠔ ꠘꠛꠤ ꠅꠇꠟꠦ ꠇꠣꠟꠣꠝ ꠛꠣꠔꠣꠁꠍꠂꠘ, ꠄꠞꠣ ꠢꠇꠟꠦꠃ ꠁ ꠅꠇ꠆ꠔꠞ ꠇꠕꠣ ꠇꠁꠍꠂꠘ।
ACT 3:25 ꠀꠙꠘꠣꠞꠣ ꠔ ꠁ ꠘꠛꠤ ꠅꠇꠟꠞ ꠅꠀꠞꠤꠡ, ꠀꠞ ꠢꠃ ꠇꠣꠘꠥꠘꠞꠅ ꠅꠀꠞꠤꠡ ꠎꠦꠔꠣ ꠀꠟ꠆ꠟꠣꠄ ꠀꠙꠘꠣꠁꠘ꠆ꠔꠞ ꠛꠣꠚ-ꠖꠣꠖꠣ ꠅꠇꠟꠞ ꠟꠉꠦ ꠇꠣꠁꠝ ꠇꠞꠍꠤꠟꠣ। ꠀꠟ꠆ꠟꠣꠄ ꠢꠎꠞꠔ ꠁꠛ꠆ꠞꠣꠢꠤꠝꠞꠦ ꠇꠁꠍꠟꠣ, ‘ꠔꠥꠝꠣꠞ ꠅꠀꠞꠤꠡꠞ ꠝꠣꠎꠦꠖꠤ ꠖꠥꠘꠤꠀꠞ ꠢꠇ꠆ꠇꠟ ꠎꠣꠔꠤꠄ ꠛꠞꠇꠔ ꠙꠣꠁꠛꠣ।’
ACT 3:26 ꠢꠃ ꠅꠀꠞꠤꠡ, ꠝꠣꠘꠤ ꠔꠣꠘ ꠈꠣꠍ ꠉꠥꠟꠣꠝ ꠁꠍꠣꠞꠦ, ꠀꠟ꠆ꠟꠣꠄ ꠙꠄꠟꠣꠃ ꠀꠙꠘꠣꠁꠘ꠆ꠔꠞ ꠉꠦꠍꠦ ꠛꠦꠎꠤꠍꠂꠘ, ꠎꠣꠔꠦ ꠔꠣꠁꠘ ꠀꠙꠘꠣꠞꠣꠞꠦ ꠛꠦ-ꠖꠤꠘꠤ ꠇꠣꠝ ꠅꠇꠟ ꠕꠣꠇꠤ ꠚꠤꠞꠣꠁꠀ ꠢꠣꠞꠤ ꠛꠞꠇꠔ ꠖꠦꠁꠘ।”
ACT 4:1 ꠙꠤꠔꠞ ꠀꠞ ꠢꠣꠘ꠆ꠘꠣꠘꠦ ꠎꠦꠛꠟꠣ ꠝꠣꠘꠡꠞꠦ ꠛꠄꠀꠘ ꠇꠞꠞꠣ ꠅꠃ ꠡꠝꠄ ꠁꠝꠣꠝ ꠅꠇꠟ, ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠞ ꠛꠠ ꠖꠣꠞꠉꠣ ꠀꠞ ꠍꠤꠖ꠆ꠖꠦꠇꠤꠀ ꠝꠎꠛꠞ ꠝꠣꠘꠥꠡ ꠀꠈꠔꠣꠃ ꠔꠣꠞꠣꠞ ꠉꠦꠍꠦ ꠀꠁꠟꠣ।
ACT 4:2 ꠙꠤꠔꠞ ꠀꠞ ꠢꠣꠘ꠆ꠘꠣꠘꠦ ꠝꠣꠘꠡꠞꠦ ꠔꠣꠟꠤꠝ ꠖꠤꠞꠣ ꠀꠞ ꠁꠍꠣꠞ ꠝꠣꠎꠖꠤꠀꠃ ꠝꠥꠞ꠆ꠖꠣ ꠅꠇꠟ ꠢꠤꠞꠛꠣꠞ ꠎꠤꠘ꠆ꠖꠣ ꠅꠁꠀ ꠃꠑꠣꠞ ꠛꠦꠙꠣꠞꠦ ꠔꠛꠟꠤꠉ ꠇꠞꠞꠣ ꠖꠦꠈꠤꠀ ꠔꠣꠞꠣ ꠈꠥꠛ ꠘꠣꠞꠣꠎ ꠅꠁꠍꠟꠣ।
ACT 4:3 ꠔꠣꠞꠣ ꠙꠤꠔꠞ ꠀꠞ ꠢꠣꠘ꠆ꠘꠣꠘꠞꠦ ꠀꠐꠇ ꠇꠞꠟꠣ ꠀꠞ ꠢꠣꠁꠘ꠆ꠎꠣ ꠅꠁꠉꠦꠍꠤꠟ ꠇꠞꠤ ꠄꠞꠣꠞꠦ ꠛꠣꠖꠞ ꠖꠤꠘ ꠙꠞ꠆ꠎꠘ꠆ꠔ ꠛꠘ꠆ꠖꠤ ꠇꠞꠤ ꠕꠁꠟꠣ।
ACT 4:4 ꠎꠦꠞꠣ ꠙꠤꠔꠞꠞ ꠛꠄꠀꠘ ꠢꠥꠘꠍꠤꠟꠣ ꠄꠞꠣꠞ ꠝꠣꠎꠦ ꠛꠃꠔꠦ ꠁꠝꠣꠘ ꠀꠘꠟꠣ, ꠔꠦꠃ ꠁꠝꠣꠘꠖꠣꠞ ꠛꠦꠐꠣꠁꠘ꠆ꠔꠞ ꠙꠞꠤꠝꠣꠘ ꠙꠣꠌ ꠀꠎꠣꠞꠞ ꠟꠣꠈꠣꠘ ꠅꠁꠟ।
ACT 4:5 ꠛꠣꠖꠞ ꠖꠤꠘ ꠁꠢꠥꠖꠤꠞ ꠘꠦꠔꠣ ꠅꠇꠟ, ꠝꠥꠞꠛ꠆ꠛꠤ-ꠡꠣꠟꠤꠡ ꠀꠞ ꠝꠃꠟꠣꠘꠣ ꠅꠇꠟ ꠄꠇꠟꠉꠦ ꠎꠦꠞꠥꠎꠣꠟꠦꠝꠅ ꠖꠟꠣ ꠅꠁꠟꠣ।
ACT 4:6 ꠢꠤꠈꠣꠘꠅ ꠙꠞꠗꠣꠘ ꠁꠝꠣꠝ ꠢꠣꠘꠘ, ꠇꠣꠄꠀꠚꠣ, ꠁꠃꠢꠥꠘ꠆ꠘꠣ, ꠍꠤꠇꠘ꠆ꠖꠞ ꠀꠞ ꠙꠞꠗꠣꠘ ꠁꠝꠣꠝꠞ ꠈꠦꠡ-ꠇꠥꠐꠥꠝ ꠅꠇꠟꠅ ꠀꠎꠤꠞ ꠀꠍꠟꠣ।
ACT 4:7 ꠔꠣꠞꠣ ꠙꠤꠔꠞ ꠀꠞ ꠢꠣꠘ꠆ꠘꠣꠘꠞꠦ ꠔꠣꠞꠣꠞ ꠝꠣꠎꠈꠣꠘꠅ ꠃꠛꠣ ꠇꠞꠣꠁꠀ ꠎꠤꠇꠣꠁꠟꠣ, “ꠔꠥꠝꠞꠣ ꠇꠥꠘ ꠛꠟꠦ ꠀꠞ ꠇꠣꠞ ꠘꠣꠝꠦ ꠁ ꠇꠣꠝ ꠇꠞꠞꠣꠄ?”
ACT 4:8 ꠔꠦꠃ ꠙꠤꠔꠞꠦ ꠙꠣꠇ ꠞꠥꠢꠦ ꠇꠣꠝꠤꠟ ꠅꠁꠀ ꠔꠣꠞꠣꠞꠦ ꠇꠁꠟꠣ, “ꠅ ꠝꠥꠞꠛ꠆ꠛꠤ ꠍꠣꠄꠛꠣꠁꠘ ꠀꠞ ꠖꠦꠡꠞ ꠛꠥꠎꠥꠞ꠆ꠉ ꠅꠇꠟ,
ACT 4:9 ꠄꠇꠎꠘ ꠟꠦꠋꠠꠣ-ꠀꠔꠥꠞ ꠝꠣꠘꠡꠞ ꠜꠣꠟꠣꠁ ꠇꠞꠍꠤ ꠇꠞꠤ ꠀꠙꠘꠣꠞꠣ ꠀꠁꠎ ꠀꠝꠞꠣꠞꠦ ꠎꠦꠞꠣ ꠇꠞꠞꠣ, ꠝꠣꠘꠥꠡꠉꠥ ꠇꠤꠟꠣ ꠜꠣꠟꠣ ꠅꠁꠟ।
ACT 4:10 ꠔꠦ ꠀꠙꠘꠣꠞꠣ ꠢꠇꠟꠦ ꠀꠞ ꠛꠘꠤ ꠁꠍꠞꠣꠁꠟ ꠅꠇꠟꠦꠅ ꠢꠥꠘꠃꠇ꠆ꠇꠣ, ꠘꠣꠍꠣꠞꠔꠞ ꠁꠍꠣ ꠀꠟ-ꠝꠍꠤꠞ ꠘꠣꠝꠦ, ꠎꠦꠘꠞꠦ ꠀꠙꠘꠣꠞꠣ ꠍꠟꠤꠛꠅ ꠉꠣꠕꠤꠀ ꠎꠣꠘꠦ ꠝꠣꠞꠍꠟꠣ, ꠎꠦꠘꠞꠦ ꠀꠟ꠆ꠟꠣꠄ ꠝꠥꠞ꠆ꠖꠣ ꠕꠣꠇꠤ ꠎꠤꠘ꠆ꠖꠣ ꠇꠞꠍꠂꠘ, ꠔꠣꠘ ꠛꠟꠦꠃ ꠁ ꠝꠣꠘꠥꠡꠉꠥ ꠀꠙꠘꠣꠁꠘ꠆ꠔꠞ ꠍꠣꠝꠘꠦ ꠜꠣꠟꠣ ꠅꠁꠀ ꠃꠛꠣꠁꠍꠦ।
ACT 4:11 ꠔꠣꠁꠘ ꠢꠃ ꠙꠣꠔ꠆ꠔꠞ, ꠎꠦꠔꠣꠞꠦ ꠞꠣꠎ ꠝꠦꠡ꠆ꠔꠁꠞ ꠅꠇꠟꠦ, ꠝꠣꠘꠤ ꠀꠙꠘꠣꠞꠣ ꠄꠟꠣꠝꠤ ꠇꠞꠤ ꠛꠣꠖ ꠖꠤꠟꠣꠁꠍꠟꠣ, ꠙꠣꠇ ꠇꠤꠔꠣꠛꠞ ꠇꠕꠣ ꠝꠣꠚꠤꠇ ꠢꠃ ꠙꠣꠔ꠆ꠔꠞꠃ ꠀꠁꠎ ꠁꠀꠘ ꠇꠥꠘꠣꠞ ꠢꠇꠟ ꠕꠣꠇꠤ ꠎꠞꠥꠞꠤ ꠈꠥꠐꠤ ꠅꠁꠍꠦ।
ACT 4:12 ꠔꠞꠣꠘꠤꠞ ꠈꠦꠝꠔꠣ ꠀꠞ ꠇꠦꠃꠞꠞ ꠉꠦꠍꠦ ꠘꠣꠁ, ꠇꠣꠞꠘ ꠀꠍꠝꠣꠘꠞ ꠔꠟꠦ ꠀꠞ ꠎꠝꠤꠘꠞ ꠃꠙꠞꠦ ꠅꠃꠟꠣ ꠀꠞ ꠇꠥꠘꠥ ꠘꠣꠝ ꠖꠦꠅꠀ ꠅꠁꠍꠦ ꠘꠣ, ꠎꠦꠘ ꠘꠣꠝꠦ ꠀꠝꠞꠣ ꠞꠦꠢꠣꠁ ꠙꠣꠁꠝꠥ।”
ACT 4:13 ꠙꠤꠔꠞ ꠀꠞ ꠢꠣꠘ꠆ꠘꠣꠘꠞ ꠡꠣꠅꠡ ꠖꠦꠈꠤꠀ, ꠄꠞꠣ ꠎꠦꠘ ꠅꠡꠤꠇ꠆ꠇꠤꠔ ꠡꠣꠝꠣꠁꠘ꠆ꠘ ꠝꠣꠘꠥꠡ ꠁꠔꠣ ꠎꠣꠘꠤꠀ ꠔꠣꠞꠣ ꠔꠣꠁꠎ꠆ꠎꠥꠛ ꠅꠁꠉꠦꠟꠣ, ꠀꠞ ꠄꠞꠣ ꠁꠍꠣꠞ ꠟꠉꠦ ꠀꠍꠟꠣ ꠇꠞꠤꠅ ꠌꠤꠘꠟꠣ।
ACT 4:14 ꠎꠦ ꠛꠦꠐꠣ ꠜꠣꠟꠣ ꠅꠁꠍꠤꠟ, ꠢꠦ ꠄꠞꠣꠞ ꠟꠉꠦ ꠃꠛꠣꠁꠞꠂꠍꠦ ꠖꠦꠈꠤꠀ ꠄꠞꠣꠞꠦ ꠀꠞ ꠇꠥꠘ꠆ꠔꠣ ꠇꠅꠀꠞ ꠡꠣꠅꠡ ꠅꠁꠟ ꠘꠣ।
ACT 4:15 ꠛꠣꠖꠦ ꠝꠎꠟꠤꠍ ꠕꠣꠇꠤ ꠄꠞꠣꠞꠦ ꠛꠣꠞꠦ ꠎꠣꠅꠀꠞ ꠢꠥꠇꠥꠝ ꠖꠤꠀ ꠔꠣꠞꠣ ꠢꠇꠟꠦ ꠙꠞꠣꠝꠤꠡ ꠇꠞꠣꠔ ꠛꠁꠀ
ACT 4:16 ꠇꠁꠟꠣ, “ꠁ ꠝꠣꠘꠡꠞꠦ ꠟꠁꠀ ꠀꠝꠞꠣ ꠇꠤꠔꠣ ꠇꠞꠔꠣꠝ? ꠄꠞꠣ ꠔ ꠛꠃꠔ ꠛꠠ ꠄꠇ ꠇꠦꠞꠣꠝꠔꠤ ꠇꠣꠝ ꠇꠞꠍꠦ ꠀꠞ ꠁꠔꠣ ꠔ ꠀꠡ꠆ꠔꠣ ꠎꠦꠞꠥꠎꠣꠟꠦꠝꠞ ꠢꠇꠟꠦ ꠎꠣꠘꠦ, ꠀꠞ ꠀꠝꠞꠣꠅ ꠁꠐꠣꠞꠦ ꠅꠡ꠆ꠛꠤꠇꠣꠞ ꠇꠞꠔꠣꠝ ꠙꠣꠞꠤꠀꠞ ꠘꠣ।
ACT 4:17 ꠅꠁꠟꠦ ꠝꠣꠘꠡꠞ ꠉꠦꠍꠦ ꠎꠣꠘꠥ ꠁ ꠇꠕꠣ ꠀꠞ ꠎꠣꠘꠣ-ꠎꠣꠘꠤ ꠘꠣ ꠅꠄ, ꠄꠞꠟꠣꠉꠤ ꠄꠞꠣꠞꠦ ꠒꠞ ꠖꠦꠈꠣꠁꠟ ꠅꠃꠇ, ꠎꠣꠔꠦ ꠁ ꠎꠘꠞ ꠘꠣꠝꠦ ꠔꠣꠞꠣ ꠀꠞ ꠇꠦꠃꠞꠞ ꠉꠦꠍꠦ ꠇꠥꠘ꠆ꠔꠣ ꠘꠣ ꠇꠄ।”
ACT 4:18 ꠛꠣꠖꠦ ꠔꠣꠞꠣ ꠙꠤꠔꠞ ꠀꠞ ꠢꠣꠘ꠆ꠘꠣꠘꠞꠦ ꠢꠤꠞꠛꠣꠞ ꠀꠘꠣꠁꠀ ꠅꠃ ꠢꠥꠇꠥꠝ ꠖꠤꠟꠣ, “ꠔꠥꠝꠞꠣ ꠁꠍꠣꠞ ꠘꠣꠝꠦ ꠀꠞ ꠇꠥꠘꠥꠖꠤꠘ ꠄꠇꠖꠝ ꠇꠤꠌ꠆ꠍꠥ ꠇꠁꠅ ꠘꠣ, ꠇꠥꠘꠥꠎꠣꠔ ꠘꠍꠤꠅꠔꠅ ꠇꠞꠤꠅ ꠘꠣ।”
ACT 4:19 ꠙꠤꠔꠞ ꠀꠞ ꠢꠣꠘ꠆ꠘꠣꠘꠦ ꠔꠣꠞꠣꠞꠦ ꠎꠥꠀꠙ ꠖꠤꠟꠣ, “ꠀꠝꠞꠣ ꠀꠙꠘꠣꠁꠘ꠆ꠔꠞ ꠢꠥꠇꠥꠝ ꠝꠣꠘꠔꠣꠝ, ꠘꠣ ꠀꠟ꠆ꠟꠣꠞ ꠢꠥꠇꠥꠝ ꠝꠣꠘꠔꠣꠝ? ꠀꠟ꠆ꠟꠣꠞ ꠘꠎꠞꠅ ꠇꠥꠘꠈꠣꠘ ꠑꠤꠇ, ꠁꠔꠣ ꠀꠙꠘꠣꠞꠣꠃ ꠛꠤꠌꠣꠞ ꠇꠞꠃꠇ꠆ꠇꠣ।
ACT 4:20 ꠀꠝꠞꠣ ꠎꠦꠔꠣ ꠖꠦꠈꠍꠤ ꠀꠞ ꠢꠥꠘꠍꠤ, ꠁꠔꠣ ꠘꠣ ꠇꠁꠀ ꠔ ꠕꠣꠇꠔꠣꠝ ꠙꠣꠞꠤ ꠘꠣ।”
ACT 4:21 ꠔꠦꠃ ꠔꠣꠞꠣ ꠙꠤꠔꠞ ꠀꠞ ꠢꠣꠘ꠆ꠘꠣꠘꠞꠦ ꠀꠞꠅ ꠒꠞ ꠖꠦꠈꠣꠁꠀ ꠍꠣꠠꠤ ꠖꠤꠟꠣ। ꠝꠣꠘꠡꠞꠦ ꠒꠞꠣꠁꠀ ꠔꠣꠞꠣ ꠄꠞꠣꠞꠦ ꠇꠥꠘꠥ ꠡꠣꠎꠣ ꠖꠤꠔꠣ ꠙꠣꠞꠟꠣ ꠘꠣ, ꠇꠣꠞꠘ ꠎꠦꠔꠣ ꠊꠐꠍꠤꠟ ꠁꠔꠣ ꠖꠦꠈꠤꠀ ꠢꠇꠟ ꠝꠣꠘꠡꠦ ꠀꠟ꠆ꠟꠣꠞ ꠙ꠆ꠞꠡꠋꠡꠣ ꠇꠞꠣꠔ ꠀꠍꠤꠟ।
ACT 4:22 ꠎꠦ ꠝꠣꠘꠥꠡꠉꠥ ꠇꠦꠞꠣꠝꠔꠤ ꠇꠣꠝꠞ ꠝꠣꠎꠖꠤ ꠜꠣꠟꠣ ꠅꠁꠍꠤꠟ ꠔꠣꠞ ꠛꠄꠅꠡ ꠌꠣꠟ꠆ꠟꠤꠡ ꠛꠍꠞꠞ ꠛꠦꠡꠤ ꠀꠍꠤꠟ।
ACT 4:23 ꠁ ꠛꠤꠌꠣꠞ ꠕꠣꠇꠤ ꠔꠣꠞꠣꠞꠦ ꠍꠣꠠꠣꠞ ꠛꠣꠖꠦ ꠙꠤꠔꠞ ꠀꠞ ꠢꠣꠘ꠆ꠘꠣꠘ ꠔꠣꠞꠣꠞ ꠀꠙꠘ ꠝꠣꠘꠡꠞ ꠉꠦꠍꠦ ꠉꠦꠟꠣꠉꠤ, ꠉꠤꠀ ꠛꠠ ꠁꠝꠣꠝ ꠅꠇꠟꠦ ꠀꠞ ꠝꠥꠞꠛ꠆ꠛꠤ-ꠡꠣꠟꠤꠡ ꠅꠇꠟꠦꠅ ꠔꠣꠞꠣꠞꠦ ꠎꠦꠔꠣ ꠎꠦꠔꠣ ꠇꠁꠍꠟꠣ, ꠁꠔꠣ ꠢꠇ꠆ꠇꠟꠔꠣ ꠎꠣꠘꠣꠁꠟꠣ।
ACT 4:24 ꠁꠔꠣ ꠢꠥꠘꠣꠞ ꠛꠣꠖꠦ ꠔꠣꠞꠣ ꠢꠇꠟꠦ ꠄꠇ ꠖꠤꠟꠦ ꠀꠟ꠆ꠟꠣꠞ ꠉꠦꠍꠦ ꠎꠥꠞꠦ ꠎꠥꠞꠦ ꠖꠥꠀ ꠇꠞꠟꠣ, “ꠅ ꠝꠣꠟꠤꠇ, ꠔꠥꠝꠤ ꠀꠍꠝꠣꠘ, ꠎꠝꠤꠘ, ꠖꠞꠤꠀ ꠀꠞ ꠁꠔꠣꠞ ꠝꠣꠎꠦ ꠎꠔꠔꠣ ꠀꠍꠦ ꠢꠇ꠆ꠇꠟꠔꠣ ꠙꠄꠖꠣ ꠇꠞꠍ।
ACT 4:25 ꠔꠥꠝꠤ ꠔꠥꠝꠣꠞ ꠉꠥꠟꠣꠝ, ꠀꠝꠞꠣꠞ ꠈꠣꠘ꠆ꠖꠣꠘꠞ ꠛꠣꠚ ꠖꠣꠃꠖꠞ ꠎꠛꠣꠘꠅ ꠙꠣꠇ ꠞꠥꠢꠥꠞ ꠝꠣꠎꠖꠤꠀ ꠅꠃꠟꠣ ꠇꠁꠍ, ꠢꠇ꠆ꠇꠟ ꠎꠣꠔꠤꠄ ꠇꠦꠘꠦ ꠅꠡ꠆ꠕꠤꠞ ꠅꠁꠀ ꠌꠤꠟ꠆ꠟꠣꠁꠞꠣ? ꠇꠤꠅꠞ ꠟꠣꠉꠤ ꠝꠣꠘꠡꠦ ꠛꠦꠢꠥꠖꠣ ꠚꠘ꠆ꠖꠤ ꠇꠞꠦꠞ?
ACT 4:26 ꠎꠉꠔꠞ ꠛꠣꠖꠡꠣ ꠅꠇꠟ ꠛꠤꠉꠠꠤ ꠉꠦꠟ, ꠞꠣꠎꠣ ꠅꠇꠟ ꠄꠇꠈꠣꠘꠅ ꠖꠟꠣ ꠅꠁꠟ, ꠝꠣꠛꠥꠖꠞ ꠛꠤꠞꠥꠖ꠆ꠖꠦ ꠀꠞ ꠔꠣꠘ ꠀꠟ-ꠝꠍꠤꠞ ꠛꠤꠞꠥꠖ꠆ꠖꠦ।
ACT 4:27 ꠔꠥꠝꠣꠞ ꠙꠛꠤꠔ꠆ꠞ ꠉꠥꠟꠣꠝ ꠁꠍꠣ, ꠎꠦꠘꠞꠦ ꠔꠥꠝꠤ ꠀꠟ-ꠝꠍꠤ ꠇꠞꠤꠀ ꠖꠥꠘꠤꠀꠔ ꠙꠣꠑꠣꠁꠍ, ꠔꠣꠘ ꠛꠤꠞꠥꠖ꠆ꠖꠦ ꠞꠣꠎꠣ ꠢꠦꠞꠥꠖ ꠀꠞ ꠙꠘ꠆ꠔꠤꠅ ꠙꠤꠟꠣꠔ, ꠅꠃ ꠡꠢꠞꠅ ꠅ-ꠁꠢꠥꠖꠤ ꠀꠞ ꠛꠘꠤ ꠁꠍꠞꠣꠁꠟꠞ ꠟꠉꠦ ꠄꠇꠈꠣꠘꠅ ꠅꠁꠍꠤꠟ।
ACT 4:28 ꠔꠥꠝꠣꠞ ꠝꠞ꠆ꠎꠤ ꠀꠞ ꠔꠥꠝꠣꠞ ꠇꠥꠖꠞꠔꠦ ꠎꠦꠔꠣ ꠊꠐꠣꠞ ꠟꠣꠉꠤ ꠔꠥꠝꠤ ꠀꠉꠦꠃ ꠑꠤꠇ ꠇꠞꠤ ꠞꠣꠈꠤꠍꠟꠣꠄ, ꠔꠣꠞꠣ ꠅꠃꠔꠣꠃ ꠊꠐꠣꠁꠍꠦ।
ACT 4:29 ꠅꠈꠘ ꠅ ꠝꠣꠟꠤꠇ, ꠔꠣꠞꠣ ꠀꠝꠞꠣꠞꠦ ꠇꠤꠟꠣ ꠒꠞ ꠖꠦꠈꠣꠁꠞꠣ, ꠔꠥꠝꠤ ꠈꠤꠀꠟ ꠇꠞꠅ, ꠔꠥꠝꠣꠞ ꠉꠥꠟꠣꠝ ꠅꠇꠟꠞꠦ ꠅꠃꠟꠣ ꠔꠣꠇ꠆ꠇꠔ ꠖꠦꠅ ꠎꠣꠔꠦ, ꠙꠥꠞꠣꠙꠥꠞ ꠡꠣꠅꠡ ꠇꠞꠤꠀ ꠔꠥꠝꠣꠞ ꠇꠣꠟꠣꠝ ꠔꠛꠟꠤꠉ ꠇꠞꠔꠣꠝ ꠙꠣꠞꠤ।
ACT 4:30 ꠛꠦꠝꠣꠞꠤ ꠅꠇꠟꠞ ꠡꠤꠚꠣꠞ ꠟꠣꠉꠤ ꠔꠥꠝꠣꠞ ꠀꠔ ꠝꠥꠛꠣꠞꠇ ꠛꠣꠠꠣꠁ ꠖꠦꠅ, ꠀꠞ ꠔꠥꠝꠣꠞ ꠙꠣꠇ ꠉꠥꠟꠣꠝ ꠁꠍꠣꠞ ꠘꠣꠝꠦ ꠝꠥꠎꠦꠎꠣ ꠀꠞ ꠇꠦꠞꠣꠝꠔꠤ ꠖꠦꠈꠣꠘꠤꠞ ꠔꠚꠤꠇ ꠖꠦꠅ।”
ACT 4:31 ꠔꠣꠞꠣꠞ ꠖꠥꠀ ꠇꠞꠣꠞ ꠛꠣꠖꠦ ꠎꠦ ꠎꠣꠉꠣꠔ ꠔꠣꠞꠣ ꠖꠟꠣ ꠅꠁꠍꠟꠣ, ꠢꠤ ꠎꠣꠉꠣ ꠇꠣꠙꠤꠀ ꠃꠑꠟ। ꠀꠞ ꠔꠣꠞꠣ ꠢꠇꠟꠦ ꠙꠣꠇ ꠞꠥꠢꠦ ꠇꠣꠝꠤꠟ ꠅꠁꠀ ꠡꠣꠅꠡ ꠇꠞꠤꠀ ꠀꠟ꠆ꠟꠣꠞ ꠇꠣꠟꠣꠝ ꠔꠛꠟꠤꠉ ꠇꠞꠣꠔ ꠞꠁꠟꠣ।
ACT 4:32 ꠎꠦꠞꠣ ꠀꠟ-ꠝꠍꠤꠞ ꠃꠙꠞꠦ ꠁꠝꠣꠘ ꠀꠘꠍꠤꠟꠣ, ꠔꠣꠞꠣꠞ ꠄꠇ ꠝꠘ ꠀꠞ ꠄꠇ ꠖꠤꠟ ꠀꠍꠤꠟ। ꠔꠣꠞꠣ ꠄꠇꠎꠘꠦꠅ ꠘꠤꠎꠞ ꠗꠘ-ꠖꠃꠟꠔꠞꠦ ꠘꠤꠎꠞ ꠇꠁꠀ ꠖꠣꠛꠤ ꠇꠞꠔꠣ ꠘꠣ, ꠢꠇ꠆ꠇꠟꠔꠣꠃ ꠢꠇꠟꠞ ꠖꠞꠇꠣꠞ ꠝꠔ ꠈꠞꠌ ꠇꠞꠔꠣ।
ACT 4:33 ꠍꠣꠢꠣꠛꠤ ꠅꠇꠟꠦ ꠈꠥꠛ ꠢꠤꠝ꠆ꠝꠔ ꠇꠞꠤꠀ, ꠢꠎꠞꠔ ꠁꠍꠣꠞ ꠝꠥꠞ꠆ꠖꠣ ꠕꠣꠇꠤ ꠎꠤꠘ꠆ꠖꠣ ꠅꠁꠀ ꠃꠑꠣꠞ ꠛꠤꠡꠄꠄ ꠔꠛꠟꠤꠉ ꠇꠞꠔꠣ, ꠀꠞ ꠔꠣꠞꠣ ꠢꠇ꠆ꠇꠟꠞ ꠃꠙꠞꠦ ꠀꠟ꠆ꠟꠣꠞ ꠈꠣꠍ ꠞꠢꠝꠔ ꠀꠍꠤꠟ।
ACT 4:34 ꠔꠣꠞꠣꠞ ꠝꠣꠎꠦ ꠇꠦꠃ ꠅꠜꠣꠛꠤ ꠀꠍꠟꠣ ꠘꠣ, ꠇꠣꠞꠘ ꠎꠦꠞꠣꠞ ꠎꠝꠤꠘ ꠛꠣ ꠛꠣꠠꠤ ꠀꠍꠤꠟ ꠔꠣꠞꠣ ꠁꠔꠣ ꠢꠇꠟꠔꠣ ꠛꠦꠌꠤꠀ,
ACT 4:35 ꠍꠣꠢꠣꠛꠤ ꠅꠇꠟꠞ ꠉꠦꠍꠦ ꠀꠘꠤꠀ ꠖꠣꠘ ꠇꠞꠤꠟꠤꠔꠣ, ꠛꠣꠖꠦ ꠎꠣꠞ ꠎꠦꠟꠣ ꠉꠞꠎ ꠔꠣꠞꠦ ꠅꠃꠟꠣ ꠖꠦꠅꠀ ꠅꠁꠔ।
ACT 4:36 ꠀꠞ ꠁꠃꠍꠥꠚ ꠘꠣꠝꠦ ꠟꠦꠛꠤꠞ ꠛꠋꠡꠞ ꠄꠇꠎꠘ ꠝꠣꠘꠥꠡ ꠀꠍꠟꠣ, ꠔꠣꠘ ꠛꠣꠠꠤ ꠍꠣꠁꠙ꠆ꠞꠣꠍ ꠖꠤꠙ, ꠍꠣꠢꠣꠛꠤ ꠅꠇꠟꠦ ꠔꠣꠘꠞꠦ ꠒꠣꠇꠤꠔꠣ ꠛꠣꠞ꠆ꠘꠣꠛꠣꠍ, ꠝꠣꠘꠤ ꠃꠔꠡꠣꠢ ꠎꠥꠉꠣꠅꠞꠣ,
ACT 4:37 ꠔꠣꠘ ꠄꠇꠎꠞꠣ ꠎꠝꠤꠘ ꠀꠍꠤꠟ, ꠔꠣꠁꠘꠅ ꠔꠣꠘ ꠎꠝꠤꠘꠈꠣꠘ ꠛꠦꠌꠤꠀ ꠐꠦꠇꠣ ꠀꠘꠤꠀ ꠍꠣꠢꠣꠛꠤ ꠅꠇꠟꠞ ꠇꠖꠝꠅ ꠖꠣꠘ ꠇꠞꠟꠣ।
ACT 5:1 ꠅꠃ ꠡꠝꠄ ꠅꠘꠘꠤꠅ ꠘꠣꠝꠦ ꠄꠇꠎꠘ ꠝꠣꠘꠥꠡ ꠀꠞ ꠔꠣꠞ ꠛꠃ ꠍꠣꠚꠤꠞꠣꠄ ꠔꠣꠞꠣꠞꠅ ꠄꠇꠎꠞꠣ ꠎꠝꠤꠘ ꠛꠦꠌꠤꠟꠣ,
ACT 5:2 ꠛꠦꠌꠤꠀ ꠔꠣꠞ ꠛꠃꠞ ꠎꠣꠘꠣ ꠝꠘ꠆ꠔꠦꠃ ꠎꠝꠤꠘꠞ ꠇꠤꠍꠥ ꠐꠦꠇꠣ ꠘꠤꠎꠞ ꠟꠣꠉꠤ ꠟꠥꠇꠣꠁꠀ, ꠛꠣꠇꠤ ꠐꠦꠇꠣ ꠍꠣꠢꠣꠛꠤ ꠅꠇꠟꠞ ꠙꠣꠅꠔ ꠖꠤꠟꠣ।
ACT 5:3 ꠔꠦꠃ ꠙꠤꠔꠞꠦ ꠇꠁꠟꠣ, “ꠅꠘꠘꠤꠅ, ꠡꠄꠔꠣꠘꠦ ꠇꠦꠝꠘꠦ ꠔꠥꠝꠣꠞ ꠖꠤꠟꠞꠦ ꠖꠈꠟ ꠇꠞꠟ, ꠔꠥꠝꠤ ꠙꠣꠇ ꠞꠥꠢꠥꠞ ꠉꠦꠍꠦ ꠇꠤꠟꠣ ꠝꠤꠍꠣ ꠝꠣꠔꠟꠣꠄ, ꠀꠞ ꠎꠝꠤꠘ ꠛꠦꠌꠣꠞ ꠐꠦꠇꠣ ꠇꠤꠍꠥ ꠟꠥꠇꠣꠁ ꠞꠣꠈꠟꠣꠄ?
ACT 5:4 ꠛꠦꠌꠣꠞ ꠀꠉꠦ ꠎꠝꠤꠘꠈꠣꠘ ꠇꠤꠔꠣ ꠔꠥꠝꠣꠞ ꠀꠍꠤꠟ ꠘꠣ ꠘꠤ? ꠀꠞ ꠛꠦꠌꠣꠞ ꠛꠣꠖꠦꠅ ꠔ ꠁ ꠐꠦꠇꠣ ꠔꠥꠝꠣꠞ ꠄꠈꠔꠤꠀꠞꠅ ꠀꠍꠤꠟ, ꠔꠦ ꠇꠦꠘꠦ ꠔꠥꠝꠣꠞ ꠜꠤꠔꠞꠦ ꠁꠔꠣ ꠢꠣꠝꠣꠁꠟ? ꠔꠥꠝꠤ ꠔ ꠝꠣꠘꠡꠞ ꠉꠦꠍꠦ ꠝꠤꠍꠣ ꠝꠣꠔꠍ ꠘꠣ, ꠀꠟ꠆ꠟꠣꠞ ꠉꠦꠍꠦꠃ ꠝꠤꠍꠣ ꠝꠣꠔꠟꠣꠄ।”
ACT 5:5 ꠁꠔꠣ ꠢꠥꠘꠣꠞ ꠟꠉꠦ ꠟꠉꠦꠃ ꠅꠘꠘꠤꠅ ꠝꠣꠐꠤꠔ ꠙꠠꠤꠀ ꠝꠞꠤꠉꠦꠟ। ꠀꠞ ꠎꠦꠞꠣ ꠁ ꠊꠐꠘꠣ ꠢꠥꠘꠟ ꠔꠣꠞꠣ ꠢꠇꠟꠦꠃ ꠈꠥꠛ ꠒꠞꠣꠁꠉꠦꠟ।
ACT 5:6 ꠛꠣꠖꠦ ꠎꠥꠀꠘ ꠅꠇꠟꠦ ꠀꠁꠀ ꠔꠣꠞꠦ ꠇꠣꠚꠘ ꠚꠤꠘ꠆ꠖꠣꠁꠀ ꠛꠣꠞꠦ ꠘꠤꠀ ꠝꠣꠐꠤ ꠖꠤꠟꠣ।
ACT 5:7 ꠅꠘꠥꠝꠣꠘ ꠔꠤꠘ ꠊꠘ꠆ꠐꠣ ꠛꠣꠖꠦ ꠔꠣꠞ ꠛꠃꠅ ꠢꠘꠅ ꠀꠁꠟ, ꠅꠁꠟꠦ ꠀꠉꠦ ꠇꠤꠔꠣ ꠊꠐꠍꠦ ꠔꠣꠁ ꠎꠣꠘꠔ ꠘꠣ।
ACT 5:8 ꠔꠦꠃ ꠙꠤꠔꠞꠦ ꠔꠣꠁꠞꠦ ꠎꠤꠇꠣꠁꠟꠣ, “ꠀꠝꠣꠞꠦ ꠇꠅ ꠌꠣꠁꠘ, ꠔꠥꠝꠞꠣ ꠁ ꠎꠝꠤꠘ ꠅꠔ ꠐꠦꠇꠣꠄ ꠛꠦꠌꠤꠍꠟꠣꠄ ꠘꠤ?” ꠔꠣꠁ ꠇꠁꠟ, “ꠎꠤꠅꠄ ꠅꠔ ꠐꠦꠇꠣꠄꠃ।”
ACT 5:9 ꠅꠃ ꠙꠤꠔꠞꠦ ꠇꠁꠟꠣ, “ꠝꠣꠛꠥꠖꠞ ꠞꠥꠢꠥꠞꠦ ꠙꠞꠤꠇ꠆ꠇꠣ ꠇꠞꠣꠞ ꠟꠣꠉꠤ ꠔꠥꠝꠞꠣ ꠇꠦꠘꠦ ꠄꠇꠝꠔ ꠅꠁꠟꠣꠄ? ꠖꠦꠈꠅ, ꠎꠦꠞꠣ ꠔꠥꠝꠣꠞ ꠎꠣꠝꠣꠁꠞꠦ ꠖꠣꠚꠘ ꠇꠞꠍꠦ ꠔꠣꠞꠣ ꠅꠈꠘ ꠖꠞꠎꠣꠞ ꠍꠣꠝꠘꠦ ꠀꠁꠅꠞ, ꠔꠣꠞꠣ ꠔꠥꠝꠣꠞꠦꠅ ꠛꠣꠞꠦ ꠟꠁꠀ ꠎꠣꠁꠛ।”
ACT 5:10 ꠟꠉꠦ ꠟꠉꠦꠃ ꠍꠣꠚꠤꠞꠣ ꠙꠤꠔꠞꠞ ꠙꠣꠅꠔ ꠙꠠꠤꠀ ꠝꠞꠤꠉꠦꠟ, ꠀꠞ ꠅꠃ ꠎꠥꠀꠘ ꠅꠇꠟꠦ ꠊꠞꠅ ꠀꠁꠀ ꠔꠣꠁꠞꠦ ꠝꠞꠣ ꠖꠦꠈꠤꠀ ꠛꠣꠞꠦ ꠘꠤꠀ ꠎꠣꠝꠣꠁꠞ ꠇꠣꠘ꠆ꠖꠣꠔ ꠝꠣꠐꠤ ꠖꠤꠟꠣ।
ACT 5:11 ꠔꠦꠃ ꠢꠇ꠆ꠇꠟ ꠎꠝꠣꠔ, ꠀꠞ ꠎꠔ ꠝꠣꠘꠡꠦ ꠁꠔꠣ ꠢꠥꠘꠟ, ꠢꠇꠟꠦꠃ ꠈꠥꠛ ꠒꠞꠣꠁꠟ।
ACT 5:12 ꠍꠣꠢꠣꠛꠤ ꠅꠇꠟꠞ ꠀꠔꠣꠘꠦ ꠝꠣꠘꠡꠞ ꠝꠣꠎꠦ ꠛꠃꠔ ꠝꠥꠎꠦꠎꠣ ꠀꠞ ꠇꠦꠞꠣꠝꠔꠤ ꠘꠤꠡꠣꠘꠣ ꠎꠣꠁꠞ ꠅꠁꠔ, ꠔꠣꠞꠣ ꠢꠇꠟꠦ ꠄꠇ ꠖꠤꠟ ꠅꠁꠀ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠞ ꠍꠥꠟꠣꠁꠝꠣꠘꠞ ꠛꠣꠞꠤꠘ꠆ꠖꠣꠔ ꠖꠟꠣ ꠅꠁꠔꠣ।
ACT 5:13 ꠎꠥꠖꠤꠅ ꠝꠣꠘꠡꠦ ꠔꠣꠞꠣꠞꠦ ꠁꠎ꠆ꠎꠔ ꠇꠞꠔꠣ, ꠔꠣ-ꠅ ꠀꠞ ꠇꠦꠃ ꠔꠣꠞꠣꠞ ꠟꠉꠦ ꠝꠤꠡꠔꠦ ꠡꠣꠅꠡ ꠇꠞꠟ ꠘꠣ।
ACT 5:14 ꠀꠞ ꠖꠤꠘꠦ ꠖꠤꠘꠦ ꠛꠃꠔ ꠛꠦꠐꠣꠁꠘ-ꠛꠦꠐꠤꠘ꠆ꠔꠦ ꠁꠝꠣꠘ ꠀꠘꠤꠀ ꠀꠟ꠆ꠟꠣꠞ ꠖꠟꠅ ꠢꠣꠝꠣꠘꠤꠔ ꠟꠣꠉꠟꠣ।
ACT 5:15 ꠀꠞ ꠝꠣꠘꠡꠦ ꠛꠦꠝꠣꠞꠤ ꠅꠇꠟꠞꠦ ꠛꠣꠞꠦ ꠀꠘꠤꠀ ꠙꠕꠞ ꠇꠣꠘ꠆ꠖꠣꠄ ꠇꠣꠘ꠆ꠖꠣꠄ ꠢꠥꠔꠣꠁꠀ ꠀꠞ ꠛꠤꠍꠘꠣ ꠙꠣꠔꠤꠀ ꠛꠅꠀꠁꠀ ꠕꠁꠔꠣ, ꠎꠣꠔꠦ ꠙꠤꠔꠞꠦ ꠌꠟꠣ-ꠚꠤꠞꠣꠞ ꠡꠝꠄ ꠅꠘ꠆ꠔꠔ ꠔꠣꠘ ꠍꠦꠛꠣ ꠈꠣꠘꠅ ꠔꠣꠞꠣ ꠇꠦꠃꠞꠞ ꠃꠙꠞꠦ ꠙꠠꠦ।
ACT 5:16 ꠀꠞ ꠎꠦꠞꠥꠎꠣꠟꠦꠝꠞ ꠇꠣꠘ꠆ꠖꠣ-ꠇꠣꠍꠣꠞ ꠉꠣꠃꠀꠁꠘ ꠕꠣꠇꠤ ꠝꠣꠘꠡꠦ ꠔꠣꠞꠣꠞ ꠛꠦꠝꠣꠞꠤ ꠅꠇꠟꠞꠦ ꠀꠞ ꠎꠤꠘꠞ ꠀꠍꠞ ꠀꠟꠣ ꠝꠣꠘꠡꠞꠦ ꠟꠁꠀ ꠀꠁꠀ ꠜꠤꠠ ꠎꠝꠣꠁꠔ, ꠔꠣꠞꠣ ꠢꠇ꠆ꠇꠟꠃ ꠜꠣꠟꠣ ꠅꠁꠔ।
ACT 5:17 ꠁꠔꠣ ꠖꠦꠈꠤꠀ ꠙꠞꠗꠣꠘ ꠁꠝꠣꠝ ꠀꠞ ꠔꠣꠘ ꠟꠉꠞ ꠍꠤꠖ꠆ꠖꠦꠇꠤꠀ ꠅꠇꠟ ꠁꠋꠡꠣꠄ ꠎꠟꠤ-ꠙꠥꠠꠤ ꠃꠑꠟꠣ,
ACT 5:18 ꠀꠞ ꠍꠣꠢꠣꠛꠤ ꠅꠇꠟꠞꠦ ꠗꠞꠤꠀ ꠡꠞꠇꠣꠞꠤ ꠎꠦꠟꠅ ꠢꠣꠞꠣꠁꠟꠣ।
ACT 5:19 ꠅꠁꠟꠦ ꠞꠣꠁꠔꠇꠥ ꠝꠣꠛꠥꠖꠞ ꠄꠇꠎꠘ ꠚꠤꠞꠤꠡ꠆ꠔꠣꠄ ꠎꠦꠟꠞ ꠖꠥꠀꠞ ꠈꠥꠟꠤꠀ ꠔꠣꠞꠣꠞꠦ ꠛꠣꠞꠦ ꠀꠘꠤꠀ ꠇꠁꠟꠣ,
ACT 5:20 “ꠔꠥꠝꠞꠣ ꠎꠣꠅ, ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠅ ꠃꠛꠣꠁꠀ ꠝꠣꠘꠡꠞ ꠉꠦꠍꠦ ꠘꠄꠀ ꠎꠤꠘ꠆ꠖꠦꠉꠤꠞ ꠇꠕꠣ ꠇꠅ।”
ACT 5:21 ꠁꠔꠣ ꠢꠥꠘꠤꠀ ꠔꠣꠞꠣ ꠈꠥꠛ ꠡꠇꠣꠟꠦ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠅ ꠢꠣꠝꠣꠁꠀ ꠝꠣꠘꠡꠞꠦ ꠘꠍꠤꠅꠔ ꠇꠞꠣꠔ ꠟꠣꠉꠟꠣ। ꠁꠛꠣꠄ ꠙꠞꠗꠣꠘ ꠁꠝꠣꠝ ꠀꠞ ꠔꠣꠘ ꠟꠉꠞ ꠢꠇꠟꠦ ꠀꠁꠀ ꠖꠦꠡꠞ ꠚꠔꠥꠀ ꠇꠝꠤꠐꠤꠞꠦ ꠀꠞ ꠛꠘꠤ ꠁꠍꠞꠣꠁꠟꠞ ꠝꠥꠞꠛ꠆ꠛꠤ ꠅꠇꠟꠞꠦ ꠄꠇꠈꠣꠘꠅ ꠖꠟꠣ ꠇꠞꠟꠣ, ꠀꠞ ꠍꠣꠢꠣꠛꠤ ꠅꠇꠟꠞꠦ ꠀꠘꠣꠞ ꠟꠣꠉꠤ ꠎꠦꠟ ꠈꠣꠘꠣꠔ ꠝꠣꠘꠥꠡ ꠙꠣꠑꠣꠁꠟꠣ।
ACT 5:22 ꠅꠁꠟꠦ ꠔꠣꠞꠣ ꠉꠤꠀ ꠄꠞꠣꠞꠦ ꠎꠦꠟ ꠈꠣꠘꠣꠔ ꠙꠣꠁꠟꠣ ꠘꠣ। ꠅꠃ ꠔꠣꠞꠣ ꠚꠤꠞꠤꠀ ꠀꠁꠀ ꠈꠛꠞ ꠇꠁꠟꠣ,
ACT 5:23 “ꠀꠝꠞꠣ ꠖꠦꠈꠍꠤ, ꠎꠦꠟꠞ ꠖꠞꠎꠣ ꠡꠇ꠆ꠔ ꠇꠞꠤ ꠟꠣꠉꠣꠁꠟ, ꠀꠞ ꠖꠥꠀꠞꠅ ꠖꠥꠀꠞꠅ ꠙꠣꠞꠣꠖꠣꠞ ꠃꠛꠣꠁ ꠞꠁꠍꠂꠘ, ꠅꠁꠟꠦ ꠖꠥꠀꠞ ꠈꠥꠟꠤꠀ ꠜꠤꠔꠞꠦ ꠇꠦꠃꠞꠞꠦ ꠙꠣꠁꠟꠣꠝ ꠘꠣ।”
ACT 5:24 ꠁꠔꠣ ꠢꠥꠘꠤꠀ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠞ ꠛꠠ ꠖꠣꠞꠉꠣꠄ ꠀꠞ ꠛꠠ ꠁꠝꠣꠝ ꠅꠇꠟꠦ ꠛꠦꠅꠇꠥꠚ ꠅꠁꠀ ꠌꠤꠘ꠆ꠔꠣꠔ ꠙꠠꠟꠣ, ꠄꠞ ꠚꠟ ꠇꠤꠔꠣ ꠅꠁꠛ।
ACT 5:25 ꠄꠞꠝꠣꠎꠦ ꠇꠥꠘꠥ ꠄꠇꠎꠘꠦ ꠀꠁꠀ ꠔꠣꠞꠣꠞꠦ ꠈꠛꠞ ꠖꠤꠟ, “ꠖꠦꠈꠃꠇ꠆ꠇꠣ, ꠀꠙꠘꠣꠞꠣ ꠎꠦ ꠝꠣꠘꠡꠞꠦ ꠎꠦꠟꠅ ꠢꠣꠞꠣꠁꠍꠟꠣ, ꠔꠣꠞꠣ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠅ ꠃꠛꠣꠁꠀ ꠝꠣꠘꠡꠞꠦ ꠘꠍꠤꠅꠔ ꠇꠞꠦꠞ।”
ACT 5:26 ꠔꠦꠃ ꠛꠠ ꠖꠣꠞꠉꠣꠄ ꠔꠣꠘ ꠍꠤꠙꠣꠁ ꠖꠟꠞꠦ ꠟꠁꠀ ꠢꠘꠅ ꠉꠤꠀ ꠍꠣꠢꠣꠛꠤ ꠅꠇꠟꠞꠦ ꠗꠞꠤꠀ ꠀꠘꠟꠣ, ꠅꠁꠟꠦ ꠎꠥꠞ-ꠎꠛꠞꠖꠡ꠆ꠔꠤ ꠇꠞꠟꠣ ꠘꠣ ꠇꠣꠞꠘ ꠔꠣꠞꠣ ꠒꠞꠣꠁꠉꠦꠟꠣ, ꠝꠣꠘꠡꠦ ꠔꠣꠞꠣꠞꠦ ꠙꠣꠔ꠆ꠔꠞꠖꠤ ꠝꠣꠞꠔꠣ ꠙꠣꠞꠂꠘ।
ACT 5:27 ꠛꠣꠖꠦ ꠍꠣꠢꠣꠛꠤ ꠅꠇꠟꠞꠦ ꠀꠘꠤꠀ ꠔꠣꠞꠣ ꠚꠔꠥꠀ ꠇꠝꠤꠐꠤꠞ ꠍꠣꠝꠘꠦ ꠃꠛꠣ ꠇꠞꠣꠁꠟꠣ, ꠀꠞ ꠙꠞꠗꠣꠘ ꠁꠝꠣꠝꠦ ꠄꠞꠣꠞꠦ ꠎꠤꠇꠣꠁꠟꠣ,
ACT 5:28 “ꠀꠝꠞꠣ ꠔꠥꠝꠞꠣꠞꠦ ꠖꠠꠣꠁꠀ ꠢꠥꠇꠥꠝ ꠖꠤꠍꠟꠣꠝ, ꠁ ꠘꠣꠝꠦ ꠇꠥꠘꠥ ꠘꠍꠤꠅꠔ ꠘꠣ ꠇꠞꠣꠞ ꠟꠣꠉꠤ, ꠔꠣ-ꠅ ꠀꠡ꠆ꠔꠣ ꠎꠦꠞꠥꠎꠣꠟꠦꠝ ꠎꠥꠠꠤ ꠔꠥꠝꠞꠣꠞ ꠔꠣꠟꠤꠝꠦ ꠜꠞꠤꠟꠤꠍ, ꠀꠞ ꠅꠃ ꠎꠘꠞ ꠈꠥꠘꠞ ꠜꠣꠞ ꠀꠝꠞꠣꠞ ꠃꠙꠞꠦ ꠚꠣꠟꠣꠁꠔꠣꠄ ꠌꠣꠁꠞꠣꠄ।”
ACT 5:29 ꠔꠦꠃ ꠙꠤꠔꠞ ꠀꠞ ꠔꠣꠘ ꠟꠉꠞ ꠍꠣꠢꠣꠛꠤ ꠅꠇꠟꠦ ꠎꠥꠀꠙ ꠖꠤꠟꠣ, “ꠝꠣꠘꠡꠞ ꠢꠥꠇꠥꠝ ꠝꠣꠘꠣꠞ ꠌꠣꠁꠔꠦ ꠀꠟ꠆ꠟꠣꠞ ꠢꠥꠇꠥꠝ ꠝꠣꠘꠣ ꠔ ꠚꠞꠎ।
ACT 5:30 ꠀꠝꠞꠣꠞ ꠛꠣꠚ-ꠖꠣꠖꠣꠞ ꠀꠟ꠆ꠟꠣꠄ ꠢꠃ ꠁꠍꠣꠞꠦ ꠝꠥꠞ꠆ꠖꠣ ꠕꠣꠇꠤ ꠎꠤꠘ꠆ꠖꠣ ꠇꠞꠍꠂꠘ, ꠎꠦꠘꠞꠦ ꠀꠙꠘꠣꠞꠣ ꠉꠣꠍꠅ ꠟꠐꠇꠣꠁꠀ ꠎꠣꠘꠦ ꠝꠣꠞꠍꠟꠣ,
ACT 5:31 ꠀꠟ꠆ꠟꠣꠄ ꠔꠣꠘꠞꠦꠃ ꠔꠞꠣꠘꠦꠀꠟꠣ ꠀꠞ ꠛꠣꠖꠡꠣ ꠛꠣꠘꠣꠁꠀ ꠘꠤꠎꠞ ꠒꠣꠁꠘ ꠉꠣꠟꠣꠔ ꠛꠁꠛꠣꠞ ꠁꠎ꠆ꠎꠔ ꠖꠣꠘ ꠇꠞꠍꠂꠘ, ꠎꠣꠔꠦ ꠔꠣꠁꠘ ꠛꠘꠤ ꠁꠍꠞꠣꠁꠟ ꠅꠇꠟꠞꠦ ꠔꠃꠛꠣ ꠇꠞꠣꠞ ꠡꠥꠎꠥꠉ, ꠀꠞ ꠉꠥꠘꠣꠞ ꠝꠣꠚꠤ ꠖꠤꠔꠣ ꠙꠣꠞꠂꠘ।
ACT 5:32 ꠀꠝꠞꠣ ꠁ ꠢꠇꠟꠔꠣꠞ ꠡꠣꠇ꠆ꠇꠤ, ꠀꠞ ꠀꠟ꠆ꠟꠣꠄ ꠔꠣꠘ ꠘꠤꠎꠞ ꠢꠥꠇꠥꠝ ꠝꠣꠘꠞꠣ ꠛꠘ꠆ꠖꠣ ꠅꠇꠟꠞꠦ ꠎꠦ ꠙꠣꠇ ꠞꠥꠢꠥ ꠖꠤꠍꠂꠘ, ꠢꠃ ꠙꠣꠇ ꠞꠥꠢꠥꠅ ꠄꠞ ꠡꠣꠇ꠆ꠇꠤ।”
ACT 5:33 ꠁꠔꠣ ꠢꠥꠘꠤꠀ ꠔꠣꠞꠣ ꠉꠥꠍꠣꠄ ꠀꠉꠥꠁꠘ ꠅꠁꠉꠦꠟꠣ, ꠀꠞ ꠍꠣꠢꠣꠛꠤ ꠅꠇꠟꠞꠦ ꠎꠣꠘꠦ ꠝꠣꠞꠣꠞ ꠟꠣꠉꠤ ꠘꠤꠅꠔ ꠇꠞꠟꠣ।
ACT 5:34 ꠅꠁꠟꠦ ꠅꠃ ꠝꠎꠟꠤꠍ ꠕꠣꠇꠤ ꠉꠝꠟꠤꠄꠟ ꠘꠣꠝꠦ ꠚꠞꠤꠡꠤ ꠝꠎꠛꠞ ꠄꠇꠎꠘ ꠝꠣꠘꠥꠡ ꠃꠛꠣꠁꠟꠣ, ꠔꠣꠁꠘ ꠄꠇꠎꠘ ꠘꠣꠝꠇꠞꠣ ꠝꠃꠟꠣꠘꠣ ꠀꠍꠟꠣ, ꠢꠇ꠆ꠇꠟꠦ ꠔꠣꠘꠞꠦ ꠁꠎ꠆ꠎꠔ ꠇꠞꠔ, ꠔꠣꠁꠘ ꠍꠣꠢꠣꠛꠤ ꠅꠇꠟꠞꠦ ꠕꠥꠠꠣ ꠛꠣꠞꠦ ꠘꠦꠅꠀꠞ ꠢꠥꠇꠥꠝ ꠖꠤꠟꠣ।
ACT 5:35 ꠛꠣꠖꠦ ꠔꠣꠁꠘ ꠚꠔꠥꠀ ꠇꠝꠤꠐꠤꠞ ꠝꠣꠘꠡꠞꠦ ꠇꠁꠟꠣ, “ꠅ ꠛꠘꠤ ꠁꠍꠞꠣꠁꠟ ꠅꠇꠟ, ꠁ ꠝꠣꠘꠥꠡ ꠅꠇꠟꠞꠦ ꠔꠥꠝꠞꠣ ꠎꠦꠔꠣ ꠇꠞꠔꠣꠄ ꠌꠣꠁꠞꠣꠄ ꠁ ꠛꠦꠙꠣꠞꠦ ꠢꠥꠡꠤꠀꠞ ꠅꠅ।
ACT 5:36 ꠢꠥꠘꠅ, ꠅꠃ ꠇꠄꠖꠤꠘ ꠀꠉꠦ ꠕꠥꠖꠣ ꠘꠣꠝꠦ ꠄꠇꠎꠘ ꠝꠣꠘꠥꠡ ꠀꠁꠀ ꠈꠥꠛ ꠛꠠ-ꠝꠣꠘꠡꠤ ꠖꠦꠈꠣꠁꠍꠤꠟ, ꠀꠞ ꠅꠘꠥꠝꠣꠘ ꠌꠣꠁꠞ-ꠡ ꠝꠣꠘꠥꠡ ꠔꠣꠞ ꠖꠟꠅ ꠢꠣꠝꠣꠁꠍꠤꠟ। ꠔꠣꠞꠦ ꠈꠥꠘ ꠇꠞꠣ ꠅꠁꠟ, ꠀꠞ ꠔꠣꠞ ꠖꠟꠞ ꠢꠇꠟ ꠝꠣꠘꠥꠡ ꠌꠣꠁꠞꠅꠛꠣꠄ ꠍꠤꠔ꠆ꠞꠤꠉꠦꠍꠦ, ꠇꠦꠃ ꠖꠟꠅ ꠞꠁꠍꠦ ꠘꠣ।
ACT 5:37 ꠛꠣꠖꠦ ꠉꠣꠟꠤꠟꠞ ꠄꠢꠥꠖꠣ ꠀꠁꠀ ꠖꠦꠡꠞ ꠝꠣꠘꠥꠡ ꠉꠘꠘꠣꠞ ꠛꠍꠞ, ꠄꠇꠖꠟ ꠝꠣꠘꠡꠞꠦ ꠔꠣꠞ ꠖꠟꠅ ꠢꠣꠞꠣꠁꠀ ꠚꠤꠔꠘꠣ ꠈꠣꠠꠣ ꠇꠞꠟ, ꠢꠦ-ꠅ ꠝꠞꠤꠉꠦꠟ, ꠀꠞ ꠔꠣꠞ ꠟꠉꠞ ꠢꠇ꠆ꠇꠟꠅ ꠍꠤꠔ꠆ꠞꠤꠉꠦꠍꠦ।
ACT 5:38 ꠁꠔꠣ ꠖꠦꠈꠤꠀ ꠀꠝꠤ ꠔꠥꠝꠞꠣꠞꠦ ꠇꠁꠞꠣꠝ, ꠔꠥꠝꠞꠣ ꠁ ꠝꠣꠘꠥꠡ ꠅꠇꠟꠞꠦ ꠇꠥꠘ꠆ꠔꠣ ꠇꠞꠤꠅ ꠘꠣ, ꠔꠣꠞꠣꠞꠦ ꠍꠣꠠꠤ ꠖꠦꠅ, ꠔꠣꠞꠣꠞ ꠇꠣꠝ-ꠇꠣꠎ ꠀꠞ ꠘꠤꠅꠔ ꠎꠥꠖꠤ ꠝꠣꠘꠥꠡ ꠕꠣꠇꠤ ꠅꠄ, ꠔꠦ ꠁꠔꠣ ꠄꠝꠘꠦꠃ ꠛꠤꠘꠣꠡ ꠅꠁꠎꠤꠛ।
ACT 5:39 ꠀꠞ ꠎꠥꠖꠤ ꠀꠟ꠆ꠟꠣ ꠕꠣꠇꠤ ꠅꠄ, ꠔꠦ ꠔꠥꠝꠞꠣ ꠔꠣꠞꠣꠞꠦ ꠕꠣꠝꠣꠁꠔꠣꠄ ꠙꠣꠞꠔꠣꠄ ꠘꠣꠄ, ꠇꠤ ꠎꠣꠘꠤ ꠢꠦꠡꠦ ꠖꠦꠈꠣ ꠎꠣꠁꠛ ꠎꠦꠘ, ꠔꠥꠝꠞꠣꠃ ꠀꠟ꠆ꠟꠣꠞ ꠛꠤꠞꠥꠖ꠆ꠖꠦ ꠎꠤꠢꠣꠖ ꠇꠞꠞꠣꠄ।” ꠉꠝꠟꠤꠄꠟꠞ ꠝꠣꠔꠦ ꠘꠦꠔꠣ ꠅꠇꠟ ꠞꠣꠎꠤ ꠅꠁꠟꠣ,
ACT 5:40 ꠔꠣꠞꠣ ꠍꠣꠢꠣꠛꠤ ꠅꠇꠟꠞꠦ ꠇꠣꠍꠣꠔ ꠀꠘꠣꠁꠀ ꠍꠤꠋꠟꠣꠖꠤ ꠝꠣꠞꠟꠣ ꠀꠞ ꠇꠁꠟꠣ, “ꠔꠥꠝꠞꠣ ꠁꠍꠣꠞ ꠘꠣꠝꠦ ꠇꠥꠘ꠆ꠔꠣ ꠝꠣꠔꠤꠅ ꠘꠣ।” ꠢꠦꠡꠦ ꠔꠣꠞꠣꠞꠦ ꠍꠣꠠꠤ ꠖꠤꠟꠣ।
ACT 5:41 ꠔꠦꠃ ꠍꠣꠢꠣꠛꠤ ꠅꠇꠟꠦ, ꠁꠍꠣꠞ ꠘꠣꠝꠞ ꠟꠣꠉꠤ ꠛꠦꠁꠎ꠆ꠎꠔꠤ ꠇꠣꠝꠣꠘꠤꠞ ꠎꠥꠇꠣ ꠅꠁꠍꠂꠘ ꠉꠔꠤꠇꠦ ꠈꠥꠡꠤ ꠅꠁꠀ ꠚꠥꠞ꠆ꠔꠤ ꠇꠞꠤ ꠇꠞꠤ ꠝꠎꠟꠤꠍ ꠕꠣꠇꠤ ꠛꠣꠞ ꠅꠁꠀ ꠉꠦꠟꠣ।
ACT 5:42 ꠍꠣꠢꠣꠛꠤ ꠅꠇꠟꠦ ꠙꠞꠔꠦꠇ ꠖꠤꠘ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠅ ꠀꠞ ꠛꠣꠠꠤꠄ ꠛꠣꠠꠤꠄ ꠉꠤꠀ ꠘꠍꠤꠅꠔ ꠇꠞꠔꠣ, ꠀꠞ ꠁꠍꠣꠃ ꠎꠦꠘ ꠀꠟ-ꠝꠍꠤ ꠁꠈꠣꠘ ꠔꠛꠟꠤꠉ ꠇꠞꠣ ꠛꠣꠖ ꠖꠤꠔꠣ ꠘꠣ।
ACT 6:1 ꠢꠤ ꠡꠝꠄ ꠃꠝ꠆ꠝꠔ ꠅꠇꠟꠞ ꠙꠞꠤꠝꠣꠘ ꠛꠣꠠꠔꠦꠃ ꠀꠍꠤꠟ, ꠀꠞ ꠃꠝ꠆ꠝꠔ ꠅꠇꠟꠞ ꠝꠣꠎꠦ ꠎꠦꠔꠣ ꠁꠢꠥꠖꠤ ꠅꠇꠟꠦ ꠁꠃꠘꠣꠘꠤ ꠜꠣꠡꠣꠄ ꠝꠣꠔꠔꠣ, ꠔꠣꠞꠣ ꠁꠛꠞꠣꠘꠤ ꠜꠣꠡꠣꠄ ꠝꠣꠔꠞꠣ ꠁꠢꠥꠖꠤ ꠅꠇꠟꠞ ꠟꠉꠦ ꠇꠣꠁꠎ꠆ꠎꠣ ꠇꠞꠔꠣ ꠟꠣꠉꠟꠣ। ꠔꠣꠞꠣ ꠖꠥꠡ ꠖꠦꠈꠣꠁꠟꠣ, ꠙꠞꠔꠦꠇ ꠖꠤꠘ ꠈꠣꠘꠤ ꠛꠤꠟꠣꠘꠤꠞ ꠡꠝꠄ ꠔꠣꠞꠣꠞ ꠠꠣꠠꠤ ꠛꠦꠐꠤꠘ꠆ꠔꠦ ꠇꠥꠘ꠆ꠔꠣ ꠙꠣꠁꠘ ꠘꠣ।
ACT 6:2 ꠔꠦꠃ ꠢꠃ ꠛꠣꠞꠅꠎꠘ ꠍꠣꠢꠣꠛꠤꠄ ꠢꠇꠟ ꠃꠝ꠆ꠝꠔꠞꠦ ꠄꠇ ꠎꠣꠉꠣꠔ ꠖꠟꠣ ꠇꠞꠤꠀ ꠇꠁꠟꠣ, “ꠀꠝꠞꠣ ꠀꠟ꠆ꠟꠣꠞ ꠇꠣꠟꠣꠝꠞ ꠔꠛꠟꠤꠉ ꠛꠣꠖ ꠖꠤꠀ, ꠈꠣꠘꠣ-ꠙꠤꠘꠣꠞ ꠛꠦꠙꠣꠞꠦ ꠛꠦꠡ꠆ꠔ ꠅꠀꠈꠣꠘ ꠑꠤꠇ ꠘꠣꠄ।
ACT 6:3 ꠅꠁꠟꠦ ꠜꠣꠁ ꠅꠇꠟ, ꠔꠥꠝꠞꠣꠞ ꠝꠣꠎ ꠕꠣꠇꠤ ꠅꠃꠟꠣ ꠡꠣꠔꠎꠘ ꠡꠥꠘꠣꠝ ꠀꠟꠣ ꠝꠣꠘꠡꠞꠦ ꠙꠍꠘ꠆ꠖ ꠇꠞꠅ, ꠎꠦꠞꠣ ꠙꠣꠇ ꠞꠥꠢꠦ ꠀꠞ ꠢꠦꠇꠝꠔꠦ ꠙꠥꠞꠣ ꠇꠣꠝꠤꠀꠛ ꠀꠍꠦ, ꠀꠝꠞꠣ ꠔꠣꠞꠣꠞ ꠃꠙꠞꠦ ꠁ ꠇꠣꠝꠞ ꠎꠤꠝ꠆ꠝꠣ ꠖꠤꠟꠣꠁꠝꠥ।
ACT 6:4 ꠀꠞ ꠀꠝꠞꠣ ꠇꠣꠟꠣꠝꠞ ꠈꠦꠎꠝꠔ ꠀꠞ ꠖꠥꠀ ꠇꠞꠣꠞ ꠇꠣꠝꠅ ꠇꠣꠁꠝ ꠞꠁꠝꠥ।”
ACT 6:5 ꠔꠦꠃ ꠢꠇ꠆ꠇꠟ ꠝꠣꠘꠥꠡ ꠡꠣꠘ꠆ꠔꠤ ꠅꠁꠟꠣ, ꠔꠣꠞꠣ ꠙꠣꠇ ꠞꠥꠢꠥ ꠀꠞ ꠁꠝꠣꠘꠦ ꠇꠣꠝꠤꠟ ꠡ꠆ꠔꠤꠚꠣꠘꠞꠦ ꠙꠍꠘ꠆ꠖ ꠇꠞꠟꠣ, ꠔꠣꠘ ꠟꠉꠦ ꠚꠤꠟꠤꠚ, ꠚꠈꠞ, ꠘꠤꠇꠣꠘꠞ, ꠔꠤꠝꠥꠘ, ꠙꠣꠞ꠆ꠝꠤꠘꠣ ꠀꠞ ꠀꠘ꠆ꠔꠤꠅꠈꠤꠀ ꠐꠣꠃꠘꠞ ꠘꠄꠀ ꠁꠢꠥꠖꠤ ꠘꠤꠇꠥꠟꠣꠄꠞꠦ ꠛꠣꠍꠤꠀ ꠘꠤꠟꠣ।
ACT 6:6 ꠛꠣꠖꠦ ꠔꠣꠞꠣ ꠅꠃ ꠡꠣꠔ ꠎꠘꠞꠦ ꠍꠣꠢꠣꠛꠤ ꠅꠇꠟꠞ ꠉꠦꠍꠦ ꠟꠁꠀ ꠀꠁꠟꠦ, ꠍꠣꠢꠣꠛꠤ ꠅꠇꠟꠦ ꠖꠥꠀ ꠇꠞꠤꠀ ꠔꠣꠞꠣꠞ ꠃꠙꠞꠦ ꠀꠔ ꠞꠣꠈꠟꠣ।
ACT 6:7 ꠀꠞ ꠀꠟ꠆ꠟꠣꠞ ꠇꠣꠟꠣꠝ ꠍꠤꠔ꠆ꠞꠤꠀ ꠌꠣꠁꠞꠅꠛꠣꠄ ꠙꠃꠍꠤꠉꠦꠟ, ꠔꠦꠃ ꠎꠦꠞꠥꠎꠣꠟꠦꠝꠅ ꠃꠝ꠆ꠝꠔꠞ ꠙꠞꠤꠝꠣꠘ ꠈꠥꠛ ꠎꠟꠖꠤ ꠇꠞꠤ ꠛꠣꠠꠔ ꠟꠣꠉꠟ, ꠁꠢꠥꠖꠤ ꠁꠝꠣꠝ ꠅꠇꠟꠞ ꠝꠣꠎꠦꠅ ꠛꠃꠔ ꠎꠘꠦ ꠀꠟ-ꠝꠍꠤꠞ ꠃꠙꠞꠦ ꠁꠝꠣꠘ ꠀꠘꠟꠣ।
ACT 6:8 ꠡ꠆ꠔꠤꠚꠣꠘ ꠀꠟ꠆ꠟꠣꠞ ꠞꠢꠝꠔ ꠀꠞ ꠢꠤꠝ꠆ꠝꠔꠦ ꠇꠣꠝꠤꠟ ꠅꠁꠀ, ꠝꠣꠘꠡꠞ ꠝꠣꠎꠦ ꠛꠃꠔ ꠇꠦꠞꠣꠝꠔꠤ ꠀꠞ ꠝꠥꠎꠦꠎꠣ ꠇꠣꠝ ꠇꠞꠔꠣ ꠟꠣꠉꠟꠣ।
ACT 6:9 ꠁꠢꠥꠖꠤꠞ ꠎꠦ ꠝꠍꠤꠖꠞꠦ ꠀꠎꠣꠖ-ꠅꠀ ꠉꠥꠟꠣꠝ ꠅꠇꠟꠞ ꠝꠍꠤꠖ ꠒꠣꠇꠣ ꠅꠁꠔ, ꠢꠃ ꠝꠍꠤꠖꠞ ꠇꠄꠎꠘ ꠝꠣꠘꠥꠡ, ꠇꠥꠘꠥ ꠇꠥꠘꠥ ꠇꠥꠞꠤꠘꠤ, ꠀꠟꠦꠇꠎꠣꠘꠖ꠆ꠞꠤꠀ, ꠇꠤꠟꠤꠇꠤꠀ ꠀꠞ ꠀꠍꠤꠀ ꠖꠦꠡꠞ ꠇꠤꠍꠥ ꠝꠣꠘꠡꠦ ꠡ꠆ꠔꠤꠚꠣꠘꠞ ꠟꠉꠦ ꠇꠣꠁꠎ꠆ꠎꠣ-ꠔꠞ꠆ꠇ ꠇꠞꠣꠔ ꠟꠣꠉꠟꠣ।
ACT 6:10 ꠅꠁꠟꠦ ꠡ꠆ꠔꠤꠚꠣꠘꠦ ꠙꠣꠇ ꠞꠥꠢꠥꠞ ꠛꠟꠦ ꠈꠥꠛ ꠀꠈꠟꠖꠣꠞ ꠝꠣꠘꠡꠞ ꠟꠣꠈꠣꠘ ꠔꠣꠞꠣꠞ ꠟꠉꠦ ꠝꠣꠔꠣꠄ, ꠔꠣꠞꠣ ꠔꠣꠘ ꠟꠉꠦ ꠝꠣꠔꠤꠀ ꠇꠥꠟꠣꠁꠔ ꠙꠣꠞꠍꠤꠟ ꠘꠣ।
ACT 6:11 ꠔꠦꠃ ꠔꠣꠞꠣ ꠇꠄꠎꠘ ꠛꠣꠎꠦ ꠝꠣꠘꠡꠞꠦ ꠊꠥꠡ ꠖꠤꠀ ꠅꠈꠣꠘ ꠢꠤꠇꠣꠁ ꠖꠤꠟ, “ꠔꠥꠝꠞꠣ ꠇꠁꠅ, ꠀꠝꠞꠣ ꠢꠥꠘꠍꠤ ꠅꠃ ꠛꠦꠐꠣꠄ ꠢꠎꠞꠔ ꠝꠥꠍꠣ ꠀꠞ ꠀꠟ꠆ꠟꠣꠞ ꠛꠤꠞꠥꠖ꠆ꠖꠦ ꠇꠥꠚꠥꠞꠤ ꠝꠣꠔ ꠝꠣꠔꠦꠞ।”
ACT 6:12 ꠅꠔꠣ ꠇꠞꠤ ꠔꠣꠞꠣ ꠝꠣꠘꠡꠞꠦ, ꠝꠥꠞꠛ꠆ꠛꠤ ꠅꠇꠟꠞꠦ, ꠀꠞ ꠀꠟꠤꠝ ꠡꠝꠣꠎꠞꠦ ꠡ꠆ꠔꠤꠚꠣꠘꠞ ꠛꠤꠞꠥꠖ꠆ꠖꠦ ꠛꠤꠉꠠꠣꠁꠟ, ꠀꠞ ꠔꠣꠘꠞꠦ ꠎꠛꠞꠖꠡ꠆ꠔꠤ ꠇꠞꠤ ꠗꠞꠤꠀ ꠖꠦꠡꠞ ꠚꠔꠥꠀ ꠇꠝꠤꠐꠤꠞ ꠍꠣꠝꠘꠦ ꠛꠤꠌꠣꠞꠅ ꠀꠘꠟ।
ACT 6:13 ꠀꠞ ꠝꠤꠍꠣ ꠡꠣꠇ꠆ꠇꠤ ꠅꠇꠟꠦ ꠇꠁꠟꠣ, “ꠅꠃ ꠛꠦꠐꠣꠄ ꠢꠣꠝꠦꠡꠣ ꠝꠥꠍꠣꠞ ꠡꠞꠤꠅꠔꠞ ꠛꠤꠞꠥꠖ꠆ꠖꠦ ꠀꠞ ꠅꠃ ꠙꠛꠤꠔ꠆ꠞ ꠝꠥꠇꠣꠝꠞ ꠛꠤꠞꠥꠖ꠆ꠖꠦꠅ ꠝꠣꠔꠦ।
ACT 6:14 ꠀꠝꠞꠣ ꠢꠥꠘꠍꠤ ꠢꠦ ꠇꠞ, ꠢꠃ ꠘꠣꠍꠣꠞꠔꠞ ꠁꠍꠣꠄ ꠁ ꠛꠣꠄꠔꠥꠟ-ꠝꠥꠇꠣꠖ꠆ꠖꠍ ꠜꠣꠋꠉꠤꠟꠤꠛ ꠀꠞ ꠝꠥꠍꠣ ꠘꠛꠤꠄ ꠀꠝꠞꠣꠞ ꠟꠣꠉꠤ ꠎꠦ ꠡꠞꠤꠅꠔ ꠕꠁꠀ ꠉꠦꠍꠂꠘ, ꠁꠔꠣ ꠛꠖꠟꠣꠁꠟꠤꠛ।”
ACT 6:15 ꠁ ꠡꠝꠄ ꠎꠦꠞꠣ ꠚꠔꠥꠀ ꠇꠝꠤꠐꠤꠔ ꠛꠅꠀꠔ ꠀꠍꠟꠣ ꠔꠣꠞꠣ ꠢꠇꠟꠦ ꠗꠤꠀꠘ ꠗꠞꠤ ꠡ꠆ꠔꠤꠚꠣꠘꠞ ꠛꠣꠄ ꠌꠣꠁꠀ ꠖꠦꠈꠟꠣ, ꠔꠣꠘ ꠝꠥꠈ ꠚꠤꠞꠤꠡ꠆ꠔꠣꠞ ꠝꠥꠈꠞ ꠟꠣꠈꠣꠘ ꠅꠁꠉꠦꠍꠦ।
ACT 7:1 ꠔꠦꠃ ꠙꠞꠗꠣꠘ ꠁꠝꠣꠝꠦ ꠡ꠆ꠔꠤꠚꠣꠘꠞꠦ ꠎꠤꠇꠣꠁꠟꠣ, “ꠁꠔꠣ ꠇꠤꠔꠣ ꠢꠣꠍꠣꠃ ꠘꠤ?”
ACT 7:2 ꠡ꠆ꠔꠤꠚꠣꠘꠦ ꠎꠥꠀꠙ ꠖꠤꠟꠣ, “ꠅ ꠜꠣꠁ ꠅꠇꠟ, ꠛꠣꠛꠣ ꠅꠇꠟ, ꠢꠥꠘꠃꠇ꠆ꠇꠣ, ꠀꠝꠞꠣꠞ ꠝꠥꠟ ꠛꠣꠚ ꠁꠛ꠆ꠞꠣꠢꠤꠝ ꠎꠦꠛꠟꠣ ꠢꠣꠞꠣꠘ ꠡꠢꠞꠅ ꠞꠅꠀꠞ ꠀꠉꠦ ꠝꠦꠡꠙꠔꠣꠝꠤꠀꠔ ꠀꠍꠟꠣ, ꠢꠃ ꠡꠝꠄ ꠀꠟ꠆ꠟꠣꠄ ꠔꠣꠘꠞꠦ ꠖꠤꠖꠣꠞ ꠖꠤꠀ ꠇꠁꠍꠟꠣ,
ACT 7:3 ‘ꠔꠥꠝꠤ ꠔꠥꠝꠣꠞ ꠖꠦꠡ ꠀꠞ ꠈꠦꠡ-ꠇꠥꠐꠥꠝ ꠍꠣꠠꠤꠀ ꠞꠅꠀꠘꠣ ꠖꠦꠅ, ꠀꠝꠤ ꠔꠥꠝꠣꠞꠦ ꠎꠦ ꠖꠦꠡ ꠖꠦꠈꠣꠁꠝꠥ ꠢꠃ ꠖꠦꠡꠅ ꠎꠣꠅ।’
ACT 7:4 ꠅꠃ ꠔꠣꠁꠘ ꠇꠟꠖꠤꠅ ꠅꠇꠟꠞ ꠛꠣꠛꠤꠟ ꠖꠦꠡ ꠕꠣꠇꠤ ꠛꠣꠞ ꠅꠁꠀ, ꠢꠣꠞꠣꠘ ꠡꠢꠞꠅ ꠛꠡꠔ ꠇꠞꠟꠣ; ꠀꠞ ꠔꠣꠘ ꠛꠣꠚꠞ ꠝꠃꠔꠞ ꠛꠣꠖꠦ ꠀꠟ꠆ꠟꠣꠄ ꠔꠣꠘꠞꠦ ꠢꠘ ꠕꠣꠇꠤ ꠁ ꠖꠦꠡꠅ ꠀꠘꠍꠂꠘ, ꠎꠦꠈꠣꠘꠅ ꠀꠙꠘꠣꠞꠣ ꠅꠈꠘ ꠛꠡꠔ ꠇꠞꠞꠣ।
ACT 7:5 ꠔꠣ-ꠅ ꠀꠟ꠆ꠟꠣꠄ ꠁꠘꠅ ꠁꠛ꠆ꠞꠣꠢꠤꠝꠞꠦ ꠔꠣꠘ ꠘꠤꠎꠞ ꠛꠟꠔꠦ ꠇꠥꠘ꠆ꠔꠣꠃ ꠖꠤꠟꠣ ꠘꠣ, ꠙꠣꠅ ꠕꠁꠛꠣꠞ ꠎꠣꠉꠣ ꠈꠣꠘꠅ ꠘꠣ, ꠅꠁꠟꠦ ꠀꠟ꠆ꠟꠣꠄ ꠔꠣꠘ ꠟꠉꠦ ꠅꠀꠖꠣ ꠇꠞꠟꠣ, ꠔꠣꠘꠞꠦ ꠀꠞ ꠔꠣꠘ ꠅꠀꠞꠤꠡ ꠅꠇꠟꠞꠦ ꠅꠃ ꠎꠝꠤꠘꠞ ꠝꠣꠟꠤꠇꠣꠘꠣ ꠖꠤꠛꠣ, ꠎꠥꠖꠤꠅ ꠁ ꠡꠝꠄ ꠁꠛ꠆ꠞꠣꠢꠤꠝꠞ ꠇꠥꠘꠥ ꠀꠅꠟꠣꠖ ꠅꠁꠍꠂꠘ ꠘꠣ।
ACT 7:6 ꠀꠟ꠆ꠟꠣꠄ ꠔꠣꠘꠞꠦ ꠇꠁꠟꠣ, ‘ꠔꠥꠝꠣꠞ ꠀꠅꠟꠣꠖ ꠅꠇꠟ ꠛꠤꠖꠦꠡꠅ ꠝꠥꠍꠣꠚꠤꠞ ꠞꠁꠛꠣ, ꠝꠣꠘꠡꠦ ꠔꠣꠞꠣꠞꠦꠖꠤ ꠉꠥꠟꠣꠝꠤ ꠇꠞꠣꠁꠛꠣ, ꠀꠞ ꠌꠣꠁꠞ-ꠡ ꠛꠞꠍ ꠔꠣꠞꠣꠞ ꠃꠙꠞꠦ ꠎꠥꠟꠥꠝ ꠌꠟꠛ।’
ACT 7:7 ꠀꠟ꠆ꠟꠣꠄ ꠄꠅꠈꠣꠘꠅ ꠇꠁꠟꠣ, ‘ꠎꠦ ꠎꠣꠔꠤꠄ ꠔꠣꠞꠣꠞꠦꠖꠤ ꠉꠥꠟꠣꠝꠤ ꠇꠞꠣꠁꠛꠣ, ꠀꠝꠤ ꠢꠤ ꠎꠣꠔꠤꠞ ꠛꠤꠌꠣꠞ ꠚꠄꠍꠣꠟꠣ ꠇꠞꠝꠥ; ꠛꠣꠖꠦ ꠔꠣꠞꠣ ꠢꠤ ꠖꠦꠡ ꠕꠣꠇꠤ ꠛꠣꠞ ꠅꠁꠀ ꠀꠁꠀ, ꠅꠃ ꠎꠣꠉꠣꠔ ꠀꠝꠣꠞ ꠄꠛꠣꠖꠔ ꠇꠞꠛꠣ।’
ACT 7:8 ꠀꠟ꠆ꠟꠣꠄ ꠔꠣꠘꠞꠦ ꠝꠍꠟꠝꠣꠘꠤ ꠇꠞꠣꠞ ꠢꠥꠇꠥꠝ ꠖꠤꠟꠣ; ꠢꠦꠡꠦ ꠁꠛ꠆ꠞꠣꠢꠤꠝꠞ ꠙꠥꠀ ꠁꠍꠢꠣꠇꠞ ꠎꠘꠝ ꠅꠁꠟ, ꠀꠞ ꠔꠣꠁꠘ ꠀꠐ ꠖꠤꠘꠞ ꠖꠤꠘ ꠔꠣꠞ ꠝꠍꠟꠝꠣꠘꠤ ꠇꠞꠣꠁꠟꠣ। ꠛꠣꠖꠦ ꠁꠍꠢꠣꠇꠦ ꠁꠀꠇꠥꠛꠞꠦ, ꠀꠞ ꠁꠀꠇꠥꠛꠦ ꠔꠣꠘ ꠙꠥꠀꠂꠘ ꠛꠣꠞꠅ ꠈꠣꠘ꠆ꠖꠣꠘꠞ ꠛꠣꠞꠅꠎꠘ ꠛꠣꠚꠞ ꠝꠍꠟꠝꠣꠘꠤ ꠇꠞꠣꠁꠟꠣ।
ACT 7:9 “ꠢꠃ ꠈꠣꠘ꠆ꠖꠣꠘꠞ ꠛꠣꠚ ꠅꠇꠟꠦ ꠁꠋꠡꠣ ꠇꠞꠤꠀ ꠁꠃꠍꠥꠚꠞꠦ ꠛꠦꠌꠤꠟꠣꠁꠟꠦ, ꠔꠣꠘꠞꠦ ꠝꠤꠡꠞ ꠖꠦꠡꠅ ꠘꠦꠅꠀ ꠅꠁꠟ। ꠅꠁꠟꠦ ꠀꠟ꠆ꠟꠣ ꠁꠃꠍꠥꠚꠞ ꠟꠉꠦ ꠟꠉꠦ ꠀꠍꠟꠣ,
ACT 7:10 ꠔꠣꠁꠘ ꠁꠃꠍꠥꠚꠞꠦ ꠢꠇꠟ ꠔꠇꠟꠤꠚ ꠕꠣꠇꠤ ꠢꠦꠚꠣꠎꠔ ꠇꠞꠟꠣ, ꠝꠤꠡꠞꠞ ꠛꠣꠖꠡꠣ ꠚꠦꠞꠣꠃꠘꠞ ꠘꠎꠞꠅ ꠖꠄꠀ ꠀꠞ ꠇꠣꠝꠤꠀꠛꠤ ꠖꠣꠘ ꠇꠞꠟꠣ; ꠔꠦꠃ ꠚꠦꠞꠣꠃꠘꠦ ꠔꠣꠘꠞꠦ ꠝꠤꠡꠞꠞ ꠢꠣꠇꠤꠝ ꠀꠞ ꠀꠡ꠆ꠔꠣ ꠞꠣꠎꠛꠣꠠꠤꠞ ꠖꠦꠈꠣ-ꠢꠥꠘꠣꠞ ꠜꠣꠞ ꠖꠤꠟꠣ।
ACT 7:11 ꠛꠣꠖꠦ ꠙꠥꠞꠣ ꠝꠤꠡꠞ ꠀꠞ ꠇꠦꠘꠣꠘ ꠖꠦꠡꠅ ꠘꠤꠖꠣꠘ ꠖꠦꠈꠣ ꠖꠤꠟ ꠄꠞꠟꠣꠉꠤ ꠝꠣꠘꠡꠞ ꠈꠥꠛ ꠖꠥꠞ꠆ꠉꠔꠤ ꠅꠁꠍꠤꠟ, ꠀꠞ ꠀꠝꠞꠣꠞ ꠛꠣꠚ-ꠖꠣꠖꠣ ꠅꠇꠟꠅ ꠈꠣꠘꠤꠞ ꠅꠜꠣꠛꠅ ꠙꠠꠟꠣ।
ACT 7:12 ꠅꠁꠟꠦ ꠝꠤꠡꠞꠅ ꠚꠡꠟ ꠀꠍꠦ ꠢꠥꠘꠤꠀ, ꠁꠀꠇꠥꠛꠦ ꠀꠝꠞꠣꠞ ꠛꠣꠚ-ꠖꠣꠖꠣ ꠅꠇꠟꠞꠦ ꠙꠄꠟꠣ ꠛꠣꠞ ꠢꠤꠈꠣꠘꠅ ꠙꠣꠑꠣꠁꠟꠣ।
ACT 7:13 ꠛꠣꠖꠦ ꠖꠥꠍꠞꠣꠛꠣꠞꠞ ꠛꠣꠟꠣ ꠁꠃꠍꠥꠚꠦ ꠔꠣꠘ ꠜꠣꠁꠀꠁꠘꠞꠦ ꠎꠣꠘꠣꠁꠟꠣ ꠔꠣꠁꠘ ꠇꠦ, ꠀꠞ ꠚꠦꠞꠣꠃꠘꠦ ꠁꠃꠍꠥꠚꠞ ꠙꠞꠤꠛꠣꠞꠞꠦ ꠌꠤꠘ ꠙꠣꠁꠟꠣ।
ACT 7:14 ꠁꠃꠍꠥꠚꠦ ꠔꠣꠘ ꠛꠣꠛꠣ ꠁꠀꠇꠥꠛ ꠀꠞ ꠘꠤꠎꠞ ꠈꠦꠡ-ꠇꠥꠐꠥꠝ ꠝꠤꠟꠣꠁꠀ ꠢꠇ꠆ꠇꠟꠔꠣꠄ ꠙꠌꠔ꠆ꠔꠁꠞ ꠎꠘꠞꠦ ꠈꠛꠞꠖꠤ ꠀꠘꠣꠁꠟꠣ।
ACT 7:15 ꠁꠀꠇꠥꠛ ꠝꠤꠡꠞꠅ ꠀꠁꠟꠣ, ꠢꠦꠡꠦ ꠔꠣꠁꠘ ꠀꠞ ꠀꠝꠞꠣꠞ ꠛꠣꠚ-ꠖꠣꠖꠣ ꠅꠇꠟꠅ ꠝꠣꠞꠣ ꠉꠦꠟꠣ।
ACT 7:16 ꠔꠣꠞꠣꠞ ꠟꠣꠡ ꠡꠤꠈꠤꠝꠅ ꠀꠘꠤꠀ ꠇꠄꠛꠞ ꠖꠦꠅꠀ ꠅꠁꠟ, ꠁ ꠇꠛꠞꠡ꠆ꠕꠣꠘ ꠁꠛ꠆ꠞꠣꠢꠤꠝꠦ ꠡꠤꠈꠤꠝ ꠡꠢꠞꠞ ꠢꠝꠥꠞꠞ ꠈꠣꠘ꠆ꠖꠣꠘꠞ ꠉꠦꠍ ꠕꠣꠇꠤ ꠞꠥꠙꠣꠞ ꠐꠦꠇꠣ ꠖꠤꠀ ꠈꠞꠤꠖ ꠇꠞꠍꠟꠣ।
ACT 7:17 “ꠁꠛ꠆ꠞꠣꠢꠤꠝꠞ ꠉꠦꠍꠦ ꠀꠟ꠆ꠟꠣꠄ ꠎꠦꠔꠣ ꠅꠀꠖꠣ ꠇꠞꠍꠤꠟꠣ, ꠢꠤ ꠅꠀꠖꠣ ꠙꠥꠞꠘ ꠅꠀꠞ ꠡꠝꠄ ꠎꠦꠛꠟꠣ ꠇꠣꠍꠣꠁ ꠉꠦꠟ, ꠁ ꠡꠝꠄ ꠝꠤꠡꠞꠅ ꠀꠝꠞꠣꠞ ꠝꠣꠘꠡꠞ ꠙꠞꠤꠝꠣꠘ ꠛꠃꠔ ꠅꠁꠉꠦꠍꠦ।
ACT 7:18 ꠢꠦꠡꠦ ꠝꠤꠡꠞꠅ ꠄꠇ ꠘꠄꠀ ꠛꠣꠖꠡꠣ ꠅꠁꠟꠣ, ꠄꠁꠘ ꠁꠃꠍꠥꠚꠞ ꠛꠦꠙꠣꠞꠦ ꠇꠥꠘ꠆ꠔꠣ ꠎꠣꠘꠔꠣ ꠘꠣ।
ACT 7:19 ꠢꠤ ꠛꠣꠖꠡꠣꠄ ꠀꠝꠞꠣꠞ ꠝꠣꠘꠡꠞꠦ ꠐꠉꠣꠁꠔꠣ ꠀꠞ ꠀꠝꠞꠣꠞ ꠛꠣꠚ-ꠖꠣꠖꠣ ꠅꠇꠟꠞ ꠃꠙꠞꠦ ꠈꠥꠛ ꠎꠥꠟꠥꠝ ꠇꠞꠔꠣ, ꠔꠣꠘ ꠘꠤꠅꠔ ꠀꠍꠤꠟ ꠄꠞꠣꠞ ꠢꠥꠞꠥꠔ꠆ꠔꠣꠁꠘ ꠎꠘꠝꠞ ꠛꠣꠖꠦꠃ ꠎꠣꠔꠦ ꠛꠣꠞꠦ ꠚꠣꠟꠣꠁ ꠖꠦꠅꠀ ꠅꠄ, ꠀꠞ ꠔꠣꠞꠣ ꠝꠞꠤ ꠎꠣꠁꠘ।
ACT 7:20 ꠢꠃ ꠡꠝꠄ ꠢꠎꠞꠔ ꠝꠥꠍꠣꠞ ꠎꠘꠝ ꠅꠁꠟ, ꠀꠟ꠆ꠟꠣꠞ ꠘꠎꠞꠅ ꠔꠣꠁꠘ ꠈꠥꠛ ꠡꠥꠘ꠆ꠖꠞ ꠀꠍꠟꠣ। ꠔꠤꠘ ꠝꠣꠡ ꠙꠞ꠆ꠎꠘ꠆ꠔ ꠔꠣꠁꠘ ꠔꠣꠘ ꠝꠣ-ꠛꠣꠚꠞ ꠛꠣꠠꠤꠔ ꠀꠍꠟꠣ।
ACT 7:21 ꠛꠣꠖꠦ ꠔꠣꠘꠞꠦ ꠛꠣꠞꠦ ꠚꠣꠟꠣꠁ ꠖꠦꠅꠀ ꠅꠁꠟꠦ, ꠚꠦꠞꠣꠃꠘꠞ ꠙꠥꠠꠤꠄ ꠔꠣꠘꠞꠦ ꠘꠤꠀ ꠘꠤꠎꠞ ꠙꠥꠀ ꠛꠣꠘꠣꠁꠀ ꠙꠣꠟꠤꠀ ꠛꠠ ꠇꠞꠟꠣ।
ACT 7:22 ꠝꠥꠍꠣ ꠝꠤꠡꠞꠤꠅ ꠁꠟꠤꠝ ꠀꠞ ꠀꠖꠛ-ꠈꠣꠁꠍꠟꠔꠦ ꠛꠠ ꠅꠁꠟꠣ, ꠔꠣꠁꠘ ꠇꠕꠣꠄ ꠀꠞ ꠇꠣꠝꠦ ꠢꠤꠝ꠆ꠝꠔꠤ ꠀꠍꠟꠣ।
ACT 7:23 ꠛꠣꠖꠦ ꠝꠥꠍꠣꠞ ꠛꠄꠅꠡ ꠎꠦꠛꠟꠣ ꠌꠣꠟ꠆ꠟꠤꠡ ꠛꠞꠍ ꠅꠁꠟ, ꠅꠃ ꠔꠣꠘ ꠖꠤꠟꠞ ꠝꠣꠎꠦ ꠘꠤꠎꠞ ꠛꠘꠤ ꠁꠍꠞꠣꠁꠟꠤ ꠜꠣꠁ ꠅꠇꠟꠞꠦ ꠖꠦꠈꠣ-ꠢꠥꠘꠣ ꠇꠞꠣꠞ ꠈꠤꠀꠟ ꠅꠁꠟ।
ACT 7:24 ꠔꠣꠁꠘ ꠛꠣꠞ ꠅꠁꠀ ꠖꠦꠈꠟꠣ, ꠄꠇꠎꠘ ꠝꠤꠡꠞꠤꠄ ꠄꠇ ꠁꠍꠞꠣꠁꠟꠤꠞ ꠃꠙꠞꠦ ꠎꠥꠟꠥꠝ ꠇꠞꠦꠞ, ꠔꠣꠁꠘ ꠢꠃ ꠁꠍꠞꠣꠁꠟꠤꠞꠦ ꠡꠣꠁꠎ꠆ꠎ ꠇꠞꠣꠔ ꠉꠦꠟꠣ, ꠀꠞ ꠝꠤꠡꠞꠤꠞꠦ ꠎꠣꠘꠦ ꠝꠣꠞꠤꠀ ꠄꠞ ꠛꠖꠟꠣ ꠟꠁꠟꠣ।
ACT 7:25 ꠝꠥꠍꠣꠄ ꠝꠘꠦ ꠇꠞꠍꠤꠟꠣ ꠔꠣꠘ ꠎꠣꠔꠤꠞ ꠝꠣꠘꠡꠦ ꠛꠥꠎꠛꠣ ꠎꠦꠘ, ꠀꠟ꠆ꠟꠣꠄ ꠔꠣꠘꠞꠦ ꠖꠤꠀꠃ ꠔꠣꠞꠣꠞꠦ ꠃꠖ꠆ꠖꠣꠞ ꠇꠞꠛꠣ; ꠅꠁꠟꠦ ꠔꠣꠞꠣ ꠁꠔꠣ ꠛꠥꠎꠟꠣ ꠘꠣ।
ACT 7:26 ꠛꠣꠖꠞ ꠖꠤꠘ ꠝꠥꠍꠣꠄ ꠖꠥꠁꠎꠘ ꠁꠍꠞꠣꠁꠟꠤꠞꠦ ꠝꠣꠁꠞ ꠇꠞꠣꠔ ꠖꠦꠈꠤꠀ, ꠔꠣꠞꠣꠞꠦ ꠝꠤꠟ-ꠝꠤꠡ ꠇꠞꠣꠞ ꠘꠤꠅꠔꠦ ꠇꠁꠟꠣ, ‘ꠅꠂ ꠔꠥꠝꠞꠣ ꠔ ꠜꠣꠁ ꠜꠣꠁ, ꠔꠦ ꠔꠥꠝꠞꠣ ꠇꠦꠘꠦ ꠄꠇꠎꠘꠦ ꠀꠞꠇ ꠎꠘꠞ ꠟꠉꠦ ꠝꠣꠞꠣ-ꠝꠣꠞꠤ ꠇꠞꠞꠣꠄ?’
ACT 7:27 ꠅꠁꠟꠦ ꠎꠦ ꠝꠣꠘꠡꠦ ꠛꠣꠖ ꠛꠦꠛꠢꠣꠞ ꠇꠞꠣꠔ ꠀꠍꠤꠟ, ꠢꠦ ꠝꠥꠍꠣꠞꠦ ꠑꠦꠟꠣ ꠝꠣꠞꠤ ꠚꠣꠟꠣꠁꠀ ꠇꠁꠟ, ‘ꠅꠛꠣ, ꠔꠥꠝꠣꠞꠦ ꠇꠦꠉꠤꠄ ꠀꠝꠞꠣꠞ ꠃꠙꠞꠦ ꠡꠣꠟꠤꠡ ꠀꠞ ꠢꠣꠇꠤꠝ ꠛꠣꠘꠣꠁꠍꠦ?
ACT 7:28 ꠇꠣꠁꠟ ꠎꠦꠟꠣ ꠢꠃ ꠝꠤꠡꠞꠤꠞꠦ ꠈꠥꠘ ꠇꠞꠍ, ꠀꠝꠣꠞꠦꠅ ꠅꠟꠣ ꠇꠞꠔꠣꠄ ꠌꠣꠅ ꠘꠤ?’
ACT 7:29 ꠁꠈꠣꠘ ꠢꠥꠘꠤꠀꠃ ꠝꠥꠍꠣꠄ ꠜꠣꠉꠤꠀ ꠝꠣꠖꠤꠀꠘ ꠖꠦꠡꠅ ꠉꠦꠟꠣꠉꠤ, ꠀꠞ ꠢꠤꠈꠣꠘꠅ ꠔꠣꠘ ꠖꠥꠁ ꠙꠥꠀꠞ ꠎꠘꠝ ꠅꠁꠟ।
ACT 7:30 “ꠛꠣꠖꠦ ꠀꠞꠅ ꠌꠣꠟ꠆ꠟꠤꠡ ꠛꠞꠍ ꠉꠥꠎꠞꠤ ꠉꠦꠟꠦ, ꠔꠥꠞ ꠙꠣꠠꠞ ꠇꠣꠘ꠆ꠖꠣꠔ ꠝꠞꠥꠜꠥꠝꠤꠔ, ꠀꠉꠥꠁꠘ ꠎꠣꠟꠣꠁꠟ ꠎꠋꠟꠣꠞ ꠝꠣꠎ ꠕꠘꠦ ꠄꠇ ꠚꠤꠞꠤꠡ꠆ꠔꠣꠄ ꠝꠥꠍꠣꠞꠦ ꠖꠞꠡꠘ ꠖꠤꠟꠣ।
ACT 7:31 ꠝꠥꠍꠣꠄ ꠁꠔꠣ ꠖꠦꠈꠤꠀ ꠄꠇ꠆ꠇꠦꠞꠦ ꠔꠣꠁꠎ꠆ꠎꠥꠛ ꠛꠘꠤꠉꠦꠟꠣ, ꠀꠞ ꠜꠣꠟꠣ ꠇꠞꠤ ꠖꠦꠈꠣꠞ ꠘꠤꠅꠔꠦ ꠇꠣꠘ꠆ꠖꠣꠔ ꠎꠣꠁꠞꠣ, ꠅꠃ ꠡꠝꠄ ꠝꠣꠛꠥꠖꠞ ꠀꠅꠀꠎ ꠢꠥꠘꠟꠣ,
ACT 7:32 ‘ꠀꠝꠤ ꠔꠥꠝꠣꠞ ꠛꠣꠚ-ꠖꠣꠖꠣꠞ ꠀꠟ꠆ꠟꠣ, ꠁꠛ꠆ꠞꠣꠢꠤꠝ, ꠁꠍꠢꠣꠇ ꠀꠞ ꠁꠀꠇꠥꠛꠞ ꠀꠟ꠆ꠟꠣ।’ ꠔꠦꠃ ꠝꠥꠍꠣꠄ ꠒꠞꠣꠁꠀ ꠇꠣꠙꠣ ꠡꠥꠞꠥ ꠇꠞꠟꠣ, ꠀꠞ ꠜꠣꠟꠣ ꠇꠞꠤ ꠖꠦꠈꠣꠞ ꠡꠣꠅꠡ ꠙꠣꠁꠟꠣ ꠘꠣ।
ACT 7:33 ꠝꠣꠛꠥꠖꠦ ꠔꠣꠘꠞꠦ ꠇꠁꠟꠣ, ‘ꠔꠥꠝꠣꠞ ꠙꠣꠅꠞ ꠎꠥꠔꠣ ꠈꠥꠟꠤꠟꠣꠅ, ꠇꠣꠞꠘ ꠔꠥꠝꠤ ꠎꠦꠘꠅ ꠃꠛꠣꠁꠍ ꠁꠈꠣꠘ ꠙꠣꠇ ꠎꠣꠉꠣ।
ACT 7:34 ꠢꠥꠘꠅ, ꠀꠝꠤ ꠝꠤꠡꠞ ꠖꠦꠡꠅ ꠀꠝꠣꠞ ꠙ꠆ꠞꠎꠣ ꠅꠇꠟꠞ ꠔꠇꠟꠤꠚ ꠖꠦꠈꠍꠤ, ꠀꠝꠤ ꠔꠣꠞꠣꠞ ꠀꠢꠣꠎꠣꠞꠤ ꠢꠥꠘꠍꠤ, ꠔꠣꠞꠣꠞꠦ ꠃꠖ꠆ꠖꠣꠞ ꠇꠞꠣꠞ ꠟꠣꠉꠤ ꠟꠣꠝꠤꠀ ꠀꠁꠍꠤ, ꠅꠈꠘ ꠀꠝꠤ ꠔꠥꠝꠣꠞꠦ ꠝꠤꠡꠞ ꠖꠦꠡꠅ ꠚꠤꠞꠔ ꠙꠣꠑꠣꠁꠝꠥ।’
ACT 7:35 “ꠄꠁꠘ ꠢꠃ ꠝꠥꠍꠣ, ꠎꠣꠞꠦ ꠁꠍꠞꠣꠁꠟꠤ ꠅꠇꠟꠦ ꠅꠃ ꠇꠕꠣ ꠇꠁꠀ ꠚꠤꠞꠔ ꠖꠤꠍꠤꠟ, ꠇꠦ ꠔꠥꠝꠣꠞꠦ ꠡꠣꠟꠤꠡ ꠀꠞ ꠢꠣꠇꠤꠝ ꠛꠣꠘꠣꠁꠍꠦ? ꠔꠣꠘꠞꠦꠃ ꠀꠟ꠆ꠟꠣꠞ ꠎꠦ ꠚꠤꠞꠤꠡ꠆ꠔꠣꠄ ꠎꠋꠟꠣꠞ ꠝꠣꠎꠦ ꠖꠦꠈꠣ ꠖꠤꠍꠟꠣ, ꠢꠃ ꠚꠤꠞꠤꠡ꠆ꠔꠣꠞ ꠀꠔꠣꠘꠦ ꠛꠘꠤ ꠁꠍꠞꠣꠁꠟꠞ ꠡꠣꠟꠤꠡ ꠀꠞ ꠔꠞꠣꠘꠦꠀꠟꠣ ꠛꠣꠘꠣꠁꠀ ꠙꠣꠑꠣꠁꠟꠣ।
ACT 7:36 ꠀꠞ ꠅꠃ ꠝꠥꠍꠣꠄꠃ ꠝꠤꠡꠞꠞ ꠘꠤꠟ ꠖꠞꠤꠀ ꠀꠞ ꠝꠞꠥꠜꠥꠝꠤꠔ ꠌꠣꠟ꠆ꠟꠤꠡ ꠛꠞꠍ ꠛꠃꠔ ꠇꠦꠞꠣꠝꠔꠤ ꠀꠞ ꠝꠥꠎꠦꠎꠣ ꠇꠣꠝ ꠇꠞꠤꠀ, ꠝꠤꠡꠞ ꠖꠦꠡ ꠕꠣꠇꠤ ꠁꠍꠞꠣꠁꠟꠤ ꠅꠇꠟꠞꠦ ꠛꠣꠞ ꠇꠞꠤ ꠀꠘꠍꠟꠣ।
ACT 7:37 “ꠄꠁꠘ ꠢꠃ ꠝꠥꠍꠣ, ꠎꠦꠁꠘ ꠛꠘꠤ ꠁꠍꠞꠣꠁꠟꠞꠦ ꠇꠁꠍꠟꠣ, ꠀꠟ꠆ꠟꠣꠄ ꠔꠥꠝꠞꠣꠞ ꠟꠣꠉꠤ ꠔꠥꠝꠞꠣꠞ ꠘꠤꠎꠞ ꠝꠣꠘꠥꠡ ꠕꠣꠇꠤ, ꠀꠝꠣꠞ ꠟꠣꠈꠣꠘ ꠄꠇꠎꠘ ꠘꠛꠤꠞꠦ ꠛꠦꠎꠤꠛꠣ।
ACT 7:38 ꠅꠃ ꠝꠥꠍꠣꠃ ꠔ ꠝꠞꠥꠜꠥꠝꠤꠔ ꠀꠝꠞꠣꠞ ꠛꠣꠚ-ꠖꠣꠖꠣ ꠛꠘꠤ ꠁꠍꠞꠣꠁꠟꠞ ꠟꠉꠦ ꠀꠍꠟꠣ। ꠀꠞ ꠎꠦ ꠚꠤꠞꠤꠡ꠆ꠔꠣꠄ ꠔꠥꠞ ꠙꠣꠠꠅ ꠛꠣꠔꠌꠤꠔ ꠇꠞꠍꠤꠟꠣ, ꠅꠃ ꠝꠥꠍꠣꠞ ꠟꠉꠦꠃ ꠔꠣꠁꠘ ꠝꠣꠔꠤꠍꠟꠣ। ꠀꠞ ꠀꠝꠞꠣꠞꠦ ꠖꠤꠛꠣꠞ ꠟꠣꠉꠤ ꠎꠤꠘ꠆ꠖꠣ-ꠇꠣꠟꠣꠝ ꠅꠃ ꠝꠥꠍꠣꠞ ꠉꠦꠍꠦꠃ ꠖꠦꠅꠀ ꠅꠁꠍꠤꠟ।
ACT 7:39 “ꠅꠁꠟꠦ ꠀꠝꠞꠣꠞ ꠛꠣꠚ-ꠖꠣꠖꠣ ꠅꠇꠟꠦ ꠝꠥꠍꠣꠞ ꠢꠥꠇꠥꠝ ꠝꠣꠘꠔꠣ ꠌꠣꠁꠟꠣ ꠘꠣ, ꠔꠣꠞꠣ ꠝꠥꠍꠣꠞꠦ ꠢꠞꠣꠁ ꠕꠁꠀ ꠝꠘꠦ ꠝꠘꠦ ꠢꠤꠞꠛꠣꠞ ꠝꠤꠡꠞꠞ ꠛꠣꠄ ꠘꠤꠅꠔ ꠇꠞꠤꠀ ꠢꠣꠞꠥꠘꠞꠦ ꠇꠁꠟꠣ,
ACT 7:40 ‘ꠀꠝꠞꠣꠞꠦ ꠙꠕ ꠌꠤꠘꠣꠁꠀ ꠟꠁꠀ ꠎꠣꠅꠀꠞ ꠟꠣꠉꠤ ꠖꠦꠛꠔꠣ ꠛꠣꠘꠣꠁ ꠖꠦꠃꠇ꠆ꠇꠣ। ꠇꠣꠞꠘ ꠎꠦ ꠝꠥꠍꠣꠄ ꠝꠤꠡꠞ ꠖꠦꠡ ꠕꠣꠇꠤ ꠀꠝꠞꠣꠞꠦ ꠛꠣꠞ ꠇꠞꠤ ꠀꠘꠍꠂꠘ, ꠔꠣꠘ ꠖꠡꠣ ꠇꠤꠔꠣ ꠅꠁꠍꠦ, ꠀꠝꠞꠣ ꠔ ꠎꠣꠘꠤ ꠘꠣ।’
ACT 7:41 ꠅꠃ ꠡꠝꠄ ꠔꠣꠞꠣ ꠉꠞꠥꠞ ꠛꠣꠍꠥꠞꠞ ꠟꠣꠈꠣꠘ ꠄꠇ ꠝꠥꠞ꠆ꠔꠤ ꠛꠣꠘꠣꠁꠟꠣ, ꠀꠞ ꠅꠃ ꠝꠥꠞ꠆ꠔꠤꠞ ꠘꠣꠝꠦ ꠛꠟꠤ ꠖꠤꠟꠣ, ꠘꠤꠎꠞ ꠀꠔꠞ ꠛꠣꠘꠣꠁꠟ ꠝꠥꠞ꠆ꠔꠤꠞꠦ ꠟꠁꠀ ꠔꠣꠞꠣ ꠚꠥꠞ꠆ꠔꠤ-ꠀꠝꠥꠖ ꠇꠞꠟꠣ।
ACT 7:42 ꠅꠁꠟꠦ ꠀꠟ꠆ꠟꠣꠄ ꠘꠣꠞꠣꠎ ꠅꠁꠀ ꠔꠣꠞꠣꠞ ꠟꠉ ꠍꠣꠠꠤ ꠖꠤꠟꠣ, ꠀꠞ ꠔꠣꠞꠣꠞꠦ ꠀꠍꠝꠣꠘꠞ ꠌꠣꠘ-ꠡꠥꠞꠥꠎ, ꠔꠦꠞꠣꠞ ꠙꠥꠎꠣꠔ ꠛꠥꠠꠣꠁ ꠕꠁꠟꠣ; ꠎꠦꠟꠣ ꠘꠛꠤ ꠅꠇꠟꠞ ꠇꠤꠔꠣꠛꠅ ꠟꠦꠈꠍꠂꠘ: ꠅ ꠁꠍꠞꠣꠁꠟ ꠎꠣꠔꠤ, ꠝꠞꠥꠜꠥꠝꠤꠔ ꠢꠤ ꠌꠣꠟ꠆ꠟꠤꠡ ꠛꠞꠍ, ꠔꠥꠝꠞꠣ ꠀꠝꠣꠞ ꠘꠣꠝꠦ ꠇꠥꠘꠥ ꠙꠡꠥ ꠇꠥꠞꠛꠣꠘꠤ ꠖꠤꠍꠟꠣꠄ ꠘꠤ?
ACT 7:43 ꠘꠣ, ꠔꠥꠝꠞꠣ ꠔ ꠝꠥꠟꠇ ꠖꠦꠛꠔꠣꠞ ꠝꠥꠞ꠆ꠔꠤ, ꠀꠞ ꠞꠤꠚꠘ ꠖꠦꠛꠔꠣꠞ ꠔꠦꠞꠣ ꠛꠣꠘꠣꠁ ꠇꠣꠘ꠆ꠖꠅ ꠟꠁꠀ ꠊꠥꠞꠍ। ꠢꠃ ꠖꠥꠁꠅ ꠙꠥꠔꠥꠟ ꠔ ꠙꠥꠎꠣ ꠇꠞꠣꠞ ꠘꠤꠅꠔꠦ ꠛꠣꠘꠣꠁꠍꠟꠣꠄ, ꠄꠞꠟꠣꠉꠤ ꠀꠝꠤ ꠔꠥꠝꠞꠣꠞꠦ ꠛꠣꠛꠤꠟ ꠖꠦꠡꠞ ꠢꠙꠣꠞꠅ ꠛꠘꠛꠣꠡ ꠖꠤꠝꠥ।
ACT 7:44 ꠔꠦ ꠡꠣꠢꠣꠖꠔ ꠔꠣꠝ꠆ꠛꠥꠞ ꠇꠣꠛꠣ ꠡꠞꠤꠚ ꠝꠞꠥꠜꠥꠝꠤꠔ ꠀꠝꠞꠣꠞ ꠛꠣꠚ-ꠖꠣꠖꠣꠁꠘ꠆ꠔꠞ ꠉꠦꠍꠦ ꠀꠍꠤꠟ। ꠔꠣꠁꠘ ꠝꠥꠍꠣꠞꠦ ꠢꠥꠇꠥꠝ ꠖꠤꠍꠟꠣ, ꠔꠥꠝꠤ ꠎꠦꠟꠣꠈꠣꠘ ꠘꠇꠡꠣ ꠖꠦꠈꠟꠣꠄ, ꠅꠃ ꠟꠣꠈꠣꠘ ꠇꠞꠤ ꠁꠐꠣ ꠔꠤꠀꠞ ꠇꠞꠅ।
ACT 7:45 ꠀꠝꠞꠣꠞ ꠛꠣꠚ-ꠖꠣꠖꠣ ꠅꠇꠟꠦ ꠢꠤ ꠇꠣꠛꠣ ꠡꠞꠤꠚ ꠙꠣꠁꠀ, ꠔꠣꠞꠣꠞ ꠀꠝꠤꠞ ꠁꠃꠍꠣꠞ ꠀꠔꠣꠘꠦ ꠘꠤꠎꠞ ꠟꠉꠦ ꠇꠞꠤ ꠀꠝꠞꠣꠞ ꠁ ꠖꠦꠡꠅ ꠀꠘꠍꠤꠟꠣ, ꠔꠣꠞꠣ ꠎꠦꠛꠟꠣ ꠢꠤ ꠖꠦꠡꠅ ꠢꠣꠝꠣꠁꠍꠤꠟ ꠁ ꠡꠝꠄ ꠀꠟ꠆ꠟꠣꠄ ꠔꠣꠞꠣꠞ ꠍꠣꠝꠘ ꠕꠣꠇꠤ ꠢꠤꠘꠞ ꠝꠣꠘꠡꠞꠦ ꠈꠦꠖꠣꠁ ꠖꠤꠍꠟꠣ। ꠢꠤ ꠔꠣꠝ꠆ꠛꠥ ꠢꠎꠞꠔ ꠖꠣꠃꠖꠞ ꠀꠝꠟ ꠙꠞ꠆ꠎꠘ꠆ꠔ ꠅꠃ ꠖꠦꠡꠅ ꠀꠍꠤꠟ।
ACT 7:46 “ꠖꠣꠃꠖꠦ ꠀꠟ꠆ꠟꠣꠞ ꠞꠢꠝꠔ ꠢꠣꠍꠤꠟ ꠇꠞꠍꠤꠟꠣ, ꠀꠞ ꠁꠀꠇꠥꠛꠞ ꠀꠟ꠆ꠟꠣꠞ ꠘꠣꠝꠦ ꠄꠇꠈꠣꠘ ꠊꠞ ꠛꠣꠘꠣꠁꠛꠣꠞ ꠀꠞꠎꠤ ꠇꠞꠍꠟꠣ।
ACT 7:47 ꠅꠁꠟꠦ ꠢꠎꠞꠔ ꠍꠥꠟꠣꠁꠝꠣꠘꠦ ꠔꠣꠘ ꠟꠣꠉꠤ ꠢꠤ ꠊꠞ ꠛꠣꠘꠣꠁꠍꠟꠣ।
ACT 7:48 ꠔꠣ-ꠅ ꠀꠟ꠆ꠟꠣꠔꠣꠟꠣ ꠔ ꠝꠣꠘꠡꠞ ꠀꠔꠞ ꠛꠣꠘꠣꠁꠟ ꠊꠞꠅ ꠛꠡꠔ ꠇꠞꠂꠘ ꠘꠣ; ꠎꠦꠟꠣ ꠘꠛꠤꠄ ꠇꠁꠍꠂꠘ,
ACT 7:49 ꠝꠣꠛꠥꠖꠦ ꠇꠂꠘ, ꠛꠦꠢꠦꠡ꠆ꠔ ꠀꠝꠣꠞ ꠔꠈ꠆ꠔ, ꠖꠥꠘꠤꠀ ꠀꠝꠣꠞ ꠙꠣꠅ ꠕꠁꠛꠣꠞ ꠎꠣꠉꠣ, ꠔꠥꠝꠞꠣ ꠀꠝꠣꠞ ꠟꠣꠉꠤ ꠇꠤꠎꠣꠔ ꠊꠞ ꠛꠣꠘꠣꠁꠛꠣꠄ? ꠀꠝꠣꠞ ꠎꠤꠞꠣꠘꠤꠞ ꠎꠣꠉꠣ ꠇꠥꠀꠁ?
ACT 7:50 ꠁ ꠢꠇ꠆ꠇꠟꠔꠣ ꠇꠤꠔꠣ ꠀꠝꠣꠞ ꠘꠤꠎꠞ ꠀꠔꠦ ꠛꠣꠘꠣꠁꠍꠤ ꠘꠣ ꠘꠤ?
ACT 7:51 “ꠅ ꠉꠣꠠꠔꠦꠠꠣꠞ ꠎꠣꠔ! ꠇꠣꠘ ꠀꠞ ꠖꠤꠟꠞ ꠝꠍꠟꠝꠣꠘꠤ ꠘꠣ ꠇꠞꠣꠁꠟ ꠎꠣꠔ! ꠔꠥꠝꠞꠣ ꠢꠣꠝꠦꠡꠣ ꠙꠣꠇ ꠞꠥꠢꠥꠞ ꠖꠥꠀꠞ ꠛꠘ꠆ꠖ ꠇꠞꠤ ꠕꠅ। ꠔꠥꠝꠞꠣꠞ ꠛꠣꠚ-ꠖꠣꠖꠣꠁꠘ ꠎꠦꠟꠣ ꠀꠍꠟꠣ, ꠔꠥꠝꠞꠣꠅ ꠅꠃꠟꠣ ꠅꠁꠍ।
ACT 7:52 ꠔꠥꠝꠞꠣꠞ ꠛꠣꠚ-ꠖꠣꠖꠣꠁꠘ꠆ꠔꠦ ꠇꠥꠘ ꠘꠛꠤꠞ ꠃꠙꠞꠦ ꠎꠥꠟꠥꠝ ꠇꠞꠍꠂꠘ ꠘꠣ? ꠔꠣꠞꠣ ꠔ ꠢꠃ ꠘꠛꠤ ꠅꠇꠟꠞꠦ ꠎꠣꠘꠦꠅ ꠝꠣꠞꠍꠦ, ꠎꠦꠞꠣ ꠀꠉꠦ ꠁ ꠖꠤꠘꠖꠣꠞ ꠎꠘ ꠀꠁꠛꠣꠞ ꠇꠕꠣ ꠄꠟꠣꠘ ꠇꠞꠍꠂꠘ। ꠅꠃ ꠖꠤꠘꠖꠣꠞ ꠎꠘꠞꠦ ꠅꠈꠘ ꠔꠥꠝꠞꠣꠅ ꠖꠥꠡꠝꠘꠞ ꠀꠔꠅ ꠡꠙꠤꠀ ꠎꠣꠘꠦ ꠝꠣꠞꠣꠁꠍ।
ACT 7:53 ꠚꠤꠞꠤꠡ꠆ꠔꠣ ꠅꠇꠟꠞ ꠝꠣꠎꠖꠤ ꠘꠣꠎꠤꠟ ꠅꠀ ꠡꠞꠤꠅꠔ ꠔꠥꠝꠞꠣꠞꠦ ꠖꠦꠅꠀ ꠅꠁꠍꠤꠟ, ꠅꠁꠟꠦ ꠁꠔꠣ ꠀꠝꠟ ꠇꠞꠍ ꠘꠣ।”
ACT 7:54 ꠁꠔꠣ ꠢꠥꠘꠤꠀꠃ ꠔꠣꠞꠣ ꠉꠥꠍꠣꠄ ꠀꠉꠥꠁꠘ ꠅꠁꠉꠦꠟꠣ, ꠀꠞ ꠖꠣꠔ ꠇꠤꠠꠤ-ꠝꠤꠠꠤ ꠇꠞꠣ ꠗꠞꠟꠣ।
ACT 7:55 ꠅꠁꠟꠦ ꠡ꠆ꠔꠤꠚꠣꠘꠦ ꠙꠣꠇ ꠞꠥꠢꠦ ꠇꠣꠝꠤꠟ ꠅꠁꠀ ꠛꠦꠢꠦꠡ꠆ꠔꠞ ꠛꠣꠄ ꠗꠤꠀꠘ ꠗꠞꠤ ꠌꠣꠁꠀ ꠀꠟ꠆ꠟꠣꠞ ꠡꠣꠘ-ꠔꠎꠟ꠆ꠟꠤ ꠖꠦꠈꠟꠣ, ꠀꠞ ꠁꠍꠣꠞꠦ ꠀꠟ꠆ꠟꠣꠞ ꠒꠣꠁꠘ ꠛꠣꠎꠥꠔ ꠃꠛꠣ ꠖꠦꠈꠟꠣ।
ACT 7:56 ꠔꠦꠃ ꠔꠣꠁꠘ ꠇꠁꠟꠣ “ꠖꠦꠈꠃꠇ꠆ꠇꠣ, ꠀꠝꠤ ꠖꠦꠈꠞꠣꠝ ꠛꠦꠢꠦꠡ꠆ꠔ ꠈꠥꠟꠣ ꠀꠍꠦ, ꠀꠞ ꠁꠍꠣ ꠛꠤꠘ-ꠀꠖꠝ ꠀꠟ꠆ꠟꠣꠞ ꠒꠣꠁꠘꠦ ꠃꠛꠣꠁ ꠞꠁꠍꠂꠘ।”
ACT 7:57 ꠀꠞ ꠔꠣꠞꠣ ꠇꠣꠘꠅ ꠀꠋꠉꠥꠟ ꠖꠤꠀ ꠄꠇꠟꠉꠦ ꠌꠤꠟ꠆ꠟꠣꠁꠀ ꠡ꠆ꠔꠤꠚꠣꠘꠞ ꠃꠙꠞꠦ ꠃꠠꠤꠀ ꠉꠤꠀ ꠙꠠꠟꠣ।
ACT 7:58 ꠔꠣꠘꠞꠦ ꠐꠣꠘꠤꠀ ꠡꠢꠞꠞ ꠛꠣꠞꠦ ꠘꠤꠀ ꠙꠣꠔ꠆ꠔꠞ ꠝꠣꠞꠣꠔ ꠟꠣꠉꠟꠣ; ꠀꠞ ꠛꠣꠖꠤ ꠅꠇꠟꠦ ꠎꠣꠞꠎꠤꠞ ꠇꠣꠙꠠ ꠈꠥꠟꠤꠀ ꠡꠃꠟ ꠘꠣꠝꠞ ꠄꠇ ꠎꠥꠀꠘꠞ ꠙꠣꠅꠞ ꠇꠣꠘ꠆ꠖꠣꠔ ꠕꠁꠟꠣ।
ACT 7:59 ꠝꠣꠘꠡꠦ ꠎꠦꠛꠟꠣ ꠡ꠆ꠔꠤꠚꠣꠘꠞꠦ ꠙꠣꠔ꠆ꠔꠞ ꠝꠣꠞꠞꠣ, ꠅꠃ ꠡꠝꠄ ꠔꠣꠁꠘ ꠖꠥꠀ ꠇꠞꠤꠀ ꠇꠁꠟꠣ, “ꠅ ꠝꠣꠟꠤꠇ ꠁꠍꠣ, ꠀꠝꠣꠞ ꠞꠥꠢꠥꠞꠦ ꠇꠛꠥꠟ ꠇꠞꠃꠇ꠆ꠇꠣ।”
ACT 7:60 ꠇꠁꠀꠃ ꠔꠣꠁꠘ ꠀꠐꠥ ꠉꠣꠟꠣ ꠖꠤꠀ ꠎꠥꠞꠦ ꠌꠤꠟ꠆ꠟꠣꠁꠀ ꠇꠁꠟꠣ, “ꠝꠣꠟꠤꠇ, ꠄꠞꠣꠞ ꠁ ꠉꠥꠘꠣꠞꠦ ꠀꠝꠟꠅ ꠗꠞꠤꠅ ꠘꠣ।” ꠅꠈꠣꠘ ꠇꠁꠀꠃ ꠔꠣꠁꠘ ꠀꠈꠦꠞꠤ ꠖꠝ ꠍꠣꠠꠤ ꠖꠤꠟꠣ। ꠀꠞ ꠡꠃꠟꠦ ꠢꠘꠅ ꠡ꠆ꠔꠤꠚꠣꠘꠞ ꠈꠥꠘꠞ ꠢꠥꠇꠥꠝꠞ ꠟꠉꠦ ꠡꠣꠄ ꠖꠤꠟꠣ।
ACT 8:1 ꠢꠤꠖꠤꠘ ꠕꠣꠇꠤ ꠎꠦꠞꠥꠎꠣꠟꠦꠝꠞ ꠎꠝꠣꠔꠞ ꠃꠙꠞꠦ ꠈꠥꠛ ꠎꠥꠟꠥꠝ-ꠝꠍꠤꠛꠔ ꠈꠣꠠꠣ ꠅꠁꠟ, ꠄꠞꠟꠣꠉꠤ ꠈꠣꠟꠤ ꠍꠣꠢꠣꠛꠤ ꠅꠇꠟ ꠛꠣꠖꠦ ꠀꠞ ꠢꠇꠟꠦꠃ ꠄꠢꠥꠖꠤꠀ ꠀꠞ ꠡꠝꠞꠤꠀ ꠄꠟꠣꠇꠣꠞ ꠎꠣꠉꠣꠄ ꠎꠣꠉꠣꠄ ꠍꠤꠔ꠆ꠞꠤ ꠉꠦꠟꠣ।
ACT 8:2 ꠇꠄꠎꠘꠦ ꠝꠤꠟꠤꠀ ꠀꠟ꠆ꠟꠣꠞꠣꠁꠀ ꠝꠣꠘꠥꠡ ꠡ꠆ꠔꠤꠚꠣꠘꠞꠦ ꠖꠣꠚꠘ ꠇꠞꠟꠣ ꠀꠞ ꠔꠣꠘ ꠟꠣꠉꠤ ꠛꠃꠔ ꠀꠢꠣꠎꠣꠞꠤ ꠇꠞꠟꠣ।
ACT 8:3 ꠅꠁꠟꠦ ꠡꠃꠟꠦ ꠎꠝꠣꠔꠞꠦ ꠛꠤꠘꠣꠡ ꠇꠞꠣꠞ ꠘꠤꠅꠔꠦ, ꠊꠞꠅ ꠊꠞꠅ ꠢꠣꠝꠣꠁꠀ ꠁꠝꠣꠘꠖꠣꠞ ꠛꠦꠐꠣꠁꠘ-ꠛꠦꠐꠤꠘꠞꠦ ꠛꠘ꠆ꠖꠤ ꠇꠞꠤ ꠐꠣꠘꠤꠀ ꠍꠦꠌꠠꠣꠁꠀ ꠎꠦꠟ ꠈꠣꠘꠣꠔ ꠢꠣꠞꠣꠘꠤꠔ ꠟꠣꠉꠟꠣ।
ACT 8:4 ꠔꠦꠃ ꠎꠦꠞꠣ ꠌꠣꠁꠞꠅꠛꠣꠄ ꠍꠤꠔ꠆ꠞꠤ ꠉꠦꠍꠤꠟ, ꠔꠣꠞꠣ ꠢꠇ꠆ꠇꠟ ꠎꠣꠉꠣꠔ ꠊꠥꠞꠤ ꠊꠥꠞꠤ ꠁꠘ꠆ꠎꠤꠟꠞ ꠈꠥꠡ-ꠈꠛꠞꠤ ꠔꠛꠟꠤꠉ ꠇꠞꠟꠣ।
ACT 8:5 ꠀꠞ ꠚꠤꠟꠤꠚ ꠡꠝꠞꠤꠀꠞ ꠄꠇ ꠡꠢꠞꠅ ꠉꠤꠀ ꠀꠟ-ꠝꠍꠤꠞ ꠛꠦꠙꠣꠞꠦ ꠔꠛꠟꠤꠉ ꠇꠞꠟꠣ।
ACT 8:6 ꠝꠣꠘꠡꠦ ꠚꠤꠟꠤꠚꠞ ꠛꠄꠀꠘ ꠢꠥꠘꠤꠀ ꠀꠞ ꠔꠣꠘ ꠇꠦꠞꠣꠝꠔꠤ ꠇꠣꠝ ꠅꠇꠟ ꠖꠦꠈꠤꠀ, ꠗꠤꠀꠘ ꠗꠞꠤ ꠄꠇ ꠖꠤꠟꠦ ꠔꠣꠘ ꠘꠍꠤꠅꠔ ꠢꠥꠘꠟꠣ।
ACT 8:7 ꠇꠣꠞꠘ ꠛꠃꠔꠞ ꠉꠦꠍ ꠕꠣꠇꠤ ꠜꠥꠔ ꠅꠇꠟ ꠎꠥꠞꠦ ꠎꠥꠞꠦ ꠌꠤꠟ꠆ꠟꠣꠁꠀ ꠍꠣꠠꠤꠀ ꠉꠦꠟ, ꠀꠞ ꠛꠃꠔ ꠅꠞ꠆ꠖꠋ ꠛꠦꠝꠣꠞꠤ ꠀꠞ ꠟꠦꠋꠠꠣ ꠅꠇꠟ ꠜꠣꠟꠣ ꠅꠁꠟꠣ।
ACT 8:8 ꠁꠔꠣ ꠖꠦꠈꠤꠀ ꠢꠤ ꠡꠢꠞꠞ ꠝꠣꠘꠥꠡ ꠈꠥꠛ ꠈꠥꠡꠤ ꠅꠁꠟꠣ।
ACT 8:9 ꠅꠁꠟꠦ ꠢꠤꠈꠣꠘꠅ ꠍꠣꠁꠝꠘ ꠘꠣꠝꠞ ꠄꠇꠎꠘ ꠝꠣꠘꠡꠦ ꠛꠃꠔ ꠖꠤꠘ ꠗꠞꠤ ꠎꠣꠖꠥ-ꠐꠥꠘꠣꠞ ꠇꠣꠝ ꠇꠞꠔ, ꠡꠝꠞꠤꠀꠞ ꠝꠣꠘꠡꠞꠦ ꠗꠣꠘ꠆ꠖꠣ ꠟꠣꠉꠣꠁꠀ ꠢꠦ ꠘꠤꠎꠞꠦ ꠄꠇꠎꠘ ꠇꠣꠝꠤꠟ ꠙꠤꠞ ꠇꠁꠀ ꠖꠣꠛꠤ ꠇꠞꠔ।
ACT 8:10 ꠀꠞ ꠢꠥꠞꠥ-ꠛꠠ ꠢꠇꠟꠦ ꠔꠣꠞ ꠇꠕꠣꠞ ꠖꠣꠝ ꠖꠤꠔ, ꠝꠣꠘꠡꠦ ꠇꠁꠔ, ꠀꠟ꠆ꠟꠣꠞ ꠎꠦ ꠇꠥꠖꠞꠔꠞꠦ ꠈꠣꠍ ꠇꠥꠖꠞꠔ ꠇꠂꠘ, ꠁ ꠛꠦꠐꠣ ꠅꠁꠟ ꠢꠃ ꠈꠣꠍ ꠇꠥꠖꠞꠔꠤ ꠛꠦꠐꠣ।
ACT 8:11 ꠝꠣꠘꠡꠦꠅ ꠔꠣꠞ ꠇꠕꠣꠝꠔ ꠌꠟꠔ ꠇꠣꠞꠘ ꠛꠃꠔ ꠖꠤꠘ ꠗꠞꠤ ꠢꠦ ꠔꠣꠞ ꠎꠣꠖꠥ-ꠐꠥꠘꠣ ꠖꠦꠈꠣꠁꠀ ꠔꠣꠞꠣꠞꠦ ꠔꠣꠁꠎ꠆ꠎꠥꠛ ꠛꠣꠘꠣꠁꠍꠤꠟ।
ACT 8:12 ꠅꠁꠟꠦ ꠚꠤꠟꠤꠚꠦ ꠎꠦꠛꠟꠣ ꠀꠟ꠆ꠟꠣꠞ ꠛꠣꠖꠡꠣꠁ ꠀꠞ ꠁꠍꠣ ꠀꠟ-ꠝꠍꠤꠞ ꠛꠦꠙꠣꠞꠦ ꠈꠥꠡ-ꠈꠛꠞꠤ ꠔꠛꠟꠤꠉ ꠇꠞꠟꠣ, ꠀꠞ ꠝꠣꠘꠡꠦ ꠔꠣꠘ ꠔꠛꠟꠤꠉꠦ ꠁꠝꠣꠘ ꠀꠘꠟꠣ, ꠁ ꠡꠝꠄ ꠛꠦꠐꠣꠁꠘ-ꠛꠦꠐꠤꠘ꠆ꠔꠦ ꠀꠁꠀ ꠔꠃꠛꠣꠞ ꠉꠥꠍꠟ ꠇꠞꠟꠣ।
ACT 8:13 ꠢꠃ ꠍꠣꠁꠝꠘꠅ ꠁꠝꠣꠘ ꠀꠘꠤꠀ ꠔꠃꠛꠣꠞ ꠉꠥꠍꠟ ꠇꠞꠤꠀ ꠚꠤꠟꠤꠚꠞ ꠈꠞꠦ ꠈꠞꠦ ꠞꠁꠟꠣ, ꠛꠃꠔ ꠇꠦꠞꠣꠝꠔꠤ ꠀꠞ ꠛꠠ ꠛꠠ ꠇꠥꠖꠞꠔꠤ ꠇꠣꠝ ꠢꠣꠍꠤꠟ ꠅꠞ ꠖꠦꠈꠤꠀ ꠔꠣꠁꠎ꠆ꠎꠥꠛ ꠅꠁꠉꠦꠟꠣ।
ACT 8:14 ꠎꠦꠞꠥꠎꠣꠟꠦꠝꠞ ꠍꠣꠢꠣꠛꠤ ꠅꠇꠟꠦ ꠎꠦꠛꠟꠣ ꠢꠥꠘꠟꠣ, ꠡꠝꠞꠤꠀꠞ ꠝꠣꠘꠥꠡ ꠅꠇꠟꠦ ꠀꠟ꠆ꠟꠣꠞ ꠇꠣꠟꠣꠝꠞ ꠃꠙꠞꠦ ꠁꠝꠣꠘ ꠀꠘꠍꠂꠘ, ꠔꠦꠃ ꠔꠣꠞꠣ ꠙꠤꠔꠞ ꠀꠞ ꠢꠣꠘ꠆ꠘꠣꠘꠞꠦ ꠄꠞꠣꠞ ꠉꠦꠍꠦ ꠙꠣꠑꠣꠁꠟꠣ।
ACT 8:15 ꠙꠤꠔꠞ ꠀꠞ ꠢꠣꠘ꠆ꠘꠣꠘ ꠀꠁꠀ ꠔꠣꠞꠣꠞ ꠟꠣꠉꠤ ꠖꠥꠀ ꠇꠞꠟꠣ, ꠎꠣꠔꠦ ꠔꠣꠞꠣ ꠙꠣꠇ ꠞꠥꠢꠥ ꠙꠣꠁꠘ।
ACT 8:16 ꠇꠣꠞꠘ ꠅꠈꠘꠅ ꠔꠣꠞꠣꠞ ꠃꠙꠞꠦ ꠙꠣꠇ ꠞꠥꠢꠥ ꠘꠣꠎꠤꠟ ꠅꠁꠍꠦ ꠘꠣ, ꠔꠣꠞꠣ ꠈꠣꠟꠤ ꠢꠎꠞꠔ ꠁꠍꠣꠞ ꠘꠣꠝꠦ ꠔꠃꠛꠣꠞ ꠉꠥꠍꠟ ꠇꠞꠍꠂꠘ।
ACT 8:17 ꠙꠤꠔꠞ ꠀꠞ ꠢꠣꠘ꠆ꠘꠣꠘꠦ ꠔꠣꠞꠣꠞ ꠃꠙꠞꠦ ꠀꠔ ꠞꠣꠈꠟꠣ, ꠔꠦꠃ ꠔꠣꠞꠣ ꠙꠣꠇ ꠞꠥꠢꠥ ꠙꠣꠁꠟꠣ।
ACT 8:18 ꠀꠞ ꠍꠣꠁꠝꠘꠦ ꠎꠦꠛꠟꠣ ꠖꠦꠈꠟꠣ, ꠍꠣꠢꠣꠛꠤ ꠅꠇꠟꠞ ꠀꠔ ꠞꠣꠈꠣꠞ ꠇꠣꠞꠘꠦ ꠙꠣꠇ ꠞꠥꠢꠥ ꠝꠤꠟꠦꠞ, ꠅꠃ ꠔꠣꠁꠘ ꠐꠦꠇꠣ ꠀꠘꠤꠀ ꠄꠞꠣꠞ ꠉꠦꠍꠦ ꠖꠤꠀ ꠇꠁꠟꠣ,
ACT 8:19 “ꠀꠝꠣꠞꠦꠅ ꠅꠃ ꠈꠦꠝꠔꠣ ꠖꠦꠃꠇ꠆ꠇꠣ, ꠎꠣꠔꠦ ꠀꠝꠤ ꠇꠦꠃꠞꠞ ꠃꠙꠞꠦ ꠀꠔ ꠞꠣꠈꠟꠦ ꠢꠦ-ꠅ ꠅꠃ ꠙꠣꠇ ꠞꠥꠢꠥ ꠙꠣꠄ।”
ACT 8:20 ꠙꠤꠔꠞꠦ ꠔꠣꠞꠦ ꠇꠁꠟꠣ, “ꠔꠥꠝꠣꠞ ꠞꠥꠙꠣ ꠔꠥꠝꠣꠞ ꠟꠉꠦꠃ ꠛꠤꠘꠣꠡ ꠅꠃꠇ, ꠔꠥꠝꠤ ꠝꠘꠅ ꠇꠞꠍ ꠀꠟ꠆ꠟꠣꠞ ꠖꠣꠘ ꠐꠦꠇꠣꠖꠤ ꠈꠞꠤꠖ ꠇꠞꠣ ꠎꠣꠄ।
ACT 8:21 ꠀꠝꠞꠣꠞ ꠁ ꠇꠣꠝꠅ ꠔꠥꠝꠣꠞ ꠇꠥꠘꠥ ꠜꠣꠉ ꠘꠣꠁ, ꠇꠣꠞꠘ ꠀꠟ꠆ꠟꠣꠞ ꠘꠎꠞꠅ ꠔꠥꠝꠣꠞ ꠖꠤꠟ ꠡꠞꠟ ꠘꠣꠄ।
ACT 8:22 ꠄꠞꠟꠣꠉꠤ ꠁ ꠘꠣꠎꠣꠁꠎ ꠇꠣꠝ ꠕꠣꠇꠤ ꠔꠥꠝꠣꠞ ꠖꠤꠟ ꠚꠤꠞꠣꠅ। ꠀꠞ ꠀꠟ꠆ꠟꠣꠞ ꠉꠦꠍꠦ ꠝꠤꠘꠔ-ꠇꠣꠎ꠆ꠎꠤ ꠇꠞꠅ, ꠇꠤꠛꠣ ꠔꠥꠝꠣꠞ ꠖꠤꠟꠞ ꠁ ꠘꠣꠎꠣꠁꠎ ꠈꠤꠀꠟ ꠔꠣꠁꠘ ꠝꠣꠚ ꠇꠞꠤꠟꠤꠔꠣ ꠙꠣꠞꠂꠘ।
ACT 8:23 ꠀꠝꠤ ꠖꠦꠈꠞꠣꠝ, ꠔꠥꠝꠣꠞ ꠖꠤꠟ ꠟꠤꠙꠡꠣꠄ ꠜꠞꠣ ꠀꠞ ꠔꠥꠝꠤ ꠉꠥꠘꠣꠞ ꠝꠣꠎꠦ ꠛꠘ꠆ꠖꠤ ꠅꠁꠞꠂꠍ।”
ACT 8:24 ꠔꠦꠃ ꠍꠣꠁꠝꠘꠦ ꠇꠁꠟꠣ, “ꠀꠙꠘꠣꠞꠣ ꠀꠟ꠆ꠟꠣꠞ ꠉꠦꠍꠦ ꠀꠝꠣꠞ ꠟꠣꠉꠤ ꠖꠥꠀ ꠇꠞꠃꠇ꠆ꠇꠣ, ꠎꠣꠔꠦ ꠀꠙꠘꠣꠞꠣ ꠎꠦꠔꠣ ꠎꠦꠔꠣ ꠇꠁꠍꠂꠘ ꠁꠔꠣ ꠎꠣꠘꠥ ꠀꠝꠣꠞ ꠃꠙꠞꠦ ꠘꠣ ꠀꠄ।”
ACT 8:25 ꠛꠣꠖꠦ ꠙꠤꠔꠞ ꠀꠞ ꠢꠣꠘ꠆ꠘꠣꠘꠦ ꠝꠣꠟꠤꠇꠞ ꠇꠣꠟꠣꠝ ꠔꠛꠟꠤꠉ ꠇꠞꠤꠀ ꠎꠦꠞꠥꠎꠣꠟꠦꠝꠅ ꠚꠤꠞꠔ ꠎꠣꠅꠀꠞ ꠙꠕꠅ, ꠡꠝꠞꠤꠀꠞ ꠛꠃꠔ ꠉꠣꠃꠔ ꠈꠥꠡ-ꠈꠛꠞꠤ ꠔꠛꠟꠤꠉ ꠇꠞꠤ ꠇꠞꠤ ꠉꠦꠟꠣ।
ACT 8:26 ꠄꠇꠖꠤꠘ ꠀꠟ꠆ꠟꠣꠞ ꠄꠇ ꠚꠤꠞꠤꠡ꠆ꠔꠣꠄ ꠢꠎꠞꠔ ꠚꠤꠟꠤꠚꠞꠦ ꠇꠁꠟꠣ, “ꠃꠑꠅ, ꠖꠃꠇꠘꠞ ꠎꠦ ꠙꠕ ꠎꠦꠞꠥꠎꠣꠟꠦꠝ ꠕꠣꠇꠤ ꠉꠣꠎꠣ ꠐꠣꠃꠘꠞ ꠛꠣꠄ ꠉꠦꠍꠦ ꠢꠃ ꠙꠕꠦ ꠞꠅꠀꠘꠣ ꠖꠦꠅ।” ꠁ ꠙꠕ ꠀꠍꠤꠟ ꠝꠞꠥꠜꠥꠝꠤꠔ।
ACT 8:27 ꠔꠦꠃ ꠚꠤꠟꠤꠚ ꠃꠑꠤꠀ ꠢꠛꠣꠄ ꠞꠅꠀꠘꠣ ꠖꠤꠟꠣ, ꠎꠣꠁꠔꠦ ꠎꠣꠁꠔꠦ ꠙꠕꠅ ꠁꠕꠤꠅꠙꠤꠀ ꠖꠦꠡꠞ ꠇꠣꠘ꠆ꠖꠣꠇꠤ ꠞꠣꠘꠤꠞ ꠄꠇꠎꠘ ꠛꠠ ꠞꠣꠎ ꠈꠣꠎꠣꠘ꠆ꠌꠤꠞ ꠟꠉꠦ ꠔꠣꠘ ꠝꠥꠟꠣꠇꠣꠔ ꠅꠁꠟ, ꠢꠤ ꠈꠣꠎꠣꠘ꠆ꠌꠤ ꠀꠍꠟꠣ ꠘꠣ-ꠝꠞ꠆ꠖ, ꠀꠞ ꠞꠣꠘꠤꠞ ꠢꠇ꠆ꠇꠟ ꠗꠘ-ꠞꠔꠘꠞ ꠎꠤꠝ꠆ꠝꠣꠖꠣꠞ। ꠀꠟ꠆ꠟꠣꠞ ꠄꠛꠣꠖꠔ-ꠛꠘ꠆ꠖꠦꠉꠤ ꠇꠞꠣꠞ ꠟꠣꠉꠤ ꠄꠁꠘ ꠎꠦꠞꠥꠎꠣꠟꠦꠝꠅ ꠀꠁꠍꠟꠣ।
ACT 8:28 ꠛꠣꠖꠦ ꠛꠣꠠꠤꠔ ꠎꠣꠅꠀꠞ ꠛꠣꠟꠣ ꠙꠕꠅ ꠔꠣꠘ ꠘꠤꠎꠞ ꠊꠥꠠꠣꠞ ꠉꠣꠠꠤꠔ ꠛꠁꠀ ꠁꠡꠣꠄꠀ ꠘꠛꠤꠞ ꠇꠤꠔꠣꠛ ꠔꠤꠟꠣꠅꠔ ꠇꠞꠣꠔ ꠀꠍꠟꠣ।
ACT 8:29 ꠅꠃ ꠡꠝꠄ ꠙꠣꠇ ꠞꠥꠢꠦ ꠚꠤꠟꠤꠚꠞꠦ ꠇꠁꠟꠣ, “ꠅꠃ ꠉꠣꠠꠤꠞ ꠇꠣꠘ꠆ꠖꠣꠔ ꠎꠣꠅ, ꠀꠞ ꠄꠘ ꠟꠉꠦ ꠟꠉ ꠗꠞꠅ।”
ACT 8:30 ꠔꠦꠃ ꠚꠤꠟꠤꠚꠦ ꠖꠃꠠꠤꠀ ꠅꠃ ꠉꠣꠠꠤꠞ ꠇꠣꠘ꠆ꠖꠣꠔ ꠉꠤꠀ ꠢꠥꠘꠟꠣ, ꠄꠁꠘ ꠁꠡꠣꠄꠀ ꠘꠛꠤꠞ ꠇꠤꠔꠣꠛ ꠔꠤꠟꠣꠅꠔ ꠇꠞꠞꠣ; ꠚꠤꠟꠤꠚꠦ ꠔꠣꠘꠞꠦ ꠎꠤꠇꠣꠁꠟꠣ, “ꠀꠙꠘꠦ ꠎꠦꠔꠣ ꠔꠤꠟꠣꠅꠔ ꠇꠞꠞꠣ ꠁꠔꠣꠞ ꠝꠣꠘꠤ ꠛꠥꠎꠞꠣ ꠘꠤ?”
ACT 8:31 ꠢꠦꠁꠘ ꠇꠁꠟꠣ, “ꠇꠦꠃ ꠛꠥꠎꠣꠁꠀ ꠘꠣ ꠖꠤꠟꠦ ꠀꠝꠤ ꠇꠦꠝꠘꠦ ꠛꠥꠎꠝꠥ?” ꠅꠃ ꠔꠣꠁꠘ ꠚꠤꠟꠤꠚꠞꠦ ꠉꠣꠠꠤꠔ ꠃꠑꠤꠀ ꠔꠣꠘ ꠇꠣꠘ꠆ꠖꠣꠔ ꠛꠅꠀꠞ ꠟꠣꠉꠤ ꠝꠤꠘꠔ ꠇꠞꠟꠣ।
ACT 8:32 ꠢꠦꠁꠘ ꠇꠤꠔꠣꠛꠞ ꠎꠦ ꠀꠄꠀꠔ ꠔꠤꠟꠣꠅꠔ ꠇꠞꠣꠔ ꠀꠍꠟꠣ, ꠁꠔꠣ ꠅꠁꠟ, ꠎꠛ ꠇꠞꠣꠞ ꠟꠣꠉꠤ ꠝꠦꠠꠣꠞꠦ ꠎꠦꠟꠣ ꠘꠦꠁꠘ, ꠝꠣꠞꠣꠞ ꠘꠤꠅꠔꠦ ꠔꠣꠘꠞꠦ ꠅꠃꠟꠣ ꠘꠦꠅꠀ ꠅꠁꠟ, ꠞꠥꠝꠣ ꠇꠣꠐꠞꠣꠞ ꠍꠣꠝꠘꠦ ꠝꠦꠠꠣ-ꠛꠣꠁꠌ꠆ꠌꠣ ꠎꠦꠟꠣ ꠘꠤꠞꠣꠁ ꠞꠄ, ꠅꠃꠟꠣ ꠔꠣꠁꠘꠅ ꠎꠛꠣꠘ ꠈꠥꠟꠟꠣ ꠘꠣ।
ACT 8:33 ꠔꠣꠁꠘ ꠛꠦꠁꠎ꠆ꠎꠔ ꠅꠁꠟꠣ, ꠔꠣꠘꠞꠦ ꠛꠦ-ꠁꠘꠍꠣꠚ ꠇꠞꠣ ꠅꠁꠟ। ꠔꠣꠘ ꠅꠀꠞꠤꠡꠞ ꠇꠕꠣ ꠇꠦꠉꠤꠄ ꠇꠁꠔ ꠙꠣꠞꠛ? ꠔꠣꠘ ꠎꠣꠘꠞꠦ ꠖꠥꠘꠤꠀ ꠕꠣꠇꠤ ꠇꠣꠠꠤꠀ ꠘꠦꠅꠀ ꠅꠁꠍꠤꠟ।
ACT 8:34 ꠢꠃ ꠈꠣꠎꠣꠘ꠆ꠌꠤꠄ ꠚꠤꠟꠤꠚꠞꠦ ꠇꠁꠟꠣ, “ꠇꠃꠇ꠆ꠇꠣ ꠌꠣꠁꠘ, ꠘꠛꠤꠄ ꠇꠣꠞ ꠛꠦꠙꠣꠞꠦ ꠁꠔꠣ ꠇꠁꠍꠂꠘ? ꠘꠤꠎꠞ ꠛꠦꠙꠣꠞꠦ ꠘꠣ ꠀꠞ ꠇꠦꠃꠞꠞ?”
ACT 8:35 ꠚꠤꠟꠤꠚꠦ ꠎꠛꠣꠘ ꠈꠥꠟꠤꠀ ꠙꠣꠇ ꠇꠣꠟꠣꠝꠞ ꠅꠃ ꠀꠄꠀꠔ ꠕꠣꠇꠤ ꠟꠁꠀ ꠁꠍꠣꠞ ꠈꠥꠡ-ꠈꠛꠞꠤ ꠙꠞ꠆ꠎꠘ꠆ꠔ ꠔꠣꠘ ꠉꠦꠍꠦ ꠔꠛꠟꠤꠉ ꠇꠞꠟꠣ।
ACT 8:36 ꠙꠕꠅ ꠎꠣꠁꠔꠦ ꠎꠣꠁꠔꠦ ꠔꠣꠞꠣ ꠙꠣꠘꠤꠀꠟꠣ ꠄꠇ ꠎꠣꠉꠣꠔ ꠀꠁꠀ ꠙꠃꠍꠟꠣ, ꠔꠦꠃ ꠢꠤ ꠈꠣꠎꠣꠘ꠆ꠌꠤꠄ ꠇꠁꠟꠣ, “ꠅꠃ ꠖꠦꠈꠃꠇ꠆ꠇꠣ ꠅꠘꠅ ꠙꠣꠘꠤ ꠀꠍꠦ, ꠔꠦ ꠀꠝꠤ ꠔꠃꠛꠣꠞ ꠉꠥꠍꠟ ꠇꠞꠔꠦ ꠇꠥꠘꠥ ꠛꠣꠗꠣ ꠀꠍꠦ ꠘꠤ?”
ACT 8:38 ꠇꠁꠀ ꠔꠣꠁꠘ ꠊꠥꠠꠣꠞ ꠉꠣꠠꠤ ꠃꠛꠣ ꠇꠞꠣꠞ ꠢꠥꠇꠥꠝ ꠖꠤꠟꠣ, ꠚꠤꠟꠤꠚ ꠀꠞ ꠢꠃ ꠘꠣ-ꠝꠞ꠆ꠖ ꠈꠣꠎꠣꠘ꠆ꠌꠤ ꠖꠥꠁꠅ ꠎꠘ ꠙꠣꠘꠤꠔ ꠟꠣꠝꠟꠣ, ꠀꠞ ꠚꠤꠟꠤꠚꠦ ꠔꠣꠘꠞꠦ ꠔꠃꠛꠣꠞ ꠉꠥꠍꠟ ꠇꠞꠣꠁꠟꠣ।
ACT 8:39 ꠔꠣꠞꠣ ꠎꠦꠛꠟꠣ ꠙꠣꠘꠤ ꠕꠣꠇꠤ ꠃꠑꠤꠀ ꠀꠁꠟꠣ, ꠅꠃ ꠡꠝꠄ ꠝꠣꠛꠥꠖꠞ ꠞꠥꠢꠦ ꠀꠈꠔꠣꠃ ꠚꠤꠟꠤꠚꠞꠦ ꠀꠅꠠꠦ ꠘꠤꠟꠣꠉꠤ। ꠢꠤ ꠘꠣ-ꠝꠞ꠆ꠖꠦ ꠀꠞ ꠚꠤꠟꠤꠚꠞꠦ ꠖꠦꠈꠟꠣ ꠘꠣ, ꠔꠦꠃ ꠔꠣꠁꠘ ꠚꠥꠞ꠆ꠔꠤ ꠇꠞꠤ ꠇꠞꠤ ꠔꠣꠘ ꠘꠤꠎꠞ ꠙꠕꠦ ꠉꠦꠟꠣꠉꠤ।
ACT 8:40 ꠅꠁꠟꠦ ꠚꠤꠟꠤꠚꠞꠦ ꠀꠡꠖꠥꠖ ꠐꠣꠃꠘꠅ ꠖꠦꠈꠣ ꠝꠤꠟꠟ; ꠔꠣꠁꠘ ꠉꠣꠃꠄ ꠉꠣꠃꠄ ꠈꠥꠡ-ꠈꠛꠞꠤ ꠔꠛꠟꠤꠉ ꠇꠞꠤ ꠇꠞꠤ ꠢꠦꠡꠦ ꠇꠂꠍꠞꠤꠀ ꠐꠣꠃꠘꠅ ꠉꠦꠟꠣ।
ACT 9:1 ꠁ ꠡꠝꠄꠅ ꠡꠃꠟꠦ ꠀꠟ-ꠝꠍꠤꠞ ꠃꠝ꠆ꠝꠔ ꠅꠇꠟꠞꠦ ꠎꠣꠘꠦ ꠝꠣꠞꠔꠣ ꠇꠞꠤ ꠒꠞ ꠖꠦꠈꠣꠘꠤꠔ ꠞꠁꠍꠂꠘ। ꠀꠞ ꠖꠣꠝꠦꠡ꠆ꠇ ꠡꠢꠞꠞ ꠁꠢꠥꠖꠤꠞ ꠝꠍꠤꠖꠣꠁꠘ꠆ꠔꠅ ꠖꠦꠅꠀꠞ ꠟꠣꠉꠤ ꠔꠣꠁꠘ ꠙꠞꠗꠣꠘ ꠁꠝꠣꠝꠞ ꠉꠦꠍ ꠕꠣꠇꠤ ꠌꠤꠑꠤ ꠌꠣꠁꠟꠣ, ꠎꠔ ꠛꠦꠐꠣꠁꠘ-ꠛꠦꠐꠤꠘ ꠁꠍꠣꠞ ꠙꠕꠦ ꠌꠟꠂꠘ, ꠔꠣꠞꠣꠞꠦ ꠛꠣꠘ꠆ꠖꠤꠀ ꠎꠦꠞꠥꠎꠣꠟꠦꠝꠅ ꠀꠘꠔꠣ ꠅꠃ ꠈꠦꠝꠔꠣ ꠙꠣꠅꠀꠞ ꠟꠣꠉꠤ ꠌꠤꠑꠤ ꠌꠣꠁꠟꠣ।
ACT 9:3 ꠙꠕꠅ ꠎꠣꠁꠔꠦ ꠎꠣꠁꠔꠦ ꠎꠦꠛꠟꠣ ꠖꠣꠝꠦꠡ꠆ꠇ ꠐꠣꠃꠘꠞ ꠇꠣꠘ꠆ꠖꠣꠔ ꠀꠁꠟꠣ, ꠔꠦꠃ ꠀꠈꠔꠣꠃ ꠀꠍꠝꠣꠘ ꠕꠣꠇꠤ ꠔꠣꠘ ꠌꠣꠁꠞꠅ ꠉꠣꠟꠣꠛꠣꠄ ꠚꠞ ꠅꠁꠀ ꠌꠝꠇꠣꠁꠀ ꠃꠑꠟ।
ACT 9:4 ꠅꠃ ꠔꠣꠁꠘ ꠝꠣꠐꠤꠔ ꠙꠠꠤꠉꠦꠟꠣ ꠀꠞ ꠉꠣꠁꠛꠤ ꠀꠅꠀꠎ ꠢꠥꠘꠟꠣ, ꠇꠦ ꠎꠣꠘꠥ ꠔꠣꠘꠞꠦ ꠇꠞ, “ꠡꠃꠟ, ꠡꠃꠟ, ꠇꠦꠘꠦ ꠀꠝꠣꠞꠦ ꠎꠥꠟꠥꠝ ꠇꠞꠞꠣꠄ?”
ACT 9:5 ꠡꠃꠟꠦ ꠎꠤꠇꠣꠁꠟꠣ, “ꠝꠣꠟꠤꠇ, ꠀꠙꠘꠦ ꠇꠦ?” ꠔꠣꠁꠘ ꠇꠁꠟꠣ, “ꠀꠝꠤ ꠁꠍꠣ, ꠎꠦꠘꠞꠦ ꠔꠥꠝꠤ ꠎꠥꠟꠥꠝ ꠇꠞꠞꠣꠄ।
ACT 9:6 ꠔꠥꠝꠤ ꠅꠈꠘ ꠃꠑꠤꠀ ꠡꠢꠞꠅ ꠎꠣꠅ, ꠔꠥꠝꠤ ꠇꠤꠔꠣ ꠇꠞꠔꠣꠄ ꠔꠥꠝꠣꠞꠦ ꠎꠣꠘꠣꠁꠟ ꠅꠁꠛ।”
ACT 9:7 ꠅꠁꠟꠦ ꠎꠦꠞꠣ ꠡꠃꠟꠞ ꠟꠉꠦ ꠎꠣꠅꠀꠔ ꠀꠍꠟꠣ ꠔꠣꠞꠣ ꠌꠝꠇꠤ ꠉꠦꠟꠣ, ꠔꠣꠞꠣ ꠁ ꠀꠅꠀꠎ ꠑꠤꠇꠃ ꠢꠥꠘꠍꠤꠟꠣ, ꠅꠁꠟꠦ ꠇꠦꠃꠞꠞꠦ ꠖꠦꠈꠟꠣ ꠘꠣ।
ACT 9:8 ꠛꠣꠖꠦ ꠡꠃꠟ ꠝꠣꠐꠤ ꠕꠣꠇꠤ ꠃꠑꠟꠣ, ꠀꠞ ꠌꠃꠈ ꠝꠦꠟꠤꠀ ꠢꠣꠞꠟꠦ ꠇꠥꠘ꠆ꠔꠣꠃ ꠖꠦꠈꠟꠣ ꠘꠣ; ꠔꠣꠘ ꠟꠉꠞ ꠝꠣꠘꠡꠦ ꠔꠣꠘꠞꠦ ꠀꠔꠅ ꠗꠞꠤꠀ ꠖꠣꠝꠦꠡ꠆ꠇꠅ ꠟꠁꠀ ꠉꠦꠟꠣ।
ACT 9:9 ꠡꠃꠟꠦ ꠔꠤꠘ ꠖꠤꠘ ꠗꠞꠤ ꠌꠃꠈꠦ ꠇꠥꠘ꠆ꠔꠣꠃ ꠖꠦꠈꠟꠣ ꠘꠣ ꠀꠞ ꠇꠥꠘꠥꠎꠣꠔ ꠈꠣꠘꠣ-ꠙꠤꠘꠣꠅ ꠈꠣꠁꠟꠣ ꠘꠣ।
ACT 9:10 ꠖꠣꠝꠦꠡ꠆ꠇ ꠡꠢꠞꠅ ꠅꠘꠘꠤꠅ ꠘꠣꠝꠦ ꠄꠇꠎꠘ ꠝꠥꠝꠤꠘ ꠀꠍꠟꠣ,
ACT 9:11 ꠝꠣꠛꠥꠖꠦ ꠔꠣꠘꠞꠦ ꠖꠞꠡꠘ ꠖꠤꠀ ꠇꠁꠟꠣ, “ꠅꠘꠘꠤꠅ!” ꠔꠣꠁꠘ ꠎꠥꠀꠙ ꠖꠤꠟꠣ, “ꠝꠣꠟꠤꠇ, ꠅꠃꠘꠥ ꠀꠝꠤ।” ꠝꠣꠛꠥꠖꠦ ꠔꠣꠘꠞꠦ ꠇꠁꠟꠣ, “ꠡꠥꠎꠣ ꠘꠣꠝꠞ ꠎꠦ ꠡꠠꠇ ꠀꠍꠦ, ꠔꠥꠝꠤ ꠢꠃ ꠡꠠꠇꠦ ꠎꠣꠅ, ꠉꠤꠀ ꠢꠘꠞ ꠄꠢꠥꠖꠣꠞ ꠛꠣꠠꠤꠔ ꠔꠣꠞ꠆ꠡ ꠡꠢꠞꠞ ꠡꠃꠟ ꠘꠣꠝꠞ ꠄꠇꠎꠘ ꠝꠣꠘꠡꠞ ꠔꠣꠟ꠆ꠟꠣꠡ ꠇꠞꠅ।
ACT 9:12 ꠢꠘꠅ ꠢꠦ ꠖꠥꠀ ꠇꠞꠦꠞ, ꠀꠞ ꠢꠦ ꠖꠞꠡꠘ ꠙꠣꠁꠍꠦ, ꠅꠘꠘꠤꠅ ꠘꠣꠝꠞ ꠄꠇꠎꠘ ꠝꠣꠘꠥꠡ ꠀꠁꠀ ꠔꠣꠞ ꠡꠞꠤꠟ ꠀꠔꠣꠁꠀ ꠖꠤꠛ, ꠔꠦꠃ ꠢꠦ ꠢꠤꠞꠛꠣꠞ ꠌꠃꠈꠦ ꠖꠦꠈꠛ।”
ACT 9:13 ꠅꠘꠘꠤꠅꠄ ꠇꠁꠟꠣ, “ꠝꠣꠟꠤꠇ, ꠀꠝꠤ ꠛꠃꠔ ꠝꠣꠘꠡꠞ ꠉꠦꠍꠦ ꠁ ꠝꠣꠘꠥꠡꠉꠥꠞ ꠈꠣꠁꠍꠟꠔ ꠢꠥꠘꠍꠤ, ꠢꠦ ꠎꠦꠞꠥꠎꠣꠟꠦꠝꠅ ꠔꠥꠝꠣꠞ ꠙꠣꠇ ꠛꠘ꠆ꠖꠣ ꠅꠇꠟꠞ ꠃꠙꠞꠦ ꠛꠃꠔ ꠎꠥꠟꠥꠝ ꠇꠞꠍꠦ।
ACT 9:14 ꠀꠞ ꠅꠃ ꠎꠣꠉꠣꠔꠅ ꠎꠔ ꠝꠣꠘꠡꠦ ꠔꠥꠝꠣꠞ ꠙꠕꠦ ꠌꠟꠦ, ꠄꠞꠣꠞꠦ ꠛꠣꠘ꠆ꠖꠤꠀ ꠘꠦꠅꠀꠞ ꠈꠦꠝꠔꠣ ꠢꠦ ꠛꠠ ꠁꠝꠣꠝ ꠅꠇꠟꠞ ꠉꠦꠍ ꠕꠣꠇꠤ ꠙꠣꠁꠍꠦ।”
ACT 9:15 ꠅꠁꠟꠦ ꠝꠣꠟꠤꠇꠦ ꠔꠣꠘꠞꠦ ꠇꠁꠟꠣ, “ꠔꠥꠝꠤ ꠎꠣꠅ, ꠇꠣꠞꠘ ꠅ-ꠁꠢꠥꠖꠤ ꠅꠇꠟ, ꠔꠣꠞꠣꠞ ꠞꠣꠎꠣ ꠅꠇꠟ, ꠀꠞ ꠛꠘꠤ ꠁꠍꠞꠣꠁꠟꠞ ꠉꠦꠍꠦ ꠀꠝꠣꠞ ꠘꠣꠝ ꠔꠛꠟꠤꠉꠞ ꠟꠣꠉꠤ ꠀꠝꠤ ꠔꠣꠞꠦ ꠙꠍꠘ꠆ꠖ ꠇꠞꠍꠤ।
ACT 9:16 ꠀꠝꠤ ꠔꠣꠞꠦ ꠖꠦꠈꠣꠁꠝꠥ, ꠀꠝꠣꠞ ꠘꠣꠝꠞ ꠟꠣꠉꠤ ꠔꠣꠞꠦ ꠇꠔ ꠎꠣꠟꠣ-ꠎꠘꠔ꠆ꠞꠘꠣ ꠡꠁꠎ꠆ꠎ ꠇꠞꠣ ꠟꠣꠉꠛ।”
ACT 9:17 ꠔꠦꠃ ꠅꠘꠘꠤꠅ ꠛꠣꠞ ꠅꠁꠀ ꠢꠃ ꠛꠣꠠꠤꠔ ꠉꠤꠀ ꠢꠣꠝꠣꠁꠟꠣ, ꠀꠞ ꠡꠃꠟꠞ ꠉꠔꠞꠅ ꠀꠔ ꠖꠤꠀ ꠇꠁꠟꠣ, “ꠜꠣꠁ ꠡꠃꠟ, ꠅꠘꠅ ꠀꠅꠀꠞ ꠙꠕꠅ ꠎꠦꠁꠘ ꠔꠥꠝꠣꠞꠦ ꠖꠞꠡꠘ ꠖꠤꠍꠂꠘ ꠔꠣꠁꠘ ꠢꠎꠞꠔ ꠁꠍꠣ, ꠔꠣꠁꠘ ꠀꠝꠣꠞꠦ ꠙꠣꠑꠣꠁꠍꠂꠘ, ꠎꠣꠔꠦ ꠔꠥꠝꠤ ꠢꠤꠞꠛꠣꠞ ꠌꠃꠈꠦ ꠖꠦꠈꠔꠣꠄ ꠙꠣꠅ ꠀꠞ ꠙꠣꠇ ꠞꠥꠢꠦ ꠇꠣꠝꠤꠟ ꠅꠅ।”
ACT 9:18 ꠀꠞ ꠟꠉꠦ ꠟꠉꠦꠃ ꠔꠣꠘ ꠌꠃꠈ ꠕꠣꠇꠤ ꠝꠣꠍꠞ-ꠚꠁꠞꠞ ꠟꠣꠈꠣꠘ ꠇꠤꠔꠣ ꠙꠠꠤꠉꠦꠟ, ꠔꠣꠁꠘ ꠖꠦꠈꠔꠣ ꠙꠣꠞꠟꠣ ꠀꠞ ꠃꠑꠤꠀ ꠙꠣꠘꠤꠔ ꠉꠤꠀ ꠔꠃꠛꠣꠞ ꠉꠥꠍꠟ ꠇꠞꠟꠣ;
ACT 9:19 ꠈꠣꠅꠀ-ꠖꠣꠅꠀꠞ ꠛꠣꠖꠦ ꠡꠞꠤꠟꠅ ꠢꠤꠞꠛꠣꠞ ꠛꠟ ꠙꠣꠁꠟꠣ। ꠀꠞ ꠔꠣꠁꠘ ꠇꠤꠍꠥꠖꠤꠘ ꠖꠣꠝꠦꠡ꠆ꠇꠞ ꠃꠝ꠆ꠝꠔ ꠅꠇꠟꠞ ꠟꠉꠦ ꠞꠁꠟꠣ।
ACT 9:20 ꠡꠃꠟꠦ ꠀꠞ ꠖꠦꠞꠤ ꠇꠞꠟꠣ ꠘꠣ, ꠔꠣꠁꠘ ꠎꠣꠉꠣꠄ ꠎꠣꠉꠣꠄ ꠝꠍꠤꠖꠣꠁꠘ꠆ꠔꠅ ꠉꠤꠀ ꠔꠛꠟꠤꠉ ꠇꠞꠣꠔ ꠟꠣꠉꠟꠣ, ꠢꠎꠞꠔ ꠁꠍꠣꠃ ꠀꠟ꠆ꠟꠣꠞ ꠢꠃ ꠈꠣꠍ ꠝꠣꠄꠀꠞ ꠎꠘ, ꠁꠛꠘꠥꠟ꠆ꠟꠣ।
ACT 9:21 ꠎꠦꠞꠣ ꠔꠣꠘ ꠛꠄꠀꠘ ꠢꠥꠘꠔ ꠔꠣꠞꠣ ꠢꠇꠟꠦꠃ ꠔꠣꠁꠎ꠆ꠎꠥꠛ ꠅꠁꠀ ꠝꠣꠔꠣ-ꠝꠣꠔꠤ ꠇꠞꠔ, “ꠄꠁꠘ ꠢꠃ ꠝꠣꠘꠥꠡ ꠘꠣꠄ ꠘꠤ ꠎꠦꠁꠘ ꠎꠦꠞꠥꠎꠣꠟꠦꠝꠅ ꠁꠍꠣꠞ ꠃꠝ꠆ꠝꠔ ꠅꠇꠟꠞꠦ ꠎꠥꠟꠥꠝ ꠇꠞꠔꠣ? ꠀꠞ ꠅꠘꠅ-ꠅ ꠔ ꠅꠔꠣꠞ ꠟꠣꠉꠤꠃ ꠀꠁꠍꠂꠘ, ꠎꠦꠞꠣ ꠁꠍꠣꠞ ꠙꠕꠦ ꠌꠟꠦ ꠔꠣꠞꠣꠞꠦ ꠛꠣꠘ꠆ꠖꠤꠀ ꠛꠠ ꠁꠝꠣꠝ ꠅꠇꠟꠞ ꠉꠦꠍꠦ ꠟꠁꠀ ꠎꠣꠁꠔꠣ?”
ACT 9:22 ꠅꠁꠟꠦ ꠡꠃꠟ ꠖꠤꠘ ꠖꠤꠘ ꠀꠞꠅ ꠢꠤꠝ꠆ꠝꠔ ꠀꠟꠣ ꠅꠁꠟꠣ, ꠀꠞ ꠖꠣꠝꠦꠡ꠆ꠇꠞ ꠁꠢꠥꠖꠤ ꠅꠇꠟꠞꠦ ꠟꠣ-ꠎꠥꠀꠙ ꠛꠣꠘꠣꠁꠔꠣ ꠟꠣꠉꠟꠣ, ꠔꠣꠁꠘ ꠙꠞꠝꠣꠘ ꠖꠦꠈꠣꠁꠟꠣ, ꠅꠃ ꠁꠍꠣꠃ ꠢꠤ ꠀꠟ-ꠝꠍꠤ।
ACT 9:23 ꠄꠞ ꠛꠃꠔ ꠛꠣꠖꠦ ꠁꠢꠥꠖꠤ ꠅꠇꠟꠦ ꠔꠣꠘꠞꠦ ꠝꠣꠞꠣꠞ ꠟꠣꠉꠤ ꠍꠟ꠆ꠟꠣ-ꠙꠞꠣꠝꠤꠡ ꠇꠞꠟꠣ,
ACT 9:24 ꠀꠞ ꠡꠃꠟꠦ ꠁ ꠈꠛꠞ ꠙꠣꠁꠟꠣ। ꠔꠣꠞꠣ ꠔꠣꠘꠞꠦ ꠝꠣꠞꠣꠞ ꠟꠣꠉꠤ ꠡꠢꠞꠅ ꠢꠣꠝꠣꠘꠤ ꠛꠣꠞꠘꠤꠞ ꠢꠇ꠆ꠇꠟ ꠖꠥꠀꠞꠅ ꠖꠤꠘꠦ-ꠞꠣꠁꠔꠦ ꠌꠇꠤꠖꠣꠞ ꠛꠅꠀꠁꠟꠣ।
ACT 9:25 ꠄꠇꠖꠤꠘ ꠞꠣꠁꠔ ꠃꠝ꠆ꠝꠔ ꠅꠇꠟꠦ ꠡꠃꠟꠞꠦ ꠄꠇ ꠐꠥꠇꠞꠤꠞ ꠜꠤꠔꠞꠦ ꠢꠣꠞꠣꠁꠀ, ꠛꠣꠃꠘ꠆ꠒꠞꠤ ꠅꠀꠟꠞ ꠈꠤꠠꠇꠤꠛꠣꠄ ꠙꠣꠞ ꠇꠞꠤ ꠛꠣꠞꠦ ꠟꠣꠝꠣꠁꠀ ꠖꠤꠟꠣ।
ACT 9:26 ꠛꠣꠖꠦ ꠔꠣꠁꠘ ꠎꠦꠞꠥꠎꠣꠟꠦꠝꠅ ꠀꠁꠀ ꠃꠝ꠆ꠝꠔ ꠅꠇꠟꠞ ꠟꠉꠦ ꠡꠞꠤꠇ ꠅꠁꠔꠣ ꠌꠣꠁꠟꠣ; ꠅꠁꠟꠦ ꠢꠇ꠆ꠇꠟꠦ ꠔꠣꠘꠞꠦ ꠒꠞꠣꠁꠟ, ꠔꠣꠁꠘ ꠎꠦꠘ ꠢꠣꠍꠣꠃ ꠁꠝꠣꠘ ꠀꠘꠍꠂꠘ ꠔꠣꠞꠣ ꠛꠤꠡ꠆ꠛꠣꠡ ꠇꠞꠟꠣ ꠘꠣ।
ACT 9:27 ꠔꠦꠃ ꠛꠣꠞ꠆ꠘꠣꠛꠣꠍꠦ ꠔꠣꠘꠞꠦ ꠀꠔꠅ ꠗꠞꠤꠀ ꠍꠣꠢꠣꠛꠤ ꠅꠇꠟꠞ ꠉꠦꠍꠦ ꠟꠁꠀ ꠉꠦꠟꠣ, ꠀꠞ ꠖꠣꠝꠦꠡ꠆ꠇ ꠎꠣꠅꠀꠞ ꠙꠕꠅ ꠇꠤꠟꠣ ꠔꠣꠁꠘ ꠀꠟ-ꠝꠍꠤꠞ ꠖꠤꠖꠣꠞ ꠙꠣꠁꠟꠣ, ꠀꠞ ꠇꠤꠟꠣ ꠝꠣꠟꠤꠇꠦ ꠔꠣꠘ ꠟꠉꠦ ꠛꠣꠔꠌꠤꠔ ꠇꠞꠟꠣ, ꠖꠣꠝꠦꠡ꠆ꠇꠅ ꠇꠤꠟꠣ ꠔꠣꠁꠘ ꠡꠣꠅꠡ ꠇꠞꠤ ꠁꠍꠣꠞ ꠘꠣꠝꠦ ꠔꠛꠟꠤꠉ ꠇꠞꠍꠂꠘ ꠢꠇꠟꠔꠣ ꠄꠞꠣꠞꠦ ꠎꠣꠘꠣꠁꠟꠣ।
ACT 9:28 ꠛꠣꠖꠦ ꠡꠃꠟ ꠎꠦꠞꠥꠎꠣꠟꠦꠝꠅ ꠄꠞꠣꠞ ꠟꠉꠦ ꠟꠉꠦ ꠞꠁꠔꠣ, ꠔꠣꠁꠘ ꠎꠦꠞꠥꠎꠣꠟꠦꠝꠞ ꠢꠇꠟ ꠎꠣꠉꠣꠔ ꠊꠥꠞꠤꠀ ꠚꠤꠞꠤꠀ ꠡꠣꠅꠡ ꠇꠞꠤ ꠁꠍꠣꠞ ꠘꠣꠝꠦ ꠔꠛꠟꠤꠉ ꠇꠞꠔꠣ।
ACT 9:29 ꠔꠣꠁꠘ ꠁꠃꠘꠣꠘꠤ ꠜꠣꠡꠣꠄ ꠝꠣꠔꠞꠣ ꠁꠢꠥꠖꠤ ꠅꠇꠟꠞ ꠟꠉꠦ ꠖꠤꠘꠤ ꠛꠣꠔꠌꠤꠔ ꠀꠞ ꠔꠞ꠆ꠇ ꠇꠞꠔꠣ; ꠁꠢꠥꠖꠤ ꠅꠇꠟꠦ ꠔꠣꠘꠞꠦ ꠎꠣꠘꠦ ꠝꠣꠞꠤꠟꠔꠣ ꠌꠣꠁꠟꠣ।
ACT 9:30 ꠝꠥꠝꠤꠘ ꠅꠇꠟꠦ ꠁ ꠈꠛꠞ ꠢꠥꠘꠤꠀ ꠔꠣꠘꠞꠦ ꠇꠂꠍꠞꠤꠀ ꠡꠢꠞꠅ ꠟꠁꠀ ꠉꠦꠟꠣ, ꠢꠘ ꠕꠣꠇꠤ ꠔꠣꠘꠞꠦ ꠔꠣꠞ꠆ꠡ ꠡꠢꠞꠅ ꠙꠣꠑꠣꠁ ꠖꠤꠟꠣ।
ACT 9:31 ꠢꠤ ꠡꠝꠄ ꠄꠢꠥꠖꠤꠀ, ꠉꠣꠟꠤꠟ ꠀꠞ ꠡꠝꠞꠤꠀ ꠄꠟꠣꠇꠣꠞ ꠎꠝꠣꠔ ꠅꠇꠟ ꠡꠣꠘ꠆ꠔꠤꠞ ꠝꠣꠎꠦ ꠔꠂꠀꠞ ꠅꠁꠟ, ꠁ ꠎꠝꠣꠔ ꠅꠇꠟ ꠝꠣꠛꠥꠖꠞ ꠒꠞꠦ ꠀꠞ ꠙꠣꠇ ꠞꠥꠢꠥꠞ ꠁꠡꠣꠞꠣꠄ ꠌꠟꠤ ꠌꠟꠤ ꠛꠃꠔ ꠙꠞꠤꠝꠣꠘꠦ ꠛꠣꠠꠟ।
ACT 9:32 ꠙꠤꠔꠞꠦ ꠢꠇ꠆ꠇꠟ ꠎꠣꠉꠣꠔ ꠊꠥꠞꠔꠦ ꠊꠥꠞꠔꠦ ꠟꠥꠖ꠆ꠖꠣ ꠉꠣꠃꠞ ꠝꠥꠝꠤꠘ ꠅꠇꠟꠞ ꠉꠦꠍꠦ ꠀꠁꠀ ꠀꠎꠤꠟꠣ।
ACT 9:33 ꠢꠃ ꠉꠣꠃꠔ ꠅꠂꠘꠤꠅ ꠘꠣꠝꠦ ꠄꠇꠎꠘ ꠝꠣꠘꠥꠡ ꠀꠍꠤꠟ; ꠢꠦ ꠅꠞ꠆ꠖꠋ ꠛꠦꠝꠣꠞꠦ ꠀꠐ ꠛꠞꠍ ꠗꠞꠤ ꠛꠤꠍꠘꠣꠔ ꠙꠠꠘꠅ ꠀꠍꠤꠟ।
ACT 9:34 ꠙꠤꠔꠞꠦ ꠔꠣꠞꠦ ꠖꠦꠈꠤꠀ ꠇꠁꠟꠣ, “ꠅꠂꠘꠤꠅ, ꠁꠍꠣ ꠀꠟ-ꠝꠍꠤ ꠔꠥꠝꠣꠞꠦ ꠜꠣꠟꠣ ꠇꠞꠟꠣ, ꠃꠑꠅ, ꠔꠥꠝꠣꠞ ꠛꠤꠍꠘꠣ ꠔꠥꠟꠤꠟꠣꠅ।” ꠀꠞ ꠟꠉꠦ ꠟꠉꠦꠃ ꠅꠂꠘꠤꠅ ꠃꠑꠤꠀ ꠃꠛꠣꠁ ꠉꠦꠟ।
ACT 9:35 ꠔꠦꠃ ꠟꠥꠖ꠆ꠖꠣ ꠉꠣꠃ ꠀꠞ ꠡꠣꠞꠥꠘ ꠄꠟꠣꠇꠣꠞ ꠢꠇꠟ ꠝꠣꠘꠡꠦ ꠅꠂꠘꠤꠅꠞ ꠢꠣꠟꠔ ꠖꠦꠈꠤꠀ ꠀꠟ꠆ꠟꠣꠞ ꠛꠣꠄ ꠚꠤꠞꠟꠣ।
ACT 9:36 ꠎꠣꠚꠣ ꠡꠢꠞꠅ ꠐꠣꠛꠤꠕꠣ ꠘꠣꠝꠦ ꠄꠇꠎꠘ ꠝꠥꠝꠤꠘ ꠛꠦꠐꠤ ꠀꠍꠟꠣ, ꠁꠃꠘꠣꠘꠤ ꠜꠣꠡꠣꠄ ꠐꠣꠛꠤꠕꠣ ꠘꠣꠝꠞ ꠅꠞ꠆ꠕ ꠖꠞ꠆ꠇꠣ, ꠝꠣꠘꠤ ꠢꠞꠤꠘꠤ, ꠔꠣꠁꠘ ꠢꠇꠟ ꠡꠝꠄ ꠜꠣꠟꠣ ꠇꠣꠝ ꠇꠞꠔꠣ ꠀꠞ ꠉꠞꠤꠛꠞꠦ ꠡꠣꠁꠎ꠆ꠎ ꠇꠞꠔꠣ।
ACT 9:37 ꠔꠣꠁꠘ ꠛꠦꠝꠣꠞ ꠙꠠꠤꠀ ꠝꠣꠞꠣ ꠉꠦꠟꠣ, ꠀꠞ ꠝꠣꠘꠡꠦ ꠔꠣꠘꠞꠦ ꠉꠥꠍꠟ ꠖꠦꠅꠀꠁꠀ ꠃꠙꠞꠞ ꠇꠥꠑꠣꠔ ꠘꠤꠀ ꠕꠁꠟꠣ।
ACT 9:38 ꠎꠣꠚꠣ ꠡꠢꠞ ꠟꠥꠖ꠆ꠖꠣꠞ ꠇꠣꠍꠣꠔ ꠀꠍꠤꠟ ꠉꠔꠤꠇꠦ, ꠃꠝ꠆ꠝꠔ ꠅꠇꠟꠦ ꠎꠦꠛꠟꠣ ꠢꠥꠘꠟꠣ, ꠙꠤꠔꠞ ꠟꠥꠖ꠆ꠖꠣꠔ ꠀꠍꠂꠘ, ꠅꠃ ꠔꠣꠞꠣ ꠖꠥꠁꠎꠘ ꠝꠣꠘꠡꠞꠦ ꠔꠣꠘ ꠉꠦꠍꠦ ꠙꠣꠑꠣꠁꠀ ꠝꠤꠘꠔ ꠇꠞꠟꠣ, “ꠀꠙꠘꠦ ꠎꠟꠖꠤ ꠇꠞꠤ ꠀꠝꠞꠣꠞ ꠉꠦꠍꠦ ꠀꠃꠇ꠆ꠇꠣ।”
ACT 9:39 ꠔꠦꠃ ꠙꠤꠔꠞ ꠔꠣꠞꠣꠞ ꠟꠉꠦ ꠞꠅꠀꠘꠣ ꠖꠤꠟꠣ, ꠔꠣꠁꠘ ꠢꠘꠅ ꠎꠣꠅꠀꠞ ꠛꠣꠖꠦ ꠔꠣꠞꠣ ꠔꠣꠘꠞꠦ ꠃꠙꠞꠞ ꠇꠥꠑꠣꠔ ꠟꠁꠀ ꠉꠦꠟ, ꠢꠇꠟ ꠠꠣꠠꠤ ꠛꠦꠐꠤꠘ꠆ꠔꠦ ꠙꠤꠔꠞꠞ ꠌꠣꠁꠞꠅꠛꠣꠄ ꠃꠛꠣꠁꠀ ꠇꠣꠘ꠆ꠖꠘ ꠡꠥꠞꠥ ꠇꠞꠟꠣ ꠀꠞ ꠖꠞ꠆ꠇꠣ ꠎꠤꠔꠣ ꠕꠣꠇꠔꠦ ꠎꠦꠔꠣ ꠇꠣꠙꠠ-ꠌꠥꠙꠠ ꠛꠣꠘꠣꠁꠍꠟꠣ, ꠅꠔꠣ ꠙꠤꠔꠞꠞꠦ ꠖꠦꠈꠣꠁꠟꠣ।
ACT 9:40 ꠙꠤꠔꠞꠦ ꠔꠣꠞꠣ ꠢꠇ꠆ꠇꠟꠞꠦ ꠇꠥꠑꠣ ꠕꠣꠇꠤ ꠛꠣꠞ ꠇꠞꠤ ꠖꠤꠀ ꠎꠣꠘꠥ ꠙꠣꠠꠤꠀ ꠖꠥꠀ ꠇꠞꠟꠣ; ꠛꠣꠖꠦ ꠝꠞꠣ ꠛꠦꠐꠤꠞ ꠟꠣꠡꠞ ꠛꠣꠄ ꠚꠤꠞꠤꠀ ꠇꠁꠟꠣ, “ꠐꠣꠛꠤꠕꠣ, ꠃꠑꠅ।” ꠟꠉꠦ ꠟꠉꠦ ꠖꠞ꠆ꠇꠣꠄ ꠌꠃꠈ ꠈꠥꠟꠟꠣ, ꠀꠞ ꠙꠤꠔꠞꠞꠦ ꠖꠦꠈꠤꠀ ꠃꠑꠤꠀ ꠛꠁꠟꠣ।
ACT 9:41 ꠙꠤꠔꠞꠦ ꠔꠣꠘ ꠀꠔꠅ ꠗꠞꠤꠀ ꠃꠛꠣ ꠇꠞꠟꠣ, ꠛꠣꠖꠦ ꠢꠤ ꠠꠣꠠꠤ ꠛꠦꠐꠤꠘ ꠀꠞ ꠝꠥꠝꠤꠘ ꠅꠇꠟꠞꠦ ꠒꠣꠇꠤꠀ ꠖꠦꠈꠣꠁꠟꠣ, ꠖꠞ꠆ꠇꠣ ꠎꠤꠔꠣ ꠅꠁꠍꠂꠘ।
ACT 9:42 ꠁ ꠈꠛꠞ ꠎꠣꠚꠣ ꠡꠢꠞꠞ ꠢꠇꠟ ꠎꠣꠉꠣꠔ ꠃꠠꠤꠉꠦꠟ ꠀꠞ ꠛꠃꠔ ꠝꠣꠘꠡꠦ ꠀꠟ-ꠝꠍꠤꠞ ꠃꠙꠞꠦ ꠁꠝꠣꠘ ꠀꠘꠟꠣ।
ACT 9:43 ꠙꠤꠔꠞ ꠛꠃꠔ ꠖꠤꠘ ꠎꠣꠚꠣ ꠡꠢꠞꠅ ꠍꠣꠁꠝꠘ ꠘꠣꠝꠞ ꠄꠇ ꠌꠣꠝꠣꠞꠞ ꠛꠣꠠꠤꠔ ꠞꠁꠟꠣ।
ACT 10:1 ꠇꠂꠍꠞꠤꠀ ꠡꠢꠞꠅ ꠇꠞꠘꠤꠟꠥꠍ ꠘꠣꠝꠦ ꠄꠇꠎꠘ ꠝꠣꠘꠥꠡ, ꠁꠔꠣꠟꠤ ꠘꠣꠝꠞ ꠍꠤꠙꠣꠁ ꠖꠟꠞ ꠍꠥꠛꠦꠖꠣꠞ ꠀꠍꠟꠣ।
ACT 10:2 ꠔꠣꠁꠘ ꠄꠇꠎꠘ ꠙꠞꠦꠎꠉꠣꠞ ꠝꠣꠘꠥꠡ, ꠔꠣꠘ ꠙꠞꠤꠛꠣꠞꠞ ꠢꠇꠟꠦꠅ ꠀꠟ꠆ꠟꠣꠞꠦ ꠒꠞꠣꠁꠔꠣ। ꠔꠣꠁꠘ ꠉꠞꠤꠛ ꠅꠇꠟꠞꠦ ꠛꠃꠔ ꠐꠦꠇꠣ-ꠙꠄꠡꠣ ꠖꠣꠘ-ꠈꠄꠞꠣꠔ ꠀꠞ ꠢꠣꠝꠦꠡꠣ ꠀꠟ꠆ꠟꠣꠞ ꠉꠦꠍꠦ ꠖꠥꠀ ꠇꠞꠔꠣ।
ACT 10:3 ꠄꠇꠖꠤꠘ ꠅꠘꠥꠝꠣꠘ ꠔꠤꠘꠐꠣꠞ ꠡꠝꠄ ꠔꠣꠁꠘ ꠄꠇ ꠍꠣꠚ ꠖꠞꠡꠘ ꠙꠣꠁꠟꠣ। ꠖꠦꠈꠟꠣ, ꠀꠟ꠆ꠟꠣꠞ ꠄꠇ ꠚꠤꠞꠤꠡ꠆ꠔꠣꠄ ꠔꠣꠘ ꠉꠦꠍꠦ ꠀꠁꠀ ꠒꠣꠇꠤꠞꠣ, “ꠇꠞꠘꠤꠟꠥꠍ!”
ACT 10:4 ꠇꠞꠘꠤꠟꠥꠍꠦ ꠒꠞꠣꠁꠀ ꠢꠤ ꠚꠤꠞꠤꠡ꠆ꠔꠣꠞ ꠛꠣꠄ ꠌꠣꠁꠀ ꠇꠁꠟꠣ, “ꠝꠣꠟꠤꠇ, ꠇꠃꠇ꠆ꠇꠣ, ꠢꠥꠘꠞꠣꠝ।” ꠚꠤꠞꠤꠡ꠆ꠔꠣꠄ ꠔꠣꠘꠞꠦ ꠇꠁꠟꠣ, “ꠔꠥꠝꠣꠞ ꠝꠥꠘꠣꠎꠣꠔ ꠀꠞ ꠉꠞꠤꠛ ꠅꠇꠟꠞꠦ ꠖꠣꠘꠞ ꠇꠕꠣ ꠛꠦꠢꠦꠡ꠆ꠔꠅ ꠙꠃꠍꠤꠍꠦ ꠀꠞ ꠀꠟ꠆ꠟꠣꠄ ꠁꠔꠣ ꠇꠛꠥꠟ ꠇꠞꠍꠂꠘ।
ACT 10:5 ꠅꠈꠘ ꠔꠥꠝꠤ ꠎꠣꠚꠣ ꠡꠢꠞꠅ ꠝꠣꠘꠥꠡ ꠙꠣꠑꠣꠅ, ꠀꠞ ꠍꠣꠁꠝꠘ ꠃꠞꠚꠦ ꠙꠤꠔꠞꠞꠦ ꠔꠣꠟ꠆ꠟꠣꠡ ꠇꠞꠣꠁ ꠀꠘꠣꠅ।
ACT 10:6 ꠄꠁꠘ ꠖꠞꠤꠀꠞ ꠙꠣꠞꠅ ꠀꠞꠇ ꠍꠣꠁꠝꠘꠞ ꠛꠣꠠꠤꠔ ꠕꠣꠇꠂꠘ, ꠢꠤ ꠍꠣꠁꠝꠘꠦ ꠌꠣꠝꠠꠣꠞ ꠇꠣꠞꠛꠣꠞ ꠇꠞꠦ।”
ACT 10:7 ꠎꠦ ꠚꠤꠞꠤꠡ꠆ꠔꠣꠄ ꠇꠞꠘꠤꠟꠥꠍꠞ ꠟꠉꠦ ꠛꠣꠔꠌꠤꠔ ꠇꠞꠍꠤꠟꠣ, ꠔꠣꠁꠘ ꠎꠣꠅꠀꠞ ꠛꠣꠖꠦ ꠇꠞꠘꠤꠟꠥꠍꠦ ꠔꠣꠘ ꠛꠣꠠꠤꠞ ꠖꠥꠁꠎꠘ ꠇꠣꠝꠟꠣ ꠀꠞ ꠔꠣꠘ ꠡꠣꠁꠎ꠆ꠎꠇꠣꠞꠤ ꠄꠇꠎꠘ ꠙꠞꠦꠎꠉꠣꠞ ꠍꠤꠙꠣꠁꠞꠦ ꠒꠣꠇ ꠖꠤꠟꠣ।
ACT 10:8 ꠔꠣꠁꠘ ꠄꠞꠣꠞꠦ ꠢꠇꠟꠔꠣ ꠛꠥꠎꠣꠁ ꠖꠤꠀ ꠎꠣꠚꠣ ꠡꠢꠞꠅ ꠙꠣꠑꠣꠁꠟꠣ।
ACT 10:9 ꠛꠣꠖꠞ ꠖꠤꠘ ꠎꠦꠛꠟꠣ ꠢꠃ ꠝꠣꠘꠥꠡ ꠅꠇꠟ ꠎꠣꠁꠔꠦ ꠎꠣꠁꠔꠦ ꠎꠣꠚꠣ ꠡꠢꠞꠞ ꠇꠣꠍꠣꠔ ꠀꠁꠟꠣ, ꠁ ꠡꠝꠄ ꠛꠦꠁꠟ ꠅꠘꠥꠝꠣꠘ ꠖꠥꠁꠚꠞ, ꠙꠤꠔꠞꠦ ꠖꠥꠀ ꠇꠞꠣꠞ ꠟꠣꠉꠤ ꠢꠃ ꠡꠝꠄ ꠍꠣꠔꠅ ꠃꠑꠍꠂꠘ।
ACT 10:10 ꠔꠣꠘ ꠈꠥꠛ ꠜꠥꠇ ꠟꠣꠉꠍꠤꠟ, ꠔꠦꠃ ꠇꠥꠘ꠆ꠔꠣ ꠈꠣꠁꠔꠣ ꠌꠣꠁꠟꠣ ꠀꠞ ꠝꠣꠘꠡꠦ ꠈꠣꠘꠤ ꠔꠤꠀꠞ ꠇꠞꠞꠣ, ꠅꠃ ꠡꠝꠄ ꠊꠥꠝꠦ ꠔꠣꠘ ꠃꠋꠉꠣꠘꠤ ꠀꠁꠟ।
ACT 10:11 ꠅꠃ ꠢꠣꠟꠔꠅ ꠔꠣꠁꠘ ꠖꠦꠈꠟꠣ, ꠀꠍꠝꠣꠘ ꠈꠥꠟꠤꠉꠦꠍꠦ ꠀꠞ ꠈꠥꠛ ꠛꠠ ꠌꠣꠖ꠆ꠖꠞꠞ ꠟꠣꠈꠣꠘ ꠄꠇ ꠌꠤꠎꠞ ꠌꠣꠁꠞ ꠇꠥꠘꠣꠔ ꠗꠞꠤꠀ ꠖꠥꠘꠤꠀꠔ ꠟꠣꠝꠣꠁ ꠖꠦꠅꠀ ꠅꠞ;
ACT 10:12 ꠀꠞ ꠁ ꠌꠣꠖ꠆ꠖꠞꠞ ꠝꠣꠎꠦ ꠖꠥꠘꠤꠀꠞ ꠢꠇ꠆ꠇꠟ ꠎꠣꠔꠞ ꠙꠡꠥ, ꠛꠥꠇꠦ ꠌꠟꠞꠣ ꠎꠣꠘꠖꠣꠞ ꠀꠞ ꠙꠣꠈꠤꠘ ꠀꠍꠦ।
ACT 10:13 ꠛꠣꠖꠦ ꠔꠣꠁꠘ ꠅꠃ ꠀꠅꠀꠎ ꠢꠥꠘꠟꠣ, ꠇꠦ ꠎꠣꠘꠥ ꠔꠣꠘꠞꠦ ꠇꠞ, “ꠙꠤꠔꠞ, ꠃꠑꠅ, ꠝꠣꠞꠤꠀ ꠈꠣꠅ।”
ACT 10:14 ꠙꠤꠔꠞꠦ ꠇꠁꠟꠣ, “ꠘꠣ, ꠘꠣ, ꠝꠣꠟꠤꠇ, ꠇꠥꠘꠥꠝꠘ꠆ꠔꠦꠃ ꠘꠣ, ꠀꠝꠤ ꠇꠥꠘꠥ ꠡꠝꠄꠃ ꠘꠣꠙꠣꠇ ꠀꠞ ꠢꠣꠞꠣꠝ ꠇꠥꠘ꠆ꠔꠣ ꠈꠣꠁ ꠘꠣ।”
ACT 10:15 ꠔꠣꠁꠘ ꠢꠤꠞꠛꠣꠞ ꠅꠃ ꠀꠅꠀꠎ ꠢꠥꠘꠟꠣ, “ꠀꠟ꠆ꠟꠣꠄ ꠎꠦꠔꠣ ꠢꠣꠟꠣꠟ ꠇꠞꠍꠂꠘ, ꠁꠔꠣꠞꠦ ꠔꠥꠝꠤ ꠢꠣꠞꠣꠝ ꠇꠁꠅ ꠘꠣ।”
ACT 10:16 ꠅꠃꠟꠣ ꠔꠤꠘꠛꠣꠞ ꠅꠀꠞ ꠛꠣꠖꠦ ꠢꠃ ꠌꠣꠖ꠆ꠖꠞꠈꠣꠘ ꠀꠍꠝꠣꠘꠅ ꠔꠥꠟꠤꠀ ꠘꠤꠟꠣꠉꠤ।
ACT 10:17 ꠙꠤꠔꠞꠦ ꠎꠦ ꠛꠣꠔꠥꠘꠤ ꠖꠞꠡꠘ ꠖꠦꠈꠟꠣ, ꠄꠞ ꠝꠣꠘꠤ ꠇꠤꠔꠣ ꠅꠁꠔ ꠙꠣꠞꠦ ꠔꠣꠁꠘ ꠗꠤꠀꠘ ꠇꠞꠞꠣ, ꠅꠃ ꠡꠝꠄ ꠇꠞꠘꠤꠟꠥꠍꠞ ꠙꠣꠑꠣꠁꠟ ꠢꠤ ꠝꠣꠘꠥꠡ ꠅꠇꠟ ꠍꠣꠁꠝꠘꠞ ꠛꠣꠠꠤ ꠔꠥꠇꠣꠁꠀ ꠙꠣꠁꠀ, ꠛꠣꠠꠤꠞ ꠖꠥꠀꠞꠞ ꠍꠣꠝꠘꠦ ꠀꠁꠀ ꠃꠛꠣꠁꠟꠣ।
ACT 10:18 ꠔꠣꠞꠣ ꠒꠣꠇꠤꠀ ꠎꠤꠇꠣꠁꠟꠣ, “ꠍꠣꠁꠝꠘ ꠎꠦꠘꠞꠦ ꠙꠤꠔꠞ ꠇꠁꠀ ꠒꠣꠇꠂꠘ, ꠔꠣꠁꠘ ꠁꠈꠣꠘꠅ ꠀꠍꠂꠘ ꠘꠤ?”
ACT 10:19 ꠙꠤꠔꠞꠦ ꠢꠃ ꠖꠞꠡꠘꠞ ꠇꠕꠣ ꠌꠤꠘ꠆ꠔꠣ ꠇꠞꠞꠣ, ꠅꠃ ꠡꠝꠄ ꠙꠣꠇ ꠞꠥꠢꠦ ꠔꠣꠘꠞꠦ ꠇꠁꠟꠣ, “ꠖꠦꠈꠅ, ꠔꠤꠘꠎꠘ ꠝꠣꠘꠡꠦ ꠔꠥꠝꠣꠞꠦ ꠔꠥꠇꠣꠘꠤꠔ ꠀꠁꠍꠂꠘ।
ACT 10:20 ꠔꠥꠝꠤ ꠟꠣꠝꠣꠔ ꠟꠣꠝꠅ ꠀꠞ ꠔꠣꠞꠣꠞ ꠟꠉꠦ ꠞꠅꠀꠘꠣ ꠖꠦꠅ, ꠇꠥꠘꠥ ꠡꠘ꠆ꠖꠄ ꠇꠞꠤꠅ ꠘꠣ, ꠔꠣꠞꠣꠞꠦ ꠀꠝꠤꠃ ꠙꠣꠑꠣꠁꠍꠤ।”
ACT 10:21 ꠔꠦꠃ ꠙꠤꠔꠞ ꠟꠣꠝꠤꠀ ꠉꠤꠀ ꠔꠣꠞꠣꠞꠦ ꠇꠁꠟꠣ, “ꠀꠙꠘꠣꠞꠣ ꠎꠣꠞꠦ ꠔꠥꠇꠣꠁꠞꠣ ꠀꠝꠤꠃ ꠢꠦꠁꠘ; ꠇꠃꠇ꠆ꠇꠣ ꠌꠣꠁꠘ, ꠇꠤꠔꠣꠟ꠆ꠟꠣꠉꠤ ꠀꠁꠍꠂꠘ?”
ACT 10:22 ꠔꠣꠞꠣ ꠇꠁꠟꠣ, “ꠡ-ꠍꠤꠙꠣꠁꠞ ꠍꠥꠛꠦꠖꠣꠞ ꠇꠞꠘꠤꠟꠥꠍꠦ ꠀꠟ꠆ꠟꠣꠞ ꠚꠤꠞꠤꠡ꠆ꠔꠣꠞ ꠢꠥꠇꠥꠝ ꠙꠣꠁꠀ ꠀꠝꠞꠣꠞꠦ ꠙꠣꠑꠣꠁꠍꠂꠘ, ꠔꠣꠁꠘ ꠄꠇꠎꠘ ꠙꠞꠦꠎꠉꠣꠞ ꠝꠣꠘꠥꠡ, ꠀꠟ꠆ꠟꠣꠞ ꠢꠥꠇꠥꠝ ꠝꠣꠚꠤꠇ ꠌꠟꠂꠘ, ꠁꠢꠥꠖꠤ ꠅꠇꠟꠦ ꠔꠣꠘꠞꠦ ꠈꠥꠛ ꠔꠣꠎꠤꠝ ꠇꠞꠂꠘ। ꠚꠤꠞꠤꠡ꠆ꠔꠣꠄ ꠔꠣꠘꠞꠦ ꠇꠁꠍꠂꠘ, ꠎꠣꠔꠦ ꠀꠙꠘꠣꠞꠦ ꠔꠣꠘ ꠛꠣꠠꠤꠔ ꠘꠦꠅꠀꠁꠀ ꠀꠙꠘꠣꠞ ꠘꠍꠤꠅꠔ ꠢꠥꠘꠂꠘ।”
ACT 10:23 ꠅꠃ ꠙꠤꠔꠞꠦ ꠔꠣꠞꠣꠞꠦ ꠜꠤꠔꠞꠦ ꠒꠣꠇꠤꠀ ꠘꠤꠀ, ꠔꠣꠞꠣꠞ ꠝꠦꠝꠣꠘꠖꠣꠞꠤ ꠇꠞꠟꠣ। ꠛꠣꠖꠞ ꠖꠤꠘ ꠃꠑꠤꠀ ꠙꠤꠔꠞ ꠔꠣꠞꠣꠞ ꠟꠉꠦ ꠞꠅꠀꠘꠣ ꠖꠤꠟꠣ, ꠀꠞ ꠎꠣꠚꠣ ꠡꠢꠞꠞ ꠇꠄꠎꠘ ꠁꠝꠣꠘꠖꠣꠞꠅ ꠔꠣꠘ ꠟꠉꠦ ꠉꠦꠟꠣ।
ACT 10:24 ꠄꠞ ꠛꠣꠖꠞ ꠖꠤꠘ ꠔꠣꠞꠣ ꠇꠂꠍꠞꠤꠀꠔ ꠙꠃꠍꠟꠣ; ꠅꠃ ꠡꠝꠄ ꠇꠞꠘꠤꠟꠥꠍꠦ ꠔꠣꠘ ꠈꠦꠡ-ꠇꠥꠐꠥꠝ ꠀꠞ ꠛꠘ꠆ꠖꠥ-ꠛꠣꠘ꠆ꠖꠛ ꠅꠇꠟꠞꠦ ꠖꠟꠣ ꠇꠞꠤꠀ ꠔꠣꠞꠣꠞ ꠛꠣꠞ ꠌꠣꠁꠞꠣ।
ACT 10:25 ꠀꠞ ꠙꠤꠔꠞ ꠉꠤꠀ ꠎꠦꠛꠟꠣ ꠊꠞꠅ ꠢꠣꠝꠣꠁꠟꠣ, ꠁ ꠡꠝꠄ ꠇꠞꠘꠤꠟꠥꠍꠦ ꠔꠣꠘ ꠇꠣꠍꠣꠔ ꠉꠤꠀ ꠙꠣꠅꠔ ꠙꠠꠤꠀ ꠍꠁꠎꠖꠣ ꠇꠞꠟꠣ।
ACT 10:26 ꠅꠁꠟꠦ ꠙꠤꠔꠞꠦ ꠔꠣꠘꠞꠦ ꠔꠥꠟꠤꠀ ꠇꠁꠟꠣ, “ꠃꠑꠃꠇ꠆ꠇꠣ, ꠀꠝꠤ ꠘꠤꠎꠦꠅ ꠔ ꠄꠇꠎꠘ ꠝꠣꠘꠥꠡ।”
ACT 10:27 ꠛꠣꠖꠦ ꠇꠞꠘꠤꠟꠥꠍꠞ ꠟꠉꠦ ꠝꠣꠔꠤ ꠝꠣꠔꠤ ꠜꠤꠔꠞꠦ ꠢꠣꠝꠣꠁꠀ ꠙꠤꠔꠞꠦ ꠖꠦꠈꠟꠣ, ꠛꠃꠔ ꠝꠣꠘꠥꠡ ꠖꠟꠣ ꠅꠁꠞꠂꠍꠦ।
ACT 10:28 ꠅꠃ ꠔꠣꠁꠘ ꠇꠁꠟꠣ, “ꠀꠙꠘꠣꠞꠣ ꠔ ꠎꠣꠘꠂꠘ, ꠄꠇꠎꠘ ꠁꠢꠥꠖꠤ ꠝꠣꠘꠡꠦ ꠇꠥꠘꠥ ꠅ-ꠁꠢꠥꠖꠤꠞ ꠇꠣꠍꠣꠔ ꠎꠣꠅꠀ ꠛꠣ ꠝꠤꠟꠣ-ꠝꠤꠡꠣ ꠇꠞꠣ ꠀꠝꠞꠣꠞ ꠡꠞꠤꠅꠔꠞ ꠘꠣꠎꠣꠁꠎ। ꠅꠁꠟꠦ ꠀꠟ꠆ꠟꠣꠄ ꠀꠝꠣꠞꠦ ꠖꠦꠈꠣꠁꠍꠂꠘ ꠎꠦꠘ, ꠇꠥꠘꠥ ꠝꠣꠘꠡꠞꠦ ꠘꠣꠙꠣꠇ ꠛꠣ ꠅꠙꠛꠤꠔ꠆ꠞ ꠇꠅꠀ ꠀꠝꠣꠞ ꠟꠣꠉꠤ ꠘꠣꠎꠣꠁꠎ।
ACT 10:29 ꠄꠞꠟꠣꠉꠤ ꠀꠙꠘꠣꠞꠣ ꠎꠦꠛꠟꠣ ꠀꠝꠣꠞꠦ ꠈꠛꠞ ꠖꠤꠍꠂꠘ, ꠔꠦ ꠀꠝꠤ ꠇꠥꠘꠥ ꠅꠝꠔ ꠘꠣ ꠇꠞꠤꠀꠃ ꠀꠁꠍꠤ। ꠅꠈꠘ ꠀꠝꠤ ꠀꠙꠘꠣꠞꠣꠞꠦ ꠎꠤꠇꠣꠁꠞꠣꠝ, ꠀꠝꠣꠞꠦ ꠇꠤꠔꠣꠟ꠆ꠟꠣꠉꠤ ꠀꠘꠣꠁꠍꠂꠘ?”
ACT 10:30 ꠇꠞꠘꠤꠟꠥꠍꠦ ꠎꠥꠀꠙ ꠖꠤꠟꠣ, “ꠀꠁꠎ ꠕꠣꠇꠤ ꠌꠣꠁꠞ ꠖꠤꠘ ꠀꠉꠦ ꠅꠝꠘ ꠛꠣꠟꠣ ꠝꠣꠘꠤ ꠔꠤꠘꠐꠣꠞ ꠡꠝꠄ ꠀꠝꠤ ꠀꠝꠣꠞ ꠊꠞꠅ ꠖꠥꠀ ꠇꠞꠣꠔ ꠀꠍꠟꠣꠝ, ꠅꠃ ꠡꠝꠄ ꠌꠝꠇꠣꠁꠟ ꠇꠣꠙꠠ ꠚꠤꠘ꠆ꠖꠣ ꠄꠇ ꠛꠦꠐꠣ ꠝꠣꠘꠥꠡ ꠀꠝꠣꠞ ꠍꠣꠝꠘꠦ ꠀꠁꠀ ꠃꠛꠣꠁꠟꠣ,
ACT 10:31 ꠔꠣꠁꠘ ꠇꠁꠟꠣ, ‘ꠇꠞꠘꠤꠟꠥꠍ, ꠀꠟ꠆ꠟꠣꠄ ꠔꠥꠝꠣꠞ ꠖꠥꠀ ꠇꠛꠥꠟ ꠇꠞꠍꠂꠘ। ꠀꠞ ꠔꠥꠝꠣꠞ ꠖꠣꠘ-ꠈꠄꠞꠣꠔꠅ ꠇꠛꠥꠟ ꠇꠞꠍꠂꠘ।
ACT 10:32 ꠅꠈꠘ ꠔꠥꠝꠤ ꠎꠣꠚꠣ ꠡꠢꠞꠅ ꠝꠣꠘꠥꠡ ꠙꠣꠑꠣꠅ ꠀꠞ ꠍꠣꠁꠝꠘ ꠃꠞꠚꠦ ꠙꠤꠔꠞꠞꠦ ꠀꠘꠣꠅ। ꠔꠣꠁꠘ ꠖꠞꠤꠀꠞ ꠙꠣꠞꠅ ꠍꠣꠁꠝꠘ ꠘꠣꠝꠞ ꠄꠇ ꠌꠣꠝꠠꠣꠞ ꠇꠣꠞꠛꠣꠞꠤꠞ ꠛꠣꠠꠤꠔ ꠀꠍꠂꠘ।’
ACT 10:33 ꠄꠞꠟꠣꠉꠤ ꠀꠝꠤ ꠎꠟꠖꠤ ꠇꠞꠤ ꠀꠙꠘꠣꠞꠦ ꠀꠘꠣꠔ ꠝꠣꠘꠥꠡ ꠙꠣꠑꠣꠁꠟꠣꠝ। ꠀꠙꠘꠦ ꠔꠡꠞꠤꠚ ꠀꠘꠍꠂꠘ ꠖꠦꠈꠤꠀ ꠈꠥꠛ ꠈꠥꠡꠤ ꠅꠁꠟꠣꠝ। ꠅꠈꠘ ꠀꠝꠞꠣ ꠢꠇꠟ ꠀꠟ꠆ꠟꠣꠞ ꠍꠣꠝꠘꠦ ꠀꠎꠤꠞ ꠀꠍꠤ, ꠀꠟ꠆ꠟꠣꠄ ꠀꠙꠘꠣꠞꠦ ꠎꠦꠔꠣ ꠢꠥꠇꠥꠝ ꠇꠞꠍꠂꠘ, ꠀꠝꠞꠣ ꠢꠇ꠆ꠇꠟꠔꠣ ꠎꠣꠘꠝꠥ।”
ACT 10:34 ꠔꠦꠃ ꠙꠤꠔꠞꠦ ꠎꠛꠣꠘ ꠈꠥꠟꠤꠀ ꠇꠁꠟꠣ, “ꠀꠝꠤ ꠅꠈꠘ ꠢꠣꠍꠣꠞꠞ ꠛꠥꠎꠟꠣꠝ, ꠀꠟ꠆ꠟꠣꠞ ꠘꠎꠞꠅ ꠢꠇꠟꠃ ꠢꠝꠣꠘ।
ACT 10:35 ꠢꠇꠟ ꠎꠣꠔꠤꠞ ꠝꠣꠎꠦ ꠎꠦꠞꠣ ꠔꠣꠘꠞꠦ ꠒꠞꠣꠄ ꠀꠞ ꠔꠣꠘ ꠢꠥꠇꠥꠝ ꠝꠣꠘꠤꠀ ꠌꠟꠦ, ꠔꠣꠞꠣꠞꠦ ꠔꠣꠁꠘ ꠇꠛꠥꠟ ꠇꠞꠂꠘ।
ACT 10:36 ꠀꠙꠘꠣꠞꠣ ꠔ ꠎꠣꠘꠂꠘ, ꠔꠣꠁꠘ ꠛꠘꠤ ꠁꠍꠞꠣꠁꠟꠞ ꠉꠦꠍꠦ ꠈꠥꠡꠤꠞ ꠄꠇꠈꠣꠘ ꠈꠛꠞ ꠎꠣꠘꠣꠁꠍꠂꠘ। ꠢꠎꠞꠔ ꠁꠍꠣ ꠀꠟ-ꠝꠍꠤ, ꠎꠦꠁꠘ ꠢꠇꠟꠞ ꠝꠣꠟꠤꠇ, ꠔꠣꠘ ꠃꠍꠤꠟ꠆ꠟꠣꠄ ꠡꠣꠘ꠆ꠔꠤ ꠙꠣꠅꠀ ꠎꠣꠄ।
ACT 10:37 ꠝꠣꠘꠡꠞ ꠟꠣꠉꠤ ꠔꠃꠛꠣꠞ ꠉꠥꠍꠟ ꠇꠞꠣ ꠎꠞꠥꠞ, ꠄꠢꠤꠀꠄ ꠁꠈꠣꠘ ꠔꠛꠟꠤꠉ ꠇꠞꠣꠞ ꠛꠣꠖꠦꠃ ꠉꠣꠟꠤꠟ ꠕꠣꠇꠤ ꠀꠡ꠆ꠔꠣ ꠄꠢꠥꠖꠤꠀ ꠎꠥꠠꠤ ꠎꠦꠔꠣ ꠊꠐꠍꠤꠟ, ꠁꠔꠣ ꠢꠇꠟꠔꠣꠃ ꠀꠙꠘꠣꠞꠣ ꠢꠥꠘꠍꠂꠘ।
ACT 10:38 ꠀꠟ꠆ꠟꠣꠄ ꠘꠣꠍꠣꠞꠔꠞ ꠁꠍꠣꠞꠦ ꠙꠣꠇ ꠞꠥꠢꠥ ꠀꠞ ꠇꠥꠖꠞꠔꠦ ꠇꠤꠟꠣ ꠈꠣꠍ ꠈꠟꠤꠚꠣ ꠛꠣꠘꠣꠁꠍꠟꠣ; ꠔꠣꠁꠘ ꠜꠣꠟꠣ ꠇꠣꠝ ꠇꠞꠤ ꠇꠞꠤ ꠍꠚꠞ ꠇꠞꠔꠣ, ꠀꠞ ꠎꠤꠘꠦ ꠗꠞꠣ ꠛꠦꠝꠣꠞꠤ ꠅꠇꠟꠞꠦ ꠜꠣꠟꠣ ꠇꠞꠔꠣ, ꠀꠟ꠆ꠟꠣ ꠙꠣꠇ ꠔ ꠔꠣꠘ ꠟꠉꠦ ꠀꠍꠟꠣ।
ACT 10:39 ꠔꠣꠁꠘ ꠁꠢꠥꠖꠤ ꠅꠇꠟꠞ ꠎꠝꠤꠘꠅ ꠀꠞ ꠎꠦꠞꠥꠎꠣꠟꠦꠝꠅ ꠎꠦꠔꠣ ꠇꠞꠍꠤꠟꠣ, ꠀꠝꠞꠣ ꠁꠔꠣ ꠢꠇꠟꠔꠣꠞ ꠡꠣꠇ꠆ꠇꠤ; ꠀꠞ ꠝꠣꠘꠡꠦ ꠔꠣꠘꠞꠦ ꠉꠣꠍꠅ ꠟꠐꠇꠣꠁꠀ ꠝꠣꠞꠟ।
ACT 10:40 ꠀꠟ꠆ꠟꠣꠄ ꠔꠣꠘꠞꠦ ꠔꠤꠘ ꠖꠤꠘ ꠛꠣꠖꠦ ꠎꠤꠘ꠆ꠖꠣ ꠇꠞꠤ ꠃꠑꠣꠁꠟꠣ, ꠀꠞ ꠝꠣꠘꠡꠦꠅ ꠔꠣꠘꠞꠦ ꠖꠦꠈꠟꠣ।
ACT 10:41 ꠔꠣ-ꠅ ꠢꠇ꠆ꠇꠟꠦ ꠔꠣꠘꠦ ꠖꠦꠈꠣꠞ ꠘꠍꠤꠛ ꠅꠁꠍꠦ ꠘꠣ, ꠈꠣꠟꠤ ꠀꠟ꠆ꠟꠣꠄ ꠎꠦꠞꠣꠞꠦ ꠀꠉꠦ ꠙꠍꠘ꠆ꠖ ꠇꠞꠍꠤꠟꠣ, ꠢꠃ ꠡꠣꠇ꠆ꠇꠤ ꠅꠇꠟꠞꠦ, ꠝꠣꠘꠤ ꠀꠝꠞꠣꠞꠦ ꠖꠦꠈꠣꠁꠟꠣ, ꠀꠞ ꠝꠥꠞ꠆ꠖꠣ ꠕꠣꠇꠤ ꠔꠣꠁꠘ ꠎꠤꠘ꠆ꠖꠣ ꠅꠁꠀ ꠃꠑꠣꠞ ꠛꠣꠖꠦ ꠀꠝꠞꠣ ꠔꠣꠘ ꠟꠉꠦ ꠈꠣꠘꠣ-ꠙꠤꠘꠣꠅ ꠈꠣꠁꠍꠤ।
ACT 10:42 ꠔꠣꠁꠘ ꠀꠝꠞꠣꠞꠦ ꠢꠥꠇꠥꠝ ꠖꠤꠍꠂꠘ, ꠀꠝꠞꠣ ꠎꠣꠘꠥ ꠁꠢꠥꠖꠤ ꠅꠇꠟꠞ ꠉꠦꠍꠦ ꠔꠛꠟꠤꠉ ꠇꠞꠤ ꠀꠞ ꠡꠣꠇ꠆ꠇꠤ ꠖꠦꠁ ꠎꠦꠘ, ꠔꠣꠘꠞꠦꠃ ꠀꠟ꠆ꠟꠣꠄ ꠎꠤꠘ꠆ꠖꠣ ꠀꠞ ꠝꠥꠞ꠆ꠖꠣ ꠅꠇꠟꠞ ꠢꠣꠇꠤꠝ ꠛꠣꠘꠣꠁ ꠙꠣꠑꠣꠁꠍꠂꠘ।
ACT 10:43 ꠢꠇꠟ ꠘꠛꠤꠄꠅ ꠔꠣꠘ ꠛꠦꠙꠣꠞꠦ ꠅꠃꠟꠣ ꠡꠣꠇ꠆ꠇꠤ ꠖꠤꠍꠂꠘ ꠎꠦꠘ, ꠎꠦꠞꠣ ꠔꠣꠘ ꠃꠙꠞꠦ ꠁꠝꠣꠘ ꠀꠘꠦ, ꠔꠣꠞꠣ ꠢꠇꠟꠦꠃ ꠔꠣꠘ ꠘꠣꠝꠞ ꠃꠍꠤꠟ꠆ꠟꠣꠄ ꠉꠥꠘꠣꠞ ꠝꠣꠚꠤ ꠙꠣꠄ।”
ACT 10:44 ꠙꠤꠔꠞꠦ ꠛꠄꠀꠘ ꠇꠞꠞꠣ, ꠁ ꠡꠝꠄ ꠎꠦꠞꠣ ꠔꠣꠘ ꠛꠄꠀꠘ ꠢꠥꠘꠣꠔ ꠀꠍꠤꠟ, ꠔꠣꠞꠣ ꠢꠇꠟꠞ ꠃꠙꠞꠦ ꠀꠟ꠆ꠟꠣꠁ ꠙꠣꠇ ꠞꠥꠢꠥ ꠘꠣꠎꠤꠟ ꠅꠁꠟ।
ACT 10:45 ꠀꠞ ꠙꠤꠔꠞꠞ ꠟꠉꠦ ꠅꠁꠀ ꠝꠍꠟꠝꠣꠘꠤ ꠇꠞꠣꠁꠟ ꠎꠦꠔꠣ ꠁꠝꠣꠘꠖꠣꠞ ꠅꠇꠟ ꠀꠁꠍꠟꠣ, ꠔꠣꠞꠣ ꠁꠔꠣ ꠖꠦꠈꠤꠀ ꠌꠝꠇꠤꠀ ꠃꠑꠟꠣ, ꠇꠣꠞꠘ ꠅ-ꠁꠢꠥꠖꠤ ꠅꠇꠟꠞ ꠃꠙꠞꠦꠅ ꠙꠣꠇ ꠞꠥꠢꠥ ꠛꠞ꠆ꠡꠤꠍꠂꠘ।
ACT 10:46 ꠔꠣꠞꠣ ꠖꠦꠈꠟꠣ, ꠅꠃ ꠅ-ꠁꠢꠥꠖꠤ ꠅꠇꠟꠦ ꠘꠣꠘꠣꠘ ꠉꠣꠁꠛꠤ ꠜꠣꠡꠣꠄ ꠝꠣꠔꠤꠞꠣ, ꠀꠞ ꠀꠟ꠆ꠟꠣꠞ ꠔꠣꠞꠤꠚ ꠇꠞꠞꠣ।
ACT 10:47 ꠔꠦꠃ ꠙꠤꠔꠞꠦ ꠇꠁꠟꠣ, “ꠅꠃ ꠎꠦꠔꠣ ꠝꠣꠘꠡꠦ ꠀꠝꠞꠣꠞ ꠟꠣꠈꠣꠘ ꠙꠣꠇ ꠞꠥꠢꠥ ꠢꠣꠍꠤꠟ ꠇꠞꠍꠂꠘ, ꠄꠞꠣ ꠙꠣꠘꠤꠔ ꠔꠃꠛꠣꠞ ꠉꠥꠍꠟ ꠇꠞꠔꠦ ꠇꠤꠔꠣ ꠇꠦꠃ ꠛꠣꠗꠣ ꠖꠤꠔ ꠙꠣꠞꠛ ꠘꠤ?”
ACT 10:48 ꠛꠣꠖꠦ ꠔꠣꠁꠘ ꠄꠞꠣꠞꠦ ꠁꠍꠣ ꠀꠟ-ꠝꠍꠤꠞ ꠘꠣꠝꠦ ꠔꠃꠛꠣꠞ ꠉꠥꠍꠟ ꠇꠞꠣꠞ ꠢꠥꠇꠥꠝ ꠖꠤꠟꠣ। ꠀꠞ ꠔꠣꠞꠣ ꠙꠤꠔꠞꠞꠦ ꠝꠤꠘꠔ ꠇꠞꠟꠣ, ꠔꠣꠞꠣꠞ ꠉꠦꠍꠦ ꠇꠄꠈꠣꠘ ꠖꠤꠘ ꠞꠅꠀꠞ ꠟꠣꠉꠤ।
ACT 11:1 ꠛꠣꠖꠦ ꠍꠣꠢꠣꠛꠤ ꠅꠇꠟꠦ ꠀꠞ ꠄꠢꠥꠖꠤꠀ ꠎꠤꠟꠣꠞ ꠢꠇ꠆ꠇꠟ ꠝꠥꠝꠤꠘ ꠜꠣꠁꠀꠁꠘ꠆ꠔꠦ ꠢꠥꠘꠟꠣ, ꠅ-ꠁꠢꠥꠖꠤ ꠅꠇꠟꠦꠅ ꠀꠟ꠆ꠟꠣꠞ ꠇꠣꠟꠣꠝꠞ ꠃꠙꠞꠦ ꠁꠝꠣꠘ ꠀꠘꠍꠂꠘ।
ACT 11:2 ꠄꠞꠟꠣꠉꠤ ꠙꠤꠔꠞ ꠎꠦꠛꠟꠣ ꠎꠦꠞꠥꠎꠣꠟꠦꠝꠅ ꠀꠁꠟꠣ, ꠁ ꠡꠝꠄ ꠝꠍꠟꠝꠣꠘꠤ ꠇꠞꠣꠁꠟ ꠁꠝꠣꠘꠖꠣꠞ ꠅꠇꠟꠦ ꠔꠣꠘꠦ ꠖꠥꠡꠤ ꠡꠣꠁꠛꠡ꠆ꠔ ꠇꠞꠤꠀ ꠇꠁꠟꠣ,
ACT 11:3 “ꠀꠙꠘꠦ ꠔ ꠝꠍꠟꠝꠣꠘꠤ ꠘꠣ ꠇꠞꠣꠁꠟ ꠝꠣꠘꠡꠞ ꠊꠞꠅ ꠢꠣꠝꠣꠁꠍꠂꠘ, ꠀꠞ ꠔꠣꠞꠣꠞ ꠟꠉꠦ ꠈꠣꠘꠣꠅ ꠈꠣꠁꠍꠂꠘ।”
ACT 11:4 ꠔꠦꠃ ꠙꠤꠔꠞꠦ ꠙꠄꠟꠣ ꠕꠣꠇꠤ ꠎꠦꠔꠣ ꠎꠦꠔꠣ ꠊꠐꠍꠤꠟ, ꠔꠣꠞꠣꠞ ꠉꠦꠍꠦ ꠄꠇ ꠄꠇ ꠇꠞꠤ ꠛꠥꠎꠣꠁꠀ ꠇꠁꠟꠣ,
ACT 11:5 “ꠀꠝꠤ ꠎꠣꠚꠣ ꠡꠢꠞꠅ ꠖꠥꠀ ꠇꠞꠣꠔ ꠀꠍꠟꠣꠝ, ꠅꠝꠘ ꠡꠝꠄ ꠙꠣꠇ ꠞꠥꠢꠥꠞ ꠖꠞꠡꠘ ꠙꠣꠁꠟꠣꠝ, ꠀꠝꠤ ꠖꠦꠈꠟꠣꠝ, ꠀꠍꠝꠣꠘ ꠕꠣꠇꠤ ꠛꠠ ꠌꠣꠖ꠆ꠖꠞꠞ ꠟꠣꠈꠣꠘ ꠄꠇꠈꠣꠘ ꠌꠤꠎꠞ ꠌꠣꠁꠞ ꠇꠥꠘꠣꠔ ꠗꠞꠤꠀ ꠀꠝꠣꠞ ꠉꠦꠍꠦ ꠟꠣꠝꠣꠁꠀ ꠖꠦꠅꠀ ꠅꠞ।
ACT 11:6 ꠀꠝꠤ ꠗꠤꠀꠘ ꠗꠞꠤ ꠌꠣꠁꠀ ꠌꠤꠘ꠆ꠔꠣꠔ ꠙꠠꠤꠉꠦꠟꠣꠝ, ꠀꠞ ꠖꠦꠈꠟꠣꠝ, ꠄꠞ ꠝꠣꠎꠦ ꠢꠇꠟ ꠎꠣꠔꠞ ꠙꠡꠥ, ꠙꠣꠈꠤ, ꠎꠋꠟꠤ ꠎꠣꠘꠥꠀꠞ ꠀꠞ ꠛꠥꠇꠦ ꠌꠟꠞꠣ ꠎꠣꠘꠖꠣꠞ ꠅꠇꠟ ꠀꠍꠂꠘ।
ACT 11:7 ꠛꠣꠖꠦ ꠄꠇ ꠀꠅꠀꠎ ꠢꠥꠘꠟꠣꠝ, ꠙꠤꠔꠞ, ꠃꠑꠅ, ꠝꠣꠞꠤꠀ ꠈꠣꠅ।
ACT 11:8 ꠀꠝꠤ ꠇꠁꠟꠣꠝ, ꠘꠣ, ꠘꠣ ꠝꠣꠟꠤꠇ, ꠇꠥꠘꠥꠝꠘ꠆ꠔꠦꠃ ꠘꠣ, ꠘꠣꠙꠣꠇ ꠛꠣ ꠢꠣꠞꠣꠝ ꠇꠥꠘ꠆ꠔꠣ ꠀꠝꠤ ꠇꠥꠘꠥꠖꠤꠘ ꠝꠥꠈꠅ ꠖꠤꠍꠤ ꠘꠣ।
ACT 11:9 ꠛꠣꠖꠦ ꠖꠥꠍꠞꠣꠛꠣꠞ ꠀꠍꠝꠣꠘ ꠕꠣꠇꠤ ꠅꠃ ꠀꠅꠀꠎ ꠢꠥꠘꠟꠣꠝ, ꠀꠟ꠆ꠟꠣꠄ ꠎꠦꠔꠣ ꠢꠣꠟꠣꠟ ꠇꠞꠍꠂꠘ, ꠔꠥꠝꠤ ꠁꠔꠣꠞꠦ ꠢꠣꠞꠣꠝ ꠇꠁꠅ ꠘꠣ।
ACT 11:10 ꠅꠃꠟꠣ ꠔꠤꠘꠛꠣꠞ ꠇꠅꠀꠞ ꠛꠣꠖꠦ ꠢꠇꠟꠔꠣ ꠀꠍꠝꠣꠘꠅ ꠔꠥꠟꠤ ꠘꠦꠅꠀ ꠅꠁꠟ।
ACT 11:11 ꠀꠞ ꠄꠞ ꠟꠉꠦ ꠟꠉꠦꠃ, ꠀꠝꠤ ꠎꠦ ꠛꠣꠠꠤꠔ ꠀꠍꠟꠣꠝ ꠅꠃ ꠛꠣꠠꠤꠔ ꠀꠁꠀ ꠔꠤꠘꠎꠘ ꠝꠣꠘꠥꠡ ꠢꠣꠝꠣꠁꠟ, ꠔꠣꠞꠣꠞꠦ ꠇꠂꠍꠞꠤꠀ ꠕꠣꠇꠤ ꠙꠣꠑꠣꠁꠟ ꠅꠁꠍꠤꠟ।
ACT 11:12 ꠔꠦꠃ ꠙꠣꠇ ꠞꠥꠢꠦ ꠀꠝꠣꠞꠦ ꠇꠁꠟꠣ, ꠇꠥꠘꠥ ꠡꠘ꠆ꠖꠄ ꠘꠣ ꠇꠞꠤꠀ ꠔꠣꠞꠣꠞ ꠟꠉꠦ ꠅꠁꠀ ꠎꠣꠅꠀꠞ ꠟꠣꠉꠤ। ꠀꠞ ꠅꠃ ꠍꠄꠎꠘ ꠜꠣꠁꠅ ꠀꠝꠣꠞ ꠟꠉꠦ ꠉꠦꠍꠟꠣ। ꠛꠣꠖꠦ ꠀꠝꠞꠣ ꠅꠃ ꠅ-ꠁꠢꠥꠖꠤꠞ ꠛꠣꠠꠤꠔ ꠢꠣꠝꠣꠁꠟꠣꠝ।
ACT 11:13 ꠔꠣꠁꠘ ꠇꠤꠟꠣ ꠔꠣꠘ ꠛꠣꠠꠤꠔ ꠄꠇꠎꠘ ꠚꠤꠞꠤꠡ꠆ꠔꠣꠞ ꠖꠞꠡꠘ ꠙꠣꠁꠍꠟꠣ ꠁꠔꠣ ꠀꠝꠞꠣꠞꠦ ꠢꠥꠘꠣꠁꠟꠣ। ꠢꠃ ꠚꠤꠞꠤꠡ꠆ꠔꠣꠄ ꠔ ꠔꠣꠘꠞꠦ ꠇꠁꠍꠟꠣ, ꠍꠣꠁꠝꠘ ꠃꠞꠚꠦ ꠙꠤꠔꠞꠞꠦ ꠀꠘꠣꠞ ꠟꠣꠉꠤ ꠎꠣꠚꠣ ꠡꠢꠞꠅ ꠝꠣꠘꠥꠡ ꠙꠣꠑꠣꠅ।
ACT 11:14 ꠢꠦ ꠔꠥꠝꠣꠞꠦ ꠅꠃꠟꠣ ꠘꠍꠤꠅꠔ ꠇꠞꠛ, ꠎꠦꠔꠣ ꠝꠣꠘꠤꠀ ꠔꠥꠝꠤ ꠀꠞ ꠔꠥꠝꠣꠞ ꠙꠞꠤꠛꠣꠞꠞ ꠢꠇꠟꠦ ꠘꠣꠎꠣꠔ ꠙꠣꠁꠛꠣꠄ।
ACT 11:15 ꠀꠞ ꠀꠝꠤ ꠛꠄꠀꠘ ꠡꠥꠞꠥ ꠇꠞꠣꠞ ꠛꠣꠖꠦ, ꠙꠣꠇ ꠞꠥꠢꠥ ꠙꠄꠟꠣ ꠎꠦꠟꠣ ꠀꠝꠞꠣꠞ ꠃꠙꠞꠦ ꠀꠁꠍꠟꠣ, ꠄꠇ꠆ꠇꠦꠞꠦ ꠅꠃꠟꠣ ꠔꠣꠞꠣꠞ ꠃꠙꠞꠦꠅ ꠀꠁꠟꠣ।
ACT 11:16 ꠅꠃꠉꠤ ꠀꠟ-ꠝꠍꠤꠞ ꠔꠣꠟꠤꠝ ꠀꠝꠣꠞ ꠝꠘꠅ ꠅꠁꠟ, ꠔꠣꠁꠘ ꠇꠁꠍꠟꠣ, ꠄꠢꠤꠀꠄ ꠔꠃꠛꠣꠞ ꠉꠥꠍꠟ ꠇꠞꠣꠁꠍꠂꠘ ꠙꠣꠘꠤꠔ, ꠀꠞ ꠔꠥꠝꠞꠣꠞ ꠉꠥꠍꠟ ꠅꠁꠛ ꠙꠣꠇ ꠞꠥꠢꠦ।
ACT 11:17 ꠔꠦ ꠜꠣꠁ ꠅꠇꠟ, ꠁꠍꠣ ꠀꠟ-ꠝꠍꠤꠞ ꠃꠙꠞꠦ ꠁꠝꠣꠘ ꠀꠘꠣꠄ ꠀꠟ꠆ꠟꠣꠄ ꠀꠝꠞꠣꠞꠦ ꠎꠦꠟꠣ ꠖꠣꠘ ꠖꠤꠍꠂꠘ, ꠢꠃ ꠄꠇꠁ ꠖꠣꠘ ꠎꠦꠛꠟꠣ ꠔꠣꠞꠣꠞꠦꠅ ꠖꠤꠟꠣ, ꠔꠦ ꠀꠝꠤ ꠀꠞꠇ ꠎꠘ ꠇꠦ, ꠀꠟ꠆ꠟꠣꠞꠦ ꠘꠣ ꠇꠞꠔꠣꠝ?”
ACT 11:18 ꠁꠈꠣꠘ ꠢꠥꠘꠣꠞ ꠛꠣꠖꠦ ꠄꠢꠥꠖꠤꠀꠞ ꠁꠝꠣꠘꠖꠣꠞ ꠅꠇꠟꠦ ꠀꠞ ꠇꠥꠘꠥ ꠀꠙꠔ꠆ꠔꠤ ꠘꠣ ꠇꠞꠤꠀ, ꠀꠟ꠆ꠟꠣꠞ ꠔꠣꠞꠤꠚ ꠇꠞꠣ ꠗꠞꠟꠣ, ꠔꠣꠞꠣ ꠇꠁꠟꠣ, “ꠔꠦ ꠀꠟ꠆ꠟꠣꠄ ꠅ-ꠁꠢꠥꠖꠤ ꠅꠇꠟꠞꠦꠅ ꠉꠥꠘꠣ ꠕꠣꠇꠤ ꠝꠘ ꠛꠖꠟꠣꠁꠀ, ꠎꠤꠘ꠆ꠖꠦꠉꠤ ꠙꠣꠅꠀꠞ ꠔꠚꠤꠇ ꠖꠤꠍꠂꠘ।”
ACT 11:19 ꠡ꠆ꠔꠤꠚꠣꠘꠞ ꠝꠃꠔꠞ ꠊꠐꠘꠣꠞ ꠛꠣꠖꠦ ꠎꠦꠔꠣ ꠁꠝꠣꠘꠖꠣꠞ ꠅꠇꠟ ꠎꠥꠟꠥꠝꠞ ꠟꠣꠉꠤ ꠍꠤꠔ꠆ꠞꠤ ꠉꠦꠍꠟꠣ, ꠔꠣꠞꠣ ꠚꠂꠘꠤꠇꠤꠀ, ꠍꠣꠁꠙ꠆ꠞꠣꠍ ꠀꠞ ꠀꠘ꠆ꠔꠤꠅꠈꠤꠀ ꠙꠞ꠆ꠎꠘ꠆ꠔ ꠉꠤꠀ ꠈꠣꠟꠤ ꠁꠢꠥꠖꠤ ꠅꠇꠟꠞ ꠉꠦꠍꠦ ꠀꠟ꠆ꠟꠣꠞ ꠇꠣꠟꠣꠝ ꠔꠛꠟꠤꠉ ꠇꠞꠟꠣ।
ACT 11:20 ꠅꠁꠟꠦ ꠄꠞꠣꠞ ꠝꠣꠎꠦ ꠇꠄꠎꠘ ꠀꠍꠟꠣ ꠍꠣꠁꠙ꠆ꠞꠣꠍ ꠖꠤꠙ ꠀꠞ ꠇꠥꠞꠤꠘꠤ ꠄꠟꠣꠇꠣꠞ ꠝꠣꠘꠥꠡ, ꠄꠞꠣ ꠀꠘ꠆ꠔꠤꠅꠈꠤꠀꠔ ꠉꠤꠀ ꠁꠃꠘꠣꠘꠤ ꠅꠇꠟꠞ ꠉꠦꠍꠦꠅ ꠢꠎꠞꠔ ꠁꠍꠣꠞ ꠈꠥꠡ-ꠈꠛꠞꠤ ꠔꠛꠟꠤꠉ ꠇꠞꠟꠣ।
ACT 11:21 ꠀꠞ ꠀꠟ꠆ꠟꠣꠄ ꠔꠣꠘ ꠇꠥꠖꠞꠔꠤ ꠛꠟꠦ ꠔꠣꠞꠣꠞꠦ ꠡꠣꠁꠎ꠆ꠎ ꠇꠞꠟꠣ, ꠔꠦꠃ ꠛꠃꠔ ꠝꠣꠘꠥꠡ ꠁꠝꠣꠘ ꠀꠘꠤꠀ ꠔꠣꠘ ꠝꠥꠈꠤ ꠅꠁꠟꠣ।
ACT 11:22 ꠁ ꠈꠛꠞ ꠎꠦꠞꠥꠎꠣꠟꠦꠝ ꠎꠝꠣꠔꠞ ꠝꠥꠝꠤꠘ ꠅꠇꠟꠞ ꠇꠣꠘꠅ ꠀꠁꠟ, ꠈꠛꠞ ꠢꠥꠘꠤꠀ ꠔꠣꠞꠣ ꠛꠣꠞ꠆ꠘꠣꠛꠣꠍꠞꠦ ꠀꠘ꠆ꠔꠤꠅꠈꠤꠀꠔ ꠙꠣꠑꠣꠁꠟꠣ।
ACT 11:23 ꠔꠣꠁꠘ ꠢꠘꠅ ꠙꠃꠍꠤꠀ ꠀꠘ꠆ꠔꠤꠅꠈꠤꠀꠔ ꠀꠟ꠆ꠟꠣꠞ ꠝꠦꠢꠦꠞꠛꠣꠘꠤ ꠖꠦꠈꠤꠀ ꠈꠥꠛ ꠈꠥꠡꠤ ꠅꠁꠟꠣ, ꠀꠞ ꠝꠣꠘꠡꠞꠦ ꠀꠡꠣ ꠖꠤꠔꠣ ꠕꠣꠇꠟꠣ, ꠎꠣꠔꠦ ꠔꠣꠞꠣ ꠖꠤꠟꠦ-ꠎꠣꠘꠦ ꠝꠣꠟꠤꠇꠞ ꠘꠣꠝꠦ ꠁꠝꠣꠘꠦ ꠝꠎꠛꠥꠔ ꠞꠂꠘ।
ACT 11:24 ꠛꠣꠞ꠆ꠘꠣꠛꠣꠍ ꠄꠇꠎꠘ ꠢꠇ ꠝꠣꠘꠥꠡ, ꠔꠣꠁꠘ ꠙꠣꠇ ꠞꠥꠢꠥ ꠀꠞ ꠁꠝꠣꠘꠦ ꠇꠣꠝꠤꠟ ꠀꠍꠟꠣ। ꠀꠞ ꠛꠃꠔ ꠝꠣꠘꠥꠡ ꠝꠣꠟꠤꠇꠞ ꠝꠥꠈꠤ ꠚꠤꠞꠤꠀ ꠀꠁꠍꠤꠟ।
ACT 11:25 ꠛꠣꠖꠦ ꠛꠣꠞ꠆ꠘꠣꠛꠣꠍ ꠡꠃꠟꠞ ꠔꠣꠟ꠆ꠟꠣꠡꠦ ꠔꠣꠞ꠆ꠡ ꠐꠣꠃꠘꠅ ꠉꠦꠟꠣ,
ACT 11:26 ꠀꠞ ꠔꠣꠘꠞꠦ ꠙꠣꠁꠀ ꠀꠘ꠆ꠔꠤꠅꠈꠤꠀꠔ ꠟꠁꠀ ꠀꠁꠟꠣ। ꠛꠣꠞ꠆ꠘꠣꠛꠣꠍ ꠀꠞ ꠡꠃꠟ ꠙꠥꠞꠣ ꠄꠇ ꠛꠞꠍ ꠢꠘꠅ ꠎꠝꠣꠔꠞ ꠟꠉꠦ ꠝꠤꠟꠤꠀ ꠛꠃꠔ ꠝꠣꠘꠡꠞꠦ ꠔꠣꠟꠤꠝ ꠖꠤꠟꠣ। ꠅꠃ ꠀꠘ꠆ꠔꠤꠅꠈꠤꠀꠔꠃ ꠀꠟ-ꠝꠍꠤꠞ ꠃꠝ꠆ꠝꠔ ꠅꠇꠟꠞꠦ ꠙꠄꠟꠣ ꠁꠍꠣꠄꠁ ꠘꠣꠝꠦ ꠒꠣꠇꠣ ꠅꠁꠟ।
ACT 11:27 ꠅꠃ ꠡꠝꠄ ꠇꠄꠎꠘ ꠘꠛꠤ ꠎꠦꠞꠥꠎꠣꠟꠦꠝ ꠕꠣꠇꠤ ꠀꠘ꠆ꠔꠤꠅꠈꠤꠀꠔ ꠀꠁꠟꠣ।
ACT 11:28 ꠄꠞꠣꠞ ꠝꠣꠎꠦ ꠀꠉꠣꠛꠥꠍ ꠘꠣꠝꠞ ꠄꠇ ꠘꠛꠤꠄ ꠙꠣꠇ ꠞꠥꠢꠥꠞ ꠎꠞꠤꠀꠄ ꠈꠣꠠꠣ ꠅꠁꠀ ꠇꠁꠟꠣ, ꠀꠡ꠆ꠔꠣ ꠖꠥꠘꠤꠀꠁ ꠎꠥꠠꠤꠀ ꠄꠇ ꠛꠦꠎꠥꠁꠔꠣ ꠘꠤꠖꠣꠘ ꠖꠦꠈꠣ ꠖꠤꠛ; ꠛꠣꠖꠡꠣ ꠇꠦꠟꠣꠖꠥꠍꠞ ꠞꠣꠎꠔ꠆ꠔꠞ ꠇꠣꠟꠅ ꠁꠈꠣꠘ ꠙꠥꠞꠣ ꠅꠁꠟ।
ACT 11:29 ꠄꠞꠟꠣꠉꠤ ꠝꠥꠝꠤꠘ ꠅꠇꠟꠦ ꠘꠤꠅꠔ ꠇꠞꠟꠣ, ꠄꠢꠥꠖꠤꠀ ꠎꠤꠟꠣꠞ ꠁꠝꠣꠘꠖꠣꠞ ꠅꠇꠟꠞ ꠈꠦꠎꠝꠔꠞ ꠟꠣꠉꠤ, ꠔꠣꠞꠣ ꠎꠣꠞꠎꠤꠞ ꠈꠦꠝꠔꠣ ꠝꠣꠚꠤꠇ ꠡꠣꠁꠎ꠆ꠎ ꠙꠣꠑꠣꠁꠔꠣ।
ACT 11:30 ꠀꠞ ꠘꠤꠅꠔ ꠝꠣꠚꠤꠇ ꠇꠣꠝꠅ ꠔꠣꠞꠣ ꠇꠞꠟꠣ, ꠔꠣꠞꠣ ꠛꠣꠞ꠆ꠘꠣꠛꠣꠍ ꠀꠞ ꠡꠃꠟꠞ ꠀꠔꠣꠘꠦ ꠄꠢꠥꠖꠤꠀꠞ ꠎꠝꠣꠔꠞ ꠝꠥꠞꠛ꠆ꠛꠤ ꠅꠇꠟꠞ ꠉꠦꠍꠦ ꠡꠣꠁꠎ꠆ꠎ ꠙꠣꠑꠣꠁꠟꠣ।
ACT 12:1 ꠢꠤ ꠡꠝꠄ ꠞꠣꠎꠣ ꠢꠦꠞꠥꠖꠦ ꠎꠝꠣꠔꠞ ꠇꠄꠎꠘ ꠝꠣꠘꠡꠞꠦ ꠗꠞꠣꠁ ꠀꠘꠤꠀ ꠎꠥꠟꠥꠝ ꠇꠞꠟꠣ।
ACT 12:2 ꠔꠣꠁꠘ ꠢꠣꠘ꠆ꠘꠣꠘꠞ ꠜꠣꠁ ꠁꠀꠇꠥꠛꠞꠦ ꠔꠟꠥꠀꠞ ꠖꠤꠀ ꠇꠣꠐꠤꠟꠤꠟꠣ।
ACT 12:3 ꠄꠞꠟꠣꠉꠤ ꠁꠢꠥꠖꠤ ꠅꠇꠟ ꠈꠥꠡꠤ ꠅꠁꠍꠂꠘ ꠖꠦꠈꠤꠀ, ꠔꠣꠁꠘ ꠈꠣꠝꠤꠞ ꠍꠣꠠꠣ ꠞꠥꠐꠤꠞ ꠁꠖꠞ ꠅꠇ꠆ꠔꠅ ꠙꠤꠔꠞꠞꠦꠅ ꠀꠐꠇ ꠇꠞꠟꠣ।
ACT 12:4 ꠀꠞ ꠔꠣꠘꠞꠦ ꠎꠦꠟꠅ ꠢꠣꠞꠣꠁꠟꠣ, ꠎꠦꠟꠅ-ꠅ ꠙꠣꠢꠣꠞꠣ ꠖꠦꠅꠀꠞ ꠟꠣꠉꠤ ꠌꠣꠁꠞ ꠎꠘ ꠇꠞꠤ, ꠌꠣꠁꠞ ꠖꠟ ꠍꠤꠙꠣꠁꠞꠦ ꠢꠥꠇꠥꠝ ꠖꠤꠟꠣ। ꠢꠦꠞꠥꠖꠞ ꠘꠤꠅꠔ ꠀꠍꠤꠟ ꠀꠎꠣꠖꠤ ꠁꠖꠞ ꠛꠣꠖꠦ ꠙꠤꠔꠞꠞꠦ ꠝꠣꠘꠡꠞ ꠍꠣꠝꠘꠦ ꠛꠣꠞ ꠇꠞꠤ ꠛꠤꠌꠣꠞ ꠇꠞꠛꠣ।
ACT 12:5 ꠙꠤꠔꠞ ꠎꠦꠟ ꠈꠣꠘꠣꠔ ꠛꠘ꠆ꠖꠤ ꠞꠁꠟꠣ, ꠅꠁꠟꠦ ꠎꠝꠣꠔꠞ ꠝꠣꠘꠡꠦ ꠙꠤꠔꠞꠞ ꠟꠣꠉꠤ ꠖꠤꠟꠦ-ꠎꠣꠘꠦ ꠀꠟ꠆ꠟꠣꠞ ꠖꠞꠛꠣꠞꠅ ꠖꠥꠀ ꠇꠞꠣꠔ ꠞꠁꠟꠣ।
ACT 12:6 ꠛꠤꠌꠣꠞꠞ ꠟꠣꠉꠤ ꠎꠦꠖꠤꠘ ꠙꠤꠔꠞꠞꠦ ꠛꠣꠞꠦ ꠀꠘꠣꠁꠔꠣ, ꠄꠞ ꠀꠉꠞ ꠞꠣꠁꠔ ꠔꠣꠁꠘ ꠖꠥꠁꠎꠘ ꠍꠤꠙꠣꠁꠞ ꠝꠣꠎꠈꠣꠘꠅ ꠖꠥꠁꠉꠦꠍꠣ ꠌꠦꠁꠘꠖꠤ ꠛꠣꠘ꠆ꠖꠣ ꠢꠣꠟꠔꠦ ꠊꠥꠝꠅ ꠀꠍꠟꠣ, ꠀꠞ ꠛꠣꠞꠦ ꠍꠤꠙꠣꠁ ꠅꠇꠟꠦ ꠖꠥꠀꠞꠅ ꠙꠣꠢꠣꠞꠣ ꠖꠤꠞꠣ।
ACT 12:7 ꠅꠝꠘ ꠡꠝꠄ ꠀꠈꠔꠣꠃ ꠝꠣꠛꠥꠖꠞ ꠄꠇꠎꠘ ꠚꠤꠞꠤꠡ꠆ꠔꠣ ꠢꠘꠅ ꠀꠁꠀ ꠃꠛꠣꠁꠟꠣ, ꠀꠞ ꠎꠦꠟꠞ ꠜꠤꠔꠞ ꠚꠞ ꠅꠁꠉꠦꠟ। ꠚꠤꠞꠤꠡ꠆ꠔꠣꠄ ꠙꠤꠔꠞꠞ ꠉꠔꠞꠅ ꠑꠦꠟꠣ ꠖꠤꠀ ꠔꠣꠘꠞꠦ ꠢꠎꠣꠉ ꠇꠞꠤ ꠇꠁꠟꠣ, “ꠎꠟꠖꠤ ꠃꠑꠅ!” ꠔꠦꠃ ꠙꠤꠔꠞꠞ ꠖꠥꠁꠅ ꠀꠔ ꠕꠣꠇꠤ ꠌꠦꠁꠘ ꠈꠥꠟꠤꠀ ꠙꠠꠤꠉꠦꠟ।
ACT 12:8 ꠛꠣꠖꠦ ꠚꠤꠞꠤꠡ꠆ꠔꠣꠄ ꠔꠣꠘꠞꠦ ꠇꠁꠟꠣ, “ꠔꠥꠝꠣꠞ ꠇꠝꠞꠅ ꠇꠣꠙꠠ ꠚꠤꠘ꠆ꠖꠅ ꠀꠞ ꠎꠥꠔꠣ ꠙꠣꠅꠔ ꠖꠦꠅ।” ꠔꠣꠁꠘ ꠅꠃꠟꠣ ꠇꠞꠟꠣ। ꠚꠤꠞꠤꠡ꠆ꠔꠣꠄ ꠇꠁꠟꠣ, “ꠔꠥꠝꠣꠞ ꠌꠣꠖ꠆ꠖꠞ ꠉꠔꠞꠅ ꠖꠤꠀ ꠀꠝꠣꠞ ꠈꠞꠦ ꠈꠞꠦ ꠀꠅ।”
ACT 12:9 ꠙꠤꠔꠞ ꠚꠤꠞꠤꠡ꠆ꠔꠣꠞ ꠈꠞꠦ ꠈꠞꠦ ꠎꠦꠟꠈꠣꠘꠣ ꠕꠣꠇꠤ ꠛꠣꠞ ꠅꠁ ꠀꠁꠟꠣ, ꠅꠁꠟꠦ ꠚꠤꠞꠤꠡ꠆ꠔꠣꠄ ꠎꠦꠔꠣ ꠇꠞꠟꠣ, ꠁꠔꠣ ꠎꠦꠘ ꠢꠣꠍꠣꠞꠞꠃ ꠅꠞ, ꠁꠔꠣ ꠇꠥꠘ꠆ꠔꠣꠃ ꠙꠤꠔꠞꠦ ꠛꠥꠎꠔꠣ ꠙꠣꠞꠟꠣ ꠘꠣ, ꠔꠣꠁꠘ ꠝꠘꠅ ꠇꠞꠟꠣ ꠁꠔꠣ ꠇꠥꠘꠥ ꠖꠞꠡꠘ ꠖꠦꠈꠞꠣ।
ACT 12:10 ꠔꠣꠞꠣ ꠙꠄꠟꠣ ꠀꠞ ꠖꠥꠁ ꠘꠝ꠆ꠛꠞ ꠙꠣꠞꠣꠖꠣꠞꠞ ꠖꠟꠞꠦ ꠙꠣꠞ ꠅꠁꠀ ꠎꠦꠛꠟꠣ ꠡꠢꠞꠅ ꠢꠣꠝꠣꠁꠛꠣꠞ ꠟꠥꠀꠞ ꠉꠦꠁꠐꠞ ꠉꠦꠍꠦ ꠀꠁꠟꠣ, ꠉꠦꠁꠐ ꠘꠤꠎꠦ ꠘꠤꠎꠦꠃ ꠈꠥꠟꠤꠉꠦꠟ। ꠔꠣꠞꠣ ꠛꠣꠞ ꠅꠁꠀ ꠄꠇ ꠉꠟ꠆ꠟꠤꠞ ꠢꠦꠡ ꠉꠣꠟꠣꠔ ꠀꠁꠀ ꠀꠎꠤꠟꠣ, ꠀꠞ ꠅꠃ ꠡꠝꠄ ꠚꠤꠞꠤꠡ꠆ꠔꠣ ꠙꠤꠔꠞꠞ ꠟꠉ ꠕꠣꠇꠤ ꠉꠦꠟꠣꠉꠤ।
ACT 12:11 ꠔꠦꠃ ꠙꠤꠔꠞꠞ ꠢꠥꠡ ꠅꠁꠟ ꠀꠞ ꠔꠣꠁꠘ ꠇꠁꠟꠣ, “ꠅꠈꠘ ꠀꠝꠤ ꠢꠣꠍꠣꠞꠞꠃ ꠛꠥꠎꠟꠣꠝ ꠎꠦꠘ, ꠝꠣꠛꠥꠖꠦ ꠔꠣꠘ ꠚꠤꠞꠤꠡ꠆ꠔꠣꠞꠦ ꠙꠣꠑꠣꠁꠀ, ꠢꠦꠞꠥꠖꠞ ꠀꠔ ꠕꠣꠇꠤ ꠀꠞ ꠁꠢꠥꠖꠤ ꠅꠇꠟꠞ ꠛꠖ ꠈꠣꠁꠡ ꠕꠣꠇꠤ ꠀꠝꠣꠞꠦ ꠢꠦꠚꠣꠎꠔ ꠇꠞꠍꠂꠘ।”
ACT 12:12 ꠔꠣꠁꠘ ꠝꠘꠦ ꠝꠘꠦ ꠁꠔꠣ ꠝꠣꠔꠤ ꠝꠣꠔꠤ ꠝꠞꠤꠅꠝꠞ ꠛꠣꠠꠤꠞ ꠝꠥꠈꠣ ꠉꠦꠟꠣ, ꠁ ꠝꠞꠤꠅꠝ ꠅꠁꠟꠣ ꠢꠣꠘ꠆ꠘꠣꠘ ꠃꠞꠚꠦ ꠝꠣꠞ꠆ꠇꠥꠍꠞ ꠝꠣ। ꠅꠘꠅ ꠛꠃꠔ ꠝꠣꠘꠥꠡ ꠖꠟꠣ ꠅꠁꠀ ꠖꠥꠀ ꠇꠞꠣꠔ ꠀꠍꠟꠣ।
ACT 12:13 ꠙꠤꠔꠞꠦ ꠉꠦꠁꠐꠅ ꠑꠥꠇꠣ ꠝꠣꠞꠣꠞ ꠛꠣꠖꠦ ꠞꠥꠖꠣ ꠘꠣꠝꠞ ꠄꠇ ꠛꠣꠘ꠆ꠖꠤ ꠛꠦꠐꠤꠄ ꠉꠦꠁꠐ ꠈꠥꠟꠣꠔ ꠀꠁꠟ;
ACT 12:14 ꠀꠞ ꠙꠤꠔꠞꠞ ꠉꠟꠣꠞ ꠡꠥꠞ ꠢꠥꠘꠤꠀ ꠈꠥꠡꠤꠄ ꠔꠣꠁ ꠉꠦꠁꠐ ꠘꠣ ꠈꠥꠟꠤꠀ ꠖꠃꠠꠤꠀ ꠉꠤꠀ ꠢꠇꠟꠞ ꠉꠦꠍꠦ ꠇꠁꠟ, “ꠙꠤꠔꠞ ꠀꠁꠀ ꠛꠣꠞꠦ ꠉꠦꠁꠐꠅ ꠃꠛꠣꠁ ꠞꠁꠍꠂꠘ।”
ACT 12:15 ꠔꠣꠞꠣ ꠁꠔꠣ ꠢꠥꠘꠤꠀ ꠢꠤ ꠛꠦꠐꠤꠞꠦ ꠇꠁꠟꠣ, “ꠔꠥꠝꠣꠞ ꠝꠣꠕꠣ ꠈꠣꠞꠣꠙ ꠅꠁꠍꠦ ꠘꠤ?” ꠛꠦꠐꠤꠄ ꠔꠣꠞꠣꠞ ꠟꠉꠦ ꠘꠤꠀꠄ ꠇꠞꠤꠀ ꠇꠁꠟ, “ꠘꠣ, ꠢꠣꠍꠣꠃ ꠙꠤꠔꠞꠞ ꠉꠟꠣ ꠢꠥꠘꠍꠤ!” ꠔꠦꠃ ꠢꠇꠟꠦ ꠇꠁꠟꠣ, “ꠔꠦ ꠄꠁꠘ ꠝꠘꠦ ꠅꠄ ꠙꠤꠔꠞꠞ ꠍꠥꠞꠔꠦ ꠇꠥꠘꠥ ꠚꠤꠞꠤꠡ꠆ꠔꠣ।”
ACT 12:16 ꠁꠛꠣꠄ ꠙꠤꠔꠞꠦ ꠉꠦꠁꠐꠅ ꠑꠥꠇꠣꠘꠤꠔ ꠞꠁꠟꠣ। ꠅꠃ ꠔꠣꠞꠣ ꠈꠥꠟꠤꠀ ꠙꠤꠔꠞꠞꠦ ꠖꠦꠈꠤꠀ ꠔꠣꠁꠎ꠆ꠎꠥꠛ ꠅꠁꠉꠦꠟꠣ।
ACT 12:17 ꠙꠤꠔꠞꠦ ꠀꠔꠖꠤ ꠁꠡꠣꠞꠣ ꠖꠤꠟꠣ ꠔꠣꠞꠣꠞꠦ ꠘꠤꠞꠣꠁ ꠅꠀꠞ ꠟꠣꠉꠤ, ꠀꠞ ꠎꠦꠟꠈꠣꠘꠣ ꠕꠣꠇꠤ ꠝꠣꠛꠥꠖꠦ ꠇꠤꠟꠣ ꠔꠣꠘꠞꠦ ꠛꠣꠞ ꠇꠞꠤ ꠀꠘꠟꠣ, ꠅꠃꠔꠣ ꠢꠇꠟꠔꠣ ꠇꠁꠟꠣ। ꠛꠣꠖꠦ ꠔꠣꠁꠘ ꠇꠁꠟꠣ, “ꠁ ꠈꠛꠞꠈꠣꠘ ꠔꠥꠝꠞꠣ ꠁꠀꠇꠥꠛ ꠀꠞ ꠛꠣꠇꠤ ꠜꠣꠁꠀꠁꠘ꠆ꠔꠞꠦꠅ ꠎꠣꠘꠣꠁꠅ।” ꠢꠦꠡꠦ ꠔꠣꠁꠘ ꠅꠘ ꠕꠣꠇꠤ ꠛꠣꠞ ꠅꠁꠀ ꠀꠞꠇ ꠎꠣꠉꠣꠔ ꠉꠦꠟꠣꠉꠤ।
ACT 12:18 ꠞꠣꠁꠔ ꠙꠥꠀꠘꠤꠞ ꠛꠣꠖꠦ ꠙꠤꠔꠞ ꠇꠥꠀꠁ ꠉꠦꠟꠣ, ꠁ ꠝꠣꠔ ꠟꠁꠀ ꠍꠤꠙꠣꠁ ꠅꠇꠟꠞ ꠝꠣꠎꠦ ꠃꠟꠥꠡ꠆ꠕꠟ ꠙꠠꠤꠉꠦꠟ।
ACT 12:19 ꠢꠦꠞꠥꠖꠦ ꠔꠣꠘꠞꠦ ꠔꠥꠇꠣꠁꠀ ꠘꠣ ꠙꠣꠅꠀꠄ ꠙꠣꠞꠣꠖꠣꠞ ꠅꠇꠟꠞꠦ ꠎꠦꠞꠣ ꠇꠞꠟꠣ, ꠀꠞ ꠔꠣꠞꠣꠞꠦ ꠎꠣꠘꠦ ꠝꠣꠞꠣꠞ ꠢꠥꠇꠥꠝ ꠖꠤꠟꠣ, ꠛꠣꠖꠦ ꠢꠦꠞꠥꠖ ꠘꠤꠎꠦꠅ ꠄꠢꠥꠖꠤꠀ ꠍꠣꠠꠤꠀ ꠇꠄꠖꠤꠘꠞ ꠟꠣꠉꠤ ꠇꠂꠍꠞꠤꠀꠔ ꠉꠦꠟꠣꠉꠤ।
ACT 12:20 ꠢꠤ ꠡꠝꠄ ꠢꠦꠞꠥꠖꠦ ꠡꠥꠞ ꠀꠞ ꠍꠤꠖꠘꠞ ꠝꠣꠘꠡꠞ ꠃꠙꠞꠦ ꠈꠥꠛ ꠉꠥꠍꠣ ꠀꠍꠟꠣ। ꠅꠁꠟꠦ ꠞꠣꠎꠣ ꠢꠦꠞꠥꠖꠞ ꠖꠦꠡ ꠕꠣꠇꠤ ꠔꠣꠞꠣꠞ ꠖꠦꠡꠅ ꠈꠣꠘꠤꠞ ꠍꠣꠝꠣꠘꠣ ꠀꠁꠔ ꠇꠞꠤ, ꠢꠤꠘꠞ ꠢꠇꠟ ꠝꠣꠘꠡꠦ ꠄꠇꠟꠉꠦ ꠝꠤꠟꠤꠀ ꠢꠦꠞꠥꠖꠞ ꠉꠦꠍꠦ ꠀꠁꠟꠣ, ꠔꠣꠞꠣ ꠞꠣꠎꠣꠞ ꠢꠥꠔꠤꠛꠣꠞ ꠊꠞꠞ ꠛꠦꠟꠣꠡ꠆ꠔꠍ ꠘꠣꠝꠞ ꠄꠇ ꠛꠠ ꠉꠥꠟꠣꠝꠞꠦ ꠀꠔ ꠇꠞꠤꠀ ꠞꠣꠎꠣꠞ ꠟꠉꠦ ꠀꠙꠥꠡ ꠇꠞꠣꠔ ꠀꠁꠟꠣ।
ACT 12:21 ꠀꠞ ꠢꠦꠞꠥꠖꠦ ꠄꠇ ꠖꠤꠘ ꠑꠤꠇ ꠇꠞꠤꠀ, ꠢꠤꠖꠤꠘ ꠔꠣꠘ ꠞꠣꠎ ꠟꠦꠛꠣꠍ ꠚꠤꠘ꠆ꠖꠤꠀ ꠡꠤꠋꠢꠣꠡꠘꠅ ꠛꠁꠀ ꠔꠣꠞꠣꠞ ꠍꠣꠝꠘꠦ ꠜꠣꠡꠘ ꠖꠦꠅꠀꠔ ꠀꠍꠟꠣ।
ACT 12:22 ꠔꠣꠘ ꠇꠕꠣ ꠢꠥꠘꠤꠀ ꠔꠣꠞꠣ ꠌꠤꠟ꠆ꠟꠣꠁꠀ ꠇꠁꠟꠣ, “ꠁꠔꠣ ꠔ ꠝꠣꠘꠡꠞ ꠛꠥꠟꠤ ꠘꠣꠄ, ꠇꠥꠘꠥ ꠖꠦꠛꠔꠣꠞ ꠛꠥꠟꠤ!”
ACT 12:23 ꠀꠞ ꠟꠉꠦ ꠟꠉꠦ ꠝꠣꠛꠥꠖꠞ ꠄꠇ ꠚꠤꠞꠤꠡ꠆ꠔꠣꠄ ꠔꠣꠘꠞꠦ ꠝꠣꠞꠟꠣ, ꠇꠣꠞꠘ ꠢꠦꠞꠥꠖꠦ ꠀꠟ꠆ꠟꠣꠞ ꠁꠎ꠆ꠎꠔ ꠞꠣꠈꠟꠣ ꠘꠣ। ꠔꠦꠃ ꠇꠤꠞꠝꠤꠞ ꠈꠥꠞꠣꠇ ꠛꠘꠤꠀ ꠔꠣꠘ ꠖꠝ ꠛꠣꠞ ꠅꠁꠟ।
ACT 12:24 ꠅꠁꠟꠦ ꠀꠟ꠆ꠟꠣꠞ ꠇꠣꠟꠣꠝ ꠢꠇꠟꠛꠣꠄ ꠀꠞꠅ ꠛꠦꠡꠤ ꠍꠤꠔ꠆ꠞꠤꠟ, ꠀꠞ ꠛꠃꠔ ꠝꠣꠘꠡꠦ ꠁꠝꠣꠘ ꠀꠘꠟꠣ।
ACT 12:25 ꠁꠛꠣꠄ ꠛꠣꠞ꠆ꠘꠣꠛꠣꠍ ꠀꠞ ꠡꠃꠟꠞ ꠔꠛꠟꠤꠉ ꠇꠣꠝ ꠡꠦꠡ ꠅꠀꠄ ꠔꠣꠞꠣ ꠢꠣꠘ꠆ꠘꠣꠘ ꠃꠞꠚꠦ ꠝꠣꠞ꠆ꠇꠥꠍꠞꠦ ꠟꠉꠦ ꠟꠁꠀ ꠎꠦꠞꠥꠎꠣꠟꠦꠝꠅ ꠚꠤꠞꠔ ꠉꠦꠟꠣ।
ACT 13:1 ꠀꠘ꠆ꠔꠤꠅꠈꠤꠀ ꠎꠝꠣꠔꠅ ꠇꠄꠎꠘ ꠘꠛꠤ ꠀꠞ ꠃꠡ꠆ꠔꠣꠖ ꠀꠍꠟꠣ, ꠄꠞꠣꠞ ꠘꠣꠝ ꠛꠣꠞ꠆ꠘꠣꠛꠣꠍ, ꠍꠣꠝꠣꠃꠘ ꠃꠞꠚꠦ ꠇꠣꠟꠣꠜꠣꠁ, ꠇꠥꠞꠤꠘꠤ ꠡꠢꠞꠞ ꠟꠥꠇꠤꠀꠍ, ꠞꠣꠎꠣ ꠢꠦꠞꠥꠖꠞ ꠈꠣꠔꠤꠞꠞ ꠝꠣꠘꠥꠡ ꠝꠘꠢꠦꠝ, ꠀꠞ ꠡꠃꠟ।
ACT 13:2 ꠄꠞꠣ ꠎꠦꠛꠟꠣ ꠞꠥꠎꠣ ꠞꠣꠈꠤꠀ ꠝꠣꠛꠥꠖꠞ ꠄꠛꠣꠖꠔ ꠇꠞꠣꠔ ꠀꠍꠟꠣ, ꠅꠃ ꠡꠝꠄ ꠙꠣꠇ ꠞꠥꠢꠦ ꠄꠞꠣꠞꠦ ꠇꠁꠟꠣ, “ꠛꠣꠞ꠆ꠘꠣꠛꠣꠍ ꠀꠞ ꠡꠃꠟꠞꠦ ꠀꠝꠤ ꠎꠦ ꠇꠣꠝꠞ ꠟꠣꠉꠤ ꠙꠍꠘ꠆ꠖ ꠇꠞꠍꠤ, ꠅꠃ ꠇꠣꠝꠞ ꠟꠣꠉꠤ ꠔꠣꠞꠣꠞꠦ ꠀꠟꠉ ꠇꠞꠤ ꠖꠦꠅ।”
ACT 13:3 ꠔꠦꠃ ꠄꠞꠣ ꠞꠥꠎꠣ ꠞꠣꠈꠤꠀ, ꠢꠃ ꠖꠥꠁꠅꠎꠘꠞ ꠃꠙꠞꠦ ꠀꠔ ꠕꠁꠀ ꠖꠥꠀ ꠇꠞꠤꠀ ꠛꠤꠖꠣꠄ ꠖꠤꠟꠣ।
ACT 13:4 ꠅꠃ ꠟꠣꠈꠣꠘ ꠇꠞꠤ ꠙꠣꠇ ꠞꠥꠢꠦ ꠛꠣꠞ꠆ꠘꠣꠛꠣꠍ ꠀꠞ ꠡꠃꠟꠞꠦ ꠡꠤꠟꠥꠇꠤꠀꠔ ꠙꠣꠑꠣꠁ ꠖꠤꠟꠣ, ꠀꠞ ꠢꠤꠈꠣꠘ ꠕꠣꠇꠤ ꠎꠣꠎꠅ ꠇꠞꠤꠀ ꠔꠣꠞꠣ ꠍꠣꠁꠙ꠆ꠞꠣꠍ ꠖꠤꠙꠅ ꠉꠦꠟꠣ।
ACT 13:5 ꠀꠞ ꠍꠣꠟꠣꠝꠤꠍ ꠉꠤꠀ ꠢꠣꠞꠟꠦ ꠔꠣꠞꠣ ꠁꠢꠥꠖꠤ ꠅꠇꠟꠞ ꠝꠍꠤꠖꠣꠁꠘ꠆ꠔꠅ ꠢꠣꠝꠣꠁꠀ ꠀꠟ꠆ꠟꠣꠞ ꠇꠣꠟꠣꠝ ꠔꠛꠟꠤꠉ ꠇꠞꠟꠣ। ꠔꠣꠞꠣꠞ ꠇꠣꠝ ꠇꠞꠣꠞ ꠟꠣꠉꠤ ꠢꠣꠘ꠆ꠘꠣꠘ ꠃꠞꠚꠦ ꠝꠣꠞ꠆ꠇꠥꠍ ꠔꠣꠞꠣꠞ ꠟꠉꠦ ꠀꠍꠟꠣ।
ACT 13:6 ꠔꠣꠞꠣ ꠀꠡ꠆ꠔꠣ ꠖꠤꠙ ꠊꠥꠞꠤꠀ ꠢꠣꠞꠟꠦ ꠙꠣꠚꠥꠍ ꠐꠣꠃꠘꠅ ꠀꠁꠟꠣ, ꠀꠞ ꠢꠤꠘꠅ ꠛꠞ-ꠎꠤꠡꠥ ꠘꠣꠝꠞ ꠄꠇ ꠁꠢꠥꠖꠤ ꠎꠣꠖꠥꠉꠤꠞꠞ ꠟꠉꠦ ꠖꠦꠈꠣ ꠅꠁꠟ, ꠢꠦ ꠀꠍꠤꠟ ꠜꠘ꠆ꠒ ꠘꠛꠤ।
ACT 13:7 ꠔꠣꠞ ꠀꠞꠇ ꠘꠣꠝ ꠀꠍꠤꠟ ꠁꠟꠥꠝꠣ, ꠝꠣꠘꠤ ꠎꠣꠖꠥꠉꠤꠞ। ꠢꠦ ꠅꠁꠟ ꠢꠤ ꠖꠦꠡꠞ ꠢꠣꠇꠤꠝ ꠡꠦꠞ꠆ꠉꠤꠅ ꠙꠣꠃꠟꠥꠍꠞ ꠖꠥꠡ꠆ꠔ, ꠅꠁꠟꠦ ꠢꠤ ꠢꠣꠇꠤꠝ ꠀꠍꠟꠣ ꠄꠇꠎꠘ ꠀꠈꠟꠖꠣꠞ ꠝꠣꠘꠥꠡ, ꠔꠣꠁꠘ ꠀꠟ꠆ꠟꠣꠞ ꠇꠣꠟꠣꠝ ꠢꠥꠘꠣꠞ ꠟꠣꠉꠤ ꠛꠣꠞ꠆ꠘꠣꠛꠣꠍ ꠀꠞ ꠡꠃꠟꠞꠦ ꠈꠛꠞꠖꠤ ꠀꠘꠣꠁꠟꠣ। ꠁꠟꠥꠝꠣꠄ ꠢꠣꠇꠤꠝꠞꠦ ꠁꠝꠣꠘ ꠀꠘꠔꠦ ꠖꠤꠔ ꠘꠣ ꠇꠞꠤ ꠛꠣꠞ꠆ꠘꠣꠛꠣꠍ ꠀꠞ ꠡꠃꠟꠞꠦ ꠛꠣꠗꠣ ꠖꠤꠟ।
ACT 13:9 ꠀꠞ ꠡꠃꠟ, ꠎꠦꠘꠞꠦ ꠙꠣꠃꠟꠥꠍ ꠇꠁꠀꠅ ꠒꠣꠇꠂꠘ, ꠔꠣꠁꠘ ꠙꠣꠇ ꠞꠥꠢꠦ ꠇꠣꠝꠤꠟ ꠅꠁꠀ ꠁꠟꠥꠝꠣꠞ ꠛꠣꠄ ꠗꠤꠀꠘ ꠗꠞꠤ ꠌꠣꠁꠀ ꠇꠁꠟꠣ,
ACT 13:10 “ꠅ ꠁꠛꠟꠤꠍꠞ ꠛꠣꠁꠌ꠆ꠌꠣ, ꠢꠇꠟ ꠝꠥꠝꠤꠘꠤ ꠇꠣꠝꠞ ꠖꠥꠡꠝꠘ, ꠔꠞ ꠜꠤꠔꠞꠦ ꠢꠇꠟ ꠟꠣꠈꠣꠘ ꠍꠟ-ꠌꠔꠥꠞꠤ ꠀꠞ ꠘꠣꠚꠞꠝꠣꠘꠤꠄ ꠜꠞꠣ, ꠔꠥꠁ ꠝꠣꠛꠥꠖꠞ ꠍꠢꠤ ꠙꠕꠞꠦ ꠔꠦꠠꠣ ꠇꠞꠣꠞ ꠚꠤꠇꠤꠞ ꠛꠣꠖ ꠖꠤꠔꠦ ꠘꠣꠄ ꠘꠤ?
ACT 13:11 ꠢꠥꠘ, ꠝꠣꠛꠥꠖꠞ ꠀꠔ ꠔꠞ ꠛꠤꠞꠥꠖ꠆ꠖꠦ ꠟꠣꠉꠍꠦ। ꠔꠥꠁ ꠀꠘ꠆ꠖꠣ ꠅꠁꠎꠤꠛꠦ, ꠀꠞ ꠇꠄꠖꠤꠘ ꠡꠥꠞꠥꠎ ꠖꠦꠈꠔꠦ ꠘꠣꠄ।” ꠟꠉꠦ ꠟꠉꠦꠃ ꠈꠥꠀ ꠀꠞ ꠀꠘ꠆ꠖꠣꠁꠞꠦ ꠔꠣꠞꠦ ꠉꠥꠞꠤꠟꠤꠟ, ꠀꠞ ꠢꠦ ꠀꠔ ꠛꠣꠠꠣꠁꠀ ꠒꠣꠁꠘꠦ-ꠛꠣꠃꠄ ꠇꠦꠃꠞꠞꠦ ꠔꠥꠇꠣꠁꠟ, ꠔꠣꠞꠦ ꠀꠔꠅ ꠗꠞꠤꠀ ꠘꠦꠅꠀꠞ ꠟꠣꠉꠤ।
ACT 13:12 ꠁꠔꠣ ꠖꠦꠈꠤꠀ ꠢꠤ ꠢꠣꠇꠤꠝꠦ ꠝꠣꠟꠤꠇꠞ ꠛꠤꠡꠄꠄ ꠎꠦ ꠔꠣꠟꠤꠝ ꠙꠣꠁꠟꠣ, ꠄꠔꠦ ꠔꠣꠁꠘ ꠔꠣꠁꠎ꠆ꠎꠥꠛ ꠅꠁꠀ ꠁꠝꠣꠘ ꠀꠘꠟꠣ।
ACT 13:13 ꠛꠣꠖꠦ ꠢꠎꠞꠔ ꠙꠣꠃꠟꠥꠍ ꠀꠞ ꠔꠣꠘ ꠟꠉꠞ ꠢꠇꠟꠦ ꠙꠣꠚꠥꠍ ꠍꠣꠠꠤꠀ ꠎꠣꠎꠅ ꠇꠞꠤ ꠙꠣꠝꠚꠥꠟꠤꠀ ꠖꠦꠡꠞ ꠙꠞ꠆ꠉꠣ ꠡꠢꠞꠅ ꠙꠃꠍꠟꠣ। ꠀꠞ ꠢꠣꠘ꠆ꠘꠣꠘ ꠃꠞꠚꠦ ꠝꠣꠞ꠆ꠇꠥꠍꠦ ꠔꠣꠞꠣꠞꠦ ꠕꠁꠀ ꠎꠦꠞꠥꠎꠣꠟꠦꠝꠅ ꠚꠤꠞꠔ ꠉꠦꠟꠣꠉꠤ।
ACT 13:14 ꠛꠣꠖꠦ ꠔꠣꠞꠣ ꠙꠞ꠆ꠉꠣ ꠕꠣꠇꠤ ꠀꠉꠥꠀꠁꠀ ꠙꠤꠡꠤꠖꠤꠀ ꠖꠦꠡꠞ ꠀꠘ꠆ꠔꠤꠅꠈꠤꠀ ꠡꠢꠞꠅ ꠙꠃꠍꠟꠣ ꠀꠞ ꠎꠥꠝ꠆ꠝꠣꠛꠣꠞꠦ ꠁꠢꠥꠖꠤꠞ ꠝꠍꠤꠖꠅ ꠢꠣꠝꠣꠁꠀ ꠛꠁꠟꠣ।
ACT 13:15 ꠝꠥꠍꠣꠞ ꠡꠞꠤꠅꠔ ꠀꠞ ꠘꠛꠤ ꠅꠇꠟꠞ ꠇꠤꠔꠣꠛ ꠕꠣꠇꠤ ꠔꠤꠟꠣꠅꠔ ꠇꠞꠣ ꠡꠦꠡ ꠅꠁꠟꠦ, ꠝꠎꠟꠤꠍꠞ ꠘꠦꠔꠣ ꠅꠇꠟꠦ ꠔꠣꠞꠣꠞꠦ ꠇꠁꠟꠣ, “ꠅ ꠜꠣꠁꠍꠣꠛ ꠅꠇꠟ, ꠝꠣꠘꠡꠞꠦ ꠘꠍꠤꠅꠔꠞ ꠟꠣꠉꠤ ꠇꠥꠘ꠆ꠔꠣ ꠛꠄꠀꠘ ꠇꠞꠣꠞ ꠈꠤꠀꠟ ꠅꠁꠟꠦ, ꠇꠞꠃꠇ꠆ꠇꠣ।”
ACT 13:16 ꠅꠃ ꠙꠣꠃꠟꠥꠍꠦ ꠃꠛꠣꠁꠀ ꠀꠔꠖꠤ ꠁꠡꠣꠞꠣ ꠇꠞꠤ ꠇꠁꠟꠣ, “ꠅ ꠛꠘꠤ ꠁꠍꠞꠣꠁꠟ ꠅꠇꠟ, ꠀꠞ ꠀꠟ꠆ꠟꠣꠞꠦ ꠒꠞꠣꠅꠞꠣ ꠅ-ꠁꠢꠥꠖꠤ ꠅꠇꠟ ꠀꠙꠘꠣꠞꠣ ꠢꠥꠘꠃꠇ꠆ꠇꠣ।
ACT 13:17 ꠅꠃ ꠁꠍꠞꠣꠁꠟ ꠎꠣꠔꠤꠞ ꠀꠟ꠆ꠟꠣꠄ ꠀꠝꠞꠣꠞ ꠛꠣꠚ-ꠖꠣꠖꠣ ꠅꠇꠟꠞꠦ ꠙꠍꠘ꠆ꠖ ꠇꠞꠍꠟꠣ, ꠎꠦꠛꠟꠣ ꠔꠣꠞꠣ ꠝꠤꠡꠞ ꠖꠦꠡꠅ ꠝꠥꠍꠣꠚꠤꠞꠤꠔ ꠀꠍꠟꠣ, ꠅꠃ ꠡꠝꠄ ꠔꠣꠞꠣꠞꠦ ꠝꠢꠣꠘ ꠇꠞꠍꠤꠟꠣ, ꠀꠞ ꠔꠣꠘ ꠝꠢꠣ ꠇꠥꠖꠞꠔꠦ ꠔꠣꠞꠣꠞꠦ ꠢꠤꠈꠣꠘ ꠕꠣꠇꠤ ꠛꠣꠞ ꠇꠞꠤ ꠀꠘꠍꠤꠟꠣ।
ACT 13:18 ꠅꠘꠥꠝꠣꠘ ꠌꠣꠟ꠆ꠟꠤꠡ ꠛꠞꠍ ꠗꠞꠤ ꠔꠣꠁꠘ ꠝꠞꠥꠜꠥꠝꠤꠞ ꠝꠣꠎꠦ ꠢꠥꠞꠥꠔ꠆ꠔꠣꠞ ꠝꠣ-ꠛꠣꠚꠞ ꠟꠣꠈꠣꠘ ꠔꠣꠞꠣꠞ ꠛꠦꠀꠖꠛꠤ ꠍꠛꠞ ꠇꠞꠍꠟꠣ।
ACT 13:19 ꠛꠣꠖꠦ ꠔꠣꠁꠘ ꠇꠦꠘꠣꠘ ꠖꠦꠡꠞ ꠡꠣꠔꠐꠣ ꠎꠣꠔꠤꠞꠦ ꠛꠤꠘꠣꠡ ꠇꠞꠤꠀ, ꠔꠣꠘ ꠘꠤꠎꠞ ꠛꠘ꠆ꠖꠣ ꠅꠇꠟꠞꠦ ꠢꠃ ꠖꠦꠡꠣꠁꠘ꠆ꠔꠞ ꠝꠣꠟꠤꠇꠣꠘꠣ ꠖꠣꠘ ꠇꠞꠟꠣ। ꠅꠃ ꠟꠣꠈꠣꠘ ꠅꠘꠥꠝꠣꠘ ꠌꠣꠁꠞ-ꠡ ꠙꠁꠘ꠆ꠌꠣꠡ ꠛꠞꠍ ꠉꠥꠎꠞꠤ ꠉꠦꠟ।
ACT 13:20 ꠢꠦꠡꠦ ꠡꠣꠝꠥꠄꠟ ꠘꠛꠤꠞ ꠀꠝꠟ ꠙꠞ꠆ꠎꠘ꠆ꠔ ꠀꠟ꠆ꠟꠣꠄ ꠇꠄꠎꠘ ꠀꠝꠤꠞ ꠛꠦꠎꠤꠍꠟꠣ।
ACT 13:21 ꠅꠁꠟꠦ ꠝꠣꠘꠡꠦ ꠄꠇꠎꠘ ꠛꠣꠖꠡꠣ ꠌꠣꠁꠟ। ꠔꠦꠃ ꠀꠟ꠆ꠟꠣꠄ ꠌꠣꠟ꠆ꠟꠤꠡ ꠛꠍꠞꠞ ꠟꠣꠉꠤ ꠛꠤꠘ-ꠁꠀꠝꠤꠘ ꠛꠋꠡꠞ ꠇꠤꠡꠞ ꠙꠥꠀ ꠔꠣꠟꠥꠔꠞꠦ ꠛꠣꠖꠡꠣ ꠛꠣꠘꠣꠁꠟꠣ।
ACT 13:22 ꠛꠣꠖꠦ ꠀꠟ꠆ꠟꠣꠄ ꠔꠣꠟꠥꠔꠞꠦ ꠢꠞꠣꠁꠀ ꠢꠎꠞꠔ ꠖꠣꠃꠖꠞꠦ ꠔꠣꠞꠣꠞ ꠛꠣꠖꠡꠣ ꠛꠣꠘꠣꠁꠟꠣ। ꠔꠣꠁꠘ ꠖꠣꠃꠖꠞ ꠛꠦꠙꠣꠞꠦ ꠇꠁꠟꠣ, ‘ꠀꠝꠤ ꠁꠀꠍꠞ ꠙꠥꠀ ꠖꠣꠃꠖꠞꠦ ꠙꠣꠁꠍꠤ, ꠢꠦ ꠀꠝꠣꠞ ꠝꠘꠞ ꠝꠔ ꠝꠣꠘꠥꠡ। ꠀꠝꠣꠞ ꠢꠇꠟ ꠝꠞ꠆ꠎꠤ ꠀꠝꠟ ꠇꠞꠛ।’
ACT 13:23 ꠀꠟ꠆ꠟꠣꠄ ꠔꠣꠘ ꠅꠀꠖꠣ ꠝꠣꠚꠤꠇ ꠅꠃ ꠝꠣꠘꠡꠞ ꠅꠀꠞꠤꠡ ꠕꠣꠇꠤ ꠄꠇꠎꠘ ꠔꠞꠣꠘꠦꠀꠟꠣ, ꠝꠣꠘꠤ ꠢꠎꠞꠔ ꠁꠍꠣꠞꠦ ꠛꠘꠤ ꠁꠍꠞꠣꠁꠟ ꠅꠇꠟꠞ ꠉꠦꠍꠦ ꠀꠎꠤꠞ ꠇꠞꠍꠤꠟꠣ;
ACT 13:24 ꠅꠃ ꠁꠍꠣ ꠀꠅꠀꠞ ꠀꠉꠦ ꠢꠇ꠆ꠇꠟ ꠛꠘꠤ ꠁꠍꠞꠣꠁꠟꠞ ꠉꠦꠍꠦ ꠢꠎꠞꠔ ꠄꠢꠤꠀꠄ ꠔꠛꠟꠤꠉ ꠇꠞꠍꠤꠟꠣ, ‘ꠉꠥꠘꠣ ꠕꠣꠇꠤ ꠖꠤꠟ ꠚꠤꠞꠣꠁꠀ ꠢꠣꠞꠤ ꠝꠣꠘꠡꠦ ꠔꠃꠛꠣꠞ ꠉꠥꠍꠟ ꠇꠞꠣ ꠖꠞꠇꠣꠞ।’
ACT 13:25 ꠀꠞ ꠄꠢꠤꠀꠄ ꠔꠣꠘ ꠔꠛꠟꠤꠉ ꠇꠣꠝꠞ ꠀꠈꠦꠞ ꠇꠣꠟꠅ ꠇꠁꠟꠣ, ‘ꠔꠥꠝꠞꠣ ꠇꠤꠔꠣ ꠝꠘꠅ ꠇꠞꠅ, ꠀꠝꠤ ꠇꠦ? ꠀꠝꠤ ꠔ ꠢꠤ ꠅꠀꠖꠣ ꠇꠞꠣ ꠀꠟ-ꠝꠍꠤ ꠘꠣꠄ; ꠔꠣꠁꠘ ꠀꠝꠣꠞ ꠛꠣꠖꠦ ꠔꠡꠞꠤꠚ ꠀꠘꠞꠣ। ꠔꠣꠘ ꠙꠣꠅꠞ ꠎꠥꠔꠣꠞ ꠚꠤꠔꠣ ꠈꠥꠟꠣꠞ ꠟꠣꠈꠅ ꠀꠝꠤ ꠘꠣꠄ।’
ACT 13:26 “ꠔꠦ ꠅ ꠜꠣꠁꠀꠁꠘ, ꠁꠛ꠆ꠞꠣꠢꠤꠝꠞ ꠅꠀꠞꠤꠡ ꠅꠇꠟ, ꠀꠞ ꠀꠟ꠆ꠟꠣꠞꠦ ꠒꠞꠣꠅꠞꠣ ꠅ-ꠁꠢꠥꠖꠤ ꠅꠇꠟ, ꠀꠝꠞꠣ ꠢꠇ꠆ꠇꠟꠞ ꠉꠦꠍꠦꠃ ꠘꠣꠎꠣꠔꠞ ꠁ ꠇꠣꠟꠣꠝ ꠘꠣꠎꠤꠟ ꠅꠁꠍꠦ।
ACT 13:27 ꠎꠦꠞꠥꠎꠣꠟꠦꠝꠞ ꠝꠣꠘꠡꠦ ꠀꠞ ꠔꠣꠞꠣꠞ ꠘꠦꠔꠣ ꠅꠇꠟꠦ ꠁꠍꠣꠞꠦ ꠘꠣ ꠌꠤꠘꠣꠄ, ꠀꠞ ꠙꠞꠔꠦꠇ ꠎꠥꠝ꠆ꠝꠣꠛꠣꠞꠦ ꠘꠛꠤ ꠅꠇꠟꠞ ꠎꠦ ꠛꠄꠀꠘ ꠔꠤꠟꠣꠅꠔ ꠅꠄ ꠄꠅꠔꠣ ꠘꠣ ꠛꠥꠎꠣꠄ, ꠔꠣꠞꠣ ꠁꠍꠣꠞꠦ ꠖꠥꠡꠤ ꠡꠣꠁꠛꠡ꠆ꠔ ꠇꠞꠤꠀ ꠢꠃ ꠇꠕꠣ ꠅꠇꠟ ꠙꠥꠞꠣ ꠇꠞꠟꠣ।
ACT 13:28 ꠀꠞ ꠎꠣꠘꠦ ꠝꠣꠞꠣꠞ ꠟꠣꠈ ꠇꠥꠘꠥ ꠖꠥꠡ ꠘꠣ ꠙꠣꠁꠟꠦꠅ ꠔꠣꠞꠣ ꠢꠣꠇꠤꠝ ꠙꠤꠟꠣꠔꠞ ꠉꠦꠍꠦ ꠖꠣꠛꠤ ꠎꠣꠘꠣꠁꠟꠣ, ꠔꠣꠘꠞꠦ ꠎꠣꠘꠦ ꠝꠣꠞꠣꠞ ꠟꠣꠉꠤ।
ACT 13:29 ꠔꠣꠘ ꠛꠤꠡꠄꠄ ꠀꠍꠝꠣꠘꠤ ꠇꠤꠔꠣꠛ ꠅꠇꠟꠅ ꠎꠦꠔꠣ ꠟꠦꠈꠣ ꠀꠍꠤꠟ, ꠁꠔꠣ ꠢꠇꠟꠔꠣ ꠙꠥꠞꠣ ꠅꠀꠞ ꠛꠣꠖꠦ ꠔꠣꠞꠣ ꠔꠣꠘꠞꠦ ꠉꠣꠍꠅ ꠟꠐꠇꠣꠁꠟ ꠢꠣꠟꠔ ꠕꠣꠇꠤ, ꠝꠣꠘꠤ ꠍꠟꠤꠛ ꠕꠣꠇꠤ ꠟꠣꠝꠣꠁꠀ ꠖꠣꠚꠘ ꠇꠞꠟ।
ACT 13:30 ꠅꠁꠟꠦ ꠀꠟ꠆ꠟꠣꠄ ꠔꠣꠘꠞꠦ ꠝꠥꠞ꠆ꠖꠣ ꠕꠣꠇꠤ ꠎꠤꠘ꠆ꠖꠣ ꠇꠞꠤ ꠔꠥꠟꠟꠣ।
ACT 13:31 ꠀꠞ ꠉꠣꠟꠤꠟ ꠕꠣꠇꠤ ꠎꠦꠞꠣ ꠔꠣꠘ ꠟꠉꠦ ꠎꠦꠞꠥꠎꠣꠟꠦꠝꠅ ꠀꠁꠍꠟꠣ, ꠔꠣꠞꠣꠞ ꠉꠦꠍꠦ ꠔꠣꠁꠘ ꠛꠃꠔ ꠖꠤꠘ ꠗꠞꠤ ꠖꠦꠈꠣ ꠖꠤꠟꠣ; ꠄꠞꠣꠃ ꠅꠈꠘ ꠀꠝꠞꠣꠞ ꠉꠦꠍꠦ ꠔꠣꠘ ꠛꠦꠙꠣꠞꠦ ꠡꠣꠇ꠆ꠇꠤ ꠖꠤꠞꠣ।
ACT 13:32 ꠀꠞ ꠀꠝꠞꠣꠞ ꠛꠣꠚ-ꠖꠣꠖꠣ ꠅꠇꠟꠞ ꠉꠦꠍꠦ ꠀꠟ꠆ꠟꠣꠄ ꠎꠦꠔꠣ ꠅꠀꠖꠣ ꠇꠞꠍꠤꠟꠣ, ꠀꠝꠞꠣ ꠀꠙꠘꠣꠁꠘ꠆ꠔꠞ ꠉꠦꠍꠦ ꠢꠃ ꠈꠥꠡ-ꠈꠛꠞꠤ ꠎꠣꠘꠣꠁꠞꠣꠝ,
ACT 13:33 ꠀꠟ꠆ꠟꠣꠄ ꠁꠍꠣꠞꠦ ꠝꠥꠞ꠆ꠖꠣ ꠕꠣꠇꠤ ꠎꠤꠘ꠆ꠖꠣ ꠇꠞꠤꠀ ꠔꠣꠞꠣꠞ ꠅꠀꠞꠤꠡ ꠅꠇꠟ, ꠝꠣꠘꠤ ꠀꠝꠞꠣꠞ ꠉꠦꠍꠦ ꠔꠣꠘ ꠅꠀꠖꠣ ꠙꠥꠞꠣ ꠇꠞꠍꠂꠘ, ꠀꠞ ꠁ ꠛꠦꠙꠣꠞꠦ ꠎꠛꠥꠞ ꠇꠤꠔꠣꠛꠞ ꠖꠥꠍꠞꠣ ꠞꠥꠇꠥꠔ ꠅꠃꠟꠣ ꠟꠦꠈꠣ ꠀꠍꠦ: ꠔꠥꠝꠤ ꠀꠝꠣꠞ ꠙꠥꠔ, ꠀꠁꠎ ꠕꠣꠇꠤ ꠀꠝꠤ ꠅꠁꠟꠣꠝ ꠔꠥꠝꠣꠞ ꠉꠣꠁꠛꠤ ꠛꠣꠚ।
ACT 13:34 ꠀꠟ꠆ꠟꠣꠄ ꠎꠦꠘ ꠔꠣꠘꠞꠦ ꠝꠥꠞ꠆ꠖꠣ ꠕꠣꠇꠤ ꠎꠤꠘ꠆ꠖꠣ ꠇꠞꠍꠂꠘ, ꠀꠞ ꠔꠣꠁꠘ ꠎꠦꠘ ꠇꠥꠘꠥꠖꠤꠘꠅ ꠇ꠆ꠇꠄ ꠅꠁꠔꠣ ꠘꠣꠄ, ꠁ ꠛꠦꠙꠣꠞꠦ ꠀꠟ꠆ꠟꠣꠄ ꠇꠁꠍꠂꠘ: ꠀꠝꠤ ꠖꠣꠃꠖꠞ ꠉꠦꠍꠦ ꠎꠦ ꠙꠣꠇ ꠅꠀꠖꠣ ꠅꠇꠟ ꠇꠞꠍꠤ, ꠁꠔꠣ ꠀꠝꠤ ꠔꠥꠝꠞꠣꠞꠦ ꠖꠣꠘ ꠇꠞꠝꠥ।
ACT 13:35 ꠔꠣꠁꠘ ꠎꠛꠥꠞ ꠡꠞꠤꠚꠞ ꠀꠞꠇ ꠀꠄꠀꠔꠅ ꠇꠁꠍꠂꠘ: ꠔꠥꠝꠤ ꠘꠤꠎꠞ ꠙꠣꠇ ꠛꠘ꠆ꠖꠣꠞꠦ ꠇ꠆ꠇꠄ ꠅꠁꠔꠦ ꠖꠤꠔꠣꠄ ꠘꠣꠄ।
ACT 13:36 ꠖꠣꠃꠖ ꠔ ꠢꠤ ꠀꠝꠟꠞ ꠝꠣꠘꠡꠞ ꠝꠣꠎꠦ ꠀꠟ꠆ꠟꠣꠞ ꠈꠤꠀꠟ-ꠈꠥꠡꠤ ꠙꠥꠞꠣ ꠇꠞꠣꠞ ꠛꠣꠖꠦ ꠁꠘ꠆ꠔꠦꠇꠣꠟ ꠇꠞꠟꠣ, ꠀꠞ ꠔꠣꠘ ꠝꠄ-ꠝꠥꠞꠛ꠆ꠛꠤ ꠅꠇꠟꠞ ꠉꠦꠍꠦ ꠔꠣꠘꠞꠦ ꠖꠣꠚꠘ ꠇꠞꠣꠞ ꠛꠣꠖꠦ ꠇ꠆ꠇꠄ ꠅꠁꠉꠦꠟꠣ,
ACT 13:37 ꠅꠁꠟꠦ ꠀꠟ꠆ꠟꠣꠄ ꠎꠦꠘꠞꠦ ꠝꠥꠞ꠆ꠖꠣ ꠕꠣꠇꠤ ꠎꠤꠘ꠆ꠖꠣ ꠇꠞꠍꠂꠘ, ꠄꠁꠘ ꠔ ꠇ꠆ꠇꠄ ꠅꠁꠍꠂꠘ ꠘꠣ।
ACT 13:38 ꠄꠞꠟꠣꠉꠤ ꠀꠝꠣꠞ ꠜꠣꠁ ꠅꠇꠟ, ꠀꠙꠘꠣꠞꠣꠅ ꠎꠣꠘꠤꠀ ꠞꠣꠈꠃꠇ꠆ꠇꠣ, ꠅꠃ ꠁꠍꠣꠞ ꠝꠣꠎꠖꠤꠀꠃ ꠉꠥꠘꠣ ꠕꠣꠇꠤ ꠝꠣꠚꠤ ꠙꠣꠅꠀꠞ ꠇꠕꠣ ꠀꠙꠘꠣꠁꠘ꠆ꠔꠞ ꠉꠦꠍꠦ ꠔꠛꠟꠤꠉ ꠇꠞꠣ ꠅꠞ।
ACT 13:39 ꠀꠙꠘꠣꠞꠣ ꠝꠥꠍꠣꠞ ꠡꠞꠤꠅꠔꠞ ꠃꠍꠤꠟ꠆ꠟꠣꠄ ꠉꠥꠘꠣꠞ ꠡꠣꠎꠣ ꠕꠣꠇꠤ ꠞꠦꠢꠣꠁ ꠙꠣꠁꠍꠂꠘ ꠘꠣ, ꠅꠁꠟꠦ ꠎꠦꠇꠥꠘꠥ ꠎꠘꠦ ꠁꠍꠣꠞ ꠃꠙꠞꠦ ꠁꠝꠣꠘ ꠀꠘꠟꠦ, ꠔꠣꠘ ꠃꠍꠤꠟ꠆ꠟꠣꠄ ꠢꠦ ꠉꠥꠘꠣꠞ ꠡꠣꠎꠣ ꠕꠣꠇꠤ ꠞꠦꠢꠣꠁ ꠙꠣꠄ।
ACT 13:40 ꠄꠞꠟꠣꠉꠤ ꠀꠙꠘꠣꠞꠣꠅ ꠢꠥꠡꠤꠀꠞ ꠅꠃꠇ꠆ꠇꠣ, ꠎꠣꠔꠦ ꠘꠛꠤ ꠅꠇꠟꠞ ꠇꠤꠔꠣꠛꠅ ꠎꠦꠔꠣ ꠛꠄꠀꠘ ꠇꠞꠣ ꠅꠁꠍꠦ, ꠁꠔꠣ ꠎꠣꠘꠥ ꠀꠙꠘꠣꠁꠘ꠆ꠔꠞ ꠃꠙꠞꠦ ꠘꠣ ꠊꠐꠦ:
ACT 13:41 ꠔꠥꠝꠞꠣ ꠎꠦꠞꠣ ꠀꠟ꠆ꠟꠣꠞꠦ ꠟꠁꠀ ꠑꠣꠐ꠆ꠐꠣ ꠇꠞ, ꠔꠥꠝꠞꠣ ꠈꠤꠀꠟ ꠇꠞꠅ, ꠔꠥꠝꠞꠣ ꠌꠝꠇꠣꠁꠀ ꠃꠑꠅ ꠀꠞ ꠛꠤꠘꠣꠡ ꠅꠅ; ꠇꠣꠞꠘ ꠔꠥꠝꠞꠣꠞ ꠀꠝꠟꠅꠃ ꠀꠝꠤ ꠅꠃꠟꠣ ꠄꠇ ꠇꠣꠝ ꠇꠞꠝꠥ, ꠎꠦ ꠇꠣꠝꠞ ꠇꠕꠣ ꠇꠦꠃ ꠔꠥꠝꠞꠣꠞ ꠉꠦꠍꠦ ꠇꠁꠟꠦꠅ, ꠔꠥꠝꠞꠣ ꠇꠥꠘꠥꠝꠘ꠆ꠔꠦꠃ ꠛꠤꠡ꠆ꠛꠣꠡ ꠇꠞꠔꠣꠄ ꠘꠣꠄ।”
ACT 13:42 ꠙꠣꠃꠟꠥꠍ ꠀꠞ ꠛꠣꠞ꠆ꠘꠣꠛꠣꠍ ꠝꠍꠤꠖ ꠕꠣꠇꠤ ꠎꠣꠅꠀꠞ ꠛꠣꠟꠣ ꠝꠣꠘꠡꠦ ꠔꠣꠞꠣꠞꠦ ꠝꠤꠘꠔ ꠇꠞꠤ ꠇꠁꠟꠣ, ꠛꠣꠖꠞ ꠎꠥꠝ꠆ꠝꠣꠛꠣꠞꠦꠅ ꠔꠣꠞꠣ ꠁ ꠛꠦꠙꠣꠞꠦ ꠀꠞꠅ ꠛꠄꠀꠘ ꠇꠞꠣꠞ ꠟꠣꠉꠤ।
ACT 13:43 ꠝꠍꠤꠖ ꠕꠣꠇꠤ ꠝꠣꠘꠥꠡ ꠅꠇꠟ ꠛꠣꠞ ꠅꠁꠀ ꠎꠣꠅꠀꠞ ꠛꠣꠖꠦ, ꠛꠃꠔ ꠁꠢꠥꠖꠤ ꠀꠞ ꠁꠢꠥꠖꠤ ꠗꠞ꠆ꠝ ꠝꠣꠘꠞꠣ ꠙꠞꠦꠎꠉꠣꠞ ꠅꠇꠟꠦ ꠙꠣꠃꠟꠥꠍ ꠀꠞ ꠛꠣꠞ꠆ꠘꠣꠛꠣꠍꠞ ꠈꠞꠦ ꠈꠞꠦ ꠉꠦꠟꠣ। ꠄꠞꠣ ꠙꠣꠃꠟꠥꠍ ꠀꠞ ꠛꠣꠞ꠆ꠘꠣꠛꠣꠍꠞ ꠟꠉꠦ ꠛꠣꠔꠌꠤꠔ ꠇꠞꠟꠣ, ꠔꠣꠞꠣ ꠄꠞꠣꠞꠦ ꠃꠔꠡꠣꠢ ꠖꠤꠟꠣ, ꠄꠞꠣ ꠀꠟ꠆ꠟꠣꠞ ꠞꠢꠝꠔꠞ ꠃꠙꠞꠦ ꠇꠣꠁꠝ ꠞꠁꠔꠣ ꠇꠞꠤ।
ACT 13:44 ꠛꠣꠖꠞ ꠎꠥꠝ꠆ꠝꠣꠛꠣꠞꠦ ꠐꠣꠃꠘꠞ ꠝꠣꠘꠥꠡ ꠖꠟꠦ ꠖꠟꠦ ꠀꠟ꠆ꠟꠣꠞ ꠇꠣꠟꠣꠝ ꠢꠥꠘꠣꠞ ꠟꠣꠉꠤ ꠀꠁꠟꠣ।
ACT 13:45 ꠅꠁꠟꠦ ꠅꠔ ꠝꠣꠘꠡꠞ ꠜꠤꠠ ꠖꠦꠈꠤꠀ ꠁꠢꠥꠖꠤ ꠅꠇꠟꠦ ꠁꠋꠡꠣꠄ ꠜꠞꠤ ꠉꠦꠟꠣ, ꠀꠞ ꠙꠣꠃꠟꠥꠍꠦ ꠎꠦꠔꠣ ꠛꠄꠀꠘ ꠇꠞꠟꠣ ꠔꠣꠞꠣ ꠄꠞ ꠘꠤꠘ꠆ꠖꠣ ꠉꠣꠁꠀ ꠔꠣꠘ ꠛꠤꠞꠥꠗꠤꠔꠣ ꠇꠞꠟꠣ।
ACT 13:46 ꠔꠦꠃ ꠙꠣꠃꠟꠥꠍ ꠀꠞ ꠛꠣꠞ꠆ꠘꠣꠛꠣꠍꠦ ꠡꠣꠅꠡ ꠇꠞꠤꠀ ꠎꠥꠀꠙ ꠖꠤꠟꠣ, “ꠀꠟ꠆ꠟꠣꠞ ꠇꠣꠟꠣꠝ ꠙꠄꠟꠣ ꠀꠙꠘꠣꠁꠘ꠆ꠔꠞ ꠉꠦꠍꠦ ꠔꠛꠟꠤꠉ ꠇꠞꠣ ꠖꠞꠇꠣꠞ ꠀꠍꠤꠟ; ꠅꠁꠟꠦ ꠀꠙꠘꠣꠞꠣ ꠎꠦꠛꠟꠣ ꠁꠔꠣ ꠑꠦꠟꠤꠀ ꠢꠞꠣꠁ ꠖꠤꠞꠣ, ꠀꠞ ꠀꠈꠦꠞꠤ ꠎꠤꠘ꠆ꠖꠦꠉꠤ ꠇꠣꠝꠣꠁ ꠇꠞꠣ ꠖꠞꠇꠣꠞ ꠝꠘꠅ ꠇꠞꠞꠣ ꠘꠣ, ꠔꠦ ꠀꠝꠞꠣꠅ ꠅ-ꠁꠢꠥꠖꠤ ꠅꠇꠟꠞ ꠛꠣꠄ ꠘꠎꠞ ꠚꠤꠞꠣꠁꠟ꠆ꠟꠣꠝ।
ACT 13:47 ꠇꠣꠞꠘ ꠝꠣꠛꠥꠖꠦ ꠀꠝꠞꠣꠞꠦ ꠅꠃꠟꠣ ꠢꠥꠇꠥꠝ ꠇꠞꠍꠂꠘ, ꠀꠝꠤ ꠔꠥꠝꠣꠞꠦ ꠅ-ꠁꠢꠥꠖꠤ ꠅꠇꠟꠞ ꠉꠦꠍꠦ ꠘꠥꠞ ꠢꠤꠡꠣꠛꠦ ꠛꠦꠎꠤꠍꠤ, ꠎꠣꠔꠦ ꠔꠥꠝꠤ ꠖꠥꠘꠤꠀꠞ ꠢꠦꠡ ꠡꠤꠝꠣꠘꠣ ꠙꠞ꠆ꠎꠘ꠆ꠔ ꠘꠣꠎꠣꠔꠞ ꠃꠍꠤꠟ꠆ꠟꠣ ꠅꠅ।”
ACT 13:48 ꠅ-ꠁꠢꠥꠖꠤ ꠅꠇꠟꠦ ꠁꠔꠣ ꠢꠥꠘꠤꠀ ꠈꠥꠡꠤ ꠅꠁꠟꠣ ꠀꠞ ꠝꠣꠟꠤꠇꠞ ꠇꠣꠟꠣꠝꠞ ꠔꠣꠞꠤꠚ ꠇꠞꠟꠣ; ꠀꠞ ꠎꠔ ꠝꠣꠘꠡꠞꠦ ꠀꠟ꠆ꠟꠣꠄ ꠀꠈꠦꠞꠤ ꠎꠤꠘ꠆ꠖꠦꠉꠤ ꠢꠣꠍꠤꠟꠞ ꠟꠣꠉꠤ ꠙꠍꠘ꠆ꠖ ꠇꠞꠤ ꠞꠣꠈꠍꠤꠟꠣ, ꠔꠣꠞꠣ ꠁꠝꠣꠘ ꠀꠘꠟꠣ।
ACT 13:49 ꠝꠣꠟꠤꠇꠞ ꠇꠣꠟꠣꠝ ꠢꠤ ꠖꠦꠡꠞ ꠢꠇꠟ ꠎꠣꠉꠣꠔ ꠙꠃꠍꠤ ꠉꠦꠟ।
ACT 13:50 ꠅꠁꠟꠦ ꠁꠢꠥꠖꠤ ꠅꠇꠟꠦ ꠔꠣꠞꠣꠞ ꠙꠞꠦꠎꠉꠣꠞ ꠈꠣꠘ꠆ꠖꠣꠘꠤ ꠛꠦꠐꠤꠘ꠆ꠔꠞꠦ ꠀꠞ ꠐꠣꠃꠘꠞ ꠛꠠ ꠛꠠ ꠝꠥꠞꠛ꠆ꠛꠤ ꠅꠇꠟꠞꠦ ꠃꠍꠇꠣꠁꠀ ꠖꠤꠟ ꠔꠣꠞꠣ ꠙꠣꠃꠟꠥꠍ ꠀꠞ ꠛꠣꠞ꠆ꠘꠣꠛꠣꠍꠞ ꠃꠙꠞꠦ ꠎꠥꠟꠥꠝ ꠇꠞꠣꠁꠀ, ꠔꠣꠞꠣꠞ ꠡꠤꠝꠣꠘꠣ ꠕꠣꠇꠤ ꠈꠦꠖꠣꠁꠀ ꠛꠣꠞ ꠇꠞꠤ ꠖꠤꠟ।
ACT 13:51 ꠔꠦꠃ ꠙꠣꠃꠟꠥꠍ ꠀꠞ ꠛꠣꠞ꠆ꠘꠣꠛꠣꠍꠦ ꠢꠤ ꠝꠣꠘꠡꠞ ꠛꠤꠞꠥꠖ꠆ꠖꠦ ꠔꠣꠞꠣꠞ ꠙꠣꠅꠞ ꠗꠥꠁꠟ ꠏꠣꠠꠤꠀ ꠚꠣꠟꠣꠁꠀ ꠁꠇꠘꠤꠅ ꠐꠣꠃꠘꠅ ꠉꠦꠟꠣꠉꠤ।
ACT 13:52 ꠀꠞ ꠢꠤꠘꠞ ꠃꠝ꠆ꠝꠔ ꠅꠇꠟ ꠈꠥꠡꠤꠄ ꠀꠞ ꠙꠣꠇ ꠞꠥꠢꠦ ꠙꠥꠞꠣꠙꠥꠞ ꠇꠣꠝꠤꠟ ꠅꠁꠟꠣ।
ACT 14:1 ꠁꠇꠘꠤꠅ ꠐꠣꠃꠘꠅ ꠀꠁꠀꠅ ꠅꠃ ꠟꠣꠈꠣꠘ ꠙꠣꠃꠟꠥꠍ ꠀꠞ ꠛꠣꠞ꠆ꠘꠣꠛꠣꠍ ꠁꠢꠥꠖꠤꠞ ꠝꠍꠤꠖꠅ ꠉꠤꠀ ꠢꠣꠝꠣꠁꠟꠣ, ꠢꠣꠝꠣꠁꠀ ꠔꠣꠞꠣ ꠅꠝꠘ ꠟꠣꠈꠣꠘ ꠔꠛꠟꠤꠉ ꠇꠞꠟꠣ, ꠁꠔꠣ ꠢꠥꠘꠤꠀ ꠛꠃꠔ ꠁꠢꠥꠖꠤ ꠀꠞ ꠅ-ꠁꠢꠥꠖꠤ ꠅꠇꠟꠦ ꠁꠝꠣꠘ ꠀꠘꠟꠣ।
ACT 14:2 ꠅꠁꠟꠦ ꠎꠦꠔꠣ ꠁꠢꠥꠖꠤꠄ ꠁꠝꠣꠘ ꠀꠘꠟꠣ ꠘꠣ, ꠔꠣꠞꠣ ꠅ-ꠁꠢꠥꠖꠤ ꠅꠇꠟꠞꠦ ꠃꠍꠇꠣꠁ ꠖꠤꠀ, ꠝꠥꠝꠤꠘ ꠅꠇꠟꠞ ꠛꠣꠄ ꠛꠤꠉꠠꠣꠁꠟꠣ।
ACT 14:3 ꠙꠣꠃꠟꠥꠍ ꠀꠞ ꠛꠣꠞ꠆ꠘꠣꠛꠣꠍ ꠢꠤ ꠐꠣꠃꠘꠅ ꠛꠃꠔ ꠖꠤꠘ ꠞꠁꠟꠣ, ꠔꠣꠞꠣ ꠡꠣꠅꠡ ꠇꠞꠤꠀ ꠝꠣꠟꠤꠇꠞ ꠛꠦꠙꠣꠞꠦ ꠔꠛꠟꠤꠉ ꠇꠞꠟꠣ। ꠀꠞ ꠝꠣꠟꠤꠇꠦꠅ ꠔꠣꠘ ꠞꠢꠝꠔꠞ ꠇꠣꠟꠣꠝꠞ ꠙꠇ꠆ꠇꠦ ꠙꠣꠃꠟꠥꠍ ꠀꠞ ꠛꠣꠞ꠆ꠘꠣꠛꠣꠍꠞ ꠝꠣꠎꠖꠤ, ꠛꠃꠔ ꠝꠥꠎꠦꠎꠣ ꠀꠞ ꠇꠦꠞꠣꠝꠔꠤ ꠅꠇꠟ ꠎꠣꠁꠞ ꠇꠞꠣꠁꠟꠣ।
ACT 14:4 ꠛꠣꠖꠦ ꠀꠡ꠆ꠔꠣ ꠐꠣꠃꠘꠞ ꠝꠣꠘꠥꠡ ꠖꠥꠁ ꠖꠟ ꠅꠁꠉꠦꠟ, ꠄꠇ ꠖꠟ ꠁꠢꠥꠖꠤ ꠅꠇꠟꠞ ꠙꠇ꠆ꠇꠦ, ꠀꠞꠇ ꠖꠟ ꠍꠣꠢꠣꠛꠤ ꠅꠇꠟꠞ ꠙꠇ꠆ꠇꠦ।
ACT 14:5 ꠅꠁꠟꠦ ꠁꠢꠥꠖꠤ ꠀꠞ ꠅ-ꠁꠢꠥꠖꠤ ꠇꠤꠍꠥ ꠝꠣꠘꠡꠦ ꠔꠣꠞꠣꠞ ꠘꠦꠔꠣ ꠅꠇꠟꠞ ꠟꠉꠦ ꠝꠤꠟꠤꠀ, ꠛꠣꠞ꠆ꠘꠣꠛꠣꠍ ꠀꠞ ꠙꠣꠃꠟꠥꠍꠞꠦ ꠝꠣꠁꠞ-ꠗꠁꠞ ꠀꠞ ꠙꠣꠔ꠆ꠔꠞ ꠝꠣꠞꠣꠞ ꠚꠘ꠆ꠖꠤ ꠇꠞꠟꠣ।
ACT 14:6 ꠙꠣꠃꠟꠥꠍ ꠀꠞ ꠛꠣꠞ꠆ꠘꠣꠛꠣꠍꠦ ꠁꠔꠣ ꠐꠦꠞ ꠙꠣꠁꠀ ꠟꠥꠇꠣꠄꠘꠤꠀ ꠖꠦꠡꠞ ꠟꠥꠡ꠆ꠞꠣ ꠀꠞ ꠖꠞ꠆ꠛꠤ ꠡꠢꠞꠅ, ꠀꠞ ꠄꠞ ꠇꠣꠘ꠆ꠖꠣ-ꠇꠣꠍꠣꠔ ꠜꠣꠉꠤꠀ ꠞꠁꠟꠣ;
ACT 14:7 ꠔꠣꠞꠣ ꠢꠘꠅ ꠁꠘ꠆ꠎꠤꠟꠞ ꠈꠥꠡ-ꠈꠛꠞꠤ ꠔꠛꠟꠤꠉ ꠇꠞꠟꠣ।
ACT 14:8 ꠟꠥꠡ꠆ꠞꠣ ꠐꠣꠃꠘꠅ ꠄꠇꠎꠘ ꠝꠣꠘꠥꠡ ꠛꠅꠀꠔ ꠕꠣꠇꠔ, ꠔꠣꠞ ꠙꠣꠅꠔ ꠇꠥꠘꠥ ꠛꠟ ꠀꠍꠤꠟ ꠘꠣ, ꠢꠦ ꠝꠣʼꠞ ꠙꠦꠐ ꠕꠣꠇꠤꠃ ꠟꠦꠋꠠꠣ, ꠇꠥꠘꠥꠖꠤꠘꠅ ꠀꠐꠔ ꠙꠣꠞꠍꠦ ꠘꠣ।
ACT 14:9 ꠢꠦ ꠙꠣꠃꠟꠥꠍꠞ ꠛꠄꠀꠘ ꠢꠥꠘꠣꠔ ꠀꠍꠤꠟ; ꠙꠣꠃꠟꠥꠍꠦ ꠔꠣꠞ ꠛꠣꠄ ꠗꠤꠀꠘ ꠇꠞꠤ ꠌꠣꠁꠟꠣ, ꠀꠞ ꠜꠣꠟꠣ ꠅꠀꠞ ꠟꠣꠉꠤ ꠔꠣꠞ ꠁꠝꠣꠘ ꠀꠍꠦ ꠛꠥꠎꠤꠀ,
ACT 14:10 ꠔꠣꠞꠦ ꠎꠥꠞꠦ ꠒꠣꠇꠖꠤ ꠇꠁꠟꠣ, “ꠔꠥꠝꠣꠞ ꠙꠣꠅꠔ ꠜꠞꠖꠤ ꠡꠤꠗꠣ ꠅꠁꠀ ꠃꠛꠣꠅ!” ꠔꠦꠃ ꠟꠉꠦ ꠟꠉꠦꠃ ꠝꠣꠘꠥꠡꠉꠥ ꠚꠣꠟꠖꠤ ꠃꠑꠤꠀ ꠀꠐꠔ ꠟꠣꠉꠟ।
ACT 14:11 ꠙꠣꠃꠟꠥꠍꠞ ꠁ ꠇꠦꠞꠣꠝꠔꠤ ꠖꠦꠈꠤꠀ ꠝꠣꠘꠡꠦ ꠟꠥꠇꠣꠄꠘꠤꠀ ꠜꠣꠡꠣꠄ ꠌꠤꠟ꠆ꠟꠣꠁꠀ ꠇꠁꠟ, “ꠖꠦꠛꠔꠣ ꠅꠇꠟꠦ ꠝꠣꠘꠡꠞ ꠍꠥꠞꠔ ꠗꠞꠤꠀ ꠀꠝꠞꠣꠞ ꠉꠦꠍꠦ ꠟꠣꠝꠤꠀ ꠀꠁꠍꠂꠘ!”
ACT 14:12 ꠀꠞ ꠝꠣꠘꠡꠦ ꠛꠣꠞ꠆ꠘꠣꠛꠣꠍꠞ ꠘꠣꠝ ꠖꠤꠟ ‘ꠎꠤꠃꠍ ꠖꠦꠛ’ ꠀꠞ ꠙꠣꠃꠟꠥꠍ ꠛꠠ ꠛꠄꠀꠘ ꠇꠞꠞꠣ ꠉꠔꠤꠇꠦ, ꠔꠣꠘ ꠘꠣꠝ ꠖꠤꠟ ‘ꠢꠣꠞ꠆ꠝꠤꠍ ꠖꠦꠛ’।
ACT 14:13 ꠡꠢꠞꠞ ꠛꠣꠁꠞꠣ ꠝꠥꠟ ꠉꠦꠁꠐꠞ ꠇꠣꠘ꠆ꠖꠣꠔ ꠎꠤꠃꠍ ꠖꠦꠛꠔꠣꠞ ꠝꠘ꠆ꠖꠤꠞꠞ ꠛꠣꠛꠘ ꠑꠣꠇꠥꠞꠦ ꠛꠤꠍꠣꠟ ꠀꠞ ꠝꠣꠟꠣ ꠟꠁꠀ ꠀꠁꠟ, ꠇꠣꠞꠘ ꠢꠤ ꠑꠣꠇꠥꠞꠦ ꠀꠞ ꠢꠇ꠆ꠇꠟ ꠝꠣꠘꠡꠦ ꠙꠣꠃꠟꠥꠍ ꠀꠞ ꠛꠣꠞ꠆ꠘꠣꠛꠣꠍꠞ ꠘꠤꠅꠔꠦ ꠙꠡꠥ ꠛꠟꠤ ꠖꠤꠔ ꠌꠣꠁꠟ।
ACT 14:14 ꠅꠁꠟꠦ ꠍꠣꠢꠣꠛꠤ ꠛꠣꠞ꠆ꠘꠣꠛꠣꠍ ꠀꠞ ꠙꠣꠃꠟꠥꠍꠦ ꠁꠔꠣ ꠢꠥꠘꠤꠀ ꠛꠦꠇꠞꠣꠞ ꠛꠘꠤꠀ ꠎꠣꠞꠎꠤꠞ ꠚꠤꠘ꠆ꠘꠞ ꠇꠣꠙꠠ ꠍꠤꠠꠤꠀ ꠖꠃꠠꠤꠀ ꠝꠣꠘꠡꠞ ꠉꠦꠍꠦ ꠉꠦꠟꠣ, ꠀꠞ ꠎꠥꠞꠦ ꠌꠤꠟ꠆ꠟꠣꠁꠀ ꠇꠁꠟꠣ,
ACT 14:15 “ꠅ ꠍꠣꠛ ꠅꠇꠟ, ꠀꠙꠘꠣꠞꠣ ꠇꠦꠘꠦ ꠁꠔꠣ ꠇꠞꠞꠣ? ꠀꠝꠞꠣ ꠔ ꠈꠣꠟꠤ ꠀꠙꠘꠣꠁꠘ꠆ꠔꠞ ꠟꠣꠈꠣꠘꠃ ꠖꠥꠈꠤ-ꠡꠥꠈꠤ ꠝꠣꠘꠥꠡ, ꠀꠝꠞꠣ ꠀꠙꠘꠣꠁꠘ꠆ꠔꠞ ꠉꠦꠍꠦ ꠅꠃ ꠈꠥꠡ-ꠈꠛꠞꠤ ꠔꠛꠟꠤꠉ ꠇꠞꠞꠣꠝ, ꠎꠣꠔꠦ ꠁ ꠅꠡꠣꠞ ꠢꠇꠟꠔꠣ ꠛꠣꠖ ꠖꠤꠀ ꠎꠤꠘ꠆ꠖꠣ ꠀꠟ꠆ꠟꠣꠞ ꠛꠣꠄ ꠚꠤꠞꠂꠘ, ꠎꠦꠁꠘ ꠀꠍꠝꠣꠘ-ꠎꠝꠤꠘ, ꠖꠞꠤꠀ ꠀꠞ ꠄꠞꠝꠣꠎꠦ ꠎꠔꠔꠣ ꠀꠍꠦ ꠢꠇ꠆ꠇꠟꠔꠣ ꠙꠄꠖꠣ ꠇꠞꠍꠂꠘ।
ACT 14:16 ꠀꠉꠞ ꠀꠝꠟꠞ ꠢꠇꠟ ꠎꠣꠔꠤꠞꠦ ꠔꠣꠁꠘ ꠎꠣꠞꠎꠤꠞ ꠁꠌ꠆ꠍꠣꠝꠔ ꠙꠕꠦ ꠌꠟꠔꠦ ꠖꠤꠍꠂꠘ;
ACT 14:17 ꠔꠣ-ꠅ ꠔꠣꠁꠘ ꠢꠣꠝꠦꠡꠣ ꠘꠤꠎꠞꠦ ꠎꠣꠁꠞ ꠇꠞꠍꠂꠘ, ꠔꠣꠁꠘ ꠀꠍꠝꠣꠘ ꠕꠣꠇꠤ ꠝꠦꠊ ꠖꠤꠀ, ꠡꠝꠄ ꠝꠔ ꠚꠡꠟ ꠖꠣꠘ ꠇꠞꠤꠀ ꠔꠣꠘ ꠝꠦꠢꠦꠞꠛꠣꠘꠤ ꠖꠦꠈꠣꠁꠍꠂꠘ, ꠀꠙꠘꠣꠁꠘ꠆ꠔꠞ ꠙꠦꠐ ꠜꠞꠣ ꠈꠣꠘꠤ ꠀꠞ ꠖꠤꠟꠞ ꠀꠞꠣꠝ ꠎꠥꠉꠣꠁꠍꠂꠘ।”
ACT 14:18 ꠁ ꠝꠣꠔ ꠅꠇꠟ ꠝꠣꠔꠣꠞ ꠛꠣꠖꠦꠅ ꠛꠃꠔ ꠇꠡ꠆ꠐ ꠇꠞꠤꠀ ꠄꠞꠣꠞ ꠙꠡꠥ ꠛꠟꠤ ꠖꠦꠅꠀ ꠛꠘ꠆ꠖ ꠇꠞꠣꠁꠟꠣ।
ACT 14:19 ꠛꠣꠖꠦ ꠀꠘ꠆ꠔꠤꠅꠈꠤꠀ ꠀꠞ ꠁꠇꠘꠤꠅ ꠕꠣꠇꠤ ꠇꠄꠎꠘ ꠁꠢꠥꠖꠤ ꠀꠁꠀ, ꠙꠣꠃꠟꠥꠍꠞ ꠛꠤꠞꠥꠖ꠆ꠖꠦ ꠝꠣꠘꠡꠞꠦ ꠃꠍꠇꠣꠁꠀ ꠖꠤꠀ ꠔꠣꠘꠞꠦ ꠙꠣꠔ꠆ꠔꠞ ꠝꠣꠞꠟ, ꠀꠞ ꠔꠣꠁꠘ ꠝꠞꠤꠉꠦꠍꠂꠘ ꠝꠘꠦ ꠇꠞꠤꠀ, ꠐꠣꠃꠘꠞ ꠛꠣꠞꠦ ꠍꠦꠌꠠꠣꠁꠀ ꠟꠁꠀ ꠉꠦꠟ।
ACT 14:20 ꠅꠁꠟꠦ ꠝꠥꠝꠤꠘ ꠅꠇꠟ ꠔꠣꠘ ꠌꠣꠁꠞꠅꠛꠣꠄ ꠄꠇꠟꠉꠦ ꠖꠟꠣ ꠅꠀꠞ ꠛꠣꠖꠦ, ꠔꠣꠁꠘ ꠃꠑꠤꠀ ꠐꠣꠃꠘꠅ ꠚꠤꠞꠤꠀ ꠉꠦꠟꠣ। ꠛꠣꠖꠞ ꠖꠤꠘ ꠔꠣꠁꠘ ꠛꠣꠞ꠆ꠘꠣꠛꠣꠍꠞ ꠟꠉꠦ ꠅꠁꠀ ꠖꠞ꠆ꠛꠤ ꠡꠢꠞꠅ ꠉꠦꠟꠣꠉꠤ।
ACT 14:21 ꠖꠞ꠆ꠛꠤꠔ ꠉꠤꠀ ꠢꠣꠞꠟꠦ ꠢꠘꠅ ꠈꠥꠡ-ꠈꠛꠞꠤ ꠔꠛꠟꠤꠉ ꠇꠞꠤꠀ ꠙꠣꠃꠟꠥꠍ ꠀꠞ ꠛꠣꠞ꠆ꠘꠣꠛꠣꠍꠦ ꠛꠃꠔ ꠝꠣꠘꠡꠞꠦ ꠁꠝꠣꠘꠖꠣꠞ ꠛꠣꠘꠣꠁꠟꠣ, ꠛꠣꠖꠦ ꠔꠣꠞꠣ ꠟꠥꠡ꠆ꠞꠣ, ꠁꠇꠘꠤꠅ ꠀꠞ ꠀꠘ꠆ꠔꠤꠅꠈꠤꠀꠔ ꠚꠤꠞꠔ ꠉꠦꠟꠣ;
ACT 14:22 ꠢꠘꠅ ꠉꠤꠀ ꠔꠣꠞꠣ ꠝꠥꠝꠤꠘ ꠅꠇꠟꠞ ꠁꠝꠣꠘꠤ ꠛꠟ ꠛꠣꠠꠣꠁꠀ ꠔꠣꠞꠣꠞꠦ ꠁꠝꠣꠘꠦ ꠝꠎꠛꠥꠔ ꠞꠅꠀꠞ ꠟꠣꠉꠤ ꠔꠣꠉꠤꠖ ꠖꠤꠟꠣ, ꠔꠣꠞꠣ ꠇꠁꠟꠣ, ꠛꠃꠔ ꠖꠥꠈ-ꠔꠇꠟꠤꠚꠞ ꠙꠕ ꠙꠣꠞ ꠅꠁꠀ ꠀꠝꠞꠣ ꠀꠟ꠆ꠟꠣꠞ ꠛꠣꠖꠡꠣꠁꠔ ꠢꠣꠝꠣꠘꠤ ꠟꠣꠉꠛ।
ACT 14:23 ꠔꠣꠞꠣ ꠎꠝꠣꠔꠞꠦ ꠌꠣꠟꠣꠘꠤꠞ ꠟꠣꠉꠤ ꠙꠞꠔꠦꠇ ꠎꠝꠣꠔꠞ ꠝꠥꠞꠛ꠆ꠛꠤ-ꠇꠝꠤꠐꠤ ꠛꠣꠘꠣꠁꠟꠣ। ꠀꠞ ꠎꠦ ꠝꠣꠟꠤꠇꠞ ꠃꠙꠞꠦ ꠔꠣꠞꠣ ꠁꠝꠣꠘ ꠀꠘꠍꠂꠘ, ꠄꠘ ꠘꠣꠝꠦ ꠞꠥꠎꠣ ꠞꠣꠈꠤꠀ ꠖꠥꠀ ꠇꠞꠤꠀ ꠅꠃ ꠁꠍꠣꠞ ꠀꠔꠅ ꠄꠞꠣꠞꠦ ꠡꠙꠤꠀ ꠖꠤꠟꠣ।
ACT 14:24 ꠛꠣꠖꠦ ꠙꠣꠃꠟꠥꠍ ꠀꠞ ꠛꠣꠞ꠆ꠘꠣꠛꠣꠍꠦ ꠙꠤꠡꠤꠖꠤꠀ ꠖꠦꠡꠞ ꠜꠤꠔꠞꠦꠖꠤ ꠙꠣꠝꠚꠥꠟꠤꠀ ꠖꠦꠡꠅ ꠉꠦꠟꠣ।
ACT 14:25 ꠔꠣꠞꠣ ꠙꠞ꠆ꠉꠣ ꠡꠢꠞꠅ ꠀꠟ꠆ꠟꠣꠞ ꠇꠣꠟꠣꠝ ꠔꠛꠟꠤꠉ ꠇꠞꠤꠀ ꠀꠘ꠆ꠔꠥꠟꠤꠀ ꠎꠣꠎ ꠊꠣꠐꠅ ꠉꠦꠟꠣ;
ACT 14:26 ꠀꠘ꠆ꠔꠥꠟꠤꠀ ꠕꠣꠇꠤ ꠎꠣꠎꠅ ꠃꠑꠤꠀ ꠀꠘ꠆ꠔꠤꠅꠈꠤꠀꠔ ꠚꠤꠞꠔ ꠀꠁꠟꠣ। ꠔꠣꠞꠣ ꠁ ꠍꠚꠞꠅ ꠎꠦꠔꠣ ꠇꠣꠝ ꠅꠇꠟ ꠁꠘ꠆ꠎꠣꠝ ꠇꠞꠍꠤꠟꠣ, ꠁ ꠇꠣꠝꠞ ꠟꠣꠉꠤ ꠔꠣꠞꠣꠞꠦ ꠅꠃ ꠀꠘ꠆ꠔꠤꠅꠈꠤꠀ ꠕꠣꠇꠤꠃ ꠀꠟ꠆ꠟꠣꠞ ꠞꠢꠝꠔꠞ ꠢꠦꠚꠣꠎꠔꠅ ꠡꠙꠤ ꠖꠦꠅꠀ ꠅꠁꠍꠤꠟ।
ACT 14:27 ꠀꠘ꠆ꠔꠤꠅꠈꠤꠀꠔ ꠙꠃꠍꠤꠀ ꠎꠝꠣꠔꠞ ꠢꠇꠟꠞꠦ ꠄꠇꠈꠣꠘꠅ ꠖꠟꠣ ꠇꠞꠟꠣ, ꠀꠞ ꠀꠟ꠆ꠟꠣꠄ ꠔꠣꠞꠣꠞ ꠁ ꠐꠣꠃꠘꠅ ꠔꠣꠞꠣꠞ ꠟꠉꠦ ꠞꠁꠀ ꠎꠦꠔꠣ ꠎꠦꠔꠣ ꠇꠣꠝ ꠅꠇꠟ ꠇꠞꠍꠂꠘ, ꠀꠞ ꠔꠣꠁꠘ ꠇꠤꠟꠣ ꠅ-ꠁꠢꠥꠖꠤ ꠅꠇꠟꠞ ꠝꠣꠎꠦ ꠁꠝꠣꠘ ꠀꠘꠣꠞ ꠖꠥꠀꠞ ꠈꠥꠟꠤꠀ ꠖꠤꠍꠂꠘ, ꠁ ꠢꠇ꠆ꠇꠟꠔꠣ ꠎꠣꠘꠣꠁꠟꠣ।
ACT 14:28 ꠢꠦꠡꠦ ꠔꠣꠞꠣ ꠝꠥꠝꠤꠘ ꠅꠇꠟꠞ ꠟꠉꠦ ꠢꠤꠈꠣꠘꠅ ꠛꠃꠔ ꠖꠤꠘ ꠞꠁꠟꠣ।
ACT 15:1 ꠄꠢꠥꠖꠤꠀ ꠕꠣꠇꠤ ꠇꠄꠎꠘ ꠝꠣꠘꠥꠡ ꠀꠘ꠆ꠔꠤꠅꠈꠤꠀꠔ ꠀꠁꠟꠣ ꠀꠞ ꠁꠝꠣꠘꠖꠣꠞ ꠅꠇꠟꠞꠦ ꠅꠃ ꠔꠣꠟꠤꠝ ꠢꠤꠇꠣꠘꠤꠔ ꠟꠣꠉꠟꠣ, “ꠝꠥꠍꠣꠞ ꠡꠞꠤꠅꠔ ꠝꠣꠚꠤꠇ ꠔꠥꠝꠞꠣꠞ ꠝꠍꠟꠝꠣꠘꠤ ꠇꠞꠣꠁꠟ ꠘꠣ ꠅꠁꠟꠦ, ꠇꠥꠘꠥꠝꠘ꠆ꠔꠦꠃ ꠉꠥꠘꠣ ꠕꠣꠇꠤ ꠘꠣꠎꠣꠔ ꠙꠣꠁꠔꠣꠄ ꠘꠣꠄ।”
ACT 15:2 ꠁꠔꠣ ꠟꠁꠀ ꠢꠎꠞꠔ ꠙꠣꠃꠟꠥꠍ ꠀꠞ ꠛꠣꠞ꠆ꠘꠣꠛꠣꠍꠞ ꠟꠉꠦ ꠅꠃ ꠝꠣꠘꠥꠡ ꠅꠇꠟꠞ ꠈꠥꠛ ꠇꠕꠣ ꠇꠣꠐꠣꠇꠣꠐꠤ ꠅꠁꠟ। ꠛꠣꠖꠦ ꠑꠤꠇ ꠅꠁꠟ, ꠙꠣꠃꠟꠥꠍ ꠀꠞ ꠛꠣꠞ꠆ꠘꠣꠛꠣꠍ ꠀꠘ꠆ꠔꠤꠅꠈꠤꠀꠞ ꠇꠄꠎꠘ ꠁꠝꠣꠘꠖꠣꠞꠞꠦ ꠟꠉꠦ ꠟꠁꠀ ꠎꠦꠞꠥꠎꠣꠟꠦꠝꠅ ꠎꠣꠁꠛꠣ, ꠉꠤꠀ ꠔꠣꠞꠣ ꠍꠣꠢꠣꠛꠤ ꠀꠞ ꠎꠝꠣꠔꠞ ꠝꠥꠞꠛ꠆ꠛꠤ ꠅꠇꠟꠞ ꠟꠉꠦ ꠁ ꠛꠤꠡꠄꠄ ꠛꠣꠔꠌꠤꠔ ꠇꠞꠛꠣ।
ACT 15:3 ꠀꠘ꠆ꠔꠤꠅꠈꠤꠀꠞ ꠎꠝꠣꠔꠦ ꠔꠣꠞꠣꠞ ꠎꠣꠅꠀꠞ ꠛꠘ꠆ꠖꠛꠡ꠆ꠔ ꠇꠞꠤ ꠖꠤꠟꠣ, ꠚꠂꠘꠤꠇꠤꠀ ꠀꠞ ꠡꠝꠞꠤꠀ ꠄꠟꠣꠇꠣꠞ ꠜꠤꠔꠞꠦꠖꠤ ꠎꠣꠁꠔꠦ ꠎꠣꠁꠔꠦ ꠙꠣꠃꠟꠥꠍ ꠀꠞ ꠛꠣꠞ꠆ꠘꠣꠛꠣꠍꠦ ꠝꠣꠘꠡꠞꠦ ꠎꠣꠘꠣꠁꠟꠣ ꠅ-ꠁꠢꠥꠖꠤ ꠅꠇꠟ ꠇꠤꠟꠣ ꠀꠟ꠆ꠟꠣꠞ ꠛꠣꠄ ꠚꠤꠞꠦꠞ, ꠁꠔꠣ ꠢꠥꠘꠤꠀ ꠔꠣꠞꠣ ꠈꠥꠛ ꠈꠥꠡꠤ ꠅꠁꠟꠣ।
ACT 15:4 ꠙꠣꠃꠟꠥꠍ ꠀꠞ ꠛꠣꠞ꠆ꠘꠣꠛꠣꠍ ꠎꠦꠞꠥꠎꠣꠟꠦꠝꠅ ꠀꠁꠀ ꠙꠃꠍꠣꠞ ꠛꠣꠖꠦ ꠎꠝꠣꠔꠞ ꠝꠣꠘꠡꠦ, ꠍꠣꠢꠣꠛꠤ ꠀꠞ ꠝꠥꠞꠛ꠆ꠛꠤ ꠅꠇꠟꠦꠅ ꠔꠣꠞꠣꠞꠦ ꠝꠣꠄꠀꠞ ꠘꠎꠞꠦ ꠇꠛꠥꠟ ꠇꠞꠟꠣ। ꠀꠞ ꠔꠣꠞꠣꠞ ꠃꠍꠤꠟ꠆ꠟꠣꠄ ꠀꠟ꠆ꠟꠣꠄ ꠎꠦꠔꠣ ꠇꠣꠝ ꠇꠞꠍꠂꠘ, ꠁꠔꠣ ꠢꠇꠟꠞ ꠉꠦꠍꠦ ꠎꠣꠘꠣꠁꠟꠣ।
ACT 15:5 ꠅꠃ ꠡꠝꠄ ꠚꠞꠤꠡꠤ ꠖꠟꠞ ꠇꠄꠎꠘ ꠁꠝꠣꠘꠖꠣꠞꠦ ꠃꠛꠣꠁꠀ ꠇꠁꠟꠣ, “ꠅ-ꠁꠢꠥꠖꠤ ꠅꠇꠟꠞ ꠝꠍꠟꠝꠣꠘꠤ ꠇꠞꠣꠘꠤ ꠎꠞꠥꠞ, ꠀꠞ ꠔꠣꠞꠣ ꠎꠣꠘꠥ ꠢꠎꠞꠔ ꠝꠥꠍꠣꠞ ꠡꠞꠤꠅꠔꠅ ꠀꠝꠟ ꠇꠞꠦ, ꠄꠞꠟꠣꠉꠤ ꠔꠣꠞꠣꠞꠦ ꠢꠥꠇꠥꠝ ꠖꠦꠅꠀ ꠅꠃꠇ।”
ACT 15:6 ꠔꠦꠃ ꠁ ꠛꠤꠡꠄꠅꠞ ꠚꠄꠍꠣꠟꠣ ꠇꠞꠣꠞ ꠟꠣꠉꠤ ꠍꠣꠢꠣꠛꠤ ꠅꠇꠟ ꠀꠞ ꠎꠝꠣꠔꠞ ꠝꠥꠞꠛ꠆ꠛꠤ ꠅꠇꠟ ꠄꠇ ꠎꠣꠉꠣꠔ ꠖꠟꠣ ꠅꠁꠟꠣ।
ACT 15:7 ꠛꠃꠔ ꠛꠣꠔꠌꠤꠔꠞ ꠛꠣꠖꠦ ꠢꠎꠞꠔ ꠙꠤꠔꠞꠦ ꠃꠛꠣꠁꠀ ꠇꠁꠟꠣ, “ꠜꠣꠁꠀꠁꠘ ꠅꠇꠟ, ꠀꠙꠘꠣꠞꠣ ꠔ ꠎꠣꠘꠂꠘ, ꠛꠃꠔ ꠖꠤꠘ ꠀꠉꠦ ꠀꠙꠘꠣꠁꠘ꠆ꠔꠞ ꠝꠣꠎ ꠕꠣꠇꠤꠃ ꠀꠟ꠆ꠟꠣꠄ ꠀꠝꠣꠞꠦ ꠙꠍꠘ꠆ꠖ ꠇꠞꠤ ꠘꠤꠍꠂꠘ, ꠎꠣꠔꠦ ꠅ-ꠁꠢꠥꠖꠤ ꠅꠇꠟꠦꠅ ꠀꠝꠣꠞ ꠝꠥꠈ ꠕꠣꠇꠤ ꠈꠥꠡ-ꠈꠛꠞꠤ ꠢꠥꠘꠤꠀ ꠁꠝꠣꠘ ꠀꠘꠂꠘ।
ACT 15:8 ꠀꠟ꠆ꠟꠣꠄ ꠔ ꠢꠇꠟꠞ ꠖꠤꠟꠞ ꠈꠛꠞ ꠎꠣꠘꠂꠘ, ꠔꠦ ꠔꠣꠁꠘ ꠀꠝꠞꠣꠞꠦ ꠎꠦꠟꠣꠈꠣꠘ ꠙꠣꠇ ꠞꠥꠢꠥ ꠖꠣꠘ ꠇꠞꠍꠂꠘ, ꠅ-ꠁꠢꠥꠖꠤ ꠅꠇꠟꠞꠦꠅ ꠅꠃꠟꠣ ꠙꠣꠇ ꠞꠥꠢꠥ ꠖꠣꠘ ꠇꠞꠤꠀ ꠖꠦꠈꠣꠁꠍꠂꠘ, ꠔꠣꠞꠣꠅ ꠘꠣꠎꠣꠔ ꠢꠣꠍꠤꠟ ꠇꠞꠍꠦ।
ACT 15:9 ꠔꠣꠁꠘ ꠀꠝꠞꠣꠞ ꠀꠞ ꠔꠣꠞꠣꠞ ꠝꠣꠎꠦ ꠀꠟꠣꠖꠣ ꠇꠥꠘ꠆ꠔꠣ ꠞꠣꠈꠍꠂꠘ ꠘꠣ, ꠇꠣꠞꠘ ꠔꠣꠞꠣ ꠁꠝꠣꠘ ꠀꠘꠍꠂꠘ ꠇꠞꠤ, ꠔꠣꠞꠣꠞ ꠖꠤꠟꠅ ꠍꠣꠚ ꠇꠞꠤꠟꠤꠍꠂꠘ।
ACT 15:10 ꠔꠦ ꠀꠝꠞꠣꠞ ꠛꠣꠚ-ꠖꠣꠖꠣ ꠅꠇꠟꠦ ꠛꠣ ꠀꠝꠞꠣꠅ ꠎꠦ ꠜꠣꠞ ꠛꠁꠔꠣꠝ ꠙꠣꠞꠍꠤ ꠘꠣ, ꠢꠤ ꠜꠣꠞ ꠅ-ꠁꠢꠥꠖꠤ ꠃꠝ꠆ꠝꠔ ꠅꠇꠟꠞ ꠇꠣꠘ꠆ꠖꠅ ꠔꠥꠟꠤꠀ ꠖꠤꠀ, ꠇꠦꠘꠦ ꠀꠙꠘꠣꠞꠣ ꠀꠟ꠆ꠟꠣ ꠙꠣꠇꠞꠦ ꠙꠞꠤꠇ꠆ꠇꠣ ꠇꠞꠞꠣ?
ACT 15:11 ꠀꠝꠞꠣ ꠔ ꠝꠘꠅ ꠇꠞꠤ, ꠢꠎꠞꠔ ꠁꠍꠣꠞ ꠝꠦꠢꠦꠞꠛꠣꠘꠤꠄ ꠀꠝꠞꠣ ꠎꠦꠟꠣ ꠉꠥꠘꠣ ꠕꠣꠇꠤ ꠝꠣꠚꠤ ꠙꠣꠁꠍꠤ, ꠔꠣꠞꠣꠅ ꠅꠃꠟꠣ ꠝꠣꠚꠤ ꠙꠣꠁꠍꠂꠘ।”
ACT 15:12 ꠔꠦꠃ ꠢꠇ꠆ꠇꠟ ꠘꠤꠞꠣꠁ ꠅꠁꠉꠦꠟꠣ; ꠙꠣꠃꠟꠥꠍ ꠀꠞ ꠛꠣꠞ꠆ꠘꠣꠛꠣꠍꠞ ꠎꠞꠤꠀꠄ ꠀꠟ꠆ꠟꠣꠄ ꠅ-ꠁꠢꠥꠖꠤꠞ ꠝꠣꠎꠦ ꠎꠦꠔꠣ ꠝꠥꠎꠦꠎꠣ ꠀꠞ ꠇꠦꠞꠣꠝꠔꠤ ꠇꠣꠝ ꠅꠇꠟ ꠇꠞꠣꠁꠍꠂꠘ, ꠔꠣꠞꠣꠞ ꠝꠥꠈ ꠕꠣꠇꠤ ꠅꠔꠣ ꠢꠥꠘꠟꠣ।
ACT 15:13 ꠔꠣꠞꠣꠞ ꠛꠄꠀꠘ ꠡꠦꠡ ꠅꠀꠞ ꠛꠣꠖꠦ ꠁꠀꠇꠥꠛꠦ ꠇꠁꠟꠣ, “ꠜꠣꠁꠍꠣꠛ ꠅꠇꠟ, ꠢꠥꠘꠃꠇ꠆ꠇꠣ,
ACT 15:14 ꠀꠟ꠆ꠟꠣꠄ ꠔꠣꠘ ꠘꠤꠎꠞ ꠛꠘ꠆ꠖꠣ ꠅꠀꠞ ꠟꠣꠉꠤ ꠅ-ꠁꠢꠥꠖꠤ ꠅꠇꠟ ꠕꠣꠇꠤ ꠄꠇꠖꠟ ꠝꠣꠘꠡꠞꠦ ꠙꠍꠘ꠆ꠖ ꠇꠞꠤ ꠘꠤꠀ ꠖꠦꠈꠣꠁꠍꠂꠘ, ꠅ-ꠁꠢꠥꠖꠤ ꠅꠇꠟꠞ ꠛꠣꠄꠅ ꠔꠣꠘ ꠈꠤꠀꠟ ꠀꠍꠦ, ꠀꠞ ꠅꠃ ꠇꠕꠣꠃ ꠍꠣꠁꠝꠘ-ꠙꠤꠔꠞꠦ ꠅꠈꠘ ꠛꠄꠀꠘ ꠇꠞꠍꠂꠘ।
ACT 15:15 ꠁ ꠛꠄꠀꠘꠞ ꠟꠉꠦ ꠘꠛꠤ ꠅꠇꠟꠞ ꠇꠣꠟꠣꠝꠞꠅ ꠝꠤꠟ ꠀꠍꠦ; ꠎꠦꠟꠣ ꠟꠦꠈꠣ ꠀꠍꠦ,
ACT 15:16 ꠄꠞꠛꠣꠖꠦ ꠀꠝꠤ ꠀꠁꠀ ꠖꠣꠃꠖꠞ ꠙꠠꠤ ꠎꠣꠅꠀ ꠊꠞ ꠢꠤꠞꠛꠣꠞ ꠔꠤꠀꠞ ꠇꠞꠝꠥ, ꠎꠦꠔꠣ ꠛꠤꠘꠣꠡ ꠅꠁꠉꠦꠍꠦ ꠁꠔꠣ ꠢꠤꠞꠛꠣꠞ ꠉꠣꠕꠤꠝꠥ, ꠢꠤꠞꠛꠣꠞ ꠘꠄꠀ ꠇꠞꠤꠀ ꠛꠣꠘꠣꠁꠝꠥ,
ACT 15:17 ꠎꠣꠔꠦ ꠛꠣꠇꠤ ꠢꠇꠟ ꠝꠣꠘꠡꠦ ꠝꠣꠛꠥꠖꠞ ꠔꠣꠟ꠆ꠟꠣꠡ ꠇꠞꠂꠘ, ꠀꠞ ꠎꠔ ꠅ-ꠁꠢꠥꠖꠤꠞ ꠘꠣꠝ ꠀꠝꠣꠞ ꠛꠘ꠆ꠖꠣꠞ ꠈꠣꠔꠣꠔ ꠟꠦꠈꠣ ꠀꠍꠦ, ꠔꠣꠞꠣꠅ ꠔꠣꠟ꠆ꠟꠣꠡ ꠇꠞꠂꠘ। ꠝꠣꠛꠥꠖꠦꠃ ꠅꠃ ꠇꠣꠟꠣꠝ ꠇꠁꠞꠣ,
ACT 15:18 ꠁꠔꠣ ꠛꠃꠔ ꠖꠤꠘ ꠀꠉ ꠕꠣꠇꠤꠃ ꠔꠣꠘ ꠝꠣꠟꠥꠝ ꠀꠍꠤꠟ।”
ACT 15:19 ꠁꠀꠇꠥꠛꠦ ꠀꠞꠅ ꠇꠁꠟꠣ, “ꠔꠦ ꠀꠝꠣꠞ ꠚꠄꠍꠣꠟꠣ ꠅꠁꠟ, ꠅ-ꠁꠢꠥꠖꠤ ꠕꠣꠇꠤ ꠎꠦꠞꠣ ꠀꠟ꠆ꠟꠣꠞ ꠙꠕꠤ ꠅꠞ, ꠔꠣꠞꠣꠞꠦ ꠀꠝꠞꠣ ꠇꠥꠘꠥ ꠖꠥꠈ ꠖꠤꠔꠣꠝ ꠘꠣꠄ।
ACT 15:20 ꠔꠣꠞꠣꠞ ꠉꠦꠍꠦ ꠈꠣꠟꠤ ꠅꠃ ꠢꠥꠇꠥꠝꠈꠣꠘ ꠟꠦꠈꠤꠀ ꠎꠣꠘꠣꠁ ꠖꠦꠁ, ꠔꠣꠞꠣ ꠎꠣꠘꠥ ꠖꠦꠛꠔꠣꠞ ꠘꠣꠝꠞ ꠢꠇ꠆ꠇꠟ ꠇꠣꠝ ꠕꠣꠇꠤ, ꠎꠤꠘꠣꠞ ꠇꠣꠝ ꠕꠣꠇꠤ, ꠀꠞ ꠉꠟꠣ ꠐꠤꠙꠤꠀ ꠝꠣꠞꠣ ꠎꠣꠘꠖꠣꠞꠞ ꠉꠥꠡ꠆ꠔ ꠈꠣꠅꠀ ꠀꠞ ꠟꠃ ꠈꠣꠅꠀ ꠕꠣꠇꠤ ꠖꠥꠞꠁ ꠞꠂꠘ।
ACT 15:21 ꠁ ꠢꠥꠇꠥꠝ ꠅꠇꠟ ꠔꠣꠞꠣꠞꠦ ꠎꠣꠘꠣꠘꠤꠈꠣꠘ ꠜꠣꠟꠣ, ꠇꠣꠞꠘ ꠝꠥꠍꠣꠄ ꠎꠦꠔꠣ ꠔꠣꠟꠤꠝ ꠖꠤꠍꠂꠘ, ꠁꠔꠣ ꠛꠃꠔ ꠎꠝꠣꠘꠣ ꠕꠣꠇꠤ ꠙꠞꠔꠦꠇ ꠐꠣꠃꠘꠅ ꠝꠣꠘꠡꠦ ꠔꠛꠟꠤꠉ ꠇꠞꠞꠣ, ꠀꠞ ꠔꠣꠁꠘ ꠎꠦꠔꠣ ꠟꠦꠈꠤꠀ ꠕꠁꠀ ꠉꠦꠍꠂꠘ, ꠁꠔꠣ ꠔ ꠙꠞꠔꠦꠇ ꠎꠥꠝ꠆ꠝꠣꠛꠣꠞꠦ ꠝꠍꠤꠖꠣꠁꠘ꠆ꠔꠅ ꠔꠤꠟꠣꠅꠔ ꠇꠞꠣ ꠅꠞ।”
ACT 15:22 ꠔꠦꠃ ꠍꠣꠢꠣꠛꠤ ꠅꠇꠟ, ꠎꠝꠣꠔꠞ ꠝꠥꠞꠛ꠆ꠛꠤ ꠅꠇꠟ, ꠀꠞ ꠎꠝꠣꠔꠞ ꠢꠇꠟ ꠀꠝ ꠝꠣꠘꠡꠦ ꠄꠇꠝꠔ ꠅꠁꠟꠣ, ꠔꠣꠞꠣꠞ ꠘꠤꠎꠞ ꠝꠣꠎ ꠕꠣꠇꠤ ꠇꠄꠎꠘꠞꠦ ꠙꠍꠘ꠆ꠖ ꠇꠞꠤꠀ ꠙꠣꠃꠟꠥꠍ ꠀꠞ ꠛꠣꠞ꠆ꠘꠣꠛꠣꠍꠞ ꠟꠉꠦ ꠀꠘ꠆ꠔꠤꠅꠈꠤꠀꠔ ꠙꠣꠑꠣꠁ ꠖꠤꠛꠣ। ꠅꠃ ꠔꠣꠞꠣ ꠍꠤꠟꠣꠍ ꠀꠞ ꠄꠢꠥꠖꠣ ꠃꠞꠚꠦ ꠛꠣꠞ꠆ꠡꠣꠛ꠆ꠛꠣ ꠘꠣꠝꠞ ꠅꠃ ꠖꠥꠁ ꠝꠥꠞꠛ꠆ꠛꠤꠞꠦ ꠙꠍꠘ꠆ꠖ ꠇꠞꠟꠣ।
ACT 15:23 ꠔꠣꠞꠣꠞ ꠀꠔꠅ ꠅꠃ ꠌꠤꠑꠤ ꠟꠦꠈꠤꠀ ꠙꠣꠑꠣꠁꠟꠣ: “ꠀꠘ꠆ꠔꠤꠅꠈꠤꠀ, ꠡꠤꠞꠤꠀ ꠀꠞ ꠇꠤꠟꠤꠇꠤꠀꠞ ꠅ-ꠁꠢꠥꠖꠤ ꠝꠥꠝꠤꠘ ꠜꠣꠁꠀꠁꠘ꠆ꠔꠞ ꠉꠦꠍꠦ, ꠍꠣꠢꠣꠛꠤ ꠅꠇꠟꠦ, ꠎꠝꠣꠔꠞ ꠝꠥꠞꠛ꠆ꠛꠤ ꠅꠇꠟꠦ, ꠀꠞ ꠝꠥꠝꠤꠘ ꠅꠇꠟꠦ ꠁ ꠍꠣꠟꠣꠝ ꠎꠣꠘꠣꠁꠞꠣꠝ।
ACT 15:24 ꠀꠝꠞꠣ ꠢꠥꠘꠟꠣꠝ ꠎꠦꠘ, ꠀꠝꠞꠣꠞ ꠝꠣꠎ ꠕꠣꠇꠤ ꠇꠄꠎꠘ ꠝꠣꠘꠥꠡ ꠉꠤꠀ ꠔꠣꠞꠣꠞ ꠎꠛꠣꠘꠖꠤ ꠀꠙꠘꠣꠞꠣꠞꠦ ꠅꠡ꠆ꠕꠤꠞ ꠛꠣꠘꠣꠁꠀ ꠙꠦꠞꠦꠡꠣꠘꠤ ꠇꠞꠣꠞ; ꠅꠁꠟꠦ ꠀꠝꠞꠣ ꠔ ꠔꠣꠞꠣꠞꠦ ꠁꠟꠣ ꠇꠣꠝꠞ ꠇꠥꠘꠥ ꠢꠥꠇꠥꠝ ꠖꠤꠍꠤ ꠘꠣ।
ACT 15:25 ꠄꠞꠟꠣꠉꠤ ꠀꠝꠞꠣ ꠢꠇꠟꠦ ꠄꠇꠝꠔ ꠅꠁꠀ ꠇꠄꠎꠘꠞꠦ ꠙꠍꠘ꠆ꠖ ꠇꠞꠤꠀ, ꠀꠝꠞꠣꠞ ꠝꠣꠄꠀꠞ ꠝꠣꠘꠥꠡ ꠛꠣꠞ꠆ꠘꠣꠛꠣꠍ ꠀꠞ ꠙꠣꠃꠟꠥꠍꠞ ꠟꠉꠦ ꠇꠞꠤ ꠔꠣꠞꠣꠞꠦ ꠀꠙꠘꠣꠁꠘ꠆ꠔꠞ ꠉꠦꠍꠦ ꠙꠣꠑꠣꠁꠟꠣꠝ,
ACT 15:26 ꠛꠣꠞ꠆ꠘꠣꠛꠣꠍ ꠀꠞ ꠙꠣꠃꠟꠥꠍ ꠔ ꠀꠝꠞꠣꠞ ꠢꠎꠞꠔ ꠁꠍꠣ ꠀꠟ-ꠝꠍꠤꠞ ꠘꠣꠝꠞ ꠟꠣꠉꠤ ꠝꠞꠣꠞ ꠎꠥꠇꠣ ꠅꠁꠉꠦꠍꠟꠣ।
ACT 15:27 ꠀꠝꠞꠣ ꠄꠢꠥꠖꠣ ꠀꠞ ꠍꠤꠟꠣꠍꠞꠦꠅ ꠙꠣꠑꠣꠁꠟꠣꠝ, ꠔꠣꠞꠣ ꠁꠔꠣ ꠝꠥꠈꠦ ꠝꠥꠈꠦꠅ ꠎꠣꠘꠣꠁꠛꠣ।
ACT 15:28 ꠙꠣꠇ ꠞꠥꠢꠥ ꠀꠞ ꠀꠝꠞꠣ ꠝꠤꠟꠤꠀ ꠅꠐꠣꠃ ꠜꠣꠟꠣ ꠝꠘꠅ ꠇꠞꠟꠣꠝ ꠎꠦꠘ, ꠅꠃ ꠎꠞꠥꠞꠤ ꠔꠣꠟꠤꠝ ꠅꠇꠟ ꠍꠣꠠꠣ ꠀꠞ ꠇꠥꠘꠥ ꠜꠣꠞ ꠀꠙꠘꠣꠁꠘ꠆ꠔꠞ ꠃꠙꠞꠦ ꠘꠣ ꠉꠍꠣꠁ।
ACT 15:29 ꠔꠦ ꠀꠙꠘꠣꠞꠣ ꠖꠦꠛꠔꠣꠞ ꠘꠣꠝꠞ ꠝꠣꠘꠣ ꠇꠥꠘꠥ ꠈꠣꠘꠤ, ꠟꠃ, ꠀꠞ ꠉꠟꠣ ꠐꠤꠙꠤꠀ ꠝꠣꠞꠣ ꠎꠣꠘꠖꠣꠞꠞ ꠉꠥꠡ꠆ꠔ ꠈꠣꠁꠛꠣ ꠘꠣ, ꠀꠞ ꠎꠤꠘꠣꠞ ꠇꠣꠝ ꠕꠣꠇꠤ ꠖꠥꠞꠁ ꠞꠁꠛꠣ; ꠁꠔꠣ ꠕꠣꠇꠤ ꠢꠦꠚꠣꠎꠔ ꠞꠁꠟꠦ ꠀꠙꠘꠣꠁꠘ꠆ꠔꠞ ꠜꠣꠟꠣꠁ ꠅꠁꠛ। ꠁꠔꠤ, ꠀꠍꠍꠣꠟꠣꠝꠥ ꠀꠟꠣꠁꠇꠥꠝ।”
ACT 15:30 ꠛꠣꠖꠦ ꠔꠣꠞꠣ ꠛꠤꠖꠣꠄ ꠟꠁꠀ ꠀꠘ꠆ꠔꠤꠅꠈꠤꠀꠔ ꠀꠁꠟꠣ, ꠢꠤꠘꠅ ꠔꠣꠞꠣ ꠎꠝꠣꠔꠞ ꠝꠣꠘꠡꠞꠦ ꠄꠇꠈꠣꠘꠅ ꠖꠟꠣ ꠇꠞꠤ ꠌꠤꠑꠤꠈꠣꠘ ꠡꠝꠎꠣꠁ ꠖꠤꠟꠣ।
ACT 15:31 ꠝꠣꠘꠡꠦ ꠌꠤꠑꠤꠈꠣꠘ ꠙꠠꠤꠀ ꠁ ꠡꠣꠘ꠆ꠔꠤꠞ ꠘꠍꠤꠅꠔ ꠢꠥꠘꠤꠀ ꠈꠥꠡꠤ ꠅꠁꠟꠣ।
ACT 15:32 ꠄꠢꠥꠖꠣ ꠀꠞ ꠍꠤꠟꠣꠍ, ꠄꠞꠣ ꠖꠥꠁꠅꠎꠘ ꠘꠛꠤ ꠀꠍꠟꠣ, ꠄꠞꠣ ꠢꠤꠘꠞ ꠝꠥꠝꠤꠘ ꠅꠇꠟꠞꠦ ꠛꠃꠔ ꠟꠣꠈꠣꠘ ꠅꠀꠎ-ꠘꠍꠤꠅꠔ ꠇꠞꠤꠀ ꠃꠔꠡꠣꠢ ꠖꠤꠟꠣ ꠀꠞ ꠔꠣꠞꠣꠞ ꠁꠝꠣꠘꠤ ꠛꠟ ꠝꠎꠛꠥꠔ ꠇꠞꠟꠣ।
ACT 15:33 ꠢꠘꠅ ꠛꠣꠇ꠆ꠇꠣ ꠇꠄꠖꠤꠘ ꠞꠅꠀꠞ ꠛꠣꠖꠦ, ꠎꠦꠞꠣ ꠔꠣꠞꠣꠞꠦ ꠙꠣꠑꠣꠁꠍꠟꠣ ꠄꠞꠣꠞ ꠉꠦꠍꠦ ꠢꠤꠞꠛꠣꠞ ꠚꠤꠞꠔ ꠀꠁꠔꠣ ꠇꠞꠤ, ꠀꠘ꠆ꠔꠤꠅꠈꠤꠀꠞ ꠝꠥꠝꠤꠘ ꠅꠇꠟꠞꠦ ꠍꠣꠟꠣꠝ ꠎꠣꠘꠣꠁꠀ ꠛꠤꠖꠣꠄ ꠟꠁꠟꠣ।
ACT 15:35 ꠅꠁꠟꠦ ꠙꠣꠃꠟꠥꠍ ꠀꠞ ꠛꠣꠞ꠆ꠘꠣꠛꠣꠍ ꠀꠘ꠆ꠔꠤꠅꠈꠤꠀꠔ ꠞꠁꠉꠦꠟꠣ, ꠔꠣꠞꠣ ꠢꠤꠘꠅ ꠀꠞꠅ ꠛꠃꠔꠞ ꠟꠉꠦ ꠝꠣꠟꠤꠇꠞ ꠇꠣꠟꠣꠝꠞ ꠔꠣꠟꠤꠝ ꠀꠞ ꠈꠥꠡ-ꠈꠛꠞꠤ ꠔꠛꠟꠤꠉ ꠇꠞꠣꠔ ꠞꠁꠟꠣ।
ACT 15:36 ꠇꠄꠖꠤꠘ ꠛꠣꠖꠦ ꠙꠣꠃꠟꠥꠍꠦ ꠛꠣꠞ꠆ꠘꠣꠛꠣꠍꠞꠦ ꠇꠁꠟꠣ, “ꠀꠝꠞꠣ ꠎꠦꠔꠣ ꠎꠣꠉꠣꠁꠘ꠆ꠔꠅ ꠀꠉꠦ ꠝꠣꠟꠤꠇꠞ ꠇꠣꠟꠣꠝ ꠔꠛꠟꠤꠉ ꠇꠞꠍꠟꠣꠝ, ꠀꠅ, ꠢꠃ ꠎꠣꠉꠣꠁꠘ꠆ꠔꠅ ꠢꠤꠞꠛꠣꠞ ꠉꠤꠀ ꠖꠦꠈꠣ ꠇꠞꠤ। ꠖꠦꠈꠤꠀ ꠀꠁ ꠜꠣꠁꠀꠁꠘ꠆ꠔꠞ ꠢꠣꠟ-ꠢꠇꠤꠇꠔ ꠇꠤꠔꠣ।”
ACT 15:37 ꠔꠦꠃ ꠛꠣꠞ꠆ꠘꠣꠛꠣꠍꠞ ꠈꠤꠀꠟ ꠅꠁꠟ, ꠢꠣꠘ꠆ꠘꠣꠘ ꠃꠞꠚꠦ ꠝꠣꠞ꠆ꠇꠥꠍꠞꠦ ꠟꠉꠦ ꠟꠁꠀ ꠎꠣꠁꠔꠣ;
ACT 15:38 ꠅꠁꠟꠦ ꠙꠣꠃꠟꠥꠍꠦ ꠄꠘꠞꠦ ꠟꠉꠦ ꠘꠦꠅꠀ ꠜꠣꠟꠣ ꠝꠘꠅ ꠇꠞꠟꠣ ꠘꠣ, ꠇꠣꠞꠘ ꠝꠣꠞ꠆ꠇꠥꠍꠦ ꠀꠉꠦ ꠙꠣꠝꠚꠥꠟꠤꠀꠔ ꠔꠣꠞꠣꠞꠦ ꠚꠣꠟꠣꠁꠀ ꠉꠦꠍꠟꠣꠉꠤ, ꠔꠣꠞꠣꠞ ꠟꠉꠦ ꠇꠣꠝ ꠇꠞꠣ ꠛꠣꠖ ꠖꠤꠟꠣꠁꠍꠟꠣ।
ACT 15:39 ꠄꠞꠟꠣꠉꠤ ꠙꠣꠃꠟꠥꠍ ꠀꠞ ꠛꠣꠞ꠆ꠘꠣꠛꠣꠍꠞ ꠝꠣꠎꠦ ꠝꠔꠞ ꠅꠝꠤꠟ ꠅꠁꠉꠦꠟ ꠄꠞꠖꠣꠄ ꠔꠣꠞꠣ ꠎꠣꠞꠎꠤꠞ ꠙꠕꠦ ꠀꠟꠉ ꠅꠁꠉꠦꠟꠣ। ꠛꠣꠞ꠆ꠘꠣꠛꠣꠍꠦ ꠝꠣꠞ꠆ꠇꠥꠍꠞꠦ ꠟꠁꠀ ꠎꠣꠎꠅ ꠇꠞꠤ ꠍꠣꠁꠙ꠆ꠞꠣꠍ ꠖꠤꠙꠅ ꠉꠦꠟꠣ;
ACT 15:40 ꠀꠞ ꠙꠣꠃꠟꠥꠍꠦ ꠍꠤꠟꠣꠍꠞꠦ ꠙꠍꠘ꠆ꠖ ꠇꠞꠤꠀ, ꠀꠘ꠆ꠔꠤꠅꠈꠤꠀꠞ ꠝꠥꠝꠤꠘ ꠅꠇꠟꠞ ꠎꠞꠤꠀꠄ ꠝꠣꠛꠥꠖꠞ ꠞꠢꠝꠔꠞ ꠀꠔꠅ ꠡꠙꠣ ꠅꠁꠀ ꠞꠅꠀꠘꠣ ꠖꠤꠟꠣ।
ACT 15:41 ꠔꠣꠁꠘ ꠡꠤꠞꠤꠀ ꠀꠞ ꠇꠤꠟꠤꠇꠤꠀꠞ ꠝꠣꠎꠦꠖꠤ ꠞꠅꠀꠘꠣ ꠇꠞꠤꠀ ꠙꠕꠦ ꠙꠕꠦ ꠎꠝꠣꠔ ꠅꠇꠟꠞꠦ ꠀꠞꠅ ꠝꠎꠛꠥꠔ ꠇꠞꠟꠣ।
ACT 16:1 ꠢꠎꠞꠔ ꠙꠣꠃꠟꠥꠍ ꠙꠄꠟꠣ ꠖꠞ꠆ꠛꠤ ꠀꠞ ꠛꠣꠖꠦ ꠟꠥꠡ꠆ꠞꠣ ꠐꠣꠃꠘꠅ ꠉꠤꠀ ꠀꠎꠤꠟꠣ। ꠟꠥꠡ꠆ꠞꠣꠔ ꠔꠤꠝꠕꠤ ꠘꠣꠝꠦ ꠄꠇꠎꠘ ꠃꠝ꠆ꠝꠔ ꠀꠍꠟꠣ, ꠔꠣꠘ ꠝꠣ ꠁꠝꠣꠘꠖꠣꠞ, ꠝꠣ ꠔ ꠁꠢꠥꠖꠤ ꠎꠣꠔꠞ, ꠅꠁꠟꠦ ꠛꠣꠚ ꠁꠃꠘꠣꠘꠤ ꠎꠣꠔꠞ।
ACT 16:2 ꠟꠥꠡ꠆ꠞꠣ ꠀꠞ ꠁꠇꠘꠤꠅ ꠐꠣꠃꠘꠞ ꠢꠇꠟ ꠁꠝꠣꠘꠖꠣꠞꠦ ꠔꠤꠝꠕꠤꠞ ꠛꠃꠔ ꠔꠣꠞꠤꠚ ꠇꠞꠔꠣ।
ACT 16:3 ꠙꠣꠃꠟꠥꠍꠦ ꠔꠤꠝꠕꠤꠞꠦ ꠟꠉꠦ ꠘꠤꠔꠣ ꠇꠞꠤ ꠈꠤꠀꠟ ꠇꠞꠟꠣ; ꠔꠣꠁꠘ ꠔꠤꠝꠕꠤꠞꠦ ꠝꠍꠟꠝꠣꠘꠤ ꠇꠞꠣꠁꠟꠣ, ꠇꠣꠞꠘ ꠢꠤ ꠎꠣꠉꠣꠁꠘ꠆ꠔꠞ ꠁꠢꠥꠖꠤ ꠅꠇꠟꠦ ꠎꠣꠘꠔꠣ ꠔꠤꠝꠕꠤꠞ ꠛꠣꠚ ꠅꠁꠟꠣ ꠁꠃꠘꠣꠘꠤ ꠎꠣꠔꠞ ꠝꠣꠘꠥꠡ।
ACT 16:4 ꠎꠦꠞꠥꠎꠣꠟꠦꠝ ꠎꠝꠣꠔꠞ ꠍꠣꠢꠣꠛꠤ ꠀꠞ ꠝꠥꠞꠛ꠆ꠛꠤ ꠅꠇꠟꠦ ꠎꠦꠔꠣ ꠢꠥꠇꠥꠝ ꠖꠤꠍꠟꠣ, ꠔꠣꠞꠣ ꠐꠣꠃꠘꠦ ꠐꠣꠃꠘꠦ ꠍꠚꠞ ꠇꠞꠤ ꠇꠞꠤ ꠁꠔꠣ ꠝꠥꠝꠤꠘ ꠅꠇꠟꠞ ꠀꠔꠅ ꠡꠝꠎꠣꠁꠟꠣ ꠀꠞ ꠝꠣꠘꠣꠞ ꠔꠣꠉꠤꠖ ꠖꠤꠟꠣ।
ACT 16:5 ꠅꠃꠟꠣ ꠎꠝꠣꠔꠞ ꠝꠥꠝꠤꠘ ꠅꠇꠟꠞ ꠁꠝꠣꠘ ꠝꠎꠛꠥꠔ ꠅꠁꠟ, ꠀꠞ ꠖꠤꠘꠦ ꠖꠤꠘꠦ ꠔꠣꠞꠣꠞ ꠙꠞꠤꠝꠣꠘ ꠀꠞꠅ ꠛꠣꠠꠤꠟ।
ACT 16:6 ꠙꠣꠇ ꠞꠥꠢꠦ ꠢꠎꠞꠔ ꠙꠣꠃꠟꠥꠍ ꠀꠞ ꠔꠣꠘ ꠟꠉꠞ ꠢꠇꠟꠞꠦ ꠀꠍꠤꠀ ꠖꠦꠡꠅ ꠇꠣꠟꠣꠝ ꠔꠛꠟꠤꠉ ꠇꠞꠔꠦ ꠝꠣꠘꠣ ꠇꠞꠟꠣ, ꠔꠦꠃ ꠔꠣꠞꠣ ꠚꠞꠥꠉꠤꠀ ꠀꠞ ꠉꠣꠟꠣꠔꠤꠀ ꠖꠦꠡꠞ ꠜꠤꠔꠞꠦꠖꠤ ꠙꠣꠞ ꠅꠁꠀ ꠉꠦꠟꠣ।
ACT 16:7 ꠉꠤꠀ ꠝꠥꠡꠤꠀꠞ ꠡꠤꠝꠣꠘꠣꠔ ꠀꠁꠀ ꠢꠣꠞꠟꠦ ꠛꠤꠕꠥꠘꠤꠀ ꠖꠦꠡꠅ ꠎꠣꠁꠔꠣ ꠌꠣꠁꠟꠣ, ꠅꠁꠟꠦ ꠁꠍꠣꠞ ꠞꠥꠢꠦ ꠔꠣꠞꠣꠞꠦ ꠢꠤꠈꠣꠘꠅ ꠎꠣꠁꠔꠦ ꠖꠤꠟꠣ ꠘꠣ,
ACT 16:8 ꠄꠞꠖꠣꠄ ꠔꠣꠞꠣ ꠝꠥꠡꠤꠀ ꠖꠦꠡ ꠚꠣꠟꠣꠁꠀ ꠔꠞꠥꠀꠍ ꠐꠣꠃꠘꠅ ꠉꠦꠟꠣꠉꠤ।
ACT 16:9 ꠞꠣꠁꠔꠞ ꠛꠣꠟꠣ ꠙꠣꠃꠟꠥꠍꠦ ꠉꠣꠁꠛꠤ ꠄꠇ ꠖꠞꠡꠘ ꠙꠣꠁꠟꠣ; ꠔꠣꠁꠘ ꠖꠦꠈꠟꠣ, ꠝꠣꠇꠤꠖꠘꠤꠀ ꠖꠦꠡꠞ ꠄꠇ ꠛꠦꠐꠣꠄ ꠃꠛꠣꠁꠀ ꠔꠣꠘꠞꠦ ꠝꠤꠘꠔ ꠇꠞꠤ ꠇꠁꠞꠣ, “ꠝꠣꠇꠤꠖꠘꠤꠀꠔ ꠙꠣꠞ ꠅꠁꠀ ꠀꠁꠀ ꠀꠝꠞꠣꠞꠦ ꠡꠣꠁꠎ꠆ꠎ ꠇꠞꠃꠇ꠆ꠇꠣ।”
ACT 16:10 ꠔꠣꠁꠘ ꠁ ꠀꠟꠣꠝꠔ ꠖꠦꠈꠣꠞ ꠛꠣꠖꠦꠃ ꠀꠝꠞꠣ ꠝꠣꠇꠤꠖꠘꠤꠀꠔ ꠎꠣꠅꠀꠞ ꠟꠣꠉꠤ ꠔꠤꠀꠞ ꠅꠁꠟꠣꠝ, ꠀꠝꠞꠣ ꠛꠥꠎꠟꠣꠝ, ꠝꠣꠇꠤꠖꠘꠤꠀꠞ ꠝꠣꠘꠡꠞ ꠉꠦꠍꠦ ꠈꠥꠡ-ꠈꠛꠞꠤ ꠔꠛꠟꠤꠉ ꠇꠞꠣꠞ ꠟꠣꠉꠤ ꠀꠟ꠆ꠟꠣꠄ ꠀꠝꠞꠣꠞꠦ ꠙꠣꠑꠣꠁꠞꠣ।
ACT 16:11 ꠅꠃ ꠀꠝꠞꠣ ꠔꠞꠥꠀꠍ ꠍꠣꠠꠤꠀ ꠎꠣꠎꠅ ꠇꠞꠤ ꠡꠥꠎꠣ ꠍꠣꠝꠕ꠆ꠞꠣꠇꠤ ꠖꠤꠙꠅ ꠉꠦꠟꠣꠝ, ꠢꠤꠘ ꠕꠣꠇꠤ ꠛꠣꠖꠞ ꠖꠤꠘ ꠘꠤꠀꠙꠟꠤ ꠐꠣꠃꠘꠅ ꠉꠤꠀ ꠀꠎꠤꠟꠣꠝ।
ACT 16:12 ꠘꠤꠀꠙꠟꠤ ꠕꠣꠇꠤ ꠀꠝꠞꠣ ꠚꠤꠟꠤꠙꠤ ꠐꠣꠃꠘꠅ ꠉꠦꠟꠣꠝ। ꠁꠐꠣ ꠅꠁꠟ ꠝꠣꠇꠤꠖꠘꠤꠀꠞ ꠢꠇꠟ ꠕꠣꠇꠤ ꠛꠠ ꠐꠣꠃꠘ, ꠁꠘꠅ ꠞꠥꠝꠣꠘ ꠞꠣꠎꠣꠞ ꠝꠣꠘꠥꠡ ꠛꠡꠔ ꠇꠞꠔꠣ। ꠀꠝꠞꠣ ꠇꠄꠖꠤꠘ ꠅꠘꠅ ꠞꠁꠟꠣꠝ।
ACT 16:13 ꠄꠇ ꠎꠥꠝ꠆ꠝꠣꠛꠣꠞꠦ ꠀꠝꠞꠣ ꠐꠣꠃꠘꠞ ꠛꠣꠁꠞꠣ ꠉꠣꠋꠉꠞ ꠙꠣꠞꠅ ꠉꠦꠟꠣꠝ, ꠝꠘꠅ ꠇꠞꠟꠣꠝ, ꠢꠤꠈꠣꠘꠅ ꠁꠢꠥꠖꠤ ꠗꠞ꠆ꠝꠞ ꠖꠥꠀ ꠇꠞꠣꠞ ꠇꠥꠘꠥ ꠎꠣꠉꠣ ꠀꠍꠦ। ꠢꠤꠘꠅ ꠉꠤꠀ ꠀꠝꠞꠣ ꠛꠦꠐꠤꠘ꠆ꠔꠞ ꠄꠇ ꠖꠟ ꠖꠦꠈꠤꠀ ꠔꠣꠞꠣꠞ ꠟꠉꠦ ꠝꠣꠔꠅ ꠛꠁꠟꠣꠝ।
ACT 16:14 ꠀꠞ ꠄꠞꠣꠞ ꠝꠣꠎꠦ ꠕꠥꠀꠔꠤꠞꠣ ꠐꠣꠃꠘꠞ ꠟꠥꠖꠤꠀ ꠘꠣꠝꠞ ꠅ-ꠁꠢꠥꠖꠤ ꠀꠟ꠆ꠟꠣꠞꠣꠁꠀ ꠄꠇ ꠛꠦꠐꠤ ꠝꠣꠘꠥꠡ ꠀꠍꠟꠣ, ꠄꠁꠘ ꠛꠣꠁꠋꠉꠘꠤ ꠞꠋꠉꠞ ꠈꠣꠘ꠆ꠖꠣꠘꠤ ꠇꠣꠙꠠꠞ ꠇꠣꠞꠛꠣꠞ ꠇꠞꠔꠣ। ꠔꠣꠁꠘ ꠀꠝꠞꠣꠞ ꠛꠄꠀꠘ ꠢꠥꠘꠣꠔ ꠀꠍꠟꠣ, ꠀꠞ ꠝꠣꠛꠥꠖꠦ ꠔꠣꠘ ꠖꠤꠟꠞ ꠖꠥꠀꠞ ꠈꠥꠟꠤꠀ ꠖꠤꠟꠣꠁꠟꠣ, ꠎꠣꠔꠦ ꠔꠣꠁꠘ ꠙꠣꠃꠟꠥꠍꠞ ꠛꠄꠀꠘ ꠖꠤꠟ ꠖꠤꠀ ꠢꠥꠘꠂꠘ।
ACT 16:15 ꠔꠣꠁꠘ ꠀꠞ ꠔꠣꠘ ꠊꠞꠞ ꠢꠇꠟꠦ ꠔꠃꠛꠣꠞ ꠉꠥꠍꠟ ꠇꠞꠤꠀ ꠢꠣꠞꠟꠦ ꠔꠣꠁꠘ ꠝꠤꠘꠔ ꠇꠞꠤ ꠇꠁꠟꠣ, “ꠀꠙꠘꠣꠞꠣ ꠎꠥꠖꠤ ꠀꠝꠣꠞꠦ ꠝꠣꠟꠤꠇꠞ ꠃꠙꠞꠦ ꠁꠝꠣꠘꠖꠣꠞ ꠝꠘꠅ ꠇꠞꠂꠘ, ꠔꠦ ꠀꠝꠣꠞ ꠛꠣꠠꠤ ꠈꠣꠘꠅ ꠀꠁꠀ ꠞꠃꠇ꠆ꠇꠣ।” ꠇꠁꠀ ꠔꠣꠁꠘ ꠎꠥꠞꠦ ꠎꠣꠔꠤꠀ ꠀꠝꠞꠣꠞꠦ ꠔꠣꠘ ꠛꠣꠠꠤꠔ ꠘꠤꠟꠣꠉꠤ।
ACT 16:16 ꠄꠇꠖꠤꠘ ꠀꠝꠞꠣ ꠎꠦꠛꠟꠣ ꠢꠃ ꠖꠥꠀ ꠇꠞꠣꠞ ꠎꠣꠉꠣꠔ ꠎꠣꠅꠀꠔ ꠀꠍꠟꠣꠝ, ꠅꠃ ꠡꠝꠄ ꠎꠤꠘ꠆ꠘꠣꠔ ꠡꠣꠗꠇꠤ ꠄꠇ ꠛꠣꠘ꠆ꠖꠤ ꠛꠦꠐꠤ ꠀꠈꠔꠣꠃ ꠀꠝꠞꠣꠞ ꠍꠣꠝꠘꠦ ꠀꠁꠟ। ꠔꠣꠁ ꠜꠣꠁꠉ꠆ꠉ ꠉꠘꠤꠀ ꠔꠣꠁꠞ ꠉꠤꠞꠡ꠆ꠔ ꠅꠇꠟꠞꠦ ꠛꠃꠔ ꠟꠣꠜ ꠇꠞꠣꠁꠔ।
ACT 16:17 ꠔꠣꠁ ꠀꠝꠞꠣꠞ ꠈꠞꠦ ꠈꠞꠦ ꠀꠁꠀ ꠌꠤꠟ꠆ꠟꠣꠁꠀ ꠇꠁꠟ, “ꠁ ꠝꠣꠘꠥꠡ ꠉꠥꠁꠘ ꠃꠙꠞꠀꠟꠣꠞ ꠡꠦꠛꠇ, ꠄꠞꠣ ꠔꠥꠝꠞꠣꠞꠦ ꠔꠞꠣꠘꠤꠞ ꠙꠕ ꠖꠦꠈꠣꠁ ꠖꠤꠞꠣ।”
ACT 16:18 ꠔꠣꠁ ꠛꠃꠔ ꠖꠤꠘ ꠗꠞꠤ ꠁꠔꠣ ꠇꠞꠍꠤꠟ, ꠄꠇꠖꠤꠘ ꠙꠣꠃꠟꠥꠍꠦ ꠛꠤꠞꠇ꠆ꠔ ꠅꠁꠀ ꠔꠣꠁꠞ ꠛꠣꠄ ꠝꠥꠈ ꠚꠤꠞꠣꠁꠀ ꠢꠃ ꠎꠤꠘꠞꠦ ꠇꠁꠟꠣ, “ꠀꠝꠤ ꠁꠍꠣ ꠀꠟ-ꠝꠍꠤꠞ ꠘꠣꠝꠦ ꠔꠥꠝꠣꠞꠦ ꠁ ꠢꠥꠇꠥꠝ ꠖꠤꠞꠣꠝ, ꠔꠥꠝꠤ ꠁ ꠛꠦꠐꠤꠞ ꠉꠦꠍ ꠕꠣꠇꠤ ꠛꠣꠞ ꠅꠁꠀ ꠎꠣꠅꠉꠤ!” ꠀꠞ ꠟꠉꠦ ꠟꠉꠦꠃ ꠢꠤ ꠎꠤꠘ ꠛꠣꠞ ꠅꠁꠀ ꠉꠦꠟꠉꠤ।
ACT 16:19 ꠅꠁꠟꠦ ꠔꠣꠁꠞ ꠝꠥꠘꠤꠛ ꠅꠇꠟꠦ ꠔꠣꠞꠣꠞ ꠟꠣꠜ ꠚꠥꠠꠣꠁꠉꠦꠟ ꠖꠦꠈꠤꠀ, ꠙꠣꠃꠟꠥꠍ ꠀꠞ ꠍꠤꠟꠣꠍꠞꠦ ꠗꠞꠤꠀ ꠐꠣꠘꠤꠀ ꠡꠖꠞꠅ ꠟꠁꠀ ꠉꠦꠟꠣ।
ACT 16:20 ꠛꠣꠖꠦ ꠢꠣꠇꠤꠝ ꠅꠇꠟꠞ ꠉꠦꠍꠦ ꠡꠝꠎꠣꠁ ꠖꠤꠀ ꠇꠁꠟꠣ, “ꠁ ꠝꠣꠘꠥꠡꠉꠥꠁꠘ꠆ꠔꠦ ꠀꠝꠞꠣꠞ ꠐꠣꠃꠘꠅ ꠀꠁꠀ ꠛꠦꠕꠣꠄꠀ ꠉꠘ꠆ꠒꠉꠥꠟ ꠛꠣꠠꠣꠁ ꠖꠤꠍꠦ। ꠄꠞꠣ ꠔ ꠁꠢꠥꠖꠤ ꠀꠞ ꠀꠝꠞꠣ ꠅꠁꠟꠣꠝ ꠞꠥꠝꠣꠘ ꠝꠣꠘꠥꠡ।
ACT 16:21 ꠄꠞꠣ ꠅꠃ ꠎꠣꠔꠞ ꠇꠣꠄꠖꠣ-ꠇꠣꠘꠥꠘꠞ ꠇꠕꠣ ꠝꠣꠘꠡꠞꠦ ꠢꠤꠇꠣꠁꠞꠣ, ꠎꠦꠔꠣ ꠇꠞꠣ ꠀꠝꠞꠣꠞ ꠟꠣꠉꠤ ꠛꠦ-ꠀꠁꠘꠤ।”
ACT 16:22 ꠀꠞ ꠢꠤꠘꠞ ꠀꠞꠅ ꠝꠣꠘꠥꠡ ꠄꠇꠟꠉꠦ ꠖꠟ ꠛꠣꠘ꠆ꠖꠤꠀ ꠙꠣꠃꠟꠥꠍ ꠀꠞ ꠍꠤꠟꠣꠍꠞ ꠛꠤꠞꠥꠗꠤꠔꠣ ꠇꠞꠟ, ꠔꠦꠃ ꠢꠣꠇꠤꠝ ꠅꠇꠟꠦ ꠄꠞꠣꠞ ꠇꠣꠙꠠ-ꠌꠥꠙꠠ ꠈꠥꠟꠤꠀ ꠍꠤꠋꠟꠣꠖꠤ ꠝꠣꠞꠣꠞ ꠢꠥꠇꠥꠝ ꠖꠤꠟꠣ।
ACT 16:23 ꠀꠞ ꠈꠥꠛ ꠜꠣꠟꠣꠐꠤꠇꠦ ꠍꠤꠋꠟꠣꠖꠤ ꠝꠣꠞꠤꠀ ꠔꠣꠞꠣꠞꠦ ꠎꠦꠟꠅ ꠢꠣꠞꠣꠁ ꠕꠁꠀ, ꠎꠦꠟꠞ ꠅꠚꠤꠡꠣꠞꠞꠦ ꠢꠥꠇꠥꠝ ꠖꠤꠟꠣ ꠇꠠꠣꠇꠠꠤ ꠙꠣꠢꠣꠞꠣ ꠖꠦꠅꠀꠞ ꠟꠣꠉꠤ।
ACT 16:24 ꠎꠦꠟꠞ ꠅꠚꠤꠡꠣꠞꠦ ꠁ ꠢꠥꠇꠥꠝ ꠙꠣꠁꠀ ꠢꠣꠞꠤ ꠔꠣꠞꠣꠞꠦ ꠎꠦꠟꠞ ꠜꠤꠔꠞꠞ ꠇꠥꠑꠣꠔ ꠢꠣꠞꠣꠁ ꠕꠁꠟꠣ, ꠀꠞ ꠔꠣꠞꠣꠞ ꠙꠣꠅꠔ ꠒꠣꠘ꠆ꠒꠣ-ꠛꠦꠠꠤ ꠟꠣꠉꠣꠁꠟꠣ।
ACT 16:25 ꠀꠗꠣ ꠞꠣꠁꠔꠇꠥꠞ ꠛꠣꠟꠣ ꠙꠣꠃꠟꠥꠍ ꠀꠞ ꠍꠤꠟꠣꠍꠦ ꠀꠟ꠆ꠟꠣꠞ ꠢꠣꠝꠖ-ꠉꠎꠟ ꠉꠣꠁꠔꠦ ꠉꠣꠁꠔꠦ ꠖꠥꠀ ꠇꠞꠣꠔ ꠀꠍꠟꠣ, ꠎꠦꠟꠞ ꠇꠄꠖꠤ ꠅꠇꠟꠦ ꠇꠣꠘ ꠙꠣꠔꠤꠀ ꠔꠣꠞꠣꠞ ꠉꠎꠟ ꠢꠥꠘꠟꠣ।
ACT 16:26 ꠅꠃ ꠡꠝꠄ ꠀꠈꠔꠣꠃ ꠛꠠ ꠄꠇ ꠜꠂꠍꠣꠟ ꠅꠁꠟ, ꠀꠡ꠆ꠔꠣ ꠎꠦꠟꠈꠣꠘꠣꠞ ꠜꠤꠔ ꠇꠣꠙꠤꠀ ꠃꠑꠟ। ꠎꠦꠟꠞ ꠢꠇꠟ ꠖꠥꠀꠞ ꠀꠞ ꠇꠄꠖꠤ ꠅꠇꠟꠞ ꠡꠤꠇꠟ ꠈꠥꠟꠤꠉꠦꠟ।
ACT 16:27 ꠔꠦꠃ ꠎꠦꠟꠞ ꠅꠚꠤꠡꠣꠞꠞ ꠊꠥꠝ ꠜꠣꠋꠟ ꠀꠞ ꠎꠦꠟꠞ ꠢꠇꠟ ꠖꠥꠀꠞ ꠈꠥꠟꠣ ꠖꠦꠈꠤꠀ ꠔꠣꠘ ꠔꠟꠥꠀꠞ ꠛꠣꠞ ꠇꠞꠤꠀ ꠘꠤꠎꠦ ꠘꠤꠎꠦ ꠈꠥꠘ ꠅꠁꠎꠤꠔꠣ ꠌꠣꠁꠟꠣ, ꠔꠣꠁꠘ ꠝꠘꠅ ꠇꠞꠟꠣ, ꠢꠇꠟ ꠇꠄꠖꠤ ꠜꠣꠉꠤꠀ ꠉꠦꠍꠂꠘꠉꠤ।
ACT 16:28 ꠅꠃ ꠙꠣꠃꠟꠥꠍꠦ ꠖꠦꠈꠤꠀ ꠌꠤꠟ꠆ꠟꠣꠁꠀ ꠇꠁꠟꠣ, “ꠖꠝ ꠟꠅ, ꠖꠝ ꠟꠅ, ꠘꠤꠎꠞ ꠈꠦꠔꠤ ꠇꠞꠤꠅ ꠘꠣ, ꠀꠝꠞꠣ ꠢꠇꠟꠃ ꠁꠈꠣꠘꠅ ꠞꠁꠍꠤ।”
ACT 16:29 ꠔꠦꠃ ꠅꠚꠤꠡꠣꠞꠦ ꠄꠇꠎꠘꠞꠦ ꠛꠣꠔ꠆ꠔꠤ ꠀꠘꠣꠞ ꠢꠥꠇꠥꠝ ꠖꠤꠀ, ꠔꠣꠁꠘ ꠖꠃꠠꠣꠁꠀ ꠉꠤꠀ ꠜꠤꠔꠞꠦ ꠢꠣꠝꠣꠁꠟꠣ, ꠀꠞ ꠒꠞꠞ ꠌꠥꠐꠦ ꠇꠣꠙꠤ ꠇꠣꠙꠤ ꠙꠣꠃꠟꠥꠍ ꠀꠞ ꠍꠤꠟꠣꠍꠞ ꠙꠣꠅꠔ ꠙꠠꠟꠣ;
ACT 16:30 ꠛꠣꠖꠦ ꠙꠣꠃꠟꠥꠍ ꠀꠞ ꠍꠤꠟꠣꠍꠞꠦ ꠛꠣꠞꠦ ꠀꠘꠤꠀ ꠎꠤꠇꠣꠁꠟꠣ, “ꠍꠣꠛ ꠅꠇꠟ, ꠀꠝꠤ ꠇꠤꠔꠣ ꠇꠞꠟꠦ ꠎꠣꠘꠦ ꠛꠣꠌꠔꠣꠝ ꠙꠣꠞꠝꠥ?”
ACT 16:31 ꠔꠣꠞꠣ ꠎꠥꠀꠙ ꠖꠤꠟꠣ, “ꠢꠎꠞꠔ ꠁꠍꠣꠞ ꠃꠙꠞꠦ ꠁꠝꠣꠘ ꠀꠘꠃꠇ꠆ꠇꠣ, ꠔꠦꠃ ꠀꠙꠘꠦ ꠀꠞ ꠀꠙꠘꠣꠞ ꠛꠣꠠꠤꠞ ꠢꠇꠟ ꠎꠣꠘꠦ ꠛꠣꠌꠛꠣ।”
ACT 16:32 ꠙꠣꠃꠟꠥꠍ ꠀꠞ ꠍꠤꠟꠣꠍꠦ ꠎꠦꠟꠞ ꠅꠚꠤꠡꠣꠞ ꠀꠞ ꠔꠣꠘ ꠛꠣꠠꠤꠞ ꠢꠇꠟꠞꠦ ꠝꠣꠟꠤꠇꠞ ꠇꠣꠟꠣꠝ ꠢꠥꠘꠣꠁꠟꠣ।
ACT 16:33 ꠀꠞ ꠢꠃ ꠞꠣꠁꠔꠃ ꠔꠣꠁꠘ ꠙꠣꠃꠟꠥꠍ ꠀꠞ ꠍꠤꠟꠣꠍꠞꠦ ꠟꠁꠀ ꠉꠤꠀ ꠔꠣꠞꠣꠞ ꠡꠞꠤꠟꠞ ꠇꠣꠐꠣ-ꠌꠤꠞꠣ ꠗꠁꠀ ꠖꠤꠟꠣ, ꠛꠣꠖꠦ ꠔꠣꠁꠘ ꠀꠞ ꠔꠣꠘ ꠛꠣꠠꠤꠞ ꠢꠇꠟꠦ ꠟꠉꠦ ꠟꠉꠦ ꠔꠃꠛꠣꠞ ꠉꠥꠍꠟ ꠇꠞꠟꠣ।
ACT 16:34 ꠀꠞ ꠔꠣꠞꠣꠞꠦ ꠔꠣꠘ ꠘꠤꠎꠞ ꠊꠞꠅ ꠘꠤꠀ ꠈꠣꠘꠣ ꠈꠣꠁꠔꠦ ꠖꠤꠟꠣ। ꠛꠣꠠꠤꠞ ꠢꠇꠟꠦ ꠝꠤꠟꠤ ꠀꠟ꠆ꠟꠣꠞ ꠃꠙꠞꠦ ꠁꠝꠣꠘ ꠀꠘꠤꠀ ꠛꠃꠔ ꠈꠥꠡꠤ ꠅꠁꠟꠣ।
ACT 16:35 ꠛꠣꠖꠞ ꠖꠤꠘ ꠛꠤꠀꠘꠦ ꠢꠣꠇꠤꠝ ꠅꠇꠟꠦ ꠙꠥꠟꠤꠡ ꠙꠣꠑꠣꠁꠀ ꠎꠣꠘꠣꠁꠟꠣ, “ꠁ ꠇꠄꠖꠤ ꠅꠇꠟꠞꠦ ꠍꠣꠠꠤ ꠖꠦꠅ।”
ACT 16:36 ꠔꠦꠃ ꠎꠦꠟꠞ ꠅꠚꠤꠡꠣꠞ ꠍꠣꠛꠦ ꠙꠣꠃꠟꠥꠍꠞꠦ ꠎꠣꠘꠣꠁꠟꠣ, “ꠢꠣꠇꠤꠝ ꠅꠇꠟꠦ ꠢꠥꠇꠥꠝ ꠖꠤꠍꠂꠘ ꠀꠙꠘꠣꠞꠣꠞꠦ ꠍꠣꠠꠤ ꠖꠤꠛꠣꠞ ꠟꠣꠉꠤ, ꠔꠦ ꠀꠙꠘꠣꠞꠣ ꠛꠣꠞ ꠅꠁꠀ ꠀꠃꠇ꠆ꠇꠣ ꠀꠞ ꠍꠢꠤ-ꠍꠣꠟꠣꠝꠔꠦ ꠔꠡꠞꠤꠚ ꠘꠦꠃꠇ꠆ꠇꠣ।”
ACT 16:37 ꠙꠣꠃꠟꠥꠍꠦ ꠔꠣꠞꠣꠞꠦ ꠇꠁꠟꠣ, “ꠀꠝꠞꠣ ꠞꠥꠝꠣꠘ ꠝꠣꠘꠥꠡ, ꠀꠝꠞꠣꠞ ꠇꠥꠘꠥ ꠛꠤꠌꠣꠞ ꠘꠣ ꠇꠞꠤꠀ ꠢꠇꠟꠞ ꠍꠣꠝꠘꠦ ꠍꠤꠋꠟꠣꠖꠤ ꠝꠣꠞꠍꠂꠘ ꠀꠞ ꠎꠦꠟꠅ ꠢꠣꠞꠣꠁꠍꠂꠘ। ꠅꠈꠘ ꠢꠣꠇꠤꠝ ꠅꠇꠟꠦ ꠀꠝꠞꠣꠞꠦ ꠟꠥꠇꠣꠁꠀ ꠍꠣꠠꠤ ꠖꠤꠔꠣ ꠌꠣꠁꠞꠣ? ꠁꠔꠣ ꠅꠁꠔ ꠘꠣꠄ, ꠔꠣꠞꠣ ꠘꠤꠎꠦ ꠀꠁꠀ ꠀꠝꠞꠣꠞꠦ ꠛꠣꠞ ꠇꠞꠤ ꠘꠦꠃꠇ꠆ꠇꠣ।”
ACT 16:38 ꠙꠥꠟꠤꠡꠦ ꠉꠤꠀ ꠢꠣꠇꠤꠝ ꠅꠇꠟꠞꠦ ꠅꠃ ꠇꠕꠣ ꠎꠣꠘꠣꠁꠟꠣ, ꠢꠣꠇꠤꠝ ꠅꠇꠟꠦ ꠙꠣꠃꠟꠥꠍ ꠀꠞ ꠍꠤꠟꠣꠍꠞꠦ ꠞꠥꠝꠣꠘ ꠝꠣꠘꠥꠡ ꠢꠥꠘꠤꠀ ꠒꠞꠣꠁꠉꠦꠟꠣ।
ACT 16:39 ꠔꠣꠞꠣ ꠙꠣꠃꠟꠥꠍ ꠀꠞ ꠍꠤꠟꠣꠍꠞ ꠉꠦꠍꠦ ꠀꠁꠀ ꠝꠣꠚ ꠌꠣꠁꠟꠣ, ꠀꠞ ꠔꠣꠞꠣꠞꠦ ꠛꠣꠞꠦ ꠘꠤꠀ ꠐꠣꠃꠘ ꠕꠣꠇꠤ ꠢꠞꠤ ꠎꠣꠅꠀꠞ ꠟꠣꠉꠤ ꠝꠤꠘꠔ ꠇꠞꠟꠣ।
ACT 16:40 ꠔꠦꠃ ꠔꠣꠞꠣ ꠎꠦꠟꠈꠣꠘꠣ ꠕꠣꠇꠤ ꠛꠣꠞ ꠅꠁꠀ ꠀꠁꠀ ꠛꠤꠛꠤ ꠟꠥꠖꠤꠀꠞ ꠛꠣꠠꠤꠔ ꠢꠣꠝꠣꠁꠟꠣ। ꠢꠤꠈꠣꠘꠅ ꠝꠥꠝꠤꠘ ꠅꠇꠟꠞ ꠟꠉꠦ ꠖꠦꠈꠣ-ꠡꠣꠇ꠆ꠇꠣꠔ ꠇꠞꠤꠀ ꠔꠣꠞꠣꠞꠦ ꠃꠔꠡꠣꠢ ꠖꠤꠟꠣ, ꠛꠣꠖꠦ ꠢꠘ ꠕꠣꠇꠤ ꠞꠅꠀꠘꠣ ꠅꠁꠟꠣ।
ACT 17:1 ꠢꠎꠞꠔ ꠙꠣꠃꠟꠥꠍ ꠀꠞ ꠍꠤꠟꠣꠍ ꠀꠝꠚꠤꠙꠥꠟꠤ ꠀꠞ ꠀꠙꠟ꠆ꠟꠥꠘꠤꠀ ꠐꠣꠃꠘꠞ ꠝꠣꠎꠦꠖꠤ ꠉꠤꠀ ꠕꠤꠡꠟꠘꠤꠇꠤꠔ ꠀꠁꠟꠣ। ꠢꠤꠘꠅ ꠁꠢꠥꠖꠤ ꠅꠇꠟꠞ ꠄꠇꠈꠣꠘ ꠝꠍꠤꠖ ꠀꠍꠤꠟ;
ACT 17:2 ꠙꠣꠃꠟꠥꠍ ꠔꠣꠘ ꠘꠤꠅꠝ ꠝꠔꠃ ꠢꠤ ꠝꠍꠤꠖꠅ ꠉꠦꠟꠣ, ꠀꠞ ꠟꠣꠉꠣ ꠟꠣꠉꠣ ꠔꠤꠘ ꠎꠥꠝ꠆ꠝꠣꠛꠣꠞꠦ ꠝꠣꠘꠡꠞꠦ ꠙꠣꠇ ꠇꠣꠟꠣꠝ ꠕꠣꠇꠤ ꠛꠥꠎꠣꠁꠟꠣ।
ACT 17:3 ꠔꠣꠁꠘ ꠛꠥꠎꠣꠁꠟꠣ ꠀꠞ ꠙꠞꠝꠣꠘꠅ ꠖꠦꠈꠣꠁꠟꠣ, ꠔꠇꠟꠤꠚ ꠡꠁꠎ꠆ꠎ ꠇꠞꠣ ꠀꠞ ꠝꠥꠞ꠆ꠖꠣ ꠕꠣꠇꠤ ꠎꠤꠘ꠆ꠖꠣ ꠅꠁꠀ ꠃꠑꠣ ꠀꠟ-ꠝꠍꠤꠞ ꠟꠣꠉꠤ ꠎꠞꠥꠞ ꠀꠍꠤꠟ। ꠔꠣꠁꠘ ꠇꠁꠟꠣ, “ꠅꠃ ꠎꠦ ꠁꠍꠣꠞ ꠇꠕꠣ ꠀꠝꠤ ꠀꠙꠘꠣꠞꠣꠞꠦ ꠛꠥꠎꠣꠁꠞꠣꠝ, ꠄꠁꠘꠃ ꠀꠟ-ꠝꠍꠤ।”
ACT 17:4 ꠁꠔꠣ ꠢꠥꠘꠤꠀ ꠄꠞꠣꠞ ꠝꠣꠎ ꠕꠣꠇꠤ ꠇꠄꠎꠘꠦ ꠁꠝꠣꠘ ꠀꠘꠤꠀ ꠙꠣꠃꠟꠥꠍ ꠀꠞ ꠍꠤꠟꠣꠍꠞ ꠟꠉꠦ ꠡꠞꠤꠇ ꠅꠁꠟꠣ। ꠛꠃꠔ ꠀꠟ꠆ꠟꠣꠞꠣꠁꠀ ꠁꠃꠘꠣꠘꠤ ꠛꠦꠐꠣꠁꠘ ꠀꠞ ꠈꠣꠘ꠆ꠖꠣꠘꠤ ꠛꠦꠐꠤꠘꠅ ꠔꠣꠞꠣꠞ ꠟꠉꠦ ꠡꠞꠤꠇ ꠅꠁꠟꠣ।
ACT 17:5 ꠅꠁꠟꠦ ꠁꠢꠥꠖꠤ ꠅꠇꠟꠦ ꠁꠋꠡꠣ ꠇꠞꠤꠀ ꠛꠣꠎꠣꠞꠤ ꠉꠥꠘ꠆ꠒꠣꠁꠘ ꠀꠘꠤꠀ ꠖꠟ ꠛꠣꠘꠣꠁꠟ ꠀꠞ ꠐꠣꠃꠘꠞ ꠝꠣꠎꠦ ꠉꠥꠟꠝꠣꠟ ꠟꠣꠉꠣꠁ ꠖꠤꠟ। ꠔꠣꠞꠣ ꠎꠣꠍꠥꠘꠞ ꠛꠣꠠꠤꠔ ꠢꠣꠝꠟꠣ ꠇꠞꠤꠀ ꠙꠣꠃꠟꠥꠍ ꠀꠞ ꠍꠤꠟꠣꠍꠞꠦ ꠔꠥꠇꠣꠁꠀ ꠝꠣꠘꠡꠞ ꠍꠣꠝꠘꠦ ꠀꠘꠔ ꠌꠣꠁꠟ।
ACT 17:6 ꠅꠁꠟꠦ ꠄꠞꠣꠞꠦ ꠘꠣ ꠙꠣꠁꠀ ꠔꠣꠞꠣ ꠎꠣꠍꠥꠘ ꠀꠞ ꠀꠞꠅ ꠇꠄꠎꠘ ꠝꠥꠝꠤꠘꠞꠦ ꠐꠣꠘꠤꠀ ꠍꠦꠌꠠꠣꠁꠀ ꠐꠣꠃꠘꠞ ꠡꠞ꠆ꠖꠣꠞ ꠅꠇꠟꠞ ꠉꠦꠍꠦ ꠟꠁꠀ ꠉꠦꠟ, ꠀꠞ ꠌꠤꠟ꠆ꠟꠣꠁ ꠌꠤꠟ꠆ꠟꠣꠁ ꠇꠁꠟ, “ꠅꠃ ꠛꠦꠐꠣꠁꠘ꠆ꠔꠦ ꠀꠡ꠆ꠔꠣ ꠖꠥꠘꠤꠀꠞꠦ ꠟꠘ꠆ꠒꠜꠘ꠆ꠒ ꠇꠞꠤꠀ ꠅꠈꠘ ꠅꠘꠅ-ꠅ ꠀꠁꠍꠦ।
ACT 17:7 ꠀꠞ ꠅꠃ ꠎꠣꠍꠥꠘꠦ ꠔꠣꠞ ꠘꠤꠎꠞ ꠛꠣꠠꠤꠔ ꠄꠞꠣꠞꠦ ꠝꠦꠝꠣꠘꠖꠣꠞꠤ ꠇꠞꠍꠦ; ꠄꠞꠣ ꠢꠇꠟꠦ ꠀꠝꠞꠣꠞ ꠛꠣꠖꠡꠣ ꠇꠂꠍꠞꠞ ꠢꠥꠇꠥꠝ ꠘꠣ ꠝꠣꠘꠤꠀ ꠇꠁꠞꠣ, ꠔꠣꠁꠘ ꠍꠣꠠꠣ ꠁꠍꠣ ꠘꠣꠝꠦ ꠀꠞꠇ ꠎꠘ ꠛꠣꠖꠡꠣ ꠀꠍꠂꠘ।”
ACT 17:8 ꠅꠃ ꠟꠣꠈꠣꠘ ꠝꠣꠔ ꠝꠣꠔꠤꠀ ꠔꠣꠞꠣ ꠡꠞ꠆ꠖꠣꠞ ꠅꠇꠟꠞꠦ ꠀꠞ ꠀꠝ ꠝꠣꠘꠡꠞꠦꠅ ꠃꠍꠟꠣꠁꠀ ꠖꠤꠟ।
ACT 17:9 ꠡꠞ꠆ꠖꠣꠞ ꠅꠇꠟꠦ ꠎꠣꠍꠥꠘ ꠀꠞ ꠔꠣꠘ ꠟꠉꠞ ꠢꠇ꠆ꠇꠟꠞ ꠎꠣꠝꠣꠘꠔ ꠟꠁꠀ ꠎꠣꠝꠤꠘꠦ ꠍꠣꠠꠤ ꠖꠤꠟꠣ।
ACT 17:10 ꠞꠣꠁꠔ ꠅꠀꠞ ꠛꠣꠖꠦ ꠝꠥꠝꠤꠘ ꠅꠇꠟꠦ ꠎꠟꠖꠤ ꠇꠞꠤ ꠙꠣꠃꠟꠥꠍ ꠀꠞ ꠍꠤꠟꠣꠍꠞꠦ ꠛꠤꠞꠄꠀꠔ ꠙꠣꠑꠣꠁ ꠖꠤꠟꠣ। ꠢꠤꠈꠣꠘꠅ ꠉꠤꠀ ꠢꠣꠞꠟꠦ ꠔꠣꠞꠣ ꠁꠢꠥꠖꠤꠞ ꠝꠍꠤꠖꠅ ꠀꠁꠟꠣ।
ACT 17:11 ꠕꠤꠡꠟꠘꠤꠇꠤꠞ ꠁꠢꠥꠖꠤ ꠅꠇꠟ ꠕꠣꠇꠤ ꠛꠤꠞꠄꠀ ꠐꠣꠃꠘꠞ ꠁꠢꠥꠖꠤ ꠅꠇꠟ ꠛꠃꠔ ꠈꠥꠟꠣ-ꠝꠦꠟꠣ ꠀꠍꠟꠣ। ꠔꠣꠞꠣ ꠀꠟ꠆ꠟꠣꠞ ꠇꠣꠟꠣꠝ ꠢꠥꠘꠤꠀ ꠈꠥꠛ ꠉꠞꠎꠤ ꠅꠁꠀ ꠇꠛꠥꠟ ꠇꠞꠟꠣ, ꠀꠞ ꠙꠣꠃꠟꠥꠍꠦ ꠎꠦꠔꠣ ꠔꠣꠟꠤꠝ ꠖꠤꠞꠣ ꠁꠔꠣ ꠢꠣꠍꠣ ꠇꠤ ꠘꠣ ꠖꠦꠈꠣꠞ ꠟꠣꠉꠤ ꠔꠣꠞꠣ ꠙꠞꠔꠦꠇ ꠖꠤꠘ ꠀꠍꠝꠣꠘꠤ ꠇꠤꠔꠣꠛ ꠈꠥꠟꠤꠀ ꠝꠤꠟꠣꠁꠔꠣ।
ACT 17:12 ꠔꠣꠞꠣꠞ ꠝꠣꠎ ꠕꠣꠇꠤ ꠛꠃꠔ ꠁꠢꠥꠖꠤꠄ, ꠀꠞ ꠁꠃꠘꠣꠘꠤ ꠕꠣꠇꠤꠅ ꠛꠃꠔ ꠈꠣꠘ꠆ꠖꠣꠘꠤ ꠛꠦꠐꠣꠁꠘ-ꠛꠦꠐꠤꠘ꠆ꠔꠦ ꠁꠍꠣꠞ ꠃꠙꠞꠦ ꠁꠝꠣꠘ ꠀꠘꠟꠣ।
ACT 17:13 ꠅꠁꠟꠦ ꠕꠤꠡꠟꠘꠤꠇꠤꠞ ꠁꠢꠥꠖꠤ ꠅꠇꠟꠦ ꠎꠦꠛꠟꠣ ꠢꠥꠘꠟ, ꠙꠣꠃꠟꠥꠍꠦ ꠛꠤꠞꠄꠀꠔ ꠀꠁꠀꠅ ꠔꠛꠟꠤꠉ ꠇꠞꠞꠣ, ꠅꠃ ꠔꠣꠞꠣꠅ ꠛꠤꠞꠄꠀꠔ ꠀꠁꠀ ꠢꠤꠘꠞ ꠝꠣꠘꠡꠞꠦ ꠃꠍꠟꠣꠁꠀ ꠉꠥꠟꠝꠣꠟ ꠟꠣꠉꠣꠁꠟ।
ACT 17:14 ꠁꠔꠣ ꠢꠥꠘꠤꠀꠃ ꠝꠥꠝꠤꠘ ꠅꠇꠟꠦ ꠙꠣꠃꠟꠥꠍꠞꠦ ꠖꠞꠤꠀꠞ ꠙꠣꠞꠅ ꠙꠣꠑꠣꠁ ꠖꠤꠟꠣ, ꠅꠁꠟꠦ ꠍꠤꠟꠣꠍ ꠀꠞ ꠔꠤꠝꠕꠤ ꠛꠤꠞꠄꠀꠔꠃ ꠞꠁꠟꠣ।
ACT 17:15 ꠙꠣꠃꠟꠥꠍꠞꠦ ꠟꠁꠀ ꠎꠦꠞꠣ ꠞꠅꠀꠘꠣ ꠅꠁꠍꠤꠟ, ꠔꠣꠞꠣ ꠔꠣꠘꠞꠦ ꠟꠁꠀ ꠀꠕꠤꠘꠤꠀꠔ ꠉꠦꠟꠣ। ꠉꠤꠀ ꠢꠣꠞꠟꠦ ꠙꠣꠃꠟꠥꠍꠦ ꠔꠣꠞꠣꠞꠦ ꠇꠁꠟꠣ, ꠍꠤꠟꠣꠍ ꠀꠞ ꠔꠤꠝꠕꠤꠞꠦ ꠈꠥꠛ ꠎꠟꠖꠤ ꠇꠞꠤ ꠔꠣꠘ ꠉꠦꠍꠦ ꠙꠣꠑꠣꠘꠤꠞ ꠟꠣꠉꠤ, ꠇꠁꠀ ꠔꠣꠞꠣꠞꠦ ꠛꠤꠖꠣꠄ ꠖꠤꠟꠣꠁꠟꠣ।
ACT 17:16 ꠀꠕꠤꠘꠤꠀꠔ ꠀꠁꠀ ꠢꠎꠞꠔ ꠙꠣꠃꠟꠥꠍꠦ ꠎꠦꠛꠟꠣ ꠍꠤꠟꠣꠍ ꠀꠞ ꠔꠤꠝꠕꠤꠞ ꠟꠣꠉꠤ ꠛꠣꠞ ꠌꠣꠁꠞꠣ, ꠅꠃ ꠡꠝꠄ ꠔꠣꠁꠘ ꠖꠦꠈꠟꠣ ꠢꠤ ꠐꠣꠃꠘꠞ ꠝꠣꠎꠦ ꠝꠥꠞ꠆ꠔꠤꠄ ꠜꠞꠣ, ꠖꠦꠈꠤꠀ ꠔꠣꠘ ꠝꠘꠞ ꠝꠣꠎꠦ ꠈꠥꠛ ꠇꠡ꠆ꠐ ꠙꠣꠁꠟꠣ।
ACT 17:17 ꠅꠃ ꠔꠣꠁꠘ ꠁꠢꠥꠖꠤ ꠝꠍꠤꠖꠅ ꠉꠤꠀ ꠁꠢꠥꠖꠤ ꠀꠞ ꠀꠟ꠆ꠟꠣꠞꠣꠁꠀ ꠁꠃꠘꠣꠘꠤ ꠅꠇꠟꠞꠦ, ꠀꠞ ꠙꠞꠔꠤꠖꠤꠘ ꠛꠣꠎꠣꠞꠅ ꠉꠤꠀꠅ ꠎꠦꠞꠣꠞ ꠟꠉꠦ ꠖꠦꠈꠣ ꠅꠁꠔ, ꠔꠣꠞꠣꠞ ꠟꠉꠦꠅ ꠢꠎꠞꠔ ꠁꠍꠣꠞ ꠛꠦꠙꠣꠞꠦ ꠛꠣꠔꠌꠤꠔ ꠇꠞꠔꠣ।
ACT 17:18 ꠔꠦꠃ ꠁꠚꠤꠇꠥꠞꠤ ꠀꠞ ꠡ꠆ꠔꠥꠁꠇꠤ ꠝꠔꠛꠣꠖꠞ ꠇꠄꠎꠘ ꠙꠘ꠆ꠒꠤꠔꠦ ꠔꠣꠘ ꠟꠉꠦ ꠔꠞ꠆ꠇ ꠟꠣꠉꠣꠁꠟꠣ, ꠔꠣꠞꠣ ꠇꠄꠎꠘꠦ ꠇꠁꠟꠣ, “ꠁ ꠛꠇ-ꠛꠇ ꠇꠞꠞꠣꠄ ꠇꠤꠔꠣ ꠢꠤꠇꠣꠁꠔ ꠌꠣꠄ?” ꠀꠞ ꠇꠦꠃ ꠇꠦꠃ ꠇꠁꠟ, “ꠝꠘꠦ ꠇꠄ ꠢꠦ ꠇꠥꠘꠥ ꠛꠤꠖꠦꠡꠤ ꠖꠦꠛꠔꠣꠁꠘ꠆ꠔꠞ ꠇꠕꠣ ꠎꠣꠘꠣꠁꠔ ꠌꠣꠞ।” ꠇꠣꠞꠘ ꠙꠣꠃꠟꠥꠍꠦ ꠢꠎꠞꠔ ꠁꠍꠣ ꠀꠞ ꠝꠥꠞ꠆ꠖꠣ ꠕꠣꠇꠤ ꠎꠤꠘ꠆ꠖꠣ ꠅꠀꠞ ꠈꠥꠡ-ꠈꠛꠞꠤꠞ ꠇꠕꠣ ꠔꠛꠟꠤꠉ ꠇꠞꠍꠤꠟꠣ।
ACT 17:19 ꠛꠣꠖꠦ ꠔꠣꠞꠣ ꠙꠣꠃꠟꠥꠍꠞꠦ ꠀꠘꠤꠀ ꠀꠞꠦꠅ-ꠙꠣꠉꠞ ꠝꠎꠟꠤꠍꠅ ꠘꠤꠀ ꠀꠎꠤꠞ ꠇꠞꠟꠣ, ꠀꠞ ꠔꠣꠘꠞꠦ ꠎꠤꠇꠣꠁꠟꠣ, “ꠅꠃ ꠎꠦꠔꠣ ꠘꠄꠀ ꠡꠤꠇ꠆ꠇꠣ ꠀꠙꠘꠦ ꠇꠁꠞꠣ, ꠁꠔꠣ ꠇꠤꠔꠣ ꠀꠝꠞꠣꠞꠦꠅ ꠢꠥꠘꠣꠁꠛꠣ ꠘꠤ?
ACT 17:20 ꠀꠙꠘꠦ ꠔ ꠇꠤꠍꠥ ꠀꠎꠉꠥꠛꠤ ꠝꠣꠔ ꠝꠣꠔꠤꠞꠣ, ꠔꠦ ꠀꠝꠞꠣ ꠎꠣꠘꠔꠣꠝ ꠌꠣꠁꠞꠣꠝ ꠄꠞ ꠀꠍꠟ ꠝꠣꠘꠤꠈꠣꠘ ꠇꠤꠔꠣ।”
ACT 17:21 ꠀꠕꠤꠘꠤꠀ ꠐꠣꠃꠘꠞ ꠝꠣꠘꠡꠦ ꠀꠞ ꠢꠤꠘꠅ ꠞꠅꠞꠣ ꠝꠥꠍꠣꠚꠤꠞ ꠅꠇꠟꠦꠅ ꠈꠣꠟꠤ ꠘꠄꠀ ꠘꠄꠀ ꠛꠦꠙꠣꠞꠞ ꠝꠣꠔ ꠝꠣꠔꠤꠀ ꠛꠣ ꠢꠥꠘꠤꠀ ꠔꠣꠞꠣꠞ ꠖꠤꠘ ꠇꠣꠐꠣꠁꠔꠣ।
ACT 17:22 ꠔꠦꠃ ꠢꠎꠞꠔ ꠙꠣꠃꠟꠥꠍꠦ ꠀꠞꠦꠅ-ꠙꠣꠉꠞ ꠝꠎꠟꠤꠍꠞ ꠝꠣꠎꠈꠣꠘꠅ ꠃꠛꠣꠁꠀ ꠇꠁꠟꠣ, “ꠅ ꠀꠕꠤꠘꠤꠀꠞ ꠝꠣꠘꠥꠡ ꠅꠇꠟ, ꠀꠝꠤ ꠖꠦꠈꠞꠣꠝ, ꠀꠙꠘꠣꠞꠣ ꠢꠇꠟ ꠇꠣꠝꠅꠃ ꠈꠥꠛ ꠖꠦꠛꠔꠣ ꠜꠎꠂꠘ।
ACT 17:23 ꠀꠝꠤ ꠎꠦꠛꠟꠣ ꠙꠣꠈꠣꠘꠤꠔ ꠉꠦꠍꠟꠣꠝ, ꠅꠃ ꠡꠝꠄ ꠀꠙꠘꠣꠁꠘ꠆ꠔꠞ ꠙꠥꠎꠣꠞ ꠢꠇꠟꠔꠣ ꠊꠥꠞꠤꠀ ꠖꠦꠈꠟꠣꠝ, ꠀꠝꠤ ꠖꠦꠈꠟꠣꠝ ꠄꠇ ꠙꠣꠔ꠆ꠔꠞꠞ ꠝꠣꠎꠦ ꠟꠦꠈꠣ ꠀꠍꠦ, ‘ꠅꠌꠤꠘꠣ ꠖꠦꠛꠔꠣꠞ ꠘꠣꠝꠦ।’ ꠔꠦ ꠢꠥꠘꠃꠇ꠆ꠇꠣ, ꠀꠙꠘꠣꠞꠣ ꠘꠣ-ꠌꠤꠘꠤꠀ ꠎꠦꠘ ꠙꠥꠎꠣ ꠇꠞꠞꠣ, ꠀꠝꠤ ꠔꠣꠘ ꠇꠕꠣꠃ ꠀꠙꠘꠣꠁꠘ꠆ꠔꠞ ꠉꠦꠍꠦ ꠔꠛꠟꠤꠉ ꠇꠞꠞꠣꠝ।
ACT 17:24 ꠀꠟ꠆ꠟꠣ ꠙꠣꠇ, ꠎꠦꠁꠘ ꠁ ꠖꠥꠘꠤꠀ ꠀꠞ ꠄꠞ ꠝꠣꠎꠞ ꠢꠇꠟꠔꠣ ꠙꠄꠖꠣ ꠇꠞꠍꠂꠘ, ꠔꠣꠁꠘ ꠛꠦꠢꠦꠡ꠆ꠔ ꠀꠞ ꠖꠥꠘꠤꠀꠞ ꠝꠣꠟꠤꠇ, ꠔꠣꠁꠘ ꠔ ꠝꠣꠘꠡꠞ ꠛꠣꠘꠣꠁꠟ ꠇꠥꠘꠥ ꠝꠘ꠆ꠖꠤꠞꠅ ꠛꠡꠔ ꠇꠞꠂꠘ ꠘꠣ।
ACT 17:25 ꠔꠣꠘ ꠇꠥꠘꠥ ꠅꠜꠣꠛ ꠘꠣꠁ ꠉꠔꠤꠇꠦ ꠝꠣꠘꠡꠞ ꠉꠦꠍ ꠕꠣꠇꠤ ꠇꠥꠘꠥꠔꠣ ꠘꠦꠅꠀꠞꠅ ꠉꠞꠎ ꠘꠣꠁ, ꠔꠣꠁꠘꠃ ꠔ ꠢꠇ꠆ꠇꠟ ꠝꠣꠘꠡꠞ ꠎꠣꠘ, ꠖꠝ, ꠀꠞ ꠢꠇꠟꠔꠣ ꠖꠣꠘ ꠇꠞꠂꠘ।
ACT 17:26 ꠔꠣꠁꠘ ꠄꠇꠎꠘ ꠝꠣꠘꠥꠡ ꠕꠣꠇꠤ ꠢꠇ꠆ꠇꠟ ꠎꠣꠔꠞ ꠝꠣꠘꠥꠡ ꠙꠄꠖꠣ ꠇꠞꠍꠂꠘ, ꠀꠡ꠆ꠔꠣ ꠖꠥꠘꠤꠀꠁ ꠎꠥꠠꠤ ꠛꠡꠔ ꠇꠞꠣꠞ ꠟꠣꠉꠤ। ꠔꠣꠞꠣ ꠇꠥꠘ ꠀꠝꠟꠅ ꠇꠥꠘꠣꠘꠅ ꠛꠡꠔ ꠇꠞꠛꠣ ꠁꠐꠣꠅ ꠔꠣꠁꠘ ꠚꠄꠍꠣꠟꠣ ꠇꠞꠤ ꠖꠤꠍꠂꠘ।
ACT 17:27 ꠀꠟ꠆ꠟꠣꠄ ꠁ ꠇꠣꠝ ꠇꠞꠍꠂꠘ ꠎꠣꠔꠦ ꠝꠣꠘꠡꠦ ꠔꠣꠘꠞꠦ ꠔꠣꠟ꠆ꠟꠣꠡ ꠇꠞꠂꠘ, ꠀꠞ ꠔꠥꠇꠣꠁ ꠔꠥꠇꠣꠁ ꠔꠣꠘ ꠖꠤꠖꠣꠞ ꠙꠣꠁꠘ। ꠅꠕꠌ ꠔꠣꠁꠘ ꠀꠝꠞꠣ ꠇꠦꠃꠞꠞ ꠉꠦꠍ ꠕꠣꠇꠤ ꠖꠥꠞꠁ ꠘꠣꠄ।
ACT 17:28 ꠀꠙꠘꠣꠁꠘ꠆ꠔꠞ ꠇꠄꠎꠘ ꠇꠛꠤꠄꠅ ꠇꠁꠍꠂꠘ, ‘ꠔꠣꠘ ꠇꠥꠖꠞꠔꠦꠃ ꠀꠝꠞꠣꠞ ꠎꠤꠘ꠆ꠖꠦꠉꠤ, ꠉꠔꠤ ꠀꠞ ꠑꠣꠁ।’ ꠀꠞ, ‘ꠀꠝꠞꠣꠅ ꠔꠣꠘ ꠅꠀꠞꠤꠡ।’
ACT 17:29 “ꠀꠞ ꠀꠝꠞꠣ ꠎꠦꠛꠟꠣ ꠀꠟ꠆ꠟꠣꠞ ꠅꠀꠞꠤꠡ, ꠔꠦ ꠀꠟ꠆ꠟꠣꠞ ꠍꠥꠞꠔꠞꠦ ꠝꠣꠘꠡꠞ ꠈꠤꠀꠟ-ꠝꠞ꠆ꠎꠤꠄ ꠛꠣꠘꠣꠁꠟ ꠡꠥꠘꠣ-ꠞꠥꠙꠣ ꠛꠣ ꠙꠣꠔ꠆ꠔꠞꠞ ꠝꠥꠞ꠆ꠔꠤ ꠝꠘꠅ ꠇꠞꠣ ꠀꠝꠞꠣꠞ ꠟꠣꠉꠤ ꠃꠌꠤꠔ ꠘꠣꠄ।
ACT 17:30 ꠀꠉꠞ ꠎꠝꠣꠘꠣꠞ ꠝꠣꠘꠡꠦ ꠁꠔꠣ ꠎꠣꠘꠔꠣ ꠘꠣ ꠉꠔꠤꠇꠦ ꠀꠟ꠆ꠟꠣꠄ ꠁꠔꠣꠞꠦ ꠇꠍꠥꠞ ꠝꠘꠅ ꠇꠞꠍꠂꠘ ꠘꠣ, ꠅꠁꠟꠦ ꠅꠈꠘ ꠔꠣꠁꠘ ꠢꠇꠟ ꠎꠣꠉꠣꠞ ꠢꠇ꠆ꠇꠟ ꠝꠣꠘꠡꠞꠦ ꠝꠘ ꠛꠖꠟꠣꠁꠀ ꠔꠃꠛꠣ ꠇꠞꠣꠞ ꠟꠣꠉꠤ ꠢꠥꠇꠥꠝ ꠖꠤꠞꠣ।
ACT 17:31 ꠔꠣꠁꠘ ꠔ ꠅꠃꠟꠣ ꠄꠇ ꠖꠤꠘꠅ ꠑꠤꠇ ꠇꠞꠍꠂꠘ, ꠎꠦꠖꠤꠘ ꠔꠣꠘ ꠙꠍꠘ꠆ꠖꠞ ꠢꠇ꠆ꠇꠣꠘꠤ ꠝꠣꠘꠡꠞ ꠀꠔꠣꠘꠦ ꠖꠤꠘ-ꠖꠥꠘꠤꠀꠞ ꠢꠇ ꠛꠤꠌꠣꠞ ꠇꠞꠣꠁꠛꠣ। ꠁꠐꠣꠞꠦ ꠄꠇꠤꠘ ꠇꠞꠣꠞ ꠟꠣꠉꠤ ꠔꠣꠁꠘ ꠢꠃ ꠝꠣꠘꠡꠞꠦ ꠝꠥꠞ꠆ꠖꠣ ꠕꠣꠇꠤ ꠎꠤꠘ꠆ꠖꠣ ꠇꠞꠤꠀ ꠄꠞ ꠙꠞꠝꠣꠘꠅ ꠖꠦꠈꠣꠁꠍꠂꠘ।”
ACT 17:32 ꠝꠥꠞ꠆ꠖꠣ ꠅꠇꠟ ꠢꠤꠞꠛꠣꠞ ꠎꠤꠘ꠆ꠖꠣ ꠅꠁꠀ ꠃꠑꠛꠣ ꠁꠈꠣꠘ ꠢꠥꠘꠤꠀ ꠇꠦꠃ ꠇꠦꠃ ꠀꠡꠣ-ꠀꠡꠤ ꠇꠞꠟ, ꠀꠞ ꠇꠦꠃ ꠇꠦꠃ ꠇꠁꠟ, “ꠀꠙꠘꠣꠞ ꠁ ꠛꠦꠙꠣꠞꠈꠣꠘ ꠀꠝꠞꠣ ꠀꠞꠇꠛꠣꠞ ꠢꠥꠘꠝꠥ।”
ACT 17:33 ꠅꠃ ꠟꠣꠈꠣꠘ ꠇꠞꠤ ꠙꠣꠃꠟꠥꠍꠦ ꠢꠤ ꠝꠎꠟꠤꠍ ꠕꠣꠇꠤ ꠃꠑꠤꠀ ꠉꠦꠟꠣꠉꠤ।
ACT 17:34 ꠅꠁꠟꠦ ꠇꠦꠃ ꠇꠦꠃ ꠔꠣꠘ ꠟꠉꠦ ꠄꠇꠝꠔ ꠅꠁꠟꠣ ꠀꠞ ꠁꠝꠣꠘꠅ ꠀꠘꠟꠣ। ꠄꠞꠣꠞ ꠝꠣꠎꠦ ꠖꠤꠅꠘꠥꠍꠤꠅ ꠘꠣꠝꠦ ꠀꠞꠦꠅ-ꠙꠣꠉꠞ ꠄꠇꠎꠘ ꠝꠦꠝ꠆ꠛꠣꠞ, ꠖꠣꠝꠣꠞꠤꠍ ꠘꠣꠝꠞ ꠄꠇꠎꠘ ꠛꠦꠐꠤ ꠝꠣꠘꠥꠡ ꠀꠞ ꠀꠞꠅ ꠇꠄꠎꠘꠦ ꠁꠝꠣꠘ ꠀꠘꠟꠣ।
ACT 18:1 ꠛꠣꠖꠦ ꠢꠎꠞꠔ ꠙꠣꠃꠟꠥꠍ ꠀꠕꠤꠘꠤꠀ ꠍꠣꠠꠤꠀ ꠇꠞꠤꠘ꠆ꠔ ꠐꠣꠃꠘꠅ ꠀꠁꠟꠣ।
ACT 18:2 ꠢꠤꠘꠅ ꠀꠁꠀ ꠢꠣꠞꠟꠦ ꠀꠇꠤꠟ ꠘꠣꠝꠞ ꠄꠇꠎꠘ ꠁꠢꠥꠖꠤꠞ ꠟꠉꠦ ꠔꠣꠘ ꠖꠦꠈꠣ ꠅꠁꠟ। ꠄꠘ ꠛꠣꠠꠤ ꠙꠘ꠆ꠔ ꠖꠦꠡꠅ, ꠞꠥꠝꠣꠘ ꠛꠣꠖꠡꠣ ꠇꠦꠟꠣꠖꠥꠍꠦ ꠁꠢꠥꠖꠤ ꠅꠇꠟꠞꠦ ꠞꠥꠝ ꠕꠣꠇꠤ ꠢꠞꠤ ꠎꠣꠅꠀꠞ ꠢꠥꠇꠥꠝ ꠖꠤꠍꠟꠣ ꠉꠔꠤꠇꠦ, ꠀꠇꠤꠟꠦ ꠔꠣꠘ ꠛꠃ ꠚꠤꠍꠇꠤꠟꠣꠞꠦ ꠟꠉꠦ ꠟꠁꠀ ꠕꠥꠠꠣ ꠇꠄꠖꠤꠘ ꠀꠉꠦ ꠁꠔꠣꠟꠤ ꠕꠣꠇꠤ ꠇꠞꠤꠘ꠆ꠔꠔ ꠀꠁꠍꠟꠣ। ꠙꠣꠃꠟꠥꠍ ꠔꠣꠞꠣꠞ ꠇꠣꠘ꠆ꠖꠣꠔ ꠉꠦꠟꠣ।
ACT 18:3 ꠔꠣꠁꠘꠅ ꠔꠣꠞꠣꠞ ꠟꠣꠈꠣꠘ ꠔꠣꠝ꠆ꠛꠥ ꠛꠣꠘꠣꠘꠤꠞ ꠇꠣꠝ ꠇꠞꠔꠣ ꠉꠔꠤꠇꠦ ꠔꠣꠁꠘ ꠔꠣꠞꠣꠞ ꠟꠉꠦ ꠞꠁꠀ ꠅꠃ ꠇꠣꠝꠅ ꠟꠣꠉꠟꠣ।
ACT 18:4 ꠙꠞꠔꠦꠇ ꠎꠥꠝ꠆ꠝꠣꠛꠣꠞꠦ ꠙꠣꠃꠟꠥꠍ ꠁꠢꠥꠖꠤ ꠝꠍꠤꠖꠅ ꠉꠤꠀ ꠁꠍꠣꠞ ꠛꠦꠙꠣꠞꠦ ꠛꠣꠔꠌꠤꠔ ꠇꠞꠔꠣ, ꠔꠣꠁꠘ ꠁꠃꠘꠣꠘꠤ ꠀꠞ ꠁꠢꠥꠖꠤ ꠅꠇꠟꠞꠦ ꠁꠝꠣꠘ ꠀꠘꠣꠞ ꠟꠣꠉꠤ ꠔꠣꠉꠤꠖ ꠖꠤꠔꠣ।
ACT 18:5 ꠢꠎꠞꠔ ꠍꠤꠟꠣꠍ ꠀꠞ ꠔꠤꠝꠕꠤ ꠝꠣꠇꠤꠖꠘꠤꠀ ꠕꠣꠇꠤ ꠀꠁꠀ ꠢꠣꠞꠟꠦ, ꠙꠣꠃꠟꠥꠍꠦ ꠈꠣꠟꠤ ꠀꠟ꠆ꠟꠣꠞ ꠇꠣꠟꠣꠝꠞ ꠔꠛꠟꠤꠉ ꠇꠞꠔꠣ। ꠔꠣꠁꠘ ꠁꠢꠥꠖꠤ ꠅꠇꠟꠞꠦ ꠛꠥꠎꠣꠁꠔꠣ, ꠢꠎꠞꠔ ꠁꠍꠣꠃ ꠅꠁꠟꠣ ꠀꠟ-ꠝꠍꠤ ꠝꠣꠘꠤ ꠀꠟ꠆ꠟꠣꠞ ꠈꠣꠍ ꠙꠍꠘ꠆ꠖ ꠇꠞꠣ ꠎꠘ।
ACT 18:6 ꠅꠁꠟꠦ ꠁꠢꠥꠖꠤ ꠅꠇꠟꠦ ꠎꠦꠛꠟꠣ ꠙꠣꠃꠟꠥꠍꠞ ꠛꠤꠞꠥꠗꠤꠔꠣ ꠀꠞ ꠛꠖꠘꠣꠝ ꠉꠣꠅꠀꠔ ꠟꠣꠉꠟꠣ, ꠁ ꠡꠝꠄ ꠔꠣꠁꠘ ꠘꠤꠎꠞ ꠟꠦꠛꠣꠍꠞ ꠗꠥꠁꠟ ꠏꠣꠠꠤꠀ ꠚꠣꠟꠣꠁꠀ ꠇꠁꠟꠣ, “ꠀꠙꠘꠣꠁꠘ꠆ꠔꠞ ꠟꠃꠞ ꠖꠣꠄ ꠀꠙꠘꠣꠁꠘ꠆ꠔꠞ ꠝꠣꠕꠣꠔꠃ ꠞꠃꠇ। ꠀꠝꠤ ꠀꠝꠣꠞ ꠖꠣꠄꠁꠔ꠆ꠔ ꠕꠣꠇꠤ ꠈꠣꠟꠣꠍ ꠙꠣꠁꠟꠣꠝ। ꠅꠈꠘ ꠕꠣꠇꠤ ꠅ-ꠁꠢꠥꠖꠤ ꠅꠇꠟꠞ ꠝꠥꠈꠣ ꠙꠕ ꠗꠞꠟꠣꠝ।”
ACT 18:7 ꠇꠁꠀ ꠢꠣꠞꠤ ꠢꠘ ꠕꠣꠇꠤ ꠔꠤꠔꠤꠅ-ꠁꠃꠍꠔꠥꠍ ꠘꠣꠝꠞ ꠄꠇꠎꠘ ꠀꠟ꠆ꠟꠣꠞꠣꠁꠀ ꠝꠣꠘꠡꠞ ꠛꠣꠠꠤꠔ ꠉꠦꠟꠣ। ꠄꠘ ꠛꠣꠠꠤ ꠀꠍꠤꠟ ꠝꠍꠤꠖꠞ ꠟꠉꠦ।
ACT 18:8 ꠝꠍꠤꠖꠞ ꠝꠥꠔꠟ꠆ꠟꠤ ꠇꠤꠞꠤꠡꠙꠅ ꠍꠣꠛ ꠀꠞ ꠔꠣꠘ ꠛꠣꠠꠤꠞ ꠢꠇꠟꠦ ꠝꠣꠟꠤꠇꠞ ꠃꠙꠞꠦ ꠁꠝꠣꠘ ꠀꠘꠟꠣ। ꠀꠞ ꠙꠣꠃꠟꠥꠍꠞ ꠛꠄꠀꠘ ꠢꠥꠘꠤꠀ ꠇꠞꠤꠘ꠆ꠔꠤꠅ ꠅꠇꠟꠞ ꠝꠣꠎꠦ ꠛꠃꠔꠦ ꠁꠝꠣꠘ ꠀꠘꠤꠀ ꠔꠃꠛꠣꠞ ꠉꠥꠍꠟ ꠇꠞꠟꠣ।
ACT 18:9 ꠞꠣꠁꠔꠞ ꠛꠣꠟꠣ ꠝꠣꠛꠥꠖꠦ ꠙꠣꠃꠟꠥꠍꠞꠦ ꠖꠞꠡꠘ ꠖꠤꠀ ꠇꠁꠟꠣ, “ꠒꠞꠣꠁꠅ ꠘꠣ, ꠔꠛꠟꠤꠉ ꠌꠣꠟꠣꠁꠀ ꠎꠣꠅ, ꠝꠥꠈ ꠛꠘ꠆ꠖ ꠇꠞꠤꠅ ꠘꠣ।
ACT 18:10 ꠀꠝꠤ ꠔꠥꠝꠣꠞ ꠟꠉꠦ ꠟꠉꠦ ꠀꠍꠤ, ꠇꠦꠃ ꠔꠥꠝꠣꠞꠦ ꠢꠣꠝꠟꠣ ꠇꠞꠤꠀ ꠔꠥꠝꠣꠞ ꠈꠦꠔꠤ ꠇꠞꠔ ꠘꠣꠄ। ꠇꠣꠞꠘ ꠁ ꠐꠣꠃꠘꠅ ꠀꠝꠣꠞ ꠛꠃꠔ ꠙ꠆ꠞꠎꠣ ꠀꠍꠂꠘ।”
ACT 18:11 ꠅꠃ ꠙꠣꠃꠟꠥꠍ ꠖꠦꠠ ꠛꠞꠍ ꠗꠞꠤ ꠢꠘꠅ ꠞꠁꠀ ꠝꠣꠘꠡꠞꠦ ꠀꠟ꠆ꠟꠣꠞ ꠇꠣꠟꠣꠝ ꠔꠣꠟꠤꠝ ꠖꠤꠟꠣ।
ACT 18:12 ꠛꠣꠖꠦ ꠉꠣꠟꠤꠅꠘ ꠎꠦꠛꠟꠣ ꠉ꠆ꠞꠤꠍ ꠖꠦꠡꠞ ꠢꠣꠇꠤꠝ ꠀꠍꠟꠣ, ꠅꠃ ꠡꠝꠄ ꠁꠢꠥꠖꠤ ꠅꠇꠟ ꠄꠇꠟꠉꠦ ꠝꠤꠟꠤꠀ ꠙꠣꠃꠟꠥꠍꠞꠦ ꠗꠞꠤꠀ ꠛꠤꠌꠣꠞ ꠇꠞꠣꠘꠤꠞ ꠟꠣꠉꠤ ꠞꠣꠎ ꠖꠞꠛꠣꠞꠅ ꠘꠤꠀ ꠇꠁꠟꠣ,
ACT 18:13 “ꠅꠃ ꠛꠦꠐꠣꠄ ꠀꠝꠞꠣꠞ ꠡꠞꠤꠅꠔꠞ ꠢꠥꠇꠥꠝꠞ ꠃꠟꠐꠣ ꠔꠣꠟꠤꠝ ꠖꠤꠀ ꠇꠞ, ꠀꠝꠞꠣꠅ ꠅꠃꠟꠣ ꠀꠟ꠆ꠟꠣꠞ ꠄꠛꠣꠖꠔ ꠇꠞꠔꠣꠝ।”
ACT 18:14 ꠅꠁꠟꠦ ꠙꠣꠃꠟꠥꠍꠦ ꠎꠦꠛꠟꠣ ꠎꠛꠣꠘꠛꠘ꠆ꠖꠤ ꠖꠤꠔꠣ ꠌꠣꠁꠟꠣ, ꠅꠃ ꠡꠝꠄ ꠉꠣꠟꠤꠅꠘꠦ ꠁꠢꠥꠖꠤ ꠅꠇꠟꠞꠦ ꠇꠁꠟꠣ, “ꠅ ꠁꠢꠥꠖꠤ ꠅꠇꠟ, ꠁꠐꠣ ꠎꠥꠖꠤ ꠇꠥꠘꠥ ꠅꠁꠘ꠆ꠘꠣꠄ ꠛꠣ ꠖꠥꠡꠞ ꠇꠣꠝ ꠅꠁꠔ ꠔꠦ ꠔꠥꠝꠞꠣꠞ ꠘꠣꠟꠤꠡ ꠀꠝꠤ ꠢꠥꠘꠟꠣꠝ ꠅꠘꠦ।
ACT 18:15 ꠅꠁꠟꠦ ꠁꠐꠣ ꠎꠦꠛꠟꠣ ꠇꠥꠘꠥ ꠈꠣꠍ ꠛꠥꠟꠤ ꠛꠣ ꠘꠣꠝ ꠛꠣ ꠔꠥꠝꠞꠣꠞ ꠡꠞꠤꠅꠔꠞ ꠚꠤꠞꠇꠣ, ꠔꠦ ꠁꠔꠣ ꠛꠤꠡꠄ-ꠀꠡꠄ ꠔꠥꠝꠞꠣꠃ ꠚꠄꠍꠣꠟꠣ ꠇꠞꠤꠟꠣꠅ, ꠁꠔꠣ ꠝꠣꠔꠞ ꠟꠣꠉꠤ ꠀꠝꠤ ꠛꠤꠌꠣꠞ ꠇꠞꠔꠣꠝ ꠌꠣꠁ ꠘꠣ।”
ACT 18:16 ꠇꠁꠀ ꠢꠣꠞꠤ ꠔꠣꠁꠘ ꠀꠖꠣꠟꠔ ꠕꠣꠇꠤ ꠁꠔꠣꠞꠦ ꠛꠣꠞ ꠇꠞꠤ ꠖꠤꠟꠣꠁꠟꠣ।
ACT 18:17 ꠔꠦꠃ ꠝꠣꠘꠡꠦ ꠁꠢꠥꠖꠤ ꠝꠍꠤꠖꠞ ꠈꠣꠖꠤꠝ ꠍꠥꠍꠤꠘꠞꠦ ꠗꠞꠤꠀ ꠀꠖꠣꠟꠔꠞ ꠍꠣꠝꠘꠦ ꠝꠣꠁꠞ-ꠗꠁꠞ ꠇꠞꠟꠣ। ꠅꠁꠟꠦ ꠉꠣꠟꠤꠅꠘꠦ ꠁꠝꠥꠈꠣ ꠚꠤꠞꠤꠀꠃ ꠌꠣꠁꠟꠣ ꠘꠣ।
ACT 18:18 ꠙꠣꠃꠟꠥꠍ ꠀꠞꠅ ꠛꠃꠔ ꠖꠤꠘ ꠇꠞꠤꠘ꠆ꠔꠔ ꠞꠅꠀꠞ ꠛꠣꠖꠦ, ꠝꠥꠝꠤꠘ ꠅꠇꠟꠞ ꠉꠦꠍ ꠕꠣꠇꠤ ꠛꠤꠖꠣꠄ ꠟꠁꠀ ꠡꠤꠞꠤꠀ ꠖꠦꠡꠅ ꠎꠣꠁꠔꠣ ꠇꠞꠤ ꠇꠤꠋꠇ꠆ꠞꠤꠀ ꠘꠣꠝꠞ ꠎꠣꠎ ꠊꠣꠐꠅ ꠀꠁꠟꠣ, ꠀꠇꠤꠟ ꠀꠞ ꠚꠤꠍꠇꠤꠟꠣꠅ ꠔꠣꠘ ꠟꠉꠦ ꠀꠁꠟꠣ। ꠙꠣꠃꠟꠥꠍꠞ ꠄꠇ ꠝꠣꠘ꠆ꠘꠔ ꠀꠍꠤꠟ ꠇꠞꠤ ꠅꠘꠅ ꠀꠁꠀ ꠔꠣꠘ ꠝꠣꠕꠣꠞ ꠌꠥꠟ ꠇꠣꠝꠣꠁꠀ ꠎꠣꠎꠅ ꠃꠑꠟꠣ।
ACT 18:19 ꠛꠣꠖꠦ ꠁꠚꠤꠍ ꠐꠣꠃꠘꠅ ꠀꠁꠀ ꠙꠣꠃꠟꠥꠍꠦ ꠢꠤ ꠖꠥꠁꠅꠎꠘꠞꠦ ꠅꠘꠅ ꠕꠁꠀ, ꠔꠣꠁꠘ ꠝꠍꠤꠖꠅ ꠢꠣꠝꠣꠁꠀ ꠁꠢꠥꠖꠤ ꠅꠇꠟꠞ ꠟꠉꠦ ꠢꠎꠞꠔ ꠁꠍꠣꠞ ꠛꠦꠙꠣꠞꠦ ꠛꠣꠔꠌꠤꠔ ꠇꠞꠟꠣ।
ACT 18:20 ꠁꠢꠥꠖꠤ ꠅꠇꠟꠦ ꠔꠣꠘꠞꠦ ꠇꠄꠖꠤꠘ ꠔꠣꠞꠣꠞ ꠉꠦꠍꠦ ꠞꠅꠀꠞ ꠟꠣꠉꠤ ꠝꠤꠘꠔ ꠇꠞꠟꠦꠅ, ꠔꠣꠁꠘ ꠞꠣꠎꠤ ꠅꠁꠟꠣ ꠘꠣ।
ACT 18:21 ꠔꠣꠁꠘ ꠄꠞꠣꠞ ꠉꠦꠍ ꠕꠣꠇꠤ ꠛꠤꠖꠣꠄ ꠟꠁꠀ ꠇꠁꠟꠣ, “ꠁꠘꠡꠣꠟ꠆ꠟꠣ, ꠀꠝꠤ ꠢꠤꠞꠛꠣꠞ ꠀꠁꠝꠥ।” ꠇꠁꠀ ꠔꠣꠁꠘ ꠁꠚꠤꠍ ꠕꠣꠇꠤ ꠎꠣꠎꠅ ꠇꠞꠤ ꠞꠅꠀꠘꠣ ꠅꠁꠉꠦꠟꠣ।
ACT 18:22 ꠀꠞ ꠇꠂꠍꠞꠤꠀꠔ ꠀꠁꠀ ꠢꠣꠞꠟꠦ ꠎꠣꠎ ꠕꠣꠇꠤ ꠟꠣꠝꠤꠀ ꠎꠦꠞꠥꠎꠣꠟꠦꠝꠅ ꠉꠦꠟꠣ, ꠉꠤꠀ ꠎꠝꠣꠔꠞ ꠝꠣꠘꠡꠞ ꠟꠉꠦ ꠝꠥꠟꠣꠇꠣꠔ ꠇꠞꠤꠀ ꠢꠘ ꠕꠣꠇꠤ ꠀꠘ꠆ꠔꠤꠅꠈꠤꠀꠔ ꠀꠁꠟꠣ।
ACT 18:23 ꠀꠘ꠆ꠔꠤꠅꠈꠤꠀꠔ ꠇꠄꠖꠤꠘ ꠇꠣꠐꠣꠘꠤꠞ ꠛꠣꠖꠦ ꠢꠤꠈꠣꠘ ꠕꠣꠇꠤ ꠞꠅꠀꠘꠣ ꠖꠤꠀ, ꠉꠣꠟꠣꠔꠤꠀ ꠀꠞ ꠚꠞꠥꠉꠤꠀ ꠖꠦꠡꠞ ꠎꠣꠉꠣꠄ ꠎꠣꠉꠣꠄ ꠊꠥꠞꠤꠀ ꠝꠥꠝꠤꠘ ꠅꠇꠟꠞ ꠁꠝꠣꠘꠤ ꠛꠟ ꠝꠎꠛꠥꠔ ꠇꠞꠟꠣ।
ACT 18:24 ꠄꠞ ꠝꠣꠎꠦ ꠀꠙꠟ꠆ꠟꠍ ꠘꠣꠝꠞ ꠄꠇꠎꠘ ꠁꠢꠥꠖꠤ ꠁꠚꠤꠍ ꠐꠣꠃꠘꠅ ꠀꠁꠟꠣ। ꠔꠣꠘ ꠛꠣꠠꠤ ꠀꠟꠦꠇꠎꠣꠘꠖ꠆ꠞꠤꠀ ꠐꠣꠃꠘꠅ, ꠔꠣꠁꠘ ꠡꠥꠘ꠆ꠖꠞ ꠇꠞꠤ ꠅꠀꠎ ꠇꠞꠂꠘ, ꠀꠞ ꠀꠍꠝꠣꠘꠤ ꠇꠤꠔꠣꠛꠅ ꠈꠥꠛ ꠜꠣꠟꠣ ꠛꠥꠎꠂꠘ।
ACT 18:25 ꠝꠣꠟꠤꠇꠞ ꠔꠞꠤꠇꠣꠞ ꠁꠟꠤꠝꠅ ꠔꠣꠘ ꠀꠍꠤꠟ, ꠔꠣꠁꠘ ꠞꠥꠢꠦ ꠉꠞꠝ ꠅꠁꠀ ꠢꠎꠞꠔ ꠁꠍꠣꠞ ꠛꠦꠙꠣꠞꠦ ꠍꠢꠤ-ꠡꠥꠖ꠆ꠖ ꠅꠀꠎ-ꠘꠍꠤꠅꠔ ꠇꠞꠔꠣ ꠀꠞ ꠔꠣꠟꠤꠝ ꠖꠤꠔꠣ। ꠅꠁꠟꠦ ꠔꠣꠁꠘ ꠈꠣꠟꠤ ꠢꠎꠞꠔ ꠄꠢꠤꠀꠞ ꠔꠞꠤꠇꠣꠞ ꠔꠃꠛꠣꠞ ꠉꠥꠍꠟ ꠍꠣꠠꠣ ꠀꠞ ꠇꠥꠘꠥ ꠔꠃꠛꠣꠞ ꠉꠥꠍꠟꠞ ꠇꠕꠣ ꠎꠣꠘꠔꠣ ꠘꠣ।
ACT 18:26 ꠔꠣꠁꠘ ꠈꠥꠛ ꠢꠤꠝ꠆ꠝꠔ ꠇꠞꠤꠀ ꠝꠍꠤꠖꠅ ꠉꠤꠀ ꠅꠀꠎ ꠇꠞꠔꠣ। ꠚꠤꠍꠇꠤꠟꠣ ꠀꠞ ꠀꠇꠤꠟꠦ ꠔꠣꠘ ꠅꠀꠎ ꠢꠥꠘꠤꠀ ꠔꠣꠘꠞꠦ ꠔꠣꠞꠣꠞ ꠛꠣꠠꠤꠔ ꠖꠣꠅꠔ ꠖꠤꠟꠣ, ꠀꠞ ꠀꠟ꠆ꠟꠣꠞ ꠞꠣꠡ꠆ꠔꠣ ꠀꠞꠅ ꠜꠣꠟꠣ ꠇꠞꠤ ꠛꠥꠎꠣꠁꠀ ꠖꠤꠟꠣ।
ACT 18:27 ꠛꠣꠖꠦ ꠀꠙꠟ꠆ꠟꠍ ꠎꠦꠛꠟꠣ ꠉ꠆ꠞꠤꠍ ꠖꠦꠡꠅ ꠎꠣꠁꠔꠣ ꠌꠣꠁꠟꠣ, ꠁ ꠡꠝꠄ ꠁꠝꠣꠘꠖꠣꠞ ꠅꠇꠟꠦ ꠔꠣꠘꠞꠦ ꠃꠔꠡꠣꠢ ꠖꠤꠟꠣ, ꠀꠞ ꠔꠣꠘꠞꠦ ꠇꠛꠥꠟ ꠇꠞꠔꠣ ꠇꠞꠤ ꠃꠝ꠆ꠝꠔ ꠅꠇꠟꠞ ꠉꠦꠍꠦ ꠌꠤꠑꠤꠅ ꠖꠤꠟꠣ। ꠔꠦꠃ ꠔꠣꠁꠘ ꠉꠤꠀ ꠉ꠆ꠞꠤꠍꠅ ꠀꠎꠤꠞ ꠅꠁꠟꠣ, ꠀꠞ ꠀꠟ꠆ꠟꠣꠞ ꠞꠢꠝꠔꠦ ꠎꠦꠞꠣ ꠁꠝꠣꠘ ꠀꠘꠍꠤꠟꠣ ꠔꠣꠞꠣꠞ ꠛꠃꠔ ꠚꠣꠄꠖꠣ ꠅꠁꠟ।
ACT 18:28 ꠀꠞ ꠢꠎꠞꠔ ꠁꠍꠣꠃ ꠎꠦꠘ ꠀꠟ-ꠝꠍꠤ, ꠅꠃ ꠇꠕꠣ ꠔ ꠔꠣꠁꠘ ꠙꠣꠇ ꠇꠤꠔꠣꠛ ꠕꠣꠇꠤ ꠙꠞꠝꠣꠘ ꠖꠦꠈꠣꠁꠀ, ꠝꠣꠘꠡꠞ ꠍꠣꠝꠘꠦ ꠢꠤꠝ꠆ꠝꠔ ꠇꠞꠤ ꠁꠢꠥꠖꠤ ꠅꠇꠟꠞꠦ ꠄꠇ꠆ꠇꠦꠞꠦ ꠟꠣ-ꠎꠥꠀꠙ ꠛꠣꠘꠣꠁꠟꠣ।
ACT 19:1 ꠀꠙꠟ꠆ꠟꠍ ꠎꠦꠛꠟꠣ ꠇꠞꠤꠘ꠆ꠔꠔ ꠀꠍꠟꠣ, ꠅꠃ ꠡꠝꠄ ꠢꠎꠞꠔ ꠙꠣꠃꠟꠥꠍ ꠀꠍꠤꠀ ꠖꠦꠡꠞ ꠝꠣꠎꠦꠖꠤ ꠁꠚꠤꠍ ꠐꠣꠃꠘꠅ ꠀꠁꠟꠣ। ꠢꠤꠈꠣꠘꠅ ꠇꠄꠎꠘ ꠃꠝ꠆ꠝꠔꠞ ꠟꠉꠦ ꠖꠦꠈꠣ ꠅꠀꠄ,
ACT 19:2 ꠔꠣꠁꠘ ꠄꠞꠣꠞꠦ ꠎꠤꠇꠣꠁꠟꠣ, “ꠀꠙꠘꠣꠞꠣ ꠁꠝꠣꠘ ꠀꠘꠣꠞ ꠡꠝꠄ ꠇꠤꠔꠣ ꠙꠣꠇ ꠞꠥꠢꠥ ꠢꠣꠍꠤꠟ ꠇꠞꠍꠟꠣ ꠘꠤ?” ꠔꠣꠞꠣ ꠎꠥꠀꠙ ꠖꠤꠟꠣ, “ꠙꠣꠇ ꠞꠥꠢꠥ ꠀꠞꠇꠔꠣ ꠇꠤꠔꠣ, ꠁꠔꠣ ꠔ ꠀꠝꠞꠣ ꠢꠥꠘꠍꠤꠃ ꠘꠣ।”
ACT 19:3 ꠙꠣꠃꠟꠥꠍꠦ ꠔꠣꠞꠣꠞꠦ ꠇꠁꠟꠣ, “ꠔꠦ ꠀꠙꠘꠣꠞꠣ ꠇꠥꠘ ꠔꠞꠤꠇꠣꠄ ꠔꠃꠛꠣꠞ ꠉꠥꠍꠟ ꠇꠞꠍꠟꠣ?” ꠔꠣꠞꠣ ꠇꠁꠟꠣ, “ꠄꠢꠤꠀ ꠘꠛꠤꠞ ꠔꠞꠤꠇꠣꠄ।”
ACT 19:4 ꠅꠃ ꠔꠣꠁꠘ ꠇꠁꠟꠣ, “ꠉꠥꠘꠣ ꠕꠣꠇꠤ ꠝꠘ ꠛꠖꠟꠣꠁꠟꠦ ꠎꠦ ꠉꠥꠍꠟ ꠇꠞꠣꠁꠟ ꠅꠄ, ꠅꠐꠣꠃ ꠅꠁꠟ ꠢꠎꠞꠔ ꠄꠢꠤꠀꠞ ꠔꠞꠤꠇꠣꠞ ꠉꠥꠍꠟ, ꠅꠁꠟꠦ ꠄꠢꠤꠀꠄ ꠔ ꠔꠣꠟꠤꠝ ꠖꠤꠍꠟꠣ, ꠔꠣꠘ ꠛꠣꠖꠦ ꠎꠦꠁꠘ ꠔꠡꠞꠤꠚ ꠀꠘꠞꠣ, ꠝꠣꠘꠤ ꠢꠎꠞꠔ ꠁꠍꠣꠞ ꠃꠙꠞꠦꠅ ꠁꠝꠣꠘ ꠀꠘꠣ ꠟꠣꠉꠛ।”
ACT 19:5 ꠁ ꠘꠍꠤꠅꠔ ꠢꠥꠘꠣꠞ ꠛꠣꠖꠦ ꠔꠣꠞꠣ ꠢꠎꠞꠔ ꠁꠍꠣꠞ ꠘꠣꠝꠦ ꠔꠃꠛꠣꠞ ꠉꠥꠍꠟ ꠇꠞꠟꠣ।
ACT 19:6 ꠛꠣꠖꠦ ꠙꠣꠃꠟꠥꠍꠦ ꠔꠣꠞꠣꠞ ꠃꠙꠞꠦ ꠀꠔ ꠞꠣꠈꠟꠦ ꠔꠣꠞꠣ ꠙꠣꠇ ꠞꠥꠢꠥ ꠙꠣꠁꠟꠣ, ꠔꠦꠃ ꠄꠞꠣ ꠘꠣꠘꠣꠘ ꠉꠣꠁꠛꠤ ꠜꠣꠡꠣꠄ ꠝꠣꠔꠤꠟꠣ ꠀꠞ ꠙꠤꠞꠣꠇꠤ ꠝꠣꠔ ꠝꠣꠔꠣ ꠗꠞꠟꠣ।
ACT 19:7 ꠄꠞꠣ ꠢꠇꠟꠦ ꠝꠤꠟꠤꠀ ꠅꠘꠥꠝꠣꠘ ꠛꠣꠞꠅ ꠎꠘ ꠀꠍꠟꠣ।
ACT 19:8 ꠛꠣꠖꠦ ꠔꠣꠁꠘ ꠁꠢꠥꠖꠤꠞ ꠝꠍꠤꠖꠅ ꠉꠤꠀ ꠄꠇꠟꠣꠉꠣꠞꠦ ꠔꠤꠘ ꠝꠣꠡ ꠢꠤꠝ꠆ꠝꠔ ꠇꠞꠤꠀ ꠔꠛꠟꠤꠉ ꠇꠞꠟꠣ, ꠀꠟ꠆ꠟꠣꠞ ꠛꠣꠖꠡꠣꠁꠞ ꠛꠦꠙꠣꠞꠦ ꠎꠥꠇ꠆ꠔꠤ-ꠔꠞ꠆ꠇ ꠖꠦꠈꠣꠁꠀ ꠔꠣꠞꠣꠞꠦ ꠛꠥꠎꠣꠁꠟꠣ।
ACT 19:9 ꠄꠞꠣꠞ ꠝꠣꠎꠦ ꠇꠄꠎꠘꠞ ꠖꠤꠟ ꠘꠣ-ꠢꠥꠝꠣꠞ ꠅꠀꠄ ꠔꠣꠞꠣ ꠁꠝꠣꠘ ꠀꠘꠟꠣ ꠘꠣ, ꠔꠣꠞꠣ ꠢꠇꠟꠞ ꠉꠦꠍꠦ ꠁꠍꠣꠞ ꠔꠞꠤꠇꠣꠞ ꠉꠤꠛꠔ ꠉꠣꠁꠔꠣ। ꠔꠦꠃ ꠙꠣꠃꠟꠥꠍꠦ ꠄꠞꠣꠞ ꠉꠦꠍ ꠕꠣꠇꠤ ꠢꠞꠤꠀ ꠃꠝ꠆ꠝꠔ ꠅꠇꠟꠞꠦ ꠀꠟꠉꠣꠁꠀ ꠔꠣꠘ ꠟꠉꠦ ꠞꠣꠈꠟꠣ, ꠀꠞ ꠙꠞꠔꠦꠇ ꠖꠤꠘ ꠔꠥꠞꠣꠘ꠆ꠘ ꠘꠣꠝꠞ ꠄꠇ ꠃꠡ꠆ꠔꠣꠖꠞ ꠐꠋꠉꠤꠔ ꠉꠤꠀ ꠔꠣꠞꠣꠞꠦ ꠔꠣꠟꠤꠝ ꠖꠤꠟꠣ।
ACT 19:10 ꠅꠃꠟꠣ ꠖꠥꠁ ꠛꠍꠞ ꠉꠥꠎꠞꠣꠞ ꠛꠣꠖꠦ ꠀꠍꠤꠀ ꠖꠦꠡꠞ ꠁꠢꠥꠖꠤ ꠀꠞ ꠁꠃꠘꠣꠘꠤ, ꠢꠇ꠆ꠇꠟꠞ ꠇꠣꠘꠅꠃ ꠝꠣꠛꠥꠖꠞ ꠇꠣꠟꠣꠝ ꠙꠃꠍꠤ ꠉꠦꠟ।
ACT 19:11 ꠀꠟ꠆ꠟꠣꠄ ꠢꠎꠞꠔ ꠙꠣꠃꠟꠥꠍꠞ ꠀꠔꠣꠘꠦ ꠀꠌꠣꠘꠇ ꠇꠦꠞꠣꠝꠔꠤ ꠇꠣꠝ ꠎꠣꠁꠞ ꠇꠞꠣꠁꠟꠣ।
ACT 19:12 ꠢꠦꠡꠦ ꠅꠃꠟꠣꠅ ꠅꠁꠟ ꠎꠦꠘ, ꠔꠣꠘ ꠉꠔꠞꠞ ꠇꠣꠙꠠ ꠛꠣ ꠉꠣꠝꠍꠣ ꠈꠣꠘꠅ ꠇꠥꠘꠥ ꠛꠦꠝꠣꠞꠤ ꠝꠣꠘꠡꠞ ꠇꠣꠍꠣꠔ ꠘꠤꠟꠦꠃ ꠛꠦꠝꠣꠞ ꠜꠣꠟꠣ ꠅꠁꠎꠤꠔ, ꠀꠞ ꠎꠤꠘ-ꠜꠥꠔꠦꠅ ꠛꠦꠝꠣꠞꠤ ꠍꠣꠠꠤꠀ ꠜꠣꠉꠤꠔꠣ।
ACT 19:13 ꠄꠞꠝꠣꠎꠦ ꠇꠄꠎꠘ ꠊꠥꠞꠤꠀ ꠙꠣꠈꠣꠁꠀ ꠈꠣꠅꠞꠣ ꠁꠢꠥꠖꠤ ꠔꠣꠛꠎꠣꠔꠤ ꠝꠥꠟ꠆ꠟꠣꠄꠅ ꠢꠎꠞꠔ ꠁꠍꠣꠞ ꠘꠣꠝ ꠟꠁꠀ ꠎꠤꠘ-ꠜꠥꠔ ꠍꠣꠠꠣꠁꠔ ꠌꠣꠁꠟ, ꠔꠣꠞꠣ ꠅꠃꠟꠣ ꠇꠁꠔ, “ꠙꠣꠃꠟꠥꠍꠦ ꠎꠦꠘ ꠘꠣꠝꠦ ꠔꠛꠟꠤꠉ ꠇꠞꠂꠘ, ꠢꠃ ꠁꠍꠣꠞ ꠖꠥꠀꠁ ꠖꠤꠀ, ꠀꠝꠤ ꠔꠥꠝꠞꠣꠞꠦ ꠛꠣꠞ ꠅꠁꠀ ꠎꠣꠅꠀꠞ ꠢꠥꠇꠥꠝ ꠖꠤꠞꠣꠝ।”
ACT 19:14 ꠄꠞꠣꠞ ꠝꠣꠎꠦ ꠡ꠆ꠇꠤꠛꠣ ꠘꠣꠝꠞ ꠄꠇꠎꠘ ꠁꠢꠥꠖꠤ ꠙꠞꠗꠣꠘ ꠁꠝꠣꠝꠞ ꠡꠣꠔ ꠙꠥꠀꠄꠅ ꠅꠃꠟꠣ ꠇꠞꠔ।
ACT 19:15 ꠔꠦꠃ ꠄꠇꠖꠤꠘ ꠜꠥꠔꠦ ꠔꠣꠞꠣꠞꠦ ꠎꠥꠀꠙ ꠖꠤꠟ, “ꠀꠝꠤ ꠁꠍꠣꠞꠦꠅ ꠌꠤꠘꠤ, ꠙꠣꠃꠟꠥꠍꠞꠦꠅ ꠌꠤꠘꠤ, ꠅꠁꠟꠦ ꠔꠥꠝꠞꠣ ꠇꠦ?”
ACT 19:16 ꠇꠁꠀꠃ ꠎꠦ ꠛꠦꠐꠣꠞꠦ ꠜꠥꠔꠦ ꠗꠞꠍꠤꠟ ꠢꠤ ꠛꠦꠐꠣꠄ ꠔꠣꠞꠣꠞ ꠃꠙꠞꠦ ꠚꠣꠟ ꠖꠤꠀ ꠙꠠꠤꠀ ꠝꠣꠁꠞ-ꠗꠁꠞ ꠇꠞꠤꠀ ꠔꠣꠞꠣ ꠡꠣꠔꠅ ꠎꠘꠞꠦ ꠀꠞꠣꠁꠟ। ꠝꠣꠁꠞꠦ ꠔꠣꠞꠣꠞ ꠡꠞꠤꠟ ꠍꠤꠠꠤꠀ-ꠛꠤꠠꠤꠀ ꠎꠈꠝ ꠅꠁꠉꠦꠟ, ꠔꠣꠞꠣ ꠟꠦꠝꠐꠣ ꠅꠁꠀ ꠁ ꠛꠣꠠꠤ ꠕꠣꠇꠤ ꠜꠣꠉꠤꠟꠣ।
ACT 19:17 ꠁ ꠈꠛꠞ ꠎꠦꠛꠟꠣ ꠁꠚꠤꠍꠞ ꠁꠢꠥꠖꠤ ꠀꠞ ꠁꠃꠘꠣꠘꠤ ꠅꠇꠟꠦ ꠎꠣꠘꠟꠣ, ꠔꠦ ꠔꠣꠞꠣ ꠢꠇ꠆ꠇꠟꠦ ꠒꠞꠣꠁꠉꠦꠟꠣ, ꠀꠞ ꠌꠣꠁꠞꠅꠛꠣꠄ ꠢꠎꠞꠔ ꠁꠍꠣꠞ ꠘꠣꠝꠞ ꠝꠢꠤꠝꠣ ꠎꠣꠁꠞ ꠅꠁꠟ।
ACT 19:18 ꠎꠦꠞꠣ ꠢꠎꠞꠔ ꠁꠍꠣꠞ ꠃꠙꠞꠦ ꠁꠝꠣꠘ ꠀꠘꠍꠤꠟ, ꠄꠞꠣ ꠛꠃꠔꠦ ꠀꠁꠀ ꠢꠣꠞꠤ ꠈꠥꠟꠣ-ꠝꠦꠟꠣ ꠇꠞꠤ ꠔꠣꠞꠣꠞ ꠛꠣꠖ ꠇꠣꠝꠞ ꠇꠕꠣ ꠡ꠆ꠛꠤꠇꠣꠞ ꠀꠞ ꠎꠣꠁꠞ ꠇꠞꠟꠣ।
ACT 19:19 ꠀꠞ ꠎꠦꠞꠣ ꠎꠣꠖꠥ-ꠐꠥꠘꠣꠞ ꠇꠣꠝ ꠇꠞꠔ, ꠔꠣꠞꠣꠞ ꠝꠣꠎꠦꠅ ꠛꠃꠔꠦ ꠔꠣꠞꠣꠞ ꠎꠣꠖꠥ-ꠐꠥꠘꠣꠞ ꠛꠁꠀꠁꠘ ꠀꠘꠤꠀ ꠖꠟꠣ ꠇꠞꠤ ꠢꠇꠟꠞ ꠍꠣꠝꠘꠦ ꠎꠣꠟꠣꠁꠟꠤꠟꠣ। ꠁ ꠛꠁꠀꠁꠘ꠆ꠔꠞ ꠖꠣꠝ ꠢꠤꠡꠣꠛ ꠇꠞꠤꠀ ꠖꠦꠈꠣ ꠉꠦꠟ ꠙꠁꠘ꠆ꠌꠣꠡ ꠀꠎꠣꠞ ꠞꠥꠙꠣꠞ ꠖꠤꠘꠣꠞ।
ACT 19:20 ꠅꠃ ꠟꠣꠈꠣꠘ ꠇꠞꠤ ꠝꠣꠟꠤꠇꠞ ꠇꠣꠟꠣꠝ ꠛꠃꠔ ꠛꠣꠠꠤꠟ ꠀꠞ ꠝꠣꠘꠡꠞ ꠝꠣꠎꠦ ꠈꠥꠛ ꠇꠣꠝ ꠇꠞꠟ।
ACT 19:21 ꠁꠔꠣ ꠊꠐꠣꠞ ꠛꠣꠖꠦ ꠙꠣꠃꠟꠥꠍꠦ ꠝꠘꠦ ꠝꠘꠦ ꠘꠤꠅꠔ ꠇꠞꠟꠣ, ꠔꠣꠁꠘ ꠝꠣꠇꠤꠖꠘꠤꠀ ꠀꠞ ꠉ꠆ꠞꠤꠍ ꠅꠁꠀ ꠎꠦꠞꠥꠎꠣꠟꠦꠝꠅ ꠎꠣꠁꠔꠣꠉꠤ, ꠔꠣꠁꠘ ꠇꠁꠟꠣ, “ꠎꠦꠞꠥꠎꠣꠟꠦꠝ ꠎꠣꠅꠀꠞ ꠛꠣꠖꠦ ꠀꠝꠤ ꠞꠥꠝ ꠐꠣꠃꠘꠅ-ꠅ ꠎꠣꠅꠀ ꠎꠞꠥꠞ।”
ACT 19:22 ꠛꠣꠖꠦ ꠔꠣꠁꠘ ꠔꠤꠝꠕꠤ ꠀꠞ ꠁꠞꠣꠡ꠆ꠔꠣꠍ ꠘꠣꠝꠞ ꠔꠣꠘ ꠖꠥꠁꠅ ꠈꠣꠖꠤꠝꠞꠦ ꠝꠣꠇꠤꠖꠘꠤꠀꠔ ꠙꠣꠑꠣꠁꠀ, ꠘꠤꠎꠦ ꠀꠞꠅ ꠇꠄꠖꠤꠘ ꠀꠍꠤꠀ ꠖꠦꠡꠅ ꠞꠁꠟꠣ।
ACT 19:23 ꠅꠃ ꠡꠝꠄ ꠁꠍꠣꠞ ꠔꠞꠤꠇꠣꠞ ꠛꠤꠡꠄ ꠟꠁꠀ ꠛꠃꠔ ꠉꠘ꠆ꠒꠉꠥꠟ ꠟꠣꠉꠟ।
ACT 19:24 ꠇꠣꠞꠘ ꠖꠤꠝꠤꠔ꠆ꠞꠤ ꠘꠣꠝꠦ ꠄꠇꠎꠘ ꠛꠣꠘꠤꠀꠄ ꠀꠞ꠆ꠔꠦꠝꠤꠍ ꠖꠦꠛꠤꠞ ꠝꠘ꠆ꠖꠤꠞꠞ ꠘꠝꠥꠘꠣꠄ ꠞꠥꠙꠣꠖꠤ ꠢꠥꠞꠥ ꠢꠥꠞꠥ ꠝꠘ꠆ꠖꠤꠞ ꠛꠣꠘꠣꠁꠔ, ꠀꠞꠅ ꠛꠃꠔ ꠛꠣꠘꠤꠀꠄꠅ ꠅꠃ ꠇꠣꠝ ꠇꠞꠤꠀ ꠛꠃꠔ ꠟꠣꠜ ꠇꠞꠔ।
ACT 19:25 ꠢꠦ ꠅꠃ ꠛꠣꠘꠤꠀ ꠅꠇꠟꠞꠦ ꠀꠞ ꠔꠣꠞꠣꠞ ꠟꠉꠤ ꠅꠇꠟꠞꠦꠅ ꠄꠇꠈꠣꠘꠅ ꠖꠟꠣ ꠇꠞꠤꠀ ꠇꠁꠟ, “ꠜꠣꠁ ꠅꠇꠟ, ꠔꠥꠝꠞꠣ ꠔ ꠎꠣꠘꠞꠣꠄ, ꠁ ꠇꠣꠞꠛꠣꠞ ꠕꠣꠇꠤ ꠀꠝꠞꠣ ꠜꠣꠟꠣ ꠟꠣꠜ ꠙꠣꠁꠞꠣꠝ।
ACT 19:26 ꠅꠁꠟꠦ ꠔꠥꠝꠞꠣ ꠖꠦꠈꠞꠣꠄ ꠀꠞ ꠢꠥꠘꠞꠣꠄꠅ, ꠙꠣꠃꠟꠥꠍ ꠘꠣꠝꠞ ꠅꠃ ꠛꠦꠐꠣꠄ ꠈꠣꠟꠤ ꠀꠝꠞꠣꠞ ꠁꠚꠤꠍꠅꠃ ꠘꠣꠄ, ꠇꠁꠔꠦ ꠉꠦꠟꠦ ꠀꠡ꠆ꠔꠣ ꠀꠍꠤꠀ ꠎꠥꠠꠤ ꠛꠃꠔ ꠝꠣꠘꠡꠞꠦ ꠇꠁꠍꠦ ꠀꠞ ꠄꠇꠤꠘ ꠇꠞꠣꠁꠍꠦ, ꠀꠔꠞ ꠛꠣꠘꠣꠁꠟ ꠖꠦꠛ-ꠖꠦꠛꠤ ꠅꠇꠟ ꠛꠥꠟꠦ ꠇꠥꠘꠥ ꠖꠦꠛꠔꠣꠃ ꠘꠣꠄ।
ACT 19:27 ꠄꠞꠟꠣꠉꠤ ꠅꠈꠘ ꠒꠞ ꠇꠞꠦꠞ, ꠈꠣꠟꠤ ꠀꠝꠞꠣꠞ ꠇꠣꠞꠛꠣꠞꠞꠃ ꠛꠖꠘꠣꠝ ꠅꠁꠛ ꠁꠟꠣ ꠘꠣꠄ, ꠅꠁꠟꠦ ꠝꠢꠣꠖꠦꠛꠤ ꠀꠞ꠆ꠔꠦꠝꠤꠍꠞ ꠝꠘ꠆ꠖꠤꠞꠅ ꠛꠦꠇꠣꠝꠣ ꠅꠁꠎꠤꠛ, ꠀꠞ ꠀꠍꠤꠀ ꠖꠦꠡꠞ ꠢꠇ꠆ꠇꠟ ꠝꠣꠘꠡꠦ ꠀꠞ ꠢꠣꠞꠣ ꠖꠥꠘꠤꠀꠁꠄ ꠝꠤꠟꠤꠀ ꠎꠦꠘ ꠙꠥꠎꠣ ꠇꠞꠦ, ꠔꠣꠁꠘꠅ ꠘꠤꠎꠞ ꠁꠎ꠆ꠎꠔ ꠀꠞꠣꠁꠛꠣ।”
ACT 19:28 ꠁꠔꠣ ꠢꠥꠘꠤꠀ ꠔꠣꠞꠣ ꠉꠥꠍꠣꠄ ꠀꠉꠥꠁꠘ ꠅꠁꠀ ꠎꠥꠞꠦ ꠎꠥꠞꠦ ꠌꠤꠟ꠆ꠟꠣꠁꠀ ꠇꠁꠟꠣ, “ꠁꠚꠤꠍꠤꠀꠞ ꠀꠞ꠆ꠔꠦꠝꠤꠍ ꠖꠦꠛꠤ, ꠎꠤꠘ꠆ꠖꠣꠛꠣꠖ!”
ACT 19:29 ꠟꠉꠦ ꠟꠉꠦ ꠀꠡ꠆ꠔꠣ ꠐꠣꠃꠘꠅ ꠉꠘ꠆ꠒꠉꠥꠟ ꠟꠣꠉꠤꠉꠦꠟ; ꠝꠣꠘꠡꠦ ꠝꠣꠇꠤꠖꠘꠤꠀꠞ ꠉꠃꠍ ꠀꠞ ꠀꠞꠤꠡ꠆ꠔꠣꠇꠥꠍ ꠘꠣꠝꠞ ꠙꠣꠃꠟꠥꠍꠞ ꠟꠉꠞ ꠖꠥꠁꠎꠘꠞꠦ ꠗꠞꠤꠀ, ꠄꠇꠟꠉꠦ ꠙꠣꠟ ꠛꠣꠘ꠆ꠖꠤꠀ ꠖꠃꠠꠣꠁꠀ ꠡ꠆ꠐꠦꠒꠤꠀꠝꠅ ꠟꠁꠀ ꠉꠦꠟꠣ।
ACT 19:30 ꠢꠎꠞꠔ ꠙꠣꠃꠟꠥꠍ ꠅꠃ ꠜꠤꠠꠞ ꠍꠣꠝꠘꠦ ꠎꠣꠁꠔꠣ ꠌꠣꠁꠟꠣ, ꠅꠁꠟꠦ ꠝꠥꠝꠤꠘ ꠅꠇꠟꠦ ꠔꠣꠘꠞꠦ ꠀꠐꠇꠣꠁꠟ꠆ꠟꠣ।
ACT 19:31 ꠀꠍꠤꠀ ꠖꠦꠡꠞ ꠡꠞꠇꠣꠞꠤ ꠅꠚꠤꠡꠣꠞꠞ ꠝꠣꠎꠦ ꠇꠄꠎꠘ ꠀꠍꠟꠣ ꠙꠣꠃꠟꠥꠍꠞ ꠖꠥꠡ꠆ꠔ, ꠄꠞꠣ ꠈꠛꠞꠤꠀꠖꠤ ꠔꠣꠘꠞꠦ ꠎꠣꠘꠣꠁꠟꠣ, ꠔꠣꠁꠘ ꠢꠤ ꠜꠤꠠꠞ ꠍꠣꠝꠘꠦ ꠉꠤꠀ ꠘꠤꠎꠞ ꠝꠍꠤꠛꠔ ꠒꠣꠇꠤꠀ ꠀꠘꠔꠣ ꠘꠣ।
ACT 19:32 ꠜꠤꠠꠞ ꠝꠣꠎꠦ ꠝꠣꠘꠡꠦ ꠈꠥꠛ ꠌꠤꠟ꠆ꠟꠣ-ꠌꠤꠟ꠆ꠟꠤ ꠀꠞ ꠉꠦꠁꠘꠎꠣꠝ ꠟꠣꠉꠣꠁꠟꠣ। ꠛꠦꠡꠤꠞ ꠜꠣꠉ ꠝꠣꠘꠡꠦ ꠎꠣꠘꠔꠣꠃ ꠘꠣ ꠁꠘꠅ ꠇꠤꠔꠣ ꠅꠁꠍꠦ, ꠔꠣꠞꠣ ꠄꠇꠎꠘꠦ ꠄꠇꠟꠣꠈꠣꠘ, ꠀꠞꠇ ꠎꠘꠦ ꠀꠞꠇ ꠟꠣꠈꠣꠘ ꠝꠣꠔꠤꠟꠣ।
ACT 19:33 ꠔꠦꠃ ꠇꠄꠎꠘ ꠁꠢꠥꠖꠤꠄ ꠍꠤꠇꠘ꠆ꠖꠞ ꠘꠣꠝꠞ ꠄꠇꠎꠘꠞꠦ ꠍꠣꠝꠘꠦ ꠑꠦꠟꠤꠀ ꠖꠤꠟ ꠜꠣꠡꠘ ꠖꠤꠛꠣꠞ ꠟꠣꠉꠤ। ꠔꠣꠁꠘ ꠀꠔꠖꠤ ꠁꠡꠣꠞꠣ ꠖꠤꠟꠣ, ꠎꠣꠔꠦ ꠝꠣꠘꠥꠡ ꠘꠤꠞꠣꠁ ꠅꠁꠀ ꠔꠣꠘ ꠛꠇ꠆ꠔꠤꠔꠣ ꠢꠥꠘꠂꠘ।
ACT 19:34 ꠅꠁꠟꠦ ꠝꠣꠘꠡꠦ ꠎꠦꠛꠟꠣ ꠛꠥꠎꠟꠣ, ꠄꠁꠘꠅ ꠁꠢꠥꠖꠤ, ꠔꠦꠃ ꠔꠣꠞꠣ ꠀꠞꠅ ꠎꠥꠞꠦ ꠎꠥꠞꠦ ꠅꠘꠥꠝꠣꠘ ꠖꠥꠁ ꠊꠘ꠆ꠐꠣ ꠗꠞꠤ ꠌꠤꠟ꠆ꠟꠣꠁꠀ ꠇꠁꠟꠣ, “ꠁꠚꠤꠍꠤꠀꠞ ꠀꠞ꠆ꠔꠦꠝꠤꠍ ꠖꠦꠛꠤ, ꠎꠤꠘ꠆ꠖꠣꠛꠣꠖ!”
ACT 19:35 ꠢꠦꠡꠦ ꠐꠣꠃꠘꠞ ꠌꠦꠀꠞꠝꠣꠘꠦ ꠝꠣꠘꠡꠞꠦ ꠘꠤꠞꠣꠁ ꠇꠞꠣꠁꠀ ꠇꠁꠟꠣ, “ꠅ ꠁꠚꠤꠍꠤꠀ ꠅꠇꠟ, ꠇꠃꠇ꠆ꠇꠣ ꠌꠣꠁꠘ, ꠇꠥꠘ ꠝꠣꠘꠥꠡꠉꠥꠄ ꠘꠣ ꠎꠣꠘꠦ ꠎꠦꠘ, ꠁ ꠁꠚꠤꠍ ꠐꠣꠃꠘ ꠅꠁꠟ ꠝꠢꠣꠘ ꠀꠞ꠆ꠔꠦꠝꠤꠍ ꠖꠦꠛꠤꠞ ꠝꠘ꠆ꠖꠤꠞ ꠀꠞ ꠀꠍꠝꠣꠘ ꠕꠣꠇꠤ ꠔꠣꠘ ꠎꠦꠔꠣ ꠝꠥꠞ꠆ꠔꠤ ꠟꠣꠝꠣꠔ ꠙꠠꠍꠦ ꠄꠞ ꠞꠁꠇ꠆ꠇꠣ ꠇꠞꠘꠦꠀꠟꠣ?
ACT 19:36 ꠀꠞ ꠁ ꠢꠣꠍꠣ ꠇꠕꠣ ꠇꠦꠃ ꠎꠦꠛꠟꠣ ꠈꠘ꠆ꠒꠣꠁꠔ ꠙꠣꠞꠔ ꠘꠣꠄ, ꠔꠦ ꠛꠦꠛꠥꠔꠣꠞ ꠟꠣꠈꠣꠘ ꠇꠥꠘꠥ ꠇꠣꠝ ꠘꠣ ꠇꠞꠤꠀ ꠔꠥꠝꠞꠣ ꠘꠤꠞꠣꠁ ꠅꠅ।
ACT 19:37 ꠅꠃ ꠝꠣꠘꠡꠦ ꠔ ꠀꠝꠞꠣꠞ ꠝꠘ꠆ꠖꠤꠞꠅ ꠌꠥꠞꠤꠅ ꠇꠞꠍꠦ ꠘꠣ, ꠀꠝꠞꠣꠞ ꠖꠦꠛꠤꠞ ꠇꠥꠘꠥ ꠛꠖꠘꠣꠝꠅ ꠇꠞꠦꠞ ꠘꠣ, ꠔꠣ-ꠅ ꠔꠥꠝꠞꠣ ꠄꠞꠣꠞꠦ ꠗꠞꠤꠀ ꠀꠘꠍ।
ACT 19:38 ꠔꠦ ꠢꠥꠘꠅ, ꠖꠤꠝꠤꠔ꠆ꠞꠤ ꠀꠞ ꠔꠣꠞ ꠟꠉꠞ ꠛꠣꠘꠤꠀ ꠅꠇꠟꠞ ꠎꠥꠖꠤ ꠇꠥꠘꠥ ꠘꠣꠟꠤꠡ ꠕꠣꠇꠦ, ꠔꠦ ꠀꠖꠣꠟꠔ ꠔ ꠈꠥꠟꠣ ꠀꠍꠦ, ꠢꠣꠇꠤꠝ ꠅꠇꠟꠅ ꠀꠍꠂꠘ, ꠔꠣꠞꠣ ꠢꠘꠅ ꠉꠤꠀ ꠎꠣꠞꠎꠤꠞ ꠝꠣꠝꠟꠣ-ꠝꠇꠖ꠆ꠖꠝꠣ ꠇꠞꠃꠇ।
ACT 19:39 ꠅꠁꠟꠦ ꠔꠥꠝꠞꠣꠞ ꠀꠞ ꠇꠥꠘꠥ ꠖꠣꠛꠤ-ꠖꠣꠅꠀ ꠕꠣꠇꠟꠦ ꠁꠔꠣ ꠘꠤꠅꠝ ꠝꠣꠚꠤꠇ ꠝꠎꠟꠤꠍꠅ ꠛꠁꠀ ꠝꠤꠐ-ꠝꠣꠐ ꠇꠞꠣ ꠅꠁꠛ।
ACT 19:40 ꠀꠍꠟꠦ ꠀꠁꠎꠇꠥꠞ ꠁ ꠉꠦꠁꠘꠎꠣꠝ ꠟꠣꠉꠣꠘꠤꠞ ꠟꠣꠉꠤ ꠀꠝꠞꠣꠞ ꠃꠙꠞꠦꠃ ꠖꠥꠡ ꠙꠠꠔ ꠙꠣꠞꠦ, ꠁ ꠉꠘ꠆ꠒꠉꠥꠟ ꠟꠣꠉꠣꠘꠤꠞ ꠇꠥꠘꠥ ꠇꠣꠞꠘ ꠖꠦꠈꠣꠁꠔꠣꠝ ꠙꠣꠞꠔꠣꠝ ꠘꠣꠄ।”
ACT 19:41 ꠅꠈꠣꠘ ꠇꠁꠀ ꠔꠣꠁꠘ ꠝꠎꠟꠤꠍ ꠜꠣꠋꠉꠤ ꠖꠤꠟꠣ।
ACT 20:1 ꠉꠦꠁꠘꠎꠣꠝ ꠡꠦꠡ ꠅꠀꠞ ꠛꠣꠖꠦ ꠢꠎꠞꠔ ꠙꠣꠃꠟꠥꠍꠦ ꠝꠥꠝꠤꠘ ꠅꠇꠟꠞꠦ ꠈꠛꠞꠖꠤ ꠀꠘꠣꠁꠟꠣ, ꠔꠣꠞꠣ ꠀꠁꠀ ꠢꠣꠞꠟꠦ ꠔꠣꠁꠘ ꠔꠣꠞꠣꠞꠦ ꠃꠔꠡꠣꠢ ꠖꠤꠀ, ꠍꠢꠤ-ꠍꠣꠟꠣꠝꠔꠦ ꠛꠤꠖꠣꠄ ꠟꠁꠀ ꠝꠣꠇꠤꠖꠘꠤꠀꠔ ꠎꠣꠁꠔꠣ ꠇꠞꠤ ꠞꠅꠀꠘꠣ ꠅꠁꠟꠣ।
ACT 20:2 ꠝꠣꠇꠤꠖꠘꠤꠀꠞ ꠝꠣꠎꠦꠖꠤ ꠎꠣꠁꠔꠦ ꠎꠣꠁꠔꠦ ꠝꠥꠝꠤꠘ ꠅꠇꠟꠞꠦ ꠛꠃꠔ ꠃꠔꠡꠣꠢ ꠖꠤꠀ, ꠉ꠆ꠞꠤꠍ ꠖꠦꠡꠅ ꠀꠁꠀ ꠀꠎꠤꠟꠣ।
ACT 20:3 ꠅꠘꠅ ꠀꠁꠀ ꠔꠤꠘ ꠝꠣꠡ ꠞꠅꠀꠞ ꠛꠣꠖꠦ ꠎꠦꠛꠟꠣ ꠎꠣꠎꠅ ꠇꠞꠤ ꠡꠤꠞꠤꠀ ꠖꠦꠡꠅ ꠎꠣꠁꠔꠣ ꠌꠣꠁꠟꠣ, ꠅꠃ ꠡꠝꠄ ꠁꠢꠥꠖꠤ ꠅꠇꠟꠦ ꠔꠣꠘ ꠛꠤꠙꠇ꠆ꠇꠦ ꠇꠥ-ꠝꠔꠟꠛ ꠇꠞꠦꠞ ꠢꠥꠘꠤꠀ, ꠔꠣꠁꠘ ꠝꠣꠇꠤꠖꠘꠤꠀꠞ ꠝꠣꠎꠦꠖꠤ ꠎꠣꠁꠔꠣ ꠇꠞꠤ ꠘꠤꠅꠔ ꠇꠞꠟꠣ।
ACT 20:4 ꠀꠞ ꠛꠤꠞꠄꠀ ꠐꠣꠃꠘꠞ ꠙꠥꠞꠍꠞ ꠙꠥꠀ ꠍꠥꠙꠣꠔꠍ, ꠕꠤꠡꠟꠘꠤꠇꠤꠞ ꠀꠞꠤꠡ꠆ꠔꠣꠇꠥꠍ ꠀꠞ ꠍꠤꠇꠥꠘ꠆ꠖꠍ, ꠖꠞ꠆ꠛꠤ ꠡꠢꠞꠞ ꠉꠃꠍ, ꠔꠤꠝꠕꠤ, ꠀꠞ ꠀꠍꠤꠀ ꠖꠦꠡꠞ ꠔꠥꠈꠤꠇ ꠀꠞ ꠔꠚꠤꠝ, ꠄꠞꠣ ꠢꠇ꠆ꠇꠟ ꠙꠣꠃꠟꠥꠍꠞ ꠟꠉꠦ ꠉꠦꠟꠣ।
ACT 20:5 ꠄꠞꠣ ꠀꠉꠦ ꠅꠁꠀ ꠔꠞꠥꠀꠍ ꠐꠣꠃꠘꠅ ꠉꠤꠀ ꠀꠝꠞꠣꠞ ꠟꠣꠉꠤ ꠛꠣꠞ ꠌꠣꠅꠀꠔ ꠀꠍꠟꠣ।
ACT 20:6 ꠛꠣꠖꠦ ꠈꠣꠝꠤꠞ ꠍꠣꠠꠣ ꠞꠥꠐꠤꠞ ꠁꠖ ꠡꠦꠡ ꠅꠁꠉꠦꠟꠦ ꠀꠝꠞꠣ ꠎꠣꠎꠅ ꠇꠞꠤ ꠚꠤꠟꠤꠙꠤ ꠕꠣꠇꠤ ꠞꠅꠀꠘꠣ ꠖꠤꠀ, ꠙꠣꠌ ꠖꠤꠘ ꠛꠣꠖꠦ ꠔꠞꠥꠀꠍ ꠀꠁꠀ ꠔꠣꠞꠣꠞ ꠟꠉꠦ ꠝꠤꠟꠟꠣꠝ, ꠅꠘꠅ ꠡꠣꠔꠖꠤꠘ ꠞꠁꠟꠣꠝ।
ACT 20:7 ꠢꠣꠙ꠆ꠔꠣꠞ ꠙꠄꠟꠣ ꠖꠤꠘ ꠁꠍꠣꠞ ꠝꠦꠎꠛꠣꠘꠤ ꠈꠣꠅꠀꠞ ꠟꠣꠉꠤ ꠀꠝꠞꠣ ꠄꠇꠈꠣꠘꠅ ꠖꠟꠣ ꠅꠁꠟꠦ, ꠙꠣꠃꠟꠥꠍ ꠛꠣꠖꠞ ꠖꠤꠘ ꠎꠣꠁꠔꠣꠉꠤ ꠇꠞꠤ ꠝꠣꠎ ꠞꠣꠁꠔ ꠙꠞ꠆ꠎꠘ꠆ꠔ ꠝꠥꠝꠤꠘ ꠅꠇꠟꠞ ꠉꠦꠍꠦ ꠅꠀꠎ ꠇꠞꠟꠣ।
ACT 20:8 ꠀꠝꠞꠣ ꠃꠙꠞꠞ ꠔꠣꠟꠣꠞ ꠎꠦ ꠊꠞꠅ ꠛꠁꠍꠟꠣꠝ ꠢꠤꠈꠣꠘꠅ ꠛꠃꠔ ꠛꠣꠔ꠆ꠔꠤ ꠀꠍꠤꠟ।
ACT 20:9 ꠀꠞ ꠃꠔꠥꠈ ꠘꠣꠝꠞ ꠄꠇ ꠎꠥꠀꠘ ꠙꠥꠀ ꠈꠤꠠꠇꠤꠞ ꠃꠙꠞꠦ ꠛꠅꠀꠔ ꠀꠍꠤꠟ, ꠙꠣꠃꠟꠥꠍꠦ ꠛꠃꠔ ꠡꠝꠄ ꠗꠞꠤ ꠅꠀꠎ ꠇꠞꠣꠄ ꠢꠦ ꠢꠥꠘꠤ ꠢꠥꠘꠤ ꠊꠥꠝꠣꠁ ꠉꠦꠍꠤꠟ, ꠀꠈꠔꠣꠃ ꠢꠦ ꠔꠤꠘ ꠔꠣꠟꠣ ꠕꠣꠇꠤ ꠟꠣꠝꠣꠔ ꠙꠠꠤꠉꠦꠟ। ꠔꠦꠃ ꠝꠣꠘꠡꠦ ꠔꠣꠞꠦ ꠝꠞꠣ ꠢꠣꠟꠔꠦ ꠔꠥꠟꠟꠣ।
ACT 20:10 ꠙꠣꠃꠟꠥꠍ ꠟꠣꠝꠣꠔ ꠟꠣꠝꠤꠀ ꠙꠥꠀꠞ ꠃꠙꠞꠦ ꠇꠣꠁꠔ ꠅꠁꠀ ꠀꠁꠘ꠆ꠎꠣ ꠇꠞꠤ ꠗꠞꠤꠀ ꠇꠁꠟꠣ, “ꠔꠥꠝꠞꠣ ꠃꠟꠁꠡ꠆ꠔꠟ ꠇꠞꠤꠅ ꠘꠣ, ꠔꠣꠞ ꠜꠤꠔꠞꠦ ꠔ ꠎꠣꠘ ꠀꠍꠦ।”
ACT 20:11 ꠛꠣꠖꠦ ꠔꠣꠁꠘ ꠢꠤꠞꠛꠣꠞ ꠃꠙꠞꠞ ꠔꠣꠟꠣꠔ ꠉꠤꠀ ꠝꠦꠎꠛꠣꠘꠤ ꠈꠣꠁꠟꠣ, ꠈꠣꠁꠀ ꠢꠣꠞꠟꠦ ꠚꠎꠞ ꠙꠞ꠆ꠎꠘ꠆ꠔ ꠛꠣꠔꠌꠤꠔ ꠇꠞꠤꠀ ꠛꠤꠖꠣꠄ ꠟꠁꠟꠣ।
ACT 20:12 ꠄꠞ ꠝꠣꠎꠦ ꠅꠃ ꠙꠥꠀꠞꠦ ꠝꠣꠘꠡꠦ ꠎꠤꠔꠣ ꠢꠣꠟꠔꠦ ꠛꠣꠠꠤꠔ ꠘꠤꠀ ꠎꠣꠞ ꠙꠞ ꠘꠣꠁ ꠈꠥꠡꠤ ꠅꠁꠟꠣ।
ACT 20:13 ꠀꠝꠞꠣ ꠀꠉꠦ ꠉꠤꠀ ꠎꠣꠎꠅ ꠇꠞꠤ ꠀꠍꠥꠍ ꠊꠣꠐꠞ ꠛꠣꠄ ꠞꠅꠀꠘꠣ ꠅꠁꠟꠣꠝ, ꠝꠘꠅ ꠇꠞꠟꠣꠝ ꠙꠣꠃꠟꠥꠍꠞꠦ ꠢꠘ ꠕꠣꠇꠤ ꠔꠥꠟꠝꠥ। ꠇꠣꠞꠘ ꠔꠣꠁꠘ ꠈꠤꠀꠟ ꠇꠞꠍꠟꠣ ꠀꠐꠤꠀ ꠢꠤꠈꠣꠘꠅ ꠉꠤꠀ ꠃꠑꠔꠣ।
ACT 20:14 ꠀꠍꠥꠍ ꠀꠁꠀ ꠔꠣꠁꠘ ꠀꠝꠞꠣꠞ ꠟꠉꠦ ꠝꠤꠟꠣꠞ ꠛꠣꠖꠦ, ꠀꠝꠞꠣ ꠔꠣꠘꠞꠦ ꠎꠣꠎꠅ ꠔꠥꠟꠤꠀ ꠝꠤꠔꠥꠟꠤꠘꠤꠔ ꠀꠁꠟꠣꠝ।
ACT 20:15 ꠛꠣꠖꠞ ꠖꠤꠘ ꠀꠝꠞꠣ ꠎꠣꠎ ꠈꠥꠟꠤꠀ ꠢꠤꠈꠣꠘ ꠕꠣꠇꠤ ꠞꠅꠀꠘꠣ ꠅꠁꠀ ꠈꠤꠅꠍ ꠖꠤꠙꠞ ꠇꠣꠘ꠆ꠖꠣꠔ ꠀꠁꠟꠣꠝ; ꠄꠞ ꠛꠣꠖꠞ ꠖꠤꠘ ꠀꠝꠞꠣ ꠍꠣꠝꠥꠍ ꠖꠤꠙꠅ ꠞꠁꠟꠣꠝ, ꠔꠣꠞ ꠛꠣꠖꠞ ꠖꠤꠘ ꠉꠤꠀ ꠀꠝꠞꠣ ꠝꠤꠟꠤꠔꠣ ꠊꠣꠐꠅ ꠜꠤꠠꠤꠟꠣꠝ।
ACT 20:16 ꠀꠍꠤꠀ ꠖꠦꠡꠅ ꠙꠣꠃꠟꠥꠍꠦ ꠖꠦꠞꠤ ꠇꠞꠣꠞ ꠈꠤꠀꠟ ꠘꠣ ꠅꠀꠄ ꠔꠣꠁꠘ ꠝꠘꠦ ꠝꠘꠦ ꠑꠤꠇ ꠇꠞꠍꠟꠣ, ꠁꠚꠤꠍꠅ ꠘꠣ ꠢꠣꠝꠣꠁꠀ ꠄꠞ ꠉꠣꠟꠣꠛꠣꠄ ꠎꠣꠁꠛꠣꠉꠤ, ꠔꠣꠁꠘ ꠎꠟꠖꠤ ꠇꠞꠤ ꠎꠦꠞꠥꠎꠣꠟꠦꠝꠅ ꠉꠤꠀ ꠢꠣꠞꠤ ꠙꠘ꠆ꠌꠣꠁꠡꠣ ꠁꠖ ꠢꠘꠅ ꠀꠖꠣꠄ ꠇꠞꠔꠣ ꠌꠣꠁꠟꠣ।
ACT 20:17 ꠝꠤꠟꠤꠔꠣ ꠕꠣꠇꠤ ꠙꠣꠃꠟꠥꠍꠦ ꠈꠛꠞꠤꠀ ꠙꠣꠑꠣꠁꠀ ꠁꠚꠤꠍꠞ ꠎꠝꠣꠔꠞ ꠝꠥꠞꠛ꠆ꠛꠤ ꠅꠇꠟꠞꠦ ꠀꠘꠣꠁꠟꠣ।
ACT 20:18 ꠔꠣꠞꠣ ꠀꠁꠀ ꠙꠃꠍꠣꠞ ꠛꠣꠖꠦ ꠙꠣꠃꠟꠥꠍꠦ ꠇꠁꠟꠣ, “ꠀꠙꠘꠣꠞꠣ ꠔ ꠎꠣꠘꠂꠘ, ꠀꠍꠤꠀ ꠖꠦꠡꠅ ꠀꠁꠀ ꠢꠣꠞꠟꠦ ꠀꠝꠤ ꠙꠄꠟꠣ ꠖꠤꠘ ꠕꠣꠇꠤꠃ ꠇꠤꠟꠣ ꠀꠙꠘꠣꠁꠘ꠆ꠔꠞ ꠟꠉꠦ ꠡꠝꠄ ꠇꠣꠐꠣꠁꠍꠤ।
ACT 20:19 ꠁꠢꠥꠖꠤ ꠅꠇꠟꠞ ꠛꠃꠔ ꠎꠣꠔꠞ ꠇꠥ-ꠙꠞꠣꠝꠤꠡ ꠕꠣꠇꠤ, ꠔꠣꠞꠣꠞ ꠙꠣꠔꠣꠁꠟ ꠚꠘ꠆ꠖꠤꠞ ꠝꠣꠎꠦꠅ ꠀꠝꠤ ꠙꠥꠞꠣꠙꠥꠞ ꠘꠞꠝ ꠖꠤꠟꠦ, ꠌꠃꠈꠞ ꠙꠣꠘꠤ ꠚꠣꠟꠣꠁꠀ ꠝꠣꠛꠥꠖꠞ ꠉꠥꠟꠣꠝꠤ ꠇꠞꠍꠤ।
ACT 20:20 ꠀꠙꠘꠣꠞꠣꠞ ꠚꠣꠄꠖꠣ ꠅꠁꠛ ꠁꠟꠣ ꠇꠥꠘꠥ ꠔꠣꠟꠤꠝꠃ ꠘꠣ ꠟꠥꠇꠣꠁꠀ ꠙꠥꠞꠣꠙꠥꠞ ꠎꠣꠘꠣꠁꠍꠤ, ꠈꠥꠟꠣ-ꠝꠦꠟꠣ ꠝꠎꠟꠤꠍꠅ ꠀꠞ ꠊꠞꠅ ꠊꠞꠅ ꠉꠤꠀ ꠔꠣꠟꠤꠝ ꠖꠤꠔꠦꠅ ꠘꠣ ꠇꠞꠍꠤ ꠘꠣ।
ACT 20:21 ꠁꠢꠥꠖꠤ ꠀꠞ ꠁꠃꠘꠣꠘꠤꠞ ꠉꠦꠍꠦ ꠔꠛꠟꠤꠉ ꠇꠞꠤꠀ ꠛꠥꠎꠣꠁꠍꠤ, ꠔꠣꠞꠣꠞ ꠉꠥꠘꠣꠞ ꠝꠘ ꠛꠖꠟꠣꠁꠀ ꠀꠟ꠆ꠟꠣꠞ ꠙꠕꠤ ꠅꠁꠔꠣ, ꠀꠞ ꠀꠝꠞꠣꠞ ꠝꠣꠟꠤꠇ ꠢꠎꠞꠔ ꠁꠍꠣꠞ ꠃꠙꠞꠦ ꠁꠝꠣꠘ ꠀꠘꠔꠣ।
ACT 20:22 ꠀꠞ ꠅꠈꠘ ꠙꠣꠇ ꠞꠥꠢꠥꠞ ꠢꠥꠇꠥꠝꠛꠘ꠆ꠖꠤ ꠅꠁꠀ ꠀꠝꠤ ꠎꠦꠞꠥꠎꠣꠟꠦꠝꠅ ꠎꠣꠁꠞꠣꠝ, ꠢꠤꠈꠣꠘꠅ ꠀꠝꠣꠞ ꠇꠥꠘ ꠖꠡꠣ ꠅꠁꠛ, ꠎꠣꠘꠤ ꠘꠣ।
ACT 20:23 ꠈꠣꠟꠤ ꠅꠃ ꠈꠛꠞꠈꠣꠘ ꠎꠣꠘꠤ, ꠙꠣꠇ ꠞꠥꠢꠦ ꠢꠇ꠆ꠇꠟ ꠐꠣꠃꠘꠅ ꠀꠝꠣꠞꠦ ꠅꠃ ꠇꠕꠣ ꠎꠣꠘꠣꠁꠞꠣ, ꠔꠇꠟꠤꠚ ꠀꠞ ꠎꠦꠟ ꠈꠣꠐꠣ ꠀꠝꠣꠞ ꠟꠣꠉꠤ ꠛꠣꠞ ꠌꠣꠞ।
ACT 20:24 ꠅꠁꠟꠦꠅ ꠀꠝꠣꠞ ꠘꠤꠎꠞ ꠎꠣꠘꠞ ꠙꠞꠥꠀ ꠇꠞꠤ ꠘꠣ, ꠀꠝꠣꠞ ꠎꠣꠘꠞꠦ ꠅꠔ ꠝꠥꠟ꠆ꠟꠛꠣꠘ ꠝꠘꠅ ꠇꠞꠤ ꠘꠣ। ꠀꠝꠤ ꠁꠞꠣꠖꠣ ꠇꠞꠣ ꠙꠕꠞ ꠢꠦꠡ ꠑꠤꠇꠣꠘꠣ ꠙꠞ꠆ꠎꠘ꠆ꠔ ꠖꠃꠠꠣꠁꠔꠣꠝ ꠌꠣꠁꠞꠣꠝ। ꠀꠟ꠆ꠟꠣꠞ ꠞꠢꠝꠔꠞ ꠈꠥꠡ-ꠈꠛꠞꠤꠞ ꠔꠛꠟꠤꠉ ꠀꠞ ꠈꠦꠎꠝꠔꠞ ꠅꠃ ꠎꠦ ꠜꠣꠞ ꠢꠎꠞꠔ ꠁꠍꠣꠞ ꠉꠦꠍ ꠕꠣꠇꠤ ꠙꠣꠁꠍꠤ, ꠄꠞ ꠁꠘ꠆ꠎꠣꠝ ꠖꠤꠔꠣꠝ ꠌꠣꠁꠞꠣꠝ।
ACT 20:25 ꠅꠈꠘ ꠀꠝꠤ ꠄꠅꠈꠣꠘꠅ ꠎꠣꠘꠤ, ꠀꠙꠘꠣꠞꠣ ꠎꠦꠞꠣꠞ ꠝꠣꠎꠦ ꠀꠝꠤ ꠀꠟ꠆ꠟꠣꠞ ꠛꠣꠖꠡꠣꠁꠞ ꠇꠕꠣ ꠔꠛꠟꠤꠉ ꠇꠞꠞꠣꠝ, ꠅꠃ ꠀꠙꠘꠣꠁꠘ꠆ꠔꠞ ꠟꠉꠦꠅ ꠀꠞ ꠇꠥꠘꠥꠖꠤꠘ ꠖꠦꠈꠣ ꠅꠁꠔ ꠘꠣꠄ।
ACT 20:26 ꠄꠞꠟꠣꠉꠤ ꠀꠝꠤ ꠀꠁꠎ ꠀꠙꠘꠣꠁꠘ꠆ꠔꠞ ꠉꠦꠍꠦ ꠅꠃ ꠎꠛꠣꠘꠛꠘ꠆ꠖꠤ ꠖꠤꠞꠣꠝ, ꠢꠇ꠆ꠇꠟꠞ ꠟꠃꠞ ꠖꠣꠄ ꠕꠣꠇꠤ ꠀꠝꠤ ꠈꠣꠟꠣꠍ।
ACT 20:27 ꠀꠝꠤ ꠀꠟ꠆ꠟꠣ ꠙꠣꠇꠞ ꠢꠇꠟ ꠟꠣꠈꠣꠘ ꠝꠞ꠆ꠎꠤꠞ ꠇꠕꠣ ꠀꠙꠘꠣꠁꠘ꠆ꠔꠞ ꠉꠦꠍꠦ ꠛꠄꠀꠘ ꠇꠞꠔꠦ ꠈꠞꠦꠖꠤ ꠉꠦꠍꠤ ꠘꠣ।
ACT 20:28 ꠀꠙꠘꠣꠞꠣ ꠎꠣꠞꠎꠤꠞ ꠛꠦꠙꠣꠞꠦ ꠢꠥꠡꠤꠀꠞ ꠅꠃꠇ꠆ꠇꠣ। ꠙꠣꠇ ꠞꠥꠢꠦ ꠀꠙꠘꠣꠞꠣꠞꠦ ꠎꠦꠞꠣꠞ ꠌꠣꠟꠇꠖꠣꠞ ꠛꠣꠘꠣꠁꠍꠂꠘ, ꠔꠣꠞꠣꠞ ꠛꠦꠙꠣꠞꠦ ꠢꠥꠡꠤꠀꠞ ꠅꠃꠇ꠆ꠇꠣ। ꠀꠟ꠆ꠟꠣꠄ ꠔꠣꠘ ꠘꠤꠎꠞ ꠎꠘꠞꠦꠖꠤ ꠎꠦꠞꠣꠞꠦ ꠈꠞꠤꠖ ꠇꠞꠍꠂꠘ, ꠢꠤ ꠎꠝꠣꠔꠞꠦ ꠙꠥꠞꠣꠙꠥꠞ ꠖꠦꠈꠣ-ꠢꠥꠘꠣ ꠇꠞꠃꠇ꠆ꠇꠣ, ꠎꠦꠟꠣ ꠞꠣꠈꠣꠟꠦ ꠔꠣꠞ ꠝꠦꠠꠣꠞ ꠙꠣꠟꠞ ꠖꠦꠈꠣ-ꠢꠥꠘꠣ ꠇꠞꠦ, ꠁꠝꠣꠝ ꠅꠁꠀ ꠀꠙꠘꠣꠞꠣꠅ ꠅꠃꠟꠣ ꠇꠞꠃꠇ꠆ꠇꠣ।
ACT 20:29 ꠀꠝꠤ ꠎꠣꠘꠤ, ꠀꠝꠤ ꠎꠣꠅꠀꠞ ꠛꠣꠖꠦ ꠔꠥꠝꠞꠣꠞ ꠝꠣꠎꠦ ꠙꠣꠉꠟꠣ ꠛꠣꠊꠞ ꠍꠥꠞꠔꠞ ꠝꠣꠘꠥꠡ ꠀꠁꠀ ꠢꠣꠝꠣꠁꠛꠣ, ꠔꠣꠞꠣ ꠘꠤꠞ꠆ꠖꠄ ꠅꠁꠀ ꠙꠣꠟꠞ ꠛꠃꠔ ꠈꠦꠔꠤ ꠇꠞꠛꠣ।
ACT 20:30 ꠀꠞ ꠀꠙꠘꠣꠁꠘ꠆ꠔꠞ ꠘꠤꠎꠞ ꠝꠣꠎ ꠕꠣꠇꠤꠅ ꠇꠦꠃ ꠇꠦꠃ ꠝꠥꠝꠤꠘ ꠅꠇꠟꠞꠦ ꠔꠣꠞ ꠈꠞꠦ ꠘꠦꠅꠀꠞ ꠟꠣꠉꠤ, ꠢꠣꠍꠣ ꠔꠣꠟꠤꠝꠞꠦ ꠝꠤꠍꠣ ꠇꠁꠀ ꠘꠄꠀ ꠔꠣꠟꠤꠝ ꠛꠣꠞ ꠇꠞꠛ।
ACT 20:31 ꠄꠞꠟꠣꠉꠤ ꠀꠙꠘꠣꠞꠣ ꠢꠎꠣꠉ ꠞꠃꠇ꠆ꠇꠣ, ꠀꠞ ꠝꠘꠅ ꠞꠣꠈꠛꠣ, ꠀꠝꠤ ꠔꠤꠘ ꠛꠞꠍ ꠗꠞꠤꠀ ꠞꠣꠁꠔ-ꠖꠤꠘ ꠌꠃꠈꠞ ꠙꠣꠘꠤ ꠚꠣꠟꠣꠁꠀ ꠀꠙꠘꠣꠞꠣꠞꠦ ꠢꠥꠡꠤꠀꠞ ꠇꠞꠔꠦ ꠖꠝ ꠟꠁꠍꠤ ꠘꠣ।
ACT 20:32 ꠅꠈꠘ ꠀꠟ꠆ꠟꠣ ꠀꠞ ꠔꠣꠘ ꠞꠢꠝꠔꠞ ꠇꠣꠟꠣꠝꠞ ꠎꠤꠝ꠆ꠝꠣꠄ ꠀꠝꠤ ꠀꠙꠘꠣꠞꠣꠞꠦ ꠡꠙꠤꠟꠣꠝ। ꠀꠟ꠆ꠟꠣꠞ ꠁ ꠇꠣꠟꠣꠝꠦ ꠀꠙꠘꠣꠞꠣꠞꠦ ꠉꠠꠤꠀ ꠔꠥꠟꠛ ꠀꠞ ꠔꠣꠘ ꠙꠣꠇ ꠛꠘ꠆ꠖꠣ ꠅꠇꠟꠞ ꠟꠣꠉꠤ ꠅꠀꠖꠣ ꠇꠞꠣ ꠛꠦꠢꠦꠡ꠆ꠔꠤ ꠝꠘ꠆ꠎꠤꠟꠅ ꠙꠃꠍꠣꠁ ꠖꠤꠛ।
ACT 20:33 ꠀꠝꠤ ꠔ ꠇꠦꠃꠞꠞ ꠡꠥꠘꠣ-ꠞꠥꠙꠣ ꠛꠣ ꠇꠣꠙꠠ-ꠌꠥꠙꠠꠞ ꠛꠣꠄ ꠟꠣꠟꠌ ꠇꠞꠍꠤ ꠘꠣ।
ACT 20:34 ꠀꠙꠘꠣꠞꠣ ꠘꠤꠎꠦꠃ ꠔ ꠎꠣꠘꠂꠘ, ꠀꠝꠣꠞ ꠀꠞ ꠀꠝꠣꠞ ꠟꠉꠤ ꠅꠇꠟꠞ ꠅꠜꠣꠛ ꠝꠤꠐꠣꠘꠤꠞ ꠟꠣꠉꠤ ꠀꠝꠤ ꠖꠥꠁꠅ ꠀꠔꠦ ꠇꠣꠝ ꠇꠞꠍꠤ।
ACT 20:35 ꠀꠝꠤ ꠢꠇꠟ ꠟꠣꠈꠣꠘ ꠇꠣꠝꠞ ꠝꠣꠎꠦ ꠘꠝꠥꠘꠣ ꠖꠦꠈꠣꠁꠍꠤ, ꠅꠃ ꠟꠣꠈꠣꠘ ꠇꠣꠝ ꠇꠞꠤꠀ ꠖꠥꠞ꠆ꠛꠟ ꠅꠇꠟꠞꠦ ꠡꠣꠁꠎ꠆ꠎ ꠇꠞꠣ ꠎꠞꠥꠞ। ꠢꠎꠞꠔ ꠁꠍꠣꠞ ꠔꠣꠟꠤꠝꠞꠦ ꠝꠘꠅ ꠞꠣꠈꠅ, ꠔꠣꠁꠘ ꠘꠤꠎꠦ ꠛꠣꠔꠣꠁꠍꠂꠘ, ꠘꠦꠅꠀꠞ ꠌꠣꠁꠔꠦ ꠖꠦꠅꠀ ꠗꠁꠘ꠆ꠘ।”
ACT 20:36 ꠅꠈꠣꠘ ꠇꠁꠀ ꠢꠣꠞꠟꠦ, ꠙꠣꠃꠟꠥꠍꠦ ꠀꠐꠥ ꠉꠣꠠꠤꠀ ꠢꠇꠟꠞ ꠟꠉꠦ ꠖꠥꠀ ꠇꠞꠟꠣ।
ACT 20:37 ꠛꠣꠖꠦ ꠎꠝꠣꠔꠞ ꠢꠇꠟꠦ ꠝꠤꠟꠤꠀ ꠈꠥꠛ ꠇꠣꠘ꠆ꠖꠘ ꠇꠣꠘ꠆ꠖꠤꠟꠣ, ꠀꠞ ꠙꠣꠃꠟꠥꠍꠞꠦ ꠀꠁꠘ꠆ꠎꠣ ꠇꠞꠤ ꠗꠞꠤꠀ ꠢꠥꠋꠉꠣ ꠖꠤꠟꠣ।
ACT 20:38 ꠈꠣꠍ ꠇꠞꠤ ꠙꠣꠃꠟꠥꠍꠞ ꠅꠃ ꠇꠕꠣꠞ ꠟꠣꠉꠤ ꠛꠦꠡꠤ ꠇꠣꠘ꠆ꠖꠤꠟꠣ, ꠔꠣꠁꠘ ꠇꠁꠍꠟꠣ, ꠔꠣꠘ ꠝꠥꠈ ꠔꠣꠞꠣ ꠀꠞ ꠖꠦꠈꠔꠣ ꠘꠣꠄ। ꠛꠣꠖꠦ ꠔꠣꠞꠣ ꠔꠣꠘ ꠟꠉꠦ ꠅꠁꠀ ꠉꠤꠀ ꠎꠣꠎꠅ ꠔꠥꠟꠤꠀ ꠖꠤꠟꠣ।
ACT 21:1 ꠁꠚꠤꠍꠞ ꠎꠝꠣꠔꠞ ꠝꠥꠞꠛ꠆ꠛꠤ ꠅꠇꠟꠞ ꠉꠦꠍ ꠕꠣꠇꠤ ꠛꠤꠖꠣꠄ ꠟꠁꠀ, ꠎꠣꠎ ꠈꠥꠟꠤꠀ ꠢꠣꠞꠤ ꠀꠝꠞꠣ ꠡꠥꠎꠣ ꠙꠕꠦ ꠇꠥꠍ ꠘꠣꠝꠞ ꠖꠤꠙꠅ ꠀꠁꠟꠣꠝ, ꠛꠣꠖꠞ ꠖꠤꠘ ꠀꠝꠞꠣ ꠞꠥꠖꠍ ꠖꠤꠙꠅ ꠀꠁꠟꠣꠝ, ꠢꠘ ꠕꠣꠇꠤ ꠙꠣꠔꠣꠞꠣ ꠘꠣꠝꠞ ꠐꠣꠃꠘꠅ ꠉꠦꠟꠣꠝ।
ACT 21:2 ꠢꠘꠅ ꠉꠤꠀ ꠢꠣꠞꠟꠦ ꠚꠂꠘꠤꠇꠤꠀꠔ ꠎꠣꠅꠞꠣ ꠄꠇꠈꠣꠘ ꠎꠣꠎ ꠙꠣꠁꠟꠣꠝ, ꠀꠝꠞꠣ ꠢꠃ ꠎꠣꠎꠦ ꠞꠅꠀꠘꠣ ꠖꠤꠟꠣꠝ।
ACT 21:3 ꠀꠞ ꠎꠦꠛꠟꠣ ꠍꠣꠁꠙ꠆ꠞꠣꠍ ꠖꠤꠙ ꠖꠦꠈꠟꠣꠝ, ꠅꠃ ꠡꠝꠄ ꠖꠤꠙꠞ ꠒꠣꠁꠘ ꠉꠣꠟꠣꠛꠣꠄ ꠉꠤꠀ ꠀꠝꠞꠣ ꠡꠤꠞꠤꠀ ꠖꠦꠡꠞ ꠡꠥꠞ ꠐꠣꠃꠘꠅ ꠀꠁꠀ ꠟꠣꠝꠟꠣꠝ। ꠢꠤꠈꠣꠘꠅ ꠎꠣꠎꠞ ꠝꠣꠟ-ꠍꠣꠝꠣꠘꠣ ꠟꠣꠝꠣꠁ ꠖꠤꠟ।
ACT 21:4 ꠢꠘꠞ ꠝꠥꠝꠤꠘ ꠅꠇꠟꠞꠦ ꠔꠥꠇꠣꠁꠀ ꠢꠣꠞꠤ ꠀꠝꠞꠣ ꠡꠣꠔ ꠖꠤꠘ ꠔꠣꠞꠣꠞ ꠉꠦꠍꠦ ꠞꠁꠟꠣꠝ; ꠔꠣꠞꠣ ꠙꠣꠇ ꠞꠥꠢꠥꠞ ꠝꠣꠞꠚꠔꠦ ꠙꠣꠃꠟꠥꠍꠞꠦ ꠝꠤꠘꠔ ꠇꠞꠟꠣ, ꠔꠣꠁꠘ ꠎꠣꠘꠥ ꠎꠦꠞꠥꠎꠣꠟꠦꠝꠅ ꠘꠣ ꠎꠣꠁꠘ।
ACT 21:5 ꠁꠘꠅ ꠇꠄꠖꠤꠘ ꠇꠣꠐꠣꠘꠤꠞ ꠛꠣꠖꠦ ꠀꠝꠞꠣ ꠢꠤꠞꠛꠣꠞ ꠞꠅꠀꠘꠣ ꠅꠁꠟꠣꠝ, ꠔꠦꠃ ꠔꠣꠞꠣ ꠢꠇ꠆ꠇꠟꠦ ꠛꠃ-ꠛꠣꠁꠌ꠆ꠌꠣ ꠟꠁꠀ ꠐꠣꠃꠘꠞ ꠛꠣꠞꠦ ꠀꠁꠀ ꠀꠝꠞꠣꠞꠦ ꠀꠉꠥꠀꠁ ꠖꠤꠟꠣ। ꠛꠣꠖꠦ ꠖꠞꠤꠀꠞ ꠙꠣꠞꠅ ꠀꠝꠞꠣ ꠀꠐꠥ ꠉꠣꠠꠤꠀ ꠖꠥꠀ ꠇꠞꠟꠣꠝ।
ACT 21:6 ꠖꠥꠀ ꠛꠣꠖꠦ ꠎꠣꠞꠎꠤꠞ ꠙꠕꠦ ꠛꠤꠖꠣꠄ ꠟꠁꠀ ꠀꠝꠞꠣ ꠎꠣꠎꠅ ꠃꠑꠟꠣꠝ, ꠀꠞ ꠔꠣꠞꠣ ꠘꠤꠎꠞ ꠛꠣꠠꠤꠔ ꠉꠦꠟꠣꠉꠤ।
ACT 21:7 ꠡꠥꠞ ꠕꠣꠇꠤ ꠞꠅꠀꠘꠣ ꠅꠁꠀ ꠀꠝꠞꠣ ꠎꠣꠎꠞ ꠍꠚꠞ ꠡꠦꠡ ꠇꠞꠤꠀ ꠔꠟꠤꠝꠣꠄꠁꠔ ꠀꠎꠤꠟꠣꠝ, ꠢꠘꠞ ꠝꠥꠝꠤꠘ ꠅꠇꠟꠞꠦ ꠜꠣꠟꠣ-ꠛꠥꠞꠣ ꠎꠤꠇꠣꠘꠤꠞ ꠛꠣꠖꠦ ꠀꠝꠞꠣ ꠔꠣꠞꠣꠞ ꠟꠉꠦ ꠄꠇꠖꠤꠘ ꠞꠁꠟꠣꠝ।
ACT 21:8 ꠛꠣꠖꠞ ꠖꠤꠘ ꠀꠝꠞꠣ ꠛꠤꠖꠣꠄ ꠟꠁꠀ ꠇꠂꠍꠞꠤꠀꠔ ꠀꠁꠟꠣꠝ, ꠀꠞ ꠔꠛꠟꠤꠉ ꠇꠣꠝꠞ ꠛꠥꠎꠥꠞ꠆ꠉ ꠚꠤꠟꠤꠚꠞ ꠛꠣꠠꠤꠔ ꠉꠦꠟꠣꠝ। ꠄꠁꠘ ꠔ ꠎꠦꠞꠥꠎꠣꠟꠦꠝꠞ ꠢꠃ ꠡꠣꠔ ꠈꠣꠖꠤꠝꠖꠣꠞꠞ ꠄꠇꠎꠘ।
ACT 21:9 ꠔꠣꠘ ꠌꠣꠁꠞꠎꠘ ꠀꠛꠤꠀꠔꠤ ꠙꠥꠠꠤꠘ ꠀꠍꠟꠣ, ꠄꠞꠣ ꠘꠛꠤꠞ ꠟꠣꠈꠣꠘ ꠅꠢꠤ ꠇꠁꠔꠣ।
ACT 21:10 ꠛꠣꠇ꠆ꠇꠣ ꠇꠄꠖꠤꠘ ꠢꠘꠅ ꠞꠅꠀꠞ ꠛꠣꠖꠦ ꠀꠉꠣꠛꠥꠍ ꠘꠣꠝꠞ ꠄꠇꠎꠘ ꠘꠛꠤꠄ ꠄꠢꠥꠖꠤꠀ ꠕꠣꠇꠤ ꠔꠡꠞꠤꠚ ꠀꠘꠟꠣ।
ACT 21:11 ꠔꠣꠁꠘ ꠀꠁꠀ ꠢꠣꠞꠤ ꠙꠣꠃꠟꠥꠍꠞ ꠇꠝꠞꠞ ꠔꠣꠉꠣ ꠈꠥꠟꠤꠟꠤꠟꠣ, ꠀꠞ ꠁꠐꠣꠖꠤ ꠘꠤꠎꠞ ꠀꠔ-ꠙꠣꠅ ꠛꠣꠘ꠆ꠖꠤꠀ ꠇꠁꠟꠣ, “ꠙꠣꠇ ꠞꠥꠢꠦ ꠅꠃꠟꠣ ꠇꠁꠞꠣ, ꠎꠦꠞꠥꠎꠣꠟꠦꠝꠞ ꠁꠢꠥꠖꠤ ꠅꠇꠟꠦ ꠅꠃ ꠇꠝꠞꠞ ꠔꠣꠉꠣ ꠀꠟꠣꠞꠦ ꠅꠃꠟꠣ ꠛꠣꠘꠛꠣ, ꠀꠞ ꠅ-ꠁꠢꠥꠖꠤ ꠅꠇꠟꠞ ꠀꠔꠅ ꠡꠙꠤꠀ ꠖꠤꠛꠣ।”
ACT 21:12 ꠁꠔꠣ ꠢꠥꠘꠤꠀ ꠢꠤꠘꠞ ꠝꠣꠘꠡꠦ ꠀꠞ ꠀꠝꠞꠣꠅ ꠙꠣꠃꠟꠥꠍꠞꠦ ꠛꠃꠔ ꠝꠤꠘꠔ ꠇꠞꠟꠣꠝ, ꠔꠣꠁꠘ ꠎꠣꠘꠥ ꠎꠦꠞꠥꠎꠣꠟꠦꠝꠅ ꠎꠣꠅꠀ ꠛꠣꠖ ꠖꠤꠟꠣꠁꠘ।
ACT 21:13 ꠙꠣꠃꠟꠥꠍꠦ ꠇꠁꠟꠣ, “ꠔꠥꠝꠞꠣ ꠁꠔꠣ ꠇꠤꠔꠣ ꠟꠣꠉꠣꠁꠟꠣꠄ? ꠇꠣꠘ꠆ꠖꠤꠀ ꠀꠝꠣꠞ ꠝꠘ ꠜꠣꠋꠉꠤ ꠖꠤꠞꠣꠄ ꠇꠦꠘꠦ? ꠢꠎꠞꠔ ꠁꠍꠣꠞ ꠟꠣꠉꠤ ꠀꠝꠤ ꠎꠦꠞꠥꠎꠣꠟꠦꠝꠅ ꠈꠣꠟꠤ ꠛꠘ꠆ꠖꠤ ꠅꠀꠃ ꠘꠣꠄ, ꠝꠞꠔꠦꠅ ꠔꠤꠀꠞ ꠀꠍꠤ।”
ACT 21:14 ꠔꠣꠘꠞꠦ ꠇꠕꠣ ꠢꠥꠘꠣꠁꠔꠣꠝ ꠘꠣ ꠙꠣꠞꠤꠀ ꠀꠝꠞꠣ ꠘꠤꠞꠣꠁ ꠅꠁꠉꠦꠟꠣꠝ, ꠀꠞ ꠇꠁꠟꠣꠝ, “ꠝꠣꠛꠥꠖꠞ ꠝꠞ꠆ꠎꠤ ꠇꠣꠁꠝ ꠅꠃꠇ।”
ACT 21:15 ꠛꠣꠖꠦ ꠀꠝꠞꠣ ꠝꠣꠟ-ꠍꠣꠝꠣꠘꠣ ꠉꠣꠁꠐ ꠛꠣꠘ꠆ꠖꠤꠀ ꠎꠦꠞꠥꠎꠣꠟꠦꠝꠅ ꠞꠅꠀꠘꠣ ꠖꠤꠟꠣꠝ।
ACT 21:16 ꠇꠂꠍꠞꠤꠀ ꠐꠣꠃꠘꠞ ꠇꠄꠎꠘ ꠝꠥꠝꠤꠘꠅ ꠀꠝꠞꠣꠞ ꠟꠉꠦ ꠀꠁꠟꠣ, ꠀꠞ ꠍꠣꠁꠙ꠆ꠞꠣꠍ ꠖꠤꠙꠞ ꠝꠦꠘꠣꠍꠘ ꠘꠣꠝꠞ ꠄꠇꠎꠘ ꠙꠥꠞꠣꠘꠣ ꠁꠝꠣꠘꠖꠣꠞꠞ ꠛꠣꠠꠤꠔ ꠀꠝꠞꠣꠞꠦ ꠟꠁꠀ ꠉꠦꠟꠣ। ꠄꠘ ꠛꠣꠠꠤꠔꠃ ꠀꠝꠞꠣ ꠞꠅꠀꠞ ꠇꠕꠣ ꠀꠍꠤꠟ।
ACT 21:17 ꠎꠦꠞꠥꠎꠣꠟꠦꠝꠅ ꠀꠅꠀꠞ ꠛꠣꠖꠦ ꠝꠥꠝꠤꠘ ꠅꠇꠟꠦ ꠈꠥꠡꠤ ꠅꠁꠀ ꠀꠝꠞꠣꠞꠦ ꠇꠛꠥꠟ ꠇꠞꠟꠣ।
ACT 21:18 ꠛꠣꠖꠞ ꠖꠤꠘ ꠙꠣꠃꠟꠥꠍꠦ ꠀꠝꠞꠣꠞꠦ ꠟꠁꠀ ꠢꠎꠞꠔ ꠁꠍꠣꠞ ꠜꠣꠁ ꠁꠀꠇꠥꠛꠞ ꠟꠉꠦ ꠝꠥꠟꠣꠇꠣꠔ ꠇꠞꠟꠣ। ꠢꠤꠈꠣꠘꠅ ꠎꠝꠣꠔꠞ ꠝꠥꠞꠛ꠆ꠛꠤ ꠅꠇꠟꠅ ꠀꠁꠟꠣ।
ACT 21:19 ꠙꠣꠃꠟꠥꠍꠦ ꠄꠞꠣꠞꠦ ꠜꠣꠟꠣ-ꠛꠥꠞꠣ ꠎꠤꠇꠣꠁꠀ ꠢꠣꠞꠟꠦ, ꠔꠣꠘ ꠔꠛꠟꠤꠉꠞ ꠝꠣꠎꠖꠤ ꠀꠟ꠆ꠟꠣꠄ ꠇꠤꠟꠣꠘ ꠅ-ꠁꠢꠥꠖꠤ ꠅꠇꠟꠞ ꠝꠣꠎꠦ ꠖꠤꠘꠤ ꠇꠣꠝ ꠢꠣꠍꠤꠟ ꠇꠞꠍꠂꠘ, ꠁꠔꠣ ꠢꠇꠟꠔꠣ ꠄꠇ ꠄꠇ ꠇꠞꠤ ꠔꠣꠞꠣꠞ ꠉꠦꠍꠦ ꠛꠄꠀꠘ ꠇꠞꠟꠣ।
ACT 21:20 ꠁꠔꠣ ꠢꠥꠘꠤꠀ ꠝꠥꠞꠛ꠆ꠛꠤ ꠅꠇꠟꠦ ꠀꠟ꠆ꠟꠣꠞ ꠔꠣꠞꠤꠚ ꠇꠞꠟꠣ ꠀꠞ ꠔꠣꠘꠞꠦ ꠇꠁꠟꠣ, “ꠜꠣꠁ, ꠔꠥꠝꠤ ꠔ ꠖꠦꠈꠞꠣꠄ, ꠀꠎꠣꠞ ꠀꠎꠣꠞ ꠁꠢꠥꠖꠤꠄ ꠢꠎꠞꠔ ꠁꠍꠣꠞ ꠃꠙꠞꠦ ꠁꠝꠣꠘ ꠀꠘꠍꠂꠘ, ꠀꠞ ꠔꠣꠞꠣ ꠢꠇꠟꠦꠃ ꠢꠎꠞꠔ ꠝꠥꠍꠣꠞ ꠡꠞꠤꠅꠔꠞꠦ ꠀꠝꠟ ꠇꠞꠣꠞ ꠈꠤꠀꠟ ꠀꠍꠦ।
ACT 21:21 ꠅꠁꠟꠦ ꠔꠣꠞꠣ ꠅꠃ ꠈꠛꠞꠅ ꠙꠣꠁꠍꠂꠘ, ꠅ-ꠁꠢꠥꠖꠤ ꠅꠇꠟꠞ ꠟꠉꠦ ꠎꠦꠔꠣ ꠁꠢꠥꠖꠤ ꠅꠇꠟ ꠕꠣꠇꠂꠘ, ꠔꠣꠞꠣꠞꠦ ꠔꠥꠝꠤ ꠔꠣꠟꠤꠝ ꠖꠤꠍ ꠝꠥꠍꠣꠞ ꠡꠞꠤꠅꠔ ꠛꠣꠖ ꠖꠤꠟꠣꠁꠔꠣ ꠇꠞꠤ, ꠔꠣꠞꠣ ꠎꠣꠘꠥ ꠢꠥꠞꠥꠔ꠆ꠔꠣꠁꠘ꠆ꠔꠞ ꠝꠍꠟꠝꠣꠘꠤ ꠇꠞꠣꠘꠤ ꠛꠣꠖ ꠖꠤꠟꠣꠁꠘ ꠀꠞ ꠁꠢꠥꠖꠤ ꠅꠇꠟꠞ ꠞꠦꠅꠀꠎꠅ ꠘꠣ ꠝꠣꠘꠂꠘ।
ACT 21:22 ꠔꠦ ꠇꠤꠔꠣ ꠇꠞꠣ ꠎꠣꠄ? ꠔꠣꠞꠣ ꠔ ꠘꠤꠌꠄ ꠢꠥꠘꠛꠣ ꠔꠥꠝꠤ ꠀꠁꠍ।
ACT 21:23 ꠅꠈꠘ ꠀꠝꠞꠣ ꠔꠥꠝꠣꠞꠦ ꠎꠦꠟꠣ ꠇꠁ, ꠔꠥꠝꠤ ꠅꠃꠟꠣ ꠇꠞꠤꠟꠣꠅ। ꠀꠝꠞꠣꠞ ꠝꠣꠎꠦ ꠌꠣꠁꠞꠎꠘ ꠛꠦꠐꠣꠁꠘ ꠀꠍꠂꠘ, ꠔꠣꠞꠣ ꠄꠇꠈꠣꠘ ꠝꠣꠘ꠆ꠘꠔ ꠇꠞꠍꠂꠘ;
ACT 21:24 ꠔꠥꠝꠤ ꠔꠣꠞꠣꠞꠦ ꠟꠉꠦ ꠟꠁꠀ ꠎꠣꠅ, ꠔꠣꠞꠣꠞ ꠟꠉꠦ ꠉꠤꠀ ꠔꠥꠝꠤ ꠀꠞ ꠔꠣꠞꠣꠞ ꠙꠣꠇ-ꠍꠣꠚ ꠅꠀꠞ ꠈꠞꠌ ꠀꠞ ꠝꠣꠕꠣꠞ ꠌꠥꠟ ꠇꠣꠝꠣꠘꠤꠞ ꠙꠄꠡꠣꠅ ꠖꠤꠟꠣꠅ। ꠔꠦꠃ ꠢꠇꠟꠦ ꠎꠣꠘꠛꠣ, ꠔꠥꠝꠣꠞ ꠘꠣꠝꠦ ꠔꠣꠞꠣ ꠎꠦꠔꠣ ꠈꠛꠞ ꠙꠣꠁꠍꠂꠘ, ꠁꠔꠣ ꠇꠥꠘ꠆ꠔꠣꠃ ꠘꠣꠄ, ꠀꠍꠟꠦ ꠔꠥꠝꠤ ꠘꠤꠎꠦꠅ ꠝꠥꠍꠣꠞ ꠡꠞꠤꠅꠔ ꠀꠞ ꠞꠦꠅꠀꠎ ꠝꠣꠘꠞꠣꠄ।
ACT 21:25 ꠅꠁꠟꠦ ꠎꠦꠔꠣ ꠅ-ꠁꠢꠥꠖꠤ ꠅꠇꠟꠦ ꠁꠝꠣꠘ ꠀꠘꠍꠂꠘ, ꠔꠣꠞꠣꠞꠦ ꠀꠝꠞꠣꠞ ꠅꠃ ꠚꠄꠍꠣꠟꠣ ꠟꠦꠈꠤꠀ ꠎꠣꠘꠣꠁ ꠖꠤꠍꠤ, ꠖꠦꠛꠔꠣꠞ ꠘꠣꠝꠦ ꠘꠤꠅꠔ ꠇꠞꠣ ꠈꠣꠘꠤ ꠈꠣꠁꠔꠣ ꠘꠣ, ꠟꠃ ꠈꠣꠁꠔꠣ ꠘꠣ ꠀꠞ ꠉꠟꠣ ꠐꠤꠙꠤꠀ ꠝꠣꠞꠣ ꠇꠥꠘꠥ ꠎꠣꠘꠖꠣꠞꠞ ꠉꠥꠡ꠆ꠔ ꠈꠣꠁꠔꠣ ꠘꠣ, ꠇꠥꠘꠥ ꠎꠣꠔꠞ ꠎꠤꠘꠣꠞ ꠇꠣꠝꠅ ꠎꠣꠁꠔꠣ ꠘꠣ।”
ACT 21:26 ꠔꠦꠃ ꠙꠣꠃꠟꠥꠍꠦ ꠢꠃ ꠝꠣꠘꠥꠡ ꠅꠇꠟꠞꠦ ꠟꠉꠦ ꠟꠁꠀ ꠉꠤꠀ, ꠔꠣꠞꠣꠞ ꠟꠉꠦ ꠘꠤꠎꠞꠦꠅ ꠙꠣꠇ-ꠍꠣꠚ ꠇꠞꠟꠣ। ꠛꠣꠖꠞ ꠖꠤꠘ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠅ ꠢꠣꠝꠣꠁꠟꠣ, ꠀꠞ ꠔꠣꠞꠣꠞ ꠙꠣꠇ-ꠍꠣꠚ ꠅꠀꠞ ꠟꠣꠉꠤ ꠙꠡꠥ ꠇꠥꠞꠛꠣꠘꠤ ꠇꠥꠘꠖꠤꠘ ꠖꠦꠅꠀ ꠅꠁꠛ, ꠄꠅ ꠔꠣꠞꠤꠈ ꠎꠣꠘꠣꠁ ꠖꠤꠟꠣ।
ACT 21:27 ꠙꠣꠇ-ꠍꠣꠚ ꠅꠀꠞ ꠘꠤꠅꠝꠞ ꠢꠤ ꠡꠣꠔ ꠖꠤꠘ ꠡꠦꠡ ꠘꠣ ꠅꠁꠔꠦꠃ, ꠀꠍꠤꠀ ꠖꠦꠡꠞ ꠇꠄꠎꠘ ꠁꠢꠥꠖꠤꠄ ꠙꠣꠃꠟꠥꠍꠞꠦ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠅ ꠖꠦꠈꠤꠀ, ꠝꠣꠘꠡꠞꠦ ꠃꠍꠇꠣꠁ ꠖꠤꠀ ꠔꠣꠘꠦ ꠗꠞꠟꠣ।
ACT 21:28 ꠔꠣꠞꠣ ꠌꠤꠟ꠆ꠟꠣꠁꠀ ꠇꠁꠟꠣ, “ꠅ ꠛꠘꠤ ꠁꠍꠞꠣꠁꠟ ꠅꠇꠟ, ꠀꠉꠥꠀꠅ! ꠀꠡ꠆ꠔꠣ ꠖꠥꠘꠤꠀꠞ ꠝꠣꠘꠡꠞ ꠉꠦꠍꠦ ꠎꠦꠉꠥꠄ ꠀꠝꠞꠣꠞ ꠎꠣꠔꠤꠞ, ꠀꠝꠞꠣꠞ ꠡꠞꠤꠅꠔꠞ ꠀꠞ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠞ ꠛꠤꠙꠇ꠆ꠇꠦ ꠔꠣꠟꠤꠝ ꠖꠤꠀ ꠊꠥꠞꠦ, ꠅꠉꠥ ꠢꠃ ꠛꠦꠐꠣ! ꠢꠦ ꠁꠃꠘꠣꠘꠤ ꠅꠇꠟꠞꠦ ꠅꠘꠅ ꠢꠣꠞꠣꠁꠀ ꠁ ꠙꠣꠇ ꠎꠣꠉꠣꠈꠣꠘꠞꠦꠅ ꠘꠣꠙꠣꠇ ꠛꠣꠘꠣꠁꠍꠦ।”
ACT 21:29 ꠄꠞ ꠀꠉꠦ ꠔ ꠁꠚꠤꠍꠞ ꠔꠚꠤꠝꠞꠦ ꠙꠣꠃꠟꠥꠍꠞ ꠟꠉꠦ ꠐꠣꠃꠘꠅ ꠌꠇ꠆ꠇꠞꠅ ꠖꠦꠈꠤꠀ ꠔꠣꠞꠣ ꠝꠘꠦ ꠝꠘꠦ ꠡꠘ꠆ꠖꠄ ꠇꠞꠍꠂꠘ, ꠙꠣꠃꠟꠥꠍꠦ ꠔꠣꠘꠞꠦ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠅ-ꠅ ꠢꠣꠞꠣꠁꠍꠂꠘ।
ACT 21:30 ꠔꠦꠃ ꠀꠡ꠆ꠔꠣ ꠐꠣꠃꠘꠞ ꠝꠣꠘꠥꠡ ꠉꠞꠝ ꠅꠁꠉꠦꠟꠣ, ꠀꠞ ꠄꠇꠟꠉꠦ ꠖꠃꠠꠤꠀ ꠀꠁꠀ ꠙꠣꠃꠟꠥꠍꠞꠦ ꠗꠞꠤꠀ ꠛꠣꠄꠔꠥꠟ-ꠝꠥꠇꠣꠖ꠆ꠖꠍ ꠕꠣꠇꠤ ꠐꠣꠘꠤꠀ ꠛꠣꠞꠦ ꠀꠘꠟꠣ, ꠀꠞ ꠟꠉꠦ ꠟꠉꠦꠃ ꠄꠞ ꠖꠥꠀꠞ ꠅꠇꠟ ꠛꠘ꠆ꠖ ꠇꠞꠤꠟ꠆ꠟꠣ।
ACT 21:31 ꠔꠣꠞꠣ ꠙꠣꠃꠟꠥꠍꠞꠦ ꠝꠣꠞꠤꠟꠤꠔꠣ ꠌꠣꠁꠟꠣ, ꠅꠁꠟꠦ ꠅꠃ ꠡꠝꠄ ꠞꠥꠝꠣꠘ ꠍꠤꠙꠣꠁ ꠅꠇꠟꠞ ꠙꠞꠗꠣꠘꠞ ꠉꠦꠍꠦ ꠈꠛꠞ ꠉꠦꠟ, ꠀꠡ꠆ꠔꠣ ꠎꠦꠞꠥꠎꠣꠟꠦꠝꠞ ꠝꠣꠎꠦ ꠃꠟꠁꠡ꠆ꠔꠟ ꠟꠣꠉꠤꠉꠦꠍꠦ।
ACT 21:32 ꠟꠉꠦ ꠟꠉꠦꠃ ꠔꠣꠁꠘ ꠍꠥꠛꠦꠖꠣꠞ ꠅꠇꠟ ꠀꠞ ꠍꠤꠙꠣꠁ ꠖꠟ ꠟꠁꠀ ꠖꠃꠠꠤꠀ ꠔꠣꠞꠣꠞ ꠉꠦꠍꠦ ꠀꠁꠟꠣ। ꠝꠣꠘꠡꠦ ꠍꠤꠙꠣꠁ ꠀꠞ ꠍꠤꠙꠣꠁꠞ ꠙꠞꠗꠣꠘꠞꠦ ꠖꠦꠈꠤꠀ ꠙꠣꠃꠟꠥꠍꠞꠦ ꠝꠣꠁꠞ-ꠗꠁꠞ ꠇꠞꠣ ꠛꠘ꠆ꠖ ꠇꠞꠟꠣ।
ACT 21:33 ꠔꠦꠃ ꠢꠤ ꠅꠚꠤꠡꠣꠞꠦ ꠀꠁꠀ ꠙꠣꠃꠟꠥꠍꠞꠦ ꠀꠐꠇ ꠇꠞꠤꠀ ꠖꠥꠁꠉꠦꠍꠣ ꠡꠤꠇꠟꠖꠤ ꠛꠣꠘ꠆ꠖꠣꠞ ꠢꠥꠇꠥꠝ ꠖꠤꠟꠣ, ꠛꠣꠖꠦ ꠎꠤꠇꠣꠁꠟꠣ, “ꠁ ꠝꠣꠘꠥꠡꠉꠥ ꠇꠦ, ꠢꠦ ꠇꠤꠔꠣ ꠖꠥꠡ ꠇꠞꠍꠦ?”
ACT 21:34 ꠉꠘ꠆ꠒꠉꠥꠟꠞ ꠝꠣꠎꠦ ꠌꠤꠟ꠆ꠟꠣꠁꠀ ꠇꠦꠃ ꠄꠇꠟꠣꠈꠣꠘ, ꠇꠦꠃ ꠇꠦꠃ ꠀꠞꠇ ꠟꠣꠈꠣꠘ ꠇꠁꠟ। ꠅꠁꠟꠦ ꠔꠣꠁꠘ ꠜꠣꠟꠣꠝꠘ꠆ꠔꠦ ꠇꠥꠘ꠆ꠔꠣ ꠡꠝꠎꠤꠔꠣ ꠘꠣ ꠙꠣꠞꠤꠀ ꠙꠣꠃꠟꠥꠍꠞꠦ ꠘꠤꠀ ꠇꠦꠘ꠆ꠐꠘꠝꠦꠘ꠆ꠐꠅ ꠢꠣꠞꠣꠁꠀ ꠕꠅꠀꠞ ꠢꠥꠇꠥꠝ ꠖꠤꠟꠣ।
ACT 21:35 ꠙꠣꠃꠟꠥꠍ ꠍꠤꠠꠤꠞ ꠝꠥꠈꠅ ꠎꠣꠁꠔꠦꠃ ꠝꠣꠘꠡꠞ ꠀꠔ ꠕꠣꠇꠤ ꠛꠣꠌꠣꠘꠤꠞ ꠟꠣꠉꠤ, ꠍꠤꠙꠣꠁ ꠅꠇꠟꠦ ꠔꠣꠘꠞꠦ ꠃꠌꠣ ꠇꠞꠤꠀ ꠛꠁꠀ ꠘꠤꠟꠣꠉꠤ।
ACT 21:36 ꠝꠣꠘꠡꠦ ꠈꠞꠦ ꠅꠁꠀ ꠝꠤꠍꠤꠟ ꠖꠤꠔꠣ ꠟꠣꠉꠟꠣ, “ꠅꠉꠥꠞꠦ ꠝꠣꠞꠤꠟꠣꠅ!”
ACT 21:37 ꠍꠤꠙꠣꠁ ꠅꠇꠟꠦ ꠔꠣꠘꠞꠦ ꠇꠦꠘ꠆ꠐꠘꠝꠦꠘ꠆ꠐꠅ ꠢꠣꠞꠣꠁ ꠖꠤꠔꠣ ꠌꠣꠁꠞꠣ, ꠅꠃ ꠡꠝꠄ ꠔꠣꠁꠘ ꠙꠞꠗꠣꠘ ꠅꠚꠤꠡꠣꠞꠞꠦ ꠁꠃꠘꠣꠘꠤ ꠜꠣꠡꠣꠄ ꠍꠅꠀꠟ ꠇꠞꠟꠣ, “ꠀꠝꠤ ꠀꠙꠘꠣꠞ ꠉꠦꠍꠦ ꠇꠥꠘ꠆ꠔꠣ ꠝꠣꠔꠔꠣꠝ ꠙꠣꠞꠝꠥ ꠘꠤ?” ꠅꠚꠤꠡꠣꠞꠦ ꠇꠁꠟꠣ, “ꠔꠥꠝꠤ ꠇꠤꠔꠣ ꠁꠃꠘꠣꠘꠤ ꠜꠣꠡꠣ ꠎꠣꠘ ꠘꠤ?
ACT 21:38 ꠔꠦ ꠔꠥꠝꠤ ꠇꠤꠔꠣ ꠢꠃ ꠝꠤꠡꠞꠤ ꠛꠦꠐꠣ ꠘꠤ, ꠎꠦꠉꠥꠄ ꠇꠄꠖꠤꠘ ꠀꠉꠦ ꠟꠣꠠꠣꠁ ꠇꠞꠤꠀ, ꠌꠣꠁꠞ ꠀꠎꠣꠞ ꠡꠘꠔ꠆ꠞꠣꠡꠤꠞꠦ ꠟꠉꠦ ꠟꠁꠀ ꠝꠞꠥꠜꠥꠝꠤꠔ ꠉꠦꠍꠤꠟ?”
ACT 21:39 ꠙꠣꠃꠟꠥꠍꠦ ꠎꠥꠀꠙ ꠖꠤꠟꠣ, “ꠍꠣꠛ, ꠀꠝꠤ ꠄꠇꠎꠘ ꠁꠢꠥꠖꠤ, ꠇꠤꠟꠤꠇꠤꠀꠞ ꠔꠣꠞ꠆ꠡ ꠡꠢꠞꠞ ꠝꠣꠘꠥꠡ, ꠀꠝꠤ ꠎꠦꠔꠣ ꠝꠘꠦ ꠇꠄ ꠁꠔꠣ ꠐꠣꠃꠘꠞ ꠝꠣꠘꠥꠡ ꠘꠣꠄ। ꠀꠝꠤ ꠀꠙꠘꠣꠞꠦ ꠝꠤꠘꠔ ꠇꠞꠞꠣꠝ, ꠖꠄꠀ ꠇꠞꠤ ꠝꠣꠘꠡꠞ ꠉꠦꠍꠦ ꠀꠝꠣꠞꠦ ꠝꠣꠔꠣꠞ ꠡꠥꠎꠥꠉ ꠈꠣꠘ ꠖꠦꠃꠇ꠆ꠇꠣ।”
ACT 21:40 ꠔꠣꠁꠘ ꠡꠥꠎꠥꠉ ꠖꠦꠅꠀꠞ ꠛꠣꠖꠦ ꠙꠣꠃꠟꠥꠍꠦ ꠍꠤꠠꠤꠞ ꠃꠙꠞꠦ ꠃꠛꠣꠁꠀ, ꠝꠣꠘꠡꠞꠦ ꠘꠤꠞꠣꠁ ꠅꠀꠞ ꠟꠣꠉꠤ ꠀꠔꠖꠤ ꠁꠡꠣꠞꠣ ꠖꠤꠟꠣ, ꠔꠣꠞꠣ ꠘꠤꠞꠣꠁ ꠅꠁꠀ ꠢꠣꠞꠟꠦ ꠔꠣꠁꠘ ꠁꠛꠞꠣꠘꠤ ꠜꠣꠡꠣꠄ ꠇꠅꠀꠔ ꠟꠣꠉꠟꠣ।
ACT 22:1 ꠙꠣꠃꠟꠥꠍꠦ ꠇꠁꠟꠣ, “ꠅ ꠛꠣꠛꠣ ꠅꠇꠟ, ꠜꠣꠁ ꠅꠇꠟ, ꠀꠝꠤ ꠅꠈꠘ ꠀꠝꠣꠞ ꠘꠤꠎꠞ ꠎꠛꠣꠘꠛꠘ꠆ꠖꠤ ꠖꠤꠞꠣꠝ, ꠀꠙꠘꠣꠞꠣ ꠢꠥꠘꠃꠇ꠆ꠇꠣ।”
ACT 22:2 ꠔꠣꠁꠘ ꠁꠛꠞꠣꠘꠤ ꠜꠣꠡꠣꠄ ꠝꠣꠔꠞꠣ ꠖꠦꠈꠤꠀ ꠝꠣꠘꠥꠡ ꠄꠇ꠆ꠇꠦꠞꠦ ꠘꠤꠞꠣꠁ ꠅꠁꠉꠦꠟꠣ। ꠅꠃ ꠔꠣꠁꠘ ꠇꠁꠟꠣ,
ACT 22:3 “ꠀꠝꠤ ꠄꠇꠎꠘ ꠁꠢꠥꠖꠤ। ꠇꠤꠟꠤꠇꠤꠀꠞ ꠔꠣꠞ꠆ꠡ ꠡꠢꠞꠅ ꠀꠝꠣꠞ ꠎꠘꠝ ꠅꠁꠍꠦ; ꠅꠁꠟꠦ ꠅꠃ ꠎꠦꠞꠥꠎꠣꠟꠦꠝ ꠐꠣꠃꠘꠅ ꠀꠁꠀ ꠀꠝꠤ ꠝꠣꠘꠥꠡ ꠅꠁꠍꠤ, ꠀꠟ꠆ꠟꠣꠝꠣ ꠉꠝꠟꠤꠄꠟꠞ ꠙꠣꠅꠞ ꠇꠣꠘ꠆ꠖꠣꠔ ꠛꠁꠀ ꠀꠝꠤ ꠀꠝꠞꠣꠞ ꠝꠄ-ꠝꠥꠞꠛ꠆ꠛꠤ ꠅꠇꠟꠞ ꠡꠞꠤꠅꠔ ꠀꠞ ꠇꠣꠄꠖꠣ-ꠇꠣꠘꠥꠘꠞ ꠡꠥꠟ꠆ꠟꠀꠘꠣ ꠔꠣꠟꠤꠝ ꠙꠣꠁꠍꠤ। ꠀꠞ ꠀꠁꠎ ꠀꠙꠘꠣꠞꠣ ꠎꠦꠟꠣ ꠀꠟ꠆ꠟꠣꠅꠀꠟꠣꠉꠤꠞꠤ ꠖꠦꠈꠣꠁꠞꠣ, ꠀꠝꠤ ꠘꠤꠎꠦꠅ ꠀꠉꠦ ꠅꠃꠟꠣ ꠀꠟ꠆ꠟꠣꠅꠀꠟꠣ ꠀꠍꠟꠣꠝ।
ACT 22:4 ꠀꠝꠤ ꠁꠍꠣꠞ ꠙꠕꠤ ꠅꠇꠟꠞꠦ ꠎꠣꠘ-ꠙꠞꠣꠘ ꠡꠙꠤꠀ ꠎꠥꠟꠥꠝ ꠀꠞ ꠎꠣꠘꠦ ꠝꠣꠞꠔꠣꠝ, ꠛꠦꠐꠣꠁꠘ-ꠛꠦꠐꠤꠘꠞꠦ ꠛꠣꠘ꠆ꠖꠤꠀ ꠘꠤꠀ ꠎꠦꠟ ꠈꠣꠘꠣꠔ ꠢꠣꠞꠣꠁꠔꠣꠝ।
ACT 22:5 ꠁꠔꠣ ꠔ ꠙꠞꠗꠣꠘ ꠁꠝꠣꠝ ꠍꠣꠛ ꠀꠞ ꠖꠦꠡꠞ ꠚꠔꠥꠀ ꠇꠝꠤꠐꠤꠞ ꠢꠇ꠆ꠇꠟ ꠝꠄ-ꠝꠥꠞꠛ꠆ꠛꠤ ꠅꠇꠟꠦꠅ ꠜꠣꠟꠣ ꠇꠞꠤ ꠎꠣꠘꠂꠘ। ꠀꠝꠤ ꠔꠣꠞꠣꠞ ꠉꠦꠍ ꠕꠣꠇꠤ ꠌꠤꠑꠤ ꠟꠁꠀ, ꠖꠣꠝꠦꠡ꠆ꠇ ꠡꠢꠞꠞ ꠀꠝꠞꠣꠞ ꠜꠣꠁꠀꠁꠘꠞꠦ ꠖꠤꠛꠣꠞ ꠟꠣꠉꠤ ꠞꠅꠀꠘꠣ ꠅꠁꠍꠟꠣꠝ। ꠢꠘꠅ ꠎꠦꠞꠣ ꠁꠍꠣꠞ ꠔꠞꠤꠇꠣꠔ ꠀꠁꠍꠟꠣ, ꠔꠣꠞꠣꠞꠦ ꠛꠘ꠆ꠖꠤ ꠇꠞꠤꠀ ꠎꠦꠞꠥꠎꠣꠟꠦꠝꠅ ꠀꠘꠤꠀ ꠡꠣꠎꠣ ꠖꠦꠅꠀꠞ ꠟꠣꠉꠤ ꠢꠘꠅ ꠎꠣꠅꠀꠔ ꠀꠍꠟꠣꠝ।
ACT 22:6 ꠎꠣꠁꠔꠦ ꠎꠣꠁꠔꠦ ꠖꠣꠝꠦꠡ꠆ꠇꠞ ꠇꠣꠘ꠆ꠖꠣꠔ ꠉꠤꠀ ꠢꠣꠞꠟꠦ ꠛꠦꠁꠟ ꠖꠥꠁꠚꠞ ꠅꠁꠉꠦꠟ, ꠀꠈꠔꠣꠃ ꠀꠝꠣꠞ ꠌꠣꠁꠞꠅ ꠉꠣꠟꠣꠛꠣꠄ ꠀꠍꠝꠣꠘꠤ ꠚꠞ ꠌꠝꠇꠣꠁꠀ ꠃꠑꠟ।
ACT 22:7 ꠀꠝꠤ ꠝꠣꠐꠤꠔ ꠙꠠꠤꠉꠦꠟꠣꠝ ꠀꠞ ꠢꠥꠘꠟꠣꠝ, ꠀꠝꠣꠞꠦ ꠇꠦꠃ ꠒꠣꠇꠤꠀ ꠇꠁꠞꠣ, ‘ꠡꠃꠟ, ꠡꠃꠟ, ꠔꠥꠝꠤ ꠀꠝꠣꠞꠦ ꠇꠦꠘꠦ ꠔꠇꠟꠤꠚ ꠖꠤꠞꠣꠄ?’
ACT 22:8 ꠀꠝꠤ ꠎꠤꠇꠣꠁꠟꠣꠝ, ‘ꠢꠥꠎꠥꠞ, ꠀꠙꠘꠦ ꠇꠦ?’ ꠔꠣꠁꠘ ꠇꠁꠟꠣ, ‘ꠀꠝꠤ ꠘꠣꠍꠣꠞꠔꠞ ꠁꠍꠣ, ꠎꠦꠘꠞꠦ ꠔꠥꠝꠤ ꠔꠇꠟꠤꠚ ꠖꠤꠞꠣꠄ।’
ACT 22:9 ꠎꠦꠞꠣ ꠀꠝꠣꠞ ꠟꠉꠦ ꠀꠍꠤꠟ ꠔꠣꠞꠣ ꠢꠇꠟꠦꠃ ꠁ ꠚꠞ ꠅꠁꠍꠦ ꠇꠞꠤ ꠖꠦꠈꠟꠣ, ꠅꠁꠟꠦ ꠎꠦꠁꠘ ꠀꠝꠣꠞ ꠟꠉꠦ ꠛꠣꠔꠌꠤꠔ ꠇꠞꠍꠤꠟꠣ, ꠔꠣꠘ ꠛꠥꠟꠤ ꠔꠣꠞꠣ ꠢꠥꠘꠟꠣ ꠘꠣ।
ACT 22:10 ꠛꠣꠖꠦ ꠀꠝꠤ ꠇꠁꠟꠣꠝ, ‘ꠝꠣꠟꠤꠇ, ꠔꠦ ꠀꠝꠤ ꠇꠤꠔꠣ ꠇꠞꠔꠣꠝ?’ ꠔꠣꠁꠘ ꠇꠁꠟꠣ, ‘ꠃꠑꠅ, ꠖꠣꠝꠦꠡ꠆ꠇꠅ ꠞꠅꠀꠘꠣ ꠖꠦꠅ, ꠔꠥꠝꠣꠞ ꠎꠦꠔꠣ ꠎꠦꠔꠣ ꠇꠞꠣꠞ ꠉꠞꠎ ꠀꠍꠦ, ꠁꠔꠣ ꠔꠥꠝꠣꠞꠦ ꠢꠘꠅ ꠎꠣꠘꠣꠁꠟ ꠅꠁꠛ।’
ACT 22:11 ꠀꠞ ꠢꠤ ꠌꠝꠇꠣꠘꠤꠄ ꠀꠝꠣꠞ ꠌꠃꠈ ꠀꠘ꠆ꠖꠣ ꠅꠁꠉꠦꠍꠤꠟ ꠉꠔꠤꠇꠦ, ꠀꠝꠣꠞ ꠟꠉꠤ ꠅꠇꠟꠦ ꠀꠝꠣꠞ ꠀꠔꠅ ꠗꠞꠤꠀ ꠖꠣꠝꠦꠡ꠆ꠇꠞ ꠛꠣꠄ ꠟꠁꠀ ꠞꠅꠀꠘꠣ ꠖꠤꠟꠣ।
ACT 22:12 “ꠢꠘꠅ ꠅꠘꠘꠤꠅ ꠘꠣꠝꠞ ꠄꠇꠎꠘ ꠝꠣꠘꠥꠡ ꠀꠍꠟꠣ, ꠔꠣꠁꠘ ꠢꠎꠞꠔ ꠝꠥꠍꠣꠞ ꠡꠞꠤꠅꠔ ꠝꠣꠚꠤꠇ ꠈꠥꠛ ꠙꠞꠦꠎꠉꠣꠞ ꠝꠣꠘꠥꠡ। ꠢꠤꠈꠣꠘꠞ ꠢꠇꠟ ꠁꠢꠥꠖꠤꠞ ꠉꠦꠍꠦ ꠔꠣꠁꠘ ꠈꠥꠛ ꠁꠎ꠆ꠎꠔꠤ ꠎꠘ।
ACT 22:13 ꠔꠣꠁꠘ ꠀꠁꠀ ꠀꠝꠣꠞ ꠇꠣꠍꠣꠔ ꠃꠛꠣꠁꠀ ꠇꠁꠟꠣ, ‘ꠜꠣꠁ ꠡꠃꠟ, ꠔꠥꠝꠣꠞ ꠖꠦꠈꠣꠞ ꠔꠣꠇ꠆ꠇꠔ ꠚꠤꠞꠔ ꠀꠃꠇ।’ ꠀꠞ ꠟꠉꠦ ꠟꠉꠦꠃ ꠀꠝꠤ ꠔꠣꠘꠞꠦ ꠖꠦꠈꠟꠣꠝ।
ACT 22:14 ꠅꠃ ꠔꠣꠁꠘ ꠇꠁꠟꠣ, ‘ꠀꠝꠞꠣꠞ ꠛꠣꠚ-ꠖꠣꠖꠣ ꠅꠇꠟꠞ ꠀꠟ꠆ꠟꠣꠄ ꠔꠥꠝꠣꠞꠦ ꠙꠍꠘ꠆ꠖ ꠇꠞꠍꠂꠘ, ꠔꠥꠝꠤ ꠎꠣꠘꠥ ꠔꠣꠘ ꠝꠞ꠆ꠎꠤ ꠎꠣꠘꠔꠣꠄ ꠙꠣꠞ, ꠀꠞ ꠢꠃ ꠝꠣꠍꠥꠝ ꠛꠘ꠆ꠖꠣ ꠢꠎꠞꠔ ꠁꠍꠣꠞꠦꠅ ꠖꠦꠈꠔꠣꠄ ꠙꠣꠞ, ꠀꠞ ꠔꠣꠘ ꠎꠛꠣꠘꠞ ꠛꠥꠟꠤꠅ ꠢꠥꠘꠔꠣꠄ ꠙꠣꠞ।
ACT 22:15 ꠔꠥꠝꠤ ꠔꠣꠘ ꠡꠣꠇ꠆ꠇꠤ ꠅꠁꠛꠣꠄ, ꠎꠦꠔꠣ ꠎꠦꠔꠣ ꠖꠦꠈꠍ ꠀꠞ ꠢꠥꠘꠍ ꠁꠔꠣ ꠢꠇ꠆ꠇꠟꠔꠣ ꠔꠣꠝꠣꠝ ꠖꠥꠘꠤꠀꠞꠦ ꠎꠣꠘꠣꠁꠛꠣꠄ।
ACT 22:16 ꠅꠈꠘ ꠀꠞ ꠖꠦꠞꠤ ꠇꠞꠞꠣꠄ ꠇꠦꠘꠦ? ꠃꠑꠅ, ꠔꠣꠘꠦ ꠒꠣꠇꠅ, ꠀꠞ ꠔꠃꠛꠣꠞ ꠉꠥꠍꠟ ꠇꠞꠤꠀ ꠔꠥꠝꠣꠞ ꠢꠇꠟ ꠉꠥꠘꠣ ꠗꠁꠀ ꠚꠣꠟꠣꠅ।’
ACT 22:17 “ꠛꠣꠖꠦ ꠀꠝꠤ ꠎꠦꠞꠥꠎꠣꠟꠦꠝꠅ ꠚꠤꠞꠔ ꠀꠁꠀ ꠢꠣꠞꠟꠦ ꠄꠇꠖꠤꠘ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠞ ꠜꠤꠔꠞꠦ ꠖꠥꠀ ꠇꠞꠣꠔ ꠀꠍꠟꠣꠝ, ꠅꠃ ꠡꠝꠄ ꠃꠋꠉꠣꠘꠤꠞ ꠢꠣꠟꠔꠅ ꠀꠈꠔꠣꠃ ꠔꠣꠘ ꠖꠞꠡꠘ ꠙꠣꠁꠟꠣꠝ।
ACT 22:18 ꠀꠝꠤ ꠖꠦꠈꠟꠣꠝ, ꠔꠣꠁꠘ ꠀꠝꠣꠞꠦ ꠇꠁꠞꠣ, ‘ꠎꠟꠖꠤ ꠇꠞꠤ ꠃꠑꠅ, ꠅꠈꠘꠃ ꠎꠦꠞꠥꠎꠣꠟꠦꠝ ꠍꠣꠠꠤꠀ ꠛꠣꠞꠅ, ꠇꠣꠞꠘ ꠀꠝꠣꠞ ꠛꠦꠙꠣꠞꠦ ꠔꠥꠝꠣꠞ ꠝꠥꠈꠞ ꠇꠥꠘꠥ ꠡꠣꠇ꠆ꠇꠤ ꠁꠘꠞ ꠝꠣꠘꠡꠦ ꠢꠥꠘꠔ ꠘꠣꠄ।’
ACT 22:19 ꠀꠝꠤ ꠇꠁꠟꠣꠝ, ‘ꠝꠣꠟꠤꠇ, ꠁ ꠢꠇꠟ ꠝꠣꠘꠡꠦꠃ ꠔ ꠎꠣꠘꠂꠘ, ꠎꠦꠞꠣ ꠔꠥꠝꠣꠞ ꠃꠙꠞꠦ ꠁꠝꠣꠘ ꠀꠘꠔꠣ, ꠄꠞꠣꠞꠦ ꠎꠦꠟꠅ ꠢꠣꠞꠣꠘꠤ ꠀꠞ ꠝꠣꠁꠞ-ꠗꠁꠞ ꠇꠞꠣꠞ ꠟꠣꠉꠤ, ꠀꠝꠤ ꠢꠇ꠆ꠇꠟ ꠝꠍꠤꠖꠣꠁꠘ꠆ꠔꠅ ꠎꠣꠁꠔꠣꠝ;
ACT 22:20 ꠔꠥꠝꠣꠞ ꠡꠣꠇ꠆ꠇꠤ ꠡ꠆ꠔꠤꠚꠣꠘꠞꠦ ꠎꠦꠛꠟꠣ ꠝꠣꠞꠣ ꠅꠁꠍꠤꠟ, ꠢꠤ ꠡꠝꠄ ꠀꠝꠤ ꠘꠤꠎꠦ ꠢꠤꠈꠣꠘꠅ ꠃꠛꠣꠁꠀ ꠡꠣꠄ ꠖꠦꠅꠀꠔ ꠀꠍꠟꠣꠝ, ꠀꠞ ꠎꠦꠞꠣ ꠔꠣꠘꠞꠦ ꠝꠣꠞꠍꠤꠟ, ꠀꠝꠤ ꠔꠣꠞꠣꠞ ꠇꠣꠙꠠ-ꠌꠥꠙꠠ ꠙꠣꠞꠣ ꠖꠤꠍꠟꠣꠝ।’
ACT 22:21 ꠔꠦꠃ ꠝꠣꠟꠤꠇꠦ ꠀꠝꠣꠞꠦ ꠇꠁꠟꠣ, ‘ꠔꠥꠝꠤ ꠞꠅꠀꠘꠣ ꠖꠦꠅ, ꠀꠝꠤ ꠖꠥꠞꠁꠞ ꠜꠤꠘ ꠎꠣꠔꠤ ꠅꠇꠟꠞ ꠉꠦꠍꠦ ꠔꠥꠝꠣꠞꠦ ꠛꠦꠎꠤꠝꠥ।’ ”
ACT 22:22 ꠝꠣꠘꠡꠦ ꠅꠔ ꠡꠝꠄ ꠗꠞꠤ ꠙꠣꠃꠟꠥꠍꠞ ꠛꠄꠀꠘ ꠢꠥꠘꠣꠔ ꠀꠍꠟꠣ, ꠛꠣꠖꠦ ꠅ-ꠁꠢꠥꠖꠤꠞ ꠘꠣꠝ ꠢꠥꠘꠤꠀꠃ ꠔꠣꠞꠣ ꠌꠤꠟ꠆ꠟꠣꠁꠀ ꠇꠁꠟꠣ, “ꠅꠉꠥꠞꠦ ꠖꠥꠘꠤꠀ ꠕꠣꠇꠤ ꠢꠞꠣꠁ ꠖꠦꠅ, ꠁꠉꠥ ꠛꠣꠌꠤꠀ ꠞꠅꠀꠞ ꠎꠥꠇꠣ ꠘꠣꠄ!”
ACT 22:23 ꠝꠣꠘꠡꠦ ꠎꠦꠛꠟꠣ ꠌꠤꠟ꠆ꠟꠣꠘꠤ ꠗꠞꠟꠣ ꠀꠞ ꠇꠣꠙꠠ-ꠌꠥꠙꠠ ꠚꠣꠟꠣꠁꠀ, ꠀꠍꠝꠣꠘꠅ ꠗꠥꠁꠟ ꠃꠠꠣꠘꠤꠔ ꠟꠣꠉꠟꠣ,
ACT 22:24 ꠅꠃ ꠡꠝꠄ ꠙꠞꠗꠣꠘ ꠅꠚꠤꠡꠣꠞꠦ ꠙꠣꠃꠟꠥꠍꠞꠦ ꠇꠦꠘ꠆ꠐꠘꠝꠦꠘ꠆ꠐꠅ ꠟꠁꠀ ꠎꠣꠅꠀꠞ ꠢꠥꠇꠥꠝ ꠖꠤꠟꠣ, ꠀꠞ ꠇꠁꠟꠣ, “ꠄꠞꠦ ꠌꠣꠛꠥꠇ ꠝꠣꠞꠤꠀ ꠎꠦꠞꠣ ꠇꠞꠅ, ꠇꠦꠘꠦ ꠝꠣꠘꠡꠦ ꠔꠣꠞ ꠛꠤꠞꠥꠖ꠆ꠖꠦ ꠁꠟꠣ ꠌꠤꠟ꠆ꠟꠣ-ꠌꠤꠟ꠆ꠟꠤ ꠇꠞꠦꠞ।”
ACT 22:25 ꠙꠣꠃꠟꠥꠍꠞꠦ ꠎꠦꠛꠟꠣ ꠌꠣꠛꠥꠇ ꠝꠣꠞꠣꠞ ꠟꠣꠉꠤ ꠛꠣꠘ꠆ꠖꠤꠟꠣ, ꠁ ꠡꠝꠄ ꠡ-ꠍꠤꠙꠣꠁꠞ ꠄꠇ ꠍꠥꠛꠦꠖꠣꠞ ꠢꠤꠈꠣꠘꠅ ꠃꠛꠣꠔ ꠀꠍꠟꠣ, ꠔꠦꠃ ꠙꠣꠃꠟꠥꠍꠦ ꠔꠣꠘꠞꠦ ꠇꠁꠟꠣ, “ꠅꠈꠘꠅ ꠎꠣꠞꠦ ꠖꠥꠡꠤ ꠡꠣꠁꠛꠡ꠆ꠔ ꠇꠞꠣ ꠅꠁꠍꠦ ꠘꠣ, ꠁꠟꠣ ꠄꠇꠎꠘ ꠞꠥꠝꠣꠘ ꠝꠣꠘꠡꠞꠦ ꠌꠣꠛꠥꠇ ꠝꠣꠞꠣ ꠀꠙꠘꠣꠁꠘ꠆ꠔꠞ ꠟꠣꠉꠤ ꠑꠤꠇ ꠅꠞ ꠘꠤ?”
ACT 22:26 ꠁꠈꠣꠘ ꠢꠥꠘꠤꠀ ꠢꠤ ꠍꠥꠛꠦꠖꠣꠞꠦ ꠙꠞꠗꠣꠘ ꠅꠚꠤꠡꠣꠞꠞꠦ ꠉꠤꠀ ꠇꠁꠟꠣ, “ꠍꠣꠞ, ꠀꠙꠘꠦ ꠁꠔꠣ ꠇꠤꠔꠣ ꠇꠞꠣꠔ ꠟꠣꠉꠍꠂꠘ? ꠁ ꠛꠦꠐꠣ ꠔ ꠞꠥꠝꠣꠘ ꠝꠣꠘꠥꠡ।”
ACT 22:27 ꠔꠦꠃ ꠔꠣꠁꠘ ꠙꠣꠃꠟꠥꠍꠞ ꠗꠣꠞꠅ ꠉꠤꠀ ꠎꠤꠇꠣꠁꠟꠣ, “ꠇꠅ ꠌꠣꠁꠘ, ꠔꠥꠝꠤ ꠞꠥꠝꠣꠘ ꠘꠤ?” ꠙꠣꠃꠟꠥꠍꠦ ꠇꠁꠟꠣ, “ꠎꠤꠅꠄ।”
ACT 22:28 ꠅꠚꠤꠡꠣꠞꠦ ꠇꠁꠟꠣ, “ꠀꠝꠤ ꠛꠃꠔ ꠐꠦꠇꠣ-ꠙꠄꠡꠣ ꠈꠞꠌ ꠇꠞꠤꠀ ꠞꠥꠝꠣꠘ ꠍꠤꠐꠤꠎꠦꠘ ꠅꠀꠞ ꠡꠥꠎꠥꠉ ꠟꠁꠍꠤ।” ꠙꠣꠃꠟꠥꠍꠦ ꠇꠁꠟꠣ, “ꠀꠝꠤ ꠎꠘꠝ ꠡꠥꠔ꠆ꠞꠦꠃ ꠞꠥꠝꠣꠘ।”
ACT 22:29 ꠁꠈꠣꠘ ꠢꠥꠘꠤꠀꠃ ꠎꠦ ꠍꠤꠙꠣꠁꠄ ꠔꠣꠘꠞꠦ ꠎꠦꠞꠣ ꠇꠞꠣꠔ ꠎꠣꠅꠀꠔ ꠀꠍꠟꠣ, ꠟꠉꠦ ꠟꠉꠦꠃ ꠔꠣꠞꠣ ꠢꠘ ꠕꠘꠦ ꠢꠞꠤꠀ ꠉꠦꠟꠣꠉꠤ। ꠀꠞ ꠔꠣꠁꠘ ꠞꠥꠝꠣꠘ ꠝꠣꠘꠥꠡ ꠅꠁꠟꠦꠅ ꠔꠣꠘꠞꠦ ꠛꠣꠘ꠆ꠖꠤꠍꠟꠣ ꠇꠞꠤ ꠙꠞꠗꠣꠘ ꠅꠚꠤꠡꠣꠞꠦꠅ ꠒꠞꠣꠁꠉꠦꠟꠣ।
ACT 22:30 ꠅꠁꠟꠦ ꠛꠣꠖꠞ ꠖꠤꠘ ꠢꠤꠞꠛꠣꠞ ꠙꠣꠃꠟꠥꠍꠞꠦ ꠎꠤꠇꠣꠁꠔꠣ ꠌꠣꠁꠟꠣ, ꠇꠤꠔꠣꠞ ꠟꠣꠉꠤ ꠁꠢꠥꠖꠤ ꠅꠇꠟꠦ ꠔꠣꠘꠞꠦ ꠖꠥꠡ ꠖꠤꠞꠣ, ꠔꠦꠃ ꠙꠞꠗꠣꠘ ꠅꠚꠤꠡꠣꠞꠦ ꠙꠣꠃꠟꠥꠍꠞ ꠛꠣꠘ꠆ꠖ ꠈꠥꠟꠤ ꠖꠤꠟꠣ, ꠛꠠ ꠁꠝꠣꠝ ꠅꠇꠟ ꠀꠞ ꠚꠔꠥꠀ ꠇꠝꠤꠐꠤꠞ ꠢꠇꠟꠞꠦ ꠄꠇꠈꠣꠘꠅ ꠖꠟꠣ ꠅꠀꠞ ꠢꠥꠇꠥꠝ ꠖꠤꠟꠣ। ꠛꠣꠖꠦ ꠙꠣꠃꠟꠥꠍꠞꠦ ꠟꠣꠝꠣꠁꠀ ꠔꠣꠞꠣꠞ ꠍꠣꠝꠘꠦ ꠀꠎꠤꠞ ꠇꠞꠟꠣ।
ACT 23:1 ꠙꠣꠃꠟꠥꠍꠦ ꠚꠔꠥꠀ ꠇꠝꠤꠐꠤꠞ ꠝꠣꠘꠡꠞ ꠛꠣꠄ ꠗꠤꠀꠘ ꠗꠞꠤ ꠌꠣꠁꠀ ꠇꠁꠟꠣ, “ꠅ ꠜꠣꠁꠍꠣꠛ ꠅꠇꠟ, ꠀꠝꠤ ꠔ ꠅꠈꠘ ꠙꠞ꠆ꠎꠘ꠆ꠔ ꠀꠝꠣꠞ ꠛꠤꠛꠦꠇ ꠙꠞꠤꠡ꠆ꠇꠣꠞ ꠞꠣꠈꠤꠀ, ꠀꠟ꠆ꠟꠣꠞ ꠛꠘ꠆ꠖꠣ ꠢꠤꠡꠣꠛꠦ ꠖꠣꠄꠁꠔ꠆ꠔ ꠀꠖꠣꠄ ꠇꠞꠞꠣꠝ।”
ACT 23:2 ꠁꠈꠣꠘ ꠢꠥꠘꠤꠀ ꠙꠞꠗꠣꠘ ꠁꠝꠣꠝ ꠅꠘꠘꠤꠅꠄ, ꠙꠣꠃꠟꠥꠍꠞ ꠉꠣꠟꠣꠔ ꠎꠦꠞꠣ ꠃꠛꠣꠔ ꠀꠍꠤꠟ, ꠔꠣꠞꠣꠞꠦ ꠇꠁꠟꠣ, “ꠅꠉꠥꠞ ꠝꠥꠈꠅ ꠌꠠ ꠝꠣꠞꠅ।”
ACT 23:3 ꠔꠦꠃ ꠙꠣꠃꠟꠥꠍꠦ ꠔꠣꠘꠞꠦ ꠇꠁꠟꠣ, “ꠅ ꠜꠘ꠆ꠒ, ꠀꠟ꠆ꠟꠣꠄ ꠔꠥꠝꠣꠞꠦꠅ ꠌꠠ ꠝꠣꠞꠛꠣ। ꠔꠥꠝꠤ ꠡꠞꠤꠅꠔꠞ ꠀꠁꠘꠦ ꠀꠝꠣꠞ ꠛꠤꠌꠣꠞ ꠇꠞꠣꠔ ꠛꠁꠀ, ꠡꠞꠤꠅꠔꠞ ꠛꠞꠈꠦꠟꠣꠚ ꠇꠞꠤꠀ ꠀꠝꠣꠞꠦ ꠌꠠ ꠝꠣꠞꠣꠞ ꠢꠥꠇꠥꠝ ꠖꠤꠞꠣꠄ?”
ACT 23:4 ꠎꠦꠞꠣ ꠙꠣꠃꠟꠥꠍꠞ ꠇꠣꠘ꠆ꠖꠣꠔ ꠃꠛꠣꠁꠍꠤꠟ, ꠔꠣꠞꠣ ꠔꠣꠘꠞꠦ ꠇꠁꠟ, “ꠔꠥꠝꠤ ꠀꠟ꠆ꠟꠣꠞ ꠊꠞꠞ ꠙꠞꠗꠣꠘ ꠁꠝꠣꠝ ꠍꠣꠛꠞꠦ ꠛꠦꠁꠎ꠆ꠎꠔ ꠇꠞꠞꠣꠄ ꠘꠤ?”
ACT 23:5 ꠙꠣꠃꠟꠥꠍꠦ ꠇꠁꠟꠣ, “ꠜꠣꠁ ꠅꠇꠟ, ꠀꠝꠤ ꠔ ꠎꠣꠘꠤ ꠘꠣ ꠄꠁꠘ ꠙꠞꠗꠣꠘ ꠁꠝꠣꠝ ꠇꠞꠤ। ꠀꠞꠘꠣꠄ ꠁꠟꠣ ꠇꠁꠟꠣꠝ ꠘꠣ ꠅꠘꠦ, ꠀꠟ꠆ꠟꠣꠞ ꠇꠣꠟꠣꠝꠅ ꠔ ꠟꠦꠈꠣ ꠀꠍꠦ, ‘ꠔꠥꠝꠣꠞ ꠘꠤꠎꠞ ꠎꠣꠔꠤꠞ ꠝꠥꠞꠛ꠆ꠛꠤꠞꠦ ꠇꠥꠘꠥ ꠉꠣꠟꠤ ꠖꠤꠅ ꠘꠣ।’ ”
ACT 23:6 ꠙꠣꠃꠟꠥꠍꠦ ꠎꠦꠛꠟꠣ ꠛꠥꠎꠟꠣ ꠢꠤ ꠝꠎꠟꠤꠍꠞ ꠇꠤꠍꠥ ꠝꠣꠘꠥꠡ ꠍꠤꠖ꠆ꠖꠦꠇꠤꠀ ꠝꠎꠛꠞ ꠀꠞ ꠇꠤꠍꠥ ꠅꠁꠟꠣ ꠚꠞꠤꠡꠤ ꠝꠎꠛꠞ, ꠅꠃ ꠔꠣꠁꠘ ꠝꠎꠟꠤꠍꠞ ꠝꠣꠎꠦ ꠎꠥꠞꠦ ꠎꠥꠞꠦ ꠇꠁꠟꠣ, “ꠅ ꠜꠣꠁ ꠅꠇꠟ, ꠀꠝꠤ ꠄꠇꠎꠘ ꠚꠞꠤꠡꠤ ꠀꠞ ꠚꠞꠤꠡꠤꠞ ꠀꠅꠟꠣꠖ। ꠝꠥꠞ꠆ꠖꠣ ꠅꠇꠟ ꠢꠤꠞꠛꠣꠞ ꠎꠤꠘ꠆ꠖꠣ ꠅꠁꠀ ꠃꠑꠛꠣ, ꠅꠃ ꠝꠣꠔꠞ ꠟꠣꠉꠤ ꠅꠈꠘ ꠀꠝꠣꠞ ꠛꠤꠌꠣꠞ ꠇꠞꠣ ꠅꠞ।”
ACT 23:7 ꠔꠣꠁꠘ ꠁꠈꠣꠘ ꠇꠅꠀꠞ ꠟꠉꠦ ꠟꠉꠦꠃ ꠚꠞꠤꠡꠤ ꠀꠞ ꠍꠤꠖ꠆ꠖꠦꠇꠤꠀ ꠅꠇꠟꠞ ꠝꠣꠎꠦ ꠇꠣꠁꠎ꠆ꠎꠣ ꠟꠣꠉꠤꠉꠦꠟ, ꠝꠎꠟꠤꠍꠞ ꠝꠣꠎꠦ ꠖꠥꠁ ꠖꠟ ꠅꠁꠉꠦꠟꠣ।
ACT 23:8 ꠇꠣꠞꠘ ꠍꠤꠖ꠆ꠖꠦꠇꠤꠀ ꠅꠇꠟꠞ ꠄꠇꠤꠘ ꠅꠁꠟ, ꠝꠥꠞ꠆ꠖꠣ ꠅꠇꠟ ꠀꠞ ꠎꠤꠘ꠆ꠖꠣ ꠅꠁꠔꠣ ꠘꠣꠄ, ꠚꠤꠞꠤꠡ꠆ꠔꠣ ꠛꠣ ꠞꠥꠢꠥ ꠁꠔꠣ ꠇꠥꠘꠥꠔꠣ ꠘꠣꠁ। ꠅꠁꠟꠦ ꠚꠞꠤꠡꠤ ꠅꠇꠟꠦ ꠄꠇꠤꠘ ꠇꠞꠂꠘ ꠁꠔꠣ ꠢꠇꠟꠔꠣꠃ ꠀꠍꠂꠘ।
ACT 23:9 ꠁ ꠉꠘ꠆ꠒꠉꠥꠟ ꠛꠃꠔ ꠛꠠ ꠅꠁꠉꠦꠟ, ꠔꠦꠃ ꠚꠞꠤꠡꠤ ꠖꠟꠞ ꠇꠄꠎꠘ ꠝꠃꠟꠣꠘꠣꠄ ꠃꠛꠣꠁꠀ ꠔꠞ꠆ꠇꠣ-ꠔꠞ꠆ꠇꠤ ꠇꠞꠤ ꠇꠁꠟꠣ, “ꠀꠝꠞꠣ ꠔ ꠁ ꠝꠣꠘꠡꠞ ꠇꠥꠘꠥ ꠖꠥꠡ ꠖꠦꠈꠞꠣꠝ ꠘꠣ। ꠇꠥꠘꠥ ꠞꠥꠢꠥ ꠛꠣ ꠚꠤꠞꠤꠡ꠆ꠔꠣꠄ ꠔ ꠔꠣꠞ ꠟꠉꠦ ꠁꠟꠣ ꠛꠣꠔꠌꠤꠔ ꠇꠞꠔꠣ ꠙꠣꠞꠂꠘ।”
ACT 23:10 ꠅꠃ ꠟꠣꠈꠣꠘ ꠇꠞꠤ ꠛꠦꠕꠣꠄꠀ ꠉꠘ꠆ꠒꠉꠥꠟ ꠟꠣꠉꠟ, ꠄꠞꠖꠣꠄ ꠙꠞꠗꠣꠘ ꠅꠚꠤꠡꠣꠞꠦ ꠒꠞꠣꠁꠉꠦꠟꠣ, ꠝꠣꠘꠡꠦ ꠙꠣꠃꠟꠥꠍꠞꠦ ꠐꠥꠇꠞꠣ ꠐꠥꠇꠞꠣ ꠇꠞꠤ ꠍꠤꠠꠤꠟꠣꠁꠛꠣ, ꠅꠃ ꠔꠣꠁꠘ ꠍꠤꠙꠣꠁ ꠅꠇꠟꠞꠦ ꠢꠥꠇꠥꠝ ꠖꠤꠟꠣ, ꠔꠣꠞꠣ ꠟꠣꠝꠤꠀ ꠉꠤꠀ ꠙꠣꠃꠟꠥꠍꠞꠦ ꠝꠣꠘꠡꠞ ꠉꠦꠍ ꠕꠣꠇꠤ ꠢꠞꠣꠁꠀ ꠘꠤꠀ ꠇꠦꠘ꠆ꠐꠘꠝꠦꠘ꠆ꠐꠅ ꠢꠣꠞꠣꠁꠟꠣ।
ACT 23:11 ꠛꠣꠖꠦ ꠞꠣꠁꠔꠞ ꠛꠣꠟꠣ ꠝꠣꠟꠤꠇ ꠁꠍꠣꠄ ꠙꠣꠃꠟꠥꠍꠞ ꠉꠦꠍꠦ ꠃꠛꠣꠁꠀ ꠇꠁꠟꠣ, “ꠢꠤꠝ꠆ꠝꠔ ꠇꠞꠅ, ꠀꠝꠣꠞ ꠘꠣꠝꠦ ꠎꠦꠞꠥꠎꠣꠟꠦꠝꠅ ꠎꠦꠟꠣ ꠡꠣꠇ꠆ꠇꠤ ꠖꠤꠍ, ꠞꠥꠝ ꠐꠣꠃꠘꠅ-ꠅ ꠅꠃꠟꠣ ꠡꠣꠇ꠆ꠇꠤ ꠖꠤꠔꠦ ꠅꠁꠛ।”
ACT 23:12 ꠛꠣꠖꠞ ꠖꠤꠘ ꠚꠎꠞꠞ ꠅꠇ꠆ꠔꠅ ꠁꠢꠥꠖꠤ ꠅꠇꠟꠦ ꠄꠇ ꠖꠣꠉꠣꠛꠣꠎꠤ ꠇꠞꠟꠣ, ꠔꠣꠞꠣ ꠇꠍꠝ ꠈꠣꠁꠀ ꠇꠁꠟꠣ, ꠙꠣꠃꠟꠥꠍꠞꠦ ꠝꠣꠞꠣꠞ ꠀꠉ ꠙꠞ꠆ꠎꠘ꠆ꠔ ꠔꠣꠞꠣ ꠖꠣꠘꠣ-ꠙꠣꠘꠤ ꠇꠥꠘ꠆ꠔꠣ ꠝꠥꠈꠅ ꠖꠤꠔꠣ ꠘꠣꠄ।
ACT 23:13 ꠌꠣꠟ꠆ꠟꠤꠡ ꠎꠘꠞꠅ ꠛꠦꠡꠤ ꠝꠣꠘꠥꠡ ꠄꠇꠈꠣꠘꠅ ꠅꠁꠀ ꠁ ꠖꠣꠉꠣꠛꠣꠎꠤꠞ ꠇꠍꠝ ꠈꠣꠁꠟꠣ।
ACT 23:14 ꠔꠣꠞꠣ ꠛꠠ ꠁꠝꠣꠝ ꠀꠞ ꠝꠥꠞꠛ꠆ꠛꠤ ꠅꠇꠟꠞ ꠉꠦꠍꠦ ꠉꠤꠀ ꠇꠁꠟꠣ, “ꠀꠝꠞꠣ ꠇꠠꠣꠇꠠꠤ ꠇꠍꠝ ꠈꠣꠁꠍꠤ, ꠙꠣꠃꠟꠥꠍꠞꠦ ꠘꠣ ꠝꠣꠞꠣ ꠙꠞ꠆ꠎꠘ꠆ꠔ ꠖꠣꠘꠣ-ꠙꠣꠘꠤ ꠇꠥꠘ꠆ꠔꠣ ꠝꠥꠈꠅ ꠖꠤꠔꠣꠝ ꠘꠣꠄ।
ACT 23:15 ꠅꠈꠘ ꠀꠙꠘꠣꠞꠣ ꠀꠞ ꠚꠔꠥꠀ ꠇꠝꠤꠐꠤꠞ ꠢꠇꠟꠦ ꠙꠞꠗꠣꠘ ꠅꠚꠤꠡꠣꠞꠞ ꠉꠦꠍꠦ ꠅꠃ ꠀꠛꠖꠣꠞ ꠇꠞꠃꠇ꠆ꠇꠣ ꠎꠦꠘ, ꠀꠙꠘꠣꠞꠣ ꠀꠞꠅ ꠜꠣꠟꠣꠐꠤꠇꠦ ꠁ ꠛꠤꠌꠣꠞꠞ ꠔꠖꠘ꠆ꠔ ꠇꠞꠔꠣ ꠌꠣꠁꠞꠣ, ꠅꠃ ꠃꠍꠤꠟ꠆ꠟꠣꠄ ꠢꠦ ꠀꠙꠘꠣꠁꠘ꠆ꠔꠞ ꠉꠦꠍꠦ ꠀꠅꠀꠞ ꠀꠉꠦꠃ, ꠙꠕꠞ ꠝꠣꠎꠦ ꠀꠝꠞꠣ ꠔꠣꠞꠦ ꠝꠣꠞꠤꠟꠤꠝꠥ।”
ACT 23:16 ꠅꠁꠟꠦ ꠙꠣꠃꠟꠥꠍꠞ ꠜꠣꠉꠘꠣꠄ ꠔꠣꠞꠣꠞ ꠁ ꠖꠣꠉꠣꠛꠣꠎꠤꠞ ꠈꠛꠞ ꠢꠥꠘꠤꠀ, ꠇꠦꠘ꠆ꠐꠘꠝꠦꠘ꠆ꠐꠅ ꠉꠤꠀ ꠙꠣꠃꠟꠥꠍꠞꠦ ꠁꠔꠣ ꠎꠣꠘꠣꠁꠟꠣ।
ACT 23:17 ꠔꠦꠃ ꠙꠣꠃꠟꠥꠍꠦ ꠡ-ꠍꠤꠙꠣꠁꠞ ꠄꠇꠎꠘ ꠍꠥꠛꠦꠖꠣꠞꠞꠦ ꠀꠘꠣꠁꠀ ꠇꠁꠟꠣ, “ꠅꠃ ꠙꠥꠀꠉꠥꠞꠦ ꠙꠞꠗꠣꠘ ꠅꠚꠤꠡꠣꠞ ꠍꠣꠛꠞ ꠉꠦꠍꠦ ꠟꠁꠀ ꠎꠣꠃꠇ꠆ꠇꠣ, ꠢꠦ ꠔꠣꠘꠞꠦ ꠇꠤꠔꠣ ꠇꠁꠔ ꠀꠁꠍꠦ।”
ACT 23:18 ꠅꠃ ꠢꠤ ꠍꠥꠛꠦꠖꠣꠞꠦ ꠔꠣꠞꠦ ꠟꠁꠀ ꠙꠞꠗꠣꠘ ꠅꠚꠤꠡꠣꠞꠞ ꠉꠦꠍꠦ ꠉꠤꠀ ꠇꠁꠟꠣ, “ꠛꠘ꠆ꠖꠤ ꠙꠣꠃꠟꠥꠍꠦ ꠀꠝꠣꠞꠦ ꠀꠘꠣꠁꠀ ꠇꠁꠟꠣ, ꠅꠃ ꠙꠥꠀꠉꠥꠞꠦ ꠀꠙꠘꠣꠞ ꠉꠦꠍꠦ ꠟꠁꠀ ꠀꠁꠔꠣꠝ, ꠢꠦ ꠀꠙꠘꠣꠞ ꠉꠦꠍꠦ ꠇꠤꠔꠣ ꠇꠁꠔ ꠌꠣꠞ।”
ACT 23:19 ꠙꠞꠗꠣꠘ ꠅꠚꠤꠡꠣꠞꠦ ꠔꠣꠞ ꠀꠔꠅ ꠗꠞꠤꠀ ꠄꠇ ꠉꠣꠟꠣꠛꠣꠄ ꠟꠁꠀ ꠉꠤꠀ ꠇꠁꠟꠣ, “ꠔꠥꠝꠤ ꠀꠝꠣꠞꠦ ꠇꠤꠔꠣ ꠇꠁꠔꠣꠄ ꠌꠣꠁꠞꠣꠄ?”
ACT 23:20 ꠢꠦ ꠇꠁꠟ, “ꠁꠢꠥꠖꠤ ꠅꠇꠟꠦ ꠘꠤꠅꠔ ꠇꠞꠍꠂꠘ, ꠔꠣꠞꠣ ꠀꠙꠘꠣꠞ ꠉꠦꠍꠦ ꠅꠃ ꠀꠛꠖꠣꠞ ꠇꠞꠛꠣ, ꠙꠣꠃꠟꠥꠍꠞ ꠛꠤꠌꠣꠞ ꠀꠞꠅ ꠜꠣꠟꠣꠐꠤꠇꠦ ꠔꠖꠘ꠆ꠔ ꠇꠞꠣꠞ ꠟꠣꠉꠤ ꠀꠙꠘꠦ ꠎꠣꠘꠥ ꠍꠣꠝꠘꠞ ꠇꠣꠁꠟ ꠔꠣꠘꠞꠦ ꠖꠦꠡꠞ ꠚꠔꠥꠀ ꠇꠝꠤꠐꠤꠞ ꠍꠣꠝꠘꠦ ꠀꠎꠤꠞ ꠇꠞꠣꠁꠘ।
ACT 23:21 ꠀꠙꠘꠦ ꠔꠣꠞꠣꠞ ꠇꠕꠣꠄ ꠞꠣꠎꠤ ꠅꠁꠘ ꠘꠣ ꠎꠣꠘꠥ, ꠄꠞꠣ ꠌꠣꠟ꠆ꠟꠤꠡ ꠎꠘꠞꠅ ꠛꠦꠡꠤ ꠝꠣꠘꠡꠦ ꠟꠥꠇꠣꠁꠀ ꠙꠣꠃꠟꠥꠍꠞ ꠟꠣꠉꠤ ꠛꠣꠞ ꠌꠣꠁꠞꠣ, ꠔꠣꠞꠣ ꠇꠍꠝ ꠈꠣꠁꠍꠦ, ꠔꠣꠘꠞꠦ ꠘꠣ ꠝꠣꠞꠣ ꠙꠞ꠆ꠎꠘ꠆ꠔ ꠖꠣꠘꠣ-ꠙꠣꠘꠤ ꠇꠥꠘ꠆ꠔꠣ ꠝꠥꠈꠅ ꠖꠤꠔ ꠘꠣꠄ। ꠔꠣꠞꠣ ꠅꠈꠘ ꠔꠤꠀꠞ ꠅꠁꠀ ꠙꠕꠅ ꠛꠁꠍꠦ, ꠈꠣꠟꠤ ꠀꠙꠘꠣꠞ ꠞꠣꠎꠤ ꠅꠀꠞ ꠛꠣꠞ ꠌꠣꠁꠞꠣ।”
ACT 23:22 ꠙꠞꠗꠣꠘ ꠅꠚꠤꠡꠣꠞꠦ ꠔꠣꠞꠦ ꠅꠃ ꠢꠥꠇꠥꠝ ꠖꠤꠀ ꠛꠤꠖꠣꠄ ꠖꠤꠟꠣ, “ꠔꠥꠝꠤ ꠀꠝꠣꠞ ꠉꠦꠍꠦ ꠁ ꠈꠛꠞ ꠇꠁꠍ ꠇꠞꠤ ꠇꠦꠃꠞꠞꠦ ꠢꠥꠘꠣꠁꠅ ꠘꠣ।”
ACT 23:23 ꠛꠣꠖꠦ ꠔꠣꠁꠘ ꠡ-ꠍꠤꠙꠣꠁꠞ ꠖꠥꠁꠎꠘ ꠍꠥꠛꠦꠖꠣꠞꠞꠦ ꠀꠘꠣꠁꠀ ꠇꠁꠟꠣ, “ꠖꠥꠁ-ꠡ ꠎꠘ ꠍꠤꠙꠣꠁ, ꠡꠔ꠆ꠔꠁꠞ ꠎꠘ ꠊꠥꠠꠣꠀꠟꠣ ꠍꠤꠙꠣꠁ, ꠀꠞ ꠖꠥꠁ-ꠡ ꠎꠘ ꠍꠥꠟꠚꠤ ꠀꠟꠣ ꠍꠤꠙꠣꠁ ꠀꠁꠎ ꠞꠣꠁꠔ ꠘꠄꠐꠣꠔ ꠇꠂꠍꠞꠤꠀꠔ ꠎꠣꠅꠀꠞ ꠟꠣꠉꠤ ꠔꠤꠀꠞ ꠇꠞꠅ।
ACT 23:24 ꠀꠞ ꠙꠣꠃꠟꠥꠍꠞ ꠟꠣꠉꠤꠅ ꠊꠥꠠꠣꠞ ꠛꠘ꠆ꠖꠛꠡ꠆ꠔ ꠇꠞꠅ, ꠔꠣꠞꠦ ꠎꠣꠘꠥ ꠘꠤꠞꠣꠙꠖꠦ ꠖꠦꠡꠞ ꠙꠞꠗꠣꠘ ꠢꠣꠇꠤꠝ ꠚꠤꠟꠤꠇ꠆ꠡꠞ ꠉꠦꠍꠦ ꠙꠃꠍꠣꠁꠟ ꠅꠄ।”
ACT 23:25 ꠇꠁꠀ, ꠔꠣꠁꠘ ꠅꠃ ꠌꠤꠑꠤ ꠟꠦꠈꠟꠣ,
ACT 23:26 “ꠝꠣꠘꠘꠤꠅ ꠙꠞꠗꠣꠘ ꠢꠣꠇꠤꠝ ꠍꠣꠛ, ꠀꠝꠤ ꠇꠦꠟꠣꠖꠥꠍ ꠟꠥꠍꠤꠀꠍ, ꠀꠙꠘꠣꠞꠦ ꠍꠣꠟꠣꠝ ꠎꠣꠘꠣꠁꠞꠣꠝ।
ACT 23:27 ꠁꠢꠥꠖꠤ ꠅꠇꠟꠦ ꠅꠃ ꠝꠣꠘꠥꠡꠉꠥꠞꠦ ꠗꠞꠤꠀ ꠎꠣꠘꠦ ꠝꠣꠞꠤꠟꠤꠔꠣ ꠌꠣꠁꠍꠟꠣ, ꠀꠝꠤ ꠢꠥꠘꠟꠣꠝ ꠢꠦ ꠄꠇꠎꠘ ꠞꠥꠝꠣꠘ ꠝꠣꠘꠥꠡ, ꠢꠥꠘꠤꠀ ꠀꠝꠣꠞ ꠍꠤꠙꠣꠁ ꠅꠇꠟ ꠟꠁꠀ ꠉꠤꠀ ꠔꠣꠞꠦ ꠛꠣꠌꠣꠁꠟꠣꠝ।
ACT 23:28 ꠛꠣꠖꠦ ꠀꠝꠤ ꠢꠥꠘꠔꠣꠝ ꠌꠣꠁꠟꠣꠝ ꠝꠣꠘꠡꠦ ꠔꠣꠞ ꠇꠤꠔꠣ ꠖꠥꠡ ꠙꠣꠁꠍꠂꠘ, ꠄꠞꠖꠣꠄ ꠔꠣꠞꠦ ꠘꠤꠀ ꠔꠣꠞꠣꠞ ꠝꠎꠟꠤꠍꠅ ꠀꠎꠤꠞ ꠇꠞꠟꠣꠝ।
ACT 23:29 ꠔꠦꠃ ꠀꠝꠤ ꠛꠥꠎꠟꠣꠝ, ꠔꠣꠞꠣꠞ ꠡꠞꠤꠅꠔꠞ ꠇꠥꠘꠥ ꠚꠔꠥꠀꠞ ꠟꠣꠉꠤ ꠄꠞ ꠃꠙꠞꠦ ꠖꠥꠡ ꠖꠤꠞꠣ, ꠅꠁꠟꠦ ꠎꠦꠟꠅ ꠢꠣꠞꠣꠘꠤ ꠛꠣ ꠎꠣꠘꠦ ꠝꠣꠞꠣꠞ ꠎꠥꠇꠣ ꠇꠥꠘꠥ ꠘꠣꠟꠤꠡ ꠙꠣꠁꠍꠤ ꠘꠣ।
ACT 23:30 ꠀꠞ ꠀꠝꠤ ꠢꠥꠘꠟꠣꠝ, ꠔꠣꠞ ꠛꠤꠞꠥꠖ꠆ꠖꠦ ꠖꠣꠉꠣꠛꠣꠎꠤ ꠇꠞꠣ ꠅꠞ, ꠔꠦꠃ ꠎꠟꠖꠤ ꠇꠞꠤ ꠔꠣꠞꠦ ꠀꠙꠘꠣꠞ ꠉꠦꠍꠦ ꠙꠣꠑꠣꠁ ꠖꠤꠟꠣꠝ। ꠔꠣꠞ ꠛꠤꠞꠥꠖ꠆ꠖꠦ ꠎꠦꠞꠣ ꠘꠣꠟꠤꠡ ꠖꠤꠍꠦ, ꠔꠣꠞꠣꠞꠦꠅ ꠇꠁꠍꠤ, ꠔꠣꠞꠣꠞ ꠇꠥꠘꠥ ꠘꠣꠟꠤꠡ ꠕꠣꠇꠟꠦ ꠀꠙꠘꠣꠞ ꠉꠦꠍꠦ ꠉꠤꠀ ꠢꠥꠘꠣꠁꠔꠣ।”
ACT 23:31 ꠍꠤꠙꠣꠁ ꠅꠇꠟꠦ ꠙꠞꠗꠣꠘ ꠅꠚꠤꠡꠣꠞꠞ ꠢꠥꠇꠥꠝ ꠝꠣꠚꠤꠇ ꠙꠣꠃꠟꠥꠍꠞꠦ ꠟꠁꠀ ꠞꠣꠁꠔꠞ ꠛꠣꠟꠣ ꠀꠘ꠆ꠔꠤꠙꠣꠔ꠆ꠞꠤ ꠐꠣꠃꠘꠅ ꠉꠦꠟꠣ।
ACT 23:32 ꠛꠣꠖꠞ ꠖꠤꠘ ꠊꠥꠠꠣꠀꠟꠣ ꠍꠤꠙꠣꠁ ꠅꠇꠟꠞ ꠟꠉꠦ ꠙꠣꠃꠟꠥꠍꠞꠦ ꠛꠤꠖꠣꠄ ꠖꠤꠀ ꠛꠣꠇꠤ ꠍꠤꠙꠣꠁ ꠅꠇꠟ ꠇꠦꠘ꠆ꠐꠘꠝꠦꠘ꠆ꠐꠅ ꠊꠥꠞꠤꠀ ꠀꠁꠟꠣ।
ACT 23:33 ꠊꠥꠠꠣꠀꠟꠣ ꠍꠤꠙꠣꠁ ꠅꠇꠟꠦ ꠌꠤꠑꠤ ꠀꠞ ꠙꠣꠃꠟꠥꠍꠞꠦ ꠟꠁꠀ ꠇꠂꠍꠞꠤꠀꠔ ꠙꠃꠍꠤꠀ ꠢꠣꠞꠟꠦ ꠖꠦꠡꠞ ꠙꠞꠗꠣꠘ ꠢꠣꠇꠤꠝꠞ ꠀꠔꠅ ꠡꠝꠎꠣꠁ ꠖꠤꠟꠣ।
ACT 23:34 ꠔꠣꠁꠘ ꠁ ꠌꠤꠑꠤ ꠙꠠꠤꠀ ꠙꠣꠃꠟꠥꠍꠞꠦ ꠎꠤꠇꠣꠁꠟꠣ, “ꠔꠥꠝꠤ ꠇꠥꠘ ꠖꠦꠡꠞ ꠝꠣꠘꠥꠡ?” ꠙꠣꠃꠟꠥꠍ ꠇꠤꠟꠤꠇꠤꠀꠞ ꠝꠣꠘꠥꠡ ꠁꠈꠣꠘ ꠢꠥꠘꠤꠀ ꠔꠣꠁꠘ ꠇꠁꠟꠣ,
ACT 23:35 “ꠔꠥꠝꠣꠞꠦ ꠎꠦꠞꠣ ꠖꠥꠡꠦꠞ ꠔꠣꠞꠣ ꠁꠈꠣꠘꠅ ꠀꠁꠀ ꠢꠣꠞꠟꠦ, ꠀꠝꠤ ꠔꠥꠝꠣꠞ ꠎꠛꠣꠘꠛꠘ꠆ꠖꠤ ꠢꠥꠘꠝꠥ।” ꠛꠣꠖꠦ ꠔꠣꠁꠘ ꠢꠥꠇꠥꠝ ꠖꠤꠟꠣ, ꠙꠣꠃꠟꠥꠍꠞꠦ ꠘꠤꠀ ꠞꠣꠎꠣ ꠢꠦꠞꠥꠖꠞ ꠛꠣꠠꠤꠞ ꠎꠦꠟꠅ ꠢꠣꠞꠣꠘꠤꠞ ꠟꠣꠉꠤ।
ACT 24:1 ꠙꠣꠌ ꠖꠤꠘ ꠛꠣꠖꠦ ꠙꠞꠗꠣꠘ ꠁꠝꠣꠝ ꠅꠘꠘꠤꠅꠄ ꠇꠄꠎꠘ ꠁꠢꠥꠖꠤ ꠝꠥꠞꠛ꠆ꠛꠤ ꠀꠞ ꠔꠞ꠆ꠔꠥꠟ꠆ꠟ ꠘꠣꠝꠞ ꠄꠇꠎꠘ ꠃꠇꠤꠟꠞꠦ ꠟꠁꠀ ꠇꠂꠍꠞꠤꠀꠔ ꠉꠦꠟꠣ, ꠉꠤꠀ ꠙꠞꠗꠣꠘ ꠢꠣꠇꠤꠝꠞ ꠀꠖꠣꠟꠔꠅ ꠢꠎꠞꠔ ꠙꠣꠃꠟꠥꠍꠞ ꠛꠤꠞꠥꠖ꠆ꠖꠦ ꠘꠣꠟꠤꠡ ꠖꠣꠈꠤꠟ ꠇꠞꠟꠣ।
ACT 24:2 ꠙꠣꠃꠟꠥꠍꠞꠦ ꠀꠘꠤꠀ ꠀꠖꠣꠟꠔꠅ ꠀꠎꠤꠞ ꠇꠞꠣ ꠅꠁꠟ। ꠛꠣꠖꠦ ꠃꠇꠤꠟ ꠔꠞ꠆ꠔꠥꠟ꠆ꠟꠄ ꠅꠃ ꠘꠣꠟꠤꠡ ꠉꠣꠁꠟꠣ, “ꠝꠣꠘꠘꠤꠅ ꠢꠣꠇꠤꠝ ꠍꠣꠛ, ꠀꠙꠘꠣꠞ ꠡꠣꠡꠘꠅ ꠞꠁꠀ ꠀꠝꠞꠣ ꠛꠃꠔ ꠖꠤꠘ ꠕꠣꠇꠤ ꠛꠠ ꠡꠣꠘ꠆ꠔꠤꠄ ꠀꠍꠤ। ꠀꠙꠘꠦ ꠀꠙꠘꠣꠞ ꠀꠈꠟ-ꠢꠦꠇꠝꠔ ꠖꠤꠀ ꠁ ꠎꠣꠔꠤꠞ ꠛꠃꠔ ꠜꠣꠟꠣꠁ ꠇꠞꠞꠣ।
ACT 24:3 ꠄꠞꠟꠣꠉꠤ ꠀꠝꠞꠣ ꠢꠣꠝꠦꠡꠣ ꠢꠇꠟ ꠎꠣꠉꠣꠔ ꠀꠙꠘꠣꠞ ꠉꠥꠘꠉꠣꠘ ꠉꠣꠁ।
ACT 24:4 ꠀꠝꠞꠣ ꠀꠙꠘꠣꠞ ꠝꠥꠟ꠆ꠟꠛꠣꠘ ꠡꠝꠄ ꠘꠡ꠆ꠐ ꠇꠞꠔꠣꠝ ꠌꠣꠁꠞꠣꠝ ꠘꠣ, ꠝꠦꠢꠦꠞꠛꠣꠘꠤ ꠇꠞꠤꠀ ꠢꠥꠘꠟꠦ, ꠀꠝꠞꠣꠞ ꠘꠣꠟꠤꠡ ꠈꠣꠘ ꠖꠥꠁ-ꠌꠣꠁꠞ ꠇꠕꠣꠄ ꠇꠁꠟꠤꠝꠥ।
ACT 24:5 ꠍꠣꠛ, ꠀꠝꠞꠣ ꠖꠦꠈꠍꠤ, ꠅꠃ ꠝꠣꠘꠥꠡꠉꠥ ꠛꠠ ꠄꠇ ꠀꠙꠖ ꠅꠁꠀ ꠀꠎꠤꠍꠦ। ꠢꠦ ꠘꠣꠍꠣꠞꠣ ꠘꠣꠝꠞ ꠄꠇ ꠛꠤꠗꠞ꠆ꠝꠤ ꠖꠟꠞ ꠃꠡ꠆ꠔꠣꠖ। ꠢꠣꠝꠦꠡꠣ ꠈꠣꠟꠤ ꠢꠣꠋꠉꠣꠝꠣ ꠟꠣꠉꠣꠄ, ꠖꠥꠘꠤꠀꠞ ꠢꠇꠟ ꠁꠢꠥꠖꠤꠞ ꠝꠣꠎꠦ ꠖꠟꠣꠖꠟꠤ ꠟꠣꠉꠣꠘꠤꠃ ꠔꠣꠞ ꠇꠣꠝ।
ACT 24:6 ꠢꠦ ꠀꠝꠞꠣꠞ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠞꠦꠅ ꠘꠣꠙꠣꠇ ꠛꠣꠘꠣꠁꠔ ꠌꠣꠁꠍꠤꠟ, ꠄꠞꠖꠣꠄ ꠀꠝꠞꠣ ꠔꠣꠞꠦ ꠀꠐꠇ ꠇꠞꠍꠤ।
ACT 24:8 ꠀꠞ ꠅꠃ ꠎꠦꠔꠣ ꠘꠣꠟꠤꠡ ꠖꠤꠟꠣꠝ, ꠀꠙꠘꠦ ꠘꠤꠎꠦ ꠔꠣꠞꠦ ꠎꠦꠞꠣ ꠇꠞꠟꠦꠃ ꠁꠔꠣ ꠢꠇꠟꠔꠣ ꠛꠣꠞ ꠅꠁꠎꠤꠛ।”
ACT 24:9 ꠃꠇꠤꠟꠞ ꠟꠉꠦ ꠅꠁꠀ ꠁꠢꠥꠖꠤ ꠅꠇꠟꠦꠅ ꠁꠔꠣ ꠢꠇ꠆ꠇꠟꠔꠣ ꠢꠣꠍꠣ ꠇꠁꠀ ꠡꠣꠄ ꠖꠤꠟꠣ।
ACT 24:10 ꠔꠦꠃ ꠙꠞꠗꠣꠘ ꠢꠣꠇꠤꠝ ꠍꠣꠛꠦ ꠙꠣꠃꠟꠥꠍꠞꠦ ꠁꠡꠣꠞꠣ ꠖꠤꠟꠣ, ꠙꠣꠃꠟꠥꠍꠦ ꠇꠁꠟꠣ, “ꠍꠣꠛ, ꠀꠙꠘꠦ ꠛꠃꠔ ꠛꠞꠍ ꠗꠞꠤ ꠁ ꠁꠢꠥꠖꠤ ꠎꠣꠔꠤꠞ ꠛꠤꠌꠣꠞ ꠇꠞꠤꠀ ꠀꠁꠞꠣ, ꠁꠐꠣ ꠢꠥꠘꠤꠀ ꠀꠝꠤ ꠈꠥꠛ ꠈꠥꠡꠤ ꠅꠁꠀ ꠀꠝꠣꠞ ꠎꠛꠣꠘꠛꠘ꠆ꠖꠤ ꠖꠤꠞꠣꠝ।
ACT 24:11 ꠀꠙꠘꠦ ꠔꠣꠟ꠆ꠟꠣꠡ ꠇꠞꠟꠦꠃ ꠎꠣꠘꠤꠟꠤꠛꠣ, ꠅꠈꠘꠅ ꠛꠣꠞꠅ ꠖꠤꠘ ꠅꠁꠍꠦ ꠘꠣ, ꠀꠝꠤ ꠄꠛꠣꠖꠔ ꠇꠞꠣꠞ ꠟꠣꠉꠤ ꠎꠦꠞꠥꠎꠣꠟꠦꠝꠅ ꠉꠦꠍꠟꠣꠝ।
ACT 24:12 ꠅꠃ ꠎꠦꠞꠣ ꠀꠝꠣꠞ ꠛꠦꠙꠣꠞꠦ ꠘꠣꠟꠤꠡ ꠖꠤꠞꠣ, ꠔꠣꠞꠣ ꠇꠦꠃ ꠀꠝꠣꠞꠦ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠅ ꠇꠥꠘꠥ ꠝꠣꠘꠡꠞ ꠟꠉꠦ ꠢꠣꠋꠉꠣꠝꠣ ꠇꠞꠣꠔ ꠖꠦꠈꠍꠂꠘ ꠘꠣ। ꠐꠣꠃꠘꠞ ꠇꠥꠘꠥꠈꠣꠘꠅ ꠛꠣ ꠇꠥꠘꠥ ꠝꠍꠤꠖꠅ-ꠅ ꠝꠣꠘꠡꠞꠦ ꠃꠍꠇꠣꠁꠀ ꠖꠦꠅꠀꠔ ꠀꠝꠣꠞꠦ ꠙꠣꠁꠍꠂꠘ ꠘꠣ।
ACT 24:13 ꠅꠈꠘ ꠔꠣꠞꠣ ꠀꠝꠣꠞ ꠎꠦꠔꠣ ꠖꠥꠡ ꠖꠦꠈꠣꠁꠞꠣ, ꠁꠔꠣꠞ ꠇꠥꠘꠥ ꠙꠞꠝꠣꠘꠅ ꠔꠣꠞꠣ ꠖꠤꠔꠣ ꠙꠣꠞꠔꠣ ꠘꠣꠄ।
ACT 24:14 ꠅꠁꠟꠦ ꠀꠝꠤ ꠀꠙꠘꠣꠞ ꠉꠦꠍꠦ ꠡ꠆ꠛꠤꠇꠣꠞ ꠇꠞꠞꠣꠝ, ꠄꠞꠣ ꠎꠦꠇꠐꠣꠞꠦ ꠛꠤꠗꠞ꠆ꠝꠤ ꠖꠟ ꠇꠁꠞꠣ, ꠢꠃ ꠁꠍꠣ ꠀꠟ-ꠝꠍꠤꠞ ꠔꠞꠤꠇꠣꠄ ꠀꠝꠤ ꠀꠝꠣꠞ ꠝꠄ-ꠝꠥꠞꠛ꠆ꠛꠤ ꠅꠇꠟꠞ ꠀꠟ꠆ꠟꠣꠞ ꠄꠛꠣꠖꠔ ꠇꠞꠤ। ꠔꠃꠞꠣꠔ ꠇꠤꠔꠣꠛꠞ ꠛꠣꠔꠣꠁꠟ ꠢꠇꠟ ꠢꠥꠇꠥꠝ-ꠀꠢꠇꠣꠝ ꠀꠞ ꠔꠣꠝꠣꠝ ꠘꠛꠤ ꠅꠇꠟꠞ ꠇꠤꠔꠣꠛꠞꠦ ꠀꠝꠤ ꠄꠇꠤꠘ ꠇꠞꠤ।
ACT 24:15 ꠀꠞ ꠄꠞꠣ ꠎꠦꠟꠣꠘ ꠄꠇꠤꠘ ꠇꠞꠂꠘ, ꠀꠝꠤꠅ ꠅꠃꠟꠣ ꠀꠟ꠆ꠟꠣꠞ ꠃꠙꠞꠦ ꠄꠇꠤꠘ ꠇꠞꠤ, ꠙꠞꠦꠎꠉꠣꠞ ꠛꠣ ꠉꠥꠘꠣꠉꠣꠞ ꠢꠇꠟꠞꠦꠃ ꠝꠞꠣꠞ ꠛꠣꠖꠦ ꠢꠤꠞꠛꠣꠞ ꠎꠤꠘ꠆ꠖꠣ ꠇꠞꠣ ꠅꠁꠛ।
ACT 24:16 ꠄꠞꠖꠣꠄ ꠀꠝꠤ ꠀꠟ꠆ꠟꠣꠞ ꠉꠦꠍꠦ ꠀꠞ ꠝꠣꠘꠡꠞ ꠉꠦꠍꠦꠅ ꠢꠣꠝꠦꠡꠣ ꠀꠝꠣꠞ ꠛꠤꠛꠦꠇ ꠙꠞꠤꠡ꠆ꠇꠣꠞ ꠞꠣꠈꠔꠣꠝ ꠌꠣꠁ।
ACT 24:17 ꠛꠃꠔ ꠛꠞꠍ ꠛꠣꠖꠦ ꠀꠝꠤ ꠎꠦꠞꠥꠎꠣꠟꠦꠝꠅ ꠉꠦꠍꠟꠣꠝ, ꠇꠥꠞꠛꠣꠘꠤ ꠖꠤꠔꠣꠝ ꠀꠞ ꠀꠝꠣꠞ ꠘꠤꠎꠞ ꠎꠣꠔꠤꠞ ꠉꠞꠤꠛ ꠅꠇꠟꠞꠦ ꠖꠣꠘ-ꠈꠄꠞꠣꠔ ꠛꠤꠟꠣꠁꠔꠣꠝ ꠇꠞꠤ।
ACT 24:18 ꠔꠦ ꠀꠝꠤ ꠙꠣꠇ-ꠍꠣꠚ ꠅꠁꠀ ꠎꠦꠛꠟꠣ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠅ ꠢꠣꠝꠣꠁꠟꠣꠝ, ꠅꠃ ꠡꠝꠄ ꠔꠣꠞꠣ ꠀꠝꠣꠞꠦ ꠖꠦꠈꠍꠂꠘ। ꠀꠝꠣꠞ ꠉꠦꠍꠦ ꠇꠥꠘꠥ ꠜꠤꠠꠅ ꠅꠁꠍꠦ ꠘꠣ, ꠛꠣ ꠇꠥꠘꠥ ꠉꠘ꠆ꠒꠉꠥꠟꠅ ꠅꠁꠍꠦ ꠘꠣ।
ACT 24:19 ꠈꠣꠟꠤ ꠀꠍꠤꠀ ꠖꠦꠡꠞ ꠇꠄꠎꠘ ꠁꠢꠥꠖꠤ ꠢꠘꠅ ꠀꠍꠟꠣ। ꠀꠝꠣꠞ ꠃꠙꠞꠦ ꠇꠥꠘꠥ ꠘꠣꠟꠤꠡ ꠕꠣꠇꠟꠦ ꠢꠃ ꠁꠢꠥꠖꠤ ꠅꠇꠟꠦ ꠀꠙꠘꠣꠞ ꠉꠦꠍꠦ ꠀꠁꠀ ꠘꠣꠟꠤꠡ ꠖꠤꠔꠣ ꠀꠍꠤꠟ।
ACT 24:20 ꠀꠞꠘꠣꠄ ꠅꠘꠅ ꠎꠦꠞꠣ ꠀꠁꠍꠂꠘ ꠄꠞꠣꠃ ꠇꠃꠇ꠆ꠇꠣ, ꠀꠝꠤ ꠎꠦꠛꠟꠣ ꠚꠔꠥꠀ ꠇꠝꠤꠐꠤꠞ ꠍꠣꠝꠘꠦ ꠃꠛꠣꠁꠍꠟꠣꠝ, ꠅꠃ ꠡꠝꠄ ꠔꠣꠞꠣ ꠀꠝꠣꠞ ꠇꠤꠔꠣ ꠖꠥꠡ ꠙꠣꠁꠍꠟꠣ?
ACT 24:21 ꠇꠥꠘ꠆ꠔꠣꠃ ꠘꠣ, ꠈꠣꠟꠤ ꠄꠇꠈꠣꠘ ꠝꠣꠔ ꠀꠝꠤ ꠎꠥꠞꠦ ꠎꠥꠞꠦ ꠝꠣꠔꠤꠍꠟꠣꠝ ꠎꠦꠘ, ꠝꠥꠞ꠆ꠖꠣ ꠅꠇꠟ ꠢꠤꠞꠛꠣꠞ ꠎꠤꠘ꠆ꠖꠣ ꠅꠁꠀ ꠃꠑꠣꠞ ꠝꠥꠍꠟꠣ ꠟꠁꠀ ꠀꠁꠎ ꠀꠙꠘꠣꠁꠘ꠆ꠔꠞ ꠍꠣꠝꠘꠦ ꠀꠝꠣꠞ ꠛꠤꠌꠣꠞ ꠇꠞꠣ ꠅꠞ।”
ACT 24:22 ꠢꠣꠇꠤꠝ ꠚꠤꠟꠤꠇ꠆ꠡꠦ ꠢꠎꠞꠔ ꠁꠍꠣꠞ ꠔꠞꠤꠇꠣꠞ ꠛꠦꠙꠣꠞꠦ ꠈꠥꠛ ꠜꠣꠟꠣ ꠇꠞꠤ ꠎꠣꠘꠔꠣ, ꠄꠞꠖꠣꠄ ꠔꠣꠁꠘ ꠛꠤꠌꠣꠞ ꠛꠘ꠆ꠖ ꠇꠞꠤꠀ ꠇꠁꠟꠣ, “ꠍꠤꠙꠣꠁꠞ ꠙꠞꠗꠣꠘ ꠅꠚꠤꠡꠣꠞ ꠟꠥꠍꠤꠀꠍ ꠀꠁꠀ ꠢꠣꠞꠟꠦ ꠀꠝꠤ ꠔꠥꠝꠞꠣꠞ ꠛꠤꠌꠣꠞꠞ ꠚꠄꠍꠣꠟꠣ ꠇꠞꠝꠥ।”
ACT 24:23 ꠔꠣꠁꠘ ꠡ-ꠍꠤꠙꠣꠁꠞ ꠍꠥꠛꠦꠖꠣꠞꠞꠦ ꠢꠥꠇꠥꠝ ꠖꠤꠟꠣ, “ꠙꠣꠃꠟꠥꠍꠞꠦ ꠀꠐꠇ ꠞꠣꠈꠅ, ꠅꠁꠟꠦ ꠔꠣꠞꠦ ꠝꠣꠄꠀꠞ ꠘꠎꠞꠦ ꠞꠣꠈꠤꠅ, ꠔꠣꠞ ꠈꠦꠡ-ꠇꠥꠐꠥꠝꠦ ꠔꠣꠞ ꠈꠦꠎꠝꠔ ꠇꠞꠣꠔ ꠀꠁꠟꠦ ꠛꠣꠗꠣ ꠖꠤꠅ ꠘꠣ।”
ACT 24:24 ꠇꠄꠖꠤꠘ ꠛꠣꠖꠦ ꠚꠤꠟꠤꠇ꠆ꠡꠦ ꠔꠣꠘ ꠁꠢꠥꠖꠤ ꠛꠃ ꠖ꠆ꠞꠥꠡꠤꠟ꠆ꠟꠣꠞꠦ ꠟꠉꠦ ꠟꠁꠀ ꠀꠁꠀ ꠙꠣꠃꠟꠥꠍꠞꠦ ꠈꠛꠞꠖꠤ ꠀꠘꠣꠁꠟꠣ, ꠀꠞ ꠙꠣꠃꠟꠥꠍꠞ ꠝꠥꠈ ꠕꠣꠇꠤ ꠁꠍꠣ ꠀꠟ-ꠝꠍꠤꠞ ꠃꠙꠞꠦ ꠁꠝꠣꠘ ꠀꠘꠣꠞ ꠛꠄꠀꠘꠤ ꠢꠥꠘꠟꠣ।
ACT 24:25 ꠙꠣꠃꠟꠥꠍꠦ ꠎꠦꠛꠟꠣ ꠢꠇ ꠙꠕꠦ ꠌꠟꠣ, ꠘꠤꠎꠞꠦ ꠖꠝꠣꠁꠀ ꠞꠣꠈꠣ, ꠀꠞ ꠢꠣꠡꠞꠞ ꠛꠤꠌꠣꠞꠞ ꠇꠕꠣ ꠛꠄꠀꠘ ꠇꠞꠟꠣ, ꠚꠤꠟꠤꠇ꠆ꠡꠦ ꠁꠔꠣ ꠢꠥꠘꠤꠀ ꠒꠞꠣꠁꠉꠦꠟꠣ। ꠒꠞꠣꠁꠀ ꠇꠁꠟꠣ, “ꠔꠥꠝꠤ ꠅꠈꠘ ꠎꠣꠅꠉꠤ, ꠡꠝꠄ ꠡꠥꠎꠥꠉ ꠅꠁꠟꠦ ꠀꠝꠤ ꠔꠥꠝꠣꠞꠦ ꠈꠛꠞꠖꠤ ꠀꠘꠣꠁꠝꠥ।”
ACT 24:26 ꠔꠣꠘ ꠝꠘꠦ ꠝꠘꠦ ꠀꠍꠤꠟ, ꠙꠣꠃꠟꠥꠍꠦ ꠔꠣꠘꠞꠦ ꠇꠤꠍꠥ ꠊꠥꠡ ꠖꠤꠛꠣ, ꠄꠞꠟꠣꠉꠤ ꠔꠣꠁꠘ ꠛꠣꠞꠦ ꠛꠣꠞꠦ ꠙꠣꠃꠟꠥꠍꠞꠦ ꠀꠘꠣꠁꠀ ꠉꠚ ꠇꠞꠔꠣ।
ACT 24:27 ꠖꠥꠁ ꠛꠞꠍ ꠙꠣꠞꠘꠤꠞ ꠛꠣꠖꠦ ꠙꠞ꠆ꠇꠤꠅ ꠚꠤꠡ꠆ꠔꠍ ꠀꠁꠀ ꠚꠤꠟꠤꠇ꠆ꠡꠞ ꠉꠖꠤꠔ ꠛꠁꠟꠣ। ꠚꠤꠟꠤꠇ꠆ꠡꠦ ꠁꠢꠥꠖꠤ ꠅꠇꠟꠞꠦ ꠈꠥꠡꠤ ꠇꠞꠔꠣ ꠇꠞꠤ ꠙꠣꠃꠟꠥꠍꠞꠦ ꠎꠦꠟꠅ ꠕꠁꠀ ꠉꠦꠟꠣꠉꠤ।
ACT 25:1 ꠁ ꠖꠦꠡꠅ ꠀꠅꠀꠞ ꠔꠤꠘ ꠖꠤꠘ ꠛꠣꠖꠦ ꠚꠤꠡ꠆ꠔꠍ ꠇꠂꠍꠞꠤꠀ ꠕꠣꠇꠤ ꠎꠦꠞꠥꠎꠣꠟꠦꠝꠅ ꠉꠦꠟꠣ।
ACT 25:2 ꠅꠃ ꠡꠝꠄ ꠛꠠ ꠁꠝꠣꠝ ꠀꠞ ꠁꠢꠥꠖꠤ ꠘꠦꠔꠣ ꠅꠇꠟꠦ ꠔꠣꠘ ꠉꠦꠍꠦ ꠀꠁꠀ ꠙꠣꠃꠟꠥꠍꠞ ꠛꠦꠙꠣꠞꠦ ꠘꠣꠟꠤꠡ ꠖꠤꠟꠣ। ꠔꠣꠞꠣ ꠚꠤꠡ꠆ꠔꠍꠞ ꠉꠦꠍꠦ ꠈꠥꠛ ꠝꠤꠘꠔ-ꠇꠣꠎ꠆ꠎꠤ ꠇꠞꠤ ꠇꠁꠟꠣ,
ACT 25:3 ꠔꠣꠁꠘ ꠎꠣꠘꠥ ꠝꠦꠢꠦꠞꠛꠣꠘꠤ ꠇꠞꠤ ꠙꠣꠃꠟꠥꠍꠞꠦ ꠎꠦꠞꠥꠎꠣꠟꠦꠝꠅ ꠀꠘꠣꠁꠘ। ꠔꠣꠞꠣꠞ ꠝꠔꠟꠛ ꠀꠍꠤꠟ, ꠙꠣꠃꠟꠥꠍꠞꠦ ꠀꠘꠣꠞ ꠡꠝꠄ ꠙꠕꠞ ꠝꠣꠎꠦ ꠟꠥꠇꠣꠁꠀ ꠞꠁꠀ ꠝꠣꠞꠤꠟꠤꠔꠣ।
ACT 25:4 ꠢꠣꠇꠤꠝ ꠚꠤꠡ꠆ꠔꠍꠦ ꠔꠣꠞꠣꠞꠦ ꠇꠁꠟꠣ, “ꠙꠣꠃꠟꠥꠍꠞꠦ ꠔ ꠇꠂꠍꠞꠤꠀꠔ ꠀꠐꠇ ꠞꠣꠈꠣ ꠅꠁꠍꠦ, ꠀꠞ ꠀꠝꠤꠅ ꠈꠥꠛ ꠔꠣꠉꠖꠣ ꠇꠞꠤ ꠢꠤꠈꠣꠘꠅ ꠎꠣꠁꠞꠣꠝ।
ACT 25:5 ꠔꠦ ꠔꠥꠝꠞꠣꠞ ꠝꠣꠎ ꠕꠣꠇꠤ ꠛꠥꠎꠖꠣꠞ ꠇꠄꠎꠘ ꠀꠝꠣꠞ ꠟꠉꠦ ꠀꠁꠅ, ꠢꠦ ꠇꠥꠘꠥ ꠖꠥꠡ ꠇꠞꠟꠦ ꠄꠞ ꠘꠣꠟꠤꠡ ꠖꠤꠛꠣꠄ।”
ACT 25:6 ꠚꠤꠡ꠆ꠔꠍ ꠔꠣꠞꠣꠞ ꠟꠉꠦ ꠀꠐ-ꠖꠡ ꠖꠤꠘ ꠞꠁꠀ ꠢꠣꠞꠟꠦ ꠇꠂꠍꠞꠤꠀꠔ ꠉꠦꠟꠣꠉꠤ। ꠉꠤꠀ ꠛꠣꠖꠞ ꠖꠤꠘ ꠔꠣꠁꠘ ꠀꠖꠣꠟꠔꠅ ꠛꠁꠀ, ꠙꠣꠃꠟꠥꠍꠞꠦ ꠔꠣꠘ ꠍꠣꠝꠘꠦ ꠀꠎꠤꠞ ꠇꠞꠣꠞ ꠢꠥꠇꠥꠝ ꠖꠤꠟꠣ।
ACT 25:7 ꠎꠦꠔꠣ ꠁꠢꠥꠖꠤ ꠅꠇꠟ ꠎꠦꠞꠥꠎꠣꠟꠦꠝ ꠕꠣꠇꠤ ꠀꠁꠍꠟꠣ, ꠙꠣꠃꠟꠥꠍ ꠢꠤꠘꠅ ꠀꠎꠤꠞ ꠅꠀꠞ ꠛꠣꠖꠦ ꠔꠣꠞꠣ ꠔꠣꠘꠞꠦ ꠌꠣꠁꠞꠅꠛꠣꠄ ꠛꠦꠞꠤꠀ ꠃꠛꠣꠁꠀ ꠈꠥꠛ ꠖꠥꠡꠣ-ꠖꠥꠡꠤ ꠇꠞꠟꠣ, ꠅꠁꠟꠦ ꠁꠔꠣꠞ ꠇꠥꠘꠥ ꠙꠞꠝꠣꠘ ꠖꠤꠔꠣ ꠙꠣꠞꠟꠣ ꠘꠣ।
ACT 25:8 ꠅꠃ ꠙꠣꠃꠟꠥꠍꠦ ꠘꠤꠎꠞ ꠎꠛꠣꠘꠛꠘ꠆ꠖꠤ ꠖꠤꠟꠣ, “ꠀꠝꠤ ꠔ ꠁꠢꠥꠖꠤ ꠅꠇꠟꠞ ꠡꠞꠤꠅꠔ, ꠛꠣꠄꠔꠥꠟ-ꠝꠥꠇꠣꠖ꠆ꠖꠍ, ꠛꠣ ꠞꠥꠝꠣꠘ ꠛꠣꠖꠡꠣ ꠇꠂꠍꠞꠞ ꠛꠤꠞꠥꠖ꠆ꠖꠦ ꠇꠥꠘꠥ ꠖꠥꠡ ꠇꠞꠍꠤ ꠘꠣ।”
ACT 25:9 ꠅꠁꠟꠦ ꠚꠤꠡ꠆ꠔꠍꠦ ꠁꠢꠥꠖꠤ ꠅꠇꠟꠞꠦ ꠈꠥꠡꠤ ꠇꠞꠣꠞ ꠈꠤꠀꠟ ꠅꠀꠄ ꠔꠣꠁꠘ ꠙꠣꠃꠟꠥꠍꠞꠦ ꠎꠤꠇꠣꠁꠟꠣ, “ꠅꠃ ꠝꠣꠝꠟꠣꠞ ꠛꠤꠌꠣꠞ ꠀꠝꠤ ꠎꠦꠞꠥꠎꠣꠟꠦꠝꠅ ꠇꠞꠔꠣꠝ ꠌꠣꠁꠞꠣꠝ, ꠔꠥꠝꠤ ꠢꠤꠈꠣꠘꠅ ꠎꠣꠁꠔꠦ ꠞꠣꠎꠤ ꠀꠍ ꠘꠤ?”
ACT 25:10 ꠙꠣꠃꠟꠥꠍꠦ ꠎꠥꠀꠙ ꠖꠤꠟꠣ, “ꠀꠝꠤ ꠔ ꠞꠥꠝꠣꠘ ꠀꠖꠣꠟꠔꠞ ꠍꠣꠝꠘꠦ ꠀꠎꠤꠞ ꠅꠁꠍꠤ, ꠀꠞ ꠅꠃ ꠀꠖꠣꠟꠔꠅꠃ ꠀꠝꠣꠞ ꠛꠤꠌꠣꠞ ꠅꠀꠈꠣꠘ ꠎꠞꠥꠞ। ꠀꠙꠘꠦ ꠘꠤꠎꠦꠅ ꠜꠣꠟꠣ ꠇꠞꠤ ꠎꠣꠘꠂꠘ, ꠀꠝꠤ ꠁꠢꠥꠖꠤ ꠅꠇꠟꠞ ꠟꠉꠦ ꠇꠥꠘꠥ ꠅꠁꠘ꠆ꠘꠣꠄ ꠇꠞꠍꠤ ꠘꠣ।
ACT 25:11 ꠔꠣ-ꠅ ꠀꠝꠣꠞ ꠇꠥꠘꠥ ꠇꠍꠥꠞ ꠅꠁꠟꠦ, ꠝꠃꠔꠞ ꠡꠣꠎꠣ ꠙꠣꠅꠀꠞ ꠎꠥꠇꠣ ꠇꠥꠘꠥ ꠖꠥꠡ ꠙꠣꠁꠟꠦ, ꠀꠝꠤ ꠝꠞꠔꠦ ꠞꠣꠎꠤ ꠀꠍꠤ। ꠅꠁꠟꠦ ꠄꠞꠣ ꠀꠝꠣꠞ ꠛꠤꠞꠥꠖ꠆ꠖꠦ ꠎꠦꠔꠣ ꠖꠥꠡ ꠖꠤꠞꠣ, ꠁꠔꠣ ꠎꠥꠖꠤ ꠢꠣꠍꠣ ꠘꠣ ꠅꠄ, ꠔꠦ ꠀꠝꠣꠞꠦ ꠔꠣꠞꠣꠞ ꠀꠔꠅ ꠍꠣꠠꠤ ꠖꠦꠅꠀꠞ ꠄꠈꠔꠤꠀꠞ ꠇꠦꠃꠞꠞ ꠘꠣꠁ। ꠄꠞꠖꠣꠄ ꠀꠝꠤ ꠛꠣꠖꠡꠣ ꠇꠂꠍꠞꠞ ꠉꠦꠍꠦ ꠀꠙꠤꠟ ꠇꠞꠞꠣꠝ।”
ACT 25:12 ꠁꠈꠣꠘ ꠢꠥꠘꠤꠀ ꠚꠤꠡ꠆ꠔꠍꠦ ꠔꠣꠘ ꠃꠎꠤꠞ-ꠘꠣꠎꠤꠞꠞ ꠟꠉꠦ ꠙꠞꠣꠝꠤꠡ ꠇꠞꠤ ꠇꠁꠟꠣ, “ꠔꠥꠝꠤ ꠎꠦꠛꠟꠣ ꠛꠣꠖꠡꠣꠞ ꠉꠦꠍꠦ ꠀꠙꠤꠟ ꠇꠞꠟꠣꠄ, ꠔꠦ ꠛꠣꠖꠡꠣꠞ ꠉꠦꠍꠦꠃ ꠎꠣꠁꠛꠣꠄ।”
ACT 25:13 ꠇꠄꠖꠤꠘ ꠛꠣꠖꠦ ꠁꠢꠥꠖꠤ ꠅꠇꠟꠞ ꠞꠣꠎꠣ ꠀꠉ꠆ꠞꠤꠙ꠆ꠙ ꠀꠞ ꠔꠣꠘ ꠛꠁꠘ ꠞꠣꠘꠤ ꠛꠞ꠆ꠘꠤꠇꠤꠄ, ꠘꠄꠀ ꠢꠣꠇꠤꠝ ꠚꠤꠡ꠆ꠔꠍꠞꠦ ꠍꠣꠟꠣꠝ ꠎꠣꠘꠣꠘꠤꠞ ꠟꠣꠉꠤ ꠇꠂꠍꠞꠤꠀꠔ ꠀꠁꠟꠣ।
ACT 25:14 ꠔꠣꠞꠣ ꠁꠈꠣꠘꠅ ꠇꠄꠖꠤꠘ ꠞꠁꠛꠣ ꠉꠔꠤꠇꠦ, ꠚꠤꠡ꠆ꠔꠍꠦ ꠙꠣꠃꠟꠥꠍꠞ ꠝꠣꠝꠟꠣꠞ ꠇꠕꠣ ꠞꠣꠎꠣꠞꠦ ꠎꠣꠘꠣꠁꠟꠣ। ꠔꠣꠁꠘ ꠇꠁꠟꠣ, “ꠚꠤꠟꠤꠇ꠆ꠡꠦ ꠄꠇꠎꠘ ꠝꠣꠘꠡꠞꠦ ꠎꠦꠟꠅ ꠕꠁꠀ ꠉꠦꠍꠂꠘ।
ACT 25:15 ꠀꠝꠤ ꠎꠦꠛꠟꠣ ꠎꠦꠞꠥꠎꠣꠟꠦꠝꠅ ꠉꠦꠍꠟꠣꠝ, ꠅꠃ ꠡꠝꠄ ꠢꠘꠞ ꠛꠠ ꠁꠝꠣꠝ ꠀꠞ ꠁꠢꠥꠖꠤ ꠝꠥꠞꠛ꠆ꠛꠤ ꠅꠇꠟꠦ ꠅꠃ ꠛꠦꠐꠣꠞ ꠛꠤꠞꠥꠖ꠆ꠖꠦ ꠘꠣꠟꠤꠡ ꠖꠤꠀ ꠔꠣꠞ ꠡꠣꠎꠣ ꠌꠣꠁꠍꠂꠘ।
ACT 25:16 ꠀꠝꠤ ꠔꠣꠞꠣꠞꠦ ꠇꠁꠍꠟꠣꠝ, ꠎꠣꠞ ꠛꠤꠞꠥꠖ꠆ꠖꠦ ꠘꠣꠟꠤꠡ ꠖꠦꠅꠀ ꠅꠄ, ꠀꠞ ꠎꠦꠞꠣ ꠁ ꠘꠣꠟꠤꠡ ꠖꠦꠁꠘ, ꠢꠤ ꠛꠣꠖꠤ-ꠛꠤꠛꠣꠖꠤꠞ ꠝꠥꠈꠣꠝꠥꠈꠤ ꠎꠛꠣꠘꠛꠘ꠆ꠖꠤ ꠀꠞ ꠎꠦꠞꠣ ꠘꠣ ꠅꠁꠟꠦ, ꠀꠡꠣꠝꠤꠞꠦ ꠇꠥꠘꠥ ꠡꠣꠎꠣ ꠖꠦꠅꠀꠞ ꠄꠈꠔꠤꠀꠞ ꠞꠥꠝꠣꠘ ꠀꠁꠘꠅ ꠘꠣꠁ।
ACT 25:17 ꠔꠦꠃ ꠔꠣꠞꠣ ꠢꠇꠟ ꠅꠘꠅ ꠀꠁꠀ ꠢꠣꠞꠟꠦ, ꠀꠝꠤ ꠛꠣꠖꠞ ꠖꠤꠘꠃ ꠀꠖꠣꠟꠔꠅ ꠛꠁꠀ ꠢꠃ ꠀꠡꠣꠝꠤꠞꠦ ꠍꠣꠝꠘꠦ ꠀꠘꠣꠞ ꠢꠥꠇꠥꠝ ꠖꠤꠟꠣꠝ।
ACT 25:18 ꠎꠦꠞꠣ ꠔꠣꠞ ꠛꠤꠞꠥꠖ꠆ꠖꠦ ꠘꠣꠟꠤꠡ ꠖꠤꠍꠟꠣ ꠔꠣꠞꠣꠞ ꠎꠛꠣꠘꠛꠘ꠆ꠖꠤ ꠢꠥꠘꠟꠣꠝ, ꠅꠁꠟꠦ ꠀꠝꠤ ꠎꠦꠟꠣ ꠅꠘꠥꠝꠣꠘ ꠇꠞꠍꠟꠣꠝ, ꠁꠟꠣ ꠇꠥꠘꠥ ꠘꠣꠟꠤꠡ ꠔꠣꠞꠣ ꠖꠤꠍꠂꠘ ꠘꠣ।
ACT 25:19 ꠈꠣꠟꠤ ꠔꠣꠞꠣꠞ ꠘꠤꠎꠞ ꠗꠞ꠆ꠝꠞ ꠇꠕꠣ, ꠀꠞ ꠁꠍꠣ ꠘꠣꠝꠞ ꠇꠥꠘꠥ ꠄꠇꠎꠘ ꠝꠞꠣ ꠝꠣꠘꠡꠞ ꠇꠕꠣ, ꠙꠣꠃꠟꠥꠍꠦ ꠄꠘꠞꠦ ꠎꠤꠘ꠆ꠖꠣ ꠇꠁꠀ ꠖꠣꠛꠤ ꠇꠞꠦꠞ, ꠅꠔꠣ ꠟꠁꠀ ꠔꠣꠞꠣ ꠀꠖꠣꠟꠔꠅ ꠘꠣꠟꠤꠡ ꠖꠤꠍꠦ।
ACT 25:20 ꠀꠞ ꠁꠔꠣ ꠇꠤꠟꠣ ꠔꠣꠟ꠆ꠟꠣꠡ ꠇꠞꠔꠣꠝ, ꠁꠈꠣꠘ ꠝꠣꠟꠥꠝ ꠘꠣ ꠅꠀꠄ ꠀꠝꠤ ꠔꠣꠞꠦ ꠎꠤꠇꠣꠁꠟꠣꠝ, ꠢꠦ ꠎꠦꠞꠥꠎꠣꠟꠦꠝꠅ ꠉꠤꠀ ꠁ ꠝꠣꠝꠟꠣꠞ ꠚꠄꠍꠣꠟꠣ ꠇꠞꠔꠦ ꠞꠣꠎꠤ ꠀꠍꠦ ꠘꠤ।
ACT 25:21 ꠢꠦ ꠞꠣꠎꠤ ꠘꠣ ꠅꠁꠀ, ꠀꠙꠤꠟ ꠇꠞꠤꠀ ꠛꠣꠖꠡꠣꠞ ꠞꠣꠄꠅꠞ ꠟꠣꠉꠤ ꠛꠣꠞ ꠌꠣꠅꠀꠄ, ꠀꠝꠤ ꠔꠣꠞꠦ ꠛꠣꠖꠡꠣ ꠇꠂꠍꠞꠞ ꠉꠦꠍꠦ ꠙꠣꠑꠣꠘꠤꠞ ꠀꠉ ꠙꠞ꠆ꠎꠘ꠆ꠔ ꠀꠐꠇ ꠞꠣꠈꠣꠞ ꠢꠥꠇꠥꠝ ꠖꠤꠍꠤ।”
ACT 25:22 ꠅꠃ ꠞꠣꠎꠣ ꠀꠉ꠆ꠞꠤꠙ꠆ꠙꠦ ꠚꠤꠡ꠆ꠔꠍꠞꠦ ꠇꠁꠟꠣ, “ꠀꠝꠤ ꠘꠤꠎꠦ ꠔꠣꠞ ꠎꠛꠣꠘꠛꠘ꠆ꠖꠤ ꠢꠥꠘꠔꠣꠝ ꠌꠣꠁ।” ꠚꠤꠡ꠆ꠔꠍꠦ ꠎꠥꠀꠙ ꠖꠤꠟꠣ, “ꠔꠦ ꠇꠣꠁꠟ ꠢꠥꠘꠛꠣꠘꠦ।”
ACT 25:23 ꠛꠣꠖꠞ ꠖꠤꠘ ꠞꠣꠎꠣ ꠀꠉ꠆ꠞꠤꠙ꠆ꠙ ꠀꠞ ꠞꠣꠘꠤ ꠛꠞ꠆ꠘꠤꠇꠤ ꠛꠃꠔ ꠗꠥꠝꠗꠣꠝ ꠇꠞꠤ ꠀꠁꠟꠣ, ꠔꠣꠁꠘ ꠍꠤꠙꠣꠁꠞ ꠙꠞꠗꠣꠘ ꠅꠚꠤꠡꠣꠞ ꠅꠇꠟ, ꠐꠣꠃꠘꠞ ꠉꠁꠘ꠆ꠘ-ꠝꠣꠁꠘ꠆ꠘ ꠝꠣꠘꠡꠞꠦ ꠟꠁꠀ ꠀꠖꠣꠟꠔꠅ ꠢꠣꠝꠣꠁꠟꠣ। ꠚꠤꠡ꠆ꠔꠍꠦ ꠢꠥꠇꠥꠝ ꠖꠤꠀ ꠙꠣꠃꠟꠥꠍꠞꠦꠅ ꠅꠘꠅ ꠀꠘꠣꠁꠟꠣ।
ACT 25:24 ꠛꠣꠖꠦ ꠚꠤꠡ꠆ꠔꠍꠦ ꠇꠁꠟꠣ, “ꠝꠢꠣꠘ ꠞꠣꠎꠣ ꠀꠉ꠆ꠞꠤꠙ꠆ꠙ, ꠀꠞ ꠀꠖꠣꠟꠔꠅ ꠀꠎꠤꠞ ꠉꠁꠘ꠆ꠘ-ꠝꠣꠁꠘ꠆ꠘ ꠍꠣꠛ ꠅꠇꠟ, ꠀꠙꠘꠣꠞꠣ ꠢꠇꠟꠦ ꠅꠃ ꠛꠦꠌꠣꠠꠣꠞꠦ ꠖꠦꠈꠞꠣ। ꠢꠇꠟ ꠁꠢꠥꠖꠤꠄ ꠝꠤꠟꠤꠀ ꠎꠦꠞꠥꠎꠣꠟꠦꠝ ꠀꠞ ꠇꠂꠍꠞꠤꠀꠔ ꠀꠝꠣꠞ ꠉꠦꠍꠦ ꠔꠣꠞ ꠛꠤꠌꠣꠞ ꠌꠣꠁꠀ ꠝꠤꠍꠤꠟ ꠖꠤꠀ ꠇꠁꠍꠂꠘ, ꠔꠣꠞꠦ ꠈꠔꠝ ꠇꠞꠅ।
ACT 25:25 ꠅꠁꠟꠦ ꠀꠝꠤ ꠖꠦꠈꠟꠣꠝ, ꠝꠃꠔꠞ ꠡꠣꠎꠣ ꠖꠦꠅꠀꠞ ꠎꠥꠇꠣ ꠇꠥꠘꠥ ꠖꠥꠡ ꠔꠣꠞ ꠘꠣꠁ। ꠔꠣ-ꠅ ꠢꠦ ꠘꠤꠎꠦ ꠛꠣꠖꠡꠣꠞ ꠉꠦꠍꠦ ꠀꠙꠤꠟ ꠇꠞꠣꠄ, ꠀꠝꠤ ꠔꠣꠞꠦ ꠔꠣꠘ ꠉꠦꠍꠦ ꠙꠣꠑꠣꠘꠤꠞ ꠈꠤꠀꠟ ꠇꠞꠍꠤ।
ACT 25:26 ꠅꠁꠟꠦ ꠝꠢꠣꠘ ꠛꠣꠖꠡꠣꠞ ꠉꠦꠍꠦ ꠟꠦꠈꠔꠣꠝ, ꠁꠟꠣ ꠇꠥꠘꠥ ꠖꠥꠡ ꠙꠣꠁꠞꠣꠝ ꠘꠣ ꠉꠔꠤꠇꠦ, ꠀꠝꠤ ꠡ꠆ꠞꠖ꠆ꠖꠦꠅ ꠞꠣꠎꠣ ꠀꠉ꠆ꠞꠤꠙ꠆ꠙ ꠀꠞ ꠀꠙꠘꠣꠞꠣ ꠢꠇꠟꠞ ꠍꠣꠝꠘꠦ ꠔꠣꠞꠦ ꠀꠎꠤꠞ ꠇꠞꠍꠤ। ꠀꠙꠘꠣꠞꠣ ꠎꠦꠞꠣ ꠇꠞꠟꠦ ꠟꠦꠈꠣꠞ ꠎꠥꠇꠣ ꠇꠥꠘ꠆ꠔꠣ ꠙꠣꠁꠝꠥ ꠇꠞꠤ ꠝꠘꠅ ꠇꠞꠞꠣꠝ।
ACT 25:27 ꠇꠣꠞꠘ ꠀꠝꠤ ꠝꠘꠅ ꠇꠞꠤ, ꠇꠥꠘꠥ ꠛꠘ꠆ꠖꠤꠞꠦ ꠌꠣꠟꠣꠘ ꠖꠦꠅꠀꠞ ꠛꠣꠟꠣ ꠔꠣꠞ ꠖꠥꠡ ꠅꠇꠟ ꠎꠣꠘꠣꠘꠤꠈꠣꠘ ꠎꠞꠥꠞ।”
ACT 26:1 ꠁꠈꠣꠘ ꠢꠥꠘꠤꠀ ꠞꠣꠎꠣ ꠀꠉ꠆ꠞꠤꠙ꠆ꠙꠦ ꠙꠣꠃꠟꠥꠍꠞꠦ ꠇꠁꠟꠣ, “ꠔꠥꠝꠣꠞ ꠎꠛꠣꠘꠛꠘ꠆ꠖꠤ ꠇꠅꠀꠞ ꠟꠣꠉꠤ ꠅꠘꠥꠝꠔꠤ ꠖꠤꠟꠣꠝ।” ꠔꠦꠃ ꠙꠣꠃꠟꠥꠍꠦ ꠀꠔ ꠎꠥꠠ ꠇꠞꠤꠀ ꠘꠤꠎꠞ ꠎꠛꠣꠘꠛꠘ꠆ꠖꠤ ꠇꠁꠟꠣ,
ACT 26:2 “ꠝꠣꠘꠘꠤꠅ ꠞꠣꠎꠣ ꠘꠣꠝꠖꠣꠞ, ꠁꠢꠥꠖꠤ ꠅꠇꠟꠦ ꠀꠝꠣꠞ ꠛꠤꠞꠥꠖ꠆ꠖꠦ ꠎꠦꠔꠣ ꠘꠣꠟꠤꠡ ꠖꠤꠍꠂꠘ, ꠁꠔꠣ ꠛꠦꠙꠣꠞꠦ ꠀꠁꠎ ꠀꠙꠘꠣꠞ ꠉꠦꠍꠦ ꠀꠝꠣꠞ ꠎꠛꠣꠘꠛꠘ꠆ꠖꠤ ꠢꠥꠘꠣꠘꠤꠞ ꠡꠥꠎꠥꠉ ꠙꠣꠁꠀ, ꠀꠝꠤ ꠘꠤꠎꠞꠦ ꠜꠣꠁꠉ꠆ꠉꠝꠣꠘ ꠝꠘꠅ ꠇꠞꠞꠣꠝ।
ACT 26:3 ꠈꠣꠍ ꠇꠞꠤ, ꠁꠢꠥꠖꠤ ꠅꠇꠟꠞ ꠢꠇꠟ ꠟꠣꠈꠣꠘ ꠌꠣꠟ-ꠌꠟꠘ ꠀꠞ ꠔꠣꠞꠣꠞ ꠚꠤꠔꠘꠣ ꠅꠇꠟ ꠀꠙꠘꠣꠞ ꠎꠣꠘꠣ ꠀꠍꠦ। ꠄꠞꠖꠣꠄ ꠀꠞꠎ ꠇꠞꠞꠣꠝ, ꠝꠦꠢꠦꠞꠛꠣꠘꠤ ꠇꠞꠤ ꠀꠙꠘꠦ ꠀꠝꠣꠞ ꠝꠣꠔ ꠈꠣꠘꠣꠁꠘ ꠢꠥꠘꠛꠣ।
ACT 26:4 “ꠢꠥꠞꠥꠝꠣꠘ ꠕꠘꠦꠃ ꠘꠤꠎꠞ ꠄꠟꠣꠇꠣꠔ ꠀꠝꠣꠞ ꠌꠣꠟ-ꠌꠟꠘ ꠇꠤꠟꠣ ꠀꠍꠤꠟ, ꠛꠣꠖꠦ ꠎꠦꠞꠥꠎꠣꠟꠦꠝꠅ ꠀꠁꠀ ꠇꠤꠟꠣꠈꠣꠘ ꠌꠟꠍꠤ, ꠁꠔꠣ ꠔ ꠔꠣꠝꠣꠝ ꠁꠢꠥꠖꠤ ꠅꠇꠟꠦ ꠎꠣꠘꠂꠘ।
ACT 26:5 ꠔꠣꠞꠣ ꠔ ꠛꠃꠔ ꠖꠤꠘ ꠗꠞꠤ ꠀꠝꠣꠞꠦ ꠌꠤꠘꠂꠘ ꠉꠔꠤꠇꠦ, ꠔꠣꠞꠣ ꠈꠤꠀꠟ ꠇꠞꠟꠦ ꠁ ꠡꠣꠇ꠆ꠇꠤ ꠖꠤꠔꠣ ꠙꠣꠞꠛꠣ, ꠀꠝꠞꠣꠞ ꠗꠞ꠆ꠝꠞ ꠝꠣꠎꠦ ꠚꠞꠤꠡꠤ ꠘꠣꠝꠞ ꠎꠦ ꠝꠃꠟꠛꠣꠖꠤ ꠖꠟ ꠀꠍꠦ, ꠀꠝꠤ ꠅꠃ ꠚꠞꠤꠡꠤ ꠔꠞꠤꠇꠣꠄ ꠎꠤꠘ꠆ꠖꠦꠉꠤ ꠇꠣꠐꠣꠁꠔꠣꠝ।
ACT 26:6 ꠀꠟ꠆ꠟꠣꠄ ꠀꠝꠞꠣꠞ ꠝꠄ-ꠝꠥꠞꠛ꠆ꠛꠤ ꠅꠇꠟꠞ ꠉꠦꠍꠦ ꠎꠦꠔꠣ ꠅꠀꠖꠣ ꠇꠞꠍꠤꠟꠣ, ꠢꠃ ꠅꠀꠖꠣꠄ ꠀꠝꠤ ꠜꠞꠡꠣ ꠇꠞꠤ, ꠄꠞꠟꠣꠉꠤ ꠀꠁꠎ ꠀꠝꠣꠞ ꠛꠤꠌꠣꠞ ꠅꠞ।
ACT 26:7 ꠀꠝꠞꠣꠞ ꠛꠣꠞꠅ ꠈꠣꠘ꠆ꠖꠣꠘꠞ ꠝꠣꠘꠡꠦ ꠞꠣꠁꠔ-ꠖꠤꠘ ꠖꠤꠟꠦ-ꠎꠣꠘꠦ ꠄꠛꠣꠖꠔꠤ ꠇꠞꠤꠀ, ꠢꠃ ꠅꠀꠖꠣꠞ ꠚꠟ ꠖꠦꠈꠣꠞ ꠀꠡꠣꠔ ꠀꠍꠂꠘ। ꠞꠣꠎꠣ ꠘꠣꠝꠖꠣꠞ, ꠢꠃ ꠀꠡꠣꠞ ꠟꠣꠉꠤꠃ ꠁꠢꠥꠖꠤ ꠅꠇꠟꠦ ꠀꠝꠣꠞꠦ ꠖꠥꠡꠤꠞꠣ।
ACT 26:8 ꠀꠟ꠆ꠟꠣꠄ ꠝꠥꠞ꠆ꠖꠣꠞꠦ ꠎꠤꠘ꠆ꠖꠣ ꠇꠞꠤꠀ ꠔꠥꠟꠂꠘ, ꠁꠈꠣꠘ ꠇꠦꠘꠦ ꠀꠙꠘꠣꠞꠣ ꠛꠤꠡ꠆ꠛꠣꠡ ꠇꠞꠔꠣ ꠙꠣꠞꠂꠘ ꠘꠣ?
ACT 26:9 “ꠀꠝꠤ ꠔ ꠝꠘꠅ ꠇꠞꠔꠣꠝ, ꠘꠣꠍꠣꠞꠔꠞ ꠁꠍꠣ ꠘꠣꠝꠞ ꠛꠤꠞꠥꠖ꠆ꠖꠦ, ꠢꠇꠟ ꠘꠝꠥꠘꠣꠞ ꠇꠣꠝ ꠇꠞꠣ ꠀꠝꠣꠞ ꠟꠣꠉꠤ ꠚꠞꠎ।
ACT 26:10 ꠀꠞ ꠎꠦꠞꠥꠎꠣꠟꠦꠝꠅ ꠀꠝꠤ ꠅꠟꠣ ꠇꠞꠍꠤꠅ। ꠛꠠ ꠁꠝꠣꠝ ꠅꠇꠟꠞ ꠅꠘꠥꠝꠔꠤ ꠟꠁꠀ ꠁꠍꠣꠞ ꠃꠝ꠆ꠝꠔ ꠅꠇꠟꠞꠦ ꠀꠝꠤ ꠎꠦꠟꠅ ꠢꠣꠞꠣꠁꠔꠣꠝ। ꠔꠣꠞꠣꠞꠦ ꠎꠣꠘꠦ ꠝꠣꠞꠣꠞ ꠇꠣꠟꠅ ꠀꠝꠤ ꠔꠣꠞꠣꠞ ꠛꠤꠞꠥꠖ꠆ꠖꠦ ꠜꠥꠐ ꠖꠤꠔꠣꠝ।
ACT 26:11 ꠀꠝꠤ ꠢꠇꠟ ꠝꠍꠤꠖꠣꠁꠘ꠆ꠔꠅ ꠉꠤꠀ ꠛꠣꠞꠦ ꠛꠣꠞꠦ ꠔꠣꠞꠣꠞꠦ ꠡꠣꠎꠣ ꠖꠤꠔꠣꠝ। ꠁꠍꠣꠞ ꠔꠞꠤꠇꠣ ꠕꠣꠇꠤ ꠔꠣꠞꠣꠞꠦ ꠚꠤꠞꠣꠁꠀ, ꠁꠍꠣꠞ ꠘꠣꠝꠦ ꠟꠣꠘ꠆ꠘꠔ ꠖꠤꠔꠣ ꠇꠞꠤ ꠔꠣꠞꠣꠞ ꠃꠙꠞꠦ ꠎꠥꠞ-ꠎꠥꠟꠥꠝ ꠇꠞꠔꠣꠝ। ꠄꠞꠣꠞ ꠃꠙꠞꠦ ꠀꠝꠣꠞ ꠅꠔ ꠉꠥꠍꠣ ꠀꠍꠤꠟ ꠎꠦꠘ, ꠄꠞꠣꠞꠦ ꠎꠥꠟꠥꠝ ꠇꠞꠣꠞ ꠟꠣꠉꠤ ꠀꠝꠤ ꠛꠣꠞꠣ ꠖꠦꠡꠞ ꠐꠣꠃꠘꠅ-ꠅ ꠎꠣꠁꠔꠣꠝ।
ACT 26:12 “ꠅꠃꠟꠣ ꠄꠇꠛꠣꠞ ꠛꠠ ꠁꠝꠣꠝ ꠅꠇꠟꠞ ꠉꠦꠍ ꠕꠣꠇꠤ ꠈꠦꠝꠔꠣ ꠀꠞ ꠢꠥꠇꠥꠝꠎꠣꠞꠤ ꠟꠁꠀ ꠀꠝꠤ ꠖꠣꠝꠦꠡ꠆ꠇꠅ ꠎꠣꠅꠀꠔ ꠀꠍꠟꠣꠝ।
ACT 26:13 ꠀꠞ ꠞꠣꠎꠣ ꠘꠣꠝꠖꠣꠞ, ꠅꠃ ꠡꠝꠄ ꠛꠦꠁꠟ ꠖꠥꠁꠚꠞ ꠅꠁꠉꠦꠍꠦ। ꠀꠈꠔꠣꠃ ꠖꠦꠈꠟꠣꠝ, ꠀꠝꠣꠞ ꠀꠞ ꠀꠝꠣꠞ ꠟꠉꠞ ꠢꠇꠟꠞ ꠌꠣꠁꠞꠅꠛꠣꠄ ꠡꠥꠞꠥꠎ ꠕꠣꠇꠤ ꠀꠞꠅ ꠛꠦꠡꠤ ꠚꠞꠀꠟꠣ ꠄꠇ ꠞꠥꠡꠘꠤ, ꠀꠍꠝꠣꠘ ꠕꠘꠦ ꠎꠟꠤ ꠃꠑꠟ।
ACT 26:14 ꠅꠃ ꠀꠝꠞꠣ ꠢꠇꠟ ꠝꠣꠐꠤꠔ ꠙꠠꠤꠉꠦꠟꠣꠝ ꠀꠞ ꠀꠝꠤ ꠢꠥꠘꠟꠣꠝ, ꠁꠛꠞꠣꠘꠤ ꠜꠣꠡꠣꠄ ꠇꠦꠃ ꠀꠝꠣꠞꠦ ꠇꠁꠞꠣ, ꠡꠃꠟ, ꠡꠃꠟ, ꠔꠥꠝꠤ ꠇꠦꠘꠦ ꠀꠝꠣꠞ ꠃꠙꠞꠦ ꠎꠥꠟꠥꠝ ꠇꠞꠞꠣꠄ? ꠌꠥꠈꠣ ꠚꠣꠁꠎꠘꠅ ꠟꠣꠕ ꠝꠣꠞꠤꠀ ꠘꠤꠎꠞ ꠈꠦꠔꠤ ꠇꠞꠞꠣꠄ ꠘꠣ ꠘꠤ?
ACT 26:15 ꠔꠦꠃ ꠀꠝꠤ ꠎꠤꠇꠣꠁꠟꠣꠝ, ꠝꠥꠘꠤꠛ, ꠀꠙꠘꠦ ꠇꠦ? ꠝꠥꠘꠤꠛꠦ ꠎꠥꠀꠙ ꠖꠤꠟꠣ, ꠀꠝꠤ ꠁꠍꠣ, ꠎꠦꠘꠞꠦ ꠔꠥꠝꠤ ꠎꠥꠟꠥꠝ ꠇꠞꠞꠣꠄ।
ACT 26:16 ꠅꠈꠘ ꠃꠑꠅ, ꠙꠣꠅꠔ ꠜꠞꠖꠤ ꠃꠛꠣꠅ। ꠔꠥꠝꠤ ꠅꠈꠘ ꠎꠦꠔꠣ ꠖꠦꠈꠍ ꠀꠞ ꠎꠦꠔꠣ ꠔꠥꠝꠣꠞꠦ ꠖꠦꠈꠣꠁꠝꠥ, ꠁꠔꠣ ꠢꠇꠟꠔꠣꠞ ꠡꠣꠇ꠆ꠇꠤ ꠀꠞ ꠈꠦꠎꠝꠔꠉꠣꠞ ꠛꠣꠘꠣꠘꠤꠞ ꠈꠤꠀꠟꠦ, ꠀꠝꠤ ꠘꠤꠎꠦ ꠔꠥꠝꠣꠞꠦ ꠖꠦꠈꠣ ꠖꠤꠟꠣꠝ।
ACT 26:17 ꠀꠝꠤ ꠔꠥꠝꠣꠞꠦ ꠅ-ꠁꠢꠥꠖꠤ ꠅꠇꠟꠞ ꠉꠦꠍꠦ ꠙꠣꠑꠣꠁꠀꠞ, ꠔꠣꠞꠣꠞ ꠀꠞ ꠔꠥꠝꠣꠞ ꠘꠤꠎꠞ ꠎꠣꠔꠤꠞ ꠀꠔ ꠕꠣꠇꠤ ꠀꠝꠤ ꠔꠥꠝꠣꠞꠦ ꠛꠣꠌꠣꠁꠝꠥ।
ACT 26:18 ꠔꠥꠝꠤ ꠔꠣꠞꠣꠞ ꠌꠃꠈ ꠈꠥꠟꠤꠀ ꠖꠤꠛꠣꠄ, ꠔꠣꠞꠣ ꠎꠣꠘꠥ ꠀꠘ꠆ꠖꠣꠁꠞ ꠕꠣꠇꠤ ꠘꠥꠞꠞ ꠛꠣꠄ, ꠡꠄꠔꠣꠘꠞ ꠖꠈꠟ ꠕꠣꠇꠤ ꠀꠟ꠆ꠟꠣꠞ ꠛꠣꠄ ꠚꠤꠞꠤꠀ ꠀꠁꠘ, ꠀꠝꠣꠞ ꠃꠙꠞꠦ ꠁꠝꠣꠘ ꠀꠘꠤꠀ ꠉꠥꠘꠣꠞ ꠝꠣꠚꠤ ꠙꠣꠁꠀ, ꠙꠞꠦꠎꠉꠣꠞ ꠛꠘ꠆ꠖꠣ ꠅꠇꠟꠞ ꠝꠣꠎꠦ ꠔꠣꠞꠣꠅ ꠖꠣꠈꠤꠟ ꠅꠁꠘ।
ACT 26:19 “ꠝꠣꠘꠘꠤꠅ ꠞꠣꠎꠣ ꠘꠣꠝꠖꠣꠞ, ꠛꠦꠢꠦꠡ꠆ꠔꠤ ꠁ ꠖꠞꠡꠘꠞꠦ ꠀꠝꠤ ꠚꠣꠟꠣꠁꠔꠣꠝ ꠙꠣꠞꠟꠣꠝ ꠘꠣ।
ACT 26:20 ꠄꠞꠖꠣꠄ ꠙꠄꠟꠣ ꠖꠣꠝꠦꠡ꠆ꠇꠞ ꠝꠣꠘꠡꠞ ꠉꠦꠍꠦ, ꠛꠣꠖꠦ ꠎꠦꠞꠥꠎꠣꠟꠦꠝꠅ, ꠄꠢꠥꠖꠤꠀ ꠎꠤꠟꠣꠞ ꠢꠇꠟ ꠎꠣꠉꠣꠔ ꠀꠞ ꠅ-ꠁꠢꠥꠖꠤ ꠅꠇꠟꠞ ꠉꠦꠍꠦꠅ ꠔꠛꠟꠤꠉ ꠇꠞꠟꠣꠝ। ꠔꠣꠞꠣꠞꠦ ꠇꠁꠟꠣꠝ, ꠔꠃꠛꠣ ꠇꠞꠤꠀ ꠀꠟ꠆ꠟꠣꠞ ꠛꠣꠄ ꠚꠤꠞꠅ, ꠀꠞ ꠅꠃ ꠟꠣꠈꠣꠘ ꠀꠝꠟ ꠇꠞꠅ, ꠎꠦꠔꠣ ꠖꠦꠈꠤꠀ ꠙꠞꠝꠣꠘ ꠝꠤꠟꠦ ꠔꠥꠝꠞꠣ ꠢꠣꠍꠣꠞꠞ ꠔꠃꠛꠣ ꠇꠞꠍ।
ACT 26:21 ꠅꠃ ꠇꠣꠞꠘꠦ ꠁꠢꠥꠖꠤ ꠅꠇꠟꠦ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠅ ꠗꠞꠤꠀ ꠀꠝꠣꠞꠦ ꠝꠣꠞꠤꠟꠤꠔꠣ ꠌꠣꠁꠍꠂꠘ।
ACT 26:22 ꠅꠁꠟꠦ ꠀꠟ꠆ꠟꠣꠞ ꠡꠣꠁꠎ꠆ꠎꠄ ꠀꠝꠤ ꠅꠈꠘ ꠙꠞ꠆ꠎꠘ꠆ꠔ ꠐꠤꠇꠤꠀ ꠀꠍꠤ, ꠀꠞ ꠢꠥꠞꠥ-ꠛꠠ ꠢꠇꠟꠞ ꠍꠣꠝꠘꠦ ꠃꠛꠣꠁꠀ ꠡꠣꠇ꠆ꠇꠤꠅ ꠖꠤꠞꠣꠝ। ꠢꠎꠞꠔ ꠝꠥꠍꠣꠄ ꠀꠞ ꠔꠣꠝꠣꠝ ꠘꠛꠤ ꠅꠇꠟꠦ ꠎꠦꠔꠣ ꠊꠐꠤꠛ ꠇꠞꠤ ꠛꠣꠔꠣꠁꠀ ꠉꠦꠍꠂꠘ, ꠁꠔꠣꠞ ꠛꠣꠞꠣ ꠀꠝꠤ ꠇꠥꠘ꠆ꠔꠣꠃ ꠇꠁꠞꠣꠝ ꠘꠣ।
ACT 26:23 ꠄꠞꠣ ꠇꠁꠍꠂꠘ, ꠀꠟ-ꠝꠍꠤꠄ ꠔꠇꠟꠤꠚ ꠡꠁꠎ꠆ꠎ ꠇꠞꠛꠣ, ꠔꠣꠁꠘꠃ ꠙꠄꠟꠣ ꠝꠥꠞ꠆ꠖꠣ ꠕꠣꠇꠤ ꠎꠤꠘ꠆ꠖꠣ ꠅꠁꠀ ꠃꠑꠤꠀ ꠢꠣꠞꠤ ꠔꠣꠘ ꠘꠤꠎꠞ ꠎꠣꠔꠤ, ꠀꠞ ꠅ-ꠁꠢꠥꠖꠤ ꠅꠇꠟꠞ ꠉꠦꠍꠦꠅ ꠘꠥꠞꠞ ꠔꠞꠤꠇꠣꠞ ꠇꠕꠣ ꠔꠛꠟꠤꠉ ꠇꠞꠛꠣ।”
ACT 26:24 ꠙꠣꠃꠟꠥꠍꠦ ꠎꠦꠛꠟꠣ ꠅꠃ ꠟꠣꠈꠣꠘ ꠎꠛꠣꠘꠛꠘ꠆ꠖꠤ ꠖꠤꠞꠣ, ꠀꠈꠔꠣꠃ ꠚꠤꠡ꠆ꠔꠍꠦ ꠔꠣꠘꠞꠦ ꠎꠥꠞꠦ ꠗꠣꠝꠇꠤ ꠝꠣꠞꠤ ꠇꠁꠟꠣ, “ꠙꠣꠃꠟꠥꠍ, ꠔꠥꠝꠤ ꠔ ꠙꠣꠉꠟ ꠅꠁꠉꠦꠍ। ꠔꠥꠝꠤ ꠛꠃꠔ ꠟꠦꠈꠣ-ꠙꠠꠣ ꠇꠞꠍ, ꠅꠃ ꠟꠦꠈꠣ-ꠙꠠꠣꠄ ꠔꠥꠝꠣꠞꠦ ꠙꠣꠉꠟ ꠛꠣꠘꠣꠁꠟꠤꠍꠦ।”
ACT 26:25 ꠙꠣꠃꠟꠥꠍꠦ ꠎꠥꠀꠙ ꠖꠤꠟꠣ, “ꠎꠤ ꠘꠣ, ꠢꠣꠇꠤꠝ ꠍꠣꠛ, ꠀꠝꠤ ꠙꠣꠉꠟ ꠘꠣꠄ। ꠀꠝꠤ ꠔ ꠢꠇ ꠀꠞ ꠎꠥꠇ꠆ꠔꠤꠞ ꠝꠣꠔ ꠝꠣꠔꠞꠣꠝ।
ACT 26:26 ꠞꠣꠎꠣ ꠘꠣꠝꠖꠣꠞꠦ ꠔ ꠁꠔꠣ ꠢꠇ꠆ꠇꠟꠔꠣꠃ ꠎꠣꠘꠂꠘ, ꠀꠞ ꠀꠝꠤ ꠢꠤꠝ꠆ꠝꠔ ꠇꠞꠤꠀ ꠔꠣꠘ ꠍꠣꠝꠘꠦ ꠈꠥꠟꠣ-ꠝꠦꠟꠣ ꠝꠣꠔꠤꠞꠣꠝ। ꠀꠝꠤ ꠙꠥꠞꠣꠙꠥꠞ ꠎꠣꠘꠤ, ꠁꠔꠣ ꠢꠇ꠆ꠇꠟꠔꠣꠃ ꠞꠣꠎꠣ ꠘꠣꠝꠖꠣꠞꠞ ꠝꠣꠟꠥꠝ ꠀꠍꠦ, ꠁꠔꠣ ꠔ ꠇꠥꠘꠥ ꠀꠘ꠆ꠖꠣꠞꠤꠞ ꠝꠣꠎꠦ ꠟꠥꠇꠣꠁꠀ ꠊꠐꠍꠦ ꠘꠣ।
ACT 26:27 “ꠔꠦ ꠝꠣꠘꠘꠤꠅ ꠞꠣꠎꠣ ꠘꠣꠝꠖꠣꠞ, ꠀꠙꠘꠦ ꠇꠤꠔꠣ ꠘꠛꠤ ꠅꠇꠟꠞꠦ ꠄꠇꠤꠘ ꠇꠞꠂꠘ ꠘꠤ? ꠀꠝꠤ ꠔ ꠎꠣꠘꠤ, ꠀꠙꠘꠦꠅ ꠇꠞꠂꠘ।”
ACT 26:28 ꠅꠃ ꠀꠉ꠆ꠞꠤꠙ꠆ꠙꠦ ꠇꠁꠟꠣ, “ꠔꠥꠝꠤ ꠇꠤꠔꠣ ꠅꠔ ꠎꠟꠖꠤ ꠀꠝꠣꠞꠦꠅ ꠀꠟ-ꠝꠍꠤꠞ ꠔꠞꠤꠇꠣꠔ ꠘꠤꠔꠣꠄꠉꠤ ꠌꠣꠁꠞꠣꠄ ꠘꠤ?”
ACT 26:29 ꠙꠣꠃꠟꠥꠍꠦ ꠇꠁꠟꠣ, “ꠀꠝꠤ ꠀꠟ꠆ꠟꠣꠞ ꠉꠦꠍꠦ ꠅꠃ ꠖꠥꠀ ꠇꠞꠞꠣꠝ, ꠎꠟꠖꠤ ꠅꠃꠇ ꠛꠣ ꠖꠦꠞꠤꠄ ꠅꠃꠇ, ꠈꠣꠟꠤ ꠀꠙꠘꠦ ꠘꠣꠄ, ꠎꠔ ꠝꠣꠘꠡꠦ ꠀꠝꠣꠞ ꠀꠁꠎꠇꠥꠞ ꠁ ꠎꠛꠣꠘꠛꠘ꠆ꠖꠤ ꠢꠥꠘꠞꠣ, ꠄꠞꠣ ꠢꠇ꠆ꠇꠟꠃ ꠀꠝꠣꠞ ꠟꠣꠈꠣꠘ ꠛꠘꠤꠎꠣꠃꠇ꠆ꠇꠣ। ꠈꠣꠟꠤ ꠅꠃ ꠡꠤꠇꠟ ꠛꠣꠖ ꠖꠤꠀ।”
ACT 26:30 ꠔꠦꠃ ꠞꠣꠎꠣ, ꠖꠦꠡꠞ ꠙꠞꠗꠣꠘ ꠢꠣꠇꠤꠝ, ꠞꠣꠘꠤ ꠛꠞ꠆ꠘꠤꠇꠤ ꠀꠞ ꠔꠣꠞꠣꠞ ꠟꠉꠦ ꠀꠖꠣꠟꠔꠞ ꠢꠇꠟ ꠝꠣꠘꠥꠡ ꠃꠛꠣꠁ ꠉꠦꠟꠣ।
ACT 26:31 ꠛꠣꠖꠦ ꠔꠣꠞꠣ ꠛꠣꠞꠘꠤꠞ ꠙꠕꠦ ꠄꠇꠦ-ꠅꠁꠘ꠆ꠘꠦ ꠇꠁꠟꠣ, “ꠁ ꠛꠦꠌꠣꠠꠣꠄ ꠔ ꠝꠃꠔꠞ ꠡꠣꠎꠣ ꠛꠣ ꠎꠦꠟ ꠈꠣꠐꠣꠞ ꠎꠥꠇꠣ ꠇꠥꠘ꠆ꠔꠣꠃ ꠇꠞꠍꠦ ꠘꠣ।”
ACT 26:32 ꠞꠣꠎꠣ ꠀꠉ꠆ꠞꠤꠙ꠆ꠙꠦ ꠚꠤꠡ꠆ꠔꠍꠞꠦ ꠇꠁꠟꠣ, “ꠢꠦ ꠎꠥꠖꠤ ꠛꠣꠖꠡꠣꠞ ꠉꠦꠍꠦ ꠀꠙꠤꠟ ꠘꠣ ꠇꠞꠔ, ꠔꠦ ꠔꠣꠞꠦ ꠅꠈꠘ ꠈꠣꠟꠣꠍ ꠖꠦꠅꠀ ꠉꠦꠟ ꠅꠘꠦ।”
ACT 27:1 ꠢꠣꠇꠤꠝꠞ ꠚꠄꠍꠣꠟꠣ ꠝꠣꠚꠤꠇ ꠎꠣꠎꠅ ꠇꠞꠤꠀ ꠀꠝꠞꠣꠞꠦ ꠁꠔꠣꠟꠤ ꠖꠦꠡꠅ ꠙꠣꠑꠣꠘꠤꠞ ꠡꠝꠄ ꠀꠁꠟꠦ, ꠙꠣꠃꠟꠥꠍ ꠀꠞ ꠀꠞꠅ ꠇꠄꠎꠘ ꠇꠄꠅꠖꠤꠞꠦ ꠎꠥꠟꠤꠅ ꠘꠣꠝꠞ ꠄꠇꠎꠘ ꠡ-ꠍꠤꠙꠣꠁꠞ ꠍꠥꠛꠦꠖꠣꠞꠞ ꠀꠔꠅ ꠡꠝꠎꠣꠁ ꠖꠤꠟꠣ। ꠎꠥꠟꠤꠅ ꠀꠍꠟꠣ ꠛꠣꠖꠡꠣ ꠇꠂꠍꠞꠞ ꠀꠙꠘ ꠍꠤꠙꠣꠁ ꠖꠟꠞ ꠄꠇꠎꠘ ꠍꠥꠛꠦꠖꠣꠞ।
ACT 27:2 ꠛꠣꠖꠦ ꠀꠝꠞꠣ ꠀꠖ꠆ꠞꠣꠝꠥꠔ꠆ꠔꠤꠅ ꠊꠣꠐꠞ ꠅꠃꠟꠣ ꠄꠇ ꠎꠣꠎꠅ ꠅꠁꠀ ꠞꠅꠀꠘꠣ ꠖꠤꠟꠣꠝ, ꠎꠦꠈꠣꠘ ꠀꠍꠤꠀ ꠖꠦꠡꠞ ꠛꠃꠔ ꠎꠣꠎ ꠊꠣꠐꠅ ꠎꠣꠅꠀꠞ ꠟꠣꠉꠤ ꠎꠥꠁꠔ ꠇꠞꠣ ꠅꠁꠍꠦ। ꠀꠞ ꠝꠣꠇꠤꠖꠘꠤꠀ ꠖꠦꠡꠞ ꠕꠤꠡꠟꠘꠤꠇꠤ ꠐꠣꠃꠘꠞ ꠀꠞꠤꠡ꠆ꠔꠣꠇꠥꠍ ꠀꠝꠞꠣꠞ ꠟꠉꠦ ꠀꠍꠟꠣ।
ACT 27:3 ꠛꠣꠖꠞ ꠖꠤꠘ ꠀꠝꠞꠣꠞ ꠎꠣꠎ ꠉꠤꠀ ꠍꠤꠖꠘꠅ ꠜꠤꠠꠟ। ꠍꠥꠛꠦꠖꠣꠞ ꠎꠥꠟꠤꠅꠄ ꠙꠣꠃꠟꠥꠍꠞ ꠟꠉꠦ ꠈꠥꠛ ꠜꠣꠟꠣ ꠛꠦꠛꠢꠣꠞ ꠇꠞꠟꠣ। ꠔꠣꠁꠘ ꠔꠣꠘ ꠖꠥꠡ꠆ꠔ ꠅꠇꠟꠞ ꠉꠦꠍꠦ ꠉꠤꠀ, ꠘꠤꠎꠞ ꠎꠞꠥꠞꠤ ꠉꠞꠎ ꠇꠥꠟꠣꠘꠤꠞ ꠁꠎꠣꠎꠔ ꠖꠤꠟꠣ।
ACT 27:4 ꠛꠣꠖꠦ ꠢꠤ ꠎꠣꠉꠣ ꠕꠣꠇꠤ ꠢꠤꠞꠛꠣꠞ ꠎꠣꠎ ꠍꠣꠠꠟ, ꠀꠞ ꠀꠝꠞꠣꠞ ꠃꠟꠐꠣꠝꠥꠈꠣ ꠛꠣꠔꠣꠡ ꠖꠦꠅꠀꠄ, ꠀꠝꠞꠣ ꠍꠣꠁꠙ꠆ꠞꠣꠍ ꠖꠤꠙꠞ ꠎꠦꠛꠣꠄ ꠛꠣꠔꠣꠡ ꠀꠍꠤꠟ ꠘꠣ ꠢꠛꠣꠄꠖꠤ ꠉꠦꠟꠣꠝ।
ACT 27:5 ꠉꠤꠀ ꠇꠤꠟꠤꠇꠤꠀ ꠀꠞ ꠙꠣꠝꠚꠥꠟꠤꠀꠞ ꠍꠣꠝꠘꠞ ꠡꠣꠉꠞ ꠙꠣꠞ ꠅꠁꠀ ꠟꠥꠇꠤꠀ ꠖꠦꠡꠞ ꠝꠥꠞꠣ ꠐꠣꠃꠘꠅ ꠀꠁꠀ ꠀꠎꠤꠟꠣꠝ।
ACT 27:6 ꠍꠥꠛꠦꠖꠣꠞꠦ ꠢꠤꠈꠣꠘꠅ ꠁꠔꠣꠟꠤ ꠖꠦꠡꠅ ꠎꠣꠅꠞꠣ, ꠀꠟꠦꠇꠎꠣꠘꠖ꠆ꠞꠤꠀꠞ ꠄꠇꠈꠣꠘ ꠎꠣꠎ ꠙꠣꠁꠀ, ꠢꠃ ꠎꠣꠎꠅ ꠇꠞꠤ ꠀꠝꠞꠣꠞꠦ ꠟꠁꠀ ꠞꠅꠀꠘꠣ ꠖꠤꠟꠣ।
ACT 27:7 ꠀꠝꠞꠣꠞ ꠎꠣꠎꠈꠣꠘ ꠈꠥꠛ ꠀꠡ꠆ꠔꠦ ꠀꠡ꠆ꠔꠦ ꠌꠟꠤꠀ ꠛꠃꠔ ꠖꠤꠘ ꠛꠣꠖꠦ ꠇꠡ꠆ꠐ ꠇꠞꠤ ꠇ꠆ꠟꠤꠖ ꠐꠣꠃꠘꠞ ꠇꠣꠘ꠆ꠖꠣꠔ ꠀꠁꠀ ꠀꠎꠤꠟ, ꠅꠁꠟꠦ ꠛꠣꠔꠣꠡꠞ ꠟꠣꠉꠤ ꠀꠝꠞꠣ ꠀꠞ ꠡꠢꠎꠦ ꠀꠉꠥꠀꠁꠔꠣꠝ ꠙꠣꠞꠟꠣꠝ ꠘꠣ। ꠔꠦꠃ ꠀꠝꠞꠣ ꠇꠝ ꠛꠣꠔꠣꠡꠦꠖꠤ ꠍꠣꠟꠝꠥꠘꠣꠞ ꠇꠣꠘ꠆ꠖꠣꠛꠣꠄ ꠉꠤꠀ ꠇ꠆ꠞꠤꠔꠤ ꠖꠤꠙꠞ ꠀꠅꠠꠦꠖꠤ ꠎꠣꠅꠀꠔ ꠟꠣꠉꠟꠣꠝ।
ACT 27:8 ꠀꠞ ꠖꠞꠤꠀꠞ ꠙꠣꠞꠞ ꠇꠣꠘ꠆ꠖꠣꠛꠣꠄ ꠇꠡ꠆ꠐ ꠇꠞꠤꠀ ꠎꠣꠁꠔꠦ ꠎꠣꠁꠔꠦ, ‘ꠡꠥꠘ꠆ꠖꠞ ꠟꠋꠉꠞꠈꠣꠘꠣ’ ꠘꠣꠝꠞ ꠄꠇ ꠢꠥꠞꠥ ꠎꠣꠎ ꠊꠣꠐꠅ ꠀꠁꠟꠣꠝ, ꠄꠞ ꠇꠣꠘ꠆ꠖꠣꠔ ꠀꠍꠤꠟ ꠟꠣꠍꠦꠀ ꠐꠣꠃꠘ।
ACT 27:9 ꠅꠃ ꠟꠣꠈꠣꠘ ꠛꠃꠔ ꠖꠤꠘ ꠉꠥꠎꠞꠤ ꠉꠦꠟ, ꠞꠥꠎꠣꠞ ꠁꠖꠞ ꠖꠤꠘ ꠡꠦꠡ ꠅꠁꠀ ꠕꠥꠠꠣ ꠕꠥꠠꠣ ꠡꠤꠔ ꠀꠁꠍꠦ। ꠁ ꠡꠝꠄ ꠎꠣꠎꠦ ꠍꠚꠞ ꠇꠞꠣ ꠈꠥꠛ ꠛꠤꠙꠖ। ꠔꠦꠃ ꠙꠣꠃꠟꠥꠍꠦ ꠎꠣꠎꠞ ꠝꠣꠘꠡꠞꠦ ꠙꠞꠣꠝꠤꠡ ꠖꠤꠟꠣ।
ACT 27:10 ꠔꠣꠁꠘ ꠇꠁꠟꠣ, “ꠍꠣꠛ ꠅꠇꠟ, ꠀꠝꠤ ꠖꠦꠈꠞꠣꠝ, ꠁ ꠍꠚꠞꠅ ꠀꠝꠞꠣꠞ ꠛꠃꠔ ꠝꠍꠤꠛꠔ ꠀꠞ ꠈꠦꠔꠤ ꠅꠁꠛ। ꠁꠔꠣ ꠈꠣꠟꠤ ꠎꠣꠎ ꠛꠣ ꠝꠣꠟ-ꠍꠣꠝꠣꠘꠣꠞ ꠘꠣꠄ, ꠀꠝꠞꠣꠞ ꠎꠣꠘꠞꠅ ꠈꠦꠔꠤ ꠅꠁꠛ।”
ACT 27:11 ꠅꠁꠟꠦ ꠍꠥꠛꠦꠖꠣꠞꠦ ꠙꠣꠃꠟꠥꠍꠞ ꠇꠕꠣ ꠘꠣ ꠝꠣꠘꠤꠀ, ꠎꠣꠎꠞ ꠝꠣꠟꠤꠇ ꠀꠞ ꠇꠦꠙꠐꠤꠘꠞ ꠇꠕꠣ ꠢꠥꠘꠟꠣ।
ACT 27:12 ꠀꠞ ꠁ ꠟꠋꠉꠞꠈꠣꠘꠣꠔ ꠡꠤꠔꠞ ꠖꠤꠘꠅ ꠞꠁꠔꠦ ꠡꠥꠛꠤꠗꠣ ꠅꠁꠔ ꠘꠣꠄ ꠉꠔꠤꠇꠦ, ꠛꠦꠡꠤꠞ ꠜꠣꠉ ꠝꠣꠘꠡꠦ ꠢꠤꠘ ꠕꠣꠇꠤ ꠎꠣꠅꠀꠞ ꠟꠣꠉꠤ ꠙꠞꠣꠝꠤꠡ ꠖꠤꠟꠣ। ꠔꠣꠞꠣ ꠌꠣꠁꠟꠣ ꠇꠥꠘꠥꠝꠘ꠆ꠔꠦ ꠚꠤꠘꠤꠇ꠆ꠡ ꠊꠣꠐꠅ ꠙꠃꠍꠤꠀ ꠡꠤꠔꠞ ꠖꠤꠘ ꠇꠣꠐꠣꠁꠔꠣ। ꠁ ꠊꠣꠐ ꠀꠍꠤꠟ ꠇ꠆ꠞꠤꠔꠤ ꠖꠤꠙꠅ, ꠄꠞ ꠃꠔ꠆ꠔꠞ-ꠙꠌ꠆ꠌꠤꠝ ꠀꠞ ꠖꠇ꠆ꠇꠤꠘ-ꠙꠌ꠆ꠌꠤꠝ ꠖꠤꠇ ꠈꠥꠟꠣ ꠀꠍꠤꠟ।
ACT 27:13 ꠛꠣꠖꠦ ꠎꠦꠛꠟꠣ ꠀꠡ꠆ꠔꠦ ꠀꠡ꠆ꠔꠦ ꠖꠃꠇꠘꠞ ꠛꠣꠔꠣꠡ ꠌꠣꠟꠥ ꠅꠁꠟ, ꠅꠃ ꠔꠣꠞꠣ ꠝꠘꠅ ꠇꠞꠟꠣ, ꠔꠣꠞꠣ ꠎꠦꠟꠣ ꠀꠡꠣ ꠇꠞꠍꠟꠣ ꠅꠟꠣꠃ ꠅꠁꠍꠦ। ꠄꠞꠖꠣꠄ ꠔꠣꠞꠣ ꠎꠣꠎꠞ ꠟꠋꠉꠞ ꠈꠥꠟꠤꠀ ꠇ꠆ꠞꠤꠔꠤ ꠖꠤꠙꠞ ꠉꠣꠟꠣꠛꠣꠄ ꠞꠅꠀꠘꠣ ꠖꠤꠟ।
ACT 27:14 ꠅꠁꠟꠦ ꠕꠥꠠꠣ ꠛꠣꠖꠦꠃ ꠢꠤ ꠙꠣꠞꠅ ꠕꠣꠇꠤ ꠁꠀꠘ-ꠇꠥꠘꠤ ꠘꠣꠝꠞ ꠈꠥꠛ ꠛꠦꠎꠥꠁꠔꠣ ꠄꠇ ꠔꠥꠚꠣꠘ ꠀꠁꠟ।
ACT 27:15 ꠀꠝꠞꠣꠞ ꠎꠣꠎ ꠔꠥꠚꠣꠘꠞ ꠝꠣꠎꠦ ꠙꠠꠟ, ꠔꠥꠚꠣꠘꠞ ꠑꠦꠟꠣ ꠝꠥꠇꠣꠛꠤꠟꠣ ꠇꠞꠔꠣꠝ ꠘꠣ ꠙꠣꠞꠤꠀ, ꠎꠣꠎꠞꠦ ꠛꠣꠔꠣꠡꠞ ꠔꠣꠟꠦ ꠔꠣꠟꠦ ꠜꠣꠐꠤꠅꠟ ꠖꠤꠟꠣꠝ।
ACT 27:16 ꠛꠣꠖꠦ ꠇꠃꠖꠣ ꠘꠣꠝꠞ ꠄꠇ ꠢꠥꠞꠥ ꠖꠤꠙꠞ ꠀꠅꠠꠦꠖꠤ ꠉꠤꠀ, ꠎꠣꠎꠞ ꠟꠉꠞ ꠛꠣꠞꠇꠤ ꠘꠣꠅꠈꠣꠘꠞꠦ ꠀꠝꠞꠣ ꠛꠃꠔ ꠇꠡ꠆ꠐ ꠇꠞꠤ ꠜꠣꠋꠉꠣ ꠕꠣꠇꠤ ꠛꠣꠌꠣꠁꠟꠣꠝ।
ACT 27:17 ꠝꠣꠘꠡꠦ ꠘꠣꠅꠞꠦ ꠐꠣꠘꠤꠀ ꠘꠤꠀ ꠎꠣꠎꠞ ꠃꠙꠞꠦ ꠔꠥꠟꠟꠣ, ꠀꠞ ꠎꠣꠎꠞ ꠔꠇ꠆ꠔꠣꠁꠘꠞꠦ ꠖꠠꠤ ꠖꠤꠀ ꠖꠠ ꠇꠞꠤ ꠛꠣꠘ꠆ꠖꠤꠟꠣ, ꠎꠣꠔꠦ ꠔꠥꠚꠣꠘꠦ ꠘꠣ ꠜꠣꠋꠉꠦ। ꠛꠣꠖꠦ ꠍꠥꠞ꠆ꠔꠤ ꠘꠣꠝꠞ ꠡꠣꠉꠞꠞ ꠌꠞꠅ ꠎꠣꠎ ꠟꠣꠉꠤꠎꠤꠛꠣꠞ ꠒꠞꠦ, ꠙꠣꠟ ꠟꠣꠝꠣꠁꠀ ꠎꠣꠎꠞꠦ ꠄꠝꠘꠦ ꠛꠣꠔꠣꠡ ꠜꠣꠐꠤꠅꠟꠦ ꠍꠣꠠꠤ ꠖꠤꠟꠣꠝ।
ACT 27:18 ꠔꠥꠚꠣꠘꠦ ꠎꠣꠎꠞꠦ ꠅꠝꠘ ꠟꠣꠈꠣꠘ ꠉꠠꠣꠉꠠꠤ ꠡꠥꠞꠥ ꠇꠞꠟ, ꠄꠞꠖꠣꠄ ꠔꠣꠞꠣ ꠛꠣꠖꠞ ꠖꠤꠘ ꠎꠣꠎꠞ ꠝꠣꠟ-ꠍꠣꠝꠣꠘꠣ ꠙꠣꠘꠤꠔ ꠚꠣꠟꠣꠁ ꠖꠤꠟꠣ।
ACT 27:19 ꠔꠤꠘ ꠖꠤꠘꠞ ꠖꠤꠘ ꠔꠣꠞꠣ ꠘꠤꠎꠞ ꠀꠔꠦ ꠎꠣꠎꠞ ꠡꠣꠎ-ꠡꠞꠘ꠆ꠎꠣꠝꠅ ꠙꠣꠘꠤꠔ ꠚꠣꠟꠣꠁ ꠖꠤꠟꠣ।
ACT 27:20 ꠛꠃꠔ ꠖꠤꠘ ꠕꠣꠇꠤ ꠌꠣꠘ-ꠡꠥꠞꠥꠎ ꠇꠥꠘ ꠎꠤꠘꠤꠡ ꠁꠔꠣ ꠘꠣ ꠖꠦꠈꠣꠄ, ꠀꠞ ꠔꠥꠚꠣꠘꠞ ꠎꠥꠞ ꠈꠥꠛ ꠛꠦꠡꠤ ꠅꠀꠄ, ꠀꠝꠞꠣ ꠎꠣꠘꠦ ꠛꠣꠌꠣꠞ ꠀꠡꠣ ꠍꠣꠠꠤ ꠖꠤꠟꠣꠝ।
ACT 27:21 ꠎꠣꠎꠞ ꠝꠣꠘꠥꠡ ꠛꠃꠔ ꠖꠤꠘ ꠗꠞꠤ ꠃꠙꠣꠡ ꠞꠅꠀꠄ ꠙꠣꠃꠟꠥꠍꠦ ꠃꠛꠣꠁꠀ ꠔꠣꠞꠣꠞꠦ ꠇꠁꠟꠣ, “ꠅ ꠜꠣꠁꠍꠣꠛ ꠅꠇꠟ, ꠀꠝꠣꠞ ꠇꠕꠣ ꠢꠥꠘꠤꠀ ꠇ꠆ꠞꠤꠔꠤ ꠖꠤꠙ ꠕꠣꠇꠤ ꠎꠣꠎꠈꠣꠘꠞꠦ ꠘꠣ ꠍꠣꠠꠟꠦ, ꠁ ꠝꠍꠤꠛꠔ ꠀꠞ ꠈꠦꠔꠤ ꠕꠣꠇꠤ ꠀꠙꠘꠣꠞꠣ ꠛꠣꠌꠟꠣ ꠅꠘꠦ।
ACT 27:22 ꠅꠁꠟꠦ ꠅꠈꠘ ꠀꠝꠤ ꠀꠙꠘꠣꠞꠣꠞꠦ ꠅꠃ ꠙꠞꠣꠝꠤꠡ ꠖꠤꠞꠣꠝ, ꠀꠙꠘꠣꠞꠣ ꠝꠘꠞ ꠝꠣꠎꠦ ꠛꠟ ꠞꠣꠈꠃꠇ꠆ꠇꠣ, ꠀꠝꠞꠣ ꠇꠦꠃ ꠎꠣꠘꠦ ꠝꠞꠔꠣꠝ ꠘꠣꠄ, ꠈꠣꠟꠤ ꠎꠣꠎꠈꠣꠘ ꠛꠤꠘꠣꠡ ꠅꠁꠎꠤꠛ।
ACT 27:23 ꠀꠝꠤ ꠎꠦ ꠀꠟ꠆ꠟꠣꠞ ꠄꠛꠣꠖꠔ-ꠛꠘ꠆ꠖꠦꠉꠤ ꠇꠞꠤ, ꠢꠃ ꠀꠟ꠆ꠟꠣꠞ ꠄꠇ ꠚꠤꠞꠤꠡ꠆ꠔꠣꠄ ꠉꠔ ꠞꠣꠁꠔ ꠀꠝꠣꠞ ꠇꠣꠘ꠆ꠖꠣꠔ ꠃꠛꠣꠁꠀ ꠇꠁꠍꠂꠘ,
ACT 27:24 ꠙꠣꠃꠟꠥꠍ, ꠒꠞꠣꠁꠅ ꠘꠣ, ꠛꠣꠖꠡꠣ ꠇꠂꠍꠞꠞ ꠍꠣꠝꠘꠦ ꠔꠥꠝꠣꠞ ꠃꠛꠣꠘꠤ ꠟꠣꠉꠛ। ꠀꠞ ꠁ ꠎꠣꠎꠅ ꠇꠞꠤ ꠎꠦꠞꠣ ꠔꠥꠝꠣꠞ ꠟꠉꠦ ꠅꠁꠀ ꠎꠣꠁꠞꠣ, ꠀꠟ꠆ꠟꠣꠄ ꠔꠥꠝꠣꠞ ꠈꠣꠔꠤꠞꠦ ꠝꠦꠢꠦꠞꠛꠣꠘꠤ ꠇꠞꠤꠀ ꠄꠞꠣ ꠢꠇ꠆ꠇꠟꠞ ꠎꠣꠘ ꠛꠣꠌꠣꠁꠍꠂꠘ।
ACT 27:25 ꠔꠦ ꠍꠣꠛ ꠅꠇꠟ, ꠀꠙꠘꠣꠞꠣ ꠝꠘꠞ ꠝꠣꠎꠦ ꠛꠟ ꠞꠣꠈꠃꠇ꠆ꠇꠣ। ꠀꠝꠤ ꠄꠇꠤꠘ ꠇꠞꠤ, ꠀꠟ꠆ꠟꠣꠄ ꠀꠝꠣꠞꠦ ꠎꠦꠟꠣ ꠇꠁꠍꠂꠘ, ꠅꠟꠣꠃ ꠅꠁꠛ।
ACT 27:26 ꠅꠁꠟꠦ ꠀꠝꠞꠣ ꠇꠥꠘꠥ ꠖꠤꠙꠞ ꠃꠙꠞꠦ ꠉꠤꠀ ꠙꠠꠝꠥ।”
ACT 27:27 ꠅꠃ ꠟꠣꠈꠣꠘ ꠇꠞꠤ ꠀꠝꠞꠣ ꠀꠖ꠆ꠞꠤꠀ ꠡꠣꠉꠞꠞ ꠃꠙꠞꠦꠖꠤ ꠎꠣꠅꠀꠔ ꠞꠁꠟꠣꠝ, ꠛꠣꠖꠦ ꠔꠥꠚꠣꠘꠞ ꠌꠃꠖ꠆ꠖ ꠖꠤꠘꠞ ꠖꠤꠘ ꠀꠗꠣ ꠞꠣꠁꠔꠇꠥꠞ ꠛꠣꠟꠣ ꠘꠣꠁꠀ ꠅꠇꠟꠦ ꠀꠘ꠆ꠖꠣꠎ ꠇꠞꠟꠣ, ꠔꠣꠞꠣ ꠙꠣꠞꠞ ꠇꠣꠘ꠆ꠖꠣꠔ ꠀꠁꠍꠂꠘ।
ACT 27:28 ꠔꠣꠞꠣ ꠙꠣꠘꠤ ꠝꠣꠙꠤꠀ ꠖꠦꠈꠟꠣ ꠈꠣꠟꠤ ꠀꠡꠤ ꠀꠔ ꠉꠁꠘ ꠀꠍꠦ, ꠕꠥꠠꠣ ꠛꠣꠖꠦ ꠢꠤꠞꠛꠣꠞ ꠝꠣꠙꠤꠀ ꠖꠦꠈꠟꠣ, ꠡꠣꠁꠐ ꠀꠔ ꠀꠍꠦ।
ACT 27:29 ꠄꠞꠖꠣꠄ ꠌꠞꠞ ꠙꠣꠔ꠆ꠔꠞꠞ ꠝꠣꠎꠦ ꠉꠤꠀ ꠎꠣꠎ ꠗꠣꠇ꠆ꠇꠣ ꠟꠣꠉꠣꠞ ꠒꠞꠦ, ꠔꠣꠞꠣ ꠎꠣꠎꠞ ꠈꠞꠦꠖꠤ ꠌꠣꠁꠞꠉꠦꠍꠣ ꠟꠋꠉꠞ ꠚꠣꠟꠣꠁꠀ, ꠡꠥꠞꠥꠎꠞ ꠚꠞ ꠖꠦꠈꠣꠞ ꠟꠣꠉꠤ ꠖꠥꠀ ꠇꠞꠣꠔ ꠛꠁꠟꠣ।
ACT 27:30 ꠘꠣꠁꠀ ꠅꠇꠟꠦ ꠎꠣꠎ ꠕꠣꠇꠤ ꠜꠣꠉꠤꠀ ꠎꠣꠅꠀꠞ ꠝꠔꠟꠛ ꠇꠞꠤ, ꠍꠣꠝꠘꠞ ꠉꠟꠁꠞ ꠕꠥꠠꠣ ꠀꠉꠦ ꠟꠋꠉꠞ ꠚꠣꠟꠣꠘꠤꠞ ꠇꠕꠣ ꠇꠁꠀ, ꠎꠣꠎꠞ ꠛꠣꠞꠇꠤ ꠘꠣꠅꠞꠦ ꠖꠞꠤꠀꠔ ꠟꠣꠝꠣꠁꠟꠣ।
ACT 27:31 ꠔꠦꠃ ꠙꠣꠃꠟꠥꠍꠦ ꠍꠥꠛꠦꠖꠣꠞꠞꠦ ꠀꠞ ꠍꠤꠙꠣꠁ ꠅꠇꠟꠞꠦ ꠇꠁꠟꠣ, “ꠘꠣꠁꠀ ꠅꠇꠟ ꠎꠣꠎ ꠕꠣꠇꠤ ꠜꠣꠉꠤ ꠉꠦꠟꠦ ꠀꠙꠘꠣꠞꠣ ꠢꠇꠟ ꠝꠣꠞꠣ ꠎꠣꠁꠛꠣ।”
ACT 27:32 ꠁꠈꠣꠘ ꠢꠥꠘꠤꠀ ꠍꠤꠙꠣꠁ ꠅꠇꠟꠦ ꠘꠣꠅꠞ ꠖꠠꠤ ꠇꠣꠐꠤ ꠖꠤꠟꠣ, ꠔꠦꠃ ꠘꠣꠅ ꠙꠣꠘꠤꠔ ꠜꠣꠡꠤꠀ ꠉꠦꠟꠉꠤ।
ACT 27:33 ꠙꠔꠣꠛꠣꠟꠣ ꠙꠣꠃꠟꠥꠍꠦ ꠢꠇꠟꠞꠦ ꠝꠤꠘꠔ ꠇꠞꠟꠣ ꠇꠥꠘ꠆ꠔꠣ ꠈꠣꠅꠀꠞ ꠟꠣꠉꠤ, ꠔꠣꠁꠘ ꠇꠁꠟꠣ, “ꠀꠁꠎ ꠌꠃꠖ꠆ꠖꠖꠤꠘ ꠗꠞꠤ ꠇꠤꠔꠣ ꠅꠁꠛ ꠘꠣ ꠅꠁꠛ ꠅꠃ ꠌꠤꠘ꠆ꠔꠣꠄ ꠀꠙꠘꠣꠞꠣ ꠇꠥꠘ꠆ꠔꠣ ꠈꠣꠁꠍꠂꠘ ꠘꠣ।
ACT 27:34 ꠀꠝꠤ ꠀꠙꠘꠣꠞꠣꠞꠦ ꠝꠤꠘꠔ ꠇꠞꠞꠣꠝ, ꠇꠥꠘ꠆ꠔꠣ ꠈꠣꠃꠇ꠆ꠇꠣ। ꠎꠣꠘ ꠛꠣꠌꠣꠁꠔꠦ ꠅꠁꠟꠦ ꠔ ꠀꠙꠘꠣꠞꠣ ꠈꠣꠁꠔꠦ ꠅꠁꠛ। ꠖꠦꠈꠛꠣꠘꠦ, ꠀꠙꠘꠣꠁꠘ꠆ꠔꠞ ꠝꠣꠕꠣꠞ ꠄꠇꠍꠣ ꠌꠥꠟꠞꠅ ꠈꠦꠔꠤ ꠅꠁꠔ ꠘꠣꠄ।”
ACT 27:35 ꠁꠈꠣꠘ ꠇꠁꠀ ꠢꠣꠞꠤ ꠙꠣꠃꠟꠥꠍꠦ ꠔꠣꠞꠣ ꠢꠇꠟꠞ ꠍꠣꠝꠘꠦ ꠞꠥꠐꠤ ꠀꠘꠤꠀ ꠀꠟ꠆ꠟꠣꠞ ꠡꠥꠇꠞꠤꠀ ꠎꠣꠘꠣꠁꠀ, ꠞꠥꠐꠤ ꠍꠤꠠꠤꠀ ꠈꠣꠅꠀꠔ ꠟꠣꠉꠟꠣ।
ACT 27:36 ꠔꠦꠃ ꠢꠇꠟꠦ ꠝꠘꠞ ꠝꠣꠎꠦ ꠛꠟ ꠙꠣꠁꠀ ꠈꠣꠘꠤ ꠈꠣꠁꠟꠣ।
ACT 27:37 ꠁ ꠎꠣꠎꠞ ꠝꠣꠎꠦ ꠀꠝꠞꠣ ꠢꠇꠟꠦ ꠝꠤꠟꠤꠀ ꠖꠥꠁ-ꠡ ꠍꠤꠅꠔ꠆ꠔꠁꠞ ꠎꠘ ꠀꠍꠟꠣꠝ।
ACT 27:38 ꠢꠇꠟꠦ ꠙꠦꠐ ꠜꠞꠤꠀ ꠈꠣꠅꠀꠞ ꠛꠣꠖꠦ ꠎꠣꠎꠞ ꠜꠣꠞ ꠇꠝꠣꠘꠤꠞ ꠟꠣꠉꠤ ꠢꠇ꠆ꠇꠟ ꠉꠝ ꠖꠞꠤꠀꠔ ꠚꠣꠟꠣꠁ ꠖꠤꠟꠣ।
ACT 27:39 ꠛꠤꠀꠘ ꠅꠁꠀ ꠢꠣꠞꠟꠦ ꠔꠣꠞꠣ ꠌꠤꠘꠟꠣ ꠘꠣ, ꠁ ꠎꠣꠉꠣ ꠀꠍꠟꠦ ꠇꠥꠘ ꠎꠣꠉꠣ। ꠅꠁꠟꠦ ꠅꠃꠟꠣ ꠄꠇ ꠛꠣꠈ ꠖꠦꠈꠣ ꠉꠦꠟ, ꠁ ꠛꠣꠈꠞ ꠌꠞ ꠛꠣꠟꠥꠄ ꠜꠞꠣ। ꠖꠦꠈꠤꠀ ꠔꠣꠞꠣ ꠙꠞꠣꠝꠤꠡ ꠇꠞꠟꠣ, ꠙꠣꠞꠟꠦ ꠎꠣꠎꠞꠦ ꠘꠤꠀ ꠢꠃ ꠌꠞꠅ ꠔꠥꠟꠤꠟꠤꠔꠣ।
ACT 27:40 ꠔꠦꠃ ꠔꠣꠞꠣ ꠟꠋꠉꠞꠣꠁꠘ ꠇꠣꠐꠤꠀ ꠖꠞꠤꠀꠔ ꠚꠣꠟꠣꠁ ꠖꠤꠟꠣ, ꠀꠞ ꠇꠣꠘ꠆ꠒꠣꠞꠤꠞ ꠛꠂꠑꠣꠞ ꠖꠠꠤꠘꠅ ꠇꠣꠐꠤ ꠖꠤꠟꠣ। ꠛꠣꠖꠦ ꠛꠣꠔꠣꠡ ꠜꠣꠐꠤꠅꠟꠦ ꠍꠣꠝꠘꠞ ꠙꠣꠟ ꠐꠣꠋꠉꠣꠁꠀ ꠢꠃ ꠛꠣꠟꠥꠞ ꠌꠞꠞ ꠝꠥꠈꠣ ꠉꠦꠟꠣꠝ।
ACT 27:41 ꠅꠁꠟꠦ ꠎꠣꠎ ꠔꠟꠦ ꠟꠥꠇꠣꠁꠟ ꠇꠥꠘ꠆ꠔꠣꠔ ꠀꠐꠇꠤ ꠉꠦꠟ। ꠀꠞ ꠍꠣꠝꠘ ꠉꠣꠟꠣ ꠀꠐꠇꠤ ꠎꠣꠅꠀꠄ, ꠈꠞꠞ ꠉꠟꠁꠔ ꠓꠦꠃꠞ ꠛꠣꠠꠤ ꠟꠣꠉꠤꠀ ꠜꠣꠋꠉꠣ ꠗꠞꠟ।
ACT 27:42 ꠔꠦꠃ ꠍꠤꠙꠣꠁ ꠅꠇꠟꠦ ꠙꠞꠣꠝꠤꠡ ꠇꠞꠟꠣ ꠛꠘ꠆ꠖꠤ ꠅꠇꠟꠞꠦ ꠝꠣꠞꠤꠟꠤꠔꠣ, ꠀꠞꠘꠣꠄ ꠇꠦꠃ ꠇꠦꠃ ꠢꠣꠔꠞꠣꠁꠀ ꠜꠣꠉꠤꠎꠤꠔ ꠙꠣꠞꠦ।
ACT 27:43 ꠅꠁꠟꠦ ꠡ-ꠍꠤꠙꠣꠁꠞ ꠍꠥꠛꠦꠖꠣꠞꠦ ꠙꠣꠃꠟꠥꠍꠞꠦ ꠛꠣꠌꠣꠘꠤꠞ ꠈꠤꠀꠟꠦ ꠍꠤꠙꠣꠁ ꠅꠇꠟꠞ ꠁ ꠙꠞꠣꠝꠤꠡ ꠝꠣꠘꠟꠣ ꠘꠣ। ꠔꠣꠁꠘ ꠢꠥꠇꠥꠝ ꠖꠤꠟꠣ, ꠎꠦꠞꠣ ꠢꠣꠔꠣꠞ ꠎꠣꠘꠦ, ꠔꠣꠞꠣ ꠀꠉꠦ ꠎꠣꠎ ꠕꠣꠇꠤ ꠚꠣꠟꠣꠁꠀ ꠙꠠꠤꠀ ꠢꠥꠇꠘꠣꠔ ꠃꠑꠃꠇ।
ACT 27:44 ꠀꠞ ꠢꠣꠔꠣꠞ ꠘꠣ ꠎꠣꠘꠞꠣ ꠅꠇꠟꠦ ꠎꠣꠎꠞ ꠔꠇ꠆ꠔꠣ ꠛꠣ ꠀꠞꠅ ꠇꠥꠘ꠆ꠔꠣꠔ ꠗꠞꠤꠀ ꠢꠥꠇꠘꠣꠔ ꠙꠣꠞꠃꠇ। ꠅꠃ ꠟꠣꠈꠣꠘ ꠢꠇꠟꠦ ꠢꠥꠇꠘꠣꠔ ꠃꠑꠤꠀ ꠎꠣꠘ ꠛꠣꠌꠣꠁꠟꠣ।
ACT 28:1 ꠀꠝꠞꠣ ꠢꠦꠚꠣꠎꠔꠦ ꠙꠣꠞꠅ ꠃꠑꠤꠀ ꠢꠣꠞꠟꠦ ꠎꠣꠘꠟꠣꠝ, ꠁ ꠖꠤꠙꠞ ꠘꠣꠝ ꠅꠁꠟ ꠝꠣꠟꠐꠣ।
ACT 28:2 ꠢꠤꠘꠞ ꠝꠣꠘꠡꠦ ꠀꠝꠞꠣꠞ ꠟꠉꠦ ꠈꠥꠛ ꠜꠣꠟꠣ-ꠝꠣꠘꠡꠤ ꠇꠞꠟꠣ, ꠝꠦꠊ ꠀꠞ ꠡꠤꠔ ꠀꠍꠤꠟ ꠇꠞꠤ ꠔꠣꠞꠣ ꠀꠉꠥꠁꠘ ꠎꠣꠟꠣꠁꠀ ꠀꠝꠞꠣꠞꠦ ꠒꠣꠇꠤꠀ ꠘꠤꠀ ꠈꠣꠔꠤꠞ-ꠎꠔꠘ ꠇꠞꠟꠣ।
ACT 28:3 ꠄꠞꠝꠣꠎꠦ ꠙꠣꠃꠟꠥꠍꠦ ꠄꠇ ꠀꠐꠣ ꠢꠥꠇꠘꠣ ꠟꠣꠇꠠꠤ ꠔꠥꠇꠣꠁꠀ ꠖꠟꠣ ꠇꠞꠤ ꠀꠘꠤꠀ ꠀꠉꠥꠘꠤꠞ ꠝꠣꠎꠦ ꠖꠦꠅꠀꠞ ꠛꠣꠖꠦ, ꠀꠉꠥꠘꠤꠞ ꠔꠦꠎꠦ ꠄꠇ ꠇꠣꠟꠘꠣꠉ ꠛꠣꠞ ꠅꠁꠀ ꠢꠣꠞꠤ ꠙꠣꠃꠟꠥꠍꠞ ꠀꠔꠅ ꠇꠣꠝꠠ ꠝꠣꠞꠤ ꠗꠞꠟ।
ACT 28:4 ꠇꠣꠟꠘꠣꠉꠦ ꠙꠣꠃꠟꠥꠍꠞ ꠀꠔꠅ ꠇꠣꠝꠠꠖꠤ ꠟꠐꠇꠤ ꠞꠁꠍꠦ ꠖꠦꠈꠤꠀ, ꠢꠤꠘꠞ ꠝꠣꠘꠡꠦ ꠝꠣꠔꠣ-ꠝꠣꠔꠤ ꠟꠣꠉꠣꠁꠟꠣ, “ꠁ ꠝꠣꠘꠥꠡꠉꠥ ꠘꠤꠌꠄ ꠇꠥꠘꠥ ꠈꠥꠘꠤ, ꠖꠞꠤꠀꠞ ꠀꠔ ꠕꠣꠇꠤ ꠢꠦ ꠛꠣꠌꠤꠉꠦꠟꠦꠅ ꠘꠤꠀꠄ-ꠖꠦꠛꠔꠣꠄ ꠔꠣꠞꠦ ꠛꠣꠌꠔꠦ ꠖꠤꠟꠣ ꠘꠣ।”
ACT 28:5 ꠅꠁꠟꠦ ꠙꠣꠃꠟꠥꠍꠦ ꠀꠔ ꠏꠣꠠꠣ ꠖꠤꠀ ꠇꠣꠟꠘꠣꠉꠞꠦ ꠀꠉꠥꠁꠘꠅ ꠚꠣꠟꠣꠁ ꠖꠤꠟꠣ, ꠀꠞ ꠔꠣꠘ ꠇꠥꠘꠥ ꠈꠦꠔꠤ ꠅꠁꠟ ꠘꠣ।
ACT 28:6 ꠝꠣꠘꠡꠦ ꠝꠘꠦ ꠝꠘꠦ ꠛꠣꠞ ꠌꠣꠅꠀꠔ ꠀꠍꠤꠟ, ꠙꠣꠃꠟꠥꠍꠞ ꠉꠔꠞ ꠚꠥꠟꠤꠎꠤꠛ, ꠛꠣ ꠔꠣꠁꠘ ꠀꠈꠔꠣꠃ ꠝꠣꠐꠤꠔ ꠙꠠꠤꠀ ꠝꠞꠤꠎꠤꠛꠣ। ꠛꠃꠔ ꠡꠝꠄ ꠛꠣꠞ ꠌꠣꠁꠀ ꠢꠣꠞꠟꠦ ꠔꠣꠘ ꠇꠥꠘꠥ ꠛꠤꠙꠖ ꠅꠁꠍꠦ ꠘꠣ ꠖꠦꠈꠤꠀ, ꠔꠣꠞꠣꠞ ꠝꠔ ꠛꠖꠟꠣꠁꠀ ꠇꠁꠟꠣ, “ꠄꠁꠘ ꠔ ꠇꠥꠘꠥ ꠖꠦꠛꠔꠣ।”
ACT 28:7 ꠁ ꠎꠣꠉꠣꠞ ꠇꠣꠘ꠆ꠖꠣꠔ ꠢꠃ ꠖꠤꠙꠞ ꠙꠥꠛꠟꠤꠅ ꠘꠣꠝꠞ ꠄꠇ ꠈꠣꠘ꠆ꠖꠣꠘꠤ ꠝꠣꠘꠡꠞ ꠎꠝꠤꠖꠣꠞꠤ ꠀꠍꠤꠟ। ꠔꠣꠁꠘ ꠀꠝꠞꠣꠞꠦ ꠔꠣꠘ ꠛꠣꠠꠤꠔ ꠖꠣꠅꠔ ꠖꠤꠟꠣ ꠀꠞ ꠔꠤꠘꠖꠤꠘ ꠗꠞꠤ ꠀꠝꠞꠣꠞꠦ ꠈꠥꠛ ꠈꠣꠔꠤꠞ-ꠎꠔꠘ ꠇꠞꠟꠣ।
ACT 28:8 ꠅꠃ ꠡꠝꠄ ꠙꠥꠛꠟꠤꠅꠞ ꠛꠣꠚ ꠔꠣꠙ ꠀꠞ ꠇꠣꠝꠠꠤ ꠛꠦꠝꠣꠞꠦ ꠛꠤꠍꠘꠣꠔ ꠚꠣꠟꠣꠁꠟ ꠀꠍꠟꠣ। ꠙꠣꠃꠟꠥꠍꠦ ꠜꠤꠔꠞꠦ ꠢꠣꠝꠣꠁꠀ ꠔꠣꠘ ꠇꠣꠘ꠆ꠖꠣꠔ ꠛꠁꠀ ꠖꠥꠀ ꠇꠞꠟꠣ, ꠔꠣꠘ ꠉꠔꠞꠅ ꠀꠔꠣꠁ ꠖꠤꠀ ꠛꠦꠝꠣꠞ ꠡꠤꠚꠣ ꠇꠞꠟꠣ।
ACT 28:9 ꠁꠔꠣ ꠖꠦꠈꠤꠀ ꠢꠣꠞꠤ ꠢꠤ ꠖꠤꠙꠞ ꠎꠔ ꠛꠦꠝꠣꠞꠤ ꠀꠍꠟꠣ, ꠔꠣꠞꠣꠅ ꠀꠁꠀ ꠜꠣꠟꠣ ꠅꠁꠟꠣ।
ACT 28:10 ꠔꠣꠞꠣ ꠀꠝꠞꠣꠞꠦ ꠛꠃꠔ ꠟꠣꠈꠣꠘ ꠁꠎ꠆ꠎꠔ ꠇꠞꠟꠣ, ꠛꠤꠖꠣꠄ ꠛꠣꠟꠣ ꠎꠣꠎ ꠍꠣꠠꠣꠞ ꠀꠉꠦ ꠀꠝꠞꠣꠞ ꠖꠞꠇꠣꠞꠤ ꠢꠇꠟ ꠌꠤꠎ ꠎꠥꠉꠣꠁꠀ ꠎꠣꠎꠅ ꠀꠘꠤꠀ ꠜꠞꠤꠀ ꠖꠤꠟꠣ।
ACT 28:11 ꠔꠤꠘ ꠝꠣꠡ ꠛꠣꠖꠦ ꠀꠝꠞꠣ ꠀꠟꠦꠇꠎꠣꠘꠖ꠆ꠞꠤꠀꠞ ꠄꠇ ꠎꠣꠎꠅ ꠇꠞꠤ ꠞꠅꠀꠘꠣ ꠖꠤꠟꠣꠝ। ꠁ ꠎꠣꠎꠈꠣꠘ ꠅꠃ ꠖꠤꠙꠅ ꠞꠁꠀ ꠡꠤꠔꠞ ꠖꠤꠘ ꠇꠣꠐꠣꠁꠍꠤꠟ, ꠄꠞ ꠍꠣꠝꠘꠞ ꠉꠟꠁ ꠈꠥꠖꠤꠀ ꠎꠥꠠ ꠖꠦꠛꠔꠣꠞ ꠝꠥꠞ꠆ꠔꠤ ꠟꠣꠉꠣꠁꠟ ꠀꠍꠤꠟ।
ACT 28:12 ꠛꠣꠖꠦ ꠀꠝꠞꠣ ꠍꠥꠞꠣꠇꠥꠡꠅ ꠀꠁꠀ ꠔꠤꠘ ꠖꠤꠘ ꠞꠁꠟꠣꠝ।
ACT 28:13 ꠢꠤꠈꠣꠘ ꠕꠣꠇꠤ ꠞꠅꠀꠘꠣ ꠖꠤꠀ ꠊꠥꠞꠤ ꠊꠥꠞꠤ ꠁꠔꠣꠟꠤꠞ ꠞꠤꠎꠤꠅꠔ ꠀꠁꠟꠣꠝ। ꠛꠣꠖꠞ ꠖꠤꠘ ꠖꠃꠇꠘꠞ ꠛꠣꠔꠣꠡ ꠍꠣꠠꠟ, ꠔꠦꠃ ꠖꠥꠍꠞꠣ ꠖꠤꠘ ꠀꠝꠞꠣ ꠙꠥꠔꠤꠅꠟꠤ ꠎꠣꠎ ꠊꠣꠐꠅ ꠀꠁꠟꠣꠝ।
ACT 28:14 ꠢꠤꠘꠅ ꠇꠄꠎꠘ ꠝꠥꠝꠤꠘꠞ ꠟꠉꠦ ꠝꠥꠟꠣꠇꠣꠔ ꠅꠁꠟ, ꠔꠣꠞꠣ ꠝꠤꠘꠔ-ꠇꠣꠎ꠆ꠎꠤ ꠇꠞꠣꠄ ꠔꠣꠞꠣꠞ ꠟꠉꠦ ꠄꠇ ꠢꠣꠙ꠆ꠔꠣ ꠞꠁꠟꠣꠝ। ꠅꠔꠣ ꠇꠞꠤ ꠇꠞꠤ ꠀꠝꠞꠣ ꠞꠥꠝ ꠐꠣꠃꠘꠅ ꠀꠁꠀ ꠀꠎꠤꠟꠣꠝ।
ACT 28:15 ꠞꠥꠝꠞ ꠝꠥꠝꠤꠘ ꠅꠇꠟꠦ ꠀꠝꠞꠣ ꠀꠅꠀꠞ ꠈꠛꠞ ꠢꠥꠘꠍꠟꠣ, ꠔꠣꠞꠣ ꠀꠝꠞꠣꠞ ꠟꠉꠦ ꠝꠥꠟꠣꠇꠣꠔ ꠇꠞꠔꠣ ꠇꠞꠤ ꠇꠥꠘꠥ ꠇꠥꠘꠥ ꠎꠘꠦ ꠀꠙ꠆ꠙꠤꠅꠞ ꠛꠣꠎꠣꠞ, ꠇꠦꠃ ꠇꠦꠃ ꠔꠤꠘ-ꠡꠞꠣꠁꠈꠣꠘꠣꠞ ꠉꠣꠃ ꠙꠞ꠆ꠎꠘ꠆ꠔ ꠀꠉꠥꠀꠁ ꠀꠁꠟꠣ। ꠄꠞꠣꠞꠦ ꠖꠦꠈꠤꠀ ꠙꠣꠃꠟꠥꠍꠦ ꠀꠟ꠆ꠟꠣꠞ ꠡꠥꠇꠞꠤꠀ ꠀꠖꠣꠄ ꠇꠞꠟꠣ, ꠀꠞ ꠖꠤꠟꠞ ꠝꠣꠎꠦ ꠛꠃꠔ ꠛꠟ ꠙꠣꠁꠟꠣ।
ACT 28:16 ꠀꠝꠞꠣ ꠞꠥꠝꠅ ꠀꠅꠀꠞ ꠛꠣꠖꠦ ꠙꠣꠃꠟꠥꠍꠦ ꠔꠣꠘ ꠘꠤꠎꠞ ꠙꠍꠘ꠆ꠖ ꠝꠣꠚꠤꠇ ꠞꠁꠛꠣꠞ ꠅꠘꠥꠝꠔꠤ ꠙꠣꠁꠟꠣ। ꠈꠣꠟꠤ ꠄꠇꠎꠘ ꠍꠤꠙꠣꠁꠄ ꠔꠣꠘꠦ ꠙꠣꠞꠣ ꠖꠤꠔ।
ACT 28:17 ꠔꠤꠘꠖꠤꠘ ꠛꠣꠖꠦ ꠙꠣꠃꠟꠥꠍꠦ ꠁꠢꠥꠖꠤ ꠅꠇꠟꠞ ꠛꠠ ꠛꠠ ꠝꠥꠞꠛ꠆ꠛꠤꠞꠦ ꠖꠟꠣ ꠇꠞꠤꠀ ꠄꠇꠈꠣꠘꠅ ꠇꠞꠣꠁꠟꠣ। ꠔꠣꠞꠣ ꠖꠟꠣ ꠅꠁꠀ ꠢꠣꠞꠟꠦ ꠔꠣꠁꠘ ꠇꠁꠟꠣ, “ꠅ ꠜꠣꠁꠍꠣꠛ ꠅꠇꠟ, ꠎꠥꠖꠤꠅ ꠀꠝꠤ ꠘꠤꠎꠞ ꠎꠣꠔꠞ ꠛꠣ ꠝꠄ-ꠝꠥꠞꠛ꠆ꠛꠤꠞ ꠛꠣꠔꠣꠁꠟ ꠘꠤꠅꠝ-ꠇꠣꠘꠥꠘꠞ ꠃꠟꠐꠣ ꠇꠥꠘ꠆ꠔꠣꠃ ꠇꠞꠍꠤ ꠘꠣ, ꠔꠣ-ꠅ ꠎꠦꠞꠥꠎꠣꠟꠦꠝ ꠕꠣꠇꠤ ꠀꠝꠣꠞꠦ ꠀꠐꠇ ꠇꠞꠤꠀ, ꠞꠥꠝꠣꠘ ꠅꠇꠟꠞ ꠀꠔꠅ ꠡꠝꠎꠣꠁꠟ ꠅꠁꠍꠦ।
ACT 28:18 ꠞꠥꠝꠣꠘ ꠅꠇꠟꠦ ꠀꠝꠣꠞꠦ ꠎꠦꠞꠣ ꠇꠞꠤꠀ ꠝꠃꠔꠞ ꠡꠣꠎꠣ ꠖꠦꠅꠀꠞ ꠎꠥꠇꠣ ꠇꠥꠘꠥ ꠖꠥꠡ ꠘꠣ ꠙꠣꠅꠀꠄ, ꠀꠝꠣꠞꠦ ꠈꠣꠟꠣꠍ ꠖꠤꠟꠣꠁꠔꠣ ꠌꠣꠁꠍꠟꠣ।
ACT 28:19 ꠅꠁꠟꠦ ꠁꠢꠥꠖꠤ ꠅꠇꠟꠦ ꠛꠣꠗꠣ ꠖꠦꠅꠀꠄ ꠘꠤꠞꠥꠙꠣꠄ ꠅꠁꠀ ꠀꠝꠤ ꠛꠣꠖꠡꠣꠞ ꠉꠦꠍꠦ ꠀꠙꠤꠟ ꠇꠞꠍꠤ। ꠔꠣ-ꠅ ꠀꠝꠤ ꠀꠝꠣꠞ ꠘꠤꠎꠞ ꠎꠣꠔꠞ ꠃꠙꠞꠦ ꠇꠥꠘꠥ ꠟꠣꠈꠣꠘ ꠖꠥꠡ ꠖꠤꠔꠣꠝ ꠌꠣꠁꠍꠤ ꠘꠣ।
ACT 28:20 ꠔꠦ ꠍꠣꠛ ꠅꠇꠟ, ꠔꠣꠝꠣꠝ ꠛꠘꠤ ꠁꠍꠞꠣꠁꠟꠞ ꠖꠤꠟꠞ ꠝꠣꠎꠦ ꠎꠦ ꠀꠡꠣ ꠀꠍꠦ, ꠢꠃ ꠀꠡꠣꠞ ꠟꠣꠉꠤꠃ ꠀꠝꠣꠞꠦ ꠁ ꠡꠤꠇꠟ ꠚꠤꠘ꠆ꠖꠣꠁꠟ ꠅꠁꠍꠦ, ꠄꠞꠟꠣꠉꠤꠃ ꠀꠝꠤ ꠀꠙꠘꠣꠁꠘ꠆ꠔꠞ ꠟꠉꠦ ꠝꠥꠟꠣꠇꠣꠔ ꠀꠞ ꠛꠣꠔꠌꠤꠔ ꠇꠞꠔꠣꠝ ꠌꠣꠁꠞꠣꠝ।”
ACT 28:21 ꠔꠣꠞꠣ ꠇꠁꠟꠣ, “ꠀꠝꠞꠣ ꠔ ꠀꠙꠘꠣꠞ ꠛꠦꠙꠣꠞꠦ ꠄꠢꠥꠖꠤꠀ ꠕꠣꠇꠤ ꠇꠥꠘꠥ ꠌꠤꠑꠤ ꠙꠣꠁꠍꠤ ꠘꠣ। ꠀꠞ ꠎꠦꠔꠣ ꠁꠢꠥꠖꠤ ꠜꠣꠁꠀꠁꠘ ꠢꠘ ꠕꠣꠇꠤ ꠀꠁꠍꠂꠘ, ꠔꠣꠞꠣꠅ ꠀꠙꠘꠣꠞ ꠘꠣꠝꠦ ꠇꠥꠘꠥ ꠘꠣꠟꠤꠡ ꠖꠤꠍꠂꠘ ꠘꠣ, ꠛꠣ ꠛꠥꠞꠣ ꠇꠥꠘ꠆ꠔꠣ ꠇꠁꠍꠂꠘꠅ ꠘꠣ।
ACT 28:22 ꠅꠁꠟꠦ ꠀꠝꠞꠣ ꠀꠙꠘꠣꠞ ꠝꠥꠈ ꠕꠣꠇꠤ ꠝꠔꠣꠝꠔ ꠢꠥꠘꠔꠣꠝ ꠌꠣꠁꠞꠣꠝ। ꠇꠣꠞꠘ ꠀꠝꠞꠣ ꠎꠣꠘꠤ, ꠢꠇꠟ ꠎꠣꠉꠣꠞ ꠝꠣꠘꠡꠦꠃ ꠁ ꠔꠞꠤꠇꠣꠞ ꠛꠤꠙꠇ꠆ꠇꠦ ꠝꠣꠔꠂꠘ।”
ACT 28:23 ꠙꠣꠃꠟꠥꠍꠞ ꠟꠉꠦ ꠢꠤꠞꠛꠣꠞ ꠝꠥꠟꠣꠇꠣꠔ ꠇꠞꠣꠞ ꠟꠣꠉꠤ ꠄꠇ ꠔꠣꠞꠤꠈ ꠑꠤꠇ ꠇꠞꠟꠣ। ꠢꠃ ꠖꠤꠘ ꠔꠣꠞꠣꠞ ꠟꠉꠦ ꠀꠞꠅ ꠛꠃꠔ ꠝꠣꠘꠥꠡ ꠙꠣꠃꠟꠥꠍꠞ ꠊꠞꠅ ꠀꠁꠟꠣ। ꠙꠣꠃꠟꠥꠍꠦ ꠚꠎꠞ ꠕꠣꠇꠤ ꠢꠣꠁꠘ꠆ꠎꠣ ꠙꠞ꠆ꠎꠘ꠆ꠔ ꠢꠣꠞꠣꠖꠤꠘ ꠀꠟ꠆ꠟꠣꠞ ꠛꠣꠖꠡꠣꠁꠞ ꠇꠕꠣ ꠔꠣꠞꠣꠞ ꠉꠦꠍꠦ ꠜꠣꠋꠉꠤꠀ ꠛꠄꠀꠘ ꠇꠞꠟꠣ। ꠢꠎꠞꠔ ꠝꠥꠍꠣꠞ ꠔꠃꠞꠣꠔ ꠇꠤꠔꠣꠛ ꠀꠞ ꠘꠛꠤ ꠅꠇꠟꠞ ꠇꠤꠔꠣꠛꠞ ꠀꠄꠀꠔ ꠖꠦꠈꠣꠁꠀ, ꠁꠍꠣꠞ ꠛꠦꠙꠣꠞꠦ ꠔꠣꠞꠣꠞ ꠖꠤꠟꠅ ꠄꠇꠤꠘ ꠎꠘꠝꠣꠁꠔꠣ ꠌꠣꠁꠟꠣ।
ACT 28:24 ꠔꠣꠘ ꠛꠄꠀꠘ ꠢꠥꠘꠤꠀ ꠇꠥꠘꠥ ꠇꠥꠘꠥ ꠎꠘꠦ ꠁꠝꠣꠘ ꠀꠘꠟꠣ, ꠀꠞ ꠇꠥꠘꠥ ꠇꠥꠘꠥ ꠎꠘꠦ ꠁꠔꠣ ꠄꠇꠤꠘ ꠇꠞꠟꠣ ꠘꠣ।
ACT 28:25 ꠛꠄꠀꠘ ꠢꠥꠘꠣꠞ ꠛꠣꠖꠦ ꠔꠣꠞꠣꠞ ꠝꠣꠎꠦ ꠝꠔꠞ ꠅꠝꠤꠟ ꠅꠁꠉꠦꠟ, ꠔꠣꠞꠣ ꠢꠤꠈꠣꠘ ꠕꠣꠇꠤ ꠛꠤꠖꠣꠄ ꠅꠁꠔꠣ ꠌꠣꠁꠟꠣ। ꠎꠣꠅꠀꠞ ꠀꠉꠦ ꠙꠣꠃꠟꠥꠍꠦ ꠔꠣꠞꠣꠞꠦ ꠈꠣꠟꠤ ꠅꠃ ꠘꠍꠤꠅꠔꠈꠣꠘ ꠇꠞꠟꠣ, “ꠙꠣꠇ ꠞꠥꠢꠦ ꠢꠎꠞꠔ ꠁꠡꠣꠄꠀ ꠘꠛꠤꠞ ꠎꠞꠤꠀꠄ ꠀꠙꠘꠣꠁꠘ꠆ꠔꠞ ꠛꠣꠚ-ꠖꠣꠖꠣ ꠅꠇꠟꠞꠦ ꠅꠃ ꠇꠕꠣꠈꠣꠘ ꠑꠤꠇꠃ ꠇꠁꠍꠟꠣ,
ACT 28:26 ꠅꠃ ꠝꠣꠘꠥꠡ ꠅꠇꠟꠞ ꠇꠣꠍꠣꠔ ꠉꠤꠀ ꠇꠅ, ꠔꠥꠝꠞꠣ ꠇꠣꠘꠦ ꠢꠥꠘꠟꠦꠅ ꠇꠥꠘ꠆ꠔꠣ ꠛꠥꠎꠔꠣꠄ ꠘꠣꠄ, ꠌꠃꠈꠦ ꠖꠦꠈꠟꠦꠅ ꠇꠥꠘ꠆ꠔꠣ ꠌꠤꠘꠔꠣꠄ ꠘꠣꠄ।
ACT 28:27 ꠇꠣꠞꠘ ꠁꠔꠣ ꠝꠣꠘꠡꠞ ꠖꠤꠟ ꠅꠡꠣꠠ ꠅꠁꠉꠦꠍꠦ, ꠔꠣꠞꠣꠞ ꠇꠣꠘꠅ ꠔꠣꠟꠣ ꠟꠣꠉꠤꠉꠦꠍꠦ, ꠔꠣꠞꠣ ꠎꠣꠞꠎꠤꠞ ꠌꠃꠈ ꠝꠥꠎꠤ ꠛꠁꠞꠁꠍꠦ। ꠎꠣꠔꠦ ꠌꠃꠈꠦ ꠘꠣ ꠖꠦꠈꠦ, ꠇꠣꠘꠦ ꠘꠣ ꠢꠥꠘꠦ, ꠖꠤꠟ ꠖꠤꠀ ꠘꠣ ꠛꠥꠎꠦ, ꠇꠤꠎꠣꠘꠥ ꠔꠣꠞꠣ ꠔꠃꠛꠣ ꠇꠞꠤꠀ, ꠀꠝꠣꠞ ꠛꠣꠄ ꠚꠤꠞꠤꠎꠣꠁꠘ, ꠀꠞ ꠀꠝꠤ ꠔꠣꠞꠣꠞ ꠡꠤꠚꠣ ꠇꠞꠤꠟꠣꠁ।
ACT 28:28 ꠄꠞꠟꠣꠉꠤ ꠀꠙꠘꠣꠞꠣꠅ ꠎꠣꠘꠤꠀ ꠞꠣꠈꠃꠇ꠆ꠇꠣ, ꠅꠈꠘ ꠕꠣꠇꠤ ꠀꠟ꠆ꠟꠣꠁ ꠘꠣꠎꠣꠔꠞ ꠈꠥꠡ-ꠈꠛꠞꠤ ꠅ-ꠁꠢꠥꠖꠤ ꠅꠇꠟꠞ ꠉꠦꠍꠦ ꠎꠣꠘꠣꠁꠟ ꠅꠁꠛ, ꠔꠣꠞꠣ ꠁꠔꠣ ꠈꠥꠡ ꠅꠁꠀ ꠢꠥꠘꠛꠣ।”
ACT 28:30 ꠢꠎꠞꠔ ꠙꠣꠃꠟꠥꠍ ꠙꠥꠞꠣ ꠖꠥꠁ ꠛꠞꠍ ꠗꠞꠤ ꠔꠣꠘ ꠘꠤꠎꠞ ꠜꠣꠠꠣ ꠇꠞꠣ ꠛꠣꠡꠣꠔ ꠞꠁꠟꠣ। ꠀꠞ ꠎꠔ ꠝꠣꠘꠥꠡ ꠔꠣꠘ ꠉꠦꠍꠦ ꠀꠁꠔꠣ ꠔꠣꠞꠣꠞꠦ ꠇꠛꠥꠟ ꠇꠞꠤꠀ,
ACT 28:31 ꠙꠥꠞꠣꠙꠥꠞ ꠢꠤꠝ꠆ꠝꠔ ꠇꠞꠤ ꠀꠟ꠆ꠟꠣꠞ ꠛꠣꠖꠡꠣꠁꠞ ꠇꠕꠣ ꠔꠛꠟꠤꠉ ꠇꠞꠔꠣ। ꠀꠞ ꠝꠣꠟꠤꠇ ꠁꠍꠣ ꠀꠟ-ꠝꠍꠤꠞ ꠛꠦꠙꠣꠞꠦ ꠛꠤꠘꠣ ꠛꠣꠗꠣꠄ ꠈꠥꠟꠣ-ꠝꠦꠟꠣ ꠔꠣꠟꠤꠝ ꠖꠤꠔꠣ॥
ROM 1:1 ꠀꠝꠤ ꠙꠣꠃꠟꠥꠍ ꠔ ꠢꠎꠞꠔ ꠁꠍꠣ ꠀꠟ-ꠝꠍꠤꠞ ꠉꠥꠟꠣꠝ। ꠞꠥꠝꠣꠘ ꠛꠣꠖꠡꠣꠁꠞ ꠞꠣꠎꠗꠣꠘꠤ ꠞꠥꠝ ꠐꠣꠃꠘꠞ ꠝꠥꠝꠤꠘ ꠅꠇꠟꠞ ꠉꠦꠍꠦ ꠅꠃ ꠍꠢꠤꠚꠣꠈꠣꠘ ꠟꠦꠈꠞꠣꠝ। ꠀꠟ꠆ꠟꠣ ꠙꠣꠇꠦ ꠀꠝꠣꠞꠦ ꠙꠍꠘ꠆ꠖ ꠇꠞꠤꠀ ꠀꠘꠍꠂꠘ ꠀꠟ-ꠝꠍꠤꠞ ꠍꠣꠢꠣꠛꠤ ꠅꠀꠞ ꠟꠣꠉꠤ ꠀꠞ ꠔꠣꠘ ꠛꠣꠔꠣꠁꠟ ꠈꠥꠡ-ꠈꠛꠞꠤ ꠔꠛꠟꠤꠉ ꠇꠞꠣꠞ ꠟꠣꠉꠤ।
ROM 1:2 ꠀꠟ꠆ꠟꠣꠄ ꠔꠣꠘ ꠘꠛꠤ ꠅꠇꠟꠞ ꠝꠣꠎꠖꠤ ꠙꠣꠇ ꠇꠤꠔꠣꠛꠞ ꠝꠣꠎꠦ ꠅꠃ ꠈꠥꠡ-ꠈꠛꠞꠤꠞ ꠇꠕꠣ ꠀꠉꠦꠃ ꠅꠀꠖꠣ ꠇꠞꠍꠂꠘ।
ROM 1:3 ꠅꠃ ꠈꠥꠡ-ꠈꠛꠞꠤ ꠅꠁꠟ ꠔꠣꠘ ꠈꠣꠍ ꠝꠣꠄꠀꠞ ꠎꠘ ꠁꠍꠣ ꠀꠟ-ꠝꠍꠤꠞ ꠛꠦꠙꠣꠞꠦ। ꠔꠣꠁꠘꠃ ꠀꠝꠞꠣꠞ ꠝꠣꠟꠤꠇ। ꠞꠇ꠆ꠔ-ꠝꠣꠋꠡꠞ ꠍꠤꠟꠍꠤꠟꠣꠄ ꠔꠣꠁꠘ ꠅꠁꠟꠣ ꠢꠎꠞꠔ ꠖꠣꠃꠖ ꠘꠛꠤꠞ ꠀꠅꠟꠣꠖ, ꠀꠞ ꠀꠟ꠆ꠟꠣꠁ ꠙꠣꠇ ꠞꠥꠢꠥꠞ ꠇꠥꠖꠞꠔꠤꠄ ꠝꠥꠞ꠆ꠖꠣ ꠕꠣꠇꠤ ꠎꠤꠘ꠆ꠖꠣ ꠅꠁꠀ ꠁꠛꠘꠥꠟ꠆ꠟꠣ ꠢꠤꠡꠣꠛꠦ ꠎꠣꠁꠞ ꠅꠁꠍꠂꠘ।
ROM 1:5 ꠔꠣꠘ ꠘꠣꠝ ꠃꠎꠤꠟꠣ ꠇꠞꠣꠞ ꠟꠣꠉꠤ, ꠔꠣꠘ ꠝꠣꠎꠖꠤꠃ ꠀꠝꠞꠣ ꠀꠟ꠆ꠟꠣꠞ ꠘꠤꠀꠝꠔ ꠀꠞ ꠍꠣꠢꠣꠛꠤ ꠙꠖ ꠙꠣꠁꠍꠤ, ꠎꠣꠔꠦ ꠢꠇꠟ ꠎꠣꠔꠤꠞ ꠝꠣꠘꠡꠦ ꠁꠝꠣꠘ ꠀꠘꠤꠀ ꠀꠟ꠆ꠟꠣꠞ ꠛꠣꠁꠖ꠆ꠖ ꠅꠁꠀ ꠌꠟꠦ।
ROM 1:6 ꠅꠃ ꠝꠣꠘꠡꠞ ꠝꠣꠎꠦ ꠔꠥꠝꠞꠣꠅ ꠀꠍ। ꠀꠟ꠆ꠟꠣꠄ ꠔ ꠔꠥꠝꠞꠣꠞꠦ ꠖꠣꠅꠔ ꠇꠞꠤꠀ ꠀꠘꠍꠂꠘ, ꠁꠍꠣ ꠀꠟ-ꠝꠍꠤꠞ ꠀꠙꠘ ꠎꠘ ꠅꠀꠞ ꠟꠣꠉꠤ।
ROM 1:7 ꠔꠦ ꠅꠃ ꠞꠥꠝ ꠐꠣꠃꠘꠅ ꠀꠟ꠆ꠟꠣꠞ ꠎꠔ ꠝꠣꠄꠀꠞ ꠛꠘ꠆ꠖꠣ ꠅꠇꠟ ꠀꠍꠂꠘ, ꠀꠟ꠆ꠟꠣꠄ ꠔꠣꠘ ꠙꠣꠇ ꠛꠘ꠆ꠖꠣ ꠅꠀꠞ ꠟꠣꠉꠤ ꠎꠦꠞꠣꠞꠦ ꠖꠣꠅꠔ ꠇꠞꠤꠀ ꠀꠘꠍꠂꠘ, ꠔꠥꠝꠞꠣ ꠢꠇꠟꠞ ꠉꠦꠍꠦ ꠀꠝꠤ ꠅꠃ ꠌꠤꠑꠤꠈꠣꠘ ꠟꠦꠈꠞꠣꠝ। ꠀꠝꠞꠣꠞ ꠉꠣꠁꠛꠤ ꠛꠣꠚ ꠀꠟ꠆ꠟꠣ ꠙꠣꠇ ꠀꠞ ꠢꠎꠞꠔ ꠁꠍꠣ ꠀꠟ-ꠝꠍꠤꠄ ꠔꠥꠝꠞꠣꠞꠦ ꠞꠢꠝꠔ ꠀꠞ ꠡꠣꠘ꠆ꠔꠤ ꠖꠣꠘ ꠇꠞꠃꠇ꠆ꠇꠣ।
ROM 1:8 ꠀꠝꠤ ꠙꠄꠟꠣꠃ ꠇꠁꠞꠣꠝ, ꠔꠥꠝꠞꠣꠞ ꠝꠎꠛꠥꠔ ꠁꠝꠣꠘꠞ ꠇꠕꠣ ꠀꠡ꠆ꠔꠣ ꠖꠥꠘꠤꠀꠁꠞ ꠝꠣꠎꠦ ꠞꠐꠤꠉꠦꠍꠦ ꠇꠞꠤ, ꠀꠝꠤ ꠁꠍꠣ ꠀꠟ-ꠝꠍꠤꠞ ꠘꠣꠝꠦ ꠀꠝꠣꠞ ꠀꠟ꠆ꠟꠣꠞ ꠡꠥꠇꠞꠤꠀ ꠀꠖꠣꠄ ꠇꠞꠞꠣꠝ।
ROM 1:9 ꠀꠟ꠆ꠟꠣꠞ ꠈꠣꠍ ꠝꠣꠄꠀꠞ ꠎꠘ ꠁꠛꠘꠥꠟ꠆ꠟꠣꠞ ꠛꠦꠙꠣꠞꠦ ꠈꠥꠡ-ꠈꠛꠞꠤ ꠔꠛꠟꠤꠉ ꠇꠞꠤꠀ, ꠀꠝꠤ ꠖꠤꠟꠦ-ꠎꠣꠘꠦ ꠀꠟ꠆ꠟꠣꠞ ꠄꠛꠣꠖꠔ ꠇꠞꠞꠣꠝ। ꠄꠇ ꠀꠟ꠆ꠟꠣꠃ ꠡꠣꠇ꠆ꠇꠤ ꠀꠍꠂꠘ, ꠀꠝꠤ ꠙꠞꠔꠦꠇ ꠛꠣꠞ ꠝꠥꠘꠣꠎꠣꠔꠞ ꠡꠝꠄ ꠔꠥꠝꠞꠣꠞ ꠇꠕꠣ ꠁꠀꠖ ꠇꠞꠤ।
ROM 1:10 ꠀꠝꠤ ꠢꠣꠝꠦꠡꠣ ꠅꠃ ꠇꠕꠣ ꠝꠣꠉꠤꠞꠣꠝ, ꠅꠔꠖꠤꠘ ꠛꠣꠖꠦ ꠅꠁꠟꠦꠅ ꠀꠟ꠆ꠟꠣꠞ ꠝꠞ꠆ꠎꠤꠄ ꠎꠦꠇꠥꠘꠥ ꠝꠘ꠆ꠔꠦ ꠀꠝꠤ ꠎꠣꠘꠥ ꠔꠥꠝꠞꠣꠞ ꠉꠦꠍꠦ ꠀꠁꠔꠣꠝ ꠙꠣꠞꠤ।
ROM 1:11 ꠀꠝꠤ ꠔꠥꠝꠞꠣꠞ ꠟꠉꠦ ꠖꠦꠈꠣ ꠇꠞꠔꠣꠝ ꠌꠣꠁꠞꠣꠝ, ꠎꠣꠔꠦ ꠞꠥꠢꠣꠘꠤ ꠇꠥꠘꠥ ꠘꠤꠀꠝꠔ ꠖꠤꠀ ꠔꠥꠝꠞꠣꠞꠦ ꠛꠟꠛꠣꠘ ꠇꠞꠔꠣꠝ ꠙꠣꠞꠤ।
ROM 1:12 ꠝꠣꠘꠤ, ꠀꠝꠣꠞ ꠁꠝꠣꠘ ꠖꠦꠈꠤꠀ ꠔꠥꠝꠞꠣ ꠢꠇꠟꠦ ꠀꠞ ꠔꠥꠝꠞꠣꠞ ꠁꠝꠣꠘ ꠖꠦꠈꠤꠀ ꠀꠝꠤ ꠘꠤꠎꠦꠅ ꠃꠔꠡꠣꠢ ꠙꠣꠁ।
ROM 1:13 ꠅ ꠜꠣꠁꠀꠁꠘ ꠢꠥꠘꠅ, ꠀꠝꠤ ꠛꠃꠔ ꠛꠣꠞ ꠔꠥꠝꠞꠣꠞ ꠉꠦꠍꠦ ꠀꠁꠔꠣꠝ ꠌꠣꠁꠍꠤ, ꠅꠁꠟꠦ ꠛꠣꠞ ꠛꠣꠞ ꠛꠣꠗꠣ ꠀꠁꠍꠦ। ꠘꠣꠘꠣꠘ ꠎꠣꠉꠣꠔ ꠉꠤꠀ ꠜꠤꠘ ꠎꠣꠔꠤꠞ ꠉꠦꠍꠦ ꠔꠛꠟꠤꠉ ꠇꠞꠤꠀ ꠎꠦꠟꠣ ꠚꠟ ꠙꠣꠁꠍꠤ, ꠔꠥꠝꠞꠣꠞ ꠉꠦꠍꠦꠅ ꠅꠟꠣ ꠚꠟ ꠖꠦꠈꠣꠞ ꠀꠡꠣꠄ ꠀꠁꠔꠣꠝ ꠌꠣꠁꠞꠣꠝ।
ROM 1:14 ꠜꠖ꠆ꠞ ꠁꠃꠘꠣꠘꠤ ꠎꠣꠔꠤ ꠛꠣ ꠅꠜꠖ꠆ꠞ ꠛꠞꠛꠞ ꠎꠣꠔꠤ, ꠡꠤꠇ꠆ꠇꠤꠔ ꠛꠣ ꠅꠡꠤꠇ꠆ꠇꠤꠔ, ꠢꠇꠟꠞ ꠟꠣꠉꠤꠃ ꠔ ꠀꠝꠣꠞ ꠄꠇ ꠢꠝꠣꠘ ꠖꠣꠄ-ꠜꠣꠞ ꠀꠍꠦ।
ROM 1:15 ꠄꠞꠟꠣꠉꠤ ꠔꠥꠝꠞꠣ ꠎꠦꠞꠣ ꠞꠥꠝ ꠐꠣꠃꠘꠅ ꠛꠡꠔ ꠇꠞꠞꠣꠄ, ꠀꠝꠤ ꠀꠝꠣꠞ ꠡꠣꠁꠖ꠆ꠖ ꠝꠣꠚꠤꠇ ꠔꠥꠝꠞꠣꠞ ꠉꠦꠍꠦꠅ ꠈꠥꠡ-ꠈꠛꠞꠤ ꠔꠛꠟꠤꠉ ꠇꠞꠣꠞ ꠟꠣꠉꠤ ꠈꠤꠀꠟꠤ।
ROM 1:16 ꠇꠣꠞꠘ ꠢꠎꠞꠔ ꠁꠍꠣ ꠀꠟ-ꠝꠍꠤꠞ ꠛꠦꠙꠣꠞꠦ ꠈꠥꠡ-ꠈꠛꠞꠤ ꠔꠛꠟꠤꠉ ꠇꠞꠔꠦ ꠀꠝꠤ ꠇꠥꠘꠥ ꠡꠞꠝ ꠝꠘꠅ ꠇꠞꠤ ꠘꠣ, ꠅꠃ ꠈꠥꠡ-ꠈꠛꠞꠤ ꠢꠥꠘꠤꠀ ꠎꠦꠞꠣ ꠁꠝꠣꠘ ꠀꠘꠦ, ꠔꠣꠞꠣꠞ ꠎꠣꠘ ꠛꠣꠌꠣꠘꠤꠞ ꠟꠣꠉꠤ ꠁꠐꠣ ꠅꠁꠟ ꠀꠟ꠆ꠟꠣꠁ ꠛꠟ। ꠙꠄꠟꠣ ꠛꠘꠤ ꠁꠍꠞꠣꠁꠟꠞ ꠟꠣꠉꠤ ꠎꠦꠞꠣ ꠄꠇ ꠀꠟ꠆ꠟꠣ ꠝꠣꠘꠂꠘ, ꠛꠣꠖꠦ ꠛꠦ-ꠖꠤꠘ ꠜꠤꠘ ꠎꠣꠔꠤ ꠅꠇꠟꠞ ꠟꠣꠉꠤ।
ROM 1:17 ꠅꠃ ꠈꠥꠡ-ꠈꠛꠞꠤꠞ ꠝꠣꠎꠦꠃ ꠔ ꠛꠣꠔꠣꠁꠟ ꠅꠁꠍꠦ, ꠀꠟ꠆ꠟꠣꠄ ꠇꠤꠟꠣ ꠝꠣꠘꠡꠞꠦ ꠛꠦ-ꠇꠍꠥꠞ ꠈꠣꠟꠣꠍ ꠢꠤꠡꠣꠛꠦ ꠇꠛꠥꠟ ꠇꠞꠂꠘ। ꠈꠣꠟꠤ ꠁꠝꠣꠘꠞ ꠝꠣꠎꠖꠤꠃ ꠝꠣꠘꠡꠞꠦ ꠀꠃꠀꠟ ꠕꠣꠇꠤ ꠀꠈꠦꠞ ꠙꠞ꠆ꠎꠘ꠆ꠔ ꠛꠦ-ꠇꠍꠥꠞ ꠈꠣꠟꠣꠍ ꠇꠁꠀ ꠉꠁꠘ꠆ꠘ ꠇꠞꠣ ꠅꠄ। ꠎꠦꠟꠣ ꠇꠤꠔꠣꠛꠅ ꠟꠦꠈꠣ ꠀꠍꠦ, “ꠁꠝꠣꠘꠞ ꠛꠟꠦꠃ ꠛꠦ-ꠇꠍꠥꠞ ꠈꠣꠟꠣꠍ ꠅꠀ ꠎꠘꠞ ꠎꠣꠘ ꠛꠣꠌꠤꠛ।”
ROM 1:18 ꠝꠣꠘꠡꠦ ꠘꠤꠎꠞ ꠘꠣꠚꠞꠝꠣꠘꠤ ꠖꠤꠀ ꠀꠟ꠆ꠟꠣꠁ ꠢꠇꠞꠦ ꠟꠥꠇꠣꠁꠀ ꠞꠣꠈꠦ। ꠔꠣꠞꠣꠞ ꠘꠣꠚꠞꠝꠣꠘꠤ ꠀꠞ ꠀꠟ꠆ꠟꠣꠞ ꠛꠣꠄ ꠒꠞ-ꠈꠚ ꠘꠣ ꠕꠣꠇꠣꠄ ꠀꠍꠝꠣꠘ ꠕꠣꠇꠤ ꠔꠣꠞꠣꠞ ꠃꠙꠞꠦ ꠉꠎꠛ ꠘꠣꠎꠤꠟ ꠅꠄ।
ROM 1:19 ꠀꠟ꠆ꠟꠣꠞ ꠛꠦꠙꠣꠞꠦ ꠎꠔꠈꠣꠘ ꠛꠥꠎꠣꠞ ꠔꠣꠇ꠆ꠇꠔ ꠀꠍꠦ ꠁꠔꠣ ꠝꠣꠘꠡꠞ ꠉꠦꠍꠦ ꠙꠞꠤꠡ꠆ꠇꠣꠞ, ꠀꠟ꠆ꠟꠣꠄ ꠘꠤꠎꠦꠃ ꠔ ꠁꠔꠣ ꠎꠣꠁꠞ ꠇꠞꠍꠂꠘ।
ROM 1:20 ꠔꠣꠘ ꠎꠦꠔꠣ ꠉꠥꠘꠣꠉꠥꠘ ꠝꠣꠘꠡꠞ ꠀ-ꠖꠦꠈꠣ, ꠝꠣꠘꠤ ꠔꠣꠘ ꠌꠤꠞꠇꠣꠟꠤꠘ ꠈꠦꠝꠔꠣ ꠀꠞ ꠀꠟ꠆ꠟꠣꠁ ꠡ꠆ꠛꠜꠣꠛ, ꠁꠔꠣ ꠖꠥꠘꠤꠀ ꠙꠄꠖꠣ ꠅꠀꠞ ꠀꠉ ꠕꠣꠇꠤꠃ ꠙꠞꠤꠡ꠆ꠇꠣꠞ ꠚꠥꠐꠤꠀ ꠃꠑꠍꠦ। ꠔꠣꠘ ꠙꠄꠖꠣ ꠇꠞꠣ ꠎꠤꠘꠤꠡ ꠖꠦꠈꠟꠦꠃ ꠝꠣꠘꠡꠦ ꠁꠔꠣ ꠛꠥꠎꠔ ꠙꠣꠞꠦ। ꠄꠞꠟꠣꠉꠤꠃ ꠔꠣꠘꠞꠦ ꠌꠤꠘꠤ ꠘꠣ ꠇꠁꠀ ꠇꠥꠘꠥ ꠝꠣꠘꠡꠦ ꠜꠣꠘꠣ ꠖꠦꠈꠣꠘꠤꠞ ꠃꠙꠣꠄ ꠘꠣꠁ।
ROM 1:21 ꠀꠟ꠆ꠟꠣꠞ ꠛꠦꠙꠣꠞꠦ ꠅꠔꠔꠣ ꠎꠣꠘꠣꠞ ꠛꠣꠖꠦꠅ ꠝꠣꠘꠡꠦ ꠔꠣꠘꠞꠦ ꠀꠟ꠆ꠟꠣ ꠜꠣꠛꠤꠀ ꠔꠣꠘ ꠄꠛꠣꠖꠔ-ꠛꠘ꠆ꠖꠦꠉꠤ ꠀꠞ ꠡꠥꠇꠥꠞ-ꠉꠥꠎꠣꠞꠤ ꠘꠣ ꠇꠞꠣꠄ, ꠔꠣꠞꠣꠞ ꠛꠤꠌꠣꠞ-ꠛꠤꠛꠦꠇ ꠅꠡꠣꠞ ꠅꠁꠉꠦꠍꠦ ꠀꠞ ꠛꠦꠀꠈꠟ ꠝꠘ ꠀꠘ꠆ꠖꠣꠁꠞ ꠅꠁꠉꠦꠍꠦ।
ROM 1:22 ꠎꠥꠖꠤꠅ ꠔꠣꠞꠣ ꠘꠤꠎꠞꠦ ꠀꠈꠟꠖꠣꠞ ꠝꠘꠅ ꠇꠞꠂꠘ, ꠀꠍꠟꠦ ꠔꠣꠞꠣ ꠛꠦꠀꠈꠟ।
ROM 1:23 ꠔꠣꠞꠣ ꠌꠤꠞꠇꠣꠟꠤꠘ ꠎꠤꠘ꠆ꠖꠣ ꠀꠟ꠆ꠟꠣꠞ ꠄꠛꠣꠖꠔ ꠛꠣꠖ ꠖꠤꠀ ꠅꠡ꠆ꠕꠣꠄꠁ ꠝꠣꠘꠥꠡ, ꠙꠡꠥ-ꠙꠣꠈꠤ, ꠀꠞ ꠛꠥꠇꠦ ꠌꠟꠞꠣ ꠎꠣꠘꠖꠣꠞꠞ ꠝꠥꠞ꠆ꠔꠤ ꠛꠣꠘꠣꠁꠀ ꠅꠔꠣꠞ ꠙꠥꠎꠣ ꠇꠞꠍꠦ, ꠀꠟ꠆ꠟꠣꠞ ꠙꠣꠅꠘꠣ ꠉꠃꠞꠛ-ꠝꠢꠤꠝꠣ ꠅꠔꠣꠞꠦ ꠖꠤꠍꠦ।
ROM 1:24 ꠄꠞꠟꠣꠉꠤ ꠀꠟ꠆ꠟꠣ ꠙꠣꠇꠦꠅ ꠔꠣꠞꠣꠞ ꠖꠤꠟꠞ ꠛꠖ ꠈꠣꠁꠡ ꠝꠣꠚꠤꠇ, ꠔꠣꠞꠣꠞꠦ ꠘꠚꠞꠔꠤ ꠇꠣꠝꠞ ꠀꠔꠅ ꠍꠣꠠꠤ ꠖꠤꠍꠂꠘ, ꠅꠔꠣꠞ ꠖꠣꠄ ꠔꠣꠞꠣ ꠄꠇꠦ-ꠅꠁꠘ꠆ꠘꠞ ꠟꠉꠦ ꠛꠖꠝꠣꠁꠡꠤ-ꠛꠦꠁꠎ꠆ꠎꠔꠤ ꠇꠞꠦꠞ।
ROM 1:25 ꠔꠣꠞꠣ ꠀꠟ꠆ꠟꠣꠞ ꠢꠇꠞꠦ ꠛꠣꠖ ꠖꠤꠀ ꠝꠤꠍꠣꠞꠦ ꠙꠍꠘ꠆ꠖ ꠇꠞꠍꠦ। ꠙꠄꠖꠣ ꠇꠞꠞꠣ ꠀꠟ꠆ꠟꠣꠞꠦ ꠛꠣꠖ ꠖꠤꠀ, ꠔꠣꠘ ꠙꠄꠖꠣ ꠇꠞꠣ ꠎꠤꠘꠤꠡꠞ ꠙꠥꠎꠣ ꠇꠞꠍꠦ। ꠅꠁꠟꠦ ꠎꠥꠉꠦ ꠎꠥꠉꠦ ꠌꠤꠞꠇꠣꠟ ꠢꠇꠟ ꠔꠣꠞꠤꠚ ꠄꠇꠝꠣꠔ꠆ꠞ ꠙꠄꠖꠣ ꠇꠞꠞꠣ ꠀꠟ꠆ꠟꠣꠞꠃ। ꠀꠝꠤꠘ।
ROM 1:26 ꠝꠣꠘꠡꠦ ꠅꠟꠣꠈꠣꠘ ꠘꠚꠞꠔꠤ ꠇꠣꠝ ꠇꠞꠦꠞ ꠖꠦꠈꠤꠀ, ꠀꠟ꠆ꠟꠣꠄꠅ ꠔꠣꠞꠣꠞꠦ ꠅꠃ ꠛꠖ ꠈꠣꠁꠡꠞ ꠀꠔꠅ ꠡꠙꠤ ꠖꠤꠍꠂꠘ। ꠅꠔꠣꠞ ꠛꠦꠐꠤꠘ꠆ꠔꠦꠅ ꠎꠣꠝꠣꠁꠞ ꠟꠉꠦ ꠝꠤꠟꠣ-ꠝꠤꠡꠣ ꠛꠣꠖ ꠖꠤꠀ ꠅꠁꠘ꠆ꠘ ꠛꠦꠐꠤꠘ꠆ꠔꠞ ꠟꠉꠦ ꠈꠛꠤꠍꠤ ꠇꠣꠝ ꠇꠞꠍꠦ।
ROM 1:27 ꠅꠃꠟꠣ ꠛꠦꠐꠣꠁꠘ꠆ꠔꠦꠅ ꠛꠦꠐꠤꠘ꠆ꠔꠞ ꠟꠉꠦ ꠝꠤꠟꠣ-ꠝꠤꠡꠣ ꠛꠣꠖ ꠖꠤꠀ ꠅꠁꠘ꠆ꠘ ꠛꠦꠐꠣꠞ ꠟꠉꠦ ꠝꠤꠟꠣ-ꠝꠤꠡꠣꠞ ꠟꠣꠉꠤ ꠙꠣꠉꠟ ꠅꠁꠉꠦꠍꠦ, ꠛꠦꠐꠣꠁꠘ꠆ꠔꠦ ꠛꠦꠐꠣꠁꠘ꠆ꠔꠞ ꠟꠉꠦ ꠈꠛꠤꠍꠤ ꠇꠣꠝ ꠇꠞꠍꠦ। ꠄꠞꠟꠣꠉꠤ ꠔꠣꠞꠣ ꠙꠞꠔꠦꠇꠞ ꠎꠤꠘ꠆ꠖꠦꠉꠤꠔ ꠎꠣꠞꠎꠤꠞ ꠛꠖ ꠇꠣꠝꠞ ꠡꠣꠎꠣ ꠙꠣꠁꠞꠣ।
ROM 1:28 ꠝꠣꠘꠡꠦ ꠔꠣꠞ ꠖꠤꠟ ꠕꠣꠇꠤ ꠀꠟ꠆ꠟꠣ ꠙꠣꠇꠞꠦ ꠝꠣꠘꠦꠞ ꠘꠣ ꠖꠦꠈꠤꠀ, ꠀꠟ꠆ꠟꠣꠄꠅ ꠔꠣꠞꠣꠞꠦ ꠅꠟꠣ ꠛꠖ ꠈꠣꠁꠡꠞ ꠈꠛꠤꠍꠤ ꠖꠤꠟꠞ ꠀꠔꠅ ꠍꠣꠠꠤ ꠖꠤꠍꠂꠘ, ꠄꠞꠟꠣꠉꠤ ꠔꠣꠞꠣ ꠅꠔꠣ ꠇꠞꠣꠔ ꠞꠄ।
ROM 1:29 ꠔꠣꠞꠣ ꠢꠇꠟ ꠘꠝꠥꠘꠣꠞ ꠘꠣꠚꠞꠝꠣꠘꠤ, ꠛꠖ ꠇꠣꠝ, ꠟꠥꠜ-ꠟꠣꠟꠌ, ꠁꠋꠡꠣ-ꠘꠤꠘ꠆ꠖꠣ, ꠈꠥꠘ-ꠈꠣꠞꠣꠙꠤ, ꠝꠣꠞꠣ-ꠝꠣꠞꠤ, ꠍꠟ-ꠌꠔꠥꠞꠤ ꠀꠞ ꠇꠣꠘꠣ-ꠇꠣꠘꠤ ꠇꠞꠣꠞ ꠟꠣꠉꠤ ꠃꠡ꠆ꠔꠣꠖ।
ROM 1:30 ꠔꠣꠞꠣ ꠝꠣꠘꠡꠞ ꠉꠤꠛꠔ ꠉꠣꠄ, ꠀꠞ ꠀꠟ꠆ꠟꠣꠞꠦ ꠊꠤꠘ꠆ꠘꠣꠄ। ꠔꠣꠞꠣ ꠛꠖ-ꠝꠤꠎꠣꠎꠤ, ꠅꠢꠋꠇꠣꠞꠤ, ꠛꠠꠣꠁ-ꠛꠦꠐꠣꠉꠤꠞꠤ ꠀꠞ ꠘꠄꠀ ꠘꠄꠀ ꠘꠣꠚꠞꠝꠣꠘꠤꠞ ꠗꠣꠘ꠆ꠖꠣꠄ ꠕꠣꠇꠦ। ꠔꠣꠞꠣ ꠝꠣ-ꠛꠣꠚꠞꠅ ꠅꠛꠣꠁꠖ꠆ꠖ।
ROM 1:31 ꠘꠦꠇꠤ-ꠛꠖꠤ ꠛꠥꠎꠣꠞ ꠀꠈꠟ ꠘꠣꠁ, ꠅꠀꠖꠣ ꠈꠦꠟꠣꠚꠇꠣꠞꠤ, ꠙꠣꠡꠣꠘ, ꠁꠔꠣꠞ ꠖꠤꠟꠅ ꠇꠥꠘꠥ ꠖꠄꠀ-ꠝꠣꠄꠀ ꠘꠣꠁ।
ROM 1:32 ꠔꠣꠞꠣ ꠔ ꠀꠟ꠆ꠟꠣꠞ ꠁ ꠛꠤꠌꠣꠞꠞ ꠇꠕꠣ ꠜꠣꠟꠣ ꠇꠞꠤꠃ ꠎꠣꠘꠦ, ꠎꠦꠞꠣ ꠁꠟꠣꠈꠣꠘ ꠇꠣꠝ ꠇꠞꠦ, ꠔꠣꠞꠣꠞ ꠡꠣꠎꠣ ꠅꠁꠛ ꠝꠃꠔ। ꠁꠈꠣꠘ ꠎꠣꠘꠤꠀꠅ, ꠔꠣꠞꠣ ꠈꠣꠟꠤ ꠘꠤꠎꠦ ꠁꠔꠣ ꠇꠞꠦ ꠘꠣ, ꠛꠣꠇꠤ ꠎꠦꠞꠣ ꠁꠟꠣ ꠇꠣꠝ ꠇꠞꠦ, ꠔꠣꠞꠣꠞ ꠙꠇ꠆ꠇꠦꠅ ꠡꠣꠄ ꠖꠦꠄ।
ROM 2:1 ꠄꠞꠟꠣꠉꠤꠃ ꠇꠁꠞꠣꠝ, ꠅ ꠝꠣꠘꠥꠡ ꠎꠣꠔꠤ, ꠔꠥꠝꠤ ꠔ ꠅꠁꠘ꠆ꠘ ꠎꠘꠞꠦ ꠖꠥꠡꠤ ꠡꠣꠁꠛꠡ꠆ꠔ ꠇꠞꠞꠣꠄ, ꠁꠔꠣ ꠛꠤꠌꠣꠞ ꠔꠥꠝꠤ ꠢꠤꠇꠟꠣꠄ ꠇꠤꠟꠣ? ꠔꠥꠝꠣꠞ ꠎꠥꠀꠙ ꠖꠤꠛꠣꠞ ꠇꠥꠘꠥ ꠙꠕ ꠀꠍꠦ ꠘꠤ? ꠇꠣꠞꠘ ꠔꠥꠝꠤ ꠘꠤꠎꠦ ꠎꠦ ꠅꠙꠞꠣꠗ ꠇꠞꠞꠣꠄ, ꠅꠃ ꠄꠇꠁ ꠅꠙꠞꠣꠗꠦ ꠔꠥꠝꠤ ꠀꠞꠇ ꠎꠘꠞꠦ ꠖꠥꠡꠤ ꠇꠁꠞꠣꠄ। ꠔꠦ ꠁ ꠖꠥꠡ ꠔꠥꠝꠣꠞ ꠃꠙꠞꠦꠅ ꠙꠠꠦꠞ ꠘꠣ ꠘꠤ?
ROM 2:2 ꠀꠝꠞꠣ ꠔ ꠎꠣꠘꠤ, ꠎꠦꠞꠣ ꠁꠟꠣꠈꠣꠘ ꠅꠙꠞꠣꠗ ꠇꠞꠦ, ꠀꠟ꠆ꠟꠣꠄ ꠢꠇ ꠁꠘꠍꠣꠚ ꠝꠣꠚꠤꠇ ꠔꠣꠞꠣꠞ ꠙꠣꠅꠘꠣ ꠡꠣꠎꠣ ꠖꠤꠛꠣ।
ROM 2:3 ꠅ ꠝꠣꠘꠥꠡ ꠎꠣꠔꠤ, ꠎꠦ ꠇꠣꠝ ꠔꠥꠝꠤ ꠘꠤꠎꠦꠅ ꠇꠞ, ꠅꠃ ꠄꠇꠁ ꠇꠣꠝꠞ ꠟꠣꠉꠤ ꠔꠥꠝꠤ ꠀꠞꠇ ꠎꠘꠞꠦ ꠖꠥꠡꠤ ꠡꠣꠁꠛꠡ꠆ꠔ ꠇꠞꠅ, ꠔꠦ ꠇꠦꠝꠘꠦ ꠛꠥꠎꠟꠣꠄ, ꠔꠥꠝꠤ ꠀꠟ꠆ꠟꠣꠞ ꠡꠣꠎꠣ ꠕꠣꠇꠤ ꠞꠦꠢꠣꠁ ꠙꠣꠁꠟꠤꠛꠣꠄ?
ROM 2:4 ꠔꠥꠝꠤ ꠔ ꠀꠟ꠆ꠟꠣ ꠙꠣꠇꠞ ꠅꠡꠦꠡ ꠝꠦꠢꠦꠞꠛꠣꠘꠤ, ꠔꠣꠘ ꠗꠂꠞ꠆ꠎ-ꠡꠇ꠆ꠔꠤ ꠀꠞ ꠍꠛꠞꠉꠣꠞꠤꠞꠦ ꠄꠟꠣꠝꠤ ꠇꠞꠞꠣꠄ। ꠔꠣꠘ ꠝꠦꠢꠦꠞꠛꠣꠘꠤꠄ ꠔꠥꠝꠣꠞꠦ ꠈꠣꠟꠤ ꠔꠃꠛꠣ ꠇꠞꠣꠞ ꠙꠕꠦ ꠐꠣꠘꠤꠀ ꠘꠦꠄ, ꠁꠈꠣꠘ ꠚꠣꠃꠞꠤꠟꠤꠍ ꠘꠤ?
ROM 2:5 ꠅꠁꠟꠦ ꠔꠥꠝꠣꠞ ꠙꠣꠡꠣꠘ ꠖꠤꠟ ꠀꠞ ꠔꠃꠛꠣ ꠘꠣ ꠇꠞꠣꠞ ꠝꠘꠜꠣꠛꠞ ꠟꠣꠉꠤ, ꠔꠥꠝꠣꠞ ꠃꠙꠞꠦ ꠀꠟ꠆ꠟꠣꠞ ꠉꠎꠛ ꠖꠟꠣ ꠇꠞꠤ ꠕꠁꠞꠣꠄ, ꠀꠟ꠆ꠟꠣꠄ ꠎꠦꠖꠤꠘ ꠉꠎꠛ ꠎꠣꠁꠞ ꠇꠞꠛꠣ, ꠢꠇ ꠛꠤꠌꠣꠞ ꠇꠞꠛꠣ, ꠢꠃ ꠖꠤꠘꠞ ꠟꠣꠉꠤ ꠡꠣꠎꠣ ꠖꠟꠣ ꠇꠞꠞꠣꠄ।
ROM 2:6 ꠔꠣꠁꠘ ꠙꠞꠔꠦꠇ ꠝꠣꠘꠡꠞꠦ ꠎꠣꠞꠎꠤꠞ ꠇꠣꠝꠞ ꠚꠟ ꠖꠤꠛꠣ।
ROM 2:7 ꠎꠦꠞꠣ ꠗꠂꠎ꠆ꠎ ꠗꠞꠤꠀ ꠘꠦꠇ ꠇꠣꠝꠞ ꠝꠣꠎꠖꠤ ꠀꠟ꠆ꠟꠣꠁ ꠔꠣꠞꠤꠚ, ꠁꠎ꠆ꠎꠔ, ꠀꠞ ꠇ꠆ꠇꠄꠢꠤꠘ ꠎꠤꠘ꠆ꠖꠦꠉꠤ ꠔꠣꠟ꠆ꠟꠣꠡ ꠇꠞꠦ, ꠀꠟ꠆ꠟꠣꠄ ꠔꠣꠞꠣꠞꠦꠃ ꠀꠈꠦꠞꠤ ꠎꠤꠘ꠆ꠖꠦꠉꠤ ꠖꠣꠘ ꠇꠞꠛꠣ।
ROM 2:8 ꠅꠁꠟꠦ ꠎꠦꠞꠣ ꠘꠤꠎꠞ ꠈꠣꠁꠡꠞ ꠛꠡꠦ ꠌꠟꠦ, ꠀꠟ꠆ꠟꠣꠁ ꠢꠇꠞ ꠛꠤꠞꠥꠖ꠆ꠖꠦ ꠞꠄ, ꠘꠣꠚꠞꠝꠣꠘꠤꠞ ꠙꠇ꠆ꠇꠦ ꠕꠣꠇꠦ, ꠔꠣꠞꠣꠞ ꠃꠙꠞꠦ ꠀꠟ꠆ꠟꠣꠁ ꠖꠥꠈ-ꠝꠍꠤꠛꠔ, ꠉꠎꠛ ꠀꠞ ꠟꠣꠘ꠆ꠘꠔ ꠀꠁꠛ।
ROM 2:9 ꠙꠞꠔꠦꠇ ꠘꠣꠚꠞꠝꠣꠘꠞ ꠃꠙꠞꠦ ꠁꠔꠣ ꠀꠁꠛ, ꠙꠄꠟꠣ ꠛꠘꠤ ꠁꠍꠞꠣꠁꠟꠞ ꠃꠙꠞꠦ, ꠛꠣꠖꠦ ꠜꠤꠘ ꠎꠣꠔꠤꠞ ꠃꠙꠞꠦ।
ROM 2:10 ꠅꠁꠟꠦ ꠎꠦꠞꠣ ꠘꠦꠇ ꠇꠣꠝ ꠇꠞꠦ, ꠔꠣꠞꠣ ꠙꠞꠔꠦꠇꠦ ꠔꠣꠞꠤꠚ, ꠁꠎ꠆ꠎꠔ ꠀꠞ ꠡꠣꠘ꠆ꠔꠤ ꠙꠣꠁꠛ। ꠙꠄꠟꠣ ꠛꠘꠤ ꠁꠍꠞꠣꠁꠟꠦ, ꠛꠣꠖꠦ ꠜꠤꠘ ꠎꠣꠔꠤꠄ ꠙꠣꠁꠛꠣ।
ROM 2:11 ꠀꠟ꠆ꠟꠣꠞ ꠖꠞꠛꠣꠞꠅ ꠔ ꠙꠇ꠆ꠇꠙꠣꠔꠤꠞ ꠇꠥꠘꠥ ꠇꠣꠞꠛꠣꠞ ꠘꠣꠁ, ꠢꠇꠟꠃ ꠢꠝꠣꠘ।
ROM 2:12 ꠡꠞꠤꠅꠔꠞ ꠛꠣꠁꠞꠦ ꠞꠁꠀ ꠎꠦꠔꠣ ꠝꠣꠘꠡꠦ ꠉꠥꠘꠣ ꠇꠞꠍꠦ, ꠔꠣꠞꠣ ꠛꠤꠘꠣꠡꠅ ꠅꠁꠛꠣ ꠡꠞꠤꠅꠔ ꠍꠣꠠꠣ, ꠀꠞ ꠡꠞꠤꠅꠔꠞ ꠜꠤꠔꠞꠦ ꠞꠁꠀ ꠎꠦꠞꠣ ꠉꠥꠘꠣ ꠇꠞꠦ, ꠅꠃ ꠡꠞꠤꠅꠔ ꠝꠣꠚꠤꠇꠃ ꠔꠣꠞꠣꠞ ꠛꠤꠌꠣꠞ ꠅꠁꠛ।
ROM 2:13 ꠎꠦꠔꠣ ꠝꠣꠘꠡꠦ ꠡꠞꠤꠅꠔꠞ ꠛꠄꠀꠘ ꠈꠣꠟꠤ ꠢꠥꠘꠦ, ꠀꠟ꠆ꠟꠣꠞ ꠘꠎꠞꠅ ꠔ ꠔꠣꠞꠣ ꠛꠦ-ꠇꠍꠥꠞ ꠘꠣꠄ, ꠅꠁꠟꠦ ꠎꠦꠞꠣ ꠡꠞꠤꠅꠔ ꠀꠝꠟ ꠇꠞꠦ, ꠔꠣꠞꠣꠃ ꠈꠣꠟꠤ ꠛꠦ-ꠇꠍꠥꠞ ꠈꠣꠟꠣꠍ ꠇꠁꠀ ꠉꠁꠘ꠆ꠘ ꠅꠁꠛꠣ।
ROM 2:14 ꠜꠤꠘ ꠎꠣꠔꠤ ꠅꠇꠟꠦ ꠀꠟ꠆ꠟꠣꠁ ꠇꠥꠘꠥ ꠡꠞꠤꠅꠔ ꠘꠣ ꠙꠣꠁꠟꠦꠅ, ꠔꠣꠞꠣ ꠎꠦꠛꠟꠣ ꠄꠝꠘꠦꠃ ꠡꠞꠤꠅꠔ ꠝꠣꠚꠤꠇ ꠌꠟꠂꠘ, ꠅꠃ ꠡꠝꠄ ꠔꠣꠞꠣꠞ ꠛꠤꠛꠦꠇꠃ ꠡꠞꠤꠅꠔ ꠛꠘꠤꠎꠣꠄ।
ROM 2:15 ꠄꠔꠦ ꠖꠦꠈꠣ ꠎꠣꠄ, ꠡꠞꠤꠅꠔ ꠝꠣꠚꠤꠇ ꠎꠦꠔꠣ ꠇꠞꠣ ꠎꠞꠥꠞ, ꠁꠔꠣ ꠔꠣꠞꠣꠞ ꠖꠤꠟꠞ ꠛꠤꠛꠦꠇꠞ ꠝꠣꠎꠦ ꠟꠦꠈꠣ ꠀꠍꠦ। ꠔꠣꠞꠣꠞ ꠛꠤꠛꠦꠇꠦ ꠔꠣꠞꠣꠞ ꠇꠣꠝꠞ ꠡꠣꠇ꠆ꠇꠤ ꠖꠦꠄ, ꠇꠥꠘꠥ ꠇꠥꠘꠥ ꠡꠝꠄ ꠔꠣꠞꠣꠞ ꠛꠤꠛꠦꠇꠦ ꠔꠣꠞꠣꠞꠦ ꠖꠥꠡꠤ ꠡꠣꠁꠛꠡ꠆ꠔ ꠇꠞꠦ, ꠀꠞ ꠇꠥꠘꠥ ꠇꠥꠘꠥ ꠡꠝꠄ ꠔꠣꠞꠣꠞ ꠙꠇ꠆ꠇꠦꠅ ꠡꠣꠄ ꠖꠦꠄ।
ROM 2:16 ꠔꠦ ꠀꠟ꠆ꠟꠣꠄ ꠎꠦꠖꠤꠘ ꠁꠍꠣ ꠀꠟ-ꠝꠍꠤꠞ ꠝꠣꠎꠖꠤ ꠢꠇꠟ ꠝꠣꠘꠡꠞ ꠟꠥꠇꠣꠁꠟ ꠀꠝꠟꠞ ꠛꠤꠌꠣꠞ ꠇꠞꠛꠣ, ꠢꠃ ꠖꠤꠘꠃ ꠁꠔꠣ ꠎꠣꠁꠞ ꠅꠁꠛ। ꠀꠞ ꠀꠝꠤ ꠅꠈꠘ ꠎꠦ ꠈꠥꠡ-ꠈꠛꠞꠤ ꠔꠛꠟꠤꠉ ꠇꠞꠤꠀꠞ, ꠅꠃ ꠝꠣꠚꠤꠇꠃ ꠛꠤꠌꠣꠞ ꠅꠁꠛ।
ROM 2:17 ꠔꠥꠝꠤ ꠎꠦꠛꠟꠣ ꠘꠤꠎꠞ ꠙꠞꠤꠌꠄ ꠖꠤꠞꠣꠄ ꠛꠘꠤ ꠁꠍꠞꠣꠁꠟ ꠇꠁꠀ, ꠔꠥꠝꠤ ꠢꠎꠞꠔ ꠝꠥꠍꠣꠞ ꠡꠞꠤꠅꠔꠞ ꠃꠙꠞꠦ ꠜꠞꠡꠣ ꠇꠞꠞꠣꠄ ꠀꠞ ꠀꠟ꠆ꠟꠣꠞ ꠝꠣꠄꠀꠞ ꠛꠘ꠆ꠖꠣ ꠇꠁꠀ ꠛꠠꠣꠁ ꠖꠦꠈꠣꠁꠞꠣꠄ।
ROM 2:18 ꠔꠦ ꠀꠟ꠆ꠟꠣꠄ ꠔꠥꠝꠣꠞ ꠉꠦꠍ ꠕꠣꠇꠤ ꠇꠤꠔꠣ ꠀꠡꠣ ꠇꠞꠂꠘ, ꠔꠥꠝꠤ ꠇꠤꠔꠣ ꠇꠞꠔꠣꠄ, ꠁꠈꠣꠘ ꠔ ꠔꠥꠝꠤ ꠎꠣꠘꠃ, ꠡꠞꠤꠅꠔ ꠕꠣꠇꠤ ꠔꠥꠝꠤ ꠁꠔꠣꠞ ꠔꠣꠟꠤꠝ ꠙꠣꠁꠍ।
ROM 2:19 ꠔꠥꠝꠤ ꠝꠘꠦ ꠝꠘꠦ ꠇꠁꠞꠣꠄ, ꠀꠝꠤ ꠔ ꠀꠘ꠆ꠖꠣꠞꠦ ꠙꠕ ꠖꠦꠈꠣꠁꠀꠞ, ꠀꠘ꠆ꠖꠣꠞꠤꠔ ꠎꠦꠔꠣ ꠀꠍꠂꠘ, ꠁꠔꠣꠞ ꠉꠦꠍꠦ ꠀꠝꠤ ꠘꠥꠞꠞ ꠞꠥꠡꠘꠤ।
ROM 2:20 ꠛꠦꠀꠈꠟꠞꠦ ꠢꠦꠖꠣꠄꠅꠔ ꠇꠞꠤꠀꠞ, ꠢꠥꠞꠥꠔ꠆ꠔꠣꠁꠘꠞꠦ ꠔꠣꠟꠤꠝ ꠖꠤꠀꠞ। ꠔꠥꠝꠤ ꠛꠥꠎꠞꠣꠄ, ꠡꠞꠤꠅꠔꠞ ꠜꠤꠔꠞꠦ ꠢꠇ ꠀꠞ ꠀꠈꠟ-ꠛꠥꠖ꠆ꠖꠤ ꠀꠍꠦ।
ROM 2:21 ꠁꠔꠣ ꠈꠥꠛ ꠜꠣꠟꠣ ꠇꠕꠣ, ꠅꠁꠟꠦ ꠔꠥꠝꠤ ꠎꠦꠛꠟꠣ ꠅꠁꠘ꠆ꠘ ꠝꠣꠘꠡꠞꠦ ꠢꠤꠇꠣꠁꠞꠣꠄ, ꠔꠦ ꠘꠤꠎꠦꠅ ꠁꠔꠣ ꠢꠤꠇ ꠘꠣ ꠇꠦꠘꠦ? ꠔꠥꠝꠤ ꠝꠣꠘꠡꠞꠦ ꠇꠁꠞꠣꠄ, ꠌꠥꠞꠤ ꠇꠞꠤꠅ ꠘꠣ, ꠅꠁꠟꠦ ꠔꠥꠝꠤ ꠘꠤꠎꠦꠃ ꠌꠥꠞꠤ ꠇꠞꠞꠣꠄ ꠘꠣ ꠘꠤ?
ROM 2:22 ꠝꠣꠘꠡꠞꠦ ꠇꠁꠞꠣꠄ, ꠎꠤꠘꠣ ꠇꠞꠤꠅ ꠘꠣ, ꠅꠁꠟꠦ ꠔꠥꠝꠤ ꠘꠤꠎꠦ ꠇꠥꠘꠥ ꠎꠤꠘꠣ ꠇꠞꠞꠣꠄ ꠘꠣ ꠘꠤ? ꠔꠥꠝꠤ ꠔ ꠖꠦꠛ-ꠖꠦꠛꠤꠞ ꠝꠥꠞ꠆ꠔꠤꠞꠦ ꠊꠤꠘ꠆ꠘꠣꠁꠞꠣꠄ, ꠢꠤꠞꠛꠣꠞ ꠘꠤꠎꠦꠃ ꠝꠥꠞ꠆ꠔꠤꠞ ꠝꠘ꠆ꠖꠤꠞꠞꠦ ꠟꠥꠐ-ꠔꠞꠣꠎ ꠇꠞꠞꠣꠄ ꠘꠣ ꠘꠤ?
ROM 2:23 ꠎꠦ ꠡꠞꠤꠅꠔ ꠟꠁꠀ ꠔꠥꠝꠤ ꠛꠠꠣꠁ ꠇꠞꠞꠣꠄ, ꠁ ꠡꠞꠤꠅꠔꠞ ꠃꠟꠐꠣ ꠌꠟꠤꠀ ꠔꠥꠝꠤ ꠘꠤꠎꠦꠃ ꠀꠟ꠆ꠟꠣꠞꠦ ꠅꠡꠝ꠆ꠝꠣꠘ ꠇꠞꠞꠣꠄ ꠘꠣ ꠘꠤ?
ROM 2:24 ꠀꠟ꠆ꠟꠣꠞ ꠇꠣꠟꠣꠝꠅ ꠀꠍꠦ, “ꠔꠥꠝꠞꠣꠞ ꠌꠣꠟ-ꠌꠟꠘ ꠖꠦꠈꠤꠀ ꠜꠤꠘ ꠎꠣꠔꠤ ꠅꠇꠟꠦ ꠀꠟ꠆ꠟꠣꠞ ꠘꠣꠝꠞꠦ ꠛꠦꠁꠎ꠆ꠎꠔ ꠇꠞꠦꠞ।”
ROM 2:25 ꠢꠥꠘꠅ, ꠔꠥꠝꠤ ꠎꠥꠖꠤ ꠡꠞꠤꠅꠔ ꠝꠣꠘꠤꠀ ꠌꠟꠅ, ꠔꠦ ꠝꠍꠟꠝꠣꠘꠤ ꠇꠣꠝ ꠇꠞꠣꠘꠤꠞ ꠖꠣꠝ ꠀꠍꠦ, ꠀꠞ ꠡꠞꠤꠅꠔ ꠝꠣꠚꠤꠇ ꠘꠣ ꠌꠟꠟꠦ, ꠝꠍꠟꠝꠣꠘꠤ ꠇꠣꠝ ꠇꠞꠣꠁꠟꠦꠅ ꠎꠦꠔꠣ, ꠘꠣ ꠇꠞꠣꠁꠟꠦꠅ ꠅꠔꠣ। ꠀꠟ꠆ꠟꠣꠞ ꠘꠎꠞꠅ ꠔꠥꠝꠤ ꠝꠍꠟꠝꠣꠘꠤ ꠘꠣ ꠇꠞꠣꠁꠟ ꠛꠦ-ꠖꠤꠘꠞ ꠟꠣꠈꠣꠘ।
ROM 2:26 ꠅꠈꠘ ꠝꠍꠟꠝꠣꠘꠤ ꠘꠣ ꠇꠞꠣꠁꠀꠅ ꠎꠥꠖꠤ ꠇꠦꠃ ꠡꠞꠤꠅꠔ ꠝꠣꠘꠤꠀ ꠌꠟꠦ, ꠔꠦ ꠀꠟ꠆ꠟꠣꠄ ꠔꠣꠞꠦ ꠝꠍꠟꠝꠣꠘꠤ ꠇꠞꠣꠁꠟ ꠇꠁꠀ ꠡꠝꠎꠤꠔꠣ ꠘꠣꠄ ꠘꠤ?
ROM 2:27 ꠀꠞ ꠝꠍꠟꠝꠣꠘꠤ ꠘꠣ ꠇꠞꠣꠁꠟ ꠝꠣꠘꠡꠦ ꠎꠦꠛꠟꠣ ꠡꠞꠤꠅꠔ ꠝꠣꠘꠤꠀ ꠌꠟꠦ, ꠔꠦ ꠟꠤꠈꠤꠔ ꠡꠞꠤꠅꠔ ꠙꠣꠁꠀ ꠀꠞ ꠝꠍꠟꠝꠣꠘꠤ ꠇꠞꠣꠁꠀꠅ ꠎꠥꠖꠤ ꠔꠥꠝꠤ ꠄꠞ ꠃꠟꠐꠣ ꠌꠟꠅ, ꠔꠣꠁꠟꠦ ꠢꠃ ꠝꠍꠟꠝꠣꠘꠤ ꠘꠣ ꠇꠞꠣꠁꠟ ꠛꠦꠐꠣꠄ ꠔꠥꠝꠣꠞꠦ ꠖꠥꠡꠤꠔ ꠘꠣꠄ ꠘꠤ?
ROM 2:28 ꠛꠤꠡꠄꠐꠣ ꠛꠥꠎꠞꠣꠄ ꠘꠤ? ꠈꠣꠟꠤ ꠘꠣꠝꠦ ꠛꠘꠤ ꠁꠍꠞꠣꠁꠟ ꠅꠁꠟꠦꠃ ꠇꠦꠃ ꠀꠍꠟ ꠛꠘꠤ ꠁꠍꠞꠣꠁꠟ ꠘꠣꠄ। ꠡꠞꠤꠟꠞ ꠅꠋꠉ ꠇꠣꠐꠤꠀ ꠝꠍꠟꠝꠣꠘꠤ ꠇꠞꠣꠁꠟꠦꠅ ꠔ, ꠀꠍꠟ ꠝꠍꠟꠝꠣꠘꠤ ꠅꠄ ꠘꠣ।
ROM 2:29 ꠅꠁꠟꠦ ꠝꠘ ꠕꠣꠇꠤ ꠎꠦꠞꠣ ꠛꠘꠤ ꠁꠍꠞꠣꠁꠟ, ꠔꠣꠞꠣꠃ ꠀꠍꠟ ꠛꠘꠤ ꠁꠍꠞꠣꠁꠟ। ꠁꠔꠣ ꠇꠥꠘꠥ ꠟꠤꠈꠤꠔ ꠀꠁꠘ-ꠇꠣꠘꠥꠘꠞ ꠛꠦꠙꠣꠞ ꠘꠣꠄ, ꠖꠤꠟꠞ ꠜꠤꠔꠞꠞ ꠞꠥꠢꠣꠘꠤ ꠛꠦꠙꠣꠞ। ꠖꠤꠟꠞ ꠝꠍꠟꠝꠣꠘꠤꠃ ꠅꠁꠟ ꠀꠍꠟ ꠝꠍꠟꠝꠣꠘꠤ। ꠎꠉꠔꠞ ꠝꠣꠘꠡꠦ ꠄꠞꠣꠞ ꠔꠣꠞꠤꠚ ꠘꠣ ꠇꠞꠟꠦꠅ, ꠀꠟ꠆ꠟꠣꠄ ꠔꠣꠞꠤꠚ ꠇꠞꠂꠘ।
ROM 3:1 ꠔꠦ ꠁꠟꠣꠈꠣꠘ ꠛꠦꠙꠣꠞ ꠅꠁꠟꠦ, ꠛꠘꠤ ꠁꠍꠞꠣꠁꠟ ꠅꠀꠄ ꠛꠣꠠꠔꠤ ꠇꠥꠘꠥ ꠟꠣꠜ ꠀꠍꠦ ꠘꠤ? ꠝꠍꠟꠝꠣꠘꠤ ꠇꠣꠝ ꠇꠞꠣꠘꠤꠔ ꠇꠥꠘꠥ ꠚꠣꠄꠖꠣ ꠀꠍꠦ ꠘꠤ?
ROM 3:2 ꠘꠤꠌ꠆ꠌꠄ ꠀꠍꠦ। ꠛꠃꠔ ꠘꠝꠥꠘꠣꠞ ꠚꠣꠄꠖꠣ ꠀꠍꠦ। ꠙꠄꠟꠣ ꠚꠣꠄꠖꠣ: ꠀꠟ꠆ꠟꠣ ꠙꠣꠇꠦ ꠔꠣꠘ ꠢꠇ꠆ꠇꠟ ꠇꠣꠟꠣꠝ ꠘꠣꠎꠤꠟ ꠇꠞꠍꠂꠘ ꠛꠘꠤ ꠁꠍꠞꠣꠁꠟꠞ ꠉꠦꠍꠦ।
ROM 3:3 ꠅꠛꠁꠡ꠆ꠡ ꠔꠣꠞꠣꠞ ꠇꠥꠘꠥ ꠇꠥꠘꠥ ꠎꠘꠦ ꠛꠦꠁꠝꠣꠘꠤ ꠇꠞꠍꠦ, ꠄꠔꠦ ꠇꠤꠔꠣ ꠅꠁꠍꠦ? ꠔꠣꠞꠣ ꠛꠦꠁꠝꠣꠘꠤ ꠇꠞꠟꠦꠅ ꠀꠟ꠆ꠟꠣ ꠙꠣꠇꠦ ꠇꠥꠘꠥ ꠔꠣꠞꠣꠞ ꠟꠣꠈꠣꠘ ꠛꠦꠁꠝꠣꠘꠤ ꠇꠞꠛꠣ ꠘꠤ?
ROM 3:4 ꠘꠣꠃꠎꠥꠛꠤꠟ꠆ꠟꠣ! ꠢꠇꠟ ꠝꠣꠘꠡꠦ ꠝꠤꠍꠣ ꠝꠣꠔꠟꠦꠅ ꠀꠟ꠆ꠟꠣ ꠔ ꠢꠣꠝꠦꠡꠣ ꠢꠇ ꠕꠣꠇꠂꠘ। ꠙꠛꠤꠔ꠆ꠞ ꠎꠛꠥꠞ ꠡꠞꠤꠚꠅ ꠀꠍꠦ: ꠄꠞꠛꠣꠖꠦꠅ ꠙꠞꠝꠣꠘ ꠝꠤꠟꠛ ꠔꠥꠝꠣꠞ ꠎꠛꠣꠘ ꠡꠑꠤꠇ, ꠔꠥꠝꠣꠞ ꠙꠇ꠆ꠇꠦ ꠞꠣꠄ ꠎꠣꠁꠛ।
ROM 3:5 ꠖꠥꠘꠤꠀꠛꠤ ꠝꠣꠘꠡꠦ ꠇꠁꠔ ꠙꠣꠞꠦ, ꠀꠝꠞꠣꠞ ꠘꠣ-ꠢꠇ ꠇꠣꠝꠦ ꠎꠦꠛꠟꠣ ꠀꠞꠅ ꠙꠞꠤꠡ꠆ꠇꠣꠞ ꠛꠥꠎꠣ ꠎꠣꠄ ꠀꠟ꠆ꠟꠣ ꠙꠣꠇ ꠇꠔ ꠢꠇ, ꠔꠦ ꠀꠝꠞꠣꠞ ꠘꠣ-ꠢꠇꠦ ꠔꠣꠘ ꠉꠃꠞꠛ ꠅꠀꠞ ꠛꠣꠖꠦꠅ ꠔꠣꠁꠘ ꠀꠝꠞꠣꠞꠦ ꠡꠣꠎꠣ ꠖꠤꠟꠦ ꠁꠔꠣ ꠔꠣꠘ ꠅꠁꠘ꠆ꠘꠣꠄ? ꠘꠣꠃꠎꠥꠛꠤꠟ꠆ꠟꠣ।
ROM 3:6 ꠀꠟ꠆ꠟꠣꠄ ꠎꠥꠖꠤ ꠢꠇ ꠁꠘꠍꠣꠚ ꠘꠣ ꠇꠞꠂꠘ, ꠔꠦ ꠔꠣꠁꠘ ꠇꠤꠟꠣ ꠀꠡ꠆ꠔꠣ ꠎꠉꠔꠞ ꠛꠤꠌꠣꠞ ꠇꠞꠛꠣ?
ROM 3:7 ꠔꠣꠞꠣ ꠇꠂꠘ, “ꠀꠝꠣꠞ ꠝꠤꠍꠣ ꠝꠣꠔꠞ ꠝꠣꠎꠖꠤꠃ ꠛꠥꠎꠣ ꠎꠣꠄ, ꠀꠟ꠆ꠟꠣ ꠙꠣꠇ ꠢꠇ-ꠁꠘꠍꠣꠚꠇꠣꠞꠤ। ꠀꠞ ꠀꠝꠣꠞ ꠝꠤꠍꠣ ꠝꠣꠔꠦ ꠎꠦꠛꠟꠣ ꠀꠟ꠆ꠟꠣꠞ ꠉꠃꠞꠛ-ꠔꠣꠞꠤꠚ ꠅꠄ, ꠔꠦ ꠔꠣꠁꠘ ꠀꠝꠣꠞꠦ ꠉꠥꠘꠣꠉꠣꠞ ꠡꠣꠁꠛꠡ꠆ꠔ ꠇꠞꠂꠘ ꠇꠦꠘꠦ?”
ROM 3:8 ꠁꠈꠣꠘ ꠈꠥꠛ ꠡꠥꠘ꠆ꠖꠞ ꠎꠥꠇ꠆ꠔꠤ। ꠄꠞꠟꠣꠉꠤ ꠀꠝꠞꠣ ꠇꠁꠔꠣꠝ ꠘꠤ, “ꠀꠅ, ꠀꠝꠞꠣ ꠘꠣꠚꠞꠝꠣꠘꠤ ꠇꠞꠣꠔ ꠞꠁ, ꠎꠣꠔꠦ ꠅꠃ ꠘꠣꠚꠞꠝꠣꠘꠤꠞ ꠝꠣꠎꠖꠤ ꠜꠣꠟꠣ ꠚꠟ ꠝꠤꠟꠦ?” ꠇꠥꠘꠥ ꠇꠥꠘꠥ ꠝꠣꠘꠡꠦ ꠀꠝꠞꠣꠞ ꠛꠖꠘꠣꠝ ꠉꠣꠁꠀ ꠇꠂꠘ, ꠀꠝꠞꠣꠅ ꠛꠥꠟꠦ ꠅꠟꠣ ꠔꠣꠟꠤꠝ ꠖꠦꠁ। ꠁꠔꠣꠄ ꠔꠣꠞꠣꠞ ꠙꠣꠅꠘꠣ ꠡꠣꠎꠣ ꠙꠣꠁꠛꠣ।
ROM 3:9 ꠅꠈꠘ ꠀꠝꠞꠣ ꠇꠤꠔꠣ ꠇꠁꠔꠣꠝ? ꠛꠘꠤ ꠁꠍꠞꠣꠁꠟ ꠢꠤꠡꠣꠛꠦ ꠀꠝꠞꠣꠞ ꠢꠣꠟꠔ ꠇꠤꠔꠣ ꠜꠤꠘ ꠎꠣꠔꠤ ꠕꠣꠇꠤ ꠜꠣꠟꠣ ꠘꠤ? ꠘꠤꠌ꠆ꠌꠄ ꠘꠣ। ꠀꠉꠦꠃ ꠀꠝꠞꠣ ꠇꠁꠍꠤ, ꠛꠘꠤ ꠁꠍꠞꠣꠁꠟ ꠀꠞ ꠜꠤꠘ ꠎꠣꠔꠤ ꠢꠇꠟꠃ ꠉꠥꠘꠣꠞ ꠉꠥꠟꠣꠝ।
ROM 3:10 ꠀꠟ꠆ꠟꠣꠞ ꠇꠣꠟꠣꠝꠅ ꠀꠍꠦ, ꠛꠦ-ꠇꠍꠥꠞ ꠛꠟꠔꠦ ꠇꠦꠃ ꠘꠣꠁ, ꠄꠇꠎꠘꠅ ꠘꠣꠁ;
ROM 3:11 ꠀꠈꠟꠖꠣꠞ ꠄꠇꠎꠘꠅ ꠘꠣꠁ, ꠇꠦꠃ ꠀꠟ꠆ꠟꠣꠞ ꠔꠣꠟ꠆ꠟꠣꠡ ꠇꠞꠦ ꠘꠣ।
ROM 3:12 ꠢꠇꠟ ꠝꠣꠘꠥꠡ ꠛꠦ-ꠙꠕꠤ ꠅꠁꠉꠦꠍꠦ, ꠢꠇꠟ ꠄꠇꠟꠉꠦ ꠘꠣꠚꠞꠝꠣꠘ ꠅꠁꠉꠦꠍꠦ, ꠘꠦꠇ ꠇꠣꠝ ꠇꠞꠦ ꠁꠟꠣ ꠇꠦꠃ ꠘꠣꠁ, ꠄꠇꠎꠘꠅ ꠘꠣꠁ।
ROM 3:13 ꠔꠣꠞꠣꠞ ꠝꠥꠈ ꠔ ꠙꠌꠣ ꠟꠣꠡꠞ ꠈꠥꠟꠣ ꠇꠄꠛꠞꠞ ꠟꠣꠈꠣꠘ, ꠔꠣꠞꠣꠞ ꠎꠤꠜꠦ ꠍꠟ-ꠌꠔꠥꠞꠤ ꠝꠣꠔꠦ, ꠀꠞ ꠑꠥꠐꠞ ꠔꠟꠦ ꠀꠍꠦ, ꠢꠣꠚꠞ ꠛꠤꠡ।
ROM 3:14 ꠔꠣꠞꠣꠞ ꠉꠟꠣꠞ ꠝꠣꠎꠦ ꠛꠖ꠆ꠖꠥꠀ ꠀꠞ ꠔꠤꠔ꠆ꠔꠣ ꠝꠣꠔ-ꠇꠕꠣꠄ ꠜꠞꠣ,
ROM 3:15 ꠈꠥꠘ-ꠈꠣꠞꠣꠙꠤꠞ ꠟꠣꠉꠤ ꠔꠣꠞꠣꠞ ꠙꠣꠅ ꠀꠉꠥꠀꠁꠟ,
ROM 3:16 ꠔꠣꠞꠣꠞ ꠙꠕꠅ ꠈꠣꠟꠤ ꠛꠤꠘꠣꠡ ꠀꠞ ꠀꠢꠣꠎꠣꠞꠤ।
ROM 3:17 ꠡꠣꠘ꠆ꠔꠤꠞ ꠙꠕ ꠔꠣꠞꠣ ꠌꠤꠘꠦ ꠘꠣ,
ROM 3:18 ꠔꠣꠞꠣꠞ ꠖꠤꠟ ꠕꠣꠇꠤ ꠀꠟ꠆ꠟꠣꠞ ꠒꠞ-ꠈꠚ ꠢꠞꠤꠉꠦꠍꠦ।
ROM 3:19 ꠀꠝꠞꠣ ꠎꠣꠘꠤ, ꠢꠎꠞꠔ ꠝꠥꠍꠣꠞ ꠡꠞꠤꠅꠔ ꠔꠣꠞꠣꠞ ꠟꠣꠉꠤꠃ, ꠎꠦꠞꠣꠞ ꠉꠦꠍꠦ ꠅꠃ ꠡꠞꠤꠅꠔ ꠖꠦꠅꠀ ꠅꠁꠍꠦ। ꠎꠣꠔꠦ ꠈꠣꠟꠤ ꠜꠤꠘ ꠎꠣꠔꠤ ꠘꠣꠄ, ꠡꠞꠤꠅꠔ ꠙꠣꠅꠞꠣ ꠛꠘꠤ ꠁꠍꠞꠣꠁꠟꠅ, ꠝꠣꠘꠤ ꠀꠡ꠆ꠔꠣ ꠎꠉꠔꠞ ꠇꠦꠃ ꠇꠥꠘ꠆ꠔꠣ ꠝꠣꠔꠤꠛꠣꠞ ꠡꠥꠎꠥꠉ ꠘꠣꠁ, ꠡꠛꠃ ꠀꠟ꠆ꠟꠣꠞ ꠛꠤꠌꠣꠞꠞ ꠖꠣꠠꠅ ꠙꠠꠦ।
ROM 3:20 ꠇꠣꠞꠘ ꠡꠞꠤꠅꠔ ꠀꠝꠟ ꠇꠞꠟꠦꠃ, ꠀꠟ꠆ꠟꠣꠄ ꠝꠣꠘꠡꠞꠦ ꠛꠦ-ꠇꠍꠥꠞ ꠈꠣꠟꠣꠍ ꠇꠁꠀ ꠉꠁꠘ꠆ꠘ ꠇꠞꠤꠟꠤꠛꠣ, ꠁꠟꠣ ꠇꠥꠘ꠆ꠔꠣ ꠘꠣꠄ। ꠅꠁꠟꠦ ꠡꠞꠤꠅꠔꠞ ꠝꠣꠎꠖꠤꠃ ꠝꠣꠘꠥꠡ ꠉꠥꠘꠣꠞ ꠛꠦꠙꠣꠞꠦ ꠢꠥꠡꠤꠀꠞ ꠅꠄ।
ROM 3:21 ꠅꠈꠘ ꠔ ꠀꠟ꠆ꠟꠣ ꠙꠣꠇꠦ ꠙꠕ ꠛꠣꠔꠣꠁ ꠖꠤꠍꠂꠘ, ꠡꠞꠤꠅꠔ ꠍꠣꠠꠣꠅ ꠔꠣꠁꠘ ꠇꠤꠟꠣ ꠝꠣꠘꠡꠞꠦ ꠛꠦ-ꠇꠍꠥꠞ ꠈꠣꠟꠣꠍ ꠢꠤꠡꠣꠛꠦ ꠉꠁꠘ꠆ꠘ ꠇꠞꠂꠘ। ꠀꠉꠦ ꠔꠣꠁꠘ ꠔꠃꠞꠣꠔ ꠡꠞꠤꠚ ꠀꠞ ꠘꠛꠤ ꠅꠇꠟꠞ ꠇꠤꠔꠣꠛꠅ ꠅꠃ ꠛꠦꠙꠣꠞꠦ ꠁꠡꠣꠞꠣ ꠖꠤꠍꠂꠘ।
ROM 3:22 ꠅꠃ ꠙꠕ ꠅꠁꠟ, ꠢꠎꠞꠔ ꠁꠍꠣ ꠀꠟ-ꠝꠍꠤꠞ ꠃꠙꠞꠦ ꠎꠦꠞꠣ ꠁꠝꠣꠘ ꠀꠘꠦ, ꠅꠃ ꠁꠝꠣꠘꠞ ꠝꠣꠎꠖꠤꠃ ꠀꠟ꠆ꠟꠣꠄ ꠔꠣꠞꠣꠞꠦ ꠛꠦ-ꠇꠍꠥꠞ ꠇꠁꠀ ꠉꠁꠘ꠆ꠘ ꠇꠞꠂꠘ। ꠁ ꠛꠦꠙꠣꠞꠦ ꠛꠘꠤ ꠁꠍꠞꠣꠁꠟ ꠅꠃꠇ ꠛꠣ ꠜꠤꠘ ꠎꠣꠔꠤ ꠅꠃꠇ ꠢꠇꠟꠃ ꠄꠇ ꠢꠝꠣꠘ।
ROM 3:23 ꠇꠣꠞꠘ, ꠢꠇꠟꠦꠃ ꠉꠥꠘꠣ ꠇꠞꠍꠦ, ꠀꠟ꠆ꠟꠣꠞ ꠡꠣꠘ-ꠔꠎꠟ꠆ꠟꠤꠔ ꠢꠣꠝꠣꠘꠤꠞ ꠡꠣꠝꠞ꠆ꠕ ꠇꠦꠃꠞꠞ ꠘꠣꠁ।
ROM 3:24 ꠅꠁꠟꠦ ꠁꠍꠣ ꠀꠟ-ꠝꠍꠤꠄ ꠝꠣꠘꠡꠞꠦ ꠉꠥꠘꠣꠞ ꠀꠔ ꠕꠣꠇꠤ ꠛꠣꠌꠣꠘꠤꠞ ꠛꠦꠛꠡ꠆ꠔꠣ ꠇꠞꠍꠂꠘ, ꠔꠣꠁꠘ ꠀꠟ꠆ꠟꠣꠞ ꠞꠢꠝꠔꠞ ꠖꠣꠘ ꠢꠤꠡꠣꠛꠦ ꠝꠣꠘꠡꠞꠦ ꠛꠦ-ꠇꠍꠥꠞ ꠇꠁꠀ ꠉꠁꠘ꠆ꠘ ꠇꠞꠣꠞ ꠙꠕ ꠇꠞꠍꠂꠘ।
ROM 3:25 ꠎꠦꠞꠣ ꠔꠣꠘ ꠃꠙꠞꠦ ꠁꠝꠣꠘ ꠀꠘꠦ, ꠀꠟ-ꠝꠍꠤꠄ ꠔꠣꠞꠣꠞ ꠟꠣꠉꠤ ꠘꠤꠎꠞ ꠟꠃꠞꠦ ꠇꠚꠞꠣꠞ ꠇꠥꠞꠛꠣꠘꠤ ꠖꠤꠀ ꠀꠟ꠆ꠟꠣ ꠙꠣꠇꠞꠦ ꠈꠥꠡꠤ ꠇꠞꠍꠂꠘ। ꠅꠃ ꠘꠝꠥꠘꠣꠄ ꠀꠟ꠆ꠟꠣꠄ ꠖꠦꠈꠣꠁꠍꠂꠘ, ꠎꠥꠖꠤꠅ ꠔꠣꠘ ꠘꠤꠎꠞ ꠍꠛꠞꠉꠣꠞꠤꠞ ꠟꠣꠉꠤ ꠝꠣꠘꠡꠞ ꠙꠥꠞꠣꠘꠣ ꠉꠥꠘꠣꠞ ꠡꠣꠎꠣ ꠖꠤꠔꠦ ꠖꠦꠞꠤ ꠇꠞꠞꠣ, ꠔꠦꠛꠃ ꠔꠣꠁꠘ ꠢꠇ-ꠁꠘꠍꠣꠚꠇꠣꠞꠤ।
ROM 3:26 ꠀꠞ ꠅꠈꠘ ꠔꠣꠁꠘ ꠁꠔꠣ ꠖꠦꠈꠣꠁꠍꠂꠘ, ꠎꠣꠔꠦ ꠙꠞꠝꠣꠘ ꠅꠄ, ꠔꠣꠁꠘ ꠘꠤꠎꠦ ꠢꠇ-ꠁꠘꠍꠣꠚꠇꠣꠞꠤ ꠀꠞ ꠎꠦꠞꠣ ꠀꠟ-ꠝꠍꠤꠞ ꠃꠙꠞꠦ ꠁꠝꠣꠘ ꠀꠘꠂꠘ, ꠔꠣꠞꠣꠞꠦ ꠛꠦ-ꠇꠍꠥꠞ ꠈꠣꠟꠣꠍ ꠇꠁꠀ ꠉꠁꠘ꠆ꠘ ꠇꠞꠂꠘ।
ROM 3:27 ꠄꠞꠛꠣꠖꠦꠅ ꠝꠣꠘꠡꠦ ꠛꠠꠣꠁ ꠖꠦꠈꠣꠘꠤꠞ ꠇꠥꠘ꠆ꠔꠣ ꠀꠍꠦ ꠘꠤ? ꠘꠣ, ꠇꠥꠘ꠆ꠔꠣꠃ ꠘꠣꠁ। ꠇꠦꠘꠦ ꠘꠣꠁ? ꠝꠣꠘꠡꠦ ꠡꠞꠤꠅꠔ ꠝꠣꠘꠦ ꠇꠞꠤ ꠔꠣꠞ ꠛꠠꠣꠁ ꠇꠞꠣꠞ ꠇꠥꠘ꠆ꠔꠣ ꠘꠣꠁ ꠘꠤ? ꠘꠣ, ꠀꠍꠟ ꠇꠕꠣ ꠅꠁꠟ, ꠁꠝꠣꠘꠞ ꠝꠣꠎꠦ ꠛꠠꠣꠁ ꠇꠞꠣꠞ ꠎꠣꠉꠣ ꠘꠣꠁ।
ROM 3:28 ꠀꠝꠞꠣ ꠎꠣꠘꠤ, ꠀꠟ꠆ꠟꠣꠄ ꠝꠣꠘꠡꠞꠦ ꠔꠣꠞ ꠁꠝꠣꠘꠞ ꠟꠣꠉꠤꠃ ꠛꠦ-ꠇꠍꠥꠞ ꠈꠣꠟꠣꠍ ꠇꠁꠀ ꠉꠁꠘ꠆ꠘ ꠇꠞꠂꠘ, ꠡꠞꠤꠅꠔ ꠝꠣꠘꠣꠞ ꠟꠣꠉꠤ ꠘꠣꠄ।
ROM 3:29 ꠔꠦ ꠀꠟ꠆ꠟꠣ ꠈꠣꠟꠤ ꠛꠘꠤ ꠁꠍꠞꠣꠁꠟꠞ ꠘꠤ, ꠜꠤꠘ ꠎꠣꠔꠤꠞ ꠟꠣꠉꠤꠅ ꠘꠣꠄ ꠘꠤ? ꠘꠤꠌ꠆ꠌꠄ, ꠔꠣꠁꠘ ꠜꠤꠘ ꠎꠣꠔꠤꠞꠅ ꠀꠟ꠆ꠟꠣ।
ROM 3:30 ꠇꠣꠞꠘ ꠀꠟ꠆ꠟꠣ ꠔ ꠄꠇꠎꠘꠃ। ꠔꠣꠁꠘ ꠛꠘꠤ ꠁꠍꠞꠣꠁꠟꠞꠦ ꠎꠦꠟꠣ ꠁꠝꠣꠘꠞ ꠝꠣꠎꠖꠤ ꠛꠦ-ꠇꠍꠥꠞ ꠇꠁꠀ ꠉꠁꠘ꠆ꠘ ꠇꠞꠂꠘ, ꠅꠟꠣ ꠜꠤꠘ ꠎꠣꠔꠤ ꠅꠇꠟꠞꠦꠅ ꠇꠞꠛꠣ।
ROM 3:31 ꠅꠈꠘ ꠇꠅ ꠌꠣꠁꠘ, ꠁꠝꠣꠘꠞ ꠟꠣꠉꠤ ꠀꠝꠞꠣ ꠡꠞꠤꠅꠔ ꠛꠣꠔꠤꠟ ꠇꠞꠞꠣꠝ ꠘꠤ? ꠘꠣ, ꠝꠥꠐꠦꠃ ꠘꠣ! ꠛꠞꠋ ꠀꠝꠞꠣ ꠡꠞꠤꠅꠔꠞꠦ ꠝꠎꠛꠥꠔ ꠇꠞꠤꠀꠞ।
ROM 4:1 ꠔꠦ ꠀꠝꠞꠣꠞ ꠈꠣꠘ꠆ꠖꠣꠘꠞ ꠝꠥꠟ ꠛꠣꠚ ꠢꠎꠞꠔ ꠁꠛ꠆ꠞꠣꠢꠤꠝꠞ ꠎꠤꠘ꠆ꠖꠦꠉꠤꠞ ꠛꠦꠙꠣꠞꠦ ꠇꠤꠔꠣ ꠇꠁꠔꠣꠝ? ꠔꠣꠁꠘ ꠇꠤꠔꠣ ꠙꠣꠁꠟꠣ?
ROM 4:2 ꠡꠞꠤꠅꠔ ꠝꠣꠘꠣꠞ ꠟꠣꠉꠤꠃ ꠎꠥꠖꠤ ꠔꠣꠘꠞꠦ ꠛꠦ-ꠇꠍꠥꠞ ꠇꠁꠀ ꠉꠘꠣ ꠅꠄ, ꠔꠦ ꠔꠣꠁꠘ ꠘꠤꠎꠞ ꠛꠠꠣꠁ ꠖꠦꠈꠣꠁꠔꠣ ꠙꠣꠞꠂꠘ, ꠅꠁꠟꠦ ꠀꠟ꠆ꠟꠣꠞ ꠖꠞꠛꠣꠞꠅ ꠔ ꠘꠣꠄ।
ROM 4:3 ꠇꠣꠞꠘ ꠀꠟ꠆ꠟꠣꠞ ꠇꠣꠟꠣꠝꠅ ꠀꠍꠦ, “ꠁꠛ꠆ꠞꠣꠢꠤꠝꠦ ꠀꠟ꠆ꠟꠣꠞ ꠃꠙꠞꠦ ꠁꠝꠣꠘ ꠀꠘꠣꠄ, ꠀꠟ꠆ꠟꠣꠄ ꠔꠣꠘꠞꠦ ꠛꠦ-ꠇꠍꠥꠞ ꠈꠣꠟꠣꠍ ꠇꠁꠀ ꠉꠁꠘ꠆ꠘ ꠇꠞꠟꠣ।”
ROM 4:4 ꠇꠣꠝꠟꠣꠄ ꠇꠣꠝ ꠇꠞꠤꠀ ꠎꠦ ꠛꠦꠔꠘ ꠙꠣꠄ, ꠁꠇꠐꠣ ꠇꠥꠘꠥ ꠖꠣꠘ ꠘꠣꠄ, ꠁꠇꠐꠣ ꠔꠣꠞ ꠙꠣꠅꠘꠣ ꠝꠎꠥꠞꠤ।
ROM 4:5 ꠅꠁꠟꠦ ꠇꠥꠘꠥ ꠝꠣꠘꠡꠦ ꠎꠥꠖꠤ ꠘꠤꠎꠞ ꠀꠝꠟꠞ ꠃꠙꠞꠦ ꠜꠞꠡꠣ ꠘꠣ ꠇꠞꠤꠀ, ꠈꠣꠟꠤ ꠔꠣꠘ ꠃꠙꠞꠦ ꠁꠝꠣꠘ ꠀꠘꠦ, ꠎꠦꠁꠘ ꠉꠥꠘꠣꠉꠣꠞꠞꠦ ꠛꠦ-ꠇꠍꠥꠞ ꠇꠁꠀ ꠉꠁꠘ꠆ꠘ ꠇꠞꠂꠘ, ꠔꠦ ꠔꠣꠞ ꠁꠝꠣꠘꠞ ꠟꠣꠉꠤ ꠢꠦ ꠈꠣꠟꠣꠍ ꠙꠣꠄ।
ROM 4:6 ꠀꠞ ꠘꠤꠎ ꠀꠝꠟ ꠍꠣꠠꠣ ꠀꠟ꠆ꠟꠣ ꠙꠣꠇꠦ ꠎꠣꠞꠦ ꠛꠦ-ꠇꠍꠥꠞ ꠇꠁꠀ ꠉꠁꠘ꠆ꠘ ꠇꠞꠍꠂꠘ, ꠢꠎꠞꠔ ꠖꠣꠃꠖꠦꠅ ꠔꠣꠞꠦ ꠘꠦꠇ-ꠇꠙꠣꠟꠤ ꠇꠁꠍꠂꠘ। ꠙꠛꠤꠔ꠆ꠞ ꠎꠛꠥꠞ ꠡꠞꠤꠚꠅ ꠔꠣꠁꠘ ꠇꠁꠞꠣ,
ROM 4:7 ꠘꠦꠇ-ꠇꠙꠣꠟꠤ ꠔꠣꠞꠣꠃ, ꠎꠦꠞꠣꠞ ꠘꠣꠚꠞꠝꠣꠘꠤꠞꠦ ꠝꠣꠚ ꠇꠞꠣ ꠅꠁꠍꠦ, ꠝꠣꠛꠥꠖ ꠝꠃꠟꠣꠄ ꠎꠦꠞꠣꠞ ꠉꠥꠘꠣꠞꠦ ꠀꠞ ꠢꠤꠡꠣꠛꠅ ꠗꠞꠔꠣ ꠘꠣꠄ।
ROM 4:8 ꠘꠦꠇ-ꠇꠙꠣꠟꠤ ꠢꠃ ꠎꠘ, ꠎꠣꠞ ꠉꠥꠘꠣꠞꠦ ꠀꠟ꠆ꠟꠣꠄ ꠔꠣꠞ ꠀꠝꠟ-ꠘꠣꠝꠣ ꠕꠣꠇꠤ ꠇꠣꠐꠤ ꠖꠤꠍꠂꠘ।
ROM 4:9 ꠔꠦ ꠘꠦꠇ-ꠇꠙꠣꠟꠤ ꠈꠣꠟꠤ ꠔꠣꠞꠣꠞꠦꠃ ꠇꠅꠀ ꠅꠁꠍꠦ ꠘꠤ, ꠎꠦꠞꠣꠞ ꠝꠍꠟꠝꠣꠘꠤ ꠇꠣꠝ ꠇꠞꠣꠁꠟ ꠅꠁꠍꠦ? ꠝꠍꠟꠝꠣꠘꠤ ꠘꠣ ꠇꠞꠣꠁꠟ ꠝꠣꠘꠡꠞꠦꠅ ꠇꠅꠀ ꠅꠁꠍꠦ ꠘꠣ ꠘꠤ? ꠅꠄ, ꠔꠣꠞꠣꠞꠦꠅ ꠘꠦꠇ-ꠇꠙꠣꠟꠤ ꠇꠅꠀ ꠅꠁꠍꠦ। ꠇꠣꠞꠘ ꠀꠟ꠆ꠟꠣꠞ ꠇꠣꠟꠣꠝꠅ ꠙꠣꠁꠍꠤ, ꠢꠎꠞꠔ ꠁꠛ꠆ꠞꠣꠢꠤꠝꠞ ꠁꠝꠣꠘꠞ ꠟꠣꠉꠤꠃ, ꠀꠟ꠆ꠟꠣꠄ ꠔꠣꠘꠞꠦ ꠛꠦ-ꠇꠍꠥꠞ ꠈꠣꠟꠣꠍ ꠇꠁꠀ ꠉꠁꠘ꠆ꠘ ꠇꠞꠟꠣ।
ROM 4:10 ꠇꠥꠘ ꠡꠝꠄ ꠇꠞꠟꠣ? ꠝꠍꠟꠝꠣꠘꠤ ꠇꠞꠣꠘꠤꠞ ꠀꠉꠦ, ꠘꠣ ꠛꠣꠖꠦ? ꠘꠤꠌ꠆ꠌꠄ, ꠝꠍꠟꠝꠣꠘꠤ ꠇꠞꠣꠘꠤꠞ ꠀꠉꠦꠃ ꠅꠁꠍꠟꠣ।
ROM 4:11 ꠝꠍꠟꠝꠣꠘꠤ ꠇꠣꠝ ꠇꠞꠣꠘꠤꠞ ꠀꠉꠦꠃ ꠀꠟ꠆ꠟꠣꠄ ꠔꠣꠘꠞꠦ ꠁꠝꠣꠘꠞ ꠟꠣꠉꠤ ꠛꠦ-ꠇꠍꠥꠞ ꠇꠁꠀ ꠉꠁꠘ꠆ꠘ ꠇꠞꠍꠟꠣ, ꠀꠞ ꠝꠍꠟꠝꠣꠘꠤ ꠇꠣꠝ ꠇꠞꠣꠘꠤ ꠀꠍꠤꠟ ꠄꠞ ꠙꠞꠝꠣꠘ ꠛꠣ ꠘꠤꠡꠣꠘꠣ। ꠄ ꠕꠣꠇꠤ ꠛꠥꠎꠣ ꠎꠣꠄ, ꠝꠍꠟꠝꠣꠘꠤ ꠘꠣ ꠖꠤꠟꠦꠅ, ꠈꠣꠟꠤ ꠁꠝꠣꠘꠞ ꠟꠣꠉꠤ ꠎꠦꠞꠣꠞꠦ ꠛꠦ-ꠇꠍꠥꠞ ꠈꠣꠟꠣꠍ ꠇꠁꠀ ꠗꠞꠣ ꠅꠄ, ꠔꠣꠞꠣꠞ ꠝꠥꠟ ꠛꠣꠚ ꠅꠁꠟꠣ ꠢꠎꠞꠔ ꠁꠛ꠆ꠞꠣꠢꠤꠝ।
ROM 4:12 ꠝꠍꠟꠝꠣꠘꠤ ꠇꠞꠣꠘꠤꠞ ꠀꠉꠦ ꠢꠎꠞꠔ ꠁꠛ꠆ꠞꠣꠢꠤꠝꠞ ꠁꠝꠣꠘ ꠎꠦꠟꠣꠈꠣꠘ ꠀꠍꠤꠟ, ꠝꠍꠟꠝꠣꠘꠤ ꠇꠞꠣꠁꠀ ꠎꠔ ꠝꠣꠘꠡꠦ ꠅꠃ ꠁꠝꠣꠘꠦ ꠌꠟꠦ, ꠔꠣꠞꠣꠞꠅ ꠝꠥꠟ ꠛꠣꠚ ꠅꠁꠟꠣ ꠅꠃ ꠁꠛ꠆ꠞꠣꠢꠤꠝ।
ROM 4:13 ꠀꠟ꠆ꠟꠣ ꠙꠣꠇꠦ ꠅꠀꠖꠣ ꠇꠞꠍꠟꠣ, ꠢꠎꠞꠔ ꠁꠛ꠆ꠞꠣꠢꠤꠝ ꠀꠞ ꠔꠣꠘ ꠈꠣꠘ꠆ꠖꠣꠘꠞꠦ ꠁ ꠖꠥꠘꠤꠀꠞ ꠖꠈꠟꠖꠣꠞꠤ ꠖꠤꠛꠣ। ꠡꠞꠤꠅꠔ ꠝꠣꠘꠣꠞ ꠟꠣꠉꠤ ꠁ ꠅꠀꠖꠣ ꠇꠞꠣ ꠅꠁꠍꠦ ꠘꠣ, ꠛꠞꠋ ꠁꠛ꠆ꠞꠣꠢꠤꠝꠞ ꠁꠝꠣꠘꠞ ꠟꠣꠉꠤꠃ ꠔꠣꠘꠞꠦ ꠛꠦ-ꠇꠍꠥꠞ ꠈꠣꠟꠣꠍ ꠇꠁꠀ ꠉꠁꠘ꠆ꠘ ꠇꠞꠤꠀ ꠅꠃ ꠅꠀꠖꠣ ꠇꠞꠍꠟꠣ।
ROM 4:14 ꠡꠞꠤꠅꠔ ꠝꠣꠘꠤꠀ ꠇꠦꠃ ꠎꠥꠖꠤ ꠖꠈꠟꠖꠣꠞꠤ ꠙꠣꠁꠟꠣꠄ, ꠔꠦ ꠔ ꠁꠝꠣꠘ ꠛꠦꠇꠣꠝꠣ ꠛꠘꠤꠎꠣꠄ ꠀꠞ ꠀꠟ꠆ꠟꠣꠞ ꠅꠀꠖꠣꠞꠅ ꠇꠥꠘꠥ ꠖꠣꠝ ꠞꠄ ꠘꠣ।
ROM 4:15 ꠡꠞꠤꠅꠔꠦ ꠔ ꠀꠟ꠆ꠟꠣꠞ ꠉꠎꠛ ꠟꠣꠝꠣꠄ। ꠀꠍꠟ ꠇꠕꠣ ꠅꠁꠟ, ꠎꠦꠈꠣꠘꠅ ꠡꠞꠤꠅꠔ ꠘꠣꠁ, ꠁꠘꠅ ꠡꠞꠤꠅꠔ ꠜꠋꠉꠞ ꠇꠕꠣꠅ ꠘꠣꠁ।
ROM 4:16 ꠄꠞꠟꠣꠉꠤ ꠁ ꠅꠀꠖꠣ ꠈꠣꠟꠤ ꠝꠣꠘꠡꠞ ꠁꠝꠣꠘꠞ ꠝꠣꠎꠖꠤ ꠙꠥꠞꠣ ꠇꠞꠣ ꠅꠄ, ꠎꠣꠔꠦ ꠁꠐꠣ ꠀꠟ꠆ꠟꠣꠞ ꠞꠢꠝꠔꠞ ꠖꠣꠘ ꠢꠤꠡꠣꠛꠦ ꠞꠄ। ꠔꠦ ꠁꠛ꠆ꠞꠣꠢꠤꠝꠞ ꠈꠣꠘ꠆ꠖꠣꠘꠞ ꠉꠦꠍꠦ ꠎꠦ ꠅꠀꠖꠣ ꠇꠞꠣ ꠅꠁꠍꠦ, ꠁꠈꠣꠘ ꠘꠤꠌ꠆ꠌꠄ ꠙꠥꠞꠣ ꠇꠞꠣ ꠅꠁꠛ। ꠈꠣꠟꠤ ꠡꠞꠤꠅꠔ ꠝꠣꠘꠞꠣ ꠅꠇꠟꠞ ꠟꠣꠉꠤꠃ ꠙꠥꠞꠘ ꠇꠞꠣ ꠅꠁꠔ ꠘꠣꠄ, ꠎꠦꠞꠣ ꠁꠛ꠆ꠞꠣꠢꠤꠝꠞ ꠁꠝꠣꠘꠞ ꠟꠉꠦ ꠡꠞꠤꠇ, ꠔꠣꠞꠣꠞ ꠟꠣꠉꠤꠅ ꠁ ꠅꠀꠖꠣ ꠙꠥꠞꠣ ꠇꠞꠣ ꠅꠄ।
ROM 4:17 ꠀꠟ꠆ꠟꠣꠞ ꠇꠣꠟꠣꠝꠅ ꠎꠦꠟꠣ ꠟꠦꠈꠣ ꠀꠍꠦ, “ꠀꠝꠤ ꠔꠥꠝꠣꠞꠦ ꠛꠃꠔ ꠎꠣꠔꠤꠞ ꠝꠥꠟ ꠛꠣꠚ ꠛꠣꠘꠣꠁꠟꠣꠝ।” ꠅꠃ ꠢꠤꠡꠣꠛꠦ ꠀꠟ꠆ꠟꠣꠞ ꠘꠎꠞꠅ ꠁꠛ꠆ꠞꠣꠢꠤꠝ ꠅꠁꠟꠣ ꠀꠝꠞꠣ ꠢꠇꠟꠞ ꠝꠥꠟ ꠛꠣꠚ। ꠎꠦꠁꠘ ꠝꠞꠣꠞꠦ ꠎꠤꠘ꠆ꠖꠦꠉꠤ ꠖꠦꠁꠘ ꠀꠞ ꠎꠦꠔꠣ ꠅꠀꠞ ꠘꠣꠄ, ꠅꠔꠣ ꠅꠀꠁꠔꠣ ꠙꠣꠞꠂꠘ, ꠢꠃ ꠀꠟ꠆ꠟꠣꠞ ꠃꠙꠞꠦ ꠔꠣꠁꠘ ꠁꠝꠣꠘ ꠀꠘꠍꠟꠣ।
ROM 4:18 ꠅꠃ ꠁꠛ꠆ꠞꠣꠢꠤꠝꠦ ꠎꠦꠛꠟꠣ ꠀꠅꠟꠣꠖ ꠙꠣꠅꠀꠞ ꠇꠥꠘꠥ ꠀꠡꠣ ꠇꠞꠣꠞ ꠇꠕꠣ ꠘꠣꠄ, ꠢꠃ ꠡꠝꠄꠅ ꠔꠣꠁꠘ ꠀꠟ꠆ꠟꠣꠞ ꠃꠙꠞꠦ ꠜꠞꠡꠣ ꠇꠞꠤꠀ ꠁꠝꠣꠘꠦ ꠝꠎꠛꠥꠔ ꠞꠁꠍꠂꠘ। ꠀꠟ꠆ꠟꠣꠄ ꠔꠣꠘꠞꠦ ꠇꠁꠍꠟꠣ, “ꠔꠥꠝꠣꠞ ꠈꠣꠘ꠆ꠖꠣꠘꠞꠦ ꠀꠝꠤ ꠀꠍꠝꠣꠘꠞ ꠔꠦꠞꠣꠞ ꠟꠣꠈꠣꠘ ꠛꠦꠢꠤꠡꠣꠛ ꠇꠞꠝꠥ।” ꠀꠞ ꠅꠃ ꠇꠕꠣꠞ ꠃꠙꠞꠦ ꠔꠣꠁꠘ ꠁꠝꠣꠘ ꠀꠘꠟꠣ।
ROM 4:19 ꠄꠇ-ꠡ ꠛꠍꠞ ꠛꠄꠅꠡꠞ ꠁꠛ꠆ꠞꠣꠢꠤꠝꠦ ꠎꠥꠖꠤꠅ ꠛꠥꠎꠍꠤꠟꠣ, ꠢꠥꠞꠥꠔ꠆ꠔꠣ ꠎꠘꠝ ꠖꠦꠅꠀꠞ ꠈꠦꠝꠔꠣ ꠀꠞ ꠔꠣꠘ ꠘꠣꠁ, ꠔꠣꠘ ꠛꠤꠛꠤ ꠍꠣꠄꠞꠣꠞꠅ ꠢꠥꠞꠥꠔ꠆ꠔꠣ ꠅꠀꠞ ꠛꠄꠅꠡ ꠡꠦꠡ ꠅꠁꠉꠦꠍꠦ, ꠔꠦꠛꠃ ꠔꠣꠘ ꠁꠝꠣꠘ ꠝꠎꠛꠥꠔ ꠀꠍꠤꠟ।
ROM 4:20 ꠀꠟ꠆ꠟꠣꠞ ꠅꠀꠖꠣꠞ ꠛꠦꠙꠣꠞꠦ ꠔꠣꠘ ꠝꠘꠅ ꠇꠥꠘꠥ ꠡꠘ꠆ꠖꠄ ꠀꠁꠍꠦ ꠘꠣ, ꠛꠞꠋ ꠔꠣꠁꠘ ꠁꠝꠣꠘꠦ ꠀꠞꠅ ꠝꠎꠛꠥꠔ ꠅꠁꠀ ꠀꠟ꠆ꠟꠣꠞ ꠔꠣꠞꠤꠚ ꠇꠞꠟꠣ।
ROM 4:21 ꠁꠛ꠆ꠞꠣꠢꠤꠝꠦ ꠙꠥꠞꠣꠙꠥꠞ ꠄꠇꠤꠘ ꠇꠞꠟꠣ, ꠀꠟ꠆ꠟꠣꠄ ꠎꠦ ꠅꠀꠖꠣ ꠇꠞꠍꠂꠘ, ꠁꠔꠣ ꠙꠥꠞꠣ ꠇꠞꠣꠞ ꠈꠦꠝꠔꠣꠅ ꠔꠣꠘ ꠀꠍꠦ।
ROM 4:22 ꠅꠃ ꠇꠣꠞꠘꠦꠃ ꠔꠣꠘ ꠁꠝꠣꠘꠞ ꠟꠣꠉꠤ ꠔꠣꠘꠞꠦ ꠛꠦ-ꠇꠍꠥꠞ ꠇꠁꠀ ꠉꠁꠘ꠆ꠘ ꠇꠞꠣ ꠅꠁꠍꠤꠟ।
ROM 4:23 “ꠛꠦ-ꠇꠍꠥꠞ ꠇꠁꠀ ꠉꠁꠘ꠆ꠘ ꠇꠞꠣ ꠅꠁꠍꠤꠟ,” ꠁꠈꠣꠘ ꠈꠣꠟꠤ ꠁꠛ꠆ꠞꠣꠢꠤꠝꠞ ꠟꠣꠉꠤ ꠟꠦꠈꠣ ꠅꠁꠍꠦ ꠘꠣ,
ROM 4:24 ꠀꠝꠞꠣꠞ ꠟꠣꠉꠤꠅ ꠟꠦꠈꠣ ꠅꠁꠍꠦ। ꠁꠝꠣꠘꠞ ꠟꠣꠉꠤꠃ ꠀꠟ꠆ꠟꠣꠄ ꠀꠝꠞꠣꠞꠦ ꠛꠦ-ꠇꠍꠥꠞ ꠇꠁꠀ ꠉꠁꠘ꠆ꠘ ꠇꠞꠛꠣ, ꠇꠣꠞꠘ ꠎꠦ ꠀꠟ꠆ꠟꠣꠄ ꠀꠝꠞꠣꠞ ꠝꠣꠟꠤꠇ ꠁꠍꠣꠞꠦ ꠝꠥꠞ꠆ꠖꠣ ꠕꠣꠇꠤ ꠎꠤꠘ꠆ꠖꠣ ꠇꠞꠍꠟꠣ, ꠀꠝꠞꠣ ꠔꠣꠘ ꠃꠙꠞꠦꠃ ꠁꠝꠣꠘ ꠀꠘꠍꠤ।
ROM 4:25 ꠀꠝꠞꠣꠞ ꠉꠥꠘꠣꠞ ꠇꠚꠞꠣ ꠢꠤꠡꠣꠛꠦ ꠅꠃ ꠁꠍꠣꠞꠦ ꠝꠃꠔꠞ ꠀꠔꠅ ꠔꠥꠟꠤ ꠖꠦꠅꠀ ꠅꠁꠍꠤꠟ, ꠀꠞ ꠀꠝꠞꠣꠞꠦ ꠛꠦ-ꠇꠍꠥꠞ ꠈꠣꠟꠣꠍ ꠇꠁꠀ ꠉꠁꠘ꠆ꠘ ꠇꠞꠣꠞ ꠟꠣꠉꠤ ꠔꠣꠘꠞꠦ ꠝꠥꠞ꠆ꠖꠣ ꠕꠣꠇꠤ ꠎꠤꠘ꠆ꠖꠣ ꠇꠞꠣ ꠅꠁꠍꠤꠟ।
ROM 5:1 ꠁꠝꠣꠘꠞ ꠝꠣꠎꠖꠤ ꠀꠝꠞꠣꠞꠦ ꠛꠦ-ꠇꠍꠥꠞ ꠈꠣꠟꠣꠍ ꠇꠁꠀ ꠉꠁꠘ꠆ꠘ ꠇꠞꠣ ꠅꠁꠍꠦ, ꠉꠔꠤꠇꠦ ꠝꠣꠟꠤꠇ ꠁꠍꠣ ꠀꠟ-ꠝꠍꠤꠞ ꠃꠍꠤꠟ꠆ꠟꠣꠄ ꠀꠟ꠆ꠟꠣ ꠙꠣꠇ ꠀꠞ ꠀꠝꠞꠣꠞ ꠝꠣꠎꠦ ꠡꠥ-ꠡꠝ꠆ꠙꠞ꠆ꠇ ꠛꠅꠀꠁꠟ ꠅꠁꠍꠦ।
ROM 5:2 ꠅꠃ ꠎꠦ ꠞꠢꠝꠔꠞ ꠔꠟꠦ ꠀꠝꠞꠣ ꠀꠍꠤ, ꠀꠟ-ꠝꠍꠤꠄ ꠀꠝꠞꠣꠞꠦ ꠁ ꠎꠣꠉꠣꠔ ꠀꠘꠤꠀ ꠙꠃꠍꠣꠁꠍꠂꠘ। ꠄꠞꠟꠣꠉꠤ ꠀꠟ꠆ꠟꠣꠞ ꠝꠢꠤꠝꠣ ꠙꠣꠅꠀꠞ ꠀꠡꠣꠄ ꠀꠝꠞꠣꠞ ꠝꠘ ꠅꠈꠘ ꠘꠤꠌ꠆ꠌꠤꠔ ꠈꠥꠡꠤꠄ ꠜꠞꠤ ꠉꠦꠍꠦ।
ROM 5:3 ꠈꠣꠟꠤ ꠁꠈꠣꠘ ꠘꠣꠄ, ꠀꠝꠞꠣ ꠖꠥꠈ-ꠇꠡ꠆ꠐꠞ ꠝꠣꠎꠦꠅ ꠈꠥꠡꠤ-ꠛꠣꠡꠤ ꠇꠞꠞꠣꠝ। ꠇꠣꠞꠘ ꠖꠥꠈ-ꠇꠡ꠆ꠐꠄ ꠍꠛꠞ ꠀꠘꠦ,
ROM 5:4 ꠍꠛꠞꠦ ꠝꠦꠅꠀ ꠚꠟꠦ, ꠅꠃ ꠝꠦꠅꠀꠄ ꠀꠡꠣ-ꠜꠞꠡꠣ ꠀꠘꠦ,
ROM 5:5 ꠀꠞ ꠅꠃ ꠀꠡꠣ-ꠜꠞꠡꠣ ꠛꠦꠇꠣꠝꠣ ꠎꠣꠄ ꠘꠣ। ꠇꠣꠞꠘ ꠀꠟ꠆ꠟꠣꠄ ꠀꠝꠞꠣꠞꠦ ꠎꠦ ꠙꠣꠇ ꠞꠥꠢꠥ ꠖꠤꠍꠂꠘ, ꠁ ꠙꠣꠇ ꠞꠥꠢꠦ ꠀꠝꠞꠣꠞ ꠖꠤꠟꠞ ꠝꠣꠎꠦ ꠀꠟ꠆ꠟꠣꠁ ꠝꠢꠛ꠆ꠛꠔ ꠎꠘꠝꠣꠄ।
ROM 5:6 ꠀꠝꠞꠣ ꠔ ꠇꠝꠎꠥꠞ-ꠟꠣꠌꠣꠞ ꠀꠍꠟꠣꠝ, ꠡꠑꠤꠇ ꠡꠝꠄꠄ ꠀꠝꠞꠣꠞ ꠟꠣꠈꠣꠘ ꠉꠥꠘꠣꠉꠣꠞꠞꠦ ꠛꠣꠌꠣꠘꠤꠞ ꠟꠣꠉꠤ, ꠀꠟ-ꠝꠍꠤꠄ ꠘꠤꠎꠞ ꠎꠣꠘ ꠇꠥꠞꠛꠣꠘꠤ ꠖꠤꠟꠣ।
ROM 5:7 ꠇꠥꠘꠥ ꠙꠞꠦꠎꠉꠣꠞ ꠝꠣꠘꠡꠞ ꠟꠣꠉꠤ ꠡꠣꠗꠣꠞꠘꠔ ꠇꠦꠃ ꠎꠣꠘ ꠖꠤꠟꠣꠁꠔ ꠌꠣꠄ ꠘꠣ, ꠔꠣ-ꠅ ꠈꠥꠛ ꠜꠣꠟꠣ ꠎꠘꠞ ꠟꠣꠉꠤ ꠀꠈꠔꠣ ꠇꠦꠃ ꠖꠤꠟꠦꠅ ꠖꠤꠟꠣꠁꠔ ꠙꠣꠞꠦ।
ROM 5:8 ꠅꠁꠟꠦ ꠀꠝꠞꠣ ꠉꠥꠘꠣꠉꠣꠞ ꠢꠣꠟꠔꠦꠃ ꠀꠟ-ꠝꠍꠤꠄ ꠀꠝꠞꠣꠞ ꠟꠣꠉꠤ ꠘꠤꠎꠞ ꠎꠣꠘ ꠇꠥꠞꠛꠣꠘꠤ ꠖꠤꠍꠂꠘ। ꠅꠈꠣꠘ ꠕꠣꠇꠤ ꠙꠞꠝꠣꠘ ꠝꠤꠟꠦ, ꠀꠟ꠆ꠟꠣꠄ ꠀꠝꠞꠣꠞꠦ ꠇꠔ ꠝꠣꠄꠀ ꠇꠞꠂꠘ।
ROM 5:9 ꠀꠞ ꠀꠟ-ꠝꠍꠤꠞ ꠇꠥꠞꠛꠣꠘꠤꠞ ꠃꠍꠤꠟ꠆ꠟꠣꠄ ꠎꠦꠛꠟꠣ ꠛꠦ-ꠇꠍꠥꠞ ꠈꠣꠟꠣꠍ ꠇꠁꠀ ꠉꠁꠘ꠆ꠘ ꠅꠁꠍꠤ, ꠔꠦ ꠅꠈꠘ ꠀꠟ-ꠝꠍꠤꠞ ꠝꠣꠎꠖꠤ ꠀꠝꠞꠣ ꠀꠟ꠆ꠟꠣꠞ ꠡꠣꠎꠣ ꠕꠣꠇꠤꠅ ꠞꠦꠢꠣꠁ ꠙꠣꠁꠝꠥ, ꠁꠐꠣ ꠔ ꠡꠥꠟ꠆ꠟꠀꠘꠣ ꠘꠤꠌ꠆ꠌꠤꠔ।
ROM 5:10 ꠀꠝꠞꠣ ꠀꠉꠦ ꠀꠟ꠆ꠟꠣꠞ ꠖꠥꠡꠝꠘ ꠀꠍꠟꠣꠝ, ꠢꠃ ꠡꠝꠄ ꠔꠣꠘ ꠈꠣꠍ ꠝꠣꠄꠀꠞ ꠎꠘ ꠁꠛꠘꠥꠟ꠆ꠟꠣꠞ ꠝꠃꠔꠞ ꠃꠍꠤꠟ꠆ꠟꠣꠄ, ꠔꠣꠘ ꠟꠉꠦ ꠀꠝꠞꠣꠞ ꠝꠤꠟꠘ ꠅꠁꠍꠦ। ꠔꠦ ꠔ ꠀꠟ-ꠝꠍꠤꠞ ꠎꠤꠘ꠆ꠖꠣ ꠅꠁꠀ ꠃꠑꠣꠞ ꠝꠣꠎꠖꠤ ꠅꠈꠘ ꠀꠞꠅ ꠛꠦꠡꠤ ꠘꠤꠌ꠆ꠌꠤꠔ, ꠀꠝꠞꠣ ꠘꠣꠎꠣꠔ ꠙꠣꠁꠝꠥ।
ROM 5:11 ꠈꠣꠟꠤ ꠁꠈꠣꠘ ꠘꠣꠄ, ꠎꠣꠞ ꠃꠍꠤꠟ꠆ꠟꠣꠄ ꠅꠃ ꠝꠤꠟꠘ ꠅꠁꠍꠦ, ꠀꠝꠞꠣꠞ ꠝꠣꠟꠤꠇ ꠅꠃ ꠁꠍꠣ ꠀꠟ-ꠝꠍꠤꠞ ꠝꠣꠎꠖꠤ ꠅꠈꠘ ꠀꠟ꠆ꠟꠣꠞ ꠘꠣꠝꠦ ꠈꠥꠡꠤ-ꠛꠣꠡꠤꠅ ꠇꠞꠞꠣꠝ।
ROM 5:12 ꠄꠇꠎꠘ ꠝꠣꠘꠡꠞ ꠝꠣꠎꠖꠤ ꠖꠥꠘꠤꠀꠁꠔ ꠉꠥꠘꠣ ꠀꠁꠀ ꠢꠣꠝꠣꠁꠍꠤꠟ, ꠀꠞ ꠅꠃ ꠉꠥꠘꠣꠞ ꠝꠣꠎꠖꠤ ꠝꠃꠔꠅ ꠀꠁꠍꠤꠟ। ꠛꠣꠖꠦ ꠢꠇꠟ ꠝꠣꠘꠡꠦꠃ ꠉꠥꠘꠣ ꠇꠞꠍꠦ, ꠄꠞꠟꠣꠉꠤ ꠢꠇꠟꠞ ꠟꠣꠉꠤꠃ ꠝꠃꠔ ꠀꠁꠀ ꠀꠎꠤꠍꠦ।
ROM 5:13 ꠢꠎꠞꠔ ꠝꠥꠍꠣꠞ ꠡꠞꠤꠅꠔ ꠘꠣꠎꠤꠟꠞ ꠀꠉꠦꠅ ꠖꠥꠘꠤꠀꠁꠔ ꠉꠥꠘꠣ ꠀꠍꠤꠟ। ꠅꠁꠟꠦ ꠡꠞꠤꠅꠔ ꠀꠍꠤꠟ ꠘꠣ ꠉꠔꠤꠇꠦ ꠉꠥꠘꠣꠞꠦ ꠢꠤꠡꠣꠛꠅ ꠗꠞꠣ ꠅꠁꠔ ꠘꠣ।
ROM 5:14 ꠔꠣ-ꠅ ꠛꠣꠛꠣ ꠀꠖꠝ ꠕꠣꠇꠤ ꠝꠥꠍꠣ ꠘꠛꠤꠞ ꠀꠝꠟ ꠙꠞ꠆ꠎꠘ꠆ꠔ ꠎꠦꠞꠣ ꠀꠖꠝꠞ ꠟꠣꠈꠣꠘ ꠡꠞꠣꠡꠞꠤ ꠀꠟ꠆ꠟꠣꠞ ꠢꠥꠇꠥꠝꠞꠦ ꠜꠣꠋꠉꠤꠍꠦ ꠘꠣ, ꠔꠣꠞꠣꠞ ꠃꠙꠞꠦꠅ ꠝꠃꠔꠦ ꠛꠦꠐꠣꠉꠤꠞꠤ ꠇꠞꠍꠦ। ꠔꠦ ꠇꠥꠘꠥ ꠇꠥꠘꠥ ꠇꠣꠞꠘꠦ ꠛꠣꠛꠣ ꠀꠖꠝꠞ ꠟꠉꠦ, ꠛꠣꠖꠦ ꠔꠡꠞꠤꠚ ꠀꠘꠣ ꠅꠃ ꠀꠟ-ꠝꠍꠤꠞꠅ ꠝꠤꠟ ꠀꠍꠤꠟ।
ROM 5:15 ꠅꠁꠟꠦ ꠛꠣꠛꠣ ꠀꠖꠝꠞ ꠘꠣꠚꠞꠝꠣꠘꠤ ꠀꠞ ꠀꠟ꠆ꠟꠣꠞ ꠞꠢꠝꠔꠞ ꠖꠣꠘꠞ ꠝꠣꠎꠦ ꠛꠃꠔ ꠔꠚꠣꠔ ꠀꠍꠦ। ꠢꠃ ꠄꠇꠎꠘꠞ ꠘꠣꠚꠞꠝꠣꠘꠤꠞ ꠖꠣꠄ ꠛꠃꠔꠞ ꠟꠣꠉꠤ ꠝꠃꠔ ꠀꠁꠟ ꠀꠞ ꠀꠞꠇ ꠎꠘ, ꠝꠣꠘꠤ ꠁꠍꠣ ꠀꠟ-ꠝꠍꠤꠞ ꠝꠦꠢꠦꠞꠛꠣꠘꠤꠞ ꠝꠣꠎꠖꠤ ꠎꠦ ꠞꠢꠝꠔꠤ ꠖꠣꠘ ꠀꠁꠟ, ꠀꠟ꠆ꠟꠣꠞ ꠁ ꠞꠢꠝꠔ ꠀꠞꠅ ꠛꠃꠔ ꠛꠦꠡꠤ ꠛꠣꠠꠤ ꠉꠦꠟ।
ROM 5:16 ꠀꠞ ꠄꠇꠎꠘ ꠝꠣꠘꠡꠞ ꠉꠥꠘꠣꠄ ꠎꠦꠟꠣ ꠚꠟ ꠖꠦꠈꠣ ꠉꠦꠟ, ꠀꠟ꠆ꠟꠣꠞ ꠞꠢꠝꠔꠞ ꠖꠣꠘ ꠔ ꠁꠟꠣꠈꠣꠘ ꠘꠣꠄ। ꠈꠣꠟꠤ ꠄꠇꠎꠘ ꠝꠣꠘꠡꠞ ꠉꠥꠘꠣꠞ ꠟꠣꠉꠤ ꠛꠃꠔ ꠝꠣꠘꠡꠞꠦ ꠖꠥꠡꠤ ꠡꠣꠁꠛꠡ꠆ꠔ ꠇꠞꠣ ꠅꠁꠍꠦ। ꠅꠁꠟꠦ ꠛꠃꠔ ꠛꠦꠡꠤ ꠙꠞꠤꠝꠣꠘꠦ ꠉꠥꠘꠣ ꠇꠞꠣꠞ ꠛꠣꠖꠦꠅ ꠀꠟ꠆ꠟꠣꠞ ꠅꠃ ꠞꠢꠝꠔꠦ ꠛꠃꠔ ꠎꠘꠞꠦ ꠛꠦ-ꠇꠍꠥꠞ ꠈꠣꠟꠣꠍ ꠇꠁꠀ ꠉꠁꠘ꠆ꠘ ꠇꠞꠣ ꠅꠁꠍꠦ।
ROM 5:17 ꠄꠇꠎꠘ ꠝꠣꠘꠡꠞ ꠉꠥꠘꠣꠞ ꠟꠣꠉꠤ ꠎꠦꠛꠟꠣ ꠝꠃꠔꠦ ꠀꠝꠞꠣꠞ ꠃꠙꠞꠦ ꠛꠦꠐꠣꠉꠤꠞꠤ ꠇꠞꠍꠦ, ꠔꠦ ꠖꠥꠍꠞꠣ ꠀꠞꠇ ꠎꠘ, ꠝꠣꠘꠤ ꠁꠍꠣ ꠀꠟ-ꠝꠍꠤꠞ ꠝꠣꠎꠖꠤ ꠀꠝꠞꠣ ꠎꠦꠞꠣ ꠀꠟ꠆ꠟꠣꠞ ꠞꠢꠝꠔꠦ ꠛꠦ-ꠇꠍꠥꠞ ꠈꠣꠟꠣꠍ ꠢꠤꠡꠣꠛꠦ ꠉꠁꠘ꠆ꠘ ꠅꠁꠍꠤ, ꠀꠝꠞꠣꠅ ꠅꠟꠣ ꠇꠔ ꠛꠦꠡꠤ ꠘꠤꠌ꠆ꠌꠤꠔ ꠅꠁꠀ ꠀꠟ꠆ꠟꠣꠁ ꠎꠤꠘ꠆ꠖꠦꠉꠤ ꠙꠣꠁꠀ ꠢꠇꠟꠔꠣꠞ ꠃꠙꠞꠦ ꠞꠣꠎꠔ꠆ꠔ ꠇꠞꠝꠥ।
ROM 5:18 ꠀꠍꠟ ꠇꠕꠣ ꠅꠁꠟ, ꠄꠇꠎꠘ ꠝꠣꠘꠡꠞ ꠉꠥꠘꠣꠞ ꠟꠣꠉꠤ ꠎꠦꠟꠣ ꠢꠇꠟ ꠝꠣꠘꠡꠞꠦ ꠖꠥꠡꠤ ꠡꠣꠁꠛꠡ꠆ꠔ ꠇꠞꠣ ꠅꠁꠍꠦ, ꠅꠃꠟꠣ ꠄꠇꠐꠣ ꠘꠦꠇ ꠇꠣꠝꠞ ꠝꠣꠎꠖꠤ ꠢꠇꠟ ꠝꠣꠘꠡꠞꠦ ꠛꠦ-ꠇꠍꠥꠞ ꠈꠣꠟꠣꠍ ꠇꠁꠀ ꠉꠁꠘ꠆ꠘ ꠅꠀꠞ ꠡꠥꠎꠥꠉ ꠖꠦꠅꠀ ꠅꠁꠍꠦ। ꠅꠃ ꠡꠥꠎꠥꠉꠞ ꠚꠟ ꠅꠁꠟ ꠀꠈꠦꠞꠤ ꠎꠤꠘ꠆ꠖꠦꠉꠤ।
ROM 5:19 ꠎꠦꠝꠘ ꠗꠞꠅ, ꠄꠇꠎꠘ ꠝꠣꠘꠡꠞ ꠅꠛꠣꠁꠖ꠆ꠖꠔꠣꠞ ꠟꠣꠉꠤ ꠛꠃꠔ ꠝꠣꠘꠥꠡ ꠉꠥꠘꠣꠉꠣꠞ ꠅꠁꠍꠂꠘ। ꠅꠃꠟꠣ ꠄꠇꠎꠘ ꠝꠣꠘꠡꠞ ꠛꠣꠁꠖ꠆ꠖꠔꠣꠞ ꠟꠣꠉꠤ ꠛꠃꠔ ꠝꠣꠘꠡꠞꠦ ꠛꠦ-ꠇꠍꠥꠞ ꠈꠣꠟꠣꠍ ꠇꠁꠀ ꠉꠁꠘ꠆ꠘ ꠇꠞꠣ ꠅꠁꠍꠦ।
ROM 5:20 ꠄꠞꠝꠣꠎꠦ ꠡꠞꠤꠅꠔꠞ ꠢꠥꠇꠥꠝ-ꠀꠢꠇꠣꠝꠅ ꠘꠣꠎꠤꠟ ꠅꠁꠉꠦꠟ, ꠎꠣꠔꠦ ꠁ ꠘꠣꠚꠞꠝꠣꠘꠤꠞ ꠢꠤꠡꠣꠛꠞ ꠙꠞꠤꠝꠣꠘ ꠀꠞꠅ ꠛꠣꠠꠤ ꠎꠣꠄ। ꠅꠁꠟꠦ ꠘꠣꠚꠞꠝꠣꠘꠤ ꠎꠦꠘꠅ ꠛꠣꠠꠤꠟ, ꠁꠘꠅ ꠀꠟ꠆ꠟꠣꠞ ꠞꠢꠝꠔ ꠀꠞꠅ ꠛꠃꠔ ꠛꠣꠠꠤꠉꠦꠟ।
ROM 5:21 ꠁ ꠞꠢꠝꠔ ꠛꠣꠠꠤꠟ, ꠎꠣꠔꠦ ꠝꠃꠔꠞ ꠝꠣꠎꠖꠤ ꠀꠉꠦ ꠉꠥꠘꠣꠄ ꠎꠦꠟꠣ ꠛꠦꠐꠣꠉꠤꠞꠤ ꠇꠞꠍꠤꠟ, ꠅꠈꠘ ꠛꠦ-ꠇꠍꠥꠞ ꠈꠣꠟꠣꠍ ꠅꠀꠞ ꠝꠣꠎꠖꠤ ꠀꠟ꠆ꠟꠣꠞ ꠞꠢꠝꠔꠦ ꠅꠃꠟꠣ ꠞꠣꠎꠔ꠆ꠔ ꠇꠞꠦ। ꠀꠞ ꠅꠔꠣꠞ ꠚꠟ ꠢꠤꠡꠣꠛꠦ ꠀꠝꠞꠣꠞ ꠝꠣꠟꠤꠇ ꠁꠍꠣ ꠀꠟ-ꠝꠍꠤꠞ ꠃꠍꠤꠟ꠆ꠟꠣꠄ ꠀꠈꠦꠞꠤ ꠎꠤꠘ꠆ꠖꠦꠉꠤ ꠙꠣꠁ।
ROM 6:1 ꠔꠦ ꠅꠈꠘ ꠀꠝꠞꠣ ꠅꠟꠣ ꠇꠁꠔꠣꠝ ꠘꠤ, ꠀꠝꠞꠣꠞ ꠃꠙꠞꠦ ꠎꠣꠔꠦ ꠀꠟ꠆ꠟꠣꠞ ꠞꠢꠝꠔ ꠀꠞꠅ ꠛꠣꠠꠦ, ꠄꠞꠟꠣꠉꠤ ꠀꠝꠞꠣ ꠀꠞꠅ ꠉꠥꠘꠣ ꠇꠞꠣꠔ ꠞꠁ?
ROM 6:2 ꠘꠣꠃꠎꠥꠛꠤꠟ꠆ꠟꠣ, ꠝꠥꠐꠦꠃ ꠘꠣ! ꠉꠥꠘꠣꠞ ꠛꠣꠛꠔꠦ ꠀꠝꠞꠣ ꠔ ꠝꠞꠤꠉꠦꠍꠤ, ꠔꠦ ꠁ ꠝꠥꠞ꠆ꠖꠣ ꠢꠣꠟꠔꠦ ꠅꠈꠘ ꠀꠞ ꠇꠦꠝꠘꠦ ꠉꠥꠘꠣꠞ ꠇꠣꠝꠅ ꠞꠁꠔꠣꠝ?
ROM 6:3 ꠀꠁꠌ꠆ꠍꠣ, ꠀꠝꠞꠣ ꠎꠔ ꠎꠘꠦ ꠀꠟ-ꠝꠍꠤꠞ ꠘꠣꠝꠦ ꠔꠃꠛꠣꠞ ꠉꠥꠍꠟ ꠇꠞꠍꠤ, ꠀꠝꠞꠣ ꠔ ꠔꠣꠘ ꠝꠃꠔꠞ ꠟꠉꠦꠅ ꠡꠞꠤꠇ ꠅꠁꠍꠤ।
ROM 6:4 ꠅꠃ ꠉꠥꠍꠟꠞ ꠇꠣꠟꠅ ꠀꠝꠞꠣꠞꠦ ꠔ ꠀꠟ-ꠝꠍꠤꠞ ꠟꠉꠦ ꠇꠄꠛꠞ ꠖꠦꠅꠀ ꠅꠁꠍꠦ। ꠀꠞ ꠉꠣꠁꠛꠤ ꠛꠣꠚ ꠀꠟ꠆ꠟꠣꠄ ꠔꠣꠘ ꠝꠢꠣ ꠇꠥꠖꠞꠔꠦ ꠀꠟ-ꠝꠍꠤꠞꠦ ꠎꠦꠟꠣ ꠇꠄꠛꠞ ꠕꠣꠇꠤ ꠎꠤꠘ꠆ꠖꠣ ꠇꠞꠤ ꠔꠥꠟꠍꠂꠘ, ꠑꠤꠇ ꠅꠃꠟꠣ ꠀꠝꠞꠣꠅ ꠎꠣꠘꠥ ꠘꠄꠀ ꠎꠤꠘ꠆ꠖꠦꠉꠤꠄ ꠖꠤꠘ ꠇꠣꠐꠣꠁ।
ROM 6:5 ꠀꠞ ꠀꠝꠞꠣ ꠎꠦꠛꠟꠣ ꠀꠟ-ꠝꠍꠤꠞ ꠝꠃꠔꠅ ꠡꠞꠤꠇ ꠅꠁꠍꠤ, ꠔꠦ ꠔꠣꠁꠘ ꠎꠦꠟꠣ ꠝꠥꠞ꠆ꠖꠣ ꠕꠣꠇꠤ ꠎꠤꠘ꠆ꠖꠣ ꠅꠁꠀ ꠃꠑꠍꠂꠘ, ꠅꠟꠣ ꠀꠝꠞꠣꠅ ꠔꠣꠘ ꠎꠤꠘ꠆ꠖꠣ ꠅꠀꠞ ꠟꠉꠦ ꠡꠞꠤꠇ ꠞꠁꠝꠥ।
ROM 6:6 ꠀꠝꠞꠣ ꠁꠈꠣꠘ ꠎꠣꠘꠤ, ꠀꠝꠞꠣꠞ ꠡꠞꠤꠟꠞ ꠛꠖ ꠈꠣꠁꠡꠞꠦ ꠛꠦꠇꠣꠝꠣ ꠇꠞꠣꠞ ꠘꠤꠅꠔꠦ ꠀꠝꠞꠣꠞ ꠙꠥꠞꠣꠘ ‘ꠀꠝꠤ’ꠞꠦ ꠀꠟ-ꠝꠍꠤꠞ ꠟꠉꠦ ꠍꠟꠤꠛꠞ ꠃꠙꠞꠦ ꠝꠣꠞꠤꠀ ꠚꠣꠟꠣꠁꠟ ꠅꠁꠍꠦ, ꠎꠣꠔꠦ ꠀꠝꠞꠣ ꠀꠞ ꠉꠥꠘꠣꠞ ꠉꠥꠟꠣꠝ ꠘꠣ ꠞꠁ।
ROM 6:7 ꠇꠣꠞꠘ ꠎꠣꠞ ꠝꠃꠔ ꠅꠁꠎꠣꠄ, ꠢꠦ ꠔ ꠉꠥꠘꠣꠞ ꠇꠛꠎꠣ ꠕꠣꠇꠤ ꠈꠣꠟꠣꠍ ꠙꠣꠁꠟꠤꠍꠦ।
ROM 6:8 ꠔꠦ ꠀꠟ-ꠝꠍꠤꠞ ꠟꠉꠦ ꠎꠦꠛꠟꠣ ꠀꠝꠞꠣꠞ ꠝꠞꠘ ꠅꠁꠍꠦ, ꠅꠈꠘ ꠀꠝꠞꠣꠞ ꠁꠝꠣꠘ ꠅꠁꠟ, ꠔꠣꠘ ꠟꠉꠦ ꠎꠤꠘ꠆ꠖꠦꠉꠤꠅ ꠙꠣꠁꠝꠥ।
ROM 6:9 ꠀꠝꠞꠣ ꠎꠣꠘꠤ, ꠀꠟ-ꠝꠍꠤ ꠝꠥꠞ꠆ꠖꠣ ꠕꠣꠇꠤ ꠎꠤꠘ꠆ꠖꠣ ꠅꠁꠀ ꠃꠑꠤꠍꠂꠘ ꠇꠞꠤ ꠔꠣꠘ ꠀꠞ ꠝꠃꠔ ꠅꠁꠔ ꠘꠣꠄ। ꠝꠃꠔꠞ ꠇꠥꠘꠥ ꠈꠦꠝꠔꠣ ꠔꠣꠘ ꠃꠙꠞꠦ ꠘꠣꠁ।
ROM 6:10 ꠀꠍꠟꠦ ꠔꠣꠘ ꠎꠦ ꠝꠃꠔ ꠅꠁꠍꠦ, ꠁꠔꠣ ꠔ ꠉꠥꠘꠣꠞ ꠈꠦꠝꠔꠣ ꠛꠤꠘꠣꠡ ꠇꠞꠣꠞ ꠟꠣꠉꠤ ꠈꠣꠟꠤ ꠄꠇꠛꠣꠞꠃ ꠅꠁꠍꠦ। ꠀꠞ ꠅꠈꠘ ꠔꠣꠘ ꠎꠦ ꠎꠤꠘ꠆ꠖꠦꠉꠤ ꠀꠍꠦ, ꠁꠐꠣ ꠔ ꠀꠟ꠆ꠟꠣꠞ ꠝꠢꠤꠝꠣꠞ ꠟꠣꠉꠤ ꠎꠤꠘ꠆ꠖꠣ ꠀꠍꠂꠘ।
ROM 6:11 ꠑꠤꠇ ꠅꠃꠟꠣ, ꠔꠥꠝꠞꠣꠅ ꠝꠘꠅ ꠇꠞꠤꠅ, ꠉꠥꠘꠣꠞ ꠈꠦꠝꠔꠣꠞ ꠛꠦꠙꠣꠞꠦ ꠔꠥꠝꠞꠣꠞ ꠝꠞꠘ ꠅꠁꠉꠦꠍꠦ, ꠅꠈꠘ ꠈꠣꠟꠤ ꠁꠍꠣ ꠀꠟ-ꠝꠍꠤꠞ ꠘꠣꠝꠦ ꠀꠟ꠆ꠟꠣꠞ ꠝꠢꠤꠝꠣꠞ ꠟꠣꠉꠤ ꠎꠤꠘ꠆ꠖꠣ ꠀꠍ।
ROM 6:12 ꠄꠞꠟꠣꠉꠤ ꠝꠃꠔꠞ ꠎꠥꠇꠣ ꠔꠥꠝꠞꠣꠞ ꠁ ꠡꠞꠤꠟꠞ ꠃꠙꠞꠦ ꠉꠥꠘꠣꠞꠦ ꠇꠥꠘꠥ ꠟꠣꠈꠣꠘ ꠛꠦꠐꠣꠉꠤꠞꠤ ꠇꠞꠔꠦ ꠖꠤꠅ ꠘꠣ, ꠡꠞꠤꠟꠞꠦ ꠛꠖ ꠈꠣꠁꠡꠞ ꠀꠔꠅ ꠡꠙꠤ ꠖꠤꠅ ꠘꠣ।
ROM 6:13 ꠡꠞꠤꠟꠞ ꠇꠥꠘꠥ ꠅꠋꠉꠞꠦ ꠛꠖ ꠇꠣꠝꠞ ꠀꠔꠤꠀꠞ ꠛꠣꠘꠣꠁꠅ ꠘꠣ। ꠛꠞꠋ ꠘꠤꠎꠞꠦ ꠝꠥꠞ꠆ꠖꠣ ꠕꠣꠇꠤ ꠎꠤꠘ꠆ꠖꠣ ꠅꠀ ꠎꠘ ꠝꠘꠅ ꠇꠞꠤꠀ ꠙꠥꠞꠣꠙꠥꠞꠤ ꠀꠟ꠆ꠟꠣꠞ ꠀꠔꠅ ꠡꠙꠤ ꠖꠦꠅ, ꠡꠞꠤꠟꠞ ꠢꠇꠟ ꠅꠋꠉꠞꠦ ꠘꠦꠇ ꠇꠣꠝꠞ ꠀꠔꠤꠀꠞ ꠢꠤꠡꠣꠛꠦ ꠀꠟ꠆ꠟꠣꠞ ꠘꠣꠝꠦ ꠛꠤꠟꠣꠁ ꠖꠦꠅ।
ROM 6:14 ꠔꠥꠝꠞꠣ ꠔ ꠉꠥꠘꠣꠞ ꠉꠥꠟꠣꠝ ꠘꠣꠄ, ꠡꠞꠤꠅꠔꠞ ꠀꠅꠔꠣꠄꠅ ꠘꠣꠄ, ꠈꠣꠟꠤ ꠀꠟ꠆ꠟꠣꠞ ꠞꠢꠝꠔꠞ ꠔꠟꠦ ꠀꠍ।
ROM 6:15 ꠔꠦ ꠅꠈꠘ ꠇꠤꠔꠣ ꠇꠞꠔꠣꠝ? ꠡꠞꠤꠅꠔꠞ ꠀꠅꠔꠣ ꠕꠣꠇꠤ ꠍꠣꠠꠣ ꠙꠣꠁꠀ, ꠀꠟ꠆ꠟꠣꠞ ꠞꠢꠝꠔꠞ ꠀꠅꠔꠣꠄ ꠀꠍꠤ ꠇꠞꠤ, ꠀꠝꠞꠣ ꠈꠣꠟꠤ ꠉꠥꠘꠣ ꠇꠞꠔꠣꠝ ꠘꠤ? ꠘꠣꠃꠎꠥꠛꠤꠟ꠆ꠟꠣ, ꠝꠥꠐꠦꠃ ꠘꠣ!
ROM 6:16 ꠔꠥꠝꠞꠣ ꠛꠥꠎ ꠘꠣ ꠘꠤ, ꠔꠥꠝꠞꠣ ꠎꠦꠛꠟꠣ ꠘꠤꠎꠞꠦ ꠇꠦꠃꠞꠞ ꠀꠔꠅ ꠡꠙꠤ ꠖꠤꠀ ꠔꠣꠞ ꠢꠥꠇꠥꠝ ꠝꠣꠚꠤꠇ ꠌꠟ, ꠔꠦ ꠄꠝꠘꠦꠃ ꠔ ꠔꠣꠞ ꠉꠥꠟꠣꠝ ꠛꠘꠤꠎꠣꠅ। ꠅꠟꠣꠈꠣꠘ ꠔꠥꠝꠞꠣ ꠢꠄꠔ ꠉꠥꠘꠣꠞ ꠉꠥꠟꠣꠝ ꠛꠘꠤꠀ ꠝꠞꠛꠣꠄ, ꠀꠞꠘꠣꠄ ꠀꠟ꠆ꠟꠣꠞ ꠉꠥꠟꠣꠝ ꠛꠘꠤꠀ ꠘꠦꠇ ꠇꠣꠝ ꠇꠞꠛꠣꠄ।
ROM 6:17 ꠀꠟ꠆ꠟꠣ ꠙꠣꠇꠞ ꠡꠥꠇꠥꠞ, ꠀꠉꠦ ꠎꠥꠖꠤꠅ ꠔꠥꠝꠞꠣ ꠉꠥꠘꠣꠞ ꠉꠥꠟꠣꠝ ꠀꠍꠟꠣꠄ, ꠔꠣ-ꠅ ꠁꠍꠣꠄꠁ ꠔꠞꠤꠇꠣꠞ ꠔꠣꠟꠤꠝ ꠙꠣꠁꠀ ꠢꠣꠞꠤ, ꠖꠤꠟꠦ-ꠎꠣꠘꠦ ꠁꠔꠣꠞ ꠀꠡꠤꠇ ꠅꠁꠍ।
ROM 6:18 ꠉꠥꠘꠣꠞ ꠉꠥꠟꠣꠝꠤ ꠕꠣꠇꠤ ꠍꠣꠠꠣ ꠙꠣꠁꠀ, ꠘꠦꠇ ꠇꠣꠝꠞ ꠉꠥꠟꠣꠝ ꠅꠁꠍ।
ROM 6:19 ꠜꠣꠁꠀꠁꠘꠞꠦ, ꠔꠥꠝꠞꠣꠞ ꠀꠈꠟꠞ ꠇꠝꠎꠥꠞꠤ ꠖꠦꠈꠤꠀ ꠀꠝꠤ ꠔꠥꠝꠞꠣꠞ ꠟꠉꠦ ꠝꠣꠘꠥꠡ ꠛꠥꠟꠤꠄ ꠝꠣꠔꠤꠞꠣꠝ, ꠀꠉꠦ ꠎꠦꠟꠣ ꠔꠥꠝꠞꠣꠞ ꠡꠞꠤꠟꠞ ꠅꠋꠉꠞꠦ ꠘꠣꠙꠣꠇꠤ ꠀꠞ ꠛꠖ ꠈꠣꠁꠡꠞ ꠉꠥꠟꠣꠝ ꠛꠣꠘꠣꠁꠍꠟꠣꠄ, ꠅꠈꠘꠅ ꠑꠤꠇ ꠅꠃꠟꠣ, ꠙꠣꠇ-ꠙꠛꠤꠔ꠆ꠞ ꠎꠤꠘ꠆ꠖꠦꠉꠤ ꠇꠣꠐꠣꠘꠤꠞ ꠟꠣꠉꠤ, ꠎꠣꠞꠎꠤꠞ ꠅꠋꠉꠞꠦ ꠘꠦꠇ ꠇꠣꠝꠞ ꠉꠥꠟꠣꠝꠤꠔ ꠡꠙꠤ ꠖꠦꠅ।
ROM 6:20 ꠔꠥꠝꠞꠣ ꠎꠦꠛꠟꠣ ꠉꠥꠘꠣꠞ ꠉꠥꠟꠣꠝ ꠀꠍꠟꠣꠄ, ꠁ ꠡꠝꠄ ꠔ ꠘꠦꠇ ꠇꠣꠝꠞ ꠖꠣꠄ-ꠖꠣꠄꠁꠔ꠆ꠔ ꠕꠣꠇꠤ ꠀꠎꠣꠖ ꠀꠍꠟꠣꠄ।
ROM 6:21 ꠀꠉꠞ ꠛꠖ ꠇꠣꠝ-ꠇꠣꠎꠞ ꠇꠕꠣ ꠝꠘꠅ ꠅꠁꠟꠦ ꠅꠈꠘ ꠔꠥꠝꠞꠣꠞ ꠡꠞꠝ ꠟꠣꠉꠦ, ꠔꠦ ꠇꠅ ꠌꠣꠁꠘ, ꠁꠔꠣ ꠇꠣꠝꠦ ꠔꠥꠝꠞꠣꠞ ꠇꠤꠔꠣ ꠟꠣꠜ ꠅꠁꠔ? ꠁꠔꠣꠞ ꠢꠦꠡ ꠚꠟ ꠔ ꠝꠞꠘ।
ROM 6:22 ꠅꠁꠟꠦ ꠅꠈꠘ ꠔꠥꠝꠞꠣ ꠉꠥꠘꠣꠞ ꠉꠥꠟꠣꠝꠤ ꠕꠣꠇꠤ ꠀꠎꠣꠖ ꠅꠁꠀ, ꠀꠟ꠆ꠟꠣꠞ ꠙꠕꠞ ꠉꠥꠟꠣꠝ ꠛꠘꠤꠀ ꠙꠣꠇ-ꠙꠛꠤꠔ꠆ꠞ ꠎꠤꠘ꠆ꠖꠦꠉꠤ ꠇꠣꠐꠣꠁꠞꠣꠄ, ꠄꠞ ꠢꠦꠡ ꠚꠟ ꠔ ꠀꠈꠦꠞꠤ ꠎꠤꠘ꠆ꠖꠦꠉꠤ।
ROM 6:23 ꠀꠍꠟꠦ ꠉꠥꠘꠣꠞ ꠝꠎꠥꠞꠤ ꠅꠁꠟ ꠝꠃꠔ, ꠅꠁꠟꠦ ꠀꠟ꠆ꠟꠣꠞ ꠞꠢꠝꠔꠞ ꠖꠣꠘ ꠅꠁꠟꠉꠤ ꠀꠝꠞꠣꠞ ꠝꠣꠟꠤꠇ ꠁꠍꠣ ꠀꠟ-ꠝꠍꠤꠞ ꠃꠍꠤꠟ꠆ꠟꠣꠄ ꠀꠈꠦꠞꠤ ꠎꠤꠘ꠆ꠖꠦꠉꠤ।
ROM 7:1 ꠔꠦ ꠅ ꠜꠣꠁ ꠅꠇꠟ, ꠢꠎꠞꠔ ꠝꠥꠍꠣꠞ ꠡꠞꠤꠅꠔꠞ ꠛꠤꠡꠄ ꠔ ꠔꠥꠝꠞꠣꠞ ꠎꠣꠘꠣꠃ ꠀꠍꠦ। ꠔꠣ-ꠅ ꠔꠥꠝꠞꠣ ꠛꠥꠎ ꠘꠣ ꠘꠤ, ꠡꠞꠤꠅꠔꠞ ꠖꠣꠛꠤ-ꠖꠣꠅꠀ ꠝꠣꠘꠡꠞ ꠃꠙꠞꠦ ꠛꠅꠀꠁꠟ ꠕꠣꠇꠦ, ꠈꠣꠟꠤ ꠎꠤꠘ꠆ꠖꠣ ꠕꠣꠇꠣ ꠙꠞ꠆ꠎꠘ꠆ꠔ।
ROM 7:2 ꠎꠦꠟꠣ, ꠎꠣꠝꠣꠁ ꠎꠔꠖꠤꠘ ꠎꠤꠔꠣ ꠀꠍꠦ, ꠅꠔꠖꠤꠘ ꠔꠣꠞ ꠛꠃ ꠔꠣꠞ ꠀꠅꠔꠣꠄ ꠛꠣꠘ꠆ꠖꠣ ꠞꠄ, ꠀꠞ ꠎꠣꠝꠣꠁꠞ ꠝꠃꠔꠞ ꠛꠣꠖꠦ ꠔꠣꠞ ꠛꠃ ꠁ ꠛꠣꠘ꠆ꠖꠘ ꠕꠣꠇꠤ ꠈꠣꠟꠣꠍ ꠙꠣꠄ।
ROM 7:3 ꠀꠞ ꠎꠣꠝꠣꠁ ꠎꠤꠔꠣ ꠕꠣꠇꠔꠦ ꠛꠃ ꠎꠥꠖꠤ ꠖꠥꠍꠞꠣ ꠛꠦꠐꠣꠞ ꠉꠦꠍꠦ ꠢꠣꠋꠉꠣ ꠛꠄ, ꠔꠣꠁꠞꠦ ꠔ ꠎꠤꠘꠣꠇꠥꠞ ꠢꠤꠡꠣꠛꠦ ꠉꠘꠣ ꠅꠄ। ꠅꠁꠟꠦ ꠎꠣꠝꠣꠁꠞ ꠝꠃꠔꠞ ꠛꠣꠖꠦ ꠔꠣꠁ ꠎꠣꠝꠣꠁꠞ ꠛꠣꠘ꠆ꠖꠘ ꠕꠣꠇꠤ ꠀꠁꠘ ꠝꠣꠚꠤꠇ ꠈꠣꠟꠣꠍ ꠙꠣꠄ, ꠄꠞꠛꠣꠖꠦ ꠔꠣꠁ ꠅꠁꠘ꠆ꠘ ꠎꠘꠞ ꠉꠦꠍꠦ ꠛꠤꠀ ꠛꠁꠟꠦ ꠎꠤꠘꠣꠇꠥꠞ ꠘꠣꠄ।
ROM 7:4 ꠜꠣꠁꠀꠁꠘꠞꠦ, ꠑꠤꠇ ꠅꠃ ꠟꠣꠈꠣꠘꠃ, ꠀꠟ-ꠝꠍꠤꠞ ꠡꠞꠤꠟꠞ ꠝꠃꠔꠞ ꠝꠣꠎꠖꠤ ꠡꠞꠤꠅꠔꠞ ꠛꠣꠘ꠆ꠖꠘ ꠕꠣꠇꠤ ꠔꠥꠝꠞꠣꠞ ꠝꠃꠔ ꠅꠁꠉꠦꠍꠦ ꠇꠞꠤ, ꠅꠈꠘ ꠔꠥꠝꠞꠣ ꠅꠁꠘ꠆ꠘ ꠎꠘꠞ ꠛꠣꠘ꠆ꠖꠘꠅ ꠎꠣꠁꠔꠣꠄ ꠙꠣꠞ, ꠀꠞ ꠅꠃ ꠅꠁꠘ꠆ꠘ ꠎꠘ ꠅꠁꠟꠣ, ꠝꠥꠞ꠆ꠖꠣ ꠕꠣꠇꠤ ꠎꠤꠘ꠆ꠖꠣ ꠅꠀ ꠢꠃ ꠁꠍꠣ ꠀꠟ-ꠝꠍꠤ, ꠎꠣꠔꠦ ꠀꠝꠞꠣꠞ ꠎꠤꠘ꠆ꠖꠦꠉꠤꠔ ꠀꠟ꠆ꠟꠣꠞ ꠘꠣꠝꠦ ꠘꠦꠇ ꠙꠕꠞ ꠚꠟ ꠗꠞꠦ।
ROM 7:5 ꠀꠉꠦ ꠎꠦꠛꠟꠣ ꠀꠝꠞꠣ ꠡꠞꠤꠟꠞ ꠝꠞ꠆ꠎꠤꠄ ꠌꠟꠔꠣꠝ, ꠅꠃ ꠡꠝꠄ ꠡꠞꠤꠅꠔꠦ ꠀꠝꠞꠣꠞ ꠝꠣꠎꠞ ꠉꠥꠘꠣꠞ ꠛꠖ ꠈꠣꠁꠡꠞꠦ ꠈꠥꠌꠣꠁꠀ ꠢꠎꠣꠉ ꠇꠞꠔ, ꠅꠃ ꠇꠣꠞꠘꠦ ꠀꠝꠞꠣꠞ ꠡꠞꠤꠟꠞ ꠅꠋꠉ ꠅꠇꠟꠦ ꠝꠃꠔꠞ ꠙꠕꠤ ꠉꠥꠘꠣꠞ ꠚꠟ ꠗꠞꠔ।
ROM 7:6 ꠔꠦ ꠀꠉꠦ ꠀꠝꠞꠣ ꠎꠦ ꠡꠞꠤꠅꠔꠞ ꠛꠣꠘ꠆ꠖꠘꠅ ꠀꠍꠟꠣꠝ, ꠁꠔꠣ ꠕꠣꠇꠤ ꠀꠝꠞꠣꠞ ꠝꠃꠔ ꠅꠁꠉꠦꠍꠦ, ꠅꠈꠘ ꠀꠝꠞꠣ ꠁ ꠡꠞꠤꠅꠔꠞ ꠛꠣꠘ꠆ꠖꠘ ꠕꠣꠇꠤ ꠈꠣꠟꠣꠍ ꠙꠣꠁꠍꠤ। ꠄꠞꠟꠣꠉꠤ ꠀꠝꠞꠣ ꠀꠞ ꠢꠤ ꠟꠤꠈꠤꠔ ꠡꠞꠤꠅꠔꠞ ꠉꠥꠟꠣꠝ ꠘꠣꠄ, ꠈꠣꠟꠤ ꠀꠟ꠆ꠟꠣꠁ ꠙꠣꠇ ꠞꠥꠢꠦ ꠘꠄꠀ ꠎꠤꠘ꠆ꠖꠦꠉꠤꠞ ꠉꠥꠟꠣꠝꠤ ꠇꠞꠤ।
ROM 7:7 ꠅꠈꠘ ꠀꠝꠞꠣ ꠅꠟꠣ ꠇꠁꠔꠣꠝ ꠙꠣꠞꠤ ꠘꠤ, ꠡꠞꠤꠅꠔꠦꠃ ꠉꠥꠘꠣ ꠇꠞꠣꠄ? ꠘꠣꠃꠎꠥꠛꠤꠟ꠆ꠟꠣ, ꠝꠥꠐꠦꠃ ꠘꠣ! ꠀꠍꠟ ꠇꠕꠣ ꠅꠁꠟ, ꠡꠞꠤꠅꠔ ꠘꠣ ꠕꠣꠇꠟꠦ ꠔ ꠀꠝꠤ ꠛꠥꠎꠔꠣꠝ ꠙꠣꠞꠟꠣꠝ ꠘꠣ ꠅꠘꠦ, ꠉꠥꠘꠣ ꠇꠤ ꠎꠤꠘꠤꠡ। ꠡꠞꠤꠅꠔꠦ ꠎꠥꠖꠤ ꠘꠣ ꠇꠁꠔ, ꠟꠥꠜ-ꠟꠣꠟꠌ ꠇꠞꠤꠅ ꠘꠣ, ꠔꠦ ꠟꠣꠟꠌ ꠇꠞꠟꠦ ꠇꠤꠔꠣ ꠅꠄ, ꠁꠔꠣ ꠀꠝꠞꠣ ꠛꠥꠎꠟꠣꠝ ꠘꠣ ꠅꠘꠦ।
ROM 7:8 ꠀꠞ ꠅꠃ ꠢꠥꠇꠥꠝꠞ ꠡꠥꠎꠥꠉ ꠛꠥꠎꠤꠀ ꠀꠝꠣꠞ ꠜꠤꠔꠞꠦ ꠉꠥꠘꠣ ꠢꠣꠝꠣꠁꠀ, ꠢꠇꠟ ꠘꠝꠥꠘꠣꠞ ꠟꠥꠜ-ꠟꠣꠟꠌ ꠎꠘꠝ ꠖꠤꠍꠦ। ꠡꠞꠤꠅꠔ ꠘꠣ ꠕꠣꠇꠟꠦ ꠔ ꠉꠥꠘꠣꠅ ꠝꠞꠣꠞ ꠟꠣꠈꠣꠘ ꠌꠥꠙꠌꠣꠙ ꠞꠄ।
ROM 7:9 ꠀꠝꠣꠞ ꠎꠤꠘ꠆ꠖꠦꠉꠤꠔ ꠡꠞꠤꠅꠔꠞꠦ ꠜꠣꠟꠣꠝꠘ꠆ꠔꠦ ꠌꠤꠘꠣꠞ ꠀꠉꠦ ꠀꠝꠤ ꠔ ꠎꠤꠔꠣ ꠀꠍꠟꠣꠝ, ꠅꠁꠟꠦ ꠅꠃ ꠢꠥꠇꠥꠝ ꠎꠣꠘꠣꠞ ꠟꠉꠦ ꠟꠉꠦꠃ ꠉꠥꠘꠣ ꠢꠎꠣꠉ ꠅꠁꠟ, ꠀꠞ ꠀꠝꠣꠞ ꠝꠃꠔ ꠅꠁꠟ।
ROM 7:10 ꠛꠥꠎꠞꠣꠄ ꠘꠤ, ꠎꠦ ꠡꠞꠤꠅꠔꠦ ꠀꠝꠤ ꠎꠤꠘ꠆ꠖꠦꠉꠤ ꠙꠣꠅꠀꠞ ꠇꠕꠣ, ꠢꠃ ꠡꠞꠤꠅꠔꠦ ꠀꠝꠣꠞ ꠟꠣꠉꠤ ꠝꠞꠘ ꠟꠁꠀ ꠀꠁꠟ।
ROM 7:11 ꠡꠞꠤꠅꠔꠞ ꠅꠃ ꠢꠥꠇꠥꠝꠞ ꠡꠥꠎꠥꠉ ꠙꠣꠁꠀ ꠉꠥꠘꠣꠄ ꠀꠝꠣꠞꠦ ꠐꠉꠤꠟ, ꠅꠃ ꠢꠥꠇꠥꠝꠞ ꠛꠟꠦꠃ ꠉꠥꠘꠣꠄ ꠀꠝꠣꠞ ꠎꠣꠘ ꠇꠣꠠꠤꠀ ꠘꠤꠟ।
ROM 7:12 ꠅꠁꠟꠦ ꠁꠈꠣꠘ ꠔ ꠢꠣꠍꠣ, ꠝꠥꠍꠣ ꠘꠛꠤꠞ ꠖꠦꠅꠀ ꠡꠞꠤꠅꠔ ꠙꠛꠤꠔ꠆ꠞ, ꠄꠞ ꠢꠥꠇꠥꠝ-ꠀꠢꠇꠣꠝꠅ ꠙꠛꠤꠔ꠆ꠞ, ꠁꠔꠣ ꠡꠑꠤꠇ ꠀꠞ ꠜꠣꠟꠣ ꠎꠤꠘꠤꠡ।
ROM 7:13 ꠔꠦ ꠅꠃ ꠜꠣꠟꠣ ꠎꠤꠘꠤꠡꠦꠃ ꠇꠤꠔꠣ ꠀꠝꠣꠞ ꠝꠞꠘ ꠀꠘꠟ ꠘꠤ? ꠘꠣꠃꠎꠥꠛꠤꠟ꠆ꠟꠣ, ꠝꠥꠐꠦꠃ ꠘꠣꠄ! ꠛꠞꠋ ꠉꠥꠘꠣꠄꠃ ꠁꠔꠣ ꠇꠞꠍꠦ, ꠢꠦ ꠜꠣꠟꠣ ꠎꠤꠘꠤꠡ ꠖꠤꠀ ꠀꠝꠣꠞꠦ ꠝꠣꠞꠤꠀ ꠢꠣꠞꠤ ꠙꠞꠝꠣꠘ ꠖꠦꠈꠣꠁꠟ, ꠉꠥꠘꠣ ꠔ ꠉꠥꠘꠣ। ꠀꠞ ꠅꠃ ꠢꠥꠇꠥꠝ-ꠀꠢꠇꠣꠝꠦꠃ ꠛꠥꠎꠣ ꠎꠣꠄ, ꠉꠥꠘꠣ ꠅꠁꠟ ꠝꠡ꠆ꠔ ꠛꠠ ꠎꠊꠁꠘ꠆ꠘ।
ROM 7:14 ꠀꠝꠞꠣ ꠔ ꠎꠣꠘꠤ, ꠡꠞꠤꠅꠔ ꠅꠁꠟꠉꠤ ꠞꠥꠢꠣꠘꠤ ꠎꠉꠔꠞ, ꠅꠁꠟꠦ ꠀꠝꠤ ꠅꠁꠟꠣꠝ ꠞꠇ꠆ꠔ-ꠝꠣꠋꠡꠞ ꠎꠉꠔꠞ, ꠀꠝꠤ ꠡꠞꠤꠟꠞ ꠝꠞ꠆ꠎꠤꠞ ꠛꠣꠘ꠆ꠖꠘꠅ ꠕꠣꠇꠣꠄ ꠉꠥꠘꠣꠞ ꠉꠥꠟꠣꠝ ꠅꠁꠍꠤ।
ROM 7:15 ꠀꠝꠤ ꠘꠤꠎꠦꠃ ꠔ ꠛꠥꠎꠤ ꠘꠣ, ꠀꠝꠤ ꠇꠤꠔꠣ ꠇꠣꠝ ꠇꠞꠤ। ꠀꠍꠟꠦ ꠀꠝꠤ ꠎꠦꠔꠣ ꠇꠞꠔꠣꠝ ꠌꠣꠁ, ꠁꠔꠣ ꠘꠣ ꠇꠞꠤꠀ, ꠎꠦꠔꠣꠞꠦ ꠊꠤꠘ꠆ꠘꠣꠁ ꠅꠔꠣꠃ ꠇꠞꠤ।
ROM 7:16 ꠀꠞ ꠎꠦꠔꠣ ꠇꠞꠔꠣꠝ ꠌꠣꠁ ꠘꠣ, ꠅꠟꠣ ꠉꠥꠘꠣꠞ ꠇꠣꠝ ꠎꠦꠛꠟꠣ ꠇꠞꠤ, ꠔꠦ ꠀꠝꠤ ꠄꠝꠘꠦꠃ ꠡ꠆ꠛꠤꠇꠣꠞ ꠇꠞꠤꠀꠞ, ꠡꠞꠤꠅꠔ ꠀꠍꠟꠦꠅ ꠜꠣꠟꠣ ꠎꠤꠘꠤꠡ।
ROM 7:17 ꠁꠔꠣ ꠕꠣꠇꠤ ꠛꠥꠎꠣ ꠎꠣꠄ, ꠀꠝꠤ ꠘꠤꠎꠦ ꠁꠟꠣ ꠇꠞꠤꠀꠞ ꠘꠣ, ꠅꠁꠟꠦ ꠀꠝꠣꠞ ꠝꠣꠎꠦ ꠎꠦ ꠉꠥꠘꠣꠄ ꠛꠡꠔ ꠇꠞꠦ, ꠢꠦ-ꠃ ꠀꠝꠣꠞꠦ ꠖꠤꠀ ꠁꠔꠣ ꠇꠞꠣꠄ।
ROM 7:18 ꠀꠞ ꠀꠝꠤ ꠔ ꠛꠥꠎꠤꠀꠞ, ꠀꠝꠣꠞ ꠟꠃꠞ ꠝꠣꠎꠦ, ꠝꠣꠘꠤ ꠡꠞꠤꠟꠞ ꠈꠣꠁꠡꠞ ꠝꠣꠎꠦ ꠜꠣꠟꠣ ꠇꠥꠘꠥ ꠎꠤꠘꠤꠡꠃ ꠘꠣꠁ। ꠀꠝꠤ ꠘꠦꠇ ꠇꠣꠝ ꠇꠞꠣꠞ ꠈꠤꠀꠟ ꠕꠣꠇꠟꠦꠅ, ꠀꠝꠣꠞ ꠡꠣꠝꠞ꠆ꠕꠄ ꠇꠥꠟꠣꠄ ꠘꠣ।
ROM 7:19 ꠇꠣꠞꠘ ꠀꠝꠤ ꠎꠦꠔꠣ ꠘꠦꠇ ꠇꠣꠝ ꠇꠞꠔꠣꠝ ꠌꠣꠁ, ꠁꠔꠣ ꠇꠞꠔꠣꠝ ꠙꠣꠞꠤ ꠘꠣ, ꠅꠁꠟꠦ ꠎꠦ ꠛꠖ ꠇꠣꠝ ꠇꠞꠔꠣꠝ ꠌꠣꠁ ꠘꠣ, ꠅꠔꠣꠃ ꠇꠞꠤ।
ROM 7:20 ꠔꠦ ꠎꠦꠔꠣ ꠇꠞꠔꠣꠝ ꠌꠣꠁ ꠘꠣ, ꠅꠔꠣꠃ ꠎꠦꠛꠟꠣ ꠇꠞꠤ, ꠄꠞ ꠝꠣꠘꠤ ꠅꠁꠟ ꠁꠔꠣ ꠀꠝꠤ ꠇꠞꠤ ꠘꠣ, ꠛꠞꠋ ꠎꠦ ꠉꠥꠘꠣꠄ ꠀꠝꠣꠞ ꠝꠣꠎꠦ ꠛꠡꠔ ꠇꠞꠦ, ꠢꠦ-ꠃ ꠁꠔꠣ ꠇꠞꠣꠄ।
ROM 7:21 ꠅꠈꠘ ꠀꠝꠣꠞ ꠘꠤꠎꠞ ꠜꠤꠔꠞꠦꠃ ꠖꠦꠈꠤꠀꠞ, ꠄꠇꠐꠣ ꠛꠖ ꠞꠤꠙꠥꠄ ꠇꠣꠝ ꠇꠞꠦꠞ, ꠀꠝꠤ ꠘꠦꠇ ꠇꠣꠝ ꠇꠞꠣꠔ ꠟꠣꠉꠟꠦ, ꠛꠖ ꠇꠣꠝ ꠄꠝꠘꠦꠃ ꠀꠁꠀ ꠀꠎꠤ ꠎꠣꠄ।
ROM 7:22 ꠀꠍꠟꠦ ꠀꠝꠣꠞ ꠖꠤꠟꠞ ꠈꠣꠁꠍꠟꠔ ꠝꠣꠚꠤꠇ ꠀꠝꠤ ꠀꠟ꠆ꠟꠣꠁ ꠢꠥꠇꠥꠝ-ꠀꠢꠇꠣꠝꠦ ꠈꠥꠡꠤ ꠅꠁ।
ROM 7:23 ꠅꠁꠟꠦ ꠀꠝꠣꠞ ꠡꠞꠤꠟꠞ ꠅꠋꠉꠞ ꠝꠣꠎꠦ ꠖꠥꠍꠞꠣ ꠀꠞꠇ ꠈꠣꠁꠍꠟꠔꠦ ꠇꠣꠝ ꠇꠞꠦꠞ, ꠀꠝꠣꠞ ꠖꠤꠟꠦ ꠘꠦꠇ ꠇꠣꠝꠞꠦ ꠙꠍꠘ꠆ꠖ ꠇꠞꠟꠦꠅ, ꠅꠃ ꠛꠖ ꠈꠣꠁꠍꠟꠔꠦ ꠀꠝꠣꠞ ꠖꠤꠟꠞ ꠟꠉꠦ ꠎꠥꠖ꠆ꠖ ꠇꠞꠤꠀ, ꠀꠝꠣꠞꠦ ꠔꠣꠞ ꠉꠥꠟꠣꠝꠤꠔ ꠛꠣꠘ꠆ꠖꠤꠀ ꠞꠣꠈꠦ।
ROM 7:24 ꠀꠝꠣꠞ ꠛꠠ ꠛꠖ ꠘꠍꠤꠛ! ꠀꠝꠣꠞ ꠡꠞꠤꠟꠞ ꠅꠃ ꠛꠖ ꠈꠣꠁꠍꠟꠔ, ꠎꠦꠉꠤꠄ ꠀꠝꠣꠞꠦ ꠝꠃꠔꠞ ꠙꠕꠦ ꠐꠣꠘꠦ, ꠔꠣꠞ ꠀꠔ ꠕꠣꠇꠤ ꠇꠦ ꠀꠝꠣꠞꠦ ꠛꠣꠌꠣꠁꠛ?
ROM 7:25 ꠀꠟ꠆ꠟꠣꠞ ꠡꠥꠇꠥꠞ, ꠀꠝꠞꠣꠞ ꠝꠣꠟꠤꠇ ꠁꠍꠣ ꠀꠟ-ꠝꠍꠤꠄ ꠔꠣꠞ ꠀꠔ ꠕꠣꠇꠤ ꠀꠝꠣꠞꠦ ꠛꠣꠌꠣꠁꠍꠂꠘ! ꠅꠈꠘ ꠘꠤꠌ꠆ꠌꠤꠔ ꠛꠥꠎꠣ ꠎꠣꠄ, ꠖꠤꠟꠞ ꠖꠤꠇ ꠕꠣꠇꠤ ꠀꠝꠤ ꠀꠟ꠆ꠟꠣꠁ ꠡꠞꠤꠅꠔꠞ ꠉꠥꠟꠣꠝꠤ ꠇꠞꠤ, ꠅꠁꠟꠦ ꠡꠞꠤꠟꠞ ꠝꠞ꠆ꠎꠤꠞ ꠖꠤꠇ ꠕꠣꠇꠤ ꠀꠝꠤ ꠉꠥꠘꠣꠞ ꠈꠣꠁꠍꠟꠔꠞ ꠉꠥꠟꠣꠝꠤ ꠇꠞꠤ।
ROM 8:1 ꠔꠦ ꠅꠃ ꠔꠣꠟꠤꠝ ꠕꠣꠇꠤ ꠀꠝꠞꠣ ꠛꠥꠎꠤ, ꠁꠍꠣ ꠀꠟ-ꠝꠍꠤꠞ ꠎꠦꠞꠣ ꠀꠙꠘ ꠎꠘ ꠛꠘꠤ ꠉꠦꠍꠂꠘ, ꠅꠈꠘ ꠔꠣꠞꠣꠞꠦ ꠀꠞ ꠖꠥꠡꠤ ꠡꠣꠁꠛꠡ꠆ꠔ ꠇꠞꠣ ꠅꠁꠔ ꠘꠣꠄ।
ROM 8:2 ꠉꠥꠘꠣ ꠀꠞ ꠝꠃꠔꠞ ꠀꠔ ꠕꠣꠇꠤ ꠀꠝꠣꠞꠦ ꠈꠣꠟꠣꠍ ꠇꠞꠣ ꠅꠁꠍꠦ, ꠎꠤꠘ꠆ꠖꠦꠉꠤ ꠖꠦꠅꠞꠣ ꠞꠥꠢꠦ ꠁꠍꠣ ꠀꠟ-ꠝꠍꠤꠞ ꠃꠍꠤꠟ꠆ꠟꠣꠄ ꠈꠣꠟꠣꠍ ꠇꠞꠍꠂꠘ।
ROM 8:3 ꠞꠇ꠆ꠔ-ꠝꠣꠋꠡꠞ ꠡꠞꠤꠟꠞ ꠛꠖ ꠈꠣꠁꠡꠞ ꠟꠣꠉꠤ ꠡꠞꠤꠅꠔꠦ ꠀꠝꠞꠣꠞꠦ ꠛꠣꠌꠣꠁꠔ ꠙꠣꠞꠍꠦ ꠘꠣ, ꠀꠞ ꠡꠞꠤꠅꠔꠦ ꠎꠦꠔꠣ ꠇꠞꠔ ꠙꠣꠞꠍꠦ ꠘꠣ, ꠀꠟ꠆ꠟꠣꠄ ꠔ ꠘꠤꠎꠦꠃ ꠁꠔꠣ ꠇꠞꠍꠂꠘ। ꠔꠣꠁꠘ ꠔꠣꠘ ꠘꠤꠎꠞ ꠈꠣꠍ ꠝꠣꠄꠀꠞ ꠎꠘ ꠁꠛꠘꠥꠟ꠆ꠟꠣꠞꠦ ꠀꠝꠞꠣꠞ ꠟꠣꠈꠣꠘ ꠉꠥꠘꠣꠉꠣꠞ ꠝꠣꠘꠡꠞ ꠍꠥꠞꠔꠦ ꠙꠣꠑꠣꠁꠟꠣ, ꠉꠥꠘꠣꠞ ꠈꠦꠝꠔꠣꠞꠦ ꠛꠤꠘꠣꠡ ꠇꠞꠣꠞ ꠟꠣꠉꠤ। ꠀꠞ ꠅꠃ ꠝꠣꠄꠀꠞ ꠎꠘꠞ ꠎꠣꠘ ꠇꠥꠞꠛꠣꠘꠤꠞ ꠝꠣꠎꠖꠤ ꠉꠥꠘꠣꠞ ꠛꠤꠌꠣꠞ ꠇꠞꠤꠀ ꠔꠣꠞ ꠈꠦꠝꠔꠣꠞꠦ ꠛꠣꠔꠤꠟ ꠇꠞꠤ ꠖꠤꠟꠣ।
ROM 8:4 ꠔꠣꠁꠘ ꠀꠝꠞꠣꠞ ꠙꠇ꠆ꠇ ꠟꠁꠀ ꠁꠔꠣ ꠇꠞꠟꠣ, ꠀꠝꠞꠣ ꠎꠦꠞꠣ ꠞꠇ꠆ꠔ-ꠝꠣꠋꠡꠞ ꠡꠞꠤꠟꠞ ꠈꠣꠁꠡꠦ ꠘꠣ ꠌꠟꠤꠀ ꠞꠥꠢꠥꠞ ꠛꠡꠦ ꠌꠟꠤ, ꠅꠃ ꠀꠝꠞꠣꠞ ꠟꠣꠉꠤ ꠡꠞꠤꠅꠔꠞ ꠖꠣꠛꠤ-ꠖꠣꠅꠀ ꠀꠖꠣꠄ ꠇꠞꠟꠣ।
ROM 8:5 ꠡꠞꠤꠟꠞ ꠛꠖ ꠈꠣꠁꠡꠞ ꠀꠅꠔꠣꠄ ꠎꠦꠔꠣ ꠝꠣꠘꠥꠡ ꠌꠟꠂꠘ, ꠔꠣꠞꠣꠞ ꠝꠘꠅ ꠛꠖ ꠈꠣꠁꠡꠞ ꠛꠣꠄ ꠈꠤꠀꠟꠤ ꠕꠣꠇꠦ, ꠀꠞ ꠎꠦꠞꠣ ꠙꠣꠇ ꠞꠥꠢꠥꠞ ꠀꠅꠔꠣꠄ, ꠔꠣꠞꠣꠞ ꠝꠘ ꠔ ꠙꠣꠇ ꠞꠥꠢꠥꠞ ꠈꠥꠡꠤ ꠝꠣꠚꠤꠇ ꠌꠟꠔꠦ ꠈꠤꠀꠟꠤ ꠞꠄ।
ROM 8:6 ꠡꠞꠤꠟꠞ ꠛꠖ ꠈꠣꠁꠡ ꠎꠦ ꠇꠣꠝꠞ ꠈꠤꠀꠟꠤ, ꠁꠔꠣꠞ ꠚꠟ ꠅꠁꠟ ꠝꠞꠘ, ꠅꠁꠟꠦ ꠙꠣꠇ ꠞꠥꠢꠥꠞ ꠈꠤꠀꠟꠦ ꠌꠟꠣꠞ ꠚꠟ ꠅꠁꠟ ꠎꠤꠘ꠆ꠖꠦꠉꠤ ꠀꠞ ꠡꠣꠘ꠆ꠔꠤ।
ROM 8:7 ꠎꠦ ꠎꠘꠞ ꠝꠘ ꠡꠞꠤꠟꠞ ꠛꠖ ꠈꠣꠁꠡꠞ ꠛꠣꠄ ꠈꠤꠀꠟꠤ, ꠁ ꠝꠘ ꠔ ꠀꠟ꠆ꠟꠣꠞ ꠖꠥꠡꠝꠘ, ꠢꠦ ꠀꠟ꠆ꠟꠣꠁ ꠡꠞꠤꠅꠔ ꠝꠣꠘꠔꠦ ꠞꠣꠎꠤ ꠘꠣꠄ, ꠝꠣꠘꠔ ꠙꠣꠞꠦꠅ ꠘꠣ।
ROM 8:8 ꠄꠞꠟꠣꠉꠤꠃ ꠎꠦꠔꠣ ꠝꠣꠘꠥꠡ ꠡꠞꠤꠟꠞ ꠛꠖ ꠈꠣꠁꠡꠞ ꠀꠅꠔꠣꠄ ꠌꠟꠂꠘ, ꠔꠣꠞꠣ ꠀꠟ꠆ꠟꠣꠞꠦ ꠈꠥꠡꠤ ꠇꠞꠔꠣ ꠙꠣꠞꠂꠘ ꠘꠣ।
ROM 8:9 ꠅꠁꠟꠦ ꠔꠥꠝꠞꠣꠞ ꠖꠤꠟꠅ ꠎꠦꠛꠟꠣ ꠀꠟ꠆ꠟꠣꠞ ꠞꠥꠢꠥ ꠛꠡꠔ ꠇꠞꠂꠘ, ꠔꠦ ꠔꠥꠝꠞꠣ ꠔ ꠡꠞꠤꠟꠞ ꠛꠖ ꠈꠣꠁꠡꠞ ꠀꠅꠔꠣꠄ ꠘꠣꠄ, ꠛꠞꠋ ꠙꠣꠇ ꠞꠥꠢꠥꠞ ꠀꠅꠔꠣꠄ। ꠀꠍꠟ ꠇꠕꠣ ꠅꠁꠟ, ꠀꠟ-ꠝꠍꠤꠞ ꠞꠥꠢꠥ ꠎꠣꠞ ꠝꠣꠎꠦ ꠘꠣꠁ, ꠢꠦ ꠀꠟ-ꠝꠍꠤꠞ ꠘꠣꠄ।
ROM 8:10 ꠀꠞ ꠢꠣꠍꠣꠃ ꠎꠥꠖꠤ ꠀꠟ-ꠝꠍꠤ ꠔꠥꠝꠞꠣꠞ ꠝꠣꠎꠦ ꠕꠣꠇꠂꠘ, ꠔꠦ ꠉꠥꠘꠣꠞ ꠚꠟ ꠢꠤꠡꠣꠛꠦ ꠔꠥꠝꠞꠣꠞ ꠡꠞꠤꠟ ꠝꠞꠣꠞ ꠙꠕꠤ ꠅꠁꠟꠦꠅ, ꠙꠣꠇ ꠞꠥꠢꠥꠞ ꠚꠟ ꠢꠤꠡꠣꠛꠦ ꠔꠥꠝꠞꠣ ꠔ ꠎꠤꠘ꠆ꠖꠣ। ꠀꠟ꠆ꠟꠣꠄ ꠔ ꠔꠥꠝꠞꠣꠞꠦ ꠛꠦ-ꠇꠍꠥꠞ ꠈꠣꠟꠣꠍ ꠇꠁꠀ ꠉꠁꠘ꠆ꠘ ꠇꠞꠍꠂꠘ।
ROM 8:11 ꠀꠞ ꠢꠃ ꠁꠍꠣꠞꠦ ꠎꠦꠁꠘ ꠝꠥꠞ꠆ꠖꠣ ꠕꠣꠇꠤ ꠎꠤꠘ꠆ꠖꠣ ꠇꠞꠍꠂꠘ, ꠅꠃ ꠀꠟ꠆ꠟꠣꠞ ꠞꠥꠢꠥ ꠎꠦꠛꠟꠣ ꠔꠥꠝꠞꠣꠞ ꠖꠤꠟꠅ ꠛꠡꠔ ꠇꠞꠂꠘ, ꠔꠦ ꠔꠣꠘ ꠅꠃ ꠞꠥꠢꠥꠞ ꠛꠟꠦ ꠝꠃꠔꠞ ꠀꠅꠔꠣꠄ ꠕꠣꠇꠣ ꠔꠥꠝꠞꠣꠞ ꠡꠞꠤꠟꠞꠦꠅ ꠎꠤꠘ꠆ꠖꠦꠉꠤ ꠖꠣꠘ ꠇꠞꠛꠣ।
ROM 8:12 ꠄꠞꠟꠣꠉꠤ ꠅ ꠜꠣꠁ ꠅꠇꠟ, ꠡꠞꠤꠟꠞ ꠛꠖ ꠈꠣꠁꠡꠞ ꠉꠦꠍꠦ ꠀꠝꠞꠣ ꠀꠞ ꠑꠦꠇꠣꠔ ꠘꠣꠄ, ꠅꠃ ꠛꠖ ꠈꠣꠁꠡꠞ ꠅꠗꠤꠘꠦ ꠌꠟꠣꠞꠅ ꠎꠞꠥꠞ ꠘꠣꠄ।
ROM 8:13 ꠅꠈꠘ ꠡꠞꠤꠟꠞ ꠛꠖ ꠈꠣꠁꠡꠞ ꠀꠅꠔꠣꠄ ꠌꠟꠟꠦ ꠔ ꠔꠥꠝꠞꠣ ꠌꠤꠞꠇꠣꠟꠞ ꠟꠣꠉꠤ ꠝꠞꠛꠣꠄ, ꠅꠁꠟꠦ ꠙꠣꠇ ꠞꠥꠢꠥꠞ ꠛꠟꠦ ꠡꠞꠤꠟꠞ ꠢꠇꠟ ꠘꠣꠚꠞꠝꠣꠘꠤꠞꠦ ꠛꠤꠘꠣꠡ ꠇꠞꠤꠟ꠆ꠟꠦ ꠌꠤꠞꠇꠣꠟ ꠎꠤꠘ꠆ꠖꠣ ꠞꠁꠛꠣꠄ।
ROM 8:14 ꠇꠣꠞꠘ ꠀꠟ꠆ꠟꠣꠞ ꠞꠥꠢꠥꠞ ꠛꠟꠦ ꠎꠦꠞꠣ ꠌꠟꠦ, ꠔꠣꠞꠣꠃ ꠀꠟ꠆ꠟꠣꠞ ꠀꠅꠟꠣꠖ।
ROM 8:15 ꠔꠥꠝꠞꠣ ꠔ ꠉꠥꠟꠣꠝꠤꠞ ꠞꠥꠢꠥ ꠙꠣꠁꠍ ꠘꠣ, ꠔꠦ ꠀꠞ ꠒꠞꠣꠁꠔꠣꠄ ꠇꠦꠘꠦ? ꠔꠥꠝꠞꠣ ꠈꠣꠟꠤ ꠢꠃ ꠀꠟ꠆ꠟꠣꠞ ꠞꠥꠢꠥ ꠙꠣꠁꠍ, ꠎꠦꠁꠘ ꠔꠥꠝꠞꠣꠞꠦ ꠀꠅꠟꠣꠖ ꠅꠀꠞ ꠄꠈꠔꠤꠀꠞ ꠖꠤꠍꠂꠘ। ꠄꠞꠟꠣꠉꠤꠃ ꠀꠟ꠆ꠟꠣ ꠙꠣꠇꠞꠦ ꠀꠝꠞꠣ ꠞꠥꠢꠣꠘꠤ ꠀꠛ꠆ꠛꠣ, ꠙꠛꠤꠔ꠆ꠞ ꠛꠣꠛꠣ ꠇꠁꠀ ꠒꠣꠇꠤ।
ROM 8:16 ꠀꠝꠞꠣꠞ ꠖꠤꠟꠞ ꠝꠣꠎꠞ ꠀꠟ꠆ꠟꠣꠁ ꠙꠣꠇ ꠞꠥꠢꠦꠅ ꠅꠟꠣ ꠡꠣꠇ꠆ꠇꠤ ꠖꠤꠀ ꠇꠁꠞꠣ, ꠀꠝꠞꠣ ꠀꠟ꠆ꠟꠣꠞ ꠀꠅꠟꠣꠖ।
ROM 8:17 ꠀꠝꠞꠣ ꠎꠦꠛꠟꠣ ꠀꠅꠟꠣꠖ, ꠔꠦ ꠀꠝꠞꠣ ꠝꠃꠞꠡꠤ ꠛꠣꠐ ꠙꠣꠁꠝꠥ। ꠀꠟ-ꠝꠍꠤꠄ ꠀꠟ꠆ꠟꠣꠞ ꠉꠦꠍ ꠕꠣꠇꠤ ꠝꠃꠞꠡꠤ ꠛꠣꠐ ꠙꠣꠁꠛꠣ, ꠀꠞ ꠔꠣꠘ ꠟꠉꠦ ꠀꠝꠞꠣꠅ ꠙꠣꠁꠝꠥ। ꠈꠣꠟꠤ ꠀꠝꠞꠣ ꠔꠣꠘ ꠟꠉꠦ ꠖꠥꠈ-ꠇꠡ꠆ꠐ ꠡꠁꠎ꠆ꠎ ꠇꠞꠟꠦ, ꠔꠣꠘ ꠟꠉꠦ ꠉꠃꠞꠛ-ꠝꠢꠤꠝꠣꠞꠅ ꠜꠣꠉ ꠙꠣꠁꠝꠥ।
ROM 8:18 ꠜꠣꠁꠀꠁꠘꠞꠦ, ꠀꠝꠞꠣ ꠛꠣꠖꠦ ꠎꠦ ꠝꠢꠤꠝꠣ ꠙꠣꠁꠝꠥ, ꠁꠔꠣꠞ ꠔꠥꠟꠘꠣꠄ ꠅꠈꠘꠇꠥꠞ ꠁ ꠖꠥꠈ-ꠇꠡ꠆ꠐ ꠇꠥꠘ꠆ꠔꠣꠃ ꠘꠣꠄ, ꠁꠔꠣ ꠔ ꠀꠝꠤ ꠎꠣꠘꠤ।
ROM 8:19 ꠢꠃ ꠡꠝꠄ ꠀꠁꠟꠦ ꠖꠦꠈꠣ ꠎꠣꠁꠛ ꠇꠦ ꠇꠦ ꠔꠣꠘ ꠀꠍꠟ ꠀꠅꠟꠣꠖ, ꠄꠞꠣꠞꠦ ꠖꠦꠈꠣꠞ ꠟꠣꠉꠤꠃ ꠀꠟ꠆ꠟꠣꠞ ꠙꠄꠖꠣ ꠇꠞꠣ ꠢꠇꠟꠔꠣꠄ ꠎꠣꠘꠦ-ꠙꠞꠣꠘꠦ ꠛꠣꠞ ꠌꠣꠁꠞꠣ।
ROM 8:20 ꠇꠣꠞꠘ ꠔꠣꠘ ꠙꠄꠖꠣ ꠇꠞꠣ ꠢꠇꠟꠔꠣꠃ ꠅꠈꠘ ꠅꠡꠣꠞ ꠅꠁꠉꠦꠍꠦ। ꠁꠔꠣ ꠇꠥꠘꠥ ꠘꠤꠎꠦ ꠘꠤꠎꠦ ꠅꠡꠣꠞ ꠅꠁꠉꠦꠍꠦ ꠘꠤ? ꠘꠣ, ꠛꠞꠋ ꠀꠟ꠆ꠟꠣꠄꠃ ꠔꠣꠞꠣꠞꠦ ꠢꠃ ꠙꠕꠦ ꠍꠣꠠꠤ ꠖꠤꠍꠂꠘ। ꠅꠁꠟꠦ ꠄꠞꠟꠉꠦ ꠔꠣꠁꠘ ꠅꠃ ꠀꠡꠣꠅ ꠖꠤꠍꠂꠘ,
ROM 8:21 ꠄꠇꠖꠤꠘ ꠁꠔꠣ ꠢꠇꠟꠔꠣ ꠛꠤꠘꠣꠡꠞ ꠀꠔ ꠕꠣꠇꠤ ꠈꠣꠟꠣꠍ ꠅꠁꠀ, ꠀꠟ꠆ꠟꠣꠞ ꠀꠅꠟꠣꠖ ꠅꠇꠟꠞ ꠡ꠆ꠛꠣꠗꠤꠘꠔꠣ ꠀꠞ ꠉꠃꠞꠛꠞ ꠜꠣꠉꠤ ꠅꠁꠔ ꠙꠣꠞꠛ।
ROM 8:22 ꠅꠈꠘ ꠙꠞ꠆ꠎꠘ꠆ꠔ ꠖꠦꠈꠤꠀꠞ, ꠢꠥꠞꠥꠔ꠆ꠔꠣ ꠙꠄꠖꠣꠞ ꠇꠣꠟꠅ ꠝꠣʼꠄ ꠎꠦꠟꠣ ꠛꠥꠇ ꠚꠣꠐꠣꠁꠀ ꠌꠤꠟ꠆ꠟꠣꠁꠘ, ꠔꠣꠘ ꠙꠄꠖꠣ ꠇꠞꠣ ꠢꠇꠟꠔꠣꠄꠃ ꠅꠟꠣ ꠀꠢꠣꠎꠣꠞꠤ ꠇꠞꠤ ꠌꠤꠟ꠆ꠟꠣꠁꠞꠣ।
ROM 8:23 ꠈꠣꠟꠤ ꠁꠈꠣꠘ ꠘꠣꠄ, ꠀꠝꠞꠣꠅ ꠢꠃ ꠎꠦ ꠝꠢꠤꠝꠣ ꠛꠣꠖꠦ ꠙꠣꠁꠝꠥ, ꠄꠞ ꠙꠄꠟꠣ ꠇꠤꠡ꠆ꠔꠤ ꠢꠤꠡꠣꠛꠦ ꠀꠟ꠆ꠟꠣꠁ ꠙꠣꠇ ꠞꠥꠢꠥꠞꠦ ꠅꠈꠘ ꠙꠣꠁꠍꠤ, ꠙꠣꠁꠀ ꠛꠣꠇꠤ ꠇꠤꠡ꠆ꠔꠤꠞ ꠟꠣꠉꠤ ꠀꠝꠞꠣꠅ ꠅꠟꠣ ꠌꠤꠟ꠆ꠟꠣꠁꠀꠞ। ꠀꠞ ꠢꠃ ꠇꠤꠡ꠆ꠔꠤ ꠙꠣꠅꠀꠞ ꠖꠤꠘꠞ ꠟꠣꠉꠤ ꠛꠣꠞ ꠌꠣꠁꠀꠞ, ꠎꠦ ꠖꠤꠘ ꠀꠝꠞꠣꠞꠦ ꠀꠟ꠆ꠟꠣꠞ ꠀꠅꠟꠣꠖ ꠢꠤꠡꠣꠛꠦ ꠎꠣꠁꠞ ꠇꠞꠣ ꠅꠁꠛ, ꠝꠣꠘꠤ ꠎꠦ ꠖꠤꠘ ꠀꠝꠞꠣꠞ ꠡꠞꠤꠟꠞꠦ ꠛꠤꠘꠣꠡꠞ ꠀꠔ ꠕꠣꠇꠤ ꠈꠣꠟꠣꠍ ꠇꠞꠣ ꠅꠁꠛ।
ROM 8:24 ꠀꠝꠞꠣ ꠈꠣꠟꠣꠍ ꠅꠀꠞ ꠅꠃ ꠀꠡꠣ ꠙꠣꠁꠍꠤ, ꠁꠝꠣꠘ ꠀꠘꠣꠞ ꠇꠣꠟꠅ। ꠔꠦ ꠎꠦꠔꠣ ꠎꠤꠘꠤꠡ ꠝꠣꠘꠡꠦ ꠖꠦꠈꠤꠟꠣꠄ, ꠁꠔꠣ ꠖꠦꠈꠣꠞ ꠟꠣꠉꠤ ꠢꠦ ꠀꠞ ꠀꠡꠣ ꠇꠞꠦ ꠘꠣ, ꠎꠦꠔꠣ ꠖꠦꠈꠣ ꠅꠁꠉꠦꠍꠦ, ꠁꠔꠣꠞꠦ ꠖꠦꠈꠣꠞ ꠀꠡꠣ ꠀꠞ ꠇꠦꠘꠦ ꠇꠞꠔ?
ROM 8:25 ꠅꠁꠟꠦ ꠘꠣ ꠖꠦꠈꠣ ꠎꠤꠘꠤꠡꠞꠦ ꠖꠦꠈꠣꠞ ꠟꠣꠉꠤ ꠀꠝꠞꠣ ꠗꠂꠎ꠆ꠎ ꠗꠞꠤꠀ ꠛꠣꠞ ꠌꠣꠁ।
ROM 8:26 ꠁꠔꠣ ꠍꠣꠠꠣ ꠀꠝꠞꠣꠞ ꠇꠝꠎꠥꠞꠤꠞ ꠡꠝꠄ ꠔ ꠙꠣꠇ ꠞꠥꠢꠦ ꠀꠝꠞꠣꠞꠦ ꠡꠣꠁꠎ꠆ꠎ ꠇꠞꠂꠘ। ꠖꠥꠀ ꠇꠞꠣꠞ ꠇꠣꠟꠅ ꠀꠝꠞꠣ ꠇꠤꠔꠣ ꠌꠣꠁꠔꠣꠝ, ꠁꠔꠣ ꠔ ꠀꠝꠞꠣ ꠎꠣꠘꠤ ꠘꠣ। ꠅꠁꠟꠦ ꠝꠥꠈꠖꠤ ꠎꠦꠔꠣ ꠇꠅꠀꠞ ꠡꠣꠁꠖ꠆ꠖ ꠘꠣꠁ, ꠖꠤꠟꠞ ꠇꠣꠘ꠆ꠖꠘꠞ ꠟꠉꠦ ꠙꠣꠇ ꠞꠥꠢꠦ ꠘꠤꠎꠦꠃ ꠀꠝꠞꠣꠞ ꠙꠇ꠆ꠇ ꠅꠁꠀ, ꠁꠔꠣꠞ ꠟꠣꠉꠤ ꠝꠤꠘꠔꠤ ꠇꠞꠂꠘ।
ROM 8:27 ꠇꠣꠞꠘ ꠎꠦꠁꠘ ꠝꠣꠘꠡꠞ ꠖꠤꠟꠞ ꠔꠣꠟ꠆ꠟꠣꠡ ꠇꠞꠂꠘ, ꠔꠣꠁꠘ ꠔ ꠙꠣꠇ ꠞꠥꠢꠥꠞ ꠇꠕꠣꠅ ꠛꠥꠎꠂꠘ। ꠙꠣꠇ ꠞꠥꠢꠦ ꠀꠟ꠆ꠟꠣꠞ ꠝꠞ꠆ꠎꠤ ꠝꠣꠚꠤꠇ ꠔꠣꠘ ꠙꠣꠇ ꠛꠘ꠆ꠖꠣ ꠅꠇꠟꠞ ꠟꠣꠉꠤ ꠝꠤꠘꠔꠤ ꠇꠞꠂꠘ।
ROM 8:28 ꠀꠝꠞꠣ ꠎꠣꠘꠤ, ꠀꠟ꠆ꠟꠣꠞꠦ ꠎꠦꠞꠣ ꠝꠢꠛ꠆ꠛꠔ ꠇꠞꠂꠘ, ꠝꠣꠘꠤ ꠀꠟ꠆ꠟꠣꠄ ꠔꠣꠘ ꠘꠤꠎꠞ ꠝꠞ꠆ꠎꠤ ꠝꠣꠚꠤꠇ ꠎꠦꠞꠣꠞꠦ ꠖꠣꠅꠔ ꠖꠤꠍꠂꠘ, ꠔꠣꠞꠣꠞ ꠜꠣꠟꠣꠁꠞ ꠟꠣꠉꠤ ꠢꠇꠟꠔꠣꠄ ꠄꠇꠟꠉꠦ ꠇꠣꠝ ꠇꠞꠦꠞ।
ROM 8:29 ꠀꠟ꠆ꠟꠣꠄ ꠎꠦꠞꠣꠞꠦ ꠀꠉ ꠕꠣꠇꠤꠃ ꠔꠣꠘ ꠘꠤꠎꠞ ꠟꠣꠉꠤ ꠙꠍꠘ꠆ꠖ ꠇꠞꠤ ꠞꠣꠈꠍꠤꠟꠣ, ꠔꠣꠞꠣꠞꠦ ꠔꠣꠘ ꠈꠣꠍ ꠝꠣꠄꠀꠞ ꠎꠘ ꠁꠍꠣꠞ ꠟꠣꠈꠣꠘ ꠅꠀꠞ ꠟꠣꠉꠤꠃ ꠙꠍꠘ꠆ꠖ ꠇꠞꠍꠤꠟꠣ, ꠎꠣꠔꠦ ꠅꠃ ꠁꠍꠣ ꠁꠛꠘꠥꠟ꠆ꠟꠣꠃ, ꠄꠞꠣ ꠢꠇꠟꠞ ꠛꠠ ꠜꠣꠁ ꠅꠁꠘ।
ROM 8:30 ꠔꠣꠁꠘ ꠀꠉꠦ ꠎꠦꠞꠣꠞꠦ ꠙꠍꠘ꠆ꠖ ꠇꠞꠍꠤꠟꠣ, ꠔꠣꠞꠣꠞꠦꠃ ꠖꠣꠅꠔ ꠖꠤꠟꠣ। ꠀꠞ ꠎꠦꠞꠣꠞꠦ ꠖꠣꠅꠔ ꠖꠤꠟꠣ, ꠔꠣꠞꠣꠞꠦ ꠛꠦ-ꠇꠍꠥꠞ ꠈꠣꠟꠣꠍ ꠇꠁꠀ ꠉꠁꠘ꠆ꠘ ꠇꠞꠟꠣ, ꠀꠞ ꠎꠦꠞꠣꠞꠦ ꠛꠦ-ꠇꠍꠥꠞ ꠉꠁꠘ꠆ꠘ ꠇꠞꠟꠣ, ꠔꠣꠞꠣꠞꠦ ꠔꠣꠘ ꠘꠤꠎꠞ ꠉꠃꠞꠛ-ꠝꠢꠤꠝꠣꠅ ꠖꠣꠘ ꠇꠞꠟꠣ।
ROM 8:31 ꠅꠈꠘ ꠁꠔꠣ ꠛꠦꠙꠣꠞꠦ ꠀꠝꠞꠣ ꠇꠤꠔꠣ ꠇꠁꠔꠣꠝ? ꠡ꠆ꠛꠄꠅꠋ ꠀꠟ꠆ꠟꠣ ꠙꠣꠇ ꠎꠦꠛꠟꠣ ꠀꠝꠞꠣꠞ ꠙꠇ꠆ꠇꠦ, ꠔꠦ ꠀꠝꠞꠣꠞ ꠛꠤꠙꠇ꠆ꠇꠦ ꠇꠦꠉꠥ ꠟꠣꠉꠔ?
ROM 8:32 ꠀꠝꠞꠣ ꠢꠇꠟꠞꠦ ꠛꠣꠌꠣꠘꠤꠞ ꠟꠣꠉꠤ, ꠀꠟ꠆ꠟꠣꠄ ꠎꠦꠛꠟꠣ ꠔꠣꠘ ꠈꠣꠍ ꠝꠣꠄꠀꠞ ꠎꠘ ꠁꠛꠘꠥꠟ꠆ꠟꠣꠞꠦ ꠛꠤꠟꠣꠁ ꠖꠤꠔꠦꠅ ꠘꠣꠞꠣꠎ ꠅꠁꠟꠣ ꠘꠣ, ꠔꠣꠘꠞꠦ ꠝꠃꠔꠞ ꠀꠔꠅ ꠡꠙꠤ ꠖꠤꠟꠣ, ꠔꠦ ꠅꠃ ꠝꠣꠄꠀꠞ ꠎꠘꠞ ꠟꠉꠦ ꠢꠇꠟꠔꠣꠃ ꠀꠝꠞꠣꠞꠦ ꠖꠣꠘ ꠇꠞꠔꠣ ꠘꠣꠄ ꠘꠤ?
ROM 8:33 ꠀꠞ ꠀꠟ꠆ꠟꠣꠄ ꠔꠣꠘ ꠘꠤꠎꠞ ꠟꠣꠉꠤ ꠎꠦꠞꠣꠞꠦ ꠙꠍꠘ꠆ꠖ ꠇꠞꠍꠂꠘ, ꠄꠞꠣꠞ ꠛꠤꠞꠥꠖ꠆ꠖꠦ ꠘꠣꠟꠤꠡ ꠖꠤꠛꠣꠞ ꠡꠣꠁꠖ꠆ꠖ ꠇꠣꠞ? ꠀꠟ꠆ꠟꠣꠄ ꠘꠤꠎꠦꠃ ꠔꠣꠞꠣꠞꠦ ꠛꠦ-ꠇꠍꠥꠞ ꠈꠣꠟꠣꠍ ꠇꠁꠀ ꠉꠁꠘ꠆ꠘ ꠇꠞꠍꠂꠘ।
ROM 8:34 ꠔꠦ ꠔꠣꠞꠣꠞꠦ ꠇꠦꠉꠥꠄ ꠖꠥꠡꠤꠔ? ꠎꠦꠞꠣꠞ ꠟꠣꠉꠤ ꠢꠃ ꠁꠍꠣ ꠀꠟ-ꠝꠍꠤꠞ ꠝꠃꠔ ꠅꠁꠍꠦ, ꠝꠃꠔꠞ ꠛꠣꠖꠦ ꠎꠤꠘ꠆ꠖꠣ ꠇꠞꠤꠅ ꠔꠥꠟꠣ ꠅꠁꠍꠦ, ꠔꠣꠁꠘ ꠅꠈꠘ ꠀꠟ꠆ꠟꠣ ꠙꠣꠇꠞ ꠒꠣꠁꠘ ꠉꠣꠟꠣꠞ ꠔꠈ꠆ꠔꠅ ꠛꠁꠀ, ꠀꠝꠞꠣꠞ ꠟꠣꠉꠤ ꠝꠤꠘꠔ-ꠇꠣꠎ꠆ꠎꠤ ꠇꠞꠣꠔ ꠀꠍꠂꠘ।
ROM 8:35 ꠄꠞꠟꠣꠉꠤ ꠁꠟꠣ ꠇꠥꠘꠥ ꠎꠤꠘꠤꠡ ꠀꠍꠦ ꠘꠤ, ꠎꠦꠔꠣꠄ ꠀꠝꠞꠣꠞꠦ ꠀꠟ-ꠝꠍꠤꠞ ꠝꠢꠛ꠆ꠛꠔ ꠕꠣꠇꠤ ꠀꠟꠉ ꠇꠞꠔ? ꠎꠥꠟꠥꠝ-ꠘꠤꠞ꠆ꠎꠣꠔꠘ, ꠎꠣꠟꠣ-ꠎꠘꠔ꠆ꠞꠘꠣ, ꠝꠘꠞ ꠇꠡ꠆ꠐ, ꠈꠣꠅꠀ-ꠚꠤꠘ꠆ꠖꠣꠞ ꠅꠜꠣꠛ, ꠛꠤꠙꠖ-ꠀꠙꠖ ꠛꠣ ꠖꠥꠡꠝꠘꠞ ꠔꠟꠥꠀꠞ?
ROM 8:36 ꠙꠛꠤꠔ꠆ꠞ ꠎꠛꠥꠞ ꠡꠞꠤꠚꠅ ꠀꠍꠦ, ꠔꠥꠝꠣꠞ ꠘꠣꠝꠞ ꠟꠣꠉꠤ ꠀꠝꠞꠣꠞꠦ ꠢꠞ-ꠢꠣꠝꠦꠡꠣ ꠈꠥꠘ ꠇꠞꠣ ꠅꠞ। ꠝꠣꠘꠡꠞ ꠌꠈꠥꠔ ꠀꠝꠞꠣ ꠅꠁꠟꠣꠝ ꠛꠟꠤꠞ ꠙꠣꠑꠣ।
ROM 8:37 ꠘꠣ, ꠁꠟꠣ ꠇꠥꠘ꠆ꠔꠣꠃ ꠘꠣꠁ। ꠇꠣꠞꠘ ꠎꠦ ꠁꠍꠣꠄ ꠀꠝꠞꠣꠞꠦ ꠅꠔ ꠝꠢꠛ꠆ꠛꠔ ꠇꠞꠍꠂꠘ, ꠔꠣꠘ ꠛꠟꠦ ꠀꠝꠞꠣ ꠁꠔꠣ ꠢꠇꠟꠔꠣꠔꠃ ꠙꠥꠞꠣꠙꠥꠞ ꠎꠄꠁ ꠅꠁꠀꠞ।
ROM 8:38 ꠔꠦ ꠀꠝꠤ ꠁꠈꠣꠘ ꠜꠣꠟꠣꠝꠘ꠆ꠔꠦꠃ ꠎꠣꠘꠤ, ꠎꠤꠘ꠆ꠖꠦꠉꠤ ꠛꠣ ꠝꠃꠔ, ꠚꠤꠞꠤꠡ꠆ꠔꠣ ꠛꠣ ꠁꠛꠟꠤꠍꠞ ꠇꠥꠘꠥ ꠌꠦꠟꠣ, ꠅꠈꠘ ꠛꠣ ꠜꠛꠤꠡꠔꠞ ꠇꠥꠘꠥꠔꠣꠄꠃ, ꠇꠥꠘꠥ ꠟꠣꠈꠣꠘ ꠡꠇ꠆ꠔꠤꠄꠃ,
ROM 8:39 ꠀꠍꠝꠣꠘꠞ ꠛꠣ ꠙꠣꠔꠣꠟꠞ ꠛꠣ ꠙꠄꠖꠣ ꠅꠀ ꠇꠥꠘꠥ ꠎꠤꠘꠤꠡꠦꠃ ꠀꠝꠞꠣꠞꠦ ꠀꠟ꠆ꠟꠣꠞ ꠝꠢꠛ꠆ꠛꠔ ꠕꠣꠇꠤ ꠀꠟꠉ ꠇꠞꠔ ꠙꠣꠞꠔ ꠘꠣꠄ। ꠔꠣꠘ ꠅꠃ ꠝꠢꠛ꠆ꠛꠔ ꠔ ꠀꠝꠞꠣꠞ ꠝꠣꠟꠤꠇ ꠁꠍꠣ ꠀꠟ-ꠝꠍꠤꠞ ꠃꠍꠤꠟ꠆ꠟꠣꠄ ꠙꠣꠁꠍꠤ।
ROM 9:1 ꠀꠝꠤ ꠀꠟ-ꠝꠍꠤꠞꠦ ꠡꠣꠇ꠆ꠇꠤ ꠞꠣꠈꠤꠀ, ꠄꠇ꠆ꠇꠦꠞꠦ ꠢꠣꠍꠣ ꠇꠕꠣ ꠇꠁꠞꠣꠝ, ꠀꠝꠣꠞ ꠛꠤꠛꠦꠇꠦꠅ ꠙꠣꠇ ꠞꠥꠢꠥꠞ ꠟꠉꠦ ꠅꠁꠀ ꠅꠃ ꠡꠣꠇ꠆ꠇꠤ ꠖꠦꠞ।
ROM 9:2 ꠛꠘꠤ ꠁꠍꠞꠣꠁꠟꠞ ꠟꠣꠉꠤ ꠀꠝꠣꠞ ꠛꠠ ꠀꠚꠍꠥꠍ ꠀꠞ ꠡꠤꠝꠣꠢꠤꠘ ꠇꠡ꠆ꠐ ꠟꠣꠉꠦꠞ।
ROM 9:3 ꠢꠣꠄꠞꠦ ꠢꠣꠄ, ꠀꠝꠤ ꠟꠣꠘ꠆ꠘꠔꠤꠞ ꠇꠣꠔꠣꠞꠅ ꠉꠤꠀ ꠀꠟ-ꠝꠍꠤꠞ ꠉꠦꠍ ꠕꠣꠇꠤ ꠢꠞꠣꠁꠟ ꠅꠁꠀꠅ ꠎꠥꠖꠤ, ꠀꠝꠣꠞ ꠎꠣꠔꠤꠞ ꠜꠣꠁꠀꠁꠘ ꠛꠘꠤ ꠁꠍꠞꠣꠁꠟꠞꠦ ꠛꠣꠌꠣꠁꠔꠣꠝ ꠙꠣꠞꠔꠣꠝ।
ROM 9:4 ꠀꠟ꠆ꠟꠣꠄ ꠔ ꠛꠘꠤ ꠁꠍꠞꠣꠁꠟꠞꠦ ꠔꠣꠘ ꠘꠤꠎꠞ ꠀꠅꠟꠣꠖꠞ ꠄꠈꠔꠤꠀꠞ ꠖꠤꠍꠂꠘ, ꠔꠣꠘ ꠡꠣꠘ-ꠔꠎꠟ꠆ꠟꠤ ꠖꠦꠈꠣꠁꠍꠂꠘ, ꠔꠣꠘ ꠟꠉꠦ ꠝꠤꠟꠘꠞ ꠃꠍꠤꠟ꠆ꠟꠣ ꠅꠇꠟ ꠇꠣꠁꠝ ꠇꠞꠍꠂꠘ, ꠡꠞꠤꠅꠔ ꠘꠣꠎꠤꠟ ꠇꠞꠍꠂꠘ, ꠔꠣꠘ ꠄꠛꠣꠖꠔ-ꠛꠘ꠆ꠖꠦꠉꠤꠞ ꠡꠥꠎꠥꠉ ꠇꠞꠤ ꠖꠤꠍꠂꠘ ꠀꠞ ꠛꠃꠔ ꠟꠣꠈꠣꠘ ꠅꠀꠖꠣꠅ ꠇꠞꠍꠂꠘ।
ROM 9:5 ꠢꠎꠞꠔ ꠁꠛ꠆ꠞꠣꠢꠤꠝ, ꠁꠍꠢꠣꠇ ꠀꠞ ꠁꠀꠇꠥꠛ ꠘꠛꠤ ꠀꠍꠟꠣ ꠛꠘꠤ ꠁꠍꠞꠣꠁꠟꠞ ꠝꠥꠟ ꠝꠥꠞꠛ꠆ꠛꠤ। ꠛꠣꠖꠦ ꠁꠍꠣ ꠀꠟ-ꠝꠍꠤꠅ ꠔ ꠞꠇ꠆ꠔ-ꠝꠣꠋꠡꠞ ꠛꠣꠄ ꠕꠣꠇꠤ ꠄꠞꠣꠞ ꠈꠣꠘ꠆ꠖꠣꠘꠅꠃ ꠎꠘꠝ ꠟꠁꠍꠂꠘ, ꠄꠁꠘ ꠢꠇꠟꠔꠣꠞ ꠃꠙꠞꠀꠟꠣ, ꠎꠥꠉꠦ ꠎꠥꠉꠦ ꠌꠤꠞꠇꠣꠟ ꠔꠣꠘ ꠔꠣꠞꠤꠚ ꠅꠃꠇ। ꠀꠝꠤꠘ।
ROM 9:6 ꠢꠥꠘꠅ, ꠀꠟ꠆ꠟꠣꠞ ꠅꠀꠖꠣ ꠅꠇꠟ ꠅꠈꠘ ꠎꠦꠘ ꠛꠦꠇꠣꠝꠣ ꠅꠁꠉꠦꠍꠦ, ꠁꠟꠣ ꠇꠥꠘ꠆ꠔꠣ ꠘꠣꠄ। ꠇꠣꠞꠘ ꠛꠘꠤ ꠁꠍꠞꠣꠁꠟꠞ ꠝꠣꠎꠦ ꠎꠘꠝ ꠅꠁꠟ ꠇꠞꠤꠃ, ꠄꠞꠣ ꠢꠇꠟ ꠔ ꠀꠍꠟ ꠛꠘꠤ ꠁꠍꠞꠣꠁꠟ ꠘꠣꠄ।
ROM 9:7 ꠢꠎꠞꠔ ꠁꠛ꠆ꠞꠣꠢꠤꠝꠞ ꠈꠣꠘ꠆ꠖꠣꠘ ꠇꠞꠤꠃ ꠔꠣꠞꠣ ꠎꠦꠘ ꠔꠣꠘ ꠀꠍꠟ ꠀꠅꠟꠣꠖ, ꠁꠟꠣ ꠇꠥꠘ꠆ꠔꠣ ꠘꠣꠄ। ꠛꠞꠋ ꠇꠤꠔꠣꠛꠅ ꠟꠦꠈꠣ ꠀꠍꠦ, “ꠔꠥꠝꠣꠞ ꠙꠥꠀ ꠁꠍꠢꠣꠇꠞ ꠈꠣꠘ꠆ꠖꠣꠘꠞꠦꠃ ꠔꠥꠝꠣꠞ ꠈꠣꠘ꠆ꠖꠣꠘ ꠇꠁꠀ ꠉꠘꠣ ꠅꠁꠛ।”
ROM 9:8 ꠝꠣꠘꠤ ꠁꠍꠞꠣꠁꠟ ꠎꠣꠔꠤꠞ ꠝꠣꠎꠦ ꠎꠘꠝ ꠅꠁꠍꠦ ꠉꠔꠤꠇꠦꠃ ꠝꠘꠅ ꠇꠞꠤꠅ ꠘꠣ, ꠔꠥꠝꠞꠣ ꠀꠟ꠆ꠟꠣꠞ ꠀꠅꠟꠣꠖ ꠛꠘꠤꠉꠦꠍ। ꠈꠣꠟꠤ ꠀꠟ꠆ꠟꠣꠞ ꠅꠀꠖꠣ ꠝꠣꠚꠤꠇ ꠎꠦꠞꠣ ꠀꠅꠟꠣꠖ ꠛꠘꠍꠦ, ꠔꠣꠞꠣꠞꠦꠃ ꠁꠛ꠆ꠞꠣꠢꠤꠝꠞ ꠈꠣꠘ꠆ꠖꠣꠘ ꠢꠤꠡꠣꠛꠦ ꠉꠁꠘ꠆ꠘ ꠇꠞꠣ ꠅꠁꠛ।
ROM 9:9 ꠛꠥꠎꠞꠣꠄ ꠘꠤ, ꠀꠟ꠆ꠟꠣꠄ ꠔ ꠢꠎꠞꠔ ꠁꠛ꠆ꠞꠣꠢꠤꠝꠞ ꠉꠦꠍꠦ ꠅꠃ ꠅꠀꠖꠣ ꠇꠞꠍꠟꠣ, “ꠍꠣꠝꠘꠞ ꠛꠍꠞ ꠅꠃ ꠌꠣꠘ꠆ꠖꠅ ꠀꠝꠤ ꠚꠤꠞꠤꠀ ꠀꠁꠝꠥ, ꠅꠃ ꠡꠝꠄ ꠔꠥꠝꠣꠞ ꠛꠤꠛꠤ ꠍꠣꠄꠞꠣꠞ ꠇꠥꠟꠅ ꠄꠇ ꠙꠥꠀ ꠕꠣꠇꠛ।”
ROM 9:10 ꠀꠞ ꠅꠃ ꠙꠥꠀ ꠅꠁꠟꠣ, ꠀꠝꠞꠣꠞ ꠙꠥꠞ꠆ꠛꠙꠥꠞꠥꠡ ꠢꠎꠞꠔ ꠁꠍꠢꠣꠇ। ꠈꠣꠟꠤ ꠁꠈꠣꠘ ꠘꠣꠄ, ꠅꠃ ꠁꠍꠢꠣꠇꠞ ꠛꠤꠛꠤ ꠞꠦꠛꠦꠇꠣꠞ ꠙꠦꠐꠞ ꠎꠥꠠꠞ ꠙꠥꠀꠂꠘ ꠄꠇꠁ ꠛꠣꠚꠞ ꠀꠅꠟꠣꠖ ꠅꠁꠟꠦꠅ,
ROM 9:11 ꠄꠞꠣ ꠝꠣʼꠞ ꠙꠦꠐꠅ ꠕꠣꠇꠣ ꠢꠣꠟꠔꠦ ꠎꠦꠛꠟꠣ ꠜꠣꠟꠣ-ꠛꠥꠞꠣ ꠇꠤꠌ꠆ꠍꠥ ꠇꠞꠍꠂꠘ ꠘꠣ, ꠢꠃ ꠡꠝꠄ ꠀꠟ꠆ꠟꠣꠄ ꠞꠦꠛꠦꠇꠣꠞꠦ ꠇꠁꠍꠟꠣ, “ꠔꠥꠝꠣꠞ ꠛꠠ ꠙꠥꠀ ꠔ ꠢꠥꠞꠥ ꠙꠥꠀꠞ ꠉꠥꠟꠣꠝ ꠅꠁꠛ।” ꠅꠘ ꠕꠣꠇꠤ ꠛꠥꠎꠣ ꠎꠣꠄ, ꠀꠟ꠆ꠟꠣꠄ ꠔꠣꠘ ꠝꠥꠘꠡꠣ ꠙꠥꠞꠣ ꠇꠞꠣꠞ ꠈꠤꠀꠟꠦ ꠝꠣꠘꠡꠞꠦ ꠙꠍꠘ꠆ꠖ ꠇꠞꠂꠘ, ꠇꠦꠃꠞꠞ ꠀꠝꠟꠞ ꠛꠣꠄ ꠘꠣ ꠌꠣꠁꠀ, ꠔꠣꠘ ꠘꠤꠎꠞ ꠙꠍꠘ꠆ꠖ ꠝꠣꠚꠤꠇ ꠛꠣꠍꠤꠀ ꠘꠦꠁꠘ।
ROM 9:13 ꠄꠞꠟꠣꠉꠤꠃ ꠙꠣꠇ ꠇꠤꠔꠣꠛꠅ ꠟꠦꠈꠣ ꠀꠍꠦ, “ꠀꠝꠤ ꠔ ꠁꠀꠇꠥꠛꠞꠦ ꠝꠢꠛ꠆ꠛꠔ ꠇꠞꠍꠤ, ꠅꠁꠟꠦ ꠔꠣꠞ ꠜꠣꠁ ꠁꠡʼꠞꠦ ꠢꠞꠣꠁꠀ ꠞꠣꠈꠍꠤ।”
ROM 9:14 ꠔꠦ ꠅꠈꠘ ꠀꠝꠞꠣ ꠇꠁꠔꠣꠝ ꠘꠤ, ꠀꠟ꠆ꠟꠣꠄꠅ ꠅꠛꠤꠌꠣꠞ ꠇꠞꠂꠘ? ꠘꠣꠃꠎꠥꠛꠤꠟ꠆ꠟꠣ, ꠝꠥꠐꠦꠃ ꠘꠣ!
ROM 9:15 ꠀꠟ꠆ꠟꠣꠄ ꠢꠎꠞꠔ ꠝꠥꠍꠣꠞꠦ ꠇꠁꠍꠟꠣ, “ꠀꠝꠤ ꠎꠣꠞꠦ ꠈꠥꠡꠤ ꠖꠄꠀ ꠇꠞꠝꠥ, ꠀꠞ ꠎꠣꠞꠦ ꠈꠥꠡꠤ ꠞꠢꠝ ꠇꠞꠝꠥ।”
ROM 9:16 ꠅꠘ ꠕꠣꠇꠤ ꠛꠥꠎꠣ ꠎꠣꠄ, ꠞꠢꠝꠔ ꠔ ꠇꠦꠃꠞꠞ ꠌꠦꠡ꠆ꠐꠣꠄ ꠛꠣ ꠁꠌ꠆ꠍꠣꠄ ꠝꠤꠟꠦ ꠘꠣ, ꠈꠣꠟꠤ ꠀꠟ꠆ꠟꠣꠞ ꠝꠦꠢꠦꠞꠛꠣꠘꠤ ꠕꠣꠇꠤꠃ ꠝꠤꠟꠦ।
ROM 9:17 ꠀꠍꠝꠣꠘꠤ ꠇꠤꠔꠣꠛꠞ ꠀꠄꠀꠔꠅ ꠀꠍꠦ, ꠀꠟ꠆ꠟꠣꠄ ꠚꠦꠞꠣꠃꠘꠞꠦ ꠇꠁꠍꠟꠣ, “ꠀꠝꠤ ꠔꠥꠝꠣꠞꠦ ꠛꠣꠖꠡꠣ ꠛꠣꠘꠣꠁꠍꠤ, ꠎꠣꠔꠦ ꠔꠥꠝꠣꠞ ꠝꠣꠎꠖꠤ ꠢꠇꠟꠦ ꠀꠝꠣꠞ ꠟꠤꠟꠣ-ꠈꠦꠟꠣ ꠖꠦꠈꠤꠀ, ꠢꠣꠞꠣ ꠖꠥꠘꠤꠀꠁꠔ ꠀꠝꠣꠞ ꠘꠣꠝ ꠎꠣꠁꠞ ꠅꠄ।”
ROM 9:18 ꠔꠦ ꠖꠦꠈꠣ ꠎꠣꠄ, ꠀꠟ꠆ꠟꠣꠄ ꠔꠣꠘ ꠘꠤꠎꠞ ꠈꠥꠡꠤ ꠝꠣꠚꠤꠇ ꠇꠦꠃꠞꠞꠦ ꠖꠄꠀ ꠇꠞꠂꠘ, ꠀꠞ ꠇꠦꠃꠞꠞ ꠖꠤꠟꠞꠦ ꠙꠣꠡꠣꠘ ꠛꠣꠘꠣꠁꠘ।
ROM 9:19 ꠅꠈꠘ ꠔꠥꠝꠞꠣ ꠀꠝꠣꠞꠦ ꠎꠤꠇꠣꠁꠔꠣꠄ ꠙꠣꠞ, “ꠀꠟ꠆ꠟꠣꠞ ꠝꠞ꠆ꠎꠤꠞ ꠛꠣꠁꠞꠣ ꠎꠦꠛꠟꠣ ꠇꠦꠃ ꠇꠥꠘ꠆ꠔꠣ ꠇꠞꠔ ꠙꠣꠞꠦ ꠘꠣ, ꠔꠦ ꠀꠟ꠆ꠟꠣꠄ ꠇꠦꠘꠦ ꠝꠣꠘꠡꠞ ꠖꠥꠡ-ꠔꠤꠞꠥꠐꠤ ꠉꠘꠂꠘ?”
ROM 9:20 ꠁ ꠍꠅꠀꠟꠞ ꠡꠥꠎꠣ ꠎꠥꠀꠙ ꠅꠁꠟ, ꠀꠟ꠆ꠟꠣꠞ ꠃꠙꠞꠦ ꠝꠣꠔꠣꠞ ꠔꠥꠝꠤ ꠇꠦ? ꠇꠦꠃ ꠎꠥꠖꠤ ꠇꠥꠘꠥ ꠎꠤꠘꠤꠡ ꠛꠣꠘꠣꠄ, ꠔꠦ ꠔꠣꠞ ꠛꠣꠘꠣꠁꠟ ꠎꠤꠘꠤꠡꠦ ꠎꠤꠇꠣꠁꠔ ꠙꠣꠞꠛ ꠘꠤ, ꠀꠝꠣꠞꠦ ꠇꠦꠘꠦ ꠁꠟꠣ ꠛꠣꠘꠣꠁꠟꠣꠄ?
ROM 9:21 ꠄꠇ ꠝꠣꠐꠤ ꠕꠣꠇꠤ ꠇꠥꠝꠣꠞꠦ ꠘꠣꠘꠣꠘ ꠎꠣꠔꠞ ꠎꠤꠘꠤꠡ ꠛꠣꠘꠣꠁꠔ ꠙꠣꠞꠦ ꠘꠣ ꠘꠤ? ꠁꠔꠣꠞ ꠇꠥꠘꠥꠐꠣ ꠁꠎ꠆ꠎꠔꠤ ꠇꠣꠝꠅ ꠀꠞ ꠇꠥꠘꠥꠐꠣ ꠡꠣꠗꠣꠞꠘ ꠇꠣꠝꠅ ꠟꠣꠉꠦ।
ROM 9:22 ꠑꠤꠇ ꠅꠟꠣꠈꠣꠘ, ꠀꠟ꠆ꠟꠣꠄ ꠔꠣꠘ ꠟꠣꠘ꠆ꠘꠔ ꠀꠞ ꠇꠥꠖꠞꠔꠤ ꠈꠦꠝꠔꠣ ꠖꠦꠈꠣꠁꠔꠣ ꠌꠣꠁꠍꠟꠣ, ꠀꠞ ꠎꠦꠞꠣꠞ ꠃꠙꠞꠦ ꠁ ꠟꠣꠘ꠆ꠘꠔ ꠓꠣꠟꠤꠔꠣ ꠌꠣꠁꠍꠟꠣ, ꠄꠞꠣꠞ ꠙꠣꠅꠘꠣ ꠀꠍꠤꠟ ꠈꠣꠟꠤ ꠛꠤꠘꠣꠡꠤ ꠉꠎꠛ, ꠔꠣ-ꠅ ꠔꠣꠁꠘ ꠛꠃꠔ ꠛꠠ ꠍꠛꠞ ꠇꠞꠤꠀ ꠔꠣꠞꠣꠞ ꠁꠔꠣ ꠡꠁꠎ꠆ꠎ ꠇꠞꠟꠣ।
ROM 9:23 ꠔꠣꠁꠘ ꠁꠔꠣ ꠡꠁꠎ꠆ꠎ ꠇꠞꠟꠣ, ꠇꠣꠞꠘ ꠀꠞꠇꠛꠣꠞ ꠘꠤꠎꠞ ꠇꠥꠖꠞꠔꠤ ꠡꠣꠘ-ꠔꠎꠟ꠆ꠟꠤꠞ ꠇꠕꠣ ꠎꠣꠘꠣꠁꠔꠣ ꠌꠣꠁꠟꠣ। ꠀꠞ ꠎꠦꠞꠣꠞꠦ ꠖꠄꠀ ꠇꠞꠍꠂꠘ, ꠄꠞꠣꠞꠦ ꠔꠣꠁꠘ ꠀꠉꠦ ꠕꠣꠇꠤꠃ ꠎꠥꠁꠔ ꠇꠞꠤꠀ ꠞꠣꠈꠍꠤꠟꠣ, ꠔꠣꠘ ꠡꠣꠘ-ꠔꠎꠟ꠆ꠟꠤ ꠖꠦꠈꠣꠘꠤꠞ ꠈꠤꠀꠟꠦ।
ROM 9:24 ꠀꠍꠟꠦ ꠀꠝꠞꠣꠃ ꠅꠁꠟꠣꠝ ꠢꠃ ꠖꠄꠀꠞ ꠎꠘ। ꠀꠝꠞꠣꠞꠦ ꠔꠣꠁꠘ ꠈꠣꠟꠤ ꠛꠘꠤ ꠁꠍꠞꠣꠁꠟꠞ ꠝꠣꠎ ꠕꠣꠇꠤꠃ ꠖꠣꠅꠔ ꠖꠤꠀ ꠀꠘꠍꠂꠘ ꠘꠣ, ꠅꠁꠘ꠆ꠘ ꠎꠣꠔꠤꠞ ꠝꠣꠎ ꠕꠣꠇꠤꠅ ꠔ ꠀꠘꠍꠂꠘ।
ROM 9:25 ꠢꠎꠞꠔ ꠢꠥꠍꠤꠀ ꠘꠛꠤꠞ ꠍꠢꠤꠚꠣꠔ ꠀꠟ꠆ꠟꠣꠄ ꠇꠁꠍꠂꠘ, ꠎꠦꠔꠣ ꠝꠣꠘꠥꠡ ꠀꠝꠣꠞ ꠙ꠆ꠞꠎꠣ ꠘꠣꠄ, ꠔꠣꠞꠣꠞꠦꠅ ꠀꠝꠣꠞ ꠘꠤꠎꠞ ꠙ꠆ꠞꠎꠣ ꠛꠣꠘꠣꠁꠝꠥ। ꠀꠞ ꠎꠦꠞꠣ ꠀꠝꠣꠞ ꠝꠣꠄꠀꠞ ꠝꠣꠘꠥꠡ ꠀꠍꠤꠟ ꠘꠣ, ꠔꠣꠞꠣꠞꠦꠅ ꠝꠣꠄꠀꠞ ꠝꠣꠘꠥꠡ ꠇꠁꠀ ꠒꠣꠇꠝꠥ।
ROM 9:26 ꠎꠦ ꠎꠝꠤꠘꠅ ꠇꠅꠀ ꠅꠁꠍꠤꠟ, ꠔꠥꠝꠞꠣ ꠀꠝꠣꠞ ꠙ꠆ꠞꠎꠣ ꠘꠣꠄ, ꠢꠃ ꠎꠝꠤꠘꠅꠃ ꠔꠣꠞꠣꠞꠦ ꠎꠤꠘ꠆ꠖꠣ ꠀꠟ꠆ꠟꠣꠞ ꠀꠅꠟꠣꠖ ꠇꠅꠀ ꠅꠁꠛ।
ROM 9:27 ꠅꠁꠟꠦ ꠛꠘꠤ ꠁꠍꠞꠣꠁꠟꠞ ꠛꠦꠙꠣꠞꠦ ꠢꠎꠞꠔ ꠁꠡꠣꠄꠀ ꠘꠛꠤꠄ ꠇꠁꠍꠟꠣ, ꠉꠘꠣꠞ ꠛꠣꠟꠣ ꠎꠥꠖꠤꠅ ꠔꠣꠞꠣ ꠖꠞꠤꠀꠞ ꠌꠞꠞ ꠛꠣꠟꠥꠞ ꠟꠣꠈꠣꠘ ꠛꠦꠢꠤꠡꠣꠛ, ꠔꠦꠛꠃ ꠔꠣꠞꠣꠞ ꠝꠣꠎꠞ ꠈꠥꠛ ꠢꠥꠞꠥ ꠄꠇ ꠅꠋꠡꠄ ꠈꠣꠟꠣꠍ ꠙꠣꠁꠛꠣ।
ROM 9:28 ꠝꠣꠛꠥꠖ ꠝꠃꠟꠣꠄ ꠎꠉꠔꠞ ꠙꠣꠅꠘꠣ ꠎꠦ ꠡꠣꠎꠣ ꠎꠥꠁꠔ ꠇꠞꠍꠂꠘ, ꠅꠃ ꠡꠥꠟ꠆ꠟꠀꠘꠣ ꠡꠣꠎꠣ ꠈꠥꠛ ꠎꠟꠖꠤꠃ ꠖꠤꠛꠣ।
ROM 9:29 ꠢꠎꠞꠔ ꠁꠡꠣꠄꠀ ꠘꠛꠤꠄ ꠀꠞꠅ ꠛꠣꠔꠣꠁꠍꠂꠘ, “ꠀꠟ꠆ꠟꠣ ꠞꠣꠛ꠆ꠛꠥꠟ ꠀꠟꠣꠝꠤꠘꠦ ꠎꠥꠖꠤ ꠀꠝꠞꠣꠞ ꠟꠣꠉꠤ ꠇꠤꠍꠥ ꠝꠣꠘꠡꠞꠦ ꠎꠤꠘ꠆ꠖꠣ ꠘꠣ ꠞꠣꠈꠔꠣ, ꠔꠦ ꠀꠝꠞꠣꠞ ꠖꠡꠣ ꠔ ꠟꠣꠘ꠆ꠘꠔꠤ ꠍꠣꠖꠥꠝ ꠀꠞ ꠀꠝꠥꠞꠣ ꠐꠣꠃꠘꠞ ꠟꠣꠈꠣꠘ ꠅꠁꠟ ꠅꠘꠦ।”
ROM 9:30 ꠔꠦ ꠀꠝꠞꠣ ꠅꠃ ꠇꠕꠣꠃ ꠇꠁꠝꠥ, ꠜꠤꠘ ꠎꠣꠔꠤ ꠅꠇꠟꠦ ꠎꠥꠖꠤꠅ ꠀꠟ꠆ꠟꠣꠞ ꠙꠞꠦꠎꠉꠣꠞ ꠛꠘ꠆ꠖꠣ ꠅꠀꠞ ꠌꠦꠡ꠆ꠐꠣ ꠇꠞꠍꠦ ꠘꠣ, ꠔꠦꠛꠃ ꠁꠝꠣꠘ ꠀꠘꠣꠞ ꠝꠣꠎꠖꠤ ꠔꠣꠞꠣ ꠀꠟ꠆ꠟꠣꠞ ꠖꠞꠛꠣꠞꠅ ꠙꠞꠦꠎꠉꠣꠞ ꠛꠘꠤꠉꠦꠍꠦ।
ROM 9:31 ꠀꠞ ꠛꠘꠤ ꠁꠍꠞꠣꠁꠟꠦ ꠈꠣꠟꠤ ꠡꠞꠤꠅꠔ ꠝꠣꠘꠤꠀ ꠙꠞꠦꠎꠉꠣꠞ ꠛꠘꠔ ꠌꠣꠁꠍꠤꠟ, ꠅꠁꠟꠦ ꠡꠞꠤꠅꠔ ꠝꠣꠘꠔ ꠙꠣꠞꠍꠦ ꠘꠣ।
ROM 9:32 ꠀꠁꠌ꠆ꠍꠣ, ꠔꠣꠞꠣ ꠇꠦꠘꠦ ꠙꠣꠞꠍꠦ ꠘꠣ? ꠔꠣꠞꠣ ꠁꠝꠣꠘꠞ ꠃꠙꠞꠦ ꠜꠞꠡꠣ ꠘꠣ ꠇꠞꠤꠀ, ꠈꠣꠟꠤ ꠇꠣꠝ-ꠇꠣꠎꠞ ꠀꠝꠟꠞ ꠃꠙꠞꠦ ꠜꠞꠡꠣ ꠇꠞꠍꠦ, ꠄꠞꠟꠣꠉꠤ ꠙꠣꠞꠍꠦ ꠘꠣ। ꠝꠣꠘꠡꠦ ꠎꠦ ꠙꠣꠔ꠆ꠔꠞꠅ ꠃꠡ꠆ꠐꠣ ꠈꠣꠁꠘ, ꠔꠣꠞꠣꠅ ꠅꠃ ꠙꠣꠔ꠆ꠔꠞꠅ ꠃꠡ꠆ꠐꠣ ꠈꠣꠁꠍꠂꠘ।
ROM 9:33 ꠁ ꠛꠦꠙꠣꠞꠦ ꠀꠍꠝꠣꠘꠤ ꠇꠤꠔꠣꠛꠅ ꠟꠦꠈꠣ ꠀꠍꠦ, ꠢꠥꠘꠅ, ꠀꠝꠤ ꠎꠦꠞꠥꠎꠣꠟꠦꠝꠅ ꠅꠟꠣ ꠄꠇ ꠙꠣꠔ꠆ꠔꠞ ꠛꠅꠀꠁꠍꠤ, ꠎꠦ ꠙꠣꠔ꠆ꠔꠞꠅ ꠝꠣꠘꠡꠦ ꠃꠡ꠆ꠐꠣ ꠈꠣꠁꠀ ꠙꠠꠛ। ꠅꠁꠟꠦ ꠎꠦ ꠎꠘꠦ ꠔꠣꠘ ꠃꠙꠞꠦ ꠁꠝꠣꠘ ꠀꠘꠛ, ꠢꠦ ꠇꠥꠘꠥꠝꠘ꠆ꠔꠦꠃ ꠡꠞꠝꠤꠘ꠆ꠖꠣ ꠅꠁꠔ ꠘꠣꠄ।
ROM 10:1 ꠔꠦ ꠅ ꠜꠣꠁ ꠅꠇꠟ, ꠛꠘꠤ ꠁꠍꠞꠣꠁꠟꠞ ꠟꠣꠉꠤ ꠀꠝꠣꠞ ꠖꠤꠟꠞ ꠅꠃ ꠚꠞꠤꠀꠖ ꠀꠍꠦ, ꠀꠝꠤ ꠀꠟ꠆ꠟꠣꠞ ꠖꠞꠛꠣꠞꠅ ꠖꠥꠀ ꠇꠞꠤꠀꠞ, ꠔꠣꠞꠣ ꠎꠣꠘꠥ ꠘꠣꠎꠣꠔ ꠙꠣꠁꠘ।
ROM 10:2 ꠔꠣꠞꠣꠞ ꠛꠦꠙꠣꠞꠦ ꠀꠝꠤ ꠅꠈꠣꠘꠃ ꠇꠁꠞꠣꠝ, ꠔꠣꠞꠣꠞ ꠝꠘꠞ ꠝꠣꠎꠦ ꠀꠟ꠆ꠟꠣꠞ ꠄꠡꠇꠤ ꠀꠍꠦ, ꠅꠁꠟꠦ ꠔꠣꠞꠣ ꠎꠣꠘꠦ ꠘꠣ, ꠀꠟ꠆ꠟꠣꠞ ꠖꠞꠛꠣꠞꠅ ꠇꠦꠝꠘꠦ ꠙꠞꠦꠎꠉꠣꠞ ꠛꠘꠣ ꠎꠣꠄ।
ROM 10:3 ꠀꠟ꠆ꠟꠣꠞ ꠖꠞꠛꠣꠞꠅ ꠛꠦ-ꠇꠍꠥꠞ ꠈꠣꠟꠣꠍ ꠅꠀꠞ ꠙꠕ ꠘꠣ ꠎꠣꠘꠣꠄ, ꠔꠣꠞꠣ ꠁ ꠙꠕꠞꠦ ꠝꠣꠘꠍꠦꠅ ꠘꠣ, ꠔꠣꠞꠣ ꠈꠣꠟꠤ ꠡꠞꠤꠅꠔ ꠀꠝꠟ ꠇꠞꠤꠀ ꠙꠞꠦꠎꠉꠣꠞ ꠛꠘꠔ ꠌꠣꠄ।
ROM 10:4 ꠅꠃ ꠡꠞꠤꠅꠔꠞ ꠢꠇꠟ ꠖꠣꠛꠤ-ꠖꠣꠅꠀ ꠀꠟ-ꠝꠍꠤꠄ ꠔ ꠀꠖꠣꠄ ꠇꠞꠤꠟꠍꠂꠘ, ꠄꠞꠟꠣꠉꠤ ꠔꠣꠘ ꠃꠙꠞꠦ ꠎꠦꠞꠣ ꠁꠝꠣꠘ ꠀꠘꠦ, ꠀꠟ꠆ꠟꠣꠞ ꠖꠞꠛꠣꠞꠅ ꠔꠣꠞꠣꠞꠦ ꠛꠦ-ꠇꠍꠥꠞ ꠈꠣꠟꠣꠍ ꠇꠁꠀ ꠉꠁꠘ꠆ꠘ ꠇꠞꠣ ꠅꠄ।
ROM 10:5 ꠡꠞꠤꠅꠔ ꠀꠝꠟ ꠇꠞꠤꠀ ꠀꠟ꠆ꠟꠣꠞ ꠖꠞꠛꠣꠞꠅ ꠙꠞꠦꠎꠉꠣꠞ ꠅꠀꠞ ꠛꠦꠙꠣꠞꠦ, ꠢꠎꠞꠔ ꠝꠥꠍꠣꠄ ꠔꠃꠞꠣꠔ ꠇꠤꠔꠣꠛꠅ ꠟꠦꠈꠍꠂꠘ, “ꠎꠦꠞꠣ ꠡꠞꠤꠅꠔ ꠝꠣꠘꠔ ꠌꠣꠄ, ꠔꠣꠞꠣ ꠙꠥꠞꠣꠙꠥꠞ ꠝꠣꠘꠟꠦ ꠛꠣꠌꠤꠛ।”
ROM 10:6 ꠀꠞ ꠁꠝꠣꠘꠞ ꠛꠟꠦ ꠝꠣꠘꠥꠡ ꠇꠤꠟꠣ ꠀꠟ꠆ꠟꠣꠞ ꠖꠞꠛꠣꠞꠅ ꠙꠞꠦꠎꠉꠣꠞ ꠛꠘꠦ ꠁ ꠛꠦꠙꠣꠞꠦ ꠀꠟ꠆ꠟꠣꠞ ꠇꠣꠟꠣꠝꠅ ꠟꠦꠈꠣ ꠀꠍꠦ, “ꠝꠘꠦ ꠝꠘꠦ ꠇꠁꠅ ꠘꠣ, ꠇꠦ ꠉꠤꠀ ꠀꠍꠝꠣꠘꠅ ꠃꠑꠤꠔ?” ꠄꠞ ꠝꠣꠘꠤ ꠅꠁꠟ, ꠢꠘꠅ ꠃꠑꠤꠀ ꠀꠟ-ꠝꠍꠤꠞꠦ ꠟꠣꠝꠣꠁꠀ ꠀꠘꠔ।
ROM 10:7 ꠛꠣ ꠁꠈꠣꠘꠅ ꠇꠁꠅ ꠘꠣ, “ꠇꠦ ꠉꠤꠀ ꠙꠣꠔꠣꠟꠅ ꠟꠣꠝꠔ?” ꠄꠞ ꠝꠣꠘꠤ ꠅꠁꠟ, ꠢꠘꠅ ꠟꠣꠝꠤꠀ ꠀꠟ-ꠝꠍꠤꠞꠦ ꠇꠄꠛꠞ ꠕꠣꠇꠤ ꠔꠥꠟꠤꠀ ꠀꠘꠔ।
ROM 10:8 ꠘꠣ ꠁꠟꠣ ꠇꠥꠘ꠆ꠔꠣ ꠘꠣꠄ, ꠇꠣꠞꠘ ꠟꠦꠈꠣ ꠀꠍꠦ, “ꠀꠍꠟꠦ ꠀꠟ꠆ꠟꠣꠞ ꠇꠣꠟꠣꠝ ꠔ ꠔꠥꠝꠣꠞ ꠈꠥꠛ ꠗꠣꠞꠅ ꠀꠍꠦ, ꠁꠔꠣ ꠔꠥꠝꠣꠞ ꠝꠥꠈꠅ ꠀꠞ ꠔꠥꠝꠣꠞ ꠖꠤꠟꠅ ꠀꠍꠦ।” ꠀꠞ ꠀꠝꠞꠣ ꠎꠦꠔꠣ ꠔꠛꠟꠤꠉ ꠇꠞꠞꠣꠝ, ꠁꠔꠣꠃ ꠔ ꠢꠃ ꠇꠣꠟꠣꠝ।
ROM 10:9 ꠅꠈꠘ ꠔꠥꠝꠤ ꠎꠥꠖꠤ ꠝꠥꠈꠦ ꠡ꠆ꠛꠤꠇꠣꠞ ꠇꠞ ꠢꠎꠞꠔ ꠁꠍꠣꠃ ꠝꠣꠟꠤꠇ, ꠀꠞ ꠖꠤꠟꠦ ꠄꠇꠤꠘ ꠇꠞ, ꠀꠟ꠆ꠟꠣꠄ ꠔꠣꠘꠞꠦ ꠝꠥꠞ꠆ꠖꠣ ꠕꠣꠇꠤ ꠎꠤꠘ꠆ꠖꠣ ꠇꠞꠍꠂꠘ, ꠔꠦ ꠔꠥꠝꠤ ꠀꠈꠦꠞ ꠙꠣꠁꠛꠣꠄ।
ROM 10:10 ꠇꠣꠞꠘ ꠖꠤꠟꠦ ꠁꠝꠣꠘ ꠀꠘꠟꠦ ꠀꠟ꠆ꠟꠣꠄ ꠝꠣꠘꠡꠞꠦ ꠛꠦ-ꠇꠍꠥꠞ ꠈꠣꠟꠣꠍ ꠇꠁꠀ ꠉꠁꠘ꠆ꠘ ꠇꠞꠂꠘ, ꠀꠞ ꠝꠥꠈꠦ ꠡ꠆ꠛꠤꠇꠣꠞ ꠇꠞꠟꠦ ꠀꠟ꠆ꠟꠣꠄ ꠘꠣꠎꠣꠔ ꠖꠣꠘ ꠇꠞꠂꠘ।
ROM 10:11 ꠀꠟ꠆ꠟꠣꠞ ꠇꠣꠟꠣꠝꠦ ꠛꠣꠔꠣꠄ, “ꠎꠦ ꠎꠘꠦ ꠔꠣꠘ ꠃꠙꠞꠦ ꠁꠝꠣꠘ ꠀꠘꠛ, ꠢꠦ ꠇꠥꠘꠥꠝꠘ꠆ꠔꠦꠃ ꠡꠞꠝꠤꠘ꠆ꠖꠣ ꠅꠁꠔ ꠘꠣꠄ।”
ROM 10:12 ꠛꠘꠤ ꠁꠍꠞꠣꠁꠟ ꠅꠃꠇ ꠛꠣ ꠜꠤꠘ ꠎꠣꠔꠤ ꠅꠃꠇ, ꠄꠞꠣꠞ ꠝꠣꠎꠦ ꠇꠥꠘꠥ ꠔꠚꠣꠔ ꠘꠣꠁ, ꠇꠣꠞꠘ ꠢꠇꠟꠞ ꠝꠣꠟꠤꠇ ꠔ ꠄꠇꠎꠘ। ꠎꠦ ꠝꠣꠘꠡꠦ ꠀꠟ꠆ꠟꠣꠞ ꠘꠣꠝ ꠟꠄ, ꠀꠟ꠆ꠟꠣꠄ ꠔꠣꠞꠦ ꠛꠃꠔ ꠝꠦꠢꠦꠞꠛꠣꠘꠤ ꠇꠞꠂꠘ।
ROM 10:13 ꠀꠟ꠆ꠟꠣꠞ ꠇꠣꠟꠣꠝꠦ ꠔ ꠇꠄ, “ꠎꠦꠇꠥꠘꠥ ꠝꠣꠘꠡꠦ ꠝꠣꠛꠥꠖꠞ ꠘꠣꠝꠦ ꠒꠣꠇꠤꠟꠦ, ꠢꠦ ꠘꠣꠎꠣꠔ ꠢꠣꠍꠤꠟ ꠇꠞꠛ।”
ROM 10:14 ꠅꠁꠟꠦ ꠎꠣꠘ ꠃꠙꠞꠦ ꠔꠣꠞꠣ ꠁꠝꠣꠘꠃ ꠀꠘꠍꠦ ꠘꠣ, ꠔꠣꠘꠞꠦ ꠇꠤꠟꠣ ꠒꠣꠇꠤꠛ? ꠀꠞ ꠎꠣꠘ ꠛꠦꠙꠣꠞꠦ ꠔꠣꠞꠣ ꠢꠥꠘꠍꠦꠃ ꠘꠣ, ꠔꠣꠘ ꠃꠙꠞꠦ ꠁꠝꠣꠘ ꠀꠘꠛ ꠇꠤꠟꠣ? ꠔꠛꠟꠤꠉ ꠇꠞꠞꠣ ꠘꠣ ꠕꠣꠇꠟꠦ, ꠔꠣꠞꠣ ꠢꠥꠘꠛ ꠇꠤꠟꠣ?
ROM 10:15 ꠀꠞ ꠔꠛꠟꠤꠉꠅ ꠇꠦꠃ ꠘꠣ ꠙꠣꠑꠣꠁꠟꠦ, ꠔꠣꠞꠣ ꠇꠤꠟꠣ ꠔꠛꠟꠤꠉꠅ ꠎꠣꠁꠛ? ꠎꠦꠟꠣ ꠀꠟ꠆ꠟꠣꠞ ꠇꠣꠟꠣꠝꠅ ꠛꠣꠔꠣꠁꠟ ꠅꠁꠍꠦ, “ꠗꠁꠘ꠆ꠘ ꠔꠣꠞꠣꠞ ꠙꠣꠅ ꠈꠣꠘꠣꠁꠘ, ꠎꠦꠞꠣ ꠀꠐꠤ ꠀꠐꠤ ꠈꠥꠡ-ꠈꠛꠞꠤ ꠔꠛꠟꠤꠉ ꠇꠞꠂꠘ।”
ROM 10:16 ꠅꠁꠟꠦ ꠢꠇꠟ ꠝꠣꠘꠡꠦ ꠔ ꠁ ꠈꠥꠡ-ꠈꠛꠞꠤꠞꠦ ꠇꠣꠘꠅ ꠑꠣꠁ ꠖꠦꠄ ꠘꠣ। ꠢꠎꠞꠔ ꠁꠡꠣꠄꠀ ꠘꠛꠤꠄ ꠇꠁꠍꠂꠘ, “ꠅ ꠝꠣꠛꠥꠖ, ꠀꠝꠞꠣꠞ ꠔꠛꠟꠤꠉ ꠢꠥꠘꠤꠀ ꠇꠦ ꠁꠝꠣꠘ ꠀꠘꠍꠦ?”
ROM 10:17 ꠔꠦ ꠖꠦꠈꠣ ꠎꠣꠞ, ꠀꠟ꠆ꠟꠣꠞ ꠇꠣꠟꠣꠝ ꠢꠥꠘꠟꠦ ꠁꠝꠣꠘ ꠀꠄ, ꠅꠃ ꠇꠣꠟꠣꠝ ꠅꠁꠟ, ꠀꠟ-ꠝꠍꠤꠞ ꠛꠦꠙꠣꠞꠦ ꠔꠛꠟꠤꠉ।
ROM 10:18 ꠅꠁꠟꠦ ꠀꠝꠤ ꠇꠁꠞꠣꠝ, ꠛꠘꠤ ꠁꠍꠞꠣꠁꠟ ꠅꠇꠟꠦ ꠁ ꠇꠣꠟꠣꠝ ꠢꠥꠘꠍꠦ ꠘꠣ ꠘꠤ? ꠘꠤꠌ꠆ꠌꠄ ꠢꠥꠘꠍꠦ। ꠙꠣꠇ ꠇꠣꠟꠣꠝꠦ ꠇꠄ, ꠔꠣꠞꠣꠞ ꠀꠅꠀꠎ ꠔ ꠢꠣꠞꠣ ꠖꠥꠘꠤꠀꠁꠔ ꠍꠤꠔ꠆ꠞꠤ ꠉꠦꠍꠦ, ꠍꠤꠔ꠆ꠞꠤ ꠉꠦꠍꠦ ꠔꠣꠞꠣꠞ ꠝꠣꠔ-ꠇꠕꠣ, ꠖꠥꠘꠤꠀꠞ ꠄꠇ ꠝꠣꠕꠣ ꠕꠣꠇꠤ ꠀꠞꠇ ꠝꠣꠕꠣ ꠙꠞ꠆ꠎꠘ꠆ꠔ।
ROM 10:19 ꠀꠝꠤ ꠢꠤꠞꠛꠣꠞ ꠇꠁꠞꠣꠝ, ꠛꠘꠤ ꠁꠍꠞꠣꠁꠟꠦ ꠢꠃ ꠇꠣꠟꠣꠝ ꠛꠥꠎꠍꠂꠘ ꠘꠣ ꠘꠤ? ꠘꠤꠌ꠆ꠌꠄ ꠛꠥꠎꠍꠂꠘ, ꠀꠟ꠆ꠟꠣꠄ ꠔ ꠢꠎꠞꠔ ꠝꠥꠍꠣ ꠘꠛꠤꠞ ꠝꠣꠎꠖꠤ ꠔꠣꠞꠣꠞꠦ ꠇꠁꠍꠂꠘ, ꠎꠦꠐꠣ ꠎꠣꠔꠤ ꠘꠣꠁ ꠁꠟꠣ ꠎꠣꠔꠤ ꠖꠤꠀ ꠁꠋꠡꠣ ꠇꠞꠣꠁꠝꠥ, ꠀꠝ꠆ꠝꠇ ꠎꠣꠔꠤ ꠖꠤꠀ ꠔꠣꠞꠣꠞ ꠉꠥꠍꠣ ꠔꠥꠟꠣꠁꠝꠥ।
ROM 10:20 ꠛꠣꠖꠦ ꠁꠡꠣꠄꠀ ꠘꠛꠤꠄ ꠈꠥꠛ ꠡꠣꠅꠡ ꠇꠞꠤꠀ ꠁ ꠀꠄꠀꠔꠅ ꠇꠁꠍꠂꠘ, ꠀꠝꠣꠞꠦ ꠎꠦꠞꠣ ꠔꠣꠟ꠆ꠟꠣꠡ ꠇꠞꠍꠦ ꠘꠣ, ꠔꠣꠞꠣꠃ ꠀꠝꠣꠞꠦ ꠙꠣꠁꠍꠦ। ꠀꠝꠣꠞ ꠉꠦꠍꠦ ꠎꠦꠞꠣ ꠇꠥꠘ꠆ꠔꠣ ꠌꠣꠁꠍꠦ ꠘꠣ, ꠔꠣꠞꠣꠞꠦ ꠀꠝꠤ ꠖꠤꠖꠣꠞ ꠖꠤꠍꠤ।
ROM 10:21 ꠅꠁꠟꠦ ꠛꠘꠤ ꠁꠍꠞꠣꠁꠟꠞ ꠛꠦꠙꠣꠞꠦ ꠔꠣꠁꠘ ꠇꠁꠞꠣ, ꠀꠝꠤ ꠀꠔ ꠛꠣꠠꠣꠁꠀ ꠒꠣꠇꠤꠞꠣꠝ, ꠢꠣꠞꠣ ꠖꠤꠘ ꠗꠞꠤ ꠖꠥꠁꠅ ꠀꠔꠦ ꠒꠣꠇꠤꠞꠣꠝ, ꠘꠣꠚꠞꠝꠣꠘ ꠀꠞ ꠙꠣꠡꠣꠘ ꠄꠇ ꠎꠣꠔꠤꠞꠦ ꠒꠣꠇꠤꠞꠣꠝ।
ROM 11:1 ꠄꠞꠟꠣꠉꠤ ꠀꠝꠤ ꠅꠈꠘ ꠎꠤꠇꠣꠁꠞꠣꠝ, ꠀꠟ꠆ꠟꠣꠄ ꠇꠥꠘꠥ ꠔꠣꠘ ꠀꠙꠘ ꠛꠘ꠆ꠖꠣ ꠛꠘꠤ ꠁꠍꠞꠣꠁꠟꠞ ꠟꠉ ꠍꠣꠠꠤ ꠖꠤꠍꠂꠘ ꠘꠤ? ꠘꠤꠌ꠆ꠌꠄ ꠘꠣ! ꠇꠣꠞꠘ ꠀꠝꠤ ꠘꠤꠎꠦꠅ ꠔ ꠄꠇꠎꠘ ꠛꠘꠤ ꠁꠍꠞꠣꠁꠟ ꠀꠞ ꠢꠎꠞꠔ ꠁꠛ꠆ꠞꠣꠢꠤꠝꠞ ꠛꠋꠡꠗꠞ, ꠛꠤꠘ-ꠁꠀꠝꠤꠘ ꠈꠣꠘ꠆ꠖꠣꠘꠞ ꠝꠣꠘꠥꠡ।
ROM 11:2 ꠀꠟ꠆ꠟꠣꠄ ꠙꠄꠟꠣ ꠕꠣꠇꠤ ꠔꠣꠘ ꠎꠦ ꠙ꠆ꠞꠎꠣꠞꠦ ꠙꠍꠘ꠆ꠖ ꠇꠞꠤꠀ ꠀꠟꠉ ꠇꠞꠍꠤꠟꠣ, ꠔꠣꠁꠘ ꠔ ꠄꠞꠣꠞ ꠟꠉ ꠍꠣꠠꠍꠂꠘ ꠘꠣ। ꠢꠎꠞꠔ ꠁꠟꠤꠀꠍ ꠘꠛꠤꠞ ꠛꠦꠙꠣꠞꠦ ꠀꠟ꠆ꠟꠣꠞ ꠇꠣꠟꠣꠝꠅ ꠇꠤꠔꠣ ꠀꠍꠦ, ꠁꠔꠣ ꠔꠥꠝꠞꠣ ꠎꠣꠘ ꠘꠣ ꠘꠤ? ꠔꠣꠁꠘ ꠔ ꠛꠘꠤ ꠁꠍꠞꠣꠁꠟꠞ ꠛꠤꠞꠥꠖ꠆ꠖꠦ ꠀꠟ꠆ꠟꠣꠞ ꠖꠞꠛꠣꠞꠅ ꠅꠃ ꠘꠣꠟꠤꠡ ꠖꠤꠍꠟꠣ,
ROM 11:3 “ꠅ ꠝꠣꠛꠥꠖ, ꠁꠔꠣꠄ ꠔꠥꠝꠣꠞ ꠘꠛꠤ ꠅꠇꠟꠞꠦ ꠎꠣꠘꠦ ꠝꠣꠞꠤꠟꠤꠍꠦ, ꠔꠥꠝꠣꠞ ꠇꠥꠞꠛꠣꠘꠤ ꠈꠣꠘꠣꠁꠘꠅ ꠜꠣꠋꠉꠤꠟꠤꠍꠦ। ꠈꠣꠟꠤ ꠀꠝꠤꠃ ꠛꠣꠌꠤꠀ ꠞꠁꠍꠤ, ꠅꠈꠘ ꠔꠣꠞꠣ ꠀꠝꠣꠞ ꠎꠣꠘꠈꠣꠘꠅ ꠘꠤꠔꠣꠉꠤ ꠌꠣꠁꠞꠣ।”
ROM 11:4 ꠔꠦꠃ ꠀꠟ꠆ꠟꠣꠄ ꠔꠣꠘꠞꠦ ꠇꠤꠔꠣ ꠎꠥꠀꠙ ꠖꠤꠍꠟꠣ ꠝꠘꠅ ꠀꠍꠦ ꠘꠤ? ꠔꠣꠁꠘ ꠇꠁꠍꠟꠣ, “ꠅ ꠁꠟꠤꠀꠍ, ꠀꠝꠤ ꠔ ꠡꠣꠔ ꠀꠎꠣꠞ ꠝꠣꠘꠡꠞꠦ ꠀꠝꠣꠞ ꠘꠤꠎꠞ ꠟꠣꠉꠤ ꠀꠟꠉ ꠇꠞꠤꠀ ꠞꠣꠈꠍꠤ, ꠄꠞꠣ ꠔ ꠁ ꠛꠣꠀꠟ ꠖꠦꠛꠔꠣꠞꠦ ꠙꠞꠘꠣꠝ ꠇꠞꠍꠦ ꠘꠣ।”
ROM 11:5 ꠑꠤꠇ ꠅꠟꠣꠈꠣꠘ, ꠀꠟ꠆ꠟꠣꠄ ꠞꠢꠝ ꠇꠞꠤꠀ ꠛꠘꠤ ꠁꠍꠞꠣꠁꠟꠞ ꠄꠇꠐꠣ ꠅꠋꠡꠞꠦ ꠅꠈꠘꠅ ꠀꠟꠉ ꠇꠞꠤ ꠞꠣꠈꠍꠂꠘ।
ROM 11:6 ꠀꠞ ꠀꠟ꠆ꠟꠣꠄ ꠎꠦꠛꠟꠣ ꠞꠢꠝ ꠇꠞꠤꠀ ꠄꠞꠣꠞꠦ ꠀꠟꠉ ꠇꠞꠍꠂꠘ, ꠔꠦ ꠁꠐꠣ ꠇꠥꠘꠥ ꠘꠦꠇ ꠀꠝꠟꠞ ꠚꠟ ꠘꠣꠄ। ꠀꠝꠟꠞ ꠚꠟ ꠅꠁꠟꠦ ꠔ ꠀꠞ ꠞꠢꠝꠔ ꠇꠅꠀ ꠅꠁꠟ ꠘꠣ ꠅꠘꠦ।
ROM 11:7 ꠔꠦ ꠛꠥꠎꠣ ꠎꠣꠄ, ꠛꠘꠤ ꠁꠍꠞꠣꠁꠟꠦ ꠡꠞꠤꠅꠔ ꠀꠝꠟ ꠇꠞꠤꠀ ꠎꠦꠔꠣ ꠙꠣꠁꠔꠣ ꠌꠣꠁꠍꠟꠣ, ꠁꠔꠣ ꠔꠣꠞꠣ ꠙꠣꠁꠍꠂꠘ ꠘꠣ। ꠈꠣꠟꠤ ꠀꠟ꠆ꠟꠣꠞ ꠙꠍꠘ꠆ꠖ ꠇꠞꠣ ꠎꠘꠦ ꠙꠣꠁꠍꠂꠘ। ꠅꠁꠟꠦ ꠛꠣꠇꠤ ꠢꠇꠟꠞ ꠖꠤꠟ ꠙꠣꠡꠣꠘ ꠛꠘꠤꠉꠦꠍꠦ।
ROM 11:8 ꠎꠦꠟꠣ ꠀꠟ꠆ꠟꠣꠞ ꠇꠣꠟꠣꠝꠦ ꠇꠁꠍꠦ, ꠀꠟ꠆ꠟꠣꠄ ꠔꠣꠞꠣꠞ ꠖꠤꠟꠞꠦ ꠛꠦꠃꠡꠤ ꠊꠥꠝꠅ ꠚꠣꠟꠣꠁꠍꠂꠘ, ꠔꠣꠞꠣꠞ ꠌꠃꠈ ꠕꠣꠇꠔꠦꠅ ꠖꠦꠈꠦ ꠘꠣ, ꠇꠣꠘ ꠕꠣꠇꠟꠦꠅ ꠢꠥꠘꠦ ꠘꠣ। ꠀꠁꠎ ꠙꠞ꠆ꠎꠘ꠆ꠔ ꠅꠃ ꠢꠣꠟꠔꠅ ꠀꠍꠦ।
ROM 11:9 ꠅꠟꠣ ꠢꠎꠞꠔ ꠖꠣꠃꠖ ꠘꠛꠤꠄꠅ ꠇꠁꠞꠣ, ꠔꠣꠞꠣꠞ ꠗꠥꠝꠗꠣꠝ ꠇꠞꠤ ꠈꠣꠅꠀ-ꠖꠣꠅꠀꠃ ꠡꠤꠇꠣꠞꠞ ꠎꠣꠟ ꠀꠞ ꠚꠣꠘ꠆ꠖ ꠛꠘꠤꠎꠣꠃꠇ। ꠁꠔꠣ ꠔꠣꠞꠣꠞ ꠛꠤꠙꠖꠞ ꠇꠣꠞꠘ ꠅꠃꠇ, ꠛꠖ ꠇꠣꠝꠞ ꠡꠣꠎꠣ ꠛꠘꠤꠎꠣꠃꠇ।
ROM 11:10 ꠔꠣꠞꠣꠞ ꠌꠃꠈ ꠀꠘ꠆ꠖꠣ ꠅꠁꠎꠣꠃꠇ ꠎꠣꠔꠦ ꠘꠣ ꠖꠦꠈꠦ, ꠔꠥꠝꠤ ꠔꠣꠞꠣꠞ ꠇꠝꠞꠞꠦ ꠢꠣꠝꠦꠡꠣ ꠉꠥꠎꠣ ꠇꠞꠤ ꠞꠣꠈꠤꠅ।
ROM 11:11 ꠔꠦ ꠛꠘꠤ ꠁꠍꠞꠣꠁꠟ ꠌꠤꠞꠇꠣꠟꠞ ꠟꠣꠉꠤ ꠅꠃ ꠛꠤꠙꠖꠞ ꠚꠣꠘ꠆ꠖꠅ ꠞꠁꠛ ꠘꠤ? ꠘꠤꠌ꠆ꠌꠄ ꠘꠣ। ꠛꠞꠋ ꠔꠣꠞꠣꠞ ꠘꠣꠚꠞꠝꠣꠘꠤꠄ ꠜꠤꠘ ꠎꠣꠔꠤ ꠅꠇꠟꠞ ꠟꠣꠉꠤ ꠘꠣꠎꠣꠔꠞ ꠖꠥꠀꠞ ꠈꠥꠟꠤꠉꠦꠟ। ꠀꠟ꠆ꠟꠣꠄ ꠌꠣꠁꠟꠣ, ꠁꠔꠣ ꠖꠦꠈꠤꠀ ꠔꠣꠞꠣꠞ ꠖꠤꠟꠅ ꠎꠣꠘꠥ ꠎꠣꠟꠣ ꠙꠄꠖꠣ ꠅꠄ, ꠇꠣꠞꠘ ꠜꠤꠘ ꠎꠣꠔꠤꠄ ꠘꠣꠎꠣꠔ ꠙꠣꠁꠟꠤꠞꠣ।
ROM 11:12 ꠅꠈꠣꠘ ꠕꠣꠇꠤ ꠛꠥꠎꠣ ꠎꠣꠄ, ꠔꠣꠞꠣꠞ ꠘꠣꠚꠞꠝꠣꠘꠤꠞ ꠟꠣꠉꠤ ꠎꠉꠔꠞ ꠝꠣꠘꠡꠞ ꠛꠃꠔ ꠚꠣꠄꠖꠣ ꠅꠁꠍꠦ, ꠀꠞ ꠔꠣꠞꠣꠞ ꠈꠦꠔꠤꠄ ꠎꠦꠛꠟꠣ ꠜꠤꠘ ꠎꠣꠔꠤꠞ ꠟꠣꠜ ꠅꠁꠟ, ꠔꠦ ꠔꠣꠞꠣ ꠎꠦꠛꠟꠣ ꠀꠟ꠆ꠟꠣꠞ ꠘꠣꠎꠣꠔꠞ ꠖꠣꠅꠔ ꠇꠛꠥꠟ ꠇꠞꠛꠣ, ꠅꠃ ꠡꠝꠄ ꠜꠤꠘ ꠎꠣꠔꠤ ꠅꠇꠟꠦ ꠀꠞꠅ ꠇꠔ ꠛꠦꠡꠤ ꠞꠢꠝ ꠙꠣꠁꠛꠣ।
ROM 11:13 ꠅ ꠜꠤꠘ ꠎꠣꠔꠤ ꠅꠇꠟ, ꠀꠝꠤ ꠔꠥꠝꠞꠣꠞꠦ ꠇꠁꠞꠣꠝ, ꠢꠥꠘꠅ, ꠔꠥꠝꠞꠣꠞ ꠉꠦꠍꠦꠃ ꠀꠝꠣꠞꠦ ꠍꠣꠢꠣꠛꠤ ꠢꠤꠡꠣꠛꠦ ꠙꠣꠑꠣꠁꠟ ꠅꠁꠍꠦ ꠇꠞꠤ, ꠀꠝꠤ ꠀꠝꠣꠞ ꠇꠣꠝꠞꠦ ꠈꠥꠛ ꠖꠣꠝ ꠖꠤꠞꠣꠝ।
ROM 11:14 ꠇꠣꠞꠘ, ꠅꠃ ꠇꠣꠝ ꠖꠦꠈꠣꠁꠀ ꠀꠝꠣꠞ ꠘꠤꠎꠞ ꠎꠣꠔꠤ ꠛꠘꠤ ꠁꠍꠞꠣꠁꠟꠞ ꠖꠤꠟꠅ ꠇꠥꠘꠥ ꠎꠣꠟꠣ ꠙꠄꠖꠣ ꠇꠞꠔꠣꠝ ꠙꠣꠞꠤ, ꠀꠞ ꠅꠃ ꠎꠣꠟꠣꠄ ꠔꠣꠞꠣꠞ ꠝꠣꠎꠞ ꠇꠤꠍꠥ ꠝꠣꠘꠡꠞ ꠎꠣꠘ ꠛꠣꠌꠣꠁꠔꠣꠝ ꠙꠣꠞꠤ।
ROM 11:15 ꠔꠣꠞꠣ ꠖꠥꠞꠁ ꠢꠞꠤ ꠎꠣꠅꠀꠄ ꠎꠦꠛꠟꠣ ꠎꠉꠔꠞ ꠝꠣꠘꠡꠞ ꠟꠉꠦ ꠀꠟ꠆ꠟꠣꠞ ꠝꠤꠟꠘ ꠅꠁꠟ, ꠔꠦ ꠔꠣꠞꠣꠞꠦ ꠎꠦꠛꠟꠣ ꠢꠤꠞꠛꠣꠞ ꠑꠣꠁ ꠖꠤꠛꠣ ꠢꠃ ꠡꠝꠄ ꠇꠥꠘ ꠢꠣꠟꠔ ꠅꠁꠛ? ꠁꠔꠣ ꠝꠞꠣ ꠝꠣꠘꠥꠡ ꠎꠤꠔꠣ ꠅꠀꠞ ꠟꠣꠈꠣꠘ ꠘꠣꠄ ꠘꠤ?
ROM 11:16 ꠗꠞꠅ, ꠀꠟ꠆ꠟꠣꠞ ꠘꠣꠝꠦ ꠛꠤꠟꠣꠘꠤꠞ ꠞꠥꠐꠤꠞ ꠝꠥꠟ ꠈꠣꠁ ꠎꠥꠖꠤ ꠙꠛꠤꠔ꠆ꠞ ꠅꠄ, ꠔꠦ ꠔ ꠛꠣꠘꠣꠁꠟ ꠞꠥꠐꠤꠅ ꠙꠛꠤꠔ꠆ꠞ। ꠉꠣꠍꠞ ꠝꠥꠟ ꠎꠠ ꠙꠛꠤꠔ꠆ꠞ ꠅꠁꠟꠦ, ꠄꠞ ꠒꠣꠟ-ꠙꠣꠟꠣꠅ ꠘꠤꠌ꠆ꠌꠄ ꠙꠛꠤꠔ꠆ꠞ। ꠑꠤꠇ ꠅꠟꠣ, ꠛꠘꠤ ꠁꠍꠞꠣꠁꠟꠞ ꠝꠥꠟ ꠛꠣꠚ ꠢꠎꠞꠔ ꠁꠛ꠆ꠞꠣꠢꠤꠝ ꠎꠦꠛꠟꠣ ꠙꠛꠤꠔ꠆ꠞ, ꠔꠦ ꠛꠘꠤ ꠁꠍꠞꠣꠁꠟꠅ ꠙꠛꠤꠔ꠆ꠞ।
ROM 11:17 ꠀꠞ ꠝꠘꠦ ꠇꠞꠅ, ꠉꠣꠍꠞ ꠇꠤꠍꠥ ꠒꠣꠟ-ꠙꠣꠟꠣ ꠇꠣꠐꠣ ꠅꠁꠟ, ꠛꠣꠖꠦ ꠅꠃ ꠇꠣꠐꠣ ꠎꠣꠉꠣꠔ ꠔꠥꠝꠣꠞ ꠟꠣꠈꠣꠘ ꠎꠋꠟꠤ ꠎꠄꠔꠥꠘ ꠉꠣꠍꠞ ꠇꠤꠍꠥ ꠒꠣꠟ ꠇꠟꠝ ꠖꠤꠀ ꠎꠥꠠꠣ ꠖꠦꠅꠀ ꠅꠁꠟ, ꠔꠦ ꠔꠥꠝꠤ ꠘꠤꠌ꠆ꠌꠄ ꠝꠥꠟ ꠉꠣꠍ ꠕꠣꠇꠤꠃ ꠞꠡ ꠙꠣꠁꠞꠣꠄ।
ROM 11:18 ꠅꠈꠘ ꠔꠥꠝꠤꠅ ꠘꠤꠎꠞꠦ ꠢꠃ ꠇꠣꠐꠤꠀ ꠚꠣꠟꠣꠁꠟ ꠒꠣꠟ ꠕꠣꠇꠤ ꠛꠠ ꠝꠘꠅ ꠇꠞꠤꠅ ꠘꠣ, ꠁꠀꠖ ꠞꠣꠈꠤꠅ, ꠔꠥꠝꠤ ꠝꠥꠟ ꠉꠣꠍꠞꠦ ꠐꠤꠇꠣꠁ ꠞꠣꠈꠍ ꠘꠣ, ꠛꠞꠋ ꠝꠥꠟ ꠉꠣꠍꠦꠃ ꠔꠥꠝꠣꠞꠦ ꠐꠤꠇꠣꠁꠀ ꠞꠣꠈꠍꠦ।
ROM 11:19 ꠔꠥꠝꠤ ꠁꠈꠣꠘ ꠇꠁꠔꠣꠄ ꠙꠣꠞ, “ꠀꠝꠣꠞꠦ ꠎꠥꠠꠣ ꠖꠤꠛꠣꠞ ꠟꠣꠉꠤꠃ ꠔ ꠀꠉꠞ ꠒꠣꠟ-ꠙꠣꠟꠣꠁꠘ ꠇꠣꠐꠣ ꠅꠁꠍꠤꠟ।”
ROM 11:20 ꠁꠈꠣꠘ ꠑꠤꠇ ꠀꠍꠦ, ꠅꠁꠟꠦ ꠁꠝꠣꠘ ꠘꠣ ꠀꠘꠣꠞ ꠇꠣꠞꠘꠦꠃ ꠔ ꠔꠣꠞꠣꠞꠦ ꠇꠣꠐꠤꠀ ꠚꠣꠟꠣꠁꠟ ꠅꠁꠍꠦ, ꠀꠞ ꠁꠝꠣꠘ ꠀꠘꠣꠄ ꠔꠥꠝꠣꠞꠦ ꠢꠘꠅ ꠟꠣꠉꠣꠁꠟ ꠅꠁꠍꠦ। ꠔꠦ ꠔꠥꠝꠤꠅ ꠛꠦꠐꠣꠉꠤꠞꠤ ꠘꠣ ꠖꠦꠈꠣꠁꠀ ꠀꠟ꠆ꠟꠣꠞꠦ ꠒꠞꠣꠅ।
ROM 11:21 ꠝꠘꠅ ꠞꠣꠈꠤꠅ, ꠀꠟ꠆ꠟꠣꠄ ꠎꠦꠛꠟꠣ ꠝꠥꠟ ꠒꠣꠟ-ꠙꠣꠟꠣꠞꠦꠃ ꠞꠦꠢꠣꠁ ꠖꠤꠍꠂꠘ ꠘꠣ, ꠔꠦ ꠔꠥꠝꠤ ꠇꠟꠝꠞ ꠒꠣꠟꠞꠦ ꠇꠥꠘꠥ ꠞꠦꠢꠣꠁ ꠖꠤꠛꠣ ꠘꠤ?
ROM 11:22 ꠄꠞꠟꠣꠉꠤꠃ ꠌꠤꠘ꠆ꠔꠣ ꠇꠞꠤꠀ ꠖꠦꠈꠅ, ꠀꠟ꠆ꠟꠣ ꠙꠣꠇ ꠇꠔ ꠖꠄꠀꠟ ꠀꠞ ꠇꠔ ꠙꠣꠡꠣꠘ। ꠎꠦꠞꠣ ꠛꠦ-ꠙꠕꠦ ꠚꠣꠐꠤ ꠉꠦꠍꠂꠘ ꠔꠣꠞꠣꠞ ꠟꠣꠉꠤ ꠔꠣꠁꠘ ꠙꠣꠡꠣꠘ, ꠀꠞ ꠔꠥꠝꠣꠞ ꠛꠣꠄ ꠔꠣꠁꠘ ꠖꠄꠀꠟꠥ, ꠎꠥꠖꠤ ꠔꠥꠝꠤ ꠔꠣꠘ ꠖꠄꠀꠞ ꠝꠣꠎꠦ ꠞꠅ, ꠘꠣ ꠞꠁꠟꠦ ꠔꠥꠝꠣꠞꠦꠅ ꠅꠟꠣ ꠇꠣꠐꠤꠀ ꠚꠣꠟꠣꠁ ꠖꠤꠛꠣ।
ROM 11:23 ꠀꠞ ꠢꠃ ꠛꠘꠤ ꠁꠍꠞꠣꠁꠟꠦꠅ ꠎꠥꠖꠤ ꠢꠤꠞꠛꠣꠞ ꠁꠝꠣꠘ ꠀꠘꠂꠘ, ꠔꠦ ꠔꠣꠞꠣꠞꠦꠅ ꠔꠣꠁꠘ ꠝꠥꠟ ꠉꠣꠍꠞ ꠟꠉꠦ ꠎꠥꠠꠣ ꠖꠤꠛꠣ, ꠀꠟ꠆ꠟꠣꠄ ꠔ ꠁꠟꠣ ꠎꠥꠠꠣ ꠖꠤꠔꠣ ꠙꠣꠞꠂꠘ।
ROM 11:24 ꠀꠍꠟꠦ ꠔ ꠔꠥꠝꠤ ꠀꠍꠟꠣꠄ ꠎꠋꠟꠤ ꠎꠄꠔꠥꠘ ꠉꠣꠍꠞ ꠒꠣꠟ, ꠔꠥꠝꠣꠞꠦ ꠎꠦꠛꠟꠣ ꠢꠘ ꠕꠣꠇꠤ ꠇꠣꠐꠤꠀ ꠀꠘꠤꠀ ꠝꠣꠟꠤꠇꠣꠘꠣ ꠛꠣꠉꠣꠘꠞ ꠎꠄꠔꠥꠘ ꠉꠣꠍꠞ ꠟꠉꠦ ꠀꠌꠣꠘꠇ ꠢꠣꠟꠔꠦ ꠎꠥꠠꠣ ꠟꠣꠉꠣꠁꠟ ꠅꠁꠍꠦ। ꠔꠦ ꠌꠤꠘ꠆ꠔꠣ ꠇꠞꠅ, ꠎꠦꠞꠣ ꠅꠃ ꠉꠣꠍꠞ ꠀꠍꠟ ꠒꠣꠟ, ꠔꠣꠞꠣꠞꠦ ꠝꠥꠟ ꠉꠣꠍꠞ ꠟꠉꠦ ꠟꠣꠉꠣꠘꠤ ꠇꠔ ꠡꠥꠎꠣ।
ROM 11:25 ꠅ ꠜꠣꠁ ꠅꠇꠟ, ꠔꠥꠝꠞꠣ ꠎꠣꠔꠦ ꠘꠤꠎꠦ ꠘꠤꠎꠦ ꠀꠈꠟꠖꠣꠞ ꠘꠣ ꠛꠘ, ꠄꠞꠟꠣꠉꠤ ꠄꠇꠐꠣ ꠛꠣꠔꠥꠘꠤ ꠛꠦꠙꠣꠞ ꠀꠝꠤ ꠔꠥꠝꠞꠣꠞꠦ ꠢꠤꠇꠣꠁ ꠖꠦꠁ। ꠢꠥꠘꠅ, ꠜꠤꠘ ꠎꠣꠔꠤ ꠅꠇꠟꠞ ꠘꠣꠎꠣꠔ ꠙꠣꠅꠀꠞ ꠡꠋꠈꠣ ꠙꠥꠞꠣ ꠘꠣ ꠅꠀ ꠙꠞ꠆ꠎꠘ꠆ꠔ ꠛꠃꠔ ꠛꠘꠤ ꠁꠍꠞꠣꠁꠟꠞ ꠖꠤꠟ ꠙꠣꠡꠣꠘ ꠢꠣꠟꠔꠦ ꠞꠁꠛ।
ROM 11:26 ꠢꠦꠡꠦ ꠅꠟꠣꠃ ꠢꠇꠟ ꠛꠘꠤ ꠁꠍꠞꠣꠁꠟꠦ ꠘꠣꠎꠣꠔ ꠢꠣꠍꠤꠟ ꠇꠞꠛꠣ, ꠎꠦꠟꠣ ꠀꠍꠝꠣꠘꠤ ꠇꠤꠔꠣꠛꠅ ꠀꠍꠦ, ꠔꠞꠣꠘꠦꠀꠟꠣꠄ ꠔꠡꠞꠤꠚ ꠀꠘꠛꠣ ꠎꠦꠞꠥꠎꠣꠟꠦꠝꠞ ꠍꠤꠅꠘ ꠙꠣꠠ ꠕꠣꠇꠤ, ꠔꠣꠁꠘ ꠁꠀꠇꠥꠛ ꠘꠛꠤꠞ ꠈꠣꠘ꠆ꠖꠣꠘ ꠕꠣꠇꠤ ꠘꠣꠚꠞꠝꠣꠘꠤ ꠈꠦꠖꠣꠁ ꠖꠤꠛꠣ।
ROM 11:27 ꠀꠝꠤ ꠅꠟꠣꠃ ꠔꠣꠞꠣꠞ ꠉꠥꠘꠣꠞꠦ ꠢꠞꠣꠁꠟꠤꠝꠥ ꠁꠐꠣ ꠔ ꠀꠝꠣꠞ ꠖꠦꠅꠀ ꠅꠀꠖꠣ।
ROM 11:28 ꠢꠥꠘꠅ, ꠔꠥꠝꠞꠣꠞ ꠜꠣꠟꠣꠁꠞ ꠟꠣꠉꠤ ꠈꠥꠡ-ꠈꠛꠞꠤꠞ ꠛꠦꠙꠣꠞꠦ ꠔꠣꠞꠣ ꠔ ꠅꠈꠘ ꠀꠟ꠆ꠟꠣꠞ ꠖꠥꠡꠝꠘ, ꠅꠁꠟꠦ ꠀꠟ꠆ꠟꠣꠁ ꠙꠍꠘ꠆ꠖꠞ ꠛꠦꠙꠣꠞꠦ ꠛꠣꠚ-ꠖꠣꠖꠣꠞ ꠍꠤꠟꠍꠤꠟꠣꠄ ꠔꠣꠞꠣ ꠅꠁꠟꠣ ꠀꠟ꠆ꠟꠣꠞ ꠝꠢꠛ꠆ꠛꠔꠞ ꠝꠣꠘꠥꠡ।
ROM 11:29 ꠇꠣꠞꠘ ꠀꠟ꠆ꠟꠣꠄ ꠔꠣꠘ ꠞꠢꠝꠔꠞ ꠖꠣꠘ-ꠖꠇ꠆ꠇꠤꠘꠣ ꠀꠞ ꠔꠣꠘ ꠖꠣꠅꠔꠞ ꠇꠕꠣ ꠇꠥꠘꠥꠝꠘ꠆ꠔꠦꠃ ꠝꠔ ꠛꠖꠟꠣꠁꠘ ꠘꠣ।
ROM 11:30 ꠎꠦꠟꠣ ꠔꠥꠝꠞꠣꠅ ꠄꠇ ꠡꠝꠄ ꠘꠣꠚꠞꠝꠣꠘ ꠀꠍꠟꠣꠄ, ꠅꠁꠟꠦ ꠅꠈꠘ ꠛꠘꠤ ꠁꠍꠞꠣꠁꠟꠦ ꠘꠣꠚꠞꠝꠣꠘꠤ ꠇꠞꠣꠄ ꠔꠥꠝꠞꠣ ꠔꠣꠘ ꠝꠦꠢꠦꠞꠛꠣꠘꠤ ꠙꠣꠁꠍ,
ROM 11:31 ꠑꠤꠇ ꠅꠃ ꠟꠣꠈꠣꠘ, ꠔꠥꠝꠞꠣ ꠝꠦꠢꠦꠞꠛꠣꠘꠤ ꠙꠣꠅꠀꠄ ꠔꠣꠞꠣ ꠅꠈꠘ ꠘꠣꠚꠞꠝꠣꠘꠤ ꠇꠞꠦꠞ, ꠎꠣꠔꠦ ꠔꠣꠞꠣꠅ ꠅꠟꠣ ꠝꠦꠢꠦꠞꠛꠣꠘꠤ ꠙꠣꠁꠘ।
ROM 11:32 ꠀꠞ ꠀꠟ꠆ꠟꠣꠞ ꠝꠥꠘꠡꠣ ꠅꠁꠟ, ꠔꠣꠁꠘ ꠎꠣꠔꠦ ꠢꠇꠟꠞ ꠛꠣꠄ ꠝꠦꠢꠦꠞꠛꠣꠘꠤ ꠖꠦꠈꠣꠁꠔꠣ ꠙꠣꠞꠂꠘ, ꠅꠔꠣꠞ ꠟꠣꠉꠤ ꠢꠇꠟꠞꠦꠃ ꠘꠣꠚꠞꠝꠣꠘꠤꠞ ꠝꠣꠎꠦ ꠛꠘ꠆ꠖꠤ ꠇꠞꠍꠂꠘ।
ROM 11:33 ꠛꠥꠎꠞꠣꠄ ꠘꠤ, ꠀꠟ꠆ꠟꠣꠞ ꠜꠣꠘ꠆ꠒꠣꠞ ꠇꠔ ꠛꠠ! ꠔꠣꠘ ꠀꠈꠟ-ꠢꠦꠇꠝꠔ ꠇꠔ ꠉꠁꠘ! ꠔꠣꠘ ꠛꠤꠛꠦꠇ-ꠛꠤꠌꠣꠞ ꠛꠥꠎꠣꠞ ꠅꠡꠣꠁꠖ꠆ꠖ, ꠔꠣꠘ ꠇꠣꠝ-ꠇꠣꠎ ꠅꠇꠟ ꠔꠣꠟ꠆ꠟꠣꠡ ꠇꠞꠤ ꠛꠥꠎꠣ ꠎꠣꠄ ꠘꠣ।
ROM 11:34 ꠎꠦꠟꠣ ꠇꠤꠔꠣꠛꠅ ꠀꠍꠦ, ꠇꠣꠞꠘ ꠝꠣꠛꠥꠖꠞ ꠝꠘ ꠌꠤꠘꠣꠞ ꠡꠣꠁꠖ꠆ꠖ ꠇꠣꠞ ꠀꠍꠦ? ꠔꠣꠘꠞꠦ ꠙꠞꠣꠝꠤꠡ ꠖꠤꠛꠣꠞ ꠟꠣꠈ ꠇꠦ ꠀꠍꠦ?
ROM 11:35 ꠇꠦ ꠀꠉꠦ ꠀꠟ꠆ꠟꠣꠞꠦ ꠇꠥꠘ꠆ꠔꠣ ꠖꠤꠟꠣꠁꠔ ꠙꠣꠞꠍꠦ, ꠎꠦ ꠇꠣꠞꠘꠦ ꠔꠣꠁꠘ ꠔꠣꠞ ꠉꠦꠍꠦ ꠖꠦꠘꠣꠖꠣꠞ ꠀꠍꠂꠘ?
ROM 11:36 ꠀꠍꠟꠦ ꠢꠇꠟꠔꠣꠃ ꠔ ꠔꠣꠘ ꠉꠦꠍ ꠕꠣꠇꠤ, ꠔꠣꠘ ꠝꠣꠎꠖꠤꠃ ꠀꠄ, ꠔꠣꠘ ꠘꠤꠎꠞ ꠟꠣꠉꠤ ꠙꠄꠖꠣ ꠇꠞꠍꠂꠘ। ꠎꠥꠉꠦ ꠎꠥꠉꠦ ꠌꠤꠞꠇꠣꠟ ꠔꠣꠘ ꠔꠣꠞꠤꠚ ꠅꠃꠇ। ꠀꠝꠤꠘ।
ROM 12:1 ꠄꠞꠟꠣꠉꠤ ꠅ ꠜꠣꠁ ꠅꠇꠟ, ꠀꠟ꠆ꠟꠣꠄ ꠔꠥꠝꠞꠣꠞꠦ ꠅꠟꠣ ꠝꠦꠢꠦꠞꠛꠣꠘꠤ ꠇꠞꠣꠄ, ꠀꠝꠤ ꠔꠥꠝꠞꠣꠞꠦ ꠈꠣꠍ ꠝꠤꠘꠔꠤ ꠇꠞꠤꠀꠞ, ꠔꠥꠝꠞꠣ ꠎꠣꠞꠎꠤꠞ ꠡꠞꠤꠟꠞꠦ ꠀꠟ꠆ꠟꠣꠞ ꠀꠔꠅ ꠡꠙꠤ ꠖꠦꠅ, ꠁꠟꠣ ꠎꠤꠘ꠆ꠖꠣ ꠙꠛꠤꠔ꠆ꠞ ꠇꠥꠞꠛꠣꠘꠤ ꠀꠟ꠆ꠟꠣꠞ ꠖꠞꠛꠣꠞꠅ ꠇꠛꠥꠟ ꠅꠄ, ꠅꠇꠐꠣꠃ ꠅꠁꠛ ꠔꠥꠝꠞꠣꠞ ꠍꠢꠤ-ꠡꠥꠖ꠆ꠖ ꠄꠛꠣꠖꠔ।
ROM 12:2 ꠀꠞ ꠅꠃ ꠈꠣꠞꠣꠙ ꠎꠝꠣꠘꠣꠞ ꠔꠣꠟꠅ ꠙꠠꠤꠅ ꠘꠣ, ꠛꠞꠋ ꠘꠤꠎꠞ ꠖꠤꠟꠞ ꠜꠣꠛ ꠛꠖꠟꠣꠁꠀ ꠘꠄꠀ ꠝꠣꠘꠥꠡ ꠅꠅ। ꠔꠦꠃ ꠔꠥꠝꠞꠣ ꠀꠟ꠆ꠟꠣꠞ ꠝꠞ꠆ꠎꠤ ꠛꠥꠎꠛꠣꠄ। ꠔꠣꠘ ꠝꠞ꠆ꠎꠤ ꠔ ꠜꠣꠟꠣ ꠀꠞ ꠙꠥꠞꠣꠙꠥꠞ ꠘꠤꠈꠥꠔ, ꠅꠟꠣ ꠇꠞꠟꠦ ꠔꠣꠁꠘ ꠈꠥꠡꠤ ꠅꠁꠘ।
ROM 12:3 ꠔꠣꠟꠤꠝ ꠖꠤꠛꠣꠞ ꠟꠣꠉꠤ ꠀꠟ꠆ꠟꠣꠄ ꠀꠝꠣꠞꠦ ꠎꠦ ꠈꠣꠍ ꠘꠤꠀꠝꠔ ꠖꠤꠍꠂꠘ, ꠅꠃ ꠘꠤꠀꠝꠔꠞ ꠛꠟꠦ ꠀꠝꠤ ꠔꠥꠝꠞꠣ ꠙꠞꠔꠦꠇ ꠎꠘꠞꠦ ꠇꠁꠞꠣꠝ, ꠘꠤꠎꠞꠦ ꠎꠔꠈꠣꠘ ꠛꠠ ꠝꠘꠅ ꠇꠞꠣ ꠃꠌꠤꠔ, ꠄꠞ ꠌꠣꠁꠔꠦ ꠛꠦꠡꠤ ꠝꠘꠅ ꠇꠞꠤꠅ ꠘꠣ। ꠀꠟ꠆ꠟꠣꠄ ꠎꠣꠞꠦ ꠎꠔꠈꠣꠘ ꠁꠝꠣꠘꠤ ꠛꠟ ꠖꠤꠍꠂꠘ, ꠢꠦ ꠎꠣꠘꠥ ꠘꠤꠎꠞꠦ ꠄꠞ ꠕꠣꠇꠤ ꠛꠦꠡꠤ ꠇꠥꠘ꠆ꠔꠣ ꠝꠘꠅ ꠘꠣ ꠇꠞꠦ।
ROM 12:4 ꠈꠤꠀꠟ ꠞꠣꠈꠤꠅ, ꠀꠝꠞꠣ ꠢꠇꠟꠞ ꠡꠞꠤꠟꠅ ꠛꠃꠔ ꠅꠋꠉ ꠀꠍꠦ, ꠢꠇꠟ ꠅꠋꠉꠄ ꠔ ꠄꠇꠟꠣꠈꠣꠘ ꠇꠣꠝ ꠇꠞꠦ ꠘꠣ।
ROM 12:5 ꠑꠤꠇ ꠅꠃ ꠟꠣꠈꠣꠘ, ꠝꠥꠝꠤꠘ ꠢꠤꠡꠣꠛꠦ ꠀꠝꠞꠣ ꠛꠃꠔ ꠎꠘ ꠅꠁꠟꠦꠅ, ꠀꠟ-ꠝꠍꠤꠞ ꠟꠉꠦ ꠡꠞꠤꠇ ꠅꠁꠀ ꠈꠣꠟꠤ ꠄꠇ ꠡꠞꠤꠟ ꠅꠁꠍꠤ। ꠄꠇꠁ ꠡꠞꠤꠟꠞ ꠅꠋꠉ ꠉꠔꠤꠇꠦ ꠀꠝꠞꠣꠞ ꠄꠇꠦ-ꠅꠁꠘ꠆ꠘꠦ ꠝꠤꠟ ꠀꠍꠦ।
ROM 12:6 ꠀꠟ꠆ꠟꠣꠞ ꠞꠢꠝꠔꠦ ꠀꠝꠞꠣ ꠘꠣꠘꠣꠘ ꠎꠘꠦ ꠘꠣꠘꠣꠘ ꠟꠣꠈꠣꠘ ꠘꠤꠀꠝꠔ ꠙꠣꠁꠍꠤ, ꠅꠃ ꠘꠤꠀꠝꠔ ꠎꠥꠖꠤ ꠉꠣꠁꠛꠤ ꠅꠢꠤ ꠎꠣꠘꠣꠘꠤꠞ ꠛꠦꠙꠣꠞꠦ ꠅꠄ, ꠔꠦ ꠀꠝꠞꠣꠞ ꠁꠝꠣꠘ ꠝꠣꠚꠤꠇ ꠅꠟꠤ-ꠀꠃꠟꠤꠀꠞ ꠟꠣꠈꠣꠘ ꠅꠢꠤ ꠇꠁꠔꠦ ꠕꠣꠇꠤ।
ROM 12:7 ꠇꠦꠃ ꠎꠥꠖꠤ ꠈꠦꠎꠝꠔ ꠇꠞꠣꠞ ꠘꠤꠀꠝꠔ ꠙꠣꠄ, ꠔꠦ ꠈꠦꠎꠝꠔ ꠇꠞꠃꠇ। ꠀꠞ ꠔꠣꠟꠤꠝ ꠖꠤꠛꠣꠞ ꠘꠤꠀꠝꠔ ꠎꠦ ꠙꠣꠁꠍꠦ, ꠢꠦ ꠔꠣꠟꠤꠝ ꠖꠦꠃꠇ।
ROM 12:8 ꠃꠔꠡꠣꠢ ꠖꠤꠛꠣꠞ ꠘꠤꠀꠝꠔ ꠎꠦ ꠙꠣꠁꠍꠦ, ꠢꠦ ꠝꠣꠘꠡꠞꠦ ꠃꠔꠡꠣꠢ ꠖꠦꠃꠇ। ꠖꠣꠘ ꠇꠞꠣꠞ ꠘꠤꠀꠝꠔ ꠎꠦ ꠙꠣꠁꠍꠦ, ꠢꠦ ꠈꠣꠟꠤꠍ ꠘꠤꠅꠔꠦ ꠖꠣꠘ ꠇꠞꠃꠇ। ꠝꠥꠞꠛ꠆ꠛꠤꠀꠘꠣ ꠇꠞꠣꠞ ꠘꠤꠀꠝꠔ ꠎꠦ ꠙꠣꠁꠍꠦ, ꠢꠦ ꠖꠤꠟꠦ-ꠎꠣꠘꠦ ꠢꠇꠟꠔꠣ ꠌꠣꠟꠣꠃꠇ। ꠝꠣꠘꠡꠞꠦ ꠡꠣꠁꠎ꠆ꠎ ꠇꠞꠣꠞ ꠘꠤꠀꠝꠔ ꠎꠦ ꠙꠣꠁꠍꠦ, ꠢꠦ ꠈꠥꠡꠤ ꠝꠘꠦ ꠡꠣꠁꠎ꠆ꠎ ꠇꠞꠃꠇ।
ROM 12:9 ꠝꠣꠄꠀ-ꠝꠢꠛ꠆ꠛꠔꠞ ꠝꠣꠎꠦ ꠇꠥꠘꠥ ꠈꠣꠖ ꠝꠤꠡꠣꠁꠅ ꠘꠣ। ꠈꠣꠞꠣꠙꠤꠞꠦ ꠊꠤꠘ꠆ꠘꠣꠅ, ꠜꠣꠟꠣꠁꠞ ꠀꠡꠤꠇ ꠅꠅ।
ROM 12:10 ꠄꠇꠦ-ꠅꠁꠘ꠆ꠘꠞꠦ ꠀꠙꠘ ꠜꠣꠁꠞ ꠟꠣꠈꠣꠘ ꠖꠤꠟꠦ-ꠎꠣꠘꠦ ꠝꠣꠄꠀ ꠇꠞꠅ, ꠘꠤꠎ ꠕꠣꠇꠤ ꠅꠁꠘ꠆ꠘꠞꠦ ꠛꠦꠡꠤ ꠖꠣꠝ ꠖꠦꠅ।
ROM 12:11 ꠈꠦꠎꠝꠔ ꠇꠣꠝꠅ ꠖꠥꠞ꠆ꠛꠟ ꠅꠁꠅ ꠘꠣ, ꠞꠥꠢꠥꠞꠦ ꠉꠞꠝ ꠞꠣꠈꠅ, ꠝꠣꠟꠤꠇꠞ ꠉꠥꠟꠣꠝꠤ ꠇꠞꠣꠔ ꠞꠅ।
ROM 12:12 ꠍꠣꠝꠘꠞ ꠙꠥꠞꠥꠡ꠆ꠇꠣꠞꠞ ꠀꠡꠣꠄ ꠢꠣꠝꠦꠡꠣ ꠈꠥꠡꠤ-ꠛꠣꠡꠤ ꠇꠞꠅ, ꠖꠥꠈ-ꠝꠍꠤꠛꠔꠅ ꠍꠛꠞ ꠇꠞꠅ, ꠢꠞ-ꠢꠣꠝꠦꠡꠣ ꠝꠥꠘꠣꠎꠣꠔ ꠇꠞꠣꠔ ꠞꠅ।
ROM 12:13 ꠀꠟ꠆ꠟꠣꠞ ꠙꠣꠇ ꠛꠘ꠆ꠖꠣ ꠅꠇꠟꠞ ꠅꠜꠣꠛꠅ ꠡꠣꠁꠎ꠆ꠎ ꠇꠞꠅ। ꠝꠦꠝꠣꠘꠖꠣꠞꠤ ꠇꠞꠔꠦ ꠈꠤꠀꠟꠤ ꠅꠅ।
ROM 12:14 ꠔꠥꠝꠞꠣꠞ ꠃꠙꠞꠦ ꠎꠦꠞꠣ ꠎꠥꠟꠥꠝ ꠇꠞꠦ, ꠔꠣꠞꠣꠞ ꠟꠣꠉꠤ ꠘꠦꠇ ꠖꠥꠀ ꠇꠞꠤꠅ, ꠛꠖ꠆ꠖꠥꠀ ꠖꠤꠅ ꠘꠣ।
ROM 12:15 ꠎꠦꠞꠣ ꠈꠥꠡꠤ-ꠛꠣꠡꠤ ꠇꠞꠦꠞ, ꠔꠣꠞꠣꠞ ꠟꠉꠦ ꠈꠥꠡꠤ ꠇꠞꠅ, ꠎꠦꠞꠣ ꠇꠣꠘ꠆ꠖꠦꠞ ꠔꠣꠞꠣꠞ ꠟꠉꠦ ꠅꠁꠀ ꠇꠣꠘ꠆ꠖꠅ।
ROM 12:16 ꠔꠥꠝꠞꠣ ꠄꠇꠦ-ꠅꠁꠘ꠆ꠘꠦ ꠜꠣꠁ ꠜꠣꠁ ꠅꠁꠀ ꠞꠅ। ꠛꠠꠟꠥꠇꠤ ꠜꠣꠛ ꠘꠣ ꠖꠦꠈꠣꠁꠀ, ꠡꠣꠗꠣꠞꠘ ꠝꠣꠘꠡꠞ ꠟꠉꠦ ꠝꠤꠟꠤ-ꠝꠤꠡꠤ ꠌꠟꠅ। ꠘꠤꠎꠞ ꠙꠘ꠆ꠒꠤꠔꠤ ꠖꠦꠈꠣꠁꠅ ꠘꠣ।
ROM 12:17 ꠈꠣꠞꠣꠙꠤꠞ ꠛꠖꠟꠣ ꠢꠤꠡꠣꠛꠦ ꠇꠦꠃꠞꠞ ꠈꠣꠞꠣꠙꠤ ꠇꠞꠤꠅ ꠘꠣ, ꠢꠇꠟ ꠝꠣꠘꠡꠦ ꠎꠦꠔꠣꠞꠦ ꠜꠣꠟꠣ ꠝꠘꠅ ꠇꠞꠂꠘ, ꠔꠥꠝꠞꠣ ꠌꠤꠘ꠆ꠔꠣ-ꠜꠣꠛꠘꠣ ꠇꠞꠤꠀ ꠅꠔꠣꠃ ꠇꠞꠅ।
ROM 12:18 ꠔꠥꠝꠞꠣꠞ ꠔꠞꠚ ꠕꠣꠇꠤ ꠎꠔꠈꠣꠘ ꠡꠝ꠆ꠛꠛ ꠢꠇꠟ ꠝꠣꠘꠡꠞ ꠟꠉꠦ ꠡꠣꠘ꠆ꠔꠤꠄ ꠛꠡꠔ ꠇꠞꠅ।
ROM 12:19 ꠅ ꠝꠣꠄꠀꠞ ꠜꠣꠁ ꠅꠇꠟ, ꠔꠥꠝꠞꠣ ꠇꠦꠃꠞꠞ ꠛꠖꠟꠣ ꠟꠁꠅ ꠘꠣ, ꠁꠔꠣ ꠀꠟ꠆ꠟꠣꠞ ꠀꠔꠅ ꠍꠣꠠꠤ ꠖꠦꠅ, ꠛꠖꠟꠣ ꠖꠦꠅꠀ ꠔꠣꠘ ꠇꠣꠝ। ꠀꠟ꠆ꠟꠣꠞ ꠇꠣꠟꠣꠝꠅ ꠀꠍꠦ, “ꠘꠣꠚꠞꠝꠣꠘꠤꠞ ꠡꠣꠎꠣ ꠖꠤꠛꠣꠞ ꠄꠈꠔꠤꠀꠞ ꠈꠣꠟꠤ ꠀꠝꠣꠞꠃ ꠀꠍꠦ, ꠎꠣꠞ ꠎꠦꠟꠣ ꠙꠣꠅꠘꠣ ꠀꠝꠤ ꠔꠣꠞꠦ ꠅꠟꠣ ꠛꠖꠟꠣ ꠖꠤꠝꠥ, ꠁꠈꠣꠘ ꠀꠝꠤ ꠝꠣꠛꠥꠖꠦ ꠇꠁꠞꠣꠝ।”
ROM 12:20 ꠛꠞꠋ ꠇꠤꠔꠣꠛꠦ ꠇꠄ, “ꠔꠥꠝꠣꠞ ꠖꠥꠡꠝꠘꠞ ꠙꠦꠐꠅ ꠜꠥꠇ ꠟꠣꠉꠟꠦ, ꠔꠣꠞꠦ ꠈꠣꠘꠤ ꠖꠦꠅ। ꠙꠤꠀꠍꠦ ꠗꠞꠟꠦ ꠔꠣꠞꠦ ꠙꠣꠘꠤ ꠖꠦꠅ। ꠅꠟꠣ ꠇꠞꠟꠦ ꠔ ꠔꠥꠝꠤ ꠔꠣꠞ ꠝꠣꠕꠣꠞ ꠃꠙꠞꠦ ꠎꠣꠟꠣꠁꠟ ꠀꠋꠞꠣꠞ ꠐꠥꠇꠞꠤ ꠕꠁꠟꠣꠄ।”
ROM 12:21 ꠈꠣꠞꠣꠙꠤꠞ ꠉꠦꠍꠦ ꠇꠥꠘꠥꠝꠘ꠆ꠔꠦꠃ ꠀꠞꠤꠅ ꠘꠣ, ꠛꠞꠋ ꠜꠣꠟꠣꠞꠦ ꠖꠤꠀ ꠈꠣꠞꠣꠙꠤꠞꠦ ꠀꠞꠣꠅ।
ROM 13:1 ꠙꠞꠔꠦꠇ ꠝꠣꠘꠡꠦ ꠖꠦꠡꠞ ꠞꠣꠎꠣꠞꠦ ꠝꠣꠘꠤꠀ ꠌꠟꠃꠇ, ꠇꠣꠞꠘ ꠀꠟ꠆ꠟꠣꠞ ꠝꠞ꠆ꠎꠤ ꠍꠣꠠꠣ ꠇꠦꠃ ꠞꠣꠎꠔ꠆ꠔ ꠙꠣꠄ ꠘꠣ, ꠞꠣꠎꠣ ꠅꠇꠟꠞꠦ ꠔ ꠀꠟ꠆ꠟꠣꠄꠃ ꠉꠖꠤꠔ ꠛꠅꠀꠁꠘ।
ROM 13:2 ꠄꠞꠟꠣꠉꠤ ꠎꠦ ꠝꠣꠘꠡꠦ ꠖꠦꠡꠞ ꠞꠣꠎꠣꠞ ꠖꠥꠡꠝꠘꠤ ꠇꠞꠦ, ꠢꠦ ꠀꠍꠟꠦ ꠀꠟ꠆ꠟꠣꠁ ꠢꠥꠇꠥꠝꠞ ꠖꠥꠡꠝꠘꠤ ꠇꠞꠦ। ꠁꠟꠣ ꠇꠣꠝ ꠎꠦꠔꠣꠄ ꠇꠞꠂꠘ, ꠔꠣꠞꠣ ꠔ ꠘꠤꠎꠞ ꠃꠙꠞꠦ ꠉꠎꠛ ꠒꠣꠇꠤꠀ ꠀꠘꠂꠘ।
ROM 13:3 ꠀꠞ ꠜꠣꠟꠣ ꠇꠣꠝ ꠇꠞꠞꠣ ꠎꠘꠦ ꠔ ꠞꠣꠎꠣꠞꠦ ꠒꠞꠣꠘꠤꠞ ꠇꠥꠘ꠆ꠔꠣ ꠘꠣꠁ, ꠅꠁꠟꠦ ꠇꠥ-ꠇꠣꠝ ꠇꠞꠞꠣ ꠎꠘꠞ ꠟꠣꠉꠤ ꠇꠑꠤꠘ ꠛꠤꠙꠖ। ꠔꠦ ꠔꠥꠝꠞꠣ ꠇꠤꠔꠣ ꠘꠤꠞꠜꠄꠄ ꠞꠁꠔꠣꠄ ꠌꠣꠅ ꠘꠤ? ꠔꠣꠁꠟꠦ ꠜꠣꠟꠣ ꠙꠕꠦ ꠀꠐꠅ, ꠔꠦꠃ ꠞꠣꠎꠣꠄ ꠔꠥꠝꠞꠣꠞ ꠔꠣꠞꠤꠚ ꠇꠞꠛꠣ।
ROM 13:4 ꠞꠣꠎꠣꠄ ꠔ ꠔꠥꠝꠞꠣꠞ ꠜꠣꠟꠣꠁꠞ ꠟꠣꠉꠤꠃ ꠀꠟ꠆ꠟꠣꠞ ꠈꠣꠖꠤꠝ ꠢꠤꠡꠣꠛꠦ ꠇꠣꠝ ꠇꠞꠂꠘ। ꠅꠁꠟꠦ ꠔꠥꠝꠞꠣ ꠎꠦꠞꠣ ꠇꠥ-ꠇꠣꠝ ꠇꠞ, ꠔꠥꠝꠞꠣꠞ ꠟꠣꠉꠤ ꠛꠤꠙꠖ ꠀꠍꠦ। ꠔꠣꠁꠘ ꠈꠣꠝꠈꠣ ꠇꠦꠃꠞꠞꠦ ꠝꠣꠞꠂꠘ ꠘꠣ, ꠅꠁꠟꠦ ꠇꠥ-ꠇꠣꠝ ꠇꠞꠞꠣꠞꠦ ꠀꠟ꠆ꠟꠣꠞ ꠈꠣꠖꠤꠝ ꠢꠤꠡꠣꠛꠦ ꠑꠤꠇꠃ ꠡꠣꠎꠣ ꠖꠦꠁꠘ।
ROM 13:5 ꠔꠦ ꠈꠣꠟꠤ ꠡꠣꠎꠣꠞ ꠒꠞꠦ ꠘꠣꠄ, ꠛꠞꠋ ꠎꠣꠞꠎꠤꠞ ꠛꠤꠛꠦꠇꠞ ꠛꠤꠌꠣꠞꠦꠅ ꠞꠣꠎꠣꠞ ꠢꠥꠇꠥꠝ ꠝꠣꠘꠣ ꠎꠞꠥꠞ।
ROM 13:6 ꠅꠔꠣꠞ ꠟꠣꠉꠤꠃ ꠔ ꠔꠥꠝꠞꠣ ꠈꠣꠎꠘꠣ ꠖꠦꠅ, ꠇꠣꠞꠘ ꠈꠣꠎꠘꠣ ꠔꠥꠟꠤꠀ ꠈꠞꠌ ꠇꠞꠣꠞ ꠝꠣꠎꠖꠤ ꠔꠣꠞꠣ ꠀꠟ꠆ꠟꠣꠞ ꠈꠦꠎꠝꠔ ꠇꠞꠞꠣ।
ROM 13:7 ꠅꠈꠘ ꠎꠣꠞ ꠎꠦꠟꠣ ꠙꠣꠅꠘꠣ, ꠔꠣꠞꠦ ꠅꠟꠣ ꠖꠦꠅ। ꠎꠦꠘꠞꠦ ꠈꠣꠎꠘꠣ ꠖꠤꠛꠣꠞ ꠇꠕꠣ, ꠄꠘꠞꠦ ꠈꠣꠎꠘꠣ ꠖꠦꠅ; ꠎꠦꠘꠞꠦ ꠝꠣꠡꠥꠟ ꠖꠤꠛꠣꠞ ꠇꠕꠣ, ꠄꠘꠞꠦ ꠝꠣꠡꠥꠟ ꠖꠦꠅ; ꠎꠦꠘꠞꠦ ꠁꠎ꠆ꠎꠔ ꠇꠞꠣꠞ ꠇꠕꠣ, ꠄꠘꠦ ꠁꠎ꠆ꠎꠔ ꠇꠞꠅ; ꠎꠦꠘꠞꠦ ꠔꠣꠎꠤꠝ ꠇꠞꠣꠞ ꠇꠕꠣ, ꠄꠘꠦ ꠔꠣꠎꠤꠝ ꠇꠞꠅ।
ROM 13:8 ꠈꠣꠟꠤ ꠝꠣꠄꠀꠞ ꠞꠤꠘ ꠍꠣꠠꠣ ꠖꠥꠍꠞꠣ ꠇꠥꠘꠥ ꠛꠦꠙꠣꠞꠦ ꠇꠦꠃꠞꠞ ꠉꠦꠍꠦ ꠞꠤꠘꠤ ꠅꠁꠅ ꠘꠣ। ꠎꠣꠘ ꠘꠤ, ꠎꠦ ꠝꠣꠘꠡꠦ ꠅꠁꠘ꠆ꠘ ꠎꠘꠞꠦ ꠝꠣꠄꠀ ꠇꠞꠦ, ꠢꠦ ꠔ ꠡꠞꠤꠅꠔꠞ ꠢꠥꠇꠥꠝ-ꠀꠢꠇꠣꠝ ꠡꠥꠟ꠆ꠟꠀꠘꠣ ꠀꠖꠣꠄ ꠇꠞꠍꠦ।
ROM 13:9 ꠎꠦꠟꠣ ꠡꠞꠤꠅꠔꠞ ꠢꠥꠇꠥꠝ ꠀꠍꠦ, “ꠎꠤꠘꠣ ꠇꠞꠤꠅ ꠘꠣ, ꠈꠥꠘ ꠇꠞꠤꠅ ꠘꠣ, ꠌꠥꠞꠤ ꠇꠞꠤꠅ ꠘꠣ, ꠟꠥꠜ-ꠟꠣꠟꠌ ꠇꠞꠤꠅ ꠘꠣ,” ꠛꠣ ꠁ ꠟꠣꠈꠣꠘ ꠀꠞꠅ ꠎꠔ ꠢꠥꠇꠥꠝ ꠀꠍꠦ, ꠁ ꠢꠇꠟ ꠢꠥꠇꠥꠝꠞꠦ ꠄꠇꠈꠣꠘꠅ ꠇꠞꠤ ꠇꠅꠀ ꠅꠁꠍꠦ, “ꠔꠥꠝꠣꠞ ꠀꠞꠤ-ꠚꠞꠤꠞꠦ ꠘꠤꠎꠞ ꠟꠣꠈꠣꠘ ꠝꠣꠄꠀ ꠇꠞꠅ।”
ROM 13:10 ꠀꠞ ꠝꠣꠄꠀ ꠕꠣꠇꠟꠦ ꠇꠦꠃ ꠀꠞꠤ-ꠚꠞꠤꠞ ꠈꠦꠔꠤ ꠇꠞꠔ ꠙꠣꠞꠦ ꠘꠣ, ꠄꠞꠟꠣꠉꠤ ꠝꠣꠄꠀ ꠇꠞꠟꠦ ꠙꠥꠞꠣꠙꠥꠞ ꠡꠞꠤꠅꠔꠃ ꠝꠣꠘꠣ ꠅꠁꠎꠣꠄ।
ROM 13:11 ꠔꠦ ꠜꠣꠁ ꠅꠇꠟ, ꠅꠈꠘꠇꠥꠞ ꠎꠝꠣꠘꠣꠞ ꠢꠣꠟꠔ ꠔ ꠔꠥꠝꠞꠣ ꠎꠣꠘꠃ, ꠄꠞꠟꠣꠉꠤ ꠛꠥꠎꠤ-ꠢꠥꠘꠤ ꠌꠟꠅ। ꠔꠥꠝꠞꠣ ꠊꠥꠝ ꠕꠣꠇꠤ ꠢꠎꠣꠉ ꠅꠀꠞ ꠡꠝꠄ ꠅꠁꠉꠦꠍꠦ, ꠇꠣꠞꠘ ꠀꠝꠞꠣ ꠎꠦ ꠡꠝꠄ ꠁꠝꠣꠘ ꠀꠘꠍꠤꠟꠣꠝ, ꠢꠃ ꠢꠣꠟꠔ ꠕꠣꠇꠤꠅ ꠀꠝꠞꠣꠞ ꠘꠣꠎꠣꠔ ꠅꠈꠘ ꠀꠞꠅ ꠗꠣꠞꠅ ꠀꠁꠌ꠆ꠍꠦ।
ROM 13:12 ꠞꠣꠁꠔ ꠙꠥꠀꠁꠀ ꠢꠣꠞꠤ ꠛꠤꠀꠘ ꠅꠁꠎꠣꠞ; ꠅꠈꠘ ꠎꠟꠖꠤ ꠀꠅ, ꠀꠝꠞꠣ ꠀꠘ꠆ꠖꠣꠞꠤꠞ ꠛꠖ ꠇꠣꠝ ꠍꠣꠠꠤꠀ ꠘꠥꠞꠞ ꠟꠦꠛꠣꠍ ꠟꠣꠉꠣꠁ, ꠀꠟ꠆ꠟꠣꠁ ꠀꠔꠤꠀꠞ ꠚꠤꠘ꠆ꠖꠤꠟꠣꠁ।
ROM 13:13 ꠢꠂ-ꠢꠥꠟ꠆ꠟꠣ ꠇꠞꠤ ꠝꠖ ꠈꠣꠁꠀ ꠐꠣꠟ ꠅꠀ, ꠎꠤꠘꠣ-ꠛꠖꠝꠣꠁꠡꠤ ꠛꠣ ꠝꠘꠉꠠꠣ ꠌꠟꠣ, ꠁꠋꠡꠣ ꠀꠞ ꠇꠣꠁꠎ꠆ꠎꠣ-ꠚꠍꠣꠖ ꠛꠣꠖ ꠖꠤꠀ, ꠀꠅ, ꠀꠝꠞꠣ ꠖꠤꠘꠞ ꠚꠞꠦ ꠌꠟꠞꠣ ꠝꠣꠘꠡꠞ ꠟꠣꠈꠣꠘ ꠌꠟꠤ।
ROM 13:14 ꠚꠤꠘ꠆ꠘꠞ ꠟꠦꠛꠣꠍꠞ ꠟꠣꠈꠣꠘ ꠔꠥꠝꠞꠣ ꠝꠣꠟꠤꠇ ꠁꠍꠣ ꠀꠟ-ꠝꠍꠤꠞꠦ ꠙꠥꠞꠣꠙꠥꠞ ꠚꠤꠘ꠆ꠖꠤꠟꠣꠅ। ꠡꠞꠤꠟꠞ ꠛꠖ ꠈꠣꠁꠡ ꠝꠤꠐꠣꠘꠤꠞ ꠌꠤꠘ꠆ꠔꠣ ꠄꠇ꠆ꠇꠦꠞꠦ ꠛꠣꠖ ꠖꠦꠅ।
ROM 14:1 ꠔꠥꠝꠞꠣꠞ ꠝꠣꠎꠞ ꠎꠦ ꠜꠣꠁ ꠁꠝꠣꠘꠦ ꠇꠝꠎꠥꠞ, ꠔꠣꠞꠦꠅ ꠀꠙꠘ ꠢꠤꠡꠣꠛꠦ ꠡꠝꠎꠅ, ꠔꠣꠞ ꠙꠍꠘ꠆ꠖ-ꠅꠙꠍꠘ꠆ꠖ ꠟꠁꠀ ꠔꠞ꠆ꠇꠣ-ꠔꠞ꠆ꠇꠤ ꠇꠞꠤꠅ ꠘꠣ।
ROM 14:2 ꠛꠥꠎꠞꠣꠄ ꠘꠤ, ꠄꠇꠎꠘꠦ ꠝꠘꠅ ꠇꠞꠦ, ꠢꠦ ꠢꠇꠟ ꠎꠣꠔꠞ ꠈꠣꠘꠤ ꠈꠣꠁꠔ ꠙꠣꠞꠛ, ꠅꠁꠟꠦ ꠇꠝꠎꠥꠞ ꠁꠝꠣꠘꠖꠣꠞ ꠎꠘꠦ ꠈꠣꠟꠤ ꠘꠤꠞꠣꠝꠤꠡ ꠈꠣꠄ।
ROM 14:3 ꠔꠦ ꠝꠣꠍ-ꠝꠣꠋꠡ ꠈꠣꠅꠞꠣ ꠎꠘꠦ ꠅꠃ ꠘꠤꠞꠣꠝꠤꠡ ꠈꠣꠅꠞꠣ ꠎꠘꠞꠦ ꠎꠣꠘꠥ ꠘꠣ ꠍꠤꠠꠣꠄ। ꠀꠞ ꠘꠤꠞꠣꠝꠤꠡ ꠈꠣꠅꠞꠣꠄꠅ ꠎꠣꠘꠥ ꠝꠣꠍ-ꠝꠣꠋꠡ ꠈꠣꠅꠞꠣꠞꠦ ꠘꠣ ꠖꠥꠡꠦ, ꠇꠣꠞꠘ ꠀꠟ꠆ꠟꠣꠄ ꠔ ꠖꠥꠁꠅꠎꠘꠞꠦꠃ ꠘꠤꠎꠞ ꠇꠁꠀ ꠇꠛꠥꠟ ꠇꠞꠍꠂꠘ।
ROM 14:4 ꠀꠞ ꠔꠥꠝꠣꠞꠦ ꠇꠦꠉꠤꠄ ꠈꠦꠝꠔꠣ ꠖꠤꠟ, ꠀꠞꠇ ꠛꠦꠐꠣꠞ ꠉꠥꠟꠣꠝꠞ ꠛꠤꠌꠣꠞ ꠇꠞꠔꠣꠄ? ꠢꠦ ꠑꠤꠇ ꠙꠕꠦ ꠀꠍꠦ, ꠘꠣ ꠜꠥꠟ ꠙꠕꠦ ꠀꠍꠦ ꠁꠈꠣꠘ ꠔ ꠔꠣꠞ ꠝꠥꠘꠤꠛꠦ ꠛꠥꠎꠛꠣ। ꠀꠍꠟꠦ ꠔ ꠢꠦ ꠑꠤꠇ ꠙꠕꠦꠃ ꠞꠁꠛ, ꠝꠣꠟꠤꠇꠦꠃ ꠔꠣꠞꠦ ꠑꠤꠇ ꠙꠕꠦ ꠞꠣꠈꠔꠣ ꠙꠣꠞꠛꠣ।
ROM 14:5 ꠇꠥꠘꠥ ꠇꠥꠘꠥ ꠝꠣꠘꠡꠦ ꠝꠘꠅ ꠇꠞꠂꠘ, ꠡꠣꠗꠣꠞꠘ ꠖꠤꠘ ꠕꠣꠇꠤ ꠇꠥꠘꠥ ꠈꠣꠍ ꠖꠤꠘꠞ ꠚꠎꠤꠟꠔ ꠛꠦꠡꠤ। ꠀꠞ ꠇꠦꠃ ꠇꠦꠃ ꠢꠇꠟ ꠖꠤꠘꠞꠦꠃ ꠄꠇꠟꠣꠈꠣꠘ ꠝꠘꠅ ꠇꠞꠦ। ꠔꠦ ꠁ ꠛꠦꠙꠣꠞꠦ ꠇꠦ ꠇꠤꠔꠣ ꠇꠞꠔ ꠘꠣ ꠇꠞꠔ, ꠁꠔꠣ ꠎꠣꠘꠥ ꠔꠣꠞ ꠖꠤꠟ ꠕꠣꠇꠤ ꠙꠥꠞꠣꠙꠥꠞ ꠡꠣꠄ ꠖꠦꠄ।
ROM 14:6 ꠎꠦ ꠝꠣꠘꠡꠦ ꠇꠥꠘꠥ ꠈꠣꠍ ꠖꠤꠘꠞꠦ ꠝꠣꠘꠦ, ꠢꠦ ꠔ ꠝꠣꠟꠤꠇ ꠁꠍꠣꠞꠦ ꠈꠥꠡꠤ ꠇꠞꠣꠞ ꠘꠤꠅꠔꠦꠃ ꠁꠔꠣ ꠝꠣꠘꠦ। ꠎꠦ ꠎꠘꠦ ꠢꠇꠟ ꠎꠣꠔꠞ ꠈꠣꠘꠤ ꠈꠣꠄ, ꠢꠦ-ꠅ ꠔ ꠝꠣꠟꠤꠇꠞꠦ ꠈꠥꠡꠤ ꠇꠞꠣꠞ ꠘꠤꠅꠔꠦꠃ ꠈꠣꠄ, ꠢꠦ ꠀꠟ꠆ꠟꠣꠞ ꠡꠥꠇꠞꠤꠀ ꠀꠖꠣꠄ ꠇꠞꠤꠀ ꠈꠣꠄ, ꠀꠞ ꠎꠦ ꠎꠘꠦ ꠢꠇꠟꠔꠣ ꠈꠣꠄ ꠘꠣ, ꠢꠦ-ꠅ ꠝꠣꠟꠤꠇꠞꠦ ꠈꠥꠡꠤ ꠇꠞꠣꠞ ꠘꠤꠅꠔꠦ ꠈꠣꠄ ꠘꠣ, ꠢꠦ-ꠅ ꠀꠟ꠆ꠟꠣꠞ ꠡꠥꠇꠞꠤꠀ ꠀꠖꠣꠄ ꠇꠞꠦ।
ROM 14:7 ꠀꠝꠞꠣꠞ ꠝꠣꠎꠞ ꠇꠥꠘꠥ ꠛꠘ꠆ꠖꠣꠃ ꠘꠤꠎꠞ ꠟꠣꠉꠤ ꠘꠤꠎꠦ ꠎꠤꠘ꠆ꠖꠣ ꠞꠄ ꠘꠣ, ꠀꠞ ꠘꠤꠎꠞ ꠟꠣꠉꠤ ꠝꠞꠦꠅ ꠘꠣ।
ROM 14:8 ꠇꠣꠞꠘ ꠀꠝꠞꠣ ꠎꠦꠛꠟꠣ ꠎꠤꠘ꠆ꠖꠣ ꠞꠁ, ꠈꠣꠟꠤ ꠝꠣꠟꠤꠇꠞ ꠟꠣꠉꠤꠃ ꠎꠤꠘ꠆ꠖꠣ ꠞꠁ, ꠀꠞ ꠎꠦꠛꠟꠣ ꠝꠞꠘ ꠅꠄ, ꠈꠣꠟꠤ ꠝꠣꠟꠤꠇꠞ ꠟꠣꠉꠤꠃ ꠝꠞꠘ ꠅꠄ। ꠔꠦ ꠀꠝꠞꠣ ꠎꠤꠘ꠆ꠖꠣ ꠞꠁꠟꠦꠅ ꠎꠦꠔꠣ, ꠝꠞꠟꠦꠅ ꠅꠔꠣ, ꠀꠝꠞꠣ ꠔ ꠝꠣꠟꠤꠇ ꠁꠍꠣꠞꠃ।
ROM 14:9 ꠝꠣꠟꠤꠇ ꠀꠟ-ꠝꠍꠤꠅ ꠔ ꠝꠣꠞꠣ ꠉꠦꠍꠟꠣ ꠀꠞ ꠢꠤꠞꠛꠣꠞ ꠎꠤꠘ꠆ꠖꠣ ꠅꠁꠀ ꠃꠑꠍꠂꠘ, ꠎꠣꠔꠦ ꠔꠣꠁꠘ ꠎꠤꠘ꠆ꠖꠣ ꠀꠞ ꠝꠥꠞ꠆ꠖꠣ ꠖꠥꠁꠅ ꠖꠟꠞꠃ ꠝꠣꠟꠤꠇ ꠛꠘꠂꠘ।
ROM 14:10 ꠔꠦ ꠔꠥꠝꠤ ꠇꠦꠘꠦ ꠔꠥꠝꠣꠞ ꠜꠣꠁꠞ ꠈꠥꠔ ꠔꠥꠇꠣꠁꠞꠣꠄ? ꠔꠣꠞꠦ ꠇꠦꠘꠦ ꠍꠤꠠꠣꠁꠞꠣꠄ? ꠀꠟ꠆ꠟꠣꠞ ꠛꠤꠌꠣꠞꠞ ꠍꠣꠝꠘꠦ ꠔ ꠀꠝꠞꠣ ꠢꠇꠟꠃ ꠃꠛꠣꠁꠝꠥ।
ROM 14:11 ꠎꠦꠟꠣ ꠀꠟ꠆ꠟꠣꠞ ꠇꠣꠟꠣꠝꠅ ꠀꠍꠦ, ꠝꠣꠛꠥꠖꠦ ꠇꠁꠞꠣ, ꠀꠝꠣꠞ ꠘꠣꠝꠞ ꠇꠍꠝ ꠈꠣꠁꠀ ꠇꠁꠀꠞ, ꠢꠇꠟꠦꠃ ꠀꠝꠣꠞ ꠍꠣꠝꠘꠦ ꠀꠁꠀ ꠍꠁꠎꠖꠣ ꠇꠞꠛ, ꠙꠞꠔꠦꠇ ꠝꠥꠈꠦꠃ ꠡ꠆ꠛꠤꠇꠣꠞ ꠇꠞꠛ, ꠀꠝꠤꠃ ꠀꠟ꠆ꠟꠣ।
ROM 14:12 ꠅꠘꠅ ꠖꠦꠈꠣ ꠎꠣꠄ, ꠀꠟ꠆ꠟꠣꠞ ꠖꠞꠛꠣꠞꠅ ꠀꠝꠞꠣ ꠙꠞꠔꠦꠇꠦꠃ ꠎꠣꠞꠎꠤꠞ ꠇꠣꠝꠞ ꠢꠤꠡꠣꠛ ꠖꠤꠔꠦ ꠅꠁꠛ।
ROM 14:13 ꠔꠦ ꠀꠅ, ꠅꠈꠘ ꠕꠣꠇꠤ ꠀꠝꠞꠣ ꠄꠇꠦ-ꠅꠁꠘ꠆ꠘꠞ ꠈꠥꠔ ꠗꠞꠣ ꠛꠘ꠆ꠖ ꠇꠞꠤ, ꠀꠞ ꠘꠤꠅꠔ ꠇꠞꠤ, ꠁꠟꠣ ꠇꠥꠘꠥ ꠇꠣꠝ ꠇꠞꠔꠣꠝ ꠘꠣꠄ, ꠎꠦ ꠇꠣꠝꠦ ꠀꠞꠇ ꠜꠣꠁꠞ ꠁꠝꠣꠘꠞ ꠈꠦꠔꠤ ꠅꠁꠛ, ꠛꠣ ꠔꠣꠞꠦ ꠉꠥꠘꠣꠞ ꠙꠕꠦ ꠘꠤꠛ।
ROM 14:14 ꠝꠣꠟꠤꠇ ꠁꠍꠣꠞ ꠃꠝ꠆ꠝꠔ ꠅꠀꠄ ꠀꠝꠤ ꠜꠣꠟꠣꠝꠘ꠆ꠔꠦꠃ ꠎꠣꠘꠤ ꠀꠞ ꠛꠥꠎꠤ, ꠄꠝꠘꠦ ꠔ ꠇꠥꠘꠥ ꠎꠤꠘꠤꠡꠃ ꠘꠣꠎꠣꠁꠎ ꠘꠣꠄ, ꠅꠁꠟꠦ ꠇꠦꠃ ꠎꠥꠖꠤ ꠁꠔꠣꠞꠦ ꠘꠣꠎꠣꠁꠎ ꠝꠘꠅ ꠇꠞꠦ, ꠔꠦ ꠔꠣꠞ ꠟꠣꠉꠤꠃ ꠁꠔꠣ ꠘꠣꠎꠣꠁꠎ।
ROM 14:15 ꠎꠥꠖꠤ ꠔꠥꠝꠣꠞ ꠇꠥꠘꠥ ꠈꠣꠘꠤꠞ ꠟꠣꠉꠤ ꠀꠞꠇ ꠜꠣꠁꠄ ꠝꠘꠅ ꠖꠥꠈ ꠙꠣꠄ, ꠔꠦ ꠔ ꠔꠥꠝꠤ ꠔꠣꠞꠦ ꠝꠢꠛ꠆ꠛꠔ ꠇꠞꠞꠣꠄ ꠘꠣ। ꠎꠦ ꠜꠣꠁꠞꠦ ꠛꠣꠌꠣꠘꠤꠞ ꠟꠣꠉꠤ ꠀꠟ-ꠝꠍꠤꠄ ꠝꠃꠔ ꠇꠛꠥꠟ ꠇꠞꠟꠣ, ꠇꠥꠘꠥ ꠈꠣꠘꠤꠞ ꠟꠣꠉꠤ ꠁ ꠜꠣꠁꠞ ꠡꠞ꠆ꠛꠘꠣꠡ ꠇꠞꠤꠅ ꠘꠣ।
ROM 14:16 ꠔꠥꠝꠤ ꠎꠦꠔꠣꠞꠦ ꠙꠍꠘ꠆ꠖ ꠇꠞꠅ, ꠁꠔꠣꠞ ꠟꠣꠉꠤ ꠖꠥꠍꠞꠣ ꠎꠘꠦ ꠎꠣꠘꠥ ꠔꠥꠝꠣꠞꠦ ꠘꠣ ꠘꠤꠘ꠆ꠖꠣꠄ।
ROM 14:17 ꠀꠟ꠆ꠟꠣꠞ ꠛꠣꠖꠡꠣꠁ ꠔ ꠈꠣꠟꠤ ꠈꠣꠘꠣ-ꠙꠤꠘꠣꠞ ꠟꠣꠉꠤ ꠘꠣꠄ, ꠛꠞꠋ ꠀꠟ꠆ꠟꠣꠁ ꠙꠣꠇ ꠞꠥꠢꠦ ꠖꠦꠅꠀ ꠙꠞꠦꠎꠉꠣꠞꠤ, ꠡꠣꠘ꠆ꠔꠤ ꠀꠞ ꠈꠥꠡꠤ-ꠛꠣꠡꠤꠞ ꠛꠦꠙꠣꠞ।
ROM 14:18 ꠅꠃ ꠘꠝꠥꠘꠣꠄ ꠎꠦꠞꠣ ꠀꠟ-ꠝꠍꠤꠞ ꠈꠦꠎꠝꠔ ꠇꠞꠦ, ꠄꠞꠣꠞ ꠃꠙꠞꠦ ꠀꠟ꠆ꠟꠣ ꠈꠥꠡꠤ ꠕꠣꠇꠂꠘ, ꠀꠞ ꠝꠣꠘꠡꠦꠅ ꠜꠣꠟꠣ ꠙꠣꠁꠘ।
ROM 14:19 ꠄꠞꠟꠣꠉꠤ ꠀꠅ, ꠀꠝꠞꠣ ꠅꠟꠣ ꠇꠣꠝ ꠇꠞꠤ, ꠎꠦ ꠇꠣꠝꠦ ꠡꠣꠘ꠆ꠔꠤ ꠇꠣꠁꠝ ꠅꠄ, ꠎꠦ ꠇꠣꠝꠦ ꠄꠇꠦ-ꠅꠁꠘ꠆ꠘꠞꠦ ꠉꠠꠤꠀ ꠔꠥꠟꠔꠣꠝ ꠙꠣꠞꠤ।
ROM 14:20 ꠀꠞ ꠇꠥꠘꠥ ꠟꠣꠈꠣꠘ ꠈꠣꠘꠤꠞ ꠟꠣꠉꠤ ꠀꠟ꠆ꠟꠣꠞ ꠇꠣꠝꠞꠦ ꠛꠤꠘꠣꠡ ꠘꠣ ꠇꠞꠤ, ꠈꠣꠘꠤꠞ ꠎꠥꠇꠣ ꠢꠇꠟꠔꠣꠃ ꠔ ꠢꠣꠟꠣꠟ। ꠅꠁꠟꠦ ꠔꠥꠝꠤ ꠇꠥꠘꠥ ꠄꠇ ꠛꠤꠡꠦꠡ ꠈꠣꠘꠤ ꠈꠣꠅꠀꠄ ꠎꠥꠖꠤ ꠖꠥꠍꠞꠣ ꠝꠣꠘꠡꠞ ꠁꠝꠣꠘꠅ ꠇꠡ꠆ꠐ ꠟꠣꠉꠦ, ꠔꠦ ꠁꠔꠣ ꠈꠣꠅꠀ ꠔꠥꠝꠣꠞ ꠟꠣꠉꠤ ꠎꠣꠁꠎ ꠘꠣꠄ।
ROM 14:21 ꠛꠤꠡꠦꠡ ꠇꠥꠘꠥ ꠉꠥꠡ꠆ꠔ ꠛꠣ ꠡꠞꠣꠛ ꠈꠣꠅꠀ, ꠎꠦ ꠇꠣꠝꠦ ꠔꠥꠝꠣꠞ ꠜꠣꠁꠄ ꠝꠘꠅ ꠖꠥꠈ ꠙꠣꠄ, ꠁꠝꠣꠘꠦ ꠛꠣꠗꠣ ꠙꠣꠄ, ꠁꠟꠣ ꠇꠥꠘꠥ ꠇꠣꠝ ꠇꠞꠣ ꠔꠥꠝꠣꠞ ꠟꠣꠉꠤ ꠑꠤꠇ ꠘꠣꠄ।
ROM 14:22 ꠔꠥꠝꠣꠞ ꠖꠤꠟꠞ ꠄꠇꠤꠘꠞꠦ, ꠈꠣꠟꠤ ꠔꠥꠝꠤ ꠀꠞ ꠔꠥꠝꠣꠞ ꠀꠟ꠆ꠟꠣꠞ ꠝꠣꠎꠦ ꠞꠣꠈꠅ। ꠘꠦꠇ-ꠇꠙꠣꠟꠤ ꠔ ꠢꠃ ꠎꠘ, ꠎꠦ ꠎꠘꠦ ꠜꠣꠟꠣ ꠝꠘꠅ ꠇꠞꠤꠀ ꠇꠥꠘꠥ ꠇꠣꠝ ꠇꠞꠤꠀ ꠢꠣꠞꠟꠦ, ꠔꠣꠞ ꠝꠘꠅ ꠈꠥꠔꠈꠥꠔꠤ ꠀꠄ ꠘꠣ।
ROM 14:23 ꠅꠁꠟꠦ ꠝꠘꠅ ꠈꠥꠔꠈꠥꠔꠤ ꠟꠁꠀ ꠎꠥꠖꠤ ꠢꠦ ꠇꠥꠘ꠆ꠔꠣ ꠈꠣꠄ, ꠔꠦ ꠔ ꠢꠦ ꠖꠥꠡꠤ। ꠇꠣꠞꠘ ꠢꠦ ꠎꠦꠔꠣ ꠈꠣꠁꠍꠦ, ꠁꠔꠣ ꠔꠣꠞ ꠛꠤꠛꠦꠇꠞ ꠅꠙꠍꠘ꠆ꠖ, ꠀꠞ ꠛꠤꠛꠦꠇꠞ ꠃꠟꠐꠣ ꠇꠣꠝꠃ ꠅꠁꠟ ꠉꠥꠘꠣ।
ROM 15:1 ꠄꠞꠟꠣꠉꠤ ꠀꠝꠞꠣ ꠎꠦꠞꠣꠞ ꠁꠝꠣꠘ ꠝꠎꠛꠥꠔ ꠀꠍꠦ, ꠀꠝꠞꠣ ꠈꠣꠟꠤ ꠘꠤꠎꠞ ꠈꠥꠡꠤꠞ ꠛꠣꠄ ꠘꠣ ꠌꠣꠁꠀ, ꠀꠝꠞꠣꠞ ꠇꠝꠎꠥꠞ ꠝꠔꠡꠇ꠆ꠇꠤ ꠝꠘꠣ ꠁꠝꠣꠘꠖꠣꠞ ꠜꠣꠁꠀꠂꠘꠞꠦꠅ ꠎꠣꠘꠥ ꠡꠁꠎ꠆ꠎ ꠇꠞꠤ।
ROM 15:2 ꠅꠔꠣ ꠜꠣꠁꠀꠁꠘ꠆ꠔꠞꠦ ꠉꠠꠤꠀ ꠔꠥꠟꠣꠞ ꠘꠤꠅꠔꠦ, ꠙꠞꠔꠦꠇꠦꠃ ꠔꠣꠞꠣꠞ ꠜꠣꠟꠣꠁꠞ ꠟꠣꠉꠤ ꠔꠣꠞꠣꠞ ꠝꠘꠞ ꠙꠍꠘ꠆ꠖꠞꠦ ꠎꠣꠘꠥ ꠈꠥꠡ ꠞꠣꠈꠤ।
ROM 15:3 ꠀꠟ-ꠝꠍꠤꠄꠅ ꠔ ꠔꠣꠘ ꠘꠤꠎꠞꠦ ꠈꠥꠡꠤ ꠇꠞꠍꠂꠘ ꠘꠣ, ꠛꠞꠋ ꠙꠛꠤꠔ꠆ꠞ ꠎꠛꠥꠞ ꠡꠞꠤꠚꠅ ꠀꠍꠦ, “ꠅ ꠝꠣꠛꠥꠖ, ꠔꠥꠝꠣꠞꠦ ꠎꠦꠞꠣ ꠛꠦꠁꠎ꠆ꠎꠔ ꠇꠞꠍꠦ, ꠔꠣꠞꠣꠞ ꠅꠃ ꠢꠇꠟ ꠛꠦꠁꠎ꠆ꠎꠔꠤ ꠀꠝꠣꠞ ꠃꠙꠞꠦꠃ ꠀꠁꠍꠦ।”
ROM 15:4 ꠔꠦ ꠀꠉꠞ ꠀꠍꠝꠣꠘꠤ ꠇꠤꠔꠣꠛꠅ ꠎꠔꠔꠣ ꠟꠦꠈꠣ ꠅꠁꠍꠦ, ꠁꠔꠣ ꠔ ꠀꠝꠞꠣꠞꠦꠃ ꠔꠣꠟꠤꠝ ꠖꠤꠛꠣꠞ ꠟꠣꠉꠤ ꠟꠦꠈꠣ ꠅꠁꠍꠦ, ꠎꠣꠔꠦ ꠅꠔꠣ ꠖꠦꠈꠤꠀ ꠀꠝꠞꠣꠞ ꠍꠛꠞ ꠀꠞ ꠡꠣꠘ꠆ꠔꠘꠣ ꠀꠄ, ꠀꠞ ꠀꠡꠣ-ꠜꠞꠡꠣ ꠙꠣꠁ।
ROM 15:5 ꠅꠈꠘ ꠍꠛꠞ ꠀꠞ ꠡꠣꠘ꠆ꠔꠘꠣ ꠖꠦꠅꠞꠣ ꠀꠟ꠆ꠟꠣꠄ ꠁꠍꠣ ꠀꠟ-ꠝꠍꠤꠞ ꠙꠕꠦ ꠌꠟꠣꠞ ꠟꠣꠉꠤ, ꠔꠥꠝꠞꠣ ꠢꠇꠟꠞ ꠝꠘ ꠄꠇ ꠇꠞꠃꠇ꠆ꠇꠣ।
ROM 15:6 ꠔꠦꠃ ꠔꠥꠝꠞꠣ ꠄꠇ ꠝꠘꠦ ꠀꠞ ꠄꠇ ꠝꠥꠈꠦ, ꠀꠝꠞꠣꠞ ꠝꠣꠟꠤꠇ ꠁꠍꠣ ꠀꠟ-ꠝꠍꠤꠞ ꠉꠣꠁꠛꠤ ꠛꠣꠚ ꠀꠟ꠆ꠟꠣꠞ ꠔꠣꠞꠤꠚ ꠇꠞꠔꠣꠄ ꠙꠣꠞꠛꠣꠄ।
ROM 15:7 ꠄꠞꠟꠣꠉꠤꠃ ꠅ ꠜꠣꠁ ꠅꠇꠟ, ꠀꠟ-ꠝꠍꠤꠄ ꠎꠦꠟꠣ ꠔꠥꠝꠞꠣꠞꠦ ꠀꠙꠘ ꠇꠞꠍꠤꠟꠣ, ꠔꠥꠝꠞꠣꠅ ꠅꠟꠣ ꠄꠇꠦ-ꠅꠁꠘ꠆ꠘꠞꠦ ꠀꠙꠘ ꠇꠞꠤꠟꠣꠅ, ꠎꠣꠔꠦ ꠀꠟ꠆ꠟꠣꠞ ꠉꠃꠞꠛ ꠅꠄ।
ROM 15:8 ꠝꠘꠅ ꠞꠣꠈꠤꠅ, ꠀꠟ꠆ꠟꠣꠄ ꠛꠘꠤ ꠁꠍꠞꠣꠁꠟꠞ ꠝꠥꠟ ꠝꠥꠞꠛ꠆ꠛꠤ ꠅꠇꠟꠞ ꠟꠉꠦ ꠎꠔ ꠅꠀꠖꠣ ꠇꠞꠍꠟꠣ, ꠅꠔꠣꠞ ꠢꠇꠤꠇꠔꠤ ꠙꠞꠝꠣꠘ ꠇꠞꠣꠞ ꠟꠣꠉꠤ ꠀꠟ-ꠝꠍꠤ ꠀꠁꠀ ꠛꠘꠤ ꠁꠍꠞꠣꠁꠟꠞ ꠈꠦꠎꠝꠔꠉꠣꠞ ꠅꠁꠟꠣ।
ROM 15:9 ꠀꠞ ꠜꠤꠘ ꠎꠣꠔꠤꠞ ꠉꠦꠍꠦꠅ ꠀꠁꠟꠣ, ꠎꠣꠔꠦ ꠄꠞꠣꠅ ꠀꠟ꠆ꠟꠣꠞ ꠞꠢꠝꠔ ꠖꠦꠈꠤꠀ ꠔꠣꠘ ꠔꠣꠞꠤꠚ ꠇꠞꠦ। ꠁ ꠛꠦꠙꠣꠞꠦ ꠎꠛꠥꠞ ꠡꠞꠤꠚꠅ ꠀꠉꠦꠃ ꠇꠅꠀ ꠅꠁꠍꠦ, ꠄꠞꠟꠣꠉꠤꠃ ꠀꠝꠤ ꠜꠤꠘ ꠎꠣꠔꠤ ꠅꠇꠟꠞ ꠝꠣꠎꠦ ꠔꠥꠝꠣꠞ ꠔꠣꠞꠤꠚ ꠇꠞꠝꠥ ꠔꠣꠞꠣꠞ ꠝꠣꠎꠦ ꠔꠥꠝꠣꠞ ꠉꠥꠘꠉꠣꠘ ꠉꠣꠁꠝꠥ।
ROM 15:10 ꠀꠞ ꠔꠃꠞꠣꠔ ꠡꠞꠤꠚꠅ ꠇꠅꠀ ꠅꠁꠍꠦ, ꠅ ꠖꠥꠘꠤꠀꠞ ꠢꠇꠟ ꠎꠣꠔꠤꠞ ꠝꠣꠘꠥꠡ, ꠀꠟ꠆ꠟꠣꠞ ꠀꠙꠘ ꠙ꠆ꠞꠎꠣ ꠛꠘꠤ ꠁꠍꠞꠣꠁꠟꠞ ꠟꠉꠦ ꠝꠤꠟꠤꠀ, ꠔꠥꠝꠞꠣꠅ ꠔꠣꠘ ꠔꠣꠞꠤꠚ ꠇꠞꠅ।
ROM 15:11 ꠢꠤꠞꠛꠣꠞ ꠎꠛꠥꠞ ꠡꠞꠤꠚꠅ ꠇꠅꠀ ꠅꠁꠍꠦ, ꠢꠇꠟ ꠎꠣꠔꠤꠄ ꠀꠟ꠆ꠟꠣꠞ ꠔꠣꠞꠤꠚ ꠇꠞꠅ, ꠖꠦꠡ ꠀꠞ ꠉꠥꠡ꠆ꠐꠤꠄ ꠔꠣꠘ ꠘꠣꠝ ꠎꠚꠅ।
ROM 15:12 ꠀꠞ ꠢꠎꠞꠔ ꠁꠡꠣꠄꠀ ꠘꠛꠤꠄ ꠟꠦꠈꠍꠂꠘ, ꠎꠦꠁꠘ ꠛꠣꠖꠡꠣ ꠖꠣꠃꠖ ꠛꠤꠘ ꠁꠀꠍꠞ ꠈꠣꠘ꠆ꠖꠣꠘꠞ ꠝꠥꠟ ꠈꠥꠐꠤ, ꠢꠇꠟ ꠎꠣꠔꠤꠞ ꠃꠙꠞꠦ ꠛꠣꠖꠡꠣꠁ ꠇꠞꠣꠞ ꠟꠣꠉꠤ ꠄꠁꠘ ꠀꠁꠛꠣ, ꠔꠣꠘ ꠃꠙꠞꠦꠃ ꠕꠣꠇꠛ ꠢꠇꠟ ꠝꠣꠘꠡꠞ ꠀꠡꠣ-ꠜꠞꠡꠣ।
ROM 15:13 ꠔꠦ ꠖꠤꠟꠞ ꠝꠣꠎꠦ ꠀꠡꠣ ꠖꠦꠅꠞꠣ ꠀꠟ꠆ꠟꠣꠄ ꠁꠝꠣꠘꠞ ꠛꠟꠦ, ꠔꠥꠝꠞꠣꠞꠦ ꠢꠇꠟ ꠟꠣꠈꠣꠘ ꠈꠥꠡꠤ-ꠛꠣꠡꠤ ꠀꠞ ꠡꠣꠘ꠆ꠔꠤꠞ ꠝꠣꠎꠦ ꠢꠣꠛꠥꠒꠥꠛꠥ ꠈꠣꠅꠀꠃꠇ꠆ꠇꠣ। ꠔꠦꠃ ꠀꠟ꠆ꠟꠣꠁ ꠙꠣꠇ ꠞꠥꠢꠥꠞ ꠇꠥꠖꠞꠔꠤꠄ ꠔꠥꠝꠞꠣꠞ ꠀꠡꠣ-ꠜꠞꠡꠣ ꠛꠣꠁꠀ ꠙꠠꠛ।
ROM 15:14 ꠅ ꠜꠣꠁ ꠅꠇꠟ, ꠔꠥꠝꠞꠣꠞ ꠛꠦꠙꠣꠞꠦ ꠀꠝꠤ ꠙꠥꠞꠣꠙꠥꠞ ꠛꠥꠎꠞꠣꠝ, ꠔꠥꠝꠞꠣꠞ ꠖꠤꠟ ꠈꠣꠘ ꠘꠦꠇ ꠘꠤꠅꠔꠦ ꠜꠞꠣ ꠀꠞ ꠍꠢꠤ-ꠡꠥꠖ꠆ꠖ ꠁꠝꠣꠘꠤ ꠀꠈꠟ ꠀꠍꠦ, ꠎꠣꠔꠦ ꠄꠇꠦ-ꠅꠁꠘ꠆ꠘꠞꠦ ꠙꠞꠣꠝꠤꠡ ꠖꠤꠔꠣꠄ ꠙꠣꠞ।
ROM 15:15 ꠔꠣ-ꠅ ꠇꠁꠄꠇꠐꠣ ꠛꠦꠙꠣꠞꠦ ꠀꠝꠤ ꠔꠥꠝꠞꠣꠞꠦ ꠝꠘꠅ ꠇꠞꠣꠁ ꠖꠤꠞꠣꠝ, ꠀꠟ꠆ꠟꠣꠄ ꠀꠝꠣꠞꠦ ꠅꠃ ꠘꠤꠀꠝꠔ ꠖꠤꠍꠂꠘ ꠇꠞꠤ, ꠀꠝꠤ ꠡꠣꠅꠡ ꠇꠞꠤ ꠔꠥꠝꠞꠣꠞ ꠉꠦꠍꠦ ꠟꠦꠈꠤꠀꠞ,
ROM 15:16 ꠁꠍꠣ ꠀꠟ-ꠝꠍꠤꠞ ꠈꠣꠖꠤꠝ ꠢꠤꠡꠣꠛꠦ ꠀꠟ꠆ꠟꠣꠄ ꠀꠝꠣꠞꠦ ꠔꠥꠝꠞꠣꠞ ꠟꠣꠈꠣꠘ ꠜꠤꠘ ꠎꠣꠔꠤ ꠅꠇꠟꠞ ꠉꠦꠍꠦ ꠙꠣꠑꠣꠁꠍꠂꠘ। ꠄꠞꠟꠣꠉꠤꠃ ꠔꠣꠘ ꠖꠦꠅꠀ ꠈꠥꠡ-ꠈꠛꠞꠤ ꠔꠛꠟꠤꠉꠞ ꠝꠣꠎꠖꠤ ꠀꠝꠤ ꠁꠝꠣꠝꠔꠤꠞ ꠇꠣꠝ ꠇꠞꠤꠀꠞ, ꠎꠣꠔꠦ ꠅꠃ ꠜꠤꠘ ꠎꠣꠔꠤ ꠅꠇꠟ ꠀꠟ꠆ꠟꠣꠞ ꠙꠣꠇ ꠞꠥꠢꠦ ꠙꠛꠤꠔ꠆ꠞ ꠅꠁꠀ ꠔꠣꠘ ꠖꠞꠛꠣꠞꠅ ꠇꠛꠥꠟ ꠅꠀꠞ ꠎꠥꠇꠣ ꠇꠥꠞꠛꠣꠘꠤ ꠅꠁꠘ।
ROM 15:17 ꠀꠟ꠆ꠟꠣ ꠙꠣꠇꠞ ꠟꠣꠉꠤ ꠀꠝꠤ ꠎꠦ ꠈꠦꠎꠝꠔ ꠇꠞꠤꠀꠞ, ꠅꠃ ꠇꠣꠝꠞ ꠇꠣꠞꠘꠦ ꠁꠍꠣ ꠀꠟ-ꠝꠍꠤꠞ ꠝꠣꠎꠖꠤ ꠀꠝꠣꠞ ꠛꠠꠣꠁ ꠖꠦꠈꠣꠘꠤꠞ ꠄꠈꠔꠤꠀꠞ ꠀꠍꠦ।
ROM 15:18 ꠀꠟ-ꠝꠍꠤꠄ ꠀꠝꠣꠞ ꠝꠣꠎꠖꠤ ꠎꠦ ꠇꠣꠝ ꠢꠣꠍꠤꠟ ꠇꠞꠞꠣ, ꠄꠞ ꠛꠣꠁꠞꠦ ꠇꠥꠘ꠆ꠔꠣ ꠝꠣꠔꠤꠛꠣꠞ ꠡꠣꠅꠡ ꠀꠝꠣꠞ ꠘꠣꠁ। ꠔꠣꠁꠘ ꠀꠝꠣꠞ ꠝꠥꠈꠞ ꠇꠕꠣ, ꠀꠝꠣꠞ ꠇꠣꠝ-ꠇꠣꠎ,
ROM 15:19 ꠇꠦꠞꠣꠝꠔꠤ-ꠝꠥꠎꠦꠎꠣ ꠀꠞ ꠀꠟ꠆ꠟꠣꠁ ꠙꠣꠇ ꠞꠥꠢꠥꠞ ꠇꠥꠖꠞꠔꠤ ꠛꠟꠦ ꠜꠤꠘ ꠎꠣꠔꠤ ꠅꠇꠟꠞꠦꠖꠤ ꠀꠟ꠆ꠟꠣꠞ ꠉꠥꠟꠣꠝꠤ ꠇꠞꠣꠁꠍꠂꠘ। ꠄꠞꠟꠣꠉꠤꠃ ꠀꠝꠤ ꠀꠟ-ꠝꠍꠤꠞ ꠈꠥꠡ-ꠈꠛꠞꠤꠞꠦ ꠎꠦꠞꠥꠎꠣꠟꠦꠝ ꠕꠣꠇꠤ ꠁꠟꠥꠞꠤꠇꠣ ꠙꠞ꠆ꠎꠘ꠆ꠔ ꠢꠇꠟ ꠎꠣꠉꠣꠞ ꠝꠣꠎꠦ ꠙꠥꠞꠣꠙꠥꠞ ꠔꠛꠟꠤꠉ ꠇꠞꠍꠤ।
ROM 15:20 ꠔꠦ ꠎꠦ ꠎꠣꠉꠣꠔ ꠇꠥꠘꠥꠖꠤꠘ ꠀꠟ-ꠝꠍꠤꠞ ꠈꠥꠡ-ꠈꠛꠞꠤ ꠔꠛꠟꠤꠉ ꠇꠞꠣ ꠅꠁꠍꠦ ꠘꠣ, ꠢꠃ ꠎꠣꠉꠣꠔ ꠔꠛꠟꠤꠉ ꠇꠞꠣꠃ ꠀꠝꠣꠞ ꠎꠤꠘ꠆ꠖꠦꠉꠤꠞ ꠝꠥꠟ ꠇꠣꠝ ꠝꠘꠅ ꠇꠞꠤ। ꠀꠝꠤ ꠌꠣꠁ ꠘꠣ ꠀꠞꠇ ꠎꠘꠞ ꠉꠣꠠꠣ ꠈꠥꠐꠤꠞ ꠃꠙꠞꠦ ꠜꠞ ꠇꠞꠤꠀ ꠊꠞ ꠛꠣꠘꠣꠁꠔꠣꠝ।
ROM 15:21 ꠎꠦꠟꠣ ꠀꠟ꠆ꠟꠣꠞ ꠇꠣꠟꠣꠝꠅ ꠀꠍꠦ, ꠔꠣꠘ ꠇꠕꠣ ꠎꠦꠞꠣꠞ ꠉꠦꠍꠦ ꠎꠣꠘꠣꠁꠟ ꠅꠁꠍꠦ ꠘꠣ ꠅꠈꠘ ꠔꠣꠞꠣ ꠁꠔꠣ ꠖꠦꠈꠛꠣ, ꠔꠣꠘ ꠛꠦꠙꠣꠞꠦ ꠀꠉꠦ ꠎꠦꠞꠣ ꠢꠥꠘꠍꠂꠘ ꠘꠣ ꠔꠣꠞꠣ ꠅꠈꠘ ꠛꠥꠎꠛꠣ।
ROM 15:22 ꠔꠦ ꠅꠃ ꠇꠣꠞꠘꠦ ꠀꠝꠤ ꠛꠃꠔ ꠛꠣꠞ ꠔꠥꠝꠞꠣꠞ ꠉꠦꠍꠦ ꠎꠣꠅꠀꠞ ꠙꠕꠦ ꠛꠣꠗꠣ ꠙꠣꠁꠍꠤ।
ROM 15:23 ꠅꠁꠘ꠆ꠘ ꠎꠣꠉꠣꠔ ꠀꠝꠣꠞ ꠇꠣꠝ ꠡꠦꠡ ꠘꠣ ꠅꠀꠄ ꠎꠣꠅꠀ ꠛꠘ꠆ꠖ ꠅꠁꠉꠦꠍꠦ, ꠅꠁꠟꠦ ꠅꠈꠘ ꠔ ꠁꠔꠣ ꠎꠣꠉꠣꠔ ꠀꠝꠣꠞ ꠔꠛꠟꠤꠉ ꠇꠣꠝ ꠡꠦꠡ, ꠇꠥꠘꠥ ꠎꠣꠉꠣꠃ ꠛꠣꠖ ꠞꠁꠍꠦ ꠘꠣ। ꠀꠍꠟꠦ ꠛꠃꠔ ꠛꠍꠞ ꠗꠞꠤꠃ ꠀꠝꠣꠞ ꠈꠤꠀꠟ ꠀꠍꠤꠟ ꠔꠥꠝꠞꠣꠞ ꠉꠦꠍꠦ ꠎꠣꠁꠔꠣꠝ,
ROM 15:24 ꠄꠞꠟꠣꠉꠤ ꠅꠈꠘ ꠡ꠆ꠙꠦꠘ ꠖꠦꠡꠅ ꠎꠣꠅꠀꠞ ꠇꠣꠟꠅ ꠀꠝꠤ ꠔꠥꠝꠞꠣꠞ ꠉꠦꠍꠦ ꠎꠣꠁꠔꠣꠝ ꠌꠣꠁꠞꠣꠝ। ꠀꠝꠤ ꠀꠡꠣ ꠇꠞꠞꠣꠝ, ꠢꠘꠅ ꠎꠣꠅꠀꠞ ꠡꠝꠄ ꠔꠥꠝꠞꠣꠞ ꠟꠉꠦ ꠖꠦꠈꠣ ꠅꠁꠛ, ꠀꠞ ꠈꠥꠡꠤ-ꠛꠣꠡꠤ ꠇꠞꠤꠀ ꠇꠄꠈꠣꠘ ꠖꠤꠘ ꠔꠥꠝꠞꠣꠞ ꠟꠉꠦ ꠇꠣꠐꠣꠁꠝꠥ। ꠛꠣꠖꠦ ꠡ꠆ꠙꠦꠘꠅ ꠎꠣꠅꠀꠞ ꠟꠣꠉꠤ ꠔꠥꠝꠞꠣꠃ ꠀꠝꠣꠞ ꠛꠦꠛꠡ꠆ꠔꠣ ꠇꠞꠤꠀ ꠖꠤꠛꠣꠄ।
ROM 15:25 ꠅꠁꠟꠦ ꠅꠈꠘ ꠀꠝꠤ ꠀꠟ꠆ꠟꠣꠞ ꠙꠣꠇ ꠛꠘ꠆ꠖꠣ ꠅꠇꠟꠞ ꠝꠣꠎꠦ ꠞꠤꠟꠤꠚ ꠛꠣꠐꠤꠛꠣꠞ ꠟꠣꠉꠤ ꠎꠦꠞꠥꠎꠣꠟꠦꠝ ꠐꠣꠃꠘꠅ ꠎꠣꠁꠞꠣꠝ।
ROM 15:26 ꠢꠤꠘꠅ ꠅꠜꠣꠛ-ꠅꠘꠐꠘꠞ ꠝꠣꠎꠦ ꠀꠟ꠆ꠟꠣꠞ ꠎꠦ ꠛꠘ꠆ꠖꠣ ꠅꠇꠟ ꠀꠍꠂꠘ, ꠔꠣꠞꠣꠞ ꠉꠦꠍꠦ ꠛꠣꠐꠤꠀ ꠖꠤꠛꠣꠞ ꠟꠣꠉꠤ ꠝꠣꠇꠤꠖꠘꠤꠀ ꠀꠞ ꠉ꠆ꠞꠤꠍ ꠖꠦꠡꠞ ꠎꠝꠣꠔ ꠅꠇꠟꠦ ꠇꠤꠍꠥ ꠡꠣꠁꠎ꠆ꠎ ꠔꠥꠟꠍꠂꠘ।
ROM 15:27 ꠔꠣꠞꠣ ꠈꠥꠛ ꠈꠥꠡꠤ ꠅꠁꠀ ꠁꠔꠣ ꠔꠥꠟꠍꠂꠘ। ꠎꠣꠘ ꠘꠤ, ꠁ ꠎꠝꠣꠔꠞ ꠜꠣꠁ-ꠛꠁꠘ ꠅꠇꠟ ꠎꠦꠞꠥꠎꠣꠟꠦꠝ ꠐꠣꠃꠘꠞ ꠀꠟ꠆ꠟꠣꠞ ꠙꠣꠇ ꠛꠘ꠆ꠖꠣ ꠅꠇꠟꠞ ꠉꠦꠍꠦ ꠞꠤꠘꠤ ꠀꠍꠂꠘ। ꠇꠣꠞꠘ ꠀꠟ꠆ꠟꠣꠁ ꠛꠣꠔꠥꠘꠤ ꠘꠤꠀꠝꠔꠞ ꠛꠣꠐ ꠎꠦꠛꠟꠣ ꠛꠘꠤ ꠁꠍꠞꠣꠁꠟꠞ ꠝꠣꠎꠖꠤ ꠜꠤꠘ ꠎꠣꠔꠤꠄ ꠙꠣꠁꠍꠂꠘ, ꠔꠦ ꠜꠤꠘ ꠎꠣꠔꠤꠞ ꠟꠣꠉꠤꠅ ꠎꠞꠥꠞ ꠅꠁꠟ, ꠛꠘꠤ ꠁꠍꠞꠣꠁꠟꠞꠦ ꠖꠥꠘꠤꠀꠛꠤ ꠛꠦꠙꠣꠞꠦ ꠡꠣꠄ-ꠡꠣꠁꠎ꠆ꠎ ꠇꠞꠣ।
ROM 15:28 ꠀꠝꠣꠞ ꠅꠃ ꠞꠤꠟꠤꠚ ꠛꠣꠐꠣꠔ ꠉꠤꠀ ꠢꠣꠞꠤ ꠀꠝꠤ ꠎꠦꠛꠟꠣ ꠘꠤꠌ꠆ꠌꠤꠔ ꠅꠁꠝꠥ, ꠁꠔꠣ ꠙꠥꠞꠣꠙꠥꠞ ꠔꠣꠞꠣꠞ ꠀꠔꠅ ꠙꠃꠍꠤ ꠉꠦꠍꠦ, ꠅꠃ ꠡꠝꠄ ꠀꠝꠤ ꠔꠥꠝꠞꠣꠞ ꠉꠦꠍꠦ ꠀꠁꠀ ꠡ꠆ꠙꠦꠘ ꠖꠦꠡꠅ ꠎꠣꠁꠝꠥ।
ROM 15:29 ꠀꠝꠤ ꠛꠥꠎꠤꠀꠞ, ꠀꠝꠤ ꠎꠦꠛꠟꠣ ꠔꠥꠝꠞꠣꠞ ꠉꠦꠍꠦ ꠀꠁꠝꠥ, ꠅꠃ ꠡꠝꠄ ꠀꠟ-ꠝꠍꠤꠞ ꠡꠥꠟ꠆ꠟꠀꠘꠣ ꠞꠢꠝ-ꠘꠤꠀꠝꠔ ꠟꠁꠀ ꠀꠁꠝꠥ।
ROM 15:30 ꠅ ꠜꠣꠁ ꠅꠇꠟ, ꠀꠟ꠆ꠟꠣꠞ ꠙꠣꠇ ꠞꠥꠢꠥꠞ ꠝꠢꠛ꠆ꠛꠔꠦ ꠀꠞ ꠀꠝꠞꠣꠞ ꠝꠣꠟꠤꠇ ꠁꠍꠣ ꠀꠟ-ꠝꠍꠤꠞ ꠘꠣꠝꠦ ꠀꠝꠤ ꠔꠥꠝꠞꠣꠞꠦ ꠈꠣꠍ ꠝꠤꠘꠔꠤ ꠇꠞꠤꠀꠞ, ꠀꠝꠣꠞ ꠟꠉꠦ ꠅꠁꠀ ꠔꠥꠝꠞꠣꠅ ꠀꠝꠣꠞ ꠟꠣꠉꠤ ꠀꠟ꠆ꠟꠣꠞ ꠖꠞꠛꠣꠞꠅ ꠖꠥꠀ-ꠝꠥꠘꠣꠎꠣꠔꠞ ꠎꠤꠢꠣꠖ ꠌꠣꠟꠣꠅ।
ROM 15:31 ꠖꠥꠀ ꠇꠞꠤꠅ, ꠄꠢꠥꠖꠤꠀ ꠎꠤꠟꠣꠔ ꠁꠍꠣꠄꠁ ꠔꠞꠤꠇꠣꠞ ꠛꠤꠞꠥꠗꠤ ꠝꠣꠘꠡꠞ ꠀꠔ ꠕꠣꠇꠤ ꠀꠝꠤ ꠎꠣꠘꠥ ꠞꠦꠢꠣꠁ ꠙꠣꠁ, ꠀꠞ ꠀꠝꠣꠞ ꠀꠘꠣ ꠁ ꠞꠤꠟꠤꠚ ꠈꠣꠘꠣꠁꠘ ꠎꠣꠘꠥ ꠎꠦꠞꠥꠎꠣꠟꠦꠝ ꠐꠣꠃꠘꠅ ꠀꠟ꠆ꠟꠣꠞ ꠙꠣꠇ ꠛꠘ꠆ꠖꠣ ꠅꠇꠟꠦ ꠡꠝꠎꠂꠘ।
ROM 15:32 ꠔꠦꠃ ꠀꠝꠤ ꠈꠥꠡꠤ ꠝꠘꠦ ꠔꠥꠝꠞꠣꠞ ꠉꠦꠍꠦ ꠎꠣꠁꠔꠣꠝ ꠙꠣꠞꠝꠥ, ꠔꠥꠝꠞꠣꠞ ꠟꠉꠦ ꠀꠞꠣꠝ-ꠀꠄꠄꠡ ꠇꠞꠝꠥ, ꠁꠘꠡꠣꠟ꠆ꠟꠣ।
ROM 15:33 ꠡꠣꠘ꠆ꠔꠤ ꠖꠦꠅꠞꠣ ꠀꠟ꠆ꠟꠣ ꠙꠣꠇ ꠔꠥꠝꠞꠣꠞ ꠟꠉꠦ ꠟꠉꠦ ꠞꠃꠇ꠆ꠇꠣ। ꠀꠝꠤꠘ।
ROM 16:1 ꠔꠦ ꠅꠈꠘ ꠀꠝꠞꠣꠞ ꠛꠁꠘ ꠚꠂꠛꠤ ꠛꠤꠛꠤꠞꠦ ꠙꠣꠑꠣꠁꠞꠣꠝ, ꠔꠣꠁꠘ ꠅꠁꠟꠣ ꠇꠤꠋꠇ꠆ꠞꠤꠀ ꠐꠣꠃꠘꠞ ꠁꠍꠣꠄꠁ ꠎꠝꠣꠔꠞ ꠈꠣꠖꠤꠝ, ꠔꠣꠘ ꠛꠦꠙꠣꠞꠦ ꠇꠁꠀꠞ,
ROM 16:2 ꠀꠟ꠆ꠟꠣꠞ ꠛꠘ꠆ꠖꠣ ꠅꠇꠟꠞꠦ ꠎꠦꠟꠣ ꠀꠙꠘ ꠇꠞꠣ ꠎꠞꠥꠞ, ꠝꠣꠟꠤꠇ ꠁꠍꠣꠞ ꠘꠣꠝꠦ ꠄꠘꠞꠦꠅ ꠅꠟꠣ ꠀꠙꠘ ꠝꠘꠅ ꠇꠞꠤꠅ। ꠔꠣꠁꠘ ꠔ ꠀꠝꠣꠞꠦ ꠀꠞ ꠀꠞꠅ ꠛꠃꠔ ꠝꠣꠘꠡꠞꠦ ꠡꠣꠁꠎ꠆ꠎ ꠇꠞꠍꠂꠘ, ꠄꠞꠟꠣꠉꠤ ꠎꠦꠇꠥꠘꠥ ꠛꠦꠙꠣꠞꠦ ꠡꠣꠁꠎ꠆ꠎ ꠌꠣꠁꠟꠦ, ꠔꠥꠝꠞꠣ ꠔꠣꠘꠞꠦ ꠡꠣꠁꠎ꠆ꠎ ꠇꠞꠤꠅ।
ROM 16:3 ꠀꠝꠣꠞ ꠟꠉꠦ ꠅꠁꠀ ꠀꠟ-ꠝꠍꠤꠞ ꠟꠣꠉꠤ ꠎꠦꠞꠣ ꠇꠣꠝ ꠇꠞꠍꠂꠘ, ꠅꠃ ꠚꠤꠍꠇꠤꠟꠣ ꠀꠞ ꠀꠇꠤꠟꠞꠦ ꠀꠝꠣꠞ ꠍꠣꠟꠣꠝ ꠎꠣꠘꠣꠁꠅ।
ROM 16:4 ꠀꠝꠣꠞ ꠎꠣꠘ ꠛꠣꠌꠣꠘꠤꠞ ꠟꠣꠉꠤ, ꠔꠣꠞꠣ ꠘꠤꠎꠞꠦ ꠝꠃꠔꠞ ꠀꠔꠅ ꠡꠙꠤ ꠖꠤꠍꠟꠣ। ꠈꠣꠟꠤ ꠀꠝꠤ ꠘꠣꠄ, ꠜꠤꠘ ꠎꠣꠔꠤꠞ ꠝꠣꠎꠞ ꠢꠇꠟ ꠎꠝꠣꠔꠃ ꠔꠣꠞꠣꠞ ꠉꠦꠍꠦ ꠞꠤꠘꠤ।
ROM 16:5 ꠅꠈꠘ ꠔꠣꠞꠣꠞ ꠛꠣꠠꠤꠞ ꠎꠝꠣꠔꠅ ꠀꠁꠀ ꠎꠦꠞꠣ ꠡꠞꠤꠇ ꠅꠁꠘ, ꠄꠞꠣ ꠢꠇꠟꠞꠦꠃ ꠀꠝꠣꠞ ꠍꠣꠟꠣꠝ ꠎꠣꠘꠣꠁꠅ। ꠔꠥꠞꠡ꠆ꠇꠞ ꠀꠍꠤꠀ ꠄꠟꠣꠇꠣꠔ ꠢꠇꠟ ꠙꠄꠟꠣ ꠎꠦꠁꠘ ꠀꠟ-ꠝꠍꠤꠞꠦ ꠇꠛꠥꠟ ꠇꠞꠍꠟꠣ, ꠢꠃ ꠀꠙꠤꠘꠤꠔꠥꠍ ꠜꠣꠁꠞꠦ ꠍꠣꠟꠣꠝ ꠎꠣꠘꠣꠁꠅ, ꠄꠁꠘ ꠀꠝꠣꠞ ꠝꠣꠄꠀꠞ ꠝꠣꠘꠥꠡ।
ROM 16:6 ꠀꠞ ꠢꠃ ꠝꠞꠤꠅꠝ ꠛꠤꠛꠤꠞꠦꠅ ꠍꠣꠟꠣꠝ ꠎꠣꠘꠣꠁꠅ, ꠎꠦꠁꠘ ꠔꠥꠝꠞꠣꠞ ꠟꠣꠉꠤ ꠛꠃꠔ ꠝꠦꠘꠔ ꠇꠞꠍꠂꠘ।
ROM 16:7 ꠀꠝꠣꠞ ꠘꠤꠎꠞ ꠎꠣꠔꠤꠞ ꠝꠣꠘꠥꠡ ꠀꠘꠖ꠆ꠞꠘꠤꠇꠥꠍ ꠀꠞ ꠎꠥꠘꠤꠀꠞꠦꠅ ꠍꠣꠟꠣꠝ ꠎꠣꠘꠣꠁꠅ, ꠄꠞꠣ ꠔ ꠀꠝꠣꠞ ꠟꠉꠦ ꠅꠁꠀ ꠎꠦꠟ ꠈꠣꠐꠤꠍꠂꠘ। ꠀꠟ-ꠝꠍꠤꠞ ꠍꠣꠢꠣꠛꠤ ꠅꠇꠟꠞ ꠉꠦꠍꠦ ꠄꠞꠣ ꠈꠥꠛ ꠁꠎ꠆ꠎꠔꠤ ꠎꠘ, ꠄꠞꠣ ꠀꠝꠣꠞ ꠀꠉꠦ ꠁꠝꠣꠘ ꠀꠘꠍꠂꠘ।
ROM 16:8 ꠀꠝꠣꠞ ꠝꠣꠄꠀꠞ ꠝꠥꠝꠤꠘ ꠜꠣꠁ ꠀꠝꠚꠤꠟꠥꠍꠞꠦ ꠍꠣꠟꠣꠝ ꠎꠣꠘꠣꠁꠅ।
ROM 16:9 ꠀꠝꠞꠣꠞ ꠟꠉꠞ ꠔꠛꠟꠤꠉꠇꠣꠞꠤ ꠃꠞꠛꠣꠘ ꠜꠣꠁꠞꠦ, ꠀꠞ ꠀꠝꠣꠞ ꠝꠣꠄꠀꠞ ꠖꠥꠡ꠆ꠔ ꠡ꠆ꠔꠣꠈꠤꠍꠞꠦꠅ ꠍꠣꠟꠣꠝ ꠇꠁꠅ।
ROM 16:10 ꠀꠟ-ꠝꠍꠤꠞ ꠙꠞꠤꠇ꠆ꠇꠣꠔ ꠙꠣꠡ ꠇꠞꠣ ꠍꠤꠙꠣꠁ ꠀꠚꠤꠟꠤꠍ ꠜꠣꠁꠞꠦꠅ ꠍꠣꠟꠣꠝ ꠖꠤꠅ। ꠜꠣꠁ ꠀꠞꠤꠡ꠆ꠔꠣꠛꠥꠟꠞ ꠛꠣꠠꠤꠞ ꠢꠇ꠆ꠇꠟꠞꠦ ꠍꠣꠟꠣꠝ ꠎꠣꠘꠣꠁꠅ।
ROM 16:11 ꠀꠝꠣꠞ ꠎꠣꠔꠤꠞ ꠜꠣꠁ ꠢꠦꠞꠥꠖꠥꠘꠞꠦ ꠍꠣꠟꠣꠝ ꠖꠤꠅ। ꠝꠞꠢꠥꠝ ꠘꠣꠇꠤꠍꠥꠍꠞ ꠛꠣꠠꠤꠞ ꠎꠦꠞꠣ ꠝꠣꠟꠤꠇ ꠁꠍꠣꠞ ꠃꠝ꠆ꠝꠔ ꠅꠁꠍꠂꠘ, ꠔꠣꠞꠣꠞꠦꠅ ꠍꠣꠟꠣꠝ ꠎꠣꠘꠣꠁꠅ।
ROM 16:12 ꠔꠥꠞꠚꠣꠘꠣ ꠀꠞ ꠔꠥꠞꠚꠣꠍꠣ ꠛꠤꠛꠤꠞꠦꠅ ꠍꠣꠟꠣꠝ ꠖꠤꠅ। ꠅꠃ ꠛꠦꠐꠤꠘ꠆ꠔꠦ ꠝꠣꠟꠤꠇ ꠁꠍꠣꠞ ꠟꠣꠉꠤ ꠛꠠ ꠝꠦꠘꠔ ꠇꠞꠞꠣ। ꠝꠣꠄꠀꠞ ꠛꠁꠘ ꠚꠣꠞ꠆ꠍꠤꠀꠞꠦꠅ ꠍꠣꠟꠣꠝ ꠇꠁꠅ, ꠝꠣꠟꠤꠇꠞ ꠟꠣꠉꠤ ꠔꠣꠁꠘꠅ ꠛꠃꠔ ꠝꠦꠘꠔ ꠇꠞꠍꠂꠘ।
ROM 16:13 ꠝꠣꠟꠤꠇ ꠁꠍꠣꠞ ꠙꠍꠘ꠆ꠖꠞ ꠝꠣꠘꠥꠡ ꠞꠃꠚ ꠜꠣꠁꠞꠦ ꠍꠣꠟꠣꠝ ꠖꠤꠅ, ꠔꠣꠘ ꠀꠝ꠆ꠝꠣꠞꠦꠅ ꠍꠣꠟꠣꠝ ꠇꠁꠅ, ꠁ ꠛꠦꠐꠤ ꠔ ꠀꠝꠣꠞꠅ ꠝꠣ।
ROM 16:14 ꠍꠤꠋꠇꠤꠞꠣꠔ, ꠚꠤꠟꠤꠉꠥꠘ, ꠢꠣꠞ꠆ꠝꠤꠍ, ꠚꠣꠔꠞꠥꠛ, ꠢꠦꠞ꠆ꠝꠣꠍ ꠀꠞ ꠔꠣꠞꠣꠞ ꠟꠉꠦ ꠎꠔ ꠁꠝꠣꠘꠖꠣꠞ ꠛꠘ꠆ꠖꠣ ꠀꠍꠂꠘ, ꠄꠞꠣ ꠢꠇꠟꠞꠦ ꠍꠣꠟꠣꠝ ꠎꠣꠘꠣꠁꠅ।
ROM 16:15 ꠜꠣꠁ ꠚꠤꠟꠣꠉꠤ, ꠎꠥꠟꠤꠀ ꠛꠤꠛꠤ, ꠘꠤꠞꠤꠀꠍ ꠀꠞ ꠔꠣꠘ ꠛꠁꠘꠞꠦ, ꠀꠞ ꠅꠟꠤꠝ꠆ꠙꠣꠍꠞꠦ ꠍꠣꠟꠣꠝ ꠇꠁꠅ, ꠀꠟ꠆ꠟꠣꠞ ꠎꠔ ꠛꠘ꠆ꠖꠣ ꠔꠣꠞꠣꠞ ꠟꠉꠦ ꠀꠍꠂꠘ ꠄꠞꠣ ꠢꠇꠟꠞꠦ ꠍꠣꠟꠣꠝ ꠖꠤꠅ।
ROM 16:16 ꠢꠥꠘꠅ, ꠔꠥꠝꠞꠣ ꠄꠇꠦ-ꠅꠁꠘ꠆ꠘꠦ ꠙꠛꠤꠔ꠆ꠞ ꠉꠟꠣꠉꠟꠤ ꠇꠞꠤꠅ। ꠀꠟ-ꠝꠍꠤꠞ ꠢꠇꠟ ꠎꠝꠣꠔꠞ ꠜꠣꠁ-ꠛꠘꠤꠘ꠆ꠔꠦ ꠔꠥꠝꠞꠣꠞꠦ ꠍꠣꠟꠣꠝ ꠎꠣꠘꠣꠁꠞꠣ।
ROM 16:17 ꠅ ꠜꠣꠁ ꠅꠇꠟ, ꠔꠥꠝꠞꠣꠞꠦ ꠝꠤꠘꠔ ꠇꠞꠤ ꠇꠁꠞꠣꠝ, ꠀꠉꠦ ꠎꠦꠔꠣ ꠔꠣꠟꠤꠝ ꠙꠣꠁꠍ, ꠅꠃ ꠔꠣꠟꠤꠝꠞ ꠃꠟꠐꠣ ꠔꠣꠟꠤꠝ ꠖꠤꠀ ꠎꠦꠉꠥꠁꠘ꠆ꠔꠦ ꠖꠟꠣꠖꠟꠤ ꠀꠞ ꠛꠣꠗꠣ-ꠛꠤꠊꠘꠞ ꠎꠘꠝ ꠖꠦꠁꠘ, ꠅꠔꠣꠞ ꠛꠣꠄ ꠘꠎꠞ ꠞꠣꠈꠤꠅ, ꠔꠥꠝꠞꠣ ꠁꠔꠣꠞ ꠉꠦꠍ ꠕꠣꠇꠤ ꠢꠞꠤꠀ ꠞꠁꠅ।
ROM 16:18 ꠇꠣꠞꠘ ꠁꠔꠣꠄ ꠀꠝꠞꠣꠞ ꠝꠣꠟꠤꠇ ꠀꠟ-ꠝꠍꠤꠞ ꠉꠥꠟꠣꠝꠤ ꠘꠣ ꠇꠞꠤꠀ, ꠔꠣꠞꠣꠞ ꠙꠦꠐꠞ ꠉꠥꠟꠣꠝꠤ ꠇꠞꠦ। ꠝꠤꠑꠣ ꠝꠤꠑꠣ ꠝꠣꠔ ꠝꠣꠔꠤꠀ ꠀꠞ ꠔꠦꠟ ꠝꠣꠟꠤꠡ ꠇꠞꠤꠀ ꠡꠞꠟ-ꠡꠥꠎꠣ ꠝꠣꠘꠡꠞꠦ ꠛꠦ-ꠙꠕꠤ ꠛꠣꠘꠣꠄ।
ROM 16:19 ꠀꠞ ꠔꠥꠝꠞꠣ ꠎꠦꠘ ꠀꠟ꠆ꠟꠣꠞ ꠢꠥꠇꠥꠝ ꠝꠣꠚꠤꠇ ꠌꠟꠞꠣꠄ, ꠁꠔꠣ ꠔ ꠢꠇꠟꠦꠃ ꠎꠣꠘꠦ, ꠁ ꠈꠛꠞ ꠢꠥꠘꠤꠀ ꠀꠝꠤꠅ ꠈꠥꠛ ꠈꠥꠡꠤ ꠅꠁꠍꠤ। ꠔꠦ ꠀꠝꠤ ꠌꠣꠁꠞꠣꠝ, ꠔꠥꠝꠞꠣ ꠘꠦꠇ ꠙꠕꠦ ꠇꠣꠝꠤꠟ ꠅꠅ, ꠛꠖ ꠙꠕ ꠕꠣꠇꠤ ꠛꠣꠌꠤꠀ ꠞꠅ।
ROM 16:20 ꠡꠣꠘ꠆ꠔꠤ ꠖꠦꠅꠞꠣ ꠀꠟ꠆ꠟꠣꠄ ꠁꠛꠟꠤꠍ-ꠡꠄꠔꠣꠘꠞꠦ ꠈꠥꠛ ꠎꠟꠖꠤ ꠇꠞꠤ ꠔꠥꠝꠞꠣꠞ ꠙꠣꠅꠞ ꠔꠟꠦ ꠚꠣꠟꠣꠁ ꠙꠤꠡꠣꠁꠛꠣ। ꠀꠝꠞꠣꠞ ꠝꠣꠟꠤꠇ ꠁꠍꠣ ꠀꠟ-ꠝꠍꠤꠞ ꠞꠢꠝ-ꠘꠤꠀꠝꠔ ꠔꠥꠝꠞꠣꠞ ꠃꠙꠞꠦ ꠎꠣꠞꠤ ꠞꠃꠇ।
ROM 16:21 ꠀꠝꠣꠞ ꠟꠉꠦ ꠈꠥꠡ-ꠈꠛꠞꠤ ꠔꠛꠟꠤꠉ ꠇꠞꠂꠘ ꠎꠦ ꠔꠤꠝꠕꠤ ꠜꠣꠁ, ꠄꠁꠘ ꠔꠥꠝꠞꠣꠞꠦ ꠍꠣꠟꠣꠝ ꠎꠣꠘꠣꠁꠞꠣ। ꠀꠝꠣꠞ ꠎꠣꠔꠤ ꠜꠣꠁ ꠟꠥꠇꠤꠀꠍ, ꠎꠣꠍꠥꠘ ꠀꠞ ꠍꠥꠙꠣꠔꠍꠦꠅ ꠔꠥꠝꠞꠣꠞꠦ ꠍꠣꠟꠣꠝ ꠇꠁꠞꠣ।
ROM 16:22 ꠢꠎꠞꠔ ꠙꠣꠃꠟꠥꠍꠞ ꠛꠥꠟꠤ ꠢꠥꠘꠤꠀ ꠀꠝꠤ ꠔꠞ꠆ꠔꠤꠃꠍ ꠝꠢꠞꠤꠞꠦ ꠟꠦꠈꠞꠣꠝ, ꠝꠣꠟꠤꠇ ꠁꠍꠣꠞ ꠘꠣꠝꠦ ꠀꠝꠤꠅ ꠔꠥꠝꠞꠣꠞꠦ ꠍꠣꠟꠣꠝ ꠎꠣꠘꠣꠁꠞꠣꠝ।
ROM 16:23 ꠀꠝꠤ ꠙꠣꠃꠟꠥꠍ ꠀꠞ ꠎꠝꠣꠔꠞ ꠢꠇꠟꠞꠦ ꠎꠦꠁꠘ ꠝꠦꠝꠣꠘꠖꠣꠞꠤ ꠇꠞꠂꠘ, ꠢꠃ ꠉꠃꠍ ꠜꠣꠁꠄ ꠔꠥꠝꠞꠣꠞꠦ ꠍꠣꠟꠣꠝ ꠎꠣꠘꠣꠁꠞꠣ। ꠅꠃ ꠐꠣꠃꠘꠞ ꠡꠞꠇꠣꠞꠤ ꠇꠦꠡꠤꠀꠞ ꠁꠞꠣꠡ꠆ꠔꠣꠍ ꠜꠣꠁꠄ ꠀꠞ ꠝꠥꠝꠤꠘ ꠜꠣꠁ ꠇꠥꠀꠔꠥꠍꠦ ꠔꠥꠝꠞꠣꠞꠦ ꠍꠣꠟꠣꠝ ꠎꠣꠘꠣꠁꠞꠣ।
ROM 16:25 ꠀꠟꠢꠣꠝꠖꠥꠟꠤꠟ꠆ꠟꠣ, ꠀꠝꠤ ꠙꠣꠃꠟꠥꠍꠦ ꠁꠍꠣ ꠀꠟ-ꠝꠍꠤꠞ ꠛꠦꠙꠣꠞꠦ ꠎꠦ ꠈꠥꠡ-ꠈꠛꠞꠤ ꠔꠛꠟꠤꠉ ꠇꠞꠤ, ꠀꠟ꠆ꠟꠣ ꠙꠣꠇꠞ ꠈꠦꠝꠔꠣ ꠀꠍꠦ ꠅꠃ ꠈꠥꠡ-ꠈꠛꠞꠤꠞ ꠃꠍꠤꠟ꠆ꠟꠣꠄ ꠔꠥꠝꠞꠣꠞꠦ ꠁꠝꠣꠘꠦ ꠕꠤꠞ ꠞꠣꠈꠣ। ꠝꠘꠅ ꠞꠣꠈꠤꠅ, ꠛꠃꠔ ꠎꠝꠣꠘꠣ ꠗꠞꠤ ꠀꠟ꠆ꠟꠣꠄ ꠔꠣꠘ ꠁ ꠛꠣꠔꠥꠘꠤ ꠝꠥꠘꠡꠣꠞ ꠇꠕꠣ ꠟꠥꠇꠣꠁ ꠞꠣꠈꠍꠤꠟꠣ,
ROM 16:26 ꠅꠁꠟꠦ ꠅꠈꠘ ꠁꠔꠣ ꠖꠥꠘꠤꠀꠞ ꠢꠇꠟ ꠎꠣꠔꠤꠞ ꠉꠦꠍꠦ ꠎꠣꠁꠞ ꠅꠞ। ꠌꠤꠞꠇꠣꠟꠤꠘ ꠎꠤꠘ꠆ꠖꠣ ꠀꠟ꠆ꠟꠣꠞ ꠢꠥꠇꠥꠝꠦ, ꠀꠉꠞ ꠎꠝꠣꠘꠣꠞ ꠘꠛꠤ ꠅꠇꠟꠦ ꠎꠦꠔꠣ ꠟꠦꠈꠤꠀ ꠞꠣꠈꠍꠤꠟꠣ, ꠅꠔꠣ ꠎꠣꠁꠞ ꠅꠞ, ꠎꠣꠔꠦ ꠔꠣꠞꠣ ꠀꠟ-ꠝꠍꠤꠞ ꠃꠙꠞꠦ ꠁꠝꠣꠘ ꠀꠘꠤꠀ ꠀꠟ꠆ꠟꠣ ꠙꠣꠇꠞ ꠛꠣꠁꠖ꠆ꠖ ꠅꠁꠘ। ꠄꠞꠟꠣꠉꠤ ꠅꠃ ꠈꠥꠡ-ꠈꠛꠞꠤ ꠅꠈꠘ ꠔꠛꠟꠤꠉ ꠇꠞꠣ ꠅꠞ।
ROM 16:27 ꠔꠣꠁꠘꠃ ꠄꠇꠝꠣꠔ꠆ꠞ ꠀꠟ꠆ꠟꠣ, ꠔꠣꠁꠘꠃ ꠀꠈꠟꠖꠣꠞ, ꠎꠥꠉꠦ ꠎꠥꠉꠦ ꠌꠤꠞꠇꠣꠟ ꠁꠍꠣ ꠀꠟ-ꠝꠍꠤꠞ ꠝꠣꠎꠖꠤ ꠔꠣꠘ ꠔꠣꠞꠤꠚ ꠅꠃꠇ। ꠀꠝꠤꠘ॥
1CO 1:1 ꠀꠝꠤ ꠙꠣꠃꠟꠥꠍ, ꠀꠟ꠆ꠟꠣ ꠙꠣꠇꠞ ꠝꠞ꠆ꠎꠤꠄ ꠀꠟ꠆ꠟꠣꠁ ꠖꠣꠅꠔ ꠙꠣꠁꠀ ꠢꠎꠞꠔ ꠁꠍꠣ ꠀꠟ-ꠝꠍꠤꠞ ꠄꠇꠎꠘ ꠍꠣꠢꠣꠛꠤ ꠅꠁꠍꠤ। ꠀꠝꠤ ꠀꠞ ꠀꠝꠣꠞ ꠝꠥꠝꠤꠘ ꠜꠣꠁ ꠍꠥꠍꠤꠘꠦ,
1CO 1:2 ꠇꠞꠤꠘ꠆ꠔ ꠐꠣꠃꠘꠞ ꠀꠟ꠆ꠟꠣꠞ ꠎꠝꠣꠔꠞ ꠝꠣꠘꠡꠞ ꠉꠦꠍꠦ, ꠝꠣꠘꠤ ꠔꠥꠝꠞꠣꠞ ꠉꠦꠍꠦ ꠟꠦꠈꠞꠣꠝ। ꠢꠎꠞꠔ ꠁꠍꠣ ꠀꠟ-ꠝꠍꠤꠞ ꠔꠞꠤꠇꠣ ꠇꠛꠥꠟ ꠇꠞꠣꠄ ꠀꠟ꠆ꠟꠣꠄ ꠔꠥꠝꠞꠣꠞꠦ ꠙꠣꠇ-ꠙꠛꠤꠔ꠆ꠞ ꠇꠞꠍꠂꠘ ꠀꠞ ꠔꠣꠘ ꠀꠙꠘ ꠛꠘ꠆ꠖꠣ ꠅꠁꠛꠣꠞ ꠟꠣꠉꠤ ꠖꠣꠅꠔ ꠖꠤꠍꠂꠘ। ꠔꠥꠝꠞꠣꠞ ꠉꠦꠍꠦ ꠀꠞ ꠅꠁꠘ꠆ꠘꠣꠁꠘ꠆ꠘ ꠎꠣꠉꠣꠞ ꠎꠔ ꠝꠣꠘꠡꠦ ꠀꠝꠞꠣꠞ ꠢꠎꠞꠔ ꠁꠍꠣ ꠀꠟ-ꠝꠍꠤꠞꠦ ꠝꠣꠟꠤꠇ ꠇꠁꠀ ꠝꠣꠘꠂꠘ, ꠔꠣꠞꠣ ꠢꠇꠟꠞ ꠉꠦꠍꠦ ꠀꠝꠞꠣ ꠅꠃ ꠌꠤꠑꠤꠈꠣꠘ ꠟꠦꠈꠞꠣꠝ। ꠔꠣꠁꠘ ꠔꠣꠞꠣꠞꠅ ꠝꠣꠟꠤꠇ, ꠀꠝꠞꠣꠞꠅ ꠝꠣꠟꠤꠇ।
1CO 1:3 ꠀꠝꠞꠣꠞ ꠉꠣꠁꠛꠤ ꠛꠣꠚ ꠀꠟ꠆ꠟꠣ ꠙꠣꠇꠦ ꠀꠞ ꠢꠎꠞꠔ ꠁꠍꠣ ꠀꠟ-ꠝꠍꠤꠄ ꠔꠥꠝꠞꠣꠞꠦ ꠞꠢꠝꠔ ꠀꠞ ꠡꠣꠘ꠆ꠔꠤ ꠖꠣꠘ ꠇꠞꠃꠇ꠆ꠇꠣ।
1CO 1:4 ꠀꠝꠤ ꠢꠣꠝꠦꠡꠣ ꠔꠥꠝꠞꠣꠞ ꠟꠣꠉꠤ ꠀꠝꠣꠞ ꠀꠟ꠆ꠟꠣꠞ ꠖꠞꠛꠣꠞꠅ ꠡꠥꠇꠞꠤꠀ ꠀꠖꠣꠄ ꠇꠞꠤ, ꠇꠣꠞꠘ ꠁꠍꠣ ꠀꠟ-ꠝꠍꠤꠞ ꠔꠞꠤꠇꠣ ꠇꠛꠥꠟ ꠇꠞꠣꠄ ꠔꠥꠝꠞꠣ ꠀꠟ꠆ꠟꠣꠞ ꠞꠢꠝꠔꠞ ꠔꠟꠦ ꠀꠁꠍ।
1CO 1:5 ꠅꠃ ꠞꠢꠝꠔ ꠅꠁꠟ, ꠢꠎꠞꠔ ꠁꠍꠣ ꠀꠟ-ꠝꠍꠤꠞ ꠟꠉꠦ ꠡꠞꠤꠇ ꠅꠁꠀ ꠔꠥꠝꠞꠣ ꠢꠇꠟ ꠘꠝꠥꠘꠣꠄ ꠝꠣꠔ-ꠇꠕꠣ ꠝꠣꠔꠣ ꠀꠞ ꠀꠈꠟ-ꠁꠟꠤꠝꠦ ꠗꠘꠤ ꠅꠁꠍ।
1CO 1:6 ꠅꠈꠘ ꠖꠦꠈꠣ ꠎꠣꠞ, ꠀꠟ-ꠝꠍꠤꠞ ꠛꠦꠙꠣꠞꠦ ꠀꠝꠞꠣ ꠎꠦꠔꠣ ꠔꠣꠟꠤꠝ ꠖꠤꠍꠟꠣꠝ, ꠁꠔꠣ ꠔꠥꠝꠞꠣꠞ ꠖꠤꠟꠅ ꠉꠣꠕꠤꠀ ꠞꠣꠈꠍ।
1CO 1:7 ꠀꠞ ꠢꠎꠞꠔ ꠁꠍꠣ ꠀꠟ-ꠝꠍꠤꠄ ꠖꠥꠍꠞꠣꠛꠣꠞ ꠔꠡꠞꠤꠚ ꠀꠘꠣꠞ ꠟꠣꠉꠤ ꠔꠥꠝꠞꠣ ꠛꠣꠞ ꠌꠣꠁꠞꠣꠄ, ꠄꠞꠝꠣꠎꠦ ꠀꠟ꠆ꠟꠣꠞ ꠖꠦꠅꠀ ꠛꠣꠔꠥꠘꠤ ꠈꠦꠝꠔꠣꠞ ꠎꠦꠇꠥꠘꠥ ꠘꠤꠀꠝꠔ ꠙꠣꠁꠔꠦ ꠔꠥꠝꠞꠣꠞ ꠅꠜꠣꠛ ꠅꠞ ꠘꠣ।
1CO 1:8 ꠀꠝꠤ ꠎꠣꠘꠤ, ꠀꠝꠞꠣꠞ ꠢꠎꠞꠔ ꠁꠍꠣ ꠀꠟ-ꠝꠍꠤꠄ ꠔꠥꠝꠞꠣꠞꠦ ꠀꠈꠦꠞ ꠙꠞ꠆ꠎꠘ꠆ꠔ ꠁꠝꠣꠘꠦ ꠝꠎꠛꠥꠔ ꠞꠣꠈꠛꠣ, ꠎꠣꠔꠦ ꠔꠣꠁꠘ ꠀꠁꠛꠣꠞ ꠀꠉ ꠙꠞ꠆ꠎꠘ꠆ꠔ ꠔꠥꠝꠞꠣ ꠙꠥꠞꠣꠙꠥꠞ ꠘꠤꠈꠥꠔ ꠞꠁꠛꠣꠄ।
1CO 1:9 ꠀꠟ꠆ꠟꠣ ꠙꠣꠇ ꠔ ꠢꠇ ꠀꠞ ꠈꠣꠐꠤ, ꠔꠣꠁꠘ ꠎꠦꠟꠣ ꠇꠂꠘ ꠅꠟꠣ ꠅꠄ। ꠔꠣꠁꠘ ꠔꠥꠝꠞꠣꠞꠦ ꠖꠣꠅꠔ ꠖꠤꠍꠂꠘ, ꠔꠥꠝꠞꠣ ꠎꠣꠘꠥ ꠔꠣꠘ ꠈꠣꠍ ꠝꠣꠄꠀꠞ ꠎꠘ ꠁꠍꠣ ꠁꠛꠘꠥꠟ꠆ꠟꠣꠞ ꠟꠉꠦ ꠈꠣꠔꠤꠞ-ꠡꠝ꠆ꠙꠞ꠆ꠇ ꠞꠣꠈꠅ, ꠄꠁꠘꠃ ꠀꠟ-ꠝꠍꠤ, ꠀꠝꠞꠣꠞ ꠝꠣꠟꠤꠇ।
1CO 1:10 ꠔꠦ ꠜꠣꠁ ꠅꠇꠟ, ꠢꠎꠞꠔ ꠁꠍꠣ ꠀꠟ-ꠝꠍꠤꠞ ꠅꠁꠀ ꠀꠝꠤ ꠔꠥꠝꠞꠣꠞꠦ ꠎꠥꠠ ꠀꠔꠦ ꠝꠤꠘꠔ ꠇꠞꠤꠀꠞ, ꠔꠥꠝꠞꠣ ꠢꠇꠟ ꠄꠇ ꠅꠅ। ꠔꠥꠝꠞꠣꠞ ꠝꠣꠎꠦ ꠇꠥꠘꠥ ꠖꠟꠣꠖꠟꠤ ꠘꠣ ꠞꠃꠇ, ꠄꠇ ꠝꠘ ꠀꠞ ꠄꠇ ꠝꠔ ꠅꠅ।
1CO 1:11 ꠢꠥꠘꠅ, ꠇꠥꠟꠥꠀ ꠛꠤꠛꠤꠞ ꠛꠣꠠꠤꠞ ꠝꠣꠘꠡꠞ ꠉꠦꠍ ꠕꠣꠇꠤ ꠎꠣꠘꠟꠣꠝ, ꠔꠥꠝꠞꠣꠞ ꠝꠣꠎꠦ ꠇꠣꠁꠎ꠆ꠎꠣ-ꠚꠍꠣꠖ ꠌꠟꠦꠞ।
1CO 1:12 ꠀꠝꠤ ꠢꠥꠘꠟꠣꠝ, ꠔꠥꠝꠞꠣꠞ ꠝꠣꠎꠦ ꠇꠦꠃ ꠇꠄ, “ꠀꠝꠤ ꠙꠣꠃꠟꠥꠍꠞ ꠖꠟꠞ,” ꠇꠦꠃ ꠇꠄ, “ꠀꠝꠤ ꠀꠙꠟ꠆ꠟꠍꠞ ꠖꠟꠞ,” ꠇꠦꠃ ꠇꠄ, “ꠀꠝꠤ ꠙꠤꠔꠞꠞ ꠖꠟꠞ,” ꠀꠞ ꠇꠦꠃ ꠇꠄ, “ꠀꠝꠤ ꠀꠟ-ꠝꠍꠤꠞ ꠖꠟꠞ।”
1CO 1:13 ꠔꠦ ꠇꠅ ꠌꠣꠁꠘ, ꠀꠟ-ꠝꠍꠤꠞꠦ ꠇꠤꠔꠣ ꠛꠣꠐꠣ-ꠛꠣꠐꠤ ꠇꠞꠣ ꠅꠁꠉꠦꠍꠦ ꠘꠤ? ꠀꠝꠤ ꠙꠣꠃꠟꠥꠍꠞꠦ ꠔꠥꠝꠞꠣꠞ ꠟꠣꠉꠤ ꠍꠟꠤꠛꠅ ꠟꠐꠇꠣꠁꠀ ꠝꠣꠞꠣ ꠅꠁꠍꠦ ꠘꠤ? ꠔꠥꠝꠞꠣ ꠇꠤꠔꠣ ꠀꠝꠣꠞ ꠘꠣꠝꠦ ꠔꠃꠛꠣꠞ ꠉꠥꠍꠟ ꠇꠞꠍ ꠘꠤ?
1CO 1:14 ꠀꠝꠤ ꠀꠟ꠆ꠟꠣꠞ ꠖꠞꠛꠣꠞꠅ ꠡꠥꠇꠞꠤꠀ ꠎꠣꠘꠣꠁ, ꠈꠣꠟꠤ ꠇꠤꠞꠤꠡꠙꠅ ꠀꠞ ꠉꠃꠍ ꠍꠣꠠꠣ, ꠖꠥꠍꠞꠣ ꠇꠥꠘꠥ ꠝꠣꠘꠡꠞꠦ ꠀꠝꠤ ꠔꠃꠛꠣꠞ ꠉꠥꠍꠟ ꠇꠞꠣꠁꠍꠤ ꠘꠣ।
1CO 1:15 ꠎꠣꠔꠦ ꠇꠦꠃ ꠇꠁꠔ ꠘꠣ ꠙꠣꠞꠦ, ꠔꠥꠝꠞꠣ ꠀꠝꠣꠞ ꠘꠣꠝꠦ ꠔꠃꠛꠣꠞ ꠉꠥꠍꠟ ꠇꠞꠍ।
1CO 1:16 ꠀꠡ꠆ꠔꠤꠚꠣꠘ ꠜꠣꠁꠞ ꠙꠞꠤꠛꠣꠞꠞ ꠝꠣꠘꠡꠞꠦꠅ ꠀꠝꠤ ꠔꠃꠛꠣꠞ ꠉꠥꠍꠟ ꠇꠞꠣꠁꠍꠤ, ꠄꠍꠣꠠꠣ ꠀꠞ ꠇꠥꠘꠥ ꠝꠣꠘꠡꠞꠦ ꠉꠥꠍꠟ ꠇꠞꠣꠁꠍꠤ ꠇꠞꠤꠀ ꠀꠝꠣꠞ ꠝꠘꠅ ꠅꠞ ꠘꠣ।
1CO 1:17 ꠀꠟ-ꠝꠍꠤꠄ ꠔ ꠀꠝꠣꠞꠦ ꠔꠃꠛꠣꠞ ꠉꠥꠍꠟ ꠇꠞꠣꠘꠤꠞ ꠟꠣꠉꠤ ꠙꠣꠑꠣꠁꠍꠂꠘ ꠘꠣ, ꠈꠣꠟꠤ ꠈꠥꠡ-ꠈꠛꠞꠤ ꠔꠛꠟꠤꠉꠞ ꠟꠣꠉꠤꠃ ꠙꠣꠑꠣꠁꠍꠂꠘ। ꠀꠞ ꠅꠃ ꠈꠥꠡ-ꠈꠛꠞꠤꠅ ꠇꠥꠘꠥ ꠀꠈꠟꠖꠣꠞꠤ ꠙꠘ꠆ꠒꠤꠔꠤ ꠜꠣꠛ-ꠜꠋꠉꠤꠄ ꠔꠛꠟꠤꠉ ꠇꠞꠣꠔ ꠙꠣꠑꠣꠁꠍꠂꠘ ꠘꠣ, ꠎꠣꠔꠦ ꠍꠟꠤꠛꠞ ꠃꠙꠞꠦ ꠀꠟ-ꠝꠍꠤꠞ ꠇꠥꠞꠛꠣꠘꠤ ꠅꠀ ꠛꠦꠇꠣꠝꠣ ꠘꠣ ꠛꠘꠦ।
1CO 1:18 ꠎꠣꠞꠣ ꠉꠎꠛꠤ ꠙꠕꠦꠖꠤ ꠖꠃꠠꠣꠞ, ꠀꠟ-ꠝꠍꠤꠞ ꠍꠟꠤꠛꠞ ꠃꠙꠞꠞ ꠇꠥꠞꠛꠣꠘꠤ ꠔꠣꠞꠣꠞ ꠉꠦꠍꠦ ꠔ ꠈꠣꠟꠤ ꠛꠦꠀꠈꠟꠤ ꠝꠘꠅ ꠅꠄ, ꠅꠁꠟꠦ ꠀꠝꠞꠣ ꠎꠣꠞꠣ ꠘꠣꠎꠣꠔꠞ ꠙꠕꠦ ꠖꠃꠠꠣꠁꠞꠣꠝ, ꠀꠝꠞꠣꠞ ꠉꠦꠍꠦ ꠁꠔꠣ ꠅꠁꠟ ꠀꠟ꠆ꠟꠣꠁ ꠛꠟ।
1CO 1:19 ꠀꠍꠝꠣꠘꠤ ꠇꠤꠔꠣꠛꠅ ꠟꠦꠈꠣ ꠀꠍꠦ, “ꠀꠝꠤ ꠀꠈꠟꠖꠣꠞ ꠅꠇꠟꠞ ꠀꠈꠟꠞꠦ ꠛꠦꠇꠣꠝꠣ ꠇꠞꠝꠥ, ꠀꠞ ꠛꠥꠖ꠆ꠖꠤꠝꠣꠘ ꠅꠇꠟꠞ ꠛꠥꠖ꠆ꠖꠤꠞꠦ ꠛꠤꠚꠟ ꠇꠞꠝꠥ।”
1CO 1:20 ꠔꠦ ꠅꠃ ꠀꠈꠟꠖꠣꠞ ꠅꠇꠟ ꠇꠥꠀꠁ? ꠀꠟꠤꠝ ꠅꠇꠟꠃ ꠛꠣ ꠇꠥꠀꠁ? ꠀꠞ ꠅꠃ ꠎꠝꠣꠘꠣꠔ ꠔꠞ꠆ꠇ ꠇꠞꠣꠞ ꠈꠦꠝꠔꠣ ꠎꠣꠞ ꠀꠍꠦ, ꠢꠦ ꠅꠈꠘ ꠇꠥꠀꠁ? ꠖꠥꠘꠤꠀꠛꠤ ꠀꠈꠟ ꠔ ꠈꠣꠟꠤ ꠛꠦꠀꠈꠟꠤ, ꠁꠔꠣ ꠀꠟ꠆ꠟꠣꠄꠃ ꠖꠦꠈꠣꠁꠞꠣ।
1CO 1:21 ꠀꠟ꠆ꠟꠣꠄ ꠔꠣꠘ ꠘꠤꠎꠞ ꠀꠈꠟ ꠖꠤꠀ ꠚꠄꠍꠣꠟꠣ ꠇꠞꠍꠂꠘ, ꠎꠣꠔꠦ ꠖꠥꠘꠤꠀꠄ ꠎꠣꠘꠥ ꠔꠣꠞ ꠀꠈꠟ ꠖꠤꠀ ꠔꠣꠘꠞꠦ ꠌꠤꠘꠔ ꠘꠣ ꠙꠣꠞꠦ। ꠄꠞꠟꠣꠉꠤ ꠛꠦꠀꠈꠟꠤꠞ ꠅꠃ ꠈꠥꠡ-ꠈꠛꠞꠤ ꠔꠛꠟꠤꠉꠞ ꠝꠣꠎꠖꠤ ꠀꠟ꠆ꠟꠣꠄ ꠝꠥꠝꠤꠘ ꠅꠇꠟꠞ ꠎꠣꠘ ꠛꠣꠌꠣꠁꠔꠣ ꠌꠣꠁꠟꠣ।
1CO 1:22 ꠁꠢꠥꠖꠤ ꠅꠇꠟꠦ ꠈꠣꠟꠤ ꠇꠦꠞꠣꠝꠔꠤ ꠇꠣꠝ ꠖꠦꠈꠔꠣ ꠌꠣꠁꠘ, ꠁꠃꠘꠣꠘꠤ ꠅꠇꠟꠦ ꠀꠈꠟꠞ ꠔꠣꠟ꠆ꠟꠣꠡ ꠇꠞꠂꠘ,
1CO 1:23 ꠅꠁꠟꠦ ꠀꠝꠞꠣ ꠔꠛꠟꠤꠉ ꠇꠞꠤ ꠍꠟꠤꠛꠞ ꠃꠙꠞꠦ ꠇꠥꠞꠛꠣꠘꠤ ꠅꠀ ꠀꠟ-ꠝꠍꠤꠞ ꠇꠕꠣ। ꠁꠔꠣ ꠅꠁꠟ ꠛꠘꠤ ꠁꠍꠞꠣꠁꠟꠞ ꠉꠦꠍꠦ ꠄꠇꠐꠣ ꠛꠦ-ꠖꠤꠘꠤ ꠇꠣꠝ ꠀꠞ ꠜꠤꠘ ꠎꠣꠔꠤ ꠅꠇꠟꠦ ꠝꠘꠅ ꠇꠞꠂꠘ ꠛꠦꠀꠈꠟꠤ ꠇꠣꠝ।
1CO 1:24 ꠅꠁꠟꠦ ꠛꠘꠤ ꠁꠍꠞꠣꠁꠟ ꠅꠃꠇ꠆ꠇꠣ ꠛꠣ ꠁꠃꠘꠣꠘꠤ ꠅꠃꠇ꠆ꠇꠣ, ꠀꠟ꠆ꠟꠣꠞ ꠖꠣꠅꠔꠤ ꠛꠘ꠆ꠖꠣ ꠅꠇꠟꠞ ꠉꠦꠍꠦ ꠅꠃ ꠀꠟ-ꠝꠍꠤꠃ ꠅꠁꠟꠣ ꠀꠟ꠆ꠟꠣꠁ ꠀꠈꠟ ꠀꠞ ꠀꠟ꠆ꠟꠣꠁ ꠛꠟ।
1CO 1:25 ꠀꠟ꠆ꠟꠣꠁ ꠛꠦꠀꠈꠟꠤ ꠝꠣꠘꠡꠞ ꠀꠈꠟ ꠕꠣꠇꠤ ꠛꠃꠔ ꠛꠠ ꠀꠈꠟꠖꠣꠞ, ꠀꠞ ꠀꠟ꠆ꠟꠣꠁ ꠇꠝꠎꠥꠞꠤ ꠝꠣꠘꠡꠞ ꠡꠇ꠆ꠔꠤ ꠕꠣꠇꠤ ꠛꠃꠔ ꠡꠛꠟ।
1CO 1:26 ꠜꠣꠁ ꠅꠇꠟ, ꠌꠤꠘ꠆ꠔꠣ ꠇꠞꠤ ꠖꠦꠈꠅ, ꠔꠥꠝꠞꠣꠞꠦ ꠎꠦꠛꠟꠣ ꠖꠣꠅꠔ ꠖꠦꠅꠀ ꠅꠁꠍꠤꠟ, ꠢꠤ ꠡꠝꠄ ꠔꠥꠝꠞꠣ ꠇꠤꠟꠣꠈꠣꠘ ꠀꠍꠟꠣꠄ। ꠔꠥꠝꠞꠣꠞ ꠝꠣꠎꠞ ꠛꠃꠔ ꠎꠘꠃ ꠝꠣꠘꠡꠞ ꠌꠈꠥꠔ ꠀꠈꠟꠖꠣꠞ, ꠈꠦꠝꠔꠣꠛꠣꠘ ꠛꠣ ꠘꠣꠝꠤ-ꠖꠣꠝꠤ ꠛꠋꠡꠞ ꠀꠍꠟꠣꠄ ꠘꠣ।
1CO 1:27 ꠅꠁꠟꠦ ꠖꠥꠘꠤꠀꠄ ꠎꠦꠔꠣꠞꠦ ꠛꠦꠀꠈꠟꠤ ꠇꠁꠀ ꠝꠘꠅ ꠇꠞꠦ ꠀꠟ꠆ꠟꠣꠄ ꠅꠔꠣꠞꠦꠃ ꠙꠍꠘ꠆ꠖ ꠇꠞꠍꠂꠘ, ꠎꠣꠔꠦ ꠖꠥꠘꠤꠀꠞ ꠀꠈꠟꠖꠣꠞ ꠅꠇꠟꠦ ꠡꠞꠝ ꠙꠣꠁꠘ। ꠀꠞ ꠖꠥꠘꠤꠀꠄ ꠎꠦꠔꠣꠞꠦ ꠇꠝꠎꠥꠞ ꠝꠘꠅ ꠇꠞꠦ, ꠀꠟ꠆ꠟꠣꠄ ꠅꠔꠣꠞꠦ ꠙꠍꠘ꠆ꠖ ꠇꠞꠍꠂꠘ, ꠎꠣꠔꠦ ꠖꠥꠘꠤꠀꠞ ꠛꠟꠛꠣꠘ ꠢꠇꠟꠔꠣ ꠡꠞꠝꠤꠘ꠆ꠖꠣ ꠅꠁꠘ।
1CO 1:28 ꠖꠥꠘꠤꠀꠞ ꠝꠣꠘꠡꠦ ꠎꠦꠔꠣꠞꠦ ꠈꠥꠛ ꠔꠥꠌ꠆ꠍ ꠝꠘꠅ ꠇꠞꠦ, ꠖꠥꠘꠤꠀꠞ ꠛꠥꠇꠥꠔ ꠎꠦꠔꠣꠞ ꠇꠥꠘꠥ ꠖꠣꠝ ꠘꠣꠁ, ꠀꠟ꠆ꠟꠣꠄ ꠅꠔꠣꠞꠦꠃ ꠙꠍꠘ꠆ꠖ ꠇꠞꠍꠂꠘ, ꠎꠣꠔꠦ ꠖꠥꠘꠤꠀꠞ ꠌꠈꠥꠔ ꠎꠦꠔꠣ ꠘꠣꠝꠤ-ꠖꠣꠝꠤ, ꠁꠔꠣ ꠛꠦ-ꠖꠣꠝꠤ ꠅꠁꠎꠣꠄ।
1CO 1:29 ꠔꠣꠁꠘ ꠁꠔꠣꠞꠦ ꠙꠍꠘ꠆ꠖ ꠇꠞꠍꠂꠘ, ꠎꠣꠔꠦ ꠖꠥꠘꠤꠀꠞ ꠇꠥꠘꠥ ꠝꠣꠘꠡꠦ ꠔꠣꠘ ꠍꠣꠝꠘꠦ ꠛꠠꠣꠁ ꠖꠦꠈꠣꠘꠤꠞ ꠡꠥꠎꠥꠉ ꠘꠣ ꠙꠣꠁꠘ।
1CO 1:30 ꠀꠞ ꠔꠥꠝꠞꠣ ꠎꠦꠞꠣ ꠁꠍꠣ ꠀꠟ-ꠝꠍꠤꠞ ꠀꠙꠘ ꠎꠘ ꠛꠘꠍ, ꠁꠔꠣ ꠔ ꠀꠟ꠆ꠟꠣ ꠕꠣꠇꠤꠃ ꠅꠁꠍꠦ। ꠀꠟ-ꠝꠍꠤꠃ ꠅꠁꠟꠣ ꠀꠝꠞꠣꠞ ꠉꠦꠍꠦ ꠀꠟ꠆ꠟꠣꠞ ꠖꠦꠅꠀ ꠀꠈꠟ, ꠙꠣꠇ-ꠙꠞꠦꠎꠉꠣꠞꠤ, ꠙꠛꠤꠔ꠆ꠞꠔꠣ ꠀꠞ ꠀꠎꠣꠖꠤꠞ ꠈꠥꠐꠤ।
1CO 1:31 ꠄꠞꠟꠣꠉꠤ ꠀꠍꠝꠣꠘꠤ ꠇꠤꠔꠣꠛꠅ ꠟꠦꠈꠣ ꠀꠍꠦ, “ꠎꠦ ꠝꠣꠘꠡꠦ ꠛꠠꠣꠁ ꠇꠞꠦ, ꠢꠦ ꠝꠣꠛꠥꠖꠞꠦ ꠟꠁꠀꠃ ꠛꠠꠣꠁ ꠇꠞꠃꠇ।”
1CO 2:1 ꠜꠣꠁ ꠅꠇꠟ, ꠀꠟ꠆ꠟꠣꠞ ꠖꠦꠅꠀ ꠈꠥꠡ-ꠈꠛꠞꠤ ꠔꠥꠝꠞꠣꠞ ꠉꠦꠍꠦ ꠔꠛꠟꠤꠉ ꠇꠞꠣꠔ ꠉꠤꠀ ꠀꠝꠤ ꠔ ꠡꠥꠘ꠆ꠖꠞ ꠡꠥꠘ꠆ꠖꠞ ꠜꠣꠡꠣꠄ ꠝꠣꠔꠤꠍꠤ ꠘꠣ, ꠛꠣ ꠛꠠ ꠇꠥꠘꠥ ꠀꠟꠤꠝ-ꠃꠟꠣꠝꠣꠞ ꠟꠣꠈꠣꠘ ꠛꠄꠀꠘ ꠇꠞꠍꠤ ꠘꠣ।
1CO 2:2 ꠀꠝꠤ ꠝꠘꠦ ꠝꠘꠦ ꠑꠤꠇ ꠇꠞꠍꠟꠣꠝ, ꠔꠥꠝꠞꠣꠞ ꠟꠉꠦ ꠕꠣꠇꠣꠞ ꠇꠣꠟꠅ ꠀꠝꠤ ꠈꠣꠟꠤ ꠅꠃ ꠁꠍꠣ ꠀꠟ-ꠝꠍꠤꠞ ꠛꠤꠡꠄꠄ ꠝꠣꠔꠤꠝꠥ, ꠎꠦ ꠁꠍꠣꠞꠦ ꠍꠟꠤꠛꠞ ꠃꠙꠞꠦ ꠟꠐꠇꠣꠁꠀ ꠝꠣꠞꠣ ꠅꠁꠍꠦ, ꠁꠔꠣ ꠍꠣꠠꠣ ꠀꠞ ꠇꠥꠘ꠆ꠔꠣ ꠝꠣꠔꠔꠣꠝ ꠘꠣꠄ।
1CO 2:3 ꠀꠝꠤ ꠎꠦꠛꠟꠣ ꠔꠥꠝꠞꠣꠞ ꠟꠉꠦ ꠞꠁꠔꠣꠝ, ꠅꠃ ꠡꠝꠄ ꠘꠤꠎꠞꠦ ꠇꠝꠎꠥꠞ ꠝꠘꠅ ꠇꠞꠔꠣꠝ ꠀꠞ ꠒꠞꠣꠁꠀ ꠇꠣꠙꠤꠔꠣꠝ।
1CO 2:4 ꠀꠝꠣꠞ ꠔꠛꠟꠤꠉ ꠀꠞ ꠀꠝꠣꠞ ꠛꠄꠀꠘꠞ ꠝꠣꠎꠦ ꠝꠣꠘꠡꠞ ꠝꠘ ꠎꠄ ꠇꠞꠣꠞ ꠝꠔ ꠇꠥꠘꠥ ꠀꠈꠟ-ꠢꠦꠇꠝꠔ ꠀꠞ ꠎꠥꠇ꠆ꠔꠤ ꠀꠍꠤꠟ ꠘꠣ, ꠈꠣꠟꠤ ꠀꠟ꠆ꠟꠣꠁ ꠙꠣꠇ ꠞꠥꠢꠥ ꠀꠞ ꠇꠥꠖꠞꠔꠤ ꠛꠟ ꠖꠦꠈꠣ ꠉꠦꠍꠤꠟ।
1CO 2:5 ꠀꠝꠤ ꠌꠣꠁꠟꠣꠝ, ꠔꠥꠝꠞꠣꠞ ꠁꠝꠣꠘ ꠝꠣꠘꠡꠞ ꠀꠈꠟ-ꠁꠟꠤꠝꠞ ꠃꠙꠞꠦ ꠜꠞꠡꠣ ꠘꠣ ꠇꠞꠤꠀ, ꠈꠣꠟꠤ ꠀꠟ꠆ꠟꠣꠁ ꠛꠟꠞ ꠃꠙꠞꠦ ꠜꠞꠡꠣ ꠇꠞꠦ।
1CO 2:6 ꠔꠣ-ꠅ ꠎꠦꠞꠣ ꠁꠝꠣꠘꠦ ꠇꠣꠝꠤꠟ, ꠔꠣꠞꠣꠞ ꠉꠦꠍꠦ ꠀꠝꠞꠣ ꠀꠈꠟꠞ ꠝꠣꠔ ꠝꠣꠔꠤ। ꠅꠁꠟꠦ ꠅꠃ ꠀꠈꠟ ꠔ ꠁ ꠎꠉꠔꠞ ꠘꠣꠄ ꠛꠣ ꠎꠉꠔꠞ ꠘꠦꠔꠣ ꠅꠇꠟꠞ ꠟꠣꠈꠣꠘꠅ ꠘꠣꠄ, ꠔꠣꠞꠣ ꠔ ꠛꠞꠛꠣꠖ ꠅꠀꠞ ꠙꠕꠤ।
1CO 2:7 ꠀꠍꠟꠦ ꠀꠝꠞꠣ ꠈꠣꠟꠤ ꠀꠟ꠆ꠟꠣꠁ ꠀꠈꠟ-ꠢꠦꠇꠝꠔꠞ ꠛꠣꠔꠥꠘꠤ ꠉꠥꠙꠘ ꠛꠦꠙꠣꠞꠦ ꠝꠣꠔꠤ। ꠅꠃ ꠛꠣꠔꠥꠘꠤ ꠛꠦꠙꠣꠞ ꠔ ꠖꠥꠘꠤꠀ ꠙꠄꠖꠣ ꠇꠞꠣꠞ ꠀꠉꠦꠃ ꠀꠟ꠆ꠟꠣꠄ ꠔꠣꠘ ꠘꠤꠎꠞ ꠝꠞ꠆ꠎꠤꠄ ꠑꠤꠇ ꠇꠞꠤꠀ ꠞꠣꠈꠍꠂꠘ, ꠎꠣꠔꠦ ꠀꠝꠞꠣ ꠔꠣꠘ ꠉꠃꠞꠛꠞ ꠜꠣꠉꠤ ꠅꠁ।
1CO 2:8 ꠅꠁꠟꠦ ꠅꠃ ꠎꠉꠔꠞ ꠘꠦꠔꠣ ꠅꠇꠟꠦ ꠁꠔꠣ ꠛꠥꠎꠞꠣ ꠘꠣ। ꠁꠔꠣ ꠛꠥꠎꠟꠦ ꠔꠣꠞꠣ, ꠢꠃ ꠉꠃꠞꠛꠞ ꠗꠘ ꠀꠝꠞꠣꠞ ꠝꠣꠟꠤꠇ ꠁꠍꠣꠞꠦ ꠍꠟꠤꠛꠞ ꠃꠙꠞꠦ ꠟꠐꠇꠣꠁꠀ ꠝꠣꠞꠟ ꠘꠣ ꠅꠘꠦ।
1CO 2:9 ꠅꠁꠟꠦ ꠀꠝꠞꠣ ꠎꠣꠘꠤ, ꠀꠟ꠆ꠟꠣꠞ ꠇꠣꠟꠣꠝꠦ ꠇꠄ, ꠎꠣꠞꠣ ꠀꠟ꠆ꠟꠣꠞꠦ ꠝꠢꠛ꠆ꠛꠔ ꠇꠞꠂꠘ, ꠔꠣꠞꠣꠞ ꠟꠣꠉꠤ ꠔꠣꠁꠘ ꠎꠦꠔꠣ ꠞꠣꠈꠍꠂꠘ, ꠁꠔꠣ ꠇꠦꠃ ꠌꠃꠈꠦ ꠖꠦꠈꠍꠦ ꠘꠣ, ꠇꠣꠘꠦꠅ ꠢꠥꠘꠍꠦ ꠘꠣ, ꠖꠤꠟꠞ ꠝꠣꠎꠦ ꠇꠥꠘꠥꠖꠤꠘ ꠌꠤꠘ꠆ꠔꠣꠅ ꠇꠞꠍꠦ ꠘꠣ।
1CO 2:10 ꠁꠔꠣ ꠅꠈꠘ ꠔꠣꠘ ꠙꠣꠇ ꠞꠥꠢꠥꠞ ꠝꠣꠎꠖꠤ ꠀꠝꠞꠣꠞ ꠉꠦꠍꠦ ꠎꠣꠁꠞ ꠇꠞꠍꠂꠘ। ꠙꠣꠇ ꠞꠥꠢꠥꠞ ꠅꠎꠣꠘꠣ ꠇꠥꠘ꠆ꠔꠣꠃ ꠘꠣꠁ, ꠔꠣꠁꠘ ꠀꠟ꠆ꠟꠣꠞ ꠢꠇꠟ ꠛꠣꠔꠥꠘꠤ ꠛꠦꠙꠣꠞꠅ ꠎꠣꠘꠂꠘ।
1CO 2:11 ꠝꠣꠘꠡꠞ ꠝꠣꠎꠦ ꠅꠟꠣ ꠇꠦꠃ ꠀꠍꠦ ꠘꠤ, ꠎꠦꠞꠣ ꠄꠇꠎꠘꠦ ꠀꠞꠇ ꠎꠘꠞ ꠝꠘꠞ ꠈꠛꠞ ꠎꠣꠘꠂꠘ? ꠈꠣꠟꠤ ꠘꠤꠎꠞ ꠞꠥꠢꠦꠃ ꠔꠣꠞ ꠝꠘꠞ ꠈꠛꠞ ꠎꠣꠘꠦ। ꠑꠤꠇ ꠅꠃ ꠟꠣꠈꠣꠘ, ꠀꠟ꠆ꠟꠣꠞ ꠙꠣꠇ ꠞꠥꠢꠥ ꠍꠣꠠꠣ ꠖꠥꠍꠞꠣ ꠇꠦꠃ ꠔꠣꠘ ꠉꠣꠁꠛꠤ ꠛꠦꠙꠣꠞ ꠎꠣꠘꠦ ꠘꠣ।
1CO 2:12 ꠀꠞ ꠀꠝꠞꠣ ꠔ ꠖꠥꠘꠤꠀꠛꠤ ꠞꠥꠢꠥ ꠙꠣꠁꠍꠤ ꠘꠣ, ꠛꠞꠋ ꠀꠟ꠆ꠟꠣꠞ ꠔꠞꠚ ꠕꠣꠇꠤ ꠔꠣꠘ ꠞꠥꠢꠥ ꠙꠣꠁꠍꠤ, ꠄꠞꠟꠣꠉꠤ ꠔꠣꠘ ꠖꠦꠅꠀ ꠘꠤꠀꠝꠔ ꠅꠇꠟ ꠀꠝꠞꠣ ꠌꠤꠘꠤ।
1CO 2:13 ꠀꠞ ꠅꠃ ꠘꠤꠀꠝꠔꠞ ꠛꠦꠙꠣꠞꠦꠃ ꠀꠝꠞꠣ ꠇꠁ, ꠁꠔꠣ ꠇꠅꠀꠞ ꠡꠝꠄ ꠀꠝꠞꠣ ꠝꠣꠘꠡꠞ ꠀꠈꠟ ꠛꠦꠛꠢꠣꠞ ꠇꠞꠤ ꠘꠣ, ꠈꠣꠟꠤ ꠙꠣꠇ ꠞꠥꠢꠥꠞ ꠝꠣꠎꠖꠤ ꠔꠣꠟꠤꠝ ꠙꠣꠁꠀ ꠇꠁ। ꠞꠥꠢꠣꠘꠤ ꠢꠇꠤꠇꠔꠞꠦ ꠎꠣꠁꠞ ꠇꠞꠣꠞ ꠟꠣꠉꠤ, ꠀꠝꠞꠣ ꠞꠥꠢꠣꠘꠤ ꠝꠣꠔ ꠝꠣꠔꠤ।
1CO 2:14 ꠎꠦ ꠝꠣꠘꠥꠡ ꠞꠥꠢꠣꠘꠤ ꠝꠘꠜꠣꠛꠞ ꠘꠣꠄ, ꠀꠟ꠆ꠟꠣꠁ ꠙꠣꠇ ꠞꠥꠢꠥꠞ ꠝꠣꠎꠖꠤ ꠎꠦꠔꠣ ꠝꠤꠟꠦ ꠢꠦ ꠁꠔꠣꠞꠦ ꠇꠛꠥꠟ ꠇꠞꠦ ꠘꠣ, ꠇꠣꠞꠘ ꠔꠣꠞ ꠉꠦꠍꠦ ꠁꠔꠣ ꠛꠦꠇꠣꠝꠣ। ꠁꠔꠣ ꠛꠦꠙꠣꠞ ꠢꠦ ꠛꠥꠎꠦꠅ ꠘꠣ, ꠇꠣꠞꠘ ꠁꠔꠣ ꠞꠥꠢꠣꠘꠤ ꠎꠉꠔꠞ ꠛꠦꠙꠣꠞ, ꠈꠣꠟꠤ ꠞꠥꠢꠥꠖꠤ ꠎꠣꠌꠣꠁ ꠇꠞꠣ ꠎꠣꠄ।
1CO 2:15 ꠎꠦ ꠎꠘꠞ ꠝꠣꠎꠦ ꠙꠣꠇ ꠞꠥꠢꠥ ꠀꠍꠦ, ꠢꠦ ꠢꠇ꠆ꠇꠟꠔꠣ ꠎꠣꠌꠣꠁ ꠇꠞꠤꠀ ꠖꠦꠈꠦ, ꠔꠣꠞꠦ ꠇꠦꠃ ꠎꠣꠌꠣꠁ ꠇꠞꠔ ꠙꠣꠞꠦ ꠘꠣ।
1CO 2:16 ꠎꠦꠟꠣ ꠀꠟ꠆ꠟꠣꠞ ꠇꠣꠟꠣꠝꠅ ꠀꠍꠦ, ꠝꠣꠛꠥꠖꠞ ꠝꠘ ꠇꠦꠉꠤꠄ ꠛꠥꠎꠔ ꠙꠣꠞꠍꠦ, ꠔꠣꠘꠞꠦ ꠙꠞꠣꠝꠤꠡ ꠖꠤꠛꠣꠞ ꠡꠣꠁꠖ꠆ꠖ ꠇꠣꠞ? ꠅꠁꠟꠦ ꠀꠟ-ꠝꠍꠤꠞ ꠝꠘ ꠀꠝꠞꠣꠞ ꠖꠤꠟꠅ ꠕꠣꠇꠣꠄ, ꠀꠝꠞꠣ ꠁꠔꠣ ꠛꠥꠎꠞꠣꠝ।
1CO 3:1 ꠜꠣꠁ ꠅꠇꠟ, ꠞꠥꠢꠣꠘꠤꠇ ꠎꠘꠞ ꠟꠉꠦ ꠎꠦꠟꠣꠈꠣꠘ ꠝꠣꠔꠣ ꠃꠌꠤꠔ, ꠀꠝꠤ ꠔꠥꠝꠞꠣꠞ ꠟꠉꠦ ꠁꠟꠣ ꠝꠣꠔꠔꠣꠝ ꠙꠣꠞꠍꠤ ꠘꠣ। ꠛꠞꠋ ꠖꠥꠘꠤꠀꠛꠤ ꠝꠣꠘꠡꠞ ꠟꠉꠦ ꠎꠦꠟꠣ ꠝꠣꠔꠣ ꠃꠌꠤꠔ, ꠔꠥꠝꠞꠣꠞ ꠟꠉꠦ ꠅꠟꠣꠃ ꠝꠣꠔꠤꠍꠤ। ꠔꠥꠝꠞꠣ ꠔ ꠁꠍꠣꠄꠁ ꠔꠞꠤꠇꠣꠔ ꠄꠇ꠆ꠇꠦꠞꠦ ꠢꠥꠞꠥꠔ꠆ꠔꠣꠁꠘ꠆ꠔꠞ ꠟꠣꠈꠣꠘ, ꠄꠞꠟꠣꠉꠤꠃ ꠅꠃꠟꠣ ꠝꠣꠔꠤꠟꠣꠝ।
1CO 3:2 ꠙꠄꠟꠣ ꠀꠝꠤ ꠔꠥꠝꠞꠣꠞꠦ ꠡꠇ꠆ꠔ ꠈꠣꠘꠤ ꠘꠣ ꠖꠤꠀ ꠈꠣꠟꠤ ꠖꠥꠗ ꠈꠣꠛꠣꠁꠍꠟꠣꠝ, ꠢꠤ ꠡꠝꠄ ꠡꠇ꠆ꠔ ꠈꠣꠘꠤ ꠈꠣꠅꠀꠞ ꠎꠥꠇꠣ ꠀꠍꠟꠣꠄ ꠘꠣ, ꠀꠞ ꠅꠔ ꠖꠤꠘ ꠛꠣꠖꠦꠅ ꠔꠥꠝꠞꠣ ꠁ ꠛꠦꠙꠣꠞꠦ ꠢꠥꠞꠥꠔ꠆ꠔꠣ ꠞꠁꠍ।
1CO 3:3 ꠇꠣꠞꠘ ꠔꠥꠝꠞꠣ ꠅꠈꠘꠅ ꠖꠥꠘꠤꠀꠛꠤ ꠞꠇ꠆ꠔ-ꠝꠣꠋꠡꠦ ꠌꠟꠞꠣꠄ। ꠔꠥꠝꠞꠣꠞ ꠝꠣꠎꠦ ꠅꠈꠘꠅ ꠁꠋꠡꠣ, ꠇꠣꠁꠎ꠆ꠎꠣ-ꠚꠍꠣꠖ ꠟꠣꠉꠣꠁꠟꠃ ꠀꠍꠦ। ꠔꠦ ꠔꠥꠝꠞꠣ ꠞꠇ꠆ꠔ-ꠝꠣꠋꠡꠞ ꠛꠡꠦ ꠞꠁꠍ ꠘꠣ ꠘꠤ?
1CO 3:4 ꠔꠥꠝꠞꠣꠞ ꠝꠣꠎꠦ ꠇꠦꠃ ꠎꠦꠛꠟꠣ ꠇꠄ, ꠢꠦ ꠙꠣꠃꠟꠥꠍꠞ ꠖꠟꠞ, ꠇꠦꠃ ꠇꠄ ꠀꠙꠟ꠆ꠟꠍꠞ ꠖꠟꠞ, ꠔꠦ ꠔꠥꠝꠞꠣ ꠖꠥꠘꠤꠀꠛꠤ ꠝꠣꠘꠡꠞ ꠟꠣꠈꠣꠘ ꠘꠣꠄ ꠘꠤ?
1CO 3:5 ꠀꠙꠟ꠆ꠟꠍ ꠇꠦ? ꠀꠞ ꠙꠣꠃꠟꠥꠍꠃ ꠛꠣ ꠇꠦ? ꠀꠝꠞꠣ ꠔ ꠡꠣꠝꠣꠁꠘ꠆ꠘ ꠈꠦꠎꠝꠔꠇꠣꠞꠤ, ꠀꠝꠞꠣꠞ ꠝꠣꠎꠖꠤ ꠔꠥꠝꠞꠣ ꠁꠝꠣꠘꠞ ꠙꠕꠦ ꠀꠁꠍ। ꠀꠟ꠆ꠟꠣꠄꠃ ꠀꠝꠞꠣꠞꠦ ꠎꠣꠞꠎꠤꠞ ꠁ ꠖꠣꠄꠁꠔ꠆ꠔ ꠖꠤꠍꠂꠘ।
1CO 3:6 ꠀꠝꠤ ꠛꠤꠌ ꠟꠣꠉꠣꠁꠍꠤ, ꠀꠙꠟ꠆ꠟꠍꠦ ꠙꠣꠘꠤ ꠖꠤꠍꠂꠘ, ꠀꠞ ꠀꠟ꠆ꠟꠣꠄ ꠁꠔꠣꠞꠦ ꠛꠠ ꠇꠞꠍꠂꠘ।
1CO 3:7 ꠄꠞꠟꠣꠉꠤ ꠎꠦꠁꠘ ꠛꠤꠌ ꠟꠣꠉꠣꠁꠘ ꠀꠞ ꠎꠦꠁꠘ ꠙꠣꠘꠤ ꠖꠦꠁꠘ, ꠄꠞꠣ ꠀꠍꠟꠦ ꠇꠥꠘ꠆ꠔꠣꠃ ꠘꠣꠄ, ꠅꠁꠟꠦ ꠎꠦꠁꠘ ꠁꠔꠣꠞꠦ ꠛꠠ ꠇꠞꠤ ꠔꠥꠟꠂꠘ, ꠔꠣꠁꠘꠃ ꠢꠇ꠆ꠇꠟꠔꠣ।
1CO 3:8 ꠛꠤꠌ ꠟꠣꠉꠣꠅꠞꠣ ꠀꠞ ꠙꠣꠘꠤ ꠖꠦꠅꠞꠣꠞ ꠄꠇꠁ ꠃꠖ꠆ꠖꠦꠡ꠆ꠡ। ꠄꠞꠣ ꠙꠞꠔꠦꠇꠦ ꠎꠣꠞꠎꠤꠞ ꠝꠦꠘꠔ ꠝꠣꠚꠤꠇ ꠇꠣꠝꠞ ꠚꠟ ꠙꠣꠁꠛꠣ।
1CO 3:9 ꠅꠁꠟꠦ ꠀꠝꠞꠣ ꠖꠥꠁꠅꠎꠘꠦꠃ ꠀꠟ꠆ꠟꠣꠞ ꠇꠣꠝ ꠇꠞꠤꠀꠞ। ꠔꠥꠝꠞꠣ ꠀꠟ꠆ꠟꠣꠞꠃ ꠈꠦꠔ, ꠔꠣꠘ ꠛꠣꠘꠣꠁꠟ ꠛꠤꠟꠒꠤꠋ।
1CO 3:10 ꠀꠟ꠆ꠟꠣꠞ ꠉꠦꠍ ꠕꠣꠇꠤ ꠎꠦ ꠈꠣꠍ ꠞꠢꠝꠔ ꠀꠝꠤ ꠙꠣꠁꠍꠤ, ꠅꠃ ꠞꠢꠝꠔꠞ ꠛꠟꠦꠃ ꠀꠝꠤ ꠀꠈꠟꠖꠣꠞ ꠞꠣꠎ ꠝꠦꠡ꠆ꠔꠞꠤꠞ ꠟꠣꠈꠣꠘ ꠁꠀꠘ ꠈꠥꠐꠤ ꠉꠣꠠꠍꠤ। ꠀꠞ ꠅꠃ ꠈꠥꠐꠤꠞ ꠃꠙꠞꠦ ꠅꠁꠘ꠆ꠘ ꠎꠘꠦ ꠛꠤꠟꠒꠤꠋ ꠛꠣꠘꠣꠁꠞꠣ। ꠅꠁꠟꠦ ꠇꠦ ꠇꠤꠟꠣ ꠛꠣꠘꠣꠁꠞꠣ, ꠁ ꠛꠦꠙꠣꠞꠦ ꠔꠣꠞꠣ ꠢꠥꠡꠤꠀꠞ ꠅꠃꠇ।
1CO 3:11 ꠎꠦ ꠁꠀꠘ ꠈꠥꠐꠤ ꠀꠉꠦꠃ ꠉꠣꠠꠣ ꠅꠁꠉꠦꠍꠦ, ꠝꠣꠟꠤꠇ ꠁꠍꠣ ꠀꠟ-ꠝꠍꠤꠃ ꠅꠁꠟꠣ ꠢꠃ ꠈꠥꠐꠤ, ꠁꠇꠐꠣ ꠛꠣꠖ ꠖꠤꠀ ꠀꠞ ꠇꠥꠘꠥ ꠘꠄꠀ ꠈꠥꠐꠤ ꠇꠦꠃ ꠉꠣꠠꠔ ꠙꠣꠞꠔ ꠘꠣꠄ।
1CO 3:12 ꠅꠈꠘ ꠁ ꠈꠥꠐꠤꠞ ꠃꠙꠞꠦ ꠡꠥꠘꠣ, ꠞꠥꠙꠣ, ꠖꠣꠝꠤ ꠙꠣꠔ꠆ꠔꠞ, ꠟꠣꠇꠠꠤ ꠀꠞ ꠍꠘ ꠖꠤꠀ ꠇꠦꠃ ꠎꠥꠖꠤ ꠊꠞ ꠛꠣꠘꠣꠄ,
1CO 3:13 ꠔꠦ ꠇꠦ ꠇꠤꠟꠣ ꠛꠣꠘꠣꠁꠍꠂꠘ, ꠁꠔꠣ ꠜꠣꠟꠣ ꠇꠞꠤ ꠖꠦꠈꠣ ꠎꠣꠁꠛ। ꠞꠥꠎ ꠢꠣꠡꠞꠞ ꠖꠤꠘ ꠁꠔꠣ ꠎꠣꠁꠞ ꠅꠁꠛ, ꠢꠃ ꠖꠤꠘ ꠅꠉ꠆ꠘꠤ-ꠙꠞꠤꠇ꠆ꠇꠣꠞ ꠝꠣꠎꠖꠤ ꠁꠔꠣ ꠈꠥꠟꠣ-ꠝꠦꠟꠣ ꠅꠁꠛ।
1CO 3:14 ꠎꠦꠁꠘ ꠎꠦꠔꠣ ꠛꠣꠘꠣꠁꠍꠂꠘ, ꠁꠔꠣ ꠎꠥꠖꠤ ꠐꠤꠇꠤꠀ ꠞꠄ, ꠔꠦ ꠄꠁꠘ ꠙꠥꠞꠥꠡ꠆ꠇꠣꠞ ꠙꠣꠁꠛꠣ।
1CO 3:15 ꠅꠁꠟꠦ ꠁꠔꠣ ꠎꠟꠤ ꠉꠦꠟꠦ ꠙꠥꠞꠥꠡ꠆ꠇꠣꠞ ꠕꠣꠇꠤ ꠛꠣꠖ ꠙꠠꠛ, ꠔꠣ-ꠅ ꠔꠣꠞ ꠘꠤꠎꠞ ꠎꠣꠘ ꠛꠣꠌꠤꠛ। ꠔꠣꠞꠦ ꠖꠦꠈꠟꠦ ꠛꠥꠎꠣ ꠎꠣꠁꠛ, ꠢꠦ ꠀꠉꠥꠁꠘꠞ ꠝꠣꠎꠖꠤ ꠙꠣꠠꠤ ꠖꠤꠀ ꠀꠁꠍꠦ।
1CO 3:16 ꠔꠥꠝꠞꠣ ꠎꠣꠘ ꠘꠣ ꠘꠤ, ꠔꠥꠝꠞꠣ ꠅꠁꠟꠣꠄ ꠀꠟ꠆ꠟꠣꠞ ꠇꠣꠛꠣ ꠊꠞ, ꠔꠥꠝꠞꠣꠞ ꠝꠣꠎꠦ ꠔꠣꠘ ꠙꠣꠇ ꠞꠥꠢꠥ ꠛꠡꠔ ꠇꠞꠂꠘ?
1CO 3:17 ꠇꠦꠃ ꠎꠥꠖꠤ ꠀꠟ꠆ꠟꠣꠞ ꠇꠣꠛꠣ ꠊꠞ ꠛꠤꠘꠣꠡ ꠇꠞꠦ, ꠔꠦ ꠀꠟ꠆ꠟꠣꠄꠅ ꠔꠣꠞꠦ ꠛꠤꠘꠣꠡ ꠇꠞꠛꠣ। ꠇꠣꠞꠘ ꠔꠣꠘ ꠕꠣꠇꠣꠞ ꠊꠞ ꠅꠁꠟ ꠙꠛꠤꠔ꠆ꠞ, ꠀꠞ ꠔꠥꠝꠞꠣꠃ ꠅꠁꠟꠣꠄ ꠢꠃ ꠊꠞ।
1CO 3:18 ꠔꠥꠝꠞꠣ ꠇꠦꠃ ꠘꠤꠎꠞꠦ ꠚꠣꠇꠤ ꠖꠤꠅ ꠘꠣ। ꠔꠥꠝꠞꠣꠞ ꠝꠣꠎꠞ ꠇꠦꠃ ꠎꠥꠖꠤ ꠖꠥꠘꠤꠀꠞ ꠀꠈꠟ-ꠁꠟꠤꠝꠦ ꠘꠤꠎꠞꠦ ꠀꠈꠟꠖꠣꠞ ꠝꠘꠅ ꠇꠞꠦ, ꠔꠦ ꠢꠦ ꠛꠦꠀꠈꠟ ꠛꠘꠃꠇ ꠎꠣꠔꠦ ꠀꠍꠟ ꠀꠈꠟꠖꠣꠞ ꠅꠁꠔ ꠙꠣꠞꠦ।
1CO 3:19 ꠇꠣꠞꠘ ꠁ ꠎꠉꠔꠞ ꠀꠈꠟ-ꠛꠥꠖ꠆ꠖꠤ, ꠀꠟ꠆ꠟꠣꠞ ꠘꠎꠞꠅ ꠈꠣꠟꠤ ꠛꠦꠀꠈꠟꠤ। ꠀꠍꠝꠣꠘꠤ ꠇꠤꠔꠣꠛꠅ ꠀꠍꠦ, “ꠀꠟ꠆ꠟꠣꠄ ꠀꠈꠟꠖꠣꠞ ꠅꠇꠟꠞꠦ ꠔꠣꠞꠣꠞ ꠌꠣꠟꠣꠇꠤꠔ ꠗꠞꠂꠘ।”
1CO 3:20 ꠀꠞꠇ ꠀꠄꠀꠔꠅ ꠀꠍꠦ, “ꠀꠈꠟꠖꠣꠞ ꠅꠇꠟꠞ ꠢꠇꠟ ꠌꠤꠘ꠆ꠔꠣꠃ ꠛꠦꠇꠣꠝꠣ, ꠁꠔꠣ ꠔ ꠝꠣꠛꠥꠖꠦ ꠎꠣꠘꠂꠘ।”
1CO 3:21 ꠄꠞꠟꠣꠉꠤ ꠀꠝꠣꠞ ꠇꠕꠣ ꠅꠁꠟ, ꠢꠇ꠆ꠇꠟꠔꠣꠃ ꠔ ꠔꠥꠝꠞꠣꠞ, ꠔꠦ ꠔꠥꠝꠞꠣ ꠇꠥꠘꠥ ꠝꠣꠘꠡꠞꠦ ꠟꠁꠀ ꠛꠠꠣꠁ ꠇꠞꠤꠅ ꠘꠣ।
1CO 3:22 ꠙꠣꠃꠟꠥꠍ, ꠀꠙꠟ꠆ꠟꠍ, ꠙꠤꠔꠞ, ꠁ ꠖꠥꠘꠤꠀ, ꠎꠤꠘ꠆ꠖꠦꠉꠤ, ꠝꠃꠔ, ꠛꠞ꠆ꠔꠝꠣꠘ, ꠜꠛꠤꠡꠔ, ꠢꠇ꠆ꠇꠟꠔꠣꠃ ꠔꠥꠝꠞꠣꠞ।
1CO 3:23 ꠔꠥꠝꠞꠣ ꠅꠁꠟꠣꠄ ꠀꠟ-ꠝꠍꠤꠞ, ꠀꠞ ꠀꠟ-ꠝꠍꠤ ꠅꠁꠟꠣ ꠀꠟ꠆ꠟꠣꠞ।
1CO 4:1 ꠀꠝꠞꠣꠞꠦ ꠖꠦꠈꠤꠀ ꠝꠣꠘꠡꠦ ꠛꠥꠎꠃꠇ, ꠀꠝꠞꠣ ꠀꠟ-ꠝꠍꠤꠞ ꠈꠣꠖꠤꠝ, ꠀꠟ꠆ꠟꠣꠁ ꠛꠣꠔꠥꠘꠤ ꠜꠣꠘ꠆ꠒꠣꠞꠞ ꠈꠣꠎꠣꠘ꠆ꠌꠤ।
1CO 4:2 ꠀꠞ ꠎꠦꠞꠣꠞ ꠃꠙꠞꠦ ꠜꠣꠘ꠆ꠒꠣꠞꠞ ꠈꠣꠎꠣꠘ꠆ꠌꠤꠞ ꠜꠣꠞ ꠖꠦꠅꠀ ꠅꠄ, ꠔꠣꠞꠣ ꠔ ꠙꠞꠝꠣꠘ ꠖꠦꠈꠣꠘꠤ ꠟꠣꠉꠛ, ꠔꠣꠞꠣ ꠢꠇ-ꠢꠣꠟꠣꠟ।
1CO 4:3 ꠔꠦ ꠀꠝꠤ ꠢꠇ-ꠢꠣꠟꠣꠟ ꠇꠤ ꠘꠣ ꠁ ꠛꠤꠌꠣꠞ ꠔꠥꠝꠞꠣ ꠇꠞꠅ ꠛꠣ ꠀꠖꠣꠟꠔꠦꠃ ꠇꠞꠃꠇ, ꠄꠔꠦ ꠀꠝꠣꠞ ꠇꠥꠘ꠆ꠔꠣ ꠎꠣꠄ ꠀꠄ ꠘꠣ। ꠀꠝꠤ ꠔ ꠀꠝꠣꠞ ꠘꠤꠎꠞ ꠛꠤꠌꠣꠞꠃ ꠇꠞꠤ ꠘꠣ।
1CO 4:4 ꠀꠝꠣꠞ ꠝꠘ ꠡꠣꠖꠣ ꠅꠁꠟꠦꠅ ꠙꠞꠝꠣꠘ ꠇꠞꠣ ꠎꠣꠞ ꠘꠣ ꠀꠝꠤ ꠘꠤꠞ꠆ꠖꠥꠡ। ꠔꠦ ꠝꠣꠟꠤꠇ ꠁꠍꠣꠄꠃ ꠀꠝꠣꠞ ꠛꠤꠌꠣꠞ ꠇꠞꠛꠣ।
1CO 4:5 ꠄꠞꠟꠣꠉꠤ ꠡꠑꠤꠇ ꠡꠝꠄꠅꠞ ꠀꠉ ꠙꠞ꠆ꠎꠘ꠆ꠔ, ꠝꠣꠘꠤ ꠝꠣꠟꠤꠇ ꠁꠍꠣ ꠢꠤꠞꠛꠣꠞ ꠘꠣ ꠀꠅꠀ ꠙꠞ꠆ꠎꠘ꠆ꠔ ꠔꠥꠝꠞꠣ ꠇꠥꠘꠥ ꠛꠤꠌꠣꠞ ꠇꠞꠤꠅ ꠘꠣ। ꠀꠘ꠆ꠖꠣꠁꠞꠅ ꠎꠦꠔꠣ ꠟꠥꠇꠣꠁꠟ ꠀꠍꠦ, ꠔꠣꠁꠘ ꠀꠁꠀ ꠁꠔꠣꠞꠦ ꠚꠞꠅ ꠀꠘꠛꠣ ꠀꠞ ꠝꠣꠘꠡꠞ ꠖꠤꠟꠞ ꠉꠥꠙꠘ ꠘꠤꠅꠔ ꠅꠇꠟ ꠎꠣꠁꠞ ꠇꠞꠛꠣ। ꠢꠃ ꠡꠝꠄ ꠀꠟ꠆ꠟꠣꠞ ꠉꠦꠍ ꠕꠣꠇꠤ ꠢꠇꠟꠦ ꠎꠣꠞꠎꠤꠞ ꠙꠣꠅꠘꠣ ꠔꠣꠞꠤꠚ ꠙꠣꠁꠛꠣ।
1CO 4:6 ꠜꠣꠁ ꠅꠇꠟ, ꠔꠥꠝꠞꠣꠞ ꠜꠣꠟꠣꠁꠞ ꠟꠣꠉꠤ ꠀꠝꠤ ꠀꠝꠣꠞ ꠘꠤꠎꠞ ꠀꠞ ꠀꠙꠟ꠆ꠟꠍꠞ ꠃꠖꠣꠢꠞꠘ ꠖꠤꠀ ꠔꠥꠝꠞꠣꠞꠦ ꠇꠁꠟꠣꠝ, ꠎꠣꠔꠦ ꠔꠥꠝꠞꠣ ꠀꠝꠞꠣꠞ ꠉꠦꠍ ꠕꠣꠇꠤ ꠅꠃ ꠔꠣꠟꠤꠝ ꠘꠦꠅ, ꠀꠍꠝꠣꠘꠤ ꠇꠤꠔꠣꠛꠅ ꠎꠦꠔꠣ ꠟꠦꠈꠣ ꠀꠍꠦ, ꠁꠔꠣꠞ ꠛꠣꠞꠦ ꠎꠣꠅꠀ ꠑꠤꠇ ꠘꠣꠄ। ꠔꠦ ꠔꠥꠝꠞꠣ ꠄꠇꠎꠘꠞꠦ ꠕꠁꠀ ꠀꠞꠦꠇꠎꠘꠞꠦ ꠟꠁꠀ ꠛꠠꠣꠁ ꠇꠞꠤꠅ ꠘꠣ।
1CO 4:7 ꠇꠦꠃ ꠎꠣꠘꠥ ꠝꠘꠅ ꠘꠣ ꠇꠞꠦ ꠔꠥꠝꠤ ꠀꠟꠣꠖꠣ ꠇꠥꠘ꠆ꠔꠣ ꠛꠘꠤꠉꠦꠍ। ꠔꠥꠝꠣꠞ ꠘꠤꠎꠞ ꠄꠝꠘ ꠇꠥꠘ ꠗꠘ ꠀꠍꠦ, ꠎꠦꠔꠣ ꠔꠥꠝꠤ ꠀꠟ꠆ꠟꠣꠞ ꠉꠦꠍ ꠕꠣꠇꠤ ꠟꠤꠟ꠆ꠟꠣ ꠙꠣꠁꠍ ꠘꠣ? ꠀꠞ ꠁꠔꠣ ꠎꠥꠖꠤ ꠟꠤꠟ꠆ꠟꠣ ꠙꠣꠁꠀ ꠕꠣꠇꠅ, ꠔꠦ ꠟꠤꠟ꠆ꠟꠣ ꠙꠣꠁꠍ ꠘꠣ ꠇꠁꠀ ꠛꠦꠐꠣꠉꠤꠞꠤ ꠇꠞꠞꠣꠄ ꠇꠦꠘꠦ?
1CO 4:8 ꠔꠥꠝꠞꠣꠞꠦ ꠖꠦꠈꠤꠀ ꠔ ꠝꠘꠅ ꠅꠞ, ꠔꠥꠝꠞꠣ ꠀꠉꠦꠃ ꠢꠇ꠆ꠇꠟꠔꠣ ꠙꠣꠁꠀ ꠗꠘꠤ ꠅꠁꠉꠦꠍ, ꠀꠝꠞꠣꠞꠦ ꠛꠣꠖ ꠖꠤꠀꠃ ꠔꠥꠝꠞꠣ ꠛꠣꠖꠡꠣ ꠛꠘꠤꠉꠦꠍ! ꠔꠥꠝꠞꠣ ꠢꠣꠍꠣꠞꠞ ꠛꠣꠖꠡꠣ ꠅꠁꠟꠦ ꠜꠣꠟꠣꠃ ꠅꠁꠔ, ꠀꠝꠞꠣꠅ ꠔꠥꠝꠞꠣꠞ ꠟꠉꠦ ꠛꠣꠖꠡꠣ ꠅꠁꠔꠣꠝ ꠙꠣꠞꠔꠣꠝ।
1CO 4:9 ꠎꠥꠖ꠆ꠖ-ꠛꠘ꠆ꠖꠤ ꠅꠇꠟꠞꠦ ꠝꠣꠞꠤꠟꠤꠛꠣꠞ ꠘꠤꠅꠔꠦ, ꠎꠥꠖ꠆ꠖꠞ ꠛꠤꠎꠄ ꠝꠤꠍꠤꠟꠞ ꠈꠞꠞ ꠇꠣꠔꠣꠞꠅ ꠎꠣꠞꠣꠞꠦ ꠞꠣꠈꠣ ꠅꠄ, ꠀꠝꠣꠞ ꠝꠘꠅ ꠅꠄ ꠀꠟ꠆ꠟꠣꠄ ꠀꠝꠞꠣꠞ ꠟꠣꠈꠣꠘ ꠍꠣꠢꠣꠛꠤ ꠅꠇꠟꠞꠦꠅ ꠅꠟꠣ ꠢꠇꠟꠞ ꠈꠞꠦ ꠞꠣꠈꠍꠂꠘ। ꠀꠝꠞꠣ ꠀꠡ꠆ꠔꠣ ꠎꠉꠔꠞ ꠉꠦꠍꠦ, ꠢꠇꠟ ꠝꠣꠘꠡꠞ ꠉꠦꠍꠦ, ꠀꠞ ꠚꠤꠞꠤꠡ꠆ꠔꠣ ꠅꠇꠟꠞ ꠉꠦꠍꠦꠅ ꠔꠣꠝꠡꠣꠞ ꠘꠣꠄꠅꠇ ꠛꠘꠤꠉꠦꠍꠤ।
1CO 4:10 ꠀꠝꠞꠣ ꠔ ꠀꠟ-ꠝꠍꠤꠞ ꠟꠣꠉꠤ ꠛꠦꠀꠈꠟ ꠅꠁꠍꠤ, ꠀꠞ ꠔꠥꠝꠞꠣ ꠛꠥꠟꠦ ꠀꠟ-ꠝꠍꠤꠞ ꠘꠣꠝꠦ ꠀꠈꠟꠖꠣꠞ ꠛꠘꠤꠉꠦꠍ। ꠀꠝꠞꠣ ꠇꠝꠎꠥꠞ, ꠔꠥꠝꠞꠣ ꠛꠟꠛꠣꠘ, ꠔꠥꠝꠞꠣ ꠛꠥꠟꠦ ꠁꠎ꠆ꠎꠔꠤ ꠛꠘꠤꠉꠦꠍ, ꠀꠝꠞꠣꠞ ꠔ ꠇꠥꠘꠥ ꠁꠎ꠆ꠎꠔ ꠘꠣꠁ।
1CO 4:11 ꠀꠝꠞꠣ ꠅꠈꠘꠅ ꠙꠦꠐꠞ ꠜꠥꠇꠦ, ꠙꠣꠘꠤꠞ ꠙꠤꠀꠍꠦ, ꠇꠣꠙꠠ-ꠌꠥꠙꠠꠞ ꠅꠜꠣꠛꠦ ꠇꠡ꠆ꠐ ꠇꠞꠤꠀꠞ, ꠛꠣꠠꠤ-ꠊꠞ ꠘꠣꠁ ꠇꠞꠤ ꠛꠂꠔꠟꠞ ꠟꠣꠈꠣꠘ ꠞꠁꠀꠞ ꠀꠞ ꠝꠣꠁꠞ-ꠗꠁꠞ ꠈꠣꠁꠀꠞ।
1CO 4:12 ꠢꠣꠝꠦꠡꠣ ꠘꠤꠎꠞ ꠀꠔꠦ ꠝꠦꠘꠔ ꠇꠞꠤ ꠈꠣꠁꠀꠞ। ꠝꠣꠘꠡꠞ ꠉꠣꠁꠟ-ꠝꠘ꠆ꠖ ꠢꠥꠘꠤꠀꠅ, ꠔꠣꠞꠣꠞ ꠜꠣꠟꠣꠁ ꠌꠣꠁꠀꠞ, ꠎꠥꠟꠥꠝ-ꠘꠤꠞ꠆ꠎꠣꠔꠘ, ꠢꠥꠝꠇꠤ-ꠗꠣꠝꠇꠤꠞꠦ ꠍꠛꠞ ꠇꠞꠤꠀꠞ।
1CO 4:13 ꠛꠖꠘꠣꠝ-ꠉꠤꠛꠔ ꠡꠁꠎ꠆ꠎ ꠇꠞꠤ ꠇꠞꠤ, ꠘꠞꠝ ꠡꠥꠞꠦ ꠔꠣꠞꠣꠞꠦ ꠛꠥꠎꠣꠁꠀꠞ। ꠅꠈꠘ ꠙꠞ꠆ꠎꠘ꠆ꠔ ꠀꠝꠞꠣ ꠀꠡ꠆ꠔꠣ ꠎꠉꠔꠞ ꠈꠣꠍꠞꠣꠞ ꠟꠣꠈꠣꠘ, ꠢꠇꠟꠔꠣꠞ ꠉꠦꠍꠦꠃ ꠎꠁꠘ꠆ꠎꠣꠟ ꠛꠘꠤꠉꠦꠍꠤ।
1CO 4:14 ꠢꠥꠘꠅ, ꠔꠥꠝꠞꠣꠞꠦ ꠡꠞꠝ ꠖꠦꠅꠀꠞ ꠘꠤꠅꠔꠦ ꠁꠔꠣ ꠟꠦꠈꠞꠣꠝ ꠘꠣ, ꠈꠣꠟꠤ ꠀꠝꠣꠞ ꠝꠣꠄꠀꠞ ꠀꠅꠟꠣꠖ ꠢꠤꠡꠣꠛꠦ ꠢꠥꠡꠤꠀꠞ ꠇꠞꠣꠞ ꠟꠣꠉꠤ ꠟꠦꠈꠞꠣꠝ।
1CO 4:15 ꠝꠘꠅ ꠞꠣꠈꠤꠅ, ꠀꠟ-ꠝꠍꠤꠞ ꠛꠦꠙꠣꠞꠦ ꠔꠣꠟꠤꠝ ꠖꠦꠅꠀꠞ ꠟꠣꠉꠤ ꠔꠥꠝꠞꠣꠞ ꠀꠎꠣꠞ ꠀꠎꠣꠞ ꠃꠡ꠆ꠔꠣꠖ ꠕꠣꠇꠔꠣ ꠙꠣꠞꠂꠘ, ꠅꠁꠟꠦ ꠔꠥꠝꠞꠣꠞ ꠛꠣꠚ ꠔ ꠅꠔ ꠎꠘ ꠘꠣꠄ। ꠈꠥꠡ-ꠈꠛꠞꠤ ꠔꠛꠟꠤꠉꠞ ꠝꠣꠎꠖꠤ ꠁꠍꠣꠄꠁ ꠎꠤꠘ꠆ꠖꠦꠉꠤꠔ ꠄꠇꠝꠣꠔ꠆ꠞ ꠀꠝꠤꠃ ꠅꠁꠟꠣꠝ ꠔꠥꠝꠞꠣꠞ ꠛꠣꠚ।
1CO 4:16 ꠅꠈꠘ ꠀꠝꠤ ꠔꠥꠝꠞꠣꠞꠦ ꠝꠤꠘꠔ ꠇꠞꠤꠀ ꠇꠁꠀꠞ, ꠀꠝꠤ ꠎꠦꠟꠣ ꠌꠟꠤ, ꠔꠥꠝꠞꠣꠅ ꠅꠟꠣ ꠌꠟꠅ।
1CO 4:17 ꠅꠃ ꠘꠤꠅꠔꠦ ꠀꠝꠤ ꠔꠤꠝꠕꠤꠞꠦ ꠔꠥꠝꠞꠣꠞ ꠉꠦꠍꠦ ꠙꠣꠑꠣꠁꠟꠣꠝ, ꠝꠣꠟꠤꠇꠞ ꠘꠣꠝꠦ ꠄꠁꠘ ꠔ ꠀꠝꠣꠞ ꠝꠣꠄꠀꠞ ꠢꠇ-ꠢꠣꠟꠣꠟ ꠙꠥꠔ। ꠝꠣꠟꠤꠇ ꠁꠍꠣ ꠀꠟ-ꠝꠍꠤꠞꠦ ꠀꠝꠤ ꠇꠤꠟꠣ ꠝꠣꠘꠤꠀ ꠌꠟꠤꠀꠞ, ꠀꠞ ꠢꠇꠟ ꠎꠣꠉꠣꠞ ꠢꠇꠟ ꠎꠝꠣꠔꠅ ꠇꠤꠟꠣ ꠔꠣꠟꠤꠝ ꠖꠤꠀꠞ, ꠁꠔꠣ ꠔꠣꠁꠘ ꠝꠘꠅ ꠇꠞꠣꠁ ꠖꠤꠛꠣ।
1CO 4:18 ꠔꠥꠝꠞꠣꠞ ꠝꠣꠎꠞ ꠇꠦꠃ ꠇꠦꠃ ꠝꠘꠅ ꠇꠞꠦꠞ, ꠀꠝꠤ ꠀꠞ ꠔꠥꠝꠞꠣꠞ ꠉꠦꠍꠦ ꠀꠁꠔꠣꠝ ꠘꠣꠄ, ꠄꠞꠟꠣꠉꠤ ꠔꠣꠞꠣ ꠛꠠꠣꠁ-ꠛꠦꠐꠣꠉꠤꠞꠤ ꠖꠦꠈꠣꠁꠞꠣ।
1CO 4:19 ꠁꠘꠡꠣꠟ꠆ꠟꠣ ꠀꠝꠤ ꠈꠥꠛ ꠎꠟꠖꠤꠃ ꠀꠁꠝꠥ। ꠎꠦꠔꠣꠄ ꠛꠠꠣꠁ-ꠛꠦꠐꠣꠉꠤꠞꠤ ꠖꠦꠈꠣꠁꠞꠣ, ꠔꠣꠞꠣꠞ ꠝꠣꠔ ꠢꠥꠘꠣꠔ ꠘꠣꠄ, ꠈꠣꠟꠤ ꠔꠣꠞꠣꠞ ꠝꠥꠟ ꠈꠦꠝꠔꠣ ꠖꠦꠈꠣꠔ ꠀꠁꠝꠥ।
1CO 4:20 ꠀꠟ꠆ꠟꠣꠞ ꠛꠣꠖꠡꠣꠁ ꠔ ꠝꠣꠔ-ꠇꠕꠣꠞ ꠛꠦꠙꠣꠞ ꠘꠣꠄ, ꠁꠔꠣ ꠅꠁꠟ ꠇꠥꠖꠞꠔꠤ ꠈꠦꠝꠔꠣꠞ ꠛꠦꠙꠣꠞ।
1CO 4:21 ꠔꠥꠝꠞꠣꠞ ꠁꠌ꠆ꠍꠣ ꠇꠤꠔꠣ? ꠀꠝꠤ ꠔꠥꠝꠞꠣꠞ ꠉꠦꠍꠦ ꠇꠤꠔꠣ ꠟꠁꠀ ꠀꠁꠔꠣꠝ? ꠍꠤꠋꠟꠣ ꠟꠁꠀ ꠘꠤ, ꠘꠣ ꠝꠣꠄꠀ-ꠝꠝꠔꠣ ꠀꠞ ꠘꠞꠝ ꠝꠤꠎꠣꠎ?
1CO 5:1 ꠀꠝꠤ ꠢꠥꠘꠞꠣꠝ, ꠔꠥꠝꠞꠣꠞ ꠝꠣꠎꠦ ꠎꠦꠟꠣꠈꠣꠘ ꠎꠊꠁꠘ꠆ꠘ ꠎꠤꠘꠣꠞ ꠇꠣꠝ ꠌꠟꠦꠞ, ꠁꠟꠣ ꠇꠣꠝ ꠛꠤꠗꠞ꠆ꠝꠤ ꠅꠇꠟꠦꠅ ꠇꠞꠦ ꠘꠣ। ꠔꠥꠝꠞꠣꠞ ꠝꠣꠎꠞ ꠄꠇ ꠎꠘꠦ ꠘꠤꠎꠞ ꠢꠣꠔꠘ ꠝꠣʼꠞꠦꠅ ꠛꠃꠞ ꠟꠣꠈꠣꠘ ꠞꠣꠈꠍꠦ।
1CO 5:2 ꠄꠞꠛꠣꠖꠦꠅ ꠔꠥꠝꠞꠣ ꠛꠠꠣꠁ ꠇꠞꠅ ꠇꠤꠟꠣ? ꠁꠔꠣꠞ ꠟꠣꠉꠤ ꠔꠥꠝꠞꠣ ꠚꠣꠘꠣ ꠝꠣꠋꠉꠣ ꠎꠞꠥꠞ ꠘꠣꠄ ꠘꠤ? ꠀꠞ ꠎꠦꠉꠤꠄ ꠁꠔꠣ ꠇꠞꠍꠦ, ꠔꠣꠞꠦ ꠎꠝꠣꠔ ꠕꠣꠇꠤ ꠛꠣꠞ ꠇꠞꠤ ꠖꠦꠅꠀ ꠃꠌꠤꠔ ꠘꠣ ꠘꠤ?
1CO 5:3 ꠀꠝꠤ ꠡ-ꠡꠞꠤꠟꠦ ꠔꠥꠝꠞꠣꠞ ꠝꠣꠎꠦ ꠘꠣ ꠕꠣꠇꠟꠦꠅ ꠞꠥꠢꠦ ꠔ ꠔꠥꠝꠞꠣꠞ ꠟꠉꠦ ꠀꠍꠤ, ꠄꠞꠟꠣꠉꠤ ꠎꠦꠉꠤꠄ ꠁꠔꠣ ꠇꠞꠍꠦ, ꠍꠣꠝꠘꠦ ꠕꠣꠇꠣ ꠛꠤꠌꠣꠞꠤꠞ ꠟꠣꠈꠣꠘ ꠀꠝꠤꠅ ꠀꠉꠦꠃ ꠔꠣꠞ ꠛꠤꠌꠣꠞ ꠇꠞꠤꠀ ꠞꠣꠈꠍꠤ।
1CO 5:4 ꠀꠝꠣꠞ ꠛꠤꠌꠣꠞ ꠅꠁꠟ, ꠔꠥꠝꠞꠣ ꠝꠣꠟꠤꠇ ꠁꠍꠣꠞ ꠘꠣꠝꠦ ꠄꠇ ꠎꠣꠉꠣꠔ ꠖꠟꠣ ꠅꠅ, ꠅꠃ ꠡꠝꠄ ꠀꠝꠤꠅ ꠞꠥꠢꠦ ꠔꠥꠝꠞꠣꠞ ꠟꠉꠦ ꠞꠁꠝꠥ ꠀꠞ ꠝꠣꠟꠤꠇ ꠁꠍꠣꠞ ꠛꠟ-ꠡꠇ꠆ꠔꠤꠅ ꠀꠝꠞꠣꠞ ꠟꠉꠦ ꠕꠣꠇꠛ।
1CO 5:5 ꠀꠞ ꠅꠃ ꠘꠣꠚꠞꠝꠣꠘꠞ ꠡꠞꠤꠟꠞꠦ ꠛꠤꠘꠣꠡ ꠇꠞꠣꠞ ꠟꠣꠉꠤ ꠡꠄꠔꠣꠘꠞ ꠀꠔꠅ ꠖꠤꠟꠣꠁꠔꠦ ꠅꠁꠛ, ꠎꠣꠔꠦ ꠝꠣꠟꠤꠇ ꠁꠍꠣ ꠀꠁꠛꠣꠞ ꠇꠣꠟꠅ ꠔꠣꠞ ꠞꠥꠢꠦ ꠘꠣꠎꠣꠔ ꠙꠣꠄ।
1CO 5:6 ꠜꠣꠁꠀꠁꠘꠞꠦ, ꠛꠠꠣꠁ ꠇꠞꠣ ꠔꠥꠝꠞꠣꠞ ꠟꠣꠉꠤ ꠑꠤꠇ ꠘꠣꠄ। ꠎꠣꠘ ꠘꠣ ꠘꠤ, ꠝꠄꠖꠣꠞ ꠈꠣꠁꠞ ꠛꠠ ꠉꠣꠝꠟꠣꠞꠦꠅ ꠕꠥꠠꠣ ꠈꠣꠝꠤꠞꠦ ꠚꠥꠟꠣꠁꠟꠣꠄ?
1CO 5:7 ꠔꠦ ꠔꠥꠝꠞꠣꠞ ꠖꠤꠟ ꠕꠣꠇꠤꠅ ꠢꠃ ꠙꠥꠞꠣꠘ ꠈꠣꠝꠤꠞꠞ ꠜꠣꠛ ꠚꠣꠟꠣꠁ ꠖꠦꠅ, ꠎꠣꠔꠦ ꠈꠣꠝꠤꠞ ꠍꠣꠠꠣ ꠝꠄꠖꠣꠞ ꠈꠣꠁ ꠛꠘ, ꠀꠞ ꠀꠍꠟꠦꠃ ꠔ ꠔꠥꠝꠞꠣ ꠈꠣꠝꠤꠞ ꠍꠣꠠꠣ ꠎꠘ। ꠀꠎꠣꠖꠤ ꠁꠖꠞ ꠇꠥꠞꠛꠣꠘꠤꠞ ꠝꠦꠠꠣ-ꠛꠣꠁꠌ꠆ꠌꠣꠞ ꠟꠣꠈꠣꠘ ꠀꠝꠞꠣꠞ ꠟꠣꠉꠤ ꠀꠟ-ꠝꠍꠤꠞꠦꠅ ꠇꠥꠞꠛꠣꠘꠤ ꠖꠦꠅꠀ ꠅꠁꠍꠦ। ꠎꠣꠘ ꠔ, ꠢꠃ ꠁꠖꠅ ꠢꠇꠟ ꠟꠣꠈꠣꠘ ꠈꠣꠝꠤꠞ ꠞꠣꠈꠣ ꠢꠣꠞꠣꠝ।
1CO 5:8 ꠄꠞꠟꠣꠉꠤ ꠀꠅ, ꠀꠝꠞꠣꠅ ꠢꠃ ꠙꠥꠞꠣꠘ ꠈꠣꠝꠤꠞ, ꠝꠣꠘꠤ ꠁꠋꠡꠣ ꠀꠞ ꠈꠣꠞꠣꠙꠤꠞꠦ ꠛꠣꠖ ꠖꠤꠟꠣꠁ, ꠄꠞ ꠛꠖꠟꠣ ꠈꠣꠝꠤꠞ ꠍꠣꠠꠣ ꠞꠥꠐꠤ, ꠝꠣꠘꠤ ꠢꠇ ꠀꠞ ꠡꠣꠖꠣ ꠖꠤꠟꠦ ꠁꠖ ꠀꠖꠣꠄ ꠇꠞꠤ।
1CO 5:9 ꠀꠝꠤ ꠀꠉꠦ ꠔꠥꠝꠞꠣꠞꠦ ꠟꠦꠈꠍꠟꠣꠝ, ꠔꠥꠝꠞꠣ ꠘꠣꠚꠞꠝꠣꠘ ꠈꠛꠤꠍ ꠅꠇꠟꠞ ꠟꠉꠦ ꠡꠋ ꠗꠞꠤꠅ ꠘꠣ।
1CO 5:10 ꠀꠝꠤ ꠇꠁꠞꠣꠝ ꠘꠣ, ꠁ ꠎꠉꠔꠞ ꠈꠛꠤꠍ ꠝꠣꠘꠥꠡ, ꠟꠥꠜꠤ, ꠖꠈꠟꠛꠣꠎ ꠀꠞ ꠖꠦꠛ-ꠖꠦꠛꠤꠞ ꠙꠥꠎꠣ ꠇꠞꠞꠣꠞ ꠡꠋꠉꠅ ꠄꠇ꠆ꠇꠦꠞꠦ ꠍꠣꠠꠤ ꠖꠤꠔꠣꠄ। ꠁꠟꠣ ꠅꠁꠟꠦ ꠔ ꠔꠥꠝꠞꠣ ꠎꠉꠔꠞ ꠛꠣꠞꠦ ꠀꠞꠅ ꠇꠥꠘꠥꠈꠣꠘꠅ ꠎꠣꠁꠔꠦꠉꠤ ꠅꠁꠛ।
1CO 5:11 ꠅꠁꠟꠦ ꠀꠝꠤ ꠈꠣꠟꠤ ꠅꠈꠣꠘ ꠇꠁꠔꠣꠝ ꠌꠣꠁꠞꠣꠝ, ꠇꠦꠃ ꠎꠥꠖꠤ ꠘꠤꠎꠞꠦ ꠝꠥꠝꠤꠘ ꠇꠁꠀ ꠖꠣꠛꠤ ꠇꠞꠦ, ꠀꠞ ꠢꠦ ꠎꠤꠘꠣꠇꠥꠞ, ꠟꠥꠜꠤ, ꠖꠦꠛ-ꠖꠦꠛꠤꠞ ꠙꠥꠎꠣꠞꠤ, ꠉꠤꠛꠔ ꠉꠣꠅꠞꠣ, ꠝꠖꠈꠥꠞ, ꠛꠣ ꠌꠥꠞ-ꠒꠣꠇꠣꠁꠔ ꠅꠄ, ꠔꠦ ꠔꠣꠞ ꠡꠋ ꠗꠞꠤꠅ ꠘꠣ, ꠔꠣꠞ ꠟꠉꠦ ꠈꠣꠘꠣ-ꠙꠤꠘꠣꠅ ꠈꠣꠁꠅ ꠘꠣ।
1CO 5:12 ꠢꠥꠘꠅ, ꠀꠝꠣꠞ ꠅꠟꠣ ꠑꠦꠇꠣ ꠙꠠꠍꠦ ꠘꠤ, ꠁꠍꠣꠞ ꠔꠞꠤꠇꠣꠞ ꠛꠣꠁꠞꠞ ꠝꠣꠘꠡꠞ ꠛꠤꠌꠣꠞ ꠇꠞꠔꠣꠝ? ꠁꠔꠣꠞ ꠛꠤꠌꠣꠞ ꠀꠟ꠆ꠟꠣꠄꠃ ꠇꠞꠛꠣ। ꠅꠁꠟꠦ ꠔꠞꠤꠇꠣꠞ ꠜꠤꠔꠞꠞ ꠝꠣꠘꠡꠞ ꠛꠤꠌꠣꠞ ꠇꠞꠣ ꠔꠥꠝꠞꠣꠞ ꠇꠣꠝ ꠘꠣ ꠘꠤ? ꠔꠃꠞꠣꠔ ꠇꠤꠔꠣꠛꠅ ꠀꠍꠦ, “ꠢꠃ ꠘꠣꠚꠞꠝꠣꠘꠞꠦ ꠔꠥꠝꠞꠣꠞ ꠡꠝꠣꠎ ꠕꠣꠇꠤ ꠛꠣꠞ ꠇꠞꠤ ꠖꠦꠅ।”
1CO 6:1 ꠔꠥꠝꠞꠣ ꠇꠦꠃꠞꠞ ꠎꠥꠖꠤ ꠇꠥꠘꠥ ꠁꠝꠣꠘꠖꠣꠞ ꠜꠣꠁꠞ ꠛꠤꠙꠇ꠆ꠇꠦ ꠘꠣꠟꠤꠡ ꠕꠣꠇꠦ, ꠔꠦ ꠀꠟ꠆ꠟꠣꠞ ꠙꠣꠇ ꠛꠘ꠆ꠖꠣ ꠅꠇꠟꠞ ꠉꠦꠍꠦ ꠘꠣ ꠉꠤꠀ, ꠢꠦ ꠇꠥꠘ ꠡꠣꠅꠡꠦ ꠛꠣꠁꠞꠣ ꠝꠣꠘꠡꠞ ꠉꠦꠍꠦ ꠛꠤꠌꠣꠞ ꠌꠣꠄ?
1CO 6:2 ꠔꠥꠝꠞꠣ ꠎꠣꠘ ꠘꠣ ꠘꠤ, ꠅꠃ ꠙꠣꠇ ꠛꠘ꠆ꠖꠣ ꠅꠇꠟꠦꠃ ꠀꠡ꠆ꠔꠣ ꠎꠉꠔꠞ ꠛꠤꠌꠣꠞ ꠇꠞꠛꠣ? ꠀꠞ ꠀꠡ꠆ꠔꠣ ꠎꠉꠔꠞ ꠛꠤꠌꠣꠞ ꠇꠞꠔꠦ ꠙꠣꠞꠟꠦ ꠅꠃ ꠝꠣꠝꠥꠟꠤ ꠛꠦꠙꠣꠞꠞ ꠚꠄꠍꠣꠟꠣ ꠇꠞꠔꠣꠄ ꠙꠣꠞ ꠘꠣ ꠘꠤ?
1CO 6:3 ꠔꠥꠝꠞꠣ ꠎꠣꠘ ꠘꠣ ꠘꠤ, ꠀꠝꠞꠣ ꠚꠤꠞꠤꠡ꠆ꠔꠣ ꠅꠇꠟꠞꠅ ꠛꠤꠌꠣꠞ ꠇꠞꠝꠥ? ꠔꠦ ꠖꠥꠘꠤꠀꠞ ꠛꠦꠙꠣꠞ ꠔ ꠇꠥꠘ꠆ꠔꠣꠃ ꠘꠣꠄ!
1CO 6:4 ꠔꠥꠝꠞꠣꠞ ꠎꠦꠛꠟꠣ ꠅꠃ ꠟꠣꠈꠣꠘ ꠛꠤꠌꠣꠞ-ꠀꠌꠣꠞꠞ ꠎꠞꠥꠞ ꠅꠄ, ꠅꠃ ꠡꠝꠄ ꠎꠝꠣꠔꠞ ꠛꠣꠁꠞꠣ ꠝꠣꠘꠡꠞꠦ ꠇꠦꠘꠦ ꠛꠤꠌꠣꠞꠞ ꠡꠣꠟꠤꠡ ꠛꠣꠘꠣꠅ?
1CO 6:5 ꠀꠝꠤ ꠔ ꠔꠥꠝꠞꠣꠞꠦ ꠡꠞꠝ ꠖꠦꠅꠀꠞ ꠟꠣꠉꠤꠃ ꠟꠦꠈꠞꠣꠝ, ꠔꠥꠝꠞꠣꠞ ꠝꠣꠎꠦ ꠁꠟꠣ ꠀꠈꠟꠖꠣꠞ ꠡꠣꠟꠤꠡ ꠄꠇꠎꠘꠅ ꠘꠣꠁ ꠘꠤ, ꠎꠦꠁꠘ ꠔꠥꠝꠞꠣꠞ ꠘꠤꠎꠞ ꠝꠣꠎꠞ ꠉꠘ꠆ꠒꠉꠥꠟ ꠝꠤꠐ-ꠝꠣꠐ ꠇꠞꠔꠣ ꠙꠣꠞꠂꠘ?
1CO 6:6 ꠀꠝꠤ ꠖꠦꠈꠞꠣꠝ, ꠛꠤꠌꠣꠞꠞ ꠝꠎꠟꠤꠍꠅ ꠛꠁꠀꠅ ꠔꠥꠝꠞꠣ ꠜꠣꠁꠄ ꠜꠣꠁꠄ ꠇꠣꠁꠎ꠆ꠎꠣ ꠇꠞꠞꠣꠄ। ꠔꠣ-ꠅ ꠀꠛꠣꠞ ꠅ-ꠁꠝꠣꠘꠖꠣꠞꠞ ꠍꠣꠝꠘꠦ!
1CO 6:7 ꠀꠍꠟꠦ ꠔꠥꠝꠞꠣ ꠜꠣꠁꠄ ꠜꠣꠁꠄ ꠅꠃ ꠎꠦꠟꠣ ꠛꠤꠌꠣꠞ ꠡꠣꠟꠤꠡ ꠌꠣꠟꠣꠁꠞꠣꠄ, ꠁꠔꠣꠄ ꠔ ꠔꠥꠝꠞꠣꠞ ꠘꠤꠎꠞꠃ ꠈꠦꠔꠤ ꠅꠞ। ꠔꠥꠝꠞꠣ ꠁꠔꠣ ꠡꠁꠎ꠆ꠎ ꠇꠞꠅ ꠘꠣ ꠇꠦꠘꠦ ꠛꠣ ꠘꠤꠎꠦ ꠘꠤꠎꠦ ꠐꠉꠣ ꠈꠣꠅ ꠘꠣ ꠇꠦꠘꠦ?
1CO 6:8 ꠛꠞꠋ ꠔꠥꠝꠞꠣ ꠘꠤꠎꠦꠃ ꠔ ꠅꠁꠘ꠆ꠘꠣꠄ ꠇꠞꠞꠣꠄ, ꠝꠣꠘꠡꠞꠦ ꠐꠉꠤꠞꠣꠄ, ꠀꠞ ꠁꠔꠣ ꠘꠤꠎꠞ ꠜꠣꠁꠞ ꠟꠉꠦꠃ ꠇꠞꠞꠣꠄ!
1CO 6:9 ꠀꠍꠟꠦ ꠔꠥꠝꠞꠣ ꠎꠣꠘ ꠘꠣ ꠘꠤ, ꠀꠟ꠆ꠟꠣꠞ ꠛꠣꠖꠡꠣꠁꠔ ꠘꠣꠚꠞꠝꠣꠘ ꠈꠛꠤꠍ ꠅꠇꠟꠞ ꠇꠥꠘꠥ ꠑꠣꠁ ꠘꠣꠁ। ꠔꠦ ꠔꠥꠝꠞꠣꠞ ꠜꠥꠟ ꠌꠤꠘ꠆ꠔꠣ ꠖꠥꠞ ꠅꠃꠇ, ꠎꠦꠔꠣ ꠝꠣꠘꠡꠞ ꠡ꠆ꠛꠜꠣꠛ ꠈꠣꠞꠣꠙ, ꠎꠦꠔꠣꠄ ꠎꠤꠘꠣ ꠇꠞꠂꠘ, ꠝꠥꠞ꠆ꠔꠤꠙꠥꠎꠣ ꠇꠞꠂꠘ, ꠉꠣꠐꠥꠀ ꠘꠣꠌꠣꠁꠘ, ꠡꠝꠇꠣꠝꠤ,
1CO 6:10 ꠌꠥꠞꠤ, ꠟꠥꠜ-ꠟꠣꠟꠌꠤ, ꠝꠖꠈꠥꠞ, ꠉꠤꠛꠔ ꠉꠣꠅꠞꠣ ꠀꠞ ꠖꠈꠟꠛꠣꠎ, ꠁꠔꠣ ꠝꠣꠘꠡꠦ ꠔ ꠀꠟ꠆ꠟꠣꠞ ꠛꠣꠖꠡꠣꠁꠔ ꠑꠣꠁ ꠙꠣꠁꠔꠣ ꠘꠣꠄ।
1CO 6:11 ꠔꠥꠝꠞꠣꠞ ꠝꠣꠎꠞ ꠇꠥꠘꠥ ꠇꠥꠘꠥ ꠎꠘꠅ ꠀꠉꠦ ꠅꠟꠣ ꠀꠍꠟꠣꠄ, ꠅꠁꠟꠦ ꠝꠣꠟꠤꠇ ꠁꠍꠣ ꠀꠟ-ꠝꠍꠤꠞ ꠃꠍꠤꠟ꠆ꠟꠣꠄ ꠀꠞ ꠀꠝꠞꠣꠞ ꠀꠟ꠆ꠟꠣꠞ ꠞꠥꠢꠦ ꠔꠥꠝꠞꠣꠞꠦ ꠗꠁꠀ ꠍꠣꠚ ꠇꠞꠍꠦ, ꠔꠥꠝꠞꠣꠞꠦ ꠙꠛꠤꠔ꠆ꠞ ꠇꠞꠣ ꠅꠁꠍꠦ ꠀꠞ ꠛꠦ-ꠇꠍꠥꠞ ꠈꠣꠟꠣꠍ ꠇꠁꠀ ꠉꠁꠘ꠆ꠘ ꠇꠞꠣ ꠅꠁꠍꠦ।
1CO 6:12 ꠇꠥꠘꠥ ꠇꠥꠘꠥ ꠝꠣꠘꠡꠦ ꠇꠂꠘ, “ꠀꠝꠣꠞ ꠟꠣꠉꠤ ꠇꠥꠘ꠆ꠔꠣꠃ ꠢꠣꠞꠣꠝ ꠘꠣꠄ, ꠢꠇ꠆ꠇꠟꠔꠣꠃ ꠎꠣꠁꠎ।” ꠅꠁꠟꠦ ꠢꠇ꠆ꠇꠟꠔꠣ ꠎꠦꠘ ꠝꠣꠘꠡꠞ ꠟꠣꠉꠤ ꠃꠙꠇꠣꠞꠤ, ꠁꠟꠣ ꠌꠤꠘ꠆ꠔꠣ ꠑꠤꠇ ꠘꠣꠄ। ꠀꠝꠣꠞ ꠟꠣꠉꠤ ꠢꠇ꠆ꠇꠟꠔꠣ ꠎꠣꠁꠎ ꠅꠁꠟꠦꠅ, ꠀꠝꠤ ꠇꠥꠘ꠆ꠔꠣꠞ ꠉꠥꠟꠣꠝ ꠅꠁꠔꠣꠝ ꠘꠣꠄ।
1CO 6:13 ꠇꠦꠃ ꠇꠦꠃ ꠇꠂꠘ, “ꠙꠦꠐꠞ ꠟꠣꠉꠤ ꠈꠣꠘꠤ ꠀꠞ ꠈꠣꠘꠤꠞ ꠟꠣꠉꠤ ꠙꠦꠐ ꠖꠦꠅꠀ ꠅꠁꠍꠦ।” ꠈꠥꠛ ꠡꠥꠘ꠆ꠖꠞ ꠇꠕꠣ, ꠅꠁꠟꠦ ꠀꠟ꠆ꠟꠣꠄ ꠔ ꠁ ꠖꠥꠁꠅꠔꠣꠃ ꠛꠤꠘꠣꠡ ꠇꠞꠤꠟꠤꠛꠣ। ꠝꠘꠅ ꠞꠣꠈꠤꠅ, ꠡꠞꠤꠟ ꠔ ꠎꠤꠘꠣ ꠇꠞꠣꠞ ꠟꠣꠉꠤ ꠘꠣꠄ ꠛꠞꠋ ꠝꠣꠟꠤꠇ ꠁꠍꠣꠞ ꠟꠣꠉꠤꠃ, ꠀꠞ ꠝꠣꠟꠤꠇ ꠁꠍꠣ ꠡꠞꠤꠟꠞ ꠟꠣꠉꠤ।
1CO 6:14 ꠀꠟ꠆ꠟꠣꠄ ꠔꠣꠘ ꠇꠥꠖꠞꠔꠤ ꠛꠟꠦ ꠝꠣꠟꠤꠇ ꠁꠍꠣꠞꠦ ꠝꠥꠞ꠆ꠖꠣ ꠕꠣꠇꠤ ꠎꠤꠘ꠆ꠖꠣ ꠇꠞꠍꠂꠘ, ꠀꠞ ꠅꠃ ꠛꠟꠦ ꠀꠝꠞꠣꠞꠦꠅ ꠎꠤꠘ꠆ꠖꠣ ꠇꠞꠛꠣ।
1CO 6:15 ꠔꠥꠝꠞꠣ ꠎꠣꠘ ꠘꠣ ꠘꠤ, ꠔꠥꠝꠞꠣꠞ ꠡꠞꠤꠟ ꠅꠁꠟ ꠀꠟ-ꠝꠍꠤꠞ ꠡꠞꠤꠟꠞ ꠅꠋꠉ? ꠔꠦ ꠀꠟ-ꠝꠍꠤꠞ ꠡꠞꠤꠟꠞꠦ ꠀꠝꠤ ꠛꠖꠝꠣꠁꠡ ꠛꠦꠐꠤꠞ ꠡꠞꠤꠟꠞ ꠟꠉꠦ ꠝꠤꠟꠣꠁꠔꠣꠝ ꠘꠤ? ꠘꠣꠃꠎꠥꠛꠤꠟ꠆ꠟꠣ, ꠇꠥꠘꠥꠝꠘ꠆ꠔꠦꠃ ꠘꠣ!
1CO 6:16 ꠔꠥꠝꠞꠣ ꠛꠥꠎ ꠘꠣ ꠘꠤ, ꠎꠦ ꠛꠦꠐꠣꠄ ꠛꠖꠝꠣꠁꠡ ꠛꠦꠐꠤꠞ ꠟꠉꠦ ꠝꠤꠟꠣ-ꠝꠤꠡꠣ ꠇꠞꠦ, ꠔꠣꠞ ꠡꠞꠤꠟ ꠔ ꠅꠃ ꠛꠦꠐꠤꠞ ꠟꠉꠦ ꠄꠇꠈꠣꠘꠅ ꠝꠤꠟꠤꠎꠣꠄ। ꠎꠦꠟꠣ ꠙꠛꠤꠔ꠆ꠞ ꠔꠃꠞꠣꠔ ꠡꠞꠤꠚꠅ ꠟꠦꠈꠣ ꠀꠍꠦ, “ꠔꠣꠞꠣ ꠖꠥꠁꠅꠎꠘ ꠄꠇ ꠡꠞꠤꠟ ꠅꠁꠛꠣ।”
1CO 6:17 ꠅꠁꠟꠦ ꠎꠦ ꠎꠘ ꠝꠣꠟꠤꠇ ꠁꠍꠣꠞ ꠟꠉꠦ ꠝꠤꠟꠤꠎꠣꠄ, ꠢꠦ ꠔꠣꠘ ꠟꠉꠦ ꠞꠥꠢꠦꠅ ꠄꠇ ꠅꠁꠎꠣꠄ।
1CO 6:18 ꠜꠣꠁꠀꠁꠘꠞꠦ, ꠔꠥꠝꠞꠣ ꠢꠇꠟ ꠎꠣꠔꠞ ꠎꠤꠘꠣ ꠕꠣꠇꠤ ꠎꠣꠘ ꠛꠣꠌꠣꠅ। ꠝꠣꠘꠡꠦ ꠛꠣꠖ-ꠛꠣꠇꠤ ꠎꠔ ꠉꠥꠘꠣ ꠇꠞꠦ, ꠁꠔꠣ ꠡꠞꠤꠟꠞ ꠛꠣꠞꠦ ꠇꠞꠦ, ꠅꠁꠟꠦ ꠎꠦꠉꠤꠄ ꠎꠤꠘꠣ ꠇꠞꠦ, ꠢꠦ ꠔꠣꠞ ꠘꠤꠎꠞ ꠡꠞꠤꠟꠞ ꠛꠤꠞꠥꠖ꠆ꠖꠦ ꠉꠥꠘꠣ ꠇꠞꠦ।
1CO 6:19 ꠔꠥꠝꠞꠣ ꠛꠥꠎ ꠘꠣ ꠘꠤ, ꠔꠥꠝꠞꠣꠞ ꠡꠞꠤꠟ ꠅꠁꠟ ꠀꠟ꠆ꠟꠣꠁ ꠙꠣꠇ ꠞꠥꠢꠥꠞ ꠇꠣꠛꠣ ꠊꠞ, ꠅꠃ ꠞꠥꠢꠥꠞꠦ ꠔꠥꠝꠞꠣ ꠀꠟ꠆ꠟꠣꠞ ꠉꠦꠍ ꠕꠣꠇꠤ ꠙꠣꠁꠍ, ꠄꠁꠘ ꠔꠥꠝꠞꠣꠞ ꠖꠤꠟꠅ ꠛꠡꠔ ꠇꠞꠂꠘ। ꠔꠥꠝꠣꠞ ꠡꠞꠤꠟ ꠔ ꠔꠥꠝꠣꠞ ꠘꠤꠎꠞ ꠡꠝ꠆ꠙꠖ ꠘꠣꠄ।
1CO 6:20 ꠛꠃꠔ ꠖꠣꠝ ꠖꠤꠀ ꠔꠥꠝꠣꠞꠦ ꠈꠞꠤꠖ ꠇꠞꠣ ꠅꠁꠍꠦ। ꠄꠞꠟꠣꠉꠤ ꠔꠥꠝꠣꠞ ꠡꠞꠤꠟꠞꠦ ꠀꠟ꠆ꠟꠣꠞ ꠉꠃꠞꠛꠞ ꠇꠣꠝꠅ ꠟꠣꠉꠣꠅ।
1CO 7:1 ꠜꠣꠁꠀꠁꠘꠞꠦ, ꠔꠥꠝꠞꠣ ꠎꠦꠔꠣ ꠚꠔꠥꠀ ꠎꠣꠘꠣꠞ ꠟꠣꠉꠤ ꠀꠝꠣꠞ ꠉꠦꠍꠦ ꠟꠦꠈꠍ, ꠅꠈꠘ ꠅꠃ ꠛꠦꠙꠣꠞꠦ ꠇꠁꠞꠣꠝ। ꠔꠥꠝꠞꠣꠞ ꠇꠕꠣ ꠑꠤꠇ ꠀꠍꠦ, ꠝꠣꠘꠡꠞ ꠟꠣꠉꠤ ꠜꠣꠟꠣ ꠇꠣꠝ ꠅꠁꠟ ꠛꠤꠀ-ꠡꠣꠖꠤ ꠘꠣ ꠇꠞꠣ।
1CO 7:2 ꠅꠁꠟꠦ ꠡꠝꠣꠎꠞ ꠢꠣꠟꠔ ꠖꠦꠈꠤꠀ ꠀꠝꠤ ꠇꠁꠞꠣꠝ, ꠎꠤꠘꠣ ꠕꠣꠇꠤ ꠛꠣꠌꠤꠛꠣꠞ ꠟꠣꠉꠤ ꠙꠞꠔꠦꠇ ꠛꠦꠐꠣꠁꠘ꠆ꠔꠞ ꠛꠃ ꠕꠣꠇꠟꠦ ꠜꠣꠟꠣ, ꠀꠞ ꠙꠞꠔꠦꠇ ꠛꠦꠐꠤꠘ꠆ꠔꠞꠅ ꠎꠣꠝꠣꠁ ꠕꠣꠇꠟꠦ ꠜꠣꠟꠣ।
1CO 7:3 ꠢꠇꠟ ꠎꠣꠝꠣꠁꠄ ꠔꠣꠞ ꠛꠃꠞ ꠙꠣꠅꠘꠣ ꠢꠇ ꠀꠖꠣꠄ ꠇꠞꠃꠇ, ꠀꠞ ꠛꠃꠄꠅ ꠅꠟꠣ ꠎꠣꠝꠣꠁꠞ ꠙꠣꠅꠘꠣ ꠀꠖꠣꠄ ꠇꠞꠃꠇ।
1CO 7:4 ꠛꠃꠞ ꠡꠞꠤꠟ ꠔ ꠔꠣꠁꠞ ꠘꠤꠎꠞ ꠘꠣꠄ, ꠔꠣꠁꠞ ꠎꠣꠝꠣꠁꠞ। ꠅꠟꠣꠈꠣꠘ ꠎꠣꠝꠣꠁꠞ ꠡꠞꠤꠟꠅ ꠔꠣꠞ ꠘꠤꠎꠞ ꠘꠣꠄ, ꠔꠣꠞ ꠛꠃꠞ।
1CO 7:5 ꠎꠣꠝꠣꠁ-ꠛꠃꠄ ꠄꠇꠦ-ꠅꠁꠘ꠆ꠘꠞꠦ ꠘꠤꠞꠣꠡ ꠇꠞꠤꠅ ꠘꠣ, ꠈꠣꠟꠤ ꠈꠣꠍ ꠇꠥꠘꠥ ꠖꠥꠀ-ꠝꠥꠘꠣꠎꠣꠔꠞ ꠟꠣꠉꠤ ꠖꠥꠁꠅꠎꠘꠦ ꠙꠞꠣꠝꠤꠡ ꠇꠞꠤꠀ ꠇꠤꠍꠥ ꠡꠝꠄ ꠀꠟꠣꠖꠣ ꠞꠁꠔꠣꠄ ꠙꠣꠞ। ꠛꠣꠖꠦ ꠢꠤꠞꠛꠣꠞ ꠝꠤꠟꠤꠎꠤꠅ, ꠎꠣꠔꠦ ꠡꠞꠤꠟꠞ ꠈꠣꠁꠡꠞ ꠟꠣꠉꠤ ꠡꠄꠔꠣꠘꠦ ꠔꠥꠝꠞꠣꠞꠦ ꠉꠥꠘꠣꠞ ꠙꠕꠦ ꠐꠣꠘꠣꠞ ꠡꠥꠎꠥꠉ ꠘꠣ ꠙꠣꠄ।
1CO 7:6 ꠔꠦ ꠁ ꠛꠦꠙꠣꠞꠦ ꠀꠝꠤ ꠔꠥꠝꠞꠣꠞꠦ ꠇꠥꠘꠥ ꠢꠥꠇꠥꠝ ꠖꠤꠞꠣꠝ ꠘꠣ, ꠈꠣꠟꠤ ꠁꠎꠣꠎꠔ ꠖꠤꠞꠣꠝ।
1CO 7:7 ꠔꠣ-ꠅ ꠀꠝꠣꠞ ꠝꠘꠞ ꠀꠡꠣ ꠅꠁꠟ, ꠢꠇꠟ ꠝꠣꠘꠥꠡ ꠀꠝꠣꠞ ꠟꠣꠈꠣꠘ ꠀꠛꠤꠀꠔꠤ ꠞꠃꠇ! ꠅꠁꠟꠦ ꠀꠟ꠆ꠟꠣꠞ ꠉꠦꠍ ꠕꠣꠇꠤ ꠔ ꠄꠇꠅ ꠝꠣꠘꠡꠦ ꠄꠇꠅ ꠘꠝꠥꠘꠣꠞ ꠞꠢꠝ-ꠘꠤꠀꠝꠔ ꠙꠣꠁꠍꠂꠘ।
1CO 7:8 ꠔꠦ ꠠꠣꠠꠤ ꠛꠦꠐꠤꠘ꠆ꠔꠞꠦ ꠀꠞ ꠛꠃ ꠝꠞꠣ ꠛꠦꠐꠣꠁꠘ꠆ꠔꠞꠦ ꠀꠝꠤ ꠙꠞꠣꠝꠤꠡ ꠖꠤꠞꠣꠝ, ꠔꠣꠞꠣ ꠎꠥꠖꠤ ꠀꠝꠣꠞ ꠟꠣꠈꠣꠘ ꠞꠁꠔꠣ ꠙꠣꠞꠂꠘ, ꠔꠦ ꠜꠣꠟꠣ।
1CO 7:9 ꠅꠁꠟꠦ ꠘꠤꠎꠞꠦ ꠡꠣꠝꠟꠣꠁꠔꠦ ꠘꠣ ꠙꠣꠞꠟꠦ ꠔꠣꠞꠣ ꠛꠤꠀ-ꠡꠣꠖꠤ ꠇꠞꠃꠇ। ꠇꠣꠞꠘ ꠡꠞꠤꠟꠞ ꠈꠣꠁꠡꠦ ꠎꠟꠤꠀ-ꠙꠥꠠꠤꠀ ꠝꠞꠣ ꠕꠣꠇꠤ ꠛꠤꠀ-ꠡꠣꠖꠤ ꠇꠞꠣꠃ ꠜꠣꠟꠣ।
1CO 7:10 ꠀꠞ ꠎꠣꠝꠣꠁ-ꠛꠃꠞꠦ ꠀꠝꠤ ꠅꠃ ꠢꠥꠇꠥꠝ ꠖꠤꠞꠣꠝ, ꠛꠃꠄ ꠎꠣꠘꠥ ꠔꠣꠁꠞ ꠎꠣꠝꠣꠁ ꠍꠣꠠꠤꠀ ꠘꠣ ꠎꠣꠄ। ꠁ ꠢꠥꠇꠥꠝ ꠈꠣꠟꠤ ꠀꠝꠤ ꠖꠤꠞꠣꠝ ꠘꠣ, ꠡ꠆ꠛꠄꠅꠋ ꠝꠣꠟꠤꠇꠦꠃ ꠖꠤꠞꠣ।
1CO 7:11 ꠀꠞ ꠎꠥꠖꠤ ꠔꠣꠁ ꠢꠞꠤꠀ ꠎꠣꠄꠉꠤ, ꠔꠦ ꠖꠥꠍꠞꠣ ꠛꠤꠀ ꠘꠣ ꠛꠃꠇ, ꠛꠞꠋ ꠎꠣꠝꠣꠁꠞ ꠉꠦꠍꠦ ꠚꠤꠞꠤꠀ ꠀꠃꠇ। ꠅꠟꠣ ꠇꠥꠘꠥ ꠎꠣꠝꠣꠁꠄꠅ ꠔꠣꠞ ꠛꠃꠞꠦ ꠔꠣꠟꠣꠇ ꠘꠣ ꠖꠦꠃꠇ।
1CO 7:12 ꠅꠈꠘ ꠎꠦꠔꠣ ꠇꠁꠞꠣꠝ, ꠁꠔꠣ ꠔ ꠡꠞꠣꠡꠞꠤ ꠝꠣꠟꠤꠇꠞ ꠢꠥꠇꠥꠝ ꠘꠣꠄ, ꠔꠣꠘ ꠙꠇ꠆ꠇꠦ ꠀꠝꠤ ꠇꠁꠞꠣꠝ, ꠇꠥꠘꠥ ꠝꠥꠝꠤꠘ ꠜꠣꠁꠞ ꠛꠃ ꠎꠥꠖꠤ ꠁꠍꠣꠄꠁ ꠔꠞꠤꠇꠣꠞ ꠘꠣ ꠅꠁꠘ ꠀꠞ ꠔꠣꠁꠘ ꠎꠣꠝꠣꠁꠞ ꠟꠉꠦ ꠡꠋꠡꠣꠞ ꠇꠞꠔꠣ ꠌꠣꠁꠘ, ꠔꠦ ꠎꠣꠝꠣꠁꠄ ꠔꠣꠘꠞꠦ ꠔꠣꠟꠣꠇ ꠘꠣ ꠖꠦꠃꠇ।
1CO 7:13 ꠅꠃ ꠟꠣꠈꠣꠘ ꠇꠥꠘꠥ ꠛꠦꠐꠤ ꠝꠣꠘꠡꠞ ꠎꠣꠝꠣꠁꠅ ꠎꠥꠖꠤ ꠁꠍꠣꠄꠁ ꠔꠞꠤꠇꠣꠞ ꠘꠣ ꠅꠁꠘ, ꠀꠞ ꠎꠣꠝꠣꠁ ꠔꠣꠘ ꠟꠉꠦ ꠞꠁꠔꠣ ꠌꠣꠁꠘ, ꠔꠦ ꠛꠃꠄ ꠁ ꠎꠣꠝꠣꠁꠞꠦ ꠔꠣꠟꠣꠇ ꠘꠣ ꠖꠦꠃꠇ।
1CO 7:14 ꠇꠣꠞꠘ ꠅꠃ ꠛꠃꠞ ꠃꠍꠤꠟ꠆ꠟꠣꠄ ꠀꠟ꠆ꠟꠣꠄ ꠔꠣꠁꠞ ꠎꠣꠝꠣꠁꠞꠦ ꠙꠣꠇ-ꠙꠛꠤꠔ꠆ꠞ ꠇꠞꠍꠂꠘ ꠀꠞ ꠅꠃ ꠎꠣꠝꠣꠁꠞ ꠃꠍꠤꠟ꠆ꠟꠣꠄ ꠔꠣꠞ ꠛꠃꠞꠦꠅ ꠙꠣꠇ-ꠙꠛꠤꠔ꠆ꠞ ꠇꠞꠍꠂꠘ। ꠁꠟꠣ ꠘꠣ ꠅꠁꠟꠦ ꠔꠥꠝꠞꠣꠞ ꠢꠥꠞꠥꠔ꠆ꠔꠣꠁꠘ ꠔ ꠘꠣꠙꠣꠇ ꠅꠁꠟ ꠅꠘꠦ। ꠀꠍꠟꠦ ꠔ ꠀꠟ꠆ꠟꠣꠄ ꠅꠈꠘ ꠔꠣꠞꠣꠞꠦꠅ ꠙꠣꠇ-ꠙꠛꠤꠔ꠆ꠞ ꠝꠘꠅ ꠇꠞꠂꠘ।
1CO 7:15 ꠅꠁꠟꠦ ꠁꠍꠣꠄꠁ ꠔꠞꠤꠇꠣꠞ ꠛꠣꠁꠞꠣ ꠢꠃ ꠛꠃ ꠛꠣ ꠎꠣꠝꠣꠁ ꠎꠥꠖꠤ ꠄꠝꠘꠦꠃ ꠀꠟꠉ ꠅꠁꠎꠤꠔꠣ ꠌꠣꠁꠘ, ꠔꠦ ꠅꠁꠔꠣ ꠙꠣꠞꠛꠣ। ꠁꠟꠣ ꠢꠣꠟꠔꠦ ꠢꠃ ꠝꠥꠝꠤꠘ ꠜꠣꠁ ꠛꠣ ꠛꠁꠘ ꠛꠤꠀꠞ ꠇꠥꠘꠥ ꠛꠣꠘ꠆ꠖꠘꠞ ꠝꠣꠎꠦ ꠕꠣꠇꠂꠘ ꠘꠣ। ꠛꠥꠎꠞꠣꠄ ꠘꠤ, ꠀꠝꠞꠣ ꠡꠣꠘ꠆ꠔꠤꠄ ꠞꠅꠀꠞ ꠟꠣꠉꠤ ꠀꠟ꠆ꠟꠣꠄꠃ ꠀꠝꠞꠣꠞꠦ ꠖꠣꠅꠔ ꠖꠤꠍꠂꠘ।
1CO 7:16 ꠅ ꠛꠃ ꠅꠇꠟ, ꠔꠥꠝꠤ ꠇꠤꠟꠣ ꠛꠥꠎꠟꠣꠄ, ꠔꠥꠝꠣꠞ ꠎꠣꠝꠣꠁꠞ ꠎꠣꠘ ꠔꠥꠝꠤ ꠛꠣꠌꠣꠁꠔꠣꠄ ꠙꠣꠞꠔꠣꠄ ꠘꠣꠄ? ꠅ ꠎꠣꠝꠣꠁ ꠅꠇꠟ, ꠔꠥꠝꠤꠃ ꠛꠣ ꠇꠤꠟꠣ ꠛꠥꠎꠟꠣꠄ, ꠔꠥꠝꠣꠞ ꠛꠃꠞ ꠎꠣꠘ ꠔꠥꠝꠤ ꠛꠣꠌꠣꠁꠔꠣꠄ ꠙꠣꠞꠔꠣꠄ ꠘꠣꠄ?
1CO 7:17 ꠎꠣꠁ ꠅꠃꠇ, ꠝꠣꠟꠤꠇ ꠁꠍꠣꠄ ꠎꠣꠞꠦ ꠎꠦꠟꠣ ꠞꠣꠈꠍꠂꠘ, ꠀꠟ꠆ꠟꠣꠄ ꠎꠣꠞꠦ ꠎꠦꠟꠣ ꠖꠣꠅꠔ ꠖꠤꠍꠂꠘ, ꠢꠦ ꠅꠟꠣ ꠌꠟꠃꠇ। ꠢꠇꠟ ꠁꠍꠣꠄꠁ ꠎꠝꠣꠔꠞꠦ ꠀꠝꠤ ꠅꠃ ꠄꠇꠁ ꠢꠥꠇꠥꠝ ꠖꠤꠀꠞ।
1CO 7:18 ꠎꠦꠟꠣ, ꠝꠍꠟꠝꠣꠘꠤ ꠇꠣꠝ ꠇꠞꠣꠁꠟ ꠇꠥꠘꠥ ꠝꠣꠘꠡꠦ ꠁꠍꠣꠄꠁ ꠔꠞꠤꠇꠣ ꠇꠛꠥꠟ ꠇꠞꠟꠦ ꠢꠦ ꠔꠣꠞ ꠅꠃ ꠝꠍꠟꠝꠣꠘꠤꠞꠦ ꠅꠡ꠆ꠛꠤꠇꠣꠞ ꠘꠣ ꠇꠞꠃꠇ, ꠀꠞ ꠝꠍꠟꠝꠣꠘꠤ ꠘꠣ ꠇꠞꠣꠁꠟ ꠇꠥꠘꠥ ꠝꠣꠘꠡꠦ ꠁꠍꠣꠄꠁ ꠔꠞꠤꠇꠣ ꠇꠛꠥꠟ ꠇꠞꠟꠦ, ꠢꠦ ꠝꠍꠟꠝꠣꠘꠤ ꠘꠣ ꠇꠞꠃꠇ।
1CO 7:19 ꠝꠍꠟꠝꠣꠘꠤ ꠇꠣꠝ ꠇꠞꠣꠘꠤ ꠛꠣ ꠘꠣ ꠇꠞꠣꠘꠤ ꠁꠐꠣ ꠇꠥꠘꠥ ꠛꠠ ꠛꠦꠙꠣꠞ ꠘꠣꠄ, ꠀꠟ꠆ꠟꠣꠞ ꠢꠥꠇꠥꠝ-ꠀꠢꠇꠣꠝ ꠝꠣꠘꠣꠃ ꠅꠁꠟ ꠀꠍꠟ ꠇꠕꠣ।
1CO 7:20 ꠀꠟ꠆ꠟꠣꠄ ꠎꠣꠞꠦ ꠎꠦ ꠢꠣꠟꠔꠦ ꠖꠣꠅꠔ ꠖꠤꠍꠂꠘ, ꠢꠦ ꠅꠃ ꠢꠣꠟꠔꠦꠃ ꠕꠣꠇꠃꠇ।
1CO 7:21 ꠁꠍꠣꠄꠁ ꠔꠞꠤꠇꠣꠔ ꠀꠁꠛꠣꠞ ꠇꠣꠟꠅ ꠔꠥꠝꠤ ꠉꠥꠟꠣꠝ ꠀꠍꠟꠣꠄ ꠘꠤ? ꠔꠦ ꠁꠔꠣꠞ ꠟꠣꠉꠤ ꠛꠦꠎꠣꠞ ꠅꠁꠅ ꠘꠣ, ꠀꠞ ꠡ꠆ꠛꠣꠗꠤꠘ ꠅꠁꠔꠦ ꠙꠣꠞꠟꠦ ꠡ꠆ꠛꠣꠗꠤꠘ ꠅꠅ।
1CO 7:22 ꠉꠥꠟꠣꠝꠤ ꠇꠞꠣ ꠢꠣꠟꠔꠦ ꠝꠣꠟꠤꠇ ꠁꠍꠣꠄ ꠎꠣꠞꠦ ꠖꠣꠅꠔ ꠇꠞꠤ ꠀꠘꠍꠂꠘ, ꠢꠦ ꠔ ꠔꠣꠘ ꠖꠞꠛꠣꠞꠅ ꠡ꠆ꠛꠣꠗꠤꠘ ꠅꠁꠉꠦꠍꠦ। ꠀꠞ ꠡ꠆ꠛꠣꠗꠤꠘ ꠢꠣꠟꠔ ꠕꠣꠇꠤ ꠎꠣꠞꠦ ꠖꠣꠅꠔ ꠇꠞꠤ ꠀꠘꠍꠂꠘ, ꠢꠦ ꠔ ꠀꠟ-ꠝꠍꠤꠞ ꠉꠥꠟꠣꠝ ꠛꠘꠤꠉꠦꠍꠦ।
1CO 7:23 ꠜꠣꠁꠀꠁꠘꠞꠦ, ꠔꠥꠝꠞꠣꠞꠦ ꠛꠃꠔ ꠖꠣꠝꠖꠤ ꠈꠞꠤꠖ ꠇꠞꠣ ꠅꠁꠍꠦ, ꠄꠞꠟꠣꠉꠤ ꠝꠣꠘꠡꠞ ꠉꠥꠟꠣꠝ ꠛꠘꠤꠅ ꠘꠣ।
1CO 7:24 ꠀꠟ꠆ꠟꠣꠄ ꠎꠣꠞꠦ ꠎꠦ ꠢꠣꠟꠔꠦ ꠖꠣꠅꠔ ꠖꠤꠍꠂꠘ, ꠀꠟ꠆ꠟꠣꠞ ꠖꠞꠛꠣꠞꠅ ꠢꠦ ꠅꠟꠣꠃ ꠞꠃꠇ।
1CO 7:25 ꠅꠈꠘ ꠀꠝꠤ ꠀꠛꠤꠀꠔꠤ ꠙꠥꠠꠤꠘ꠆ꠔꠞ ꠝꠥꠍꠟꠣꠞ ꠛꠦꠙꠣꠞꠦ ꠇꠁꠞꠣꠝ। ꠁ ꠛꠦꠙꠣꠞꠦ ꠝꠣꠟꠤꠇꠞ ꠉꠦꠍ ꠕꠣꠇꠤ ꠀꠝꠤ ꠡꠞꠣꠡꠞꠤ ꠇꠥꠘꠥ ꠢꠥꠇꠥꠝ ꠙꠣꠁꠍꠤ ꠘꠣ, ꠅꠁꠟꠦ ꠀꠟ꠆ꠟꠣꠞ ꠞꠢꠝꠔꠦ ꠢꠇ-ꠢꠣꠟꠣꠟ ꠞꠁꠀ ꠀꠝꠤ ꠀꠝꠣꠞ ꠝꠔꠣꠝꠔ ꠎꠣꠘꠣꠁꠞꠣꠝ।
1CO 7:26 ꠅꠃ ꠀꠈꠦꠞꠤ ꠎꠝꠣꠘꠣꠔ ꠎꠦꠟꠣ ꠝꠍꠤꠛꠔ ꠀꠁꠀ ꠀꠎꠤꠍꠦ, ꠀꠝꠣꠞ ꠝꠘꠦ ꠅꠞ ꠔꠥꠝꠞꠣ ꠎꠦꠁꠘ ꠎꠦꠟꠣ ꠀꠍ, ꠅꠟꠣꠃ ꠞꠅ।
1CO 7:27 ꠔꠥꠝꠣꠞ ꠎꠥꠖꠤ ꠛꠃ ꠕꠣꠇꠦ, ꠔꠦ ꠔꠣꠁꠞꠦ ꠔꠣꠟꠣꠇ ꠖꠤꠅ ꠘꠣ, ꠀꠞ ꠛꠃ ꠘꠣ ꠕꠣꠇꠟꠦ ꠛꠤꠀ-ꠡꠣꠖꠤ ꠇꠞꠣꠔꠅ ꠟꠣꠉꠤꠅ ꠘꠣ।
1CO 7:28 ꠅꠁꠟꠦ ꠛꠤꠀ ꠇꠞꠟꠦ ꠇꠥꠘꠥ ꠉꠥꠘꠣ ꠅꠁꠔ ꠘꠣꠄ, ꠀꠞ ꠇꠥꠘꠥ ꠀꠛꠤꠀꠔꠤ ꠙꠥꠠꠤ ꠛꠤꠀ ꠛꠁꠟꠦ ꠔꠣꠁꠞꠅ ꠉꠥꠘꠣ ꠅꠁꠔ ꠘꠣꠄ। ꠈꠣꠟꠤ ꠎꠉꠔꠅ ꠔꠣꠞꠣꠞ ꠇꠡ꠆ꠐ ꠛꠣꠠꠤꠛ, ꠅꠃ ꠇꠡ꠆ꠐ ꠕꠣꠇꠤ ꠀꠝꠤ ꠔꠥꠝꠞꠣꠞꠦ ꠛꠣꠌꠣꠁꠔꠣꠝ ꠌꠣꠁꠞꠣꠝ।
1CO 7:29 ꠜꠣꠁ ꠅꠇꠟ, ꠀꠝꠤ ꠇꠁꠔꠣꠝ ꠌꠣꠁꠞꠣꠝ, ꠝꠣꠟꠤꠇ ꠁꠍꠣꠄ ꠈꠥꠛ ꠎꠟꠖꠤ ꠔꠡꠞꠤꠚ ꠀꠘꠞꠣ, ꠛꠦꠡꠤ ꠖꠦꠞꠤ ꠘꠣꠄ। ꠄꠞꠟꠣꠉꠤ ꠅꠈꠘ ꠕꠣꠇꠤ ꠅꠃꠟꠣ ꠝꠘꠅ ꠇꠞꠤꠅ, ꠎꠦꠞꠣꠞ ꠛꠃ-ꠛꠣꠁꠌ꠆ꠌꠣ ꠀꠍꠦ, ꠝꠘꠅ ꠇꠞꠤꠅ ꠛꠃ-ꠛꠣꠁꠌ꠆ꠌꠣ ꠘꠣꠁ।
1CO 7:30 ꠎꠦꠞꠣ ꠖꠥꠈ-ꠝꠍꠤꠛꠔꠅ ꠀꠍꠂꠘ, ꠔꠣꠞꠣ ꠝꠘꠦ ꠇꠞꠃꠇ꠆ꠇꠣ ꠇꠥꠘꠥ ꠖꠥꠈ-ꠝꠍꠤꠛꠔ ꠘꠣꠁ, ꠎꠦꠞꠣ ꠈꠥꠡꠤ-ꠛꠣꠡꠤ ꠇꠞꠞꠣ, ꠔꠣꠞꠣ ꠝꠘꠦ ꠇꠞꠃꠇ꠆ꠇꠣ ꠇꠥꠘꠥ ꠈꠥꠡꠤ-ꠛꠣꠡꠤ ꠘꠣꠁ, ꠀꠞ ꠎꠣꠞꠣ ꠈꠞꠤꠖ-ꠛꠤꠇꠤ ꠇꠞꠦꠞ, ꠔꠣꠞꠣꠅ ꠝꠘꠦ ꠇꠞꠃꠇ꠆ꠇꠣ, ꠁꠔꠣ ꠝꠣꠟꠞ ꠃꠙꠞꠦ ꠔꠣꠞꠣꠞ ꠇꠥꠘꠥ ꠖꠣꠛꠤ-ꠖꠣꠅꠀ ꠘꠣꠁ।
1CO 7:31 ꠎꠦꠞꠣ ꠎꠉꠔ-ꠡꠋꠡꠣꠞ ꠟꠁꠀ ꠛꠦꠡ꠆ꠔ, ꠔꠣꠞꠣꠞ ꠜꠣꠛ ꠎꠣꠘꠥ ꠙꠥꠞꠣꠙꠥꠞ ꠡꠋꠡꠣꠞꠤ ꠘꠣ ꠅꠄ, ꠇꠣꠞꠘ ꠜꠛꠞ ꠛꠣꠎꠣꠞ ꠔ ꠡꠣꠋꠉ ꠅꠁꠎꠣꠞ।
1CO 7:32 ꠀꠝꠤ ꠌꠣꠁꠞꠣꠝ, ꠔꠥꠝꠞꠣꠞꠦ ꠢꠇꠟ ꠘꠝꠥꠘꠣꠞ ꠌꠤꠘ꠆ꠔꠣ-ꠜꠣꠛꠘꠣ ꠕꠣꠇꠤ ꠢꠞꠣꠁ ꠞꠣꠈꠔꠣꠝ। ꠇꠣꠞꠘ ꠀꠛꠤꠀꠔꠤ ꠛꠦꠐꠣꠁꠘ꠆ꠔꠦ ꠌꠤꠘ꠆ꠔꠣ ꠇꠞꠂꠘ ꠝꠣꠟꠤꠇꠞ ꠛꠦꠙꠣꠞꠦ, ꠇꠤꠟꠣ ꠝꠣꠟꠤꠇ ꠝꠃꠟꠣꠞꠦ ꠈꠥꠡꠤ ꠞꠣꠈꠣ ꠎꠣꠄ।
1CO 7:33 ꠅꠁꠟꠦ ꠛꠤꠀꠔꠤ ꠝꠣꠘꠡꠦ ꠌꠤꠘ꠆ꠔꠣ ꠇꠞꠂꠘ ꠡꠋꠡꠣꠞꠞ ꠛꠦꠙꠣꠞꠦ, ꠇꠤꠟꠣ ꠊꠞꠞ ꠛꠃ-ꠛꠣꠁꠌ꠆ꠌꠣꠞꠦ ꠈꠥꠡꠤ ꠞꠣꠈꠣ ꠎꠣꠄ,
1CO 7:34 ꠄꠞꠟꠣꠉꠤ ꠔꠣꠞꠣꠞ ꠝꠘ ꠖꠥ-ꠐꠣꠘꠣꠔ ꠙꠠꠤ ꠎꠣꠄ। ꠅꠃꠟꠣ ꠀꠛꠤꠀꠔꠤ ꠛꠦꠐꠤ ꠀꠞ ꠙꠥꠠꠤꠘ꠆ꠔꠦ ꠌꠤꠘ꠆ꠔꠣ ꠇꠞꠂꠘ ꠝꠣꠟꠤꠇꠞ ꠛꠦꠙꠣꠞꠦ, ꠇꠤꠟꠣ ꠝꠣꠟꠤꠇ ꠝꠃꠟꠣꠞꠦ ꠈꠥꠡꠤ ꠞꠣꠈꠣ ꠎꠣꠄ, ꠎꠣꠔꠦ ꠔꠣꠞꠣꠞ ꠡꠞꠤꠟ ꠀꠞ ꠝꠘ ꠙꠣꠇ-ꠙꠛꠤꠔ꠆ꠞ ꠕꠣꠇꠦ। ꠅꠁꠟꠦ ꠛꠤꠀꠔꠤ ꠛꠦꠐꠤꠘ꠆ꠔꠦ ꠌꠤꠘ꠆ꠔꠣ ꠇꠞꠂꠘ ꠡꠋꠡꠣꠞꠞ ꠛꠦꠙꠣꠞꠦ, ꠇꠤꠟꠣ ꠎꠣꠝꠣꠁꠞꠦ ꠈꠥꠡꠤ ꠞꠣꠈꠣ ꠎꠣꠄ।
1CO 7:35 ꠛꠥꠎꠞꠣꠄ ꠘꠤ, ꠅꠃ ꠔꠣꠟꠤꠝ ꠅꠇꠟ ꠔ ꠔꠥꠝꠞꠣꠞ ꠜꠣꠟꠣꠁꠞ ꠟꠣꠉꠤ ꠇꠁꠞꠣꠝ। ꠀꠝꠤ ꠔꠥꠝꠞꠣꠞ ꠉꠟꠣꠔ ꠇꠥꠘꠥ ꠚꠣꠡ ꠟꠣꠉꠣꠁꠔꠣꠝ ꠌꠣꠁꠞꠣꠝ ꠘꠣ, ꠈꠣꠟꠤ ꠇꠁꠔꠣꠝ ꠌꠣꠁꠞꠣꠝ, ꠔꠥꠝꠞꠣ ꠘꠦꠇ ꠙꠕꠦ ꠌꠟꠅ ꠀꠞ ꠖꠤꠟꠦ-ꠎꠣꠘꠦ ꠝꠣꠟꠤꠇ ꠝꠃꠟꠣꠞ ꠀꠡꠤꠇ ꠅꠅ।
1CO 7:36 ꠇꠥꠘꠥ ꠝꠣꠘꠡꠦ ꠎꠥꠖꠤ ꠝꠘꠅ ꠇꠞꠦ, ꠢꠦ ꠔꠣꠞ ꠀꠛꠤꠀꠔꠤ ꠙꠥꠠꠤꠞ ꠖꠣꠄ-ꠖꠣꠄꠁꠔ꠆ꠔ ꠀꠖꠣꠄ ꠇꠞꠦꠞ ꠘꠣ, ꠙꠥꠠꠤꠞ ꠛꠤꠀꠞ ꠛꠄꠅꠡ ꠙꠣꠞ ꠅꠁꠎꠣꠞ ꠇꠞꠤ, ꠢꠦ ꠙꠥꠠꠤꠞꠦ ꠛꠤꠀ ꠖꠦꠅꠀ ꠎꠞꠥꠞ ꠝꠘꠅ ꠇꠞꠦ, ꠔꠦ ꠔꠣꠞ ꠈꠥꠡꠤ ꠝꠣꠚꠤꠇ ꠙꠥꠠꠤꠞꠦ ꠛꠤꠀ ꠖꠦꠃꠇ। ꠄꠔꠦ ꠇꠥꠘꠥ ꠉꠥꠘꠣ ꠅꠁꠔ ꠘꠣꠄ।
1CO 7:37 ꠅꠁꠟꠦ ꠎꠦ ꠝꠣꠘꠡꠞ ꠝꠘ ꠕꠤꠞ ꠀꠍꠦ, ꠎꠣꠞ ꠝꠘꠅ ꠇꠥꠘꠥ ꠅꠡꠣꠘ꠆ꠔꠤ ꠘꠣꠁ, ꠢꠦ ꠔꠣꠞ ꠘꠤꠎꠞ ꠝꠘꠞꠦ ꠡꠣꠝꠟꠣꠁꠀ ꠇꠣꠝ ꠇꠞꠦ, ꠁ ꠝꠣꠘꠡꠦ ꠎꠥꠖꠤ ꠝꠘꠦ ꠇꠞꠦ ꠔꠣꠞ ꠙꠥꠠꠤꠞ ꠛꠤꠀ-ꠡꠣꠖꠤ ꠎꠞꠥꠞ ꠘꠣꠄ, ꠔꠦ ꠢꠦ ꠑꠤꠇ ꠇꠣꠝꠃ ꠇꠞꠦꠞ।
1CO 7:38 ꠅꠈꠘ ꠛꠥꠎꠣ ꠎꠣꠞ, ꠎꠦ ꠎꠘꠦ ꠔꠣꠞ ꠙꠥꠠꠤꠞꠦ ꠛꠤꠀ-ꠡꠣꠖꠤ ꠖꠦꠄ, ꠢꠦ ꠘꠦꠇ ꠇꠣꠝ ꠇꠞꠦ ꠀꠞ ꠎꠦ ꠎꠘꠦ ꠔꠣꠞ ꠙꠥꠠꠤꠞꠦ ꠀꠛꠤꠀꠔꠤ ꠢꠣꠟꠔꠦ ꠞꠣꠈꠦ, ꠢꠦ ꠀꠞꠅ ꠛꠦꠡꠤ ꠘꠦꠇ ꠇꠣꠝ ꠇꠞꠦ।
1CO 7:39 ꠎꠣꠝꠣꠁ ꠎꠔꠖꠤꠘ ꠎꠤꠘ꠆ꠖꠣ ꠕꠣꠇꠂꠘ, ꠅꠔꠖꠤꠘ ꠛꠃ ꠎꠣꠝꠣꠁꠞ ꠛꠣꠘ꠆ꠖꠘꠅ ꠕꠣꠇꠂꠘ। ꠅꠁꠟꠦ ꠎꠣꠝꠣꠁ ꠝꠣꠞꠣ ꠉꠦꠟꠦ ꠛꠃꠄ ꠈꠣꠟꠣꠍ ꠙꠣꠁꠘ, ꠀꠞ ꠘꠤꠎꠞ ꠙꠍꠘ꠆ꠖ ꠝꠣꠚꠤꠇ ꠁꠍꠣꠄꠁ ꠔꠞꠤꠇꠣꠞ ꠎꠦꠇꠥꠘꠥ ꠎꠘꠞ ꠉꠦꠍꠦ ꠛꠤꠀ ꠛꠁꠔꠣ ꠙꠣꠞꠂꠘ।
1CO 7:40 ꠔꠣ-ꠅ ꠀꠝꠤ ꠝꠘꠅ ꠇꠞꠤ, ꠔꠣꠁꠘ ꠠꠣꠠꠤ ꠢꠣꠟꠔꠦ ꠞꠁꠟꠦꠃ ꠀꠞꠅ ꠜꠣꠟꠣ। ꠀꠝꠤ ꠛꠥꠎꠞꠣꠝ, ꠀꠝꠤ ꠅꠃ ꠢꠇ꠆ꠇꠟꠔꠣ ꠀꠟ꠆ꠟꠣꠁ ꠞꠥꠢꠥꠞ ꠛꠟꠦ ꠇꠁꠞꠣꠝ।
1CO 8:1 ꠢꠥꠘꠅ, ꠅꠈꠘ ꠀꠝꠤ ꠖꠦꠛꠔꠣꠞ ꠘꠣꠝꠦ ꠛꠤꠟꠣꠁ ꠖꠦꠅꠀ ꠙꠡꠣꠖꠞ ꠝꠥꠍꠟꠣꠞ ꠇꠕꠣ ꠇꠁꠞꠣꠝ। ꠀꠝꠞꠣ ꠔ ꠎꠣꠘꠤ, ꠀꠝꠞꠣ ꠢꠇꠟꠞꠃ ꠀꠈꠟ-ꠛꠥꠖ꠆ꠖꠤ ꠀꠍꠦ। ꠅꠁꠟꠦ ꠀꠈꠟꠦ ꠛꠠꠣꠁ ꠛꠣꠠꠦ, ꠀꠞ ꠝꠢꠛ꠆ꠛꠔꠦ ꠝꠣꠘꠥꠡ ꠉꠠꠦ।
1CO 8:2 ꠇꠦꠃ ꠎꠥꠖꠤ ꠘꠤꠎꠞꠦ ꠡꠤꠀꠘ ꠝꠘꠅ ꠇꠞꠦ, ꠔꠦ ꠎꠔꠈꠣꠘ ꠡꠤꠀꠘ ꠅꠀ ꠎꠞꠥꠞ, ꠅꠔꠈꠣꠘ ꠔ ꠅꠁꠍꠦ ꠘꠣ।
1CO 8:3 ꠅꠁꠟꠦ ꠎꠦ ꠎꠘꠦ ꠀꠟ꠆ꠟꠣꠞꠦ ꠝꠢꠛ꠆ꠛꠔ ꠇꠞꠦ, ꠀꠟ꠆ꠟꠣ ꠙꠣꠇꠦ ꠔ ꠔꠣꠞꠦ ꠌꠤꠘꠂꠘ।
1CO 8:4 ꠔꠦ ꠖꠦꠛꠔꠣꠞ ꠘꠣꠝꠦ ꠛꠤꠟꠣꠁ ꠖꠦꠅꠀ ꠙꠡꠣꠖꠞ ꠛꠦꠙꠣꠞꠦ ꠇꠁꠞꠣꠝ, ꠀꠝꠞꠣ ꠎꠣꠘꠤ, ꠖꠦꠛꠔꠣ ꠛꠟꠔꠦ ꠁ ꠎꠉꠔꠅ ꠇꠥꠘ꠆ꠔꠣꠃ ꠘꠣꠁ, ꠄꠇ ꠀꠟ꠆ꠟꠣ ꠍꠣꠠꠣ ꠖꠥꠍꠞꠣ ꠇꠥꠘ꠆ꠔꠣꠃ ꠘꠣꠁ।
1CO 8:5 ꠀꠍꠝꠣꠘꠅ ꠛꠣ ꠎꠝꠤꠘꠅ ꠎꠦꠇꠥꠘꠥ ꠎꠣꠉꠣꠔ, ꠖꠦꠛ-ꠖꠦꠛꠤ ꠘꠣꠝꠦ ꠎꠥꠖꠤ ꠇꠥꠘ꠆ꠔꠣ ꠕꠣꠇꠤꠀ ꠕꠣꠇꠦ, ꠔꠦ ꠛꠃꠔ ꠖꠦꠛꠔꠣ ꠀꠞ ꠛꠃꠔ ꠝꠥꠘꠤꠛ ꠀꠍꠂꠘ।
1CO 8:6 ꠅꠁꠟꠦ ꠀꠝꠞꠣꠞ ꠎꠣꠘꠣ ꠝꠔꠦ ꠈꠣꠟꠤ ꠄꠇ ꠀꠟ꠆ꠟꠣ ꠀꠍꠂꠘ, ꠔꠣꠁꠘꠃ ꠀꠝꠞꠣꠞ ꠉꠣꠁꠛꠤ ꠛꠣꠚ। ꠔꠣꠘ ꠀꠔꠦ ꠢꠇ꠆ꠇꠟꠔꠣ ꠙꠄꠖꠣ ꠅꠁꠍꠦ, ꠔꠣꠘ ꠟꠣꠉꠤꠃ ꠀꠝꠞꠣ ꠛꠣꠌꠤꠀ ꠀꠍꠤ। ꠑꠤꠇ ꠅꠃꠟꠣ ꠀꠝꠞꠣꠞ ꠝꠣꠟꠤꠇꠅ ꠈꠣꠟꠤ ꠄꠇꠎꠘ, ꠔꠣꠘ ꠘꠣꠝ ꠁꠍꠣ ꠀꠟ-ꠝꠍꠤ। ꠔꠣꠘ ꠃꠍꠤꠟ꠆ꠟꠣꠄ ꠢꠇ꠆ꠇꠟꠔꠣ ꠙꠄꠖꠣ ꠅꠁꠍꠦ, ꠀꠝꠞꠣ ꠈꠣꠟꠤ ꠔꠣꠘ ꠟꠣꠉꠤꠃ ꠐꠤꠇꠤꠀ ꠀꠍꠤ।
1CO 8:7 ꠁꠔꠣ ꠛꠥꠎꠣꠞ ꠀꠈꠟ ꠔ ꠢꠇꠟ ꠝꠣꠘꠡꠞ ꠘꠣꠁ। ꠇꠥꠘꠥ ꠇꠥꠘꠥ ꠎꠘꠦ ꠀꠉꠦ ꠖꠦꠛꠔꠣꠞꠦ ꠜꠎꠘꠣ ꠇꠞꠔ, ꠄꠞꠟꠣꠉꠤ ꠔꠣꠞꠣ ꠅꠈꠘ ꠖꠦꠛꠔꠣꠞ ꠘꠣꠝꠦ ꠛꠤꠟꠣꠁ ꠖꠦꠅꠀ ꠙꠡꠣꠖ ꠈꠣꠁꠟꠦ, ꠔꠣꠞꠣꠞ ꠛꠤꠛꠦꠇꠞ ꠇꠝꠎꠥꠞꠤꠄ ꠔꠣꠞꠦ ꠇꠟꠋꠇꠤ ꠛꠣꠘꠣꠄ।
1CO 8:8 ꠀꠍꠟꠦ ꠇꠥꠘꠥ ꠘꠝꠥꠘꠣꠞ ꠈꠣꠘꠤꠞ ꠛꠟꠦꠃ ꠀꠝꠞꠣ ꠀꠟ꠆ꠟꠣꠞ ꠖꠞꠛꠣꠞꠅ ꠇꠛꠥꠟ ꠅꠁ ꠘꠣ। ꠈꠣꠘꠤ ꠘꠣ ꠈꠣꠁꠟꠦꠅ ꠀꠝꠞꠣꠞ ꠁꠝꠣꠘꠞ ꠈꠦꠔꠤ ꠅꠄ ꠘꠣ, ꠀꠞ ꠈꠣꠁꠟꠦꠅ ꠇꠥꠘꠥ ꠟꠣꠜ ꠅꠄ ꠘꠣ।
1CO 8:9 ꠅꠁꠟꠦ ꠢꠥꠡꠤꠀꠞ ꠞꠁꠅ, ꠔꠥꠝꠞꠣꠞ ꠅꠃ ꠡ꠆ꠛꠣꠗꠤꠘꠔꠣ ꠇꠥꠘꠥꠝꠘ꠆ꠔꠦꠃ ꠎꠣꠘꠥ ꠇꠝꠎꠥꠞ ꠁꠝꠣꠘꠖꠣꠞꠞ ꠟꠣꠉꠤ ꠉꠥꠘꠣꠞ ꠇꠣꠞꠘ ꠘꠣ ꠅꠄ।
1CO 8:10 ꠔꠥꠝꠣꠞ ꠔ ꠀꠈꠟ-ꠛꠤꠛꠦꠇ ꠀꠍꠦ, ꠅꠁꠟꠦ ꠎꠣꠞ ꠛꠤꠛꠦꠇ ꠇꠝꠎꠥꠞ, ꠢꠦ ꠎꠥꠖꠤ ꠔꠥꠝꠣꠞꠦ ꠖꠦꠛꠔꠣꠞ ꠝꠘ꠆ꠖꠤꠞꠅ ꠛꠁꠀ ꠙꠡꠣꠖ ꠈꠣꠅꠀꠔ ꠖꠦꠈꠦ, ꠔꠦ ꠢꠦ-ꠅ ꠅꠃ ꠙꠡꠣꠖ ꠈꠣꠁꠔ ꠘꠣꠄ ꠘꠤ?
1CO 8:11 ꠀꠞ ꠅꠃ ꠇꠝꠎꠥꠞ ꠜꠣꠁꠞꠦ ꠛꠣꠌꠣꠘꠤꠞ ꠟꠣꠉꠤꠃ ꠔ ꠀꠟ-ꠝꠍꠤꠄ ꠎꠣꠘ ꠇꠥꠞꠛꠣꠘꠤ ꠖꠤꠍꠟꠣ, ꠅꠈꠘ ꠔꠥꠝꠣꠞ ꠅꠃ ꠀꠈꠟꠦ ꠔꠣꠞ ꠁꠝꠣꠘꠞ ꠡꠞ꠆ꠛꠘꠣꠡ ꠅꠞ।
1CO 8:12 ꠅꠟꠣꠈꠣꠘ ꠔꠥꠝꠞꠣ ꠎꠦꠛꠟꠣ ꠔꠥꠝꠞꠣꠞ ꠝꠥꠝꠤꠘ ꠜꠣꠁꠀꠁꠘ꠆ꠔꠞ ꠟꠉꠦ ꠉꠥꠘꠣꠞ ꠇꠣꠝ ꠇꠞ, ꠔꠣꠞꠣꠞ ꠇꠝꠎꠥꠞ ꠛꠤꠛꠦꠇꠞꠦ ꠖꠥꠈ ꠖꠦꠅ, ꠅꠃ ꠡꠝꠄ ꠔꠥꠝꠞꠣ ꠀꠟ-ꠝꠍꠤꠞ ꠛꠤꠞꠥꠖ꠆ꠖꠦꠃ ꠉꠥꠘꠣ ꠇꠞ।
1CO 8:13 ꠄꠞꠟꠣꠉꠤ ꠀꠝꠤ ꠇꠁꠞꠣꠝ, ꠈꠣꠘꠣ-ꠙꠤꠘꠣꠞ ꠇꠣꠞꠘꠦ ꠎꠥꠖꠤ ꠀꠝꠣꠞ ꠜꠣꠁꠞ ꠁꠝꠣꠘꠞ ꠈꠦꠔꠤ ꠅꠄ, ꠔꠦ ꠔꠣꠞꠦ ꠉꠥꠘꠣ ꠕꠣꠇꠤ ꠛꠣꠌꠣꠘꠤꠞ ꠟꠣꠉꠤ ꠀꠝꠤ ꠉꠥꠡ꠆ꠔ ꠈꠣꠅꠀꠅ ꠄꠇ꠆ꠇꠦꠞꠦ ꠛꠣꠖ ꠖꠤꠟꠣꠁꠝꠥ।
1CO 9:1 ꠜꠣꠁꠀꠁꠘꠞꠦ, ꠀꠝꠤ ꠇꠤꠔꠣ ꠡ꠆ꠛꠣꠗꠤꠘ ꠘꠣꠄ ꠘꠤ? ꠀꠝꠤ ꠇꠥꠘꠥ ꠍꠣꠢꠣꠛꠤ ꠘꠣꠄ ꠘꠤ? ꠀꠝꠤ ꠇꠥꠘꠥ ꠀꠝꠞꠣꠞ ꠝꠣꠟꠤꠇ ꠁꠍꠣꠞꠦ ꠖꠦꠈꠍꠤ ꠘꠣ ꠘꠤ? ꠝꠣꠟꠤꠇꠞ ꠟꠣꠉꠤ ꠀꠝꠤ ꠎꠦ ꠔꠛꠟꠤꠉ ꠇꠣꠝ ꠇꠞꠍꠤ, ꠁꠔꠣꠞ ꠚꠟ ꠔꠥꠝꠞꠣ ꠘꠣꠄ ꠘꠤ?
1CO 9:2 ꠅꠁꠘ꠆ꠘ ꠇꠦꠃ ꠀꠝꠣꠞꠦ ꠍꠣꠢꠣꠛꠤ ꠇꠁꠀ ꠘꠣ ꠝꠣꠘꠟꠦꠅ ꠔꠥꠝꠞꠣ ꠔ ꠝꠣꠘꠛꠣꠄ, ꠀꠝꠣꠞ ꠍꠣꠢꠣꠛꠤ ꠇꠣꠝꠞ ꠡꠤꠟ-ꠌꠣꠙ꠆ꠙꠠ ꠔꠥꠝꠞꠣꠃ, ꠇꠣꠞꠘ ꠀꠝꠣꠞ ꠝꠣꠎꠖꠤ ꠔꠥꠝꠞꠣ ꠔꠣꠘ ꠃꠝ꠆ꠝꠔ ꠅꠁꠍ।
1CO 9:3 ꠔꠦ ꠀꠝꠣꠞ ꠍꠣꠢꠣꠛꠤ ꠙꠖ ꠟꠁꠀ ꠎꠦꠞꠣ ꠡꠘ꠆ꠖꠄ ꠇꠞꠂꠘ, ꠔꠣꠞꠣ ꠀꠝꠣꠞ ꠅꠃ ꠎꠥꠀꠙ ꠢꠥꠘꠃꠇ꠆ꠇꠣ।
1CO 9:4 ꠀꠝꠤ ꠀꠞ ꠍꠣꠢꠣꠛꠤ ꠛꠣꠞ꠆ꠘꠣꠛꠣꠍꠦ ꠇꠤꠔꠣ ꠈꠣꠘꠣ-ꠙꠤꠘꠣꠞ ꠛꠦꠔꠘ ꠙꠣꠁꠛꠣꠞ ꠅꠗꠤꠇꠣꠞ ꠘꠣꠁ ꠘꠤ?
1CO 9:5 ꠝꠥꠝꠤꠘ ꠇꠥꠘꠥ ꠛꠁꠘꠞꠦ ꠡꠣꠖꠤ ꠇꠞꠣꠞ ꠅꠗꠤꠇꠣꠞ ꠀꠝꠞꠣꠞ ꠘꠣꠁ ꠘꠤ? ꠅꠁꠘ꠆ꠘ ꠍꠣꠢꠣꠛꠤ ꠅꠇꠟꠦ, ꠝꠣꠟꠤꠇ ꠁꠍꠣꠞ ꠜꠣꠁꠀꠁꠘ꠆ꠔꠦ ꠀꠞ ꠍꠣꠢꠣꠛꠤ ꠙꠤꠔꠞꠦ ꠎꠦꠟꠣ ꠎꠣꠞꠎꠤꠞ ꠛꠤꠛꠤꠞꠦ ꠟꠁꠀ ꠍꠚꠞꠅ ꠎꠣꠁꠘ, ꠀꠝꠞꠣꠅ ꠅꠟꠣ ꠙꠣꠞꠤ ꠘꠣ ꠘꠤ?
1CO 9:6 ꠈꠣꠟꠤ ꠀꠝꠤ ꠀꠞ ꠛꠣꠞ꠆ꠘꠣꠛꠣꠍꠦꠃ ꠘꠤꠎꠞ ꠀꠔꠦ ꠇꠣꠝꠣꠁ ꠇꠞꠤꠀ ꠈꠣꠁꠔꠣꠝ ꠘꠤ?
1CO 9:7 ꠘꠤꠎꠞ ꠉꠣꠐ꠆ꠐꠤꠞ ꠐꠦꠇꠣ ꠜꠣꠋꠉꠤꠀ ꠇꠦꠃ ꠍꠤꠙꠣꠁꠞ ꠌꠣꠇꠞꠤ ꠇꠞꠦ ꠘꠤ? ꠎꠦ ꠉꠤꠞꠡ꠆ꠔꠦ ꠚꠟꠞ ꠛꠣꠉꠣꠘ ꠇꠞꠦ, ꠢꠦ ꠁꠔꠣꠞ ꠚꠟ ꠈꠣꠄ ꠘꠣ ꠘꠤ? ꠎꠦ ꠞꠣꠈꠣꠟꠦ ꠙꠡꠥꠙꠣꠟ ꠞꠣꠈꠦ, ꠢꠦ ꠁꠔꠣꠞ ꠖꠥꠗ ꠈꠣꠄ ꠘꠣ ꠘꠤ?
1CO 9:8 ꠀꠝꠤ ꠔ ꠈꠣꠟꠤ ꠝꠣꠘꠥꠡ ꠀꠈꠟꠦ ꠝꠣꠔꠤꠀꠞ ꠘꠣ, ꠝꠥꠍꠣ ꠘꠛꠤꠞ ꠡꠞꠤꠅꠔꠦꠅ ꠅꠟꠣ ꠇꠁꠍꠦ।
1CO 9:9 ꠡꠞꠤꠅꠔꠅ ꠀꠍꠦ, “ꠗꠣꠘ ꠝꠣꠠꠣ ꠖꠦꠅꠀꠞ ꠡꠝꠄ ꠉꠞꠥꠞ ꠝꠥꠈꠅ ꠢꠥꠚꠤ ꠟꠣꠉꠣꠁꠅ ꠘꠣ।” ꠔꠦ ꠀꠟ꠆ꠟꠣꠄ ꠈꠣꠟꠤ ꠉꠞꠥꠞ ꠇꠕꠣꠃ ꠌꠤꠘ꠆ꠔꠣ ꠇꠞꠂꠘ ꠘꠤ?
1CO 9:10 ꠔꠣꠁꠘ ꠀꠍꠟꠦ ꠀꠝꠞꠣꠞ ꠇꠕꠣꠃ ꠇꠁꠍꠂꠘ, ꠁꠈꠣꠘ ꠢꠣꠍꠣ ꠘꠣꠄ ꠘꠤ? ꠘꠤꠌ꠆ꠌꠄ, ꠁꠔꠣ ꠀꠝꠞꠣꠞ ꠟꠣꠉꠤꠃ ꠟꠦꠈꠣ ꠅꠁꠍꠤꠟ, ꠇꠣꠞꠘ ꠎꠦꠁꠘ ꠈꠦꠔ ꠇꠞꠂꠘ ꠀꠞ ꠎꠦꠁꠘ ꠗꠣꠘ ꠝꠣꠠꠣ ꠖꠦꠁꠘ, ꠚꠡꠟꠞ ꠛꠣꠐ ꠙꠣꠅꠀꠞ ꠀꠡꠣꠄꠃ ꠔꠣꠞꠣꠞ ꠁꠔꠣ ꠇꠞꠣ ꠃꠌꠤꠔ।
1CO 9:11 ꠔꠦ ꠀꠝꠞꠣ ꠎꠦꠟꠣ ꠔꠥꠝꠞꠣꠞ ꠝꠣꠎꠦ ꠞꠥꠢꠣꠘꠤꠇ ꠛꠤꠌꠤ ꠞꠥꠁꠍꠤ, ꠅꠃꠟꠣ ꠎꠥꠖꠤ ꠔꠥꠝꠞꠣꠞ ꠉꠦꠍ ꠕꠣꠇꠤ ꠖꠥꠘꠤꠀꠛꠤ ꠈꠣꠘꠤ-ꠙꠣꠘꠤ ꠎꠥꠉꠣꠁ, ꠔꠦ ꠛꠦꠡꠤ ꠇꠥꠘ꠆ꠔꠣ ꠘꠤꠞꠣꠝ ꠘꠤ?
1CO 9:12 ꠀꠞ ꠅꠃ ꠛꠦꠙꠣꠞꠦ ꠎꠥꠖꠤ ꠔꠥꠝꠞꠣꠞ ꠃꠙꠞꠦ ꠅꠁꠘ꠆ꠘ ꠝꠣꠘꠡꠞ ꠖꠣꠛꠤ ꠈꠣꠐꠦ, ꠔꠦ ꠀꠝꠞꠣ ꠀꠞꠅ ꠛꠦꠡꠤ ꠖꠣꠛꠤ ꠈꠣꠐꠣꠁꠔꠣꠝ ꠙꠣꠞꠤ ꠘꠣ ꠘꠤ? ꠅꠁꠟꠦ ꠀꠝꠞꠣ ꠁꠟꠣ ꠖꠣꠛꠤ ꠘꠣ ꠈꠣꠐꠣꠁꠀ ꠡꠁꠎ꠆ꠎ ꠇꠞꠤꠀꠞ, ꠎꠣꠔꠦ ꠀꠟ-ꠝꠍꠤꠞ ꠛꠦꠙꠣꠞꠦ ꠈꠥꠡ-ꠈꠛꠞꠤ ꠔꠛꠟꠤꠉ ꠇꠣꠝꠅ ꠀꠝꠞꠣ ꠇꠦꠃꠞꠞ ꠙꠕꠞ ꠇꠣꠐꠣ ꠘꠣ ꠅꠁ।
1CO 9:13 ꠔꠥꠝꠞꠣ ꠎꠣꠘ ꠘꠣ ꠘꠤ, ꠙꠛꠤꠔ꠆ꠞ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠅ ꠎꠦꠞꠣ ꠇꠣꠝ ꠇꠞꠂꠘ, ꠔꠣꠞꠣ ꠅꠈꠣꠘ ꠕꠣꠇꠤꠃ ꠈꠣꠘꠣ-ꠙꠤꠘꠣ ꠙꠣꠁꠘ, ꠀꠞ ꠇꠥꠞꠛꠣꠘꠤ ꠈꠣꠘꠣꠔ ꠎꠦꠞꠣ ꠇꠣꠝ ꠇꠞꠂꠘ, ꠔꠣꠞꠣ ꠅꠃ ꠇꠥꠞꠛꠣꠘꠤꠞ ꠝꠣꠟ ꠕꠣꠇꠤ ꠛꠣꠐ ꠙꠣꠁꠘ।
1CO 9:14 ꠑꠤꠇ ꠅꠟꠣꠈꠣꠘ ꠝꠣꠟꠤꠇ ꠁꠍꠣꠞ ꠢꠥꠇꠥꠝ ꠀꠍꠦ, ꠎꠣꠞꠣ ꠈꠥꠡ-ꠈꠛꠞꠤ ꠔꠛꠟꠤꠉ ꠇꠞꠂꠘ, ꠔꠣꠞꠣ ꠎꠣꠘꠥ ꠅꠃ ꠇꠣꠝꠞ ꠃꠍꠤꠟ꠆ꠟꠣꠄ ꠈꠣꠅꠀ-ꠚꠤꠘ꠆ꠖꠣ ꠙꠣꠁꠘ।
1CO 9:15 ꠅꠁꠟꠦ ꠀꠝꠤ ꠔ ꠄꠞ ꠇꠥꠘ꠆ꠔꠣꠃ ꠘꠤꠍꠤ ꠘꠣ। ꠀꠞ ꠅꠈꠘ ꠔꠥꠝꠞꠣꠞꠦꠅ ꠁꠔꠣ ꠟꠦꠈꠤꠀꠞ ꠘꠣ, ꠀꠝꠣꠞ ꠟꠣꠉꠤ ꠅꠔꠣꠞ ꠛꠦꠛꠡ꠆ꠔꠣ ꠇꠞꠔꠣꠄ ꠇꠞꠤ। ꠅꠈꠘ ꠀꠝꠣꠞ ꠅꠃ ꠛꠠꠣꠁꠞꠦ ꠎꠥꠖꠤ ꠇꠦꠃ ꠛꠦꠇꠣꠝꠣ ꠛꠣꠘꠣꠁꠟꠣꠄ, ꠔꠦ ꠀꠝꠣꠞ ꠝꠞꠤ ꠎꠣꠅꠀꠃ ꠜꠣꠟꠣ।
1CO 9:16 ꠀꠝꠤ ꠎꠦ ꠈꠥꠡ-ꠈꠛꠞꠤ ꠔꠛꠟꠤꠉ ꠇꠞꠤꠀꠞ, ꠄꠔꠦ ꠀꠝꠣꠞ ꠛꠠꠣꠁ ꠖꠦꠈꠣꠘꠤꠞ ꠇꠥꠘ꠆ꠔꠣ ꠘꠣꠄ, ꠁꠔꠣ ꠀꠝꠣꠞ ꠟꠣꠉꠤ ꠚꠞꠎ। ꠔꠛꠟꠤꠉ ꠘꠣ ꠇꠞꠟꠦ ꠀꠝꠣꠞ ꠃꠙꠞꠦ ꠟꠣꠘ꠆ꠘꠔ ꠙꠠꠃꠇ!
1CO 9:17 ꠅꠁꠟꠦ ꠀꠝꠤ ꠎꠥꠖꠤ ꠈꠥꠡꠤ ꠝꠘꠦ ꠔꠛꠟꠤꠉ ꠇꠞꠤ, ꠔꠦ ꠔ ꠀꠝꠣꠞ ꠙꠥꠞꠥꠡ꠆ꠇꠣꠞ ꠀꠍꠦ, ꠀꠞ ꠎꠥꠖꠤ ꠘꠤꠎꠞ ꠈꠥꠡꠤꠄ ꠘꠣ-ꠅ ꠇꠞꠤ, ꠔꠦ ꠝꠣꠟꠤꠇꠞ ꠖꠦꠅꠀ ꠎꠤꠝ꠆ꠝꠣꠖꠣꠞ ꠢꠤꠡꠣꠛꠦ ꠔ ꠇꠞꠤꠀꠞ।
1CO 9:18 ꠅꠈꠘ ꠀꠝꠣꠞ ꠁ ꠇꠣꠝꠞ ꠙꠥꠞꠥꠡ꠆ꠇꠣꠞ ꠇꠤꠔꠣ? ꠁ ꠙꠥꠞꠥꠡ꠆ꠇꠣꠞ ꠅꠁꠟ, ꠈꠥꠡ-ꠈꠛꠞꠤ ꠔꠛꠟꠤꠉ ꠇꠞꠤꠀ ꠢꠣꠞꠤ ꠙꠣꠅꠘꠣ ꠛꠦꠔꠘ ꠘꠦꠁ ꠘꠣ, ꠛꠤꠘꠣ ꠙꠄꠡꠣꠄ ꠔꠛꠟꠤꠉ ꠇꠞꠣꠃ ꠀꠝꠣꠞ ꠛꠦꠔꠘ।
1CO 9:19 ꠀꠝꠤ ꠎꠥꠖꠤꠅ ꠇꠥꠘꠥ ꠛꠦꠐꠣꠞ ꠉꠥꠟꠣꠝ ꠘꠣꠄ, ꠔꠦꠛꠃ ꠛꠃꠔ ꠝꠣꠘꠡꠞ ꠎꠣꠘ ꠛꠣꠌꠣꠘꠤꠞ ꠟꠣꠉꠤ ꠘꠤꠎꠞꠦ ꠢꠇꠟꠞ ꠉꠥꠟꠣꠝ ꠛꠣꠘꠣꠁꠀ ꠞꠣꠈꠍꠤ।
1CO 9:20 ꠁꠢꠥꠖꠤ ꠅꠇꠟꠞ ꠝꠘ ꠎꠄ ꠇꠞꠣꠞ ꠟꠣꠉꠤ ꠁꠢꠥꠖꠤ ꠡꠝꠣꠎꠅ ꠀꠝꠤ ꠁꠢꠥꠖꠤꠞ ꠟꠣꠈꠣꠘ ꠅꠁꠍꠤ। ꠀꠝꠤ ꠔ ꠝꠥꠍꠣ ꠘꠛꠤꠞ ꠡꠞꠤꠅꠔꠞ ꠅꠗꠤꠘꠦ ꠘꠣꠄ, ꠅꠁꠟꠦ ꠎꠣꠞꠣ ꠔꠣꠘ ꠡꠞꠤꠅꠔ ꠝꠣꠘꠦ, ꠔꠣꠞꠣꠞꠦ ꠎꠄ ꠇꠞꠣꠞ ꠟꠣꠉꠤ ꠀꠝꠤ ꠔꠣꠞꠣꠞ ꠟꠣꠈꠣꠘ ꠅꠁꠍꠤ।
1CO 9:21 ꠀꠞ ꠎꠣꠞꠣ ꠡꠞꠤꠅꠔꠞ ꠛꠣꠁꠞꠣ, ꠔꠣꠞꠣꠞꠦ ꠎꠄ ꠇꠞꠣꠞ ꠟꠣꠉꠤ ꠀꠝꠤ ꠡꠞꠤꠅꠔꠞ ꠛꠣꠁꠞꠣ ꠝꠣꠘꠡꠞ ꠟꠣꠈꠣꠘ ꠅꠁꠍꠤ। ꠀꠍꠟꠦ ꠀꠝꠤ ꠀꠟ꠆ꠟꠣꠞ ꠖꠦꠅꠀ ꠡꠞꠤꠅꠔꠞ ꠛꠣꠞꠦ ꠘꠣꠄ, ꠀꠟ-ꠝꠍꠤꠞ ꠡꠞꠤꠅꠔꠞ ꠅꠗꠤꠘꠦ ꠀꠍꠤ।
1CO 9:22 ꠎꠦꠞꠣ ꠇꠝꠎꠥꠞ, ꠔꠣꠞꠣꠞ ꠉꠦꠍꠦ ꠀꠝꠤ ꠇꠝꠎꠥꠞꠞ ꠟꠣꠈꠣꠘ ꠅꠁꠍꠤ, ꠔꠣꠞꠣꠞꠦꠅ ꠎꠄ ꠇꠞꠣꠞ ꠟꠣꠉꠤ। ꠛꠦꠙꠣꠞ ꠅꠁꠟ, ꠎꠦꠇꠥꠘꠥ ꠝꠘ꠆ꠔꠦ ꠇꠤꠍꠥ ꠝꠣꠘꠡꠞ ꠎꠣꠘ ꠛꠣꠌꠣꠘꠤꠞ ꠟꠣꠉꠤ ꠀꠝꠤ ꠢꠇꠟ ꠡꠝꠣꠎꠞ ꠝꠘ ꠎꠥꠉꠣꠁ ꠌꠟꠤꠀꠞ।
1CO 9:23 ꠈꠣꠟꠤ ꠈꠥꠡ-ꠈꠛꠞꠤꠞ ꠟꠣꠉꠤꠃ ꠀꠝꠤ ꠁꠔꠣ ꠇꠞꠤꠀꠞ, ꠎꠣꠔꠦ ꠄꠞ ꠞꠢꠝꠔꠞ ꠜꠣꠉꠤ ꠅꠁ।
1CO 9:24 ꠔꠥꠝꠞꠣ ꠎꠣꠘ ꠘꠣ ꠘꠤ, ꠖꠃꠠꠞ ꠈꠦꠟꠣꠔ ꠃꠑꠤꠀ ꠢꠇꠟꠦꠃ ꠖꠃꠠꠣꠄ, ꠅꠁꠟꠦ ꠙꠥꠞꠥꠡ꠆ꠇꠣꠞ ꠈꠣꠟꠤ ꠄꠇꠎꠘꠦꠃ ꠙꠣꠄ। ꠅꠈꠘ ꠔꠥꠝꠞꠣꠅ ꠅꠃꠟꠣ ꠖꠃꠠꠣꠅ ꠎꠣꠔꠦ ꠙꠥꠞꠥꠡ꠆ꠇꠣꠞ ꠙꠣꠅ।
1CO 9:25 ꠖꠃꠠꠞ ꠈꠦꠟꠣꠔ ꠖꠃꠠꠣꠁꠀ ꠢꠣꠞꠤ ꠝꠣꠘꠡꠦ ꠅꠟꠣ ꠄꠇ ꠝꠣꠟꠣ ꠙꠣꠄ, ꠎꠦ ꠝꠣꠟꠣ ꠛꠣꠖꠦ ꠘꠡ꠆ꠐ ꠅꠁꠎꠣꠄ, ꠀꠞ ꠅꠃ ꠝꠣꠟꠣ ꠙꠣꠅꠀꠞ ꠟꠣꠉꠤ ꠄꠞꠣ ꠛꠃꠔ ꠇꠑꠤꠘ ꠘꠤꠅꠝ-ꠇꠣꠘꠥꠘꠅ ꠝꠣꠘꠦ। ꠅꠁꠟꠦ ꠀꠝꠞꠣ ꠔ ꠀꠍꠟ ꠅꠇ꠆ꠇꠄ ꠝꠣꠟꠣ ꠙꠣꠅꠀꠞ ꠟꠣꠉꠤ ꠁꠔꠣ ꠇꠞꠞꠣꠝ।
1CO 9:26 ꠄꠞꠟꠣꠉꠤ ꠃꠖ꠆ꠖꠦꠡ꠆ꠡ ꠍꠣꠠꠣ ꠀꠝꠤ ꠖꠃꠠꠣꠁꠞꠣꠝ ꠘꠣ। ꠎꠦꠔꠣ ꠛꠦꠐꠣꠁꠘ꠆ꠔꠦ ꠛꠣꠔꠣꠡꠞ ꠟꠉꠦ ꠇꠤꠟꠣꠇꠤꠟꠤ ꠇꠞꠂꠘ, ꠀꠝꠤ ꠔ ꠁꠔꠣꠞ ꠟꠣꠈꠣꠘ ꠘꠣꠄ।
1CO 9:27 ꠛꠞꠋ ꠀꠝꠤ ꠘꠤꠎꠞ ꠡꠞꠤꠟꠞꠦ ꠇꠡ꠆ꠐ ꠖꠤꠀ ꠉꠥꠟꠣꠝꠞ ꠟꠣꠈꠣꠘ ꠞꠣꠈꠍꠤ, ꠎꠣꠔꠦ ꠅꠁꠘ꠆ꠘꠞ ꠉꠦꠍꠦ ꠈꠥꠡ-ꠈꠛꠞꠤ ꠔꠛꠟꠤꠉ ꠇꠞꠤꠀ ꠢꠣꠞꠤ, ꠙꠥꠞꠥꠡ꠆ꠇꠣꠞ ꠕꠣꠇꠤ ꠘꠤꠎꠦ ꠛꠣꠖ ꠘꠣ ꠙꠠꠤ।
1CO 10:1 ꠜꠣꠁ ꠅꠇꠟ, ꠀꠝꠤ ꠌꠣꠁꠞꠣꠝ, ꠝꠞꠥꠜꠥꠝꠤꠞ ꠝꠣꠎꠦ ꠀꠝꠞꠣꠞ ꠝꠄ-ꠝꠥꠞꠛ꠆ꠛꠤ ꠅꠇꠟꠞ ꠊꠐꠘꠣ ꠔꠥꠝꠞꠣꠞ ꠝꠘꠅ ꠞꠃꠇ। ꠄꠞꠣ ꠢꠇꠟ ꠔ ꠉꠣꠁꠛꠤ ꠝꠦꠊꠞ ꠈꠥꠐꠤꠞ ꠔꠟꠦ ꠞꠁꠔꠣ, ꠢꠇꠟꠦ ꠙꠣꠅꠄ ꠀꠐꠤꠀ ꠘꠤꠟ ꠖꠞꠤꠀ ꠙꠣꠞꠅꠁꠀ ꠉꠦꠍꠟꠣ।
1CO 10:2 ꠢꠇꠟꠦꠃ ꠢꠃ ꠝꠦꠊꠞ ꠈꠥꠐꠤ ꠀꠞ ꠘꠤꠟ ꠖꠞꠤꠀꠞ ꠝꠣꠎꠦ ꠢꠎꠞꠔ ꠝꠥꠍꠣꠞ ꠔꠞꠤꠇꠣꠄ ꠙꠣꠇ ꠉꠥꠍꠟ ꠇꠞꠍꠟꠣ।
1CO 10:3 ꠔꠣꠞꠣ ꠀꠟ꠆ꠟꠣꠞ ꠖꠦꠅꠀ ꠄꠇꠁ ꠟꠣꠈꠣꠘ ꠉꠣꠁꠛꠤ ꠈꠣꠘꠤ ꠈꠣꠁꠍꠂꠘ,
1CO 10:4 ꠄꠇꠁ ꠟꠣꠈꠣꠘ ꠉꠣꠁꠛꠤ ꠙꠣꠘꠤꠅ ꠈꠣꠁꠍꠂꠘ, ꠢꠇꠟꠦ ꠅꠟꠣ ꠄꠇ ꠇꠥꠖꠞꠔꠤ ꠙꠣꠔ꠆ꠔꠞ ꠕꠣꠇꠤ ꠙꠣꠘꠤ ꠈꠣꠁꠔꠣ, ꠎꠦ ꠙꠣꠔ꠆ꠔꠞ ꠔꠣꠞꠣꠞ ꠟꠉꠦ ꠟꠉꠦ ꠞꠁꠔ, ꠅꠃ ꠙꠣꠔ꠆ꠔꠞꠃ ꠅꠁꠟꠣ ꠀꠟ-ꠝꠍꠤ।
1CO 10:5 ꠔꠣ-ꠅ ꠄꠞꠣ ꠛꠦꠡꠤꠞ ꠜꠣꠉ ꠝꠣꠘꠡꠞ ꠃꠙꠞꠦ ꠀꠟ꠆ꠟꠣ ꠙꠣꠇ ꠈꠥꠡꠤ ꠀꠍꠟꠣ ꠘꠣ। ꠄꠞꠟꠣꠉꠤꠃ ꠔꠣꠞꠣꠞ ꠟꠣꠡ ꠝꠞꠥꠜꠥꠝꠤꠞ ꠝꠣꠎꠦ ꠙꠠꠤ ꠞꠁꠟ।
1CO 10:6 ꠁꠔꠣ ꠊꠐꠘꠣ ꠅꠁꠟ ꠀꠝꠞꠣꠞ ꠔꠣꠟꠤꠝꠞ ꠟꠣꠉꠤ ꠄꠇ ꠁꠔꠤꠢꠣꠡ, ꠎꠣꠔꠦ ꠅꠔꠣ ꠖꠦꠈꠤꠀ ꠀꠝꠞꠣ ꠢꠥꠡꠤꠀꠞ ꠅꠁ ꠀꠞ ꠔꠣꠞꠣꠞ ꠟꠣꠈꠣꠘ ꠇꠥ-ꠙꠕꠞ ꠀꠡꠤꠇ ꠘꠣ ꠅꠁ।
1CO 10:7 ꠔꠣꠞꠣꠞ ꠝꠣꠎꠦ ꠇꠦꠃ ꠇꠦꠃ ꠎꠦꠟꠣ ꠝꠥꠞ꠆ꠔꠤꠙꠥꠎꠣ ꠇꠞꠍꠤꠟ, ꠔꠥꠝꠞꠣ ꠁꠟꠣ ꠇꠞꠤꠅ ꠘꠣ। ꠔꠃꠞꠣꠔ ꠡꠞꠤꠚꠅ ꠀꠍꠦ, “ꠢꠇꠟ ꠝꠣꠘꠥꠡ ꠈꠣꠘꠤꠔ ꠛꠁꠟꠣ, ꠛꠣꠖꠦ ꠔꠣꠞꠣ ꠈꠣꠅꠀ-ꠖꠣꠅꠀ ꠇꠞꠤꠀ ꠢꠣꠞꠤ, ꠢꠂ-ꠢꠥꠟ꠆ꠟꠣ ꠇꠞꠤ ꠘꠣꠌ-ꠉꠣꠘ, ꠚꠥꠞ꠆ꠔꠤ-ꠀꠝꠥꠖ ꠇꠞꠣꠔ ꠟꠣꠉꠟꠣ।”
1CO 10:8 ꠀꠞꠇꠛꠣꠞ ꠔꠣꠞꠣꠞ ꠝꠣꠎꠞ ꠛꠃꠔ ꠎꠘꠦ ꠎꠤꠘꠣ ꠇꠞꠣꠄ, ꠄꠇꠁ ꠖꠤꠘꠦ ꠔꠦꠁꠡ ꠀꠎꠣꠞ ꠝꠣꠘꠥꠡ ꠝꠣꠞꠣ ꠉꠦꠍꠟꠣ। ꠔꠦ ꠀꠝꠞꠣ ꠎꠣꠘꠥ ꠅꠟꠣꠈꠣꠘ ꠎꠤꠘꠣ ꠕꠣꠇꠤ ꠛꠣꠌꠤꠀ ꠞꠁ।
1CO 10:9 ꠔꠣꠞꠣꠞ ꠝꠣꠎꠞ ꠛꠃꠔꠦ ꠝꠣꠟꠤꠇ ꠝꠃꠟꠣꠞꠦ ꠙꠞꠤꠇ꠆ꠇꠣ ꠇꠞꠣꠔ ꠟꠣꠉꠤꠀ ꠢꠣꠚꠞ ꠇꠣꠝꠠ ꠈꠣꠁꠀ ꠝꠞꠍꠂꠘ। ꠀꠝꠞꠣ ꠎꠣꠘꠥ ꠔꠣꠘꠞꠦ ꠁꠟꠣ ꠙꠞꠤꠇ꠆ꠇꠣ ꠘꠣ ꠇꠞꠤ।
1CO 10:10 ꠔꠣꠞꠣꠞ ꠝꠣꠎꠞ ꠛꠃꠔꠦ ꠘꠣ-ꠈꠥꠡ ꠅꠁꠀ ꠛꠇꠣ-ꠎꠇꠣ ꠇꠞꠣꠄ, ꠀꠟ꠆ꠟꠣꠞ ꠉꠎꠛꠞ ꠚꠤꠞꠤꠡ꠆ꠔꠣꠄ ꠔꠣꠞꠣꠞꠦ ꠛꠤꠘꠣꠡ ꠇꠞꠍꠂꠘ। ꠄꠞꠟꠣꠉꠤ ꠔꠥꠝꠞꠣ ꠁꠟꠣ ꠇꠞꠤꠅ ꠘꠣ।
1CO 10:11 ꠔꠣꠞꠣꠞ ꠃꠙꠞꠦ ꠁꠔꠣ ꠊꠐꠤꠍꠤꠟ ꠘꠤꠡꠣꠘꠣ ꠢꠤꠡꠣꠛꠦ, ꠎꠣꠔꠦ ꠅꠔꠣ ꠖꠦꠈꠤꠀ ꠀꠝꠞꠣ ꠢꠥꠡꠤꠀꠞ ꠅꠁ। ꠀꠝꠞꠣ ꠎꠦꠞꠣ ꠅꠃ ꠀꠈꠦꠞꠤ ꠎꠝꠣꠘꠣꠞ ꠝꠣꠘꠥꠡ, ꠅꠃ ꠟꠦꠈꠣ ꠙꠠꠤꠀ ꠀꠝꠞꠣ ꠎꠣꠘꠥ ꠡꠣꠛꠗꠣꠘꠦ ꠞꠁ।
1CO 10:12 ꠄꠞꠟꠣꠉꠤ ꠇꠥꠘꠥ ꠝꠣꠘꠡꠦ ꠎꠥꠖꠤ ꠝꠘꠅ ꠇꠞꠦ, ꠢꠦ ꠝꠎꠛꠥꠔ ꠀꠍꠦ, ꠔꠦ ꠢꠦ ꠢꠥꠡꠤꠀꠞ ꠞꠃꠇ ꠎꠣꠔꠦ ꠔꠣꠞ ꠁꠝꠣꠘ ꠘꠣ ꠀꠟꠦ।
1CO 10:13 ꠝꠣꠘꠡꠞ ꠎꠤꠘ꠆ꠖꠦꠉꠤꠔ ꠎꠦꠟꠣꠈꠣꠘ ꠙꠞꠤꠇ꠆ꠇꠣ ꠀꠄ, ꠅꠔꠣꠞ ꠛꠣꠁꠞꠣ ꠘꠄꠀ ꠇꠥꠘꠥ ꠙꠞꠤꠇ꠆ꠇꠣ ꠔ ꠔꠥꠝꠞꠣꠞ ꠃꠙꠞꠦ ꠅꠞ ꠘꠣ। ꠀꠟ꠆ꠟꠣ ꠙꠣꠇ ꠔ ꠢꠇ-ꠢꠣꠟꠣꠟ, ꠔꠣꠁꠘ ꠔꠥꠝꠞꠣꠞꠦ ꠡꠁꠎ꠆ꠎꠞ ꠅꠔꠤꠞꠤꠇ꠆ꠔ ꠇꠥꠘꠥ ꠙꠞꠤꠇ꠆ꠇꠣꠔ ꠚꠣꠟꠣꠁꠔꠣ ꠘꠣꠄ, ꠛꠞꠋ ꠙꠞꠤꠇ꠆ꠇꠣ ꠕꠣꠇꠤ ꠛꠣꠌꠤꠛꠣꠞ ꠙꠕꠅ ꠛꠣꠔꠣꠁ ꠖꠤꠛꠣ, ꠎꠣꠔꠦ ꠔꠥꠝꠞꠣ ꠁꠔꠣ ꠡꠁꠎ꠆ꠎ ꠇꠞꠔꠣꠄ ꠙꠣꠞ।
1CO 10:14 ꠅ ꠝꠣꠄꠀꠞ ꠖꠥꠡ꠆ꠔ ꠅꠇꠟ, ꠄꠞꠟꠣꠉꠤ ꠀꠝꠤ ꠔꠥꠝꠞꠣꠞꠦ ꠇꠁꠞꠣꠝ, ꠖꠦꠛ-ꠖꠦꠛꠤꠞ ꠙꠥꠎꠣ ꠕꠣꠇꠤ ꠎꠣꠘ ꠛꠣꠌꠣꠅ।
1CO 10:15 ꠔꠥꠝꠞꠣꠞꠦ ꠀꠈꠟꠖꠣꠞ ꠎꠣꠘꠤꠀꠃ ꠀꠝꠤ ꠇꠁꠞꠣꠝ, ꠀꠝꠤ ꠎꠦꠔꠣ ꠇꠁꠞꠣꠝ ꠔꠥꠝꠞꠣ ꠁꠔꠣ ꠎꠣꠌꠣꠁ-ꠛꠣꠌꠣꠁ ꠇꠞꠤꠀ ꠖꠦꠈꠅ।
1CO 10:16 ꠀꠟ-ꠝꠍꠤꠞ ꠝꠦꠎꠛꠣꠘꠤꠞ ꠡꠝꠄ, ꠡꠥꠇꠞꠤꠀ ꠀꠖꠣꠄ ꠇꠞꠤꠀ ꠙꠤꠀꠟꠣ ꠕꠣꠇꠤ ꠀꠝꠞꠣ ꠎꠦ ꠡꠞꠛꠔ ꠈꠣꠁ, ꠁꠔꠣꠞ ꠝꠣꠎꠖꠤ ꠀꠝꠞꠣ ꠀꠟ-ꠝꠍꠤꠞ ꠟꠃꠞ ꠟꠉꠦ ꠡꠞꠤꠇ ꠅꠁ ꠘꠣ ꠘꠤ? ꠀꠞ ꠎꠦ ꠞꠥꠐꠤ ꠍꠤꠠꠤꠀ ꠈꠣꠁ, ꠁ ꠈꠣꠘꠤꠞ ꠝꠣꠎꠖꠤ ꠔꠣꠘ ꠡꠞꠤꠟꠞ ꠟꠉꠦ ꠡꠞꠤꠇ ꠅꠁ ꠘꠣ ꠘꠤ?
1CO 10:17 ꠀꠝꠞꠣ ꠢꠇꠟꠦ ꠎꠦꠛꠟꠣ ꠄꠇ ꠞꠥꠐꠤ ꠛꠣꠐꠤꠀ ꠈꠣꠁ, ꠔꠦ ꠛꠥꠎꠣ ꠎꠣꠄ, ꠀꠝꠞꠣ ꠛꠃꠔ ꠎꠘ ꠅꠁꠟꠦꠅ ꠀꠝꠞꠣ ꠈꠣꠟꠤ ꠄꠇ ꠡꠞꠤꠟ।
1CO 10:18 ꠢꠥꠘꠅ, ꠛꠘꠤ ꠁꠍꠞꠣꠁꠟꠞ ꠢꠣꠟꠔ ꠌꠤꠘ꠆ꠔꠣ ꠇꠞꠅ, ꠔꠣꠞꠣꠞ ꠎꠦꠔꠣ ꠝꠣꠘꠡꠦ ꠇꠥꠞꠛꠣꠘꠤꠞ ꠉꠥꠡ꠆ꠔ ꠈꠣꠁꠘ, ꠔꠣꠞꠣ ꠢꠃ ꠇꠥꠞꠛꠣꠘꠤ ꠈꠣꠘꠣꠞ ꠢꠇꠟ ꠇꠣꠝꠅ-ꠅ ꠡꠞꠤꠇ ꠅꠁꠎꠣꠁꠘ ꠘꠣ ꠘꠤ?
1CO 10:19 ꠀꠞ ꠀꠝꠤ ꠇꠥꠘꠥ ꠇꠁꠞꠣꠝ ꠘꠤ, ꠖꠦꠛꠔꠣꠞ ꠘꠣꠝꠞ ꠙꠡꠣꠖꠞꠦ ꠢꠤꠡꠣꠛꠅ ꠗꠞꠣ ꠎꠣꠄ, ꠛꠣ ꠅꠃ ꠖꠦꠛꠔꠣꠞꠦ ꠢꠤꠡꠣꠛꠅ ꠗꠞꠣ ꠎꠣꠄ?
1CO 10:20 ꠘꠣ, ꠝꠥꠐꠦꠃ ꠘꠣ। ꠔꠣ-ꠅ ꠛꠤꠗꠞ꠆ꠝꠤ ꠅꠇꠟꠦ ꠎꠔ ꠘꠝꠥꠘꠣꠞ ꠛꠟꠤ ꠖꠦꠁꠘ, ꠁꠔꠣ ꠖꠦꠅ-ꠖꠣꠘꠛ, ꠜꠥꠔ-ꠙꠦꠞꠔꠞ ꠘꠣꠝꠦꠃ ꠖꠦꠁꠘ, ꠀꠟ꠆ꠟꠣꠞ ꠘꠣꠝꠦ ꠘꠣꠄ। ꠔꠦ ꠀꠝꠤ ꠌꠣꠁ ꠘꠣ, ꠅꠃ ꠜꠥꠔ-ꠙꠦꠞꠔꠞ ꠟꠉꠦ ꠔꠥꠝꠞꠣꠞ ꠇꠥꠘꠥ ꠈꠣꠔꠤꠞ-ꠖꠥꠡ꠆ꠔꠤ ꠞꠃꠇ।
1CO 10:21 ꠢꠥꠘꠅ, ꠝꠣꠟꠤꠇ ꠁꠍꠣꠞ ꠝꠦꠎꠛꠣꠘꠤ ꠀꠞ ꠜꠥꠔ-ꠙꠦꠞꠔꠞ ꠝꠦꠎꠛꠣꠘꠤ, ꠁ ꠖꠥꠁꠅ ꠇꠣꠝꠅ ꠡꠞꠤꠇ ꠅꠀ ꠔꠥꠝꠞꠣꠞ ꠟꠣꠉꠤ ꠑꠤꠇ ꠘꠣꠄ। ꠝꠣꠟꠤꠇꠞ ꠙꠤꠀꠟꠣ ꠀꠞ ꠜꠥꠔꠞ ꠙꠤꠀꠟꠣ, ꠖꠥꠁꠅꠔꠣ ꠕꠣꠇꠤ ꠄꠇꠟꠉꠦ ꠈꠣꠅꠀ ꠑꠤꠇ ꠘꠣꠄ।
1CO 10:22 ꠔꠦ ꠀꠝꠞꠣ ꠇꠤꠔꠣ ꠇꠞꠤꠀꠞ, ꠀꠝꠞꠣ ꠝꠣꠟꠤꠇ ꠁꠍꠣꠞ ꠖꠤꠟꠅ ꠀꠉꠥꠁꠘ ꠟꠣꠉꠣꠁꠔꠣꠝ ꠘꠤ? ꠔꠣꠘ ꠟꠉꠦ ꠟꠣꠠꠣꠁ ꠇꠞꠤꠀ ꠎꠤꠔꠔꠣꠝ ꠙꠣꠞꠝꠥ ꠘꠤ?
1CO 10:23 ꠝꠘꠅ ꠅꠞ ꠘꠤ, ꠀꠝꠤ ꠔ ꠀꠉꠦ ꠇꠁꠍꠤ, ꠇꠥꠘꠥ ꠇꠥꠘꠥ ꠎꠘꠦ ꠇꠂꠘ, “ꠀꠝꠣꠞ ꠟꠣꠉꠤ ꠇꠥꠘ꠆ꠔꠣꠃ ꠢꠣꠞꠣꠝ ꠘꠣꠄ, ꠢꠇ꠆ꠇꠟꠔꠣꠃ ꠎꠣꠁꠎ।” ꠅꠁꠟꠦ ꠢꠇ꠆ꠇꠟꠔꠣ ꠎꠦꠘ ꠝꠣꠘꠡꠞ ꠟꠣꠉꠤ ꠃꠙꠇꠣꠞꠤ, ꠁꠟꠣ ꠌꠤꠘ꠆ꠔꠣ ꠔ ꠑꠤꠇ ꠘꠣꠄ। ꠎꠥꠖꠤꠅ ꠄꠞꠣ ꠇꠂꠘ, ꠢꠇ꠆ꠇꠟꠔꠣꠃ ꠢꠣꠟꠣꠟ, ꠅꠁꠟꠦ ꠢꠇꠟꠔꠣꠄ ꠔ ꠝꠣꠘꠡꠞ ꠁꠝꠣꠘ ꠛꠣꠠꠣꠄ ꠘꠣ।
1CO 10:24 ꠔꠦ ꠇꠥꠘꠥ ꠎꠘꠦꠃ ꠘꠤꠎꠞ ꠡ꠆ꠛꠣꠞꠕ ꠟꠁꠀ ꠙꠣꠉꠟ ꠅꠁꠅ ꠘꠣ, ꠛꠞꠋ ꠅꠁꠘ꠆ꠘꠞ ꠜꠣꠟꠣꠁ ꠇꠞꠣꠞ ꠌꠦꠡ꠆ꠐꠣ ꠇꠞꠅ।
1CO 10:25 ꠛꠣꠎꠣꠞ-ꠀꠐꠅ ꠎꠦꠇꠥꠘꠥ ꠉꠥꠡ꠆ꠔ ꠛꠤꠇꠤ ꠅꠁꠟꠦ ꠁꠔꠣ ꠈꠣꠁꠅ, ꠘꠤꠎꠞ ꠛꠤꠛꠦꠇꠞꠦ ꠡꠣꠘ꠆ꠔꠤ ꠞꠣꠈꠣꠞ ꠟꠣꠉꠤ ꠇꠥꠘꠥ ꠡꠘ꠆ꠖꠄ ꠇꠞꠤꠅ ꠘꠣ।
1CO 10:26 ꠙꠛꠤꠔ꠆ꠞ ꠎꠛꠥꠞ ꠡꠞꠤꠚꠦ ꠔ ꠇꠄ, “ꠁ ꠎꠉꠔ ꠀꠞ ꠎꠉꠔꠞ ꠢꠇ꠆ꠇꠟꠔꠣꠃ ꠝꠣꠛꠥꠖꠞ।”
1CO 10:27 ꠄꠞꠟꠣꠉꠤ ꠀꠝꠞꠣꠞ ꠔꠞꠤꠇꠣꠞ ꠛꠣꠁꠞꠞ ꠇꠥꠘꠥ ꠝꠣꠘꠡꠦ ꠎꠥꠖꠤ ꠔꠥꠝꠞꠣꠞꠦ ꠖꠣꠅꠔ ꠖꠦꠁꠘ, ꠀꠞ ꠔꠥꠝꠞꠣ ꠎꠣꠁꠔꠣꠄ ꠌꠣꠅ, ꠔꠦ ꠛꠤꠛꠦꠇꠞꠦ ꠑꠣꠘ꠆ꠒꠣ ꠞꠣꠈꠣꠞ ꠟꠣꠉꠤ ꠇꠥꠘꠥ ꠡꠘ꠆ꠖꠄ ꠘꠣ ꠇꠞꠤꠀ ꠎꠦꠔꠣ ꠍꠣꠝꠘꠦ ꠖꠦꠁꠘ ꠅꠔꠣꠃ ꠈꠣꠁꠅ।
1CO 10:28 ꠅꠁꠟꠦ ꠇꠦꠃ ꠎꠥꠖꠤ ꠔꠥꠝꠞꠣꠞꠦ ꠎꠣꠘꠣꠁ ꠖꠦꠄ, ꠁ ꠈꠣꠘꠤ ꠇꠥꠘꠥ ꠖꠦꠛꠔꠣꠞ ꠘꠣꠝꠞ ꠙꠡꠣꠖ, ꠔꠦ ꠎꠦ ꠎꠘꠦ ꠁꠈꠣꠘ ꠇꠁꠍꠦ, ꠔꠣꠞ ꠜꠣꠟꠣꠁꠞ ꠟꠣꠉꠤ ꠀꠞ ꠛꠤꠛꠦꠇꠞ ꠀꠞꠣꠝꠞ ꠟꠣꠉꠤ ꠁꠔꠣ ꠈꠣꠁꠅ ꠘꠣ।
1CO 10:29 ꠀꠝꠤ ꠔ ꠔꠥꠝꠞꠣꠞ ꠛꠤꠛꠦꠇꠞ ꠇꠕꠣ ꠇꠁꠞꠣꠝ ꠘꠣ, ꠢꠃ ꠖꠥꠍꠞꠣ ꠝꠣꠘꠡꠞ ꠛꠤꠛꠦꠇꠞ ꠇꠕꠣ ꠇꠁꠞꠣꠝ। ꠇꠣꠞꠘ ꠅꠁꠘ꠆ꠘ ꠝꠣꠘꠡꠞ ꠛꠤꠛꠦꠇ-ꠛꠤꠌꠣꠞꠦ, ꠀꠝꠣꠞ ꠁꠌ꠆ꠍꠣ-ꠅꠘꠤꠌ꠆ꠍꠣꠞ ꠡ꠆ꠛꠣꠗꠤꠘꠔꠣꠔ ꠇꠦꠘꠦ ꠘꠣꠇ ꠉꠟꠣꠁꠔ?
1CO 10:30 ꠀꠝꠤ ꠎꠥꠖꠤ ꠀꠟ꠆ꠟꠣꠞ ꠡꠥꠇꠞꠤꠀ ꠀꠖꠣꠄ ꠇꠞꠤꠀ ꠈꠣꠘꠣ-ꠙꠤꠘꠣ ꠈꠣꠁ, ꠔꠦ ꠎꠦ ꠈꠣꠘꠤꠞ ꠟꠣꠉꠤ ꠡꠥꠇꠞꠤꠀ ꠀꠖꠣꠄ ꠇꠞꠟꠣꠝ, ꠅꠃ ꠈꠣꠘꠤꠞ ꠟꠣꠉꠤ ꠀꠞ ꠛꠖꠘꠣꠝ ꠅꠁꠔ ꠇꠦꠘꠦ?
1CO 10:31 ꠄꠞꠟꠣꠉꠤ ꠔꠥꠝꠞꠣ ꠈꠣꠘꠣ-ꠙꠤꠘꠣ ꠇꠞ ꠛꠣ ꠎꠦꠔꠣꠃ ꠇꠞ ꠘꠣ ꠇꠦꠘꠦ, ꠢꠇꠟꠔꠣꠃ ꠀꠟ꠆ꠟꠣꠞ ꠉꠃꠞꠛꠞ ꠘꠤꠅꠔꠦ ꠇꠞꠤꠅ।
1CO 10:32 ꠛꠘꠤ ꠁꠍꠞꠣꠁꠟ ꠛꠣ ꠜꠤꠘ ꠎꠣꠔꠤ, ꠛꠣ ꠀꠟ꠆ꠟꠣꠞ ꠎꠝꠣꠔꠞ ꠇꠥꠘꠥ ꠝꠣꠘꠡꠞ ꠙꠕꠞ ꠇꠣꠐꠣ ꠛꠘꠤꠅ ꠘꠣ।
1CO 10:33 ꠀꠝꠤ ꠎꠦꠟꠣ ꠢꠇꠟ ꠘꠝꠥꠘꠣꠞ ꠝꠣꠘꠡꠞꠦ ꠢꠇꠟ ꠛꠦꠙꠣꠞꠦ ꠈꠥꠡ ꠞꠣꠈꠣꠞ ꠌꠦꠡ꠆ꠐꠣ ꠇꠞꠤ, ꠔꠥꠝꠞꠣꠅ ꠅꠃꠟꠣ ꠇꠞꠤꠅ। ꠀꠝꠤ ꠔ ꠘꠤꠎꠞ ꠡ꠆ꠛꠣꠞꠕꠞ ꠌꠤꠘ꠆ꠔꠣ ꠇꠞꠤ ꠘꠣ, ꠡꠛ ꠝꠣꠘꠡꠞ ꠜꠣꠟꠣꠁꠞ ꠌꠦꠡ꠆ꠐꠣ ꠇꠞꠤ, ꠎꠣꠔꠦ ꠔꠣꠞꠣ ꠘꠣꠎꠣꠔ ꠢꠣꠍꠤꠟ ꠇꠞꠂꠘ।
1CO 11:1 ꠔꠦ ꠀꠝꠤ ꠎꠦꠟꠣ ꠀꠟ-ꠝꠍꠤꠞ ꠟꠣꠈꠣꠘ ꠌꠟꠤꠀꠞ, ꠔꠥꠝꠞꠣꠅ ꠅꠃꠟꠣ ꠀꠝꠣꠞ ꠟꠣꠈꠣꠘ ꠌꠟꠅ।
1CO 11:2 ꠅ ꠜꠣꠁ ꠅꠇꠟ, ꠔꠥꠝꠞꠣ ꠀꠝꠣꠞ ꠖꠦꠅꠀ ꠔꠣꠟꠤꠝ ꠝꠘꠅ ꠞꠣꠈꠤꠀ ꠌꠟꠞꠣꠄ, ꠀꠞ ꠢꠇꠟ ꠛꠦꠙꠣꠞꠦꠃ ꠀꠝꠣꠞꠦ ꠁꠀꠖ ꠞꠣꠈꠞꠣꠄ, ꠄꠞꠟꠣꠉꠤ ꠀꠝꠤ ꠔꠥꠝꠞꠣꠞ ꠔꠣꠞꠤꠚ ꠇꠞꠤꠀꠞ।
1CO 11:3 ꠔꠦ ꠀꠝꠤ ꠌꠣꠁꠞꠣꠝ, ꠔꠥꠝꠞꠣ ꠅꠈꠣꠘ ꠛꠥꠎ, ꠀꠟ-ꠝꠍꠤꠃ ꠅꠁꠟꠣ ꠢꠇꠟ ꠛꠦꠐꠣꠁꠘ꠆ꠔꠞ ꠝꠣꠕꠣ, ꠛꠦꠐꠣꠁꠘ ꠅꠁꠟꠣ ꠛꠦꠐꠤꠘ꠆ꠔꠞ ꠝꠣꠕꠣ, ꠀꠞ ꠀꠟ꠆ꠟꠣ ꠙꠣꠇ ꠅꠁꠟꠣ ꠀꠟ-ꠝꠍꠤꠞ ꠝꠣꠕꠣ।
1CO 11:4 ꠄꠛꠣꠖꠔ-ꠛꠘ꠆ꠖꠦꠉꠤꠞ ꠡꠝꠄ ꠎꠦ ꠛꠦꠐꠣꠄ ꠝꠣꠕꠣ ꠉꠥꠞꠤꠀ ꠖꠥꠀ-ꠝꠥꠘꠣꠎꠣꠔ ꠇꠞꠦ, ꠛꠣ ꠙꠤꠞꠣꠇꠤ ꠝꠣꠔꠦ, ꠢꠦ ꠔ ꠔꠣꠞ ꠝꠣꠕꠣꠞꠦ ꠅꠡꠝ꠆ꠝꠣꠘ ꠇꠞꠦ।
1CO 11:5 ꠅꠟꠣꠈꠣꠘ ꠎꠦ ꠛꠦꠐꠤꠄ ꠝꠣꠕꠣ ꠘꠣ ꠉꠥꠞꠤꠀ ꠖꠥꠀ-ꠝꠥꠘꠣꠎꠣꠔ ꠇꠞꠦ, ꠛꠣ ꠙꠤꠞꠣꠇꠤ ꠝꠣꠔꠦ, ꠅꠃ ꠛꠦꠐꠤꠄꠅ ꠔꠣꠁꠞ ꠝꠣꠕꠣꠞ ꠅꠡꠝ꠆ꠝꠣꠘ ꠇꠞꠦ, ꠔꠣꠁ ꠝꠣꠕꠣ ꠇꠣꠝꠣꠁꠟ ꠛꠦꠐꠤꠘ꠆ꠔꠞ ꠟꠣꠈꠣꠘ ꠛꠘꠤꠎꠣꠄ।
1CO 11:6 ꠇꠥꠘꠥ ꠛꠦꠐꠤꠄ ꠎꠥꠖꠤ ꠝꠣꠕꠣ ꠘꠣ ꠉꠥꠞꠦ, ꠔꠦ ꠔꠣꠁꠞ ꠌꠥꠟ ꠇꠣꠝꠣꠁꠟꠣꠃꠇ। ꠅꠁꠟꠦ ꠛꠦꠐꠤꠘ꠆ꠔꠞ ꠌꠥꠟ ꠇꠣꠝꠣꠘꠤ ꠡꠞꠝꠞ ꠛꠤꠡꠄ ꠝꠘꠅ ꠅꠁꠟꠦ, ꠔꠣꠁꠞ ꠝꠣꠕꠣ ꠉꠥꠞꠤꠀ ꠞꠣꠈꠃꠇ।
1CO 11:7 ꠄꠛꠣꠖꠔ-ꠛꠘ꠆ꠖꠦꠉꠤꠞ ꠡꠝꠄ ꠝꠣꠕꠣ ꠉꠥꠞꠤꠀ ꠞꠣꠈꠣ ꠛꠦꠐꠣꠁꠘ꠆ꠔꠞ ꠟꠣꠉꠤ ꠑꠤꠇ ꠘꠣꠄ, ꠀꠟ꠆ꠟꠣꠄ ꠔ ꠛꠦꠐꠣꠁꠘ꠆ꠔꠞꠦ ꠔꠣꠘ ꠘꠤꠎꠞ ꠍꠥꠞꠔꠦ ꠙꠄꠖꠣ ꠇꠞꠍꠂꠘ ꠀꠞ ꠛꠦꠐꠣꠁꠘ꠆ꠔꠞ ꠝꠣꠎꠖꠤꠃ ꠀꠟ꠆ꠟꠣꠞ ꠝꠢꠤꠝꠣ ꠎꠣꠁꠞ ꠅꠄ, ꠅꠁꠟꠦ ꠛꠦꠐꠤꠘ꠆ꠔꠞ ꠝꠣꠎꠖꠤ ꠛꠦꠐꠣꠁꠘ꠆ꠔꠞ ꠝꠢꠤꠝꠣ ꠎꠣꠁꠞ ꠅꠄ।
1CO 11:8 ꠙꠄꠟꠣ ꠛꠦꠐꠣ ꠝꠣꠘꠥꠡ ꠛꠣꠛꠣ ꠀꠖꠝ ꠔ ꠛꠦꠐꠤ ꠕꠣꠇꠤ ꠙꠄꠖꠣ ꠅꠁꠍꠂꠘ ꠘꠣ, ꠅꠁꠟꠦ ꠙꠄꠟꠣ ꠛꠦꠐꠤ ꠝꠣꠘꠥꠡ ꠝꠣꠁ ꠢꠣꠅꠀ ꠘꠤꠌ꠆ꠌꠄ ꠛꠦꠐꠣ ꠕꠣꠇꠤꠃ ꠙꠄꠖꠣ ꠅꠁꠍꠂꠘ।
1CO 11:9 ꠀꠞ ꠛꠦꠐꠤꠘ꠆ꠔꠞ ꠟꠣꠉꠤ ꠛꠦꠐꠣꠁꠘ ꠙꠄꠖꠣ ꠅꠁꠍꠂꠘ ꠘꠣ, ꠛꠞꠋ ꠛꠦꠐꠣꠁꠘ꠆ꠔꠞ ꠟꠣꠉꠤꠃ ꠛꠦꠐꠤꠘ ꠙꠄꠖꠣ ꠅꠁꠍꠂꠘ।
1CO 11:10 ꠅꠃ ꠔꠣꠟꠤꠝ ꠝꠣꠚꠤꠇ ꠚꠤꠞꠤꠡ꠆ꠔꠣ ꠅꠇꠟꠞ ꠇꠕꠣ ꠈꠤꠀꠟ ꠞꠣꠈꠤꠀ, ꠔꠣꠛꠦꠖꠣꠞꠤ ꠝꠣꠘꠣꠞ ꠘꠤꠡꠣꠘꠣ ꠢꠤꠡꠣꠛꠦ ꠢꠇꠟ ꠛꠦꠐꠤꠘ꠆ꠔꠦ ꠝꠣꠕꠣ ꠉꠥꠞꠤꠀ ꠞꠣꠈꠣ ꠎꠞꠥꠞ।
1CO 11:11 ꠔꠣ-ꠅ ꠝꠣꠟꠤꠇ ꠁꠍꠣꠞ ꠔꠞꠤꠇꠣꠞ ꠛꠦꠐꠤ ꠝꠣꠘꠡꠦ ꠊꠞꠞ ꠛꠦꠐꠣꠞ ꠃꠙꠞꠦ ꠜꠞꠡꠣ ꠇꠞꠂꠘ, ꠀꠞ ꠛꠦꠐꠣꠄꠅ ꠅꠟꠣ ꠛꠦꠐꠤꠞ ꠃꠙꠞꠦ ꠜꠞꠡꠣ ꠇꠞꠂꠘ।
1CO 11:12 ꠇꠣꠞꠘ, ꠙꠄꠟꠣ ꠛꠦꠐꠣ ꠀꠖꠝ ꠕꠣꠇꠤ ꠎꠥꠖꠤꠅ ꠙꠄꠟꠣ ꠛꠦꠐꠤ ꠝꠣꠁ ꠢꠣꠅꠀ ꠙꠄꠖꠣ, ꠔꠣ-ꠅ ꠛꠦꠐꠤꠘ ꠕꠣꠇꠤꠃ ꠢꠤꠞꠛꠣꠞ ꠛꠦꠐꠣꠁꠘ꠆ꠔꠞ ꠎꠘꠝ ꠅꠄ। ꠀꠍꠟꠦ ꠢꠇ꠆ꠇꠟꠔꠣꠃ ꠔ ꠀꠟ꠆ꠟꠣꠞ ꠙꠄꠖꠣ।
1CO 11:13 ꠔꠥꠝꠞꠣ ꠘꠤꠎꠦꠃ ꠛꠤꠌꠣꠞ ꠇꠞꠤ ꠖꠦꠈꠅ, ꠝꠣꠕꠣꠔ ꠇꠣꠙꠠ ꠘꠣ ꠖꠤꠀ ꠇꠥꠘꠥ ꠛꠦꠐꠤꠄ ꠖꠥꠀ-ꠝꠥꠘꠣꠎꠣꠔ ꠇꠞꠣ ꠑꠤꠇ ꠘꠤ?
1CO 11:14 ꠀꠞ ꠡꠝꠣꠎꠞ ꠢꠣꠟ-ꠌꠣꠟ ꠕꠣꠇꠤꠃ ꠔ ꠛꠥꠎꠣ ꠎꠣꠄ, ꠛꠦꠐꠣꠁꠘ꠆ꠔꠞ ꠝꠣꠕꠣꠔ ꠟꠣꠝ꠆ꠛꠣ ꠌꠥꠟ ꠞꠣꠈꠣ ꠡꠞꠝꠞ ꠛꠦꠙꠣꠞ,
1CO 11:15 ꠅꠁꠟꠦ ꠛꠦꠐꠤꠘ꠆ꠔꠦ ꠟꠣꠝ꠆ꠛꠣ ꠌꠥꠟ ꠞꠣꠈꠟꠦ ꠔꠣꠞꠣꠞ ꠡꠥꠘꠣꠝ ꠛꠣꠠꠦ ꠘꠣ ꠘꠤ? ꠘꠤꠎꠞꠦ ꠉꠥꠞꠤꠀ ꠞꠣꠈꠣꠞ ꠟꠣꠉꠤꠃ ꠔ ꠔꠣꠞꠣ ꠁ ꠟꠣꠝ꠆ꠛꠣ ꠌꠥꠟ ꠙꠣꠁꠍꠂꠘ।
1CO 11:16 ꠔꠦ ꠁꠔꠣ ꠟꠁꠀ ꠇꠦꠃ ꠔꠞ꠆ꠇ-ꠛꠤꠔꠞ꠆ꠇ ꠇꠞꠟꠦ, ꠀꠝꠣꠞ ꠙꠞꠤꠡ꠆ꠇꠣꠞ ꠎꠥꠀꠙ ꠅꠁꠟ, ꠁꠔꠣ ꠍꠣꠠꠣ ꠖꠥꠍꠞꠣ ꠇꠥꠘꠥ ꠘꠤꠅꠝ ꠀꠝꠞꠣꠞ ꠝꠣꠎꠦ ꠘꠣꠁ ꠀꠞ ꠀꠟ꠆ꠟꠣꠞ ꠎꠝꠣꠔꠞ ꠝꠣꠎꠦꠅ ꠘꠣꠁ।
1CO 11:17 ꠅꠈꠘ ꠀꠝꠤ ꠎꠦ ꠛꠦꠙꠣꠞꠦ ꠙꠞꠣꠝꠤꠡ ꠖꠤꠔꠣꠝ ꠌꠣꠁꠞꠣꠝ, ꠁ ꠛꠦꠙꠣꠞꠦ ꠔ ꠔꠥꠝꠞꠣ ꠝꠥꠐꠦꠃ ꠔꠣꠞꠤꠚ ꠙꠣꠅꠀꠞ ꠎꠥꠇꠣ ꠘꠣꠄ। ꠔꠥꠝꠞꠣ ꠎꠝꠣꠔꠅ ꠎꠦꠟꠣ ꠡꠞꠤꠇ ꠅꠅ, ꠁꠔꠣꠄ ꠔꠥꠝꠞꠣꠞ ꠇꠥꠘꠥ ꠚꠣꠄꠖꠣ ꠅꠄ ꠘꠣ, ꠛꠞꠋ ꠈꠦꠔꠤ ꠅꠄ।
1CO 11:18 ꠀꠝꠤ ꠢꠥꠘꠤꠀꠞ, ꠔꠥꠝꠞꠣ ꠎꠦꠛꠟꠣ ꠎꠝꠣꠔꠅ ꠡꠞꠤꠇ ꠅꠅ, ꠅꠃ ꠡꠝꠄ ꠔꠥꠝꠞꠣꠞ ꠝꠣꠎꠦ ꠖꠟꠣꠖꠟꠤ ꠕꠣꠇꠦ, ꠀꠞ ꠁꠔꠣ ꠇꠤꠍꠥ ꠀꠝꠤ ꠛꠤꠡ꠆ꠛꠣꠡꠅ ꠇꠞꠤ।
1CO 11:19 ꠀꠍꠟꠦ ꠔ ꠔꠥꠝꠞꠣꠞ ꠝꠣꠎꠦ ꠝꠔꠞ ꠅꠝꠤꠟ ꠕꠣꠇꠛꠃ, ꠎꠣꠔꠦ ꠔꠥꠝꠞꠣꠞ ꠝꠣꠎꠞ ꠈꠣꠐꠤ ꠘꠤꠈꠥꠔ ꠝꠣꠘꠡꠞ ꠙꠞꠤꠌꠄ ꠝꠤꠟꠦ।
1CO 11:20 ꠢꠥꠘꠅ, ꠔꠥꠝꠞꠣ ꠎꠦꠛꠟꠣ ꠄꠇꠈꠣꠘꠅ ꠝꠤꠟꠤꠀ ꠄꠛꠣꠖꠔ-ꠛꠘ꠆ꠖꠦꠉꠤ ꠇꠞ, ꠅꠃ ꠡꠝꠄ ꠔ ꠀꠟ-ꠝꠍꠤꠞ ꠝꠦꠎꠛꠣꠘꠤꠞ ꠘꠤꠅꠔꠦ ꠈꠣꠘꠤ ꠛꠤꠟꠣꠘꠤ ꠅꠄ ꠘꠣ।
1CO 11:21 ꠇꠣꠞꠘ ꠔꠥꠝꠞꠣ ꠄꠇꠎꠘꠦ ꠀꠞꠇ ꠎꠘꠞ ꠛꠣꠄ ꠈꠤꠀꠟ ꠘꠣ ꠇꠞꠤꠀꠃ ꠈꠣꠘꠤ ꠈꠣꠁꠟꠣꠅ। ꠔꠥꠝꠞꠣꠞ ꠄꠇꠎꠘꠞ ꠙꠦꠐꠅ ꠜꠥꠇ ꠕꠣꠇꠦ, ꠀꠞ ꠀꠞꠇ ꠎꠘ ꠈꠣꠁꠀ ꠐꠣꠟ ꠅꠁꠎꠣꠄ।
1CO 11:22 ꠈꠣꠘꠣ-ꠙꠤꠘꠣ ꠈꠣꠁꠛꠣꠞ ꠟꠣꠉꠤ ꠔꠥꠝꠞꠣꠞ ꠇꠥꠘꠥ ꠊꠞ-ꠛꠣꠠꠤ ꠘꠣꠁ ꠘꠤ? ꠔꠥꠝꠞꠣ ꠁꠌ꠆ꠍꠣ ꠇꠞꠤꠀ ꠀꠟ꠆ꠟꠣꠞ ꠎꠝꠣꠔꠞꠦ ꠄꠟꠣꠝꠤ ꠇꠞꠞꠣꠄ ꠘꠤ? ꠀꠞ ꠎꠦꠞꠣꠞ ꠈꠣꠘꠤꠞ ꠇꠥꠘ꠆ꠔꠣ ꠘꠣꠁ, ꠔꠣꠞꠣꠞꠦ ꠡꠞꠝ ꠖꠤꠞꠣꠄ ꠘꠤ? ꠅꠈꠘ ꠀꠝꠤ ꠀꠞ ꠇꠤꠔꠣ ꠇꠁꠔꠣꠝ? ꠔꠥꠝꠞꠣꠞ ꠔꠣꠞꠤꠚ ꠇꠞꠔꠣꠝ ꠘꠤ? ꠘꠣꠃꠎꠥꠛꠤꠟ꠆ꠟꠣ!
1CO 11:23 ꠀꠍꠟꠦ ꠀꠝꠤ ꠝꠣꠟꠤꠇ ꠁꠍꠣꠞ ꠉꠦꠍ ꠕꠣꠇꠤ ꠎꠦ ꠔꠣꠟꠤꠝ ꠙꠣꠁꠍꠤ, ꠅꠃ ꠔꠣꠟꠤꠝꠃ ꠀꠝꠤ ꠔꠥꠝꠞꠣꠞꠦ ꠖꠤꠍꠤ। ꠝꠣꠟꠤꠇ ꠁꠍꠣꠞꠦ ꠎꠦ ꠞꠣꠁꠔ ꠖꠥꠡꠝꠘꠞ ꠀꠔꠅ ꠗꠞꠣꠁ ꠖꠦꠅꠀ ꠅꠁꠍꠤꠟ, ꠢꠃ ꠞꠣꠁꠔ ꠔꠣꠁꠘ ꠈꠣꠘꠤꠞ ꠞꠥꠐꠤ ꠀꠔꠅ ꠟꠁꠟꠣ,
1CO 11:24 ꠀꠞ ꠀꠟ꠆ꠟꠣꠞ ꠡꠥꠇꠞꠤꠀ ꠀꠖꠣꠄ ꠇꠞꠟꠣ, ꠛꠣꠖꠦ ꠅꠃ ꠞꠥꠐꠤ ꠐꠥꠇꠞꠣꠁꠀ ꠇꠁꠟꠣ, “ꠁꠔꠣ ꠔ ꠀꠝꠣꠞ ꠡꠞꠤꠟ, ꠅꠃ ꠡꠞꠤꠟ ꠔꠥꠝꠞꠣꠞ ꠟꠣꠉꠤ ꠛꠤꠟꠣꠁ ꠖꠦꠅꠀ ꠅꠞ, ꠔꠦ ꠀꠝꠣꠞꠦ ꠝꠘꠅ ꠞꠣꠈꠣꠞ ꠟꠣꠉꠤ ꠅꠃꠟꠣ ꠇꠞꠤꠅ।”
1CO 11:25 ꠅꠟꠣ ꠈꠣꠅꠀꠞ ꠛꠣꠖꠦ ꠔꠣꠁꠘ ꠡꠞꠛꠔꠞ ꠙꠤꠀꠟꠣ ꠟꠁꠀ ꠇꠁꠟꠣ, “ꠀꠝꠣꠞ ꠟꠃꠞ ꠎꠞꠤꠀꠄ ꠀꠟ꠆ꠟꠣꠞ ꠟꠉꠦ ꠝꠤꠟꠘꠞ ꠎꠦ ꠘꠄꠀ ꠃꠍꠤꠟ꠆ꠟꠣ ꠇꠣꠁꠝ ꠅꠁꠛ, ꠅꠃ ꠙꠤꠀꠟꠣ ꠅꠁꠟ ꠄꠞ ꠘꠤꠡꠣꠘꠣ। ꠔꠥꠝꠞꠣ ꠅꠃ ꠙꠤꠀꠟꠣ ꠕꠣꠇꠤ ꠈꠣꠅꠀꠞ ꠡꠝꠄ ꠀꠝꠣꠞꠦ ꠁꠀꠖ ꠇꠞꠣꠞ ꠟꠣꠉꠤ ꠢꠣꠝꠦꠡꠣ ꠅꠟꠣ ꠇꠞꠤꠅ।”
1CO 11:26 ꠔꠦ ꠔꠥꠝꠞꠣ ꠎꠔꠛꠣꠞ ꠅꠃ ꠞꠥꠐꠤ ꠈꠣꠁꠛꠣꠄ ꠀꠞ ꠅꠃ ꠙꠤꠀꠟꠣꠞ ꠡꠞꠛꠔ ꠈꠣꠁꠛꠣꠄ, ꠝꠣꠟꠤꠇ ꠁꠍꠣ ꠢꠤꠞꠛꠣꠞ ꠘꠣ ꠀꠅꠀ ꠙꠞ꠆ꠎꠘ꠆ꠔ ꠅꠔꠛꠣꠞꠃ ꠔꠣꠘ ꠝꠃꠔꠞ ꠇꠕꠣ ꠄꠟꠣꠘ ꠇꠞꠞꠣꠄ।
1CO 11:27 ꠄꠞꠟꠣꠉꠤ ꠈꠣꠝ-ꠈꠦꠀꠟꠤ ꠇꠞꠤꠀ ꠇꠦꠃ ꠎꠥꠖꠤ ꠁ ꠞꠥꠐꠤ ꠈꠣꠄ ꠀꠞ ꠙꠤꠀꠟꠣꠞ ꠡꠞꠛꠔ ꠈꠣꠄ, ꠔꠦ ꠢꠦ ꠝꠣꠟꠤꠇ ꠁꠍꠣꠞ ꠡꠞꠤꠟ ꠀꠞ ꠟꠃꠞ ꠛꠤꠞꠥꠖ꠆ꠖꠦ ꠉꠥꠘꠣ ꠇꠞꠤꠀ ꠖꠥꠡꠤ ꠛꠘꠤꠎꠣꠄ।
1CO 11:28 ꠅꠃ ꠞꠥꠐꠤ ꠈꠣꠁꠛꠣꠞ ꠀꠉꠦ ꠀꠞ ꠙꠤꠀꠟꠣꠞ ꠡꠞꠛꠔ ꠈꠣꠁꠛꠣꠞ ꠀꠉꠦ, ꠝꠣꠘꠡꠦ ꠘꠤꠎꠞꠦ ꠎꠣꠌꠣꠁ ꠇꠞꠤ ꠖꠦꠈꠃꠇ।
1CO 11:29 ꠇꠣꠞꠘ ꠁꠔꠣ ꠈꠣꠅꠀꠞ ꠡꠝꠄ ꠢꠦ ꠎꠥꠖꠤ ꠝꠣꠟꠤꠇ ꠁꠍꠣꠞ ꠡꠞꠤꠟꠞ ꠛꠦꠙꠣꠞꠦ ꠘꠣ ꠛꠥꠎꠦ, ꠔꠦ ꠁꠔꠣ ꠈꠣꠁꠀ ꠢꠦ ꠘꠤꠎꠞ ꠃꠙꠞꠦ ꠉꠎꠛ ꠒꠣꠇꠤꠀ ꠀꠘꠦ।
1CO 11:30 ꠅꠔꠣꠞ ꠟꠣꠉꠤꠃ ꠔꠥꠝꠞꠣꠞ ꠝꠣꠎꠞ ꠛꠃꠔ ꠝꠣꠘꠥꠡ ꠇꠝꠎꠥꠞ ꠀꠞ ꠛꠦꠝꠣꠞꠤ ꠀꠍꠂꠘ, ꠄꠝꠘꠇꠤ ꠇꠦꠃ ꠇꠦꠃ ꠝꠞꠍꠂꠘ।
1CO 11:31 ꠀꠝꠞꠣ ꠘꠤꠎꠞ ꠛꠤꠌꠣꠞ ꠘꠤꠎꠦ ꠇꠞꠤꠟ꠆ꠟꠦ, ꠝꠣꠟꠤꠇꠞ ꠀꠔꠞ ꠛꠤꠌꠣꠞ ꠕꠣꠇꠤ ꠞꠦꠢꠣꠁ ꠙꠣꠁꠝꠥ।
1CO 11:32 ꠅꠁꠟꠦ ꠝꠣꠟꠤꠇꠦ ꠎꠦꠛꠟꠣ ꠀꠝꠞꠣꠞ ꠛꠤꠌꠣꠞ ꠇꠞꠂꠘ, ꠅꠃ ꠡꠝꠄ ꠔꠣꠁꠘ ꠀꠝꠞꠣꠞꠦ ꠡꠣꠡꠘ ꠇꠞꠂꠘ, ꠎꠣꠔꠦ ꠖꠥꠘꠤꠀꠞ ꠢꠇꠟꠞ ꠟꠉꠦ ꠀꠈꠦꠞꠣꠔꠞ ꠖꠤꠘ ꠀꠝꠞꠣꠞꠦ ꠖꠥꠡꠤ ꠡꠣꠁꠛꠡ꠆ꠔ ꠇꠞꠣ ꠘꠣ ꠅꠄ।
1CO 11:33 ꠄꠞꠟꠣꠉꠤ ꠅ ꠜꠣꠁ ꠅꠇꠟ, ꠔꠥꠝꠞꠣ ꠎꠦꠛꠟꠣ ꠝꠦꠎꠛꠣꠘꠤ ꠈꠣꠅꠀꠞ ꠟꠣꠉꠤ ꠄꠇꠈꠣꠘꠅ ꠖꠟꠣ ꠅꠅ, ꠅꠃ ꠡꠝꠄ ꠄꠇꠦ-ꠅꠁꠘ꠆ꠘꠞ ꠛꠣꠄ ꠈꠤꠀꠟ ꠇꠞꠤꠅ।
1CO 11:34 ꠄꠇꠎꠘꠞ ꠎꠥꠖꠤ ꠙꠦꠐꠅ ꠜꠥꠇ ꠟꠣꠉꠤꠎꠣꠄ, ꠔꠦ ꠢꠦ ꠛꠣꠠꠤ ꠕꠣꠇꠤ ꠈꠣꠁꠀ ꠀꠃꠇ, ꠎꠣꠔꠦ ꠔꠥꠝꠞꠣ ꠄꠇꠈꠣꠘꠅ ꠅꠀꠄ ꠇꠥꠘꠥ ꠡꠣꠎꠣ ꠘꠣ ꠙꠣꠅ। ꠔꠦ ꠀꠝꠤ ꠎꠦꠛꠟꠣ ꠔꠥꠝꠞꠣꠞ ꠉꠦꠍꠦ ꠀꠁꠝꠥ, ꠅꠃ ꠡꠝꠄ ꠛꠣꠖ-ꠛꠣꠇꠤ ꠛꠦꠙꠣꠞꠦ ꠘꠍꠤꠅꠔ ꠇꠞꠝꠥ।
1CO 12:1 ꠅ ꠜꠣꠁ ꠅꠇꠟ, ꠀꠝꠤ ꠌꠣꠁꠞꠣꠝ ꠀꠟ꠆ꠟꠣꠁ ꠙꠣꠇ ꠞꠥꠢꠥꠞ ꠖꠣꠘ-ꠘꠤꠀꠝꠔꠞ ꠛꠦꠙꠣꠞꠦ ꠔꠥꠝꠞꠣꠞ ꠇꠥꠘ꠆ꠔꠣꠃ ꠅꠎꠣꠘꠣ ꠘꠣ ꠞꠃꠇ।
1CO 12:2 ꠔꠥꠝꠞꠣꠞ ꠎꠣꠘꠣ ꠀꠍꠦ, ꠀꠉꠦ ꠎꠦꠛꠟꠣ ꠔꠥꠝꠞꠣ ꠀꠟ꠆ꠟꠣꠞ ꠄꠛꠣꠖꠔ ꠇꠞꠔꠣꠄ ꠘꠣ, ꠢꠃ ꠡꠝꠄ ꠔꠥꠝꠞꠣꠞꠦ ꠅꠟꠣꠈꠣꠘ ꠖꠦꠛ-ꠖꠦꠛꠤꠞ ꠛꠣꠄ ꠐꠣꠘꠤꠀ ꠘꠦꠅꠀ ꠅꠁꠔ, ꠎꠦꠔꠣꠄ ꠇꠥꠘ꠆ꠔꠣ ꠝꠣꠔꠤꠔ ꠙꠣꠞꠦ ꠘꠣ।
1CO 12:3 ꠅꠁꠟꠦ ꠀꠝꠤ ꠔꠥꠝꠞꠣꠞꠦ ꠎꠣꠘꠣꠁꠞꠣꠝ, ꠀꠟ꠆ꠟꠣꠞ ꠞꠥꠢꠥꠞ ꠛꠟꠦ ꠝꠣꠔꠤꠟꠦ ꠇꠥꠘꠥ ꠝꠣꠘꠡꠦ ꠁꠈꠣꠘ ꠇꠄ ꠘꠣ, “ꠁꠍꠣꠞ ꠃꠙꠞꠦ ꠟꠣꠘ꠆ꠘꠔ ꠙꠠꠃꠇ।” ꠀꠞ ꠀꠟ꠆ꠟꠣꠁ ꠙꠣꠇ ꠞꠥꠢꠥꠞ ꠛꠟ ꠍꠣꠠꠣ ꠇꠦꠃ ꠇꠁꠔ-ꠅ ꠙꠣꠞꠦ ꠘꠣ, “ꠢꠎꠞꠔ ꠁꠍꠣꠃ ꠝꠣꠟꠤꠇ।”
1CO 12:4 ꠅꠃ ꠄꠇꠁ ꠙꠣꠇ ꠞꠥꠢꠥꠞ ꠘꠣꠘꠣꠘ ꠘꠝꠥꠘꠣꠞ ꠖꠣꠘ-ꠘꠤꠀꠝꠔ ꠀꠍꠦ।
1CO 12:5 ꠀꠝꠞꠣ ꠘꠣꠘꠣꠘ ꠘꠤꠅꠝꠦ ꠄꠇꠁ ꠝꠣꠟꠤꠇꠞ ꠈꠦꠎꠝꠔ ꠇꠞꠤ।
1CO 12:6 ꠀꠝꠞꠣ ꠙꠞꠔꠦꠇ ꠎꠘꠞꠦ ꠘꠣꠘꠣꠘ ꠘꠝꠥꠘꠣꠞ ꠇꠣꠝ-ꠇꠣꠎ ꠖꠦꠅꠀ ꠅꠁꠍꠦ, ꠅꠁꠟꠦ ꠀꠟ꠆ꠟꠣ ꠙꠣꠇ ꠔ ꠄꠇꠎꠘꠃ, ꠔꠣꠁꠘ ꠘꠣꠘꠣꠘ ꠃꠙꠣꠄꠄ ꠀꠝꠞꠣꠞ ꠝꠣꠎꠦ ꠇꠣꠝ ꠇꠞꠂꠘ।
1CO 12:7 ꠢꠇꠟꠞ ꠚꠣꠄꠖꠣꠞ ꠟꠣꠉꠤ ꠅꠃ ꠙꠣꠇ ꠞꠥꠢꠥ ꠄꠇꠅ ꠎꠘꠞ ꠝꠣꠎꠦ ꠄꠇꠅ ꠘꠝꠥꠘꠣꠄ ꠎꠣꠁꠞ ꠅꠁꠘ।
1CO 12:8 ꠅꠃ ꠙꠣꠇ ꠞꠥꠢꠥꠞ ꠛꠟꠦ ꠇꠥꠘꠥ ꠇꠥꠘꠥ ꠎꠘꠞꠦ ꠉꠤꠀꠘ-ꠛꠥꠖ꠆ꠖꠤꠞ ꠝꠣꠔ ꠝꠣꠔꠣ, ꠀꠞ ꠇꠦꠃꠞꠞꠦ ꠀꠈꠟꠖꠣꠞꠤ ꠝꠣꠔ ꠝꠣꠔꠣꠞ ꠘꠤꠀꠝꠔ ꠖꠦꠅꠀ ꠅꠄ।
1CO 12:9 ꠄꠇꠎꠘꠦ ꠅꠃ ꠞꠥꠢꠥꠞ ꠛꠟꠦ ꠉꠣꠁꠛꠤ ꠜꠞꠡꠣ ꠙꠣꠁꠘ, ꠀꠞ ꠅꠃ ꠞꠥꠢꠥꠞ ꠛꠟꠦ ꠖꠥꠍꠞꠣ ꠎꠘꠦ ꠛꠦꠝꠣꠞꠤꠞꠦ ꠜꠣꠟꠣ ꠇꠞꠣꠞ ꠈꠦꠝꠔꠣ ꠙꠣꠁꠘ,
1CO 12:10 ꠇꠦꠃ ꠇꠦꠃ ꠇꠦꠞꠣꠝꠔꠤ ꠇꠣꠝ ꠇꠞꠣꠞ ꠈꠦꠝꠔꠣ, ꠇꠦꠃ ꠇꠦꠃ ꠙꠤꠞꠣꠇꠤ ꠝꠣꠔꠣꠞ ꠈꠦꠝꠔꠣ, ꠇꠦꠃ ꠇꠦꠃ ꠛꠣꠖ-ꠜꠣꠟꠣ ꠞꠥꠢꠥ ꠅꠇꠟ ꠀꠞ ꠎꠤꠘ-ꠜꠥꠔꠞꠦ ꠌꠤꠘꠣꠞ ꠈꠦꠝꠔꠣ, ꠇꠦꠃ ꠇꠦꠃ ꠘꠣꠘꠣꠘ ꠘꠝꠥꠘꠣꠞ ꠉꠣꠁꠛꠤ ꠜꠣꠡꠣꠄ ꠝꠣꠔꠣꠞ ꠈꠦꠝꠔꠣ ꠀꠞ ꠇꠦꠃ ꠇꠦꠃ ꠁꠔꠣꠞ ꠝꠣꠘꠤ ꠛꠥꠎꠣꠁꠀ ꠖꠤꠛꠣꠞ ꠈꠦꠝꠔꠣ ꠙꠣꠁꠘ।
1CO 12:11 ꠁꠔꠣ ꠢꠇꠟ ꠇꠣꠝ ꠔ ꠅꠃ ꠄꠇꠁ ꠙꠣꠇ ꠞꠥꠢꠦ ꠇꠞꠂꠘ। ꠅꠃ ꠖꠣꠘ-ꠘꠤꠀꠝꠔ ꠅꠇꠟ ꠔꠣꠘ ꠘꠤꠎꠞ ꠈꠥꠡꠤ ꠝꠣꠚꠤꠇ ꠙꠞꠔꠦꠇ ꠝꠥꠝꠤꠘꠞꠦ ꠛꠣꠐꠤꠀ ꠖꠦꠁꠘ।
1CO 12:12 ꠅ ꠜꠣꠁꠀꠁꠘ ꠅꠇꠟ, ꠄꠇ ꠡꠞꠤꠟꠞ ꠎꠦꠟꠣ ꠛꠃꠔ ꠅꠋꠉ ꠕꠣꠇꠦ, ꠅꠟꠣ ꠛꠃꠔ ꠅꠋꠉ ꠝꠤꠟꠤꠀ ꠄꠇ ꠡꠞꠤꠟ ꠅꠄ, ꠀꠟ-ꠝꠍꠤꠅ ꠔ ꠑꠤꠇ ꠅꠟꠣꠈꠣꠘ।
1CO 12:13 ꠀꠝꠞꠣ ꠛꠘꠤ ꠁꠍꠞꠣꠁꠟ ꠅꠁ ꠛꠣ ꠜꠤꠘ ꠎꠣꠔꠤ ꠅꠁ, ꠀꠎꠣꠖ ꠛꠣ ꠉꠥꠟꠣꠝ ꠅꠁ, ꠅꠃ ꠄꠇꠁ ꠙꠣꠇ ꠞꠥꠢꠦ ꠢꠇꠟꠞ ꠔꠞꠤꠇꠣꠛꠘ꠆ꠖꠤ ꠅꠁꠍꠦ ꠄꠇ ꠡꠞꠤꠟ ꠅꠀꠞ ꠟꠣꠉꠤ। ꠢꠇꠟꠦꠃ ꠔ ꠅꠃ ꠄꠇꠁ ꠙꠣꠇ ꠞꠥꠢꠥ ꠙꠣꠁꠍꠤ।
1CO 12:14 ꠇꠥꠘꠥ ꠝꠣꠘꠡꠞ ꠡꠞꠤꠟꠞꠦ ꠈꠣꠟꠤ ꠄꠇ ꠅꠋꠉ ꠖꠤꠀ ꠛꠣꠘꠣꠁꠟ ꠅꠁꠍꠦ ꠘꠣ, ꠛꠞꠋ ꠛꠃꠔ ꠅꠋꠉ ꠎꠥꠠꠣ ꠖꠦꠅꠀ ꠅꠁꠍꠦ।
1CO 12:15 ꠅꠈꠘ ꠙꠣꠅꠄ ꠎꠥꠖꠤ ꠇꠄ, “ꠀꠝꠣꠞ ꠘꠣꠝ ꠔ ꠀꠔ ꠘꠣꠄ, ꠔꠦ ꠀꠝꠤ ꠡꠞꠤꠟꠞ ꠅꠋꠉ-ꠅ ꠘꠣꠄ,” ꠄꠞꠟꠣꠉꠤ ꠙꠣꠅ ꠎꠦꠘ ꠡꠞꠤꠟꠞ ꠅꠋꠉ ꠘꠣꠄ, ꠁꠈꠣꠘ ꠔ ꠑꠤꠇ ꠘꠣꠄ।
1CO 12:16 ꠅꠃꠟꠣ ꠇꠣꠘꠦ ꠎꠥꠖꠤ ꠇꠄ, “ꠀꠝꠣꠞ ꠘꠣꠝ ꠔ ꠌꠃꠈ ꠘꠣꠄ, ꠔꠦ ꠀꠝꠤ ꠡꠞꠤꠟꠞ ꠅꠋꠉ-ꠅ ꠘꠣꠄ,” ꠄꠞꠟꠣꠉꠤ ꠇꠣꠘ ꠎꠦꠘ ꠡꠞꠤꠟꠞ ꠅꠋꠉ ꠘꠣꠄ, ꠁꠈꠣꠘ ꠔ ꠑꠤꠇ ꠘꠣꠄ।
1CO 12:17 ꠝꠣꠘꠡꠞ ꠀꠡ꠆ꠔꠣ ꠡꠞꠤꠟꠃ ꠎꠥꠖꠤ ꠌꠃꠈ ꠅꠁꠎꠤꠔ, ꠔꠦ ꠢꠥꠘꠛꠣꠞ ꠈꠦꠝꠔꠣ ꠇꠁ ꠙꠣꠁꠟ ꠅꠘꠦ? ꠀꠞ ꠎꠥꠖꠤ ꠡꠣꠞꠣ ꠡꠞꠤꠟꠃ ꠇꠣꠘ ꠅꠁꠎꠤꠔ, ꠔꠦ ꠊꠦꠞꠣꠘ ꠢꠥꠋꠉꠤꠛꠣꠞ ꠈꠦꠝꠔꠣ ꠇꠁ ꠞꠁꠟ ꠅꠘꠦ?
1CO 12:18 ꠔꠦ ꠀꠟ꠆ꠟꠣꠄ ꠔꠣꠘ ꠘꠤꠎꠞ ꠈꠤꠀꠟ-ꠈꠥꠡꠤ ꠝꠣꠚꠤꠇ ꠡꠞꠤꠟꠞ ꠘꠣꠘꠣꠘ ꠅꠋꠉꠞꠦ ꠄꠇ ꠄꠇ ꠇꠞꠤ ꠢꠣꠎꠣꠁꠍꠂꠘ।
1CO 12:19 ꠢꠇꠟ ꠅꠋꠉ ꠎꠥꠖꠤ ꠄꠇꠟꠣꠈꠣꠘ ꠅꠁꠎꠤꠔ, ꠔꠣꠁꠟꠦ ꠡꠞꠤꠟꠞ ꠇꠥꠘ ꠢꠣꠟꠔ ꠅꠁꠟ ꠅꠘꠦ?
1CO 12:20 ꠡꠞꠤꠟꠅ ꠛꠃꠔ ꠅꠋꠉ ꠀꠍꠦ, ꠔꠣ-ꠅ ꠡꠞꠤꠟ ꠔ ꠄꠇꠐꠣꠃ।
1CO 12:21 ꠌꠃꠈꠦ ꠀꠔꠞꠦ ꠇꠁꠔ ꠙꠣꠞꠦ ꠘꠣ, “ꠔꠥꠝꠣꠞꠦ ꠀꠝꠣꠞ ꠖꠞꠇꠣꠞ ꠘꠣꠁ,” ꠀꠞ ꠝꠣꠕꠣꠄ ꠖꠥꠁꠅ ꠙꠣꠅꠞꠦ ꠇꠁꠔ ꠙꠣꠞꠦ ꠘꠣ, “ꠔꠥꠝꠞꠣꠞꠦ ꠀꠝꠣꠞ ꠖꠞꠇꠣꠞ ꠘꠣꠁ।”
1CO 12:22 ꠀꠍꠟꠦ ꠡꠞꠤꠟꠞ ꠎꠦ ꠅꠋꠉꠞꠦ ꠇꠝꠎꠥꠞ ꠝꠘꠅ ꠅꠄ, ꠅꠉꠥꠁꠘꠃ ꠛꠦꠡꠤ ꠖꠞꠇꠣꠞꠤ।
1CO 12:23 ꠡꠞꠤꠟꠞ ꠎꠦ ꠡꠞꠝꠞ ꠅꠋꠉꠞꠦ ꠀꠝꠞꠣ ꠢꠥꠞꠥ-ꠝꠥꠞꠥ ꠝꠘꠅ ꠇꠞꠤ, ꠁꠐꠣꠞꠦ ꠀꠝꠞꠣ ꠛꠦꠡꠤ ꠖꠣꠝ ꠖꠦꠁ, ꠝꠣꠘꠤ ꠎꠦ ꠅꠋꠉꠞꠦ ꠛꠣꠞꠦ ꠖꠦꠈꠣꠘꠤ ꠎꠣꠄ ꠘꠣ, ꠁꠔꠣꠞꠦ ꠀꠝꠞꠣ ꠁꠎ꠆ꠎꠔ ꠇꠞꠤꠀ ꠉꠥꠞꠤꠀ ꠞꠣꠈꠤ।
1CO 12:24 ꠅꠁꠟꠦ ꠎꠦ ꠅꠋꠉꠞꠦ ꠛꠣꠞꠦ ꠖꠦꠈꠣꠘꠤ ꠎꠣꠄ, ꠁꠔꠣꠞꠦ ꠉꠥꠞꠤꠀ ꠞꠣꠈꠣꠞ ꠖꠞꠇꠣꠞ ꠅꠄ ꠘꠣ। ꠀꠍꠟꠦ ꠀꠟ꠆ꠟꠣꠄ ꠅꠃ ꠢꠥꠞꠥ-ꠝꠥꠞꠥ ꠀꠞ ꠇꠝꠎꠥꠞ ꠅꠋꠉꠞꠦ ꠛꠦꠡꠤ ꠁꠎ꠆ꠎꠔ ꠖꠤꠀ, ꠢꠇꠟ ꠅꠋꠉꠞꠦ ꠎꠥꠠꠣ ꠟꠣꠉꠣꠁꠀ ꠄꠇ ꠡꠞꠤꠟ ꠛꠣꠘꠣꠁꠍꠂꠘ,
1CO 12:25 ꠎꠣꠔꠦ ꠡꠞꠤꠟ ꠜꠣꠉꠣꠜꠣꠉꠤ ꠘꠣ ꠅꠄ, ꠛꠞꠋ ꠄꠇ ꠅꠋꠉꠄ ꠀꠞꠇ ꠅꠋꠉꠞꠦ ꠘꠤꠎꠞ ꠟꠣꠈꠣꠘ ꠝꠘꠅ ꠇꠞꠦ।
1CO 12:26 ꠡꠞꠤꠟꠞ ꠄꠇ ꠅꠋꠉꠞ ꠎꠥꠖꠤ ꠇꠡ꠆ꠐ ꠅꠄ, ꠔꠦ ꠡꠣꠞꠣ ꠡꠞꠤꠟꠦ ꠇꠡ꠆ꠐ ꠙꠣꠄ, ꠀꠞ ꠄꠇ ꠅꠋꠉꠦ ꠁꠎ꠆ꠎꠔ ꠙꠣꠁꠟꠦ, ꠀꠡ꠆ꠔꠣ ꠡꠞꠤꠟꠦ ꠈꠥꠡꠤ-ꠛꠣꠡꠤ ꠇꠞꠦ।
1CO 12:27 ꠔꠦ ꠔꠥꠝꠞꠣꠃ ꠅꠁꠟꠣꠄ ꠀꠟ-ꠝꠍꠤꠞ ꠡꠞꠤꠟ, ꠔꠥꠝꠞꠣ ꠄꠇꠅ ꠎꠘ ꠅꠃ ꠡꠞꠤꠟꠞ ꠄꠇꠅ ꠅꠋꠉ।
1CO 12:28 ꠎꠣꠘ ꠘꠤ, ꠀꠟ꠆ꠟꠣꠄ ꠔ ꠎꠝꠣꠔꠞ ꠜꠤꠔꠞꠦ ꠙꠄꠟꠣ ꠍꠣꠢꠣꠛꠤ, ꠛꠣꠖꠦ ꠙꠤꠞꠣꠇꠤ ꠝꠣꠔ ꠝꠣꠔꠞꠣ, ꠛꠣꠖꠦ ꠃꠡ꠆ꠔꠣꠖ ꠅꠇꠟ ꠛꠅꠀꠁꠟ ꠇꠞꠍꠂꠘ। ꠄꠞꠛꠣꠖꠦ ꠛꠅꠀꠁꠟ ꠇꠞꠍꠂꠘ ꠎꠦꠞꠣ ꠇꠦꠞꠣꠝꠔꠤ ꠇꠣꠝ ꠇꠞꠞꠣ, ꠛꠦꠝꠣꠞ ꠜꠣꠟꠣ ꠇꠞꠞꠣ, ꠡꠣꠁꠎ꠆ꠎ-ꠡꠢꠣꠄꠅꠔꠣ ꠇꠞꠞꠣ, ꠁꠍꠣꠄꠁ ꠎꠝꠣꠔꠞꠦ ꠌꠣꠟꠣꠅꠞꠣ ꠀꠞ ꠘꠣꠘꠣꠘ ꠉꠣꠁꠛꠤ ꠜꠣꠡꠣꠄ ꠝꠣꠔꠞꠣ ꠎꠘ।
1CO 12:29 ꠔꠦ ꠄꠞꠣ ꠢꠇꠟꠦꠃ ꠇꠥꠘꠥ ꠍꠣꠢꠣꠛꠤ ꠙꠖ ꠙꠣꠁꠍꠂꠘ ꠘꠤ? ꠢꠇꠟꠦꠃ ꠙꠤꠞꠣꠇꠤ ꠝꠣꠔꠂꠘ ꠘꠤ? ꠢꠇꠟꠃ ꠃꠡ꠆ꠔꠣꠖ ꠘꠤ? ꠀꠞ ꠢꠇꠟꠦ ꠇꠥꠘꠥ ꠇꠦꠞꠣꠝꠔꠤ ꠇꠣꠝ ꠇꠞꠣꠞ ꠈꠦꠝꠔꠣ ꠙꠣꠁꠍꠂꠘ ꠘꠤ?
1CO 12:30 ꠢꠇꠟꠦ ꠇꠥꠘꠥ ꠛꠦꠝꠣꠞ ꠡꠤꠚꠣ ꠇꠞꠔꠣ ꠙꠣꠞꠂꠘ ꠘꠤ? ꠢꠇꠟꠦꠃ ꠉꠣꠁꠛꠤ ꠜꠣꠡꠣꠄ ꠝꠣꠔꠂꠘ ꠘꠤ? ꠢꠇꠟꠦꠃ ꠁꠔꠣꠞ ꠝꠣꠘꠤ ꠛꠥꠎꠣꠁꠀ ꠖꠤꠔꠣ ꠙꠣꠞꠂꠘ ꠘꠤ? ꠘꠤꠌ꠆ꠌꠄ ꠘꠣ।
1CO 12:31 ꠔꠣ-ꠅ ꠀꠝꠤ ꠇꠁꠞꠣꠝ, ꠔꠥꠝꠞꠣ ꠢꠇꠟ ꠕꠣꠇꠤ ꠖꠣꠝꠤ ꠘꠤꠀꠝꠔ ꠅꠇꠟ ꠙꠣꠅꠀꠞ ꠟꠣꠉꠤ ꠀꠡꠤꠇ ꠅꠅ। ꠀꠞ ꠈꠤꠀꠟ ꠇꠞꠅ, ꠅꠈꠘ ꠀꠝꠤ ꠔꠥꠝꠞꠣꠞꠦ ꠀꠞꠅ ꠜꠣꠟꠣ ꠄꠇꠈꠣꠘ ꠙꠕ ꠖꠦꠈꠣꠁꠞꠣꠝ।
1CO 13:1 ꠀꠝꠤ ꠎꠥꠖꠤ ꠎꠉꠔꠞ ꠝꠣꠘꠥꠡ ꠛꠣ ꠀꠍꠝꠣꠘꠤ ꠚꠤꠞꠤꠡ꠆ꠔꠣꠞ ꠉꠣꠁꠛꠤ ꠜꠣꠡꠣꠄ ꠝꠣꠔꠤ, ꠀꠞ ꠀꠝꠣꠞ ꠜꠤꠔꠞꠦ ꠇꠥꠘꠥ ꠝꠢꠛ꠆ꠛꠔ ꠘꠣ ꠕꠣꠇꠦ, ꠔꠦ ꠔ ꠀꠝꠤ ꠎꠥꠞꠦ ꠎꠥꠞꠦ ꠛꠣꠎꠣꠁꠟ ꠙꠤꠔꠟꠞ ꠊꠘ꠆ꠐꠤ ꠛꠣ ꠏꠘꠏꠘ ꠇꠞꠣ ꠇꠞꠔꠣꠟꠞ ꠟꠣꠈꠣꠘ ꠅꠁꠉꠦꠍꠤ।
1CO 13:2 ꠀꠝꠣꠞ ꠎꠥꠖꠤ ꠙꠤꠞꠣꠇꠤ ꠝꠣꠔꠤꠛꠣꠞ ꠈꠦꠝꠔꠣ ꠕꠣꠇꠦ, ꠢꠇꠟ ꠛꠣꠔꠥꠘꠤ ꠛꠦꠙꠣꠞ ꠛꠥꠎꠤ, ꠢꠇꠟ ꠘꠝꠥꠘꠣꠞ ꠀꠈꠟ-ꠛꠥꠖ꠆ꠖꠤꠄ ꠇꠣꠝꠤꠟ ꠅꠁ, ꠀꠞ ꠀꠝꠣꠞ ꠁꠝꠣꠘꠤ ꠛꠟꠖꠤ ꠃꠌꠣ ꠙꠣꠠꠅꠞꠦꠅ ꠄꠇ ꠎꠣꠉꠣ ꠕꠣꠇꠤ ꠀꠞꠇ ꠎꠣꠉꠣꠔ ꠢꠞꠣꠁꠟꠤꠔꠣꠝ ꠙꠣꠞꠤ, ꠅꠁꠟꠦ ꠀꠝꠣꠞ ꠖꠤꠟꠅ ꠇꠥꠘꠥ ꠝꠢꠛ꠆ꠛꠔ ꠘꠣ ꠕꠣꠇꠦ, ꠔꠦ ꠀꠟ꠆ꠟꠣꠞ ꠘꠎꠞꠅ ꠀꠝꠤ ꠇꠥꠘ꠆ꠔꠣꠃ ꠘꠣꠄ।
1CO 13:3 ꠀꠝꠣꠞ ꠢꠇꠟ ꠗꠘ-ꠍꠣꠝꠣꠘꠣ ꠎꠥꠖꠤ ꠉꠞꠤꠛ-ꠖꠥꠈꠤꠞꠦ ꠛꠤꠟꠣꠁ ꠖꠦꠁ, ꠄꠝꠘꠇꠤ ꠀꠝꠣꠞ ꠡꠞꠤꠟꠞꠦꠅ ꠎꠥꠖꠤ ꠎꠣꠟꠣꠘꠤꠞ ꠟꠣꠉꠤ ꠖꠣꠘ ꠇꠞꠤꠟꠣꠁ, ꠀꠞ ꠀꠝꠣꠞ ꠜꠤꠔꠞꠦ ꠎꠥꠖꠤ ꠝꠢꠛ꠆ꠛꠔ ꠘꠣ ꠕꠣꠇꠦ, ꠔꠦ ꠇꠥꠘꠥ ꠚꠣꠄꠖꠣ ꠘꠣꠁ।
1CO 13:4 ꠝꠢꠛ꠆ꠛꠔ ꠢꠇꠟ ꠡꠝꠄ ꠍꠛꠞ ꠇꠞꠦ, ꠖꠄꠀ-ꠝꠣꠄꠀ ꠇꠞꠦ, ꠁꠋꠡꠣ ꠇꠞꠦ ꠘꠣ, ꠛꠠꠣꠁ ꠇꠞꠦ ꠘꠣ, ꠅꠢꠋꠇꠣꠞ ꠇꠞꠦ ꠘꠣ,
1CO 13:5 ꠛꠣꠖ ꠛꠦꠛꠢꠣꠞ ꠇꠞꠦ ꠘꠣ, ꠘꠤꠎꠞ ꠡ꠆ꠛꠣꠞꠕꠞ ꠌꠦꠡ꠆ꠐꠣ ꠇꠞꠦ ꠘꠣ, ꠞꠣꠉ-ꠉꠥꠍꠣ ꠇꠞꠦ ꠘꠣ, ꠇꠦꠃ ꠇꠥꠘꠥ ꠈꠦꠔꠤ ꠇꠞꠟꠦ ꠝꠘꠅ ꠞꠣꠈꠦ ꠘꠣ,
1CO 13:6 ꠘꠣꠚꠞꠝꠣꠘꠤꠔ ꠈꠥꠡꠤ ꠅꠄ ꠘꠣ, ꠛꠞꠋ ꠢꠇꠤꠇꠔꠤꠄ ꠈꠥꠡꠤ ꠇꠞꠦ।
1CO 13:7 ꠝꠢꠛ꠆ꠛꠔꠦ ꠢꠇ꠆ꠇꠟꠔꠣ ꠡꠁꠎ꠆ꠎ ꠇꠞꠦ, ꠢꠇꠟꠔꠣ ꠛꠤꠡ꠆ꠛꠣꠡ ꠇꠞꠦ, ꠢꠇꠟ ꠛꠦꠙꠣꠞꠦ ꠝꠘꠞ ꠝꠣꠎꠦ ꠀꠡꠣ ꠎꠥꠉꠣꠄ ꠀꠞ ꠢꠇꠟ ꠛꠦꠙꠣꠞꠦ ꠍꠛꠞ ꠇꠞꠤꠀ ꠗꠂꠎ꠆ꠎ ꠗꠞꠦ।
1CO 13:8 ꠢꠥꠘꠅ, ꠢꠇꠟ ꠙꠤꠞꠣꠇꠤ ꠝꠣꠔ ꠄꠇꠖꠤꠘ ꠚꠥꠠꠣꠁꠎꠤꠛ, ꠘꠣꠘꠣꠘ ꠜꠣꠡꠣꠅ ꠡꠦꠡ ꠅꠁꠎꠤꠛ ꠀꠞ ꠀꠈꠟꠖꠣꠞꠞ ꠀꠈꠟꠅ ꠚꠥꠠꠣꠁꠎꠤꠛ, ꠅꠁꠟꠦ ꠝꠢꠛ꠆ꠛꠔ ꠇꠥꠘꠥ ꠡꠝꠄ ꠚꠥꠠꠣꠄ ꠘꠣ।
1CO 13:9 ꠔꠦ ꠅꠈꠘ ꠀꠝꠞꠣ ꠔ ꠇꠥꠘꠥꠔꠣꠃ ꠡꠥꠟ꠆ꠟꠀꠘꠣ ꠎꠣꠘꠤ ꠘꠣ, ꠙꠤꠞꠣꠇꠤ ꠝꠣꠔꠅ ꠡꠥꠟ꠆ꠟꠀꠘꠣ ꠇꠁꠔꠣꠝ ꠙꠣꠞꠤ ꠘꠣ।
1CO 13:10 ꠅꠁꠟꠦ ꠀꠝꠞꠣ ꠎꠣꠘꠤ, ꠡꠥꠟ꠆ꠟꠀꠘꠣ ꠅꠀꠞ ꠡꠝꠄ ꠎꠦꠛꠟꠣ ꠀꠁꠛ, ꠅꠃ ꠡꠝꠄ ꠜꠣꠋꠉꠣ-ꠌꠥꠞꠣ ꠢꠇꠟꠔꠣ ꠚꠥꠠꠣꠁꠎꠤꠛ।
1CO 13:11 ꠀꠝꠤ ꠎꠦꠛꠟꠣ ꠢꠥꠞꠥ ꠀꠍꠟꠣꠝ, ꠅꠃ ꠡꠝꠄ ꠢꠥꠞꠥꠔ꠆ꠔꠣꠞ ꠟꠣꠈꠣꠘ ꠝꠣꠔꠤꠔꠣꠝ, ꠢꠥꠞꠥꠔ꠆ꠔꠣꠞ ꠟꠣꠈꠣꠘ ꠌꠤꠘ꠆ꠔꠣ-ꠜꠣꠛꠘꠣ ꠇꠞꠔꠣꠝ, ꠀꠞ ꠢꠥꠞꠥꠔ꠆ꠔꠣꠞ ꠟꠣꠈꠣꠘ ꠛꠤꠌꠣꠞ-ꠛꠤꠛꠦꠌꠘꠣ ꠇꠞꠔꠣꠝ। ꠅꠁꠟꠦ ꠅꠈꠘ ꠔ ꠛꠠ ꠅꠁꠉꠦꠍꠤ, ꠄꠞꠟꠣꠉꠤ ꠢꠥꠞꠥꠔ꠆ꠔꠣꠞ ꠟꠣꠈꠣꠘ ꠀꠌꠣꠞ-ꠛꠦꠛꠢꠣꠞ ꠛꠣꠖ ꠖꠤꠟꠣꠁꠍꠤ।
1CO 13:12 ꠅꠈꠘ ꠔ ꠀꠝꠞꠣ ꠏꠣꠙꠡꠣ ꠀꠄꠘꠣꠞ ꠝꠣꠎꠦ ꠢꠇꠟꠔꠣ ꠙꠞꠤꠡ꠆ꠇꠣꠞ ꠖꠦꠈꠞꠣꠝ ꠘꠣ, ꠛꠣꠖꠦ ꠢꠃ ꠡꠥꠟ꠆ꠟꠀꠘꠣ ꠅꠀꠞ ꠡꠝꠄ ꠀꠁꠟꠦ ꠀꠝꠞꠣ ꠢꠇꠟꠔꠣ ꠍꠣꠝꠘꠣ-ꠍꠣꠝꠘꠤ ꠖꠦꠈꠝꠥ। ꠅꠈꠘ ꠀꠝꠤ ꠢꠇ꠆ꠇꠟꠔꠣ ꠙꠥꠞꠣꠙꠥꠞ ꠎꠣꠘꠤ ꠘꠣ, ꠢꠃ ꠡꠝꠄ ꠀꠁꠟꠦ ꠀꠝꠤ ꠢꠇꠟꠔꠣ ꠙꠥꠞꠣꠙꠥꠞ ꠎꠣꠘꠝꠥ, ꠀꠟ꠆ꠟꠣꠄ ꠀꠝꠣꠞꠦ ꠎꠦꠟꠣ ꠙꠥꠞꠣꠙꠥꠞ ꠌꠤꠘꠂꠘ, ꠅꠟꠣ ꠀꠝꠤꠅ ꠢꠇꠟꠔꠣ ꠎꠣꠘꠝꠥ।
1CO 13:13 ꠛꠥꠎꠞꠣꠄ ꠘꠤ, ꠁꠝꠣꠘ, ꠀꠡꠣ, ꠀꠞ ꠝꠢꠛ꠆ꠛꠔ, ꠅꠃ ꠔꠤꠘꠅ ꠗꠘ ꠢꠞ-ꠢꠣꠝꠦꠡꠣ ꠞꠁꠛ, ꠁꠔꠣꠞ ꠝꠣꠎꠦ ꠝꠢꠛ꠆ꠛꠔꠃ ꠢꠇꠟ ꠕꠣꠇꠤ ꠛꠠ।
1CO 14:1 ꠄꠞꠟꠣꠉꠤ ꠅ ꠜꠣꠁ ꠅꠇꠟ, ꠔꠥꠝꠞꠣꠅ ꠝꠢꠛ꠆ꠛꠔꠞ ꠟꠣꠉꠤ ꠀꠡꠤꠇ ꠅꠅ, ꠙꠣꠇ ꠞꠥꠢꠥꠞ ꠖꠦꠅꠀ ꠖꠣꠘ-ꠘꠤꠀꠝꠔꠞ ꠟꠣꠉꠤ ꠈꠤꠀꠟꠤ ꠅꠅ, ꠈꠣꠍ ꠇꠞꠤ ꠙꠤꠞꠣꠇꠤ ꠝꠣꠔꠤꠛꠣꠞ ꠈꠦꠝꠔꠣ ꠙꠣꠁꠔꠦ ꠈꠤꠀꠟꠤ ꠅꠅ।
1CO 14:2 ꠇꠣꠞꠘ ꠎꠦ ꠝꠣꠘꠡꠦ ꠉꠣꠁꠛꠤ ꠇꠥꠘꠥ ꠜꠣꠡꠣꠄ ꠝꠣꠔꠦ, ꠢꠦ ꠁꠔꠣ ꠝꠣꠘꠡꠞ ꠟꠉꠦ ꠝꠣꠔꠦꠞ ꠘꠣ, ꠀꠟ꠆ꠟꠣꠞ ꠟꠉꠦꠃ ꠝꠣꠔꠦꠞ। ꠔꠣꠞ ꠝꠣꠔꠞ ꠜꠣꠡꠣ ꠇꠥꠘꠥ ꠝꠣꠘꠡꠦ ꠛꠥꠎꠦ ꠘꠣ, ꠢꠦ ꠈꠣꠟꠤ ꠙꠣꠇ ꠞꠥꠢꠥꠞ ꠛꠟꠦ ꠛꠣꠔꠥꠘꠤ ꠛꠥꠟꠤ ꠇꠄ।
1CO 14:3 ꠅꠁꠟꠦ ꠎꠦꠁꠘ ꠙꠤꠞꠣꠇꠤ ꠝꠣꠔꠂꠘ, ꠄꠁꠘ ꠝꠣꠘꠡꠞ ꠉꠦꠍꠦꠃ ꠝꠣꠔꠂꠘ, ꠄꠘ ꠝꠣꠔꠦ ꠝꠣꠘꠡꠞ ꠎꠤꠘ꠆ꠖꠦꠉꠤꠞꠦ ꠉꠠꠤꠀ ꠔꠥꠟꠦ, ꠝꠣꠘꠡꠞ ꠖꠤꠟꠅ ꠀꠡꠣ ꠀꠞ ꠡꠣꠘ꠆ꠔꠘꠣ ꠎꠥꠉꠣꠄ।
1CO 14:4 ꠔꠦ ꠎꠦ ꠎꠘꠦ ꠉꠣꠁꠛꠤ ꠜꠣꠡꠣꠄ ꠝꠣꠔꠦ, ꠢꠦ ꠈꠣꠟꠤ ꠘꠤꠎꠞꠦ ꠉꠠꠤꠀ ꠔꠥꠟꠦ, ꠅꠁꠟꠦ ꠎꠦꠁꠘ ꠙꠤꠞꠣꠇꠤ ꠝꠣꠔꠂꠘ, ꠄꠁꠘ ꠔ ꠀꠟ꠆ꠟꠣꠞ ꠎꠝꠣꠔꠞꠦ ꠉꠠꠤꠀ ꠔꠥꠟꠂꠘ।
1CO 14:5 ꠄꠞꠟꠣꠉꠤ ꠀꠝꠤ ꠌꠣꠁꠞꠣꠝ, ꠔꠥꠝꠞꠣ ꠢꠇꠟꠦꠃ ꠉꠣꠁꠛꠤ ꠜꠣꠡꠣꠄ ꠝꠣꠔꠅ, ꠅꠁꠟꠦ ꠀꠞꠅ ꠛꠦꠡꠤ ꠌꠣꠁꠞꠣꠝ, ꠔꠥꠝꠞꠣ ꠢꠇꠟꠦ ꠙꠤꠞꠣꠇꠤ ꠝꠣꠔ ꠝꠣꠔꠅ। ꠝꠘꠅ ꠞꠣꠈꠤꠅ, ꠇꠥꠘꠥ ꠝꠣꠘꠡꠦ ꠎꠥꠖꠤ ꠉꠣꠁꠛꠤ ꠜꠣꠡꠣꠄ ꠝꠣꠔꠦ, ꠀꠞ ꠝꠣꠔꠞ ꠛꠣꠖꠦ ꠎꠝꠣꠔꠞ ꠝꠣꠘꠡꠞꠦ ꠉꠠꠤꠀ ꠔꠥꠟꠣꠞ ꠟꠣꠉꠤ ꠖꠥꠍꠞꠣ ꠇꠦꠃ ꠁꠔꠣꠞ ꠝꠣꠘꠤ ꠛꠥꠎꠣꠁꠀ ꠘꠣ ꠖꠦꠄ, ꠔꠦ ꠢꠃ ꠎꠦꠁꠘ ꠙꠤꠞꠣꠇꠤ ꠝꠣꠔꠂꠘ ꠄꠁꠘꠃ ꠛꠠ।
1CO 14:6 ꠜꠣꠁꠀꠁꠘꠞꠦ, ꠀꠝꠤ ꠎꠥꠖꠤ ꠔꠥꠝꠞꠣꠞ ꠉꠦꠍꠦ ꠀꠁꠀ ꠈꠣꠟꠤ ꠉꠣꠁꠛꠤ ꠇꠥꠘꠥ ꠜꠣꠡꠣꠄ ꠝꠣꠔꠤ, ꠅꠁꠟꠦ ꠄꠞ ꠝꠣꠎꠖꠤ ꠀꠟ꠆ꠟꠣꠞ ꠛꠣꠔꠥꠘꠤ ꠝꠥꠘꠡꠣꠞ ꠇꠕꠣ, ꠀꠈꠟ-ꠢꠦꠇꠝꠔꠞ ꠇꠕꠣ, ꠙꠤꠞꠣꠇꠤ ꠇꠥꠘꠥ ꠝꠣꠔ ꠛꠣ ꠇꠤꠔꠣꠛꠤ ꠘꠍꠤꠅꠔ ꠘꠣ ꠎꠣꠘꠣꠁ, ꠔꠦ ꠀꠝꠣꠞꠦꠖꠤ ꠔꠥꠝꠞꠣꠞ ꠇꠥꠘꠥ ꠚꠣꠄꠖꠣ ꠅꠁꠛ ꠘꠤ?
1CO 14:7 ꠝꠘꠦ ꠇꠞꠅ, ꠛꠣꠡꠤ, ꠡꠣꠞꠤꠘ꠆ꠖꠣ, ꠀꠞ ꠎꠦꠔꠣ ꠛꠣꠁꠖ꠆ꠖ-ꠛꠣꠎꠘꠣꠞ ꠜꠤꠔꠞꠦ ꠇꠥꠘꠥ ꠎꠣꠘ ꠘꠣꠁ, ꠁꠔꠣ ꠎꠥꠖꠤ ꠉꠣꠘꠞ ꠡꠑꠤꠇ ꠡꠥꠞ-ꠔꠣꠟ ꠘꠣ ꠝꠣꠘꠤꠀ ꠛꠣꠎꠦ, ꠔꠦ ꠅꠃ ꠛꠣꠎꠘꠣꠔ ꠇꠤꠔꠣ ꠛꠣꠎꠦꠞ, ꠝꠣꠘꠡꠦ ꠁꠔꠣ ꠇꠦꠝꠘꠦ ꠛꠥꠎꠛ?
1CO 14:8 ꠎꠥꠖ꠆ꠖꠔ ꠎꠣꠅꠀꠞ ꠟꠣꠉꠤ ꠚꠃꠎꠤ ꠡꠤꠋꠉꠣꠄ ꠎꠥꠖꠤ ꠙꠞꠤꠡ꠆ꠇꠣꠞ ꠀꠅꠀꠎ ꠘꠣ ꠖꠦꠄ, ꠔꠦ ꠇꠥꠘꠥ ꠍꠤꠙꠣꠁ ꠞꠦꠒꠤ ꠅꠁꠛ ꠘꠤ?
1CO 14:9 ꠅꠟꠣꠈꠣꠘ ꠔꠥꠝꠤ ꠎꠦꠛꠟꠣ ꠅꠎꠣꠘꠣ ꠜꠣꠡꠣꠄ ꠝꠣꠔꠅ, ꠔꠦ ꠔꠥꠝꠤ ꠇꠤꠔꠣ ꠇꠁꠞꠣꠄ, ꠔꠣꠞꠣ ꠇꠦꠝꠘꠦ ꠛꠥꠎꠛ? ꠔꠥꠝꠣꠞ ꠁ ꠝꠣꠔ ꠈꠣꠟꠤ ꠛꠣꠔꠣꠡꠞ ꠟꠉꠦ ꠝꠣꠔꠞꠣꠄ ꠘꠤ?
1CO 14:10 ꠁ ꠖꠥꠘꠤꠀꠔ ꠘꠣꠘꠣꠘ ꠎꠣꠔꠞ ꠛꠥꠟꠤ ꠀꠍꠦ, ꠁꠔꠣ ꠇꠥꠘꠥꠐꠣꠃ ꠝꠣꠘꠤ ꠍꠣꠠꠣ ꠘꠣꠄ।
1CO 14:11 ꠀꠞ ꠀꠝꠤ ꠎꠥꠖꠤ ꠅꠃ ꠛꠥꠟꠤ ꠘꠣ ꠛꠥꠎꠤ, ꠔꠦ ꠎꠦ ꠎꠘꠦ ꠝꠣꠔꠤꠞꠣ, ꠔꠣꠘ ꠉꠦꠍꠦ ꠔ ꠀꠝꠤ ꠛꠤꠖꠦꠡꠤ ꠝꠣꠘꠡꠞ ꠟꠣꠈꠣꠘ, ꠀꠞ ꠔꠣꠁꠘꠅ ꠀꠝꠣꠞ ꠉꠦꠍꠦ ꠛꠤꠖꠦꠡꠤ।
1CO 14:12 ꠁꠈꠣꠘ ꠔ ꠔꠥꠝꠞꠣꠞ ꠛꠦꠟꠣꠄꠅ ꠑꠤꠇ। ꠔꠥꠝꠞꠣ ꠎꠦꠛꠟꠣ ꠙꠣꠇ ꠞꠥꠢꠥꠞ ꠖꠦꠅꠀ ꠖꠣꠘ-ꠘꠤꠀꠝꠔꠞ ꠟꠣꠉꠤ ꠈꠤꠀꠟꠤ ꠅꠁꠞꠣꠄ, ꠔꠦ ꠎꠦ ꠘꠤꠀꠝꠔ ꠖꠤꠀ ꠎꠝꠣꠔꠞꠦ ꠉꠠꠤꠀ ꠔꠥꠟꠣ ꠎꠣꠄ, ꠅꠃ ꠘꠤꠀꠝꠔ ꠙꠣꠅꠀꠞ ꠟꠣꠉꠤꠃ ꠛꠦꠡꠤ ꠌꠦꠡ꠆ꠐꠣ ꠇꠞꠤꠅ।
1CO 14:13 ꠄꠞꠟꠣꠉꠤ ꠎꠦ ꠝꠣꠘꠡꠦ ꠉꠣꠁꠛꠤ ꠜꠣꠡꠣꠄ ꠝꠣꠔꠦ, ꠢꠦ ꠀꠟ꠆ꠟꠣꠞ ꠉꠦꠍꠦ ꠝꠣꠋꠉꠃꠇ, ꠎꠣꠔꠦ ꠁꠔꠣꠞ ꠝꠣꠘꠤ ꠛꠥꠎꠣꠁꠀ ꠖꠤꠔ ꠙꠣꠞꠦ।
1CO 14:14 ꠀꠝꠤ ꠎꠥꠖꠤ ꠉꠣꠁꠛꠤ ꠜꠣꠡꠣꠄ ꠖꠥꠀ ꠇꠞꠤ, ꠔꠦ ꠀꠍꠟꠦ ꠀꠝꠣꠞ ꠞꠥꠢꠦ ꠖꠥꠀ ꠇꠞꠦꠞ, ꠀꠝꠣꠞ ꠘꠤꠎꠞ ꠝꠘꠦ ꠇꠥꠘ꠆ꠔꠣ ꠇꠞꠦꠞ ꠘꠣ।
1CO 14:15 ꠅꠈꠘ ꠀꠝꠤ ꠇꠤꠔꠣ ꠇꠞꠔꠣꠝ? ꠀꠝꠤ ꠞꠥꠢꠥ ꠖꠤꠀ ꠖꠥꠀ ꠇꠞꠔꠣꠝ, ꠀꠞ ꠛꠥꠖ꠆ꠖꠤ ꠖꠤꠀꠅ ꠇꠞꠔꠣꠝ। ꠀꠝꠤ ꠞꠥꠢꠥ ꠖꠤꠀ ꠉꠤꠔ-ꠉꠎꠟ ꠉꠣꠁꠝꠥ, ꠛꠥꠖ꠆ꠖꠤ ꠖꠤꠀꠅ ꠉꠤꠔ-ꠉꠎꠟ ꠉꠣꠁꠝꠥ।
1CO 14:16 ꠀꠞ ꠔꠥꠝꠤ ꠎꠥꠖꠤ ꠈꠣꠟꠤ ꠞꠥꠢꠥ ꠖꠤꠀ ꠡꠥꠇꠞꠤꠀ ꠀꠖꠣꠄ ꠇꠞ, ꠔꠦ ꠝꠎꠟꠤꠍꠞ ꠝꠣꠘꠡꠦ ꠇꠤꠟꠣ ꠀꠝꠤꠘ ꠇꠁꠔ? ꠔꠣꠞꠣ ꠔ ꠛꠥꠎꠦꠞꠃ ꠘꠣ ꠔꠥꠝꠤ ꠇꠤꠔꠣ ꠇꠁꠞꠣꠄ, ꠔꠣꠞꠣ ꠔ ꠅꠌꠤꠘꠣ ꠎꠘꠞ ꠟꠣꠈꠣꠘ ꠞꠁꠟꠣ।
1CO 14:17 ꠔꠥꠝꠤ ꠢꠄꠔ ꠑꠤꠇ ꠜꠣꠛꠦꠃ ꠡꠥꠇꠞꠤꠀ ꠀꠖꠣꠄ ꠇꠞꠞꠣꠄ, ꠅꠁꠟꠦ ꠅꠃ ꠝꠣꠘꠡꠞꠦ ꠔ ꠉꠠꠤꠀ ꠔꠥꠟꠣ ꠅꠞ ꠘꠣ।
1CO 14:18 ꠀꠝꠤ ꠀꠟ꠆ꠟꠣ ꠙꠣꠇꠞ ꠡꠥꠇꠞꠤꠀ ꠀꠖꠣꠄ ꠇꠞꠤ, ꠇꠣꠞꠘ ꠀꠝꠤ ꠉꠣꠁꠛꠤ ꠜꠣꠡꠣꠄ ꠔꠥꠝꠞꠣꠞ ꠌꠣꠁꠔꠦ ꠛꠃꠔ ꠛꠦꠡꠤ ꠝꠣꠔꠤ।
1CO 14:19 ꠔꠣ-ꠅ ꠎꠝꠣꠔꠞ ꠝꠣꠢꠚꠤꠟꠞ ꠝꠣꠎꠦ ꠉꠣꠁꠛꠤ ꠜꠣꠡꠣꠄ ꠀꠎꠣꠞ ꠀꠎꠣꠞ ꠇꠕꠣꠞ ꠛꠖꠟꠣ, ꠝꠣꠘꠡꠞ ꠔꠣꠟꠤꠝꠞ ꠟꠣꠉꠤ ꠀꠝꠤ ꠀꠈꠟ ꠈꠣꠐꠣꠁꠀ ꠈꠣꠟꠤ ꠙꠣꠌꠈꠣꠘ ꠇꠕꠣ ꠇꠁꠝꠥ।
1CO 14:20 ꠜꠣꠁꠀꠁꠘꠞꠦ, ꠔꠥꠝꠞꠣꠞ ꠀꠈꠟ-ꠛꠥꠖ꠆ꠖꠤ ꠢꠥꠞꠥꠔ꠆ꠔꠣꠞ ꠟꠣꠈꠣꠘ ꠘꠣ ꠅꠁꠀ ꠛꠄꠅꠡ꠆ꠇ ꠝꠣꠘꠡꠞ ꠟꠣꠈꠣꠘ ꠅꠃꠇ। ꠅꠁꠟꠦ ꠁꠋꠡꠣ-ꠘꠤꠘ꠆ꠖꠣꠞ ꠛꠦꠙꠣꠞꠦ ꠔꠥꠝꠞꠣꠞ ꠝꠘ ꠝꠣꠍꠥꠝ ꠛꠣꠁꠌ꠆ꠌꠣꠞ ꠟꠣꠈꠣꠘ ꠅꠃꠇ।
1CO 14:21 ꠀꠍꠝꠣꠘꠤ ꠇꠤꠔꠣꠛꠅ ꠀꠍꠦ, ꠅꠌꠤꠘꠣ ꠜꠣꠡꠣꠄ ꠝꠣꠔꠞꠣ ꠝꠣꠘꠥꠡꠖꠤ, ꠛꠤꠖꠦꠡꠤ ꠝꠣꠘꠡꠞ ꠝꠥꠈꠖꠤ, ꠀꠝꠤ ꠅꠃ ꠎꠣꠔꠤꠞ ꠟꠉꠦ ꠝꠣꠔꠤꠝꠥ। ꠔꠣ-ꠅ ꠀꠝꠣꠞ ꠝꠣꠔ ꠔꠣꠞꠣ ꠢꠥꠘꠔ ꠘꠣꠄ, ꠁꠈꠣꠘ ꠀꠝꠤ ꠝꠣꠛꠥꠖꠦ ꠇꠁꠞꠣꠝ।
1CO 14:22 ꠔꠦ ꠛꠥꠎꠣ ꠎꠣꠄ, ꠉꠣꠁꠛꠤ ꠜꠣꠡꠣꠄ ꠝꠣꠔꠣ ꠁꠝꠣꠘꠖꠣꠞ ꠅꠇꠟꠞ ꠟꠣꠉꠤ ꠇꠥꠘꠥ ꠘꠤꠡꠣꠘꠣ ꠘꠣꠄ, ꠛꠞꠋ ꠅ-ꠁꠝꠣꠘꠖꠣꠞ ꠅꠇꠟꠞ ꠟꠣꠉꠤ ꠁꠔꠣ ꠄꠇꠐꠣ ꠘꠤꠡꠣꠘꠣ। ꠀꠞ ꠙꠤꠞꠣꠇꠤ ꠝꠣꠔ ꠝꠣꠔꠣ ꠅ-ꠁꠝꠣꠘꠖꠣꠞꠞ ꠟꠣꠉꠤ ꠇꠥꠘꠥ ꠘꠤꠡꠣꠘꠣ ꠘꠣꠄ, ꠅꠁꠟꠦ ꠁꠝꠣꠘꠖꠣꠞꠞ ꠟꠣꠉꠤ ꠔ ꠁꠔꠣ ꠄꠇꠐꠣ ꠘꠤꠡꠣꠘꠣ।
1CO 14:23 ꠎꠝꠣꠔꠞ ꠢꠇꠟ ꠝꠣꠘꠥꠡ ꠄꠇ ꠎꠣꠉꠣꠔ ꠝꠤꠟꠣꠞ ꠛꠣꠖꠦ, ꠢꠇꠟꠦ ꠎꠥꠖꠤ ꠄꠇꠟꠉꠦ ꠉꠣꠁꠛꠤ ꠜꠣꠡꠣꠄ ꠝꠣꠔꠦ, ꠀꠞ ꠅꠃ ꠡꠝꠄ ꠎꠝꠣꠔꠞ ꠛꠣꠁꠞꠞ ꠛꠣ ꠅ-ꠁꠝꠣꠘꠖꠣꠞ ꠇꠥꠘꠥ ꠝꠣꠘꠥꠡ ꠁꠘꠅ ꠀꠄ, ꠔꠦ ꠔꠣꠞꠣ ꠔꠥꠝꠞꠣꠞꠦ ꠙꠣꠉꠟ ꠇꠁꠛꠣ ꠘꠣ ꠘꠤ?
1CO 14:24 ꠀꠞ ꠢꠇꠟꠦ ꠎꠥꠖꠤ ꠙꠤꠞꠣꠇꠤ ꠝꠣꠔꠂꠘ, ꠅꠝꠘ ꠡꠝꠄ ꠇꠥꠘꠥ ꠅ-ꠁꠝꠣꠘꠖꠣꠞ ꠀꠁꠀ ꠁꠘꠅ ꠢꠣꠝꠣꠄ, ꠔꠦ ꠅꠃ ꠢꠇꠟꠞ ꠝꠣꠔꠞ ꠝꠣꠎꠖꠤ ꠢꠦ ꠘꠤꠎꠞ ꠉꠥꠘꠣꠞ ꠢꠣꠟꠔ ꠛꠥꠎꠤꠟꠤꠛ, ꠅꠃ ꠝꠣꠔ ꠢꠥꠘꠣꠄ ꠔꠣꠞ ꠘꠤꠎꠞ ꠛꠤꠌꠣꠞ ꠘꠤꠎꠦ ꠇꠞꠛ।
1CO 14:25 ꠔꠣꠞ ꠝꠘꠞ ꠟꠥꠇꠣꠁꠟ ꠛꠤꠡꠄ ꠈꠥꠟꠣ-ꠝꠦꠟꠣ ꠅꠁꠛ, ꠔꠦꠃ ꠢꠦ ꠍꠁꠎꠖꠣꠔ ꠙꠠꠤꠀ ꠀꠟ꠆ꠟꠣꠞ ꠉꠃꠞꠛ-ꠔꠣꠞꠤꠚ ꠇꠞꠤꠀ ꠇꠁꠛ, “ꠀꠙꠘꠣꠞꠣꠞ ꠝꠣꠎꠦ ꠘꠤꠌ꠆ꠌꠄ ꠀꠟ꠆ꠟꠣ ꠙꠣꠇ ꠀꠎꠤꠞ ꠀꠍꠂꠘ।”
1CO 14:26 ꠜꠣꠁꠀꠁꠘꠞꠦ, ꠇꠤꠔꠣ ꠅꠁꠔ? ꠔꠥꠝꠞꠣ ꠎꠦꠛꠟꠣ ꠄꠇ ꠎꠣꠉꠣꠔ ꠎꠝꠣꠔꠅ ꠖꠟꠣ ꠅꠅ, ꠅꠃ ꠡꠝꠄ ꠇꠦꠃ ꠉꠤꠔ-ꠉꠎꠟ ꠉꠣꠁꠘ, ꠇꠦꠃ ꠘꠍꠤꠅꠔ ꠇꠞꠂꠘ, ꠇꠦꠃ ꠛꠣꠔꠥꠘꠤ ꠛꠦꠙꠣꠞꠦ ꠇꠂꠘ, ꠇꠦꠃ ꠉꠣꠁꠛꠤ ꠜꠣꠡꠣꠄ ꠝꠣꠔꠂꠘ, ꠀꠞ ꠇꠦꠃ ꠁꠔꠣꠞ ꠝꠣꠘꠤ ꠛꠥꠎꠣꠁꠀ ꠖꠦꠁꠘ। ꠔꠦ ꠎꠦꠁꠘ ꠎꠦꠔꠣꠃ ꠇꠞꠂꠘ ꠘꠣ ꠇꠦꠘꠦ, ꠁꠔꠣ ꠎꠣꠘꠥ ꠎꠝꠣꠔꠞꠦ ꠉꠠꠤꠀ ꠔꠥꠟꠣꠞ ꠘꠤꠅꠔꠦ ꠅꠄ।
1CO 14:27 ꠇꠦꠃ ꠎꠥꠖꠤ ꠉꠣꠁꠛꠤ ꠜꠣꠡꠣꠄ ꠇꠥꠘ꠆ꠔꠣ ꠝꠣꠔꠦ, ꠔꠦ ꠄꠇꠅꠎꠘ ꠇꠞꠤ ꠖꠥꠁ-ꠔꠤꠘꠎꠘꠦ ꠝꠣꠔꠃꠇ ꠀꠞ ꠄꠇꠎꠘꠦ ꠁꠔꠣꠞ ꠝꠣꠘꠤ ꠛꠥꠎꠣꠁꠀ ꠖꠦꠃꠇ।
1CO 14:28 ꠝꠣꠘꠤ ꠛꠥꠎꠣꠁ ꠖꠤꠛꠣꠞ ꠇꠦꠃ ꠘꠣ ꠕꠣꠇꠟꠦ, ꠔꠣꠞꠣ ꠎꠝꠣꠔꠅ ꠌꠥꠙꠌꠣꠙ ꠕꠣꠇꠃꠇ, ꠈꠣꠟꠤ ꠘꠤꠎꠦ ꠘꠤꠎꠦ ꠀꠟ꠆ꠟꠣꠞ ꠟꠉꠦ ꠝꠣꠔꠃꠇ।
1CO 14:29 ꠀꠞ ꠙꠤꠞꠣꠇꠤ ꠝꠣꠔꠞꠣ ꠅꠇꠟꠦ ꠅꠟꠣ ꠖꠥꠁ-ꠔꠤꠘꠎꠘꠦ ꠝꠣꠔꠃꠇ ꠀꠞ ꠛꠣꠇꠤ ꠢꠇꠟꠦ ꠎꠣꠌꠣꠁ-ꠛꠣꠌꠣꠁ ꠇꠞꠃꠇ।
1CO 14:30 ꠅꠁꠟꠦ ꠎꠝꠣꠔꠅ ꠎꠦꠞꠣ ꠛꠅꠀꠔ ꠀꠍꠂꠘ, ꠔꠣꠞꠣ ꠇꠦꠃꠞꠞ ꠉꠦꠍꠦ ꠎꠥꠖꠤ ꠇꠥꠘꠥ ꠅꠢꠤ ꠛꠣ ꠛꠣꠔꠥꠘꠤ ꠈꠛꠞ ꠘꠣꠎꠤꠟ ꠅꠄ, ꠔꠦ ꠎꠦꠁꠘ ꠛꠄꠀꠘ ꠇꠞꠞꠣ, ꠔꠣꠁꠘ ꠘꠤꠞꠣꠁ ꠅꠁꠎꠣꠃꠇ꠆ꠇꠣ।
1CO 14:31 ꠅꠟꠣꠈꠣꠘ ꠔꠥꠝꠞꠣ ꠢꠇꠟꠦꠃ ꠄꠇ ꠄꠇ ꠇꠞꠤ ꠙꠤꠞꠣꠇꠤ ꠝꠣꠔꠤꠅ, ꠎꠣꠔꠦ ꠢꠥꠘꠞꠣ ꠅꠇꠟꠦ ꠔꠣꠟꠤꠝ ꠀꠞ ꠃꠔꠡꠣꠢ ꠙꠣꠄ।
1CO 14:32 ꠙꠤꠞꠣꠇꠤ ꠝꠣꠔꠞꠣꠞ ꠞꠥꠢꠥ ꠔ ꠔꠣꠞꠣꠞ ꠘꠤꠎꠞ ꠛꠡꠦ ꠕꠣꠇꠦ,
1CO 14:33 ꠀꠟ꠆ꠟꠣ ꠙꠣꠇꠦ ꠘꠤꠌ꠆ꠌꠄ ꠉꠥꠟꠝꠣꠟ ꠙꠍꠘ꠆ꠖ ꠇꠞꠂꠘ ꠘꠣ, ꠛꠞꠋ ꠡꠣꠘ꠆ꠔꠤ ꠙꠍꠘ꠆ꠖ ꠇꠞꠂꠘ।
1CO 14:34 ꠀꠟ꠆ꠟꠣꠞ ꠙꠣꠇ ꠛꠘ꠆ꠖꠣ ꠅꠇꠟꠞ ꠢꠇꠟ ꠎꠝꠣꠔꠞ ꠘꠤꠅꠝ-ꠇꠣꠘꠥꠘ ꠅꠁꠟ, ꠎꠝꠣꠔꠞ ꠝꠣꠎꠦ ꠛꠦꠐꠤ ꠝꠣꠘꠥꠡ ꠘꠤꠞꠣꠁ ꠞꠅꠀ ꠃꠌꠤꠔ, ꠉꠚ-ꠡꠚ ꠇꠞꠣ ꠔꠣꠞꠣꠞ ꠟꠣꠉꠤ ꠑꠤꠇ ꠘꠣꠄ। ꠡꠞꠤꠅꠔꠞ ꠘꠤꠅꠝ ꠝꠣꠚꠤꠇ ꠔꠣꠞꠣ ꠅꠗꠤꠘꠔꠣ ꠝꠣꠘꠃꠇ।
1CO 14:35 ꠔꠣꠞꠣ ꠇꠥꠘꠥ ꠔꠣꠟꠤꠝ ꠎꠣꠘꠣꠞ ꠈꠤꠀꠟꠤ ꠅꠁꠟꠦ ꠛꠣꠠꠤꠔ ꠉꠤꠀ ꠘꠤꠎꠞ ꠎꠣꠝꠣꠁꠞ ꠉꠦꠍ ꠕꠣꠇꠤ ꠎꠣꠘꠃꠇ। ꠇꠣꠞꠘ ꠎꠝꠣꠔꠞ ꠝꠣꠎꠦ ꠛꠦꠐꠤꠘ꠆ꠔꠦ ꠉꠚ-ꠡꠚ ꠇꠞꠣ ꠡꠞꠝ।
1CO 14:36 ꠀꠁꠌ꠆ꠍꠣ ꠇꠅ ꠌꠣꠁꠘ, ꠀꠟ꠆ꠟꠣꠞ ꠇꠣꠟꠣꠝ ꠇꠥꠘꠥ ꠔꠥꠝꠞꠣꠞ ꠉꠦꠍ ꠕꠣꠇꠤ ꠛꠣꠞ ꠅꠁꠍꠦ ꠘꠤ? ꠈꠣꠟꠤ ꠔꠥꠝꠞꠣꠞ ꠉꠦꠍꠦꠃ ꠀꠁꠍꠦ ꠘꠤ?
1CO 14:37 ꠝꠘꠅ ꠞꠣꠈꠤꠅ, ꠇꠥꠘꠥ ꠝꠣꠘꠡꠦ ꠎꠥꠖꠤ ꠘꠤꠎꠞꠦ ꠙꠤꠞ-ꠖꠞꠛꠦꠡ ꠛꠣ ꠛꠣꠔꠥꠘꠤ ꠈꠦꠝꠔꠣꠀꠟꠣ ꠝꠘꠅ ꠇꠞꠦ, ꠔꠦ ꠢꠦ ꠁꠈꠣꠘ ꠛꠥꠎꠤꠟꠣꠃꠇ, ꠀꠝꠤ ꠔꠥꠝꠞꠣꠞ ꠉꠦꠍꠦ ꠎꠦꠔꠣ ꠟꠦꠈꠟꠣꠝ, ꠁꠔꠣ ꠢꠇ꠆ꠇꠟꠔꠣꠃ ꠝꠣꠟꠤꠇ ꠁꠍꠣꠞ ꠢꠥꠇꠥꠝ।
1CO 14:38 ꠀꠞ ꠇꠦꠃ ꠁꠔꠣ ꠘꠣ ꠝꠣꠘꠟꠦ, ꠔꠣꠞꠦꠅ ꠝꠣꠁꠘ꠆ꠘ ꠇꠞꠣ ꠅꠁꠔ ꠘꠣꠄ।
1CO 14:39 ꠄꠞꠟꠣꠉꠤ ꠅ ꠜꠣꠁ ꠅꠇꠟ, ꠔꠥꠝꠞꠣ ꠙꠤꠞꠣꠇꠤ ꠝꠣꠔ ꠝꠣꠔꠤꠛꠣꠞ ꠟꠣꠉꠤ ꠈꠤꠀꠟꠤ ꠅꠅ, ꠀꠞ ꠉꠣꠁꠛꠤ ꠜꠣꠡꠣꠄ ꠝꠣꠔꠤꠔꠦꠅ ꠛꠣꠗꠣ ꠖꠤꠅ ꠘꠣ।
1CO 14:40 ꠔꠣ-ꠅ ꠎꠝꠣꠔꠞ ꠢꠇꠟ ꠇꠣꠝꠃ ꠙꠥꠞꠣꠙꠥꠞ ꠀꠖꠛ-ꠇꠣꠄꠖꠣ ꠀꠞ ꠘꠤꠅꠝ-ꠇꠣꠘꠥꠘ ꠝꠣꠘꠤꠀ ꠇꠞꠣ ꠎꠞꠥꠞ।
1CO 15:1 ꠅ ꠝꠥꠝꠤꠘ ꠜꠣꠁ ꠅꠇꠟ, ꠀꠝꠤ ꠀꠉꠦ ꠎꠦ ꠈꠥꠡ-ꠈꠛꠞꠤ ꠔꠛꠟꠤꠉ ꠇꠞꠍꠤꠟꠣꠝ, ꠢꠃ ꠇꠕꠣ ꠅꠈꠘ ꠁꠀꠖ ꠇꠞꠣꠁ ꠖꠤꠞꠣꠝ। ꠔꠥꠝꠞꠣ ꠔ ꠁꠔꠣ ꠇꠛꠥꠟ ꠇꠞꠍꠟꠣꠄ ꠀꠞ ꠁꠝꠣꠘꠦ ꠐꠤꠇꠤꠀꠅ ꠞꠁꠍ।
1CO 15:2 ꠀꠝꠤ ꠎꠦ ꠇꠣꠟꠣꠝ ꠔꠛꠟꠤꠉ ꠇꠞꠍꠤ, ꠁꠔꠣ ꠎꠥꠖꠤ ꠔꠥꠝꠞꠣ ꠝꠎꠛꠥꠔ ꠇꠞꠤ ꠗꠞꠤꠀ ꠞꠣꠈꠅ, ꠔꠦ ꠅꠃ ꠈꠥꠡ-ꠈꠛꠞꠤꠞ ꠝꠣꠎꠖꠤ ꠘꠣꠎꠣꠔ ꠙꠣꠁꠞꠣꠄ, ꠀꠞ ꠘꠣ ꠙꠣꠁꠟꠦ ꠔꠥꠝꠞꠣꠞ ꠁꠝꠣꠘ ꠀꠘꠣꠃ ꠛꠦꠇꠣꠝꠣ।
1CO 15:3 ꠀꠍꠟꠦ ꠀꠝꠤ ꠘꠤꠎꠦ ꠎꠦ ꠔꠣꠟꠤꠝ ꠙꠣꠁꠍꠤ, ꠅꠃ ꠔꠣꠟꠤꠝꠞꠦ ꠈꠥꠛ ꠎꠞꠥꠞꠤ ꠝꠘꠅ ꠇꠞꠤꠀ ꠔꠥꠝꠞꠣꠞꠦꠅ ꠎꠣꠘꠣꠁꠍꠤ। ꠀꠟ꠆ꠟꠣꠞ ꠇꠣꠟꠣꠝ ꠝꠣꠚꠤꠇ ꠀꠝꠞꠣꠞ ꠉꠥꠘꠣꠞ ꠝꠣꠚꠤꠞ ꠟꠣꠉꠤ ꠀꠟ-ꠝꠍꠤꠄ ꠘꠤꠎꠞ ꠎꠣꠘ ꠇꠥꠞꠛꠣꠘꠤ ꠖꠤꠍꠂꠘ।
1CO 15:4 ꠔꠣꠘꠞꠦ ꠖꠣꠚꠘ ꠇꠞꠣ ꠅꠁꠍꠤꠟ, ꠀꠞ ꠀꠟ꠆ꠟꠣꠞ ꠇꠣꠟꠣꠝ ꠝꠣꠚꠤꠇ ꠝꠃꠔꠞ ꠔꠤꠘ ꠖꠤꠘꠞ ꠖꠤꠘ ꠔꠣꠁꠘ ꠝꠥꠞ꠆ꠖꠣ ꠕꠣꠇꠤ ꠎꠤꠘ꠆ꠖꠣ ꠅꠁꠍꠂꠘ।
1CO 15:5 ꠎꠤꠘ꠆ꠖꠣ ꠅꠀꠞ ꠛꠣꠖꠦ ꠔꠣꠁꠘ ꠙꠄꠟꠣ ꠍꠣꠢꠣꠛꠤ ꠙꠤꠔꠞꠞꠦ, ꠛꠣꠖꠦ ꠔꠣꠘ ꠢꠃ ꠛꠣꠞꠅꠎꠘ ꠍꠣꠢꠣꠛꠤꠞꠦ ꠖꠦꠈꠣ ꠖꠤꠍꠂꠘ।
1CO 15:6 ꠄꠞꠛꠣꠖꠦ ꠔꠣꠁꠘ ꠄꠇꠟꠉꠦ ꠙꠣꠌ-ꠡꠞꠅ ꠛꠦꠡꠤ ꠝꠥꠝꠤꠘ ꠜꠣꠁꠞꠦ ꠖꠦꠈꠣ ꠖꠤꠍꠂꠘ। ꠄꠞꠣꠞ ꠝꠣꠎꠦ ꠇꠦꠃ ꠇꠦꠃ ꠝꠣꠞꠣ ꠉꠦꠟꠦꠅ, ꠅꠈꠘꠅ ꠛꠦꠡꠤꠞ ꠜꠣꠉ ꠎꠤꠘ꠆ꠖꠣ ꠀꠍꠂꠘ।
1CO 15:7 ꠄꠞꠛꠣꠖꠦ ꠔꠣꠘ ꠜꠣꠁ ꠁꠀꠇꠥꠛꠞꠦ, ꠛꠣꠖꠦ ꠢꠇꠟ ꠍꠣꠢꠣꠛꠤꠞꠦ ꠖꠦꠈꠣ ꠖꠤꠍꠂꠘ।
1CO 15:8 ꠀꠞ ꠀꠝꠤ ꠔ ꠢꠇꠟꠞ ꠢꠦꠡꠞ ꠏꠥꠟꠤ-ꠏꠣꠠꠣ ꠙꠥꠔ, ꠅꠃ ꠀꠝꠣꠞꠦꠅ ꠔꠣꠁꠘ ꠖꠦꠈꠣ ꠖꠤꠍꠂꠘ।
1CO 15:9 ꠍꠣꠢꠣꠛꠤ ꠅꠇꠟꠞ ꠝꠣꠎꠦ ꠀꠝꠤꠃ ꠢꠇꠟ ꠕꠣꠇꠤ ꠘꠉꠁꠘ꠆ꠘ, ꠀꠝꠤ ꠔ ꠍꠣꠢꠣꠛꠤ ꠇꠁꠀ ꠙꠞꠤꠌꠄ ꠖꠤꠛꠣꠞ ꠟꠣꠈ ꠘꠣꠄ, ꠀꠉꠦ ꠀꠝꠤ ꠀꠟ꠆ꠟꠣꠞ ꠎꠝꠣꠔꠞ ꠃꠙꠞꠦ ꠎꠥꠟꠥꠝ ꠇꠞꠔꠣꠝ।
1CO 15:10 ꠅꠁꠟꠦ ꠅꠈꠘ ꠀꠝꠤ ꠎꠦꠟꠣ ꠅꠁꠍꠤ, ꠁꠔꠣ ꠀꠟ꠆ꠟꠣꠞ ꠞꠢꠝꠔꠦꠃ ꠅꠁꠍꠤ। ꠀꠝꠣꠞ ꠃꠙꠞꠦ ꠔꠣꠘ ꠁ ꠞꠢꠝꠔ ꠛꠦꠇꠣꠝꠣ ꠉꠦꠍꠦ ꠘꠣ, ꠀꠝꠤ ꠅꠁꠘ꠆ꠘ ꠍꠣꠢꠣꠛꠤ ꠅꠇꠟ ꠕꠣꠇꠤ ꠛꠦꠡꠤ ꠝꠦꠘꠔ ꠇꠞꠍꠤ। ꠁ ꠝꠦꠘꠔ ꠔ ꠀꠝꠤ ꠘꠤꠎꠦ ꠘꠤꠎꠦ ꠇꠞꠔꠣꠝ ꠙꠣꠞꠍꠤ ꠘꠣ, ꠛꠞꠋ ꠀꠟ꠆ꠟꠣꠞ ꠞꠢꠝꠔꠦꠃ ꠁꠔꠣ ꠇꠞꠣꠁꠍꠦ।
1CO 15:11 ꠄꠞꠟꠣꠉꠤ ꠀꠝꠤ ꠛꠣ ꠅꠁꠘ꠆ꠘ ꠇꠥꠘꠥ ꠍꠣꠢꠣꠛꠤꠄ ꠎꠦꠁꠘꠃ ꠔꠛꠟꠤꠉ ꠇꠞꠤ ꠘꠣ ꠇꠦꠘꠦ, ꠀꠝꠞꠣ ꠅꠃ ꠄꠇꠁ ꠛꠦꠙꠣꠞꠦꠃ ꠔꠛꠟꠤꠉ ꠇꠞꠤꠀꠞ, ꠁꠔꠣ ꠢꠥꠘꠤꠀ ꠔꠥꠝꠞꠣꠅ ꠁꠝꠣꠘ ꠀꠘꠍ।
1CO 15:12 ꠔꠦ ꠀꠟ-ꠝꠍꠤꠞꠦ ꠝꠥꠞ꠆ꠖꠣ ꠕꠣꠇꠤ ꠎꠤꠘ꠆ꠖꠣ ꠇꠞꠣ ꠅꠁꠍꠦ ꠇꠁꠀ ꠎꠦꠛꠟꠣ ꠔꠛꠟꠤꠉ ꠇꠞꠣ ꠅꠄ, ꠔꠣꠁꠟꠦ ꠔꠥꠝꠞꠣꠞ ꠝꠣꠎꠞ ꠇꠦꠃ ꠇꠦꠃ ꠇꠦꠝꠘꠦ ꠇꠄ, ꠝꠣꠘꠥꠡ ꠝꠞꠤꠉꠦꠟꠦ ꠀꠞ ꠎꠤꠘ꠆ꠖꠣ ꠅꠁꠔꠣ ꠘꠣꠄ?
1CO 15:13 ꠝꠞꠘ ꠛꠣꠖꠦ ꠎꠤꠘ꠆ꠖꠣ ꠅꠁꠀ ꠃꠑꠔꠦ ꠘꠣ ꠙꠣꠞꠟꠦ ꠔ, ꠀꠟ-ꠝꠍꠤꠅ ꠎꠤꠘ꠆ꠖꠣ ꠅꠁꠍꠂꠘ ꠘꠣ।
1CO 15:14 ꠀꠞ ꠀꠟ-ꠝꠍꠤ ꠎꠤꠘ꠆ꠖꠣ ꠅꠁꠀ ꠘꠣ ꠃꠑꠟꠦ ꠔ ꠀꠝꠞꠣꠞ ꠔꠛꠟꠤꠉꠅ ꠛꠦꠇꠣꠝꠣ ꠀꠞ ꠔꠥꠝꠞꠣꠞ ꠁꠝꠣꠘ ꠀꠘꠣꠅ ꠛꠦꠇꠣꠝꠣ।
1CO 15:15 ꠄꠝꠘꠇꠤ ꠅꠈꠣꠘꠅ ꠛꠥꠎꠣ ꠎꠣꠞ ꠎꠦꠘ, ꠀꠟ꠆ꠟꠣꠞ ꠛꠦꠙꠣꠞꠦ ꠀꠝꠞꠣ ꠎꠦꠔꠣ ꠔꠛꠟꠤꠉ ꠇꠞꠤꠀꠞ ꠁꠔꠣ ꠝꠤꠍꠣ, ꠇꠣꠞꠘ ꠀꠝꠞꠣꠞ ꠔꠛꠟꠤꠉ ꠅꠁꠟ, ꠀꠟ꠆ꠟꠣꠄ ꠀꠟ-ꠝꠍꠤꠞꠦ ꠝꠥꠞ꠆ꠖꠣ ꠕꠣꠇꠤ ꠎꠤꠘ꠆ꠖꠣ ꠇꠞꠍꠂꠘ। ꠅꠁꠟꠦ ꠝꠥꠞ꠆ꠖꠣ ꠅꠇꠟꠞꠦ ꠎꠥꠖꠤ ꠎꠤꠘ꠆ꠖꠣ ꠇꠞꠣ ꠘꠣ ꠅꠄ, ꠔꠦ ꠔ ꠔꠣꠁꠘ ꠀꠟ-ꠝꠍꠤꠞꠦꠅ ꠎꠤꠘ꠆ꠖꠣ ꠇꠞꠍꠂꠘ ꠘꠣ।
1CO 15:16 ꠀꠞ ꠝꠥꠞ꠆ꠖꠣ ꠅꠇꠟ ꠎꠥꠖꠤ ꠎꠤꠘ꠆ꠖꠣ ꠅꠁꠀ ꠘꠣ ꠃꠑꠂꠘ, ꠔꠦ ꠔ ꠀꠟ-ꠝꠍꠤꠅ ꠎꠤꠘ꠆ꠖꠣ ꠅꠁꠀ ꠃꠑꠍꠂꠘ ꠘꠣ।
1CO 15:17 ꠀꠟ-ꠝꠍꠤꠞꠦ ꠎꠥꠖꠤ ꠎꠤꠘ꠆ꠖꠣ ꠇꠞꠣ ꠘꠣ ꠅꠁꠀꠃ ꠕꠣꠇꠦ, ꠔꠦ ꠔ ꠔꠥꠝꠞꠣꠞ ꠁꠝꠣꠘ ꠛꠦꠇꠣꠝꠣ, ꠀꠞ ꠔꠥꠝꠞꠣ ꠅꠈꠘꠅ ꠉꠥꠘꠣꠞ ꠝꠣꠎꠦ ꠢꠣꠛꠥꠒꠥꠛꠥ ꠈꠣꠁꠞꠣꠄ।
1CO 15:18 ꠔꠣꠁꠟꠦ ꠀꠟ-ꠝꠍꠤꠞ ꠔꠞꠤꠇꠣꠞ ꠎꠦꠞꠣꠞ ꠝꠃꠔ ꠅꠁꠉꠦꠍꠦ, ꠔꠣꠞꠣꠅ ꠔ ꠛꠤꠘꠣꠡ ꠅꠁꠉꠦꠍꠂꠘ।
1CO 15:19 ꠀꠟ-ꠝꠍꠤꠞ ꠃꠙꠞꠦ ꠀꠝꠞꠣꠞ ꠎꠦ ꠀꠡꠣ, ꠁ ꠀꠡꠣ ꠎꠥꠖꠤ ꠈꠣꠟꠤ ꠅꠃ ꠖꠥꠘꠤꠀꠛꠤ ꠎꠤꠘ꠆ꠖꠦꠉꠤꠞ ꠟꠣꠉꠤ ꠅꠄ, ꠔꠦ ꠔ ꠢꠇꠟ ꠕꠣꠇꠤ ꠀꠝꠞꠣꠞꠃ ꠛꠦꠡꠤ ꠛꠖ ꠘꠍꠤꠛ।
1CO 15:20 ꠅꠁꠟꠦ ꠀꠍꠟ ꠇꠕꠣ ꠅꠁꠟ, ꠀꠟ-ꠝꠍꠤꠞꠦ ꠔ ꠢꠣꠍꠣꠃ ꠝꠥꠞ꠆ꠖꠣ ꠕꠣꠇꠤ ꠎꠤꠘ꠆ꠖꠣ ꠇꠞꠣ ꠅꠁꠍꠦ। ꠔꠣꠁꠘꠃ ꠙꠄꠟꠣ ꠚꠡꠟ, ꠝꠥꠞ꠆ꠖꠣ ꠕꠣꠇꠤ ꠎꠔ ꠎꠘꠞꠦ ꠎꠤꠘ꠆ꠖꠣ ꠇꠞꠣ ꠅꠁꠛ, ꠄꠞꠣꠞ ꠝꠣꠎꠦ ꠔꠣꠘꠞꠦꠃ ꠙꠄꠟꠣ ꠎꠤꠘ꠆ꠖꠣ ꠇꠞꠣ ꠅꠁꠍꠦ।
1CO 15:21 ꠛꠥꠎꠞꠣꠄ ꠘꠤ, ꠄꠇꠎꠘ ꠝꠣꠘꠡꠞ ꠝꠣꠎꠖꠤ ꠎꠦꠟꠣ ꠝꠃꠔ ꠀꠁꠍꠦ, ꠅꠟꠣ ꠎꠤꠘ꠆ꠖꠣ ꠅꠁꠀ ꠃꠑꠣꠅ ꠄꠇꠎꠘ ꠝꠣꠘꠡꠞ ꠝꠣꠎꠖꠤ ꠀꠁꠍꠦ।
1CO 15:22 ꠛꠣꠛꠣ ꠀꠖꠝꠞ ꠀꠅꠟꠣꠖ ꠢꠤꠡꠣꠛꠦ ꠢꠇꠟ ꠝꠣꠘꠡꠞ ꠎꠦꠟꠣ ꠝꠞꠘ ꠅꠄ, ꠀꠟ-ꠝꠍꠤꠞ ꠃꠝ꠆ꠝꠔ ꠢꠤꠡꠣꠛꠦ ꠅꠃꠟꠣ ꠢꠇꠟꠞꠦ ꠎꠤꠘ꠆ꠖꠣ ꠇꠞꠣ ꠅꠁꠛ।
1CO 15:23 ꠅꠁꠟꠦ ꠄꠞ ꠝꠣꠎꠦ ꠇꠕꠣ ꠀꠍꠦ, ꠀꠟ꠆ꠟꠣꠄ ꠔꠣꠘ ꠝꠞ꠆ꠎꠤ ꠝꠣꠚꠤꠇ ꠗꠣꠙꠦ ꠗꠣꠙꠦ ꠢꠇꠟꠔꠣ ꠇꠞꠣꠁꠛꠣ। ꠈꠦꠔꠅ ꠕꠣꠇꠤ ꠙꠄꠟꠣ ꠔꠥꠟꠣ ꠚꠡꠟꠞ ꠟꠣꠈꠣꠘ ꠙꠄꠟꠣ ꠗꠣꠙꠅ ꠀꠟ-ꠝꠍꠤꠞꠦ ꠎꠤꠘ꠆ꠖꠣ ꠇꠞꠣ ꠅꠁꠍꠦ, ꠛꠣꠖꠦ ꠔꠣꠁꠘ ꠖꠥꠍꠞꠣꠛꠣꠞ ꠔꠡꠞꠤꠚ ꠀꠘꠣꠞ ꠇꠣꠟꠅ ꠔꠣꠘ ꠃꠝ꠆ꠝꠔ ꠅꠇꠟꠞꠦꠅ ꠎꠤꠘ꠆ꠖꠣ ꠇꠞꠣ ꠅꠁꠛ।
1CO 15:24 ꠄꠞꠛꠣꠖꠦ ꠇꠤꠀꠝꠔꠞ ꠇꠣꠟꠅ ꠀꠟ-ꠝꠍꠤꠄ ꠖꠥꠘꠤꠀꠛꠤ ꠢꠇꠟ ꠡꠣꠡꠘ, ꠅꠗꠤꠇꠣꠞ ꠀꠞ ꠈꠦꠝꠔꠣꠞꠦ ꠛꠤꠘꠣꠡ ꠇꠞꠤꠀ ꠉꠣꠁꠛꠤ ꠛꠣꠚ ꠀꠟ꠆ꠟꠣꠞ ꠀꠔꠅ ꠛꠣꠖꠡꠣꠁ ꠡꠝꠎꠣꠁꠛꠣ।
1CO 15:25 ꠇꠣꠞꠘ, ꠀꠟ꠆ꠟꠣꠄ ꠎꠔ ꠡꠝꠄ ꠙꠞ꠆ꠎꠘ꠆ꠔ ꠀꠟ-ꠝꠍꠤꠞ ꠢꠇꠟ ꠖꠥꠡꠝꠘꠞꠦ ꠔꠣꠘ ꠙꠣꠅꠞ ꠔꠟꠣꠔ ꠘꠣ ꠚꠣꠟꠣꠁꠘ, ꠅꠔ ꠡꠝꠄ ꠙꠞ꠆ꠎꠘ꠆ꠔ ꠔꠣꠁꠘ ꠛꠣꠖꠡꠣꠁ ꠇꠞꠔꠦ ꠅꠁꠛ।
1CO 15:26 ꠀꠞ ꠡꠦꠡ ꠖꠥꠡꠝꠘ ꠝꠃꠔꠞꠦꠅ ꠔꠣꠁꠘ ꠛꠤꠘꠣꠡ ꠇꠞꠛꠣ।
1CO 15:27 ꠙꠛꠤꠔ꠆ꠞ ꠎꠛꠥꠞ ꠡꠞꠤꠚꠅ ꠀꠍꠦ, “ꠔꠣꠁꠘ ꠢꠇ꠆ꠇꠟꠔꠣꠞꠦꠃ ꠀꠟ-ꠝꠍꠤꠞ ꠙꠣꠅꠞ ꠔꠟꠣꠔ ꠞꠣꠈꠍꠂꠘ।” ꠔꠦ ꠛꠥꠎꠣ ꠎꠣꠄ, ꠢꠇ꠆ꠇꠟꠔꠣꠞꠦ ꠀꠟ-ꠝꠍꠤꠞ ꠅꠗꠤꠘꠦ ꠞꠣꠈꠣꠞ ꠝꠣꠘꠤ ꠅꠁꠟ, ꠀꠟ꠆ꠟꠣꠄ ꠔꠣꠘ ꠘꠤꠎꠞꠦ ꠛꠣꠖ ꠞꠣꠈꠤꠀ ꠅꠁꠘ꠆ꠘ ꠢꠇꠟꠔꠣꠞꠦꠃ ꠀꠟ-ꠝꠍꠤꠞ ꠔꠟꠦ ꠞꠣꠈꠍꠂꠘ।
1CO 15:28 ꠀꠞ ꠢꠇ꠆ꠇꠟꠔꠣ ꠔꠣꠘ ꠅꠗꠤꠘꠦ ꠀꠁꠀ ꠢꠣꠞꠟꠦ, ꠢꠇ꠆ꠇꠟꠔꠣꠞꠦ ꠟꠁꠀ ꠅꠃ ꠈꠣꠍ ꠝꠣꠄꠀꠞ ꠎꠘ ꠁꠛꠘꠥꠟ꠆ꠟꠣꠅ ꠀꠟ꠆ꠟꠣ ꠙꠣꠇꠞ ꠅꠗꠤꠘ ꠅꠁꠛꠣ। ꠎꠣꠔꠦ ꠎꠦꠁꠘ ꠢꠇꠟꠔꠣ ꠔꠣꠘ ꠅꠗꠤꠘꠦ ꠞꠣꠈꠍꠤꠟꠣ, ꠢꠃ ꠀꠟ꠆ꠟꠣ ꠙꠣꠇꠃ ꠢꠇ꠆ꠇꠟꠔꠣꠞ ꠃꠙꠞꠀꠟꠣ ꠅꠁꠘ।
1CO 15:29 ꠀꠁꠌ꠆ꠍꠣ ꠗꠞꠅ, ꠝꠥꠞ꠆ꠖꠣ ꠅꠇꠟꠞ ꠟꠣꠉꠤ ꠎꠦꠞꠣ ꠔꠃꠛꠣꠞ ꠉꠥꠍꠟ ꠇꠞꠦꠞ, ꠝꠥꠞ꠆ꠖꠣ ꠅꠇꠟꠞꠦ ꠎꠥꠖꠤ ꠇꠥꠘꠥꠖꠤꠘꠃ ꠎꠤꠘ꠆ꠖꠣ ꠇꠞꠣ ꠘꠣ ꠅꠄ, ꠔꠦ ꠄꠞꠣꠞ ꠚꠣꠄꠖꠣ ꠇꠤꠔꠣ?
1CO 15:30 ꠀꠞ ꠀꠝꠞꠣ ꠍꠣꠢꠣꠛꠤ ꠅꠇꠟꠅ ꠇꠦꠘꠦ ꠊꠘ꠆ꠐꠣꠄ ꠊꠘ꠆ꠐꠣꠄ ꠛꠤꠙꠖꠞ ꠝꠥꠈꠣꠝꠥꠈꠤ ꠅꠁꠀꠞ?
1CO 15:31 ꠅꠄ, ꠜꠣꠁ ꠅꠇꠟ, ꠀꠝꠤ ꠔ ꠙꠞꠔꠦꠇ ꠖꠤꠘꠃ ꠝꠃꠔꠞ ꠝꠥꠈꠣꠝꠥꠈꠤ ꠅꠁꠀꠞ! ꠀꠝꠞꠣꠞ ꠝꠣꠟꠤꠇ ꠁꠍꠣ ꠀꠟ-ꠝꠍꠤꠞ ꠘꠣꠝꠦ ꠔꠥꠝꠞꠣꠞꠦ ꠟꠁꠀ ꠎꠦ ꠛꠠꠣꠁ ꠖꠦꠈꠣꠁ, ꠅꠃ ꠛꠠꠣꠁꠞ ꠟꠣꠉꠤꠃ ꠀꠝꠤ ꠔꠥꠝꠞꠣꠞꠦ ꠁꠔꠣ ꠎꠣꠘꠣꠁꠞꠣꠝ।
1CO 15:32 ꠁꠚꠤꠍ ꠐꠣꠃꠘꠅ ꠎꠋꠟꠤ ꠎꠣꠘꠥꠀꠞ ꠙꠣꠟꠞ ꠟꠉꠦ ꠀꠝꠤ ꠎꠦ ꠟꠣꠠꠣꠁ ꠇꠞꠍꠤ, ꠁꠔꠣ ꠎꠥꠖꠤ ꠈꠣꠟꠤ ꠖꠥꠘꠤꠀꠛꠤ ꠘꠤꠅꠔꠦ ꠇꠞꠤꠀ ꠕꠣꠇꠤ, ꠔꠦ ꠀꠝꠣꠞ ꠇꠥꠘꠥ ꠟꠣꠜ ꠅꠁꠍꠦ ꠘꠤ? ꠝꠥꠞ꠆ꠖꠣ ꠅꠇꠟꠞꠦ ꠎꠥꠖꠤ ꠎꠤꠘ꠆ꠖꠣ ꠇꠞꠣ ꠘꠣ ꠅꠄ, ꠔꠦ ꠀꠅ, ꠅꠟꠣ ꠇꠁ, “ꠀꠅ, ꠈꠣꠅ-ꠖꠣꠅ ꠚꠥꠞ꠆ꠔꠤ ꠇꠞꠅ, ꠇꠣꠁꠟ ꠔ ꠘꠤꠌ꠆ꠌꠤꠔ ꠝꠞꠘ ꠅꠁꠛ।”
1CO 15:33 ꠜꠣꠁꠀꠁꠘꠞꠦ, ꠔꠥꠝꠞꠣ ꠜꠥꠟ ꠇꠞꠤꠅ ꠘꠣ, ꠅꠟꠣ ꠄꠇ ꠍꠤꠟ꠆ꠟꠦꠈ ꠀꠍꠦ, “ꠇꠥ-ꠡꠋꠉꠤꠄ ꠜꠣꠟꠣ ꠝꠣꠘꠡꠞꠦꠅ ꠘꠣꠐꠣꠁꠟꠣꠄ।”
1CO 15:34 ꠄꠞꠟꠣꠉꠤ ꠔꠥꠝꠞꠣ ꠛꠖ ꠘꠤꠡꠣ ꠕꠣꠇꠤ ꠢꠎꠣꠉ ꠅꠅ, ꠀꠞ ꠉꠥꠘꠣ ꠇꠞꠤꠅ ꠘꠣ। ꠔꠥꠝꠞꠣꠞ ꠝꠣꠎꠞ ꠇꠦꠃ ꠇꠦꠃ ꠔ ꠡ꠆ꠛꠄꠅꠋ ꠀꠟ꠆ꠟꠣꠞꠦꠃ ꠌꠤꠘꠦ ꠘꠣ, ꠁꠔꠣ ꠛꠠ ꠡꠞꠝꠞ ꠛꠦꠙꠣꠞ।
1CO 15:35 ꠇꠥꠘꠥ ꠇꠥꠘꠥ ꠝꠣꠘꠡꠦ ꠎꠤꠇꠣꠁꠔ ꠙꠣꠞꠦ, “ꠝꠥꠞ꠆ꠖꠣ ꠅꠇꠟ ꠇꠦꠝꠘꠦ ꠎꠤꠘ꠆ꠖꠣ ꠅꠁꠛꠣ? ꠔꠣꠞꠣꠞ ꠡꠞꠤꠟꠞ ꠉꠑꠘ ꠇꠤꠟꠣꠈꠣꠘ ꠅꠁꠛ?”
1CO 15:36 ꠢꠣꠄꠞꠦ ꠛꠦꠀꠈꠟ! ꠔꠥꠝꠣꠞ ꠘꠤꠎꠞ ꠈꠦꠔꠞ ꠝꠣꠎꠦ ꠎꠦ ꠛꠤꠌꠤ ꠛꠣꠁꠘ ꠇꠞꠅ, ꠁ ꠛꠤꠌꠤ ꠘꠣ ꠝꠞꠟꠦ ꠔ ꠌꠦꠞꠣ ꠃꠑꠦ ꠘꠣ।
1CO 15:37 ꠀꠞ ꠔꠥꠝꠣꠞ ꠛꠣꠁꠘ ꠇꠞꠣ ꠛꠤꠌꠤ ꠕꠣꠇꠤ ꠎꠦ ꠌꠦꠞꠣ ꠛꠣꠞꠅꠄ, ꠔꠥꠝꠤ ꠔ ꠁ ꠌꠦꠞꠣ ꠛꠣꠁꠘ ꠇꠞ ꠘꠣ, ꠔꠥꠝꠤ ꠈꠣꠟꠤ ꠛꠤꠌꠤ ꠛꠣꠁꠘ ꠇꠞ ꠗꠣꠘ ꠛꠣ ꠅꠁꠘ꠆ꠘ ꠇꠥꠘꠥ ꠚꠡꠟꠞ, ꠅꠉꠥ ꠝꠞꠤꠀꠃ ꠌꠦꠞꠣ ꠛꠣꠞꠅꠄ।
1CO 15:38 ꠛꠣꠖꠦ ꠀꠟ꠆ꠟꠣꠄ ꠔꠣꠘ ꠝꠞ꠆ꠎꠤ ꠝꠣꠚꠤꠇ ꠁꠔꠣꠞ ꠍꠥꠞꠔ-ꠀꠇꠣꠞ ꠉꠑꠘ ꠇꠞꠂꠘ। ꠔꠣꠁꠘ ꠙꠞꠔꠦꠇ ꠛꠤꠌꠞꠦꠃ ꠔꠣꠞ ꠎꠣꠔ ꠝꠣꠚꠤꠇ ꠌꠦꠞꠣꠞ ꠍꠥꠞꠔ-ꠀꠇꠣꠞ ꠖꠦꠁꠘ।
1CO 15:39 ꠛꠥꠎ ꠘꠣ ꠘꠤ, ꠢꠇꠟ ꠎꠣꠘꠖꠣꠞꠞ ꠉꠥꠡ꠆ꠔ ꠔ ꠄꠇ ꠡꠝꠣꠘ ꠘꠣꠄ। ꠝꠣꠘꠡꠞ ꠉꠥꠡ꠆ꠔ ꠄꠇꠟꠣꠈꠣꠘ, ꠙꠡꠥꠞ ꠄꠇꠟꠣꠈꠣꠘ, ꠙꠣꠈꠤꠞ ꠄꠇꠟꠣꠈꠣꠘ ꠀꠞ ꠝꠣꠍꠞ ꠀꠞꠇ ꠟꠣꠈꠣꠘ।
1CO 15:40 ꠅꠃꠟꠣ ꠀꠍꠝꠣꠘꠅ-ꠅ ꠛꠃꠔ ꠘꠝꠥꠘꠣꠞ ꠡꠞꠤꠟ ꠀꠍꠦ, ꠖꠥꠘꠤꠀꠔꠅ ꠛꠃꠔ ꠡꠞꠤꠟ ꠀꠍꠦ, ꠔꠣ-ꠅ ꠛꠦꠢꠦꠡ꠆ꠔꠤ ꠡꠞꠤꠟꠞ ꠔꠦꠎ ꠄꠇꠟꠣꠈꠣꠘ, ꠀꠞ ꠖꠥꠘꠤꠀꠛꠤ ꠡꠞꠤꠟꠞ ꠔꠦꠎ ꠀꠞꠇ ꠟꠣꠈꠣꠘ।
1CO 15:41 ꠡꠥꠞꠥꠎꠞ ꠔꠦꠎ ꠄꠇꠟꠣꠈꠣꠘ, ꠌꠣꠘ꠆ꠖꠞ ꠔꠦꠎ ꠀꠞꠇ ꠟꠣꠈꠣꠘ ꠀꠞ ꠔꠦꠞꠣꠞ ꠔꠦꠎ ꠖꠥꠍꠞꠣ ꠟꠣꠈꠣꠘ। ꠄꠝꠘꠇꠤ ꠄꠇ ꠔꠦꠞꠣ ꠕꠣꠇꠤ ꠀꠞꠇ ꠔꠦꠞꠣꠞ ꠔꠦꠎꠅ ꠀꠟꠣꠖꠣ।
1CO 15:42 ꠝꠞꠘ ꠛꠣꠖꠦ ꠎꠤꠘ꠆ꠖꠣ ꠅꠁꠀ ꠃꠑꠣꠅ ꠅꠃ ꠟꠣꠈꠣꠘ। ꠟꠣꠡ ꠝꠣꠐꠤ ꠖꠤꠀ ꠢꠣꠞꠟꠦ ꠙꠌꠤꠎꠣꠄ, ꠅꠁꠟꠦ ꠅꠃ ꠟꠣꠡꠞꠦ ꠎꠦꠛꠟꠣ ꠎꠤꠘ꠆ꠖꠣ ꠇꠞꠣ ꠅꠁꠛ, ꠁꠐꠣ ꠀꠞ ꠙꠌꠔ ꠘꠣꠄ।
1CO 15:43 ꠅꠡꠝ꠆ꠝꠣꠘꠤ ꠢꠣꠟꠔꠦ ꠝꠣꠐꠤ ꠖꠦꠅꠀ ꠅꠄ, ꠡꠝ꠆ꠝꠣꠘꠤ ꠢꠣꠟꠔꠦ ꠔꠥꠟꠣ ꠅꠁꠛ। ꠝꠣꠐꠤ ꠖꠦꠅꠀ ꠅꠄ ꠖꠥꠞ꠆ꠛꠟ ꠢꠣꠟꠔꠦ, ꠀꠞ ꠔꠥꠟꠣ ꠅꠁꠛ ꠛꠟꠛꠣꠘ ꠢꠣꠟꠔꠦ।
1CO 15:44 ꠝꠣꠐꠤ ꠖꠦꠅꠀ ꠅꠄ ꠞꠇ꠆ꠔ-ꠝꠣꠋꠡꠞ ꠡꠞꠤꠟ, ꠅꠁꠟꠦ ꠔꠥꠟꠣ ꠅꠁꠛ ꠞꠥꠢꠣꠘꠤꠇ ꠡꠞꠤꠟ। ꠞꠇ꠆ꠔ-ꠝꠣꠋꠡꠞ ꠡꠞꠤꠟ ꠎꠦꠛꠟꠣ ꠀꠍꠦ, ꠔꠦ ꠔ ꠞꠥꠢꠣꠘꠤꠇ ꠡꠞꠤꠟꠅ ꠀꠍꠦ।
1CO 15:45 ꠎꠦꠟꠣ ꠛꠣꠛꠣ ꠀꠖꠝꠞ ꠛꠦꠙꠣꠞꠦ ꠙꠛꠤꠔ꠆ꠞ ꠔꠃꠞꠣꠔ ꠡꠞꠤꠚꠅ ꠀꠍꠦ, “ꠅꠃ ꠙꠄꠟꠣ ꠀꠖꠝ ꠎꠤꠘ꠆ꠖꠣ ꠎꠣꠘꠖꠣꠞ ꠅꠁꠟꠣ।” ꠔꠦ ꠡꠦꠡ ꠀꠖꠝ, ꠎꠦꠁꠘ ꠀꠟ-ꠝꠍꠤ, ꠔꠣꠁꠘ ꠇꠤꠔꠣ ꠅꠁꠟꠣ? ꠔꠣꠁꠘ ꠔ ꠅꠁꠟꠣ ꠎꠤꠘ꠆ꠖꠦꠉꠤ ꠖꠦꠅꠞꠣ ꠞꠥꠢꠥ।
1CO 15:46 ꠅꠁꠟꠦ ꠞꠥꠢꠣꠘꠤꠇ ꠎꠦ ꠡꠞꠤꠟ, ꠁꠈꠣꠘ ꠔ ꠙꠄꠟꠣ ꠅꠄ ꠘꠣ, ꠙꠄꠟꠣ ꠅꠄ ꠞꠇ꠆ꠔ-ꠝꠣꠋꠡꠞ ꠡꠞꠤꠟ, ꠛꠣꠖꠦ ꠅꠄ ꠞꠥꠢꠣꠘꠤꠇ ꠡꠞꠤꠟ।
1CO 15:47 ꠎꠦꠟꠣ ꠙꠄꠟꠣ ꠀꠖꠝ ꠝꠣꠐꠤ ꠕꠣꠇꠤ ꠀꠁꠟꠣ, ꠛꠣꠖꠦ ꠖꠥꠍꠞꠣ ꠀꠖꠝ, ꠀꠟ-ꠝꠍꠤ ꠀꠁꠟꠣ ꠛꠦꠢꠦꠡ꠆ꠔ ꠕꠣꠇꠤ।
1CO 15:48 ꠎꠉꠔꠞ ꠝꠣꠘꠥꠡ ꠅꠁꠟꠣ ꠅꠃ ꠝꠣꠐꠤꠞ ꠛꠣꠘꠣꠁꠟ ꠝꠣꠘꠡꠞ ꠟꠣꠈꠣꠘ, ꠀꠞ ꠛꠦꠢꠦꠡ꠆ꠔꠤ ꠝꠣꠘꠥꠡ ꠅꠁꠟꠣ ꠢꠃ ꠛꠦꠢꠦꠡ꠆ꠔꠤ ꠎꠘ ꠀꠟ-ꠝꠍꠤꠞ ꠟꠣꠈꠣꠘ।
1CO 15:49 ꠔꠦ ꠛꠣꠛꠣ ꠀꠖꠝꠞ ꠟꠣꠈꠣꠘ ꠀꠝꠞꠣ ꠎꠦꠟꠣ ꠝꠣꠐꠤꠞ ꠇꠣꠄꠀꠞ ꠍꠥꠞꠔ ꠙꠣꠁꠍꠤ, ꠑꠤꠇ ꠅꠃꠟꠣ ꠢꠃ ꠛꠦꠢꠦꠡ꠆ꠔꠤ ꠎꠘꠞ ꠟꠣꠈꠣꠘ ꠛꠦꠢꠦꠡ꠆ꠔꠤ ꠍꠥꠞꠔꠅ ꠙꠣꠁꠝꠥ।
1CO 15:50 ꠜꠣꠁꠀꠁꠘꠞꠦ ꠀꠝꠤ ꠔꠥꠝꠞꠣꠞꠦ ꠇꠁꠞꠣꠝ, ꠞꠇ꠆ꠔ-ꠝꠣꠋꠡꠞ ꠇꠥꠘꠥ ꠡꠞꠤꠟ ꠀꠟ꠆ꠟꠣꠞ ꠛꠣꠖꠡꠣꠁꠞ ꠅꠗꠤꠇꠣꠞ ꠙꠣꠄ ꠘꠣ। ꠎꠦꠔꠣꠞ ꠛꠤꠘꠣꠡ ꠀꠍꠦ, ꠁꠔꠣ ꠇꠥꠘꠥꠝꠘ꠆ꠔꠦꠃ ꠌꠤꠞꠡ꠆ꠕꠣꠄꠁ ꠛꠘꠦ ꠘꠣ।
1CO 15:51 ꠔꠦ ꠀꠝꠤ ꠔꠥꠝꠞꠣꠞꠦ ꠄꠇꠐꠣ ꠛꠣꠔꠥꠘꠤ ꠇꠕꠣ ꠎꠣꠘꠣꠁꠞꠣꠝ, ꠎꠣꠘ ꠘꠤ, ꠀꠝꠞꠣ ꠢꠇꠟꠞ ꠔ ꠝꠃꠔ ꠅꠁꠔ ꠘꠣꠄ, ꠅꠁꠟꠦ ꠢꠇꠟꠞꠃ ꠍꠥꠞꠔ ꠛꠖꠟꠤꠎꠤꠛ।
1CO 15:52 ꠇꠤꠀꠝꠔꠞ ꠇꠣꠟꠅ ꠄꠇ ꠝꠥꠢꠥꠞ꠆ꠔꠞ ꠝꠣꠎꠦ, ꠌꠈꠥꠞ ꠙꠟꠇꠦ, ꠡꠤꠋꠉꠣꠔ ꠚꠥ ꠖꠦꠅꠀꠞ ꠟꠉꠦ ꠟꠉꠦꠃ ꠀꠝꠞꠣ ꠛꠖꠟꠤꠎꠤꠝꠥ। ꠅꠃ ꠡꠤꠋꠉꠣ ꠛꠣꠎꠤꠀ ꠢꠣꠞꠟꠦ, ꠢꠇꠟ ꠝꠥꠞ꠆ꠖꠣ ꠅꠟꠣ ꠍꠥꠞꠔꠦ ꠎꠤꠘ꠆ꠖꠣ ꠅꠁꠛꠣ, ꠎꠦꠔꠣ ꠇꠥꠘꠥꠖꠤꠘ ꠛꠤꠘꠣꠡ ꠅꠁꠔ ꠘꠣꠄ, ꠀꠞ ꠀꠝꠞꠣꠅ ꠢꠃ ꠍꠥꠞꠔꠦ ꠛꠖꠟꠤꠎꠤꠝꠥ।
1CO 15:53 ꠄꠞꠟꠣꠉꠤ ꠎꠦ ꠡꠞꠤꠟ ꠛꠤꠘꠣꠡ ꠅꠁꠎꠣꠄ, ꠁꠔꠣꠄ ꠅꠟꠣ ꠍꠥꠞꠔ ꠙꠣꠁꠔꠦ ꠅꠁꠛ, ꠎꠦꠔꠣ ꠇꠥꠘꠥꠖꠤꠘ ꠙꠌꠤꠔ ꠘꠣꠄ, ꠀꠞ ꠎꠦꠔꠣ ꠝꠞꠤꠎꠤꠛ, ꠁꠔꠣꠄ ꠅꠟꠣ ꠍꠥꠞꠔ ꠙꠣꠁꠔꠦ ꠅꠁꠛ, ꠎꠦꠔꠣ ꠇꠥꠘꠥꠖꠤꠘ ꠝꠞꠔ ꠘꠣꠄ।
1CO 15:54 ꠀꠞ ꠎꠦ ꠡꠞꠤꠟ ꠙꠌꠤꠎꠣꠄ, ꠁ ꠡꠞꠤꠟꠦ ꠎꠦꠛꠟꠣ ꠌꠤꠞꠡ꠆ꠕꠣꠄꠁ ꠍꠥꠞꠔ ꠙꠣꠁꠛ, ꠎꠦ ꠡꠞꠤꠟꠞ ꠝꠃꠔ ꠅꠄ, ꠁꠔꠣꠄ ꠎꠦꠛꠟꠣ ꠌꠤꠞꠇꠣꠟꠤꠘ ꠎꠤꠘ꠆ꠖꠦꠉꠤ ꠙꠣꠁꠛ, ꠢꠃ ꠡꠝꠄ ꠀꠟ꠆ꠟꠣꠞ ꠇꠣꠟꠣꠝꠞ ꠅꠃ ꠟꠦꠈꠣ ꠚꠟꠤꠛ, ꠝꠃꠔꠞ ꠛꠤꠘꠣꠡ ꠅꠁꠀ ꠎꠄ ꠀꠁꠍꠦ।
1CO 15:55 ꠅ ꠝꠃꠔ, ꠔꠞ ꠎꠄ ꠇꠥꠀꠁ? ꠝꠃꠔꠞꠦ, ꠔꠞ ꠛꠤꠡ-ꠖꠣꠔ ꠇꠥꠀꠁ?
1CO 15:56 ꠝꠃꠔꠞ ꠛꠤꠡ-ꠖꠣꠔ ꠅꠁꠟ ꠉꠥꠘꠣ, ꠀꠞ ꠉꠥꠘꠣꠞꠦ ꠈꠦꠝꠔꠣ ꠎꠥꠉꠣꠄ ꠝꠥꠍꠣ ꠘꠛꠤꠞ ꠡꠞꠤꠅꠔ।
1CO 15:57 ꠅꠁꠟꠦ ꠀꠟ꠆ꠟꠣ ꠙꠣꠇꠞ ꠡꠥꠇꠞꠤꠀ ꠀꠖꠣꠄ ꠇꠞꠤ, ꠀꠝꠞꠣꠞ ꠝꠣꠟꠤꠇ ꠁꠍꠣ ꠀꠟ-ꠝꠍꠤꠞ ꠃꠍꠤꠟ꠆ꠟꠣꠄ ꠔꠣꠁꠘ ꠀꠝꠞꠣꠞꠦ ꠎꠄ ꠖꠣꠘ ꠇꠞꠂꠘ।
1CO 15:58 ꠔꠦ, ꠅ ꠀꠝꠣꠞ ꠝꠣꠄꠀꠞ ꠜꠣꠁꠀꠁꠘ, ꠔꠥꠝꠞꠣ ꠁꠝꠣꠘꠦ ꠝꠎꠛꠥꠔ ꠅꠅ, ꠎꠣꠔꠦ ꠇꠥꠘ꠆ꠔꠣꠄ ꠔꠥꠝꠞꠣꠞꠦ ꠀꠟꠣꠁꠔ ꠘꠣ ꠙꠣꠞꠦ। ꠝꠣꠟꠤꠇꠞ ꠈꠦꠎꠝꠔꠞ ꠟꠣꠉꠤ ꠘꠤꠎꠞꠦ ꠢꠞ-ꠢꠣꠝꠦꠡꠣ ꠙꠥꠞꠣꠙꠥꠞ ꠛꠤꠟꠣꠁ ꠖꠦꠅ, ꠔꠥꠝꠞꠣ ꠔ ꠎꠣꠘ, ꠔꠣꠘ ꠟꠣꠉꠤ ꠝꠦꠘꠔ ꠇꠞꠟꠦ ꠁ ꠝꠦꠘꠔ ꠇꠥꠘꠥꠝꠘ꠆ꠔꠦꠃ ꠛꠦꠇꠣꠝꠣ ꠎꠣꠄ ꠘꠣ।
1CO 16:1 ꠅ ꠜꠣꠁ ꠅꠇꠟ, ꠀꠟ꠆ꠟꠣꠞ ꠙꠣꠇ ꠛꠘ꠆ꠖꠣ ꠅꠇꠟꠞꠦ ꠡꠣꠁꠎ꠆ꠎꠞ ꠟꠣꠉꠤ ꠌꠣꠘ꠆ꠖꠣ ꠔꠥꠟꠣꠞ ꠛꠦꠙꠣꠞꠦ ꠀꠝꠤ ꠅꠈꠘ ꠇꠁꠞꠣꠝ। ꠉꠣꠟꠣꠔꠤꠀ ꠖꠦꠡꠞ ꠁꠍꠣꠄꠁ ꠎꠝꠣꠔ ꠅꠇꠟꠞꠦ ꠀꠝꠤ ꠎꠦꠟꠣ ꠢꠥꠇꠥꠝ ꠖꠤꠍꠤ, ꠔꠥꠝꠞꠣꠅ ꠅꠃꠟꠣ ꠇꠞꠅ।
1CO 16:2 ꠔꠥꠝꠞꠣ ꠙꠞꠔꠦꠇ ꠎꠘꠦ ꠎꠣꠞꠎꠤꠞ ꠔꠚꠤꠇ ꠅꠘꠥꠎꠣꠄꠁ ꠢꠣꠙ꠆ꠔꠣꠞ ꠙꠄꠟꠣ ꠖꠤꠘ ꠇꠤꠍꠥ ꠐꠦꠇꠣ-ꠙꠄꠡꠣ ꠖꠟꠣ ꠇꠞꠅ, ꠎꠣꠔꠦ ꠀꠝꠤ ꠎꠦꠛꠟꠣ ꠀꠁꠝꠥ, ꠅꠃ ꠡꠝꠄ ꠇꠥꠘꠥ ꠌꠣꠘ꠆ꠖꠣ ꠔꠥꠟꠣ ꠘꠣ ꠟꠣꠉꠦ।
1CO 16:3 ꠀꠝꠤ ꠀꠁꠀ ꠢꠣꠞꠟꠦ ꠔꠥꠝꠞꠣꠞ ꠖꠟꠣ ꠇꠞꠣ ꠅꠃ ꠖꠣꠘ-ꠈꠄꠞꠣꠔ ꠎꠦꠞꠥꠎꠣꠟꠦꠝꠅ ꠟꠁꠀ ꠎꠣꠅꠀꠞ ꠟꠣꠉꠤ, ꠔꠥꠝꠞꠣ ꠎꠦꠞꠣꠞꠦ ꠙꠍꠘ꠆ꠖ ꠇꠞꠛꠣꠄ, ꠀꠝꠤ ꠌꠤꠑꠤ ꠖꠤꠀ ꠔꠣꠞꠣꠞꠦ ꠙꠣꠑꠣꠁꠝꠥ।
1CO 16:4 ꠀꠞ ꠔꠥꠝꠞꠣ ꠎꠥꠖꠤ ꠝꠘꠅ ꠇꠞꠅ ꠀꠝꠤꠅ ꠎꠣꠅꠀ ꠎꠞꠥꠞ, ꠔꠦ ꠔꠣꠞꠣ ꠀꠝꠣꠞ ꠟꠉꠦ ꠅꠁꠀ ꠎꠣꠁꠛꠣ।
1CO 16:5 ꠀꠝꠣꠞ ꠈꠤꠀꠟ ꠅꠁꠟ ꠝꠣꠇꠤꠖꠘꠤꠀ ꠅꠁꠀ ꠀꠁꠔꠣꠝ, ꠄꠞꠟꠣꠉꠤ ꠀꠝꠤ ꠝꠣꠇꠤꠖꠘꠤꠀ ꠖꠦꠡꠞ ꠜꠤꠔꠞꠦꠖꠤ ꠔꠥꠝꠞꠣꠞ ꠉꠦꠍꠦ ꠀꠁꠝꠥ।
1CO 16:6 ꠀꠁꠀ ꠢꠄꠔ ꠕꠥꠠꠣ ꠇꠄꠖꠤꠘ ꠔꠥꠝꠞꠣꠞ ꠉꠦꠍꠦ ꠞꠁꠝꠥ ꠛꠣ ꠀꠡ꠆ꠔꠣ ꠡꠤꠔꠇꠣꠟ ꠔꠥꠝꠞꠣꠞ ꠉꠦꠍꠦꠃ ꠇꠣꠐꠣꠁꠝꠥ, ꠎꠣꠔꠦ ꠀꠝꠤ ꠎꠦꠘꠅꠃ ꠎꠣꠁ ꠘꠣ ꠇꠦꠘꠦ ꠔꠥꠝꠞꠣꠃ ꠀꠝꠣꠞꠦ ꠅꠃ ꠍꠚꠞꠞ ꠟꠣꠉꠤ ꠢꠇꠟꠔꠣ ꠎꠥꠁꠔ-ꠎꠣꠁꠔ ꠇꠞꠤꠀ ꠖꠤꠛꠣꠄ।
1CO 16:7 ꠙꠕꠞ ꠇꠥꠐꠝꠞ ꠟꠣꠈꠣꠘ ꠀꠝꠤ ꠈꠣꠟꠤ ꠙꠕꠦꠖꠤ ꠎꠣꠅꠀꠞ ꠇꠣꠟꠅ ꠔꠥꠝꠞꠣꠞ ꠟꠉꠦ ꠖꠦꠈꠣ ꠇꠞꠔꠣꠝ ꠌꠣꠁ ꠘꠣ, ꠀꠝꠤ ꠌꠣꠁꠞꠣꠝ, ꠀꠟ꠆ꠟꠣꠞ ꠝꠞ꠆ꠎꠤ ꠅꠁꠟꠦ ꠛꠣꠇ꠆ꠇꠣ ꠇꠄꠖꠤꠘ ꠔꠥꠝꠞꠣꠞ ꠟꠉꠦ ꠕꠣꠇꠝꠥ।
1CO 16:8 ꠅꠁꠟꠦ ꠙꠘ꠆ꠌꠣꠁꠡꠣ ꠁꠖ ꠙꠞ꠆ꠎꠘ꠆ꠔ ꠀꠝꠤ ꠅꠃ ꠁꠚꠤꠍ ꠐꠣꠃꠘꠅꠃ ꠞꠁꠝꠥ,
1CO 16:9 ꠇꠣꠞꠘ ꠀꠝꠣꠞ ꠍꠣꠝꠘꠦ ꠅꠃꠟꠣ ꠛꠠ ꠄꠇꠐꠣ ꠡꠥꠎꠥꠉ ꠀꠍꠦ, ꠁ ꠡꠥꠎꠥꠉꠦ ꠛꠠ ꠜꠣꠟꠣ ꠚꠟ ꠝꠤꠟꠦ। ꠔꠣ-ꠅ ꠛꠃꠔ ꠝꠣꠘꠡꠦ ꠁꠔꠣꠞ ꠛꠤꠞꠥꠗꠤꠔꠣ ꠇꠞꠞꠣ।
1CO 16:10 ꠈꠤꠀꠟ ꠞꠣꠈꠤꠅ, ꠔꠤꠝꠕꠤ ꠜꠣꠁ ꠔꠥꠝꠞꠣꠞ ꠅꠘꠅ ꠀꠁꠟꠦ ꠔꠣꠁꠘ ꠎꠣꠘꠥ ꠡꠣꠘ꠆ꠔꠤꠄ-ꠘꠤꠞꠜꠄꠄ ꠞꠁꠔꠣ ꠙꠣꠞꠂꠘ। ꠎꠣꠘ ꠔ, ꠀꠝꠤ ꠎꠦꠟꠣ ꠝꠣꠟꠤꠇꠞ ꠈꠦꠎꠝꠔ ꠇꠞꠤꠀꠞ, ꠔꠣꠁꠘꠅ ꠑꠤꠇ ꠅꠃꠟꠣ ꠇꠞꠞꠣ।
1CO 16:11 ꠄꠞꠟꠣꠉꠤ ꠇꠦꠃ ꠎꠣꠘꠥ ꠔꠣꠘꠞꠦ ꠄꠟꠣꠝꠤ ꠘꠣ ꠇꠞꠦ। ꠛꠣꠖꠦ ꠔꠣꠁꠘ ꠎꠦꠟꠣ ꠀꠝꠣꠞ ꠉꠦꠍꠦ ꠀꠁꠔꠣ ꠙꠣꠞꠂꠘ, ꠅꠃꠟꠣ ꠡꠣꠘ꠆ꠔꠤ ꠝꠔ ꠔꠣꠘꠞꠦ ꠀꠉꠥꠀꠁꠀ ꠖꠤꠅ। ꠀꠝꠤ ꠔ ꠔꠣꠘ ꠟꠣꠉꠤ ꠛꠣꠞ ꠌꠣꠁꠀꠞ, ꠀꠡꠣ ꠇꠞꠤ ꠜꠣꠁꠀꠁꠘ꠆ꠔꠞ ꠟꠉꠦ ꠔꠣꠁꠘꠅ ꠀꠁꠛꠣ।
1CO 16:12 ꠀꠞ ꠀꠙꠟ꠆ꠟꠍ ꠜꠣꠁꠞ ꠛꠦꠙꠣꠞꠦ ꠇꠁꠞꠣꠝ, ꠔꠣꠘꠞꠦ ꠛꠃꠔ ꠝꠤꠘꠔ ꠇꠞꠍꠟꠣꠝ, ꠜꠣꠁꠀꠁꠘ꠆ꠔꠞ ꠟꠉꠦ ꠅꠁꠀ ꠅꠈꠘ ꠔꠥꠝꠞꠣꠞ ꠉꠦꠍꠦ ꠎꠣꠁꠔꠣ, ꠔꠣ-ꠅ ꠇꠥꠘꠥꠝꠘ꠆ꠔꠦꠃ ꠞꠣꠎꠤ ꠅꠁꠟꠣ ꠘꠣ। ꠔꠦ ꠡꠝꠄ-ꠡꠥꠎꠥꠉ ꠅꠁꠟꠦ ꠛꠣꠖꠦ ꠎꠣꠁꠛꠣꠘꠦ।
1CO 16:13 ꠜꠣꠁꠀꠁꠘꠞꠦ, ꠔꠥꠝꠞꠣ ꠢꠇꠟ ꠢꠥꠡꠤꠀꠞ ꠅꠅ, ꠁꠝꠣꠘꠦ ꠝꠎꠛꠥꠔ ꠅꠅ, ꠡꠣꠅꠡꠤ ꠜꠣꠛ ꠖꠦꠈꠣꠅ ꠀꠞ ꠛꠟꠛꠣꠘ ꠅꠅ।
1CO 16:14 ꠔꠥꠝꠞꠣ ꠎꠔꠔꠣꠃ ꠇꠞ, ꠝꠢꠛ꠆ꠛꠔꠞ ꠡꠢꠤꠔ ꠇꠞꠤꠅ।
1CO 16:15 ꠀꠞ ꠔꠥꠝꠞꠣꠞ ꠔ ꠎꠣꠘꠣ ꠀꠍꠦ, ꠀꠡ꠆ꠔꠣ ꠉ꠆ꠞꠤꠍ ꠖꠦꠡꠞ ꠝꠣꠎꠦ ꠀꠡ꠆ꠔꠤꠚꠣꠘ ꠜꠣꠁꠞ ꠙꠞꠤꠛꠣꠞꠃ ꠅꠁꠟꠣ ꠙꠄꠟꠣ ꠁꠝꠣꠘꠖꠣꠞ। ꠀꠟ꠆ꠟꠣꠞ ꠙꠣꠇ ꠛꠘ꠆ꠖꠣ ꠅꠇꠟꠞ ꠈꠦꠎꠝꠔꠞ ꠟꠣꠉꠤ ꠔꠣꠞꠣ ꠘꠤꠎꠞꠦ ꠡꠙꠤ ꠖꠤꠍꠂꠘ।
1CO 16:16 ꠄꠞꠟꠣꠉꠤ ꠝꠤꠘꠔ ꠇꠞꠤꠀꠞ, ꠁꠟꠣꠈꠣꠘ ꠝꠣꠘꠡꠞꠦ ꠔꠥꠝꠞꠣ ꠁꠎ꠆ꠎꠔꠞ ꠡꠢꠤꠔ ꠜꠎꠤꠅ, ꠀꠞꠅ ꠎꠔ ꠎꠘꠦ ꠅꠟꠣ ꠈꠦꠎꠝꠔ ꠇꠞꠂꠘ, ꠀꠟ꠆ꠟꠣꠞ ꠘꠣꠝꠦ ꠝꠦꠘꠔ ꠇꠞꠂꠘ, ꠔꠣꠞꠣꠞꠦꠅ ꠅꠟꠣ ꠜꠎꠤꠅ।
1CO 16:17 ꠅꠃ ꠀꠡ꠆ꠔꠤꠚꠣꠘ ꠜꠣꠁ, ꠚꠣꠔꠥꠘꠣꠔ ꠜꠣꠁ ꠀꠞ ꠀꠇꠤꠇ ꠜꠣꠁ ꠀꠁꠍꠂꠘ ꠖꠦꠈꠤꠀ ꠀꠝꠤ ꠈꠥꠛ ꠈꠥꠡꠤ ꠅꠁꠍꠤ, ꠄꠞꠣ ꠀꠅꠀꠄ ꠔꠥꠝꠞꠣꠞ ꠅꠜꠣꠛ ꠙꠥꠞꠘ ꠅꠁꠍꠦ।
1CO 16:18 ꠄꠞꠣ ꠀꠝꠣꠞ ꠀꠞ ꠔꠥꠝꠞꠣꠞ ꠖꠤꠟꠅ ꠀꠞꠣꠝ ꠖꠤꠍꠂꠘ। ꠔꠥꠝꠞꠣ ꠅꠃ ꠟꠣꠈꠣꠘ ꠝꠣꠘꠡꠞꠦ ꠈꠣꠍ ꠁꠎ꠆ꠎꠔ ꠇꠞꠤꠅ।
1CO 16:19 ꠔꠥꠞꠡ꠆ꠇꠞ ꠀꠍꠤꠀ ꠖꠦꠡꠞ ꠎꠝꠣꠔꠞ ꠝꠣꠘꠡꠦ ꠔꠥꠝꠞꠣꠞꠦ ꠍꠣꠟꠣꠝ ꠎꠣꠘꠣꠁꠞꠣ। ꠀꠇꠤꠟ ꠀꠞ ꠚꠤꠍꠇꠤꠟꠣ, ꠀꠞ ꠔꠣꠞꠣꠞ ꠊꠞꠞ ꠎꠝꠣꠔꠞ ꠝꠣꠘꠡꠦ ꠝꠣꠟꠤꠇꠞ ꠝꠢꠛ꠆ꠛꠔꠞ ꠡꠢꠤꠔ ꠔꠥꠝꠞꠣꠞꠦ ꠍꠣꠟꠣꠝ ꠎꠣꠘꠣꠁꠞꠣ।
1CO 16:20 ꠢꠇꠟ ꠝꠥꠝꠤꠘ ꠜꠣꠁꠀꠁꠘ꠆ꠔꠦ ꠔꠥꠝꠞꠣꠞꠦ ꠍꠣꠟꠣꠝ ꠎꠣꠘꠣꠁꠞꠣ। ꠔꠥꠝꠞꠣ ꠄꠇꠦ-ꠅꠁꠘ꠆ꠘꠦ ꠙꠛꠤꠔ꠆ꠞ ꠉꠟꠣꠉꠟꠤ ꠇꠞꠤꠅ।
1CO 16:21 ꠀꠝꠤ ꠙꠣꠃꠟꠥꠍꠦ ꠘꠤꠎꠞ ꠀꠔꠦ ꠅꠃ ꠍꠣꠟꠣꠝꠞ ꠇꠕꠣ ꠟꠦꠈꠟꠣꠝ।
1CO 16:22 ꠝꠣꠟꠤꠇ ꠁꠍꠣꠞꠦ ꠎꠥꠖꠤ ꠇꠦꠃ ꠝꠢꠛ꠆ꠛꠔ ꠘꠣ ꠇꠞꠦ, ꠔꠦ ꠔꠣꠞ ꠃꠙꠞꠦ ꠟꠣꠘ꠆ꠘꠔ ꠙꠠꠃꠇ। ꠝꠣꠞꠣꠘꠣ ꠕꠣ! ꠝꠣꠘꠤ, ꠅ ꠀꠝꠞꠣꠞ ꠝꠣꠟꠤꠇ, ꠔꠡꠞꠤꠚ ꠀꠘꠃꠇ꠆ꠇꠣ!
1CO 16:23 ꠝꠣꠟꠤꠇ ꠁꠍꠣꠞ ꠞꠢꠝꠔ ꠔꠥꠝꠞꠣꠞ ꠃꠙꠞꠦ ꠎꠣꠞꠤ ꠞꠃꠇ।
1CO 16:24 ꠔꠥꠝꠞꠣ ꠢꠇꠟꠞ ꠟꠣꠉꠤ ꠀꠝꠣꠞ ꠁꠍꠣꠄꠁ ꠝꠢꠛ꠆ꠛꠔ ꠞꠁꠟ। ꠀꠝꠤꠘ॥
2CO 1:1 ꠀꠝꠤ ꠙꠣꠃꠟꠥꠍ, ꠀꠟ꠆ꠟꠣ ꠙꠣꠇꠞ ꠝꠞ꠆ꠎꠤ ꠝꠣꠚꠤꠇ ꠢꠎꠞꠔ ꠁꠍꠣ ꠀꠟ-ꠝꠍꠤꠞ ꠄꠇꠎꠘ ꠍꠣꠢꠣꠛꠤ। ꠇꠞꠤꠘ꠆ꠔ ꠐꠣꠃꠘꠞ ꠁꠍꠣꠄꠁ ꠎꠝꠣꠔ ꠀꠞ ꠀꠡ꠆ꠔꠣ ꠉ꠆ꠞꠤꠍ ꠖꠦꠡꠞ ꠝꠣꠎꠦ ꠀꠟ꠆ꠟꠣꠞ ꠎꠔ ꠙꠣꠇ ꠛꠘ꠆ꠖꠣ ꠅꠇꠟ ꠛꠡꠔ ꠇꠞꠂꠘ, ꠄꠞꠣꠞ ꠉꠦꠍꠦ ꠀꠝꠤ ꠀꠞ ꠀꠝꠞꠣꠞ ꠝꠥꠝꠤꠘ ꠜꠣꠁ ꠔꠤꠝꠕꠤꠄ ꠅꠃ ꠍꠢꠤꠚꠣꠈꠣꠘ ꠟꠦꠈꠞꠣꠝ।
2CO 1:2 ꠀꠝꠞꠣꠞ ꠉꠣꠁꠛꠤ ꠛꠣꠚ ꠀꠟ꠆ꠟꠣ ꠙꠣꠇꠦ ꠀꠞ ꠝꠣꠟꠤꠇ ꠁꠍꠣ ꠀꠟ-ꠝꠍꠤꠄ ꠀꠙꠘꠣꠞꠣ ꠢꠇꠟꠞ ꠃꠙꠞꠦ ꠞꠢꠝꠔ ꠀꠞ ꠡꠣꠘ꠆ꠔꠤ ꠘꠣꠎꠤꠟ ꠇꠞꠃꠇ꠆ꠇꠣ।
2CO 1:3 ꠀꠝꠞꠣꠞ ꠝꠣꠟꠤꠇ ꠁꠍꠣ ꠀꠟ-ꠝꠍꠤꠞ ꠉꠣꠁꠛꠤ ꠛꠣꠚ ꠀꠟ꠆ꠟꠣ ꠙꠣꠇꠞ ꠔꠣꠞꠤꠚ ꠅꠃꠇ। ꠔꠣꠁꠘꠃ ꠞꠢꠝꠣꠘꠥꠞ ꠞꠢꠤꠝ ꠀꠟ꠆ꠟꠣ, ꠢꠇ꠆ꠇꠟꠞ ꠖꠤꠟꠞ ꠛꠥꠎ ꠖꠦꠅꠞꠣ ꠀꠟ꠆ꠟꠣ।
2CO 1:4 ꠢꠇꠟ ꠎꠣꠔ ꠖꠥꠈ-ꠝꠍꠤꠛꠔꠞ ꠡꠝꠄ ꠔꠣꠁꠘ ꠀꠝꠞꠣꠞꠦ ꠛꠥꠎ ꠖꠦꠁꠘ, ꠎꠣꠔꠦ ꠔꠣꠘ ꠉꠦꠍ ꠕꠣꠇꠤ ꠛꠥꠎ ꠙꠣꠁꠀ, ꠅꠁꠘ꠆ꠘꠞ ꠖꠥꠈ-ꠝꠍꠤꠛꠔꠞ ꠡꠝꠄ ꠀꠝꠞꠣꠅ ꠔꠣꠞꠣꠞꠦ ꠛꠥꠎ ꠖꠤꠔꠣꠝ ꠙꠣꠞꠤ।
2CO 1:5 ꠀꠟ-ꠝꠍꠤꠞ ꠟꠣꠈꠣꠘ ꠀꠝꠞꠣ ꠎꠦꠟꠣ ꠛꠃꠔ ꠖꠥꠈ-ꠝꠍꠤꠛꠔ ꠡꠁꠎ꠆ꠎ ꠇꠞꠤꠀꠞ, ꠅꠃꠟꠣ ꠔꠣꠘ ꠃꠍꠤꠟ꠆ꠟꠣꠄ ꠛꠃꠔ ꠛꠥꠎ-ꠡꠣꠘ꠆ꠔꠤꠅ ꠙꠣꠁꠀꠞ।
2CO 1:6 ꠀꠝꠞꠣ ꠎꠦ ꠖꠥꠈ-ꠝꠍꠤꠛꠔ ꠡꠁꠎ꠆ꠎ ꠇꠞꠤ, ꠁꠔꠣ ꠔ ꠔꠥꠝꠞꠣꠞ ꠝꠘꠞ ꠡꠣꠘ꠆ꠔꠘꠣ ꠀꠞ ꠘꠣꠎꠣꠔꠞ ꠟꠣꠉꠤꠃ ꠇꠞꠤ। ꠔꠥꠝꠞꠣꠞꠦ ꠛꠥꠎ ꠖꠦꠅꠀꠞ ꠘꠤꠅꠔꠦꠃ ꠀꠟ꠆ꠟꠣꠄ ꠀꠝꠞꠣꠞꠦ ꠛꠥꠎ ꠖꠦꠁꠘ। ꠔꠥꠝꠞꠣ ꠎꠦꠛꠟꠣ ꠀꠝꠞꠣꠞ ꠟꠣꠈꠣꠘ ꠖꠥꠈ-ꠝꠍꠤꠛꠔꠅ ꠙꠠꠛꠣꠄ, ꠅꠃ ꠡꠝꠄ ꠀꠝꠞꠣꠞ ꠖꠦꠅꠀ ꠛꠥꠎ ꠝꠣꠚꠤꠇ ꠔꠥꠝꠞꠣꠞ ꠇꠡ꠆ꠐꠞꠦ ꠡꠁꠎ꠆ꠎ ꠇꠞꠔꠦ ꠡꠣꠁꠎ꠆ꠎ ꠇꠞꠛ।
2CO 1:7 ꠔꠥꠝꠞꠣꠞ ꠃꠙꠞꠦ ꠀꠝꠞꠣꠞ ꠝꠎꠛꠥꠔ ꠄꠇꠤꠘ ꠀꠍꠦ, ꠔꠥꠝꠞꠣ ꠎꠦꠟꠣ ꠀꠝꠞꠣꠞ ꠖꠥꠈ-ꠝꠍꠤꠛꠔꠅ ꠡꠞꠤꠇ ꠀꠍ, ꠅꠃꠟꠣ ꠀꠟ꠆ꠟꠣꠞ ꠖꠦꠅꠀ ꠛꠥꠎ-ꠡꠣꠘ꠆ꠔꠘꠣꠞ ꠝꠣꠎꠦꠅ ꠡꠞꠤꠇ ꠀꠍ।
2CO 1:8 ꠔꠥꠞꠡ꠆ꠇꠞ ꠀꠍꠤꠀ ꠖꠦꠡꠅ ꠀꠝꠞꠣ ꠎꠦ ꠝꠍꠤꠛꠔꠅ ꠙꠠꠍꠟꠣꠝ, ꠅꠔꠣ ꠔꠥꠝꠞꠣꠞꠦ ꠎꠣꠘꠣꠁꠔꠣꠝ ꠌꠣꠁ। ꠢꠤꠘꠅ ꠕꠣꠇꠔꠦ ꠀꠝꠞꠣꠞ ꠃꠙꠞꠦ ꠎꠦ ꠀꠎꠣꠛ ꠀꠁꠍꠤꠟ, ꠅꠃ ꠀꠎꠣꠛ ꠅꠟꠣ ꠝꠣꠞꠣꠔ꠆ꠔꠇ ꠀꠍꠤꠟ, ꠄꠞꠟꠣꠉꠤ ꠀꠝꠞꠣ ꠎꠣꠘꠞ ꠝꠣꠄꠀ ꠍꠣꠠꠤ ꠖꠤꠍꠟꠣꠝ।
2CO 1:9 ꠝꠘꠅ ꠇꠞꠍꠟꠣꠝ, ꠀꠝꠞꠣ ꠘꠤꠌ꠆ꠌꠤꠔ ꠝꠣꠞꠣ ꠎꠣꠁꠝꠥ। ꠔꠦ ꠀꠝꠞꠣꠞ ꠁ ꠢꠣꠟꠔ ꠅꠁꠍꠤꠟ, ꠎꠣꠔꠦ ꠀꠝꠞꠣ ꠘꠤꠎꠞ ꠃꠙꠞꠦ ꠜꠞꠡꠣ ꠘꠣ ꠇꠞꠤꠀ, ꠎꠦ ꠀꠟ꠆ꠟꠣꠄ ꠝꠥꠞ꠆ꠖꠣꠞꠦ ꠎꠤꠘ꠆ꠖꠣ ꠇꠞꠤ ꠔꠥꠟꠂꠘ, ꠅꠃ ꠀꠟ꠆ꠟꠣꠞ ꠃꠙꠞꠦ ꠜꠞꠡꠣ ꠇꠞꠤ।
2CO 1:10 ꠄꠇ ꠛꠦꠎꠥꠁꠔꠣ ꠝꠃꠔꠞ ꠀꠔ ꠕꠣꠇꠤ ꠔꠣꠁꠘ ꠀꠝꠞꠣꠞꠦ ꠛꠣꠌꠣꠁꠍꠂꠘ, ꠀꠞ ꠅꠈꠘꠅ ꠛꠣꠌꠣꠁꠞꠣ। ꠀꠝꠞꠣ ꠔꠣꠘ ꠃꠙꠞꠦ ꠜꠞꠡꠣ ꠇꠞꠔꠣꠝ ꠙꠣꠞꠤ, ꠔꠣꠁꠘ ꠢꠣꠝꠦꠡꠣꠃ ꠀꠝꠞꠣꠞꠦ ꠅꠟꠣꠈꠣꠘ ꠛꠣꠌꠣꠁꠛꠣ।
2CO 1:11 ꠔꠥꠝꠞꠣꠅ ꠖꠥꠀ-ꠝꠥꠘꠣꠎꠣꠔ ꠇꠞꠤꠀ ꠀꠝꠞꠣꠞꠦ ꠡꠣꠁꠎ꠆ꠎ ꠇꠞꠞꠣꠄ, ꠄꠞꠟꠣꠉꠤ ꠛꠃꠔ ꠎꠘꠞ ꠖꠥꠀꠞ ꠈꠣꠔꠤꠞꠦ ꠀꠝꠞꠣ ꠎꠦ ꠞꠢꠝ ꠙꠣꠁꠍꠤ, ꠅꠔꠣꠞ ꠚꠟ ꠖꠦꠈꠤꠀ ꠛꠃꠔꠦ ꠀꠟ꠆ꠟꠣꠞ ꠡꠥꠇꠞꠤꠀ ꠀꠖꠣꠄ ꠇꠞꠛꠣ।
2CO 1:12 ꠀꠝꠞꠣ ꠎꠦꠔꠣ ꠟꠁꠀ ꠉꠃꠞꠛ ꠇꠞꠤꠀꠞ, ꠀꠝꠞꠣꠞ ꠛꠤꠛꠦꠇꠦꠅ ꠅꠟꠣ ꠇꠄ, ꠀꠟ꠆ꠟꠣꠞ ꠖꠦꠅꠀ ꠙꠛꠤꠔ꠆ꠞ ꠀꠞ ꠡꠞꠟ ꠝꠘ ꠟꠁꠀ ꠢꠇꠟ ꠝꠣꠘꠡꠞ ꠝꠣꠎꠦ ꠎꠤꠘ꠆ꠖꠦꠉꠤ ꠇꠣꠐꠣꠁꠍꠤ, ꠈꠣꠍ ꠇꠞꠤ ꠔꠥꠝꠞꠣꠞ ꠝꠣꠎꠦꠃ ꠇꠣꠐꠣꠁꠍꠤ। ꠁ ꠎꠤꠘ꠆ꠖꠦꠉꠤ ꠀꠝꠞꠣ ꠖꠥꠘꠤꠀꠛꠤ ꠀꠈꠟ-ꠢꠦꠇꠝꠔꠦ ꠘꠣꠄ, ꠈꠣꠟꠤ ꠀꠟ꠆ꠟꠣꠞ ꠞꠢꠝꠔꠞ ꠛꠟꠦ ꠇꠣꠐꠣꠁꠍꠤ।
2CO 1:13 ꠀꠝꠞꠣ ꠔ ꠔꠥꠝꠞꠣꠞ ꠉꠦꠍꠦ ꠟꠥꠇꠣꠁ-ꠌꠣꠙꠣꠁ ꠇꠥꠘꠥꠔꠣ ꠟꠦꠈꠤꠀꠞ ꠘꠣ, ꠔꠥꠝꠞꠣ ꠎꠦ ꠟꠦꠈꠣ ꠙꠠꠞꠣꠄ ꠀꠞ ꠛꠥꠎꠞꠣꠄ, ꠈꠣꠟꠤ ꠅꠃ ꠛꠦꠙꠣꠞꠦꠃ ꠟꠦꠈꠤꠀꠞ। ꠀꠞ ꠀꠡꠣ ꠇꠞꠤꠀꠞ, ꠔꠥꠝꠞꠣ ꠢꠣꠝꠦꠡꠣꠃ ꠅꠟꠣ ꠛꠥꠎꠣꠔ ꠞꠁꠛꠣꠄ।
2CO 1:14 ꠀꠍꠟꠦ ꠀꠝꠞꠣꠞ ꠛꠦꠙꠣꠞꠦ ꠔꠥꠝꠞꠣ ꠕꠥꠠꠣ ꠇꠤꠍꠥ ꠎꠣꠘꠤꠀꠃ, ꠀꠝꠞꠣꠞꠦ ꠟꠁꠀ ꠎꠦꠟꠣ ꠛꠠꠣꠁ ꠇꠞꠞꠣꠄ, ꠝꠣꠟꠤꠇ ꠁꠍꠣꠄ ꠔꠡꠞꠤꠚ ꠀꠘꠣꠞ ꠡꠝꠄ ꠔꠥꠝꠞꠣꠞꠦ ꠟꠁꠀ ꠀꠝꠞꠣꠅ ꠅꠟꠣ ꠛꠠꠣꠁ ꠇꠞꠝꠥ।
2CO 1:15 ꠀꠞ ꠅꠃ ꠇꠕꠣꠞ ꠃꠙꠞꠦ ꠜꠞꠡꠣ ꠇꠞꠤꠀ ꠀꠝꠤ ꠈꠥꠛ ꠈꠤꠀꠟꠤ ꠅꠁꠍꠟꠣꠝ, ꠀꠝꠤ ꠀꠅꠀ-ꠎꠣꠅꠀꠞ ꠙꠕꠅ ꠖꠥꠁꠅꠛꠣꠞ ꠔꠥꠝꠞꠣꠞ ꠉꠦꠍꠦ ꠎꠣꠁꠝꠥ, ꠉꠦꠟꠦ ꠔꠥꠝꠞꠣ ꠖꠥꠁꠅꠛꠣꠞꠃ ꠞꠢꠝ-ꠘꠤꠀꠝꠔ ꠙꠣꠁꠛꠣꠄ।
2CO 1:16 ꠀꠝꠤ ꠝꠘꠅ ꠇꠞꠍꠟꠣꠝ, ꠝꠣꠇꠤꠖꠘꠤꠀꠔ ꠎꠣꠅꠀꠞ ꠙꠕꠦ ꠔꠥꠝꠞꠣꠞ ꠟꠉꠦ ꠖꠦꠈꠣ ꠇꠞꠝꠥ ꠀꠞ ꠢꠘ ꠕꠣꠇꠤ ꠢꠤꠞꠛꠣꠞ ꠔꠥꠝꠞꠣꠞ ꠉꠦꠍꠦ ꠀꠁꠝꠥ, ꠎꠣꠔꠦ ꠄꠢꠥꠖꠤꠀ ꠎꠤꠟꠣꠔ ꠎꠣꠅꠀꠞ ꠇꠣꠟꠅ ꠔꠥꠝꠞꠣ ꠀꠝꠣꠞꠦ ꠀꠉꠥꠀꠁꠀ ꠖꠦꠅ।
2CO 1:17 ꠅꠁꠟꠦ ꠀꠝꠤ ꠘꠣ ꠀꠅꠀꠄ ꠔꠥꠝꠞꠣ ꠝꠘꠅ ꠇꠞꠞꠣꠄ ꠘꠤ, ꠀꠝꠤ ꠁꠔꠣ ꠓꠋ ꠇꠞꠍꠟꠣꠝ? ꠎꠉꠔꠞ ꠝꠣꠘꠡꠦ ꠎꠦꠟꠣ ꠄꠇꠛꠣꠞ ꠇꠄ “ꠅꠄ, ꠅꠄ” ꠀꠞꠇꠛꠣꠞ ꠇꠄ “ꠘꠣ, ꠘꠣ”, ꠀꠝꠤꠅ ꠅꠟꠣ ꠘꠤ?
2CO 1:18 ꠀꠟ꠆ꠟꠣ ꠙꠣꠇ ꠔ ꠢꠇ ꠀꠞ ꠈꠣꠐꠤ, ꠁꠈꠣꠘ ꠎꠦꠟꠣ ꠢꠣꠍꠣ, ꠅꠃꠟꠣ ꠄꠅꠈꠣꠘꠅ ꠢꠣꠍꠣ, ꠔꠥꠝꠞꠣꠞ ꠉꠦꠍꠦ ꠀꠝꠞꠣꠞ ꠎꠛꠣꠘ ꠄꠇꠛꠣꠞ “ꠅꠄ” ꠀꠞ ꠀꠞꠇꠛꠣꠞ “ꠘꠣ” ꠅꠄ ꠘꠣ।
2CO 1:19 ꠀꠝꠤ, ꠍꠤꠟꠣꠍ, ꠀꠞ ꠜꠣꠁ ꠔꠤꠝꠕꠤꠄ ꠔꠥꠝꠞꠣꠞ ꠉꠦꠍꠦ ꠎꠣꠞ ꠇꠕꠣ ꠔꠛꠟꠤꠉ ꠇꠞꠍꠤ, ꠢꠃ ꠁꠍꠣ ꠀꠟ-ꠝꠍꠤꠃ ꠅꠁꠟꠣ ꠀꠟ꠆ꠟꠣꠞ ꠈꠣꠍ ꠝꠣꠄꠀꠞ ꠎꠘ ꠁꠛꠘꠥꠟ꠆ꠟꠣ, ꠔꠣꠁꠘ ꠄꠇꠛꠣꠞ “ꠅꠄ” ꠀꠞ ꠄꠇꠛꠣꠞ “ꠘꠣ” ꠘꠣꠄ, ꠔꠣꠁꠘ ꠔ ꠢꠇꠟ ꠡꠝꠄꠃ “ꠅꠄ।”
2CO 1:20 ꠀꠟ꠆ꠟꠣ ꠙꠣꠇꠞ ꠢꠇꠟ ꠅꠀꠖꠣꠃ ꠔ ꠀꠟ-ꠝꠍꠤꠞ ꠝꠣꠎꠖꠤ ꠙꠥꠞꠣ ꠅꠄ। ꠄꠞꠟꠣꠉꠤ ꠝꠥꠘꠣꠎꠣꠔꠞ ꠡꠝꠄ ꠀꠟ꠆ꠟꠣꠞ ꠉꠃꠞꠛꠞ ꠟꠣꠉꠤ ꠀꠟ-ꠝꠍꠤꠞ ꠘꠣꠝꠞ ꠃꠍꠤꠟ꠆ꠟꠣꠄ ꠀꠝꠞꠣ “ꠀꠝꠤꠘ” ꠝꠣꠘꠤ “ꠅꠄ” ꠇꠁ।
2CO 1:21 ꠀꠞ ꠀꠟ-ꠝꠍꠤꠞ ꠟꠣꠉꠤ ꠀꠝꠞꠣꠞꠦ ꠀꠞ ꠔꠥꠝꠞꠣꠞꠦ ꠎꠦꠁꠘ ꠝꠎꠛꠥꠔ ꠇꠞꠤ ꠐꠤꠇꠣꠁ ꠞꠣꠈꠍꠂꠘ, ꠔꠣꠘ ꠘꠣꠝ ꠀꠟ꠆ꠟꠣ। ꠔꠣꠁꠘꠃ ꠀꠝꠞꠣꠞꠦ ꠈꠦꠟꠣꠚꠔꠤ ꠖꠤꠍꠂꠘ।
2CO 1:22 ꠔꠣꠘ ꠘꠤꠎꠞ ꠗꠘ ꠢꠤꠡꠣꠛꠦ ꠀꠝꠞꠣꠞꠦ ꠡꠤꠟ-ꠌꠣꠙ꠆ꠙꠠ ꠝꠣꠞꠤꠀ ꠞꠣꠈꠍꠂꠘ, ꠀꠞ ꠔꠣꠁꠘ ꠎꠦꠔꠣ ꠀꠝꠞꠣꠞꠦ ꠖꠤꠛꠣꠞ ꠅꠀꠖꠣ ꠇꠞꠍꠂꠘ, ꠁꠔꠣꠞ ꠙꠄꠟꠣ ꠇꠤꠡ꠆ꠔꠤ ꠢꠤꠡꠣꠛꠦ ꠀꠝꠞꠣꠞ ꠖꠤꠟꠞ ꠝꠣꠎꠦ ꠀꠟ꠆ꠟꠣꠁ ꠙꠣꠇ ꠞꠥꠢꠥ ꠖꠣꠘ ꠇꠞꠍꠂꠘ।
2CO 1:23 ꠀꠝꠤ ꠀꠟ꠆ꠟꠣꠞꠦ ꠡꠣꠇ꠆ꠇꠤ ꠞꠣꠈꠤꠀ ꠀꠝꠣꠞ ꠎꠤꠘ꠆ꠖꠦꠉꠤꠞ ꠇꠍꠝ ꠈꠣꠁꠀ ꠇꠁꠞꠣꠝ, ꠔꠥꠝꠞꠣꠞ ꠛꠣꠄ ꠖꠄꠀ-ꠝꠣꠄꠀ ꠕꠣꠇꠣꠄ ꠔꠥꠝꠞꠣꠞꠦ ꠛꠣꠌꠣꠘꠤꠞ ꠈꠤꠀꠟꠦ ꠀꠝꠤ ꠇꠞꠤꠘ꠆ꠔ ꠐꠣꠃꠘꠅ ꠎꠣꠅꠀ ꠛꠘ꠆ꠖ ꠞꠣꠈꠍꠤ।
2CO 1:24 ꠀꠝꠞꠣ ꠘꠤꠎꠞꠦ ꠔꠥꠝꠞꠣꠞ ꠁꠝꠣꠘꠞ ꠝꠣꠟꠤꠇ ꠝꠘꠅ ꠇꠞꠞꠣꠝ ꠘꠣ, ꠛꠞꠋ ꠔꠥꠝꠞꠣꠞꠦ ꠈꠥꠡꠤ-ꠛꠣꠡꠤꠄ ꠞꠣꠈꠣꠞ ꠟꠣꠉꠤ ꠔꠥꠝꠞꠣꠞ ꠟꠉꠦ ꠞꠁꠀ ꠇꠣꠝ ꠇꠞꠞꠣꠝ। ꠇꠣꠞꠘ ꠔꠥꠝꠞꠣ ꠁꠝꠣꠘꠦ ꠝꠎꠛꠥꠔ ꠀꠍ।
2CO 2:1 ꠄꠞꠟꠣꠉꠤ ꠝꠘꠦ ꠝꠘꠦ ꠑꠤꠇ ꠇꠞꠟꠣꠝ, ꠔꠥꠝꠞꠣꠞ ꠝꠘꠅ ꠖꠥꠈ ꠖꠦꠅꠀꠞ ꠟꠣꠉꠤ ꠀꠝꠤ ꠀꠞ ꠔꠥꠝꠞꠣꠞ ꠉꠦꠍꠦ ꠎꠣꠁꠔꠣꠝ ꠘꠣꠄ।
2CO 2:2 ꠇꠣꠞꠘ ꠀꠝꠤ ꠔꠥꠝꠞꠣꠞꠦ ꠖꠥꠈ ꠖꠤꠟꠦ ꠀꠝꠣꠞꠦ ꠈꠥꠡꠤ ꠇꠞꠛ ꠇꠦ? ꠀꠞ ꠀꠝꠤ ꠎꠣꠞꠣꠞꠦ ꠖꠥꠈ ꠖꠤꠝꠥ, ꠅꠃ ꠔꠥꠝꠞꠣ ꠍꠣꠠꠣ ꠀꠝꠣꠞꠦ ꠈꠥꠡꠤ ꠇꠞꠣꠞ ꠀꠞ ꠔ ꠇꠦꠃ ꠘꠣꠁ।
2CO 2:3 ꠀꠝꠣꠞ ꠁꠟꠣ ꠟꠦꠈꠣꠞ ꠇꠣꠞꠘ ꠅꠁꠟ, ꠀꠝꠤ ꠎꠦꠛꠟꠣ ꠎꠣꠁꠝꠥ, ꠅꠃ ꠡꠝꠄ ꠎꠦꠞꠣ ꠀꠝꠣꠞꠦ ꠈꠥꠡꠤ ꠇꠞꠣꠞ ꠇꠕꠣ, ꠔꠣꠞꠣꠞ ꠉꠦꠍ ꠕꠣꠇꠤ ꠎꠣꠘꠥ ꠇꠥꠘꠥ ꠖꠥꠈ ꠘꠣ ꠙꠣꠁ। ꠔꠥꠝꠞꠣꠞ ꠃꠙꠞꠦ ꠀꠝꠣꠞ ꠁ ꠛꠤꠡ꠆ꠛꠣꠡ ꠀꠍꠦ, ꠀꠝꠤ ꠎꠦꠔꠣꠔ ꠈꠥꠡꠤ ꠅꠁꠝꠥ, ꠔꠥꠝꠞꠣꠅ ꠁꠔꠣꠔ ꠈꠥꠡꠤ ꠅꠁꠛꠣꠄ।
2CO 2:4 ꠀꠝꠣꠞ ꠝꠘꠅ ꠛꠠ ꠖꠥꠈ ꠟꠁꠀ, ꠌꠈꠥꠞ ꠙꠣꠘꠤ ꠚꠣꠟꠣꠁꠀ ꠀꠉꠦ ꠔꠥꠝꠞꠣꠞ ꠉꠦꠍꠦ ꠟꠦꠈꠍꠟꠣꠝ। ꠀꠍꠟꠦ ꠀꠝꠤ ꠔꠥꠝꠞꠣꠞꠦ ꠖꠥꠈ ꠖꠦꠅꠀꠞ ꠟꠣꠉꠤ ꠟꠦꠈꠍꠤ ꠘꠣ, ꠛꠞꠋ ꠔꠥꠝꠞꠣꠞ ꠟꠣꠉꠤ ꠀꠝꠣꠞ ꠎꠦ ꠇꠔ ꠝꠢꠛ꠆ꠛꠔ, ꠅꠈꠣꠘ ꠎꠣꠘꠣꠘꠤꠞ ꠟꠣꠉꠤꠃ ꠟꠦꠈꠍꠤ।
2CO 2:5 ꠀꠝꠣꠞꠦ ꠎꠥꠖꠤ ꠇꠦꠃ ꠖꠥꠈ ꠖꠤꠀ ꠕꠣꠇꠦ, ꠔꠦ ꠢꠦ ꠈꠣꠟꠤ ꠀꠝꠣꠞꠦ ꠘꠣꠄ, ꠕꠥꠠꠣ ꠅꠁꠟꠦꠅ ꠔꠥꠝꠞꠣ ꠢꠇꠟꠞꠦꠃ ꠖꠥꠈ ꠖꠤꠍꠦ।
2CO 2:6 ꠔꠥꠝꠞꠣ ꠛꠦꠡꠤꠞ ꠜꠣꠉ ꠎꠘꠦ ꠝꠤꠟꠤꠀ ꠔꠣꠞꠦ ꠎꠦ ꠡꠣꠎꠣ ꠖꠤꠍ, ꠅꠔꠣꠃ ꠔꠣꠞ ꠟꠣꠉꠤ ꠎꠕꠦꠡ꠆ꠐ।
2CO 2:7 ꠅꠈꠘ ꠔꠥꠝꠞꠣ ꠔꠣꠞꠦ ꠝꠣꠚ ꠇꠞꠤ ꠖꠤꠟꠣꠅ, ꠔꠣꠞꠦ ꠛꠥꠎ ꠖꠦꠅ, ꠎꠣꠔꠦ ꠛꠦꠡꠤ ꠖꠥꠈꠦ ꠢꠦ ꠇꠣꠔꠞ ꠘꠣ ꠅꠄ।
2CO 2:8 ꠄꠞꠟꠣꠉꠤ ꠈꠣꠍ ꠇꠞꠤ ꠔꠥꠝꠞꠣꠞꠦ ꠇꠁꠞꠣꠝ, ꠔꠥꠝꠞꠣ ꠎꠦꠘ ꠔꠣꠞꠦ ꠝꠣꠄꠀ ꠇꠞ, ꠁꠔꠣ ꠙꠞꠝꠣꠘ ꠇꠞꠤ ꠖꠦꠈꠣꠅ।
2CO 2:9 ꠀꠝꠤ ꠙꠞꠤꠇ꠆ꠇꠣ ꠇꠞꠤ ꠖꠦꠈꠔꠣꠝ ꠌꠣꠁꠍꠟꠣꠝ, ꠔꠥꠝꠞꠣ ꠢꠇꠟ ꠛꠦꠙꠣꠞꠦ ꠛꠣꠁꠖ꠆ꠖ ꠀꠍ ꠇꠤ ꠘꠣ, ꠄꠞꠟꠣꠉꠤꠃ ꠀꠝꠤ ꠔꠥꠝꠞꠣꠞ ꠉꠦꠍꠦ ꠟꠦꠈꠍꠤ।
2CO 2:10 ꠔꠥꠝꠞꠣ ꠎꠥꠖꠤ ꠇꠥꠘꠥ ꠛꠦꠙꠣꠞꠦ ꠇꠦꠃꠞꠞꠦ ꠝꠣꠚ ꠇꠞꠤ ꠖꠤꠟꠣꠅ, ꠔꠦ ꠀꠝꠤꠅ ꠔꠣꠞꠦ ꠝꠣꠚ ꠇꠞꠤ ꠖꠦꠁ। ꠀꠞ ꠢꠣꠍꠣꠃ ꠎꠥꠖꠤ ꠀꠝꠤ ꠇꠥꠘ꠆ꠔꠣ ꠝꠣꠚ ꠇꠞꠤꠀ ꠕꠣꠇꠤ, ꠔꠦ ꠀꠟ-ꠝꠍꠤꠞ ꠍꠣꠝꠘꠦ ꠔꠥꠝꠞꠣꠞ ꠟꠣꠉꠤꠃ ꠇꠞꠤꠀꠞ,
2CO 2:11 ꠎꠣꠔꠦ ꠡꠄꠔꠣꠘꠦ ꠀꠝꠞꠣꠞꠦ ꠗꠥꠇꠣ ꠖꠤꠔ ꠘꠣ ꠙꠣꠞꠦ। ꠔꠣꠞ ꠇꠥ-ꠝꠔꠟꠛꠞ ꠇꠕꠣ ꠔ ꠀꠝꠞꠣꠞ ꠅꠎꠣꠘꠣ ꠘꠣꠄ।
2CO 2:12 ꠀꠝꠤ ꠔꠞꠥꠀꠍ ꠐꠣꠃꠘꠅ ꠀꠟ-ꠝꠍꠤꠞ ꠛꠦꠙꠣꠞꠦ ꠈꠥꠡ-ꠈꠛꠞꠤ ꠔꠛꠟꠤꠉ ꠇꠞꠣꠔ ꠉꠤꠀ ꠖꠦꠈꠟꠣꠝ, ꠢꠘꠅ ꠇꠣꠝ ꠇꠞꠣꠞ ꠟꠣꠉꠤ ꠝꠣꠟꠤꠇꠦ ꠀꠝꠣꠞꠦ ꠄꠇꠐꠣ ꠡꠥꠎꠥꠉ ꠇꠞꠤ ꠖꠤꠍꠂꠘ।
2CO 2:13 ꠅꠁꠟꠦ ꠀꠝꠣꠞ ꠁꠝꠣꠘꠖꠣꠞ ꠜꠣꠁ ꠔꠤꠔꠣꠍꠞꠦ ꠢꠘꠅ ꠘꠣ ꠙꠣꠅꠀꠄ ꠀꠝꠣꠞ ꠝꠘꠅ ꠈꠥꠛ ꠅꠡꠣꠘ꠆ꠔꠤ ꠀꠍꠤꠟ। ꠄꠞꠟꠣꠉꠤ ꠔꠞꠥꠀꠍ ꠐꠣꠃꠘꠞ ꠝꠣꠘꠡꠞ ꠉꠦꠍ ꠕꠣꠇꠤ ꠛꠤꠖꠣꠄ ꠟꠁꠀ ꠝꠣꠇꠤꠖꠘꠤꠀꠔ ꠉꠦꠟꠣꠝꠉꠤ।
2CO 2:14 ꠅꠁꠟꠦ ꠀꠝꠞꠣ ꠀꠟ꠆ꠟꠣꠞ ꠡꠥꠇꠞꠤꠀ ꠎꠣꠘꠣꠁ, ꠔꠣꠁꠘ ꠀꠝꠞꠣꠞꠦ ꠢꠣꠝꠦꠡꠣ ꠀꠟ-ꠝꠍꠤꠞ ꠛꠤꠎꠄꠅꠞ ꠝꠢꠣ ꠚꠥꠞ꠆ꠔꠤꠞ ꠝꠤꠍꠤꠟꠞ ꠟꠉꠦ ꠌꠣꠟꠣꠁꠞꠣ। ꠀꠟ-ꠝꠍꠤꠞꠦ ꠌꠤꠘꠣ ꠔ ꠄꠇ ꠊꠦꠞꠣꠘꠞ ꠟꠣꠈꠣꠘ। ꠀꠟ꠆ꠟꠣꠄ ꠔꠣꠘ ꠎꠄ-ꠎꠣꠔ꠆ꠞꠣꠄ ꠅꠃ ꠊꠦꠞꠣꠘ ꠀꠝꠞꠣꠞ ꠝꠣꠎꠖꠤ ꠢꠇꠟ ꠎꠣꠉꠣꠔ ꠍꠤꠔ꠆ꠞꠣꠁ ꠖꠦꠁꠘ।
2CO 2:15 ꠎꠦꠞꠣ ꠘꠣꠎꠣꠔ ꠢꠣꠍꠤꠟ ꠇꠞꠞꠣ ꠀꠞ ꠎꠦꠞꠣ ꠛꠤꠘꠣꠡ ꠅꠁꠞꠣ, ꠅꠃ ꠖꠥꠁꠅ ꠖꠟꠞ ꠟꠣꠉꠤ ꠀꠝꠞꠣ ꠅꠁꠟꠣꠝ ꠀꠟ-ꠝꠍꠤꠞ ꠄꠇ ꠊꠦꠞꠣꠘ, ꠅꠃ ꠊꠦꠞꠣꠘꠞꠦ ꠀꠟ-ꠝꠍꠤꠄ ꠀꠟ꠆ꠟꠣꠞ ꠖꠞꠛꠣꠞꠅ ꠇꠥꠞꠛꠣꠘꠤꠞ ꠟꠣꠈꠣꠘ ꠡꠙꠤꠀ ꠖꠤꠞꠣ।
2CO 2:16 ꠎꠦꠞꠣ ꠛꠤꠘꠣꠡ ꠅꠁꠎꠣꠞ, ꠔꠣꠞꠣꠞ ꠉꠦꠍꠦ ꠀꠝꠞꠣꠞ ꠊꠦꠞꠣꠘ ꠅꠁꠟ ꠝꠞꠣꠞ ꠉꠘ꠆ꠖ, ꠎꠣꠞ ꠚꠟ ꠅꠁꠟ ꠘꠤꠌ꠆ꠌꠤꠔ ꠝꠞꠘ। ꠀꠞ ꠎꠦꠞꠣ ꠘꠣꠎꠣꠔ ꠢꠣꠍꠤꠟ ꠇꠞꠞꠣ, ꠔꠣꠞꠣꠞ ꠉꠦꠍꠦ ꠀꠝꠞꠣ ꠅꠁꠟꠣꠝ ꠎꠤꠘ꠆ꠖꠦꠉꠤꠞ ꠊꠦꠞꠣꠘ, ꠄꠞ ꠚꠟ ꠅꠁꠟ ꠀꠈꠦꠞꠣꠔꠞ ꠎꠤꠘ꠆ꠖꠦꠉꠤ। ꠁ ꠅꠔ ꠛꠠ ꠘꠦꠇ ꠇꠣꠝ ꠇꠞꠣꠞ ꠟꠣꠈ ꠇꠥꠘ ꠎꠘ?
2CO 2:17 ꠘꠤꠎꠞ ꠟꠣꠜꠞ ꠟꠣꠉꠤ ꠎꠦꠟꠣ ꠛꠃꠔ ꠎꠘꠦ ꠀꠟ꠆ꠟꠣꠞ ꠇꠣꠟꠣꠝ ꠟꠁꠀ ꠛꠦꠛꠡꠣ ꠇꠞꠦ, ꠀꠝꠞꠣ ꠔ ꠁꠔꠣꠞ ꠟꠣꠈꠣꠘ ꠘꠣꠄ। ꠀꠝꠞꠣ ꠛꠞꠋ ꠀꠟ꠆ꠟꠣꠞ ꠙꠣꠑꠣꠁꠟ ꠎꠘ ꠢꠤꠡꠣꠛꠦ ꠡꠞꠟ ꠝꠘꠦ ꠀꠟ-ꠝꠍꠤꠞ ꠘꠣꠝꠦ ꠀꠟ꠆ꠟꠣꠞꠦ ꠀꠎꠤꠞ-ꠘꠣꠎꠤꠞ ꠞꠣꠈꠤꠀ ꠔꠛꠟꠤꠉ ꠇꠞꠤꠀꠞ।
2CO 3:1 ꠔꠥꠝꠞꠣ ꠇꠤꠔꠣ ꠝꠘꠅ ꠇꠞꠅ, ꠀꠝꠞꠣ ꠁꠔꠣ ꠇꠁꠀ ꠢꠤꠞꠛꠣꠞ ꠀꠝꠞꠣꠞ ꠘꠤꠎꠞ ꠡꠥꠘꠣꠝ ꠉꠣꠅꠀꠔ ꠟꠣꠉꠍꠤ ꠘꠤ? ꠇꠥꠘꠥ ꠇꠥꠘꠥ ꠝꠣꠘꠡꠞ ꠎꠦꠟꠣ ꠅꠁꠘ꠆ꠘꠞ ꠉꠦꠍ ꠕꠣꠇꠤ ꠍꠘꠖ ꠘꠦꠅꠀ ꠟꠣꠉꠦ, ꠀꠝꠞꠣꠅ ꠅꠟꠣꠈꠣꠘ ꠔꠥꠝꠞꠣꠞ ꠉꠦꠍꠦ ꠛꠣ ꠔꠥꠝꠞꠣ ꠕꠣꠇꠤ ꠍꠘꠖ ꠙꠣꠅꠀ ꠟꠣꠉꠛ ꠘꠤ? ꠘꠣ, ꠝꠥꠐꠦꠃ ꠘꠣ।
2CO 3:2 ꠔꠥꠝꠞꠣꠞ ꠘꠣꠝ ꠔ ꠀꠝꠞꠣꠞ ꠖꠤꠟꠞ ꠝꠣꠎꠦ ꠟꠦꠈꠣ ꠀꠍꠦ, ꠔꠥꠝꠞꠣꠃ ꠅꠁꠟꠣꠄ ꠀꠝꠞꠣꠞ ꠍꠘꠖ। ꠀꠞ ꠅꠃ ꠍꠘꠖꠞ ꠇꠕꠣ ꠔ ꠢꠇꠟꠦꠃ ꠎꠣꠘꠦ ꠀꠞ ꠢꠇꠟꠦꠃ ꠙꠠꠦ।
2CO 3:3 ꠁꠈꠣꠘ ꠔ ꠙꠞꠤꠡ꠆ꠇꠣꠞ ꠛꠥꠎꠣ ꠎꠣꠄ, ꠀꠟ-ꠝꠍꠤꠞ ꠟꠦꠈꠣ ꠍꠘꠖ ꠅꠁꠟꠣꠄ ꠔꠥꠝꠞꠣꠃ, ꠔꠥꠝꠞꠣꠃ ꠀꠝꠞꠣꠞ ꠝꠦꠘꠔꠞ ꠚꠟ। ꠁ ꠍꠘꠖ ꠔ ꠇꠥꠘꠥ ꠇꠣꠟꠤ-ꠇꠟꠝ ꠖꠤꠀ ꠟꠦꠈꠣ ꠅꠁꠍꠦ ꠘꠣ, ꠈꠣꠟꠤ ꠀꠟ꠆ꠟꠣꠞ ꠙꠣꠇ ꠞꠥꠢꠥ ꠖꠤꠀ ꠟꠦꠈꠣ ꠅꠁꠍꠦ। ꠁꠈꠣꠘ ꠔ ꠔꠥꠞ ꠙꠣꠠꠅ ꠙꠣꠅꠀ ꠡꠞꠤꠅꠔꠞ ꠟꠣꠈꠣꠘ ꠇꠥꠘꠥ ꠙꠣꠔ꠆ꠔꠞꠞ ꠃꠙꠞꠦ ꠟꠦꠈꠣ ꠘꠣꠄ, ꠛꠞꠋ ꠝꠣꠘꠡꠞ ꠖꠤꠟꠞ ꠝꠣꠎꠦꠃ ꠟꠦꠈꠣ ꠅꠁꠍꠦ।
2CO 3:4 ꠅꠃ ꠛꠦꠙꠣꠞꠦ ꠀꠟ-ꠝꠍꠤꠞ ꠃꠍꠤꠟ꠆ꠟꠣꠄ ꠀꠟ꠆ꠟꠣꠞ ꠖꠞꠛꠣꠞꠅ ꠀꠝꠞꠣꠞ ꠙꠥꠞꠣꠙꠥꠞ ꠘꠤꠌ꠆ꠌꠄꠅꠔꠣ ꠀꠍꠦ,
2CO 3:5 ꠔꠣ-ꠅ ꠀꠝꠞꠣ ꠎꠦ ꠘꠤꠎꠞ ꠉꠥꠘꠦ ꠢꠇꠟꠔꠣ ꠇꠞꠤꠟꠔꠣꠝ ꠙꠣꠞꠝꠥ, ꠁꠟꠣ ꠇꠥꠘꠥ ꠇꠕꠣ ꠘꠣꠄ। ꠁ ꠈꠦꠎꠝꠔꠤ ꠉꠥꠘ ꠔ ꠈꠣꠟꠤ ꠀꠟ꠆ꠟꠣꠞ ꠉꠦꠍ ꠕꠣꠇꠤꠃ ꠙꠣꠁ।
2CO 3:6 ꠀꠟ꠆ꠟꠣꠞ ꠟꠉꠦ ꠝꠤꠟꠘꠞ ꠘꠄꠀ ꠃꠍꠤꠟ꠆ꠟꠣꠞ ꠇꠕꠣ ꠎꠣꠘꠣꠘꠤꠞ ꠟꠣꠉꠤ, ꠔꠣꠁꠘꠃ ꠀꠝꠞꠣꠞꠦ ꠁ ꠈꠦꠎꠝꠔꠤ ꠉꠥꠘ ꠖꠣꠘ ꠇꠞꠍꠂꠘ। ꠁ ꠃꠍꠤꠟ꠆ꠟꠣ ꠔ ꠅꠇ꠆ꠇꠞꠦ ꠅꠇ꠆ꠇꠞꠦ ꠡꠞꠤꠅꠔ ꠝꠣꠘꠣꠞ ꠛꠦꠙꠣꠞ ꠘꠣꠄ, ꠛꠞꠋ ꠙꠣꠇ ꠞꠥꠢꠥꠞ ꠙꠞꠤꠌꠣꠟꠘꠣꠄ ꠖꠤꠟꠞ ꠁꠝꠣꠘ-ꠀꠇꠤꠖꠣꠞ ꠛꠦꠙꠣꠞ। ꠇꠣꠞꠘ ꠅꠇ꠆ꠇꠞꠦ ꠝꠃꠔ, ꠀꠞ ꠞꠥꠢꠦ ꠎꠤꠘ꠆ꠖꠦꠉꠤ।
2CO 3:7 ꠙꠣꠔ꠆ꠔꠞꠞ ꠃꠙꠞꠦ ꠟꠦꠈꠣ ꠡꠞꠤꠅꠔꠤ ꠎꠦ ꠈꠦꠎꠝꠔꠦ ꠝꠞꠘ ꠀꠄ, ꠅꠃ ꠡꠞꠤꠅꠔ ꠘꠣꠎꠤꠟꠞ ꠡꠝꠄ ꠔ ꠀꠟ꠆ꠟꠣꠞ ꠝꠢꠤꠝꠣ ꠎꠣꠁꠞ ꠅꠁꠍꠤꠟ। ꠅꠃ ꠡꠝꠄ ꠢꠎꠞꠔ ꠝꠥꠍꠣꠞ ꠌꠦꠢꠣꠞꠣꠅ ꠀꠟ꠆ꠟꠣꠞ ꠝꠢꠤꠝꠣꠄ ꠘꠥꠞꠣꠘꠤ ꠅꠁꠉꠦꠍꠤꠟ। ꠔꠣꠘ ꠝꠥꠈꠞ ꠘꠥꠞꠣꠘꠤ ꠍꠥꠞꠔ ꠎꠥꠖꠤꠅ ꠀꠡ꠆ꠔꠦ ꠀꠡ꠆ꠔꠦ ꠇꠝꠤ ꠎꠣꠅꠀ ꠗꠞꠍꠤꠟ, ꠔꠦꠛꠃ ꠛꠘꠤ ꠁꠍꠞꠣꠁꠟ ꠅꠇꠟꠦ ꠔꠣꠘ ꠌꠦꠢꠣꠞꠣꠞ ꠛꠣꠄ ꠌꠣꠅꠀꠞ ꠔꠣꠇ꠆ꠇꠔ ꠅꠁꠍꠦ ꠘꠣ।
2CO 3:8 ꠅꠃ ꠡꠞꠤꠅꠔꠞ ꠈꠦꠎꠝꠔꠤ ꠚꠟ ꠎꠥꠖꠤ ꠅꠔ ꠝꠢꠤꠝꠣ-ꠀꠟꠣ ꠅꠄ, ꠔꠦ ꠙꠣꠇ ꠞꠥꠢꠥꠞ ꠈꠦꠎꠝꠔꠤ ꠚꠟ ꠇꠔ ꠛꠦꠡꠤ ꠝꠢꠤꠝꠣ-ꠀꠟꠣ!
2CO 3:9 ꠅꠃ ꠎꠦ ꠅꠇ꠆ꠇꠞꠤ ꠡꠞꠤꠅꠔꠦ ꠝꠣꠘꠡꠞꠦ ꠖꠥꠡꠤ ꠡꠣꠁꠛꠡ꠆ꠔ ꠇꠞꠦ, ꠔꠣꠞ ꠈꠦꠎꠝꠔꠤ ꠇꠣꠝ ꠎꠥꠖꠤ ꠅꠔ ꠝꠢꠤꠝꠣ-ꠀꠟꠣ ꠅꠄ, ꠔꠦ ꠎꠦ ꠈꠦꠎꠝꠔꠦ ꠛꠦ-ꠇꠍꠥꠞ ꠈꠣꠟꠣꠍ ꠇꠁꠀ ꠉꠁꠘ꠆ꠘ ꠇꠞꠦ, ꠁ ꠈꠦꠎꠝꠔ ꠔ ꠀꠞꠅ ꠇꠔ ꠛꠦꠡꠤ ꠝꠢꠤꠝꠣ-ꠀꠟꠣ!
2CO 3:10 ꠛꠥꠎꠞꠣꠄ ꠘꠤ, ꠀꠉꠦ ꠎꠦꠔꠣ ꠝꠢꠤꠝꠣ-ꠀꠟꠣ ꠀꠍꠤꠟ, ꠅꠈꠘ ꠁꠔꠣꠞ ꠇꠥꠘꠥ ꠝꠢꠤꠝꠣ ꠘꠣꠁ ꠇꠁꠟꠦꠃ ꠌꠟꠦ, ꠔꠣꠞ ꠔꠥꠟꠘꠣꠄ ꠅꠈꠘꠇꠥꠞ ꠘꠄꠀ ꠈꠦꠎꠝꠔꠞ ꠝꠢꠤꠝꠣ ꠛꠃꠔ ꠛꠦꠡꠤ।
2CO 3:11 ꠎꠦ ꠘꠥꠞꠣꠘꠤꠞ ꠔꠦꠎ ꠇꠝꠣ ꠗꠞꠍꠤꠟ, ꠁꠔꠣ ꠎꠦꠛꠟꠣ ꠅꠔ ꠝꠢꠤꠝꠣ-ꠀꠟꠣ, ꠔꠦ ꠎꠦꠔꠣ ꠌꠤꠞꠇꠣꠟ ꠞꠁꠛ, ꠁꠔꠣ ꠔ ꠀꠞꠅ ꠇꠔ ꠛꠦꠡꠤ ꠝꠢꠤꠝꠣ-ꠀꠟꠣ!
2CO 3:12 ꠀꠝꠞꠣꠞ ꠝꠘꠅ ꠅꠟꠣꠈꠣꠘ ꠀꠡꠣ ꠀꠍꠦ ꠉꠔꠤꠇꠦꠃ ꠀꠝꠞꠣ ꠈꠥꠟꠣ-ꠈꠥꠟꠤ ꠝꠣꠔꠤ।
2CO 3:13 ꠀꠝꠞꠣ ꠔ ꠢꠎꠞꠔ ꠝꠥꠍꠣꠞ ꠟꠣꠈꠣꠘ ꠘꠣꠄ, ꠔꠣꠁꠘ ꠙꠞ꠆ꠖꠣ ꠖꠤꠀ ꠔꠣꠘ ꠝꠥꠈ ꠉꠥꠞꠤꠀ ꠕꠁꠍꠟꠣ, ꠎꠣꠔꠦ ꠔꠣꠘ ꠝꠥꠈꠞ ꠇꠝꠤ ꠎꠣꠅꠀ ꠘꠥꠞꠣꠘꠤ ꠍꠥꠞꠔ ꠛꠘꠤ ꠁꠍꠞꠣꠁꠟꠦ ꠘꠣ ꠖꠦꠈꠂꠘ।
2CO 3:14 ꠅꠁꠟꠦ ꠔꠣꠞꠣꠞ ꠖꠤꠟ ꠙꠣꠡꠣꠘ ꠅꠁꠉꠦꠍꠤꠟ। ꠀꠞ ꠅꠈꠘꠅ ꠔꠃꠞꠣꠔ ꠡꠞꠤꠚꠅ ꠟꠦꠈꠣ, ꠀꠟ꠆ꠟꠣꠞ ꠟꠉꠦ ꠝꠤꠟꠘꠞ ꠢꠃ ꠙꠥꠞꠣꠘꠣ ꠃꠍꠤꠟ꠆ꠟꠣꠞ ꠇꠕꠣ ꠔꠤꠟꠣꠅꠔ ꠇꠞꠟꠦ, ꠔꠣꠞꠣꠞ ꠖꠤꠟꠞ ꠝꠣꠎꠦ ꠙꠞ꠆ꠖꠣ ꠕꠣꠇꠦ। ꠈꠣꠟꠤ ꠁꠍꠣ ꠀꠟ-ꠝꠍꠤꠞ ꠃꠙꠞꠦ ꠁꠝꠣꠘ ꠀꠘꠟꠦ ꠅꠃ ꠙꠞ꠆ꠖꠣ ꠢꠞꠤ ꠎꠣꠄ।
2CO 3:15 ꠀꠞ ꠅꠈꠘ ꠙꠞ꠆ꠎꠘ꠆ꠔ ꠢꠎꠞꠔ ꠝꠥꠍꠣꠞ ꠔꠃꠞꠣꠔ ꠡꠞꠤꠚ ꠔꠤꠟꠣꠅꠔ ꠇꠞꠣꠞ ꠡꠝꠄ ꠛꠘꠤ ꠁꠍꠞꠣꠁꠟ ꠅꠇꠟꠞ ꠖꠤꠟ ꠙꠞ꠆ꠖꠣ ꠖꠤꠀ ꠉꠥꠞꠣ ꠕꠣꠇꠦ।
2CO 3:16 ꠔꠣꠞꠣꠞ ꠝꠣꠎꠦ ꠇꠦꠃ ꠎꠦꠛꠟꠣ ꠝꠣꠟꠤꠇꠞ ꠃꠙꠞꠦ ꠁꠝꠣꠘ ꠀꠘꠦ, ꠅꠃ ꠡꠝꠄ ꠢꠃ ꠙꠞ꠆ꠖꠣ ꠢꠞꠤ ꠎꠣꠄ।
2CO 3:17 ꠅꠃ ꠝꠣꠟꠤꠇ ꠅꠁꠟꠣ ꠙꠣꠇ ꠞꠥꠢꠥ, ꠀꠞ ꠝꠣꠟꠤꠇꠞ ꠞꠥꠢꠥ ꠎꠦꠘꠅ ꠀꠍꠦ, ꠅꠘꠅꠃ ꠡ꠆ꠛꠣꠗꠤꠘꠔꠣ ꠀꠍꠦ।
2CO 3:18 ꠀꠄꠘꠣꠞ ꠍꠣꠝꠘꠦ ꠎꠦꠟꠣ ꠙꠞ꠆ꠖꠣ ꠍꠣꠠꠣ ꠝꠥꠈ ꠡꠞꠣꠡꠞꠤ ꠖꠦꠈꠣ ꠎꠣꠄ, ꠅꠃꠟꠣ ꠀꠝꠞꠣ ꠢꠇꠟꠃ ꠀꠟ-ꠝꠍꠤꠞ ꠘꠥꠞꠣꠘꠤ ꠝꠢꠤꠝꠣ ꠖꠦꠈꠤ ꠖꠦꠈꠤ ꠀꠞꠅ ꠛꠦꠡꠤ ꠝꠢꠤꠝꠣ-ꠀꠟꠣ ꠛꠘꠤꠀ ꠔꠣꠘ ꠟꠣꠈꠣꠘ ꠝꠢꠤꠝꠣ-ꠀꠟꠣ ꠅꠁꠞꠣꠝ। ꠀꠝꠞꠣꠞ ꠝꠣꠟꠤꠇ ꠁꠍꠣ, ꠝꠣꠘꠤ ꠙꠣꠇ ꠞꠥꠢꠥꠞ ꠇꠥꠖꠞꠔꠤ ꠛꠟꠦꠃ ꠁꠟꠣ ꠅꠞ।
2CO 4:1 ꠅꠃ ꠇꠣꠞꠘꠦ, ꠀꠟ꠆ꠟꠣꠄ ꠝꠦꠢꠦꠞꠛꠣꠘꠤ ꠇꠞꠤꠀ ꠅꠃ ꠘꠄꠀ ꠈꠦꠎꠝꠔꠤ ꠇꠣꠝꠞ ꠖꠣꠄꠁꠔ꠆ꠔ ꠀꠝꠞꠣꠞ ꠀꠔꠅ ꠖꠤꠍꠂꠘ ꠇꠞꠤ, ꠀꠝꠞꠣ ꠘꠤꠞꠣꠡ ꠅꠁ ꠘꠣ।
2CO 4:2 ꠔꠛꠟꠤꠉ ꠇꠣꠝꠅ ꠝꠣꠘꠡꠦ ꠟꠥꠇꠣꠁꠀ ꠎꠦꠔꠣ ꠛꠦꠢꠣꠄꠀꠝꠤ ꠇꠞꠂꠘ, ꠁꠔꠣ ꠀꠝꠞꠣ ꠝꠥꠐꠦꠃ ꠇꠞꠤ ꠘꠣ। ꠀꠝꠞꠣ ꠇꠥꠘꠥ ꠇꠣꠝꠅ ꠍꠟ-ꠌꠔꠥꠞꠤ ꠇꠞꠤ ꠘꠣ, ꠀꠟ꠆ꠟꠣꠞ ꠇꠣꠟꠣꠝꠅ ꠜꠦꠎꠣꠟ ꠝꠤꠡꠣꠁ ꠘꠣ। ꠛꠞꠋ ꠢꠇ ꠇꠕꠣꠞꠦ ꠈꠥꠟꠣ-ꠝꠦꠟꠣ ꠇꠁꠀ ꠢꠇꠟ ꠝꠣꠘꠡꠞ ꠉꠦꠍꠦ ꠀꠞ ꠀꠟ꠆ꠟꠣꠞ ꠖꠞꠛꠣꠞꠅ ꠀꠝꠞꠣꠞꠦ ꠎꠁꠉ꠆ꠉ ꠢꠤꠡꠣꠛꠦ ꠙꠞꠝꠣꠘ ꠇꠞꠤ।
2CO 4:3 ꠀꠝꠞꠣꠞ ꠈꠥꠡ-ꠈꠛꠞꠤ ꠎꠥꠖꠤ ꠟꠥꠇꠣꠁꠟ ꠕꠣꠇꠦ, ꠔꠦ ꠟꠣꠘ꠆ꠘꠔꠤ ꠙꠕꠦ ꠎꠦꠞꠣ ꠎꠣꠁꠞꠣ, ꠔꠣꠞꠣꠞ ꠉꠦꠍꠦꠃ ꠟꠥꠇꠣꠁꠟ ꠕꠣꠇꠦ।
2CO 4:4 ꠅꠃ ꠎꠉꠔꠞ ꠖꠦꠛꠔꠣ ꠁꠛꠟꠤꠍꠦ ꠅ-ꠁꠝꠣꠘꠖꠣꠞ ꠅꠇꠟꠞ ꠖꠤꠟꠞꠦ ꠀꠘ꠆ꠖꠣ ꠛꠣꠘꠣꠁꠟꠤꠍꠦ, ꠎꠣꠔꠦ ꠔꠣꠞꠣ ꠈꠥꠡ-ꠈꠛꠞꠤꠞ ꠘꠥꠞ ꠘꠣ ꠖꠦꠈꠦ। ꠅꠃ ꠈꠥꠡ-ꠈꠛꠞꠤꠞ ꠝꠣꠎꠖꠤ ꠀꠟ-ꠝꠍꠤꠞ ꠉꠃꠞꠛ ꠎꠣꠁꠞ ꠅꠁꠍꠦ, ꠀꠞ ꠅꠃ ꠀꠟ-ꠝꠍꠤꠃ ꠅꠁꠟꠣ ꠀꠟ꠆ꠟꠣꠞ ꠅꠛꠤꠇꠟ ꠍꠥꠞꠔ।
2CO 4:5 ꠀꠝꠞꠣ ꠔ ꠘꠤꠎꠞ ꠛꠦꠙꠣꠞꠦ ꠔꠛꠟꠤꠉ ꠇꠞꠞꠣꠝ ꠘꠣ, ꠈꠣꠟꠤ ꠁꠍꠣ ꠀꠟ-ꠝꠍꠤꠞꠦ ꠔꠛꠟꠤꠉ ꠇꠞꠞꠣꠝ, ꠔꠣꠁꠘꠃ ꠝꠣꠟꠤꠇ, ꠔꠣꠘ ꠟꠣꠉꠤꠃ ꠀꠝꠞꠣ ꠔꠥꠝꠞꠣꠞ ꠉꠥꠟꠣꠝ ꠛꠘꠍꠤ।
2CO 4:6 ꠀꠝꠞꠣ ꠁꠔꠣ ꠔꠛꠟꠤꠉ ꠇꠞꠞꠣꠝ, ꠇꠣꠞꠘ ꠎꠦ ꠀꠟ꠆ꠟꠣꠄ ꠇꠁꠍꠂꠘ, “ꠀꠘ꠆ꠖꠣꠁꠞ ꠕꠣꠇꠤ ꠚꠞ ꠅꠃꠇ,” ꠢꠃ ꠀꠟ꠆ꠟꠣ ꠙꠣꠇꠦ ꠔꠣꠘ ꠘꠥꠞ ꠀꠝꠞꠣꠞ ꠖꠤꠟꠅ ꠎꠣꠟꠣꠁꠍꠂꠘ, ꠎꠣꠔꠦ ꠀꠟ-ꠝꠍꠤꠞ ꠌꠦꠢꠣꠞꠣꠞ ꠝꠣꠎꠦ ꠀꠟ꠆ꠟꠣꠞ ꠘꠥꠞꠞ ꠝꠢꠤꠝꠣ ꠎꠣꠁꠞ ꠅꠄ।
2CO 4:7 ꠀꠟ꠆ꠟꠣꠁ ꠅꠃ ꠘꠥꠞꠞ ꠗꠘ ꠔ ꠝꠣꠐꠤꠞ ꠛꠣꠡꠘꠅ ꠞꠣꠈꠣ ꠅꠁꠍꠦ, ꠅꠃ ꠛꠣꠡꠘ ꠅꠁꠟꠣꠝ ꠀꠝꠞꠣꠃ। ꠝꠣꠐꠤꠞ ꠛꠣꠡꠘꠅ ꠞꠣꠈꠣ ꠅꠁꠍꠦ, ꠎꠣꠔꠦ ꠝꠣꠘꠡꠦ ꠛꠥꠎꠔ ꠙꠣꠞꠦ ꠅꠃ ꠇꠥꠖꠞꠔꠤ ꠝꠢꠣꠡꠇ꠆ꠔꠤ ꠀꠝꠞꠣꠞ ꠘꠤꠎꠞ ꠉꠦꠍ ꠕꠣꠇꠤ ꠀꠁꠍꠦ ꠘꠣ, ꠛꠞꠋ ꠀꠟ꠆ꠟꠣꠞ ꠉꠦꠍ ꠕꠣꠇꠤꠃ ꠀꠁꠍꠦ।
2CO 4:8 ꠢꠇꠟꠛꠣꠄ ꠕꠣꠇꠤ ꠀꠝꠞꠣꠞ ꠃꠙꠞꠦ ꠛꠃꠔ ꠟꠣꠈꠣꠘ ꠌꠣꠙ ꠀꠁꠟꠦꠅ, ꠀꠝꠞꠣ ꠌꠥꠞꠝꠣꠞ ꠅꠁꠍꠤ ꠘꠣ। ꠀꠝꠞꠣ ꠛꠦꠖꠤꠡꠣ ꠟꠣꠉꠟꠦꠅ ꠙꠥꠞꠣꠙꠥꠞ ꠘꠤꠞꠣꠡ ꠅꠁꠍꠤ ꠘꠣ।
2CO 4:9 ꠀꠝꠞꠣꠞ ꠃꠙꠞꠦ ꠎꠥꠟꠥꠝ ꠇꠞꠣ ꠅꠁꠟꠦꠅ ꠀꠟ꠆ꠟꠣꠄ ꠔ ꠀꠝꠞꠣꠞ ꠟꠉ ꠍꠣꠠꠍꠂꠘ ꠘꠣ। ꠝꠣꠐꠤꠔ ꠚꠣꠟꠣꠁꠀ ꠀꠍꠣꠠꠟꠦꠅ ꠀꠝꠞꠣ ꠛꠤꠘꠣꠡ ꠅꠁꠍꠤ ꠘꠣ।
2CO 4:10 ꠢꠣꠝꠦꠡꠣ ꠝꠣꠟꠤꠇ ꠁꠍꠣꠞ ꠝꠃꠔꠞ ꠖꠥꠈ-ꠇꠡ꠆ꠐꠞ ꠘꠤꠡꠣꠘꠣ ꠀꠝꠞꠣꠞ ꠡꠞꠤꠟꠅ ꠟꠁꠀ ꠊꠥꠞꠤꠀꠞ, ꠎꠣꠔꠦ ꠀꠝꠞꠣꠞ ꠡꠞꠤꠟꠞ ꠝꠣꠎꠦ ꠔꠣꠘ ꠎꠤꠘ꠆ꠖꠦꠉꠤꠅ ꠖꠦꠈꠣ ꠎꠣꠄ।
2CO 4:11 ꠀꠞ ꠀꠝꠞꠣ ꠎꠔ ꠡꠝꠄ ꠛꠣꠌꠤꠀ ꠀꠍꠤ, ꠝꠣꠟꠤꠇ ꠁꠍꠣꠞ ꠟꠣꠉꠤ ꠀꠝꠞꠣꠞꠦ ꠔ ꠢꠞ-ꠢꠣꠝꠦꠡꠣꠃ ꠝꠃꠔꠞ ꠀꠔꠅ ꠔꠥꠟꠤ ꠖꠦꠅꠀ ꠅꠞ, ꠎꠣꠔꠦ ꠅꠃ ꠝꠃꠔꠞ ꠅꠗꠤꠘ ꠡꠞꠤꠟꠅ ꠔꠣꠘ ꠎꠤꠘ꠆ꠖꠦꠉꠤ ꠎꠣꠁꠞ ꠅꠄ।
2CO 4:12 ꠅꠃ ꠘꠝꠥꠘꠣꠄ ꠀꠝꠞꠣꠞ ꠝꠣꠎꠦ ꠇꠣꠝ ꠇꠞꠦꠞ ꠝꠃꠔꠦ, ꠀꠞ ꠔꠥꠝꠞꠣꠞ ꠝꠣꠎꠦ ꠇꠣꠝ ꠇꠞꠦꠞ ꠎꠤꠘ꠆ꠖꠦꠉꠤꠄ।
2CO 4:13 ꠙꠛꠤꠔ꠆ꠞ ꠎꠛꠥꠞ ꠡꠞꠤꠚꠅ ꠀꠍꠦ, “ꠀꠝꠤ ꠁꠝꠣꠘ ꠀꠘꠍꠤ ꠉꠔꠤꠇꠦꠃ ꠇꠁꠟꠣꠝ।” ꠅꠃ ꠄꠇꠁ ꠁꠝꠣꠘꠞ ꠜꠣꠉꠤ ꠅꠁꠀ ꠀꠝꠞꠣꠅ ꠅꠟꠣ ꠇꠁ।
2CO 4:14 ꠇꠣꠞꠘ ꠀꠝꠞꠣ ꠎꠣꠘꠤ, ꠎꠦ ꠀꠟ꠆ꠟꠣꠄ ꠝꠣꠟꠤꠇ ꠁꠍꠣꠞꠦ ꠎꠤꠘ꠆ꠖꠣ ꠇꠞꠍꠟꠣ, ꠢꠃ ꠀꠟ꠆ꠟꠣꠄ ꠔꠣꠘ ꠟꠉꠦ ꠀꠝꠞꠣꠞꠦꠅ ꠎꠤꠘ꠆ꠖꠣ ꠇꠞꠛꠣ, ꠀꠞ ꠀꠝꠞꠣꠞ ꠟꠉꠦ ꠇꠞꠤ ꠔꠥꠝꠞꠣꠞꠦꠅ ꠔꠣꠘ ꠍꠣꠝꠘꠦ ꠀꠎꠤꠞ ꠇꠞꠛꠣ।
2CO 4:15 ꠁꠔꠣ ꠢꠇꠟꠔꠣ ꠔꠥꠝꠞꠣꠞ ꠜꠣꠟꠣꠁꠞ ꠟꠣꠉꠤꠃ ꠅꠁꠍꠦ, ꠎꠣꠔꠦ ꠝꠣꠘꠡꠞ ꠃꠙꠞꠦ ꠀꠟ꠆ꠟꠣꠞ ꠎꠦ ꠞꠢꠝꠔ ꠘꠣꠎꠤꠟ ꠅꠁꠍꠦ, ꠢꠃ ꠞꠢꠝꠔꠞ ꠈꠣꠔꠤꠞꠦ ꠛꠃꠔꠦ ꠀꠞꠅ ꠛꠦꠡꠤ ꠇꠞꠤ ꠀꠟ꠆ꠟꠣꠞ ꠡꠥꠇꠞꠤꠀ ꠀꠖꠣꠄ ꠇꠞꠦ ꠀꠞ ꠀꠟ꠆ꠟꠣꠞ ꠉꠃꠞꠛ ꠅꠄ।
2CO 4:16 ꠄꠞꠟꠣꠉꠤ ꠀꠝꠞꠣ ꠘꠤꠞꠣꠡ ꠅꠁ ꠘꠣ। ꠎꠥꠖꠤꠅ ꠀꠝꠞꠣꠞ ꠞꠇ꠆ꠔ-ꠝꠣꠋꠡꠞ ꠡꠞꠤꠟ ꠇ꠆ꠇꠄ ꠅꠁꠎꠣꠞ, ꠔꠦꠛꠃ ꠀꠝꠞꠣꠞ ꠞꠥꠢꠥ ꠖꠤꠘ ꠖꠤꠘ ꠔꠣꠎꠣ ꠅꠁꠀ ꠃꠑꠦꠞ।
2CO 4:17 ꠅꠈꠘ ꠀꠝꠞꠣ ꠎꠦ ꠇꠄꠖꠤꠘꠞ ꠟꠣꠉꠤ ꠡꠣꠝꠣꠁꠘ꠆ꠘ ꠇꠡ꠆ꠐ ꠇꠞꠤꠀꠞ, ꠁ ꠇꠡ꠆ꠐꠞ ꠛꠖꠟꠣ ꠀꠝꠞꠣ ꠌꠤꠞꠇꠣꠟꠞ ꠟꠣꠉꠤ ꠅꠚꠥꠞꠘ꠆ꠔ ꠡꠣꠘ-ꠝꠢꠤꠝꠣ ꠟꠣꠜ ꠇꠞꠝꠥ।
2CO 4:18 ꠌꠃꠈꠖꠤ ꠎꠦꠔꠣ ꠖꠦꠈꠣ ꠎꠣꠄ, ꠀꠝꠞꠣ ꠔ ꠁꠔꠣꠞ ꠛꠣꠄ ꠌꠣꠁꠞꠣꠝ ꠘꠣ, ꠛꠞꠋ ꠎꠦꠔꠣ ꠖꠦꠈꠣ ꠎꠣꠄ ꠘꠣ, ꠅꠔꠣꠞ ꠛꠣꠄ ꠌꠣꠁꠞꠣꠝ। ꠌꠃꠈꠦ ꠎꠦꠔꠣ ꠖꠦꠈꠣ ꠎꠣꠄ, ꠁꠔꠣ ꠔ ꠕꠥꠠꠣ ꠇꠄꠖꠤꠘꠞ, ꠅꠁꠟꠦ ꠎꠦꠔꠣ ꠖꠦꠈꠣ ꠎꠣꠄ ꠘꠣ, ꠁꠔꠣ ꠌꠤꠞꠇꠣꠟꠞ।
2CO 5:1 ꠀꠝꠞꠣ ꠎꠣꠘꠤ, ꠀꠝꠞꠣ ꠁ ꠖꠥꠘꠤꠀꠛꠤ ꠎꠦ ꠒꠦꠞꠣ-ꠊꠞꠅ ꠛꠡꠔ ꠇꠞꠤ, ꠝꠣꠘꠤ ꠎꠦ ꠇꠝꠎꠥꠞ ꠡꠞꠤꠟ ꠟꠁꠀ ꠀꠍꠤ, ꠁꠈꠣꠘ ꠎꠥꠖꠤ ꠛꠤꠘꠣꠡꠅ ꠅꠁꠎꠣꠄ, ꠔꠦꠛꠃ ꠀꠟ꠆ꠟꠣꠞ ꠖꠦꠅꠀ ꠄꠇꠈꠣꠘ ꠊꠞ ꠀꠝꠞꠣꠞ ꠀꠍꠦ। ꠁ ꠊꠞ ꠇꠥꠘꠥ ꠝꠣꠘꠡꠞ ꠀꠔꠞ ꠛꠣꠘꠣꠁꠟ ꠘꠣꠄ, ꠁꠈꠣꠘ ꠔ ꠢꠣꠝꠦꠡꠣ ꠛꠦꠢꠦꠡ꠆ꠔꠅ ꠀꠍꠦ।
2CO 5:2 ꠅꠃ ꠒꠦꠞꠣ-ꠊꠞꠅ ꠛꠡꠔ ꠇꠞꠣ ꠢꠣꠟꠔꠦ ꠀꠝꠞꠣ ꠟꠣꠝ꠆ꠛꠣ ꠇꠞꠤ ꠖꠝ ꠚꠣꠟꠣꠁꠀꠞ ꠀꠞ ꠖꠤꠟꠦ-ꠎꠣꠘꠦ ꠀꠡꠣ ꠇꠞꠤꠀꠞ, ꠎꠣꠔꠦ ꠛꠦꠢꠦꠡ꠆ꠔꠤ ꠢꠃ ꠘꠄꠀ ꠊꠞꠞ ꠝꠣꠎꠦ ꠀꠝꠞꠣꠞꠦ ꠉꠥꠞꠣ ꠅꠄ।
2CO 5:3 ꠔꠣ-ꠅ ꠇꠕꠣ ꠅꠁꠟ, ꠅꠃ ꠒꠦꠞꠣ-ꠊꠞ ꠜꠣꠋꠉꠣꠞ ꠛꠣꠖꠦ ꠀꠝꠞꠣꠞꠦ ꠎꠣꠘꠥ ꠟꠦꠝꠐꠣ ꠖꠦꠈꠣ ꠘꠣ ꠎꠣꠄ।
2CO 5:4 ꠅꠃ ꠒꠦꠞꠣ-ꠊꠞꠅ ꠞꠁꠀ ꠜꠣꠞ-ꠛꠥꠏꠣ ꠛꠁꠔꠦ ꠛꠁꠔꠦ ꠀꠝꠞꠣ ꠀꠢꠣꠎꠣꠞꠤ ꠇꠞꠤꠀꠞ। ꠄꠞꠛꠣꠖꠦꠅ ꠀꠝꠞꠣ ꠞꠇ꠆ꠔ-ꠝꠣꠋꠡꠞ ꠁ ꠒꠦꠞꠣ-ꠊꠞ ꠍꠣꠠꠔꠣꠝ ꠌꠣꠁ ꠘꠣ, ꠔꠣ-ꠅ ꠜꠣꠟꠣ ꠊꠞꠞ ꠟꠣꠉꠤ ꠛꠣꠞ ꠌꠣꠁꠞꠣꠝ, ꠎꠣꠔꠦ ꠅꠈꠘꠇꠥꠞ ꠅꠃ ꠝꠃꠔꠞ ꠅꠗꠤꠘ ꠒꠦꠞꠣ-ꠊꠞ ꠚꠣꠟꠣꠁꠀ, ꠌꠤꠞꠇꠣꠟ ꠎꠤꠘ꠆ꠖꠣ ꠕꠣꠇꠣꠞ ꠎꠥꠇꠣ ꠊꠞ ꠙꠣꠁ।
2CO 5:5 ꠅꠔꠣꠞ ꠟꠣꠉꠤꠃ ꠀꠟ꠆ꠟꠣꠄ ꠀꠝꠞꠣꠞꠦ ꠎꠥꠁꠔ ꠇꠞꠍꠂꠘ ꠀꠞ ꠁꠔꠣꠞ ꠛꠣꠄꠘꠣꠝꠣ ꠢꠤꠡꠣꠛꠦ ꠀꠝꠞꠣꠞꠦ ꠙꠣꠇ ꠞꠥꠢꠥ ꠖꠣꠘ ꠇꠞꠍꠂꠘ।
2CO 5:6 ꠄꠞꠖꠣꠄ ꠀꠝꠞꠣꠞ ꠡꠣꠅꠡꠞ ꠇꠥꠘꠥ ꠇꠝꠔꠤ ꠘꠣꠁ। ꠀꠝꠞꠣ ꠔ ꠛꠥꠎꠤꠟꠤꠍꠤ, ꠎꠔꠖꠤꠘ ꠅꠃ ꠞꠇ꠆ꠔ-ꠝꠣꠋꠡꠞ ꠡꠞꠤꠟ ꠟꠁꠀ ꠛꠡꠔ ꠇꠞꠝꠥ, ꠅꠔꠖꠤꠘ ꠀꠝꠞꠣ ꠝꠣꠟꠤꠇꠞ ꠉꠦꠍ ꠕꠣꠇꠤ ꠢꠞꠣꠁꠟ ꠞꠁꠝꠥ।
2CO 5:7 ꠀꠝꠞꠣ ꠔ ꠌꠈꠥꠞ ꠖꠦꠈꠣ ꠇꠥꠘ꠆ꠔꠣꠞ ꠜꠞꠡꠣꠄ ꠌꠟꠤ ꠘꠣ, ꠈꠣꠟꠤ ꠁꠝꠣꠘꠞ ꠛꠟꠦꠃ ꠌꠟꠤ।
2CO 5:8 ꠀꠍꠟꠦ ꠀꠝꠞꠣꠞ ꠜꠤꠔꠞ ꠜꠞꠣ ꠡꠣꠅꠡ ꠀꠍꠦ, ꠀꠞ ꠀꠝꠞꠣ ꠞꠇ꠆ꠔ-ꠝꠣꠋꠡꠞ ꠡꠞꠤꠟꠅ ꠞꠅꠀ ꠕꠣꠇꠤ ꠝꠣꠟꠤꠇꠞ ꠟꠉꠦ ꠛꠡꠔ ꠇꠞꠣꠈꠣꠘꠃ ꠜꠣꠟꠣ ꠝꠘꠅ ꠇꠞꠤ।
2CO 5:9 ꠄꠞꠟꠣꠉꠤ ꠀꠝꠞꠣ ꠡꠞꠤꠟꠞ ꠝꠣꠎꠦ ꠕꠣꠇꠤ ꠛꠣ ꠘꠣ ꠕꠣꠇꠤ, ꠀꠝꠞꠣꠞ ꠘꠤꠅꠔ ꠅꠁꠟ ꠝꠣꠟꠤꠇꠞꠦ ꠈꠥꠡꠤ ꠇꠞꠣ।
2CO 5:10 ꠇꠣꠞꠘ ꠀꠟ-ꠝꠍꠤꠞ ꠀꠖꠣꠟꠔꠅ ꠀꠝꠞꠣ ꠢꠇꠟꠦꠃ ꠃꠛꠣꠘꠤ ꠟꠣꠉꠛ, ꠎꠣꠔꠦ ꠖꠥꠘꠤꠀꠛꠤ ꠅꠃ ꠡꠞꠤꠟꠦ ꠀꠝꠞꠣ ꠎꠔ ꠘꠝꠥꠘꠣꠞ ꠛꠣꠖ-ꠜꠣꠟꠣ ꠇꠣꠝ ꠇꠞꠍꠤ, ꠅꠃ ꠇꠣꠝꠞ ꠛꠖꠟꠣ ꠙꠣꠁ।
2CO 5:11 ꠀꠝꠞꠣ ꠔ ꠀꠟ꠆ꠟꠣ ꠙꠣꠇꠞꠦ ꠒꠞꠣꠁꠀ ꠌꠟꠤ, ꠄꠞꠟꠣꠉꠤ ꠝꠣꠘꠡꠞꠦ ꠛꠥꠎꠣꠘꠤꠞ ꠌꠦꠡ꠆ꠐꠣ ꠇꠞꠞꠣꠝ। ꠀꠝꠞꠣꠞ ꠛꠦꠙꠣꠞ ꠔ ꠀꠟ꠆ꠟꠣꠞ ꠖꠞꠛꠣꠞꠅ ꠙꠞꠤꠡ꠆ꠇꠣꠞ, ꠀꠡꠣ ꠇꠞꠤ ꠔꠥꠝꠞꠣꠞ ꠉꠦꠍꠦꠅ ꠅꠟꠣ ꠙꠞꠤꠡ꠆ꠇꠣꠞ ꠀꠍꠤ।
2CO 5:12 ꠁꠈꠣꠘ ꠇꠁꠀ ꠀꠝꠞꠣ ꠢꠤꠞꠛꠣꠞ ꠘꠤꠎꠞ ꠔꠣꠞꠤꠚ ꠉꠣꠁꠞꠣꠝ ꠘꠣ, ꠛꠞꠋ ꠀꠝꠞꠣꠞꠦ ꠟꠁꠀ ꠔꠥꠝꠞꠣꠞ ꠛꠠꠣꠁꠞ ꠇꠣꠞꠘ ꠎꠣꠘꠣꠁꠞꠣꠝ। ꠔꠦ ꠎꠦꠔꠣ ꠝꠣꠘꠡꠦ ꠜꠤꠔꠞ ꠘꠣ ꠖꠦꠈꠤꠀ, ꠈꠣꠟꠤ ꠝꠣꠘꠡꠞ ꠛꠣꠞꠉꠣꠟꠣ ꠟꠁꠀ ꠛꠠꠣꠁ ꠇꠞꠦ, ꠔꠥꠝꠞꠣ ꠔꠣꠞꠣꠞꠦ ꠄꠇꠐꠣ ꠎꠥꠀꠙ ꠖꠤꠔꠣꠄ ꠙꠣꠞ।
2CO 5:13 ꠀꠝꠞꠣ ꠎꠥꠖꠤ ꠙꠣꠉꠟ ꠅꠁ, ꠔꠦ ꠀꠟ꠆ꠟꠣꠞ ꠙꠣꠉꠟ ꠅꠁꠍꠤ, ꠀꠞ ꠎꠥꠖꠤ ꠝꠣꠕꠣ ꠜꠣꠟꠣ ꠕꠣꠇꠦ, ꠔꠦ ꠔꠥꠝꠞꠣꠞ ꠟꠣꠉꠤꠃ ꠜꠣꠟꠣ ꠀꠍꠦ।
2CO 5:14 ꠀꠟ-ꠝꠍꠤꠞ ꠝꠢꠛ꠆ꠛꠔꠦ ꠀꠝꠞꠣꠞꠦ ꠙꠥꠡ ꠝꠣꠘꠣꠁꠀ ꠌꠣꠟꠣꠄ। ꠀꠝꠞꠣ ꠘꠤꠌ꠆ꠌꠤꠔ ꠛꠥꠎꠍꠤ, ꠢꠇꠟꠞ ꠔꠞꠚ ꠕꠣꠇꠤ ꠄꠇꠎꠘꠞ ꠝꠃꠔ ꠅꠁꠍꠤꠟ, ꠄꠞꠟꠣꠉꠤ ꠢꠇꠟꠞꠃ ꠝꠃꠔ ꠅꠁꠍꠦ।
2CO 5:15 ꠔꠣꠁꠘ ꠢꠇꠟꠞ ꠟꠣꠉꠤ ꠝꠣꠞꠣ ꠉꠦꠍꠟꠣ, ꠎꠣꠔꠦ ꠎꠦꠞꠣ ꠎꠤꠘ꠆ꠖꠣ ꠀꠍꠂꠘ, ꠔꠣꠞꠣ ꠎꠣꠘꠥ ꠀꠞ ꠘꠤꠎꠞ ꠟꠣꠉꠤ ꠘꠣ ꠛꠣꠌꠂꠘ। ꠛꠞꠋ ꠔꠣꠞꠣꠞ ꠟꠣꠉꠤ ꠎꠦꠁꠘ ꠝꠣꠞꠣ ꠉꠦꠍꠟꠣ ꠀꠞ ꠢꠤꠞꠛꠣꠞ ꠎꠤꠘ꠆ꠖꠣ ꠅꠁꠍꠟꠣ, ꠔꠣꠘ ꠟꠣꠉꠤꠃ ꠔꠣꠞꠣ ꠛꠣꠌꠂꠘ।
2CO 5:16 ꠄꠞꠟꠣꠉꠤ ꠅꠈꠘ ꠕꠣꠇꠤ ꠀꠝꠞꠣ ꠀꠞ ꠝꠣꠘꠡꠞ ꠛꠣꠁꠞꠞ ꠍꠥꠞꠔ ꠖꠦꠈꠤꠀ ꠛꠤꠌꠣꠞ ꠇꠞꠤ ꠘꠣ। ꠀꠝꠞꠣ ꠔ ꠀꠉꠦ ꠀꠟ-ꠝꠍꠤꠞꠦ ꠅꠟꠣꠈꠣꠘ ꠝꠘꠅ ꠇꠞꠍꠟꠣꠝ, ꠅꠁꠟꠦ ꠅꠈꠘ ꠀꠞ ꠁꠟꠣ ꠇꠞꠤ ꠘꠣ।
2CO 5:17 ꠇꠦꠃ ꠎꠥꠖꠤ ꠀꠟ-ꠝꠍꠤꠞ ꠔꠞꠤꠇꠣ ꠇꠛꠥꠟ ꠇꠞꠦ, ꠔꠦ ꠢꠦ ꠘꠄꠀ ꠙꠄꠖꠣ ꠅꠁꠟ। ꠔꠣꠞ ꠙꠥꠞꠣꠘ ꠢꠇꠟꠔꠣ ꠚꠥꠍꠤꠀ ꠢꠣꠞꠤ ꠄꠇ꠆ꠇꠦꠞꠦ ꠘꠄꠀ ꠛꠘꠤꠉꠦꠟ।
2CO 5:18 ꠁꠔꠣ ꠔ ꠀꠟ꠆ꠟꠣ ꠕꠣꠇꠤꠃ ꠅꠄ। ꠔꠣꠁꠘ ꠀꠟ-ꠝꠍꠤꠞ ꠃꠍꠤꠟ꠆ꠟꠣꠄ ꠔꠣꠘ ꠟꠉꠦ ꠀꠝꠞꠣꠞ ꠝꠤꠟꠘ ꠊꠐꠣꠁꠍꠂꠘ, ꠀꠞ ꠀꠝꠞꠣꠞꠦ ꠅꠃ ꠈꠦꠎꠝꠔꠞ ꠖꠣꠄꠁꠔ꠆ꠔ ꠖꠤꠍꠂꠘ, ꠛꠣꠖ-ꠛꠣꠇꠤ ꠢꠇꠟ ꠝꠣꠘꠡꠞꠦ ꠔꠣꠘ ꠟꠉꠦ ꠝꠤꠟꠣꠁ ꠖꠤꠔꠣꠝ।
2CO 5:19 ꠄꠞ ꠝꠣꠘꠤ ꠅꠁꠟ, ꠀꠟ꠆ꠟꠣꠄ ꠝꠣꠘꠡꠞ ꠉꠥꠘꠣꠞ ꠛꠣꠄ ꠘꠣ ꠌꠣꠁꠀ, ꠀꠟ-ꠝꠍꠤꠞ ꠃꠍꠤꠟ꠆ꠟꠣꠄ ꠔꠣꠘ ꠟꠉꠦ ꠝꠣꠘꠡꠞ ꠝꠤꠟꠘ ꠊꠐꠣꠁꠍꠂꠘ। ꠀꠞ ꠅꠃ ꠝꠤꠟꠘꠞ ꠈꠥꠡ-ꠈꠛꠞꠤ ꠔꠛꠟꠤꠉꠞ ꠖꠣꠄꠁꠔ꠆ꠔ ꠀꠝꠞꠣꠞꠦ ꠖꠤꠍꠂꠘ।
2CO 5:20 ꠄꠞꠟꠣꠉꠤꠃ ꠀꠝꠞꠣ ꠀꠟ-ꠝꠍꠤꠞ ꠘꠣꠁꠛ ꠢꠤꠡꠣꠛꠦ ꠔꠣꠘ ꠙꠇ꠆ꠇꠦ ꠝꠣꠔꠤꠞꠣꠝ। ꠀꠍꠟꠦ ꠀꠟ꠆ꠟꠣꠄꠃ ꠀꠝꠞꠣꠞ ꠝꠣꠎꠖꠤ ꠝꠣꠘꠡꠞꠦ ꠝꠤꠘꠔꠤ ꠇꠞꠞꠣ। ꠀꠞ ꠀꠟ-ꠝꠍꠤꠞ ꠙꠇ꠆ꠇꠦ ꠀꠝꠞꠣꠅ ꠝꠤꠘꠔ ꠇꠞꠞꠣꠝ, ꠔꠥꠝꠞꠣ ꠀꠟ꠆ꠟꠣꠞ ꠟꠉꠦ ꠝꠤꠟꠤꠔ ꠅꠅ।
2CO 5:21 ꠢꠎꠞꠔ ꠁꠍꠣ ꠀꠟ-ꠝꠍꠤꠄ ꠔ ꠇꠥꠘꠥ ꠉꠥꠘꠣ-ꠘꠣꠚꠞꠝꠣꠘꠤ ꠇꠞꠍꠂꠘ ꠘꠣ। ꠅꠁꠟꠦ ꠀꠝꠞꠣ ꠢꠇꠟꠞ ꠉꠥꠘꠣꠞ ꠡꠣꠎꠣ ꠀꠟ꠆ꠟꠣꠄ ꠔꠣꠘ ꠇꠣꠘ꠆ꠖꠅ ꠔꠥꠟꠤ ꠖꠤꠟꠣ, ꠎꠣꠔꠦ ꠔꠣꠘ ꠃꠙꠞꠦ ꠁꠝꠣꠘ ꠀꠘꠣꠞ ꠝꠣꠎꠖꠤ ꠀꠟ꠆ꠟꠣꠁ ꠙꠛꠤꠔ꠆ꠞꠔꠣꠄ ꠀꠝꠞꠣ ꠙꠞꠦꠎꠉꠣꠞ ꠢꠤꠡꠣꠛꠦ ꠇꠛꠥꠟ ꠅꠁ।
2CO 6:1 ꠀꠟ꠆ꠟꠣꠞ ꠈꠣꠖꠤꠝ ꠢꠤꠡꠣꠛꠦ ꠀꠝꠞꠣ ꠅꠃ ꠝꠤꠘꠔ ꠇꠞꠤꠀꠞ, ꠔꠥꠝꠞꠣ ꠎꠦꠛꠟꠣ ꠀꠟ꠆ꠟꠣꠞ ꠞꠢꠝꠔ ꠙꠣꠁꠍ, ꠔꠦ ꠁꠇꠐꠣꠞꠦ ꠛꠤꠚꠟ ꠅꠁꠔꠦ ꠖꠤꠅ ꠘꠣ।
2CO 6:2 ꠙꠣꠇ ꠇꠣꠟꠣꠝꠅ ꠀꠟ꠆ꠟꠣꠄ ꠛꠣꠔꠣꠁꠍꠂꠘ, ꠀꠝꠤ ꠡꠑꠤꠇ ꠡꠝꠄꠄ ꠔꠥꠝꠣꠞ ꠀꠞꠎꠤ ꠢꠥꠘꠍꠤ, ꠘꠣꠎꠣꠔ ꠙꠣꠅꠀꠞ ꠖꠤꠘ ꠔꠥꠝꠣꠞꠦ ꠡꠣꠁꠎ꠆ꠎ ꠇꠞꠍꠤ। ꠢꠥꠘꠅ, ꠅꠈꠘꠃ ꠡꠑꠤꠇ ꠡꠝꠄ, ꠅꠈꠘꠃ ꠘꠣꠎꠣꠔ ꠙꠣꠅꠀꠞ ꠖꠤꠘ।
2CO 6:3 ꠀꠟ-ꠝꠍꠤꠞ ꠘꠣꠝꠦ ꠀꠝꠞꠣ ꠎꠦ ꠔꠛꠟꠤꠉ ꠇꠞꠤ, ꠅꠃ ꠔꠛꠟꠤꠉꠞ ꠛꠖꠘꠣꠝ ꠘꠣ ꠅꠀꠞ ꠟꠣꠉꠤ ꠀꠝꠞꠣ ꠁꠟꠣ ꠇꠥꠘꠥ ꠇꠣꠝ ꠇꠞꠤ ꠘꠣ, ꠎꠦ ꠇꠣꠝꠦ ꠝꠣꠘꠡꠞ ꠝꠘꠅ ꠛꠣꠗꠣ ꠀꠄ।
2CO 6:4 ꠛꠞꠋ ꠢꠇꠟ ꠛꠦꠙꠣꠞꠦ ꠀꠝꠞꠣ ꠙꠞꠝꠣꠘ ꠖꠦꠈꠣꠁꠞꠣꠝ, ꠀꠝꠞꠣ ꠀꠟ꠆ꠟꠣꠞ ꠈꠦꠎꠝꠔꠇꠣꠞꠤ। ꠛꠃꠔ ꠖꠥꠈ-ꠇꠡ꠆ꠐ, ꠎꠥꠟꠥꠝ-ꠝꠍꠤꠛꠔ, ꠀꠞ ꠛꠤꠙꠖ-ꠀꠙꠖ ꠡꠁꠎ꠆ꠎ ꠇꠞꠤꠀ ꠁꠔꠣꠞ ꠙꠞꠝꠣꠘ ꠖꠤꠞꠣꠝ।
2CO 6:5 ꠀꠝꠞꠣꠞꠦ ꠛꠃꠔ ꠛꠣꠞ ꠝꠣꠁꠞ-ꠗꠁꠞ ꠇꠞꠣ ꠅꠁꠍꠦ, ꠛꠃꠔ ꠛꠣꠞ ꠎꠦꠟꠅ ꠢꠣꠞꠣꠘꠤ ꠅꠁꠍꠦ, ꠛꠃꠔ ꠖꠣꠋꠉꠣ-ꠢꠣꠋꠉꠣꠝꠣ ꠀꠝꠞꠣꠞ ꠃꠙꠞꠦꠖꠤ ꠉꠦꠍꠦ, ꠛꠃꠔ ꠝꠦꠘꠔ ꠇꠞꠍꠤ, ꠘꠣ ꠊꠥꠝꠣꠁꠀ ꠞꠣꠁꠔ ꠇꠣꠐꠣꠁꠍꠤ ꠀꠞ ꠃꠙꠣꠡ-ꠈꠣꠙꠣꠡ ꠞꠁꠍꠤ।
2CO 6:6 ꠁꠔꠣ ꠍꠣꠠꠣ ꠀꠝꠞꠣꠞ ꠙꠣꠇ-ꠙꠞꠦꠎꠉꠣꠞ ꠎꠤꠘ꠆ꠖꠦꠉꠤ, ꠀꠈꠟ-ꠛꠥꠖ꠆ꠖꠤ, ꠍꠛꠞꠉꠣꠞꠤ, ꠖꠄꠀ-ꠝꠣꠄꠀ, ꠖꠤꠟꠞ ꠙꠣꠇ ꠞꠥꠢꠥ, ꠈꠣꠐꠤ ꠝꠢꠛ꠆ꠛꠔ,
2CO 6:7 ꠢꠇ ꠇꠕꠣ ꠇꠅꠀ ꠀꠞ ꠀꠟ꠆ꠟꠣꠞ ꠇꠥꠖꠞꠔꠤ ꠛꠟ, ꠖꠥꠁꠅ ꠀꠔꠦ ꠙꠞꠦꠎꠉꠣꠞꠤꠞ ꠀꠔꠤꠀꠞ ꠛꠦꠛꠢꠣꠞ ꠇꠞꠤꠀꠞ।
2CO 6:8 ꠝꠣꠘꠡꠦ ꠀꠝꠞꠣꠞꠦ ꠖꠣꠝ ꠖꠦꠃꠇ ꠛꠣ ꠘꠣ ꠖꠦꠃꠇ, ꠀꠝꠞꠣꠞ ꠡꠥꠘꠣꠝ ꠉꠣꠃꠇ ꠛꠣ ꠛꠖꠘꠣꠝ ꠉꠣꠃꠇ, ꠁꠔꠣꠄ ꠀꠝꠞꠣꠞ ꠎꠣꠄ ꠀꠄ ꠘꠣ। ꠝꠣꠘꠡꠦ ꠇꠁꠞꠣ, ꠀꠝꠞꠣ ꠛꠥꠟꠦ ꠐꠉ, ꠀꠍꠟꠦ ꠔ ꠀꠝꠞꠣ ꠢꠇ ꠙꠕꠦ ꠌꠟꠤ।
2CO 6:9 ꠝꠣꠘꠡꠦ ꠇꠂꠘ, ꠀꠝꠞꠣꠞꠦ ꠌꠤꠘꠂꠘ ꠘꠣ, ꠔꠦꠛꠃ ꠢꠇꠟꠦ ꠀꠝꠞꠣꠞꠦ ꠌꠤꠘꠦ। ꠀꠝꠞꠣ ꠝꠞꠣꠞ ꠟꠣꠈ ꠅꠁꠉꠦꠟꠦꠅ ꠛꠣꠌꠤꠀ ꠀꠍꠤ। ꠀꠝꠞꠣꠞꠦ ꠝꠣꠁꠞ-ꠗꠁꠞ ꠇꠞꠣ ꠅꠞ, ꠅꠁꠟꠦ ꠎꠣꠘꠦ ꠝꠣꠞꠣ ꠅꠞ ꠘꠣ।
2CO 6:10 ꠛꠃꠔ ꠖꠥꠈꠞ ꠝꠣꠎꠦꠅ ꠀꠝꠞꠣ ꠢꠣꠝꠦꠡꠣ ꠈꠥꠡꠤ-ꠛꠣꠡꠤ ꠀꠍꠤ। ꠀꠝꠞꠣ ꠘꠤꠎꠦ ꠉꠞꠤꠛ ꠅꠁꠀꠅ ꠛꠃꠔꠞꠦ ꠗꠘꠤ ꠛꠣꠘꠣꠁꠍꠤ। ꠀꠝꠞꠣꠞ ꠔ ꠇꠥꠘ꠆ꠔꠣꠃ ꠘꠣꠁ, ꠔꠦꠛꠃ ꠢꠇ꠆ꠇꠟꠔꠣꠞ ꠝꠣꠟꠤꠇ। ꠅꠃ ꠟꠣꠈꠣꠘ ꠀꠝꠞꠣ ꠙꠞꠝꠣꠘ ꠇꠞꠍꠤ, ꠀꠝꠞꠣ ꠀꠟ꠆ꠟꠣꠞ ꠈꠦꠎꠝꠔꠇꠣꠞꠤ।
2CO 6:11 ꠅ ꠇꠞꠤꠘ꠆ꠔ ꠎꠝꠣꠔꠞ ꠝꠥꠝꠤꠘ ꠜꠣꠁ ꠅꠇꠟ, ꠔꠥꠝꠞꠣꠞ ꠉꠦꠍꠦ ꠔ ꠈꠥꠟꠣ-ꠝꠦꠟꠣꠃ ꠝꠣꠔꠤꠍꠤ, ꠔꠥꠝꠞꠣꠞ ꠟꠣꠉꠤ ꠀꠝꠞꠣꠞ ꠝꠘ ꠃꠎꠣꠠ ꠇꠞꠤ ꠖꠤꠍꠤ।
2CO 6:12 ꠀꠝꠞꠣꠞ ꠖꠤꠟ ꠔꠥꠝꠞꠣꠞ ꠟꠣꠉꠤ ꠈꠥꠟꠤꠀ ꠞꠣꠈꠍꠤ, ꠅꠁꠟꠦ ꠔꠥꠝꠞꠣꠞ ꠖꠤꠟ ꠀꠝꠞꠣꠞ ꠟꠣꠉꠤ ꠛꠘ꠆ꠖ ꠇꠞꠤ ꠕꠁꠍ।
2CO 6:13 ꠔꠦ ꠀꠝꠣꠞ ꠀꠅꠟꠣꠖ ꠢꠤꠡꠣꠛꠦ ꠔꠥꠝꠞꠣꠞꠦ ꠇꠁꠞꠣꠝ, ꠀꠝꠞꠣ ꠎꠦꠟꠣ ꠔꠥꠝꠞꠣꠞ ꠟꠣꠉꠤ ꠖꠤꠟ ꠈꠥꠟꠤꠀ ꠞꠣꠈꠍꠤ, ꠔꠥꠝꠞꠣꠅ ꠅꠟꠣ ꠀꠝꠞꠣꠞ ꠟꠣꠉꠤ ꠔꠥꠝꠞꠣꠞ ꠖꠤꠟ ꠈꠣꠘ ꠈꠥꠟꠤꠀ ꠖꠦꠅ।
2CO 6:14 ꠔꠥꠝꠞꠣ ꠛꠤꠗꠞ꠆ꠝꠤ ꠝꠣꠘꠡꠞ ꠟꠉꠦ ꠈꠦꠡꠤ-ꠇꠥꠐꠥꠝꠤꠔꠣ ꠇꠞꠤꠅ ꠘꠣ। ꠙꠞꠦꠎꠉꠣꠞꠞ ꠟꠉꠦ ꠘꠣꠚꠞꠝꠣꠘꠞ ꠝꠤꠟ ꠇꠥꠀꠁ? ꠀꠟ꠆ꠟꠣꠞ ꠘꠥꠞꠞ ꠟꠉꠦ ꠀꠘ꠆ꠖꠣꠞꠤꠞ ꠇꠥꠘꠥ ꠈꠣꠔꠤꠞ ꠀꠍꠦ ꠘꠤ?
2CO 6:15 ꠁꠛꠟꠤꠍꠞ ꠟꠉꠦ ꠀꠟ-ꠝꠍꠤꠞ ꠇꠥꠘꠥ ꠈꠣꠔꠤꠞ ꠀꠍꠦ ꠘꠤ? ꠝꠥꠝꠤꠘꠞ ꠟꠉꠦ ꠛꠤꠗꠞ꠆ꠝꠤ ꠡꠞꠤꠇ ꠅꠁꠛ ꠇꠤꠟꠣ?
2CO 6:16 ꠎꠣꠘ ꠔ, ꠙꠣꠇ ꠇꠣꠟꠣꠝꠅ ꠀꠟ꠆ꠟꠣꠄ ꠇꠁꠞꠣ, ꠀꠝꠤ ꠔꠣꠞꠣꠞ ꠜꠤꠔꠞꠦ ꠛꠡꠔ ꠇꠞꠝꠥ, ꠔꠣꠞꠣꠞ ꠟꠉꠦꠃ ꠌꠟꠣ-ꠚꠤꠞꠣ ꠇꠞꠝꠥ। ꠀꠝꠤ ꠅꠁꠝꠥ ꠔꠣꠞꠣꠞ ꠀꠟ꠆ꠟꠣ, ꠔꠣꠞꠣ ꠅꠁꠛꠣ ꠀꠝꠣꠞ ꠙ꠆ꠞꠎꠣ। ꠔꠦ ꠀꠝꠞꠣꠃ ꠅꠁꠟꠣꠝ ꠎꠤꠘ꠆ꠖꠣ ꠀꠟ꠆ꠟꠣꠞ ꠛꠡꠔ ꠈꠣꠘꠣ। ꠀꠟ꠆ꠟꠣꠞ ꠇꠣꠛꠣ ꠊꠞꠞ ꠜꠤꠔꠞꠦ ꠝꠥꠞ꠆ꠔꠤꠞ ꠇꠥꠘꠥ ꠎꠣꠉꠣ ꠀꠍꠦ ꠘꠤ?
2CO 6:17 ꠙꠣꠇ ꠇꠣꠟꠣꠝꠅ ꠀꠞꠅ ꠛꠣꠔꠣꠁꠍꠂꠘ, ꠄꠞꠟꠣꠉꠤ ꠔꠥꠝꠞꠣ ꠛꠤꠗꠞ꠆ꠝꠤꠞ ꠉꠦꠍ ꠕꠣꠇꠤ ꠢꠞꠅ, ꠔꠣꠞꠣꠞ ꠉꠦꠍ ꠕꠣꠇꠤ ꠀꠟꠉ ꠞꠅ, ꠘꠣꠙꠣꠇ ꠇꠥꠘꠥ ꠎꠤꠘꠤꠡ ꠍꠁꠅ ꠘꠣ, ꠔꠦꠃ ꠀꠝꠤ ꠔꠥꠝꠞꠣꠞꠦ ꠇꠛꠥꠟ ꠇꠞꠝꠥ।
2CO 6:18 ꠀꠝꠤ ꠅꠁꠝꠥ ꠔꠥꠝꠞꠣꠞ ꠉꠣꠁꠛꠤ ꠛꠣꠚ, ꠔꠥꠝꠞꠣ ꠅꠁꠛꠣꠄ ꠀꠝꠣꠞ ꠀꠅꠟꠣꠖ, ꠁꠈꠣꠘ ꠀꠝꠤ ꠀꠟ꠆ꠟꠣ ꠞꠣꠛ꠆ꠛꠥꠟ ꠀꠟꠣꠝꠤꠘꠦ ꠇꠁꠞꠣꠝ।
2CO 7:1 ꠅ ꠝꠣꠄꠀꠞ ꠜꠣꠁ ꠅꠇꠟ, ꠅꠃ ꠅꠀꠖꠣ ꠅꠇꠟ ꠔ ꠀꠝꠞꠣꠞ ꠟꠣꠉꠤꠃ ꠇꠞꠣ ꠅꠁꠍꠦ, ꠔꠦ ꠀꠅ ꠀꠝꠞꠣ ꠡꠞꠤꠟꠞ ꠀꠞ ꠖꠤꠟꠞ ꠘꠣꠙꠣꠇꠤ ꠖꠥꠞ ꠇꠞꠤꠀ ꠘꠤꠎꠞꠦ ꠙꠣꠇ-ꠍꠣꠚ ꠇꠞꠤ, ꠀꠞ ꠀꠟ꠆ꠟꠣꠞ ꠒꠞ-ꠈꠚꠦ ꠙꠥꠞꠣꠙꠥꠞ ꠙꠣꠇ-ꠙꠛꠤꠔ꠆ꠞ ꠎꠤꠘ꠆ꠖꠦꠉꠤꠞ ꠙꠕꠦ ꠌꠟꠤ।
2CO 7:2 ꠜꠣꠁ ꠅꠇꠟ, ꠀꠝꠞꠣ ꠔ ꠇꠥꠘꠥ ꠝꠣꠘꠡꠞ ꠟꠉꠦ ꠅꠁꠘ꠆ꠘꠣꠄ ꠇꠞꠍꠤ ꠘꠣ, ꠇꠦꠃꠞꠞ ꠈꠦꠔꠤꠅ ꠇꠞꠍꠤ ꠘꠣ ꠀꠞ ꠇꠦꠃꠞꠞꠦ ꠐꠉꠣꠁꠍꠤꠅ ꠘꠣ। ꠄꠞꠟꠣꠉꠤ ꠀꠝꠞꠣꠞꠦ ꠔꠥꠝꠞꠣꠞ ꠖꠤꠟꠞ ꠝꠣꠎꠦ ꠑꠣꠁ ꠖꠦꠅ।
2CO 7:3 ꠔꠥꠝꠞꠣꠞꠦ ꠖꠥꠡꠤꠛꠣꠞ ꠟꠣꠉꠤ ꠁꠈꠣꠘ ꠇꠁꠞꠣꠝ ꠘꠣ। ꠀꠝꠤ ꠀꠉꠦꠃ ꠇꠁꠍꠤ, ꠔꠥꠝꠞꠣ ꠔ ꠀꠝꠞꠣꠞ ꠎꠣꠘꠞ ꠎꠣꠘ ꠇꠁꠟꠎꠣꠞ ꠐꠥꠇꠞꠣ, ꠀꠝꠞꠣ ꠝꠞꠟꠦꠅ ꠄꠇꠟꠉꠦ ꠝꠞꠝꠥ, ꠛꠣꠌꠟꠦꠅ ꠄꠇꠟꠉꠦ ꠛꠣꠌꠝꠥ।
2CO 7:4 ꠔꠥꠝꠞꠣꠞ ꠃꠙꠞꠦ ꠀꠝꠤ ꠈꠥꠛ ꠜꠞꠡꠣ ꠇꠞꠤ, ꠔꠥꠝꠞꠣꠞꠦ ꠟꠁꠀ ꠛꠠꠣꠁ ꠇꠞꠤ। ꠄꠞꠟꠣꠉꠤ ꠅꠔ ꠖꠥꠈ-ꠝꠍꠤꠛꠔꠞ ꠝꠣꠎꠦ ꠞꠁꠀꠅ ꠀꠝꠣꠞ ꠎꠣꠘꠅ ꠡꠣꠘ꠆ꠔꠤ ꠀꠍꠤꠟ, ꠀꠝꠣꠞ ꠝꠘ ꠈꠥꠡꠤ-ꠛꠣꠡꠤꠄ ꠜꠞꠣ।
2CO 7:5 ꠢꠥꠘꠅ, ꠅꠃ ꠝꠣꠇꠤꠖꠘꠤꠀꠔ ꠀꠁꠀꠅ ꠀꠝꠞꠣꠞ ꠡꠞꠤꠟꠅ ꠇꠥꠘꠥ ꠡꠥꠈ ꠙꠣꠁꠍꠤ ꠘꠣ, ꠢꠇꠟꠛꠣꠄ ꠕꠣꠇꠤꠃ ꠀꠝꠞꠣ ꠇꠡ꠆ꠐ ꠙꠣꠁꠍꠤ, ꠛꠣꠁꠞꠦ ꠀꠍꠤꠟ ꠉꠘ꠆ꠒꠉꠥꠟ ꠀꠞ ꠎꠣꠘꠞ ꠜꠤꠔꠞꠦ ꠀꠍꠤꠟ ꠒꠞ-ꠈꠚ।
2CO 7:6 ꠅꠁꠟꠦ ꠀꠟ꠆ꠟꠣ ꠙꠣꠇ, ꠎꠦꠁꠘ ꠖꠥꠈꠤ ꠎꠘꠞꠦ ꠛꠥꠎ ꠖꠦꠁꠘ, ꠔꠣꠁꠘ ꠀꠝꠞꠣꠞꠦ ꠛꠥꠎ ꠖꠤꠛꠣꠞ ꠟꠣꠉꠤ ꠔꠤꠔꠣꠍ ꠜꠣꠁꠞꠦ ꠅꠘꠅ ꠀꠘꠣꠁꠟꠣ।
2CO 7:7 ꠈꠣꠟꠤ ꠁꠈꠣꠘ ꠘꠣꠄ, ꠔꠤꠔꠣꠍ ꠜꠣꠁꠄ ꠔꠥꠝꠞꠣꠞ ꠉꠦꠍ ꠕꠣꠇꠤ ꠎꠦ ꠛꠥꠎ ꠙꠣꠁꠍꠟꠣ, ꠅꠃ ꠛꠥꠎꠦ ꠔꠣꠁꠘ ꠀꠝꠞꠣꠞꠦꠅ ꠛꠥꠎ ꠖꠤꠟꠣ। ꠔꠣꠁꠘ ꠔꠥꠝꠞꠣꠞ ꠝꠘꠞ ꠄꠡꠇꠤ, ꠔꠥꠝꠞꠣꠞ ꠇꠣꠘ꠆ꠖꠣ-ꠇꠣꠐꠤꠞ ꠇꠕꠣ ꠎꠣꠘꠣꠁꠟꠣ, ꠀꠝꠣꠞ ꠛꠦꠙꠣꠞꠦ ꠔꠥꠝꠞꠣ ꠛꠥꠟꠦ ꠈꠥꠛ ꠀꠉ꠆ꠞꠢꠤ। ꠅꠃ ꠢꠇꠟꠔꠣ ꠢꠥꠘꠤꠀ ꠀꠝꠤ ꠈꠥꠛ ꠈꠥꠡꠤ ꠅꠁꠍꠤ।
2CO 7:8 ꠜꠣꠁꠀꠁꠘꠞꠦ, ꠀꠝꠣꠞ ꠀꠉꠞ ꠌꠤꠑꠤꠞ ꠝꠣꠎꠦ ꠎꠥꠖꠤꠅ ꠔꠥꠝꠞꠣꠞꠦ ꠖꠥꠈ ꠖꠤꠍꠟꠣꠝ, ꠔꠦꠛꠃ ꠀꠝꠣꠞ ꠝꠘꠅ ꠇꠥꠘꠥ ꠇꠡ꠆ꠐ ꠘꠣꠁ। ꠀꠝꠤ ꠎꠦꠛꠟꠣ ꠛꠥꠎꠟꠣꠝ, ꠅꠃ ꠌꠤꠑꠤꠄ ꠔꠥꠝꠞꠣꠞ ꠝꠘꠞ ꠝꠣꠎꠦ ꠕꠥꠠꠣ ꠇꠄꠖꠤꠘ ꠖꠥꠈ ꠖꠤꠍꠦ, ꠅꠃ ꠡꠝꠄ ꠀꠝꠤꠅ ꠇꠤꠍꠥ ꠖꠥꠈ ꠙꠣꠁꠍꠟꠣꠝ,
2CO 7:9 ꠅꠁꠟꠦ ꠅꠈꠘ ꠀꠝꠤ ꠈꠥꠡꠤ। ꠔꠥꠝꠞꠣꠞꠦ ꠖꠥꠈ ꠖꠦꠅꠀꠄ ꠈꠥꠡꠤ ꠅꠁꠍꠤ ꠘꠣ, ꠛꠞꠋ ꠖꠥꠈ ꠙꠣꠁꠀ ꠔꠥꠝꠞꠣ ꠔꠃꠛꠣ ꠇꠞꠍ ꠖꠦꠈꠤꠀ ꠈꠥꠡꠤ ꠅꠁꠍꠤ। ꠅꠃ ꠖꠥꠈ ꠙꠣꠁꠍꠟꠣꠄ ꠔꠥꠝꠞꠣ ꠀꠟ꠆ꠟꠣꠞ ꠝꠞ꠆ꠎꠤꠄ, ꠎꠣꠔꠦ ꠀꠝꠞꠣꠞ ꠖꠣꠞꠣ ꠔꠥꠝꠞꠣꠞ ꠇꠥꠘꠥ ꠈꠦꠔꠤ ꠘꠣ ꠅꠄ।
2CO 7:10 ꠀꠟ꠆ꠟꠣꠞ ꠖꠦꠅꠀ ꠝꠘꠞ ꠇꠡ꠆ꠐꠄ ꠝꠣꠘꠡꠦ ꠔꠃꠛꠣ ꠇꠞꠂꠘ, ꠀꠞ ꠎꠣꠘ ꠛꠣꠌꠣꠁꠘ। ꠔꠦ ꠅꠃ ꠇꠡ꠆ꠐꠄ ꠔ ꠖꠥꠈ ꠘꠣꠁ। ꠅꠁꠟꠦ ꠖꠥꠘꠤꠀꠛꠤ ꠝꠘꠞ ꠇꠡ꠆ꠐꠄ ꠝꠣꠘꠡꠞ ꠝꠞꠘ ꠀꠘꠦ।
2CO 7:11 ꠔꠥꠝꠞꠣ ꠛꠥꠎꠞꠣꠄ ꠘꠤ, ꠀꠟ꠆ꠟꠣꠞ ꠖꠦꠅꠀ ꠝꠘꠞ ꠇꠡ꠆ꠐꠄ ꠔꠥꠝꠞꠣꠞ ꠇꠔ ꠜꠣꠟꠣꠁ ꠇꠞꠍꠦ, ꠔꠥꠝꠞꠣꠞꠦ ꠘꠣꠚꠞꠝꠣꠘꠤ ꠕꠣꠇꠤ ꠛꠣꠌꠣꠁꠍꠦ, ꠉꠥꠘꠣꠞ ꠛꠣꠄ ꠔꠥꠝꠞꠣꠞ ꠊꠤꠘ꠆ꠘꠣ ꠎꠘꠝꠣꠁꠍꠦ, ꠝꠘꠦ ꠝꠘꠦ ꠇꠔ ꠒꠞ ꠒꠞꠣꠁꠍ, ꠀꠟ꠆ꠟꠣꠞ ꠛꠣꠄ ꠇꠔ ꠀꠉꠥꠀꠁꠍ, ꠘꠣꠚꠞꠝꠣꠘꠤ ꠇꠣꠝꠞ ꠛꠤꠌꠣꠞ ꠇꠞꠍ। ꠅꠃ ꠛꠦꠙꠣꠞꠦ ꠔꠥꠝꠞꠣ ꠢꠇꠟ ꠝꠘ꠆ꠔꠦꠃ ꠙꠞꠝꠣꠘ ꠖꠤꠍ, ꠔꠥꠝꠞꠣ ꠘꠤꠈꠥꠔ।
2CO 7:12 ꠀꠝꠤ ꠎꠥꠖꠤꠅ ꠅꠃ ꠌꠤꠑꠤ ꠟꠦꠈꠍꠤꠟꠣꠝ, ꠅꠁꠟꠦ ꠎꠦ ꠝꠣꠘꠡꠦ ꠅꠁꠘ꠆ꠘꠣꠄ ꠇꠞꠍꠦ ꠛꠣ ꠎꠣꠞ ꠃꠙꠞꠦ ꠅꠁꠘ꠆ꠘꠣꠄ ꠇꠞꠣ ꠅꠁꠍꠦ ꠔꠣꠞ ꠟꠣꠉꠤ ꠘꠣꠄ, ꠛꠞꠋ ꠀꠟ꠆ꠟꠣꠞ ꠖꠞꠛꠣꠞꠅ ꠎꠣꠔꠦ ꠔꠥꠝꠞꠣꠞ ꠅꠃ ꠢꠣꠟꠔꠈꠣꠘ ꠎꠣꠁꠞ ꠅꠄ ꠎꠦꠘ, ꠔꠥꠝꠞꠣ ꠢꠣꠍꠣꠃ ꠀꠝꠞꠣꠞꠦ ꠝꠢꠛ꠆ꠛꠔ ꠇꠞꠅ, ꠅꠔꠣꠞ ꠟꠣꠉꠤꠃ ꠟꠦꠈꠍꠤ।
2CO 7:13 ꠄꠞꠟꠣꠉꠤ ꠀꠝꠞꠣ ꠛꠥꠎꠅ ꠙꠣꠁꠍꠤ। ꠅꠃ ꠛꠥꠎ ꠙꠣꠁꠀ ꠀꠞ ꠜꠣꠁ ꠔꠤꠔꠣꠍꠞ ꠈꠥꠡꠤ ꠖꠦꠈꠤꠀ ꠀꠝꠞꠣ ꠀꠞꠅ ꠛꠦꠡꠤ ꠈꠥꠡꠤ ꠅꠁꠍꠤ, ꠇꠣꠞꠘ ꠔꠥꠝꠞꠣ ꠢꠇꠟꠞ ꠉꠦꠍ ꠕꠣꠇꠤ ꠔꠣꠁꠘ ꠈꠥꠛ ꠀꠞꠣꠝ ꠙꠣꠁꠍꠂꠘ।
2CO 7:14 ꠀꠍꠟꠦ ꠀꠝꠤ ꠔꠥꠝꠞꠣꠞꠦ ꠟꠁꠀ ꠔꠣꠘ ꠉꠦꠍꠦ ꠛꠠꠣꠁ ꠇꠞꠍꠟꠣꠝ, ꠄꠔꠦ ꠇꠥꠘꠥ ꠡꠞꠝꠤꠘ꠆ꠖꠣꠅ ꠅꠁꠍꠤ ꠘꠣ। ꠔꠥꠝꠞꠣꠞ ꠉꠦꠍꠦ ꠀꠝꠞꠣꠞ ꠛꠣꠔꠣꠁꠟ ꠢꠇꠟ ꠇꠕꠣ ꠎꠦꠟꠣ ꠢꠣꠍꠣ ꠀꠍꠤꠟ, ꠅꠃꠟꠣ ꠔꠥꠝꠞꠣꠞꠦ ꠟꠁꠀ ꠀꠝꠞꠣꠞ ꠛꠠꠣꠁ ꠇꠞꠣꠈꠣꠘꠅ ꠔꠣꠘ ꠉꠦꠍꠦ ꠢꠣꠍꠣ ꠙꠞꠝꠣꠘ ꠅꠁꠍꠦ।
2CO 7:15 ꠔꠥꠝꠞꠣ ꠢꠇꠟꠦ ꠎꠦꠟꠣ ꠔꠣꠘ ꠘꠍꠤꠅꠔ ꠝꠣꠘꠍ, ꠝꠘꠞ ꠒꠞ-ꠈꠚꠦ ꠇꠣꠙꠤ ꠇꠣꠙꠤ ꠔꠣꠘꠞꠦ ꠇꠛꠥꠟ ꠇꠞꠍ, ꠅꠈꠣꠘ ꠝꠘꠅ ꠅꠀꠄ ꠔꠥꠝꠞꠣꠞ ꠛꠣꠄ ꠔꠣꠘ ꠝꠣꠄꠀ ꠈꠥꠛ ꠛꠦꠡꠤ ꠛꠣꠠꠤꠍꠦ।
2CO 7:16 ꠀꠞ ꠀꠝꠤꠅ ꠈꠥꠛ ꠈꠥꠡꠤ, ꠔꠥꠝꠞꠣꠞ ꠃꠙꠞꠦ ꠀꠝꠤ ꠅꠈꠘ ꠙꠥꠞꠣꠙꠥꠞ ꠜꠞꠡꠣ ꠇꠞꠔꠣꠝ ꠙꠣꠞꠤ।
2CO 8:1 ꠜꠣꠁ ꠅꠇꠟ, ꠀꠝꠤ ꠔꠥꠝꠞꠣꠞꠦ ꠎꠣꠘꠣꠁꠞꠣꠝ ꠝꠣꠇꠤꠖꠘꠤꠀ ꠖꠦꠡꠞ ꠎꠝꠣꠔ ꠅꠇꠟꠦ ꠀꠟ꠆ꠟꠣꠞ ꠉꠦꠍ ꠕꠣꠇꠤ ꠇꠔ ꠘꠤꠀꠝꠔ ꠙꠣꠁꠍꠂꠘ।
2CO 8:2 ꠎꠥꠖꠤꠅ ꠛꠃꠔ ꠖꠥꠈ-ꠝꠍꠤꠛꠔ ꠖꠤꠀ ꠔꠣꠞꠣꠞꠦ ꠙꠞꠤꠇ꠆ꠇꠣ ꠇꠞꠣ ꠅꠁꠍꠤꠟ, ꠔꠣꠞꠣ ꠈꠥꠛ ꠉꠞꠤꠛ ꠢꠣꠟꠔꠦ ꠀꠍꠟꠣ, ꠔꠦꠛꠃ ꠔꠣꠞꠣꠞ ꠝꠘꠞ ꠝꠣꠎꠦ ꠛꠃꠔ ꠚꠥꠞ꠆ꠔꠤ ꠀꠍꠤꠟ, ꠔꠣꠞꠣ ꠈꠥꠟꠣ ꠀꠔꠦ ꠀꠟ꠆ꠟꠣꠞ ꠘꠣꠝꠦ ꠖꠣꠘ-ꠈꠄꠞꠣꠔ ꠇꠞꠍꠂꠘ।
2CO 8:3 ꠀꠝꠤ ꠔꠣꠞꠣꠞ ꠙꠇ꠆ꠇꠦ ꠇꠁꠞꠣꠝ, ꠔꠣꠞꠣ ꠈꠥꠡꠤ ꠅꠁꠀ ꠘꠤꠎꠞ ꠔꠚꠤꠇ ꠝꠣꠚꠤꠇ, ꠄꠝꠘꠇꠤ ꠔꠚꠤꠇ ꠕꠣꠇꠤ ꠀꠞꠅ ꠛꠦꠡꠤꠅ ꠖꠣꠘ ꠇꠞꠍꠂꠘ।
2CO 8:4 ꠀꠞ ꠈꠥꠛ ꠈꠤꠀꠟꠤ ꠅꠁꠀ ꠀꠝꠞꠣꠞꠦ ꠝꠤꠘꠔ ꠇꠞꠍꠤꠟꠣ, ꠎꠣꠔꠦ ꠀꠟ꠆ꠟꠣꠞ ꠎꠦ ꠛꠘ꠆ꠖꠣ ꠅꠇꠟ ꠅꠜꠣꠛꠞ ꠝꠣꠎꠦ ꠀꠍꠂꠘ, ꠄꠞꠣꠞꠦ ꠅꠜꠣꠛ ꠕꠣꠇꠤ ꠛꠣꠌꠣꠘꠤꠞ ꠟꠣꠉꠤ ꠔꠣꠞꠣ ꠡꠞꠤꠇ ꠅꠁꠔꠣ ꠙꠣꠞꠂꠘ।
2CO 8:5 ꠀꠝꠞꠣ ꠎꠔꠈꠣꠘ ꠀꠡꠣ ꠇꠞꠍꠟꠣꠝ, ꠔꠣꠞꠣ ꠄꠞ ꠌꠣꠁꠔꠦꠅ ꠛꠦꠡꠤ ꠖꠣꠘ ꠇꠞꠍꠂꠘ। ꠈꠣꠟꠤ ꠁꠈꠣꠘ ꠘꠣꠄ, ꠔꠣꠞꠣ ꠙꠄꠟꠣ ꠘꠤꠎꠞꠦ ꠝꠣꠟꠤꠇ ꠁꠍꠣꠞ ꠀꠔꠅ ꠡꠙꠤꠍꠂꠘ, ꠛꠣꠖꠦ ꠀꠟ꠆ꠟꠣꠞ ꠝꠞ꠆ꠎꠤꠄ ꠀꠝꠞꠣꠞ ꠉꠦꠍꠦꠅ ꠡꠙꠣ ꠅꠁꠍꠂꠘ।
2CO 8:6 ꠁꠔꠣ ꠖꠦꠈꠤꠀ ꠀꠝꠞꠣ ꠔꠤꠔꠣꠍ ꠜꠣꠁꠞꠦ ꠈꠥꠛ ꠝꠤꠘꠔ ꠇꠞꠍꠟꠣꠝ, ꠖꠣꠘ-ꠈꠄꠞꠣꠔ ꠇꠞꠣꠞ ꠎꠦ ꠇꠣꠝ ꠔꠣꠁꠘ ꠔꠥꠝꠞꠣꠞ ꠝꠣꠎꠦ ꠌꠣꠟꠥ ꠇꠞꠍꠂꠘ, ꠁꠔꠣ ꠎꠣꠘꠥ ꠡꠦꠡꠅ ꠇꠞꠂꠘ।
2CO 8:7 ꠔꠥꠝꠞꠣ ꠎꠦꠟꠣ ꠢꠇꠟ ꠛꠦꠙꠣꠞꠦꠃ ꠀꠉꠥꠀꠁꠟ ꠀꠍ, ꠔꠥꠝꠞꠣꠞ ꠡꠛꠟ ꠁꠝꠣꠘ, ꠇꠕꠣ-ꠛꠣꠞ꠆ꠔꠣ, ꠀꠈꠟ-ꠢꠦꠇꠝꠔ, ꠝꠘꠞ ꠄꠡꠇꠤ, ꠀꠞ ꠀꠝꠞꠣꠞ ꠛꠣꠄ ꠎꠦꠟꠣ ꠈꠥꠛ ꠝꠣꠄꠀ-ꠝꠢꠛ꠆ꠛꠔ ꠀꠍꠦ, ꠑꠤꠇ ꠅꠃ ꠟꠣꠈꠣꠘ ꠖꠣꠘ-ꠈꠄꠞꠣꠔ ꠇꠞꠣꠞ ꠘꠦꠇ ꠀꠝꠟꠅ ꠎꠣꠘꠥ ꠔꠥꠝꠞꠣꠞ ꠝꠣꠎꠦ ꠛꠣꠁꠀ ꠙꠠꠦ।
2CO 8:8 ꠁꠔꠣ ꠟꠦꠈꠤꠀ ꠀꠝꠤ ꠔꠥꠝꠞꠣꠞꠦ ꠇꠥꠘꠥ ꠢꠥꠇꠥꠝ ꠖꠤꠞꠣꠝ ꠘꠣ, ꠈꠣꠟꠤ ꠙꠞꠤꠇ꠆ꠇꠣ ꠇꠞꠤ ꠖꠦꠈꠞꠣꠝ, ꠄꠞꠟꠣꠉꠤ ꠅꠁꠘ꠆ꠘ ꠝꠥꠝꠤꠘ ꠅꠇꠟꠞ ꠘꠦꠇ ꠇꠣꠝꠞ ꠄꠡꠇꠤꠞ ꠇꠕꠣ ꠎꠣꠘꠣꠁꠞꠣꠝ। ꠖꠦꠈꠤ, ꠔꠥꠝꠞꠣꠞ ꠝꠢꠛ꠆ꠛꠔ ꠇꠔꠈꠣꠘ ꠘꠤꠈꠥꠔ।
2CO 8:9 ꠀꠝꠞꠣꠞ ꠝꠣꠟꠤꠇ ꠁꠍꠣ ꠀꠟ-ꠝꠍꠤꠞ ꠞꠢꠝ-ꠘꠤꠀꠝꠔꠞ ꠇꠕꠣ ꠔ ꠔꠥꠝꠞꠣ ꠎꠣꠘꠃ, ꠔꠣꠁꠘ ꠔ ꠀꠟ꠆ꠟꠣꠁ ꠗꠘꠦ ꠗꠘꠤ ꠀꠍꠟꠣ, ꠅꠁꠟꠦ ꠔꠥꠝꠞꠣꠞ ꠟꠣꠉꠤ ꠉꠞꠤꠛ ꠛꠘꠟꠣ, ꠎꠣꠔꠦ ꠔꠣꠁꠘ ꠉꠞꠤꠛ ꠛꠘꠣꠞ ꠇꠣꠞꠘꠦ ꠔꠥꠝꠞꠣ ꠗꠘꠤ ꠅꠁꠔꠣꠄ ꠙꠣꠞ।
2CO 8:10 ꠔꠦ ꠀꠝꠤ ꠔꠥꠝꠞꠣꠞꠦ ꠙꠞꠣꠝꠤꠡ ꠖꠤꠞꠣꠝ, ꠁꠔꠣ ꠝꠣꠘꠟꠦ ꠔꠥꠝꠞꠣꠞ ꠜꠣꠟꠣꠁ ꠅꠁꠛ, ꠔꠥꠝꠞꠣ ꠈꠥꠛ ꠈꠥꠡꠤ ꠅꠁꠀ ꠉꠔ ꠛꠍꠞ ꠖꠣꠘ-ꠈꠄꠞꠣꠔ ꠔꠥꠟꠣꠔ ꠟꠣꠉꠍꠤꠟꠣꠄ,
2CO 8:11 ꠅꠈꠘ ꠅꠃ ꠇꠣꠝ ꠡꠦꠡ ꠇꠞꠅ। ꠝꠘꠞ ꠎꠦ ꠄꠡꠇꠤ ꠟꠁꠀ ꠔꠥꠝꠞꠣ ꠁ ꠇꠣꠝ ꠡꠥꠞꠥ ꠇꠞꠍꠤꠟꠣꠄ, ꠅꠃꠟꠣ ꠄꠡꠇꠤꠄ ꠎꠣꠞꠎꠤꠞ ꠔꠚꠤꠇ ꠝꠣꠚꠤꠇ ꠖꠣꠘ-ꠈꠄꠞꠣꠔ ꠖꠤꠀ ꠁꠔꠣ ꠡꠦꠡ ꠇꠞꠅ।
2CO 8:12 ꠖꠣꠘ-ꠈꠄꠞꠣꠔ ꠖꠤꠛꠣꠞ ꠘꠤꠅꠔ ꠇꠞꠟꠦ, ꠀꠟ꠆ꠟꠣꠄ ꠔ ꠘꠤꠅꠔ ꠝꠣꠚꠤꠇ ꠇꠛꠥꠟ ꠇꠞꠂꠘ, ꠔꠦ ꠔꠚꠤꠇ ꠕꠣꠇꠟꠦ ꠖꠦꠅ, ꠘꠣ ꠕꠣꠇꠟꠦ ꠘꠣꠁ।
2CO 8:13 ꠜꠣꠁꠀꠁꠘꠞꠦ, ꠀꠝꠤ ꠌꠣꠁꠞꠣꠝ ꠘꠣ, ꠅꠁꠘ꠆ꠘ ꠝꠣꠘꠡꠦ ꠀꠞꠣꠝ ꠇꠞꠃꠇ ꠀꠞ ꠔꠥꠝꠞꠣ ꠇꠡ꠆ꠐ ꠇꠞ, ꠛꠞꠋ ꠔꠥꠝꠞꠣ ꠢꠇꠟꠞ ꠢꠣꠟꠔ ꠄꠇꠟꠣꠈꠣꠘ ꠅꠃꠇ, ꠅꠈꠣꠘꠃ ꠀꠡꠣ ꠇꠞꠞꠣꠝ।
2CO 8:14 ꠔꠥꠝꠞꠣꠞ ꠎꠦꠔꠣ ꠗꠘ-ꠖꠃꠟꠔ ꠅꠈꠘ ꠛꠣꠠꠔꠤ ꠀꠍꠦ, ꠅꠔꠣꠄ ꠔꠣꠞꠣꠞ ꠅꠜꠣꠛ ꠝꠤꠐꠣꠃꠇ, ꠀꠞ ꠔꠣꠞꠣꠞ ꠎꠦꠛꠟꠣ ꠛꠦꠡꠤ ꠅꠁꠛ, ꠅꠃ ꠡꠝꠄ ꠔꠣꠞꠣꠅ ꠔꠥꠝꠞꠣꠞ ꠅꠜꠣꠛ ꠝꠤꠐꠣꠁꠛꠣ। ꠅꠟꠣꠈꠣꠘ ꠢꠇꠟꠞ ꠢꠣꠟꠔ ꠄꠇꠁ ꠟꠣꠈꠣꠘ ꠅꠃꠇ।
2CO 8:15 ꠎꠦꠟꠣ ꠔꠃꠞꠣꠔ ꠡꠞꠤꠚꠅ ꠀꠍꠦ, “ꠎꠦꠁꠘ ꠛꠦꠡꠤ ꠔꠥꠇꠣꠁꠍꠟꠣ ꠔꠣꠘꠅ ꠛꠦꠡꠤ ꠅꠁꠍꠦ ꠘꠣ, ꠀꠞ ꠎꠦꠁꠘ ꠕꠥꠠꠣ ꠔꠥꠇꠣꠁꠍꠟꠣ ꠔꠣꠘꠅ ꠇꠝ ꠅꠁꠍꠦ ꠘꠣ।”
2CO 8:16 ꠢꠥꠘꠅ, ꠀꠝꠤ ꠀꠟ꠆ꠟꠣꠞ ꠡꠥꠇꠞꠤꠀ ꠀꠖꠣꠄ ꠇꠞꠤ, ꠀꠝꠣꠞ ꠝꠘꠞ ꠝꠣꠎꠦ ꠔꠥꠝꠞꠣꠞ ꠛꠣꠄ ꠎꠦꠟꠣ ꠈꠤꠀꠟ ꠀꠍꠦ, ꠀꠟ꠆ꠟꠣꠄ ꠅꠃ ꠄꠇꠁ ꠟꠣꠈꠣꠘ ꠈꠤꠀꠟ ꠖꠣꠘ ꠇꠞꠍꠂꠘ ꠜꠣꠁ ꠔꠤꠔꠣꠍꠞ ꠝꠣꠎꠦꠅ।
2CO 8:17 ꠔꠣꠁꠘ ꠀꠝꠞꠣꠞ ꠅꠘꠥꠞꠥꠗ ꠝꠣꠘꠤꠀ ꠔꠥꠝꠞꠣꠞ ꠉꠦꠍꠦ ꠎꠣꠁꠞꠣ, ꠀꠞ ꠀꠍꠟ ꠇꠕꠣ ꠅꠁꠟ ꠔꠣꠁꠘ ꠘꠤꠎꠦꠃ ꠈꠥꠡꠤ ꠅꠁꠀ ꠎꠣꠁꠞꠣ।
2CO 8:18 ꠔꠣꠘ ꠟꠉꠦ ꠇꠞꠤ ꠀꠝꠞꠣ ꠢꠃ ꠜꠣꠁꠞꠦꠅ ꠙꠣꠑꠣꠁꠀꠞ, ꠈꠥꠡ-ꠈꠛꠞꠤ ꠔꠛꠟꠤꠉꠞ ꠟꠣꠉꠤ ꠢꠇꠟ ꠎꠝꠣꠔꠦꠃ ꠁ ꠜꠣꠁꠞ ꠔꠣꠞꠤꠚ ꠇꠞꠂꠘ।
2CO 8:19 ꠎꠝꠣꠔꠞ ꠝꠣꠘꠡꠦ ꠈꠣꠟꠤ ꠔꠣꠘ ꠔꠣꠞꠤꠚ ꠇꠞꠍꠦ ꠘꠣ, ꠀꠝꠞꠣꠞ ꠟꠉꠦ ꠅꠁꠀ ꠖꠣꠘ-ꠈꠄꠞꠣꠔ ꠟꠁꠀ ꠎꠣꠁꠛꠣꠞ ꠟꠣꠉꠤ ꠔꠣꠞꠣꠃ ꠔꠣꠘꠞꠦ ꠙꠍꠘ꠆ꠖ ꠇꠞꠍꠦ। ꠔꠦ ꠝꠣꠟꠤꠇ ꠁꠍꠣꠞ ꠉꠃꠞꠛꠞ ꠟꠣꠉꠤ, ꠀꠞ ꠅꠁꠘ꠆ꠘ ꠝꠥꠝꠤꠘ ꠅꠇꠟꠞꠦ ꠡꠣꠁꠎ꠆ꠎ ꠇꠞꠣꠞ ꠟꠣꠉꠤ, ꠀꠝꠞꠣ ꠅꠃ ꠖꠣꠘ-ꠈꠄꠞꠣꠔ ꠘꠤꠛꠣꠞ ꠛꠦꠛꠡ꠆ꠔꠣ ꠇꠞꠍꠤ।
2CO 8:20 ꠀꠝꠞꠣ ꠈꠥꠛ ꠢꠥꠡꠤꠀꠞ ꠅꠁꠀ ꠌꠟꠤꠀꠞ, ꠎꠣꠔꠦ ꠛꠠ ꠀꠇꠣꠞꠞ ꠅꠃ ꠞꠤꠟꠤꠚ ꠛꠤꠟꠣꠘꠤꠞ ꠛꠣꠖꠦ ꠇꠦꠃ ꠀꠝꠞꠣꠞ ꠛꠖꠘꠣꠝ ꠇꠞꠣꠞ ꠡꠥꠎꠥꠉ ꠘꠣ ꠙꠣꠄ।
2CO 8:21 ꠝꠘꠅ ꠞꠣꠈꠤꠅ, ꠀꠝꠞꠣ ꠈꠣꠟꠤ ꠝꠣꠟꠤꠇ ꠁꠍꠣꠞ ꠉꠦꠍꠦ ꠘꠣꠄ, ꠝꠣꠘꠡꠞ ꠍꠣꠝꠘꠦꠅ ꠢꠇ-ꠢꠣꠟꠣꠟꠤ ꠞꠅꠀꠞ ꠌꠦꠡ꠆ꠐꠣ ꠇꠞꠤꠀꠞ।
2CO 8:22 ꠀꠞ ꠄꠞꠣꠞ ꠟꠉꠦ ꠇꠞꠤ ꠀꠝꠞꠣ ꠀꠞꠇ ꠜꠣꠁꠞꠦ ꠙꠣꠑꠣꠁꠞꠣꠝ, ꠄꠘꠞꠦ ꠀꠝꠞꠣ ꠛꠃꠔ ꠛꠣꠞ ꠛꠃꠔ ꠟꠣꠈꠣꠘ ꠙꠞꠤꠇ꠆ꠇꠣ ꠇꠞꠤꠀ ꠖꠦꠈꠍꠤ, ꠔꠣꠘ ꠈꠥꠛ ꠄꠡꠇꠤ ꠀꠍꠦ। ꠅꠈꠘ ꠖꠦꠈꠞꠣꠝ, ꠔꠣꠁꠘ ꠔꠥꠝꠞꠣꠞꠦ ꠈꠥꠛ ꠛꠤꠡ꠆ꠛꠣꠡ ꠇꠞꠂꠘ, ꠄꠞꠟꠣꠉꠤ ꠔꠥꠝꠞꠣꠞ ꠛꠣꠄ ꠔꠣꠘ ꠄꠡꠇꠤ ꠀꠞꠅ ꠛꠣꠠꠤꠍꠦ।
2CO 8:23 ꠅꠈꠘ ꠔꠤꠔꠣꠍ ꠜꠣꠁꠞ ꠛꠦꠙꠣꠞꠦ ꠀꠝꠤ ꠇꠁꠞꠣꠝ, ꠄꠁꠘ ꠔ ꠀꠝꠣꠞ ꠟꠉꠦ ꠞꠂꠘ, ꠀꠞ ꠔꠥꠝꠞꠣꠞ ꠟꠣꠉꠤ ꠇꠣꠝ ꠇꠞꠂꠘ। ꠛꠣꠖ-ꠛꠣꠇꠤ ꠢꠇꠟ ꠜꠣꠁꠀꠁꠘ꠆ꠔꠞ ꠛꠦꠙꠣꠞꠦ ꠇꠁꠞꠣꠝ, ꠢꠇꠟ ꠎꠝꠣꠔꠞ ꠝꠣꠘꠡꠦ ꠙꠍꠘ꠆ꠖ ꠇꠞꠤꠀ ꠔꠣꠞꠣꠞꠦ ꠙꠣꠑꠣꠁꠞꠣ, ꠔꠣꠞꠣꠞ ꠝꠣꠎꠖꠤ ꠀꠟ-ꠝꠍꠤꠞ ꠉꠃꠞꠛ ꠅꠄ।
2CO 8:24 ꠄꠞꠟꠣꠉꠤ ꠇꠁꠞꠣꠝ, ꠔꠥꠝꠞꠣꠞ ꠜꠤꠔꠞꠞ ꠝꠢꠛ꠆ꠛꠔ, ꠀꠞ ꠔꠥꠝꠞꠣꠞꠦ ꠟꠁꠀ ꠀꠝꠞꠣ ꠎꠦ ꠛꠠꠣꠁ-ꠛꠦꠐꠣꠉꠤꠞꠤ ꠖꠦꠈꠣꠁ, ꠁꠔꠣꠞ ꠙꠞꠝꠣꠘ ꠖꠦꠈꠣꠁꠅ। ꠔꠦꠃ ꠢꠇꠟ ꠎꠝꠣꠔꠞ ꠝꠣꠘꠡꠦ ꠛꠥꠎꠛꠣ, ꠔꠥꠝꠞꠣ ꠇꠦ।
2CO 9:1 ꠜꠣꠁꠀꠁꠘꠞꠦ, ꠀꠟ꠆ꠟꠣꠞ ꠙꠣꠇ ꠛꠘ꠆ꠖꠣ ꠅꠇꠟꠞꠦ ꠡꠣꠁꠎ꠆ꠎꠞ ꠟꠣꠉꠤ ꠖꠣꠘ-ꠈꠄꠞꠣꠔ ꠔꠥꠟꠣꠞ ꠎꠦ ꠇꠣꠝ ꠌꠟꠦꠞ, ꠁꠔꠣ ꠛꠦꠙꠣꠞꠦ ꠔ ꠔꠥꠝꠞꠣꠞꠦ ꠇꠥꠘ꠆ꠔꠣ ꠟꠦꠈꠣꠞ ꠎꠞꠥꠞ ꠘꠣꠄ।
2CO 9:2 ꠅꠃ ꠛꠦꠙꠣꠞꠦ ꠔꠥꠝꠞꠣꠞ ꠝꠘꠞ ꠈꠤꠀꠟ ꠔ ꠀꠝꠣꠞ ꠎꠣꠘꠣ ꠀꠍꠦ। ꠝꠣꠇꠤꠖꠘꠤꠀꠞ ꠝꠣꠘꠡꠞ ꠉꠦꠍꠦ ꠀꠝꠤ ꠔꠥꠝꠞꠣꠞ ꠡꠥꠘꠣꠝ ꠉꠣꠁꠀ ꠇꠁꠞꠣꠝ, ꠉ꠆ꠞꠤꠍ ꠖꠦꠡꠞ ꠝꠣꠘꠥꠡ ꠝꠣꠘꠤ ꠔꠥꠝꠞꠣ, ꠉꠔ ꠛꠍꠞ ꠕꠣꠇꠤꠃ ꠖꠣꠘ-ꠈꠄꠞꠣꠔ ꠟꠁꠀ ꠎꠥꠁꠔ ꠀꠍ। ꠔꠥꠝꠞꠣꠞ ꠁ ꠄꠡꠇꠤ ꠖꠦꠈꠤꠀ, ꠝꠣꠇꠤꠖꠘꠤꠀꠞ ꠛꠃꠔ ꠝꠣꠘꠥꠡ ꠢꠎꠣꠉ ꠅꠁꠍꠂꠘ।
2CO 9:3 ꠄꠞꠟꠣꠉꠤ ꠀꠝꠤ ꠅꠃ ꠜꠣꠁꠀꠁꠘꠞꠦ ꠙꠣꠑꠣꠁꠞꠣꠝ, ꠎꠣꠔꠦ ꠔꠥꠝꠞꠣꠞꠦ ꠟꠁꠀ ꠀꠝꠞꠣ ꠎꠦ ꠛꠠꠣꠁ ꠖꠦꠈꠣꠁ, ꠔꠣꠞꠣ ꠉꠤꠀ ꠘꠤꠎꠞ ꠌꠃꠈꠦ ꠁꠔꠣ ꠖꠦꠈꠤꠀ ꠙꠞꠝꠣꠘ ꠙꠣꠁꠘ। ꠔꠦ ꠀꠝꠤ ꠎꠦꠟꠣ ꠛꠠꠣꠁ ꠇꠞꠍꠤ ꠔꠥꠝꠞꠣꠅ ꠅꠟꠣꠈꠣꠘ ꠎꠥꠁꠔ ꠞꠁꠅ।
2CO 9:4 ꠀꠞꠘꠣꠄ ꠀꠝꠣꠞ ꠟꠉꠦ ꠅꠁꠀ ꠝꠣꠇꠤꠖꠘꠤꠀꠞ ꠇꠥꠘꠥ ꠜꠣꠁꠀꠁꠘ ꠉꠤꠀ ꠎꠥꠖꠤ ꠖꠦꠈꠂꠘ ꠔꠥꠝꠞꠣ ꠎꠥꠁꠔ ꠘꠣꠄ, ꠔꠦ ꠔꠥꠝꠞꠣꠞ ꠃꠙꠞꠦ ꠅꠔ ꠛꠠ ꠜꠞꠡꠣ ꠇꠞꠣꠄ, ꠀꠝꠞꠣ ꠡꠞꠝ ꠙꠣꠁꠝꠥ ꠀꠞ ꠔꠥꠝꠞꠣꠅ ꠡꠞꠝꠤꠘ꠆ꠖꠣ ꠅꠁꠛꠣꠄ।
2CO 9:5 ꠄꠞꠟꠣꠉꠤ ꠅꠃ ꠝꠥꠝꠤꠘ ꠅꠇꠟꠞꠦ ꠅꠘꠥꠞꠥꠗ ꠇꠞꠟꠣꠝ, ꠔꠣꠞꠣ ꠎꠣꠘꠥ ꠀꠝꠣꠞ ꠀꠉꠦ ꠔꠥꠝꠞꠣꠞ ꠉꠦꠍꠦ ꠎꠣꠁꠘ। ꠞꠤꠟꠤꠚ ꠇꠣꠝꠞ ꠟꠣꠉꠤ ꠖꠣꠘ-ꠈꠄꠞꠣꠔ ꠖꠤꠛꠣꠞ ꠎꠦ ꠅꠀꠖꠣ ꠇꠞꠍꠤꠟꠣꠄ, ꠔꠣꠞꠣ ꠉꠤꠀ ꠅꠉꠥꠁꠘ ꠎꠥꠁꠔ ꠇꠞꠣꠔ ꠡꠣꠁꠎ꠆ꠎ ꠇꠞꠛꠣ। ꠔꠦ ꠔꠥꠝꠞꠣꠞ ꠉꠦꠍ ꠕꠣꠇꠤ ꠎꠥꠞ-ꠎꠛꠞꠖꠡ꠆ꠔꠤ ꠇꠞꠤꠀ ꠇꠥꠘ꠆ꠔꠣ ꠀꠖꠣꠄ ꠇꠞꠣ ꠅꠁꠔ ꠘꠣꠄ, ꠈꠣꠟꠤ ꠝꠘꠞ ꠈꠥꠡꠤꠄ ꠖꠦꠅꠀ ꠖꠣꠘ-ꠈꠄꠞꠣꠔ ꠘꠦꠅꠀ ꠅꠁꠛ।
2CO 9:6 ꠈꠤꠀꠟ ꠞꠣꠈꠤꠅ, ꠎꠦ ꠉꠤꠞꠡ꠆ꠔꠦ ꠕꠥꠠꠣ ꠇꠞꠤ ꠎꠣꠟꠣ ꠛꠣꠁꠘ ꠖꠦꠄ, ꠢꠦ ꠕꠥꠠꠣ ꠚꠡꠟ ꠖꠣꠁꠛ, ꠀꠞ ꠎꠦ ꠉꠤꠞꠡ꠆ꠔꠦ ꠛꠦꠡ ꠇꠞꠤ ꠎꠣꠟꠣ ꠛꠣꠁꠘ ꠖꠦꠄ, ꠢꠦ ꠛꠦꠡ ꠇꠞꠤ ꠚꠡꠟ ꠖꠣꠁꠛ।
2CO 9:7 ꠔꠦ ꠔꠥꠝꠞꠣꠅ ꠅꠟꠣ ꠙꠞꠔꠦꠇꠦ ꠎꠣꠞꠎꠤꠞ ꠘꠤꠅꠔ ꠝꠣꠚꠤꠇ ꠖꠣꠘ-ꠈꠄꠞꠣꠔ ꠖꠦꠅ। ꠝꠘꠞ ꠝꠣꠎꠦ ꠇꠡ꠆ꠐ ꠟꠁꠀ ꠛꠣ ꠖꠦꠅꠀ ꠟꠣꠉꠛ ꠇꠞꠤ ꠖꠤꠅ ꠘꠣ। ꠇꠣꠞꠘ ꠖꠤꠟꠞ ꠈꠥꠡꠤꠄ ꠖꠣꠘ ꠇꠞꠟꠦ, ꠀꠟ꠆ꠟꠣꠄ ꠝꠣꠄꠀ ꠇꠞꠂꠘ।
2CO 9:8 ꠀꠟ꠆ꠟꠣꠄ ꠔꠥꠝꠞꠣꠞꠦ ꠢꠇꠟ ꠟꠣꠈꠣꠘ ꠞꠢꠝ-ꠛꠞꠇꠔ ꠖꠤꠔꠣ ꠙꠣꠞꠂꠘ। ꠁ ꠈꠦꠝꠔꠣ ꠔꠣꠘ ꠀꠍꠦ, ꠎꠣꠔꠦ ꠔꠥꠝꠞꠣꠞ ꠖꠞꠇꠣꠞꠤ ꠢꠇꠟꠔꠣ ꠢꠣꠝꠦꠡꠣ ꠔꠥꠝꠞꠣꠞ ꠉꠦꠍꠦ ꠕꠣꠇꠦ, ꠀꠞ ꠘꠦꠇ ꠇꠣꠝꠞ ꠟꠣꠉꠤ ꠈꠥꠟꠣ ꠀꠔꠦ ꠁꠔꠣ ꠛꠤꠟꠣꠁꠔꠣꠄ ꠙꠣꠞ।
2CO 9:9 ꠎꠦꠟꠣ ꠙꠛꠤꠔ꠆ꠞ ꠎꠛꠥꠞ ꠡꠞꠤꠚꠅ ꠀꠍꠦ, ꠢꠦ ꠔ ꠈꠥꠟꠣ ꠀꠔꠦ ꠛꠤꠟꠣꠁ ꠖꠤꠍꠦ, ꠉꠞꠤꠛ ꠅꠇꠟꠞꠦ ꠖꠣꠘ ꠇꠞꠍꠦ, ꠔꠣꠞ ꠙꠞꠦꠎꠉꠣꠞꠤ ꠌꠤꠞꠇꠣꠟ ꠡ꠆ꠕꠣꠄꠁ।
2CO 9:10 ꠝꠘꠅ ꠞꠣꠈꠤꠅ, ꠉꠤꠞꠡ꠆ꠔꠞ ꠟꠣꠉꠤ ꠎꠦꠁꠘ ꠛꠤꠌ ꠎꠥꠉꠣꠁꠀ ꠖꠦꠁꠘ, ꠀꠞ ꠈꠣꠁꠛꠣꠞ ꠟꠣꠉꠤ ꠎꠦꠁꠘ ꠖꠣꠘꠣ-ꠙꠣꠘꠤ ꠎꠥꠉꠣꠁꠀ ꠖꠦꠁꠘ, ꠔꠣꠁꠘ ꠔꠥꠝꠞꠣꠞꠦꠅ ꠛꠤꠌ ꠎꠥꠉꠣꠁ ꠖꠤꠛꠣ, ꠁꠔꠣꠔ ꠛꠞꠇꠔ ꠖꠤꠛꠣ, ꠔꠥꠝꠞꠣꠞ ꠘꠦꠇ ꠇꠣꠝꠞ ꠚꠡꠟ ꠛꠃꠔ ꠛꠣꠠꠣꠁ ꠖꠤꠛꠣ।
2CO 9:11 ꠅꠃ ꠟꠣꠈꠣꠘ ꠔꠥꠝꠞꠣ ꠢꠇꠟꠝꠘ꠆ꠔꠦ ꠗꠘꠤ ꠅꠁꠛꠣꠄ, ꠀꠞ ꠈꠥꠟꠣ ꠀꠔꠦ ꠖꠣꠘ-ꠈꠄꠞꠣꠔ ꠛꠤꠟꠣꠁꠛꠣꠄ, ꠔꠦꠃ ꠀꠝꠞꠣꠞ ꠝꠣꠎꠖꠤ ꠀꠟ꠆ꠟꠣꠞ ꠡꠥꠇꠥꠞ-ꠉꠥꠎꠣꠞ ꠀꠖꠣꠄ ꠅꠁꠛ।
2CO 9:12 ꠅꠃ ꠞꠤꠟꠤꠚ ꠇꠣꠝꠦ ꠈꠣꠟꠤ ꠀꠟ꠆ꠟꠣꠞ ꠛꠘ꠆ꠖꠣ ꠅꠇꠟꠞ ꠅꠜꠣꠛꠅ ꠡꠣꠁꠎ꠆ꠎ ꠅꠁꠔ ꠘꠣꠄ, ꠛꠞꠋ ꠛꠃꠔ ꠎꠘꠞ ꠔꠞꠚ ꠕꠣꠇꠤ ꠀꠟ꠆ꠟꠣꠞ ꠡꠥꠇꠥꠞ-ꠉꠥꠎꠣꠞꠅ ꠛꠣꠁꠀ ꠙꠠꠦꠞ।
2CO 9:13 ꠔꠥꠝꠞꠣ ꠀꠟ-ꠝꠍꠤꠞ ꠈꠥꠡ-ꠈꠛꠞꠤꠞ ꠃꠙꠎꠥꠇ꠆ꠔ ꠅꠃ ꠈꠦꠎꠝꠔ ꠇꠞꠍ ꠖꠦꠈꠤꠀ, ꠔꠣꠞꠣ ꠀꠟ꠆ꠟꠣꠞ ꠡꠥꠇꠥꠞ-ꠉꠥꠎꠣꠞ ꠀꠖꠣꠄ ꠇꠞꠛꠣ। ꠔꠥꠝꠞꠣ ꠖꠥꠁꠅ ꠀꠔꠦ ꠖꠣꠘ-ꠈꠄꠞꠣꠔ ꠛꠤꠟꠣꠘꠤꠄ, ꠝꠣꠇꠤꠖꠘꠤꠀꠞ ꠝꠣꠘꠡꠦ ꠀꠞ ꠛꠣꠇꠤ ꠢꠇꠟꠦꠃ ꠀꠟ꠆ꠟꠣꠞ ꠉꠃꠞꠛ ꠇꠞꠛꠣ।
2CO 9:14 ꠔꠥꠝꠞꠣ ꠖꠣꠘ-ꠈꠄꠞꠣꠔ ꠖꠦꠅꠀꠄ ꠀꠟ꠆ꠟꠣꠞ ꠉꠦꠍ ꠕꠣꠇꠤ ꠅꠃ ꠎꠦ ꠀꠌꠣꠘꠇ ꠘꠤꠀꠝꠔ ꠙꠣꠁꠍ, ꠅꠔꠣ ꠖꠦꠈꠤꠀ ꠔꠣꠞꠣ ꠔꠥꠝꠞꠣꠞ ꠟꠣꠉꠤ ꠖꠤꠟꠦ-ꠎꠣꠘꠦ ꠖꠥꠀ ꠇꠞꠛꠣ।
2CO 9:15 ꠀꠟ꠆ꠟꠣꠞ ꠎꠦ ꠖꠣꠘꠞ ꠇꠕꠣ ꠝꠥꠈꠖꠤ ꠇꠁꠀ ꠚꠥꠠꠣꠘꠤꠞ ꠡꠣꠁꠖ꠆ꠖ ꠘꠣꠁ, ꠢꠃ ꠖꠣꠘꠞ ꠟꠣꠉꠤ ꠔꠣꠘ ꠔꠣꠞꠤꠚ ꠅꠃꠇ।
2CO 10:1 ꠅ ꠝꠥꠝꠤꠘ ꠜꠣꠁꠀꠁꠘ, ꠀꠟ-ꠝꠍꠤꠞ ꠘꠞꠝ ꠀꠞ ꠖꠄꠀꠟꠥ ꠜꠣꠛꠞ ꠇꠕꠣ ꠁꠀꠖ ꠇꠞꠤꠀ, ꠀꠝꠤ ꠙꠣꠃꠟꠥꠍꠦ ꠔꠥꠝꠞꠣꠞꠦ ꠝꠤꠘꠔ ꠇꠞꠤꠀꠞ, ꠝꠣꠘꠡꠦ ꠇꠂꠘ, ꠀꠝꠤ ꠎꠦꠛꠟꠣ ꠔꠥꠝꠞꠣꠞ ꠟꠉꠦ ꠞꠁ, ꠅꠃ ꠡꠝꠄ ꠀꠝꠤ ꠛꠥꠟꠦ ꠒꠞꠣꠁ ꠒꠞꠣꠁ ꠕꠣꠇꠤ, ꠀꠞ ꠢꠞꠤꠀ ꠉꠤꠀ ꠢꠣꠞꠟꠦ ꠡꠣꠅꠡꠤ ꠅꠁꠎꠣꠁ।
2CO 10:2 ꠔꠦ ꠎꠦꠞꠣ ꠝꠘꠅ ꠇꠞꠦ, ꠀꠝꠞꠣ ꠖꠥꠘꠤꠀꠛꠤ ꠝꠣꠘꠡꠞ ꠟꠣꠈꠣꠘ ꠎꠤꠘ꠆ꠖꠦꠉꠤ ꠇꠣꠐꠣꠁꠀꠞ, ꠔꠣꠞꠣꠞ ꠟꠉꠦ ꠎꠔꠈꠣꠘ ꠡꠣꠅꠡ ꠖꠦꠈꠣꠘꠤ ꠖꠞꠇꠣꠞ, ꠀꠝꠤ ꠌꠣꠁꠞꠣꠝ, ꠀꠝꠤ ꠀꠅꠀꠞ ꠛꠣꠖꠦ ꠎꠣꠘꠥ ꠅꠔꠈꠣꠘ ꠡꠣꠅꠡ ꠖꠦꠈꠣꠘꠤ ꠘꠣ ꠟꠣꠉꠦ।
2CO 10:3 ꠀꠝꠞꠣ ꠎꠥꠖꠤꠅ ꠞꠇ꠆ꠔ-ꠝꠣꠋꠡꠞ ꠝꠣꠘꠥꠡ, ꠅꠁꠟꠦ ꠀꠝꠞꠣ ꠎꠦ ꠟꠣꠠꠣꠁ ꠇꠞꠞꠣꠝ, ꠁꠔꠣ ꠔ ꠇꠥꠘꠥ ꠞꠇ꠆ꠔ-ꠝꠣꠋꠡꠞ ꠟꠣꠠꠣꠁ ꠘꠣꠄ।
2CO 10:4 ꠖꠥꠘꠤꠀꠛꠤ ꠍꠤꠙꠣꠁꠄ ꠎꠦꠔꠣ ꠅꠡꠔ꠆ꠞ-ꠡꠡꠔ꠆ꠞ ꠖꠤꠀ ꠟꠣꠠꠣꠁ ꠇꠞꠂꠘ, ꠀꠝꠞꠣ ꠔ ꠁꠔꠣ ꠖꠤꠀ ꠟꠣꠠꠣꠁ ꠇꠞꠤ ꠘꠣ, ꠀꠟ꠆ꠟꠣꠁ ꠛꠟꠦ ꠀꠝꠞꠣꠞ ꠅꠡꠔ꠆ꠞ-ꠡꠡꠔ꠆ꠞꠄ ꠙꠣꠠꠞ ꠃꠙꠞꠞ ꠛꠣꠋꠇꠣꠞꠅ ꠜꠣꠋꠉꠤꠟꠔ ꠙꠣꠞꠦ।
2CO 10:5 ꠀꠝꠞꠣꠞ ꠅꠡꠔ꠆ꠞꠖꠤ ꠝꠣꠘꠡꠞ ꠛꠣꠘꠥꠀꠐ ꠎꠥꠇ꠆ꠔꠤ ꠛꠤꠘꠣꠡ ꠇꠞꠤ, ꠀꠞ ꠀꠟ꠆ꠟꠣꠞꠦ ꠌꠤꠘꠣꠞ ꠙꠕꠦ ꠎꠔ ꠟꠣꠈꠣꠘ ꠛꠣꠗꠣ-ꠛꠤꠊꠘꠄ ꠖꠤꠟꠞꠦ ꠀꠐꠇꠣꠁꠀ ꠞꠣꠈꠦ, ꠁꠔꠣꠞꠦꠅ ꠛꠤꠘꠣꠡ ꠇꠞꠤ। ꠝꠣꠘꠡꠞ ꠝꠘꠞ ꠢꠇꠟ ꠇꠥ-ꠌꠤꠘ꠆ꠔꠣꠞꠦ ꠈꠦꠖꠣꠁꠀ ꠢꠣꠞꠤ ꠀꠟ-ꠝꠍꠤꠞ ꠔꠟꠦ ꠀꠘꠤ।
2CO 10:6 ꠔꠦ ꠔꠥꠝꠞꠣ ꠎꠦꠛꠟꠣ ꠡꠥꠟ꠆ꠟꠀꠘꠣ ꠛꠣꠁꠖ꠆ꠖ ꠅꠁꠀ ꠔꠣꠘ ꠔꠟꠦ ꠀꠁꠛꠣꠄ, ꠢꠃ ꠡꠝꠄ ꠎꠦꠔꠣ ꠅꠛꠣꠁꠖ꠆ꠖ ꠞꠁꠛꠣ, ꠁꠔꠣꠞꠦ ꠡꠣꠎꠣ ꠖꠤꠛꠣꠞ ꠟꠣꠉꠤ ꠀꠝꠞꠣ ꠎꠥꠁꠔ ꠅꠁꠝꠥ।
2CO 10:7 ꠔꠥꠝꠞꠣ ꠔ ꠈꠣꠟꠤ ꠀꠝꠞꠣꠞ ꠛꠣꠁꠞꠞ ꠍꠥꠞꠔ ꠖꠦꠈꠍ। ꠇꠥꠘꠥ ꠝꠣꠘꠡꠦ ꠎꠥꠖꠤ ꠘꠤꠎꠞꠦ ꠀꠟ-ꠝꠍꠤꠞ ꠃꠝ꠆ꠝꠔ ꠝꠘꠅ ꠇꠞꠦ, ꠔꠦ ꠔꠣꠞ ꠌꠤꠘ꠆ꠔꠣ ꠇꠞꠣ ꠎꠞꠥꠞ, ꠢꠦ ꠎꠣꠘ ꠃꠝ꠆ꠝꠔ, ꠀꠝꠞꠣꠅ ꠔ ꠔꠣꠘ ꠃꠝ꠆ꠝꠔ।
2CO 10:8 ꠀꠍꠟꠦ ꠝꠣꠟꠤꠇ ꠁꠍꠣꠄ ꠀꠝꠞꠣꠞꠦ ꠎꠦ ꠅꠗꠤꠇꠣꠞ ꠖꠤꠍꠂꠘ, ꠁ ꠛꠦꠙꠣꠞꠦ ꠀꠝꠤ ꠇꠤꠍꠥ ꠛꠠꠣꠁ ꠖꠦꠈꠣꠁꠟꠦꠅ ꠔ ꠡꠞꠝꠤꠘ꠆ꠖꠣ ꠅꠁꠔꠣꠝ ꠘꠣꠄ। ꠇꠣꠞꠘ ꠁ ꠅꠗꠤꠇꠣꠞꠞ ꠃꠖ꠆ꠖꠦꠡ꠆ꠡ ꠅꠁꠟ, ꠔꠥꠝꠞꠣꠞꠦ ꠉꠠꠤꠀ ꠔꠥꠟꠣ, ꠇꠥꠘꠥ ꠈꠦꠔꠤ ꠇꠞꠣ ꠘꠣꠄ।
2CO 10:9 ꠀꠝꠣꠞ ꠁ ꠟꠦꠈꠣ ꠙꠠꠤꠀ ꠝꠘꠅ ꠇꠞꠤꠅ ꠘꠣ, ꠀꠝꠤ ꠌꠤꠑꠤ ꠖꠤꠀ ꠔꠥꠝꠞꠣꠞꠦ ꠒꠞ ꠖꠦꠈꠣꠁꠞꠣꠝ।
2CO 10:10 ꠇꠥꠘꠥ ꠇꠥꠘꠥ ꠝꠣꠘꠡꠦ ꠝꠣꠔꠂꠘ, “ꠔꠣꠘ ꠟꠦꠈꠣ ꠌꠤꠑꠤꠘ꠆ꠔꠦ ꠖꠤꠟꠅ ꠒꠦꠇ꠆ꠇꠣ ꠝꠣꠞꠦ, ꠁꠔꠣ ꠡꠇ꠆ꠔꠤꠡꠣꠟꠤ ꠌꠤꠑꠤ, ꠅꠁꠟꠦ ꠔꠣꠁꠘ ꠇꠣꠘ꠆ꠖꠣꠔ ꠀꠁꠟꠦ ꠖꠦꠈꠣ ꠎꠣꠄ, ꠔꠣꠁꠘ ꠇꠝꠎꠥꠞ ꠀꠞ ꠅꠀꠎ-ꠘꠍꠤꠅꠔꠅ ꠝꠥꠐꠦꠃ ꠉꠞꠝ ꠘꠣꠄ।”
2CO 10:11 ꠅꠔꠣ ꠝꠣꠘꠡꠞꠦ ꠎꠣꠘꠣꠘꠤꠞ ꠟꠣꠉꠤ ꠇꠁꠞꠣꠝ, ꠀꠝꠞꠣ ꠖꠥꠞꠁ ꠕꠣꠇꠤ ꠌꠤꠑꠤꠞ ꠝꠣꠎꠖꠤ ꠎꠦꠔꠣ ꠟꠦꠈꠞꠣꠝ, ꠍꠣꠝꠘꠦ ꠀꠁꠟꠦ ꠑꠤꠇ ꠅꠟꠣꠃ ꠇꠞꠝꠥ।
2CO 10:12 ꠔꠥꠝꠞꠣꠞ ꠝꠣꠎꠞ ꠇꠥꠘꠥ ꠇꠥꠘꠥ ꠎꠘꠦ ꠔꠣꠞ ꠘꠤꠎꠞ ꠔꠣꠞꠤꠚ ꠉꠣꠄ। ꠔꠣꠞꠣꠞ ꠟꠉꠦ ꠔ ꠀꠝꠞꠣꠞ ꠔꠥꠟꠘꠣ ꠌꠟꠦ ꠘꠣ, ꠛꠣ ꠔꠣꠞꠣꠞ ꠖꠟꠞ ꠡꠖꠁꠡ꠆ꠡ ꠅꠁꠔꠦꠅ ꠡꠣꠅꠡ ꠇꠞꠤ ꠘꠣ। ꠔꠣꠞꠣ ꠔ ꠘꠤꠎꠦ ꠘꠤꠎꠦ ꠎꠦꠔꠣ ꠜꠣꠟꠣ ꠝꠘꠅ ꠇꠞꠂꠘ, ꠅꠔꠣꠞ ꠟꠉꠦꠃ ꠔꠣꠞꠣꠞ ꠔꠥꠟꠘꠣ ꠇꠞꠂꠘ, ꠅꠔꠣꠖꠤꠃ ꠛꠤꠌꠣꠞ ꠇꠞꠂꠘ, ꠛꠥꠎꠞꠣꠄ ꠘꠤ, ꠁꠔꠣ ꠇꠔ ꠛꠠ ꠀꠝ꠆ꠝꠇ!
2CO 10:13 ꠢꠥꠘꠅ, ꠀꠝꠞꠣꠞ ꠎꠔꠈꠣꠘ ꠛꠠꠣꠁ ꠇꠞꠣ ꠃꠌꠤꠔ, ꠄꠞ ꠛꠦꠡꠤ ꠇꠞꠔꠣꠝ ꠘꠣꠄ, ꠛꠞꠋ ꠀꠟ꠆ꠟꠣꠄ ꠀꠝꠞꠣꠞ ꠇꠣꠝꠞ ꠎꠦ ꠡꠤꠝꠣꠘꠣ ꠑꠤꠇ ꠇꠞꠤ ꠖꠤꠍꠂꠘ, ꠀꠝꠞꠣ ꠄꠞ ꠜꠤꠔꠞꠦ ꠞꠁꠀꠃ ꠛꠠꠣꠁ ꠇꠞꠝꠥ, ꠁ ꠡꠤꠝꠣꠘꠣꠞ ꠜꠤꠔꠞꠦ ꠔꠥꠝꠞꠣꠅ ꠀꠍ।
2CO 10:14 ꠄꠞꠟꠣꠉꠤ ꠀꠝꠞꠣ ꠎꠦꠛꠟꠣ ꠔꠥꠝꠞꠣꠞ ꠉꠦꠍꠦ ꠉꠦꠍꠟꠣꠝ, ꠅꠃ ꠡꠝꠄ ꠡꠤꠝꠣꠞ ꠛꠣꠞꠣ ꠔ ꠉꠦꠍꠤ ꠘꠣ। ꠔꠥꠝꠞꠣꠞ ꠉꠦꠍꠦ ꠔ ꠢꠇꠟ ꠙꠄꠟꠣ ꠀꠝꠞꠣꠃ ꠀꠟ-ꠝꠍꠤꠞ ꠈꠥꠡ-ꠈꠛꠞꠤ ꠔꠛꠟꠤꠉ ꠇꠞꠣꠔ ꠉꠦꠍꠟꠣꠝ।
2CO 10:15 ꠄꠍꠣꠠꠣ ꠙꠞꠞ ꠇꠣꠝ ꠟꠁꠀ ꠀꠝꠞꠣ ꠉꠃꠞꠛ ꠇꠞꠤꠀꠞ ꠘꠣ, ꠁꠔꠣ ꠇꠞꠟꠦ ꠡꠤꠝꠣꠞ ꠛꠣꠞꠣ ꠅꠁꠟ ꠅꠘꠦ। ꠀꠝꠞꠣ ꠀꠡꠣ ꠇꠞꠤꠀꠞ, ꠔꠥꠝꠞꠣꠞ ꠁꠝꠣꠘꠤ ꠛꠟ ꠛꠣꠠꠣꠞ ꠟꠉꠦ ꠟꠉꠦ ꠔꠥꠝꠞꠣꠞ ꠝꠣꠎꠦ ꠀꠞꠅ ꠛꠃꠔ ꠇꠣꠝ ꠇꠞꠔꠣꠝ ꠙꠣꠞꠝꠥ।
2CO 10:16 ꠢꠃ ꠡꠝꠄ ꠔꠥꠝꠞꠣꠞ ꠉꠦꠍ ꠕꠣꠇꠤ ꠀꠞꠅ ꠖꠥꠞꠞ ꠖꠦꠡꠣꠁꠘ꠆ꠔꠅ ꠉꠤꠀ ꠈꠥꠡ-ꠈꠛꠞꠤ ꠔꠛꠟꠤꠉ ꠇꠞꠔꠣꠝ ꠙꠣꠞꠝꠥ। ꠔꠦꠃ ꠇꠥꠘꠥ ꠝꠣꠘꠡꠦ ꠇꠁꠔ ꠙꠣꠞꠔ ꠘꠣꠄ, ꠙꠞꠞ ꠇꠣꠝ ꠟꠁꠀ ꠀꠝꠞꠣ ꠛꠠꠣꠁ ꠇꠞꠤꠀꠞ।
2CO 10:17 ꠅꠁꠟꠦ ꠀꠟ꠆ꠟꠣꠞ ꠇꠣꠟꠣꠝꠅ ꠀꠍꠦ, “ꠎꠦ ꠝꠣꠘꠡꠦ ꠛꠠꠣꠁ ꠇꠞꠦ, ꠢꠦ ꠝꠣꠟꠤꠇ ꠝꠃꠟꠣꠞꠦ ꠟꠁꠀ ꠛꠠꠣꠁ ꠇꠞꠃꠇ।”
2CO 10:18 ꠇꠣꠞꠘ ꠘꠤꠎꠞ ꠡꠥꠘꠣꠝ ꠘꠤꠎꠦ ꠉꠣꠁꠟꠦꠃ ꠙꠞꠝꠣꠘ ꠅꠄ ꠘꠣ ꠢꠦ ꠜꠣꠟꠣ ꠝꠣꠘꠥꠡ, ꠛꠞꠋ ꠝꠣꠟꠤꠇ ꠝꠃꠟꠣꠄ ꠎꠣꠞ ꠡꠥꠘꠣꠝ ꠉꠣꠁꠘ, ꠢꠦ-ꠃ ꠜꠣꠟꠣ ꠢꠤꠡꠣꠛꠦ ꠙꠞꠝꠣꠘ ꠅꠄ।
2CO 11:1 ꠅ ꠝꠥꠝꠤꠘ ꠜꠣꠁ ꠅꠇꠟ, ꠀꠝꠤ ꠌꠣꠁꠞꠣꠝ, ꠀꠝꠣꠞ ꠕꠥꠠꠣ ꠛꠦꠀꠈꠟꠤ ꠔꠥꠝꠞꠣ ꠡꠁꠎ꠆ꠎ ꠇꠞ, ꠀꠞ ꠢꠣꠍꠣꠃ ꠔꠥꠝꠞꠣ ꠀꠝꠣꠞꠦ ꠡꠁꠎ꠆ꠎ ꠇꠞꠞꠣꠄꠅ।
2CO 11:2 ꠀꠟ꠆ꠟꠣꠁ ꠄꠡꠇꠤꠞ ꠎꠣꠟꠣꠄ ꠀꠝꠣꠞ ꠖꠤꠟꠅ ꠔꠥꠝꠞꠣꠞ ꠟꠣꠉꠤ ꠄꠇ ꠎꠣꠟꠣ ꠙꠄꠖꠣ ꠅꠁꠍꠦ। ꠔꠦ ꠀꠝꠤ ꠄꠇꠎꠘ ꠘꠡꠣꠞ ꠟꠉꠦ ꠔꠥꠝꠞꠣꠞ ꠛꠤꠀꠞ ꠝꠣꠔ-ꠇꠕꠣ ꠑꠤꠇ ꠇꠞꠤ ꠞꠣꠈꠍꠤ, ꠄꠘ ꠘꠣꠝ ꠀꠟ-ꠝꠍꠤ। ꠀꠝꠤ ꠌꠣꠁꠞꠣꠝ, ꠡꠔꠤ ꠇꠁꠘꠣ ꠢꠤꠡꠣꠛꠦ ꠔꠥꠝꠞꠣꠞꠦ ꠔꠣꠘ ꠀꠔꠅ ꠡꠝꠎꠣꠁ ꠖꠤꠔꠣꠝ।
2CO 11:3 ꠅꠁꠟꠦ ꠀꠝꠤ ꠒꠞꠣꠁꠀꠞ, ꠢꠃ ꠢꠣꠚꠦ ꠎꠦꠟꠣ ꠇꠥ-ꠛꠥꠖ꠆ꠖꠤ ꠖꠤꠀ ꠛꠤꠛꠤ ꠢꠣꠅꠀꠞꠦ ꠛꠦ-ꠙꠕꠦ ꠘꠤꠍꠤꠟꠉꠤ, ꠅꠟꠣꠈꠣꠘ ꠔꠥꠝꠞꠣꠞꠦꠅ ꠀꠟ-ꠝꠍꠤꠞ ꠉꠦꠍ ꠕꠣꠇꠤ ꠢꠞꠣꠁꠟꠤꠔ ꠙꠣꠞꠦ, ꠢꠦ ꠔꠥꠝꠞꠣꠞ ꠖꠤꠟꠞ ꠈꠣꠐꠤ ꠜꠣꠛ ꠀꠞ ꠝꠘꠞ ꠘꠤꠡꠣꠘꠣ ꠀꠟꠣꠁꠟꠤꠛ।
2CO 11:4 ꠇꠣꠞꠘ ꠀꠝꠞꠣ ꠎꠦ ꠁꠍꠣꠞ ꠛꠦꠙꠣꠞꠦ ꠔꠛꠟꠤꠉ ꠇꠞꠍꠤ, ꠅꠁꠘ꠆ꠘ ꠎꠘꠦ ꠎꠦꠛꠟꠣ ꠔꠣꠘꠞꠦ ꠍꠣꠠꠣ ꠖꠥꠍꠞꠣ ꠇꠥꠘꠥ ꠁꠍꠣꠞ ꠇꠕꠣ ꠔꠛꠟꠤꠉ ꠇꠞꠦ, ꠔꠥꠝꠞꠣ ꠁꠔꠣ ꠝꠣꠘꠞꠣꠄ। ꠀꠞ ꠔꠥꠝꠞꠣ ꠎꠦ ꠙꠣꠇ ꠞꠥꠢꠥ ꠙꠣꠁꠍ, ꠅꠃ ꠙꠣꠇ ꠞꠥꠢꠥ ꠍꠣꠠꠣ ꠖꠥꠍꠞꠣ ꠇꠥꠘꠥ ꠞꠥꠢꠥ ꠙꠣꠁꠟꠦ, ꠛꠣ ꠎꠦ ꠈꠥꠡ-ꠈꠛꠞꠤ ꠔꠥꠝꠞꠣ ꠝꠣꠘꠞꠣꠄ, ꠁ ꠈꠥꠡ-ꠈꠛꠞꠤ ꠍꠣꠠꠣ ꠖꠥꠍꠞꠣ ꠇꠥꠘꠥ ꠈꠥꠡ-ꠈꠛꠞꠤ ꠢꠥꠘꠟꠦ, ꠈꠥꠛ ꠈꠥꠡꠤ ꠅꠁꠀꠃ ꠝꠣꠘꠤꠟꠤꠞꠣꠄ।
2CO 11:5 ꠅꠁꠟꠦ ꠀꠝꠤ ꠝꠘꠅ ꠇꠞꠤ ꠘꠣ, ꠢꠃ ꠘꠣꠝ-ꠒꠣꠇꠤ ꠍꠣꠢꠣꠛꠤ ꠖꠟ ꠕꠣꠇꠤ ꠀꠝꠤ ꠇꠥꠘꠥꠝꠘ꠆ꠔꠦꠃ ꠢꠥꠞꠥ।
2CO 11:6 ꠀꠝꠤ ꠎꠥꠖꠤꠅ ꠈꠥꠛ ꠝꠤꠑꠣ ꠝꠤꠑꠣ ꠡꠥꠞꠦ ꠅꠀꠎ ꠇꠞꠔꠣꠝ ꠙꠣꠞꠤ ꠘꠣ, ꠔꠦꠛꠃ ꠀꠝꠣꠞ ꠔ ꠀꠈꠟ-ꠛꠥꠖ꠆ꠖꠤꠞ ꠇꠝꠔꠤ ꠘꠣꠄ, ꠁꠔꠣ ꠔ ꠀꠝꠤ ꠢꠇꠟ ꠘꠝꠥꠘꠣꠄ ꠢꠇꠟ ꠢꠣꠟꠔꠦ ꠔꠥꠝꠞꠣꠞꠦ ꠖꠦꠈꠣꠁꠍꠤ।
2CO 11:7 ꠔꠥꠝꠞꠣꠞ ꠃꠘ꠆ꠘꠔꠤ ꠖꠦꠈꠣꠘꠤꠞ ꠟꠣꠉꠤ ꠀꠝꠤ ꠛꠤꠘꠣ ꠛꠦꠔꠘꠦ ꠀꠟ꠆ꠟꠣꠞ ꠖꠦꠅꠀ ꠈꠥꠡ-ꠈꠛꠞꠤ ꠔꠛꠟꠤꠉ ꠇꠞꠤꠀ ꠘꠤꠎꠞꠦ ꠘꠤꠌꠣ ꠇꠞꠍꠤ, ꠁꠔꠣ ꠇꠥꠘꠥ ꠙꠣꠙ ꠇꠞꠍꠤ ꠘꠤ?
2CO 11:8 ꠔꠥꠝꠞꠣꠞ ꠈꠦꠎꠝꠔꠞ ꠟꠣꠉꠤ ꠀꠝꠤ ꠅꠁꠘ꠆ꠘ ꠎꠝꠣꠔ ꠅꠇꠟꠞ ꠉꠦꠍ ꠕꠣꠇꠤ ꠡꠣꠁꠎ꠆ꠎ ꠀꠘꠍꠤ, ꠇꠁꠔꠦ ꠉꠦꠟꠦ ꠔꠣꠞꠣꠞꠦ ꠟꠥꠐꠤꠀ ꠀꠘꠍꠤ।
2CO 11:9 ꠔꠥꠝꠞꠣꠞ ꠉꠦꠍꠦ ꠞꠅꠀꠞ ꠇꠣꠟꠅ ꠀꠝꠤ ꠎꠦꠛꠟꠣ ꠅꠜꠣꠛꠅ ꠙꠠꠟꠣꠝ, ꠢꠃ ꠡꠝꠄꠅ ꠀꠝꠤ ꠇꠦꠃꠞꠞ ꠛꠥꠏꠣ ꠅꠁꠍꠤ ꠘꠣ। ꠇꠣꠞꠘ ꠝꠣꠇꠤꠖꠘꠤꠀ ꠕꠣꠇꠤ ꠎꠦꠔꠣ ꠜꠣꠁꠀꠁꠘ ꠀꠁꠍꠟꠣ, ꠔꠣꠞꠣ ꠀꠝꠣꠞꠦ ꠡꠣꠁꠎ꠆ꠎ ꠇꠞꠍꠂꠘ। ꠔꠦ ꠇꠥꠘꠥ ꠢꠣꠟꠔꠦꠃ ꠀꠝꠤ ꠔꠥꠝꠞꠣꠞ ꠛꠥꠏꠣ ꠅꠁꠍꠤ ꠘꠣ, ꠅꠁꠔꠣꠝꠅ ꠘꠣꠄ।
2CO 11:10 ꠀꠟ-ꠝꠍꠤꠞ ꠎꠦ ꠢꠇꠤꠇꠔꠤ ꠀꠝꠣꠞ ꠜꠤꠔꠞꠦ ꠀꠍꠦ ꠅꠃ ꠢꠇꠞ ꠛꠟꠦꠃ ꠀꠝꠤ ꠇꠁꠞꠣꠝ, ꠀꠡ꠆ꠔꠣ ꠉ꠆ꠞꠤꠍ ꠖꠦꠡꠞ ꠇꠥꠘꠥ ꠎꠣꠉꠣꠔꠃ ꠀꠝꠣꠞ ꠁ ꠛꠦꠐꠣꠉꠤꠞꠤ ꠇꠦꠃ ꠛꠘ꠆ꠖ ꠇꠞꠔ ꠙꠣꠞꠔ ꠘꠣꠄ।
2CO 11:11 ꠀꠝꠤ ꠁꠟꠣ ꠝꠣꠔꠣꠞ ꠇꠣꠞꠘ ꠇꠤꠔꠣ? ꠀꠝꠤ ꠔꠥꠝꠞꠣꠞꠦ ꠝꠣꠄꠀ ꠇꠞꠤ ꠘꠣ ꠘꠤ? ꠄꠇ ꠀꠟ꠆ꠟꠣꠄꠃ ꠎꠣꠘꠂꠘ, ꠀꠝꠤ ꠔꠥꠝꠞꠣꠞꠦ ꠇꠔ ꠝꠣꠄꠀ ꠇꠞꠤ।
2CO 11:12 ꠘꠤꠎꠞ ꠛꠠꠣꠁ-ꠛꠦꠐꠣꠉꠤꠞꠤ ꠖꠦꠈꠣꠁꠀ ꠎꠦꠉꠥꠁꠘ ꠀꠝꠞꠣꠞ ꠢꠝꠣꠘꠤ ꠅꠁꠔꠣ ꠌꠣꠁꠘ, ꠁꠔꠣꠄ ꠎꠣꠘꠥ ꠁ ꠡꠥꠎꠥꠉ ꠘꠣ ꠙꠣꠁꠘ, ꠅꠔꠣꠞ ꠟꠣꠉꠤ ꠀꠝꠤ ꠎꠦꠈꠣꠘ ꠇꠞꠣꠔ ꠀꠍꠤ, ꠁꠈꠣꠘ ꠇꠞꠣꠔ ꠞꠁꠝꠥꠃ।
2CO 11:13 ꠀꠍꠟꠦ ꠔ ꠁꠔꠣ ꠅꠁꠟꠣ ꠜꠘ꠆ꠒ ꠍꠣꠢꠣꠛꠤ ꠀꠞ ꠐꠉ ꠇꠣꠝꠟꠣꠁꠘ। ꠔꠣꠞꠣ ꠘꠤꠎꠞꠦ ꠀꠟ-ꠝꠍꠤꠞ ꠍꠣꠢꠣꠛꠤ ꠖꠦꠈꠣꠁꠔ ꠇꠞꠤ ꠘꠤꠎꠞ ꠍꠥꠞꠔ ꠛꠖꠟꠤꠟꠣꠄ।
2CO 11:14 ꠄꠔꠦ ꠔꠣꠁꠎ꠆ꠎꠥꠛ ꠅꠀꠞ ꠇꠥꠘ꠆ꠔꠣ ꠘꠣꠄ, ꠁꠛꠟꠤꠍꠦꠅ ꠔ ꠘꠤꠎꠞꠦ ꠘꠥꠞꠞ ꠚꠤꠞꠤꠡ꠆ꠔꠣ ꠖꠦꠈꠣꠘꠤꠞ ꠟꠣꠉꠤ ꠔꠣꠞ ꠍꠥꠞꠔ ꠛꠖꠟꠣꠄ।
2CO 11:15 ꠄꠞꠟꠣꠉꠤ ꠎꠦꠉꠥꠁꠘ꠆ꠔꠦ ꠁꠛꠟꠤꠍꠞ ꠈꠦꠎꠝꠔ ꠇꠞꠂꠘ, ꠔꠣꠞꠣꠅ ꠎꠥꠖꠤ ꠘꠤꠎꠞ ꠍꠥꠞꠔ ꠛꠖꠟꠣꠁꠀ ꠖꠦꠈꠣꠁꠘ ꠔꠣꠞꠣ ꠘꠦꠇ ꠇꠣꠝ ꠇꠞꠞꠣ, ꠔꠦ ꠔꠣꠁꠎ꠆ꠎꠥꠛ ꠅꠀꠞ ꠇꠤꠔꠣ ꠀꠍꠦ? ꠔꠣꠞꠣꠞ ꠇꠣꠝꠞ ꠚꠟ ꠔꠣꠞꠣ ꠀꠈꠦꠞꠣꠔꠅ ꠙꠣꠁꠛ।
2CO 11:16 ꠀꠝꠤ ꠀꠞꠇꠛꠣꠞ ꠇꠁꠞꠣꠝ, ꠀꠝꠣꠞꠦ ꠎꠣꠘꠥ ꠇꠦꠃ ꠙꠣꠉꠟ ꠝꠘꠅ ꠘꠣ ꠇꠞꠦ। ꠀꠞ ꠎꠥꠖꠤ ꠁꠟꠣ ꠝꠘꠅ ꠇꠞꠤꠟꠣꠅ, ꠔꠦ ꠀꠝꠣꠞꠦ ꠄꠇ ꠙꠣꠉꠟ ꠢꠤꠡꠣꠛꠦꠃ ꠡꠝꠎꠤꠟꠣꠅ, ꠎꠣꠔꠦ ꠀꠝꠤꠅ ꠕꠥꠠꠣ ꠛꠠꠣꠁ ꠇꠞꠣꠞ ꠡꠥꠎꠥꠉ ꠙꠣꠁ।
2CO 11:17 ꠀꠝꠤ ꠅꠈꠘ ꠎꠦꠔꠣ ꠇꠁꠞꠣꠝ, ꠁꠔꠣ ꠝꠣꠟꠤꠇ ꠁꠍꠣꠞ ꠢꠥꠇꠥꠝꠦ ꠇꠁꠞꠣꠝ ꠘꠣ, ꠈꠣꠟꠤ ꠘꠤꠎꠞ ꠛꠠꠣꠁ ꠖꠦꠈꠣꠘꠤꠔ ꠉꠤꠀ ꠙꠣꠉꠟꠣꠝꠤ ꠇꠞꠞꠣꠝ।
2CO 11:18 ꠛꠃꠔ ꠎꠘꠦ ꠎꠦꠛꠟꠣ ꠖꠥꠘꠤꠀꠛꠤ ꠛꠤꠡꠄ ꠟꠁꠀ ꠛꠠꠣꠁ ꠖꠦꠈꠣꠁꠞꠣ, ꠔꠦ ꠀꠝꠤ ꠇꠦꠘꠦ ꠖꠦꠈꠣꠁꠔꠣꠝ ꠘꠣ?
2CO 11:19 ꠔꠥꠝꠞꠣ ꠔ ꠛꠦꠡꠤ ꠀꠈꠟꠖꠣꠞ, ꠄꠞꠟꠣꠉꠤ ꠛꠦꠀꠈꠟ ꠅꠇꠟꠞꠦ ꠈꠥꠡ ꠖꠤꠟꠦ ꠡꠁꠎ꠆ꠎ ꠇꠞ।
2CO 11:20 ꠈꠣꠟꠤ ꠁꠈꠣꠘ ꠘꠣꠄ, ꠇꠦꠃ ꠎꠥꠖꠤ ꠔꠥꠝꠞꠣꠞꠦ ꠘꠤꠎꠞ ꠉꠥꠟꠣꠝ ꠛꠣꠘꠣꠁꠀ ꠞꠣꠈꠦ, ꠔꠥꠝꠞꠣꠞꠦ ꠔꠣꠞ ꠡꠤꠇꠣꠞ ꠛꠣꠘꠣꠁꠟꠣꠄ, ꠚꠣꠘ꠆ꠖꠅ ꠚꠣꠟꠣꠄ, ꠔꠥꠝꠞꠣꠞ ꠃꠙꠞꠦ ꠃꠡ꠆ꠔꠣꠖꠤ ꠇꠞꠦ ꠛꠣ ꠔꠥꠝꠞꠣꠞ ꠉꠣꠟꠅ ꠌꠠ ꠝꠣꠞꠦ, ꠔꠣ-ꠅ ꠔ ꠔꠥꠝꠞꠣ ꠈꠥꠡꠤ ꠅꠁꠀ ꠡꠁꠎ꠆ꠎ ꠇꠞꠞꠣꠄ।
2CO 11:21 ꠅꠁꠟꠦ ꠀꠝꠤ ꠈꠥꠛ ꠡꠞꠝꠤꠘ꠆ꠖꠣ ꠅꠁꠀ ꠡ꠆ꠛꠤꠇꠣꠞ ꠇꠞꠤꠀꠞ, ꠁꠔꠣ ꠛꠦꠙꠣꠞꠦ ꠔꠥꠝꠞꠣꠞ ꠉꠦꠍꠦ ꠀꠝꠞꠣ ꠛꠠ ꠇꠝꠎꠥꠞ ꠀꠍꠟꠣꠝ, ꠁꠟꠣ ꠘꠦꠔꠣꠉꠤꠞꠤ ꠇꠞꠔꠣꠝ ꠙꠣꠞꠍꠤ ꠘꠣ। ꠅꠁꠘ꠆ꠘ ꠝꠣꠘꠡꠦ ꠎꠦꠔꠣ ꠟꠁꠀ ꠛꠠꠣꠁ ꠇꠞꠣꠞ ꠡꠣꠅꠡ ꠙꠣꠄ, ꠀꠝꠣꠞꠅ ꠡꠣꠅꠡ ꠀꠍꠦ ꠁꠔꠣ ꠛꠦꠙꠣꠞꠦ ꠛꠠꠣꠁ ꠖꠦꠈꠣꠘꠤꠞ, ꠀꠝꠤ ꠈꠣꠟꠤ ꠙꠣꠉꠟꠞ ꠟꠣꠈꠣꠘ ꠁꠔꠣ ꠝꠣꠔꠤꠞꠣꠝ।
2CO 11:22 ꠎꠦꠔꠣꠄ ꠛꠠꠣꠁ-ꠛꠦꠐꠣꠉꠤꠞꠤ ꠖꠦꠈꠣꠁꠘ, ꠔꠣꠞꠣ ꠇꠤꠔꠣ ꠁꠛꠞꠣꠘꠤ ꠎꠣꠔꠤꠞ ꠘꠤ? ꠀꠝꠤꠅ ꠔ ꠔꠣꠞꠣꠞ ꠟꠣꠈꠣꠘ। ꠔꠣꠞꠣ ꠛꠘꠤ ꠁꠍꠞꠣꠁꠟ ꠎꠣꠔꠤꠞ ꠘꠤ? ꠀꠝꠤꠅ ꠅꠟꠣ। ꠔꠣꠞꠣ ꠢꠎꠞꠔ ꠁꠛ꠆ꠞꠣꠢꠤꠝꠞ ꠀꠅꠟꠣꠖ ꠘꠤ? ꠀꠝꠤꠅ ꠔ।
2CO 11:23 ꠔꠣꠞꠣ ꠀꠟ-ꠝꠍꠤꠞ ꠈꠦꠎꠝꠔꠇꠣꠞꠤ ꠘꠤ? ꠀꠝꠤ ꠀꠞꠅ ꠛꠠ ꠈꠦꠎꠝꠔꠇꠣꠞꠤ। ꠝꠘꠅ ꠞꠣꠈꠤꠅ, ꠀꠝꠤ ꠙꠣꠉꠟꠞ ꠟꠣꠈꠣꠘ ꠝꠣꠔꠤꠞꠣꠝ। ꠀꠝꠤ ꠀꠟ-ꠝꠍꠤꠞ ꠈꠦꠎꠝꠔꠅ ꠟꠣꠉꠤꠀ ꠔꠣꠞꠣ ꠕꠣꠇꠤ ꠛꠃꠔ ꠛꠦꠡꠤ ꠝꠦꠘꠔ ꠇꠞꠍꠤ। ꠛꠃꠔ ꠛꠣꠞ ꠎꠦꠟ ꠈꠣꠐꠍꠤ, ꠛꠃꠔ ꠛꠣꠞ ꠝꠣꠁꠞ-ꠗꠁꠞ ꠈꠣꠁꠍꠤ, ꠀꠞ ꠛꠃꠔ ꠛꠣꠞ ꠝꠃꠔꠞ ꠝꠥꠇꠣꠛꠤꠟꠣ ꠅꠁꠍꠤ।
2CO 11:24 ꠁꠢꠥꠖꠤ ꠅꠇꠟꠦ ꠀꠝꠣꠞꠦ ꠙꠣꠌꠛꠣꠞ ꠖꠥꠞꠞꠣ ꠝꠣꠞꠍꠂꠘ, ꠙꠞꠔꠦꠇ ꠛꠣꠞ ꠃꠘꠥꠌꠣꠟ꠆ꠟꠤꠡꠐꠣ ꠇꠞꠤ ꠖꠥꠞꠞꠣ ꠈꠣꠁꠍꠤ।
2CO 11:25 ꠔꠤꠘꠛꠣꠞ ꠀꠝꠣꠞꠦ ꠍꠤꠋꠟꠣꠖꠤ ꠝꠣꠞꠣ ꠅꠁꠍꠦ। ꠄꠇꠛꠣꠞ ꠀꠝꠣꠞꠦ ꠙꠣꠔ꠆ꠔꠞ ꠝꠣꠞꠣ ꠅꠁꠍꠦ। ꠔꠤꠘꠛꠣꠞ ꠀꠝꠣꠞ ꠎꠣꠎ ꠒꠥꠛꠤ ꠉꠦꠍꠤꠟ, ꠀꠞ ꠄꠇ ꠖꠤꠘ ꠄꠇ ꠞꠣꠁꠔ ꠖꠞꠤꠀꠞ ꠙꠣꠘꠤꠔ ꠜꠣꠡꠣꠁꠟ ꠀꠍꠟꠣꠝ।
2CO 11:26 ꠀꠝꠤ ꠛꠃꠔ ꠖꠦꠡ ꠍꠚꠞ ꠇꠞꠍꠤ। ꠛꠣꠘ-ꠙꠣꠘꠤꠞ ꠀꠔꠅ, ꠌꠥꠞ-ꠒꠣꠇꠣꠁꠔꠞ ꠀꠔꠅ, ꠘꠤꠎꠞ ꠎꠣꠔꠤꠞ ꠀꠔꠅ ꠀꠞ ꠜꠤꠘ ꠎꠣꠔꠤꠞ ꠀꠔꠅ ꠀꠝꠤ ꠝꠍꠤꠛꠔꠅ ꠙꠠꠍꠤ। ꠄꠍꠣꠠꠣ ꠐꠣꠃꠘꠅ, ꠝꠞꠥꠜꠥꠝꠤꠔ, ꠖꠞꠤꠀꠔ, ꠀꠞ ꠜꠘ꠆ꠒ ꠝꠥꠝꠤꠘ ꠅꠇꠟꠞ ꠀꠔꠅꠃ ꠀꠝꠤ ꠝꠍꠤꠛꠔꠅ ꠙꠠꠍꠤ।
2CO 11:27 ꠅꠃ ꠖꠥꠈ-ꠝꠍꠤꠛꠔꠞ ꠝꠣꠎꠦꠅ ꠎꠣꠘꠦ-ꠙꠞꠣꠘꠦ ꠝꠦꠘꠔ ꠇꠞꠍꠤ, ꠛꠃꠔ ꠞꠣꠁꠔ ꠃꠎꠣꠉꠞꠤ ꠇꠞꠍꠤ, ꠈꠣꠘꠤ-ꠙꠣꠘꠤꠞ ꠟꠣꠉꠤ ꠇꠡ꠆ꠐ ꠙꠣꠁꠍꠤ, ꠛꠃꠔ ꠃꠙꠣꠡ-ꠈꠣꠙꠣꠡ ꠞꠁꠍꠤ, ꠡꠤꠔ ꠀꠞ ꠇꠣꠙꠠ-ꠌꠥꠙꠠꠞ ꠅꠜꠣꠛꠦꠅ ꠇꠡ꠆ꠐ ꠙꠣꠁꠍꠤ।
2CO 11:28 ꠁꠔꠣ ꠍꠣꠠꠣꠅ ꠀꠟ-ꠝꠍꠤꠞ ꠎꠝꠣꠔ ꠅꠇꠟꠞ ꠟꠣꠉꠤ ꠀꠝꠤ ꠙꠞꠔꠦꠇ ꠖꠤꠘ ꠌꠤꠘ꠆ꠔꠣ ꠇꠞꠤ।
2CO 11:29 ꠇꠦꠃ ꠇꠝꠎꠥꠞ ꠅꠁꠟꠦ ꠀꠝꠤ ꠘꠤꠎꠦꠅ ꠔꠣꠞ ꠇꠝꠎꠥꠞꠤꠞ ꠜꠣꠉꠤ ꠅꠁ ꠘꠣ ꠘꠤ? ꠇꠥꠘꠥ ꠇꠥ-ꠡꠋꠉꠤꠞ ꠔꠣꠟꠅ ꠙꠠꠤꠀ ꠇꠦꠃ ꠉꠥꠘꠣꠞ ꠙꠕꠦ ꠉꠦꠟꠦꠉꠤ, ꠀꠝꠤ ꠅꠡꠣꠘ꠆ꠔꠤ ꠇꠞꠤ ꠘꠣ ꠘꠤ?
2CO 11:30 ꠀꠝꠤ ꠎꠥꠖꠤ ꠛꠠꠣꠁ ꠖꠦꠈꠣꠁꠔꠣꠝ ꠌꠣꠁ, ꠔꠦ ꠅꠃ ꠇꠝꠎꠥꠞꠤ ꠟꠁꠀꠃ ꠛꠠꠣꠁ ꠇꠞꠝꠥ।
2CO 11:31 ꠀꠝꠞꠣꠞ ꠀꠟ꠆ꠟꠣ ꠙꠣꠇ ꠀꠞ ꠝꠣꠟꠤꠇ ꠁꠍꠣ ꠀꠟ-ꠝꠍꠤꠞ ꠉꠣꠁꠛꠤ ꠛꠣꠚ, ꠎꠦꠁꠘ ꠢꠣꠝꠦꠡꠣ ꠉꠃꠞꠛ ꠙꠣꠅꠀꠞ ꠟꠣꠈ, ꠔꠣꠁꠘ ꠘꠤꠎꠦꠃ ꠎꠣꠘꠂꠘ, ꠀꠝꠤ ꠇꠥꠘ꠆ꠔꠣꠃ ꠝꠤꠍꠣ ꠝꠣꠔꠞꠣꠝ ꠘꠣ।
2CO 11:32 ꠖꠣꠝꠦꠡ꠆ꠇꠞ ꠛꠣꠖꠡꠣ ꠀꠞꠤꠔꠣꠞ ꠢꠣꠇꠤꠝ ꠍꠣꠛꠦ ꠀꠝꠣꠞꠦ ꠗꠞꠣꠞ ꠟꠣꠉꠤ ꠖꠣꠝꠦꠡ꠆ꠇ ꠐꠣꠃꠘꠅ ꠙꠣꠞꠣ ꠖꠦꠅꠀꠞ ꠢꠥꠇꠥꠝ ꠖꠤꠍꠟꠣ।
2CO 11:33 ꠅꠁꠟꠦ ꠐꠣꠃꠘꠞ ꠛꠣꠃꠘ꠆ꠒꠞꠤꠞ ꠅꠀꠟꠞ ꠝꠣꠎꠦ ꠎꠦ ꠈꠤꠠꠇꠤ ꠀꠍꠤꠟ, ꠝꠥꠝꠤꠘ ꠜꠣꠁꠀꠁꠘ꠆ꠔꠦ ꠄꠇ ꠐꠥꠇꠞꠤꠔ ꠇꠞꠤ ꠅꠃ ꠈꠤꠠꠇꠤ ꠛꠣꠄꠖꠤ ꠀꠝꠣꠞꠦ ꠝꠣꠐꠤꠔ ꠟꠣꠝꠣꠁ ꠖꠤꠍꠟꠣ, ꠅꠃ ꠘꠝꠥꠘꠣꠄ ꠀꠝꠤ ꠔꠣꠘ ꠀꠔ ꠕꠣꠇꠤ ꠜꠣꠉꠤꠍꠤ।
2CO 12:1 ꠔꠦ ꠀꠝꠣꠞ ꠀꠞꠅ ꠇꠤꠍꠥ ꠛꠠꠣꠁ ꠇꠞꠣ ꠖꠞꠇꠣꠞ, ꠁ ꠛꠠꠣꠁꠄ ꠇꠥꠘꠥ ꠚꠣꠄꠖꠣ ꠘꠣꠁ, ꠅꠁꠟꠦ ꠝꠣꠟꠤꠇ ꠁꠍꠣꠄ ꠎꠦ ꠖꠞꠡꠘ ꠖꠦꠈꠣꠁꠍꠂꠘ ꠀꠞ ꠎꠦꠔꠣ ꠎꠣꠘꠣꠁꠍꠂꠘ, ꠁꠔꠣ ꠅꠈꠘ ꠇꠁꠞꠣꠝ।
2CO 12:2 ꠢꠎꠞꠔ ꠁꠍꠣꠞ ꠄꠇꠎꠘ ꠈꠣꠖꠤꠝꠞꠦ ꠀꠝꠤ ꠌꠤꠘꠤ, ꠅꠈꠘ ꠕꠣꠇꠤ ꠌꠃꠖ꠆ꠖ ꠛꠍꠞ ꠀꠉꠦ ꠝꠦꠞꠣꠎ ꠡꠞꠤꠚꠞ ꠟꠣꠉꠤ ꠔꠣꠘꠞꠦ ꠛꠦꠢꠦꠡ꠆ꠔꠅ ꠔꠥꠟꠤꠀ ꠘꠦꠅꠀ ꠅꠁꠍꠤꠟ। ꠔꠣꠁꠘ ꠎꠣꠘ꠆ꠘꠣꠔꠥꠟ-ꠚꠦꠞꠖꠃꠍꠅ ꠉꠦꠟꠣ, ꠁ ꠡꠝꠄ ꠔꠣꠁꠘ ꠡ-ꠡꠞꠤꠟꠦ ꠉꠦꠍꠂꠘ ꠇꠤ ꠘꠣ ꠎꠣꠘꠤ ꠘꠣ, ꠈꠣꠟꠤ ꠀꠟ꠆ꠟꠣꠄꠃ ꠎꠣꠘꠂꠘ।
2CO 12:3 ꠔꠦ ꠄꠘꠞꠦ ꠀꠝꠤ ꠌꠤꠘꠤ, ꠅꠁꠟꠦ ꠔꠣꠘꠦ ꠡ-ꠡꠞꠤꠟꠦ ꠘꠦꠅꠀ ꠅꠁꠍꠦ ꠇꠤ ꠘꠣ ꠀꠝꠤ ꠎꠣꠘꠤ ꠘꠣ, ꠈꠣꠟꠤ ꠀꠟ꠆ꠟꠣ ꠙꠣꠇꠦ ꠎꠣꠘꠂꠘ।
2CO 12:4 ꠝꠦꠞꠣꠎ ꠡꠞꠤꠚꠅ ꠘꠤꠀ ꠢꠣꠞꠟꠦ ꠔꠣꠘ ꠟꠉꠦ ꠛꠃꠔ ꠛꠣꠔꠌꠤꠔ ꠇꠞꠣ ꠅꠁꠍꠦ, ꠁꠔꠣ ꠛꠣꠔꠌꠤꠔ ꠝꠣꠘꠡꠞꠦ ꠢꠥꠘꠣꠘꠤ ꠑꠤꠇ ꠘꠣꠄ।
2CO 12:5 ꠅꠃꠟꠣ ꠝꠣꠘꠡꠞꠦ ꠟꠁꠀ ꠀꠝꠤ ꠛꠠꠣꠁ ꠇꠞꠝꠥ। ꠀꠝꠣꠞ ꠘꠤꠎꠞꠦ ꠟꠁꠀ ꠇꠥꠘꠥ ꠛꠠꠣꠁ ꠘꠣꠄ, ꠈꠣꠟꠤ ꠀꠝꠣꠞ ꠇꠝꠎꠥꠞꠤꠞ ꠟꠣꠉꠤ ꠛꠠꠣꠁ ꠇꠞꠝꠥ।
2CO 12:6 ꠅꠃ ꠛꠠꠣꠁ ꠖꠦꠈꠣꠁꠔꠦ ꠌꠣꠁꠟꠦꠅ, ꠀꠝꠤ ꠇꠥꠘꠥ ꠛꠦꠀꠈꠟꠤ ꠇꠞꠔꠣꠝ ꠘꠣꠄ, ꠈꠣꠟꠤ ꠢꠣꠍꠣ ꠝꠣꠔ ꠝꠣꠔꠤꠝꠥ। ꠔꠣ-ꠅ ꠀꠝꠤ ꠛꠠꠣꠁ ꠖꠦꠈꠣꠘꠤ ꠛꠣꠖ ꠖꠤꠟꠣꠁꠟꠣꠝ, ꠇꠤꠎꠣꠘꠥ ꠀꠝꠣꠞ ꠇꠣꠝ-ꠇꠣꠎ ꠖꠦꠈꠤꠀ ꠛꠣ ꠀꠝꠣꠞ ꠝꠥꠈꠞ ꠎꠛꠣꠘꠛꠘ꠆ꠖꠤ ꠢꠥꠘꠤꠀ, ꠝꠣꠘꠡꠦ ꠅꠈꠘ ꠀꠝꠣꠞꠦ ꠎꠔꠈꠣꠘ ꠝꠘꠅ ꠇꠞꠂꠘ, ꠄꠞ ꠌꠣꠁꠔꠦ ꠛꠦꠡꠤ ꠝꠘꠅ ꠇꠞꠤꠟꠣꠁꠘ।
2CO 12:7 ꠀꠟ꠆ꠟꠣꠄ ꠀꠝꠣꠞꠦ ꠅꠔ ꠛꠣꠔꠥꠘꠤ ꠛꠦꠙꠣꠞ ꠎꠣꠘꠣꠘꠤꠄ ꠀꠝꠣꠞ ꠖꠤꠟꠅ ꠎꠣꠘꠥ ꠅꠢꠋꠇꠣꠞ ꠘꠣ ꠀꠄ, ꠅꠃ ꠘꠤꠅꠔꠦ ꠔꠣꠁꠘ ꠀꠝꠣꠞ ꠡꠞꠤꠟꠅ ꠄꠇꠐꠣ ꠞꠤꠙꠥ ꠖꠤꠟꠣ, ꠀꠝꠣꠞꠦ ꠇꠡ꠆ꠐ ꠖꠤꠛꠣꠞ ꠟꠣꠉꠤ, ꠅꠃ ꠞꠤꠙꠥ ꠅꠁꠟ ꠁꠛꠟꠤꠍꠞ ꠌꠦꠟꠣ।
2CO 12:8 ꠝꠣꠟꠤꠇ ꠁꠍꠣꠞ ꠖꠞꠛꠣꠞꠅ ꠀꠝꠤ ꠔꠤꠘꠛꠣꠞ ꠀꠞꠎ ꠇꠞꠍꠟꠣꠝ, ꠅꠃ ꠞꠤꠙꠥꠉꠥ ꠀꠝꠣꠞ ꠉꠦꠍ ꠕꠣꠇꠤ ꠢꠞꠣꠁꠀ ꠘꠤꠔꠣꠉꠤ।
2CO 12:9 ꠅꠁꠟꠦ ꠔꠣꠁꠘ ꠎꠥꠀꠙ ꠖꠤꠟꠣ, “ꠀꠝꠣꠞ ꠞꠢꠝꠔꠃ ꠔꠥꠝꠣꠞ ꠛꠃꠔꠔꠣ, ꠀꠝꠣꠞ ꠛꠟ-ꠡꠇ꠆ꠔꠤ ꠝꠤꠟꠦ ꠈꠣꠟꠤ ꠇꠝꠎꠥꠞ ꠢꠣꠟꠔꠦ।” ꠄꠞꠟꠣꠉꠤ ꠀꠝꠣꠞ ꠇꠝꠎꠥꠞꠤꠞ ꠛꠦꠙꠣꠞꠦ ꠀꠝꠤ ꠈꠥꠡꠤ ꠝꠘꠦꠃ ꠛꠠꠣꠁ ꠇꠞꠝꠥ, ꠎꠣꠔꠦ ꠀꠟ-ꠝꠍꠤꠞ ꠅꠃ ꠛꠟ-ꠡꠇ꠆ꠔꠤ ꠀꠝꠣꠞ ꠝꠣꠎꠦ ꠛꠡꠔ ꠇꠞꠦ।
2CO 12:10 ꠔꠦ ꠀꠟ-ꠝꠍꠤꠞ ꠘꠣꠝꠞ ꠟꠣꠉꠤ ꠘꠣꠘꠣꠘ ꠟꠣꠈꠣꠘ ꠇꠝꠎꠥꠞꠤ, ꠛꠦꠁꠎ꠆ꠎꠔꠤ, ꠅꠜꠣꠛ-ꠅꠘꠐꠘ, ꠎꠥꠟꠥꠝ-ꠝꠍꠤꠛꠔ, ꠀꠞ ꠛꠦꠚꠣꠘꠣꠔ ꠙꠠꠟꠦꠅ ꠀꠝꠤ ꠈꠥꠡꠤ ꠅꠁ। ꠇꠣꠞꠘ ꠇꠝꠎꠥꠞ ꠢꠣꠟꠔꠦꠃ ꠀꠝꠤ ꠛꠟꠛꠣꠘ ꠅꠁ।
2CO 12:11 ꠀꠝꠤ ꠙꠣꠉꠟ ꠅꠁꠍꠤ ꠑꠤꠇꠃ, ꠅꠁꠟꠦ ꠔꠥꠝꠞꠣꠃ ꠀꠝꠣꠞꠦ ꠙꠣꠉꠟ ꠅꠁꠔꠦ ꠛꠣꠁꠖ꠆ꠖ ꠇꠞꠍ। ꠔꠥꠝꠞꠣꠞ ꠃꠌꠤꠔ ꠀꠍꠤꠟ ꠀꠝꠣꠞ ꠔꠣꠞꠤꠚ ꠇꠞꠣ। ꠀꠝꠤ ꠎꠥꠖꠤꠅ ꠈꠥꠛ ꠡꠣꠗꠣꠞꠘ ꠝꠣꠘꠥꠡ, ꠔꠦꠛꠃ ꠔꠥꠝꠞꠣꠞ ꠢꠃ ꠘꠣꠝ-ꠒꠣꠇꠤ ꠍꠣꠢꠣꠛꠤ ꠖꠟ ꠕꠣꠇꠤ ꠇꠥꠘꠥꠝꠘ꠆ꠔꠦꠃ ꠢꠥꠞꠥ ꠘꠣꠄ।
2CO 12:12 ꠀꠝꠤ ꠘꠤꠎꠞꠦ ꠄꠇꠎꠘ ꠢꠇ ꠍꠣꠢꠣꠛꠤ ꠢꠤꠡꠣꠛꠦ ꠙꠞꠝꠣꠘ ꠇꠞꠍꠤ, ꠛꠃꠔ ꠡꠁꠎ꠆ꠎ ꠇꠞꠤꠀ ꠔꠥꠝꠞꠣꠞ ꠝꠣꠎꠦ ꠘꠣꠘꠣꠘ ꠘꠝꠥꠘꠣꠞ ꠇꠦꠞꠣꠝꠔꠤ ꠇꠣꠝ, ꠇꠥꠖꠞꠔꠤ ꠘꠤꠡꠣꠘꠣ ꠀꠞ ꠝꠥꠎꠦꠎꠣ ꠖꠦꠈꠣꠁꠍꠤ।
2CO 12:13 ꠀꠁꠌ꠆ꠍꠣ ꠇꠅ ꠌꠣꠁꠘ, ꠅꠁꠘ꠆ꠘ ꠎꠝꠣꠔ ꠅꠇꠟ ꠕꠣꠇꠤ ꠔꠥꠝꠞꠣ ꠇꠥꠘꠥꠝꠘ꠆ꠔꠦ ꠢꠥꠞꠥ ꠘꠤ? ꠅꠄ, ꠈꠣꠟꠤ ꠄꠇꠐꠣ ꠛꠦꠙꠣꠞꠦ ꠢꠥꠞꠥ ꠀꠍ, ꠁꠔꠣ ꠅꠁꠟ, ꠀꠝꠤ ꠔꠥꠝꠞꠣꠞ ꠉꠦꠍꠦ ꠛꠥꠏꠣ ꠅꠁꠍꠤ ꠘꠣ। ꠁ ꠜꠥꠟꠞ ꠟꠣꠉꠤ ꠀꠝꠣꠞꠦ ꠝꠣꠚꠤ ꠖꠦꠅ।
2CO 12:14 ꠢꠥꠘꠅ, ꠀꠝꠤ ꠔꠥꠝꠞꠣꠞ ꠉꠦꠍꠦ ꠎꠣꠅꠀꠞ ꠟꠣꠉꠤ ꠅꠃ ꠔꠤꠘ ꠘꠝ꠆ꠛꠞ ꠛꠣꠞ ꠎꠥꠁꠔ ꠅꠁꠟꠣꠝ, ꠔꠦ ꠀꠝꠤ ꠇꠥꠘꠥ ꠛꠥꠏꠣ ꠅꠁꠔꠣꠝ ꠘꠣꠄ, ꠔꠥꠝꠞꠣꠞ ꠉꠦꠍꠦ ꠇꠥꠘꠥ ꠗꠘ-ꠍꠣꠝꠣꠘꠣ ꠌꠣꠁꠞꠣꠝ ꠘꠣ, ꠈꠣꠟꠤ ꠔꠥꠝꠞꠣꠞꠦ ꠌꠣꠁꠞꠣꠝ। ꠝꠣ-ꠛꠣꠚꠞ ꠟꠣꠉꠤ ꠗꠘ-ꠍꠣꠝꠣꠘꠣ ꠎꠝꠣꠘꠤ ꠔ ꠀꠅꠟꠣꠖꠞ ꠚꠞꠎ ꠘꠣꠄ, ꠛꠞꠋ ꠝꠣ-ꠛꠣꠚꠞ ꠃꠌꠤꠔ ꠅꠁꠟ ꠀꠅꠟꠣꠖꠞ ꠟꠣꠉꠤ ꠗꠘ ꠎꠝꠣꠘꠤ।
2CO 12:15 ꠔꠦ ꠀꠝꠤ ꠈꠥꠛ ꠈꠥꠡꠤ ꠅꠁꠀꠃ ꠔꠥꠝꠞꠣꠞ ꠟꠣꠉꠤ ꠀꠝꠣꠞ ꠢꠇꠟꠔꠣ ꠈꠞꠌ ꠇꠞꠝꠥ, ꠀꠝꠣꠞ ꠘꠤꠎꠞꠦꠅ ꠛꠤꠟꠣꠁ ꠖꠤꠝꠥ। ꠀꠝꠤ ꠎꠦꠛꠟꠣ ꠔꠥꠝꠞꠣꠞꠦ ꠛꠦꠡ ꠇꠞꠤ ꠝꠣꠄꠀ-ꠝꠢꠛ꠆ꠛꠔ ꠇꠞꠤꠀꠞ, ꠔꠦ ꠔꠥꠝꠞꠣ ꠇꠦꠘꠦ ꠀꠝꠣꠞꠦ ꠇꠝ ꠝꠣꠄꠀ ꠇꠞꠞꠣꠄ?
2CO 12:16 ꠎꠣꠁ ꠅꠃꠇ, ꠀꠝꠤ ꠔꠥꠝꠞꠣꠞ ꠃꠙꠞꠦ ꠛꠥꠏꠣ ꠅꠁꠍꠤ ꠘꠣ, ꠀꠞꠘꠣꠄ ꠇꠦꠃ ꠇꠁꠟꠤꠔ ꠙꠣꠞꠦ, ꠀꠝꠤ ꠌꠣꠟꠣꠇꠤ ꠇꠞꠤꠀ ꠔꠥꠝꠞꠣꠞꠦ ꠗꠥꠇꠣ ꠖꠤꠍꠤ।
2CO 12:17 ꠀꠞ ꠔꠥꠝꠞꠣꠞ ꠉꠦꠍꠦ ꠀꠝꠤ ꠎꠦꠞꠣꠞꠦ ꠙꠣꠑꠣꠁꠍꠟꠣꠝ, ꠄꠞꠣꠞꠦꠖꠤ ꠔꠥꠝꠞꠣꠞꠦ ꠐꠉꠣꠁꠍꠤ ꠘꠤ?
2CO 12:18 ꠔꠤꠔꠣꠍ ꠜꠣꠁꠞꠦ ꠀꠝꠤ ꠝꠤꠘꠔ ꠇꠞꠟꠣꠝ ꠔꠥꠝꠞꠣꠞ ꠉꠦꠍꠦ ꠎꠣꠅꠀꠞ ꠟꠣꠉꠤ, ꠔꠣꠘ ꠟꠉꠦ ꠢꠃ ꠜꠣꠁꠞꠦꠅ ꠙꠣꠑꠣꠁꠟꠣꠝ। ꠔꠦ ꠅꠃ ꠔꠤꠔꠣꠍꠦ ꠔꠥꠝꠞꠣꠞꠦ ꠐꠉꠤꠍꠂꠘ ꠘꠤ? ꠀꠝꠤ ꠀꠞ ꠔꠤꠔꠣꠍ, ꠀꠝꠞꠣ ꠖꠥꠁꠅꠎꠘꠦ ꠔ ꠄꠇꠁ ꠞꠥꠢꠦ ꠀꠞ ꠄꠇꠁ ꠘꠤꠅꠔꠦ ꠇꠣꠝ ꠇꠞꠤ।
2CO 12:19 ꠀꠁꠌ꠆ꠍꠣ, ꠔꠥꠝꠞꠣ ꠝꠘꠅ ꠇꠞꠞꠣꠄ ꠘꠤ, ꠅꠃ ꠌꠤꠑꠤ ꠟꠦꠈꠤꠀ ꠀꠝꠞꠣ ꠘꠤꠎꠞ ꠖꠥꠡ ꠇꠣꠐꠣꠁꠞꠣꠝ? ꠘꠣ, ꠁꠈꠣꠘ ꠑꠤꠇ ꠘꠣꠄ, ꠅ ꠖꠥꠡ꠆ꠔ ꠅꠇꠟ, ꠀꠝꠞꠣ ꠀꠟ-ꠝꠍꠤꠞ ꠈꠣꠖꠤꠝ ꠢꠤꠡꠣꠛꠦ ꠀꠟ꠆ꠟꠣ ꠙꠣꠇꠞꠦ ꠀꠎꠤꠞ-ꠘꠣꠎꠤꠞ ꠞꠣꠈꠤꠀ ꠟꠦꠈꠞꠣꠝ, ꠔꠥꠝꠞꠣꠞꠦ ꠉꠠꠤꠀ ꠔꠥꠟꠣꠞ ꠘꠤꠅꠔꠦꠃ ꠁꠔꠣ ꠇꠁꠞꠣꠝ।
2CO 12:20 ꠀꠍꠟꠦ ꠀꠝꠣꠞ ꠈꠥꠛ ꠒꠞ ꠇꠞꠦꠞ, ꠀꠝꠤ ꠎꠦꠛꠟꠣ ꠔꠥꠝꠞꠣꠞ ꠉꠦꠍꠦ ꠀꠁꠝꠥ, ꠀꠁꠀ ꠢꠣꠞꠤ ꠔꠥꠝꠞꠣꠞꠦ ꠎꠦꠟꠣ ꠖꠦꠈꠔꠣꠝ ꠌꠣꠁꠞꠣꠝ, ꠔꠥꠝꠞꠣ ꠎꠥꠖꠤ ꠁꠟꠣꠈꠣꠘ ꠎꠥꠁꠔ ꠘꠣ ꠅꠅ, ꠀꠞ ꠔꠥꠝꠞꠣꠅ ꠀꠝꠣꠞ ꠎꠦ ꠞꠥꠙ ꠖꠦꠈꠔꠣꠄ ꠌꠣꠅ ꠘꠣ, ꠀꠝꠤ ꠎꠥꠖꠤ ꠢꠃ ꠞꠥꠙ ꠖꠦꠈꠣꠘꠤ ꠟꠣꠉꠦ। ꠛꠣ ꠀꠁꠀ ꠖꠦꠈꠤ ꠔꠥꠝꠞꠣꠞ ꠝꠣꠎꠦ ꠇꠣꠁꠎ꠆ꠎꠣ-ꠚꠍꠣꠖ, ꠁꠋꠡꠣ-ꠘꠤꠘ꠆ꠖꠣ, ꠞꠣꠉ-ꠉꠥꠍꠣ, ꠖꠟꠣꠖꠟꠤ, ꠙꠞꠞ ꠛꠖꠘꠣꠝ ꠉꠣꠅꠀ, ꠉꠤꠛꠔ ꠉꠣꠅꠀ, ꠛꠠꠣꠁ-ꠛꠦꠐꠣꠉꠤꠞꠤ ꠀꠞ ꠉꠥꠟꠝꠣꠟ ꠀꠍꠦ।
2CO 12:21 ꠀꠝꠣꠞ ꠜꠤꠔꠞꠦ ꠒꠞ ꠇꠞꠦꠞ, ꠀꠝꠤ ꠀꠞꠇꠛꠣꠞ ꠎꠦꠛꠟꠣ ꠔꠥꠝꠞꠣꠞ ꠉꠦꠍꠦ ꠀꠁꠝꠥ, ꠅꠃ ꠡꠝꠄ ꠀꠝꠣꠞ ꠀꠟ꠆ꠟꠣꠄ ꠘꠤ ꠔꠥꠝꠞꠣꠞ ꠍꠣꠝꠘꠦ ꠀꠝꠣꠞꠦ ꠡꠞꠝꠤꠘ꠆ꠖꠣ ꠛꠣꠘꠣꠁꠟꠣꠁꠘ, ꠎꠦꠔꠣ ꠝꠣꠘꠡꠦ ꠉꠥꠘꠣ ꠇꠞꠍꠂꠘ, ꠎꠦꠔꠣꠄ ꠘꠣꠙꠣꠇꠤ ꠇꠣꠝ, ꠎꠤꠘꠣ, ꠀꠞ ꠛꠖꠝꠣꠁꠡꠤ ꠇꠞꠤꠀ ꠔꠃꠛꠣ ꠇꠞꠍꠦ ꠘꠣ, ꠅꠔꠣꠞꠦ ꠖꠦꠈꠤꠀ ꠘꠤ ꠀꠝꠤ ꠝꠘꠞ ꠝꠣꠎꠦ ꠇꠡ꠆ꠐ ꠙꠣꠁ।
2CO 13:1 ꠜꠣꠁꠀꠁꠘꠞꠦ, ꠀꠝꠤ ꠅꠃ ꠔꠤꠘ ꠘꠝ꠆ꠛꠞ ꠛꠣꠞ ꠔꠥꠝꠞꠣꠞ ꠉꠦꠍꠦ ꠀꠁꠞꠣꠝ। ꠎꠣꠘ ꠔ, ꠀꠟ꠆ꠟꠣꠞ ꠇꠣꠟꠣꠝꠅ ꠀꠍꠦ, “ꠖꠥꠁ ꠛꠣ ꠔꠤꠘ ꠎꠘ ꠝꠣꠘꠡꠦ ꠄꠇꠁ ꠟꠣꠈꠣꠘ ꠡꠣꠇ꠆ꠇꠤ ꠖꠤꠟꠦ ꠅꠃ ꠛꠦꠙꠣꠞ ꠢꠣꠍꠣ ꠙꠞꠝꠣꠘ ꠅꠄ।”
2CO 13:2 ꠔꠦ ꠀꠝꠤ ꠎꠦꠛꠟꠣ ꠖꠥꠍꠞꠣꠛꠣꠞ ꠔꠥꠝꠞꠣꠞ ꠉꠦꠍꠦ ꠉꠦꠍꠟꠣꠝ, ꠢꠃ ꠍꠚꠞꠞ ꠀꠉꠦ ꠎꠦꠞꠣ ꠉꠥꠘꠣ-ꠇꠍꠥꠞꠤ ꠇꠞꠍꠤꠟ, ꠀꠝꠤ ꠔꠣꠞꠣꠞꠦ ꠀꠞ ꠛꠣꠖ-ꠛꠣꠇꠤ ꠢꠇꠟꠞꠦ ꠢꠥꠡꠤꠀꠞ ꠇꠞꠤ ꠖꠤꠍꠟꠣꠝ। ꠀꠞ ꠅꠈꠘ ꠀꠝꠤ ꠘꠤꠎꠦ ꠀꠎꠤꠞ ꠘꠣ ꠅꠁꠟꠦꠅ ꠔꠣꠞꠣꠞꠦ ꠅꠟꠣ ꠢꠥꠡꠤꠀꠞ ꠇꠞꠤ ꠖꠤꠞꠣꠝ, ꠀꠝꠤ ꠀꠞꠇꠛꠣꠞ ꠀꠁꠟꠦ ꠔꠣꠞꠣ ꠇꠦꠃ ꠞꠦꠢꠣꠁ ꠙꠣꠁꠔꠣ ꠘꠣꠄ।
2CO 13:3 ꠔꠥꠝꠞꠣ ꠛꠥꠟꠦ ꠙꠞꠝꠣꠘ ꠌꠣꠁꠞꠣꠄ, ꠀꠝꠣꠞ ꠝꠥꠈ ꠖꠤꠀ ꠀꠟ-ꠝꠍꠤꠄ ꠝꠣꠔꠤꠞꠣ ꠘꠤ। ꠀꠍꠟꠦ ꠀꠟ-ꠝꠍꠤ ꠔ ꠔꠥꠝꠞꠣꠞ ꠛꠦꠙꠣꠞꠦ ꠇꠥꠘꠥꠝꠘ꠆ꠔꠦꠃ ꠇꠝꠎꠥꠞ ꠘꠣꠄ, ꠔꠣꠘ ꠘꠤꠎꠞ ꠛꠟ-ꠡꠇ꠆ꠔꠤ ꠔꠥꠝꠞꠣꠞ ꠝꠣꠎꠦ ꠀꠎꠤꠞ ꠀꠍꠦ।
2CO 13:4 ꠎꠥꠖꠤꠅ ꠔꠣꠘꠞꠦ ꠇꠝꠎꠥꠞ ꠢꠣꠟꠔꠦ ꠍꠟꠤꠛꠞ ꠃꠙꠞꠦ ꠟꠐꠇꠣꠁꠀ ꠎꠣꠘꠦ ꠝꠣꠞꠣ ꠅꠁꠍꠤꠟ, ꠔꠣ-ꠅ ꠀꠟ꠆ꠟꠣꠞ ꠇꠥꠖꠞꠔꠤ ꠛꠟꠦ ꠔꠣꠁꠘ ꠅꠈꠘ ꠎꠤꠘ꠆ꠖꠣ ꠀꠍꠂꠘ। ꠀꠞ ꠀꠝꠞꠣꠅ ꠅꠟꠣ ꠔꠣꠘ ꠟꠣꠈꠣꠘ ꠇꠝꠎꠥꠞ ꠀꠍꠤ, ꠅꠁꠟꠦ ꠔꠣꠘ ꠟꠉꠦ ꠎꠤꠘ꠆ꠖꠣ ꠞꠅꠀꠄ ꠀꠟ꠆ꠟꠣꠁ ꠇꠥꠖꠞꠔꠤ ꠛꠟꠦ ꠔꠥꠝꠞꠣꠞ ꠉꠦꠍꠦ ꠀꠁꠀ ꠝꠥꠇꠣꠛꠤꠟꠣ ꠅꠁꠝꠥ।
2CO 13:5 ꠔꠥꠝꠞꠣ ꠘꠤꠎꠞꠦ ꠎꠣꠌꠣꠁ ꠇꠞꠤ ꠖꠦꠈꠅ, ꠀꠟ-ꠝꠍꠤꠞ ꠃꠙꠞꠦ ꠢꠣꠍꠣꠞꠞ ꠁꠝꠣꠘ ꠀꠍꠦ ꠘꠤ? ꠔꠥꠝꠞꠣ ꠛꠥꠎ ꠘꠣ ꠘꠤ, ꠁꠍꠣ ꠀꠟ-ꠝꠍꠤ ꠔꠥꠝꠞꠣꠞ ꠖꠤꠟꠅ ꠀꠍꠂꠘ। ꠈꠤꠀꠟ ꠞꠣꠈꠤꠅ, ꠎꠣꠌꠣꠁ ꠇꠞꠣꠔ ꠉꠤꠀ ꠎꠣꠘꠥ ꠔꠥꠝꠞꠣꠞ ꠝꠣꠎꠦ ꠜꠦꠎꠣꠟ ꠘꠣ ꠝꠤꠟꠦ।
2CO 13:6 ꠀꠞ ꠀꠝꠤ ꠀꠡꠣ ꠇꠞꠤ ꠔꠥꠝꠞꠣ ꠛꠥꠎꠛꠣꠄ, ꠀꠝꠞꠣ ꠔ ꠈꠣꠐꠤ ꠢꠤꠡꠣꠛꠦ ꠙꠞꠝꠣꠘ ꠅꠁꠉꠦꠍꠤ।
2CO 13:7 ꠀꠝꠞꠣ ꠀꠟ꠆ꠟꠣꠞ ꠖꠞꠛꠣꠞꠅ ꠝꠥꠘꠣꠎꠣꠔ ꠇꠞꠞꠣꠝ, ꠔꠥꠝꠞꠣ ꠢꠇꠟ ꠟꠣꠈꠣꠘ ꠛꠖ ꠇꠣꠝ ꠕꠣꠇꠤ ꠛꠣꠌꠤꠀ ꠞꠅ। ꠀꠝꠞꠣ ꠘꠤꠎꠞ ꠙꠞꠦꠎꠉꠣꠞꠤꠞ ꠙꠞꠝꠣꠘ ꠖꠦꠈꠣꠘꠤꠞ ꠟꠣꠉꠤ ꠁꠈꠣꠘ ꠇꠁꠞꠣꠝ ꠘꠣ। ꠀꠞ ꠝꠣꠘꠡꠦ ꠀꠝꠞꠣꠞꠦ ꠙꠞꠦꠎꠉꠣꠞ ꠝꠘꠅ ꠘꠣ ꠇꠞꠟꠦꠅ, ꠔꠥꠝꠞꠣ ꠢꠣꠝꠦꠡꠣ ꠘꠦꠇ ꠇꠣꠝ ꠇꠞꠣꠔ ꠞꠅ।
2CO 13:8 ꠀꠝꠞꠣꠞ ꠈꠦꠝꠔꠣ ꠅꠁꠟ ꠢꠇꠞ ꠙꠇ꠆ꠇꠦ, ꠘꠣ-ꠢꠇꠞ ꠙꠇ꠆ꠇꠦ ꠀꠝꠞꠣꠞ ꠇꠥꠘꠥ ꠛꠟ ꠘꠣꠁ।
2CO 13:9 ꠔꠦ ꠀꠝꠞꠣ ꠎꠦꠛꠟꠣ ꠇꠝꠎꠥꠞ ꠀꠞ ꠔꠥꠝꠞꠣ ꠛꠟꠛꠣꠘ, ꠁꠔꠣ ꠖꠦꠈꠟꠦ ꠀꠝꠞꠣ ꠈꠥꠡꠤ। ꠀꠝꠞꠣ ꠖꠥꠀ ꠇꠞꠤꠀꠞ, ꠔꠥꠝꠞꠣ ꠔꠃꠛꠣ ꠇꠞꠤꠀ ꠢꠣꠞꠤ ꠙꠥꠞꠣꠙꠥꠞ ꠈꠣꠐꠤ ꠅꠅ।
2CO 13:10 ꠄꠞꠟꠣꠉꠤ ꠀꠝꠤ ꠔꠥꠝꠞꠣꠞ ꠉꠦꠍ ꠕꠣꠇꠤ ꠖꠥꠞꠁ ꠞꠁꠀ ꠁꠔꠣ ꠟꠦꠈꠞꠣꠝ, ꠎꠣꠔꠦ ꠔꠥꠝꠞꠣꠞ ꠍꠣꠝꠘꠦ ꠀꠁꠀ ꠢꠣꠞꠟꠦ ꠝꠣꠟꠤꠇ ꠁꠍꠣꠞ ꠖꠦꠅꠀ ꠈꠦꠝꠔꠣ ꠈꠣꠐꠣꠁꠀ ꠇꠐꠥ ꠛꠦꠛꠢꠣꠞ ꠇꠞꠣ ꠘꠣ ꠟꠣꠉꠦ। ꠝꠣꠟꠤꠇꠦ ꠀꠝꠣꠞꠦ ꠁ ꠈꠦꠝꠔꠣ ꠖꠤꠍꠂꠘ ꠔꠥꠝꠞꠣꠞꠦ ꠉꠠꠤꠀ ꠔꠥꠟꠣꠞ ꠟꠣꠉꠤ, ꠈꠦꠔꠤ ꠇꠞꠣꠞ ꠟꠣꠉꠤ ꠘꠣꠄ।
2CO 13:11 ꠅ ꠜꠣꠁ ꠅꠇꠟ, ꠢꠦꠡ-ꠝꠦꠡ ꠇꠁꠞꠣꠝ, ꠔꠥꠝꠞꠣ ꠈꠥꠡꠤ-ꠛꠣꠡꠤ ꠇꠞꠅ, ꠘꠤꠎꠞꠦ ꠇꠣꠝꠤꠟ ꠛꠣꠘꠣꠅ, ꠄꠇꠦ-ꠅꠁꠘ꠆ꠘꠞꠦ ꠘꠍꠤꠅꠔ ꠇꠞꠅ, ꠄꠇꠁ ꠝꠘꠜꠣꠛꠦ ꠞꠅ, ꠡꠣꠘ꠆ꠔꠤꠄ ꠛꠡꠔ ꠇꠞꠅ। ꠔꠦꠃ ꠡꠣꠘ꠆ꠔꠤꠞ ꠀꠞ ꠝꠢꠛ꠆ꠛꠔꠞ ꠀꠟ꠆ꠟꠣꠅ ꠔꠥꠝꠞꠣꠞ ꠟꠉꠦ ꠟꠉꠦ ꠞꠁꠛꠣ।
2CO 13:12 ꠔꠥꠝꠞꠣ ꠄꠇꠦ-ꠅꠁꠘ꠆ꠘꠦ ꠙꠛꠤꠔ꠆ꠞ ꠉꠟꠣꠉꠟꠤ ꠇꠞꠤꠅ।
2CO 13:13 ꠀꠟ꠆ꠟꠣꠞ ꠢꠇꠟ ꠙꠣꠇ ꠛꠘ꠆ꠖꠣꠄ ꠔꠥꠝꠞꠣꠞꠦ ꠍꠣꠟꠣꠝ ꠎꠣꠘꠣꠁꠞꠣ।
2CO 13:14 ꠝꠣꠟꠤꠇ ꠁꠍꠣ ꠀꠟ-ꠝꠍꠤꠞ ꠞꠢꠝꠔ, ꠀꠟ꠆ꠟꠣ ꠙꠣꠇꠞ ꠝꠢꠛ꠆ꠛꠔ, ꠀꠞ ꠙꠣꠇ ꠞꠥꠢꠥꠞ ꠈꠣꠔꠤꠞ-ꠎꠔꠘ ꠔꠥꠝꠞꠣ ꠢꠇꠟꠞ ꠖꠤꠟꠅ ꠞꠃꠇ। ꠀꠝꠤꠘ॥
GAL 1:1 ꠀꠝꠤ ꠙꠣꠃꠟꠥꠍ, ꠁꠍꠣ ꠀꠟ-ꠝꠍꠤꠞ ꠄꠇꠎꠘ ꠍꠣꠢꠣꠛꠤ। ꠀꠝꠤ ꠇꠥꠘꠥ ꠝꠣꠘꠡꠞ ꠢꠥꠇꠥꠝ-ꠙꠞꠣꠝꠤꠡꠦ ꠛꠣ ꠇꠥꠘꠥ ꠝꠣꠘꠡꠞ ꠃꠍꠤꠟ꠆ꠟꠣꠄ ꠍꠣꠢꠣꠛꠤ ꠅꠁꠍꠤ ꠘꠣ। ꠈꠣꠟꠤ ꠁꠍꠣ ꠀꠟ-ꠝꠍꠤ ꠀꠞ ꠀꠝꠞꠣꠞ ꠉꠣꠁꠛꠤ ꠛꠣꠚ ꠀꠟ꠆ꠟꠣ, ꠎꠦꠁꠘ ꠀꠟ-ꠝꠍꠤꠞꠦ ꠝꠥꠞ꠆ꠖꠣ ꠕꠣꠇꠤ ꠎꠤꠘ꠆ꠖꠣ ꠇꠞꠤ ꠔꠥꠟꠍꠂꠘ, ꠄꠞꠣꠞ ꠉꠦꠍ ꠕꠣꠇꠤꠃ ꠈꠦꠟꠣꠚꠔꠤ ꠙꠣꠁꠍꠤ।
GAL 1:2 ꠀꠝꠤ ꠀꠞ ꠀꠝꠣꠞ ꠟꠉꠞ ꠢꠇꠟ ꠝꠥꠝꠤꠘ ꠜꠣꠁꠀꠁꠘ꠆ꠔꠦ ꠝꠤꠟꠤꠀ, ꠉꠣꠟꠣꠔꠤꠀ ꠖꠦꠡꠞ ꠁꠍꠣꠄꠁ ꠎꠝꠣꠔ ꠅꠇꠟꠞ ꠉꠦꠍꠦ ꠅꠃ ꠍꠢꠤꠚꠣꠈꠣꠘ ꠟꠦꠈꠞꠣꠝ।
GAL 1:3 ꠀꠝꠞꠣꠞ ꠉꠣꠁꠛꠤ ꠛꠣꠚ ꠀꠟ꠆ꠟꠣ ꠙꠣꠇꠦ ꠀꠞ ꠁꠍꠣ ꠀꠟ-ꠝꠍꠤꠄ ꠔꠥꠝꠞꠣꠞꠦ ꠞꠢꠝꠔ ꠀꠞ ꠡꠣꠘ꠆ꠔꠤ ꠖꠣꠘ ꠇꠞꠃꠇ꠆ꠇꠣ।
GAL 1:4 ꠀꠝꠞꠣꠞ ꠉꠣꠁꠛꠤ ꠛꠣꠚ ꠀꠟ꠆ꠟꠣ ꠙꠣꠇꠞ ꠝꠥꠘꠡꠣꠄ, ꠢꠃ ꠁꠍꠣꠄ ꠀꠝꠞꠣꠞ ꠉꠥꠘꠣꠞ ꠝꠣꠚꠤꠞ ꠟꠣꠉꠤ ꠘꠤꠎꠞ ꠙꠛꠤꠔ꠆ꠞ ꠎꠣꠘ ꠇꠥꠞꠛꠣꠘꠤ ꠖꠤꠍꠂꠘ, ꠎꠣꠔꠦ ꠅꠃ ꠈꠣꠞꠣꠙ ꠎꠝꠣꠘꠣꠞ ꠀꠔ ꠕꠣꠇꠤ ꠀꠝꠞꠣꠞꠦ ꠛꠣꠌꠣꠁꠔꠣ ꠙꠣꠞꠂꠘ।
GAL 1:5 ꠀꠟ꠆ꠟꠣ ꠙꠣꠇꠞ ꠔꠣꠞꠤꠚ ꠢꠞ-ꠢꠣꠝꠦꠡꠣ ꠎꠣꠞꠤ ꠞꠃꠇ। ꠀꠝꠤꠘ।
GAL 1:6 ꠀꠝꠤ ꠛꠠ ꠔꠣꠁꠎ꠆ꠎꠥꠛ ꠅꠁꠉꠦꠍꠤ, ꠀꠟ-ꠝꠍꠤꠞ ꠞꠢꠝꠦ ꠎꠦꠁꠘ ꠒꠣꠇꠤꠀ ꠀꠘꠤꠀ ꠔꠥꠝꠞꠣꠞꠦ ꠘꠤꠎꠞ ꠛꠘ꠆ꠖꠣ ꠛꠣꠘꠣꠁꠍꠂꠘ, ꠔꠣꠘꠦ ꠍꠣꠠꠤꠀ ꠔꠥꠝꠞꠣ ꠇꠤꠟꠣ ꠅꠔ ꠎꠟꠖꠤ ꠀꠞꠇ ꠘꠝꠥꠘꠣꠞ ꠈꠥꠡ-ꠈꠛꠞꠤꠞ ꠛꠣꠄ ꠚꠤꠞꠤꠉꠦꠟꠣꠄ।
GAL 1:7 ꠀꠍꠟꠦ ꠔ ꠁꠐꠣ ꠇꠥꠘꠥ ꠈꠥꠡ-ꠈꠛꠞꠤꠃ ꠘꠣꠄ। ꠅꠁꠟꠦ ꠇꠄꠎꠘ ꠝꠣꠘꠥꠡ ꠀꠍꠦ, ꠎꠦꠔꠣꠄ ꠔꠥꠝꠞꠣꠞ ꠁꠝꠣꠘ ꠟꠁꠀ ꠈꠦꠁꠠ ꠈꠦꠟꠣꠁꠞꠣ, ꠔꠣꠞꠣ ꠀꠟ-ꠝꠍꠤꠞ ꠈꠥꠡ-ꠈꠛꠞꠤꠞꠦ ꠃꠟ꠆ꠐꠣ-ꠙꠣꠟ꠆ꠐꠣ ꠇꠞꠤꠟꠔꠣ ꠌꠣꠁꠞꠣ।
GAL 1:8 ꠢꠥꠘꠅ, ꠀꠝꠞꠣ ꠎꠦ ꠈꠥꠡ-ꠈꠛꠞꠤ ꠔꠥꠝꠞꠣꠞ ꠉꠦꠍꠦ ꠔꠛꠟꠤꠉ ꠇꠞꠍꠤ, ꠅꠃ ꠈꠥꠡ-ꠈꠛꠞꠤ ꠍꠣꠠꠣ ꠖꠥꠍꠞꠣ ꠇꠥꠘꠥ ꠈꠥꠡ-ꠈꠛꠞꠤ ꠎꠥꠖꠤ ꠔꠥꠝꠞꠣꠞ ꠉꠦꠍꠦ ꠔꠛꠟꠤꠉ ꠇꠞꠣ ꠅꠄ, ꠁꠔꠣ ꠎꠥꠖꠤ ꠀꠝꠞꠣ ꠘꠤꠎꠦꠃ ꠇꠞꠤ, ꠛꠣ ꠀꠍꠝꠣꠘꠤ ꠇꠥꠘꠥ ꠚꠤꠞꠤꠡ꠆ꠔꠣꠄ ꠀꠁꠀ ꠇꠞꠂꠘ, ꠔꠦ ꠅꠉꠥꠞ ꠃꠙꠞꠦ ꠟꠣꠘ꠆ꠘꠔ ꠙꠠꠃꠇ।
GAL 1:9 ꠀꠝꠤ ꠀꠉꠦ ꠎꠦꠝꠘꠦ ꠇꠁꠍꠤ, ꠅꠈꠘ ꠢꠤꠞꠛꠣꠞ ꠅꠃꠟꠣ ꠇꠁꠞꠣꠝ, ꠀꠉꠞ ꠎꠦ ꠈꠥꠡ-ꠈꠛꠞꠤ ꠔꠥꠝꠞꠣ ꠝꠣꠘꠍ, ꠁꠔꠣ ꠍꠣꠠꠣ ꠖꠥꠍꠞꠣ ꠇꠥꠘꠥ ꠈꠥꠡ-ꠈꠛꠞꠤ ꠇꠦꠃ ꠔꠥꠝꠞꠣꠞ ꠉꠦꠍꠦ ꠔꠛꠟꠤꠉ ꠇꠞꠟꠦ, ꠅꠉꠥꠞ ꠃꠙꠞꠦ ꠟꠣꠘ꠆ꠘꠔ ꠙꠠꠃꠇ।
GAL 1:10 ꠁꠔꠣ ꠇꠞꠤꠀ ꠀꠝꠤ ꠇꠣꠞ ꠉꠦꠍ ꠕꠣꠇꠤ ꠔꠣꠞꠤꠚ ꠙꠣꠁꠔꠣꠝ ꠌꠣꠁꠀꠞ, ꠇꠥꠘꠥ ꠝꠣꠘꠡꠞ ꠉꠦꠍ ꠕꠣꠇꠤ ꠘꠣ ꠀꠟ꠆ꠟꠣꠞ ꠉꠦꠍ ꠕꠣꠇꠤ? ꠀꠝꠤ ꠇꠥꠘꠥ ꠝꠣꠘꠡꠞꠦ ꠈꠥꠡ ꠇꠞꠣꠞ ꠌꠦꠡ꠆ꠐꠣ ꠇꠞꠤꠀꠞ ꠘꠤ? ꠀꠝꠤ ꠎꠥꠖꠤ ꠅꠈꠘꠅ ꠝꠣꠘꠡꠞꠦ ꠈꠥꠡ ꠇꠞꠣꠞ ꠌꠦꠡ꠆ꠐꠣ ꠇꠞꠔꠣꠝ, ꠔꠦ ꠀꠝꠤ ꠀꠟ-ꠝꠍꠤꠞ ꠈꠣꠖꠤꠝ ꠅꠁꠟꠣꠝ ꠘꠣ ꠅꠘꠦ।
GAL 1:11 ꠅ ꠜꠣꠁꠍꠣꠛ ꠅꠇꠟ, ꠀꠙꠘꠣꠞꠣ ꠎꠣꠘꠤꠀ ꠞꠣꠈꠃꠇ꠆ꠇꠣ, ꠀꠝꠤ ꠎꠦ ꠈꠥꠡ-ꠈꠛꠞꠤ ꠔꠛꠟꠤꠉ ꠇꠞꠍꠤ, ꠁꠔꠣ ꠔ ꠇꠥꠘꠥ ꠝꠣꠘꠡꠞ ꠛꠣꠘꠣꠁꠟ ꠝꠔꠛꠣꠖ ꠘꠣꠄ।
GAL 1:12 ꠀꠝꠤ ꠁꠔꠣ ꠇꠥꠘꠥ ꠝꠣꠘꠡꠞ ꠉꠦꠍ ꠕꠣꠇꠤ ꠙꠣꠁꠍꠤ ꠘꠣ, ꠇꠦꠃ ꠀꠝꠣꠞꠦ ꠁꠔꠣ ꠢꠤꠇꠣꠁꠍꠦꠅ ꠘꠣ। ꠈꠣꠟꠤ ꠁꠍꠣ ꠀꠟ-ꠝꠍꠤꠄ ꠘꠤꠎꠦ ꠀꠝꠣꠞ ꠉꠦꠍꠦ ꠁꠔꠣ ꠎꠣꠁꠞ ꠇꠞꠍꠂꠘ।
GAL 1:13 ꠀꠝꠤ ꠀꠉꠦ ꠎꠦꠛꠟꠣ ꠁꠢꠥꠖꠤ ꠗꠞ꠆ꠝ ꠝꠣꠘꠔꠣꠝ, ꠢꠃ ꠡꠝꠄ ꠀꠝꠣꠞ ꠌꠣꠟ-ꠌꠟꠘ ꠇꠤꠟꠣ ꠀꠍꠤꠟ ꠁꠔꠣ ꠔ ꠔꠥꠝꠞꠣ ꠢꠥꠘꠍ। ꠀꠝꠤ ꠀꠟ꠆ꠟꠣꠞ ꠎꠝꠣꠔ ꠅꠇꠟꠞꠦ ꠇꠔ ꠛꠦꠡꠤ ꠎꠥꠟꠥꠝ ꠇꠞꠔꠣꠝ, ꠀꠞ ꠁꠔꠣꠞꠦ ꠛꠤꠘꠣꠡ ꠇꠞꠣꠞ ꠌꠦꠡ꠆ꠐꠣꠔ ꠀꠍꠟꠣꠝ, ꠄꠅꠔꠣ ꠔꠥꠝꠞꠣ ꠎꠣꠘ।
GAL 1:14 ꠀꠝꠣꠞ ꠛꠣꠚ-ꠖꠣꠖꠣꠞ ꠉꠦꠍ ꠕꠣꠇꠤ ꠙꠣꠅꠀ ꠡꠞꠣ-ꠞꠍꠥꠝꠔ ꠝꠣꠘꠣꠔꠅ ꠀꠝꠤ ꠈꠥꠛ ꠈꠤꠀꠟꠤ ꠀꠍꠟꠣꠝ। ꠄꠞꠖꠣꠄ ꠀꠝꠣꠞ ꠛꠄꠅꠡꠤ ꠁꠢꠥꠖꠤ ꠅꠇꠟꠞ ꠝꠣꠎꠦ ꠀꠟ꠆ꠟꠣ-ꠛꠤꠟ꠆ꠟꠣ ꠇꠞꠣꠔ ꠀꠝꠤ ꠛꠃꠔ ꠀꠉꠥꠀꠁꠟ ꠀꠍꠟꠣꠝ।
GAL 1:15 ꠅꠁꠟꠦ ꠀꠟ꠆ꠟꠣꠄ ꠔ ꠀꠝꠣꠞ ꠝꠣʼꠞ ꠙꠦꠐꠅ ꠕꠣꠇꠔꠦꠃ ꠀꠝꠣꠞꠦ ꠙꠍꠘ꠆ꠖ ꠇꠞꠍꠂꠘ, ꠔꠣꠁꠘꠃ ꠘꠤꠎꠞ ꠞꠢꠝꠔꠦ ꠀꠝꠣꠞꠦ ꠖꠣꠅꠔ ꠖꠤꠍꠂꠘ। ꠔꠣꠘ ꠝꠥꠘꠡꠣ ꠀꠍꠤꠟ,
GAL 1:16 ꠀꠝꠤ ꠔꠣꠘ ꠈꠣꠍ ꠝꠣꠄꠀꠞ ꠎꠘꠞ ꠖꠤꠖꠣꠞ ꠙꠣꠁꠀ, ꠅꠁꠘ꠆ꠘꠣꠁꠘ꠆ꠘ ꠎꠣꠔꠤꠞ ꠉꠦꠍꠦ ꠈꠥꠡ-ꠈꠛꠞꠤ ꠔꠛꠟꠤꠉ ꠇꠞꠤ। ꠔꠦ ꠅꠃ ꠖꠤꠖꠣꠞ ꠙꠣꠁꠀꠅ ꠀꠝꠤ ꠇꠥꠘꠥ ꠀꠖꠝ ꠎꠣꠔꠞ ꠟꠉꠦ ꠙꠞꠣꠝꠤꠡ ꠇꠞꠍꠤ ꠘꠣ।
GAL 1:17 ꠀꠞ ꠀꠝꠣꠞ ꠀꠉꠞ ꠇꠥꠘꠥ ꠍꠣꠢꠣꠛꠤꠞ ꠟꠉꠦ ꠝꠥꠟꠣꠇꠣꠔ ꠇꠞꠣꠞ ꠟꠣꠉꠤ ꠀꠝꠤ ꠎꠦꠞꠥꠎꠣꠟꠦꠝ ꠐꠣꠃꠘ ꠈꠣꠘꠅ-ꠅ ꠉꠦꠍꠤ ꠘꠣ। ꠛꠞꠋ ꠀꠝꠤ ꠀꠞꠛ ꠖꠦꠡꠅ ꠉꠦꠍꠟꠣꠝꠉꠤ, ꠉꠤꠀ ꠊꠥꠞꠤ-ꠚꠤꠞꠤ ꠢꠤꠞꠛꠣꠞ ꠖꠣꠝꠦꠡ꠆ꠇ ꠐꠣꠃꠘꠅ ꠀꠁꠍꠤ।
GAL 1:18 ꠄꠞ ꠔꠤꠘ ꠛꠞꠍ ꠛꠣꠖꠦ ꠍꠣꠢꠣꠛꠤ ꠙꠤꠔꠞꠞ ꠟꠉꠦ ꠝꠥꠟꠣꠇꠣꠔ ꠇꠞꠣꠞ ꠘꠤꠅꠔꠦ ꠎꠦꠞꠥꠎꠣꠟꠦꠝ ꠉꠦꠍꠟꠣꠝ, ꠉꠤꠀ ꠔꠣꠘ ꠅꠘꠅ ꠙꠘꠞ ꠖꠤꠘ ꠀꠍꠟꠣꠝ।
GAL 1:19 ꠅꠃ ꠡꠝꠄ ꠢꠎꠞꠔ ꠁꠍꠣꠞ ꠜꠣꠁ ꠍꠣꠢꠣꠛꠤ ꠁꠀꠇꠥꠛ ꠍꠣꠠꠣ, ꠖꠥꠍꠞꠣ ꠇꠥꠘꠥ ꠍꠣꠢꠣꠛꠤꠞ ꠟꠉꠦ ꠀꠝꠣꠞ ꠖꠦꠈꠣ ꠅꠁꠍꠦ ꠘꠣ।
GAL 1:20 ꠄꠇ ꠀꠟ꠆ꠟꠣ ꠡꠣꠇ꠆ꠇꠤ ꠀꠍꠂꠘ, ꠀꠝꠤ ꠅꠃ ꠎꠦꠔꠣ ꠟꠦꠈꠟꠣꠝ, ꠄꠞ ꠄꠇꠐꠣ ꠢꠞꠚꠅ ꠝꠤꠍꠣ ꠘꠣꠄ। ꠝꠘꠅ ꠞꠣꠈꠛꠣ, ꠅꠃ ꠈꠥꠡ-ꠈꠛꠞꠤ ꠔ ꠇꠥꠘꠥ ꠝꠣꠘꠡꠞ ꠉꠦꠍ ꠕꠣꠇꠤ ꠙꠣꠁꠍꠤ ꠘꠣ, ꠈꠣꠟꠤ ꠁꠍꠣ ꠀꠟ-ꠝꠍꠤꠄ ꠘꠤꠎꠦ ꠀꠝꠣꠞ ꠉꠦꠍꠦ ꠎꠣꠁꠞ ꠇꠞꠍꠂꠘ।
GAL 1:21 ꠛꠣꠖꠦ ꠀꠝꠤ ꠡꠤꠞꠤꠀ ꠀꠞ ꠇꠤꠟꠤꠇꠤꠀ ꠖꠦꠡꠞ ꠛꠃꠔ ꠎꠣꠉꠣꠔ ꠉꠦꠍꠟꠣꠝ।
GAL 1:22 ꠅꠃ ꠡꠝꠄ ꠄꠢꠥꠖꠤꠀ ꠎꠤꠟꠣꠞ ꠁꠍꠣꠄꠁ ꠎꠝꠣꠔ ꠅꠇꠟꠦꠅ ꠀꠝꠣꠞꠦ ꠌꠤꠘꠔꠣ ꠘꠣ।
GAL 1:23 ꠔꠣꠞꠣ ꠈꠣꠟꠤ ꠅꠃ ꠈꠛꠞ ꠢꠥꠘꠍꠤꠟꠣ, “ꠀꠉꠦ ꠎꠦ ꠛꠦꠐꠣꠄ ꠀꠝꠞꠣꠞ ꠃꠙꠞꠦ ꠎꠥꠟꠥꠝ ꠇꠞꠔ, ꠀꠞ ꠁꠍꠣꠞ ꠘꠣꠝꠞꠦ ꠖꠥꠘꠤꠀ ꠕꠣꠇꠤ ꠔꠥꠠꠤꠟꠤꠔ ꠌꠣꠁꠍꠤꠟ, ꠅꠈꠘ ꠢꠃ ꠛꠦꠐꠣꠄ ꠀꠟ-ꠝꠍꠤꠞ ꠁꠝꠣꠘꠞ ꠈꠥꠡ-ꠈꠛꠞꠤ ꠔꠛꠟꠤꠉ ꠇꠞꠦꠞ।”
GAL 1:24 ꠀꠝꠤ ꠁꠝꠣꠘ ꠀꠘꠤꠀ ꠛꠖꠟꠤ ꠎꠣꠅꠀꠄ, ꠔꠣꠞꠣ ꠀꠟ꠆ꠟꠣꠞ ꠡꠥꠇꠥꠞ-ꠔꠣꠞꠤꠚ ꠇꠞꠔꠣ।
GAL 2:1 ꠌꠃꠖ꠆ꠖ ꠛꠞꠍ ꠛꠣꠖꠦ ꠛꠣꠞ꠆ꠘꠣꠛꠣꠍꠞ ꠟꠉꠦ ꠅꠁꠀ ꠀꠝꠤ ꠢꠤꠞꠛꠣꠞ ꠎꠦꠞꠥꠎꠣꠟꠦꠝ ꠉꠦꠟꠣꠝ, ꠅꠃ ꠡꠝꠄ ꠔꠤꠔꠣꠍꠞꠦꠅ ꠟꠉꠦ ꠘꠤꠟꠣꠝ।
GAL 2:2 ꠀꠟ꠆ꠟꠣꠁ ꠢꠥꠇꠥꠝꠦ ꠀꠝꠤ ꠢꠘꠅ ꠉꠦꠟꠣꠝ। ꠉꠤꠀ ꠢꠘꠞ ꠜꠣꠁꠀꠁꠘꠞꠦ ꠇꠁꠟꠣꠝ, ꠅꠁꠘ꠆ꠘꠣꠁꠘ꠆ꠘ ꠎꠣꠔꠤꠞ ꠉꠦꠍꠦ ꠀꠝꠤ ꠇꠥꠘ ꠈꠥꠡ-ꠈꠛꠞꠤ ꠔꠛꠟꠤꠉ ꠇꠞꠤ। ꠅꠁꠟꠦ ꠎꠝꠣꠔꠞ ꠝꠥꠞꠛ꠆ꠛꠤ ꠅꠇꠟꠞꠦ ꠁꠔꠣ ꠘꠤꠞꠣꠟꠣꠄ ꠇꠁꠟꠣꠝ, ꠀꠝꠣꠞ ꠌꠤꠘ꠆ꠔꠣ ꠀꠍꠤꠟ, ꠀꠝꠣꠞ ꠅꠔ ꠖꠃꠠꠞ ꠇꠣꠝ ꠎꠣꠔꠦ ꠛꠦꠇꠣꠝꠣ ꠘꠣ ꠎꠣꠄ।
GAL 2:3 ꠀꠝꠣꠞ ꠟꠉꠞ ꠜꠣꠁ ꠔꠤꠔꠣꠍ ꠅ-ꠁꠢꠥꠖꠤ ꠅꠁꠟꠦꠅ, ꠔꠣꠘ ꠝꠍꠟꠝꠣꠘꠤ ꠇꠣꠝ ꠇꠞꠣꠘꠤꠞ ꠟꠣꠉꠤ ꠄꠞꠣ ꠇꠥꠘꠥ ꠌꠣꠙ ꠖꠤꠍꠦ ꠘꠣ।
GAL 2:4 ꠀꠍꠟꠦ ꠁꠝꠣꠘꠖꠣꠞ ꠖꠟꠞ ꠜꠤꠔꠞꠦ ꠇꠄꠎꠘ ꠝꠥꠘꠣꠚꠤꠇ ꠢꠣꠝꠣꠘꠤꠄ ꠅꠟꠣ ꠅꠁꠟ। ꠁꠍꠣ ꠀꠟ-ꠝꠍꠤꠞ ꠃꠝ꠆ꠝꠔ ꠛꠘꠣꠄ ꠀꠝꠞꠣ ꠎꠦ ꠡ꠆ꠛꠣꠗꠤꠘꠔꠣ ꠙꠣꠁꠍꠤ, ꠅꠔꠣꠞ ꠈꠥꠔ ꠗꠞꠣꠞ ꠟꠣꠉꠤꠃ ꠄꠞꠣ ꠢꠣꠝꠣꠁꠍꠤꠟ, ꠎꠣꠔꠦ ꠀꠝꠞꠣꠞꠦ ꠝꠥꠍꠣꠞ ꠡꠞꠤꠅꠔꠞ ꠉꠥꠟꠣꠝꠤꠔ ꠞꠣꠈꠔ ꠙꠣꠞꠦ।
GAL 2:5 ꠅꠁꠟꠦ ꠀꠝꠞꠣ ꠄꠇ ꠙꠟꠇꠞ ꠟꠣꠉꠤꠅ ꠔꠣꠞꠣꠞ ꠉꠥꠟꠣꠝꠤ ꠝꠣꠘꠟꠣꠝ ꠘꠣ, ꠎꠣꠔꠦ ꠈꠥꠡ-ꠈꠛꠞꠤꠞ ꠢꠇꠤꠇꠔꠤ ꠔꠥꠝꠞꠣꠞ ꠉꠦꠍꠦ ꠇꠣꠁꠝ ꠞꠄ।
GAL 2:6 ꠀꠞ ꠎꠝꠣꠔꠞ ꠘꠣꠝ-ꠒꠣꠇꠤ ꠎꠘ ꠅꠇꠟꠞ ꠟꠉꠦ ꠀꠝꠤ ꠝꠣꠔꠤꠟꠣꠝ, ꠄꠞꠣ ꠎꠦꠁꠘꠃ ꠅꠁꠘ ꠘꠣ ꠇꠦꠘꠦ, ꠁꠔꠣꠄ ꠀꠝꠣꠞ ꠇꠥꠘ꠆ꠔꠣꠃ ꠎꠣꠄ ꠀꠄ ꠘꠣ, ꠀꠟ꠆ꠟꠣꠄ ꠔ ꠝꠥꠈ ꠌꠣꠁꠀ ꠝꠍꠟꠝꠣꠘꠤ ꠇꠞꠂꠘ ꠘꠣ। ꠄꠞꠣ ꠔ ꠀꠝꠣꠞꠦ ꠘꠄꠀ ꠇꠥꠘ꠆ꠔꠣ ꠖꠤꠍꠂꠘ ꠘꠣ,
GAL 2:7 ꠛꠞꠋ ꠔꠣꠞꠣ ꠛꠥꠎꠤꠟꠤꠟꠣ, ꠁꠢꠥꠖꠤ ꠡꠝꠣꠎꠞ ꠉꠦꠍꠦ ꠈꠥꠡ-ꠈꠛꠞꠤ ꠔꠛꠟꠤꠉꠅ ꠙꠤꠔꠞꠞꠦ ꠎꠦꠟꠣ ꠖꠣꠄꠁꠔ꠆ꠔ ꠖꠦꠅꠀ ꠅꠁꠍꠤꠟ, ꠅꠃ ꠟꠣꠈꠣꠘ ꠅꠁꠘ꠆ꠘꠣꠁꠘ꠆ꠘ ꠎꠣꠔꠤꠞ ꠉꠦꠍꠦ ꠔꠛꠟꠤꠉꠞ ꠖꠣꠄꠁꠔ꠆ꠔ ꠀꠝꠣꠞꠦ ꠖꠦꠅꠀ ꠅꠁꠍꠦ।
GAL 2:8 ꠔꠣꠞꠣ ꠅꠈꠣꠘ ꠖꠦꠈꠟꠣ, ꠁꠢꠥꠖꠤ ꠅꠇꠟꠞ ꠉꠦꠍꠦ ꠍꠣꠢꠣꠛꠤ ꠇꠣꠝꠅ ꠙꠤꠔꠞꠞꠦ ꠎꠦꠁꠘ ꠌꠣꠟꠣꠁꠍꠂꠘ, ꠢꠃ ꠀꠟ꠆ꠟꠣꠄꠃ ꠅꠁꠘ꠆ꠘꠣꠁꠘ꠆ꠘ ꠎꠣꠔꠤꠞ ꠝꠣꠎꠦ ꠍꠣꠢꠣꠛꠤ ꠇꠣꠝꠅ ꠀꠝꠣꠞꠦ ꠌꠣꠟꠣꠁꠍꠂꠘ।
GAL 2:9 ꠅꠈꠣꠘ ꠖꠦꠈꠤꠀ ꠎꠝꠣꠔꠞ ꠉꠁꠘ꠆ꠘ-ꠝꠣꠁꠘ꠆ꠘ ꠝꠥꠞꠛ꠆ꠛꠤ, ꠝꠣꠘꠤ ꠁꠀꠇꠥꠛ, ꠙꠤꠔꠞ ꠀꠞ ꠢꠣꠘ꠆ꠘꠣꠘꠦ ꠛꠥꠎꠤꠟꠤꠟꠣ, ꠀꠟ꠆ꠟꠣꠞ ꠔꠞꠚ ꠕꠘꠦ ꠀꠝꠤ ꠈꠣꠍ ꠞꠢꠝꠔ ꠙꠣꠁꠍꠤ। ꠔꠦꠃ ꠔꠣꠞꠣꠅ ꠀꠝꠞꠣꠞ ꠟꠉꠦ ꠄꠇꠝꠔ ꠀꠍꠂꠘ ꠅꠈꠣꠘ ꠖꠦꠈꠣꠁꠔꠣ ꠇꠞꠤ, ꠀꠝꠣꠞ ꠀꠞ ꠛꠣꠞ꠆ꠘꠣꠛꠣꠍꠞ ꠟꠉꠦ ꠔꠣꠞꠣꠞ ꠀꠔ ꠝꠤꠟꠣꠁꠟꠣ। ꠀꠞ ꠅꠃ ꠝꠣꠔꠦ ꠞꠣꠎꠤ ꠅꠁꠟꠣ, ꠀꠝꠞꠣ ꠔꠛꠟꠤꠉ ꠇꠞꠝꠥ ꠅꠁꠘ꠆ꠘꠣꠁꠘ꠆ꠘ ꠎꠣꠔꠤꠞ ꠉꠦꠍꠦ, ꠅꠁꠟꠦ ꠔꠣꠞꠣ ꠔꠛꠟꠤꠉ ꠇꠞꠛꠣ ꠁꠢꠥꠖꠤ ꠡꠝꠣꠎꠞ ꠉꠦꠍꠦ।
GAL 2:10 ꠔꠣꠞꠣ ꠈꠣꠟꠤ ꠄꠇꠈꠣꠘ ꠀꠛꠖꠣꠞ ꠇꠞꠟꠣ, ꠀꠝꠞꠣ ꠎꠣꠘꠥ ꠎꠝꠣꠔꠞ ꠉꠞꠤꠛ ꠅꠇꠟꠞ ꠛꠣꠄ ꠈꠤꠀꠟ ꠞꠣꠈꠤ। ꠀꠍꠟꠦ ꠀꠝꠣꠞꠅ ꠅꠟꠣ ꠇꠞꠣꠞ ꠈꠥꠛ ꠁꠌ꠆ꠍꠣ ꠀꠍꠤꠟ।
GAL 2:11 ꠛꠣꠖꠦ ꠙꠤꠔꠞ ꠀꠘ꠆ꠔꠤꠅꠈꠤꠀ ꠐꠣꠃꠘꠅ ꠀꠁꠟꠣ। ꠄꠞꠝꠣꠎꠦ ꠔꠣꠁꠘ ꠄꠇ ꠛꠠ ꠅꠁꠘ꠆ꠘꠣꠄ ꠇꠞꠣꠄ ꠀꠝꠤ ꠔꠣꠘ ꠝꠥꠈꠞ ꠍꠣꠝꠘꠦꠃ ꠀꠙꠔ꠆ꠔꠤ ꠎꠣꠘꠣꠁꠟꠣꠝ।
GAL 2:12 ꠅꠃ ꠡꠝꠄ ꠁꠢꠥꠖꠤ ꠕꠣꠇꠤ ꠝꠥꠝꠤꠘ ꠅꠀ ꠄꠇꠖꠟ ꠝꠣꠘꠡꠦ ꠚꠔꠥꠀ ꠖꠤꠔꠣ, ꠅꠁꠘ꠆ꠘꠣꠁꠘ꠆ꠘ ꠎꠣꠔꠤ ꠕꠣꠇꠤ ꠎꠦꠞꠣ ꠁꠍꠣꠞ ꠃꠝ꠆ꠝꠔ ꠅꠄ, ꠔꠣꠞꠣꠞ ꠝꠍꠟꠝꠣꠘꠤ ꠇꠣꠝ ꠇꠞꠣꠘꠤ ꠎꠞꠥꠞ। ꠅꠃ ꠚꠔꠥꠀ ꠖꠟꠞ ꠇꠤꠍꠥ ꠝꠣꠘꠥꠡ ꠍꠣꠢꠣꠛꠤ ꠁꠀꠇꠥꠛꠞ ꠉꠦꠍ ꠕꠣꠇꠤ ꠀꠁꠛꠣꠞ ꠀꠉꠦ ꠙꠤꠔꠞꠦ ꠅꠁꠘ꠆ꠘ ꠎꠣꠔꠤꠞ ꠟꠉꠦ ꠝꠤꠟꠣ-ꠝꠤꠡꠣ ꠇꠞꠤ ꠈꠣꠘꠣ-ꠖꠣꠘꠣ ꠈꠣꠁꠔꠣ। ꠁꠐꠣ ꠔ ꠈꠥꠛ ꠜꠣꠟꠣ। ꠅꠁꠟꠦ ꠄꠞꠣ ꠀꠅꠀꠄ ꠄꠞꠣꠞ ꠒꠞꠦ ꠔꠣꠁꠘ ꠅꠃ ꠜꠣꠟꠣ ꠇꠣꠝ ꠛꠘ꠆ꠖ ꠇꠞꠤꠟ꠆ꠟꠣ। ꠅꠇꠐꠣꠃ ꠛꠠ ꠅꠁꠘ꠆ꠘꠣꠄ।
GAL 2:13 ꠀꠘ꠆ꠔꠤꠅꠈꠤꠀꠞ ꠀꠞꠅ ꠛꠃꠔ ꠁꠢꠥꠖꠤ ꠝꠥꠝꠤꠘꠦꠅ ꠙꠤꠔꠞꠞ ꠟꠉꠦ ꠅꠃ ꠜꠘ꠆ꠒꠣꠝꠤꠔ ꠡꠣꠝꠤꠟ ꠅꠁꠟꠣ। ꠢꠦꠡ-ꠝꠦꠡ ꠛꠣꠞ꠆ꠘꠣꠛꠣꠍꠅ ꠔꠣꠞꠣꠞ ꠟꠉꠦ ꠜꠥꠟ ꠙꠕꠦ ꠙꠣꠅ ꠖꠤꠟꠣꠁꠟꠣ।
GAL 2:14 ꠅꠁꠟꠦ ꠀꠝꠤ ꠎꠦꠛꠟꠣ ꠖꠦꠈꠟꠣꠝ, ꠈꠥꠡ-ꠈꠛꠞꠤꠞ ꠢꠇꠤꠇꠔꠞ ꠟꠉꠦ ꠔꠣꠞꠣꠞ ꠇꠣꠝ-ꠇꠣꠎ ꠝꠤꠟꠦꠞ ꠘꠣ, ꠅꠃ ꠢꠇꠟꠞ ꠍꠣꠝꠘꠦ ꠙꠤꠔꠞꠞꠦ ꠇꠁꠟꠣꠝ, “ꠀꠙꠘꠦ ꠁꠢꠥꠖꠤ ꠅꠁꠀꠅ ꠎꠥꠖꠤ ꠁꠢꠥꠖꠤ ꠘꠤꠅꠝ ꠛꠣꠖ ꠖꠤꠀ ꠅꠁꠘ꠆ꠘ ꠎꠣꠔꠤꠞ ꠟꠣꠈꠣꠘ ꠌꠟꠂꠘ, ꠔꠦ ꠅꠁꠘ꠆ꠘ ꠎꠣꠔꠤꠞꠦ ꠇꠦꠘꠦ ꠅꠈꠘ ꠁꠢꠥꠖꠤ ꠘꠤꠅꠝ ꠝꠣꠘꠣꠞ ꠔꠣꠉꠤꠖ ꠖꠤꠞꠣ?
GAL 2:15 ꠀꠙꠘꠦ-ꠀꠝꠤ ꠖꠥꠁꠅꠎꠘꠃ ꠔ ꠁꠢꠥꠖꠤ, ꠘꠣꠚꠞꠝꠣꠘ ꠅ-ꠁꠢꠥꠖꠤ ꠇꠥꠟꠅ ꠎꠘꠝꠤꠍꠤ ꠘꠣ।
GAL 2:16 ꠄꠞꠛꠣꠖꠦꠅ ꠔ ꠀꠝꠞꠣ ꠎꠣꠘꠤ, ꠝꠥꠍꠣꠞ ꠡꠞꠤꠅꠔ ꠀꠝꠟ ꠇꠞꠟꠦꠅ ꠀꠟ꠆ꠟꠣꠄ ꠝꠣꠘꠡꠞꠦ ꠖꠤꠘꠖꠣꠞ ꠇꠁꠀ ꠇꠛꠥꠟ ꠇꠞꠂꠘ ꠘꠣ, ꠈꠣꠟꠤ ꠁꠍꠣ ꠀꠟ-ꠝꠍꠤꠞ ꠃꠙꠞꠦ ꠁꠝꠣꠘ ꠀꠘꠟꠦꠃ ꠖꠤꠘꠖꠣꠞ ꠇꠁꠀ ꠇꠛꠥꠟ ꠇꠞꠂꠘ। ꠄꠞꠖꠣꠄꠃ ꠀꠝꠞꠣ ꠔꠣꠘ ꠃꠙꠞꠦ ꠁꠝꠣꠘ ꠀꠘꠍꠤ, ꠎꠣꠔꠦ ꠡꠞꠤꠅꠔꠞ ꠀꠝꠟꠦ ꠘꠣꠄ, ꠅꠁꠟꠦ ꠀꠟ-ꠝꠍꠤꠞ ꠃꠙꠞꠦ ꠁꠝꠣꠘ ꠀꠘꠣꠄ ꠀꠝꠞꠣꠞꠦ ꠖꠤꠘꠖꠣꠞ ꠇꠁꠀ ꠇꠛꠥꠟ ꠇꠞꠂꠘ। ꠇꠣꠞꠘ ꠡꠞꠤꠅꠔ ꠀꠝꠟ ꠇꠞꠟꠦꠅ ꠇꠥꠘꠥ ꠝꠣꠘꠡꠞꠦ ꠖꠤꠘꠖꠣꠞ ꠇꠁꠀ ꠉꠘꠣ ꠅꠁꠔ ꠘꠣꠄ।”
GAL 2:17 ꠅꠁꠟꠦ ꠅꠈꠘ ꠀꠝꠞꠣ ꠀꠟ-ꠝꠍꠤꠞ ꠔꠞꠤꠇꠣꠄ ꠖꠤꠘꠖꠣꠞ ꠛꠘꠔꠣꠝ ꠌꠣꠁꠞꠣꠝ ꠇꠞꠤ, ꠁꠢꠥꠖꠤ ꠡꠞꠣꠞ ꠘꠤꠅꠝ-ꠇꠣꠘꠥꠘ ꠛꠣꠖ ꠖꠤꠟꠣꠁꠍꠤ। ꠄꠔꠦ ꠎꠥꠖꠤ ꠇꠥꠘꠥ ꠇꠥꠘꠥ ꠎꠘꠦ ꠀꠝꠞꠣꠞꠦ ꠘꠣꠚꠞꠝꠣꠘ ꠇꠂꠘ, ꠔꠦ ꠇꠤꠔꠣ ꠛꠥꠎꠣ ꠎꠣꠄ, ꠀꠟ-ꠝꠍꠤꠄ ꠇꠥꠘꠥ ꠉꠥꠘꠣꠞ ꠈꠦꠎꠝꠔ ꠇꠞꠂꠘ ꠘꠤ? ꠘꠣꠃꠎꠥꠛꠤꠟ꠆ꠟꠣ, ꠘꠤꠌꠄ ꠘꠣ।
GAL 2:18 ꠀꠝꠤ ꠘꠤꠎꠦ ꠎꠦꠔꠣ ꠛꠣꠖ ꠖꠤꠟꠣꠁꠍꠤ, ꠅꠔꠣ ꠎꠥꠖꠤ ꠢꠤꠞꠛꠣꠞ ꠇꠞꠤ, ꠔꠦ ꠔ ꠘꠤꠎꠦꠃ ꠘꠤꠎꠞꠦ ꠖꠥꠡꠤ ꠙꠞꠝꠣꠘ ꠇꠞꠤꠀꠞ।
GAL 2:19 ꠡꠞꠤꠅꠔꠞ ꠘꠤꠅꠝꠦ ꠡꠞꠤꠅꠔꠞ ꠀꠔꠅꠃ ꠀꠝꠣꠞ ꠝꠃꠔ ꠅꠁꠉꠦꠍꠦ, ꠎꠣꠔꠦ ꠀꠟ꠆ꠟꠣꠞ ꠔꠣꠞꠤꠚꠞ ꠟꠣꠉꠤ ꠀꠝꠤ ꠎꠤꠘ꠆ꠖꠣ ꠞꠁ।
GAL 2:20 ꠔꠦ ꠗꠞꠤꠟꠣꠅ, ꠀꠝꠣꠞꠦ ꠀꠟ-ꠝꠍꠤꠞ ꠟꠉꠦ ꠉꠣꠍꠅ ꠟꠐꠇꠣꠁꠀ ꠎꠣꠘꠦ ꠝꠣꠞꠣ ꠅꠁꠍꠦ। ꠀꠝꠤ ꠀꠞ ꠎꠤꠘ꠆ꠖꠣ ꠘꠣꠄ, ꠀꠝꠣꠞ ꠇꠣꠄꠀꠞ ꠝꠣꠎꠦ ꠀꠟ-ꠝꠍꠤꠃ ꠎꠤꠘ꠆ꠖꠣ ꠀꠍꠂꠘ। ꠅꠃ ꠇꠣꠄꠀꠄ ꠅꠈꠘ ꠎꠦ ꠎꠤꠘ꠆ꠖꠦꠉꠤ ꠇꠣꠐꠣꠁꠞꠣꠝ, ꠁꠐꠣ ꠀꠟ꠆ꠟꠣꠞ ꠈꠣꠍ ꠝꠣꠄꠀꠞ ꠎꠘꠞ ꠃꠙꠞꠦ ꠁꠝꠣꠘꠞ ꠛꠟꠦ ꠇꠣꠐꠣꠁꠞꠣꠝ। ꠔꠣꠁꠘ ꠀꠝꠣꠞꠦ ꠝꠢꠛ꠆ꠛꠔ ꠇꠞꠤꠀ, ꠀꠝꠣꠞꠦ ꠔꠞꠣꠘꠤꠞ ꠟꠣꠉꠤ ꠘꠤꠎꠞ ꠎꠣꠘ ꠇꠥꠞꠛꠣꠘꠤ ꠖꠤꠍꠂꠘ।
GAL 2:21 ꠀꠟ꠆ꠟꠣ ꠙꠣꠇꠞ ꠁ ꠞꠢꠝꠔ ꠀꠝꠤ ꠛꠤꠚꠟ ꠅꠁꠔꠦ ꠖꠤꠔꠣꠝ ꠘꠣꠄ। ꠡꠞꠤꠅꠔ ꠀꠝꠟ ꠇꠞꠤꠀ ꠎꠥꠖꠤ ꠝꠣꠘꠥꠡ ꠖꠤꠘꠖꠣꠞ ꠛꠘꠤꠎꠤꠔ, ꠔꠦ ꠀꠟ-ꠝꠍꠤ ꠈꠣꠝꠈꠣ ꠇꠥꠞꠛꠣꠘꠤ ꠅꠁꠟꠣ ꠘꠤ?
GAL 3:1 ꠅ ꠛꠦꠀꠈꠟ ꠉꠣꠟꠣꠔꠤ ꠅꠇꠟ, ꠔꠥꠝꠞꠣꠞꠦ ꠇꠦꠉꠤꠄ ꠎꠣꠖꠥ ꠇꠞꠍꠦ? ꠔꠥꠝꠞꠣꠞ ꠉꠦꠍꠦ ꠔ ꠈꠥꠟꠣ-ꠝꠦꠟꠣ ꠀꠞ ꠍꠣꠚ-ꠍꠚꠣ ꠔꠛꠟꠤꠉ ꠇꠞꠣ ꠅꠁꠍꠦ, ꠁꠍꠣ ꠀꠟ-ꠝꠍꠤꠞꠦ ꠉꠣꠍꠅ ꠟꠐꠇꠣꠁꠀ ꠎꠣꠘꠦ ꠝꠣꠞꠣ ꠅꠁꠍꠤꠟ।
GAL 3:2 ꠔꠦ ꠅꠈꠘ ꠀꠝꠤ ꠈꠣꠟꠤ ꠅꠃ ꠇꠕꠣꠈꠣꠘ ꠎꠣꠘꠔꠣꠝ ꠌꠣꠁꠞꠣꠝ, ꠔꠥꠝꠞꠣ ꠎꠦ ꠙꠣꠇ ꠞꠥꠢꠥ ꠙꠣꠁꠍ, ꠁꠐꠣ ꠇꠤꠔꠣ ꠝꠥꠍꠣꠞ ꠡꠞꠤꠅꠔ ꠀꠝꠟ ꠇꠞꠤꠀ ꠙꠣꠁꠍ ꠘꠤ? ꠘꠣ ꠈꠥꠡ-ꠈꠛꠞꠤ ꠢꠥꠘꠤꠀ ꠁꠝꠣꠘ ꠀꠘꠣꠄ ꠙꠣꠁꠍ?
GAL 3:3 ꠔꠥꠝꠞꠣ ꠇꠥꠘꠥ ꠅꠟꠣ ꠛꠦꠀꠈꠟ ꠘꠤ? ꠙꠣꠇ ꠞꠥꠢꠥꠞ ꠛꠟꠦ ꠘꠄꠀ ꠎꠤꠘ꠆ꠖꠦꠉꠤ ꠡꠥꠞꠥ ꠇꠞꠤꠀ, ꠅꠈꠘ ꠘꠤꠎꠞ ꠛꠟꠦ ꠇꠣꠝꠤꠀꠛ ꠅꠁꠔꠣꠄ ꠌꠣꠁꠞꠣꠄ?
GAL 3:4 ꠔꠦ ꠈꠣꠝꠈꠣ ꠅꠔ ꠖꠥꠈ-ꠇꠡ꠆ꠐ ꠇꠞꠟꠣꠄ ꠘꠤ? ꠀꠝꠤ ꠀꠡꠣ ꠇꠞꠤ ꠔꠥꠝꠞꠣꠞ ꠁ ꠇꠡ꠆ꠐ ꠝꠥꠐꠦꠃ ꠛꠦꠢꠥꠖꠣ ꠉꠦꠍꠦ ꠘꠣ।
GAL 3:5 ꠀꠁꠌ꠆ꠍꠣ, ꠀꠟ꠆ꠟꠣꠄ ꠔ ꠔꠥꠝꠞꠣꠞꠦ ꠙꠣꠇ ꠞꠥꠢꠥ ꠖꠣꠘ ꠇꠞꠍꠂꠘ, ꠀꠞ ꠔꠥꠝꠞꠣꠞ ꠝꠣꠎꠦ ꠛꠃꠔ ꠇꠦꠞꠣꠝꠔꠤ ꠇꠣꠝꠅ ꠇꠞꠍꠂꠘ। ꠔꠦ ꠇꠅ ꠌꠣꠁꠘ, ꠔꠣꠘ ꠡꠞꠤꠅꠔ ꠝꠣꠘꠣꠄ ꠔꠣꠁꠘ ꠁꠔꠣ ꠇꠞꠟꠣ ꠘꠤ? ꠘꠣ ꠈꠥꠡ-ꠈꠛꠞꠤ ꠢꠥꠘꠤꠀ ꠔꠥꠝꠞꠣ ꠁꠝꠣꠘ ꠀꠘꠣꠄ ꠁꠔꠣ ꠇꠞꠍꠂꠘ?
GAL 3:6 ꠁꠛ꠆ꠞꠣꠢꠤꠝ ꠘꠛꠤꠞ ꠛꠦꠙꠣꠞꠈꠣꠘ ꠖꠦꠈꠅ, ꠀꠟ꠆ꠟꠣꠞ ꠇꠣꠟꠣꠝꠅ ꠀꠍꠦ, “ꠁꠛ꠆ꠞꠣꠢꠤꠝꠦ ꠀꠟ꠆ꠟꠣꠞ ꠅꠀꠖꠣꠄ ꠁꠝꠣꠘ ꠀꠘꠣꠄ, ꠀꠟ꠆ꠟꠣꠄ ꠔꠣꠘꠞꠦ ꠖꠤꠘꠖꠣꠞ ꠇꠁꠀ ꠇꠛꠥꠟ ꠇꠞꠟꠣ।”
GAL 3:7 ꠄꠞꠖꠣꠄ ꠔꠥꠝꠞꠣꠅ ꠡꠝꠎꠤꠟꠣꠅ, ꠎꠦꠞꠣ ꠁꠝꠣꠘ ꠀꠘꠦ, ꠔꠣꠞꠣꠃ ꠁꠛ꠆ꠞꠣꠢꠤꠝꠞ ꠀꠍꠟ ꠀꠅꠟꠣꠖ।
GAL 3:8 ꠀꠍꠝꠣꠘꠤ ꠇꠤꠔꠣꠛꠅ ꠀꠉꠦꠃ ꠛꠣꠔꠣꠁꠟ ꠅꠁꠍꠦ, ꠀꠟ꠆ꠟꠣꠞ ꠃꠙꠞꠦ ꠁꠝꠣꠘ ꠀꠘꠟꠦꠃ ꠔ ꠔꠣꠁꠘ ꠅꠁꠘ꠆ꠘꠣꠁꠘ꠆ꠘ ꠎꠣꠔꠤꠞꠦ ꠖꠤꠘꠖꠣꠞ ꠇꠁꠀ ꠇꠛꠥꠟ ꠇꠞꠂꠘ। ꠁꠛ꠆ꠞꠣꠢꠤꠝꠞ ꠉꠦꠍꠦ ꠅꠃ ꠀꠄꠀꠔꠞ ꠈꠥꠡ-ꠈꠛꠞꠤ ꠀꠉꠦꠃ ꠎꠣꠘꠣꠁꠟ ꠅꠁꠍꠤꠟ, “ꠔꠥꠝꠣꠞ ꠃꠍꠤꠟ꠆ꠟꠣꠄ ꠖꠥꠘꠤꠀꠞ ꠔꠣꠝꠣꠝ ꠎꠣꠔꠤꠄ ꠛꠞꠇꠔ ꠙꠣꠁꠛꠣ।”
GAL 3:9 ꠔꠦ ꠛꠥꠎꠣ ꠎꠣꠄ, ꠀꠟ꠆ꠟꠣꠞ ꠅꠀꠖꠣꠄ ꠁꠝꠣꠘ ꠀꠘꠣꠄ ꠁꠛ꠆ꠞꠣꠢꠤꠝꠦ ꠎꠦꠟꠣ ꠛꠞꠇꠔ ꠙꠣꠁꠍꠂꠘ, ꠔꠣꠘ ꠛꠣꠖꠦ ꠎꠦꠞꠣ ꠁꠝꠣꠘ ꠀꠘꠛꠣ ꠔꠣꠞꠣꠅ ꠅꠟꠣ ꠛꠞꠇꠔ ꠙꠣꠁꠛꠣ।
GAL 3:10 ꠀꠍꠝꠣꠘꠤ ꠇꠤꠔꠣꠛꠦ ꠇꠄ, “ꠎꠦ ꠝꠣꠘꠡꠦ ꠡꠞꠤꠅꠔꠞ ꠇꠤꠔꠣꠛꠅ ꠟꠦꠈꠣ ꠔꠣꠝꠣꠝ ꠢꠥꠇꠥꠝ-ꠀꠢꠇꠣꠝ ꠀꠝꠟ ꠘꠣ ꠇꠞꠦ, ꠢꠦ ꠟꠣꠘ꠆ꠘꠔꠤ।” ꠅꠘ ꠕꠣꠇꠤ ꠛꠥꠎꠣ ꠎꠣꠄ, ꠎꠦꠞꠣ ꠡꠞꠤꠅꠔ ꠝꠣꠘꠣꠞ ꠃꠙꠞꠦ ꠜꠞꠡꠣ ꠇꠞꠦ, ꠔꠣꠞꠣ ꠢꠇꠟꠞ ꠃꠙꠞꠦꠃ ꠁ ꠟꠣꠘ꠆ꠘꠔ ꠀꠍꠦ।
GAL 3:11 ꠀꠟ꠆ꠟꠣꠞ ꠇꠣꠟꠣꠝꠦ ꠛꠣꠔꠣꠄ, “ꠖꠤꠘꠖꠣꠞ ꠇꠁꠀ ꠎꠣꠞꠦ ꠇꠛꠥꠟ ꠇꠞꠣ ꠅꠄ, ꠢꠦ ꠔꠣꠞ ꠁꠝꠣꠘꠞ ꠎꠞꠤꠀꠄ ꠎꠤꠘ꠆ꠖꠦꠉꠤ ꠙꠣꠁꠛ।” ꠄꠞꠖꠣꠄ ꠛꠥꠎꠣ ꠎꠣꠄ, ꠡꠞꠤꠅꠔꠞ ꠢꠥꠇꠥꠝ-ꠀꠢꠇꠣꠝ ꠝꠣꠘꠟꠦꠅ ꠀꠟ꠆ꠟꠣꠄ ꠇꠦꠃꠞꠞꠦ ꠖꠤꠘꠖꠣꠞ ꠇꠁꠀ ꠇꠛꠥꠟ ꠇꠞꠂꠘ ꠘꠣ।
GAL 3:12 ꠅꠁꠟꠦ ꠡꠞꠤꠅꠔꠦ ꠇꠄ, “ꠡꠞꠤꠅꠔꠞ ꠢꠥꠇꠥꠝ-ꠀꠢꠇꠣꠝ ꠝꠣꠚꠤꠇ ꠎꠦ ꠝꠣꠘꠥꠡ ꠌꠟꠦ, ꠢꠦ ꠡꠞꠤꠅꠔꠞ ꠝꠣꠎꠖꠤꠃ ꠎꠤꠘ꠆ꠖꠦꠉꠤ ꠇꠣꠐꠣꠁꠛ।” ꠔꠦ ꠔ ꠛꠥꠎꠣ ꠎꠣꠄ, ꠡꠞꠤꠅꠔꠦ ꠁꠝꠣꠘꠞ ꠃꠙꠞꠦ ꠜꠞꠡꠣ ꠇꠞꠦ ꠘꠣ।
GAL 3:13 ꠡꠞꠤꠅꠔꠞ ꠛꠞꠈꠦꠟꠣꠚ ꠇꠞꠣꠄ ꠀꠝꠞꠣꠞ ꠃꠙꠞꠦ ꠎꠦ ꠟꠣꠘ꠆ꠘꠔ ꠀꠍꠤꠟ, ꠅꠃ ꠟꠣꠘ꠆ꠘꠔ ꠀꠟ-ꠝꠍꠤꠄ ꠔꠣꠘ ꠘꠤꠎꠞ ꠇꠣꠘ꠆ꠖꠅ ꠘꠤꠀ ꠀꠝꠞꠣꠞꠦ ꠀꠎꠣꠖ ꠇꠞꠍꠂꠘ। ꠀꠟ꠆ꠟꠣꠞ ꠇꠣꠟꠣꠝꠅ ꠔ ꠀꠍꠦ, “ꠉꠣꠍꠅ ꠟꠐꠇꠣꠁꠀ ꠎꠣꠞꠦ ꠎꠣꠘꠦ ꠝꠣꠞꠣ ꠅꠄ, ꠢꠦ ꠟꠣꠘ꠆ꠘꠔꠤ।”
GAL 3:14 ꠀꠟ꠆ꠟꠣꠄ ꠁꠛ꠆ꠞꠣꠢꠤꠝ ꠘꠛꠤꠞꠦ ꠎꠦ ꠛꠞꠇꠔ ꠖꠣꠘ ꠇꠞꠍꠂꠘ, ꠁꠍꠣ ꠀꠟ-ꠝꠍꠤꠞ ꠎꠞꠤꠀꠄ ꠅꠃ ꠛꠞꠇꠔ ꠎꠣꠔꠦ ꠅꠁꠘ꠆ꠘ ꠎꠣꠔꠤ ꠅꠇꠟꠦꠅ ꠙꠣꠁꠘ, ꠀꠞ ꠀꠝꠞꠣꠅ ꠎꠣꠔꠦ ꠁꠝꠣꠘꠞ ꠝꠣꠎꠖꠤ ꠅꠀꠖꠣ ꠇꠞꠣ ꠢꠃ ꠙꠣꠇ ꠞꠥꠢꠥ ꠙꠣꠁ, ꠅꠔꠣꠞ ꠖꠣꠄꠃ ꠀꠟ-ꠝꠍꠤꠄ ꠁ ꠟꠣꠘ꠆ꠘꠔ ꠘꠤꠎꠞ ꠇꠣꠘ꠆ꠖꠅ ꠘꠤꠍꠂꠘ।
GAL 3:15 ꠅ ꠜꠣꠁ ꠅꠇꠟ, ꠀꠝꠤ ꠖꠥꠘꠤꠀꠛꠤ ꠇꠕꠣꠖꠤ ꠛꠥꠎꠣꠁ ꠖꠤꠞꠣꠝ। ꠖꠥꠁ ꠙꠇ꠆ꠇ ꠝꠣꠘꠡꠞ ꠝꠣꠎꠦ ꠎꠦꠛꠟꠣ ꠇꠥꠘꠥ ꠌꠥꠇ꠆ꠔꠤ ꠙꠣꠇꠣ-ꠙꠥꠇ꠆ꠔ ꠅꠁꠎꠣꠄ, ꠅꠃ ꠌꠥꠇ꠆ꠔꠤ ꠄꠇ ꠙꠇ꠆ꠇꠄ ꠀꠞ ꠛꠣꠔꠤꠟ ꠇꠞꠔ ꠙꠣꠞꠦ ꠘꠣ, ꠛꠣ ꠄꠞ ꠝꠣꠎꠦ ꠘꠄꠀ ꠇꠥꠘ꠆ꠔꠣ ꠟꠣꠉꠣꠁꠔ-ꠅ ꠙꠣꠞꠦ ꠘꠣ।
GAL 3:16 ꠔꠦ ꠁꠛ꠆ꠞꠣꠢꠤꠝ ꠘꠛꠤ ꠀꠞ ꠔꠣꠘ ꠀꠅꠟꠣꠖꠞ ꠟꠉꠦ ꠀꠟ꠆ꠟꠣꠄ ꠎꠦ ꠅꠀꠖꠣ ꠇꠞꠍꠟꠣ, ꠀꠟ꠆ꠟꠣꠞ ꠇꠣꠟꠣꠝꠅ ꠔ ꠇꠅꠀ ꠅꠁꠍꠦ ꠘꠣ, “ꠀꠅꠟꠣꠖ ꠅꠇꠟꠞ ꠟꠉꠦ” ꠝꠣꠘꠤ ꠛꠃꠔ ꠀꠅꠟꠣꠖꠞ ꠟꠉꠦ। ꠛꠞꠋ ꠇꠅꠀ ꠅꠁꠍꠦ ꠈꠣꠟꠤ “ꠔꠥꠝꠣꠞ ꠀꠅꠟꠣꠖꠞ ꠟꠉꠦ” ꠝꠣꠘꠤ ꠄꠇ ꠀꠅꠟꠣꠖꠞ ꠟꠉꠦ, ꠀꠞ ꠅꠃ ꠀꠅꠟꠣꠖꠃ ꠅꠁꠟꠣ ꠀꠟ-ꠝꠍꠤ।
GAL 3:17 ꠀꠝꠤ ꠇꠁꠔꠣꠝ ꠌꠣꠁꠞꠣꠝ, ꠀꠟ꠆ꠟꠣꠄ ꠁꠛ꠆ꠞꠣꠢꠤꠝꠞ ꠀꠝꠟꠅ ꠅꠀꠖꠣꠞ ꠝꠣꠎꠖꠤ ꠎꠦ ꠘꠤꠅꠝ ꠛꠅꠀꠁꠟ ꠇꠞꠍꠟꠣ, ꠄꠞ ꠌꠣꠁꠞ-ꠡ ꠔꠤꠡ ꠛꠞꠍ ꠛꠣꠖꠦ ꠡꠞꠤꠅꠔ ꠖꠦꠅꠀ ꠅꠁꠍꠤꠟ। ꠅꠃ ꠡꠞꠤꠅꠔ ꠀꠅꠀꠄ ꠀꠉꠞ ꠢꠃ ꠅꠀꠖꠣꠞ ꠘꠤꠅꠝ ꠔ ꠛꠣꠔꠤꠟ ꠇꠞꠔ ꠙꠣꠞꠦ ꠘꠣ। ꠔꠦ ꠔ ꠔꠣꠘ ꠅꠀꠖꠣ ꠎꠣꠞꠤ ꠞꠁꠟ।
GAL 3:18 ꠀꠞ ꠀꠟ꠆ꠟꠣꠞ ꠛꠞꠇꠔ ꠙꠣꠅꠀ ꠎꠥꠖꠤ ꠡꠞꠤꠅꠔ ꠀꠝꠟꠞ ꠃꠙꠞꠦ ꠘꠤꠞꠜꠞ ꠇꠞꠔ, ꠔꠦ ꠅꠀꠖꠣꠞ ꠃꠙꠞꠦ ꠘꠤꠞꠜꠞ ꠞꠁꠟ ꠘꠣ ꠅꠘꠦ। ꠅꠁꠟꠦ ꠀꠟ꠆ꠟꠣꠄ ꠅꠀꠖꠣꠞ ꠝꠣꠎꠖꠤꠃ ꠁꠛ꠆ꠞꠣꠢꠤꠝꠞꠦ ꠛꠞꠇꠔ ꠖꠣꠘ ꠇꠞꠍꠟꠣ।
GAL 3:19 ꠔꠦ ꠇꠁꠛꠣ, ꠡꠞꠤꠅꠔ ꠇꠦꠘꠦ ꠖꠦꠅꠀ ꠅꠁꠍꠤꠟ? ꠝꠣꠘꠡꠦ ꠉꠥꠘꠣꠞ ꠇꠣꠝ ꠘꠣ ꠍꠣꠠꠣꠄ, ꠀꠟ꠆ꠟꠣꠞ ꠔꠞꠚ ꠕꠣꠇꠤ ꠅꠀꠖꠣꠞ ꠟꠉꠦ ꠡꠞꠤꠅꠔꠅ ꠡꠣꠝꠤꠟ ꠇꠞꠍꠟꠣ। ꠀꠞ ꠁꠛ꠆ꠞꠣꠢꠤꠝꠞ ꠎꠦ ꠀꠅꠟꠣꠖꠞ ꠛꠦꠙꠣꠞꠦ ꠀꠟ꠆ꠟꠣꠄ ꠅꠀꠖꠣ ꠇꠞꠍꠟꠣ, ꠅꠃ ꠎꠘꠦ ꠔꠡꠞꠤꠚ ꠘꠣ ꠀꠘꠣ ꠙꠞ꠆ꠎꠘ꠆ꠔ ꠁ ꠡꠞꠤꠅꠔ ꠛꠅꠀꠁꠟ ꠀꠍꠤꠟ। ꠀꠟ꠆ꠟꠣꠞ ꠚꠤꠞꠤꠡ꠆ꠔꠣꠞ ꠎꠞꠤꠀꠄ ꠝꠥꠍꠣ ꠘꠛꠤꠞ ꠉꠦꠍꠦ ꠁ ꠡꠞꠤꠅꠔ ꠘꠣꠎꠤꠟ ꠅꠁꠍꠤꠟ। ꠅꠃ ꠝꠥꠍꠣꠃ ꠀꠍꠟꠣ ꠀꠟ꠆ꠟꠣ ꠀꠞ ꠝꠣꠘꠡꠞ ꠝꠣꠎꠦ ꠡꠣꠚꠣꠄꠀꠔꠇꠣꠞꠤ, ꠝꠣꠘꠤ ꠝꠣꠎꠞ ꠝꠣꠘꠥꠡ।
GAL 3:20 ꠅꠁꠟꠦ ꠈꠣꠟꠤ ꠄꠇꠙꠇ꠆ꠇ ꠕꠣꠇꠟꠦ ꠔ ꠝꠣꠎꠞ ꠝꠣꠘꠡꠞ ꠎꠞꠥꠞ ꠀꠍꠤꠟ ꠘꠣ; ꠀꠞ ꠀꠟ꠆ꠟꠣ ꠔ ꠄꠇꠎꠘꠃ। ꠔꠣꠁꠘ ꠁꠛ꠆ꠞꠣꠢꠤꠝꠞ ꠟꠉꠦ ꠅꠀꠖꠣꠞ ꠇꠣꠟꠅ ꠇꠥꠘꠥ ꠝꠣꠎꠞ ꠎꠘ ꠟꠣꠉꠍꠦ ꠘꠣ।
GAL 3:21 ꠔꠦ ꠡꠞꠤꠅꠔ ꠇꠥꠘꠥ ꠀꠟ꠆ꠟꠣꠞ ꠅꠀꠖꠣ ꠅꠇꠟꠞ ꠃꠟꠐꠣ ꠘꠤ? ꠘꠤꠌꠄ ꠘꠣ। ꠀꠟ꠆ꠟꠣꠄ ꠎꠥꠖꠤ ꠅꠃ ꠟꠣꠈꠣꠘ ꠡꠞꠤꠅꠔ ꠖꠣꠘ ꠇꠞꠔꠣ, ꠎꠦꠔꠣꠄ ꠀꠈꠦꠞꠤ ꠎꠤꠘ꠆ꠖꠦꠉꠤ ꠝꠤꠟꠦ, ꠔꠦ ꠡꠞꠤꠅꠔ ꠝꠣꠘꠤꠀꠃ ꠝꠣꠘꠥꠡ ꠀꠟ꠆ꠟꠣꠞ ꠖꠞꠛꠣꠞꠅ ꠇꠛꠥꠟ ꠅꠁꠉꠦꠟꠘꠦ।
GAL 3:22 ꠅꠁꠟꠦ ꠀꠍꠝꠣꠘꠤ ꠇꠤꠔꠣꠛꠦ ꠛꠣꠔꠣꠄ, ꠔꠣꠝꠣꠝ ꠝꠣꠘꠥꠡꠃ ꠉꠥꠘꠣꠞ ꠇꠛꠎꠣꠄ ꠛꠘ꠆ꠖꠤ, ꠔꠣꠞꠣ ꠎꠣꠘꠥ ꠁꠍꠣ ꠀꠟ-ꠝꠍꠤꠞ ꠃꠙꠞꠦ ꠁꠝꠣꠘ ꠀꠘꠤꠀ, ꠁꠝꠣꠘꠞ ꠎꠞꠤꠀꠄ ꠅꠀꠖꠣ ꠇꠞꠣ ꠢꠃ ꠛꠞꠇꠔ ꠙꠣꠁꠘ।
GAL 3:23 ꠁꠝꠣꠘ ꠀꠅꠀꠞ ꠀꠉꠦ ꠡꠞꠤꠅꠔꠦ ꠀꠝꠞꠣꠞꠦ ꠙꠣꠞꠣ ꠖꠤꠍꠤꠟ। ꠁꠝꠣꠘ ꠎꠣꠁꠞ ꠘꠣ ꠅꠀ ꠙꠞ꠆ꠎꠘ꠆ꠔ ꠅꠃ ꠡꠞꠤꠅꠔꠦꠃ ꠀꠝꠞꠣꠞꠦ ꠛꠣꠘ꠆ꠖꠤꠀ ꠞꠣꠈꠍꠤꠟ।
GAL 3:24 ꠄꠞꠖꠣꠄ ꠛꠥꠎꠣ ꠎꠣꠄ, ꠀꠟ-ꠝꠍꠤꠞ ꠉꠦꠍꠦ ꠙꠃꠍꠣꠘꠤꠞ ꠀꠉꠦ ꠅꠃ ꠡꠞꠤꠅꠔꠦꠃ ꠅꠔꠖꠤꠘ ꠀꠝꠞꠣꠞꠦ ꠌꠣꠟꠣꠁꠍꠦ, ꠎꠣꠔꠦ ꠁꠝꠣꠘꠞ ꠎꠞꠤꠀꠄ ꠀꠝꠞꠣꠞꠦ ꠖꠤꠘꠖꠣꠞ ꠇꠁꠀ ꠇꠛꠥꠟ ꠇꠞꠣ ꠅꠄ।
GAL 3:25 ꠅꠁꠟꠦ ꠅꠈꠘ ꠁꠝꠣꠘ ꠇꠣꠁꠝ ꠅꠀꠄ, ꠀꠝꠞꠣ ꠀꠞ ꠌꠣꠟꠇꠖꠣꠞ ꠡꠞꠤꠅꠔꠞ ꠔꠟꠥꠀ ꠘꠣꠄ।
GAL 3:26 ꠁꠍꠣ ꠀꠟ-ꠝꠍꠤꠞ ꠃꠙꠞꠦ ꠁꠝꠣꠘ ꠀꠘꠣꠄ ꠔꠥꠝꠞꠣ ꠢꠇ꠆ꠇꠟ ꠅꠈꠘ ꠀꠟ꠆ꠟꠣꠞ ꠀꠅꠟꠣꠖ ꠛꠘꠤꠉꠦꠍ।
GAL 3:27 ꠔꠥꠝꠞꠣ ꠎꠣꠞꠣ ꠀꠟ-ꠝꠍꠤꠞ ꠔꠞꠤꠇꠣ ꠇꠛꠥꠟ ꠇꠞꠍ, ꠔꠥꠝꠞꠣ ꠔ ꠚꠤꠘ꠆ꠘꠞ ꠘꠄꠀ ꠇꠣꠙꠠꠞ ꠟꠣꠈꠣꠘ ꠀꠟ-ꠝꠍꠤꠞ ꠜꠤꠔꠞꠦ ꠢꠣꠝꠣꠁꠉꠦꠍ।
GAL 3:28 ꠁꠢꠥꠖꠤ ꠀꠞ ꠅ-ꠁꠢꠥꠖꠤ, ꠉꠥꠟꠣꠝ ꠀꠞ ꠀꠎꠣꠖ, ꠛꠦꠐꠤꠘ ꠀꠞ ꠛꠦꠐꠣꠁꠘ꠆ꠔꠞ ꠝꠣꠎꠦ ꠅꠈꠘ ꠇꠥꠘꠥ ꠔꠚꠣꠔ ꠘꠣꠁ। ꠁꠍꠣ ꠀꠟ-ꠝꠍꠤꠞ ꠟꠉꠦ ꠝꠤꠡꠤ ꠎꠣꠅꠀꠄ ꠔꠥꠝꠞꠣ ꠢꠇꠟꠃ ꠔ ꠄꠇ ꠅꠁꠉꠦꠍ।
GAL 3:29 ꠔꠥꠝꠞꠣ ꠎꠦꠛꠟꠣ ꠀꠟ-ꠝꠍꠤꠞ ꠎꠘ ꠅꠁꠉꠦꠍ, ꠔꠦ ꠔ ꠁꠛ꠆ꠞꠣꠢꠤꠝꠞ ꠀꠅꠟꠣꠖꠅ ꠅꠁꠍ, ꠀꠞ ꠀꠟ꠆ꠟꠣꠄ ꠁꠛ꠆ꠞꠣꠢꠤꠝꠞꠦ ꠎꠦꠔꠣ ꠖꠤꠛꠣ ꠇꠞꠤ ꠅꠀꠖꠣ ꠇꠞꠍꠟꠣ, ꠔꠥꠝꠞꠣꠅ ꠅꠔꠣꠞ ꠜꠣꠉꠤ ꠛꠘꠤꠉꠦꠍ।
GAL 4:1 ꠀꠍꠟꠦ ꠀꠝꠤ ꠛꠥꠎꠣꠁꠔꠣꠝ ꠌꠣꠁꠞꠣꠝ, ꠛꠣꠚꠞ ꠢꠇꠟ ꠗꠘ-ꠍꠣꠝꠣꠘꠣꠔ ꠀꠅꠟꠣꠖꠞ ꠄꠈꠔꠤꠀꠞ ꠕꠣꠇꠟꠦꠅ, ꠢꠦ ꠎꠔꠖꠤꠘ ꠘꠣꠛꠣꠟꠤꠇ ꠞꠄ ꠅꠔꠖꠤꠘ ꠀꠅꠟꠣꠖ ꠀꠞ ꠉꠥꠟꠣꠝꠞ ꠝꠣꠎꠦ ꠇꠥꠘꠥ ꠔꠚꠣꠔ ꠝꠤꠟꠦ ꠘꠣ।
GAL 4:2 ꠔꠣꠞ ꠛꠣꠚꠦ ꠎꠦ ꠡꠝꠄꠅꠞ ꠇꠕꠣ ꠅꠍꠤꠅꠔ ꠇꠞꠤ ꠎꠣꠁꠘ, ꠅꠔꠖꠤꠘ ꠢꠦ ꠔꠣꠞ ꠝꠥꠞꠛ꠆ꠛꠤ ꠛꠣ ꠎꠤꠝ꠆ꠝꠣꠖꠣꠞꠞ ꠀꠅꠔꠣꠄ ꠞꠁꠔꠦ ꠅꠄ।
GAL 4:3 ꠅꠃ ꠟꠣꠈꠣꠘ ꠀꠝꠞꠣꠅ ꠎꠦꠛꠟꠣ ꠘꠣꠛꠣꠟꠤꠇ ꠀꠍꠟꠣꠝ, ꠢꠃ ꠡꠝꠄ ꠖꠥꠘꠤꠀꠞ ꠘꠣꠘꠣꠘ ꠌꠣꠟ-ꠌꠟꠘꠞ ꠉꠥꠟꠣꠝ ꠀꠍꠟꠣꠝ।
GAL 4:4 ꠅꠁꠟꠦ ꠡꠝꠄ ꠙꠥꠞꠣ ꠅꠁꠀ ꠢꠣꠞꠟꠦ, ꠀꠟ꠆ꠟꠣꠄ ꠔꠣꠘ ꠈꠣꠍ ꠝꠣꠄꠀꠞ ꠎꠘꠞꠦ ꠛꠦꠎꠤꠟꠣ। ꠔꠣꠁꠘ ꠄꠇꠎꠘ ꠘꠦꠇ ꠀꠅꠞꠔꠞ ꠙꠦꠐꠅ ꠎꠘꠝ ꠟꠁꠀ, ꠡꠞꠤꠅꠔꠞ ꠢꠥꠇꠥꠝ-ꠀꠢꠇꠣꠝ ꠝꠣꠚꠤꠇ ꠎꠤꠘ꠆ꠖꠦꠉꠤ ꠇꠣꠐꠣꠁꠟꠣ।
GAL 4:5 ꠎꠣꠔꠦ ꠡꠞꠤꠅꠔꠞ ꠀꠅꠔꠣꠄ ꠕꠣꠇꠣ ꠝꠣꠘꠡꠞꠦ ꠀꠎꠣꠖ ꠇꠞꠔꠣ ꠙꠣꠞꠂꠘ, ꠀꠞ ꠀꠝꠞꠣꠞꠦꠅ ꠀꠟ꠆ꠟꠣꠞ ꠀꠅꠟꠣꠖ ꠛꠘꠣꠞ ꠄꠈꠔꠤꠀꠞ ꠖꠦꠁꠘ।
GAL 4:6 ꠄꠞꠖꠣꠄ ꠔꠥꠝꠞꠣ ꠀꠟ꠆ꠟꠣꠞ ꠀꠅꠟꠣꠖ ꠛꠘꠤꠎꠣꠅꠀꠄ ꠔꠥꠝꠞꠣꠞ ꠖꠤꠟꠅ ꠛꠡꠔ ꠇꠞꠣꠞ ꠟꠣꠉꠤ, ꠀꠟ꠆ꠟꠣꠄ ꠔꠣꠘ ꠈꠣꠍ ꠝꠣꠄꠀꠞ ꠎꠘꠞ ꠞꠥꠢꠥꠞꠦ ꠛꠦꠎꠤꠍꠂꠘ। ꠔꠥꠝꠞꠣꠞ ꠖꠤꠟꠞ ꠅꠃ ꠞꠥꠢꠦ ꠔ ꠀꠟ꠆ꠟꠣ ꠙꠣꠇꠞꠦ ꠀꠛ꠆ꠛꠣ ꠇꠁꠀ ꠒꠣꠇꠂꠘ।
GAL 4:7 ꠉꠔꠤꠇꠦꠃ ꠔꠥꠝꠞꠣ ꠉꠥꠟꠣꠝ ꠞꠁꠍ ꠘꠣ, ꠀꠅꠟꠣꠖ ꠛꠘꠤꠉꠦꠍ; ꠀꠞ ꠀꠅꠟꠣꠖꠞꠦ ꠀꠟ꠆ꠟꠣꠄ ꠎꠦꠔꠣ ꠖꠦꠅꠀꠞ ꠅꠀꠖꠣ ꠇꠞꠍꠤꠟꠣ, ꠅꠈꠘ ꠔꠥꠝꠞꠣ ꠄꠅꠔꠣꠞ ꠝꠣꠟꠤꠇꠣꠘꠣꠅ ꠙꠣꠁꠍ।
GAL 4:8 ꠀꠉꠦ ꠔꠥꠝꠞꠣ ꠎꠦꠛꠟꠣ ꠀꠟ꠆ꠟꠣ ꠙꠣꠇꠞꠦ ꠌꠤꠘꠔꠣꠄ ꠘꠣ, ꠢꠃ ꠡꠝꠄ ꠔꠥꠝꠞꠣ ꠎꠦꠔꠣꠞ ꠉꠥꠟꠣꠝꠤ ꠇꠞꠔꠣꠄ, ꠁꠉꠥꠁꠘ ꠔ ꠀꠍꠟꠦ ꠇꠥꠘꠥ ꠖꠦꠛꠔꠣꠃ ꠘꠣꠄ।
GAL 4:9 ꠅꠁꠟꠦ ꠅꠈꠘ ꠔ ꠀꠟ꠆ꠟꠣꠞꠦ ꠌꠤꠘꠍ; ꠀꠍꠟꠦ ꠀꠟ꠆ꠟꠣꠄꠃ ꠔꠣꠘ ꠘꠤꠎꠞ ꠙꠞꠤꠌꠄ ꠖꠤꠍꠂꠘ। ꠔꠦ ꠔꠥꠝꠞꠣ ꠇꠤꠟꠣ ꠢꠤꠞꠛꠣꠞ ꠖꠥꠘꠤꠀꠛꠤ ꠢꠃ ꠇꠝꠎꠥꠞ ꠀꠞ ꠛꠣꠔꠤꠟ ꠌꠣꠟ-ꠌꠟꠘꠞ ꠛꠣꠄ ꠚꠤꠞꠤꠎꠤꠞꠣꠄ? ꠀꠞꠇꠛꠣꠞ ꠅꠔꠣꠞ ꠉꠥꠟꠣꠝ ꠛꠘꠔꠣꠄ ꠌꠣꠁꠞꠣꠄ ꠘꠤ?
GAL 4:10 ꠔꠥꠝꠞꠣ ꠢꠤꠞꠛꠣꠞ ꠅꠝꠥꠇ ꠀꠞ ꠔꠝꠥꠇ ꠖꠤꠘ, ꠝꠣꠡ, ꠞꠤꠔꠥ ꠀꠞ ꠛꠍꠞꠞꠦ ꠝꠣꠘꠞꠣꠄ।
GAL 4:11 ꠄꠞꠖꠣꠄ ꠀꠝꠣꠞ ꠒꠞ ꠇꠞꠦꠞ, ꠔꠥꠝꠞꠣꠞ ꠔꠟꠦ ꠀꠝꠣꠞ ꠅꠔ ꠝꠦꠘꠔ ꠘꠤ ꠝꠣꠐꠤ ꠅꠁꠎꠣꠄ।
GAL 4:12 ꠅ ꠜꠣꠁ ꠅꠇꠟ, ꠀꠝꠤ ꠔꠥꠝꠞꠣꠞꠦ ꠝꠤꠘꠔ ꠇꠞꠤꠀꠞ, ꠀꠝꠤ ꠎꠦꠟꠣ ꠔꠥꠝꠞꠣꠞ ꠟꠣꠈꠣꠘ ꠅꠁꠉꠦꠍꠤ, ꠔꠥꠝꠞꠣꠅ ꠅꠟꠣ ꠀꠝꠣꠞ ꠟꠣꠈꠣꠘ ꠅꠅ। ꠔꠥꠝꠞꠣ ꠔ ꠅꠔꠖꠤꠘ ꠀꠝꠣꠞ ꠇꠥꠘꠥ ꠈꠦꠔꠤ ꠇꠞꠍ ꠘꠣ।
GAL 4:13 ꠔꠥꠝꠞꠣꠞ ꠎꠣꠘꠣ ꠀꠍꠦ, ꠀꠝꠣꠞ ꠡꠞꠤꠟꠅ ꠛꠦꠝꠣꠞ ꠅꠀꠄ, ꠀꠝꠤ ꠔꠥꠝꠞꠣꠞ ꠉꠦꠍꠦ ꠙꠄꠟꠣ ꠛꠣꠞ ꠈꠥꠡ-ꠈꠛꠞꠤ ꠔꠛꠟꠤꠉꠞ ꠡꠥꠎꠥꠉ ꠙꠣꠁꠍꠟꠣꠝ।
GAL 4:14 ꠀꠝꠣꠞ ꠛꠦꠝꠣꠞꠞ ꠖꠣꠄ ꠔꠥꠝꠞꠣꠞ ꠇꠡ꠆ꠐ ꠅꠁꠟꠦꠅ, ꠔꠥꠝꠞꠣ ꠔ ꠊꠤꠘ ꠛꠣ ꠄꠟꠣ ꠇꠞꠤꠀ ꠀꠝꠣꠞꠦ ꠚꠣꠟꠣꠁꠍ ꠘꠣ। ꠛꠞꠋ ꠀꠟ꠆ꠟꠣꠞ ꠇꠥꠘꠥ ꠚꠤꠞꠤꠡ꠆ꠔꠣ ꠛꠣ ꠁꠍꠣ ꠀꠟ-ꠝꠍꠤꠞꠦ ꠎꠦꠟꠣꠈꠣꠘ ꠇꠛꠥꠟ ꠇꠞꠔꠣꠄ, ꠅꠃ ꠟꠣꠈꠣꠘ ꠀꠝꠣꠞꠦꠅ ꠇꠛꠥꠟ ꠇꠞꠍ।
GAL 4:15 ꠅꠁꠟꠦ ꠅꠈꠘ ꠔꠥꠝꠞꠣꠞ ꠖꠤꠟꠞ ꠢꠤ ꠄꠡꠇꠤ ꠉꠦꠟ ꠇꠥꠀꠁ? ꠀꠝꠤ ꠔ ꠔꠥꠝꠞꠣꠞ ꠛꠦꠙꠣꠞꠦ ꠅꠈꠣꠘꠃ ꠇꠁꠔꠣꠝ ꠙꠣꠞꠤ, ꠢꠃ ꠡꠝꠄ ꠙꠣꠞꠟꠦ ꠔꠥꠝꠞꠣ ꠘꠤꠎꠞ ꠇꠁꠟꠎꠣ ꠈꠥꠟꠤꠀ ꠀꠝꠣꠞꠦ ꠖꠤꠟꠣꠁꠟꠣꠄ ꠅꠘꠦ।
GAL 4:16 ꠔꠦ ꠔꠥꠝꠞꠣꠞ ꠉꠦꠍꠦ ꠢꠇ ꠇꠕꠣ ꠝꠣꠔꠣꠄ, ꠀꠝꠤ ꠅꠈꠘ ꠖꠥꠡꠝꠘ ꠅꠁꠉꠦꠟꠣꠝ ꠘꠤ?
GAL 4:17 ꠢꠥꠘꠅ, ꠅꠃ ꠎꠦꠉꠥꠁꠘ꠆ꠔꠦ ꠔꠥꠝꠞꠣꠞ ꠈꠥꠎ-ꠈꠛꠞ ꠟꠁꠞꠣ, ꠅꠉꠥꠁꠘ ꠔ ꠛꠖ ꠘꠤꠅꠔꠦ ꠀꠁꠞꠣ। ꠔꠣꠞꠣ ꠌꠣꠁꠘ, ꠔꠥꠝꠞꠣꠞꠦ ꠀꠝꠣꠞ ꠛꠣꠄ ꠕꠘꠦ ꠚꠤꠞꠣꠁꠀ, ꠔꠣꠞꠣꠞ ꠀꠡꠤꠇ ꠛꠣꠘꠣꠁꠔꠣ।
GAL 4:18 ꠜꠣꠟꠣ ꠘꠤꠅꠔꠦ ꠅꠟꠣ ꠇꠞꠟꠦ ꠚꠣꠄꠖꠣ ꠅꠁꠟ ꠅꠘꠦ। ꠅꠁꠟꠦ ꠀꠝꠤ ꠎꠦꠛꠟꠣ ꠔꠥꠝꠞꠣꠞ ꠍꠣꠝꠘꠦ ꠀꠁ, ꠈꠣꠟꠤ ꠅꠃ ꠡꠝꠄ ꠘꠣꠄ, ꠘꠦꠇ ꠘꠤꠅꠔꠦ ꠢꠞ-ꠢꠣꠝꠦꠡꠣ ꠈꠥꠎ-ꠈꠛꠞ ꠟꠅꠀ ꠜꠣꠟꠣ।
GAL 4:19 ꠅ ꠀꠝꠣꠞ ꠙꠤꠀꠞꠣ ꠀꠅꠟꠣꠖ ꠅꠇꠟ, ꠔꠥꠝꠞꠣ ꠎꠔꠖꠤꠘ ꠀꠟ-ꠝꠍꠤꠞ ꠟꠣꠈꠣꠘ ꠘꠣ ꠛꠘꠍ, ꠅꠔꠖꠤꠘ ꠀꠝꠤ ꠢꠤꠞꠛꠣꠞ ꠔꠥꠝꠞꠣꠞ ꠟꠣꠉꠤ ꠢꠥꠞꠥꠔ꠆ꠔꠣ ꠙꠄꠖꠣꠞ ꠛꠤꠡꠞ ꠟꠣꠈꠣꠘ ꠍꠐꠚꠐ ꠇꠞꠞꠣꠝ।
GAL 4:20 ꠀꠝꠣꠞ ꠝꠘꠦ ꠌꠣꠞ, ꠅꠃ ꠙꠄꠉꠣꠝ ꠟꠦꠈꠣ ꠛꠣꠖ ꠖꠤꠀ ꠅꠈꠘꠃ ꠀꠝꠤ ꠘꠤꠎꠦ ꠔꠥꠝꠞꠣꠞ ꠉꠦꠍꠦ ꠀꠁꠀ, ꠑꠣꠘ꠆ꠒꠣ ꠝꠣꠕꠣꠄ ꠛꠣꠔꠌꠤꠔ ꠇꠞꠔꠣꠝ। ꠔꠦ ꠔꠥꠝꠞꠣꠞꠦ ꠟꠁꠀ ꠇꠤꠔꠣ ꠇꠞꠔꠣꠝ ꠇꠥꠘ꠆ꠔꠣ ꠛꠥꠎꠞꠣꠝ ꠘꠣ।
GAL 4:21 ꠔꠥꠝꠞꠣ ꠎꠦꠞꠣ ꠝꠥꠍꠣꠞ ꠡꠞꠤꠅꠔꠞ ꠉꠥꠟꠣꠝꠤ ꠇꠞꠔꠣꠄ ꠌꠣꠅ, ꠔꠥꠝꠞꠣ ꠇꠅ ꠌꠣꠁꠘ, ꠡꠞꠤꠅꠔꠦ ꠎꠦꠔꠣ ꠇꠄ ꠁꠔꠣ ꠔꠥꠝꠞꠣꠞ ꠇꠣꠘꠅ ꠢꠣꠝꠣꠄ ꠘꠣ ꠘꠤ?
GAL 4:22 ꠀꠟ꠆ꠟꠣꠞ ꠇꠣꠟꠣꠝꠦ ꠛꠣꠔꠣꠄ, ꠁꠛ꠆ꠞꠣꠢꠤꠝ ꠘꠛꠤꠞ ꠖꠥꠁ ꠙꠥꠀ ꠀꠍꠟꠣ, ꠙꠄꠟꠣ ꠙꠥꠀ ꠛꠣꠘ꠆ꠖꠤ ꠛꠦꠐꠤ ꠢꠣꠎꠦꠞꠣꠞ ꠔꠞꠚꠣ ꠀꠞ ꠖꠥꠍꠞꠣ ꠙꠥꠀ ꠀꠍꠟ ꠡ꠆ꠛꠣꠗꠤꠘ ꠛꠤꠛꠤ ꠍꠣꠄꠞꠣꠞ ꠔꠞꠚꠣ।
GAL 4:23 ꠛꠣꠘ꠆ꠖꠤ ꠛꠦꠐꠤꠞ ꠔꠞꠚꠣ ꠙꠥꠀꠞ ꠎꠘꠝ ꠅꠁꠍꠤꠟ ꠖꠥꠘꠤꠀꠞ ꠘꠤꠅꠝꠦ, ꠅꠁꠟꠦ ꠀꠍꠟ ꠡ꠆ꠛꠣꠗꠤꠘ ꠛꠤꠛꠤꠞ ꠙꠥꠀꠞ ꠎꠘꠝ ꠅꠁꠍꠤꠟ ꠀꠟ꠆ꠟꠣ ꠙꠣꠇꠞ ꠅꠀꠖꠣꠄ ꠇꠥꠖꠞꠔꠤ ꠛꠟꠦ।
GAL 4:24 ꠁ ꠝꠣꠔꠞ ꠝꠣꠘꠤ ꠅꠁꠟ, ꠅꠃ ꠖꠥꠁ ꠛꠦꠐꠤ ꠅꠁꠟꠣ ꠖꠥꠁꠐꠣ ꠘꠤꠅꠝ। ꠄꠇ ꠘꠤꠅꠝ ꠔꠥꠞ ꠙꠣꠠ ꠕꠘꠦ ꠀꠁꠍꠦ, ꠁꠐꠣꠄ ꠔꠣꠞ ꠈꠦꠎꠝꠔ ꠇꠞꠞꠣ ꠝꠣꠘꠡꠞꠦ ꠉꠥꠟꠣꠝꠤꠞ ꠙꠕꠦ ꠐꠣꠘꠦ; ꠄꠁꠘ ꠅꠁꠟꠣ ꠛꠣꠘ꠆ꠖꠤ ꠢꠣꠎꠦꠞꠣ।
GAL 4:25 ꠅꠃ ꠢꠣꠎꠦꠞꠣ ꠝꠣꠘꠤ ꠀꠞꠛ ꠖꠦꠡꠞ ꠔꠥꠞ ꠙꠣꠠ। ꠀꠞ ꠢꠣꠎꠦꠞꠣ ꠅꠁꠟꠣ ꠅꠃ ꠎꠉꠔꠞ ꠎꠦꠞꠥꠎꠣꠟꠦꠝ ꠐꠣꠃꠘꠞ ꠄꠇ ꠘꠝꠥꠘꠣ, ꠎꠦꠞꠥꠎꠣꠟꠦꠝ ꠐꠣꠃꠘꠦ ꠔ ꠔꠣꠞ ꠙꠥꠀ-ꠙꠥꠠꠤꠘꠞꠦ ꠟꠁꠀ ꠛꠣꠘ꠆ꠖꠤ ꠛꠘꠍꠦ।
GAL 4:26 ꠅꠁꠟꠦ ꠀꠍꠝꠣꠘꠤ ꠎꠦ ꠎꠦꠞꠥꠎꠣꠟꠦꠝ, ꠄꠁꠘ ꠔ ꠡ꠆ꠛꠣꠗꠤꠘ; ꠄꠁꠘꠃ ꠀꠝꠞꠣꠞ ꠝꠣ।
GAL 4:27 ꠀꠍꠝꠣꠘꠤ ꠇꠤꠔꠣꠛꠦ ꠇꠄ, “ꠅ ꠘꠤꠀꠅꠟꠣꠖꠤ ꠛꠦꠐꠤ, ꠎꠣꠞ ꠇꠥꠘꠥ ꠢꠥꠞꠥꠔ꠆ꠔꠣ ꠅꠁꠍꠦ ꠘꠣ, ꠔꠥꠝꠤ ꠈꠥꠡꠤꠞ ꠉꠎꠟ ꠉꠣꠅ। ꠢꠥꠞꠥꠔ꠆ꠔꠣ ꠙꠄꠖꠣꠞ ꠛꠤꠡꠦ ꠎꠣꠞꠦ ꠗꠞꠍꠦ ꠘꠣ, ꠔꠥꠝꠤ ꠉꠟꠣ ꠚꠣꠐꠣꠁꠀ ꠎꠥꠞꠦ ꠎꠥꠞꠦ ꠉꠎꠟ ꠉꠣꠅ। ꠎꠣꠝꠣꠁꠞ ꠊꠞꠞ ꠛꠃꠞ ꠌꠣꠁꠔꠦꠅ, ꠎꠣꠞ ꠇꠦꠃ ꠘꠣꠁ ꠔꠣꠁꠞ ꠛꠃꠔ ꠛꠦꠡꠤ ꠀꠅꠟꠣꠖ ꠅꠁꠛꠣ।”
GAL 4:28 ꠜꠣꠁ ꠅꠇꠟ, ꠄꠞꠖꠣꠄꠃ ꠔꠥꠝꠞꠣꠞ ꠎꠘꠝ ꠅꠁꠍꠦ ꠀꠟ꠆ꠟꠣꠞ ꠅꠀꠖꠣꠞ ꠁꠍꠢꠣꠇꠞ ꠟꠣꠈꠣꠘ।
GAL 4:29 ꠅꠁꠟꠦ ꠢꠃ ꠡꠝꠄ ꠖꠥꠘꠤꠀꠞ ꠘꠤꠅꠝꠦ ꠎꠣꠞ ꠎꠘꠝ ꠅꠁꠍꠤꠟ, ꠢꠦ ꠎꠥꠟꠥꠝ ꠇꠞꠔ ꠅꠃ ꠎꠘꠞꠦ, ꠎꠦꠁꠘ ꠎꠘꠝ ꠟꠁꠍꠂꠘ ꠀꠟ꠆ꠟꠣꠞ ꠙꠣꠇ ꠞꠥꠢꠥꠞ ꠛꠟꠦ; ꠀꠞ ꠅꠈꠘꠅ ꠅꠃꠟꠣ ꠎꠥꠟꠥꠝ ꠅꠞ।
GAL 4:30 ꠄꠞꠖꠣꠄ ꠖꠦꠈꠅ, ꠀꠟ꠆ꠟꠣꠞ ꠇꠣꠟꠣꠝꠦ ꠇꠄ, “ꠛꠣꠘ꠆ꠖꠤꠞꠦ ꠀꠞ ꠔꠣꠁꠞ ꠙꠥꠀꠞꠦ ꠛꠣꠠꠤ ꠕꠘꠦ ꠈꠦꠖꠣꠁ ꠖꠦꠅ; ꠛꠣꠘ꠆ꠖꠤꠞ ꠔꠞꠚꠣ ꠙꠥꠀꠄ ꠇꠥꠘꠥꠝꠘ꠆ꠔꠦꠃ ꠀꠍꠟ ꠛꠤꠛꠤꠞ ꠙꠥꠀꠞ ꠟꠉꠦ, ꠗꠘ-ꠍꠣꠝꠣꠘꠣꠞ ꠛꠣꠐ ꠙꠣꠁꠔ ꠘꠣꠄ।”
GAL 4:31 ꠔꠦ ꠅ ꠜꠣꠁ ꠅꠇꠟ, ꠅꠃ ꠀꠄꠀꠔꠦ ꠛꠥꠎꠣ ꠎꠣꠄ, ꠀꠝꠞꠣ ꠛꠣꠘ꠆ꠖꠤꠞ ꠀꠅꠟꠣꠖ ꠘꠣꠄ, ꠀꠝꠞꠣ ꠔ ꠀꠍꠟ ꠡ꠆ꠛꠣꠗꠤꠘ ꠛꠤꠛꠤꠞ ꠊꠞꠞ ꠀꠅꠟꠣꠖ।
GAL 5:1 ꠅ ꠝꠥꠝꠤꠘ ꠅꠇꠟ, ꠀꠟ-ꠝꠍꠤꠄ ꠀꠝꠞꠣꠞꠦ ꠡ꠆ꠛꠣꠗꠤꠘ ꠇꠞꠍꠂꠘ, ꠡ꠆ꠛꠣꠗꠤꠘ ꠢꠣꠟꠔꠦ ꠞꠅꠀꠞ ꠟꠣꠉꠤ। ꠄꠞꠖꠣꠄ ꠔꠥꠝꠞꠣꠞ ꠡ꠆ꠛꠣꠗꠤꠘꠔꠣꠞꠦ ꠗꠞꠤꠀ ꠞꠣꠈꠅ, ꠉꠥꠟꠣꠝꠤꠞ ꠟꠣꠉꠣꠝ ꠀꠞ ꠚꠤꠘ꠆ꠖꠤꠅ ꠘꠣ।
GAL 5:2 ꠢꠥꠘꠅ, ꠀꠝꠤ ꠙꠣꠃꠟꠥꠍꠦ ꠔꠥꠝꠞꠣꠞꠦ ꠇꠁꠞꠣꠝ, ꠔꠥꠝꠞꠣ ꠎꠥꠖꠤ ꠅꠈꠘꠅ ꠝꠍꠟꠝꠣꠘꠤ ꠇꠣꠝ ꠇꠞꠣꠅ, ꠔꠦ ꠀꠟ-ꠝꠍꠤꠞ ꠇꠥꠘꠥ ꠖꠣꠝꠃ ꠔ ꠔꠥꠝꠞꠣꠞ ꠉꠦꠍꠦ ꠘꠣꠁ।
GAL 5:3 ꠀꠝꠤ ꠢꠇꠟꠞ ꠉꠦꠍꠦ ꠢꠤꠞꠛꠣꠞ ꠅꠈꠣꠘ ꠇꠁꠞꠣꠝ, ꠎꠦ ꠎꠘꠞꠦ ꠝꠍꠟꠝꠣꠘꠤ ꠇꠞꠣꠁꠟ ꠅꠄ, ꠔꠣꠞ ꠃꠙꠞꠦ ꠚꠞꠎ ꠅꠁꠎꠣꠄ ꠡꠞꠤꠅꠔꠞ ꠔꠣꠝꠣꠝ ꠢꠥꠇꠥꠝ-ꠀꠢꠇꠣꠝ ꠝꠣꠘꠣ।
GAL 5:4 ꠔꠥꠝꠞꠣ ꠎꠣꠞꠣ ꠡꠞꠤꠅꠔ ꠀꠝꠟ ꠇꠞꠤꠀ ꠖꠤꠘꠖꠣꠞ ꠛꠘꠔꠣꠄ ꠌꠣꠁꠞꠣꠄ, ꠔꠥꠝꠞꠣ ꠔ ꠀꠟ-ꠝꠍꠤꠞ ꠉꠦꠍ ꠕꠘꠦ ꠀꠟꠉ ꠅꠁꠉꠦꠍ, ꠀꠟ꠆ꠟꠣꠞ ꠞꠢꠝꠔ ꠕꠘꠦ ꠢꠞꠤꠉꠦꠍ।
GAL 5:5 ꠅꠁꠟꠦ ꠀꠝꠞꠣꠞꠦ ꠖꠤꠘꠖꠣꠞ ꠇꠁꠀ ꠇꠛꠥꠟ ꠇꠞꠣ ꠅꠁꠛ, ꠁꠝꠣꠘꠦ ꠅꠃ ꠘꠤꠌꠄꠅꠔꠣ ꠙꠣꠁꠀ ꠙꠣꠇ ꠞꠥꠢꠥꠞ ꠛꠟꠦ ꠀꠝꠞꠣ ꠛꠣꠞ ꠌꠣꠁꠞꠣꠝ।
GAL 5:6 ꠁꠍꠣ ꠀꠟ-ꠝꠍꠤꠞ ꠃꠝ꠆ꠝꠔ ꠛꠘꠤꠀ ꠢꠣꠞꠟꠦ ꠝꠍꠟꠝꠣꠘꠤ ꠇꠣꠝ ꠇꠞꠣꠁꠟꠦꠅ ꠎꠦꠔꠣ, ꠘꠣ ꠇꠞꠣꠁꠟꠦꠅ ꠅꠔꠣ। ꠛꠞꠋ ꠝꠢꠛ꠆ꠛꠔꠞ ꠝꠣꠎꠖꠤ ꠎꠦ ꠁꠝꠣꠘ ꠎꠣꠁꠞ ꠅꠄ, ꠅꠃ ꠁꠝꠣꠘꠃ ꠅꠁꠟ ꠀꠍꠟ।
GAL 5:7 ꠔꠥꠝꠞꠣ ꠔ ꠜꠣꠟꠣ ꠙꠕꠦ ꠌꠟꠣꠔ ꠀꠍꠟꠣꠄ; ꠔꠦ ꠅꠃ ꠢꠇ ꠙꠕꠦ ꠌꠟꠔꠦ ꠔꠥꠝꠞꠣꠞꠦ ꠇꠦꠉꠤꠄ ꠛꠣꠗꠣ ꠖꠤꠟ?
GAL 5:8 ꠢꠥꠘꠅ, ꠔꠥꠝꠞꠣ ꠅꠈꠘ ꠎꠦ ꠝꠔꠛꠣꠖ ꠝꠣꠘꠞꠣꠄ, ꠎꠦ ꠀꠟ꠆ꠟꠣꠄ ꠔꠥꠝꠞꠣꠞꠦ ꠙꠍꠘ꠆ꠖ ꠇꠞꠤ ꠀꠘꠍꠂꠘ, ꠁ ꠝꠔꠛꠣꠖ ꠔ ꠔꠣꠘ ꠛꠣꠔꠣꠁꠟ ꠙꠕ ꠘꠣꠄ।
GAL 5:9 ꠎꠣꠘ ꠘꠤ, ꠄꠇ ꠚꠥꠐꠣ ꠌꠦꠘꠣꠄ ꠄꠇ ꠛꠣꠟꠔꠤ ꠖꠥꠗꠞꠦ ꠛꠞꠛꠣꠖ ꠇꠞꠤꠟꠣꠄ।
GAL 5:10 ꠔꠦ ꠔꠥꠝꠞꠣꠞ ꠛꠦꠙꠣꠞꠦ ꠀꠝꠤ ꠝꠣꠟꠤꠇꠞ ꠖꠞꠛꠣꠞꠅ ꠅꠃ ꠜꠞꠡꠣ ꠇꠞꠤ, ꠔꠥꠝꠞꠣ ꠖꠥꠍꠞꠣ ꠇꠥꠘꠥ ꠝꠔꠛꠣꠖꠅ ꠎꠣꠁꠔꠣꠄ ꠘꠣꠄ। ꠅꠁꠟꠦ ꠎꠦꠉꠤꠄ ꠔꠥꠝꠞꠣꠞꠦ ꠍꠣꠔꠣꠞ, ꠢꠦ ꠎꠦ-ꠃ ꠅꠄ ꠘꠣ ꠇꠦꠘꠦ, ꠔꠣꠞ ꠙꠣꠅꠘꠣ ꠡꠣꠎꠣ ꠢꠦ ꠙꠣꠁꠛ।
GAL 5:11 ꠅ ꠜꠣꠁ ꠅꠇꠟ, ꠀꠝꠤ ꠎꠥꠖꠤ ꠅꠈꠘꠅ ꠅꠈꠣꠘ ꠇꠁ, ꠝꠣꠘꠡꠦ ꠝꠍꠟꠝꠣꠘꠤ ꠇꠣꠝ ꠇꠞꠣꠘꠤ ꠎꠞꠥꠞ, ꠔꠦ ꠀꠝꠣꠞ ꠃꠙꠞꠦ ꠇꠦꠘꠦ ꠅꠈꠘꠅ ꠎꠥꠟꠥꠝ ꠅꠞ? ꠔꠦ ꠖꠥꠈ-ꠇꠡ꠆ꠐꠞ ꠍꠟꠤꠛꠞ ꠃꠙꠞꠦ ꠀꠟ-ꠝꠍꠤꠞ ꠝꠃꠔꠞ ꠇꠕꠣ ꠢꠥꠘꠟꠦ ꠎꠦꠔꠣꠄ ꠝꠥꠈ ꠟꠥꠇꠣꠁꠘ, ꠔꠣꠞꠣꠞ ꠝꠥꠈ ꠟꠥꠇꠣꠘꠤ ꠔ ꠛꠘ꠆ꠖ ꠅꠁꠉꠦꠟ ꠅꠘꠦ।
GAL 5:12 ꠄꠞꠖꠣꠄ ꠀꠝꠤ ꠌꠣꠁꠞꠣꠝ, ꠔꠥꠝꠞꠣꠞ ꠖꠤꠟꠅ ꠎꠦꠔꠣꠄ ꠉꠘ꠆ꠒꠉꠥꠟ ꠟꠣꠉꠣꠁꠍꠂꠘ, ꠅꠉꠥꠁꠘ꠆ꠔꠦ ꠔꠣꠞꠣꠞ ꠀꠡ꠆ꠔꠣ ꠘꠚꠍ ꠇꠣꠐꠤꠀ ꠚꠣꠟꠣꠁ ꠖꠦꠃꠇ।
GAL 5:13 ꠅ ꠜꠣꠁ ꠅꠇꠟ, ꠀꠟ꠆ꠟꠣꠄ ꠔꠥꠝꠞꠣꠞꠦ ꠙꠍꠘ꠆ꠖ ꠇꠞꠤꠀ ꠀꠘꠍꠂꠘ ꠀꠎꠣꠖ ꠅꠀꠞ ꠟꠣꠉꠤ। ꠅꠁꠟꠦ ꠀꠎꠣꠖ ꠛꠘꠤꠀ ꠔꠥꠝꠞꠣꠞ ꠖꠤꠟꠞ ꠉꠥꠘꠣꠞ ꠈꠣꠁꠡ ꠙꠥꠞꠣꠘꠤꠔ ꠟꠣꠉꠤꠅ ꠘꠣ, ꠛꠞꠋ ꠖꠤꠟꠞ ꠝꠢꠛ꠆ꠛꠔꠦ ꠄꠇꠦ-ꠅꠁꠘ꠆ꠘꠞ ꠈꠦꠎꠝꠔ ꠇꠞꠅ।
GAL 5:14 ꠇꠣꠞꠘ ꠀꠡ꠆ꠔꠣ ꠡꠞꠤꠅꠔꠞꠦꠃ ꠄꠇꠈꠣꠘꠅ ꠇꠞꠤꠀ ꠇꠅꠀ ꠅꠁꠍꠦ, “ꠔꠥꠝꠣꠞ ꠀꠞꠤ-ꠚꠞꠤꠞꠦ ꠘꠤꠎꠞ ꠟꠣꠈꠣꠘ ꠝꠣꠄꠀ ꠇꠞꠤꠅ।”
GAL 5:15 ꠅꠁꠟꠦ ꠔꠥꠝꠞꠣ ꠎꠥꠖꠤ ꠄꠇꠦ-ꠅꠁꠘ꠆ꠘꠦ ꠇꠣꠁꠎ꠆ꠎꠣ-ꠚꠍꠣꠖ ꠀꠞ ꠞꠦꠡꠣ-ꠞꠦꠡꠤ ꠇꠞ, ꠔꠦ ꠢꠥꠡꠤꠀꠞ ꠅꠁꠎꠣꠅ! ꠁꠔꠣ ꠇꠞꠟꠦ ꠔ ꠔꠥꠝꠞꠣ ꠄꠇꠦ-ꠅꠁꠘ꠆ꠘꠞꠦ ꠛꠤꠘꠣꠡ ꠇꠞꠤꠟꠤꠛꠣꠄ।
GAL 5:16 ꠢꠥꠘꠅ, ꠀꠝꠤ ꠔꠥꠝꠞꠣꠞꠦ ꠇꠁꠞꠣꠝ, ꠙꠣꠇ ꠞꠥꠢꠥꠞ ꠛꠟꠦ ꠎꠤꠘ꠆ꠖꠦꠉꠤ ꠇꠣꠐꠣꠅ, ꠔꠦꠃ ꠖꠤꠟꠞ ꠅꠃ ꠈꠣꠁꠡ ꠝꠤꠐꠣꠘꠤꠞ ꠈꠤꠀꠟ ꠅꠁꠔ ꠘꠣꠄ।
GAL 5:17 ꠅꠃ ꠈꠣꠁꠡꠦ ꠎꠦꠔꠣ ꠇꠄ, ꠁꠔꠣ ꠔ ꠙꠣꠇ ꠞꠥꠢꠥꠞ ꠛꠤꠙꠇ꠆ꠇꠦ, ꠀꠞ ꠙꠣꠇ ꠞꠥꠢꠦ ꠎꠦꠔꠣ ꠇꠂꠘ ꠁꠔꠣ ꠛꠖ ꠈꠣꠁꠡꠞ ꠛꠤꠙꠇ꠆ꠇꠦ। ꠛꠖ ꠈꠣꠁꠡ ꠀꠞ ꠙꠣꠇ ꠞꠥꠢꠥ ꠄꠞꠣ ꠄꠇꠦ-ꠅꠁꠘ꠆ꠘꠞ ꠛꠤꠞꠥꠗꠤ, ꠄꠞꠖꠣꠄ ꠘꠦꠇ ꠇꠣꠝꠞ ꠘꠤꠅꠔ ꠇꠞꠤꠀꠅ ꠔꠥꠝꠞꠣ ꠁꠔꠣ ꠙꠥꠞꠣ ꠇꠞ ꠘꠣ।
GAL 5:18 ꠀꠞ ꠔꠥꠝꠞꠣ ꠎꠥꠖꠤ ꠙꠣꠇ ꠞꠥꠢꠥꠞ ꠛꠟꠦ ꠎꠤꠘ꠆ꠖꠦꠉꠤ ꠇꠣꠐꠣꠅ, ꠔꠦ ꠔꠥꠝꠞꠣ ꠡꠞꠤꠅꠔꠞ ꠉꠥꠟꠣꠝ ꠘꠣꠄ।
GAL 5:19 ꠖꠤꠟꠞ ꠛꠖ ꠈꠣꠁꠡꠞ ꠇꠣꠝ-ꠇꠣꠎ ꠔ ꠈꠥꠟꠣ-ꠝꠦꠟꠣꠃ ꠌꠤꠘꠣ ꠎꠣꠄ, ꠁꠔꠣ ꠅꠁꠟꠉꠤ ꠎꠤꠘꠣ, ꠘꠣꠙꠣꠇꠤ, ꠛꠖꠝꠣꠁꠡꠤ,
GAL 5:20 ꠖꠦꠛꠔꠣ ꠙꠥꠎꠣ, ꠎꠣꠖꠥ-ꠐꠥꠘꠣ, ꠖꠥꠡꠝꠘꠤ, ꠇꠣꠁꠎ꠆ꠎꠣ-ꠚꠍꠣꠖ, ꠟꠥꠜ-ꠟꠣꠟꠌ, ꠉꠥꠍꠣ, ꠘꠤꠎ-ꠝꠔꠟꠛꠤ, ꠅꠝꠤꠟ, ꠖꠟꠣꠖꠟꠤ,
GAL 5:21 ꠁꠋꠡꠣ, ꠝꠣꠔꠟꠣꠝꠤ, ꠢꠂ-ꠢꠥꠟ꠆ꠟꠣ ꠇꠞꠤ ꠛꠎ꠆ꠎꠣꠔꠤ ꠇꠞꠣ, ꠀꠞ ꠅꠃ ꠘꠝꠥꠘꠣꠞ ꠀꠞꠅ ꠛꠃꠔ ꠇꠣꠝ। ꠔꠦ ꠀꠝꠤ ꠀꠉꠦ ꠎꠦꠟꠣ ꠢꠥꠡꠤꠀꠞ ꠇꠞꠍꠟꠣꠝ, ꠅꠈꠘ ꠢꠤꠞꠛꠣꠞ ꠅꠃꠟꠣ ꠇꠁꠞꠣꠝ, ꠖꠤꠟꠞ ꠅꠃ ꠛꠖ ꠈꠣꠁꠡꠞ ꠉꠥꠟꠣꠝꠤ ꠎꠦꠞꠣ ꠇꠞꠦ, ꠀꠟ꠆ꠟꠣꠞ ꠛꠣꠖꠡꠣꠁꠔ ꠔꠣꠞꠣꠞ ꠇꠥꠘꠥ ꠑꠣꠁ ꠘꠣꠁ।
GAL 5:22 ꠅꠁꠟꠦ ꠙꠣꠇ ꠞꠥꠢꠦ ꠌꠟꠣ ꠎꠤꠘ꠆ꠖꠦꠉꠤꠞ ꠚꠟ ꠅꠁꠟ ꠝꠢꠛ꠆ꠛꠔ, ꠈꠥꠡꠤ-ꠛꠣꠡꠤ, ꠡꠣꠘ꠆ꠔꠤ, ꠍꠛꠞ ꠇꠞꠣ, ꠖꠄꠀꠟꠥ ꠜꠣꠛ, ꠜꠣꠟꠣ-ꠝꠣꠘꠡꠤ ꠇꠞꠣ, ꠢꠇ-ꠢꠣꠟꠣꠟꠤ ꠞꠅꠀ,
GAL 5:23 ꠘꠞꠝ ꠅꠀ ꠀꠞ ꠘꠤꠎꠞꠦ ꠡꠣꠝꠟꠣꠁꠀ ꠞꠣꠈꠣ। ꠅꠃ ꠘꠦꠇ ꠇꠣꠝꠞ ꠛꠤꠞꠥꠗꠤ ꠇꠥꠘꠥꠎꠣꠔ ꠀꠁꠘ ꠘꠣꠁ।
GAL 5:24 ꠀꠞ ꠁꠍꠣ ꠀꠟ-ꠝꠍꠤꠞ ꠀꠙꠘ ꠃꠝ꠆ꠝꠔꠦ ꠔ, ꠎꠣꠞꠎꠤꠞ ꠞꠤꠙꠥꠞꠦ, ꠖꠤꠟꠞ ꠢꠇꠟ ꠛꠖ ꠈꠣꠁꠡ ꠡꠥꠖ꠆ꠖꠣ ꠁꠍꠣ ꠀꠟ-ꠝꠍꠤꠞ ꠍꠟꠤꠛꠅ ꠇꠄꠛꠞ ꠖꠤꠟꠣꠁꠍꠦ।
GAL 5:25 ꠅꠈꠘ ꠀꠝꠞꠣ ꠎꠥꠖꠤ ꠄꠇꠤꠘ ꠇꠞꠤ ꠙꠣꠇ ꠞꠥꠢꠥꠞ ꠎꠞꠤꠀꠄ ꠘꠄꠀ ꠎꠤꠘ꠆ꠖꠦꠉꠤ ꠙꠣꠁꠍꠤ, ꠔꠦ ꠀꠅ, ꠀꠝꠞꠣ ꠙꠣꠇ ꠞꠥꠢꠥꠞ ꠎꠤꠝ꠆ꠝꠣꠄ ꠎꠤꠘ꠆ꠖꠦꠉꠤ ꠇꠣꠐꠣꠁ।
GAL 5:26 ꠀꠝꠞꠣ ꠛꠦꠢꠥꠖꠣ ꠛꠠꠣꠁ-ꠛꠦꠐꠣꠉꠤꠞꠤ ꠛꠣꠖ ꠖꠦꠁ, ꠄꠇꠦ-ꠅꠁꠘ꠆ꠘꠞꠦ ꠍꠣꠔꠣꠘꠤ ꠀꠞ ꠁꠋꠡꠣ-ꠁꠋꠡꠤ ꠄꠇ꠆ꠇꠦꠞꠦ ꠍꠣꠠꠤ ꠖꠦꠁ।
GAL 6:1 ꠅ ꠜꠣꠁ ꠅꠇꠟ, ꠎꠝꠣꠔꠞ ꠇꠦꠃ ꠎꠥꠖꠤ ꠀꠈꠔꠣ ꠇꠥꠘꠥ ꠉꠥꠘꠣꠞ ꠚꠣꠘ꠆ꠖꠅ ꠙꠠꠤꠎꠣꠄ, ꠔꠦ ꠔꠥꠝꠞꠣ ꠎꠦꠞꠣ ꠙꠣꠇ ꠞꠥꠢꠦ ꠎꠤꠘ꠆ꠖꠦꠉꠤ ꠇꠣꠐꠣꠁꠞꠣꠄ, ꠔꠥꠝꠞꠣ ꠔꠣꠞꠦ ꠔꠥꠟꠤꠀ ꠀꠘꠤꠅ। ꠀꠞ ꠈꠥꠛ ꠘꠞꠝ ꠖꠤꠟꠦ ꠁ ꠇꠣꠝ ꠇꠞꠤꠅ, ꠘꠤꠎꠞ ꠛꠦꠙꠣꠞꠦꠅ ꠢꠥꠡꠤꠀꠞ ꠞꠁꠅ, ꠎꠣꠔꠦ ꠘꠤꠎꠦꠅ ꠚꠣꠘ꠆ꠖꠅ ꠘꠣ ꠙꠠ।
GAL 6:2 ꠔꠥꠝꠞꠣ ꠄꠇꠦ-ꠅꠁꠘ꠆ꠘꠞ ꠜꠣꠞ ꠛꠅ, ꠔꠦꠃ ꠀꠟ-ꠝꠍꠤꠞ ꠘꠤꠅꠝ ꠙꠥꠞꠣꠙꠥꠞ ꠝꠣꠘꠣ ꠅꠁꠛ।
GAL 6:3 ꠇꠥꠘ꠆ꠔꠣ ꠘꠣ ꠛꠘꠤꠀꠅ ꠎꠦ ꠝꠣꠘꠡꠦ ꠘꠤꠎꠞ ꠛꠠꠣꠁ-ꠛꠣꠢꠣꠖꠥꠞꠤ ꠖꠦꠈꠣꠄ, ꠢꠦ ꠔ ꠘꠤꠎꠦꠃ ꠘꠤꠎꠞꠦ ꠐꠉꠣꠄ।
GAL 6:4 ꠔꠦ ꠙꠞꠔꠦꠇ ꠝꠣꠘꠡꠦ ꠎꠣꠞꠎꠤꠞ ꠀꠝꠟ-ꠈꠣꠁꠍꠟꠔ ꠙꠞꠤꠇ꠆ꠇꠣ ꠇꠞꠃꠇ। ꠔꠦꠃ ꠅꠁꠘ꠆ꠘꠞ ꠟꠉꠦ ꠘꠤꠎꠞ ꠔꠥꠟꠘꠣ ꠘꠣ ꠇꠞꠤꠀ, ꠔꠣꠞ ꠘꠤꠎꠞ ꠇꠣꠝꠞ ꠟꠣꠉꠤ ꠛꠠꠣꠁ ꠇꠞꠔ ꠙꠣꠞꠛ।
GAL 6:5 ꠙꠞꠔꠦꠇ ꠎꠘꠦꠃ ꠘꠤꠎꠞ ꠉꠣꠁꠐ ꠘꠤꠎꠦ ꠛꠅ।
GAL 6:6 ꠢꠥꠘꠅ, ꠎꠦ ꠎꠘꠞꠦ ꠀꠟ꠆ꠟꠣꠞ ꠇꠣꠟꠣꠝ ꠢꠤꠇꠣꠁꠟ ꠅꠄ, ꠢꠦ ꠔꠣꠞ ꠃꠡ꠆ꠔꠣꠖꠞ ꠜꠣꠟꠣꠁꠞ ꠟꠣꠉꠤ ꠈꠦꠎꠝꠔ ꠇꠞꠃꠇ।
GAL 6:7 ꠜꠣꠁ ꠅꠇꠟ, ꠔꠥꠝꠞꠣ ꠛꠦ-ꠙꠕꠤ ꠛꠘꠤꠅ ꠘꠣ, ꠀꠟ꠆ꠟꠣꠞ ꠟꠉꠦ ꠔ ꠑꠣꠐ꠆ꠐꠣ-ꠝꠡꠇꠞꠣ ꠌꠟꠦ ꠘꠣ। ꠎꠦꠁꠘ ꠎꠦꠟꠣ ꠈꠦꠔ ꠇꠞꠛꠣꠄ, ꠄꠁꠘ ꠅꠟꠣ ꠚꠡꠟ ꠙꠣꠁꠛꠣꠄ।
GAL 6:8 ꠖꠤꠟꠞ ꠅꠃ ꠛꠖ ꠈꠣꠁꠡꠞꠦ ꠈꠥꠡ ꠇꠞꠣꠞ ꠟꠣꠉꠤ ꠈꠦꠔ ꠇꠞꠟꠦ, ꠁ ꠈꠦꠔ ꠕꠣꠇꠤ ꠉꠎꠛ ꠝꠤꠟꠛ। ꠅꠁꠟꠦ ꠙꠣꠇ ꠞꠥꠢꠥꠞꠦ ꠈꠥꠡ ꠞꠣꠈꠣꠞ ꠟꠣꠉꠤ ꠈꠦꠔ ꠇꠞꠟꠦ, ꠁ ꠙꠣꠇ ꠞꠥꠢꠥ ꠕꠣꠇꠤ ꠀꠈꠦꠞꠤ ꠎꠤꠘ꠆ꠖꠦꠉꠤ ꠝꠤꠟꠛ।
GAL 6:9 ꠘꠦꠇ ꠇꠣꠝ ꠇꠞꠣꠔ ꠟꠣꠉꠤꠀ ꠀꠝꠞꠣ ꠎꠣꠘꠥ ꠘꠤꠞꠣꠡ ꠘꠣ ꠅꠁ। ꠢꠣꠝꠦꠡꠣ ꠟꠣꠉꠤꠀ ꠞꠁꠟꠦ ꠑꠤꠇ ꠡꠝꠄꠄ ꠄꠞ ꠚꠡꠟ ꠙꠣꠁꠝꠥ।
GAL 6:10 ꠡꠥꠎꠥꠉ ꠙꠣꠁꠟꠦꠃ ꠀꠝꠞꠣ ꠎꠣꠘꠥ ꠢꠇꠟ ꠝꠣꠘꠡꠞ, ꠈꠣꠍ ꠇꠞꠤ ꠀꠟ꠆ꠟꠣꠞ ꠙꠞꠤꠛꠣꠞꠞ ꠝꠣꠘꠡꠞ ꠀꠍꠣꠘ ꠇꠞꠤ।
GAL 6:11 ꠖꠦꠈꠞꠣꠄ ꠘꠤ, ꠇꠔ ꠝꠥꠐꠣ ꠝꠥꠐꠣ ꠢꠞꠚꠦ ꠀꠝꠤ ꠘꠤꠎꠞ ꠀꠔꠦ ꠔꠥꠝꠞꠣꠞ ꠉꠦꠍꠦ ꠟꠦꠈꠍꠤ!
GAL 6:12 ꠎꠦꠉꠥꠁꠘ꠆ꠔꠦ ꠔꠣꠞꠣꠞ ꠘꠤꠎꠞ ꠜꠣꠟꠣ-ꠝꠣꠘꠡꠤ ꠎꠣꠁꠞ ꠇꠞꠔ ꠌꠣꠄ, ꠅꠔꠣꠄ ꠔꠥꠝꠞꠣꠞꠦ ꠝꠍꠟꠝꠣꠘꠤ ꠇꠣꠝ ꠇꠞꠣꠘꠤꠞ ꠟꠣꠉꠤ ꠔꠣꠉꠤꠖ ꠖꠦꠞ। ꠀꠟ-ꠝꠍꠤꠞ ꠍꠟꠤꠛꠞ ꠟꠣꠉꠤ ꠎꠣꠔꠦ ꠔꠣꠞꠣꠞ ꠃꠙꠞꠦ ꠇꠥꠘꠥ ꠎꠥꠟꠥꠝ ꠘꠣ ꠅꠄ, ꠎꠥꠟꠥꠝ ꠕꠣꠇꠤ ꠛꠣꠌꠣꠞ ꠟꠣꠉꠤ ꠔꠣꠞꠣ ꠁꠔꠣ ꠇꠞꠦꠞ।
GAL 6:13 ꠢꠥꠘꠅ, ꠝꠍꠟꠝꠣꠘꠤ ꠇꠣꠝ ꠎꠦꠔꠣꠄ ꠇꠞꠣꠁꠍꠂꠘ, ꠅꠔꠣꠄꠅ ꠔ ꠡꠞꠤꠅꠔꠞ ꠛꠞꠈꠦꠟꠣꠚ ꠇꠞꠂꠘ। ꠅꠁꠟꠦ ꠄꠞꠛꠣꠖꠦꠅ ꠔꠣꠞꠣ ꠔꠥꠝꠞꠣꠞꠦ ꠝꠍꠟꠝꠣꠘꠤ ꠇꠞꠣꠁꠔ ꠌꠣꠄ, ꠎꠣꠔꠦ ꠔꠣꠞꠣ ꠛꠠꠣꠁ ꠇꠞꠤꠀ ꠇꠁꠔ ꠙꠣꠞꠦ ꠔꠥꠝꠞꠣꠅ ꠔꠣꠞꠣꠞ ꠖꠟꠅ ꠀꠍ।
GAL 6:14 ꠅꠁꠟꠦ ꠀꠝꠤ ꠇꠁꠞꠣꠝ, ꠈꠣꠟꠤ ꠁꠍꠣ ꠀꠟ-ꠝꠍꠤꠞ ꠍꠟꠤꠛ ꠍꠣꠠꠣ ꠖꠥꠍꠞꠣ ꠇꠥꠘꠥ ꠛꠦꠙꠣꠞꠦꠃ ꠀꠝꠤ ꠛꠠꠣꠁ ꠇꠞꠤ ꠘꠣ। ꠅꠃ ꠍꠟꠤꠛꠞ ꠝꠣꠎꠖꠤꠃ ꠁ ꠖꠥꠘꠤꠀ ꠀꠝꠣꠞ ꠉꠦꠍꠦ ꠝꠞꠤꠉꠦꠍꠦ, ꠀꠞ ꠀꠝꠤꠅ ꠖꠥꠘꠤꠀꠞ ꠌꠈꠥꠔ ꠝꠞꠤꠉꠦꠍꠤ।
GAL 6:15 ꠄꠞꠖꠣꠄ ꠝꠍꠟꠝꠣꠘꠤ ꠇꠣꠝ ꠇꠞꠣꠁꠟꠦꠅ ꠎꠦꠔꠣ, ꠘꠣ ꠇꠞꠣꠁꠟꠦꠅ ꠅꠔꠣ। ꠀꠟ-ꠝꠍꠤꠞ ꠎꠞꠤꠀꠄ ꠢꠤꠞꠛꠣꠞ ꠘꠄꠀ ꠙꠄꠖꠣ ꠅꠀꠃ ꠅꠁꠟ ꠀꠍꠟ ꠛꠦꠙꠣꠞ।
GAL 6:16 ꠀꠞ ꠅꠃ ꠁꠝꠣꠘꠦ ꠎꠦꠞꠣ ꠎꠤꠘ꠆ꠖꠦꠉꠤ ꠇꠣꠐꠣꠄ, ꠝꠣꠘꠤ ꠈꠣꠐꠤ ꠀꠟ꠆ꠟꠣꠞ ꠛꠘ꠆ꠖꠣꠞꠦ, ꠔꠣꠁꠘ ꠞꠢꠝ ꠀꠞ ꠡꠣꠘ꠆ꠔꠤ ꠖꠣꠘ ꠇꠞꠃꠇ꠆ꠇꠣ।
GAL 6:17 ꠢꠦꠡ-ꠝꠦꠡ ꠇꠁꠞꠣꠝ, ꠢꠎꠞꠔ ꠁꠍꠣꠞ ꠟꠣꠉꠤ ꠝꠣꠁꠞ ꠈꠣꠁꠀ ꠇꠔ ꠘꠝꠥꠘꠣꠞ ꠎꠈꠝ ꠀꠝꠣꠞ ꠘꠤꠎꠞ ꠡꠞꠤꠟꠅ ꠟꠁꠀ ꠌꠇ꠆ꠇꠞ ꠖꠤꠀꠞ। ꠔꠦ ꠀꠝꠣꠞꠦ ꠇꠦꠃ ꠖꠥꠈ ꠖꠤꠅ ꠘꠣ।
GAL 6:18 ꠜꠣꠁ ꠅꠇꠟ, ꠀꠝꠞꠣꠞ ꠝꠥꠘꠤꠛ ꠁꠍꠣ ꠀꠟ-ꠝꠍꠤꠞ ꠞꠢꠝꠔ ꠔꠥꠝꠞꠣꠞ ꠖꠤꠟꠅ ꠇꠣꠁꠝ ꠞꠃꠇ। ꠀꠝꠤꠘ॥
EPH 1:1 ꠀꠝꠤ ꠙꠣꠃꠟꠥꠍ, ꠀꠟ꠆ꠟꠣ ꠙꠣꠇꠞ ꠝꠞ꠆ꠎꠤ ꠝꠣꠚꠤꠇ ꠢꠎꠞꠔ ꠁꠍꠣ ꠀꠟ-ꠝꠍꠤꠞ ꠄꠇꠎꠘ ꠍꠣꠢꠣꠛꠤ। ꠁꠚꠤꠍ ꠐꠣꠃꠘꠞ ꠝꠣꠎꠦ ꠀꠟ-ꠝꠍꠤꠞ ꠔꠞꠤꠇꠣꠞ ꠙꠣꠇ ꠛꠘ꠆ꠖꠣ ꠀꠞ ꠝꠥꠝꠤꠘ ꠅꠇꠟꠞ ꠉꠦꠍꠦ ꠀꠝꠤ ꠙꠣꠃꠟꠥꠍꠦ ꠅꠃ ꠍꠢꠤꠚꠣꠈꠣꠘ ꠟꠦꠈꠞꠣꠝ।
EPH 1:2 ꠀꠝꠞꠣꠞ ꠉꠣꠁꠛꠤ ꠛꠣꠚ ꠀꠟ꠆ꠟꠣ ꠙꠣꠇꠦ ꠀꠞ ꠢꠎꠞꠔ ꠁꠍꠣ ꠀꠟ-ꠝꠍꠤꠄ ꠀꠙꠘꠣꠞꠣ ꠢꠇꠟꠞ ꠃꠙꠞꠦ ꠞꠢꠝꠔ ꠀꠞ ꠡꠣꠘ꠆ꠔꠤ ꠘꠣꠎꠤꠟ ꠇꠞꠃꠇ꠆ꠇꠣ।
EPH 1:3 ꠀꠟ꠆ꠟꠣ ꠙꠣꠇꠞ ꠔꠣꠞꠤꠚ ꠅꠃꠇ, ꠔꠣꠁꠘꠃ ꠁꠍꠣ ꠀꠟ-ꠝꠍꠤꠞ ꠀꠟ꠆ꠟꠣ ꠀꠞ ꠔꠣꠘ ꠉꠣꠁꠛꠤ ꠛꠣꠚ, ꠀꠞ ꠅꠃ ꠢꠎꠞꠔ ꠁꠍꠣꠃ ꠀꠝꠞꠣꠞ ꠝꠣꠟꠤꠇ। ꠀꠟ꠆ꠟꠣ ꠙꠣꠇꠦ ꠔ ꠀꠟ-ꠝꠍꠤꠞ ꠃꠍꠤꠟ꠆ꠟꠣꠄ ꠀꠍꠝꠣꠘꠞ ꠙꠞꠔꠦꠇ ꠘꠝꠥꠘꠣꠞ ꠞꠥꠢꠣꠘꠤ ꠞꠢꠝꠔ ꠀꠝꠞꠣꠞꠦ ꠖꠣꠘ ꠇꠞꠍꠂꠘ।
EPH 1:4 ꠀꠟ꠆ꠟꠣ ꠙꠣꠇꠞ ꠖꠞꠛꠣꠞꠅ ꠀꠝꠞꠣ ꠎꠣꠔꠦ ꠙꠣꠇ-ꠙꠛꠤꠔ꠆ꠞ ꠀꠞ ꠘꠤꠈꠥꠔ ꠅꠁꠔꠣꠝ ꠙꠣꠞꠤ, ꠅꠃ ꠈꠤꠀꠟꠦ ꠔꠣꠁꠘ ꠁ ꠖꠥꠘꠤꠀ ꠙꠄꠖꠣꠞ ꠀꠉꠦꠃ, ꠘꠤꠎꠞ ꠝꠣꠄꠀ-ꠝꠢꠛ꠆ꠛꠔꠦ ꠀꠟ-ꠝꠍꠤꠞ ꠃꠍꠤꠟ꠆ꠟꠣꠄ ꠀꠝꠞꠣꠞꠦ ꠙꠍꠘ꠆ꠖ ꠇꠞꠍꠂꠘ।
EPH 1:5 ꠀꠟ꠆ꠟꠣꠄ ꠔꠣꠘ ꠘꠤꠎꠞ ꠝꠞ꠆ꠎꠤ ꠀꠞ ꠘꠤꠎꠞ ꠈꠥꠡꠤꠄ ꠀꠉꠦꠃ ꠑꠤꠇ ꠇꠞꠤꠀ ꠞꠣꠈꠍꠂꠘ, ꠎꠣꠔꠦ ꠁꠍꠣ ꠀꠟ-ꠝꠍꠤꠞ ꠃꠍꠤꠟ꠆ꠟꠣꠄ ꠀꠝꠞꠣꠞꠦ ꠔꠣꠘ ꠀꠙꠘ ꠀꠅꠟꠣꠖ ꠢꠤꠡꠣꠛꠦ ꠇꠛꠥꠟ ꠇꠞꠛꠣ।
EPH 1:6 ꠀꠟ꠆ꠟꠣꠄ ꠁꠔꠣ ꠇꠞꠍꠂꠘ, ꠎꠣꠔꠦ ꠔꠣꠘ ꠈꠣꠍ ꠝꠣꠄꠀꠞ ꠎꠘ ꠁꠍꠣꠞ ꠃꠍꠤꠟ꠆ꠟꠣꠄ ꠀꠝꠞꠣꠞꠦ ꠎꠔ ꠙꠞꠤꠝꠣꠘꠦ ꠞꠢꠝꠔ ꠀꠞ ꠝꠢꠤꠝꠣ ꠖꠣꠘ ꠇꠞꠍꠂꠘ, ꠅꠔꠣꠄ ꠔꠣꠘ ꠔꠣꠞꠤꠚ ꠅꠄ।
EPH 1:7 ꠀꠟ-ꠝꠍꠤꠞ ꠙꠛꠤꠔ꠆ꠞ ꠇꠥꠞꠛꠣꠘꠤꠞ ꠃꠍꠤꠟ꠆ꠟꠣꠄ ꠔꠣꠘ ꠟꠃꠞ ꠛꠖꠟꠣ ꠀꠝꠞꠣ ꠉꠥꠘꠣꠞ ꠡꠣꠎꠣ ꠕꠣꠇꠤ ꠈꠣꠟꠣꠍ ꠙꠣꠁꠍꠤ, ꠀꠝꠞꠣ ꠅꠃ ꠝꠣꠚꠤ ꠙꠣꠁꠍꠤ, ꠁꠔꠣ ꠔ ꠀꠟ꠆ꠟꠣ ꠙꠣꠇꠞ ꠈꠣꠍ ꠞꠢꠝꠔ।
EPH 1:8 ꠅꠃ ꠞꠢꠝꠔ ꠔ ꠀꠟ꠆ꠟꠣꠄ ꠔꠣꠘ ꠈꠣꠍ ꠀꠈꠟ-ꠢꠦꠇꠝꠔꠦ ꠀꠝꠞꠣꠞ ꠃꠙꠞꠦ ꠓꠣꠟꠤꠀ ꠖꠤꠍꠂꠘ।
EPH 1:9 ꠔꠣꠁꠘ ꠀꠉꠦ ꠕꠣꠇꠤ ꠎꠦꠟꠣꠈꠣꠘ ꠈꠤꠀꠟ ꠇꠞꠍꠟꠣ, ꠀꠟ-ꠝꠍꠤꠞ ꠝꠣꠎꠖꠤ ꠎꠦꠔꠣ ꠇꠞꠣꠞ ꠘꠤꠅꠔ ꠇꠞꠍꠤꠟꠣ, ꠅꠃ ꠈꠤꠀꠟ-ꠈꠥꠡꠤꠞ ꠢꠇ꠆ꠇꠟ ꠛꠣꠔꠥꠘꠤ ꠛꠦꠙꠣꠞ ꠔꠣꠁꠘ ꠀꠝꠞꠣꠞꠦ ꠎꠣꠘꠣꠁꠍꠂꠘ।
EPH 1:10 ꠔꠣꠁꠘ ꠔ ꠀꠉꠦꠃ ꠅꠈꠣꠘ ꠑꠤꠇ ꠇꠞꠤꠀ ꠞꠣꠈꠍꠤꠟꠣ, ꠎꠣꠔꠦ ꠡꠝꠄ ꠙꠥꠞꠣ ꠅꠁꠀ ꠢꠣꠞꠟꠦ, ꠔꠣꠘ ꠀꠙꠘ ꠝꠞ꠆ꠎꠤ ꠝꠣꠚꠤꠇ ꠀꠍꠝꠣꠘ-ꠎꠝꠤꠘꠞ ꠢꠇ꠆ꠇꠟꠔꠣꠞꠦ ꠄꠇꠈꠣꠘꠅ ꠇꠞꠤꠀ, ꠀꠟ-ꠝꠍꠤꠞ ꠀꠅꠔꠣꠄ ꠀꠘꠛꠣ।
EPH 1:11 ꠀꠟ꠆ꠟꠣꠄ ꠔꠣꠘ ꠘꠤꠎꠞ ꠀꠈꠟ-ꠁꠘꠍꠣꠚ ꠖꠤꠀ ꠘꠤꠎꠞ ꠝꠞ꠆ꠎꠤ ꠝꠣꠚꠤꠇ ꠢꠇꠟ ꠇꠣꠝ ꠇꠞꠂꠘ। ꠔꠣꠘ ꠝꠥꠘꠡꠣ ꠝꠣꠚꠤꠇ ꠔꠣꠁꠘ ꠀꠉꠦꠃ ꠎꠦꠔꠣ ꠑꠤꠇ ꠇꠞꠤꠀ ꠞꠣꠈꠍꠤꠟꠣ, ꠢꠃ ꠝꠥꠘꠡꠣ ꠝꠣꠚꠤꠇ ꠔꠣꠁꠘ ꠀꠝꠞꠣꠞꠦꠅ ꠙꠍꠘ꠆ꠖ ꠇꠞꠍꠂꠘ ꠀꠟ-ꠝꠍꠤꠞ ꠃꠍꠤꠟ꠆ꠟꠣꠄ ꠔꠣꠘ ꠈꠣꠍ ꠛꠘ꠆ꠖꠣ ꠅꠀꠞ ꠟꠣꠉꠤ।
EPH 1:12 ꠄꠞꠟꠣꠉꠤ ꠀꠝꠞꠣ ꠎꠦꠞꠣ ꠀꠉ ꠕꠣꠇꠤꠃ ꠀꠟ-ꠝꠍꠤꠞ ꠃꠙꠞꠦ ꠜꠞꠡꠣ ꠇꠞꠔꠣꠝ, ꠅꠃ ꠀꠝꠞꠣꠞ ꠝꠣꠎꠖꠤꠃ ꠎꠣꠔꠦ ꠀꠟ꠆ꠟꠣꠞ ꠉꠃꠞꠛ-ꠝꠢꠤꠝꠣꠞ ꠔꠣꠞꠤꠚ ꠅꠄ, ꠅꠃ ꠈꠤꠀꠟꠦꠃ ꠔꠣꠁꠘ ꠀꠝꠞꠣꠞꠦ ꠙꠍꠘ꠆ꠖ ꠇꠞꠍꠂꠘ।
EPH 1:13 ꠀꠞ ꠀꠙꠘꠣꠞꠣꠅ ꠀꠟ꠆ꠟꠣꠞ ꠢꠇ ꠇꠣꠟꠣꠝ, ꠝꠣꠘꠤ ꠘꠣꠎꠣꠔꠞ ꠈꠥꠡ-ꠈꠛꠞꠤ ꠙꠣꠁꠀ ꠀꠟ-ꠝꠍꠤꠞ ꠃꠙꠞꠦ ꠁꠝꠣꠘ ꠀꠘꠍꠂꠘ। ꠀꠟ-ꠝꠍꠤꠞ ꠃꠝ꠆ꠝꠔ ꠅꠀꠄ ꠀꠟ꠆ꠟꠣ ꠙꠣꠇꠦ ꠔꠣꠘ ꠅꠀꠖꠣ ꠇꠞꠣ ꠙꠣꠇ ꠞꠥꠢꠥ ꠖꠤꠀ ꠀꠙꠘꠣꠁꠘ꠆ꠔꠞꠦ ꠡꠤꠟ-ꠌꠣꠙ꠆ꠙꠠ ꠝꠣꠞꠍꠂꠘ।
EPH 1:14 ꠔꠦ ꠎꠦꠔꠣ ꠝꠣꠘꠡꠞꠦ ꠀꠟ꠆ꠟꠣ ꠙꠣꠇꠦ ꠔꠣꠘ ꠘꠤꠎꠞ ꠡꠝ꠆ꠙꠖ ꠇꠁꠀ ꠒꠣꠇꠤꠍꠂꠘ, ꠄꠞꠣꠞꠦ ꠔꠣꠁꠘ ꠄꠇꠐꠣ ꠅꠗꠤꠇꠣꠞ ꠖꠤꠛꠣꠞ ꠅꠀꠖꠣ ꠇꠞꠍꠂꠘ। ꠄꠞꠟꠣꠉꠤ ꠎꠔꠖꠤꠘ ꠙꠞ꠆ꠎꠘ꠆ꠔ ꠄꠞꠣ ꠙꠥꠞꠣꠙꠥꠞ ꠈꠣꠟꠣꠍ ꠘꠣ ꠅꠁꠍꠂꠘ, ꠅꠔꠖꠤꠘ ꠙꠞ꠆ꠎꠘ꠆ꠔ ꠅꠃ ꠅꠗꠤꠇꠣꠞꠞ ꠙꠄꠟꠣ ꠇꠤꠡ꠆ꠔꠤ ꠢꠤꠡꠣꠛꠦ ꠄꠞꠣꠞꠦ ꠙꠣꠇ ꠞꠥꠢꠥ ꠖꠣꠘ ꠇꠞꠍꠂꠘ। ꠀꠞ ꠅꠃ ꠢꠇ꠆ꠇꠟꠔꠣꠞ ꠝꠣꠎꠖꠤ ꠀꠟ꠆ꠟꠣꠞ ꠉꠃꠞꠛ-ꠝꠢꠤꠝꠣꠞ ꠔꠣꠞꠤꠚ ꠅꠁꠛ।
EPH 1:15 ꠔꠦ ꠢꠎꠞꠔ ꠁꠍꠣꠞ ꠃꠙꠞꠦ ꠀꠙꠘꠣꠞꠣ ꠁꠝꠣꠘ ꠀꠘꠍꠂꠘ ꠀꠞ ꠀꠟ꠆ꠟꠣꠞ ꠢꠇꠟ ꠛꠘ꠆ꠖꠣꠞꠦꠃ ꠀꠙꠘꠣꠞꠣ ꠝꠣꠄꠀ-ꠝꠢꠛ꠆ꠛꠔ ꠇꠞꠞꠣ, ꠅꠃ ꠈꠛꠞ ꠀꠝꠤ ꠎꠦꠛꠟꠣ ꠢꠥꠘꠟꠣꠝ,
EPH 1:16 ꠢꠥꠘꠣꠞ ꠛꠣꠖ ꠕꠣꠇꠤꠃ, ꠀꠝꠤ ꠀꠙꠘꠣꠞꠣꠞ ꠟꠣꠉꠤ ꠀꠟ꠆ꠟꠣꠞ ꠖꠞꠛꠣꠞꠅ ꠡꠥꠇꠞꠤꠀ ꠀꠖꠣꠄ ꠇꠞꠣ ꠇꠥꠘꠥ ꠡꠝꠄꠅ ꠛꠘ꠆ꠖ ꠇꠞꠍꠤ ꠘꠣ। ꠀꠝꠤ ꠎꠦꠛꠟꠣ ꠝꠥꠘꠣꠎꠣꠔ ꠇꠞꠤ, ꠁ ꠡꠝꠄ ꠀꠙꠘꠣꠁꠘ꠆ꠔꠞ ꠇꠕꠣ ꠚꠣꠃꠞꠤ ꠘꠣ।
EPH 1:17 ꠀꠝꠤ ꠀꠟ꠆ꠟꠣꠞ ꠖꠞꠛꠣꠞꠅ ꠀꠞꠎ ꠇꠞꠤ, ꠀꠝꠞꠣꠞ ꠝꠣꠟꠤꠇ ꠁꠍꠣ ꠀꠟ-ꠝꠍꠤꠞ ꠀꠟ꠆ꠟꠣꠄ, ꠎꠣꠟꠣꠟ ꠀꠞ ꠡꠣꠘ ꠀꠟꠣ ꠉꠣꠁꠛꠤ ꠛꠣꠚꠦ ꠀꠙꠘꠣꠁꠘ꠆ꠔꠞꠦ ꠞꠥꠢꠣꠘꠤ ꠀꠈꠟ ꠀꠞ ꠛꠥꠎꠣꠞ ꠈꠦꠝꠔꠣ ꠖꠦꠃꠇ꠆ꠇꠣ। ꠔꠦꠃ ꠀꠙꠘꠣꠞꠣ ꠀꠞꠅ ꠜꠣꠟꠣꠝꠘ꠆ꠔꠦ ꠔꠣꠘꠞꠦ ꠌꠤꠘꠛꠣ।
EPH 1:18 ꠀꠝꠤ ꠀꠞꠅ ꠝꠥꠘꠣꠎꠣꠔ ꠇꠞꠤꠀꠞ, ꠀꠙꠘꠣꠞꠣꠞ ꠖꠤꠟꠞ ꠌꠃꠈ ꠈꠥꠟꠤ ꠎꠣꠃꠇ, ꠔꠦꠃ ꠀꠟ꠆ꠟꠣꠁ ꠖꠣꠅꠔ ꠙꠣꠁꠀ ꠀꠙꠘꠣꠞꠣꠞ ꠖꠤꠟꠞ ꠝꠣꠎꠦ ꠎꠦ ꠄꠡꠇꠤ ꠙꠄꠖꠣ ꠅꠁꠍꠦ ꠅꠔꠣ ꠀꠞꠅ ꠜꠣꠟꠣꠝꠘ꠆ꠔꠦ ꠛꠥꠎꠛꠣ। ꠄꠞꠟꠉꠦ ꠄꠅꠈꠣꠘꠅ ꠛꠥꠎꠔꠣ ꠙꠣꠞꠛꠣ, ꠀꠟ꠆ꠟꠣꠞ ꠖꠞꠛꠣꠞꠅ ꠔꠣꠘ ꠙꠣꠇ ꠛꠘ꠆ꠖꠣ ꠅꠇꠟ ꠇꠔ ꠛꠠ ꠡꠝ꠆ꠙꠔ꠆ꠔꠤ।
EPH 1:19 ꠀꠞ ꠀꠝꠞꠣ ꠎꠦꠞꠣ ꠔꠣꠘ ꠃꠙꠞꠦ ꠁꠝꠣꠘ ꠀꠘꠍꠤ, ꠀꠝꠞꠣꠞ ꠖꠤꠟꠞ ꠝꠣꠎꠦ ꠇꠔ ꠛꠠ ꠡꠇ꠆ꠔꠤꠄ ꠇꠣꠝ ꠇꠞꠦꠞ। ꠁ ꠡꠇ꠆ꠔꠤ ꠅꠁꠟ, ꠔꠣꠘ ꠇꠥꠖꠞꠔꠞ ꠝꠢꠣꠡꠇ꠆ꠔꠤ।
EPH 1:20 ꠅꠃ ꠡꠇ꠆ꠔꠤꠞ ꠛꠟꠦꠃ ꠔꠣꠁꠘ ꠀꠟ-ꠝꠍꠤꠞꠦ ꠝꠞꠣ ꠕꠣꠇꠤ ꠎꠤꠘ꠆ꠖꠣ ꠇꠞꠍꠂꠘ, ꠀꠞ ꠛꠦꠢꠦꠡ꠆ꠔꠞ ꠀꠞꠡꠦ-ꠀꠎꠤꠝꠅ ꠔꠣꠘ ꠒꠣꠁꠘꠞ ꠔꠈ꠆ꠔꠅ ꠘꠤꠀ ꠛꠅꠀꠁꠍꠂꠘ।
EPH 1:21 ꠀꠍꠝꠣꠘꠞ ꠢꠇ꠆ꠇꠟ ꠘꠝꠥꠘꠣꠞ ꠈꠦꠝꠔꠣ, ꠡꠣꠡꠘ, ꠡꠇ꠆ꠔꠤ, ꠀꠞ ꠛꠣꠢꠣꠖꠥꠞꠤ ꠎꠣꠞꠣꠞ ꠀꠔꠅ ꠀꠍꠦ, ꠄꠞꠣ ꠢꠇꠟꠞꠦꠃ ꠔꠣꠁꠘ ꠀꠟ-ꠝꠍꠤꠞ ꠔꠟꠦ ꠞꠣꠈꠍꠂꠘ। ꠀꠞ ꠎꠣꠞꠦ ꠎꠦ ꠘꠣꠝꠦꠃ ꠒꠣꠇꠣ ꠅꠄ ꠘꠣ ꠇꠦꠘꠦ, ꠁꠔꠣ ꠁ ꠎꠉꠔꠞ ꠅꠃꠇ ꠛꠣ ꠀꠈꠦꠞꠤ ꠎꠉꠔꠞ ꠅꠃꠇ, ꠢꠇ꠆ꠇꠟ ꠘꠣꠝꠞ ꠃꠙꠞꠦ ꠁꠍꠣ ꠀꠟ-ꠝꠍꠤꠞ ꠘꠣꠝ।
EPH 1:22 ꠀꠟ꠆ꠟꠣꠄ ꠢꠇ꠆ꠇꠟꠔꠣꠞꠦꠃ ꠀꠟ-ꠝꠍꠤꠞ ꠀꠅꠔꠣꠄ ꠞꠣꠈꠍꠂꠘ। ꠝꠣꠘꠡꠞ ꠝꠣꠕꠣ ꠎꠦꠟꠣ ꠔꠣꠞ ꠡꠞꠤꠟꠞ ꠛꠣꠖꠡꠣ, ꠀꠟ-ꠝꠍꠤꠞꠦ ꠅꠟꠣ ꠎꠝꠣꠔꠞ ꠝꠣꠕꠣ, ꠝꠣꠘꠤ ꠛꠣꠖꠡꠣ ꠢꠤꠡꠣꠛꠦ ꠛꠅꠀꠁꠟ ꠇꠞꠍꠂꠘ।
EPH 1:23 ꠀꠞ ꠁ ꠎꠝꠣꠔ ꠅꠁꠟꠉꠤ ꠀꠟ-ꠝꠍꠤꠞ ꠡꠞꠤꠟ। ꠎꠦꠁꠘ ꠀꠍꠝꠣꠘ-ꠎꠝꠤꠘꠞ ꠢꠇ꠆ꠇꠟꠔꠣꠞꠦ ꠡꠥꠟ꠆ꠟꠀꠘꠣ ꠙꠥꠞꠣꠙꠥꠞ ꠇꠞꠍꠂꠘ, ꠅꠃ ꠀꠟ-ꠝꠍꠤꠄ ꠎꠝꠣꠔꠞꠦ ꠙꠥꠞꠣꠙꠥꠞ ꠇꠞꠂꠘ।
EPH 2:1 ꠔꠥꠝꠞꠣ ꠔ ꠉꠥꠘꠣ ꠀꠞ ꠘꠣꠚꠞꠝꠣꠘꠤꠞ ꠝꠣꠎꠦ ꠝꠞꠣ ꠀꠍꠟꠣꠄ।
EPH 2:2 ꠎꠉꠔꠞ ꠜꠣꠛꠞ ꠝꠣꠎꠦ ꠙꠠꠤꠀ ꠔꠥꠝꠞꠣꠅ ꠄꠇ ꠡꠝꠄ ꠢꠃ ꠘꠣꠚꠞꠝꠣꠘꠤ ꠀꠞ ꠉꠥꠘꠣꠞ ꠙꠕꠦ ꠌꠟꠣ-ꠚꠤꠞꠣ ꠇꠞꠔꠣꠄ। ꠎꠦ ꠛꠖ ꠞꠥꠢꠥ ꠀꠍꠝꠣꠘꠞ ꠢꠇꠟ ꠕꠣꠇꠤ ꠡꠇ꠆ꠔꠤꠀꠟꠣ ꠞꠣꠎꠣ, ꠢꠃ ꠛꠖ ꠞꠥꠢꠦ ꠘꠣꠚꠞꠝꠣꠘ ꠅꠇꠟꠞ ꠜꠤꠔꠞꠦ ꠇꠣꠝ ꠇꠞꠦ, ꠀꠞ ꠔꠥꠝꠞꠣꠅ ꠢꠃ ꠛꠖ ꠞꠥꠢꠥꠞ ꠝꠥꠞꠤꠖ ꠀꠍꠟꠣꠄ।
EPH 2:3 ꠀꠝꠞꠣ ꠢꠇꠟꠦꠃ ꠄꠇ ꠡꠝꠄ ꠉꠥꠘꠣꠞ ꠡ꠆ꠛꠜꠣꠛꠞ ꠉꠥꠟꠣꠝ ꠛꠘꠤꠀ, ꠅꠔꠣ ꠘꠣꠚꠞꠝꠣꠘ ꠝꠣꠘꠡꠞ ꠟꠣꠈꠣꠘ ꠎꠤꠘ꠆ꠖꠦꠉꠤ ꠇꠣꠐꠣꠁꠔꠣꠝ। ꠅꠃ ꠛꠖ ꠡ꠆ꠛꠜꠣꠛ ꠕꠣꠇꠤ ꠎꠦ ꠛꠖ ꠈꠣꠁꠡ ꠀꠝꠞꠣꠞ ꠖꠤꠟꠅ ꠀꠁꠔ, ꠀꠝꠞꠣ ꠅꠟꠣ ꠇꠣꠝ ꠇꠞꠔꠣꠝ। ꠀꠞ ꠅꠃ ꠇꠣꠝ-ꠇꠣꠎꠞ ꠟꠣꠉꠤ ꠢꠔꠣ ꠝꠣꠘꠡꠞ ꠟꠣꠈꠣꠘ ꠀꠝꠞꠣꠅ ꠀꠟ꠆ꠟꠣꠞ ꠉꠎꠛꠞ ꠟꠣꠈ ꠀꠍꠟꠣꠝ।
EPH 2:4 ꠅꠁꠟꠦ ꠀꠟ꠆ꠟꠣ ꠙꠣꠇ ꠔ ꠞꠢꠝꠔꠞ ꠜꠣꠘ꠆ꠒꠣꠞ; ꠔꠣꠁꠘ ꠀꠝꠞꠣꠞꠦ ꠈꠥꠛ ꠛꠦꠡꠤ ꠝꠣꠄꠀ-ꠝꠢꠛ꠆ꠛꠔ ꠇꠞꠂꠘ।
EPH 2:5 ꠄꠞꠟꠣꠉꠤꠃ ꠘꠣꠚꠞꠝꠣꠘꠤ ꠇꠞꠤꠀ ꠀꠝꠞꠣ ꠎꠦꠛꠟꠣ ꠝꠞꠣ ꠎꠤꠘ꠆ꠖꠦꠉꠤꠞ ꠝꠣꠎꠦ ꠢꠣꠛꠥꠒꠥꠛꠥ ꠈꠣꠁꠍꠟꠣꠝ, ꠢꠃ ꠡꠝꠄ ꠀꠟ-ꠝꠍꠤꠞ ꠟꠉꠦ ꠔꠣꠁꠘ ꠀꠝꠞꠣꠞꠦ ꠎꠤꠘ꠆ꠖꠣ ꠇꠞꠟꠣ। ꠀꠟ꠆ꠟꠣꠞ ꠞꠢꠝꠔꠦ ꠔꠥꠝꠞꠣ ꠞꠦꠢꠣꠁ ꠙꠣꠁꠍ।
EPH 2:6 ꠀꠝꠞꠣ ꠀꠟ-ꠝꠍꠤꠞ ꠟꠉꠦ ꠀꠍꠤ, ꠄꠞꠟꠣꠉꠤ ꠀꠟ꠆ꠟꠣꠄ ꠀꠝꠞꠣꠞꠦ ꠀꠟ-ꠝꠍꠤꠞ ꠟꠉꠦ ꠎꠤꠘ꠆ꠖꠣ ꠇꠞꠤꠀ, ꠔꠣꠘ ꠟꠉꠦ ꠇꠞꠤ ꠛꠦꠢꠦꠡ꠆ꠔꠞ ꠜꠤꠔꠞꠦ ꠛꠅꠀꠁꠍꠂꠘ।
EPH 2:7 ꠔꠣꠁꠘ ꠁꠔꠣ ꠇꠞꠍꠂꠘ, ꠎꠣꠔꠦ ꠔꠣꠘ ꠝꠢꠣ-ꠝꠥꠟ꠆ꠟꠛꠣꠘ ꠞꠢꠝꠔ ꠅꠇꠟ ꠎꠥꠉꠦ ꠎꠥꠉꠦ ꠌꠤꠞꠇꠣꠟ ꠖꠦꠈꠣꠁꠔꠣ ꠙꠣꠞꠂꠘ। ꠀꠟ-ꠝꠍꠤꠞ ꠃꠍꠤꠟ꠆ꠟꠣꠄ ꠔꠣꠁꠘ ꠀꠝꠞꠣꠞꠦ ꠎꠦ ꠖꠄꠀ ꠇꠞꠍꠂꠘ, ꠅꠃ ꠖꠄꠀꠞ ꠝꠣꠎꠖꠤ ꠔꠣꠘ ꠁ ꠞꠢꠝꠔꠞ ꠇꠕꠣ ꠎꠣꠁꠞ ꠅꠁꠍꠦ।
EPH 2:8 ꠀꠟ꠆ꠟꠣꠞ ꠞꠢꠝꠔꠦ ꠁꠝꠣꠘ ꠀꠘꠣꠄ ꠔꠥꠝꠞꠣ ꠘꠣꠎꠣꠔ ꠙꠣꠁꠍ। ꠁꠔꠣ ꠔꠥꠝꠞꠣꠞ ꠘꠤꠎꠞ ꠇꠥꠘꠥ ꠀꠝꠟꠞ ꠚꠟ ꠘꠣꠄ, ꠈꠣꠟꠤ ꠀꠟ꠆ꠟꠣꠞ ꠖꠦꠅꠀ ꠖꠣꠘ।
EPH 2:9 ꠁꠔꠣ ꠔ ꠇꠥꠘꠥ ꠘꠦꠇ ꠇꠣꠝꠞ ꠛꠖꠟꠣ ꠘꠣꠄ, ꠎꠣꠔꠦ ꠇꠦꠃ ꠇꠥꠘꠥ ꠟꠣꠈꠣꠘ ꠛꠠꠣꠁ ꠇꠞꠔ ꠘꠣ ꠙꠣꠞꠦ।
EPH 2:10 ꠀꠝꠞꠣ ꠔ ꠀꠟ꠆ꠟꠣ ꠙꠣꠇꠞ ꠀꠔꠞ ꠙꠄꠖꠣ। ꠔꠣꠁꠘ ꠀꠟ-ꠝꠍꠤꠞ ꠃꠝ꠆ꠝꠔ ꠢꠤꠡꠣꠛꠦ ꠀꠝꠞꠣꠞꠦ ꠢꠤꠞꠛꠣꠞ ꠘꠄꠀ ꠇꠞꠤ ꠙꠄꠖꠣ ꠇꠞꠍꠂꠘ, ꠎꠣꠔꠦ ꠀꠝꠞꠣ ꠘꠦꠇ ꠇꠣꠝ ꠇꠞꠤ। ꠅꠃ ꠘꠦꠇ ꠇꠣꠝ ꠔꠣꠁꠘ ꠀꠉꠦ ꠕꠣꠇꠤꠃ ꠑꠤꠇ ꠇꠞꠤꠀ ꠞꠣꠈꠍꠤꠟꠣ ꠎꠣꠔꠦ ꠀꠝꠞꠣ ꠅꠟꠣ ꠎꠤꠘ꠆ꠖꠦꠉꠤ ꠇꠣꠐꠣꠁ।
EPH 2:11 ꠎꠘꠝꠉꠔ ꠜꠣꠛꠦ ꠔꠥꠝꠞꠣ ꠅꠁꠟꠣꠄ ꠛꠤꠗꠞ꠆ꠝꠤ ꠎꠣꠔꠤꠞ ꠝꠣꠘꠥꠡ। ꠝꠣꠘꠡꠞ ꠀꠔ ꠖꠤꠀ ꠎꠣꠞꠣꠞꠦ ꠡꠞꠤꠟꠅ ꠝꠍꠟꠝꠣꠘꠤ ꠇꠞꠣꠁꠟ ꠅꠁꠍꠦ, ꠄꠞꠣ ꠇꠁꠞꠣ, ꠔꠥꠝꠞꠣ ꠛꠥꠟꠦ ꠝꠍꠟꠝꠣꠘꠤ ꠇꠞꠣꠁꠍ ꠘꠣ।
EPH 2:12 ꠔꠦ ꠝꠘꠅ ꠞꠣꠈꠤꠅ, ꠀꠉꠦ ꠔ ꠔꠥꠝꠞꠣ ꠀꠟ-ꠝꠍꠤꠞ ꠉꠦꠍ ꠕꠣꠇꠤ ꠢꠞꠣꠁꠟ ꠀꠍꠟꠣꠄ; ꠔꠥꠝꠞꠣ ꠀꠍꠟꠣꠄ ꠀꠟ꠆ꠟꠣꠞ ꠙꠍꠘ꠆ꠖ ꠇꠞꠣ ꠛꠘꠤ ꠁꠍꠞꠣꠁꠟꠞ ꠛꠣꠁꠞꠞ ꠝꠣꠘꠥꠡ। ꠀꠟ꠆ꠟꠣꠄ ꠛꠘꠤ ꠁꠍꠞꠣꠁꠟꠞ ꠟꠉꠦ ꠝꠤꠟꠘꠞ ꠎꠔ ꠟꠣꠈꠣꠘ ꠃꠍꠤꠟ꠆ꠟꠣꠞ ꠅꠀꠖꠣ ꠇꠞꠍꠂꠘ, ꠁꠔꠣꠞ ꠟꠉꠦ ꠔꠥꠝꠞꠣꠞ ꠔ ꠇꠥꠘꠥ ꠡꠝ꠆ꠙꠞ꠆ꠇ ꠀꠍꠤꠟ ꠘꠣ। ꠔꠥꠝꠞꠣꠞ ꠇꠥꠘꠥ ꠀꠡꠣꠅ ꠀꠍꠤꠟ ꠘꠣ; ꠔꠥꠝꠞꠣ ꠀꠍꠟꠣꠄ ꠁ ꠖꠥꠘꠤꠀꠔ ꠀꠟ꠆ꠟꠣ ꠍꠣꠠꠣ ꠎꠣꠔꠤ।
EPH 2:13 ꠄꠇ ꠇꠕꠣꠄ, ꠔꠥꠝꠞꠣ ꠀꠟ꠆ꠟꠣ ꠕꠣꠇꠤ ꠖꠥꠞꠁ ꠀꠍꠟꠣꠄ। ꠅꠁꠟꠦ ꠅꠈꠘ ꠁꠍꠣ ꠀꠟ-ꠝꠍꠤꠞ ꠃꠝ꠆ꠝꠔ ꠅꠀꠄ, ꠔꠣꠘ ꠇꠥꠞꠛꠣꠘꠤꠞ ꠟꠃꠞ ꠃꠍꠤꠟ꠆ꠟꠣꠄ ꠔꠥꠝꠞꠣꠞꠦ ꠀꠟ꠆ꠟꠣꠞ ꠗꠣꠞꠅ ꠀꠘꠣ ꠅꠁꠍꠦ।
EPH 2:14 ꠔꠣꠁꠘꠃ ꠀꠝꠞꠣꠞ ꠡꠣꠘ꠆ꠔꠤ। ꠁꠍꠞꠣꠁꠟ ꠎꠣꠔꠤ ꠀꠞ ꠜꠤꠘ ꠎꠣꠔꠤ, ꠢꠇ꠆ꠇꠟꠞꠦ ꠔꠣꠁꠘ ꠄꠇ ꠇꠞꠍꠂꠘ। ꠁ ꠖꠥꠁꠅ ꠎꠣꠔꠤꠞ ꠝꠣꠎꠦ ꠖꠥꠡꠝꠘꠤꠞ ꠎꠦ ꠅꠀꠟ ꠀꠍꠤꠟ, ꠁ ꠅꠀꠟꠞꠦ ꠔꠣꠁꠘ ꠜꠣꠋꠉꠤꠀ ꠌꠥꠞꠝꠣꠞ ꠇꠞꠍꠂꠘ।
EPH 2:15 ꠀꠞ ꠍꠟꠤꠛꠞ ꠃꠙꠞꠦ ꠘꠤꠎꠞ ꠇꠣꠄꠀꠞꠦ ꠇꠥꠞꠛꠣꠘꠤ ꠖꠤꠀ, ꠔꠣꠁꠘ ꠝꠥꠍꠣ ꠘꠛꠤꠞ ꠡꠞꠤꠅꠔꠞ ꠢꠇꠟ ꠢꠥꠇꠥꠝ-ꠀꠢꠇꠣꠝ ꠀꠞ ꠀꠁꠘ-ꠇꠣꠘꠥꠘꠞ ꠈꠦꠝꠔꠣꠞꠦ ꠛꠣꠔꠤꠟ ꠇꠞꠍꠂꠘ। ꠔꠣꠘ ꠁꠟꠣ ꠇꠞꠣꠞ ꠇꠣꠞꠘ ꠅꠁꠟ, ꠔꠣꠁꠘ ꠌꠣꠁꠟꠣ, ꠅꠃ ꠖꠥꠁꠅꠔꠣ ꠖꠤꠀ ꠔꠣꠘ ꠘꠤꠎꠞ ꠘꠄꠀ ꠄꠇ ꠎꠣꠔꠤ ꠙꠄꠖꠣ ꠇꠞꠔꠣ, ꠎꠣꠔꠦ ꠅꠃ ꠎꠣꠔꠤꠞ ꠝꠣꠎꠖꠤ ꠁ ꠖꠥꠁꠅ ꠖꠟꠞ ꠝꠣꠎꠦ ꠡꠣꠘ꠆ꠔꠤ ꠅꠄ।
EPH 2:16 ꠀꠞ ꠔꠣꠁꠘ ꠌꠣꠁꠟꠣ, ꠍꠟꠤꠛꠞ ꠃꠙꠞꠦ ꠔꠣꠘ ꠘꠤꠎꠞ ꠎꠣꠘ ꠇꠥꠞꠛꠣꠘꠤꠞ ꠃꠍꠤꠟ꠆ꠟꠣꠄ, ꠅꠃ ꠖꠥꠁꠅ ꠖꠟꠞꠦ ꠔꠣꠁꠘ ꠄꠇꠈꠣꠘꠅ ꠇꠞꠤꠀ ꠀꠟ꠆ꠟꠣꠞ ꠟꠉꠦ ꠝꠤꠟꠘ ꠊꠐꠣꠁꠔꠣ। ꠄꠞꠟꠣꠉꠤ ꠅꠃ ꠖꠥꠁꠅ ꠖꠟꠞ ꠝꠣꠎꠦ ꠖꠥꠡꠝꠘꠤꠞ ꠎꠦ ꠜꠣꠛ ꠀꠍꠤꠟ, ꠁ ꠖꠥꠡꠝꠘꠤꠞꠦ ꠔꠣꠁꠘ ꠄꠇ꠆ꠇꠦꠛꠣꠞꠦ ꠝꠤꠐꠣꠁ ꠖꠤꠍꠂꠘ।
EPH 2:17 ꠔꠥꠝꠞꠣ ꠄꠇ ꠡꠝꠄ ꠀꠟ꠆ꠟꠣ ꠕꠣꠇꠤ ꠖꠥꠞꠁ ꠀꠍꠟꠣꠄ, ꠀꠞ ꠛꠘꠤ ꠁꠍꠞꠣꠁꠟ ꠅꠇꠟ ꠇꠣꠍꠣꠔ ꠀꠍꠟꠣ, ꠅꠈꠘ ꠔꠣꠁꠘ ꠀꠁꠀ ꠅꠃ ꠖꠥꠁꠅ ꠖꠟꠞ ꠉꠦꠍꠦꠃ ꠡꠣꠘ꠆ꠔꠤꠞ ꠈꠥꠡ-ꠈꠛꠞꠤ ꠔꠛꠟꠤꠉ ꠇꠞꠍꠂꠘ।
EPH 2:18 ꠄꠞ ꠚꠟꠦ ꠔꠣꠘ ꠃꠍꠤꠟ꠆ꠟꠣꠄ ꠀꠝꠞꠣ ꠖꠥꠁꠅ ꠖꠟ ꠙꠣꠇ ꠞꠥꠢꠥꠞ ꠝꠣꠎꠖꠤ, ꠀꠝꠞꠣꠞ ꠛꠦꠢꠦꠡ꠆ꠔꠤ ꠛꠣꠚ ꠀꠟ꠆ꠟꠣ ꠙꠣꠇꠞ ꠖꠞꠛꠣꠞꠅ ꠀꠎꠤꠞ ꠅꠁꠔꠣꠝ ꠙꠣꠞꠤ।
EPH 2:19 ꠄꠞꠟꠣꠉꠤꠃ ꠔꠥꠝꠞꠣ ꠅꠈꠘ ꠛꠣꠁꠞꠞ ꠝꠣꠘꠥꠡ ꠘꠣꠄ, ꠜꠤꠘ ꠎꠣꠔꠤꠅ ꠘꠣꠄ। ꠛꠞꠋ ꠀꠟ꠆ꠟꠣꠞ ꠈꠣꠍ ꠛꠘ꠆ꠖꠣ ꠅꠇꠟꠞ ꠟꠉꠦ ꠔꠥꠝꠞꠣꠅ ꠀꠟ꠆ꠟꠣꠞ ꠛꠣꠖꠡꠣꠁ ꠀꠞ ꠔꠣꠘ ꠙꠞꠤꠛꠣꠞꠞ ꠡꠖꠁꠡ꠆ꠡ ꠛꠘꠤꠉꠦꠍ।
EPH 2:20 ꠍꠣꠢꠣꠛꠤ ꠀꠞ ꠘꠛꠤ ꠅꠇꠟ ꠅꠁꠟꠣ ꠔꠣꠘ ꠊꠞꠞ ꠈꠥꠐꠤ, ꠀꠞ ꠢꠎꠞꠔ ꠁꠍꠣ ꠀꠟ-ꠝꠍꠤ ꠅꠁꠟꠣ ꠝꠥꠟ ꠁꠀꠘ ꠈꠥꠐꠤ। ꠅꠃ ꠈꠥꠐꠤꠞ ꠃꠙꠞꠦꠃ ꠔꠥꠝꠞꠣꠞꠦ ꠉꠠꠣ ꠅꠁꠍꠦ।
EPH 2:21 ꠀꠟ-ꠝꠍꠤꠞ ꠟꠉꠦ ꠎꠥꠠꠣ ꠟꠣꠉꠣꠄ, ꠀꠡ꠆ꠔꠣ ꠊꠞꠞ ꠢꠇꠟ ꠅꠋꠡ ꠄꠇꠟꠉꠦ ꠝꠤꠟꠤꠀ ꠄꠇꠈꠣꠘ ꠙꠛꠤꠔ꠆ꠞ ꠊꠞ ꠔꠤꠀꠞ ꠅꠁꠍꠦ।
EPH 2:22 ꠔꠥꠝꠞꠣꠅ ꠀꠁꠀ ꠔꠣꠘ ꠟꠉꠦ ꠎꠥꠠꠣ ꠟꠣꠉꠍ, ꠝꠣꠘꠤ ꠔꠣꠘ ꠃꠝ꠆ꠝꠔ ꠅꠁꠍ, ꠄꠞꠟꠣꠉꠤ ꠔꠥꠝꠞꠣꠞꠦꠅ ꠄꠇꠟꠉꠦ ꠉꠠꠤꠀ ꠔꠥꠟꠣ ꠅꠞ, ꠎꠣꠔꠦ ꠙꠣꠇ ꠞꠥꠢꠥꠞ ꠝꠣꠎꠖꠤ ꠁ ꠊꠞꠞ ꠝꠣꠎꠦ ꠀꠟ꠆ꠟꠣꠞ ꠛꠡꠔ ꠈꠣꠘꠣ ꠅꠄ।
EPH 3:1 ꠅꠃ ꠇꠣꠞꠘꠦ ꠀꠝꠤ ꠙꠣꠃꠟꠥꠍꠦ ꠀꠟ꠆ꠟꠣꠞ ꠖꠞꠛꠣꠞꠅ ꠖꠥꠀ ꠇꠞꠤꠀꠞ। ꠀꠞ ꠔꠥꠝꠞꠣ ꠎꠣꠞꠣ ꠜꠤꠘ ꠎꠣꠔꠤ, ꠔꠥꠝꠞꠣꠞꠦ ꠁꠍꠣ ꠀꠟ-ꠝꠍꠤꠞ ꠔꠞꠤꠇꠣꠞ ꠖꠣꠅꠔ ꠖꠦꠅꠀꠞ ꠟꠣꠉꠤꠃ ꠀꠝꠤ ꠅꠈꠘ ꠎꠦꠟꠅ ꠛꠘ꠆ꠖꠤ ꠅꠁꠍꠤ।
EPH 3:2 ꠔꠥꠝꠞꠣ ꠘꠤꠌꠄ ꠢꠥꠘꠍ, ꠀꠟ꠆ꠟꠣꠄ ꠀꠝꠣꠞꠦ ꠅꠃ ꠈꠣꠍ ꠖꠣꠄꠁꠔ꠆ꠔ ꠖꠤꠍꠂꠘ, ꠔꠣꠘ ꠞꠢꠝꠔꠞꠦ ꠀꠝꠤ ꠔꠥꠝꠞꠣꠞ ꠀꠔꠅ ꠙꠃꠍꠣꠁ ꠖꠤꠔꠣꠝ।
EPH 3:3 ꠀꠟ꠆ꠟꠣꠄ ꠔꠣꠘ ꠘꠤꠎꠞ ꠛꠣꠔꠥꠘꠤ ꠝꠥꠘꠡꠣ ꠅꠢꠤꠞ ꠝꠣꠎꠖꠤ ꠀꠝꠣꠞꠦ ꠎꠣꠘꠣꠁꠍꠂꠘ, ꠀꠞ ꠅꠃ ꠛꠦꠙꠣꠞꠈꠣꠘ ꠀꠝꠤ ꠔꠥꠝꠞꠣꠞ ꠉꠦꠍꠦ ꠡꠋꠇ꠆ꠇꠦꠙꠦ ꠟꠦꠈꠟꠣꠝ।
EPH 3:4 ꠁꠈꠣꠘ ꠙꠠꠟꠦ ꠔꠥꠝꠞꠣ ꠛꠥꠎꠛꠣꠄ, ꠀꠟ-ꠝꠍꠤꠞ ꠛꠦꠙꠣꠞꠦ ꠅꠃ ꠛꠣꠔꠥꠘꠤ ꠛꠤꠡꠄ ꠛꠥꠎꠣꠞ ꠈꠦꠝꠔꠣ ꠀꠝꠣꠞ ꠀꠍꠦ।
EPH 3:5 ꠁ ꠛꠣꠔꠥꠘꠤ ꠛꠦꠙꠣꠞꠈꠣꠘ ꠍꠣꠢꠣꠛꠤ ꠀꠞ ꠘꠛꠤ ꠅꠇꠟꠞ ꠉꠦꠍꠦ ꠎꠦꠟꠣ ꠙꠣꠇ ꠞꠥꠢꠥꠞ ꠝꠣꠎꠖꠤ ꠅꠈꠘ ꠎꠣꠁꠞ ꠅꠞ, ꠀꠉꠞ ꠎꠝꠣꠘꠣꠞ ꠇꠥꠘꠥ ꠝꠣꠘꠡꠞ ꠉꠦꠍꠦꠃ ꠁꠟꠣ ꠎꠣꠁꠞ ꠅꠁꠍꠦ ꠘꠣ।
EPH 3:6 ꠀꠞ ꠁ ꠛꠣꠔꠥꠘꠤ ꠛꠦꠙꠣꠞ ꠅꠁꠟ, ꠁꠘ꠆ꠎꠤꠟꠞ ꠈꠥꠡ-ꠈꠛꠞꠤꠞ ꠝꠣꠎꠖꠤ ꠜꠤꠘ ꠎꠣꠔꠤ ꠅꠇꠟꠅ ꠁꠍꠣ ꠀꠟ-ꠝꠍꠤꠞ ꠟꠉꠦ ꠄꠇ ꠅꠁꠀ, ꠛꠘꠤ ꠁꠍꠞꠣꠁꠟꠞ ꠟꠉꠦ ꠀꠟ꠆ꠟꠣꠁ ꠅꠗꠤꠇꠣꠞꠅ ꠡꠞꠤꠇ ꠅꠄ, ꠢꠇꠟ ꠄꠇ ꠡꠞꠤꠟꠞ ꠅꠋꠡ ꠅꠄ, ꠄꠇꠁ ꠅꠀꠖꠣꠞ ꠖꠥꠀꠞ ꠜꠣꠉꠤ ꠅꠄ।
EPH 3:7 ꠀꠟ꠆ꠟꠣꠄ ꠔꠣꠘ ꠝꠢꠣ ꠇꠥꠖꠞꠔꠞ ꠛꠟꠦ ꠀꠝꠣꠞꠦ ꠞꠢꠝꠔ ꠖꠣꠘ ꠇꠞꠍꠂꠘ, ꠀꠞ ꠎꠦꠟꠣ ꠞꠢꠝꠔ ꠙꠣꠁꠍꠤ, ꠅꠟꠣ ꠈꠥꠡ-ꠈꠛꠞꠤ ꠔꠛꠟꠤꠉꠞ ꠖꠣꠄꠁꠔ꠆ꠔ ꠀꠖꠣꠄ ꠇꠞꠞꠣꠝ।
EPH 3:8 ꠀꠟ꠆ꠟꠣꠞ ꠢꠇ꠆ꠇꠟ ꠛꠘ꠆ꠖꠣꠞ ꠝꠣꠎꠦ ꠀꠝꠣ ꠕꠣꠇꠤ ꠢꠥꠞꠥ ꠀꠞ ꠇꠦꠃ ꠘꠣꠁ, ꠔꠣ-ꠅ ꠀꠟ-ꠝꠍꠤꠞ ꠎꠦ ꠗꠘꠞ ꠇꠕꠣ ꠡꠥꠟ꠆ꠟꠀꠘꠣ ꠛꠥꠎꠣ ꠎꠣꠄ ꠘꠣ, ꠅꠃ ꠝꠥꠟ꠆ꠟꠛꠣꠘ ꠗꠘꠞ ꠈꠥꠡ-ꠈꠛꠞꠤ ꠜꠤꠘ ꠎꠣꠔꠤꠞ ꠉꠦꠍꠦ ꠔꠛꠟꠤꠉꠞ ꠖꠣꠄꠁꠔ꠆ꠔ ꠀꠝꠣꠞ ꠃꠙꠞꠦ ꠖꠤꠍꠂꠘ, ꠁꠐꠣꠃ ꠀꠟ꠆ꠟꠣꠞ ꠞꠢꠝꠔ।
EPH 3:9 ꠀꠞ ꠔꠣꠘ ꠛꠣꠔꠥꠘꠤ ꠝꠥꠘꠡꠣ ꠇꠤꠟꠣ ꠇꠣꠝꠅ ꠟꠣꠉꠣꠁꠟ ꠎꠣꠄ, ꠁꠈꠣꠘ ꠎꠣꠁꠞ ꠇꠞꠣꠞ ꠜꠣꠞꠅ ꠔꠣꠁꠘ ꠀꠝꠣꠞ ꠃꠙꠞꠦ ꠖꠤꠍꠂꠘ। ꠎꠦꠁꠘ ꠀꠍꠝꠣꠘ-ꠎꠝꠤꠘ ꠢꠇ꠆ꠇꠟꠔꠣ ꠙꠄꠖꠣ ꠇꠞꠍꠂꠘ, ꠢꠃ ꠀꠟ꠆ꠟꠣꠄ ꠅꠔꠖꠤꠘ ꠗꠞꠤꠀ ꠁꠔꠣ ꠛꠣꠔꠥꠘꠤ ꠞꠣꠈꠍꠤꠟꠣ।
EPH 3:10 ꠔꠣꠁꠘ ꠁꠔꠣ ꠛꠣꠔꠥꠘꠤ ꠞꠣꠈꠣꠞ ꠇꠣꠞꠘ ꠅꠁꠟ, ꠀꠍꠝꠣꠘꠞ ꠢꠇꠟ ꠞꠣꠎꠣ ꠀꠞ ꠈꠦꠝꠔꠣꠀꠟꠣ ꠢꠇꠟꠞ ꠉꠦꠍꠦ, ꠀꠟ꠆ꠟꠣꠞ ꠘꠣꠘꠣꠘ ꠘꠝꠥꠘꠣꠞ ꠀꠈꠟ-ꠢꠦꠇꠝꠔ ꠀꠟ-ꠝꠍꠤꠞ ꠎꠝꠣꠔꠞ ꠝꠣꠎꠖꠤ ꠅꠈꠘ ꠈꠥꠟꠣ-ꠝꠦꠟꠣ ꠅꠄ।
EPH 3:11 ꠔꠣꠘ ꠘꠤꠎꠞ ꠌꠤꠞꠇꠣꠟꠞ ꠝꠥꠘꠡꠣ ꠝꠣꠚꠤꠇ ꠁꠔꠣ ꠅꠁꠍꠦ, ꠀꠞ ꠅꠃ ꠝꠥꠘꠡꠣ-ꠝꠞ꠆ꠎꠤ ꠀꠝꠞꠣꠞ ꠝꠣꠟꠤꠇ ꠁꠍꠣ ꠀꠟ-ꠝꠍꠤꠞ ꠝꠣꠎꠖꠤ ꠙꠥꠞꠣ ꠇꠞꠍꠂꠘ।
EPH 3:12 ꠔꠣꠘ ꠟꠉꠦ ꠡꠞꠤꠇ ꠅꠁꠀ ꠁꠝꠣꠘꠞ ꠛꠟꠦ, ꠛꠥꠇꠥꠔ ꠡꠣꠅꠡ ꠞꠣꠈꠤꠀ ꠀꠟ꠆ꠟꠣꠞ ꠍꠣꠝꠘꠦ ꠀꠝꠞꠣ ꠀꠎꠤꠞ ꠅꠀꠞ ꠄꠈꠔꠤꠀꠞ ꠙꠣꠁꠍꠤ।
EPH 3:13 ꠄꠞꠟꠣꠉꠤ ꠀꠝꠤ ꠔꠥꠝꠞꠣꠞꠦ ꠝꠤꠘꠔ ꠇꠞꠤꠀꠞ, ꠀꠝꠤ ꠖꠥꠈ-ꠝꠍꠤꠛꠔ ꠡꠁꠎ꠆ꠎ ꠇꠞꠤꠀꠞ ꠖꠦꠈꠤꠀ ꠔꠥꠝꠞꠣ ꠘꠤꠞꠣꠡ ꠅꠁꠅ ꠘꠣ। ꠁꠔꠣ ꠔ ꠔꠥꠝꠞꠣꠞ ꠟꠣꠉꠤꠃ ꠡꠁꠎ꠆ꠎ ꠇꠞꠤꠀꠞ, ꠄꠞꠟꠣꠉꠤ ꠉꠃꠞꠛ ꠇꠞꠅ।
EPH 3:14 ꠔꠦ ꠀꠍꠝꠣꠘ-ꠎꠝꠤꠘꠞ ꠢꠇꠟ ꠎꠣꠘꠖꠣꠞꠞꠦ ꠎꠦꠁꠘ ꠙꠄꠖꠣ ꠇꠞꠍꠂꠘ, ꠀꠝꠤ ꠀꠐꠥ ꠉꠣꠠꠤꠀ ꠢꠃ ꠛꠣꠔꠥꠘꠤ ꠛꠣꠚꠞ ꠍꠣꠝꠘꠦ ꠝꠥꠘꠣꠎꠣꠔꠅ ꠛꠁꠍꠤ।
EPH 3:16 ꠀꠝꠤ ꠖꠥꠀ ꠇꠞꠤ, ꠀꠟ꠆ꠟꠣꠄ ꠎꠣꠘꠥ ꠔꠣꠘ ꠅꠡꠦꠡ ꠇꠥꠖꠞꠔꠞ ꠛꠟꠦ ꠔꠥꠝꠞꠣꠞꠦ ꠅꠝꠘ ꠛꠟ-ꠡꠇ꠆ꠔꠤ ꠖꠦꠁꠘ, ꠎꠣꠔꠦ ꠙꠣꠇ ꠞꠥꠢꠥꠞ ꠝꠣꠎꠖꠤ ꠔꠥꠝꠞꠣꠞ ꠖꠤꠟ ꠝꠎꠛꠥꠔ ꠅꠄ,
EPH 3:17 ꠀꠞ ꠁꠝꠣꠘꠞ ꠃꠍꠤꠟ꠆ꠟꠣꠄ ꠀꠟ-ꠝꠍꠤꠄ ꠔꠥꠝꠞꠣꠞ ꠖꠤꠟ ꠙꠥꠞꠣꠙꠥꠞ ꠖꠈꠟ ꠇꠞꠂꠘ। ꠀꠝꠤ ꠖꠥꠀ ꠇꠞꠤ, ꠔꠥꠝꠞꠣ ꠎꠣꠘꠥ ꠁꠍꠣ ꠀꠟ-ꠝꠍꠤꠞ ꠝꠢꠛ꠆ꠛꠔꠞ ꠝꠣꠎꠦ ꠙꠥꠞꠣꠙꠥꠞ ꠒꠥꠛ ꠖꠤꠀ ꠕꠤꠞ ꠞꠅ।
EPH 3:18 ꠔꠦꠃ ꠢꠇꠟ ꠙꠣꠇ ꠛꠘ꠆ꠖꠣ ꠅꠇꠟꠞ ꠟꠉꠦ ꠔꠥꠝꠞꠣꠅ ꠛꠥꠎꠛꠣꠄ, ꠀꠟ-ꠝꠍꠤꠞ ꠝꠢꠛ꠆ꠛꠔꠞ ꠇꠥꠘꠥ ꠇꠥꠟ-ꠇꠤꠘꠣꠞ ꠘꠣꠁ, ꠇꠥꠘꠥ ꠡꠦꠡ ꠡꠤꠝꠣ ꠘꠣꠁ।
EPH 3:19 ꠅꠃ ꠎꠦ ꠝꠢꠛ꠆ꠛꠔ ꠙꠥꠞꠣꠙꠥꠞ ꠛꠥꠎꠣꠞ ꠅꠡꠣꠁꠖ꠆ꠖ, ꠀꠝꠤ ꠖꠥꠀ ꠇꠞꠤꠀꠞ, ꠁ ꠝꠢꠛ꠆ꠛꠔꠞꠦ ꠎꠣꠘꠥ ꠔꠥꠝꠞꠣ ꠌꠤꠘꠅ, ꠌꠤꠘꠤꠀ ꠢꠣꠞꠤ ꠔꠥꠝꠞꠣꠅ ꠀꠟ꠆ꠟꠣꠁ ꠢꠇꠟ ꠘꠝꠥꠘꠣꠞ ꠉꠥꠘꠣꠉꠥꠘ ꠢꠣꠍꠤꠟ ꠇꠞꠤꠀ ꠙꠥꠞꠣꠙꠥꠞ ꠇꠣꠝꠤꠟ ꠅꠅ।
EPH 3:20 ꠀꠍꠟꠦ ꠀꠟ꠆ꠟꠣꠞ ꠎꠦ ꠇꠥꠖꠞꠔꠤ ꠛꠟꠦ ꠀꠝꠞꠣꠞ ꠖꠤꠟꠞ ꠝꠣꠎꠦ ꠇꠣꠝ ꠇꠞꠦ, ꠢꠃ ꠛꠟꠞ ꠃꠍꠤꠟ꠆ꠟꠣꠄ ꠀꠝꠞꠣꠞ ꠌꠤꠘ꠆ꠔꠣ-ꠜꠣꠛꠘꠣ ꠛꠣ ꠌꠣꠅꠀ-ꠙꠣꠅꠀ ꠕꠣꠇꠤ ꠀꠞꠅ ꠛꠃꠔ ꠛꠦꠡꠤ ꠇꠣꠝ ꠔꠣꠁꠘ ꠇꠞꠔꠣ ꠙꠣꠞꠂꠘ।
EPH 3:21 ꠢꠎꠞꠔ ꠁꠍꠣ ꠀꠟ-ꠝꠍꠤꠞ ꠝꠣꠎꠖꠤꠀ ꠀꠞ ꠎꠝꠣꠔꠞ ꠝꠣꠎꠖꠤꠀꠅ ꠎꠥꠉ ꠎꠥꠉ ꠗꠞꠤ ꠢꠞ-ꠢꠣꠝꠦꠡꠣ ꠀꠟ꠆ꠟꠣ ꠙꠣꠇꠞ ꠔꠣꠞꠤꠚ ꠅꠃꠇ। ꠀꠝꠤꠘ।
EPH 4:1 ꠀꠝꠣꠞ ꠝꠣꠟꠤꠇ ꠀꠟ-ꠝꠍꠤꠞ ꠟꠣꠉꠤ ꠀꠝꠤ ꠎꠦꠟꠅ ꠛꠘ꠆ꠖꠤ ꠀꠍꠤ। ꠅꠃ ꠛꠘ꠆ꠖꠤ ꠢꠣꠟꠔꠦ ꠀꠝꠤ ꠔꠥꠝꠞꠣꠞꠦ ꠝꠤꠘꠔ ꠇꠞꠤꠀꠞ, ꠎꠦ ꠇꠣꠝꠞ ꠟꠣꠉꠤ ꠀꠟ꠆ꠟꠣꠄ ꠔꠥꠝꠞꠣꠞꠦ ꠖꠣꠅꠔ ꠖꠤꠍꠂꠘ, ꠔꠥꠝꠞꠣ ꠄꠞ ꠃꠙꠎꠥꠇ꠆ꠔ ꠅꠁꠀ ꠌꠟ।
EPH 4:2 ꠔꠥꠝꠞꠣꠞ ꠀꠌꠣꠞ-ꠛꠦꠛꠢꠣꠞ ꠎꠣꠘꠥ ꠙꠥꠞꠣꠙꠥꠞ ꠝꠤꠑꠣ ꠀꠞ ꠘꠞꠝ ꠅꠄ। ꠙꠞꠔꠦꠇꠦ ꠍꠛꠞ ꠇꠞꠅ ꠀꠞ ꠖꠤꠟꠅ ꠝꠢꠛ꠆ꠛꠔ ꠞꠣꠈꠤꠀ ꠄꠇꠦ-ꠅꠁꠘ꠆ꠘꠞꠦ ꠡꠁꠎ꠆ꠎ ꠇꠞꠅ।
EPH 4:3 ꠀꠟ-ꠝꠍꠤꠞ ꠎꠦ ꠡꠣꠘ꠆ꠔꠤꠄ ꠀꠝꠞꠣꠞꠦ ꠄꠇꠈꠣꠘꠅ ꠎꠥꠠꠣ ꠟꠣꠉꠣꠁꠍꠦ, ꠢꠃ ꠡꠣꠘ꠆ꠔꠤꠞ ꠛꠟꠦ ꠙꠣꠇ ꠞꠥꠢꠥꠞ ꠖꠦꠅꠀ ꠄꠇꠔꠣ ꠞꠇ꠆ꠇꠣꠞ ꠟꠣꠉꠤ ꠖꠤꠟꠦ-ꠎꠣꠘꠦ ꠌꠦꠡ꠆ꠐꠣ ꠇꠞꠅ।
EPH 4:4 ꠀꠟ꠆ꠟꠣꠄ ꠔꠥꠝꠞꠣꠞꠦ ꠔꠣꠘ ꠙꠕꠦ ꠖꠣꠅꠔ ꠖꠤꠍꠂꠘ ꠇꠞꠤꠀ ꠔꠥꠝꠞꠣꠞ ꠝꠣꠎꠦ ꠈꠣꠟꠤ ꠄꠇꠈꠣꠘ ꠀꠡꠣ ꠀꠍꠦ, ꠈꠣꠟꠤ ꠄꠇ ꠡꠞꠤꠟ ꠀꠞ ꠄꠇꠎꠘ ꠙꠣꠇ ꠞꠥꠢꠥ ꠀꠍꠂꠘ।
EPH 4:5 ꠄꠇ ꠁꠝꠣꠘ, ꠄꠇ ꠔꠞꠤꠇꠣꠛꠘ꠆ꠖꠤ ꠀꠞ ꠄꠇꠎꠘ ꠝꠣꠟꠤꠇ ꠀꠍꠂꠘ।
EPH 4:6 ꠢꠇꠟꠞ ꠀꠟ꠆ꠟꠣ ꠈꠣꠟꠤ ꠄꠇꠎꠘ, ꠝꠣꠘꠤ ꠛꠦꠢꠦꠡ꠆ꠔꠤ ꠛꠣꠚ ꠄꠇꠎꠘꠃ ꠀꠍꠂꠘ। ꠔꠣꠁꠘꠃ ꠢꠇꠟꠞ ꠃꠙꠞꠦ, ꠢꠇꠟꠞ ꠝꠣꠎꠦ, ꠢꠇꠟꠞ ꠖꠤꠟꠅ ꠀꠍꠂꠘ।
EPH 4:7 ꠅꠁꠟꠦ ꠀꠟ-ꠝꠍꠤꠄ ꠎꠦꠟꠣ ꠑꠤꠇ ꠇꠞꠤꠀ ꠞꠣꠈꠍꠂꠘ, ꠢꠃ ꠝꠣꠚꠤꠇ ꠀꠝꠞꠣ ꠙꠞꠔꠦꠇꠦ ꠈꠣꠍ ꠞꠢꠝꠔ ꠙꠣꠁꠍꠤ।
EPH 4:8 ꠄꠞꠟꠣꠉꠤ ꠎꠛꠥꠞ ꠡꠞꠤꠚꠅ ꠟꠦꠈꠣ ꠀꠍꠦ, ꠔꠣꠁꠘ ꠉꠤꠀ ꠎꠦꠛꠟꠣ ꠛꠦꠢꠦꠡ꠆ꠔꠅ ꠃꠑꠤꠟꠣ, ꠅꠃ ꠡꠝꠄ ꠛꠘ꠆ꠖꠤ ꠅꠇꠟꠞꠦ ꠛꠣꠘ꠆ꠖꠤꠀ ꠐꠣꠘꠤꠀ ꠘꠤꠟꠣ, ꠀꠞ ꠔꠣꠘ ꠝꠣꠘꠡꠞꠦ ꠛꠃꠔ ꠖꠣꠘ ꠖꠤꠟꠣ।
EPH 4:9 ꠔꠦ ꠛꠦꠢꠦꠡ꠆ꠔꠅ ꠉꠤꠀ ꠃꠑꠤꠟꠣ, ꠁ ꠀꠄꠀꠔ ꠕꠣꠇꠤ ꠛꠥꠎꠣ ꠎꠣꠄ ꠘꠣ ꠘꠤ, ꠀꠉꠦ ꠔꠣꠁꠘ ꠖꠥꠘꠤꠀꠞ ꠔꠟꠦ ꠟꠣꠝꠍꠤꠟꠣ।
EPH 4:10 ꠀꠞ ꠎꠦꠁꠘ ꠟꠣꠝꠍꠤꠟꠣ, ꠔꠣꠁꠘ ꠢꠇꠟꠔꠣ ꠙꠥꠞꠘ ꠇꠞꠣꠞ ꠟꠣꠉꠤ, ꠀꠍꠝꠣꠘ ꠕꠣꠇꠤ ꠀꠞꠅ ꠃꠙꠞꠦ ꠉꠤꠀ ꠃꠑꠤꠍꠂꠘ।
EPH 4:11 ꠔꠣꠁꠘ ꠝꠣꠘꠡꠞꠦ ꠅꠃ ꠖꠣꠘ ꠖꠤꠍꠂꠘ, ꠇꠄꠎꠘꠞꠦ ꠍꠣꠢꠣꠛꠤ, ꠇꠄꠎꠘꠞꠦ ꠘꠛꠤ, ꠇꠄꠎꠘꠞꠦ ꠈꠥꠡ-ꠈꠛꠞꠤꠞ ꠔꠛꠟꠤꠉ, ꠇꠄꠎꠘꠞꠦ ꠎꠝꠣꠔꠞ ꠁꠝꠣꠝ ꠀꠞ ꠃꠡ꠆ꠔꠣꠖ ꠢꠤꠡꠣꠛꠦ ꠛꠅꠀꠁꠟ ꠇꠞꠍꠂꠘ।
EPH 4:12 ꠔꠣꠁꠘ ꠁꠟꠣ ꠇꠞꠣꠞ ꠇꠣꠞꠘ ꠅꠁꠟ, ꠀꠟ꠆ꠟꠣꠞ ꠙꠣꠇ ꠛꠘ꠆ꠖꠣ ꠅꠇꠟꠦ ꠎꠣꠘꠥ ꠔꠣꠘ ꠄꠛꠣꠖꠔ-ꠛꠘ꠆ꠖꠦꠉꠤ ꠇꠞꠣꠞ ꠟꠣꠉꠤ ꠎꠥꠁꠔ ꠅꠄ, ꠀꠞ ꠅꠃ ꠘꠝꠥꠘꠣꠄ ꠀꠟ-ꠝꠍꠤꠞ ꠡꠞꠤꠟ, ꠎꠝꠣꠔ ꠢꠤꠡꠣꠛꠦ ꠉꠠꠤꠀ ꠃꠑꠦ।
EPH 4:13 ꠔꠣꠘ ꠈꠤꠀꠟ ꠅꠁꠟ, ꠀꠝꠞꠣ ꠢꠇꠟꠦ ꠎꠣꠘꠥ ꠀꠟ꠆ꠟꠣꠞ ꠈꠣꠍ ꠝꠣꠄꠀꠞ ꠎꠘ, ꠁꠛꠘꠥꠟ꠆ꠟꠣꠞ ꠃꠙꠞꠦ ꠁꠝꠣꠘ ꠀꠘꠤꠀ, ꠔꠣꠘꠞꠦ ꠜꠣꠟꠣ ꠇꠞꠤ ꠌꠤꠘꠤꠀ ꠄꠇꠈꠣꠘꠅ ꠅꠁ। ꠀꠞ ꠀꠟ-ꠝꠍꠤ ꠎꠦꠟꠣ ꠢꠇꠟ ꠟꠣꠈꠣꠘ ꠉꠥꠘꠦ ꠙꠥꠞꠣꠙꠥꠞ ꠜꠞꠣ, ꠀꠝꠞꠣꠅ ꠅꠟꠣ ꠢꠇꠟ ꠉꠥꠘꠦ ꠙꠥꠞꠣꠙꠥꠞ ꠅꠁꠀ ꠇꠣꠝꠤꠟ ꠅꠁ।
EPH 4:14 ꠔꠦꠃ ꠀꠝꠞꠣ ꠀꠞ ꠢꠥꠞꠥꠔ꠆ꠔꠣꠞ ꠟꠣꠈꠣꠘ ꠞꠁꠔꠣꠝ ꠘꠣꠄ। ꠝꠣꠘꠡꠦ ꠡꠄꠔꠣꠘꠤ ꠀꠈꠟ ꠈꠣꠐꠣꠁꠀ ꠛꠦ-ꠙꠕꠦ ꠘꠤꠛꠣꠞ ꠟꠣꠉꠤ ꠝꠣꠘꠡꠞꠦ ꠎꠦ ꠜꠥꠟ ꠔꠣꠟꠤꠝ ꠖꠦꠄ, ꠅꠃ ꠜꠥꠟ ꠔꠣꠟꠤꠝꠦ ꠎꠣꠘꠥ ꠀꠝꠞꠣꠞꠦ ꠙꠣꠘꠤꠞ ꠀꠃꠟꠣ-ꠎꠣꠃꠟꠣ ꠓꠦꠃꠞ ꠟꠣꠈꠣꠘ ꠖꠥ-ꠖꠤꠟꠣ ꠘꠣ ꠛꠣꠘꠣꠄ।
EPH 4:15 ꠛꠞꠋ ꠀꠝꠞꠣꠞ ꠖꠤꠟꠞ ꠝꠢꠛ꠆ꠛꠔꠦ ꠢꠇ ꠝꠣꠔ ꠝꠣꠔꠤꠝꠥ, ꠢꠇꠟ ꠘꠝꠥꠘꠣꠄ ꠛꠠ ꠅꠁꠀ ꠀꠟ-ꠝꠍꠤꠞ ꠟꠣꠈꠣꠘ ꠅꠁꠝꠥ। ꠔꠣꠁꠘꠃ ꠔ ꠀꠡ꠆ꠔꠣ ꠡꠞꠤꠟꠞ ꠝꠣꠕꠣ।
EPH 4:16 ꠀꠡ꠆ꠔꠣ ꠡꠞꠤꠟ ꠅꠝꠟꠣ ꠛꠣꠘꠣꠁꠟ ꠅꠁꠍꠦ, ꠎꠣꠔꠦ ꠡꠞꠤꠟꠞ ꠢꠇꠟ ꠅꠋꠉ ꠎꠣꠞꠎꠤꠞ ꠎꠣꠉꠣꠔ ꠞꠁꠀ ꠝꠥꠟ ꠇꠣꠄꠀꠞ ꠟꠉꠦ ꠎꠥꠠꠣ ꠟꠣꠉꠣꠁꠟ ꠞꠄ। ꠙꠞꠔꠦꠇ ꠅꠋꠉ ꠎꠦꠛꠟꠣ ꠑꠤꠇ-ꠑꠣꠇ ꠇꠣꠝ ꠇꠞꠦ, ꠅꠃ ꠡꠝꠄ ꠀꠡ꠆ꠔꠣ ꠡꠞꠤꠟꠃ ꠝꠣꠕꠣꠞ ꠛꠟꠦ ꠛꠣꠠꠤꠀ ꠃꠑꠦ, ꠀꠞ ꠝꠢꠛ꠆ꠛꠔꠞ ꠝꠣꠎꠖꠤ ꠘꠤꠎꠞꠦ ꠉꠠꠤꠀ ꠔꠥꠟꠦ।
EPH 4:17 ꠄꠞꠟꠣꠉꠤ ꠀꠝꠤ ꠀꠝꠣꠞ ꠝꠣꠟꠤꠇꠞ ꠘꠣꠝꠦ ꠔꠥꠝꠞꠣꠞꠦ ꠢꠥꠡꠤꠀꠞ ꠇꠞꠤ ꠖꠤꠀꠞ, ꠜꠤꠘ ꠗꠞ꠆ꠝꠞ ꠝꠣꠘꠡꠦ ꠎꠦꠟꠣ ꠛꠣꠎꠦ ꠌꠤꠘ꠆ꠔꠣ ꠇꠞꠤꠀ ꠎꠤꠘ꠆ꠖꠦꠉꠤ ꠇꠣꠐꠣꠁꠘ, ꠔꠥꠝꠞꠣ ꠀꠞ ꠁꠟꠣ ꠎꠤꠘ꠆ꠖꠦꠉꠤ ꠇꠣꠐꠣꠁꠅ ꠘꠣ।
EPH 4:18 ꠔꠣꠞꠣꠞ ꠖꠤꠟ ꠔ ꠀꠘ꠆ꠖꠣꠁꠞꠞ ꠝꠣꠎꠦ ꠙꠠꠤ ꠞꠁꠍꠦ। ꠁꠔꠣꠞ ꠖꠤꠟ ꠉꠥꠝꠞꠣ, ꠄꠞꠟꠣꠉꠤꠃ ꠔꠣꠞꠣ ꠀꠟ꠆ꠟꠣꠞ ꠛꠦꠙꠣꠞꠦ ꠇꠥꠘ꠆ꠔꠣ ꠌꠤꠘꠦ ꠘꠣ, ꠇꠥꠘ꠆ꠔꠣ ꠌꠤꠘꠔ ꠌꠣꠄꠅ ꠘꠣ, ꠄꠞꠟꠣꠉꠤ ꠀꠟ꠆ꠟꠣꠞ ꠖꠦꠅꠀ ꠎꠤꠘ꠆ꠖꠦꠉꠤ ꠕꠣꠇꠤ ꠔꠣꠞꠣ ꠛꠃꠔ ꠖꠥꠞꠁ।
EPH 4:19 ꠔꠣꠞꠣꠞ ꠛꠤꠛꠦꠇ ꠅꠡꠣꠠ ꠅꠁꠉꠦꠍꠦ, ꠅꠔꠣꠞ ꠖꠣꠄ ꠢꠞ-ꠢꠣꠝꠦꠡꠣ ꠘꠣꠙꠣꠇꠤ ꠇꠣꠝꠞ ꠗꠣꠘ꠆ꠖꠣ ꠇꠞꠦ, ꠔꠣꠞꠣ ꠘꠤꠎꠞ ꠎꠤꠘ꠆ꠖꠦꠉꠤꠞꠦ ꠟꠣꠉꠣꠝ ꠍꠣꠠꠣ ꠛꠖ ꠈꠣꠁꠡꠞ ꠀꠔꠅ ꠍꠣꠠꠤ ꠖꠤꠍꠦ।
EPH 4:20 ꠅꠁꠟꠦ ꠔꠥꠝꠞꠣ ꠔ ꠀꠟ-ꠝꠍꠤꠞ ꠛꠦꠙꠣꠞꠦ ꠁꠟꠣꠈꠣꠘ ꠔꠣꠟꠤꠝ ꠙꠣꠁꠍ ꠘꠣ।
EPH 4:21 ꠔꠥꠝꠞꠣ ꠘꠤꠌ꠆ꠌꠄ ꠔꠣꠘ ꠛꠦꠙꠣꠞꠦ ꠢꠥꠘꠍ, ꠢꠥꠘꠤꠀ ꠔꠣꠘ ꠟꠉꠦ ꠡꠞꠤꠇ ꠅꠁꠀ, ꠔꠣꠘ ꠝꠣꠎꠦ ꠎꠦ ꠢꠇ ꠀꠍꠦ, ꠅꠃ ꠢꠇꠞ ꠔꠣꠟꠤꠝ ꠙꠣꠁꠍ।
EPH 4:22 ꠔꠣꠘ ꠔꠣꠟꠤꠝ ꠅꠁꠟ, ꠚꠤꠘ꠆ꠘꠞ ꠙꠥꠞꠣꠘ ꠇꠣꠙꠠ ꠝꠣꠘꠡꠦ ꠎꠦꠛꠟꠣ ꠄꠇ꠆ꠇꠦꠞꠦ ꠚꠣꠟꠣꠁ ꠖꠦꠄ, ꠅꠃ ꠟꠣꠈꠣꠘ ꠔꠥꠝꠞꠣꠞ ꠜꠤꠔꠞꠞ ꠙꠥꠞꠣꠘ ‘ꠀꠝꠤ’ꠞꠦ ꠄꠇ꠆ꠇꠦꠛꠣꠞꠦ ꠚꠣꠟꠣꠁ ꠖꠦꠅ, ꠇꠣꠞꠘ ꠅꠃ ‘ꠀꠝꠤ’ꠞ ꠛꠖ ꠈꠣꠁꠡꠦ ꠝꠣꠘꠡꠞ ꠎꠤꠘ꠆ꠖꠦꠉꠤꠞꠦ ꠛꠞꠛꠣꠖ ꠇꠞꠤꠟꠣꠄ।
EPH 4:23 ꠄꠞ ꠛꠖꠟꠣ ꠀꠟ꠆ꠟꠣ ꠙꠣꠇꠞꠦ ꠡꠥꠎꠥꠉ ꠖꠦꠅ, ꠔꠣꠁꠘ ꠔꠥꠝꠞꠣꠞ ꠖꠤꠟꠞꠦ ꠘꠄꠀ ꠢꠣꠟꠔꠦ ꠉꠠꠤꠀ ꠔꠥꠟꠃꠇ꠆ꠇꠣ,
EPH 4:24 ꠔꠣꠘ ꠖꠦꠅꠀ ꠘꠄꠀ ‘ꠀꠝꠤ’ꠞꠦ ꠘꠄꠀ ꠇꠣꠙꠠꠞ ꠟꠣꠈꠣꠘ ꠚꠤꠘ꠆ꠖꠅ। ꠅꠃ ꠘꠄꠀ ‘ꠀꠝꠤ’ꠞꠦ ꠀꠍꠟ ꠢꠇ-ꠙꠞꠦꠎꠉꠣꠞꠤ ꠀꠞ ꠙꠣꠇ-ꠙꠛꠤꠔ꠆ꠞ ꠇꠞꠤꠀ ꠀꠟ꠆ꠟꠣꠞ ꠍꠥꠞꠔꠦ ꠉꠠꠣ ꠅꠁꠍꠦ।
EPH 4:25 ꠄꠞꠟꠣꠉꠤ ꠔꠥꠝꠞꠣ ꠝꠤꠍꠣ ꠝꠣꠔꠣ ꠛꠣꠖ ꠖꠦꠅ, ꠄꠇꠦ-ꠅꠁꠘ꠆ꠘꠦ ꠢꠣꠍꠣ ꠝꠣꠔꠅ, ꠇꠣꠞꠘ ꠀꠝꠞꠣ ꠢꠇꠟꠃ ꠄꠇꠦ-ꠅꠁꠘ꠆ꠘꠦ ꠝꠤꠡꠤꠀ ꠀꠍꠤ।
EPH 4:26 ꠞꠣꠉ-ꠉꠥꠍꠣ ꠇꠞꠟꠦꠅ ꠁ ꠞꠣꠉꠞ ꠟꠣꠉꠤ ꠉꠥꠘꠣ ꠇꠞꠤꠅ ꠘꠣ, ꠡꠥꠞꠥꠎ ꠒꠥꠛꠣꠞ ꠀꠉꠦꠃ ꠉꠥꠍꠣꠞ ꠇꠕꠣ ꠚꠣꠃꠞꠤꠟꠣꠅ,
EPH 4:27 ꠁꠛꠟꠤꠍ-ꠡꠄꠔꠣꠘꠞꠦ ꠇꠥꠘꠥ ꠡꠥꠎꠥꠉ ꠖꠤꠅ ꠘꠣ।
EPH 4:28 ꠌꠥꠞꠦ ꠔꠣꠞ ꠌꠥꠞꠤ ꠇꠞꠣ ꠛꠣꠖ ꠖꠦꠃꠇ, ꠘꠤꠎꠞ ꠀꠔꠦ ꠢꠣꠟꠣꠟ ꠙꠕꠦ ꠝꠦꠘꠔ ꠇꠞꠤꠀ ꠈꠣꠘꠣ ꠈꠣꠃꠇ, ꠎꠣꠔꠦ ꠔꠣꠞ ꠈꠣꠅꠀ-ꠚꠤꠘ꠆ꠖꠣꠞ ꠛꠣꠖꠦꠅ ꠉꠞꠤꠛ-ꠖꠥꠈꠤꠞꠦ ꠖꠤꠛꠣꠞ ꠟꠣꠉꠤ ꠇꠤꠍꠥ ꠎꠝꠣ ꠞꠄ।
EPH 4:29 ꠔꠥꠝꠞꠣꠞ ꠝꠥꠈꠖꠤ ꠎꠣꠘꠥ ꠛꠣꠖ ꠇꠕꠣ ꠘꠣ ꠛꠣꠞꠅꠄ, ꠛꠞꠋ ꠀꠞꠇ ꠎꠘꠞ ꠃꠙꠇꠣꠞꠤ ꠔꠣꠟꠤꠝꠞ ꠟꠣꠉꠤ ꠜꠣꠟꠣ ꠝꠣꠔ ꠝꠣꠔꠤꠅ, ꠎꠣꠔꠦ ꠁꠔꠣ ꠢꠥꠘꠤꠀ ꠢꠥꠘꠞꠣ ꠎꠘꠞ ꠜꠣꠟꠣꠁ ꠅꠄ।
EPH 4:30 ꠔꠥꠝꠞꠣ ꠀꠟ꠆ꠟꠣꠞ ꠙꠣꠇ ꠞꠥꠢꠥꠞꠦ ꠖꠥꠈ ꠖꠤꠅ ꠘꠣ, ꠀꠈꠦꠞꠤ ꠘꠣꠎꠣꠔꠞ ꠀꠉ ꠙꠞ꠆ꠎꠘ꠆ꠔ ꠅꠃ ꠞꠥꠢꠥ ꠖꠤꠀꠃ ꠀꠟ꠆ꠟꠣꠄ ꠔꠥꠝꠞꠣꠞꠦ ꠡꠤꠟ-ꠌꠣꠙ꠆ꠙꠠ ꠝꠣꠞꠤꠀ ꠕꠁꠍꠂꠘ।
EPH 4:31 ꠢꠇꠟ ꠘꠝꠥꠘꠣꠞ ꠛꠤꠞꠇ꠆ꠔꠤ ꠜꠣꠛ, ꠝꠤꠎꠣꠎ ꠖꠦꠈꠣꠘꠤ, ꠞꠣꠉ-ꠉꠥꠍꠣ, ꠌꠤꠟ꠆ꠟꠣꠁꠀ ꠇꠣꠁꠎ꠆ꠎꠣ ꠇꠞꠣ, ꠉꠣꠟꠣ-ꠉꠣꠟꠤ, ꠀꠞ ꠢꠇꠟ ꠘꠝꠥꠘꠣꠞ ꠁꠋꠡꠣ-ꠘꠤꠘ꠆ꠖꠣ ꠔꠥꠝꠞꠣꠞ ꠉꠦꠍ ꠕꠣꠇꠤ ꠢꠞꠣꠁꠟꠣꠅ।
EPH 4:32 ꠛꠞꠋ ꠔꠥꠝꠞꠣ ꠄꠇꠦ-ꠅꠁꠘ꠆ꠘꠦ ꠖꠄꠀ ꠇꠞꠅ, ꠅꠁꠘ꠆ꠘꠞ ꠖꠥꠈꠦ ꠖꠥꠈꠤ ꠅꠅ, ꠀꠟ-ꠝꠍꠤꠞ ꠝꠣꠎꠖꠤ ꠀꠟ꠆ꠟꠣꠄ ꠎꠦꠟꠣ ꠔꠥꠝꠞꠣꠞꠦ ꠝꠣꠚ ꠇꠞꠍꠂꠘ, ꠔꠥꠝꠞꠣꠅ ꠅꠟꠣ ꠄꠇꠦ-ꠅꠁꠘ꠆ꠘꠞꠦ ꠝꠣꠚ ꠇꠞꠅ।
EPH 5:1 ꠔꠥꠝꠞꠣ ꠔ ꠀꠟ꠆ꠟꠣꠞ ꠝꠣꠄꠀꠞ ꠀꠅꠟꠣꠖ, ꠔꠦ ꠙꠥꠔ ꠎꠦꠟꠣ ꠛꠣꠚꠞ ꠟꠣꠈꠣꠘ ꠅꠄ, ꠔꠥꠝꠞꠣꠅ ꠅꠟꠣ ꠅꠅ।
EPH 5:2 ꠀꠟ-ꠝꠍꠤꠄ ꠎꠦꠟꠣ ꠀꠝꠞꠣꠞꠦ ꠝꠢꠛ꠆ꠛꠔ ꠇꠞꠍꠂꠘ, ꠔꠥꠝꠞꠣꠅ ꠅꠟꠣ ꠝꠣꠄꠀ-ꠝꠢꠛ꠆ꠛꠔꠞ ꠙꠕꠦ ꠌꠟꠅ। ꠔꠣꠁꠘ ꠀꠝꠞꠣꠞꠦ ꠛꠣꠌꠣꠁꠔꠣ ꠇꠞꠤ ꠘꠤꠎꠞ ꠎꠣꠘꠞꠦ ꠈꠥꠡꠛꠄꠖꠣꠞ ꠇꠥꠞꠛꠣꠘꠤ ꠢꠤꠡꠣꠛꠦ ꠀꠟ꠆ꠟꠣꠞ ꠘꠣꠝꠦ ꠛꠤꠟꠣꠁ ꠖꠤꠍꠂꠘ।
EPH 5:3 ꠇꠥꠘꠥ ꠘꠝꠥꠘꠣꠞ ꠎꠤꠘꠣ, ꠘꠣꠙꠣꠇꠤ ꠀꠞ ꠟꠥꠜ-ꠟꠣꠟꠌꠞ ꠇꠕꠣ ꠔꠥꠝꠞꠣꠞ ꠝꠣꠎꠦ ꠎꠣꠘꠥ ꠘꠣ ꠢꠥꠘꠣ ꠎꠣꠄ, ꠇꠣꠞꠘ ꠁꠔꠣ ꠇꠣꠝ ꠀꠟ꠆ꠟꠣꠞ ꠙꠣꠇ ꠛꠘ꠆ꠖꠣꠞ ꠟꠣꠉꠤ ꠑꠤꠇ ꠘꠣꠄ।
EPH 5:4 ꠀꠞ ꠛꠦꠢꠣꠄꠀ-ꠛꠦꠁꠎ꠆ꠎꠔꠤꠞ ꠎꠦꠇꠥꠘꠥ ꠝꠣꠔ-ꠇꠕꠣ, ꠀꠌꠣꠞ-ꠛꠦꠛꠢꠣꠞ ꠛꠣ ꠈꠛꠤꠍꠤ ꠑꠣꠐ꠆ꠐꠣ-ꠝꠡꠇꠞꠣ ꠎꠣꠘꠥ ꠔꠥꠝꠞꠣꠞ ꠝꠣꠎꠦ ꠘꠣ ꠅꠄ, ꠁꠔꠣꠄ ꠔꠥꠝꠞꠣꠞꠦ ꠝꠣꠘꠣꠄ ꠘꠣ। ꠁꠔꠣꠞ ꠛꠖꠟꠣ ꠀꠟ꠆ꠟꠣꠞ ꠡꠥꠇꠥꠞ-ꠉꠥꠎꠣꠞ ꠇꠞꠅ।
EPH 5:5 ꠔꠥꠝꠞꠣ ꠔ ꠎꠣꠘꠃ, ꠎꠤꠘꠣꠇꠥꠞ, ꠘꠣꠙꠣꠇ ꠀꠞ ꠟꠣꠟꠌꠤ ꠝꠣꠘꠡꠦ, ꠀꠟ꠆ꠟꠣ ꠙꠣꠇ ꠀꠞ ꠀꠟ-ꠝꠍꠤꠞ ꠛꠣꠖꠡꠣꠁꠞ ꠝꠣꠎꠦ ꠇꠥꠘꠥ ꠎꠣꠉꠣ ꠙꠣꠁꠔ ꠘꠣꠄ। ꠁꠔꠣꠄ ꠔ ꠄꠇꠟꠣꠈꠣꠘ ꠝꠥꠞ꠆ꠔꠤꠙꠥꠎꠣ ꠇꠞꠞꠣ।
EPH 5:6 ꠢꠥꠡꠤꠀꠞ ꠞꠁꠅ, ꠝꠤꠍꠣ ꠝꠣꠔ ꠝꠣꠔꠤꠀ ꠇꠦꠃ ꠎꠣꠘꠥ ꠔꠥꠝꠞꠣꠞꠦ ꠛꠦ-ꠙꠕꠦ ꠘꠣ ꠘꠦꠄ, ꠀꠟ꠆ꠟꠣꠞ ꠘꠣꠚꠞꠝꠣꠘ ꠛꠘꠤꠀ ꠎꠦꠞꠣ ꠁꠔꠣ ꠛꠖ ꠇꠣꠝ ꠇꠞꠦ, ꠔꠣꠞꠣꠞ ꠃꠙꠞꠦ ꠀꠟ꠆ꠟꠣꠞ ꠉꠎꠛ ꠟꠣꠝꠦ।
EPH 5:7 ꠔꠥꠝꠞꠣ ꠁꠟꠣꠈꠣꠘ ꠝꠣꠘꠡꠞ ꠟꠉꠦ ꠝꠤꠡꠤꠅ ꠘꠣ,
EPH 5:8 ꠇꠣꠞꠘ ꠔꠥꠝꠞꠣ ꠀꠉꠦ ꠀꠘ꠆ꠖꠣꠞꠤꠞ ꠝꠣꠎꠦ ꠕꠣꠇꠟꠦꠅ ꠅꠈꠘ ꠔ ꠀꠟ-ꠝꠍꠤꠞ ꠃꠝ꠆ꠝꠔ ꠛꠘꠤꠀ ꠘꠥꠞꠞ ꠙꠕꠅ ꠀꠁꠍ। ꠄꠞꠟꠣꠉꠤ ꠀꠟ꠆ꠟꠣꠞ ꠘꠥꠞꠦ ꠇꠣꠝꠤꠟ ꠎꠘꠦ ꠎꠦꠟꠣ ꠎꠤꠘ꠆ꠖꠦꠉꠤ ꠇꠣꠐꠣꠘꠤ ꠃꠌꠤꠔ, ꠔꠥꠝꠞꠣ ꠅꠃꠟꠣ ꠌꠟꠅ।
EPH 5:9 ꠀꠞ ꠘꠥꠞꠦ ꠌꠟꠣꠞ ꠚꠟ ꠅꠁꠟ, ꠙꠞꠦꠎꠉꠣꠞꠤ, ꠡꠔꠔꠣ, ꠢꠇꠟ ꠘꠝꠥꠘꠣꠞ ꠘꠦꠇ ꠇꠣꠝ।
EPH 5:10 ꠄꠞꠟꠣꠉꠤ ꠎꠦ ꠇꠣꠝꠦ ꠝꠣꠟꠤꠇ ꠈꠥꠡꠤ ꠅꠁꠘ, ꠔꠥꠝꠞꠣ ꠎꠣꠌꠣꠁ ꠇꠞꠤꠀ ꠅꠃ ꠇꠣꠝ ꠇꠞꠅ।
EPH 5:11 ꠀꠘ꠆ꠖꠣꠁꠞ ꠎꠉꠔꠞ ꠛꠦꠚꠣꠄꠖꠣ ꠇꠣꠝꠞ ꠟꠉꠦ ꠇꠥꠘꠥ ꠘꠝꠥꠘꠣꠞ ꠡꠝ꠆ꠙꠞ꠆ꠇ ꠞꠣꠈꠤꠅ ꠘꠣ, ꠛꠞꠋ ꠔꠥꠝꠞꠣ ꠅꠔꠣꠞ ꠖꠥꠡ ꠖꠦꠈꠣꠁ ꠖꠦꠅ।
EPH 5:12 ꠝꠣꠘꠡꠦ ꠟꠥꠇꠣꠁꠀ ꠎꠦꠔꠣ ꠇꠣꠝ ꠇꠞꠂꠘ, ꠁꠔꠣ ꠛꠦꠙꠣꠞꠦ ꠇꠥꠘ꠆ꠔꠣ ꠝꠣꠔꠣꠅ ꠡꠞꠝ।
EPH 5:13 ꠘꠥꠞꠞ ꠝꠣꠎꠖꠤ ꠖꠥꠡ ꠖꠦꠈꠣꠁꠀ ꠖꠤꠟꠣꠁꠟꠦ ꠁꠔꠣ ꠎꠣꠁꠞꠣ ꠅꠁꠎꠣꠄ,
EPH 5:14 ꠇꠣꠞꠘ ꠅꠃ ꠘꠥꠞꠦꠃ ꠢꠇꠟꠔꠣ ꠎꠣꠁꠞ ꠇꠞꠦ। ꠄꠞꠟꠣꠉꠤ ꠍꠤꠟ꠆ꠟꠦꠈ ꠀꠍꠦ, ꠅ ꠊꠥꠝꠞ ꠝꠣꠘꠥꠡ, ꠢꠎꠣꠉ ꠅꠅ, ꠝꠞꠣ ꠕꠣꠇꠤ ꠎꠤꠔꠣ ꠅꠅ, ꠔꠦꠃ ꠀꠟ-ꠝꠍꠤꠞ ꠘꠥꠞꠦ, ꠘꠥꠞꠣꠘꠤ ꠇꠞꠤꠛꠣ ꠔꠥꠝꠣꠞꠦ।
EPH 5:15 ꠔꠥꠝꠞꠣ ꠌꠤꠘ꠆ꠔꠣ-ꠜꠣꠛꠘꠣ ꠇꠞꠤ ꠖꠦꠈꠅ, ꠔꠥꠝꠞꠣꠞ ꠌꠣꠟ-ꠌꠟꠘ ꠇꠤꠟꠣꠈꠣꠘ। ꠛꠦꠀꠈꠟꠞ ꠟꠣꠈꠣꠘ ꠘꠣ ꠌꠟꠤꠀ, ꠀꠈꠟꠖꠣꠞꠞ ꠟꠣꠈꠣꠘ ꠌꠟꠅ।
EPH 5:16 ꠘꠦꠇ ꠇꠣꠝ ꠇꠞꠣꠞ ꠎꠦ ꠡꠥꠎꠥꠉ ꠔꠥꠝꠞꠣꠞ ꠀꠔꠅ ꠀꠍꠦ, ꠁꠔꠣ ꠡꠥꠟ꠆ꠟꠀꠘꠣ ꠇꠣꠝꠅ ꠟꠣꠉꠣꠅ, ꠎꠣꠘ ꠔ ꠅꠈꠘꠇꠥꠞ ꠎꠝꠣꠘꠣ ꠈꠣꠞꠣꠙ।
EPH 5:17 ꠄꠞꠟꠣꠉꠤꠃ ꠇꠁꠞꠣꠝ, ꠔꠥꠝꠞꠣ ꠛꠦꠀꠈꠟ ꠛꠘꠤꠅ ꠘꠣ, ꠛꠞꠋ ꠝꠣꠟꠤꠇꠞ ꠝꠞ꠆ꠎꠤꠞꠦ ꠛꠥꠎꠅ।
EPH 5:18 ꠝꠖꠞ ꠘꠤꠡꠣꠄ ꠐꠣꠟ ꠅꠁꠅ ꠘꠣ, ꠁꠔꠣꠄ ꠎꠤꠘ꠆ꠖꠦꠉꠤ ꠘꠡ꠆ꠐ ꠇꠞꠤꠟꠣꠄ। ꠛꠞꠋ ꠙꠥꠞꠣꠙꠥꠞ ꠙꠣꠇ ꠞꠥꠢꠥꠞ ꠛꠡꠦ ꠞꠅ,
EPH 5:19 ꠔꠥꠝꠞꠣ ꠢꠣꠝꠖ, ꠇꠣꠅꠀꠟꠤ ꠀꠞ ꠙꠛꠤꠔ꠆ꠞ ꠎꠛꠥꠞ ꠡꠞꠤꠚꠞ ꠉꠎꠟ ꠉꠣꠁꠀ ꠄꠇꠦ-ꠅꠁꠘ꠆ꠘꠦ ꠛꠣꠔꠌꠤꠔ ꠇꠞꠅ; ꠔꠥꠝꠞꠣꠞ ꠖꠤꠟꠞ ꠜꠤꠔꠞꠦ ꠝꠣꠟꠤꠇꠞ ꠘꠣꠝꠦ ꠉꠎꠟ ꠉꠣꠅ।
EPH 5:20 ꠢꠣꠝꠦꠡꠣ ꠢꠇꠟ ꠛꠦꠙꠣꠞꠦ ꠀꠝꠞꠣꠞ ꠝꠣꠟꠤꠇ ꠁꠍꠣ ꠀꠟ-ꠝꠍꠤꠞ ꠘꠣꠝꠦ ꠛꠦꠢꠦꠡ꠆ꠔꠤ ꠛꠣꠚ ꠀꠟ꠆ꠟꠣꠞ ꠡꠥꠇꠞꠤꠀ ꠀꠖꠣꠄ ꠇꠞꠅ।
EPH 5:21 ꠀꠟ-ꠝꠍꠤꠞ ꠁꠎ꠆ꠎꠔ ꠀꠞ ꠒꠞꠦ ꠔꠥꠝꠞꠣ ꠄꠇꠦ-ꠅꠁꠘ꠆ꠘꠞꠦ ꠖꠤꠟ ꠕꠣꠇꠤ ꠝꠣꠁꠘ꠆ꠘ ꠇꠞꠅ।
EPH 5:22 ꠔꠥꠝꠞꠣ ꠎꠦꠞꠣ ꠛꠃ ꠅꠁꠍ, ꠔꠥꠝꠞꠣ ꠎꠦꠟꠣ ꠝꠣꠟꠤꠇ ꠁꠍꠣꠞꠦ ꠝꠣꠁꠘ꠆ꠘ ꠇꠞꠅ, ꠅꠃ ꠟꠣꠈꠣꠘ ꠎꠣꠞꠎꠤꠞ ꠎꠣꠝꠣꠁꠞꠦ ꠝꠣꠁꠘ꠆ꠘ ꠇꠞꠅ।
EPH 5:23 ꠇꠣꠞꠘ ꠀꠟ-ꠝꠍꠤ ꠎꠦꠟꠣ ꠎꠝꠣꠔꠞ, ꠝꠣꠘꠤ ꠔꠣꠘ ꠡꠞꠤꠟꠞ ꠝꠣꠕꠣ, ꠎꠣꠝꠣꠁꠅ ꠅꠟꠣ ꠛꠃꠞ ꠝꠣꠕꠣ। ꠀꠍꠟꠦ ꠀꠟ-ꠝꠍꠤꠃ ꠅꠃ ꠀꠡ꠆ꠔꠣ ꠡꠞꠤꠟꠞ ꠔꠞꠣꠘꠦꠀꠟꠣ।
EPH 5:24 ꠀꠞ ꠎꠝꠣꠔ ꠎꠦꠟꠣ ꠀꠟ-ꠝꠍꠤꠞ ꠎꠤꠝ꠆ꠝꠣꠄ ꠀꠍꠦ, ꠅꠃꠟꠣ ꠛꠃ ꠅꠇꠟꠅ ꠢꠇꠟ ꠛꠦꠙꠣꠞꠦ ꠎꠣꠝꠣꠁꠞ ꠎꠤꠝ꠆ꠝꠣꠄ ꠞꠅꠀ ꠃꠌꠤꠔ।
EPH 5:25 ꠔꠥꠝꠞꠣ ꠎꠦꠞꠣ ꠎꠣꠝꠣꠁ ꠅꠁꠍ, ꠢꠥꠘꠅ, ꠀꠟ-ꠝꠍꠤꠄ ꠎꠦꠟꠣ ꠎꠝꠣꠔꠞꠦ ꠝꠢꠛ꠆ꠛꠔ ꠇꠞꠍꠂꠘ, ꠑꠤꠇ ꠅꠟꠣꠈꠣꠘ ꠔꠥꠝꠞꠣꠅ ꠎꠣꠞꠎꠤꠞ ꠛꠃꠞꠦ ꠝꠢꠛ꠆ꠛꠔ ꠇꠞꠤꠅ। ꠔꠣꠁꠘ ꠔ ꠎꠝꠣꠔꠞ ꠟꠣꠉꠤ ꠔꠣꠘ ꠘꠤꠎꠞ ꠎꠣꠘ ꠇꠥꠞꠛꠣꠘꠤ ꠖꠤꠍꠂꠘ।
EPH 5:26 ꠔꠣꠘ ꠈꠤꠀꠟ ꠅꠁꠟ, ꠔꠣꠁꠘ ꠎꠝꠣꠔꠞꠦ ꠙꠛꠤꠔ꠆ꠞ ꠇꠞꠣꠞ ꠟꠣꠉꠤ, ꠔꠣꠘ ꠇꠣꠟꠣꠝꠞ ꠝꠣꠎꠖꠤ ꠝꠣꠘꠡꠞꠦ ꠔꠞꠤꠇꠣꠞ ꠉꠥꠍꠟ ꠇꠞꠣꠁꠀ,
EPH 5:27 ꠘꠥꠞꠞ ꠝꠢꠤꠝꠣꠄ ꠘꠤꠎꠞ ꠍꠣꠝꠘꠦ ꠀꠎꠤꠞ ꠇꠞꠣ। ꠅꠃ ꠡꠝꠄ ꠎꠝꠣꠔꠞ ꠝꠣꠎꠦ ꠇꠥꠘꠥ ꠇꠟꠋꠇꠞ ꠖꠣꠉ, ꠈꠥꠔ ꠛꠣ ꠁꠟꠣ ꠇꠥꠘ꠆ꠔꠣꠃ ꠞꠁꠔ ꠘꠣꠄ, ꠁꠔꠣ ꠙꠣꠇ-ꠙꠛꠤꠔ꠆ꠞ ꠀꠞ ꠘꠤꠈꠥꠔ ꠅꠁꠛ।
EPH 5:28 ꠄꠞꠟꠣꠉꠤ ꠎꠣꠝꠣꠁꠄ ꠔꠣꠞ ꠘꠤꠎꠞ ꠡꠞꠤꠟꠞꠦ ꠎꠦꠟꠣ ꠝꠣꠄꠀ ꠇꠞꠦ, ꠑꠤꠇ ꠔꠣꠞ ꠛꠃꠞꠦꠅ ꠅꠃꠟꠣ ꠝꠣꠄꠀ ꠇꠞꠣ ꠚꠞꠎ। ꠘꠤꠎꠞ ꠛꠃꠞꠦ ꠝꠣꠄꠀ ꠇꠞꠣꠞ ꠝꠣꠘꠤ ꠅꠁꠟ, ꠘꠤꠎꠞ ꠡꠞꠤꠟꠞꠦ ꠝꠣꠄꠀ ꠇꠞꠣ।
EPH 5:29 ꠇꠦꠃ ꠔ ꠇꠥꠘꠥ ꠡꠝꠄ ꠔꠣꠞ ꠘꠤꠎꠞ ꠡꠞꠤꠟꠞꠦ ꠊꠤꠘ꠆ꠘꠣꠄ ꠘꠣ, ꠢꠇꠟꠦꠃ ꠎꠣꠞꠎꠤꠞ ꠡꠞꠤꠟꠞ ꠜꠞꠘ-ꠙꠥꠡꠘ ꠇꠞꠦ। ꠄꠇ꠆ꠇꠦꠞꠦ ꠅꠃ ꠟꠣꠈꠣꠘ, ꠀꠟ-ꠝꠍꠤꠄꠅ ꠔꠣꠘ ꠎꠝꠣꠔꠞ ꠜꠞꠘ-ꠙꠥꠡꠘ ꠎꠥꠉꠣꠁꠘ।
EPH 5:30 ꠇꠣꠞꠘ ꠀꠝꠞꠣ ꠔꠣꠘ ꠡꠞꠤꠟꠞ ꠅꠋꠉ।
EPH 5:31 ꠀꠟ꠆ꠟꠣꠞ ꠇꠣꠟꠣꠝꠅ ꠟꠦꠈꠣ ꠀꠍꠦ, “ꠄꠞꠟꠣꠉꠤꠃ ꠛꠦꠐꠣꠁꠘ꠆ꠔꠦ ꠝꠣ-ꠛꠣꠚꠞꠦ ꠍꠣꠠꠤꠀ ꠛꠃꠞ ꠟꠉꠦ ꠕꠣꠇꠛꠣ, ꠔꠣꠞꠣ ꠖꠥꠁꠅꠎꠘ ꠄꠇ ꠡꠞꠤꠟ ꠅꠁꠛꠣ।”
EPH 5:32 ꠁꠈꠣꠘ ꠅꠁꠟ ꠛꠃꠔ ꠛꠠ ꠛꠣꠔꠥꠘꠤ ꠛꠦꠙꠣꠞ, ꠀꠍꠟꠦ ꠀꠝꠤ ꠔ ꠀꠟ-ꠝꠍꠤ ꠀꠞ ꠔꠣꠘ ꠎꠝꠣꠔꠞ ꠛꠦꠙꠣꠞꠦ ꠇꠁꠞꠣꠝ।
EPH 5:33 ꠎꠣꠁ ꠅꠃꠇ, ꠔꠥꠝꠞꠣ ꠢꠇꠟꠦꠃ ꠎꠣꠞꠎꠤꠞ ꠛꠃꠞꠦ ꠘꠤꠎꠞ ꠟꠣꠈꠣꠘ ꠝꠣꠄꠀ ꠇꠞꠤꠅ, ꠀꠞ ꠛꠃ ꠅꠇꠟꠦꠅ ꠎꠣꠞꠎꠤꠞ ꠎꠣꠝꠣꠁꠞꠦ ꠁꠎ꠆ꠎꠔ ꠇꠞꠣ ꠎꠞꠥꠞ।
EPH 6:1 ꠅ ꠀꠅꠟꠣꠖ ꠅꠇꠟ, ꠝꠣꠟꠤꠇꠞ ꠝꠞ꠆ꠎꠤ ꠝꠣꠚꠤꠇ ꠔꠥꠝꠞꠣꠞ ꠝꠣ-ꠛꠣꠚꠞ ꠇꠕꠣꠝꠔ ꠌꠟꠤꠅ, ꠀꠞ ꠅꠟꠣ ꠌꠟꠣꠐꠣꠃ ꠔ ꠃꠌꠤꠔ।
EPH 6:2 ꠀꠟ꠆ꠟꠣꠞ ꠇꠣꠟꠣꠝꠞ ꠙꠄꠟꠣ ꠢꠥꠇꠥꠝ, ꠎꠦ ꠢꠥꠇꠥꠝꠞ ꠟꠉꠦ ꠙꠥꠞꠥꠡ꠆ꠇꠣꠞꠞ ꠅꠀꠖꠣ ꠀꠍꠦ, ꠁꠐꠣ ꠅꠁꠟ, “ꠔꠥꠝꠣꠞ ꠝꠣ-ꠛꠣꠚꠞꠦ ꠁꠎ꠆ꠎꠔ ꠇꠞꠤꠅ।
EPH 6:3 ꠔꠦꠃ ꠔꠥꠝꠣꠞ ꠜꠣꠟꠣꠁ ꠅꠁꠛ, ꠀꠞ ꠁ ꠖꠥꠘꠤꠀꠔ ꠔꠥꠝꠣꠞ ꠢꠣꠄꠀꠔꠤ ꠛꠣꠠꠤꠛ।”
EPH 6:4 ꠔꠦ ꠔꠥꠝꠞꠣ ꠎꠦꠞꠣ ꠢꠥꠞꠥꠔ꠆ꠔꠣꠞ ꠛꠣꠚ ꠅꠁꠍ, ꠔꠥꠝꠞꠣꠅ ꠘꠤꠎꠞ ꠀꠅꠟꠣꠖꠞꠦ ꠍꠣꠔꠣꠁꠅ ꠘꠣ, ꠛꠞꠋ ꠝꠣꠟꠤꠇꠞ ꠔꠣꠟꠤꠝ ꠀꠞ ꠡ꠆ꠞꠤꠋꠈꠟꠣꠞ ꠝꠣꠎꠖꠤ ꠔꠣꠞꠣꠞꠦ ꠝꠣꠘꠥꠡ ꠛꠣꠘꠣꠅ।
EPH 6:5 ꠔꠥꠝꠞꠣ ꠎꠦꠞꠣ ꠉꠥꠟꠣꠝ, ꠔꠥꠝꠞꠣ ꠀꠟ-ꠝꠍꠤꠞ ꠎꠦꠟꠣ ꠛꠣꠁꠖ꠆ꠖ, ꠅꠃꠟꠣ ꠒꠞ ꠀꠞ ꠔꠣꠎꠤꠝꠦ ꠖꠤꠟꠦ-ꠎꠣꠘꠦ ꠔꠥꠝꠞꠣꠞ ꠎꠉꠔꠞ ꠝꠥꠘꠤꠛ ꠅꠇꠟꠞ ꠛꠣꠁꠖ꠆ꠖ ꠞꠁꠅ।
EPH 6:6 ꠈꠣꠟꠤ ꠝꠣꠘꠡꠞꠦ ꠈꠥꠡꠤ ꠇꠞꠣꠞ ꠘꠤꠅꠔꠦ ꠝꠥꠘꠤꠛꠞ ꠍꠣꠝꠘꠦ ꠛꠣꠁꠖ꠆ꠖ ꠞꠁꠅ ꠘꠣ, ꠛꠞꠋ ꠀꠟ-ꠝꠍꠤꠞ ꠉꠥꠟꠣꠝ ꠢꠤꠡꠣꠛꠦ ꠖꠤꠟꠦ-ꠎꠣꠘꠦ ꠀꠟ꠆ꠟꠣꠞ ꠝꠞ꠆ꠎꠤ ꠝꠣꠚꠤꠇ ꠌꠟꠞꠣꠄ ꠇꠞꠤꠀ ꠔꠥꠝꠞꠣꠞ ꠝꠥꠘꠤꠛꠞ ꠛꠣꠁꠖ꠆ꠖ ꠞꠁꠅ।
EPH 6:7 ꠔꠥꠝꠞꠣ ꠁꠈꠣꠘ ꠝꠘꠅ ꠇꠞꠤꠅ ꠘꠣ ꠎꠦ, ꠔꠥꠝꠞꠣ ꠝꠣꠘꠡꠞ ꠈꠦꠎꠝꠔ ꠇꠞꠞꠣꠄ, ꠛꠞꠋ ꠀꠍꠝꠣꠘꠤ ꠝꠣꠟꠤꠇꠞ ꠈꠦꠎꠝꠔ ꠇꠞꠞꠣꠄ ꠝꠘꠅ ꠇꠞꠤꠀ, ꠎꠉꠔꠞ ꠝꠥꠘꠤꠛꠞ ꠈꠦꠎꠝꠔꠅ ꠈꠤꠀꠟꠤ ꠅꠅ।
EPH 6:8 ꠝꠘꠅ ꠞꠣꠈꠤꠅ, ꠝꠣꠟꠤꠇꠞ ꠉꠦꠍ ꠕꠣꠇꠤ ꠙꠞꠔꠦꠇ ꠝꠣꠘꠡꠦ ꠎꠣꠞꠎꠤꠞ ꠘꠦꠇ ꠇꠣꠝꠞ ꠙꠥꠞꠥꠡ꠆ꠇꠣꠞ ꠙꠣꠁꠛ, ꠢꠦ ꠉꠥꠟꠣꠝ ꠅꠃꠇ ꠛꠣ ꠀꠎꠣꠖ ꠅꠃꠇ।
EPH 6:9 ꠔꠥꠝꠞꠣ ꠎꠦꠞꠣ ꠝꠥꠘꠤꠛ, ꠔꠥꠝꠞꠣꠅ ꠔꠥꠝꠞꠣꠞ ꠉꠥꠟꠣꠝ ꠅꠇꠟꠞ ꠟꠉꠦ ꠅꠃꠟꠣ ꠜꠣꠟꠣ ꠛꠦꠛꠢꠣꠞ ꠇꠞꠅ। ꠔꠣꠞꠣꠞꠦ ꠒꠞ ꠖꠦꠈꠣꠘꠤ ꠛꠣꠖ ꠖꠦꠅ, ꠇꠣꠞꠘ ꠔꠥꠝꠞꠣ ꠔ ꠎꠣꠘ, ꠔꠣꠞꠣ ꠛꠣ ꠔꠥꠝꠞꠣ ꠢꠇꠟꠞꠃ ꠝꠣꠟꠤꠇ ꠄꠇꠎꠘ, ꠔꠣꠁꠘ ꠛꠦꠢꠦꠡ꠆ꠔꠅ ꠀꠍꠂꠘ; ꠔꠣꠘ ꠘꠎꠞꠅ ꠢꠇꠟꠃ ꠡꠝꠣꠘ।
EPH 6:10 ꠢꠦꠡ-ꠝꠦꠡ ꠇꠁꠞꠣꠝ, ꠔꠥꠝꠞꠣ ꠀꠍꠝꠣꠘꠤ ꠝꠣꠟꠤꠇꠞ ꠟꠉꠦ ꠝꠤꠟꠤꠀ ꠞꠁꠀ ꠔꠣꠘ ꠇꠥꠖꠞꠔꠤ ꠛꠟꠦ ꠛꠟꠀꠟꠣ ꠅꠅ।
EPH 6:11 ꠎꠥꠖ꠆ꠖꠞ ꠟꠣꠉꠤ ꠀꠟ꠆ꠟꠣꠞ ꠖꠦꠅꠀ ꠢꠇꠟ ꠘꠝꠥꠘꠣꠞ ꠀꠔꠤꠀꠞ ꠟꠣꠉꠣꠅ, ꠔꠦꠃ ꠁꠛꠟꠤꠍꠞ ꠢꠇꠟ ꠍꠟ-ꠌꠔꠥꠞꠤꠞ ꠛꠤꠞꠥꠖ꠆ꠖꠦ ꠝꠎꠛꠥꠔ ꠅꠁꠀ ꠃꠛꠣꠁꠔꠣꠄ ꠙꠣꠞꠛꠣꠄ।
EPH 6:12 ꠀꠝꠞꠣꠞ ꠅꠃ ꠎꠥꠖ꠆ꠖ ꠔ ꠇꠥꠘꠥ ꠝꠣꠘꠡꠞ ꠟꠉꠦ ꠘꠣꠄ, ꠁꠔꠣ ꠅꠁꠟ ꠀꠘ꠆ꠖꠣꠁꠞ ꠎꠉꠔꠞ ꠢꠇꠟ ꠞꠣꠎꠣ ꠀꠞ ꠔꠣꠞ ꠈꠦꠝꠔꠣꠀꠟꠣ ꠅꠇꠟꠞ ꠛꠤꠞꠥꠖ꠆ꠖꠦ, ꠀꠘ꠆ꠖꠣꠁꠞ ꠎꠉꠔꠞ ꠡꠇ꠆ꠔꠤꠀꠟꠣ ꠛꠖ ꠞꠥꠢꠥ ꠅꠇꠟꠞ ꠛꠤꠞꠥꠖ꠆ꠖꠦ, ꠀꠞ ꠀꠍꠝꠣꠘꠞ ꠁꠛꠟꠤꠍ-ꠡꠄꠔꠣꠘ ꠖꠟꠞ ꠛꠤꠞꠥꠖ꠆ꠖꠦ।
EPH 6:13 ꠔꠦ ꠅꠃ ꠎꠥꠖ꠆ꠖꠞ ꠟꠣꠉꠤ ꠔꠥꠝꠞꠣ ꠀꠟ꠆ꠟꠣꠞ ꠖꠦꠅꠀ ꠢꠇꠟ ꠘꠝꠥꠘꠣꠞ ꠀꠔꠤꠀꠞ ꠚꠤꠘ꠆ꠖꠤꠟꠣꠅ, ꠎꠣꠔꠦ ꠁꠛꠟꠤꠍꠦ ꠎꠦꠛꠟꠣ ꠢꠣꠝꠟꠣ ꠇꠞꠛ ꠅꠃ ꠡꠝꠄ ꠝꠎꠛꠥꠔ ꠅꠁꠀ ꠃꠛꠣꠁꠔꠣꠄ ꠙꠣꠞ, ꠀꠞ ꠢꠦꠡ-ꠝꠦꠡ ꠕꠤꠞ ꠞꠁꠔꠣꠄ ꠙꠣꠞ।
EPH 6:14 ꠄꠞꠟꠣꠉꠤ ꠀꠟ꠆ꠟꠣꠁ ꠢꠇꠤꠇꠔꠤꠞ ꠛꠦꠟꠐ ꠇꠝꠞꠅ ꠛꠣꠘ꠆ꠖꠅ, ꠀꠞ ꠛꠥꠇ ꠛꠣꠌꠣꠘꠤꠞ ꠟꠣꠉꠤ ꠙꠞꠦꠎꠉꠣꠞꠤꠞ ꠀꠝꠟ ꠖꠤꠀ ꠛꠥꠇ ꠉꠥꠞꠤꠀ ꠞꠣꠈꠅ,
EPH 6:15 ꠍꠤꠙꠣꠁ ꠅꠇꠟꠞ ꠟꠣꠈꠣꠘ ꠖꠥꠁꠅ ꠙꠣꠅ-ꠅ ꠎꠥꠔꠣ ꠟꠣꠉꠣꠅ, ꠎꠣꠔꠦ ꠡꠣꠘ꠆ꠔꠤꠞ ꠈꠥꠡ-ꠈꠛꠞꠤ ꠔꠛꠟꠤꠉꠞ ꠟꠣꠉꠤ ꠎꠥꠁꠔ ꠕꠣꠇꠔꠣꠄ ꠙꠣꠞ।
EPH 6:16 ꠀꠞ ꠍꠤꠙꠣꠁ ꠅꠇꠟꠦ ꠘꠤꠎꠞꠦ ꠛꠣꠌꠣꠘꠤꠞ ꠟꠣꠉꠤ ꠎꠦ ꠓꠣꠟꠣ ꠛꠦꠛꠢꠣꠞ ꠇꠞꠦ, ꠅꠃꠟꠣ ꠢꠇꠟ ꠡꠝꠄ ꠔꠥꠝꠞꠣ ꠁꠝꠣꠘꠞ ꠓꠣꠟꠣ ꠀꠔꠅ ꠟꠅ, ꠅꠃ ꠓꠣꠟꠣ ꠖꠤꠀ ꠁꠛꠟꠤꠍꠞ ꠢꠇꠟ ꠎꠣꠟꠣꠁꠟ ꠔꠤꠞ ꠘꠤꠜꠣꠁꠔꠣꠄ ꠙꠣꠞꠛꠣꠄ।
EPH 6:17 ꠝꠣꠕꠣꠞꠦ ꠛꠣꠌꠣꠘꠤꠞ ꠟꠣꠉꠤ ꠀꠟ꠆ꠟꠣꠞ ꠖꠦꠅꠀ ꠘꠣꠎꠣꠔ ꠍꠤꠙꠣꠁꠞ ꠇꠦꠙꠞ ꠟꠣꠈꠣꠘ ꠚꠤꠘ꠆ꠖꠤꠟꠣꠅ। ꠀꠞ ꠙꠣꠇ ꠞꠥꠢꠥꠞ ꠔꠟꠥꠀꠞ ꠝꠣꠘꠤ, ꠀꠟ꠆ꠟꠣꠞ ꠇꠣꠟꠣꠝꠞꠦ ꠝꠎꠛꠥꠔ ꠇꠞꠤ ꠗꠞꠅ।
EPH 6:18 ꠙꠣꠇ ꠞꠥꠢꠥꠞ ꠛꠟꠦ ꠖꠤꠟꠦ-ꠎꠣꠘꠦ ꠢꠞ-ꠢꠣꠝꠦꠡꠣ ꠝꠥꠘꠣꠎꠣꠔ ꠇꠞꠅ। ꠄꠞꠟꠣꠉꠤ ꠢꠎꠣꠉ ꠞꠁꠀ ꠢꠇꠟ ꠙꠣꠇ ꠛꠘ꠆ꠖꠣ ꠅꠇꠟꠞ ꠟꠣꠉꠤ ꠡꠛ ꠡꠝꠄ ꠝꠥꠘꠣꠎꠣꠔ ꠇꠞꠣꠔ ꠞꠁꠅ।
EPH 6:19 ꠀꠝꠣꠞ ꠟꠣꠉꠤꠅ ꠖꠥꠀ ꠇꠞꠤꠅ, ꠀꠝꠤ ꠇꠕꠣ ꠝꠣꠔꠣꠞ ꠛꠣꠟꠣ ꠎꠣꠘꠥ ꠀꠟ꠆ꠟꠣꠄ ꠀꠝꠣꠞ ꠝꠥꠈꠞ ꠛꠥꠟꠤ ꠎꠥꠉꠣꠁ ꠖꠦꠁꠘ, ꠎꠣꠔꠦ ꠔꠛꠟꠤꠉ ꠇꠞꠣꠞ ꠡꠝꠄ ꠀꠝꠤ ꠡꠣꠅꠡ ꠈꠣꠐꠣꠁꠀ ꠈꠥꠡ-ꠈꠛꠞꠤꠞ ꠀꠍꠟ ꠛꠣꠔꠥꠘꠤ ꠜꠦꠖ ꠝꠣꠘꠡꠞꠦ ꠛꠥꠎꠣꠁꠔꠣꠝ ꠙꠣꠞꠤ।
EPH 6:20 ꠅꠃ ꠈꠥꠡ-ꠈꠛꠞꠤ ꠔꠛꠟꠤꠉꠞ ꠟꠣꠉꠤ ꠟꠥꠀꠞ ꠌꠦꠁꠘꠖꠤ ꠛꠣꠘ꠆ꠖꠣ ꠢꠣꠟꠔꠦꠅ ꠀꠝꠤ ꠀꠟ-ꠝꠍꠤꠞ ꠘꠣꠁꠛ ꠢꠤꠡꠣꠛꠦ ꠇꠣꠝ ꠇꠞꠞꠣꠝ। ꠔꠦ ꠎꠦꠟꠞ ꠝꠣꠎꠦ ꠞꠁꠀ ꠎꠦꠟꠣꠈꠣꠘ ꠡꠣꠅꠡ ꠈꠣꠐꠣꠁꠀ ꠔꠛꠟꠤꠉ ꠇꠞꠣ ꠎꠞꠥꠞ, ꠖꠥꠀ ꠇꠞꠤꠅ, ꠀꠝꠤ ꠎꠣꠔꠦ ꠅꠟꠣ ꠇꠞꠔꠣꠝ ꠙꠣꠞꠤ।
EPH 6:21 ꠀꠝꠣꠞ ꠢꠣꠟ-ꠢꠇꠤꠇꠔ ꠇꠤꠟꠣꠈꠣꠘ ꠀꠞ ꠀꠝꠣꠞ ꠖꠤꠘ-ꠇꠣꠟ ꠇꠤꠟꠣ ꠎꠣꠞ, ꠁꠔꠣ ꠀꠝꠣꠞ ꠝꠣꠄꠀꠞ ꠖꠥꠡ꠆ꠔ ꠔꠥꠈꠤꠇ ꠜꠣꠁꠞ ꠉꠦꠍ ꠕꠣꠇꠤ ꠢꠥꠘꠛꠣꠄ। ꠄꠁꠘ ꠀꠝꠞꠣꠞ ꠝꠣꠟꠤꠇꠞ ꠢꠇ-ꠢꠣꠟꠣꠟ ꠈꠦꠎꠝꠔꠇꠣꠞꠤ।
EPH 6:22 ꠀꠝꠤ ꠔꠣꠘꠞꠦ ꠔꠥꠝꠞꠣꠞ ꠉꠦꠍꠦ ꠙꠣꠑꠣꠁꠟꠣꠝ, ꠔꠥꠝꠞꠣ ꠔꠣꠘ ꠝꠥꠈ ꠕꠣꠇꠤ ꠀꠝꠞꠣꠞ ꠈꠛꠞꠣ-ꠈꠛꠞ ꠢꠥꠘꠛꠣꠄ, ꠔꠣꠁꠘ ꠉꠤꠀ ꠔꠥꠝꠞꠣꠞꠦ ꠃꠔꠡꠣꠢ ꠖꠤꠛꠣ।
EPH 6:23 ꠀꠝꠞꠣꠞ ꠉꠣꠁꠛꠤ ꠛꠣꠚ ꠀꠟ꠆ꠟꠣ ꠙꠣꠇꠦ ꠀꠞ ꠢꠎꠞꠔ ꠁꠍꠣ ꠀꠟ-ꠝꠍꠤꠄ, ꠝꠥꠝꠤꠘ ꠜꠣꠁ ꠅꠇꠟꠞꠦ ꠡꠣꠘ꠆ꠔꠤ ꠀꠞ ꠁꠝꠣꠘꠤ ꠝꠣꠄꠀ-ꠝꠢꠛ꠆ꠛꠔꠦ ꠞꠣꠈꠃꠇ꠆ꠇꠣ।
EPH 6:24 ꠀꠝꠞꠣꠞ ꠢꠎꠞꠔ ꠁꠍꠣ ꠀꠟ-ꠝꠍꠤꠞ ꠟꠣꠉꠤ ꠎꠣꠞꠣꠞ ꠖꠤꠟꠅ ꠈꠣꠐꠤ ꠝꠢꠛ꠆ꠛꠔ ꠀꠍꠦ, ꠄꠞꠣ ꠢꠇꠟꠞ ꠃꠙꠞꠦ ꠀꠟ꠆ꠟꠣꠞ ꠞꠢꠝꠔ ꠘꠣꠎꠤꠟ ꠅꠃꠇ। ꠀꠝꠤꠘ॥
PHI 1:1 ꠀꠝꠤ ꠙꠣꠃꠟꠥꠍ ꠀꠞ ꠔꠤꠝꠕꠤ ꠅꠁꠟꠣꠝ ꠢꠎꠞꠔ ꠁꠍꠣ ꠀꠟ-ꠝꠍꠤꠞ ꠉꠥꠟꠣꠝ। ꠅꠃ ꠚꠤꠟꠤꠙꠤ ꠐꠣꠃꠘꠅ ꠛꠡꠔ ꠇꠞꠞꠣ, ꠎꠦ ꠙꠣꠇ ꠛꠘ꠆ꠖꠣ ꠅꠇꠟꠦ ꠢꠎꠞꠔ ꠁꠍꠣ ꠀꠟ-ꠝꠍꠤꠞ ꠃꠙꠞꠦ ꠁꠝꠣꠘ ꠀꠘꠍꠂꠘ ꠄꠞꠣꠞꠦ, ꠄꠞꠣꠞ ꠃꠡ꠆ꠔꠣꠖ ꠅꠇꠟꠞꠦ ꠀꠞ ꠈꠣꠖꠤꠝꠖꠣꠞ ꠅꠇꠟꠞ ꠉꠦꠍꠦ ꠟꠦꠈꠞꠣꠝ।
PHI 1:2 ꠀꠝꠞꠣꠞ ꠉꠣꠁꠛꠤ ꠛꠣꠚ ꠀꠟ꠆ꠟꠣ ꠙꠣꠇ ꠀꠞ ꠢꠎꠞꠔ ꠁꠍꠣ ꠀꠟ-ꠝꠍꠤꠞ ꠞꠢꠝꠔ ꠀꠞ ꠡꠣꠘ꠆ꠔꠤ ꠔꠥꠝꠞꠣꠞ ꠃꠙꠞꠦ ꠘꠣꠎꠤꠟ ꠅꠃꠇ।
PHI 1:3 ꠔꠥꠝꠞꠣꠞ ꠇꠕꠣ ꠎꠔꠛꠣꠞꠃ ꠀꠝꠣꠞ ꠁꠀꠖ ꠅꠄ, ꠅꠔꠛꠣꠞꠃ ꠀꠝꠤ ꠀꠝꠣꠞ ꠀꠟ꠆ꠟꠣꠞ ꠡꠥꠇꠞꠤꠀ ꠀꠖꠣꠄ ꠇꠞꠤ।
PHI 1:4 ꠀꠝꠤ ꠎꠦꠛꠟꠣ ꠔꠥꠝꠞꠣꠞ ꠟꠣꠉꠤ ꠖꠥꠀ ꠇꠞꠤ, ꠀꠝꠣꠞ ꠝꠘꠅ ꠈꠥꠛ ꠈꠥꠡꠤ ꠟꠁꠀ ꠖꠥꠀ ꠇꠞꠤ।
PHI 1:5 ꠢꠎꠞꠔ ꠁꠍꠣ ꠀꠟ-ꠝꠍꠤꠞ ꠔꠛꠟꠤꠉ ꠇꠣꠝꠞ ꠟꠣꠉꠤ ꠔ ꠔꠥꠝꠞꠣ ꠙꠄꠟꠣ ꠕꠣꠇꠤ ꠅꠈꠘ ꠙꠞ꠆ꠎꠘ꠆ꠔ ꠀꠝꠣꠞꠦ ꠡꠣꠁꠎ꠆ꠎ ꠇꠞꠞꠣꠄ।
PHI 1:6 ꠀꠝꠤ ꠄꠇꠤꠘ ꠇꠞꠤ, ꠎꠦ ꠀꠟ꠆ꠟꠣꠄ ꠔꠥꠝꠞꠣꠞ ꠖꠤꠟꠞ ꠝꠣꠎꠦ ꠅꠃ ꠘꠦꠇ ꠇꠣꠝ ꠡꠥꠞꠥ ꠇꠞꠍꠂꠘ, ꠀꠟ-ꠝꠍꠤꠄ ꠖꠥꠍꠞꠣꠛꠣꠞ ꠔꠡꠞꠤꠚ ꠀꠘꠣ ꠙꠞ꠆ꠎꠘ꠆ꠔ, ꠅꠃ ꠀꠟ꠆ꠟꠣꠄ ꠁ ꠇꠣꠝ ꠙꠥꠞꠣ ꠇꠞꠛꠣ।
PHI 1:7 ꠔꠥꠝꠞꠣ ꠔ ꠀꠝꠣꠞ ꠝꠣꠄꠀꠞ ꠝꠣꠘꠥꠡ, ꠄꠞꠟꠣꠉꠤ ꠔꠥꠝꠞꠣꠞ ꠛꠦꠙꠣꠞꠦ ꠀꠝꠣꠞ ꠝꠘꠞ ꠜꠣꠛ ꠅꠟꠣ ꠅꠀ ꠃꠌꠤꠔ। ꠀꠝꠤ ꠎꠦꠟꠅ ꠛꠘ꠆ꠖꠤ ꠢꠣꠟꠔꠦ ꠛꠣ ꠈꠥꠡ-ꠈꠛꠞꠤꠞ ꠢꠇ ꠇꠕꠣ ꠎꠦꠘꠅꠃ ꠔꠛꠟꠤꠉ ꠇꠞꠤ ꠘꠣ ꠇꠦꠘꠦ, ꠔꠥꠝꠞꠣꠅ ꠀꠝꠣꠞ ꠟꠉꠞ ꠞꠢꠝꠔꠞ ꠜꠣꠉꠤ।
PHI 1:8 ꠄꠇ ꠀꠟ꠆ꠟꠣꠄ ꠎꠣꠘꠂꠘ, ꠀꠟ-ꠝꠍꠤꠞ ꠝꠢꠛ꠆ꠛꠔꠦ ꠀꠝꠤ ꠔꠥꠝꠞꠣꠞ ꠟꠣꠉꠤ ꠇꠔ ꠀꠡꠤꠇ।
PHI 1:9 ꠀꠝꠤ ꠖꠥꠀ ꠇꠞꠤ, ꠔꠥꠝꠞꠣꠞ ꠝꠢꠛ꠆ꠛꠔ ꠎꠣꠘꠥ ꠇꠣꠝꠤꠟ ꠛꠤꠛꠦꠇ ꠀꠞ ꠀꠈꠟꠦ ꠖꠤꠘ ꠖꠤꠘ ꠛꠣꠠꠦ।
PHI 1:10 ꠎꠣꠔꠦ ꠔꠥꠝꠞꠣ ꠀꠈꠟ ꠇꠣꠐꠣꠁꠀ ꠜꠣꠟꠣ ꠜꠣꠟꠣ ꠛꠦꠙꠣꠞ ꠅꠇꠟ ꠌꠤꠘꠛꠣꠄ, ꠀꠞ ꠀꠟ-ꠝꠍꠤꠄ ꠖꠥꠍꠞꠣꠛꠣꠞ ꠔꠡꠞꠤꠚ ꠀꠘꠣꠞ ꠀꠉ ꠙꠞ꠆ꠎꠘ꠆ꠔ,
PHI 1:11 ꠔꠣꠘ ꠛꠟꠦ ꠔꠥꠝꠞꠣ ꠘꠦꠇ ꠇꠣꠝ-ꠇꠣꠎ ꠇꠞꠤꠀ ꠈꠣꠐꠤ ꠙꠕꠦ ꠘꠤꠈꠥꠔ ꠅꠁꠀ ꠞꠁꠛꠣꠄ। ꠔꠦꠃ ꠀꠟ꠆ꠟꠣ ꠙꠣꠇꠞ ꠉꠃꠞꠛ ꠀꠞ ꠔꠣꠞꠤꠚ ꠎꠣꠁꠞ ꠅꠁꠛ।
PHI 1:12 ꠅ ꠀꠝꠣꠞ ꠜꠣꠁ ꠅꠇꠟ, ꠀꠝꠤ ꠌꠣꠁꠞꠣꠝ ꠔꠥꠝꠞꠣꠅ ꠎꠣꠘ, ꠀꠝꠣꠞ ꠃꠙꠞꠦ ꠎꠦꠔꠣ ꠎꠦꠔꠣ ꠊꠐꠤꠍꠦ, ꠁꠔꠣꠞ ꠟꠣꠉꠤ ꠀꠍꠟꠦ ꠈꠥꠡ-ꠈꠛꠞꠤ ꠔꠛꠟꠤꠉꠞ ꠇꠣꠝ ꠀꠞꠅ ꠛꠣꠠꠤꠉꠦꠍꠦ।
PHI 1:13 ꠄꠞꠟꠣꠉꠤ ꠅꠘꠞ ꠞꠣꠎꠛꠣꠠꠤꠞ ꠍꠤꠙꠣꠁ ꠅꠇꠟꠦ ꠀꠞ ꠛꠣꠖ-ꠛꠣꠇꠤ ꠝꠣꠘꠡꠦꠅ ꠎꠣꠘꠤꠟꠤꠍꠂꠘ, ꠀꠝꠤ ꠔ ꠈꠣꠟꠤ ꠀꠟ-ꠝꠍꠤꠞ ꠟꠣꠉꠤꠃ ꠎꠦꠟ ꠈꠣꠐꠤꠀꠞ।
PHI 1:14 ꠀꠞ ꠀꠝꠤ ꠎꠦꠟꠅ ꠢꠣꠝꠣꠘꠤꠄ ꠀꠝꠞꠣꠞ ꠛꠃꠔ ꠜꠣꠁꠀꠁꠘ꠆ꠔꠦ ꠝꠣꠟꠤꠇꠞ ꠃꠙꠞꠦ ꠀꠞꠅ ꠛꠦꠡ ꠇꠞꠤ ꠜꠞꠡꠣ ꠇꠞꠣ ꠢꠤꠇꠍꠂꠘ, ꠔꠣꠞꠣ ꠒꠞ-ꠜꠄ ꠚꠣꠃꠞꠤꠀ ꠀꠟ꠆ꠟꠣꠞ ꠇꠣꠟꠣꠝ ꠔꠛꠟꠤꠉꠞ ꠟꠣꠉꠤ ꠀꠞꠅ ꠡꠣꠅꠡꠤ ꠅꠁꠍꠂꠘ।
PHI 1:15 ꠄꠞꠣꠞ ꠝꠣꠎꠦ ꠇꠦꠃ ꠇꠦꠃ ꠁꠋꠡꠣ ꠀꠞ ꠖꠟꠣꠖꠟꠤꠞ ꠘꠤꠅꠔꠦ ꠀꠟ-ꠝꠍꠤꠞ ꠔꠛꠟꠤꠉ ꠇꠞꠦꠞ, ꠅꠁꠟꠦ ꠇꠦꠃ ꠇꠦꠃ ꠜꠣꠟꠣ ꠘꠤꠅꠔꠦ ꠇꠞꠦꠞ।
PHI 1:16 ꠄꠞꠣꠞ ꠖꠤꠟꠞ ꠝꠢꠛ꠆ꠛꠔꠦꠃ ꠀꠟ-ꠝꠍꠤꠞ ꠔꠛꠟꠤꠉ ꠇꠞꠦꠞ। ꠔꠣꠞꠣ ꠎꠣꠘꠂꠘ, ꠈꠥꠡ-ꠈꠛꠞꠤꠞ ꠙꠇ꠆ꠇꠦ ꠝꠣꠔꠣꠞ ꠟꠣꠉꠤꠃ ꠀꠝꠣꠞꠦ ꠀꠐꠇ ꠇꠞꠣ ꠅꠁꠍꠦ।
PHI 1:17 ꠅꠁꠟꠦ ꠎꠦꠞꠣ ꠘꠤꠎꠞ ꠚꠣꠄꠖꠣ ꠇꠣꠝꠣꠘꠤꠞ ꠟꠣꠉꠤ ꠀꠟ-ꠝꠍꠤꠞ ꠔꠛꠟꠤꠉ ꠇꠞꠦ, ꠄꠞꠣ ꠔ ꠜꠣꠟꠣ ꠘꠤꠅꠔꠦ ꠇꠣꠝ ꠇꠞꠦ ꠘꠣ। ꠔꠣꠞꠣ ꠌꠣꠄ, ꠀꠝꠤ ꠎꠦꠟꠅ ꠛꠘ꠆ꠖꠤ ꠞꠁ ꠀꠞ ꠀꠝꠣꠞ ꠇꠡ꠆ꠐ ꠛꠣꠠꠃꠇ।
PHI 1:18 ꠅꠁꠟꠦ ꠁꠔꠣꠄ ꠇꠤꠔꠣ ꠀꠄ ꠎꠣꠄ? ꠀꠍꠟ ꠇꠕꠣ ꠅꠁꠟ, ꠎꠦꠝꠘꠦꠃ ꠅꠄ ꠘꠣ ꠇꠦꠘꠦ, ꠀꠟ-ꠝꠍꠤꠞ ꠘꠣꠝ ꠔ ꠔꠛꠟꠤꠉ ꠅꠞ। ꠁꠔꠣ ꠗꠥꠇꠣꠛꠣꠎꠤꠞ ꠘꠤꠅꠔꠦ ꠅꠃꠇ ꠛꠣ ꠍꠢꠤ ꠘꠤꠅꠔꠦꠃ ꠅꠃꠇ। ꠀꠞ ꠅꠔꠣ ꠖꠦꠈꠤꠀꠃ ꠀꠝꠤ ꠈꠥꠡꠤ। ꠀꠝꠣꠞ ꠁ ꠈꠥꠡꠤ ꠇꠥꠘꠥꠖꠤꠘ ꠚꠥꠠꠣꠁꠔ ꠘꠣꠄ।
PHI 1:19 ꠀꠝꠤ ꠔ ꠎꠣꠘꠤ, ꠀꠝꠣꠞ ꠃꠙꠞꠦ ꠎꠦꠔꠣ ꠊꠐꠤꠍꠦ, ꠁꠔꠣꠞ ꠢꠦꠡ ꠚꠟ ꠅꠁꠟ, ꠀꠝꠤ ꠘꠤꠡ꠆ꠔꠣꠞ ꠙꠣꠁꠝꠥ। ꠔꠥꠝꠞꠣꠞ ꠖꠥꠀ ꠀꠞ ꠁꠍꠣ ꠀꠟ-ꠝꠍꠤꠞ ꠞꠥꠢꠥꠞ ꠛꠟꠦ ꠁꠔꠣ ꠅꠁꠛ।
PHI 1:20 ꠀꠝꠣꠞ ꠈꠥꠛ ꠝꠎꠛꠥꠔ ꠄꠇꠤꠘ ꠀꠍꠦ, ꠀꠝꠤ ꠇꠥꠘꠥꠝꠘ꠆ꠔꠦꠃ ꠡꠞꠝ ꠙꠣꠁꠔꠣꠝ ꠘꠣꠄ। ꠀꠝꠤ ꠙꠥꠞꠣꠙꠥꠞ ꠡꠣꠅꠡ ꠇꠞꠤꠀ ꠀꠉꠦ ꠎꠦꠟꠣ ꠀꠟ-ꠝꠍꠤꠞ ꠉꠃꠞꠛ ꠎꠣꠁꠞ ꠇꠞꠍꠤ, ꠀꠝꠤ ꠝꠞꠤ ꠛꠣ ꠛꠣꠌꠤ ꠅꠈꠘꠅ ꠅꠟꠣ ꠎꠣꠁꠞ ꠅꠁꠛ।
PHI 1:21 ꠇꠣꠞꠘ ꠀꠝꠣꠞ ꠟꠣꠉꠤ ꠎꠤꠘ꠆ꠖꠦꠉꠤ ꠅꠁꠟꠣ ꠀꠟ-ꠝꠍꠤ ꠀꠞ ꠝꠞꠘ ꠅꠁꠟ ꠟꠣꠜ।
PHI 1:22 ꠅꠁꠟꠦ ꠀꠝꠤ ꠎꠥꠖꠤ ꠛꠣꠌꠤꠀ ꠞꠁ, ꠔꠦ ꠀꠝꠣꠞ ꠎꠤꠘ꠆ꠖꠦꠉꠤꠔ ꠈꠥꠛ ꠜꠣꠟꠣ ꠇꠣꠝ ꠇꠞꠣꠞ ꠡꠥꠎꠥꠉ ꠅꠁꠛ। ꠄꠞꠟꠣꠉꠤ ꠀꠝꠤ ꠛꠥꠎꠞꠣꠝ ꠘꠣ, ꠀꠝꠤ ꠇꠥꠘ ꠙꠕ ꠟꠁꠔꠣꠝ।
PHI 1:23 ꠖꠥꠁꠅ ꠙꠕꠦꠃ ꠀꠝꠣꠞꠦ ꠐꠣꠘꠦꠞ। ꠀꠝꠣꠞ ꠁꠌ꠆ꠍꠣ ꠅꠁꠟ, ꠀꠝꠤ ꠝꠞꠤꠀ ꠢꠣꠞꠤ ꠀꠟ-ꠝꠍꠤꠞ ꠟꠉꠦ ꠞꠁꠔꠣꠝ, ꠅꠈꠣꠘꠃ ꠀꠝꠣꠞ ꠟꠣꠉꠤ ꠜꠣꠟꠣ।
PHI 1:24 ꠅꠁꠟꠦ ꠔꠥꠝꠞꠣꠞ ꠟꠣꠉꠤ ꠀꠝꠣꠞ ꠛꠣꠌꠤꠀ ꠞꠅꠀꠈꠣꠘ ꠀꠞꠅ ꠎꠞꠥꠞꠤ।
PHI 1:25 ꠀꠞ ꠅꠃ ꠝꠘꠅꠛꠟꠦ ꠀꠝꠤ ꠜꠣꠟꠣ ꠇꠞꠤ ꠎꠣꠘꠤ, ꠀꠝꠤ ꠛꠣꠌꠝꠥ ꠀꠞ ꠔꠥꠝꠞꠣꠞ ꠟꠉꠦ ꠞꠁꠝꠥ, ꠎꠣꠔꠦ ꠔꠥꠝꠞꠣꠞ ꠁꠝꠣꠘ ꠀꠞꠅ ꠝꠎꠛꠥꠔ ꠅꠁꠀ ꠔꠥꠝꠞꠣꠞ ꠈꠥꠡꠤ ꠛꠣꠠꠦ।
PHI 1:26 ꠀꠝꠤ ꠔꠥꠝꠞꠣꠞ ꠝꠣꠎꠦ ꠢꠤꠞꠛꠣꠞ ꠀꠁꠀ ꠢꠣꠞꠟꠦ, ꠀꠝꠣꠞꠦ ꠟꠁꠀ ꠔꠥꠝꠞꠣ ꠁꠍꠣ ꠀꠟ-ꠝꠍꠤꠞ ꠘꠣꠝꠦ ꠈꠥꠛ ꠈꠥꠡꠤ ꠇꠞꠛꠣꠄ।
PHI 1:27 ꠀꠍꠟ ꠛꠦꠙꠣꠞ ꠅꠁꠟ, ꠔꠥꠝꠞꠣ ꠎꠣꠞꠎꠤꠞ ꠎꠤꠘ꠆ꠖꠦꠉꠤꠞꠦ ꠅꠃ ꠘꠝꠥꠘꠣꠄ ꠇꠣꠐꠣꠅ, ꠎꠦ ꠎꠤꠘ꠆ꠖꠦꠉꠤ ꠀꠟ-ꠝꠍꠤꠞ ꠈꠥꠡ-ꠈꠛꠞꠤꠞ ꠟꠣꠈ। ꠔꠦꠃ ꠀꠝꠤ ꠘꠤꠎꠦ ꠀꠁꠀ ꠖꠦꠈꠤ ꠛꠣ ꠖꠥꠞꠁ ꠕꠣꠇꠤ ꠢꠥꠘꠤ, ꠀꠝꠤ ꠛꠥꠎꠝꠥ, ꠔꠥꠝꠞꠣ ꠖꠤꠟꠦ-ꠎꠣꠘꠦ ꠝꠤꠟꠤꠀ ꠝꠎꠛꠥꠔ ꠀꠍ। ꠀꠞ ꠈꠥꠡ-ꠈꠛꠞꠤꠞ ꠝꠣꠎꠖꠤ ꠎꠦ ꠁꠝꠣꠘ ꠙꠄꠖꠣ ꠅꠄ, ꠅꠃ ꠁꠝꠣꠘꠞ ꠟꠣꠉꠤ ꠢꠇꠟꠦ ꠝꠤꠟꠤꠀ ꠄꠇ ꠖꠤꠟꠦ ꠝꠦꠘꠔ ꠇꠞꠞꠣꠄ।
PHI 1:28 ꠎꠦꠔꠣꠄ ꠔꠥꠝꠞꠣꠞ ꠛꠤꠞꠥꠗꠤꠔꠣ ꠇꠞꠂꠘ, ꠇꠥꠘꠥ ꠛꠦꠙꠣꠞꠦꠃ ꠔꠥꠝꠞꠣ ꠁꠔꠣꠞꠦ ꠒꠞꠣꠁꠅ ꠘꠣ। ꠔꠦꠃ ꠙꠞꠝꠣꠘ ꠅꠁꠎꠤꠛ, ꠔꠣꠞꠣ ꠛꠤꠘꠣꠡꠞ ꠙꠕꠦ ꠎꠣꠁꠞꠣꠉꠤ ꠀꠞ ꠔꠥꠝꠞꠣ ꠞꠦꠢꠣꠁ ꠙꠣꠁꠞꠣꠄ। ꠁ ꠞꠦꠢꠣꠁ ꠈꠣꠟꠤ ꠀꠟ꠆ꠟꠣꠞ ꠉꠦꠍ ꠕꠣꠇꠤꠃ ꠝꠤꠟꠦ।
PHI 1:29 ꠀꠟ-ꠝꠍꠤꠞ ꠃꠙꠞꠦ ꠁꠝꠣꠘ ꠀꠘꠍ ꠁꠐꠣ ꠎꠦꠟꠣ ꠞꠢꠝꠔ, ꠔꠣꠘ ꠟꠣꠉꠤ ꠎꠥꠟꠥꠝ-ꠝꠍꠤꠛꠔ ꠡꠁꠎ꠆ꠎ ꠇꠞꠣꠞ ꠡꠥꠎꠥꠉ ꠙꠣꠁꠍ ꠁꠐꠣꠅ ꠔꠥꠝꠞꠣꠞ ꠟꠣꠉꠤ ꠞꠢꠝꠔ।
PHI 1:30 ꠔꠥꠝꠞꠣ ꠀꠉꠦ ꠀꠝꠣꠞꠦ ꠎꠦꠟꠣ ꠇꠡ꠆ꠐ ꠇꠞꠣꠔ ꠖꠦꠈꠍ ꠀꠞ ꠅꠈꠘꠅ ꠎꠦꠔꠣ ꠇꠡ꠆ꠐꠞ ꠇꠕꠣ ꠢꠥꠘꠞꠣꠄ, ꠔꠥꠝꠞꠣꠅ ꠔ ꠅꠃ ꠟꠣꠈꠣꠘ ꠇꠡ꠆ꠐꠞ ꠝꠣꠎꠦ ꠙꠠꠤꠉꠦꠍ।
PHI 2:1 ꠀꠟ-ꠝꠍꠤꠞ ꠃꠙꠞꠦ ꠁꠝꠣꠘ ꠀꠘꠟꠦ ꠎꠦꠛꠟꠣ ꠜꠞꠡꠣ ꠝꠤꠟꠦ, ꠔꠣꠘ ꠝꠢꠛ꠆ꠛꠔꠦ ꠎꠦꠛꠟꠣ ꠡꠣꠘ꠆ꠔꠤ ꠝꠤꠟꠦ, ꠔꠥꠝꠞꠣꠞ ꠟꠉꠦ ꠎꠦꠛꠟꠣ ꠙꠣꠇ ꠞꠥꠢꠥꠞ ꠜꠣꠟꠣ ꠡꠝ꠆ꠙꠞ꠆ꠇ ꠀꠍꠦ, ꠀꠞ ꠔꠥꠝꠞꠣꠞ ꠖꠤꠟꠅ ꠎꠦꠛꠟꠣ ꠝꠣꠄꠀ-ꠝꠝꠔꠣ ꠀꠍꠦ,
PHI 2:2 ꠔꠦ ꠔꠥꠝꠞꠣ ꠀꠝꠣꠞ ꠜꠤꠔꠞꠞ ꠈꠥꠡꠤꠈꠣꠘ ꠙꠥꠞꠣꠁꠟꠣꠅ। ꠔꠥꠝꠞꠣ ꠢꠇꠟ ꠄꠇ ꠝꠘꠦ ꠌꠟꠅ, ꠖꠤꠟꠦ-ꠎꠣꠘꠦ ꠄꠇ ꠅꠅ, ꠀꠞ ꠄꠇꠦ-ꠅꠁꠘ꠆ꠘꠞꠦ ꠝꠢꠛ꠆ꠛꠔ ꠇꠞꠅ।
PHI 2:3 ꠘꠤꠎꠞ ꠟꠣꠜꠞ ꠀꠡꠣ ꠛꠣ ꠛꠦꠐꠣꠉꠤꠞꠤ ꠖꠦꠈꠣꠘꠤꠞ ꠟꠣꠉꠤ ꠇꠥꠘ꠆ꠔꠣ ꠇꠞꠤꠅ ꠘꠣ, ꠛꠞꠋ ꠘꠔ ꠅꠁꠀ ꠘꠤꠎꠞ ꠌꠣꠁꠔꠦ ꠅꠁꠘ꠆ꠘꠞꠦ ꠛꠦꠡꠤ ꠖꠣꠝ ꠖꠦꠅ।
PHI 2:4 ꠈꠣꠟꠤ ꠘꠤꠎꠞ ꠡ꠆ꠛꠣꠞꠕꠞ ꠌꠤꠘ꠆ꠔꠣ ꠇꠞꠤꠅ ꠘꠣ, ꠙꠞꠞ ꠇꠕꠣꠅ ꠌꠤꠘ꠆ꠔꠣ ꠇꠞꠤꠅ।
PHI 2:5 ꠢꠎꠞꠔ ꠁꠍꠣ ꠀꠟ-ꠝꠍꠤꠞ ꠝꠘ ꠎꠦꠟꠣꠈꠣꠘ ꠀꠍꠤꠟ, ꠔꠥꠝꠞꠣꠞ ꠝꠘꠅ ꠅꠟꠣꠈꠣꠘ ꠛꠣꠘꠣꠁꠟꠣꠅ।
PHI 2:6 ꠔꠣꠁꠘ ꠀꠍꠟꠦ ꠀꠟ꠆ꠟꠣꠁ ꠍꠥꠞꠔꠦ ꠞꠁꠟꠦꠅ, ꠀꠟ꠆ꠟꠣꠁ ꠡꠤꠋꠢꠣꠡꠘ ꠗꠞꠤꠀ ꠞꠣꠈꠣꠞ ꠟꠣꠉꠤ ꠟꠣꠟꠌꠤ ꠀꠍꠟꠣ ꠘꠣ।
PHI 2:7 ꠛꠞꠋ ꠉꠥꠟꠣꠝ ꠛꠘꠤꠀ ꠝꠣꠘꠥꠡ ꠢꠤꠡꠣꠛꠦ ꠎꠘꠝ ꠟꠁꠀ ꠘꠤꠎꠞꠦ ꠢꠥꠞꠥ ꠛꠣꠘꠣꠁꠟꠣ।
PHI 2:8 ꠔꠣꠁꠘ ꠝꠣꠘꠥꠡ ꠍꠥꠞꠔꠦ ꠞꠁꠀ ꠝꠃꠔ ꠙꠞ꠆ꠎꠘ꠆ꠔ, ꠖꠥꠈ-ꠇꠡ꠆ꠐꠞ ꠍꠟꠤꠛꠞ ꠃꠙꠞꠞ ꠝꠃꠔ ꠙꠞ꠆ꠎꠘ꠆ꠔ ꠛꠣꠁꠖ꠆ꠖ ꠞꠁꠀ ꠘꠤꠎꠞꠦ ꠘꠔ ꠇꠞꠟꠣ।
PHI 2:9 ꠄꠞꠟꠣꠉꠤꠃ ꠀꠟ꠆ꠟꠣꠄ ꠔꠣꠘꠞꠦ ꠀꠞꠡꠦ-ꠀꠎꠤꠝꠅ ꠃꠑꠣꠁꠟꠣ ꠀꠞ ꠅꠟꠣ ꠁꠎ꠆ꠎꠔꠤ ꠄꠇ ꠘꠣꠝ ꠖꠤꠟꠣ, ꠎꠦ ꠘꠣꠝ ꠢꠇꠟ ꠕꠣꠇꠤ ꠡꠦꠞꠣ।
PHI 2:10 ꠎꠣꠔꠦ ꠅꠃ ꠘꠣꠝꠞ ꠉꠥꠘꠦ ꠀꠍꠝꠣꠘ-ꠎꠝꠤꠘ ꠀꠞ ꠙꠣꠔꠣꠟꠞ ꠔꠣꠝꠣꠝ ꠎꠣꠘꠖꠣꠞ ꠁꠍꠣꠞ ꠍꠣꠝꠘꠦ ꠘꠔ ꠅꠁꠘ,
PHI 2:11 ꠀꠞ ꠉꠣꠁꠛꠤ ꠛꠣꠚ ꠀꠟ꠆ꠟꠣ ꠙꠣꠇꠞ ꠉꠃꠞꠛꠞ ꠟꠣꠉꠤ ꠡ꠆ꠛꠤꠇꠣꠞ ꠇꠞꠂꠘ, ꠁꠍꠣ ꠀꠟ-ꠝꠍꠤꠃ ꠝꠣꠟꠤꠇ।
PHI 2:12 ꠅ ꠀꠝꠣꠞ ꠝꠣꠄꠀꠞ ꠜꠣꠁ ꠅꠇꠟ, ꠔꠥꠝꠞꠣ ꠔ ꠢꠣꠝꠦꠡꠣꠃ ꠀꠝꠣꠞ ꠢꠥꠇꠥꠝ ꠝꠣꠘꠤꠀ ꠀꠁꠞꠣꠄ। ꠔꠦ ꠀꠝꠤ ꠍꠣꠝꠘꠦ ꠕꠣꠇꠟꠦ ꠎꠦꠟꠣ ꠝꠣꠘꠅ, ꠅꠈꠘ ꠀꠝꠣꠞ ꠀꠚꠞꠈꠦꠅ ꠅꠟꠣ ꠔꠥꠝꠞꠣꠞ ꠖꠤꠟꠞ ꠒꠞ-ꠈꠚꠦ ꠘꠦꠇ ꠀꠝꠟ ꠇꠞꠅ। ꠅꠃ ꠀꠝꠟꠞ ꠝꠣꠎꠖꠤ ꠖꠦꠈꠣꠅ, ꠔꠥꠝꠞꠣ ꠉꠥꠘꠣ ꠕꠣꠇꠤ ꠘꠣꠎꠣꠔ ꠙꠣꠁꠟꠤꠍ।
PHI 2:13 ꠛꠥꠎꠞꠣꠄ ꠘꠤ, ꠀꠟ꠆ꠟꠣꠄ ꠔꠥꠝꠞꠣꠞ ꠖꠤꠟꠞ ꠝꠣꠎꠦ ꠅꠟꠣ ꠄꠇ ꠜꠣꠛ ꠖꠣꠘ ꠇꠞꠍꠂꠘ, ꠁꠔꠣ ꠀꠝꠟ ꠇꠞꠟꠦ ꠔꠣꠁꠘ ꠈꠥꠡꠤ ꠅꠁꠘ, ꠅꠃ ꠀꠝꠟ ꠇꠞꠣꠞ ꠘꠤꠅꠔ ꠀꠞ ꠔꠣꠇ꠆ꠇꠔꠅ ꠔꠣꠁꠘ ꠔꠥꠝꠞꠣꠞꠦ ꠖꠤꠍꠂꠘ।
PHI 2:14 ꠔꠥꠝꠞꠣ ꠇꠥꠘꠥꠎꠣꠔ ꠔꠞ꠆ꠇꠣ-ꠔꠞ꠆ꠇꠤ ꠛꠣ ꠇꠣꠁꠎ꠆ꠎꠣ-ꠚꠍꠣꠖ ꠘꠣ ꠇꠞꠤꠀ ꠢꠇꠟ ꠇꠣꠝ ꠇꠞꠅ।
PHI 2:15 ꠎꠣꠔꠦ ꠡꠥꠟ꠆ꠟꠀꠘꠣ ꠙꠞꠦꠎꠉꠣꠞ ꠀꠞ ꠘꠤꠈꠥꠔ ꠛꠘ, ꠀꠞ ꠁ ꠎꠝꠣꠘꠣꠞ ꠈꠛꠤꠍ ꠘꠣꠚꠞꠝꠣꠘ ꠡꠝꠣꠎꠞ ꠝꠣꠎꠦꠅ ꠔꠥꠝꠞꠣ ꠀꠟ꠆ꠟꠣꠞ ꠀꠅꠟꠣꠖ ꠢꠤꠡꠣꠛꠦ ꠞꠅ। ꠅꠔꠣ ꠝꠣꠘꠡꠞ ꠍꠣꠝꠘꠦ ꠀꠟ꠆ꠟꠣꠞ ꠙꠣꠇ ꠇꠣꠟꠣꠝ ꠔꠛꠟꠤꠉ ꠇꠞꠤꠀ, ꠅꠃ ꠖꠥꠘꠤꠀꠔꠃ ꠔꠥꠝꠞꠣ ꠀꠍꠝꠣꠘꠞ ꠌꠣꠘ-ꠡꠥꠞꠥꠎꠞ ꠟꠣꠈꠣꠘ ꠌꠇꠌꠇꠣ ꠛꠘꠤꠎꠣꠅ। ꠔꠦꠃ ꠀꠟ-ꠝꠍꠤ ꠎꠦꠛꠟꠣ ꠖꠥꠍꠞꠣꠛꠣꠞ ꠔꠡꠞꠤꠚ ꠀꠘꠛꠣ, ꠢꠃ ꠖꠤꠘ ꠀꠝꠤ ꠛꠥꠇ ꠚꠥꠟꠣꠁꠀ ꠇꠁꠔꠣꠝ ꠙꠣꠞꠝꠥ, ꠀꠝꠣꠞ ꠅꠃ ꠝꠦꠘꠔ ꠀꠞ ꠀꠐꠘꠤ-ꠈꠣꠐꠘꠤ ꠛꠦꠇꠣꠝꠣ ꠉꠦꠍꠦ ꠘꠣ।
PHI 2:17 ꠢꠥꠘꠅ, ꠎꠦ ꠁꠝꠣꠘꠞ ꠇꠥꠞꠛꠣꠘꠤꠞ ꠝꠣꠎꠖꠤ ꠔꠥꠝꠞꠣ ꠀꠟ꠆ꠟꠣꠞ ꠄꠛꠣꠖꠔ ꠇꠞꠞꠣꠄ, ꠄꠞ ꠃꠙꠞꠦ ꠎꠥꠖꠤ ꠀꠝꠣꠞ ꠘꠤꠎꠞ ꠟꠃꠞꠦ ꠇꠥꠞꠛꠣꠘꠤ ꠢꠤꠡꠣꠛꠦ ꠓꠣꠟꠤ ꠖꠦꠅꠀ ꠅꠄ, ꠔꠣ-ꠅ ꠀꠝꠤ ꠈꠥꠡ ꠀꠍꠤ, ꠔꠥꠝꠞꠣꠞꠦ ꠟꠁꠀ ꠈꠥꠡꠤ ꠇꠞꠞꠣꠝ।
PHI 2:18 ꠑꠤꠇ ꠔꠥꠝꠞꠣꠅ ꠅꠟꠣ ꠈꠥꠡꠤ ꠅꠅ, ꠀꠝꠣꠞ ꠟꠉꠦ ꠈꠥꠡꠤ ꠇꠞꠅ।
PHI 2:19 ꠀꠝꠤ ꠀꠡꠣ ꠇꠞꠤ, ꠢꠎꠞꠔ ꠁꠍꠣꠞ ꠝꠞ꠆ꠎꠤ ꠅꠁꠟꠦ ꠀꠝꠤ ꠔꠤꠝꠕꠤꠞꠦ ꠈꠥꠛ ꠎꠟꠖꠤ ꠇꠞꠤ ꠔꠥꠝꠞꠣꠞ ꠉꠦꠍꠦ ꠙꠣꠑꠣꠁꠝꠥ, ꠔꠦꠃ ꠔꠥꠝꠞꠣꠞ ꠢꠣꠟꠔ ꠎꠣꠘꠤꠀ ꠀꠝꠤ ꠡꠣꠘ꠆ꠔꠤ ꠅꠁꠝꠥ।
PHI 2:20 ꠔꠤꠝꠕꠤꠞ ꠟꠣꠈꠣꠘ ꠁꠟꠣ ꠀꠞ ꠇꠦꠃ ꠀꠝꠣꠞ ꠉꠦꠍꠦ ꠘꠣꠁ, ꠎꠦꠁꠘ ꠔꠥꠝꠞꠣꠞ ꠟꠣꠉꠤ ꠌꠤꠘ꠆ꠔꠣ ꠇꠞꠂꠘ।
PHI 2:21 ꠛꠣꠇꠤ ꠢꠇꠟꠦꠃ ꠁꠍꠣ ꠀꠟ-ꠝꠍꠤꠞ ꠛꠦꠙꠣꠞꠦ ꠌꠤꠘ꠆ꠔꠣ ꠘꠣ ꠇꠞꠤꠀ, ꠔꠣꠞꠣ ꠎꠣꠞꠎꠤꠞ ꠗꠣꠘ꠆ꠖꠣꠄ ꠀꠍꠂꠘ।
PHI 2:22 ꠅꠁꠟꠦ ꠔꠤꠝꠕꠤꠞ ꠛꠦꠙꠣꠞ ꠔ ꠔꠥꠝꠞꠣ ꠎꠣꠘ, ꠙꠥꠔꠦ ꠎꠦꠟꠣ ꠘꠤꠎꠞ ꠛꠣꠚꠞ ꠟꠉꠦ ꠇꠣꠝ ꠇꠞꠦ, ꠔꠣꠁꠘꠅ ꠅꠟꠣ ꠀꠟ-ꠝꠍꠤꠞ ꠈꠥꠡ-ꠈꠛꠞꠤ ꠔꠛꠟꠤꠉꠞ ꠟꠣꠉꠤ ꠀꠝꠣꠞ ꠟꠉꠦ ꠝꠦꠘꠔ ꠇꠞꠍꠂꠘ।
PHI 2:23 ꠄꠞꠟꠣꠉꠤꠃ ꠀꠝꠤ ꠀꠡꠣ ꠇꠞꠤꠀꠞ, ꠀꠝꠣꠞ ꠖꠡꠣ ꠇꠤꠔꠣ ꠅꠁꠛ, ꠅꠈꠣꠘ ꠎꠣꠘꠣꠞ ꠛꠣꠖꠦꠃ ꠀꠝꠤ ꠔꠣꠘꠞꠦ ꠙꠣꠑꠣꠁꠔꠣꠝ।
PHI 2:24 ꠅꠁꠟꠦ ꠀꠝꠤ ꠝꠣꠟꠤꠇꠞ ꠃꠙꠞꠦ ꠜꠞꠡꠣ ꠇꠞꠤ ꠇꠁꠀꠞ, ꠀꠝꠤ ꠘꠤꠎꠦꠅ ꠈꠥꠛ ꠎꠟꠖꠤ ꠇꠞꠤ ꠀꠁꠔꠣꠝ ꠙꠣꠞꠝꠥ।
PHI 2:25 ꠀꠞ ꠀꠝꠤ ꠝꠘꠅ ꠇꠞꠤꠀꠞ, ꠃꠍꠣꠁꠖꠞꠦ ꠔꠥꠝꠞꠣꠞ ꠉꠦꠍꠦ ꠙꠣꠑꠣꠘꠤꠈꠣꠘ ꠈꠥꠛ ꠎꠞꠥꠞ। ꠀꠝꠣꠞ ꠈꠦꠎꠝꠔ ꠇꠞꠣꠞ ꠟꠣꠉꠤ ꠔꠥꠝꠞꠣ ꠔꠣꠘꠞꠦ ꠀꠝꠣꠞ ꠉꠦꠍꠦ ꠙꠣꠑꠣꠁꠍꠟꠣꠄ। ꠀꠝꠞꠣ ꠄꠇꠟꠉꠦ ꠔꠛꠟꠤꠉ ꠇꠞꠤ, ꠁꠍꠣ ꠀꠟ-ꠝꠍꠤꠞ ꠟꠣꠉꠤ ꠎꠤꠢꠣꠖ ꠇꠞꠤ। ꠄꠁꠘ ꠀꠝꠣꠞ ꠁꠝꠣꠘꠖꠣꠞ ꠜꠣꠁ।
PHI 2:26 ꠔꠣꠁꠘꠅ ꠔꠥꠝꠞꠣꠞ ꠟꠉꠦ ꠖꠦꠈꠣ ꠇꠞꠔꠣ ꠌꠣꠁꠞꠣ, ꠔꠥꠝꠞꠣ ꠔꠣꠘ ꠛꠦꠝꠣꠞꠞ ꠈꠛꠞ ꠢꠥꠘꠣꠄ, ꠔꠣꠁꠘ ꠙꠦꠞꠦꠡꠣꠘꠤꠔ ꠙꠠꠤꠉꠦꠍꠂꠘ, ꠄꠞꠟꠣꠉꠤ ꠀꠝꠤ ꠔꠣꠘꠞꠦ ꠙꠣꠑꠣꠁꠀꠞ।
PHI 2:27 ꠀꠍꠟꠦ ꠔꠣꠁꠘ ꠈꠥꠛ ꠛꠦꠝꠣꠞ ꠀꠍꠟꠣ, ꠛꠦꠝꠣꠞꠦ ꠔꠣꠘ ꠘꠣ-ꠛꠣꠌꠣꠞ ꠢꠣꠟꠔ ꠅꠁꠉꠦꠍꠤꠟ। ꠅꠁꠟꠦ ꠀꠟ꠆ꠟꠣꠄ ꠔꠣꠘꠞꠦ ꠞꠢꠝ ꠇꠞꠍꠂꠘ। ꠈꠣꠟꠤ ꠔꠣꠘꠞꠦ ꠘꠣꠄ, ꠔꠣꠁꠘ ꠛꠣꠌꠤ ꠎꠣꠅꠀꠄ ꠀꠟ꠆ꠟꠣꠄ ꠀꠝꠣꠞꠦꠅ ꠛꠃꠔ ꠛꠠ ꠞꠢꠝ ꠇꠞꠍꠂꠘ, ꠎꠣꠔꠦ ꠀꠝꠤ ꠄꠇ ꠇꠡ꠆ꠐꠞ ꠃꠙꠞꠦ ꠀꠞ ꠇꠥꠘꠥ ꠇꠡ꠆ꠐ ꠘꠣ ꠙꠣꠁ।
PHI 2:28 ꠄꠞꠟꠣꠉꠤ ꠀꠝꠤ ꠈꠥꠛ ꠈꠤꠀꠟꠤ ꠅꠁꠀ ꠔꠣꠘꠞꠦ ꠙꠣꠑꠣꠁꠀꠞ, ꠎꠣꠔꠦ ꠔꠣꠘꠞꠦ ꠙꠣꠁꠀ ꠔꠥꠝꠞꠣꠅ ꠈꠥꠡꠤ ꠅꠅ, ꠀꠞ ꠀꠝꠣꠞ ꠝꠘꠞ ꠌꠤꠘ꠆ꠔꠣꠅ ꠢꠞꠤ ꠎꠣꠄ।
PHI 2:29 ꠔꠦ ꠀꠟ꠆ꠟꠣꠞ ꠛꠘ꠆ꠖꠣ ꠢꠤꠡꠣꠛꠦ ꠙꠥꠞꠣꠙꠥꠞ ꠈꠥꠡꠤ ꠅꠁꠀ ꠔꠣꠘꠞꠦ ꠇꠛꠥꠟ ꠇꠞꠤꠅ, ꠀꠞ ꠄꠞꠣꠞ ꠟꠣꠈꠣꠘ ꠝꠣꠘꠡꠞꠦ ꠁꠎ꠆ꠎꠔ ꠇꠞꠤꠅ।
PHI 2:30 ꠀꠟ-ꠝꠍꠤꠞ ꠔꠛꠟꠤꠉ ꠇꠞꠣꠔ ꠉꠤꠀ ꠔꠣꠁꠘ ꠝꠞꠣꠞ ꠙꠕꠤ ꠅꠁꠉꠦꠍꠟꠣ। ꠀꠝꠣꠞ ꠍꠣꠝꠘꠦ ꠘꠣ ꠕꠣꠇꠣꠄ ꠔꠥꠝꠞꠣ ꠎꠦ ꠇꠣꠝ ꠇꠞꠔꠣꠄ ꠙꠣꠞꠍ ꠘꠣ, ꠅꠃ ꠇꠣꠝꠞ ꠟꠣꠉꠤ ꠔꠣꠁꠘ ꠘꠤꠎꠞ ꠎꠣꠘ ꠖꠤꠔꠦꠅ ꠞꠣꠎꠤ ꠀꠍꠟꠣ।
PHI 3:1 ꠅ ꠀꠝꠣꠞ ꠜꠣꠁ ꠅꠇꠟ, ꠢꠦꠡ-ꠝꠦꠡ ꠇꠁꠞꠣꠝ, ꠝꠣꠟꠤꠇꠞ ꠘꠣꠝꠦ ꠈꠥꠡꠤ ꠇꠞꠅ। ꠄꠇ ꠛꠦꠙꠣꠞ ꠟꠁꠀ ꠛꠣꠞꠦ ꠛꠣꠞꠦ ꠟꠦꠈꠔꠦ ꠀꠝꠣꠞ ꠇꠥꠘꠥ ꠇꠡ꠆ꠐ ꠅꠞ ꠘꠣ, ꠔꠥꠝꠞꠣꠞꠦ ꠛꠣꠌꠣꠘꠤꠞ ꠟꠣꠉꠤꠃ ꠀꠝꠤ ꠁꠔꠣ ꠇꠞꠞꠣꠝ।
PHI 3:2 ꠢꠥꠘꠅ, ꠢꠃ ꠇꠥꠇꠞꠞ ꠙꠣꠟ ꠕꠣꠇꠤ, ꠝꠣꠘꠤ ꠘꠣꠚꠞꠝꠣꠘ ꠖꠟꠞ ꠖꠣꠖꠤꠞ ꠝꠥꠍꠟꠣ ꠕꠣꠇꠤ ꠢꠥꠡꠤꠀꠞ ꠞꠁꠅ। ꠁꠔꠣꠄ ꠔ ꠔꠣꠞꠣꠞ ꠡꠞꠤꠟꠞ ꠇꠣꠐꠣ-ꠌꠤꠞꠣꠞ ꠃꠙꠞꠦꠃ ꠜꠞꠡꠣ ꠇꠞꠦ।
PHI 3:3 ꠀꠍꠟꠦ ꠀꠝꠞꠣꠃ ꠅꠁꠟꠣꠝ ꠈꠣꠐꠤ ꠝꠍꠟꠝꠣꠘꠤ ꠇꠞꠣꠁꠟ ꠝꠣꠘꠥꠡ, ꠀꠝꠞꠣ ꠔ ꠁꠍꠣ ꠀꠟ-ꠝꠍꠤꠞ ꠘꠣꠝꠦ ꠉꠃꠞꠛ ꠇꠞꠤ, ꠀꠟ꠆ꠟꠣꠞ ꠞꠥꠢꠥꠞ ꠛꠟꠦ ꠔꠣꠘ ꠄꠛꠣꠖꠔ ꠇꠞꠤ, ꠡꠞꠤꠟꠤ ꠇꠥꠘꠥ ꠄꠛꠣꠖꠔꠞ ꠃꠙꠞꠦ ꠜꠞꠡꠣ ꠇꠞꠤ ꠘꠣ।
PHI 3:4 ꠀꠍꠟꠦ ꠇꠦꠃ ꠎꠥꠖꠤ ꠝꠘꠅ ꠇꠞꠦ, ꠘꠤꠎꠞ ꠡꠞꠤꠟꠤ ꠄꠛꠣꠖꠔꠞ ꠃꠙꠞꠦ ꠜꠞꠡꠣ ꠇꠞꠣꠞ ꠎꠥꠇ꠆ꠔꠤ ꠀꠍꠦ, ꠔꠦ ꠢꠦ ꠛꠥꠎꠤꠟꠣꠃꠇ, ꠔꠣꠞ ꠌꠣꠁꠔꠦ ꠀꠝꠣꠞ ꠀꠞꠅ ꠛꠦꠡꠤ ꠎꠥꠇ꠆ꠔꠤ ꠀꠍꠦ। ꠀꠝꠤꠅ ꠁꠔꠣꠞ ꠃꠙꠞꠦ ꠜꠞꠡꠣ ꠇꠞꠔꠣꠝ ꠙꠣꠞꠟꠣꠝ ꠅꠘꠦ।
PHI 3:5 ꠎꠘꠝꠞ ꠀꠐ ꠖꠤꠘꠞ ꠖꠤꠘꠃ ꠀꠝꠣꠞ ꠝꠍꠟꠝꠣꠘꠤ ꠇꠣꠝ ꠇꠞꠣꠁꠟ ꠅꠁꠍꠤꠟ। ꠀꠝꠤ ꠄꠇꠎꠘ ꠈꠣꠐꠤ ꠁꠛꠞꠣꠘꠤ, ꠀꠝꠣꠞ ꠎꠘꠝ ꠅꠁꠍꠦ ꠔ ꠛꠘꠤ ꠁꠍꠞꠣꠁꠟꠞ ꠛꠤꠘ-ꠁꠀꠝꠤꠘ ꠉꠥꠡ꠆ꠐꠤꠔ। ꠢꠎꠞꠔ ꠝꠥꠍꠣ ꠘꠛꠤꠞ ꠡꠞꠤꠅꠔꠞ ꠛꠦꠙꠣꠞꠦ ꠀꠝꠤ ꠔ ꠚꠞꠤꠡꠤ ꠎꠝꠣꠔꠞ।
PHI 3:6 ꠡꠞꠤꠅꠔ ꠝꠣꠘꠣꠞ ꠛꠦꠙꠣꠞꠦ ꠇꠥꠘꠥ ꠝꠣꠘꠡꠦ ꠀꠝꠣꠞ ꠈꠥꠔ ꠛꠣꠞ ꠇꠞꠔ ꠙꠣꠞꠍꠦ ꠘꠣ। ꠗꠞ꠆ꠝꠞ ꠛꠦꠙꠣꠞꠦ ꠀꠝꠤ ꠈꠥꠛ ꠇꠠꠣ, ꠀꠟ-ꠝꠍꠤꠞ ꠎꠝꠣꠔꠞ ꠃꠙꠞꠦꠅ ꠀꠝꠤ ꠎꠥꠟꠥꠝ ꠇꠞꠔꠣꠝ।
PHI 3:7 ꠅꠁꠟꠦ ꠅꠃ ꠀꠝꠟ ꠇꠞꠣꠄ ꠀꠝꠣꠞ ꠎꠔ ꠚꠣꠄꠖꠣ ꠅꠁꠍꠤꠟ, ꠅꠈꠘ ꠀꠟ-ꠝꠍꠤꠞ ꠟꠣꠉꠤ ꠀꠝꠤ ꠁꠔꠣꠞꠦ ꠈꠦꠔꠤ ꠝꠘꠅ ꠇꠞꠤ।
PHI 3:8 ꠀꠍꠟꠦ ꠀꠝꠤ ꠎꠣꠞ ꠟꠣꠉꠤ ꠁ ꠈꠦꠔꠤ ꠡ꠆ꠛꠤꠇꠣꠞ ꠇꠞꠤꠀꠞ, ꠄꠁꠘꠃ ꠀꠝꠣꠞ ꠝꠣꠟꠤꠇ ꠁꠍꠣ ꠀꠟ-ꠝꠍꠤ। ꠔꠣꠘꠞꠦ ꠎꠣꠘꠣꠞ ꠝꠣꠎꠦꠃ ꠢꠇꠟ ꠕꠣꠇꠤ ꠛꠠ ꠚꠣꠄꠖꠣ, ꠔꠣꠘ ꠔꠥꠟꠘꠣꠄ ꠛꠣꠖ-ꠛꠣꠇꠤ ꠢꠇ꠆ꠇꠟꠔꠣꠞꠦꠃ ꠀꠝꠤ ꠈꠦꠔꠤ ꠝꠘꠅ ꠇꠞꠤ। ꠀꠝꠤ ꠎꠣꠔꠦ ꠀꠟ-ꠝꠍꠤꠞꠦ ꠙꠣꠁ, ꠀꠞ ꠀꠝꠣꠞꠦ ꠎꠣꠔꠦ ꠀꠟ-ꠝꠍꠤꠞ ꠟꠉꠦ ꠄꠇꠈꠣꠘꠅ ꠝꠤꠟꠣꠁꠟ ꠖꠦꠈꠣ ꠎꠣꠄ, ꠅꠃ ꠘꠤꠅꠔꠦꠃ ꠀꠝꠤ ꠁꠔꠣ ꠢꠇ꠆ꠇꠟꠔꠣꠞꠦ ꠝꠄꠟꠣꠞ ꠟꠣꠈꠣꠘ ꠢꠞꠣꠁꠀ ꠚꠣꠟꠣꠁꠍꠤ।
PHI 3:9 ꠔꠦ ꠡꠞꠤꠅꠔ ꠝꠣꠘꠣꠄ ꠀꠝꠤ ꠎꠦ ꠙꠞꠦꠎꠉꠣꠞ ꠛꠘꠤꠉꠦꠍꠤ, ꠁꠈꠣꠘ ꠘꠣꠄ, ꠀꠟ-ꠝꠍꠤꠞ ꠃꠙꠞꠦ ꠁꠝꠣꠘ ꠀꠘꠣꠄꠃ ꠀꠟ꠆ꠟꠣꠄ ꠀꠝꠣꠞꠦ ꠙꠞꠦꠎꠉꠣꠞ ꠢꠤꠡꠣꠛꠦ ꠇꠛꠥꠟ ꠇꠞꠍꠂꠘ। ꠁ ꠙꠞꠦꠎꠉꠣꠞꠤ ꠈꠣꠟꠤ ꠀꠟ꠆ꠟꠣ ꠕꠣꠇꠤꠃ ꠝꠤꠟꠦ, ꠁꠐꠣ ꠔ ꠁꠝꠣꠘꠞ ꠃꠙꠞꠦ ꠘꠤꠞꠜꠞ ꠇꠞꠦ। ꠀꠟ-ꠝꠍꠤꠞ ꠟꠉꠦ ꠝꠤꠟꠣꠞ ꠛꠣꠖꠦꠃ ꠀꠝꠣꠞ ꠅꠃ ꠢꠣꠟꠔ ꠅꠁꠍꠦ।
PHI 3:10 ꠔꠦ ꠀꠝꠤ ꠀꠟ-ꠝꠍꠤꠞꠦ ꠌꠤꠘꠔꠣꠝ ꠌꠣꠁ, ꠎꠦ ꠇꠥꠖꠞꠔꠤ ꠛꠟꠦ ꠔꠣꠘꠞꠦ ꠝꠞꠣ ꠕꠣꠇꠤ ꠎꠤꠘ꠆ꠖꠣ ꠇꠞꠣ ꠅꠁꠍꠤꠟ, ꠅꠃ ꠛꠟꠞꠦꠅ ꠌꠤꠘꠔꠣꠝ ꠌꠣꠁ। ꠀꠝꠤ ꠔꠣꠘ ꠖꠥꠈ-ꠝꠍꠤꠛꠔꠞ ꠜꠣꠉꠤ ꠅꠁꠔꠣꠝ ꠌꠣꠁ, ꠔꠣꠁꠘ ꠎꠦꠟꠣ ꠘꠤꠎꠞ ꠎꠣꠘ ꠇꠥꠞꠛꠣꠘꠤ ꠖꠤꠍꠟꠣ, ꠀꠝꠤꠅ ꠅꠃ ꠝꠃꠔꠅ ꠡꠞꠤꠇ ꠅꠁꠔꠣꠝ ꠌꠣꠁ।
PHI 3:11 ꠀꠞ ꠎꠦꠇꠥꠘꠥ ꠟꠣꠈꠣꠘ ꠝꠞꠘ ꠕꠣꠇꠤ ꠎꠤꠘ꠆ꠖꠣ ꠅꠀꠔꠅ ꠡꠞꠤꠇ ꠞꠁ।
PHI 3:12 ꠔꠦ ꠀꠝꠤ ꠎꠦꠔꠣ ꠙꠣꠁꠔꠣꠝ ꠌꠣꠁꠞꠣꠝ, ꠁꠔꠣ ꠎꠦ ꠅꠈꠘꠃ ꠙꠣꠁꠟꠤꠍꠤ, ꠛꠣ ꠙꠥꠞꠣꠙꠥꠞ ꠇꠣꠝꠤꠀꠛ ꠅꠁꠉꠦꠍꠤ ꠁꠟꠣ ꠇꠥꠘ꠆ꠔꠣ ꠘꠣꠄ। ꠢꠎꠞꠔ ꠁꠍꠣ ꠀꠟ-ꠝꠍꠤꠄ ꠎꠦ ꠘꠤꠅꠔꠦ ꠀꠝꠣꠞꠦ ꠛꠘ꠆ꠖꠤ ꠇꠞꠍꠂꠘ, ꠅꠃ ꠘꠤꠅꠔ ꠙꠥꠞꠣ ꠇꠞꠣꠞ ꠟꠣꠉꠤꠃ ꠀꠝꠤ ꠖꠃꠠꠣꠁꠞꠣꠝ।
PHI 3:13 ꠜꠣꠁ ꠅꠇꠟ, ꠀꠝꠤ ꠝꠘꠅ ꠇꠞꠞꠣꠝ ꠘꠣ, ꠀꠝꠤ ꠁꠔꠣꠞ ꠟꠣꠉꠣꠟ ꠙꠣꠁꠟꠤꠍꠤ। ꠅꠁꠟꠦ ꠈꠞꠞ ꠢꠇꠟꠔꠣ ꠚꠣꠟꠣꠁꠀ ꠀꠝꠤ ꠖꠤꠟꠦ-ꠎꠣꠘꠦ ꠍꠣꠝꠘꠦꠖꠤ ꠖꠃꠠꠣꠁꠀꠞ।
PHI 3:14 ꠖꠃꠠꠣꠁ ꠖꠃꠠꠣꠁ ꠌꠦꠡ꠆ꠐꠣ ꠇꠞꠤꠀꠞ, ꠁꠍꠣ ꠀꠟ-ꠝꠍꠤꠞ ꠎꠞꠤꠀꠄ ꠀꠟ꠆ꠟꠣ ꠙꠣꠇꠞ ꠎꠦ ꠛꠦꠢꠦꠡ꠆ꠔꠤ ꠖꠣꠅꠔ ꠀꠍꠦ, ꠙꠥꠞꠥꠡ꠆ꠇꠣꠞ ꠢꠤꠡꠣꠛꠦ ꠅꠃ ꠖꠣꠅꠔꠅ ꠢꠣꠝꠣꠁꠔꠣꠝ ꠙꠣꠞꠤ।
PHI 3:15 ꠄꠞꠟꠣꠉꠤ ꠇꠁꠞꠣꠝ, ꠀꠝꠞꠣ ꠎꠣꠞꠣ ꠢꠎꠞꠔ ꠁꠍꠣꠞ ꠙꠕꠦ ꠛꠃꠔ ꠀꠉꠥꠀꠁ ꠉꠦꠍꠤ, ꠀꠝꠞꠣꠞ ꠘꠤꠅꠔꠅ ꠅꠟꠣꠈꠣꠘ ꠅꠀ ꠎꠞꠥꠞ। ꠀꠞ ꠔꠥꠝꠞꠣꠞ ꠎꠥꠖꠤ ꠅꠁꠘ꠆ꠘ ꠇꠥꠘꠥ ꠘꠤꠅꠔ ꠕꠣꠇꠦ, ꠔꠦ ꠀꠟ꠆ꠟꠣꠄꠃ ꠙꠕ ꠛꠣꠔꠣꠁ ꠖꠤꠛꠣꠘꠦ।
PHI 3:16 ꠎꠣꠁ ꠅꠃꠇ, ꠀꠝꠞꠣ ꠎꠔꠈꠣꠘ ꠀꠉꠥꠀꠁꠍꠤ, ꠅꠃ ꠟꠣꠈꠣꠘ ꠎꠤꠘ꠆ꠖꠦꠉꠤꠅ ꠇꠣꠐꠣꠘꠤ ꠃꠌꠤꠔ।
PHI 3:17 ꠜꠣꠁ ꠅꠇꠟ, ꠔꠥꠝꠞꠣ ꠇꠤꠟꠣꠘ ꠎꠤꠘ꠆ꠖꠦꠉꠤ ꠇꠣꠐꠣꠁꠔꠣꠄ, ꠁꠔꠣ ꠔ ꠀꠝꠤ ꠢꠤꠇꠣꠁꠍꠤ। ꠔꠥꠝꠞꠣ ꠀꠝꠣꠞ ꠟꠣꠈꠣꠘ ꠌꠟꠅ, ꠀꠞ ꠅꠃ ꠟꠣꠈꠣꠘ ꠎꠣꠞꠣ ꠌꠟꠦ, ꠔꠣꠞꠣꠞꠦ ꠖꠦꠈꠤꠀ ꠢꠤꠇꠅ।
PHI 3:18 ꠀꠝꠤ ꠔ ꠛꠃꠔ ꠛꠣꠞ ꠔꠥꠝꠞꠣꠞꠦ ꠇꠁꠍꠤ, ꠀꠞ ꠌꠈꠥꠞ ꠙꠣꠘꠤ ꠚꠣꠟꠣꠁꠀ ꠅꠈꠘꠅ ꠇꠁꠞꠣꠝ, ꠁꠟꠣꠅ ꠛꠃꠔ ꠎꠘ ꠀꠍꠦ, ꠎꠦꠞꠣ ꠀꠟ-ꠝꠍꠤꠞ ꠖꠥꠈ-ꠇꠡ꠆ꠐꠞ ꠍꠟꠤꠛꠞ ꠖꠥꠡꠝꠘꠞ ꠟꠣꠈꠣꠘ ꠌꠟꠦꠞ।
PHI 3:19 ꠔꠣꠞꠣꠞ ꠇꠙꠣꠟꠅ ꠀꠍꠦ ꠛꠤꠘꠣꠡ। ꠔꠣꠞꠣꠞ ꠙꠦꠐꠃ ꠔꠣꠞꠣꠞ ꠀꠟ꠆ꠟꠣ। ꠘꠣꠚꠞꠝꠣꠘꠤ ꠇꠣꠝ ꠟꠁꠀ ꠔꠣꠞꠣ ꠛꠠꠣꠁ ꠇꠞꠦ, ꠈꠣꠟꠤ ꠖꠥꠘꠤꠀꠞ ꠗꠣꠘ꠆ꠖꠣꠄ ꠙꠣꠉꠟ।
PHI 3:20 ꠅꠁꠟꠦ ꠀꠝꠞꠣꠞ ꠀꠍꠟ ꠛꠣꠠꠤ ꠔ ꠛꠦꠢꠦꠡ꠆ꠔꠅ। ꠀꠝꠞꠣꠞ ꠔꠞꠣꠅꠞꠣ ꠝꠣꠟꠤꠇ, ꠢꠎꠞꠔ ꠁꠍꠣ ꠀꠟ-ꠝꠍꠤꠄ ꠢꠘ ꠕꠣꠇꠤ ꠔꠡꠞꠤꠚ ꠀꠘꠛꠣ। ꠀꠝꠞꠣ ꠔꠣꠘ ꠟꠣꠉꠤ ꠖꠤꠟꠦ-ꠎꠣꠘꠦ ꠛꠣꠞ ꠌꠣꠁꠞꠣꠝ।
PHI 3:21 ꠔꠣꠁꠘ ꠀꠁꠀ ꠀꠝꠞꠣꠞ ꠅꠃ ꠇꠝꠎꠥꠞ ꠇꠣꠄꠀ ꠛꠖꠟꠣꠁꠀ, ꠔꠣꠘ ꠇꠣꠄꠀꠞ ꠟꠣꠈꠣꠘ ꠈꠦꠝꠔꠣꠀꠟꠣ ꠘꠥꠞꠞ ꠇꠣꠄꠀ ꠖꠤꠛꠣ। ꠎꠦ ꠇꠥꠖꠞꠔꠤ ꠛꠟꠦ ꠔꠣꠁꠘ ꠢꠇ꠆ꠇꠟꠔꠣ ꠇꠞꠔꠣ ꠙꠣꠞꠂꠘ, ꠢꠃ ꠛꠟꠦꠃ ꠔꠣꠁꠘ ꠁꠔꠣ ꠇꠞꠛꠣ।
PHI 4:1 ꠅ ꠀꠝꠣꠞ ꠝꠣꠄꠀꠞ ꠜꠣꠁ ꠅꠇꠟ, ꠀꠝꠤ ꠔꠥꠝꠞꠣꠞꠦ ꠖꠦꠈꠔꠣꠝ ꠌꠣꠁ। ꠔꠥꠝꠞꠣꠃ ꠀꠝꠣꠞ ꠈꠥꠡꠤ, ꠀꠝꠣꠞ ꠎꠄꠅꠞ ꠝꠣꠟꠣ। ꠀꠝꠞꠣꠞ ꠝꠣꠟꠤꠇꠞ ꠟꠉꠦ ꠔꠥꠝꠞꠣ ꠝꠎꠛꠥꠔ ꠅꠁꠀ ꠟꠣꠉꠤꠀ ꠞꠅ।
PHI 4:2 ꠅ ꠀꠝꠣꠞ ꠛꠁꠘ ꠍꠣꠟꠤꠝꠣ ꠀꠞ ꠍꠣꠁꠖꠣ, ꠀꠝꠤ ꠝꠤꠘꠔ ꠇꠞꠤ ꠇꠁꠞꠣꠝ, ꠄꠇ ꠝꠣꠟꠤꠇꠞ ꠈꠦꠎꠝꠔꠅ ꠟꠣꠉꠣꠁꠟ ꠀꠍ ꠇꠞꠤ, ꠔꠥꠝꠞꠣ ꠝꠤꠟꠤ-ꠝꠤꠡꠤ ꠄꠇ ꠝꠘꠦ ꠌꠟꠅ।
PHI 4:3 ꠅ ꠀꠝꠣꠞ ꠟꠉꠞ ꠀꠍꠟ ꠡꠋꠉꠤ, ꠀꠝꠤ ꠔꠥꠝꠣꠞꠦꠅ ꠝꠤꠘꠔ ꠇꠞꠞꠣꠝ, ꠔꠥꠝꠤ ꠅꠃ ꠛꠦꠐꠤꠘ꠆ꠔꠞꠦ ꠡꠣꠁꠎ꠆ꠎ ꠇꠞꠤꠅ। ꠀꠟ-ꠝꠍꠤꠞ ꠈꠥꠡ-ꠈꠛꠞꠤ ꠔꠛꠟꠤꠉ ꠇꠣꠝꠅ ꠄꠞꠣ ꠀꠝꠣꠞ ꠟꠉꠦ ꠛꠃꠔ ꠇꠡ꠆ꠐ ꠇꠞꠍꠂꠘ। ꠇꠤꠟꠤꠝꠣꠘ ꠀꠞ ꠅꠁꠘ꠆ꠘꠣꠁꠘ꠆ꠘ ꠜꠣꠁꠀꠁꠘ꠆ꠔꠞ ꠟꠉꠦꠅ ꠇꠡ꠆ꠐ ꠇꠞꠍꠂꠘ। ꠔꠣꠞꠣꠞ ꠘꠣꠝ ꠔ ꠀꠟ꠆ꠟꠣꠞ ꠎꠤꠘ꠆ꠖꠦꠉꠤ ꠈꠣꠔꠣꠔ ꠟꠦꠈꠣ ꠀꠍꠦ।
PHI 4:4 ꠝꠣꠟꠤꠇ ꠁꠍꠣꠞ ꠘꠣꠝꠦ ꠔꠥꠝꠞꠣ ꠢꠣꠝꠦꠡꠣ ꠈꠥꠡꠤ-ꠛꠣꠡꠤ ꠇꠞꠅ। ꠀꠝꠤ ꠢꠤꠞꠛꠣꠞ ꠇꠁꠞꠣꠝ, ꠈꠥꠡꠤ-ꠛꠣꠡꠤ ꠇꠞꠅ।
PHI 4:5 ꠔꠥꠝꠞꠣꠞ ꠘꠞꠝ ꠛꠦꠛꠢꠣꠞ ꠎꠣꠘꠥ ꠢꠇꠟ ꠝꠣꠘꠡꠞ ꠌꠈꠥꠔ ꠙꠠꠦ। ꠎꠣꠘ ꠔ, ꠀꠝꠞꠣꠞ ꠝꠣꠟꠤꠇ ꠈꠥꠛ ꠎꠟꠖꠤꠃ ꠀꠁꠞꠣ।
PHI 4:6 ꠇꠥꠘꠥ ꠛꠦꠙꠣꠞꠦꠃ ꠔꠥꠝꠞꠣ ꠙꠦꠞꠦꠡꠣꠘ ꠅꠁꠅ ꠘꠣ, ꠛꠞꠋ ꠝꠥꠘꠣꠎꠣꠔ ꠇꠞꠅ। ꠔꠥꠝꠞꠣꠞ ꠎꠔꠔꠣ ꠌꠣꠁꠛꠣꠞ ꠀꠍꠦ, ꠀꠟ꠆ꠟꠣꠞ ꠡꠥꠇꠞꠤꠀ ꠀꠖꠣꠄ ꠇꠞꠤꠀ ꠔꠣꠘ ꠉꠦꠍꠦ ꠌꠣꠅ।
PHI 4:7 ꠔꠦꠃ ꠀꠟ꠆ꠟꠣꠞ ꠖꠦꠅꠀ ꠎꠦ ꠡꠣꠘ꠆ꠔꠤꠞ ꠇꠕꠣ ꠝꠣꠘꠡꠦ ꠌꠤꠘ꠆ꠔꠣꠅ ꠇꠞꠔ ꠙꠣꠞꠦ ꠘꠣ, ꠁꠍꠣ ꠀꠟ-ꠝꠍꠤꠞ ꠝꠣꠎꠖꠤ ꠅꠃ ꠡꠣꠘ꠆ꠔꠤ ꠀꠁꠀ ꠔꠥꠝꠞꠣꠞ ꠖꠤꠟ ꠀꠞ ꠝꠘꠞꠦ ꠞꠁꠇ꠆ꠇꠣ ꠇꠞꠛ।
PHI 4:8 ꠅ ꠜꠣꠁ ꠅꠇꠟ, ꠀꠝꠤ ꠢꠦꠡ-ꠝꠦꠡ ꠇꠁꠞꠣꠝ, ꠎꠦꠔꠣ ꠢꠣꠍꠣ, ꠎꠦꠔꠣ ꠃꠙꠎꠥꠇ꠆ꠔ, ꠢꠇ, ꠈꠣꠐꠤ, ꠡꠥꠘ꠆ꠖꠞ, ꠀꠞ ꠁꠎ꠆ꠎꠔ ꠙꠣꠅꠀꠞ ꠎꠥꠇꠣ, ꠝꠣꠘꠤ ꠎꠦꠔꠣ ꠜꠣꠟꠣ ꠀꠞ ꠎꠦꠔꠣꠄ ꠔꠣꠞꠤꠚ ꠅꠄ, ꠅꠃ ꠟꠣꠈꠣꠘ ꠛꠦꠙꠣꠞꠦ ꠔꠥꠝꠞꠣ ꠈꠤꠀꠟꠤ ꠅꠅ।
PHI 4:9 ꠔꠥꠝꠞꠣ ꠀꠝꠣꠞ ꠉꠦꠍ ꠕꠣꠇꠤ ꠎꠦ ꠔꠣꠟꠤꠝ ꠙꠣꠁꠍ, ꠎꠦꠔꠣ ꠢꠥꠘꠍ, ꠎꠦꠔꠣ ꠖꠦꠈꠍ, ꠀꠞ ꠎꠦꠔꠣ ꠇꠛꠥꠟ ꠇꠞꠍ ꠅꠔꠣ ꠅꠈꠘ ꠀꠝꠟ ꠇꠞꠅ। ꠔꠦꠃ ꠡꠣꠘ꠆ꠔꠤ ꠖꠦꠅꠞꠣ ꠀꠟ꠆ꠟꠣꠅ ꠔꠥꠝꠞꠣꠞ ꠟꠉꠦ ꠟꠉꠦ ꠞꠁꠛꠣ।
PHI 4:10 ꠝꠣꠟꠤꠇꠦ ꠀꠝꠣꠞ ꠈꠥꠡꠤ ꠀꠞꠅ ꠛꠣꠠꠣꠁ ꠖꠤꠟꠣ, ꠛꠃꠔ ꠖꠤꠘ ꠛꠣꠖꠦ ꠔꠥꠝꠞꠣ ꠀꠝꠣꠞꠦ ꠝꠘꠅ ꠇꠞꠞꠣꠄ। ꠀꠝꠣꠞ ꠟꠣꠉꠤ ꠔ ꠢꠣꠝꠦꠡꠣꠃ ꠔꠥꠝꠞꠣ ꠌꠤꠘ꠆ꠔꠣ ꠇꠞꠍ, ꠅꠁꠟꠦ ꠁꠔꠣ ꠖꠦꠈꠣꠘꠤꠞ ꠡꠥꠎꠥꠉ ꠙꠣꠁꠍ ꠘꠣ।
PHI 4:11 ꠇꠥꠘꠥ ꠅꠜꠣꠛꠅ ꠙꠠꠤꠀ ꠀꠝꠤ ꠁꠈꠣꠘ ꠇꠁꠞꠣꠝ ꠘꠣ, ꠎꠦꠇꠥꠘꠥ ꠢꠣꠟꠔꠦꠃ ꠡꠘ꠆ꠔꠥꠡ꠆ꠐ ꠞꠅꠀꠈꠣꠘ ꠀꠝꠤ ꠎꠣꠘꠤ।
PHI 4:12 ꠅꠜꠣꠛꠤ ꠛꠣ ꠘꠛꠣꠛꠤ ꠢꠣꠟꠔꠦ, ꠃꠙꠣꠡꠤ ꠙꠦꠐꠦ ꠛꠣ ꠜꠞꠣ ꠙꠦꠐꠦ, ꠗꠘꠤ ꠛꠣ ꠉꠞꠤꠛꠤꠞ ꠝꠣꠎꠦ ꠇꠤꠟꠣ ꠡꠘ꠆ꠔꠥꠡ꠆ꠐ ꠞꠅꠀ ꠎꠣꠄ, ꠁꠔꠣ ꠔꠣꠟꠤꠝ ꠀꠝꠤ ꠙꠣꠁꠍꠤ।
PHI 4:13 ꠀꠍꠟꠦ ꠎꠦꠁꠘ ꠀꠝꠣꠞꠦ ꠛꠟ-ꠡꠇ꠆ꠔꠤ ꠎꠥꠉꠣꠁꠀ ꠖꠦꠁꠘ, ꠔꠣꠘ ꠛꠟꠦꠃ ꠀꠝꠤ ꠢꠇ꠆ꠇꠟꠔꠣ ꠇꠞꠔꠣꠝ ꠙꠣꠞꠤ।
PHI 4:14 ꠔꠣ-ꠅ ꠔꠥꠝꠞꠣ ꠀꠝꠣꠞ ꠇꠡ꠆ꠐꠞ ꠟꠉꠦ ꠡꠞꠤꠇ ꠅꠁꠀ, ꠈꠥꠛ ꠜꠣꠟꠣ ꠇꠣꠝ ꠇꠞꠍ।
PHI 4:15 ꠅ ꠚꠤꠟꠤꠙꠤ ꠎꠝꠣꠔꠞ ꠝꠥꠝꠤꠘ ꠅꠇꠟ, ꠔꠥꠝꠞꠣ ꠔ ꠎꠣꠘ, ꠔꠥꠝꠞꠣ ꠙꠄꠟꠣ ꠈꠥꠡ-ꠈꠛꠞꠤ ꠙꠣꠅꠀꠞ ꠛꠣꠖꠦ ꠀꠝꠤ ꠎꠦꠛꠟꠣ ꠝꠣꠇꠤꠖꠘꠤꠀ ꠖꠦꠡ ꠕꠣꠇꠤ ꠉꠦꠍꠟꠣꠝꠉꠤ, ꠅꠃ ꠡꠝꠄ ꠔꠥꠝꠞꠣ ꠍꠣꠠꠣ ꠀꠞ ꠇꠥꠘꠥ ꠎꠝꠣꠔꠦꠃ ꠀꠝꠣꠞ ꠟꠉꠦ ꠇꠥꠘꠥꠎꠣꠔ ꠟꠦꠘ-ꠖꠦꠘ ꠇꠞꠍꠦ ꠘꠣ।
PHI 4:16 ꠀꠝꠤ ꠎꠦꠛꠟꠣ ꠕꠤꠡꠟꠘꠤꠇꠤ ꠐꠣꠃꠘꠅ ꠀꠍꠟꠣꠝ, ꠅꠃ ꠡꠝꠄ ꠀꠝꠣꠞ ꠅꠜꠣꠛꠞ ꠇꠣꠟꠅ ꠔꠥꠝꠞꠣ ꠇꠄꠛꠣꠞ ꠡꠣꠁꠎ꠆ꠎ ꠙꠣꠑꠣꠁꠍ।
PHI 4:17 ꠀꠝꠤ ꠔꠥꠝꠞꠣꠞ ꠉꠦꠍ ꠕꠣꠇꠤ ꠇꠥꠘꠥ ꠖꠣꠘ-ꠖꠇ꠆ꠇꠤꠘꠣ ꠌꠣꠁꠞꠣꠝ ꠘꠣ, ꠅꠁꠟꠦ ꠔꠥꠝꠞꠣꠞ ꠟꠣꠉꠤ ꠅꠟꠣ ꠄꠇ ꠚꠟ ꠀꠡꠣ ꠇꠞꠞꠣꠝ, ꠎꠦꠔꠣ ꠔꠥꠝꠞꠣꠞ ꠀꠝꠟ-ꠘꠣꠝꠣꠔ ꠎꠝꠣ ꠞꠁꠛ।
PHI 4:18 ꠀꠝꠣꠞ ꠢꠇꠟ ꠙꠣꠅꠘꠣꠃ ꠀꠝꠤ ꠙꠣꠁꠟꠤꠍꠤ। ꠀꠍꠟꠦ ꠀꠝꠣꠞ ꠎꠔꠈꠣꠘ ꠎꠞꠥꠞ, ꠄꠞ ꠌꠣꠁꠔꠦꠅ ꠛꠦꠡꠤ ꠀꠍꠦ। ꠃꠍꠣꠁꠖ ꠜꠣꠁꠞ ꠀꠔ ꠕꠣꠇꠤ ꠔꠥꠝꠞꠣꠞ ꠃꠙꠢꠣꠞ ꠙꠣꠁꠀ ꠅꠈꠘ ꠀꠝꠣꠞ ꠛꠃꠔ ꠅꠁꠍꠦ। ꠅꠃ ꠃꠙꠢꠣꠞ ꠔ ꠀꠟ꠆ꠟꠣꠁ ꠈꠥꠡꠛꠄ ꠀꠟꠣ, ꠀꠟ꠆ꠟꠣꠞ ꠖꠞꠛꠣꠞꠅ ꠇꠛꠥꠟ ꠅꠀꠞ ꠎꠥꠇꠣ ꠇꠥꠞꠛꠣꠘꠤ। ꠀꠟ꠆ꠟꠣ ꠙꠣꠇ ꠁꠔꠣꠄ ꠈꠥꠡꠤ ꠅꠁꠘ।
PHI 4:19 ꠀꠝꠣꠞ ꠀꠟ꠆ꠟꠣꠄ ꠔꠣꠘ ꠘꠤꠎꠞ ꠉꠃꠞꠛꠞ ꠗꠘ ꠢꠤꠡꠣꠛꠦ, ꠢꠎꠞꠔ ꠁꠍꠣ ꠀꠟ-ꠝꠍꠤꠞ ꠃꠍꠤꠟ꠆ꠟꠣꠄ ꠔꠥꠝꠞꠣꠞ ꠢꠇꠟ ꠅꠜꠣꠛ ꠖꠥꠞ ꠇꠞꠛꠣ।
PHI 4:20 ꠎꠥꠉꠦ ꠎꠥꠉꠦ ꠢꠞ-ꠢꠣꠝꠦꠡꠣ ꠀꠝꠞꠣꠞ ꠉꠣꠁꠛꠤ ꠛꠣꠚ ꠀꠟ꠆ꠟꠣ ꠙꠣꠇꠞ ꠔꠣꠞꠤꠚ ꠎꠣꠞꠤ ꠞꠃꠇ। ꠀꠝꠤꠘ।
PHI 4:21 ꠢꠎꠞꠔ ꠁꠍꠣ ꠀꠟ-ꠝꠍꠤꠞ ꠔꠞꠤꠇꠣꠞ ꠀꠟ꠆ꠟꠣꠞ ꠢꠇꠟ ꠛꠘ꠆ꠖꠣꠞꠦ ꠀꠝꠣꠞ ꠍꠣꠟꠣꠝ ꠖꠤꠅ। ꠀꠝꠣꠞ ꠟꠉꠞ ꠢꠇꠟ ꠜꠣꠁꠀꠁꠘ꠆ꠔꠦ ꠔꠥꠝꠞꠣꠞꠦ ꠍꠣꠟꠣꠝ ꠎꠣꠘꠣꠁꠞꠣ।
PHI 4:22 ꠀꠟ꠆ꠟꠣꠞ ꠎꠔ ꠙꠣꠇ ꠛꠘ꠆ꠖꠣ ꠁ ꠎꠣꠉꠣꠔ ꠀꠍꠂꠘ, ꠈꠣꠍ ꠇꠞꠤ ꠛꠣꠖꠡꠣ ꠇꠂꠍꠞꠞ ꠛꠣꠠꠤꠞ ꠝꠥꠝꠤꠘ ꠅꠇꠟꠦ ꠍꠣꠟꠣꠝ ꠎꠣꠘꠣꠁꠞꠣ।
PHI 4:23 ꠢꠎꠞꠔ ꠁꠍꠣ ꠀꠟ-ꠝꠍꠤꠞ ꠞꠢꠝꠔ ꠔꠥꠝꠞꠣꠞ ꠖꠤꠟꠅ ꠕꠣꠇꠃꠇ। ꠀꠝꠤꠘ॥
COL 1:1 ꠀꠝꠤ ꠙꠣꠃꠟꠥꠍ, ꠀꠟ꠆ꠟꠣ ꠙꠣꠇꠞ ꠝꠞ꠆ꠎꠤꠄ ꠢꠎꠞꠔ ꠁꠍꠣ ꠀꠟ-ꠝꠍꠤꠞ ꠄꠇꠎꠘ ꠍꠣꠢꠣꠛꠤ। ꠇꠟ꠆ꠟꠍꠤ ꠐꠣꠃꠘꠞ ꠝꠣꠎꠦ ꠀꠟ-ꠝꠍꠤꠞ ꠔꠞꠤꠇꠣꠞ ꠙꠣꠇ ꠛꠘ꠆ꠖꠣ ꠀꠞ ꠝꠥꠝꠤꠘ ꠅꠇꠟꠞ ꠉꠦꠍꠦ ꠀꠝꠤ ꠀꠞ ꠜꠣꠁ ꠔꠤꠝꠕꠤꠄ ꠅꠃ ꠍꠢꠤꠚꠣꠈꠣꠘ ꠟꠦꠈꠞꠣꠝ। ꠀꠝꠞꠣꠞ ꠉꠣꠁꠛꠤ ꠛꠣꠚ ꠀꠟ꠆ꠟꠣ ꠙꠣꠇꠦ ꠔꠥꠝꠞꠣꠞ ꠃꠙꠞꠦ ꠞꠢꠝꠔ ꠀꠞ ꠡꠣꠘ꠆ꠔꠤ ꠘꠣꠎꠤꠟ ꠇꠞꠃꠇ꠆ꠇꠣ।
COL 1:3 ꠢꠎꠞꠔ ꠁꠍꠣ ꠀꠟ-ꠝꠍꠤꠞ ꠃꠙꠞꠦ ꠔꠥꠝꠞꠣꠞ ꠁꠝꠣꠘ ꠀꠞ ꠀꠟ꠆ꠟꠣꠞ ꠙꠣꠇ ꠛꠘ꠆ꠖꠣ ꠅꠇꠟꠞꠦ ꠝꠣꠄꠀ ꠇꠞꠣꠞ ꠇꠕꠣ ꠀꠝꠞꠣ ꠢꠥꠘꠍꠤ। ꠄꠞꠟꠣꠉꠤ ꠎꠦꠛꠟꠣꠃ ꠔꠥꠝꠞꠣꠞ ꠟꠣꠉꠤ ꠖꠥꠀ ꠇꠞꠤ, ꠅꠃ ꠡꠝꠄ ꠀꠝꠞꠣꠞ ꠝꠣꠟꠤꠇ ꠁꠍꠣ ꠀꠟ-ꠝꠍꠤꠞ ꠉꠣꠁꠛꠤ ꠛꠣꠚ ꠀꠟ꠆ꠟꠣ ꠙꠣꠇꠞ ꠡꠥꠇꠞꠤꠀ ꠀꠖꠣꠄ ꠇꠞꠤ।
COL 1:5 ꠔꠥꠝꠞꠣ ꠀꠉꠦ ꠎꠦ ꠈꠥꠡ-ꠈꠛꠞꠤ ꠝꠣꠘꠤ ꠀꠟ꠆ꠟꠣꠞ ꠢꠇ ꠇꠣꠟꠣꠝ ꠙꠣꠁꠍ, ꠅꠃ ꠇꠣꠟꠣꠝ ꠢꠥꠘꠤꠀꠃ ꠔꠥꠝꠞꠣꠞ ꠝꠘꠅ ꠄꠇ ꠀꠡꠣ ꠎꠘꠝꠤꠍꠦ। ꠅꠃ ꠀꠡꠣ ꠕꠣꠇꠤꠃ ꠔꠥꠝꠞꠣꠞ ꠁꠝꠣꠘ ꠀꠞ ꠝꠣꠄꠀ ꠙꠄꠖꠣ ꠅꠁꠍꠦ। ꠀꠞ ꠔꠥꠝꠞꠣ ꠀꠡꠣ ꠇꠞꠞꠣꠄ ꠎꠦ ꠍꠣꠝꠣꠘ ꠙꠣꠁꠔꠣꠄ, ꠁꠔꠣ ꠔ ꠛꠦꠢꠦꠡ꠆ꠔꠅ ꠞꠣꠈꠣ ꠀꠍꠦ।
COL 1:6 ꠁ ꠈꠥꠡ-ꠈꠛꠞꠤ ꠖꠥꠘꠤꠀꠞ ꠢꠇꠟꠛꠣꠄ ꠍꠤꠔ꠆ꠞꠤꠀ ꠜꠣꠟꠣ ꠚꠟꠀꠟꠣ ꠅꠁꠀ ꠖꠤꠘ ꠖꠤꠘ ꠛꠣꠠꠦꠞ। ꠎꠦ ꠖꠤꠘ ꠕꠘꠦ ꠔꠥꠝꠞꠣ ꠅꠃ ꠈꠥꠡ-ꠈꠛꠞꠤ ꠀꠞ ꠀꠟ꠆ꠟꠣꠞ ꠞꠢꠝꠔꠞ ꠛꠦꠙꠣꠞꠦ ꠙꠥꠞꠣꠙꠥꠞ ꠢꠥꠘꠍ, ꠅꠃ ꠖꠤꠘ ꠕꠘꠦꠃ ꠁꠔꠣꠄ ꠔꠥꠝꠞꠣꠞ ꠜꠤꠔꠞꠦꠅ ꠙꠥꠞꠣꠙꠥꠞ ꠇꠣꠝ ꠇꠞꠦꠞ।
COL 1:7 ꠅꠃ ꠈꠥꠡ-ꠈꠛꠞꠤꠞ ꠇꠕꠣ ꠔꠥꠝꠞꠣ ꠀꠝꠣꠞ ꠟꠉꠞ ꠝꠣꠄꠀꠞ ꠜꠣꠁ ꠀꠛꠥ-ꠚꠣꠞꠣꠍꠞ ꠉꠦꠍꠦ ꠢꠥꠘꠍ। ꠔꠣꠁꠘ ꠔꠥꠝꠞꠣꠞ ꠔꠞꠚ ꠕꠣꠇꠤ ꠀꠟ-ꠝꠍꠤꠞ ꠄꠇꠎꠘ ꠢꠇ ꠈꠦꠎꠝꠔꠇꠣꠞꠤ।
COL 1:8 ꠙꠣꠇ ꠞꠥꠢꠥꠞ ꠛꠟꠦ ꠔꠥꠝꠞꠣꠞ ꠖꠤꠟꠞ ꠝꠣꠎꠦ ꠎꠦ ꠝꠣꠄꠀ ꠙꠄꠖꠣ ꠅꠁꠍꠦ, ꠅꠃ ꠛꠦꠙꠣꠞꠦ ꠀꠛꠥ-ꠚꠣꠞꠣꠍꠦ ꠀꠝꠞꠣꠞꠦ ꠎꠣꠘꠣꠁꠍꠂꠘ।
COL 1:9 ꠄꠞꠟꠣꠉꠤ ꠔꠥꠝꠞꠣꠞ ꠛꠦꠙꠣꠞꠦ ꠢꠥꠘꠣꠞ ꠛꠣꠖ ꠕꠣꠇꠤꠃ ꠀꠝꠞꠣ ꠢꠣꠝꠦꠡꠣ ꠔꠥꠝꠞꠣꠞ ꠟꠣꠉꠤ ꠖꠥꠀ ꠇꠞꠤ। ꠞꠥꠢꠣꠘꠤ ꠁꠟꠤꠝ ꠀꠞ ꠛꠥꠖ꠆ꠖꠤ ꠖꠤꠀ ꠔꠥꠝꠞꠣ ꠎꠣꠘꠥ ꠀꠟ꠆ꠟꠣꠞ ꠝꠥꠘꠡꠣ ꠙꠥꠞꠣꠙꠥꠞ ꠛꠥꠎꠔꠣꠄ ꠙꠣꠞ।
COL 1:10 ꠀꠝꠞꠣ ꠀꠟ꠆ꠟꠣꠞ ꠖꠞꠛꠣꠞꠅ ꠅꠃ ꠖꠥꠀꠃ ꠇꠞꠞꠣꠝ, ꠔꠥꠝꠞꠣ ꠎꠣꠔꠦ ꠢꠇꠟ ꠛꠦꠙꠣꠞꠦ ꠀꠟ-ꠝꠍꠤꠞ ꠝꠞ꠆ꠎꠤ ꠎꠥꠉꠣꠁꠀ ꠌꠟ ꠀꠞ ꠔꠣꠘ ꠃꠙꠎꠥꠇ꠆ꠔ ꠃꠝ꠆ꠝꠔꠞ ꠟꠣꠈꠣꠘ ꠎꠤꠘ꠆ꠖꠦꠉꠤ ꠇꠣꠐꠣꠅ। ꠢꠇ ꠇꠣꠝ ꠇꠞꠤ ꠇꠞꠤ ꠚꠟꠛꠣꠘ ꠅꠅ, ꠀꠞ ꠀꠟ꠆ꠟꠣ ꠙꠣꠇꠞꠦ ꠀꠞꠅ ꠜꠣꠟꠣ ꠇꠞꠤ ꠌꠤꠘꠅ।
COL 1:11 ꠀꠟ꠆ꠟꠣꠄ ꠔꠣꠘ ꠝꠢꠣ ꠇꠥꠖꠞꠔꠤ ꠛꠟꠦ ꠢꠇꠟ ꠘꠝꠥꠘꠣꠞ ꠛꠟ ꠖꠤꠀ ꠔꠥꠝꠞꠣꠞꠦ ꠛꠟꠛꠣꠘ ꠇꠞꠃꠇ꠆ꠇꠣ। ꠛꠣꠟꠣ-ꠝꠍꠤꠛꠔꠅ ꠙꠠꠟꠦꠅ ꠈꠥꠡꠤ-ꠛꠣꠡꠤ ꠞꠁꠀ ꠍꠛꠞ ꠇꠞꠣꠞ ꠔꠚꠤꠇ ꠖꠦꠃꠇ꠆ꠇꠣ।
COL 1:12 ꠀꠞ ꠢꠇꠟ ꠡꠝꠄ ꠛꠦꠢꠦꠡ꠆ꠔꠤ ꠛꠣꠚ ꠀꠟ꠆ꠟꠣ ꠙꠣꠇꠞ ꠡꠥꠇꠞꠤꠀ ꠎꠣꠘꠣꠅ। ꠀꠟ꠆ꠟꠣꠞ ꠙꠣꠇ ꠛꠘ꠆ꠖꠣ ꠅꠇꠟꠦ ꠘꠥꠞꠞ ꠛꠣꠖꠡꠣꠁꠔ ꠎꠦ ꠅꠗꠤꠇꠣꠞ ꠙꠣꠁꠛꠣ, ꠁꠔꠣꠞ ꠜꠣꠉꠤ ꠅꠀꠞ ꠟꠣꠉꠤ ꠔ ꠔꠣꠁꠘꠃ ꠔꠥꠝꠞꠣꠞꠦ ꠃꠙꠎꠥꠇ꠆ꠔ ꠛꠣꠘꠣꠁꠍꠂꠘ।
COL 1:13 ꠔꠣꠁꠘꠃ ꠀꠝꠞꠣꠞꠦ ꠀꠘ꠆ꠖꠣꠁꠞꠞ ꠛꠣꠖꠡꠣꠁ ꠕꠣꠇꠤ ꠃꠖ꠆ꠖꠣꠞ ꠇꠞꠤꠀ, ꠔꠣꠘ ꠈꠣꠍ ꠝꠣꠄꠀꠞ ꠎꠘꠞ ꠛꠣꠖꠡꠣꠁꠔ ꠀꠘꠍꠂꠘ।
COL 1:14 ꠅꠃ ꠝꠣꠄꠀꠞ ꠎꠘꠞ ꠃꠙꠞꠦ ꠁꠝꠣꠘ ꠀꠘꠣꠄ ꠀꠝꠞꠣ ꠞꠦꠢꠣꠁ ꠙꠣꠁꠍꠤ, ꠝꠣꠘꠤ ꠉꠥꠘꠣ ꠕꠣꠇꠤ ꠝꠣꠚꠤ ꠙꠣꠁꠍꠤ।
COL 1:15 ꠅꠃ ꠝꠣꠄꠀꠞ ꠎꠘꠃ ꠅꠁꠟꠣ, ꠛꠣꠔꠥꠘꠤ ꠀꠟ꠆ꠟꠣꠞ ꠎꠣꠁꠞꠤ ꠍꠥꠞꠔ; ꠢꠇ꠆ꠇꠟꠔꠣ ꠙꠄꠖꠣ ꠇꠞꠣꠞ ꠀꠉꠦ ꠔꠣꠁꠘ ꠀꠍꠟꠣ, ꠀꠞ ꠙꠄꠖꠣ ꠅꠀ ꠢꠇ꠆ꠇꠟꠔꠣꠞ ꠝꠣꠎꠦ ꠔꠣꠁꠘꠃ ꠙꠞꠗꠣꠘ।
COL 1:16 ꠀꠍꠝꠣꠘ-ꠎꠝꠤꠘꠞ ꠝꠣꠎꠦ ꠖꠦꠈꠣ ꠀꠞ ꠀ-ꠖꠦꠈꠣ ꠎꠔꠔꠣ ꠀꠍꠦ, ꠁꠔꠣ ꠛꠣꠖꠡꠣꠁ ꠅꠃꠇ ꠛꠣ ꠛꠣꠢꠣꠖꠥꠞꠤ, ꠡꠣꠡꠘ ꠇꠤꠛꠣ ꠈꠦꠝꠔꠣ ꠅꠃꠇ, ꠢꠇ꠆ꠇꠟꠔꠣꠃ ꠔꠣꠘ ꠀꠔꠞ ꠙꠄꠖꠣ। ꠁꠔꠣ ꠔ ꠈꠣꠟꠤ ꠔꠣꠘ ꠟꠣꠉꠤꠃ ꠙꠄꠖꠣ ꠇꠞꠣ ꠅꠁꠍꠦ।
COL 1:17 ꠢꠇ꠆ꠇꠟꠔꠣꠞ ꠙꠄꠟꠣ ꠔꠣꠁꠘ ꠀꠍꠟꠣ ꠀꠞ ꠔꠣꠘ ꠝꠣꠎꠖꠤꠀꠃ ꠢꠇꠟꠔꠣ ꠐꠤꠇꠤꠀ ꠀꠍꠦ।
COL 1:18 ꠔꠣꠁꠘꠃ ꠔꠣꠘ ꠡꠞꠤꠟꠞ ꠝꠣꠕꠣ, ꠝꠣꠘꠤ ꠎꠝꠣꠔꠞ ꠝꠣꠕꠣ। ꠔꠣꠁꠘꠃ ꠢꠇ꠆ꠇꠟꠔꠣꠞ ꠙꠄꠟꠣ, ꠀꠞ ꠔꠣꠁꠘꠃ ꠙꠄꠟꠣ ꠝꠥꠞ꠆ꠖꠣ ꠕꠣꠇꠤ ꠎꠤꠘ꠆ꠖꠣ ꠅꠁꠍꠂꠘ, ꠎꠣꠔꠦ ꠢꠇꠟ ꠛꠦꠙꠣꠞꠦ ꠔꠣꠁꠘꠃ ꠙꠞꠗꠣꠘ ꠅꠁꠔꠣ ꠙꠣꠞꠂꠘ।
COL 1:19 ꠀꠟ꠆ꠟꠣꠄ ꠌꠣꠁꠟꠣ, ꠔꠣꠘ ꠀꠟ꠆ꠟꠣꠁ ꠉꠥꠘꠞ ꠢꠇ꠆ꠇꠟꠔꠣ ꠎꠣꠘꠥ ꠀꠟ-ꠝꠍꠤꠞ ꠝꠣꠎꠦ ꠕꠣꠇꠦ।
COL 1:20 ꠀꠞ ꠖꠥꠘꠤꠀꠔ ꠛꠣ ꠛꠦꠢꠦꠡ꠆ꠔꠅ ꠎꠦꠘꠅꠃ ꠅꠄ ꠘꠣ ꠇꠦꠘꠦ, ꠅꠃ ꠀꠟ-ꠝꠍꠤꠞ ꠝꠣꠎꠖꠤꠀ ꠎꠣꠘꠥ ꠢꠇ꠆ꠇꠟꠔꠣꠞ ꠟꠉꠦ ꠔꠣꠘ ꠝꠤꠟꠘ ꠅꠄ। ꠔꠣꠁꠘ ꠌꠣꠁꠟꠣ, ꠍꠟꠤꠛꠞ ꠃꠙꠞꠦ ꠀꠟ-ꠝꠍꠤꠞ ꠇꠥꠞꠛꠣꠘꠤꠞ ꠟꠃꠞ ꠛꠖꠟꠣ ꠡꠣꠘ꠆ꠔꠤ ꠇꠣꠁꠝꠞ ꠝꠣꠎꠖꠤ ꠅꠃ ꠝꠤꠟꠘ ꠅꠃꠇ।
COL 1:21 ꠔꠥꠝꠞꠣ ꠔ ꠄꠇ ꠡꠝꠄ ꠀꠟ꠆ꠟꠣꠞ ꠉꠦꠍ ꠕꠣꠇꠤ ꠖꠥꠞꠁ ꠀꠍꠟꠣꠄ, ꠀꠞ ꠔꠣꠘ ꠛꠦꠙꠣꠞꠦ ꠔꠥꠝꠞꠣꠞ ꠖꠤꠟꠅ ꠖꠥꠡꠝꠘꠤ ꠜꠣꠛ ꠀꠍꠤꠟ। ꠁꠔꠣ ꠔꠥꠝꠞꠣꠞ ꠛꠖ ꠇꠣꠝꠞ ꠝꠣꠎꠖꠤ ꠎꠣꠁꠞ ꠅꠁꠍꠦ।
COL 1:22 ꠅꠁꠟꠦ ꠀꠟ-ꠝꠍꠤꠞ ꠎꠣꠘ ꠇꠥꠞꠛꠣꠘꠤꠞ ꠝꠣꠎꠖꠤ ꠀꠟ꠆ꠟꠣꠄ ꠔꠥꠝꠞꠣꠞꠦꠅ ꠔꠣꠘ ꠟꠉꠦ ꠝꠤꠟꠘ ꠊꠐꠣꠁꠍꠂꠘ, ꠎꠣꠔꠦ ꠔꠥꠝꠞꠣꠞꠦ ꠙꠣꠇ-ꠙꠛꠤꠔ꠆ꠞ, ꠘꠤꠈꠥꠔ ꠀꠞ ꠘꠤ-ꠅꠙꠞꠣꠗꠤ ꠢꠣꠟꠔꠦ ꠔꠣꠘ ꠍꠣꠝꠘꠦ ꠀꠎꠤꠞ ꠇꠞꠔꠣ ꠙꠣꠞꠂꠘ।
COL 1:23 ꠔꠦ ꠀꠟ-ꠝꠍꠤꠞ ꠛꠦꠙꠣꠞꠦ ꠈꠥꠡ-ꠈꠛꠞꠤ ꠕꠣꠇꠤ ꠎꠦ ꠘꠤꠌ꠆ꠌꠤꠔ ꠀꠡꠣ ꠔꠥꠝꠞꠣ ꠙꠣꠁꠍ, ꠈꠣꠟꠤ ꠅꠃ ꠀꠡꠣꠞ ꠃꠙꠞꠦ ꠁꠝꠣꠘꠦ ꠕꠤꠞ ꠞꠁꠅ, ꠁꠘ ꠕꠣꠇꠤ ꠟꠠꠤꠅ ꠘꠣ। ꠔꠥꠝꠞꠣ ꠔ ꠎꠣꠘ, ꠁ ꠈꠥꠡ-ꠈꠛꠞꠤ ꠢꠣꠞꠣ ꠖꠥꠘꠤꠀꠔ ꠔꠛꠟꠤꠉ ꠇꠞꠣ ꠅꠁꠍꠦ, ꠀꠝꠤ ꠙꠣꠃꠟꠥꠍꠅ ꠅꠃ ꠈꠥꠡ-ꠈꠛꠞꠤ ꠔꠛꠟꠤꠉꠞ ꠈꠣꠖꠤꠝ ꠅꠁꠍꠤ।
COL 1:24 ꠔꠥꠝꠞꠣꠞ ꠟꠣꠉꠤ ꠀꠝꠤ ꠖꠥꠈ-ꠝꠍꠤꠛꠔ ꠡꠁꠎ꠆ꠎ ꠇꠞꠣꠄ ꠈꠥꠛ ꠀꠘꠘ꠆ꠖ ꠙꠣꠁꠞꠣꠝ। ꠎꠣꠘ ꠔ, ꠀꠟ-ꠝꠍꠤꠞ ꠡꠞꠤꠟ ꠝꠣꠘꠤ ꠎꠝꠣꠔꠞ ꠟꠣꠉꠤ ꠔꠣꠘ ꠎꠦ ꠖꠥꠈ-ꠝꠍꠤꠛꠔ ꠅꠈꠘꠅ ꠛꠣꠇꠤ ꠀꠍꠦ, ꠁꠔꠣ ꠅꠈꠘ ꠀꠝꠣꠞ ꠡꠞꠤꠟ ꠖꠤꠀ ꠙꠥꠞꠣ ꠇꠞꠤꠀꠞ।
COL 1:25 ꠀꠟ꠆ꠟꠣ ꠙꠣꠇꠦ ꠔꠣꠘ ꠙꠛꠤꠔ꠆ꠞ ꠇꠣꠟꠣꠝ ꠔꠥꠝꠞꠣꠞ ꠉꠦꠍꠦ ꠙꠥꠞꠣꠙꠥꠞ ꠔꠛꠟꠤꠉ ꠇꠞꠣꠞ ꠜꠣꠞ ꠀꠝꠣꠞꠦ ꠖꠤꠍꠂꠘ, ꠉꠔꠤꠇꠦꠃ ꠀꠝꠤ ꠎꠝꠣꠔꠞ ꠄꠇꠎꠘ ꠈꠦꠎꠝꠔꠇꠣꠞꠤ ꠅꠁꠍꠤ।
COL 1:26 ꠀꠟ꠆ꠟꠣꠞ ꠇꠣꠟꠣꠝꠞ ꠎꠦ ꠛꠣꠔꠥꠘꠤ ꠛꠦꠙꠣꠞ ꠀꠉꠞ ꠎꠝꠣꠘꠣꠞ ꠝꠣꠘꠡꠞ ꠉꠦꠍꠦ ꠎꠥꠉ ꠎꠥꠉ ꠗꠞꠤ ꠟꠥꠇꠣꠁꠟ ꠀꠍꠤꠟ, ꠁꠔꠣ ꠅꠈꠘ ꠔꠣꠘ ꠙꠣꠇ ꠛꠘ꠆ꠖꠣ ꠅꠇꠟꠞ ꠉꠦꠍꠦ ꠎꠣꠁꠞ ꠇꠞꠣ ꠅꠁꠍꠦ।
COL 1:27 ꠀꠟ꠆ꠟꠣꠄ ꠌꠣꠁꠍꠂꠘ, ꠜꠤꠘ ꠎꠣꠔꠤ ꠅꠇꠟꠞ ꠉꠦꠍꠦꠅ ꠔꠣꠘ ꠛꠣꠔꠥꠘꠤ ꠝꠥꠘꠡꠣꠞ ꠉꠃꠞꠛ ꠎꠦ ꠇꠤꠔꠣ, ꠁꠔꠣ ꠎꠦꠘꠥ ꠔꠣꠘ ꠢꠇꠟ ꠛꠘ꠆ꠖꠣ ꠅꠇꠟꠦ ꠎꠣꠘꠔꠣ ꠙꠣꠞꠂꠘ। ꠀꠍꠟꠦ ꠀꠟ-ꠝꠍꠤ ꠔꠥꠝꠞꠣꠞ ꠖꠤꠟꠅ ꠀꠍꠂꠘ, ꠉꠔꠤꠇꠦ ꠔꠥꠝꠞꠣ ꠉꠃꠞꠛ ꠙꠣꠅꠀꠞ ꠀꠡꠣ ꠙꠣꠁꠍ।
COL 1:28 ꠀꠞ ꠅꠃ ꠀꠟ-ꠝꠍꠤꠞ ꠛꠦꠙꠣꠞꠦ ꠀꠝꠞꠣ ꠔꠛꠟꠤꠉ ꠇꠞꠤꠀꠞ, ꠀꠟ꠆ꠟꠣꠞ ꠖꠦꠅꠀ ꠀꠈꠟ-ꠢꠦꠇꠝꠔ ꠖꠤꠀ ꠝꠣꠘꠡꠞꠦ ꠢꠥꠡꠤꠀꠞ ꠇꠞꠤꠀꠞ ꠀꠞ ꠔꠣꠟꠤꠝ ꠖꠤꠀꠞ ꠎꠣꠔꠦ ꠀꠟ-ꠝꠍꠤꠞ ꠔꠞꠤꠇꠣꠔ ꠙꠥꠞꠣꠙꠥꠞ ꠇꠣꠝꠤꠟ ꠢꠣꠟꠔꠦ ꠔꠣꠞꠣꠞꠦ ꠀꠟ꠆ꠟꠣꠞ ꠖꠞꠛꠣꠞꠅ ꠀꠎꠤꠞ ꠇꠞꠔꠣꠝ ꠙꠣꠞꠤ।
COL 1:29 ꠅꠃ ꠘꠤꠅꠔꠦ ꠀꠟ꠆ꠟꠣꠞ ꠎꠦ ꠇꠥꠖꠞꠔꠤ ꠛꠟ ꠀꠝꠣꠞ ꠝꠣꠎꠦ ꠇꠣꠝ ꠇꠞꠦꠞ, ꠅꠃ ꠇꠥꠖꠞꠔꠤ ꠛꠟꠦꠃ ꠀꠝꠤ ꠖꠤꠟꠦ-ꠎꠣꠘꠦ ꠝꠦꠘꠔ ꠇꠞꠤꠀꠞ।
COL 2:1 ꠀꠝꠤ ꠔꠥꠝꠞꠣꠞꠦ ꠎꠣꠘꠣꠁꠔꠣꠝ ꠌꠣꠁꠞꠣꠝ, ꠀꠝꠤ ꠔ ꠔꠥꠝꠞꠣꠞ ꠟꠣꠉꠤ, ꠟꠣꠅꠖꠤꠇꠦꠀ ꠐꠣꠃꠘꠞ ꠎꠝꠣꠔꠞ ꠟꠣꠉꠤ, ꠀꠞ ꠎꠦꠞꠣ ꠀꠝꠣꠞꠦ ꠖꠦꠈꠍꠦ ꠘꠣ ꠔꠣꠞꠣꠞ ꠟꠣꠉꠤꠅ ꠇꠔ ꠝꠦꠘꠔ ꠇꠞꠞꠣꠝ।
COL 2:2 ꠀꠝꠤ ꠌꠣꠁꠞꠣꠝ, ꠔꠣꠞꠣꠞ ꠖꠤꠟꠅ ꠜꠞꠡꠣ ꠙꠣꠁꠀ ꠝꠢꠛ꠆ꠛꠔꠦ ꠄꠇ ꠅꠃꠇ। ꠀꠞ ꠙꠥꠞꠣꠙꠥꠞ ꠀꠈꠟꠦ ꠀꠈꠟꠖꠣꠞ ꠛꠘꠤꠀ ꠘꠤꠌ꠆ꠌꠤꠔ ꠅꠃꠇ। ꠔꠦꠃ ꠀꠟ꠆ꠟꠣꠞ ꠟꠥꠇꠣꠁꠟ ꠛꠣꠔꠥꠘꠤ ꠜꠦꠖ ꠛꠥꠎꠛ, ꠝꠣꠘꠤ ꠀꠟ-ꠝꠍꠤꠞꠦ ꠔꠣꠞꠣ ꠌꠤꠘꠛ।
COL 2:3 ꠀꠟ-ꠝꠍꠤꠞ ꠝꠣꠎꠦꠃ ꠢꠇꠟ ꠀꠈꠟ-ꠢꠦꠇꠝꠔ ꠟꠥꠇꠣꠁꠟ ꠀꠍꠦ।
COL 2:4 ꠀꠝꠤ ꠁꠔꠣ ꠇꠁꠟꠣꠝ, ꠎꠣꠔꠦ ꠇꠦꠃ ꠛꠣꠘꠥꠀꠐ ꠝꠣꠔ-ꠇꠕꠣ ꠝꠣꠔꠤꠀ ꠔꠥꠝꠞꠣꠞꠦ ꠛꠦ-ꠙꠕꠦ ꠘꠤꠔ ꠘꠣ ꠙꠣꠞꠦ।
COL 2:5 ꠀꠝꠤ ꠡ-ꠡꠞꠤꠟꠦ ꠔꠥꠝꠞꠣꠞ ꠝꠣꠎꠦ ꠘꠣ ꠕꠣꠇꠟꠦꠅ ꠞꠥꠢꠥꠞ ꠛꠟꠦ ꠑꠤꠇꠃ ꠔꠥꠝꠞꠣꠞ ꠝꠣꠎꠦ ꠀꠎꠤꠞ ꠀꠍꠤ। ꠔꠥꠝꠞꠣꠞ ꠜꠣꠟꠣ ꠌꠣꠟ-ꠌꠟꠘ ꠀꠞ ꠀꠟ-ꠝꠍꠤꠞ ꠃꠙꠞꠦ ꠝꠎꠛꠥꠔ ꠁꠝꠣꠘ ꠖꠦꠈꠤꠀ ꠀꠝꠣꠞ ꠈꠥꠛ ꠜꠣꠟꠣ ꠟꠣꠉꠦꠞ।
COL 2:6 ꠁꠍꠣ ꠀꠟ-ꠝꠍꠤꠞꠦ ꠔꠥꠝꠞꠣ ꠝꠣꠟꠤꠇ ꠢꠤꠡꠣꠛꠦ ꠎꠦꠟꠣ ꠇꠛꠥꠟ ꠇꠞꠍ, ꠅꠃ ꠟꠣꠈꠣꠘ ꠔꠣꠘ ꠟꠉꠦ ꠞꠁꠀ ꠎꠤꠘ꠆ꠖꠦꠉꠤꠅ ꠇꠣꠐꠣꠅ।
COL 2:7 ꠀꠟ-ꠝꠍꠤꠞ ꠝꠣꠎꠦ ꠡꠥꠟ꠆ꠟꠀꠘꠣ ꠒꠥꠛ ꠖꠤꠀ ꠔꠥꠝꠞꠣꠞ ꠎꠤꠘ꠆ꠖꠦꠉꠤꠞꠦ ꠉꠠꠤꠀ ꠔꠥꠟꠅ। ꠔꠥꠝꠞꠣ ꠔꠣꠟꠤꠝ ꠙꠣꠁꠀ ꠎꠦ ꠁꠝꠣꠘ ꠀꠘꠍ, ꠅꠃ ꠁꠝꠣꠘꠦ ꠝꠎꠛꠥꠔ ꠞꠅ ꠀꠞ ꠢꠣꠝꠦꠡꠣ ꠀꠟ꠆ꠟꠣ ꠙꠣꠇꠞ ꠡꠥꠇꠞꠤꠀ ꠀꠖꠣꠄ ꠇꠞꠅ।
COL 2:8 ꠔꠥꠝꠞꠣ ꠢꠥꠡꠤꠀꠞ ꠞꠁꠅ, ꠇꠦꠃ ꠎꠣꠘꠥ ꠔꠥꠝꠞꠣꠞꠦ ꠝꠣꠘꠡꠞ ꠛꠣꠘꠣꠁꠟ ꠝꠘꠉꠠꠣ ꠔꠣꠟꠤꠝꠖꠤ ꠛꠣꠘ꠆ꠖꠤꠀ ꠛꠦ-ꠙꠕꠦ ꠐꠣꠘꠤꠀ ꠘꠤꠔ ꠘꠣ ꠙꠣꠞꠦ। ꠀꠟ-ꠝꠍꠤꠞ ꠟꠉꠦ ꠁ ꠔꠣꠟꠤꠝꠞ ꠇꠥꠘꠥ ꠝꠤꠟ ꠘꠣꠁ, ꠁꠔꠣ ꠔ ꠝꠣꠘꠡꠞ ꠝꠘꠉꠠꠣ ꠞꠍꠥꠝꠔ ꠀꠞ ꠖꠥꠘꠤꠀꠛꠤ ꠘꠣꠘꠣꠘ ꠀꠌꠣꠞ-ꠛꠦꠛꠢꠣꠞꠞ ꠃꠙꠞꠦ ꠜꠞꠡꠣ ꠇꠞꠦ।
COL 2:9 ꠀꠟ꠆ꠟꠣꠞ ꠢꠇ꠆ꠇꠟ ꠟꠣꠈꠣꠘ ꠉꠥꠘꠣꠉꠥꠘ ꠀꠟ-ꠝꠍꠤꠞ ꠇꠣꠄꠀꠞ ꠜꠤꠔꠞꠦ ꠀꠍꠦ।
COL 2:10 ꠄꠞꠟꠣꠉꠤ ꠀꠟ-ꠝꠍꠤꠞ ꠟꠉꠦ ꠡꠞꠤꠇ ꠅꠁꠀ ꠔꠥꠝꠞꠣꠅ ꠢꠇꠟ ꠉꠥꠘꠦ ꠇꠣꠝꠤꠟ ꠅꠁꠍ, ꠔꠣꠘ ꠀꠡꠘ ꠔ ꠢꠇꠟ ꠘꠝꠥꠘꠣꠞ ꠡꠣꠡꠘꠇꠣꠞꠤ ꠀꠞ ꠈꠦꠝꠔꠣꠀꠟꠣ ꠢꠇ꠆ꠇꠟꠔꠣꠞ ꠃꠙꠞꠦ।
COL 2:11 ꠀꠟ-ꠝꠍꠤꠞ ꠃꠙꠞꠦ ꠁꠝꠣꠘ ꠀꠘꠣꠄ ꠔ ꠔꠥꠝꠞꠣꠞꠦ ꠝꠍꠟꠝꠣꠘꠤ ꠇꠣꠝ ꠇꠞꠣꠁꠟ ꠅꠁꠍꠦ। ꠅꠃ ꠝꠍꠟꠝꠣꠘꠤ ꠇꠥꠘꠥ ꠝꠣꠘꠡꠞ ꠀꠔꠦ ꠇꠞꠣꠁꠟ ꠅꠁꠍꠦ ꠘꠣ, ꠀꠟ-ꠝꠍꠤꠄ ꠘꠤꠎꠦꠃ ꠁꠔꠣ ꠇꠞꠍꠂꠘ, ꠝꠣꠘꠤ ꠖꠤꠟꠞ ꠝꠣꠎꠦ ꠎꠦ ꠛꠖ ꠈꠣꠁꠡ ꠀꠍꠤꠟ, ꠅꠃ ꠛꠖ ꠈꠣꠁꠡꠞꠦ ꠖꠤꠟ ꠕꠣꠇꠤ ꠇꠣꠐꠤꠀ ꠚꠣꠟꠣꠁꠍꠂꠘ।
COL 2:12 ꠔꠃꠛꠣꠞ ꠉꠥꠍꠟꠞ ꠝꠣꠎꠖꠤ ꠀꠟ-ꠝꠍꠤꠞ ꠟꠉꠦ ꠔꠥꠝꠞꠣꠞꠦꠅ ꠝꠣꠐꠤ ꠖꠦꠅꠀ ꠅꠁꠍꠤꠟ, ꠀꠞ ꠎꠦꠁꠘ ꠀꠟ-ꠝꠍꠤꠞꠦ ꠝꠥꠞ꠆ꠖꠣ ꠕꠣꠇꠤ ꠎꠤꠘ꠆ꠖꠣ ꠇꠞꠍꠂꠘ, ꠢꠃ ꠀꠟ꠆ꠟꠣꠞ ꠇꠥꠖꠞꠔꠤ ꠛꠟꠦ ꠁꠝꠣꠘꠞ ꠝꠣꠎꠖꠤ ꠔꠥꠝꠞꠣꠞꠦꠅ ꠀꠟ-ꠝꠍꠤꠞ ꠟꠉꠦ ꠎꠤꠘ꠆ꠖꠣ ꠇꠞꠣ ꠅꠁꠍꠦ।
COL 2:13 ꠔꠥꠝꠞꠣꠞ ꠉꠥꠘꠣ ꠀꠞ ꠖꠤꠟꠞ ꠛꠖ ꠈꠣꠁꠡ ꠘꠣ ꠢꠞꠣꠘꠤꠄ ꠝꠥꠞ꠆ꠖꠣ ꠀꠍꠟꠣꠄ, ꠅꠁꠟꠦ ꠀꠟ꠆ꠟꠣꠄ ꠔꠥꠝꠞꠣꠞꠦ ꠀꠟ-ꠝꠍꠤꠞ ꠟꠉꠦ ꠎꠤꠘ꠆ꠖꠣ ꠇꠞꠍꠂꠘ। ꠔꠣꠁꠘ ꠀꠝꠞꠣꠞ ꠢꠇꠟ ꠉꠥꠘꠣꠞ ꠝꠣꠚꠤ ꠖꠤꠍꠂꠘ।
COL 2:14 ꠀꠞ ꠀꠝꠞꠣꠞ ꠛꠖ ꠀꠝꠟ-ꠘꠣꠝꠣꠞ ꠎꠦ ꠖꠟꠤꠟ ꠀꠍꠤꠟ, ꠅꠃ ꠖꠟꠤꠟꠞꠦ ꠢꠇꠟ ꠎꠣꠔꠞ ꠖꠣꠛꠤ-ꠖꠣꠅꠀ ꠡꠥꠖ꠆ꠖꠣ ꠚꠥꠍꠤꠀ ꠚꠣꠟꠣꠁꠍꠂꠘ। ꠟꠣꠇꠠꠤꠖꠤ ꠛꠣꠘꠣꠁꠟ ꠎꠦ ꠍꠟꠤꠛꠅ ꠁꠍꠣꠞꠦ ꠎꠣꠘꠦ ꠝꠣꠞꠣ ꠅꠁꠍꠦ, ꠅꠃ ꠍꠟꠤꠛꠅ ꠁ ꠖꠟꠤꠟꠞꠦ ꠙꠦꠞꠦꠉ ꠝꠣꠞꠤꠀ ꠛꠣꠔꠤꠟ ꠇꠞꠍꠂꠘ।
COL 2:15 ꠀꠟ-ꠝꠍꠤꠄ ꠛꠖ ꠡꠣꠡꠘꠇꠣꠞꠤ ꠀꠞ ꠈꠦꠝꠔꠣꠀꠟꠣ ꠢꠇ꠆ꠇꠟꠞ ꠈꠦꠝꠔꠣꠞꠦ ꠛꠤꠘꠣꠡ ꠇꠞꠍꠂꠘ। ꠍꠟꠤꠛꠅ ꠔꠣꠘ ꠘꠤꠎꠞ ꠎꠣꠘ ꠇꠥꠞꠛꠣꠘꠤꠞ ꠝꠣꠎꠖꠤ ꠔꠣꠞꠣꠞ ꠃꠙꠞꠦ ꠎꠄꠁ ꠅꠁꠍꠂꠘ ꠀꠞ ꠢꠇꠟꠞ ꠍꠣꠝꠘꠦ ꠔꠣꠞꠣꠞ ꠝꠥꠈ ꠘꠤꠌꠣ ꠇꠞꠍꠂꠘ।
COL 2:16 ꠄꠞꠟꠣꠉꠤꠃ ꠡꠤꠘ꠆ꠘꠤ-ꠍꠈꠣꠔ, ꠙꠥꠎꠣ-ꠙꠡꠣꠖ ꠅꠝꠣꠛꠁꠡ꠆ꠡꠣ-ꠙꠥꠘ꠆ꠘꠤꠝꠣ, ꠁꠖ ꠛꠣ ꠎꠥꠝ꠆ꠝꠣꠛꠣꠞꠞ ꠘꠤꠅꠝ-ꠇꠣꠘꠥꠘ ꠟꠁꠀ ꠔꠥꠝꠞꠣꠞꠦ ꠖꠥꠡꠤ ꠇꠞꠣꠞ ꠄꠈꠔꠤꠀꠞ ꠇꠦꠃꠞꠞ ꠘꠣꠁ।
COL 2:17 ꠁꠔꠣ ꠔ ꠀꠍꠤꠟ, ꠜꠛꠤꠡꠔꠦ ꠎꠦꠔꠣ ꠀꠁꠛ ꠅꠔꠣꠞ ꠄꠇꠐꠣ ꠘꠝꠥꠘꠣ ꠝꠣꠔ꠆ꠞ, ꠅꠁꠟꠦ ꠀꠍꠟꠔꠣ ꠔ ꠀꠟ-ꠝꠍꠤꠞ ꠝꠣꠎꠦꠃ ꠀꠍꠦ।
COL 2:18 ꠎꠦꠞꠣ ꠘꠤꠎꠞ ꠡꠞꠤꠟꠞꠦ ꠇꠡ꠆ꠐ ꠖꠦꠅꠀ ꠀꠞ ꠚꠤꠞꠤꠡ꠆ꠔꠣ ꠅꠇꠟꠞ ꠄꠛꠣꠖꠔ ꠇꠞꠣꠞꠦ ꠎꠞꠥꠞꠤ ꠝꠘꠅ ꠇꠞꠦ, ꠄꠞꠣ ꠎꠣꠘꠥ ꠔꠥꠝꠞꠣꠞꠦ ꠙꠥꠞꠥꠡ꠆ꠇꠣꠞꠞ ꠙꠕ ꠕꠣꠇꠤ ꠢꠞꠣꠁꠔ ꠘꠣ ꠙꠣꠞꠦ। ꠅꠃ ꠘꠝꠥꠘꠣꠞ ꠝꠣꠘꠡꠦ ꠎꠦꠔꠣ ꠖꠦꠈꠍꠦ ꠇꠁꠀ ꠈꠣꠝꠈꠣ ꠛꠠꠣꠁ-ꠛꠦꠐꠣꠉꠤꠞꠤ ꠇꠞꠦ, ꠀꠞ ꠅꠔꠣ ꠟꠁꠀ ꠛꠠ ꠛꠠ ꠉꠚ ꠝꠣꠞꠦ, ꠀꠍꠟꠦ ꠄꠞꠣꠞ ꠅꠘ꠆ꠔꠞ ꠔ ꠈꠣꠟꠤ ꠖꠥꠘꠤꠀꠛꠤ ꠌꠤꠘ꠆ꠔꠣꠄ ꠜꠞꠣ।
COL 2:19 ꠔꠣꠞꠣ ꠔ ꠝꠣꠕꠣꠞꠦ, ꠝꠣꠘꠤ ꠁꠍꠣ ꠀꠟ-ꠝꠍꠤꠞꠦ ꠝꠎꠛꠥꠔ ꠇꠞꠤ ꠗꠞꠤꠀ ꠞꠣꠈꠦ ꠘꠣ, ꠅꠃ ꠝꠣꠕꠣꠞ ꠈꠦꠝꠔꠣꠄ ꠀꠡ꠆ꠔꠣ ꠡꠞꠤꠟꠞ ꠀꠒ꠆ꠒꠤ-ꠝꠣꠋꠡ ꠛꠟ-ꠡꠇ꠆ꠔꠤ ꠙꠣꠁꠀ ꠄꠇꠈꠣꠘꠅ ꠞꠄ, ꠀꠞ ꠀꠟ꠆ꠟꠣꠁ ꠛꠟꠦ ꠛꠣꠠꠦ।
COL 2:20 ꠀꠟ-ꠝꠍꠤꠞ ꠟꠉꠦ ꠝꠣꠞꠣ ꠉꠤꠀ ꠔꠥꠝꠞꠣ ꠎꠦꠛꠟꠣ ꠖꠥꠘꠤꠀꠛꠤ ꠢꠇꠟ ꠌꠣꠟ-ꠌꠟꠘ ꠕꠣꠇꠤ ꠢꠞꠤꠀ ꠀꠁꠍ, ꠔꠦ ꠢꠤꠞꠛꠣꠞ ꠇꠦꠘꠦ ꠖꠥꠘꠤꠀꠛꠤ ꠝꠣꠘꠡꠞ ꠟꠣꠈꠣꠘ ꠖꠥꠘꠤꠀꠛꠤ ꠘꠤꠅꠝ-ꠘꠤꠔꠤꠞ ꠉꠥꠟꠣꠝ ꠅꠁꠞꠣꠄ?
COL 2:21 ꠢꠥꠘꠅ, ꠎꠦ ꠎꠤꠘꠤꠡ ꠛꠦꠛꠢꠣꠞ ꠇꠞꠔꠦ ꠇꠞꠔꠦ ꠛꠞꠛꠣꠖ ꠅꠁꠎꠣꠄ, ꠅꠃ ꠎꠤꠘꠤꠡꠞ ꠛꠦꠙꠣꠞꠦ ꠅꠟꠣ ꠘꠤꠅꠝ ꠀꠍꠦ, ꠁꠔꠣ ꠗꠞꠤꠅ ꠘꠣ, ꠍꠁꠅ ꠘꠣ, ꠈꠣꠁꠅ ꠘꠣ। ꠁꠔꠣ ꠔ ꠈꠣꠟꠤ ꠝꠣꠘꠡꠞ ꠝꠘꠉꠠꠣ ꠢꠥꠇꠥꠝ ꠀꠞ ꠔꠣꠟꠤꠝ।
COL 2:23 ꠇꠦꠝꠘꠦ ꠄꠛꠣꠖꠔ ꠇꠞꠣ, ꠘꠤꠎꠞꠦ ꠘꠤꠌꠣ ꠇꠞꠣ, ꠇꠦꠝꠘꠦ ꠘꠤꠎꠞ ꠡꠞꠤꠟꠞꠦ ꠇꠡ꠆ꠐ ꠖꠦꠅꠀ, ꠅꠃ ꠘꠤꠅꠝ-ꠘꠤꠔꠤꠄ ꠅꠔꠣ ꠢꠤꠇꠣꠄ। ꠁ ꠘꠤꠅꠝ-ꠘꠤꠔꠤ ꠖꠦꠈꠟꠦ ꠝꠘꠅ ꠅꠄ, ꠁꠔꠣ ꠈꠥꠛ ꠀꠈꠟꠞ ꠇꠣꠝ, ꠅꠁꠟꠦ ꠖꠤꠟꠞ ꠛꠖ ꠈꠣꠁꠡꠞꠦ ꠖꠝꠘ ꠇꠞꠣꠞ ꠟꠣꠉꠤ ꠁꠔꠣꠞ ꠇꠥꠘꠥ ꠖꠣꠝꠃ ꠘꠣꠁ।
COL 3:1 ꠢꠥꠘꠅ, ꠔꠥꠝꠞꠣ ꠔ ꠀꠟ-ꠝꠍꠤꠞ ꠟꠉꠦ ꠝꠞꠣ ꠕꠣꠇꠤ ꠎꠤꠘ꠆ꠖꠣ ꠅꠁꠍ, ꠀꠞ ꠀꠟ-ꠝꠍꠤ ꠔ ꠛꠦꠢꠦꠡ꠆ꠔꠅ ꠀꠟ꠆ꠟꠣꠞ ꠒꠣꠁꠘꠞ ꠔꠈ꠆ꠔꠅ ꠛꠅꠀꠔ ꠀꠍꠂꠘ, ꠄꠞꠟꠣꠉꠤ ꠔꠥꠝꠞꠣꠅ ꠅꠃꠟꠣ ꠛꠦꠢꠦꠡ꠆ꠔꠤ ꠛꠦꠙꠣꠞ ꠟꠁꠀ ꠀꠡꠤꠇ ꠅꠅ।
COL 3:2 ꠖꠥꠘꠤꠀꠛꠤ ꠛꠦꠙꠣꠞꠦ ꠀꠡꠤꠇ ꠘꠣ ꠛꠘꠤꠀ, ꠛꠦꠢꠦꠡ꠆ꠔꠤ ꠛꠦꠙꠣꠞꠦ ꠀꠡꠤꠇ ꠅꠅ।
COL 3:3 ꠔꠥꠝꠞꠣ ꠔ ꠝꠣꠞꠣ ꠉꠦꠍ, ꠔꠥꠝꠞꠣꠞ ꠎꠤꠘ꠆ꠖꠦꠉꠤ ꠀꠟ-ꠝꠍꠤꠞ ꠟꠉꠦ ꠀꠟ꠆ꠟꠣꠞ ꠖꠞꠛꠣꠞꠅ ꠟꠥꠇꠣꠁꠟ ꠀꠍꠦ।
COL 3:4 ꠎꠦꠁꠘ ꠔꠥꠝꠞꠣꠞ ꠎꠤꠘ꠆ꠖꠦꠉꠤ, ꠢꠃ ꠀꠟ-ꠝꠍꠤ ꠎꠦꠛꠟꠣ ꠢꠇꠟꠞ ꠍꠣꠝꠘꠦ ꠎꠣꠁꠞ ꠅꠁꠛꠣ, ꠅꠃ ꠡꠝꠄ ꠔꠥꠝꠞꠣꠅ ꠔꠣꠘ ꠝꠢꠤꠝꠣꠞ ꠜꠣꠉꠤ ꠅꠁꠀ ꠔꠣꠘ ꠟꠉꠦ ꠎꠣꠁꠞ ꠅꠁꠛꠣꠄ।
COL 3:5 ꠄꠞꠟꠣꠉꠤ ꠉꠥꠘꠣꠞ ꠎꠦꠔꠣ ꠞꠤꠙꠥ ꠅꠇꠟ ꠔꠥꠝꠞꠣꠞ ꠎꠤꠘ꠆ꠖꠦꠉꠤꠔ ꠀꠍꠦ, ꠁꠔꠣꠞꠦ ꠄꠇꠖꠝ ꠛꠤꠘꠣꠡ ꠇꠞꠤꠟꠣꠅ। ꠁꠔꠣ ꠅꠁꠟ ꠢꠇ꠆ꠇꠟ ꠘꠝꠥꠘꠣꠞ ꠎꠤꠘꠣ, ꠘꠣꠙꠣꠇꠤ, ꠛꠖ ꠈꠣꠁꠡ, ꠇꠥ-ꠌꠤꠘ꠆ꠔꠣ, ꠀꠞ ꠟꠥꠜ-ꠟꠣꠟꠌ, ꠁ ꠟꠥꠜ-ꠟꠣꠟꠌ ꠅꠁꠟ ꠄꠇꠟꠣꠈꠣꠘ ꠝꠥꠞ꠆ꠔꠤꠙꠥꠎꠣ।
COL 3:6 ꠎꠣꠞꠣ ꠀꠟ꠆ꠟꠣꠞ ꠘꠣꠚꠞꠝꠣꠘꠤ ꠇꠞꠦ, ꠅꠔꠣꠞ ꠇꠣꠞꠘꠦꠃ ꠔꠣꠞꠣꠞ ꠃꠙꠞꠦ ꠀꠟ꠆ꠟꠣꠞ ꠉꠎꠛ ꠟꠣꠝꠤꠀ ꠀꠄ।
COL 3:7 ꠔꠥꠝꠞꠣꠅ ꠀꠉꠦ ꠅꠃ ꠟꠣꠈꠣꠘ ꠘꠣꠚꠞꠝꠣꠘꠤꠞ ꠝꠣꠎꠦ ꠎꠤꠘ꠆ꠖꠦꠉꠤ ꠇꠣꠐꠣꠁꠔꠣꠄ।
COL 3:8 ꠅꠁꠟꠦ ꠅꠈꠘ ꠞꠣꠉ-ꠉꠥꠍꠣ, ꠜꠤꠔꠞꠤ ꠖꠥꠡꠝꠘꠤ, ꠁꠋꠡꠣ-ꠘꠤꠘ꠆ꠖꠣ, ꠉꠣꠟꠣ-ꠉꠣꠟꠤ ꠀꠞ ꠈꠛꠤꠍꠤ ꠝꠣꠔ-ꠇꠕꠣ ꠔꠥꠝꠞꠣꠞ ꠉꠦꠍ ꠕꠣꠇꠤ ꠢꠞꠣꠁꠟꠣꠅ।
COL 3:9 ꠄꠇꠦ-ꠅꠁꠘ꠆ꠘꠦ ꠝꠤꠍꠣ ꠝꠣꠔꠤꠅ ꠘꠣ, ꠇꠣꠞꠘ ꠔꠥꠝꠞꠣꠞ ꠎꠤꠘ꠆ꠖꠦꠉꠤꠞ ꠙꠥꠞꠣꠘ ‘ꠀꠝꠤ’ꠞꠦ ꠔꠣꠞ ꠢꠇꠟ ꠀꠝꠟ ꠡꠥꠖ꠆ꠖꠣ ꠙꠥꠞꠣꠘ ꠇꠣꠙꠠꠞ ꠟꠣꠈꠣꠘ ꠚꠣꠟꠣꠁ ꠖꠤꠍ,
COL 3:10 ꠀꠞ ꠀꠟ꠆ꠟꠣꠞ ꠖꠦꠅꠀ ꠘꠄꠀ ‘ꠀꠝꠤ’ꠞꠦ ꠘꠄꠀ ꠇꠣꠙꠠꠞ ꠟꠣꠈꠣꠘ ꠚꠤꠘ꠆ꠖꠤꠍ। ꠅꠃ ꠘꠄꠀ ‘ꠀꠝꠤ’ ꠀꠞꠅ ꠘꠄꠀ ꠅꠁꠀ ꠔꠣꠞ ꠙꠄꠖꠣ ꠇꠞꠞꠣ ꠝꠣꠟꠤꠇꠞ ꠟꠣꠈꠣꠘ ꠛꠘꠦꠞ, ꠎꠣꠔꠦ ꠅꠃ ꠙꠄꠖꠣ ꠇꠞꠞꠣꠞꠦ ꠔꠥꠝꠞꠣ ꠙꠥꠞꠣꠙꠥꠞ ꠌꠤꠘ।
COL 3:11 ꠅꠃ ꠢꠣꠟꠔꠦ ꠁꠢꠥꠖꠤ ꠇꠤꠛꠣ ꠜꠤꠘ ꠎꠣꠔꠤ, ꠝꠍꠟꠝꠣꠘꠤ ꠇꠣꠝ ꠇꠞꠣꠁꠟ ꠛꠣ ꠘꠣ ꠇꠞꠣꠁꠟ, ꠅꠡꠤꠇ꠆ꠇꠤꠔ ꠛꠞꠛꠞ, ꠘꠤꠌꠣ ꠎꠣꠔꠤ, ꠉꠥꠟꠣꠝ ꠛꠣ ꠀꠎꠣꠖ ꠝꠣꠘꠡꠞ ꠝꠣꠎꠦ ꠇꠥꠘꠥ ꠔꠚꠣꠔ ꠘꠣꠁ। ꠁꠔꠣ ꠢꠇꠟꠔꠣꠞ ꠝꠣꠎꠦ ꠀꠟ-ꠝꠍꠤꠃ ꠙꠞꠗꠣꠘ, ꠢꠇꠟꠞ ꠝꠣꠎꠦꠃ ꠔꠣꠁꠘ ꠀꠍꠂꠘ।
COL 3:12 ꠔꠦ ꠀꠟ꠆ꠟꠣꠄ ꠎꠣꠞꠣꠞꠦ ꠙꠍꠘ꠆ꠖ ꠇꠞꠤꠀ ꠔꠣꠘ ꠘꠤꠎꠞ ꠟꠣꠉꠤ ꠀꠟꠉ ꠇꠞꠍꠂꠘ, ꠔꠣꠘ ꠢꠃ ꠝꠣꠄꠀꠞ ꠛꠘ꠆ꠖꠣ ꠢꠤꠡꠣꠛꠦ ꠔꠥꠝꠞꠣꠞ ꠖꠤꠟꠞ ꠝꠣꠄꠀ-ꠝꠝꠔꠣ, ꠖꠄꠀ, ꠘꠞꠝ ꠛꠦꠛꠢꠣꠞ, ꠘꠞꠝ ꠡ꠆ꠛꠜꠣꠛ ꠀꠞ ꠍꠛꠞ ꠖꠤꠀ ꠘꠤꠎꠞꠦ ꠢꠣꠎꠣꠅ।
COL 3:13 ꠄꠇꠦ-ꠅꠁꠘ꠆ꠘꠞꠦ ꠡꠁꠎ꠆ꠎ ꠇꠞꠅ, ꠇꠦꠃꠞꠞ ꠛꠤꠞꠥꠖ꠆ꠖꠦ ꠔꠥꠝꠞꠣꠞ ꠇꠥꠘꠥ ꠘꠣꠟꠤꠡ ꠕꠣꠇꠟꠦ ꠔꠣꠞꠦ ꠝꠣꠚ ꠇꠞꠤ ꠖꠦꠅ। ꠝꠣꠟꠤꠇꠦ ꠎꠦꠟꠣ ꠔꠥꠝꠞꠣꠞꠦ ꠝꠣꠚ ꠇꠞꠍꠂꠘ, ꠔꠥꠝꠞꠣꠅ ꠅꠃꠟꠣ ꠄꠇꠦ-ꠅꠁꠘ꠆ꠘꠦ ꠝꠣꠚ ꠇꠞꠣ ꠎꠞꠥꠞ।
COL 3:14 ꠀꠞ ꠁꠔꠣ ꠢꠇ꠆ꠇꠟꠔꠣꠞ ꠟꠉꠦ ꠝꠣꠄꠀ-ꠝꠢꠛ꠆ꠛꠔꠖꠤ ꠘꠤꠎꠞꠦ ꠢꠣꠎꠣꠅ। ꠝꠢꠛ꠆ꠛꠔꠦ ꠔ ꠢꠇꠟꠞꠦ ꠙꠥꠞꠣꠙꠥꠞ ꠄꠇꠟꠉꠦ ꠛꠣꠘ꠆ꠖꠤꠀ ꠞꠣꠈꠦ।
COL 3:15 ꠀꠟ-ꠝꠍꠤꠄ ꠎꠦ ꠡꠣꠘ꠆ꠔꠤ ꠖꠣꠘ ꠇꠞꠂꠘ, ꠅꠃ ꠡꠣꠘ꠆ꠔꠤ ꠔꠥꠝꠞꠣꠞ ꠖꠤꠟꠅ ꠞꠁꠀ ꠔꠥꠝꠞꠣꠞꠦ ꠌꠣꠟꠣꠃꠇ। ꠄꠇ ꠡꠞꠤꠟ ꠅꠁꠀ ꠡꠣꠘ꠆ꠔꠤꠞ ꠝꠣꠎꠦ ꠞꠁꠔꠣꠄ ꠇꠞꠤꠃ ꠔ ꠔꠥꠝꠞꠣꠞꠦ ꠖꠣꠅꠔ ꠖꠦꠅꠀ ꠅꠁꠍꠦ। ꠔꠥꠝꠞꠣ ꠡꠥꠇꠥꠞ-ꠉꠥꠎꠣꠞ ꠇꠞꠣꠔ ꠞꠅ।
COL 3:16 ꠀꠟ-ꠝꠍꠤꠞ ꠇꠣꠟꠣꠝꠞꠦ ꠔꠥꠝꠞꠣꠞ ꠖꠤꠟꠞ ꠝꠣꠎꠦ ꠙꠥꠞꠣꠙꠥꠞ ꠛꠡꠔ ꠇꠞꠔꠦ ꠖꠦꠅ। ꠀꠟ꠆ꠟꠣꠞ ꠖꠦꠅꠀ ꠀꠈꠟ ꠈꠣꠐꠣꠁꠀ ꠄꠇꠦ-ꠅꠁꠘ꠆ꠘꠞꠦ ꠔꠣꠟꠤꠝ ꠀꠞ ꠙꠞꠣꠝꠤꠡ ꠖꠦꠅ। ꠀꠟ꠆ꠟꠣꠞ ꠡꠥꠇꠞꠤꠀ ꠀꠖꠣꠄ ꠇꠞꠣꠞ ꠝꠣꠎꠖꠤ ꠔꠣꠘ ꠘꠣꠝꠦ ꠢꠣꠝꠖ, ꠇꠣꠅꠀꠟꠤ ꠀꠞ ꠎꠛꠥꠞ ꠡꠞꠤꠚꠞ ꠉꠎꠟ ꠉꠣꠅ।
COL 3:17 ꠔꠥꠝꠞꠣ ꠝꠥꠈꠖꠤ ꠎꠦꠔꠣ ꠝꠣꠔ ꠀꠞ ꠡꠞꠤꠟ ꠖꠤꠀ ꠎꠔꠔꠣ ꠇꠞ, ꠁꠔꠣ ꠢꠎꠞꠔ ꠁꠍꠣꠞ ꠘꠣꠝꠦ ꠇꠞꠅ, ꠔꠣꠘ ꠃꠍꠤꠟ꠆ꠟꠣ ꠟꠁꠀ ꠉꠣꠁꠛꠤ ꠛꠣꠚ ꠀꠟ꠆ꠟꠣ ꠙꠣꠇꠞ ꠡꠥꠇꠞꠤꠀ ꠎꠣꠘꠣꠅ।
COL 3:18 ꠔꠥꠝꠞꠣ ꠎꠦꠞꠣ ꠛꠃ ꠅꠁꠍ, ꠔꠥꠝꠞꠣ ꠙꠞꠔꠦꠇꠦ ꠎꠣꠞꠎꠤꠞ ꠎꠣꠝꠣꠁꠞ ꠢꠥꠇꠥꠝ ꠝꠣꠘꠤꠀ ꠌꠟꠅ, ꠝꠣꠟꠤꠇꠞ ꠛꠘ꠆ꠖꠣ ꠢꠤꠡꠣꠛꠦ ꠔ ꠅꠟꠣ ꠌꠟꠣ ꠎꠞꠥꠞ।
COL 3:19 ꠔꠥꠝꠞꠣ ꠎꠦꠞꠣ ꠎꠣꠝꠣꠁ ꠅꠁꠍ, ꠔꠥꠝꠞꠣꠅ ꠎꠣꠞꠎꠤꠞ ꠛꠃꠞꠦ ꠝꠢꠛ꠆ꠛꠔ ꠇꠞꠤꠅ, ꠛꠃꠞ ꠟꠉꠦ ꠇꠐꠥ ꠛꠦꠛꠢꠣꠞ ꠇꠞꠤꠅ ꠘꠣ।
COL 3:20 ꠔꠥꠝꠞꠣ ꠎꠦꠞꠣ ꠙꠥꠀ-ꠙꠥꠠꠤ, ꠔꠥꠝꠞꠣ ꠢꠇꠟ ꠛꠦꠙꠣꠞꠦ ꠝꠣ-ꠛꠣꠚꠞ ꠛꠣꠁꠖ꠆ꠖ ꠞꠁꠅ, ꠁꠟꠣ ꠌꠟꠟꠦ ꠝꠣꠟꠤꠇ ꠈꠥꠡꠤ ꠅꠁꠘ।
COL 3:21 ꠀꠞ ꠔꠥꠝꠞꠣ ꠎꠦꠞꠣ ꠛꠣꠚ ꠅꠁꠍ, ꠔꠥꠝꠞꠣ ꠘꠤꠎꠞ ꠙꠥꠀ-ꠙꠥꠠꠤꠘ꠆ꠔꠞ ꠝꠘꠞꠦ ꠔꠤꠔ꠆ꠔꠣ ꠇꠞꠤꠅ ꠘꠣ, ꠎꠣꠔꠦ ꠔꠣꠞꠣꠞ ꠝꠘ ꠘꠣ ꠜꠣꠋꠉꠦ।
COL 3:22 ꠔꠥꠝꠞꠣ ꠎꠦꠞꠣ ꠉꠥꠟꠣꠝ, ꠔꠥꠝꠞꠣ ꠢꠇꠟ ꠛꠦꠙꠣꠞꠦ ꠔꠥꠝꠞꠣꠞ ꠎꠉꠔꠞ ꠝꠥꠘꠤꠛ ꠅꠇꠟꠞ ꠛꠣꠁꠖ꠆ꠖ ꠞꠁꠅ। ꠔꠣꠞꠣ ꠍꠣꠝꠘꠦ ꠞꠁꠀ ꠎꠦꠛꠟꠣ ꠔꠥꠝꠞꠣꠞ ꠇꠣꠝ-ꠇꠣꠎ ꠖꠦꠈꠂꠘ, ꠈꠣꠟꠤ ꠅꠃ ꠡꠝꠄ ꠔꠣꠞꠣꠞꠦ ꠈꠥꠡꠤ ꠞꠣꠈꠣꠞ ꠌꠦꠡ꠆ꠐꠣ ꠘꠣ ꠇꠞꠤꠀ, ꠛꠞꠋ ꠝꠣꠟꠤꠇꠞ ꠒꠞ-ꠈꠚ ꠜꠤꠔꠞꠦ ꠞꠣꠈꠤꠀ ꠈꠣꠐꠤ ꠖꠤꠟꠦ ꠔꠣꠞꠣꠞ ꠛꠣꠁꠖ꠆ꠖ ꠞꠁꠅ।
COL 3:23 ꠔꠥꠝꠞꠣ ꠎꠦꠔꠣꠃ ꠇꠞꠅ ꠘꠣ ꠇꠦꠘꠦ, ꠁꠔꠣ ꠝꠣꠘꠡꠞ ꠟꠣꠉꠤ ꠘꠣꠄ, ꠛꠞꠋ ꠝꠣꠟꠤꠇꠞꠦ ꠈꠥꠡꠤ ꠇꠞꠣꠞ ꠘꠤꠅꠔꠦ ꠖꠤꠟꠦ-ꠎꠣꠘꠦ ꠇꠞꠤꠅ।
COL 3:24 ꠝꠘꠅ ꠞꠣꠈꠤꠅ, ꠝꠣꠟꠤꠇꠦ ꠔꠣꠘ ꠛꠘ꠆ꠖꠣ ꠅꠇꠟꠞ ꠟꠣꠉꠤ ꠎꠦꠔꠣ ꠞꠣꠈꠍꠂꠘ, ꠁꠔꠣ ꠔ ꠙꠥꠞꠥꠡ꠆ꠇꠣꠞ ꠢꠤꠡꠣꠛꠦ ꠔꠣꠘ ꠉꠦꠍ ꠕꠣꠇꠤꠃ ꠔꠥꠝꠞꠣ ꠙꠣꠁꠛꠣꠄ। ꠔꠥꠝꠞꠣ ꠔ ꠈꠣꠟꠤ ꠢꠎꠞꠔ ꠁꠍꠣ ꠀꠟ-ꠝꠍꠤꠞ ꠈꠦꠎꠝꠔ ꠇꠞꠞꠣꠄ।
COL 3:25 ꠀꠞ ꠎꠦ ꠎꠘꠦ ꠘꠣꠚꠞꠝꠣꠘꠤ ꠇꠞꠦ, ꠢꠦ ꠔ ꠔꠣꠞ ꠇꠣꠝꠞ ꠚꠟ ꠙꠣꠁꠛ। ꠝꠘꠅ ꠞꠣꠈꠤꠅ, ꠝꠣꠟꠤꠇꠦ ꠇꠦꠃꠞꠞ ꠝꠥꠈ ꠌꠣꠁꠀ ꠛꠤꠌꠣꠞ ꠇꠞꠂꠘ ꠘꠣ।
COL 4:1 ꠔꠥꠝꠞꠣ ꠎꠦꠞꠣ ꠝꠥꠘꠤꠛ, ꠔꠥꠝꠞꠣꠞ ꠉꠥꠟꠣꠝ ꠅꠇꠟꠞ ꠟꠉꠦ ꠘꠤꠀꠄ ꠀꠞ ꠢꠇ ꠁꠘꠍꠣꠚ ꠇꠞꠤꠅ। ꠝꠘꠅ ꠞꠣꠈꠤꠅ, ꠛꠦꠢꠦꠡ꠆ꠔꠞ ꠝꠣꠎꠦ ꠔꠥꠝꠞꠣꠞꠅ ꠄꠇꠎꠘ ꠝꠥꠘꠤꠛ ꠀꠍꠂꠘ।
COL 4:2 ꠔꠥꠝꠞꠣ ꠝꠘ ꠖꠤꠀ ꠡꠥꠇꠞꠤꠀ ꠀꠖꠣꠄ ꠇꠞꠤꠀ ꠖꠥꠀ ꠇꠞꠣꠔ ꠞꠁꠅ।
COL 4:3 ꠀꠝꠞꠣꠞ ꠟꠣꠉꠤꠅ ꠖꠥꠀ ꠇꠞꠤꠅ, ꠎꠣꠔꠦ ꠀꠟ꠆ꠟꠣꠄ ꠀꠝꠞꠣꠞꠦ ꠀꠟ-ꠝꠍꠤꠞ ꠛꠦꠙꠣꠞꠦ ꠛꠣꠔꠥꠘꠤ ꠢꠇ ꠇꠣꠟꠣꠝ ꠔꠛꠟꠤꠉ ꠇꠞꠣꠞ ꠔꠚꠤꠇ ꠖꠦꠁꠘ। ꠅꠃ ꠛꠣꠔꠥꠘꠤ ꠢꠇ ꠇꠣꠟꠣꠝꠞ ꠟꠣꠉꠤꠃ ꠔ ꠀꠝꠣꠞꠦ ꠛꠘ꠆ꠖꠤ ꠇꠞꠣ ꠅꠁꠍꠦ।
COL 4:4 ꠖꠥꠀ ꠇꠞꠤꠅ, ꠝꠣꠘꠡꠞꠦ ꠎꠦꠟꠣ ꠙꠞꠤꠡ꠆ꠇꠣꠞ ꠇꠞꠤ ꠛꠥꠎꠣꠘꠤ ꠎꠞꠥꠞ, ꠀꠝꠤ ꠎꠣꠘꠥ ꠑꠤꠇ ꠅꠃꠟꠣ ꠛꠥꠎꠣꠁꠔꠣꠝ ꠙꠣꠞꠤ।
COL 4:5 ꠀꠟ-ꠝꠍꠤꠞ ꠔꠞꠤꠇꠣꠞ ꠛꠣꠁꠞꠞ ꠝꠣꠘꠡꠞ ꠟꠉꠦ ꠀꠈꠟ ꠈꠣꠐꠣꠁꠀ ꠌꠟꠤꠅ, ꠀꠞ ꠔꠛꠟꠤꠉ ꠇꠞꠣꠞ ꠢꠇ꠆ꠇꠟ ꠡꠥꠎꠥꠉ ꠇꠣꠝꠅ ꠟꠣꠉꠣꠁꠅ।
COL 4:6 ꠔꠥꠝꠞꠣꠞ ꠝꠥꠈꠞ ꠎꠛꠣꠘ ꠢꠣꠝꠦꠡꠣ ꠝꠤꠑꠣ ꠀꠞ ꠞꠡꠣꠁꠟ ꠅꠃꠇ, ꠎꠣꠔꠦ ꠇꠣꠞꠦ ꠇꠤꠟꠣ ꠎꠥꠀꠙ ꠖꠤꠔꠣꠄ, ꠁꠔꠣ ꠔꠥꠝꠞꠣ ꠛꠥꠎ।
COL 4:7 ꠀꠝꠞꠣꠞ ꠝꠣꠄꠀꠞ ꠜꠣꠁ, ꠛꠤꠡ꠆ꠛꠣꠡꠤ ꠈꠣꠖꠤꠝ ꠀꠞ ꠝꠣꠟꠤꠇꠞ ꠈꠦꠎꠝꠔꠅ ꠀꠝꠞꠣꠞ ꠟꠉꠞ ꠔꠛꠟꠤꠉꠇꠣꠞꠤ ꠔꠥꠈꠤꠇ ꠜꠣꠁꠄ, ꠀꠝꠣꠞ ꠛꠤꠡ꠆ꠔꠣꠞꠤꠔ ꠈꠛꠞꠣ-ꠈꠛꠞ ꠔꠥꠝꠞꠣꠞꠦ ꠎꠣꠘꠣꠁꠛꠣ।
COL 4:8 ꠔꠣꠘ ꠝꠣꠞꠚꠔꠦ ꠀꠝꠞꠣꠞ ꠢꠣꠟ-ꠢꠇꠤꠇꠔ ꠎꠣꠘꠛꠣꠄ, ꠔꠣꠁꠘ ꠔꠥꠝꠞꠣꠞꠦ ꠡꠣꠅꠡ ꠖꠤꠛꠣ। ꠄꠞꠟꠣꠉꠤ ꠀꠝꠤ ꠔꠣꠘꠞꠦ ꠔꠥꠝꠞꠣꠞ ꠉꠦꠍꠦ ꠙꠣꠑꠣꠁꠟꠣꠝ।
COL 4:9 ꠔꠥꠈꠤꠇꠞ ꠟꠉꠦ ꠀꠝꠞꠣꠞ ꠝꠣꠄꠀꠞ ꠁꠝꠣꠘꠖꠣꠞ ꠜꠣꠁ ꠅꠘꠤꠍꠤꠝꠞꠦꠅ ꠙꠣꠑꠣꠁꠟꠣꠝ। ꠄꠁꠘ ꠔ ꠔꠥꠝꠞꠣꠞꠃ ꠄꠇꠎꠘ। ꠔꠣꠞꠣ ꠁꠘꠞ ꠢꠇꠟ ꠈꠛꠞ-ꠀꠘ꠆ꠔꠞ ꠔꠥꠝꠞꠣꠞꠦ ꠎꠣꠘꠣꠁꠛꠣ।
COL 4:10 ꠀꠝꠣꠞ ꠟꠉꠞ ꠛꠘ꠆ꠖꠤ ꠜꠣꠁ ꠀꠞꠤꠡ꠆ꠔꠣꠇꠥꠍ ꠀꠞ ꠛꠣꠞ꠆ꠘꠣꠛꠣꠍꠞ ꠇꠥꠐꠥꠝ ꠝꠣꠞ꠆ꠇꠥꠍꠦꠅ ꠔꠥꠝꠞꠣꠞꠦ ꠍꠣꠟꠣꠝ ꠖꠤꠍꠂꠘ। ꠅꠃ ꠝꠣꠞ꠆ꠇꠥꠍꠞ ꠛꠦꠙꠣꠞꠦ ꠔꠥꠝꠞꠣ ꠔ ꠀꠉ ꠕꠣꠇꠤꠃ ꠈꠛꠞ ꠙꠣꠁꠍ, ꠔꠣꠁꠘ ꠎꠥꠖꠤ ꠔꠥꠝꠞꠣꠞ ꠉꠦꠍꠦ ꠎꠣꠁꠘ, ꠔꠦ ꠈꠥꠡꠤ ꠝꠘꠦ ꠔꠣꠘꠞꠦ ꠇꠛꠥꠟ ꠇꠞꠤꠅ।
COL 4:11 ꠀꠞ ꠁꠍꠣ ꠃꠞꠚꠦ ꠁꠃꠍꠔꠥꠍꠦꠅ ꠔꠥꠝꠞꠣꠞꠦ ꠍꠣꠟꠣꠝ ꠖꠤꠍꠂꠘ। ꠀꠟ꠆ꠟꠣꠞ ꠛꠣꠖꠡꠣꠁꠞ ꠟꠣꠉꠤ ꠁꠢꠥꠖꠤ ꠅꠇꠟꠞ ꠝꠣꠎꠦ ꠈꠣꠟꠤ ꠅꠃ ꠔꠤꠘ ꠎꠘꠦꠃ ꠀꠝꠣꠞ ꠟꠉꠦ ꠇꠣꠝ ꠇꠞꠂꠘ, ꠔꠣꠞꠣ ꠀꠝꠣꠞꠦ ꠛꠃꠔ ꠡꠣꠅꠡ ꠖꠤꠍꠂꠘ।
COL 4:12 ꠀꠛꠥ-ꠚꠣꠞꠣꠍꠦꠅ ꠔꠥꠝꠞꠣꠞꠦ ꠍꠣꠟꠣꠝ ꠖꠤꠍꠂꠘ, ꠔꠣꠁꠘ ꠔ ꠔꠥꠝꠞꠣꠞ ꠀꠙꠘ ꠝꠣꠘꠥꠡ ꠀꠞ ꠁꠍꠣ ꠀꠟ-ꠝꠍꠤꠞ ꠉꠥꠟꠣꠝ। ꠄꠁꠘ ꠢꠣꠝꠦꠡꠣ ꠔꠥꠝꠞꠣꠞ ꠟꠣꠉꠤ ꠖꠤꠟꠦ-ꠎꠣꠘꠦ ꠝꠥꠘꠣꠎꠣꠔ ꠇꠞꠞꠣ, ꠔꠥꠝꠞꠣ ꠎꠣꠔꠦ ꠇꠣꠝꠤꠟ ꠅꠅ, ꠀꠞ ꠀꠟ꠆ꠟꠣꠞ ꠝꠞ꠆ꠎꠤ-ꠝꠥꠘꠡꠣ ꠛꠥꠎꠤꠀ ꠝꠎꠛꠥꠔ ꠅꠁꠀ ꠃꠛꠣꠅ।
COL 4:13 ꠔꠣꠘ ꠛꠦꠙꠣꠞꠦ ꠀꠝꠤ ꠅꠃ ꠡꠣꠇ꠆ꠇꠤ ꠖꠤꠔꠣꠝ ꠙꠣꠞꠤ, ꠔꠥꠝꠞꠣꠞ ꠟꠣꠉꠤ ꠀꠞ ꠟꠣꠅꠖꠤꠇꠦꠀ, ꠢꠤꠅꠞꠣꠙꠟꠤ ꠐꠣꠃꠘꠞ ꠝꠣꠘꠡꠞ ꠟꠣꠉꠤꠅ ꠀꠛꠥ-ꠚꠣꠞꠣꠍꠦ ꠈꠥꠛ ꠝꠦꠘꠔ ꠇꠞꠂꠘ।
COL 4:14 ꠀꠝꠞꠣꠞ ꠝꠣꠄꠀꠞ ꠇꠛꠤꠞꠣꠎ ꠟꠥꠇ ꠀꠞ ꠜꠣꠁ ꠖꠤꠝꠣꠍꠦꠅ ꠔꠥꠝꠞꠣꠞꠦ ꠍꠣꠟꠣꠝ ꠖꠤꠍꠂꠘ।
COL 4:15 ꠟꠣꠅꠖꠤꠇꠦꠀꠞ ꠁꠝꠣꠘꠖꠣꠞ ꠜꠣꠁ ꠅꠇꠟꠞꠦ, ꠀꠞ ꠘꠤꠝꠥꠚꠣ ꠀꠞ ꠔꠣꠘ ꠛꠣꠠꠤꠞ ꠎꠝꠣꠔꠞ ꠢꠇꠟꠞ ꠉꠦꠍꠦꠅ ꠍꠣꠟꠣꠝ ꠎꠣꠘꠣꠁꠅ।
COL 4:16 ꠔꠥꠝꠞꠣ ꠅꠃ ꠌꠤꠑꠤꠈꠣꠘ ꠙꠠꠤꠀ ꠢꠣꠞꠟꠦ ꠟꠣꠅꠖꠤꠇꠦꠀꠞ ꠎꠝꠣꠔꠞ ꠝꠣꠘꠡꠞꠦ ꠙꠠꠣꠞ ꠟꠣꠉꠤ ꠖꠤꠅ ꠀꠞ ꠟꠣꠅꠖꠤꠇꠦꠀ ꠎꠝꠣꠔꠞꠦ ꠖꠥꠍꠞꠣ ꠎꠦ ꠌꠤꠑꠤ ꠖꠦꠅꠀ ꠅꠁꠍꠦ, ꠅꠃ ꠌꠤꠑꠤꠅ ꠔꠥꠝꠞꠣ ꠙꠠꠤꠅ।
COL 4:17 ꠀꠞ꠆ꠈꠤꠙꠣꠍꠞꠦ ꠅꠈꠣꠘ ꠇꠁꠅ, “ꠝꠣꠟꠤꠇꠞ ꠈꠦꠎꠝꠔꠅ ꠔꠥꠝꠣꠞꠦ ꠎꠦ ꠇꠣꠝ ꠖꠦꠅꠀ ꠅꠁꠍꠦ, ꠅꠃ ꠇꠣꠝ ꠡꠦꠡ ꠇꠞꠣꠞ ꠘꠤꠅꠔꠦ ꠝꠘ ꠖꠤꠀ ꠇꠣꠝ ꠇꠞꠅ।”
COL 4:18 ꠀꠝꠤ ꠙꠣꠃꠟꠥꠍꠦ ꠘꠤꠎꠞ ꠀꠔꠦ ꠅꠃ ꠍꠣꠟꠣꠝꠞ ꠇꠕꠣ ꠟꠦꠈꠟꠣꠝ। ꠝꠘꠅ ꠞꠣꠈꠤꠅ, ꠀꠝꠤ ꠎꠦꠟꠅ ꠛꠘ꠆ꠖꠤ ꠀꠍꠤ। ꠀꠟ꠆ꠟꠣꠄ ꠔꠥꠝꠞꠣ ꠢꠇꠟꠞ ꠃꠙꠞꠦ ꠞꠢꠝꠔ ꠘꠣꠎꠤꠟ ꠇꠞꠃꠇ꠆ꠇꠣ। ꠀꠝꠤꠘ॥
1TH 1:1 ꠀꠝꠤ ꠙꠣꠃꠟꠥꠍ, ꠜꠣꠁ ꠍꠤꠟꠣꠍ ꠀꠞ ꠔꠤꠝꠕꠤꠄ ꠕꠤꠡꠟꠘꠤꠇꠤ ꠐꠣꠃꠘꠞ ꠎꠝꠣꠔꠞ ꠉꠦꠍꠦ ꠟꠦꠈꠞꠣꠝ। ꠔꠥꠝꠞꠣ ꠀꠝꠞꠣꠞ ꠉꠣꠁꠛꠤ ꠛꠣꠚ ꠀꠟ꠆ꠟꠣ ꠙꠣꠇ ꠀꠞ ꠢꠎꠞꠔ ꠁꠍꠣ ꠀꠟ-ꠝꠍꠤꠞ ꠀꠙꠘ ꠎꠘ ꠅꠁꠍ। ꠔꠥꠝꠞꠣꠞ ꠃꠙꠞꠦ ꠞꠢꠝꠔ ꠀꠞ ꠡꠣꠘ꠆ꠔꠤ ꠘꠣꠎꠤꠟ ꠅꠃꠇ।
1TH 1:2 ꠀꠝꠞꠣ ꠖꠥꠀ ꠇꠞꠣꠞ ꠛꠣꠟꠣ ꠢꠣꠝꠦꠡꠣ ꠔꠥꠝꠞꠣꠞ ꠎꠝꠣꠔꠞ ꠢꠇꠟꠞ ꠘꠣꠝ ꠝꠘꠅ ꠇꠞꠤꠀ ꠀꠟ꠆ꠟꠣꠞ ꠡꠥꠇꠞꠤꠀ ꠀꠖꠣꠄ ꠇꠞꠤ।
1TH 1:3 ꠁꠝꠣꠘꠞ ꠟꠣꠉꠤ ꠔꠥꠝꠞꠣ ꠎꠦ ꠇꠣꠝ ꠇꠞꠞꠣꠄ, ꠝꠢꠛ꠆ꠛꠔꠞ ꠟꠣꠉꠤ ꠔꠥꠝꠞꠣ ꠎꠦ ꠝꠦꠘꠔ ꠇꠞꠞꠣꠄ ꠀꠞ ꠢꠎꠞꠔ ꠁꠍꠣ ꠀꠟ-ꠝꠍꠤꠞ ꠃꠙꠞꠦ ꠀꠡꠣ-ꠜꠞꠡꠣ ꠇꠞꠤꠀ ꠔꠥꠝꠞꠣ ꠎꠦ ꠍꠛꠞ ꠇꠞꠞꠣꠄ, ꠁꠔꠣ ꠀꠝꠞꠣꠞ ꠉꠣꠁꠛꠤ ꠛꠣꠚ ꠀꠟ꠆ꠟꠣꠞ ꠖꠞꠛꠣꠞꠅ ꠖꠥꠀ ꠇꠞꠣꠞ ꠡꠝꠄ ꠢꠣꠝꠦꠡꠣ ꠝꠘꠅ ꠇꠞꠤ।
1TH 1:4 ꠅ ꠜꠣꠁ ꠅꠇꠟ, ꠀꠟ꠆ꠟꠣꠞ ꠝꠣꠄꠀꠞ ꠛꠘ꠆ꠖꠣ ꠅꠇꠟ, ꠀꠝꠞꠣ ꠎꠣꠘꠤ, ꠀꠟ꠆ꠟꠣꠄꠃ ꠔꠥꠝꠞꠣꠞꠦ ꠙꠍꠘ꠆ꠖ ꠇꠞꠍꠂꠘ।
1TH 1:5 ꠀꠝꠞꠣꠞ ꠈꠥꠡ-ꠈꠛꠞꠤꠞ ꠔꠛꠟꠤꠉ ꠇꠣꠝ ꠔ ꠔꠥꠝꠞꠣꠞ ꠉꠦꠍꠦ ꠈꠣꠟꠤ ꠝꠥꠈꠞ ꠇꠕꠣꠃ ꠞꠁꠍꠦ ꠘꠣ, ꠛꠞꠋ ꠀꠟ꠆ꠟꠣꠁ ꠛꠟ, ꠙꠣꠇ ꠞꠥꠢꠥ, ꠀꠞ ꠘꠤꠌ꠆ꠌꠤꠔ ꠜꠞꠡꠣꠞ ꠃꠙꠞꠦ ꠌꠣꠟꠥ ꠅꠁꠍꠦ। ꠔꠥꠝꠞꠣꠞ ꠜꠣꠟꠣꠁꠞ ꠟꠣꠉꠤ ꠀꠝꠞꠣ ꠎꠦꠛꠟꠣ ꠔꠥꠝꠞꠣꠞ ꠟꠉꠦ ꠞꠁꠔꠣꠝ, ꠅꠃ ꠡꠝꠄ ꠇꠤꠟꠣꠘ ꠌꠟꠍꠤ, ꠁꠔꠣ ꠔ ꠔꠥꠝꠞꠣ ꠎꠣꠘꠃ।
1TH 1:6 ꠔꠥꠝꠞꠣ ꠛꠃꠔ ꠎꠥꠟꠥꠝ-ꠝꠍꠤꠛꠔꠞ ꠝꠣꠎꠦꠅ ꠙꠣꠇ ꠞꠥꠢꠥꠞ ꠖꠦꠅꠀ ꠈꠥꠡꠤꠄ ꠀꠝꠞꠣꠞ ꠔꠛꠟꠤꠉ ꠇꠛꠥꠟ ꠇꠞꠤꠀ, ꠀꠝꠞꠣꠞ ꠀꠞ ꠝꠣꠟꠤꠇꠞ ꠙꠕꠦ ꠌꠟꠞꠣꠄ।
1TH 1:7 ꠅꠃꠟꠣ ꠌꠟꠤꠀ ꠔꠥꠝꠞꠣ ꠝꠣꠇꠤꠖꠘꠤꠀ ꠀꠞ ꠉ꠆ꠞꠤꠍ ꠖꠦꠡꠞ ꠝꠥꠝꠤꠘ ꠅꠇꠟꠞ ꠉꠦꠍꠦ ꠄꠇ ꠘꠤꠡꠣꠘꠣ ꠅꠁꠉꠦꠍ।
1TH 1:8 ꠝꠣꠟꠤꠇꠞ ꠇꠣꠟꠣꠝ ꠔꠥꠝꠞꠣꠞ ꠝꠣꠎꠖꠤ ꠈꠣꠟꠤ ꠝꠣꠇꠤꠖꠘꠤꠀ ꠀꠞ ꠉ꠆ꠞꠤꠍ ꠖꠦꠡꠅꠃ ꠍꠤꠔ꠆ꠞꠤꠍꠦ ꠘꠣ, ꠛꠞꠋ ꠀꠟ꠆ꠟꠣꠞ ꠃꠙꠞꠦ ꠔꠥꠝꠞꠣꠞ ꠁꠝꠣꠘꠞ ꠇꠕꠣ ꠢꠇꠟ ꠎꠣꠉꠣꠔꠃ ꠍꠤꠔ꠆ꠞꠤꠉꠦꠍꠦ। ꠁ ꠛꠦꠙꠣꠞꠦ ꠀꠝꠞꠣ ꠇꠥꠘ꠆ꠔꠣ ꠝꠣꠔꠣꠞ ꠎꠞꠥꠞ ꠘꠣꠄ।
1TH 1:9 ꠢꠇꠟ ꠝꠣꠘꠡꠦꠃ ꠔ ꠀꠝꠞꠣꠞꠦ ꠇꠁꠞꠣ, ꠔꠥꠝꠞꠣ ꠇꠔ ꠀꠖꠞ ꠇꠞꠤꠀ ꠀꠝꠞꠣꠞꠦ ꠇꠛꠥꠟ ꠇꠞꠍꠤꠟꠣꠄ, ꠔꠣꠞꠣ ꠄꠅꠈꠣꠘ ꠇꠁꠞꠣ, ꠔꠥꠝꠞꠣ ꠇꠤꠟꠣ ꠖꠦꠛ-ꠖꠦꠛꠤꠘ꠆ꠔꠞ ꠙꠥꠎꠣ ꠛꠣꠖ ꠖꠤꠀ ꠀꠟ꠆ꠟꠣꠞ ꠙꠕꠤ ꠅꠁꠀ, ꠎꠤꠘ꠆ꠖꠣ ꠢꠇ ꠀꠟ꠆ꠟꠣꠞ ꠄꠛꠣꠖꠔ ꠇꠞꠣꠔ ꠀꠁꠍ।
1TH 1:10 ꠀꠞ ꠝꠥꠞ꠆ꠖꠣ ꠅꠇꠟꠞ ꠝꠣꠎ ꠕꠣꠇꠤ ꠎꠦꠘꠞꠦ ꠎꠤꠘ꠆ꠖꠣ ꠇꠞꠤ ꠔꠥꠟꠣ ꠅꠁꠍꠦ, ꠢꠃ ꠁꠍꠣ ꠖꠥꠘꠤꠀꠔ ꠀꠅꠀꠞ ꠛꠣꠞ ꠌꠣꠁꠔꠣꠄ ꠙꠣꠞ। ꠔꠣꠁꠘ ꠅꠁꠟꠣ ꠀꠟ꠆ꠟꠣꠞ ꠈꠣꠍ ꠝꠣꠄꠀꠞ ꠎꠘ ꠁꠛꠘꠥꠟ꠆ꠟꠣ, ꠛꠦꠢꠦꠡ꠆ꠔ ꠕꠣꠇꠤ ꠟꠣꠝꠤꠀ ꠀꠁꠞꠣ, ꠀꠟ꠆ꠟꠣꠞ ꠎꠦ ꠉꠎꠛ ꠀꠁꠀ ꠟꠣꠝꠦꠞ, ꠁ ꠉꠎꠛ ꠕꠣꠇꠤ ꠅꠃ ꠁꠍꠣꠄ ꠀꠝꠞꠣꠞꠦ ꠛꠣꠌꠣꠁꠛꠣ।
1TH 2:1 ꠜꠣꠁ ꠅꠇꠟ, ꠔꠥꠝꠞꠣ ꠔ ꠘꠤꠎꠦꠃ ꠎꠣꠘ, ꠔꠥꠝꠞꠣꠞ ꠉꠦꠍꠦ ꠀꠝꠞꠣꠞ ꠎꠣꠅꠀꠈꠣꠘ ꠛꠦꠇꠣꠝꠣ ꠉꠦꠍꠦ ꠘꠣ।
1TH 2:2 ꠔꠥꠝꠞꠣ ꠄꠅꠈꠣꠘꠅ ꠎꠣꠘ, ꠄꠞ ꠀꠉꠦ ꠀꠝꠞꠣ ꠚꠤꠟꠤꠙꠤ ꠐꠣꠃꠘꠅ ꠎꠥꠟꠥꠝ-ꠝꠍꠤꠛꠔꠅ ꠙꠠꠍꠟꠣꠝ ꠀꠞ ꠛꠦꠁꠎ꠆ꠎꠔ ꠅꠁꠍꠟꠣꠝ। ꠛꠣꠖꠦ ꠔꠥꠝꠞꠣꠞ ꠅꠘꠅ-ꠅ ꠛꠃꠔ ꠛꠣꠗꠣ-ꠘꠤꠡꠦꠗ ꠇꠣꠐꠣꠁꠀ ꠀꠝꠞꠣ ꠀꠟ꠆ꠟꠣꠁ ꠡꠣꠅꠡꠦ ꠡꠣꠅꠡꠤ ꠅꠁꠀ ꠖꠤꠟꠦ-ꠎꠣꠘꠦ ꠔꠣꠘ ꠈꠥꠡ-ꠈꠛꠞꠤ ꠈꠥꠟꠣ-ꠝꠦꠟꠣ ꠔꠛꠟꠤꠉ ꠇꠞꠍꠤꠟꠣꠝ।
1TH 2:3 ꠀꠝꠞꠣꠞ ꠖꠣꠅꠔ ꠔ ꠇꠥꠘꠥ ꠜꠥꠟ ꠔꠣꠟꠤꠝ ꠕꠣꠇꠤ ꠘꠣꠄ, ꠇꠥꠘꠥ ꠛꠖ ꠘꠤꠅꠔꠦꠅ ꠘꠣꠄ ꠛꠣ ꠇꠥꠘꠥ ꠐꠉꠣ-ꠐꠉꠤꠞ ꠘꠤꠅꠔꠦꠅ ꠘꠣꠄ।
1TH 2:4 ꠈꠣꠟꠤ ꠀꠟ꠆ꠟꠣꠄ ꠀꠝꠞꠣꠞꠦ ꠎꠁꠉ꠆ꠉ ꠝꠘꠅ ꠇꠞꠤꠀ ꠎꠦꠟꠣ ꠈꠥꠡ-ꠈꠛꠞꠤ ꠔꠛꠟꠤꠉꠞ ꠖꠣꠄꠁꠔ꠆ꠔ ꠖꠤꠍꠂꠘ, ꠀꠝꠞꠣ ꠅꠟꠣꠃ ꠔꠛꠟꠤꠉ ꠇꠞꠞꠣꠝ। ꠇꠥꠘꠥ ꠝꠣꠘꠡꠞꠦ ꠈꠥꠡ ꠇꠞꠣꠞ ꠘꠤꠅꠔꠦ ꠀꠝꠞꠣ ꠁꠔꠣ ꠇꠁꠞꠣꠝ ꠘꠣ, ꠈꠣꠟꠤ ꠎꠦꠁꠘ ꠀꠝꠞꠣꠞ ꠖꠤꠟꠞꠦ ꠎꠣꠌꠣꠁ ꠇꠞꠤꠀ ꠖꠦꠈꠂꠘ, ꠢꠃ ꠀꠟ꠆ꠟꠣꠞꠦ ꠈꠥꠡ ꠇꠞꠣꠞ ꠟꠣꠉꠤꠃ ꠔꠛꠟꠤꠉ ꠇꠞꠞꠣꠝ।
1TH 2:5 ꠔꠥꠝꠞꠣ ꠔ ꠎꠣꠘ, ꠀꠝꠞꠣ ꠇꠥꠘꠥ ꠡꠝꠄꠃ ꠇꠦꠃꠞꠞ ꠉꠦꠍꠦ ꠔꠦꠟ-ꠝꠣꠟꠤꠡ ꠇꠞꠤꠀ ꠇꠕꠣ ꠝꠣꠔꠍꠤ ꠘꠣ, ꠀꠞ ꠇꠥꠘꠥ ꠟꠥꠜ-ꠟꠣꠟꠌꠅ ꠙꠠꠤꠀ ꠗꠣꠘ꠆ꠖꠣꠛꠣꠎꠤꠞ ꠇꠣꠝꠅ ꠇꠞꠍꠤ ꠘꠣ, ꠄꠇ ꠀꠟ꠆ꠟꠣꠃ ꠁꠔꠣꠞ ꠡꠣꠇ꠆ꠇꠤ।
1TH 2:6 ꠇꠥꠘꠥ ꠝꠣꠘꠡꠞ ꠉꠦꠍ ꠕꠣꠇꠤ ꠁꠎ꠆ꠎꠔ ꠙꠣꠁꠔꠦ ꠀꠡꠣ ꠇꠞꠍꠤ ꠘꠣ, ꠔꠥꠝꠞꠣꠞ ꠉꠦꠍ ꠕꠣꠇꠤꠅ ꠘꠣ, ꠛꠣ ꠛꠣꠁꠞꠣ ꠝꠣꠘꠡꠞ ꠉꠦꠍ ꠕꠣꠇꠤꠅ ꠘꠣ।
1TH 2:7 ꠀꠝꠞꠣ ꠁꠌ꠆ꠍꠣ ꠇꠞꠟꠦ ꠔ ꠀꠟ-ꠝꠍꠤꠞ ꠍꠣꠢꠣꠛꠤ ꠢꠤꠡꠣꠛꠦ ꠔꠥꠝꠞꠣꠞ ꠃꠙꠞꠦ ꠖꠣꠛꠤ ꠈꠣꠐꠣꠁꠔꠣꠝ ꠙꠣꠞꠟꠣꠝ ꠅꠘꠦ। ꠅꠁꠟꠦ ꠄꠞ ꠛꠖꠟꠣ, ꠝꠣʼꠄ ꠎꠦꠟꠣ ꠘꠤꠎꠞ ꠢꠥꠞꠥꠔ꠆ꠔꠣꠁꠘꠞꠦ ꠎꠄ-ꠎꠔꠘ ꠇꠞꠂꠘ, ꠔꠥꠝꠞꠣꠞ ꠟꠉꠦ ꠕꠣꠇꠣꠞ ꠡꠝꠄ ꠀꠝꠞꠣꠅ ꠅꠟꠣ ꠘꠞꠝ ꠛꠦꠛꠢꠣꠞ ꠇꠞꠍꠤ।
1TH 2:8 ꠔꠥꠝꠞꠣꠞ ꠟꠣꠉꠤ ꠈꠥꠛ ꠛꠦꠡꠤ ꠝꠣꠄꠀ-ꠝꠢꠛ꠆ꠛꠔ ꠅꠀꠄ, ꠈꠣꠟꠤ ꠀꠟ꠆ꠟꠣꠁ ꠈꠥꠡ-ꠈꠛꠞꠤ ꠔꠛꠟꠤꠉ ꠘꠣꠄ, ꠀꠝꠞꠣꠞ ꠘꠤꠎꠞ ꠎꠣꠘ ꠖꠤꠔꠦꠅ ꠞꠣꠎꠤ ꠀꠍꠟꠣꠝ। ꠎꠣꠘ ꠔ, ꠔꠥꠝꠞꠣ ꠅꠁꠟꠣꠄ ꠀꠝꠞꠣꠞ ꠈꠥꠛ ꠝꠣꠄꠀꠞ ꠝꠣꠘꠥꠡ।
1TH 2:9 ꠜꠣꠁꠀꠁꠘꠞꠦ, ꠀꠍꠟꠦ ꠔ ꠀꠝꠞꠣꠞ ꠝꠦꠘꠔ ꠀꠞ ꠀꠐꠘꠤ-ꠈꠣꠐꠘꠤꠞ ꠇꠕꠣ, ꠘꠤꠌ꠆ꠌꠄ ꠔꠥꠝꠞꠣꠞ ꠝꠘꠅ ꠀꠍꠦ। ꠀꠟ꠆ꠟꠣꠁ ꠈꠥꠡ-ꠈꠛꠞꠤ ꠔꠛꠟꠤꠉꠞ ꠚꠣꠇꠦ ꠚꠣꠇꠦ ꠀꠝꠞꠣ ꠖꠤꠘꠦ-ꠞꠣꠁꠔꠦ ꠞꠥꠎꠤ-ꠞꠥꠎꠉꠣꠞ ꠇꠞꠍꠤ, ꠎꠣꠔꠦ ꠀꠝꠞꠣꠞ ꠈꠞꠌꠣ-ꠙꠣꠔꠤ ꠔꠥꠝꠞꠣ ꠇꠦꠃꠞꠞ ꠟꠣꠉꠤ ꠛꠥꠏꠣ ꠘꠣ ꠅꠄ।
1TH 2:10 ꠀꠞ ꠔꠥꠝꠞꠣ ꠎꠦꠞꠣ ꠁꠝꠣꠘ ꠀꠘꠍ, ꠔꠥꠝꠞꠣꠞ ꠟꠉꠦ ꠔ ꠀꠝꠞꠣꠞ ꠀꠌꠣꠞ-ꠛꠦꠛꠢꠣꠞ ꠀꠍꠤꠟ ꠙꠛꠤꠔ꠆ꠞ, ꠢꠇ ꠀꠞ ꠘꠤꠈꠥꠔ। ꠔꠥꠝꠞꠣꠃ ꠁꠔꠣꠞ ꠡꠣꠇ꠆ꠇꠤ, ꠀꠞ ꠀꠟ꠆ꠟꠣ ꠙꠣꠇꠅ ꠡꠣꠇ꠆ꠇꠤ ꠀꠍꠂꠘ।
1TH 2:11 ꠔꠥꠝꠞꠣ ꠔ ꠎꠣꠘ, ꠛꠣꠚꠦ ꠎꠦꠟꠣ ꠘꠤꠎꠞ ꠙꠞꠔꠦꠇ ꠀꠅꠟꠣꠖꠞꠦ ꠃꠔꠡꠣꠢ, ꠡꠣꠘ꠆ꠔꠘꠣ ꠀꠞ ꠝꠎꠛꠥꠔ ꠙꠞꠣꠝꠤꠡ ꠖꠦꠁꠘ, ꠀꠝꠞꠣꠅ ꠔꠥꠝꠞꠣ ꠢꠇꠟꠞꠦ ꠅꠃꠟꠣ ꠙꠞꠣꠝꠤꠡ ꠖꠤꠔꠣꠝ,
1TH 2:12 ꠎꠣꠔꠦ ꠀꠟ꠆ꠟꠣꠞ ꠛꠘ꠆ꠖꠣ ꠢꠤꠡꠣꠛꠦ ꠔꠥꠝꠞꠣ ꠃꠙꠎꠥꠇ꠆ꠔ ꠅꠁꠀ ꠌꠟ। ꠀꠟ꠆ꠟꠣꠄ ꠔꠥꠝꠞꠣꠞꠦ ꠖꠣꠅꠔ ꠖꠤꠞꠣ, ꠔꠣꠘ ꠘꠤꠎꠞ ꠛꠣꠖꠡꠣꠁ ꠀꠞ ꠉꠃꠞꠛꠞ ꠜꠣꠉꠤ ꠅꠀꠞ ꠟꠣꠉꠤ।
1TH 2:13 ꠝꠘꠅ ꠞꠣꠈꠤꠅ, ꠀꠝꠞꠣ ꠢꠣꠝꠦꠡꠣ ꠀꠟ꠆ꠟꠣꠞ ꠡꠥꠇꠞꠤꠀ ꠀꠖꠣꠄ ꠇꠞꠞꠣꠝ, ꠇꠣꠞꠘ ꠀꠝꠞꠣꠞ ꠉꠦꠍ ꠕꠣꠇꠤ ꠀꠟ꠆ꠟꠣꠞ ꠇꠣꠟꠣꠝ ꠢꠥꠘꠤꠀ ꠔꠥꠝꠞꠣ ꠎꠦꠛꠟꠣ ꠁꠝꠣꠘ ꠀꠘꠍꠤꠟꠣꠄ, ꠢꠃ ꠡꠝꠄ ꠇꠥꠘꠥ ꠝꠣꠘꠡꠞ ꠝꠥꠈꠞ ꠇꠕꠣ ꠘꠣꠄ, ꠛꠞꠋ ꠀꠟ꠆ꠟꠣꠞ ꠇꠣꠟꠣꠝ ꠢꠤꠡꠣꠛꠦꠃ ꠔꠥꠝꠞꠣ ꠁꠔꠣ ꠇꠛꠥꠟ ꠇꠞꠍꠤꠟꠣꠄ, ꠀꠞ ꠢꠣꠍꠣꠃ ꠁꠔꠣ ꠀꠟ꠆ꠟꠣꠞ ꠇꠣꠟꠣꠝ। ꠔꠥꠝꠞꠣ ꠎꠦꠞꠣ ꠁꠝꠣꠘ ꠀꠘꠍ, ꠢꠃ ꠇꠣꠟꠣꠝꠦꠃ ꠔꠥꠝꠞꠣꠞ ꠖꠤꠟꠅ ꠇꠣꠝ ꠇꠞꠦꠞ।
1TH 2:14 ꠜꠣꠁ ꠅꠇꠟ, ꠢꠎꠞꠔ ꠁꠍꠣꠞ ꠔꠞꠤꠇꠣꠄ ꠌꠟꠞꠣ ꠀꠟ꠆ꠟꠣꠞ ꠎꠔ ꠎꠝꠣꠔ ꠅꠇꠟ ꠄꠢꠥꠖꠤꠀ ꠎꠤꠟꠣꠔ ꠀꠍꠦ, ꠔꠥꠝꠞꠣꠞ ꠢꠣꠟ-ꠢꠇꠤꠇꠔ ꠔ ꠔꠣꠞꠣꠞ ꠟꠣꠈꠣꠘꠃ। ꠇꠣꠞꠘ ꠔꠣꠞꠣ ꠎꠦꠟꠣ ꠘꠤꠎꠞ ꠁꠢꠥꠖꠤ ꠎꠣꠔꠤꠞ ꠀꠔꠅ ꠖꠥꠈ-ꠝꠍꠤꠛꠔ ꠙꠣꠁꠍꠂꠘ, ꠔꠥꠝꠞꠣꠅ ꠅꠃꠟꠣ ꠘꠤꠎꠞ ꠎꠣꠔꠤꠞ ꠝꠣꠘꠡꠞ ꠉꠦꠍ ꠕꠣꠇꠤ ꠖꠥꠈ-ꠝꠍꠤꠛꠔ ꠙꠣꠁꠍ।
1TH 2:15 ꠝꠘꠅ ꠞꠣꠈꠤꠅ, ꠁꠢꠥꠖꠤ ꠅꠇꠟꠦ ꠢꠎꠞꠔ ꠁꠍꠣ ꠀꠞ ꠘꠛꠤ ꠅꠇꠟꠞꠦ ꠎꠣꠘꠦ ꠝꠣꠞꠍꠤꠟ, ꠔꠣꠞꠣ ꠀꠝꠞꠣꠞ ꠃꠙꠞꠦꠅ ꠎꠥꠟꠥꠝ ꠇꠞꠍꠦ। ꠔꠦ ꠀꠟ꠆ꠟꠣ ꠙꠣꠇ ꠔꠣꠞꠣꠞ ꠃꠙꠞꠦ ꠈꠥꠡꠤ ꠘꠣꠄ, ꠢꠇꠟ ꠝꠣꠘꠡꠞ ꠟꠉꠦꠅ ꠔꠣꠞꠣꠞ ꠖꠥꠡꠝꠘꠤ ꠜꠣꠛ ꠀꠍꠦ।
1TH 2:16 ꠔꠣꠞꠣ ꠀꠝꠞꠣꠞꠦ ꠘꠤꠡꠦꠗ ꠖꠤꠞꠣ, ꠎꠣꠔꠦ ꠜꠤꠘ-ꠗꠞ꠆ꠝꠤ ꠝꠣꠘꠡꠞ ꠉꠦꠍꠦ ꠀꠝꠞꠣ ꠀꠟ꠆ꠟꠣꠁ ꠘꠣꠎꠣꠔꠞ ꠈꠥꠡ-ꠈꠛꠞꠤ ꠔꠛꠟꠤꠉ ꠘꠣ ꠇꠞꠤ। ꠅꠃ ꠟꠣꠈꠣꠘ ꠔꠣꠞꠣ ꠎꠣꠞꠎꠤꠞ ꠉꠥꠘꠣꠞ ꠛꠥꠏꠣ ꠛꠠ ꠇꠞꠞꠣ। ꠄꠞꠟꠣꠉꠤ ꠔꠣꠞꠣꠞ ꠃꠙꠞꠦ ꠀꠟ꠆ꠟꠣꠞ ꠈꠣꠠꠣ ꠉꠎꠛ ꠟꠣꠝꠍꠦ।
1TH 2:17 ꠅ ꠜꠣꠁ ꠅꠇꠟ, ꠝꠘꠞ ꠖꠤꠇ ꠕꠣꠇꠤ ꠘꠣ ꠅꠁꠟꠦꠅ, ꠡꠞꠤꠟꠞ ꠖꠤꠇ ꠕꠣꠇꠤ ꠔ ꠀꠝꠞꠣ ꠕꠥꠠꠣ ꠖꠤꠘꠞ ꠟꠣꠉꠤ, ꠔꠥꠝꠞꠣꠞ ꠉꠦꠍ ꠕꠣꠇꠤ ꠢꠞꠣꠁꠟ ꠀꠍꠤ। ꠄꠞꠟꠣꠉꠤ ꠀꠝꠞꠣꠞ ꠈꠥꠛ ꠈꠤꠀꠟ ꠀꠍꠦ, ꠎꠣꠔꠦ ꠔꠥꠝꠞꠣꠞ ꠝꠥꠈꠈꠣꠘ ꠢꠤꠞꠛꠣꠞ ꠖꠦꠈꠔꠣꠝ ꠙꠣꠞꠤ।
1TH 2:18 ꠀꠝꠞꠣ ꠢꠇꠟꠃ, ꠈꠣꠍ ꠇꠞꠤ ꠀꠝꠤ ꠙꠣꠃꠟꠥꠍꠦ ꠛꠣꠞ ꠛꠣꠞ ꠌꠦꠡ꠆ꠐꠣ ꠇꠞꠍꠤ ꠔꠥꠝꠞꠣꠞ ꠉꠦꠍꠦ ꠀꠁꠔꠣꠝ। ꠅꠁꠟꠦ ꠡꠄꠔꠣꠘꠦ ꠀꠝꠞꠣꠞꠦ ꠀꠐꠇꠣꠁꠟꠤꠍꠦ।
1TH 2:19 ꠢꠣꠍꠣꠃ ꠀꠝꠞꠣꠞ ꠝꠣꠟꠤꠇ ꠁꠍꠣꠄ ꠎꠦꠛꠟꠣ ꠔꠡꠞꠤꠚ ꠀꠘꠛꠣ, ꠅꠃ ꠡꠝꠄ ꠔꠣꠘ ꠍꠣꠝꠘꠦ ꠀꠝꠞꠣꠞ ꠀꠡꠣ, ꠀꠘꠘ꠆ꠖ ꠀꠞ ꠉꠃꠞꠛꠞ ꠎꠄꠅꠞ ꠝꠣꠟꠣ ꠢꠤꠡꠣꠛꠦ ꠇꠤꠔꠣ ꠙꠣꠁꠝꠥ? ꠁꠔꠣ ꠔ ꠔꠥꠝꠞꠣꠃ ꠘꠣꠄ ꠘꠤ?
1TH 2:20 ꠀꠍꠟꠦ ꠔꠥꠝꠞꠣꠃ ꠀꠝꠞꠣꠞ ꠉꠃꠞꠛ, ꠔꠥꠝꠞꠣꠃ ꠀꠝꠞꠣꠞ ꠀꠘꠘ꠆ꠖ।
1TH 3:1 ꠛꠣꠖꠦ ꠀꠝꠞꠣ ꠎꠦꠛꠟꠣ ꠀꠞ ꠡꠁꠎ꠆ꠎ ꠇꠞꠔꠣꠝ ꠙꠣꠞꠟꠣꠝ ꠘꠣ, ꠅꠃ ꠡꠝꠄ ꠀꠝꠞꠣ ꠘꠤꠅꠔ ꠇꠞꠟꠣꠝ, ꠀꠝꠞꠣ ꠄꠇꠟꠣꠃ ꠀꠕꠤꠘꠤꠀ ꠐꠣꠃꠘꠅ ꠞꠁꠀ,
1TH 3:2 ꠀꠝꠞꠣꠞ ꠜꠣꠁ ꠔꠤꠝꠕꠤꠞꠦ ꠙꠣꠑꠣꠁꠝꠥ, ꠎꠣꠔꠦ ꠔꠣꠁꠘ ꠉꠤꠀ ꠔꠥꠝꠞꠣꠞ ꠁꠝꠣꠘ ꠝꠎꠛꠥꠔ ꠇꠞꠂꠘ ꠀꠞ ꠝꠘꠞ ꠡꠣꠅꠡ ꠎꠥꠉꠣꠁꠘ। ꠔꠣꠁꠘ ꠔ ꠀꠟ-ꠝꠍꠤꠞ ꠈꠥꠡ-ꠈꠛꠞꠤꠞ ꠔꠛꠟꠤꠉ ꠇꠣꠝꠅ ꠀꠟ꠆ꠟꠣꠞ ꠈꠣꠖꠤꠝ, ꠀꠝꠞꠣꠞ ꠟꠉꠞ ꠜꠣꠁ, ꠔꠣꠘꠞꠦ ꠙꠣꠑꠣꠁꠟꠣꠝ,
1TH 3:3 ꠎꠣꠔꠦ ꠅꠃ ꠖꠥꠈ-ꠝꠍꠤꠛꠔꠞ ꠝꠣꠎꠦꠅ ꠔꠥꠝꠞꠣ ꠇꠦꠃ ꠈꠞꠦꠖꠤ ꠘꠣ ꠎꠣꠅ। ꠔꠥꠝꠞꠣꠞ ꠎꠣꠘꠣ ꠀꠍꠦ, ꠖꠥꠈ-ꠝꠍꠤꠛꠔ ꠀꠝꠞꠣꠞ ꠃꠙꠞꠦ ꠑꠤꠇꠃ ꠀꠁꠛ, ꠀꠞ ꠁꠔꠣ ꠡꠁꠎ꠆ꠎ ꠇꠞꠣ ꠟꠣꠉꠛ।
1TH 3:4 ꠀꠝꠤ ꠀꠉꠦ ꠎꠦꠛꠟꠣ ꠔꠥꠝꠞꠣꠞ ꠟꠉꠦ ꠀꠍꠟꠣꠝ, ꠢꠃ ꠡꠝꠄ ꠔꠥꠝꠞꠣꠞꠦ ꠇꠁꠍꠤ, ꠖꠥꠈ-ꠝꠍꠤꠛꠔ ꠀꠝꠞꠣꠞ ꠃꠙꠞꠦ ꠀꠁꠛꠃ, ꠀꠞ ꠑꠤꠇꠃ ꠅꠟꠣꠈꠣꠘ ꠀꠁꠍꠦ।
1TH 3:5 ꠔꠦ ꠀꠝꠤ ꠎꠦꠛꠟꠣ ꠀꠞ ꠡꠁꠎ꠆ꠎ ꠇꠞꠔꠣꠝ ꠙꠣꠞꠟꠣꠝ ꠘꠣ, ꠅꠃ ꠡꠝꠄ ꠔꠥꠝꠞꠣꠞ ꠁꠝꠣꠘꠞ ꠢꠣꠟꠔ ꠖꠦꠈꠣꠞ ꠟꠣꠉꠤ ꠔꠤꠝꠕꠤ ꠜꠣꠁꠞꠦ ꠙꠣꠑꠣꠁꠟꠣꠝ। ꠀꠝꠣꠞ ꠝꠘꠅ ꠒꠞ ꠀꠍꠤꠟ, ꠇꠤꠎꠣꠘꠥ ꠡꠄꠔꠣꠘꠦ ꠔꠥꠝꠞꠣꠞꠦ ꠟꠣꠟꠌ ꠖꠦꠈꠣꠁꠍꠦ ꠀꠞ ꠀꠝꠞꠣꠞ ꠢꠇꠟ ꠝꠦꠘꠔ ꠛꠦꠇꠣꠝꠣ ꠉꠦꠍꠦꠉꠤ।
1TH 3:6 ꠅꠁꠟꠦ ꠔꠤꠝꠕꠤ ꠜꠣꠁ ꠔꠥꠝꠞꠣꠞ ꠉꠦꠍ ꠕꠣꠇꠤ ꠚꠤꠞꠤꠀ ꠀꠁꠀ ꠀꠝꠞꠣꠞꠦ ꠎꠣꠘꠣꠁꠍꠂꠘ, ꠔꠥꠝꠞꠣꠞ ꠁꠝꠣꠘ ꠀꠞ ꠝꠣꠄꠀ-ꠝꠢꠛ꠆ꠛꠔꠞ ꠢꠣꠟꠔ ꠛꠃꠔ ꠜꠣꠟꠣ। ꠔꠣꠁꠘ ꠇꠁꠍꠂꠘ, ꠔꠥꠝꠞꠣ ꠢꠣꠝꠦꠡꠣ ꠝꠣꠄꠀ-ꠝꠢꠛ꠆ꠛꠔꠦ ꠀꠝꠞꠣꠞꠦ ꠝꠘꠅ ꠇꠞꠅ, ꠀꠞ ꠀꠝꠞꠣ ꠎꠦꠟꠣ ꠔꠥꠝꠞꠣꠞꠦ ꠖꠦꠈꠔꠣꠝ ꠌꠣꠁꠞꠣꠝ, ꠔꠥꠝꠞꠣꠅ ꠅꠃꠟꠣ ꠀꠝꠞꠣꠞꠦ ꠖꠦꠈꠣꠞ ꠀꠡꠣ ꠇꠞꠞꠣꠄ।
1TH 3:7 ꠅ ꠜꠣꠁ ꠅꠇꠟ, ꠄꠞꠟꠣꠉꠤꠃ ꠔꠥꠝꠞꠣꠞ ꠁꠝꠣꠘꠞ ꠝꠎꠛꠥꠔꠤꠞ ꠇꠕꠣ ꠢꠥꠘꠤꠀ, ꠀꠝꠞꠣꠞ ꠅꠔ ꠖꠥꠈ-ꠝꠍꠤꠛꠔꠞ ꠝꠣꠎꠦꠅ ꠖꠤꠟꠅ ꠡꠣꠘ꠆ꠔꠤ ꠙꠣꠁꠍꠤ।
1TH 3:8 ꠔꠥꠝꠞꠣ ꠝꠣꠟꠤꠇꠞ ꠃꠙꠞꠦ ꠁꠝꠣꠘꠦ ꠝꠎꠛꠥꠔ ꠞꠁꠟꠦꠃ, ꠀꠝꠞꠣꠞ ꠎꠤꠘ꠆ꠖꠦꠉꠤꠈꠣꠘ ꠗꠁꠘ꠆ꠘ।
1TH 3:9 ꠔꠥꠝꠞꠣꠞꠦ ꠟꠁꠀ ꠀꠟ꠆ꠟꠣꠞ ꠖꠞꠛꠣꠞꠅ ꠀꠝꠞꠣ ꠎꠦ ꠈꠥꠡꠤ-ꠛꠣꠡꠤ ꠇꠞꠤꠀꠞ, ꠁꠔꠣꠞ ꠟꠣꠉꠤ ꠀꠝꠞꠣ ꠇꠤꠟꠣ ꠀꠟ꠆ꠟꠣꠞ ꠡꠥꠇꠞꠤꠀ ꠎꠣꠘꠣꠁꠔꠣꠝ, ꠎꠣꠘꠞꠣꠝ ꠘꠣ।
1TH 3:10 ꠀꠝꠞꠣ ꠝꠘ ꠖꠤꠀ ꠖꠤꠘꠦ-ꠞꠣꠁꠔꠦ ꠢꠣꠝꠦꠡꠣ ꠖꠥꠀ ꠇꠞꠞꠣꠝ, ꠎꠣꠔꠦ ꠔꠥꠝꠞꠣꠞ ꠝꠥꠈꠈꠣꠘ ꠢꠤꠞꠛꠣꠞ ꠖꠦꠈꠣꠞ ꠡꠥꠎꠥꠉ ꠙꠣꠁ, ꠀꠞ ꠔꠥꠝꠞꠣꠞ ꠁꠝꠣꠘꠞ ꠛꠣꠖ-ꠛꠣꠇꠤ ꠢꠇꠟꠔꠣ ꠙꠥꠞꠣ ꠇꠞꠔꠣꠝ ꠙꠣꠞꠤ।
1TH 3:11 ꠔꠦ ꠉꠣꠁꠛꠤ ꠛꠣꠚ ꠀꠟ꠆ꠟꠣꠄ ꠀꠞ ꠢꠎꠞꠔ ꠁꠍꠣ ꠀꠟ-ꠝꠍꠤꠄ ꠎꠣꠘꠥ ꠔꠥꠝꠞꠣꠞ ꠉꠦꠍꠦ ꠎꠣꠅꠀꠞ ꠟꠣꠉꠤ ꠀꠝꠞꠣꠞꠦ ꠡꠥꠎꠥꠉ ꠖꠦꠁꠘ।
1TH 3:12 ꠀꠝꠞꠣ ꠎꠦꠟꠣ ꠔꠥꠝꠞꠣꠞ ꠛꠣꠄ ꠝꠣꠄꠀ-ꠝꠢꠛ꠆ꠛꠔꠞ ꠝꠣꠎꠦ ꠒꠥꠛꠤ ꠉꠦꠍꠤ, ꠑꠤꠇ ꠅꠃꠟꠣ ꠝꠣꠟꠤꠇ ꠁꠍꠣꠄ ꠔꠥꠝꠞꠣꠞꠦꠅ ꠄꠇꠦ-ꠅꠁꠘ꠆ꠘꠦ, ꠀꠞ ꠢꠇꠟꠞ ꠛꠣꠄ ꠝꠣꠄꠀ-ꠝꠢꠛ꠆ꠛꠔꠦ ꠢꠣꠛꠥꠒꠥꠛꠥ ꠈꠣꠅꠀꠃꠇ꠆ꠇꠣ।
1TH 3:13 ꠅꠃ ꠟꠣꠈꠣꠘ ꠔꠣꠁꠘ ꠔꠥꠝꠞꠣꠞ ꠖꠤꠟ ꠙꠥꠞꠣꠙꠥꠞ ꠝꠎꠛꠥꠔ ꠇꠞꠃꠇ꠆ꠇꠣ, ꠎꠣꠔꠦ ꠀꠝꠞꠣꠞ ꠢꠎꠞꠔ ꠁꠍꠣꠄ ꠎꠦꠛꠟꠣ ꠔꠣꠘ ꠘꠤꠎꠞ ꠙꠣꠇ ꠛꠘ꠆ꠖꠣ ꠅꠇꠟ ꠟꠁꠀ ꠔꠡꠞꠤꠚ ꠀꠘꠛꠣ, ꠅꠃ ꠡꠝꠄ ꠀꠝꠞꠣꠞ ꠉꠣꠁꠛꠤ ꠛꠣꠚ ꠀꠟ꠆ꠟꠣꠞ ꠘꠎꠞꠅ ꠔꠥꠝꠞꠣ ꠙꠛꠤꠔ꠆ꠞ ꠀꠞ ꠘꠤꠈꠥꠔ ꠞꠅ।
1TH 4:1 ꠅ ꠜꠣꠁꠀꠁꠘ ꠢꠥꠘꠅ, ꠀꠟ꠆ꠟꠣꠞꠦ ꠈꠥꠡꠤ ꠇꠞꠣꠞ ꠟꠣꠉꠤ ꠇꠦꠝꠘꠦ ꠎꠤꠘ꠆ꠖꠦꠉꠤ ꠇꠣꠐꠣꠘꠤ ꠟꠣꠉꠦ, ꠁ ꠔꠣꠟꠤꠝ ꠔ ꠔꠥꠝꠞꠣ ꠀꠝꠞꠣꠞ ꠉꠦꠍ ꠕꠣꠇꠤ ꠀꠉꠦꠃ ꠙꠣꠁꠍ ꠀꠞ ꠔꠥꠝꠞꠣ ꠅꠟꠣ ꠌꠟꠞꠣꠄꠅ। ꠄꠞꠛꠣꠖꠦꠅ ꠢꠎꠞꠔ ꠁꠍꠣꠞ ꠅꠁꠀ ꠔꠥꠝꠞꠣꠞꠦ ꠝꠤꠘꠔ ꠇꠞꠤꠀꠞ ꠀꠞ ꠢꠥꠡꠤꠀꠞ ꠇꠞꠤꠀꠞ, ꠔꠥꠝꠞꠣ ꠎꠦꠟꠣ ꠌꠟꠞꠣꠄ, ꠅꠃꠟꠣ ꠀꠞꠅ ꠛꠦꠡ ꠇꠞꠤ ꠌꠟꠅ।
1TH 4:2 ꠢꠎꠞꠔ ꠁꠍꠣꠞ ꠖꠦꠅꠀ ꠄꠈꠔꠤꠀꠞꠦ ꠀꠝꠞꠣ ꠎꠦꠔꠣ ꠢꠥꠇꠥꠝ ꠖꠤꠍꠤ, ꠁꠔꠣ ꠔ ꠔꠥꠝꠞꠣꠞ ꠎꠣꠘꠣ ꠀꠍꠦ।
1TH 4:3 ꠀꠍꠟꠦ ꠀꠟ꠆ꠟꠣꠄ ꠌꠣꠁꠞꠣ, ꠔꠥꠝꠞꠣ ꠎꠣꠘꠥ ꠙꠣꠇ-ꠙꠛꠤꠔ꠆ꠞ ꠅꠅ, ꠝꠣꠘꠤ ꠢꠇꠟ ꠘꠝꠥꠘꠣꠞ ꠎꠤꠘꠣ ꠕꠣꠇꠤ ꠢꠞꠤꠀ ꠞꠅ।
1TH 4:4 ꠀꠞ ꠎꠦꠔꠣ ꠝꠣꠘꠡꠦ ꠀꠟ꠆ꠟꠣꠞꠦ ꠌꠤꠘꠂꠘ ꠘꠣ, ꠢꠃ ꠜꠤꠘ-ꠗꠞ꠆ꠝꠤꠞ ꠟꠣꠈꠣꠘ ꠡꠞꠤꠟꠞ ꠈꠣꠁꠡꠞ ꠛꠡꠦ ꠘꠣ ꠌꠟꠤꠀ, ꠔꠥꠝꠞꠣ ꠙꠞꠔꠦꠇ ꠎꠘꠦ ꠎꠣꠞꠎꠤꠞ ꠡꠞꠤꠟꠞꠦ ꠙꠣꠇ-ꠙꠛꠤꠔ꠆ꠞ ꠞꠣꠈꠤꠀ ꠝꠣꠘ-ꠡꠝ꠆ꠝꠣꠘꠦ ꠎꠤꠘꠣ ꠕꠣꠇꠤ ꠢꠥꠡꠤꠀꠞ ꠞꠅ।
1TH 4:6 ꠁ ꠛꠦꠙꠣꠞꠦ ꠇꠦꠃ ꠎꠣꠘꠥ ꠘꠤꠎꠞ ꠜꠣꠁꠞ ꠟꠉꠦ ꠉꠣꠖ꠆ꠖꠣꠞꠤ ꠘꠣ ꠇꠞꠦ। ꠝꠘꠅ ꠞꠣꠈꠤꠅ, ꠀꠝꠞꠣ ꠀꠉꠦꠃ ꠔꠥꠝꠞꠣꠞꠦ ꠇꠁꠍꠤ ꠀꠞ ꠢꠥꠡꠤꠀꠞꠅ ꠇꠞꠍꠤ, ꠁꠔꠣ ꠘꠣꠚꠞꠝꠣꠘꠤ ꠇꠞꠟꠦ ꠝꠣꠟꠤꠇ ꠁꠍꠣꠄ ꠡꠣꠎꠣ ꠖꠤꠛꠣ।
1TH 4:7 ꠀꠟ꠆ꠟꠣꠄ ꠇꠥꠘꠥ ꠀꠝꠞꠣꠞꠦ ꠖꠣꠅꠔ ꠖꠤꠍꠂꠘ ꠘꠤ ꠘꠣꠚꠞꠝꠣꠘꠤꠞ ꠙꠕꠦ ꠌꠟꠣꠞ ꠟꠣꠉꠤ? ꠔꠣꠁꠘ ꠔ ꠀꠝꠞꠣꠞꠦ ꠙꠣꠇ-ꠙꠛꠤꠔ꠆ꠞ ꠅꠁꠀ ꠌꠟꠣꠞ ꠟꠣꠉꠤ ꠇꠁꠍꠂꠘ।
1TH 4:8 ꠄꠞꠟꠣꠉꠤ ꠎꠦꠉꠤꠄ ꠁ ꠔꠣꠟꠤꠝ ꠝꠣꠘꠦ ꠘꠣ, ꠢꠦ ꠈꠣꠟꠤ ꠖꠥꠘꠤꠀꠞ ꠝꠣꠘꠡꠞꠦ ꠝꠣꠘꠦ ꠘꠣ ꠁꠈꠣꠘ ꠘꠣꠄ, ꠢꠦ ꠀꠍꠟꠦ ꠢꠃ ꠀꠟ꠆ꠟꠣꠞꠦꠃ ꠝꠣꠘꠦꠞ ꠘꠣ, ꠎꠦꠁꠘ ꠔꠥꠝꠞꠣꠞꠦ ꠙꠣꠇ ꠞꠥꠢꠥ ꠖꠣꠘ ꠇꠞꠍꠂꠘ।
1TH 4:9 ꠔꠦ ꠜꠣꠁꠄ ꠜꠣꠁꠄ ꠇꠤꠟꠣ ꠝꠣꠄꠀ-ꠝꠢꠛ꠆ꠛꠔ ꠕꠣꠇꠣ ꠎꠞꠥꠞ, ꠁ ꠛꠦꠙꠣꠞꠦ ꠔꠥꠝꠞꠣꠞꠦ ꠇꠥꠘ꠆ꠔꠣ ꠟꠦꠈꠣꠞ ꠉꠞꠎ ꠘꠣꠁ, ꠇꠣꠞꠘ ꠀꠟ꠆ꠟꠣꠄ ꠔꠥꠝꠞꠣꠞꠦ ꠢꠤꠇꠣꠁꠍꠂꠘ, ꠄꠇꠦ-ꠅꠁꠘ꠆ꠘꠦ ꠝꠣꠄꠀ-ꠝꠢꠛ꠆ꠛꠔ ꠇꠞꠔꠣꠄ।
1TH 4:10 ꠀꠞ ꠢꠣꠍꠣꠃ ꠔꠥꠝꠞꠣ ꠀꠡ꠆ꠔꠣ ꠝꠣꠇꠤꠖꠘꠤꠀ ꠖꠦꠡꠞ ꠜꠣꠁ-ꠛꠁꠘꠞꠦ ꠅꠃꠟꠣ ꠝꠣꠄꠀ ꠇꠞꠞꠣꠄ। ꠅꠁꠟꠦ ꠀꠝꠞꠣꠞ ꠈꠣꠍ ꠅꠘꠥꠞꠥꠗ ꠅꠁꠟ, ꠔꠥꠝꠞꠣꠞ ꠁ ꠝꠢꠛ꠆ꠛꠔ ꠎꠣꠘꠥ ꠖꠤꠘꠦ ꠖꠤꠘꠦ ꠀꠞꠅ ꠛꠣꠠꠦ।
1TH 4:11 ꠢꠥꠘꠅ, ꠀꠝꠞꠣ ꠀꠉꠦ ꠎꠦꠟꠣ ꠇꠁꠍꠤ, ꠅꠃ ꠇꠕꠣ ꠝꠣꠚꠤꠇ ꠡꠣꠘ꠆ꠔꠤꠄ ꠎꠤꠘ꠆ꠖꠦꠉꠤ ꠇꠣꠐꠣꠅ, ꠙꠞꠞ ꠇꠣꠝꠅ ꠘꠣꠇ ꠘꠣ ꠉꠟꠣꠁꠀ ꠘꠤꠎꠦ ꠇꠣꠝ ꠇꠞꠤꠀ ꠈꠣꠅ।
1TH 4:12 ꠔꠦꠃ ꠛꠣꠁꠞꠣ ꠝꠣꠘꠡꠞ ꠌꠈꠥꠔ ꠔꠥꠝꠞꠣꠞ ꠌꠣꠟ-ꠌꠟꠘ ꠜꠖ꠆ꠞ ꠅꠁꠛ, ꠀꠞ ꠅꠁꠘ꠆ꠘ ꠎꠘꠞ ꠞꠥꠎꠤꠞ ꠃꠙꠞꠦ ꠔꠥꠝꠞꠣꠞ ꠜꠞꠡꠣ ꠇꠞꠣ ꠟꠣꠉꠔ ꠘꠣꠄ।
1TH 4:13 ꠅ ꠜꠣꠁ ꠅꠇꠟ, ꠢꠥꠘꠅ, ꠝꠥꠞ꠆ꠖꠣ ꠅꠇꠟꠞ ꠇꠥꠘ ꠢꠣꠟꠔ ꠅꠁꠛ, ꠀꠝꠞꠣ ꠌꠣꠁꠞꠣꠝ ꠁꠔꠣ ꠔꠥꠝꠞꠣ ꠎꠣꠘ, ꠎꠣꠔꠦ ꠝꠞꠘ ꠛꠣꠖꠦ ꠇꠤꠔꠣ ꠅꠁꠛ ꠁꠈꠣꠘ ꠘꠣ ꠎꠣꠘꠣꠄ ꠎꠦꠞꠣ ꠘꠤꠞꠣꠡ ꠅꠁꠎꠣꠄ, ꠔꠥꠝꠞꠣꠞ ꠝꠘ ꠎꠣꠘꠥ ꠁꠟꠣꠈꠣꠘ ꠘꠣ ꠅꠄ।
1TH 4:14 ꠢꠥꠘꠅ, ꠀꠝꠞꠣ ꠎꠦꠛꠟꠣ ꠄꠇꠤꠘ ꠇꠞꠤ, ꠢꠎꠞꠔ ꠁꠍꠣꠞ ꠝꠃꠔ ꠅꠁꠍꠤꠟ ꠅꠁꠟꠦ ꠔꠣꠁꠘ ꠎꠤꠘ꠆ꠖꠣ ꠅꠁꠀ ꠃꠑꠍꠂꠘ, ꠔꠦ ꠄꠅꠈꠣꠘꠅ ꠄꠇꠤꠘ ꠇꠞꠤ, ꠢꠎꠞꠔ ꠁꠍꠣꠄ ꠖꠥꠍꠞꠣꠛꠣꠞ ꠔꠡꠞꠤꠚ ꠀꠘꠟꠦ ꠁꠍꠣꠞ ꠃꠙꠞꠦ ꠁꠝꠣꠘ ꠀꠘꠤꠀ ꠎꠦꠞꠣꠞ ꠝꠃꠔ ꠅꠁꠍꠦ, ꠀꠟ꠆ꠟꠣꠄ ꠔꠣꠞꠣꠞꠦꠅ ꠁꠍꠣꠞ ꠟꠉꠦ ꠝꠤꠟꠘ ꠇꠞꠤꠀ ꠔꠣꠘ ꠟꠉꠦ ꠘꠤꠛꠣ।
1TH 4:15 ꠄꠞꠟꠣꠉꠤ ꠝꠣꠟꠤꠇꠞ ꠇꠣꠟꠣꠝ ꠝꠣꠚꠤꠇ ꠔꠥꠝꠞꠣꠞꠦ ꠇꠁꠞꠣꠝ, ꠀꠝꠞꠣ ꠎꠦꠞꠣ ꠎꠤꠘ꠆ꠖꠣ ꠀꠍꠤ ꠀꠞ ꠝꠣꠟꠤꠇꠦ ꠔꠡꠞꠤꠚ ꠀꠘꠣꠞ ꠀꠉ ꠙꠞ꠆ꠎꠘ꠆ꠔ ꠎꠤꠘ꠆ꠖꠣ ꠞꠁꠝꠥ, ꠀꠝꠞꠣ ꠇꠥꠘꠥꠝꠘ꠆ꠔꠦꠃ ꠢꠤ ꠝꠥꠞ꠆ꠖꠣ ꠅꠇꠟꠞ ꠀꠉꠦ ꠎꠣꠁꠔꠣꠝ ꠙꠣꠞꠔꠣꠝ ꠘꠣꠄ।
1TH 4:16 ꠇꠣꠞꠘ ꠀꠟ꠆ꠟꠣꠁ ꠡꠤꠋꠉꠣꠞ ꠀꠅꠀꠎꠞ ꠟꠉꠦ ꠟꠉꠦ, ꠙꠞꠗꠣꠘ ꠚꠤꠞꠤꠡ꠆ꠔꠣꠞ ꠒꠣꠇꠞ ꠟꠉꠦ, ꠝꠣꠟꠤꠇ ꠁꠍꠣꠄ ꠎꠥꠞꠦ ꠢꠣꠃꠇꠖꠤ ꠢꠥꠇꠥꠝ ꠖꠤꠛꠣ, ꠔꠣꠁꠘ ꠘꠤꠎꠦꠃ ꠛꠦꠢꠦꠡ꠆ꠔ ꠕꠣꠇꠤ ꠟꠣꠝꠤꠀ ꠀꠁꠛꠣ। ꠀꠞ ꠀꠟ-ꠝꠍꠤꠞ ꠃꠝ꠆ꠝꠔ ꠛꠘꠤꠀ ꠎꠦꠞꠣꠞ ꠝꠃꠔ ꠅꠁꠉꠦꠍꠦ, ꠔꠣꠞꠣꠃ ꠙꠄꠟꠣ ꠎꠤꠘ꠆ꠖꠣ ꠅꠁꠀ ꠃꠑꠛꠣ।
1TH 4:17 ꠄꠞꠛꠣꠖꠦ ꠀꠝꠞꠣ ꠎꠦꠞꠣ ꠖꠥꠘꠤꠀꠔ ꠎꠤꠘ꠆ꠖꠣ ꠕꠣꠇꠝꠥ, ꠀꠝꠞꠣꠞ ꠝꠣꠟꠤꠇꠞ ꠟꠉꠦ ꠝꠥꠟꠣꠇꠣꠔ ꠇꠞꠣꠞ ꠟꠣꠉꠤ ꠀꠝꠞꠣꠞꠦꠅ ꠝꠦꠊꠞ ꠈꠥꠐꠤꠔ ꠇꠞꠤ ꠀꠍꠝꠣꠘꠅ ꠔꠥꠟꠤꠀ ꠘꠦꠅꠀ ꠅꠁꠛ। ꠅꠟꠣꠈꠣꠘ ꠀꠝꠞꠣ ꠌꠤꠞꠇꠣꠟ ꠝꠣꠟꠤꠇꠞ ꠟꠉꠦ ꠞꠁꠝꠥ।
1TH 4:18 ꠄꠞꠟꠣꠉꠤ ꠔꠥꠝꠞꠣ ꠅꠔꠣ ꠎꠣꠘꠣꠁꠀ ꠄꠇ ꠎꠘꠦ ꠀꠞꠇ ꠎꠘꠞꠦ ꠃꠔꠡꠣꠢ ꠖꠦꠅ।
1TH 5:1 ꠜꠣꠁꠀꠁꠘꠞꠦ, ꠇꠥꠘ ꠎꠝꠣꠘꠣꠔ ꠇꠥꠘ ꠡꠝꠄ ꠇꠤꠔꠣ ꠊꠐꠤꠛ, ꠁꠔꠣ ꠔꠥꠝꠞꠣꠞ ꠉꠦꠍꠦ ꠟꠦꠈꠣꠞ ꠎꠞꠥꠞ ꠘꠣꠁ।
1TH 5:2 ꠔꠥꠝꠞꠣ ꠘꠤꠎꠦꠃ ꠔ ꠜꠣꠟꠣ ꠇꠞꠤ ꠎꠣꠘ, ꠞꠣꠁꠔꠇꠥꠞ ꠛꠣꠟꠣ ꠎꠦꠟꠣ ꠀꠈꠔꠣꠃ ꠌꠥꠞ ꠀꠄ, ꠝꠣꠟꠤꠇ ꠁꠍꠣ ꠀꠁꠛꠣꠞ ꠖꠤꠘꠅ ꠑꠤꠇ ꠅꠟꠣꠃ ꠀꠁꠛ।
1TH 5:3 ꠁ ꠎꠉꠔꠞ ꠝꠣꠘꠡꠦ ꠎꠦꠛꠟꠣ ꠇꠁꠛꠣ, “ꠢꠇꠟꠔꠣ ꠡꠣꠘ꠆ꠔꠤ ꠅꠁꠉꠦꠍꠦ, ꠇꠥꠘꠥ ꠒꠞ-ꠜꠄ ꠘꠣꠁ,” ꠅꠃ ꠡꠝꠄ, ꠛꠦꠐꠤꠘ꠆ꠔꠞ ꠢꠥꠞꠥꠔ꠆ꠔꠣ ꠅꠀꠞ ꠛꠦꠖꠘꠣ ꠎꠦꠟꠣ ꠀꠈꠔꠣꠃ ꠗꠞꠦ, ꠅꠃꠟꠣ ꠅꠔꠣ ꠝꠣꠘꠡꠞ ꠡꠞ꠆ꠛꠘꠣꠡ ꠀꠈꠔꠣꠃ ꠅꠁꠛ। ꠔꠣꠞꠣ ꠇꠥꠘꠥꠝꠘ꠆ꠔꠦꠃ ꠞꠦꠢꠣꠁ ꠙꠣꠁꠔ ꠘꠣꠄ।
1TH 5:4 ꠜꠣꠁ ꠅꠇꠟ, ꠔꠥꠝꠞꠣ ꠇꠥꠘꠥ ꠀꠘ꠆ꠖꠣꠞꠤꠞ ꠝꠣꠎꠦ ꠛꠡꠔ ꠇꠞꠞꠣꠄ ꠘꠤ ꠎꠦꠘ, ꠢꠃ ꠖꠤꠘ ꠀꠈꠔꠣꠃ ꠌꠥꠞꠞ ꠟꠣꠈꠣꠘ ꠔꠥꠝꠞꠣꠞ ꠃꠙꠞꠦ ꠀꠁꠔ?
1TH 5:5 ꠔꠥꠝꠞꠣ ꠢꠇꠟꠃ ꠔ ꠀꠟ꠆ꠟꠣꠞ ꠘꠥꠞꠞ ꠀꠞ ꠖꠤꠘꠞ ꠚꠞꠞ ꠝꠣꠘꠥꠡ। ꠀꠝꠞꠣ ꠔ ꠀꠘ꠆ꠖꠣꠞꠤꠞ ꠛꠣ ꠞꠣꠁꠔꠞ ꠛꠣꠟꠣꠞ ꠝꠣꠘꠥꠡ ꠘꠣꠄ।
1TH 5:6 ꠄꠞꠟꠣꠉꠤ ꠀꠅ, ꠅꠁꠘ꠆ꠘ ꠝꠣꠘꠡꠞ ꠟꠣꠈꠣꠘ ꠀꠝꠞꠣ ꠘꠣ ꠊꠥꠝꠣꠁꠀ ꠛꠞꠋ ꠢꠎꠣꠉ ꠞꠁ ꠀꠞ ꠘꠤꠎꠞꠦ ꠡꠣꠝꠟꠣꠁꠀ ꠞꠣꠈꠤ।
1TH 5:7 ꠎꠣꠘ ꠔ, ꠎꠦꠞꠣ ꠊꠥꠝꠣꠄ, ꠔꠣꠞꠣ ꠞꠣꠁꠔꠞ ꠛꠣꠟꠣꠄꠃ ꠊꠥꠝꠣꠄ ꠀꠞ ꠎꠦꠞꠣ ꠝꠖꠈꠥꠞ, ꠞꠣꠁꠔ ꠅꠁꠟꠦ ꠔꠣꠞꠣ ꠝꠖ ꠈꠣꠁꠀ ꠐꠣꠟ ꠅꠄ।
1TH 5:8 ꠅꠁꠟꠦ ꠀꠝꠞꠣ ꠔ ꠖꠤꠘꠞ ꠚꠞꠞ ꠝꠣꠘꠥꠡ, ꠄꠞꠟꠣꠉꠤ ꠘꠤꠎꠞꠦ ꠡꠣꠝꠟꠣꠁꠀ ꠞꠣꠈꠤ। ꠀꠝꠞꠣꠞ ꠛꠥꠇ ꠛꠣꠌꠣꠘꠤꠞ ꠟꠣꠉꠤ ꠁꠝꠣꠘ ꠀꠞ ꠝꠢꠛ꠆ꠛꠔ ꠖꠤꠀ ꠛꠥꠇ ꠉꠥꠞꠤ, ꠀꠞ ꠝꠣꠕꠣꠞꠦ ꠛꠣꠌꠣꠘꠤꠞ ꠟꠣꠉꠤ ꠀꠟ꠆ꠟꠣꠁ ꠘꠣꠎꠣꠔꠞ ꠀꠡꠣꠞꠦ ꠍꠤꠙꠣꠁꠞ ꠇꠦꠙꠞ ꠟꠣꠈꠣꠘ ꠝꠣꠕꠣꠔ ꠟꠣꠉꠣꠁ।
1TH 5:9 ꠝꠘꠅ ꠞꠣꠈꠤꠅ, ꠀꠟ꠆ꠟꠣꠄ ꠀꠝꠞꠣꠞꠦ ꠡꠣꠎꠣ ꠖꠤꠛꠣꠞ ꠟꠣꠉꠤ ꠒꠣꠇꠤꠀ ꠀꠘꠍꠂꠘ ꠘꠣ, ꠛꠞꠋ ꠀꠝꠞꠣꠞ ꠝꠣꠟꠤꠇ ꠁꠍꠣ ꠀꠟ-ꠝꠍꠤꠞ ꠃꠍꠤꠟ꠆ꠟꠣꠄ ꠘꠣꠎꠣꠔ ꠙꠣꠅꠀꠞ ꠟꠣꠉꠤꠃ ꠒꠣꠇꠤꠍꠂꠘ।
1TH 5:10 ꠀꠞ ꠀꠟ-ꠝꠍꠤꠞ ꠝꠃꠔ ꠅꠁꠍꠦ ꠔ ꠀꠝꠞꠣꠞ ꠟꠣꠉꠤꠃ, ꠎꠣꠔꠦ ꠀꠝꠞꠣ ꠛꠣꠌꠤ ꠛꠣ ꠝꠞꠤ, ꠔꠣꠘ ꠟꠉꠦꠃ ꠢꠣꠝꠦꠡꠣ ꠎꠤꠘ꠆ꠖꠣ ꠞꠁ।
1TH 5:11 ꠄꠞꠟꠣꠉꠤꠃ ꠔꠥꠝꠞꠣ ꠅꠈꠘ ꠎꠦꠟꠣ ꠇꠞꠞꠣꠄ, ꠢꠣꠝꠦꠡꠣ ꠅꠟꠣ ꠄꠇꠦ-ꠅꠁꠘ꠆ꠘꠞꠦ ꠡꠣꠅꠡ ꠖꠦꠅ ꠀꠞ ꠉꠠꠤꠀ ꠔꠥꠟꠅ।
1TH 5:12 ꠔꠦ ꠜꠣꠁꠀꠁꠘ, ꠀꠝꠞꠣ ꠝꠤꠘꠔ ꠇꠞꠤꠀ ꠇꠁꠀꠞ, ꠔꠥꠝꠞꠣꠞ ꠟꠣꠉꠤ ꠎꠦꠞꠣ ꠀꠐꠘꠤ-ꠈꠣꠐꠘꠤ ꠈꠣꠐꠂꠘ, ꠝꠣꠟꠤꠇꠞ ꠅꠁꠀ ꠔꠥꠝꠞꠣꠞꠦ ꠌꠣꠟꠣꠁꠘ ꠀꠞ ꠘꠍꠤꠅꠔ ꠇꠞꠂꠘ, ꠔꠥꠝꠞꠣ ꠄꠞꠣꠞꠦ ꠁꠎ꠆ꠎꠔ ꠇꠞꠤꠅ।
1TH 5:13 ꠔꠣꠞꠣ ꠎꠦꠟꠣ ꠈꠦꠎꠝꠔ ꠇꠞꠞꠣ, ꠅꠔꠣꠞ ꠛꠣꠄ ꠌꠣꠁꠀ ꠖꠤꠟꠞ ꠝꠢꠛ꠆ꠛꠔꠦ ꠔꠣꠞꠣꠞꠦ ꠈꠣꠍ ꠁꠎ꠆ꠎꠔ ꠖꠤꠅ। ꠀꠞ ꠔꠥꠝꠞꠣ ꠄꠇꠦ-ꠅꠁꠘ꠆ꠘꠦ ꠝꠤꠟꠤ-ꠝꠤꠡꠤ ꠞꠁꠅ।
1TH 5:14 ꠅ ꠜꠣꠁ ꠅꠇꠟ, ꠔꠥꠝꠞꠣꠞꠦ ꠅꠃ ꠘꠍꠤꠅꠔꠈꠣꠘ ꠇꠞꠤꠀꠞ, ꠎꠦꠔꠣ ꠝꠣꠘꠥꠡ ꠇꠥꠠꠤꠀ, ꠔꠥꠝꠞꠣ ꠁꠔꠣꠞꠦ ꠢꠥꠡꠤꠀꠞ ꠇꠞꠤ ꠖꠦꠅ, ꠒꠞꠣꠟꠥꠇ ꠎꠘꠞꠦ ꠡꠣꠅꠡ ꠖꠦꠅ, ꠇꠝꠎꠥꠞ ꠅꠇꠟꠞꠦ ꠡꠣꠁꠎ꠆ꠎ ꠇꠞꠅ, ꠀꠞ ꠗꠂꠎ꠆ꠎ ꠗꠞꠤꠀ ꠢꠇ꠆ꠇꠟꠞꠦ ꠡꠁꠎ꠆ꠎ ꠇꠞꠅ।
1TH 5:15 ꠈꠤꠀꠟ ꠞꠣꠈꠤꠅ, ꠅꠁꠘ꠆ꠘꠣꠄꠞ ꠛꠖꠟꠣ ꠇꠦꠃ ꠎꠣꠘꠥ ꠅꠁꠘ꠆ꠘꠣꠄ ꠘꠣ ꠇꠞꠦ। ꠔꠥꠝꠞꠣ ꠢꠣꠝꠦꠡꠣ ꠄꠇꠦ-ꠅꠁꠘ꠆ꠘꠞ, ꠀꠞ ꠢꠇꠟꠞꠃ ꠜꠣꠟꠣꠁ ꠇꠞꠣꠞ ꠌꠦꠡ꠆ꠐꠣ ꠇꠞꠤꠅ।
1TH 5:16 ꠢꠇꠟ ꠡꠝꠄ ꠈꠥꠡꠤ-ꠛꠣꠡꠤ ꠇꠞꠣꠔ ꠞꠁꠅ,
1TH 5:17 ꠢꠣꠝꠦꠡꠣ ꠖꠥꠀ-ꠝꠥꠘꠣꠎꠣꠔ ꠇꠞꠤꠅ
1TH 5:18 ꠀꠞ ꠢꠇꠟ ꠢꠣꠟꠔꠅ ꠀꠟ꠆ꠟꠣꠞ ꠡꠥꠇꠞꠤꠀ ꠀꠖꠣꠄ ꠇꠞꠤꠅ। ꠇꠣꠞꠘ ꠀꠟ꠆ꠟꠣ ꠙꠣꠇꠞ ꠈꠤꠀꠟ ꠅꠁꠟ, ꠢꠎꠞꠔ ꠁꠍꠣ ꠀꠟ-ꠝꠍꠤꠞ ꠟꠉꠦ ꠁꠝꠣꠘꠦ ꠔꠥꠝꠞꠣ ꠅꠟꠣꠈꠣꠘ ꠌꠟ।
1TH 5:19 ꠙꠣꠇ ꠞꠥꠢꠥꠞꠦ ꠖꠤꠟꠞ ꠜꠤꠔꠞ ꠕꠣꠇꠤ ꠘꠤꠜꠣꠁꠅ ꠘꠣ।
1TH 5:20 ꠀꠞ ꠎꠦꠞꠣ ꠀꠟ꠆ꠟꠣꠞ ꠅꠟꠤ ꠢꠤꠡꠣꠛꠦ ꠛꠣꠔꠥꠘꠤ ꠇꠂꠘ, ꠔꠣꠞꠣꠞ ꠇꠕꠣꠞꠦ ꠄꠟꠣꠝꠤ ꠇꠞꠤꠅ ꠘꠣ,
1TH 5:21 ꠛꠞꠋ ꠢꠇꠟꠔꠣ ꠎꠣꠌꠣꠁ ꠇꠞꠤ ꠖꠦꠈꠤꠀ, ꠜꠣꠟꠣꠈꠣꠘ ꠜꠤꠔꠞꠦ ꠢꠣꠞꠣꠁꠅ।
1TH 5:22 ꠀꠞ ꠢꠇꠟ ꠘꠝꠥꠘꠣꠞ ꠘꠣꠚꠞꠝꠣꠘꠤ ꠕꠣꠇꠤ ꠢꠞꠤꠀ ꠞꠁꠅ।
1TH 5:23 ꠡꠣꠘ꠆ꠔꠤ ꠖꠦꠅꠞꠣ ꠀꠟ꠆ꠟꠣꠄ ꠘꠤꠎꠦ ꠔꠥꠝꠞꠣꠞꠦ ꠙꠥꠞꠣꠙꠥꠞ ꠙꠣꠇ-ꠙꠛꠤꠔ꠆ꠞ ꠇꠞꠃꠇ꠆ꠇꠣ, ꠀꠝꠞꠣꠞ ꠝꠣꠟꠤꠇ ꠁꠍꠣ ꠀꠟ-ꠝꠍꠤꠄ ꠔꠡꠞꠤꠚ ꠀꠘꠣꠞ ꠇꠣꠟꠅ ꠔꠥꠝꠞꠣꠞ ꠀꠡ꠆ꠔꠣ ꠡꠞꠤꠟ, ꠞꠥꠢꠥ ꠀꠞ ꠖꠤꠟꠞꠦ ꠙꠥꠞꠣꠙꠥꠞ ꠘꠤꠈꠥꠔ ꠞꠣꠈꠃꠇ꠆ꠇꠣ।
1TH 5:24 ꠀꠞ ꠔꠣꠁꠘ ꠘꠤꠌ꠆ꠌꠤꠔ ꠅꠟꠣꠃ ꠇꠞꠛꠣ। ꠎꠣꠘ ꠔ, ꠎꠦꠁꠘ ꠔꠥꠝꠞꠣꠞꠦ ꠖꠣꠅꠔ ꠇꠞꠤ ꠀꠘꠍꠂꠘ, ꠔꠣꠘ ꠃꠙꠞꠦ ꠙꠥꠞꠣꠙꠥꠞ ꠜꠞꠡꠣ ꠇꠞꠣ ꠎꠣꠄ।
1TH 5:25 ꠅ ꠜꠣꠁꠀꠁꠘ, ꠀꠝꠞꠣꠞ ꠟꠣꠉꠤ ꠖꠥꠀ ꠇꠞꠤꠅ।
1TH 5:26 ꠔꠥꠝꠞꠣ ꠄꠇꠦ-ꠅꠁꠘ꠆ꠘꠦ ꠙꠛꠤꠔ꠆ꠞ ꠉꠟꠣꠉꠟꠤ ꠇꠞꠤꠅ।
1TH 5:27 ꠀꠝꠞꠣꠞ ꠝꠣꠟꠤꠇꠞ ꠘꠣꠝꠦ ꠀꠝꠤ ꠔꠥꠝꠞꠣꠞꠦ ꠅꠃ ꠢꠥꠇꠥꠝ ꠖꠤꠀꠞ, ꠅꠃ ꠌꠤꠑꠤꠈꠣꠘ ꠙꠠꠤꠀ ꠎꠣꠘꠥ ꠢꠇꠟ ꠜꠣꠁꠀꠁꠘ꠆ꠔꠞꠦ ꠢꠥꠘꠣꠁꠟ ꠅꠄ।
1TH 5:28 ꠀꠝꠞꠣꠞ ꠝꠣꠟꠤꠇ ꠁꠍꠣ ꠀꠟ-ꠝꠍꠤꠞ ꠞꠢꠝꠔ ꠔꠥꠝꠞꠣꠞ ꠟꠉꠦ ꠞꠃꠇ। ꠀꠝꠤꠘ॥
2TH 1:1 ꠀꠝꠞꠣꠞ ꠉꠣꠁꠛꠤ ꠛꠣꠚ ꠀꠟ꠆ꠟꠣ ꠙꠣꠇ ꠀꠞ ꠢꠎꠞꠔ ꠁꠍꠣ ꠀꠟ-ꠝꠍꠤꠞ ꠟꠉꠦ ꠡꠞꠤꠇ, ꠕꠤꠡꠟꠘꠤꠇꠤ ꠐꠣꠃꠘꠞ ꠎꠝꠣꠔꠞ ꠉꠦꠍꠦ ꠀꠝꠤ ꠙꠣꠃꠟꠥꠍ, ꠜꠣꠁ ꠍꠤꠟꠣꠍ ꠀꠞ ꠔꠤꠝꠕꠤꠄ ꠅꠃ ꠍꠢꠤꠚꠣꠈꠣꠘ ꠟꠦꠈꠞꠣꠝ।
2TH 1:2 ꠉꠣꠁꠛꠤ ꠛꠣꠚ ꠀꠟ꠆ꠟꠣꠄ ꠀꠞ ꠢꠎꠞꠔ ꠁꠍꠣ ꠀꠟ-ꠝꠍꠤꠄ ꠔꠥꠝꠞꠣꠞꠦ ꠞꠢꠝꠔ ꠀꠞ ꠡꠣꠘ꠆ꠔꠤ ꠖꠣꠘ ꠇꠞꠃꠇ꠆ꠇꠣ।
2TH 1:3 ꠜꠣꠁ ꠅꠇꠟ, ꠀꠝꠞꠣ ꠢꠣꠝꠦꠡꠣ ꠔꠥꠝꠞꠣꠞ ꠟꠣꠉꠤ ꠀꠟ꠆ꠟꠣꠞ ꠡꠥꠇꠞꠤꠀ ꠀꠖꠣꠄ ꠇꠞꠣ ꠎꠞꠥꠞ। ꠔꠥꠝꠞꠣꠞ ꠁꠝꠣꠘꠤ ꠛꠟ ꠛꠃꠔ ꠛꠣꠠꠦꠞ ꠀꠞ ꠄꠇꠦ-ꠅꠁꠘ꠆ꠘꠦ ꠝꠣꠄꠀ-ꠝꠢꠛ꠆ꠛꠔꠅ ꠛꠣꠁꠀ ꠙꠠꠦꠞ, ꠄꠞꠟꠣꠉꠤ ꠀꠝꠞꠣ ꠡꠥꠇꠞꠤꠀ ꠀꠖꠣꠄ ꠇꠞꠣ ꠖꠞꠇꠣꠞ।
2TH 1:4 ꠀꠝꠞꠣ ꠔ ꠀꠟ꠆ꠟꠣꠞ ꠎꠝꠣꠔ ꠅꠇꠟꠞ ꠍꠣꠝꠘꠦ ꠔꠥꠝꠞꠣꠞꠦ ꠟꠁꠀ ꠛꠠꠣꠁ ꠇꠞꠤꠀꠞ, ꠇꠣꠞꠘ ꠅꠔ ꠎꠥꠟꠥꠝ-ꠝꠍꠤꠛꠔ ꠀꠞ ꠖꠥꠈ-ꠇꠡ꠆ꠐ ꠙꠣꠁꠀꠅ ꠔꠥꠝꠞꠣ ꠍꠛꠞ ꠇꠞꠍ ꠀꠞ ꠁꠝꠣꠘꠦ ꠐꠤꠇꠤꠀ ꠞꠁꠍ।
2TH 1:5 ꠔꠥꠝꠞꠣꠞꠦ ꠎꠣꠔꠦ ꠀꠟ꠆ꠟꠣꠞ ꠛꠣꠖꠡꠣꠁꠞ ꠎꠁꠉ꠆ꠉ ꠇꠁꠀ ꠉꠘꠣ ꠅꠄ, ꠅꠔꠣꠞ ꠟꠣꠉꠤꠃ ꠔꠥꠝꠞꠣ ꠅꠔ ꠖꠥꠈ-ꠝꠍꠤꠛꠔ ꠡꠁꠎ꠆ꠎ ꠇꠞꠞꠣꠄ, ꠁꠔꠣ ꠅꠁꠟ ꠀꠟ꠆ꠟꠣꠞ ꠢꠇ-ꠁꠘꠍꠣꠚꠞ ꠙꠞꠝꠣꠘ,
2TH 1:6 ꠔꠣꠘ ꠢꠇ-ꠁꠘꠍꠣꠚ ꠅꠁꠟ, ꠎꠦꠔꠣꠄ ꠔꠥꠝꠞꠣꠞꠦ ꠇꠡ꠆ꠐ ꠖꠦꠁꠘ, ꠔꠣꠁꠘ ꠁꠔꠣꠞꠦ ꠇꠡ꠆ꠐ ꠖꠤꠛꠣ।
2TH 1:7 ꠀꠞ ꠔꠥꠝꠞꠣ ꠎꠦꠞꠣ ꠅꠈꠘ ꠇꠡ꠆ꠐ ꠙꠣꠁꠞꠣꠄ, ꠀꠟ꠆ꠟꠣꠄ ꠀꠝꠞꠣꠞ ꠟꠉꠦ ꠔꠥꠝꠞꠣꠞꠦꠅ ꠁ ꠇꠡ꠆ꠐ ꠕꠣꠇꠤ ꠞꠦꠢꠣꠁ ꠖꠤꠛꠣ। ꠢꠎꠞꠔ ꠁꠍꠣꠄ ꠎꠦꠛꠟꠣ ꠔꠣꠘ ꠡꠇ꠆ꠔꠤꠡꠣꠟꠤ ꠚꠤꠞꠤꠡ꠆ꠔꠣ ꠅꠇꠟ ꠟꠁꠀ, ꠎꠣꠟꠣꠁꠟ ꠀꠉꠥꠘꠤꠞ ꠇꠥꠘ꠆ꠒꠟꠤꠔ ꠅꠁꠀ ꠛꠦꠢꠦꠡ꠆ꠔ ꠕꠣꠇꠤ ꠟꠣꠝꠤꠀ ꠀꠁꠛꠣ, ꠅꠃ ꠡꠝꠄ ꠅꠃꠟꠣ ꠅꠁꠛ। ꠎꠦꠔꠣ ꠝꠣꠘꠡꠦ ꠀꠟ꠆ꠟꠣꠞꠦ ꠌꠤꠘꠦ ꠘꠣ ꠀꠞ ꠢꠎꠞꠔ ꠁꠍꠣꠞ ꠈꠥꠡ-ꠈꠛꠞꠤꠞ ꠇꠕꠣ ꠝꠣꠘꠦ ꠘꠣ, ꠀꠟ꠆ꠟꠣꠄ ꠁꠔꠣꠞꠦ ꠔꠣꠞꠣꠞ ꠙꠣꠅꠘꠣ ꠡꠣꠎꠣ ꠖꠤꠛꠣ।
2TH 1:9 ꠝꠣꠟꠤꠇ ꠁꠍꠣꠄ ꠎꠦꠛꠟꠣ ꠔꠡꠞꠤꠚ ꠀꠘꠛꠣ, ꠅꠃ ꠡꠝꠄ ꠔꠣꠞꠣꠞꠦ ꠅꠝꠘ ꠡꠣꠎꠣ ꠖꠦꠅꠀ ꠅꠁꠛ, ꠎꠣꠔꠦ ꠔꠣꠞꠣ ꠔꠣꠘ ꠖꠤꠖꠣꠞꠞ ꠀꠞ ꠝꠢꠣ ꠇꠥꠖꠞꠔꠤꠞ ꠛꠣꠞꠦ ꠙꠠꠤꠀ ꠢꠞ-ꠢꠣꠝꠦꠡꠣ ꠟꠣꠘ꠆ꠘꠔꠤ ꠡꠣꠎꠣ ꠙꠣꠁꠛ।
2TH 1:10 ꠢꠃ ꠖꠤꠘ ꠔꠣꠘ ꠘꠤꠎꠞ ꠙꠣꠇ ꠛꠘ꠆ꠖꠣ ꠅꠇꠟ, ꠎꠦꠞꠣ ꠔꠣꠘ ꠃꠙꠞꠦ ꠁꠝꠣꠘ ꠀꠘꠍꠦ ꠔꠣꠞꠣꠞ ꠝꠣꠎꠖꠤ, ꠔꠣꠘ ꠉꠃꠞꠛ-ꠝꠢꠤꠝꠣ ꠎꠣꠁꠞ ꠅꠁꠛ। ꠄꠞꠣꠞ ꠝꠣꠎꠦ ꠔꠥꠝꠞꠣꠅ ꠀꠍ, ꠇꠣꠞꠘ ꠀꠝꠞꠣꠞ ꠔꠛꠟꠤꠉ ꠢꠥꠘꠤꠀ ꠔꠥꠝꠞꠣ ꠁꠝꠣꠘ ꠀꠘꠍ।
2TH 1:11 ꠄꠞꠟꠣꠉꠤ ꠀꠝꠞꠣ ꠢꠣꠝꠦꠡꠣ ꠔꠥꠝꠞꠣꠞ ꠟꠣꠉꠤ ꠖꠥꠀ ꠇꠞꠤ, ꠀꠝꠞꠣꠞ ꠀꠟ꠆ꠟꠣꠄ ꠎꠣꠘꠥ ꠔꠥꠝꠞꠣꠞꠦ ꠔꠣꠘ ꠖꠣꠅꠔꠞ ꠎꠥꠇꠣ ꠝꠘꠅ ꠇꠞꠂꠘ, ꠔꠣꠘ ꠈꠦꠝꠔꠣꠞ ꠛꠟꠦ ꠔꠥꠝꠞꠣꠞ ꠢꠇꠟ ꠘꠦꠇ ꠇꠣꠝꠞ ꠀꠡꠣ ꠙꠥꠞꠘ ꠇꠞꠂꠘ, ꠀꠞ ꠁꠝꠣꠘ ꠀꠘꠤꠀ ꠢꠣꠞꠤ ꠔꠥꠝꠞꠣ ꠎꠦꠔꠣ ꠇꠣꠝ ꠇꠞꠞꠣꠄ, ꠁ ꠇꠣꠝꠅ ꠎꠣꠘꠥ ꠔꠣꠁꠘ ꠙꠥꠞꠣ ꠇꠞꠂꠘ।
2TH 1:12 ꠔꠦꠃ ꠀꠝꠞꠣꠞ ꠀꠟ꠆ꠟꠣ ꠀꠞ ꠢꠎꠞꠔ ꠁꠍꠣ ꠀꠟ-ꠝꠍꠤꠞ ꠞꠢꠝꠔꠞ ꠟꠣꠉꠤ, ꠔꠥꠝꠞꠣꠞ ꠝꠣꠎꠖꠤ ꠀꠝꠞꠣꠞ ꠝꠣꠟꠤꠇ ꠁꠍꠣꠞ ꠉꠃꠞꠛ ꠎꠣꠁꠞ ꠅꠁꠛ, ꠀꠞ ꠔꠣꠘ ꠝꠣꠎꠖꠤ ꠔꠥꠝꠞꠣꠅ ꠉꠃꠞꠛꠞ ꠜꠣꠉꠤ ꠅꠁꠛꠣꠄ।
2TH 2:1 ꠅ ꠜꠣꠁ ꠅꠇꠟ ꠢꠥꠘꠅ, ꠀꠝꠞꠣꠞ ꠝꠣꠟꠤꠇ ꠁꠍꠣ ꠀꠟ-ꠝꠍꠤ ꠔ ꠢꠤꠞꠛꠣꠞ ꠀꠁꠛꠣ, ꠀꠁꠀ ꠀꠝꠞꠣ ꠢꠇꠟꠞꠦ ꠄꠇꠈꠣꠘꠅ ꠖꠟꠣ ꠇꠞꠤꠀ ꠔꠣꠘ ꠉꠦꠍꠦ ꠘꠤꠛꠣ। ꠔꠦ ꠅꠃ ꠛꠦꠙꠣꠞꠦ ꠔꠥꠝꠞꠣꠞꠦ ꠝꠤꠘꠔ ꠇꠞꠤ ꠇꠁꠞꠣꠝ,
2TH 2:2 ꠇꠦꠃ ꠎꠥꠖꠤ ꠀꠁꠀ ꠇꠄ ꠝꠣꠟꠤꠇ ꠁꠍꠣꠞ ꠖꠤꠘ ꠀꠁꠀ ꠢꠣꠞꠍꠦ, ꠢꠦ ꠇꠥꠘꠥ ꠉꠣꠁꠛꠤ ꠖꠞꠡꠘ ꠖꠦꠈꠍꠦ, ꠛꠣ ꠅꠢꠤ ꠘꠣꠎꠤꠟ ꠅꠁꠍꠦ, ꠛꠣ ꠀꠝꠞꠣꠞ ꠟꠦꠈꠣ ꠌꠤꠑꠤ ꠝꠘꠅ ꠇꠞꠤꠀꠅ ꠔꠥꠝꠞꠣ ꠒꠞꠣꠁꠀ ꠅꠡ꠆ꠕꠤꠞ ꠅꠁꠅ ꠘꠣ।
2TH 2:3 ꠇꠦꠃ ꠎꠣꠘꠥ ꠇꠥꠘꠥꠝꠘ꠆ꠔꠦꠃ ꠔꠥꠝꠞꠣꠞꠦ ꠐꠉꠤꠀ ꠁꠝꠣꠘ ꠟꠥꠐꠤꠔ ꠘꠣ ꠙꠣꠞꠦ। ꠇꠣꠞꠘ ꠢꠃ ꠖꠤꠘ ꠀꠅꠀꠞ ꠀꠉꠦ ꠛꠦꠡꠤꠞ ꠜꠣꠉ ꠝꠣꠘꠥꠡ ꠀꠟ꠆ꠟꠣ ꠙꠣꠇꠞ ꠛꠤꠞꠥꠖ꠆ꠖꠦ ꠎꠣꠁꠛ, ꠔꠣꠞꠣ ꠀꠟ꠆ꠟꠣꠞ ꠉꠦꠍ ꠕꠣꠇꠤ ꠖꠥꠞꠁ ꠢꠞꠤꠎꠤꠛ, ꠀꠞ ꠖꠥꠎꠈꠤ ꠎꠘ, ꠢꠃ ꠘꠣꠚꠞꠝꠣꠘ ꠈꠣꠘꠦ-ꠖꠞ꠆ꠎꠣꠟ ꠛꠣꠞ ꠅꠁꠛ।
2TH 2:4 ꠛꠣꠞ ꠅꠁꠀ “ꠀꠟ꠆ꠟꠣꠞ ꠘꠣꠝꠦ” ꠎꠔꠔꠣ ꠀꠍꠦ, ꠁꠔꠣ ꠢꠇ꠆ꠇꠟꠔꠣꠞ ꠛꠤꠙꠇ꠆ꠇꠦ ꠀꠞ ꠄꠛꠣꠖꠔꠤ ꠇꠞꠣꠞ ꠎꠥꠇꠣ ꠢꠇ꠆ꠇꠟꠔꠣꠞ ꠛꠤꠙꠇ꠆ꠇꠦ ꠉꠤꠀ, ꠢꠦ ꠘꠤꠎꠞꠦ ꠛꠠ ꠝꠘꠅ ꠇꠞꠛ। ꠢꠦ ꠅꠟꠣꠅ ꠇꠞꠛ, ꠀꠟ꠆ꠟꠣꠞ ꠄꠛꠣꠖꠔ ꠈꠣꠘꠣꠔ ꠛꠁꠀ ꠘꠤꠎꠞꠦ ꠀꠟ꠆ꠟꠣ ꠇꠁꠀ ꠖꠣꠛꠤ ꠇꠞꠛ।
2TH 2:5 ꠔꠦ ꠀꠝꠤ ꠎꠦꠛꠟꠣ ꠔꠥꠝꠞꠣꠞ ꠉꠦꠍꠦ ꠞꠁꠔꠣꠝ, ꠢꠃ ꠡꠝꠄ ꠀꠝꠤ ꠁ ꠛꠦꠙꠣꠞꠦ ꠝꠣꠔꠔꠣꠝ, ꠁꠔꠣ ꠔꠥꠝꠞꠣꠞ ꠝꠘꠅ ꠅꠞ ꠘꠣ ꠘꠤ?
2TH 2:6 ꠢꠃ ꠘꠣꠚꠞꠝꠣꠘ ꠎꠣꠔꠦ ꠡꠝꠄ ꠙꠥꠞꠣ ꠅꠀꠞ ꠀꠉꠦ ꠛꠣꠞ ꠅꠁꠔ ꠘꠣ ꠙꠣꠞꠦ, ꠄꠞꠟꠣꠉꠤ ꠇꠤꠔꠣꠄ ꠔꠣꠞꠦ ꠀꠐꠇꠣꠁꠀ ꠞꠣꠈꠍꠦ, ꠁꠈꠣꠘ ꠔ ꠔꠥꠝꠞꠣ ꠎꠣꠘꠃ।
2TH 2:7 ꠔꠥꠝꠞꠣ ꠄꠅꠈꠣꠘꠅ ꠎꠣꠘ, ꠢꠃ ꠘꠣꠚꠞꠝꠣꠘꠞ ꠟꠥꠇꠣꠁꠟ ꠇꠣꠝ-ꠇꠣꠎ ꠅꠈꠘꠅ ꠌꠟꠦꠞ। ꠅꠁꠟꠦ ꠎꠦꠁꠘ ꠔꠣꠞꠦ ꠀꠐꠇꠣꠁꠀ ꠞꠣꠈꠞꠣ, ꠔꠣꠁꠘ ꠢꠞꠤꠀ ꠎꠣꠅꠀꠞ ꠀꠉ ꠙꠞ꠆ꠎꠘ꠆ꠔ ꠔꠣꠞꠦ ꠀꠐꠇꠣꠘꠤꠔ ꠞꠁꠛꠣ।
2TH 2:8 ꠔꠣꠁꠘ ꠢꠞꠤ ꠉꠦꠟꠦ ꠢꠃ ꠘꠣꠚꠞꠝꠣꠘ ꠈꠣꠘꠦ-ꠖꠞ꠆ꠎꠣꠟ ꠛꠣꠞ ꠅꠁꠛ। ꠢꠎꠞꠔ ꠁꠍꠣꠄ ꠝꠥꠈꠖꠤ ꠚꠥ ꠖꠤꠀ ꠔꠣꠞꠦ ꠛꠤꠘꠣꠡ ꠇꠞꠛꠣ, ꠀꠞ ꠔꠣꠘ ꠇꠥꠖꠞꠔꠤ ꠝꠢꠤꠝꠣꠄ ꠀꠎꠤꠞ ꠅꠁꠀ ꠔꠣꠞ ꠛꠟ-ꠡꠇ꠆ꠔꠤꠞꠦ ꠈꠔꠝ ꠇꠞꠛꠣ।
2TH 2:9 ꠢꠤ ꠈꠣꠘꠦ-ꠖꠞ꠆ꠎꠣꠟ ꠎꠦꠛꠟꠣ ꠀꠁꠛ, ꠔꠣꠞ ꠟꠉꠦ ꠞꠁꠛ ꠡꠄꠔꠣꠘꠤ ꠈꠦꠝꠔꠣ। ꠅꠃ ꠡꠄꠔꠣꠘꠤ ꠈꠦꠝꠔꠣꠄ ꠢꠦ ꠢꠇꠟ ꠝꠤꠍꠣ ꠇꠦꠞꠣꠝꠔꠤ ꠀꠞ ꠝꠥꠎꠦꠎꠣ ꠇꠣꠝ ꠖꠦꠈꠣꠁꠛ।
2TH 2:10 ꠔꠣꠞ ꠢꠇꠟ ꠘꠝꠥꠘꠣꠞ ꠛꠦꠁꠝꠣꠘꠤ ꠈꠣꠐꠣꠁꠀ ꠛꠦꠁꠝꠣꠘ ꠝꠣꠘꠡꠞꠦ ꠐꠉꠤꠛ। ꠁꠔꠣ ꠝꠣꠘꠥꠡ ꠛꠤꠘꠣꠡ ꠅꠁꠎꠤꠛꠣ, ꠇꠣꠞꠘ ꠎꠣꠘ ꠛꠣꠌꠣꠘꠤꠞ ꠟꠣꠉꠤ ꠔꠣꠞꠣ ꠀꠟ꠆ꠟꠣꠁ ꠢꠇꠞꠦ ꠙꠍꠘ꠆ꠖ ꠇꠞꠍꠦ ꠘꠣ, ꠀꠞ ꠇꠛꠥꠟꠅ ꠇꠞꠍꠦ ꠘꠣ।
2TH 2:11 ꠄꠞꠟꠣꠉꠤ ꠀꠟ꠆ꠟꠣꠄ ꠔꠣꠞꠣꠞꠦ ꠡꠇ꠆ꠔꠤꠡꠣꠟꠤ ꠄꠇ ꠇꠥ-ꠗꠣꠘ꠆ꠖꠣꠔ ꠚꠣꠟꠣꠁꠛꠣ, ꠎꠣꠔꠦ ꠔꠣꠞꠣ ꠝꠤꠍꠣ ꠛꠦꠙꠣꠞꠞꠦ ꠄꠇꠤꠘ ꠇꠞꠦ।
2TH 2:12 ꠄꠔꠦ ꠀꠟ꠆ꠟꠣꠁ ꠢꠇꠞ ꠃꠙꠞꠦ ꠁꠝꠣꠘ ꠘꠣ ꠀꠘꠤꠀ ꠎꠦꠔꠣꠄ ꠘꠣꠚꠞꠝꠣꠘꠤꠞꠦ ꠙꠍꠘ꠆ꠖ ꠇꠞꠍꠂꠘ, ꠔꠣꠞꠣꠞꠦ ꠇꠤꠀꠝꠔꠞ ꠖꠤꠘ ꠖꠥꠡꠤ ꠡꠣꠁꠛꠡ꠆ꠔ ꠇꠞꠣ ꠅꠁꠛ।
2TH 2:13 ꠅ ꠜꠣꠁ ꠅꠇꠟ, ꠅ ꠝꠣꠟꠤꠇ ꠁꠍꠣꠞ ꠝꠣꠄꠀꠞ ꠎꠘ ꠅꠇꠟ, ꠔꠥꠝꠞꠣꠞ ꠟꠣꠉꠤ ꠀꠝꠞꠣ ꠢꠣꠝꠦꠡꠣ ꠀꠟ꠆ꠟꠣꠞ ꠖꠞꠛꠣꠞꠅ ꠡꠥꠇꠞꠤꠀ ꠀꠖꠣꠄ ꠇꠞꠣ ꠖꠞꠇꠣꠞ, ꠀꠟ꠆ꠟꠣꠄ ꠔ ꠔꠥꠝꠞꠣꠞꠦ ꠙꠄꠟꠣ ꠕꠣꠇꠤꠃ ꠛꠣꠍꠤꠀ ꠀꠟꠉ ꠇꠞꠍꠂꠘ ꠘꠣꠎꠣꠔ ꠙꠣꠅꠀꠞ ꠟꠣꠉꠤ। ꠙꠣꠇ ꠞꠥꠢꠥ ꠖꠤꠀ ꠔꠥꠝꠞꠣꠞꠦ ꠙꠛꠤꠔ꠆ꠞ ꠇꠞꠣꠞ ꠝꠣꠎꠖꠤ, ꠀꠞ ꠀꠟ꠆ꠟꠣꠁ ꠈꠥꠡ-ꠈꠛꠞꠤꠞ ꠢꠇꠞ ꠃꠙꠞꠦ ꠁꠝꠣꠘ ꠀꠘꠤꠀ ꠔꠥꠝꠞꠣ ꠘꠣꠎꠣꠔ ꠙꠣꠁꠍ।
2TH 2:14 ꠀꠝꠞꠣ ꠎꠦ ꠈꠥꠡ-ꠈꠛꠞꠤ ꠔꠛꠟꠤꠉ ꠇꠞꠍꠤ, ꠄꠞ ꠃꠍꠤꠟ꠆ꠟꠣꠄ ꠘꠣꠎꠣꠔ ꠙꠣꠅꠀꠞ ꠟꠣꠉꠤ ꠀꠟ꠆ꠟꠣꠄ ꠔꠥꠝꠞꠣꠞꠦ ꠙꠍꠘ꠆ꠖ ꠇꠞꠍꠂꠘ, ꠎꠣꠔꠦ ꠔꠥꠝꠞꠣ ꠀꠝꠞꠣꠞ ꠝꠣꠟꠤꠇ ꠁꠍꠣ ꠀꠟ-ꠝꠍꠤꠞ ꠝꠢꠤꠝꠣꠔ ꠡꠞꠤꠇ ꠅꠅ।
2TH 2:15 ꠔꠦ ꠅ ꠜꠣꠁ ꠅꠇꠟ, ꠔꠥꠝꠞꠣ ꠁꠝꠣꠘꠦ ꠕꠤꠞ ꠞꠅ ꠀꠞ ꠝꠥꠈꠦ ꠝꠥꠈꠦ ꠛꠣ ꠌꠤꠑꠤꠞ ꠝꠣꠞꠚꠔꠦ ꠀꠝꠞꠣ ꠎꠦ ꠔꠣꠟꠤꠝ ꠖꠤꠍꠤ, ꠁꠔꠣ ꠜꠣꠟꠣꠝꠘ꠆ꠔꠦ ꠝꠘꠅ ꠞꠣꠈꠤꠅ।
2TH 2:16 ꠀꠝꠞꠣꠞ ꠉꠣꠁꠛꠤ ꠛꠣꠚ ꠀꠟ꠆ꠟꠣ ꠙꠣꠇꠦ ꠀꠞ ꠡ꠆ꠛꠄꠅꠋ ꠁꠍꠣ ꠀꠟ-ꠝꠍꠤꠄ ꠔꠥꠝꠞꠣꠞ ꠖꠤꠟꠅ ꠘꠦꠇ ꠃꠔꠡꠣꠢ ꠖꠣꠘ ꠇꠞꠃꠇ꠆ꠇꠣ, ꠢꠇꠟ ꠘꠝꠥꠘꠣꠞ ꠘꠦꠇ ꠇꠣꠝ ꠀꠞ ꠝꠣꠔ-ꠇꠕꠣꠞ ꠝꠣꠎꠦ ꠕꠤꠞ ꠞꠣꠈꠃꠇ꠆ꠇꠣ। ꠔꠣꠁꠘꠃ ꠀꠝꠞꠣꠞꠦ ꠝꠢꠛ꠆ꠛꠔ ꠇꠞꠍꠂꠘ, ꠔꠣꠁꠘ ꠞꠢꠝ ꠇꠞꠤꠀ ꠌꠤꠞꠇꠣꠟꠤꠘ ꠃꠔꠡꠣꠢ ꠀꠞ ꠈꠥꠡꠤ-ꠛꠣꠡꠤꠞ ꠀꠡꠣ ꠖꠣꠘ ꠇꠞꠍꠂꠘ।
2TH 3:1 ꠅ ꠜꠣꠁ ꠅꠇꠟ, ꠢꠦꠡ-ꠝꠦꠡ ꠇꠁꠞꠣꠝ, ꠀꠝꠞꠣꠞ ꠟꠣꠉꠤ ꠖꠥꠀ ꠇꠞꠤꠅ, ꠢꠎꠞꠔ ꠁꠍꠣꠞ ꠈꠥꠡ-ꠈꠛꠞꠤ ꠔꠥꠝꠞꠣꠞ ꠝꠣꠎꠦ ꠎꠦꠟꠣ ꠎꠟꠖꠤ ꠎꠟꠖꠤ ꠍꠤꠔ꠆ꠞꠤꠍꠤꠟ, ꠅꠃꠟꠣ ꠎꠣꠘꠥ ꠖꠤꠘ ꠖꠤꠘ ꠍꠤꠔ꠆ꠞꠣꠔ ꠞꠄ ꠀꠞ ꠉꠃꠞꠛ ꠙꠣꠅꠀꠔ ꠞꠄ।
2TH 3:2 ꠀꠞ ꠅꠃ ꠖꠥꠀꠈꠣꠘꠅ ꠇꠞꠤꠅ, ꠀꠝꠞꠣ ꠎꠣꠘꠥ ꠛꠤꠛꠦꠇ ꠍꠣꠠꠣ ꠘꠣꠚꠞꠝꠣꠘ ꠅꠇꠟꠞ ꠀꠔ ꠕꠣꠇꠤ ꠞꠦꠢꠣꠁ ꠙꠣꠁ। ꠡꠛ ꠝꠣꠘꠥꠡ ꠔ ꠀꠞ ꠁꠝꠣꠘꠖꠣꠞ ꠘꠣꠄ।
2TH 3:3 ꠅꠁꠟꠦ ꠝꠣꠟꠤꠇ ꠁꠍꠣ ꠔ ꠢꠇ ꠀꠞ ꠈꠣꠐꠤ, ꠔꠣꠁꠘꠃ ꠔꠥꠝꠞꠣꠞꠦ ꠁꠝꠣꠘꠦ ꠕꠤꠞ ꠞꠣꠈꠛꠣ ꠀꠞ ꠡꠄꠔꠣꠘꠞ ꠀꠔ ꠕꠣꠇꠤ ꠢꠣꠝꠦꠡꠣ ꠢꠦꠚꠣꠎꠔ ꠇꠞꠛꠣ।
2TH 3:4 ꠝꠣꠟꠤꠇꠞ ꠃꠙꠞꠦ ꠁꠝꠣꠘ ꠀꠘꠍ ꠇꠞꠤ ꠔꠥꠝꠞꠣꠞ ꠃꠙꠞꠦ ꠀꠝꠞꠣꠞ ꠁ ꠄꠇꠤꠘ ꠀꠍꠦ, ꠀꠝꠞꠣ ꠎꠦꠟꠣ ꠢꠥꠇꠥꠝ ꠖꠤꠍꠤ, ꠔꠥꠝꠞꠣ ꠑꠤꠇ ꠅꠃ ꠟꠣꠈꠣꠘ ꠇꠣꠝ ꠇꠞꠞꠣꠄ ꠀꠞ ꠇꠞꠣꠔ ꠞꠁꠛꠣꠄꠅ।
2TH 3:5 ꠝꠣꠟꠤꠇ ꠁꠍꠣꠄ ꠎꠣꠘꠥ ꠔꠥꠝꠞꠣꠞ ꠖꠤꠟꠞꠦ ꠀꠟ꠆ꠟꠣꠞ ꠝꠢꠛ꠆ꠛꠔꠞ ꠙꠕꠦ ꠀꠞ ꠀꠟ-ꠝꠍꠤꠞ ꠍꠛꠞꠞ ꠙꠕꠦ ꠌꠣꠟꠥ ꠞꠣꠈꠂꠘ।
2TH 3:6 ꠜꠣꠁ ꠅꠇꠟ, ꠀꠝꠞꠣꠞ ꠢꠎꠞꠔ ꠁꠍꠣ ꠀꠟ-ꠝꠍꠤꠞ ꠘꠣꠝꠦ ꠅꠃ ꠢꠥꠇꠥꠝ ꠖꠤꠞꠣꠝ, ꠔꠥꠝꠞꠣꠞ ꠎꠝꠣꠔꠞ ꠇꠥꠘꠥ ꠁꠝꠣꠘꠖꠣꠞ ꠜꠣꠁꠄ ꠎꠥꠖꠤ ꠇꠥꠠꠤꠀꠝꠤ ꠇꠞꠦ ꠀꠞ ꠀꠝꠞꠣ ꠎꠦꠔꠣ ꠔꠣꠟꠤꠝ ꠖꠤꠍꠤ, ꠁꠔꠣ ꠘꠣ ꠝꠣꠘꠦ, ꠔꠦ ꠔꠣꠞ ꠟꠉꠦ ꠌꠟꠣ-ꠚꠤꠞꠣ ꠛꠣꠖ ꠖꠤꠟꠣꠅ।
2TH 3:7 ꠢꠥꠘꠅ, ꠀꠝꠞꠣꠞ ꠟꠣꠈꠣꠘ ꠇꠦꠝꠘꠦ ꠌꠟꠔꠣꠄ, ꠁꠔꠣ ꠔ ꠔꠥꠝꠞꠣ ꠎꠣꠘꠃ। ꠀꠝꠞꠣ ꠎꠦꠛꠟꠣ ꠔꠥꠝꠞꠣꠞ ꠟꠉꠦ ꠞꠁꠔꠣꠝ, ꠅꠃ ꠡꠝꠄ ꠔ ꠇꠥꠘꠥꠎꠣꠔ ꠇꠥꠠꠤꠀꠝꠤ ꠇꠞꠍꠤ ꠘꠣ,
2TH 3:8 ꠝꠣꠉꠘꠣ ꠇꠥꠘꠥ ꠈꠣꠘꠤ ꠈꠣꠁꠍꠤ ꠘꠣ। ꠀꠝꠞꠣ ꠖꠤꠘꠦ-ꠞꠣꠁꠔꠦ ꠝꠦꠘꠔ ꠇꠞꠤꠀ ꠞꠥꠎꠤ-ꠞꠥꠎꠉꠣꠞ ꠇꠞꠍꠤ, ꠎꠣꠔꠦ ꠔꠥꠝꠞꠣ ꠇꠦꠃꠞꠞ ꠛꠥꠏꠣ ꠘꠣ ꠅꠁ।
2TH 3:9 ꠅꠁꠟꠦ ꠀꠝꠞꠣ ꠎꠦꠘ ꠔꠥꠝꠞꠣꠞ ꠉꠦꠍ ꠕꠣꠇꠤ ꠡꠣꠁꠎ꠆ꠎ ꠘꠤꠛꠣꠞ ꠅꠗꠤꠇꠣꠞ ꠘꠣꠁ, ꠁꠟꠣ ꠔ ꠘꠣꠄ, ꠔꠣ-ꠅ ꠀꠝꠞꠣ ꠅꠟꠣ ꠇꠞꠤꠀ ꠖꠦꠈꠣꠁꠍꠤ, ꠎꠣꠔꠦ ꠔꠥꠝꠞꠣꠅ ꠀꠝꠞꠣꠞ ꠟꠣꠈꠣꠘ ꠌꠟ।
2TH 3:10 ꠔꠥꠝꠞꠣꠞ ꠉꠦꠍꠦ ꠕꠣꠇꠣꠞ ꠇꠣꠟꠅ ꠔꠣꠟꠤꠝ ꠖꠤꠍꠟꠣꠝ, ꠇꠥꠘꠥ ꠎꠘꠦ ꠎꠥꠖꠤ ꠇꠣꠝ ꠇꠞꠔ ꠘꠣ ꠌꠣꠄ, ꠔꠦ ꠢꠦ ꠈꠣꠘꠤꠅ ꠛꠣꠖ ꠖꠤꠟꠣꠃꠇ।
2TH 3:11 ꠀꠝꠞꠣ ꠅꠈꠘꠅ ꠢꠥꠘꠞꠣꠝ, ꠔꠥꠝꠞꠣꠞ ꠝꠣꠎꠦ ꠇꠦꠃ ꠇꠦꠃ ꠇꠥꠠꠤꠀꠝꠤ ꠇꠞꠦꠞ ꠀꠞ ꠇꠥꠘꠥꠎꠣꠔ ꠇꠣꠝ-ꠇꠣꠎ ꠇꠞꠦꠞ ꠘꠣ, ꠛꠞꠋ ꠢꠣꠝꠦꠡꠣ ꠙꠞꠞ ꠇꠤꠌ꠆ꠍꠣ ꠉꠣꠁꠀ ꠖꠤꠘ ꠇꠣꠐꠣꠄ।
2TH 3:12 ꠔꠦ ꠀꠝꠞꠣꠞ ꠝꠣꠟꠤꠇ ꠁꠍꠣ ꠀꠟ-ꠝꠍꠤꠞ ꠅꠁꠀ ꠁꠔꠣ ꠝꠣꠘꠡꠞꠦ ꠘꠍꠤꠅꠔ ꠀꠞ ꠢꠥꠇꠥꠝ ꠖꠤꠀꠞ, ꠔꠣꠞꠣ ꠎꠣꠘꠥ ꠡꠣꠘ꠆ꠔꠤ ꠅꠁꠀ ꠞꠥꠎꠤ-ꠞꠥꠎꠉꠣꠞ ꠇꠞꠤꠀ ꠈꠣꠄ, ꠀꠞ ꠘꠤꠎꠞ ꠈꠣꠘꠤ ꠘꠤꠎꠦ ꠎꠥꠉꠣꠄ।
2TH 3:13 ꠜꠣꠁꠀꠁꠘꠞꠦ, ꠘꠦꠇ ꠇꠣꠝꠅ ꠢꠦꠞꠣꠘ ꠅꠁꠅ ꠘꠣ।
2TH 3:14 ꠅꠃ ꠌꠤꠑꠤꠞ ꠜꠣꠡꠣꠄ ꠟꠦꠈꠣ ꠀꠝꠞꠣꠞ ꠙꠞꠣꠝꠤꠡ ꠎꠥꠖꠤ ꠇꠦꠃ ꠘꠣ ꠝꠣꠘꠦ, ꠔꠦ ꠔꠣꠞꠦ ꠌꠤꠘꠤꠀ ꠞꠣꠈꠅ, ꠔꠣꠞ ꠟꠉꠦ ꠌꠟꠣ-ꠚꠤꠞꠣ ꠛꠣꠖ ꠖꠤꠟꠣꠅ, ꠔꠦꠃ ꠢꠦ ꠡꠞꠝꠤꠘ꠆ꠖꠣ ꠅꠁꠛ।
2TH 3:15 ꠅꠁꠟꠦ ꠈꠤꠀꠟ ꠞꠣꠈꠤꠅ, ꠔꠣꠞꠦ ꠖꠥꠡꠝꠘ ꠝꠘꠅ ꠇꠞꠤꠅ ꠘꠣ, ꠛꠞꠋ ꠜꠣꠁ ꠢꠤꠡꠣꠛꠦ ꠢꠥꠡꠤꠀꠞ ꠇꠞꠅ।
2TH 3:16 ꠡꠣꠘ꠆ꠔꠤ ꠖꠦꠅꠞꠣ ꠝꠣꠟꠤꠇꠦ ꠔꠥꠝꠞꠣꠞꠦ ꠢꠣꠝꠦꠡꠣ ꠢꠇꠟ ꠘꠝꠥꠘꠣꠞ ꠡꠣꠘ꠆ꠔꠤ ꠖꠣꠘ ꠇꠞꠃꠇ꠆ꠇꠣ। ꠝꠣꠟꠤꠇ ꠁꠍꠣ ꠔꠥꠝꠞꠣ ꠢꠇꠟꠞ ꠟꠉꠦ ꠟꠉꠦ ꠞꠃꠇ꠆ꠇꠣ।
2TH 3:17 ꠢꠥꠘꠅ, ꠁ ꠍꠣꠟꠣꠝꠞ ꠇꠕꠣ ꠀꠝꠤ ꠙꠣꠃꠟꠥꠍꠦ ꠘꠤꠎꠞ ꠀꠔꠦ ꠟꠦꠈꠍꠤ। ꠅꠇꠐꠣꠃ ꠀꠝꠣꠞ ꠙꠞꠔꠦꠇ ꠌꠤꠑꠤꠞ ꠀꠟꠣꠝꠔ, ꠀꠝꠤ ꠅꠃ ꠘꠝꠥꠘꠣꠄ ꠌꠤꠑꠤ ꠟꠦꠈꠤ।
2TH 3:18 ꠔꠥꠝꠞꠣ ꠢꠇꠟꠞ ꠃꠙꠞꠦ ꠀꠝꠞꠣꠞ ꠝꠣꠟꠤꠇ ꠁꠍꠣ ꠀꠟ-ꠝꠍꠤꠞ ꠞꠢꠝꠔ ꠎꠣꠞꠤ ꠞꠃꠇ। ꠀꠝꠤꠘ॥
1TI 1:1 ꠀꠝꠤ ꠙꠣꠃꠟꠥꠍ ꠔ ꠀꠝꠞꠣꠞ ꠔꠞꠣꠘꠦꠀꠟꠣ ꠀꠟ꠆ꠟꠣ ꠙꠣꠇ ꠀꠞ ꠀꠝꠞꠣꠞ ꠀꠡꠣ-ꠜꠞꠡꠣ ꠢꠎꠞꠔ ꠁꠍꠣ ꠀꠟ-ꠝꠍꠤꠞ ꠢꠥꠇꠥꠝꠦ ꠔꠣꠘ ꠍꠣꠢꠣꠛꠤ ꠅꠁꠍꠤ।
1TI 1:2 ꠝꠥꠝꠤꠘ ꠢꠤꠡꠣꠛꠦ ꠀꠝꠣꠞ ꠈꠣꠍ ꠀꠅꠟꠣꠖ, ꠔꠤꠝꠕꠤꠞ ꠉꠦꠍꠦ ꠟꠦꠈꠞꠣꠝ। ꠉꠣꠁꠛꠤ ꠛꠣꠚ ꠀꠟ꠆ꠟꠣ ꠙꠣꠇꠦ ꠀꠞ ꠀꠝꠞꠣꠞ ꠝꠣꠟꠤꠇ ꠁꠍꠣ ꠀꠟ-ꠝꠍꠤꠄ ꠔꠥꠝꠣꠞꠦ ꠞꠢꠝꠔ, ꠝꠦꠢꠦꠞꠛꠣꠘꠤ ꠀꠞ ꠡꠣꠘ꠆ꠔꠤ ꠖꠣꠘ ꠇꠞꠃꠇ꠆ꠇꠣ।
1TI 1:3 ꠅ ꠔꠤꠝꠕꠤ, ꠀꠝꠤ ꠝꠣꠇꠤꠖꠘꠤꠀ ꠖꠦꠡꠅ ꠎꠣꠅꠀꠞ ꠛꠣꠟꠣ ꠔꠥꠝꠣꠞꠦ ꠇꠁꠍꠟꠣꠝ, ꠅꠈꠘ ꠢꠤꠞꠛꠣꠞ ꠝꠤꠘꠔꠤ ꠇꠞꠤ ꠇꠁꠞꠣꠝ, ꠢꠥꠘꠅ, ꠔꠥꠝꠤ ꠁꠚꠤꠍ ꠐꠣꠃꠘꠅꠃ ꠞꠅ, ꠞꠁꠀ ꠅꠘꠞ ꠅꠟꠣ ꠇꠤꠍꠥ ꠝꠥꠟ꠆ꠟꠣꠁꠘ꠆ꠔꠞꠦ ꠢꠥꠇꠥꠝ ꠖꠦꠅ, ꠔꠣꠞꠣ ꠎꠣꠘꠥ ꠝꠣꠘꠡꠞꠦ ꠀꠞ ꠜꠥꠟ ꠔꠣꠟꠤꠝ ꠘꠣ ꠖꠦꠄ।
1TI 1:4 ꠔꠣꠞꠣꠞꠦ ꠇꠁꠅ, ꠔꠣꠞꠣ ꠎꠣꠔꠦ ꠛꠣꠘꠥꠀꠐ ꠇꠤꠌ꠆ꠍꠣ ꠀꠞ ꠟꠣꠝ꠆ꠛꠣ ꠟꠣꠝ꠆ꠛꠣ ꠈꠣꠘ꠆ꠖꠣꠘꠞ ꠟꠤꠡ꠆ꠐꠞ ꠛꠣꠄ ꠈꠤꠀꠟꠤ ꠘꠣ ꠅꠁꠘ। ꠁꠔꠣꠄ ꠔ ꠘꠣꠘꠣꠘ ꠘꠝꠥꠘꠣꠞ ꠖꠟꠣꠖꠟꠤꠞ ꠎꠘꠝ ꠖꠦꠄ, ꠀꠟ꠆ꠟꠣꠞ ꠇꠣꠝꠞ ꠇꠥꠘꠥ ꠚꠣꠄꠖꠣ ꠅꠄ ꠘꠣ, ꠀꠟ꠆ꠟꠣꠁ ꠚꠣꠄꠖꠣ ꠝꠤꠟꠦ ꠈꠣꠟꠤ ꠁꠝꠣꠘꠞ ꠝꠣꠎꠖꠤ।
1TI 1:5 ꠛꠞꠋ ꠡꠑꠤꠇ ꠔꠣꠟꠤꠝꠞ ꠚꠟ ꠅꠁꠟ, ꠝꠣꠄꠀ-ꠝꠢꠛ꠆ꠛꠔ, ꠁꠔꠣ ꠔ ꠈꠣꠐꠤ ꠖꠤꠟ, ꠙꠞꠤꠡ꠆ꠇꠣꠞ ꠛꠤꠛꠦꠇ ꠀꠞ ꠢꠣꠍꠣꠞꠞ ꠁꠝꠣꠘ ꠕꠣꠇꠤ ꠙꠄꠖꠣ ꠅꠄ।
1TI 1:6 ꠅꠁꠟꠦ ꠇꠤꠍꠥ ꠝꠣꠘꠡꠦ ꠁꠔꠣ ꠛꠣꠖ ꠖꠤꠀ ꠛꠣꠘꠥꠀꠐ ꠝꠣꠔ-ꠇꠕꠣꠞ ꠛꠣꠄ ꠝꠘ ꠖꠤꠟꠣꠁꠍꠦ।
1TI 1:7 ꠔꠣꠞꠣ ꠎꠥꠖꠤꠅ ꠘꠤꠎꠦꠃ ꠘꠤꠎꠞ ꠝꠣꠔꠞ ꠝꠣꠘꠤ ꠛꠥꠎꠦ ꠘꠣ, ꠀꠞ ꠎꠦ ꠛꠦꠙꠣꠞ ꠟꠁꠀ ꠛꠠ ꠉꠟꠣꠄ ꠝꠣꠔꠦꠞ, ꠁ ꠛꠦꠙꠣꠞꠦꠅ ꠜꠣꠟꠣꠝꠘ꠆ꠔꠦ ꠎꠣꠘꠦ ꠘꠣ, ꠔꠦꠛꠃ ꠔꠣꠞꠣ ꠝꠥꠍꠣ ꠘꠛꠤꠞ ꠛꠣꠔꠣꠁꠟ ꠡꠞꠤꠅꠔꠞ ꠃꠡ꠆ꠔꠣꠖ ꠅꠁꠔ ꠌꠣꠄ।
1TI 1:8 ꠀꠝꠞꠣ ꠎꠣꠘꠤ, ꠡꠞꠤꠅꠔ ꠜꠣꠟꠣ ꠎꠤꠘꠤꠡ, ꠇꠦꠃ ꠎꠥꠖꠤ ꠑꠤꠇ ꠝꠔ ꠁꠔꠣ ꠇꠣꠝꠅ ꠟꠣꠉꠣꠄ।
1TI 1:9 ꠀꠝꠞꠣ ꠔ ꠎꠣꠘꠤ, ꠁ ꠡꠞꠤꠅꠔ ꠇꠥꠘꠥ ꠙꠞꠦꠎꠉꠣꠞ ꠝꠣꠘꠡꠞ ꠟꠣꠉꠤ ꠖꠦꠅꠀ ꠅꠁꠍꠦ ꠘꠣ। ꠁꠈꠣꠘ ꠖꠦꠅꠀ ꠅꠁꠍꠦ, ꠎꠦꠔꠣꠄ ꠀꠟ꠆ꠟꠣꠞ ꠀꠁꠘ ꠝꠣꠘꠂꠘ ꠘꠣ, ꠀꠟ꠆ꠟꠣꠞꠦ ꠒꠞꠣꠁꠘ ꠘꠣ, ꠘꠣꠚꠞꠝꠣꠘꠤ ꠇꠞꠂꠘ, ꠉꠥꠘꠣꠉꠣꠞ, ꠈꠥꠘꠤ, ꠘꠣꠙꠣꠇ ꠀꠞ ꠛꠦ-ꠖꠤꠘ, ꠝꠣ-ꠛꠣꠚꠞ ꠈꠥꠘꠤ,
1TI 1:10 ꠎꠤꠘꠣꠇꠥꠞ, ꠡꠝꠇꠣꠝꠤ, ꠛꠣꠘ꠆ꠖꠤ-ꠉꠥꠟꠣꠝꠞ ꠇꠣꠞꠛꠣꠞꠤ, ꠝꠤꠍꠣ ꠝꠣꠔꠞꠣ, ꠝꠤꠍꠣ ꠡꠣꠇ꠆ꠇꠤ ꠖꠦꠅꠞꠣ, ꠄꠇ ꠇꠕꠣꠄ ꠉꠥꠘꠉꠣꠘꠦ ꠗꠘꠤ ꠀꠟ꠆ꠟꠣ ꠙꠣꠇꠞ ꠝꠢꠣꠘ ꠈꠥꠡ-ꠈꠛꠞꠤꠞ ꠔꠣꠟꠤꠝꠞ ꠛꠤꠞꠥꠗꠤ ꠎꠦꠔꠣ ꠝꠣꠘꠥꠡ, ꠅꠔꠣꠞ ꠟꠣꠉꠤꠃ ꠁ ꠡꠞꠤꠅꠔ ꠖꠦꠅꠀ ꠅꠁꠍꠦ। ꠀꠞ ꠅꠃ ꠝꠢꠣꠘ ꠈꠥꠡ-ꠈꠛꠞꠤ ꠔꠛꠟꠤꠉꠞ ꠜꠣꠞ ꠔꠣꠁꠘ ꠀꠝꠣꠞꠦ ꠖꠣꠘ ꠇꠞꠍꠂꠘ।
1TI 1:12 ꠢꠎꠞꠔ ꠁꠍꠣ ꠀꠟ-ꠝꠍꠤ, ꠎꠦꠁꠘ ꠀꠝꠞꠣꠞ ꠝꠣꠟꠤꠇ, ꠔꠣꠁꠘ ꠀꠝꠣꠞꠦ ꠛꠟ ꠎꠥꠉꠣꠁꠍꠂꠘ, ꠀꠝꠣꠞꠦ ꠢꠇ-ꠢꠣꠟꠣꠟ ꠝꠘꠅ ꠇꠞꠤꠀ ꠔꠣꠘ ꠇꠣꠝꠅ ꠛꠅꠀꠁꠟ ꠇꠞꠍꠂꠘ, ꠄꠞꠟꠣꠉꠤ ꠀꠝꠤ ꠔꠣꠘ ꠖꠞꠛꠣꠞꠅ ꠡꠥꠇꠞꠤꠀ ꠎꠣꠘꠣꠁꠞꠣꠝ।
1TI 1:13 ꠎꠥꠖꠤꠅ ꠀꠝꠤ ꠀꠉꠦ ꠀꠟ-ꠝꠍꠤꠞ ꠛꠖꠘꠣꠝ ꠉꠣꠁꠔꠣꠝ, ꠔꠣꠘ ꠝꠣꠘꠡꠞ ꠃꠙꠞꠦ ꠎꠥꠟꠥꠝ ꠇꠞꠔꠣꠝ, ꠛꠖ-ꠝꠤꠎꠣꠎ ꠖꠦꠈꠣꠁꠔꠣꠝ। ꠔꠣ-ꠅ ꠔꠣꠁꠘ ꠀꠝꠣꠞꠦ ꠞꠢꠝꠔ ꠖꠣꠘ ꠇꠞꠍꠂꠘ, ꠇꠣꠞꠘ ꠢꠃ ꠡꠝꠄ ꠀꠝꠤ ꠁꠝꠣꠘ ꠀꠘꠍꠤꠟꠣꠝ ꠘꠣ।
1TI 1:14 ꠀꠝꠞꠣꠞ ꠝꠥꠘꠤꠛꠦ ꠀꠝꠣꠞꠦ ꠇꠔ ꠛꠠ ꠝꠦꠢꠦꠞꠛꠣꠘꠤ ꠇꠞꠍꠂꠘ, ꠁꠍꠣ ꠀꠟ-ꠝꠍꠤꠞ ꠔꠞꠤꠇꠣ ꠇꠛꠥꠟ ꠇꠞꠟꠦ ꠎꠦ ꠁꠝꠣꠘ ꠀꠞ ꠝꠢꠛ꠆ꠛꠔ ꠙꠄꠖꠣ ꠅꠄ, ꠁꠔꠣ ꠔ ꠀꠝꠣꠞꠦ ꠙꠥꠞꠣꠙꠥꠞ ꠖꠣꠘ ꠇꠞꠍꠂꠘ।
1TI 1:15 ꠀꠍꠟꠦ ꠁ ꠇꠕꠣ ꠔ ꠢꠇ-ꠈꠣꠐꠤ ꠀꠞ ꠡꠥꠟ꠆ꠟꠀꠘꠣ ꠝꠣꠘꠣꠞ ꠟꠣꠈ, ꠉꠥꠘꠣꠉꠣꠞ ꠅꠇꠟꠞ ꠎꠣꠘ ꠛꠣꠌꠣꠘꠤꠞ ꠟꠣꠉꠤꠃ ꠁꠍꠣ ꠀꠟ-ꠝꠍꠤꠄ ꠁ ꠖꠥꠘꠤꠀꠔ ꠔꠡꠞꠤꠚ ꠀꠘꠍꠤꠟꠣ। ꠅꠃ ꠉꠥꠘꠣꠉꠣꠞꠞ ꠝꠣꠎꠦ ꠀꠝꠤꠃ ꠙꠞꠗꠣꠘ।
1TI 1:16 ꠅꠔꠣꠞ ꠟꠣꠉꠤꠃ ꠀꠟ꠆ꠟꠣꠄ ꠀꠝꠣꠞꠦ ꠖꠄꠀ ꠇꠞꠍꠂꠘ, ꠎꠣꠔꠦ ꠀꠝꠣꠞ ꠝꠔ ꠙꠞꠗꠣꠘ ꠉꠥꠘꠣꠉꠣꠞꠞ ꠝꠣꠎꠖꠤ ꠁꠍꠣ ꠀꠟ-ꠝꠍꠤꠄ ꠔꠣꠘ ꠡꠤꠝꠣ ꠍꠣꠠꠣ ꠍꠛꠞꠉꠣꠞꠤ ꠖꠦꠈꠣꠁꠔꠣ ꠙꠣꠞꠂꠘ, ꠀꠞ ꠔꠣꠘ ꠃꠙꠞꠦ ꠁꠝꠣꠘ ꠀꠘꠣꠄ ꠎꠦꠞꠣ ꠀꠈꠦꠞꠤ ꠎꠤꠘ꠆ꠖꠦꠉꠤ ꠙꠣꠁꠛꠣ, ꠔꠣꠞꠣ ꠎꠣꠘꠥ ꠀꠝꠣꠞꠦ ꠖꠦꠈꠤꠀ ꠀꠟ꠆ꠟꠣꠁ ꠙꠕ ꠛꠥꠎꠂꠘ।
1TI 1:17 ꠎꠦꠁꠘ ꠌꠤꠞꠇꠣꠟꠤꠘ ꠛꠣꠖꠡꠣ, ꠎꠦꠁꠘ ꠘꠤꠞꠣꠇꠣꠞ, ꠄꠇꠝꠣꠔ꠆ꠞ ꠀꠟ꠆ꠟꠣ, ꠎꠣꠘ ꠇꠥꠘꠥ ꠇ꠆ꠇꠄ ꠘꠣꠁ, ꠔꠣꠘ ꠁꠎ꠆ꠎꠔ ꠀꠞ ꠉꠃꠞꠛ ꠢꠞ-ꠢꠣꠝꠦꠡꠣ ꠎꠣꠞꠤ ꠞꠃꠇ। ꠀꠝꠤꠘ।
1TI 1:18 ꠅ ꠝꠣꠄꠀꠞ ꠙꠥꠔ ꠔꠤꠝꠕꠤ, ꠔꠥꠝꠣꠞ ꠛꠦꠙꠣꠞꠦ ꠀꠉꠦ ꠎꠦꠔꠣ ꠛꠣꠔꠥꠘꠤ ꠝꠣꠔ ꠝꠣꠔꠣ ꠅꠁꠍꠤꠟ, ꠅꠃ ꠝꠣꠚꠤꠇ ꠀꠝꠤ ꠔꠥꠝꠣꠞꠦ ꠝꠤꠘꠔ ꠇꠞꠤ ꠇꠁꠞꠣꠝ, ꠔꠥꠝꠤ ꠁꠔꠣ ꠝꠘꠅ ꠞꠣꠈꠤꠀ ꠀꠟ-ꠝꠍꠤꠞ ꠟꠣꠉꠤ ꠖꠤꠟꠦ-ꠎꠣꠘꠦ ꠟꠣꠠꠣꠁ ꠇꠞꠣꠔ ꠞꠅ।
1TI 1:19 ꠄꠞꠟꠉꠦ ꠘꠤꠎꠞ ꠁꠝꠣꠘ ꠀꠞ ꠙꠞꠤꠡ꠆ꠇꠣꠞ ꠛꠤꠛꠦꠇꠞꠦ ꠛꠣꠌꠣꠁꠅ। ꠇꠥꠘꠥ ꠇꠥꠘꠥ ꠝꠣꠘꠡꠦ ꠛꠤꠛꠦꠇꠞ ꠛꠥꠟꠤ ꠘꠣ ꠝꠣꠘꠤꠀ, ꠘꠤꠎꠞ ꠁꠝꠣꠘꠞꠦ ꠘꠡ꠆ꠐ ꠇꠞꠤꠟꠤꠍꠦ।
1TI 1:20 ꠁ ꠖꠟꠅ ꠀꠍꠂꠘ, ꠢꠥꠝꠤꠘꠣꠍ ꠀꠞ ꠍꠤꠇꠘ꠆ꠖꠞ। ꠄꠞꠟꠣꠉꠤ ꠀꠝꠤ ꠁꠔꠣꠞꠦ ꠁꠛꠟꠤꠍꠞ ꠀꠔꠅ ꠡꠙꠤ ꠖꠤꠍꠤ, ꠎꠣꠔꠦ ꠔꠣꠞꠣ ꠛꠥꠎꠔꠣ ꠙꠣꠞꠂꠘ, ꠇꠥꠚꠥꠞꠤ ꠝꠣꠔ ꠝꠣꠔꠣ ꠑꠤꠇ ꠘꠣꠄ।
1TI 2:1 ꠀꠝꠤ ꠙꠄꠟꠣꠃ ꠎꠣꠘꠣꠁꠞꠣꠝ, ꠙꠞꠔꠦꠇ ꠝꠣꠘꠡꠞ ꠟꠣꠉꠤ ꠔꠥꠝꠞꠣ ꠀꠟ꠆ꠟꠣꠞ ꠖꠞꠛꠣꠞꠅ ꠇꠣꠇꠥꠔꠤ-ꠝꠤꠘꠔꠤ, ꠖꠥꠀ-ꠝꠥꠘꠣꠎꠣꠔ, ꠚꠞꠤꠀꠖ ꠎꠣꠘꠣꠅ ꠀꠞ ꠡꠥꠇꠞꠤꠀ ꠀꠖꠣꠄ ꠇꠞꠅ।
1TI 2:2 ꠅꠟꠣꠈꠣꠘ ꠞꠣꠎꠣ-ꠛꠣꠖꠡꠣ ꠅꠇꠟ ꠀꠞ ꠃꠌꠣ ꠙꠖꠞ ꠢꠇꠟ ꠅꠚꠤꠡꠣꠞꠞ ꠟꠣꠉꠤ ꠝꠥꠘꠣꠎꠣꠔ ꠇꠞꠣ ꠎꠞꠥꠞ, ꠎꠣꠔꠦ ꠀꠝꠞꠣ ꠀꠟ꠆ꠟꠣꠞ ꠒꠞ-ꠈꠚ ꠝꠘꠅ ꠞꠣꠈꠤꠀ, ꠢꠇ-ꠢꠣꠟꠣꠟ ꠙꠕꠦ ꠞꠁꠀ, ꠘꠤꠞꠣꠙꠖꠦ ꠡꠣꠘ꠆ꠔꠤꠄ ꠎꠤꠘ꠆ꠖꠦꠉꠤ ꠇꠣꠐꠣꠁꠔꠣꠝ ꠙꠣꠞꠤ।
1TI 2:3 ꠁꠔꠣ ꠔ ꠀꠝꠞꠣꠞ ꠔꠞꠣꠘꠦꠀꠟꠣ ꠀꠟ꠆ꠟꠣꠞ ꠘꠎꠞꠅ ꠘꠦꠇ ꠇꠣꠝ, ꠁꠔꠣꠄ ꠔꠣꠁꠘ ꠈꠥꠡꠤ ꠅꠁꠘ।
1TI 2:4 ꠀꠟ꠆ꠟꠣ ꠙꠣꠇꠞ ꠈꠤꠀꠟ ꠅꠁꠟ, ꠎꠣꠔꠦ ꠢꠇꠟ ꠝꠣꠘꠡꠦ ꠘꠣꠎꠣꠔ ꠙꠣꠁꠘ, ꠀꠞ ꠀꠟ-ꠝꠍꠤꠞ ꠔꠞꠤꠇꠣꠞ ꠢꠇ꠆ꠇꠟꠔꠣ ꠡꠥꠟ꠆ꠟꠀꠘꠣ ꠛꠥꠎꠂꠘ।
1TI 2:5 ꠁ ꠢꠇꠤꠇꠔꠤ ꠅꠁꠟ, ꠀꠟ꠆ꠟꠣ ꠈꠣꠟꠤ ꠄꠇꠎꠘ, ꠀꠟ꠆ꠟꠣ ꠀꠞ ꠝꠣꠘꠡꠞ ꠝꠣꠎꠦ ꠡꠣꠚꠣꠄꠀꠔꠇꠣꠞꠤ ꠝꠣꠎꠞ ꠝꠣꠘꠥꠡꠅ ꠈꠣꠟꠤ ꠄꠇꠎꠘꠃ ꠀꠍꠂꠘ, ꠄꠘ ꠘꠣꠝ ꠁꠍꠣ ꠀꠟ-ꠝꠍꠤ, ꠄꠁꠘꠅ ꠝꠣꠘꠥꠡ।
1TI 2:6 ꠖꠥꠘꠤꠀꠞ ꠢꠇꠟ ꠝꠣꠘꠡꠞ ꠎꠣꠘꠞ ꠛꠖꠟꠣ ꠢꠤꠡꠣꠛꠦ, ꠔꠣꠁꠘ ꠘꠤꠎꠞ ꠎꠣꠘ ꠇꠥꠞꠛꠣꠘꠤ ꠖꠤꠍꠂꠘ। ꠅꠃ ꠛꠦꠙꠣꠞꠦ ꠔ ꠀꠟ꠆ꠟꠣꠞ ꠑꠤꠇ ꠇꠞꠣ ꠡꠝꠄꠄ ꠡꠣꠇ꠆ꠇꠤ ꠖꠦꠅꠀ ꠅꠁꠍꠦ।
1TI 2:7 ꠀꠞ ꠅꠃ ꠡꠣꠇ꠆ꠇꠤ ꠖꠤꠛꠣꠞ ꠟꠣꠉꠤ ꠀꠟ꠆ꠟꠣꠄ ꠀꠝꠣꠞꠦ ꠔꠛꠟꠤꠉ ꠇꠣꠝꠅ, ꠍꠣꠢꠣꠛꠤ ꠙꠖꠅ ꠛꠅꠀꠁꠟ ꠇꠞꠍꠂꠘ, ꠔꠣꠁꠘ ꠀꠝꠣꠞꠦ ꠖꠣꠄꠁꠔ꠆ꠔ ꠖꠤꠍꠂꠘ, ꠜꠤꠘ ꠎꠣꠔꠤꠞ ꠉꠦꠍꠦ ꠁꠝꠣꠘ ꠀꠞ ꠀꠟ꠆ꠟꠣꠁ ꠢꠇꠞ ꠃꠡ꠆ꠔꠣꠖ ꠢꠤꠡꠣꠛꠦ। ꠀꠝꠤ ꠁꠔꠣ ꠢꠇ ꠝꠣꠔ ꠝꠣꠔꠤꠀꠞ, ꠝꠤꠍꠣ ꠇꠥꠘ꠆ꠔꠣ ꠘꠣꠄ।
1TI 2:8 ꠀꠝꠤ ꠌꠣꠁꠞꠣꠝ, ꠢꠇꠟ ꠎꠣꠉꠣꠞ ꠛꠦꠐꠣꠁꠘ꠆ꠔꠦ ꠈꠣꠟꠤꠍ ꠘꠤꠅꠔꠦ ꠖꠥꠁꠅ ꠀꠔ ꠔꠥꠟꠤꠀ ꠝꠥꠘꠣꠎꠣꠔ ꠇꠞꠃꠇ। ꠔꠣꠞꠣꠞ ꠝꠘꠞ ꠝꠣꠎꠦ ꠇꠥꠘꠥꠎꠣꠔ ꠞꠣꠉ-ꠉꠥꠍꠣ ꠛꠣ ꠇꠣꠁꠎ꠆ꠎꠣ-ꠚꠍꠣꠖꠞ ꠜꠣꠛ ꠘꠣ ꠞꠃꠇ।
1TI 2:9 ꠀꠝꠤ ꠄꠅꠈꠣꠘꠅ ꠌꠣꠁꠞꠣꠝ, ꠛꠦꠐꠤꠘ꠆ꠔꠦ ꠔꠣꠞꠣꠞ ꠢꠣꠄꠀ-ꠡꠞꠝ ꠞꠣꠈꠤꠀ ꠡꠝꠣꠎꠞ ꠃꠙꠎꠥꠇ꠆ꠔ ꠛꠦꠡꠦ ꠜꠖ꠆ꠞ ꠇꠣꠙꠠ-ꠌꠥꠙꠠ ꠚꠤꠘ꠆ꠖꠃꠇ। ꠔꠣꠞꠣ ꠎꠣꠘꠥ ꠘꠣꠘꠣꠘ ꠘꠝꠥꠘꠣꠄ ꠌꠥꠟꠞ ꠛꠦꠘꠤ ꠛꠟꠤꠀ, ꠡꠥꠘꠣ-ꠞꠥꠙꠣ ꠀꠞ ꠝꠘꠤ-ꠝꠥꠇ꠆ꠔꠣꠞ ꠉꠄꠘꠣ ꠟꠣꠉꠣꠁꠀ ꠀꠞ ꠖꠣꠝꠤ ꠖꠣꠝꠤ ꠇꠣꠙꠠ ꠚꠤꠘ꠆ꠖꠤꠀ ꠘꠤꠎꠞꠦ ꠘꠣ ꠢꠣꠎꠣꠁꠘ।
1TI 2:10 ꠛꠞꠋ ꠀꠟ꠆ꠟꠣꠞ ꠙꠞꠦꠎꠉꠣꠞ ꠛꠣꠘ꠆ꠖꠤꠄ ꠎꠦꠟꠣ ꠘꠦꠇ ꠇꠣꠝꠞ ꠝꠣꠎꠦ ꠎꠤꠘ꠆ꠖꠦꠉꠤ ꠇꠣꠐꠣꠘꠤ ꠃꠌꠤꠔ, ꠔꠣꠞꠣꠅ ꠅꠟꠣ ꠅꠁꠘ।
1TI 2:11 ꠇꠞ꠆ꠔꠣꠞ ꠙꠥꠞꠣꠙꠥꠞ ꠛꠣꠁꠖ꠆ꠖ ꠞꠁꠀ, ꠀꠞ ꠘꠤꠞꠣꠁ-ꠎꠤꠞꠣꠁ ꠞꠁꠀ ꠁꠟꠤꠝ ꠇꠣꠝꠣꠁ ꠇꠞꠃꠇ꠆ꠇꠣ।
1TI 2:12 ꠃꠡ꠆ꠔꠣꠖꠤ ꠇꠞꠣ ꠀꠞ ꠛꠦꠐꠣꠁꠘ꠆ꠔꠞ ꠃꠙꠞꠦ ꠝꠥꠍꠖ꠆ꠖꠞꠤ ꠇꠞꠣꠞ ꠅꠗꠤꠇꠣꠞ ꠀꠝꠤ ꠇꠥꠘꠥ ꠛꠦꠐꠤꠞꠦ ꠖꠦꠁ ꠘꠣ। ꠔꠣꠞꠣ ꠘꠤꠞꠣꠁ-ꠎꠤꠞꠣꠁ ꠞꠅꠀ ꠎꠞꠥꠞ।
1TI 2:13 ꠎꠣꠘ ꠔ, ꠢꠇꠟ ꠙꠄꠟꠣ ꠀꠖꠝꠞꠦ ꠀꠞ ꠛꠣꠖꠦ ꠛꠤꠛꠤ ꠢꠣꠅꠀꠞꠦ ꠙꠄꠖꠣ ꠇꠞꠣ ꠅꠁꠍꠤꠟ।
1TI 2:14 ꠀꠖꠝ ꠔ ꠁꠛꠟꠤꠍ-ꠡꠄꠔꠣꠘꠞ ꠗꠥꠇꠣꠔ ꠙꠠꠍꠂꠘ ꠘꠣ, ꠅꠁꠟꠦ ꠢꠣꠅꠀ ꠁꠛꠟꠤꠍꠞ ꠗꠥꠇꠣꠔ ꠙꠠꠤꠀ ꠀꠟ꠆ꠟꠣꠞ ꠢꠥꠇꠥꠝꠞ ꠛꠞꠈꠦꠟꠣꠚ ꠇꠞꠍꠂꠘ।
1TI 2:15 ꠅꠈꠘ ꠎꠥꠖꠤ ꠛꠦꠐꠤꠘ꠆ꠔꠦ ꠔꠣꠞꠣꠞ ꠢꠣꠄꠀ-ꠡꠞꠝ ꠞꠣꠈꠤꠀ ꠁꠝꠣꠘ, ꠝꠢꠛ꠆ꠛꠔ ꠀꠞ ꠙꠣꠇ-ꠙꠛꠤꠔ꠆ꠞ ꠅꠁꠀ ꠌꠟꠂꠘ, ꠔꠦ ꠢꠥꠞꠥꠔ꠆ꠔꠣ ꠎꠘꠝ ꠖꠦꠅꠀꠞ ꠝꠣꠎꠖꠤ ꠔꠣꠞꠣ ꠞꠦꠢꠣꠁ ꠙꠣꠁꠛꠣ।
1TI 3:1 ꠢꠥꠘꠅ, ꠀꠍꠟ ꠢꠇ ꠇꠕꠣ ꠅꠁꠟ, ꠇꠦꠃ ꠎꠥꠖꠤ ꠎꠝꠣꠔꠞ ꠌꠣꠟꠇꠖꠣꠞ ꠅꠁꠔꠣ ꠌꠣꠁꠘ, ꠔꠦ ꠔꠣꠁꠘ ꠔ ꠘꠦꠇ ꠇꠣꠝ ꠇꠞꠣꠞ ꠈꠤꠀꠟꠤ ꠅꠁꠍꠂꠘ।
1TI 3:2 ꠎꠝꠣꠔꠞ ꠌꠣꠟꠇꠖꠣꠞ ꠝꠣꠘꠡꠞ ꠌꠈꠥꠔ ꠘꠤꠈꠥꠔ ꠅꠁꠔꠦ ꠅꠁꠛ। ꠔꠣꠘ ꠈꠣꠟꠤ ꠄꠇ ꠛꠃ ꠅꠁꠛ। ꠔꠣꠁꠘ ꠘꠤꠎꠞꠦ ꠡꠣꠝꠟꠣꠁꠀ ꠞꠣꠈꠛꠣ, ꠔꠣꠘ ꠜꠣꠟꠣ ꠀꠈꠟ-ꠛꠥꠖ꠆ꠖꠤ ꠞꠁꠛ, ꠡ꠆ꠛꠜꠣꠛ ꠅꠁꠛ ꠜꠖ꠆ꠞ, ꠀꠞ ꠝꠦꠝꠣꠘꠖꠣꠞꠤ ꠇꠞꠔꠦ ꠜꠣꠟꠣ ꠙꠣꠁꠛꠣ। ꠝꠣꠘꠡꠞꠦ ꠔꠣꠟꠤꠝ ꠖꠦꠅꠀꠞ ꠈꠦꠝꠔꠣ ꠕꠣꠇꠔꠦ ꠅꠁꠛ।
1TI 3:3 ꠔꠣꠁꠘ ꠎꠣꠘꠥ ꠝꠖꠈꠥꠞ ꠀꠞ ꠛꠖ-ꠝꠤꠎꠣꠎꠤ ꠘꠣ ꠅꠁꠘ, ꠛꠞꠋ ꠔꠣꠘ ꠡ꠆ꠛꠜꠣꠛ ꠅꠁꠛ ꠘꠞꠝ, ꠔꠣꠁꠘ ꠎꠣꠘꠥ ꠝꠣꠁꠞ-ꠖꠣꠋꠉꠣ ꠇꠞꠞꠣ ꠛꠣ ꠐꠦꠇꠣ-ꠙꠄꠡꠣꠞ ꠟꠣꠟꠌꠤ ꠘꠣ ꠅꠁꠘ।
1TI 3:4 ꠔꠣꠁꠘ ꠎꠣꠘꠥ ꠡꠑꠤꠇ ꠜꠣꠛꠦ ꠔꠣꠘ ꠘꠤꠎꠞ ꠙꠞꠤꠛꠣꠞꠞ ꠢꠇ꠆ꠇꠟꠔꠣ ꠌꠣꠟꠣꠁꠘ, ꠔꠣꠘ ꠢꠥꠞꠥꠔ꠆ꠔꠣꠁꠘ ꠅꠁꠛꠣ ꠛꠣꠁꠖ꠆ꠖ ꠀꠞ ꠀꠖꠛ-ꠇꠣꠄꠖꠣ ꠝꠣꠘꠞꠣ।
1TI 3:5 ꠎꠦ ꠝꠣꠘꠡꠦ ꠔꠣꠞ ꠘꠤꠎꠞ ꠊꠞ ꠡꠣꠝꠟꠣꠁꠔ ꠙꠣꠞꠦ ꠘꠣ, ꠢꠦ ꠀꠟ꠆ꠟꠣꠞ ꠎꠝꠣꠔꠞꠦ ꠇꠤꠟꠣ ꠖꠦꠈꠣ-ꠢꠥꠘꠣ ꠇꠞꠛ?
1TI 3:6 ꠇꠥꠘꠥ ꠘꠄꠀ ꠁꠝꠣꠘꠖꠣꠞ ꠜꠣꠁ ꠎꠝꠣꠔꠞ ꠌꠣꠟꠇꠖꠣꠞ ꠅꠀ ꠑꠤꠇ ꠘꠣꠄ, ꠁꠟꠣ ꠅꠁꠟꠦ ꠔꠣꠁꠘ ꠢꠄꠔ ꠛꠠꠣꠁ-ꠛꠦꠐꠣꠉꠤꠞꠤꠄ ꠛꠣꠢꠣꠖꠥꠞꠤ ꠇꠞꠛꠣ, ꠀꠞ ꠁꠛꠟꠤꠍꠞ ꠟꠣꠉꠤ ꠑꠤꠇ ꠇꠞꠣ ꠡꠣꠎꠣꠞ ꠜꠣꠉꠤ ꠅꠁꠛꠣ।
1TI 3:7 ꠎꠝꠣꠔꠞ ꠛꠣꠁꠞꠞ ꠝꠣꠘꠡꠞ ꠉꠦꠍꠦ ꠔꠣꠘ ꠡꠥꠘꠣꠝ ꠕꠣꠇꠣ ꠖꠞꠇꠣꠞ, ꠎꠣꠔꠦ ꠀꠈꠔꠣ ꠇꠥꠘꠥ ꠛꠖꠘꠣꠝꠞ ꠜꠣꠉꠤ ꠘꠣ ꠅꠁꠘ ꠀꠞ ꠁꠛꠟꠤꠍꠞ ꠚꠣꠘ꠆ꠖꠅ ꠘꠣ ꠙꠠꠂꠘ।
1TI 3:8 ꠅꠃꠟꠣ ꠎꠝꠣꠔꠞ ꠈꠣꠖꠤꠝ ꠅꠇꠟꠅ ꠁꠎ꠆ꠎꠔꠤ ꠀꠞ ꠄꠇ ꠇꠕꠣꠞ ꠝꠣꠘꠥꠡ ꠅꠀ ꠎꠞꠥꠞꠤ। ꠄꠞꠣ ꠎꠣꠔꠦ ꠝꠖꠈꠥꠞ ꠀꠞ ꠢꠣꠞꠣꠝ ꠟꠥꠜ-ꠟꠣꠟꠌꠤ ꠘꠣ ꠅꠁꠘ।
1TI 3:9 ꠔꠣꠞꠣ ꠎꠣꠘꠥ ꠢꠇ ꠛꠤꠛꠦꠇꠦ ꠁꠍꠣꠄꠁ ꠁꠝꠣꠘꠞ ꠛꠣꠔꠥꠘꠤ ꠛꠦꠙꠣꠞꠞꠦ ꠝꠎꠛꠥꠔ ꠇꠞꠤ ꠖꠤꠟꠅ ꠞꠣꠈꠂꠘ।
1TI 3:10 ꠄꠞꠟꠣꠉꠤ ꠙꠄꠟꠣ ꠔꠣꠞꠣꠞꠦ ꠎꠣꠌꠣꠁ ꠇꠞꠤ ꠖꠦꠈꠣ ꠎꠞꠥꠞ, ꠎꠣꠌꠣꠁꠔ ꠎꠥꠖꠤ ꠔꠣꠞꠣ ꠘꠤꠈꠥꠔ ꠅꠁꠘ, ꠔꠦ ꠎꠝꠣꠔꠞ ꠈꠣꠖꠤꠝ ꠅꠁꠔꠣ ꠙꠣꠞꠛꠣ।
1TI 3:11 ꠑꠤꠇ ꠅꠟꠣꠈꠣꠘ ꠛꠦꠐꠤ ꠝꠣꠘꠥꠡꠅ ꠎꠣꠘꠥ ꠁꠎ꠆ꠎꠔꠤ ꠅꠁꠘ। ꠄꠞꠣ ꠝꠣꠘꠡꠞ ꠛꠖꠘꠣꠝ ꠘꠣ ꠉꠣꠁꠘ, ꠘꠤꠎꠞꠦ ꠡꠣꠝꠟꠣꠁꠀ ꠞꠣꠈꠂꠘ, ꠀꠞ ꠢꠇꠟ ꠛꠦꠙꠣꠞꠦ ꠛꠤꠡ꠆ꠛꠣꠡꠤ ꠅꠁꠘ।
1TI 3:12 ꠈꠣꠖꠤꠝ ꠍꠣꠛ ꠈꠣꠟꠤ ꠄꠇ ꠛꠃꠀꠟꠣ ꠝꠣꠘꠥꠡ ꠅꠁꠛꠣ। ꠔꠣꠁꠘ ꠎꠣꠘꠥ ꠜꠣꠟꠣꠝꠘ꠆ꠔꠦ ꠔꠣꠘ ꠛꠃ ꠙꠥꠀ-ꠙꠥꠠꠤꠘ ꠀꠞ ꠡꠋꠡꠣꠞꠞ ꠖꠦꠈꠣ-ꠢꠥꠘꠣ ꠇꠞꠂꠘ।
1TI 3:13 ꠎꠦ ꠈꠣꠖꠤꠝꠦ ꠜꠣꠟꠣꠝꠘ꠆ꠔꠦ ꠈꠦꠎꠝꠔ ꠇꠞꠂꠘ, ꠄꠁꠘ ꠡꠥꠘꠣꠝ ꠙꠣꠁꠘ, ꠀꠞ ꠢꠎꠞꠔ ꠁꠍꠣ ꠀꠟ-ꠝꠍꠤꠞ ꠃꠙꠞꠦ ꠁꠝꠣꠘ ꠕꠣꠇꠣꠄ ꠔꠣꠘ ꠖꠤꠟ ꠡꠣꠅꠡꠦ ꠜꠞꠣ ꠞꠄ।
1TI 3:14 ꠅ ꠔꠤꠝꠕꠤ, ꠀꠝꠤ ꠀꠡꠣ ꠇꠞꠞꠣꠝ ꠈꠥꠛ ꠎꠟꠖꠤꠃ ꠔꠥꠝꠣꠞ ꠉꠦꠍꠦ ꠀꠁꠔꠣꠝ। ꠅꠈꠣꠘ ꠝꠘꠅ ꠇꠞꠤꠀ ꠔꠥꠝꠣꠞꠦ ꠁꠔꠣ ꠟꠦꠈꠞꠣꠝ।
1TI 3:15 ꠎꠥꠖꠤ ꠇꠥꠘꠥ ꠇꠣꠞꠘꠦ ꠀꠝꠣꠞ ꠀꠁꠔꠦ ꠖꠦꠞꠤ ꠅꠁꠎꠣꠄ, ꠔꠦ ꠁ ꠟꠦꠈꠣ ꠙꠠꠟꠦ ꠔꠥꠝꠤ ꠛꠥꠎꠛꠣꠄ, ꠀꠟ꠆ꠟꠣꠞ ꠙꠞꠤꠛꠣꠞꠞ ꠝꠣꠘꠡꠞ ꠌꠣꠟ-ꠌꠟꠘ ꠇꠤꠟꠣ ꠅꠁꠔ। ꠁ ꠙꠞꠤꠛꠣꠞ ꠔ ꠎꠤꠘ꠆ꠖꠣ ꠀꠟ꠆ꠟꠣꠞ ꠎꠝꠣꠔ, ꠀꠟ꠆ꠟꠣꠁ ꠢꠇꠤꠇꠔꠞ ꠜꠤꠔ ꠀꠞ ꠁꠀꠘ ꠈꠥꠐꠤ।
1TI 3:16 ꠁꠍꠣꠄꠁ ꠁꠝꠣꠘꠞ ꠝꠣꠞꠤꠚꠔꠤ ꠇꠔ ꠝꠢꠣꠘ, ꠁꠔꠣ ꠔ ꠅꠡ꠆ꠛꠤꠇꠣꠞ ꠇꠞꠣ ꠎꠣꠄ ꠘꠣ। ꠅꠃ ꠝꠣꠞꠤꠚꠔꠤ ꠅꠃꠟꠣ ꠎꠣꠁꠞ ꠅꠁꠟ, ꠔꠣꠁꠘ ꠝꠣꠘꠥꠡ ꠍꠥꠞꠔꠦ ꠎꠣꠁꠞ ꠅꠁꠟꠣ, ꠙꠣꠇ ꠞꠥꠢꠦ ꠙꠞꠝꠣꠘ ꠅꠁꠟꠣ ꠛꠦ-ꠇꠍꠥꠞ, ꠚꠤꠞꠤꠡ꠆ꠔꠣ ꠅꠇꠟꠦ ꠔꠣꠘ ꠖꠞꠡꠘ ꠙꠣꠁꠟꠣ। ꠔꠣꠘ ꠛꠦꠙꠣꠞꠦ ꠢꠇ꠆ꠇꠟ ꠎꠣꠔꠤꠞ ꠉꠦꠍꠦ ꠔꠛꠟꠤꠉ ꠇꠞꠣ ꠅꠁꠟ, ꠀꠡ꠆ꠔꠣ ꠖꠥꠘꠤꠀꠞ ꠝꠣꠘꠡꠦ ꠔꠣꠘ ꠃꠙꠞꠦ ꠁꠝꠣꠘ ꠀꠘꠟꠣ, ꠉꠃꠞꠛ-ꠝꠢꠤꠝꠣꠄ ꠔꠣꠘꠞꠦ ꠃꠙꠞꠦ ꠔꠥꠟꠤ ꠘꠦꠅꠀ ꠅꠁꠟ।
1TI 4:1 ꠅ ꠔꠤꠝꠕꠤ, ꠀꠟ꠆ꠟꠣꠁ ꠙꠣꠇ ꠞꠥꠢꠦ ꠙꠞꠤꠡ꠆ꠇꠣꠞ ꠇꠞꠤ ꠇꠁꠞꠣ, ꠀꠈꠦꠞꠤ ꠎꠝꠣꠘꠣꠔ ꠇꠤꠍꠥ ꠝꠣꠘꠥꠡ ꠁꠍꠣꠄꠁ ꠁꠝꠣꠘ ꠕꠣꠇꠤ ꠢꠞꠤꠎꠤꠛ, ꠔꠣꠞꠣ ꠘꠣ-ꠢꠇ ꠞꠥꠢꠥ ꠀꠞ ꠎꠤꠘ-ꠜꠥꠔꠞ ꠔꠣꠟꠤꠝꠞ ꠀꠡꠤꠇ ꠅꠁꠛ।
1TI 4:2 ꠎꠦꠔꠣ ꠛꠦꠁꠝꠣꠘ ꠅꠇꠟꠞ ꠛꠤꠛꠦꠇ-ꠛꠥꠖ꠆ꠖꠤ ꠅꠡꠣꠠ ꠅꠁꠉꠦꠍꠦ, ꠅꠔꠣꠞ ꠜꠘ꠆ꠒꠣꠝꠤꠞ ꠖꠣꠄ ꠅꠟꠣ ꠅꠁꠛ।
1TI 4:3 ꠁꠔꠣꠄ ꠝꠣꠘꠡꠞꠦ ꠇꠠꠣꠇꠠꠤ ꠢꠥꠇꠥꠝ ꠖꠦꠁꠘ ꠛꠤꠀ-ꠡꠣꠖꠤ ꠘꠣ ꠇꠞꠣꠞ ꠟꠣꠉꠤ, ꠀꠞ ꠇꠥꠘꠥ ꠇꠥꠘꠥ ꠈꠣꠘꠤ ꠈꠣꠁꠔꠦꠅ ꠘꠤꠡꠦꠗ ꠇꠞꠂꠘ। ꠅꠁꠟꠦ ꠀꠟ꠆ꠟꠣꠄ ꠔ ꠁ ꠈꠣꠘꠤ ꠙꠄꠖꠣꠃ ꠇꠞꠍꠂꠘ, ꠎꠦꠞꠣ ꠁꠝꠣꠘ ꠀꠘꠍꠦ, ꠎꠦꠞꠣ ꠀꠟ꠆ꠟꠣꠞ ꠢꠇꠞꠦ ꠎꠣꠘꠤꠟꠤꠍꠦ, ꠔꠣꠞꠣ ꠎꠣꠔꠦ ꠀꠟ꠆ꠟꠣꠞ ꠡꠥꠇꠞꠤꠀ ꠀꠖꠣꠄ ꠇꠞꠤꠀ ꠁꠔꠣ ꠈꠣꠁꠘ।
1TI 4:4 ꠀꠟ꠆ꠟꠣꠞ ꠙꠄꠖꠣ ꠇꠞꠣ ꠢꠇꠟ ꠎꠤꠘꠤꠡꠃ ꠜꠣꠟꠣ। ꠢꠣꠞꠣꠝ ꠝꠘꠅ ꠇꠞꠤꠀ ꠇꠥꠘꠥꠔꠣ ꠛꠣꠖ ꠖꠦꠅꠀ ꠑꠤꠇ ꠘꠣꠄ, ꠛꠞꠋ ꠀꠟ꠆ꠟꠣꠞ ꠡꠥꠇꠞꠤꠀ ꠀꠖꠣꠄ ꠇꠞꠤꠀ ꠈꠣꠅꠀ ꠎꠣꠄ।
1TI 4:5 ꠇꠣꠞꠘ ꠀꠟ꠆ꠟꠣꠞ ꠇꠣꠟꠣꠝ ꠀꠞ ꠁ ꠝꠥꠘꠣꠎꠣꠔꠞ ꠝꠣꠎꠖꠤ ꠁꠔꠣ ꠙꠣꠇ-ꠙꠛꠤꠔ꠆ꠞ ꠅꠁꠎꠣꠄ।
1TI 4:6 ꠅ ꠔꠤꠝꠕꠤ, ꠔꠥꠝꠤ ꠎꠥꠖꠤ ꠅꠃ ꠔꠣꠟꠤꠝ ꠅꠇꠟ ꠝꠥꠝꠤꠘ ꠜꠣꠁꠀꠁꠘꠞꠦ ꠛꠥꠎꠣꠁꠀ ꠖꠦꠅ, ꠔꠦ ꠁꠍꠣꠄꠁ ꠁꠝꠣꠘꠞ ꠎꠦ ꠢꠇ ꠀꠞ ꠘꠤꠞꠜꠥꠟ ꠔꠣꠟꠤꠝ ꠝꠣꠘꠤꠀ ꠌꠟꠞꠣꠄ, ꠁ ꠛꠦꠙꠣꠞꠦ ꠔꠥꠝꠤ ꠙꠣꠇꠣ-ꠙꠥꠇ꠆ꠔ ꠅꠁꠀ ꠀꠟ-ꠝꠍꠤꠞ ꠄꠇꠎꠘ ꠃꠙꠎꠥꠇ꠆ꠔ ꠈꠣꠖꠤꠝ ꠅꠁꠛꠣꠄ।
1TI 4:7 ꠔꠥꠝꠤ ꠀꠎꠦ-ꠛꠣꠎꠦ ꠇꠤꠌ꠆ꠍꠣ-ꠇꠣꠢꠤꠘꠤ ꠕꠣꠇꠤ ꠢꠞꠤꠀ ꠞꠁꠅ, ꠁꠔꠣ ꠔ ꠖꠣꠖꠤ-ꠘꠣꠘꠤꠞ ꠇꠅꠀ ꠛꠣꠘꠣꠁꠟ ꠇꠤꠌ꠆ꠍꠣꠞ ꠟꠣꠈꠣꠘ। ꠄꠞꠟꠣꠉꠤ ꠁꠔꠣ ꠛꠣꠖ ꠖꠤꠀ ꠖꠤꠟꠞ ꠁꠝꠣꠘꠤ ꠛꠦꠀꠝ ꠇꠞꠣꠔ ꠞꠅ।
1TI 4:8 ꠡꠞꠤꠟꠞ ꠛꠦꠀꠝ ꠇꠞꠟꠦ ꠇꠤꠍꠥ ꠚꠣꠄꠖꠣ ꠅꠄ, ꠅꠁꠟꠦ ꠖꠤꠟꠞ ꠁꠝꠣꠘꠤ ꠛꠦꠀꠝꠦ ꠢꠇ꠆ꠇꠟ ꠛꠣꠄ ꠕꠣꠇꠤ ꠚꠣꠄꠖꠣ ꠅꠄ। ꠄꠞꠝꠣꠎꠦ ꠔ ꠈꠣꠟꠤ ꠁ ꠖꠥꠘꠤꠀ ꠘꠣꠄ, ꠀꠈꠦꠞꠣꠔꠞ ꠀꠡꠣꠅ ꠀꠍꠦ।
1TI 4:9 ꠁꠔꠣ ꠔ ꠙꠥꠞꠣꠙꠥꠞ ꠢꠇ ꠀꠞ ꠈꠣꠐꠤ, ꠡꠥꠟ꠆ꠟꠀꠘꠣ ꠇꠛꠥꠟ ꠇꠞꠣꠞ ꠟꠣꠈ।
1TI 4:10 ꠄꠞꠟꠣꠉꠤꠃ ꠀꠝꠞꠣ ꠎꠣꠘꠦ-ꠙꠞꠣꠘꠦ ꠁꠝꠣꠘꠞ ꠝꠦꠘꠔ ꠇꠞꠤꠀꠞ ꠀꠞ ꠈꠤꠀꠟꠤ ꠅꠁꠀ ꠇꠣꠝ ꠇꠞꠤꠀꠞ। ꠇꠣꠞꠘ ꠀꠝꠞꠣ ꠔ ꠎꠤꠘ꠆ꠖꠣ ꠀꠟ꠆ꠟꠣꠞ ꠃꠙꠞꠦ ꠜꠞꠡꠣ ꠇꠞꠤ। ꠔꠣꠁꠘꠃ ꠢꠇꠟ ꠝꠣꠘꠡꠞ ꠔꠞꠣꠘꠦꠀꠟꠣ, ꠈꠣꠍ ꠇꠞꠤ ꠎꠦꠞꠣ ꠔꠣꠘ ꠃꠙꠞꠦ ꠁꠝꠣꠘ ꠀꠘꠦ।
1TI 4:11 ꠔꠦ ꠔꠥꠝꠤꠅ ꠅꠃ ꠛꠦꠙꠣꠞꠦ ꠢꠥꠇꠥꠝ ꠀꠞ ꠔꠣꠟꠤꠝ ꠖꠦꠅ।
1TI 4:12 ꠔꠥꠝꠤ ꠎꠥꠀꠘ ꠛꠦꠐꠣ ꠝꠘꠅ ꠇꠞꠤꠀ ꠇꠦꠃ ꠎꠣꠘꠥ ꠔꠥꠝꠣꠞꠦ ꠄꠟꠣ ꠘꠣ ꠇꠞꠦ, ꠄꠞꠟꠣꠉꠤ ꠝꠣꠔ-ꠇꠕꠣꠄ, ꠌꠣꠟ-ꠌꠟꠘꠦ, ꠝꠢꠛ꠆ꠛꠔꠦ, ꠁꠝꠣꠘꠦ ꠀꠞ ꠙꠣꠇ-ꠙꠛꠤꠔ꠆ꠞꠔꠣꠄ ꠔꠥꠝꠤ ꠝꠥꠝꠤꠘ ꠅꠇꠟꠞ ꠉꠦꠍꠦ ꠄꠇꠐꠣ ꠘꠤꠡꠣꠘꠣ ꠛꠘꠤꠎꠣꠅ।
1TI 4:13 ꠀꠞ ꠀꠝꠤ ꠀꠁꠛꠣꠞ ꠀꠉ ꠙꠞ꠆ꠎꠘ꠆ꠔ ꠔꠥꠝꠤ ꠝꠥꠝꠤꠘ ꠅꠇꠟꠞꠦ ꠙꠣꠇ ꠇꠣꠟꠣꠝ ꠔꠤꠟꠣꠅꠔ ꠇꠞꠣ, ꠡꠥ-ꠙꠞꠣꠝꠤꠡ ꠖꠦꠅꠀ, ꠀꠞ ꠔꠣꠟꠤꠝ ꠖꠦꠅꠀꠔ ꠟꠣꠉꠣꠁꠟ ꠞꠁꠅ।
1TI 4:14 ꠝꠘꠅ ꠞꠣꠈꠤꠅ, ꠎꠝꠣꠔꠞ ꠝꠥꠞꠛ꠆ꠛꠤ ꠅꠇꠟꠦ ꠔꠥꠝꠣꠞ ꠃꠙꠞꠦ ꠀꠔ ꠞꠣꠈꠤꠀ, ꠘꠛꠤꠞ ꠟꠣꠈꠣꠘ ꠉꠣꠁꠛꠤ ꠛꠥꠟꠤ ꠝꠣꠔꠤꠀ ꠔꠥꠝꠣꠞꠦ ꠈꠦꠟꠣꠚꠔꠤ ꠖꠤꠍꠂꠘ, ꠔꠦ ꠔꠥꠝꠤ ꠁ ꠘꠤꠀꠝꠔꠞꠦ ꠄꠟꠣꠝꠤ ꠇꠞꠤꠅ ꠘꠣ।
1TI 4:15 ꠁꠔꠣ ꠛꠦꠙꠣꠞꠦ ꠈꠤꠀꠟꠤ ꠅꠅ, ꠘꠤꠎꠞꠦ ꠅꠔꠣꠞ ꠝꠣꠎꠦ ꠙꠥꠞꠣꠙꠥꠞ ꠒꠥꠛꠣꠁꠀ ꠞꠣꠈꠅ, ꠔꠦꠃ ꠢꠇꠟꠞ ꠌꠈꠥꠔ ꠙꠠꠛ ꠔꠥꠝꠤ ꠀꠉꠦꠖꠤ ꠀꠉꠥꠀꠁꠞꠣꠄ।
1TI 4:16 ꠔꠥꠝꠣꠞ ꠘꠤꠎꠞ ꠛꠦꠙꠣꠞꠦ ꠀꠞ ꠔꠥꠝꠣꠞ ꠔꠣꠟꠤꠝꠞ ꠛꠦꠙꠣꠞꠦ ꠢꠥꠡꠤꠀꠞ ꠞꠁꠅ। ꠔꠦꠃ ꠔꠥꠝꠤ ꠘꠤꠎꠞꠦ ꠛꠣꠌꠣꠁꠛꠣꠄ, ꠀꠞ ꠎꠦꠞꠣ ꠔꠥꠝꠣꠞ ꠛꠄꠀꠘ ꠢꠥꠘꠛ, ꠔꠣꠞꠣꠞꠦꠅ ꠛꠣꠌꠣꠁꠔꠣꠄ ꠙꠣꠞꠛꠣꠄ।
1TI 5:1 ꠅ ꠔꠤꠝꠕꠤ, ꠢꠥꠘꠅ, ꠇꠥꠘꠥ ꠝꠥꠞꠛ꠆ꠛꠤ ꠝꠣꠘꠡꠞ ꠖꠥꠡ ꠖꠦꠈꠣꠘꠤꠔ ꠉꠤꠀ ꠇꠠꠣ ꠜꠣꠡꠣꠄ ꠝꠣꠔꠤꠅ ꠘꠣ। ꠔꠣꠞꠣꠞ ꠟꠉꠦ ꠘꠤꠎꠞ ꠛꠣꠚꠞ ꠟꠣꠈꠣꠘ ꠛꠦꠛꠢꠣꠞ ꠇꠞꠤꠅ। ꠀꠞ ꠎꠥꠀꠘ ꠅꠇꠟꠞꠦ ꠘꠤꠎꠞ ꠜꠣꠁ ꠝꠘꠅ ꠇꠞꠤꠀ ꠢꠦꠖꠣꠄꠅꠔ ꠇꠞꠤꠅ।
1TI 5:2 ꠝꠥꠞꠛ꠆ꠛꠤ ꠛꠦꠐꠤꠘꠞꠦ ꠘꠤꠎꠞ ꠝꠣ ꠀꠞ ꠙꠥꠠꠤꠘ꠆ꠔꠞꠦ ꠛꠁꠘ ꠝꠘꠅ ꠇꠞꠤꠀ, ꠝꠘꠞ ꠜꠣꠛ ꠙꠣꠇ-ꠙꠛꠤꠔ꠆ꠞ ꠞꠣꠈꠤꠀ ꠔꠣꠞꠣꠞꠦ ꠢꠦꠖꠣꠄꠅꠔ ꠇꠞꠤꠅ।
1TI 5:3 ꠎꠦꠔꠣ ꠠꠣꠠꠤ ꠛꠦꠐꠤꠘ꠆ꠔꠞ ꠇꠦꠃ ꠘꠣꠁ, ꠔꠣꠞꠣꠞꠦ ꠈꠥꠛ ꠎꠔꠘ ꠇꠞꠤ ꠖꠦꠈꠣ-ꠢꠥꠘꠣ ꠇꠞꠤꠅ।
1TI 5:4 ꠅꠁꠟꠦ ꠇꠥꠘꠥ ꠠꠣꠠꠤ ꠛꠦꠐꠤꠘ꠆ꠔꠞ ꠎꠥꠖꠤ ꠙꠥꠀ-ꠙꠥꠠꠤꠘ ꠛꠣ ꠘꠣꠔꠤ-ꠘꠣꠔꠘꠤ ꠕꠣꠇꠂꠘ, ꠔꠦ ꠀꠟ꠆ꠟꠣꠞ ꠒꠞꠦ ꠄꠞꠣꠃ ꠎꠣꠘꠥ ꠙꠄꠟꠣ ꠎꠣꠞꠎꠤꠞ ꠙꠞꠤꠛꠣꠞꠞ ꠖꠦꠈꠣ-ꠢꠥꠘꠣ ꠇꠞꠦ। ꠅꠃ ꠘꠝꠥꠘꠣꠄ ꠔꠣꠞꠣꠞ ꠝꠄ-ꠝꠥꠞꠛ꠆ꠛꠤꠞ ꠝꠣꠄꠀ-ꠝꠝꠔꠣꠞ ꠞꠤꠘ ꠡꠥꠗ ꠇꠞꠔꠣ ꠙꠣꠞꠛꠣ, ꠀꠞ ꠁꠔꠣ ꠇꠣꠝꠦ ꠔ ꠀꠟ꠆ꠟꠣ ꠈꠥꠡꠤ ꠅꠁꠘ।
1TI 5:5 ꠎꠦ ꠠꠣꠠꠤ ꠛꠦꠐꠤꠘ꠆ꠔꠞ ꠇꠦꠃ ꠘꠣꠁ, ꠔꠣꠞꠣ ꠈꠣꠟꠤ ꠀꠟ꠆ꠟꠣꠞ ꠃꠙꠞꠦ ꠜꠞꠡꠣ ꠞꠣꠈꠤꠀ, ꠖꠤꠘꠦ-ꠞꠣꠁꠔꠦ ꠔꠣꠘ ꠖꠞꠛꠣꠞꠅ ꠝꠥꠘꠣꠎꠣꠔ ꠀꠞ ꠇꠣꠘ꠆ꠖꠣ-ꠇꠣꠐꠤ ꠇꠞꠣꠔ ꠞꠂꠘ।
1TI 5:6 ꠅꠁꠟꠦ ꠎꠦꠔꠣ ꠠꠣꠠꠤ ꠛꠦꠐꠤꠘ꠆ꠔꠦ ꠎꠦꠝꠘꠦ ꠝꠘꠦ ꠌꠣꠄ ꠄꠝꠘꠦ ꠌꠟꠂꠘ, ꠁꠔꠣ ꠔ ꠎꠤꠘ꠆ꠖꠣ ꠢꠣꠟꠔꠦꠃ ꠝꠞꠣ।
1TI 5:7 ꠅꠃ ꠛꠦꠙꠣꠞꠦ ꠢꠥꠇꠥꠝ ꠖꠦꠅ, ꠎꠣꠔꠦ ꠇꠦꠃ ꠔꠣꠞꠣꠞꠦ ꠖꠥꠡꠤ ꠇꠅꠀꠞ ꠡꠥꠎꠥꠉ ꠘꠣ ꠙꠣꠄ।
1TI 5:8 ꠎꠦ ꠎꠘꠦ ꠀꠙꠘ ꠎꠘꠞꠦ, ꠈꠣꠍ ꠇꠞꠤ ꠘꠤꠎꠞ ꠙꠞꠤꠛꠣꠞꠞ ꠝꠣꠘꠡꠞ ꠖꠦꠈꠣ-ꠢꠥꠘꠣ ꠇꠞꠦ ꠘꠣ, ꠢꠦ ꠀꠍꠟꠦ ꠁꠍꠣꠄꠁ ꠁꠝꠣꠘꠞꠦꠃ ꠅꠡ꠆ꠛꠤꠇꠣꠞ ꠇꠞꠟ। ꠁꠉꠥ ꠔ ꠛꠤꠗꠞ꠆ꠝꠤ ꠕꠣꠇꠤꠅ ꠛꠣꠖ।
1TI 5:9 ꠄꠞꠟꠣꠉꠤ ꠠꠣꠠꠤ ꠛꠦꠐꠤꠘ꠆ꠔꠞ ꠘꠣꠝꠞ ꠟꠤꠡ꠆ꠐ ꠇꠞꠣꠞ ꠛꠣꠟꠣ ꠀꠉꠦ ꠖꠦꠈꠔꠦ ꠅꠁꠛ, ꠁ ꠛꠦꠐꠤꠞ ꠛꠄꠅꠡ ꠡꠣꠁꠐ ꠛꠍꠞ ꠅꠁꠍꠦ ꠘꠤ, ꠀꠞ ꠎꠣꠝꠣꠁꠞ ꠛꠣꠄ ꠔꠣꠁꠘ ꠙꠥꠞꠣꠙꠥꠞ ꠢꠇ-ꠢꠣꠟꠣꠟꠤ ꠀꠍꠟꠣ ꠘꠤ।
1TI 5:10 ꠄꠍꠣꠠꠣ ꠘꠦꠇ ꠇꠣꠝꠞ ꠟꠣꠉꠤ ꠔꠣꠘ ꠡꠥꠘꠣꠝ ꠕꠣꠇꠔꠦ ꠅꠁꠛ, ꠅꠃ ꠘꠦꠇ ꠇꠣꠝ ꠅꠁꠟ, ꠙꠥꠀ-ꠙꠥꠠꠤꠘ ꠝꠣꠘꠥꠡ ꠛꠣꠘꠣꠘꠤ, ꠝꠦꠝꠣꠘꠖꠣꠞꠤ ꠇꠞꠣ, ꠀꠟ꠆ꠟꠣꠞ ꠛꠘ꠆ꠖꠣ ꠅꠇꠟꠞ ꠙꠣꠅ ꠗꠅꠀꠘꠤ, ꠖꠥꠈ-ꠝꠍꠤꠛꠔꠤ ꠝꠣꠘꠡꠞꠦ ꠡꠣꠁꠎ꠆ꠎ ꠇꠞꠣ, ꠀꠞ ꠢꠇꠟ ꠘꠝꠥꠘꠣꠞ ꠘꠦꠇ ꠇꠣꠝꠅ ꠡꠞꠤꠇ ꠅꠀ।
1TI 5:11 ꠇꠥꠘꠥ ꠎꠥꠀꠘ ꠠꠣꠠꠤ ꠛꠦꠐꠤꠞ ꠘꠣꠝ ꠁ ꠟꠤꠡ꠆ꠐꠅ ꠔꠥꠟꠤꠅ ꠘꠣ। ꠇꠣꠞꠘ ꠔꠣꠞꠣꠞ ꠎꠃꠛꠘꠞ ꠟꠣꠉꠤ ꠡꠞꠤꠟꠞ ꠉꠞꠝꠦ ꠎꠦꠛꠟꠣ ꠃꠔꠣꠟ-ꠙꠣꠔꠣꠟ ꠇꠞꠂꠘ, ꠅꠃ ꠡꠝꠄ ꠀꠟ-ꠝꠍꠤꠞ ꠛꠣꠄ ꠔꠣꠞꠣꠞ ꠒꠞ-ꠜꠄ ꠇꠝꠤ ꠎꠣꠄ, ꠔꠦꠃ ꠔꠣꠞꠣ ꠢꠤꠞꠛꠣꠞ ꠛꠤꠀ ꠛꠁꠔꠣ ꠌꠣꠁꠘ।
1TI 5:12 ꠄꠞꠟꠣꠉꠤ ꠔꠣꠞꠣ ꠀꠟ꠆ꠟꠣꠞ ꠟꠉꠞ ꠀꠉꠞ ꠅꠀꠖꠣ ꠜꠋꠉ ꠇꠞꠂꠘ, ꠘꠤꠎꠞ ꠃꠙꠞꠦ ꠉꠎꠛ ꠒꠣꠇꠤꠀ ꠀꠘꠂꠘ।
1TI 5:13 ꠀꠞ ꠔꠣꠞꠣ ꠛꠣꠠꠤꠄ ꠛꠣꠠꠤꠄ ꠀꠒ꠆ꠒꠣ ꠝꠣꠞꠤꠀ ꠇꠥꠠꠤꠀ ꠛꠘꠤꠎꠣꠁꠘ। ꠈꠣꠟꠤ ꠇꠥꠠꠤꠀ ꠘꠣꠄ, ꠎꠦꠔꠣ ꠝꠣꠔ-ꠇꠕꠣ ꠔꠣꠞꠣꠞ ꠟꠣꠉꠤ ꠎꠣꠁꠎ ꠘꠣꠄ, ꠅꠔꠣ ꠛꠣꠎꠦ ꠝꠣꠔ-ꠇꠕꠣꠅ ꠝꠣꠔꠂꠘ ꠀꠞ ꠙꠞꠞ ꠉꠤꠛꠔ ꠉꠣꠅꠀꠔ ꠞꠂꠘ।
1TI 5:14 ꠄꠞꠟꠣꠉꠤ ꠀꠝꠤ ꠅꠃ ꠘꠍꠤꠅꠔ ꠇꠞꠤꠀꠞ, ꠎꠥꠀꠘ ꠠꠣꠠꠤ ꠛꠦꠐꠤꠘ꠆ꠔꠦ ꠛꠤꠀ-ꠡꠣꠖꠤ ꠇꠞꠣꠃ ꠜꠣꠟꠣ, ꠔꠣꠞꠣ ꠢꠥꠞꠥꠔ꠆ꠔꠣꠞ ꠝꠣ ꠅꠃꠇ, ꠘꠤꠎꠞ ꠡꠋꠡꠣꠞꠞ ꠖꠦꠈꠣ-ꠢꠥꠘꠣ ꠇꠞꠃꠇ, ꠀꠞ ꠖꠥꠡꠝꠘꠞꠦ ꠇꠥꠘꠥ ꠟꠣꠈꠣꠘ ꠛꠖꠘꠣꠝ ꠉꠣꠅꠀꠞ ꠡꠥꠎꠥꠉ ꠘꠣ ꠖꠦꠃꠇ।
1TI 5:15 ꠇꠄꠎꠘ ꠠꠣꠠꠤ ꠛꠦꠐꠤꠘ ꠄꠞꠝꠣꠎꠦꠃ ꠔ ꠛꠦ-ꠙꠕꠤ ꠛꠘꠤꠀ ꠡꠄꠔꠣꠘꠞ ꠙꠕꠦ ꠌꠟꠣ-ꠚꠤꠞꠣ ꠇꠞꠞꠣ।
1TI 5:16 ꠇꠥꠘꠥ ꠁꠍꠣꠄꠁ ꠁꠝꠣꠘꠖꠣꠞ ꠛꠦꠐꠤ ꠝꠣꠘꠡꠞ ꠊꠞꠅ ꠎꠥꠖꠤ ꠠꠣꠠꠤ ꠛꠦꠐꠤꠘ ꠕꠣꠇꠂꠘ, ꠔꠦ ꠅꠃ ꠛꠦꠐꠤꠄ ꠎꠣꠘꠥ ꠄꠞꠣꠞ ꠖꠦꠈꠣ-ꠢꠥꠘꠣ ꠇꠞꠂꠘ। ꠄꠞꠣꠞꠦ ꠖꠦꠈꠣ-ꠢꠥꠘꠣꠞ ꠜꠣꠞ ꠎꠝꠣꠔꠞ ꠃꠙꠞꠦ ꠘꠣ ꠖꠦꠅꠀ ꠜꠣꠟꠣ। ꠔꠦꠃ ꠎꠦꠔꠣ ꠠꠣꠠꠤ ꠛꠦꠐꠤꠘ ꠄꠇꠖꠝ ꠟꠣꠍꠣꠞ, ꠎꠝꠣꠔꠦ ꠔꠣꠞꠣꠞ ꠖꠦꠈꠣ-ꠢꠥꠘꠣ ꠇꠞꠔꠦ ꠡꠥꠛꠤꠗꠣ ꠅꠁꠛ।
1TI 5:17 ꠎꠝꠣꠔꠞ ꠎꠦ ꠙꠞꠗꠣꠘ ꠝꠥꠞꠛ꠆ꠛꠤ ꠅꠇꠟꠦ ꠎꠝꠣꠔꠞꠦ ꠜꠣꠟꠣꠝꠘ꠆ꠔꠦ ꠌꠣꠟꠣꠁꠘ, ꠈꠣꠍ ꠇꠞꠤ ꠎꠦꠞꠣ ꠀꠟ꠆ꠟꠣꠞ ꠇꠣꠟꠣꠝ ꠔꠛꠟꠤꠉ ꠀꠞ ꠔꠣꠟꠤꠝ ꠖꠦꠅꠀꠞ ꠟꠣꠉꠤ ꠝꠦꠘꠔ ꠇꠞꠂꠘ, ꠔꠣꠞꠣ ꠒꠣꠛꠥꠟ ꠁꠎ꠆ꠎꠔ ꠙꠣꠅꠀ ꠎꠞꠥꠞ।
1TI 5:18 ꠀꠟ꠆ꠟꠣꠞ ꠇꠣꠟꠣꠝꠅ ꠔ ꠀꠍꠦ, “ꠗꠣꠘ ꠝꠣꠠꠣ ꠖꠦꠅꠀꠞ ꠡꠝꠄ ꠉꠞꠥꠞ ꠝꠥꠈꠅ ꠢꠥꠚꠤ ꠟꠣꠉꠣꠁꠅ ꠘꠣ।” ꠀꠞꠇ ꠀꠄꠀꠔꠅ ꠀꠍꠦ, “ꠇꠣꠝꠟꠣꠄ ꠔꠣꠞ ꠛꠦꠔꠘ ꠙꠣꠅꠀꠞ ꠎꠁꠉ꠆ꠉ।”
1TI 5:19 ꠝꠘꠅ ꠞꠣꠈꠤꠅ, ꠖꠥꠁ ꠛꠣ ꠔꠤꠘ ꠎꠘ ꠡꠣꠇ꠆ꠇꠤꠞ ꠇꠕꠣ ꠍꠣꠠꠣ, ꠎꠝꠣꠔꠞ ꠝꠥꠞꠛ꠆ꠛꠤꠞ ꠛꠤꠞꠥꠖ꠆ꠖꠦ ꠇꠥꠘꠥ ꠘꠣꠟꠤꠡ ꠡꠝꠎꠤꠅ ꠘꠣ।
1TI 5:20 ꠅꠁꠟꠦ ꠎꠦ ꠝꠥꠞꠛ꠆ꠛꠤ ꠅꠇꠟꠦ ꠉꠥꠘꠣ ꠇꠞꠣꠔꠃ ꠕꠣꠇꠂꠘ, ꠎꠝꠣꠔꠞ ꠝꠣꠘꠡꠞ ꠉꠦꠍꠦ ꠔꠣꠞꠣꠞ ꠖꠥꠡ ꠎꠣꠁꠞ ꠇꠞꠤꠅ, ꠎꠣꠔꠦ ꠅꠁꠘ꠆ꠘ ꠢꠇꠟꠦ ꠒꠞꠣꠁꠘ।
1TI 5:21 ꠢꠥꠘꠅ, ꠀꠟ꠆ꠟꠣ ꠙꠣꠇ, ꠝꠣꠟꠤꠇ ꠁꠍꠣ ꠀꠟ-ꠝꠍꠤ, ꠀꠞ ꠀꠟ꠆ꠟꠣꠞ ꠝꠣꠄꠀꠞ ꠚꠤꠞꠤꠡ꠆ꠔꠣ ꠅꠇꠟꠞꠦ ꠡꠣꠇ꠆ꠇꠤ ꠞꠣꠈꠤꠀ ꠔꠥꠝꠣꠞꠦ ꠅꠃ ꠢꠥꠇꠥꠝ ꠖꠤꠞꠣꠝ, ꠔꠥꠝꠤ ꠘꠤꠞꠙꠇ꠆ꠇ ꠞꠁꠀ ꠁꠔꠣ ꠇꠣꠝ ꠇꠞꠤꠅ, ꠇꠦꠃꠞꠞꠦ ꠙꠞ ꠛꠣ ꠀꠙꠘ ꠝꠘꠅ ꠇꠞꠤꠅ ꠘꠣ।
1TI 5:22 ꠌꠐ ꠇꠞꠤ ꠇꠦꠃꠞꠞꠦ ꠈꠦꠟꠣꠚꠔꠤ ꠖꠤꠀ, ꠇꠥꠘꠥ ꠙꠖꠅ ꠛꠅꠀꠁꠟ ꠇꠞꠤꠅ ꠘꠣ। ꠅꠁꠘ꠆ꠘ ꠝꠣꠘꠡꠦ ꠎꠦꠛꠟꠣ ꠉꠥꠘꠣꠞ ꠇꠣꠝ ꠇꠞꠦ, ꠔꠥꠝꠤ ꠔꠣꠞꠣꠞ ꠟꠉꠦ ꠡꠞꠤꠇ ꠅꠁꠅ ꠘꠣ, ꠘꠤꠎꠞꠦ ꠘꠤꠈꠥꠔ ꠞꠣꠈꠤꠅ।
1TI 5:23 ꠀꠞ ꠇꠄꠖꠤꠘ ꠛꠣꠖꠦ ꠛꠣꠖꠦꠃ ꠔꠥꠝꠣꠞ ꠛꠦꠝꠣꠞ ꠅꠄ, ꠄꠞꠟꠣꠉꠤ ꠔꠥꠝꠤ ꠈꠣꠟꠤ ꠙꠣꠘꠤ ꠈꠣꠁꠅ ꠘꠣ, ꠕꠥꠠꠣ ꠕꠥꠠꠣ ꠀꠋꠉꠥꠞꠞ ꠡꠞꠛꠔꠅ ꠈꠣꠁꠅ, ꠔꠦꠃ ꠅꠎꠝ ꠅꠁꠛ।
1TI 5:24 ꠈꠤꠀꠟ ꠞꠣꠈꠤꠅ, ꠇꠥꠘꠥ ꠇꠥꠘꠥ ꠝꠣꠘꠡꠞ ꠉꠥꠘꠣ ꠅꠟꠣ ꠙꠞꠤꠡ꠆ꠇꠣꠞ ꠖꠦꠈꠣ ꠎꠣꠄ, ꠄꠞꠟꠣꠉꠤ ꠔꠣꠞ ꠛꠤꠌꠣꠞ ꠀꠉꠦꠃ ꠅꠁꠎꠣꠄ। ꠀꠞ ꠇꠥꠘꠥ ꠇꠥꠘꠥ ꠝꠣꠘꠡꠞ ꠉꠥꠘꠣ ꠛꠣꠖꠦ ꠗꠞꠣ ꠙꠠꠦ।
1TI 5:25 ꠅꠟꠣꠈꠣꠘ ꠘꠦꠇ ꠇꠣꠝ ꠙꠞꠤꠡ꠆ꠇꠣꠞ ꠖꠦꠈꠣ ꠎꠣꠄ, ꠀꠞ ꠇꠥꠘꠥ ꠘꠦꠇ ꠇꠣꠝ ꠙꠞꠤꠡ꠆ꠇꠣꠞ ꠖꠦꠈꠣ ꠘꠣ ꠉꠦꠟꠦꠅ, ꠁꠔꠣ ꠟꠥꠇꠣꠁꠟ ꠞꠄ ꠘꠣ।
1TI 6:1 ꠢꠥꠘꠅ, ꠎꠦ ꠉꠥꠟꠣꠝ-ꠛꠣꠘ꠆ꠖꠤꠄ ꠝꠥꠘꠤꠛꠞ ꠉꠥꠟꠣꠝꠤ ꠇꠞꠂꠘ, ꠔꠣꠞꠣ ꠢꠇꠟꠦꠃ ꠎꠣꠞꠎꠤꠞ ꠝꠥꠘꠤꠛꠞꠦ ꠁꠎ꠆ꠎꠔꠤ ꠎꠘ ꠝꠘꠅ ꠇꠞꠃꠇ, ꠎꠣꠔꠦ ꠇꠦꠃ ꠀꠟ꠆ꠟꠣꠞ ꠘꠣꠝꠞꠦ ꠛꠣ ꠀꠝꠞꠣꠞ ꠔꠣꠟꠤꠝꠞꠦ ꠈꠣꠞꠣꠙ ꠇꠅꠀꠞ ꠡꠥꠎꠥꠉ ꠘꠣ ꠙꠣꠄ।
1TI 6:2 ꠎꠦ ꠎꠘꠦ ꠁꠍꠣꠄꠁ ꠁꠝꠣꠘꠖꠣꠞ ꠇꠥꠘꠥ ꠝꠥꠘꠤꠛꠞ ꠉꠥꠟꠣꠝꠤ ꠇꠞꠂꠘ, ꠄꠁꠘ ꠎꠣꠘꠥ ꠁꠝꠣꠘꠖꠣꠞ ꠜꠣꠁ ꠢꠤꠡꠣꠛꠦ ꠔꠣꠘ ꠝꠥꠘꠤꠛꠞꠦ ꠄꠟꠣꠝꠤ ꠘꠣ ꠇꠞꠂꠘ ꠛꠞꠋ ꠀꠞꠅ ꠜꠣꠟꠣ ꠇꠞꠤ ꠔꠣꠘ ꠈꠦꠎꠝꠔ ꠇꠞꠂꠘ। ꠇꠣꠞꠘ ꠉꠥꠟꠣꠝꠞ ꠈꠦꠎꠝꠔꠦ ꠎꠦ ꠝꠥꠘꠤꠛꠦ ꠃꠙꠇꠣꠞ ꠙꠣꠁꠞꠣ, ꠔꠣꠁꠘ ꠔ ꠝꠣꠄꠀꠞ ꠁꠝꠣꠘꠖꠣꠞ ꠜꠣꠁ। ꠔꠦ ꠅꠔꠣ ꠛꠦꠙꠣꠞꠦ ꠔꠥꠝꠤ ꠔꠣꠟꠤꠝ ꠀꠞ ꠢꠥꠇꠥꠝ ꠖꠦꠅ।
1TI 6:3 ꠇꠦꠃ ꠎꠥꠖꠤ ꠁꠔꠣ ꠛꠣꠖ ꠖꠤꠀ ꠖꠥꠍꠞꠣ ꠇꠥꠘꠥ ꠔꠣꠟꠤꠝ ꠖꠦꠄ, ꠀꠞ ꠀꠝꠞꠣꠞ ꠝꠣꠟꠤꠇ ꠁꠍꠣ ꠀꠟ-ꠝꠍꠤꠞ ꠈꠣꠐꠤ ꠔꠣꠟꠤꠝ ꠀꠞ ꠀꠟ꠆ꠟꠣꠞ ꠒꠞ-ꠈꠚꠞ ꠔꠣꠟꠤꠝꠞꠦ ꠘꠣ ꠝꠣꠘꠦ,
1TI 6:4 ꠢꠦ ꠔ ꠝꠤꠍꠣ ꠅꠢꠋꠇꠣꠞꠤ, ꠢꠦ ꠇꠥꠘ꠆ꠔꠣꠃ ꠛꠥꠎꠦ ꠘꠣ, ꠝꠔꠜꠦꠖ ꠇꠞꠣ, ꠛꠦꠢꠥꠖꠣ ꠃꠚꠔꠣꠝꠤ ꠇꠞꠣ ꠔꠣꠞ ꠄꠇꠐꠣ ꠛꠦꠝꠣꠞ। ꠅꠔꠣꠞ ꠇꠣꠞꠘꠦ ꠁꠋꠡꠣ-ꠘꠤꠘ꠆ꠖꠣ, ꠇꠣꠁꠎ꠆ꠎꠣ-ꠚꠍꠣꠖ, ꠇꠥ-ꠡꠘ꠆ꠖꠄ ꠙꠄꠖꠣ ꠅꠄ।
1TI 6:5 ꠀꠞ ꠅꠡꠣꠠ ꠛꠤꠛꠦꠇꠀꠟꠣ ꠝꠣꠘꠡꠞ ꠝꠣꠎꠦ ꠢꠣꠝꠦꠡꠣ ꠉꠥꠟꠝꠣꠟ ꠟꠣꠉꠣꠁꠟꠃ ꠕꠣꠇꠦ। ꠁꠔꠣ ꠝꠣꠘꠡꠞ ꠝꠣꠎꠦ ꠀꠟ꠆ꠟꠣꠁ ꠢꠇ ꠘꠣꠁ। ꠔꠣꠞꠣ ꠁꠍꠣꠄꠁ ꠁꠝꠣꠘꠞꠦ ꠖꠥꠘꠤꠀꠛꠤ ꠟꠣꠜꠞ ꠃꠙꠣꠄ ꠝꠘꠅ ꠇꠞꠦ।
1TI 6:6 ꠀꠍꠟꠦ ꠝꠘꠞ ꠔꠥꠡ꠆ꠐꠤꠄ ꠁꠍꠣꠄꠁ ꠁꠝꠣꠘ ꠝꠣꠚꠤꠇ ꠎꠤꠘ꠆ꠖꠦꠉꠤ ꠇꠣꠐꠣꠁꠟꠦ ꠈꠥꠛ ꠛꠦꠡꠤ ꠟꠣꠜ ꠅꠄ।
1TI 6:7 ꠀꠝꠞꠣ ꠖꠥꠘꠤꠀꠔ ꠀꠁꠛꠣꠞ ꠇꠣꠟꠅ ꠔ ꠇꠥꠘ꠆ꠔꠣꠃ ꠟꠉꠦ ꠟꠁꠀ ꠀꠁꠍꠤ ꠘꠣ, ꠀꠞ ꠎꠣꠅꠀꠞ ꠇꠣꠟꠅ-ꠅ ꠇꠥꠘ꠆ꠔꠣ ꠘꠤꠔꠣꠝ ꠙꠣꠞꠔꠣꠝ ꠘꠣꠄ।
1TI 6:8 ꠄꠞꠟꠣꠉꠤ ꠈꠣꠟꠤ ꠈꠣꠘꠤ-ꠇꠣꠙꠠ ꠙꠣꠁꠟꠦꠃ ꠀꠝꠞꠣ ꠈꠥꠡꠤ ꠞꠁꠝꠥ।
1TI 6:9 ꠅꠁꠟꠦ ꠖꠥꠘꠤꠀꠔ ꠎꠦꠞꠣ ꠗꠘꠤ ꠅꠁꠔ ꠌꠣꠄ, ꠔꠣꠞꠣ ꠘꠣꠘꠣꠘ ꠘꠝꠥꠘꠣꠞ ꠙꠞꠤꠇ꠆ꠇꠣꠔ ꠀꠞ ꠚꠣꠘ꠆ꠖꠅ ꠙꠠꠦ, ꠔꠣꠞꠣꠞ ꠝꠘꠅ ꠈꠥꠛ ꠛꠖ ꠈꠣꠁꠡ ꠙꠄꠖꠣ ꠅꠄ, ꠎꠦꠔꠣꠄ ꠔꠣꠞꠣꠞ ꠎꠤꠘ꠆ꠖꠦꠉꠤꠞꠦ ꠡꠞ꠆ꠛꠘꠣꠡꠞ ꠉꠣꠔꠅ ꠚꠣꠟꠣꠄ।
1TI 6:10 ꠇꠣꠞꠘ ꠢꠇꠟ ꠘꠝꠥꠘꠣꠞ ꠛꠖ ꠇꠣꠝꠞ ꠎꠘꠝ ꠅꠁꠟ ꠐꠦꠇꠣ-ꠙꠄꠡꠣꠞ ꠝꠣꠄꠀ। ꠇꠥꠘꠥ ꠇꠥꠘꠥ ꠎꠘ ꠐꠦꠇꠣ-ꠙꠄꠡꠣꠞ ꠟꠣꠟꠌꠦ ꠁꠍꠣꠄꠁ ꠁꠝꠣꠘ ꠕꠣꠇꠤ ꠢꠞꠤꠀ ꠉꠤꠀ, ꠘꠤꠎꠞ ꠃꠙꠞꠦ ꠛꠠ ꠖꠥꠈ-ꠝꠍꠤꠛꠔ ꠒꠣꠇꠤꠀ ꠀꠘꠍꠦ।
1TI 6:11 ꠅꠁꠟꠦ ꠔꠥꠝꠤ ꠔ ꠀꠟ꠆ꠟꠣꠞ ꠛꠘ꠆ꠖꠣ, ꠔꠥꠝꠤ ꠁꠔꠣ ꠛꠖ ꠇꠣꠝ ꠕꠣꠇꠤ ꠢꠞꠤꠀ ꠞꠅ। ꠔꠥꠝꠤ ꠙꠣꠇ-ꠙꠞꠦꠎꠉꠣꠞ ꠎꠤꠘ꠆ꠖꠦꠉꠤ, ꠀꠟ꠆ꠟꠣꠞ ꠒꠞ-ꠈꠚ, ꠁꠝꠣꠘ, ꠝꠢꠛ꠆ꠛꠔ, ꠍꠛꠞ, ꠀꠞ ꠘꠞꠝ ꠡ꠆ꠛꠜꠣꠛꠞ ꠛꠣꠄ ꠈꠤꠀꠟꠤ ꠅꠅ।
1TI 6:12 ꠁꠝꠣꠘꠤ ꠟꠣꠠꠣꠁ ꠇꠞꠣꠔ ꠞꠅ। ꠀꠈꠦꠞꠣꠔꠞ ꠎꠦ ꠎꠤꠘ꠆ꠖꠦꠉꠤꠞ ꠟꠣꠉꠤ ꠀꠟ꠆ꠟꠣ ꠙꠣꠇꠦ ꠔꠥꠝꠣꠞꠦ ꠖꠣꠅꠔ ꠖꠤꠍꠂꠘ, ꠢꠃ ꠎꠤꠘ꠆ꠖꠦꠉꠤꠞꠦ ꠔꠥꠝꠤ ꠝꠎꠛꠥꠔ ꠇꠞꠤ ꠗꠞꠅ। ꠔꠥꠝꠤ ꠔ ꠁꠝꠣꠘꠤ ꠡꠣꠇ꠆ꠇꠤ ꠖꠤꠍꠟꠣꠄ ꠛꠃꠔ ꠝꠣꠘꠡꠞ ꠍꠣꠝꠘꠦ।
1TI 6:13 ꠅꠈꠘ ꠀꠟ꠆ꠟꠣ ꠙꠣꠇꠞ ꠘꠣꠝꠦ, ꠎꠦꠁꠘ ꠢꠇ꠆ꠇꠟꠔꠣꠞ ꠎꠣꠘ ꠖꠦꠁꠘ, ꠀꠞ ꠎꠦꠁꠘ ꠢꠣꠇꠤꠝ ꠙꠘ꠆ꠔꠤꠅ ꠙꠤꠟꠣꠔꠞ ꠍꠣꠝꠘꠦ ꠘꠤꠎꠞ ꠛꠦꠙꠣꠞꠦ ꠢꠇ ꠡꠣꠇ꠆ꠇꠤ ꠖꠤꠍꠟꠣ, ꠢꠃ ꠁꠍꠣ ꠀꠟ-ꠝꠍꠤꠞ ꠘꠣꠝꠦꠅ ꠔꠥꠝꠣꠞꠦ ꠅꠃ ꠝꠤꠘꠔꠤ ꠇꠞꠞꠣꠝ,
1TI 6:14 ꠀꠝꠞꠣꠞ ꠝꠣꠟꠤꠇ ꠁꠍꠣ ꠀꠟ-ꠝꠍꠤ ꠎꠣꠁꠞ ꠅꠀꠞ ꠀꠉ ꠙꠞ꠆ꠎꠘ꠆ꠔ ꠔꠥꠝꠤ ꠙꠥꠞꠣꠙꠥꠞ ꠘꠤꠈꠥꠔ ꠀꠞ ꠛꠖꠘꠣꠝ ꠍꠣꠠꠣ ꠞꠁꠀ ꠢꠥꠇꠥꠝ ꠀꠖꠣꠄ ꠇꠞꠅ।
1TI 6:15 ꠀꠞ ꠉꠥꠘꠉꠣꠘꠦ ꠗꠘꠤ ꠢꠃ ꠀꠟ꠆ꠟꠣ, ꠎꠦꠁꠘ ꠄꠇꠝꠣꠔ꠆ꠞ ꠡꠝ꠆ꠞꠣꠐ, ꠛꠣꠖꠡꠣ ꠅꠇꠟꠞ ꠛꠣꠖꠡꠣ ꠀꠞ ꠝꠣꠟꠤꠇ ꠅꠇꠟꠞ ꠝꠣꠟꠤꠇ, ꠔꠣꠁꠘꠃ ꠔꠣꠘ ꠃꠙꠎꠥꠇ꠆ꠔ ꠡꠝꠄꠄ ꠀꠟ-ꠝꠍꠤꠞꠦ ꠎꠣꠁꠞ ꠇꠞꠛꠣ।
1TI 6:16 ꠈꠣꠟꠤ ꠀꠟ꠆ꠟꠣ ꠙꠣꠇꠞꠦꠃ ꠝꠃꠔꠦ ꠇꠛꠎꠣ ꠇꠞꠔ ꠙꠣꠞꠦ ꠘꠣ। ꠔꠣꠁꠘ ꠅꠟꠣ ꠄꠇ ꠘꠥꠞꠞ ꠚꠞꠅ ꠛꠡꠔ ꠇꠞꠂꠘ, ꠢꠤꠘꠅ ꠇꠥꠘꠥ ꠀꠖꠝ ꠎꠣꠔ ꠎꠣꠁꠔ ꠙꠣꠞꠦ ꠘꠣ। ꠇꠥꠘꠥ ꠀꠖꠝꠦ ꠇꠥꠘꠥꠖꠤꠘ ꠔꠣꠘꠞꠦ ꠖꠦꠈꠍꠦꠅ ꠘꠣ, ꠖꠦꠈꠣꠞ ꠔꠣꠇ꠆ꠇꠔꠅ ꠘꠣꠁ। ꠁꠎ꠆ꠎꠔ ꠀꠞ ꠈꠦꠝꠔꠣ ꠌꠤꠞꠇꠣꠟ ꠈꠣꠟꠤ ꠔꠣꠘꠃ। ꠀꠝꠤꠘ।
1TI 6:17 ꠢꠥꠘꠅ, ꠅꠃ ꠖꠥꠘꠤꠀꠞ ꠗꠘꠤ ꠅꠇꠟꠞꠦ ꠢꠥꠇꠥꠝ ꠖꠦꠅ, ꠔꠣꠞꠣ ꠎꠣꠘꠥ ꠛꠠꠣꠁ ꠘꠣ ꠇꠞꠂꠘ, ꠀꠞ ꠖꠥꠘꠤꠀꠛꠤ ꠅꠡ꠆ꠕꠣꠄꠁ ꠗꠘꠞ ꠃꠙꠞꠦ ꠜꠞꠡꠣ ꠘꠣ ꠇꠞꠤꠀ, ꠀꠟ꠆ꠟꠣꠞ ꠃꠙꠞꠦ ꠜꠞꠡꠣ ꠇꠞꠂꠘ। ꠀꠝꠞꠣꠞ ꠜꠣꠟꠣꠁꠞ ꠟꠣꠉꠤ ꠔꠣꠁꠘꠃ ꠢꠇꠟꠔꠣ ꠈꠥꠟꠣ ꠀꠔꠦ ꠖꠣꠘ ꠇꠞꠂꠘ।
1TI 6:18 ꠀꠞ ꠔꠣꠞꠣꠞꠦ ꠇꠅ, ꠔꠣꠞꠣ ꠎꠣꠘꠥ ꠅꠁꠘ꠆ꠘꠞ ꠜꠣꠟꠣꠁ ꠇꠞꠦ, ꠘꠦꠇ ꠇꠣꠝ ꠇꠞꠣꠔ ꠞꠄ, ꠝꠘ ꠈꠥꠟꠤꠀ ꠖꠣꠘ-ꠈꠄꠞꠣꠔ ꠇꠞꠦ, ꠀꠞ ꠔꠣꠞꠣꠞ ꠗꠘ-ꠖꠃꠟꠔꠞ ꠛꠣꠐ ꠅꠁꠘ꠆ꠘ ꠝꠣꠘꠡꠞꠦ ꠖꠦꠄ।
1TI 6:19 ꠔꠦꠃ ꠔꠣꠞꠣ ꠘꠤꠎꠞ ꠟꠣꠉꠤ ꠄꠝꠘ ꠗꠘ ꠎꠝꠣ ꠇꠞꠛ, ꠎꠦꠔꠣ ꠜꠛꠤꠡꠔꠦ ꠔꠣꠞꠣꠞ ꠟꠣꠉꠤ ꠄꠇꠈꠣꠘ ꠝꠎꠛꠥꠔ ꠜꠤꠔꠞ ꠟꠣꠈꠣꠘ ꠅꠁꠛ। ꠄꠔꠦ ꠢꠣꠍꠣꠞꠞ ꠎꠤꠘ꠆ꠖꠦꠉꠤꠞꠦ ꠔꠣꠞꠣ ꠡꠇ꠆ꠔ ꠇꠞꠤ ꠗꠞꠤꠀ ꠞꠣꠈꠔ ꠙꠣꠞꠛ।
1TI 6:20 ꠅ ꠔꠤꠝꠕꠤ, ꠔꠥꠝꠣꠞ ꠎꠤꠝ꠆ꠝꠣꠄ ꠎꠦ ꠡꠝ꠆ꠙꠖ ꠖꠦꠅꠀ ꠅꠁꠍꠦ, ꠁ ꠡꠝ꠆ꠙꠖ ꠔꠥꠝꠤ ꠜꠣꠟꠣꠝꠘ꠆ꠔꠦ ꠢꠦꠚꠣꠎꠔ ꠇꠞꠅ। ꠀꠎꠦ-ꠛꠣꠎꠦ ꠀꠈꠟꠞ ꠛꠦꠇꠣꠝꠣ ꠛꠤꠖ꠆ꠖꠣꠞ ꠛꠥꠟꠤꠞ ꠖꠥ-ꠘꠍꠟꠣ ꠔꠣꠟꠤꠝ ꠕꠣꠇꠤ ꠢꠞꠤꠀ ꠞꠅ।
1TI 6:21 ꠇꠥꠘꠥ ꠇꠥꠘꠥ ꠎꠘ ꠅꠔꠣ ꠛꠦꠇꠣꠝꠣ ꠀꠈꠟ ꠖꠦꠈꠣꠘꠤꠔ ꠉꠤꠀ, ꠀꠍꠟ ꠁꠝꠣꠘ ꠕꠣꠇꠤ ꠛꠦ-ꠙꠕꠦ ꠉꠦꠍꠦꠉꠤ। ꠀꠟ꠆ꠟꠣ ꠙꠣꠇꠦ ꠔꠥꠝꠞꠣꠞꠦ ꠞꠢꠝꠔ ꠖꠣꠘ ꠇꠞꠃꠇ꠆ꠇꠣ। ꠀꠝꠤꠘ॥
2TI 1:1 ꠀꠝꠤ ꠙꠣꠃꠟꠥꠍ ꠔ ꠀꠟ꠆ꠟꠣ ꠙꠣꠇꠞ ꠝꠞ꠆ꠎꠤꠄ ꠢꠎꠞꠔ ꠁꠍꠣ ꠀꠟ-ꠝꠍꠤꠞ ꠍꠣꠢꠣꠛꠤ। ꠀꠟ-ꠝꠍꠤꠞ ꠃꠍꠤꠟ꠆ꠟꠣꠄ ꠀꠟ꠆ꠟꠣꠞ ꠅꠀꠖꠣ ꠇꠞꠣ ꠀꠈꠦꠞꠤ ꠎꠤꠘ꠆ꠖꠦꠉꠤꠞ ꠇꠕꠣ ꠔꠛꠟꠤꠉꠞ ꠟꠣꠉꠤ ꠍꠣꠢꠣꠛꠤ ꠙꠖ ꠙꠣꠁꠍꠤ।
2TI 1:2 ꠀꠝꠤ ꠀꠝꠣꠞ ꠝꠣꠄꠀꠞ ꠀꠅꠟꠣꠖ ꠔꠤꠝꠕꠤꠞ ꠉꠦꠍꠦ ꠟꠦꠈꠞꠣꠝ। ꠉꠣꠁꠛꠤ ꠛꠣꠚ ꠀꠟ꠆ꠟꠣꠄ ꠀꠞ ꠀꠝꠞꠣꠞ ꠝꠣꠟꠤꠇ ꠁꠍꠣ ꠀꠟ-ꠝꠍꠤꠄ ꠔꠥꠝꠣꠞꠦ ꠞꠢꠝꠔ, ꠝꠦꠢꠦꠞꠛꠣꠘꠤ ꠀꠞ ꠡꠣꠘ꠆ꠔꠤ ꠖꠣꠘ ꠇꠞꠃꠇ꠆ꠇꠣ।
2TI 1:3 ꠅ ꠔꠤꠝꠕꠤ, ꠢꠥꠘꠅ, ꠀꠝꠣꠞ ꠝꠄ-ꠝꠥꠞꠛ꠆ꠛꠤꠄ ꠎꠦꠟꠣ ꠄꠇ ꠀꠟ꠆ꠟꠣꠞ ꠄꠛꠣꠖꠔ ꠇꠞꠔꠣ, ꠀꠝꠤꠅ ꠅꠃꠟꠣ ꠙꠞꠤꠡ꠆ꠇꠣꠞ ꠛꠤꠛꠦꠇꠦ ꠀꠟ꠆ꠟꠣꠞ ꠄꠛꠣꠖꠔ ꠇꠞꠤ। ꠀꠝꠤ ꠖꠥꠀ ꠇꠞꠣꠞ ꠛꠣꠟꠣ ꠖꠤꠘꠦ-ꠞꠣꠁꠔꠦ ꠢꠣꠝꠦꠡꠣ ꠔꠥꠝꠣꠞ ꠟꠣꠉꠤ ꠀꠟ꠆ꠟꠣꠞ ꠡꠥꠇꠞꠤꠀ ꠀꠖꠣꠄ ꠇꠞꠤ।
2TI 1:4 ꠔꠥꠝꠣꠞ ꠢꠃ ꠇꠣꠘ꠆ꠖꠘꠞ ꠇꠕꠣ ꠝꠘꠅ ꠇꠞꠤꠀ ꠔꠥꠝꠣꠞꠦ ꠖꠦꠈꠣꠞ ꠟꠣꠉꠤ ꠝꠘꠦ ꠈꠥꠛ ꠐꠣꠘꠦꠞ, ꠔꠥꠝꠣꠞꠦ ꠖꠦꠈꠟꠦ ꠀꠝꠣꠞ ꠜꠤꠔꠞ ꠈꠥꠡꠤꠄ ꠜꠞꠤꠎꠤꠛ।
2TI 1:5 ꠀꠝꠣꠞ ꠝꠘꠅ ꠀꠍꠦ, ꠔꠥꠝꠣꠞ ꠖꠤꠟꠈꠣꠘ ꠢꠇ ꠁꠝꠣꠘꠦ ꠜꠞꠣ, ꠔꠥꠝꠣꠞ ꠘꠣꠘꠤ ꠟꠥꠁꠍ ꠀꠞ ꠔꠥꠝꠣꠞ ꠀꠝ꠆ꠝꠣ ꠃꠘꠤꠇꠤꠞ ꠜꠤꠔꠞꠦꠅ ꠅꠟꠣ ꠢꠇ ꠁꠝꠣꠘ ꠀꠍꠤꠟ। ꠀꠝꠤ ꠘꠤꠌ꠆ꠌꠤꠔ ꠎꠣꠘꠤ, ꠔꠥꠝꠣꠞ ꠜꠤꠔꠞꠦꠅ ꠅꠟꠣ ꠁꠝꠣꠘ ꠀꠍꠦ।
2TI 1:6 ꠄꠞꠟꠣꠉꠤ ꠅꠈꠘ ꠔꠥꠝꠣꠞꠦ ꠝꠘꠅ ꠇꠞꠣꠁ ꠖꠤꠞꠣꠝ, ꠀꠝꠤ ꠔꠥꠝꠣꠞ ꠡꠞꠤꠟꠅ ꠀꠔ ꠞꠣꠈꠤꠀ ꠈꠦꠟꠣꠚꠔꠤ ꠖꠦꠅꠀꠄ, ꠀꠟ꠆ꠟꠣꠄ ꠔꠥꠝꠣꠞꠦ ꠎꠦ ꠈꠣꠍ ꠘꠤꠀꠝꠔ ꠖꠣꠘ ꠇꠞꠍꠂꠘ, ꠁ ꠀꠉꠥꠁꠘ ꠎꠣꠟꠣꠁꠀ ꠔꠥꠟꠅ।
2TI 1:7 ꠀꠟ꠆ꠟꠣꠄ ꠔ ꠀꠝꠞꠣꠞꠦ ꠜꠤꠔꠥ-ꠒꠞꠣꠟꠥꠇꠞ ꠝꠘꠜꠣꠛ ꠖꠤꠍꠂꠘ ꠘꠣ। ꠛꠞꠋ ꠛꠟ-ꠡꠇ꠆ꠔꠤ, ꠝꠣꠄꠀ-ꠝꠢꠛ꠆ꠛꠔ ꠀꠞ ꠘꠤꠎꠞꠦ ꠡꠣꠝꠟꠣꠘꠤꠞ ꠈꠦꠝꠔꠣ ꠖꠣꠘ ꠇꠞꠍꠂꠘ।
2TI 1:8 ꠄꠞꠟꠣꠉꠤ ꠀꠝꠞꠣꠞ ꠝꠣꠟꠤꠇ ꠁꠍꠣꠞ ꠛꠦꠙꠣꠞꠦ ꠡꠣꠇ꠆ꠇꠤ ꠖꠤꠔꠦ ꠡꠞꠝꠣꠁꠅ ꠘꠣ, ꠀꠞ ꠔꠣꠘ ꠘꠣꠝꠞ ꠟꠣꠉꠤ ꠀꠝꠤ ꠎꠦꠘ ꠎꠦꠟꠅ ꠛꠘ꠆ꠖꠤ ꠀꠍꠤ, ꠀꠝꠣꠞꠦ ꠟꠁꠀꠅ ꠡꠞꠝꠣꠁꠅ ꠘꠣ। ꠛꠞꠋ ꠀꠟ꠆ꠟꠣꠞ ꠖꠦꠅꠀ ꠛꠟꠦ ꠈꠥꠡ-ꠈꠛꠞꠤ ꠔꠛꠟꠤꠉꠞ ꠇꠣꠝꠅ ꠀꠝꠣꠞ ꠟꠉꠦ ꠞꠁꠀ ꠖꠥꠈ-ꠇꠡ꠆ꠐ ꠡꠁꠎ꠆ꠎ ꠇꠞꠅ।
2TI 1:9 ꠀꠟ꠆ꠟꠣꠄ ꠀꠝꠞꠣꠞ ꠎꠣꠘ ꠛꠣꠌꠣꠁꠍꠂꠘ, ꠀꠞ ꠙꠣꠇ-ꠙꠛꠤꠔ꠆ꠞ ꠅꠁꠀ ꠎꠤꠘ꠆ꠖꠦꠉꠤ ꠇꠣꠐꠣꠘꠤꠞ ꠟꠣꠉꠤ ꠖꠣꠅꠔ ꠖꠤꠍꠂꠘ। ꠁꠔꠣ ꠔ ꠀꠝꠞꠣꠞ ꠇꠥꠘꠥ ꠘꠦꠇ ꠇꠣꠝꠞ ꠉꠥꠘꠦ ꠘꠣꠄ, ꠛꠞꠋ ꠔꠣꠘ ꠝꠞ꠆ꠎꠤ ꠀꠞ ꠞꠢꠝꠔꠞ ꠉꠥꠘꠦꠃ ꠇꠞꠍꠂꠘ। ꠀꠝꠞꠣꠞꠦ ꠁ ꠞꠢꠝꠔ ꠖꠣꠘ ꠇꠞꠍꠂꠘ ꠔ, ꠖꠥꠘꠤꠀ ꠙꠄꠖꠣ ꠇꠞꠣꠞ ꠀꠉꠦ ꠢꠎꠞꠔ ꠁꠍꠣ ꠀꠟ-ꠝꠍꠤꠞ ꠃꠍꠤꠟ꠆ꠟꠣꠄ।
2TI 1:10 ꠀꠞ ꠀꠟ꠆ꠟꠣꠄ ꠅꠈꠘ ꠅꠃ ꠞꠢꠝꠔ ꠎꠣꠁꠞ ꠇꠞꠍꠂꠘ, ꠀꠝꠞꠣꠞ ꠔꠞꠣꠘꠦꠀꠟꠣ ꠁꠍꠣ ꠀꠟ-ꠝꠍꠤꠄ ꠖꠥꠘꠤꠀꠔ ꠔꠡꠞꠤꠚ ꠀꠘꠣꠞ ꠝꠣꠎꠖꠤ। ꠀꠟ-ꠝꠍꠤꠄ ꠔ ꠝꠃꠔꠞ ꠈꠦꠝꠔꠣꠞꠦ ꠌꠥꠞꠝꠣꠞ ꠇꠞꠍꠂꠘ, ꠔꠣꠘ ꠈꠥꠡ-ꠈꠛꠞꠤꠞ ꠝꠣꠎꠖꠤ ꠌꠤꠞꠇꠣꠟꠤꠘ ꠘꠥꠞꠣꠘꠤ ꠎꠤꠘ꠆ꠖꠦꠉꠤꠞ ꠙꠕ ꠈꠥꠟꠣ-ꠝꠦꠟꠣ ꠇꠞꠍꠂꠘ।
2TI 1:11 ꠅꠃ ꠈꠥꠡ-ꠈꠛꠞꠤ ꠔꠛꠟꠤꠉꠞ ꠟꠣꠉꠤꠃ ꠔ ꠀꠝꠣꠞꠦ ꠔꠛꠟꠤꠉꠇꠣꠞꠤ, ꠍꠣꠢꠣꠛꠤ ꠀꠞ ꠃꠡ꠆ꠔꠣꠖ ꠢꠤꠡꠣꠛꠦ ꠛꠅꠀꠁꠟ ꠇꠞꠣ ꠅꠁꠍꠦ।
2TI 1:12 ꠄꠞꠟꠣꠉꠤꠃ ꠀꠝꠤ ꠅꠟꠣ ꠖꠥꠈ-ꠇꠡ꠆ꠐ ꠙꠣꠁꠀꠞ, ꠔꠣ-ꠅ ꠀꠝꠤ ꠡꠞꠝꠤꠘ꠆ꠖꠣ ꠘꠣꠄ। ꠇꠣꠞꠘ ꠀꠝꠤ ꠎꠣꠘꠤ, ꠀꠝꠤ ꠇꠣꠞ ꠃꠙꠞꠦ ꠜꠞꠡꠣ ꠇꠞꠍꠤ। ꠀꠝꠣꠞ ꠙꠥꠞꠣꠙꠥꠞ ꠄꠇꠤꠘ ꠀꠍꠦ, ꠀꠝꠤ ꠔꠣꠘ ꠖꠞꠛꠣꠞꠅ ꠎꠦꠔꠣ ꠎꠝꠣ ꠇꠞꠍꠤ, ꠁꠔꠣꠞꠦ ꠢꠦꠚꠣꠎꠔꠦ ꠞꠣꠈꠣꠞ ꠈꠦꠝꠔꠣ ꠔꠣꠘ ꠀꠍꠦ, ꠀꠟ-ꠝꠍꠤꠄ ꠖꠥꠍꠞꠣꠛꠣꠞ ꠔꠡꠞꠤꠚ ꠀꠘꠣꠞ ꠖꠤꠘ ꠙꠞ꠆ꠎꠘ꠆ꠔ ꠁꠔꠣ ꠞꠁꠛ।
2TI 1:13 ꠔꠦ ꠔꠥꠝꠤ ꠀꠝꠣꠞ ꠝꠥꠈ ꠕꠣꠇꠤ ꠎꠔ ꠔꠣꠟꠤꠝ ꠢꠥꠘꠍ, ꠅꠃ ꠢꠇ ꠔꠣꠟꠤꠝꠞꠦ ꠎꠣꠘꠞ ꠇꠛꠎ ꠝꠘꠅ ꠇꠞꠤꠀ, ꠀꠟ-ꠝꠍꠤꠞ ꠃꠙꠞꠞ ꠁꠝꠣꠘ ꠀꠞ ꠝꠢꠛ꠆ꠛꠔꠦ ꠗꠞꠤꠀ ꠞꠣꠈꠅ।
2TI 1:14 ꠀꠟ꠆ꠟꠣꠄ ꠎꠦ ꠍꠣꠝꠣꠘꠣ ꠢꠦꠚꠣꠎꠔꠦ ꠞꠣꠈꠣꠞ ꠟꠣꠉꠤ ꠔꠥꠝꠣꠞ ꠎꠤꠝ꠆ꠝꠣꠄ ꠖꠤꠍꠂꠘ, ꠀꠝꠞꠣꠞ ꠖꠤꠟꠞ ꠝꠣꠎꠞ ꠀꠟ꠆ꠟꠣꠁ ꠙꠣꠇ ꠞꠥꠢꠥꠞ ꠛꠟꠦ ꠔꠥꠝꠤ ꠁꠔꠣꠞ ꠢꠦꠚꠣꠎꠔ ꠇꠞꠅ।
2TI 1:15 ꠔꠥꠝꠤ ꠔ ꠎꠣꠘ, ꠔꠥꠞꠡ꠆ꠇꠞ ꠀꠍꠤꠀ ꠄꠟꠣꠇꠣꠞ ꠢꠇꠟ ꠝꠣꠘꠥꠡ ꠀꠝꠣꠞ ꠉꠦꠍ ꠕꠣꠇꠤ ꠀꠟꠉꠤ ꠉꠦꠍꠂꠘ, ꠚꠥꠉꠤꠟꠣꠍ ꠀꠞ ꠢꠣꠝꠣꠉꠤꠘꠣꠍꠅ ꠔꠣꠞꠣꠞ ꠟꠉꠦ ꠉꠦꠍꠂꠘꠉꠤ।
2TI 1:16 ꠜꠣꠁ ꠀꠘꠤꠍꠞ ꠙꠞꠤꠛꠣꠞꠞ ꠃꠙꠞꠦ ꠝꠣꠟꠤꠇ ꠁꠍꠣꠄ ꠞꠢꠝ-ꠛꠞꠇꠔ ꠖꠦꠃꠇ꠆ꠇꠣ। ꠄꠁꠘ ꠛꠃꠔ ꠛꠣꠞ ꠀꠝꠣꠞ ꠎꠣꠘꠅ ꠀꠞꠣꠝ ꠖꠤꠍꠂꠘ, ꠀꠝꠤ ꠎꠦꠟꠅ ꠢꠣꠝꠣꠁꠟꠦꠅ ꠔꠣꠁꠘ ꠇꠥꠘꠥ ꠡꠞꠝ ꠝꠘꠅ ꠇꠞꠍꠂꠘ ꠘꠣ।
2TI 1:17 ꠔꠣꠁꠘ ꠅꠃ ꠞꠥꠝ ꠐꠣꠃꠘꠅ ꠀꠁꠀ ꠛꠃꠔ ꠔꠣꠟ꠆ꠟꠣꠡ ꠇꠞꠤ ꠀꠝꠣꠞꠦ ꠛꠣꠞ ꠇꠞꠍꠂꠘ।
2TI 1:18 ꠀꠝꠤ ꠁꠚꠤꠍ ꠐꠣꠃꠘꠅ ꠕꠣꠇꠔꠦ ꠔꠣꠁꠘ ꠇꠤꠟꠣ ꠀꠝꠣꠞ ꠈꠦꠎꠝꠔ ꠇꠞꠍꠟꠣ, ꠁꠔꠣ ꠔ ꠔꠥꠝꠤ ꠜꠣꠟꠣꠝꠘ꠆ꠔꠦꠃ ꠎꠣꠘ। ꠝꠣꠟꠤꠇ ꠁꠍꠣꠄ ꠅꠟꠣ ꠇꠞꠃꠇ꠆ꠇꠣ, ꠎꠣꠔꠦ ꠔꠣꠘ ꠔꠡꠞꠤꠚ ꠀꠘꠣꠞ ꠖꠤꠘ ꠄꠁꠘ ꠝꠦꠢꠦꠞꠛꠣꠘꠤ ꠙꠣꠁꠘ।
2TI 2:1 ꠅ ꠀꠝꠣꠞ ꠀꠅꠟꠣꠖ ꠔꠤꠝꠕꠤ, ꠁꠍꠣ ꠀꠟ-ꠝꠍꠤꠞ ꠃꠍꠤꠟ꠆ꠟꠣꠄ ꠙꠣꠅꠀ ꠞꠢꠝꠔꠦ ꠔꠥꠝꠤ ꠛꠟꠛꠣꠘ ꠅꠅ।
2TI 2:2 ꠀꠞ ꠛꠃꠔ ꠡꠣꠇ꠆ꠇꠤꠞ ꠍꠣꠝꠘꠦ ꠀꠝꠣꠞ ꠝꠥꠈꠞ ꠎꠦꠔꠣ ꠔꠣꠟꠤꠝ ꠢꠥꠘꠍ, ꠅꠃ ꠔꠣꠟꠤꠝꠞꠦ ꠅꠟꠣꠈꠣꠘ ꠢꠇ-ꠢꠣꠟꠣꠟ ꠝꠣꠘꠡꠞ ꠀꠔꠅ ꠖꠦꠅ, ꠎꠦꠞꠣ ꠅꠁꠘ꠆ꠘ ꠝꠣꠘꠡꠞꠦꠅ ꠔꠣꠟꠤꠝ ꠖꠦꠅꠀꠞ ꠃꠙꠎꠥꠇ꠆ꠔ।
2TI 2:3 ꠔꠥꠝꠤ ꠁꠍꠣ ꠀꠟ-ꠝꠍꠤꠞ ꠈꠣꠐꠤ ꠍꠤꠙꠣꠁ ꠅꠁꠀ ꠖꠥꠈ-ꠇꠡ꠆ꠐꠔ ꠡꠞꠤꠇ ꠅꠅ।
2TI 2:4 ꠇꠣꠝꠣꠘ꠆ꠒꠣꠞꠞꠦ ꠈꠥꠡꠤ ꠞꠣꠈꠣꠞ ꠟꠣꠉꠤ ꠎꠥꠖ꠆ꠖꠞ ꠇꠣꠟꠅ ꠇꠥꠘꠥ ꠍꠤꠙꠣꠁ ꠡꠋꠡꠣꠞꠞ ꠝꠣꠄꠀ-ꠎꠣꠟꠅ ꠢꠣꠝꠣꠄ ꠘꠣ।
2TI 2:5 ꠅꠃ ꠟꠣꠈꠣꠘ ꠈꠦꠟꠣꠔ ꠟꠣꠉꠤꠀ ꠇꠦꠃ ꠎꠥꠖꠤ ꠘꠤꠅꠝ ꠝꠔ ꠘꠣ ꠈꠦꠟꠣꠄ, ꠔꠦ ꠎꠄꠅꠞ ꠝꠣꠟꠣ ꠢꠦ ꠙꠣꠄ ꠘꠣ।
2TI 2:6 ꠀꠞ ꠎꠦ ꠉꠤꠞꠡ꠆ꠔꠦ ꠝꠦꠘꠔ ꠇꠞꠦ, ꠚꠡꠟꠞ ꠙꠄꠟꠣ ꠛꠣꠐ ꠔ ꠢꠦ-ꠃ ꠙꠣꠄ, ꠁꠐꠣꠃ ꠘꠤꠅꠝ।
2TI 2:7 ꠔꠦ ꠀꠝꠤ ꠎꠦꠔꠣ ꠛꠥꠎꠣꠁꠔꠣꠝ ꠌꠣꠁꠞꠣꠝ, ꠁꠔꠣ ꠌꠤꠘ꠆ꠔꠣ ꠇꠞꠤ ꠖꠦꠈꠅ, ꠝꠣꠟꠤꠇ ꠁꠍꠣꠄ ꠔꠥꠝꠣꠞꠦ ꠁꠔꠣ ꠢꠇꠟꠔꠣ ꠛꠥꠎꠣꠞ ꠀꠈꠟ ꠖꠤꠛꠣ।
2TI 2:8 ꠁꠍꠣ ꠀꠟ-ꠝꠍꠤꠞ ꠛꠦꠙꠣꠞꠦ ꠔꠥꠝꠤ ꠅꠈꠣꠘ ꠝꠘꠅ ꠞꠣꠈꠤꠅ, ꠔꠣꠘꠞꠦ ꠝꠥꠞ꠆ꠖꠣ ꠕꠣꠇꠤ ꠎꠤꠘ꠆ꠖꠣ ꠇꠞꠣ ꠅꠁꠍꠤꠟ, ꠔꠣꠁꠘ ꠅꠁꠟꠣ ꠛꠣꠖꠡꠣ ꠖꠣꠃꠖ ꠘꠛꠤꠞ ꠛꠋꠡꠗꠞ, ꠀꠝꠣꠞ ꠇꠅꠀ ꠈꠥꠡ-ꠈꠛꠞꠤꠞ ꠝꠣꠎꠦꠅ ꠁꠈꠣꠘ ꠀꠍꠦ।
2TI 2:9 ꠀꠞ ꠅꠃ ꠈꠥꠡ-ꠈꠛꠞꠤ ꠔꠛꠟꠤꠉ ꠇꠞꠣꠄꠃ ꠀꠝꠤ ꠖꠥꠈ-ꠇꠡ꠆ꠐ ꠙꠣꠁꠀꠞ। ꠖꠣꠉꠤ ꠀꠡꠣꠝꠤꠞ ꠟꠣꠈꠣꠘ ꠀꠝꠣꠞꠦ ꠛꠘ꠆ꠖꠤ ꠞꠣꠈꠣ ꠅꠁꠍꠦ, ꠅꠁꠟꠦ ꠀꠟ꠆ꠟꠣꠞ ꠇꠣꠟꠣꠝ ꠔ ꠛꠘ꠆ꠖꠤ ꠅꠁꠍꠦ ꠘꠣ।
2TI 2:10 ꠀꠟ꠆ꠟꠣꠄ ꠎꠦꠞꠣꠞꠦ ꠙꠍꠘ꠆ꠖ ꠇꠞꠤꠀ ꠀꠟꠉ ꠇꠞꠍꠂꠘ, ꠔꠣꠞꠣꠞ ꠟꠣꠉꠤ ꠀꠝꠤ ꠢꠇ꠆ꠇꠟꠔꠣ ꠡꠁꠎ꠆ꠎ ꠇꠞꠤꠀꠞ, ꠎꠣꠔꠦ ꠀꠟ-ꠝꠍꠤꠞ ꠃꠍꠤꠟ꠆ꠟꠣꠄ ꠔꠣꠞꠣ ꠘꠣꠎꠣꠔ ꠙꠣꠁꠘ, ꠟꠉꠦ ꠌꠤꠞꠇꠣꠟꠤꠘ ꠉꠃꠞꠛ-ꠝꠢꠤꠝꠣꠅ ꠙꠣꠁꠘ।
2TI 2:11 ꠅꠃ ꠇꠕꠣ ꠔ ꠄꠇꠤꠘ ꠇꠞꠣꠞ ꠎꠁꠉ꠆ꠉ, ꠀꠟ-ꠝꠍꠤꠞ ꠟꠉꠦ ꠎꠦꠛꠟꠣ ꠀꠝꠞꠣꠞ ꠝꠞꠘ ꠅꠁꠍꠦ, ꠔꠦ ꠀꠝꠞꠣ ꠎꠤꠘ꠆ꠖꠣꠅ ꠅꠁꠝꠥ ꠔꠣꠘ ꠟꠉꠦ।
2TI 2:12 ꠀꠝꠞꠣ ꠍꠛꠞ ꠇꠞꠤꠀ ꠡꠁꠎ꠆ꠎ ꠇꠞꠟꠦ, ꠔꠣꠘ ꠟꠉꠦ ꠛꠣꠖꠡꠣꠁ ꠇꠞꠝꠥ। ꠀꠞ ꠔꠣꠘꠞꠦ ꠅꠡ꠆ꠛꠤꠇꠣꠞ ꠇꠞꠟꠦ ꠔ, ꠔꠣꠁꠘꠅ ꠀꠝꠞꠣꠞꠦ ꠅꠡ꠆ꠛꠤꠇꠣꠞ ꠇꠞꠛꠣ।
2TI 2:13 ꠀꠝꠞꠣ ꠛꠦꠁꠝꠣꠘ ꠅꠁꠉꠦꠟꠦꠅ, ꠔꠣꠁꠘ ꠢꠣꠝꠦꠡꠣ ꠢꠇ-ꠢꠣꠟꠣꠟꠤ ꠞꠂꠘ। ꠔꠣꠁꠘ ꠇꠥꠘꠥꠝꠘ꠆ꠔꠦꠃ ꠘꠤꠎꠞꠦ ꠅꠡ꠆ꠛꠤꠇꠣꠞ ꠇꠞꠔꠣ ꠙꠣꠞꠂꠘ ꠘꠣ।
2TI 2:14 ꠅ ꠔꠤꠝꠕꠤ, ꠔꠥꠝꠤ ꠝꠥꠝꠤꠘ ꠅꠇꠟꠞꠦ ꠀꠝꠣꠞ ꠅꠃ ꠔꠣꠟꠤꠝꠈꠣꠘ ꠝꠘꠅ ꠇꠞꠣꠁ ꠖꠦꠅ। ꠀꠟ꠆ꠟꠣꠞ ꠍꠣꠝꠘꠦ ꠔꠣꠞꠣꠞꠦ ꠢꠥꠡꠤꠀꠞ ꠇꠞꠅ, ꠎꠣꠔꠦ ꠀꠎꠦ-ꠛꠣꠎꠦ ꠝꠣꠔ ꠟꠁꠀ ꠔꠞ꠆ꠇꠣ-ꠔꠞ꠆ꠇꠤ ꠘꠣ ꠇꠞꠂꠘ, ꠁꠔꠣ ꠝꠣꠔꠞ ꠔ ꠇꠥꠘꠥ ꠖꠣꠝ ꠘꠣꠁ, ꠁꠔꠣ ꠎꠦꠞꠣ ꠢꠥꠘꠦ, ꠔꠣꠞꠣꠞ ꠡꠞ꠆ꠛꠘꠣꠡ ꠅꠄ।
2TI 2:15 ꠔꠥꠝꠤ ꠀꠟ꠆ꠟꠣꠞ ꠈꠥꠡꠤ ꠝꠣꠚꠤꠇ ꠘꠤꠎꠞꠦ ꠙꠞꠦꠎꠉꠣꠞ ꠢꠣꠟꠔꠦ ꠔꠣꠘ ꠍꠣꠝꠘꠦ ꠀꠎꠤꠞ ꠇꠞꠅ, ꠅꠃ ꠟꠣꠈꠣꠘ ꠇꠣꠝꠟꠣ ꠛꠘꠅ, ꠎꠦ ꠇꠣꠝꠟꠣꠄ ꠀꠟ꠆ꠟꠣꠞ ꠖꠞꠛꠣꠞꠅ ꠡꠞꠝ ꠙꠣꠅꠀꠞ ꠇꠥꠘꠥ ꠇꠣꠞꠘ ꠘꠣꠁ। ꠎꠦ ꠇꠣꠝꠟꠣꠄ ꠡꠑꠤꠇ ꠜꠣꠛꠦ ꠢꠇ ꠇꠣꠟꠣꠝ ꠔꠣꠟꠤꠝ ꠖꠦꠁꠘ, ꠅꠃ ꠟꠣꠈꠣꠘ ꠅꠅ।
2TI 2:16 ꠀꠟ꠆ꠟꠣꠞ ꠛꠤꠞꠥꠗꠤ ꠀꠎꠦ-ꠛꠣꠎꠦ ꠝꠣꠔ ꠕꠣꠇꠤ ꠖꠥꠞꠁ ꠞꠅ। ꠁꠟꠣ ꠝꠣꠔꠦ ꠀꠟ꠆ꠟꠣꠞ ꠛꠣꠄ ꠝꠣꠘꠡꠞ ꠒꠞ-ꠈꠚ ꠇꠝꠣ ꠗꠞꠛ।
2TI 2:17 ꠁꠟꠣ ꠀꠎꠦ-ꠛꠣꠎꠦ ꠔꠣꠟꠤꠝ ꠔ ꠙꠌꠣ-ꠊꠣꠞ ꠟꠣꠈꠣꠘ ꠌꠣꠁꠞꠅꠛꠣꠄ ꠍꠤꠔ꠆ꠞꠦ। ꠁ ꠖꠟꠅ ꠀꠍꠦ, ꠢꠥꠝꠤꠘꠣꠍ ꠀꠞ ꠚꠤꠟꠤꠔꠣꠍ।
2TI 2:18 ꠁꠉꠥꠁꠘ ꠔ ꠀꠟ꠆ꠟꠣꠁ ꠢꠇ ꠕꠣꠇꠤ ꠇꠥ-ꠙꠕꠦ ꠉꠦꠍꠂꠘꠉꠤ। ꠁꠔꠣꠄ ꠇꠂꠘ, ꠝꠥꠝꠤꠘ ꠅꠇꠟ ꠛꠥꠟꠦ ꠝꠥꠞ꠆ꠖꠣ ꠕꠣꠇꠤ ꠎꠤꠘ꠆ꠖꠣ ꠅꠁꠀ ꠢꠣꠞꠍꠂꠘ। ꠅꠟꠣ ꠀꠎꠦ-ꠛꠣꠎꠦ ꠝꠣꠔꠤꠀ ꠔꠣꠞꠣ ꠇꠥꠘꠥ ꠇꠥꠘꠥ ꠎꠘꠞ ꠁꠝꠣꠘ ꠘꠡ꠆ꠐ ꠇꠞꠤꠟꠤꠍꠦ।
2TI 2:19 ꠔꠦꠛꠃ ꠀꠟ꠆ꠟꠣꠞ ꠛꠣꠘꠣꠁꠟ ꠝꠎꠛꠥꠔ ꠜꠤꠔ ꠃꠛꠣ ꠞꠁꠍꠦ, ꠄꠞ ꠃꠙꠞꠦ ꠡꠤꠟ-ꠌꠣꠙ꠆ꠙꠠꠞ ꠟꠣꠈꠣꠘ ꠅꠃ ꠇꠕꠣ ꠟꠦꠈꠣ ꠀꠍꠦ, “ꠝꠣꠟꠤꠇꠦ ꠎꠣꠘꠂꠘ, ꠇꠦ ꠇꠦ ꠔꠣꠘ,” ꠀꠞ “ꠎꠦ ꠎꠘꠦ ꠀꠟ-ꠝꠍꠤꠞꠦ ꠝꠣꠟꠤꠇ ꠇꠁꠀ ꠡ꠆ꠛꠤꠇꠣꠞ ꠇꠞꠦ, ꠢꠦ ꠢꠇꠟ ꠎꠣꠔꠞ ꠉꠥꠘꠣ ꠕꠣꠇꠤ ꠢꠞꠣꠁꠟ ꠞꠃꠇ।”
2TI 2:20 ꠅ ꠔꠤꠝꠕꠤ, ꠎꠝꠤꠖꠣꠞ ꠛꠣꠠꠤꠔ ꠔ ꠈꠣꠟꠤ ꠡꠥꠘꠣ-ꠞꠥꠙꠣꠞ ꠎꠤꠘꠤꠡ ꠕꠣꠇꠦ ꠘꠣ, ꠟꠣꠇꠠꠤꠞ ꠎꠤꠘꠤꠡ ꠀꠞ ꠝꠣꠐꠤꠞ ꠕꠣꠟ-ꠛꠣꠡꠘꠅ ꠕꠣꠇꠦ। ꠄꠞꠝꠣꠎꠦ ꠇꠥꠘꠥꠐꠣ ꠡꠝ꠆ꠝꠣꠘꠤ ꠇꠣꠝꠅ ꠀꠞ ꠇꠥꠘꠥꠐꠣ ꠘꠤꠌꠣ ꠇꠣꠝꠅ ꠛꠦꠛꠢꠣꠞ ꠅꠄ।
2TI 2:21 ꠔꠦ ꠎꠦꠔꠣ ꠝꠣꠘꠥꠡ ꠅꠃ ꠘꠤꠌꠣ ꠇꠣꠝꠞ ꠀꠡꠛꠣꠛꠞ ꠟꠣꠈꠣꠘ, ꠁꠔꠣꠞ ꠉꠦꠍ ꠕꠣꠇꠤ ꠢꠞꠤꠀ ꠀꠁꠀ ꠇꠦꠃ ꠎꠥꠖꠤ ꠘꠤꠎꠞꠦ ꠙꠣꠇ-ꠍꠣꠚ ꠇꠞꠤꠟꠣꠄ, ꠔꠦ ꠢꠦ ꠡꠝ꠆ꠝꠣꠘꠤ ꠎꠤꠘꠤꠡ ꠛꠘꠤꠎꠣꠄ। ꠔꠣꠞꠦ ꠙꠛꠤꠔ꠆ꠞ ꠢꠤꠡꠣꠛꠦ ꠀꠟꠣꠖꠣ ꠇꠞꠤ ꠞꠣꠈꠣ ꠅꠁꠛ। ꠢꠦ ꠔꠣꠞ ꠝꠣꠟꠤꠇꠞ ꠇꠣꠝꠅ ꠟꠣꠉꠛ ꠀꠞ ꠢꠇꠟ ꠘꠝꠥꠘꠣꠞ ꠘꠦꠇ ꠇꠣꠝꠞ ꠟꠣꠉꠤ ꠎꠥꠁꠔ ꠅꠁꠛ।
2TI 2:22 ꠔꠤꠝꠕꠤ ꠢꠥꠡꠤꠀꠞ ꠅꠅ, ꠎꠃꠛꠘꠞ ꠛꠖ ꠈꠣꠁꠡ ꠕꠣꠇꠤ ꠔꠥꠝꠣꠞ ꠎꠣꠘ ꠛꠣꠌꠣꠅ, ꠀꠞ ꠎꠦꠞꠣ ꠈꠣꠍ ꠖꠤꠟꠦ ꠝꠣꠟꠤꠇꠞ ꠘꠣꠝ ꠟꠄ, ꠔꠣꠞꠣꠞ ꠟꠉꠦ ꠡꠞꠤꠇ ꠅꠁꠀ ꠙꠞꠦꠎꠉꠣꠞꠤ, ꠁꠝꠣꠘ, ꠝꠢꠛ꠆ꠛꠔ ꠀꠞ ꠡꠣꠘ꠆ꠔꠤꠞ ꠟꠣꠉꠤ ꠈꠤꠀꠟꠤ ꠅꠅ।
2TI 2:23 ꠀꠎꠦ-ꠛꠣꠎꠦ ꠛꠦꠀꠈꠟꠤ ꠔꠞ꠆ꠇꠣ-ꠔꠞ꠆ꠇꠤꠔ ꠡꠣꠝꠤꠟ ꠅꠁꠅ ꠘꠣ, ꠔꠥꠝꠣꠞ ꠎꠣꠘꠣ ꠀꠍꠦ, ꠁꠔꠣꠄ ꠈꠣꠟꠤ ꠇꠣꠁꠎ꠆ꠎꠣ-ꠚꠍꠣꠖ ꠛꠣꠠꠣꠄ।
2TI 2:24 ꠝꠣꠟꠤꠇ ꠁꠍꠣꠞ ꠉꠥꠟꠣꠝꠦ ꠇꠣꠁꠎ꠆ꠎꠣ-ꠚꠍꠣꠖ ꠇꠞꠣ ꠑꠤꠇ ꠘꠣꠄ, ꠄꠁꠘ ꠛꠞꠋ ꠢꠇꠟꠞ ꠛꠣꠄ ꠖꠄꠀꠟ ꠅꠁꠔꠦ ꠅꠁꠛ, ꠄꠁꠘ ꠝꠣꠘꠡꠞꠦ ꠔꠣꠟꠤꠝ ꠖꠦꠅꠀꠞ ꠈꠦꠝꠔꠣ ꠀꠞ ꠍꠛꠞ-ꠡꠇ꠆ꠔꠤ ꠕꠣꠇꠔꠦ ꠅꠁꠛ।
2TI 2:25 ꠔꠣꠁꠘ ꠘꠤꠎꠞ ꠛꠤꠞꠥꠗꠤ ꠝꠣꠘꠡꠞꠦꠅ ꠘꠞꠝ ꠝꠘꠦ ꠛꠥꠎ ꠖꠤꠛꠣ। ꠅꠃ ꠀꠡꠣꠄ ꠔꠣꠟꠤꠝ ꠖꠤꠛꠣ, ꠢꠄꠔꠛꠣ ꠀꠟ꠆ꠟꠣꠄ ꠔꠣꠞꠣꠞꠦ ꠔꠃꠛꠣ ꠇꠞꠣꠞ ꠡꠥꠎꠥꠉ ꠖꠤꠛꠣ, ꠎꠣꠔꠦ ꠔꠣꠞꠣ ꠀꠟ꠆ꠟꠣꠁ ꠢꠇꠞꠦ ꠜꠣꠟꠣꠝꠘ꠆ꠔꠦ ꠌꠤꠘꠂꠘ।
2TI 2:26 ꠔꠦꠃ ꠔꠣꠞꠣ ꠌꠦꠔꠘ ꠙꠣꠁꠀ ꠁꠛꠟꠤꠍꠞ ꠚꠣꠘ꠆ꠖꠅ ꠕꠣꠇꠤ ꠎꠣꠘ ꠛꠣꠌꠣꠁꠛꠣ, ꠅꠃ ꠁꠛꠟꠤꠍꠦ ꠔꠣꠞ ꠉꠥꠟꠣꠝ ꠛꠣꠘꠣꠘꠤꠞ ꠟꠣꠉꠤ ꠄꠞꠣꠞꠦ ꠗꠞꠍꠤꠟ।
2TI 3:1 ꠅ ꠔꠤꠝꠕꠤ, ꠅꠃ ꠢꠥꠡꠤꠀꠞꠤ ꠈꠣꠘꠣꠁꠘ ꠝꠘꠅ ꠞꠣꠈꠤꠅ, ꠀꠈꠦꠞꠤ ꠎꠝꠣꠘꠣꠔ ꠈꠥꠛ ꠝꠍꠤꠛꠔꠞ ꠖꠤꠘ ꠀꠁꠛ।
2TI 3:2 ꠝꠣꠘꠥꠡ ꠡ꠆ꠛꠣꠞꠕꠙꠞ ꠅꠁꠎꠤꠛ, ꠐꠦꠇꠣ-ꠙꠄꠡꠣꠞ ꠟꠣꠟꠌꠤ, ꠛꠠꠣꠁ-ꠛꠦꠐꠣꠉꠤꠞꠤ ꠖꠦꠈꠣꠘꠤ, ꠝꠣꠘꠡꠞꠦ ꠄꠟꠣꠝꠤ ꠇꠞꠣ, ꠖꠥꠞꠘꠣꠝ ꠉꠣꠅꠀ, ꠝꠣ-ꠛꠣꠚꠞ ꠅꠛꠣꠁꠖ꠆ꠖ, ꠘꠤꠝꠇ-ꠢꠣꠞꠣꠝꠤ ꠇꠞꠛ ꠀꠞ ꠀꠟ꠆ꠟꠣꠞ ꠘꠣꠚꠞꠝꠣꠘꠤ ꠇꠞꠛ।
2TI 3:3 ꠝꠣꠄꠀ-ꠝꠝꠔꠣ ꠇꠝꠤꠎꠤꠛ, ꠇꠣꠁꠎ꠆ꠎꠣ-ꠚꠍꠣꠖ ꠇꠞꠟꠦ ꠀꠙꠥꠡ ꠇꠞꠔ ꠘꠣꠄ। ꠙꠞꠞ ꠛꠖꠘꠣꠝ ꠉꠣꠁꠛ, ꠘꠤꠎꠞꠦ ꠡꠣꠝꠟꠣꠁꠔ ꠙꠣꠞꠔ ꠘꠣꠄ, ꠝꠣꠘꠥꠡ ꠅꠝꠣꠘꠥꠡ ꠅꠁꠎꠤꠛ ꠀꠞ ꠢꠇꠟ ꠘꠝꠥꠘꠣꠞ ꠘꠦꠇ ꠇꠣꠝꠞ ꠖꠥꠡꠝꠘꠤ ꠇꠞꠛ।
2TI 3:4 ꠝꠣꠘꠡꠦ ꠛꠦꠁꠝꠣꠘꠤ, ꠚꠥꠐꠣꠘꠤ ꠀꠞ ꠛꠦꠙꠞꠥꠀ ꠜꠣꠛ ꠖꠦꠈꠣꠁꠛ, ꠀꠟ꠆ꠟꠣꠞ ꠀꠡꠤꠇ ꠘꠣ ꠅꠁꠀ ꠖꠥꠘꠤꠀꠛꠤ ꠀꠞꠣꠝ-ꠀꠄꠄꠡꠞ ꠀꠡꠤꠇ ꠅꠁꠛ।
2TI 3:5 ꠛꠣꠁꠞꠞ ꠜꠣꠛ-ꠍꠥꠞꠔꠦ ꠛꠥꠎꠣ ꠎꠣꠁꠛ ꠈꠥꠛ ꠀꠟ꠆ꠟꠣꠅꠀꠟꠣ ꠙꠣꠇ-ꠝꠥꠍꠟ꠆ꠟꠤ, ꠅꠁꠟꠦ ꠝꠥꠟꠔ ꠟꠦꠛꠣꠍꠗꠣꠞꠤ ꠜꠘ꠆ꠒ। ꠔꠦ ꠔꠥꠝꠤ ꠁꠔꠣꠞ ꠉꠦꠍ ꠕꠣꠇꠤ ꠢꠞꠤꠀ ꠞꠁꠅ।
2TI 3:6 ꠅꠔꠣꠞ ꠝꠣꠎꠞ ꠇꠦꠃ ꠇꠦꠃ ꠗꠥꠇꠣ ꠖꠤꠀ ꠝꠣꠘꠡꠞ ꠊꠞꠅ ꠢꠣꠝꠣꠁꠀ ꠇꠝ ꠁꠝꠣꠘꠤ ꠛꠦꠐꠤꠘ꠆ꠔꠞꠦ ꠇꠥ-ꠙꠕꠦ ꠐꠣꠘꠦ। ꠁꠔꠣ ꠛꠦꠐꠤꠘ꠆ꠔꠞ ꠝꠉꠎ ꠅꠁꠟ ꠉꠥꠘꠣꠞ ꠜꠣꠘ꠆ꠒꠣꠞ। ꠔꠣꠞꠣ ꠘꠣꠘꠣꠘ ꠘꠝꠥꠘꠣꠞ ꠚꠥꠞ꠆ꠔꠤ-ꠀꠝꠥꠖꠞ ꠛꠡꠦ ꠌꠟꠦ।
2TI 3:7 ꠔꠣꠞꠣ ꠢꠣꠝꠦꠡꠣ ꠀꠟ꠆ꠟꠣꠁ ꠙꠕꠞ ꠔꠣꠟꠤꠝ ꠢꠥꠘꠦ, ꠅꠁꠟꠦ ꠇꠥꠘꠥꠖꠤꠘꠅ ꠀꠟ꠆ꠟꠣꠁ ꠢꠇꠤꠇꠔ ꠔꠣꠞꠣꠞ ꠜꠤꠔꠞꠦ ꠢꠣꠝꠣꠄ ꠘꠣ।
2TI 3:8 ꠝꠤꠡꠞꠞ ꠚꠦꠞꠣꠃꠘꠞ ꠎꠣꠖꠥꠉꠤꠞ-ꠉꠥꠘꠤꠘ ꠎꠣꠘ꠆ꠘꠤ ꠀꠞ ꠎꠣꠝ꠆ꠛꠞꠤꠄ ꠎꠦꠟꠣ ꠝꠥꠍꠣ ꠘꠛꠤꠞ ꠛꠤꠞꠥꠗꠤꠔꠣ ꠇꠞꠍꠤꠟꠣ, ꠑꠤꠇ ꠅꠃ ꠟꠣꠈꠣꠘ ꠅꠉꠥꠁꠘ꠆ꠔꠦꠅ ꠀꠟ꠆ꠟꠣꠁ ꠢꠇꠞ ꠛꠤꠞꠥꠗꠤꠔꠣ ꠇꠞꠦ। ꠁꠔꠣꠞ ꠛꠤꠛꠦꠇ ꠙꠌꠤ ꠉꠦꠍꠦ, ꠔꠣꠞꠣꠞ ꠜꠤꠔꠞꠦ ꠁꠝꠣꠘꠞ ꠜꠣꠟꠣꠁ ꠘꠣꠁ।
2TI 3:9 ꠅꠁꠟꠦ ꠔꠣꠞꠣ ꠀꠞ ꠀꠉꠥꠀꠁꠔ ꠙꠣꠞꠔ ꠘꠣꠄ, ꠢꠃ ꠎꠣꠖꠥꠉꠤꠞ ꠎꠣꠘ꠆ꠘꠤ ꠀꠞ ꠎꠣꠝ꠆ꠛꠞꠤꠞ ꠛꠦꠀꠈꠟꠤ ꠎꠦꠟꠣ ꠢꠇꠟꠞ ꠉꠦꠍꠦ ꠗꠞꠣ ꠙꠠꠍꠤꠟ, ꠁꠔꠣꠞ ꠛꠦꠀꠈꠟꠤꠅ ꠅꠟꠣ ꠗꠞꠣ ꠙꠠꠛ।
2TI 3:10 ꠅ ꠔꠤꠝꠕꠤ, ꠔꠥꠝꠤ ꠀꠝꠣꠞ ꠔꠣꠟꠤꠝ, ꠀꠝꠣꠞ ꠌꠣꠟ-ꠌꠟꠘ, ꠀꠝꠣꠞ ꠃꠖ꠆ꠖꠦꠡ꠆ꠡ, ꠁꠝꠣꠘ, ꠍꠛꠞꠉꠣꠞꠤ, ꠝꠢꠛ꠆ꠛꠔ, ꠀꠞ ꠀꠝꠣꠞ ꠗꠂꠎ꠆ꠎꠞ ꠇꠕꠣ ꠙꠥꠞꠣꠙꠥꠞ ꠈꠤꠀꠟ ꠇꠞꠍ।
2TI 3:11 ꠀꠘ꠆ꠔꠤꠅꠈꠤꠀ, ꠁꠇꠘꠤꠅ ꠀꠞ ꠟꠥꠡ꠆ꠞꠣ ꠐꠣꠃꠘꠅ ꠀꠝꠤ ꠇꠔ ꠎꠥꠟꠥꠝ-ꠝꠍꠤꠛꠔ ꠡꠁꠎ꠆ꠎ ꠇꠞꠍꠤ, ꠁꠔꠣ ꠔ ꠔꠥꠝꠤ ꠎꠣꠘ। ꠅꠁꠟꠦ ꠝꠣꠟꠤꠇꠦ ꠀꠝꠣꠞꠦ ꠞꠇ꠆ꠇꠣ ꠇꠞꠍꠂꠘ।
2TI 3:12 ꠀꠍꠟꠦ ꠀꠟ꠆ꠟꠣꠞ ꠒꠞ-ꠈꠚ ꠜꠤꠔꠞꠦ ꠞꠣꠈꠤꠀ, ꠁꠍꠣꠄꠁ ꠁꠝꠣꠘꠖꠣꠞ ꠛꠘꠤꠀ ꠎꠦꠞꠣ ꠎꠤꠘ꠆ꠖꠦꠉꠤ ꠇꠣꠐꠣꠁꠔ ꠌꠣꠄ, ꠔꠣꠞꠣ ꠔ ꠎꠥꠟꠥꠝ-ꠝꠍꠤꠛꠔꠅ ꠙꠠꠛꠃ।
2TI 3:13 ꠅꠁꠟꠦ ꠜꠘ꠆ꠒ ꠀꠞ ꠈꠛꠤꠍ ꠅꠇꠟ ꠖꠤꠘ ꠖꠤꠘ ꠀꠞꠅ ꠈꠣꠞꠣꠙ ꠅꠁꠛ। ꠔꠣꠞꠣ ꠘꠤꠎꠦꠅ ꠛꠦ-ꠙꠕꠦ ꠌꠟꠛ, ꠀꠞ ꠀꠞꠇ ꠎꠘꠞꠦꠅ ꠛꠦ-ꠙꠕꠤ ꠛꠣꠘꠣꠁꠛ।
2TI 3:14 ꠔꠦ ꠔꠥꠝꠤ ꠎꠦꠔꠣ ꠔꠣꠟꠤꠝ ꠙꠣꠁꠍ, ꠙꠣꠁꠀ ꠖꠤꠟꠦ-ꠎꠣꠘꠦ ꠄꠇꠤꠘ ꠇꠞꠍ, ꠄꠞ ꠃꠙꠞꠦ ꠕꠤꠞ ꠕꠣꠇꠅ, ꠇꠣꠞꠘ ꠔꠥꠝꠤ ꠘꠤꠎꠦ ꠎꠣꠘ, ꠁ ꠔꠣꠟꠤꠝ ꠇꠣꠞ ꠉꠦꠍ ꠕꠣꠇꠤ ꠙꠣꠁꠍ।
2TI 3:15 ꠔꠥꠝꠤ ꠔ ꠢꠥꠞꠥꠝꠣꠘ ꠕꠘꠦꠃ ꠀꠟ꠆ꠟꠣꠞ ꠇꠣꠟꠣꠝꠞ ꠔꠣꠟꠤꠝ ꠙꠣꠁꠍ, ꠀꠞ ꠅꠃ ꠇꠣꠟꠣꠝꠦꠃ ꠔꠥꠝꠣꠞꠦ ꠁꠍꠣ ꠀꠟ-ꠝꠍꠤꠞ ꠃꠙꠞꠦ ꠁꠝꠣꠘ ꠀꠘꠣꠞ ꠃꠍꠤꠟ꠆ꠟꠣꠄ, ꠘꠣꠎꠣꠔ ꠢꠣꠍꠤꠟꠞ ꠙꠕ ꠛꠣꠔꠣꠁ ꠖꠤꠛ।
2TI 3:16 ꠢꠥꠘꠅ, ꠀꠟ꠆ꠟꠣꠞ ꠇꠣꠟꠣꠝꠞ ꠙꠞꠔꠦꠇꠐꠣ ꠢꠞꠚ ꠀꠟ꠆ꠟꠣꠞ ꠉꠦꠍ ꠕꠣꠇꠤꠃ ꠀꠁꠍꠦ। ꠁꠔꠣ ꠔ ꠔꠣꠟꠤꠝ, ꠢꠥꠡꠤꠀꠞꠤ, ꠢꠦꠖꠣꠄꠅꠔ, ꠀꠞ ꠢꠇ ꠎꠤꠘ꠆ꠖꠦꠉꠤ ꠉꠠꠤꠛꠣꠞ ꠈꠥꠞꠣꠇ,
2TI 3:17 ꠎꠣꠔꠦ ꠀꠟ꠆ꠟꠣꠞ ꠛꠘ꠆ꠖꠣ ꠅꠇꠟ ꠃꠙꠎꠥꠇ꠆ꠔ ꠛꠘꠤꠀ ꠢꠇꠟ ꠘꠦꠇ ꠇꠣꠝꠞ ꠟꠣꠉꠤ ꠎꠥꠁꠔ ꠅꠁꠘ।
2TI 4:1 ꠀꠝꠤ ꠀꠟ꠆ꠟꠣ ꠙꠣꠇꠞꠦ ꠡꠣꠇ꠆ꠇꠤ ꠞꠣꠈꠤꠀ, ꠀꠞ ꠎꠦꠁꠘ ꠔꠣꠝꠣꠝ ꠎꠤꠘ꠆ꠖꠣ-ꠝꠥꠞ꠆ꠖꠣꠞ ꠛꠤꠌꠣꠞ ꠇꠞꠛꠣ, ꠢꠃ ꠁꠍꠣ ꠀꠟ-ꠝꠍꠤꠞꠦ ꠡꠣꠇ꠆ꠇꠤ ꠞꠣꠈꠤꠀ, ꠖꠥꠘꠤꠀꠔ ꠔꠣꠘ ꠖꠥꠍꠞꠣꠛꠣꠞꠞ ꠔꠡꠞꠤꠚ ꠀꠘꠣ ꠀꠞ ꠔꠣꠘ ꠛꠣꠖꠡꠣꠁꠞ ꠖꠥꠀꠁ ꠖꠤꠀ ꠔꠥꠝꠣꠞꠦ ꠅꠃ ꠇꠠꠣ ꠢꠥꠇꠥꠝ ꠖꠤꠀꠞ।
2TI 4:2 ꠔꠥꠝꠤ ꠀꠟ꠆ꠟꠣꠞ ꠇꠣꠟꠣꠝ ꠔꠛꠟꠤꠉ ꠇꠞꠅ, ꠡꠝꠄ-ꠅꠡꠝꠄ ꠇꠥꠘ꠆ꠔꠣ ꠘꠣꠁ, ꠢꠣꠝꠦꠡꠣ ꠔꠛꠟꠤꠉ ꠇꠞꠅ, ꠈꠥꠛ ꠛꠦꠡꠤ ꠗꠂꠎ꠆ꠎ ꠗꠞꠤꠀ ꠔꠣꠟꠤꠝ ꠖꠦꠅ ꠀꠞ ꠝꠣꠘꠡꠞ ꠅꠙꠞꠣꠗ ꠖꠦꠈꠣꠁ ꠖꠦꠅ, ꠔꠣꠞꠣꠞꠦ ꠢꠥꠡꠤꠀꠞ ꠇꠞꠅ ꠀꠞ ꠛꠥꠎꠣꠅ।
2TI 4:3 ꠀꠉꠦꠖꠤ ꠅꠟꠣ ꠡꠝꠄ ꠀꠁꠛ, ꠎꠦꠛꠟꠣ ꠢꠣꠍꠣ ꠔꠣꠟꠤꠝ ꠝꠣꠘꠡꠞ ꠡꠁꠎ꠆ꠎ ꠅꠁꠔ ꠘꠣꠄ, ꠛꠞꠋ ꠘꠤꠎꠞ ꠝꠘꠞ ꠈꠣꠁꠡ ꠙꠥꠞꠣꠁꠔꠣ ꠇꠞꠤ ꠔꠣꠞꠣ ꠅꠟꠣꠈꠣꠘ ꠃꠡ꠆ꠔꠣꠖ ꠗꠞꠛꠣ, ꠎꠦꠔꠣꠄ ꠔꠣꠞꠣꠞ ꠝꠘ ꠎꠥꠉꠣꠁꠀ ꠝꠘꠉꠠꠣ ꠔꠣꠟꠤꠝ ꠖꠤꠛꠣ।
2TI 4:4 ꠔꠣꠞꠣ ꠢꠇ ꠔꠣꠟꠤꠝ ꠕꠣꠇꠤ ꠝꠥꠈ ꠚꠤꠞꠣꠁꠀ, ꠝꠘꠉꠠꠣ ꠇꠤꠌ꠆ꠍꠣ-ꠇꠣꠢꠤꠘꠤꠞ ꠈꠞꠦ ꠖꠃꠠꠣꠁꠛꠣ।
2TI 4:5 ꠅꠁꠟꠦ ꠔꠥꠝꠤ ꠢꠇꠟ ꠛꠦꠙꠣꠞꠦ ꠘꠤꠎꠞꠦ ꠡꠣꠝꠟꠣꠁꠀ ꠞꠣꠈꠅ, ꠖꠥꠈ-ꠇꠡ꠆ꠐ ꠡꠁꠎ꠆ꠎ ꠇꠞꠅ, ꠀꠟ-ꠝꠍꠤꠞ ꠛꠦꠙꠣꠞꠦ ꠈꠥꠡ-ꠈꠛꠞꠤ ꠔꠛꠟꠤꠉ ꠇꠞꠣꠔ ꠞꠅ, ꠀꠟ꠆ꠟꠣꠞ ꠖꠦꠅꠀ ꠖꠣꠄꠁꠔ꠆ꠔ ꠀꠖꠣꠄ ꠇꠞꠅ।
2TI 4:6 ꠀꠝꠣꠞ ꠝꠃꠔꠞ ꠖꠤꠘ ꠀꠁꠀ ꠀꠎꠤ ꠉꠦꠍꠦ, ꠀꠝꠣꠞ ꠘꠤꠎꠞ ꠟꠃꠞꠦ ꠇꠥꠞꠛꠣꠘꠤ ꠢꠤꠡꠣꠛꠦ ꠓꠣꠟꠤ ꠖꠦꠅꠀ ꠅꠞ।
2TI 4:7 ꠀꠝꠤ ꠔ ꠀꠟ-ꠝꠍꠤꠞ ꠟꠣꠉꠤ ꠎꠣꠘꠦ-ꠙꠞꠣꠘꠦ ꠟꠣꠠꠣꠁ ꠇꠞꠍꠤ, ꠀꠝꠣꠞꠦ ꠛꠣꠔꠣꠁ ꠖꠦꠅꠀ ꠙꠕꠞ ꠢꠦꠡ ꠝꠣꠕꠣ ꠙꠞ꠆ꠎꠘ꠆ꠔ ꠖꠃꠠꠣꠁꠍꠤ, ꠀꠝꠣꠞ ꠁꠝꠣꠘ ꠐꠤꠇꠣꠁꠀ ꠞꠣꠈꠍꠤ।
2TI 4:8 ꠔꠦ ꠀꠝꠣꠞ ꠙꠞꠦꠎꠉꠣꠞꠤꠞ ꠙꠥꠞꠥꠡ꠆ꠇꠣꠞ ꠔ ꠎꠝꠣ ꠀꠍꠦ, ꠢꠃ ꠢꠇ-ꠁꠘꠍꠣꠚꠇꠣꠞꠤ ꠝꠣꠟꠤꠇꠦ ꠞꠥꠎ ꠢꠣꠡꠞꠞ ꠖꠤꠘ ꠀꠝꠣꠞꠦ ꠎꠄꠅꠞ ꠝꠣꠟꠣ ꠙꠥꠞꠥꠡ꠆ꠇꠣꠞ ꠖꠤꠛꠣ। ꠁꠔꠣ ꠈꠣꠟꠤ ꠀꠝꠣꠞꠦ ꠘꠣꠄ, ꠎꠔ ꠝꠣꠘꠥꠡ ꠀꠡꠤꠇ ꠅꠁꠀ ꠔꠣꠘ ꠟꠣꠉꠤ ꠛꠣꠞ ꠌꠣꠁꠞꠣ, ꠔꠣꠞꠣ ꠢꠇꠟꠞꠦꠃ ꠖꠤꠛꠣ।
2TI 4:9 ꠅ ꠔꠤꠝꠕꠤ, ꠔꠥꠝꠤ ꠌꠦꠡ꠆ꠐꠣ ꠌꠣꠟꠣꠁꠀ ꠎꠔ ꠎꠟꠖꠤ ꠙꠣꠞ ꠀꠝꠣꠞ ꠉꠦꠍꠦ ꠀꠅ।
2TI 4:10 ꠇꠣꠞꠘ ꠇꠤꠞꠤꠍꠇꠦꠘ ꠜꠣꠁ ꠉꠣꠟꠣꠔꠤꠀ ꠖꠦꠡꠅ, ꠔꠤꠔꠣꠍ ꠜꠣꠁ ꠖꠣꠟꠝꠣꠔꠤꠀ ꠖꠦꠡꠅ ꠉꠦꠍꠂꠘ। ꠀꠞ ꠖꠤꠝꠣꠍ ꠜꠣꠁ ꠖꠥꠘꠤꠀꠛꠤ ꠝꠣꠄꠀꠞ ꠗꠣꠘ꠆ꠖꠣꠔ ꠙꠠꠤꠀ, ꠀꠝꠣꠞꠦ ꠍꠣꠠꠤꠀ ꠕꠤꠡꠟꠘꠤꠇꠤ ꠐꠣꠃꠘꠅ ꠉꠦꠍꠂꠘꠉꠤ।
2TI 4:11 ꠈꠣꠟꠤ ꠟꠥꠇ ꠜꠣꠁ ꠀꠝꠣꠞ ꠉꠦꠍꠦ ꠀꠍꠂꠘ। ꠄꠞꠟꠣꠉꠤ ꠝꠣꠞ꠆ꠇꠥꠍ ꠜꠣꠁꠞꠦ ꠟꠁꠀ ꠔꠥꠝꠤ ꠎꠟꠖꠤ ꠀꠅ, ꠀꠝꠣꠞ ꠇꠣꠝ-ꠇꠣꠎꠅ ꠔꠣꠁꠘ ꠛꠃꠔ ꠡꠣꠁꠎ꠆ꠎ ꠇꠞꠂꠘ।
2TI 4:12 ꠔꠥꠈꠤꠇ ꠜꠣꠁꠞꠦ ꠀꠝꠤ ꠁꠚꠤꠍꠅ ꠙꠣꠑꠣꠁꠍꠤ।
2TI 4:13 ꠀꠝꠤ ꠀꠁꠛꠣꠞ ꠡꠝꠄ ꠔꠞꠥꠀꠍ ꠐꠣꠃꠘꠞ ꠇꠣꠞꠚꠥꠍ ꠜꠣꠁꠞ ꠉꠦꠍꠦ, ꠀꠝꠣꠞ ꠄꠇꠈꠣꠘ ꠌꠣꠖ꠆ꠖꠞ ꠕꠁꠀ ꠀꠁꠍꠤ, ꠔꠥꠝꠤ ꠀꠁꠛꠣꠞ ꠙꠕꠦ ꠅꠈꠣꠘꠔꠣ ꠀꠘꠤꠅ, ꠀꠞ ꠀꠝꠣꠞ ꠇꠤꠔꠣꠛ ꠈꠣꠘꠣꠁꠘ, ꠈꠣꠍ ꠇꠞꠤ ꠌꠣꠝꠠꠣꠞ ꠃꠙꠞꠦ ꠟꠦꠈꠣ ꠇꠤꠔꠣꠛ ꠈꠣꠘꠣꠁꠘꠅ ꠀꠘꠤꠅ।
2TI 4:14 ꠢꠥꠘꠅ, ꠔꠣꠝꠣ-ꠙꠤꠔꠟꠞ ꠇꠣꠝ ꠇꠞꠦ ꠎꠦ ꠍꠤꠇꠘ꠆ꠖꠞ, ꠅꠉꠤꠄ ꠀꠝꠣꠞ ꠛꠃꠔ ꠈꠦꠔꠤ ꠇꠞꠍꠦ, ꠅꠁꠟꠦ ꠝꠣꠟꠤꠇ ꠁꠍꠣꠄ ꠔꠣꠞꠦ ꠃꠙꠎꠥꠇ꠆ꠔ ꠛꠖꠟꠣ ꠖꠤꠛꠣ।
2TI 4:15 ꠔꠦ ꠔꠣꠞ ꠛꠦꠙꠣꠞꠦ ꠔꠥꠝꠤ ꠢꠥꠡꠤꠀꠞ ꠞꠁꠅ, ꠢꠦ ꠇꠝꠞ ꠛꠣꠘ꠆ꠖꠤꠀ ꠀꠝꠞꠣꠞ ꠔꠛꠟꠤꠉ ꠇꠣꠝꠞ ꠛꠤꠞꠥꠗꠤꠔꠣ ꠇꠞꠍꠤꠟ।
2TI 4:16 ꠎꠣꠘ ꠘꠤ, ꠀꠝꠣꠞꠦ ꠙꠄꠟꠣ ꠛꠣꠞ ꠎꠦꠛꠟꠣ ꠀꠖꠣꠟꠔꠅ ꠘꠦꠅꠀ ꠅꠁꠟ, ꠅꠃ ꠡꠝꠄ ꠇꠦꠃ ꠀꠝꠣꠞꠦ ꠡꠣꠁꠎ꠆ꠎ ꠇꠞꠍꠦ ꠘꠣ, ꠢꠇꠟꠦꠃ ꠀꠝꠣꠞꠦ ꠍꠣꠠꠤꠀ ꠜꠣꠉꠤꠍꠦ। ꠔꠣ-ꠅ ꠀꠟ꠆ꠟꠣꠄ ꠎꠣꠘꠥ ꠔꠣꠞꠣꠞ ꠁ ꠛꠤꠡꠄꠈꠣꠘ ꠢꠤꠡꠣꠛꠅ ꠘꠣ ꠗꠞꠂꠘ।
2TI 4:17 ꠈꠣꠟꠤ ꠝꠣꠟꠤꠇ ꠁꠍꠣ ꠀꠝꠣꠞ ꠙꠇ꠆ꠇꠦ ꠃꠛꠣꠁꠟꠣ, ꠔꠣꠁꠘ ꠀꠝꠣꠞꠦ ꠛꠟ ꠎꠥꠉꠣꠁꠟꠣ। ꠄꠞꠟꠣꠉꠤ ꠀꠝꠤ ꠜꠤꠘ ꠎꠣꠔꠤꠞ ꠍꠣꠝꠘꠦ ꠡꠥꠟ꠆ꠟꠀꠘꠣ ꠈꠥꠡ-ꠈꠛꠞꠤ ꠔꠛꠟꠤꠉ ꠇꠞꠣꠞ ꠡꠥꠎꠥꠉ ꠙꠣꠁꠍꠤ, ꠔꠣꠞꠣ ꠢꠇꠟꠦ ꠁꠔꠣ ꠢꠥꠘꠍꠦ। ꠅꠃ ꠛꠤꠌꠣꠞꠅ ꠔꠣꠞꠣꠞ ꠡꠤꠋꠢꠞ ꠝꠥꠈꠞ ꠈꠥꠞꠣꠇ ꠅꠀ ꠕꠣꠇꠤ ꠀꠟ꠆ꠟꠣꠄ ꠀꠝꠣꠞꠦ ꠛꠣꠌꠣꠁꠍꠂꠘ।
2TI 4:18 ꠅꠃ ꠝꠣꠟꠤꠇ ꠁꠍꠣꠄ ꠢꠇꠟ ꠘꠝꠥꠘꠣꠞ ꠛꠖ ꠇꠣꠝ ꠕꠣꠇꠤꠅ ꠀꠝꠣꠞꠦ ꠢꠦꠚꠣꠎꠔꠦ ꠞꠣꠈꠛꠣ ꠀꠞ ꠍꠢꠤ-ꠍꠣꠟꠣꠝꠔꠦ ꠛꠦꠢꠦꠡ꠆ꠔꠤ ꠛꠣꠖꠡꠣꠁꠔ ꠙꠣꠞ ꠇꠞꠛꠣ। ꠎꠥꠉꠦ ꠎꠥꠉꠦ ꠌꠤꠞꠇꠣꠟ ꠔꠣꠘ ꠔꠣꠞꠤꠚ ꠅꠃꠇ। ꠀꠝꠤꠘ।
2TI 4:19 ꠀꠝꠞꠣꠞ ꠝꠥꠝꠤꠘ ꠜꠣꠁ ꠀꠇꠤꠟꠞꠦ, ꠔꠣꠘ ꠛꠤꠛꠤ ꠚꠤꠍꠇꠤꠟꠣ ꠀꠞ ꠀꠘꠤꠍ ꠜꠣꠁꠞ ꠙꠞꠤꠛꠣꠞꠞꠦ ꠀꠝꠣꠞ ꠍꠣꠟꠣꠝ ꠎꠣꠘꠣꠁꠅ।
2TI 4:20 ꠁꠞꠣꠡ꠆ꠔꠣꠍ ꠜꠣꠁ ꠇꠞꠤꠘ꠆ꠔ ꠐꠣꠃꠘꠅ ꠞꠁꠍꠂꠘ, ꠀꠞ ꠔꠚꠤꠝꠞꠦ ꠛꠦꠝꠣꠞ ꠢꠣꠟꠔꠦ ꠀꠝꠤ ꠝꠤꠟꠤꠔꠣ ꠛꠘ꠆ꠖꠞꠅ ꠕꠁꠀ ꠀꠁꠍꠤ।
2TI 4:21 ꠔꠦ ꠔꠥꠝꠤ ꠈꠥꠛ ꠌꠦꠡ꠆ꠐꠣ ꠌꠣꠟꠣꠅ, ꠡꠤꠔꠞ ꠀꠉꠦ ꠀꠁꠛꠣꠞ ꠟꠣꠉꠤ। ꠜꠣꠁ ꠀꠛꠥꠟ, ꠛꠖꠤꠍ, ꠅꠟꠤꠘꠤꠍ, ꠛꠁꠘ ꠇꠥꠟꠥꠖꠤꠀ ꠡꠢ ꠀꠞꠅ ꠢꠇꠟ ꠜꠣꠁ-ꠛꠁꠘꠦ ꠔꠥꠝꠣꠞꠦ ꠍꠣꠟꠣꠝ ꠖꠤꠍꠂꠘ।
2TI 4:22 ꠝꠣꠟꠤꠇ ꠁꠍꠣ ꠔꠥꠝꠣꠞ ꠟꠉꠦ ꠟꠉꠦ ꠞꠃꠇ꠆ꠇꠣ। ꠀꠟ꠆ꠟꠣꠞ ꠞꠢꠝꠔ ꠔꠥꠝꠞꠣꠞ ꠟꠉꠦ ꠕꠣꠇꠃꠇ। ꠀꠝꠤꠘ॥
TIT 1:1 ꠀꠝꠤ ꠙꠣꠃꠟꠥꠍ ꠔ ꠀꠟ꠆ꠟꠣ ꠙꠣꠇꠞ ꠉꠥꠟꠣꠝ ꠀꠞ ꠢꠎꠞꠔ ꠁꠍꠣ ꠀꠟ-ꠝꠍꠤꠞ ꠄꠇꠎꠘ ꠍꠣꠢꠣꠛꠤ। ꠀꠝꠣꠞ ꠖꠣꠄꠁꠔ꠆ꠔ ꠅꠁꠟ, ꠀꠟ꠆ꠟꠣꠞ ꠙꠍꠘ꠆ꠖ ꠇꠞꠣ ꠛꠘ꠆ꠖꠣ ꠅꠇꠟꠞꠦ ꠁꠝꠣꠘꠞ ꠙꠕꠦ ꠀꠘꠣ, ꠀꠞ ꠀꠟ꠆ꠟꠣꠞꠦ ꠝꠣꠘꠤꠀ ꠌꠟꠣꠞ ꠝꠣꠎꠦ ꠎꠦ ꠢꠇꠤꠇꠔ ꠀꠍꠦ, ꠅꠃ ꠢꠇꠤꠇꠔꠞꠦ ꠌꠤꠘꠣꠁ ꠖꠦꠅꠀ।
TIT 1:2 ꠀꠝꠤ ꠀꠟ-ꠝꠍꠤꠞ ꠈꠦꠎꠝꠔ ꠇꠞꠤꠀꠞ, ꠀꠈꠦꠞꠤ ꠎꠤꠘ꠆ꠖꠦꠉꠤ ꠙꠣꠅꠀꠞ ꠀꠡꠣꠄ। ꠎꠦ ꠀꠟ꠆ꠟꠣꠄ ꠇꠥꠘꠥ ꠝꠤꠍꠣ ꠝꠣꠔꠂꠘ ꠘꠣ, ꠢꠃ ꠀꠟ꠆ꠟꠣꠄ ꠁ ꠎꠤꠘ꠆ꠖꠦꠉꠤ ꠖꠦꠅꠀꠞ ꠅꠀꠖꠣ ꠇꠞꠍꠂꠘ, ꠖꠥꠘꠤꠀ ꠙꠄꠖꠣ ꠅꠀꠞ ꠀꠉꠦꠃ।
TIT 1:3 ꠔꠣꠁꠘ ꠔꠣꠘ ꠇꠣꠟꠣꠝ ꠡꠑꠤꠇ ꠡꠝꠄꠄ ꠎꠣꠁꠞ ꠇꠞꠍꠂꠘ, ꠀꠞ ꠀꠝꠞꠣꠞ ꠔꠞꠣꠘꠦꠀꠟꠣ ꠀꠟ꠆ꠟꠣꠞ ꠢꠥꠇꠥꠝ ꠝꠣꠚꠤꠇ ꠁꠔꠣ ꠔꠛꠟꠤꠉ ꠇꠞꠣꠞ ꠜꠣꠞ ꠀꠝꠣꠞ ꠀꠔꠅ ꠖꠦꠅꠀ ꠅꠁꠍꠦ।
TIT 1:4 ꠀꠝꠣꠞ ꠢꠃ ꠈꠣꠍ ꠀꠅꠟꠣꠖ ꠔꠤꠔꠣꠍꠞ ꠉꠦꠍꠦ ꠟꠦꠈꠞꠣꠝ, ꠀꠝꠞꠣ ꠖꠥꠁꠅꠎꠘꠃ ꠄꠇꠁ ꠁꠝꠣꠘꠦ ꠀꠟ-ꠝꠍꠤꠞ ꠃꠝ꠆ꠝꠔ ꠅꠁꠍꠤ। ꠀꠝꠞꠣꠞ ꠉꠣꠁꠛꠤ ꠛꠣꠚ ꠀꠟ꠆ꠟꠣꠄ ꠀꠞ ꠔꠞꠣꠘꠦꠀꠟꠣ ꠁꠍꠣ ꠀꠟ-ꠝꠍꠤꠄ ꠞꠢꠝꠔ ꠀꠞ ꠡꠣꠘ꠆ꠔꠤ ꠖꠣꠘ ꠇꠞꠃꠇ꠆ꠇꠣ।
TIT 1:5 ꠔꠤꠔꠣꠍ ꠢꠥꠘꠅ, ꠀꠝꠤ ꠔꠥꠝꠣꠞꠦ ꠅꠃ ꠇ꠆ꠞꠤꠔꠤ ꠖꠤꠙꠅ ꠕꠁꠀ ꠀꠁꠍꠤ, ꠎꠣꠔꠦ ꠎꠦꠔꠣ ꠇꠣꠝ ꠅꠈꠘꠅ ꠛꠣꠇꠤ ꠞꠁꠍꠦ, ꠔꠥꠝꠤ ꠅꠔꠣ ꠙꠥꠞꠣꠙꠥꠞ ꠀꠖꠣꠄ ꠇꠞ। ꠀꠞ ꠀꠝꠤ ꠎꠦꠟꠣ ꠢꠥꠇꠥꠝ ꠖꠤꠍꠟꠣꠝ, ꠑꠤꠇ ꠅꠃꠟꠣ ꠔꠥꠝꠤ ꠙꠞꠔꠦꠇ ꠐꠣꠃꠘꠞ ꠎꠝꠣꠔꠞ ꠝꠥꠞꠛ꠆ꠛꠤ ꠅꠇꠟꠞꠦ ꠇꠣꠝꠅ ꠛꠅꠀꠁꠟ ꠇꠞꠅ।
TIT 1:6 ꠝꠘꠅ ꠞꠣꠈꠤꠅ, ꠎꠦ ꠝꠥꠞꠛ꠆ꠛꠤ ꠅꠇꠟ ꠛꠖꠘꠣꠝ ꠍꠣꠠꠣ ꠘꠤꠈꠥꠔ, ꠎꠦꠞꠣꠞ ꠈꠣꠟꠤ ꠄꠇꠎꠘ ꠛꠃ ꠀꠍꠂꠘ, ꠎꠦꠞꠣꠞ ꠙꠥꠀ-ꠙꠥꠠꠤꠘ ꠁꠍꠣꠄꠁ ꠁꠝꠣꠘꠖꠣꠞ, ꠎꠦꠞꠣ ꠛꠦꠙꠞꠥꠀ ꠜꠣꠛꠦ ꠎꠤꠘ꠆ꠖꠦꠉꠤ ꠇꠣꠐꠣꠄ ꠘꠣ, ꠛꠞꠋ ꠝꠣ-ꠛꠣꠚꠞ ꠛꠣꠁꠖ꠆ꠖ ꠀꠍꠦ, ꠅꠃ ꠝꠥꠞꠛ꠆ꠛꠤꠞꠦ ꠔꠥꠝꠤ ꠛꠅꠀꠁꠟ ꠇꠞꠅ।
TIT 1:7 ꠀꠟ꠆ꠟꠣꠁ ꠇꠣꠝꠞ ꠎꠤꠝ꠆ꠝꠣꠖꠣꠞꠤ ꠙꠣꠅꠀꠄ ꠎꠦꠇꠥꠘꠥ ꠌꠣꠟꠇꠖꠣꠞ ꠎꠣꠘꠥ ꠛꠖꠘꠣꠝ ꠍꠣꠠꠣ ꠘꠤꠈꠥꠔ ꠅꠁꠘ। ꠔꠣꠁꠘ ꠎꠣꠘꠥ ꠡ꠆ꠛꠂꠞꠣꠌꠣꠞ, ꠛꠖꠞꠣꠉꠤ, ꠘꠤꠡꠣꠈꠥꠞ, ꠝꠣꠞꠣ-ꠝꠣꠞꠤ ꠇꠞꠞꠣ ꠛꠣ ꠢꠣꠞꠣꠝ ꠞꠥꠎꠤ-ꠞꠥꠎꠉꠣꠞꠞ ꠟꠣꠟꠌꠤ ꠘꠣ ꠅꠁꠘ।
TIT 1:8 ꠄꠞ ꠛꠖꠟꠣ ꠔꠣꠁꠘ ꠎꠣꠘꠥ ꠝꠦꠝꠣꠘꠖꠣꠞꠤ ꠇꠞꠞꠣ, ꠘꠦꠇ ꠜꠣꠛꠞ ꠀꠡꠤꠇ, ꠢꠇ-ꠢꠣꠟꠣꠟꠤ, ꠀꠞ ꠀꠟ꠆ꠟꠣꠞ ꠛꠣꠁꠖ꠆ꠖ ꠎꠘ ꠅꠁꠘ। ꠔꠣꠘ ꠜꠣꠟꠣ ꠛꠤꠌꠣꠞ-ꠛꠥꠖ꠆ꠖꠤ ꠕꠣꠇꠦ, ꠀꠞ ꠘꠤꠎꠞꠦ ꠙꠥꠞꠣꠙꠥꠞ ꠡꠣꠝꠟꠣꠁꠀ ꠞꠣꠈꠔꠣ ꠙꠣꠞꠂꠘ।
TIT 1:9 ꠀꠟ꠆ꠟꠣ ꠙꠣꠇꠞ ꠎꠦ ꠢꠇ ꠇꠣꠟꠣꠝ ꠔꠣꠟꠤꠝ ꠙꠣꠁꠍꠂꠘ, ꠔꠣꠁꠘ ꠁꠔꠣꠞꠦ ꠝꠎꠛꠥꠔ ꠇꠞꠤ ꠗꠞꠤꠀ ꠞꠣꠈꠂꠘ, ꠀꠞ ꠑꠤꠇ ꠅꠃ ꠟꠣꠈꠣꠘ ꠈꠣꠐꠤ ꠔꠣꠟꠤꠝ ꠔꠛꠟꠤꠉ ꠇꠞꠔꠣ ꠙꠣꠞꠂꠘ। ꠄꠞꠟꠉꠦ ꠎꠦꠞꠣ ꠔꠣꠘ ꠛꠤꠙꠇ꠆ꠇꠦ ꠀꠍꠦ, ꠔꠣꠞꠣꠞ ꠜꠥꠟ-ꠛꠦꠀꠈꠟꠤꠅ ꠗꠞꠣꠁ ꠖꠦꠁꠘ।
TIT 1:10 ꠇꠣꠞꠘ ꠛꠃꠔ ꠛꠦꠡꠣꠝꠣꠟ ꠝꠣꠘꠥꠡ ꠀꠍꠂꠘ, ꠎꠦꠔꠣꠄ ꠇꠦꠃꠞꠞꠦ ꠝꠣꠘꠂꠘ ꠘꠣ, ꠛꠦꠇꠣꠝꠣ ꠝꠣꠔ ꠝꠣꠔꠂꠘ, ꠍꠟ-ꠌꠔꠥꠞꠤ ꠇꠞꠂꠘ। ꠎꠦꠔꠣꠄ ꠝꠍꠟꠝꠣꠘꠤ ꠇꠣꠝ ꠇꠞꠣꠘꠤꠞ ꠟꠣꠉꠤ ꠎꠥꠞꠣ-ꠎꠥꠞꠤ ꠇꠞꠂꠘ, ꠀꠝꠤ ꠈꠣꠍ ꠇꠞꠤ ꠅꠔꠣꠞ ꠇꠕꠣꠃ ꠇꠁꠞꠣꠝ।
TIT 1:11 ꠁꠔꠣꠞ ꠝꠥꠈ ꠛꠘ꠆ꠖ ꠇꠞꠣ ꠎꠞꠥꠞ। ꠁꠔꠣꠄ ꠇꠥ-ꠙꠕꠦ ꠐꠦꠇꠣ ꠇꠣꠝꠣꠘꠤꠞ ꠀꠡꠣꠄ ꠅꠟꠣ ꠔꠣꠟꠤꠝ ꠖꠦꠁꠘ, ꠎꠦ ꠔꠣꠟꠤꠝ ꠖꠦꠅꠀ ꠔꠣꠞꠣꠞ ꠟꠣꠉꠤ ꠑꠤꠇ ꠘꠣꠄ। ꠁ ꠔꠣꠟꠤꠝ ꠖꠤꠀ ꠇꠥꠘꠥ ꠇꠥꠘꠥ ꠙꠞꠤꠛꠣꠞꠞꠦ ꠛꠤꠉꠠꠣꠁꠟꠤꠞꠣ।
TIT 1:12 ꠄꠞꠟꠣꠉꠤ ꠔꠣꠞꠣꠞ ꠘꠤꠎꠞ ꠖꠦꠡꠞ ꠄꠇꠎꠘ ꠙꠘ꠆ꠒꠤꠔꠦ ꠇꠁꠍꠂꠘ, “ꠇ꠆ꠞꠤꠔꠤ ꠖꠤꠙꠞ ꠝꠣꠘꠡꠦ ꠢꠣꠝꠦꠡꠣ ꠝꠤꠍꠣ ꠝꠣꠔꠂꠘ, ꠁꠉꠥꠁꠘ ꠔ ꠎꠋꠟꠤ ꠎꠣꠘꠥꠀꠞꠞ ꠟꠣꠈꠣꠘ, ꠇꠥꠠꠤꠀ ꠀꠞ ꠙꠦꠐꠥꠀ।”
TIT 1:13 ꠁꠔꠣ ꠔ ꠄꠇꠖꠝ ꠢꠣꠍꠣ, ꠄꠞꠟꠣꠉꠤ ꠔꠥꠝꠤ ꠈꠥꠛ ꠉꠞꠝ ꠅꠁꠀ ꠔꠣꠞꠣꠞ ꠀꠁꠛ ꠖꠦꠈꠣꠁꠀ ꠖꠦꠅ, ꠎꠣꠔꠦ ꠔꠣꠞꠣꠞ ꠁꠍꠣꠄꠁ ꠁꠝꠣꠘ ꠡꠥꠟ꠆ꠟꠀꠘꠣ ꠘꠤꠈꠥꠔ ꠅꠄ।
TIT 1:14 ꠁꠢꠥꠖꠤ ꠅꠇꠟꠞ ꠛꠣꠘꠣꠁꠟ ꠇꠤꠌ꠆ꠍꠣ-ꠇꠣꠢꠤꠘꠤ, ꠀꠞ ꠎꠦꠔꠣ ꠝꠣꠘꠥꠡ ꠀꠟ꠆ꠟꠣꠁ ꠢꠇꠤꠇꠔ ꠕꠣꠇꠤ ꠛꠦ-ꠙꠕꠦ ꠉꠦꠍꠦꠉꠤ, ꠔꠣꠞꠣ ꠎꠣꠘꠥ ꠁꠔꠣꠞ ꠢꠥꠇꠥꠝ-ꠃꠙꠖꠦꠡ ꠇꠣꠘꠅ ꠘꠣ ꠟꠂꠘ।
TIT 1:15 ꠎꠦꠞꠣꠞ ꠖꠤꠟ ꠙꠣꠇ-ꠙꠛꠤꠔ꠆ꠞ, ꠔꠣꠞꠣꠞ ꠉꠦꠍꠦ ꠢꠇꠟꠔꠣꠃ ꠙꠛꠤꠔ꠆ꠞ। ꠅꠁꠟꠦ ꠎꠦꠞꠣꠞ ꠖꠤꠟ ꠘꠣꠙꠣꠇꠤꠄ ꠜꠞꠣ, ꠀꠞ ꠎꠦꠔꠣ ꠛꠦꠁꠝꠣꠘ, ꠁꠔꠣꠞ ꠉꠦꠍꠦ ꠇꠥꠘ꠆ꠔꠣꠃ ꠙꠛꠤꠔ꠆ꠞ ꠘꠣꠄ। ꠁꠔꠣꠞ ꠝꠘ ꠀꠞ ꠛꠤꠛꠦꠇ ꠢꠇꠟꠔꠣꠃ ꠛꠞꠛꠣꠖ।
TIT 1:16 ꠔꠣꠞꠣ ꠝꠥꠈꠖꠤ ꠖꠣꠛꠤ ꠇꠞꠂꠘ ꠀꠟ꠆ꠟꠣꠞꠦ ꠝꠣꠘꠂꠘ, ꠅꠁꠟꠦ ꠔꠣꠞꠣꠞ ꠇꠣꠝꠞ ꠝꠣꠎꠖꠤ ꠔꠣꠘꠞꠦ ꠅꠡ꠆ꠛꠤꠇꠣꠞ ꠇꠞꠂꠘ। ꠁꠉꠥꠁꠘ ꠔ ꠘꠚꠞꠔꠤ ꠀꠞ ꠅꠛꠣꠁꠖ꠆ꠖ। ꠁꠔꠣꠞꠦ ꠇꠥꠘꠥ ꠜꠣꠟꠣ ꠇꠣꠝꠅ ꠟꠣꠉꠣꠁꠟ ꠎꠣꠄ ꠘꠣ।
TIT 2:1 ꠔꠤꠔꠣꠍ ꠢꠥꠘꠅ, ꠔꠥꠝꠤ ꠝꠣꠘꠡꠞꠦ ꠅꠟꠣꠈꠣꠘ ꠔꠣꠟꠤꠝ ꠖꠦꠅ, ꠎꠣꠔꠦ ꠔꠥꠝꠣꠞ ꠝꠣꠔꠞ ꠝꠣꠎꠦ ꠘꠤꠈꠥꠔ ꠢꠇ ꠔꠣꠟꠤꠝ ꠕꠣꠇꠦ।
TIT 2:2 ꠎꠝꠣꠔꠞ ꠝꠥꠞꠛ꠆ꠛꠤ ꠛꠦꠐꠣꠁꠘꠞꠦ ꠇꠅ, ꠔꠣꠞꠣ ꠎꠣꠘꠥ ꠢꠣꠝꠦꠡꠣ ꠘꠤꠎꠞꠦ ꠡꠣꠝꠟꠣꠁꠀ ꠞꠣꠈꠂꠘ, ꠁꠎ꠆ꠎꠔꠤ ꠛꠘꠂꠘ, ꠜꠣꠟꠣ ꠛꠤꠌꠣꠞ-ꠛꠤꠛꠦꠇ ꠈꠣꠐꠣꠁꠘ। ꠔꠣꠞꠣꠞ ꠎꠣꠘꠥ ꠈꠣꠐꠤ ꠁꠝꠣꠘ, ꠝꠣꠄꠀ-ꠝꠢꠛ꠆ꠛꠔ ꠀꠞ ꠍꠛꠞ ꠕꠣꠇꠦ।
TIT 2:3 ꠅꠟꠣꠈꠣꠘ ꠝꠥꠞꠛ꠆ꠛꠤ ꠛꠦꠐꠤꠘ꠆ꠔꠞꠦꠅ ꠇꠅ, ꠔꠣꠞꠣ ꠎꠣꠘꠥ ꠙꠞꠦꠎꠉꠣꠞꠤꠞ ꠀꠖꠛ-ꠇꠣꠄꠖꠣ ꠝꠣꠘꠤꠀ ꠌꠟꠂꠘ ꠀꠞ ꠘꠦꠇꠤꠞ ꠜꠣꠛ ꠢꠤꠇꠣꠁꠘ। ꠅꠁꠘ꠆ꠘꠞ ꠛꠖꠘꠣꠝ ꠉꠣꠅꠀ, ꠛꠣ ꠘꠤꠡꠣꠈꠥꠞ ꠛꠘꠣ ꠔꠣꠞꠣꠞ ꠟꠣꠉꠤ ꠑꠤꠇ ꠘꠣꠄ।
TIT 2:4 ꠔꠦꠃ ꠔꠣꠞꠣ ꠎꠥꠀꠘ ꠙꠥꠠꠤꠘ꠆ꠔꠞꠦ ꠢꠤꠇꠣꠁꠔꠣ ꠙꠣꠞꠛꠣ, ꠎꠣꠔꠦ ꠔꠣꠞꠣꠞ ꠎꠣꠝꠣꠁ ꠀꠞ ꠙꠥꠀ-ꠙꠥꠠꠤꠘꠞꠦ ꠝꠢꠛ꠆ꠛꠔ ꠇꠞꠂꠘ,
TIT 2:5 ꠘꠤꠎꠞꠦ ꠡꠣꠝꠟꠣꠁꠀ ꠞꠣꠈꠂꠘ, ꠡꠔꠤ ꠞꠂꠘ, ꠜꠣꠟꠣ ꠡꠋꠡꠣꠞꠤ ꠅꠁꠘ, ꠖꠄꠀꠟꠥ ꠅꠁꠘ, ꠀꠞ ꠎꠣꠝꠣꠁꠞ ꠛꠣꠁꠖ꠆ꠖ ꠕꠣꠇꠂꠘ। ꠔꠦꠃ ꠀꠟ꠆ꠟꠣꠞ ꠇꠣꠟꠣꠝꠞ ꠛꠖꠘꠣꠝ ꠇꠞꠣꠞ ꠡꠥꠎꠥꠉ ꠇꠦꠃ ꠙꠣꠁꠔ ꠘꠣꠄ।
TIT 2:6 ꠅꠟꠣꠈꠣꠘ ꠎꠥꠀꠘ ꠙꠥꠀꠂꠘ꠆ꠔꠞꠦꠅ ꠃꠙꠖꠦꠡ ꠖꠦꠅ, ꠎꠣꠔꠦ ꠔꠣꠞꠣ ꠘꠤꠎꠞꠦ ꠡꠣꠝꠟꠣꠁꠀ ꠞꠣꠈꠂꠘ।
TIT 2:7 ꠔꠥꠝꠤ ꠔꠣꠞꠣꠞ ꠉꠦꠍꠦ ꠢꠇꠟ ꠘꠝꠥꠘꠣꠞ ꠘꠦꠇ ꠇꠣꠝꠞ ꠘꠤꠡꠣꠘꠣ ꠅꠅ। ꠢꠇ ꠘꠤꠅꠔꠦ ꠀꠞ ꠖꠣꠄ-ꠖꠣꠄꠁꠔ꠆ꠔ ꠟꠁꠀ ꠔꠣꠟꠤꠝ ꠖꠦꠅ।
TIT 2:8 ꠇꠦꠃ ꠎꠣꠘꠥ ꠔꠥꠝꠣꠞ ꠎꠛꠣꠘꠞ ꠇꠥꠘꠥ ꠖꠥꠡ ꠘꠣ ꠙꠣꠄ। ꠔꠥꠝꠣꠞ ꠅꠃꠟꠣ ꠌꠣꠟ-ꠌꠟꠘ ꠖꠦꠈꠤꠀ ꠖꠥꠡꠝꠘ ꠅꠇꠟ ꠡꠞꠝꠤꠘ꠆ꠖꠣ ꠅꠁꠛꠣ ꠀꠞ ꠀꠝꠞꠣꠞ ꠛꠖꠘꠣꠝ ꠇꠞꠣꠞ ꠇꠥꠘꠥ ꠈꠥꠔ ꠙꠣꠁꠔꠣ ꠘꠣꠄ।
TIT 2:9 ꠔꠥꠝꠤ ꠌꠣꠇꠞ ꠅꠇꠟꠞꠦ ꠇꠅ, ꠔꠣꠞꠣ ꠎꠣꠘꠥ ꠢꠇ꠆ꠇꠟ ꠛꠦꠙꠣꠞꠦ ꠝꠥꠘꠤꠛꠞ ꠛꠣꠁꠖ꠆ꠖ ꠞꠂꠘ, ꠝꠥꠘꠤꠛꠞ ꠝꠘ ꠎꠥꠉꠣꠁꠀ ꠌꠟꠂꠘ, ꠔꠣꠞꠣꠞ ꠝꠥꠈꠞ ꠃꠙꠞꠦ ꠛꠦꠀꠖꠛꠤ ꠝꠣꠔ ꠘꠣ ꠝꠣꠔꠂꠘ।
TIT 2:10 ꠝꠥꠘꠤꠛꠞ ꠝꠣꠟ-ꠍꠣꠝꠣꠘꠣ ꠌꠥꠞꠤ ꠘꠣ ꠇꠞꠂꠘ, ꠛꠞꠋ ꠘꠤꠎꠞ ꠢꠇ-ꠢꠣꠟꠣꠟꠤꠞ ꠙꠞꠝꠣꠘ ꠖꠦꠈꠣꠁꠀ ꠢꠣꠞꠤ, ꠀꠝꠞꠣꠞ ꠔꠞꠣꠘꠦꠀꠟꠣ ꠀꠟ꠆ꠟꠣꠞ ꠛꠦꠙꠣꠞꠦ ꠎꠦ ꠔꠣꠟꠤꠝ ꠀꠍꠦ, ꠅꠃ ꠔꠣꠟꠤꠝꠞꠦ ꠢꠇ꠆ꠇꠟ ꠘꠝꠥꠘꠣꠄ ꠡꠥꠘ꠆ꠖꠞ ꠇꠞꠤ ꠢꠣꠎꠣꠁꠘ।
TIT 2:11 ꠎꠣꠘ ꠔ, ꠀꠟ꠆ꠟꠣꠞ ꠎꠦ ꠞꠢꠝꠔꠞ ꠃꠍꠤꠟ꠆ꠟꠣꠄ ꠢꠇꠟꠞ ꠘꠣꠎꠣꠔ ꠝꠤꠟꠦ, ꠁꠔꠣ ꠅꠈꠘ ꠖꠥꠘꠤꠀꠔ ꠎꠣꠁꠞ ꠅꠁꠉꠦꠍꠦ।
TIT 2:12 ꠅꠃ ꠞꠢꠝꠔꠦꠃ ꠀꠝꠞꠣꠞꠦ ꠔꠣꠟꠤꠝ ꠖꠤꠞꠣ, ꠎꠣꠔꠦ ꠀꠝꠞꠣ ꠛꠦ-ꠖꠤꠘꠤ ꠇꠣꠝ-ꠇꠣꠎ ꠕꠣꠇꠤ ꠀꠞ ꠖꠥꠘꠤꠀꠞ ꠢꠇꠟ ꠛꠖ ꠈꠣꠁꠡ ꠕꠣꠇꠤ ꠖꠥꠞꠁ ꠞꠁꠀ, ꠁ ꠎꠉꠔꠅ ꠘꠤꠎꠞꠦ ꠡꠣꠝꠟꠣꠁꠀ ꠞꠣꠈꠤ, ꠀꠞ ꠘꠦꠇ ꠙꠕꠦ ꠞꠁꠀ ꠙꠞꠦꠎꠉꠣꠞ ꠎꠤꠘ꠆ꠖꠦꠉꠤ ꠇꠣꠐꠣꠁ।
TIT 2:13 ꠄꠞꠟꠉꠦ ꠀꠝꠞꠣꠞ ꠖꠤꠟꠞ ꠙꠞꠝ ꠀꠡꠣ ꠙꠥꠞꠘꠞ ꠟꠣꠉꠤ ꠛꠣꠞ ꠌꠣꠁ, ꠀꠟ꠆ꠟꠣꠔꠣꠟꠣ ꠀꠞ ꠔꠞꠣꠘꠦꠀꠟꠣ ꠁꠍꠣ ꠀꠟ-ꠝꠍꠤꠞ ꠡꠣꠘ-ꠝꠢꠤꠝꠣ ꠎꠣꠁꠞ ꠅꠀꠞ ꠈꠥꠡꠤ-ꠛꠣꠡꠤ ꠙꠥꠞꠘꠞ ꠟꠣꠉꠤ ꠛꠣꠞ ꠌꠣꠁ।
TIT 2:14 ꠁꠍꠣ ꠀꠟ-ꠝꠍꠤꠄ ꠔ ꠀꠝꠞꠣꠞꠦ ꠛꠣꠌꠣꠘꠤꠞ ꠟꠣꠉꠤ ꠔꠣꠘ ꠘꠤꠎꠞ ꠎꠣꠘ ꠇꠥꠞꠛꠣꠘꠤ ꠖꠤꠟꠣꠁꠍꠂꠘ, ꠎꠣꠔꠦ ꠢꠇꠟ ꠉꠥꠘꠣ ꠕꠣꠇꠤ ꠀꠝꠞꠣꠞꠦ ꠈꠣꠟꠣꠍ ꠇꠞꠤ ꠀꠘꠔꠣ ꠙꠣꠞꠂꠘ, ꠀꠞ ꠅꠃ ꠟꠣꠈꠣꠘ ꠄꠇꠖꠟ ꠝꠣꠘꠡꠞꠦ ꠙꠣꠇ-ꠙꠛꠤꠔ꠆ꠞ ꠇꠞꠂꠘ, ꠎꠦꠞꠣ ꠈꠣꠟꠤ ꠔꠣꠘ ꠘꠤꠎꠞ ꠅꠁꠛꠣ, ꠎꠦꠞꠣ ꠘꠦꠇ ꠇꠣꠝꠞ ꠀꠡꠤꠇ ꠅꠁꠛꠣ।
TIT 2:15 ꠔꠥꠝꠤ ꠙꠥꠞꠣꠙꠥꠞ ꠛꠟ ꠈꠣꠐꠣꠁꠀ ꠅꠔꠣ ꠛꠦꠙꠣꠞꠦ ꠔꠣꠟꠤꠝ ꠖꠦꠅ, ꠝꠣꠘꠡꠞꠦ ꠘꠍꠤꠅꠔ ꠇꠞꠅ ꠀꠞ ꠔꠣꠞꠣꠞ ꠖꠥꠡ-ꠇꠍꠥꠞꠤ ꠖꠦꠈꠣꠁꠀ ꠖꠦꠅ। ꠔꠥꠝꠣꠞꠦ ꠢꠦꠄ ꠇꠞꠣꠞ ꠡꠥꠎꠥꠉ ꠇꠦꠃꠞꠞꠦ ꠖꠤꠅ ꠘꠣ।
TIT 3:1 ꠀꠟ꠆ꠟꠣꠞ ꠛꠘ꠆ꠖꠣ ꠅꠇꠟꠞꠦ ꠝꠘꠅ ꠇꠞꠣꠁ ꠖꠦꠅ, ꠔꠣꠞꠣ ꠎꠣꠘꠥ ꠖꠦꠡꠞ ꠞꠣꠎꠣ ꠀꠞ ꠡꠞꠇꠣꠞꠤ ꠘꠤꠅꠝꠞ ꠅꠗꠤꠘꠦ ꠞꠂꠘ, ꠔꠣꠞꠣ ꠅꠛꠣꠁꠖ꠆ꠖ ꠘꠣ ꠅꠁꠘ, ꠝꠣꠘꠡꠞ ꠢꠇꠟ ꠘꠝꠥꠘꠣꠞ ꠃꠙꠇꠣꠞ ꠇꠞꠣꠞ ꠟꠣꠉꠤ ꠎꠥꠁꠔ ꠕꠣꠇꠂꠘ।
TIT 3:2 ꠔꠣꠞꠣ ꠎꠣꠘꠥ ꠇꠦꠃꠞꠞ ꠛꠖꠘꠣꠝ ꠘꠣ ꠉꠣꠁꠘ, ꠇꠣꠁꠎ꠆ꠎꠣ-ꠚꠍꠣꠖ ꠘꠣ ꠇꠞꠂꠘ, ꠛꠞꠋ ꠡꠣꠘ꠆ꠔ-ꠡꠤꠡ꠆ꠐ ꠞꠁꠀ ꠢꠇꠟꠞ ꠟꠉꠦ ꠘꠞꠝ ꠛꠦꠛꠢꠣꠞ ꠇꠞꠂꠘ।
TIT 3:3 ꠀꠝꠞꠣꠅ ꠀꠉꠦ ꠛꠦꠀꠈꠟ ꠀꠞ ꠘꠣꠚꠞꠝꠣꠘ ꠀꠍꠟꠣꠝ, ꠛꠦ-ꠙꠕꠦ ꠌꠟꠔꠣꠝ, ꠖꠥꠘꠤꠀꠛꠤ ꠀꠞꠣꠝ-ꠀꠄꠄꠡ ꠀꠞ ꠘꠣꠘꠣꠘ ꠘꠝꠥꠘꠣꠞ ꠛꠖ ꠈꠣꠁꠡꠞ ꠉꠥꠟꠣꠝ ꠀꠍꠟꠣꠝ। ꠅꠁꠘ꠆ꠘ ꠝꠣꠘꠡꠞꠦ ꠁꠋꠡꠣ ꠇꠞꠔꠣꠝ, ꠔꠣꠞꠣꠞ ꠈꠦꠔꠤ ꠇꠞꠣꠞ ꠗꠣꠘ꠆ꠖꠣꠄ ꠖꠤꠘ ꠇꠣꠐꠣꠁꠔꠣꠝ। ꠀꠞ ꠘꠤꠎꠦ ꠊꠤꠘ꠆ꠘꠣꠞ ꠎꠁꠉ꠆ꠉ ꠅꠁꠟꠦꠅ ꠄꠇꠦ-ꠅꠁꠘ꠆ꠘꠞꠦ ꠊꠤꠘ꠆ꠘꠣꠁꠔꠣꠝ।
TIT 3:4 ꠅꠁꠟꠦ ꠀꠝꠞꠣꠞ ꠔꠞꠣꠘꠦꠀꠟꠣ ꠀꠟ꠆ꠟꠣꠞ ꠞꠢꠝꠔ ꠀꠞ ꠝꠢꠛ꠆ꠛꠔ ꠎꠦꠛꠟꠣ ꠎꠣꠁꠞ ꠅꠁꠟ,
TIT 3:5 ꠅꠃ ꠡꠝꠄ ꠔꠣꠁꠘ ꠀꠝꠞꠣꠞꠦ ꠞꠦꠢꠣꠁ ꠖꠤꠟꠣ। ꠀꠝꠞꠣꠞ ꠘꠤꠎꠞ ꠇꠥꠘꠥ ꠘꠦꠇ ꠇꠣꠝꠞ ꠟꠣꠉꠤ ꠞꠦꠢꠣꠁ ꠖꠤꠍꠂꠘ ꠘꠣ, ꠈꠣꠟꠤ ꠔꠣꠘ ꠖꠄꠀ-ꠝꠣꠄꠀꠄ ꠖꠤꠍꠂꠘ। ꠙꠣꠇ ꠞꠥꠢꠦ ꠘꠄꠀ ꠎꠘꠝ ꠖꠤꠀ, ꠘꠄꠀ ꠜꠣꠛꠦ ꠙꠄꠖꠣ ꠇꠞꠤꠀ ꠀꠝꠞꠣꠞ ꠖꠤꠟꠞꠦ ꠙꠞꠤꠡ꠆ꠇꠣꠞ ꠇꠞꠍꠂꠘ। ꠀꠞ ꠅꠟꠣꠈꠣꠘꠃ ꠔꠣꠁꠘ ꠀꠝꠞꠣꠞꠦ ꠞꠦꠢꠣꠁ ꠖꠤꠍꠂꠘ।
TIT 3:6 ꠀꠝꠞꠣꠞ ꠔꠞꠣꠘꠦꠀꠟꠣ ꠁꠍꠣ ꠀꠟ-ꠝꠍꠤꠞ ꠝꠣꠎꠖꠤ ꠔꠣꠁꠘ ꠈꠥꠟꠣ ꠀꠔꠦ ꠀꠝꠞꠣꠞ ꠝꠣꠎꠦ ꠅꠃ ꠙꠣꠇ ꠞꠥꠢꠥ ꠓꠣꠟꠤꠀ ꠖꠤꠍꠂꠘ।
TIT 3:7 ꠎꠣꠔꠦ ꠀꠈꠦꠞꠤ ꠎꠤꠘ꠆ꠖꠦꠉꠤꠞ ꠀꠡꠣ-ꠜꠞꠡꠣ ꠙꠣꠁꠀ, ꠀꠟ꠆ꠟꠣꠁ ꠢꠇ꠆ꠇꠟꠔꠣꠞ ꠅꠗꠤꠇꠣꠞꠤ ꠅꠁ। ꠀꠟ꠆ꠟꠣꠞ ꠞꠢꠝꠔꠦ ꠀꠝꠞꠣꠞꠦ ꠛꠦ-ꠇꠍꠥꠞ ꠈꠣꠟꠣꠍ ꠢꠤꠡꠣꠛꠦ ꠇꠛꠥꠟ ꠇꠞꠣꠄꠃ ꠔ ꠀꠝꠞꠣ ꠁꠔꠣ ꠙꠣꠁꠍꠤ।
TIT 3:8 ꠁꠈꠣꠘ ꠔ ꠙꠥꠞꠣꠙꠥꠞ ꠢꠣꠍꠣ। ꠀꠝꠤ ꠌꠣꠁꠀꠞ, ꠔꠥꠝꠤ ꠅꠃ ꠛꠦꠙꠣꠞꠦ ꠙꠥꠞꠣꠙꠥꠞ ꠎꠥꠞ ꠖꠦꠅ, ꠎꠣꠔꠦ ꠀꠟ꠆ꠟꠣꠞ ꠃꠙꠞꠦ ꠎꠦꠞꠣ ꠁꠝꠣꠘ ꠀꠘꠍꠦ, ꠔꠣꠞꠣ ꠘꠦꠇ ꠇꠣꠝ ꠇꠞꠣꠞ ꠈꠤꠀꠟꠤ ꠅꠄ। ꠁꠟꠣ ꠘꠦꠇ ꠇꠣꠝ ꠇꠞꠣ ꠔ ꠢꠇꠟꠞ ꠟꠣꠉꠤ ꠜꠣꠟꠣ ꠀꠞ ꠃꠙꠇꠣꠞꠤ।
TIT 3:9 ꠔꠣ-ꠅ ꠛꠦꠅꠇꠥꠚꠞ ꠟꠣꠈꠣꠘ ꠔꠞ꠆ꠇꠣ-ꠔꠞ꠆ꠇꠤ, ꠎꠣꠔ-ꠛꠋꠡ ꠟꠁꠀ ꠝꠣꠔꠣ, ꠇꠣꠁꠎ꠆ꠎꠣ-ꠚꠍꠣꠖ, ꠀꠞ ꠡꠞꠤꠅꠔ ꠟꠁꠀ ꠇꠕꠣ ꠇꠣꠐꠣꠇꠣꠐꠤ ꠇꠞꠤꠅ ꠘꠣ। ꠁꠔꠣꠄ ꠔ ꠇꠥꠘꠥ ꠚꠣꠄꠖꠣ ꠅꠄ ꠘꠣ, ꠁꠔꠣ ꠄꠇ꠆ꠇꠦꠞꠦ ꠛꠦꠇꠣꠝꠣ।
TIT 3:10 ꠎꠦ ꠝꠣꠘꠡꠦ ꠖꠟꠣꠖꠟꠤ ꠟꠣꠉꠣꠄ, ꠔꠣꠞꠦ ꠙꠄꠟꠣ ꠄꠇꠛꠣꠞ, ꠛꠣꠖꠦ ꠖꠥꠍꠞꠣꠛꠣꠞꠅ ꠢꠥꠡꠤꠀꠞ ꠇꠞꠤꠅ, ꠁꠔꠣꠄ ꠎꠥꠖꠤ ꠢꠦ ꠘꠣ ꠛꠖꠟꠦ, ꠔꠦ ꠔꠣꠞ ꠟꠉꠦ ꠌꠟꠣ-ꠚꠤꠞꠣ ꠄꠇ꠆ꠇꠦꠞꠦ ꠛꠣꠖ ꠖꠤꠟꠣꠁꠅ।
TIT 3:11 ꠔꠥꠝꠤ ꠔ ꠎꠣꠘꠃ, ꠁꠔꠣ ꠝꠣꠘꠡꠞ ꠖꠤꠟꠞ ꠌꠤꠘ꠆ꠔꠣ ꠈꠥꠛ ꠈꠣꠞꠣꠙ, ꠢꠦ ꠉꠥꠘꠣꠉꠣꠞ। ꠢꠦ ꠄꠝꠘꠦꠃ ꠘꠤꠎꠞ ꠘꠣꠚꠞꠝꠣꠘꠤꠞ ꠙꠞꠝꠣꠘ ꠖꠦꠄ।
TIT 3:12 ꠔꠤꠔꠣꠍ ꠢꠥꠘꠅ, ꠀꠝꠤ ꠀꠞ꠆ꠔꠤꠝꠣꠍ ꠛꠣ ꠔꠥꠈꠤꠇ ꠜꠣꠁꠞꠦ ꠔꠥꠝꠣꠞ ꠉꠦꠍꠦ ꠙꠣꠑꠣꠁꠝꠥ, ꠄꠞꠣ ꠇꠦꠃ ꠉꠦꠟꠦ ꠔꠥꠝꠤ ꠈꠣꠍ ꠇꠞꠤ ꠌꠦꠡ꠆ꠐꠣ ꠇꠞꠤꠅ ꠘꠤꠇꠣꠙꠟꠤ ꠐꠣꠃꠘꠅ ꠀꠁꠀ ꠀꠝꠣꠞ ꠟꠉꠦ ꠖꠦꠈꠣ ꠇꠞꠣꠞ ꠟꠣꠉꠤ। ꠀꠝꠤ ꠘꠤꠅꠔ ꠇꠞꠍꠤ, ꠡꠤꠔꠞ ꠇꠄꠝꠣꠡ ꠅꠃ ꠘꠤꠇꠣꠙꠟꠤꠔ ꠞꠁꠝꠥ।
TIT 3:13 ꠃꠇꠤꠟ ꠎꠁꠘ ꠍꠣꠛ ꠀꠞ ꠀꠙꠟ꠆ꠟꠍ ꠜꠣꠁꠞ ꠍꠚꠞꠞ ꠟꠣꠉꠤ ꠎꠔꠈꠣꠘ ꠙꠣꠞ ꠡꠣꠁꠎ꠆ꠎ ꠇꠞꠤꠅ, ꠎꠣꠔꠦ ꠔꠣꠞꠣꠞ ꠇꠥꠘꠥ ꠅꠜꠣꠛ ꠘꠣ ꠅꠄ।
TIT 3:14 ꠀꠝꠞꠣꠞ ꠝꠣꠘꠡꠞꠦ ꠔ ꠢꠤꠇꠣꠘꠤ ꠎꠞꠥꠞ, ꠡꠝꠣꠎꠞ ꠜꠣꠟꠣꠁꠞ ꠟꠣꠉꠤ ꠇꠤꠟꠣ ꠘꠤꠎꠞꠦ ꠈꠣꠐꠣꠁꠟ ꠎꠣꠄ। ꠔꠦꠃ ꠔꠣꠞꠣ ꠝꠣꠘꠡꠞ ꠎꠞꠥꠞꠤ ꠅꠜꠣꠛ ꠝꠤꠐꠣꠁꠔ ꠙꠣꠞꠛ, ꠅꠟꠣ ꠔꠣꠞꠣꠞ ꠘꠤꠎꠞ ꠎꠤꠘ꠆ꠖꠦꠉꠤꠅ ꠚꠟꠀꠟꠣ ꠅꠁꠛ।
TIT 3:15 ꠀꠝꠣꠞ ꠟꠉꠞ ꠢꠇꠟꠦ ꠔꠥꠝꠣꠞꠦ ꠍꠣꠟꠣꠝ ꠎꠣꠘꠣꠁꠞꠣ। ꠀꠟ-ꠝꠍꠤꠞ ꠃꠙꠞꠦ ꠁꠝꠣꠘ ꠀꠘꠣꠄ ꠎꠦꠞꠣ ꠀꠝꠞꠣꠞꠦ ꠝꠣꠄꠀ ꠇꠞꠂꠘ, ꠔꠣꠞꠣꠞꠦ ꠀꠝꠣꠞ ꠍꠣꠟꠣꠝ ꠖꠤꠅ। ꠀꠟ꠆ꠟꠣꠞ ꠞꠢꠝꠔ ꠔꠥꠝꠞꠣ ꠢꠇꠟꠞ ꠃꠙꠞꠦ ꠇꠣꠁꠝ ꠞꠃꠇ। ꠀꠝꠤꠘ॥
PHM 1:1 ꠀꠝꠤ ꠙꠣꠃꠟꠥꠍ, ꠁꠍꠣ ꠀꠟ-ꠝꠍꠤꠞ ꠟꠣꠉꠤ ꠛꠘ꠆ꠖꠤ ꠀꠍꠤ। ꠀꠝꠤ ꠀꠞ ꠀꠝꠞꠣꠞ ꠜꠣꠁ ꠔꠤꠝꠕꠤꠄ, ꠀꠝꠞꠣꠞ ꠟꠉꠞ ꠔꠛꠟꠤꠉ ꠇꠞꠞꠣ ꠝꠣꠄꠀꠞ ꠖꠥꠡ꠆ꠔ ꠚꠤꠟꠤꠝꠘꠞ ꠉꠦꠍꠦ ꠟꠦꠈꠞꠣꠝ।
PHM 1:2 ꠛꠁꠘ ꠀꠚꠤꠀ, ꠀꠝꠞꠣꠞ ꠟꠉꠦ ꠁꠝꠣꠘꠞ ꠎꠥꠖ꠆ꠖꠣ ꠀꠞ꠆ꠈꠤꠙꠣꠍ ꠀꠞ ꠔꠥꠝꠣꠞ ꠛꠣꠠꠤꠞ ꠎꠝꠣꠔꠞ ꠢꠇꠟꠞꠦ ꠍꠣꠟꠣꠝ ꠎꠣꠘꠣꠁꠞꠣꠝ।
PHM 1:3 ꠀꠝꠞꠣꠞ ꠉꠣꠁꠛꠤ ꠛꠣꠚ ꠀꠟ꠆ꠟꠣ ꠙꠣꠇꠦ ꠀꠞ ꠢꠎꠞꠔ ꠁꠍꠣ ꠀꠟ-ꠝꠍꠤꠄ ꠔꠥꠝꠞꠣꠞ ꠃꠙꠞꠦ ꠞꠢꠝꠔ ꠀꠞ ꠡꠣꠘ꠆ꠔꠤ ꠘꠣꠎꠤꠟ ꠇꠞꠃꠇ꠆ꠇꠣ।
PHM 1:4 ꠀꠝꠤ ꠢꠣꠝꠦꠡꠣ ꠝꠥꠘꠣꠎꠣꠔꠞ ꠡꠝꠄ ꠔꠥꠝꠣꠞ ꠇꠕꠣ ꠁꠀꠖ ꠇꠞꠤꠀ ꠀꠟ꠆ꠟꠣꠞ ꠡꠥꠇꠞꠤꠀ ꠀꠖꠣꠄ ꠇꠞꠤ।
PHM 1:5 ꠇꠣꠞꠘ ꠢꠎꠞꠔ ꠁꠍꠣ ꠀꠟ-ꠝꠍꠤꠞ ꠃꠙꠞꠦ ꠔꠥꠝꠣꠞ ꠁꠝꠣꠘ ꠀꠞ ꠙꠣꠇ ꠛꠘ꠆ꠖꠣ ꠅꠇꠟꠞ ꠛꠣꠄ ꠔꠥꠝꠣꠞ ꠝꠢꠛ꠆ꠛꠔꠞ ꠇꠕꠣ ꠀꠝꠤ ꠢꠥꠘꠍꠤ।
PHM 1:6 ꠀꠝꠤ ꠖꠥꠀ ꠇꠞꠤ, ꠝꠥꠝꠤꠘ ꠅꠇꠟꠞ ꠟꠉꠦ ꠔꠥꠝꠣꠞ ꠈꠣꠔꠤꠞ-ꠡꠝ꠆ꠙꠞ꠆ꠇ ꠀꠞꠅ ꠛꠣꠠꠃꠇ। ꠔꠥꠝꠤ ꠔ ꠎꠣꠘ, ꠀꠟ-ꠝꠍꠤꠞ ꠈꠣꠔꠤꠞꠦ ꠀꠟ꠆ꠟꠣꠄ ꠀꠝꠞꠣꠞꠦ ꠇꠔ ꠜꠣꠟꠣ ꠜꠣꠟꠣ ꠘꠤꠀꠝꠔ ꠛꠤꠟꠣꠁ ꠖꠤꠍꠂꠘ।
PHM 1:7 ꠜꠣꠁ, ꠔꠥꠝꠣꠞ ꠝꠢꠛ꠆ꠛꠔ ꠖꠦꠈꠤꠀ ꠀꠝꠤ ꠈꠥꠛ ꠈꠥꠡꠤ ꠅꠁꠍꠤ ꠀꠞ ꠃꠔꠡꠣꠢ ꠙꠣꠁꠍꠤ, ꠔꠥꠝꠤ ꠔ ꠀꠟ꠆ꠟꠣꠞ ꠙꠣꠇ ꠛꠘ꠆ꠖꠣ ꠅꠇꠟꠞ ꠖꠤꠟꠅ ꠀꠞꠣꠝ ꠖꠤꠍ।
PHM 1:8 ꠔꠥꠝꠣꠞ ꠁ ꠜꠣꠛ ꠖꠦꠈꠤꠀ ꠀꠝꠤ ꠔꠥꠝꠣꠞꠦ ꠄꠇꠈꠣꠘ ꠇꠕꠣ ꠇꠁꠔꠣꠝ ꠌꠣꠁꠞꠣꠝ। ꠀꠝꠤ ꠔ ꠀꠟ-ꠝꠍꠤꠞ ꠘꠣꠝꠦ ꠔꠥꠝꠣꠞꠦ ꠢꠥꠇꠥꠝ ꠖꠤꠔꠣꠝ ꠙꠣꠞꠟꠣꠝ ꠅꠘꠦ, ꠔꠥꠝꠣꠞ ꠇꠣꠝ ꠙꠥꠞꠣ ꠇꠞꠣꠞ ꠟꠣꠉꠤ।
PHM 1:9 ꠅꠁꠟꠦ ꠝꠢꠛ꠆ꠛꠔꠞ ꠈꠣꠔꠤꠞꠦ ꠢꠥꠇꠥꠝ ꠘꠣ ꠖꠤꠀ ꠔꠥꠝꠣꠞꠦ ꠝꠤꠘꠔ ꠇꠞꠤꠀꠞ। ꠀꠝꠤ ꠙꠣꠃꠟꠥꠍ ꠅꠃ ꠝꠥꠞꠛ꠆ꠛꠤ ꠛꠄꠅꠡꠅ ꠀꠟ-ꠝꠍꠤꠞ ꠟꠣꠉꠤ ꠛꠘ꠆ꠖꠤ ꠢꠣꠟꠔꠦ ꠔꠥꠝꠣꠞ ꠉꠦꠍꠦ ꠁ ꠝꠤꠘꠔꠤ ꠇꠞꠞꠣꠝ।
PHM 1:10 ꠀꠝꠣꠞ ꠀꠅꠟꠣꠖ ꠅꠘꠤꠍꠤꠝꠞ ꠟꠣꠉꠤ ꠀꠞꠎꠤ ꠎꠣꠘꠣꠁꠞꠣꠝ, ꠀꠝꠤ ꠎꠦꠟꠅ ꠛꠘ꠆ꠖꠤ ꠕꠣꠇꠣ ꠢꠣꠟꠔꠦ ꠢꠦ ꠁꠝꠣꠘ ꠀꠘꠤꠀ ꠀꠝꠣꠞ ꠀꠅꠟꠣꠖ ꠛꠘꠤꠉꠦꠍꠦ।
PHM 1:11 ꠄꠇ ꠡꠝꠄ ꠔꠥꠝꠣꠞ ꠉꠦꠍꠦ ꠢꠦ ꠛꠦꠇꠣꠝꠣ ꠀꠍꠤꠟ, ꠅꠁꠟꠦ ꠅꠈꠘ ꠀꠝꠣꠞ ꠀꠞ ꠔꠥꠝꠣꠞ ꠉꠦꠍꠦ ꠢꠦ ꠛꠃꠔ ꠇꠣꠝꠣꠅꠞꠣ ꠛꠘꠤꠉꠦꠍꠦ।
PHM 1:12 ꠎꠣꠁ ꠅꠃꠇ, ꠀꠝꠣꠞ ꠎꠣꠘꠞ ꠕꠣꠇꠤ ꠛꠦꠡꠤ ꠝꠣꠄꠀꠞ ꠅꠃ ꠝꠣꠘꠡꠞꠦ ꠀꠝꠤ ꠔꠥꠝꠣꠞ ꠉꠦꠍꠦ ꠚꠤꠞꠔ ꠙꠣꠑꠣꠁꠞꠣꠝ।
PHM 1:13 ꠀꠝꠤ ꠔꠣꠞꠦ ꠀꠝꠣꠞ ꠉꠦꠍꠦ ꠞꠣꠈꠔꠣꠝ ꠌꠣꠁꠍꠟꠣꠝ, ꠎꠣꠔꠦ ꠈꠥꠡ-ꠈꠛꠞꠤꠞ ꠖꠣꠄ ꠛꠘ꠆ꠖꠤ ꠢꠣꠟꠔꠦ ꠔꠥꠝꠣꠞ ꠅꠁꠀ ꠢꠦ ꠀꠝꠣꠞ ꠈꠦꠎꠝꠔ ꠇꠞꠔ ꠙꠣꠞꠦ।
PHM 1:14 ꠅꠁꠟꠦ ꠔꠥꠝꠣꠞ ꠁꠎꠣꠎꠔ ꠍꠣꠠꠣ ꠀꠝꠤ ꠇꠥꠘ꠆ꠔꠣ ꠇꠞꠟꠣꠝ ꠘꠣ, ꠎꠣꠔꠦ ꠎꠥꠞ ꠇꠞꠤꠀ ꠔꠥꠝꠣꠞ ꠜꠣꠟꠣ ꠇꠣꠝ ꠀꠖꠣꠄ ꠇꠞꠣ ꠘꠣ ꠟꠣꠉꠦ। ꠀꠝꠤ ꠌꠣꠁꠞꠣꠝ, ꠔꠥꠝꠤ ꠘꠤꠎ ꠕꠣꠇꠤꠃ ꠅꠃ ꠇꠣꠝ ꠇꠞ।
PHM 1:15 ꠔꠥꠝꠤ ꠎꠣꠔꠦ ꠌꠤꠞꠇꠣꠟꠞ ꠟꠣꠉꠤ ꠔꠣꠞꠦ ꠚꠤꠞꠤꠀ ꠙꠣꠅ, ꠅꠁꠔ ꠙꠣꠞꠦ ꠅꠃ ꠇꠣꠞꠘꠦꠃ ꠢꠦ ꠔꠥꠝꠣꠞ ꠉꠦꠍ ꠕꠣꠇꠤ ꠕꠥꠠꠣ ꠖꠤꠘꠞ ꠟꠣꠉꠤ ꠢꠞꠤꠀ ꠀꠍꠤꠟ।
PHM 1:16 ꠅꠁꠟꠦ ꠔꠥꠝꠤ ꠅꠈꠘ ꠔꠣꠞꠦ ꠀꠞ ꠉꠥꠟꠣꠝ ꠢꠤꠡꠣꠛꠦ ꠙꠣꠁꠔꠣꠄ ꠘꠣꠄ ꠛꠞꠋ ꠉꠥꠟꠣꠝ ꠕꠣꠇꠤ ꠛꠠ, ꠝꠣꠘꠤ ꠝꠣꠄꠀꠞ ꠜꠣꠁ ꠢꠤꠡꠣꠛꠦ ꠙꠣꠁꠛꠣꠄ। ꠈꠣꠍ ꠇꠞꠤ ꠢꠦ ꠀꠝꠣꠞ ꠈꠥꠛ ꠝꠣꠄꠀꠞ ꠝꠣꠘꠥꠡ, ꠅꠈꠘ ꠔꠥꠝꠣꠞ ꠉꠦꠍꠦꠅ ꠢꠦ ꠀꠞꠅ ꠝꠣꠄꠀꠞ, ꠈꠣꠟꠤ ꠞꠇ꠆ꠔ-ꠝꠣꠋꠡꠦ ꠘꠣꠄ, ꠁꠝꠣꠘꠖꠣꠞ ꠜꠣꠁ ꠢꠤꠡꠣꠛꠦ ꠝꠣꠄꠀꠞ।
PHM 1:17 ꠄꠞꠖꠣꠄ ꠔꠥꠝꠤ ꠎꠥꠖꠤ ꠀꠝꠣꠞꠦ ꠄꠇꠁ ꠁꠝꠣꠘꠞ ꠜꠣꠉꠤ ꠎꠣꠘ, ꠔꠦ ꠀꠝꠣꠞꠦ ꠎꠦꠟꠣ ꠇꠛꠥꠟ ꠇꠞꠣꠞ ꠇꠕꠣ, ꠔꠣꠞꠦꠅ ꠅꠟꠣ ꠇꠛꠥꠟ ꠇꠞꠤꠅ।
PHM 1:18 ꠢꠦ ꠎꠥꠖꠤ ꠔꠥꠝꠣꠞ ꠇꠥꠘꠥ ꠈꠦꠔꠤ ꠇꠞꠤꠀ ꠕꠣꠇꠦ ꠀꠞ ꠔꠣꠞ ꠉꠦꠍꠦ ꠔꠥꠝꠣꠞ ꠇꠥꠘꠥ ꠙꠣꠅꠘꠣ ꠕꠣꠇꠦ, ꠔꠦ ꠝꠘꠅ ꠇꠞꠤꠅ, ꠁ ꠙꠣꠅꠘꠣ ꠔꠥꠝꠤ ꠀꠝꠣꠞ ꠉꠦꠍꠦ ꠙꠣꠅ।
PHM 1:19 ꠀꠝꠤ ꠙꠣꠃꠟꠥꠍꠦ ꠘꠤꠎꠞ ꠀꠔꠦ ꠟꠦꠈꠤꠀ ꠎꠣꠘꠣꠁꠞꠣꠝ, ꠔꠥꠝꠣꠞ ꠙꠣꠅꠘꠣ ꠀꠝꠤ ꠖꠤꠟꠣꠁꠝꠥ। ꠀꠍꠟꠦ ꠀꠝꠤ ꠇꠁꠔꠣꠝ ꠌꠣꠁꠞꠣꠝ ꠘꠣ ꠎꠦ, ꠔꠥꠝꠣꠞ ꠘꠤꠎꠞ ꠎꠣꠘꠞ ꠟꠣꠉꠤꠃ ꠔꠥꠝꠤ ꠀꠝꠣꠞ ꠉꠦꠍꠦ ꠞꠤꠘꠤ ꠀꠍ।
PHM 1:20 ꠜꠣꠁ ꠚꠤꠟꠤꠝꠘ, ꠀꠟ꠆ꠟꠣꠞ ꠅꠀꠡ꠆ꠔꠦ ꠄꠇꠈꠣꠘ ꠇꠣꠝ ꠇꠞꠅ, ꠄꠇꠎꠘ ꠁꠝꠣꠘꠖꠣꠞ ꠜꠣꠁ ꠢꠤꠡꠣꠛꠦ ꠀꠝꠣꠞ ꠎꠣꠘꠅ ꠀꠞꠣꠝ ꠖꠦꠅ।
PHM 1:21 ꠔꠥꠝꠤ ꠀꠝꠣꠞ ꠇꠕꠣ ꠞꠣꠈꠛꠣꠄ ꠎꠣꠘꠤꠀꠃ, ꠔꠥꠝꠣꠞ ꠉꠦꠍꠦ ꠅꠃ ꠌꠤꠑꠤꠈꠣꠘ ꠟꠦꠈꠟꠣꠝ। ꠀꠝꠤ ꠝꠘꠅ ꠇꠞꠤ, ꠀꠝꠤ ꠎꠦꠔꠣ ꠇꠞꠣꠞ ꠟꠣꠉꠤ ꠇꠁꠞꠣꠝ, ꠄꠞ ꠕꠣꠇꠤ ꠛꠦꠡꠤ ꠔꠥꠝꠤ ꠇꠞꠛꠣꠄ।
PHM 1:22 ꠢꠥꠘꠅ, ꠀꠞꠅ ꠄꠇꠈꠣꠘ ꠇꠕꠣ ꠇꠁꠞꠣꠝ, ꠔꠥꠝꠤ ꠀꠝꠣꠞ ꠟꠣꠉꠤ ꠝꠦꠝꠣꠘꠞ ꠇꠥꠑꠣ ꠑꠤꠇ ꠇꠞꠤꠀ ꠞꠣꠈꠤꠅ। ꠇꠣꠞꠘ ꠀꠝꠤ ꠀꠡꠣ ꠇꠞꠞꠣꠝ, ꠔꠥꠝꠞꠣꠞ ꠖꠥꠀꠞ ꠃꠍꠤꠟ꠆ꠟꠣꠄ ꠀꠝꠣꠞꠦ ꠔꠥꠝꠞꠣꠞ ꠉꠦꠍꠦ ꠚꠤꠞꠔ ꠖꠦꠅꠀ ꠅꠁꠛ।
PHM 1:23 ꠀꠛꠥ-ꠚꠣꠞꠣꠍꠦ ꠔꠥꠝꠣꠞꠦ ꠍꠣꠟꠣꠝ ꠖꠤꠍꠂꠘ, ꠔꠣꠁꠘ ꠁꠍꠣ ꠀꠟ-ꠝꠍꠤꠞ ꠟꠣꠉꠤ ꠀꠝꠣꠞ ꠟꠉꠦ ꠅꠁꠀ ꠛꠘ꠆ꠖꠤ ꠀꠍꠂꠘ।
PHM 1:24 ꠀꠞ ꠀꠝꠣꠞ ꠟꠉꠞ ꠔꠛꠟꠤꠉꠇꠣꠞꠤ ꠝꠣꠞ꠆ꠇꠥꠍ, ꠀꠞꠤꠡ꠆ꠔꠣꠇꠥꠍ, ꠖꠤꠝꠣꠍ ꠀꠞ ꠟꠥꠇꠦꠅ ꠔꠥꠝꠣꠞꠦ ꠍꠣꠟꠣꠝ ꠎꠣꠘꠣꠁꠞꠣ।
PHM 1:25 ꠀꠝꠞꠣꠞ ꠢꠎꠞꠔ ꠁꠍꠣ ꠀꠟ-ꠝꠍꠤꠞ ꠞꠢꠝꠔ ꠔꠥꠝꠞꠣꠞ ꠖꠤꠟꠅ ꠇꠣꠁꠝ ꠞꠃꠇ। ꠀꠝꠤꠘ॥
HEB 1:1 ꠀꠟ꠆ꠟꠣ ꠙꠣꠇꠦ ꠀꠉꠞ ꠎꠝꠣꠘꠣꠔ ꠘꠣꠘꠣꠘ ꠘꠝꠥꠘꠣꠄ ꠘꠛꠤ ꠅꠇꠟꠞ ꠝꠣꠎꠖꠤꠀ ꠀꠝꠞꠣꠞ ꠝꠄ-ꠝꠥꠞꠛ꠆ꠛꠤ ꠅꠇꠟꠞ ꠉꠦꠍꠦ ꠐꠥꠇꠞꠣ ꠐꠥꠇꠞꠣ ꠇꠞꠤ ꠅꠢꠤ ꠛꠦꠎꠤꠍꠂꠘ,
HEB 1:2 ꠅꠁꠟꠦ ꠅꠈꠘ ꠀꠈꠦꠞꠤ ꠎꠝꠣꠘꠣꠔ ꠀꠁꠀ ꠔꠣꠁꠘ ꠅꠢꠤꠞꠦ ꠝꠣꠘꠥꠡ ꠍꠥꠞꠔꠦ ꠡꠞꠣꠡꠞꠤ ꠛꠦꠎꠤꠍꠂꠘ। ꠅꠃ ꠝꠣꠘꠥꠡ ꠅꠁꠟꠣ ꠀꠟ꠆ꠟꠣꠞ ꠈꠣꠍ ꠝꠣꠄꠀꠞ ꠙꠥꠔꠞ ꠟꠣꠈꠣꠘ, ꠄꠘ ꠘꠣꠝꠃ ꠇꠟꠤꠝꠣꠔꠥꠟ꠆ꠟꠣ, ꠝꠣꠘꠤ ꠀꠟ꠆ꠟꠣꠞ ꠅꠢꠤ। ꠅꠃ ꠝꠣꠄꠀꠞ ꠙꠥꠔ ꠇꠟꠤꠝꠣꠔꠥꠟ꠆ꠟꠣꠞ ꠀꠔꠅꠃ ꠔꠣꠁꠘ ꠢꠇ꠆ꠇꠟꠔꠣꠞ ꠝꠣꠟꠤꠇꠣꠘꠣ ꠖꠤꠟꠣꠁꠍꠂꠘ, ꠄꠘ ꠃꠍꠤꠟ꠆ꠟꠣꠄ ꠀꠍꠝꠣꠘ-ꠎꠝꠤꠘ ꠀꠞ ꠢꠇ꠆ꠇꠟꠔꠣ ꠙꠄꠖꠣ ꠅꠁꠍꠦ।
HEB 1:3 ꠄꠁꠘꠃ ꠅꠁꠟꠣ ꠀꠟ꠆ꠟꠣꠞ ꠡꠣꠘ-ꠔꠎꠟ꠆ꠟꠤꠞ ꠘꠥꠞ, ꠔꠣꠘ ꠝꠣꠎꠖꠤꠀꠃ ꠀꠟ꠆ꠟꠣ ꠙꠣꠇꠦ ꠘꠤꠎꠞꠦ ꠎꠣꠁꠞ ꠇꠞꠍꠂꠘ। ꠅꠃ ꠝꠣꠄꠀꠞ ꠙꠥꠔ ꠇꠟꠤꠝꠣꠔꠥꠟ꠆ꠟꠣꠞ ꠢꠥꠇꠥꠝꠞ ꠛꠟꠦ, ꠔꠣꠝꠣꠝ ꠎꠉꠔꠞ ꠢꠇ꠆ꠇꠟꠔꠣ ꠌꠟꠦ। ꠔꠣꠁꠘ ꠖꠥꠘꠤꠀꠞ ꠝꠣꠘꠡꠞ ꠉꠥꠘꠣꠞꠦ ꠗꠁꠀ ꠍꠣꠚ ꠇꠞꠤꠀ, ꠀꠞꠡꠦ-ꠀꠎꠤꠝꠅ ꠀꠟ꠆ꠟꠣꠞ ꠒꠣꠁꠘꠞ ꠔꠈ꠆ꠔꠅ ꠔꠡꠞꠤꠚ ꠞꠣꠈꠍꠂꠘ।
HEB 1:4 ꠁꠔꠣ ꠖꠦꠈꠤꠀ ꠀꠝꠞꠣ ꠛꠥꠎꠤ, ꠀꠟ꠆ꠟꠣꠄ ꠔꠣꠘꠞꠦ ꠚꠤꠞꠤꠡ꠆ꠔꠣ ꠅꠇꠟ ꠕꠣꠇꠤ ꠀꠞꠅ ꠛꠦꠡꠤ ꠝꠞꠔꠥꠛꠣ ꠀꠟꠣ ꠘꠣꠝ ꠖꠤꠍꠂꠘ, ꠀꠞ ꠎꠦꠟꠣ ꠘꠣꠝ ꠅꠃꠟꠣ ꠁꠎ꠆ꠎꠔꠅ ꠖꠣꠘ ꠇꠞꠍꠂꠘ।
HEB 1:5 ꠀꠟ꠆ꠟꠣꠄ ꠇꠥꠘꠥꠖꠤꠘ ꠇꠥꠘꠥ ꠚꠤꠞꠤꠡ꠆ꠔꠣꠞꠦ ꠁꠟꠣ ꠇꠕꠣ ꠇꠁꠍꠂꠘ ꠘꠣ, ꠔꠥꠝꠤ ꠔ ꠀꠝꠣꠞ ꠙꠥꠔ, ꠀꠁꠎꠃ ꠀꠝꠤ ꠔꠥꠝꠣꠞ ꠛꠣꠚꠞ ꠟꠣꠈꠣꠘ ꠅꠁꠟꠣꠝ। ꠛꠣ, ꠀꠝꠤꠃ ꠔꠣꠞ ꠛꠣꠚꠞ ꠟꠣꠈꠣꠘ ꠅꠁꠝꠥ ꠀꠞ ꠢꠦ ꠅꠁꠛ ꠀꠝꠣꠞ ꠙꠥꠔ।
HEB 1:6 ꠔꠣꠁꠘ ꠎꠦꠛꠟꠣ ꠔꠣꠘ ꠈꠣꠍ ꠙꠞꠗꠣꠘ ꠙꠥꠔꠞꠦ ꠖꠥꠘꠤꠀꠔ ꠛꠦꠎꠤꠟꠣ, ꠅꠃ ꠡꠝꠄ ꠚꠤꠞꠤꠡ꠆ꠔꠣ ꠅꠇꠟꠞꠦ ꠢꠥꠇꠥꠝ ꠖꠤꠟꠣ, ꠅ ꠚꠤꠞꠤꠡ꠆ꠔꠣ ꠅꠇꠟ, ꠔꠥꠝꠞꠣ ꠄꠘꠞꠦ ꠍꠁꠎꠖꠣ ꠇꠞꠅ।
HEB 1:7 ꠀꠟ꠆ꠟꠣꠄ ꠚꠤꠞꠤꠡ꠆ꠔꠣ ꠅꠇꠟꠞ ꠛꠦꠙꠣꠞꠦ ꠇꠁꠞꠣ, ꠚꠤꠞꠤꠡ꠆ꠔꠣ ꠅꠇꠟꠞꠦ ꠔꠣꠁꠘ ꠢꠣꠅꠀꠞ ꠘꠝꠥꠘꠣꠄ ꠙꠄꠖꠣ ꠇꠞꠍꠂꠘ, ꠘꠤꠎꠞ ꠈꠣꠖꠤꠝ ꠅꠇꠟꠞꠦ ꠀꠉꠥꠘꠤꠞ ꠚꠥꠟꠇꠤꠞ ꠟꠣꠈꠣꠘ ꠛꠣꠘꠣꠁꠍꠂꠘ।
HEB 1:8 ꠅꠁꠟꠦ ꠅꠃ ꠙꠥꠔꠞ ꠛꠦꠙꠣꠞꠦ ꠔꠣꠁꠘ ꠇꠁꠞꠣ, ꠁꠀ ꠄꠟꠣꠢꠤ, ꠔꠥꠝꠣꠞ ꠔꠈ꠆ꠔ ꠢꠞ-ꠢꠣꠝꠦꠡꠣ ꠛꠅꠀꠁꠟ ꠞꠁꠛ, ꠔꠥꠝꠣꠞ ꠁꠘꠍꠣꠚꠃ ꠅꠁꠟ ꠢꠇ ꠁꠘꠍꠣꠚ,
HEB 1:9 ꠔꠥꠝꠤ ꠘꠣꠚꠞꠝꠣꠘꠤꠞꠦ ꠊꠤꠘ꠆ꠘꠣꠅ ꠀꠞ ꠖꠤꠘꠖꠣꠞꠤꠞꠦ ꠜꠣꠟꠣ ꠙꠣꠅ, ꠄꠞꠟꠣꠉꠤ ꠀꠟ꠆ꠟꠣꠄꠅ, ꠔꠥꠝꠣꠞ ꠀꠟ꠆ꠟꠣꠄ ꠔꠥꠝꠣꠞꠦ ꠈꠦꠟꠣꠚꠔꠤ ꠖꠤꠍꠂꠘ, ꠔꠥꠝꠣꠞꠦ ꠁꠎ꠆ꠎꠔꠤ ꠉꠖꠤ ꠖꠣꠘ ꠇꠞꠍꠂꠘ, ꠔꠥꠝꠣꠞ ꠜꠣꠁ-ꠛꠤꠞꠣꠖꠞ ꠕꠣꠇꠤꠅ ꠔꠥꠝꠣꠞꠦ ꠛꠃꠔ ꠛꠦꠡꠤ ꠈꠥꠡꠤ ꠖꠤꠍꠂꠘ।
HEB 1:10 ꠀꠟ꠆ꠟꠣꠄ ꠀꠞꠅ ꠇꠁꠞꠣ, ꠅ ꠝꠣꠟꠤꠇ, ꠔꠥꠝꠤꠃ ꠙꠄꠟꠣ ꠖꠥꠘꠤꠀꠞ ꠁꠀꠘ ꠈꠥꠐꠤ ꠉꠣꠠꠤꠍ, ꠀꠍꠝꠣꠘ ꠅꠇꠟꠅ ꠔꠥꠝꠣꠞ ꠀꠔꠦ ꠙꠄꠖꠣ ꠇꠞꠍꠦ।
HEB 1:11 ꠁꠔꠣ ꠢꠇ꠆ꠇꠟꠔꠣ ꠛꠤꠘꠣꠡ ꠅꠁꠎꠤꠛ, ꠅꠁꠟꠦ ꠔꠥꠝꠤ ꠔ ꠢꠣꠝꠦꠡꠣ ꠛꠅꠀꠁꠟ ꠞꠁꠛꠣꠄ। ꠁꠔꠣ ꠇꠣꠙꠠꠞ ꠟꠣꠈꠣꠘ ꠙꠥꠞꠣꠘ ꠅꠁꠎꠤꠛ,
HEB 1:12 ꠔꠥꠝꠤ ꠁꠔꠣꠞꠦ ꠌꠣꠖ꠆ꠖꠞꠞ ꠟꠣꠈꠣꠘ ꠜꠣꠁꠘ꠆ꠎ ꠇꠞꠤꠀ ꠕꠁꠛꠣꠄ, ꠚꠤꠘ꠆ꠖꠤꠛꠣꠞ ꠇꠣꠙꠠꠞ ꠟꠣꠈꠣꠘ ꠁꠔꠣ ꠢꠇ꠆ꠇꠟꠔꠣ ꠛꠖꠟꠣꠁꠛꠣꠄ। ꠅꠁꠟꠦ ꠔꠥꠝꠤ ꠎꠦꠟꠣ ꠀꠍ, ꠅꠃꠟꠣꠃ ꠞꠁꠛꠣꠄ, ꠔꠥꠝꠣꠞ ꠢꠣꠄꠀꠔꠤ ꠇꠥꠘꠥꠖꠤꠘꠃ ꠚꠥꠠꠣꠁꠔ ꠘꠣꠄ।
HEB 1:13 ꠀꠞ ꠀꠟ꠆ꠟꠣꠄ ꠇꠥꠘꠥꠖꠤꠘ ꠇꠥꠘꠥ ꠚꠤꠞꠤꠡ꠆ꠔꠣꠞꠦ ꠁꠟꠣ ꠇꠕꠣ ꠇꠁꠍꠂꠘ ꠘꠣ, ꠔꠥꠝꠣꠞ ꠖꠥꠡꠝꠘ ꠅꠇꠟꠞꠦ ꠎꠔꠖꠤꠘ ꠔꠥꠝꠣꠞ ꠙꠣꠅꠞ ꠔꠟꠣꠔ ꠘꠣ ꠚꠣꠟꠣꠁ, ꠅꠔꠖꠤꠘ ꠔꠥꠝꠤ ꠀꠝꠣꠞ ꠘꠤꠎꠞ ꠔꠈ꠆ꠔꠞ ꠒꠣꠁꠘ ꠉꠣꠟꠣꠔ ꠛꠅ।
HEB 1:14 ꠚꠤꠞꠤꠡ꠆ꠔꠣ ꠅꠇꠟ ꠔ ꠈꠣꠟꠤ ꠈꠦꠎꠝꠔ ꠇꠞꠞꠣ ꠞꠥꠢꠥ ꠘꠣꠄ ꠘꠤ? ꠎꠦꠞꠣ ꠘꠣꠎꠣꠔ ꠢꠣꠍꠤꠟ ꠇꠞꠛꠣ, ꠔꠣꠞꠣꠞ ꠃꠙꠇꠣꠞ ꠇꠞꠣꠞ ꠟꠣꠉꠤꠃ ꠄꠞꠣꠞꠦ ꠛꠦꠎꠣ ꠅꠁꠍꠦ।
HEB 2:1 ꠔꠦ ꠅꠃ ꠙꠥꠔꠞ ꠛꠦꠙꠣꠞꠦ ꠀꠝꠞꠣ ꠎꠔꠔꠣ ꠢꠥꠘꠍꠤ, ꠁꠔꠣ ꠈꠥꠛ ꠈꠤꠀꠟ ꠇꠞꠤꠀ ꠡꠝꠎꠣ ꠖꠞꠇꠣꠞ, ꠀꠞꠘꠣꠄ ꠀꠡ꠆ꠔꠦ ꠀꠡ꠆ꠔꠦ ꠁ ꠔꠣꠟꠤꠝ ꠕꠣꠇꠤ ꠛꠦ-ꠙꠕꠦ ꠎꠣꠁꠔꠣꠝꠉꠤ ꠙꠣꠞꠤ।
HEB 2:2 ꠚꠤꠞꠤꠡ꠆ꠔꠣꠞ ꠝꠣꠞꠚꠔꠦ ꠛꠣꠔꠣꠁꠟ ꠇꠣꠟꠣꠝ ꠎꠦꠛꠟꠣ ꠇꠣꠁꠝ ꠞꠁꠍꠦ, ꠀꠞ ꠎꠦꠞꠣ ꠁ ꠇꠣꠟꠣꠝꠞ ꠃꠟꠐꠣ ꠌꠟꠍꠤꠟ, ꠄꠞꠣꠅ ꠔꠣꠞꠣꠞ ꠙꠣꠅꠘꠣ ꠡꠣꠎꠣ ꠙꠣꠁꠍꠦ,
HEB 2:3 ꠔꠣꠁꠟꠦ ꠀꠟ꠆ꠟꠣꠄ ꠔꠣꠘ ꠈꠣꠍ ꠝꠦꠢꠦꠞꠛꠣꠘꠤꠄ ꠀꠝꠞꠣꠞ ꠟꠣꠉꠤ ꠅꠈꠘ ꠎꠦ ꠘꠣꠎꠣꠔꠞ ꠙꠕ ꠔꠤꠀꠞ ꠇꠞꠍꠂꠘ, ꠁ ꠙꠕꠞ ꠃꠟꠐꠣ ꠌꠟꠟꠦ ꠀꠝꠞꠣ ꠇꠥꠘꠥ ꠛꠣꠌꠝꠥ ꠘꠤ? ꠅꠃ ꠘꠣꠎꠣꠔꠞ ꠇꠕꠣ ꠔ ꠢꠇ꠆ꠇꠟ ꠙꠄꠟꠣ ꠝꠣꠟꠤꠇ ꠁꠍꠣꠄ ꠘꠤꠎꠦꠃ ꠇꠁꠍꠂꠘ, ꠀꠞ ꠎꠦꠞꠣ ꠁꠔꠣ ꠢꠥꠘꠍꠤꠟ ꠔꠣꠞꠣꠅ ꠙꠥꠞꠣꠙꠥꠞ ꠍꠣꠚ ꠇꠞꠤꠀ ꠀꠝꠞꠣꠞꠦ ꠇꠁꠍꠂꠘ, ꠁꠔꠣ ꠄꠇ꠆ꠇꠦꠛꠣꠞꠦ ꠢꠣꠍꠣ।
HEB 2:4 ꠄꠞꠣꠞ ꠟꠉꠦ ꠀꠟ꠆ꠟꠣꠄ ꠘꠤꠎꠦꠅ ꠘꠣꠘꠣꠘ ꠇꠤꠍꠤꠝꠞ ꠇꠥꠖꠞꠔꠤ ꠀꠟꠣꠝꠔ, ꠇꠦꠞꠣꠝꠔꠤꠞ ꠛꠟ-ꠔꠣꠇ꠆ꠇꠔꠖꠤ ꠅꠃ ꠘꠣꠎꠣꠔꠞ ꠙꠇ꠆ꠇꠦ ꠡꠣꠇ꠆ꠇꠤ ꠖꠤꠍꠂꠘ। ꠀꠞ ꠘꠤꠎꠞ ꠝꠞ꠆ꠎꠤꠄ ꠙꠣꠇ ꠞꠥꠢꠥꠞ ꠖꠦꠅꠀ ꠘꠣꠘꠣꠘ ꠘꠤꠀꠝꠔ ꠛꠤꠟꠣꠁ ꠖꠤꠀꠅ ꠡꠣꠇ꠆ꠇꠤ ꠖꠤꠍꠂꠘ।
HEB 2:5 ꠔꠦ ꠀꠝꠞꠣ ꠎꠦ ꠛꠣꠔꠥꠘꠤ ꠛꠣꠖꠡꠣꠁꠞ ꠇꠕꠣ ꠇꠁꠀꠞ, ꠁ ꠛꠣꠖꠡꠣꠁ ꠔ ꠀꠟ꠆ꠟꠣꠄ ꠇꠥꠘꠥ ꠚꠤꠞꠤꠡ꠆ꠔꠣꠞ ꠎꠤꠝ꠆ꠝꠣꠄ ꠞꠣꠈꠍꠂꠘ ꠘꠣ।
HEB 2:6 ꠛꠞꠋ ꠀꠟ꠆ꠟꠣꠞ ꠇꠣꠟꠣꠝꠞ ꠝꠣꠎꠦ ꠄꠇꠎꠘꠦ ꠛꠣꠔꠣꠁꠍꠂꠘ, ꠝꠣꠘꠥꠡ ꠀꠞꠇꠔꠣ ꠇꠤꠔꠣ ꠎꠦꠘ ꠔꠥꠝꠤ ꠔꠣꠞꠣꠞꠦ ꠁꠀꠖ ꠇꠞ? ꠝꠣꠘꠡꠞ ꠀꠅꠟꠣꠖꠃ ꠛꠣ ꠇꠤꠔꠣ ꠎꠦꠘ ꠔꠣꠞꠣꠞꠦ ꠖꠦꠈꠣ-ꠢꠥꠘꠣ ꠇꠞ?
HEB 2:7 ꠔꠥꠝꠤ ꠔ ꠝꠣꠘꠡꠞꠦ ꠚꠤꠞꠤꠡ꠆ꠔꠣ ꠕꠣꠇꠤ ꠈꠣꠟꠤ ꠕꠥꠠꠣ ꠟꠣꠝꠣꠔ ꠟꠣꠝꠣꠁꠍ, ꠉꠃꠞꠛ ꠀꠞ ꠁꠎ꠆ꠎꠔꠞ ꠝꠣꠟꠣ ꠔ ꠝꠣꠘꠡꠞꠦꠃ ꠖꠣꠘ ꠇꠞꠍ।
HEB 2:8 ꠔꠥꠝꠣꠞ ꠙꠄꠖꠣ ꠢꠇ꠆ꠇꠟꠔꠣꠞ ꠃꠙꠞꠦ ꠄꠞꠣꠞꠦ ꠁꠎ꠆ꠎꠔ ꠖꠤꠍ, ꠢꠇ꠆ꠇꠟꠔꠣꠃ ꠄꠞꠣꠞ ꠙꠣꠅꠞ ꠔꠟꠣꠔ, ꠄꠞꠣꠞ ꠀꠅꠔꠣꠄ ꠞꠣꠈꠍ। ꠔꠦ ꠀꠟ꠆ꠟꠣꠄ ꠢꠇ꠆ꠇꠟꠔꠣꠞꠦ ꠄꠞꠣꠞ ꠀꠅꠔꠣꠄ ꠀꠘꠣꠄ, ꠄꠞꠣꠞ ꠈꠦꠝꠔꠣꠞ ꠛꠣꠞꠦ ꠀꠞ ꠇꠥꠘ꠆ꠔꠣꠃ ꠞꠁꠍꠦ ꠘꠣ। ꠅꠁꠟꠦ ꠅꠈꠘꠅ ꠔ ꠢꠇ꠆ꠇꠟꠔꠣꠞꠦ ꠀꠝꠞꠣꠞ ꠘꠤꠎꠞ ꠀꠅꠔꠣꠄ ꠖꠦꠈꠞꠣꠝ ꠘꠣ।
HEB 2:9 ꠈꠣꠟꠤ ꠢꠃ ꠁꠍꠣꠞꠦ ꠖꠦꠈꠞꠣꠝ, ꠔꠣꠘꠞꠦ ꠚꠤꠞꠤꠡ꠆ꠔꠣ ꠅꠇꠟ ꠕꠣꠇꠤ ꠕꠥꠠꠣ ꠟꠣꠝꠣꠔ ꠟꠣꠝꠣꠁꠟ ꠅꠁꠍꠤꠟ, ꠎꠣꠔꠦ ꠀꠟ꠆ꠟꠣꠞ ꠞꠢꠝꠔꠦ ꠖꠥꠘꠤꠀꠞ ꠔꠣꠝꠣꠝ ꠝꠣꠘꠡꠞ ꠎꠣꠘ ꠛꠣꠌꠣꠘꠤꠞ ꠟꠣꠉꠤ, ꠔꠣꠘ ꠘꠤꠎꠞ ꠎꠣꠘ ꠛꠤꠟꠣꠁ ꠖꠦꠁꠘ। ꠢꠣꠍꠣꠃ ꠔꠣꠁꠘ ꠈꠥꠛ ꠇꠡ꠆ꠐ ꠙꠣꠁꠀ ꠘꠤꠎꠞ ꠎꠣꠘ ꠛꠤꠟꠣꠁ ꠖꠤꠀ ꠝꠣꠞꠣ ꠉꠦꠍꠂꠘ, ꠄꠞꠟꠣꠉꠤꠃ ꠖꠦꠈꠞꠣꠝ, ꠀꠟ꠆ꠟꠣꠄ ꠔꠣꠘꠞꠦ ꠅꠃ ꠁꠎ꠆ꠎꠔ ꠀꠞ ꠉꠃꠞꠛꠞ ꠝꠣꠟꠣ ꠚꠤꠘ꠆ꠖꠣꠁꠍꠂꠘ।
HEB 2:10 ꠀꠍꠟꠦ ꠢꠇ꠆ꠇꠟꠔꠣꠃ ꠔ ꠀꠟ꠆ꠟꠣꠞ ꠟꠣꠉꠤ, ꠔꠣꠁꠘꠃ ꠢꠇ꠆ꠇꠟꠔꠣ ꠙꠄꠖꠣ ꠇꠞꠍꠂꠘ, ꠀꠞ ꠔꠣꠘ ꠈꠤꠀꠟ ꠅꠁꠟ ꠔꠣꠘ ꠛꠃꠔ ꠀꠅꠟꠣꠖꠅ ꠔꠣꠘ ꠡꠣꠘ-ꠝꠢꠤꠝꠣꠞ ꠜꠣꠉꠤ ꠅꠁꠘ। ꠄꠞꠟꠣꠉꠤꠃ ꠔꠣꠞꠣꠞ ꠘꠣꠎꠣꠔꠞ ꠇꠣꠘ꠆ꠒꠣꠞꠤ ꠅꠃ ꠁꠍꠣꠞꠦ ꠖꠥꠈ-ꠇꠡ꠆ꠐ ꠖꠤꠀ ꠇꠣꠝꠤꠟ ꠛꠣꠘꠣꠁꠍꠂꠘ, ꠎꠣꠔꠦ ꠄꠘ ꠟꠉ ꠗꠞꠤꠀ ꠄꠞꠣ ꠔꠣꠘ ꠉꠦꠍꠦ ꠀꠁꠘ।
HEB 2:11 ꠔꠦ ꠎꠦ ꠁꠍꠣꠄ ꠝꠣꠘꠡꠞꠦ ꠙꠣꠇ-ꠍꠣꠚ ꠇꠞꠂꠘ ꠀꠞ ꠎꠦꠞꠣ ꠙꠣꠇ-ꠍꠣꠚ ꠛꠘꠂꠘ, ꠄꠞꠣ ꠢꠇ꠆ꠇꠟꠃ ꠔ ꠄꠇ ꠀꠟ꠆ꠟꠣꠞ ꠙꠞꠤꠛꠣꠞꠞ। ꠅꠔꠣꠞ ꠖꠣꠄ ꠁꠍꠣꠄ ꠄꠞꠣꠞꠦ ꠜꠣꠁ ꠇꠁꠀ ꠒꠣꠇꠔꠦ ꠇꠥꠘꠥ ꠡꠞꠝ ꠙꠣꠁꠘ ꠘꠣ।
HEB 2:12 ꠔꠣꠁꠘ ꠇꠁꠍꠂꠘ, ꠀꠝꠤ ꠀꠝꠣꠞ ꠜꠣꠁꠀꠁꠘ꠆ꠔꠞ ꠉꠦꠍꠦ ꠔꠥꠝꠣꠞ ꠘꠣꠝ ꠔꠛꠟꠤꠉ ꠇꠞꠝꠥ, ꠡꠝꠣꠎꠞ ꠝꠣꠎꠦ ꠔꠥꠝꠣꠞ ꠔꠣꠞꠤꠚ-ꠉꠎꠟ ꠉꠣꠁꠝꠥ।
HEB 2:13 ꠔꠣꠁꠘ ꠢꠤꠞꠛꠣꠞ ꠇꠁꠍꠂꠘ, ꠀꠝꠤ ꠀꠟ꠆ꠟꠣꠞ ꠃꠙꠞꠦ ꠜꠞꠡꠣ ꠇꠞꠝꠥ। ꠀꠞ ꠀꠞꠇꠛꠣꠞ ꠇꠁꠍꠂꠘ, ꠖꠦꠈꠃꠇ꠆ꠇꠣ, ꠀꠝꠤꠅ ꠀꠍꠤ ꠀꠞ ꠢꠃ ꠀꠅꠟꠣꠖ ꠅꠇꠟꠅ ꠅꠘꠅ ꠀꠍꠂꠘ, ꠎꠦꠞꠣꠞꠦ ꠀꠟ꠆ꠟꠣꠄ ꠀꠝꠣꠞ ꠀꠔꠅ ꠡꠙꠤꠀ ꠖꠤꠍꠂꠘ।
HEB 2:14 ꠀꠁꠌ꠆ꠍꠣ, ꠔꠦ ꠁ ꠀꠅꠟꠣꠖ ꠅꠇꠟ ꠔ ꠞꠇ꠆ꠔ-ꠝꠣꠋꠡꠞ ꠝꠣꠘꠥꠡ, ꠉꠔꠤꠇꠦ ꠁꠍꠣ ꠘꠤꠎꠦꠅ ꠅꠃꠟꠣ ꠞꠇ꠆ꠔ-ꠝꠣꠋꠡꠞ ꠇꠣꠄꠀꠄ ꠎꠘꠝ ꠟꠁꠟꠣ। ꠈꠣꠟꠤ ꠅꠃ ꠇꠣꠄꠀꠞ ꠝꠃꠔꠞ ꠃꠍꠤꠟ꠆ꠟꠣꠄ, ꠝꠃꠔꠞ ꠈꠦꠝꠔꠣꠞ ꠝꠣꠟꠤꠇ ꠢꠃ ꠁꠛꠟꠤꠍꠞꠦ ꠊꠣꠄꠄꠟ ꠇꠞꠔꠣ ꠙꠣꠞꠂꠘ,
HEB 2:15 ꠀꠞ ꠝꠞꠘꠞ ꠒꠞꠦ ꠎꠦꠞꠣ ꠢꠣꠞꠣ ꠎꠤꠘ꠆ꠖꠦꠉꠤ ꠝꠃꠔꠞ ꠉꠥꠟꠣꠝꠞ ꠟꠣꠈꠣꠘ ꠇꠣꠐꠣꠁꠞꠣ, ꠔꠣꠞꠣꠞꠦꠅ ꠀꠎꠣꠖ ꠇꠞꠔꠣ ꠙꠣꠞꠂꠘ।
HEB 2:16 ꠔꠣꠁꠘ ꠔ ꠚꠤꠞꠤꠡ꠆ꠔꠣ ꠅꠇꠟꠞꠦ ꠡꠣꠁꠎ꠆ꠎ ꠇꠞꠂꠘ ꠘꠣ, ꠈꠣꠟꠤ ꠁꠛ꠆ꠞꠣꠢꠤꠝꠞ ꠀꠅꠟꠣꠖ ꠅꠇꠟꠞꠦꠃ ꠡꠣꠁꠎ꠆ꠎ ꠇꠞꠞꠣ।
HEB 2:17 ꠁ ꠢꠇ꠆ꠇꠟꠔꠣ ꠙꠥꠞꠣꠙꠥꠞ ꠀꠖꠣꠄ ꠇꠞꠣꠞ ꠟꠣꠉꠤ ꠁꠍꠣꠞꠅ ꠎꠞꠥꠞ ꠀꠍꠤꠟ, ꠔꠣꠁꠘ ꠘꠤꠎꠦꠅ ꠅꠃ ꠜꠣꠁꠀꠁꠘ꠆ꠔꠞ ꠟꠉꠦ ꠢꠇꠟ ꠛꠦꠙꠣꠞꠦ ꠢꠝꠣꠘꠤ ꠅꠀ। ꠢꠝꠣꠘꠤ ꠅꠁꠀ ꠀꠟ꠆ꠟꠣꠞ ꠖꠞꠛꠣꠞꠅ ꠘꠤꠞꠜꠞ ꠇꠞꠣꠞ ꠎꠥꠇꠣ, ꠖꠤꠟ-ꠖꠞꠖꠤ ꠙꠞꠗꠣꠘ ꠁꠝꠣꠝ ꠅꠁꠔꠣ ꠙꠣꠞꠂꠘ। ꠁꠝꠣꠝ ꠛꠘꠤꠀ ꠝꠣꠘꠡꠞ ꠉꠥꠘꠣꠞ ꠇꠚꠞꠣꠞ ꠟꠣꠉꠤ ꠘꠤꠎꠞ ꠎꠣꠘ ꠇꠥꠞꠛꠣꠘꠤ ꠖꠦꠁꠘ।
HEB 2:18 ꠔꠣꠁꠘ ꠘꠤꠎꠦ ꠙꠞꠤꠇ꠆ꠇꠣꠔ ꠙꠠꠤꠀ ꠖꠥꠈ-ꠇꠡ꠆ꠐ ꠡꠁꠎ꠆ꠎ ꠇꠞꠍꠂꠘ, ꠄꠞꠟꠣꠉꠤꠃ ꠎꠦꠞꠣ ꠙꠞꠤꠇ꠆ꠇꠣꠔ ꠙꠠꠂꠘ ꠔꠣꠞꠣꠞꠦꠅ ꠔꠣꠁꠘ ꠡꠣꠁꠎ꠆ꠎ ꠇꠞꠔꠣ ꠙꠣꠞꠂꠘ।
HEB 3:1 ꠄꠞꠟꠣꠉꠤ ꠅ ꠀꠝꠣꠞ ꠙꠣꠇ-ꠙꠞꠦꠎꠉꠣꠞ ꠜꠣꠁ ꠅꠇꠟ, ꠔꠥꠝꠞꠣ ꠎꠦꠞꠣ ꠛꠦꠢꠦꠡ꠆ꠔꠤ ꠖꠣꠅꠔꠅ ꠡꠞꠤꠇ ꠅꠁꠍ, ꠔꠥꠝꠞꠣ ꠙꠞꠔꠦꠇꠦꠃ ꠁꠍꠣꠞ ꠛꠣꠄ ꠌꠃꠈ ꠞꠣꠈꠅ। ꠀꠟ꠆ꠟꠣ ꠙꠣꠇꠦ ꠔꠣꠘ ꠁ ꠈꠣꠍ ꠈꠟꠤꠚꠣꠞꠦ ꠛꠦꠎꠤꠍꠂꠘ, ꠔꠣꠁꠘꠃ ꠔ ꠢꠃ ꠙꠞꠗꠣꠘ ꠁꠝꠣꠝ, ꠁꠈꠣꠘ ꠀꠝꠞꠣ ꠝꠣꠘꠍꠤ।
HEB 3:2 ꠢꠎꠞꠔ ꠝꠥꠍꠣ ꠎꠦꠟꠣ ꠀꠟ꠆ꠟꠣꠞ ꠊꠞ-ꠡꠋꠡꠣꠞꠅ ꠘꠤꠞꠜꠞ ꠇꠞꠣꠞ ꠎꠥꠇꠣ ꠀꠍꠟꠣ, ꠅꠃ ꠟꠣꠈꠣꠘ ꠁꠍꠣꠞꠦꠅ ꠎꠦꠁꠘ ꠛꠦꠎꠤꠍꠂꠘ, ꠅꠃ ꠀꠟ꠆ꠟꠣꠞ ꠖꠞꠛꠣꠞꠅ ꠔꠣꠁꠘ ꠀꠍꠟꠣ ꠘꠤꠞꠜꠞ ꠇꠞꠣꠞ ꠎꠥꠇꠣ।
HEB 3:3 ꠔꠦ ꠊꠞ ꠛꠣꠘꠣꠅꠞꠣ ꠝꠣꠟꠤꠇꠦ ꠎꠦꠟꠣ ꠊꠞ ꠕꠣꠇꠤꠅ ꠛꠦꠡꠤ ꠁꠎ꠆ꠎꠔ ꠙꠣꠁꠘ, ꠅꠃ ꠟꠣꠈꠣꠘ ꠀꠟ꠆ꠟꠣꠞ ꠊꠞ-ꠡꠋꠡꠣꠞꠅ ꠢꠎꠞꠔ ꠁꠍꠣꠄꠅ ꠝꠥꠍꠣ ꠘꠛꠤ ꠕꠣꠇꠤ ꠛꠦꠡꠤ ꠁꠎ꠆ꠎꠔ ꠢꠣꠍꠤꠟ ꠇꠞꠍꠂꠘ।
HEB 3:4 ꠢꠇ꠆ꠇꠟ ꠊꠞꠣꠁꠘꠃ ꠔ ꠇꠥꠘꠥ ꠘꠣ ꠇꠥꠘꠥ ꠝꠣꠘꠡꠦ ꠛꠣꠘꠣꠁꠍꠂꠘ, ꠅꠁꠟꠦ ꠎꠦꠁꠘ ꠢꠇ꠆ꠇꠟꠔꠣ ꠛꠣꠘꠣꠁꠍꠂꠘ ꠔꠣꠁꠘꠃ ꠀꠟ꠆ꠟꠣ।
HEB 3:5 ꠀꠍꠟꠦ ꠍꠣꠝꠘꠞ ꠎꠝꠣꠘꠣꠞ ꠟꠣꠉꠤ ꠎꠦꠔꠣ ꠛꠣꠔꠣꠁꠟ ꠅꠁꠛ, ꠅꠔꠣ ꠛꠦꠙꠣꠞ ꠎꠣꠘꠣꠘꠤꠞ ꠟꠣꠉꠤ, ꠝꠥꠍꠣ ꠀꠍꠟꠣ ꠀꠟ꠆ꠟꠣꠞ ꠊꠞ-ꠡꠋꠡꠣꠞꠞ ꠇꠣꠝ-ꠇꠣꠎꠅ ꠘꠤꠞꠜꠞ ꠇꠞꠣꠞ ꠎꠥꠇꠣ ꠇꠣꠝꠟꠣꠞ ꠟꠣꠈꠣꠘ।
HEB 3:6 ꠅꠁꠟꠦ ꠀꠟ-ꠝꠍꠤ ꠔ ꠀꠟ꠆ꠟꠣꠞ ꠊꠞ-ꠡꠋꠡꠣꠞꠞ ꠎꠤꠝ꠆ꠝꠣꠖꠣꠞ ꠢꠤꠡꠣꠛꠦ ꠘꠤꠞꠜꠞ ꠇꠞꠣꠞ ꠎꠥꠇꠣ ꠙꠥꠔꠞ ꠟꠣꠈꠣꠘ ꠀꠍꠟꠣ। ꠅꠈꠘ ꠀꠝꠞꠣꠅ ꠎꠥꠖꠤ ꠎꠣꠞꠎꠤꠞ ꠖꠤꠟꠞ ꠀꠡꠣ ꠀꠞ ꠢꠤꠝ꠆ꠝꠔ ꠞꠣꠈꠤꠀ ꠝꠃꠔ ꠙꠞ꠆ꠎꠘ꠆ꠔ ꠇꠣꠁꠝ ꠞꠁ, ꠔꠦ ꠖꠦꠈꠣ ꠎꠣꠁꠛ ꠎꠦꠘ, ꠀꠝꠞꠣꠅ ꠀꠟ꠆ꠟꠣꠞ ꠊꠞ-ꠡꠋꠡꠣꠞꠞ ꠜꠣꠉꠤ ꠅꠁꠍꠤ।
HEB 3:7 ꠄꠞꠟꠣꠉꠤꠃ ꠀꠟ꠆ꠟꠣꠞ ꠙꠣꠇ ꠞꠥꠢꠦ ꠛꠣꠔꠣꠁꠍꠂꠘ, ꠀꠁꠎ ꠎꠥꠖꠤ ꠔꠥꠝꠞꠣ ꠔꠣꠘ ꠀꠅꠀꠎ ꠢꠥꠘ,
HEB 3:8 ꠔꠦ ꠔꠥꠝꠞꠣꠞ ꠝꠄ-ꠝꠥꠞꠛ꠆ꠛꠤꠞ ꠟꠣꠈꠣꠘ, ꠔꠥꠝꠞꠣꠞ ꠘꠤꠎꠞ ꠖꠤꠟꠞꠦ ꠙꠣꠡꠣꠘ ꠛꠣꠘꠣꠁꠅ ꠘꠣ। ꠀꠟ꠆ꠟꠣꠄ ꠇꠁꠞꠣ, ꠔꠣꠞꠣ ꠎꠦꠟꠣ ꠝꠞꠥꠜꠥꠝꠤꠞ ꠝꠣꠎꠦ, ꠀꠝꠣꠞ ꠛꠤꠞꠥꠖ꠆ꠖꠦ ꠉꠤꠀ ꠀꠝꠣꠞꠦ ꠙꠞꠤꠇ꠆ꠇꠣ ꠇꠞꠍꠟꠣ, ꠔꠥꠝꠞꠣ ꠁꠟꠣ ꠇꠞꠤꠅ ꠘꠣ।
HEB 3:9 ꠔꠥꠝꠞꠣꠞ ꠛꠣꠚ-ꠖꠣꠖꠣꠁꠘ꠆ꠔꠦ ꠌꠣꠟ꠆ꠟꠤꠡ ꠛꠍꠞ ꠗꠞꠤ ꠀꠝꠣꠞ ꠇꠥꠖꠞꠔꠤ ꠇꠣꠝ ꠖꠦꠈꠣꠞ ꠛꠣꠖꠦꠅ, ꠢꠘꠅ ꠀꠝꠣꠞꠦ ꠙꠞꠤꠇ꠆ꠇꠣ ꠇꠞꠍꠂꠘ।
HEB 3:10 ꠄꠞꠟꠣꠉꠤ ꠀꠝꠤ ꠔꠣꠞꠣꠞ ꠃꠙꠞꠦ ꠈꠥꠛ ꠛꠦꠎꠣꠞ ꠅꠁꠀ ꠇꠁꠟꠣꠝ, ꠄꠞꠣꠞ ꠖꠤꠟ ꠔ ꠢꠣꠝꠦꠡꠣ ꠛꠦ-ꠙꠕꠦ ꠌꠇ꠆ꠇꠞ ꠖꠦꠞ, ꠔꠣꠞꠣ ꠔ ꠀꠝꠣꠞ ꠙꠕ ꠌꠤꠘꠟ ꠘꠣ।
HEB 3:11 ꠔꠦꠃ ꠀꠝꠤ ꠉꠥꠍꠣ ꠇꠞꠤꠀ ꠇꠍꠝ ꠈꠣꠁꠀ ꠇꠁꠍꠟꠣꠝ, ꠀꠝꠣꠞ ꠖꠦꠅꠀ ꠢꠃ ꠀꠞꠣꠝꠞ ꠎꠣꠉꠣꠔ, ꠄꠞꠣ ꠢꠣꠝꠣꠁꠔ ꠙꠣꠞꠔ ꠘꠣꠄ।
HEB 3:12 ꠜꠣꠁꠀꠁꠘ ꠅꠇꠟ, ꠢꠥꠡꠤꠀꠞ ꠅꠅ! ꠔꠥꠝꠞꠣꠞ ꠖꠤꠟꠞ ꠝꠣꠎꠦ ꠎꠣꠘꠥ ꠘꠣꠚꠞꠝꠣꠘꠤ ꠀꠞ ꠛꠦꠁꠝꠣꠘꠤ ꠘꠣ ꠢꠣꠝꠣꠄ, ꠁꠔꠣ ꠢꠣꠝꠣꠁ ꠉꠦꠟꠦ ꠎꠤꠘ꠆ꠖꠣ ꠀꠟ꠆ꠟꠣꠞ ꠉꠦꠍ ꠕꠣꠇꠤ ꠘꠤꠎꠞꠦ ꠖꠥꠞꠁ ꠢꠞꠣꠁꠟꠣꠄ।
HEB 3:13 ꠁꠔꠣꠞ ꠛꠖꠟꠣ ꠎꠔꠖꠤꠘꠞꠦ ꠀꠁꠎ ꠇꠁꠀ ꠒꠣꠇꠣ ꠅꠄ, ꠅꠔꠖꠤꠘ ꠔꠥꠝꠞꠣ ꠄꠇꠦ-ꠅꠁꠘ꠆ꠘꠞꠦ ꠡꠣꠅꠡ ꠖꠦꠅ, ꠎꠣꠔꠦ ꠇꠦꠃ ꠉꠥꠘꠣꠞ ꠚꠣꠘ꠆ꠖꠅ ꠙꠠꠤꠀ ꠘꠤꠎꠞ ꠖꠤꠟꠞꠦ ꠙꠣꠡꠣꠘ ꠘꠣ ꠛꠣꠘꠣꠄ।
HEB 3:14 ꠇꠣꠞꠘ ꠀꠝꠞꠣ ꠎꠥꠖꠤ ꠙꠄꠟꠣꠇꠥꠞ ꠟꠣꠈꠣꠘ ꠢꠦꠡ ꠙꠞ꠆ꠎꠘ꠆ꠔ ꠁꠝꠣꠘꠦ ꠝꠎꠛꠥꠔ ꠞꠁꠀ ꠌꠟꠤ, ꠔꠦ ꠛꠥꠎꠣ ꠎꠣꠁꠛ ꠀꠝꠞꠣ ꠀꠟ-ꠝꠍꠤꠞ ꠟꠉꠦ ꠡꠞꠤꠇ ꠅꠁꠍꠤ।
HEB 3:15 ꠕꠥꠠꠣ ꠀꠉꠦ ꠛꠣꠔꠣꠁꠟ ꠅꠁꠍꠦ, ꠀꠁꠎ ꠎꠥꠖꠤ ꠔꠥꠝꠞꠣ ꠔꠣꠘ ꠀꠅꠀꠎ ꠢꠥꠘ, ꠔꠦ ꠔꠥꠝꠞꠣꠞ ꠝꠄ-ꠝꠥꠞꠛ꠆ꠛꠤꠞ ꠟꠣꠈꠣꠘ, ꠔꠥꠝꠞꠣꠞ ꠘꠤꠎꠞ ꠖꠤꠟꠞꠦ ꠙꠣꠡꠣꠘ ꠛꠣꠘꠣꠁꠅ ꠘꠣ।
HEB 3:16 ꠀꠁꠌ꠆ꠍꠣ ꠇꠅ ꠌꠣꠁꠘ, ꠀꠟ꠆ꠟꠣꠞ ꠘꠤꠎꠞ ꠎꠛꠣꠘꠞ ꠛꠥꠟꠤ ꠢꠥꠘꠣꠞ ꠛꠣꠖꠦꠅ ꠇꠦꠉꠤꠄ ꠔꠣꠘ ꠛꠤꠞꠥꠗꠤꠔꠣ ꠇꠞꠍꠤꠟ? ꠄꠞꠣꠃ ꠘꠣꠄ ꠘꠤ, ꠎꠦꠞꠣꠞꠦ ꠝꠥꠍꠣ ꠘꠛꠤꠄ ꠝꠤꠡꠞ ꠕꠣꠇꠤ ꠛꠣꠞ ꠇꠞꠤ ꠀꠘꠍꠤꠟꠣ?
HEB 3:17 ꠇꠅ ꠌꠣꠁꠘ, ꠀꠟ꠆ꠟꠣꠄ ꠌꠣꠟ꠆ꠟꠤꠡ ꠛꠍꠞ ꠗꠞꠤ ꠇꠣꠞ ꠃꠙꠞꠦ ꠛꠦꠎꠣꠞ ꠀꠍꠟꠣ? ꠄꠞꠣꠞ ꠃꠙꠞꠦꠃ ꠘꠣꠄ ꠘꠤ, ꠎꠦꠞꠣ ꠉꠥꠘꠣ ꠇꠞꠍꠟꠣ ꠀꠞ ꠝꠞꠥꠜꠥꠝꠤꠞ ꠝꠣꠎꠦ ꠟꠣꠡ ꠅꠁꠀ ꠙꠠꠍꠟꠣ?
HEB 3:18 ꠀꠟ꠆ꠟꠣꠄ ꠇꠣꠞ ꠃꠙꠞꠦ ꠛꠦꠎꠣꠞ ꠅꠁꠀ ꠇꠍꠝ ꠈꠣꠁꠀ ꠇꠁꠍꠟꠣ, “ꠀꠝꠣꠞ ꠖꠦꠅꠀ ꠢꠃ ꠀꠞꠣꠝꠞ ꠎꠣꠉꠣꠔ ꠄꠞꠣ ꠢꠣꠝꠣꠁꠔ ꠙꠣꠞꠔ ꠘꠣꠄ”? ꠅꠃ ꠄꠞꠣꠞ ꠃꠙꠞꠦꠃ ꠘꠣꠄ ꠘꠤ, ꠎꠦꠞꠣ ꠔꠣꠘ ꠎꠛꠣꠘꠞ ꠛꠥꠟꠤ ꠢꠥꠘꠤꠀꠅ ꠘꠣꠚꠞꠝꠣꠘꠤ ꠇꠞꠍꠤꠟ?
HEB 3:19 ꠅꠔꠣ ꠕꠣꠇꠤꠃ ꠔ ꠀꠝꠞꠣ ꠛꠥꠎꠞꠣꠝ, ꠁꠝꠣꠘ ꠘꠣ ꠀꠘꠣꠄ ꠔꠣꠞꠣ ꠀꠟ꠆ꠟꠣꠞ ꠖꠦꠅꠀ ꠢꠃ ꠀꠞꠣꠝꠞ ꠎꠣꠉꠣꠔ ꠢꠣꠝꠣꠁꠔ ꠙꠣꠞꠍꠦ ꠘꠣ।
HEB 4:1 ꠀꠟ꠆ꠟꠣꠞ ꠖꠦꠅꠀ ꠀꠞꠣꠝꠞ ꠎꠣꠉꠣꠔ ꠢꠣꠝꠣꠘꠤꠞ ꠅꠀꠖꠣ ꠅꠈꠘꠅ ꠀꠝꠞꠣꠞ ꠟꠣꠉꠤ ꠌꠣꠟꠥ ꠀꠍꠦ। ꠄꠞꠟꠣꠉꠤ ꠀꠅ, ꠀꠝꠞꠣ ꠀꠞꠅ ꠢꠥꠡꠤꠀꠞ ꠅꠁꠀ ꠌꠟꠤ, ꠘꠣꠁꠟꠦ ꠖꠦꠈꠣ ꠎꠣꠁꠛ ꠢꠦꠡꠦ ꠔꠥꠝꠞꠣ ꠇꠦꠃ ꠀꠞꠣꠝꠞ ꠎꠣꠉꠣ ꠕꠣꠇꠤ ꠛꠣꠖ ꠙꠠꠤꠉꠦꠍ।
HEB 4:2 ꠀꠝꠞꠣꠞ ꠉꠦꠍꠦ ꠎꠦꠟꠣ ꠈꠥꠡ-ꠈꠛꠞꠤ ꠔꠛꠟꠤꠉ ꠇꠞꠣ ꠅꠁꠍꠦ, ꠛꠘꠤ ꠁꠍꠞꠣꠁꠟꠞ ꠉꠦꠍꠦꠅ ꠅꠃꠟꠣ ꠔꠛꠟꠤꠉ ꠇꠞꠣ ꠅꠁꠍꠤꠟ, ꠁ ꠈꠥꠡ-ꠈꠛꠞꠤ ꠢꠥꠘꠤꠀ ꠔꠣꠞꠣꠞ ꠇꠥꠘꠥ ꠚꠣꠄꠖꠣ ꠅꠁꠍꠦ ꠘꠣ, ꠇꠣꠞꠘ ꠔꠣꠞꠣ ꠁꠔꠣ ꠢꠥꠘꠟꠦꠅ ꠁꠝꠣꠘ ꠀꠘꠍꠦ ꠘꠣ।
HEB 4:3 ꠅꠁꠟꠦ ꠀꠝꠞꠣ ꠔ ꠁꠝꠣꠘ ꠀꠘꠍꠤ ꠀꠞ ꠀꠟ꠆ꠟꠣꠞ ꠅꠀꠖꠣ ꠇꠞꠣ ꠢꠃ ꠀꠞꠣꠝꠞ ꠎꠣꠉꠣꠔ ꠢꠣꠝꠣꠁꠔꠣꠝ ꠙꠣꠞꠤꠀꠞ। ꠅꠃ ꠀꠞꠣꠝꠞ ꠛꠦꠙꠣꠞꠦ ꠀꠟ꠆ꠟꠣꠄ ꠇꠁꠍꠂꠘ, ꠔꠦꠃ ꠀꠝꠤ ꠉꠥꠍꠣ ꠇꠞꠤꠀ ꠇꠍꠝ ꠈꠣꠁꠀ ꠇꠁꠍꠟꠣꠝ, ꠀꠝꠣꠞ ꠖꠦꠅꠀ ꠢꠃ ꠀꠞꠣꠝꠞ ꠎꠣꠉꠣꠔ, ꠄꠞꠣ ꠢꠣꠝꠣꠁꠔ ꠙꠣꠞꠔ ꠘꠣꠄ। ꠎꠥꠖꠤꠅ ꠖꠥꠘꠤꠀ ꠙꠄꠖꠣ ꠇꠞꠣꠞ ꠛꠣꠖ ꠕꠣꠇꠤꠃ, ꠀꠟ꠆ꠟꠣꠞ ꠁ ꠀꠞꠣꠝ ꠔꠤꠀꠞ ꠇꠞꠣ ꠅꠁꠍꠦ, ꠔꠣ-ꠅ ꠔꠣꠁꠘ ꠅꠟꠣ ꠇꠁꠍꠂꠘ।
HEB 4:4 ꠅꠃ ꠀꠞꠣꠝꠞ ꠛꠦꠙꠣꠞꠦ ꠀꠞꠇ ꠀꠄꠀꠔꠅ ꠟꠦꠈꠣ ꠀꠍꠦ, “ꠀꠟ꠆ꠟꠣꠄ ꠁ ꠢꠇꠟ ꠇꠣꠝ ꠡꠦꠡ ꠇꠞꠤꠀ ꠡꠣꠔ ꠘꠝ꠆ꠛꠞ ꠖꠤꠘ ꠀꠞꠣꠝ ꠇꠞꠟꠣ, ꠔꠣꠁꠘ ꠁꠖꠤꠘ ꠀꠞ ꠇꠥꠘ꠆ꠔꠣ ꠙꠄꠖꠣ ꠇꠞꠟꠣ ꠘꠣ।”
HEB 4:5 ꠅꠁꠟꠦ ꠔꠣꠁꠘꠃ ꠢꠤꠞꠛꠣꠞ ꠇꠁꠍꠂꠘ, ꠀꠝꠣꠞ ꠖꠦꠅꠀ ꠢꠃ ꠀꠞꠣꠝꠞ ꠎꠣꠉꠣꠔ, ꠄꠞꠣ ꠢꠣꠝꠣꠁꠔ ꠙꠣꠞꠔ ꠘꠣꠄ।
HEB 4:6 ꠄꠞꠟꠣꠉꠤ ꠅꠃ ꠇꠕꠣꠃ ꠚꠄꠍꠣꠟꠣ ꠅꠁꠟ ꠎꠦꠘ, ꠇꠤꠍꠥ ꠝꠣꠘꠥꠡ ꠀꠟ꠆ꠟꠣꠞ ꠢꠤ ꠀꠞꠣꠝꠞ ꠝꠣꠎꠦ ꠢꠣꠝꠣꠁꠔꠣ ꠙꠣꠞꠛꠣ, ꠅꠁꠟꠦ ꠙꠄꠟꠣ ꠎꠦꠞꠣꠞ ꠉꠦꠍꠦ ꠈꠥꠡ-ꠈꠛꠞꠤ ꠔꠛꠟꠤꠉ ꠇꠞꠣ ꠅꠁꠍꠤꠟ, ꠔꠣꠞꠣꠞ ꠘꠣꠚꠞꠝꠣꠘꠤꠞ ꠇꠣꠞꠘꠦꠃ ꠔꠣꠞꠣ ꠀꠟ꠆ꠟꠣꠞ ꠢꠤ ꠀꠞꠣꠝꠞ ꠝꠣꠎꠦ ꠢꠣꠝꠣꠁꠔ ꠙꠣꠞꠍꠦ ꠘꠣ।
HEB 4:7 ꠀꠟ꠆ꠟꠣꠄ ꠛꠃꠔ ꠖꠤꠘ ꠀꠉꠦ ꠁꠔꠣ ꠛꠘꠤ ꠁꠍꠞꠣꠁꠟꠞ ꠉꠦꠍꠦ ꠛꠣꠔꠣꠁꠍꠟꠣ, ꠛꠣꠖꠦ ꠔꠣꠘ ꠀꠞꠣꠝꠞ ꠝꠣꠎꠦ ꠢꠣꠝꠣꠘꠤꠞ ꠟꠣꠉꠤ ꠢꠤꠞꠛꠣꠞ ꠘꠄꠀ ꠖꠤꠘ ꠑꠤꠇ ꠇꠞꠤꠀ ꠅꠃ ꠖꠤꠘꠞ ꠘꠣꠝ ꠖꠤꠟꠣ, ꠀꠁꠎ। ꠢꠤꠞꠛꠣꠞ ꠛꠃꠔ ꠖꠤꠘ ꠛꠣꠖꠦ ꠔꠣꠁꠘ ꠖꠣꠃꠖ ꠘꠛꠤꠞ ꠉꠦꠍꠦ ꠇꠁꠍꠂꠘ, ꠎꠦꠟꠣ ꠃꠙꠞꠦ ꠟꠦꠈꠣ ꠀꠍꠦ, ꠀꠁꠎ ꠎꠥꠖꠤ ꠔꠥꠝꠞꠣ ꠔꠣꠘ ꠀꠅꠀꠎ ꠢꠥꠘꠅ, ꠔꠦ ꠔꠥꠝꠞꠣꠞ ꠘꠤꠎꠞ ꠖꠤꠟꠞꠦ ꠙꠣꠡꠣꠘ ꠛꠣꠘꠣꠁꠅ ꠘꠣ।
HEB 4:8 ꠅꠈꠣꠘ ꠇꠅꠀꠞ ꠝꠣꠘꠤ ꠅꠁꠟ, ꠢꠎꠞꠔ ꠝꠥꠍꠣꠞ ꠝꠃꠔꠞ ꠛꠣꠖꠦ ꠁꠃꠍꠣ ꠘꠛꠤꠄ ꠎꠥꠖꠤ ꠔꠣꠞꠣꠞꠦ ꠢꠤ ꠀꠞꠣꠝꠅ ꠢꠣꠞꠣꠁꠟꠤꠔꠣ ꠙꠣꠞꠔꠣ, ꠔꠦ ꠀꠟ꠆ꠟꠣꠄ ꠛꠣꠖꠦ ꠀꠞꠇ ꠖꠤꠘꠞ ꠇꠕꠣ ꠇꠁꠟꠣ ꠘꠣ ꠅꠘꠦ।
HEB 4:9 ꠔꠦ ꠛꠥꠎꠣ ꠎꠣꠄ, ꠀꠞꠣꠝꠅ ꠢꠣꠝꠣꠘꠤꠞ ꠙꠕ ꠀꠟ꠆ꠟꠣꠞ ꠛꠘ꠆ꠖꠣ ꠅꠇꠟꠞ ꠟꠣꠉꠤ ꠅꠈꠘꠅ ꠈꠥꠟꠣ ꠀꠍꠦ।
HEB 4:10 ꠝꠥꠟ ꠇꠕꠣ ꠅꠁꠟ, ꠀꠟ꠆ꠟꠣꠄ ꠎꠦꠟꠣ ꠔꠣꠘ ꠢꠇ꠆ꠇꠟ ꠇꠣꠝ ꠡꠦꠡ ꠇꠞꠤꠀ ꠛꠣꠖꠦ ꠀꠞꠣꠝ ꠇꠞꠍꠟꠣ, ꠅꠃ ꠟꠣꠈꠣꠘ ꠇꠥꠘꠥ ꠛꠘ꠆ꠖꠣꠅ ꠔꠣꠘ ꠀꠞꠣꠝꠞ ꠝꠣꠎꠦ ꠢꠣꠝꠣꠁꠀ ꠢꠣꠞꠟꠦ, ꠢꠦ-ꠅ ꠔꠣꠞ ꠇꠣꠝ ꠕꠣꠇꠤ ꠀꠞꠣꠝ ꠙꠣꠄ।
HEB 4:11 ꠔꠦ ꠀꠅ, ꠀꠝꠞꠣꠅ ꠢꠤ ꠀꠞꠣꠝꠞ ꠝꠣꠎꠦ ꠢꠣꠝꠣꠘꠤꠞ ꠟꠣꠉꠤ ꠈꠣꠍ ꠖꠤꠟꠦ ꠀꠉꠥꠀꠁ, ꠎꠣꠔꠦ ꠢꠃ ꠘꠣꠚꠞꠝꠣꠘ ꠛꠘꠤ ꠁꠍꠞꠣꠁꠟꠞ ꠟꠣꠈꠣꠘ ꠀꠟ꠆ꠟꠣꠞ ꠢꠥꠇꠥꠝꠞ ꠛꠤꠞꠥꠖ꠆ꠖꠦ ꠉꠤꠀ, ꠁ ꠀꠞꠣꠝ ꠕꠣꠇꠤ ꠛꠣꠖ ꠘꠣ ꠙꠠꠤ।
HEB 4:12 ꠀꠟ꠆ꠟꠣꠞ ꠇꠣꠟꠣꠝ ꠔ ꠎꠤꠘ꠆ꠖꠣ ꠀꠞ ꠛꠟꠀꠟꠣ ꠇꠣꠝꠟꠣ, ꠖꠥꠁꠅ ꠉꠣꠟꠣ ꠗꠣꠞꠣꠁꠟ ꠔꠟꠥꠀꠞꠞ ꠌꠣꠁꠔꠦꠅ ꠛꠦꠡꠤ ꠗꠣꠞꠀꠟꠣ। ꠁ ꠇꠣꠟꠣꠝꠦ ꠚꠥꠠ ꠇꠞꠤꠀ ꠝꠣꠘꠡꠞ ꠜꠤꠔꠞꠦ ꠢꠣꠝꠣꠁꠀ ꠖꠤꠟ-ꠞꠥꠢꠥ, ꠀꠒ꠆ꠒꠤ-ꠉꠥꠡ꠆ꠔꠞꠦ ꠀꠟꠉꠣꠄ, ꠀꠞ ꠖꠤꠟꠞ ꠜꠤꠔꠞꠞ ꠘꠤꠅꠔ-ꠌꠤꠘ꠆ꠔꠣ ꠢꠇ꠆ꠇꠟꠔꠣꠞꠦ ꠙꠞꠤꠇ꠆ꠇꠣ ꠇꠞꠤꠀ ꠖꠦꠈꠦ।
HEB 4:13 ꠀꠟ꠆ꠟꠣꠞ ꠙꠄꠖꠣ ꠇꠞꠣ ꠇꠥꠘꠥ ꠝꠈꠟꠥꠇꠣꠔꠃ ꠔꠣꠘ ꠉꠦꠍꠦ ꠟꠥꠇꠣꠁꠟ ꠘꠣꠄ। ꠔꠣꠘ ꠌꠃꠈꠞ ꠍꠣꠝꠘꠦ ꠢꠇ꠆ꠇꠟꠔꠣꠃ ꠈꠥꠟꠣ-ꠝꠦꠟꠣ ꠎꠣꠁꠞ ꠀꠍꠦ, ꠔꠣꠘ ꠉꠦꠍꠦꠃ ꠀꠝꠞꠣꠞ ꠢꠤꠡꠣꠛ ꠖꠤꠔꠦ ꠅꠁꠛ।
HEB 4:14 ꠀꠝꠞꠣ ꠔ ꠅꠟꠣ ꠄꠇ ꠙꠞꠗꠣꠘ ꠁꠝꠣꠝ ꠙꠣꠁꠍꠤ, ꠎꠦꠁꠘ ꠔꠣꠝꠣꠝ ꠀꠍꠝꠣꠘ ꠙꠣꠞ ꠅꠁꠀ ꠢꠣꠞꠤ ꠀꠟ꠆ꠟꠣꠞ ꠀꠞꠡꠅ ꠔꠡꠞꠤꠚ ꠘꠤꠍꠂꠘ, ꠔꠣꠁꠘꠃ ꠀꠟ꠆ꠟꠣꠞ ꠈꠣꠍ ꠝꠣꠄꠀꠞ ꠎꠘ, ꠁꠍꠣ ꠁꠛꠘꠥꠟ꠆ꠟꠣ। ꠔꠦ ꠀꠃꠇ꠆ꠇꠣ, ꠀꠝꠞꠣ ꠔꠣꠘ ꠇꠟꠤꠝꠣꠞꠦ ꠝꠎꠛꠥꠔ ꠇꠞꠤ ꠝꠣꠘꠤ।
HEB 4:15 ꠇꠣꠞꠘ ꠀꠝꠞꠣꠞ ꠙꠞꠗꠣꠘ ꠁꠝꠣꠝ ꠁ ꠟꠣꠈꠣꠘ ꠘꠣꠄ ꠎꠦꠘ, ꠀꠝꠞꠣꠞ ꠇꠥꠘꠥ ꠇꠝꠎꠥꠞꠤꠞ ꠖꠥꠈꠦ ꠔꠣꠁꠘ ꠖꠥꠈꠤ ꠅꠁꠔꠣ ꠘꠣꠄ, ꠔꠣꠁꠘꠅ ꠀꠝꠞꠣꠞ ꠟꠣꠈꠣꠘ ꠢꠇ꠆ꠇꠟ ꠎꠣꠔꠞ ꠉꠥꠘꠣꠞ ꠙꠞꠤꠇ꠆ꠇꠣꠔ ꠙꠠꠍꠂꠘ, ꠅꠁꠟꠦ ꠇꠥꠘꠥꠎꠣꠔ ꠉꠥꠘꠣ ꠇꠞꠍꠂꠘ ꠘꠣ।
HEB 4:16 ꠄꠞꠟꠣꠉꠤ ꠀꠃꠇ꠆ꠇꠣ, ꠀꠝꠞꠣ ꠢꠤꠝ꠆ꠝꠔ ꠇꠞꠤꠀ ꠀꠟ꠆ꠟꠣꠞ ꠞꠢꠝꠔꠞ ꠔꠈ꠆ꠔꠞ ꠇꠤꠘꠣꠞꠅ ꠎꠣꠁ, ꠎꠣꠔꠦ ꠝꠦꠢꠦꠞꠛꠣꠘꠤ ꠢꠣꠍꠤꠟ ꠇꠞꠔꠣꠝ ꠙꠣꠞꠤ, ꠀꠞ ꠎꠦꠟꠣꠈꠣꠘ ꠞꠢꠝꠔꠞ ꠉꠞꠎ ꠀꠍꠦ, ꠅꠃ ꠟꠣꠈꠣꠘ ꠞꠢꠝꠔꠅ ꠙꠣꠁ।
HEB 5:1 ꠝꠣꠘꠡꠞ ꠙꠇ꠆ꠇꠦ ꠞꠁꠀ ꠀꠟ꠆ꠟꠣꠞ ꠄꠛꠣꠖꠔꠤꠞ ꠟꠣꠉꠤ ꠝꠣꠘꠡꠞ ꠝꠣꠎ ꠕꠘꠦꠃ ꠙꠞꠔꠦꠇ ꠙꠞꠗꠣꠘ ꠁꠝꠣꠝꠞꠦ ꠙꠍꠘ꠆ꠖ ꠇꠞꠤ ꠘꠦꠅꠀ ꠅꠄ। ꠔꠣꠘ ꠇꠣꠝ ꠅꠁꠟ ꠝꠣꠘꠡꠞ ꠉꠥꠘꠣ ꠝꠣꠚꠤꠞ ꠟꠣꠉꠤ ꠙꠡꠥ ꠇꠥꠞꠛꠣꠘꠤ ꠖꠦꠅꠀ ꠀꠞ ꠢꠇꠟ ꠎꠣꠔꠞ ꠟꠤꠟ꠆ꠟꠣ-ꠍꠖꠉꠣ ꠛꠈꠡꠤꠀ ꠖꠦꠅꠀ।
HEB 5:2 ꠎꠦꠞꠣ ꠘꠣ ꠛꠥꠎꠤꠀ ꠉꠥꠘꠣ ꠇꠞꠦ ꠀꠞ ꠛꠦ-ꠙꠕꠤ ꠅꠄ ꠄꠞꠣꠞ ꠟꠉꠦ ꠔꠣꠁꠘ ꠘꠞꠝ ꠛꠦꠛꠢꠣꠞ ꠇꠞꠔꠣ ꠙꠣꠞꠂꠘ, ꠇꠣꠞꠘ ꠔꠣꠘ ꠝꠣꠎꠦꠅ ꠇꠝꠎꠥꠞꠤ ꠀꠍꠦ।
HEB 5:3 ꠔꠣꠁꠘ ꠎꠦꠟꠣ ꠅꠁꠘ꠆ꠘ ꠝꠣꠘꠡꠞ ꠉꠥꠘꠣꠞ ꠟꠣꠉꠤꠀ ꠇꠥꠞꠛꠣꠘꠤ ꠖꠦꠁꠘ, ꠅꠃꠟꠣ ꠔꠣꠘ ꠘꠤꠎꠞ ꠇꠝꠎꠥꠞꠤ ꠀꠞ ꠉꠥꠘꠣꠞ ꠟꠣꠉꠤꠅ ꠇꠥꠞꠛꠣꠘꠤ ꠇꠞꠣ ꠚꠞꠎ।
HEB 5:4 ꠙꠞꠗꠣꠘ ꠁꠝꠣꠝ ꠅꠀꠞ ꠁꠎ꠆ꠎꠔ ꠇꠦꠃ ꠘꠤꠎꠦ ꠘꠤꠎꠦ ꠇꠣꠝꠣꠁꠔ ꠙꠣꠞꠦ ꠘꠣ, ꠈꠣꠟꠤ ꠀꠟ꠆ꠟꠣꠄ ꠎꠦꠘꠞꠦ ꠙꠍꠘ꠆ꠖ ꠇꠞꠂꠘ ꠔꠣꠁꠘꠃ ꠁ ꠁꠎ꠆ꠎꠔ ꠢꠣꠍꠤꠟ ꠇꠞꠂꠘ, ꠎꠦꠟꠣ ꠀꠟ꠆ꠟꠣꠄ ꠢꠣꠞꠥꠘ ꠘꠛꠤꠞꠦ ꠁ ꠁꠎ꠆ꠎꠔ ꠖꠤꠍꠟꠣ।
HEB 5:5 ꠁꠍꠣꠄꠅ ꠅꠃꠟꠣ ꠙꠞꠗꠣꠘ ꠁꠝꠣꠝ ꠅꠀꠞ ꠟꠣꠉꠤ ꠘꠤꠎꠦ ꠘꠤꠎꠞꠦ ꠛꠠ ꠛꠣꠘꠣꠁꠟꠣ ꠘꠣ, ꠛꠞꠋ ꠀꠟ꠆ꠟꠣꠄꠃ ꠔꠣꠘꠞꠦ ꠅꠃ ꠉꠃꠞꠛ ꠖꠣꠘ ꠇꠞꠍꠂꠘ, ꠀꠟ꠆ꠟꠣꠄ ꠛꠣꠔꠣꠁꠍꠂꠘ, ꠔꠥꠝꠤ ꠔ ꠀꠝꠣꠞ ꠙꠥꠔ, ꠀꠁꠎꠃ ꠀꠝꠤ ꠔꠥꠝꠣꠞ ꠛꠣꠚꠞ ꠟꠣꠈꠣꠘ ꠅꠁꠟꠣꠝ।
HEB 5:6 ꠔꠣꠁꠘ ꠅꠃꠟꠣ ꠀꠞꠇ ꠀꠄꠀꠔꠅ ꠇꠁꠍꠂꠘ, ꠛꠣꠖꠡꠣ ꠝꠣꠟꠇꠤ-ꠍꠤꠖ꠆ꠖꠤꠇꠞ ꠍꠤꠟꠍꠤꠟꠣꠄ, ꠔꠥꠝꠤꠃ ꠢꠞ-ꠢꠣꠝꠦꠡꠣꠇꠥꠞ ꠁꠝꠣꠝ।
HEB 5:7 ꠀꠟ꠆ꠟꠣꠄ ꠔ ꠁꠍꠣꠞꠦ ꠝꠃꠔꠞ ꠀꠔ ꠕꠣꠇꠤ ꠛꠣꠌꠣꠁꠔꠣ ꠙꠣꠞꠟꠣ ꠅꠘꠦ, ꠁꠍꠣ ꠖꠥꠘꠤꠀꠔ ꠕꠣꠇꠣꠞ ꠡꠝꠄ ꠔꠣꠘ ꠉꠦꠍꠦ ꠀꠢꠣꠎꠣꠞꠤ ꠇꠞꠤ ꠇꠣꠘ꠆ꠖꠤꠀ ꠖꠥꠀ-ꠝꠤꠘꠔꠤ ꠇꠞꠤ ꠜꠤꠇ ꠝꠣꠉꠤꠍꠂꠘ, ꠔꠣꠘ ꠝꠣꠎꠦ ꠀꠟ꠆ꠟꠣꠞ ꠒꠞ-ꠈꠚ ꠀꠞ ꠛꠣꠁꠖ꠆ꠖꠔꠣ ꠕꠣꠇꠣꠄ ꠁꠔꠣꠞ ꠎꠥꠀꠙꠅ ꠙꠣꠁꠍꠂꠘ।
HEB 5:8 ꠔꠣꠁꠘ ꠙꠥꠔ ꠅꠁꠟꠦꠅ ꠇꠡ꠆ꠐ ꠡꠁꠎ꠆ꠎ ꠇꠞꠤꠀ, ꠀꠟ꠆ꠟꠣꠞ ꠛꠣꠁꠖ꠆ꠖ ꠅꠁꠀ ꠞꠅꠀ ꠢꠤꠇꠤꠍꠂꠘ,
HEB 5:9 ꠀꠞ ꠅꠃ ꠟꠣꠈꠣꠘ ꠞꠁꠀ ꠔꠣꠁꠘ ꠎꠦꠛꠟꠣ ꠙꠥꠞꠣꠙꠥꠞ ꠇꠣꠝꠤꠟ ꠛꠘꠤꠉꠦꠟꠣ, ꠀꠟ꠆ꠟꠣꠄ ꠔꠣꠘꠞꠦ ꠝꠣꠟꠇꠤ-ꠍꠤꠖ꠆ꠖꠤꠇꠞ ꠘꠝꠥꠘꠣꠄ ꠙꠞꠗꠣꠘ ꠁꠝꠣꠝꠞ ꠈꠦꠔꠣꠛ ꠖꠤꠟꠣ, ꠅꠃ ꠘꠝꠥꠘꠣꠄ ꠔꠣꠘ ꠛꠣꠁꠖ꠆ꠖ ꠃꠝ꠆ꠝꠔ ꠅꠇꠟꠞ ꠟꠣꠉꠤ ꠀꠟ꠆ꠟꠣꠁ ꠘꠣꠎꠣꠔꠞ ꠙꠕ ꠈꠥꠟꠤꠀ ꠖꠤꠍꠂꠘ।
HEB 5:11 ꠝꠣꠟꠇꠤ-ꠍꠤꠖ꠆ꠖꠤꠇꠞ ꠛꠦꠙꠣꠞꠦ ꠀꠝꠞꠣꠞ ꠀꠞꠅ ꠛꠃꠔ ꠛꠄꠀꠘ ꠀꠍꠦ, ꠅꠁꠟꠦ ꠔꠥꠝꠞꠣꠞ ꠇꠣꠘꠅ ꠔꠣꠟꠣ ꠟꠣꠉꠣꠁ ꠖꠤꠍ ꠇꠞꠤ ꠔꠥꠝꠞꠣꠞꠦ ꠁꠔꠣ ꠛꠥꠎꠣꠘꠤ ꠈꠥꠛ ꠇꠡ꠆ꠐ।
HEB 5:12 ꠅꠔꠖꠤꠘꠞ ꠝꠣꠎꠦ ꠔꠥꠝꠞꠣꠅ ꠃꠡ꠆ꠔꠣꠖ ꠅꠁꠎꠤꠔꠣꠄ ꠀꠍꠤꠟ, ꠅꠁꠟꠦ ꠅꠈꠘꠅ ꠖꠦꠈꠣ ꠎꠣꠞ ꠔꠥꠝꠞꠣꠞꠦ ꠀꠟ꠆ꠟꠣꠞ ꠇꠣꠟꠣꠝꠞ ꠙꠄꠟꠣ ꠍꠛꠇ ꠢꠤꠇꠣꠘꠤ ꠟꠣꠉꠛ। ꠔꠥꠝꠞꠣꠞꠦ ꠅꠈꠘꠅ ꠢꠥꠞꠥꠔ꠆ꠔꠣꠞ ꠟꠣꠈꠣꠘ ꠖꠥꠗ ꠈꠣꠅꠀꠘꠤ ꠟꠣꠉꠦꠞ, ꠡꠇ꠆ꠔ ꠈꠣꠘꠣ ꠢꠎꠝ ꠇꠞꠔꠣꠄ ꠙꠣꠞꠞꠣꠄ ꠘꠣ।
HEB 5:13 ꠀꠞ ꠎꠦꠞꠣ ꠖꠥꠗ ꠈꠣꠄ ꠔꠣꠞꠣ ꠔ ꠉꠦꠖꠣ ꠢꠥꠞꠥꠔ꠆ꠔꠣ, ꠡꠞꠤꠅꠔꠞ ꠢꠥꠇꠥꠝ-ꠀꠢꠇꠣꠝꠞ ꠛꠦꠙꠣꠞꠦ ꠔꠣꠞꠣ ꠇꠥꠘ꠆ꠔꠣꠃ ꠛꠥꠎꠦ ꠘꠣ।
HEB 5:14 ꠡꠇ꠆ꠔ ꠈꠣꠘꠣ ꠔꠣꠞꠣꠞ ꠟꠣꠉꠤꠃ ꠎꠦꠞꠣꠞ ꠛꠄꠅꠡ ꠅꠁꠍꠦ, ꠔꠣꠞꠣ ꠜꠣꠟꠣ-ꠛꠥꠞꠣꠞ ꠔꠚꠣꠔ ꠛꠥꠎꠤꠀ ꠀꠈꠟ ꠈꠣꠐꠣꠁꠀ ꠌꠟꠦ।
HEB 6:1 ꠁꠍꠣꠞ ꠛꠦꠙꠣꠞꠦ ꠀꠝꠞꠣ ꠙꠄꠟꠣ ꠎꠦꠔꠣ ꠔꠣꠟꠤꠝ ꠙꠣꠁꠍꠤ, ꠀꠃꠇ꠆ꠇꠣ ꠁꠔꠣꠞꠦ ꠙꠣꠞ ꠅꠁꠀ ꠀꠝꠞꠣ ꠀꠞꠅ ꠀꠉꠦꠖꠤ ꠀꠉꠥꠀꠁꠀ ꠇꠣꠝꠤꠟ ꠅꠁ। ꠢꠃ ꠙꠄꠟꠣꠇꠥꠞ ꠔꠣꠟꠤꠝ ꠢꠤꠞꠛꠣꠞ ꠢꠤꠇꠣꠞ ꠀꠞ ꠉꠞꠎ ꠘꠣꠁ, ꠎꠦꠝꠘ ꠘꠣꠚꠞꠝꠣꠘꠤ ꠇꠣꠝ ꠕꠣꠇꠤ ꠖꠤꠟꠞꠦ ꠛꠖꠟꠣꠘꠤ, ꠀꠟ꠆ꠟꠣꠞ ꠃꠙꠞꠦ ꠁꠝꠣꠘ ꠀꠘꠣ,
HEB 6:2 ꠘꠣꠘꠣꠘ ꠘꠝꠥꠘꠣꠞ ꠉꠥꠍꠟ, ꠖꠥꠀ ꠘꠤꠛꠣꠞ ꠡꠝꠄ ꠀꠔꠣꠁ ꠖꠦꠅꠀ, ꠝꠃꠔꠞ ꠛꠣꠖꠦ ꠎꠤꠘ꠆ꠖꠣ ꠅꠁꠀ ꠃꠑꠣ, ꠀꠞ ꠀꠈꠦꠞꠣꠔꠞ ꠛꠤꠌꠣꠞ।
HEB 6:3 ꠁꠘꠡꠣꠟ꠆ꠟꠣ, ꠀꠝꠞꠣ ꠅꠟꠣꠃ ꠇꠞꠝꠥ।
HEB 6:4 ꠅꠁꠟꠦ ꠎꠦꠞꠣ ꠄꠇꠛꠣꠞ ꠀꠟ꠆ꠟꠣꠞ ꠙꠕ ꠖꠦꠈꠤꠟꠣꠁꠍꠦ, ꠛꠦꠢꠦꠡ꠆ꠔꠤ ꠖꠣꠘꠞ ꠝꠎꠣ ꠙꠣꠁꠍꠦ, ꠙꠣꠇ ꠞꠥꠢꠦ ꠡꠞꠤꠇ ꠅꠁꠍꠦ,
HEB 6:5 ꠀꠟ꠆ꠟꠣꠞ ꠞꠢꠝꠔꠞ ꠇꠣꠟꠣꠝꠞ ꠝꠎꠣ ꠛꠥꠎꠍꠦ, ꠀꠞ ꠍꠣꠝꠘꠞ ꠎꠝꠣꠘꠣꠞ ꠘꠣꠘꠣꠘ ꠇꠥꠖꠞꠔꠤ ꠇꠣꠝ ꠖꠦꠈꠍꠦ,
HEB 6:6 ꠖꠦꠈꠣꠞ ꠛꠣꠖꠦꠅ ꠇꠣꠚꠤꠞꠤ ꠇꠣꠝ ꠇꠞꠍꠦ, ꠄꠞꠣꠞ ꠖꠤꠟꠞꠦ ꠀꠞ ꠛꠖꠟꠣꠁꠟ ꠎꠣꠁꠔ ꠘꠣꠄ, ꠇꠣꠞꠘ ꠔꠣꠞꠣ ꠘꠤꠎꠦ ꠀꠟ꠆ꠟꠣꠞ ꠈꠣꠍ ꠝꠣꠄꠀꠞ ꠎꠘ ꠁꠛꠘꠥꠟ꠆ꠟꠣꠞꠦ ꠢꠤꠞꠛꠣꠞ ꠖꠥꠈ-ꠇꠡ꠆ꠐꠞ ꠍꠟꠤꠛꠅ ꠎꠣꠘꠦ ꠝꠣꠞꠦꠞ, ꠀꠞ ꠢꠇꠟꠞ ꠍꠣꠝꠘꠦ ꠈꠥꠟꠣ-ꠝꠦꠟꠣ ꠔꠣꠘ ꠉꠤꠛꠔ ꠉꠣꠞ।
HEB 6:7 ꠎꠦ ꠝꠣꠐꠤꠄ ꠛꠣꠞꠦ ꠛꠣꠞꠦ ꠝꠦꠊꠞ ꠙꠣꠘꠤ ꠅꠎꠝ ꠇꠞꠤꠀ ꠉꠤꠞꠡ꠆ꠔ ꠅꠇꠟꠞꠦ ꠢꠣꠉ-ꠔꠞꠇꠣꠞꠤ ꠎꠥꠉꠣꠁꠀ ꠖꠦꠄ, ꠁ ꠝꠣꠐꠤꠔ ꠀꠟ꠆ꠟꠣꠞ ꠞꠢꠝꠔ ꠘꠣꠎꠤꠟ ꠅꠄ।
HEB 6:8 ꠅꠁꠟꠦ ꠎꠦ ꠝꠣꠐꠤꠔ ꠈꠣꠟꠤ ꠛꠘ-ꠎꠋꠉꠟ ꠀꠞ ꠇꠣꠐꠣ-ꠉꠍꠣ ꠚꠟꠦ, ꠁꠔꠣ ꠛꠦꠇꠣꠝꠣ ꠝꠣꠐꠤ, ꠁ ꠝꠣꠐꠤꠔ ꠟꠣꠘ꠆ꠘꠔ ꠙꠠꠦ। ꠝꠣꠘꠡꠦ ꠁꠔꠣꠞꠦ ꠀꠉꠥꠁꠘꠖꠤ ꠎꠣꠟꠣꠁꠘ।
HEB 6:9 ꠅ ꠝꠣꠄꠀꠞ ꠖꠥꠡ꠆ꠔ ꠅꠇꠟ, ꠎꠥꠖꠤꠅ ꠀꠝꠞꠣ ꠁꠟꠣꠈꠣꠘ ꠇꠁꠞꠣꠝ, ꠅꠁꠟꠦ ꠀꠍꠟꠦ ꠀꠝꠞꠣ ꠈꠣꠍ ꠖꠤꠟꠦ ꠝꠘꠅ ꠇꠞꠤ, ꠔꠥꠝꠞꠣꠞ ꠢꠣꠟꠔ ꠄ ꠕꠣꠇꠤ ꠛꠃꠔ ꠜꠣꠟꠣ ꠀꠍꠦ, ꠀꠞ ꠔꠥꠝꠞꠣꠞ ꠎꠤꠘ꠆ꠖꠦꠉꠤꠔ ꠘꠣꠎꠣꠔꠞ ꠚꠟꠅ ꠖꠦꠈꠣ ꠎꠣꠞ।
HEB 6:10 ꠀꠟ꠆ꠟꠣ ꠔ ꠢꠇ-ꠁꠘꠍꠣꠚꠇꠣꠞꠤ, ꠔꠥꠝꠞꠣ ꠔꠣꠘ ꠟꠣꠉꠤ ꠎꠦ ꠝꠢꠛ꠆ꠛꠔ ꠖꠦꠈꠣꠁꠞꠣꠄ, ꠔꠣꠘ ꠟꠣꠉꠤ ꠎꠦꠔꠣ ꠇꠣꠝ-ꠇꠣꠎ ꠇꠞꠞꠣꠄ, ꠔꠣꠘ ꠙꠣꠇ ꠛꠘ꠆ꠖꠣ ꠅꠇꠟꠞ ꠈꠦꠎꠝꠔ ꠇꠞꠤꠀ ꠀꠁꠞꠣꠄ, ꠁꠔꠣ ꠔ ꠔꠣꠁꠘ ꠚꠣꠃꠞꠤꠔꠣ ꠘꠣꠄ।
HEB 6:11 ꠀꠝꠞꠣꠞ ꠈꠥꠛ ꠁꠌ꠆ꠍꠣ ꠅꠁꠟ, ꠔꠥꠝꠞꠣ ꠙꠞꠔꠦꠇ ꠎꠘꠦꠃ ꠢꠦꠡ ꠙꠞ꠆ꠎꠘ꠆ꠔ ꠄꠇꠁ ꠟꠣꠈꠣꠘ ꠇꠣꠝ ꠇꠞꠣꠔ ꠀꠉꠥꠀꠁ ꠀꠁꠛꠣꠄ, ꠎꠣꠔꠦ ꠔꠥꠝꠞꠣꠞ ꠀꠡꠣ ꠙꠥꠞꠣ ꠅꠄ।
HEB 6:12 ꠅꠃ ꠟꠣꠈꠣꠘ ꠇꠣꠝꠅ ꠀꠉꠥꠀꠁꠔꠦ ꠔꠥꠝꠞꠣꠞ ꠀꠟꠡꠤ ꠘꠣ ꠀꠄ; ꠛꠞꠋ ꠁꠝꠣꠘꠦ ꠀꠞ ꠍꠛꠞꠦ ꠎꠦꠞꠣ ꠀꠟ꠆ꠟꠣꠞ ꠅꠀꠖꠣ ꠇꠞꠣ ꠛꠞꠇꠔ ꠢꠣꠍꠤꠟ ꠇꠞꠍꠂꠘ, ꠔꠥꠝꠞꠣꠅ ꠔꠣꠞꠣꠞ ꠟꠣꠈꠣꠘ ꠅꠁꠎꠣꠅ।
HEB 6:13 ꠢꠎꠞꠔ ꠁꠛ꠆ꠞꠣꠢꠤꠝꠞ ꠟꠉꠦ ꠀꠟ꠆ꠟꠣꠄ ꠎꠦꠛꠟꠣ ꠅꠀꠖꠣ ꠇꠞꠍꠟꠣ, ꠁ ꠡꠝꠄ ꠖꠥꠍꠞꠣ ꠇꠥꠘ꠆ꠔꠣꠞ ꠘꠣꠝꠦ ꠔꠣꠁꠘ ꠇꠍꠝ ꠈꠣꠁꠍꠂꠘ ꠘꠣ, ꠇꠣꠞꠘ ꠔꠣꠘ ꠕꠣꠇꠤ ꠛꠠ ꠖꠥꠍꠞꠣ ꠇꠥꠘ꠆ꠔꠣꠃ ꠘꠣꠁ, ꠄꠞꠟꠣꠉꠤ ꠔꠣꠁꠘ ꠘꠤꠎꠞ ꠘꠣꠝꠦ ꠇꠍꠝ ꠇꠞꠤꠀ ꠇꠁꠍꠟꠣ,
HEB 6:14 ꠀꠝꠤ ꠘꠤꠌꠄ ꠔꠥꠝꠣꠞꠦ ꠛꠞꠇꠔ ꠘꠣꠎꠤꠟ ꠇꠞꠝꠥ, ꠔꠥꠝꠣꠞ ꠀꠅꠟꠣꠖ ꠛꠃꠔ ꠙꠞꠤꠝꠣꠘꠦ ꠛꠣꠠꠣꠁ ꠖꠤꠝꠥ।
HEB 6:15 ꠁꠛ꠆ꠞꠣꠢꠤꠝꠦ ꠅꠃꠟꠣ ꠛꠃꠔ ꠟꠣꠝ꠆ꠛꠣ ꠡꠝꠄ ꠍꠛꠞ ꠇꠞꠤꠀ ꠀꠟ꠆ꠟꠣꠞ ꠅꠀꠖꠣꠞ ꠚꠟ ꠙꠣꠁꠟꠣ।
HEB 6:16 ꠝꠣꠘꠡꠦ ꠎꠦꠛꠟꠣ ꠇꠥꠘꠥ ꠇꠍꠝ ꠈꠣꠄ, ꠢꠦ ꠔꠣꠞ ꠌꠣꠁꠔꠦ ꠖꠣꠝꠤ ꠇꠦꠃꠞꠞ ꠘꠣꠝꠦ ꠇꠍꠝ ꠈꠣꠄ, ꠔꠦꠃ ꠛꠥꠎꠣ ꠎꠣꠄ ꠔꠣꠞ ꠇꠍꠝ ꠢꠣꠍꠣ, ꠀꠞ ꠅꠃ ꠇꠍꠝꠞ ꠟꠣꠉꠤ ꠢꠇꠟꠔꠣ ꠝꠤꠐ-ꠝꠣꠐ ꠅꠁꠎꠣꠄ।
HEB 6:17 ꠅꠃꠟꠣ ꠀꠟ꠆ꠟꠣꠄꠅ ꠎꠦꠞꠣꠞ ꠟꠉꠦ ꠅꠀꠖꠣ ꠇꠞꠍꠂꠘ, ꠔꠣꠘ ꠅꠀꠖꠣꠞ ꠘꠤꠌ꠆ꠌꠄꠅꠔꠣꠞ ꠟꠣꠉꠤꠀ ꠔꠣꠁꠘꠅ ꠇꠍꠝ ꠈꠣꠁꠍꠂꠘ, ꠎꠣꠔꠦ ꠔꠣꠘ ꠅꠀꠖꠣ ꠞꠖ-ꠛꠖꠟ ꠅꠀꠞ ꠡꠘ꠆ꠖꠄ ꠘꠣ ꠕꠣꠇꠦ।
HEB 6:18 ꠀꠞ ꠀꠟ꠆ꠟꠣꠄ ꠇꠥꠘꠥ ꠝꠤꠍꠣ ꠝꠣꠔꠣ ꠔ ꠛꠃꠔ ꠖꠥꠞꠞ ꠇꠕꠣ। ꠔꠦ ꠔꠣꠁꠘ ꠎꠦꠛꠟꠣ ꠅꠀꠖꠣꠞ ꠟꠉꠦ ꠇꠍꠝꠅ ꠇꠞꠍꠂꠘ, ꠅꠈꠘ ꠀꠝꠞꠣ ꠀꠞꠅ ꠇꠔ ꠛꠦꠡꠤ ꠜꠞꠡꠣ ꠞꠣꠈꠔꠣꠝ ꠙꠣꠞꠤ। ꠄꠞꠟꠣꠉꠤ ꠀꠅ, ꠀꠝꠞꠣ ꠎꠦꠞꠣ ꠔꠣꠘ ꠖꠞꠛꠣꠞꠅ ꠉꠤꠀ ꠀꠡꠞꠄ ꠙꠣꠁꠍꠤ, ꠙꠣꠁꠀ ꠎꠦ ꠀꠡꠣ ꠙꠄꠖꠣ ꠀꠍꠦ, ꠀꠝꠞꠣꠞ ꠍꠣꠝꠘꠞ ꠢꠃ ꠀꠡꠣꠞꠦ ꠝꠎꠛꠥꠔ ꠇꠞꠤ ꠗꠞꠤꠀ ꠞꠁ।
HEB 6:19 ꠅꠃ ꠀꠡꠣ ꠀꠝꠞꠣꠞ ꠎꠣꠘꠞ ꠟꠋꠉꠞꠞ ꠟꠣꠈꠣꠘ, ꠇꠣꠁꠝ ꠀꠞ ꠝꠎꠛꠥꠔ। ꠁꠐꠣꠄ ꠀꠟ꠆ꠟꠣꠞ ꠛꠦꠢꠦꠡ꠆ꠔꠤ ꠄꠛꠣꠖꠔ ꠈꠣꠘꠣꠞ ꠙꠞ꠆ꠖꠣ ꠙꠣꠞ ꠅꠁꠀ ꠢꠦꠞꠦꠝ ꠡꠞꠤꠚꠞ ꠜꠤꠔꠞꠦ ꠀꠝꠞꠣꠞꠦ ꠘꠤꠀ ꠙꠃꠍꠣꠄ।
HEB 6:20 ꠀꠞ ꠀꠝꠞꠣꠞ ꠙꠇ꠆ꠇ ꠅꠁꠀ ꠁꠍꠣ ꠉꠤꠀ ꠀꠝꠞꠣꠞ ꠀꠉꠦ ꠢꠤ ꠎꠣꠉꠣꠔ ꠙꠃꠍꠤ ꠉꠦꠍꠂꠘ। ꠔꠣꠁꠘ ꠔ ꠝꠣꠟꠇꠤ-ꠍꠤꠖ꠆ꠖꠤꠇꠞ ꠍꠤꠟꠍꠤꠟꠣꠞ ꠞꠦꠅꠀꠎ ꠝꠣꠚꠤꠇ ꠢꠞ-ꠢꠣꠝꠦꠡꠣꠇꠥꠞ ꠟꠣꠉꠤ ꠙꠞꠗꠣꠘ ꠁꠝꠣꠝ ꠅꠁꠍꠂꠘ, ꠔꠦ ꠅꠃ ꠛꠦꠙꠣꠞꠦ ꠅꠈꠘ ꠇꠁꠞꠣꠝ।
HEB 7:1 ꠁ ꠝꠣꠟꠇꠤ-ꠍꠤꠖ꠆ꠖꠤꠇ ꠅꠁꠟꠣ ꠀꠟ꠆ꠟꠣꠔꠣꠟꠣꠞ ꠁꠝꠣꠝ, ꠡꠣꠟꠦꠝꠞ ꠛꠣꠖꠡꠣ। ꠁꠛ꠆ꠞꠣꠢꠤꠝꠦ ꠛꠣꠖꠡꠣ ꠅꠇꠟꠞꠦ ꠎꠥꠖ꠆ꠖꠔ ꠀꠞꠣꠁꠀ ꠢꠣꠞꠤ ꠚꠤꠞꠤꠀ ꠀꠅꠀꠞ ꠛꠣꠟꠣ ꠅꠃ ꠝꠣꠟꠇꠤ-ꠍꠤꠖ꠆ꠖꠤꠇꠞ ꠟꠉꠦ ꠔꠣꠘ ꠝꠥꠟꠣꠇꠣꠔ ꠅꠁꠟꠦ, ꠝꠣꠟꠇꠤ-ꠍꠤꠖ꠆ꠖꠤꠇꠦ ꠁꠛ꠆ꠞꠣꠢꠤꠝꠞꠦ ꠖꠥꠀ ꠇꠞꠍꠟꠣ।
HEB 7:2 ꠁꠛ꠆ꠞꠣꠢꠤꠝꠦ ꠔꠣꠘ ꠢꠇ꠆ꠇꠟꠔꠣꠞ ꠖꠡ ꠛꠣꠐꠞ ꠄꠇ ꠛꠣꠐ ꠄꠘꠞꠦ ꠖꠤꠟꠣꠁꠟꠣ। ꠝꠣꠟꠇꠤ-ꠍꠤꠖ꠆ꠖꠤꠇ ꠘꠣꠝꠞ ꠝꠣꠘꠤ ꠅꠁꠟ, ꠙꠞꠦꠎꠉꠣꠞꠞ ꠛꠣꠖꠡꠣ। ꠔꠣꠁꠘ ꠡꠣꠟꠦꠝ ꠐꠣꠃꠘꠞꠅ ꠛꠣꠖꠡꠣ, ꠝꠣꠘꠤ ꠡꠣꠘ꠆ꠔꠤꠞ ꠛꠣꠖꠡꠣ।
HEB 7:3 ꠝꠣꠟꠇꠤ-ꠍꠤꠖ꠆ꠖꠤꠇꠞ ꠝꠣ ꠘꠣꠁ, ꠛꠣꠚꠅ ꠘꠣꠁ, ꠔꠣꠘ ꠇꠥꠘꠥ ꠈꠣꠘ꠆ꠖꠣꠘ-ꠘꠣꠝꠣꠅ ꠘꠣꠁ, ꠔꠣꠘ ꠢꠣꠄꠀꠔꠤꠞ ꠡꠥꠞꠥ ꠛꠣ ꠡꠦꠡ ꠘꠣꠁ। ꠔꠦ ꠛꠥꠎꠣ ꠎꠣꠄ, ꠔꠣꠁꠘ ꠀꠟ꠆ꠟꠣꠞ ꠈꠣꠍ ꠝꠣꠄꠀꠞ ꠙꠥꠔꠞ ꠟꠣꠈꠣꠘ, ꠢꠞ-ꠢꠣꠝꠦꠡꠣꠇꠥꠞ ꠁꠝꠣꠝ।
HEB 7:4 ꠔꠦ ꠌꠤꠘ꠆ꠔꠣ ꠇꠞꠤ ꠖꠦꠈꠃꠇ꠆ꠇꠣ, ꠄꠁꠘ ꠇꠔ ꠝꠢꠣꠘ, ꠎꠦꠘꠞꠦ ꠀꠝꠞꠣꠞ ꠈꠣꠘ꠆ꠖꠣꠘꠞ ꠝꠥꠟ ꠛꠣꠛꠣ ꠁꠛ꠆ꠞꠣꠢꠤꠝꠦꠅ ꠔꠣꠘ ꠉꠘꠤꠝꠔꠞ ꠝꠣꠟꠞ ꠖꠡ ꠛꠣꠐꠞ ꠄꠇ ꠛꠣꠐ ꠖꠣꠘ ꠇꠞꠤ ꠖꠤꠍꠂꠘ।
HEB 7:5 ꠀꠞ ꠟꠦꠛꠤ ꠉꠥꠡ꠆ꠐꠤꠞ ꠝꠣꠎꠦ ꠎꠦꠞꠣ ꠁꠝꠣꠝꠔꠤ ꠇꠣꠝ ꠇꠞꠂꠘ, ꠔꠣꠞꠣ ꠡꠞꠤꠅꠔꠞ ꠢꠥꠇꠥꠝ ꠝꠣꠚꠤꠇ ꠔꠣꠞꠣꠞ ꠜꠣꠁꠀꠁꠘ, ꠝꠣꠘꠤ ꠛꠘꠤ ꠁꠍꠞꠣꠁꠟꠞ ꠉꠦꠍ ꠕꠣꠇꠤ ꠖꠡ ꠛꠣꠐꠞ ꠄꠇ ꠛꠣꠐ ꠀꠖꠣꠄ ꠇꠞꠣꠞ ꠄꠈꠔꠤꠀꠞ ꠙꠣꠁꠍꠂꠘ। ꠅꠃ ꠛꠘꠤ ꠁꠍꠞꠣꠁꠟꠅ ꠔ ꠁꠛ꠆ꠞꠣꠢꠤꠝꠞ ꠈꠣꠘ꠆ꠖꠣꠘꠞ ꠝꠣꠎꠦ ꠎꠘꠝꠤꠍꠂꠘ।
HEB 7:6 ꠅꠁꠟꠦ ꠢꠃ ꠎꠦ ꠝꠣꠟꠇꠤ-ꠍꠤꠖ꠆ꠖꠤꠇ ꠁꠛ꠆ꠞꠣꠢꠤꠝꠞ ꠈꠣꠘ꠆ꠖꠣꠘꠞ ꠘꠣ ꠅꠁꠟꠦꠅ, ꠁꠛ꠆ꠞꠣꠢꠤꠝꠞ ꠉꠦꠍ ꠕꠣꠇꠤ ꠖꠡ ꠛꠣꠐꠞ ꠄꠇ ꠛꠣꠐ ꠘꠤꠍꠟꠣ, ꠀꠞ ꠁꠛ꠆ꠞꠣꠢꠤꠝꠞꠦ ꠖꠥꠀꠅ ꠖꠤꠍꠟꠣ, ꠎꠦꠘ ꠟꠉꠦ ꠀꠟ꠆ꠟꠣꠄ ꠘꠤꠎꠦ ꠅꠀꠖꠣ ꠇꠞꠍꠂꠘ।
HEB 7:7 ꠢꠥꠞꠥ ꠅꠇꠟꠦ ꠛꠠ ꠅꠇꠟꠞ ꠉꠦꠍ ꠕꠣꠇꠤ ꠖꠥꠀ ꠙꠣꠁꠀ ꠕꠣꠇꠂꠘ, ꠄꠞ ꠝꠣꠎꠦ ꠔ ꠡꠘ꠆ꠖꠄ ꠘꠣꠁ।
HEB 7:8 ꠄꠇꠛꠣꠄꠖꠤ ꠎꠦ ꠁꠝꠣꠝꠞ ꠝꠃꠔ ꠅꠄ, ꠅꠃ ꠟꠦꠛꠤ ꠉꠥꠡ꠆ꠐꠤꠞ ꠁꠝꠣꠝ ꠅꠇꠟꠦ ꠖꠡ ꠛꠣꠐꠞ ꠄꠇ ꠛꠣꠐ ꠀꠖꠣꠄ ꠇꠞꠂꠘ, ꠀꠞ ꠀꠞꠇꠛꠣꠄ ꠝꠣꠟꠇꠤ-ꠍꠤꠖ꠆ꠖꠤꠇ, ꠇꠤꠔꠣꠛꠦ ꠇꠄ ꠔꠣꠁꠘ ꠢꠞ-ꠢꠣꠝꠦꠡꠣ ꠎꠤꠘ꠆ꠖꠣ ꠀꠍꠂꠘ, ꠔꠣꠁꠘꠅ ꠖꠡ ꠛꠣꠐꠞ ꠄꠇ ꠛꠣꠐ ꠀꠖꠣꠄ ꠇꠞꠍꠂꠘ।
HEB 7:9 ꠢꠤꠞꠛꠣꠞ ꠁꠈꠣꠘꠅ ꠇꠅꠀ ꠎꠣꠄ, ꠟꠦꠛꠤ ꠉꠥꠡ꠆ꠐꠤꠞ ꠎꠦ ꠁꠝꠣꠝꠦ ꠖꠡ ꠛꠣꠐꠞ ꠄꠇ ꠛꠣꠐ ꠀꠖꠣꠄ ꠇꠞꠍꠂꠘ, ꠔꠣꠁꠘꠅ ꠁꠛ꠆ꠞꠣꠢꠤꠝꠞ ꠝꠣꠎꠖꠤ ꠝꠣꠟꠇꠤ-ꠍꠤꠖ꠆ꠖꠤꠇꠞꠦ ꠖꠡ ꠛꠣꠐꠞ ꠄꠇ ꠛꠣꠐ ꠖꠤꠍꠂꠘ,
HEB 7:10 ꠇꠣꠞꠘ ꠝꠣꠟꠇꠤ-ꠍꠤꠖ꠆ꠖꠤꠇꠦ ꠎꠦꠛꠟꠣ ꠁꠛ꠆ꠞꠣꠢꠤꠝꠞ ꠟꠉꠦ ꠝꠥꠟꠣꠇꠣꠔ ꠇꠞꠟꠣ, ꠟꠦꠛꠤ ꠔ ꠅꠃ ꠡꠝꠄ ꠁꠛ꠆ꠞꠣꠢꠤꠝꠞ ꠘꠣꠠꠞ ꠜꠤꠔꠞꠦ ꠀꠍꠟꠣ।
HEB 7:11 ꠟꠦꠛꠤ ꠉꠥꠡ꠆ꠐꠤꠞ ꠁꠝꠣꠝ ꠍꠣꠛ ꠅꠇꠟꠞ ꠇꠣꠝ-ꠇꠣꠎꠞ ꠃꠙꠞꠦ ꠘꠤꠞꠜꠞ ꠇꠞꠤꠀ ꠀꠟ꠆ꠟꠣꠄ ꠛꠘꠤ ꠁꠍꠞꠣꠁꠟꠞꠦ ꠡꠞꠤꠅꠔ ꠖꠤꠍꠟꠣ, ꠁ ꠁꠝꠣꠝꠞ ꠝꠣꠎꠖꠤ ꠎꠥꠖꠤ ꠇꠣꠝꠤꠟ ꠅꠀ ꠎꠣꠁꠔ, ꠔꠦ ꠟꠦꠛꠤ ꠉꠥꠡ꠆ꠐꠤꠞ ꠙꠄꠟꠣ ꠁꠝꠣꠝ ꠢꠣꠞꠥꠘꠞ ꠛꠖꠟꠣ ꠝꠣꠟꠇꠤ-ꠍꠤꠖ꠆ꠖꠤꠇꠞ ꠘꠝꠥꠘꠣꠞ ꠀꠞꠇ ꠁꠝꠣꠝ ꠀꠅꠀꠞ ꠇꠥꠘꠥ ꠉꠞꠎ ꠀꠍꠤꠟ ꠘꠤ?
HEB 7:12 ꠁꠝꠣꠝꠞ ꠍꠤꠟꠍꠤꠟꠣ ꠛꠖꠟꠣꠁꠟ ꠅꠁꠟꠦ ꠔ ꠡꠞꠤꠅꠔꠞꠦꠅ ꠛꠖꠟꠣꠘꠤ ꠟꠣꠉꠦ।
HEB 7:13 ꠁ ꠢꠇꠟ ꠛꠄꠀꠘ ꠎꠣꠘ ꠘꠤꠅꠔꠦ ꠇꠞꠞꠣꠝ, ꠄꠁꠘ ꠔ ꠟꠦꠛꠤ ꠉꠥꠡ꠆ꠐꠤꠞ ꠘꠣꠄ, ꠀꠞꠇ ꠉꠥꠡ꠆ꠐꠤꠞ, ꠢꠤ ꠉꠥꠡ꠆ꠐꠤꠞ ꠇꠦꠃ ꠇꠥꠞꠛꠣꠘꠤ ꠈꠣꠘꠣꠞ ꠈꠣꠖꠤꠝ ꠀꠍꠟꠣ ꠘꠣ।
HEB 7:14 ꠀꠝꠞꠣꠞ ꠝꠥꠘꠤꠛ ꠔ ꠄꠢꠥꠖꠣ ꠉꠥꠡ꠆ꠐꠤꠞ ꠝꠣꠎꠦ ꠙꠄꠖꠣ ꠅꠁꠍꠂꠘ, ꠁ ꠉꠥꠡ꠆ꠐꠤꠞ ꠇꠦꠃ ꠁꠝꠣꠝ ꠅꠁꠛꠣ ꠇꠞꠤꠀ ꠝꠥꠍꠣꠄ ꠇꠥꠘ꠆ꠔꠣ ꠇꠁꠍꠂꠘ ꠘꠣ।
HEB 7:15 ꠝꠣꠟꠇꠤ-ꠍꠤꠖ꠆ꠖꠤꠇꠞ ꠘꠝꠥꠘꠣꠄ ꠎꠦꠛꠟꠣ ꠀꠞꠇ ꠎꠘ ꠁꠝꠣꠝꠦ ꠔꠡꠞꠤꠚ ꠀꠘꠂꠘ, ꠁ ꠡꠝꠄ ꠔ ꠀꠝꠞꠣꠞ ꠛꠄꠀꠘ ꠀꠞꠅ ꠍꠣꠚ ꠅꠁꠉꠦꠍꠦ।
HEB 7:16 ꠁꠍꠣ ꠔ ꠞꠇ꠆ꠔ-ꠝꠣꠋꠡꠞ ꠇꠥꠘꠥ ꠘꠤꠅꠝꠦ ꠁꠝꠣꠝ ꠅꠁꠍꠂꠘ ꠘꠣ, ꠈꠣꠟꠤ ꠔꠣꠘ ꠢꠞ-ꠢꠣꠝꠦꠡꠣꠇꠥꠞ ꠇꠥꠖꠞꠔꠤ ꠎꠤꠘ꠆ꠖꠦꠉꠤꠞ ꠛꠟꠦꠃ ꠅꠁꠍꠂꠘ।
HEB 7:17 ꠔꠣꠘ ꠛꠦꠙꠣꠞꠦ ꠙꠣꠇ ꠇꠣꠟꠣꠝꠦ ꠇꠄ, ꠝꠣꠟꠇꠤ-ꠍꠤꠖ꠆ꠖꠤꠇꠞ ꠍꠤꠟꠍꠤꠟꠣꠄ, ꠔꠥꠝꠤꠃ ꠢꠞ-ꠢꠣꠝꠦꠡꠣꠇꠥꠞ ꠁꠝꠣꠝ।
HEB 7:18 ꠔꠦ ꠖꠦꠈꠃꠇ꠆ꠇꠣ, ꠄꠇꠛꠣꠄ ꠀꠉꠞ ꠁꠝꠣꠝꠔꠤꠞ ꠢꠥꠇꠥꠝ-ꠀꠢꠇꠣꠝ ꠅꠇꠟ ꠇꠝꠎꠥꠞ ꠀꠞ ꠛꠦꠇꠣꠝꠣ ꠅꠁꠎꠣꠅꠀꠄ ꠁꠔꠣꠞꠦ ꠢꠞꠣꠁ ꠖꠦꠅꠀ ꠅꠁꠍꠦ,
HEB 7:19 ꠝꠥꠍꠣꠞ ꠡꠞꠤꠅꠔꠦ ꠔ ꠇꠥꠘ꠆ꠔꠣꠞꠦꠃ ꠇꠣꠝꠤꠟ ꠛꠣꠘꠣꠁꠔ ꠙꠣꠞꠍꠦ ꠘꠣ। ꠀꠞ ꠀꠞꠇꠛꠣꠄ ꠅꠃꠟꠣ ꠄꠇ ꠝꠢꠣꠘ ꠘꠄꠀ ꠅꠀꠖꠣ ꠎꠣꠞꠤ ꠇꠞꠣ ꠅꠁꠍꠦ, ꠁ ꠅꠀꠖꠣꠞ ꠎꠞꠤꠀꠄ ꠀꠝꠞꠣ ꠀꠟ꠆ꠟꠣꠞ ꠀꠞꠅ ꠇꠣꠍꠣꠔ ꠀꠁꠔꠣꠝ ꠙꠣꠞꠝꠥ।
HEB 7:20 ꠀꠞ ꠀꠉꠞ ꠁꠝꠣꠝ ꠅꠇꠟꠞ ꠛꠦꠙꠣꠞꠦ ꠔ ꠇꠥꠘꠥ ꠇꠍꠝ ꠇꠞꠣ ꠅꠁꠍꠦ ꠘꠣ, ꠅꠁꠟꠦ ꠁꠍꠣꠞ ꠁꠝꠣꠝꠔꠤꠞ ꠛꠦꠙꠣꠞꠦ ꠀꠟ꠆ꠟꠣꠄ ꠇꠍꠝ ꠇꠞꠍꠂꠘ।
HEB 7:21 ꠔꠣꠁꠘ ꠇꠍꠝ ꠇꠞꠤꠀ ꠄꠘꠞꠦ ꠛꠅꠀꠁꠟ ꠇꠞꠍꠂꠘ, ꠀꠞ ꠇꠁꠍꠂꠘ, ꠝꠣꠛꠥꠖꠦ ꠇꠍꠝ ꠈꠣꠁꠀ ꠇꠁꠞꠣ, ꠔꠥꠝꠤꠃ ꠢꠞ-ꠢꠣꠝꠦꠡꠣꠇꠥꠞ ꠁꠝꠣꠝ, ꠔꠥꠝꠣꠞ ꠛꠦꠙꠣꠞꠦ ꠔꠣꠘ ꠝꠥꠘꠡꠣ ꠛꠖꠟꠣꠁꠔꠣ ꠘꠣꠄ।
HEB 7:22 ꠔꠦ ꠀꠝꠞꠣ ꠛꠥꠎꠞꠣꠝ ꠎꠦꠘ, ꠁꠍꠣ ꠀꠟ꠆ꠟꠣꠞ ꠟꠉꠦ ꠝꠣꠘꠡꠞ ꠝꠤꠟꠘꠞ ꠀꠞꠅ ꠝꠢꠣꠘ ꠄꠇ ꠃꠍꠤꠟ꠆ꠟꠣꠞ ꠎꠣꠝꠤꠘꠖꠣꠞ ꠅꠁꠍꠂꠘ।
HEB 7:23 ꠀꠞ ꠟꠦꠛꠤꠞ ꠉꠥꠡ꠆ꠐꠤ ꠕꠣꠇꠤ ꠛꠃꠔ ꠝꠣꠘꠡꠦ ꠁꠝꠣꠝꠔꠤ ꠇꠞꠍꠂꠘ, ꠝꠃꠔ ꠅꠁꠎꠣꠄ ꠇꠞꠤ ꠄꠞꠣ ꠇꠥꠘꠥ ꠎꠘꠃ ꠢꠣꠝꠦꠡꠣ ꠁꠝꠣꠝꠔꠤ ꠇꠞꠔꠣ ꠙꠣꠞꠍꠂꠘ ꠘꠣ।
HEB 7:24 ꠅꠁꠟꠦ ꠁꠍꠣ ꠔ ꠢꠞ-ꠢꠣꠝꠦꠡꠣ ꠎꠤꠘ꠆ꠖꠣ ꠀꠍꠂꠘ, ꠄꠞꠟꠣꠉꠤ ꠔꠣꠘ ꠁꠝꠣꠝꠔꠤ ꠇꠥꠘꠥꠖꠤꠘꠅ ꠚꠥꠠꠣꠁꠔ ꠘꠣꠄ।
HEB 7:25 ꠄꠞꠟꠣꠉꠤꠃ ꠎꠦꠞꠣ ꠔꠣꠘ ꠃꠍꠤꠟ꠆ꠟꠣ ꠟꠁꠀ ꠀꠟ꠆ꠟꠣꠞ ꠇꠣꠍꠣꠔ ꠀꠄ, ꠀꠟ꠆ꠟꠣꠄ ꠔꠣꠞꠣꠞꠦ ꠙꠥꠞꠣꠙꠥꠞ ꠘꠣꠎꠣꠔ ꠖꠣꠘ ꠇꠞꠂꠘ, ꠇꠣꠞꠘ ꠔꠣꠞꠣꠞ ꠙꠇ꠆ꠇꠦ ꠡꠥꠙꠣꠞꠤꠡ ꠇꠞꠣꠞ ꠟꠣꠉꠤ ꠔꠣꠁꠘ ꠢꠣꠝꠦꠡꠣ ꠎꠤꠘ꠆ꠖꠣ ꠀꠍꠂꠘ।
HEB 7:26 ꠀꠍꠟꠦ ꠀꠝꠞꠣꠞ ꠟꠣꠉꠤ ꠅꠃꠟꠣ ꠄꠇꠎꠘ ꠙꠞꠗꠣꠘ ꠁꠝꠣꠝꠞ ꠎꠞꠥꠞꠅ ꠀꠍꠤꠟ, ꠎꠦꠁꠘ ꠙꠣꠇ-ꠙꠞꠦꠎꠉꠣꠞ, ꠛꠦ-ꠉꠥꠘꠣ, ꠉꠥꠘꠣꠉꠣꠞ ꠅꠇꠟ ꠕꠘꠦ ꠀꠟꠉ, ꠀꠞ ꠀꠟ꠆ꠟꠣꠄ ꠎꠦꠘꠞꠦ ꠀꠍꠝꠣꠘ ꠅꠇꠟꠞ ꠃꠙꠞꠦ ꠔꠥꠟꠍꠂꠘ।
HEB 7:27 ꠛꠣꠇꠤ ꠢꠇ꠆ꠇꠟ ꠙꠞꠗꠣꠘ ꠁꠝꠣꠝꠦ ꠙꠄꠟꠣ ꠔꠣꠘ ꠘꠤꠎꠞ ꠟꠣꠉꠤ, ꠛꠣꠖꠦ ꠔꠣꠘ ꠇꠃꠝꠞ ꠉꠥꠘꠣꠞ ꠟꠣꠉꠤ ꠙꠞꠔꠦꠇ ꠖꠤꠘ ꠇꠥꠞꠛꠣꠘꠤ ꠀꠖꠣꠄ ꠇꠞꠣ ꠟꠣꠉꠔ। ꠅꠁꠟꠦ ꠅꠃ ꠁꠝꠣꠝꠞ ꠟꠣꠉꠤ ꠁꠔꠣꠞ ꠎꠞꠥꠞ ꠀꠍꠤꠟ ꠘꠣ, ꠇꠣꠞꠘ ꠔꠣꠁꠘ ꠔꠣꠘ ꠘꠤꠎꠞꠦ ꠇꠥꠞꠛꠣꠘꠤ ꠖꠤꠀ ꠄꠇꠁ ꠛꠣꠞꠦ ꠁ ꠇꠣꠝ ꠀꠖꠣꠄ ꠇꠞꠤꠟꠤꠍꠂꠘ।
HEB 7:28 ꠡꠞꠤꠅꠔꠦ ꠎꠔ ꠙꠞꠗꠣꠘ ꠁꠝꠣꠝ ꠅꠇꠟꠞꠦ ꠛꠅꠀꠁꠟ ꠇꠞꠍꠦ ꠄꠞꠣ ꠢꠇꠟꠃ ꠇꠝꠎꠥꠞ, ꠅꠁꠟꠦ ꠡꠞꠤꠅꠔꠞ ꠛꠣꠖꠦ ꠀꠟ꠆ꠟꠣꠞ ꠇꠍꠝ ꠝꠣꠚꠤꠇ ꠎꠦꠘꠞꠦ ꠛꠅꠀꠁꠟ ꠇꠞꠣ ꠅꠁꠍꠦ, ꠄꠁꠘꠃ ꠈꠣꠍ ꠝꠣꠄꠀꠞ ꠙꠥꠔ, ꠢꠞ-ꠢꠣꠝꠦꠡꠣꠇꠥꠞ ꠁꠝꠣꠝꠔꠤꠞ ꠟꠣꠉꠤ ꠄꠘꠞꠦ ꠇꠣꠝꠤꠟ ꠛꠣꠘꠣꠁꠟ ꠅꠁꠍꠦ।
HEB 8:1 ꠀꠝꠞꠣꠞ ꠛꠄꠀꠘꠞ ꠝꠥꠟ ꠛꠦꠙꠣꠞ ꠅꠁꠟ, ꠀꠝꠞꠣꠞ ꠅꠃꠟꠣ ꠄꠇꠎꠘ ꠙꠞꠗꠣꠘ ꠁꠝꠣꠝ ꠀꠍꠂꠘ, ꠎꠦꠁꠘ ꠛꠦꠢꠦꠡ꠆ꠔꠅ ꠀꠞꠡꠦ-ꠀꠎꠤꠝꠅ ꠀꠟ꠆ꠟꠣꠞ ꠒꠣꠁꠘꠞ ꠔꠈ꠆ꠔꠅ ꠔꠡꠞꠤꠚ ꠞꠣꠈꠍꠂꠘ।
HEB 8:2 ꠔꠣꠁꠘ ꠢꠃ ꠀꠍꠟ ꠙꠣꠇ ꠎꠣꠉꠣ, ꠝꠣꠘꠤ ꠛꠦꠢꠦꠡ꠆ꠔꠤ ꠄꠛꠣꠖꠔ ꠈꠣꠘꠣꠔ ꠄꠛꠣꠖꠔꠤ ꠇꠞꠞꠣ, ꠁ ꠄꠛꠣꠖꠔ ꠈꠣꠘꠣ ꠔ ꠇꠥꠘꠥ ꠝꠣꠘꠡꠞ ꠀꠔꠞ ꠛꠣꠘꠣꠁꠟ ꠘꠣꠄ, ꠈꠣꠟꠤ ꠝꠣꠛꠥꠖꠦ ꠘꠤꠎꠦ ꠛꠣꠘꠣꠁꠍꠂꠘ।
HEB 8:3 ꠙꠡꠥ ꠇꠥꠞꠛꠣꠘꠤ ꠀꠞ ꠟꠤꠟ꠆ꠟꠣ-ꠍꠖꠉꠣ ꠀꠖꠣꠄ ꠇꠞꠣ ꠅꠁꠟ ꠙꠞꠔꠦꠇ ꠙꠞꠗꠣꠘ ꠁꠝꠣꠝꠞ ꠖꠣꠄꠁꠔ꠆ꠔ, ꠄꠞꠟꠣꠉꠤ ꠅꠃ ꠙꠞꠗꠣꠘ ꠁꠝꠣꠝꠞ ꠉꠦꠍꠦꠅ ꠇꠥꠞꠛꠣꠘꠤꠞ ꠎꠤꠘꠤꠡ ꠕꠣꠇꠔꠦ ꠅꠁꠛ।
HEB 8:4 ꠔꠣꠁꠘ ꠎꠥꠖꠤ ꠅꠈꠘ ꠖꠥꠘꠤꠀꠔ ꠕꠣꠇꠔꠣ ꠔꠦ ꠁꠝꠣꠝꠔꠤ ꠇꠞꠔꠣ ꠙꠣꠞꠟꠣ ꠘꠣ ꠅꠘꠦ, ꠇꠣꠞꠘ ꠡꠞꠤꠅꠔꠞ ꠢꠥꠇꠥꠝ ꠝꠣꠚꠤꠇ ꠇꠥꠞꠛꠣꠘꠤ ꠖꠤꠛꠣꠞ ꠁꠝꠣꠝ ꠔ ꠀꠍꠂꠘꠃ।
HEB 8:5 ꠢꠤ ꠁꠝꠣꠝ ꠅꠇꠟꠞ ꠇꠣꠝ ꠅꠁꠟ ꠛꠦꠢꠦꠡ꠆ꠔꠤ ꠇꠣꠝꠞ ꠘꠝꠥꠘꠣ ꠛꠣ ꠍꠣꠄꠀ, ꠎꠦꠟꠣ ꠝꠥꠍꠣꠄ ꠢꠤ ꠄꠛꠣꠖꠔ ꠈꠣꠘꠣ ꠛꠣꠘꠣꠘꠤꠞ ꠡꠝꠄ ꠀꠟ꠆ꠟꠣꠄ ꠝꠥꠍꠣꠞꠦ ꠢꠥꠡꠤꠀꠞ ꠇꠞꠤ ꠇꠁꠟꠣ, “ꠖꠦꠈꠤꠅ, ꠅꠃ ꠙꠣꠠꠞ ꠃꠙꠞꠦ ꠔꠥꠝꠣꠞꠦ ꠎꠦꠟꠣ ꠘꠇꠡꠣ ꠖꠦꠈꠣꠁꠟꠣꠝ, ꠄꠇ꠆ꠇꠦꠞꠦ ꠅꠃ ꠟꠣꠈꠣꠘ ꠇꠞꠤ ꠢꠇꠟꠔꠣ ꠛꠣꠘꠣꠁꠅ।”
HEB 8:6 ꠅꠁꠟꠦ ꠅꠈꠘ ꠀꠝꠞꠣ ꠖꠦꠈꠞꠣꠝ, ꠁꠍꠣꠄ ꠁꠝꠣꠝꠔꠤꠞ ꠎꠦ ꠖꠣꠄꠁꠔ꠆ꠔ ꠙꠣꠁꠍꠂꠘ, ꠁꠐꠣ ꠢꠤ ꠁꠝꠣꠝ ꠅꠇꠟ ꠕꠣꠇꠤ ꠛꠃꠔ ꠜꠣꠟꠣ, ꠎꠦꠟꠣ ꠀꠟ꠆ꠟꠣꠞ ꠟꠉꠦ ꠝꠣꠘꠡꠞ ꠝꠤꠟꠘꠞ ꠀꠞꠅ ꠜꠣꠟꠣ ꠄꠇ ꠃꠍꠤꠟ꠆ꠟꠣꠞ ꠟꠣꠉꠤ ꠔꠣꠁꠘ ꠎꠤꠝ꠆ꠝꠣꠖꠣꠞ ꠅꠁꠍꠂꠘ। ꠁ ꠃꠍꠤꠟ꠆ꠟꠣ ꠀꠉꠞ ꠃꠍꠤꠟ꠆ꠟꠣ ꠕꠣꠇꠤ ꠛꠃꠔ ꠜꠣꠟꠣ; ꠁ ꠃꠍꠤꠟ꠆ꠟꠣ ꠔ ꠛꠃꠔ ꠜꠣꠟꠣ ꠜꠣꠟꠣ ꠅꠀꠖꠣꠞ ꠃꠙꠞꠦ ꠇꠣꠁꠝ ꠅꠁꠍꠦ।
HEB 8:7 ꠀꠟ꠆ꠟꠣꠞ ꠟꠉꠦ ꠀꠝꠞꠣꠞ ꠝꠤꠟꠘꠞ ꠙꠄꠟꠣ ꠃꠍꠤꠟ꠆ꠟꠣ ꠎꠥꠖꠤ ꠘꠤꠈꠥꠔ ꠅꠁꠔ, ꠔꠦ ꠖꠥꠍꠞꠣ ꠃꠍꠤꠟ꠆ꠟꠣ ꠇꠣꠁꠝꠞ ꠇꠥꠘꠥ ꠎꠞꠥꠞ ꠀꠍꠤꠟ ꠘꠣ।
HEB 8:8 ꠅꠁꠟꠦ ꠀꠟ꠆ꠟꠣꠄ ꠔꠣꠞꠣꠞ ꠖꠥꠡ ꠖꠦꠈꠣꠁꠍꠂꠘ, ꠎꠦꠟꠣ ꠀꠍꠝꠣꠘꠤ ꠇꠤꠔꠣꠛꠦ ꠇꠄ, ꠝꠣꠛꠥꠖꠦ ꠇꠁꠞꠣ, ꠢꠥꠘꠅ, ꠅꠟꠣ ꠄꠇ ꠅꠇ꠆ꠔ ꠀꠁꠛ, ꠎꠦꠛꠟꠣ ꠀꠝꠤ ꠛꠘꠤ ꠁꠍꠞꠣꠁꠟ ꠀꠞ ꠄꠢꠥꠖꠣ ꠉꠥꠡ꠆ꠐꠤꠞ ꠟꠣꠉꠤ, ꠀꠝꠣꠞ ꠟꠉꠦ ꠝꠤꠟꠘꠞ ꠄꠇ ꠘꠄꠀ ꠃꠍꠤꠟ꠆ꠟꠣ ꠇꠣꠁꠝ ꠇꠞꠝꠥ।
HEB 8:9 ꠅꠃ ꠘꠄꠀ ꠃꠍꠤꠟ꠆ꠟꠣ ꠀꠉꠞ ꠢꠤ ꠃꠍꠤꠟ꠆ꠟꠣꠞ ꠟꠣꠈꠣꠘ ꠘꠣꠄ, ꠝꠤꠡꠞ ꠖꠦꠡ ꠕꠣꠇꠤ ꠔꠣꠞꠣꠞ ꠝꠄ-ꠝꠥꠞꠛ꠆ꠛꠤ ꠅꠇꠟꠞꠦ, ꠀꠎꠣꠖ ꠇꠞꠤ ꠀꠘꠣꠞ ꠛꠣꠟꠣ ꠎꠦ ꠃꠍꠤꠟ꠆ꠟꠣ ꠇꠞꠍꠟꠣꠝ। ꠇꠣꠞꠘ ꠔꠣꠞꠣ ꠀꠝꠣꠞ ꠃꠍꠤꠟ꠆ꠟꠣꠞ ꠃꠙꠞꠦ ꠑꠤꠇ ꠞꠁꠍꠦ ꠘꠣ, ꠄꠞꠟꠣꠉꠤ ꠀꠝꠤꠅ ꠔꠣꠞꠣꠞ ꠟꠉ ꠍꠣꠠꠤ ꠖꠤꠍꠤ, ꠁꠈꠣꠘ ꠝꠣꠛꠥꠖꠦ ꠇꠁꠞꠣꠝ।
HEB 8:10 ꠅꠁꠟꠦ ꠀꠝꠤ ꠝꠣꠛꠥꠖꠦ ꠄꠅꠈꠣꠘꠅ ꠇꠁꠞꠣꠝ, ꠁ ꠎꠝꠣꠘꠣꠞ ꠛꠣꠖꠦ ꠀꠝꠤ ꠛꠘꠤ ꠁꠍꠞꠣꠁꠟꠞ ꠟꠉꠦ, ꠀꠝꠣꠞ ꠘꠄꠀ ꠅꠃ ꠃꠍꠤꠟ꠆ꠟꠣ ꠇꠣꠁꠝ ꠇꠞꠝꠥ, ꠀꠝꠣꠞ ꠡꠞꠤꠅꠔ ꠔꠣꠞꠣꠞ ꠖꠤꠟꠞ ꠝꠣꠎꠦ ꠖꠤꠝꠥ, ꠔꠣꠞꠣꠞ ꠅꠘ꠆ꠔꠞꠞ ꠝꠣꠎꠦ ꠀꠝꠤ ꠟꠦꠈꠤꠀ ꠖꠤꠝꠥ, ꠀꠝꠤ ꠔꠣꠞꠣꠞ ꠀꠟ꠆ꠟꠣ ꠅꠁꠝꠥ, ꠔꠣꠞꠣ ꠅꠁꠛꠣ ꠀꠝꠣꠞ ꠙ꠆ꠞꠎꠣ।
HEB 8:11 ꠔꠣꠞꠣ ꠢꠇꠟꠦꠃ ꠔꠣꠞꠣꠞ ꠀꠞꠤ-ꠚꠞꠤꠞꠦ, ꠎꠣꠞꠎꠤꠞ ꠜꠣꠁ-ꠛꠤꠞꠣꠖꠞꠞꠦ ꠁꠟꠣ ꠔꠣꠟꠤꠝ ꠖꠦꠅꠀ ꠟꠣꠉꠔ ꠘꠣꠄ ꠛꠥꠟꠦ, ꠔꠥꠝꠞꠣ ꠀꠟ꠆ꠟꠣꠞꠦ ꠌꠤꠘꠅ। ꠔꠣꠞꠣ ꠢꠥꠞꠥ-ꠛꠠ ꠢꠇ꠆ꠇꠟꠦ ꠄꠝꠘꠦꠃ ꠔ ꠀꠝꠣꠞꠦ ꠌꠤꠘꠛꠣ,
HEB 8:12 ꠇꠣꠞꠘ ꠀꠝꠤ ꠔꠣꠞꠣꠞ ꠢꠇ꠆ꠇꠟ ꠘꠣꠚꠞꠝꠣꠘꠤ ꠝꠣꠚ ꠇꠞꠝꠥ, ꠔꠣꠞꠣꠞ ꠉꠥꠘꠣꠞꠦ ꠀꠞ ꠇꠥꠘꠥꠖꠤꠘꠃ ꠝꠘꠅ ꠞꠣꠈꠔꠣꠝ ꠘꠣꠄ।
HEB 8:13 ꠔꠦ ꠛꠥꠎꠣ ꠎꠣꠄ, ‘ꠘꠄꠀ ꠃꠍꠤꠟ꠆ꠟꠣ’ ꠇꠕꠣ ꠇꠁꠀ ꠔꠣꠁꠘ ꠙꠄꠟꠣ ꠃꠍꠤꠟ꠆ꠟꠣꠞꠦ ꠙꠥꠞꠣꠘ ꠛꠣꠘꠣꠁꠍꠂꠘ, ꠀꠞ ꠎꠦꠔꠣ ꠅꠌꠟ-ꠙꠥꠞꠣꠘ ꠅꠁꠎꠣꠄ, ꠁꠔꠣ ꠔ ꠎꠟꠖꠤ ꠇꠞꠤ ꠀꠞꠣꠁꠎꠣꠄ।
HEB 9:1 ꠀꠟ꠆ꠟꠣꠞ ꠟꠉꠦ ꠝꠣꠘꠡꠞ ꠝꠤꠟꠘꠞ ꠙꠄꠟꠣ ꠃꠍꠤꠟ꠆ꠟꠣꠞ ꠝꠣꠎꠦ, ꠀꠟ꠆ꠟꠣꠞ ꠄꠛꠣꠖꠔꠤꠞ ꠟꠣꠉꠤ ꠘꠣꠘꠣꠘ ꠘꠝꠥꠘꠣꠞ ꠘꠤꠅꠝ-ꠇꠣꠘꠥꠘ ꠀꠍꠤꠟ, ꠀꠞ ꠖꠥꠘꠤꠀꠔ ꠄꠛꠣꠖꠔ ꠇꠞꠣꠞ ꠟꠣꠉꠤ ꠄꠇꠈꠣꠘ ꠄꠛꠣꠖꠔ ꠈꠣꠘꠣꠞ ꠇꠕꠣꠅ ꠟꠦꠈꠣ ꠀꠍꠤꠟ।
HEB 9:2 ꠢꠃ ꠘꠤꠅꠝ ꠝꠣꠚꠤꠇ ꠄꠇꠈꠣꠘ ꠄꠛꠣꠖꠔ-ꠔꠣꠝ꠆ꠛꠥ ꠛꠣꠘꠣꠁꠟ ꠅꠁꠍꠤꠟ, ꠢꠤ ꠄꠛꠣꠖꠔ-ꠔꠣꠝ꠆ꠛꠥꠞ ꠙꠄꠟꠣ ꠇꠥꠑꠣꠔ ꠀꠍꠤꠟ ꠌꠦꠞꠣꠉ ꠖꠣꠘꠤ, ꠙꠛꠤꠔ꠆ꠞ ꠞꠥꠐꠤ ꠀꠞ ꠁꠔꠣ ꠞꠣꠈꠣꠞ ꠐꠦꠛꠥꠟ। ꠁ ꠙꠄꠟꠣ ꠇꠥꠑꠣꠞ ꠘꠣꠝ ꠀꠍꠤꠟ ꠙꠣꠇ ꠎꠣꠉꠣ।
HEB 9:3 ꠖꠥꠍꠞꠣ ꠙꠞ꠆ꠖꠣꠞ ꠜꠤꠔꠞꠦ ꠀꠞꠇ ꠇꠥꠑꠣ ꠀꠍꠤꠟ, ꠢꠤ ꠖꠥꠍꠞꠣ ꠇꠥꠑꠣꠞ ꠘꠣꠝ ꠀꠍꠤꠟ ꠈꠣꠍ ꠙꠣꠇ ꠎꠣꠉꠣ ꠛꠣ ꠢꠦꠞꠦꠝ ꠡꠞꠤꠚ।
HEB 9:4 ꠁ ꠇꠥꠑꠣꠞ ꠝꠣꠎꠦ ꠀꠍꠤꠟ, ꠡꠥꠘꠣꠖꠤ ꠛꠣꠘꠣꠁꠟ ꠀꠉꠞ-ꠈꠥꠡꠛꠄ ꠎꠣꠟꠣꠘꠤ ꠐꠦꠛꠥꠟ, ꠡꠥꠘꠣꠖꠤ ꠟꠦꠙꠣ ꠡꠣꠢꠣꠖꠔ ꠡꠘ꠆ꠖꠥꠇ, ꠡꠘ꠆ꠖꠥꠇꠞ ꠜꠤꠔꠞꠦ ꠀꠍꠤꠟ ꠡꠥꠘꠣꠞ ꠛꠂꠀꠝꠅ ꠜꠞꠣ ꠇꠥꠖꠞꠔꠤ ꠈꠣꠘꠤ ꠝꠣꠘ꠆ꠘꠣ, ꠁꠝꠣꠝ ꠢꠣꠞꠥꠘꠞ ꠟꠣꠑꠤ, ꠅꠃ ꠟꠣꠑꠤꠔ ꠇꠥꠖꠞꠔꠤ ꠚꠥꠟ ꠚꠥꠐꠤꠍꠤꠟ। ꠀꠞꠅ ꠀꠍꠤꠟ ꠀꠟ꠆ꠟꠣꠞ ꠟꠉꠦ ꠝꠤꠟꠘꠞ ꠃꠍꠤꠟ꠆ꠟꠣ ꠟꠦꠈꠣ ꠢꠃ ꠖꠥꠁꠅ ꠡꠣꠢꠣꠖꠔ ꠙꠣꠔ꠆ꠔꠞ।
HEB 9:5 ꠢꠤ ꠡꠘ꠆ꠖꠥꠇꠞ ꠃꠙꠞꠦ ꠀꠍꠤꠟ ꠀꠟ꠆ꠟꠣꠞ ꠎꠣꠟꠣꠟꠤ ꠡꠥꠘꠣꠞ ꠖꠥꠁ ꠇꠣꠞꠥꠛꠤ, ꠅꠔꠣꠞ ꠒꠣꠈꠘꠣꠉꠥꠁꠘ ꠢꠃ ꠡꠘ꠆ꠖꠥꠇꠞ ꠓꠣꠇꠘꠤꠞ ꠃꠙꠞꠦ ꠝꠤꠟꠤꠀ ꠖꠦꠅꠀ ꠀꠍꠤꠟ, ꠀꠞ ꠅꠘꠅꠃ ꠉꠥꠘꠣꠞ ꠇꠚꠞꠣ ꠀꠖꠣꠄ ꠇꠞꠣ ꠅꠁꠔ। ꠁꠔꠣ ꠢꠇ꠆ꠇꠟꠔꠣꠞ ꠈꠥꠐꠤꠘꠣꠐꠤ ꠛꠄꠀꠘ ꠇꠞꠣ ꠅꠈꠘ ꠎꠞꠥꠞ ꠘꠣꠄ।
HEB 9:6 ꠁ ꠢꠇ꠆ꠇꠟꠔꠣ ꠎꠥꠁꠔ ꠇꠞꠣꠞ ꠛꠣꠖꠦ ꠁꠝꠣꠝ ꠅꠇꠟꠦ ꠁꠝꠣꠝꠔꠤ ꠇꠣꠝꠞ ꠟꠣꠉꠤ ꠢꠣꠝꠦꠡꠣ ꠙꠄꠟꠣ ꠇꠥꠑꠣꠞ ꠜꠤꠔꠞꠦ ꠢꠣꠝꠣꠁꠔꠣ।
HEB 9:7 ꠅꠁꠟꠦ ꠖꠥꠍꠞꠣ ꠇꠥꠑꠣꠔ, ꠝꠣꠘꠤ ꠢꠦꠞꠦꠝ ꠡꠞꠤꠚꠅ ꠈꠣꠟꠤ ꠙꠞꠗꠣꠘ ꠁꠝꠣꠝ ꠍꠣꠛꠦ ꠛꠍꠞꠅ ꠄꠇꠛꠣꠞꠃ ꠢꠣꠝꠣꠁꠔꠣ ꠙꠣꠞꠔꠣ, ꠔꠣꠁꠘꠅ ꠇꠥꠞꠛꠣꠘꠤꠞ ꠟꠃ ꠛꠤꠘꠣ ꠢꠤꠘꠅ ꠢꠣꠝꠣꠁꠔꠣ ꠙꠣꠞꠔꠣ ꠘꠣ। ꠔꠣꠘ ꠘꠤꠎꠞ ꠉꠥꠘꠣ ꠀꠞ ꠔꠣꠘ ꠇꠃꠝꠞ ꠘꠣ-ꠎꠣꠘꠣ ꠢꠇꠟ ꠉꠥꠘꠣꠞ ꠝꠣꠚꠤꠞ ꠟꠣꠉꠤ, ꠇꠥꠞꠛꠣꠘꠤꠞ ꠟꠃ ꠟꠁꠀ ꠢꠘꠅ ꠢꠣꠝꠣꠁꠔꠣ।
HEB 9:8 ꠔꠦ ꠙꠣꠇ ꠞꠥꠢꠦ ꠖꠦꠈꠣꠁꠀ ꠖꠤꠞꠣ, ꠁ ꠖꠥꠘꠤꠀꠞ ꠙꠄꠟꠣ ꠄꠛꠣꠖꠔ ꠈꠣꠘꠣ ꠎꠔꠖꠤꠘ ꠇꠣꠁꠝ ꠀꠍꠦ, ꠅꠔꠖꠤꠘ ꠢꠤ ꠢꠦꠞꠦꠝ ꠡꠞꠤꠚꠅ ꠢꠣꠝꠣꠘꠤꠞ ꠙꠕ ꠈꠥꠟꠣ ꠅꠁꠔ ꠘꠣꠄ।
HEB 9:9 ꠢꠤ ꠄꠛꠣꠖꠔ ꠈꠣꠘꠣ ꠅꠁꠟ ꠁ ꠎꠝꠣꠘꠣꠞ ꠟꠣꠉꠤ ꠄꠇ ꠘꠤꠡꠣꠘꠣ, ꠁ ꠘꠤꠡꠣꠘꠣꠄ ꠀꠝꠞꠣꠞꠦ ꠛꠣꠔꠣꠁ ꠖꠦꠄ, ꠅꠃ ꠟꠣꠈꠣꠘ ꠇꠥꠞꠛꠣꠘꠤ ꠀꠞ ꠟꠤꠟ꠆ꠟꠣ-ꠍꠖꠉꠣꠄ ꠄꠛꠣꠖꠔꠇꠣꠞꠤꠞ ꠛꠤꠛꠦꠇꠞ ꠈꠥꠔꠈꠥꠔꠤ ꠜꠣꠛ ꠖꠥꠞ ꠇꠞꠔ ꠙꠣꠞꠦ ꠘꠣ।
HEB 9:10 ꠁꠔꠣ ꠔ ꠈꠣꠟꠤ ꠈꠣꠅꠀ-ꠖꠣꠅꠀ, ꠅꠎꠥ-ꠉꠥꠍꠟꠞ ꠛꠦꠙꠣꠞ, ꠢꠇ꠆ꠇꠟꠔꠣꠃ ꠈꠣꠟꠤ ꠎꠣꠁꠞꠣ ꠡꠞꠤꠅꠔ, ꠖꠤꠟꠞ ꠇꠥꠘ꠆ꠔꠣ ꠘꠣꠄ। ꠁ ꠡꠞꠤꠅꠔ ꠇꠣꠁꠝ ꠀꠍꠤꠟ, ꠀꠞꠅ ꠜꠣꠟꠣ ꠇꠥꠘꠥ ꠃꠍꠤꠟ꠆ꠟꠣ ꠀꠁꠛꠣꠞ ꠀꠉ ꠙꠞ꠆ꠎꠘ꠆ꠔ।
HEB 9:11 ꠅꠁꠟꠦ ꠅꠈꠘ ꠎꠔ ꠜꠣꠟꠣ ꠜꠣꠟꠣ ꠛꠦꠙꠣꠞ ꠀꠁꠍꠦ, ꠀꠟ-ꠝꠍꠤ ꠔ ꠅꠃ ꠘꠄꠀ ꠔꠞꠤꠇꠣꠞ ꠙꠞꠗꠣꠘ ꠁꠝꠣꠝ ꠅꠁꠍꠂꠘ। ꠔꠣꠁꠘ ꠀꠞꠅ ꠁꠎ꠆ꠎꠔꠤ ꠀꠞꠅ ꠛꠦꠡꠤ ꠇꠣꠝꠤꠟ ꠄꠛꠣꠖꠔ ꠈꠣꠘꠣ ꠅꠁꠀ ꠀꠁꠍꠂꠘ। ꠁ ꠄꠛꠣꠖꠔ ꠈꠣꠘꠣ ꠇꠥꠘꠥ ꠝꠣꠘꠡꠞ ꠀꠔꠞ ꠛꠣꠘꠣꠁꠟ ꠘꠣꠄ, ꠁꠈꠣꠘ ꠁ ꠖꠥꠘꠤꠀꠞ ꠖꠥꠘꠤꠀꠛꠤ ꠇꠥꠘ꠆ꠔꠣ ꠘꠣꠄ।
HEB 9:12 ꠇꠥꠘꠥ ꠉꠞꠥ ꠛꠣ ꠍꠣꠉꠟꠞ ꠟꠃ ꠀꠔꠅ ꠟꠁꠀ ꠔꠣꠁꠘ ꠢꠤꠘꠅ ꠢꠣꠝꠣꠁꠍꠂꠘ ꠘꠣ। ꠈꠣꠟꠤ ꠔꠣꠘ ꠘꠤꠎꠞ ꠎꠣꠘ ꠇꠥꠞꠛꠣꠘꠤꠞ ꠟꠃ ꠖꠤꠀ ꠄꠇꠛꠣꠞꠃ ꠢꠤ ꠢꠦꠞꠦꠝ ꠡꠞꠤꠚꠈꠣꠘꠅ ꠢꠣꠝꠣꠁꠍꠂꠘ, ꠢꠣꠝꠣꠁꠀ ꠀꠝꠞꠣꠞꠦ ꠢꠞ-ꠢꠣꠝꠦꠡꠣꠇꠥꠞ ꠟꠣꠉꠤ ꠈꠣꠟꠣꠍ ꠇꠞꠍꠂꠘ।
HEB 9:13 ꠀꠉꠦ ꠎꠦꠞꠣ ꠘꠣꠙꠣꠇ ꠛꠘꠤꠎꠤꠔ, ꠔꠣꠞꠣꠞ ꠟꠣꠉꠤ ꠉꠞꠥ ꠛꠣ ꠍꠣꠉꠟꠞ ꠟꠃ ꠀꠞ ꠒꠦꠇꠤ-ꠉꠞꠥꠞ ꠎꠣꠟꠣꠁꠟ ꠍꠣꠟꠤ ꠍꠤꠐꠣꠁꠀ ꠙꠣꠇ-ꠍꠣꠚ ꠇꠞꠣ ꠅꠁꠔ, ꠅꠁꠟꠦ ꠁꠔꠣꠄ ꠔ ꠄꠞꠣꠞ ꠡꠞꠤꠟꠞ ꠛꠣꠁꠞꠉꠣꠟꠣ ꠈꠣꠟꠤ ꠙꠣꠇ-ꠍꠣꠚ ꠅꠁꠔ।
HEB 9:14 ꠔꠦ ꠎꠦꠁꠘ ꠢꠞ-ꠢꠣꠝꠦꠡꠣꠇꠥꠞ ꠎꠤꠘ꠆ꠖꠣ ꠞꠥꠢꠥꠞ ꠝꠣꠎꠖꠤꠀ, ꠛꠦ-ꠉꠥꠘꠣ ꠇꠥꠞꠛꠣꠘꠤ ꠅꠁꠀ ꠔꠣꠘ ꠘꠤꠎꠞ ꠎꠣꠘꠞꠦ ꠀꠟ꠆ꠟꠣꠞ ꠘꠣꠝꠦ ꠡꠙꠤꠀ ꠖꠤꠟꠣꠁꠍꠂꠘ, ꠢꠤ ꠀꠟ-ꠝꠍꠤꠞ ꠟꠃꠄ ꠀꠝꠞꠣꠞ ꠖꠤꠟꠞꠦ ꠘꠣꠙꠣꠇꠤ ꠇꠣꠝ-ꠇꠣꠎ ꠕꠣꠇꠤ ꠀꠞꠅ ꠇꠔ ꠛꠦꠡꠤ ꠙꠞꠤꠝꠣꠘꠦ ꠙꠣꠇ-ꠍꠣꠚ ꠇꠞꠛ, ꠎꠣꠔꠦ ꠀꠝꠞꠣ ꠎꠤꠘ꠆ꠖꠣ ꠀꠟ꠆ꠟꠣꠞ ꠄꠛꠣꠖꠔ-ꠛꠘ꠆ꠖꠦꠉꠤ ꠇꠞꠔꠣꠝ ꠙꠣꠞꠤ।
HEB 9:15 ꠀꠞ ꠙꠄꠟꠣ ꠃꠍꠤꠟ꠆ꠟꠣ ꠌꠣꠟꠥ ꠕꠣꠇꠔꠦ ꠝꠣꠘꠡꠦ ꠎꠦꠔꠣ ꠉꠥꠘꠣ ꠇꠞꠍꠟꠣ, ꠅꠃ ꠉꠥꠘꠣꠞ ꠀꠔ ꠕꠣꠇꠤ ꠈꠣꠟꠣꠍ ꠇꠞꠣꠞ ꠘꠤꠅꠔꠦ, ꠇꠚꠞꠣ ꠢꠤꠡꠣꠛꠦ ꠀꠟ-ꠝꠍꠤꠞ ꠝꠃꠔ ꠅꠁꠍꠦ। ꠀꠟ꠆ꠟꠣꠄ ꠎꠦꠞꠣꠞꠦ ꠖꠣꠅꠔꠖꠤ ꠀꠘꠤꠀ ꠌꠤꠞꠇꠣꠟꠤꠘ ꠝꠃꠞꠡꠤ ꠡꠝ꠆ꠙꠖ ꠖꠤꠛꠣꠞ ꠅꠀꠖꠣ ꠇꠞꠍꠂꠘ, ꠀꠟ-ꠝꠍꠤ ꠔ ꠄꠞꠣꠞ ꠟꠣꠉꠤꠃ ꠘꠄꠀ ꠃꠍꠤꠟ꠆ꠟꠣꠞ ꠎꠤꠝ꠆ꠝꠣꠖꠣꠞ ꠅꠁꠍꠂꠘ। ꠅꠃ ꠝꠃꠞꠡꠤ ꠡꠝ꠆ꠙꠖ ꠅꠈꠘ ꠝꠣꠘꠡꠦ ꠙꠣꠁꠛꠣꠞ ꠡꠥꠎꠥꠉ ꠅꠁꠍꠦ,
HEB 9:16 ꠇꠣꠞꠘ ꠖꠥꠘꠤꠀꠛꠤ ꠘꠤꠅꠝꠦ ꠝꠃꠞꠡꠤ ꠡꠝ꠆ꠙꠖꠞ ꠇꠥꠘꠥ ꠅꠍꠤꠅꠔ-ꠘꠣꠝꠣ ꠇꠣꠝꠅ ꠟꠣꠉꠣꠁꠔꠦ ꠅꠁꠟꠦ, ꠙꠄꠟꠣ ꠅꠃ ꠅꠍꠤꠅꠔ ꠇꠞꠞꠣꠞ ꠝꠃꠔ ꠅꠁꠍꠦ ꠇꠞꠤ ꠙꠞꠝꠣꠘ ꠖꠞꠇꠣꠞ ꠅꠄ।
HEB 9:17 ꠝꠣꠘꠡꠞ ꠝꠃꠔꠞ ꠛꠣꠖꠦ ꠔꠣꠞ ꠅꠍꠤꠅꠔ-ꠘꠣꠝꠣ ꠇꠣꠝꠅ ꠟꠣꠉꠦ, ꠅꠍꠤꠅꠔ ꠇꠞꠞꠣ ꠎꠤꠘ꠆ꠖꠣ ꠕꠣꠇꠔꠦ ꠁꠔꠣ ꠇꠥꠘꠥ ꠇꠣꠝꠅ ꠟꠣꠉꠦ ꠘꠣ।
HEB 9:18 ꠑꠤꠇ ꠅꠃ ꠟꠣꠈꠣꠘꠃ, ꠀꠟ꠆ꠟꠣꠞ ꠟꠉꠦ ꠝꠤꠟꠘꠞ ꠙꠄꠟꠣ ꠃꠍꠤꠟ꠆ꠟꠣꠅ, ꠝꠃꠔꠞ ꠟꠃ ꠍꠣꠠꠣ ꠇꠣꠝꠅ ꠟꠣꠉꠣꠁꠟ ꠅꠁꠍꠦ ꠘꠣ।
HEB 9:19 ꠢꠎꠞꠔ ꠝꠥꠍꠣꠄ ꠡꠞꠤꠅꠔꠞ ꠔꠣꠝꠣꠝ ꠢꠥꠇꠥꠝ-ꠀꠢꠇꠣꠝ ꠛꠘꠤ ꠁꠍꠞꠣꠁꠟꠞꠦ ꠎꠣꠘꠣꠘꠤꠞ ꠛꠣꠖꠦ, ꠔꠣꠁꠘ ꠛꠤꠍꠣꠟ ꠀꠞ ꠍꠣꠉꠟꠞ ꠟꠃꠞ ꠟꠉꠦ ꠙꠣꠘꠤ ꠝꠤꠡꠣꠁꠟꠣ, ꠛꠣꠖꠦ ꠟꠣꠟ ꠞꠋ ꠇꠞꠣ ꠝꠦꠠꠣꠞ ꠞꠥꠝꠣ ꠀꠞ ꠄꠍꠥꠛ ꠉꠣꠍꠞ ꠒꠦꠐꠣꠖꠤ ꠀꠟ꠆ꠟꠣꠁ ꠡꠞꠤꠅꠔ ꠇꠤꠔꠣꠛꠞ ꠃꠙꠞꠦ, ꠀꠞ ꠢꠇ꠆ꠇꠟ ꠝꠣꠘꠡꠞ ꠉꠔꠞꠅ ꠍꠤꠐꠣꠁꠀ ꠖꠤꠟꠣ।
HEB 9:20 ꠝꠥꠍꠣꠄ ꠇꠁꠟꠣ, “ꠁ ꠟꠃ ꠅꠁꠟ ꠀꠟ꠆ꠟꠣꠁ ꠝꠤꠟꠘꠞ ꠢꠃ ꠃꠍꠤꠟ꠆ꠟꠣꠞ ꠟꠃ, ꠎꠦ ꠃꠍꠤꠟ꠆ꠟꠣ ꠝꠣꠚꠤꠇ ꠌꠟꠣꠞ ꠟꠣꠉꠤ ꠀꠟ꠆ꠟꠣꠄ ꠔꠥꠝꠞꠣꠞꠦ ꠢꠥꠇꠥꠝ ꠖꠤꠍꠂꠘ।”
HEB 9:21 ꠅꠃ ꠘꠝꠥꠘꠣꠄ ꠔꠣꠁꠘ ꠄꠛꠣꠖꠔ ꠈꠣꠘꠣ ꠀꠞ ꠄꠛꠣꠖꠔꠤ ꠇꠣꠝꠞ ꠢꠇ꠆ꠇꠟ ꠝꠣꠟ-ꠍꠣꠝꠣꠘꠣꠞ ꠃꠙꠞꠦꠅ ꠟꠃ ꠍꠤꠐꠣꠁꠀ ꠖꠤꠟꠣ।
HEB 9:22 ꠀꠍꠟ ꠇꠕꠣ ꠅꠁꠟ, ꠝꠥꠍꠣꠞ ꠡꠞꠤꠅꠔ ꠝꠣꠚꠤꠇ ꠛꠦꠡꠤꠞ ꠜꠣꠉ ꠎꠤꠘꠤꠡꠃ ꠟꠃ ꠖꠤꠀ ꠙꠣꠇ-ꠍꠣꠚ ꠅꠁꠔꠦ ꠅꠄ, ꠇꠥꠞꠛꠣꠘꠤꠞ ꠟꠃ ꠍꠣꠠꠣ ꠇꠥꠘꠥꠝꠘ꠆ꠔꠦꠃ ꠉꠥꠘꠣꠞ ꠝꠣꠚꠤ ꠙꠣꠅꠀ ꠎꠣꠄ ꠘꠣ।
HEB 9:23 ꠎꠦꠔꠣ ꠎꠤꠘꠤꠡ ꠅꠇꠟ ꠈꠣꠟꠤ ꠛꠦꠢꠦꠡ꠆ꠔꠤ ꠎꠤꠘꠤꠡꠞ ꠘꠤꠡꠣꠘꠣ, ꠅꠔꠣꠞꠦ ꠇꠥꠞꠛꠣꠘꠤꠞ ꠙꠡꠥꠞ ꠟꠃꠖꠤ ꠙꠣꠇ-ꠍꠣꠚ ꠇꠞꠣ ꠎꠞꠥꠞ ꠀꠍꠤꠟ, ꠅꠁꠟꠦ ꠎꠦꠔꠣ ꠎꠤꠘꠤꠡ ꠀꠍꠟ ꠛꠦꠢꠦꠡ꠆ꠔꠤ, ꠁꠔꠣꠞꠦ ꠙꠣꠇ-ꠍꠣꠚ ꠇꠞꠣꠞ ꠟꠣꠉꠤ ꠔ ꠀꠞꠅ ꠝꠢꠣꠘ ꠇꠥꠞꠛꠣꠘꠤꠞ ꠎꠞꠥꠞ।
HEB 9:24 ꠀꠞ ꠀꠟ-ꠝꠍꠤ ꠔ ꠢꠃ ꠘꠤꠡꠣꠘꠣꠞ ꠎꠤꠘꠤꠡꠞ ꠟꠣꠈꠣꠘ, ꠝꠣꠘꠡꠞ ꠀꠔꠞ ꠛꠣꠘꠣꠁꠟ ꠇꠥꠘꠥ ꠢꠦꠞꠦꠝ ꠡꠞꠤꠚꠅ ꠢꠣꠝꠣꠁꠍꠂꠘ ꠘꠣ, ꠔꠣꠁꠘ ꠈꠣꠟꠤ ꠀꠍꠟ ꠛꠦꠢꠦꠡ꠆ꠔꠅ ꠢꠣꠝꠣꠁꠍꠂꠘ, ꠎꠣꠔꠦ ꠀꠝꠞꠣꠞ ꠘꠣꠎꠣꠔꠞ ꠟꠣꠉꠤ ꠀꠟ꠆ꠟꠣꠞ ꠍꠣꠝꠘꠦ ꠅꠈꠘ ꠀꠎꠤꠞ ꠅꠁꠔꠣ ꠙꠣꠞꠂꠘ।
HEB 9:25 ꠢꠇꠟ ꠙꠞꠗꠣꠘ ꠁꠝꠣꠝꠦ ꠇꠥꠞꠛꠣꠘꠤꠞ ꠙꠡꠥꠞ ꠟꠃ ꠟꠁꠀ ꠎꠦꠟꠣ ꠙꠞꠔꠦꠇ ꠛꠍꠞ ꠢꠦꠞꠦꠝ ꠡꠞꠤꠚꠅ ꠢꠣꠝꠣꠘꠤ ꠟꠣꠉꠦ, ꠀꠟ-ꠝꠍꠤ ꠔ ꠁ ꠟꠣꠈꠣꠘ ꠛꠣꠞꠦ ꠛꠣꠞꠦ ꠇꠥꠞꠛꠣꠘꠤ ꠅꠀꠞ ꠟꠣꠉꠤ ꠛꠦꠢꠦꠡ꠆ꠔꠅ ꠔꠡꠞꠤꠚ ꠘꠤꠍꠂꠘ ꠘꠣ।
HEB 9:26 ꠁ ꠟꠣꠈꠣꠘ ꠅꠁꠟꠦ ꠔ ꠖꠥꠘꠤꠀ ꠙꠄꠖꠣ ꠕꠣꠇꠤ ꠅꠈꠘ ꠙꠞ꠆ꠎꠘ꠆ꠔ ꠔꠣꠁꠘ ꠛꠣꠞꠦ ꠛꠣꠞꠦ ꠇꠡ꠆ꠐ ꠙꠣꠁꠀ ꠇꠥꠞꠛꠣꠘꠤ ꠅꠁꠔꠦ ꠅꠁꠟ ꠅꠘꠦ। ꠅꠁꠟꠦ ꠔꠣꠁꠘ ꠔ ꠀꠈꠦꠞꠤ ꠎꠝꠣꠘꠣꠔ ꠀꠁꠀ ꠈꠣꠟꠤ ꠄꠇꠛꠣꠞꠃ ꠎꠣꠁꠞ ꠅꠁꠍꠂꠘ, ꠎꠣꠔꠦ ꠘꠤꠎꠞꠦ ꠇꠥꠞꠛꠣꠘꠤ ꠖꠤꠀ ꠔꠣꠝꠣꠝ ꠉꠥꠘꠣꠞ ꠇꠚꠞꠣ ꠅꠁꠘ।
HEB 9:27 ꠀꠟ꠆ꠟꠣꠄ ꠔ ꠑꠤꠇ ꠇꠞꠤꠀ ꠖꠤꠟꠣꠁꠍꠂꠘ, ꠢꠇ꠆ꠇꠟ ꠝꠣꠘꠡꠞ ꠈꠣꠟꠤ ꠄꠇꠛꠣꠞ ꠝꠞꠘ ꠅꠁꠛ, ꠀꠞ ꠝꠞꠘ ꠛꠣꠖꠦ ꠛꠤꠌꠣꠞ।
HEB 9:28 ꠑꠤꠇ ꠅꠃ ꠟꠣꠈꠣꠘ, ꠛꠃꠔ ꠝꠣꠘꠡꠞ ꠉꠥꠘꠣꠞ ꠛꠥꠏꠣ ꠛꠁꠛꠣꠞ ꠟꠣꠉꠤ ꠀꠟ-ꠝꠍꠤꠞꠦꠅ ꠈꠣꠟꠤ ꠄꠇꠛꠣꠞꠃ ꠇꠥꠞꠛꠣꠘꠤ ꠖꠦꠅꠀ ꠅꠁꠍꠦ। ꠔꠣꠁꠘ ꠖꠥꠍꠞꠣꠛꠣꠞ ꠔꠡꠞꠤꠚ ꠀꠘꠛꠣ, ꠅꠁꠟꠦ ꠉꠥꠘꠣꠞ ꠇꠚꠞꠣ ꠛꠘꠣꠞ ꠟꠣꠉꠤ ꠀꠁꠔꠣ ꠘꠣꠄ। ꠈꠣꠟꠤ ꠎꠦꠞꠣ ꠀꠡꠤꠇ ꠅꠁꠀ ꠔꠣꠘ ꠟꠣꠉꠤ ꠛꠣꠞ ꠌꠣꠞ, ꠔꠣꠞꠣꠞꠦ ꠙꠥꠞꠣꠙꠥꠞ ꠘꠣꠎꠣꠔ ꠇꠞꠣꠞ ꠟꠣꠉꠤ ꠖꠥꠍꠞꠣꠛꠣꠞ ꠀꠁꠛꠣ।
HEB 10:1 ꠡꠞꠤꠅꠔ ꠅꠁꠟꠉꠤ ꠈꠣꠟꠤ ꠄꠇ ꠘꠤꠡꠣꠘꠣ, ꠁꠔꠣꠄ ꠜꠛꠤꠡꠔꠞ ꠘꠤꠀꠝꠔꠞ ꠇꠕꠣ ꠛꠣꠔꠣꠁ ꠖꠦꠄ, ꠁꠐꠣ ꠔ ꠀꠍꠟ ꠇꠥꠘꠥ ꠛꠦꠙꠣꠞ ꠘꠣꠄ। ꠄꠞꠟꠣꠉꠤꠃ ꠎꠦꠞꠣ ꠀꠟ꠆ꠟꠣꠞ ꠄꠛꠣꠖꠔ ꠇꠞꠣꠞ ꠈꠤꠀꠟꠤ ꠅꠄ, ꠡꠞꠤꠅꠔꠞ ꠘꠤꠅꠝꠦ ꠔꠣꠞꠣ ꠛꠍꠞ ꠛꠍꠞ ꠄꠇꠁ ꠟꠣꠈꠣꠘ ꠇꠥꠞꠛꠣꠘꠤ ꠖꠤꠀ ꠔ ꠇꠥꠘꠥꠝꠘ꠆ꠔꠦꠃ ꠇꠣꠝꠤꠟ ꠅꠁꠔ ꠙꠣꠞꠦ ꠘꠣ।
HEB 10:2 ꠡꠞꠤꠅꠔꠦ ꠎꠥꠖꠤ ꠔꠣꠞꠣꠞꠦ ꠙꠥꠞꠣꠙꠥꠞ ꠇꠣꠝꠤꠟ ꠛꠣꠘꠣꠁꠟꠤꠔ, ꠔꠦ ꠔ ꠙꠡꠥ ꠇꠥꠞꠛꠣꠘꠤ ꠖꠦꠅꠀ ꠄꠇꠛꠣꠞꠦꠃ ꠛꠘ꠆ꠖ ꠅꠁꠉꠦꠟ ꠅꠘꠦ। ꠄꠛꠣꠖꠔ ꠇꠞꠞꠣ ꠅꠇꠟ ꠎꠥꠖꠤ ꠄꠇꠛꠣꠞꠦꠃ ꠙꠣꠇ-ꠍꠣꠚ ꠛꠘꠤꠎꠤꠔ, ꠔꠦ ꠄꠞꠣ ꠘꠤꠎꠞꠦ ꠀꠞ ꠉꠥꠘꠣꠉꠣꠞ ꠝꠘꠅ ꠇꠞꠟ ꠘꠣ ꠅꠘꠦ।
HEB 10:3 ꠅꠁꠟꠦ ꠅꠃ ꠙꠡꠥ ꠇꠥꠞꠛꠣꠘꠤꠄ ꠔꠣꠞꠣꠞꠦ ꠙꠞꠔꠦꠇ ꠛꠍꠞ ꠁꠀꠖ ꠇꠞꠣꠁꠀ ꠖꠦꠄ ꠎꠦꠘ, ꠔꠣꠞꠣ ꠀꠍꠟꠦ ꠉꠥꠘꠣꠉꠣꠞ।
HEB 10:4 ꠝꠥꠟꠔ, ꠍꠣꠉꠟ ꠛꠣ ꠛꠤꠍꠣꠟꠞ ꠟꠃꠄ ꠝꠣꠘꠡꠞ ꠉꠥꠘꠣꠞꠦ ꠇꠥꠘꠥ ꠟꠣꠈꠣꠘꠃ ꠍꠣꠚ ꠇꠞꠔ ꠙꠣꠞꠦ ꠘꠣ।
HEB 10:5 ꠄꠞꠟꠣꠉꠤꠃ ꠀꠟ-ꠝꠍꠤꠄ ꠖꠥꠘꠤꠀꠔ ꠔꠡꠞꠤꠚ ꠀꠘꠣꠞ ꠇꠣꠟꠅ ꠀꠟ꠆ꠟꠣꠞ ꠖꠞꠛꠣꠞꠅ ꠇꠁꠍꠂꠘ, ꠙꠡꠥ ꠇꠥꠞꠛꠣꠘꠤ ꠛꠣ ꠖꠣꠘ-ꠍꠖꠉꠣ ꠔ ꠀꠍꠟꠦ ꠔꠥꠝꠤ ꠌꠣꠅ ꠘꠣ, ꠅꠁꠟꠦ ꠀꠝꠣꠞꠦ ꠄꠇꠈꠣꠘ ꠇꠣꠄꠀ ꠖꠤꠍ ꠛꠤꠟꠣꠁ ꠖꠤꠛꠣꠞ ꠟꠣꠉꠤ।
HEB 10:6 ꠎꠣꠟꠣꠁꠟ ꠇꠥꠞꠛꠣꠘꠤ ꠛꠣ ꠉꠥꠘꠣꠞ ꠇꠚꠞꠣꠞ ꠇꠥꠞꠛꠣꠘꠤꠄ ꠔꠥꠝꠤ ꠔ ꠈꠥꠡꠤ ꠅꠁꠍ ꠘꠣ।
HEB 10:7 ꠔꠦꠃ ꠀꠝꠤ ꠇꠁꠟꠣꠝ, ꠅ ꠀꠟ꠆ꠟꠣ, ꠖꠦꠈꠃꠇ꠆ꠇꠣ, ꠀꠝꠤ ꠔ ꠅꠘꠅ ꠀꠁꠍꠤ; ꠔꠥꠝꠣꠞ ꠇꠣꠟꠣꠝ ꠡꠞꠤꠚꠅ ꠎꠦꠟꠣ ꠀꠍꠦ, ꠀꠝꠣꠞ ꠎꠘꠝ ꠅꠁꠛ ꠅꠃ ꠎꠉꠔꠅ, ꠔꠥꠝꠣꠞ ꠝꠥꠘꠡꠣꠞꠦ ꠇꠣꠁꠝ ꠇꠞꠣꠞ ꠟꠣꠉꠤ, ꠀꠞ ꠢꠣꠍꠣꠃ ꠀꠝꠤ ꠀꠁꠍꠤ।
HEB 10:8 ꠃꠙꠞꠞ ꠀꠄꠀꠔ ꠅꠇꠟꠞ ꠝꠣꠎꠦ ꠀꠟ-ꠝꠍꠤꠄ ꠙꠄꠟꠣ ꠇꠁꠞꠣ, “ꠙꠡꠥ ꠇꠥꠞꠛꠣꠘꠤ ꠛꠣ ꠖꠣꠘ-ꠍꠖꠉꠣ ꠔ ꠀꠍꠟꠦ ꠔꠥꠝꠤ ꠌꠣꠅ ꠘꠣ, ꠎꠣꠟꠣꠁꠟ ꠇꠥꠞꠛꠣꠘꠤ ꠛꠣ ꠉꠥꠘꠣꠞ ꠇꠚꠞꠣꠞ ꠇꠥꠞꠛꠣꠘꠤꠄ ꠔꠥꠝꠤ ꠔ ꠈꠥꠡꠤ ꠅꠁꠍ ꠘꠣ।” ꠡꠞꠤꠅꠔꠞ ꠢꠥꠇꠥꠝ ꠝꠣꠚꠤꠇ ꠅꠃ ꠇꠥꠞꠛꠣꠘꠤ ꠅꠇꠟ ꠀꠖꠣꠄ ꠇꠞꠣ ꠅꠁꠟꠦꠅ, ꠀꠟ-ꠝꠍꠤꠄ ꠅꠟꠣ ꠇꠁꠟꠣ।
HEB 10:9 ꠛꠣꠖꠞ ꠀꠄꠀꠔꠅ ꠔꠣꠁꠘ ꠢꠤꠞꠛꠣꠞ ꠇꠁꠟꠣ, “ꠖꠦꠈꠃꠇ꠆ꠇꠣ, ꠀꠝꠤ ꠔ ꠅꠘꠅ ꠀꠁꠍꠤ, ꠔꠥꠝꠣꠞ ꠝꠥꠘꠡꠣꠞꠦ ꠇꠣꠁꠝ ꠇꠞꠣꠞ ꠟꠣꠉꠤ।” ꠔꠦ ꠛꠥꠎꠣ ꠎꠣꠄ, ꠖꠥꠍꠞꠣ ꠃꠍꠤꠟ꠆ꠟꠣꠞꠦ ꠇꠣꠁꠝ ꠇꠞꠣꠞ ꠘꠤꠅꠔꠦ, ꠔꠣꠁꠘ ꠙꠄꠟꠣ ꠃꠍꠤꠟ꠆ꠟꠣꠞꠦ ꠛꠣꠔꠤꠟ ꠇꠞꠤꠟꠤꠟꠣ।
HEB 10:10 ꠄꠞꠟꠣꠉꠤ ꠀꠟ꠆ꠟꠣ ꠙꠣꠇꠞ ꠢꠃ ꠝꠥꠘꠡꠣ ꠝꠣꠚꠤꠇ ꠁꠍꠣ ꠀꠟ-ꠝꠍꠤꠞ ꠇꠣꠄꠀꠞꠦ ꠈꠣꠟꠤ ꠄꠇꠛꠣꠞꠃ ꠇꠥꠞꠛꠣꠘꠤ ꠖꠦꠅꠀ ꠅꠁꠍꠤꠟ, ꠅꠃ ꠇꠥꠞꠛꠣꠘꠤꠞ ꠛꠟꠦ ꠀꠟ꠆ꠟꠣꠞ ꠖꠞꠛꠣꠞꠅ ꠀꠝꠞꠣꠞꠦ ꠙꠣꠇ-ꠍꠣꠚ ꠇꠞꠣ ꠅꠁꠍꠦ।
HEB 10:11 ꠙꠞꠔꠦꠇ ꠁꠝꠣꠝ ꠍꠣꠛꠦ ꠙꠞꠔꠤꠖꠤꠘ ꠀꠎꠤꠞ ꠅꠁꠀ ꠀꠟ꠆ꠟꠣꠞ ꠄꠛꠣꠖꠔꠤ ꠇꠞꠂꠘ ꠀꠞ ꠛꠣꠞꠦ ꠛꠣꠞꠦ ꠇꠥꠞꠛꠣꠘꠤ ꠀꠖꠣꠄ ꠇꠞꠂꠘ, ꠔꠣ-ꠅ ꠅꠃ ꠟꠣꠈꠣꠘ ꠇꠥꠞꠛꠣꠘꠤꠄ ꠇꠥꠘꠥꠖꠤꠘꠃ ꠉꠥꠘꠣꠞꠦ ꠗꠁꠀ ꠍꠣꠚ ꠇꠞꠔ ꠙꠣꠞꠦ ꠘꠣ।
HEB 10:12 ꠅꠁꠟꠦ ꠀꠟ-ꠝꠍꠤꠄ ꠔ ꠌꠤꠞꠇꠣꠟꠞ ꠉꠥꠘꠣꠞ ꠝꠣꠚꠤꠞ ꠟꠣꠉꠤ ꠈꠣꠟꠤ ꠄꠇꠛꠣꠞꠃ ꠇꠥꠞꠛꠣꠘꠤ ꠅꠁꠀ, ꠀꠞꠡꠦ-ꠀꠎꠤꠝꠅ ꠀꠟ꠆ꠟꠣꠞ ꠒꠣꠁꠘꠞ ꠔꠈ꠆ꠔꠅ ꠔꠡꠞꠤꠚ ꠞꠣꠈꠍꠂꠘ।
HEB 10:13 ꠀꠞ ꠢꠃ ꠡꠝꠄ ꠕꠣꠇꠤ ꠔꠣꠁꠘ ꠛꠣꠞ ꠌꠣꠁꠞꠣ, ꠎꠔꠖꠤꠘ ꠙꠞ꠆ꠎꠘ꠆ꠔ ꠖꠥꠡꠝꠘ ꠅꠇꠟꠞꠦ ꠔꠣꠘ ꠙꠣꠅꠞ ꠔꠟꠣꠔ ꠚꠣꠟꠣꠁꠀ ꠌꠥꠞꠝꠣꠞ ꠇꠞꠣ ꠘꠣ ꠅꠄ, ꠅꠔꠖꠤꠘ ꠛꠣꠞ ꠌꠣꠁꠛꠣ।
HEB 10:14 ꠇꠣꠞꠘ ꠔꠣꠘ ꠅꠃ ꠄꠇꠛꠣꠞꠞ ꠇꠥꠞꠛꠣꠘꠤꠞ ꠃꠍꠤꠟ꠆ꠟꠣꠄ ꠎꠦꠞꠣꠞꠦ ꠙꠣꠇ-ꠍꠣꠚ ꠇꠞꠣ ꠅꠁꠍꠦ, ꠄꠞꠣꠞꠦ ꠌꠤꠞꠇꠣꠟꠞ ꠟꠣꠉꠤꠃ ꠔꠣꠁꠘ ꠙꠥꠞꠣꠙꠥꠞ ꠇꠣꠝꠤꠟ ꠇꠞꠍꠂꠘ।
HEB 10:15 ꠅꠃ ꠛꠦꠙꠣꠞꠦ ꠀꠟ꠆ꠟꠣꠞ ꠙꠣꠇ ꠞꠥꠢꠦꠅ ꠀꠝꠞꠣꠞ ꠉꠦꠍꠦ ꠡꠣꠇ꠆ꠇꠤ ꠖꠤꠞꠣ, ꠔꠣꠁꠘ ꠙꠄꠟꠣ ꠇꠁꠍꠂꠘ,
HEB 10:16 ꠀꠝꠤ ꠝꠣꠛꠥꠖꠦ ꠇꠁꠞꠣꠝ, ꠁ ꠎꠝꠣꠘꠣꠞ ꠛꠣꠖꠦ ꠀꠝꠤ ꠛꠘꠤ ꠁꠍꠞꠣꠁꠟꠞ ꠟꠉꠦ, ꠀꠝꠣꠞ ꠘꠄꠀ ꠅꠃ ꠃꠍꠤꠟ꠆ꠟꠣ ꠇꠣꠁꠝ ꠇꠞꠝꠥ, ꠀꠝꠣꠞ ꠡꠞꠤꠅꠔ ꠔꠣꠞꠣꠞ ꠖꠤꠟꠞ ꠝꠣꠎꠦ ꠖꠤꠝꠥ, ꠔꠣꠞꠣꠞ ꠅꠘ꠆ꠔꠞꠞ ꠝꠣꠎꠦ ꠀꠝꠤ ꠟꠦꠈꠤꠀ ꠖꠤꠝꠥ।
HEB 10:17 ꠛꠣꠖꠦ ꠢꠤꠞꠛꠣꠞ ꠇꠁꠞꠣ, ꠀꠝꠤ ꠔꠣꠞꠣꠞ ꠘꠣꠚꠞꠝꠣꠘꠤ ꠀꠞ ꠉꠥꠘꠣꠞꠦ ꠀꠞ ꠇꠥꠘꠥꠖꠤꠘꠃ ꠝꠘꠅ ꠞꠣꠈꠔꠣꠝ ꠘꠣꠄ।
HEB 10:18 ꠔꠦ ꠛꠥꠎꠞꠣꠄ ꠘꠤ, ꠀꠟ꠆ꠟꠣꠄ ꠎꠦꠛꠟꠣ ꠉꠥꠘꠣ ꠀꠞ ꠘꠣꠚꠞꠝꠣꠘꠤꠞꠦ ꠝꠣꠚꠤ ꠖꠤꠟꠣꠁꠘ, ꠄꠞꠛꠣꠖꠦ ꠔ ꠉꠥꠘꠣꠞ ꠟꠣꠉꠤ ꠇꠥꠘꠥꠎꠣꠔ ꠇꠥꠞꠛꠣꠘꠤꠞꠃ ꠎꠞꠥꠞ ꠘꠣꠁ।
HEB 10:19 ꠄꠞꠟꠣꠉꠤꠃ ꠅ ꠜꠣꠁ ꠅꠇꠟ, ꠢꠎꠞꠔ ꠁꠍꠣ ꠀꠟ-ꠝꠍꠤꠞ ꠟꠃꠞ ꠎꠞꠤꠀꠄ, ꠀꠝꠞꠣ ꠛꠦꠢꠦꠡ꠆ꠔꠞ ꠢꠦꠞꠦꠝ ꠡꠞꠤꠚꠅ ꠢꠣꠝꠣꠘꠤꠞ ꠡꠣꠅꠡ ꠙꠣꠁꠍꠤ।
HEB 10:20 ꠀꠟ-ꠝꠍꠤꠄ ꠀꠝꠞꠣꠞ ꠟꠣꠉꠤ ꠘꠄꠀ ꠀꠞ ꠎꠤꠘ꠆ꠖꠣ ꠄꠇ ꠔꠞꠤꠇꠣ ꠈꠥꠟꠍꠂꠘ, ꠔꠣꠘ ꠡꠞꠤꠟ ꠇꠥꠞꠛꠣꠘꠤꠞ ꠃꠍꠤꠟ꠆ꠟꠣꠄ ꠀꠝꠞꠣ ꠎꠣꠘꠥ ꠅꠃ ꠢꠦꠞꠦꠝ ꠡꠞꠤꠚꠞ ꠖꠥꠀꠞꠞ ꠙꠞ꠆ꠖꠣ ꠙꠣꠞ ꠅꠁꠀ, ꠀꠟ꠆ꠟꠣꠞ ꠍꠣꠝꠘꠦ ꠀꠎꠤꠞ ꠅꠁꠔꠣꠝ ꠙꠣꠞꠤ।
HEB 10:21 ꠔꠦ ꠀꠝꠞꠣꠞ ꠄꠇꠎꠘ ꠙꠞꠗꠣꠘ ꠁꠝꠣꠝꠅ ꠀꠍꠂꠘ, ꠀꠟ꠆ꠟꠣꠞ ꠙꠞꠤꠛꠣꠞꠞ ꠔꠣꠝꠣꠝ ꠝꠣꠘꠡꠞ ꠎꠤꠝ꠆ꠝꠣ ꠔ ꠔꠣꠘ ꠀꠔꠅ ꠖꠦꠅꠀ ꠅꠁꠍꠦ।
HEB 10:22 ꠄꠞꠟꠣꠉꠤ ꠀꠅ, ꠁꠝꠣꠘꠞ ꠝꠣꠎꠖꠤ ꠀꠝꠞꠣ ꠙꠥꠞꠣꠙꠥꠞ ꠘꠤꠌ꠆ꠌꠤꠔ ꠛꠘꠤꠀ ꠈꠣꠐꠤ ꠖꠤꠟꠦ ꠀꠟ꠆ꠟꠣꠞ ꠖꠞꠛꠣꠞꠅ ꠀꠎꠤꠞ ꠅꠁ; ꠇꠣꠞꠘ ꠖꠥꠡꠤ ꠛꠤꠛꠦꠇꠞ ꠀꠔ ꠕꠣꠇꠤ ꠀꠝꠞꠣꠞ ꠖꠤꠟꠞꠦ ꠀꠟ-ꠝꠍꠤꠞ ꠟꠃꠄ ꠙꠣꠇ-ꠍꠣꠚ ꠛꠣꠘꠣꠁꠍꠦ, ꠀꠞ ꠙꠞꠤꠡ꠆ꠇꠣꠞ ꠙꠣꠘꠤ ꠖꠤꠀ ꠀꠝꠞꠣꠞꠦ ꠘꠣꠅꠀꠁꠟ ꠅꠁꠍꠦ।
HEB 10:23 ꠝꠥꠝꠤꠘ ꠢꠤꠡꠣꠛꠦ ꠀꠝꠞꠣꠞ ꠖꠤꠟꠅ ꠎꠦ ꠜꠞꠡꠣ ꠀꠍꠦ ꠇꠁꠀ ꠡ꠆ꠛꠤꠇꠣꠞ ꠇꠞꠤ, ꠀꠅ, ꠅꠃ ꠜꠞꠡꠣꠄ ꠙꠥꠞꠣꠙꠥꠞ ꠝꠎꠛꠥꠔ ꠞꠁꠀ ꠔꠣꠘ ꠔꠞꠤꠇꠣꠄ ꠌꠟꠤ, ꠇꠣꠞꠘ ꠎꠦꠁꠘ ꠅꠀꠖꠣ ꠇꠞꠍꠂꠘ ꠄꠁꠘ ꠔ ꠡꠥꠟ꠆ꠟꠀꠘꠣ ꠢꠇ-ꠢꠣꠟꠣꠟꠤ।
HEB 10:24 ꠀꠝꠞꠣ ꠄꠇꠦ-ꠅꠁꠘ꠆ꠘꠞ ꠟꠣꠉꠤ ꠈꠤꠀꠟ ꠇꠞꠤ, ꠝꠢꠛ꠆ꠛꠔ ꠀꠞ ꠘꠦꠇ ꠇꠣꠝ ꠇꠞꠣꠞ ꠟꠣꠉꠤ ꠄꠇꠦ-ꠅꠁꠘ꠆ꠘꠞꠦ ꠡꠣꠅꠡ-ꠙꠞꠣꠝꠤꠡ ꠖꠦꠁ।
HEB 10:25 ꠇꠥꠘꠥ ꠇꠥꠘꠥ ꠎꠘꠞ ꠡ꠆ꠛꠜꠣꠛ ꠅꠁꠟ, ꠔꠣꠞꠣ ꠎꠝꠣꠔꠅ ꠀꠁꠀ ꠡꠞꠤꠇ ꠅꠄ ꠘꠣ, ꠅꠁꠟꠦ ꠀꠝꠞꠣ ꠎꠣꠘꠥ ꠅꠃ ꠟꠣꠈꠣꠘ ꠘꠣ ꠅꠁ। ꠀꠟ-ꠝꠍꠤꠄ ꠖꠥꠍꠞꠣꠛꠣꠞ ꠔꠡꠞꠤꠚ ꠀꠘꠣꠞ ꠅꠇ꠆ꠔ ꠎꠔ ꠊꠘꠣꠁꠀ ꠀꠁꠅꠞ, ꠀꠝꠞꠣ ꠅꠔ ꠛꠦꠡꠤ ꠇꠞꠤ ꠄꠇꠦ-ꠅꠁꠘ꠆ꠘꠞꠦ ꠡꠣꠅꠡ-ꠙꠞꠣꠝꠤꠡ ꠖꠦꠅꠀꠔ ꠞꠁ।
HEB 10:26 ꠀꠟ꠆ꠟꠣ ꠙꠣꠇꠞ ꠢꠇ ꠔꠞꠤꠇꠣ ꠎꠣꠘꠣꠞ ꠛꠣꠖꠦꠅ ꠎꠥꠖꠤ ꠀꠝꠞꠣ ꠎꠣꠘꠤꠀ-ꠢꠥꠘꠤꠀ ꠉꠥꠘꠣ ꠇꠞꠣꠔ ꠞꠁ, ꠔꠦ ꠁ ꠉꠥꠘꠣꠞ ꠇꠚꠞꠣꠞ ꠟꠣꠉꠤ ꠇꠥꠘꠥꠎꠣꠔꠞ ꠇꠥꠞꠛꠣꠘꠤ ꠘꠣꠁ।
HEB 10:27 ꠀꠍꠦ ꠈꠣꠟꠤ ꠢꠣꠡꠞꠞ ꠝꠄꠖꠣꠘꠅ ꠇꠑꠤꠘ ꠛꠤꠌꠣꠞꠞ ꠟꠣꠉꠤ ꠒꠞꠣꠁ ꠒꠞꠣꠁ ꠛꠣꠞ ꠌꠣꠅꠀ, ꠀꠞ ꠀꠟ꠆ꠟꠣꠞ ꠖꠥꠡꠝꠘ ꠅꠇꠟꠞꠦ ꠎꠣꠟꠣꠁꠀ ꠍꠣꠟꠤ ꠇꠞꠣꠞ ꠉꠎꠛꠞ ꠒꠞ।
HEB 10:28 ꠇꠥꠘꠥ ꠎꠘꠦ ꠝꠥꠍꠣꠞ ꠡꠞꠤꠅꠔꠞ ꠢꠥꠇꠥꠝ-ꠀꠢꠇꠣꠝꠞ ꠛꠞꠈꠦꠟꠣꠚ ꠇꠞꠟꠦ, ꠄꠞꠦ ꠇꠥꠘꠥ ꠝꠣꠄꠀ-ꠝꠝꠔꠣ ꠘꠣ ꠇꠞꠤꠀ ꠖꠥꠁ ꠛꠣ ꠔꠤꠘꠎꠘꠞ ꠡꠣꠇ꠆ꠇꠤ ꠟꠁꠀ ꠎꠣꠘꠦ ꠝꠣꠞꠤꠟꠤꠔꠦ ꠅꠄ।
HEB 10:29 ꠔꠦ ꠌꠤꠘ꠆ꠔꠣ ꠇꠞꠤ ꠖꠦꠈꠃꠇ꠆ꠇꠣ, ꠎꠦ ꠎꠘꠦ ꠀꠟ꠆ꠟꠣꠞ ꠈꠣꠍ ꠝꠣꠄꠀꠞ ꠎꠘ ꠁꠛꠘꠥꠟ꠆ꠟꠣꠞꠦ ꠊꠤꠘ ꠇꠞꠦ, ꠢꠦ ꠀꠞꠅ ꠇꠔ ꠛꠠ ꠀꠎꠣꠛꠞ ꠜꠣꠉꠤ ꠅꠁꠍꠦ! ꠎꠦ ꠟꠃꠞ ꠃꠍꠤꠟ꠆ꠟꠣꠄ ꠢꠦ ꠙꠣꠇ-ꠍꠣꠚ ꠅꠁꠍꠦ, ꠀꠟ꠆ꠟꠣꠁ ꠢꠃ ꠃꠍꠤꠟ꠆ꠟꠣꠞ ꠟꠃꠞꠦ ꠢꠦ ꠄꠟꠣꠝꠤ ꠇꠞꠍꠦ, ꠀꠞ ꠎꠦ ꠙꠣꠇ ꠞꠥꠢꠦ ꠞꠢꠝꠔ ꠛꠈꠡꠤꠀ ꠖꠦꠁꠘ, ꠢꠃ ꠞꠥꠢꠥꠞꠦꠅ ꠛꠦꠁꠎ꠆ꠎꠔ ꠇꠞꠍꠦ।
HEB 10:30 ꠀꠍꠟꠦ ꠀꠝꠞꠣ ꠔ ꠔꠣꠘꠞꠦ ꠌꠤꠘꠤꠃ, ꠎꠦꠁꠘ ꠚꠞꠝꠣꠁꠍꠂꠘ, ꠘꠣꠚꠞꠝꠣꠘꠤꠞ ꠡꠣꠎꠣ ꠖꠦꠅꠀ ꠀꠝꠣꠞꠃ ꠇꠣꠝ, ꠀꠝꠟ ꠝꠣꠚꠤꠇ ꠛꠖꠟꠣ ꠖꠤꠝꠥ ꠔꠣꠝꠣꠝ ꠁꠘꠍꠣꠘ। ꠀꠞꠇ ꠀꠄꠀꠔꠅ ꠔꠣꠁꠘ ꠇꠁꠍꠂꠘ, ꠝꠣꠛꠥꠖꠦ ꠔꠣꠘ ꠛꠘ꠆ꠖꠣ ꠅꠇꠟꠞ ꠛꠤꠌꠣꠞ ꠇꠞꠛꠣ।
HEB 10:31 ꠛꠥꠎꠞꠣꠄ ꠘꠤ, ꠎꠤꠘ꠆ꠖꠣ ꠀꠟ꠆ꠟꠣꠞ ꠍꠣꠝꠘꠦ ꠀꠎꠤꠞꠣ ꠖꠦꠅꠀ ꠇꠔ ꠛꠠ ꠝꠍꠤꠛꠔꠞ ꠛꠦꠙꠣꠞ!
HEB 10:32 ꠔꠥꠝꠞꠣ ꠢꠃ ꠖꠤꠘꠞ ꠇꠕꠣ ꠁꠀꠖ ꠇꠞꠅ, ꠎꠦꠛꠟꠣ ꠁꠍꠣꠞ ꠔꠞꠤꠇꠣꠞ ꠘꠥꠞꠞ ꠙꠕ ꠙꠣꠁꠀ ꠢꠣꠞꠤ, ꠛꠃꠔ ꠘꠝꠥꠘꠣꠞ ꠎꠥꠟꠥꠝ-ꠝꠍꠤꠛꠔꠞ ꠝꠣꠎꠦꠅ ꠝꠎꠛꠥꠔ ꠞꠁꠍꠟꠣꠄ।
HEB 10:33 ꠇꠥꠘꠥ ꠇꠥꠘꠥ ꠡꠝꠄ ꠡꠝꠣꠎꠞ ꠍꠣꠝꠘꠦ ꠛꠦꠁꠎ꠆ꠎꠔꠤ, ꠎꠥꠟꠥꠝ-ꠐꠤꠐꠇꠣꠞꠤ, ꠑꠣꠐ꠆ꠐꠣ-ꠝꠡꠇꠞꠣ ꠢꠥꠘꠤꠀꠅ ꠔꠥꠝꠞꠣ ꠘꠤꠎꠦ ꠇꠡ꠆ꠐ ꠡꠁꠎ꠆ꠎ ꠇꠞꠍꠟꠣꠄ। ꠀꠞ ꠇꠥꠘꠥ ꠇꠥꠘꠥ ꠡꠝꠄ ꠅꠁꠘ꠆ꠘꠞ ꠃꠙꠞꠦ ꠅꠃ ꠟꠣꠈꠣꠘ ꠇꠡ꠆ꠐ ꠀꠁꠍꠦ ꠢꠥꠘꠤꠀ, ꠔꠣꠞꠣꠞ ꠟꠉꠦ ꠔꠥꠝꠞꠣꠅ ꠖꠥꠈꠤꠔ ꠅꠁꠍꠟꠣꠄ।
HEB 10:34 ꠔꠥꠝꠞꠣꠞ ꠝꠣꠎꠞ ꠎꠦꠞꠣ ꠎꠦꠟ ꠈꠣꠐꠤꠍꠟꠣ, ꠔꠣꠞꠣꠞ ꠖꠥꠈꠦ ꠔꠥꠝꠞꠣꠅ ꠖꠥꠈꠤ ꠅꠁꠍꠟꠣꠄ। ꠔꠥꠝꠞꠣꠞ ꠗꠘ-ꠍꠣꠝꠣꠘꠣ ꠟꠥꠐ-ꠙꠣꠐ ꠇꠞꠣ ꠅꠁꠟꠦꠅ ꠈꠥꠡꠤ ꠀꠍꠟꠣꠄ, ꠀꠍꠟꠦ ꠛꠥꠎꠔꠣꠄ ꠙꠣꠞꠍꠟꠣꠄ, ꠔꠥꠝꠞꠣꠞ ꠟꠣꠉꠤ ꠀꠞꠅ ꠛꠃꠔ ꠜꠣꠟꠣ ꠜꠣꠟꠣ ꠍꠣꠝꠣꠘꠣ ꠎꠝꠣ ꠀꠍꠦ, ꠎꠦ ꠍꠣꠝꠣꠘꠣ ꠌꠤꠞꠇꠣꠟ ꠞꠁꠛ।
HEB 10:35 ꠔꠦ ꠅꠈꠘ ꠔꠥꠝꠞꠣꠞ ꠢꠤ ꠝꠘꠅꠛꠟ ꠈꠥꠀꠁꠅ ꠘꠣ, ꠄꠞ ꠝꠣꠎꠦ ꠔ ꠛꠃꠔ ꠖꠣꠝꠤ ꠙꠥꠞꠥꠡ꠆ꠇꠣꠞ ꠀꠍꠦ।
HEB 10:36 ꠔꠥꠝꠞꠣ ꠝꠎꠛꠥꠔ ꠞꠅꠀ ꠖꠞꠇꠣꠞ, ꠎꠣꠔꠦ ꠀꠟ꠆ꠟꠣꠄ ꠎꠦ ꠙꠥꠞꠥꠡ꠆ꠇꠣꠞ ꠖꠤꠛꠣ ꠇꠞꠤ ꠅꠀꠖꠣ ꠇꠞꠍꠂꠘ, ꠔꠣꠘ ꠝꠞ꠆ꠎꠤ ꠝꠣꠚꠤꠇ ꠌꠟꠤꠀ ꠔꠥꠝꠞꠣꠅ ꠢꠃ ꠙꠥꠞꠥꠡ꠆ꠇꠣꠞ ꠙꠣꠅ।
HEB 10:37 ꠀꠟ꠆ꠟꠣꠄ ꠔ ꠇꠁꠍꠂꠘ, ꠀꠞ ꠕꠥꠠꠣ ꠇꠄꠈꠣꠘ ꠖꠤꠘ ꠛꠣꠇꠤ ꠀꠍꠦ, ꠎꠦꠁꠘ ꠔꠡꠞꠤꠚ ꠀꠘꠣꠞ ꠇꠕꠣ, ꠔꠣꠁꠘ ꠔꠡꠞꠤꠚ ꠀꠘꠤꠟꠤꠛꠣ, ꠛꠦꠡꠤ ꠖꠦꠞꠤ ꠇꠞꠔꠣ ꠘꠣꠄ।
HEB 10:38 ꠀꠝꠣꠞ ꠖꠤꠘꠖꠣꠞ ꠛꠘ꠆ꠖꠣꠄ ꠁꠝꠣꠘꠞ ꠛꠟꠦꠃ ꠀꠈꠦꠞ ꠙꠣꠁꠛ, ꠅꠁꠟꠦ ꠇꠦꠃ ꠈꠞꠦꠖꠤ ꠙꠤꠍꠟꠤ ꠉꠦꠟꠦ ꠔꠣꠞ ꠃꠙꠞꠦ ꠀꠝꠤ ꠈꠥꠡꠤ ꠞꠁꠔꠣꠝ ꠘꠣꠄ।
HEB 10:39 ꠅꠁꠟꠦ ꠀꠝꠞꠣ ꠔ ꠈꠞꠦꠖꠤ ꠙꠤꠍꠟꠤꠀ ꠛꠤꠘꠣꠡ ꠅꠀꠞ ꠝꠣꠘꠥꠡ ꠘꠣꠄ। ꠎꠦꠞꠣ ꠁꠝꠣꠘ ꠀꠘꠤꠀ ꠘꠣꠎꠣꠔ ꠢꠣꠍꠤꠟ ꠇꠞꠦ, ꠀꠝꠞꠣ ꠅꠁꠟꠣꠝ ꠢꠃ ꠖꠟꠞ ꠝꠣꠘꠥꠡ।
HEB 11:1 ꠁꠝꠣꠘ ꠇꠤꠔꠣ? ꠀꠝꠞꠣ ꠎꠦꠔꠣ ꠙꠣꠁꠝꠥ ꠇꠞꠤ ꠀꠡꠣ ꠇꠞꠍꠤ, ꠁꠔꠣ ꠅꠈꠘ ꠘꠣ ꠙꠣꠁꠟꠦꠅ ꠛꠣꠖꠦ ꠙꠣꠁꠝꠥꠃ ꠙꠣꠁꠝꠥ, ꠅꠃ ꠄꠇꠤꠘꠞ ꠘꠣꠝꠃ ꠁꠝꠣꠘ। ꠅꠃ ꠁꠝꠣꠘꠞ ꠛꠟꠦꠃ ꠀꠝꠞꠣ ꠘꠤꠌ꠆ꠌꠤꠔ ꠅꠁꠀ ꠛꠥꠎꠤ, ꠅꠈꠘ ꠎꠦꠔꠣ ꠀꠝꠞꠣꠞ ꠌꠃꠈꠦ ꠖꠦꠈꠞꠣꠝ ꠘꠣ, ꠁꠔꠣ ꠀꠍꠟꠦꠅ ꠀꠍꠦ।
HEB 11:2 ꠅꠃ ꠁꠝꠣꠘꠞ ꠛꠟꠦꠃ ꠀꠝꠞꠣꠞ ꠝꠄ-ꠝꠥꠞꠛ꠆ꠛꠤ ꠅꠇꠟꠦ ꠀꠟ꠆ꠟꠣꠞ ꠉꠦꠍ ꠕꠣꠇꠤ ꠔꠣꠞꠤꠚ ꠇꠣꠝꠣꠁꠍꠂꠘ।
HEB 11:3 ꠁꠝꠣꠘꠦꠃ ꠀꠝꠞꠣ ꠛꠥꠎꠞꠣꠝ ꠎꠦꠘ, ꠀꠟ꠆ꠟꠣꠄ ꠔꠣꠘ ꠇꠣꠟꠣꠝꠞ ꠛꠟꠦꠃ ꠀꠍꠝꠣꠘ-ꠎꠝꠤꠘꠞ ꠢꠇ꠆ꠇꠟꠔꠣ ꠙꠄꠖꠣ ꠇꠞꠍꠂꠘ, ꠁꠔꠣ ꠀꠝꠞꠣꠞ ꠌꠈꠥꠞ ꠖꠦꠈꠣ ꠇꠥꠘꠥ ꠌꠤꠎ ꠕꠣꠇꠤ ꠄꠝꠘꠦ ꠙꠄꠖꠣ ꠅꠁꠍꠦ ꠘꠣ।
HEB 11:4 ꠁꠝꠣꠘꠞ ꠛꠟꠦ ꠢꠣꠛꠤꠟꠦ ꠀꠟ꠆ꠟꠣꠞ ꠘꠣꠝꠦ ꠇꠣꠛꠤꠟꠞ ꠌꠣꠁꠔꠦ ꠜꠣꠟꠣ ꠇꠥꠞꠛꠣꠘꠤ ꠀꠖꠣꠄ ꠇꠞꠟꠣ। ꠄꠞꠟꠣꠉꠤ ꠀꠟ꠆ꠟꠣꠄ ꠢꠣꠛꠤꠟꠞ ꠛꠦꠙꠣꠞꠦ ꠛꠣꠔꠣꠁꠟꠣ, ꠄꠁꠘ ꠄꠇꠎꠘ ꠇꠣꠝꠤꠟ ꠝꠣꠘꠥꠡ। ꠔꠦ ꠛꠃꠔ ꠎꠝꠣꠘꠣ ꠀꠉꠦ ꠢꠣꠛꠤꠟꠞ ꠝꠃꠔ ꠅꠁꠟꠦꠅ, ꠁꠝꠣꠘꠞ ꠛꠦꠙꠣꠞꠦ ꠔꠣꠁꠘ ꠅꠈꠘꠅ ꠀꠝꠞꠣꠞ ꠟꠉꠦ ꠝꠣꠔꠤꠞꠣ।
HEB 11:5 ꠁꠝꠣꠘꠞ ꠛꠟꠞ ꠟꠣꠉꠤꠃ ꠁꠖ꠆ꠞꠤꠍ ꠘꠛꠤꠞ ꠝꠃꠔ ꠅꠁꠟ ꠘꠣ, ꠀꠟ꠆ꠟꠣꠄ ꠔꠣꠘꠞꠦ ꠎꠤꠘ꠆ꠖꠣ ꠢꠣꠟꠔꠦ ꠛꠦꠢꠦꠡ꠆ꠔꠅ ꠔꠥꠟꠤꠀ ꠘꠤꠟꠣꠉꠤ, ꠖꠥꠘꠤꠀꠔ ꠔꠣꠘꠞꠦ ꠔꠥꠇꠣꠁꠀ ꠝꠤꠟꠟ ꠘꠣ। ꠁꠖ꠆ꠞꠤꠍꠞꠦ ꠛꠦꠢꠦꠡ꠆ꠔꠅ ꠔꠥꠟꠤꠀ ꠘꠦꠅꠀꠞ ꠀꠉꠦ ꠀꠟ꠆ꠟꠣꠄ ꠎꠣꠘꠣꠁꠍꠟꠣ, ꠁꠖ꠆ꠞꠤꠍ ꠀꠝꠣꠞ ꠈꠥꠡꠤ ꠝꠣꠚꠤꠇ ꠌꠟꠍꠂꠘ।
HEB 11:6 ꠅꠁꠟꠦ ꠁꠝꠣꠘ ꠍꠣꠠꠣ ꠔ ꠇꠦꠃ ꠀꠟ꠆ꠟꠣꠞꠦ ꠈꠥꠡꠤ ꠇꠞꠔ ꠙꠣꠞꠦ ꠘꠣ। ꠎꠦꠇꠥꠘꠥ ꠝꠣꠘꠥꠡ ꠀꠟ꠆ꠟꠣꠞ ꠗꠣꠞꠅ ꠎꠣꠁꠔꠦ ꠌꠣꠁꠟꠦ, ꠢꠦ ꠄꠇꠤꠘ ꠇꠞꠣ ꠟꠣꠉꠛ ꠎꠦꠘ, ꠀꠟ꠆ꠟꠣ ꠀꠍꠂꠘ, ꠀꠞ ꠎꠦꠞꠣ ꠔꠣꠘ ꠔꠣꠟ꠆ꠟꠣꠡ ꠇꠞꠦ, ꠔꠣꠁꠘ ꠄꠞꠣꠞꠦ ꠙꠥꠞꠥꠡ꠆ꠇꠣꠞ ꠖꠦꠁꠘ।
HEB 11:7 ꠁꠝꠣꠘꠞ ꠛꠟꠦ ꠘꠥꠢ ꠘꠛꠤꠞ ꠎꠝꠣꠘꠣꠔ ꠎꠦꠔꠣ ꠊꠐꠘꠣ ꠖꠦꠈꠣ ꠉꠦꠍꠤꠟ ꠘꠣ, ꠀꠟ꠆ꠟꠣꠞ ꠢꠥꠡꠤꠀꠞꠤ ꠙꠣꠁꠀ ꠔꠣꠁꠘ ꠅꠔꠣ ꠄꠇꠤꠘ ꠇꠞꠟꠣ, ꠄꠇꠤꠘ ꠇꠞꠤꠀ ꠘꠤꠎꠞ ꠙꠞꠤꠛꠣꠞꠞꠦ ꠛꠣꠌꠣꠘꠤꠞ ꠟꠣꠉꠤ ꠄꠇꠈꠣꠘ ꠎꠣꠎ ꠛꠣꠘꠣꠁꠟꠣ। ꠔꠣꠘ ꠅꠃ ꠁꠝꠣꠘꠤ ꠇꠣꠝꠞ ꠝꠣꠎꠖꠤ ꠎꠉꠔꠞ ꠘꠣꠚꠞꠝꠣꠘꠤꠞ ꠙꠞꠝꠣꠘ ꠖꠦꠈꠣꠁꠟꠣ, ꠀꠞ ꠀꠟ꠆ꠟꠣꠞ ꠖꠞꠛꠣꠞꠅ ꠙꠞꠦꠎꠉꠣꠞ ꠢꠤꠡꠣꠛꠦ ꠉꠁꠘ꠆ꠘ ꠅꠁꠉꠦꠟꠣ, ꠈꠣꠟꠤ ꠁꠝꠣꠘꠞ ꠛꠟꠦꠃ ꠁꠟꠣ ꠅꠀ ꠎꠣꠄ।
HEB 11:8 ꠁꠝꠣꠘꠞ ꠛꠟꠦ ꠁꠛ꠆ꠞꠣꠢꠤꠝ ꠘꠛꠤꠄ ꠀꠟ꠆ꠟꠣꠞ ꠢꠥꠇꠥꠝ ꠙꠣꠁꠀꠃ ꠘꠤꠎꠞ ꠜꠤꠐꠣ-ꠝꠣꠐꠤ ꠍꠣꠠꠤꠀ ꠞꠅꠀꠘꠣ ꠖꠤꠟꠣ। ꠀꠟ꠆ꠟꠣꠄ ꠔꠣꠘꠞꠦ ꠎꠦ ꠖꠦꠡ ꠖꠤꠔꠣ ꠇꠞꠤ ꠅꠀꠖꠣ ꠇꠞꠍꠂꠘ, ꠢꠤ ꠖꠦꠡꠈꠣꠘ ꠇꠥꠘ ꠎꠣꠉꠣꠔ, ꠁꠈꠣꠘ ꠘꠣ ꠎꠣꠘꠤꠀꠅ ꠔꠣꠁꠘ ꠞꠅꠀꠘꠣ ꠅꠁꠉꠦꠟꠣ।
HEB 11:9 ꠁꠝꠣꠘꠞ ꠛꠟꠦ ꠔꠣꠁꠘ ꠀꠟ꠆ꠟꠣꠞ ꠅꠀꠖꠣ ꠇꠞꠣ ꠢꠃ ꠇꠦꠘꠣꠘ ꠖꠦꠡꠞ ꠜꠤꠔꠞꠦꠅ ꠝꠥꠍꠣꠚꠤꠞꠞ ꠟꠣꠈꠣꠘ ꠖꠤꠘ ꠇꠣꠐꠣꠁꠟꠣ। ꠔꠣꠘ ꠟꠉꠦ ꠀꠞꠅ ꠎꠦꠞꠣ ꠢꠤ ꠅꠀꠖꠣꠞ ꠜꠣꠉꠤ ꠀꠍꠟꠣ, ꠢꠃ ꠁꠍꠢꠣꠇ ꠀꠞ ꠁꠀꠇꠥꠛꠞ ꠟꠣꠈꠣꠘ ꠔꠣꠁꠘꠅ ꠔꠣꠝ꠆ꠛꠥꠄ ꠔꠣꠝ꠆ꠛꠥꠄ ꠞꠁꠀ ꠎꠤꠘ꠆ꠖꠦꠉꠤ ꠇꠣꠐꠣꠁꠟꠣ।
HEB 11:10 ꠀꠍꠟꠦ ꠎꠦ ꠐꠣꠃꠘ ꠢꠞ-ꠢꠣꠝꠦꠡꠣ ꠇꠣꠁꠝ ꠞꠁꠛ, ꠢꠃ ꠛꠦꠢꠦꠡ꠆ꠔꠤ ꠐꠣꠃꠘꠞ ꠟꠣꠉꠤ ꠔꠣꠁꠘ ꠛꠣꠞ ꠌꠣꠅꠀꠔ ꠀꠍꠟꠣ, ꠁ ꠐꠣꠃꠘꠞ ꠘꠇꠡꠣ-ꠘꠝꠥꠘꠣ ꠡꠢ ꠢꠇ꠆ꠇꠟ ꠇꠣꠞꠤꠉꠞꠤ ꠡ꠆ꠛꠄꠅꠋ ꠀꠟ꠆ꠟꠣꠞ ꠇꠣꠝ।
HEB 11:11 ꠁꠝꠣꠘꠞ ꠛꠟꠦ ꠁꠛ꠆ꠞꠣꠢꠤꠝꠞ ꠘꠤꠀꠅꠟꠣꠖꠤ ꠛꠤꠛꠤ ꠍꠣꠄꠞꠣꠄ ꠀꠅꠟꠣꠖ ꠎꠘꠝ ꠖꠦꠅꠀꠞ ꠈꠦꠝꠔꠣ ꠙꠣꠁꠟꠣ, ꠔꠣꠞꠣꠞ ꠢꠥꠞꠥꠔ꠆ꠔꠣ ꠙꠄꠖꠣꠞ ꠛꠄꠅꠡ ꠙꠣꠞ ꠅꠁꠉꠦꠟꠦꠅ ꠁꠛ꠆ꠞꠣꠢꠤꠝꠦ ꠄꠇꠤꠘ ꠇꠞꠍꠟꠣ, ꠎꠦꠁꠘ ꠁ ꠅꠀꠖꠣ ꠇꠞꠍꠂꠘ, ꠄꠁꠘ ꠔ ꠢꠇ, ꠄꠁꠘ ꠘꠤꠎꠞ ꠅꠀꠖꠣ ꠙꠥꠞꠣꠁꠛꠣꠃ ꠙꠥꠞꠣꠁꠛꠣ।
HEB 11:12 ꠄꠞꠟꠣꠉꠤ ꠛꠄꠅꠡꠞ ꠜꠣꠞꠦ ꠝꠞꠣꠞ ꠙꠕꠤ ꠅꠃ ꠄꠇ ꠁꠛ꠆ꠞꠣꠢꠤꠝ ꠕꠣꠇꠤ ꠅꠔ ꠝꠣꠘꠥꠡ ꠎꠘꠝ ꠟꠁꠟꠣ, ꠎꠦꠞꠣ ꠀꠍꠝꠣꠘꠞ ꠔꠦꠞꠣ ꠀꠞ ꠖꠞꠤꠀꠞ ꠌꠞꠞ ꠛꠣꠟꠥꠞ ꠟꠣꠈꠣꠘ, ꠉꠘꠤꠀ ꠚꠥꠠꠣꠁꠟ ꠎꠣꠄ ꠘꠣ।
HEB 11:13 ꠝꠎꠛꠥꠔ ꠁꠝꠣꠘꠦ ꠎꠤꠘ꠆ꠖꠦꠉꠤ ꠇꠣꠐꠣꠁꠀ ꠄꠞꠣ ꠢꠇꠟꠞ ꠝꠃꠔ ꠅꠁꠍꠦ, ꠄꠞꠣ ꠇꠦꠃ ꠢꠤ ꠅꠀꠖꠣꠞ ꠚꠟ ꠜꠥꠉ ꠇꠞꠔꠣ ꠙꠣꠞꠍꠂꠘ ꠘꠣ, ꠈꠣꠟꠤ ꠖꠥꠞꠁ ꠕꠣꠇꠤ ꠁꠔꠣ ꠖꠦꠈꠤꠀ ꠢꠣꠞꠤ ꠈꠥꠡꠤ ꠅꠁꠍꠂꠘ। ꠁ ꠖꠥꠘꠤꠀꠔ ꠔꠣꠞꠣ ꠝꠥꠍꠣꠚꠤꠞꠤꠔ ꠀꠁꠍꠂꠘ, ꠁꠈꠣꠘ ꠔꠣꠞꠣꠞ ꠘꠤꠎꠞ ꠛꠡꠔ ꠈꠣꠘꠣ ꠘꠣꠄ, ꠁꠔꠣ ꠔ ꠔꠣꠞꠣ ꠝꠣꠘꠍꠂꠘ।
HEB 11:14 ꠀꠞ ꠎꠦꠞꠣ ꠁꠈꠣꠘ ꠝꠣꠘꠍꠂꠘ, ꠔꠣꠞꠣ ꠢꠇꠟꠦꠃ ꠡꠥꠘ꠆ꠖꠞ ꠇꠞꠤ ꠛꠥꠎꠣꠁꠍꠂꠘ ꠎꠦꠘ, ꠔꠣꠞꠣ ꠘꠤꠎꠞ ꠀꠙꠘ ꠖꠦꠡꠞ ꠔꠣꠟ꠆ꠟꠣꠡ ꠇꠞꠞꠣ।
HEB 11:15 ꠎꠦ ꠎꠝꠤꠘ ꠕꠣꠇꠤ ꠔꠣꠞꠣ ꠛꠣꠞ ꠅꠁꠀ ꠀꠁꠍꠟꠣ, ꠢꠤ ꠎꠝꠤꠘꠞ ꠇꠕꠣ ꠈꠤꠀꠟ ꠇꠞꠟꠦ ꠔ ꠔꠣꠞꠣ ꠢꠤꠞꠛꠣꠞ ꠢꠘꠅ ꠢꠣꠝꠣꠘꠤꠞ ꠡꠥꠎꠥꠉ ꠙꠣꠁꠟꠣ ꠅꠘꠦ।
HEB 11:16 ꠅꠁꠟꠦ ꠔꠣꠞꠣ ꠔ ꠀꠞꠅ ꠜꠣꠟꠣ ꠄꠇ ꠖꠦꠡ, ꠝꠣꠘꠤ ꠛꠦꠢꠦꠡ꠆ꠔꠞ ꠔꠣꠟ꠆ꠟꠣꠡ ꠇꠞꠍꠟꠣ। ꠄꠞꠟꠣꠉꠤꠃ ꠀꠟ꠆ꠟꠣ ꠙꠣꠇꠦ ꠘꠤꠎꠞꠦ ꠔꠣꠞꠣꠞ ꠀꠟ꠆ꠟꠣ ꠇꠁꠀ ꠙꠞꠤꠌꠄ ꠖꠤꠔꠦ ꠇꠥꠘꠥ ꠡꠞꠝ ꠙꠣꠁꠘ ꠘꠣ, ꠔꠣꠁꠘꠃ ꠔꠣꠞꠣꠞ ꠟꠣꠉꠤꠀ ꠀꠞꠣꠝꠞ ꠄꠇ ꠐꠣꠃꠘ ꠔꠤꠀꠞ ꠇꠞꠍꠂꠘ।
HEB 11:17 ꠁꠛ꠆ꠞꠣꠢꠤꠝ ꠘꠛꠤ ꠙꠞꠤꠇ꠆ꠇꠣꠔ ꠙꠠꠤꠀ ꠢꠣꠞꠤ ꠁꠝꠣꠘꠞ ꠛꠟꠦꠃ ꠔꠣꠘ ꠙꠥꠀ ꠁꠍꠢꠣꠇꠞꠦ ꠇꠥꠞꠛꠣꠘꠤ ꠖꠤꠍꠟꠣ। ꠎꠦ ꠁꠛ꠆ꠞꠣꠢꠤꠝꠞ ꠟꠉꠦ ꠀꠟ꠆ꠟꠣꠄ ꠘꠤꠎꠦ ꠅꠀꠖꠣ ꠇꠞꠍꠂꠘ, ꠢꠃ ꠎꠘꠦ ꠔꠣꠘ ꠈꠣꠍ ꠝꠣꠄꠀꠞ ꠙꠥꠔꠞꠦ ꠇꠥꠞꠛꠣꠘꠤ ꠖꠤꠟꠣꠁꠔꠣ ꠌꠣꠁꠍꠂꠘ।
HEB 11:18 ꠎꠦ ꠙꠥꠔꠞ ꠛꠦꠙꠣꠞꠦ ꠀꠟ꠆ꠟꠣꠄ ꠛꠣꠔꠣꠁꠍꠟꠣ, “ꠔꠥꠝꠣꠞ ꠙꠥꠀ ꠁꠍꠢꠣꠇꠞ ꠈꠣꠘ꠆ꠖꠣꠘꠞꠦꠃ ꠔꠥꠝꠣꠞ ꠈꠣꠘ꠆ꠖꠣꠘ ꠇꠁꠀ ꠉꠘꠣ ꠅꠁꠛ।”
HEB 11:19 ꠁꠛ꠆ꠞꠣꠢꠤꠝꠞ ꠖꠤꠟꠞ ꠅꠃ ꠄꠇꠤꠘꠦ ꠔꠣꠁꠘ ꠇꠥꠞꠛꠣꠘꠤ ꠖꠤꠔꠦ ꠞꠣꠎꠤ ꠅꠁꠍꠟꠣ ꠎꠦꠘ, ꠀꠟ꠆ꠟꠣꠄ ꠔ ꠝꠥꠞ꠆ꠖꠣꠞꠦꠅ ꠎꠤꠘ꠆ꠖꠣ ꠇꠞꠔꠣ ꠙꠣꠞꠂꠘ। ꠀꠞ ꠢꠣꠍꠣꠃ ꠝꠃꠔꠞ ꠔꠟ ꠕꠣꠇꠤ ꠁꠍꠢꠣꠇꠞꠦ ꠚꠤꠞꠔ ꠙꠣꠁꠟꠣ।
HEB 11:20 ꠁꠝꠣꠘꠞ ꠛꠟꠦ ꠁꠍꠢꠣꠇꠦ ꠔꠣꠘ ꠙꠥꠀꠂꠘ ꠁꠀꠇꠥꠛ ꠀꠞ ꠁꠡʼꠞ ꠜꠛꠤꠡꠔ ꠎꠤꠘ꠆ꠖꠦꠉꠤꠞ ꠟꠣꠉꠤ ꠖꠥꠀ ꠖꠤꠍꠟꠣ।
HEB 11:21 ꠁꠝꠣꠘꠞ ꠛꠟꠦ ꠁꠀꠇꠥꠛꠦ ꠝꠃꠔꠞ ꠅꠇ꠆ꠔꠅ ꠁꠃꠍꠥꠚꠞ ꠖꠥꠁꠅ ꠙꠥꠀꠞꠦ ꠖꠥꠀ ꠖꠤꠟꠣ, ꠔꠣꠁꠘ ꠘꠤꠎꠞ ꠟꠣꠑꠤꠞ ꠃꠙꠞꠦ ꠜꠞꠖꠤ ꠀꠟ꠆ꠟꠣꠞ ꠄꠛꠣꠖꠔꠤ ꠇꠞꠟꠣ।
HEB 11:22 ꠁꠝꠣꠘꠞ ꠛꠟꠦ ꠁꠃꠍꠥꠚꠦ ꠝꠃꠔꠞ ꠅꠇ꠆ꠔꠅ ꠇꠁꠍꠟꠣ, ꠔꠣꠘ ꠘꠤꠎꠞ ꠎꠣꠔꠤ ꠛꠘꠤ ꠁꠍꠞꠣꠁꠟ ꠝꠤꠡꠞ ꠖꠦꠡ ꠕꠣꠇꠤ ꠛꠣꠞ ꠅꠁꠀ ꠎꠣꠁꠛꠣ, ꠔꠣꠞꠣ ꠎꠣꠅꠀꠞ ꠇꠣꠟꠅ ꠔꠣꠘ ꠀꠒ꠆ꠒꠤ-ꠉꠥꠒ꠆ꠒꠤꠞꠦ ꠛꠁꠀ ꠘꠦꠅꠀꠞ ꠢꠥꠇꠥꠝ ꠖꠤꠟꠣ।
HEB 11:23 ꠁꠝꠣꠘꠞ ꠛꠟꠦꠃ ꠝꠥꠍꠣꠞ ꠝꠣ-ꠛꠣꠚꠦ ꠝꠥꠍꠣꠞ ꠎꠘꠝꠞ ꠛꠣꠖꠦ ꠔꠤꠘ ꠝꠣꠡ ꠙꠞ꠆ꠎꠘ꠆ꠔ ꠟꠥꠇꠣꠁꠀ ꠕꠁꠟꠣ, ꠔꠣꠞꠣ ꠖꠦꠈꠍꠟꠣ, ꠙꠥꠀꠉꠥ ꠈꠥꠛ ꠡꠥꠘ꠆ꠖꠞ, ꠛꠣꠖꠡꠣꠞ ꠢꠥꠇꠥꠝꠦꠅ ꠔꠣꠞꠣ ꠒꠞꠣꠁꠟꠣ ꠘꠣ।
HEB 11:24 ꠁꠝꠣꠘꠞ ꠛꠟꠦꠃ ꠝꠥꠍꠣꠄ, ꠔꠣꠘ ꠛꠥꠎꠖꠣꠞ ꠅꠀꠞ ꠛꠣꠖꠦ ꠚꠦꠞꠣꠃꠘꠞ ꠙꠥꠠꠤꠞ ꠊꠞꠞ ꠘꠣꠔꠤ ꠇꠁꠀ ꠙꠞꠤꠌꠄ ꠖꠤꠔꠦ ꠞꠣꠎꠤ ꠅꠁꠟꠣ ꠘꠣ।
HEB 11:25 ꠔꠣꠁꠘ ꠉꠥꠘꠣꠞ ꠝꠣꠎꠦ ꠞꠁꠀ ꠕꠥꠠꠣ ꠇꠄꠖꠤꠘ ꠡꠥꠈ ꠇꠣꠝꠣꠘꠤꠞ ꠌꠣꠁꠔꠦ, ꠀꠟ꠆ꠟꠣꠞ ꠛꠘ꠆ꠖꠣ ꠅꠇꠟꠞ ꠟꠉꠦ ꠝꠤꠟꠤꠀ ꠎꠥꠟꠥꠝ-ꠝꠍꠤꠛꠔꠞ ꠝꠣꠎꠦ ꠞꠅꠀꠃ ꠙꠍꠘ꠆ꠖ ꠇꠞꠟꠣ।
HEB 11:26 ꠔꠣꠁꠘ ꠝꠤꠡꠞꠞ ꠢꠇ꠆ꠇꠟ ꠎꠣꠇ-ꠎꠝꠇꠞ ꠌꠣꠁꠔꠦ, ꠀꠟ-ꠝꠍꠤꠞ ꠘꠣꠝꠦ ꠖꠥꠞꠘꠣꠝ ꠢꠣꠍꠤꠟꠞꠦꠃ ꠛꠦꠡꠤ ꠝꠥꠟ꠆ꠟꠛꠣꠘ ꠝꠘꠅ ꠇꠞꠟꠣ, ꠇꠣꠞꠘ ꠔꠣꠘ ꠘꠎꠞ ꠀꠍꠤꠟ ꠛꠦꠢꠦꠡ꠆ꠔꠤ ꠙꠥꠞꠥꠡ꠆ꠇꠣꠞꠞ ꠛꠣꠄ।
HEB 11:27 ꠁꠝꠣꠘꠞ ꠛꠟꠦ ꠔꠣꠁꠘ ꠝꠤꠡꠞ ꠕꠣꠇꠤ ꠛꠣꠞ ꠅꠁꠉꠦꠟꠣ, ꠛꠣꠖꠡꠣꠞ ꠉꠥꠍꠣꠞꠦꠅ ꠒꠞꠣꠁꠟꠣ ꠘꠣ। ꠘꠤꠞꠣꠇꠣꠞ ꠀꠟ꠆ꠟꠣꠞꠦ ꠖꠦꠈꠤꠟꠣꠁꠍꠂꠘ, ꠅꠃꠟꠣ ꠝꠘꠅ ꠇꠞꠤꠀꠃ ꠔꠣꠁꠘ ꠍꠛꠞ ꠇꠞꠤ ꠞꠁꠟꠣ।
HEB 11:28 ꠁꠝꠣꠘꠞ ꠛꠟꠦꠃ ꠔꠣꠁꠘ ꠀꠎꠣꠖꠤ ꠁꠖ ꠀꠞ ꠟꠃ ꠍꠤꠐꠣꠁꠀ ꠖꠦꠅꠀꠞ ꠘꠤꠅꠝ ꠝꠣꠘꠟꠣ, ꠎꠣꠔꠦ ꠀꠎꠞꠣꠁꠟ ꠚꠤꠞꠤꠡ꠆ꠔꠣꠄ ꠛꠘꠤ ꠁꠍꠞꠣꠁꠟꠞ ꠙꠄꠟꠣ ꠙꠥꠀꠂꠘ꠆ꠔꠞꠦ ꠘꠣ ꠍꠁꠘ।
HEB 11:29 ꠁꠝꠣꠘꠞ ꠛꠟꠦꠃ ꠝꠣꠘꠡꠦ ꠘꠤꠟ ꠖꠞꠤꠀꠞ ꠝꠣꠎꠦꠖꠤ ꠢꠥꠇꠘꠣ ꠝꠣꠐꠤꠞ ꠙꠕꠞ ꠟꠣꠈꠣꠘ ꠀꠐꠤꠀ ꠉꠦꠟꠣ, ꠅꠁꠟꠦ ꠝꠤꠡꠞꠤ ꠅꠇꠟꠦ ꠁꠟꠣ ꠎꠣꠅꠀꠔ ꠟꠣꠉꠤꠀ ꠛꠥꠠꠤꠀ ꠝꠞꠟꠣ।
HEB 11:30 ꠁꠝꠣꠘꠞ ꠛꠟꠦꠃ ꠛꠘꠤ ꠁꠍꠞꠣꠁꠟꠦ ꠎꠤꠞꠤꠢꠅ ꠐꠣꠃꠘꠞ ꠛꠣꠃꠘ꠆ꠒꠞꠤꠞ ꠅꠀꠟ ꠡꠣꠔꠖꠤꠘ ꠌꠇ꠆ꠇꠞ ꠖꠦꠅꠀꠞ ꠛꠣꠖꠦ ꠄꠝꠘꠦꠃ ꠙꠠꠤꠉꠦꠟ।
HEB 11:31 ꠁꠝꠣꠘꠞ ꠛꠟꠦꠃ ꠅꠃ ꠐꠣꠃꠘꠞ ꠞꠣꠢꠛꠣ ꠘꠣꠝꠞ ꠛꠖꠝꠣꠁꠡ ꠛꠦꠐꠤꠄ ꠛꠘꠤ ꠁꠍꠞꠣꠁꠟꠞ ꠉꠥꠁꠀ ꠅꠇꠟꠞꠦ ꠝꠦꠝꠣꠘꠖꠣꠞꠤ ꠇꠞꠣꠄ, ꠢꠤꠘꠞ ꠘꠣꠚꠞꠝꠣꠘ ꠅꠇꠟꠞ ꠟꠉꠦ ꠁ ꠛꠦꠐꠤ ꠛꠤꠘꠣꠡ ꠅꠁꠟꠣ ꠘꠣ।
HEB 11:32 ꠀꠞ ꠇꠔ ꠎꠘꠞ ꠛꠄꠀꠘ ꠇꠁꠔꠣꠝ? ꠎꠤꠖꠣꠃꠘ, ꠛꠣꠞꠣꠇ, ꠡꠤꠝꠡꠥꠘ, ꠁꠚꠔꠣ, ꠖꠣꠃꠖ, ꠡꠣꠝꠥꠄꠟ ꠀꠞ ꠘꠛꠤ ꠅꠇꠟꠞ ꠁꠝꠣꠘꠤ ꠛꠟꠞ ꠛꠄꠀꠘ ꠇꠞꠣꠔ ꠟꠣꠉꠟꠦ ꠡꠝꠄꠄ ꠇꠥꠟꠣꠁꠔ ꠘꠣꠄ।
HEB 11:33 ꠁꠝꠣꠘꠞ ꠛꠟꠦ ꠄꠞꠣ ꠛꠃꠔ ꠖꠦꠡ ꠖꠈꠟ ꠇꠞꠍꠂꠘ, ꠢꠇ ꠁꠘꠍꠣꠚ ꠇꠣꠁꠝ ꠇꠞꠍꠂꠘ, ꠀꠟ꠆ꠟꠣꠁ ꠅꠀꠖꠣꠞ ꠚꠣꠄꠖꠣ ꠢꠣꠍꠤꠟ ꠇꠞꠍꠂꠘ, ꠡꠤꠋꠢꠞ ꠝꠥꠈ ꠛꠘ꠆ꠖ ꠇꠞꠍꠂꠘ,
HEB 11:34 ꠀꠉꠥꠘꠤꠞ ꠇꠥꠘ꠆ꠒꠟꠤꠞ ꠔꠦꠎ ꠇꠝꠣꠁꠟꠤꠍꠂꠘ, ꠔꠟꠥꠀꠞꠞ ꠍꠣꠝꠘ ꠕꠣꠇꠤ ꠞꠦꠢꠣꠁ ꠙꠣꠁꠍꠂꠘ, ꠇꠝꠎꠥꠞ ꠕꠣꠇꠤꠅ ꠛꠟ ꠢꠣꠍꠤꠟ ꠇꠞꠍꠂꠘ, ꠎꠤꠢꠣꠖꠞ ꠝꠣꠎꠦ ꠛꠟ-ꠈꠦꠝꠔꠣ ꠖꠦꠈꠣꠁꠍꠂꠘ, ꠜꠤꠘ-ꠖꠦꠡꠤ ꠅꠇꠟꠞ ꠚꠃꠎꠞꠦ ꠈꠦꠖꠣꠁꠀ ꠖꠤꠍꠂꠘ।
HEB 11:35 ꠛꠦꠐꠤꠘ꠆ꠔꠦ ꠔꠣꠞꠣ ꠎꠣꠞꠎꠤꠞ ꠝꠥꠞ꠆ꠖꠣ ꠅꠇꠟꠞꠦ ꠢꠤꠞꠛꠣꠞ ꠎꠤꠘ꠆ꠖꠣ ꠢꠣꠟꠔꠦ ꠙꠣꠁꠟꠣ। ꠀꠞꠅ ꠛꠃꠔꠦ ꠎꠣꠘꠞ ꠝꠣꠄꠀ ꠍꠣꠠꠤꠀ ꠎꠥꠟꠥꠝ-ꠘꠤꠞ꠆ꠎꠣꠔꠘ ꠡꠁꠎ꠆ꠎ ꠇꠞꠤꠀ ꠝꠞꠟꠣ, ꠎꠣꠔꠦ ꠇꠤꠀꠝꠔꠞ ꠛꠣꠖꠦ ꠛꠦꠢꠦꠡ꠆ꠔꠤ ꠡꠥꠈ ꠙꠣꠁꠘ।
HEB 11:36 ꠛꠃꠔꠦ ꠑꠣꠐ꠆ꠐꠣ-ꠝꠡꠇꠞꠣ ꠀꠞ ꠝꠣꠁꠞ-ꠗꠁꠞ ꠡꠁꠎ꠆ꠎ ꠇꠞꠍꠂꠘ, ꠛꠃꠔꠦ ꠒꠣꠘ꠆ꠒꠣ-ꠛꠦꠠꠤ ꠡꠢ ꠎꠦꠟ ꠈꠣꠐꠤꠍꠂꠘ।
HEB 11:37 ꠝꠣꠘꠡꠦ ꠔꠣꠞꠣꠞꠦ ꠙꠣꠔ꠆ꠔꠞꠖꠤ ꠁꠐꠣꠁꠍꠂꠘ, ꠇꠞꠣꠔꠖꠤ ꠌꠤꠞꠤꠀ ꠖꠥꠁ ꠐꠥꠇꠞꠣ ꠇꠞꠍꠂꠘ, ꠔꠟꠥꠀꠞꠖꠤ ꠎꠣꠘꠦ ꠝꠣꠞꠍꠂꠘ। ꠔꠣꠞꠣ ꠎꠥꠟꠥꠝ-ꠝꠍꠤꠛꠔ, ꠎꠣꠟꠣ-ꠎꠘꠔ꠆ꠞꠘꠣ ꠙꠣꠁꠍꠂꠘ, ꠅꠜꠣꠛꠞ ꠑꠦꠟꠣꠄ ꠙꠡꠥꠞ ꠌꠣꠝꠠꠣ ꠚꠤꠘ꠆ꠖꠤꠀ ꠡꠞꠝ ꠟꠥꠇꠣꠁꠍꠂꠘ।
HEB 11:38 ꠁ ꠖꠥꠘꠤꠀ ꠔꠣꠞꠣꠞ ꠎꠥꠇꠣ ꠀꠍꠤꠟ ꠘꠣ, ꠔꠣꠞꠣ ꠙꠣꠠ-ꠎꠋꠉꠟ, ꠝꠞꠥꠜꠥꠝꠤ, ꠀꠞ ꠉꠣꠔ-ꠉꠣꠠꠣꠞ ꠝꠣꠎꠦ ꠞꠁꠀ ꠖꠥꠘꠤꠀꠞ ꠎꠤꠘ꠆ꠖꠦꠉꠤ ꠇꠣꠐꠣꠁꠍꠂꠘ।
HEB 11:39 ꠁꠝꠣꠘꠞ ꠛꠟꠞ ꠟꠣꠉꠤ ꠄꠞꠣ ꠢꠇ꠆ꠇꠟꠦ ꠔꠣꠞꠤꠚ ꠇꠣꠝꠣꠁꠍꠂꠘ, ꠔꠣ-ꠅ ꠀꠟ꠆ꠟꠣꠞ ꠅꠀꠖꠣꠞ ꠚꠟ ꠁ ꠖꠥꠘꠤꠀꠔ ꠙꠣꠁꠍꠂꠘ ꠘꠣ।
HEB 11:40 ꠇꠣꠞꠘ ꠀꠟ꠆ꠟꠣꠄ ꠀꠝꠞꠣꠞ ꠟꠣꠉꠤ ꠢꠃ ꠎꠝꠣꠘꠣ ꠕꠣꠇꠤ ꠀꠞꠅ ꠜꠣꠟꠣ ꠙꠥꠞꠥꠡ꠆ꠇꠣꠞ ꠕꠁꠍꠂꠘ, ꠎꠣꠔꠦ ꠀꠝꠞꠣꠞꠦ ꠛꠣꠖ ꠖꠤꠀ ꠔꠣꠞꠣ ꠇꠣꠝꠤꠟ ꠘꠣ ꠛꠘꠂꠘ।
HEB 12:1 ꠔꠦ ꠀꠝꠞꠣ ꠖꠦꠈꠞꠣꠝ, ꠁꠝꠣꠘꠤ ꠔꠦꠎꠞ ꠛꠃꠔ ꠡꠣꠇ꠆ꠇꠤ ꠀꠝꠞꠣꠞ ꠌꠣꠁꠞꠅꠛꠣꠄ ꠀꠍꠦ। ꠄꠞꠟꠣꠉꠤ ꠀꠅ, ꠀꠝꠞꠣꠅ ꠢꠇꠟ ꠎꠣꠄ-ꠎꠣꠝꠦꠟꠣ ꠢꠞꠣꠁ, ꠎꠦ ꠉꠥꠘꠣꠄ ꠀꠝꠞꠣꠞꠦ ꠙꠦꠌꠣꠁꠀ ꠞꠣꠈꠦ, ꠅꠔꠣꠞꠦ ꠢꠞꠣꠁꠀ ꠚꠣꠟꠣꠁ, ꠀꠞ ꠖꠃꠠꠣꠅꠞꠣ ꠖꠟꠞ ꠟꠉꠦ ꠅꠁꠀ ꠗꠂꠎ꠆ꠎ ꠗꠞꠤ ꠢꠦꠡ ꠙꠞ꠆ꠎꠘ꠆ꠔ ꠖꠃꠠꠣꠁ।
HEB 12:2 ꠀꠃꠇ꠆ꠇꠣ, ꠀꠝꠞꠣꠞ ꠘꠎꠞ ꠞꠣꠈꠤ ꠝꠣꠟꠤꠇ ꠁꠍꠣꠞ ꠛꠣꠄ, ꠀꠃꠀꠟ ꠕꠣꠇꠤ ꠀꠈꠦꠞ ꠙꠞ꠆ꠎꠘ꠆ꠔ ꠔꠣꠁꠘ ꠅꠁꠟꠣ ꠀꠝꠞꠣꠞ ꠁꠝꠣꠘꠞ ꠝꠥꠟ ꠈꠥꠐꠤ। ꠔꠣꠘ ꠟꠣꠉꠤ ꠎꠦ ꠈꠥꠡꠤ ꠞꠣꠈꠣ ꠅꠁꠍꠦ, ꠅꠃ ꠈꠥꠡꠤꠞ ꠛꠣꠄꠖꠤ ꠌꠣꠁꠀ, ꠖꠥꠈ-ꠇꠡ꠆ꠐꠞ ꠍꠟꠤꠛꠞ ꠃꠙꠞꠞ ꠝꠃꠔꠞꠦꠅ ꠇꠛꠥꠟ ꠇꠞꠟꠣ, ꠁ ꠛꠦꠁꠎ꠆ꠎꠔꠤꠞꠦ ꠇꠥꠘꠥ ꠖꠣꠝ ꠖꠤꠟꠣ ꠘꠣ। ꠀꠞ ꠅꠈꠘ ꠀꠞꠡꠦ-ꠀꠎꠤꠝꠅ ꠀꠟ꠆ꠟꠣꠞ ꠒꠣꠁꠘꠞ ꠔꠈ꠆ꠔꠅ ꠔꠣꠁꠘ ꠔꠡꠞꠤꠚ ꠞꠣꠈꠍꠂꠘ।
HEB 12:3 ꠔꠦ ꠎꠦꠁꠘ ꠉꠥꠘꠣꠉꠣꠞ ꠝꠣꠘꠡꠞ ꠅꠔ ꠛꠠ ꠖꠥꠡꠝꠘꠤꠞꠦ ꠡꠁꠎ꠆ꠎ ꠇꠞꠟꠣ, ꠔꠣꠘ ꠛꠦꠙꠣꠞꠦ ꠌꠤꠘ꠆ꠔꠣ ꠇꠞꠅ, ꠎꠣꠔꠦ ꠔꠥꠝꠞꠣꠞ ꠖꠤꠟꠅ ꠇꠥꠘꠥ ꠇꠝꠎꠥꠞꠤ ꠛꠣ ꠘꠤꠞꠣꠡꠣ ꠘꠣ ꠀꠄ।
HEB 12:4 ꠉꠥꠘꠣꠞ ꠟꠉꠦ ꠟꠣꠠꠣꠁꠔ ꠟꠣꠉꠤꠀ ꠔ ꠟꠃ ꠛꠣꠞꠘꠤꠞ ꠖꠡꠣ ꠔꠥꠝꠞꠣꠞ ꠅꠈꠘꠅ ꠅꠁꠍꠦ ꠘꠣ।
HEB 12:5 ꠔꠥꠝꠞꠣꠞ ꠉꠣꠁꠛꠤ ꠛꠣꠚ ꠀꠟ꠆ꠟꠣꠄ, ꠔꠣꠘ ꠀꠅꠟꠣꠖ ꠢꠤꠡꠣꠛꠦ ꠔꠥꠝꠞꠣꠞꠦ ꠎꠦ ꠘꠍꠤꠅꠔ ꠇꠞꠍꠂꠘ, ꠔꠥꠝꠞꠣ ꠁꠔꠣ ꠚꠣꠃꠞꠤꠟꠤꠍ ꠘꠤ? ꠇꠤꠔꠣꠛꠅ ꠀꠍꠦ, ꠅ ꠀꠝꠣꠞ ꠙꠥꠔ, ꠝꠣꠛꠥꠖꠞ ꠡꠣꠡꠘꠞꠦ ꠄꠟꠣꠝꠤ ꠇꠞꠤꠅ ꠘꠣ, ꠔꠣꠁꠘ ꠇꠥꠘꠥ ꠗꠣꠝꠇꠤ ꠖꠤꠟꠦ, ꠛꠦꠎꠣꠞ ꠅꠁꠅ ꠘꠣ।
HEB 12:6 ꠇꠣꠞꠘ ꠝꠣꠛꠥꠖꠦ ꠎꠦꠞꠣꠞꠦ ꠝꠢꠛ꠆ꠛꠔ ꠇꠞꠂꠘ, ꠔꠣꠞꠣꠞꠦꠃ ꠡꠣꠡꠘ ꠇꠞꠂꠘ, ꠎꠦꠞꠣꠞꠦ ꠔꠣꠁꠘ ꠀꠅꠟꠣꠖ ꠢꠤꠡꠣꠛꠦ ꠇꠛꠥꠟ ꠇꠞꠤꠟꠣꠁꠘ, ꠄꠞꠣ ꠙꠞꠔꠦꠇ ꠎꠘꠞꠦ ꠡꠣꠎꠣ ꠖꠦꠁꠘ।
HEB 12:7 ꠡꠣꠡꠘ ꠝꠘꠅ ꠇꠞꠤꠀ ꠔꠥꠝꠞꠣ ꠇꠡ꠆ꠐ ꠡ꠆ꠛꠤꠇꠣꠞ ꠇꠞꠅ। ꠛꠣꠚꠦ-ꠙꠥꠔꠦ ꠎꠦꠟꠣꠈꠣꠘ ꠡꠝ꠆ꠙꠞ꠆ꠇ, ꠀꠟ꠆ꠟꠣꠄꠅ ꠔꠥꠝꠞꠣꠞ ꠟꠉꠦ ꠅꠃꠟꠣ ꠡꠝ꠆ꠙꠞ꠆ꠇ ꠞꠣꠈꠍꠂꠘ। ꠁꠟꠣ ꠇꠥꠘꠥ ꠙꠥꠔ ꠀꠍꠦ ꠘꠤ, ꠎꠣꠞꠦ ꠔꠣꠞ ꠛꠣꠚꠦ ꠡꠣꠡꠘ ꠇꠞꠂꠘ ꠘꠣ?
HEB 12:8 ꠢꠇ꠆ꠇꠟ ꠙꠥꠔꠞꠦꠃ ꠡꠣꠡꠘ ꠇꠞꠣ ꠅꠄ। ꠔꠥꠝꠞꠣꠞꠦ ꠎꠥꠖꠤ ꠡꠣꠡꠘ ꠇꠞꠣ ꠘꠣ ꠅꠄ, ꠔꠦ ꠔ ꠔꠥꠝꠞꠣ ꠚꠥꠋꠉꠣ, ꠀꠍꠟ ꠙꠥꠔ ꠘꠣꠄ।
HEB 12:9 ꠎꠣꠘ ꠔ, ꠀꠝꠞꠣꠞ ꠖꠥꠘꠤꠀꠛꠤ ꠛꠣꠚ ꠅꠇꠟꠦ ꠀꠝꠞꠣꠞꠦ ꠡꠣꠡꠘ ꠇꠞꠂꠘ, ꠀꠞ ꠀꠝꠞꠣ ꠔꠣꠞꠣꠞꠦ ꠁꠎ꠆ꠎꠔ ꠇꠞꠤ। ꠔꠦ ꠎꠦꠁꠘ ꠀꠝꠞꠣꠞ ꠀꠍꠝꠣꠘꠤ ꠛꠣꠚ, ꠔꠣꠘ ꠉꠦꠍꠦ ꠉꠞ꠆ꠖꠘꠣ ꠘꠥꠀꠁꠀ ꠌꠟꠣ ꠀꠝꠞꠣꠞ ꠟꠣꠉꠤ ꠎꠞꠥꠞ ꠘꠣꠄ ꠘꠤ, ꠎꠣꠔꠦ ꠀꠝꠞꠣ ꠎꠤꠘ꠆ꠖꠦꠉꠤ ꠙꠣꠁ?
HEB 12:10 ꠀꠝꠞꠣꠞ ꠖꠥꠘꠤꠀꠛꠤ ꠛꠣꠚ ꠅꠇꠟꠦ ꠎꠦꠟꠣ ꠜꠣꠟꠣ ꠝꠘꠅ ꠇꠞꠔꠣ, ꠅꠟꠣ ꠀꠝꠞꠣꠞꠦ ꠡꠣꠡꠘ ꠇꠞꠔꠣ, ꠀꠞ ꠁꠔꠣ ꠔ ꠕꠥꠠꠣ ꠇꠄꠖꠤꠘꠞ ꠟꠣꠉꠤ, ꠅꠁꠟꠦ ꠀꠟ꠆ꠟꠣꠄ ꠔ ꠀꠝꠞꠣꠞꠦ ꠡꠣꠡꠘ ꠇꠞꠞꠣ ꠎꠣꠔꠦ ꠀꠝꠞꠣꠅ ꠔꠣꠘ ꠙꠣꠇ-ꠙꠛꠤꠔ꠆ꠞꠔꠣ ꠢꠣꠍꠤꠟ ꠇꠞꠤ।
HEB 12:11 ꠇꠥꠘꠥ ꠡꠣꠡꠘꠞꠦꠃ ꠈꠥꠡꠤꠞ ꠛꠦꠙꠣꠞ ꠝꠘꠅ ꠇꠞꠣ ꠅꠄ ꠘꠣ, ꠖꠥꠈꠞ ꠛꠦꠙꠣꠞꠃ ꠝꠘꠅ ꠅꠄ, ꠅꠁꠟꠦ ꠎꠦꠞꠣ ꠡꠣꠡꠘ ꠝꠣꠘꠤꠀ ꠌꠟꠦ, ꠔꠣꠞꠣ ꠛꠣꠖꠦ ꠖꠤꠘꠖꠣꠞꠤꠞ ꠡꠣꠘ꠆ꠔꠤꠀꠟꠣ ꠎꠤꠘ꠆ꠖꠦꠉꠤ ꠙꠣꠄ।
HEB 12:12 ꠄꠞꠟꠣꠉꠤ ꠔꠥꠝꠞꠣꠞ ꠇꠝꠎꠥꠞ ꠀꠔꠞꠦ ꠝꠎꠛꠥꠔ ꠇꠞꠅ, ꠖꠥꠞ꠆ꠛꠟ ꠀꠐꠥꠞꠦ ꠡꠛꠟ ꠇꠞꠅ।
HEB 12:13 ꠔꠥꠝꠞꠣ ꠡꠤꠗꠣ ꠙꠕꠦ ꠀꠐꠅ, ꠎꠣꠔꠦ ꠟꠦꠋꠠꠣ ꠙꠣꠅ ꠀꠞ ꠘꠣ ꠇꠌꠇꠦ, ꠛꠞꠋ ꠜꠣꠟꠣ ꠅꠁꠎꠣꠄ।
HEB 12:14 ꠢꠇꠟ ꠝꠣꠘꠡꠞ ꠟꠉꠦ ꠡꠣꠘ꠆ꠔꠤꠄ ꠛꠡꠔ ꠇꠞꠣ ꠀꠞ ꠙꠣꠇ-ꠙꠣꠇꠤꠎꠣ ꠅꠁꠀ ꠌꠟꠣꠞ ꠟꠣꠉꠤ ꠈꠤꠀꠟꠤ ꠅꠅ, ꠁꠟꠣ ꠘꠣ ꠌꠟꠟꠦ ꠇꠦꠃ ꠝꠣꠟꠤꠇꠞ ꠖꠞꠡꠘ ꠙꠣꠁꠔꠣꠄ ꠘꠣꠄ।
HEB 12:15 ꠢꠥꠡꠤꠀꠞ ꠞꠁꠅ, ꠎꠣꠔꠦ ꠇꠦꠃ ꠀꠟ꠆ꠟꠣꠞ ꠞꠢꠝꠔ ꠕꠣꠇꠤ ꠛꠣꠖ ꠘꠣ ꠙꠠꠅ। ꠈꠤꠀꠟ ꠞꠣꠈꠤꠅ, ꠔꠥꠝꠞꠣꠞ ꠝꠣꠎꠞ ꠇꠦꠃ ꠎꠣꠘꠥ ꠛꠤꠡꠣꠇ꠆ꠔ ꠔꠤꠔ꠆ꠔꠣ ꠉꠣꠍꠞ ꠎꠠꠞ ꠟꠣꠈꠣꠘ ꠛꠣꠞ ꠅꠁꠀ ꠘꠣ ꠍꠣꠔꠣꠄ, ꠀꠞ ꠛꠃꠔ ꠝꠣꠘꠡꠞꠦ ꠘꠣꠙꠣꠇ ꠘꠣ ꠛꠣꠘꠣꠄ।
HEB 12:16 ꠢꠎꠞꠔ ꠁꠀꠇꠥꠛꠞ ꠜꠣꠁ ꠁꠡʼꠞ ꠟꠣꠈꠣꠘ ꠇꠥꠘꠥ ꠛꠦ-ꠙꠕꠤ ꠘꠣꠚꠞꠝꠣꠘ ꠙꠄꠖꠣ ꠘꠣ ꠅꠄ। ꠁꠡꠦ ꠔ ꠈꠣꠟꠤ ꠄꠇ ꠅꠇ꠆ꠔꠞ ꠈꠣꠘꠤꠞ ꠟꠣꠉꠤ, ꠔꠣꠞ ꠘꠤꠎꠞ ꠝꠃꠞꠡꠤ ꠝꠣꠟꠤꠇꠣꠘꠣ ꠛꠦꠌꠤꠟꠣꠁꠍꠦ।
HEB 12:17 ꠔꠥꠝꠞꠣꠞ ꠔ ꠎꠣꠘꠣꠃ ꠀꠍꠦ, ꠎꠥꠖꠤꠅ ꠛꠣꠖꠦ ꠢꠦ ꠌꠈꠥꠞ ꠙꠣꠘꠤ ꠚꠣꠟꠣꠁꠀ ꠇꠣꠘ꠆ꠖꠤ ꠇꠣꠘ꠆ꠖꠤ ꠖꠥꠀ ꠝꠣꠋꠉꠤꠍꠤꠟ, ꠅꠁꠟꠦ ꠔꠃꠛꠣ ꠇꠞꠣꠞ ꠡꠥꠎꠥꠉ ꠀꠞ ꠢꠦ ꠙꠣꠁꠍꠦ ꠘꠣ।
HEB 12:18 ꠔꠥꠝꠞꠣ ꠘꠤꠌ꠆ꠌꠄ ꠁꠟꠣ ꠇꠥꠘꠥ ꠙꠣꠠꠞ ꠇꠣꠘ꠆ꠖꠣꠔ ꠀꠁꠍ ꠘꠣ, ꠎꠦ ꠙꠣꠠꠅ ꠀꠔꠖꠤ ꠍꠅꠀ ꠎꠣꠄ। ꠢꠃ ꠔꠥꠞ ꠙꠣꠠꠞ ꠎꠣꠟꠣꠁꠟ ꠀꠉꠥꠁꠘ, ꠉꠁꠘ ꠀꠘ꠆ꠖꠣꠁꠞ, ꠢꠤꠟ-ꠔꠥꠚꠣꠘ,
HEB 12:19 ꠡꠤꠋꠉꠣꠞ ꠀꠅꠀꠎ, ꠛꠣ ꠎꠥꠞꠦ ꠎꠥꠞꠦ ꠝꠣꠔ-ꠇꠕꠣꠞ ꠇꠥꠘꠥ ꠀꠅꠀꠎꠞ ꠉꠦꠍꠦꠅ ꠀꠁꠍ ꠘꠣ। ꠎꠥꠞꠦ ꠎꠥꠞꠦ ꠝꠣꠔꠞ ꠅꠃ ꠀꠅꠀꠎ ꠎꠦꠞꠣ ꠢꠥꠘꠍꠤꠟ, ꠔꠣꠞꠣ ꠝꠤꠘꠔ ꠇꠞꠤ ꠇꠁꠍꠤꠟ, ꠎꠣꠔꠦ ꠔꠣꠞꠣꠞ ꠟꠉꠦ ꠀꠞ ꠛꠣꠔꠌꠤꠔ ꠇꠞꠣ ꠘꠣ ꠅꠄ।
HEB 12:20 ꠔꠣꠞꠣ ꠀꠟ꠆ꠟꠣꠞ ꠅꠃ ꠢꠥꠇꠥꠝ ꠡꠁꠔ ꠙꠣꠞꠍꠤꠟ ꠘꠣ, ꠀꠟ꠆ꠟꠣꠄ ꠇꠁꠍꠟꠣ, “ꠎꠥꠖꠤ ꠇꠥꠘꠥ ꠙꠡꠥꠄꠅ ꠁ ꠙꠣꠠꠅ ꠍꠄ, ꠔꠦ ꠔꠣꠞꠦꠅ ꠙꠣꠔ꠆ꠔꠞ ꠝꠣꠞꠤꠀ ꠝꠣꠞꠤꠟꠤꠔꠦ ꠅꠁꠛ।”
HEB 12:21 ꠅꠃ ꠡꠝꠄ ꠎꠦꠞꠣ ꠝꠣꠛꠥꠖꠞ ꠖꠤꠖꠣꠞ ꠖꠦꠈꠍꠤꠟ, ꠔꠣꠞꠣ ꠅꠔ ꠒꠞ ꠒꠞꠣꠁꠍꠤꠟ ꠎꠦꠘ, ꠡ꠆ꠛꠄꠅꠋ ꠝꠥꠍꠣ ꠘꠛꠤꠄ ꠇꠁꠟꠣ, “ꠒꠞꠞ ꠌꠥꠐꠦ ꠀꠝꠤ ꠇꠣꠙꠤꠞꠣꠝ।”
HEB 12:22 ꠅꠁꠟꠦ ꠔꠥꠝꠞꠣ ꠔ ꠙꠛꠤꠔ꠆ꠞ ꠍꠤꠅꠘ ꠙꠣꠠ ꠀꠞ ꠎꠤꠘ꠆ꠖꠣ ꠀꠟ꠆ꠟꠣꠞ ꠐꠣꠃꠘꠞ ꠇꠣꠍꠣꠔ ꠀꠁꠍ, ꠀꠎꠣꠞ ꠀꠎꠣꠞ ꠚꠤꠞꠤꠡ꠆ꠔꠣꠄ ꠎꠦꠈꠣꠘꠅ ꠈꠥꠡꠤ-ꠛꠣꠡꠤꠞ ꠝꠣꠢꠚꠤꠟ ꠇꠞꠞꠣ, ꠢꠘꠅ ꠀꠁꠍ। ꠁ ꠐꠣꠃꠘ ꠅꠁꠟꠉꠤ, ꠛꠦꠢꠦꠡ꠆ꠔꠤ ꠎꠦꠞꠥꠎꠣꠟꠦꠝ।
HEB 12:23 ꠛꠦꠢꠦꠡ꠆ꠔꠤ ꠈꠣꠔꠣꠔ ꠎꠦꠞꠣꠞ ꠘꠣꠝ ꠟꠦꠈꠣ ꠅꠁꠉꠦꠍꠦ, ꠛꠠ ꠙꠥꠀꠞ ꠟꠣꠈꠣꠘ ꠎꠦꠞꠣꠞꠦ ꠁꠎ꠆ꠎꠔ ꠖꠦꠅꠀ ꠅꠁꠍꠦ, ꠄꠞꠣꠞ ꠛꠣꠘꠣꠁꠟ ꠎꠝꠣꠔꠞ ꠗꠣꠞꠅ ꠀꠁꠍ। ꠎꠦꠁꠘ ꠔꠣꠝꠣꠝ ꠝꠣꠘꠡꠞ ꠛꠤꠌꠣꠞ ꠇꠞꠂꠘ, ꠢꠃ ꠀꠟ꠆ꠟꠣꠞ ꠇꠣꠍꠣꠔ ꠀꠁꠍ। ꠎꠦ ꠙꠞꠦꠎꠉꠣꠞ ꠅꠇꠟ ꠙꠥꠞꠣꠙꠥꠞ ꠇꠣꠝꠤꠟ ꠅꠁꠉꠦꠍꠂꠘ, ꠄꠞꠣꠞ ꠞꠥꠢꠥꠞ ꠝꠎꠟꠤꠍꠅ ꠀꠁꠍ।
HEB 12:24 ꠎꠦ ꠁꠍꠣ ꠀꠟ꠆ꠟꠣꠞ ꠟꠉꠦ ꠝꠤꠟꠘꠞ ꠘꠄꠀ ꠃꠍꠤꠟ꠆ꠟꠣꠞ ꠎꠤꠝ꠆ꠝꠣꠖꠣꠞ, ꠢꠃ ꠁꠍꠣꠞ ꠉꠦꠍꠦ ꠀꠁꠍ। ꠢꠣꠛꠤꠟꠞ ꠟꠃ ꠕꠣꠇꠤ ꠀꠞꠅ ꠝꠞꠔꠥꠛꠣꠀꠟꠣ ꠎꠦ ꠟꠃ, ꠔꠥꠝꠞꠣ ꠍꠤꠐꠣꠁꠟ ꠢꠃ ꠟꠃꠞ ꠇꠣꠍꠣꠔ ꠀꠁꠍ।
HEB 12:25 ꠝꠥꠍꠣ ꠘꠛꠤꠄ ꠀꠟ꠆ꠟꠣꠁ ꠢꠥꠡꠤꠀꠞꠤꠞ ꠇꠕꠣ ꠖꠥꠘꠤꠀꠞ ꠝꠣꠘꠡꠞꠦ ꠎꠣꠘꠣꠘꠤꠞ ꠛꠣꠖꠦ ꠎꠦꠞꠣ ꠔꠣꠘ ꠢꠥꠡꠤꠀꠞꠤꠞꠦ ꠄꠟꠣꠝꠤ ꠇꠞꠍꠤꠟ, ꠄꠞꠣ ꠎꠦꠛꠟꠣ ꠞꠦꠢꠣꠁ ꠙꠣꠁꠍꠂꠘ ꠘꠣ, ꠔꠦ ꠎꠦꠁꠘ ꠛꠦꠢꠦꠡ꠆ꠔꠅ ꠕꠣꠇꠤꠀ ꠀꠝꠞꠣꠞꠦ ꠢꠥꠡꠤꠀꠞ ꠇꠞꠞꠣ, ꠔꠣꠘ ꠢꠥꠡꠤꠀꠞꠤꠞꠦ ꠄꠟꠣꠝꠤ ꠇꠞꠟꠦ ꠔ ꠄꠇ꠆ꠇꠦꠛꠣꠞꠦ ꠘꠤꠌ꠆ꠌꠤꠔꠃ ꠀꠝꠞꠣ ꠇꠥꠘꠥ ꠞꠦꠢꠣꠁ ꠙꠣꠁꠔꠣꠝ ꠘꠣꠄ। ꠄꠞꠟꠣꠉꠤ ꠈꠤꠀꠟ ꠞꠣꠈꠤꠅ, ꠎꠦꠁꠘ ꠢꠃ ꠛꠣꠔꠌꠤꠔ ꠇꠞꠍꠂꠘ, ꠔꠣꠘ ꠢꠥꠇꠥꠝꠞꠦ ꠄꠟꠣꠝꠤ ꠇꠞꠤꠅ ꠘꠣ।
HEB 12:26 ꠢꠤ ꠀꠝꠟꠅ ꠀꠟ꠆ꠟꠣ ꠙꠣꠇꠞ ꠝꠥꠈꠞ ꠀꠅꠀꠎꠦ ꠢꠣꠞꠣ ꠖꠥꠘꠤꠀꠞꠦ ꠇꠣꠙꠣꠁꠍꠤꠟ, ꠅꠁꠟꠦ ꠅꠈꠘ ꠔꠣꠁꠘ ꠅꠃ ꠅꠀꠖꠣ ꠇꠞꠍꠂꠘ, “ꠀꠝꠤ ꠖꠥꠍꠞꠣꠛꠣꠞ ꠈꠣꠟꠤ ꠁ ꠖꠥꠘꠤꠀꠞꠦ ꠘꠣꠄ, ꠀꠍꠝꠣꠘꠞꠦꠅ ꠇꠣꠙꠣꠁꠝꠥ।”
HEB 12:27 ꠔꠦ “ꠖꠥꠍꠞꠣꠛꠣꠞ” ꠅꠃ ꠡꠛ꠆ꠖ ꠕꠣꠇꠤ ꠛꠥꠎꠣ ꠎꠣꠄ ꠎꠦꠘ, ꠎꠦꠔꠣ ꠎꠤꠘꠤꠡ ꠅꠇꠟ ꠟꠣꠠꠣ-ꠌꠣꠠꠣ ꠇꠞꠣꠁꠟ ꠎꠣꠄ, ꠝꠣꠘꠤ ꠎꠦꠔꠣ ꠙꠄꠖꠣ ꠇꠞꠣ ꠅꠁꠍꠦ, ꠁꠔꠣꠞꠦ ꠛꠣꠖ ꠖꠦꠅꠀ ꠅꠁꠎꠤꠛ, ꠀꠞ ꠎꠦꠔꠣꠞꠦ ꠟꠣꠠꠣ-ꠌꠣꠠꠣ ꠇꠞꠣ ꠎꠣꠄ ꠘꠣ, ꠅꠔꠣ ꠇꠣꠁꠝ ꠞꠄ।
HEB 12:28 ꠛꠥꠎꠞꠣ ꠘꠤ, ꠎꠦ ꠛꠣꠖꠡꠣꠁꠞꠦ ꠟꠣꠠꠣ-ꠌꠣꠠꠣ ꠇꠞꠣ ꠎꠣꠄ ꠘꠣ, ꠀꠝꠞꠣ ꠔ ꠢꠃ ꠛꠣꠖꠡꠣꠁ ꠙꠣꠁꠞꠣꠝ, ꠄꠞꠟꠣꠉꠤ ꠀꠃꠇ꠆ꠇꠣ, ꠀꠝꠞꠣ ꠀꠟ꠆ꠟꠣꠞ ꠖꠞꠛꠣꠞꠅ ꠡꠥꠇꠞꠤꠀ ꠎꠣꠘꠣꠁ। ꠀꠟ꠆ꠟꠣ ꠙꠣꠇ ꠎꠦ ꠘꠝꠥꠘꠣꠄ ꠈꠥꠡꠤ ꠅꠁꠘ, ꠅꠃ ꠘꠝꠥꠘꠣꠄ ꠀꠝꠞꠣ ꠔꠣꠘ ꠄꠛꠣꠖꠔ ꠇꠞꠔꠣꠝ ꠙꠣꠞꠝꠥ, ꠔꠣꠘꠞꠦ ꠒꠞꠣꠁꠀ, ꠔꠣꠎꠤꠝ ꠇꠞꠤꠀ ꠄꠛꠣꠖꠔ ꠇꠞꠝꠥ।
HEB 12:29 ꠇꠣꠞꠘ ꠀꠝꠞꠣꠞ ꠀꠟ꠆ꠟꠣ ꠔ ꠛꠤꠘꠣꠡ ꠇꠞꠞꠣ ꠀꠉꠥꠘꠤꠞ ꠟꠣꠈꠣꠘ।
HEB 13:1 ꠔꠥꠝꠞꠣ ꠄꠇꠦ-ꠅꠁꠘ꠆ꠘꠞꠦ ꠀꠙꠘ ꠜꠣꠁꠞ ꠟꠣꠈꠣꠘ ꠢꠣꠝꠦꠡꠣ ꠝꠣꠄꠀ ꠇꠞꠤꠅ।
HEB 13:2 ꠝꠦꠝꠣꠘꠖꠣꠞꠤ ꠇꠞꠣ ꠚꠣꠃꠞꠤꠅ ꠘꠣ। ꠎꠣꠘ ꠘꠤ, ꠇꠥꠘꠥ ꠇꠥꠘꠥ ꠎꠘꠦ ꠘꠣ ꠌꠤꠘꠤꠀ ꠀꠟ꠆ꠟꠣꠞ ꠚꠤꠞꠤꠡ꠆ꠔꠣꠞꠅ ꠝꠦꠝꠣꠘꠖꠣꠞꠤ ꠇꠞꠍꠂꠘ।
HEB 13:3 ꠎꠦꠟ ꠈꠣꠘꠣꠔ ꠎꠦꠔꠣ ꠝꠣꠘꠥꠡ ꠛꠘ꠆ꠖꠤ ꠀꠍꠂꠘ, ꠘꠤꠎꠞꠦꠅ ꠅꠟꠣ ꠛꠘ꠆ꠖꠤ ꠝꠘꠅ ꠇꠞꠤꠀ ꠔꠣꠞꠣꠞꠦ ꠡꠣꠁꠎ꠆ꠎ ꠇꠞꠤꠅ, ꠀꠞ ꠎꠦꠞꠣꠞ ꠃꠙꠞꠦ ꠎꠥꠟꠥꠝ-ꠝꠍꠤꠛꠔ ꠇꠞꠣ ꠅꠞ, ꠘꠤꠎꠦ ꠅꠃ ꠝꠍꠤꠛꠔꠅ ꠙꠠꠍ ꠝꠘꠅ ꠇꠞꠤꠀ, ꠔꠣꠞꠣꠞꠦ ꠈꠤꠀꠟ ꠇꠞꠤꠅ।
HEB 13:4 ꠢꠇꠟꠦꠃ ꠛꠤꠀ-ꠡꠣꠖꠤꠞꠦ ꠁꠎ꠆ꠎꠔ ꠇꠞꠤꠅ। ꠎꠣꠝꠣꠁ-ꠛꠃꠞ ꠡꠝ꠆ꠙꠞ꠆ꠇꠞꠦ ꠙꠣꠇ-ꠙꠛꠤꠔ꠆ꠞ ꠞꠣꠈꠤꠅ। ꠝꠘꠅ ꠞꠣꠈꠤꠅ, ꠀꠟ꠆ꠟꠣꠄ ꠇꠥ-ꠘꠎꠞꠤ, ꠎꠤꠘꠣꠇꠥꠞ ꠀꠞ ꠟꠥꠌ꠆ꠌꠣ ꠅꠇꠟꠞ ꠛꠤꠌꠣꠞ ꠇꠞꠛꠣ।
HEB 13:5 ꠖꠥꠘꠤꠀꠛꠤ ꠗꠘ-ꠍꠣꠝꠣꠘꠣꠞ ꠟꠣꠟꠌ ꠕꠣꠇꠤ ꠢꠞꠤꠀ ꠞꠁꠅ। ꠔꠥꠝꠞꠣꠞ ꠎꠦꠔꠣ ꠀꠍꠦ, ꠅꠔꠣ ꠟꠁꠀꠃ ꠈꠥꠡꠤ ꠞꠁꠅ। ꠀꠟ꠆ꠟꠣꠄ ꠛꠣꠔꠣꠁꠍꠂꠘ, ꠀꠝꠤ ꠇꠥꠘꠥꠝꠘ꠆ꠔꠦꠃ ꠔꠥꠝꠣꠞꠦ ꠍꠣꠠꠔꠣꠝ ꠘꠣꠄ, ꠇꠥꠘꠥ ꠢꠣꠟꠔꠦꠃ ꠔꠥꠝꠣꠞꠦ ꠚꠣꠟꠣꠁꠔꠣꠝ ꠘꠣꠄ।
HEB 13:6 ꠄꠞꠟꠣꠉꠤꠃ ꠀꠝꠞꠣ ꠢꠤꠝ꠆ꠝꠔ ꠇꠞꠤꠀ ꠇꠁꠔꠣꠝ ꠙꠣꠞꠤꠀꠞ, ꠝꠣꠛꠥꠖ ꠀꠝꠣꠞ ꠡꠢꠣꠄ ꠀꠍꠂꠘ, ꠀꠝꠤ ꠒꠞꠣꠁꠔꠣꠝ ꠘꠣꠄ। ꠝꠣꠘꠡꠦ ꠀꠝꠣꠞ ꠇꠤꠔꠣ ꠇꠞꠔ?
HEB 13:7 ꠢꠥꠘꠅ, ꠎꠦ ꠛꠥꠎꠥꠞ꠆ꠉ ꠅꠇꠟꠦ ꠔꠥꠝꠞꠣꠞꠦ ꠀꠟ꠆ꠟꠣꠞ ꠇꠣꠟꠣꠝ ꠔꠣꠟꠤꠝ ꠖꠤꠍꠂꠘ, ꠔꠣꠞꠣꠞ ꠇꠕꠣ ꠁꠀꠖ ꠇꠞꠤꠅ। ꠔꠣꠞꠣꠞ ꠎꠤꠘ꠆ꠖꠦꠉꠤꠞ ꠢꠣꠟꠔꠞ ꠇꠕꠣ ꠜꠣꠟꠣꠝꠘ꠆ꠔꠦ ꠌꠤꠘ꠆ꠔꠣ ꠇꠞꠤꠀ, ꠔꠥꠝꠞꠣꠅ ꠔꠣꠞꠣꠞ ꠟꠣꠈꠣꠘ ꠁꠝꠣꠘꠦ ꠝꠎꠛꠥꠔ ꠅꠅ।
HEB 13:8 ꠁꠍꠣ ꠀꠟ-ꠝꠍꠤ ꠉꠔꠇꠣꠁꠟ ꠎꠦꠟꠣ ꠀꠍꠟꠣ, ꠀꠁꠎꠅ ꠅꠟꠣ ꠀꠍꠂꠘ, ꠀꠞ ꠢꠞ-ꠢꠣꠝꠦꠡꠣꠃ ꠅꠟꠣ ꠞꠁꠛꠣ।
HEB 13:9 ꠘꠣꠘꠣꠘ ꠘꠝꠥꠘꠣꠞ ꠘꠄꠀ ꠘꠄꠀ ꠔꠣꠟꠤꠝꠦ ꠎꠣꠘꠥ ꠔꠥꠝꠞꠣꠞꠦ ꠛꠦ-ꠙꠕꠦ ꠘꠣ ꠘꠦꠄ, ꠈꠣꠘꠣ-ꠙꠤꠘꠣꠞ ꠈꠥꠐꠤꠘꠣꠐꠤ ꠛꠤꠡꠄ ꠘꠣ ꠔꠥꠇꠣꠁꠀ, ꠛꠞꠋ ꠀꠟ꠆ꠟꠣꠞ ꠞꠢꠝꠔꠞ ꠃꠙꠞꠦ ꠇꠣꠁꠝ ꠞꠅ। ꠁꠟꠣ ꠈꠥꠐꠤꠘꠣꠐꠤ ꠘꠤꠅꠝꠞ ꠃꠙꠞꠦ ꠎꠦꠞꠣ ꠜꠞꠡꠣ ꠇꠞꠔ, ꠁꠔꠣꠄ ꠔ ꠔꠣꠞꠣꠞ ꠇꠥꠘꠥ ꠟꠣꠜ ꠅꠁꠍꠦ ꠘꠣ।
HEB 13:10 ꠀꠝꠞꠣꠞ ꠔ ꠄꠇꠈꠣꠘ ꠇꠥꠞꠛꠣꠘꠤ ꠈꠣꠘꠣ ꠀꠍꠦ, ꠁꠈꠣꠘꠞ ꠇꠥꠘ꠆ꠔꠣ ꠈꠣꠁꠛꠣꠞ ꠄꠈꠔꠤꠀꠞ ꠝꠥꠍꠣ ꠘꠛꠤꠞ ꠄꠛꠣꠖꠔ-ꠔꠣꠝ꠆ꠛꠥꠞ ꠁꠝꠣꠝ ꠅꠇꠟꠞ ꠘꠣꠁ।
HEB 13:11 ꠉꠥꠘꠣꠞ ꠝꠣꠚꠤꠞ ꠟꠣꠉꠤ ꠎꠛ ꠇꠞꠣ ꠙꠡꠥꠞ ꠟꠃ ꠟꠁꠀ, ꠛꠘꠤ ꠁꠍꠞꠣꠁꠟꠞ ꠙꠞꠗꠣꠘ ꠁꠝꠣꠝ ꠅꠇꠟ ꠄꠛꠣꠖꠔ ꠈꠣꠘꠣꠞ ꠢꠦꠞꠦꠝ ꠡꠞꠤꠚꠅ ꠢꠣꠝꠣꠁꠘ, ꠅꠁꠟꠦ ꠅꠃ ꠙꠡꠥꠞ ꠀꠒ꠆ꠒꠤ-ꠝꠣꠋꠡ ꠢꠇꠟꠔꠣ ꠛꠘꠤ ꠁꠍꠞꠣꠁꠟꠞ ꠇꠦꠝ꠆ꠙꠞ ꠛꠣꠞꠦ ꠘꠤꠀ ꠎꠣꠟꠣꠁꠟ ꠅꠄ।
HEB 13:12 ꠅꠃ ꠟꠣꠈꠣꠘ ꠢꠎꠞꠔ ꠁꠍꠣꠅ ꠎꠦꠞꠥꠎꠣꠟꠦꠝ ꠐꠣꠃꠘꠞ ꠛꠣꠞꠦ ꠉꠤꠀ ꠎꠥꠟꠥꠝ-ꠇꠡ꠆ꠐ ꠡꠁꠎ꠆ꠎ ꠇꠞꠤꠀ ꠝꠃꠔ ꠇꠛꠥꠟ ꠇꠞꠟꠣ, ꠎꠣꠔꠦ ꠔꠣꠘ ꠘꠤꠎꠞ ꠟꠃꠞ ꠃꠍꠤꠟ꠆ꠟꠣꠄ ꠝꠣꠘꠡꠞꠦ ꠉꠥꠘꠣ ꠕꠣꠇꠤ ꠙꠣꠇ-ꠍꠣꠚ ꠇꠞꠔꠣ ꠙꠣꠞꠂꠘ।
HEB 13:13 ꠅꠈꠘ ꠀꠃꠇ꠆ꠇꠣ, ꠀꠝꠞꠣꠅ ꠔꠣꠘ ꠛꠖꠘꠣꠝꠞꠦ ꠘꠤꠎꠞ ꠇꠣꠘ꠆ꠖꠅ ꠟꠁꠀ ꠇꠦꠝ꠆ꠙꠞ ꠛꠣꠞꠦ ꠔꠣꠘ ꠇꠣꠘ꠆ꠖꠣꠔ ꠎꠣꠁꠉꠤ।
HEB 13:14 ꠇꠣꠞꠘ ꠁ ꠖꠥꠘꠤꠀꠔ ꠀꠝꠞꠣꠞ ꠟꠣꠉꠤ ꠡ꠆ꠕꠣꠄꠁ ꠇꠥꠘꠥ ꠐꠣꠃꠘ ꠘꠣꠁ, ꠀꠝꠞꠣ ꠈꠣꠟꠤ ꠢꠃ ꠐꠣꠃꠘꠞ ꠔꠣꠟ꠆ꠟꠣꠡ ꠇꠞꠞꠣꠝ, ꠎꠦ ꠐꠣꠃꠘꠞ ꠖꠤꠖꠣꠞ ꠛꠣꠖꠦ ꠙꠣꠁꠝꠥ।
HEB 13:15 ꠔꠦ ꠅꠈꠘ ꠀꠝꠞꠣ ꠀꠟ-ꠝꠍꠤꠞ ꠎꠞꠤꠀꠄ ꠢꠣꠝꠦꠡꠣ ꠀꠟ꠆ꠟꠣꠞ ꠖꠞꠛꠣꠞꠅ ꠎꠤꠇꠤꠞ-ꠀꠎꠇꠣꠞ ꠇꠥꠞꠛꠣꠘꠤ ꠇꠞꠤ, ꠝꠣꠘꠤ ꠖꠥꠁꠅ ꠑꠥꠐꠦ ꠔꠣꠘ ꠘꠣꠝꠞ ꠉꠥꠘꠉꠣꠘ ꠉꠣꠁ।
HEB 13:16 ꠘꠦꠇ ꠇꠣꠝ ꠇꠞꠣ ꠀꠞ ꠅꠜꠣꠛꠤ ꠝꠣꠘꠡꠞꠦ ꠖꠣꠘ-ꠈꠄꠞꠣꠔ ꠛꠤꠟꠣꠘꠤ ꠚꠣꠃꠞꠤꠅ ꠘꠣ, ꠇꠣꠞꠘ ꠅꠃ ꠟꠣꠈꠣꠘ ꠇꠥꠞꠛꠣꠘꠤꠄ ꠀꠟ꠆ꠟꠣ ꠙꠣꠇ ꠈꠥꠡꠤ ꠅꠁꠘ।
HEB 13:17 ꠔꠥꠝꠞꠣꠞ ꠝꠥꠞꠛ꠆ꠛꠤ ꠅꠇꠟꠞ ꠢꠥꠇꠥꠝ ꠝꠣꠘꠤꠀ ꠔꠣꠞꠣꠞ ꠉꠦꠍꠦ ꠝꠣꠕꠣ ꠘꠥꠀꠁꠀ ꠞꠁꠅ, ꠀꠟ꠆ꠟꠣꠞ ꠖꠞꠛꠣꠞꠅ ꠢꠤꠡꠣꠛ ꠖꠦꠅꠀ ꠟꠣꠉꠛ ꠇꠞꠤ ꠔꠣꠞꠣ ꠢꠣꠝꠦꠡꠣ ꠔꠥꠝꠞꠣꠞ ꠎꠣꠘꠞ ꠙꠣꠞꠣꠖꠣꠞ ꠅꠁꠀ ꠇꠣꠝ ꠇꠞꠞꠣ। ꠅꠈꠘ ꠔꠣꠞꠣ ꠎꠣꠔꠦ ꠈꠥꠡꠤ ꠝꠘꠦ ꠁꠔꠣ ꠇꠞꠂꠘ, ꠄꠞꠟꠣꠉꠤ ꠔꠥꠝꠞꠣ ꠛꠣꠁꠖ꠆ꠖ ꠞꠁꠅ। ꠔꠣꠞꠣ ꠎꠥꠖꠤ ꠝꠘꠅ ꠖꠥꠈ ꠙꠣꠁꠀ ꠔꠥꠝꠞꠣꠞ ꠟꠣꠉꠤ ꠇꠣꠝ ꠇꠞꠂꠘ, ꠔꠦ ꠔꠥꠝꠞꠣꠞ ꠜꠣꠟꠣꠁ ꠅꠁꠔ ꠘꠣꠄ।
HEB 13:18 ꠀꠝꠞꠣꠞ ꠟꠣꠉꠤ ꠖꠥꠀ ꠇꠞꠤꠅ। ꠀꠝꠞꠣ ꠔ ꠎꠣꠘꠤ, ꠀꠝꠞꠣꠞ ꠛꠤꠛꠦꠇ ꠍꠣꠚ-ꠍꠚꠣ ꠀꠍꠦ, ꠢꠇ꠆ꠇꠟ ꠛꠦꠙꠣꠞꠦ ꠢꠇ ꠙꠕꠦ ꠌꠟꠔꠣꠝ ꠌꠣꠁ।
HEB 13:19 ꠀꠝꠤ ꠈꠣꠍ ꠇꠞꠤ ꠔꠥꠝꠞꠣꠞ ꠉꠦꠍꠦ ꠅꠃ ꠖꠥꠀ ꠌꠣꠁꠞꠣꠝ, ꠎꠣꠔꠦ ꠎꠟꠖꠤ ꠇꠞꠤ ꠀꠝꠤ ꠢꠤꠞꠛꠣꠞ ꠔꠥꠝꠞꠣꠞ ꠟꠉꠦ ꠝꠥꠟꠣꠇꠣꠔ ꠇꠞꠔꠣꠝ ꠙꠣꠞꠤ।
HEB 13:20 ꠀꠟ꠆ꠟꠣꠞ ꠟꠉꠦ ꠀꠝꠞꠣꠞ ꠝꠤꠟꠘ, ꠢꠞ-ꠢꠣꠝꠦꠡꠣꠇꠥꠞ ꠃꠍꠤꠟ꠆ꠟꠣ, ꠙꠥꠞꠣꠙꠥꠞ ꠇꠣꠁꠝ ꠇꠞꠣꠞ ꠟꠣꠉꠤꠀ, ꠀꠝꠞꠣꠞ ꠝꠣꠟꠤꠇ ꠢꠎꠞꠔ ꠁꠍꠣ, ꠘꠤꠎꠞ ꠟꠃ ꠛꠤꠟꠣꠁ ꠖꠤꠀ, ꠝꠦꠠꠣ ꠙꠣꠟꠞ ꠝꠢꠣꠘ ꠞꠣꠈꠣꠟ ꠛꠘꠤꠍꠂꠘ। ꠢꠎꠞꠔ ꠁꠍꠣꠞ ꠝꠃꠔꠞ ꠛꠣꠖꠦ, ꠡꠣꠘ꠆ꠔꠤ ꠖꠦꠃꠞꠣ ꠀꠟ꠆ꠟꠣ ꠙꠣꠇꠦ, ꠝꠥꠞ꠆ꠖꠣ ꠕꠣꠇꠤ ꠔꠣꠘꠞꠦ ꠎꠤꠘ꠆ꠖꠣ ꠇꠞꠤꠍꠂꠘ।
HEB 13:21 ꠢꠇꠟ ꠘꠦꠇ ꠇꠣꠝꠞ ꠔꠚꠤꠇ ꠖꠦꠃꠇ꠆ꠇꠣ, ꠔꠣꠘ ꠝꠞ꠆ꠎꠤ ꠎꠥꠉꠣꠁꠀ ꠌꠟꠣꠞ, ꠀꠞ ꠔꠣꠁꠘ ꠎꠦꠔꠣ ꠙꠍꠘ꠆ꠖ ꠇꠞꠂꠘ, ꠖꠤꠟꠅ ꠅꠔꠣꠞ ꠄꠡꠇꠤ ꠖꠦꠃꠇ꠆ꠇꠣ, ꠁꠍꠣ ꠀꠟ-ꠝꠍꠤꠞ ꠎꠞꠤꠀꠄ, ꠄꠘ ꠝꠢꠤꠝꠣ ꠢꠞ-ꠢꠣꠝꠦꠡꠣ ꠞꠃꠇ, ꠀꠝꠤꠘ।
HEB 13:22 ꠜꠣꠁ ꠅꠇꠟ, ꠔꠥꠝꠞꠣꠞ ꠉꠦꠍꠦ ꠝꠤꠘꠔ ꠇꠞꠞꠣꠝ, ꠔꠥꠝꠞꠣ ꠛꠤꠞꠇ꠆ꠔ ꠘꠣ ꠅꠁꠀ ꠁ ꠘꠍꠤꠅꠔ ꠢꠥꠘꠅ, ꠀꠝꠤ ꠈꠥꠛ ꠡꠐꠇꠣꠐꠦ ꠟꠦꠈꠟꠣꠝ।
HEB 13:23 ꠢꠥꠘꠅ, ꠀꠝꠞꠣꠞ ꠜꠣꠁ ꠔꠤꠝꠕꠤꠄ ꠈꠣꠟꠣꠍ ꠙꠣꠁꠍꠂꠘ, ꠔꠣꠁꠘ ꠎꠥꠖꠤ ꠡꠝꠄ ꠝꠔ ꠀꠝꠣꠞ ꠅꠘꠅ ꠀꠁꠘ, ꠔꠦ ꠀꠝꠤ ꠔꠥꠝꠞꠣꠞ ꠉꠦꠍꠦ ꠀꠅꠀꠞ ꠡꠝꠄ ꠔꠣꠘꠦ ꠟꠉꠦ ꠟꠁꠀ ꠀꠁꠝꠥ।
HEB 13:24 ꠔꠥꠝꠞꠣ ꠘꠤꠎꠞ ꠝꠥꠞꠛ꠆ꠛꠤ ꠅꠇꠟꠞꠦ, ꠀꠞ ꠙꠣꠇ ꠛꠘ꠆ꠖꠣ ꠅꠇꠟꠞꠦ ꠀꠝꠣꠞ ꠍꠣꠟꠣꠝ ꠎꠣꠘꠣꠁꠅ। ꠁꠔꠣꠟꠤ ꠖꠦꠡꠞ ꠝꠣꠘꠡꠦ ꠔꠥꠝꠞꠣꠞꠦ ꠍꠣꠟꠣꠝ ꠎꠣꠘꠣꠁꠞꠣ।
HEB 13:25 ꠔꠥꠝꠞꠣ ꠢꠇꠟꠞ ꠃꠙꠞꠦ ꠀꠟ꠆ꠟꠣꠞ ꠞꠢꠝꠔ ꠇꠣꠁꠝ ꠞꠃꠇ। ꠀꠝꠤꠘ॥
JAM 1:1 ꠀꠝꠤ ꠁꠀꠇꠥꠛ, ꠀꠟ꠆ꠟꠣ ꠀꠞ ꠢꠎꠞꠔ ꠁꠍꠣ ꠀꠟ-ꠝꠍꠤꠞ ꠉꠥꠟꠣꠝ, ꠖꠥꠘꠤꠀꠞ ꠘꠣꠘꠣꠘ ꠖꠦꠡꠅ ꠍꠤꠔ꠆ꠞꠣꠁꠟ ꠛꠘꠤ ꠁꠍꠞꠣꠁꠟꠞ ꠛꠣꠞꠅ ꠉꠥꠡ꠆ꠐꠤꠞ ꠝꠣꠘꠡꠞꠦ ꠍꠣꠟꠣꠝ ꠎꠣꠘꠣꠁꠞꠣꠝ।
JAM 1:2 ꠅ ꠀꠝꠣꠞ ꠜꠣꠁ ꠅꠇꠟ, ꠔꠥꠝꠞꠣ ꠎꠦꠛꠟꠣ ꠘꠣꠘꠣꠘ ꠎꠣꠔꠞ ꠙꠞꠤꠇ꠆ꠇꠣꠞ ꠝꠣꠎꠦ ꠙꠠꠅ, ꠁ ꠡꠝꠄ ꠁꠔꠣ ꠈꠥꠛ ꠈꠥꠡꠤꠞ ꠛꠦꠙꠣꠞ ꠝꠘꠅ ꠇꠞꠤꠅ।
JAM 1:3 ꠎꠣꠘ ꠔ, ꠁꠝꠣꠘꠞ ꠙꠞꠤꠇ꠆ꠇꠣꠄ ꠔꠥꠝꠞꠣꠞꠦ ꠕꠤꠞ ꠕꠣꠇꠣꠞ ꠈꠦꠝꠔꠣ ꠛꠣꠠꠣꠁ ꠖꠦꠄ।
JAM 1:4 ꠀꠞ ꠁ ꠕꠤꠞ ꠕꠣꠇꠣꠞ ꠈꠦꠝꠔꠣꠞꠦ ꠇꠣꠝꠅ ꠟꠣꠉꠣꠅ, ꠎꠣꠔꠦ ꠔꠥꠝꠞꠣ ꠇꠣꠝꠤꠟ ꠀꠞ ꠈꠣꠐꠤ ꠅꠁꠀ ꠔꠥꠝꠞꠣꠞ ꠇꠥꠘꠥ ꠇꠝꠔꠤ ꠘꠣ ꠞꠄ।
JAM 1:5 ꠔꠥꠝꠞꠣꠞ ꠝꠣꠎꠦ ꠇꠦꠃꠞꠞ ꠎꠥꠖꠤ ꠀꠈꠟꠞ ꠇꠝꠔꠤ ꠕꠣꠇꠦ, ꠔꠦ ꠢꠦ ꠎꠣꠘꠥ ꠀꠟ꠆ꠟꠣꠞ ꠉꠦꠍꠦ ꠌꠣꠄ, ꠔꠦꠃ ꠙꠣꠁꠛ। ꠔꠣꠁꠘ ꠇꠥꠘꠥ ꠛꠦꠎꠣꠞꠤ ꠜꠣꠛ ꠘꠣ ꠀꠘꠤꠀ ꠢꠇ꠆ꠇꠟꠞꠦꠃ ꠛꠦꠢꠤꠡꠣꠛ ꠖꠣꠘ ꠇꠞꠂꠘ, ꠈꠣꠟꠤ ꠀꠔꠦ ꠚꠤꠞꠣꠁꠘ ꠘꠣ।
JAM 1:6 ꠅꠁꠟꠦ ꠢꠦ ꠝꠘꠅ ꠇꠥꠘꠥ ꠡꠘ꠆ꠖꠄ ꠘꠣ ꠞꠣꠈꠤꠀ ꠄꠇꠤꠘ ꠇꠞꠤꠀ ꠌꠣꠁꠔꠦ ꠅꠁꠛ। ꠎꠦ ꠡꠘ꠆ꠖꠄ ꠇꠞꠦ ꠢꠦ ꠔ ꠖꠞꠤꠀꠞ ꠓꠦꠃꠞ ꠟꠣꠈꠣꠘ, ꠔꠣꠞꠦ ꠀꠃꠟꠣ-ꠎꠣꠃꠟꠣ ꠛꠣꠔꠣꠡꠦ ꠃꠠꠣꠁꠀ ꠟꠁꠀ ꠎꠣꠄ।
JAM 1:7 ꠁꠟꠣꠈꠣꠘ ꠝꠣꠘꠡꠦ ꠎꠣꠘꠥ ꠝꠣꠛꠥꠖꠞ ꠉꠦꠍ ꠕꠘꠦ ꠇꠥꠘ꠆ꠔꠣ ꠙꠣꠅꠀꠞ ꠀꠡꠣ ꠘꠣ ꠇꠞꠦ,
JAM 1:8 ꠢꠦ ꠔ ꠖꠥ-ꠖꠤꠟꠣ ꠝꠣꠘꠥꠡ, ꠔꠣꠞ ꠢꠇꠟ ꠇꠣꠝꠅꠃ ꠅꠡꠣꠘ꠆ꠔꠤ।
JAM 1:9 ꠎꠦ ꠁꠝꠣꠘꠖꠣꠞ ꠜꠣꠁ ꠉꠞꠤꠛ, ꠔꠣꠞꠦ ꠛꠠ ꠛꠣꠘꠣꠁꠍꠂꠘ ꠇꠞꠤꠀ ꠢꠦ ꠘꠤꠎꠞꠦ ꠝꠥꠛꠣꠞꠇ ꠝꠘꠅ ꠇꠞꠃꠇ।
JAM 1:10 ꠀꠞ ꠎꠦ ꠗꠘꠤ, ꠔꠣꠞꠦ ꠢꠥꠞꠥ ꠛꠣꠘꠣꠁꠍꠂꠘ ꠇꠞꠤꠀ ꠢꠦ-ꠅ ꠘꠤꠎꠞꠦ ꠝꠥꠛꠣꠞꠇ ꠝꠘꠅ ꠇꠞꠃꠇ, ꠇꠣꠞꠘ ꠢꠦ ꠊꠣꠡ ꠚꠥꠟꠞ ꠟꠣꠈꠣꠘ ꠏꠞꠤꠀ ꠙꠠꠤꠎꠤꠛ।
JAM 1:11 ꠡꠥꠞꠥꠎ ꠎꠦꠛꠟꠣ ꠃꠑꠦ, ꠁ ꠡꠝꠄ ꠔꠣꠞ ꠔꠦꠎꠦ ꠊꠣꠡ ꠢꠥꠇꠣꠁ ꠎꠣꠄ, ꠚꠥꠟ ꠏꠞꠤꠀ ꠙꠠꠤꠎꠣꠄ, ꠀꠞ ꠔꠣꠞ ꠡꠥꠘ꠆ꠖꠞ ꠘꠡ꠆ꠐ ꠅꠁꠎꠣꠄ। ꠗꠘꠤ ꠝꠣꠘꠥꠡꠅ ꠅꠟꠣꠈꠣꠘ ꠔꠣꠞ ꠛꠦꠡ꠆ꠔꠔꠣꠞ ꠝꠣꠎꠦ ꠏꠞꠤꠀ ꠙꠠꠤꠎꠤꠛ।
JAM 1:12 ꠝꠥꠛꠣꠞꠇ ꠢꠃ ꠎꠘ, ꠎꠦ ꠎꠘ ꠙꠞꠤꠇ꠆ꠇꠣꠞ ꠡꠝꠄ ꠝꠎꠛꠥꠔ ꠞꠄ। ꠙꠞꠤꠇ꠆ꠇꠣꠔ ꠇꠣꠝꠤꠀꠛ ꠅꠁꠟꠦ ꠎꠄꠅꠞ ꠝꠣꠟꠣ ꠢꠤꠡꠣꠛꠦ ꠢꠦ ꠀꠈꠦꠞ ꠙꠣꠁꠛ। ꠅꠃ ꠝꠣꠟꠣ ꠔꠣꠘ ꠀꠡꠤꠇ ꠅꠇꠟꠞꠦ ꠖꠤꠛꠣ ꠇꠞꠤ ꠡ꠆ꠛꠄꠅꠋ ꠀꠟ꠆ꠟꠣ ꠙꠣꠇꠦ ꠅꠀꠖꠣ ꠇꠞꠍꠂꠘ।
JAM 1:13 ꠇꠥꠘꠥ ꠝꠣꠘꠡꠦ ꠉꠥꠘꠣꠞ ꠛꠣꠄ ꠄꠡꠇꠤ ꠅꠁꠀ ꠎꠣꠘꠥ ꠘꠣ ꠇꠄ, ꠀꠟ꠆ꠟꠣꠄ ꠀꠝꠣꠞꠦ ꠉꠥꠘꠣꠞ ꠙꠕꠦ ꠐꠣꠘꠤꠞꠣ। ꠇꠥꠘꠥ ꠘꠣꠚꠞꠝꠣꠘꠤꠞ ꠙꠕꠦꠃ ꠀꠟ꠆ꠟꠣꠞꠦ ꠐꠣꠘꠣ ꠎꠣꠄ ꠘꠣ, ꠔꠣꠁꠘꠅ ꠇꠦꠃꠞꠞꠦ ꠁ ꠙꠕꠦ ꠘꠦꠁꠘ ꠘꠣ।
JAM 1:14 ꠅꠁꠟꠦ ꠝꠣꠘꠡꠞ ꠘꠤꠎꠞ ꠖꠤꠟꠦꠃ ꠐꠣꠘꠤꠀ ꠘꠤꠀ ꠔꠣꠞꠦ ꠚꠣꠘ꠆ꠖꠅ ꠚꠣꠟꠣꠄ।
JAM 1:15 ꠛꠣꠖꠦ ꠖꠤꠟꠞ ꠛꠖ ꠘꠤꠅꠔ ꠙꠥꠞꠣ ꠅꠁꠟꠦ ꠉꠥꠘꠣꠞ ꠛꠤꠌ ꠙꠦꠐꠅ ꠟꠄ, ꠀꠞ ꠉꠥꠘꠣ ꠛꠠ ꠅꠁꠀ ꠝꠃꠔꠞ ꠎꠘꠝ ꠖꠦꠄ।
JAM 1:16 ꠅ ꠀꠝꠣꠞ ꠝꠣꠄꠀꠞ ꠜꠣꠁ ꠅꠇꠟ, ꠔꠥꠝꠞꠣ ꠅꠃ ꠟꠣꠈꠣꠘ ꠜꠥꠟ ꠇꠞꠤꠅ ꠘꠣ।
JAM 1:17 ꠢꠇ꠆ꠇꠟ ꠜꠣꠟꠣ ꠀꠞ ꠘꠤꠈꠥꠔ ꠖꠣꠘ ꠔ ꠛꠦꠢꠦꠡ꠆ꠔ ꠕꠘꠦ ꠟꠣꠝꠤꠀ ꠀꠄ, ꠎꠦꠁꠘ ꠀꠍꠝꠣꠘꠤ ꠘꠥꠞ ꠅꠇꠟ ꠙꠄꠖꠣ ꠇꠞꠍꠂꠘ, ꠢꠃ ꠀꠟ꠆ꠟꠣꠞ ꠉꠦꠍ ꠕꠘꠦ ꠀꠄ। ꠅꠃ ꠘꠥꠞ ꠅꠇꠟ ꠍꠦꠛꠣꠞ ꠟꠣꠈꠣꠘ ꠒꠥꠟꠣꠒꠥꠟꠤ ꠇꠞꠟꠦꠅ, ꠔꠣꠁꠘ ꠁꠟꠣ ꠇꠞꠂꠘ ꠘꠣ।
JAM 1:18 ꠔꠣꠁꠘ ꠘꠤꠎꠞ ꠈꠥꠡꠤꠄ ꠀꠝꠞꠣꠞꠦ ꠢꠇ ꠇꠣꠟꠣꠝ ꠖꠤꠀ ꠔꠣꠘ ꠛꠘ꠆ꠖꠣ ꠛꠣꠘꠣꠁꠍꠂꠘ, ꠀꠝꠞꠣ ꠎꠣꠘꠥ ꠀꠡꠞꠣꠚꠥꠟ ꠝꠈꠟꠥꠇꠣꠔ, ꠡ꠆ꠞꠤꠡ꠆ꠐꠤꠞ ꠡꠦꠞꠣ ꠝꠣꠘꠥꠡ ꠅꠁ।
JAM 1:19 ꠅ ꠀꠝꠣꠞ ꠝꠣꠄꠀꠞ ꠜꠣꠁ ꠅꠇꠟ, ꠝꠘꠅ ꠞꠣꠈꠤꠅ, ꠔꠥꠝꠞꠣ ꠀꠉꠦ ꠢꠥꠘꠅ ꠛꠣꠖꠦ ꠝꠣꠔꠅ, ꠎꠟꠖꠤ ꠉꠥꠍꠣ ꠇꠞꠤꠅ ꠘꠣ।
JAM 1:20 ꠝꠣꠘꠡꠦ ꠉꠥꠍꠣ ꠇꠞꠟꠦ ꠀꠟ꠆ꠟꠣꠞ ꠖꠞꠛꠣꠞꠅ ꠇꠥꠘꠥ ꠜꠣꠟꠣ ꠇꠣꠝ ꠇꠞꠔ ꠙꠣꠞꠦ ꠘꠣ।
JAM 1:21 ꠉꠔꠤꠇꠦ ꠔꠥꠝꠞꠣ ꠢꠇꠟ ꠎꠣꠔꠞ ꠢꠣꠞꠣꠝ ꠀꠞ ꠘꠣꠚꠞꠝꠣꠘꠤ ꠇꠣꠝ ꠛꠣꠖ ꠖꠤꠟꠣꠅ। ꠔꠥꠝꠞꠣꠞ ꠖꠤꠟꠞ ꠝꠣꠎꠦ ꠎꠦ ꠇꠣꠟꠣꠝ ꠞꠥꠀ ꠅꠁꠍꠦ, ꠘꠞꠝ ꠖꠤꠟꠦ ꠅꠃ ꠇꠣꠟꠣꠝ ꠇꠛꠥꠟ ꠇꠞꠅ। ꠔꠥꠝꠞꠣꠞꠦ ꠔꠞꠣꠘꠤꠞ ꠈꠦꠝꠔꠣ ꠁ ꠇꠣꠟꠣꠝꠞ ꠀꠍꠦ।
JAM 1:22 ꠀꠟ꠆ꠟꠣꠞ ꠇꠣꠟꠣꠝ ꠈꠣꠟꠤ ꠢꠥꠘꠟꠦꠃ ꠅꠁꠔ ꠘꠣꠄ, ꠅꠟꠣꠈꠣꠘ ꠀꠝꠟꠅ ꠇꠞꠅ। ꠇꠣꠟꠣꠝ ꠢꠥꠘꠤꠀ ꠎꠥꠖꠤ ꠀꠝꠟ ꠘꠣ ꠇꠞ, ꠔꠦ ꠔꠥꠝꠞꠣ ꠘꠤꠎꠞꠦ ꠐꠉꠤꠞꠣꠄ।
JAM 1:23 ꠇꠦꠃ ꠎꠥꠖꠤ ꠁ ꠇꠣꠟꠣꠝ ꠢꠥꠘꠤꠀ ꠀꠝꠟ ꠘꠣ ꠇꠞꠦ, ꠔꠦ ꠢꠦ ꠅꠃ ꠝꠣꠘꠡꠞ ꠟꠣꠈꠣꠘ, ꠎꠦ ꠀꠄꠘꠣꠔ ꠘꠤꠎꠞ ꠌꠦꠞꠣ ꠖꠦꠈꠤꠀ ꠎꠣꠄꠉꠤ,
JAM 1:24 ꠛꠣꠖꠦ ꠢꠞꠤꠀ ꠉꠤꠀ ꠚꠣꠃꠞꠤꠟꠣꠄ ꠔꠣꠞ ꠌꠦꠞꠣ ꠇꠤꠟꠣꠈꠣꠘ।
JAM 1:25 ꠅꠁꠟꠦ ꠎꠦ ꠈꠣꠐꠤ ꠀꠁꠘ ꠝꠣꠘꠡꠞꠦ ꠀꠎꠣꠖ ꠇꠞꠦ, ꠀꠞ ꠅꠃ ꠀꠁꠘꠞ ꠛꠣꠄ ꠘꠎꠞ ꠞꠣꠈꠤꠀ ꠎꠦꠞꠣ ꠢꠣꠝꠦꠡꠣ ꠎꠤꠀꠁꠟ ꠞꠄ, ꠁꠔꠣ ꠢꠥꠘꠤꠀ ꠢꠣꠞꠤ ꠚꠣꠃꠞꠦ ꠘꠣ, ꠀꠝꠟ ꠇꠞꠦ, ꠔꠣꠞꠣ ꠢꠇꠟ ꠇꠣꠝꠅ ꠝꠥꠛꠣꠞꠇ ꠅꠁꠛ।
JAM 1:26 ꠎꠦ ꠝꠣꠘꠡꠦ ꠘꠤꠎꠞꠦ ꠙꠞꠦꠎꠉꠣꠞ ꠝꠘꠅ ꠇꠞꠦ, ꠅꠁꠟꠦ ꠘꠤꠎꠞ ꠎꠤꠚꠞꠣꠞꠦ ꠡꠣꠝꠟꠣꠄ ꠘꠣ, ꠢꠦ ꠔ ꠔꠣꠞ ꠘꠤꠎꠞꠦ ꠐꠉꠦ, ꠔꠣꠞ ꠢꠇ꠆ꠇꠟ ꠄꠛꠣꠖꠔꠤꠃ ꠝꠤꠍꠣ।
JAM 1:27 ꠄꠔꠤꠝ ꠅꠇꠟꠞꠦ ꠀꠞ ꠠꠣꠠꠤ ꠛꠦꠐꠤꠘ꠆ꠔꠞꠦ ꠛꠤꠙꠖꠞ ꠡꠝꠄ ꠡꠣꠄ-ꠡꠣꠁꠎ꠆ꠎ ꠇꠞꠣ, ꠄꠞꠟꠉꠦ ꠖꠥꠘꠤꠀꠞ ꠢꠇꠟ ꠘꠣꠚꠞꠝꠣꠘꠤ ꠕꠣꠇꠤ ꠘꠤꠎꠞꠦ ꠙꠣꠇ-ꠍꠣꠚ ꠞꠣꠈꠣꠃ ꠅꠁꠟ, ꠀꠟ꠆ꠟꠣꠞ ꠘꠎꠞꠅ ꠈꠣꠐꠤ ꠀꠞ ꠍꠢꠤ ꠄꠛꠣꠖꠔꠤ।
JAM 2:1 ꠅ ꠀꠝꠣꠞ ꠜꠣꠁ ꠅꠇꠟ, ꠔꠥꠝꠞꠣ ꠎꠦꠛꠟꠣ ꠀꠝꠞꠣꠞ ꠇꠥꠖꠞꠔꠤ ꠝꠣꠟꠤꠇ ꠢꠎꠞꠔ ꠁꠍꠣ ꠀꠟ-ꠝꠍꠤꠞ ꠃꠙꠞꠦ ꠁꠝꠣꠘ ꠀꠘꠍ, ꠔꠦ ꠢꠇꠟꠞꠦ ꠄꠇ ꠘꠎꠞꠦ ꠖꠦꠈꠤꠅ।
JAM 2:2 ꠗꠞꠅ, ꠄꠇꠎꠘ ꠝꠣꠘꠥꠡ ꠔꠥꠝꠞꠣꠞ ꠝꠎꠟꠤꠍ ꠈꠣꠘꠣꠔ ꠡꠥꠘ꠆ꠖꠞ ꠇꠣꠙꠠ-ꠌꠥꠙꠠ ꠚꠤꠘ꠆ꠖꠤꠀ ꠀꠔꠅ ꠡꠥꠘꠣꠞ ꠀꠋꠐꠤ ꠟꠣꠉꠣꠁꠀ ꠀꠁꠟ, ꠀꠞ ꠝꠄꠟꠣ ꠇꠣꠙꠠ ꠚꠤꠘ꠆ꠖꠤꠀ ꠄꠇꠎꠘ ꠉꠞꠤꠛ ꠝꠣꠘꠥꠡꠅ ꠀꠁꠟ।
JAM 2:3 ꠔꠥꠝꠞꠣ ꠎꠥꠖꠤ ꠡꠥꠘ꠆ꠖꠞ ꠇꠣꠙꠠ ꠀꠟꠣ ꠝꠣꠘꠡꠞ ꠝꠥꠈꠦꠖꠤ ꠌꠣꠁꠀ ꠇꠅ, “ꠀꠙꠘꠦ ꠅꠃ ꠜꠣꠟꠣ ꠎꠣꠉꠣꠈꠣꠘꠅ ꠛꠃꠇ꠆ꠇꠣ,” ꠀꠞ ꠉꠞꠤꠛ ꠛꠦꠐꠣꠞꠦ ꠇꠅ, “ꠅꠛꠣ, ꠔꠥꠁ ꠢꠘꠅ ꠃꠛꠣ, ꠀꠞꠘꠣꠄ ꠀꠝꠣꠞ ꠙꠣꠅꠞ ꠇꠣꠘ꠆ꠖꠣꠔ ꠛꠅ,”
JAM 2:4 ꠔꠦ ꠔꠥꠝꠞꠣ ꠘꠤꠎꠞ ꠝꠣꠎꠦ ꠢꠣꠞ-ꠙꠞ ꠇꠞꠞꠣꠄ ꠘꠣ ꠘꠤ, ꠀꠞ ꠡꠄꠔꠣꠘꠤ ꠘꠤꠅꠔꠦ ꠛꠤꠌꠣꠞ ꠇꠞꠞꠣꠄ ꠘꠣ ꠘꠤ?
JAM 2:5 ꠅ ꠀꠝꠣꠞ ꠝꠣꠄꠀꠞ ꠜꠣꠁ ꠅꠇꠟ, ꠢꠥꠘꠅ। ꠁ ꠖꠥꠘꠤꠀꠞ ꠉꠞꠤꠛ ꠝꠣꠘꠡꠞꠦ ꠀꠟ꠆ꠟꠣꠄ ꠙꠍꠘ꠆ꠖ ꠇꠞꠍꠂꠘ ꠘꠣ ꠘꠤ ꠁꠝꠣꠘꠦ ꠗꠘꠤ ꠛꠣꠘꠣꠘꠤꠞ ꠟꠣꠉꠤ? ꠀꠟ꠆ꠟꠣꠞ ꠀꠡꠤꠇ ꠝꠣꠘꠡꠞꠦ ꠀꠟ꠆ꠟꠣꠄ ꠎꠦ ꠛꠣꠖꠡꠣꠁ ꠖꠦꠅꠀꠞ ꠅꠀꠖꠣ ꠇꠞꠍꠟꠣ, ꠁ ꠛꠣꠖꠡꠣꠁꠞ ꠝꠣꠟꠤꠇ ꠅꠀꠞ ꠟꠣꠉꠤ ꠔꠣꠁꠘ ꠉꠞꠤꠛ ꠅꠇꠟꠞꠦ ꠙꠍꠘ꠆ꠖ ꠇꠞꠍꠂꠘ ꠘꠣ ꠘꠤ?
JAM 2:6 ꠅꠁꠟꠦ ꠔꠥꠝꠞꠣ ꠔ ꠁ ꠉꠞꠤꠛ ꠅꠇꠟꠞꠦ ꠄꠟꠣꠝꠤ ꠇꠞꠍ। ꠗꠘꠤ ꠅꠇꠟꠦ ꠇꠤꠔꠣ ꠔꠥꠝꠞꠣꠞꠦ ꠎꠥꠟꠥꠝ ꠇꠞꠦ ꠘꠣ ꠘꠤ? ꠔꠣꠞꠣꠃ ꠔ ꠔꠥꠝꠞꠣꠞꠦ ꠐꠣꠘꠤꠀ-ꠍꠦꠌꠠꠣꠁꠀ ꠛꠤꠌꠣꠞꠅ ꠟꠁꠀ ꠎꠣꠄ।
JAM 2:7 ꠎꠦ ꠝꠢꠣꠘ ꠘꠣꠝꠞ ꠈꠣꠔꠤꠞꠦ ꠔꠥꠝꠞꠣꠞꠦ ꠒꠣꠇꠣ ꠅꠄ, ꠔꠣꠞꠣ ꠇꠤꠔꠣ ꠁ ꠘꠣꠝꠞꠦ ꠟꠁꠀ ꠇꠥꠚꠥꠞꠤ ꠇꠞꠦꠞ ꠘꠣ ꠘꠤ?
JAM 2:8 ꠙꠣꠇ ꠇꠤꠔꠣꠛꠅ ꠟꠦꠈꠣ ꠀꠍꠦ, “ꠔꠥꠝꠣꠞ ꠀꠞꠤ-ꠚꠞꠤꠞꠦ ꠘꠤꠎꠞ ꠟꠣꠈꠣꠘ ꠝꠣꠄꠀ ꠇꠞꠤꠅ,” ꠔꠥꠝꠞꠣ ꠎꠥꠖꠤ ꠢꠣꠍꠣꠃ ꠀꠟ꠆ꠟꠣꠞ ꠛꠣꠖꠡꠣꠁꠞ ꠅꠃ ꠢꠥꠇꠥꠝ ꠀꠝꠟ ꠇꠞ, ꠔꠦ ꠔ ꠜꠣꠟꠣꠃ ꠇꠞꠞꠣꠄ।
JAM 2:9 ꠅꠁꠟꠦ ꠔꠥꠝꠞꠣ ꠎꠥꠖꠤ ꠢꠇꠟꠞꠦ ꠄꠇ ꠘꠎꠞꠦ ꠘꠣ ꠖꠦꠈ, ꠔꠦ ꠔ ꠉꠥꠘꠣ ꠇꠞꠞꠣꠄ, ꠀꠞ ꠡꠞꠤꠅꠔꠞ ꠛꠞꠈꠦꠟꠣꠚ ꠇꠞꠤꠀ ꠖꠥꠡꠤ ꠅꠁꠞꠣꠄ।
JAM 2:10 ꠇꠦꠃ ꠎꠥꠖꠤ ꠡꠞꠤꠅꠔꠞ ꠢꠇ꠆ꠇꠟ ꠢꠥꠇꠥꠝ ꠀꠝꠟ ꠇꠞꠤꠀꠅ ꠈꠣꠟꠤ ꠄꠇ ꠢꠥꠇꠥꠝ ꠜꠣꠋꠉꠦ, ꠔꠦ ꠗꠞꠣ ꠅꠁꠛ ꠢꠦ ꠀꠡ꠆ꠔꠣ ꠡꠞꠤꠅꠔꠃ ꠅꠝꠣꠁꠘ꠆ꠘ ꠇꠞꠍꠦ।
JAM 2:11 ꠇꠣꠞꠘ ꠎꠦꠁꠘ ꠇꠁꠍꠂꠘ, “ꠎꠤꠘꠣ ꠇꠞꠤꠅ ꠘꠣ,” ꠔꠣꠁꠘꠃ ꠢꠤꠞꠛꠣꠞ ꠇꠁꠍꠂꠘ, “ꠈꠥꠘ ꠇꠞꠤꠅ ꠘꠣ।” ꠔꠦ ꠔꠥꠝꠤ ꠎꠥꠖꠤ ꠎꠤꠘꠣ ꠘꠣ ꠇꠞꠤꠀ ꠈꠥꠘ ꠇꠞ, ꠔꠦꠛꠃ ꠔ ꠡꠞꠤꠅꠔꠞ ꠛꠞꠈꠦꠟꠣꠚ ꠇꠞꠍ।
JAM 2:12 ꠎꠦ ꠀꠁꠘꠦ ꠝꠣꠘꠡꠞꠦ ꠀꠎꠣꠖ ꠇꠞꠦ, ꠅꠃ ꠀꠁꠘ ꠖꠤꠀꠃ ꠔꠥꠝꠞꠣꠞ ꠛꠤꠌꠣꠞ ꠅꠁꠛ। ꠉꠔꠤꠇꠦ ꠛꠥꠎꠤ-ꠢꠥꠘꠤ ꠝꠣꠔ ꠝꠣꠔꠅ ꠀꠞ ꠇꠣꠝ ꠇꠞꠅ।
JAM 2:13 ꠝꠘꠅ ꠞꠣꠈꠤꠅ, ꠎꠦ ꠝꠣꠘꠡꠦ ꠖꠄꠀ ꠇꠞꠍꠦ ꠘꠣ, ꠛꠤꠌꠣꠞꠞ ꠡꠝꠄ ꠔꠣꠞꠦꠅ ꠖꠄꠀ ꠇꠞꠣ ꠅꠁꠔ ꠘꠣꠄ। ꠢꠣꠡꠞꠞ ꠝꠄꠖꠣꠘꠅ ꠖꠄꠀꠉꠤꠞ ꠅꠇꠟꠦꠃ ꠖꠄꠀ ꠙꠣꠁꠛ।
JAM 2:14 ꠅ ꠀꠝꠣꠞ ꠜꠣꠁ ꠅꠇꠟ, ꠇꠦꠃ ꠎꠥꠖꠤ ꠇꠄ ꠀꠝꠣꠞ ꠁꠝꠣꠘ ꠀꠍꠦ, ꠅꠁꠟꠦ ꠀꠝꠟ ꠘꠣ ꠇꠞꠦ, ꠔꠦ ꠚꠣꠄꠖꠣ ꠇꠤꠔꠣ ꠅꠁꠛ? ꠁ ꠁꠝꠣꠘꠦ ꠔꠣꠞꠦ ꠛꠣꠌꠣꠁꠔ ꠙꠣꠞꠛ ꠘꠤ?
JAM 2:15 ꠝꠘꠅ ꠇꠞꠅ, ꠔꠥꠝꠞꠣꠞ ꠇꠥꠘꠥ ꠜꠣꠁ ꠛꠣ ꠛꠁꠘꠞ ꠊꠞꠅ ꠈꠣꠘꠤ ꠘꠣꠁ, ꠚꠤꠘ꠆ꠖꠣꠞ ꠇꠣꠙꠠꠅ ꠘꠣꠁ।
JAM 2:16 ꠁ ꠢꠣꠟꠔꠦ ꠎꠥꠖꠤ ꠔꠣꠞꠦ ꠇꠅ, “ꠔꠥꠝꠣꠞ ꠜꠣꠟꠣꠁ ꠅꠃꠇ, ꠈꠣꠁꠀ-ꠚꠤꠘ꠆ꠖꠤꠀ ꠡꠥꠈꠦ ꠞꠅ,” ꠅꠁꠟꠦ ꠔꠣꠞ ꠘꠤꠖꠣꠘ ꠢꠞꠣꠘꠤꠞ ꠟꠣꠉꠤ ꠇꠥꠘꠥ ꠃꠙꠣꠄ ꠘꠣ ꠇꠞ, ꠔꠦ ꠔꠣꠞ ꠇꠥꠘꠥ ꠚꠣꠄꠖꠣ ꠅꠁꠟ ꠘꠤ?
JAM 2:17 ꠅꠟꠣꠈꠣꠘ ꠎꠦ ꠁꠝꠣꠘꠞ ꠟꠉꠦ ꠀꠝꠟ ꠘꠣꠁ, ꠁ ꠁꠝꠣꠘ ꠔ ꠝꠥꠞ꠆ꠖꠣ।
JAM 2:18 ꠝꠘꠅ ꠇꠞꠅ ꠇꠦꠃ ꠇꠁꠟ, “ꠔꠥꠝꠣꠞ ꠁꠝꠣꠘ ꠀꠍꠦ ꠀꠞ ꠀꠝꠣꠞ ꠀꠝꠟ ꠀꠍꠦ।” ꠑꠤꠇ ꠀꠍꠦ, ꠔꠥꠝꠣꠞ ꠀꠝꠟ ꠍꠣꠠꠣ ꠁꠝꠣꠘ ꠀꠝꠣꠞꠦ ꠖꠦꠈꠣꠅ, ꠀꠞ ꠀꠝꠤ ꠔꠥꠝꠣꠞꠦ ꠀꠝꠣꠞ ꠀꠝꠟꠞ ꠝꠣꠎ ꠖꠤꠀ ꠁꠝꠣꠘ ꠖꠦꠈꠣꠁꠝꠥ।
JAM 2:19 ꠔꠥꠝꠤ ꠄꠇꠤꠘ ꠇꠞꠍ ꠀꠟ꠆ꠟꠣ ꠄꠇ, ꠈꠥꠛ ꠜꠣꠟꠣ ꠇꠕꠣ। ꠜꠥꠔꠦꠅ ꠔ ꠅꠟꠣ ꠄꠇꠤꠘ ꠇꠞꠦ, ꠀꠞ ꠀꠟ꠆ꠟꠣꠞ ꠒꠞꠦ ꠇꠣꠙꠦ।
JAM 2:20 ꠅ ꠛꠦꠀꠈꠟ, ꠔꠥꠝꠣꠞꠦ ꠀꠝꠤ ꠇꠤꠟꠣ ꠛꠥꠎꠣꠁꠔꠣꠝ, ꠀꠝꠟ ꠍꠣꠠꠣ ꠁꠝꠣꠘ ꠔ ꠇꠥꠘꠥ ꠇꠣꠝꠞ ꠘꠣꠄ?
JAM 2:21 ꠀꠝꠞꠣꠞ ꠛꠣꠚ ꠁꠛ꠆ꠞꠣꠢꠤꠝꠦ ꠎꠦꠛꠟꠣ ꠔꠣꠘ ꠙꠥꠀ ꠁꠍꠢꠣꠇꠞꠦ ꠇꠥꠞꠛꠣꠘꠤ ꠖꠦꠅꠀꠞ ꠟꠣꠉꠤ ꠇꠥꠞꠛꠣꠘꠤꠞ ꠎꠣꠉꠣꠔ ꠘꠤꠍꠟꠣ, ꠁ ꠡꠝꠄ ꠇꠤꠔꠣ ꠔꠣꠘ ꠁ ꠇꠣꠝꠞ ꠟꠣꠉꠤ ꠔꠣꠘꠞꠦ ꠙꠞꠦꠎꠉꠣꠞ ꠢꠤꠡꠣꠛꠦ ꠇꠛꠥꠟ ꠇꠞꠣ ꠅꠁꠍꠦ ꠘꠣ ꠘꠤ?
JAM 2:22 ꠔꠥꠝꠤ ꠔ ꠖꠦꠈꠍ, ꠔꠣꠘ ꠁꠝꠣꠘ ꠀꠞ ꠀꠝꠟ ꠄꠇꠟꠉꠦ ꠇꠣꠝ ꠇꠞꠍꠤꠟ, ꠀꠞ ꠀꠝꠟꠞ ꠟꠣꠉꠤꠃ ꠁꠝꠣꠘ ꠇꠣꠝꠤꠀꠛ ꠅꠁꠟ।
JAM 2:23 ꠅꠟꠣꠈꠣꠘ ꠙꠣꠇ ꠇꠤꠔꠣꠛꠞ ꠀꠄꠀꠔ ꠙꠥꠞꠣ ꠅꠁꠟ, “ꠁꠛ꠆ꠞꠣꠢꠤꠝꠦ ꠀꠟ꠆ꠟꠣꠞ ꠅꠀꠖꠣꠄ ꠁꠝꠣꠘ ꠀꠘꠣꠄ, ꠀꠟ꠆ꠟꠣꠄ ꠔꠣꠘꠞꠦ ꠖꠤꠘꠖꠣꠞ ꠇꠁꠀ ꠇꠛꠥꠟ ꠇꠞꠟꠣ।” ꠔꠣꠘ ꠃꠙꠣꠗꠤ ꠖꠤꠟꠣ ꠀꠟ꠆ꠟꠣꠞ ꠖꠥꠡ꠆ꠔ।
JAM 2:24 ꠔꠥꠝꠞꠣ ꠔ ꠖꠦꠈꠟꠣꠄ, ꠀꠝꠟꠞ ꠟꠣꠉꠤ ꠝꠣꠘꠡꠞꠦ ꠙꠞꠦꠎꠉꠣꠞ ꠢꠤꠡꠣꠛꠦ ꠇꠛꠥꠟ ꠇꠞꠣ ꠅꠄ, ꠈꠣꠟꠤ ꠁꠝꠣꠘꠞ ꠟꠣꠉꠤ ꠘꠣꠄ।
JAM 2:25 ꠅꠃ ꠟꠣꠈꠣꠘ ꠢꠃ ꠍꠤꠟꠣꠘ ꠛꠦꠐꠤ ꠞꠣꠢꠛꠣꠞꠦꠅ ꠔꠣꠁꠞ ꠀꠝꠟꠞ ꠟꠣꠉꠤ ꠙꠞꠦꠎꠉꠣꠞ ꠢꠤꠡꠣꠛꠦ ꠇꠛꠥꠟ ꠇꠞꠣ ꠅꠁꠍꠤꠟ ꠘꠣ ꠘꠤ? ꠔꠣꠁ ꠔ ꠢꠃ ꠖꠥꠁꠅ ꠉꠥꠁꠀꠞꠦ ꠟꠥꠇꠣꠁꠀ ꠞꠣꠈꠤꠀ, ꠖꠥꠍꠞꠣ ꠙꠕꠦꠖꠤ ꠍꠢꠤ-ꠍꠣꠟꠣꠝꠔꠦ ꠛꠣꠞ ꠇꠞꠤ ꠖꠤꠍꠤꠟ।
JAM 2:26 ꠅꠃ ꠢꠣꠟꠔꠦ ꠀꠝꠞꠣ ꠛꠥꠎꠔꠣꠝ ꠙꠣꠞꠤ, ꠞꠥꠢꠥ ꠍꠣꠠꠣ ꠇꠣꠄꠀ ꠝꠥꠞ꠆ꠖꠣ, ꠀꠝꠟ ꠍꠣꠠꠣ ꠁꠝꠣꠘꠅ ꠝꠥꠞ꠆ꠖꠣ।
JAM 3:1 ꠅ ꠀꠝꠣꠞ ꠜꠣꠁ ꠅꠇꠟ, ꠔꠥꠝꠞꠣ ꠢꠇꠟ ꠃꠡ꠆ꠔꠣꠖ ꠅꠁꠅ ꠘꠣ। ꠔꠥꠝꠞꠣ ꠔ ꠎꠣꠘ, ꠀꠝꠞꠣ ꠃꠡ꠆ꠔꠣꠖ ꠉꠔꠤꠇꠦ ꠀꠝꠞꠣꠞ ꠛꠤꠌꠣꠞ ꠀꠞꠅ ꠇꠑꠤꠘ ꠅꠁꠛ।
JAM 3:2 ꠀꠝꠞꠣ ꠢꠇꠟꠃ ꠘꠣꠘꠣꠘ ꠘꠝꠥꠘꠣꠄ ꠛꠦ-ꠙꠕꠤ ꠅꠁ। ꠇꠦꠃ ꠎꠥꠖꠤ ꠎꠛꠣꠘ ꠖꠤꠀ ꠇꠥꠘꠥ ꠉꠥꠘꠣ ꠘꠣ ꠇꠞꠦ, ꠔꠦ ꠢꠦ ꠇꠣꠝꠤꠟ ꠝꠣꠘꠥꠡ, ꠔꠣꠞ ꠀꠡ꠆ꠔꠣ ꠡꠞꠤꠟꠃ ꠡꠣꠝꠟꠣꠁꠔ ꠙꠣꠞꠛ।
JAM 3:3 ꠊꠥꠠꠣꠞꠦ ꠡꠣꠝꠟꠣꠘꠤꠞ ꠟꠣꠉꠤ ꠝꠥꠈꠅ ꠟꠣꠉꠣꠝ ꠟꠣꠉꠣꠁꠀ ꠀꠝꠞꠣ ꠎꠦꠛꠣꠄ ꠁꠌ꠆ꠍꠣ ꠅꠛꠣꠄ ꠘꠤꠔꠣꠝ ꠙꠣꠞꠤ।
JAM 3:4 ꠀꠞ ꠇꠣꠠꠣꠟꠤꠄꠅ ꠢꠥꠞꠥ ꠄꠇ ꠇꠣꠠꠣꠟ ꠗꠞꠤꠀ ꠛꠠ ꠛꠠ ꠎꠣꠎꠞꠦ ꠔꠥꠚꠣꠘꠤ ꠛꠣꠔꠣꠡ ꠑꠦꠟꠤꠀ, ꠎꠦꠛꠣꠄ ꠈꠥꠡꠤ ꠅꠛꠣꠄ ꠘꠤꠔ ꠙꠣꠞꠦ।
JAM 3:5 ꠅꠃꠟꠣ ꠎꠤꠚꠞꠣ ꠈꠥꠛ ꠢꠥꠞꠥ ꠅꠁꠟꠦꠅ ꠛꠃꠔ ꠛꠠ ꠛꠠ ꠝꠣꠔ ꠝꠣꠔꠦ। ꠀꠞ ꠡꠣꠝꠣꠁꠘ꠆ꠘ ꠀꠉꠥꠁꠘꠦ ꠇꠤꠟꠣ ꠛꠠ ꠎꠋꠉꠟ ꠎꠣꠟꠣꠁꠔ ꠙꠣꠞꠦ!
JAM 3:6 ꠎꠤꠚꠞꠣꠅ ꠅꠟꠣ ꠄꠇ ꠀꠉꠥꠁꠘ। ꠀꠝꠞꠣꠞ ꠡꠞꠤꠟꠞ ꠝꠣꠎꠦ ꠎꠤꠚꠞꠣ ꠄꠇꠐꠣ ꠈꠣꠞꠣꠙꠤꠞ ꠜꠣꠘ꠆ꠒꠣꠞ, ꠎꠣꠢꠣꠘ꠆ꠘꠣꠝꠞ ꠀꠉꠥꠁꠘꠦ ꠎꠤꠚꠞꠣꠞꠦ ꠎꠣꠟꠣꠄ ꠀꠞ ꠎꠤꠚꠞꠣꠄ ꠀꠡ꠆ꠔꠣ ꠡꠞꠤꠟꠞꠦ ꠎꠣꠟꠣꠁꠀ ꠇꠟꠋꠇꠤ ꠛꠣꠘꠣꠁꠀ, ꠀꠝꠞꠣꠞ ꠎꠤꠘ꠆ꠖꠦꠉꠤꠔ ꠀꠉꠥꠁꠘ ꠗꠞꠣꠄ।
JAM 3:7 ꠝꠣꠘꠡꠦ ꠎꠥꠖꠤꠅ ꠢꠇ꠆ꠇꠟ ꠎꠣꠔꠞ ꠙꠡꠥ-ꠙꠣꠈꠤ, ꠢꠣꠚ-ꠛꠤꠌ꠆ꠍꠥ ꠀꠞ ꠖꠞꠤꠀꠞ ꠛꠠ ꠛꠠ ꠝꠣꠍꠞꠦ ꠡꠣꠝꠟꠣꠁꠍꠦ ꠀꠞ ꠅꠈꠘꠅ ꠡꠣꠝꠟꠣꠄ,
JAM 3:8 ꠅꠁꠟꠦꠅ ꠢꠥꠞꠥ-ꠝꠥꠞꠥ ꠎꠤꠚꠞꠣꠞꠦ ꠇꠦꠃ ꠡꠣꠝꠟꠣꠁꠔ ꠙꠣꠞꠦ ꠘꠣ। ꠁꠈꠣꠘ ꠈꠥꠛ ꠌꠘ꠆ꠌꠟ ꠀꠞ ꠈꠣꠞꠣꠙ, ꠛꠦꠎꠥꠁꠔꠣ ꠛꠤꠡꠦ ꠜꠞꠣ।
JAM 3:9 ꠄꠇ ꠎꠤꠚꠞꠣ ꠖꠤꠀꠃ ꠀꠝꠞꠣꠞ ꠉꠣꠁꠛꠤ ꠛꠣꠚ ꠀꠟ꠆ꠟꠣꠞ ꠔꠣꠞꠤꠚ ꠇꠞꠤ, ꠢꠤꠞꠛꠣꠞ ꠅꠃ ꠎꠤꠚꠞꠣ ꠖꠤꠀꠃ ꠀꠟ꠆ꠟꠣꠞ ꠍꠥꠞꠔꠦ ꠙꠄꠖꠣ ꠇꠞꠣ ꠝꠣꠘꠡꠞꠦ ꠛꠖ꠆ꠖꠥꠀ ꠖꠦꠁ।
JAM 3:10 ꠄꠇ ꠝꠥꠈ ꠕꠣꠇꠤꠃ ꠔꠣꠞꠤꠚ ꠀꠞ ꠛꠖ꠆ꠖꠥꠀ ꠛꠣꠞ ꠅꠁꠀ ꠀꠄ। ꠜꠣꠁ ꠅꠇꠟ, ꠁꠔꠣ ꠔ ꠑꠤꠇ ꠘꠣꠄ।
JAM 3:11 ꠏꠞꠘꠣꠞ ꠝꠥꠈ ꠕꠣꠇꠤ ꠄꠇꠟꠉꠦ ꠝꠤꠑꠣ ꠀꠞ ꠔꠤꠔ꠆ꠔꠣ ꠙꠣꠘꠤ ꠛꠣꠞ ꠅꠁꠀ ꠀꠄ ꠘꠤ?
JAM 3:12 ꠜꠣꠁ ꠅꠇꠟ, ꠀꠝ ꠉꠣꠍꠅ ꠇꠤꠔꠣ ꠎꠣꠝ ꠗꠞꠦ ꠘꠤ? ꠀꠞ ꠀꠋꠉꠥꠞ ꠉꠣꠍꠅ ꠀꠝ ꠗꠞꠦ ꠘꠤ? ꠅꠃꠟꠣ ꠔꠤꠔ꠆ꠔꠣ ꠙꠣꠘꠤꠞ ꠝꠣꠎꠦ ꠝꠤꠑꠣ ꠙꠣꠘꠤ ꠝꠤꠟꠦ ꠘꠣ।
JAM 3:13 ꠔꠥꠝꠞꠣꠞ ꠝꠣꠎꠦ ꠀꠈꠟ-ꠢꠦꠇꠝꠔ ꠀꠟꠣ ꠇꠦꠃ ꠀꠍꠦ ꠘꠤ? ꠕꠣꠇꠟꠦ ꠢꠦ ꠜꠣꠟꠣ ꠀꠝꠟ-ꠈꠣꠁꠍꠟꠔꠦ ꠘꠞꠝ ꠅꠁꠀ ꠅꠔꠣ ꠖꠦꠈꠣꠃꠇ।
JAM 3:14 ꠅꠁꠟꠦ ꠔꠥꠝꠞꠣꠞ ꠖꠤꠟ ꠎꠥꠖꠤ ꠁꠋꠡꠣꠄ ꠔꠤꠔ꠆ꠔꠣ ꠅꠁꠀ ꠡ꠆ꠛꠣꠞꠕꠄ ꠜꠞꠣ ꠕꠣꠇꠦ, ꠔꠦ ꠔꠥꠝꠞꠣ ꠛꠠꠣꠁ ꠇꠞꠤꠀ ꠢꠣꠍꠣꠞꠦ ꠝꠤꠍꠣ ꠛꠣꠘꠣꠁꠅ ꠘꠣ।
JAM 3:15 ꠁꠟꠣꠈꠣꠘ ꠢꠦꠇꠝꠔ ꠛꠦꠢꠦꠡ꠆ꠔ ꠕꠘꠦ ꠀꠄ ꠘꠣ, ꠁꠔꠣ ꠖꠥꠘꠤꠀ, ꠈꠣꠞꠣꠙ ꠘꠚꠍ, ꠀꠞ ꠁꠛꠟꠤꠍ ꠕꠣꠇꠤꠃ ꠀꠄ।
JAM 3:16 ꠇꠣꠞꠘ ꠎꠦ ꠎꠣꠉꠣꠔ ꠁꠋꠡꠣ ꠀꠞ ꠡ꠆ꠛꠣꠞꠕꠙꠞꠤ ꠕꠣꠇꠦ, ꠁ ꠎꠣꠉꠣꠔ ꠚꠤꠔꠘꠣ-ꠚꠍꠣꠖ ꠀꠞ ꠢꠇꠟ ꠎꠣꠔꠞ ꠘꠣꠚꠞꠝꠣꠘꠤ ꠕꠣꠇꠦ।
JAM 3:17 ꠅꠁꠟꠦ ꠛꠦꠢꠦꠡ꠆ꠔ ꠕꠣꠇꠤ ꠎꠦ ꠢꠦꠇꠝꠔ ꠀꠄ, ꠁꠇꠐꠣ ꠅꠁꠟ ꠈꠣꠐꠤ। ꠁꠇꠐꠣ ꠡꠣꠘ꠆ꠔꠤꠄ ꠜꠞꠣ, ꠍꠛꠞꠀꠟꠣ ꠀꠞ ꠘꠞꠝ ꠝꠤꠎꠣꠎꠤ, ꠖꠄꠀ ꠀꠞ ꠢꠇ ꠇꠣꠝꠦ ꠜꠞꠣ, ꠔꠣꠞ ꠝꠣꠎꠦ ꠇꠥꠘꠥ ꠢꠣꠞ-ꠙꠞ ꠛꠣ ꠜꠘ꠆ꠒꠣꠝꠤ ꠘꠣꠁ।
JAM 3:18 ꠎꠣꠞꠣ ꠡꠝꠣꠎꠅ ꠡꠣꠘ꠆ꠔꠤꠞ ꠛꠤꠌ ꠍꠤꠐꠣꠄ, ꠔꠣꠞꠣꠞ ꠚꠟ ꠅꠁꠟ ꠙꠞꠦꠎꠉꠣꠞ ꠎꠤꠘ꠆ꠖꠦꠉꠤ।
JAM 4:1 ꠔꠥꠝꠞꠣꠞ ꠝꠣꠎꠦ ꠇꠥꠀꠁ ꠕꠘꠦ ꠝꠣꠁꠞ-ꠖꠞꠛꠣꠞ ꠀꠞ ꠇꠣꠁꠎ꠆ꠎꠣ ꠙꠄꠖꠣ ꠅꠄ? ꠔꠥꠝꠞꠣꠞ ꠡꠥꠈꠞ ꠈꠣꠁꠡꠦ ꠡꠞꠤꠟꠞ ꠎꠦ ꠞꠤꠙꠥꠄ ꠟꠣꠠꠣꠁ ꠇꠞꠦ, ꠅꠉꠥ ꠕꠣꠇꠤꠃ ꠀꠄ।
JAM 4:2 ꠎꠦꠔꠣ ꠔꠥꠝꠞꠣꠞ ꠘꠣꠄ, ꠅꠔꠣ ꠔꠥꠝꠞꠣ ꠝꠘꠦ ꠝꠘꠦ ꠌꠣꠅ, ꠄꠞꠟꠣꠉꠤ ꠔꠥꠝꠞꠣ ꠈꠥꠘ ꠇꠞ। ꠀꠞ ꠟꠣꠟꠌ ꠇꠞ ꠅꠁꠟꠦ ꠙꠣꠅ ꠘꠣ, ꠄꠞꠖꠣꠄ ꠔꠥꠝꠞꠣ ꠝꠣꠁꠞ-ꠖꠞꠛꠣꠞ ꠀꠞ ꠇꠣꠁꠎ꠆ꠎꠣ ꠇꠞ। ꠔꠥꠝꠞꠣ ꠔ ꠌꠣꠅ ꠘꠣ, ꠄꠞꠖꠣꠄ ꠙꠣꠅ ꠘꠣ।
JAM 4:3 ꠀꠞ ꠌꠣꠁꠟꠦꠅ ꠙꠣꠅ ꠘꠣ, ꠇꠣꠞꠘ ꠔꠥꠝꠞꠣ ꠔ ꠛꠖ ꠘꠤꠅꠔꠦ ꠌꠣꠅ, ꠎꠦꠟꠣ ꠔꠥꠝꠞꠣꠞ ꠝꠘꠞ ꠈꠣꠁꠡ ꠙꠥꠞꠣ ꠅꠄ।
JAM 4:4 ꠅ ꠛꠦꠁꠝꠣꠘ ꠅꠇꠟ, ꠔꠥꠝꠞꠣ ꠇꠤꠔꠣ ꠎꠣꠘ ꠘꠣ ꠘꠤ, ꠖꠥꠘꠤꠀꠞ ꠟꠉꠦ ꠖꠥꠡ꠆ꠔꠤꠞ ꠝꠣꠘꠤ ꠀꠟ꠆ꠟꠣꠞ ꠟꠉꠦ ꠖꠥꠡꠝꠘꠤ? ꠎꠦ ꠖꠥꠘꠤꠀꠞ ꠝꠣꠄꠀꠄ ꠛꠥꠠꠤ ꠎꠣꠄ, ꠢꠦ ꠀꠟ꠆ꠟꠣꠞ ꠖꠥꠡꠝꠘ ꠅꠁꠎꠣꠄ।
JAM 4:5 “ꠀꠝꠞꠣꠞ ꠜꠤꠔꠞꠦ ꠎꠦ ꠞꠥꠢꠥ ꠖꠦꠅꠀ ꠅꠁꠍꠦ, ꠁꠇꠐꠣꠄ ꠀꠝꠞꠣꠞꠦ ꠁꠋꠡꠣꠞ ꠛꠣꠄ ꠐꠣꠘꠦ।” ꠙꠣꠇ ꠇꠤꠔꠣꠛꠞ ꠅꠃ ꠔꠣꠟꠤꠝ ꠇꠥꠘꠥ ꠄꠝꠘꠦ ꠛꠣꠔꠣꠁꠟ ꠅꠁꠍꠦ ꠘꠤ?
JAM 4:6 ꠅꠁꠟꠦ ꠁꠔꠣ ꠕꠣꠇꠤ ꠀꠝꠞꠣꠞ ꠃꠙꠞꠦ ꠀꠟ꠆ꠟꠣꠞ ꠞꠢꠝꠔ ꠀꠞꠅ ꠛꠦꠡꠤ। ꠄꠞꠟꠣꠉꠤ ꠇꠤꠔꠣꠛꠞ ꠝꠣꠎꠦ ꠟꠦꠈꠣ ꠀꠍꠦ, “ꠛꠠꠣꠁ ꠇꠞꠞꠣꠞ ꠃꠙꠞꠦ ꠀꠟ꠆ꠟꠣꠄ ꠀꠔ ꠔꠥꠟꠂꠘ, ꠅꠁꠟꠦ ꠘꠞꠝ ꠝꠣꠘꠡꠞꠦ ꠞꠢꠝ ꠇꠞꠂꠘ।”
JAM 4:7 ꠉꠔꠤꠇꠦ ꠔꠥꠝꠞꠣ ꠀꠟ꠆ꠟꠣꠞ ꠎꠤꠝ꠆ꠝꠣꠄ ꠞꠁꠀ ꠡꠄꠔꠣꠘꠞ ꠝꠥꠇꠣꠛꠤꠟꠣ ꠇꠞꠅ, ꠔꠦꠃ ꠢꠦ ꠔꠥꠝꠞꠣꠞ ꠉꠦꠍ ꠕꠘꠦ ꠜꠣꠉꠤꠛ।
JAM 4:8 ꠀꠟ꠆ꠟꠣꠞ ꠛꠣꠄ ꠌꠣꠅ, ꠔꠦꠃ ꠔꠣꠁꠘꠅ ꠔꠥꠝꠞꠣꠞ ꠛꠣꠄ ꠌꠣꠁꠛꠣ। ꠅ ꠉꠥꠘꠣꠉꠣꠞ ꠅꠇꠟ, ꠔꠥꠝꠞꠣ ꠘꠤꠎꠞꠦ ꠙꠣꠇ-ꠍꠣꠚ ꠇꠞꠅ, ꠅ ꠖꠥ-ꠖꠤꠟꠣ ꠝꠣꠘꠥꠡ, ꠔꠥꠝꠞꠣꠞ ꠖꠤꠟ ꠈꠣꠐꠤ ꠇꠞꠅ।
JAM 4:9 ꠖꠥꠈꠦ ꠇꠣꠔꠞ ꠅꠁꠀ ꠀꠢꠣꠎꠣꠞꠤ ꠇꠞꠅ, ꠀꠡꠤꠞ ꠛꠖꠟꠣ ꠇꠣꠘ꠆ꠖꠅ, ꠈꠥꠡꠤꠞ ꠛꠖꠟꠣ ꠝꠣꠔ꠆ꠔꠝ ꠇꠞꠅ।
JAM 4:10 ꠝꠣꠛꠥꠖꠞ ꠖꠞꠛꠣꠞꠅ ꠘꠔ ꠅꠅ, ꠔꠦꠃ ꠔꠣꠁꠘ ꠔꠥꠝꠞꠣꠞꠦ ꠃꠌꠣ ꠇꠞꠛꠣ।
JAM 4:11 ꠅ ꠜꠣꠁ ꠅꠇꠟ, ꠔꠥꠝꠞꠣ ꠄꠇꠎꠘꠦ ꠀꠞꠇ ꠎꠘꠞ ꠉꠤꠛꠔ ꠉꠣꠁꠅ ꠘꠣ। ꠇꠦꠃ ꠎꠥꠖꠤ ꠜꠣꠁꠞ ꠛꠖꠘꠣꠝ ꠉꠣꠄ ꠛꠣ ꠔꠣꠞ ꠛꠤꠌꠣꠞ ꠇꠞꠦ, ꠄꠞ ꠝꠣꠘꠤ ꠢꠦ ꠡꠞꠤꠅꠔꠞ ꠛꠖꠘꠣꠝ ꠇꠞꠟ ꠀꠞ ꠡꠞꠤꠅꠔꠞ ꠛꠤꠌꠣꠞ ꠇꠞꠟ। ꠔꠥꠝꠤ ꠎꠥꠖꠤ ꠡꠞꠤꠅꠔꠞ ꠛꠤꠌꠣꠞ ꠇꠞ, ꠔꠦ ꠔ ꠡꠞꠤꠅꠔ ꠝꠣꠘꠞꠣꠄ ꠘꠣ, ꠃꠟꠐꠣ ꠔꠣꠞ ꠛꠤꠌꠣꠞ ꠇꠞꠣꠔ ꠈꠣꠠꠣ ꠅꠁꠍ।
JAM 4:12 ꠡꠞꠤꠅꠔ ꠀꠞ ꠛꠤꠌꠣꠞꠞ ꠈꠦꠝꠔꠣ ꠈꠣꠟꠤ ꠄꠇꠎꠘꠞ ꠀꠔꠅꠃ ꠀꠍꠦ। ꠔꠣꠁꠘꠃ ꠛꠣꠌꠣꠁꠘ, ꠔꠣꠁꠘꠃ ꠝꠣꠞꠂꠘ। ꠔꠦ ꠀꠞꠤ-ꠚꠞꠤꠞ ꠛꠤꠌꠣꠞ ꠇꠞꠞꠣ ꠔꠥꠝꠤ ꠀꠞꠇ ꠎꠘ ꠇꠦ?
JAM 4:13 ꠢꠥꠘꠅ, ꠔꠥꠝꠞꠣ ꠎꠣꠞꠣ ꠇꠅ, ꠀꠁꠎ ꠛꠣ ꠇꠣꠁꠟ ꠀꠝꠞꠣ ꠅꠝꠥꠇ ꠐꠣꠃꠘꠅ ꠎꠣꠁꠝꠥꠉꠤ, ꠉꠤꠀ ꠢꠘꠅ ꠄꠇ ꠛꠞꠍ ꠞꠁꠀ ꠇꠣꠄ-ꠇꠣꠞꠛꠣꠞ ꠇꠞꠤꠀ ꠟꠣꠜ ꠇꠞꠝꠥ।
JAM 4:14 ꠅꠁꠟꠦ ꠇꠣꠁꠟꠇꠥꠞ ꠈꠛꠞ ꠔ ꠔꠥꠝꠞꠣ ꠎꠣꠘ ꠘꠣ। ꠔꠥꠝꠞꠣꠞ ꠎꠤꠘ꠆ꠖꠦꠉꠤꠃ ꠛꠣ ꠇꠤꠔꠣ? ꠔꠥꠝꠞꠣꠞ ꠎꠤꠘ꠆ꠖꠦꠉꠤ ꠔ ꠇꠍꠥ ꠙꠣꠔꠣꠞ ꠙꠣꠘꠤ, ꠕꠥꠠꠣ ꠡꠝꠄ ꠕꠣꠇꠦ, ꠛꠣꠖꠦ ꠙꠠꠤꠎꠣꠄ।
JAM 4:15 ꠄꠞꠖꠣꠄ ꠁꠟꠣ ꠘꠣ ꠇꠁꠀ ꠅꠟꠣ ꠇꠅ, “ꠁꠘꠡꠣꠟ꠆ꠟꠣ, ꠀꠝꠞꠣ ꠢꠣꠄꠀꠔꠤ ꠙꠣꠁꠝꠥ, ꠀꠞ ꠅꠔꠣ-ꠢꠔꠣ ꠇꠞꠝꠥ।”
JAM 4:16 ꠅꠁꠟꠦ ꠔꠥꠝꠞꠣ ꠔ ꠛꠠꠣꠁ ꠇꠞꠤꠀ ꠚꠥꠐꠣꠘꠤ ꠖꠦꠈꠣꠁꠞꠣꠄ। ꠁꠟꠣꠈꠣꠘ ꠚꠥꠐꠣꠘꠤ ꠜꠣꠟꠣ ꠘꠣꠄ।
JAM 4:17 ꠇꠦꠃ ꠎꠥꠖꠤ ꠎꠣꠘꠤꠀꠅ ꠜꠣꠟꠣ ꠇꠣꠝ ꠘꠣ ꠇꠞꠦ, ꠔꠦ ꠢꠦ ꠉꠥꠘꠣꠞ ꠜꠣꠉꠤ ꠅꠁꠛ।
JAM 5:1 ꠅ ꠗꠘꠤ ꠅꠇꠟ, ꠢꠥꠘꠅ, ꠔꠥꠝꠞꠣꠞ ꠃꠙꠞꠦ ꠎꠦ ꠝꠍꠤꠛꠔ ꠀꠞ, ꠁꠔꠣꠞ ꠟꠣꠉꠤ ꠔꠥꠝꠞꠣ ꠇꠣꠘ꠆ꠖꠅ ꠀꠞ ꠀꠢꠣꠎꠣꠞꠤ ꠇꠞꠅ।
JAM 5:2 ꠔꠥꠝꠞꠣꠞ ꠗꠘ-ꠡꠝ꠆ꠙꠖ ꠛꠤꠘꠣꠡ ꠅꠁꠉꠦꠍꠦ, ꠔꠥꠝꠞꠣꠞ ꠇꠣꠙꠠ-ꠌꠥꠙꠠ ꠃꠘ꠆ꠖꠥꠞꠦ ꠇꠣꠐꠤꠟꠤꠍꠦ।
JAM 5:3 ꠔꠥꠝꠞꠣꠞ ꠡꠥꠘꠣ-ꠞꠥꠙꠣꠔ ꠎꠋꠉꠣꠞꠦ ꠗꠞꠤꠟꠤꠍꠦ, ꠁ ꠎꠋꠉꠣꠞꠦ ꠔꠥꠝꠞꠣꠞ ꠛꠤꠙꠇ꠆ꠇꠦ ꠡꠣꠇ꠆ꠇꠤ ꠖꠤꠛ, ꠀꠞ ꠀꠉꠥꠘꠤꠞ ꠟꠣꠈꠣꠘ ꠔꠥꠝꠞꠣꠞ ꠉꠥꠡ꠆ꠔ ꠈꠣꠁꠛ। ꠁꠔꠣ ꠔ ꠇꠤꠀꠝꠔꠞ ꠟꠣꠉꠤ ꠔꠥꠝꠞꠣ ꠖꠟꠣ ꠇꠞꠤ ꠕꠁꠍ।
JAM 5:4 ꠢꠥꠘꠅ, ꠔꠥꠝꠞꠣꠞ ꠗꠣꠘ ꠖꠣꠅꠞꠣ ꠇꠣꠝꠟꠣꠞ ꠎꠦ ꠛꠦꠔꠘ ꠀꠐꠇꠣꠁꠍ, ꠅꠃ ꠛꠦꠔꠘꠦ ꠅꠈꠘ ꠌꠤꠟ꠆ꠟꠣꠁꠀ ꠀꠢꠣꠎꠣꠞꠤ ꠇꠞꠦꠞ। ꠁ ꠇꠣꠝꠟꠣꠁꠘ꠆ꠔꠞ ꠀꠢꠣꠎꠣꠞꠤ ꠀꠟ꠆ꠟꠣ ꠞꠣꠛ꠆ꠛꠥꠟ ꠀꠟꠣꠝꠤꠘꠞ ꠇꠣꠘꠅ ꠉꠤꠀ ꠀꠎꠤꠍꠦ।
JAM 5:5 ꠖꠥꠘꠤꠀꠞ ꠛꠥꠇꠥꠔ ꠛꠤꠟꠣꠡꠤꠔꠣ ꠀꠞ ꠞꠋ-ꠔꠣꠝꠡꠣꠞ ꠝꠣꠎꠦ ꠔꠥꠝꠞꠣ ꠖꠤꠘ ꠇꠣꠐꠣꠁꠍ, ꠖꠥꠎꠈꠞ ꠈꠥꠞꠣꠇ ꠛꠘꠣꠞ ꠟꠣꠉꠤ ꠘꠤꠎꠞꠦ ꠈꠥꠛ ꠚꠥꠟꠚꠥꠟꠣ ꠛꠣꠘꠣꠁꠍ।
JAM 5:6 ꠔꠥꠝꠞꠣ ꠘꠤ-ꠅꠙꠞꠣꠗꠤꠞꠦ ꠖꠥꠡꠤ ꠡꠣꠁꠛꠡ꠆ꠔ ꠇꠞꠤꠀ ꠈꠥꠘ ꠇꠞꠍ, ꠅꠁꠟꠦ ꠄꠞꠣ ꠇꠥꠘꠥ ꠙ꠆ꠞꠔꠤꠛꠣꠖ ꠇꠞꠍꠦ ꠘꠣ।
JAM 5:7 ꠉꠔꠤꠇꠦ ꠅ ꠀꠝꠣꠞ ꠝꠣꠄꠀꠞ ꠜꠣꠁ ꠅꠇꠟ, ꠀꠝꠞꠣꠞ ꠝꠣꠟꠤꠇꠦ ꠔꠡꠞꠤꠚ ꠀꠘꠣꠞ ꠀꠉ ꠙꠞ꠆ꠎꠘ꠆ꠔ ꠔꠥꠝꠞꠣ ꠇꠡ꠆ꠐ ꠇꠞꠤꠀ ꠕꠥꠠꠣ ꠍꠛꠞ ꠇꠞꠅ। ꠔꠥꠝꠞꠣ ꠔ ꠖꠦꠈꠍ, ꠉꠤꠞꠡ꠆ꠔꠦ ꠜꠣꠟꠣ ꠚꠡꠟ ꠙꠣꠅꠀꠞ ꠟꠣꠉꠤ ꠝꠦꠊꠞ ꠀꠡꠣꠄ ꠇꠤꠟꠣ ꠍꠛꠞ ꠇꠞꠤ ꠛꠁ ꠞꠄ।
JAM 5:8 ꠔꠥꠝꠞꠣꠅ ꠅꠟꠣ ꠍꠛꠞ ꠇꠞꠅ, ꠅꠡ꠆ꠕꠤꠞ ꠅꠁꠅ ꠘꠣ, ꠇꠣꠞꠘ ꠝꠣꠟꠤꠇꠦ ꠈꠥꠛ ꠎꠟꠖꠤꠃ ꠔꠡꠞꠤꠚ ꠀꠘꠞꠣ।
JAM 5:9 ꠅ ꠜꠣꠁ ꠅꠇꠟ, ꠔꠥꠝꠞꠣ ꠎꠣꠔꠦ ꠀꠟ꠆ꠟꠣꠞ ꠘꠎꠞꠅ ꠖꠥꠡꠤ ꠘꠣ ꠛꠘ, ꠄꠞꠟꠣꠉꠤ ꠔꠥꠝꠞꠣ ꠈꠣꠟꠤ ꠄꠇꠎꠘꠦ ꠀꠞꠇꠎꠘꠞ ꠈꠥꠔ ꠔꠥꠇꠣꠘꠤꠔ ꠞꠁꠅ ꠘꠣ। ꠢꠥꠘꠅ, ꠛꠤꠌꠣꠞ ꠇꠞꠣꠞ ꠟꠣꠉꠤ ꠔ ꠀꠟ꠆ꠟꠣ ꠙꠣꠇ ꠀꠝꠞꠣꠞ ꠍꠣꠝꠘꠦ ꠀꠁꠀ ꠃꠛꠣꠁ ꠞꠁꠍꠂꠘ।
JAM 5:10 ꠅ ꠝꠣꠄꠀꠞ ꠜꠣꠁ ꠅꠇꠟ, ꠎꠦ ꠘꠛꠤ-ꠞꠍꠥꠟ ꠅꠇꠟꠦ ꠝꠣꠛꠥꠖꠞ ꠘꠣꠝꠦ ꠔꠛꠟꠤꠉ ꠇꠞꠍꠟꠣ, ꠔꠣꠞꠣꠞ ꠇꠡ꠆ꠐ ꠀꠞ ꠍꠛꠞꠞ ꠇꠕꠣ ꠌꠤꠘ꠆ꠔꠣ ꠇꠞꠤ ꠖꠦꠈꠅ।
JAM 5:11 ꠔꠣꠞꠣ ꠔ ꠇꠡ꠆ꠐ ꠙꠣꠁꠀꠅ ꠕꠤꠞ ꠞꠁꠍꠂꠘ, ꠄꠞꠟꠣꠉꠤ ꠀꠝꠞꠣ ꠔꠣꠞꠣꠞ ꠉꠥꠘꠉꠣꠘ ꠉꠣꠁ। ꠔꠥꠝꠞꠣ ꠔ ꠀꠁꠃꠛ ꠘꠛꠤꠞ ꠍꠛꠞꠞ ꠇꠕꠣ ꠜꠣꠟꠣ ꠇꠞꠤ ꠎꠣꠘ, ꠀꠞ ꠄꠅꠈꠣꠘ ꠎꠣꠘ, ꠀꠟ꠆ꠟꠣꠄ ꠛꠣꠖꠦ ꠔꠣꠘꠞꠦ ꠇꠤꠟꠣ ꠞꠢꠝ ꠇꠞꠍꠟꠣ। ꠀꠟ꠆ꠟꠣ ꠔ ꠖꠄꠀ-ꠝꠣꠄꠀꠞ ꠡꠣꠉꠞ।
JAM 5:12 ꠅ ꠀꠝꠣꠞ ꠜꠣꠁ ꠅꠇꠟ, ꠀꠝꠣꠞ ꠀꠍꠟ ꠇꠕꠣ ꠅꠁꠟ, ꠔꠥꠝꠞꠣ ꠇꠥꠘꠥꠎꠣꠔ ꠇꠍꠝ ꠇꠞꠤꠅ ꠘꠣ। ꠀꠍꠝꠣꠘꠞ ꠘꠣꠝꠦꠅ ꠘꠣ, ꠎꠝꠤꠘꠞ ꠘꠣꠝꠦꠅ ꠘꠣ, ꠅꠟꠣ ꠇꠥꠘꠥ ꠘꠣꠝꠦꠃ ꠇꠍꠝ ꠇꠞꠤꠅ ꠘꠣ। ꠄꠞ ꠛꠖꠟꠣ ꠔꠥꠝꠞꠣꠞ ꠅꠄ ꠈꠣꠘ ꠅꠄ, ꠀꠞ ꠘꠣ ꠈꠣꠘ ꠘꠣ ꠅꠃꠇ, ꠎꠣꠔꠦ ꠔꠥꠝꠞꠣ ꠛꠤꠌꠣꠞꠞ ꠖꠣꠠꠅ ꠘꠣ ꠙꠠ।
JAM 5:13 ꠔꠥꠝꠞꠣꠞ ꠝꠣꠎꠦ ꠇꠦꠃ ꠝꠍꠤꠛꠔꠅ ꠕꠣꠇꠟꠦ ꠢꠦ ꠖꠥꠀ ꠇꠞꠃꠇ। ꠇꠦꠃ ꠡꠥꠈꠦ ꠕꠣꠇꠟꠦ ꠢꠣꠝꠖ-ꠇꠣꠅꠀꠟꠤ ꠉꠣꠃꠇ।
JAM 5:14 ꠇꠦꠃꠞꠞ ꠛꠦꠝꠣꠞ ꠅꠁꠟꠦ ꠢꠦ ꠎꠝꠣꠔꠞ ꠝꠥꠞꠛ꠆ꠛꠤ ꠅꠇꠟꠞꠦ ꠖꠣꠅꠔ ꠖꠦꠃꠇ, ꠔꠣꠞꠣ ꠀꠁꠀ ꠀꠟ꠆ꠟꠣꠞ ꠘꠣꠝ ꠟꠁꠀ ꠔꠣꠞ ꠝꠣꠕꠣꠔ ꠔꠦꠟ ꠖꠤꠀ ꠖꠥꠀ ꠇꠞꠃꠇ꠆ꠇꠣ।
JAM 5:15 ꠔꠦꠃ ꠁꠝꠣꠘꠞ ꠍꠣꠔꠦ ꠖꠥꠀ ꠇꠞꠣꠞ ꠈꠣꠔꠤꠞꠦ ꠀꠟ꠆ꠟꠣꠄ ꠁ ꠛꠦꠝꠣꠞꠤꠞꠦ ꠡꠤꠚꠣ ꠇꠞꠛꠣ। ꠢꠦ ꠎꠥꠖꠤ ꠉꠥꠘꠣꠅ ꠇꠞꠤꠀ ꠕꠣꠇꠦ, ꠔꠦ ꠔꠣꠞ ꠉꠥꠘꠣ ꠝꠣꠚ ꠇꠞꠣ ꠅꠁꠛ।
JAM 5:16 ꠄꠞꠟꠣꠉꠤ ꠔꠥꠝꠞꠣ ꠄꠇꠎꠘꠦ ꠀꠞꠇ ꠎꠘꠞ ꠉꠦꠍꠦ ꠎꠣꠞꠎꠤꠞ ꠉꠥꠘꠣ ꠡ꠆ꠛꠤꠇꠣꠞ ꠇꠞꠅ, ꠀꠞ ꠄꠇꠦ-ꠅꠁꠘ꠆ꠘꠞ ꠟꠣꠉꠤ ꠖꠥꠀ ꠇꠞꠅ, ꠎꠣꠔꠦ ꠜꠣꠟꠣ ꠅꠁꠔꠣꠄ ꠙꠣꠞ। ꠙꠞꠦꠎꠉꠣꠞ ꠅꠇꠟꠞ ꠝꠥꠘꠣꠎꠣꠔ ꠀꠌꠣꠘꠇ ꠛꠟꠀꠟꠣ।
JAM 5:17 ꠁꠟꠤꠀꠍ ꠘꠛꠤ ꠀꠝꠞꠣꠞ ꠟꠣꠈꠣꠘꠃ ꠞꠇ꠆ꠔꠄ-ꠝꠣꠋꠡꠄ ꠝꠣꠘꠥꠡ ꠀꠍꠟꠣ। ꠔꠣꠁꠘ ꠖꠤꠟꠦ-ꠎꠣꠘꠦ ꠖꠥꠀ ꠇꠞꠟꠣ ꠝꠦꠊ ꠘꠣ ꠅꠀꠞ ꠟꠣꠉꠤ, ꠢꠣꠍꠣꠃ ꠡꠣꠠꠦ ꠔꠤꠘ ꠛꠞꠍ ꠇꠥꠘꠥ ꠝꠦꠊ ꠅꠁꠟ ꠘꠣ।
JAM 5:18 ꠛꠣꠖꠦ ꠔꠣꠁꠘ ꠝꠦꠊꠞ ꠟꠣꠉꠤ ꠖꠥꠀ ꠇꠞꠟꠣ, ꠔꠦꠃ ꠝꠦꠊ ꠅꠁꠟ, ꠀꠞ ꠎꠝꠤꠘꠅ ꠚꠡꠟ ꠚꠟꠤꠟ।
JAM 5:19 ꠅ ꠀꠝꠣꠞ ꠜꠣꠁ ꠅꠇꠟ, ꠔꠥꠝꠞꠣꠞ ꠝꠣꠎꠦ ꠇꠦꠃ ꠎꠥꠖꠤ ꠛꠦ-ꠙꠕꠤ ꠅꠁꠎꠣꠄ, ꠀꠞ ꠇꠦꠃ ꠔꠣꠞꠦ ꠚꠤꠞꠣꠁꠀ ꠀꠘꠦ,
JAM 5:20 ꠔꠦ ꠎꠣꠘꠤꠅ, ꠎꠦ ꠝꠣꠘꠡꠦ ꠇꠥꠘꠥ ꠉꠥꠘꠣꠉꠣꠞꠞꠦ ꠛꠦ-ꠙꠕ ꠕꠘꠦ ꠚꠤꠞꠣꠁꠀ ꠀꠘꠦ, ꠢꠦ ꠅꠃ ꠉꠥꠘꠣꠉꠣꠞꠞ ꠎꠣꠘ ꠛꠣꠌꠣꠄ ꠀꠞ ꠔꠣꠞ ꠉꠥꠘꠣ ꠛꠦꠡꠤ ꠅꠁꠟꠦꠅ ꠝꠣꠚꠤ ꠙꠣꠄ॥
1PE 1:1 ꠀꠟ꠆ꠟꠣꠞ ꠙꠍꠘ꠆ꠖ ꠇꠞꠣ ꠎꠔ ꠛꠘ꠆ꠖꠣ ꠅꠇꠟ ꠙꠘ꠆ꠔ, ꠉꠣꠟꠣꠔꠤꠀ, ꠇꠣꠙ꠆ꠙꠣꠖꠇꠤꠀ, ꠀꠍꠤꠀ ꠀꠞ ꠛꠤꠕꠥꠘꠤꠀ ꠖꠦꠡꠅ ꠍꠤꠔ꠆ꠞꠤꠀ ꠜꠤꠘ-ꠖꠦꠡꠤ ꠢꠤꠡꠣꠛꠦ ꠛꠡꠔ ꠇꠞꠞꠣ, ꠔꠣꠞꠣꠞ ꠉꠦꠍꠦ ꠀꠝꠤ ꠀꠟ-ꠝꠍꠤꠞ ꠍꠣꠢꠣꠛꠤ ꠙꠤꠔꠞꠦ ꠅꠃ ꠍꠢꠤꠚꠣꠈꠣꠘ ꠟꠦꠈꠞꠣꠝ।
1PE 1:2 ꠉꠣꠁꠛꠤ ꠛꠣꠚ ꠀꠟ꠆ꠟꠣꠄ ꠔꠣꠘ ꠝꠥꠘꠡꠣꠄ ꠔꠥꠝꠞꠣꠞꠦ ꠙꠍꠘ꠆ꠖ ꠇꠞꠍꠂꠘ ꠀꠞ ꠙꠣꠇ ꠞꠥꠢꠦ ꠙꠛꠤꠔ꠆ꠞ ꠇꠞꠍꠂꠘ। ꠄꠞ ꠃꠖ꠆ꠖꠦꠡ꠆ꠡ ꠅꠁꠟ, ꠔꠥꠝꠞꠣ ꠎꠣꠔꠦ ꠁꠍꠣ ꠀꠟ-ꠝꠍꠤꠞ ꠛꠣꠁꠖ꠆ꠖ ꠅꠅ ꠀꠞ ꠔꠣꠘ ꠟꠃ ꠍꠤꠐꠣꠁꠀ ꠔꠥꠝꠞꠣꠞꠦ ꠙꠣꠇ-ꠍꠣꠚ ꠇꠞꠣ ꠅꠄ। ꠀꠟ꠆ꠟꠣꠄ ꠔꠥꠝꠞꠣꠞꠦ ꠛꠦꠡ ꠇꠞꠤ ꠞꠢꠝꠔ ꠀꠞ ꠡꠣꠘ꠆ꠔꠤ ꠖꠣꠘ ꠇꠞꠃꠇ꠆ꠇꠣ।
1PE 1:3 ꠢꠃ ꠀꠟ꠆ꠟꠣ ꠙꠣꠇꠞ ꠔꠣꠞꠤꠚ ꠅꠃꠇ, ꠎꠦꠁꠘ ꠀꠝꠞꠣꠞ ꠝꠣꠟꠤꠇ ꠁꠍꠣ ꠀꠟ-ꠝꠍꠤꠞ ꠝꠣꠛꠥꠖ ꠀꠞ ꠉꠣꠁꠛꠤ ꠛꠣꠚ। ꠔꠣꠁꠘ ꠁꠍꠣ ꠀꠟ-ꠝꠍꠤꠞꠦ ꠝꠞꠣ ꠕꠣꠇꠤ ꠎꠤꠘ꠆ꠖꠣ ꠇꠞꠤꠀ, ꠔꠣꠘ ꠝꠢꠣ ꠖꠄꠀꠄ ꠀꠝꠞꠣꠞꠦ ꠘꠄꠀ ꠎꠘꠝ ꠖꠣꠘ ꠇꠞꠍꠂꠘ, ꠄꠔꠦ ꠀꠝꠞꠣ ꠄꠇ ꠎꠤꠘ꠆ꠖꠣ ꠀꠡꠣ ꠙꠣꠁꠍꠤ।
1PE 1:4 ꠝꠣꠘꠤ ꠀꠝꠞꠣ ꠅꠟꠣ ꠄꠇ ꠗꠘꠞ ꠀꠡꠣ ꠙꠣꠁꠍꠤ, ꠎꠦ ꠗꠘ ꠇꠥꠘꠥꠖꠤꠘ ꠘꠡ꠆ꠐ ꠅꠁꠔ ꠘꠣꠄ, ꠢꠣꠞꠣ ꠎꠤꠛꠘ ꠘꠄꠀ ꠕꠣꠇꠛ, ꠄꠞ ꠝꠣꠎꠦ ꠈꠣꠞꠣꠙ ꠇꠥꠘ꠆ꠔꠣ ꠕꠣꠇꠔ ꠘꠣꠄ। ꠘꠣꠎꠣꠔꠞ ꠁ ꠗꠘ ꠔꠥꠝꠞꠣꠞ ꠟꠣꠉꠤ ꠛꠦꠢꠦꠡ꠆ꠔꠅ ꠞꠣꠈꠣ ꠅꠁꠍꠦ।
1PE 1:5 ꠔꠥꠝꠞꠣ ꠙꠥꠞꠣꠙꠥꠞ ꠘꠣꠎꠣꠔ ꠘꠣ ꠙꠣꠅꠀ ꠙꠞ꠆ꠎꠘ꠆ꠔ, ꠀꠟ꠆ꠟꠣꠁ ꠡꠇ꠆ꠔꠤꠄ ꠁꠝꠣꠘꠞ ꠝꠣꠎꠖꠤ ꠔꠥꠝꠞꠣꠞꠦ ꠢꠦꠚꠣꠎꠔꠦ ꠞꠣꠈꠣ ꠅꠁꠍꠦ। ꠅꠃ ꠘꠣꠎꠣꠔ ꠑꠤꠇ ꠇꠞꠣ ꠅꠁꠍꠦ, ꠀꠈꠦꠞꠣꠔꠞ ꠡꠝꠄ ꠎꠣꠁꠞ ꠅꠀꠞ ꠟꠣꠉꠤ।
1PE 1:6 ꠎꠥꠖꠤꠅ ꠇꠄ ꠖꠤꠘꠞ ꠟꠣꠉꠤ ꠘꠣꠘꠣꠘ ꠎꠣꠔ ꠙꠞꠤꠇ꠆ꠇꠣꠞ ꠝꠣꠎꠖꠤ ꠔꠥꠝꠞꠣ ꠅꠈꠘ ꠖꠥꠈ-ꠇꠡ꠆ꠐ ꠇꠞꠞꠣꠄ, ꠔꠣ-ꠅ ꠅꠃ ꠘꠣꠎꠣꠔꠞ ꠀꠡꠣꠄ ꠔ ꠔꠥꠝꠞꠣꠞ ꠝꠘ ꠈꠥꠡꠤꠄ ꠜꠞꠣ।
1PE 1:7 ꠅꠃ ꠙꠞꠤꠇ꠆ꠇꠣ ꠅꠇꠟ ꠌꠟꠦꠞ, ꠔꠥꠝꠞꠣ ꠎꠦꠘ ꠁꠝꠣꠘꠦ ꠈꠣꠐꠤ ꠅꠈꠣꠘ ꠙꠞꠝꠣꠘ ꠇꠞꠣꠞ ꠟꠣꠉꠤ। ꠀꠞ ꠁꠍꠣ ꠀꠟ-ꠝꠍꠤꠞ ꠎꠣꠁꠞ ꠅꠀꠞ ꠡꠝꠄ, ꠔꠥꠝꠞꠣ ꠎꠣꠘꠥ ꠔꠣꠞꠤꠚ, ꠉꠃꠞꠛ ꠀꠞ ꠡꠝ꠆ꠝꠣꠘ ꠙꠣꠅ। ꠎꠦ ꠡꠥꠘꠣ ꠇ꠆ꠇꠄ ꠅꠁꠎꠣꠄ, ꠅꠃ ꠡꠥꠘꠣꠞꠦꠅ ꠀꠉꠥꠘꠤꠔ ꠙꠥꠠꠤꠀ ꠎꠣꠌꠣꠁ ꠇꠞꠣ ꠅꠄ। ꠀꠞ ꠔꠥꠝꠞꠣꠞ ꠁꠝꠣꠘꠞ ꠖꠣꠝ ꠔ ꠅꠃ ꠡꠥꠘꠣꠞ ꠌꠣꠁꠔꠦꠅ ꠛꠃꠔ ꠛꠦꠡꠤ, ꠄꠞꠟꠣꠉꠤ ꠅꠃ ꠙꠞꠤꠇ꠆ꠇꠣ ꠌꠟꠦꠞ।
1PE 1:8 ꠎꠥꠖꠤꠅ ꠀꠟ-ꠝꠍꠤꠞꠦ ꠔꠥꠝꠞꠣ ꠖꠦꠈꠍ ꠘꠣ, ꠔꠦꠛꠃ ꠔꠥꠝꠞꠣ ꠔꠣꠘꠞꠦ ꠝꠢꠛ꠆ꠛꠔ ꠇꠞꠞꠣꠄ। ꠀꠞ ꠅꠈꠘꠅ ꠔꠣꠘꠞꠦ ꠌꠃꠈꠦ ꠘꠣ ꠖꠦꠈꠟꠦꠅ, ꠈꠥꠡꠤ ꠅꠁꠀ ꠔꠣꠘꠞꠦ ꠄꠇꠤꠘ ꠇꠞꠞꠣꠄ, ꠁ ꠈꠥꠡꠤ ꠔ ꠜꠣꠡꠣꠄ ꠇꠅꠀ ꠎꠣꠄ ꠘꠣ, ꠁꠔꠣ ꠈꠣꠟꠤ ꠛꠦꠢꠦꠡ꠆ꠔꠤ ꠈꠥꠡꠤ।
1PE 1:9 ꠇꠣꠞꠘ ꠔꠥꠝꠞꠣꠞ ꠁꠝꠣꠘꠞ ꠀꠈꠦꠞꠤ ꠚꠟ ꠙꠣꠁꠞꠣꠄ, ꠁꠇꠐꠣ ꠅꠁꠟ ꠔꠥꠝꠞꠣꠞ ꠎꠣꠘꠞ ꠙꠥꠞꠣꠙꠥꠞ ꠘꠣꠎꠣꠔ।
1PE 1:10 ꠎꠦ ꠖꠥꠀ ꠔꠥꠝꠞꠣꠞ ꠙꠣꠅꠀꠞ ꠇꠕꠣ, ꠁ ꠛꠦꠙꠣꠞꠦ ꠛꠃꠔ ꠀꠉꠦ ꠘꠛꠤ ꠅꠇꠟꠦ ꠛꠣꠔꠣꠁꠍꠂꠘ। ꠔꠣꠞꠣ ꠅꠃ ꠘꠣꠎꠣꠔꠞ ꠛꠦꠙꠣꠞ ꠎꠣꠘꠣꠞ ꠟꠣꠉꠤ ꠛꠃꠔ ꠈꠥꠎ-ꠈꠛꠞ ꠇꠞꠍꠂꠘ।
1PE 1:11 ꠔꠣꠞꠣꠞ ꠖꠤꠟꠅ ꠀꠟ-ꠝꠍꠤꠞ ꠞꠥꠢꠦ ꠀꠉꠦꠃ ꠡꠣꠇ꠆ꠇꠤ ꠖꠤꠀ ꠇꠁꠍꠂꠘ, ꠔꠣꠘꠞꠦ ꠇꠡ꠆ꠐ ꠇꠞꠔꠦ ꠅꠁꠛ ꠀꠞ ꠛꠣꠖꠦ ꠔꠣꠁꠘ ꠝꠢꠤꠝꠣ ꠙꠣꠁꠛꠣ। ꠘꠛꠤ ꠅꠇꠟꠦ ꠎꠣꠘꠔꠣ ꠌꠣꠁꠍꠟꠣ, ꠀꠟ-ꠝꠍꠤꠞ ꠅꠃ ꠞꠥꠢꠦ ꠇꠥꠘ ꠡꠝꠄꠇꠥꠞ ꠀꠞ ꠇꠥꠘ ꠢꠣꠟꠔꠞ ꠇꠕꠣ ꠔꠣꠞꠣꠞꠦ ꠎꠣꠘꠣꠁꠞꠣ।
1PE 1:12 ꠅꠁꠟꠦ ꠀꠟ꠆ꠟꠣꠄ ꠔꠣꠞꠣꠞꠦ ꠖꠦꠈꠣꠁꠀ ꠖꠤꠍꠂꠘ, ꠔꠣꠞꠣ ꠎꠦꠔꠣ ꠛꠣꠔꠣꠁꠞꠣ ꠁꠔꠣ ꠖꠤꠀ ꠔꠣꠞꠣꠞ ꠘꠤꠎꠞ ꠈꠦꠎꠝꠔ ꠘꠣ ꠇꠞꠤꠀ, ꠔꠥꠝꠞꠣꠞ ꠈꠦꠎꠝꠔ ꠇꠞꠞꠣ। ꠀꠍꠝꠣꠘ ꠕꠣꠇꠤ ꠙꠣꠑꠣꠁꠟ ꠙꠣꠇ ꠞꠥꠢꠥ ꠖꠤꠀ, ꠎꠦꠞꠣ ꠔꠥꠝꠞꠣꠞ ꠉꠦꠍꠦ ꠀꠟ-ꠝꠍꠤꠞ ꠛꠦꠙꠣꠞꠦ ꠈꠥꠡ-ꠈꠛꠞꠤ ꠔꠛꠟꠤꠉ ꠇꠞꠍꠂꠘ, ꠔꠣꠞꠣ ꠔꠥꠝꠞꠣꠞꠦ ꠘꠛꠤ ꠅꠇꠟꠞ ꠇꠕꠣꠃ ꠎꠣꠘꠣꠁꠍꠂꠘ। ꠚꠤꠞꠤꠡ꠆ꠔꠣ ꠅꠇꠟꠦꠅ ꠁꠔꠣ ꠛꠦꠙꠣꠞ ꠎꠣꠘꠣꠞ ꠟꠣꠉꠤ ꠈꠤꠀꠟꠤ।
1PE 1:13 ꠄꠞꠟꠣꠉꠤ ꠔꠥꠝꠞꠣꠞ ꠝꠘꠞꠦ ꠢꠎꠣꠉ ꠇꠞꠅ ꠀꠞ ꠘꠤꠎꠞꠦ ꠡꠣꠝꠟꠣꠁꠀ ꠞꠣꠈꠅ। ꠀꠟ-ꠝꠍꠤ ꠎꠣꠁꠞ ꠅꠀꠞ ꠛꠣꠖꠦ ꠎꠦ ꠞꠢꠝꠔ ꠔꠥꠝꠞꠣ ꠙꠣꠁꠛꠣꠄ, ꠅꠃ ꠞꠢꠝꠔꠤ ꠘꠣꠎꠣꠔ ꠙꠣꠅꠀꠞ ꠟꠣꠉꠤ ꠙꠥꠞꠣꠙꠥꠞ ꠀꠡꠣ ꠟꠁꠀ ꠔꠥꠝꠞꠣ ꠛꠣꠞ ꠌꠣꠅ।
1PE 1:14 ꠔꠥꠝꠞꠣꠞ ꠀꠉꠞ ꠅꠛꠥꠎ ꠢꠣꠟꠔꠞ ꠈꠣꠞꠣꠙ ꠇꠣꠝ-ꠇꠣꠎ ꠝꠣꠚꠤꠇ ꠎꠤꠘ꠆ꠖꠦꠉꠤ ꠇꠣꠐꠣꠁꠅ ꠘꠣ, ꠛꠞꠋ ꠀꠟ꠆ꠟꠣꠞ ꠢꠥꠇꠥꠝ ꠝꠣꠘꠞꠣ ꠀꠅꠟꠣꠖ ꠢꠤꠡꠣꠛꠦ ꠖꠤꠘ ꠇꠣꠐꠣꠅ।
1PE 1:15 ꠎꠦꠁꠘ ꠔꠥꠝꠞꠣꠞꠦ ꠖꠣꠅꠔ ꠖꠤꠍꠂꠘ, ꠔꠣꠁꠘ ꠎꠦꠟꠣ ꠙꠛꠤꠔ꠆ꠞ, ꠔꠥꠝꠞꠣꠅ ꠅꠃꠟꠣ ꠢꠇꠟ ꠌꠟꠣ-ꠚꠤꠞꠣꠔ ꠙꠛꠤꠔ꠆ꠞ ꠅꠅ।
1PE 1:16 ꠙꠣꠇ ꠇꠤꠔꠣꠛꠅ ꠀꠟ꠆ꠟꠣꠄ ꠇꠁꠍꠂꠘ, “ꠀꠝꠤ ꠙꠛꠤꠔ꠆ꠞ, ꠄꠞꠟꠣꠉꠤ ꠔꠥꠝꠞꠣꠅ ꠙꠛꠤꠔ꠆ꠞ ꠅꠅ।”
1PE 1:17 ꠀꠟ꠆ꠟꠣꠄ ꠙꠞꠔꠦꠇ ꠝꠣꠘꠡꠞ ꠀꠝꠟ-ꠘꠣꠝꠣ ꠖꠦꠈꠤꠀ ꠛꠤꠌꠣꠞ ꠇꠞꠂꠘ, ꠇꠦꠃꠞ ꠝꠥꠈꠞ ꠛꠣꠄ ꠌꠣꠁꠀ ꠛꠤꠌꠣꠞ ꠇꠞꠂꠘ ꠘꠣ। ꠄꠞꠟꠣꠉꠤ ꠔꠣꠘꠞꠦ ꠎꠥꠖꠤ ꠔꠥꠝꠞꠣ ꠉꠣꠁꠛꠤ ꠛꠣꠚ ꠒꠣꠇ, ꠔꠦ ꠎꠔꠖꠤꠘ ꠔꠥꠝꠞꠣ ꠅꠃ ꠖꠥꠘꠤꠀꠔ ꠝꠥꠍꠣꠚꠤꠞ ꠢꠣꠟꠔꠦ ꠕꠣꠇꠛꠣꠄ, ꠅꠔꠖꠤꠘ ꠔꠥꠝꠞꠣ ꠔꠣꠘꠞꠦ ꠒꠞꠣꠁꠀ ꠎꠤꠘ꠆ꠖꠦꠉꠤ ꠇꠣꠐꠣꠅ।
1PE 1:18 ꠔꠥꠝꠞꠣ ꠎꠣꠘ, ꠔꠥꠝꠞꠣꠞ ꠛꠣꠚ-ꠖꠣꠖꠣ ꠕꠣꠇꠤ ꠙꠣꠅꠀ ꠛꠦꠇꠣꠝꠣ ꠌꠣꠟ-ꠌꠟꠘꠞ ꠙꠕ ꠕꠣꠇꠤ, ꠇ꠆ꠇꠄ ꠅꠀꠞ ꠎꠥꠇꠣ ꠡꠥꠘꠣ-ꠞꠥꠙꠣꠞ ꠟꠣꠈꠣꠘ ꠇꠥꠘꠥꠔꠣ ꠖꠤꠀ ꠔꠥꠝꠞꠣꠞꠦ ꠀꠎꠣꠖ ꠇꠞꠣ ꠅꠁꠍꠦ ꠘꠣ।
1PE 1:19 ꠛꠞꠋ ꠔꠥꠝꠞꠣꠞꠦ ꠀꠎꠣꠖ ꠇꠞꠣ ꠅꠁꠍꠦ, ꠀꠟ-ꠝꠍꠤꠞ ꠝꠢꠣ ꠖꠣꠝꠤ ꠟꠃ ꠖꠤꠀ, ꠘꠤꠈꠥꠔ-ꠘꠤꠡ꠆ꠇꠟꠋꠇ ꠝꠦꠠꠣ-ꠛꠣꠁꠌ꠆ꠌꠣꠞ ꠟꠃ ꠖꠤꠀ।
1PE 1:20 ꠖꠥꠘꠤꠀ ꠙꠄꠖꠣ ꠅꠀꠞ ꠀꠉꠦꠃ ꠀꠟ꠆ꠟꠣꠄ ꠔꠣꠘꠞꠦ ꠑꠤꠇ ꠇꠞꠤ ꠞꠣꠈꠍꠂꠘ, ꠅꠁꠟꠦ ꠅꠃ ꠢꠦꠡ-ꠝꠦꠡ ꠡꠝꠄ ꠔꠣꠁꠘ ꠔꠥꠝꠞꠣꠞ ꠟꠣꠉꠤꠃ ꠎꠣꠁꠞ ꠅꠁꠍꠂꠘ।
1PE 1:21 ꠀꠟ꠆ꠟꠣꠄ ꠄꠘꠞꠦ ꠝꠞꠣ ꠕꠣꠇꠤ ꠎꠤꠘ꠆ꠖꠣ ꠇꠞꠤ ꠔꠥꠟꠤꠀ ꠝꠢꠤꠝꠣ ꠖꠣꠘ ꠇꠞꠍꠂꠘ ꠀꠞ ꠔꠣꠘ ꠝꠣꠎꠖꠤ ꠔꠥꠝꠞꠣ ꠀꠟ꠆ꠟꠣꠞ ꠃꠙꠞꠦ ꠁꠝꠣꠘ ꠀꠘꠍ। ꠄꠞꠟꠣꠉꠤꠃ ꠔꠥꠝꠞꠣꠞ ꠁꠝꠣꠘ ꠀꠞ ꠀꠡꠣ ꠀꠟ꠆ꠟꠣꠞ ꠃꠙꠞꠦꠃ ꠀꠍꠦ।
1PE 1:22 ꠅꠈꠘ ꠢꠇ-ꠢꠣꠟꠣꠟꠤ ꠝꠣꠘꠤꠀ, ꠔꠥꠝꠞꠣꠞ ꠖꠤꠟꠞꠦ ꠙꠣꠇ-ꠍꠣꠚ ꠇꠞꠍ ꠀꠞ ꠁꠝꠣꠘꠖꠣꠞ ꠜꠣꠁ ꠅꠇꠟ ꠎꠦꠛꠟꠣ ꠔꠥꠝꠞꠣꠞ ꠉꠦꠍꠦ ꠝꠣꠄꠀꠞ ꠝꠣꠘꠥꠡ ꠅꠁꠍꠂꠘ, ꠔꠦ ꠀꠝꠤ ꠇꠁꠞꠣꠝ, ꠔꠥꠝꠞꠣ ꠄꠇꠦ-ꠅꠁꠘ꠆ꠘꠞꠦ ꠖꠤꠟꠦ-ꠎꠣꠘꠦ ꠝꠣꠄꠀ ꠇꠞꠅ।
1PE 1:23 ꠎꠦ ꠛꠤꠌ ꠘꠡ꠆ꠐ ꠅꠁꠎꠣꠄ, ꠔꠥꠝꠞꠣꠞ ꠎꠘꠝ ꠔ ꠁꠟꠣ ꠛꠤꠌꠞ ꠘꠣꠄ। ꠛꠞꠋ ꠎꠦꠔꠣ ꠘꠡ꠆ꠐ ꠅꠄ ꠘꠣ, ꠅꠔꠣ ꠕꠣꠇꠤꠃ ꠔꠥꠝꠞꠣꠞ ꠘꠄꠀ ꠎꠘꠝ ꠅꠁꠍꠦ। ꠅꠃ ꠛꠤꠌ ꠅꠁꠟ ꠀꠟ꠆ꠟꠣꠞ ꠌꠤꠞꠇꠣꠟꠤꠘ ꠎꠤꠘ꠆ꠖꠣ ꠇꠣꠟꠣꠝ।
1PE 1:24 ꠀꠟ꠆ꠟꠣꠞ ꠇꠣꠟꠣꠝꠅ ꠟꠦꠈꠣ ꠀꠍꠦ, ꠢꠇꠟ ꠝꠣꠘꠥꠡꠃ ꠊꠣꠡꠞ ꠟꠣꠈꠣꠘ, ꠊꠣꠡ ꠚꠥꠟꠞ ꠟꠣꠈꠣꠘ ꠔꠣꠞꠣ ꠡꠥꠘ꠆ꠖꠞ; ꠊꠣꠡ ꠢꠥꠇꠣꠁ ꠎꠣꠄ, ꠚꠥꠟꠅ ꠏꠞꠤ ꠎꠣꠄ,
1PE 1:25 ꠈꠣꠟꠤ ꠀꠟ꠆ꠟꠣꠞ ꠇꠣꠟꠣꠝ ꠞꠄ ꠌꠤꠞꠇꠣꠟ। ꠀꠞ ꠅꠃ ꠇꠣꠟꠣꠝꠃ ꠅꠁꠟ ꠈꠥꠡ-ꠈꠛꠞꠤ, ꠎꠦꠔꠣ ꠔꠥꠝꠞꠣꠞ ꠉꠦꠍꠦ ꠔꠛꠟꠤꠉ ꠇꠞꠣ ꠅꠁꠍꠦ।
1PE 2:1 ꠄꠞꠟꠣꠉꠤ ꠅꠁꠘ꠆ꠘ ꠝꠣꠘꠡꠞ ꠈꠦꠔꠤ ꠇꠞꠣꠞ ꠢꠇꠟ ꠎꠣꠔ ꠇꠥ-ꠝꠔꠟꠛ, ꠍꠟ-ꠌꠔꠥꠞꠤ, ꠜꠘ꠆ꠒꠣꠝꠤ, ꠁꠋꠡꠣ, ꠀꠞ ꠢꠇꠟ ꠎꠣꠔ ꠘꠤꠘ꠆ꠖꠣꠞ ꠝꠣꠔ-ꠇꠕꠣ ꠔꠥꠝꠞꠣꠞ ꠖꠤꠟ ꠕꠣꠇꠤ ꠢꠞꠣꠁ ꠖꠦꠅ।
1PE 2:2 ꠉꠦꠖꠣ ꠢꠥꠞꠥꠔ꠆ꠔꠣꠁꠘ꠆ꠔꠞ ꠖꠥꠗꠞ ꠙꠤꠀꠍꠞ ꠟꠣꠈꠣꠘ ꠔꠥꠝꠞꠣ ꠈꠣꠐꠤ ꠞꠥꠢꠣꠘꠤ ꠖꠥꠗꠞ ꠈꠤꠀꠟꠤ ꠅꠅ, ꠀꠞ ꠅꠃ ꠖꠥꠗ ꠈꠣꠁꠀ ꠈꠣꠁꠀ ꠎꠣꠘꠥ ꠔꠥꠝꠞꠣ ꠛꠠ ꠅꠁꠀ ꠘꠣꠎꠣꠔ ꠙꠣꠅ।
1PE 2:3 ꠝꠣꠟꠤꠇ ꠁꠍꠣꠞ ꠝꠦꠢꠦꠞꠛꠣꠘꠤꠞ ꠝꠎꠣ ꠔ ꠔꠥꠝꠞꠣ ꠙꠣꠁꠍꠃ।
1PE 2:4 ꠔꠦ ꠔꠥꠝꠞꠣ ꠔꠣꠘ ꠉꠦꠍꠦ ꠀꠅ। ꠔꠣꠁꠘꠃ ꠅꠁꠟꠣ ꠀꠉꠞ ꠘꠛꠤ ꠅꠇꠟꠞ ꠇꠅꠀ ꠢꠃ “ꠎꠤꠘ꠆ꠖꠣ ꠙꠣꠔ꠆ꠔꠞ”, ꠎꠦ ꠙꠣꠔ꠆ꠔꠞꠞꠦ ꠝꠣꠘꠡꠦ ꠖꠣꠝ ꠖꠤꠍꠦ ꠘꠣ, ꠅꠁꠟꠦ ꠀꠟ꠆ꠟꠣꠞ ꠉꠦꠍꠦ ꠁꠇꠐꠣ ꠝꠢꠣ ꠖꠣꠝꠤ ꠀꠞ ꠙꠍꠘ꠆ꠖꠞ ꠙꠣꠔ꠆ꠔꠞ।
1PE 2:5 ꠀꠞ ꠔꠥꠝꠞꠣ ꠔꠣꠘ ꠔꠞꠤꠇꠣ ꠇꠛꠥꠟ ꠇꠞꠣꠄ, ꠔꠥꠝꠞꠣꠞꠦꠅ ꠎꠤꠘ꠆ꠖꠣ ꠙꠣꠔ꠆ꠔꠞꠞ ꠟꠣꠈꠣꠘ ꠀꠟ꠆ꠟꠣ ꠙꠣꠇ ꠞꠁꠛꠣꠞ ꠙꠛꠤꠔ꠆ꠞ ꠇꠣꠛꠣ ꠊꠞ ꠛꠣꠘꠣꠘꠤ ꠅꠞ। ꠄꠞꠟꠣꠉꠤ ꠀꠟ꠆ꠟꠣꠁ ꠁꠝꠣꠝ ꠍꠣꠛ ꠢꠤꠡꠣꠛꠦ ꠔꠥꠝꠞꠣꠞꠦ ꠀꠟꠣꠖꠣ ꠇꠞꠤ ꠞꠣꠈꠣ ꠅꠁꠍꠦ, ꠎꠣꠔꠦ ꠔꠥꠝꠞꠣ ꠅꠃꠟꠣ ꠞꠥꠢꠣꠘꠤ ꠇꠥꠞꠛꠣꠘꠤ ꠖꠦꠅ, ꠎꠦꠔꠣ ꠁꠍꠣ ꠀꠟ-ꠝꠍꠤꠞ ꠈꠣꠔꠤꠞꠦ ꠀꠟ꠆ꠟꠣꠄ ꠇꠛꠥꠟ ꠇꠞꠂꠘ।
1PE 2:6 ꠀꠟ꠆ꠟꠣꠞ ꠇꠣꠟꠣꠝꠅ ꠀꠍꠦ: ꠢꠥꠘꠅ, ꠀꠝꠤ ꠄꠇꠐꠣ ꠝꠢꠣ ꠖꠣꠝꠤ ꠙꠣꠔ꠆ꠔꠞ ꠙꠍꠘ꠆ꠖ ꠇꠞꠍꠤ; ꠁꠇꠐꠣꠞꠦ ꠎꠦꠞꠥꠎꠣꠟꠦꠝꠅ ꠁꠀꠘ ꠈꠥꠐꠤ ꠢꠤꠡꠣꠛꠦ ꠉꠣꠠꠤꠍꠤ। ꠎꠦ ꠎꠘꠦ ꠔꠣꠘ ꠃꠙꠞꠦ ꠁꠝꠣꠘ ꠀꠘꠦ, ꠢꠦ ꠇꠥꠘꠥꠝꠘ꠆ꠔꠦꠃ ꠡꠞꠝꠤꠘ꠆ꠖꠣ ꠅꠁꠔ ꠘꠣꠄ।
1PE 2:7 ꠀꠞ ꠔꠥꠝꠞꠣ ꠁꠝꠣꠘ ꠀꠘꠣꠄ, ꠔꠥꠝꠞꠣꠞ ꠉꠦꠍꠦ ꠢꠃ ꠙꠣꠔ꠆ꠔꠞ ꠝꠢꠣ ꠖꠣꠝꠤ ꠅꠁꠉꠦꠍꠦ। ꠅꠁꠟꠦ ꠎꠦꠞꠣ ꠁꠝꠣꠘ ꠀꠘꠍꠦ ꠘꠣ, ꠔꠣꠞꠣꠞ ꠛꠦꠟꠣꠄ ꠇꠤꠔꠣꠛꠞ ꠅꠃ ꠇꠕꠣꠃ ꠈꠣꠐꠦ: ꠞꠣꠎ ꠝꠦꠡ꠆ꠔꠁꠞ ꠅꠇꠟꠦ ꠎꠦ ꠙꠣꠔ꠆ꠔꠞꠞꠦ ꠛꠦꠇꠣꠝꠣ ꠇꠁꠀ ꠚꠣꠟꠣꠁ ꠖꠤꠍꠤꠟ, ꠅꠇꠐꠣ ꠖꠤꠀꠃ ꠊꠞꠞ ꠁꠀꠘ ꠈꠥꠐꠤ ꠅꠁꠟ।
1PE 2:8 ꠀꠞ, ꠁꠇꠐꠣ ꠅꠃꠟꠣ ꠙꠣꠔ꠆ꠔꠞ, ꠎꠦ ꠙꠣꠔ꠆ꠔꠞꠅ ꠝꠣꠘꠡꠦ ꠃꠡ꠆ꠐꠣ ꠈꠣꠁꠛ, ꠔꠣꠞꠣꠞ ꠀꠍꠣꠠ ꠈꠣꠁꠀ ꠙꠠꠣꠞ ꠇꠣꠞꠘ ꠅꠁꠛ। ꠝꠣꠘꠡꠦ ꠀꠟ꠆ꠟꠣꠞ ꠇꠣꠟꠣꠝ ꠝꠣꠘꠦ ꠘꠣ, ꠉꠔꠤꠇꠦꠃ ꠃꠡ꠆ꠐꠣ ꠈꠣꠄ। ꠁꠔꠣ ꠔ ꠔꠣꠞꠣꠞ ꠇꠙꠣꠟꠤ ꠖꠡꠣ।
1PE 2:9 ꠅꠁꠟꠦ ꠔꠥꠝꠞꠣ ꠔ ꠁꠟꠣ ꠘꠣꠄ, ꠔꠥꠝꠞꠣ ꠅꠁꠟꠣꠄ ꠀꠟ꠆ꠟꠣꠞ ꠙꠍꠘ꠆ꠖ ꠇꠞꠣ ꠈꠣꠘ꠆ꠖꠣꠘ, ꠛꠣꠖꠡꠣꠁ ꠁꠝꠣꠝꠞ ꠖꠟ, ꠙꠛꠤꠔ꠆ꠞ ꠎꠣꠔꠤ, ꠔꠣꠘ ꠀꠙꠘ ꠙ꠆ꠞꠎꠣ। ꠔꠣꠁꠘ ꠔꠥꠝꠞꠣꠞꠦ ꠀꠘ꠆ꠖꠣꠁꠞ ꠕꠣꠇꠤ ꠘꠤꠎꠞ ꠘꠥꠞꠞ ꠚꠞꠅ ꠖꠣꠅꠔ ꠇꠞꠤ ꠀꠘꠍꠂꠘ, ꠔꠣꠘ ꠉꠥꠘꠉꠣꠘ ꠇꠞꠣꠞ ꠟꠣꠉꠤ।
1PE 2:10 ꠀꠉꠦ ꠔ ꠔꠥꠝꠞꠣ ꠀꠟ꠆ꠟꠣꠞ ꠙ꠆ꠞꠎꠣ ꠀꠍꠟꠣꠄ ꠘꠣ, ꠅꠁꠟꠦ ꠅꠈꠘ ꠅꠁꠍ। ꠀꠉꠦ ꠔꠣꠘ ꠝꠣꠄꠀ-ꠝꠢꠛ꠆ꠛꠔꠅ ꠙꠣꠁꠍ ꠘꠣ, ꠅꠈꠘ ꠙꠣꠁꠍ।
1PE 2:11 ꠜꠣꠁ ꠅꠇꠟ, ꠁ ꠖꠥꠘꠤꠀꠔ ꠔꠥꠝꠞꠣ ꠝꠥꠍꠣꠚꠤꠞ ꠢꠤꠡꠣꠛꠦ ꠀꠝꠤ ꠔꠥꠝꠞꠣꠞꠦ ꠝꠤꠘꠔ ꠇꠞꠤ ꠇꠁꠞꠣꠝ, ꠔꠥꠝꠞꠣ ꠡꠞꠤꠟꠞ ꠛꠖ ꠈꠣꠁꠡ ꠕꠣꠇꠤ ꠛꠣꠌꠤꠀ ꠞꠅ, ꠁꠔꠣꠄ ꠔ ꠔꠥꠝꠞꠣꠞ ꠞꠥꠢꠥꠞ ꠛꠤꠙꠇ꠆ꠇꠦ ꠎꠥꠖ꠆ꠖ ꠇꠞꠦ।
1PE 2:12 ꠎꠦꠞꠣ ꠀꠟ꠆ꠟꠣꠞꠦ ꠌꠤꠘꠦ ꠘꠣ, ꠔꠣꠞꠣꠞ ꠝꠣꠎꠦ ꠔꠥꠝꠞꠣ ꠢꠇ ꠙꠕꠦ ꠌꠟꠅ। ꠔꠦꠃ ꠔꠣꠞꠣ ꠔꠥꠝꠞꠣꠞꠦ ꠖꠥꠡꠤ ꠇꠁꠀ ꠘꠤꠘ꠆ꠖꠣ ꠇꠞꠟꠦꠅ, ꠔꠥꠝꠞꠣꠞ ꠢꠇꠟ ꠜꠣꠟꠣ ꠇꠣꠝ ꠖꠦꠈꠤꠀ ꠇꠤꠀꠝꠔꠞ ꠖꠤꠘ ꠀꠟ꠆ꠟꠣꠞ ꠉꠃꠞꠛ ꠇꠞꠛ।
1PE 2:13 ꠔꠥꠝꠞꠣ ꠝꠣꠟꠤꠇ ꠁꠍꠣꠞ ꠈꠣꠔꠤꠞꠦ ꠝꠣꠘꠡꠞ ꠛꠣꠘꠣꠁꠟ ꠡꠣꠡꠘ-ꠛꠦꠛꠡ꠆ꠔꠣ ꠝꠣꠘꠤꠅ। ꠖꠦꠡꠞ ꠞꠣꠎꠣꠞꠦ ꠝꠣꠘꠤꠅ, ꠄꠁꠘ ꠔ ꠖꠦꠡꠞ ꠙꠞꠗꠣꠘ।
1PE 2:14 ꠔꠣꠘ ꠝꠘꠔ꠆ꠞꠤ ꠀꠞ ꠢꠣꠇꠤꠝꠞꠦ ꠝꠣꠘꠤꠅ, ꠅꠙꠞꠣꠗꠤꠞ ꠡꠣꠎꠣ ꠀꠞ ꠜꠣꠟꠣ ꠎꠘꠞꠦ ꠙꠥꠞꠥꠡ꠆ꠇꠣꠞ ꠖꠤꠛꠣꠞ ꠟꠣꠉꠤ ꠔꠣꠁꠘ ꠄꠞꠣꠞꠦ ꠞꠣꠈꠍꠂꠘ।
1PE 2:15 ꠀꠟ꠆ꠟꠣꠞ ꠝꠥꠘꠡꠣ ꠅꠁꠟ, ꠔꠥꠝꠞꠣ ꠜꠣꠟꠣ ꠇꠣꠝ ꠇꠞꠤꠀ ꠛꠥꠠꠛꠇ ꠝꠣꠘꠡꠞ ꠛꠦꠇꠣꠝꠣ ꠝꠣꠔ-ꠇꠕꠣ ꠛꠘ꠆ꠖ ꠇꠞꠅ।
1PE 2:16 ꠔꠥꠝꠞꠣ ꠘꠤꠌ꠆ꠌꠄ ꠡ꠆ꠛꠣꠗꠤꠘ, ꠔꠣ-ꠅ ꠘꠣꠚꠞꠝꠣꠘꠤꠞꠦ ꠉꠥꠞꠤꠀ ꠞꠣꠈꠣꠞ ꠟꠣꠉꠤ ꠁ ꠡ꠆ꠛꠣꠗꠤꠘꠔꠣ ꠛꠦꠛꠢꠣꠞ ꠇꠞꠤꠅ ꠘꠣ। ꠛꠞꠋ ꠘꠤꠎꠞꠦ ꠀꠟ꠆ꠟꠣꠞ ꠉꠥꠟꠣꠝ ꠝꠘꠅ ꠇꠞꠅ।
1PE 2:17 ꠢꠇꠟ ꠝꠣꠘꠡꠞꠦ ꠁꠎ꠆ꠎꠔ ꠇꠞꠅ, ꠔꠥꠝꠞꠣꠞ ꠁꠝꠣꠘꠖꠣꠞ ꠜꠣꠁ ꠅꠇꠟꠞꠦ ꠝꠢꠛ꠆ꠛꠔ ꠇꠞꠅ, ꠀꠟ꠆ꠟꠣꠞꠦ ꠒꠞꠣꠅ ꠀꠞ ꠖꠦꠡꠞ ꠞꠣꠎꠣꠞꠦ ꠁꠎ꠆ꠎꠔ ꠖꠦꠅ।
1PE 2:18 ꠀꠞ ꠛꠣꠠꠤꠞ ꠉꠥꠟꠣꠝ ꠅꠇꠟꠞꠦ ꠇꠁꠞꠣꠝ, ꠔꠥꠝꠞꠣ ꠝꠥꠘꠤꠛꠞꠦ ꠁꠎ꠆ꠎꠔ ꠖꠦꠅ ꠀꠞ ꠔꠣꠞꠣꠞ ꠇꠕꠣꠔ ꠞꠅ। ꠎꠦ ꠝꠥꠘꠤꠛ ꠜꠣꠟꠣ ꠀꠞ ꠖꠄꠀꠟꠥ, ꠈꠣꠟꠤ ꠎꠦꠘ ꠔꠣꠞꠣꠞ ꠇꠕꠣꠔ ꠕꠣꠇꠔꠣꠄ, ꠁꠟꠣ ꠇꠥꠘ꠆ꠔꠣ ꠘꠣꠄ। ꠅꠁꠟꠦ ꠎꠦꠞꠣ ꠇꠐꠥ ꠛꠦꠛꠢꠣꠞ ꠇꠞꠦ, ꠔꠣꠞꠣꠞ ꠇꠕꠣꠔꠅ ꠞꠅ।
1PE 2:19 ꠅꠟꠣ ꠇꠦꠃ ꠎꠥꠖꠤ ꠈꠣꠝꠈꠣ ꠖꠥꠈ-ꠇꠡ꠆ꠐ ꠙꠣꠄ ꠀꠞ ꠀꠟ꠆ꠟꠣꠞꠦ ꠝꠘꠅ ꠞꠣꠈꠤꠀ ꠁꠔꠣ ꠡꠁꠎ꠆ꠎ ꠇꠞꠤꠟꠣꠄ, ꠔꠦ ꠙꠥꠞꠥꠡ꠆ꠇꠣꠞ ꠙꠣꠁꠛ।
1PE 2:20 ꠅꠛꠁꠡ꠆ꠡ ꠅꠙꠞꠣꠗꠞ ꠟꠣꠉꠤ ꠝꠣꠁꠞ ꠈꠣꠁꠀ ꠔꠥꠝꠞꠣ ꠎꠥꠖꠤ ꠡꠁꠎ꠆ꠎ ꠇꠞ, ꠔꠦ ꠔꠣꠞꠤꠚ ꠇꠞꠣꠞ ꠇꠥꠘ꠆ꠔꠣ ꠀꠍꠦ ꠘꠤ? ꠅꠁꠟꠦ ꠜꠣꠟꠣ ꠇꠣꠝꠞ ꠟꠣꠉꠤ ꠔꠥꠝꠞꠣ ꠎꠥꠖꠤ ꠇꠡ꠆ꠐ ꠙꠣꠁꠀꠅ ꠡꠁꠎ꠆ꠎ ꠇꠞꠤꠟꠣꠅ, ꠔꠦ ꠁꠔꠣ ꠀꠟ꠆ꠟꠣꠞ ꠖꠞꠛꠣꠞꠅ ꠔꠣꠞꠤꠚꠞ ꠟꠣꠈ,
1PE 2:21 ꠀꠟ꠆ꠟꠣꠄ ꠔꠥꠝꠞꠣꠞꠦ ꠅꠔꠣꠞ ꠟꠣꠉꠤꠃ ꠖꠣꠅꠔ ꠖꠤꠍꠂꠘ। ꠀꠟ-ꠝꠍꠤꠄꠅ ꠇꠡ꠆ꠐ ꠡꠁꠎ꠆ꠎ ꠇꠞꠤꠀ ꠘꠝꠥꠘꠣ ꠖꠦꠈꠣꠁꠍꠂꠘ, ꠔꠦ ꠔꠥꠝꠞꠣꠅ ꠔꠣꠘ ꠙꠣꠅꠞ ꠔꠣꠟꠦ ꠔꠣꠟꠦ ꠌꠟꠅ।
1PE 2:22 ꠔꠣꠁꠘ ꠇꠥꠘꠥ ꠉꠥꠘꠣ ꠇꠞꠍꠂꠘ ꠘꠣ, ꠔꠣꠘ ꠝꠥꠈꠅ ꠀꠍꠤꠟ ꠘꠣ ꠇꠥꠘꠥ ꠍꠟ-ꠌꠔꠥꠞꠤ।
1PE 2:23 ꠝꠣꠘꠡꠦ ꠔꠣꠘꠞꠦ ꠉꠣꠟꠤ ꠖꠤꠟꠦꠅ, ꠔꠣꠁꠘ ꠚꠤꠞꠤꠀ ꠉꠣꠟꠤ ꠖꠤꠍꠂꠘ ꠘꠣ। ꠇꠡ꠆ꠐꠞ ꠡꠝꠄ ꠄꠞ ꠛꠖꠟꠣ ꠟꠁꠛꠣ ꠇꠁꠀ ꠒꠞ-ꠜꠄꠅ ꠖꠦꠈꠣꠁꠍꠂꠘ ꠘꠣ, ꠛꠞꠋ ꠎꠦꠁꠘ ꠢꠇ ꠛꠤꠌꠣꠞ ꠇꠞꠂꠘ ꠔꠣꠘ ꠀꠔꠅ ꠘꠤꠎꠞꠦ ꠡꠙꠤ ꠖꠤꠍꠂꠘ।
1PE 2:24 ꠔꠣꠁꠘ ꠘꠤꠎꠞ ꠡꠞꠤꠟ ꠖꠤꠀ ꠀꠝꠞꠣꠞ ꠉꠥꠘꠣꠞ ꠛꠥꠏꠣ ꠛꠁꠍꠂꠘ ꠉꠣꠍꠞ ꠐꠥꠇꠞꠣꠞ ꠍꠟꠤꠛꠅ, ꠎꠣꠔꠦ ꠉꠥꠘꠣꠞ ꠛꠣꠛꠔꠦ ꠀꠝꠞꠣ ꠝꠞꠤꠀ ꠢꠣꠞꠤ, ꠙꠣꠇ-ꠙꠞꠦꠎꠉꠣꠞꠤꠄ ꠎꠤꠘ꠆ꠖꠣ ꠞꠁ। ꠔꠣꠘ ꠡꠞꠤꠟꠞ ꠇꠣꠐꠣ-ꠌꠤꠞꠣꠄ ꠔꠥꠝꠞꠣꠞ ꠡꠤꠚꠣ ꠅꠁꠍꠦ।
1PE 2:25 ꠀꠉꠦ ꠔ ꠔꠥꠝꠞꠣ ꠛꠦ-ꠙꠕꠦ ꠎꠣꠅꠀ ꠝꠦꠠꠣꠞ ꠟꠣꠈꠣꠘ ꠀꠍꠟꠣꠄ, ꠅꠁꠟꠦ ꠎꠦ ꠞꠣꠈꠣꠟꠦ ꠔꠥꠝꠞꠣꠞ ꠖꠤꠟꠞ ꠖꠦꠈꠣ-ꠢꠥꠘꠣ ꠇꠞꠂꠘ, ꠅꠈꠘ ꠔꠣꠘ ꠉꠦꠍꠦꠃ ꠚꠤꠞꠤꠀ ꠀꠁꠍ।
1PE 3:1 ꠅꠟꠣꠈꠣꠘ, ꠎꠣꠝꠣꠁꠞ ꠊꠞꠞ ꠢꠇꠟ ꠛꠃꠀꠁꠘ꠆ꠔꠞꠦ ꠇꠁꠞꠣꠝ, ꠔꠥꠝꠞꠣ ꠎꠣꠞꠎꠤꠞ ꠎꠣꠝꠣꠁꠞ ꠇꠕꠣꠄ ꠌꠟꠅ। ꠎꠥꠖꠤꠅ ꠇꠥꠘꠥ ꠇꠥꠘꠥ ꠎꠣꠝꠣꠁꠄ ꠀꠟ꠆ꠟꠣꠞ ꠇꠣꠟꠣꠝꠞꠦ ꠖꠣꠝ ꠖꠦꠄ ꠘꠣ, ꠔꠣ-ꠅ ꠔꠥꠝꠞꠣꠞ ꠌꠣꠟ-ꠌꠟꠘꠦ ꠎꠣꠘꠥ ꠔꠣꠞꠣꠞꠦ ꠀꠟ-ꠝꠍꠤꠞ ꠛꠣꠄ ꠐꠣꠘꠤꠀ ꠀꠘꠦ। ꠔꠦꠃ ꠁ ꠛꠦꠙꠣꠞꠦ ꠔꠥꠝꠞꠣꠞ ꠄꠇꠈꠣꠘ ꠇꠕꠣꠅ ꠝꠣꠔꠣ ꠟꠣꠉꠔ ꠘꠣꠄ।
1PE 3:2 ꠔꠥꠝꠞꠣꠞ ꠙꠛꠤꠔ꠆ꠞ ꠎꠤꠘ꠆ꠖꠦꠉꠤꠞ ꠢꠣꠟꠔ ꠖꠦꠈꠤꠀ, ꠀꠞ ꠀꠟ꠆ꠟꠣꠞ ꠒꠞ-ꠈꠚꠦ ꠌꠟꠣ ꠖꠦꠈꠤꠀ ꠔꠣꠞꠣ ꠘꠤꠎꠦꠃ ꠀꠁꠛ।
1PE 3:3 ꠘꠣꠘꠣꠘ ꠘꠝꠥꠘꠣꠄ ꠢꠣꠎꠤ-ꠙꠣꠠꠤ ꠌꠥꠟꠞ ꠈꠥꠙꠣ ꠛꠣꠘ꠆ꠖꠤꠀ, ꠡꠥꠘꠣ-ꠞꠥꠙꠣꠞ ꠉꠄꠘꠣ ꠟꠣꠉꠣꠁꠀ, ꠀꠞ ꠖꠣꠝꠤ ꠖꠣꠝꠤ ꠇꠣꠙꠠ ꠚꠤꠘ꠆ꠖꠤꠀ ꠘꠤꠎꠞꠦ ꠢꠣꠎꠣꠘꠤꠔ ꠞꠁꠅ ꠘꠣ।
1PE 3:4 ꠛꠞꠋ ꠎꠦ ꠡꠥꠘ꠆ꠖꠞ ꠇꠥꠘꠥꠖꠤꠘ ꠘꠡ꠆ꠐ ꠅꠁꠔ ꠘꠣꠄ, ꠢꠃ ꠘꠝꠥꠘꠣꠄ ꠌꠟꠣ-ꠚꠤꠞꠣ ꠀꠞ ꠡꠣꠘ꠆ꠔꠤꠞ ꠈꠣꠁꠍꠟꠔ ꠖꠤꠀ ꠘꠤꠎꠞ ꠖꠤꠟꠞꠦ ꠢꠣꠎꠣꠅ। ꠀꠟ꠆ꠟꠣꠞ ꠘꠎꠞꠅ ꠅꠔꠣꠃ ꠔ ꠝꠢꠣ ꠖꠣꠝꠤ।
1PE 3:5 ꠑꠤꠇ ꠅꠟꠣꠈꠣꠘ ꠀꠉꠞ ꠎꠝꠣꠘꠣꠞ ꠀꠟ꠆ꠟꠣꠅꠀꠟꠣ ꠛꠦꠐꠤꠘ꠆ꠔꠦ, ꠀꠟ꠆ꠟꠣꠞ ꠃꠙꠞꠦ ꠜꠞꠡꠣ ꠇꠞꠤꠀ ꠎꠣꠝꠣꠁꠞ ꠛꠣꠁꠖ꠆ꠖ ꠞꠁꠀ ꠘꠤꠎꠞꠦ ꠢꠣꠎꠣꠁꠔꠣ।
1PE 3:6 ꠢꠎꠞꠔ ꠁꠛ꠆ꠞꠣꠢꠤꠝꠞ ꠛꠤꠛꠤ ꠍꠣꠄꠞꠣꠅ ꠔꠣꠘ ꠎꠣꠝꠣꠁꠞ ꠛꠣꠁꠖ꠆ꠖ ꠀꠍꠟꠣ ꠀꠞ ꠔꠣꠘꠞꠦ ꠝꠥꠘꠤꠛ ꠇꠁꠀ ꠒꠣꠇꠤꠔꠣ। ꠔꠥꠝꠞꠣꠅ ꠝꠣꠘꠡꠞꠦ ꠘꠣ ꠒꠞꠣꠁꠀ ꠎꠥꠖꠤ ꠘꠦꠇ ꠇꠣꠝ ꠇꠞ, ꠔꠦ ꠅꠇꠐꠣꠃ ꠙꠞꠝꠣꠘ ꠅꠁꠛ, ꠔꠥꠝꠞꠣ ꠛꠤꠛꠤ ꠍꠣꠄꠞꠣꠞ ꠎꠁꠉ꠆ꠉ ꠀꠅꠟꠣꠖ।
1PE 3:7 ꠀꠞ ꠎꠣꠝꠣꠁ ꠅꠇꠟꠞꠦꠅ ꠇꠁꠞꠣꠝ, ꠔꠥꠝꠞꠣ ꠛꠤꠛꠦꠇ-ꠛꠥꠖ꠆ꠖꠤ ꠈꠣꠐꠣꠁꠀ ꠛꠃꠞ ꠟꠉꠦ ꠌꠟꠅ। ꠔꠣꠞꠣꠅ ꠔ ꠔꠥꠝꠞꠣꠞ ꠟꠉꠞ ꠇꠝꠎꠥꠞ ꠝꠣꠘꠥꠡ ꠀꠞ ꠀꠟ꠆ꠟꠣꠞ ꠞꠢꠝꠔꠞ ꠖꠣꠘ ꠢꠤꠡꠣꠛꠦ ꠔꠣꠞꠣꠅ ꠔꠥꠝꠞꠣꠞ ꠟꠉꠦ ꠎꠤꠘ꠆ꠖꠦꠉꠤ ꠙꠣꠁꠛ। ꠄꠞꠟꠣꠉꠤ ꠔꠣꠞꠣꠞꠦ ꠁꠎ꠆ꠎꠔ ꠖꠦꠅ, ꠎꠣꠔꠦ ꠀꠟ꠆ꠟꠣꠞ ꠖꠞꠛꠣꠞꠅ ꠔꠥꠝꠞꠣꠞ ꠝꠥꠘꠣꠎꠣꠔ ꠛꠦꠇꠣꠝꠣ ꠘꠣ ꠎꠣꠄ।
1PE 3:8 ꠢꠦꠡꠦ ꠢꠇꠟꠞꠦ ꠇꠁꠞꠣꠝ, ꠔꠥꠝꠞꠣ ꠢꠇꠟ ꠄꠇ-ꠖꠤꠟꠣ ꠅꠅ, ꠄꠇꠦ-ꠅꠁꠘ꠆ꠘꠞ ꠖꠥꠈꠦ ꠖꠥꠈꠤ ꠅꠅ, ꠜꠣꠁꠀꠁꠘ꠆ꠔꠞꠦ ꠝꠣꠄꠀ ꠇꠞꠅ, ꠖꠄꠀꠟꠥ ꠀꠞ ꠘꠞꠝ ꠖꠤꠟꠞ ꠝꠣꠘꠥꠡ ꠅꠅ।
1PE 3:9 ꠅꠁꠘ꠆ꠘꠣꠄꠞ ꠛꠖꠟꠣ ꠅꠁꠘ꠆ꠘꠣꠄ ꠇꠞꠤꠅ ꠘꠣ, ꠇꠦꠃ ꠉꠣꠟꠤ ꠖꠤꠟꠦ ꠚꠤꠞꠤꠀ ꠉꠣꠟꠤ ꠖꠤꠅ ꠘꠣ। ꠛꠞꠋ ꠔꠣꠞꠣꠞ ꠟꠣꠉꠤ ꠖꠥꠀ ꠌꠣꠁꠅ, ꠅꠟꠣ ꠌꠟꠣꠞ ꠟꠣꠉꠤꠃ ꠀꠟ꠆ꠟꠣꠄ ꠔꠥꠝꠞꠣꠞꠦ ꠖꠣꠅꠔ ꠖꠤꠍꠂꠘ, ꠁꠟꠣ ꠇꠞꠟꠦ ꠔꠥꠝꠞꠣ ꠞꠢꠝꠔ ꠙꠣꠁꠛꠣꠄ।
1PE 3:10 ꠎꠦꠟꠣ ꠎꠛꠥꠞ ꠡꠞꠤꠚꠅ ꠀꠍꠦ, ꠎꠦ ꠎꠘꠦ ꠡꠥꠈꠤ ꠎꠤꠘ꠆ꠖꠦꠉꠤ ꠇꠣꠐꠣꠁꠔ ꠌꠣꠄ ꠀꠞ ꠡꠥꠖꠤꠘ ꠖꠦꠈꠣꠞ ꠀꠡꠣ ꠇꠞꠦ, ꠢꠦ ꠛꠣꠖ ꠇꠕꠣ ꠕꠣꠇꠤ ꠔꠣꠞ ꠎꠤꠚꠞꠣꠞꠦ, ꠍꠟ-ꠌꠔꠥꠞꠤ ꠕꠣꠇꠤ ꠑꠥꠐꠞꠦ ꠡꠣꠝꠟꠣꠃꠇ।
1PE 3:11 ꠛꠣꠖ ꠇꠣꠝ ꠕꠣꠇꠤ ꠚꠤꠞꠤꠀ ꠜꠣꠟꠣ ꠇꠣꠝ ꠇꠞꠃꠇ, ꠡꠣꠘ꠆ꠔꠤꠞ ꠀꠡꠤꠇ ꠅꠁꠀ ꠄꠞ ꠈꠞꠦ ꠈꠞꠦ ꠞꠃꠇ।
1PE 3:12 ꠙꠞꠦꠎꠉꠣꠞꠞ ꠃꠙꠞꠦ ꠔ ꠝꠣꠛꠥꠖꠞ ꠘꠎꠞ, ꠔꠣꠞꠣꠞ ꠖꠥꠀ ꠢꠥꠘꠣꠞ ꠟꠣꠉꠤ ꠔꠣꠘ ꠇꠣꠘ ꠈꠣꠠꠣ, ꠅꠁꠟꠦ ꠛꠣꠖ ꠇꠣꠝ ꠇꠞꠞꠣꠞ ꠃꠙꠞꠦ, ꠝꠣꠟꠤꠇ ꠝꠃꠟꠣꠞ ꠛꠖ ꠘꠎꠞ।
1PE 3:13 ꠔꠥꠝꠞꠣ ꠎꠥꠖꠤ ꠜꠣꠟꠣ ꠜꠣꠟꠣ ꠇꠣꠝꠞ ꠀꠡꠤꠇ ꠅꠅ, ꠔꠦ ꠇꠦ ꠔꠥꠝꠞꠣꠞ ꠈꠦꠔꠤ ꠇꠞꠛ?
1PE 3:14 ꠙꠞꠦꠎꠉꠣꠞꠤꠞ ꠙꠕꠦ ꠌꠟꠣꠞ ꠟꠣꠉꠤ ꠎꠥꠖꠤꠅ ꠔꠥꠝꠞꠣꠞ ꠇꠡ꠆ꠐ ꠅꠄ, ꠔꠣ-ꠅ ꠔꠥꠝꠞꠣ ꠝꠥꠛꠣꠞꠇ। ꠀꠞ ꠔꠥꠝꠞꠣꠞꠦ ꠎꠦꠔꠣꠄ ꠒꠞ ꠖꠦꠈꠣꠁꠘ ꠁꠔꠣꠞꠦ ꠒꠞꠣꠁꠅ ꠘꠣ, ꠅꠡ꠆ꠕꠤꠞ ꠅꠁꠅ ꠘꠣ,
1PE 3:15 ꠛꠞꠋ ꠀꠟ-ꠝꠍꠤꠞꠦ ꠘꠤꠎꠞ ꠖꠤꠟꠅ ꠝꠣꠟꠤꠇ ꠢꠤꠡꠣꠛꠦ ꠇꠛꠥꠟ ꠇꠞꠅ। ꠔꠥꠝꠞꠣꠞ ꠀꠡꠣ-ꠜꠞꠡꠣ ꠎꠥꠖꠤ ꠇꠦꠃ ꠎꠣꠘꠔ ꠌꠣꠄ, ꠔꠦ ꠔꠣꠞ ꠎꠥꠀꠙ ꠖꠤꠛꠣꠞ ꠟꠣꠉꠤ ꠢꠣꠝꠦꠡꠣ ꠎꠥꠁꠔ ꠞꠁꠅ।
1PE 3:16 ꠅꠁꠟꠦ ꠁ ꠎꠥꠀꠙ ꠘꠞꠝ ꠡꠥꠞꠦ ꠖꠤꠅ। ꠔꠥꠝꠞꠣꠞ ꠖꠤꠟ ꠍꠣꠚ ꠞꠣꠈꠤꠅ, ꠁꠍꠣꠄꠁ ꠃꠝ꠆ꠝꠔ ꠢꠤꠡꠣꠛꠦ ꠎꠦꠞꠣ ꠔꠥꠝꠞꠣꠞ ꠜꠣꠟꠣ ꠌꠣꠟ-ꠌꠟꠘꠞ ꠘꠤꠘ꠆ꠖꠣ ꠇꠞꠦ, ꠔꠣꠞꠣ ꠎꠣꠘꠥ ꠡꠞꠝꠤꠘ꠆ꠖꠣ ꠅꠄ।
1PE 3:17 ꠛꠖ ꠇꠣꠝ ꠇꠞꠤꠀ ꠇꠡ꠆ꠐ ꠙꠣꠅꠀ ꠕꠣꠇꠤ ꠔ, ꠀꠟ꠆ꠟꠣꠞ ꠝꠞ꠆ꠎꠤ ꠅꠁꠟꠦ ꠘꠦꠇ ꠇꠣꠝ ꠇꠞꠤꠀ ꠇꠡ꠆ꠐ ꠙꠣꠅꠀ ꠛꠃꠔ ꠜꠣꠟꠣ।
1PE 3:18 ꠝꠘꠅ ꠞꠣꠈꠤꠅ, ꠀꠝꠞꠣꠞ ꠉꠥꠘꠣꠞ ꠝꠣꠚꠤꠞ ꠟꠣꠉꠤ ꠀꠟ-ꠝꠍꠤꠄꠅ ꠄꠇꠛꠣꠞ ꠇꠡ꠆ꠐ ꠇꠞꠍꠂꠘ, ꠘꠣꠚꠞꠝꠣꠘꠞꠦ ꠛꠣꠌꠣꠘꠤꠞ ꠟꠣꠉꠤ ꠢꠃ ꠙꠞꠦꠎꠉꠣꠞ ꠎꠘꠦ ꠎꠣꠘ ꠖꠤꠍꠂꠘ, ꠀꠝꠞꠣꠞꠦ ꠀꠟ꠆ꠟꠣꠞ ꠖꠞꠛꠣꠞꠅ ꠙꠃꠍꠣꠘꠤꠞ ꠟꠣꠉꠤ। ꠡꠞꠤꠟꠦ ꠔꠣꠘꠞꠦ ꠝꠣꠞꠣ ꠅꠁꠍꠤꠟ, ꠅꠁꠟꠦ ꠞꠥꠢꠦ ꠎꠤꠘ꠆ꠖꠣ ꠇꠞꠣ ꠅꠁꠍꠦ।
1PE 3:19 ꠀꠞ ꠞꠥꠢꠦ ꠔꠣꠁꠘ ꠛꠘ꠆ꠖꠤ ꠞꠥꠢꠥ ꠅꠇꠟꠞ ꠉꠦꠍꠦ ꠉꠤꠀ ꠔꠛꠟꠤꠉ ꠇꠞꠍꠂꠘ।
1PE 3:20 ꠅꠃ ꠞꠥꠢꠥ ꠅꠇꠟ ꠔ ꠘꠥꠢ ꠘꠛꠤꠞ ꠎꠝꠣꠘꠣꠞ ꠅꠛꠣꠁꠖ꠆ꠖ ꠝꠣꠘꠡꠞ ꠞꠥꠢꠥ। ꠔꠣꠘ ꠎꠣꠎ ꠛꠣꠘꠣꠘꠤꠞ ꠡꠝꠄ, ꠀꠟ꠆ꠟꠣꠞ ꠟꠣꠝ꠆ꠛꠣ ꠍꠛꠞꠉꠣꠞꠤꠞ ꠇꠣꠟꠅ ꠄꠞꠣ ꠅꠛꠣꠁꠖ꠆ꠖ ꠞꠁꠍꠂꠘ, ꠅꠃ ꠎꠣꠎꠅ ꠃꠑꠤꠀ ꠈꠣꠟꠤ ꠀꠐꠎꠘ ꠝꠣꠘꠡꠦ ꠉꠎꠛꠤ ꠙꠣꠘꠤ ꠕꠣꠇꠤ ꠎꠣꠘ ꠛꠣꠌꠣꠁꠍꠤꠟ।
1PE 3:21 ꠁ ꠙꠣꠘꠤ ꠅꠁꠟ ꠀꠟ-ꠝꠍꠤꠞ ꠘꠣꠝꠦ ꠔꠞꠤꠇꠣꠛꠘ꠆ꠖꠤꠞ ꠄꠇꠐꠣ ꠘꠤꠡꠣꠘꠣ, ꠎꠦꠔꠣꠄ ꠅꠈꠘ ꠔꠥꠝꠞꠣꠞ ꠎꠣꠘ ꠛꠣꠌꠦ। ꠔꠞꠤꠇꠣꠛꠘ꠆ꠖꠤꠄ ꠔꠥꠝꠞꠣꠞ ꠡꠞꠤꠟꠞ ꠝꠄꠟꠣ ꠍꠣꠚ ꠅꠄ ꠘꠣ, ꠈꠣꠟꠤ ꠀꠟ꠆ꠟꠣꠞ ꠖꠞꠛꠣꠞꠅ ꠍꠣꠚ ꠖꠤꠟꠞ ꠡꠣꠄ ꠖꠦꠄ। ꠢꠎꠞꠔ ꠁꠍꠣ ꠀꠟ-ꠝꠍꠤ ꠝꠞꠣ ꠕꠣꠇꠤ ꠎꠤꠘ꠆ꠖꠣ ꠅꠁꠀ ꠃꠑꠣꠄ ꠔꠥꠝꠞꠣꠞ ꠎꠣꠘ ꠛꠣꠌꠦ,
1PE 3:22 ꠔꠣꠁꠘ ꠛꠦꠢꠦꠡ꠆ꠔꠅ ꠉꠦꠍꠂꠘ ꠀꠞ ꠀꠟ꠆ꠟꠣ ꠙꠣꠇꠞ ꠒꠣꠁꠘ ꠉꠣꠟꠣꠞ ꠔꠈ꠆ꠔꠅ ꠛꠅꠀꠔ ꠀꠍꠂꠘ। ꠀꠍꠝꠣꠘꠞ ꠚꠤꠞꠤꠡ꠆ꠔꠣ ꠅꠇꠟ, ꠈꠦꠝꠔꠣꠞ ꠝꠣꠟꠤꠇ ꠅꠇꠟ ꠀꠞ ꠞꠣꠎꠣ ꠅꠇꠟ ꠔꠣꠘ ꠅꠗꠤꠘꠦ ꠀꠍꠂꠘ।
1PE 4:1 ꠀꠟ-ꠝꠍꠤꠄ ꠘꠤꠎꠞ ꠡꠞꠤꠟꠅ ꠇꠡ꠆ꠐ ꠡꠁꠎ꠆ꠎ ꠇꠞꠍꠂꠘ ꠇꠞꠤ, ꠔꠥꠝꠞꠣꠞ ꠖꠤꠟꠞ ꠜꠣꠛꠞꠦꠅ ꠅꠟꠣꠈꠣꠘ ꠇꠞꠅ। ꠡꠞꠤꠟꠅ ꠎꠣꠞ ꠇꠡ꠆ꠐ ꠅꠁꠍꠦ, ꠢꠦ ꠔ ꠉꠥꠘꠣꠞ ꠎꠣꠟꠅ ꠛꠘ꠆ꠖꠤ ꠞꠁꠍꠦ ꠘꠣ।
1PE 4:2 ꠄꠞꠟꠣꠉꠤ ꠢꠦ ꠎꠔꠖꠤꠘ ꠖꠥꠘꠤꠀꠔ ꠀꠍꠦ, ꠅꠔꠖꠤꠘ ꠛꠖ ꠈꠣꠁꠡꠦ ꠘꠣ ꠌꠟꠤꠀ ꠈꠣꠟꠤ ꠀꠟ꠆ꠟꠣꠁ ꠝꠥꠘꠡꠣꠄ ꠎꠤꠘ꠆ꠖꠦꠉꠤ ꠇꠣꠐꠣꠄ।
1PE 4:3 ꠀꠟ꠆ꠟꠣꠞꠦ ꠎꠦꠞꠣ ꠌꠤꠘꠦ ꠘꠣ, ꠔꠣꠞꠣꠞ ꠟꠣꠈꠣꠘ ꠔꠥꠝꠞꠣꠅ ꠀꠉꠦ ꠎꠤꠘꠣ-ꠛꠖꠝꠣꠁꠡꠤ, ꠝꠃꠎ-ꠚꠥꠞ꠆ꠔꠤ, ꠝꠣꠔꠟꠣꠝꠤ, ꠢꠂ-ꠢꠥꠟ꠆ꠟꠣ ꠀꠞ ꠎꠊꠁꠘ꠆ꠘ ꠝꠥꠞ꠆ꠔꠤꠙꠥꠎꠣ ꠇꠞꠤꠀ ꠖꠤꠘ ꠇꠣꠐꠣꠁꠔꠣꠄ।
1PE 4:4 ꠅꠁꠟꠦ ꠅꠈꠘ ꠔꠥꠝꠞꠣ ꠔꠣꠞꠣꠞ ꠟꠉꠦ ꠅꠁꠀ ꠅꠟꠣꠈꠣꠘ ꠛꠦꠡꠣꠝꠣꠟ ꠘꠣꠚꠞꠝꠣꠘꠤ ꠇꠞꠞꠣꠄ ꠘꠣ ꠖꠦꠈꠤꠀ, ꠔꠣꠞꠣ ꠔꠣꠁꠎ꠆ꠎꠥꠛ ꠛꠘꠤꠀ ꠔꠥꠝꠞꠣꠞ ꠘꠤꠘ꠆ꠖꠣ ꠉꠣꠁꠞꠣ।
1PE 4:5 ꠔꠣ-ꠅ ꠎꠦꠁꠘ ꠎꠤꠘ꠆ꠖꠣ ꠀꠞ ꠝꠥꠞ꠆ꠖꠣ ꠅꠇꠟꠞ ꠛꠤꠌꠣꠞꠞ ꠟꠣꠉꠤ ꠎꠥꠁꠔ ꠀꠍꠂꠘ, ꠔꠣꠞꠣ ꠔꠣꠘ ꠉꠦꠍꠦꠃ ꠢꠤꠡꠣꠛ-ꠘꠤꠇꠣꠡ ꠖꠤꠔꠦ ꠅꠁꠛ।
1PE 4:6 ꠄꠞꠟꠣꠉꠤꠃ ꠝꠥꠞ꠆ꠖꠣ ꠅꠇꠟꠞ ꠉꠦꠍꠦꠅ ꠈꠥꠡ-ꠈꠛꠞꠤ ꠔꠛꠟꠤꠉ ꠇꠞꠣ ꠅꠁꠍꠤꠟ, ꠎꠣꠔꠦ ꠝꠣꠘꠥꠡ ꠢꠤꠡꠣꠛꠦ ꠔꠣꠞꠣꠞ ꠡꠞꠤꠟꠤ ꠛꠤꠌꠣꠞ ꠅꠁꠟꠦꠅ, ꠞꠥꠢꠣꠘꠤ ꠎꠉꠔꠅ ꠔꠣꠞꠣ ꠀꠟ꠆ꠟꠣꠞ ꠟꠣꠈꠣꠘ ꠎꠤꠘ꠆ꠖꠣ ꠞꠂꠘ।
1PE 4:7 ꠅꠈꠘ ꠔ ꠢꠇ꠆ꠇꠟꠔꠣꠞ ꠢꠦꠡ ꠡꠝꠄ ꠀꠁꠌ꠆ꠍꠦ। ꠄꠞꠟꠣꠉꠤ ꠔꠥꠝꠞꠣꠞ ꠝꠘꠞꠦ ꠑꠤꠇ ꠇꠞꠅ, ꠘꠤꠎꠞꠦ ꠡꠣꠝꠟꠣꠁꠀ ꠞꠣꠈꠅ, ꠎꠣꠔꠦ ꠝꠥꠘꠣꠎꠣꠔꠅ ꠇꠣꠝꠤꠀꠛ ꠅꠅ।
1PE 4:8 ꠀꠍꠟ ꠇꠕꠣ ꠅꠁꠟ, ꠔꠥꠝꠞꠣ ꠄꠇꠦ-ꠅꠁꠘ꠆ꠘꠞꠦ ꠖꠤꠟ ꠕꠣꠇꠤ ꠝꠢꠛ꠆ꠛꠔ ꠇꠞꠅ, ꠇꠣꠞꠘ ꠝꠣꠄꠀ-ꠝꠢꠛ꠆ꠛꠔꠦ ꠛꠃꠔ ꠉꠥꠘꠣ ꠉꠥꠞꠤꠀ ꠞꠣꠈꠦ।
1PE 4:9 ꠇꠥꠘꠥꠎꠣꠔ ꠛꠤꠔꠤꠡꠘꠣ ꠘꠣ ꠖꠦꠈꠣꠁꠀ, ꠔꠥꠝꠞꠣ ꠄꠇꠦ-ꠅꠁꠘ꠆ꠘꠞ ꠝꠦꠝꠣꠘꠖꠣꠞꠤ ꠇꠞꠅ।
1PE 4:10 ꠀꠟ꠆ꠟꠣꠞ ꠉꠦꠍ ꠕꠣꠇꠤ ꠎꠦꠁꠘ ꠎꠦꠟꠣꠈꠣꠘ ꠘꠤꠀꠝꠔ ꠙꠣꠁꠍ, ꠅꠃ ꠗꠘꠞ ꠈꠣꠐꠤ ꠈꠣꠎꠣꠘ꠆ꠌꠤ ꠢꠤꠡꠣꠛꠦ ꠁꠔꠣꠞꠦ ꠄꠇꠦ-ꠅꠁꠘ꠆ꠘꠞ ꠈꠦꠎꠝꠔꠅ ꠟꠣꠉꠣꠅ।
1PE 4:11 ꠇꠦꠃ ꠎꠥꠖꠤ ꠔꠛꠟꠤꠉ ꠇꠞꠂꠘ, ꠔꠦ ꠅꠃ ꠟꠣꠈꠣꠘ ꠇꠞꠃꠇ꠆ꠇꠣ ꠎꠣꠔꠦ ꠛꠥꠎꠣ ꠎꠣꠄ, ꠁꠔꠣ ꠀꠟ꠆ꠟꠣꠁ ꠛꠥꠟꠤ। ꠀꠞ ꠎꠦꠁꠘ ꠈꠦꠎꠝꠔ ꠇꠞꠂꠘ, ꠄꠁꠘ ꠀꠟ꠆ꠟꠣꠞ ꠖꠦꠅꠀ ꠛꠟ-ꠡꠇ꠆ꠔꠤꠄ ꠈꠦꠎꠝꠔ ꠇꠞꠃꠇ꠆ꠇꠣ, ꠎꠣꠔꠦ ꠢꠇ꠆ꠇꠟꠔꠣꠔꠃ ꠀꠟ-ꠝꠍꠤꠞ ꠃꠍꠤꠟ꠆ꠟꠣꠄ ꠀꠟ꠆ꠟꠣꠞ ꠔꠣꠞꠤꠚ ꠅꠄ। ꠔꠣꠞꠤꠚ ꠀꠞ ꠇꠥꠖꠞꠔꠤ ꠈꠦꠝꠔꠣ ꠢꠞ-ꠢꠣꠝꠦꠡꠣ ꠔꠣꠘꠃ। ꠀꠝꠤꠘ।
1PE 4:12 ꠜꠣꠁ ꠅꠇꠟ, ꠔꠥꠝꠞꠣ ꠅꠈꠘ ꠎꠤꠛꠘ-ꠝꠞꠘ ꠙꠞꠤꠇ꠆ꠇꠣꠔ ꠙꠠꠤꠀ ꠔꠣꠁꠎ꠆ꠎꠥꠛ ꠅꠁꠅ ꠘꠣ, ꠝꠘꠅ ꠇꠞꠤꠅ ꠘꠣ ꠁꠔꠣ ꠀꠌꠣꠘꠇ ꠇꠥꠘ꠆ꠔꠣ ꠊꠐꠦꠞ।
1PE 4:13 ꠛꠞꠋ ꠔꠥꠝꠞꠣ ꠀꠟ-ꠝꠍꠤꠞ ꠇꠡ꠆ꠐꠞ ꠜꠣꠉꠤ ꠅꠁꠞꠣꠄ ꠇꠞꠤ ꠈꠥꠡꠤ ꠇꠞꠅ, ꠎꠣꠔꠦ ꠔꠣꠘ ꠝꠢꠤꠝꠣ ꠎꠣꠁꠞ ꠅꠀꠞ ꠡꠝꠄꠅ ꠔꠥꠝꠞꠣ ꠀꠝꠥꠖ-ꠚꠥꠞ꠆ꠔꠤꠄ ꠈꠥꠡꠤ-ꠛꠣꠡꠤ ꠇꠞꠔꠣꠄ ꠙꠣꠞ।
1PE 4:14 ꠀꠟ-ꠝꠍꠤꠞ ꠘꠣꠝꠞ ꠟꠣꠉꠤ ꠔꠥꠝꠞꠣ ꠎꠥꠖꠤ ꠛꠦꠁꠎ꠆ꠎꠔ ꠅꠅ, ꠔꠦ ꠔꠥꠝꠞꠣ ꠘꠦꠇ-ꠇꠙꠣꠟꠤ। ꠇꠣꠞꠘ ꠀꠟ꠆ꠟꠣꠞ ꠝꠢꠤꠝꠣ-ꠀꠟꠣ ꠙꠣꠇ ꠞꠥꠢꠥ ꠔꠥꠝꠞꠣꠞ ꠃꠙꠞꠦ ꠀꠍꠦ।
1PE 4:15 ꠔꠥꠝꠞꠣꠞ ꠝꠣꠎꠞ ꠇꠦꠃ ꠎꠣꠘꠥ ꠌꠥꠞꠤ, ꠈꠥꠘ ꠛꠣ ꠇꠥꠘꠥꠎꠣꠔ ꠅꠙꠞꠣꠗꠤ ꠢꠤꠡꠣꠛꠦ, ꠄꠝꠘꠇꠤ ꠙꠞꠞ ꠇꠣꠝꠦ ꠘꠣꠇ ꠉꠟꠣꠁꠀ ꠇꠡ꠆ꠐ ꠘꠣ ꠇꠞꠃꠇ।
1PE 4:16 ꠅꠁꠟꠦ ꠇꠦꠃ ꠎꠥꠖꠤ ꠁꠍꠣꠄꠁ ꠁꠝꠣꠘꠖꠣꠞ ꠢꠤꠡꠣꠛꠦ ꠖꠥꠈ-ꠇꠡ꠆ꠐ ꠇꠞꠦ, ꠔꠦ ꠢꠦ ꠡꠞꠝꠤꠘ꠆ꠖꠣ ꠘꠣ ꠅꠃꠇ, ꠛꠞꠋ ꠁꠍꠣꠄꠁ ꠙꠞꠤꠌꠄꠞ ꠟꠣꠉꠤ ꠀꠟ꠆ꠟꠣꠞ ꠔꠣꠞꠤꠚ ꠇꠞꠃꠇ।
1PE 4:17 ꠛꠤꠌꠣꠞꠞ ꠡꠝꠄ ꠀꠁꠌ꠆ꠍꠦ, ꠀꠞ ꠀꠟ꠆ꠟꠣꠞ ꠙꠍꠘ꠆ꠖ ꠇꠞꠣ ꠛꠘ꠆ꠖꠣ ꠅꠇꠟꠞꠦꠖꠤꠃ ꠛꠤꠌꠣꠞ ꠡꠥꠞꠥ ꠅꠁꠛ। ꠁꠔꠣ ꠎꠥꠖꠤ ꠀꠝꠞꠣꠞ ꠝꠣꠎ ꠕꠣꠇꠤꠃ ꠡꠥꠞꠥ ꠅꠄ, ꠔꠦ ꠎꠦꠞꠣ ꠀꠟ꠆ꠟꠣꠞ ꠈꠥꠡ-ꠈꠛꠞꠤ ꠝꠣꠘꠍꠦ ꠘꠣ, ꠔꠣꠞꠣꠞ ꠖꠡꠣ ꠇꠤꠟꠣꠘ ꠅꠁꠛ?
1PE 4:18 ꠀꠟ꠆ꠟꠣꠞ ꠇꠣꠟꠣꠝꠅ ꠀꠍꠦ, ꠀꠟ꠆ꠟꠣꠞꠣꠁꠀ ꠝꠣꠘꠡꠞ ꠎꠣꠘꠞ ꠍꠖꠝꠣ ꠅꠁꠟꠦ, ꠉꠥꠘꠣꠉꠣꠞ ꠀꠞ ꠛꠦ-ꠖꠤꠘꠦ ꠝꠥꠈ ꠟꠥꠇꠣꠁꠛ ꠇꠥꠀꠁ?
1PE 4:19 ꠅꠁꠟꠦ ꠀꠟ꠆ꠟꠣꠞ ꠝꠞ꠆ꠎꠤꠄ ꠎꠦꠞꠣ ꠖꠥꠈ-ꠇꠡ꠆ꠐ ꠇꠞꠦꠞ, ꠔꠣꠞꠣ ꠘꠦꠇ ꠇꠣꠝ ꠇꠞꠤ ꠇꠞꠤ ꠘꠤꠎꠞ ꠎꠣꠘꠞꠦ ꠢꠃ ꠢꠇ-ꠢꠣꠟꠣꠟ ꠙꠄꠖꠣ ꠇꠞꠞꠣꠞ ꠀꠔꠅ ꠡꠙꠤ ꠖꠦꠃꠇ।
1PE 5:1 ꠅꠈꠘ ꠎꠝꠣꠔꠞ ꠝꠥꠞꠛ꠆ꠛꠤ ꠅꠇꠟꠞꠦ ꠇꠁꠞꠣꠝ, ꠀꠝꠤꠅ ꠔ ꠄꠇꠎꠘ ꠝꠥꠞꠛ꠆ꠛꠤ, ꠀꠝꠤ ꠘꠤꠎꠞ ꠌꠃꠈꠦ ꠀꠟ-ꠝꠍꠤꠞ ꠖꠥꠈ-ꠇꠡ꠆ꠐ ꠖꠦꠈꠍꠤ, ꠀꠞ ꠔꠣꠘ ꠎꠦ ꠝꠢꠤꠝꠣ ꠎꠣꠁꠞ ꠅꠁꠛ, ꠅꠃ ꠝꠢꠤꠝꠣꠔꠅ ꠡꠞꠤꠇ ꠅꠁꠝꠥ। ꠀꠝꠤ ꠝꠤꠘꠔ ꠇꠞꠤ ꠇꠁꠞꠣꠝ,
1PE 5:2 ꠀꠟ꠆ꠟꠣꠁ ꠎꠦ ꠝꠦꠠꠣꠞ ꠙꠣꠟ ꠔꠥꠝꠞꠣꠞ ꠀꠅꠔꠣꠄ ꠀꠍꠂꠘ, ꠄꠞꠣꠞ ꠞꠣꠈꠣꠟꠤ ꠇꠞꠅ। ꠔꠣꠞꠣꠞ ꠁꠝꠣꠝꠔꠤ ꠇꠞꠅ, ꠇꠞꠣ ꠟꠣꠉꠛ ꠇꠞꠤ ꠘꠣ ꠇꠞꠤꠀ ꠛꠣ ꠖꠥꠘꠤꠀꠛꠤ ꠟꠣꠜꠞ ꠀꠡꠣꠄ ꠘꠣ ꠇꠞꠤꠀ, ꠈꠥꠡ ꠖꠤꠟꠦ ꠇꠞꠅ। ꠀꠟ꠆ꠟꠣꠄ ꠔ ꠅꠟꠣ ꠁꠝꠣꠝꠔꠤꠃ ꠀꠡꠣ ꠇꠞꠂꠘ।
1PE 5:3 ꠔꠥꠝꠞꠣꠞ ꠀꠅꠔꠣꠄ ꠎꠦꠞꠣ ꠀꠍꠦ, ꠄꠞꠣꠞ ꠃꠙꠞꠦ ꠝꠥꠍꠖ꠆ꠖꠞꠤ ꠇꠞꠤꠅ ꠘꠣ, ꠛꠞꠋ ꠙꠣꠟꠞ ꠞꠣꠈꠣꠟꠤ ꠇꠞꠤꠀ ꠔꠣꠞꠣꠞ ꠉꠦꠍꠦ ꠘꠝꠥꠘꠣ ꠛꠘꠅ।
1PE 5:4 ꠔꠦꠃ ꠢꠃ ꠙꠞꠗꠣꠘ ꠞꠣꠈꠣꠟ ꠁꠍꠣꠄ ꠎꠦꠛꠟꠣ ꠖꠥꠘꠤꠀꠔ ꠢꠤꠞꠛꠣꠞ ꠔꠡꠞꠤꠚ ꠀꠘꠛꠣ, ꠅꠃ ꠡꠝꠄ ꠔꠥꠝꠞꠣ ꠙꠥꠞꠥꠡ꠆ꠇꠣꠞ ꠢꠤꠡꠣꠛꠦ ꠅꠟꠣ ꠄꠇ ꠎꠄꠅꠞ ꠝꠣꠟꠣ ꠙꠣꠁꠛꠣꠄ ꠎꠦꠔꠣ ꠇꠥꠘꠥꠖꠤꠘ ꠛꠤꠘꠣꠡ ꠅꠁꠔ ꠘꠣꠄ।
1PE 5:5 ꠅꠃ ꠟꠣꠈꠣꠘ ꠎꠥꠀꠘ ꠅꠇꠟꠦꠅ ꠔꠥꠝꠞꠣꠞ ꠝꠥꠞꠛ꠆ꠛꠤꠞꠦ ꠝꠣꠘꠤꠀ ꠌꠟꠅ। ꠉꠥꠟꠣꠝꠤꠞ ꠛꠦꠡꠦ ꠢꠇꠟꠦꠃ ꠄꠇꠦ-ꠅꠁꠘ꠆ꠘꠞ ꠈꠦꠎꠝꠔ ꠇꠞꠅ, ꠎꠦꠟꠣ ꠀꠟ꠆ꠟꠣꠞ ꠇꠣꠟꠣꠝꠅ ꠀꠍꠦ, ꠀꠟ꠆ꠟꠣꠄ ꠅꠢꠋꠇꠣꠞꠤꠞ ꠛꠤꠞꠥꠖ꠆ꠖꠦ ꠕꠣꠇꠂꠘ, ꠘꠞꠝ ꠖꠤꠟꠞ ꠝꠣꠘꠡꠞꠦ ꠞꠢꠝ ꠇꠞꠂꠘ।
1PE 5:6 ꠄꠞꠟꠣꠉꠤ ꠀꠟ꠆ꠟꠣꠞ ꠈꠦꠝꠔꠣꠞ ꠍꠣꠝꠘꠦ ꠔꠥꠝꠞꠣ ꠘꠔ ꠅꠅ, ꠔꠦꠃ ꠡꠝꠄ ꠝꠔ ꠀꠟ꠆ꠟꠣꠄ ꠔꠥꠝꠞꠣꠞꠦ ꠃꠌꠣ ꠇꠞꠛꠣ।
1PE 5:7 ꠀꠟ꠆ꠟꠣꠄ ꠔ ꠔꠥꠝꠞꠣꠞꠦ ꠟꠁꠀꠃ ꠌꠤꠘ꠆ꠔꠣ ꠇꠞꠂꠘ, ꠄꠞꠟꠣꠉꠤ ꠢꠇꠟ ꠌꠤꠘ꠆ꠔꠣ-ꠜꠣꠛꠘꠣꠞ ꠜꠣꠞ ꠔꠣꠘ ꠃꠙꠞꠦ ꠖꠤꠟꠣꠅ।
1PE 5:8 ꠔꠥꠝꠞꠣ ꠘꠤꠎꠞꠦ ꠡꠣꠝꠟꠣꠁꠀ ꠞꠣꠈꠅ ꠀꠞ ꠢꠥꠡꠤꠀꠞ ꠅꠅ। ꠇꠣꠞꠘ ꠔꠥꠝꠞꠣꠞ ꠖꠥꠡꠝꠘ ꠁꠛꠟꠤꠍꠦ ꠉꠞ꠆ꠎꠘ ꠇꠞꠞꠣ ꠛꠣꠊꠞ ꠟꠣꠈꠣꠘ, ꠔꠥꠝꠞꠣꠞꠦ ꠈꠣꠁꠟꠤꠔ ꠇꠞꠤ ꠈꠣꠙ ꠗꠞꠤꠀ ꠊꠥꠞꠦꠞ।
1PE 5:9 ꠄꠞꠟꠣꠉꠤ ꠁꠝꠣꠘꠦ ꠝꠎꠛꠥꠔ ꠞꠁꠀ ꠔꠣꠞ ꠝꠥꠇꠣꠛꠤꠟꠣ ꠇꠞꠅ। ꠔꠥꠝꠞꠣ ꠔ ꠎꠣꠘ, ꠖꠥꠘꠤꠀꠞ ꠢꠇꠟ ꠎꠣꠉꠣꠔ ꠔꠥꠝꠞꠣꠞ ꠁꠝꠣꠘꠖꠣꠞ ꠜꠣꠁꠀꠁꠘ꠆ꠔꠦ ꠄꠇꠁ ꠟꠣꠈꠣꠘ ꠖꠥꠈ-ꠇꠡ꠆ꠐ ꠇꠞꠦꠞ।
1PE 5:10 ꠞꠢꠝꠣꠘꠥꠞ ꠞꠢꠤꠝ ꠀꠟ꠆ꠟꠣ ꠙꠣꠇꠦ ꠔꠥꠝꠞꠣꠞꠦ ꠖꠣꠅꠔ ꠖꠤꠍꠂꠘ ꠀꠟ-ꠝꠍꠤꠞ ꠟꠉꠦ ꠅꠁꠀ ꠔꠣꠘ ꠌꠤꠞꠡ꠆ꠕꠣꠄꠁ ꠝꠢꠤꠝꠣꠞ ꠜꠣꠉꠤ ꠅꠀꠞ ꠟꠣꠉꠤ। ꠕꠥꠠꠣ ꠇꠄꠖꠤꠘ ꠖꠥꠈ-ꠇꠡ꠆ꠐ ꠇꠞꠤꠀ ꠢꠣꠞꠟꠦ, ꠔꠣꠁꠘ ꠘꠤꠎꠦꠃ ꠔꠥꠝꠞꠣꠞꠦ ꠑꠤꠇ-ꠑꠣꠇ ꠇꠞꠛꠣ ꠀꠞ ꠕꠤꠞ ꠞꠣꠈꠛꠣ, ꠔꠥꠝꠞꠣꠞꠦ ꠛꠟꠛꠣꠘ ꠇꠞꠤꠀ ꠝꠎꠛꠥꠔ ꠈꠥꠐꠤꠞ ꠃꠙꠞꠦ ꠈꠣꠠꠣ ꠇꠞꠣꠁꠛꠣ।
1PE 5:11 ꠔꠣꠘ ꠞꠣꠎ-ꠈꠦꠝꠔꠣ ꠢꠞ-ꠢꠣꠝꠦꠡꠣ ꠎꠣꠞꠤ ꠞꠃꠇ। ꠀꠝꠤꠘ।
1PE 5:12 ꠅꠃ ꠌꠤꠑꠤꠈꠣꠘ ꠀꠝꠤ ꠍꠤꠟꠣꠍ ꠝꠢꠞꠤꠞ ꠍꠣꠛꠞꠦꠖꠤ ꠈꠥꠛ ꠇꠝ ꠇꠕꠣꠄ ꠔꠥꠝꠞꠣꠞ ꠉꠦꠍꠦ ꠟꠦꠈꠣꠁꠍꠤ, ꠀꠝꠤ ꠔꠣꠘꠞꠦ ꠢꠇ-ꠢꠣꠟꠣꠟ ꠜꠣꠁ ꠝꠘꠅ ꠇꠞꠤ। ꠀꠝꠤ ꠌꠣꠁꠞꠣꠝ ꠀꠟ꠆ꠟꠣꠞ ꠈꠣꠍ ꠞꠢꠝꠔꠞ ꠅꠃ ꠡꠣꠇ꠆ꠇꠤ ꠢꠥꠘꠤꠀ ꠔꠥꠝꠞꠣꠞ ꠡꠣꠅꠡ ꠛꠣꠠꠃꠇ, ꠀꠞ ꠔꠥꠝꠞꠣ ꠅꠘꠅ ꠕꠤꠞ ꠅꠁꠀ ꠞꠅ।
1PE 5:13 ꠀꠟ꠆ꠟꠣꠄ ꠔꠥꠝꠞꠣꠞ ꠟꠉꠦ ꠎꠦꠞꠣꠞꠦ ꠙꠍꠘ꠆ꠖ ꠇꠞꠍꠂꠘ, ꠢꠃ ꠛꠣꠛꠤꠟ ꠐꠣꠃꠘꠞ ꠝꠥꠝꠤꠘ ꠅꠇꠟꠦ ꠔꠥꠝꠞꠣꠞꠦ ꠍꠣꠟꠣꠝ ꠎꠣꠘꠣꠁꠞꠣ, ꠀꠞ ꠀꠝꠣꠞ ꠗꠞ꠆ꠝꠞ ꠙꠥꠀ ꠝꠣꠞ꠆ꠇꠥꠍꠦꠅ ꠔꠥꠝꠞꠣꠞꠦ ꠍꠣꠟꠣꠝ ꠎꠣꠘꠣꠁꠞꠣ।
1PE 5:14 ꠔꠥꠝꠞꠣ ꠄꠇꠦ-ꠅꠁꠘ꠆ꠘꠦ ꠝꠢꠛ꠆ꠛꠔꠦ ꠉꠟꠣꠉꠟꠤ ꠇꠞꠤꠅ। ꠔꠥꠝꠞꠣ ꠎꠦꠞꠣ ꠀꠟ-ꠝꠍꠤꠞ ꠀꠙꠘ ꠎꠘ ꠅꠁꠍ, ꠔꠥꠝꠞꠣꠞ ꠃꠙꠞꠦ ꠡꠣꠘ꠆ꠔꠤ ꠘꠣꠎꠤꠟ ꠅꠃꠇ। ꠀꠝꠤꠘ॥
2PE 1:1 ꠀꠝꠤ ꠍꠣꠁꠝꠘ-ꠙꠤꠔꠞ, ꠢꠎꠞꠔ ꠁꠍꠣ ꠀꠟ-ꠝꠍꠤꠞ ꠄꠇꠎꠘ ꠉꠥꠟꠣꠝ ꠀꠞ ꠍꠣꠢꠣꠛꠤ। ꠔꠥꠝꠞꠣ ꠎꠦꠞꠣ ꠀꠝꠞꠣꠞ ꠟꠣꠈꠣꠘ, ꠀꠝꠞꠣꠞ ꠀꠟ꠆ꠟꠣ ꠀꠞ ꠔꠞꠣꠘꠦꠀꠟꠣ ꠁꠍꠣ ꠀꠟ-ꠝꠍꠤꠞ ꠙꠣꠇ-ꠙꠞꠦꠎꠉꠣꠞꠤꠄ ꠄꠇꠁ ꠟꠣꠈꠣꠘ ꠝꠢꠣ ꠖꠣꠝꠤ ꠁꠝꠣꠘ ꠢꠣꠍꠤꠟ ꠇꠞꠍ, ꠀꠝꠤ ꠔꠥꠝꠞꠣꠞ ꠉꠦꠍꠦ ꠟꠦꠈꠞꠣꠝ।
2PE 1:2 ꠀꠟ꠆ꠟꠣ ꠙꠣꠇ ꠀꠞ ꠀꠝꠞꠣꠞ ꠝꠣꠟꠤꠇ ꠢꠎꠞꠔ ꠁꠍꠣꠞꠦ ꠙꠥꠞꠣꠙꠥꠞ ꠌꠤꠘꠣꠞ ꠝꠣꠎꠖꠤ, ꠔꠥꠝꠞꠣꠞ ꠃꠙꠞꠦ ꠛꠦꠡ ꠇꠞꠤ ꠞꠢꠝꠔ ꠀꠞ ꠡꠣꠘ꠆ꠔꠤ ꠘꠣꠎꠤꠟ ꠅꠃꠇ।
2PE 1:3 ꠎꠦꠁꠘ ꠔꠣꠘ ꠘꠤꠎꠞ ꠝꠢꠤꠝꠣ ꠀꠞ ꠉꠥꠘꠦ ꠀꠝꠞꠣꠞꠦ ꠖꠣꠅꠔ ꠖꠤꠍꠂꠘ, ꠔꠣꠘꠞꠦ ꠙꠥꠞꠣꠙꠥꠞ ꠌꠤꠘꠣꠞ ꠝꠣꠎꠖꠤ ꠔꠣꠘ ꠇꠥꠖꠞꠔꠦ ꠀꠝꠞꠣ ꠅꠟꠣ ꠘꠤꠀꠝꠔ ꠙꠣꠁꠍꠤ, ꠎꠣꠔꠦ ꠀꠝꠞꠣ ꠙꠞꠦꠎꠉꠣꠞ ꠛꠘꠤꠀ ꠎꠤꠘ꠆ꠖꠦꠉꠤ ꠇꠣꠐꠣꠁ।
2PE 1:4 ꠔꠣꠘ ꠝꠢꠤꠝꠣ ꠀꠞ ꠉꠥꠘꠦ ꠀꠝꠞꠣꠞ ꠟꠉꠦ ꠝꠢꠣ ꠖꠣꠝꠤ ꠀꠞ ꠛꠃꠔ ꠛꠠ ꠛꠠ ꠅꠀꠖꠣ ꠇꠞꠍꠂꠘ, ꠎꠣꠔꠦ ꠔꠥꠝꠞꠣ ꠖꠥꠘꠤꠀꠛꠤ ꠢꠇꠟ ꠛꠖ ꠈꠣꠁꠡ ꠕꠣꠇꠤ ꠛꠣꠌꠤꠀ ꠀꠟ꠆ꠟꠣꠁ ꠉꠥꠘꠞ ꠜꠣꠉꠤ ꠅꠅ।
2PE 1:5 ꠄꠞꠖꠣꠄ ꠔꠥꠝꠞꠣ ꠈꠥꠛ ꠈꠤꠀꠟꠤ ꠅꠁꠀ, ꠁꠝꠣꠘꠞ ꠟꠉꠦ ꠘꠦꠇ ꠈꠣꠁꠍꠟꠔ, ꠘꠦꠇ ꠈꠣꠁꠍꠟꠔꠞ ꠟꠉꠦ ꠀꠟ-ꠝꠍꠤꠞꠦ ꠌꠤꠘꠣꠞ ꠀꠈꠟ,
2PE 1:6 ꠁ ꠀꠈꠟꠞ ꠟꠉꠦ ꠘꠤꠎꠞꠦ ꠡꠣꠝꠟꠣꠘꠤ, ꠡꠣꠝꠟꠣꠘꠤꠞ ꠟꠉꠦ ꠗꠂꠎ꠆ꠎ ꠀꠞ ꠗꠂꠎ꠆ꠎꠞ ꠟꠉꠦ ꠙꠞꠦꠎꠉꠣꠞꠤ,
2PE 1:7 ꠙꠞꠦꠎꠉꠣꠞꠤꠞ ꠟꠉꠦ ꠄꠇꠦ-ꠅꠁꠘ꠆ꠘꠦ ꠝꠣꠄꠀ, ꠀꠞ ꠄꠇꠦ-ꠅꠁꠘ꠆ꠘꠦ ꠝꠣꠄꠀꠞ ꠟꠉꠦ ꠀꠟ꠆ꠟꠣꠁ ꠝꠢꠛ꠆ꠛꠔꠦ ꠛꠣꠠꠅ।
2PE 1:8 ꠔꠥꠝꠞꠣꠞ ꠝꠣꠎꠦ ꠎꠥꠖꠤ ꠁꠔꠣ ꠉꠥꠘꠣꠉꠥꠘ ꠕꠣꠇꠦ, ꠀꠞ ꠁꠔꠣ ꠜꠞꠤꠀ ꠙꠠꠣꠔ ꠞꠄ, ꠔꠦ ꠀꠝꠞꠣꠞ ꠝꠣꠟꠤꠇ ꠁꠍꠣ ꠀꠟ-ꠝꠍꠤꠞꠦ ꠙꠥꠞꠣꠙꠥꠞ ꠌꠤꠘꠣꠈꠣꠘ ꠔꠥꠝꠞꠣꠞ ꠛꠦꠇꠣꠝꠣ-ꠛꠦꠢꠥꠖꠣ ꠎꠣꠁꠔ ꠘꠣꠄ।
2PE 1:9 ꠅꠁꠟꠦ ꠎꠦ ꠎꠘꠞ ꠝꠣꠎꠦ ꠁꠔꠣ ꠉꠥꠘꠣꠉꠥꠘ ꠘꠣꠁ, ꠢꠦ ꠔ ꠀꠘ꠆ꠖꠣ, ꠢꠦ ꠇꠥꠘ꠆ꠔꠣꠃ ꠛꠥꠎꠦ ꠘꠣ। ꠇꠣꠞꠘ ꠀꠉꠞ ꠎꠦ ꠉꠥꠘꠣ ꠕꠣꠇꠤ ꠔꠣꠞꠦ ꠙꠣꠇ-ꠍꠣꠚ ꠇꠞꠣ ꠅꠁꠍꠦ, ꠁꠈꠣꠘ ꠢꠦ ꠚꠣꠃꠞꠤꠟꠤꠍꠦ।
2PE 1:10 ꠄꠞꠟꠣꠉꠤ ꠜꠣꠁ ꠅꠇꠟ ꠢꠥꠘꠅ, ꠀꠟ꠆ꠟꠣꠄ ꠎꠦꠘ ꠢꠣꠍꠣꠃ ꠔꠥꠝꠞꠣꠞꠦ ꠖꠣꠅꠔ ꠖꠤꠍꠂꠘ ꠀꠞ ꠙꠍꠘ꠆ꠖ ꠇꠞꠍꠂꠘ, ꠁꠔꠣ ꠘꠤꠌ꠆ꠌꠤꠔ ꠇꠞꠣꠞ ꠟꠣꠉꠤ ꠀꠞꠅ ꠛꠦꠡꠤ ꠈꠤꠀꠟꠤ ꠅꠅ। ꠁꠟꠣ ꠇꠞꠟꠦ ꠔꠥꠝꠞꠣ ꠇꠥꠘꠥ ꠡꠝꠄ ꠃꠡ꠆ꠐꠣ ꠈꠣꠁꠔꠣꠄ ꠘꠣꠄ।
2PE 1:11 ꠀꠞ ꠀꠝꠞꠣꠞ ꠝꠣꠟꠤꠇ ꠔꠞꠣꠘꠦꠀꠟꠣ ꠁꠍꠣ ꠀꠟ-ꠝꠍꠤꠞ ꠢꠣꠝꠦꠡꠣꠇꠥꠞ ꠛꠣꠖꠡꠣꠁꠔ ꠔꠥꠝꠞꠣꠞꠦ ꠀꠖꠞ ꠇꠞꠤ ꠢꠣꠞꠣꠁꠟ ꠅꠁꠛ।
2PE 1:12 ꠄꠞꠟꠣꠉꠤ, ꠀꠝꠤ ꠢꠣꠝꠦꠡꠣ ꠔꠥꠝꠞꠣꠞꠦ ꠅꠔꠣ ꠛꠦꠙꠣꠞꠦ ꠝꠘꠅ ꠇꠞꠣꠁ ꠖꠤꠞꠣꠝ, ꠎꠥꠖꠤꠅ ꠁꠔꠣ ꠔꠥꠝꠞꠣꠞ ꠎꠣꠘꠣ ꠀꠍꠦ ꠀꠞ ꠔꠥꠝꠞꠣꠞ ꠉꠦꠍꠦ ꠎꠦ ꠢꠇꠤꠇꠔ ꠀꠁꠍꠦ, ꠁꠔꠣꠔ ꠕꠤꠞꠅ ꠀꠍ।
2PE 1:13 ꠀꠍꠟꠦ ꠀꠝꠤ ꠝꠘꠅ ꠇꠞꠞꠣꠝ, ꠀꠝꠤ ꠎꠔꠖꠤꠘ ꠔꠣꠝ꠆ꠛꠥꠞ ꠟꠣꠈꠣꠘ ꠅꠃ ꠡꠞꠤꠟꠦ ꠛꠣꠌꠤꠀ ꠞꠁꠝꠥ, ꠅꠔꠖꠤꠘ ꠔꠥꠝꠞꠣꠞꠦ ꠅꠔꠣ ꠝꠘꠅ ꠇꠞꠣꠁ ꠖꠤꠀ ꠢꠎꠣꠉ ꠞꠣꠈꠣ ꠃꠌꠤꠔ।
2PE 1:14 ꠇꠣꠞꠘ ꠀꠝꠤ ꠔ ꠀꠞ ꠛꠦꠡꠤ ꠖꠤꠘ ꠅꠃ ꠡꠞꠤꠟꠦ ꠞꠁꠔꠣꠝ ꠘꠣꠄ, ꠀꠝꠞꠣꠞ ꠝꠣꠟꠤꠇ ꠁꠍꠣ ꠀꠟ-ꠝꠍꠤꠄ ꠁꠈꠣꠘ ꠀꠝꠣꠞꠦ ꠙꠞꠤꠡ꠆ꠇꠣꠞ ꠎꠣꠘꠣꠁ ꠖꠤꠍꠂꠘ।
2PE 1:15 ꠔꠦ ꠀꠝꠣꠞ ꠝꠃꠔꠞ ꠛꠣꠖꠦꠅ ꠢꠣꠝꠦꠡꠣ ꠎꠣꠔꠦ ꠅꠔꠣ ꠝꠘꠅ ꠞꠣꠈꠔꠣꠄ ꠙꠣꠞ, ꠀꠝꠤ ꠅꠃ ꠝꠦꠘꠔꠅ ꠇꠞꠝꠥ।
2PE 1:16 ꠀꠝꠞꠣꠞ ꠝꠣꠟꠤꠇ ꠁꠍꠣ ꠀꠟ-ꠝꠍꠤꠞ ꠇꠥꠖꠞꠔꠤ ꠡꠇ꠆ꠔꠤ ꠀꠞ ꠔꠣꠘ ꠢꠤꠞꠛꠣꠞ ꠔꠡꠞꠤꠚ ꠀꠘꠣꠞ ꠇꠕꠣ ꠎꠣꠘꠣꠘꠤꠔ ꠉꠤꠀ, ꠀꠝꠞꠣ ꠇꠥꠘꠥ ꠛꠣꠘꠣꠁꠟ ꠇꠤꠌ꠆ꠍꠣ ꠇꠁꠍꠤ ꠘꠣ। ꠀꠝꠞꠣ ꠔ ꠘꠤꠎꠞ ꠌꠃꠈꠦ ꠔꠣꠘ ꠝꠢꠤꠝꠣ ꠖꠦꠈꠍꠤ।
2PE 1:17 ꠀꠍꠝꠣꠘ ꠕꠣꠇꠤ ꠎꠣꠟꠣꠟ ꠀꠞ ꠡꠣꠘꠞ ꠎꠦ ꠀꠅꠀꠎ ꠀꠁꠟ, “ꠄꠁꠘꠃ ꠀꠝꠣꠞ ꠈꠣꠍ ꠝꠣꠄꠀꠞ ꠎꠘ ꠁꠛꠘꠥꠟ꠆ꠟꠣ, ꠄꠘ ꠃꠙꠞꠦ ꠀꠝꠤ ꠈꠥꠛ ꠈꠥꠡꠤ,” ꠅꠃ ꠀꠅꠀꠎꠞ ꠝꠣꠎꠖꠤ ꠀꠟ-ꠝꠍꠤꠄ ꠔꠣꠘ ꠉꠣꠁꠛꠤ ꠛꠣꠚ ꠀꠟ꠆ꠟꠣꠞ ꠉꠦꠍ ꠕꠣꠇꠤ ꠁꠎ꠆ꠎꠔ ꠀꠞ ꠉꠃꠞꠛ ꠙꠣꠁꠍꠂꠘ।
2PE 1:18 ꠀꠝꠞꠣ ꠎꠦꠛꠟꠣ ꠔꠣꠘ ꠟꠉꠦ ꠢꠃ ꠙꠛꠤꠔ꠆ꠞ ꠙꠣꠠꠅ ꠀꠍꠟꠣꠝ, ꠅꠃ ꠡꠝꠄ ꠘꠤꠎꠞ ꠇꠣꠘꠦ ꠛꠦꠢꠦꠡ꠆ꠔꠞ ꠅꠃ ꠉꠣꠁꠛꠤ ꠀꠅꠀꠎ ꠢꠥꠘꠍꠤ।
2PE 1:19 ꠀꠞ ꠀꠝꠞꠣꠞ ꠟꠣꠉꠤ ꠀꠞꠅ ꠛꠠ ꠙꠞꠝꠣꠘ ꠅꠁꠟ, ꠙꠣꠇ ꠇꠤꠔꠣꠛꠅ ꠘꠛꠤ ꠅꠇꠟꠦ ꠎꠔꠔꠣ ꠛꠣꠔꠣꠁ ꠉꠦꠍꠂꠘ। ꠀꠘ꠆ꠖꠣꠞꠤꠞ ꠝꠣꠎꠦ ꠔꠥꠝꠞꠣꠞ ꠌꠃꠈ ꠎꠦꠟꠣꠈꠣꠘ ꠞꠥꠡꠘꠤꠞ ꠛꠣꠄ ꠕꠣꠇꠦ, ꠑꠤꠇ ꠅꠟꠣꠈꠣꠘ ꠎꠔ ꠡꠝꠄ ꠛꠤꠀꠘ ꠅꠁꠍꠦ ꠘꠣ ꠀꠞ ꠔꠥꠝꠞꠣꠞ ꠖꠤꠟꠅ ꠚꠎꠞꠞ ꠡꠥꠇ-ꠔꠦꠞꠣ ꠃꠑꠍꠦ ꠘꠣ, ꠅꠔ ꠡꠝꠄ ꠔꠥꠝꠞꠣ ꠘꠛꠤ ꠅꠇꠟꠞ ꠇꠕꠣꠄ ꠈꠤꠀꠟꠤ ꠅꠅ, ꠔꠦꠃ ꠔꠥꠝꠞꠣꠞ ꠜꠣꠟꠣ ꠅꠁꠛ।
2PE 1:20 ꠀꠞ ꠈꠣꠍ ꠇꠞꠤ ꠝꠘꠅ ꠞꠣꠈꠤꠅ, ꠇꠤꠔꠣꠛꠞ ꠝꠣꠎꠞ ꠇꠥꠘꠥ ꠇꠕꠣ ꠘꠛꠤ ꠅꠇꠟꠞ ꠝꠘꠉꠠꠣ ꠘꠣꠄ।
2PE 1:21 ꠇꠣꠞꠘ ꠘꠛꠤ ꠅꠇꠟꠦ ꠔꠣꠞꠣꠞ ꠁꠌ꠆ꠍꠣꠝꠔ ꠇꠥꠘꠥ ꠇꠕꠣ ꠇꠁꠍꠂꠘ ꠘꠣ, ꠈꠣꠟꠤ ꠙꠣꠇ ꠞꠥꠢꠥꠞ ꠛꠟꠦ ꠀꠟ꠆ꠟꠣꠞ ꠖꠦꠅꠀ ꠛꠥꠟꠤ ꠛꠣꠔꠣꠁꠍꠂꠘ।
2PE 2:1 ꠝꠘꠅ ꠞꠣꠈꠤꠅ, ꠛꠘꠤ ꠁꠍꠞꠣꠁꠟꠞ ꠝꠣꠎꠦ ꠎꠦꠟꠣ ꠜꠘ꠆ꠒ ꠘꠛꠤ ꠅꠇꠟ ꠀꠍꠟꠣ, ꠔꠥꠝꠞꠣꠞ ꠝꠣꠎꠦꠅ ꠅꠃꠟꠣ ꠜꠘ꠆ꠒ ꠃꠡ꠆ꠔꠣꠖ ꠅꠇꠟ ꠕꠣꠇꠛꠣ। ꠔꠣꠞꠣ ꠟꠥꠇꠣꠁ ꠟꠥꠇꠣꠁ ꠅꠝꠘ ꠜꠥꠟ ꠔꠣꠟꠤꠝ ꠖꠤꠛ, ꠎꠦ ꠔꠣꠟꠤꠝꠦ ꠝꠣꠘꠡꠞꠦ ꠛꠤꠘꠣꠡ ꠇꠞꠦ ꠀꠞ ꠎꠦ ꠝꠣꠟꠤꠇꠦ ꠔꠣꠞꠣꠞꠦ ꠀꠎꠣꠖ ꠇꠞꠣꠞ ꠟꠣꠉꠤ ꠈꠞꠤꠖ ꠇꠞꠍꠂꠘ, ꠅꠃ ꠝꠣꠟꠤꠇꠞꠦ ꠙꠞ꠆ꠎꠘ꠆ꠔ ꠔꠣꠞꠣ ꠅꠡ꠆ꠛꠤꠇꠣꠞ ꠇꠞꠛ। ꠅꠟꠣꠈꠣꠘ ꠈꠥꠛ ꠎꠟꠖꠤ ꠔꠣꠞꠣ ꠘꠤꠎꠞ ꠃꠙꠞꠦ ꠛꠤꠘꠣꠡ ꠒꠣꠇꠤꠀ ꠀꠘꠛ।
2PE 2:2 ꠔꠣꠞꠣꠞ ꠖꠦꠈꠣ-ꠖꠦꠈꠤ ꠛꠃꠔ ꠝꠣꠘꠥꠡ ꠈꠛꠤꠍꠤ ꠙꠕꠦ ꠎꠣꠁꠛ, ꠔꠣꠞꠣꠞ ꠟꠣꠉꠤꠃ ꠁꠍꠣꠄꠁ ꠢꠇ ꠔꠞꠤꠇꠣꠞ ꠛꠖꠘꠣꠝ ꠅꠁꠛ।
2PE 2:3 ꠟꠥꠜ-ꠟꠣꠟꠌ ꠇꠞꠤꠀ ꠍꠟ-ꠌꠔꠥꠞꠤꠞ ꠝꠣꠔ ꠝꠣꠔꠤꠀ, ꠘꠤꠎꠞ ꠟꠣꠜꠞ ꠀꠡꠣꠄ ꠔꠣꠞꠣ ꠔꠥꠝꠞꠣꠞꠦ ꠇꠣꠝꠅ ꠟꠣꠉꠣꠁꠛ। ꠔꠣꠞꠣꠞ ꠙꠣꠅꠘꠣ ꠡꠣꠎꠣ ꠔ ꠛꠃꠔ ꠖꠤꠘ ꠕꠣꠇꠤ ꠛꠣꠞ ꠌꠣꠞ, ꠔꠣꠞꠣꠞ ꠛꠤꠘꠣꠡꠅ ꠛꠦꠡꠤ ꠖꠦꠞꠤ ꠘꠣꠄ।
2PE 2:4 ꠄꠝꠘꠇꠤ ꠀꠉꠞ ꠚꠤꠞꠤꠡ꠆ꠔꠣ ꠅꠇꠟꠦ ꠎꠦꠛꠟꠣ ꠉꠥꠘꠣ ꠇꠞꠍꠟꠣ, ꠅꠃ ꠡꠝꠄ ꠀꠟ꠆ꠟꠣꠄ ꠔꠣꠞꠣꠞꠦ ꠞꠦꠢꠣꠁ ꠖꠤꠍꠂꠘ ꠘꠣ, ꠛꠞꠋ ꠖꠥꠎꠈꠞ ꠀꠘ꠆ꠖꠣꠁꠞꠞ ꠉꠣꠔꠅ ꠚꠣꠟꠣꠁꠀ ꠔꠣꠞꠣꠞ ꠛꠤꠌꠣꠞ ꠇꠞꠣꠞ ꠟꠣꠉꠤ ꠞꠣꠈꠍꠂꠘ।
2PE 2:5 ꠀꠞ ꠔꠣꠁꠘ ꠢꠃ ꠀꠉꠞ ꠖꠥꠘꠤꠀꠞꠦꠅ ꠞꠦꠢꠣꠁ ꠖꠤꠍꠂꠘ ꠘꠣ, ꠛꠞꠋ ꠅꠃ ꠛꠦ-ꠖꠤꠘ ꠅꠇꠟꠞꠦ ꠛꠁꠘ꠆ꠘꠣꠞ ꠙꠣꠘꠤꠖꠤ ꠝꠣꠞꠍꠂꠘ। ꠅꠁꠟꠦ ꠘꠥꠢ ꠘꠛꠤ ꠀꠞ ꠅꠁꠘ꠆ꠘ ꠡꠣꠔ ꠎꠘꠞꠦ ꠔꠣꠁꠘ ꠛꠣꠌꠣꠁꠍꠂꠘ। ꠇꠣꠞꠘ ꠘꠥꠢ ꠘꠛꠤꠄ ꠙꠞꠦꠎꠉꠣꠞꠤꠞ ꠇꠕꠣ ꠔꠛꠟꠤꠉ ꠇꠞꠔꠣ।
2PE 2:6 ꠀꠞ ꠀꠟ꠆ꠟꠣꠄ ꠍꠣꠖꠥꠝ ꠀꠞ ꠀꠝꠥꠞꠣ ꠐꠣꠃꠘꠞꠦ ꠀꠉꠥꠁꠘ ꠖꠤꠀ ꠎꠣꠟꠣꠁꠀ ꠍꠣꠟꠤ ꠇꠞꠤꠀ, ꠅꠘꠞ ꠝꠣꠘꠡꠞꠦ ꠡꠣꠎꠣ ꠖꠤꠍꠟꠣ। ꠅꠃ ꠘꠝꠥꠘꠣꠄ ꠔꠣꠁꠘ ꠖꠦꠈꠣꠁꠍꠟꠣ, ꠛꠦ-ꠖꠤꠘ ꠅꠇꠟꠞ ꠖꠡꠣ ꠇꠤꠟꠣꠈꠣꠘ ꠅꠄ।
2PE 2:7 ꠔꠣ-ꠅ ꠟꠥꠔ ꠘꠛꠤꠞꠦ ꠔꠣꠁꠘ ꠛꠣꠌꠣꠁꠍꠂꠘ। ꠄꠁꠘ ꠔ ꠙꠞꠦꠎꠉꠣꠞ ꠝꠣꠘꠥꠡ ꠀꠍꠟꠣ, ꠢꠤꠘꠞ ꠘꠣꠚꠞꠝꠣꠘ ꠅꠇꠟꠞ ꠛꠦꠡꠣꠝꠣꠟ ꠜꠣꠛ ꠖꠦꠈꠤꠀ ꠔꠣꠁꠘ ꠈꠥꠛ ꠇꠡ꠆ꠐ ꠙꠣꠁꠔꠣ।
2PE 2:8 ꠖꠤꠘ ꠖꠤꠘ ꠔꠣꠞꠣꠞ ꠀꠇꠣꠝ-ꠇꠥꠇꠣꠝ ꠀꠞ ꠇꠕꠣꠛꠣꠞ꠆ꠔꠣ ꠢꠥꠘꠔꠣ। ꠡꠞꠤꠅꠔꠞ ꠛꠤꠙꠇ꠆ꠇꠦ ꠔꠣꠞꠣꠞ ꠘꠣꠚꠞꠝꠣꠘꠤ ꠖꠦꠈꠤꠀ, ꠅꠃ ꠙꠞꠦꠎꠉꠣꠞ ꠎꠘꠞ ꠝꠘꠅ ꠈꠥꠛ ꠖꠥꠈ ꠟꠣꠉꠔ।
2PE 2:9 ꠅꠔꠣ ꠕꠣꠇꠤ ꠖꠦꠈꠣ ꠎꠣꠞ, ꠀꠟ꠆ꠟꠣꠄ ꠔ ꠙꠞꠦꠎꠉꠣꠞ ꠝꠣꠘꠡꠞꠦ ꠙꠞꠤꠇ꠆ꠇꠣꠞ ꠝꠣꠎ ꠕꠣꠇꠤꠅ ꠛꠣꠌꠣꠁꠔꠣ ꠙꠣꠞꠂꠘ। ꠅꠁꠟꠦ ꠎꠦꠞꠣ ꠛꠦ-ꠖꠤꠘꠤ ꠇꠣꠝ ꠇꠞꠦ, ꠈꠣꠍ ꠇꠞꠤ ꠎꠦꠞꠣ ꠈꠛꠤꠍꠤ ꠇꠞꠦ, ꠇꠥꠘꠥ ꠡꠣꠡꠘ ꠝꠣꠘꠦ ꠘꠣ, ꠔꠣꠞꠣꠞꠦ ꠡꠣꠎꠣ ꠖꠦꠅꠀꠐꠣ ꠇꠤꠀꠝꠔ ꠙꠞ꠆ꠎꠘ꠆ꠔ ꠞꠣꠈꠔꠣꠅ ꠙꠣꠞꠂꠘ। ꠁ ꠜꠘ꠆ꠒ ꠃꠡ꠆ꠔꠣꠖ ꠅꠇꠟ ꠈꠥꠛ ꠛꠖ-ꠡꠣꠅꠡꠤ। ꠔꠣꠞꠣ ꠘꠤꠎꠞ ꠁꠌ꠆ꠍꠣꠝꠔ ꠌꠟꠦ ꠀꠞ ꠛꠣꠔꠥꠘꠤ ꠡꠞ꠆ꠖꠣꠞ ꠅꠇꠟꠞ ꠛꠖꠘꠣꠝ ꠉꠣꠁꠔꠦ ꠒꠞꠣꠄ ꠘꠣ।
2PE 2:11 ꠚꠤꠞꠤꠡ꠆ꠔꠣ ꠅꠇꠟ ꠡꠇ꠆ꠔꠤ ꠀꠞ ꠈꠦꠝꠔꠣꠄ ꠄꠞꠣ ꠕꠣꠇꠤ ꠛꠃꠔ ꠛꠠ ꠅꠁꠟꠦꠅ, ꠅꠃ ꠛꠣꠔꠥꠘꠤ ꠡꠞ꠆ꠖꠣꠞꠞ ꠛꠤꠙꠇ꠆ꠇꠦ ꠝꠣꠛꠥꠖꠞ ꠖꠞꠛꠣꠞꠅ ꠛꠖꠘꠣꠝ ꠉꠣꠁꠀ ꠇꠥꠘꠥ ꠘꠣꠟꠤꠡ ꠖꠦꠁꠘ ꠘꠣ।
2PE 2:12 ꠛꠦꠀꠈꠟ ꠎꠋꠟꠤ ꠎꠣꠘꠥꠀꠞ ꠅꠇꠟꠦ ꠘꠣ ꠛꠥꠎꠤꠀ ꠎꠦꠟꠣ ꠘꠤꠎꠞ ꠈꠥꠡꠤꠄ ꠌꠟꠦ ꠀꠞ ꠗꠞꠣ ꠈꠣꠁꠀ ꠝꠞꠦ, ꠅꠃ ꠜꠘ꠆ꠒ ꠃꠡ꠆ꠔꠣꠖ ꠅꠇꠟꠅ ꠅꠔꠣꠞ ꠟꠣꠈꠣꠘ। ꠔꠣꠞꠣ ꠎꠦꠔꠣ ꠛꠥꠎꠦ ꠘꠣ, ꠅꠔꠣꠞꠅ ꠛꠖꠘꠣꠝ ꠉꠣꠄ। ꠄꠞꠟꠣꠉꠤ ꠅꠃ ꠎꠋꠟꠤ ꠎꠣꠘꠥꠀꠞꠞ ꠟꠣꠈꠣꠘ ꠔꠣꠞꠣꠞ ꠛꠤꠘꠣꠡ ꠀꠍꠦ,
2PE 2:13 ꠈꠣꠞꠣꠙꠤꠞ ꠛꠖꠟꠣ ꠛꠣꠛꠔ ꠔꠣꠞꠣꠞ ꠟꠣꠉꠤꠅ ꠈꠣꠞꠣꠙꠤ ꠀꠍꠦ। ꠖꠤꠘꠞ ꠛꠦꠟꠣꠄꠅ ꠝꠃꠎ-ꠚꠥꠞ꠆ꠔꠤ ꠇꠞꠤꠀ ꠝꠖ ꠈꠣꠁꠔꠦ ꠔꠣꠞꠣꠞ ꠜꠣꠟꠣ ꠟꠣꠉꠦ। ꠔꠣꠞꠣ ꠔ ꠔꠥꠝꠞꠣꠞ ꠈꠣꠘꠤꠞ ꠕꠣꠟꠞ ꠕꠥ ꠀꠞ ꠉꠥ। ꠔꠣꠞꠣ ꠎꠦꠛꠟꠣ ꠔꠥꠝꠞꠣꠞ ꠟꠉꠦ ꠛꠁꠀ ꠝꠦꠎꠛꠣꠘꠤ ꠈꠣꠄ, ꠅꠃ ꠡꠝꠄ ꠔꠣꠞꠣ ꠜꠘ꠆ꠒꠣꠝꠤ ꠇꠞꠔꠦ ꠈꠥꠛ ꠀꠞꠣꠝ ꠙꠣꠄ।
2PE 2:14 ꠔꠣꠞꠣꠞ ꠌꠃꠈ ꠎꠤꠘꠣꠄ ꠜꠞꠣ, ꠉꠥꠘꠣꠞ ꠇꠣꠝ ꠇꠥꠘꠥ ꠡꠝꠄ ꠛꠘ꠆ꠖ ꠇꠞꠦ ꠘꠣ। ꠅꠡ꠆ꠕꠤꠞ ꠝꠣꠘꠡꠞꠦ ꠛꠦ-ꠙꠕꠦ ꠐꠣꠘꠤꠀ ꠘꠦꠄ। ꠔꠣꠞꠣꠞ ꠝꠘ ꠟꠥꠜ-ꠟꠣꠟꠌꠞ ꠃꠡ꠆ꠔꠣꠖ। ꠁꠉꠥꠁꠘ ꠔ ꠟꠣꠘ꠆ꠘꠔꠤ!
2PE 2:15 ꠔꠣꠞꠣ ꠛꠣꠟꠣꠝ ꠛꠤꠘ ꠛꠣꠃꠞꠞ ꠟꠣꠈꠣꠘ ꠍꠢꠤ ꠙꠕ ꠍꠣꠠꠤꠀ ꠛꠦ-ꠙꠕꠦ ꠉꠦꠍꠦꠉꠤ। ꠅꠃ ꠜꠘ꠆ꠒ ꠙꠤꠞ ꠛꠣꠟꠣꠝ ꠔ ꠢꠣꠞꠣꠝ ꠇꠣꠝꠣꠁ-ꠞꠥꠎꠉꠣꠞꠞ ꠙꠣꠉꠟ ꠀꠍꠤꠟ,
2PE 2:16 ꠅꠁꠟꠦ ꠅꠟꠣ ꠛꠖ ꠇꠣꠝꠞ ꠟꠣꠉꠤ ꠢꠦ ꠛꠥꠛꠣ ꠉꠣꠗꠣꠞ ꠗꠝꠇ ꠈꠣꠁꠍꠦ। ꠅꠃ ꠉꠣꠗꠣꠄ ꠝꠣꠘꠥꠡ ꠛꠥꠟꠤꠄ ꠝꠣꠔꠤꠀ ꠔꠣꠞ ꠙꠣꠉꠟꠣꠝꠤꠔ ꠛꠣꠗꠣ ꠖꠤꠍꠦ।
2PE 2:17 ꠁꠔꠣ ꠝꠣꠘꠥꠡ ꠔ ꠙꠣꠘꠤꠞ ꠢꠥꠇꠘꠣ ꠇꠥꠀꠞ ꠟꠣꠈꠣꠘ ꠀꠞ ꠛꠣꠔꠣꠡꠞ ꠇꠥꠠꠥꠟ꠆ꠟꠣꠞ ꠟꠣꠈꠣꠘ। ꠔꠣꠞꠣꠞ ꠟꠣꠉꠤ ꠉꠁꠘ ꠀꠘ꠆ꠖꠣꠁꠞ ꠎꠝꠣ ꠞꠣꠈꠣ ꠀꠍꠦ।
2PE 2:18 ꠔꠣꠞꠣ ꠛꠠ ꠛꠠ ꠛꠦꠇꠣꠝꠣ ꠝꠣꠔ ꠝꠣꠔꠦ। ꠀꠞ ꠎꠦꠞꠣ ꠕꠥꠠꠣ ꠀꠉꠦ ꠇꠥ-ꠙꠕ ꠍꠣꠠꠤꠀ ꠎꠣꠘ ꠛꠣꠌꠣꠘꠤꠞ ꠟꠣꠉꠤ ꠜꠣꠉꠤꠍꠂꠘ, ꠅꠔꠣ ꠝꠣꠘꠡꠞꠦ ꠡꠞꠤꠟꠞ ꠈꠣꠁꠡꠦ ꠌꠟꠤꠀ ꠛꠖꠝꠣꠁꠡꠤ ꠇꠞꠣꠞ ꠁꠘ꠆ꠗꠘ ꠖꠦꠄ।
2PE 2:19 ꠢꠃ ꠜꠘ꠆ꠒ ꠃꠡ꠆ꠔꠣꠖ ꠅꠇꠟꠦ ꠇꠍꠝ ꠈꠣꠁꠀ ꠇꠄ ꠝꠣꠘꠡꠞꠦ ꠀꠎꠣꠖ ꠇꠞꠔ, ꠅꠁꠟꠦ ꠔꠣꠞꠣ ꠘꠤꠎꠦꠃ ꠘꠚꠞꠔꠤ ꠇꠣꠝꠞ ꠉꠥꠟꠣꠝ। ꠎꠣꠘ ꠔ, ꠇꠦꠃ ꠎꠥꠖꠤ ꠇꠥꠘ꠆ꠔꠣꠞ ꠉꠦꠍꠦ ꠀꠞꠤꠎꠣꠄ, ꠔꠦ ꠢꠦ ꠁꠔꠣꠞ ꠉꠥꠟꠣꠝ।
2PE 2:20 ꠔꠦ ꠀꠝꠞꠣꠞ ꠝꠣꠟꠤꠇ ꠀꠞ ꠔꠞꠣꠘꠦꠀꠟꠣ ꠁꠍꠣ ꠀꠟ-ꠝꠍꠤꠞꠦ ꠌꠤꠘꠤꠀ ꠢꠣꠞꠤ ꠎꠉꠔꠞ ꠈꠣꠞꠣꠙꠤ ꠕꠣꠇꠤ ꠢꠞꠤꠀ ꠀꠁꠀꠅ, ꠇꠦꠃ ꠎꠥꠖꠤ ꠢꠤꠞꠛꠣꠞ ꠉꠤꠀ ꠅꠃ ꠈꠣꠞꠣꠙꠤꠞ ꠎꠣꠟꠅ ꠀꠐꠇꠣꠄ, ꠔꠦ ꠔꠣꠞꠣꠞ ꠙꠄꠟꠣ ꠖꠡꠣ ꠕꠣꠇꠤ ꠢꠦꠡ ꠖꠡꠣ ꠀꠞꠅ ꠝꠘ꠆ꠖ।
2PE 2:21 ꠙꠞꠦꠎꠉꠣꠞꠤꠞ ꠙꠕ ꠌꠤꠘꠣꠞ ꠛꠣꠖꠦꠅ ꠔꠣꠞꠣꠞ ꠉꠦꠍꠦ ꠡꠝꠎꠣꠁꠟ ꠅꠃ ꠙꠛꠤꠔ꠆ꠞ ꠢꠥꠇꠥꠝꠞ ꠃꠟꠐꠣ ꠉꠦꠍꠦ, ꠄꠞ ꠕꠣꠇꠤ ꠀꠞꠅ ꠜꠣꠟꠣ ꠀꠍꠤꠟ ꠁ ꠙꠕ ꠘꠣ ꠌꠤꠘꠣ।
2PE 2:22 ꠔꠣꠞꠣꠞ ꠛꠦꠙꠣꠞꠦ ꠅꠃ ꠍꠤꠟ꠆ꠟꠦꠈꠃ ꠡꠑꠤꠇ, “ꠇꠥꠇꠞꠦ ꠘꠤꠎꠞ ꠛꠝꠤ ꠚꠤꠞꠤꠀ ꠈꠣꠄ,” ꠀꠞ “ꠡꠥꠅꠞꠞꠦ ꠘꠣꠅꠀꠁꠟꠦꠅ ꠚꠦꠇꠅ ꠙꠠꠤꠀ ꠉꠠꠤꠀꠄ।”
2PE 3:1 ꠝꠣꠄꠀꠞ ꠜꠣꠁ ꠅꠇꠟ, ꠁꠈꠣꠘ ꠅꠁꠟ ꠔꠥꠝꠞꠣꠞ ꠉꠦꠍꠦ ꠟꠦꠈꠣ ꠀꠝꠣꠞ ꠖꠥꠁ ꠘꠝ꠆ꠛꠞ ꠌꠤꠑꠤ, ꠁ ꠖꠥꠁꠅ ꠌꠤꠑꠤꠔꠃ ꠀꠝꠤ ꠔꠥꠝꠞꠣꠞꠦ ꠈꠤꠀꠟ ꠇꠞꠣꠁ ꠖꠤꠞꠣꠝ ꠀꠞ ꠔꠥꠝꠞꠣꠞ ꠖꠤꠟꠞꠦ ꠢꠎꠣꠉ ꠇꠞꠞꠣꠝ।
2PE 3:2 ꠀꠝꠤ ꠌꠣꠁꠞꠣꠝ, ꠙꠛꠤꠔ꠆ꠞ ꠘꠛꠤ ꠅꠇꠟꠦ ꠀꠉꠦ ꠎꠔꠔꠣ ꠛꠣꠔꠣꠁꠍꠂꠘ, ꠀꠞ ꠀꠝꠞꠣꠞ ꠔꠞꠣꠘꠦꠀꠟꠣ ꠝꠣꠟꠤꠇꠦ ꠔꠥꠝꠞꠣꠞ ꠉꠦꠍꠞ ꠍꠣꠢꠣꠛꠤ ꠅꠇꠟꠞ ꠝꠣꠎꠖꠤ ꠎꠦ ꠢꠥꠇꠥꠝ ꠖꠤꠍꠂꠘ, ꠅꠔꠣ ꠝꠘꠅ ꠞꠣꠈꠅ।
2PE 3:3 ꠈꠥꠛ ꠈꠤꠀꠟ ꠇꠞꠤ ꠛꠥꠎꠤꠅ, ꠀꠈꠦꠞꠤ ꠎꠝꠣꠘꠣꠔ ꠞꠋ-ꠔꠣꠝꠡꠣ ꠇꠞꠞꠣ ꠅꠇꠟꠦ ꠞꠋ-ꠔꠣꠝꠡꠣ ꠟꠁꠀ ꠀꠎꠤꠛꠣ, ꠔꠣꠞꠣ ꠎꠣꠞꠎꠤꠞ ꠈꠣꠁꠡꠦ ꠌꠟꠛꠣ।
2PE 3:4 ꠔꠣꠞꠣ ꠇꠁꠛꠣ, “ꠇꠤꠔꠣ ꠛꠣ, ꠢꠦꠁꠘ ꠀꠁꠛꠣꠞ ꠟꠣꠉꠤ ꠎꠦ ꠅꠀꠖꠣ ꠀꠍꠤꠟ, ꠁꠔꠣꠞ ꠇꠤꠔꠣ ꠅꠁꠟ? ꠖꠥꠘꠤꠀꠞ ꠡꠥꠞꠥ ꠕꠣꠇꠤ ꠎꠦꠟꠣꠈꠣꠘ ꠌꠟꠍꠤꠟ, ꠀꠝꠞꠣꠞ ꠛꠣꠚ-ꠖꠣꠖꠣꠞ ꠝꠞꠘꠞ ꠛꠣꠖ ꠕꠣꠇꠤ ꠅꠈꠘꠅ ꠔ ꠅꠟꠣꠈꠣꠘꠃ ꠌꠟꠦꠞ।”
2PE 3:5 ꠀꠍꠟꠦ ꠁꠔꠣꠄ ꠔ ꠁꠌ꠆ꠍꠣ ꠇꠞꠤꠃ ꠚꠣꠃꠞꠤꠟꠣꠄ, ꠛꠃꠔ ꠖꠤꠘ ꠀꠉꠦ ꠀꠟ꠆ꠟꠣꠞ ꠇꠣꠟꠣꠝꠞ ꠛꠟꠦ ꠀꠍꠝꠣꠘ ꠙꠄꠖꠣ ꠅꠁꠍꠦ ꠀꠞ ꠙꠣꠘꠤꠞꠦ ꠢꠞꠣꠁ ꠖꠤꠀ ꠎꠝꠤꠘ ꠛꠣꠞ ꠇꠞꠣ ꠅꠁꠍꠤꠟ, ꠙꠣꠘꠤꠞꠦ ꠎꠝꠤꠘꠞ ꠌꠣꠁꠞꠅ ꠉꠣꠟꠣꠛꠣꠄ ꠖꠟꠣ ꠇꠞꠣ ꠅꠁꠍꠤꠟ।
2PE 3:6 ꠛꠣꠖꠦ ꠢꠃ ꠙꠣꠘꠤꠄ ꠛꠁꠘ꠆ꠘꠣ ꠅꠁꠀ ꠢꠤ ꠎꠝꠣꠘꠣꠞ ꠖꠥꠘꠤꠀꠞꠦ ꠛꠤꠘꠣꠡ ꠇꠞꠍꠤꠟ।
2PE 3:7 ꠀꠞ ꠢꠃ ꠇꠣꠟꠣꠝꠞ ꠛꠟꠦ, ꠅꠈꠘꠇꠥꠞ ꠀꠍꠝꠣꠘ-ꠎꠝꠤꠘꠞꠦ ꠀꠉꠥꠁꠘꠖꠤ ꠎꠣꠟꠣꠁꠛꠣꠞ ꠟꠣꠉꠤ ꠞꠣꠈꠣ ꠅꠞ। ꠀꠈꠦꠞꠤ ꠛꠤꠌꠣꠞ ꠖꠤꠘ ꠙꠞ꠆ꠎꠘ꠆ꠔ ꠁꠔꠣꠞꠦ ꠅꠟꠣ ꠞꠇ꠆ꠇꠣ ꠇꠞꠣ ꠅꠞ, ꠢꠃ ꠖꠤꠘ ꠛꠦ-ꠖꠤꠘ ꠅꠇꠟꠞ ꠡꠞ꠆ꠛꠘꠣꠡ ꠅꠁꠛ।
2PE 3:8 ꠔꠣ-ꠅ ꠜꠣꠁ ꠅꠇꠟ, ꠔꠥꠝꠞꠣ ꠁꠈꠣꠘ ꠚꠣꠃꠞꠤꠅ ꠘꠣ, ꠝꠣꠟꠤꠇꠞ ꠉꠦꠍꠦ ꠄꠇ ꠖꠤꠘ ꠄꠇ ꠀꠎꠣꠞ ꠛꠍꠞꠞ ꠢꠝꠣꠘ ꠀꠞ ꠄꠇ ꠀꠎꠣꠞ ꠛꠍꠞ ꠄꠇ ꠖꠤꠘꠞ ꠢꠝꠣꠘ।
2PE 3:9 ꠇꠥꠘꠥ ꠇꠥꠘꠥ ꠝꠣꠘꠡꠦ ꠝꠘꠅ ꠇꠞꠂꠘ, ꠝꠣꠟꠤꠇꠦ ꠔꠣꠘ ꠅꠀꠖꠣ ꠙꠥꠞꠘ ꠇꠞꠔꠦ ꠖꠦꠞꠤ ꠇꠞꠞꠣ, ꠁꠈꠣꠘ ꠑꠤꠇ ꠘꠣꠄ। ꠀꠍꠟꠦ ꠔꠣꠁꠘ ꠔꠥꠝꠞꠣꠞ ꠛꠣꠄ ꠍꠛꠞ ꠇꠞꠤꠀ ꠞꠁꠍꠂꠘ, ꠔꠣꠁꠘ ꠌꠣꠁꠞꠣ ꠘꠣ ꠇꠦꠃ ꠛꠤꠘꠣꠡ ꠅꠃꠇ, ꠛꠞꠋ ꠢꠇꠟꠞꠦ ꠔꠃꠛꠣ ꠇꠞꠣꠞ ꠡꠥꠎꠥꠉ ꠖꠤꠞꠣ।
2PE 3:10 ꠅꠁꠟꠦ ꠝꠣꠟꠤꠇ ꠁꠍꠣ ꠀꠁꠛꠣꠞ ꠖꠤꠘ ꠔ ꠌꠥꠞꠞ ꠟꠣꠈꠣꠘ ꠀꠈꠔꠣꠃ ꠀꠁꠛ। ꠢꠃ ꠖꠤꠘ ꠀꠍꠝꠣꠘꠦ ꠢꠥ ꠢꠥ ꠀꠅꠀꠎ ꠇꠞꠤꠀ ꠛꠤꠘꠣꠡ ꠅꠁꠛ ꠀꠞ ꠙꠄꠖꠣ ꠇꠞꠣ ꠢꠇꠟꠔꠣ ꠀꠉꠥꠁꠘꠦ ꠉꠟꠤꠀ ꠝꠤꠟꠣꠁ ꠎꠤꠛ। ꠖꠥꠘꠤꠀ ꠀꠞ ꠄꠞ ꠝꠣꠎꠦ ꠎꠔꠔꠣ ꠇꠞꠣ ꠅꠁꠍꠦ, ꠢꠇ꠆ꠇꠟꠔꠣ ꠎꠣꠁꠞ ꠅꠁꠛ।
2PE 3:11 ꠅꠟꠣꠈꠣꠘ ꠢꠇ꠆ꠇꠟꠔꠣ ꠛꠤꠘꠣꠡ ꠅꠁꠛ ꠎꠣꠘꠤꠀ, ꠔꠥꠝꠞꠣ ꠇꠤꠟꠣꠈꠣꠘ ꠞꠅꠀ ꠎꠞꠥꠞ? ꠔꠥꠝꠞꠣ ꠙꠣꠇ-ꠙꠛꠤꠔ꠆ꠞ ꠞꠁꠀ ꠙꠞꠦꠎꠉꠣꠞ ꠎꠤꠘ꠆ꠖꠦꠉꠤ ꠇꠣꠐꠣꠁꠀ,
2PE 3:12 ꠀꠟ꠆ꠟꠣꠞ ꠑꠤꠇ ꠇꠞꠣ ꠖꠤꠘꠞ ꠟꠣꠉꠤ ꠀꠡꠤꠇ ꠅꠁꠀ ꠛꠣꠞ ꠌꠣꠅ। ꠢꠃ ꠖꠤꠘ ꠔ ꠀꠍꠝꠣꠘ ꠎꠟꠤ ꠎꠟꠤ ꠛꠤꠘꠣꠡ ꠅꠁꠛ ꠀꠞ ꠙꠄꠖꠣ ꠇꠞꠣ ꠢꠇꠟꠔꠣ ꠀꠉꠥꠁꠘꠦ ꠉꠟꠤꠎꠤꠛ।
2PE 3:13 ꠅꠁꠟꠦ ꠀꠝꠞꠣ ꠀꠟ꠆ꠟꠣ ꠙꠣꠇꠞ ꠅꠀꠖꠣ ꠇꠞꠣ ꠘꠄꠀ ꠀꠍꠝꠣꠘ, ꠘꠄꠀ ꠎꠝꠤꠘꠞ ꠛꠣꠞ ꠌꠣꠁꠞꠣꠝ, ꠎꠦꠈꠣꠘꠅ ꠈꠣꠟꠤ ꠙꠞꠦꠎꠉꠣꠞꠤꠞ ꠑꠤꠇꠣꠘꠣ।
2PE 3:14 ꠄꠞꠟꠣꠉꠤ ꠜꠣꠁ ꠅꠇꠟ, ꠔꠥꠝꠞꠣ ꠎꠦꠛꠟꠣ ꠅꠃ ꠖꠤꠘꠞ ꠟꠣꠉꠤ ꠛꠣꠞ ꠌꠣꠅꠀꠔ ꠀꠍ, ꠔꠦ ꠈꠥꠛ ꠈꠤꠀꠟ ꠇꠞꠅ, ꠅꠃ ꠖꠤꠘ ꠔꠣꠁꠘ ꠎꠣꠘꠥ ꠔꠥꠝꠞꠣꠞꠦ ꠘꠤꠈꠥꠔ-ꠘꠤꠡ꠆ꠇꠟꠋꠇ ꠢꠣꠟꠔꠦ ꠡꠣꠘ꠆ꠔꠤꠞ ꠝꠣꠎꠦ ꠖꠦꠈꠂꠘ।
2PE 3:15 ꠀꠞ ꠀꠝꠞꠣꠞ ꠝꠣꠟꠤꠇꠞ ꠟꠣꠝ꠆ꠛꠣ ꠍꠛꠞꠉꠣꠞꠤꠞꠦ ꠝꠣꠘꠡꠞ ꠎꠣꠘ ꠛꠣꠌꠣꠘꠤꠞ ꠡꠥꠎꠥꠉ ꠝꠘꠅ ꠇꠞꠤꠅ। ꠅꠃ ꠄꠇꠁ ꠇꠕꠣ ꠀꠟ꠆ꠟꠣꠞ ꠖꠦꠅꠀ ꠀꠈꠟꠦ ꠀꠝꠞꠣꠞ ꠝꠣꠄꠀꠞ ꠜꠣꠁ ꠙꠣꠃꠟꠥꠍꠦꠅ ꠔꠥꠝꠞꠣꠞ ꠉꠦꠍꠦ ꠟꠦꠈꠍꠂꠘ।
2PE 3:16 ꠔꠣꠘ ꠢꠇ꠆ꠇꠟ ꠌꠤꠑꠤꠔꠃ ꠅꠃ ꠛꠦꠙꠣꠞꠦ ꠟꠦꠈꠂꠘ। ꠄꠞ ꠝꠣꠎꠦ ꠇꠤꠍꠥ ꠛꠦꠙꠣꠞ ꠀꠍꠦ ꠎꠦꠔꠣ ꠛꠥꠎꠣ ꠇꠑꠤꠘ, ꠈꠣꠟꠤ ꠛꠦꠀꠈꠟ ꠀꠞ ꠛꠦꠖꠤꠡꠣ ꠎꠘꠦ ꠅꠁꠘ꠆ꠘꠣꠁꠘ꠆ꠘ ꠇꠤꠔꠣꠛꠞ ꠟꠣꠈꠣꠘ ꠁꠔꠣꠞ ꠝꠣꠘꠤꠅ ꠛꠖꠟꠣꠁꠀ, ꠘꠤꠎꠞ ꠡꠞ꠆ꠛꠘꠣꠡ ꠒꠣꠇꠤꠀ ꠀꠘꠦ।
2PE 3:17 ꠜꠣꠁ ꠅꠇꠟ, ꠅꠃ ꠇꠕꠣ ꠅꠇꠟ ꠔꠥꠝꠞꠣ ꠀꠉꠦꠃ ꠎꠣꠘꠍ, ꠄꠞꠟꠣꠉꠤ ꠢꠥꠡꠤꠀꠞ ꠅꠅ ꠎꠣꠔꠦ ꠅꠃ ꠘꠣꠚꠞꠝꠣꠘ ꠝꠣꠘꠡꠞ ꠜꠥꠟꠦ ꠔꠥꠝꠞꠣꠞꠦ ꠜꠥꠟ ꠙꠕꠦ ꠘꠣ ꠘꠦꠄ, ꠀꠞ ꠁꠝꠣꠘꠤ ꠜꠤꠔ ꠕꠣꠇꠤ ꠘꠣ ꠢꠞꠣꠄ।
2PE 3:18 ꠔꠥꠝꠞꠣ ꠀꠝꠞꠣꠞ ꠝꠣꠟꠤꠇ ꠀꠞ ꠔꠞꠣꠘꠦꠀꠟꠣ ꠁꠍꠣ ꠀꠟ-ꠝꠍꠤꠞ ꠞꠢꠝꠔꠦ ꠀꠞ ꠔꠣꠘꠞꠦ ꠌꠤꠘꠣꠞ ꠔꠣꠇ꠆ꠇꠔꠦ ꠛꠣꠠꠤꠀ ꠃꠑꠅ। ꠅꠈꠘ ꠀꠞ ꠢꠞ-ꠢꠣꠝꠦꠡꠣ ꠔꠣꠘ ꠝꠢꠤꠝꠣ ꠎꠣꠞꠤ ꠞꠃꠇ। ꠀꠝꠤꠘ॥
1JO 1:1 ꠢꠇꠟ ꠙꠄꠟꠣ ꠕꠣꠇꠤꠃ ꠎꠦꠁꠘ ꠀꠍꠟꠣ, ꠎꠣꠘꠞꠦ ꠘꠤꠎꠞ ꠌꠃꠈꠦ ꠖꠦꠈꠍꠤ, ꠎꠣꠘ ꠝꠥꠈꠞ ꠀꠅꠀꠎ ꠀꠝꠞꠣ ꠢꠥꠘꠍꠤ, ꠈꠥꠛ ꠈꠤꠀꠟ ꠇꠞꠤ ꠀꠎꠝꠣꠁꠀ ꠌꠣꠁꠍꠤ ꠀꠞ ꠘꠤꠎꠞ ꠀꠔꠦ ꠗꠞꠣ-ꠍꠀ ꠇꠞꠍꠤ, ꠢꠃ ꠎꠤꠘ꠆ꠖꠦꠉꠤ ꠇꠣꠟꠣꠝꠞ ꠛꠄꠀꠘꠤ ꠟꠦꠈꠞꠣꠝ।
1JO 1:2 ꠅꠃ ꠎꠤꠘ꠆ꠖꠦꠉꠤ ꠔ ꠁ ꠖꠥꠘꠤꠀꠔ ꠎꠣꠁꠞ ꠅꠁꠍꠟꠣ, ꠀꠝꠞꠣꠞ ꠘꠤꠎꠞ ꠌꠃꠈꠦ ꠁ ꠎꠤꠘ꠆ꠖꠦꠉꠤꠞꠦ ꠖꠦꠈꠍꠤ, ꠖꠦꠈꠤꠀ ꠢꠣꠞꠤ ꠔꠣꠘ ꠛꠦꠙꠣꠞꠦ ꠡꠣꠇ꠆ꠇꠤ ꠖꠤꠞꠣꠝ। ꠛꠦꠢꠦꠡ꠆ꠔꠤ ꠛꠣꠚ ꠀꠟ꠆ꠟꠣ ꠙꠣꠇꠞ ꠉꠦꠍꠦ ꠎꠦꠁꠘ ꠀꠍꠟꠣ ꠀꠞ ꠀꠝꠞꠣꠞ ꠝꠣꠎꠦ ꠎꠣꠁꠞ ꠅꠁꠍꠟꠣ, ꠀꠈꠦꠞꠤ ꠅꠃ ꠎꠤꠘ꠆ꠖꠦꠉꠣꠘꠤꠞ ꠇꠕꠣꠃ ꠔꠥꠝꠞꠣꠞꠦ ꠎꠣꠘꠣꠁꠞꠣꠝ।
1JO 1:3 ꠅꠃ ꠎꠦ ꠎꠘꠞꠦ ꠀꠝꠞꠣ ꠖꠦꠈꠍꠤ, ꠎꠣꠘ ꠝꠥꠈꠞ ꠛꠥꠟꠤ ꠢꠥꠘꠍꠤ, ꠔꠣꠘ ꠛꠦꠙꠣꠞꠦꠃ ꠔꠥꠝꠞꠣꠞꠦ ꠇꠁꠞꠣꠝ। ꠎꠣꠔꠦ ꠅꠔꠣ ꠢꠥꠘꠣꠞ ꠛꠣꠖꠦ ꠀꠝꠞꠣꠞ ꠟꠉꠦ ꠔꠥꠝꠞꠣꠞꠅ ꠈꠣꠔꠤꠞ-ꠖꠥꠡ꠆ꠔꠤ ꠅꠄ। ꠀꠝꠞꠣꠞ ꠅꠃ ꠈꠣꠔꠤꠞ ꠅꠁꠟꠉꠤ, ꠉꠣꠁꠛꠤ ꠛꠣꠚ ꠀꠟ꠆ꠟꠣ ꠙꠣꠇ ꠀꠞ ꠔꠣꠘ ꠈꠣꠍ ꠝꠣꠄꠀꠞ ꠎꠘ ꠁꠛꠘꠥꠟ꠆ꠟꠣ ꠁꠍꠣ ꠀꠟ-ꠝꠍꠤꠞ ꠟꠉꠦ।
1JO 1:4 ꠔꠦ ꠀꠝꠞꠣ ꠁꠔꠣ ꠟꠦꠈꠞꠣꠝ, ꠎꠣꠔꠦ ꠀꠝꠞꠣ ꠀꠞ ꠔꠥꠝꠞꠣꠞ ꠈꠥꠡꠤ-ꠛꠣꠡꠤ ꠙꠥꠞꠣ ꠅꠄ।
1JO 1:5 ꠀꠝꠞꠣ ꠀꠟ-ꠝꠍꠤꠞ ꠝꠥꠈ ꠕꠣꠇꠤ ꠁꠔꠣ ꠢꠥꠘꠤꠀ ꠢꠣꠞꠤ, ꠅꠈꠘ ꠔꠥꠝꠞꠣꠞꠦꠅ ꠎꠣꠘꠣꠁꠞꠣꠝ, ꠀꠟ꠆ꠟꠣ ꠙꠣꠇ ꠔ ꠘꠥꠞ। ꠔꠣꠘ ꠝꠣꠎꠦ ꠀꠘ꠆ꠖꠣꠞꠤꠞ ꠇꠥꠘꠥ ꠍꠤꠐꠣ-ꠚꠥꠐꠣꠅ ꠘꠣꠁ।
1JO 1:6 ꠀꠞ ꠀꠝꠞꠣ ꠀꠘ꠆ꠖꠣꠞꠤꠞ ꠝꠣꠎꠦ ꠌꠟꠤꠀ ꠎꠥꠖꠤ ꠇꠁ, ꠀꠟ꠆ꠟꠣ ꠙꠣꠇ ꠀꠞ ꠀꠝꠞꠣꠞ ꠝꠣꠎꠦ ꠈꠣꠔꠤꠞ-ꠖꠥꠡ꠆ꠔꠤ ꠀꠍꠦ, ꠔꠦ ꠔ ꠀꠝꠞꠣ ꠝꠤꠍꠣ ꠝꠣꠔꠞꠣꠝ, ꠡꠑꠤꠇ ꠇꠣꠝ ꠇꠞꠞꠣꠝ ꠘꠣ।
1JO 1:7 ꠅꠁꠟꠦ ꠀꠟ꠆ꠟꠣ ꠙꠣꠇ ꠎꠦꠟꠣ ꠘꠥꠞꠞ ꠝꠣꠎꠦ ꠛꠡꠔ ꠇꠞꠂꠘ, ꠅꠃꠟꠣ ꠀꠝꠞꠣꠅ ꠎꠥꠖꠤ ꠘꠥꠞꠞ ꠚꠞꠦ ꠌꠟꠤ, ꠔꠦ ꠀꠝꠞꠣ ꠄꠇꠦ-ꠅꠁꠘ꠆ꠘꠦ ꠈꠣꠔꠤꠞ-ꠖꠥꠡ꠆ꠔꠤ ꠀꠍꠦ, ꠀꠞ ꠔꠣꠘ ꠈꠣꠍ ꠝꠣꠄꠀꠞ ꠎꠘ ꠁꠍꠣ ꠁꠛꠘꠥꠟ꠆ꠟꠣꠞ ꠙꠛꠤꠔ꠆ꠞ ꠟꠃꠄ ꠀꠝꠞꠣꠞ ꠔꠣꠝꠣꠝ ꠉꠥꠘꠣ-ꠇꠍꠥꠞꠤ ꠙꠣꠇ-ꠍꠣꠚ ꠇꠞꠦ।
1JO 1:8 ꠅꠈꠘ ꠀꠝꠞꠣ ꠎꠥꠖꠤ ꠇꠁ, ꠀꠝꠞꠣ ꠝꠥꠐꠦꠃ ꠉꠥꠘꠣꠉꠣꠞ ꠘꠣꠄ, ꠔꠦ ꠀꠝꠞꠣ ꠘꠤꠎꠦ ꠘꠤꠎꠞꠦ ꠐꠉꠤꠀꠞ, ꠄꠔꠦ ꠙꠞꠝꠣꠘ ꠅꠄ ꠀꠝꠞꠣꠞ ꠝꠣꠎꠦ ꠀꠟ꠆ꠟꠣꠁ ꠢꠇꠤꠇꠔꠤ ꠘꠣꠁ।
1JO 1:9 ꠀꠝꠞꠣ ꠎꠥꠖꠤ ꠎꠣꠞꠎꠤꠞ ꠉꠥꠘꠣꠞ ꠡ꠆ꠛꠤꠇꠣꠞꠥꠇ꠆ꠔꠤ ꠖꠤꠟꠣꠁ, ꠔꠦ ꠔꠣꠘ ꠀꠙꠘ ꠢꠇ-ꠢꠣꠟꠣꠟꠤ ꠀꠞ ꠙꠣꠇ-ꠙꠞꠦꠎꠉꠣꠞꠤꠞ ꠉꠥꠘꠦ, ꠟꠉꠦ ꠟꠉꠦ ꠉꠥꠘꠣꠞ ꠝꠣꠚꠤ ꠖꠤꠟꠣꠁꠘ, ꠔꠣꠝꠣꠝ ꠘꠣꠚꠞꠝꠣꠘꠤ ꠕꠣꠇꠤ ꠀꠝꠞꠣꠞꠦ ꠙꠣꠇ-ꠍꠣꠚ ꠇꠞꠤꠟꠣꠁꠘ।
1JO 1:10 ꠅꠈꠘ ꠀꠝꠞꠣ ꠎꠥꠖꠤ ꠇꠁ, ꠀꠝꠞꠣ ꠇꠥꠘꠥ ꠉꠥꠘꠣ ꠇꠞꠍꠤ ꠘꠣ, ꠔꠦ ꠀꠝꠞꠣ ꠔꠣꠘꠞꠦꠃ ꠝꠤꠍꠣ ꠝꠣꠔꠞꠣ ꠛꠣꠘꠣꠁꠟꠣꠝ, ꠄꠔꠦ ꠙꠞꠝꠣꠘ ꠝꠤꠟꠦ, ꠀꠝꠞꠣꠞ ꠖꠤꠟꠞ ꠝꠣꠎꠦ ꠔꠣꠘ ꠇꠣꠟꠣꠝ ꠘꠣꠁ।
1JO 2:1 ꠅ ꠀꠝꠣꠞ ꠍꠣꠛꠣꠟ ꠅꠇꠟ, ꠀꠝꠤ ꠔꠥꠝꠞꠣꠞ ꠉꠦꠍꠦ ꠁꠔꠣ ꠟꠦꠈꠞꠣꠝ, ꠎꠣꠔꠦ ꠔꠥꠝꠞꠣ ꠉꠥꠘꠣꠞ ꠇꠣꠝ ꠕꠣꠇꠤ ꠛꠣꠌꠤꠀ ꠞꠅ। ꠄꠞꠛꠣꠖꠦꠅ ꠇꠦꠃ ꠎꠥꠖꠤ ꠇꠥꠘꠥ ꠉꠥꠘꠣ ꠇꠞꠤꠟꠣꠄ, ꠔꠦ ꠛꠦꠢꠦꠡ꠆ꠔꠤ ꠛꠣꠛꠣꠞ ꠖꠞꠛꠣꠞꠅ ꠀꠝꠞꠣꠞ ꠄꠇꠎꠘ ꠙꠣꠇ-ꠙꠞꠦꠎꠉꠣꠞ ꠡꠣꠚꠣꠄꠀꠔꠇꠣꠞꠤ ꠀꠍꠂꠘ, ꠔꠣꠘ ꠘꠣꠝ ꠁꠍꠣ ꠀꠟ-ꠝꠍꠤ।
1JO 2:2 ꠎꠣꠘ ꠘꠤ ꠔꠣꠁꠘ ꠇꠤꠔꠣ ꠇꠞꠍꠂꠘ? ꠀꠝꠞꠣꠞ ꠉꠥꠘꠣꠞ ꠇꠚꠞꠣ ꠢꠤꠡꠣꠛꠦ ꠔꠣꠘ ꠘꠤꠎꠞ ꠎꠣꠘ ꠇꠥꠞꠛꠣꠘꠤ ꠖꠤꠍꠂꠘ। ꠈꠣꠟꠤ ꠀꠝꠞꠣꠞ ꠘꠣꠄ, ꠛꠞꠋ ꠖꠥꠘꠤꠀꠞ ꠢꠇꠟ ꠝꠣꠘꠡꠞ ꠉꠥꠘꠣꠞ ꠇꠚꠞꠣꠞ ꠟꠣꠉꠤ ꠖꠤꠍꠂꠘ।
1JO 2:3 ꠅꠈꠘ ꠀꠝꠞꠣ ꠔꠣꠘꠞꠦ ꠌꠤꠘꠤ ꠘꠤ? ꠘꠤꠌ꠆ꠌꠄ ꠌꠤꠘꠤ, ꠀꠝꠞꠣ ꠔꠣꠘ ꠢꠇꠟ ꠢꠥꠇꠥꠝ-ꠀꠢꠇꠣꠝ ꠝꠣꠘꠟꠦ ꠛꠥꠎꠣ ꠎꠣꠁꠛ, ꠀꠝꠞꠣ ꠔꠣꠘꠞꠦ ꠌꠤꠘꠤ।
1JO 2:4 ꠀꠞ ꠎꠦ ꠝꠣꠘꠡꠦ ꠇꠄ ꠔꠣꠘꠞꠦ ꠌꠤꠘꠦ, ꠌꠤꠘꠤꠀꠅ ꠔꠣꠘ ꠢꠥꠇꠥꠝ-ꠀꠢꠇꠣꠝ ꠝꠣꠘꠦ ꠘꠣ, ꠢꠦ ꠝꠤꠍꠣ ꠝꠣꠔꠦ, ꠔꠣꠞ ꠖꠤꠟꠅ ꠢꠇꠤꠇꠔꠤ ꠘꠣꠁ।
1JO 2:5 ꠅꠁꠟꠦ ꠎꠦ ꠎꠘꠦ ꠔꠣꠘ ꠇꠣꠟꠣꠝ ꠝꠣꠚꠤꠇ ꠌꠟꠦ, ꠔꠣꠞ ꠖꠤꠟꠞ ꠝꠣꠎꠦ ꠘꠤꠌ꠆ꠌꠄ ꠀꠟ꠆ꠟꠣꠁ ꠝꠢꠛ꠆ꠛꠔ ꠡꠥꠟ꠆ꠟꠀꠘꠣ ꠚꠟꠤꠍꠦ। ꠔꠦ ꠀꠝꠞꠣ ꠔꠣꠘ ꠝꠣꠎꠦ ꠛꠡꠔ ꠇꠞꠤ ꠘꠤ? ꠅꠄ, ꠅꠃ ꠝꠘ꠆ꠔꠦ ꠛꠥꠎꠣ ꠎꠣꠄ ꠀꠝꠞꠣ ꠔꠣꠘ ꠝꠣꠎꠦ ꠛꠡꠔ ꠇꠞꠤ:
1JO 2:6 ꠀꠞ ꠔꠣꠘ ꠝꠣꠎꠦ ꠛꠡꠔ ꠇꠞꠤ ꠇꠁꠟꠦ, ꠀꠝꠞꠣꠞ ꠟꠣꠉꠤ ꠎꠞꠥꠞ ꠅꠁꠟ, ꠔꠣꠁꠘ ꠎꠦꠟꠣ ꠌꠟꠍꠂꠘ, ꠀꠝꠞꠣꠅ ꠅꠟꠣ ꠌꠟꠣ।
1JO 2:7 ꠅ ꠡꠥꠘꠣ ꠅꠇꠟ, ꠀꠝꠤ ꠔ ꠔꠥꠝꠞꠣꠞ ꠉꠦꠍꠦ ꠘꠄꠀ ꠇꠥꠘꠥ ꠢꠥꠇꠥꠝꠞ ꠇꠕꠣ ꠟꠦꠈꠞꠣꠝ ꠘꠣ, ꠛꠞꠋ ꠅꠟꠣ ꠄꠇ ꠢꠥꠇꠥꠝꠞ ꠇꠕꠣ ꠟꠦꠈꠞꠣꠝ, ꠎꠦꠐꠣ ꠙꠄꠟꠣ ꠕꠣꠇꠤꠃ ꠀꠍꠤꠟ। ꠔꠥꠝꠞꠣ ꠀꠉꠦ ꠕꠣꠇꠤ ꠎꠦ ꠇꠣꠟꠣꠝ ꠢꠥꠘꠍ, ꠅꠐꠣꠃ ꠅꠁꠟ ꠢꠃ ꠙꠥꠞꠣꠘꠣ ꠢꠥꠇꠥꠝ।
1JO 2:8 ꠁꠐꠣꠞꠦ ꠙꠥꠞꠣꠘꠣ ꠇꠁꠟꠦꠅ ꠀꠍꠟꠦ ꠁꠐꠣ ꠘꠄꠀ। ꠅꠃ ꠢꠥꠇꠥꠝꠞ ꠢꠇꠤꠇꠔꠤꠄ ꠁꠍꠣ ꠀꠟ-ꠝꠍꠤ ꠌꠟꠔꠣ, ꠀꠞ ꠔꠥꠝꠞꠣꠞ ꠎꠤꠘ꠆ꠖꠦꠉꠤꠔꠅ ꠁꠔꠣ ꠀꠍꠦ। ꠖꠦꠈꠞꠣꠄ ꠘꠤ, ꠀꠘ꠆ꠖꠣꠁꠞ ꠇꠣꠐꠤ ꠎꠣꠞ, ꠀꠍꠟ ꠘꠥꠞ ꠅꠈꠘ ꠎꠣꠁꠞ ꠅꠞ।
1JO 2:9 ꠇꠥꠘꠥ ꠝꠣꠘꠡꠦ ꠎꠦꠛꠟꠣ ꠇꠄ, ꠢꠦ ꠀꠟ꠆ꠟꠣꠁ ꠘꠥꠞꠞ ꠚꠞꠅ ꠀꠍꠦ, ꠅꠕꠌ ꠔꠣꠞ ꠜꠣꠁꠞꠦ ꠊꠤꠘ꠆ꠘꠣꠄ, ꠢꠦ ꠀꠍꠟꠦ ꠀꠘ꠆ꠖꠣꠞꠤꠔ ꠞꠁꠍꠦ।
1JO 2:10 ꠀꠞ ꠎꠦ ꠝꠣꠘꠡꠦ ꠔꠣꠞ ꠜꠣꠁꠞꠦ ꠝꠣꠄꠀ-ꠝꠢꠛ꠆ꠛꠔ ꠇꠞꠦ, ꠢꠦ ꠘꠥꠞꠞ ꠚꠞꠅ ꠛꠡꠔ ꠇꠞꠦ, ꠄꠞꠟꠣꠉꠤ ꠢꠦ ꠀꠍꠣꠠ ꠈꠣꠅꠀꠞ ꠒꠞ ꠘꠣꠁ।
1JO 2:11 ꠅꠁꠟꠦ ꠎꠦꠉꠤꠄ ꠔꠣꠞ ꠜꠣꠁꠞꠦ ꠊꠤꠘ꠆ꠘꠣꠄ, ꠢꠦ ꠔ ꠀꠘ꠆ꠖꠣꠞꠤꠔ ꠙꠠꠤ ꠞꠁꠍꠦ, ꠀꠘ꠆ꠖꠣꠞꠤꠞ ꠝꠣꠎꠦ ꠌꠟꠣ-ꠚꠤꠞꠣ ꠇꠞꠦ। ꠀꠍꠟꠦ ꠀꠘ꠆ꠖꠣꠁꠞꠦ ꠔꠣꠞꠦ ꠀꠘ꠆ꠖꠣ ꠛꠣꠘꠣꠁꠟꠤꠍꠦ, ꠄꠞꠟꠣꠉꠤ ꠢꠦ ꠎꠣꠘꠦꠃ ꠘꠣ, ꠢꠦ ꠇꠥꠘ ꠙꠕꠦꠖꠤ ꠎꠣꠞ।
1JO 2:12 ꠅ ꠍꠣꠛꠣꠟ ꠅꠇꠟ, ꠀꠝꠤ ꠔꠥꠝꠞꠣꠞ ꠉꠦꠍꠦ ꠟꠦꠈꠞꠣꠝ, ꠎꠣꠘ ꠘꠤ, ꠀꠟ-ꠝꠍꠤꠞ ꠘꠣꠝꠞ ꠈꠣꠔꠤꠞꠦ, ꠔꠥꠝꠞꠣꠞ ꠔꠣꠝꠣꠝ ꠉꠥꠘꠣ-ꠇꠍꠥꠞꠤ ꠝꠣꠚ ꠇꠞꠣ ꠅꠁꠉꠦꠍꠦ।
1JO 2:13 ꠅ ꠛꠣꠚ ꠅꠇꠟ, ꠀꠝꠤ ꠀꠙꠘꠣꠁꠘ꠆ꠔꠞ ꠉꠦꠍꠦꠅ ꠟꠦꠈꠞꠣꠝ, ꠙꠄꠟꠣ ꠕꠣꠇꠤꠃ ꠎꠦꠁꠘ ꠀꠍꠂꠘ, ꠀꠙꠘꠣꠞꠣ ꠔ ꠔꠣꠘꠞꠦ ꠌꠤꠘꠂꠘ। ꠅ ꠎꠥꠀꠘ ꠅꠇꠟ, ꠀꠝꠤ ꠔꠥꠝꠞꠣꠞꠦ ꠟꠦꠈꠞꠣꠝ, ꠁꠛꠟꠤꠍꠞ ꠟꠉꠞ ꠝꠢꠣ-ꠟꠣꠠꠣꠁꠔ ꠔ, ꠔꠥꠝꠤꠔꠣꠁꠘ ꠎꠤꠔꠤ ꠉꠦꠍ।
1JO 2:14 ꠅ ꠢꠥꠞꠥꠔ꠆ꠔꠣ ꠅꠇꠟ, ꠀꠝꠤ ꠔꠥꠝꠞꠣꠞꠦ ꠟꠦꠈꠟꠣꠝ, ꠔꠥꠝꠞꠣ ꠔ ꠛꠦꠢꠦꠡ꠆ꠔꠤ ꠛꠣꠚꠞꠦ ꠌꠤꠘꠤꠟꠤꠍ। ꠅ ꠛꠣꠚ ꠅꠇꠟ, ꠀꠝꠤ ꠀꠙꠘꠣꠁꠘ꠆ꠔꠞꠦ ꠟꠦꠈꠟꠣꠝ, ꠀꠙꠘꠣꠞꠣ ꠔ ꠔꠣꠘꠞꠦ ꠌꠤꠘꠤꠟꠤꠍꠂꠘ, ꠎꠦꠁꠘ ꠢꠇ꠆ꠇꠟꠔꠣꠞ ꠙꠄꠟꠣ ꠕꠣꠇꠤꠃ ꠀꠍꠂꠘ। ꠅ ꠘꠃꠎꠥꠀꠘ ꠅꠇꠟ, ꠀꠝꠤ ꠔꠥꠝꠞꠣꠞꠦ ꠟꠦꠈꠟꠣꠝ, ꠔꠥꠝꠞꠣꠃ ꠛꠟꠛꠣꠘ, ꠀꠟ꠆ꠟꠣꠞ ꠇꠣꠟꠣꠝ ꠔꠥꠝꠞꠣꠞ ꠖꠤꠟꠅ ꠉꠣꠕꠣ, ꠁꠛꠟꠤꠍꠞ ꠟꠉꠞ ꠝꠢꠣ-ꠟꠣꠠꠣꠁꠔ ꠔꠥꠝꠞꠣ ꠎꠤꠔꠍ।
1JO 2:15 ꠅꠈꠘ ꠈꠤꠀꠟ ꠇꠞꠤ ꠢꠥꠘꠅ, ꠔꠥꠝꠞꠣ ꠁ ꠖꠥꠘꠤꠀ ꠀꠞ ꠎꠉꠔ-ꠡꠋꠡꠣꠞꠞ ꠇꠥꠘꠥꠔꠣꠞ ꠝꠣꠄꠀꠔ ꠙꠠꠤꠅ ꠘꠣ। ꠎꠦ ꠝꠣꠘꠥꠡ ꠖꠥꠘꠤꠀꠞ ꠝꠣꠄꠀꠔ ꠙꠠꠤꠎꠣꠄ, ꠢꠦ ꠔ ꠘꠤꠎꠞ ꠛꠦꠢꠦꠡ꠆ꠔꠤ ꠛꠣꠚꠞꠦ ꠝꠢꠛ꠆ꠛꠔ ꠇꠞꠦ ꠘꠣ।
1JO 2:16 ꠎꠣꠘ ꠔ, ꠖꠥꠘꠤꠀꠔ ꠎꠦꠔꠣ ꠝꠤꠟꠦ, ꠁꠔꠣ ꠅꠁꠟ, ꠞꠇ꠆ꠔ-ꠝꠣꠋꠡꠞ ꠈꠣꠁꠡ, ꠌꠃꠈꠞ ꠟꠥꠜ-ꠟꠣꠟꠌ ꠀꠞ ꠡꠋꠡꠣꠞꠞ ꠛꠣꠢꠣꠖꠥꠞꠤ, ꠁꠔꠣ ꠇꠥꠘꠥꠐꠣꠃ ꠛꠦꠢꠦꠡ꠆ꠔꠤ ꠛꠣꠚꠞ ꠉꠦꠍ ꠕꠣꠇꠤ ꠀꠄ ꠘꠣ, ꠈꠣꠟꠤ ꠖꠥꠘꠤꠀ ꠕꠣꠇꠤ ꠀꠄ।
1JO 2:17 ꠔꠦ ꠖꠥꠘꠤꠀꠛꠤ ꠎꠉꠔ-ꠡꠋꠡꠣꠞꠞ ꠢꠇ꠆ꠇꠟ ꠛꠣꠢꠣꠖꠥꠞꠤꠞ ꠖꠤꠘ ꠚꠥꠠꠣꠁ ꠎꠣꠞ, ꠅꠁꠟꠦ ꠎꠦ ꠛꠘ꠆ꠖꠣꠄ ꠀꠟ꠆ꠟꠣꠞ ꠝꠞ꠆ꠎꠤ ꠎꠥꠉꠣꠁ ꠌꠟꠦ, ꠢꠦ ꠔ ꠌꠤꠞꠇꠣꠟ ꠐꠤꠇꠤꠀ ꠞꠁꠛ।
1JO 2:18 ꠛꠣꠛꠣ ꠅꠇꠟꠞꠦ, ꠇꠤꠀꠝꠔ ꠗꠣꠞꠅ ꠀꠁꠌ꠆ꠍꠦ। ꠔꠦ ꠔꠥꠝꠞꠣ ꠘꠤꠌ꠆ꠌꠄ ꠢꠥꠘꠍ, ꠈꠣꠘꠦ-ꠖꠞ꠆ꠎꠣꠟ ꠀꠅꠀꠞ ꠡꠝꠄ ꠅꠁꠉꠦꠍꠦ। ꠀꠞ ꠀꠍꠟ ꠇꠕꠣ ꠅꠁꠟ, ꠄꠞꠝꠣꠎꠦ ꠛꠃꠔ ꠖꠞ꠆ꠎꠣꠟ ꠀꠁꠀ ꠢꠣꠞꠍꠂꠘ। ꠅꠔꠣ ꠖꠦꠈꠤꠀ ꠀꠝꠞꠣ ꠛꠥꠎꠤꠀꠞ, ꠢꠣꠍꠣꠃ ꠇꠤꠀꠝꠔ ꠗꠣꠞꠅ ꠀꠁꠌ꠆ꠍꠦ।
1JO 2:19 ꠅꠃ ꠖꠞ꠆ꠎꠣꠟ ꠅꠇꠟ ꠔ ꠀꠝꠞꠣꠞ ꠝꠣꠎ ꠕꠣꠇꠤꠃ ꠛꠣꠞ ꠅꠁꠍꠂꠘ। ꠔꠣ-ꠅ ꠄꠞꠣ ꠀꠍꠟꠦ ꠀꠝꠞꠣꠞ ꠔꠞꠤꠇꠣꠔ ꠀꠍꠤꠟ ꠘꠣ, ꠀꠝꠞꠣꠞ ꠔꠞꠤꠇꠣꠞ ꠅꠁꠟꠦ ꠔ ꠀꠝꠞꠣꠞ ꠟꠉꠦ ꠞꠁꠟ ꠅꠘꠦ। ꠔꠣꠞꠣ ꠛꠣꠞ ꠅꠁꠀ ꠉꠦꠍꠦꠉꠤ ꠇꠞꠤꠃ ꠛꠥꠎꠣ ꠎꠣꠄ, ꠔꠣꠞꠣ ꠇꠦꠃ ꠀꠝꠞꠣꠞ ꠘꠣꠄ।
1JO 2:20 ꠅꠁꠟꠦ ꠔꠥꠝꠞꠣ ꠔ ꠢꠃ ꠙꠛꠤꠔ꠆ꠞ ꠎꠘꠞ ꠉꠦꠍ ꠕꠣꠇꠤ ꠈꠦꠟꠣꠚꠔꠤ ꠙꠣꠁꠍ ꠀꠞ ꠢꠇꠟꠦꠃ ꠢꠇ ꠀꠈꠟ ꠙꠣꠁꠍ।
1JO 2:21 ꠔꠥꠝꠞꠣ ꠢꠇꠤꠇꠔꠤ ꠌꠤꠘ ꠘꠣ ꠝꠘꠅ ꠇꠞꠤꠀ ꠀꠝꠤ ꠔꠥꠝꠞꠣꠞ ꠉꠦꠍꠦ ꠟꠦꠈꠞꠣꠝ ꠘꠤ? ꠘꠣ, ꠁꠟꠣ ꠇꠥꠘ꠆ꠔꠣ ꠘꠣꠄ। ꠀꠍꠟꠦ ꠔꠥꠝꠞꠣ ꠢꠇꠤꠇꠔꠤ ꠌꠤꠘꠅ, ꠀꠞ ꠢꠇ ꠕꠣꠇꠤ ꠇꠥꠘꠥꠝꠘ꠆ꠔꠦꠃ ꠘꠣ-ꠢꠇ ꠛꠣꠞꠅꠄ ꠘꠣ, ꠄꠞꠟꠣꠉꠤꠃ ꠔꠥꠝꠞꠣꠞꠦ ꠟꠦꠈꠟꠣꠝ।
1JO 2:22 ꠢꠎꠞꠔ ꠁꠍꠣꠃ ꠀꠟ꠆ꠟꠣꠞ ꠅꠀꠖꠣ ꠇꠞꠣ ꠀꠟ-ꠝꠍꠤ, ꠁꠈꠣꠘ ꠎꠦꠉꠤꠄ ꠡ꠆ꠛꠤꠇꠣꠞ ꠇꠞꠦ ꠘꠣ, ꠢꠦ ꠔ ꠘꠤꠌ꠆ꠌꠤꠔ ꠝꠤꠍꠣ ꠝꠣꠔꠞꠣ। ꠉꠣꠁꠛꠤ ꠛꠣꠚ ꠀꠞ ꠔꠣꠘ ꠈꠣꠍ ꠝꠣꠄꠀꠞ ꠎꠘ ꠁꠛꠘꠥꠟ꠆ꠟꠣꠞꠦ ꠎꠦꠉꠤꠄ ꠅꠡ꠆ꠛꠤꠇꠣꠞ ꠇꠞꠦ, ꠢꠦ-ꠃ ꠅꠁꠟ ꠖꠞ꠆ꠎꠣꠟ।
1JO 2:23 ꠅꠃ ꠝꠣꠄꠀꠞ ꠎꠘꠞꠦ ꠎꠦꠉꠤꠄ ꠅꠡ꠆ꠛꠤꠇꠣꠞ ꠇꠞꠦ, ꠛꠦꠢꠦꠡ꠆ꠔꠤ ꠛꠣꠚꠞ ꠟꠉꠦ ꠔꠣꠞ ꠇꠥꠘꠥ ꠈꠣꠔꠤꠞ-ꠡꠝ꠆ꠙꠞ꠆ꠇ ꠘꠣꠁ, ꠀꠞ ꠎꠦ ꠝꠣꠘꠡꠦ ꠝꠣꠄꠀꠞ ꠎꠘꠞꠦ ꠡ꠆ꠛꠤꠇꠣꠞ ꠇꠞꠦ, ꠔꠣꠞ ꠟꠉꠦ ꠔ ꠛꠦꠢꠦꠡ꠆ꠔꠤ ꠛꠣꠚꠞꠅ ꠈꠣꠔꠤꠞ-ꠡꠝ꠆ꠙꠞ꠆ꠇ ꠀꠍꠦ।
1JO 2:24 ꠔꠦ ꠙꠄꠟꠣ ꠕꠣꠇꠤ ꠔꠥꠝꠞꠣ ꠎꠦꠔꠣ ꠢꠥꠘꠤꠀ ꠀꠁꠞꠣꠄ, ꠁꠔꠣ ꠎꠣꠘꠥ ꠔꠥꠝꠞꠣꠞ ꠖꠤꠟꠅ ꠉꠣꠕꠣ ꠞꠄ। ꠁꠔꠣ ꠖꠤꠟꠅ ꠞꠁꠟꠦ, ꠛꠦꠢꠦꠡ꠆ꠔꠤ ꠛꠣꠚ ꠀꠞ ꠔꠣꠘ ꠈꠣꠍ ꠝꠣꠄꠀꠞ ꠎꠘꠞ ꠟꠉꠦ ꠔꠥꠝꠞꠣꠅ ꠉꠣꠕꠣ ꠞꠁꠛꠣꠄ।
1JO 2:25 ꠀꠞ ꠁꠐꠣꠃ ꠅꠁꠟ ꠢꠃ ꠀꠈꠦꠞꠤ ꠎꠤꠘ꠆ꠖꠦꠉꠤ, ꠎꠦ ꠎꠤꠘ꠆ꠖꠦꠉꠤ ꠀꠟ-ꠝꠍꠤꠄ ꠀꠝꠞꠣꠞꠦ ꠖꠤꠛꠣꠞ ꠅꠀꠖꠣ ꠇꠞꠍꠂꠘ।
1JO 2:26 ꠢꠥꠘꠅ, ꠔꠥꠝꠞꠣꠞꠦ ꠎꠦꠉꠥꠁꠘ꠆ꠔꠦ ꠛꠦ-ꠙꠕꠤ ꠛꠣꠘꠣꠁꠔ ꠌꠣꠄ, ꠅꠔꠣꠞ ꠙꠞꠤꠌꠄ ꠎꠣꠘꠣꠘꠤꠞ ꠟꠣꠉꠤ ꠀꠝꠤ ꠁꠔꠣ ꠟꠦꠈꠟꠣꠝ।
1JO 2:27 ꠀꠍꠟꠦ ꠀꠟ-ꠝꠍꠤ ꠕꠣꠇꠤ ꠔꠥꠝꠞꠣ ꠎꠦ ꠈꠦꠟꠣꠚꠔꠤ ꠙꠣꠁꠍ, ꠅꠃ ꠈꠦꠟꠣꠚꠔꠤ ꠔ ꠔꠥꠝꠞꠣꠞ ꠖꠤꠟꠅ ꠛꠡꠔ ꠇꠞꠦ। ꠄꠞꠟꠣꠉꠤ ꠖꠥꠍꠞꠣ ꠇꠦꠃꠞꠞ ꠉꠦꠍ ꠕꠣꠇꠤ ꠔꠣꠟꠤꠝ ꠘꠤꠛꠣꠞ ꠇꠥꠘꠥ ꠎꠞꠥꠞ ꠘꠣꠄ, ꠅꠃ ꠈꠦꠟꠣꠚꠔꠤꠞ ꠞꠥꠢꠦ ꠔꠥꠝꠞꠣꠞꠦ ꠖꠞꠇꠣꠞꠤ ꠢꠇꠟꠔꠣ ꠢꠤꠇꠣꠁꠛꠣ। ꠔꠣꠁꠘ ꠔ ꠢꠇ, ꠔꠣꠘ ꠝꠣꠎꠦ ꠘꠣ-ꠢꠇ ꠇꠥꠘ꠆ꠔꠣ ꠘꠣꠁ। ꠅꠈꠘ ꠀꠟ-ꠝꠍꠤꠞ ꠝꠣꠎꠦ ꠛꠡꠔ ꠇꠞꠣꠞ ꠟꠣꠉꠤ ꠔꠣꠁꠘ ꠎꠦꠟꠣ ꠔꠣꠟꠤꠝ ꠖꠤꠍꠂꠘ, ꠔꠥꠝꠞꠣ ꠑꠤꠇ ꠅꠃꠟꠣ ꠞꠅ।
1JO 2:28 ꠅ ꠍꠣꠛꠣꠟ ꠅꠇꠟ, ꠀꠝꠣꠞ ꠙꠞꠣꠝꠤꠡ ꠅꠁꠟ, ꠔꠣꠘ ꠝꠣꠎꠦ ꠛꠡꠔ ꠇꠞꠣꠔ ꠞꠅ, ꠔꠦꠃ ꠔꠣꠁꠘ ꠎꠦꠛꠟꠣ ꠢꠤꠞꠛꠣꠞ ꠎꠣꠁꠞꠣ ꠅꠁꠛꠣ, ꠅꠃ ꠡꠝꠄ ꠀꠝꠞꠣ ꠡꠣꠅꠡ ꠙꠣꠁꠝꠥ, ꠔꠣꠘ ꠍꠣꠝꠘꠦ ꠀꠁꠔꠦ ꠡꠞꠝ ꠇꠞꠔ ꠘꠣꠄ।
1JO 2:29 ꠀꠞ ꠔꠥꠝꠞꠣ ꠎꠦꠛꠟꠣ ꠄꠇꠤꠘ ꠇꠞꠅ ꠔꠣꠁꠘ ꠡꠥꠟ꠆ꠟꠀꠘꠣ ꠙꠣꠇ-ꠙꠞꠦꠎꠉꠣꠞ, ꠔꠦ ꠄꠅꠈꠣꠘꠅ ꠄꠇꠤꠘ ꠇꠞꠤꠅ, ꠎꠦ ꠛꠘ꠆ꠖꠣ ꠘꠦꠇ ꠇꠣꠝꠞ ꠀꠡꠤꠇ, ꠔꠣꠞ ꠎꠘꠝ ꠔ ꠡ꠆ꠛꠄꠅꠋ ꠀꠟ꠆ꠟꠣꠞ ꠘꠥꠞ ꠕꠣꠇꠤ।
1JO 3:1 ꠢꠥꠘꠅ, ꠛꠦꠢꠦꠡ꠆ꠔꠤ ꠛꠣꠚꠦ ꠀꠝꠞꠣꠞꠦ ꠇꠔ ꠛꠦꠡꠤ ꠝꠣꠄꠀ ꠇꠞꠂꠘ! ꠔꠣꠁꠘ ꠀꠝꠞꠣꠞꠦ ꠔꠣꠘ ꠀꠅꠟꠣꠖ ꠇꠁꠀ ꠒꠣꠇꠂꠘ, ꠀꠞ ꠀꠍꠟꠦꠅ ꠀꠝꠞꠣ ꠔꠣꠘ ꠀꠅꠟꠣꠖ। ꠔꠣ-ꠅ ꠁ ꠎꠉꠔꠦ ꠀꠝꠞꠣꠞꠦ ꠌꠤꠘꠦ ꠘꠣ, ꠇꠣꠞꠘ ꠎꠉꠔꠦ ꠅꠃ ꠉꠣꠁꠛꠤ ꠛꠣꠚꠞꠦꠅ ꠌꠤꠘꠦ ꠘꠣ।
1JO 3:2 ꠅ ꠡꠥꠘꠣ ꠅꠇꠟ, ꠅꠈꠘ ꠔ ꠀꠝꠞꠣ ꠀꠟ꠆ꠟꠣꠞ ꠀꠅꠟꠣꠖ ꠛꠘꠍꠤ, ꠄꠞꠛꠣꠖꠦ ꠇꠤꠔꠣ ꠛꠘꠝꠥ, ꠁꠈꠣꠘ ꠅꠈꠘꠅ ꠎꠣꠘꠤ ꠘꠣ। ꠈꠣꠟꠤ ꠎꠣꠘꠤ, ꠀꠟ-ꠝꠍꠤ ꠎꠦꠛꠟꠣ ꠖꠥꠍꠞꠣꠛꠣꠞ ꠎꠣꠁꠞ ꠅꠁꠛꠣ, ꠢꠃ ꠡꠝꠄ ꠀꠝꠞꠣꠅ ꠔꠣꠘ ꠟꠣꠈꠣꠘ ꠅꠁꠝꠥ। ꠀꠝꠞꠣ ꠔ ꠔꠣꠘꠞꠦ ꠔꠣꠘ ꠀꠍꠟ ꠍꠥꠞꠔꠦ ꠖꠦꠈꠣꠞ ꠡꠥꠎꠥꠉ ꠙꠣꠁꠝꠥ।
1JO 3:3 ꠀꠞ ꠎꠔ ꠝꠣꠘꠡꠦ ꠀꠟ-ꠝꠍꠤꠞ ꠃꠙꠞꠦ ꠁꠟꠣ ꠀꠡꠣ ꠇꠞꠦ, ꠔꠣꠞꠣ ꠘꠤꠎꠞꠦ ꠀꠟ-ꠝꠍꠤꠞ ꠟꠣꠈꠣꠘ ꠈꠣꠐꠤ ꠛꠣꠘꠣꠘꠤꠔ ꠞꠄ।
1JO 3:4 ꠎꠦ ꠝꠣꠘꠡꠦ ꠉꠥꠘꠣ ꠇꠞꠦ, ꠢꠦ ꠀꠟ꠆ꠟꠣꠞ ꠢꠥꠇꠥꠝ-ꠀꠢꠇꠣꠝ ꠜꠣꠋꠉꠦ, ꠀꠟ꠆ꠟꠣꠞ ꠢꠥꠇꠥꠝ ꠜꠣꠋꠉꠣꠃ ꠔ ꠉꠥꠘꠣ।
1JO 3:5 ꠔꠥꠝꠞꠣꠞ ꠎꠣꠘꠣ ꠀꠍꠦ, ꠀꠟ-ꠝꠍꠤ ꠅꠁꠟꠣ ꠛꠦ-ꠉꠥꠘꠣ ꠝꠣꠍꠥꠝ, ꠔꠣꠁꠘ ꠉꠥꠘꠣꠞꠦ ꠈꠦꠖꠣꠘꠤꠞ ꠟꠣꠉꠤ ꠖꠥꠘꠤꠀꠔ ꠎꠣꠁꠞ ꠅꠁꠟꠣ।
1JO 3:6 ꠄꠞꠟꠣꠉꠤ ꠎꠦꠞꠣ ꠔꠣꠘ ꠝꠣꠎꠦ ꠛꠡꠔ ꠇꠞꠦ, ꠔꠣꠞꠣ ꠉꠥꠘꠣꠞ ꠙꠕꠦ ꠌꠟꠦ ꠘꠣ। ꠉꠥꠘꠣꠞ ꠉꠣꠔꠅ ꠎꠦꠉꠥꠁꠘ ꠙꠠꠤ ꠞꠂꠘ, ꠁꠉꠥꠁꠘ꠆ꠔꠦ ꠔꠣꠘꠞꠦ ꠖꠦꠈꠍꠦꠅ ꠘꠣ, ꠌꠤꠘꠍꠦꠅ ꠘꠣ।
1JO 3:7 ꠅ ꠍꠣꠛꠣꠟ ꠅꠇꠟ, ꠔꠥꠝꠞꠣꠞꠦ ꠎꠣꠘꠥ ꠇꠦꠃ ꠛꠦ-ꠙꠕꠦ ꠘꠤꠔ ꠘꠣ ꠙꠣꠞꠦ। ꠀꠟ-ꠝꠍꠤ ꠔ ꠙꠣꠇ-ꠙꠞꠦꠎꠉꠣꠞ, ꠀꠞ ꠘꠦꠇ ꠇꠣꠝꠞ ꠀꠡꠤꠇ ꠅꠇꠟꠅ ꠔꠣꠘ ꠟꠣꠈꠣꠘ ꠙꠞꠦꠎꠉꠣꠞ ꠅꠄ।
1JO 3:8 ꠅꠁꠟꠦ ꠉꠥꠘꠣꠞ ꠙꠕꠞ ꠀꠡꠤꠇ ꠎꠦꠞꠣ, ꠔꠣꠞꠣ ꠡꠄꠔꠣꠘꠞ ꠝꠥꠞꠤꠖ, ꠁꠛꠟꠤꠍ-ꠡꠄꠔꠣꠘꠦ ꠔ ꠙꠄꠟꠣ ꠕꠣꠇꠤꠃ ꠉꠥꠘꠣ ꠇꠞꠦꠞ। ꠔꠣꠞ ꠇꠣꠝꠞꠦ ꠛꠤꠘꠣꠡ ꠇꠞꠣꠞ ꠘꠤꠅꠔꠦ, ꠅꠈꠘ ꠀꠟ꠆ꠟꠣꠞ ꠈꠣꠍ ꠝꠣꠄꠀꠞ ꠎꠘ ꠁꠛꠘꠥꠟ꠆ꠟꠣ ꠁ ꠖꠥꠘꠤꠀꠔ ꠎꠣꠁꠞ ꠅꠁꠟꠣ।
1JO 3:9 ꠔꠦ ꠎꠦ ꠛꠘ꠆ꠖꠣꠞ ꠎꠘꠝ ꠅꠁꠍꠦ ꠀꠟ꠆ꠟꠣꠞ ꠘꠥꠞ ꠕꠣꠇꠤ, ꠔꠣꠞ ꠜꠤꠔꠞꠦ ꠀꠟ꠆ꠟꠣꠞ ꠘꠥꠞꠞ ꠛꠤꠌ ꠛꠡꠔ ꠇꠞꠦ, ꠄꠞꠟꠣꠉꠤ ꠢꠦ ꠉꠥꠘꠣꠞ ꠉꠣꠔꠅ ꠙꠠꠤ ꠞꠄ ꠘꠣ। ꠀꠟ꠆ꠟꠣꠁ ꠘꠥꠞ ꠕꠣꠇꠤ ꠎꠘꠝ ꠅꠁꠍꠦ ꠇꠞꠤ, ꠢꠦ ꠉꠥꠘꠣꠞ ꠇꠣꠝꠅ ꠙꠠꠤ ꠞꠁꠔ ꠙꠣꠞꠦ ꠘꠣ।
1JO 3:10 ꠀꠞ ꠎꠣꠞꠎꠤꠞ ꠀꠝꠟ ꠖꠦꠈꠟꠦꠃ ꠛꠥꠎꠣ ꠎꠣꠄ, ꠇꠦ ꠀꠟ꠆ꠟꠣꠞ ꠀꠅꠟꠣꠖ, ꠇꠦ ꠡꠄꠔꠣꠘꠞ ꠙꠥꠔ: ꠎꠦꠔꠣ ꠝꠣꠘꠥꠡ ꠘꠦꠇ ꠙꠕꠦ ꠌꠟꠦ ꠘꠣ, ꠔꠣꠞ ꠝꠥꠝꠤꠘ ꠜꠣꠁꠞꠦ ꠝꠢꠛ꠆ꠛꠔ ꠇꠞꠦ ꠘꠣ, ꠢꠦ ꠔ ꠀꠟ꠆ꠟꠣꠞ ꠝꠣꠘꠥꠡ ꠘꠣꠄ।
1JO 3:11 ꠔꠥꠝꠞꠣ ꠝꠥꠟꠅ ꠕꠣꠇꠤꠃ ꠁꠈꠣꠘ ꠢꠥꠘꠤꠀ ꠀꠁꠞꠣꠄ, ꠀꠝꠞꠣꠞ ꠟꠣꠉꠤ ꠚꠞꠎ ꠅꠁꠟ, ꠄꠇꠦ-ꠅꠁꠘ꠆ꠘꠞꠦ ꠝꠢꠛ꠆ꠛꠔ ꠇꠞꠣ।
1JO 3:12 ꠔꠦ ꠀꠝꠞꠣ ꠎꠣꠘꠥ ꠛꠣꠛꠣ ꠀꠖꠝꠞ ꠙꠥꠔ ꠇꠣꠛꠤꠟꠞ ꠟꠣꠈꠣꠘ ꠘꠣ ꠅꠁ। ꠢꠦ ꠀꠍꠤꠟ ꠁꠛꠟꠤꠍꠞ ꠝꠥꠞꠤꠖ, ꠁꠋꠡꠣ ꠇꠞꠤꠀ ꠔꠣꠞ ꠀꠙꠘ ꠜꠣꠁꠞꠦ ꠈꠥꠘ ꠇꠞꠍꠤꠟ। ꠎꠣꠘ ꠘꠤ ꠇꠦꠘꠦ ꠈꠥꠘ ꠇꠞꠍꠤꠟ? ꠢꠦ ꠢꠣꠝꠦꠡꠣ ꠘꠣꠚꠞꠝꠣꠘꠤ ꠇꠣꠝ ꠇꠞꠔ, ꠅꠁꠟꠦ ꠔꠣꠞ ꠜꠣꠁꠄ ꠘꠦꠇ ꠇꠣꠝ ꠇꠞꠔ।
1JO 3:13 ꠅ ꠜꠣꠁ ꠅꠇꠟ, ꠖꠥꠘꠤꠀꠞ ꠝꠣꠘꠡꠦ ꠎꠥꠖꠤ ꠔꠥꠝꠞꠣꠞꠦ ꠊꠤꠘ꠆ꠘꠣꠄ, ꠔꠦ ꠔꠣꠁꠎ꠆ꠎꠥꠛ ꠅꠁꠅ ꠘꠣ।
1JO 3:14 ꠀꠝꠞꠣ ꠔ ꠀꠝꠞꠣꠞ ꠝꠥꠝꠤꠘ ꠜꠣꠁꠞꠦ ꠝꠢꠛ꠆ꠛꠔ ꠇꠞꠤ, ꠄꠞꠟꠣꠉꠤ ꠛꠥꠎꠞꠣꠝ, ꠀꠝꠞꠣ ꠝꠞꠘ ꠕꠣꠇꠤ ꠛꠣꠌꠤꠀ ꠎꠤꠘ꠆ꠖꠦꠉꠤꠔ ꠀꠁꠍꠤ। ꠎꠦꠞꠣ ꠝꠢꠛ꠆ꠛꠔ ꠇꠞꠦ ꠘꠣ, ꠔꠣꠞꠣ ꠔ ꠝꠞꠘꠞ ꠉꠣꠔꠅ ꠙꠠꠤ ꠞꠁꠍꠦ।
1JO 3:15 ꠘꠤꠎꠞ ꠜꠣꠁꠞꠦ ꠎꠦꠉꠤꠄ ꠊꠤꠘ꠆ꠘꠣꠄ, ꠢꠦ ꠔ ꠈꠥꠘꠤ। ꠀꠞ ꠔꠥꠝꠞꠣꠞ ꠎꠣꠘꠣ ꠀꠍꠦ, ꠇꠥꠘꠥ ꠈꠥꠘꠤꠞ ꠖꠤꠟꠅ ꠀꠈꠦꠞꠤ ꠎꠤꠘ꠆ꠖꠦꠉꠤ ꠛꠡꠔ ꠇꠞꠦ ꠘꠣ।
1JO 3:16 ꠀꠟ-ꠝꠍꠤꠄ ꠀꠝꠞꠣꠞ ꠟꠣꠉꠤ ꠔꠣꠘ ꠘꠤꠎꠞ ꠎꠣꠘ ꠛꠤꠟꠣꠁ ꠖꠤꠍꠟꠣ, ꠅꠈꠣꠘ ꠕꠣꠇꠤꠃ ꠀꠝꠞꠣ ꠛꠥꠎꠍꠤ, ꠝꠢꠛ꠆ꠛꠔ ꠇꠣꠞꠦ ꠇꠄ। ꠅꠈꠘ ꠀꠝꠞꠣꠞ ꠜꠣꠁꠞ ꠟꠣꠉꠤꠅ ꠀꠝꠞꠣꠞ ꠎꠣꠘ ꠛꠤꠟꠣꠁ ꠖꠦꠅꠀ ꠎꠞꠥꠞ।
1JO 3:17 ꠡꠋꠡꠣꠞꠅ ꠈꠣꠁꠀ-ꠚꠤꠘ꠆ꠖꠤꠀ ꠛꠣꠌꠣꠞ ꠛꠦꠛꠡ꠆ꠔꠣ ꠎꠣꠞ ꠀꠍꠦ, ꠢꠦ ꠔꠣꠞ ꠜꠣꠁꠞ ꠅꠜꠣꠛ ꠖꠦꠈꠤꠀꠅ ꠎꠥꠖꠤ ꠌꠃꠈ ꠝꠥꠎꠤꠀ ꠛꠁꠞꠄ, ꠔꠦ ꠔꠣꠞ ꠜꠤꠔꠞꠦ ꠇꠤꠟꠣ ꠀꠟ꠆ꠟꠣꠁ ꠝꠢꠛ꠆ꠛꠔ ꠛꠡꠔ ꠇꠞꠦ?
1JO 3:18 ꠛꠣꠛꠣ ꠅꠇꠟꠞꠦ, ꠀꠝꠞꠣ ꠈꠣꠟꠤ ꠝꠥꠈꠞ ꠝꠣꠄꠀ ꠘꠣ ꠖꠦꠈꠣꠁꠀ, ꠇꠣꠝꠞ ꠝꠣꠎꠖꠤ ꠎꠣꠘꠥ ꠀꠍꠟ ꠝꠢꠛ꠆ꠛꠔ ꠖꠦꠈꠣꠁ।
1JO 3:19 ꠔꠦꠃ ꠀꠝꠞꠣ ꠛꠥꠎꠝꠥ, ꠀꠝꠞꠣ ꠢꠇꠞ ꠟꠉꠦ ꠀꠍꠤ। ꠀꠞ ꠢꠇ ꠀꠟ꠆ꠟꠣꠞ ꠍꠣꠝꠘꠦ ꠀꠝꠞꠣꠞ ꠖꠤꠟꠞ ꠔꠍꠟ꠆ꠟꠤ ꠀꠁꠛ।
1JO 3:20 ꠇꠣꠞꠘ ꠀꠝꠞꠣꠞ ꠖꠤꠟꠦꠃ ꠎꠥꠖꠤ ꠀꠝꠞꠣꠞꠦ ꠖꠥꠡꠤ ꠇꠁꠀ ꠞꠣꠄ ꠖꠦꠄ, ꠔꠦ ꠀꠟ꠆ꠟꠣ ꠙꠣꠇ ꠔ ꠁ ꠖꠤꠟ ꠕꠣꠇꠤ ꠛꠃꠔ ꠝꠢꠣꠘ, ꠢꠇ꠆ꠇꠟꠔꠣꠃ ꠎꠣꠘꠂꠘ।
1JO 3:21 ꠄꠞꠟꠣꠉꠤ ꠇꠁꠞꠣꠝ, ꠅ ꠡꠥꠘꠣ ꠅꠇꠟ, ꠀꠝꠞꠣꠞ ꠀꠙꠘ ꠖꠤꠟꠦ ꠎꠥꠖꠤ ꠀꠝꠞꠣꠞꠦ ꠖꠥꠡꠤ ꠡꠣꠁꠛꠡ꠆ꠔ ꠘꠣ ꠇꠞꠦ, ꠔꠦ ꠡꠣꠅꠡ ꠇꠞꠤꠀ ꠀꠟ꠆ꠟꠣꠞ ꠖꠞꠛꠣꠞꠅ ꠀꠎꠤꠞꠣ ꠖꠤꠔꠣꠝ ꠙꠣꠞꠝꠥ।
1JO 3:22 ꠀꠞ ꠔꠣꠘ ꠉꠦꠍꠦ ꠀꠝꠞꠣ ꠎꠦꠔꠣ ꠝꠣꠋꠉꠤꠝꠥ, ꠁꠔꠣ ꠔꠣꠁꠘ ꠖꠤꠛꠣ। ꠇꠣꠞꠘ ꠀꠝꠞꠣ ꠔꠣꠘ ꠢꠥꠇꠥꠝ-ꠀꠢꠇꠣꠝ ꠝꠣꠘꠤꠀ ꠌꠟꠤ, ꠀꠞ ꠎꠦ ꠇꠣꠝ ꠇꠞꠟꠦ ꠔꠣꠁꠘ ꠈꠥꠡꠤ ꠅꠁꠘ, ꠈꠣꠟꠤ ꠅꠃ ꠇꠣꠝ ꠇꠞꠤ।
1JO 3:23 ꠔꠣꠘ ꠢꠥꠇꠥꠝ ꠅꠁꠟ, ꠀꠝꠞꠣ ꠎꠣꠘꠥ ꠔꠣꠘ ꠈꠣꠍ ꠝꠣꠄꠀꠞ ꠎꠘ ꠁꠛꠘꠥꠟ꠆ꠟꠣ ꠁꠍꠣ ꠀꠟ-ꠝꠍꠤꠞ ꠃꠙꠞꠦ ꠁꠝꠣꠘ ꠀꠘꠤ, ꠀꠞ ꠄꠇꠦ-ꠅꠁꠘ꠆ꠘꠞꠦ ꠝꠢꠛ꠆ꠛꠔ ꠇꠞꠤ। ꠅꠃ ꠢꠥꠇꠥꠝꠃ ꠔꠣꠁꠘ ꠀꠝꠞꠣꠞꠦ ꠖꠤꠍꠂꠘ।
1JO 3:24 ꠀꠞ ꠎꠦ ꠛꠘ꠆ꠖꠣꠄ ꠔꠣꠘ ꠢꠥꠇꠥꠝ ꠝꠣꠘꠤꠀ ꠌꠟꠦ, ꠢꠦ ꠔꠣꠘ ꠝꠣꠎꠦꠃ ꠛꠡꠔ ꠇꠞꠦ, ꠅꠟꠣ ꠔꠣꠁꠘꠅ ꠔꠣꠞ ꠝꠣꠎꠦ ꠛꠡꠔ ꠇꠞꠂꠘ। ꠅꠈꠘ ꠔꠣꠁꠘ ꠀꠝꠞꠣꠞꠦ ꠎꠦ ꠙꠣꠇ ꠞꠥꠢꠥ ꠖꠣꠘ ꠇꠞꠍꠂꠘ, ꠅꠃ ꠞꠥꠢꠥꠞ ꠝꠣꠎꠖꠤ ꠀꠝꠞꠣ ꠛꠥꠎꠤꠀꠞ, ꠔꠣꠁꠘ ꠀꠝꠞꠣꠞ ꠖꠤꠟꠅ ꠛꠡꠔ ꠇꠞꠂꠘ।
1JO 4:1 ꠅ ꠡꠥꠘꠣ ꠅꠇꠟ, ꠖꠥꠘꠤꠀꠔ ꠛꠃꠔ ꠜꠘ꠆ꠒ ꠘꠛꠤ ꠛꠣꠞ ꠅꠁꠍꠂꠘ। ꠄꠞꠟꠣꠉꠤ ꠇꠦꠃ ꠎꠥꠖꠤ ꠀꠁꠀ ꠇꠄ, ꠀꠝꠤ ꠞꠥꠢꠥꠞ ꠛꠟꠦ ꠝꠣꠔꠤꠞꠣꠝ, ꠔꠦ ꠔꠥꠝꠞꠣ ꠎꠟꠖꠤ ꠛꠤꠡ꠆ꠛꠣꠡ ꠇꠞꠤꠅ ꠘꠣ, ꠛꠞꠋ ꠎꠣꠌꠣꠁ ꠇꠞꠤꠀ ꠖꠦꠈꠅ, ꠁ ꠞꠥꠢꠥ ꠀꠟ꠆ꠟꠣꠞ ꠉꠦꠍ ꠕꠣꠇꠤ ꠀꠁꠍꠦ ꠇꠤ ꠘꠣ।
1JO 4:2 ꠀꠟ꠆ꠟꠣꠁ ꠞꠥꠢꠥꠞꠦ ꠌꠤꠘꠣꠞ ꠘꠤꠅꠝ ꠅꠁꠟ, ꠎꠦ ꠞꠥꠢꠦ ꠡ꠆ꠛꠤꠇꠣꠞ ꠇꠞꠦ ꠝꠣꠘꠥꠡ ꠍꠥꠞꠔꠦ ꠁꠍꠣ ꠀꠟ-ꠝꠍꠤꠄ ꠖꠥꠘꠤꠀꠔ ꠔꠡꠞꠤꠚ ꠀꠘꠍꠂꠘ, ꠅꠃ ꠞꠥꠢꠥ ꠀꠟ꠆ꠟꠣꠞ ꠉꠦꠍ ꠕꠣꠇꠤ ꠀꠁꠍꠦ।
1JO 4:3 ꠅꠁꠟꠦ ꠎꠦ ꠞꠥꠢꠦ ꠅꠃ ꠁꠍꠣꠞꠦ ꠡ꠆ꠛꠤꠇꠣꠞ ꠇꠞꠦ ꠘꠣ, ꠁ ꠞꠥꠢꠥ ꠀꠟ꠆ꠟꠣꠞ ꠉꠦꠍ ꠕꠣꠇꠤ ꠀꠁꠍꠦ ꠘꠣ। ꠁꠔꠣ ꠅꠁꠟ ꠈꠣꠘꠦ-ꠖꠞ꠆ꠎꠣꠟꠞ ꠞꠥꠢꠥ, ꠅꠃ ꠖꠞ꠆ꠎꠣꠟꠞ ꠞꠥꠢꠥ ꠀꠁꠛꠣꠞ ꠇꠕꠣ ꠔꠥꠝꠞꠣ ꠀꠉꠦ ꠢꠥꠘꠍ, ꠀꠞ ꠅꠈꠘꠅ ꠢꠦ ꠅꠃ ꠎꠉꠔꠅ ꠀꠍꠦ।
1JO 4:4 ꠅꠁꠟꠦ ꠅ ꠍꠣꠛꠣꠟ ꠅꠇꠟ, ꠔꠥꠝꠞꠣ ꠔ ꠀꠟ꠆ꠟꠣꠞ ꠝꠣꠘꠥꠡ, ꠢꠃ ꠜꠘ꠆ꠒ ꠅꠇꠟꠞ ꠃꠙꠞꠦ ꠔꠥꠝꠞꠣ ꠎꠤꠔꠤꠍ। ꠔꠥꠝꠞꠣꠞ ꠖꠤꠟꠅ ꠎꠦ ꠞꠥꠢꠥ ꠀꠍꠂꠘ, ꠄꠁꠘ ꠔ ꠁ ꠎꠉꠔꠞ ꠞꠥꠢꠥ ꠕꠣꠇꠤ ꠛꠃꠔ ꠝꠢꠣꠘ।
1JO 4:5 ꠀꠍꠟꠦ ꠅꠃ ꠜꠘ꠆ꠒ ꠅꠇꠟ ꠔ ꠅꠃ ꠎꠉꠔꠞ, ꠄꠞꠟꠣꠉꠤ ꠔꠣꠞꠣ ꠈꠣꠟꠤ ꠎꠉꠔꠞ ꠛꠥꠟꠤ ꠛꠥꠟꠦ, ꠀꠞ ꠎꠉꠔꠦꠅ ꠔꠣꠞꠣꠞ ꠛꠥꠟꠤ ꠝꠣꠘꠦ।
1JO 4:6 ꠀꠞ ꠀꠝꠞꠣ ꠅꠁꠟꠣꠝ ꠀꠟ꠆ꠟꠣꠞ ꠝꠣꠘꠥꠡ। ꠀꠟ꠆ꠟꠣꠞꠦ ꠎꠦꠞꠣ ꠌꠤꠘꠦ, ꠔꠣꠞꠣ ꠀꠝꠞꠣꠞ ꠛꠥꠟꠤ ꠝꠣꠘꠦ। ꠅꠁꠟꠦ ꠎꠦꠞꠣ ꠀꠟ꠆ꠟꠣꠞ ꠘꠣꠄ, ꠔꠣꠞꠣ ꠀꠝꠞꠣꠞ ꠇꠕꠣ ꠢꠥꠘꠦ ꠘꠣ। ꠅꠃ ꠘꠝꠥꠘꠣꠄ ꠀꠝꠞꠣ ꠗꠥꠇꠣꠛꠣꠎ ꠞꠥꠢꠥ ꠀꠞ ꠀꠟ꠆ꠟꠣꠁ ꠢꠇ ꠞꠥꠢꠥꠞꠦ ꠌꠤꠘꠤ।
1JO 4:7 ꠅ ꠡꠥꠘꠣ ꠅꠇꠟ, ꠀꠟ꠆ꠟꠣꠞ ꠖꠦꠅꠀ ꠖꠣꠘ ꠅꠁꠟ ꠝꠢꠛ꠆ꠛꠔ, ꠄꠞꠟꠣꠉꠤ ꠀꠝꠞꠣ ꠎꠣꠘꠥ ꠄꠇꠦ-ꠅꠁꠘ꠆ꠘꠦ ꠝꠢꠛ꠆ꠛꠔ ꠇꠞꠤ। ꠎꠦ ꠛꠘ꠆ꠖꠣꠞ ꠖꠤꠟꠅ ꠝꠢꠛ꠆ꠛꠔ ꠀꠍꠦ, ꠔꠣꠞ ꠎꠘꠝ ꠅꠁꠍꠦ ꠀꠟ꠆ꠟꠣꠞ ꠘꠥꠞ ꠕꠣꠇꠤ, ꠢꠦ ꠀꠟ꠆ꠟꠣ ꠙꠣꠇꠞꠦ ꠌꠤꠘꠦ।
1JO 4:8 ꠀꠞ ꠎꠦꠉꠥꠞ ꠜꠤꠔꠞꠦ ꠝꠢꠛ꠆ꠛꠔ ꠘꠣꠁ, ꠢꠦ ꠔ ꠀꠟ꠆ꠟꠣ ꠙꠣꠇꠞꠦ ꠌꠤꠘꠦ ꠘꠣ, ꠇꠣꠞꠘ ꠀꠟ꠆ꠟꠣ ꠘꠤꠎꠦꠃ ꠔ ꠝꠢꠛ꠆ꠛꠔ।
1JO 4:9 ꠀꠟ꠆ꠟꠣ ꠙꠣꠇꠞ ꠝꠢꠛ꠆ꠛꠔ ꠀꠝꠞꠣꠞ ꠝꠣꠎꠦ ꠅꠃ ꠘꠝꠥꠘꠣꠄ ꠎꠣꠁꠞ ꠅꠁꠍꠦ, ꠔꠣꠁꠘ ꠔꠣꠘ ꠈꠣꠍ ꠝꠣꠄꠀꠞ ꠎꠘ ꠁꠛꠘꠥꠟ꠆ꠟꠣꠞꠦ ꠅꠃ ꠖꠥꠘꠤꠀꠔ ꠛꠦꠎꠤꠍꠂꠘ, ꠎꠣꠔꠦ ꠄꠘ ꠃꠍꠤꠟ꠆ꠟꠣꠄ ꠀꠝꠞꠣ ꠀꠈꠦꠞꠤ ꠎꠤꠘ꠆ꠖꠦꠉꠤ ꠢꠣꠍꠤꠟ ꠇꠞꠔꠣꠝ ꠙꠣꠞꠤ।
1JO 4:10 ꠀꠞ ꠀꠝꠞꠣ ꠎꠦꠘ ꠀꠟ꠆ꠟꠣ ꠙꠣꠇꠞꠦ ꠝꠢꠛ꠆ꠛꠔ ꠇꠞꠍꠟꠣꠝ ꠁꠟꠣ ꠇꠥꠘ꠆ꠔꠣ ꠘꠣꠄ, ꠛꠞꠋ ꠔꠣꠁꠘ ꠘꠤꠎꠦꠃ ꠀꠝꠞꠣꠞꠦ ꠝꠢꠛ꠆ꠛꠔ ꠇꠞꠤꠀ, ꠀꠝꠞꠣꠞ ꠉꠥꠘꠣꠞ ꠇꠚꠞꠣ ꠅꠁꠛꠣꠞ ꠟꠣꠉꠤ, ꠔꠣꠘ ꠈꠣꠍ ꠝꠣꠄꠀꠞ ꠎꠘ ꠁꠛꠘꠥꠟ꠆ꠟꠣꠞꠦ ꠎꠉꠔꠅ ꠙꠣꠑꠣꠁ ꠖꠤꠟꠣ, ꠅꠇꠐꠣꠞꠦꠃ ꠇꠄ ꠝꠢꠛ꠆ꠛꠔ।
1JO 4:11 ꠅ ꠡꠥꠘꠣ ꠅꠇꠟ, ꠀꠟ꠆ꠟꠣ ꠙꠣꠇꠦ ꠎꠦꠛꠟꠣ ꠀꠝꠞꠣꠞꠦ ꠅꠟꠣ ꠝꠢꠛ꠆ꠛꠔ ꠇꠞꠟꠣ, ꠔꠦ ꠀꠝꠞꠣꠞ ꠟꠣꠉꠤꠅ ꠎꠞꠥꠞ ꠅꠁꠟ ꠄꠇꠦ-ꠅꠁꠘ꠆ꠘꠞꠦ ꠝꠢꠛ꠆ꠛꠔ ꠇꠞꠣ।
1JO 4:12 ꠀꠟ꠆ꠟꠣꠞꠦ ꠔ ꠇꠦꠃ ꠇꠥꠘꠥꠖꠤꠘ ꠖꠦꠈꠍꠦ ꠘꠣ। ꠅꠈꠘ ꠀꠝꠞꠣ ꠎꠥꠖꠤ ꠄꠇꠦ-ꠅꠁꠘ꠆ꠘꠞꠦ ꠝꠢꠛ꠆ꠛꠔ ꠇꠞꠤ, ꠔꠦ ꠛꠥꠎꠣ ꠎꠣꠁꠛ, ꠔꠣꠁꠘ ꠀꠝꠞꠣꠞ ꠖꠤꠟꠅ ꠛꠡꠔ ꠇꠞꠂꠘ, ꠔꠣꠘ ꠝꠢꠛ꠆ꠛꠔꠦ ꠀꠝꠞꠣꠞ ꠖꠤꠟꠅ ꠙꠥꠞꠣꠙꠥꠞ ꠚꠟ ꠗꠞꠍꠦ।
1JO 4:13 ꠀꠝꠞꠣꠞꠦ ꠔꠣꠘ ꠞꠥꠢꠥ ꠝꠥꠛꠣꠞꠇ ꠖꠣꠘ ꠇꠞꠍꠂꠘ, ꠄꠞꠟꠣꠉꠤ ꠛꠥꠎꠞꠣꠝ, ꠀꠝꠞꠣ ꠔꠣꠘ ꠝꠣꠎꠦ ꠛꠡꠔ ꠇꠞꠤ, ꠀꠞ ꠔꠣꠁꠘꠅ ꠀꠝꠞꠣꠞ ꠝꠣꠎꠦ ꠛꠡꠔ ꠇꠞꠂꠘ।
1JO 4:14 ꠀꠝꠞꠣ ꠘꠤꠎꠦ ꠖꠦꠈꠍꠤ, ꠖꠦꠈꠤꠀ ꠢꠣꠞꠤ ꠅꠃ ꠡꠣꠇ꠆ꠇꠤ ꠖꠤꠞꠣꠝ, ꠎꠉꠔꠞ ꠔꠞꠣꠘꠦꠀꠟꠣ ꠇꠣꠘ꠆ꠒꠣꠞꠤ ꠢꠤꠡꠣꠛꠦ, ꠉꠣꠁꠛꠤ ꠛꠣꠚꠦ ꠔꠣꠘ ꠈꠣꠍ ꠝꠣꠄꠀꠞ ꠎꠘ ꠁꠛꠘꠥꠟ꠆ꠟꠣꠞꠦ ꠛꠦꠎꠤꠍꠂꠘ।
1JO 4:15 ꠄꠞꠟꠣꠉꠤ ꠎꠦ ꠎꠘꠦ ꠡ꠆ꠛꠤꠇꠣꠞ ꠇꠞꠦ, ꠢꠎꠞꠔ ꠁꠍꠣꠃ ꠅꠁꠟꠣ ꠀꠟ꠆ꠟꠣꠞ ꠈꠣꠍ ꠝꠣꠄꠀꠞ ꠎꠘ ꠁꠛꠘꠥꠟ꠆ꠟꠣ, ꠔꠣꠞ ꠖꠤꠟꠅ ꠡ꠆ꠛꠄꠅꠋ ꠀꠟ꠆ꠟꠣ ꠙꠣꠇ ꠛꠡꠔ ꠇꠞꠂꠘ, ꠀꠞ ꠢꠦ-ꠅ ꠀꠟ꠆ꠟꠣꠞ ꠝꠣꠎꠦ ꠛꠡꠔ ꠇꠞꠦ।
1JO 4:16 ꠀꠝꠞꠣꠞ ꠟꠉꠦ ꠀꠟ꠆ꠟꠣꠞ ꠎꠦ ꠝꠢꠛ꠆ꠛꠔ ꠀꠍꠦ, ꠁꠈꠣꠘ ꠀꠝꠞꠣ ꠎꠣꠘꠤ, ꠎꠣꠘꠤꠀ ꠄꠇꠤꠘꠅ ꠇꠞꠤ। ꠀꠍꠟꠦ ꠀꠟ꠆ꠟꠣ ꠘꠤꠎꠦꠃ ꠝꠢꠛ꠆ꠛꠔ। ꠝꠢꠛ꠆ꠛꠔꠞ ꠝꠣꠎꠦ ꠎꠦ ꠛꠘ꠆ꠖꠣ ꠛꠡꠔ ꠇꠞꠦ, ꠢꠦ ꠀꠟ꠆ꠟꠣꠞ ꠝꠣꠎꠦꠃ ꠛꠡꠔ ꠇꠞꠦ, ꠀꠞ ꠀꠟ꠆ꠟꠣ ꠙꠣꠇꠅ ꠔꠣꠞ ꠝꠣꠎꠦ ꠛꠡꠔ ꠇꠞꠂꠘ।
1JO 4:17 ꠅꠃ ꠘꠝꠥꠘꠣꠄ ꠝꠢꠛ꠆ꠛꠔ ꠀꠝꠞꠣꠞ ꠖꠤꠟꠞ ꠝꠣꠎꠦ ꠙꠥꠞꠣꠙꠥꠞ ꠚꠟꠀꠟꠣ ꠅꠄ। ꠔꠦꠃ ꠇꠤꠀꠝꠔꠞ ꠖꠤꠘ ꠀꠝꠞꠣ ꠡꠣꠅꠡꠤ ꠛꠘꠤ, ꠇꠣꠞꠘ ꠅꠃ ꠎꠉꠔꠅ ꠀꠝꠞꠣ ꠔꠣꠘ ꠞꠋꠉꠦ ꠞꠋꠉꠤ ꠉꠦꠍꠤ।
1JO 4:18 ꠝꠢꠛ꠆ꠛꠔꠞ ꠝꠣꠎꠦ ꠇꠥꠘꠥ ꠒꠞ-ꠜꠄ ꠘꠣꠁ, ꠡꠥꠟ꠆ꠟꠀꠘꠣ ꠝꠢꠛ꠆ꠛꠔꠦ ꠛꠞꠋ ꠒꠞ-ꠜꠄꠞꠦ ꠈꠦꠖꠣꠁ ꠖꠦꠄ। ꠒꠞ-ꠜꠄꠞ ꠝꠣꠎꠦ ꠔ ꠡꠣꠎꠣ ꠙꠣꠅꠀꠞ ꠜꠣꠛ-ꠡꠣꠛ ꠀꠍꠦ, ꠄꠞꠟꠣꠉꠤ ꠒꠞ-ꠜꠄ ꠎꠣꠞ ꠜꠤꠔꠞꠦ, ꠢꠦ ꠝꠢꠛ꠆ꠛꠔꠞ ꠡꠥꠟ꠆ꠟꠀꠘꠣ ꠚꠟ ꠗꠞꠍꠦ ꠘꠣ।
1JO 4:19 ꠔꠦ ꠀꠝꠞꠣ ꠀꠟ꠆ꠟꠣ ꠙꠣꠇꠞꠦ ꠝꠢꠛ꠆ꠛꠔ ꠇꠞꠤ, ꠇꠣꠞꠘ ꠔꠣꠁꠘ ꠀꠝꠞꠣꠞꠦ ꠙꠄꠟꠣ ꠝꠢꠛ꠆ꠛꠔ ꠇꠞꠍꠂꠘ।
1JO 4:20 ꠀꠞ ꠎꠦ ꠝꠣꠘꠡꠦ ꠇꠄ, ꠢꠦ ꠀꠟ꠆ꠟꠣ ꠙꠣꠇꠞꠦ ꠝꠢꠛ꠆ꠛꠔ ꠇꠞꠦ, ꠇꠁꠀ ꠔꠣꠞ ꠝꠥꠝꠤꠘ ꠜꠣꠁꠞꠦ ꠊꠤꠘ꠆ꠘꠣꠄ, ꠢꠦ ꠔ ꠝꠤꠍꠣ ꠝꠣꠔꠞꠣ। ꠇꠣꠞꠘ ꠘꠤꠎꠞ ꠌꠃꠈꠦ ꠖꠦꠈꠣ ꠜꠣꠁꠞꠦ ꠎꠦꠉꠤꠄ ꠝꠢꠛ꠆ꠛꠔ ꠇꠞꠦ ꠘꠣ, ꠀ-ꠖꠦꠈꠣ ꠀꠟ꠆ꠟꠣꠞꠦ ꠇꠤꠟꠣ ꠝꠢꠛ꠆ꠛꠔ ꠇꠞꠛ?
1JO 4:21 ꠀꠝꠞꠣ ꠔ ꠔꠣꠘ ꠉꠦꠍ ꠕꠣꠇꠤ ꠅꠃ ꠢꠥꠇꠥꠝ ꠙꠣꠁꠍꠤ, ꠎꠦ ꠛꠘ꠆ꠖꠣꠄ ꠀꠟ꠆ꠟꠣ ꠙꠣꠇꠞꠦ ꠝꠢꠛ꠆ꠛꠔ ꠇꠞꠦ, ꠢꠦ ꠎꠣꠘꠥ ꠔꠣꠞ ꠜꠣꠁꠞꠦꠅ ꠝꠢꠛ꠆ꠛꠔ ꠇꠞꠦ।
1JO 5:1 ꠢꠎꠞꠔ ꠁꠍꠣꠃ ꠅꠁꠟꠣ ꠀꠟ꠆ꠟꠣꠞ ꠅꠀꠖꠣ ꠇꠞꠣ ꠢꠃ ꠀꠟ-ꠝꠍꠤ, ꠁꠈꠣꠘ ꠎꠦꠞꠣ ꠄꠇꠤꠘ ꠇꠞꠦ, ꠔꠣꠞꠣꠞ ꠎꠘꠝ ꠅꠁꠍꠦ ꠀꠟ꠆ꠟꠣꠞ ꠘꠥꠞ ꠕꠣꠇꠤ। ꠎꠣꠘ ꠘꠤ, ꠎꠦ ꠝꠣꠘꠡꠦ ꠇꠥꠘꠥ ꠝꠣ-ꠛꠣꠚꠞꠦ ꠝꠢꠛ꠆ꠛꠔ ꠇꠞꠦ, ꠢꠦ ꠄꠞꠣꠞ ꠀꠅꠟꠣꠖꠞꠦꠅ ꠝꠢꠛ꠆ꠛꠔ ꠇꠞꠛ।
1JO 5:2 ꠔꠦ ꠀꠟ꠆ꠟꠣ ꠙꠣꠇꠞ ꠀꠅꠟꠣꠖꠞꠦ ꠝꠢꠛ꠆ꠛꠔꠞ ꠛꠦꠙꠣꠞ ꠇꠤꠟꠣ ꠛꠥꠎꠣꠁꠔꠣꠝ? ꠀꠟ꠆ꠟꠣ ꠙꠣꠇꠞꠦ ꠝꠢꠛ꠆ꠛꠔ ꠇꠞꠤꠀ ꠔꠣꠘ ꠢꠥꠇꠥꠝ-ꠀꠢꠇꠣꠝ ꠝꠣꠘꠤꠀ ꠌꠟꠟꠦꠃ ꠛꠥꠎꠣ ꠎꠣꠄ, ꠀꠝꠞꠣ ꠢꠣꠍꠣꠃ ꠔꠣꠘ ꠀꠅꠟꠣꠖꠞꠦ ꠝꠢꠛ꠆ꠛꠔ ꠇꠞꠤ।
1JO 5:3 ꠀꠟ꠆ꠟꠣꠞ ꠢꠥꠇꠥꠝ-ꠀꠢꠇꠣꠝ ꠝꠣꠘꠤꠀ ꠌꠟꠣꠃ ꠅꠁꠟ ꠀꠟ꠆ꠟꠣꠞꠦ ꠝꠢꠛ꠆ꠛꠔ ꠇꠞꠣ। ꠀꠞ ꠔꠣꠘ ꠢꠥꠇꠥꠝ-ꠀꠢꠇꠣꠝ ꠝꠣꠘꠣ ꠔ ꠈꠥꠛ ꠇꠑꠤꠘ ꠇꠥꠘꠥ ꠇꠣꠝ ꠘꠣꠄ।
1JO 5:4 ꠇꠣꠞꠘ ꠀꠟ꠆ꠟꠣꠞ ꠘꠥꠞꠞ ꠀꠅꠟꠣꠖ ꠅꠇꠟ ꠁ ꠎꠉꠔꠞ ꠃꠙꠞꠦ ꠎꠄꠁ ꠅꠁꠘ, ꠀꠞ ꠎꠉꠔꠞ ꠟꠣꠠꠣꠁꠔ ꠎꠦ ꠎꠤꠘꠤꠡꠞ ꠛꠟꠦ ꠎꠄꠁ ꠅꠁꠍꠤ, ꠁꠇꠐꠣ ꠅꠁꠟ ꠀꠝꠞꠣꠞ ꠁꠝꠣꠘ।
1JO 5:5 ꠢꠎꠞꠔ ꠁꠍꠣꠃ ꠅꠁꠟꠣ ꠀꠟ꠆ꠟꠣꠞ ꠈꠣꠍ ꠝꠣꠄꠀꠞ ꠎꠘ ꠁꠛꠘꠥꠟ꠆ꠟꠣ, ꠁꠈꠣꠘ ꠎꠦꠞꠣ ꠄꠇꠤꠘ ꠇꠞꠦ, ꠁ ꠎꠉꠔꠞ ꠟꠣꠠꠣꠁꠔ ꠔꠣꠞꠣꠃ ꠈꠣꠟꠤ ꠎꠄꠁ ꠅꠄ।
1JO 5:6 ꠁꠍꠣ ꠀꠟ-ꠝꠍꠤ ꠅꠁꠟꠣ ꠢꠃ ꠎꠘ, ꠎꠦꠁꠘ ꠙꠣꠘꠤ ꠀꠞ ꠟꠃꠞ ꠛꠟꠦ ꠖꠥꠘꠤꠀꠔ ꠀꠁꠍꠂꠘ। ꠔꠣꠁꠘ ꠈꠣꠟꠤ ꠙꠣꠘꠤꠞ ꠎꠞꠤꠀꠄ ꠘꠣꠄ, ꠛꠞꠋ ꠢꠃ ꠙꠣꠇ ꠉꠥꠍꠟꠞ ꠙꠣꠘꠤ ꠀꠞ ꠍꠟꠤꠛꠅ ꠎꠣꠘ ꠇꠥꠞꠛꠣꠘꠤꠞ ꠟꠃꠞ ꠛꠟꠦ ꠀꠁꠍꠂꠘ। ꠁꠔꠣ ꠛꠦꠙꠣꠞꠦ ꠀꠟ꠆ꠟꠣꠁ ꠙꠣꠇ ꠞꠥꠢꠦ ꠡꠣꠇ꠆ꠇꠤ ꠖꠤꠞꠣ, ꠀꠞ ꠅꠃ ꠞꠥꠢꠥ ꠔ ꠢꠇ।
1JO 5:7 ꠀꠍꠟꠦ ꠔꠤꠘꠅ ꠡꠣꠇ꠆ꠇꠤꠄ ꠡꠣꠇ꠆ꠇꠤ ꠖꠤꠞꠣ:
1JO 5:8 ꠞꠥꠢꠥ, ꠙꠣꠘꠤ ꠀꠞ ꠟꠃ, ꠅꠃ ꠔꠤꠘ ꠡꠣꠇ꠆ꠇꠤꠞ ꠡꠣꠇ꠆ꠇꠤ ꠄꠇ ꠡꠝꠣꠘ।
1JO 5:9 ꠝꠣꠘꠡꠞ ꠝꠥꠈꠞ ꠡꠣꠇ꠆ꠇꠤ ꠎꠦꠛꠟꠣ ꠀꠝꠞꠣ ꠝꠣꠘꠤ, ꠔꠦ ꠀꠟ꠆ꠟꠣꠞ ꠖꠦꠅꠀ ꠡꠣꠇ꠆ꠇꠤ ꠔ ꠀꠞꠅ ꠝꠎꠛꠥꠔ, ꠔꠣꠘ ꠈꠣꠍ ꠝꠣꠄꠀꠞ ꠎꠘ ꠁꠛꠘꠥꠟ꠆ꠟꠣꠞ ꠛꠦꠙꠣꠞꠦ ꠔꠣꠁꠘ ꠅꠟꠣ ꠡꠣꠇ꠆ꠇꠤ ꠖꠤꠍꠂꠘ।
1JO 5:10 ꠀꠞ ꠅꠃ ꠝꠣꠄꠀꠞ ꠎꠘꠞ ꠃꠙꠞꠦ ꠎꠦꠞꠣ ꠁꠝꠣꠘ ꠀꠘꠦ, ꠔꠣꠞꠣꠞ ꠖꠤꠟꠦꠅ ꠅꠃꠟꠣ ꠡꠣꠇ꠆ꠇꠤ ꠖꠦꠄ। ꠅꠈꠘ ꠀꠟ꠆ꠟꠣꠁ ꠡꠣꠇ꠆ꠇꠤꠞꠦ ꠎꠦꠞꠣ ꠝꠣꠘꠍꠦ ꠘꠣ, ꠔꠣꠞꠣ ꠔ ꠡ꠆ꠛꠄꠅꠋ ꠀꠟ꠆ꠟꠣꠞꠦꠃ ꠝꠤꠍꠣ ꠝꠣꠔꠞꠣ ꠛꠣꠘꠣꠁꠟꠤꠍꠦ, ꠇꠣꠞꠘ ꠀꠟ꠆ꠟꠣꠄ ꠘꠤꠎꠦ ꠔꠣꠘ ꠝꠣꠄꠀꠞ ꠎꠘꠞ ꠛꠦꠙꠣꠞꠦ ꠎꠦ ꠡꠣꠇ꠆ꠇꠤ ꠖꠤꠍꠂꠘ, ꠔꠣꠞꠣ ꠁꠔꠣ ꠝꠣꠘꠍꠦ ꠘꠣ।
1JO 5:11 ꠔꠣꠘ ꠡꠣꠇ꠆ꠇꠤ ꠅꠁꠟ, ꠔꠣꠁꠘ ꠘꠤꠎꠦ ꠀꠝꠞꠣꠞꠦ ꠀꠈꠦꠞꠣꠔꠞ ꠎꠤꠘ꠆ꠖꠦꠉꠤ ꠖꠣꠘ ꠇꠞꠍꠂꠘ, ꠅꠃ ꠎꠤꠘ꠆ꠖꠦꠉꠤ ꠔꠣꠘ ꠈꠣꠍ ꠝꠣꠄꠀꠞ ꠎꠘꠞ ꠉꠦꠍꠦ ꠀꠍꠦ।
1JO 5:12 ꠎꠦ ꠝꠣꠘꠡꠦ ꠅꠃ ꠝꠣꠄꠀꠞ ꠎꠘꠞꠦ ꠙꠣꠁꠍꠦ, ꠢꠦ ꠎꠤꠘ꠆ꠖꠦꠉꠤꠅ ꠙꠣꠁꠍꠦ। ꠀꠞ ꠀꠟ꠆ꠟꠣꠞ ꠢꠃ ꠝꠣꠄꠀꠞ ꠎꠘꠞꠦ ꠎꠦꠞꠣ ꠙꠣꠁꠍꠦ ꠘꠣ, ꠔꠣꠞꠣ ꠁ ꠎꠤꠘ꠆ꠖꠦꠉꠤꠅ ꠙꠣꠁꠍꠦ ꠘꠣ।
1JO 5:13 ꠜꠣꠁꠀꠁꠘꠞꠦ, ꠔꠥꠝꠞꠣ ꠎꠦꠞꠣ ꠁꠍꠣ ꠁꠛꠘꠥꠟ꠆ꠟꠣꠞ ꠃꠙꠞꠦ ꠁꠝꠣꠘ ꠀꠘꠍ, ꠔꠥꠝꠞꠣꠞꠦ ꠎꠣꠘꠣꠘꠤꠞ ꠟꠣꠉꠤ ꠀꠝꠤ ꠁꠔꠣ ꠟꠦꠈꠟꠣꠝ, ꠔꠥꠝꠞꠣ ꠀꠈꠦꠞꠣꠔꠞ ꠎꠤꠘ꠆ꠖꠦꠉꠤ ꠙꠣꠁꠟꠤꠍ।
1JO 5:14 ꠅꠈꠘ ꠀꠝꠞꠣ ꠔꠣꠘ ꠖꠞꠛꠣꠞꠅ ꠅꠃ ꠡꠣꠅꠡ ꠙꠣꠁꠍꠤ, ꠔꠣꠘ ꠝꠞ꠆ꠎꠤ ꠝꠣꠚꠤꠇ ꠀꠝꠞꠣ ꠇꠥꠘ꠆ꠔꠣ ꠝꠣꠉꠤꠟꠦ, ꠁꠔꠣ ꠔꠣꠁꠘ ꠢꠥꠘꠛꠣ।
1JO 5:15 ꠀꠝꠞꠣ ꠎꠦꠛꠟꠣ ꠎꠣꠘꠤ, ꠀꠝꠞꠣ ꠎꠦꠔꠣ ꠝꠣꠉꠤ ꠁꠔꠣ ꠔꠣꠁꠘ ꠢꠥꠘꠂꠘ, ꠔꠦ ꠄꠅꠈꠣꠘꠅ ꠎꠣꠘꠤ, ꠔꠣꠘ ꠖꠞꠛꠣꠞꠅ ꠀꠝꠞꠣ ꠎꠦꠔꠣ ꠝꠣꠉꠤꠍꠤ, ꠁꠔꠣ ꠘꠤꠌ꠆ꠌꠤꠔ ꠙꠣꠁꠟꠤꠍꠤ।
1JO 5:16 ꠇꠦꠃ ꠎꠥꠖꠤ ꠇꠥꠘꠥ ꠝꠥꠝꠤꠘ ꠜꠣꠁꠞꠦ ꠅꠟꠣ ꠄꠇ ꠉꠥꠘꠣ ꠇꠞꠣꠔ ꠖꠦꠈꠦ, ꠎꠦ ꠉꠥꠘꠣ ꠝꠃꠔꠞ ꠙꠕꠤ ꠘꠣꠄ, ꠔꠦ ꠢꠦ ꠀꠞꠎ ꠇꠞꠟꠦ ꠀꠟ꠆ꠟꠣꠄ ꠢꠃ ꠜꠣꠁꠞꠦ ꠢꠦꠚꠣꠎꠔ ꠇꠞꠛꠣ। ꠀꠝꠤ ꠁꠘꠅ ꠅꠃ ꠟꠣꠈꠣꠘ ꠉꠥꠘꠣꠞ ꠇꠕꠣ ꠇꠁꠞꠣꠝ, ꠎꠦꠞꠣꠞ ꠉꠥꠘꠣ ꠝꠃꠔꠞ ꠙꠕꠤ ꠘꠣꠄ। ꠅꠁꠟꠦ ꠝꠘꠅ ꠞꠣꠈꠤꠅ, ꠝꠃꠔꠞ ꠙꠕꠤ ꠉꠥꠘꠣꠅ ꠀꠍꠦ, ꠁꠟꠣ ꠉꠥꠘꠣꠞ ꠛꠦꠙꠣꠞꠦ ꠀꠞꠎ ꠇꠞꠣꠞ ꠟꠣꠉꠤ ꠀꠝꠤ ꠇꠁꠞꠣꠝ ꠘꠣ।
1JO 5:17 ꠀꠍꠟꠦ ꠢꠇꠟ ꠎꠣꠔꠞ ꠘꠣꠚꠞꠝꠣꠘꠤꠃ ꠉꠥꠘꠣ, ꠅꠁꠟꠦ ꠢꠇꠟ ꠉꠥꠘꠣ ꠔ ꠝꠃꠔꠞ ꠙꠕꠤ ꠘꠣꠄ।
1JO 5:18 ꠀꠝꠞꠣ ꠎꠣꠘꠤ, ꠀꠟ꠆ꠟꠣꠞ ꠘꠥꠞ ꠕꠣꠇꠤ ꠎꠦ ꠛꠘ꠆ꠖꠣ ꠅꠇꠟꠞ ꠎꠘꠝ ꠅꠁꠍꠦ, ꠄꠞꠣ ꠉꠥꠘꠣꠞ ꠇꠣꠝꠅ ꠛꠘ꠆ꠖꠤ ꠞꠄ ꠘꠣ। ꠛꠞꠋ ꠀꠟ꠆ꠟꠣꠞ ꠘꠥꠞꠦ ꠎꠘꠝ ꠟꠅꠀ ꠢꠃ ꠈꠣꠍ ꠝꠣꠄꠀꠞ ꠎꠘꠦ ꠔꠣꠞꠣꠞ ꠎꠣꠘꠞ ꠢꠦꠚꠣꠎꠔ ꠇꠞꠂꠘ, ꠁꠛꠟꠤꠍꠦ ꠔꠣꠞꠣꠞꠦ ꠇꠛꠎꠣ ꠇꠞꠔ ꠙꠣꠞꠦ ꠘꠣ।
1JO 5:19 ꠀꠞ ꠀꠝꠞꠣ ꠔ ꠎꠣꠘꠤ, ꠈꠣꠟꠤ ꠀꠝꠞꠣꠃ ꠅꠁꠟꠣꠝ ꠀꠟ꠆ꠟꠣꠞ ꠝꠣꠘꠥꠡ, ꠛꠣꠖ-ꠛꠣꠇꠤ ꠀꠡ꠆ꠔꠣ ꠎꠉꠔꠃ ꠁꠛꠟꠤꠍꠞ ꠙꠣꠅꠞ ꠔꠟꠦ।
1JO 5:20 ꠀꠝꠞꠣ ꠄꠅꠈꠣꠘꠅ ꠎꠣꠘꠤ, ꠀꠟ꠆ꠟꠣꠞ ꠈꠣꠍ ꠝꠣꠄꠀꠞ ꠎꠘ ꠀꠁꠀ ꠢꠣꠞꠤ ꠀꠝꠞꠣꠞꠦ ꠅꠃ ꠀꠈꠟ ꠖꠤꠍꠂꠘ, ꠎꠣꠔꠦ ꠢꠇ ꠀꠟ꠆ꠟꠣꠞꠦ ꠀꠝꠞꠣ ꠌꠤꠘꠤ। ꠔꠦ ꠢꠇ ꠀꠟ꠆ꠟꠣꠞ ꠟꠉꠦ ꠀꠝꠞꠣꠞ ꠝꠤꠟꠘ ꠅꠁꠍꠦ, ꠝꠣꠘꠤ ꠔꠣꠘ ꠈꠣꠍ ꠝꠣꠄꠀꠞ ꠎꠘ ꠁꠍꠣ ꠀꠟ-ꠝꠍꠤꠞ ꠟꠉꠦ ꠀꠝꠞꠣꠞ ꠝꠤꠟꠘ ꠅꠁꠍꠦ। ꠔꠣꠁꠘꠃ ꠔ ꠢꠇ ꠀꠟ꠆ꠟꠣ, ꠔꠣꠁꠘꠃ ꠀꠈꠦꠞꠤ ꠎꠤꠘ꠆ꠖꠦꠉꠤ।
1JO 5:21 ꠅ ꠍꠣꠛꠣꠟ ꠅꠇꠟ, ꠢꠇꠟ ꠘꠝꠥꠘꠣꠞ ꠝꠥꠞ꠆ꠔꠤꠙꠥꠎꠣ ꠕꠣꠇꠤ ꠛꠣꠌꠤꠀ ꠞꠅ। ꠀꠝꠤꠘ॥
2JO 1:1 ꠀꠝꠤ ꠢꠃ ꠝꠥꠞꠛ꠆ꠛꠤꠄ ꠁꠔꠣ ꠟꠦꠈꠞꠣꠝ, ꠀꠟ꠆ꠟꠣꠞ ꠙꠍꠘ꠆ꠖꠞ ꠢꠃ ꠛꠦꠉꠝ ꠍꠣꠄꠛꠣꠘꠤ ꠀꠞ ꠔꠣꠘ ꠀꠅꠟꠣꠖ ꠅꠇꠟꠞ ꠉꠦꠍꠦ। ꠀꠟ꠆ꠟꠣꠁ ꠢꠇꠞ ꠈꠣꠔꠤꠞꠦ ꠀꠝꠤ ꠎꠣꠞꠣꠞꠦ ꠝꠢꠛ꠆ꠛꠔ ꠇꠞꠤ, ꠈꠣꠟꠤ ꠀꠝꠤ ꠘꠣꠄ, ꠀꠞꠅ ꠎꠔ ꠝꠣꠘꠡꠦ ꠀꠟ꠆ꠟꠣꠁ ꠢꠇ ꠎꠣꠘꠍꠂꠘ ꠔꠣꠞꠣ ꠢꠇꠟꠦ ꠎꠣꠞꠦ ꠝꠢꠛ꠆ꠛꠔ ꠇꠞꠂꠘ, ꠅꠃ ꠔꠥꠝꠞꠣꠞ ꠉꠦꠍꠦ ꠟꠦꠈꠞꠣꠝ।
2JO 1:2 ꠅꠃ ꠢꠇ ꠔ ꠅꠈꠘ ꠀꠝꠞꠣꠞ ꠜꠤꠔꠞꠦ ꠛꠡꠔ ꠇꠞꠦ ꠀꠞ ꠢꠞ-ꠢꠣꠝꠦꠡꠣ ꠀꠝꠞꠣꠞ ꠟꠉꠦ ꠞꠁꠛ।
2JO 1:3 ꠢꠇ ꠀꠞ ꠝꠢꠛ꠆ꠛꠔꠞ ꠈꠣꠔꠤꠞꠦ, ꠉꠣꠁꠛꠤ ꠛꠣꠚ ꠀꠟ꠆ꠟꠣ ꠙꠣꠇ ꠀꠞ ꠅꠃ ꠛꠣꠚꠞ ꠈꠣꠍ ꠝꠣꠄꠀꠞ ꠎꠘ ꠁꠛꠘꠥꠟ꠆ꠟꠣ, ꠄꠁꠘꠃ ꠁꠍꠣ ꠀꠟ-ꠝꠍꠤ, ꠄꠞꠣꠞ ꠔꠞꠚ ꠕꠣꠇꠤ ꠞꠢꠝꠔ, ꠝꠦꠢꠦꠞꠛꠣꠘꠤ ꠀꠞ ꠡꠣꠘ꠆ꠔꠤ ꠀꠝꠞꠣꠞ ꠟꠉꠦ ꠞꠁꠛ।
2JO 1:4 ꠉꠣꠁꠛꠤ ꠛꠣꠚꠦ ꠎꠦꠟꠣ ꠢꠥꠇꠥꠝ ꠖꠤꠍꠂꠘ, ꠢꠃ ꠢꠥꠇꠥꠝ ꠝꠣꠚꠤꠇ ꠀꠙꠘꠣꠞ ꠇꠄꠎꠘ ꠙꠥꠀ-ꠙꠥꠠꠤꠘ ꠀꠟ꠆ꠟꠣꠁ ꠢꠇꠞ ꠙꠕꠦ ꠌꠟꠦꠞ ꠖꠦꠈꠤꠀ ꠀꠝꠤ ꠈꠥꠛ ꠈꠥꠡꠤ ꠅꠁꠍꠤ।
2JO 1:5 ꠅ ꠝꠣꠄꠀꠞ ꠍꠣꠄꠛꠣꠘꠤ, ꠀꠙꠘꠣꠞ ꠉꠦꠍꠦ ꠀꠝꠣꠞ ꠄꠇꠐꠣ ꠅꠘꠥꠞꠥꠗ ꠀꠍꠦ, ꠀꠝꠞꠣ ꠎꠣꠘꠥ ꠙꠞꠔꠦꠇꠦ ꠄꠇꠦ-ꠅꠁꠘ꠆ꠘꠞꠦ ꠝꠢꠛ꠆ꠛꠔ ꠇꠞꠤ। ꠀꠞ ꠅꠃ ꠎꠦ ꠅꠘꠥꠞꠥꠗ ꠀꠝꠤ ꠇꠞꠤꠀꠞ, ꠁꠐꠣ ꠔ ꠘꠄꠀ ꠇꠥꠘꠥ ꠢꠥꠇꠥꠝ ꠘꠣꠄ, ꠛꠞꠋ ꠝꠥꠟꠅ ꠕꠣꠇꠤꠃ ꠀꠝꠞꠣ ꠅꠃ ꠢꠥꠇꠥꠝ ꠙꠣꠁꠍꠟꠣꠝ।
2JO 1:6 ꠀꠟ꠆ꠟꠣꠞ ꠢꠥꠇꠥꠝ ꠝꠣꠚꠤꠇ ꠌꠟꠣꠃ ꠅꠁꠟ ꠝꠢꠛ꠆ꠛꠔ। ꠔꠥꠝꠞꠣ ꠙꠄꠟꠣ ꠕꠣꠇꠤ ꠎꠦ ꠢꠥꠇꠥꠝꠞ ꠇꠕꠣ ꠢꠥꠘꠤꠀ ꠀꠁꠞꠣꠄ, ꠅꠟꠣꠈꠣꠘ ꠝꠢꠛ꠆ꠛꠔꠞ ꠙꠕꠦ ꠌꠟꠅ।
2JO 1:7 ꠖꠥꠘꠤꠀꠔ ꠅꠈꠘ ꠛꠃꠔ ꠟꠣꠈꠣꠘ ꠗꠥꠇꠣꠛꠣꠎ ꠛꠣꠞ ꠅꠁꠍꠂꠘ। ꠎꠦꠔꠣꠄ ꠇꠂꠘ, ꠝꠣꠘꠥꠡ ꠍꠥꠞꠔꠦ ꠢꠎꠞꠔ ꠁꠍꠣ ꠀꠟ-ꠝꠍꠤ ꠖꠥꠘꠤꠀꠔ ꠀꠁꠍꠂꠘ ꠘꠣ, ꠁꠟꠣ ꠝꠣꠔ ꠎꠦꠞꠣ ꠝꠣꠔꠦ ꠄꠞꠣ ꠅꠁꠟ ꠢꠃ ꠗꠥꠇꠣꠛꠣꠎ ꠀꠞ ꠈꠣꠘꠦ-ꠖꠞ꠆ꠎꠣꠟ।
2JO 1:8 ꠔꠦ ꠔꠥꠝꠞꠣ ꠢꠥꠡꠤꠀꠞ ꠞꠁꠅ, ꠎꠣꠔꠦ ꠔꠥꠝꠞꠣꠞ ꠝꠦꠘꠔꠞ ꠚꠟ ꠘꠣ ꠀꠞꠣꠁꠀ ꠡꠥꠟ꠆ꠟꠀꠘꠣ ꠙꠥꠞꠥꠡ꠆ꠇꠣꠞ ꠇꠣꠝꠣꠁꠔꠣꠄ ꠙꠣꠞ।
2JO 1:9 ꠎꠦꠔꠣ ꠝꠣꠘꠡꠦ ꠀꠟ-ꠝꠍꠤꠞ ꠖꠦꠅꠀ ꠔꠣꠟꠤꠝꠞ ꠡꠤꠝꠣ ꠙꠣꠞ ꠅꠁ ꠎꠣꠁꠘ, ꠔꠣꠘ ꠔꠣꠟꠤꠝꠞ ꠜꠤꠔꠞꠦ ꠞꠂꠘ ꠘꠣ, ꠔꠣꠞꠣꠞ ꠖꠤꠟꠞ ꠜꠤꠔꠞꠦ ꠀꠟ꠆ꠟꠣ ꠘꠣꠁ। ꠅꠁꠟꠦ ꠎꠦ ꠝꠣꠘꠥꠡ ꠔꠣꠘ ꠔꠣꠟꠤꠝꠞ ꠃꠙꠞꠦ ꠕꠤꠞ ꠞꠄ, ꠔꠣꠞ ꠖꠤꠟꠞ ꠝꠣꠎꠦ ꠉꠣꠁꠛꠤ ꠛꠣꠚ ꠀꠞ ꠔꠣꠘ ꠈꠣꠍ ꠝꠣꠄꠀꠞ ꠎꠘ ꠁꠛꠘꠥꠟ꠆ꠟꠣ, ꠁ ꠖꠥꠁꠅꠎꠘꠃ ꠀꠍꠂꠘ।
2JO 1:10 ꠇꠥꠘꠥ ꠃꠡ꠆ꠔꠣꠖ ꠔꠥꠝꠞꠣꠞ ꠉꠦꠍꠦ ꠀꠁꠟꠦ ꠢꠦ ꠎꠥꠖꠤ ꠅꠃ ꠟꠣꠈꠣꠘ ꠔꠣꠟꠤꠝ ꠘꠣ ꠖꠦꠄ, ꠔꠦ ꠔꠣꠞꠦ ꠍꠣꠟꠣꠝ ꠇꠞꠤꠅ ꠘꠣ, ꠀꠞ ꠔꠥꠝꠞꠣꠞ ꠛꠣꠠꠤꠔ ꠀꠡꠞꠄꠅ ꠖꠤꠅ ꠘꠣ।
2JO 1:11 ꠔꠣꠞꠦ ꠎꠦꠉꠤꠄ ꠍꠣꠟꠣꠝ ꠇꠞꠛ, ꠢꠦ ꠔ ꠅꠉꠥꠞ ꠛꠖ ꠇꠣꠝꠞ ꠜꠣꠉꠤ ꠅꠁꠛ।
2JO 1:12 ꠔꠥꠝꠞꠣꠞ ꠉꠦꠍꠦ ꠔ ꠀꠝꠣꠞ ꠀꠞꠅ ꠛꠃꠔ ꠇꠕꠣ ꠟꠦꠈꠣꠞ ꠀꠍꠤꠟ, ꠅꠁꠟꠦ ꠇꠣꠉꠎ-ꠇꠟꠝꠦ ꠢꠇꠟꠔꠣ ꠟꠦꠈꠔꠣꠝ ꠌꠣꠁꠞꠣꠝ ꠘꠣ। ꠛꠞꠋ ꠀꠝꠣꠞ ꠈꠤꠀꠟ ꠅꠁꠟ, ꠀꠝꠤ ꠘꠤꠎꠦ ꠀꠁꠀ ꠔꠥꠝꠞꠣꠞ ꠟꠉꠦ ꠛꠁꠀ ꠍꠣꠝꠘꠣ-ꠍꠣꠝꠘꠤ ꠉꠚ ꠇꠞꠝꠥ, ꠔꠦꠃ ꠢꠇꠟꠞ ꠜꠤꠔꠞꠞ ꠈꠥꠡꠤ ꠝꠤꠐꠛ।
2JO 1:13 ꠀꠙꠘꠣꠞ ꠎꠦ ꠛꠁꠘꠞꠦ ꠀꠟ꠆ꠟꠣꠄ ꠙꠍꠘ꠆ꠖ ꠇꠞꠍꠂꠘ, ꠔꠣꠘ ꠀꠅꠟꠣꠖ ꠅꠇꠟꠦ ꠀꠙꠘꠣꠞꠦ ꠍꠣꠟꠣꠝ ꠎꠣꠘꠣꠁꠞꠣ। ꠀꠝꠤꠘ॥
3JO 1:1 ꠀꠟ꠆ꠟꠣꠁ ꠢꠇꠞ ꠈꠣꠔꠤꠞꠦ ꠀꠝꠤ ꠎꠣꠞꠦ ꠝꠢꠛ꠆ꠛꠔ ꠇꠞꠤ, ꠀꠝꠣꠞ ꠝꠣꠄꠀꠞ ꠖꠥꠡ꠆ꠔ ꠉꠃꠍꠞ ꠉꠦꠍꠦ, ꠀꠝꠤ ꠢꠃ ꠝꠥꠞꠛ꠆ꠛꠤꠄ ꠁꠔꠣ ꠟꠦꠈꠞꠣꠝ।
3JO 1:2 ꠅ ꠝꠣꠄꠀꠞ ꠖꠥꠡ꠆ꠔ, ꠀꠝꠤ ꠖꠥꠀ ꠇꠞꠤꠀꠞ ꠔꠥꠝꠣꠞ ꠢꠇ꠆ꠇꠟꠔꠣ ꠎꠣꠘꠥ ꠡꠑꠤꠇ ꠜꠣꠛꠦ ꠌꠟꠦ, ꠀꠞꠅ ꠌꠣꠁꠀꠞ ꠔꠥꠝꠣꠞ ꠖꠤꠟ ꠎꠦꠟꠣ ꠜꠣꠟꠣ ꠔꠥꠝꠣꠞ ꠡꠞꠤꠟ-ꠉꠔꠞꠅ ꠎꠣꠘꠥ ꠅꠟꠣ ꠜꠣꠟꠣ ꠕꠣꠇꠦ।
3JO 1:3 ꠔꠥꠝꠣꠞ ꠅꠈꠣꠘ ꠕꠣꠇꠤ ꠇꠄꠎꠘ ꠝꠥꠝꠤꠘ ꠜꠣꠁ ꠀꠁꠀ ꠇꠁꠟꠣ, ꠀꠟ꠆ꠟꠣꠁ ꠢꠇꠞ ꠛꠦꠙꠣꠞꠦ ꠔꠥꠝꠤ ꠛꠥꠟꠦ ꠝꠎꠛꠥꠔ ꠀꠍ, ꠁꠈꠣꠘ ꠢꠥꠘꠤꠀ ꠀꠝꠤ ꠈꠥꠛ ꠈꠥꠡꠤ ꠅꠁꠍꠤ।
3JO 1:4 ꠀꠝꠣꠞ ꠀꠅꠟꠣꠖ ꠅꠇꠟ ꠀꠟ꠆ꠟꠣꠁ ꠢꠇꠞ ꠙꠕꠦ ꠌꠟꠞꠣ ꠢꠥꠘꠤꠀ ꠈꠥꠡꠤ ꠟꠣꠉꠦꠞ, ꠁꠈꠣꠘ ꠕꠣꠇꠤ ꠛꠠ ꠀꠞ ꠇꠥꠘꠥ ꠈꠥꠡꠤꠞ ꠈꠛꠞ ꠅꠄ ꠘꠤ?
3JO 1:5 ꠅ ꠝꠣꠄꠀꠞ ꠖꠥꠡ꠆ꠔ, ꠔꠥꠝꠣꠞ ꠅꠌꠤꠘꠣ ꠢꠃ ꠝꠥꠍꠣꠚꠤꠞ ꠜꠣꠁꠀꠁꠘꠞꠦ ꠎꠦꠟꠣ ꠈꠦꠎꠝꠔ ꠇꠞꠍ, ꠁꠔꠣ ꠔ ꠈꠣꠐꠤ ꠝꠥꠝꠤꠘꠞ ꠇꠣꠝ।
3JO 1:6 ꠔꠥꠝꠣꠞ ꠝꠣꠄꠀ-ꠝꠢꠛ꠆ꠛꠔꠞ ꠇꠕꠣ ꠔꠣꠞꠣ ꠎꠝꠣꠔꠞ ꠢꠥꠞꠥ-ꠛꠠ ꠢꠇꠟꠞ ꠍꠣꠝꠘꠦ ꠇꠁꠍꠦ। ꠅꠈꠘ ꠀꠟ꠆ꠟꠣꠞ ꠈꠥꠡꠤ ꠝꠣꠚꠤꠇ ꠔꠣꠞꠣꠞꠦ ꠍꠢꠤ-ꠍꠣꠟꠣꠝꠔꠦ ꠙꠣꠑꠣꠘꠤꠞ ꠛꠦꠛꠡ꠆ꠔꠣ ꠇꠞꠤ ꠖꠦꠅ, ꠔꠦ ꠀꠞꠅ ꠜꠣꠟꠣ ꠅꠁꠛ।
3JO 1:7 ꠔꠣꠞꠣ ꠈꠣꠟꠤ ꠀꠟ-ꠝꠍꠤꠞ ꠔꠛꠟꠤꠉꠅ ꠛꠣꠞ ꠅꠁꠍꠂꠘ, ꠔꠞꠤꠇꠣꠞ ꠛꠣꠁꠞꠣ ꠝꠣꠘꠡꠞ ꠉꠦꠍ ꠕꠣꠇꠤ ꠇꠥꠘꠥ ꠡꠣꠁꠎ꠆ꠎ ꠟꠁꠍꠂꠘ ꠘꠣ।
3JO 1:8 ꠄꠞꠟꠣꠉꠤ ꠅꠃ ꠟꠣꠈꠣꠘ ꠝꠣꠘꠡꠞꠦ ꠡꠣꠁꠎ꠆ꠎ ꠇꠞꠣ ꠎꠞꠥꠞ, ꠎꠣꠔꠦ ꠢꠇ ꠇꠣꠝꠅ ꠀꠝꠞꠣꠅ ꠡꠞꠤꠇ ꠕꠣꠇꠤ।
3JO 1:9 ꠀꠝꠤ ꠀꠉꠦ ꠎꠝꠣꠔꠞ ꠉꠦꠍꠦ ꠄꠇꠈꠣꠘ ꠌꠤꠑꠤ ꠟꠦꠈꠍꠟꠣꠝ, ꠅꠁꠟꠦ ꠈꠛꠤꠍ ꠖꠤꠔ꠆ꠞꠤꠚꠦ ꠎꠝꠣꠔꠞ ꠘꠦꠔꠣꠉꠤꠞꠤ ꠇꠞꠔ ꠌꠣꠄ, ꠄꠞꠟꠣꠉꠤ ꠢꠦ ꠀꠝꠞꠣꠞ ꠇꠕꠣ ꠢꠥꠘꠦ ꠘꠣ।
3JO 1:10 ꠅꠈꠘ ꠢꠦ ꠎꠦꠔꠣ ꠇꠞꠦꠞ, ꠀꠝꠤ ꠀꠁꠀ ꠢꠣꠞꠤ ꠁꠔꠣ ꠢꠇꠟꠞꠦ ꠎꠣꠘꠣꠁꠝꠥ। ꠢꠦ ꠀꠝꠞꠣꠞꠦ ꠁꠋꠡꠣ ꠇꠞꠤꠀ ꠛꠃꠔ ꠝꠤꠍꠣ ꠛꠖꠘꠣꠝ ꠞꠐꠣꠁꠍꠦ। ꠈꠣꠟꠤ ꠁꠈꠣꠘ ꠘꠣꠄ, ꠝꠥꠝꠤꠘ ꠇꠥꠘꠥ ꠜꠣꠁꠞꠦ ꠢꠦ ꠝꠣꠘꠦꠞ ꠘꠣ, ꠀꠞ ꠅꠁꠘ꠆ꠘ ꠎꠦꠞꠣ ꠝꠣꠘꠔ ꠌꠣꠄ, ꠔꠣꠞꠣꠞꠦꠅ ꠛꠣꠗꠣ ꠖꠦꠞ, ꠄꠝꠘꠇꠤ ꠎꠝꠣꠔ ꠕꠣꠇꠤ ꠛꠣꠞ ꠇꠞꠤ ꠖꠦꠞ।
3JO 1:11 ꠅ ꠝꠣꠄꠀꠞ ꠖꠥꠡ꠆ꠔ, ꠔꠥꠝꠤ ꠛꠖ ꠇꠣꠝꠞ ꠈꠞꠦꠖꠤ ꠘꠣ ꠖꠃꠠꠣꠁꠀ ꠛꠞꠋ ꠘꠦꠇ ꠇꠣꠝ ꠇꠞꠅ। ꠎꠦ ꠝꠣꠘꠡꠦ ꠘꠦꠇ ꠇꠣꠝ ꠇꠞꠦ ꠢꠦ ꠅꠁꠟ ꠀꠟ꠆ꠟꠣꠞ ꠛꠘ꠆ꠖꠣ, ꠀꠞ ꠎꠦꠉꠤꠄ ꠛꠖ ꠇꠣꠝ ꠇꠞꠦ, ꠢꠦ ꠔ ꠀꠟ꠆ꠟꠣꠞ ꠖꠞꠡꠘ ꠙꠣꠁꠍꠦ ꠘꠣ।
3JO 1:12 ꠎꠣꠘ ꠘꠤ, ꠢꠇꠟꠦꠃ ꠖꠤꠝꠤꠔ꠆ꠞꠤ ꠜꠣꠁꠞ ꠡꠥꠘꠣꠝ ꠉꠣꠁꠞꠣ, ꠄꠝꠘꠇꠤ ꠡ꠆ꠛꠄꠅꠋ ꠀꠟ꠆ꠟꠣꠞ ꠢꠇꠦꠅ ꠄꠘ ꠔꠣꠞꠤꠚ ꠇꠞꠞꠣ। ꠀꠝꠞꠣꠅ ꠄꠘ ꠔꠣꠞꠤꠚ ꠇꠞꠞꠣꠝ, ꠀꠞ ꠔꠥꠝꠤ ꠔ ꠎꠣꠘ ꠀꠝꠞꠣꠞ ꠝꠥꠈꠞ ꠇꠕꠣ ꠢꠣꠍꠣ।
3JO 1:13 ꠜꠣꠁꠞꠦ, ꠔꠥꠝꠣꠞ ꠉꠦꠍꠦ ꠟꠦꠈꠣꠞ ꠛꠃꠔꠔꠣ ꠀꠍꠤꠟ, ꠅꠁꠟꠦ ꠇꠟꠝꠦ-ꠇꠣꠟꠤꠄ ꠢꠇꠟꠔꠣ ꠟꠦꠈꠞꠣꠝ ꠘꠣ।
3JO 1:14 ꠀꠡꠣ ꠀꠍꠦ, ꠈꠥꠛ ꠎꠟꠖꠤ ꠔꠥꠝꠣꠞ ꠟꠉꠦ ꠖꠦꠈꠣ-ꠡꠣꠇ꠆ꠇꠣꠔ ꠅꠁꠛ, ꠅꠃ ꠡꠝꠄ ꠝꠥꠈꠣꠝꠥꠈꠤ ꠢꠇꠟꠔꠣ ꠉꠚ ꠇꠞꠝꠥ।
3JO 1:15 ꠔꠥꠝꠣꠞ ꠖꠥꠡ꠆ꠔ ꠅꠇꠟꠦꠅ ꠔꠥꠝꠣꠞꠦ ꠍꠣꠟꠣꠝ ꠎꠣꠘꠣꠁꠍꠂꠘ। ꠀꠝꠞꠣꠞ ꠢꠇꠟ ꠛꠘ꠆ꠖꠥ-ꠛꠣꠘ꠆ꠖꠛꠞꠦ ꠍꠣꠟꠣꠝ ꠎꠣꠘꠣꠁꠅ। ꠀꠍꠍꠣꠟꠣꠝꠥ ꠀꠟꠣꠁꠇꠥꠝ॥
JUD 1:1 ꠀꠝꠤ ꠄꠢꠥꠖꠣ ꠔ ꠍꠣꠢꠣꠛꠤ ꠁꠀꠇꠥꠛꠞ ꠜꠣꠁ ꠀꠞ ꠢꠎꠞꠔ ꠁꠍꠣ ꠀꠟ-ꠝꠍꠤꠞ ꠉꠥꠟꠣꠝ। ꠀꠝꠞꠣꠞ ꠉꠣꠁꠛꠤ ꠛꠣꠚ ꠀꠟ꠆ꠟꠣ ꠙꠣꠇꠦ ꠎꠦꠞꠣꠞꠦ ꠝꠢꠛ꠆ꠛꠔ ꠇꠞꠂꠘ, ꠎꠦꠞꠣ ꠀꠟ꠆ꠟꠣꠁ ꠖꠣꠅꠔ ꠙꠣꠁꠍꠂꠘ, ꠀꠞ ꠁꠍꠣ ꠀꠟ-ꠝꠍꠤꠄ ꠎꠦꠞꠣꠞ ꠢꠦꠚꠣꠎꠔ ꠇꠞꠂꠘ, ꠅꠃ ꠍꠢꠤꠚꠣꠈꠣꠘ ꠀꠝꠤ ꠄꠞꠣꠞ ꠉꠦꠍꠦ ꠟꠦꠈꠞꠣꠝ।
JUD 1:2 ꠔꠥꠝꠞꠣꠞ ꠃꠙꠞꠦ ꠛꠦꠡ ꠇꠞꠤ ꠝꠦꠢꠦꠞꠛꠣꠘꠤ, ꠡꠣꠘ꠆ꠔꠤ ꠀꠞ ꠝꠢꠛ꠆ꠛꠔ ꠎꠣꠞꠤ ꠞꠃꠇ।
JUD 1:3 ꠅ ꠝꠣꠄꠀꠞ ꠖꠥꠡ꠆ꠔ ꠅꠇꠟ, ꠀꠝꠞꠣ ꠢꠇꠟꠦ ꠝꠤꠟꠤ ꠎꠦ ꠘꠣꠎꠣꠔꠞ ꠜꠣꠉꠤ ꠅꠁꠍꠤ, ꠅꠃ ꠘꠣꠎꠣꠔꠞ ꠛꠦꠙꠣꠞꠦ ꠀꠝꠤ ꠈꠥꠛ ꠈꠤꠀꠟꠤ ꠅꠁꠀ ꠔꠥꠝꠞꠣꠞ ꠉꠦꠍꠦ ꠟꠦꠈꠔꠣꠝ ꠌꠣꠁꠍꠤ। ꠄꠞꠝꠣꠎꠦ ꠛꠥꠎꠟꠣꠝ, ꠀꠞꠅ ꠖꠞꠇꠣꠞ ꠀꠍꠦ ꠁꠝꠣꠘꠞ ꠟꠣꠉꠤ ꠟꠣꠠꠣꠁꠞ ꠛꠦꠙꠣꠞꠦ ꠟꠦꠈꠤꠀ ꠔꠥꠝꠞꠣꠞꠦ ꠃꠔꠡꠣꠢ ꠖꠦꠅꠀ। ꠀꠟ꠆ꠟꠣꠄ ꠔꠣꠘ ꠙꠣꠇ ꠛꠘ꠆ꠖꠣ ꠅꠇꠟꠞꠦ ꠌꠤꠞꠇꠣꠟꠞ ꠟꠣꠉꠤ ꠎꠦ ꠁꠝꠣꠘꠤ ꠗꠘ ꠖꠤꠍꠂꠘ, ꠅꠃ ꠁꠍꠣꠄꠁ ꠁꠝꠣꠘꠞ ꠙꠇ꠆ꠇꠦ ꠖꠤꠟꠦ-ꠎꠣꠘꠦ ꠟꠣꠠꠣꠁ ꠇꠞꠣ ꠔ ꠎꠞꠥꠞ।
JUD 1:4 ꠁꠔꠣꠞ ꠎꠞꠥꠞ ꠅꠁꠍꠦ, ꠇꠣꠞꠘ ꠎꠦꠔꠣ ꠝꠣꠘꠡꠦ ꠛꠦ-ꠖꠤꠘꠤ ꠇꠣꠝꠞ ꠡꠣꠎꠣ ꠙꠣꠁꠛꠣꠞ ꠇꠕꠣ ꠀꠉ ꠕꠣꠇꠤꠃ ꠟꠦꠈꠣ ꠀꠍꠤꠟ, ꠔꠟꠦ ꠔꠟꠦ ꠅꠔꠣ ꠝꠣꠘꠥꠡ ꠀꠁꠀ ꠔꠥꠝꠞꠣꠞ ꠖꠟꠅ ꠢꠣꠝꠣꠁ ꠉꠦꠍꠦ। ꠀꠝꠞꠣꠞ ꠀꠟ꠆ꠟꠣꠞ ꠞꠢꠝꠔꠞꠦ ꠔꠣꠞꠣꠞ ꠛꠖ ꠈꠣꠁꠡ ꠝꠤꠐꠣꠘꠤꠞ ꠀꠔꠤꠀꠞ ꠛꠣꠘꠣꠁꠍꠦ, ꠀꠞ ꠀꠝꠞꠣꠞ ꠄꠇꠝꠣꠔ꠆ꠞ ꠝꠣꠟꠤꠇ ꠁꠍꠣ ꠀꠟ-ꠝꠍꠤꠞ ꠃꠟꠐꠣ ꠌꠟꠦ।
JUD 1:5 ꠔꠦ ꠅꠃ ꠛꠦꠙꠣꠞ ꠔ ꠔꠥꠝꠞꠣ ꠈꠥꠛ ꠜꠣꠟꠣ ꠇꠞꠤꠃ ꠎꠣꠘ, ꠔꠣ-ꠅ ꠀꠝꠤ ꠈꠣꠟꠤ ꠅꠈꠣꠘ ꠝꠘꠅ ꠇꠞꠣꠁ ꠖꠤꠞꠣꠝ, ꠝꠤꠡꠞ ꠖꠦꠡ ꠕꠣꠇꠤ ꠛꠘꠤ ꠁꠍꠞꠣꠁꠟꠞꠦ ꠀꠎꠣꠖ ꠇꠞꠤꠀ ꠀꠘꠣꠞ ꠛꠣꠖꠦ, ꠔꠣꠞꠣꠞ ꠝꠣꠎꠞ ꠎꠦꠔꠣꠄ ꠁꠝꠣꠘ ꠀꠘꠍꠤꠟ ꠘꠣ, ꠝꠣꠟꠤꠇꠦ ꠔꠣꠞꠣꠞꠦ ꠛꠤꠘꠣꠡ ꠇꠞꠍꠟꠣ।
JUD 1:6 ꠀꠞ ꠎꠦꠔꠣ ꠚꠤꠞꠤꠡ꠆ꠔꠣ ꠅꠇꠟꠦ ꠘꠤꠎꠞ ꠖꠣꠄ-ꠖꠣꠄꠁꠔ꠆ꠔ ꠀꠖꠣꠄ ꠘꠣ ꠇꠞꠤꠀ, ꠘꠤꠎꠞ ꠀꠡꠘ ꠕꠣꠇꠤ ꠢꠞꠤ ꠉꠦꠍꠟꠣ, ꠀꠟ꠆ꠟꠣꠄ ꠔꠣꠞꠣꠞꠦ ꠌꠤꠞꠇꠣꠟ ꠗꠞꠤ ꠡꠤꠇꠟꠖꠤ ꠛꠣꠘ꠆ꠖꠤꠀ ꠉꠁꠘ ꠀꠘ꠆ꠖꠣꠁꠞ ꠊꠞꠅ ꠞꠣꠈꠍꠂꠘ ꠢꠣꠡꠞꠞ ꠖꠤꠘꠞ ꠟꠣꠉꠤ।
JUD 1:7 ꠅꠃ ꠟꠣꠈꠣꠘ ꠢꠎꠞꠔ ꠟꠥꠔ ꠘꠛꠤꠞ ꠎꠝꠣꠘꠣꠞ ꠍꠣꠖꠥꠝ, ꠀꠝꠥꠞꠣ ꠀꠞ ꠇꠣꠘ꠆ꠖꠣ-ꠇꠣꠍꠣꠞ ꠢꠇꠟ ꠐꠣꠃꠘꠞ ꠝꠣꠘꠡꠦ ꠅꠔꠣꠞ ꠟꠣꠈꠣꠘ ꠎꠤꠘꠣ ꠇꠞꠍꠤꠟ, ꠈꠣꠟꠤ ꠎꠤꠘꠣ ꠘꠣꠄ, ꠔꠣꠞꠣ ꠈꠥꠛ ꠈꠛꠤꠍꠤ ꠎꠤꠘꠣ ꠇꠞꠣꠄ ꠌꠤꠞꠇꠣꠟ ꠗꠞꠤ ꠖꠥꠎꠈꠅ ꠎꠟꠛ, ꠁꠔꠣ ꠅꠁꠟ ꠄꠇꠐꠣ ꠘꠤꠡꠣꠘꠣ।
JUD 1:8 ꠄꠞꠛꠣꠖꠦꠅ ꠅꠃ ꠜꠘ꠆ꠒ ꠃꠡ꠆ꠔꠣꠖ ꠅꠇꠟ, ꠎꠦꠔꠣꠄ ꠛꠣꠎꠦ ꠈꠥꠀꠛ ꠖꠦꠈꠤ ꠖꠦꠈꠤ ꠔꠣꠟꠤꠝ ꠖꠦꠁꠘ, ꠔꠣꠞꠣ ꠈꠛꠤꠍꠤ ꠇꠣꠝ ꠇꠞꠂꠘ, ꠇꠥꠘꠥꠎꠣꠔ ꠡꠣꠡꠘ ꠝꠣꠘꠂꠘ ꠘꠣ, ꠀꠞ ꠛꠣꠔꠥꠘꠤ ꠡꠞ꠆ꠖꠣꠞ ꠅꠇꠟꠞ ꠛꠖꠘꠣꠝ ꠉꠣꠁꠘ।
JUD 1:9 ꠄꠝꠘꠇꠤ ꠀꠍꠝꠣꠘꠞ ꠡꠞ꠆ꠖꠣꠞ ꠚꠤꠞꠤꠡ꠆ꠔꠣ ꠝꠤꠇꠣꠁꠟꠦ ꠎꠦꠛꠟꠣ ꠢꠎꠞꠔ ꠝꠥꠍꠣꠞ ꠟꠣꠡ ꠟꠁꠀ ꠁꠛꠟꠤꠍꠞ ꠟꠉꠦ ꠔꠞ꠆ꠇꠣ-ꠔꠞ꠆ꠇꠤ ꠇꠞꠍꠟꠣ, ꠅꠃ ꠡꠝꠄ ꠔꠣꠁꠘ ꠁꠛꠟꠤꠍ-ꠡꠄꠔꠣꠘꠞ ꠛꠖꠘꠣꠝ ꠉꠣꠁꠀ ꠖꠥꠡꠤ ꠡꠣꠁꠛꠡ꠆ꠔ ꠇꠞꠣꠞ ꠡꠣꠅꠡ ꠇꠞꠟꠣ ꠘꠣ, ꠛꠞꠋ ꠇꠁꠟꠣ, “ꠝꠣꠟꠤꠇꠦ ꠎꠣꠘꠥ ꠔꠥꠝꠣꠞꠦ ꠛꠘ꠆ꠖ ꠇꠞꠂꠘ।”
JUD 1:10 ꠅꠁꠟꠦ ꠅꠃ ꠜꠘ꠆ꠒ ꠃꠡ꠆ꠔꠣꠖ ꠅꠇꠟꠦ ꠎꠦꠔꠣ ꠛꠥꠎꠦ ꠘꠣ ꠅꠔꠣꠞ ꠛꠖꠘꠣꠝ ꠉꠣꠄ, ꠀꠞ ꠎꠋꠟꠤ ꠎꠣꠘꠥꠀꠞꠞ ꠟꠣꠈꠣꠘ ꠘꠤꠎꠞ ꠀꠈꠟꠦ ꠘꠤꠎꠞ ꠡꠞ꠆ꠛꠘꠣꠡ ꠊꠐꠣꠄ।
JUD 1:11 ꠁꠔꠣ ꠔ ꠟꠣꠘ꠆ꠘꠔꠤ! ꠁꠉꠥꠁꠘ ꠛꠣꠛꠣ ꠀꠖꠝꠞ ꠟꠣꠘ꠆ꠘꠔꠤ ꠙꠥꠔ ꠇꠣꠛꠤꠟꠞ ꠟꠣꠈꠣꠘ ꠛꠘꠍꠂꠘ। ꠖꠥꠘꠤꠀꠛꠤ ꠟꠣꠜꠞ ꠀꠡꠣꠄ ꠔꠣꠞꠣ ꠢꠃ ꠜꠘ꠆ꠒ ꠘꠛꠤ ꠛꠣꠟꠣꠝꠞ ꠈꠣꠁꠡꠞ ꠀꠔꠅ ꠘꠤꠎꠞꠦ ꠡꠙꠤ ꠖꠤꠍꠦ। ꠀꠞ ꠝꠥꠍꠣ ꠘꠛꠤꠞ ꠛꠣꠄ ꠛꠤꠉꠠꠤ ꠎꠣꠅꠞꠣ ꠢꠃ ꠘꠦꠔꠣ ꠇꠥꠞꠣꠢꠞ ꠟꠣꠈꠣꠘ ꠔꠣꠞꠣꠞ ꠛꠤꠘꠣꠡ ꠀꠍꠦ।
JUD 1:12 ꠔꠦ ꠅꠃ ꠟꠣꠘ꠆ꠘꠔꠤ ꠅꠔꠣ ꠀꠁꠀ ꠎꠦꠛꠟꠣ ꠛꠦ-ꠡꠞꠝꠞ ꠟꠣꠈꠣꠘ ꠔꠥꠝꠞꠣꠞ ꠝꠦꠎꠛꠣꠘꠤ ꠈꠣꠄ, ꠅꠃ ꠡꠝꠄ ꠁꠔꠣ ꠅꠁꠎꠣꠁꠘ ꠔꠥꠝꠞꠣꠞ ꠈꠣꠘꠤꠞ ꠕꠣꠟꠞ ꠝꠄꠟꠣ। ꠔꠣꠞꠣ ꠈꠣꠟꠤ ꠘꠤꠎꠞ ꠡ꠆ꠛꠣꠞꠕꠞ ꠗꠣꠘ꠆ꠖꠣ ꠇꠞꠦ। ꠔꠣꠞꠣ ꠅꠁꠟꠣ ꠀꠍꠝꠣꠘꠅ ꠃꠠꠞꠣ ꠢꠥꠖꠣ ꠝꠦꠊꠞ ꠈꠥꠐꠤ, ꠛꠣ ꠛꠣꠉꠣꠘꠅ ꠖꠥꠁꠛꠣꠞ ꠝꠞꠣ-ꠢꠥꠇꠘꠣ ꠚꠟ ꠉꠣꠍ, ꠎꠦꠉꠤꠄ ꠚꠟ ꠘꠣ ꠗꠞꠣꠄ, ꠎꠠꠦ-ꠚꠠꠦ ꠢꠥꠞꠤꠀ ꠔꠥꠟꠤꠀ ꠚꠣꠟꠣꠁꠟ ꠅꠁꠍꠦ।
JUD 1:13 ꠀꠞ ꠔꠣꠞꠣ ꠅꠁꠟꠣ ꠔꠥꠚꠣꠘꠞ ꠇꠣꠟꠞ ꠖꠞꠤꠀꠞ ꠓꠦꠃꠞ ꠟꠣꠈꠣꠘ, ꠖꠞꠤꠀꠞ ꠓꠦꠃꠄ ꠎꠦꠟꠣ ꠚꠦꠘꠣꠞꠦ ꠜꠣꠡꠣꠁꠀ ꠔꠥꠟꠦ, ꠔꠣꠞꠣꠞ ꠛꠖ ꠇꠣꠝꠞ ꠡꠞꠝꠅ ꠅꠟꠣ ꠜꠣꠡꠤꠀ ꠃꠑꠦ। ꠔꠣꠞꠣ ꠅꠁꠟꠣ ꠌꠣꠁꠞꠅꠛꠣꠄ ꠌꠇ꠆ꠇꠞ ꠖꠦꠅꠞꠣ ꠔꠦꠞꠣꠞ ꠟꠣꠈꠣꠘ, ꠁꠔꠣꠞ ꠢꠦꠡ ꠖꠡꠣ ꠅꠁꠟ ꠢꠞ-ꠢꠣꠝꠦꠡꠣꠇꠥꠞ ꠟꠣꠉꠤ ꠎꠝꠣ ꠞꠣꠈꠣ ꠉꠁꠘ ꠀꠘ꠆ꠖꠣꠁꠞ।
JUD 1:14 ꠛꠣꠛꠣ ꠀꠖꠝꠞ ꠈꠣꠘ꠆ꠖꠣꠘꠞ ꠡꠣꠔ ꠘꠝ꠆ꠛꠞ ꠎꠘ ꠢꠎꠞꠔ ꠁꠖ꠆ꠞꠤꠍꠦꠅ ꠅꠔꠣ ꠝꠣꠘꠡꠞ ꠛꠦꠙꠣꠞꠦ ꠇꠁꠀ ꠉꠦꠍꠂꠘ, “ꠢꠥꠘꠅ, ꠝꠣꠘꠡꠞ ꠛꠤꠌꠣꠞ ꠇꠞꠣꠞ ꠟꠣꠉꠤ, ꠝꠣꠟꠤꠇ ꠝꠃꠟꠣꠄ ꠔꠣꠘ ꠀꠎꠣꠞ ꠀꠎꠣꠞ ꠙꠛꠤꠔ꠆ꠞ ꠚꠤꠞꠤꠡ꠆ꠔꠣ ꠟꠁꠀ ꠀꠁꠞꠣ।
JUD 1:15 ꠎꠦꠔꠣꠄ ꠛꠦ-ꠖꠤꠘꠤ ꠇꠣꠝ ꠇꠞꠍꠂꠘ ꠀꠞ ꠔꠣꠘ ꠛꠤꠞꠥꠖ꠆ꠖꠦ ꠟꠣꠘ꠆ꠘꠔꠤ ꠝꠣꠔ ꠝꠣꠔꠤꠍꠂꠘ, ꠅꠈꠘ ꠅꠃ ꠛꠦ-ꠖꠤꠘ ꠉꠥꠘꠣꠉꠣꠞ ꠅꠇꠟꠞ ꠙꠣꠅꠘꠣ ꠢꠤꠡꠣꠛꠦ ꠔꠣꠁꠘ ꠁꠔꠣꠞꠦ ꠙꠥꠞꠣꠙꠥꠞ ꠖꠥꠡꠤ ꠡꠣꠁꠛꠡ꠆ꠔ ꠇꠞꠣꠔ ꠀꠁꠞꠣ।”
JUD 1:16 ꠁꠔꠣꠄ ꠔ ꠢꠣꠝꠦꠡꠣꠃ ꠘꠣ-ꠍꠛꠞꠤ ꠇꠞꠂꠘ, ꠘꠤꠎꠞ ꠇꠙꠣꠟꠞꠦ ꠖꠥꠡꠂꠘ ꠀꠞ ꠔꠣꠞꠣꠞ ꠛꠖ ꠈꠣꠁꠡꠞ ꠛꠡꠦ ꠌꠟꠂꠘ। ꠔꠣꠞꠣꠞ ꠢꠇꠟ ꠝꠣꠔꠅ ꠘꠤꠎꠞ ꠛꠠꠣꠁ-ꠛꠦꠐꠣꠉꠤꠞꠤ ꠖꠦꠈꠣꠁꠘ, ꠡ꠆ꠛꠣꠞꠕ ꠢꠣꠍꠤꠟꠞ ꠟꠣꠉꠤ ꠝꠣꠘꠡꠞ ꠜꠎꠘꠣ ꠇꠞꠂꠘ।
JUD 1:17 ꠅꠁꠟꠦ ꠅ ꠝꠣꠄꠀꠞ ꠖꠥꠡ꠆ꠔ ꠅꠇꠟ, ꠀꠝꠤ ꠔꠥꠝꠞꠣꠞꠦ ꠇꠁꠞꠣꠝ, ꠀꠝꠞꠣꠞ ꠝꠣꠟꠤꠇ ꠁꠍꠣ ꠀꠟ-ꠝꠍꠤꠞ ꠍꠣꠢꠣꠛꠤ ꠅꠇꠟꠦ ꠀꠉꠦ ꠎꠦꠔꠣ ꠛꠣꠔꠣꠁꠍꠂꠘ, ꠁꠔꠣ ꠝꠘꠅ ꠞꠣꠈꠤꠅ।
JUD 1:18 ꠄꠞꠣ ꠔꠥꠝꠞꠣꠞꠦ ꠅꠃ ꠢꠥꠡꠤꠀꠞꠤ ꠖꠤꠔꠣ ꠘꠣ ꠘꠤ, “ꠀꠈꠦꠞꠤ ꠎꠝꠣꠘꠣꠔ ꠙꠞꠦꠎꠉꠣꠞꠞꠦ ꠑꠣꠐ꠆ꠐꠣ-ꠝꠡꠇꠞꠣ ꠇꠞꠞꠣ ꠄꠇꠎꠣꠔ ꠝꠣꠘꠥꠡ ꠀꠁꠛꠣ, ꠀꠁꠀ ꠔꠣꠞꠣꠞ ꠛꠦ-ꠖꠤꠘꠤ ꠛꠖ ꠈꠣꠁꠡ ꠝꠣꠚꠤꠇ ꠌꠟꠛꠣ।”
JUD 1:19 ꠖꠥꠘꠤꠀꠛꠤ ꠜꠣꠛꠞ ꠁꠔꠣ ꠝꠣꠘꠡꠦ ꠈꠣꠟꠤ ꠖꠟꠣꠖꠟꠤ ꠟꠣꠉꠣꠁꠘ, ꠔꠣꠞꠣꠞ ꠜꠤꠔꠞꠦ ꠀꠟ꠆ꠟꠣꠁ ꠙꠣꠇ ꠞꠥꠢꠥ ꠘꠣꠁ।
JUD 1:20 ꠔꠣ-ꠅ ꠝꠣꠄꠀꠞ ꠜꠣꠁꠀꠁꠘ, ꠔꠥꠝꠞꠣꠞ ꠅꠃ ꠘꠤꠈꠥꠔ ꠙꠣꠇ-ꠙꠛꠤꠔ꠆ꠞ ꠁꠝꠣꠘꠞ ꠃꠙꠞꠦ ꠜꠞ ꠇꠞꠤꠀ ꠘꠤꠎꠞꠦ ꠉꠠꠤꠀ ꠔꠥꠟꠣꠔ ꠞꠅ, ꠀꠞ ꠙꠣꠇ ꠞꠥꠢꠦ ꠇꠣꠝꠤꠟ ꠅꠁꠀ ꠝꠥꠘꠣꠎꠣꠔ ꠇꠞꠣꠔ ꠞꠅ।
JUD 1:21 ꠀꠟ꠆ꠟꠣꠞ ꠝꠢꠛ꠆ꠛꠔꠞ ꠝꠣꠎꠦ ꠘꠤꠎꠞꠦ ꠛꠣꠘ꠆ꠖꠤꠀ ꠞꠣꠈꠅ, ꠀꠞ ꠀꠈꠦꠞꠤ ꠎꠤꠘ꠆ꠖꠦꠉꠤ ꠙꠣꠁꠛꠣꠞ ꠀꠡꠣꠄ ꠀꠝꠞꠣꠞ ꠝꠣꠟꠤꠇ ꠁꠍꠣ ꠀꠟ-ꠝꠍꠤꠞ ꠝꠦꠢꠦꠞꠛꠣꠘꠤꠞ ꠟꠣꠉꠤ ꠛꠣꠞ ꠌꠣꠅ।
JUD 1:22 ꠔꠥꠝꠞꠣꠞ ꠝꠣꠎꠦ ꠎꠦꠞꠣꠞ ꠁꠝꠣꠘꠦ ꠟꠠꠣ-ꠌꠠꠣ ꠇꠞꠦ, ꠔꠣꠞꠣꠞꠦ ꠖꠄꠀ ꠇꠞꠅ।
JUD 1:23 ꠀꠉꠥꠁꠘ ꠕꠣꠇꠤ ꠔꠥꠟꠤꠀ ꠀꠘꠤꠀ ꠝꠣꠘꠡꠞ ꠎꠣꠘ ꠛꠣꠌꠣꠅ। ꠀꠞ ꠉꠥꠘꠣꠞ ꠛꠖ ꠈꠣꠁꠡꠞ ꠎꠣꠟꠣꠄ ꠎꠦꠔꠣꠞ ꠎꠤꠘ꠆ꠖꠦꠉꠤ ꠛꠞꠛꠣꠖ ꠅꠁꠉꠦꠍꠦ, ꠁꠔꠣꠞ ꠚꠤꠘ꠆ꠘꠞ ꠘꠣꠙꠣꠇ ꠇꠣꠙꠠ ꠈꠣꠘꠞꠦꠅ ꠊꠤꠘ꠆ꠘꠣ ꠇꠞꠅ, ꠀꠞ ꠘꠤꠎꠞꠦ ꠢꠦꠚꠣꠎꠔꠦ ꠞꠣꠈꠤꠀ ꠔꠣꠞꠣꠞꠦ ꠖꠄꠀ ꠇꠞꠅ।
JUD 1:24 ꠀꠞ ꠎꠦ ꠀꠟ꠆ꠟꠣꠄ ꠔꠥꠝꠞꠣꠞꠦ ꠃꠡ꠆ꠐꠣ ꠈꠣꠅꠀ ꠕꠣꠇꠤ ꠛꠣꠌꠣꠁꠘ, ꠎꠦꠁꠘ ꠘꠤꠈꠥꠔ ꠢꠣꠟꠔꠦ ꠔꠥꠝꠞꠣꠞꠦ ꠈꠥꠡꠤ-ꠛꠣꠡꠤꠄ ꠔꠣꠘ ꠡꠣꠘ-ꠔꠎꠟ꠆ꠟꠤꠞ ꠍꠣꠝꠘꠦ ꠀꠎꠤꠞ ꠇꠞꠔꠣ ꠙꠣꠞꠂꠘ,
JUD 1:25 ꠢꠃ ꠄꠇꠝꠣꠔ꠆ꠞ ꠀꠟ꠆ꠟꠣ ꠎꠦꠁꠘ ꠀꠝꠞꠣꠞ ꠎꠣꠘ ꠛꠣꠌꠣꠁꠘ, ꠔꠣꠘ ꠎꠣꠟꠣꠟ-ꠡꠣꠘ, ꠝꠢꠤꠝꠣ, ꠇꠥꠖꠞꠔꠤ ꠛꠟ-ꠡꠇ꠆ꠔꠤ, ꠀꠞ ꠞꠣꠎ-ꠈꠦꠝꠔꠣ ꠀꠝꠞꠣꠞ ꠝꠣꠟꠤꠇ ꠁꠍꠣ ꠀꠟ-ꠝꠍꠤꠞ ꠃꠍꠤꠟ꠆ꠟꠣꠄ ꠎꠣꠁꠞ ꠅꠃꠇ, ꠢꠇ꠆ꠇꠟ ꠎꠥꠉꠞ ꠀꠉ ꠕꠣꠇꠤ ꠅꠈꠘ ꠙꠞ꠆ꠎꠘ꠆ꠔ ꠀꠞ ꠎꠥꠉꠦ ꠎꠥꠉꠦ ꠢꠞ-ꠢꠣꠝꠦꠡꠣꠃ ꠅꠟꠣ ꠅꠃꠇ। ꠀꠝꠤꠘ॥
REV 1:1 ꠅꠃ ꠇꠤꠔꠣꠛꠅ ꠎꠔꠔꠣ ꠟꠦꠈꠣ ꠅꠁꠍꠦ, ꠁꠔꠣ ꠀꠟ꠆ꠟꠣ ꠙꠣꠇꠦ ꠁꠍꠣ ꠀꠟ-ꠝꠍꠤꠞꠦ ꠎꠣꠘꠣꠁꠍꠂꠘ, ꠀꠞ ꠀꠟ-ꠝꠍꠤꠄ ꠁꠔꠣ ꠎꠣꠁꠞ ꠇꠞꠍꠂꠘ। ꠕꠥꠠꠣ ꠖꠤꠘꠞ ꠜꠤꠔꠞꠦ ꠎꠦꠔꠣ ꠎꠦꠔꠣ ꠛꠦꠙꠣꠞ ꠘꠤꠌ꠆ꠌꠤꠔ ꠊꠐꠤꠛ, ꠁꠔꠣ ꠎꠣꠔꠦ ꠔꠣꠘ ꠉꠥꠟꠣꠝ ꠅꠇꠟꠦ ꠎꠣꠘꠂꠘ। ꠀꠟ-ꠝꠍꠤꠄ ꠔꠣꠘ ꠚꠤꠞꠤꠡ꠆ꠔꠣ ꠙꠣꠑꠣꠁꠀ ꠘꠤꠎꠞ ꠉꠥꠟꠣꠝ ꠍꠣꠢꠣꠛꠤ ꠢꠣꠘ꠆ꠘꠣꠘꠞꠦ ꠁꠔꠣ ꠢꠇꠟꠔꠣ ꠎꠣꠘꠣꠁꠟꠣ।
REV 1:2 ꠍꠣꠢꠣꠛꠤ ꠢꠣꠘ꠆ꠘꠣꠘꠦ ꠀꠟ꠆ꠟꠣꠞ ꠇꠣꠟꠣꠝ ꠀꠞ ꠁꠍꠣ ꠀꠟ-ꠝꠍꠤꠞ ꠡꠣꠇ꠆ꠇꠤꠞ ꠛꠦꠙꠣꠞꠦ ꠎꠔ ꠖꠞꠡꠘ ꠖꠦꠈꠟꠣ, ꠅꠃ ꠖꠞꠡꠘꠞ ꠛꠦꠙꠣꠞꠦꠃ ꠔꠣꠁꠘ ꠎꠛꠣꠘꠛꠘ꠆ꠖꠤ ꠖꠤꠟꠣ।
REV 1:3 ꠀꠞ ꠢꠃ ꠎꠘꠃ ꠘꠦꠇ-ꠇꠙꠣꠟꠤ, ꠎꠦꠁꠘ ꠁ ꠇꠣꠟꠣꠝꠞ ꠀꠉꠣꠝ ꠈꠛꠞ ꠅꠇꠟ ꠔꠤꠟꠣꠅꠔ ꠇꠞꠂꠘ, ꠀꠞ ꠔꠣꠞꠣꠅ ꠘꠦꠇ-ꠇꠙꠣꠟꠤ, ꠎꠦꠞꠣ ꠁ ꠇꠣꠟꠣꠝ ꠢꠥꠘꠂꠘ, ꠢꠥꠘꠤꠀ ꠢꠣꠞꠤ ꠀꠝꠟ ꠇꠞꠂꠘ; ꠇꠣꠞꠘ ꠡꠝꠄ ꠔ ꠗꠣꠞꠅ ꠀꠁꠌ꠆ꠍꠦ।
REV 1:4 ꠔꠦ ꠀꠝꠤ ꠢꠣꠘ꠆ꠘꠣꠘꠦ ꠞꠥꠝꠣꠘ ꠛꠣꠖꠡꠣꠁꠞ ꠀꠍꠤꠀ ꠖꠦꠡꠞ ꠡꠣꠔꠅ ꠎꠝꠣꠔꠞ ꠉꠦꠍꠦ ꠅꠃ ꠎꠛꠣꠘꠛꠘ꠆ꠖꠤ ꠟꠦꠈꠞꠣꠝ। ꠎꠦꠁꠘ ꠀꠍꠟꠣ, ꠎꠦꠁꠘ ꠀꠍꠂꠘ ꠀꠞ ꠎꠦꠁꠘ ꠢꠣꠝꠦꠡꠣ ꠞꠁꠛꠣ ꠢꠃ ꠀꠟ꠆ꠟꠣ ꠙꠣꠇ, ꠀꠞ ꠔꠣꠘ ꠔꠈ꠆ꠔꠞ ꠍꠣꠝꠘꠦ ꠎꠦ ꠡꠣꠔ ꠘꠝꠥꠘꠣꠞ ꠞꠥꠢꠥ ꠕꠣꠇꠂꠘ, ꠄꠞꠣ ꠀꠞ ꠎꠦꠁꠘ ꠢꠇ-ꠢꠣꠟꠣꠟ ꠡꠣꠇ꠆ꠇꠤ ꠢꠃ ꠁꠍꠣ ꠀꠟ-ꠝꠍꠤꠄ ꠔꠥꠝꠞꠣꠞꠦ ꠞꠢꠝꠔ ꠀꠞ ꠡꠣꠘ꠆ꠔꠤ ꠖꠣꠘ ꠇꠞꠃꠇ꠆ꠇꠣ। ꠔꠣꠁꠘ ꠔ ꠝꠥꠞ꠆ꠖꠣ ꠅꠇꠟꠞ ꠝꠣꠎ ꠕꠣꠇꠤ ꠙꠄꠟꠣ ꠎꠤꠘ꠆ꠖꠣ ꠅꠁꠀ ꠃꠑꠤꠍꠂꠘ, ꠔꠣꠁꠘꠃ ꠖꠥꠘꠤꠀꠞ ꠞꠣꠎꠣ ꠅꠇꠟꠞ ꠛꠣꠖꠡꠣ। ꠔꠣꠁꠘ ꠀꠝꠞꠣꠞꠦ ꠝꠢꠛ꠆ꠛꠔ ꠇꠞꠂꠘ, ꠄꠞꠟꠣꠉꠤ ꠘꠤꠎꠞ ꠎꠣꠘ ꠇꠥꠞꠛꠣꠘꠤ ꠖꠤꠀ, ꠀꠝꠞꠣꠞꠦ ꠉꠥꠘꠣꠞ ꠡꠣꠎꠣ ꠕꠣꠇꠤ ꠛꠣꠌꠣꠁꠍꠂꠘ।
REV 1:6 ꠔꠣꠁꠘ ꠀꠝꠞꠣꠞꠦ ꠟꠁꠀ ꠄꠇ ꠛꠣꠖꠡꠣꠁ ꠔꠤꠀꠞ ꠇꠞꠤꠀ, ꠔꠣꠘ ꠉꠣꠁꠛꠤ ꠛꠣꠚ ꠀꠟ꠆ꠟꠣꠞ ꠄꠛꠣꠖꠔꠤꠞ ꠟꠣꠉꠤ ꠁꠝꠣꠝ ꠛꠣꠘꠣꠁꠍꠂꠘ। ꠔꠣꠘ ꠝꠢꠤꠝꠣ ꠀꠞ ꠇꠥꠖꠞꠔꠤ ꠛꠟ ꠢꠞ-ꠢꠣꠝꠦꠡꠣ ꠛꠅꠀꠁꠟ ꠞꠃꠇ। ꠀꠝꠤꠘ।
REV 1:7 ꠢꠥꠘꠅ, ꠔꠣꠁꠘ ꠝꠦꠊꠞ ꠌꠣꠇꠣꠔ ꠅꠁꠀ ꠔꠡꠞꠤꠚ ꠀꠘꠞꠣ, ꠙꠞꠔꠦꠇꠦ ꠔꠣꠘꠞꠦ ꠌꠃꠈꠖꠤ ꠖꠦꠈꠛ, ꠎꠣꠞꠣ ꠟꠣꠇꠠꠤꠖꠤ ꠛꠣꠘꠣꠁꠟ ꠍꠟꠤꠛꠅ ꠉꠣꠕꠤꠀ ꠔꠣꠘꠞꠦ ꠎꠣꠘꠦ ꠝꠣꠞꠤꠟꠤꠍꠤꠟ ꠔꠣꠞꠣꠅ ꠖꠦꠈꠛ, ꠀꠞ ꠔꠣꠘ ꠟꠣꠉꠤ ꠖꠥꠘꠤꠀꠞ ꠢꠇꠟ ꠎꠣꠔꠤꠄ ꠎꠥꠞꠦ ꠎꠥꠞꠦ ꠇꠣꠘ꠆ꠖꠤꠛꠣ। ꠅꠃꠟꠣꠃ ꠅꠃꠇ, ꠀꠝꠤꠘ।
REV 1:8 ꠀꠟ꠆ꠟꠣ ꠝꠣꠛꠥꠖꠦ ꠛꠣꠔꠣꠁꠞꠣ, “ꠀꠝꠤꠃ ꠀꠟꠤꠚ ꠀꠞ ꠁꠀ, ꠎꠦꠁꠘ ꠀꠍꠂꠘ, ꠎꠦꠁꠘ ꠀꠍꠟꠣ ꠀꠞ ꠎꠦꠁꠘ ꠢꠣꠝꠦꠡꠣ ꠞꠁꠛꠣ। ꠀꠝꠤꠃ ꠡꠞ꠆ꠛ-ꠡꠇ꠆ꠔꠤꠝꠣꠘ।”
REV 1:9 ꠀꠝꠤ ꠔ ꠔꠥꠝꠞꠣꠞ ꠜꠣꠁ ꠢꠣꠘ꠆ꠘꠣꠘ, ꠢꠎꠞꠔ ꠁꠍꠣꠞ ꠃꠝ꠆ꠝꠔ ꠅꠀꠄ ꠀꠝꠤꠅ ꠔꠥꠝꠞꠣꠞ ꠟꠣꠈꠣꠘ ꠄꠇꠁ ꠇꠡ꠆ꠐ, ꠄꠇꠁ ꠛꠣꠖꠡꠣꠁ ꠀꠞ ꠄꠇꠁ ꠍꠛꠞꠞ ꠜꠣꠉꠤ ꠅꠁꠍꠤ। ꠀꠟ꠆ꠟꠣꠞ ꠇꠣꠟꠣꠝ ꠔꠛꠟꠤꠉ ꠇꠞꠣꠄ ꠀꠞ ꠁꠍꠣꠞ ꠙꠇ꠆ꠇꠦ ꠎꠛꠣꠘꠛꠘ꠆ꠖꠤ ꠖꠦꠅꠀꠄ ꠀꠝꠣꠞꠦ ꠙꠣꠔꠝꠥꠍ ꠘꠣꠝꠞ ꠖꠤꠙꠅ ꠘꠤꠀ ꠛꠘꠛꠣꠡ ꠖꠦꠅꠀ ꠅꠁꠍꠤꠟ।
REV 1:10 ꠄꠞꠝꠣꠎꠦ ꠢꠎꠞꠔ ꠁꠍꠣꠞ ꠙꠛꠤꠔ꠆ꠞ ꠖꠤꠘ, ꠄꠇ ꠞꠛꠤꠛꠣꠞꠦ ꠀꠝꠤ ꠀꠟ꠆ꠟꠣꠁ ꠙꠣꠇ ꠞꠥꠢꠥꠞ ꠝꠣꠎꠦ ꠙꠥꠞꠣꠙꠥꠞ ꠒꠥꠛꠤ ꠉꠦꠟꠣꠝ, ꠅꠝꠘ ꠡꠝꠄ ꠀꠝꠣꠞ ꠈꠞꠦꠖꠤ ꠡꠤꠋꠉꠣꠞ ꠀꠅꠀꠎꠞ ꠟꠣꠈꠣꠘ ꠄꠇ ꠀꠅꠀꠎ ꠢꠥꠘꠟꠣꠝ।
REV 1:11 ꠢꠥꠘꠟꠣꠝ, ꠇꠥꠘꠥ ꠄꠇ ꠎꠘꠦ ꠀꠝꠣꠞꠦ ꠇꠁꠞꠣ, “ꠢꠥꠘꠅ, ꠔꠥꠝꠤ ꠅꠈꠘ ꠎꠦꠔꠣ ꠖꠦꠈꠞꠣꠄ, ꠁꠔꠣ ꠄꠇ ꠇꠤꠔꠣꠛꠅ ꠟꠦꠈꠅ, ꠟꠦꠈꠤꠀ ꠁꠚꠤꠍ, ꠁꠎꠝꠤꠞ, ꠚꠞꠉꠣꠝ, ꠕꠥꠀꠔꠤꠞꠣ, ꠍꠣꠞ꠆ꠖꠤ, ꠚꠤꠟꠣꠖꠤꠟꠚꠤꠀ ꠀꠞ ꠟꠣꠅꠖꠤꠇꠦꠀ ꠐꠣꠃꠘꠞ ꠡꠣꠔꠅ ꠎꠝꠣꠔꠞ ꠉꠦꠍꠦ ꠙꠣꠑꠣꠅ।”
REV 1:12 ꠀꠝꠣꠞ ꠟꠉꠦ ꠎꠦꠁꠘ ꠝꠣꠔꠤꠞꠣ, ꠔꠣꠘꠞꠦ ꠖꠦꠈꠣꠞ ꠈꠤꠀꠟꠦ ꠀꠝꠤ ꠈꠞꠦꠖꠤ ꠊꠥꠞꠟꠣꠝ, ꠊꠥꠞꠤꠀ ꠖꠦꠈꠤ, ꠡꠥꠘꠣꠞ ꠡꠣꠔꠐꠣ ꠌꠦꠞꠣꠉꠖꠣꠘꠤ।
REV 1:13 ꠅꠃ ꠌꠦꠞꠣꠉꠖꠣꠘꠤꠞ ꠝꠣꠎꠈꠣꠘꠅ ꠛꠤꠘ-ꠀꠖꠝꠞ ꠟꠣꠈꠣꠘ ꠄꠇꠎꠘꠞꠦ ꠖꠦꠈꠟꠣꠝ। ꠔꠣꠘ ꠚꠤꠘ꠆ꠘ ꠙꠣꠅ ꠙꠞ꠆ꠎꠘ꠆ꠔ ꠟꠣꠝ꠆ꠛꠣ ꠙꠣꠁꠘ꠆ꠎꠣꠛꠤ, ꠀꠞ ꠛꠥꠇꠥꠞ ꠃꠙꠞꠦ ꠡꠥꠘꠣꠟꠤ ꠄꠇ ꠙꠐ꠆ꠐꠤ।
REV 1:14 ꠔꠣꠘ ꠝꠣꠕꠣꠞ ꠌꠥꠟ ꠖꠥꠗꠞ ꠟꠣꠈꠣꠘ ꠗꠟꠣ ꠌꠇꠌꠇꠣ। ꠔꠣꠘ ꠌꠃꠈ ꠀꠉꠥꠘꠤꠞ ꠟꠥꠇ꠆ꠇꠣꠞ ꠟꠣꠈꠣꠘ।
REV 1:15 ꠙꠣꠅ ꠅꠁꠟꠉꠤ, ꠀꠉꠥꠁꠘꠖꠤ ꠎꠣꠟꠣꠁꠀ ꠝꠣꠘ꠆ꠎꠤꠀ ꠙꠞꠤꠡ꠆ꠇꠣꠞ ꠇꠞꠣ ꠌꠇꠌꠇꠣ ꠙꠤꠔꠟꠞ ꠟꠣꠈꠣꠘ, ꠀꠞ ꠔꠣꠘ ꠉꠟꠣꠞ ꠀꠅꠀꠎ ꠅꠁꠟ, ꠎꠥꠞꠦ ꠎꠥꠞꠦ ꠇꠟ-ꠇꠟꠣꠁꠀ ꠎꠣꠅꠀ ꠙꠣꠘꠤꠞ ꠚꠥꠔꠞ ꠟꠣꠈꠣꠘ।
REV 1:16 ꠔꠣꠘ ꠝꠥꠈꠞ ꠍꠥꠞꠔ ꠀꠍꠤꠟ ꠙꠥꠞꠣ ꠏꠟꠝꠟ ꠇꠞꠞꠣ ꠡꠥꠞꠥꠎꠞ ꠟꠣꠈꠣꠘ। ꠔꠣꠘ ꠝꠥꠈ ꠕꠣꠇꠤ ꠗꠣꠞꠣꠁꠟ ꠄꠇꠈꠣꠘ ꠔꠟꠥꠀꠞ ꠛꠣꠞ ꠅꠁꠟ, ꠁ ꠔꠟꠥꠀꠞꠞ ꠖꠥꠁꠅ ꠉꠣꠟꠣꠛꠣꠄ ꠗꠣꠞ ꠀꠍꠤꠟ, ꠀꠞ ꠔꠣꠘ ꠒꠣꠁꠘ ꠀꠔꠅ ꠀꠍꠤꠟ ꠀꠍꠝꠣꠘꠞ ꠡꠣꠔꠐꠣ ꠔꠦꠞꠣ।
REV 1:17 ꠔꠣꠘꠦ ꠖꠦꠈꠤꠀ ꠀꠝꠤ ꠝꠞꠣꠞ ꠟꠣꠈꠣꠘ ꠔꠣꠘ ꠙꠣꠅꠞ ꠇꠣꠘ꠆ꠖꠣꠔ ꠙꠠꠤ ꠞꠁꠟꠣꠝ। ꠔꠦꠃ ꠔꠣꠘ ꠘꠤꠎꠞ ꠒꠣꠁꠘꠞ ꠀꠔ ꠀꠝꠣꠞ ꠃꠙꠞꠦ ꠕꠁꠀ ꠇꠁꠟꠣ, “ꠒꠞꠣꠁꠅ ꠘꠣ। ꠀꠝꠤꠃ ꠀꠃꠀꠟ ꠀꠞ ꠀꠝꠤꠃ ꠀꠈꠦꠞ,
REV 1:18 ꠀꠝꠤꠃ ꠢꠣꠁꠃꠟ-ꠇꠣꠁꠃꠝ, ꠎꠦꠁꠘ ꠘꠤꠎꠦ ꠘꠤꠎꠦ ꠢꠞ-ꠢꠣꠝꠦꠡꠣ ꠀꠍꠤ। ꠀꠝꠣꠞ ꠝꠃꠔ ꠅꠁꠍꠤꠟ, ꠅꠁꠟꠦ ꠅꠈꠘ ꠀꠝꠤ ꠎꠥꠉ ꠎꠥꠉ ꠗꠞꠤ ꠌꠤꠞꠇꠣꠟ ꠎꠤꠘ꠆ꠖꠣ ꠀꠍꠤ। ꠝꠃꠔ ꠀꠞ ꠇꠄꠛꠞꠞ ꠌꠣꠛꠤ ꠀꠝꠣꠞ ꠀꠔꠅ ꠀꠍꠦ।
REV 1:19 ꠄꠞꠟꠣꠉꠤꠃ ꠔꠥꠝꠤ ꠅꠈꠘ ꠎꠦꠔꠣ ꠖꠦꠈꠞꠣꠄ, ꠄꠞ ꠀꠉꠦ ꠎꠦꠔꠣ ꠊꠐꠤꠍꠦ ꠀꠞ ꠛꠣꠖꠦ ꠎꠦꠔꠣ ꠊꠐꠤꠛ, ꠁꠔꠣ ꠢꠇ꠆ꠇꠟꠔꠣ ꠔꠥꠝꠤ ꠟꠦꠈꠤꠀ ꠕꠅ।
REV 1:20 ꠔꠥꠝꠤ ꠡꠥꠘꠣꠞ ꠎꠦ ꠡꠣꠔꠐꠣ ꠌꠦꠞꠣꠉꠖꠣꠘꠤ ꠖꠦꠈꠍ ꠀꠞ ꠀꠝꠣꠞ ꠒꠣꠁꠘ ꠀꠔꠅ ꠡꠣꠔꠐꠣ ꠔꠦꠞꠣ ꠖꠦꠈꠍ, ꠁꠔꠣꠞ ꠝꠣꠘꠤ ꠅꠁꠟ, ꠡꠣꠔꠅ ꠔꠦꠞꠣ ꠅꠁꠟ ꠡꠣꠔ ꠎꠝꠣꠔꠞ ꠡꠣꠔꠎꠘ ꠚꠤꠞꠤꠡ꠆ꠔꠣ, ꠡꠣꠔꠐꠣ ꠌꠦꠞꠣꠉꠖꠣꠘꠤ ꠅꠁꠟ ꠢꠃ ꠡꠣꠔꠅ ꠎꠝꠣꠔ।
REV 2:1 “ꠁꠚꠤꠍ ꠐꠣꠃꠘꠞ ꠎꠝꠣꠔꠞ ꠚꠤꠞꠤꠡ꠆ꠔꠣꠞ ꠉꠦꠍꠦ ꠟꠦꠈꠅ: ꠎꠦꠁꠘ ꠘꠤꠎꠞ ꠒꠣꠁꠘ ꠀꠔꠅ ꠀꠍꠝꠣꠘꠞ ꠡꠣꠔꠐꠣ ꠔꠦꠞꠣ ꠗꠞꠤꠀ, ꠡꠥꠘꠣꠞ ꠡꠣꠔꠐꠣ ꠌꠦꠞꠣꠉꠖꠣꠘꠤꠞ ꠝꠣꠎꠈꠣꠘꠅ ꠌꠟꠣ-ꠚꠤꠞꠣ ꠇꠞꠂꠘ, ꠔꠣꠁꠘ ꠅꠃ ꠇꠕꠣ ꠇꠁꠞꠣ,
REV 2:2 “ꠀꠝꠤ ꠔ ꠔꠥꠝꠞꠣꠞ ꠇꠣꠝ-ꠇꠣꠎ, ꠔꠥꠝꠞꠣꠞ ꠝꠦꠘꠔ ꠀꠞ ꠔꠥꠝꠞꠣꠞ ꠍꠛꠞꠞ ꠇꠕꠣꠅ ꠎꠣꠘꠤ। ꠀꠝꠤ ꠎꠣꠘꠤ, ꠔꠥꠝꠞꠣ ꠇꠥꠘꠥꠎꠣꠔ ꠛꠖ ꠝꠣꠘꠡꠞꠦ ꠡꠁꠎ꠆ꠎ ꠇꠞꠔꠣꠄ ꠙꠣꠞ ꠘꠣ, ꠀꠞ ꠍꠣꠢꠣꠛꠤ ꠘꠣ ꠅꠁꠀꠅ ꠎꠦꠉꠥꠁꠘ꠆ꠔꠦ ꠘꠤꠎꠞꠦ ꠍꠣꠢꠣꠛꠤ ꠇꠁꠀ ꠙꠞꠤꠌꠄ ꠖꠦꠁꠘ, ꠔꠣꠞꠣꠞꠦ ꠙꠞꠤꠇ꠆ꠇꠣ ꠇꠞꠤꠀ ꠖꠦꠈꠍ, ꠀꠞ ꠙꠞꠝꠣꠘꠅ ꠙꠣꠁꠍ ꠔꠣꠞꠣ ꠎꠦꠘ ꠛꠦꠁꠝꠣꠘꠤ ꠝꠣꠔꠦꠞ।
REV 2:3 ꠔꠥꠝꠞꠣꠞ ꠛꠃꠔ ꠍꠛꠞ ꠀꠍꠦ, ꠔꠥꠝꠞꠣ ꠀꠝꠣꠞ ꠟꠣꠉꠤ ꠛꠃꠔ ꠇꠡ꠆ꠐ ꠇꠞꠞꠣꠄ, ꠇꠥꠘꠥꠝꠘ꠆ꠔꠦ ꠢꠦꠞꠣꠘ ꠅꠁꠍ ꠘꠣ।
REV 2:4 “ꠅꠁꠟꠦ ꠔꠥꠝꠞꠣꠞ ꠛꠤꠞꠥꠖ꠆ꠖꠦ ꠔ ꠀꠝꠣꠞ ꠘꠣꠟꠤꠡ ꠀꠍꠦ, ꠔꠥꠝꠞꠣ ꠙꠄꠟꠣ ꠀꠝꠣꠞꠦ ꠎꠦꠟꠣ ꠝꠢꠛ꠆ꠛꠔ ꠇꠞꠔꠣꠄ, ꠅꠈꠘ ꠁꠔꠣ ꠛꠣꠖ ꠖꠤꠟꠣꠁꠍ।
REV 2:5 ꠕꠥꠠꠣ ꠌꠤꠘ꠆ꠔꠣ ꠇꠞꠤ ꠖꠦꠈꠅ, ꠔꠥꠝꠞꠣ ꠇꠔ ꠃꠌꠣ ꠕꠣꠇꠤ ꠇꠔ ꠟꠣꠝꠣꠔ ꠟꠣꠝꠤ ꠉꠦꠍ। ꠁ ꠢꠣꠟꠔ ꠕꠣꠇꠤ ꠖꠤꠟ ꠛꠖꠟꠣꠁꠀ, ꠀꠉꠦ ꠎꠦꠔꠣ ꠇꠞꠔꠣꠄ ꠅꠈꠘ ꠢꠤꠞꠛꠣꠞ ꠅꠟꠣ ꠇꠞꠅ। ꠀꠞ ꠎꠥꠖꠤ ꠖꠤꠟ ꠘꠣ ꠚꠤꠞꠣꠅ, ꠔꠦ ꠀꠝꠤ ꠔꠥꠝꠞꠣꠞ ꠉꠦꠍꠦ ꠀꠁꠀ ꠔꠥꠝꠞꠣꠞ ꠌꠦꠞꠣꠉ ꠖꠣꠘꠤꠈꠣꠘ ꠎꠣꠉꠣ ꠕꠣꠇꠤ ꠢꠞꠣꠁꠟꠤꠝꠥ।
REV 2:6 ꠔꠥꠝꠞꠣꠞ ꠔ ꠄꠇꠐꠣ ꠉꠥꠘ ꠀꠍꠦ, ꠘꠤꠇꠥꠟꠣꠄꠔꠤ ꠅꠇꠟꠦ ꠎꠦꠔꠣ ꠇꠣꠝ ꠇꠞꠂꠘ ꠔꠥꠝꠞꠣ ꠁꠔꠣꠞꠦ ꠊꠤꠘ꠆ꠘꠣ ꠇꠞ, ꠀꠞ ꠀꠝꠤꠅ ꠁꠔꠣꠞꠦ ꠊꠤꠘ ꠇꠞꠤ।
REV 2:7 “ꠎꠣꠞ ꠇꠣꠘ ꠀꠍꠦ ꠢꠦ ꠢꠥꠘꠃꠇ, ꠙꠣꠇ ꠞꠥꠢꠦ ꠎꠝꠣꠔ ꠅꠇꠟꠞꠦ ꠇꠤꠔꠣ ꠛꠣꠔꠣꠁꠞꠣ। ꠎꠦ ꠎꠘ ꠎꠄꠁ ꠅꠁꠛ ꠔꠣꠞꠦ ꠀꠝꠤ ꠀꠟ꠆ꠟꠣ ꠙꠣꠇꠞ ꠎꠣꠘ꠆ꠘꠣꠔꠥꠟ-ꠚꠦꠞꠖꠃꠍꠞ ꠎꠤꠘ꠆ꠖꠦꠉꠤ-ꠉꠣꠍꠞ ꠚꠟ ꠈꠣꠁꠔꠦ ꠖꠤꠝꠥ।
REV 2:8 “ꠁꠎꠝꠤꠞ ꠐꠣꠃꠘꠞ ꠎꠝꠣꠔꠞ ꠚꠤꠞꠤꠡ꠆ꠔꠣꠞ ꠉꠦꠍꠦ ꠅꠃ ꠇꠕꠣ ꠟꠦꠈꠅ: ꠎꠦꠁꠘ ꠀꠃꠀꠟ ꠀꠞ ꠀꠈꠦꠞ, ꠎꠦꠁꠘ ꠝꠣꠞꠣ ꠉꠦꠍꠟꠣ, ꠛꠣꠖꠦ ꠎꠤꠘ꠆ꠖꠣ ꠅꠁꠍꠂꠘ, ꠔꠣꠁꠘ ꠅꠈꠣꠘ ꠇꠁꠞꠣ,
REV 2:9 “ꠀꠝꠤ ꠔ ꠔꠥꠝꠞꠣꠞ ꠅꠜꠣꠛ-ꠅꠘꠐꠘ ꠀꠞ ꠇꠡ꠆ꠐꠞ ꠇꠕꠣ ꠎꠣꠘꠤ, ꠅꠁꠟꠦ ꠄꠞꠛꠣꠖꠦꠅ ꠔꠥꠝꠞꠣ ꠗꠘꠤ। ꠎꠦꠔꠣ ꠝꠣꠘꠡꠦ ꠈꠣꠐꠤ ꠁꠢꠥꠖꠤ ꠘꠣꠝꠦ ꠘꠤꠎꠞ ꠙꠞꠤꠌꠄ ꠖꠦꠄ, ꠅꠕꠌ ꠁꠢꠥꠖꠤꠞ ꠀꠝꠟ ꠘꠣꠁ, ꠛꠞꠋ ꠁꠛꠟꠤꠍꠞ ꠖꠟꠞ ꠝꠣꠘꠥꠡ, ꠁꠔꠣꠄ ꠔꠥꠝꠞꠣꠞ ꠛꠤꠞꠥꠖ꠆ꠖꠦ ꠇꠤꠔꠣ ꠝꠣꠔꠤꠞꠣ ꠀꠝꠤ ꠔ ꠎꠣꠘꠤ।
REV 2:10 ꠔꠥꠝꠞꠣ ꠎꠦ ꠝꠍꠤꠛꠔꠞ ꠝꠣꠎꠦ ꠙꠠꠛꠣꠄ, ꠁ ꠝꠍꠤꠛꠔꠞꠦ ꠄꠇꠖꠝ ꠒꠞꠣꠁꠅ ꠘꠣ। ꠎꠣꠘ ꠘꠤ, ꠁꠛꠟꠤꠍꠦ ꠙꠞꠤꠇ꠆ꠇꠣ ꠇꠞꠣꠞ ꠘꠤꠅꠔꠦ ꠔꠥꠝꠞꠣꠞ ꠝꠣꠎꠞ ꠇꠄꠎꠘꠞꠦ ꠎꠦꠟꠅ ꠖꠤꠛ, ꠢꠘꠅ ꠔꠥꠝꠞꠣ ꠖꠡ ꠖꠤꠘ ꠇꠡ꠆ꠐ ꠙꠣꠁꠛꠣꠄ। ꠢꠥꠘꠅ, ꠁꠝꠣꠘꠞ ꠙꠕꠦ ꠔꠥꠝꠞꠣ ꠝꠞꠘ ꠙꠞ꠆ꠎꠘ꠆ꠔ ꠢꠇ-ꠢꠣꠟꠣꠟ ꠞꠁꠅ, ꠔꠦꠃ ꠎꠄꠅꠞ ꠝꠣꠟꠣ ꠢꠤꠡꠣꠛꠦ ꠀꠝꠤ ꠔꠥꠝꠞꠣꠞꠦ ꠀꠈꠦꠞꠞ ꠎꠤꠘ꠆ꠖꠦꠉꠤ ꠖꠤꠝꠥ।
REV 2:11 “ꠎꠣꠞ ꠇꠣꠘ ꠀꠍꠦ ꠢꠦ ꠢꠥꠘꠃꠇ, ꠙꠣꠇ ꠞꠥꠢꠦ ꠎꠝꠣꠔ ꠅꠇꠟꠞꠦ ꠇꠤꠔꠣ ꠛꠣꠔꠣꠁꠞꠣ। ꠎꠦ ꠎꠘ ꠎꠄꠁ ꠅꠁꠛ, ꠖꠥꠍꠞꠣꠛꠣꠞꠞ ꠝꠃꠔꠦ, ꠝꠣꠘꠤ ꠖꠥꠎꠈꠦ ꠔꠣꠞ ꠈꠦꠔꠤ ꠇꠞꠣꠞ ꠇꠥꠘꠥ ꠡꠣꠁꠖ꠆ꠖ ꠘꠣꠁ।
REV 2:12 “ꠚꠞꠉꠣꠝ ꠐꠣꠃꠘꠞ ꠎꠝꠣꠔꠞ ꠚꠤꠞꠤꠡ꠆ꠔꠣꠞ ꠉꠦꠍꠦ ꠅꠃ ꠇꠕꠣ ꠟꠦꠈꠅ: ꠗꠣꠞꠀꠟꠣ ꠎꠦ ꠔꠟꠥꠀꠞꠞ ꠖꠥꠁꠅ ꠉꠣꠟꠣꠛꠣꠄ ꠗꠣꠞ ꠀꠍꠦ, ꠅꠃ ꠔꠟꠥꠀꠞꠞ ꠝꠣꠟꠤꠇꠦ ꠅꠈꠣꠘ ꠇꠁꠞꠣ,
REV 2:13 “ꠔꠥꠝꠞꠣ ꠇꠥꠘ ꠎꠣꠉꠣꠔ ꠛꠡꠔ ꠇꠞꠞꠣꠄ ꠁꠔꠣ ꠔ ꠀꠝꠤ ꠎꠣꠘꠤ, ꠁꠈꠣꠘꠅ ꠁꠛꠟꠤꠍꠞ ꠡꠤꠋꠢꠣꠡꠘ ꠀꠍꠦ। ꠅꠁꠟꠦ ꠀꠝꠣꠞ ꠛꠦꠙꠣꠞꠦ ꠔꠥꠝꠞꠣ ꠢꠇ-ꠢꠣꠟꠣꠟ ꠀꠍ, ꠀꠝꠣꠞ ꠃꠙꠞꠞ ꠁꠝꠣꠘꠞꠦ ꠅꠡ꠆ꠛꠤꠇꠣꠞ ꠇꠞꠍ ꠘꠣ। ꠀꠝꠣꠞ ꠔꠛꠟꠤꠉ ꠇꠞꠞꠣ ꠢꠃ ꠢꠇ-ꠢꠣꠟꠣꠟ ꠎꠘ ꠀꠘ꠆ꠔꠤꠙꠣꠍꠞꠦ ꠎꠦꠛꠟꠣ ꠡꠢꠤꠖ ꠇꠞꠣ ꠅꠁꠍꠤꠟ, ꠁꠛꠟꠤꠍꠞ ꠀꠈꠠꠣꠞ ꠝꠣꠎꠦ, ꠔꠥꠝꠞꠣꠞ ꠐꠣꠃꠘꠅ ꠔꠣꠞꠦ ꠈꠥꠘ ꠇꠞꠣ ꠅꠁꠍꠤꠟ, ꠢꠃ ꠡꠝꠄꠅ ꠔꠥꠝꠞꠣꠞ ꠁꠝꠣꠘꠞꠦ ꠅꠡ꠆ꠛꠤꠇꠣꠞ ꠇꠞꠍ ꠘꠣ।
REV 2:14 “ꠔꠣ-ꠅ ꠔꠥꠝꠞꠣꠞ ꠛꠤꠞꠥꠖ꠆ꠖꠦ ꠀꠝꠣꠞ ꠇꠤꠍꠥ ꠝꠣꠔ ꠀꠍꠦ। ꠔꠥꠝꠞꠣꠞ ꠅꠘꠅ ꠅꠟꠣ ꠇꠤꠍꠥ ꠝꠣꠘꠥꠡ ꠀꠍꠂꠘ, ꠎꠦꠔꠣꠄ ꠝꠥꠍꠣ ꠘꠛꠤꠞ ꠀꠝꠟꠞ ꠜꠘ꠆ꠒ ꠘꠛꠤ ꠛꠣꠟꠣꠝꠞ ꠔꠣꠟꠤꠝꠦ ꠌꠟꠂꠘ। ꠅꠃ ꠛꠣꠟꠣꠝꠦ ꠛꠣꠖꠡꠣ ꠛꠣꠟꠣꠇꠞꠦ ꠢꠤꠇꠣꠁꠍꠤꠟ, ꠎꠣꠔꠦ ꠢꠦ ꠖꠦꠛꠔꠣꠞ ꠝꠥꠞ꠆ꠔꠤꠞ ꠍꠣꠝꠘꠞ ꠙꠡꠣꠖ ꠈꠣꠅꠀꠁꠀ ꠀꠞ ꠎꠤꠘꠣ ꠇꠞꠣꠁꠀ, ꠛꠘꠤ ꠁꠍꠞꠣꠁꠟꠞꠦ ꠉꠥꠘꠣꠞ ꠙꠕꠦ ꠘꠦꠄ।
REV 2:15 ꠁꠔꠣ ꠍꠣꠠꠣꠅ ꠘꠤꠇꠥꠟꠣꠄꠔꠤ ꠅꠇꠟꠞ ꠔꠣꠟꠤꠝꠦ ꠎꠦꠔꠣ ꠌꠟꠂꠘ, ꠅꠔꠣ ꠇꠄꠉꠥꠅ ꠔꠥꠝꠞꠣꠞ ꠅꠘꠅ ꠀꠍꠂꠘ।
REV 2:16 ꠄꠞꠟꠣꠉꠤ ꠁ ꠢꠣꠟꠔ ꠕꠣꠇꠤ ꠔꠥꠝꠞꠣ ꠖꠤꠟ ꠛꠖꠟꠣꠅ, ꠀꠞ ꠘꠣ ꠛꠖꠟꠤꠟꠦ ꠀꠝꠤ ꠈꠥꠛ ꠎꠟꠖꠤ ꠔꠥꠝꠞꠣꠞ ꠗꠣꠞꠅ ꠀꠁꠝꠥ, ꠀꠁꠀ ꠀꠝꠣꠞ ꠝꠥꠈꠞ ꠔꠟꠥꠀꠞꠖꠤ ꠔꠣꠞꠣꠞ ꠟꠉꠦ ꠎꠤꠢꠣꠖ ꠇꠞꠝꠥ।
REV 2:17 “ꠎꠣꠞ ꠇꠣꠘ ꠀꠍꠦ ꠢꠦ ꠢꠥꠘꠃꠇ, ꠙꠣꠇ ꠞꠥꠢꠦ ꠎꠝꠣꠔ ꠅꠇꠟꠞꠦ ꠇꠤꠔꠣ ꠛꠣꠔꠣꠁꠞꠣ। ꠎꠦ ꠎꠘ ꠎꠄꠁ ꠅꠁꠛ, ꠀꠝꠤ ꠔꠣꠞꠦ ꠟꠥꠇꠣꠁꠟ ꠛꠦꠢꠦꠡ꠆ꠔꠤ ꠝꠣꠘ꠆ꠘꠣ ꠕꠣꠇꠤ ꠕꠥꠠꠣ ꠝꠣꠘ꠆ꠘꠣ ꠀꠞ ꠄꠇꠐꠣ ꠗꠟꠣ ꠙꠣꠔ꠆ꠔꠞ ꠖꠤꠝꠥ। ꠅꠃ ꠙꠣꠔ꠆ꠔꠞꠞ ꠃꠙꠞꠦ ꠅꠝꠘ ꠄꠇ ꠘꠣꠝ ꠟꠦꠈꠣ ꠕꠣꠇꠛ, ꠁ ꠘꠣꠝ ꠇꠦꠃ ꠌꠤꠘꠦ ꠘꠣ; ꠎꠦ ꠎꠘꠦ ꠅꠃ ꠙꠣꠔ꠆ꠔꠞ ꠙꠣꠁꠛ, ꠈꠣꠟꠤ ꠢꠦ-ꠃ ꠁ ꠘꠣꠝ ꠌꠤꠘꠛ।
REV 2:18 “ꠕꠥꠀꠔꠤꠞꠣ ꠐꠣꠃꠘꠞ ꠎꠝꠣꠔꠞ ꠚꠤꠞꠤꠡ꠆ꠔꠣꠞ ꠉꠦꠍꠦ ꠅꠃ ꠇꠕꠣ ꠟꠦꠈꠅ: ꠀꠟ꠆ꠟꠣꠞ ꠈꠣꠍ ꠝꠣꠄꠀꠞ ꠎꠘ ꠁꠛꠘꠥꠟ꠆ꠟꠣ, ꠔꠣꠘ ꠌꠃꠈ ꠅꠁꠟ ꠀꠉꠥꠘꠤꠞ ꠟꠥꠇ꠆ꠇꠣꠞ ꠟꠣꠈꠣꠘ, ꠙꠣꠅ ꠖꠥꠁꠅꠈꠣꠘ ꠝꠣꠘ꠆ꠎꠤꠀ ꠙꠞꠤꠡ꠆ꠇꠣꠞ ꠇꠞꠣ ꠌꠇꠌꠇꠣ ꠙꠤꠔꠟꠞ ꠟꠣꠈꠣꠘ, ꠔꠣꠁꠘ ꠅꠈꠣꠘ ꠇꠁꠞꠣ,
REV 2:19 “ꠀꠝꠤ ꠔ ꠔꠥꠝꠞꠣꠞ ꠇꠣꠝ-ꠇꠣꠎ, ꠔꠥꠝꠞꠣꠞ ꠝꠣꠄꠀ-ꠝꠢꠛ꠆ꠛꠔ, ꠁꠝꠣꠘ, ꠈꠦꠎꠝꠔ ꠀꠞ ꠔꠥꠝꠞꠣꠞ ꠍꠛꠞꠞ ꠇꠕꠣ ꠎꠣꠘꠤ। ꠀꠞ ꠄꠅꠈꠣꠘꠅ ꠎꠣꠘꠤ, ꠔꠥꠝꠞꠣ ꠀꠉꠦ ꠎꠦꠔꠣ ꠇꠣꠝ ꠇꠞꠍ, ꠅꠈꠘ ꠄꠞ ꠕꠣꠇꠤ ꠀꠞꠅ ꠛꠦꠡꠤ ꠇꠣꠝ ꠇꠞꠞꠣꠄ।
REV 2:20 “ꠅꠁꠟꠦ ꠔꠥꠝꠞꠣ ꠔ ꠁꠎꠣꠛꠦꠟ ꠘꠣꠝꠞ ꠅꠃ ꠛꠦꠐꠤꠞꠦ ꠀꠡꠞꠄ ꠖꠤꠞꠣꠄ, ꠄꠞꠟꠣꠉꠤ ꠔꠥꠝꠞꠣꠞ ꠛꠤꠞꠥꠖ꠆ꠖꠦ ꠀꠝꠣꠞ ꠄꠇꠈꠣꠘ ꠇꠕꠣ ꠀꠍꠦ, ꠔꠣꠁ ꠘꠤꠎꠞꠦ ꠘꠛꠤ ꠇꠁꠀ ꠙꠞꠤꠌꠄ ꠖꠦꠄ। ꠀꠝꠣꠞ ꠛꠘ꠆ꠖꠣ ꠅꠇꠟꠞꠦ ꠔꠣꠁ ꠎꠤꠘꠣ ꠇꠞꠣ ꠀꠞ ꠖꠦꠛꠔꠣꠞ ꠍꠣꠝꠘꠞ ꠙꠡꠣꠖ ꠈꠣꠅꠀ ꠢꠤꠇꠣꠁꠀ ꠛꠦ-ꠙꠕꠦ ꠘꠦꠞꠉꠤ।
REV 2:21 ꠅꠃ ꠎꠤꠘꠣ ꠕꠣꠇꠤ ꠔꠃꠛꠣ ꠇꠞꠣꠞ ꠟꠣꠉꠤ ꠀꠝꠤ ꠔꠣꠁꠞꠦ ꠡꠝꠄ ꠖꠤꠍꠟꠣꠝ, ꠅꠁꠟꠦ ꠔꠣꠁ ꠔꠃꠛꠣ ꠇꠞꠔꠦ ꠞꠣꠎꠤ ꠘꠣꠄ।
REV 2:22 ꠢꠥꠘꠅ, ꠄꠞꠟꠣꠉꠤ ꠀꠝꠤ ꠔꠣꠁꠞꠦ ꠄꠇ ꠛꠤꠍꠘꠣꠔ ꠚꠣꠟꠣꠁꠀ ꠕꠁꠝꠥ, ꠔꠣꠁꠞ ꠟꠉꠦ ꠎꠦꠔꠣꠄ ꠎꠤꠘꠣ ꠇꠞꠂꠘ, ꠁꠔꠣꠄ ꠎꠥꠖꠤ ꠔꠃꠛꠣ ꠘꠣ ꠇꠞꠂꠘ, ꠔꠦ ꠔꠣꠞꠣꠞꠦꠅ ꠛꠠ ꠝꠍꠤꠛꠔꠅ ꠚꠣꠟꠣꠁꠝꠥ।
REV 2:23 ꠔꠣꠁꠞ ꠙꠥꠀ-ꠙꠥꠠꠤꠘꠞꠦꠅ ꠀꠝꠤ ꠝꠣꠞꠤꠟꠤꠝꠥ। ꠔꠦꠃ ꠢꠇꠟ ꠎꠝꠣꠔꠦ ꠎꠣꠘꠤꠟꠤꠛꠣ, ꠀꠝꠤ ꠔ ꠝꠣꠘꠡꠞ ꠖꠤꠟꠞ ꠀꠞ ꠝꠘꠞ ꠈꠛꠞ ꠞꠣꠈꠤ। ꠀꠝꠤ ꠀꠝꠟ-ꠘꠣꠝꠣ ꠖꠦꠈꠤꠀ ꠔꠥꠝꠞꠣ ꠙꠞꠔꠦꠇ ꠎꠘꠞ ꠚꠟ ꠖꠤꠝꠥ।
REV 2:24 ꠕꠥꠀꠔꠤꠞꠣ ꠎꠝꠣꠔꠞ ꠛꠣꠇꠤ ꠝꠥꠝꠤꠘ ꠅꠇꠟꠞꠦ ꠇꠁꠞꠣꠝ, ꠔꠥꠝꠞꠣ ꠎꠦꠞꠣ ꠅꠃ ꠛꠦꠐꠤꠞ ꠇꠕꠣꠄ ꠌꠟ ꠘꠣ, ꠝꠣꠘꠡꠦ ꠎꠦꠔꠣꠞꠦ ꠁꠛꠟꠤꠍꠞ ꠉꠁꠘ ꠔꠣꠟꠤꠝ ꠇꠂꠘ, ꠔꠥꠝꠞꠣ ꠎꠦꠞꠣ ꠢꠃ ꠙꠕ ꠌꠤꠘ ꠘꠣ, ꠀꠝꠤ ꠔꠥꠝꠞꠣꠞꠦ ꠖꠥꠍꠞꠣ ꠇꠥꠘꠥ ꠜꠣꠞ ꠖꠤꠔꠣꠝ ꠘꠣꠄ।
REV 2:25 ꠈꠣꠟꠤ ꠔꠥꠝꠞꠣꠞ ꠎꠦꠔꠣ ꠀꠍꠦ, ꠀꠝꠤ ꠘꠣ ꠀꠅꠀ ꠙꠞ꠆ꠎꠘ꠆ꠔ ꠅꠈꠘꠣꠁꠘꠞꠦ ꠔꠥꠝꠞꠣ ꠝꠎꠛꠥꠔ ꠇꠞꠤ ꠗꠞꠤꠀ ꠞꠁꠅ।
REV 2:26 “ꠀꠝꠣꠞ ꠉꠣꠁꠛꠤ ꠛꠣꠚꠦ ꠎꠦꠟꠣ ꠢꠇ꠆ꠇꠟ ꠎꠣꠔꠤꠞ ꠃꠙꠞꠦ ꠀꠝꠣꠞꠦ ꠈꠦꠝꠔꠣ ꠖꠤꠍꠂꠘ, ꠎꠦꠞꠣ ꠎꠄꠁ ꠅꠁꠛ, ꠔꠣꠞꠣꠞꠦꠅ ꠀꠝꠤ ꠅꠃ ꠈꠦꠝꠔꠣ ꠖꠤꠝꠥ। ꠀꠝꠤ ꠎꠦ ꠇꠣꠝꠦ ꠈꠥꠡꠤ ꠅꠁ ꠅꠃ ꠇꠣꠝ ꠎꠦꠞꠣ ꠀꠈꠦꠞ ꠙꠞ꠆ꠎꠘ꠆ꠔ ꠇꠞꠛ, ꠔꠣꠞꠣ ꠁ ꠈꠦꠝꠔꠣ ꠙꠣꠁꠛꠣ।
REV 2:27 ꠔꠣꠞꠣ ꠟꠥꠀꠞ ꠟꠣꠑꠤ ꠖꠤꠀ ꠁꠔꠣꠞ ꠡꠣꠡꠘ ꠇꠞꠛꠣ, ꠀꠞ ꠝꠣꠐꠤꠞ ꠙꠣꠔꠤꠟꠞ ꠟꠣꠈꠣꠘ ꠁꠔꠣꠞꠦ ꠌꠥꠞꠝꠣꠞ ꠇꠞꠛꠣ।
REV 2:28 ꠎꠦꠞꠣ ꠎꠄꠁ ꠅꠁꠛ, ꠀꠝꠤ ꠔꠣꠞꠦ ꠚꠎꠞꠞ ꠡꠥꠇ-ꠔꠦꠞꠣꠅ ꠖꠤꠝꠥ।
REV 2:29 “ꠎꠣꠞ ꠇꠣꠘ ꠀꠍꠦ ꠢꠦ ꠢꠥꠘꠃꠇ, ꠙꠣꠇ ꠞꠥꠢꠦ ꠎꠝꠣꠔ ꠅꠇꠟꠞꠦ ꠇꠤꠔꠣ ꠛꠣꠔꠣꠁꠞꠣ।
REV 3:1 “ꠍꠣꠞ꠆ꠖꠤ ꠐꠣꠃꠘꠞ ꠎꠝꠣꠔꠞ ꠚꠤꠞꠤꠡ꠆ꠔꠣꠞ ꠉꠦꠍꠦ ꠟꠦꠈꠅ: ꠀꠟ꠆ꠟꠣꠞ ꠡꠣꠔ ꠘꠝꠥꠘꠣꠞ ꠞꠥꠢꠥ ꠀꠞ ꠡꠣꠔꠐꠣ ꠔꠦꠞꠣ ꠎꠦꠁꠘ ꠗꠞꠤꠀ ꠞꠣꠈꠍꠂꠘ, ꠔꠣꠁꠘ ꠅꠈꠣꠘ ꠇꠁꠞꠣ, “ꠔꠥꠝꠞꠣꠞ ꠇꠣꠝ-ꠇꠣꠎ ꠔ ꠀꠝꠤ ꠎꠣꠘꠤ। ꠔꠥꠝꠞꠣ ꠎꠤꠘ꠆ꠖꠣ ꠀꠍ ꠇꠞꠤꠀ ꠔꠥꠝꠞꠣꠞ ꠛꠃꠔ ꠡꠥꠘꠣꠝ ꠀꠍꠦ, ꠅꠁꠟꠦ ꠀꠍꠟꠦ ꠔ ꠔꠥꠝꠞꠣ ꠝꠥꠞ꠆ꠖꠣ।
REV 3:2 ꠔꠥꠝꠞꠣ ꠢꠎꠣꠉ ꠅꠁꠀ ꠃꠑꠅ, ꠀꠞ ꠛꠣꠖ-ꠛꠣꠇꠤ ꠎꠔꠔꠣ ꠝꠞꠣꠞ ꠙꠕꠤ ꠅꠁꠉꠦꠍꠦ, ꠁꠔꠣꠞꠦ ꠛꠟ ꠎꠥꠉꠣꠅ। ꠢꠥꠘꠅ, ꠀꠝꠣꠞ ꠀꠟ꠆ꠟꠣꠞ ꠍꠣꠝꠘꠦ ꠔꠥꠝꠞꠣꠞ ꠄꠇꠈꠣꠘ ꠇꠣꠝꠅ ꠀꠝꠤ ꠡꠑꠤꠇ ꠖꠦꠈꠍꠤ ꠘꠣ।
REV 3:3 ꠄꠞꠟꠣꠉꠤ ꠔꠥꠝꠞꠣ ꠎꠦꠔꠣ ꠙꠣꠁꠍ ꠀꠞ ꠎꠦꠔꠣ ꠢꠥꠘꠍ, ꠅꠔꠣ ꠁꠀꠖ ꠞꠣꠈꠅ ꠀꠞ ꠀꠝꠟ ꠇꠞꠅ। ꠔꠥꠝꠞꠣꠞ ꠅꠈꠘꠇꠥꠞ ꠢꠣꠟꠔ ꠕꠣꠇꠤ ꠖꠤꠟ ꠛꠖꠟꠣꠅ। ꠔꠥꠝꠞꠣ ꠎꠥꠖꠤ ꠢꠎꠣꠉ ꠘꠣ ꠅꠅ, ꠔꠦ ꠀꠝꠤ ꠌꠥꠞꠞ ꠟꠣꠈꠣꠘ ꠟꠥꠇꠣꠁꠀ ꠀꠁꠝꠥ, ꠇꠥꠘ ꠛꠣꠟꠣ ꠔꠥꠝꠞꠣꠞ ꠉꠦꠍꠦ ꠀꠁꠝꠥ, ꠔꠥꠝꠞꠣ ꠐꠦꠞꠃ ꠙꠣꠁꠔꠣꠄ ꠘꠣꠄ।
REV 3:4 ꠔꠦ ꠅꠃ ꠍꠣꠞ꠆ꠖꠤ ꠎꠝꠣꠔꠅ ꠔꠥꠝꠞꠣꠞ ꠅꠟꠣ ꠇꠄꠎꠘ ꠝꠣꠘꠥꠡ ꠀꠍꠂꠘ ꠎꠦꠞꠣꠞ ꠟꠦꠛꠣꠍꠅ ꠇꠥꠘꠥ ꠈꠥꠔ ꠘꠣꠁ, ꠝꠣꠘꠤ ꠔꠣꠞꠣꠞ ꠌꠣꠟ-ꠌꠟꠘ ꠈꠣꠞꠣꠙꠤꠞ ꠛꠣꠄ ꠉꠦꠍꠦ ꠘꠣ। ꠔꠣꠞꠣ ꠙꠞꠦꠎꠉꠣꠞ ꠛꠘ꠆ꠖꠣ, ꠄꠞꠟꠣꠉꠤ ꠔꠣꠞꠣ ꠙꠞꠤꠡ꠆ꠇꠣꠞ ꠗꠟꠣ ꠟꠦꠛꠣꠍ ꠚꠤꠘ꠆ꠖꠤꠀ ꠀꠝꠣꠞ ꠟꠉꠦ ꠌꠟꠣ-ꠚꠤꠞꠣ ꠇꠞꠛꠣ।
REV 3:5 ꠎꠦ ꠎꠘ ꠎꠄꠁ ꠅꠁꠛ, ꠢꠦ ꠅꠟꠣ ꠗꠟꠣ ꠟꠦꠛꠣꠍ ꠚꠤꠘꠛ। ꠀꠈꠦꠞꠣꠔꠞ ꠎꠤꠘ꠆ꠖꠦꠉꠤ ꠈꠣꠔꠣ ꠕꠣꠇꠤ ꠔꠣꠞ ꠘꠣꠝ ꠀꠝꠤ ꠇꠥꠘꠥꠖꠤꠘꠅ ꠚꠥꠍꠔꠣꠝ ꠘꠣꠄ। ꠛꠞꠋ ꠀꠝꠣꠞ ꠉꠣꠁꠛꠤ ꠛꠣꠚ ꠀꠞ ꠔꠣꠘ ꠚꠤꠞꠤꠡ꠆ꠔꠣ ꠅꠇꠟꠞ ꠍꠣꠝꠘꠦ ꠀꠝꠤ ꠔꠣꠞꠦ ꠀꠝꠣꠞ ꠇꠁꠀ ꠡ꠆ꠛꠤꠇꠣꠞ ꠇꠞꠝꠥ।
REV 3:6 “ꠎꠣꠞ ꠇꠣꠘ ꠀꠍꠦ ꠢꠦ ꠢꠥꠘꠃꠇ, ꠙꠣꠇ ꠞꠥꠢꠦ ꠎꠝꠣꠔ ꠅꠇꠟꠞꠦ ꠇꠤꠔꠣ ꠛꠣꠔꠣꠁꠞꠣ।
REV 3:7 “ꠚꠤꠟꠣꠖꠤꠟꠚꠤꠀ ꠐꠣꠃꠘꠞ ꠎꠝꠣꠔꠞ ꠚꠤꠞꠤꠡ꠆ꠔꠣꠞ ꠉꠦꠍꠦ ꠟꠦꠈꠅ: ꠎꠦꠁꠘ ꠢꠇ ꠀꠞ ꠙꠣꠇ-ꠙꠛꠤꠔ꠆ꠞ, ꠎꠦꠘ ꠀꠔꠅ ꠛꠣꠖꠡꠣ ꠖꠣꠃꠖ ꠘꠛꠤꠞ ꠌꠣꠛꠤ ꠀꠍꠦ, ꠎꠦꠁꠘ ꠈꠥꠟꠟꠦ ꠀꠞ ꠇꠦꠃ ꠛꠘ꠆ꠖ ꠇꠞꠔ ꠙꠣꠞꠦ ꠘꠣ, ꠀꠞ ꠛꠘ꠆ꠖ ꠇꠞꠟꠦ ꠇꠦꠃ ꠈꠥꠟꠔ ꠙꠣꠞꠦ ꠘꠣ, ꠔꠣꠁꠘ ꠅꠈꠣꠘ ꠇꠁꠞꠣ,
REV 3:8 “ꠀꠝꠤ ꠔ ꠔꠥꠝꠞꠣꠞ ꠇꠣꠝ-ꠇꠣꠎ ꠎꠣꠘꠤ। ꠢꠥꠘꠅ, ꠀꠝꠤ ꠔꠥꠝꠞꠣꠞ ꠍꠣꠝꠘꠦ ꠄꠇꠈꠣꠘ ꠖꠥꠀꠞ ꠈꠥꠟꠣ ꠞꠣꠈꠟꠣꠝ, ꠁꠈꠣꠘ ꠛꠘ꠆ꠖ ꠇꠞꠣꠞ ꠈꠦꠝꠔꠣ ꠇꠦꠃꠞꠞ ꠘꠣꠁ। ꠀꠝꠤ ꠔ ꠎꠣꠘꠤ, ꠔꠥꠝꠞꠣ ꠈꠥꠛ ꠇꠝꠎꠥꠞ, ꠄꠞꠛꠣꠖꠦꠅ ꠔꠥꠝꠞꠣ ꠀꠝꠣꠞ ꠢꠥꠇꠥꠝ ꠀꠝꠟ ꠇꠞꠍ ꠀꠞ ꠀꠝꠣꠞꠦ ꠅꠡ꠆ꠛꠤꠇꠣꠞ ꠇꠞꠍ ꠘꠣ।
REV 3:9 ꠎꠦꠞꠣ ꠁꠢꠥꠖꠤ ꠇꠁꠀ ꠘꠤꠎꠞ ꠙꠞꠤꠌꠄ ꠖꠦꠄ ꠅꠕꠌ ꠀꠍꠟ ꠁꠢꠥꠖꠤ ꠘꠣꠄ, ꠁꠛꠟꠤꠍ-ꠡꠄꠔꠣꠘꠞ ꠖꠟꠞ ꠢꠃ ꠛꠦꠁꠝꠣꠘ ꠅꠇꠟꠞꠦ ꠀꠝꠤ ꠔꠥꠝꠞꠣꠞ ꠉꠦꠍꠦ ꠀꠘꠣꠁꠝꠥ, ꠔꠥꠝꠞꠣꠞ ꠙꠣꠅ-ꠅ ꠗꠞꠣꠁ ꠇꠖꠝꠛꠥꠍꠤ ꠇꠞꠣꠁꠝꠥ, ꠀꠞ ꠔꠣꠞꠣꠞꠦ ꠎꠣꠘꠣꠁ ꠖꠤꠝꠥ ꠀꠝꠤ ꠔꠥꠝꠞꠣꠞꠦ ꠝꠢꠛ꠆ꠛꠔ ꠇꠞꠤ।
REV 3:10 ꠔꠥꠝꠞꠣꠞꠦ ꠍꠛꠞ ꠇꠞꠣꠞ ꠟꠣꠉꠤ ꠀꠝꠤ ꠎꠦ ꠢꠥꠇꠥꠝ ꠖꠤꠍꠟꠣꠝ ꠁꠔꠣ ꠔꠥꠝꠞꠣ ꠝꠣꠘꠍ; ꠄꠞꠟꠣꠉꠤ ꠁ ꠖꠥꠘꠤꠀꠞ ꠃꠙꠞꠦ ꠝꠍꠤꠛꠔꠞ ꠎꠦ ꠡꠝꠄ ꠀꠁꠀ ꠀꠎꠦꠞ, ꠢꠃ ꠡꠝꠄ ꠕꠣꠇꠤ ꠀꠝꠤ ꠔꠥꠝꠞꠣꠞꠦ ꠢꠦꠚꠣꠎꠔ ꠇꠞꠝꠥ। ꠖꠥꠘꠤꠀꠞ ꠝꠣꠘꠡꠞꠦ ꠙꠞꠤꠇ꠆ꠇꠣ ꠇꠞꠣꠞ ꠟꠣꠉꠤ ꠅꠃ ꠝꠍꠤꠛꠔꠞ ꠡꠝꠄ ꠀꠁꠛ।
REV 3:11 “ꠢꠥꠘꠅ, ꠀꠝꠤ ꠈꠥꠛ ꠎꠟꠖꠤ ꠀꠁꠞꠣꠝ। ꠔꠥꠝꠞꠣꠞ ꠎꠦꠔꠣ ꠀꠍꠦ ꠅꠔꠣꠞꠦ ꠝꠎꠛꠥꠔ ꠇꠞꠤ ꠗꠞꠤꠀ ꠞꠣꠈꠅ, ꠎꠣꠔꠦ ꠔꠥꠝꠞꠣꠞ ꠎꠄꠅꠞ ꠝꠣꠟꠣ ꠇꠦꠃ ꠇꠣꠠꠤꠀ ꠘꠤꠔ ꠘꠣ ꠙꠣꠞꠦ।
REV 3:12 ꠎꠦ ꠎꠘ ꠎꠄꠁ ꠅꠁꠛ, ꠔꠣꠞꠦ ꠀꠝꠤ ꠀꠝꠣꠞ ꠀꠟ꠆ꠟꠣꠞ ꠊꠞꠞ ꠄꠇꠐꠣ ꠈꠥꠐꠤ ꠛꠣꠘꠣꠁꠝꠥ, ꠢꠦ ꠀꠞ ꠇꠥꠘꠥꠖꠤꠘ ꠛꠣꠞ ꠅꠁꠀ ꠎꠣꠁꠔ ꠘꠣꠄ। ꠀꠝꠤ ꠔꠣꠞ ꠃꠙꠞꠦ ꠀꠝꠣꠞ ꠀꠟ꠆ꠟꠣꠞ ꠘꠣꠝ ꠀꠞ ꠀꠟ꠆ꠟꠣꠞ ꠐꠣꠃꠘꠞ ꠘꠣꠝꠅ ꠟꠦꠈꠝꠥ। ꠢꠃ ꠐꠣꠃꠘ ꠅꠁꠟꠉꠤ ꠘꠄꠀ ꠎꠦꠞꠥꠎꠣꠟꠦꠝ। ꠛꠦꠢꠦꠡ꠆ꠔꠞ ꠝꠣꠎ ꠕꠣꠇꠤ, ꠀꠝꠣꠞ ꠀꠟ꠆ꠟꠣꠞ ꠗꠣꠞꠅ ꠕꠣꠇꠤ ꠢꠃ ꠐꠣꠃꠘ ꠟꠣꠝꠤꠀ ꠀꠁꠛ। ꠀꠞ ꠎꠦ ꠎꠘ ꠎꠄꠁ ꠅꠁꠛ, ꠔꠣꠞ ꠃꠙꠞꠦ ꠀꠝꠤ ꠀꠝꠣꠞ ꠘꠄꠀ ꠘꠣꠝꠈꠣꠘꠅ ꠟꠦꠈꠝꠥ।
REV 3:13 “ꠎꠣꠞ ꠇꠣꠘ ꠀꠍꠦ ꠢꠦ ꠢꠥꠘꠃꠇ, ꠙꠣꠇ ꠞꠥꠢꠦ ꠎꠝꠣꠔ ꠅꠇꠟꠞꠦ ꠇꠤꠔꠣ ꠛꠣꠔꠣꠁꠞꠣ।
REV 3:14 “ꠟꠣꠅꠖꠤꠇꠦꠀ ꠐꠣꠃꠘꠞ ꠎꠝꠣꠔꠞ ꠚꠤꠞꠤꠡ꠆ꠔꠣꠞ ꠉꠦꠍꠦ ꠟꠦꠈꠅ: ꠎꠦꠘ ꠘꠣꠝ ꠀꠝꠤꠘ, ꠎꠦꠁꠘ ꠢꠇ-ꠢꠣꠟꠣꠟ ꠡꠣꠇ꠆ꠇꠤ, ꠎꠦꠁꠘ ꠀꠟ꠆ꠟꠣꠞ ꠙꠄꠖꠣ ꠇꠞꠣ ꠢꠇ꠆ꠇꠟꠔꠣꠞ ꠝꠥꠟ ꠈꠥꠐꠤ, ꠔꠣꠁꠘ ꠅꠈꠣꠘ ꠇꠁꠞꠣ,
REV 3:15 “ꠔꠥꠝꠞꠣꠞ ꠇꠣꠝ-ꠇꠣꠎꠞ ꠇꠕꠣ ꠔ ꠀꠝꠤ ꠎꠣꠘꠤ। ꠔꠥꠝꠞꠣ ꠅꠁꠟꠣꠄ ꠘꠣ ꠑꠣꠘ꠆ꠒꠣ, ꠘꠣ ꠉꠞꠝ। ꠔꠥꠝꠞꠣ ꠢꠄ ꠑꠣꠘ꠆ꠒꠣ ꠘꠣ ꠅꠄ ꠉꠞꠝ ꠅꠁꠟꠦ ꠜꠣꠟꠣ ꠅꠁꠟ ꠅꠘꠦ।
REV 3:16 ꠅꠁꠟꠦ ꠔꠥꠝꠞꠣ ꠔ ꠃꠝꠟꠤ ꠉꠞꠝ, ꠘꠣ ꠑꠣꠘ꠆ꠒꠣ, ꠘꠣ ꠉꠞꠝ, ꠄꠞꠟꠣꠉꠤ ꠀꠝꠤ ꠀꠝꠣꠞ ꠝꠥꠈꠞ ꠍꠦꠚꠞ ꠟꠣꠈꠣꠘ ꠕꠥ ꠇꠞꠤ ꠔꠥꠝꠞꠣꠞꠦ ꠚꠣꠟꠣꠁ ꠖꠤꠝꠥ।
REV 3:17 ꠔꠥꠝꠞꠣ ꠔ ꠇꠁꠞꠣꠄ, ꠔꠥꠝꠞꠣ ꠛꠃꠔ ꠗꠘꠤ, ꠔꠥꠝꠞꠣ ꠛꠠꠟꠥꠇ ꠅꠁꠉꠦꠍ, ꠄꠞꠟꠣꠉꠤ ꠔꠥꠝꠞꠣꠞ ꠇꠥꠘ꠆ꠔꠣꠞ ꠅꠜꠣꠛ ꠘꠣꠁ। ꠁꠔꠣ ꠈꠥꠛ ꠜꠣꠟꠣ ꠇꠕꠣ, ꠅꠁꠟꠦ ꠀꠍꠟꠦ ꠔ ꠔꠥꠝꠞꠣ ꠛꠥꠎꠞꠣꠄ ꠘꠣ, ꠔꠥꠝꠞꠣ ꠈꠥꠛ ꠖꠥꠈꠤ, ꠇꠣꠋꠉꠣꠟ, ꠉꠞꠤꠛ, ꠀꠘ꠆ꠖꠣ ꠀꠞ ꠟꠦꠝꠐꠣ ꠀꠍ।
REV 3:18 ꠄꠞꠟꠣꠉꠤ ꠀꠝꠤ ꠔꠥꠝꠞꠣꠞꠦ ꠅꠃ ꠃꠙꠖꠦꠡ ꠖꠤꠞꠣꠝ, ꠀꠉꠥꠁꠘꠖꠤ ꠎꠣꠟꠣꠁꠟ ꠈꠣꠐꠤ ꠡꠥꠘꠣ ꠔꠥꠝꠞꠣ ꠀꠝꠣꠞ ꠉꠦꠍ ꠕꠣꠇꠤ ꠟꠁꠀ ꠘꠦꠅ, ꠎꠣꠔꠦ ꠔꠥꠝꠞꠣ ꠢꠣꠍꠣꠞꠞ ꠗꠘꠤ ꠅꠁꠔꠣꠄ ꠙꠣꠞ। ꠀꠝꠣꠞ ꠉꠦꠍ ꠕꠣꠇꠤ ꠗꠟꠣ ꠟꠦꠛꠣꠍ ꠟꠁꠀ ꠘꠤꠀ ꠚꠤꠘ꠆ꠖꠅ, ꠔꠦꠃ ꠔꠥꠝꠞꠣꠞꠦ ꠀꠞ ꠟꠦꠝꠐꠣ ꠖꠦꠈꠣ ꠎꠣꠁꠔ ꠘꠣꠄ। ꠀꠝꠣꠞ ꠉꠦꠍ ꠕꠣꠇꠤ ꠌꠈꠥꠔ ꠟꠣꠉꠣꠘꠤꠞ ꠡꠥꠞꠝꠣ ꠟꠁꠀ ꠘꠦꠅ, ꠔꠦꠃ ꠔꠥꠝꠞꠣ ꠢꠣꠍꠣꠞꠞ ꠌꠃꠈꠦ ꠖꠦꠈꠛꠣꠄ।
REV 3:19 “ꠢꠥꠘꠅ, ꠀꠝꠤ ꠎꠦꠞꠣꠞꠦ ꠝꠣꠄꠀ ꠇꠞꠤ, ꠔꠣꠞꠣꠞ ꠖꠥꠡ-ꠔꠤꠞꠥꠐꠤ ꠖꠦꠈꠣꠁ ꠖꠦꠁ ꠀꠞ ꠡꠣꠡꠘꠅ ꠇꠞꠤ। ꠄꠞꠟꠣꠉꠤ ꠔꠥꠝꠞꠣ ꠃꠝꠟꠤ ꠉꠞꠝ ꠕꠣꠇꠤ ꠙꠥꠞꠣ ꠉꠞꠝ ꠅꠁꠀ ꠔꠃꠛꠣ ꠇꠞꠅ।
REV 3:20 ꠎꠣꠘ ꠘꠤ, ꠀꠝꠤ ꠖꠥꠀꠞꠞ ꠉꠦꠍꠦ ꠃꠛꠣꠁꠀ ꠖꠥꠀꠞꠅ ꠑꠥꠇꠣꠁꠞꠣꠝ। ꠀꠝꠣꠞ ꠉꠟꠣꠞ ꠀꠅꠀꠎ ꠢꠥꠘꠤꠀ ꠎꠥꠖꠤ ꠇꠦꠃ ꠔꠣꠞ ꠖꠥꠀꠞ ꠈꠥꠟꠤꠀ ꠖꠦꠄ, ꠔꠦ ꠀꠝꠤ ꠔꠣꠞ ꠜꠤꠔꠞꠦ ꠢꠣꠝꠣꠁꠝꠥ, ꠔꠣꠞ ꠟꠉꠦ ꠈꠣꠘꠣ-ꠖꠣꠘꠣ ꠈꠣꠁꠝꠥ ꠀꠞ ꠢꠦ-ꠅ ꠀꠝꠣꠞ ꠟꠉꠦ ꠈꠣꠘꠣ-ꠖꠣꠘꠣ ꠈꠣꠁꠛ।
REV 3:21 ꠀꠝꠤ ꠎꠦꠟꠣ ꠎꠄꠁ ꠅꠁꠀ ꠀꠝꠣꠞ ꠉꠣꠁꠛꠤ ꠛꠣꠚꠞ ꠟꠉꠦ ꠔꠣꠘ ꠙꠛꠤꠔ꠆ꠞ ꠀꠞꠡꠞ ꠇꠥꠞꠍꠤꠔ ꠛꠁꠍꠤ, ꠑꠤꠇ ꠅꠃ ꠟꠣꠈꠣꠘ ꠎꠦ ꠎꠘ ꠎꠄꠁ ꠅꠁꠛ, ꠔꠣꠞꠦꠅ ꠀꠝꠤ ꠀꠝꠣꠞ ꠟꠉꠦ ꠀꠝꠣꠞ ꠇꠥꠞꠍꠤꠔ ꠛꠅꠀꠞ ꠅꠗꠤꠇꠣꠞ ꠖꠤꠝꠥ।
REV 3:22 “ꠎꠣꠞ ꠇꠣꠘ ꠀꠍꠦ ꠢꠦ ꠢꠥꠘꠃꠇ, ꠙꠣꠇ ꠞꠥꠢꠦ ꠎꠝꠣꠔ ꠅꠇꠟꠞꠦ ꠇꠤꠔꠣ ꠛꠣꠔꠣꠁꠞꠣ।”
REV 4:1 ꠄꠞꠛꠣꠖꠦ ꠀꠝꠤ ꠖꠞꠡꠘ ꠖꠦꠈꠟꠣꠝ, ꠛꠦꠢꠦꠡ꠆ꠔꠞ ꠄꠇꠈꠣꠘ ꠖꠥꠀꠞ ꠈꠥꠟꠣ ꠀꠍꠦ। ꠀꠞ ꠀꠝꠤ ꠔꠣꠘ ꠉꠟꠣꠞ ꠀꠅꠀꠎ ꠢꠥꠘꠟꠣꠝ, ꠡꠤꠋꠉꠣꠞ ꠀꠅꠀꠎꠞ ꠟꠣꠈꠣꠘ ꠎꠦꠁꠘ ꠀꠉꠦ ꠝꠣꠔꠤꠍꠟꠣ, ꠔꠣꠁꠘ ꠀꠝꠣꠞꠦ ꠒꠣꠇ ꠖꠤꠟꠣ, ꠇꠁꠟꠣ, “ꠔꠥꠝꠤ ꠅꠘꠅ ꠃꠑꠤꠀ ꠀꠅ। ꠀꠝꠤ ꠅꠈꠘ ꠔꠥꠝꠣꠞꠦ ꠖꠦꠈꠣꠁꠝꠥ, ꠄꠞꠛꠣꠖꠦ ꠇꠤꠔꠣ ꠇꠤꠔꠣ ꠘꠤꠌ꠆ꠌꠤꠔ ꠊꠐꠤꠛ।”
REV 4:2 ꠒꠣꠇ ꠢꠥꠘꠣꠞ ꠟꠉꠦ ꠟꠉꠦꠃ ꠀꠝꠤ ꠙꠣꠇ ꠞꠥꠢꠦ ꠇꠣꠝꠤꠟ ꠅꠁꠟꠣꠝ, ꠀꠞ ꠖꠦꠈꠟꠣꠝ, ꠛꠦꠢꠦꠡ꠆ꠔꠞ ꠝꠣꠎꠦ ꠄꠇꠈꠣꠘ ꠔꠈ꠆ꠔ ꠀꠍꠦ, ꠅꠃ ꠔꠈ꠆ꠔꠞ ꠃꠙꠞꠦ ꠄꠇꠎꠘ ꠛꠅꠀꠔ ꠀꠍꠂꠘ।
REV 4:3 ꠄꠘ ꠍꠥꠞꠔ ꠅꠁꠟ, ꠖꠣꠝꠤ ꠢꠤꠞꠣ ꠀꠞ ꠟꠣꠟ ꠝꠘꠤꠞ ꠟꠣꠈꠣꠘ। ꠁ ꠔꠈ꠆ꠔꠞ ꠌꠣꠁꠞꠅ ꠉꠣꠟꠣꠛꠣꠄ ꠀꠍꠤꠟ ꠞꠋꠗꠦꠘꠥ, ꠁꠔꠣ ꠖꠦꠈꠔꠦ ꠄꠇ꠆ꠇꠦꠞꠦ ꠇꠌꠥꠀ ꠙꠣꠘ꠆ꠘꠣ ꠝꠘꠤꠞ ꠟꠣꠈꠣꠘ।
REV 4:4 ꠅꠃ ꠔꠈ꠆ꠔꠞ ꠌꠣꠁꠞꠅ ꠇꠣꠘ꠆ꠖꠣꠛꠣꠄ ꠀꠞꠅ ꠌꠛ꠆ꠛꠤꠡꠈꠣꠘ ꠔꠈ꠆ꠔ ꠀꠍꠤꠟ, ꠢꠃ ꠔꠈ꠆ꠔꠅ ꠛꠅꠀꠔ ꠀꠍꠟꠣ ꠌꠛ꠆ꠛꠤꠡꠎꠘ ꠝꠥꠞꠛ꠆ꠛꠤ ꠘꠦꠔꠣ। ꠄꠞꠣꠞ ꠟꠦꠛꠣꠍ ꠀꠍꠤꠟ ꠗꠟꠣ ꠌꠇꠌꠇꠣ ꠀꠞ ꠝꠣꠕꠣꠔ ꠀꠍꠤꠟ ꠡꠥꠘꠣꠞ ꠔꠣꠎ।
REV 4:5 ꠝꠣꠎꠈꠣꠘꠞ ꠔꠈ꠆ꠔ ꠕꠣꠇꠤ ꠝꠦꠊꠞ ꠎꠤꠟꠇꠣꠘꠤ, ꠉꠥꠠ-ꠉꠥꠠꠤ ꠒꠣꠇ ꠀꠞ ꠛꠦꠎꠥꠁꠔꠣ ꠑꠣꠐꠣꠞꠤ ꠡꠛ꠆ꠖ ꠛꠣꠞꠘꠤꠔ ꠀꠍꠤꠟ। ꠄꠞ ꠍꠣꠝꠘꠦ ꠡꠣꠔꠐꠣ ꠝꠥꠡꠣꠟ ꠎꠣꠟꠣꠁꠟ ꠀꠍꠤꠟ, ꠁ ꠝꠥꠡꠣꠟ ꠅꠁꠟ ꠀꠟ꠆ꠟꠣꠞ ꠡꠣꠔ ꠘꠝꠥꠘꠣꠞ ꠞꠥꠢꠥ।
REV 4:6 ꠔꠈ꠆ꠔꠞ ꠍꠣꠝꠘꠦ ꠚꠐꠤꠇꠞ ꠉ꠆ꠟꠣꠡꠞ ꠟꠣꠈꠣꠘ ꠙꠞꠤꠡ꠆ꠇꠣꠞ ꠇꠣꠌꠞ ꠄꠇ ꠖꠞꠤꠀ ꠀꠍꠤꠟ। ꠀꠞ ꠅꠃ ꠝꠣꠎꠞ ꠔꠈ꠆ꠔꠞ ꠌꠣꠁꠞꠅ ꠉꠣꠟꠣꠔ ꠌꠣꠁꠞꠎꠘ ꠎꠣꠘꠖꠣꠞ ꠀꠍꠤꠟ, ꠄꠞꠣꠞ ꠍꠣꠝꠘꠦ-ꠙꠤꠍꠦ ꠖꠥꠁꠅꠛꠣꠄ ꠌꠃꠈ ꠅꠇꠟꠦ ꠜꠞꠣ।
REV 4:7 ꠙꠄꠟꠣ ꠎꠣꠘꠖꠣꠞꠐꠣ ꠖꠦꠈꠔꠦ ꠡꠤꠋꠢꠞ ꠟꠣꠈꠣꠘ, ꠖꠥꠍꠞꠣꠐꠣ ꠛꠤꠍꠣꠟꠞ ꠟꠣꠈꠣꠘ, ꠔꠤꠘ ꠘꠝ꠆ꠛꠞꠐꠣ ꠝꠣꠘꠡꠞ ꠟꠣꠈꠣꠘ ꠀꠞ ꠌꠣꠁꠞ ꠘꠝ꠆ꠛꠞꠐꠣ ꠃꠠꠣꠟ ꠖꠦꠅꠞꠣ ꠌꠤꠟꠞ ꠟꠣꠈꠣꠘ।
REV 4:8 ꠅꠃ ꠌꠣꠁꠞꠅ ꠎꠣꠘꠖꠣꠞꠞ ꠙꠞꠔꠦꠇꠞ ꠍꠄꠐꠣ ꠇꠞꠤ ꠒꠣꠈꠘꠣ ꠀꠍꠤꠟ, ꠀꠞ ꠛꠣꠞꠦ-ꠜꠤꠔꠞꠦ ꠌꠣꠁꠞꠅꠛꠣꠄ ꠌꠃꠈ ꠀꠍꠤꠟ। ꠔꠣꠞꠣ ꠖꠤꠘ-ꠞꠣꠁꠔ ꠢꠣꠝꠦꠡꠣ ꠅꠃ ꠎꠤꠇꠤꠞ ꠇꠞꠞꠣ, “ꠇꠥꠖ꠆ꠖꠥꠍꠥꠘ, ꠇꠥꠖ꠆ꠖꠥꠍꠥꠘ, ꠇꠥꠖ꠆ꠖꠥꠍꠥꠘ, ꠞꠣꠛ꠆ꠛꠥ ꠁꠟꠣꠢꠥꠟ ꠇꠣꠖꠤꠞ, ꠇꠣꠘꠣ ꠅꠀ-ꠢꠥꠀ ꠇꠣꠁꠘꠥꠍ ꠍꠣꠁꠀꠔꠤꠘ। ꠙꠛꠤꠔ꠆ꠞ, ꠙꠛꠤꠔ꠆ꠞ, ꠙꠛꠤꠔ꠆ꠞ ꠀꠟ꠆ꠟꠣ ꠝꠣꠛꠥꠖ ꠡꠞ꠆ꠛ-ꠡꠇ꠆ꠔꠤꠝꠣꠘ, ꠎꠦꠁꠘ ꠀꠍꠟꠣ, ꠎꠦꠁꠘ ꠀꠍꠂꠘ, ꠀꠞ ꠎꠦꠁꠘ ꠢꠣꠝꠦꠡꠣ ꠞꠁꠛꠣ।”
REV 4:9 ꠎꠦꠁꠘ ꠌꠤꠞꠇꠣꠟꠤꠘ ꠎꠤꠘ꠆ꠖꠣ, ꠎꠦꠁꠘ ꠔꠈ꠆ꠔꠅ ꠛꠅꠀꠔ ꠀꠍꠂꠘ, ꠅꠃ ꠎꠣꠘꠖꠣꠞ ꠅꠇꠟꠦ ꠎꠦꠛꠟꠣꠃ ꠔꠣꠘ ꠔꠣꠞꠤꠚ, ꠡꠝ꠆ꠝꠣꠘ ꠀꠞ ꠡꠥꠇꠞꠤꠀ ꠎꠣꠘꠣꠁꠘ,
REV 4:10 ꠅꠃ ꠡꠝꠄ ꠎꠦꠁꠘ ꠔꠈ꠆ꠔꠅ ꠛꠅꠀꠔ ꠀꠍꠂꠘ, ꠎꠦꠁꠘ ꠌꠤꠞꠇꠣꠟꠤꠘ ꠎꠤꠘ꠆ꠖꠣ, ꠄꠘ ꠍꠣꠝꠘꠦ ꠢꠃ ꠌꠛ꠆ꠛꠤꠡꠎꠘ ꠝꠥꠞꠛ꠆ꠛꠤ ꠘꠦꠔꠣ ꠘꠔ ꠅꠁꠀ ꠍꠁꠎꠖꠣ ꠇꠞꠂꠘ। ꠁ ꠘꠦꠔꠣ ꠅꠇꠟꠦ ꠎꠣꠞꠎꠤꠞ ꠝꠣꠕꠣꠞ ꠔꠣꠎ ꠡꠤꠋꠢꠣꠡꠘꠞ ꠍꠣꠝꠘꠦ ꠈꠥꠟꠤꠀ ꠕꠁꠀ ꠇꠂꠘ,
REV 4:11 “ꠅ ꠀꠝꠞꠣꠞ ꠝꠣꠛꠥꠖ ꠀꠟ꠆ꠟꠣ, ꠔꠥꠝꠤ ꠔ ꠁꠎ꠆ꠎꠔ, ꠔꠣꠞꠤꠚ ꠀꠞ ꠇꠥꠖꠞꠔꠤ ꠈꠦꠝꠔꠣꠞ ꠎꠁꠉ꠆ꠉ। ꠔꠥꠝꠤꠃ ꠔ ꠢꠇꠟꠔꠣ ꠙꠄꠖꠣ ꠇꠞꠍ, ꠔꠥꠝꠣꠞ ꠝꠞ꠆ꠎꠤꠄ ꠢꠇꠟꠔꠣ ꠙꠄꠖꠣ ꠅꠁꠍꠦ ꠀꠞ ꠐꠤꠇꠤꠀ ꠀꠍꠦ।”
REV 5:1 ꠅꠃ ꠔꠈ꠆ꠔꠞ ꠝꠣꠎꠦ ꠎꠦꠁꠘ ꠛꠅꠀꠔ ꠀꠍꠟꠣ, ꠔꠣꠘ ꠒꠣꠁꠘꠞ ꠀꠔꠅ ꠀꠝꠤ ꠄꠇꠈꠣꠘ ꠇꠤꠔꠣꠛ ꠖꠦꠈꠟꠣꠝ। ꠇꠤꠔꠣꠛꠞ ꠛꠣꠞꠦ-ꠜꠤꠔꠞꠦ ꠇꠥꠘ꠆ꠔꠣ ꠟꠦꠈꠣ ꠀꠍꠦ, ꠁꠈꠣꠘ ꠡꠣꠔꠐꠣ ꠡꠤꠟ ꠖꠤꠀ ꠡꠤꠟ-ꠌꠣꠙ꠆ꠙꠠ ꠝꠣꠞꠣ।
REV 5:2 ꠛꠣꠖꠦ ꠀꠝꠤ ꠖꠦꠈꠟꠣꠝ, ꠈꠥꠛ ꠡꠇ꠆ꠔꠤꠀꠟꠣ ꠄꠇꠎꠘ ꠚꠤꠞꠤꠡ꠆ꠔꠣꠄ ꠎꠥꠞꠦ ꠎꠥꠞꠦ ꠇꠁꠞꠣ, “ꠁꠟꠣ ꠎꠁꠉ꠆ꠉ ꠇꠦꠃ ꠀꠍꠂꠘ ꠘꠤ, ꠎꠦꠁꠘ ꠅꠃ ꠡꠤꠟ-ꠌꠣꠙ꠆ꠙꠠ ꠜꠣꠋꠉꠤꠀ ꠇꠤꠔꠣꠛꠈꠣꠘ ꠈꠥꠟꠔꠣ ꠙꠣꠞꠛꠣ?”
REV 5:3 ꠅꠁꠟꠦ ꠀꠍꠝꠣꠘ-ꠎꠝꠤꠘ ꠛꠣ ꠙꠣꠔꠣꠟꠞ ꠝꠣꠎꠦ ꠁꠟꠣ ꠇꠦꠃ ꠝꠤꠟꠟ ꠘꠣ, ꠎꠦꠁꠘ ꠁꠈꠣꠘ ꠈꠥꠟꠣ ꠛꠣ ꠄꠞ ꠜꠤꠔꠞ ꠖꠦꠈꠣꠞ ꠎꠁꠉ꠆ꠉ।
REV 5:4 ꠔꠦꠃ ꠀꠝꠤ ꠢꠣꠘ꠆ꠘꠣꠘꠞ ꠈꠥꠛ ꠇꠣꠘ꠆ꠖꠘ ꠀꠁꠟ, ꠇꠣꠞꠘ ꠁ ꠇꠤꠔꠣꠛꠈꠣꠘ ꠈꠥꠟꠣꠞ ꠛꠣ ꠄꠞ ꠜꠤꠔꠞ ꠖꠦꠈꠣꠞ ꠎꠁꠉ꠆ꠉ ꠄꠇꠎꠘꠅ ꠙꠣꠅꠀ ꠉꠦꠟ ꠘꠣ।
REV 5:5 ꠛꠣꠖꠦ ꠢꠃ ꠝꠥꠞꠛ꠆ꠛꠤ ꠘꠦꠔꠣ ꠅꠇꠟꠞ ꠝꠣꠎꠞ ꠄꠇꠎꠘꠦ ꠀꠝꠣꠞꠦ ꠇꠁꠟꠣ, “ꠅꠛꠣ, ꠇꠣꠘ꠆ꠖꠤꠅ ꠘꠣ। ꠢꠥꠘꠅ, ꠎꠦꠁꠘ ꠄꠢꠥꠖꠣ ꠈꠣꠘ꠆ꠖꠣꠘꠞ ꠡꠤꠋꠢ, ꠖꠣꠃꠖ ꠘꠛꠤꠞ ꠛꠋꠡꠗꠞ, ꠔꠣꠁꠘ ꠎꠤꠔꠤꠍꠂꠘ। ꠔꠣꠁꠘ ꠅꠃ ꠡꠣꠔꠅ ꠡꠤꠟ-ꠌꠣꠙ꠆ꠙꠠ ꠜꠣꠋꠉꠤꠀ ꠇꠤꠔꠣꠛꠈꠣꠘ ꠈꠥꠟꠔꠣ ꠙꠣꠞꠛꠣ।”
REV 5:6 ꠀꠝꠤ ꠀꠞꠅ ꠖꠦꠈꠟꠣꠝ, ꠝꠥꠞꠛ꠆ꠛꠤ ꠘꠦꠔꠣ ꠅꠇꠟꠞ, ꠌꠣꠁꠞꠅ ꠎꠣꠘꠖꠣꠞꠞ, ꠀꠞ ꠅꠃ ꠔꠈ꠆ꠔꠞ ꠝꠣꠎꠈꠣꠘꠅ ꠄꠇ ꠝꠦꠠꠣ-ꠛꠣꠁꠌ꠆ꠌꠣ ꠃꠛꠣꠁ ꠞꠁꠍꠦ। ꠖꠦꠈꠔꠦ ꠝꠘꠅ ꠅꠁꠟ, ꠁ ꠛꠣꠁꠌ꠆ꠌꠣꠞꠦ ꠎꠛ ꠇꠞꠣ ꠅꠁꠍꠦ। ꠁ ꠝꠦꠠꠣ-ꠛꠣꠁꠌ꠆ꠌꠣꠞ ꠡꠣꠔꠐꠣ ꠢꠤꠋ ꠀꠞ ꠡꠣꠔꠐꠣ ꠌꠃꠈ। ꠀꠟ꠆ꠟꠣꠞ ꠎꠦ ꠡꠣꠔ ꠘꠝꠥꠘꠣꠞ ꠞꠥꠢꠥꠞꠦ ꠖꠥꠘꠤꠀꠞ ꠝꠣꠎꠦ ꠙꠣꠑꠣꠁꠟ ꠅꠄ, ꠅꠃ ꠡꠣꠔꠅ ꠌꠃꠈ ꠅꠁꠟ ꠢꠃ ꠡꠣꠔꠅ ꠞꠥꠢꠥ।
REV 5:7 ꠛꠣꠖꠦ ꠅꠃ ꠝꠦꠠꠣ-ꠛꠣꠁꠌ꠆ꠌꠣ ꠀꠁꠀ, ꠔꠈ꠆ꠔꠅ ꠎꠦꠁꠘ ꠛꠅꠀꠔ ꠀꠍꠟꠣ, ꠄꠘ ꠒꠣꠁꠘ ꠀꠔ ꠕꠣꠇꠤ ꠅꠃ ꠇꠤꠔꠣꠛꠈꠣꠘ ꠘꠤꠟꠣ।
REV 5:8 ꠇꠤꠔꠣꠛ ꠘꠦꠅꠀꠞ ꠛꠣꠖꠦ ꠢꠃ ꠌꠣꠁꠞꠅ ꠎꠣꠘꠖꠣꠞꠦ ꠀꠞ ꠌꠛ꠆ꠛꠤꠡꠎꠘ ꠝꠥꠞꠛ꠆ꠛꠤ ꠘꠦꠔꠣꠄ ꠅꠃ ꠝꠦꠠꠣ-ꠛꠣꠁꠌ꠆ꠌꠣꠞꠦ ꠍꠁꠎꠖꠣ ꠇꠞꠟꠣ। ꠄꠞꠣ ꠙꠞꠔꠦꠇꠞ ꠀꠔꠅ ꠄꠉꠥ ꠇꠞꠤ ꠡꠣꠞꠤꠘ꠆ꠖꠣ, ꠀꠞ ꠀꠉꠞ-ꠈꠥꠡꠛꠄꠄ ꠜꠞꠣ ꠄꠉꠥ ꠡꠥꠘꠣꠞ ꠛꠣꠐꠤ ꠀꠍꠤꠟ। ꠁ ꠀꠉꠞ-ꠈꠥꠡꠛꠄ ꠅꠁꠟ ꠀꠟ꠆ꠟꠣꠞ ꠙꠣꠇ ꠛꠘ꠆ꠖꠣ ꠅꠇꠟꠞ ꠖꠥꠀ-ꠝꠥꠘꠣꠎꠣꠔ।
REV 5:9 ꠀꠞ ꠔꠣꠞꠣ ꠘꠄꠀ ꠅꠃ ꠉꠎꠟ ꠉꠣꠁꠟꠣ, “ꠈꠣꠟꠤ ꠔꠥꠝꠤꠃ ꠡꠑꠤꠇ ꠎꠘ ꠅꠃ ꠇꠤꠔꠣꠛꠈꠣꠘ ꠘꠤꠛꠣꠞ, ꠘꠤꠀ ꠄꠞ ꠡꠤꠟ-ꠌꠣꠙ꠆ꠙꠠ ꠈꠥꠟꠛꠣꠞ। ꠔꠥꠝꠣꠞꠦ ꠔ ꠎꠣꠘꠦ ꠝꠣꠞꠣ ꠅꠁꠍꠤꠟ। ꠔꠥꠝꠤ ꠔꠥꠝꠣꠞ ꠟꠃ ꠖꠤꠀ ꠢꠇ꠆ꠇꠟ ꠈꠣꠘ꠆ꠖꠣꠘ ꠕꠣꠇꠤ, ꠀꠟ꠆ꠟꠣꠞ ꠟꠣꠉꠤ ꠝꠣꠘꠥꠡ ꠈꠞꠤꠖ ꠇꠞꠍ। ꠢꠇ꠆ꠇꠟ ꠎꠣꠔꠞ ꠛꠥꠟꠤꠄ ꠝꠣꠔꠞꠣ ꠝꠣꠘꠥꠡ, ꠢꠇꠟ ꠖꠦꠡ ꠀꠞ ꠎꠣꠔꠤ ꠕꠣꠇꠤꠅ ꠈꠣꠟꠣꠍ ꠇꠞꠍ।
REV 5:10 ꠄꠞꠣꠞꠦ ꠟꠁꠀ ꠔꠥꠝꠤ ꠄꠇ ꠛꠣꠖꠡꠣꠁ ꠇꠣꠁꠝ ꠇꠞꠍ, ꠀꠝꠞꠣꠞ ꠀꠟ꠆ꠟꠣꠞ ꠄꠛꠣꠖꠔꠤꠞ ꠟꠣꠉꠤ ꠁꠝꠣꠝ ꠛꠣꠘꠣꠁꠍ, ꠄꠞꠣꠃ ꠀꠡ꠆ꠔꠣ ꠎꠉꠔꠅ ꠛꠣꠖꠡꠣꠁ ꠇꠞꠛꠣ।”
REV 5:11 ꠛꠣꠖꠦ ꠀꠝꠤ ꠌꠣꠁꠟꠣꠝ, ꠀꠞ ꠢꠃ ꠔꠈ꠆ꠔ, ꠌꠣꠁꠞꠅ ꠎꠣꠘꠖꠣꠞ ꠀꠞ ꠝꠥꠞꠛ꠆ꠛꠤ ꠘꠦꠔꠣ ꠅꠇꠟꠞ ꠌꠣꠁꠞꠅꠛꠣꠄ ꠛꠃꠔ ꠚꠤꠞꠤꠡ꠆ꠔꠣ ꠅꠇꠟꠞ ꠀꠅꠀꠎ ꠢꠥꠘꠟꠣꠝ। ꠁꠘꠅ ꠢꠣꠎꠣꠞꠦ ꠢꠣꠎꠣꠞ, ꠇꠥꠐꠤ ꠇꠥꠐꠤ ꠚꠤꠞꠤꠡ꠆ꠔꠣ ꠀꠍꠟꠣ।
REV 5:12 ꠄꠞꠣ ꠎꠥꠞꠦ ꠎꠥꠞꠦ ꠅꠃ ꠉꠎꠟ ꠇꠁꠟꠣ, “ꠎꠦ ꠝꠦꠠꠣ-ꠛꠣꠁꠌ꠆ꠌꠣꠞꠦ ꠎꠛ ꠇꠞꠣ ꠅꠁꠍꠤꠟ, ꠄꠁꠘꠃ ꠈꠦꠝꠔꠣ, ꠗꠘ-ꠖꠃꠟꠔ, ꠀꠈꠟ, ꠛꠟ-ꠡꠇ꠆ꠔꠤ, ꠁꠎ꠆ꠎꠔ, ꠉꠃꠞꠛ ꠀꠞ ꠔꠣꠞꠤꠚ ꠙꠣꠅꠀꠞ ꠎꠁꠉ꠆ꠉ।”
REV 5:13 ꠄꠞꠛꠣꠖꠦ ꠀꠝꠤ ꠢꠥꠘꠟꠣꠝ, ꠀꠍꠝꠣꠘꠅ, ꠎꠝꠤꠘꠅ, ꠙꠣꠔꠣꠟꠅ ꠀꠞ ꠖꠞꠤꠀꠞ ꠝꠣꠎꠦ ꠎꠔ ꠎꠣꠘꠖꠣꠞ ꠀꠍꠦ, ꠛꠣ ꠁꠔꠣꠞ ꠜꠤꠔꠞꠦ ꠀꠞꠅ ꠎꠔꠔꠣ ꠀꠍꠦ, ꠄꠞꠣ ꠢꠇ꠆ꠇꠟꠦ ꠅꠈꠣꠘ ꠇꠁꠞꠣ, “ꠔꠈ꠆ꠔꠞ ꠝꠣꠎꠦ ꠎꠦꠁꠘ ꠛꠅꠀꠔ ꠀꠍꠂꠘ, ꠔꠣꠁꠘ ꠀꠞ ꠅꠃ ꠝꠦꠠꠣ-ꠛꠣꠁꠌ꠆ꠌꠣꠞ, ꠔꠣꠞꠤꠚ, ꠁꠎ꠆ꠎꠔ, ꠉꠃꠞꠛ ꠀꠞ ꠈꠦꠝꠔꠣ ꠢꠞ-ꠢꠣꠝꠦꠡꠣ ꠎꠣꠞꠤ ꠞꠃꠇ।”
REV 5:14 ꠔꠦꠃ ꠢꠃ ꠌꠣꠁꠞꠅ ꠎꠣꠘꠖꠣꠞꠦ ꠇꠁꠟꠣ, “ꠀꠝꠤꠘ।” ꠀꠞ ꠢꠃ ꠝꠥꠞꠛ꠆ꠛꠤ ꠘꠦꠔꠣ ꠅꠇꠟ ꠘꠔ ꠅꠁꠀ ꠍꠁꠎꠖꠣ ꠇꠞꠟꠣ।
REV 6:1 ꠛꠣꠖꠦ ꠀꠝꠤ ꠖꠦꠈꠟꠣꠝ, ꠢꠃ ꠝꠦꠠꠣ-ꠛꠣꠁꠌ꠆ꠌꠣꠄ ꠎꠦꠛꠟꠣ ꠡꠣꠔꠅ ꠡꠤꠟ-ꠌꠣꠙ꠆ꠙꠠꠞ ꠝꠣꠎ ꠕꠣꠇꠤ ꠙꠄꠟꠣ ꠡꠤꠟ ꠜꠣꠋꠉꠤꠞꠣ, ꠅꠃ ꠡꠝꠄ ꠢꠃ ꠌꠣꠁꠞꠅ ꠎꠣꠘꠖꠣꠞꠞ ꠝꠣꠎꠞ ꠄꠇꠎꠘꠦ ꠑꠣꠐꠣ ꠙꠠꠣꠞ ꠀꠅꠀꠎꠞ ꠟꠣꠈꠣꠘ ꠎꠥꠞꠦ ꠇꠁꠟꠣ, “ꠀꠅ।”
REV 6:2 ꠔꠦꠃ ꠀꠝꠤ ꠌꠣꠁꠀ ꠖꠦꠈꠟꠣꠝ, ꠗꠟꠣ ꠄꠇꠐꠣ ꠊꠥꠠꠣ, ꠄꠞ ꠃꠙꠞꠦ ꠎꠦꠁꠘ ꠍꠅꠀꠞ ꠅꠁꠍꠂꠘ ꠔꠣꠘ ꠀꠔꠅ ꠔꠤꠞ-ꠗꠘꠥꠇ ꠀꠍꠦ। ꠔꠣꠘ ꠝꠣꠕꠣꠔ ꠔꠣꠎ ꠟꠣꠉꠣꠁꠟ ꠅꠁꠟ, ꠔꠣꠁꠘ ꠎꠄ ꠇꠞꠣꠞ ꠟꠣꠉꠤ ꠎꠄ ꠇꠞꠤ ꠇꠞꠤ ꠞꠅꠀꠘꠣ ꠅꠁꠟꠣ।
REV 6:3 ꠀꠞ ꠔꠣꠁꠘ ꠎꠦꠛꠟꠣ ꠖꠥꠍꠞꠣ ꠡꠤꠟ ꠜꠣꠋꠉꠤꠟꠣ, ꠅꠃ ꠡꠝꠄ ꠀꠝꠤ ꠖꠥꠍꠞꠣ ꠎꠣꠘꠖꠣꠞꠞ ꠀꠅꠀꠎ ꠢꠥꠘꠟꠣꠝ, ꠄꠁꠘ ꠇꠁꠟꠣ, “ꠀꠅ।”
REV 6:4 ꠔꠦꠃ ꠟꠣꠟ ꠌꠥꠞꠥꠇ ꠀꠞꠇꠐꠣ ꠊꠥꠠꠣ ꠛꠣꠞ ꠅꠁꠟ, ꠀꠞ ꠄꠞ ꠃꠙꠞꠦ ꠎꠦꠁꠘ ꠍꠅꠀꠞ ꠅꠁꠍꠂꠘ, ꠄꠘꠞꠦ ꠅꠃ ꠈꠦꠝꠔꠣ ꠖꠦꠅꠀ ꠅꠁꠟ, ꠎꠣꠔꠦ ꠔꠣꠁꠘ ꠖꠥꠘꠤꠀ ꠕꠣꠇꠤ ꠢꠇꠟ ꠡꠣꠘ꠆ꠔꠤ ꠇꠣꠠꠤꠀ ꠘꠦꠁꠘꠉꠤ, ꠝꠣꠘꠡꠦ ꠄꠇꠦ-ꠅꠁꠘ꠆ꠘꠞꠦ ꠈꠥꠘ ꠇꠞꠂꠘ, ꠄꠘꠞꠦ ꠛꠠ ꠄꠇꠈꠣꠘ ꠔꠟꠥꠀꠞꠅ ꠖꠦꠅꠀ ꠅꠁꠟ।
REV 6:5 ꠛꠣꠖꠦ ꠝꠦꠠꠣ-ꠛꠣꠁꠌ꠆ꠌꠣꠄ ꠎꠦꠛꠟꠣ ꠔꠤꠘ ꠘꠝ꠆ꠛꠞ ꠡꠤꠟ ꠜꠣꠋꠉꠤꠟꠣ, ꠅꠃ ꠡꠝꠄ ꠀꠝꠤ ꠔꠤꠘ ꠘꠝ꠆ꠛꠞ ꠎꠣꠘꠖꠣꠞꠞ ꠀꠅꠀꠎ ꠢꠥꠘꠟꠣꠝ, ꠔꠣꠁꠘ ꠇꠁꠟꠣ, “ꠀꠅ।” ꠔꠦꠃ ꠀꠝꠤ ꠖꠦꠈꠟꠣꠝ, ꠄꠇꠐꠣ ꠇꠣꠟꠣ ꠊꠥꠠꠣ। ꠄꠞ ꠃꠙꠞꠦ ꠎꠦꠁꠘ ꠍꠅꠀꠞ ꠅꠁꠍꠂꠘ, ꠔꠣꠘ ꠀꠔꠅ ꠄꠇꠈꠣꠘ ꠙꠣꠟ꠆ꠟꠣ ꠀꠍꠦ।
REV 6:6 ꠀꠞ ꠀꠝꠤ ꠢꠥꠘꠟꠣꠝ, ꠢꠃ ꠌꠣꠁꠞꠎꠘ ꠎꠣꠘꠖꠣꠞꠞ ꠝꠣꠎꠈꠣꠘ ꠕꠣꠇꠤ ꠇꠦꠃ ꠎꠣꠘꠥ ꠇꠁꠞꠣ, “ꠄꠇ ꠖꠤꠘꠣꠞꠦ ꠈꠣꠟꠤ ꠄꠇ ꠡꠦꠞ ꠉꠝ ꠛꠣ ꠄꠇ ꠖꠤꠘꠣꠞꠦ ꠔꠤꠘ ꠡꠦꠞ ꠛꠣꠞ꠆ꠟꠤ ꠝꠤꠟꠦ। ꠅꠁꠟꠦ ꠔꠥꠝꠤ ꠎꠄꠔꠥꠘ ꠀꠞ ꠀꠋꠉꠥꠞ ꠉꠣꠍꠞ ꠈꠦꠔꠤ ꠇꠞꠤꠅ ꠘꠣ।”
REV 6:7 ꠅꠃ ꠝꠦꠠꠣ-ꠛꠣꠁꠌ꠆ꠌꠣꠄ ꠎꠦꠛꠟꠣ ꠌꠣꠁꠞ ꠘꠝ꠆ꠛꠞ ꠡꠤꠟ ꠜꠣꠋꠉꠤꠟꠣ, ꠅꠃ ꠡꠝꠄ ꠀꠝꠤ ꠢꠥꠘꠟꠣꠝ, ꠌꠣꠁꠞ ꠘꠝ꠆ꠛꠞ ꠎꠣꠘꠖꠣꠞꠦ ꠇꠁꠟꠣ, “ꠀꠅ।”
REV 6:8 ꠔꠦꠃ ꠀꠝꠤ ꠌꠣꠁꠀ ꠖꠦꠈꠟꠣꠝ, ꠍꠣꠟꠤ ꠞꠋꠉꠞ ꠄꠇ ꠊꠥꠠꠣ, ꠅꠃ ꠊꠥꠠꠣꠞ ꠎꠦꠁꠘ ꠍꠅꠀꠞ, ꠄꠘ ꠘꠣꠝ ꠅꠁꠟ ꠝꠃꠔ ꠀꠞ ꠔꠣꠘ ꠈꠞꠦ ꠈꠞꠦ ꠇꠄꠛꠞꠦ ꠀꠐꠦꠞ। ꠄꠞꠣꠞꠦ ꠖꠥꠘꠤꠀꠞ ꠌꠣꠁꠞ ꠛꠣꠐꠞ ꠝꠣꠎꠞ ꠄꠇ ꠛꠣꠐꠞ ꠃꠙꠞꠦ ꠈꠦꠝꠔꠣ ꠖꠦꠅꠀ ꠅꠁꠟ, ꠎꠣꠔꠦ ꠔꠣꠞꠣ ꠔꠟꠥꠀꠞ ꠖꠤꠀ, ꠘꠤꠖꠣꠘ ꠖꠤꠀ, ꠉꠎꠛꠤ ꠝꠃꠔ ꠀꠞ ꠎꠋꠟꠤ ꠎꠣꠘꠥꠀꠞ ꠖꠤꠀ ꠝꠣꠘꠡꠞ ꠎꠣꠘ ꠘꠦꠁꠘ।
REV 6:9 ꠛꠣꠖꠦ ꠔꠣꠁꠘ ꠎꠦꠛꠟꠣ ꠙꠣꠌ ꠘꠝ꠆ꠛꠞ ꠡꠤꠟ ꠜꠣꠋꠉꠤꠟꠣ, ꠅꠃ ꠡꠝꠄ ꠀꠝꠤ ꠖꠦꠈꠟꠣꠝ, ꠇꠥꠞꠛꠣꠘꠤ ꠈꠣꠘꠣꠞ ꠔꠟꠦ ꠅꠃ ꠟꠣꠈꠣꠘ ꠝꠣꠘꠡꠞ ꠞꠥꠢꠥ ꠅꠇꠟ ꠀꠍꠦ, ꠎꠦꠞꠣꠞꠦ ꠀꠟ꠆ꠟꠣꠞ ꠇꠣꠟꠣꠝꠞ ꠟꠣꠉꠤ ꠀꠞ ꠢꠎꠞꠔ ꠁꠍꠣꠞ ꠙꠇ꠆ꠇꠦ ꠎꠛꠣꠘꠛꠘ꠆ꠖꠤ ꠖꠦꠅꠀꠞ ꠟꠣꠉꠤ ꠎꠣꠘꠦ ꠝꠣꠞꠣ ꠅꠁꠍꠦ।
REV 6:10 ꠄꠞꠣ ꠎꠥꠞꠦ ꠎꠥꠞꠦ ꠇꠁꠟꠣ, “ꠅ ꠙꠣꠇ-ꠙꠛꠤꠔ꠆ꠞ ꠢꠇ꠆ꠇꠣꠘꠤ ꠝꠃꠟꠣ, ꠀꠝꠞꠣꠞꠦ ꠈꠥꠘ ꠇꠞꠣꠞ ꠛꠤꠌꠣꠞ ꠇꠞꠔꠦ ꠀꠞ ꠛꠖꠟꠣ ꠟꠁꠔꠦ, ꠔꠥꠝꠤ ꠖꠥꠘꠤꠀꠞ ꠝꠣꠘꠡꠞꠦ ꠀꠞ ꠇꠔꠖꠤꠘ ꠡꠝꠄ ꠖꠤꠔꠣꠄ?”
REV 6:11 ꠔꠦꠃ ꠄꠞꠣ ꠢꠇꠟꠞꠦ ꠗꠟꠣ ꠟꠦꠛꠣꠍ ꠖꠣꠘ ꠇꠞꠣ ꠅꠁꠟ, ꠀꠞ ꠇꠅꠀ ꠅꠁꠟ, ꠔꠣꠞꠣꠞ ꠟꠉꠞ ꠈꠦꠎꠝꠔꠉꠣꠞ ꠀꠞ ꠔꠣꠞꠣꠞ ꠎꠔ ꠜꠣꠁꠀꠁꠘꠞꠦ ꠔꠣꠞꠣꠞ ꠘꠝꠥꠘꠣꠄ ꠡꠢꠤꠖ ꠇꠞꠣ ꠅꠁꠛ, ꠄꠞꠣꠞ ꠡꠋꠈꠣ ꠙꠥꠞꠣ ꠘꠣ ꠅꠀ ꠙꠞ꠆ꠎꠘ꠆ꠔ, ꠀꠞꠅ ꠇꠤꠍꠥ ꠖꠤꠘ ꠛꠣꠞ ꠌꠣꠁꠔꠦ ꠅꠁꠛ।
REV 6:12 ꠛꠣꠖꠦ ꠀꠝꠤ ꠖꠦꠈꠟꠣꠝ, ꠝꠦꠠꠣ-ꠛꠣꠁꠌ꠆ꠌꠣꠄ ꠍꠄ ꠘꠝ꠆ꠛꠞ ꠡꠤꠟ ꠜꠣꠋꠉꠤꠟꠣ, ꠅꠃ ꠡꠝꠄ ꠈꠥꠛ ꠛꠠ ꠜꠂꠍꠣꠟ ꠅꠁꠟ। ꠡꠥꠞꠥꠎꠞ ꠞꠋ ꠅꠁꠉꠦꠟ ꠇꠣꠟꠣ ꠍꠤꠀꠁ ꠀꠞ ꠜꠞꠣ ꠌꠣꠘ꠆ꠖꠞ ꠞꠋ ꠅꠁꠟ ꠟꠃꠞ ꠟꠣꠈꠣꠘ ꠟꠣꠟ।
REV 6:13 ꠔꠥꠚꠣꠘ ꠀꠁꠟꠦ ꠎꠦꠟꠣ ꠒꠥꠝꠥꠞ ꠉꠣꠍ ꠕꠣꠇꠤ ꠇꠣꠌꠣ ꠚꠟꠅ ꠔꠥꠚꠣꠘꠦ ꠚꠣꠟꠣꠁ ꠖꠦꠄ, ꠑꠤꠇ ꠅꠃꠟꠣ ꠀꠍꠝꠣꠘꠞ ꠔꠦꠞꠣ ꠅꠇꠟ ꠈꠥꠟꠤꠀ ꠎꠝꠤꠘꠞ ꠃꠙꠞꠦ ꠙꠠꠤꠉꠦꠟ।
REV 6:14 ꠀꠡ꠆ꠔꠣ ꠀꠍꠝꠣꠘ ꠖꠟꠣ ꠅꠁꠀ ꠇꠣꠉꠎꠞ ꠙꠥꠐꠟꠣ ꠟꠣꠈꠣꠘ ꠛꠘꠤꠀ ꠉꠣꠁꠛ ꠅꠁꠉꠦꠟ। ꠙꠣꠠ-ꠙꠞꠛꠔ ꠀꠞ ꠖꠤꠙ ꠅꠇꠟꠅ ꠎꠣꠞꠎꠤꠞ ꠎꠣꠉꠣ ꠕꠣꠇꠤ ꠢꠞꠤꠉꠦꠟ।
REV 6:15 ꠀꠞ ꠖꠥꠘꠤꠀꠞ ꠢꠇꠟ ꠞꠣꠎꠣ-ꠛꠣꠖꠡꠣꠁꠘ, ꠘꠣꠝꠇꠞꠣ ꠎꠘ, ꠍꠤꠙꠣꠁꠞ ꠙꠞꠗꠣꠘ, ꠎꠝꠤꠖꠣꠞ, ꠙꠄꠟꠥꠀꠘ, ꠉꠥꠟꠣꠝ ꠛꠣ ꠀꠎꠣꠖ ꠙꠞꠔꠦꠇ ꠎꠘꠃ ꠙꠣꠠꠞ ꠉꠣꠔꠦ ꠉꠣꠔꠦ, ꠙꠣꠔ꠆ꠔꠞꠞ ꠀꠅꠠꠦ ꠟꠥꠇꠣꠁꠟ।
REV 6:16 ꠔꠣꠞꠣ ꠅꠃ ꠙꠣꠠ ꠀꠞ ꠙꠣꠔ꠆ꠔꠞ ꠅꠇꠟꠞꠦ ꠇꠁꠟ, “ꠀꠝꠞꠣꠞ ꠃꠙꠞꠦ ꠀꠁꠀ ꠙꠠꠅ, ꠎꠦꠁꠘ ꠔꠈ꠆ꠔꠅ ꠛꠅꠀꠔ ꠀꠍꠂꠘ ꠔꠣꠘ ꠌꠃꠈꠞ ꠍꠣꠝꠘ ꠕꠣꠇꠤ ꠀꠞ ꠝꠦꠠꠣ-ꠛꠣꠁꠌ꠆ꠌꠣꠞ ꠉꠎꠛ ꠕꠣꠇꠤ ꠀꠝꠞꠣꠞꠦ ꠟꠥꠇꠣꠅ।
REV 6:17 ꠔꠣꠞꠣꠞ ꠉꠎꠛꠤ ꠢꠃ ꠇꠤꠀꠝꠔꠞ ꠖꠤꠘ ꠔ ꠀꠁꠌ꠆ꠍꠦ, ꠅꠈꠘ ꠀꠞ ꠐꠤꠇꠤꠀ ꠕꠣꠇꠣꠞ ꠡꠣꠁꠖ꠆ꠖ ꠇꠣꠞ ꠀꠍꠦ?”
REV 7:1 ꠄꠞꠛꠣꠖꠦ ꠀꠝꠤ ꠖꠦꠈꠟꠣꠝ, ꠖꠥꠘꠤꠀꠞ ꠌꠣꠁꠞ ꠇꠥꠘꠣꠔ ꠌꠣꠁꠞꠎꠘ ꠚꠤꠞꠤꠡ꠆ꠔꠣ ꠃꠛꠣꠁ ꠞꠁꠍꠂꠘ। ꠔꠣꠞꠣ ꠖꠥꠘꠤꠀꠔ, ꠖꠞꠤꠀꠔ ꠀꠞ ꠢꠇꠟ ꠉꠣꠍ-ꠙꠣꠟꠣꠔ ꠛꠣꠔꠣꠡ ꠢꠣꠝꠣꠘꠤꠞ ꠖꠥꠀꠞ ꠛꠘ꠆ꠖ ꠇꠞꠣꠞ ꠟꠣꠉꠤ ꠃꠛꠣꠁꠍꠂꠘ।
REV 7:2 ꠛꠣꠖꠦ ꠀꠝꠤ ꠖꠦꠈꠟꠣꠝ, ꠙꠥꠛꠦ ꠕꠣꠇꠤ ꠀꠞꠇ ꠎꠘ ꠚꠤꠞꠤꠡ꠆ꠔꠣ ꠃꠑꠤꠀ ꠀꠁꠞꠣ, ꠎꠤꠘ꠆ꠖꠣ ꠀꠟ꠆ꠟꠣꠞ ꠡꠤꠟ-ꠌꠣꠙ꠆ꠙꠠ ꠔꠣꠘ ꠉꠦꠍꠦ ꠀꠍꠦ। ꠔꠣꠁꠘ ꠀꠁꠀ ꠎꠦ ꠌꠣꠁꠞꠎꠘ ꠚꠤꠞꠤꠡ꠆ꠔꠣꠞꠦ ꠖꠥꠘꠤꠀ ꠀꠞ ꠖꠞꠤꠀꠞ ꠈꠦꠔꠤ ꠇꠞꠣꠞ ꠟꠣꠉꠤ ꠈꠦꠝꠔꠣ ꠖꠦꠅꠀ ꠅꠁꠍꠤꠟ, ꠢꠃ ꠌꠣꠁꠞꠅ ꠚꠤꠞꠤꠡ꠆ꠔꠣꠞꠦ ꠎꠥꠞꠦ ꠎꠥꠞꠦ ꠒꠣꠇꠤꠀ ꠇꠁꠟꠣ,
REV 7:3 “ꠀꠝꠞꠣ ꠎꠔꠛꠁꠟ ꠀꠝꠞꠣꠞ ꠀꠟ꠆ꠟꠣꠞ ꠉꠥꠟꠣꠝ ꠅꠇꠟꠞ ꠇꠙꠣꠟꠅ ꠡꠤꠟ ꠘꠣ ꠝꠣꠞꠍꠤ, ꠅꠔꠛꠁꠟ ꠔꠥꠝꠞꠣ ꠖꠥꠘꠤꠀꠞ, ꠖꠞꠤꠀꠞ ꠛꠣ ꠉꠣꠍ-ꠙꠣꠟꠣꠞ ꠈꠦꠔꠤ ꠇꠞꠤꠅ ꠘꠣ।”
REV 7:4 ꠛꠣꠖꠦ ꠀꠝꠤ ꠢꠃ ꠡꠤꠟ-ꠌꠣꠙ꠆ꠙꠠ ꠝꠣꠞꠣ ꠝꠣꠘꠡꠞ ꠙꠞꠤꠝꠣꠘ ꠢꠥꠘꠟꠣꠝ। ꠛꠘꠤ ꠁꠍꠞꠣꠁꠟꠞ ꠢꠇꠟ ꠈꠣꠘ꠆ꠖꠣꠘ ꠕꠣꠇꠤ ꠄꠇ ꠟꠣꠈ ꠌꠃꠌꠣꠟ꠆ꠟꠤꠡ ꠀꠎꠣꠞ ꠎꠘꠞꠦ ꠡꠤꠟ ꠝꠣꠞꠣ ꠅꠁꠍꠦ।
REV 7:5 ꠄꠢꠥꠖꠣ ꠈꠣꠘ꠆ꠖꠣꠘꠞ ꠛꠣꠞꠅ ꠀꠎꠣꠞ ꠎꠘ ꠡꠤꠟ ꠝꠣꠞꠣ; ꠞꠥꠛꠦꠘ ꠈꠣꠘ꠆ꠖꠣꠘ ꠕꠣꠇꠤ ꠛꠣꠞꠅ ꠀꠎꠣꠞ; ꠍꠣꠖꠥ ꠈꠣꠘ꠆ꠖꠣꠘ ꠕꠣꠇꠤ ꠛꠣꠞꠅ ꠀꠎꠣꠞ;
REV 7:6 ꠀꠡꠤꠞ ꠈꠣꠘ꠆ꠖꠣꠘ ꠕꠣꠇꠤ ꠛꠣꠞꠅ ꠀꠎꠣꠞ; ꠘꠙ꠆ꠔꠣꠟꠤ ꠈꠣꠘ꠆ꠖꠣꠘ ꠕꠣꠇꠤ ꠛꠣꠞꠅ ꠀꠎꠣꠞ; ꠝꠣꠘꠡꠣ ꠈꠣꠘ꠆ꠖꠣꠘ ꠕꠣꠇꠤ ꠛꠣꠞꠅ ꠀꠎꠣꠞ;
REV 7:7 ꠡꠤꠝꠤꠅꠘ ꠈꠣꠘ꠆ꠖꠣꠘ ꠕꠣꠇꠤ ꠛꠣꠞꠅ ꠀꠎꠣꠞ; ꠟꠦꠛꠤ ꠈꠣꠘ꠆ꠖꠣꠘ ꠕꠣꠇꠤ ꠛꠣꠞꠅ ꠀꠎꠣꠞ; ꠁꠍꠣꠈꠞ ꠈꠣꠘ꠆ꠖꠣꠘ ꠕꠣꠇꠤ ꠛꠣꠞꠅ ꠀꠎꠣꠞ;
REV 7:8 ꠍꠛꠥꠟꠘ ꠈꠣꠘ꠆ꠖꠣꠘ ꠕꠣꠇꠤ ꠛꠣꠞꠅ ꠀꠎꠣꠞ; ꠁꠃꠍꠥꠚ ꠈꠣꠘ꠆ꠖꠣꠘ ꠕꠣꠇꠤ ꠛꠣꠞꠅ ꠀꠎꠣꠞ; ꠛꠤꠘ-ꠁꠀꠝꠤꠘ ꠈꠣꠘ꠆ꠖꠣꠘ ꠕꠣꠇꠤ ꠛꠣꠞꠅ ꠀꠎꠣꠞ ꠎꠘ ꠡꠤꠟ ꠝꠣꠞꠣ।
REV 7:9 ꠛꠣꠖꠦ ꠀꠝꠤ ꠖꠦꠈꠟꠣꠝ, ꠙꠞꠔꠦꠇ ꠖꠦꠡ, ꠢꠇꠟ ꠈꠣꠘ꠆ꠖꠣꠘ, ꠢꠇꠟ ꠎꠣꠔꠤ ꠀꠞ ꠢꠇꠟ ꠎꠣꠔꠞ ꠛꠥꠟꠤꠄ ꠝꠣꠔꠞꠣ ꠛꠃꠔ ꠝꠣꠘꠥꠡ ꠖꠟꠣ ꠅꠁꠍꠂꠘ, ꠄꠞꠣꠞꠦ ꠉꠘꠤꠀ ꠚꠥꠠꠣꠘꠤꠞ ꠡꠣꠁꠖ꠆ꠖ ꠇꠦꠃꠞꠞ ꠘꠣꠁ। ꠄꠞꠣ ꠗꠟꠣ ꠟꠦꠛꠣꠍ ꠚꠤꠘ꠆ꠖꠤꠀ ꠈꠦꠎꠥꠞ ꠙꠣꠔꠣ ꠀꠔꠅ ꠟꠁꠀ, ꠢꠃ ꠔꠈ꠆ꠔ ꠀꠞ ꠝꠦꠠꠣ-ꠛꠣꠁꠌ꠆ꠌꠣꠞ ꠍꠣꠝꠘꠦ ꠃꠛꠣꠁ ꠞꠁꠍꠂꠘ।
REV 7:10 ꠔꠣꠞꠣ ꠎꠥꠞꠦ ꠎꠥꠞꠦ ꠇꠁꠞꠣ, “ꠀꠝꠞꠣꠞ ꠀꠟ꠆ꠟꠣ ꠎꠦꠁꠘ ꠔꠈ꠆ꠔꠅ ꠛꠅꠀꠔ ꠀꠍꠂꠘ, ꠀꠞ ꠝꠦꠠꠣ-ꠛꠣꠁꠌ꠆ꠌꠣꠞ ꠀꠔꠅꠃ, ꠉꠥꠘꠣꠞ ꠝꠣꠚꠤ ꠀꠞ ꠘꠣꠎꠣꠔ ꠀꠍꠦ।”
REV 7:11 ꠄꠞꠛꠣꠖꠦ ꠔꠣꠝꠣꠝ ꠚꠤꠞꠤꠡ꠆ꠔꠣ ꠅꠇꠟ, ꠢꠃ ꠔꠈ꠆ꠔꠞ, ꠢꠃ ꠝꠥꠞꠛ꠆ꠛꠤ ꠘꠦꠔꠣ ꠅꠇꠟꠞ ꠀꠞ ꠌꠣꠁꠞꠅ ꠎꠣꠘꠖꠣꠞꠞ ꠌꠣꠁꠞꠅ ꠇꠣꠘ꠆ꠖꠣꠛꠣꠄ ꠃꠛꠣꠁꠟꠣ। ꠔꠣꠞꠣ ꠔꠈ꠆ꠔꠞ ꠍꠣꠝꠘꠦ ꠍꠁꠎꠖꠣꠔ ꠙꠠꠤꠀ ꠇꠁꠟꠣ,
REV 7:12 “ꠀꠝꠤꠘ। ꠔꠣꠞꠤꠚ, ꠉꠃꠞꠛ, ꠀꠈꠟ ꠀꠞ ꠡꠥꠇꠞꠤꠀ, ꠁꠎ꠆ꠎꠔ, ꠈꠦꠝꠔꠣ ꠀꠞ ꠛꠟ-ꠡꠇ꠆ꠔꠤ, ꠎꠥꠉꠦ ꠎꠥꠉꠦ ꠀꠝꠞꠣꠞ ꠀꠟ꠆ꠟꠣꠞꠃ ꠅꠃꠇ। ꠀꠝꠤꠘ।”
REV 7:13 ꠛꠣꠖꠦ ꠝꠥꠞꠛ꠆ꠛꠤ ꠘꠦꠔꠣ ꠅꠇꠟꠞ ꠝꠣꠎꠞ ꠄꠇꠎꠘꠦ ꠀꠝꠣꠞꠦ ꠇꠁꠟꠣ, “ꠛꠥꠎꠞꠣꠄ ꠘꠤ, ꠗꠟꠣ ꠟꠦꠛꠣꠍ ꠚꠤꠘ꠆ꠖꠣ ꠅꠃ ꠝꠣꠘꠥꠡ ꠅꠇꠟ ꠇꠦ, ꠄꠞꠣ ꠇꠥꠀꠁ ꠕꠣꠇꠤ ꠀꠁꠍꠂꠘ?”
REV 7:14 ꠀꠝꠤ ꠔꠣꠘꠞꠦ ꠇꠁꠟꠣꠝ, “ꠅ ꠝꠣꠟꠤꠇ, ꠁꠔꠣ ꠔ ꠀꠙꠘꠦꠃ ꠎꠣꠘꠂꠘ।” ꠔꠦꠃ ꠔꠣꠁꠘ ꠇꠁꠟꠣ, “ꠄꠞꠣ ꠅꠁꠟꠣ ꠢꠃ ꠎꠘ ꠅꠇꠟ, ꠎꠦꠞꠣ ꠢꠃ ꠝꠢꠣ ꠝꠍꠤꠛꠔꠞ ꠝꠣꠎ ꠕꠣꠇꠤ ꠀꠁꠍꠦ। ꠔꠣꠞꠣꠞ ꠟꠦꠛꠣꠍꠞꠦ ꠝꠦꠠꠣ-ꠛꠣꠁꠌ꠆ꠌꠣꠞ ꠟꠃꠖꠤ ꠗꠁꠀ ꠗꠟꠣ ꠛꠣꠘꠣꠁꠍꠦ।
REV 7:15 ꠄꠞꠟꠣꠉꠤ ꠄꠞꠣ ꠀꠟ꠆ꠟꠣꠞ ꠔꠈ꠆ꠔꠞ ꠍꠣꠝꠘꠦ ꠀꠍꠦ; ꠔꠣꠞꠣ ꠖꠤꠘ-ꠞꠣꠁꠔ ꠛꠦꠢꠦꠡ꠆ꠔꠤ ꠄꠛꠣꠖꠔ ꠈꠣꠘꠣꠞ ꠝꠣꠎꠦ ꠄꠛꠣꠖꠔ-ꠛꠘ꠆ꠖꠦꠉꠤ ꠇꠞꠞꠣ। ꠀꠞ ꠔꠈ꠆ꠔꠅ ꠎꠦꠁꠘ ꠛꠅꠀꠔ ꠀꠍꠂꠘ, ꠔꠣꠁꠘ ꠘꠤꠎꠦ ꠄꠞꠣꠞ ꠃꠙꠞꠦ ꠔꠣꠝ꠆ꠛꠥ ꠐꠣꠘꠣꠁ ꠖꠤꠛꠣ।
REV 7:16 ꠄꠞꠣꠞ ꠀꠞ ꠇꠥꠘꠥꠖꠤꠘ ꠜꠥꠇ ꠟꠣꠉꠔ ꠘꠣꠄ, ꠙꠣꠘꠤꠞ ꠙꠤꠀꠍꠦ ꠗꠞꠔ ꠘꠣꠄ; ꠡꠥꠞꠥꠎꠞ ꠔꠦꠎ ꠄꠞꠣꠞ ꠉꠔꠞꠅ ꠟꠣꠉꠔ ꠘꠣꠄ, ꠇꠥꠘꠥ ꠉꠞꠝꠅ ꠟꠣꠉꠔ ꠘꠣꠄ।
REV 7:17 ꠔꠈ꠆ꠔꠞ ꠝꠣꠎꠞ ꠝꠦꠠꠣ-ꠛꠣꠁꠌ꠆ꠌꠣꠄꠃ ꠄꠞꠣꠞ ꠞꠣꠈꠣꠟꠤ ꠇꠞꠛꠣ। ꠔꠣꠁꠘ ꠄꠞꠣꠞꠦ ꠀꠛꠦ-ꠢꠣꠄꠀꠔꠞ ꠎꠤꠘ꠆ꠖꠦꠉꠤ-ꠙꠣꠘꠤꠞ ꠏꠞꠘꠣꠞ ꠉꠦꠍꠦ ꠟꠁꠀ ꠎꠣꠁꠛꠣ, ꠀꠞ ꠀꠟ꠆ꠟꠣꠄ ꠄꠞꠣꠞ ꠌꠃꠈꠞ ꠙꠣꠘꠤ ꠚꠥꠍꠤꠀ ꠖꠤꠛꠣ।”
REV 8:1 ꠛꠣꠖꠦ ꠅꠃ ꠝꠦꠠꠣ-ꠛꠣꠁꠌ꠆ꠌꠣꠄ ꠎꠦꠛꠟꠣ ꠡꠣꠔ ꠘꠝ꠆ꠛꠞ ꠡꠤꠟ-ꠌꠣꠙ꠆ꠙꠠ ꠜꠣꠋꠉꠤꠟꠣ, ꠅꠃ ꠡꠝꠄ ꠅꠘꠥꠝꠣꠘ ꠀꠗꠣ ꠊꠘ꠆ꠐꠣ ꠡꠝꠄ ꠛꠦꠢꠦꠡ꠆ꠔꠅ ꠇꠥꠘꠥ ꠀꠅꠀꠎ ꠢꠥꠘꠣ ꠉꠦꠟ ꠘꠣ।
REV 8:2 ꠀꠞ ꠎꠦ ꠡꠣꠔꠎꠘ ꠚꠤꠞꠤꠡ꠆ꠔꠣ ꠀꠟ꠆ꠟꠣꠞ ꠍꠣꠝꠘꠦ ꠃꠛꠣꠔ ꠕꠣꠇꠂꠘ, ꠀꠝꠤ ꠄꠞꠣꠞꠦ ꠖꠦꠈꠟꠣꠝ, ꠄꠞꠣꠞ ꠀꠔꠅ ꠡꠣꠔꠐꠣ ꠡꠤꠋꠉꠣ ꠖꠦꠅꠀ ꠅꠁꠟ।
REV 8:3 ꠄꠞꠛꠣꠖꠦ ꠀꠞꠇ ꠎꠘ ꠚꠤꠞꠤꠡ꠆ꠔꠣ ꠀꠁꠀ ꠇꠥꠞꠛꠣꠘꠤ ꠈꠣꠘꠣꠞ ꠍꠣꠝꠘꠦ ꠃꠛꠣꠁꠟꠣ। ꠔꠣꠘ ꠀꠔꠅ ꠡꠥꠘꠣꠞ ꠀꠉꠞ-ꠈꠥꠡꠛꠄ ꠖꠣꠘꠤ। ꠔꠈ꠆ꠔꠞ ꠍꠣꠝꠘꠞ ꠀꠉꠞ ꠎꠣꠟꠣꠘꠤꠞ ꠡꠥꠘꠣꠞ ꠐꠦꠛꠥꠟꠞ ꠃꠙꠞꠦ ꠎꠣꠟꠣꠘꠤꠞ ꠟꠣꠉꠤ ꠛꠃꠔ ꠀꠉꠞ-ꠈꠥꠡꠛꠄ ꠔꠣꠘꠞꠦ ꠖꠦꠅꠀ ꠅꠁꠟ, ꠀꠟ꠆ꠟꠣꠞ ꠔꠣꠝꠣꠝ ꠙꠣꠇ ꠛꠘ꠆ꠖꠣ ꠅꠇꠟꠞ ꠖꠥꠀ-ꠝꠥꠘꠣꠎꠣꠔꠞ ꠟꠉꠦ ꠝꠤꠡꠣꠘꠤꠞ ꠟꠣꠉꠤ ꠁꠔꠣ ꠖꠦꠅꠀ ꠅꠁꠟ।
REV 8:4 ꠄꠞꠟꠣꠉꠤ ꠢꠃ ꠚꠤꠞꠤꠡ꠆ꠔꠣꠞ ꠀꠔꠞ ꠀꠉꠞ-ꠈꠥꠡꠛꠄꠞ ꠗꠥꠝꠣꠞ ꠟꠉꠦ, ꠙꠣꠇ ꠛꠘ꠆ꠖꠣ ꠅꠇꠟꠞ ꠖꠥꠀ-ꠝꠥꠘꠣꠎꠣꠔꠅ ꠀꠟ꠆ꠟꠣꠞ ꠍꠣꠝꠘꠦ ꠃꠑꠟ।
REV 8:5 ꠛꠣꠖꠦ ꠅꠃ ꠚꠤꠞꠤꠡ꠆ꠔꠣꠄ ꠇꠥꠞꠛꠣꠘꠤ ꠈꠣꠘꠣ ꠕꠣꠇꠤ ꠀꠉꠥꠁꠘ ꠘꠤꠀ ꠀꠉꠞ ꠖꠣꠘꠤꠔ ꠜꠞꠟꠣ, ꠜꠞꠤꠀ ꠁꠔꠣ ꠖꠥꠘꠤꠀꠔ ꠚꠣꠟꠣꠁꠟꠣ। ꠔꠦꠃ ꠑꠣꠐꠣꠞꠤ ꠀꠅꠀꠎ, ꠝꠦꠊꠞ ꠒꠣꠇ, ꠎꠤꠟꠇꠣꠘꠤ, ꠀꠞ ꠜꠂꠍꠣꠟ ꠅꠁꠟ।
REV 8:6 ꠀꠞ ꠢꠃ ꠎꠦ ꠡꠣꠔꠎꠘ ꠚꠤꠞꠤꠡ꠆ꠔꠣꠞ ꠀꠔꠅ ꠡꠣꠔꠐꠣ ꠡꠤꠋꠉꠣ ꠀꠍꠤꠟ, ꠄꠞꠣ ꠅꠃ ꠡꠤꠋꠉꠣ ꠛꠣꠎꠣꠘꠤꠞ ꠟꠣꠉꠤ ꠎꠥꠁꠔ ꠅꠁꠟꠣ।
REV 8:7 ꠙꠄꠟꠣ ꠚꠤꠞꠤꠡ꠆ꠔꠣꠄ ꠡꠤꠋꠉꠣ ꠛꠣꠎꠣꠘꠤꠞ ꠟꠉꠦ ꠟꠉꠦ ꠟꠃ ꠝꠣꠈꠣꠁꠟ ꠢꠤꠟ ꠀꠞ ꠀꠉꠥꠁꠘ ꠎꠝꠤꠘꠅ ꠚꠣꠟꠣꠁꠟ ꠅꠁꠟ। ꠔꠦꠃ ꠎꠝꠤꠘꠞ ꠔꠤꠘ ꠛꠣꠐꠞ ꠄꠇ ꠛꠣꠐ, ꠉꠣꠍ-ꠉꠣꠍꠣꠟꠤꠞ ꠔꠤꠘ ꠛꠣꠐꠞ ꠄꠇ ꠛꠣꠐ, ꠀꠞ ꠢꠇꠟ ꠊꠣꠡ-ꠙꠣꠔꠣ ꠎꠟꠤ ꠉꠦꠟ।
REV 8:8 ꠄꠞꠛꠣꠖꠦ ꠖꠥꠍꠞꠣ ꠚꠤꠞꠤꠡ꠆ꠔꠣꠄ ꠔꠣꠘ ꠡꠤꠋꠉꠣ ꠚꠥꠇꠤꠟꠣ। ꠅꠃ ꠡꠝꠄ ꠎꠣꠟꠣꠁꠟ ꠙꠣꠠꠞ ꠟꠣꠈꠣꠘ ꠝꠥꠐꠣ ꠄꠇ ꠌꠤꠎ ꠖꠞꠤꠀꠔ ꠚꠣꠟꠣꠁꠟ ꠅꠁꠟ। ꠁꠔꠣꠄ ꠖꠞꠤꠀꠞ ꠔꠤꠘ ꠛꠣꠐꠞ ꠄꠇ ꠛꠣꠐ ꠙꠣꠘꠤ ꠟꠃ ꠅꠁꠉꠦꠟ।
REV 8:9 ꠖꠞꠤꠀꠞ ꠔꠤꠘ ꠛꠣꠐꠞ ꠄꠇ ꠛꠣꠐ ꠎꠣꠘꠖꠣꠞ ꠝꠞꠤꠉꠦꠟ, ꠔꠤꠘ ꠛꠣꠐꠞ ꠄꠇ ꠛꠣꠐ ꠎꠣꠎ ꠛꠤꠘꠣꠡ ꠅꠁꠉꠦꠟ।
REV 8:10 ꠛꠣꠖꠦ ꠔꠤꠘ ꠘꠝ꠆ꠛꠞ ꠚꠤꠞꠤꠡ꠆ꠔꠣꠄ ꠔꠣꠘ ꠡꠤꠋꠉꠣ ꠚꠥꠇꠤꠟꠣ। ꠔꠦꠃ ꠀꠍꠝꠣꠘꠞ ꠌꠇꠌꠇꠣ ꠛꠤꠞꠣꠐ ꠄꠇ ꠔꠦꠞꠣ ꠛꠠ ꠝꠥꠡꠣꠟꠞ ꠟꠣꠈꠣꠘ ꠎꠟꠤ ꠎꠟꠤ ꠔꠟꠦ ꠙꠠꠟ, ꠁꠐꠣ ꠀꠁꠀ ꠢꠇꠟ ꠉꠣꠋ, ꠈꠣꠟ-ꠛꠤꠟꠞ ꠔꠤꠘ ꠛꠣꠐꠞ ꠄꠇ ꠛꠣꠐꠞ ꠃꠙꠞꠦ ꠙꠠꠟ।
REV 8:11 ꠅꠃ ꠔꠦꠞꠣꠞ ꠘꠣꠝ ꠀꠍꠤꠟ ꠘꠣꠉꠖꠣꠘꠣ। ꠁꠐꠣ ꠙꠠꠤꠀ ꠔꠤꠘ ꠛꠣꠐꠞ ꠄꠇ ꠛꠣꠐ ꠙꠣꠘꠤ ꠔꠤꠔ꠆ꠔꠣ-ꠎꠢꠞ ꠅꠁꠉꠦꠟ, ꠁ ꠙꠣꠘꠤꠞ ꠟꠣꠉꠤ ꠛꠃꠔ ꠎꠘ ꠝꠞꠟꠣ।
REV 8:12 ꠀꠞ ꠌꠣꠁꠞ ꠘꠝ꠆ꠛꠞ ꠚꠤꠞꠤꠡ꠆ꠔꠣꠄ ꠎꠦꠛꠟꠣ ꠡꠤꠋꠉꠣ ꠚꠥꠇꠤꠟꠣ, ꠅꠃ ꠡꠝꠄ ꠌꠣꠘ꠆ꠖ, ꠡꠥꠞꠥꠎ ꠀꠞ ꠔꠦꠞꠣ, ꠁꠔꠣ ꠢꠇ꠆ꠇꠟꠔꠣꠞ ꠔꠤꠘ ꠛꠣꠐꠞ ꠄꠇ ꠅꠋꠡ ꠎꠈꠝ ꠅꠁꠉꠦꠟ, ꠔꠦꠃ ꠢꠇꠟꠔꠣꠞ ꠔꠤꠘ ꠛꠣꠐꠞ ꠄꠇ ꠛꠣꠐ ꠀꠘ꠆ꠖꠣꠁꠞ ꠅꠁꠉꠦꠟ, ꠄꠞꠟꠣꠉꠤ ꠖꠤꠘꠞ ꠔꠤꠘ ꠛꠣꠐꠞ ꠄꠇ ꠛꠣꠐꠅ ꠀꠞ ꠞꠣꠁꠔꠞ ꠔꠤꠘ ꠛꠣꠐꠞ ꠄꠇ ꠛꠣꠐꠅ ꠇꠥꠘꠥꠎꠣꠔ ꠞꠥꠡꠘꠤ ꠞꠁꠟ ꠘꠣ।
REV 8:13 ꠛꠣꠖꠦ ꠀꠝꠤ ꠌꠣꠁꠟꠣꠝ, ꠌꠣꠁꠀ ꠖꠦꠈꠤ, ꠄꠇꠐꠣ ꠌꠤꠟ ꠙꠣꠈꠤ ꠛꠃꠔ ꠃꠌꠣꠔ ꠀꠍꠝꠣꠘꠞ ꠝꠣꠎꠦꠖꠤ ꠃꠠꠦꠞ, ꠀꠞ ꠢꠦ ꠎꠥꠞꠦ ꠎꠥꠞꠦ ꠝꠣꠔꠦꠞ, “ꠛꠣꠇꠤ ꠎꠦ ꠔꠤꠘꠎꠘ ꠚꠤꠞꠤꠡ꠆ꠔꠣꠄ ꠡꠤꠋꠉꠣ ꠚꠥꠇꠤꠛꠣ, ꠔꠣꠞꠣꠞ ꠡꠤꠋꠉꠣ ꠚꠥꠇꠤꠟꠦ ꠖꠥꠘꠤꠀꠞ ꠛꠣꠡꠤꠘ꠆ꠖꠣ ꠅꠇꠟꠞ ꠃꠙꠞꠦ ꠉꠎꠛ, ꠉꠎꠛ, ꠉꠎꠛ ꠟꠣꠝꠛ।”
REV 9:1 ꠛꠣꠖꠦ ꠙꠣꠌ ꠘꠝ꠆ꠛꠞ ꠚꠤꠞꠤꠡ꠆ꠔꠣꠄ ꠡꠤꠋꠉꠣ ꠚꠥꠇꠤꠟꠣ, ꠔꠦꠃ ꠀꠝꠤ ꠖꠦꠈꠟꠣꠝ, ꠀꠍꠝꠣꠘꠞ ꠄꠇꠐꠣ ꠔꠦꠞꠣ ꠛꠦꠢꠦꠡ꠆ꠔ ꠕꠣꠇꠤ ꠖꠥꠘꠤꠀꠔ ꠙꠠꠟ। ꠅꠃ ꠔꠦꠞꠣꠞꠦ ꠢꠣꠛꠤꠀ ꠖꠥꠎꠈꠞ ꠌꠣꠛꠤ ꠖꠦꠅꠀ ꠅꠁꠟ।
REV 9:2 ꠔꠦꠃ ꠢꠦ ꠢꠣꠛꠤꠀ ꠖꠥꠎꠈꠞ ꠖꠥꠀꠞ ꠈꠥꠟꠟ, ꠛꠃꠔ ꠛꠠ ꠒꠝꠇꠣ ꠕꠣꠇꠤ ꠎꠦꠟꠣ ꠗꠥꠝꠣ ꠛꠣꠞꠅꠄ, ꠁ ꠖꠥꠎꠈ ꠕꠣꠇꠤ ꠅꠟꠣ ꠗꠥꠝꠣ ꠛꠣꠞ ꠅꠁꠟ। ꠅꠃ ꠖꠥꠎꠈꠤ ꠗꠥꠝꠣꠄ ꠀꠍꠝꠣꠘ ꠀꠞ ꠡꠥꠞꠥꠎ ꠀꠘ꠆ꠖꠣꠁꠞ ꠅꠁꠉꠦꠟ।
REV 9:3 ꠢꠃ ꠗꠥꠝꠣ ꠕꠣꠇꠤ ꠛꠃꠔ ꠙꠋꠉꠙꠣꠟ ꠛꠣꠞ ꠅꠁꠀ ꠖꠥꠘꠤꠀꠔ ꠀꠁꠟꠣ। ꠁꠔꠣꠞꠦ ꠖꠥꠘꠤꠀꠞ ꠇꠣꠇꠠꠣ-ꠛꠤꠍꠣꠞ ꠟꠣꠈꠣꠘ ꠈꠦꠝꠔꠣ ꠖꠦꠅꠀ ꠅꠁꠟ।
REV 9:4 ꠔꠣꠞꠣꠞꠦ ꠢꠥꠇꠥꠝ ꠖꠦꠅꠀ ꠅꠁꠟ, ꠔꠣꠞꠣ ꠎꠣꠘꠥ ꠖꠥꠘꠤꠀꠞ ꠇꠥꠘꠥ ꠊꠣꠡ-ꠙꠣꠔꠣ, ꠉꠣꠍ-ꠙꠣꠟꠣ ꠛꠣ ꠢꠣꠉ-ꠔꠞꠇꠣꠞꠤꠞ ꠈꠦꠔꠤ ꠘꠣ ꠇꠞꠦ। ꠈꠣꠟꠤ ꠎꠦꠔꠣ ꠝꠣꠘꠡꠞ ꠇꠙꠣꠟꠅ ꠀꠟ꠆ꠟꠣꠞ ꠡꠤꠟ-ꠌꠣꠙ꠆ꠙꠠ ꠝꠣꠞꠣ ꠘꠣꠁ, ꠅꠔꠣꠞ ꠈꠦꠔꠤ ꠇꠞꠂꠘ।
REV 9:5 ꠁꠔꠣ ꠝꠣꠘꠡꠞꠦ ꠎꠣꠘꠦ ꠝꠣꠞꠣꠞ ꠇꠥꠘꠥ ꠈꠦꠝꠔꠣ ꠔꠣꠞꠣꠞꠦ ꠖꠦꠅꠀ ꠅꠁꠟ ꠘꠣ, ꠅꠁꠟꠦ ꠙꠣꠌ ꠝꠣꠡ ꠙꠞ꠆ꠎꠘ꠆ꠔ ꠎꠣꠟꠣ-ꠎꠘꠔ꠆ꠞꠘꠣ ꠖꠤꠛꠣꠞ ꠈꠦꠝꠔꠣ ꠖꠦꠅꠀ ꠅꠁꠟ। ꠇꠣꠇꠠꠣ-ꠛꠤꠍꠣꠄ ꠇꠥꠘꠥ ꠝꠣꠘꠡꠞꠦ ꠇꠣꠝꠠ ꠖꠤꠟꠦ ꠎꠦꠟꠣ ꠛꠤꠡ-ꠛꠦꠖꠘꠣ ꠅꠄ, ꠅꠃ ꠙꠋꠉꠙꠣꠟꠦ ꠇꠣꠝꠠꠣꠁꠟꠦꠅ ꠅꠟꠣ ꠅꠁꠛ।
REV 9:6 ꠢꠃ ꠡꠝꠄ ꠝꠣꠘꠡꠦ ꠝꠃꠔ ꠝꠣꠋꠉꠤꠛꠣ, ꠔꠣ-ꠅ ꠝꠃꠔ ꠅꠁꠔ ꠘꠣꠄ। ꠔꠣꠞꠣ ꠝꠞꠔꠣ ꠌꠣꠁꠛꠣ ꠅꠁꠟꠦ ꠝꠞꠘ ꠔꠣꠞꠣꠞ ꠉꠦꠍ ꠕꠣꠇꠤ ꠜꠣꠉꠤꠛ।
REV 9:7 ꠁ ꠙꠋꠉꠙꠣꠟ ꠅꠇꠟ ꠖꠦꠈꠔꠦ ꠎꠥꠖ꠆ꠖꠞ ꠟꠣꠉꠤ ꠎꠥꠁꠔ ꠇꠞꠣ ꠊꠥꠠꠣꠞ ꠟꠣꠈꠣꠘ। ꠔꠣꠞꠣꠞ ꠝꠣꠕꠣꠔ ꠡꠥꠘꠣꠞ ꠔꠣꠎꠞ ꠟꠣꠈꠣꠘ ꠌꠤꠎ ꠀꠍꠤꠟ, ꠀꠞ ꠝꠥꠈꠞ ꠉꠑꠘ ꠅꠁꠟ ꠝꠣꠘꠡꠞ ꠟꠣꠈꠣꠘ।
REV 9:8 ꠔꠣꠞꠣꠞ ꠌꠥꠟ ꠅꠁꠟ ꠛꠦꠐꠤꠘ꠆ꠔꠞ ꠌꠥꠟꠞ ꠟꠣꠈꠣꠘ ꠀꠞ ꠖꠣꠔ ꠅꠁꠟ ꠡꠤꠋꠢꠞ ꠖꠣꠔꠞ ꠟꠣꠈꠣꠘ।
REV 9:9 ꠔꠣꠞꠣꠞ ꠛꠥꠇꠥꠞ ꠝꠣꠎꠦ ꠀꠍꠤꠟ ꠟꠥꠀꠞ ꠙꠣꠔꠞ ꠟꠣꠈꠣꠘ ꠈꠡꠈꠡꠣ ꠍꠣꠟ। ꠎꠥꠖ꠆ꠖꠞ ꠊꠥꠠꠣꠞ ꠉꠣꠠꠤ ꠐꠣꠘꠤꠀ ꠊꠥꠠꠣꠞ ꠙꠣꠟ ꠄꠇꠟꠉꠦ ꠉꠦꠟꠦ ꠎꠦꠟꠣ ꠀꠅꠀꠎ ꠅꠄ, ꠔꠣꠞꠣꠞ ꠒꠣꠈꠘꠣꠞ ꠀꠅꠀꠎꠅ ꠀꠍꠤꠟ ꠅꠃ ꠟꠣꠈꠣꠘ।
REV 9:10 ꠔꠣꠞꠣꠞ ꠟꠦꠁꠘ꠆ꠎ ꠀꠞ ꠟꠦꠁꠘ꠆ꠎꠞ ꠝꠥꠈꠞ ꠛꠤꠡ-ꠖꠣꠔ ꠀꠍꠤꠟ ꠇꠣꠇꠠꠣ-ꠛꠤꠍꠣꠞ ꠟꠣꠈꠣꠘ। ꠙꠣꠌ ꠝꠣꠡ ꠗꠞꠤ ꠝꠣꠘꠡꠞꠦ ꠇꠡ꠆ꠐ ꠖꠤꠛꠣꠞ ꠈꠦꠝꠔꠣ ꠁ ꠟꠦꠁꠘ꠆ꠎꠅ ꠀꠍꠦ।
REV 9:11 ꠢꠣꠛꠤꠀ ꠖꠥꠎꠈꠞ ꠚꠤꠞꠤꠡ꠆ꠔꠣ ꠀꠍꠟꠣ ꠅꠃ ꠙꠋꠉꠙꠣꠟꠞ ꠞꠣꠎꠣ। ꠁꠛꠞꠣꠘꠤ ꠜꠣꠡꠣꠄ ꠁ ꠚꠤꠞꠤꠡ꠆ꠔꠣꠞ ꠘꠣꠝ ꠅꠁꠟ ꠀꠛꠣꠖ꠆ꠖꠘ, ꠀꠞ ꠁꠃꠘꠣꠘꠤ ꠛꠣ ꠉ꠆ꠞꠤꠇ ꠜꠣꠡꠣꠄ ꠄꠞ ꠘꠣꠝ ꠅꠁꠟ ꠀꠙꠟ꠆ꠟꠤꠅꠘ, ꠝꠣꠘꠤ ꠉꠎꠛꠤ ꠚꠤꠞꠤꠡ꠆ꠔꠣ।
REV 9:12 ꠙꠄꠟꠣ ꠉꠎꠛ ꠢꠞꠟ, ꠅꠁꠟꠦ ꠢꠥꠘꠅ, ꠀꠞꠅ ꠖꠥꠁꠐꠣ ꠉꠎꠛ ꠀꠁꠀ ꠀꠎꠦꠞ।
REV 9:13 ꠛꠣꠖꠦ ꠍꠄ ꠘꠝ꠆ꠛꠞ ꠚꠤꠞꠤꠡ꠆ꠔꠣꠄ ꠔꠣꠘ ꠡꠤꠋꠉꠣ ꠚꠥꠇꠤꠟꠣ। ꠔꠦꠃ ꠀꠟ꠆ꠟꠣꠞ ꠍꠣꠝꠘꠞ ꠀꠉꠞ ꠎꠣꠟꠣꠘꠤꠞ ꠡꠥꠘꠣꠞ ꠐꠦꠛꠥꠟꠞ ꠌꠣꠁꠞꠐꠣ ꠢꠤꠋꠉꠞ ꠉꠦꠍ ꠕꠣꠇꠤ ꠀꠝꠤ ꠄꠇꠎꠘꠞꠦ ꠅꠈꠣꠘ ꠇꠁꠔꠦ ꠢꠥꠘꠟꠣꠝ,
REV 9:14 ꠄꠁꠘ ꠢꠃ ꠡꠤꠋꠉꠣ ꠀꠟꠣ ꠍꠄ ꠘꠝ꠆ꠛꠞ ꠚꠤꠞꠤꠡ꠆ꠔꠣꠞꠦ ꠇꠁꠟꠣ, “ꠝꠢꠣ ꠉꠣꠋ ꠚꠥꠞꠣꠔꠞ ꠝꠣꠎꠦ ꠎꠦ ꠌꠣꠁꠞꠎꠘ ꠚꠤꠞꠤꠡ꠆ꠔꠣ ꠀꠐꠇ ꠀꠍꠂꠘ, ꠔꠣꠞꠣꠞꠦ ꠈꠥꠟꠤꠀ ꠖꠦꠅ।”
REV 9:15 ꠄꠞꠟꠣꠉꠤ ꠢꠃ ꠌꠣꠁꠞꠅ ꠚꠤꠞꠤꠡ꠆ꠔꠣꠞꠦ ꠍꠣꠠꠤ ꠖꠦꠅꠀ ꠅꠁꠟ। ꠖꠥꠘꠤꠀꠞ ꠔꠤꠘ ꠛꠣꠐꠞ ꠄꠇ ꠛꠣꠐ ꠝꠣꠘꠡꠞꠦ ꠝꠣꠞꠣꠞ ꠟꠣꠉꠤ ꠅꠃ ꠚꠤꠞꠤꠡ꠆ꠔꠣ ꠅꠇꠟꠞꠦ ꠡꠑꠤꠇ ꠡꠝꠄ, ꠡꠑꠤꠇ ꠖꠤꠘ, ꠝꠣꠡ ꠀꠞ ꠛꠍꠞꠞ ꠟꠣꠉꠤ ꠎꠥꠁꠔ ꠇꠞꠤ ꠞꠣꠈꠣ ꠅꠁꠍꠤꠟ।
REV 9:16 ꠛꠣꠖꠦ ꠀꠝꠤ ꠢꠥꠘꠟꠣꠝ, ꠊꠥꠠꠣꠔ ꠌꠠꠤꠀ ꠎꠣꠅꠀ ꠅꠃ ꠍꠤꠙꠣꠁꠞ ꠙꠞꠤꠝꠣꠘ ꠀꠍꠤꠟ ꠛꠤꠡ ꠇꠥꠐꠤ।
REV 9:17 ꠅꠃ ꠖꠞꠡꠘꠅ ꠀꠝꠤ ꠎꠔ ꠊꠥꠠꠣꠁꠘ ꠀꠞ ꠊꠥꠠ-ꠍꠅꠀꠞ ꠅꠇꠟ ꠖꠦꠈꠟꠣꠝ, ꠁ ꠍꠅꠀꠞꠞꠦ ꠖꠦꠈꠔꠦ ꠅꠟꠣ ꠟꠣꠉꠟ, ꠄꠞꠣꠞ ꠛꠥꠇꠥꠞ ꠃꠙꠞꠞ ꠚꠃꠎꠤ ꠟꠦꠛꠣꠍ ꠀꠉꠥꠘꠤꠞ ꠟꠣꠈꠣꠘ ꠟꠣꠟ, ꠀꠇꠣꠡꠞ ꠟꠣꠈꠣꠘ ꠟꠤꠟ ꠀꠞ ꠉꠘ꠆ꠖꠇꠞ ꠟꠣꠈꠣꠘ ꠅꠟꠖꠤꠀ। ꠊꠥꠠꠣꠁꠘ꠆ꠔꠞ ꠇꠟ꠆ꠟꠣ ꠀꠍꠤꠟ ꠡꠤꠋꠢꠞ ꠇꠟ꠆ꠟꠣꠞ ꠟꠣꠈꠣꠘ, ꠁꠔꠣꠞ ꠝꠥꠈꠅ ꠕꠣꠇꠤ ꠀꠉꠥꠁꠘ, ꠗꠥꠝꠣ ꠀꠞ ꠉꠘ꠆ꠖꠇ ꠛꠣꠞ ꠅꠞ।
REV 9:18 ꠄꠞꠣꠞ ꠝꠥꠈꠞ ꠅꠃ ꠀꠉꠥꠁꠘ, ꠗꠥꠝꠣ ꠀꠞ ꠉꠘ꠆ꠖꠇꠞ ꠉꠎꠛꠖꠤ ꠔꠤꠘ ꠛꠣꠐꠞ ꠄꠇ ꠛꠣꠐ ꠝꠣꠘꠥꠡ ꠝꠣꠞꠣ ꠅꠁꠟ।
REV 9:19 ꠁ ꠊꠥꠠꠣꠁꠘ꠆ꠔꠞ ꠟꠦꠁꠘ꠆ꠎ ꠀꠞ ꠝꠥꠈꠞ ꠝꠣꠎꠦꠃ ꠀꠍꠤꠟ ꠔꠣꠞꠣꠞ ꠛꠟ, ꠁ ꠟꠦꠁꠘ꠆ꠎ ꠀꠍꠤꠟ ꠖꠥ-ꠝꠥꠈꠤ ꠢꠣꠚꠞ ꠟꠣꠈꠣꠘ। ꠅꠃ ꠟꠦꠁꠘ꠆ꠎꠖꠤ ꠔꠣꠞꠣ ꠝꠣꠘꠡꠞ ꠈꠦꠔꠤ ꠇꠞꠦ।
REV 9:20 ꠅꠁꠟꠦ ꠅꠃ ꠉꠎꠛꠞ ꠛꠣꠖꠦꠅ ꠎꠦꠔꠣ ꠝꠣꠘꠥꠡ ꠎꠤꠔꠣ ꠞꠁꠟꠣ, ꠔꠣꠞꠣ ꠘꠤꠎꠞ ꠀꠔꠞ ꠛꠣꠘꠣꠁꠟ ꠝꠥꠞ꠆ꠔꠤꠙꠥꠎꠣ ꠕꠣꠇꠤ ꠔꠃꠛꠣ ꠇꠞꠟ ꠘꠣ। ꠔꠣꠞꠣ ꠘꠣꠘꠣꠘ ꠘꠝꠥꠘꠣꠞ ꠜꠥꠔꠞ ꠙꠥꠎꠣ, ꠀꠞ ꠎꠦꠔꠣꠄ ꠖꠦꠈꠂꠘ ꠘꠣ, ꠢꠥꠘꠂꠘ ꠘꠣ ꠛꠣ ꠀꠐꠣ-ꠌꠟꠣ ꠇꠞꠔꠣ ꠙꠣꠞꠂꠘ ꠘꠣ ꠅꠔꠣ ꠝꠥꠞ꠆ꠔꠤꠞ ꠙꠥꠎꠣ ꠇꠞꠣꠔ ꠞꠁꠟꠣ। ꠡꠥꠘꠣ, ꠞꠥꠙꠣ, ꠙꠤꠔꠟ, ꠙꠣꠔ꠆ꠔꠞ ꠀꠞ ꠟꠣꠇꠠꠤꠖꠤ ꠛꠣꠘꠣꠁꠟ ꠝꠥꠞ꠆ꠔꠤꠙꠥꠎꠣꠔ ꠞꠁꠟꠣ।
REV 9:21 ꠄꠞꠟꠉꠦ ꠈꠥꠘ-ꠈꠣꠞꠣꠙꠤ, ꠎꠣꠖꠥ-ꠐꠥꠘꠣ, ꠎꠤꠘꠣ ꠀꠞ ꠌꠥꠞꠤ ꠕꠣꠇꠤꠅ ꠔꠃꠛꠣ ꠇꠞꠟ ꠘꠣ।
REV 10:1 ꠛꠣꠖꠦ ꠀꠝꠤ ꠖꠦꠈꠟꠣꠝ, ꠛꠦꠢꠦꠡ꠆ꠔ ꠕꠣꠇꠤ ꠈꠥꠛ ꠡꠇ꠆ꠔꠤꠀꠟꠣ ꠀꠞꠇ ꠎꠘ ꠚꠤꠞꠤꠡ꠆ꠔꠣ ꠟꠣꠝꠤꠀ ꠀꠁꠞꠣ। ꠝꠦꠊꠞ ꠌꠣꠇꠣ ꠀꠍꠤꠟ ꠔꠣꠘ ꠟꠦꠛꠣꠍ, ꠔꠣꠘ ꠝꠥꠈ ꠡꠥꠞꠥꠎꠞ ꠟꠣꠈꠣꠘ ꠌꠇꠌꠇꠣ, ꠔꠣꠘ ꠙꠣꠅ ꠀꠍꠤꠟ ꠀꠉꠥꠘꠤꠞ ꠈꠥꠐꠤꠞ ꠟꠣꠈꠣꠘ। ꠔꠣꠘ ꠝꠣꠕꠣꠞ ꠃꠙꠞꠦ ꠀꠍꠤꠟ ꠞꠋꠗꠦꠘꠥ।
REV 10:2 ꠔꠣꠘ ꠀꠔꠅ ꠢꠥꠞꠥ-ꠝꠥꠞꠥ ꠄꠇꠈꠣꠘ ꠇꠤꠔꠣꠛ ꠈꠥꠟꠣ ꠀꠍꠤꠟ। ꠔꠣꠘ ꠒꠣꠁꠘꠞ ꠙꠣꠅ ꠖꠞꠤꠀꠔ ꠀꠞ ꠛꠣꠃꠅꠞ ꠙꠣꠅ ꠎꠝꠤꠘꠞ ꠃꠙꠞꠦ ꠕꠁꠀ,
REV 10:3 ꠡꠤꠋꠢꠞ ꠟꠣꠈꠣꠘ ꠈꠥꠛ ꠎꠥꠞꠦ ꠉꠞ꠆ꠎꠤꠀ ꠃꠑꠤꠟꠣ। ꠅꠃ ꠉꠞ꠆ꠎꠘꠞ ꠟꠉꠦ ꠟꠉꠦꠃ ꠑꠣꠐꠣ ꠙꠠꠣꠞ ꠝꠔ ꠡꠣꠔꠐꠣ ꠀꠅꠀꠎ ꠅꠁꠟ।
REV 10:4 ꠅꠃ ꠡꠣꠔꠅ ꠀꠅꠀꠎ ꠢꠥꠘꠤꠀ ꠀꠝꠤ ꠟꠦꠈꠣꠔ ꠟꠣꠉꠟꠣꠝ; ꠄꠞꠝꠣꠎꠦ ꠛꠦꠢꠦꠡ꠆ꠔ ꠕꠣꠇꠤ ꠅꠃ ꠡꠛ꠆ꠖ ꠀꠁꠟ, “ꠢꠥꠘꠅ, ꠅꠃ ꠡꠣꠔꠅ ꠑꠣꠐꠣꠞꠤ ꠀꠅꠀꠎꠦ ꠎꠦꠔꠣ ꠇꠁꠍꠂꠘ, ꠁꠔꠣ ꠛꠣꠔꠥꠘꠤ ꠞꠣꠈꠅ, ꠟꠦꠈꠤꠅ ꠘꠣ।”
REV 10:5 ꠛꠣꠖꠦ ꠢꠃ ꠚꠤꠞꠤꠡ꠆ꠔꠣ, ꠎꠦꠘꠞꠦ ꠀꠝꠤ ꠖꠞꠤꠀ ꠀꠞ ꠎꠝꠤꠘꠞ ꠃꠙꠞꠦ ꠃꠛꠣꠔ ꠖꠦꠈꠍꠟꠣꠝ, ꠔꠣꠁꠘ ꠛꠦꠢꠦꠡ꠆ꠔꠞ ꠛꠣꠄ ꠘꠤꠎꠞ ꠒꠣꠁꠘ ꠀꠔ ꠔꠥꠟꠟꠣ।
REV 10:6 ꠔꠥꠟꠤꠀ ꠎꠦꠁꠘ ꠢꠞ-ꠢꠣꠝꠦꠡꠣ ꠌꠤꠞꠇꠣꠟ ꠎꠤꠘ꠆ꠖꠣ ꠀꠍꠂꠘ, ꠎꠦꠁꠘ ꠀꠍꠝꠣꠘ, ꠎꠝꠤꠘ, ꠖꠞꠤꠀ ꠀꠞ ꠁꠔꠣꠞ ꠝꠣꠎꠞ ꠢꠇ꠆ꠇꠟꠔꠣ ꠙꠄꠖꠣ ꠇꠞꠍꠂꠘ, ꠔꠣꠘ ꠘꠣꠝꠦ ꠇꠍꠝ ꠈꠣꠁꠀ ꠇꠁꠟꠣ, “ꠀꠞ ꠔ ꠖꠦꠞꠤ ꠅꠁꠔ ꠘꠣꠄ।
REV 10:7 ꠅꠁꠟꠦ ꠡꠣꠔ ꠘꠝ꠆ꠛꠞ ꠚꠤꠞꠤꠡ꠆ꠔꠣꠄ ꠡꠤꠋꠉꠣ ꠚꠥꠇꠤꠛꠣꠞ ꠖꠤꠘ ꠀꠟ꠆ꠟꠣꠞ ꠛꠣꠔꠥꠘꠤ ꠟꠤꠟꠣ-ꠈꠦꠟꠣ ꠙꠥꠞꠣ ꠅꠁꠛ। ꠀꠟ꠆ꠟꠣꠄ ꠔꠣꠘ ꠘꠤꠎꠞ ꠉꠥꠟꠣꠝ, ꠘꠛꠤ ꠅꠇꠟꠞ ꠉꠦꠍꠦ ꠎꠦꠟꠣ ꠛꠣꠔꠣꠁꠍꠟꠣ, ꠅꠃꠟꠣꠃ ꠚꠟꠤꠛ।”
REV 10:8 ꠛꠦꠢꠦꠡ꠆ꠔ ꠕꠣꠇꠤ ꠀꠉꠦ ꠎꠦ ꠡꠛ꠆ꠖ ꠢꠥꠘꠍꠤꠟꠣꠝ, ꠄꠁꠘ ꠢꠤꠞꠛꠣꠞ ꠀꠝꠣꠞꠦ ꠇꠁꠟꠣ, “ꠢꠥꠘꠅ, ꠖꠞꠤꠀ ꠀꠞ ꠎꠝꠤꠘꠞ ꠃꠙꠞꠦ ꠎꠦ ꠚꠤꠞꠤꠡ꠆ꠔꠣ ꠃꠛꠣꠔ ꠀꠍꠂꠘ, ꠔꠣꠘ ꠉꠦꠍꠦ ꠎꠣꠅ, ꠉꠤꠀ ꠔꠣꠘ ꠀꠔ ꠕꠣꠇꠤ ꠈꠥꠟꠣ ꠇꠤꠔꠣꠛꠈꠣꠘ ꠘꠦꠅ।”
REV 10:9 ꠔꠦꠃ ꠀꠝꠤ ꠄꠘ ꠉꠦꠍꠦ ꠉꠤꠀ ꠇꠁꠟꠣꠝ, ꠅꠃ ꠢꠥꠞꠥ-ꠝꠥꠞꠥ ꠇꠤꠔꠣꠛꠈꠣꠘ ꠀꠝꠣꠞ ꠀꠔꠅ ꠖꠦꠅꠀꠞ ꠟꠣꠉꠤ। ꠔꠣꠁꠘ ꠇꠁꠟꠣ, “ꠀꠁꠌ꠆ꠍꠣ ꠘꠦꠅꠉꠤ, ꠘꠤꠀ ꠈꠣꠁꠟꠣꠅ। ꠁꠈꠣꠘꠦ ꠔꠥꠝꠣꠞ ꠙꠦꠐꠞꠦ ꠔꠤꠔ꠆ꠔꠣ ꠇꠞꠤꠟꠤꠛ, ꠅꠁꠟꠦ ꠔꠥꠝꠣꠞ ꠝꠥꠈꠅ ꠝꠃ ꠟꠣꠈꠣꠘ ꠝꠤꠑꠣ ꠟꠣꠉꠛ।”
REV 10:10 ꠅꠃ ꠀꠝꠤ ꠢꠤ ꠚꠤꠞꠤꠡ꠆ꠔꠣꠞ ꠀꠔꠞ ꠢꠥꠞꠥ-ꠝꠥꠞꠥ ꠇꠤꠔꠣꠛꠈꠣꠘ ꠘꠤꠀ ꠈꠣꠁꠟꠤꠟꠣꠝ। ꠈꠣꠁꠔꠦ ꠡꠝꠄ ꠢꠣꠍꠣꠃ ꠀꠝꠣꠞ ꠝꠥꠈꠅ ꠝꠃ ꠟꠣꠈꠣꠘ ꠝꠤꠑꠣ ꠟꠣꠉꠟ, ꠀꠞ ꠉꠤꠟꠤꠀ ꠢꠣꠞꠟꠦ ꠀꠡ꠆ꠔꠣ ꠙꠦꠐ ꠔꠤꠔ꠆ꠔꠣ ꠅꠁꠉꠦꠟ।
REV 10:11 ꠛꠣꠖꠦ ꠀꠝꠣꠞꠦ ꠇꠅꠀ ꠅꠁꠟ, “ꠔꠥꠝꠤ ꠛꠃꠔ ꠖꠦꠡ, ꠛꠃꠔ ꠎꠣꠔꠤ, ꠘꠣꠘꠣꠘ ꠛꠥꠟꠤꠄ ꠝꠣꠔꠞꠣ ꠝꠣꠘꠥꠡ, ꠀꠞ ꠛꠣꠖꠡꠣꠞ ꠛꠦꠙꠣꠞꠦ ꠢꠤꠞꠛꠣꠞ ꠅꠢꠤ ꠎꠣꠘꠣꠁꠔꠦ ꠅꠁꠛ।”
REV 11:1 ꠛꠣꠖꠦ ꠝꠣꠙꠤꠛꠣꠞ ꠟꠣꠉꠤ ꠟꠣꠑꠤꠞ ꠟꠣꠈꠣꠘ ꠄꠇꠐꠣ ꠘꠟ ꠀꠝꠣꠞ ꠀꠔꠅ ꠖꠦꠅꠀ ꠅꠁꠟ, ꠀꠞ ꠄꠇꠎꠘꠦ ꠇꠁꠟꠣ, “ꠢꠥꠘꠅ, ꠙꠛꠤꠔ꠆ꠞ ꠛꠣꠄꠔꠥꠟ-ꠝꠥꠇꠣꠖ꠆ꠖꠍ ꠇꠣꠛꠣ ꠡꠞꠤꠚ ꠀꠞ ꠇꠥꠞꠛꠣꠘꠤ ꠈꠣꠘꠣꠞꠦ ꠝꠣꠙꠅ। ꠝꠣꠙꠤꠀ ꠢꠘꠅ ꠎꠦꠞꠣ ꠄꠛꠣꠖꠔ ꠇꠞꠦ ꠔꠣꠞꠣꠞ ꠙꠞꠤꠝꠣꠘ ꠉꠘꠅ।
REV 11:2 ꠅꠁꠟꠦ ꠅꠃ ꠇꠣꠛꠣ ꠊꠞꠞ ꠃꠑꠣꠘꠞꠦ ꠝꠣꠙꠤꠅ ꠘꠣ, ꠁꠈꠣꠘ ꠛꠣꠖ ꠖꠦꠅ, ꠁꠈꠣꠘ ꠔ ꠛꠤꠗꠞ꠆ꠝꠤ ꠅꠇꠟꠞꠦ ꠖꠦꠅꠀ ꠅꠁꠍꠦ। ꠔꠣꠞꠣ ꠛꠦꠀꠟ꠆ꠟꠤꠡ ꠝꠣꠡ ꠗꠞꠤ ꠁ ꠙꠛꠤꠔ꠆ꠞ ꠎꠣꠉꠣꠈꠣꠘꠞꠦ ꠙꠣꠅꠖꠤ ꠇꠌꠟꠣꠁꠛ।
REV 11:3 ꠀꠞ ꠀꠝꠤ ꠀꠝꠣꠞ ꠖꠥꠁꠎꠘ ꠡꠣꠇ꠆ꠇꠤꠞꠦ ꠅꠟꠣ ꠈꠦꠝꠔꠣ ꠖꠤꠝꠥ, ꠁ ꠈꠦꠝꠔꠣ ꠙꠣꠁꠀ ꠄꠞꠣ ꠇꠣꠔꠞ ꠅꠁꠀ ꠍꠟꠣꠞ ꠌꠐ ꠚꠤꠘ꠆ꠖꠤꠀ, ꠄꠇ ꠀꠎꠣꠞ ꠖꠥꠁ-ꠡ ꠡꠣꠁꠐ ꠖꠤꠘ ꠘꠛꠤꠞ ꠟꠣꠈꠣꠘ ꠅꠢꠤ ꠛꠣꠔꠣꠁꠛꠣ।”
REV 11:4 ꠄꠞꠣ ꠅꠁꠟꠣ ꠢꠃ ꠎꠄꠔꠥꠘ ꠉꠣꠍ ꠎꠥꠠꠣ, ꠀꠞ ꠢꠃ ꠌꠦꠞꠣꠉꠖꠣꠘꠤ ꠎꠥꠠꠣ, ꠔꠣꠞꠣ ꠔ ꠖꠤꠘ-ꠖꠥꠘꠤꠀꠞ ꠝꠣꠟꠤꠇꠞ ꠍꠣꠝꠘꠦ ꠃꠛꠣꠔ ꠀꠍꠂꠘ।
REV 11:5 ꠇꠦꠃ ꠔꠣꠞꠣꠞ ꠈꠦꠔꠤ ꠇꠞꠔꠦ ꠌꠣꠁꠟꠦ, ꠔꠣꠞꠣꠞ ꠝꠥꠈ ꠕꠣꠇꠤ ꠀꠉꠥꠁꠘ ꠛꠣꠞ ꠅꠁꠀ ꠢꠤ ꠖꠥꠡꠝꠘ ꠅꠇꠟꠞꠦ ꠎꠣꠟꠣꠁꠟꠤꠛ। ꠎꠦꠇꠥꠘꠥ ꠎꠘꠦ ꠔꠣꠞꠣꠞ ꠈꠦꠔꠤ ꠇꠞꠣꠔ ꠟꠣꠉꠟꠦ ꠅꠃ ꠖꠡꠣꠄ ꠝꠃꠔ ꠅꠁꠛ।
REV 11:6 ꠄꠞꠣ ꠎꠔꠖꠤꠘ ꠘꠛꠤ ꠢꠣꠟꠔꠦ ꠅꠢꠤ ꠛꠣꠔꠣꠁꠛꠣ, ꠅꠔ ꠖꠤꠘ ꠎꠣꠔꠦ ꠇꠥꠘꠥ ꠝꠦꠊ ꠘꠣ ꠅꠄ ꠄꠞꠟꠣꠉꠤ ꠀꠍꠝꠣꠘꠞ ꠖꠥꠀꠞ ꠛꠘ꠆ꠖ ꠇꠞꠤ ꠖꠤꠛꠣꠞ ꠈꠦꠝꠔꠣ ꠔꠣꠞꠣꠞ ꠀꠍꠦ। ꠙꠣꠘꠤꠞꠦ ꠟꠃ ꠛꠣꠘꠣꠘꠤ, ꠀꠞ ꠎꠔꠛꠣꠞ ꠈꠥꠡꠤ ꠅꠔꠛꠣꠞ ꠎꠦꠇꠥꠘꠥ ꠉꠎꠛ ꠓꠣꠟꠤꠀ ꠎꠉꠔꠞ ꠈꠦꠔꠤ ꠇꠞꠣꠞ ꠈꠦꠝꠔꠣꠅ ꠔꠣꠞꠣꠞ ꠀꠍꠦ।
REV 11:7 ꠔꠣꠞꠣꠞ ꠎꠛꠣꠘꠛꠘ꠆ꠖꠤ ꠖꠦꠅꠀ ꠡꠦꠡ ꠅꠁꠉꠦꠟꠦ ꠢꠣꠛꠤꠀ ꠖꠥꠎꠈ ꠕꠣꠇꠤ ꠢꠃ ꠎꠣꠘꠥꠀꠞ ꠃꠑꠤꠀ ꠀꠁꠀ ꠔꠣꠞꠣꠞ ꠟꠉꠦ ꠟꠣꠠꠣꠁ ꠇꠞꠤꠀ, ꠔꠣꠞꠣꠞꠦ ꠀꠞꠣꠁꠀ ꠈꠥꠘ ꠇꠞꠛ।
REV 11:8 ꠀꠞ ꠔꠣꠞꠣꠞ ꠟꠣꠡ ꠢꠃ ꠝꠢꠣꠘ ꠐꠣꠃꠘꠞ ꠞꠣꠡ꠆ꠔꠣꠞ ꠝꠣꠎꠦ ꠙꠠꠤ ꠞꠁꠛ, ꠎꠦ ꠐꠣꠃꠘꠅ ꠔꠣꠞꠣꠞ ꠝꠣꠟꠤꠇꠞꠦ ꠍꠟꠤꠛꠞ ꠃꠙꠞꠦ ꠟꠐꠇꠣꠁꠀ ꠈꠥꠘ ꠇꠞꠣ ꠅꠁꠍꠤꠟ। ꠁ ꠐꠣꠃꠘꠞ ꠘꠣꠝ ꠑꠤꠇ ꠍꠣꠖꠥꠝ ꠛꠣ ꠝꠤꠡꠞ ꠘꠣ ꠅꠁꠟꠦꠅ ꠄꠇꠁ ꠟꠣꠈꠣꠘꠃ ꠈꠣꠞꠣꠙ।
REV 11:9 ꠢꠃ ꠡꠝꠄ ꠢꠇꠟ ꠖꠦꠡ, ꠈꠣꠘ꠆ꠖꠣꠘ, ꠢꠇꠟ ꠎꠣꠔꠞ ꠛꠥꠟꠤꠄ ꠝꠣꠔꠞꠣ ꠝꠣꠘꠡꠦ ꠀꠞ ꠢꠇꠟ ꠎꠣꠔꠤꠞ ꠝꠣꠘꠡꠦ ꠡꠣꠠꠦ ꠔꠤꠘ ꠖꠤꠘ ꠗꠞꠤ ꠅꠃ ꠟꠣꠡꠉꠥꠁꠘ ꠖꠦꠈꠛꠣ। ꠀꠞ ꠄꠞꠣ ꠝꠣꠞꠣ ꠉꠦꠍꠂꠘ ꠇꠞꠤ ꠎꠉꠔꠞ ꠖꠥꠘꠤꠀꠛꠤ ꠝꠣꠘꠡꠦ ꠈꠥꠡꠤꠄ ꠚꠥꠞ꠆ꠔꠤ-ꠀꠝꠥꠖ ꠇꠞꠛꠣ, ꠄꠇꠦ-ꠅꠁꠘ꠆ꠘꠞꠦ ꠃꠙꠢꠣꠞ ꠖꠤꠛꠣ। ꠀꠞ ꠁ ꠟꠣꠡ ꠖꠣꠚꠘ ꠇꠞꠣꠞ ꠙꠣꠞꠝꠤꠡꠘ ꠖꠤꠔꠣ ꠘꠣꠄ, ꠇꠣꠞꠘ ꠅꠃ ꠖꠥꠁꠅ ꠘꠛꠤꠞ ꠟꠣꠉꠤ ꠖꠥꠘꠤꠀꠖꠣꠞꠤ ꠝꠣꠘꠡꠞ ꠇꠡ꠆ꠐ ꠅꠁꠍꠤꠟ।
REV 11:11 ꠛꠣꠖꠦ ꠢꠃ ꠡꠣꠠꠦ ꠔꠤꠘ ꠖꠤꠘ ꠙꠣꠞ ꠅꠁꠀ ꠢꠣꠞꠟꠦ ꠀꠟ꠆ꠟꠣꠞ ꠖꠦꠅꠀ ꠎꠣꠘ ꠄꠞꠣꠞ ꠜꠤꠔꠞꠦ ꠢꠣꠝꠣꠁꠟ, ꠔꠦꠃ ꠄꠞꠣ ꠙꠣꠅ-ꠅ ꠜꠞꠖꠤ ꠃꠛꠣꠁꠟꠣ। ꠀꠞ ꠎꠔ ꠎꠘꠦ ꠄꠞꠣꠞꠦ ꠖꠦꠈꠟꠣ, ꠢꠇꠟꠦꠃ ꠒꠞꠣꠁꠀ ꠇꠣꠙꠤꠟꠣ।
REV 11:12 ꠛꠣꠖꠦ ꠄꠞꠣ ꠢꠥꠘꠟꠣ, ꠛꠦꠢꠦꠡ꠆ꠔ ꠕꠣꠇꠤ ꠒꠣꠇꠤꠀ ꠎꠥꠞꠦ ꠎꠥꠞꠦ ꠇꠅꠀ ꠅꠞ, “ꠔꠥꠝꠞꠣ ꠅꠘꠅ ꠃꠑꠤꠀ ꠀꠁꠅ।” ꠔꠦꠃ ꠄꠞꠣ ꠘꠤꠎꠞ ꠖꠥꠡꠝꠘꠞ ꠍꠣꠝꠘꠦ ꠄꠇ ꠝꠦꠊꠞ ꠌꠣꠇꠣꠔ ꠅꠁꠀ ꠛꠦꠢꠦꠡ꠆ꠔꠅ ꠉꠦꠟꠣꠉꠤ।
REV 11:13 ꠅꠃ ꠡꠝꠄ ꠈꠥꠛ ꠛꠠ ꠜꠂꠍꠣꠟ ꠅꠁꠟ, ꠀꠞ ꠢꠤ ꠐꠣꠃꠘꠞ ꠖꠡ ꠛꠣꠐꠞ ꠄꠇ ꠛꠣꠐ ꠜꠣꠋꠉꠤ ꠉꠦꠟ। ꠜꠂꠍꠣꠟꠦ ꠡꠣꠔ ꠀꠎꠣꠞ ꠝꠣꠘꠥꠡ ꠝꠞꠟꠣ। ꠁꠔꠣ ꠖꠦꠈꠤꠀ ꠛꠣꠖ-ꠛꠣꠇꠤ ꠢꠇꠟꠦ ꠒꠞꠣꠁꠀ ꠛꠦꠢꠦꠡ꠆ꠔꠞ ꠀꠟ꠆ꠟꠣꠞ ꠔꠣꠞꠤꠚ ꠇꠞꠣꠔ ꠟꠣꠉꠟꠣ।
REV 11:14 ꠅꠃ ꠘꠝꠥꠘꠣꠄ ꠖꠥꠍꠞꠣ ꠉꠎꠛ ꠙꠣꠞ ꠅꠁꠟ, ꠅꠁꠟꠦ ꠢꠥꠘꠅ, ꠔꠤꠘ ꠘꠝ꠆ꠛꠞ ꠉꠎꠛ ꠈꠥꠛ ꠎꠟꠖꠤ ꠀꠁꠀ ꠀꠎꠤꠛ।
REV 11:15 ꠛꠣꠖꠦ ꠡꠣꠔ ꠘꠝ꠆ꠛꠞ ꠚꠤꠞꠤꠡ꠆ꠔꠣꠄ ꠔꠣꠘ ꠡꠤꠋꠉꠣ ꠚꠥꠇꠤꠟꠣ। ꠔꠦꠃ ꠛꠦꠢꠦꠡ꠆ꠔꠞ ꠝꠣꠎꠦ ꠎꠥꠞꠦ ꠎꠥꠞꠦ ꠄꠟꠣꠘ ꠇꠞꠣ ꠅꠁꠟ, “ꠅꠈꠘ ꠔ ꠖꠥꠘꠤꠀꠞ ꠛꠣꠖꠡꠣꠁ ꠀꠝꠞꠣꠞ ꠝꠣꠛꠥꠖ ꠀꠞ ꠔꠣꠘ ꠝꠍꠤꠞ ꠢꠥꠇꠥꠝꠅ ꠀꠁꠍꠦ। ꠔꠣꠁꠘ ꠎꠥꠉ ꠎꠥꠉ ꠗꠞꠤ ꠌꠤꠞꠇꠣꠟ ꠛꠣꠖꠡꠣꠁ ꠇꠞꠛꠣ।”
REV 11:16 ꠛꠣꠖꠦ ꠢꠃ ꠌꠛ꠆ꠛꠤꠡꠎꠘ ꠝꠥꠞꠛ꠆ꠛꠤ ꠘꠦꠔꠣ, ꠎꠦꠞꠣ ꠀꠟ꠆ꠟꠣꠞ ꠍꠣꠝꠘꠦ ꠎꠣꠞꠎꠤꠞ ꠔꠈ꠆ꠔꠅ ꠛꠅꠀꠔ ꠀꠍꠟꠣ, ꠄꠞꠣ ꠀꠟ꠆ꠟꠣꠞꠦ ꠍꠁꠎꠖꠣ ꠇꠞꠤꠀ ꠇꠁꠟꠣ,
REV 11:17 “ꠅ ꠡꠞ꠆ꠛ-ꠡꠇ꠆ꠔꠤꠝꠣꠘ ꠝꠣꠛꠥꠖ ꠀꠟ꠆ꠟꠣ, ꠔꠥꠝꠤ ꠀꠉꠦꠅ ꠀꠍꠟꠣꠄ ꠀꠞ ꠅꠈꠘꠅ ꠀꠍ। ꠀꠝꠞꠣ ꠔꠥꠝꠣꠞ ꠡꠥꠇꠥꠞ-ꠉꠥꠎꠣꠞ ꠇꠞꠞꠣꠝ, ꠔꠥꠝꠤ ꠔ ꠔꠥꠝꠣꠞ ꠝꠢꠣ ꠈꠦꠝꠔꠣ ꠀꠔꠅ ꠟꠁꠀ ꠅꠈꠘ ꠛꠣꠖꠡꠣꠁ ꠇꠞꠞꠣꠄ।
REV 11:18 ꠢꠇ꠆ꠇꠟ ꠎꠣꠔꠤꠄ ꠉꠥꠍꠣ ꠇꠞꠤꠀ ꠌꠤꠟ꠆ꠟꠣꠁꠍꠦ, ꠔꠦ ꠅꠈꠘ ꠔꠥꠝꠣꠞ ꠉꠎꠛ ꠓꠣꠟꠤꠛꠣꠞ ꠡꠝꠄ ꠅꠁꠉꠦꠍꠦ। ꠝꠥꠞ꠆ꠖꠣ ꠅꠇꠟꠞ ꠛꠤꠌꠣꠞꠞ ꠡꠝꠄ ꠀꠁꠍꠦ, ꠀꠞ ꠔꠥꠝꠣꠞ ꠀꠙꠘ ꠉꠥꠟꠣꠝ ꠘꠛꠤ ꠅꠇꠟꠞ, ꠔꠥꠝꠣꠞ ꠙꠣꠇ ꠛꠘ꠆ꠖꠣ ꠅꠇꠟꠞ, ꠢꠥꠞꠥ-ꠛꠠ ꠎꠔꠎꠘꠦ ꠔꠥꠝꠣꠞꠦ ꠒꠞꠣꠁꠘ, ꠔꠣꠞꠣꠞꠦ ꠙꠥꠞꠥꠡ꠆ꠇꠣꠞ ꠖꠤꠛꠣꠞ ꠡꠝꠄ ꠀꠁꠍꠦ। ꠀꠞ ꠎꠦꠞꠣ ꠖꠥꠘꠤꠀꠞ ꠈꠦꠔꠤ ꠇꠞꠍꠦ, ꠔꠣꠞꠣꠞꠦ ꠛꠤꠘꠣꠡ ꠇꠞꠣꠞ ꠡꠝꠄꠅ ꠀꠁꠍꠦ।”
REV 11:19 ꠛꠣꠖꠦ ꠀꠟ꠆ꠟꠣꠞ ꠛꠦꠢꠦꠡ꠆ꠔꠞ ꠄꠛꠣꠖꠔ ꠈꠣꠘꠣꠞ ꠖꠥꠀꠞ ꠈꠥꠟꠣ ꠅꠁꠟ, ꠀꠞ ꠄꠞ ꠜꠤꠔꠞꠦ ꠀꠟ꠆ꠟꠣꠁ ꠡꠣꠢꠣꠖꠔ ꠡꠘ꠆ꠖꠥꠇ ꠖꠦꠈꠣ ꠉꠦꠟ। ꠅꠃ ꠡꠝꠄ ꠝꠦꠊꠞ ꠎꠤꠟꠇꠣꠘꠤ, ꠉꠥꠠ-ꠉꠥꠠꠤ ꠒꠣꠇ, ꠑꠣꠐꠣ ꠙꠠꠣ, ꠜꠂꠍꠣꠟ ꠀꠞ ꠈꠥꠛ ꠛꠦꠡꠤ ꠢꠤꠟ-ꠝꠦꠊ ꠅꠁꠟ।
REV 12:1 ꠛꠣꠖꠦ ꠀꠍꠝꠣꠘꠞ ꠝꠣꠎꠦ ꠄꠇ ꠇꠥꠖꠞꠔꠤ ꠇꠣꠞꠛꠣꠞ ꠖꠦꠈꠣ ꠉꠦꠟ, ꠄꠇꠎꠘ ꠛꠦꠐꠤ ꠝꠣꠘꠥꠡ ꠀꠍꠂꠘ, ꠔꠣꠘ ꠚꠤꠘ꠆ꠘ ꠀꠍꠤꠟ ꠡꠥꠞꠥꠎ ꠀꠞ ꠙꠣꠅꠞ ꠔꠟꠦ ꠌꠣꠘ꠆ꠖ, ꠄꠘ ꠝꠣꠕꠣꠔ ꠀꠍꠦ ꠛꠣꠞꠅꠐꠣ ꠔꠦꠞꠣ ꠖꠤꠀ ꠉꠣꠕꠣ ꠄꠇꠐꠣ ꠔꠣꠎ।
REV 12:2 ꠛꠦꠐꠤꠞ ꠊꠞꠅ ꠢꠥꠞꠥꠔ꠆ꠔꠣ ꠅꠁꠔꠣ, ꠄꠞꠟꠣꠉꠤ ꠢꠥꠞꠥꠔ꠆ꠔꠣ ꠅꠀꠞ ꠛꠦꠖꠘꠣꠄ ꠛꠦꠐꠤꠄ ꠈꠣꠟꠤ ꠌꠤꠟ꠆ꠟꠣꠁꠞꠣ।
REV 12:3 ꠄꠞꠛꠣꠖꠦ ꠀꠍꠝꠣꠘꠅ ꠀꠞꠇ ꠇꠣꠞꠛꠣꠞ ꠖꠦꠈꠣ ꠉꠦꠟ, ꠀꠉꠥꠘꠤꠞ ꠟꠣꠈꠣꠘ ꠟꠣꠟ ꠄꠇ ꠛꠤꠞꠣꠐ ꠖꠣꠘꠛ। ꠔꠣꠞ ꠡꠣꠔꠐꠣ ꠝꠣꠕꠣ ꠀꠞ ꠖꠡꠐꠣ ꠢꠤꠋ, ꠡꠣꠔꠅ ꠝꠣꠕꠣꠔ ꠡꠣꠔꠐꠣ ꠔꠣꠎ ꠟꠣꠉꠣꠁꠟ।
REV 12:4 ꠔꠣꠞ ꠟꠦꠁꠘ꠆ꠎꠥꠠꠖꠤ ꠛꠣꠠꠤꠀꠁꠀ ꠀꠍꠝꠣꠘꠞ ꠔꠤꠘ ꠛꠣꠐꠞ ꠄꠇ ꠛꠣꠐ ꠔꠦꠞꠣꠞꠦ ꠖꠥꠘꠤꠀꠔ ꠚꠣꠟꠣꠁ ꠖꠤꠟ। ꠀꠞ ꠎꠦ ꠛꠦꠐꠤꠞ ꠊꠞꠅ ꠢꠥꠞꠥꠔ꠆ꠔꠣ ꠅꠁꠔꠣ, ꠅꠃ ꠖꠣꠘꠛ ꠀꠁꠀ ꠛꠦꠐꠤꠞ ꠍꠣꠝꠘꠦ ꠅꠃ ꠘꠝꠥꠘꠣꠄ ꠃꠛꠣꠔ ꠀꠍꠤꠟ ꠎꠦꠘ, ꠛꠦꠐꠤꠞ ꠊꠞꠅ ꠢꠥꠞꠥꠔ꠆ꠔꠣ ꠅꠁꠔꠦꠃ ꠢꠦ ꠈꠣꠁꠟꠤꠔ।
REV 12:5 ꠛꠦꠐꠤꠞ ꠊꠞꠅ ꠄꠇ ꠙꠥꠀ ꠙꠄꠖꠣ ꠅꠁꠟ, ꠅꠃ ꠙꠥꠀꠄ ꠢꠇ꠆ꠇꠟ ꠎꠣꠔꠤꠞꠦ ꠟꠥꠀꠞ ꠟꠣꠑꠤ ꠖꠤꠀ ꠡꠣꠡꠘ ꠇꠞꠛꠣ। ꠅꠃ ꠢꠥꠞꠥꠔ꠆ꠔꠣꠞꠦ ꠀꠟ꠆ꠟꠣ ꠀꠞ ꠔꠣꠘ ꠔꠈ꠆ꠔꠞ ꠉꠦꠍꠦ ꠌꠥ ꠝꠣꠞꠤ ꠔꠥꠟꠤꠀ ꠘꠦꠅꠀ ꠅꠁꠟ।
REV 12:6 ꠀꠞ ꠅꠃ ꠛꠦꠐꠤ ꠝꠣꠘꠥꠡ ꠝꠞꠥꠜꠥꠝꠤꠞ ꠛꠣꠄ ꠜꠣꠉꠤꠀ ꠉꠦꠟꠣꠉꠤ। ꠀꠟ꠆ꠟꠣꠄ ꠢꠤ ꠝꠞꠥꠜꠥꠝꠤꠞ ꠝꠣꠎꠦ ꠛꠦꠐꠤꠞ ꠟꠣꠉꠤ ꠄꠇꠈꠣꠘ ꠎꠣꠉꠣ ꠎꠥꠁꠔ ꠇꠞꠍꠤꠟꠣ, ꠄꠁꠘ ꠢꠘꠅ ꠄꠇ ꠀꠎꠣꠞ ꠖꠥꠁ-ꠡ ꠡꠣꠁꠐ ꠖꠤꠘ ꠟꠣꠟꠘ-ꠙꠣꠟꠘ ꠙꠣꠁꠛꠣ।
REV 12:7 ꠛꠣꠖꠦ ꠛꠦꠢꠦꠡ꠆ꠔꠅ ꠎꠥꠖ꠆ꠖ ꠟꠣꠉꠤꠉꠦꠟ। ꠚꠤꠞꠤꠡ꠆ꠔꠣ ꠝꠤꠇꠣꠁꠟ ꠀꠞ ꠔꠣꠘ ꠅꠗꠤꠘꠞ ꠚꠤꠞꠤꠡ꠆ꠔꠣ ꠅꠇꠟꠦ ꠢꠃ ꠖꠣꠘꠛꠞ ꠟꠉꠦ ꠟꠣꠠꠣꠁ ꠇꠞꠟꠣ, ꠀꠞ ꠢꠃ ꠖꠣꠘꠛꠦꠅ ꠔꠣꠞ ꠌꠦꠟꠣ-ꠌꠣꠝꠌꠣꠞꠦ ꠟꠁꠀ ꠄꠞꠣꠞ ꠟꠉꠦ ꠟꠣꠠꠣꠁ ꠇꠞꠟ।
REV 12:8 ꠟꠣꠠꠣꠁꠔ ꠢꠤ ꠖꠣꠘꠛ ꠀꠞꠤꠉꠦꠟ, ꠀꠞ ꠔꠣꠞꠣꠞꠦ ꠛꠦꠢꠦꠡ꠆ꠔ ꠕꠣꠇꠤ ꠛꠣꠞ ꠇꠞꠤ ꠖꠦꠅꠀ ꠅꠁꠟ।
REV 12:9 ꠢꠃ ꠖꠣꠘꠛꠞꠦ ꠀꠞ ꠔꠣꠞ ꠌꠦꠟꠣ-ꠌꠣꠝꠌꠣ ꠅꠇꠟꠞꠦ ꠖꠥꠘꠤꠀꠔ ꠚꠣꠟꠣꠁ ꠖꠦꠅꠀ ꠅꠁꠟ। ꠅꠃ ꠖꠣꠘꠛ ꠅꠁꠟ ꠢꠃ ꠙꠥꠞꠣꠘꠣ ꠢꠣꠚ, ꠎꠦꠉꠥꠞ ꠘꠣꠝ ꠁꠛꠟꠤꠍ-ꠡꠄꠔꠣꠘ, ꠢꠦ ꠖꠥꠘꠤꠀꠞ ꠢꠇꠟ ꠝꠣꠘꠡꠞꠦ ꠛꠦ-ꠙꠕꠤ ꠛꠣꠘꠣꠄ।
REV 12:10 ꠛꠣꠖꠦ ꠀꠝꠤ ꠢꠥꠘꠟꠣꠝ, ꠛꠦꠢꠦꠡ꠆ꠔ ꠕꠣꠇꠤ ꠄꠇꠎꠘꠦ ꠎꠥꠞꠦ ꠎꠥꠞꠦ ꠇꠁꠞꠣ, “ꠅꠈꠘ ꠔ ꠀꠝꠞꠣꠞ ꠀꠟ꠆ꠟꠣꠞ ꠘꠣꠎꠣꠔ, ꠔꠣꠘ ꠛꠟ-ꠡꠇ꠆ꠔꠤ, ꠔꠣꠘ ꠛꠣꠖꠡꠣꠁ ꠀꠞ ꠔꠣꠘ ꠝꠍꠤꠞ ꠈꠦꠝꠔꠣ ꠀꠎꠤꠞ ꠅꠁꠉꠦꠍꠦ। ꠇꠣꠞꠘ ꠎꠦꠉꠤꠄ ꠀꠝꠞꠣꠞ ꠜꠣꠁꠀꠁꠘ꠆ꠔꠞꠦ ꠖꠥꠡꠤ ꠛꠣꠘꠣꠁꠔ, ꠔꠣꠞꠦ ꠔ ꠛꠦꠢꠦꠡ꠆ꠔ ꠕꠣꠇꠤ ꠚꠣꠟꠣꠁ ꠖꠦꠅꠀ ꠅꠁꠍꠦ। ꠢꠦ ꠖꠤꠘ-ꠞꠣꠁꠔ ꠢꠣꠝꠦꠡꠣ ꠀꠝꠞꠣꠞ ꠀꠟ꠆ꠟꠣꠞ ꠉꠦꠍꠦ ꠔꠣꠞꠣꠞ ꠘꠣꠝꠦ ꠘꠣꠟꠤꠡ ꠖꠤꠔ।
REV 12:11 ꠝꠦꠠꠣ-ꠛꠣꠁꠌ꠆ꠌꠣꠞ ꠟꠃ ꠀꠞ ꠎꠣꠞꠎꠤꠞ ꠔꠛꠟꠤꠉꠤ ꠎꠛꠣꠘꠛꠘ꠆ꠖꠤꠞ ꠛꠟꠦ ꠔꠣꠞꠣ ꠁꠛꠟꠤꠍꠞꠦ ꠀꠞꠣꠁꠍꠂꠘ। ꠔꠣꠞꠣ ꠘꠤꠎꠞ ꠇꠣꠄꠀꠞꠦ ꠛꠦꠡꠤ ꠝꠣꠄꠀ ꠘꠣ ꠇꠞꠤꠀ, ꠎꠣꠘ ꠖꠤꠔꠦꠅ ꠎꠥꠁꠔ ꠀꠍꠟꠣ।
REV 12:12 “ꠄꠞꠟꠣꠉꠤꠃ ꠅ ꠛꠦꠢꠦꠡ꠆ꠔ, ꠔꠥꠝꠤ ꠈꠥꠡꠤ ꠇꠞꠅ। ꠔꠥꠝꠞꠣ ꠎꠦꠞꠣ ꠛꠦꠢꠦꠡ꠆ꠔ ꠛꠣꠡꠤ, ꠔꠥꠝꠞꠣꠅ ꠚꠥꠞ꠆ꠔꠤ ꠇꠞꠅ। ꠅꠁꠟꠦ ꠀꠚꠍꠥꠍ ꠖꠥꠘꠤꠀ ꠀꠞ ꠖꠞꠤꠀꠞ ꠟꠣꠉꠤ, ꠁꠛꠟꠤꠍ ꠔ ꠔꠣꠞꠣꠞ ꠉꠦꠍꠦ ꠟꠣꠝꠤꠉꠦꠍꠦ। ꠢꠦ ꠉꠥꠍꠣꠄ ꠚꠥꠡ-ꠚꠣꠡ ꠇꠞꠦꠞ, ꠢꠦ ꠔ ꠎꠣꠘꠦꠃ, ꠔꠣꠞ ꠡꠝꠄ ꠀꠞ ꠛꠦꠡꠤ ꠘꠣꠁ।”
REV 12:13 ꠢꠃ ꠖꠣꠘꠛꠦ ꠎꠦꠛꠟꠣ ꠖꠦꠈꠟ ꠔꠣꠞꠦ ꠖꠥꠘꠤꠀꠔ ꠚꠣꠟꠣꠁ ꠖꠦꠅꠀ ꠅꠁꠍꠦ, ꠖꠦꠈꠤꠀ ꠢꠃ ꠎꠦ ꠛꠦꠐꠤꠞ ꠊꠞꠅ ꠙꠥꠀ ꠙꠄꠖꠣ ꠅꠁꠍꠤꠟ, ꠢꠦ ꠅꠃ ꠛꠦꠐꠤꠞ ꠈꠞꠦ ꠟꠣꠉꠟ।
REV 12:14 ꠄꠞꠟꠣꠉꠤ ꠅꠃ ꠛꠦꠐꠤꠞꠦ ꠈꠥꠛ ꠛꠠ ꠄꠇ ꠌꠤꠟ ꠙꠣꠈꠤꠞ ꠖꠥꠈꠣꠘ ꠒꠣꠈꠘꠣ ꠖꠦꠅꠀ ꠅꠁꠟ, ꠛꠦꠐꠤꠄ ꠅꠃ ꠒꠣꠈꠘꠣꠖꠤ ꠃꠠꠣꠟ ꠖꠤꠀ ꠝꠞꠥꠜꠥꠝꠤꠔ ꠘꠤꠎꠞ ꠎꠣꠉꠣꠔ ꠎꠣꠁꠔꠣ ꠙꠣꠞꠛꠣ। ꠢꠘꠅ ꠢꠃ ꠖꠣꠘꠛ-ꠢꠣꠚꠞ ꠌꠃꠈꠞ ꠀꠅꠠꠦ ꠡꠣꠠꠦ ꠔꠤꠘ ꠛꠍꠞ ꠔꠣꠘꠞꠦ ꠟꠣꠟꠘ-ꠙꠣꠟꠘ ꠇꠞꠣ ꠅꠁꠛ।
REV 12:15 ꠔꠦꠃ ꠢꠤ ꠢꠣꠚꠦ ꠔꠣꠞ ꠝꠥꠈ ꠕꠣꠇꠤ ꠙꠣꠘꠤ ꠛꠣꠞ ꠇꠞꠤꠀ ꠄꠇ ꠉꠣꠋ ꠛꠣꠘꠣꠁꠟꠤꠟ, ꠉꠣꠋꠉꠞ ꠚꠥꠔꠦ ꠛꠦꠐꠤꠞꠦ ꠜꠣꠡꠣꠁ ꠘꠤꠔꠉꠤ ꠇꠞꠤ।
REV 12:16 ꠅꠁꠟꠦ ꠖꠥꠘꠤꠀꠄ ꠛꠦꠐꠤꠞꠦ ꠡꠣꠁꠎ꠆ꠎ ꠇꠞꠟ, ꠁ ꠢꠣꠚꠦ ꠎꠦ ꠙꠣꠘꠤ ꠛꠣꠞ ꠇꠞꠟ, ꠖꠥꠘꠤꠀꠞ ꠝꠣꠐꠤꠄ ꠀ ꠇꠞꠤꠀ ꠁ ꠙꠣꠘꠤꠞꠦ ꠈꠣꠁꠟꠤꠟ।
REV 12:17 ꠄꠞꠟꠣꠉꠤ ꠁ ꠖꠣꠘꠛ-ꠢꠣꠚꠦ ꠛꠦꠐꠤꠞ ꠛꠣꠄ ꠀꠞꠅ ꠛꠦꠡꠤ ꠉꠥꠍꠣ ꠇꠞꠟ, ꠢꠦ ꠛꠦꠐꠤꠞ ꠅꠁꠘ꠆ꠘ ꠀꠅꠟꠣꠖ ꠅꠇꠟꠞꠦ, ꠝꠣꠘꠤ ꠎꠦꠞꠣ ꠀꠟ꠆ꠟꠣꠞ ꠢꠥꠇꠥꠝꠦ ꠌꠟꠦ ꠀꠞ ꠢꠎꠞꠔ ꠁꠍꠣꠞ ꠙꠇ꠆ꠇꠦ ꠎꠛꠣꠘꠛꠘ꠆ꠖꠤ ꠖꠦꠄ, ꠔꠣꠞꠣꠞ ꠟꠉꠦ ꠎꠥꠖ꠆ꠖ ꠇꠞꠣꠔ ꠉꠦꠟ।
REV 12:18 ꠉꠤꠀ ꠢꠦ ꠖꠞꠤꠀꠞ ꠌꠞꠞ ꠛꠣꠟꠥꠞ ꠃꠙꠞꠦ ꠃꠛꠣꠁ ꠞꠁꠟ।
REV 13:1 ꠛꠣꠖꠦ ꠀꠝꠤ ꠖꠦꠈꠟꠣꠝ, ꠖꠞꠤꠀ ꠕꠣꠇꠤ ꠄꠇ ꠎꠣꠘꠥꠀꠞ ꠃꠑꠦꠞ, ꠔꠣꠞ ꠖꠡꠉꠥ ꠢꠤꠋ, ꠡꠣꠔꠉꠥ ꠇꠟ꠆ꠟꠣ, ꠙꠞꠔꠦꠇ ꠢꠤꠋꠉꠞ ꠝꠣꠕꠣꠔ ꠄꠇꠐꠣ ꠇꠞꠤ ꠔꠣꠎ, ꠀꠞ ꠙꠞꠔꠦꠇ ꠇꠟ꠆ꠟꠣꠞ ꠃꠙꠞꠦ ꠘꠣꠘꠣꠘ ꠇꠥꠚꠥꠞꠤ ꠘꠣꠝ ꠟꠦꠈꠣ।
REV 13:2 ꠁ ꠎꠣꠘꠥꠀꠞꠉꠥ ꠖꠦꠈꠔꠦ ꠌꠤꠔꠣꠛꠣꠊꠞ ꠟꠣꠈꠣꠘ, ꠔꠣꠞ ꠙꠣꠅ ꠅꠁꠟ ꠜꠣꠟ꠆ꠟꠥꠇꠞ ꠙꠣꠅꠞ ꠟꠣꠈꠣꠘ, ꠀꠞ ꠝꠥꠈ ꠅꠁꠟ ꠡꠤꠋꠢꠞ ꠝꠥꠈꠞ ꠟꠣꠈꠣꠘ। ꠢꠃ ꠖꠣꠘꠛꠦ ꠔꠣꠞ ꠡꠇ꠆ꠔꠤ, ꠔꠣꠞ ꠉꠖꠤ ꠀꠞ ꠝꠢꠣ ꠈꠦꠝꠔꠣ ꠅꠃ ꠎꠣꠘꠥꠀꠞꠞꠦ ꠖꠤꠟꠣꠁꠟ।
REV 13:3 ꠁ ꠎꠣꠘꠥꠀꠞꠞ ꠄꠇꠐꠣ ꠇꠟ꠆ꠟꠣꠞ ꠝꠣꠎꠦ ꠅꠝꠘ ꠄꠇ ꠎꠈꠝ ꠀꠍꠤꠟ, ꠅꠃ ꠎꠈꠝꠦ ꠢꠦ ꠝꠞꠣꠞ ꠟꠣꠈ ꠅꠁꠉꠦꠍꠤꠟ, ꠅꠁꠟꠦ ꠎꠈꠝꠐꠣ ꠜꠣꠟꠣ ꠅꠁꠉꠦꠟ। ꠁꠔꠣ ꠖꠦꠈꠤꠀ ꠖꠥꠘꠤꠀꠞ ꠢꠇꠟ ꠝꠣꠘꠥꠡ ꠔꠣꠁꠎ꠆ꠎꠥꠛ ꠛꠘꠤꠀ ꠔꠣꠞ ꠈꠞꠦ ꠈꠞꠦ ꠉꠦꠟ।
REV 13:4 ꠀꠞ ꠢꠃ ꠖꠣꠘꠛꠦ ꠔꠣꠞꠦ ꠁ ꠈꠦꠝꠔꠣ ꠖꠤꠍꠤꠟ ꠇꠞꠤ ꠝꠣꠘꠡꠦ ꠢꠃ ꠖꠣꠘꠛꠞꠦ ꠍꠁꠎꠖꠣ ꠇꠞꠟ, ꠄꠞꠟꠉꠦ ꠅꠃ ꠎꠣꠘꠥꠀꠞꠞꠦꠅ ꠍꠁꠎꠖꠣ ꠇꠞꠟ। ꠔꠣꠞꠣ ꠇꠁꠟ, “ꠁ ꠎꠣꠘꠥꠀꠞꠞ ꠟꠣꠈꠣꠘ ꠀꠞ ꠇꠦ ꠀꠍꠦ? ꠔꠣꠞ ꠟꠉꠦ ꠟꠣꠠꠣꠁ ꠇꠞꠣꠞ ꠈꠦꠝꠔꠣ ꠇꠣꠞ ꠀꠍꠦ?”
REV 13:5 ꠁ ꠎꠣꠘꠥꠀꠞꠞꠦ ꠇꠥꠚꠥꠞꠤ ꠛꠥꠟꠤ ꠀꠞ ꠛꠦꠐꠣꠉꠤꠞꠤ ꠝꠣꠔꠞ ꠝꠥꠈ ꠖꠦꠅꠀ ꠅꠁꠟ। ꠛꠦꠀꠟ꠆ꠟꠤꠡ ꠝꠣꠡ ꠗꠞꠤ ꠔꠣꠞ ꠇꠣꠝ ꠌꠣꠟꠣꠘꠤꠞ ꠈꠦꠝꠔꠣ ꠙꠣꠁꠟ।
REV 13:6 ꠄꠞꠟꠣꠉꠤ ꠢꠦ ꠀꠟ꠆ꠟꠣꠞ ꠛꠤꠞꠥꠖ꠆ꠖꠦ ꠇꠥꠚꠥꠞꠤ ꠝꠣꠔ ꠝꠣꠔꠤꠟ, ꠢꠦ ꠀꠟ꠆ꠟꠣꠞ ꠘꠣꠝ, ꠔꠣꠘ ꠛꠡꠔ ꠈꠣꠘꠣ ꠀꠞ ꠛꠦꠢꠦꠡ꠆ꠔꠛꠣꠡꠤ ꠅꠇꠟꠞ ꠛꠖꠘꠣꠝ ꠇꠞꠣꠔ ꠞꠁꠟ।
REV 13:7 ꠔꠣꠞꠦ ꠈꠦꠝꠔꠣ ꠖꠦꠅꠀ ꠅꠁꠟ, ꠢꠦ ꠀꠟ꠆ꠟꠣꠞ ꠙꠣꠇ ꠛꠘ꠆ꠖꠣ ꠅꠇꠟꠞ ꠛꠤꠞꠥꠖ꠆ꠖꠦ ꠎꠥꠖ꠆ꠖ ꠇꠞꠤꠀ ꠎꠤꠔꠤꠔ ꠙꠣꠞꠛ। ꠀꠞ ꠙꠞꠔꠦꠇ ꠈꠣꠘ꠆ꠖꠣꠘ, ꠙꠞꠔꠦꠇ ꠖꠦꠡ, ꠙꠞꠔꠦꠇ ꠎꠣꠔꠤ, ꠙꠞꠔꠦꠇ ꠘꠝꠥꠘꠣꠞ ꠛꠥꠟꠤꠄ ꠝꠣꠔꠞꠣ ꠝꠣꠘꠡꠞ ꠃꠙꠞꠦꠅ ꠔꠣꠞꠦ ꠈꠦꠝꠔꠣ ꠖꠦꠅꠀ ꠅꠁꠟ।
REV 13:8 ꠁꠔꠣ ꠖꠦꠈꠤꠀ ꠖꠥꠘꠤꠀꠛꠤ ꠢꠇꠟ ꠝꠣꠘꠡꠦ ꠔꠣꠞꠦ ꠍꠁꠎꠖꠣ ꠇꠞꠛ। ꠎꠉꠔ ꠙꠄꠖꠣ ꠇꠞꠣꠞ ꠀꠉꠦ ꠎꠦ ꠝꠦꠠꠣ-ꠛꠣꠁꠌ꠆ꠌꠣꠞꠦ ꠎꠛ ꠇꠞꠣꠞ ꠇꠕꠣ ꠡꠣꠁꠛꠡ꠆ꠔ ꠇꠞꠣ ꠅꠁꠍꠦ, ꠢꠃ ꠝꠦꠠꠣ-ꠛꠣꠁꠌ꠆ꠌꠣꠞ ꠎꠤꠘ꠆ꠖꠦꠉꠤ ꠈꠣꠔꠣꠔ ꠎꠦꠞꠣꠞ ꠘꠣꠝ ꠘꠣꠁ, ꠄꠞꠣ ꠙꠞꠔꠦꠇꠦ ꠔꠣꠞꠦ ꠍꠁꠎꠖꠣ ꠇꠞꠛ।
REV 13:9 ꠎꠣꠞ ꠇꠣꠘ ꠀꠍꠦ, ꠢꠦ ꠢꠥꠘꠃꠇ:
REV 13:10 ꠎꠦ ꠎꠘ ꠛꠘ꠆ꠖꠤ ꠅꠀꠞ ꠇꠕꠣ, ꠢꠦ ꠔ ꠛꠘ꠆ꠖꠤ ꠅꠁꠛꠃ। ꠔꠟꠥꠀꠞꠞ ꠔꠟꠦ ꠎꠣꠞ ꠈꠥꠘ ꠅꠀꠞ ꠇꠕꠣ, ꠢꠦ ꠅꠟꠣ ꠈꠥꠘ ꠅꠁꠛ। ꠄꠞꠟꠣꠉꠤ ꠙꠣꠇ ꠛꠘ꠆ꠖꠣ ꠅꠇꠟꠦ ꠝꠎꠛꠥꠔ ꠁꠝꠣꠘ ꠀꠞ ꠍꠛꠞ ꠇꠞꠣ ꠎꠞꠥꠞ।
REV 13:11 ꠛꠣꠖꠦ ꠀꠝꠤ ꠖꠦꠈꠟꠣꠝ, ꠎꠝꠤꠘ ꠕꠣꠇꠤ ꠀꠞꠇꠐꠣ ꠎꠣꠘꠥꠀꠞ ꠛꠣꠞ ꠅꠁꠀ ꠀꠁꠟ। ꠝꠦꠠꠣꠞ ꠢꠤꠋꠉꠞ ꠟꠣꠈꠣꠘ ꠔꠣꠞ ꠖꠥꠁ ꠢꠤꠋ ꠀꠍꠦ, ꠅꠁꠟꠦ ꠢꠦ ꠝꠣꠔꠤꠔ ꠢꠃ ꠖꠣꠘꠛꠞ ꠟꠣꠈꠣꠘ।
REV 13:12 ꠅꠃ ꠝꠦꠠꠣꠞ ꠢꠤꠋ ꠀꠟꠣ ꠎꠣꠘꠥꠀꠞꠦ ꠢꠃ ꠙꠄꠟꠣ ꠎꠣꠘꠥꠀꠞꠞ ꠢꠇꠟ ꠈꠦꠝꠔꠣ ꠛꠦꠛꠢꠣꠞ ꠇꠞꠔ। ꠖꠥꠘꠤꠀꠞ ꠢꠇꠟ ꠝꠣꠘꠡꠞꠦ ꠢꠦ ꠎꠥꠞ ꠇꠞꠤꠀ ꠢꠃ ꠎꠈꠝ ꠜꠣꠟꠣ ꠅꠀ ꠙꠄꠟꠣ ꠎꠣꠘꠥꠀꠞꠞꠦ ꠍꠁꠎꠖꠣ ꠇꠞꠣꠁꠔ।
REV 13:13 ꠢꠦ ꠢꠇꠟꠞ ꠍꠣꠝꠘꠦ ꠛꠠ ꠛꠠ ꠇꠦꠞꠣꠝꠔꠤ ꠇꠣꠝ ꠇꠞꠔ, ꠄꠝꠘꠇꠤ ꠀꠍꠝꠣꠘ ꠕꠣꠇꠤ ꠎꠝꠤꠘꠅ ꠀꠉꠥꠁꠘ ꠟꠣꠝꠣꠁꠀ ꠖꠦꠈꠣꠁꠔ।
REV 13:14 ꠢꠃ ꠙꠄꠟꠣ ꠎꠣꠘꠥꠀꠞꠞ ꠟꠣꠉꠤ ꠎꠔ ꠟꠣꠈꠣꠘ ꠇꠦꠞꠣꠝꠔꠤ ꠖꠦꠈꠣꠘꠤꠞ ꠈꠦꠝꠔꠣ ꠔꠣꠞꠦ ꠖꠦꠅꠀ ꠅꠁꠍꠤꠟ, ꠅꠔꠣ ꠖꠦꠈꠣꠁꠀ ꠢꠦ ꠝꠣꠘꠡꠞꠦ ꠛꠦ-ꠙꠕꠤ ꠛꠣꠘꠣꠁꠟ। ꠙꠄꠟꠣ ꠎꠦ ꠎꠣꠘꠥꠀꠞ ꠔꠟꠥꠀꠞꠞ ꠍꠦꠖ ꠈꠣꠁꠀꠅ ꠛꠣꠌꠤ ꠉꠦꠍꠤꠟ, ꠔꠣꠞ ꠄꠇꠐꠣ ꠝꠥꠞ꠆ꠔꠤ ꠛꠣꠘꠣꠘꠤꠞ ꠟꠣꠉꠤ ꠖꠥꠍꠞꠣ ꠎꠣꠘꠥꠀꠞꠦ ꠝꠣꠘꠡꠞꠦ ꠙꠞꠣꠝꠤꠡ ꠖꠤꠟ।
REV 13:15 ꠀꠞ ꠝꠥꠞ꠆ꠔꠤꠞ ꠜꠤꠔꠞꠦ ꠎꠣꠘ ꠢꠣꠞꠣꠘꠤꠞ ꠈꠦꠝꠔꠣ ꠔꠣꠞꠦ ꠖꠦꠅꠀ ꠅꠁꠟ, ꠎꠣꠔꠦ ꠁ ꠝꠥꠞ꠆ꠔꠤꠄ ꠝꠣꠔꠤꠔ ꠙꠣꠞꠦ, ꠀꠞ ꠎꠦꠞꠣ ꠁ ꠝꠥꠞ꠆ꠔꠤꠞꠦ ꠍꠁꠎꠖꠣ ꠇꠞꠔ ꠘꠣꠄ, ꠔꠣꠞꠣꠞꠦ ꠎꠣꠘꠦ ꠝꠣꠞꠣꠞ ꠈꠦꠝꠔꠣꠅ ꠔꠣꠞꠦ ꠖꠦꠅꠀ ꠅꠁꠟ।
REV 13:16 ꠢꠦ ꠢꠥꠞꠥ-ꠛꠠ, ꠗꠘꠤ-ꠉꠞꠤꠛ, ꠝꠥꠘꠤꠛ ꠛꠣ ꠉꠥꠟꠣꠝ ꠢꠇꠟꠞꠦ ꠛꠣꠁꠖ꠆ꠖ ꠇꠞꠟ, ꠎꠣꠞꠎꠤꠞ ꠒꠣꠁꠘ ꠀꠔꠅ ꠛꠣ ꠇꠙꠣꠟꠞ ꠃꠙꠞꠦ ꠄꠇꠐꠣ ꠡꠤꠟ ꠝꠣꠞꠣꠞ ꠟꠣꠉꠤ।
REV 13:17 ꠄꠞꠟꠣꠉꠤ ꠅꠃ ꠡꠤꠟ ꠍꠣꠠꠣ ꠇꠦꠃ ꠇꠥꠘꠥ ꠌꠤꠎ ꠈꠞꠤꠖ-ꠛꠤꠇꠤꠞ ꠃꠙꠣꠄ ꠞꠁꠟ ꠘꠣ। ꠁ ꠡꠤꠟ ꠀꠍꠤꠟ ꠢꠃ ꠎꠣꠘꠥꠀꠞꠞ ꠘꠣꠝ ꠛꠣ ꠘꠣꠝꠞ ꠝꠣꠞ꠆ꠇꠣ ꠘꠝ꠆ꠛꠞ।
REV 13:18 ꠁꠔꠣ ꠢꠇꠟꠔꠣ ꠛꠥꠎꠔꠦ ꠛꠃꠔ ꠀꠈꠟꠞ ꠖꠞꠇꠣꠞ। ꠎꠣꠞ ꠀꠈꠟ ꠀꠍꠦ ꠢꠦ ꠅꠃ ꠎꠣꠘꠥꠀꠞꠞ ꠘꠣꠝꠞ ꠢꠞꠚꠞ ꠘꠝ꠆ꠛꠞ ꠉꠘꠃꠇ, ꠁꠔꠣ ꠔ ꠇꠥꠘꠥ ꠝꠣꠘꠡꠞ ꠘꠣꠝꠞ ꠘꠝ꠆ꠛꠞ। ꠄꠞ ꠙꠞꠤꠝꠣꠘ ꠅꠁꠟ, ৬৬৬; ꠍꠄ-ꠡ ꠍꠄꠡꠐ꠆ꠐꠤ।
REV 14:1 ꠛꠣꠖꠦ ꠀꠝꠤ ꠌꠣꠁꠀ ꠖꠦꠈꠤ, ꠢꠃ ꠝꠦꠠꠣ-ꠛꠣꠁꠌ꠆ꠌꠣ ꠎꠦꠞꠥꠎꠣꠟꠦꠝꠞ ꠙꠛꠤꠔ꠆ꠞ ꠍꠤꠅꠘ ꠙꠣꠠꠞ ꠃꠙꠞꠦ ꠃꠛꠣꠁ ꠞꠁꠍꠂꠘ। ꠔꠣꠘ ꠟꠉꠦ ꠀꠍꠂꠘ ꠄꠇ ꠟꠣꠈ ꠌꠃꠌꠣꠟ꠆ꠟꠤꠡ ꠀꠎꠣꠞ ꠝꠣꠘꠥꠡ। ꠔꠣꠞꠣꠞ ꠇꠙꠣꠟꠞ ꠃꠙꠞꠦ ꠅꠃ ꠝꠦꠠꠣ-ꠛꠣꠁꠌ꠆ꠌꠣ ꠀꠞ ꠔꠣꠘ ꠉꠣꠁꠛꠤ ꠛꠣꠚꠞ ꠘꠣꠝ ꠟꠦꠈꠣ ꠀꠍꠦ।
REV 14:2 ꠄꠞꠛꠣꠖꠦ ꠀꠝꠤ ꠛꠦꠢꠦꠡ꠆ꠔ ꠕꠣꠇꠤ ꠎꠥꠞꠦ ꠎꠥꠞꠦ ꠇꠟ-ꠇꠟꠣꠁꠀ ꠎꠣꠅꠀ ꠙꠣꠘꠤꠞ ꠚꠥꠔꠞ ꠀꠅꠀꠎ ꠀꠞ ꠎꠥꠞꠦ ꠑꠣꠐꠣ ꠙꠠꠣꠞ ꠡꠛ꠆ꠖꠞ ꠟꠣꠈꠣꠘ ꠄꠇ ꠀꠅꠀꠎ ꠢꠥꠘꠟꠣꠝ। ꠀꠝꠣꠞ ꠝꠘꠅ ꠅꠁꠟ, ꠇꠥꠘꠥ ꠡꠣꠞꠤꠘ꠆ꠖꠣ ꠛꠣꠎꠣꠅꠞꠣ ꠖꠟꠦ ꠡꠣꠞꠤꠘ꠆ꠖꠣ ꠛꠣꠎꠣꠁꠞꠣ।
REV 14:3 ꠄꠞꠣ ꠢꠃ ꠔꠈ꠆ꠔ, ꠢꠃ ꠌꠣꠁꠞꠅ ꠎꠣꠘꠖꠣꠞ ꠀꠞ ꠢꠃ ꠝꠥꠞꠛ꠆ꠛꠤ ꠘꠦꠔꠣ ꠅꠇꠟꠞ ꠍꠣꠝꠘꠦ ꠄꠇ ꠘꠄꠀ ꠉꠎꠟ ꠉꠣꠁꠞꠣ। ꠇꠥꠘꠥ ꠝꠣꠘꠡꠦ ꠁ ꠉꠎꠟ ꠢꠤꠇꠔ ꠙꠣꠞꠟ ꠘꠣ, ꠈꠣꠟꠤ ꠖꠥꠘꠤꠀ ꠕꠣꠇꠤ ꠈꠣꠟꠣꠍ ꠇꠞꠤ ꠘꠦꠅꠀ ꠅꠃ ꠄꠇ ꠟꠣꠈ ꠌꠃꠌꠣꠟ꠆ꠟꠤꠡ ꠀꠎꠣꠞ ꠎꠘ ꠍꠣꠠꠣ।
REV 14:4 ꠄꠞꠣ ꠔ ꠢꠃ ꠝꠣꠘꠥꠡ, ꠎꠦꠞꠣ ꠇꠥꠘꠥ ꠛꠦꠐꠤꠘ꠆ꠔꠞ ꠟꠉꠦ ꠎꠤꠘꠣ ꠇꠞꠤꠀ ꠘꠤꠎꠞ ꠇꠣꠄꠀꠞꠦ ꠘꠣꠙꠣꠇ ꠛꠣꠘꠣꠁꠍꠦ ꠘꠣ। ꠅꠃ ꠝꠦꠠꠣ-ꠛꠣꠁꠌ꠆ꠌꠣ ꠎꠦ ꠎꠣꠉꠣꠔ ꠎꠣꠁꠘ, ꠔꠣꠞꠣꠅ ꠄꠘ ꠈꠞꠦ ꠈꠞꠦ ꠞꠂꠘ। ꠀꠟ꠆ꠟꠣ ꠀꠞ ꠝꠦꠠꠣ-ꠛꠣꠁꠌ꠆ꠌꠣꠞ ꠘꠣꠝꠦ ꠈꠦꠔꠞ ꠙꠄꠟꠣ ꠚꠡꠟ ꠢꠤꠡꠣꠛꠦ ꠄꠞꠣꠞꠦ ꠎꠉꠔꠞ ꠝꠣꠘꠡꠞ ꠉꠦꠍ ꠕꠣꠇꠤ ꠈꠣꠟꠣꠍ ꠇꠞꠣ ꠅꠁꠍꠤꠟ।
REV 14:5 ꠄꠞꠣ ꠇꠥꠘꠥꠖꠤꠘꠅ ꠝꠤꠍꠣ ꠝꠣꠔ ꠝꠣꠔꠤꠍꠂꠘ ꠘꠣ, ꠄꠞꠣ ꠡꠥꠟ꠆ꠟꠀꠘꠣ ꠘꠤꠈꠥꠔ।
REV 14:6 ꠛꠣꠖꠦ ꠀꠝꠤ ꠀꠞꠇ ꠎꠘ ꠚꠤꠞꠤꠡ꠆ꠔꠣ ꠖꠦꠈꠟꠣꠝ, ꠄꠁꠘ ꠀꠍꠝꠣꠘꠞ ꠝꠣꠎꠦꠖꠤ ꠃꠠꠤꠞꠣ। ꠖꠥꠘꠤꠀꠔ ꠛꠡꠔ ꠇꠞꠞꠣ ꠙꠞꠔꠦꠇ ꠖꠦꠡ, ꠙꠞꠔꠦꠇ ꠈꠣꠘ꠆ꠖꠣꠘ, ꠙꠞꠔꠦꠇ ꠜꠣꠡꠣꠄ ꠝꠣꠔꠞꠣ ꠀꠞ ꠙꠞꠔꠦꠇ ꠎꠣꠔꠤꠞ ꠝꠣꠘꠡꠞ ꠟꠣꠉꠤ ꠌꠤꠞꠇꠣꠟꠤꠘ ꠈꠥꠡꠤꠞ ꠈꠛꠞ ꠔꠣꠘ ꠉꠦꠍꠦ ꠀꠍꠦ।
REV 14:7 ꠔꠣꠁꠘ ꠎꠥꠞꠦ ꠎꠥꠞꠦ ꠄꠟꠣꠘ ꠇꠞꠟꠣ, “ꠀꠟ꠆ꠟꠣ ꠙꠣꠇꠞꠦ ꠒꠞꠣꠅ, ꠔꠣꠘ ꠁꠎ꠆ꠎꠔ-ꠔꠣꠞꠤꠚ ꠇꠞꠅ, ꠔꠣꠘ ꠛꠤꠌꠣꠞꠞ ꠡꠝꠄ ꠀꠁꠌ꠆ꠍꠦ। ꠎꠦꠁꠘ ꠀꠍꠝꠣꠘ-ꠎꠝꠤꠘ, ꠖꠞꠤꠀ ꠀꠞ ꠈꠣꠟ-ꠛꠤꠟ, ꠉꠣꠋ ꠅꠇꠟ ꠙꠄꠖꠣ ꠇꠞꠍꠂꠘ, ꠔꠣꠘ ꠄꠛꠣꠖꠔ ꠇꠞꠅ।”
REV 14:8 ꠛꠣꠖꠦ ꠔꠣꠘ ꠈꠞꠦ ꠈꠞꠦ ꠖꠥꠍꠞꠣ ꠚꠤꠞꠤꠡ꠆ꠔꠣ ꠀꠁꠀ ꠇꠁꠟꠣ, “ꠛꠤꠘꠣꠡ ꠅꠁꠉꠦꠟ, ꠛꠤꠘꠣꠡ ꠅꠁꠉꠦꠟ, ꠢꠃ ꠘꠣꠝꠇꠞꠣ ꠛꠣꠛꠤꠟ ꠐꠣꠃꠘ ꠛꠤꠘꠣꠡ ꠅꠁꠉꠦꠟ। ꠎꠦ ꠐꠣꠃꠘꠦ ꠔꠣꠁꠞ ꠎꠤꠘꠣꠞ ꠇꠣꠝꠞ ꠇꠠꠣ ꠘꠤꠡꠣ-ꠙꠣꠘꠤ ꠢꠇꠟ ꠎꠣꠔꠤꠞꠦ ꠈꠣꠅꠀꠁꠍꠦ, ꠔꠣꠁ ꠛꠤꠘꠣꠡ ꠅꠁꠉꠦꠟ।”
REV 14:9 ꠛꠣꠖꠦ ꠔꠤꠘ ꠘꠝ꠆ꠛꠞ ꠚꠤꠞꠤꠡ꠆ꠔꠣ ꠄꠞꠣꠞ ꠈꠞꠦ ꠈꠞꠦ ꠀꠁꠀ ꠎꠥꠞ ꠉꠟꠣꠄ ꠇꠁꠟꠣ, “ꠇꠥꠘꠥ ꠝꠣꠘꠡꠦ ꠎꠥꠖꠤ ꠅꠃ ꠎꠣꠘꠥꠀꠞ ꠀꠞ ꠅꠉꠥꠞ ꠝꠥꠞ꠆ꠔꠤꠞ ꠙꠥꠎꠣ ꠇꠞꠦ, ꠅꠉꠥꠞ ꠡꠤꠟ ꠔꠣꠞ ꠀꠔꠅ ꠛꠣ ꠇꠙꠣꠟꠅ ꠟꠣꠉꠣꠄ,
REV 14:10 ꠔꠦ ꠢꠦ-ꠅ ꠀꠟ꠆ꠟꠣꠁ ꠉꠎꠛꠤ ꠘꠤꠡꠣ-ꠙꠣꠘꠤ ꠈꠣꠁꠔꠦ ꠅꠁꠛ। ꠅꠃ ꠘꠤꠡꠣꠞ ꠟꠉꠦ ꠇꠥꠘꠥꠎꠣꠔ ꠙꠣꠘꠤ ꠘꠣ ꠝꠤꠡꠣꠁꠀ ꠀꠟ꠆ꠟꠣꠁ ꠉꠎꠛꠤ ꠛꠣꠐꠤꠔ ꠜꠞꠣ ꠅꠁꠍꠦ। ꠙꠛꠤꠔ꠆ꠞ ꠚꠤꠞꠤꠡ꠆ꠔꠣ ꠅꠇꠟ ꠀꠞ ꠀꠟ꠆ꠟꠣꠁ ꠝꠦꠠꠣ-ꠛꠣꠁꠌ꠆ꠌꠣꠞ ꠍꠣꠝꠘꠦ, ꠀꠉꠥꠁꠘ ꠀꠞ ꠉꠘ꠆ꠖꠇ ꠖꠤꠀ ꠁ ꠝꠣꠘꠡꠞꠦ ꠡꠣꠎꠣ ꠖꠦꠅꠀ ꠅꠁꠛ।
REV 14:11 ꠎꠦ ꠀꠉꠥꠘꠤꠔ ꠁꠔꠣꠞꠦ ꠎꠣꠟꠣꠁꠟ ꠅꠁꠛ, ꠁ ꠀꠉꠥꠘꠤꠞ ꠗꠥꠝꠣ ꠇꠥꠘꠥꠖꠤꠘ ꠛꠘ꠆ꠖ ꠅꠁꠔ ꠘꠣꠄ। ꠎꠦ ꠝꠣꠘꠡꠦ ꠅꠃ ꠎꠣꠘꠥꠀꠞ ꠀꠞ ꠔꠣꠞ ꠝꠥꠞ꠆ꠔꠤꠞ ꠙꠥꠎꠣ ꠇꠞꠛ, ꠅꠉꠥꠞ ꠘꠣꠝꠞ ꠢꠃ ꠡꠤꠟ ꠟꠣꠉꠣꠁꠛ, ꠢꠦ ꠖꠤꠘ-ꠞꠣꠁꠔ ꠇꠥꠘꠥ ꠡꠝꠄꠃ ꠀꠎꠣꠛ ꠕꠣꠇꠤ ꠞꠦꠢꠣꠁ ꠙꠣꠁꠔ ꠘꠣꠄ।”
REV 14:12 ꠄꠞꠟꠣꠉꠤ ꠎꠦꠞꠣ ꠀꠟ꠆ꠟꠣꠞ ꠢꠥꠇꠥꠝ ꠝꠣꠘꠦ ꠀꠞ ꠢꠎꠞꠔ ꠁꠍꠣꠞ ꠔꠞꠤꠇꠣꠞ ꠁꠝꠣꠘꠦ ꠝꠎꠛꠥꠔ ꠞꠄ, ꠀꠟ꠆ꠟꠣꠞ ꠅꠃ ꠙꠣꠇ ꠛꠘ꠆ꠖꠣ ꠅꠇꠟꠦ ꠁ ꠢꠣꠟꠔꠞ ꠝꠣꠎꠦ ꠍꠛꠞ ꠕꠣꠇꠣ ꠎꠞꠥꠞ।
REV 14:13 ꠛꠣꠖꠦ ꠀꠝꠤ ꠢꠥꠘꠟꠣꠝ, ꠛꠦꠢꠦꠡ꠆ꠔ ꠕꠣꠇꠤ ꠄꠇꠎꠘꠦ ꠇꠁꠞꠣ, “ꠅꠃ ꠀꠄꠀꠔ ꠟꠦꠈꠅ, ꠅꠈꠘ ꠕꠣꠇꠤ ꠝꠣꠟꠤꠇꠞ ꠔꠞꠤꠇꠣꠔ ꠞꠁꠀ ꠎꠔ ꠎꠘꠞ ꠎꠣꠘ ꠎꠣꠁꠛ, ꠄꠞꠣꠃ ꠘꠦꠇ-ꠇꠙꠣꠟꠤ।” ꠙꠣꠇ ꠞꠥꠢꠦ ꠅꠃ ꠡꠣꠇ꠆ꠇꠤ ꠖꠤꠞꠣ, “ꠘꠤꠌ꠆ꠌꠄ ꠄꠞꠣꠃ ꠘꠦꠇ-ꠇꠙꠣꠟꠤ। ꠔꠣꠞꠣꠞ ꠇꠣꠝ-ꠇꠣꠎ ꠕꠣꠇꠤ ꠔꠣꠞꠣ ꠞꠦꠢꠣꠁ ꠙꠣꠁꠛꠣ, ꠇꠣꠞꠘ ꠔꠣꠞꠣꠞ ꠇꠣꠝꠞ ꠚꠟ ꠔꠣꠞꠣꠞ ꠟꠉꠦ ꠟꠉꠦ ꠞꠁꠛ।”
REV 14:14 ꠛꠣꠖꠦ ꠀꠝꠤ ꠌꠣꠁꠀ ꠖꠦꠈꠟꠣꠝ, ꠗꠟꠣ ꠄꠇ ꠝꠦꠊꠞ ꠌꠣꠇꠣ, ꠅꠃ ꠌꠣꠇꠣꠞ ꠃꠙꠞꠦ ꠛꠤꠘ-ꠀꠖꠝꠞ ꠟꠣꠈꠣꠘ ꠇꠦꠃ ꠄꠇꠎꠘ ꠛꠅꠀꠔ ꠀꠍꠂꠘ। ꠔꠣꠘ ꠝꠣꠕꠣꠔ ꠡꠥꠘꠣꠞ ꠔꠣꠎ ꠀꠞ ꠀꠔꠅ ꠀꠍꠤꠟ ꠗꠣꠞꠣꠁꠟ ꠇꠣꠌꠤ।
REV 14:15 ꠛꠣꠖꠦ ꠀꠞꠇ ꠎꠘ ꠚꠤꠞꠤꠡ꠆ꠔꠣ ꠛꠦꠢꠦꠡ꠆ꠔꠤ ꠄꠛꠣꠖꠔ ꠈꠣꠘꠣ ꠕꠣꠇꠤ ꠛꠣꠞ ꠅꠁꠀ ꠀꠁꠟꠣ, ꠀꠞ ꠎꠦꠁꠘ ꠝꠦꠊꠞ ꠃꠙꠞꠦ ꠛꠅꠀꠔ ꠀꠍꠟꠣ ꠔꠣꠘꠞꠦ ꠎꠥꠞꠦ ꠌꠤꠟ꠆ꠟꠣꠁꠀ ꠇꠁꠟꠣ, “ꠖꠥꠘꠤꠀꠞ ꠚꠡꠟ ꠇꠣꠐꠤꠛꠣꠞ ꠡꠝꠄ ꠅꠁꠍꠦ, ꠚꠡꠟ ꠙꠥꠞꠣꠙꠥꠞ ꠙꠣꠇꠤ ꠉꠦꠍꠦ, ꠀꠙꠘꠣꠞ ꠇꠣꠌꠤ ꠟꠣꠉꠣꠃꠇ꠆ꠇꠣ ꠀꠞ ꠚꠡꠟ ꠇꠣꠐꠃꠇ꠆ꠇꠣ।”
REV 14:16 ꠔꠦꠃ ꠅꠃ ꠝꠦꠊꠞ ꠌꠣꠇꠣꠞ ꠃꠙꠞꠦ ꠎꠦꠁꠘ ꠛꠅꠀꠔ ꠀꠍꠟꠣ, ꠄꠁꠘ ꠖꠥꠘꠤꠀꠔ ꠔꠣꠘ ꠇꠣꠌꠤ ꠟꠣꠉꠣꠁꠟꠣ ꠀꠞ ꠖꠥꠘꠤꠀꠞ ꠚꠡꠟ ꠇꠣꠐꠣ ꠅꠁꠟ।
REV 14:17 ꠛꠣꠖꠦ ꠛꠦꠢꠦꠡ꠆ꠔꠞ ꠄꠛꠣꠖꠔ ꠈꠣꠘꠣ ꠕꠣꠇꠤ ꠀꠞꠇ ꠎꠘ ꠚꠤꠞꠤꠡ꠆ꠔꠣ ꠛꠣꠞ ꠅꠁꠀ ꠀꠁꠟꠣ, ꠔꠣꠘ ꠉꠦꠍꠦꠅ ꠄꠇꠈꠣꠘ ꠗꠣꠞꠣꠁꠟ ꠇꠣꠌꠤ ꠀꠍꠤꠟ।
REV 14:18 ꠄꠞꠛꠣꠖꠦ ꠇꠥꠞꠛꠣꠘꠤ ꠈꠣꠘꠣꠞ ꠉꠦꠍ ꠕꠣꠇꠤ ꠄꠇꠎꠘ ꠚꠤꠞꠤꠡ꠆ꠔꠣ ꠛꠣꠞ ꠅꠁꠀ ꠀꠁꠟꠣ, ꠔꠣꠘ ꠈꠦꠝꠔꠣ ꠀꠍꠤꠟ ꠀꠉꠥꠘꠤꠞ ꠃꠙꠞꠦ। ꠀꠁꠀ ꠔꠣꠁꠘ ꠎꠥꠞꠦ ꠎꠥꠞꠦ ꠢꠃ ꠇꠣꠌꠤꠀꠟꠣ ꠚꠤꠞꠤꠡ꠆ꠔꠣꠞꠦ ꠒꠣꠇꠤꠀ ꠇꠁꠟꠣ, “ꠔꠥꠝꠣꠞ ꠗꠣꠞꠣꠁꠟ ꠇꠣꠌꠤꠈꠣꠘ ꠟꠣꠉꠣꠅ ꠀꠞ ꠖꠥꠘꠤꠀꠞ ꠀꠋꠉꠥꠞ ꠉꠣꠍ ꠕꠣꠇꠤ ꠀꠋꠉꠥꠞꠞ ꠍꠠꠤꠘ ꠇꠣꠐꠤꠀ ꠖꠟꠣ ꠇꠞꠅ, ꠁꠔꠣ ꠔ ꠙꠣꠇꠤ ꠉꠦꠍꠦ।”
REV 14:19 ꠔꠦꠃ ꠢꠃ ꠚꠤꠞꠤꠡ꠆ꠔꠣꠄ ꠖꠥꠘꠤꠀꠔ ꠔꠣꠘ ꠇꠣꠌꠤ ꠟꠣꠉꠣꠁꠟꠣ ꠀꠞ ꠖꠥꠘꠤꠀꠞ ꠀꠋꠉꠥꠞ ꠉꠣꠍꠞ ꠢꠇꠟ ꠀꠋꠉꠥꠞ ꠖꠟꠣ ꠇꠞꠤꠀ, ꠀꠋꠉꠥꠞ ꠝꠣꠠꠣꠞ ꠉꠣꠔꠅ ꠚꠣꠟꠣꠁꠟꠣ। ꠅꠃ ꠉꠣꠔ ꠅꠁꠟ ꠀꠟ꠆ꠟꠣꠞ ꠉꠎꠛꠞ ꠝꠢꠣ ꠉꠣꠔ।
REV 14:20 ꠐꠣꠃꠘꠞ ꠛꠣꠞꠦ ꠀꠋꠉꠥꠞ ꠝꠣꠠꠣꠞ ꠉꠣꠔꠅ ꠁ ꠀꠋꠉꠥꠞ ꠝꠣꠠꠤꠀ ꠢꠣꠞꠟꠦ, ꠁꠔꠣ ꠕꠣꠇꠤ ꠟꠃ ꠛꠣꠞ ꠅꠁꠟ, ꠁ ꠟꠃꠞ ꠛꠁꠘ꠆ꠘꠣꠄ ꠊꠥꠠꠣꠁꠘ꠆ꠔꠞ ꠟꠣꠉꠣꠝ ꠙꠞ꠆ꠎꠘ꠆ꠔ ꠀꠁꠀ ꠍꠁꠟ। ꠟꠃꠄ ꠄꠇ ꠀꠎꠣꠞ ꠍꠄ-ꠡ ꠡ꠆ꠔꠣꠖꠤꠀ (ꠅꠘꠥꠝꠣꠘ ꠖꠥꠁ-ꠡ ꠝꠣꠁꠟ) ꠎꠣꠉꠣ ꠒꠥꠛꠤ ꠉꠦꠟ।
REV 15:1 ꠛꠣꠖꠦ ꠀꠝꠤ ꠛꠦꠢꠦꠡ꠆ꠔꠞ ꠝꠣꠎꠦ ꠀꠞꠇꠐꠣ ꠟꠤꠟꠣ-ꠈꠦꠟꠣ ꠖꠦꠈꠟꠣꠝ, ꠁꠐꠣ ꠛꠠ ꠝꠢꠣꠘ ꠔꠣꠁꠎ꠆ꠎꠥꠛꠤ। ꠀꠝꠤ ꠖꠦꠈꠟꠣꠝ, ꠡꠣꠔꠎꠘ ꠚꠤꠞꠤꠡ꠆ꠔꠣ ꠀꠍꠂꠘ, ꠄꠞꠣꠞ ꠀꠔꠅ ꠀꠈꠦꠞꠤ ꠡꠣꠔꠐꠣ ꠉꠎꠛ। ꠁꠔꠣꠞꠦ ꠀꠈꠦꠞꠤ ꠉꠎꠛ ꠇꠅꠀꠞ ꠇꠣꠞꠘ ꠅꠁꠟ, ꠅꠉꠥꠁꠘ ꠖꠤꠀ ꠀꠟ꠆ꠟꠣ ꠙꠣꠇꠞ ꠉꠥꠍꠣꠞ ꠡꠦꠡ ꠚꠄꠍꠣꠟꠣ ꠅꠁꠛ।
REV 15:2 ꠛꠣꠖꠦ ꠀꠝꠤ ꠖꠦꠈꠟꠣꠝ, ꠀꠉꠥꠁꠘ ꠀꠟꠣ ꠄꠇ ꠇꠣꠌꠞ ꠖꠞꠤꠀ, ꠀꠞ ꠎꠔ ꠝꠣꠘꠡꠦ ꠢꠃ ꠎꠣꠘꠥꠀꠞ, ꠔꠣꠞ ꠝꠥꠞ꠆ꠔꠤ ꠛꠣ ꠔꠣꠞ ꠘꠣꠝꠞ ꠘꠝ꠆ꠛꠞꠞ ꠃꠙꠞꠦ ꠎꠤꠔꠍꠂꠘ, ꠔꠣꠞꠣꠞꠦꠅ ꠖꠦꠈꠟꠣꠝ। ꠖꠦꠈꠟꠣꠝ, ꠔꠣꠞꠣ ꠀꠟ꠆ꠟꠣꠞ ꠖꠦꠅꠀ ꠡꠣꠞꠤꠘ꠆ꠖꠣ ꠀꠔꠅ ꠟꠁꠀ ꠇꠣꠌꠞ ꠖꠞꠤꠀꠞ ꠙꠣꠞꠅ ꠃꠛꠣꠁ ꠞꠁꠍꠂꠘ।
REV 15:3 ꠔꠣꠞꠣ ꠀꠟ꠆ꠟꠣꠞ ꠛꠘ꠆ꠖꠣ ꠝꠥꠍꠣ ꠘꠛꠤꠞ ꠀꠞ ꠢꠃ ꠝꠦꠠꠣ-ꠛꠣꠁꠌ꠆ꠌꠣꠞ ꠅꠃ ꠇꠣꠅꠀꠟꠤ ꠉꠣꠁꠞꠣ, “ꠅ ꠡꠞ꠆ꠛ-ꠡꠇ꠆ꠔꠤꠝꠣꠘ ꠝꠣꠛꠥꠖ ꠀꠟ꠆ꠟꠣ, ꠔꠥꠝꠣꠞ ꠟꠤꠟꠣ-ꠈꠦꠟꠣ ꠇꠔ ꠝꠢꠣꠘ ꠀꠞ ꠀꠌꠣꠘꠇ! ꠅ ꠔꠣꠝꠣꠝ ꠎꠣꠔꠤꠞ ꠛꠣꠖꠡꠣ, ꠇꠔ ꠢꠇ ꠀꠞ ꠡꠑꠤꠇ ꠔꠥꠝꠣꠞ ꠙꠕ!
REV 15:4 ꠅ ꠝꠣꠛꠥꠖ, ꠔꠥꠝꠣꠞꠦ ꠒꠞꠣꠁꠔ ꠘꠣꠄ ꠇꠥꠘ ꠎꠘꠦ? ꠇꠥꠘ ꠎꠘꠦ ꠔꠥꠝꠣꠞ ꠘꠣꠝꠞ ꠔꠣꠞꠤꠚ ꠇꠞꠔ ꠘꠣꠄ? ꠈꠣꠟꠤ ꠔꠥꠝꠤꠃ ꠔ ꠙꠣꠇ-ꠙꠛꠤꠔ꠆ꠞ, ꠔꠣꠝꠣꠝ ꠎꠣꠔꠤꠃ ꠀꠁꠛ ꠔꠥꠝꠣꠞ ꠖꠞꠛꠣꠞꠅ, ꠢꠇ꠆ꠇꠟꠦꠃ ꠔꠥꠝꠣꠞ ꠄꠛꠣꠖꠔ ꠇꠞꠛ, ꠔꠥꠝꠣꠞ ꠢꠇ ꠛꠤꠌꠣꠞ ꠔ ꠎꠣꠁꠞ ꠅꠁꠉꠦꠍꠦ।”
REV 15:5 ꠄꠞꠛꠣꠖꠦ ꠀꠝꠤ ꠖꠦꠈꠟꠣꠝ, ꠛꠦꠢꠦꠡ꠆ꠔꠞ ꠢꠃ ꠡꠣꠢꠣꠖꠔ ꠔꠣꠝ꠆ꠛꠥꠞ ꠜꠤꠔꠞꠞ ꠙꠛꠤꠔ꠆ꠞ ꠇꠣꠛꠣ ꠊꠞꠈꠣꠘ ꠈꠥꠟꠣ ꠅꠁꠟ।
REV 15:6 ꠅꠃ ꠡꠝꠄ ꠢꠃ ꠡꠣꠔꠎꠘ ꠚꠤꠞꠤꠡ꠆ꠔꠣꠄ ꠡꠣꠔꠐꠣ ꠉꠎꠛ ꠟꠁꠀ ꠇꠣꠛꠣ ꠊꠞ ꠕꠣꠇꠤ ꠛꠣꠞ ꠅꠁꠀ ꠀꠁꠟꠣ। ꠔꠣꠞꠣꠞ ꠚꠤꠘ꠆ꠘꠞ ꠟꠦꠛꠣꠍ ꠀꠍꠤꠟ ꠌꠇꠌꠇꠣ ꠙꠞꠤꠡ꠆ꠇꠣꠞ ꠀꠞ ꠛꠥꠇꠥꠔ ꠀꠍꠤꠟ ꠡꠥꠘꠣꠟꠤ ꠙꠐ꠆ꠐꠤ।
REV 15:7 ꠢꠃ ꠌꠣꠁꠞꠎꠘ ꠎꠣꠘꠖꠣꠞꠞ ꠄꠇꠎꠘꠦ ꠅꠃ ꠡꠣꠔꠅ ꠚꠤꠞꠤꠡ꠆ꠔꠣꠞꠦ ꠡꠣꠔꠐꠣ ꠡꠥꠘꠣꠞ ꠛꠣꠐꠤ ꠖꠤꠟꠣ। ꠁ ꠡꠣꠔꠅ ꠛꠣꠐꠤ ꠜꠞꠣ ꠀꠍꠤꠟ ꠈꠣꠟꠤ ꠀꠟ꠆ꠟꠣ ꠙꠣꠇꠞ ꠉꠥꠍꠣ, ꠎꠦꠁꠘ ꠎꠥꠉꠦ ꠎꠥꠉꠦ ꠢꠞ-ꠢꠣꠝꠦꠡꠣ ꠎꠤꠘ꠆ꠖꠣ ꠀꠍꠂꠘ।
REV 15:8 ꠀꠟ꠆ꠟꠣꠞ ꠇꠥꠖꠞꠔꠤ ꠝꠢꠤꠝꠣ ꠕꠣꠇꠤ ꠎꠦ ꠗꠥꠝꠣ ꠛꠣꠞꠘꠤꠔ ꠀꠍꠤꠟ, ꠅꠃ ꠗꠥꠝꠣꠄ ꠀꠡ꠆ꠔꠣ ꠊꠞ ꠜꠞꠤ ꠉꠦꠟ। ꠀꠞ ꠅꠃ ꠡꠣꠔꠎꠘ ꠚꠤꠞꠤꠡ꠆ꠔꠣꠞ ꠡꠣꠔꠐꠣ ꠉꠎꠛ ꠘꠣ ꠚꠥꠠꠣꠘꠤ ꠙꠞ꠆ꠎꠘ꠆ꠔ ꠇꠦꠃ ꠉꠤꠀ ꠇꠣꠛꠣ ꠊꠞꠅ ꠢꠣꠝꠣꠁꠔ ꠙꠣꠞꠟ ꠘꠣ।
REV 16:1 ꠛꠣꠖꠦ ꠀꠝꠤ ꠢꠥꠘꠟꠣꠝ, ꠢꠃ ꠇꠣꠛꠣ ꠊꠞ ꠕꠣꠇꠤ ꠄꠇꠎꠘꠦ ꠅꠃ ꠡꠣꠔꠅ ꠚꠤꠞꠤꠡ꠆ꠔꠣꠞꠦ ꠎꠥꠞꠦ ꠎꠥꠞꠦ ꠒꠣꠇꠤꠀ ꠇꠁꠞꠣ, “ꠔꠥꠝꠞꠣ ꠎꠣꠅ, ꠉꠤꠀ ꠀꠟ꠆ꠟꠣꠞ ꠉꠎꠛꠦ ꠜꠞꠣ ꠅꠃ ꠡꠣꠔꠅ ꠛꠣꠐꠤ ꠖꠥꠘꠤꠀꠞ ꠃꠙꠞꠦ ꠃꠚꠁꠔ ꠇꠞꠤ ꠓꠣꠟꠤ ꠖꠦꠅ।”
REV 16:2 ꠔꠦꠃ ꠙꠄꠟꠣ ꠚꠤꠞꠤꠡ꠆ꠔꠣꠄ ꠉꠤꠀ ꠔꠣꠘ ꠛꠣꠐꠤ ꠖꠥꠘꠤꠀꠞ ꠃꠙꠞꠦ ꠃꠚꠁꠔ ꠇꠞꠟꠣ। ꠄꠞꠟꠣꠉꠤ ꠎꠣꠞꠣꠞ ꠉꠔꠞꠅ ꠢꠃ ꠎꠣꠘꠥꠀꠞꠞ ꠡꠤꠟ ꠀꠍꠤꠟ, ꠎꠦꠞꠣ ꠔꠣꠞ ꠝꠥꠞ꠆ꠔꠤꠞ ꠙꠥꠎꠣ ꠇꠞꠔ, ꠁꠔꠣ ꠢꠇ꠆ꠇꠟꠐꠤꠞ ꠉꠔꠞꠅ ꠄꠇ ꠎꠣꠔꠞ ꠈꠥꠛ ꠛꠣꠖ ꠛꠤꠡ ꠚꠥꠠꠣ ꠖꠦꠈꠣ ꠖꠤꠟ।
REV 16:3 ꠖꠥꠍꠞꠣ ꠚꠤꠞꠤꠡ꠆ꠔꠣꠄ ꠔꠣꠘ ꠛꠣꠐꠤ ꠖꠞꠤꠀꠞ ꠃꠙꠞꠦ ꠃꠚꠁꠔ ꠇꠞꠟꠣ। ꠔꠦꠃ ꠖꠞꠤꠀꠞ ꠢꠇꠟ ꠙꠣꠘꠤ ꠝꠞꠣ ꠝꠣꠘꠡꠞ ꠟꠃꠞ ꠟꠣꠈꠣꠘ ꠅꠁꠉꠦꠟ, ꠖꠞꠤꠀꠞ ꠢꠇꠟ ꠎꠣꠘꠖꠣꠞ ꠝꠞꠤꠉꠦꠟ।
REV 16:4 ꠀꠞ ꠔꠤꠘ ꠘꠝ꠆ꠛꠞ ꠚꠤꠞꠤꠡ꠆ꠔꠣꠄ ꠔꠣꠘ ꠛꠣꠐꠤ ꠉꠣꠋ ꠀꠞ ꠢꠇꠟ ꠈꠣꠟ-ꠛꠤꠟꠞ ꠃꠙꠞꠦ ꠃꠚꠁꠔ ꠇꠞꠟꠣ। ꠄꠞꠟꠣꠉꠤ ꠁꠔꠣ ꠅꠁꠉꠦꠟ ꠟꠃꠞ ꠉꠣꠋ ꠀꠞ ꠈꠣꠟ-ꠛꠤꠟ।
REV 16:5 ꠀꠞ ꠀꠝꠤ ꠢꠥꠘꠟꠣꠝ, ꠙꠣꠘꠤꠞ ꠃꠙꠞꠦ ꠎꠦ ꠚꠤꠞꠤꠡ꠆ꠔꠣꠞ ꠈꠦꠝꠔꠣ ꠀꠍꠤꠟ, ꠄꠁꠘ ꠇꠁꠞꠣ, “ꠅ ꠙꠣꠇ-ꠙꠛꠤꠔ꠆ꠞ ꠀꠟ꠆ꠟꠣ, ꠔꠥꠝꠤ ꠀꠉꠦꠅ ꠀꠍꠟꠣꠄ, ꠅꠈꠘꠅ ꠀꠍ। ꠔꠥꠝꠤ ꠢꠇ-ꠁꠘꠍꠣꠚꠇꠣꠞꠤ, ꠔꠥꠝꠤꠃ ꠔ ꠁ ꠉꠎꠛꠤ ꠡꠣꠎꠣ ꠖꠤꠞꠣꠄ।
REV 16:6 ꠁꠉꠥꠁꠘ꠆ꠔꠦ ꠙꠣꠇ ꠛꠘ꠆ꠖꠣ ꠅꠇꠟꠞ ꠟꠃ ꠏꠞꠣꠁꠍꠦ, ꠘꠛꠤ ꠅꠇꠟꠞꠅ ꠟꠃ ꠏꠞꠣꠁꠍꠦ। ꠄꠞꠖꠣꠄꠃ ꠔꠥꠝꠤ ꠁꠔꠣꠞꠦ ꠅꠃ ꠟꠃ ꠈꠣꠛꠣꠁꠞꠣꠄ, ꠁꠔꠣꠃ ꠔꠣꠞꠣꠞ ꠡꠑꠤꠇ ꠙꠣꠅꠘꠣ ꠡꠣꠎꠣ।”
REV 16:7 ꠀꠝꠤ ꠢꠥꠘꠟꠣꠝ, ꠇꠥꠞꠛꠣꠘꠤ ꠈꠣꠘꠣꠄ ꠡꠣꠄ ꠖꠤꠟꠣ, “ꠅ ꠡꠞ꠆ꠛ-ꠡꠇ꠆ꠔꠤꠝꠣꠘ ꠝꠣꠛꠥꠖ ꠀꠟ꠆ꠟꠣ, ꠔꠥꠝꠣꠞ ꠢꠇꠟ ꠛꠤꠌꠣꠞꠃ ꠢꠇ ꠀꠞ ꠡꠑꠤꠇ।”
REV 16:8 ꠌꠣꠁꠞ ꠘꠝ꠆ꠛꠞ ꠚꠤꠞꠤꠡ꠆ꠔꠣꠄ ꠔꠣꠘ ꠛꠣꠐꠤ ꠡꠥꠞꠥꠎꠞ ꠃꠙꠞꠦ ꠃꠚꠁꠔ ꠇꠞꠟꠣ। ꠔꠦꠃ ꠡꠥꠞꠥꠎꠞꠦ ꠈꠦꠝꠔꠣ ꠖꠦꠅꠀ ꠅꠁꠟ, ꠝꠣꠘꠡꠞꠦ ꠀꠉꠥꠘꠤꠔ ꠎꠣꠟꠣꠁꠀ ꠇꠥꠟꠡ ꠔꠥꠟꠣꠞ ꠟꠣꠉꠤ।
REV 16:9 ꠅꠃ ꠡꠝꠄ ꠈꠥꠛ ꠉꠞꠝꠦ ꠝꠣꠘꠡꠞ ꠡꠞꠤꠟ ꠎꠟꠤ ꠉꠦꠟ, ꠀꠞ ꠅꠃ ꠉꠎꠛ ꠅꠇꠟꠞ ꠃꠙꠞꠦ ꠎꠣꠘ ꠈꠦꠝꠔꠣ ꠀꠍꠦ, ꠢꠃ ꠀꠟ꠆ꠟꠣꠞ ꠛꠤꠞꠥꠖ꠆ꠖꠦ ꠔꠣꠞꠣ ꠇꠥꠚꠥꠞꠤ ꠝꠣꠔ ꠝꠣꠔꠤꠟ। ꠅꠔꠔꠣꠞ ꠛꠣꠖꠦꠅ ꠔꠣꠞꠣ ꠔꠃꠛꠣ ꠇꠞꠟ ꠘꠣ, ꠛꠣ ꠀꠟ꠆ꠟꠣꠞ ꠔꠣꠞꠤꠚꠅ ꠇꠞꠟ ꠘꠣ।
REV 16:10 ꠛꠣꠖꠦ ꠙꠣꠌ ꠘꠝ꠆ꠛꠞ ꠚꠤꠞꠤꠡ꠆ꠔꠣꠄ ꠢꠃ ꠎꠣꠘꠥꠀꠞꠞ ꠉꠖꠤꠞ ꠃꠙꠞꠦ ꠔꠣꠘ ꠛꠣꠐꠤ ꠃꠚꠁꠔ ꠇꠞꠟꠣ। ꠔꠦꠃ ꠁ ꠎꠣꠘꠥꠀꠞꠞ ꠛꠣꠖꠡꠣꠁ ꠀꠘ꠆ꠖꠣꠁꠞ ꠅꠁꠉꠦꠟ। ꠝꠣꠘꠡꠦ ꠎꠣꠟꠣ-ꠎꠘꠔ꠆ꠞꠘꠣꠄ ꠎꠣꠞꠎꠤꠞ ꠎꠤꠜꠅ ꠇꠣꠝꠠꠣꠁꠟ।
REV 16:11 ꠅꠃ ꠎꠣꠟꠣ-ꠎꠘꠔ꠆ꠞꠘꠣ ꠀꠞ ꠡꠞꠤꠟꠞ ꠛꠤꠡ ꠚꠥꠠꠣꠞ ꠇꠣꠞꠘꠦ ꠔꠣꠞꠣ ꠛꠦꠢꠦꠡ꠆ꠔꠤ ꠀꠟ꠆ꠟꠣꠞ ꠛꠤꠞꠥꠖ꠆ꠖꠦ ꠇꠥꠚꠥꠞꠤ ꠝꠣꠔꠅ ꠞꠁꠟ, ꠅꠔꠣꠞ ꠛꠣꠖꠦꠅ ꠔꠣꠞꠣꠞ ꠛꠖ ꠇꠣꠝꠞ ꠟꠣꠉꠤ ꠔꠃꠛꠣ ꠇꠞꠟ ꠘꠣ।
REV 16:12 ꠀꠞ ꠍꠄ ꠘꠝ꠆ꠛꠞ ꠚꠤꠞꠤꠡ꠆ꠔꠣꠄ ꠢꠃ ꠝꠢꠣ ꠉꠣꠋ ꠚꠥꠞꠣꠔꠞ ꠃꠙꠞꠦ ꠔꠣꠘ ꠉꠎꠛꠤ ꠛꠣꠐꠤ ꠃꠚꠁꠔ ꠇꠞꠟꠣ। ꠔꠦꠃ ꠉꠣꠋꠉꠞ ꠙꠣꠘꠤ ꠢꠥꠇꠣꠁꠀ ꠙꠥꠛꠞ ꠖꠦꠡꠞ ꠞꠣꠎꠣ ꠅꠇꠟꠞ ꠎꠣꠁꠛꠣꠞ ꠙꠕ ꠅꠁꠟ।
REV 16:13 ꠅꠃ ꠡꠝꠄ ꠀꠝꠤ ꠖꠦꠈꠟꠣꠝ, ꠛꠦꠋꠉꠞ ꠟꠣꠈꠣꠘ ꠔꠤꠘꠐꠣ ꠜꠥꠔ। ꠁ ꠔꠤꠘꠅꠐꠣ ꠢꠃ ꠖꠣꠘꠛ, ꠢꠃ ꠎꠣꠘꠥꠀꠞ ꠀꠞ ꠢꠃ ꠜꠘ꠆ꠒ ꠘꠛꠤꠞ ꠝꠥꠈ ꠕꠣꠇꠤ ꠛꠣꠞ ꠅꠁꠀ ꠀꠁꠍꠦ।
REV 16:14 ꠅꠃ ꠜꠥꠔ ꠅꠇꠟꠦ ꠇꠦꠞꠣꠝꠔꠤ ꠇꠣꠝ ꠖꠦꠈꠣꠘꠤꠔ ꠀꠍꠤꠟ। ꠔꠣꠞꠣ ꠢꠣꠞꠣ ꠎꠉꠔꠞ ꠞꠣꠎꠣ ꠅꠇꠟꠞꠦ ꠄꠇꠈꠣꠘꠅ ꠖꠟꠣ ꠇꠞꠟ, ꠡꠞ꠆ꠛ-ꠡꠇ꠆ꠔꠤꠝꠣꠘ ꠀꠟ꠆ꠟꠣꠞ ꠢꠃ ꠝꠢꠣꠘ ꠖꠤꠘꠅ ꠎꠥꠖ꠆ꠖ ꠇꠞꠣꠞ ꠟꠣꠉꠤ।
REV 16:15 ꠝꠘꠅ ꠞꠣꠈꠤꠅ, ꠢꠎꠞꠔ ꠁꠍꠣꠄ ꠇꠁꠞꠣ, “ꠢꠥꠘꠅ, ꠀꠝꠤ ꠔ ꠌꠥꠞꠞ ꠟꠣꠈꠣꠘ ꠘꠤꠞꠣꠟꠣꠄ ꠀꠁꠝꠥ। ꠔꠦ ꠗꠁꠘ꠆ꠘ ꠢꠃ ꠎꠘ, ꠎꠦ ꠎꠘ ꠢꠎꠣꠉ ꠞꠁꠛ ꠀꠞ ꠘꠤꠎꠞ ꠟꠦꠛꠣꠍ ꠚꠤꠘ꠆ꠖꠤꠀ ꠞꠁꠛ, ꠎꠣꠔꠦ ꠢꠦ ꠟꠦꠝꠐꠣ ꠅꠁꠀ ꠊꠥꠞꠣ ꠘꠣ ꠟꠣꠉꠦ, ꠀꠞ ꠝꠣꠘꠡꠦ ꠔꠣꠞ ꠡꠞꠝ ꠘꠣ ꠖꠦꠈꠦ।”
REV 16:16 ꠁꠛꠞꠣꠘꠤ ꠜꠣꠡꠣꠄ ꠎꠦ ꠎꠣꠉꠣꠞ ꠘꠣꠝ ꠀꠞ-ꠝꠣꠎꠣꠖ꠆ꠖꠥꠘ, ꠜꠥꠔ ꠅꠇꠟꠦ ꠢꠃ ꠞꠣꠎꠣꠁꠘ꠆ꠔꠞꠦ ꠀꠘꠤꠀ ꠅꠘꠅ ꠖꠟꠣ ꠇꠞꠟꠣ।
REV 16:17 ꠛꠣꠖꠦ ꠡꠣꠔ ꠘꠝ꠆ꠛꠞ ꠚꠤꠞꠤꠡ꠆ꠔꠣꠄ ꠔꠣꠘ ꠛꠣꠐꠤ ꠛꠣꠔꠣꠡꠞ ꠃꠙꠞꠦ ꠃꠚꠁꠔ ꠇꠞꠟꠣ। ꠅꠃ ꠡꠝꠄ ꠛꠦꠢꠦꠡ꠆ꠔꠤ ꠄꠛꠣꠖꠔ ꠈꠣꠘꠣꠞ ꠔꠈ꠆ꠔ ꠕꠣꠇꠤ ꠎꠥꠞꠦ ꠎꠥꠞꠦ ꠅꠃ ꠀꠅꠀꠎ ꠅꠁꠟ, “ꠅꠈꠘ ꠅꠁꠍꠦ।”
REV 16:18 ꠔꠦꠃ ꠝꠦꠊꠞ ꠎꠤꠟꠇꠣꠘꠤ, ꠉꠥꠠ-ꠉꠥꠠꠤ ꠒꠣꠇ ꠀꠞ ꠑꠣꠐꠣ ꠙꠠꠔ ꠟꠣꠉꠟ, ꠄꠞꠟꠉꠦ ꠅꠟꠣ ꠛꠦꠎꠥꠁꠔꠣ ꠜꠂꠍꠣꠟ ꠅꠁꠟ, ꠁꠟꠣ ꠜꠂꠍꠣꠟ ꠖꠥꠘꠤꠀꠔ ꠝꠣꠘꠥꠡ ꠙꠄꠖꠣ ꠕꠣꠇꠤ ꠅꠈꠘ ꠙꠞ꠆ꠎꠘ꠆ꠔ ꠇꠥꠘꠥꠖꠤꠘ ꠅꠁꠍꠦ ꠘꠣ।
REV 16:19 ꠢꠃ ꠝꠢꠣꠘ ꠐꠣꠃꠘ ꠔꠤꠘ ꠐꠥꠇꠞꠣ ꠅꠁꠉꠦꠟ, ꠖꠥꠘꠤꠀꠞ ꠘꠣꠘꠣꠘ ꠎꠣꠔꠤꠞ ꠐꠣꠃꠘ ꠅꠇꠟ ꠌꠥꠞꠝꠣꠞ ꠅꠁꠉꠦꠟ। ꠀꠞ ꠀꠟ꠆ꠟꠣ ꠙꠣꠇꠞ ꠝꠘꠅ ꠅꠁꠟ, ꠢꠃ ꠘꠣꠝꠇꠞꠣ ꠛꠣꠛꠤꠟ ꠐꠣꠃꠘꠞ ꠇꠕꠣ, ꠔꠣꠁꠘ ꠔꠣꠘ ꠘꠤꠎꠞ ꠉꠎꠛꠤ ꠘꠤꠡꠣ-ꠙꠣꠘꠤꠞ ꠙꠤꠀꠟꠣ ꠜꠞꠤꠀ ꠅꠃ ꠛꠣꠛꠤꠟꠞꠦ ꠈꠣꠛꠣꠁꠟꠣ।
REV 16:20 ꠅꠃ ꠡꠝꠄ ꠔꠣꠝꠣꠝ ꠖꠤꠙ ꠅꠇꠟ ꠜꠣꠉꠤꠀ ꠉꠦꠟꠉꠤ, ꠙꠣꠠ ꠅꠇꠟꠞꠦ ꠀꠞ ꠖꠦꠈꠣ ꠉꠦꠟ ꠘꠣ।
REV 16:21 ꠀꠍꠝꠣꠘ ꠕꠣꠇꠤ ꠛꠠ ꠛꠠ ꠙꠣꠔ꠆ꠔꠞꠞ ꠟꠣꠈꠣꠘ ꠢꠤꠟ ꠅꠇꠟ ꠝꠣꠘꠡꠞ ꠃꠙꠞꠦ ꠙꠠꠣꠔ ꠞꠁꠟ। ꠁꠔꠣ ꠄꠇꠅ ꠙꠣꠔ꠆ꠔꠞꠞ ꠃꠎꠘ ꠅꠁꠟ, ꠅꠘꠥꠝꠣꠘ ꠄꠇ ꠝꠘ। ꠅꠃ ꠢꠤꠟꠞ ꠉꠎꠛꠞ ꠟꠣꠉꠤ ꠝꠣꠘꠡꠦ ꠀꠟ꠆ꠟꠣꠞ ꠛꠤꠞꠥꠖ꠆ꠖꠦ ꠇꠥꠚꠥꠞꠤ ꠝꠣꠔ ꠝꠣꠔꠤꠟ, ꠁꠔꠣ ꠀꠍꠤꠟ ꠈꠥꠛ ꠝꠣꠞꠣꠔ꠆ꠔꠇ ꠉꠎꠛ।
REV 17:1 ꠎꠦ ꠡꠣꠔꠎꠘ ꠚꠤꠞꠤꠡ꠆ꠔꠣꠞ ꠀꠔꠅ ꠡꠣꠔꠐꠣ ꠛꠣꠐꠤ ꠀꠍꠤꠟ, ꠄꠞꠣꠞ ꠝꠣꠎꠞ ꠄꠇꠎꠘꠦ ꠀꠁꠀ ꠀꠝꠣꠞꠦ ꠇꠁꠟꠣ, “ꠀꠅ, ꠀꠁꠀ ꠖꠦꠈꠅ, ꠛꠃꠔ ꠙꠣꠘꠤꠞ ꠃꠙꠞꠦ ꠎꠦ ꠝꠢꠣ ꠛꠖꠝꠣꠁꠡꠘꠤ ꠛꠁꠍꠦ, ꠔꠣꠁꠞ ꠇꠤꠔꠣ ꠡꠣꠎꠣ ꠅꠁꠛ।
REV 17:2 ꠎꠉꠔꠞ ꠞꠣꠎꠣ ꠅꠇꠟꠦ ꠔꠣꠁꠞ ꠟꠉꠦ ꠎꠤꠘꠣ ꠇꠞꠍꠟꠣ, ꠢꠘꠞ ꠝꠣꠘꠡꠦ ꠔꠣꠁꠞ ꠎꠤꠘꠣꠞ ꠘꠤꠡꠣ-ꠙꠣꠘꠤ ꠈꠣꠁꠀ ꠐꠣꠟ ꠅꠁꠍꠟꠣ।”
REV 17:3 ꠛꠣꠖꠦ ꠢꠃ ꠚꠤꠞꠤꠡ꠆ꠔꠣꠄ ꠞꠥꠢꠣꠘꠤ ꠢꠣꠟꠔꠦ ꠀꠝꠣꠞꠦ ꠝꠞꠥꠜꠥꠝꠤꠔ ꠘꠤꠟꠣ। ꠢꠘꠅ ꠀꠝꠤ ꠖꠦꠈꠟꠣꠝ, ꠟꠣꠟ ꠞꠋꠉꠞ ꠄꠇ ꠎꠣꠘꠥꠀꠞꠞ ꠃꠙꠞꠦ ꠄꠇ ꠛꠦꠐꠤ ꠛꠁꠞꠁꠍꠦ। ꠅꠃ ꠎꠣꠘꠥꠀꠞꠞ ꠉꠔꠞꠅ ꠛꠃꠔ ꠇꠥꠚꠥꠞꠤ ꠘꠣꠝ ꠟꠦꠈꠣ ꠀꠍꠦ। ꠅꠉꠥꠞ ꠡꠣꠔꠉꠥ ꠇꠟ꠆ꠟꠣ ꠀꠞ ꠖꠡꠉꠥ ꠢꠤꠋ ꠖꠦꠈꠟꠣꠝ।
REV 17:4 ꠅꠃ ꠛꠦꠐꠤꠄ ꠟꠣꠟ ꠀꠞ ꠛꠣꠁꠋꠉꠘꠤ ꠞꠋꠉꠞ ꠈꠥꠛ ꠖꠣꠝꠤ ꠇꠣꠙꠠ ꠚꠤꠘ꠆ꠖꠤꠍꠦ, ꠔꠣꠁ ꠡꠥꠘꠣ ꠀꠞ ꠖꠣꠝꠤ ꠖꠣꠝꠤ ꠝꠘꠤ-ꠝꠥꠇ꠆ꠔꠣꠞ ꠉꠄꠘꠣꠖꠤ ꠢꠣꠎꠤꠍꠦ। ꠔꠣꠁꠞ ꠀꠔꠅ ꠎꠤꠘꠣꠞ ꠝꠄꠟꠣ ꠀꠞ ꠘꠣꠘꠣꠘ ꠘꠝꠥꠘꠣꠞ ꠘꠚꠞꠔꠤ ꠎꠤꠘꠤꠡꠦ ꠜꠞꠣ ꠡꠥꠘꠣꠞ ꠄꠇ ꠙꠤꠀꠟꠣ।
REV 17:5 ꠔꠣꠁꠞ ꠇꠙꠣꠟꠅ ꠅꠟꠣ ꠄꠇ ꠘꠣꠝ ꠟꠦꠈꠣ ꠀꠍꠤꠟ, ꠁ ꠟꠦꠈꠣꠞ ꠄꠇ ꠉꠥꠙꠘ ꠝꠣꠘꠤ ꠀꠍꠤꠟ। ꠁ ꠘꠣꠝ ꠅꠁꠟ, “ꠘꠣꠝꠇꠞꠣ ꠛꠣꠛꠤꠟ ꠐꠣꠃꠘ, ꠛꠖꠝꠣꠁꠡ ꠛꠦꠐꠤꠘ ꠀꠞ ꠎꠉꠔꠞ ꠢꠇꠟ ꠘꠚꠞꠔꠤ ꠎꠤꠘꠤꠡꠞ ꠝꠣ।”
REV 17:6 ꠀꠝꠤ ꠖꠦꠈꠟꠣꠝ, ꠅꠃ ꠛꠦꠐꠤꠄ ꠀꠟ꠆ꠟꠣꠞ ꠙꠣꠇ ꠛꠘ꠆ꠖꠣ ꠅꠇꠟꠞ ꠟꠃ ꠀꠞ ꠎꠦꠞꠣ ꠢꠎꠞꠔ ꠁꠍꠣꠞ ꠇꠕꠣ ꠔꠛꠟꠤꠉ ꠇꠞꠦ, ꠄꠞꠣꠞ ꠟꠃ ꠈꠣꠁꠀ ꠐꠣꠟ ꠅꠁꠉꠦꠍꠦ। ꠔꠣꠁꠞꠦ ꠖꠦꠈꠤꠀ ꠀꠝꠤ ꠀꠌꠣꠘꠇ ꠔꠣꠁꠎ꠆ꠎꠥꠛ ꠅꠁꠟꠣꠝ।
REV 17:7 ꠔꠦꠃ ꠢꠃ ꠚꠤꠞꠤꠡ꠆ꠔꠣꠄ ꠀꠝꠣꠞꠦ ꠇꠁꠟꠣ, “ꠔꠥꠝꠤ ꠔꠣꠁꠎ꠆ꠎꠥꠛ ꠅꠁꠉꠦꠟꠣꠄ ꠇꠦꠘꠦ? ꠅꠃ ꠛꠦꠐꠤꠞ ꠛꠦꠙꠣꠞꠦ, ꠀꠞ ꠎꠦ ꠎꠣꠘꠥꠀꠞꠦ ꠔꠣꠁꠞꠦ ꠛꠁꠀ ꠘꠦꠞ, ꠎꠦꠉꠥꠞ ꠡꠣꠔꠉꠥ ꠇꠟ꠆ꠟꠣ ꠀꠞ ꠖꠡꠉꠥ ꠢꠤꠋ, ꠁꠔꠣꠞ ꠉꠥꠙꠘ ꠜꠦꠖ ꠀꠝꠤ ꠔꠥꠝꠣꠞꠦ ꠎꠣꠘꠣꠁꠀꠞ।
REV 17:8 ꠔꠥꠝꠤ ꠎꠦ ꠎꠣꠘꠥꠀꠞ ꠖꠦꠈꠍꠤꠟꠣꠄ, ꠁꠉꠥ ꠀꠉꠦ ꠀꠍꠤꠟ, ꠅꠈꠘ ꠘꠣꠁ, ꠛꠣꠖꠦ ꠢꠦ ꠢꠣꠛꠤꠀ ꠖꠥꠎꠈ ꠕꠣꠇꠤ ꠃꠑꠤꠀ ꠀꠁꠀ ꠌꠤꠞꠇꠣꠟꠞ ꠟꠣꠉꠤ ꠡꠣꠎꠣ ꠙꠣꠁꠛ। ꠢꠃ ꠎꠦꠞꠣ ꠅꠃ ꠎꠉꠔꠞ ꠝꠣꠘꠥꠡ, ꠎꠦꠔꠣꠞ ꠘꠣꠝ ꠖꠥꠘꠤꠀꠞ ꠙꠄꠟꠣ ꠕꠣꠇꠤꠃ ꠀꠟ꠆ꠟꠣꠞ ꠎꠤꠘ꠆ꠖꠦꠉꠤ ꠈꠣꠔꠣꠔ ꠟꠦꠈꠣ ꠘꠣꠁ, ꠔꠣꠞꠣ ꠅꠃ ꠎꠣꠘꠥꠀꠞꠞꠦ ꠖꠦꠈꠤꠀ ꠔꠣꠁꠎ꠆ꠎꠥꠛ ꠅꠁꠎꠤꠛꠣ, ꠇꠣꠞꠘ ꠁꠉꠥ ꠀꠉꠦ ꠀꠍꠤꠟ, ꠅꠈꠘ ꠘꠣꠁ, ꠅꠕꠌ ꠢꠤꠞꠛꠣꠞ ꠖꠦꠈꠣ ꠖꠤꠛ।
REV 17:9 “ꠢꠥꠘꠅ, ꠅꠈꠘ ꠎꠦꠔꠣ ꠛꠣꠔꠣꠁꠟ ꠅꠁꠛ, ꠁꠔꠣ ꠛꠥꠎꠣꠞ ꠟꠣꠉꠤ ꠀꠈꠟꠞ ꠖꠞꠇꠣꠞ। ꠅꠃ ꠡꠣꠔꠅ ꠇꠟ꠆ꠟꠣ ꠅꠁꠟꠉꠤ, ꠡꠣꠔꠐꠣ ꠙꠣꠠ, ꠎꠦ ꠙꠣꠠꠞ ꠃꠙꠞꠦ ꠅꠃ ꠛꠦꠐꠤ ꠛꠁꠍꠦ। ꠅꠃ ꠡꠣꠔꠅ ꠇꠟ꠆ꠟꠣꠞꠦ ꠡꠣꠔꠎꠘ ꠞꠣꠎꠣꠅ ꠛꠥꠎꠣ ꠎꠣꠁꠛ।
REV 17:10 ꠄꠞꠣꠞ ꠝꠣꠎꠞ ꠙꠣꠌ ꠞꠣꠎꠣ ꠀꠉꠦꠃ ꠡꠦꠡ ꠅꠁꠉꠦꠍꠦ। ꠄꠇꠎꠘ ꠅꠈꠘ ꠀꠍꠦ ꠀꠞ ꠄꠇꠎꠘ ꠅꠈꠘꠅ ꠀꠁꠍꠦ ꠘꠣ। ꠅꠃ ꠞꠣꠎꠣ ꠀꠁꠀ ꠢꠣꠞꠟꠦ ꠕꠥꠠꠣ ꠇꠄꠖꠤꠘ ꠞꠁꠔꠦꠃ ꠅꠁꠛ।
REV 17:11 ꠢꠃ ꠎꠦ ꠎꠣꠘꠥꠀꠞ ꠀꠉꠦ ꠀꠍꠤꠟ ꠅꠈꠘ ꠘꠣꠁ, ꠢꠦ ꠡꠣꠔꠎꠘꠞ ꠝꠣꠎꠞ ꠄꠇꠎꠘ ꠅꠁꠟꠦꠅ, ꠢꠦ ꠀꠍꠟꠦ ꠀꠐ ꠘꠝ꠆ꠛꠞ ꠞꠣꠎꠣ। ꠛꠣꠖꠦ ꠢꠦ ꠢꠞ-ꠢꠣꠝꠦꠡꠣ ꠌꠤꠞꠇꠣꠟ ꠡꠣꠎꠣ ꠙꠣꠁꠛ।
REV 17:12 “ꠀꠞ ꠔꠥꠝꠤ ꠎꠦ ꠖꠡꠉꠥ ꠢꠤꠋ ꠖꠦꠈꠍ, ꠁꠔꠣ ꠅꠁꠟꠉꠤ ꠖꠡꠎꠘ ꠞꠣꠎꠣ। ꠔꠣꠞꠣ ꠅꠈꠘꠅ ꠞꠣꠎꠔ꠆ꠔ ꠇꠞꠣ ꠡꠥꠞꠥ ꠇꠞꠍꠦ ꠘꠣ, ꠅꠁꠟꠦ ꠢꠃ ꠎꠣꠘꠥꠀꠞꠞ ꠟꠉꠦ ꠞꠣꠎꠣ ꠛꠘꠤꠀ ꠔꠣꠞꠣ ꠈꠥꠛ ꠇꠝ ꠡꠝꠄ ꠞꠣꠎꠔ꠆ꠔ ꠇꠞꠣꠞ ꠈꠦꠝꠔꠣ ꠙꠣꠁꠛ।
REV 17:13 ꠁ ꠞꠣꠎꠣ ꠅꠇꠟꠞ ꠝꠘ ꠅꠁꠛ ꠄꠇꠁ ꠟꠣꠈꠣꠘ, ꠔꠣꠞꠣ ꠢꠇꠟꠦ ꠔꠣꠞꠣꠞ ꠈꠦꠝꠔꠣ ꠀꠞ ꠄꠈꠔꠤꠀꠞ ꠢꠃ ꠎꠣꠘꠥꠀꠞꠞꠦ ꠖꠤꠟꠣꠁꠛ।
REV 17:14 ꠔꠣꠞꠣ ꠝꠦꠠꠣ-ꠛꠣꠁꠌ꠆ꠌꠣꠞ ꠟꠉꠦ ꠎꠥꠖ꠆ꠖ ꠇꠞꠛ, ꠀꠞ ꠝꠦꠠꠣ-ꠛꠣꠁꠌ꠆ꠌꠣꠄ ꠔꠣꠞꠣꠞꠦ ꠀꠞꠣꠁꠛꠣ। ꠇꠣꠞꠘ ꠔꠣꠁꠘ ꠅꠁꠟꠣ ꠝꠣꠟꠤꠇ ꠅꠇꠟꠞ ꠝꠣꠟꠤꠇ, ꠛꠣꠖꠡꠣ ꠅꠇꠟꠞ ꠛꠣꠖꠡꠣ। ꠀꠞ ꠔꠣꠘ ꠟꠉꠦ ꠎꠦꠞꠣ ꠞꠁꠛꠣ ꠔꠣꠞꠣꠞꠦ ꠖꠣꠅꠔ ꠖꠦꠅꠀ ꠅꠁꠍꠦ, ꠀꠞ ꠛꠣꠍꠤꠀ ꠀꠟꠉꠣꠁꠟ ꠅꠁꠍꠦ, ꠔꠣꠞꠣ ꠢꠇ-ꠢꠣꠟꠣꠟꠤ।”
REV 17:15 ꠛꠣꠖꠦ ꠅꠃ ꠚꠤꠞꠤꠡ꠆ꠔꠣꠄ ꠀꠝꠣꠞꠦ ꠇꠁꠟꠣ, “ꠔꠥꠝꠤ ꠎꠦ ꠙꠣꠘꠤ ꠖꠦꠈꠍ, ꠎꠦ ꠙꠣꠘꠤꠞ ꠃꠙꠞꠦ ꠅꠃ ꠝꠢꠣ ꠛꠖꠝꠣꠁꠡꠘꠤ ꠛꠁꠍꠦ, ꠁꠔꠣ ꠅꠁꠟꠉꠤ ꠛꠃꠔ ꠖꠦꠡ, ꠛꠃꠔ ꠝꠣꠘꠥꠡ, ꠛꠃꠔ ꠎꠣꠔꠤ ꠀꠞ ꠛꠃꠔ ꠎꠣꠔꠞ ꠛꠥꠟꠤꠄ ꠝꠣꠔꠞꠣ ꠝꠣꠘꠥꠡ।
REV 17:16 ꠀꠞ ꠎꠦ ꠖꠡꠉꠥ ꠢꠤꠋ ꠖꠦꠈꠍ, ꠁꠔꠣꠄ ꠀꠞ ꠅꠃ ꠎꠣꠘꠥꠀꠞꠦ ꠁ ꠛꠖꠝꠣꠁꠡꠘꠤꠞꠦ ꠛꠣꠖꠦ ꠊꠤꠘ꠆ꠘꠣꠁꠛꠣ, ꠔꠣꠞꠣ ꠔꠣꠁꠞꠦ ꠙꠕꠞ ꠢꠇꠤꠞ ꠛꠣꠘꠣꠁꠀ ꠟꠦꠝꠐꠣ ꠇꠞꠛꠣ, ꠀꠞ ꠔꠣꠁꠞ ꠉꠥꠡ꠆ꠔ ꠈꠣꠁꠛꠣ, ꠢꠦꠡꠦ ꠔꠣꠁꠞꠦ ꠀꠉꠥꠘꠤꠔ ꠚꠣꠟꠣꠁ ꠎꠣꠟꠣꠁꠛꠣ।
REV 17:17 ꠄꠞ ꠇꠣꠞꠘ ꠅꠁꠟ, ꠀꠟ꠆ꠟꠣꠄ ꠔꠣꠞꠣꠞ ꠖꠤꠟꠞ ꠝꠣꠎꠦ ꠅꠟꠣ ꠄꠇ ꠘꠤꠅꠔ ꠖꠤꠍꠂꠘ, ꠎꠣꠔꠦ ꠔꠣꠘ ꠝꠞ꠆ꠎꠤ ꠙꠥꠞꠣꠙꠥꠞ ꠚꠟꠦ। ꠄꠞꠟꠣꠉꠤ ꠔꠣꠞꠣ ꠄꠇꠝꠔ ꠅꠁꠀ ꠢꠃ ꠎꠣꠘꠥꠀꠞꠞꠦ ꠢꠇ꠆ꠇꠟ ꠈꠦꠝꠔꠣ ꠖꠤꠟꠣꠁꠛꠣ, ꠎꠣꠔꠦ ꠀꠟ꠆ꠟꠣꠞ ꠇꠣꠟꠣꠝ ꠙꠥꠞꠣꠙꠥꠞ ꠚꠟꠤꠛꠣꠞ ꠀꠉ ꠙꠞ꠆ꠎꠘ꠆ꠔ ꠢꠦ ꠞꠣꠎꠔ꠆ꠔ ꠇꠞꠦ।
REV 17:18 ꠔꠥꠝꠤ ꠎꠦ ꠛꠦꠐꠤꠞꠦ ꠖꠦꠈꠍ, ꠁꠉꠥ ꠅꠁꠟꠉꠤ ꠢꠃ ꠘꠣꠝꠇꠞꠣ ꠐꠣꠃꠘ, ꠁ ꠐꠣꠃꠘꠦ ꠎꠉꠔꠞ ꠢꠇꠟ ꠞꠣꠎꠣꠁꠘ꠆ꠔꠞ ꠃꠙꠞꠦ ꠞꠣꠎꠔ꠆ꠔ ꠇꠞꠦꠞ।”
REV 18:1 ꠁꠔꠣꠞ ꠛꠣꠖꠦ ꠀꠝꠤ ꠀꠞꠇ ꠎꠘ ꠚꠤꠞꠤꠡ꠆ꠔꠣꠞꠦ ꠖꠦꠈꠟꠣꠝ, ꠔꠣꠁꠘ ꠛꠦꠢꠦꠡ꠆ꠔ ꠕꠣꠇꠤ ꠟꠣꠝꠤꠀ ꠀꠁꠞꠣ। ꠔꠣꠘ ꠛꠃꠔ ꠛꠠ ꠈꠦꠝꠔꠣ ꠀꠍꠦ, ꠔꠣꠘ ꠝꠢꠤꠝꠣꠞ ꠛꠟꠦ ꠀꠡ꠆ꠔꠣ ꠖꠥꠘꠤꠀꠄ ꠏꠟꠝꠟ ꠇꠞꠟ।
REV 18:2 ꠔꠣꠁꠘ ꠎꠥꠞꠦ ꠎꠥꠞꠦ ꠇꠁꠟꠣ, “ꠛꠤꠘꠣꠡ ꠅꠁꠉꠦꠍꠦ, ꠛꠤꠘꠣꠡ ꠅꠁꠉꠦꠍꠦ, ꠢꠃ ꠘꠣꠝꠇꠞꠣ ꠛꠣꠛꠤꠟ ꠐꠣꠃꠘ। ꠁꠈꠣꠘ ꠅꠈꠘ ꠜꠥꠔꠞ ꠀꠈꠠꠣ ꠅꠁꠍꠦ, ꠢꠇ꠆ꠇꠟ ꠘꠝꠥꠘꠣꠞ ꠜꠥꠔ-ꠙꠦꠞꠔꠞ ꠀꠈꠠꠣ, ꠘꠣꠙꠣꠇ ꠀꠞ ꠎꠊꠁꠘ꠆ꠘ ꠙꠣꠈꠤꠘ꠆ꠔꠞ ꠛꠡꠔ ꠈꠣꠘꠣ ꠅꠁꠍꠦ।
REV 18:3 ꠇꠣꠞꠘ ꠁꠈꠣꠘꠦ ꠔꠣꠁꠞ ꠎꠤꠘꠣꠞ ꠇꠣꠝꠞ ꠛꠦꠎꠥꠁꠔꠣ ꠘꠤꠡꠣ-ꠙꠣꠘꠤ ꠖꠥꠘꠤꠀꠞ ꠢꠇꠟ ꠎꠣꠔꠤꠞꠦ ꠈꠣꠛꠣꠁꠍꠦ। ꠎꠉꠔꠞ ꠞꠣꠎꠣ ꠅꠇꠟꠦ ꠔꠣꠁꠞ ꠟꠉꠦ ꠎꠤꠘꠣ ꠇꠞꠍꠦ, ꠎꠉꠔꠞ ꠛꠦꠙꠣꠞꠤ ꠡꠖꠣꠉꠞ ꠅꠇꠟꠦ ꠅꠈꠣꠘꠞ ꠔꠣꠟꠦ ꠔꠣꠟꠦ ꠟꠣꠉꠣꠝ ꠍꠣꠠꠣ ꠘꠤꠡꠣꠄ ꠗꠘꠤ ꠛꠘꠍꠦ।”
REV 18:4 ꠛꠣꠖꠦ ꠀꠝꠤ ꠢꠥꠘꠟꠣꠝ, ꠛꠦꠢꠦꠡ꠆ꠔ ꠕꠣꠇꠤ ꠀꠞꠇ ꠎꠘꠦ ꠇꠁꠞꠣ, “ꠅ ꠀꠝꠣꠞ ꠛꠘ꠆ꠖꠣ ꠅꠇꠟ, ꠔꠥꠝꠞꠣ ꠛꠣꠛꠤꠟ ꠐꠣꠃꠘ ꠕꠣꠇꠤ ꠛꠣꠞ ꠅꠁꠀ ꠀꠅ, ꠎꠣꠔꠦ ꠔꠥꠝꠞꠣ ꠔꠣꠁꠞ ꠉꠥꠘꠣꠞ ꠜꠣꠉꠤ ꠘꠣ ꠅꠅ। ꠀꠞ ꠔꠣꠁꠞ ꠃꠙꠞꠦ ꠎꠦꠔꠣ ꠉꠎꠛ ꠘꠣꠎꠤꠟ ꠅꠁꠛ, ꠁꠔꠣ ꠉꠎꠛꠦ ꠔꠥꠝꠞꠣꠞꠦ ꠘꠣ ꠙꠣꠄ।
REV 18:5 ꠔꠣꠁꠞ ꠉꠥꠘꠣ ꠉꠤꠀ ꠔ ꠀꠍꠝꠣꠘꠅ ꠟꠣꠉꠤꠉꠦꠍꠦ, ꠔꠣꠁꠞ ꠘꠣꠚꠞꠝꠣꠘꠤꠞ ꠛꠣꠄ ꠀꠟ꠆ꠟꠣꠄ ꠈꠤꠀꠟ ꠇꠞꠍꠂꠘ।
REV 18:6 ꠅꠁꠘ꠆ꠘ ꠎꠘꠞ ꠟꠉꠦ ꠔꠣꠁ ꠎꠦꠟꠣ ꠇꠞꠍꠦ, ꠔꠥꠝꠞꠣꠅ ꠔꠣꠁꠞ ꠟꠉꠦ ꠅꠟꠣ ꠇꠞꠅ, ꠔꠣꠁꠞ ꠇꠣꠝꠞ ꠙꠥꠞꠣꠙꠥꠞ ꠙꠣꠅꠘꠣ ꠔꠣꠁꠞꠦ ꠖꠦꠅ। ꠎꠦ ꠙꠤꠀꠟꠣꠞ ꠝꠣꠎꠦ ꠔꠣꠁ ꠅꠁꠘ꠆ꠘꠞ ꠟꠣꠉꠤ ꠘꠣꠚꠞꠝꠣꠘꠤ ꠉꠥꠟꠣꠁꠔ, ꠅꠃ ꠙꠤꠀꠟꠣꠔ ꠔꠣꠁꠞ ꠙꠥꠞꠣꠙꠥꠞ ꠡꠣꠎꠣ, ꠡꠥꠟ꠆ꠟꠀꠘꠣ ꠡꠣꠎꠣ ꠉꠥꠟꠤꠀ ꠔꠣꠁꠞꠦ ꠈꠣꠛꠣꠅ।
REV 18:7 ꠔꠣꠁ ꠘꠤꠎꠞꠦ ꠟꠁꠀ ꠎꠔꠈꠣꠘ ꠛꠠꠣꠁ ꠇꠞꠍꠦ, ꠎꠔ ꠛꠦꠡꠤ ꠛꠤꠟꠣꠡꠤꠔꠣꠞ ꠝꠣꠎꠦ ꠎꠤꠘ꠆ꠖꠦꠉꠤ ꠇꠣꠐꠣꠁꠍꠦ, ꠑꠤꠇ ꠅꠔꠈꠣꠘ ꠎꠘꠔ꠆ꠞꠘꠣ ꠀꠞ ꠖꠥꠈ ꠔꠣꠁꠞꠦ ꠖꠦꠅ। ꠔꠣꠁ ꠔ ꠝꠘꠦ ꠝꠘꠦ ꠇꠄ, ‘ꠀꠝꠤ ꠇꠥꠘꠥ ꠠꠣꠠꠤ ꠛꠦꠐꠤ ꠘꠤ? ꠀꠝꠤ ꠔ ꠞꠣꠘꠤꠞ ꠀꠡꠘꠅ ꠛꠁꠍꠤ, ꠀꠝꠤ ꠇꠥꠘꠥꠝꠘ꠆ꠔꠦꠃ ꠖꠥꠈ-ꠝꠍꠤꠛꠔꠅ ꠙꠠꠔꠣꠝ ꠘꠣꠄ।’
REV 18:8 ꠄꠞꠟꠣꠉꠤ ꠔꠣꠁꠞ ꠃꠙꠞꠦ ꠄꠇꠖꠤꠘꠦꠃ ꠢꠇꠟ ꠉꠎꠛ ꠙꠠꠛ। ꠁ ꠉꠎꠛ ꠅꠁꠟ ꠝꠃꠔ, ꠛꠤꠟꠣꠙ-ꠀꠢꠣꠎꠣꠞꠤ ꠀꠞ ꠘꠤꠖꠣꠘ। ꠔꠣꠁꠞꠦ ꠀꠉꠥꠁꠘꠖꠤ ꠎꠣꠟꠣꠁꠟ ꠅꠁꠛ, ꠇꠣꠞꠘ ꠎꠦꠁꠘ ꠔꠣꠁꠞ ꠛꠤꠌꠣꠞ ꠇꠞꠛꠣ, ꠁ ꠀꠟ꠆ꠟꠣ ꠝꠣꠛꠥꠖ ꠈꠥꠛ ꠛꠟꠛꠣꠘ।”
REV 18:9 ꠎꠉꠔꠞ ꠎꠔ ꠞꠣꠎꠣ ꠅꠇꠟꠦ ꠅꠉꠥꠞ ꠟꠉꠦ ꠎꠤꠘꠣ ꠇꠞꠍꠦ, ꠔꠣꠁꠞ ꠟꠉꠦ ꠢꠂ-ꠢꠥꠟ꠆ꠟꠣ ꠇꠞꠤ ꠛꠤꠟꠣꠡꠤ ꠖꠤꠘ ꠇꠣꠐꠣꠁꠍꠦ, ꠔꠣꠁꠞꠦ ꠎꠣꠟꠣꠘꠤꠞ ꠛꠣꠟꠣ ꠔꠣꠁꠞ ꠗꠥꠝꠣ ꠖꠦꠈꠤꠀ ꠅꠔꠣꠄ ꠇꠣꠘ꠆ꠖꠤꠛꠣ, ꠔꠣꠁꠞ ꠟꠣꠉꠤ ꠀꠢꠣꠎꠣꠞꠤ ꠇꠞꠛꠣ।
REV 18:10 ꠔꠣꠁꠞ ꠎꠘꠔ꠆ꠞꠘꠣ ꠖꠦꠈꠤꠀ ꠔꠣꠞꠣ ꠒꠞꠣꠁꠀ ꠖꠥꠞꠁ ꠃꠛꠣꠁꠀ ꠇꠁꠛꠣ, “ꠢꠣꠄꠞꠦ ꠛꠣꠛꠤꠟ, ꠢꠣꠄꠞꠦ ꠢꠣꠄ! ꠅꠔ ꠘꠣꠝꠇꠞꠣ ꠐꠣꠃꠘ, ꠅꠔ ꠈꠦꠝꠔꠣꠀꠟꠣ ꠐꠣꠃꠘ! ꠅꠟꠣ ꠎꠟꠖꠤ ꠔꠥꠝꠣꠞ ꠃꠙꠞꠦ ꠉꠎꠛ ꠀꠁꠟ ꠘꠤ?”
REV 18:11 ꠎꠉꠔꠞ ꠛꠦꠙꠣꠞꠤ ꠡꠖꠣꠉꠞ ꠅꠇꠟꠦꠅ ꠔꠣꠁꠞ ꠟꠣꠉꠤ ꠇꠣꠘ꠆ꠖꠤꠛꠣ ꠀꠞ ꠀꠢꠣꠎꠣꠞꠤ ꠇꠞꠛꠣ, ꠇꠣꠞꠘ ꠔꠣꠞꠣꠞ ꠝꠣꠟ-ꠍꠣꠝꠣꠘꠣ ꠅꠈꠘ ꠇꠥꠘꠥ ꠝꠣꠘꠡꠦ ꠟꠁꠔ ꠘꠣꠄ।
REV 18:12 ꠔꠣꠞꠣꠞ ꠁꠔꠣ ꠝꠣꠟ-ꠍꠣꠝꠣꠘꠣ ꠅꠁꠟ, ꠡꠥꠘꠣ, ꠞꠥꠙꠣ, ꠖꠣꠝꠤ ꠖꠣꠝꠤ ꠝꠘꠤ-ꠝꠥꠇ꠆ꠔꠣ, ꠖꠣꠝꠤ ꠖꠣꠝꠤ ꠇꠣꠙꠠ, ꠛꠣꠁꠋꠉꠘꠤ ꠞꠋꠉꠞ ꠛꠣꠖꠡꠣꠁ ꠇꠣꠙꠠ, ꠞꠦꠡꠝꠤ ꠀꠞ ꠟꠣꠟ ꠇꠣꠙꠠ, ꠘꠣꠘꠣꠘ ꠘꠝꠥꠘꠣꠞ ꠈꠥꠡꠛꠄ ꠀꠟꠣ ꠟꠣꠇꠠꠤ, ꠀꠔ꠆ꠔꠤꠞ ꠖꠣꠔꠖꠤ ꠛꠣꠘꠣꠁꠟ ꠘꠣꠘꠣꠘ ꠌꠤꠎ, ꠖꠣꠝꠤ ꠟꠣꠇꠠꠤꠖꠤ ꠛꠣꠘꠣꠁꠟ ꠌꠤꠎ, ꠙꠤꠔꠟ, ꠟꠥꠀ ꠀꠞ ꠝꠣꠞꠛꠦꠟ ꠙꠣꠔ꠆ꠔꠞꠖꠤ ꠛꠣꠘꠣꠁꠟ ꠘꠣꠘꠣꠘ ꠍꠣꠝꠣꠘꠣ,
REV 18:13 ꠒꠣꠁꠟꠌꠤꠘꠤ, ꠄꠟꠣꠁꠌ, ꠀꠉꠞ-ꠈꠥꠡꠛꠄ, ꠝꠥꠞꠣ-ꠀꠔꠞ, ꠟꠥꠛꠣꠘ-ꠀꠉꠞ, ꠀꠋꠉꠥꠞꠞ ꠞꠡ, ꠎꠄꠔꠥꠘꠞ ꠔꠦꠟ, ꠝꠄꠖꠣ-ꠉꠝ, ꠉꠞꠥ-ꠝꠦꠠꠣ, ꠊꠥꠠꠣ ꠀꠞ ꠊꠥꠠꠣꠞ ꠉꠣꠠꠤ, ꠄꠞꠟꠉꠦ ꠈꠞꠤꠖꠣ ꠉꠥꠟꠣꠝ-ꠛꠣꠘ꠆ꠖꠤ ꠅꠇꠟ।
REV 18:14 ꠢꠃ ꠡꠖꠣꠉꠞ ꠅꠇꠟꠦ ꠇꠁꠛꠣ, “ꠅ ꠛꠣꠛꠤꠟ, ꠔꠥꠝꠤ ꠎꠦ ꠀꠞꠣꠝ-ꠀꠄꠄꠡ ꠙꠣꠁꠔꠣꠄ ꠌꠣꠁꠍꠟꠣꠄ, ꠁꠔꠣ ꠔ ꠔꠥꠝꠣꠞ ꠉꠦꠍ ꠕꠣꠇꠤ ꠢꠞꠤꠉꠦꠍꠦ। ꠔꠥꠝꠣꠞ ꠢꠇꠟ ꠗꠘ-ꠍꠣꠝꠣꠘꠣ, ꠎꠣꠇ-ꠎꠝꠇ ꠛꠤꠘꠣꠡ ꠅꠁꠉꠦꠍꠦ। ꠁꠔꠣ ꠔ ꠀꠞ ꠇꠥꠘꠥꠖꠤꠘꠃ ꠚꠤꠞꠔ ꠙꠣꠅꠀ ꠎꠣꠁꠔ ꠘꠣꠄ।”
REV 18:15 ꠎꠦꠔꠣ ꠡꠖꠣꠉꠞ ꠅꠇꠟꠦ ꠅꠔꠣ ꠝꠣꠟꠞ ꠛꠦꠛꠡꠣ ꠇꠞꠤꠀ ꠗꠘꠤ ꠅꠁꠍꠟꠣ, ꠔꠣꠁꠞ ꠎꠘꠔ꠆ꠞꠘꠣ ꠖꠦꠈꠤꠀ ꠢꠃ ꠛꠦꠙꠣꠞꠤ ꠅꠇꠟꠦ ꠒꠞꠣꠁꠀ ꠖꠥꠞꠁ ꠃꠛꠣꠁ ꠞꠁꠛꠣ। ꠔꠣꠞꠣ ꠇꠣꠘ꠆ꠖꠤ ꠇꠣꠘ꠆ꠖꠤ ꠝꠣꠔ꠆ꠔꠝ ꠇꠞꠤꠀ ꠇꠁꠛꠣ,
REV 18:16 “ꠁꠡ, ꠢꠣꠄꠞꠦ ꠢꠣꠄ, ꠖꠣꠝꠤ ꠖꠣꠝꠤ ꠝꠍꠟꠤꠘ ꠇꠣꠙꠠ, ꠛꠣꠁꠋꠉꠘꠤ ꠀꠞ ꠟꠣꠟ ꠞꠋꠉꠞ ꠛꠣꠖꠡꠣꠁ ꠇꠣꠙꠠ ꠚꠤꠘ꠆ꠖꠣ ꠛꠣꠛꠤꠟ ꠐꠣꠃꠘ, ꠡꠥꠘꠣ ꠀꠞ ꠖꠣꠝꠤ ꠖꠣꠝꠤ ꠝꠘꠤ-ꠝꠥꠇ꠆ꠔꠣ ꠖꠤꠀ ꠢꠣꠎꠣꠁꠟ-ꠙꠣꠠꠣꠁꠟ ꠅꠔ ꠘꠣꠝꠇꠞꠣ ꠐꠣꠃꠘ!
REV 18:17 ꠅꠔ ꠎꠟꠖꠤ ꠔꠥꠝꠣꠞ ꠅꠔ ꠗꠘ-ꠍꠣꠝꠣꠘꠣꠞ ꠜꠣꠘ꠆ꠒꠣꠞ ꠛꠤꠘꠣꠡ ꠅꠁꠉꠦꠟ ꠘꠤ?” ꠡꠖꠣꠉꠞꠤ ꠎꠣꠎꠞ ꠡꠣꠞꠋ ꠀꠞ ꠇꠣꠙ꠆ꠔꠣꠘ ꠅꠇꠟꠦ, ꠘꠣꠁꠀ ꠅꠇꠟꠦ, ꠎꠣꠎ ꠀꠞ ꠙꠣꠟꠞ ꠘꠣꠁꠀ ꠇꠣꠞꠛꠣꠞꠤ ꠅꠇꠟꠦ ꠖꠥꠞꠁ ꠃꠛꠣꠁꠀ ꠁꠔꠣ ꠖꠦꠈꠛꠣ।
REV 18:18 ꠔꠣꠁꠞꠦ ꠎꠣꠟꠣꠘꠤꠞ ꠡꠝꠄ ꠔꠣꠁꠞ ꠗꠥꠝꠣ ꠖꠦꠈꠤꠀ ꠔꠣꠞꠣ ꠌꠤꠟ꠆ꠟꠣꠁꠀ ꠇꠁꠛꠣ, “ꠁ ꠐꠣꠃꠘꠞ ꠟꠣꠈꠣꠘ ꠘꠣꠝꠇꠞꠣ, ꠎꠉꠔꠞ ꠀꠞ ꠇꠥꠘꠥ ꠐꠣꠃꠘ ꠀꠍꠤꠟ ꠘꠤ?”
REV 18:19 ꠔꠣꠞꠣ ꠘꠤꠎꠞ ꠝꠣꠕꠣꠔ ꠗꠥꠁꠟ ꠝꠣꠈꠣꠁꠀ ꠌꠤꠟ꠆ꠟꠣ-ꠌꠤꠟ꠆ꠟꠤ ꠇꠞꠛꠣ ꠀꠞ ꠇꠣꠘ꠆ꠖꠤ ꠇꠣꠘ꠆ꠖꠤ ꠝꠣꠔ꠆ꠔꠝ ꠇꠞꠤꠀ ꠇꠁꠛꠣ, “ꠢꠣꠄꠞꠦ ꠢꠣꠄ, ꠢꠃ ꠘꠣꠝꠇꠞꠣ ꠛꠣꠛꠤꠟ ꠐꠣꠃꠘ, ꠢꠣꠄꠞꠦ ꠢꠣꠄ! ꠖꠞꠤꠀꠞ ꠝꠣꠎꠦ ꠎꠦꠞꠣꠞ ꠎꠣꠎ ꠌꠟꠣꠌꠟ ꠇꠞꠦ, ꠔꠣꠞꠣ ꠔ ꠎꠣꠎꠞ ꠇꠣꠝꠣꠁ ꠖꠤꠀ ꠛꠠꠟꠥꠇ ꠅꠁꠍꠟꠣ, ꠅꠈꠘ ꠖꠦꠈꠞꠣꠄ ꠘꠤ, ꠅꠔ ꠎꠟꠖꠤ ꠇꠤꠟꠣ ꠢꠇꠟꠔꠣ ꠛꠤꠘꠣꠡ ꠅꠁꠉꠦꠟ!”
REV 18:20 ꠅꠃ ꠡꠝꠄ ꠢꠃ ꠚꠤꠞꠤꠡ꠆ꠔꠣꠄ ꠇꠁꠟꠣ, “ꠅ ꠛꠦꠢꠦꠡ꠆ꠔ, ꠔꠥꠝꠤ ꠚꠥꠞ꠆ꠔꠤ ꠇꠞꠅ, ꠅꠃ ꠐꠣꠃꠘꠞꠦ ꠛꠤꠘꠣꠡ ꠇꠞꠣꠄ ꠈꠥꠡꠤ ꠇꠞꠅ। ꠅ ꠀꠟ꠆ꠟꠣꠞ ꠙꠣꠇ ꠛꠘ꠆ꠖꠣ ꠅꠇꠟ, ꠘꠛꠤ-ꠞꠍꠥꠟ ꠅꠇꠟ ꠀꠞ ꠍꠣꠢꠣꠛꠤ ꠅꠇꠟ, ꠚꠥꠞ꠆ꠔꠤ ꠇꠞꠅ। ꠅꠉꠤꠄ ꠔꠥꠝꠞꠣꠞ ꠛꠤꠞꠥꠖ꠆ꠖꠦ ꠎꠔꠔꠣ ꠇꠞꠍꠤꠟ, ꠅꠈꠘ ꠀꠟ꠆ꠟꠣꠄ ꠔꠣꠁꠞ ꠛꠤꠌꠣꠞ ꠇꠞꠍꠂꠘ।”
REV 18:21 ꠛꠣꠖꠦ ꠈꠥꠛ ꠡꠇ꠆ꠔꠤꠀꠟꠣ ꠄꠇ ꠚꠤꠞꠤꠡ꠆ꠔꠣꠄ ꠛꠤꠞꠣꠐ ꠄꠇ ꠙꠣꠔ꠆ꠔꠞ ꠀꠘꠤꠀ ꠖꠞꠤꠀꠔ ꠚꠣꠟꠣꠁꠀ ꠇꠁꠟꠣ, “ꠢꠥꠘꠅ, ꠅꠃ ꠘꠣꠝꠇꠞꠣ ꠛꠣꠛꠤꠟ ꠐꠣꠃꠘꠞꠦꠅ ꠅꠟꠣ ꠒꠦꠇ꠆ꠇꠣ ꠝꠣꠞꠤ ꠚꠣꠟꠣꠁ ꠖꠦꠅꠀ ꠅꠁꠛ, ꠔꠣꠁꠞꠦ ꠀꠞ ꠇꠥꠘꠥꠖꠤꠘ ꠙꠣꠅꠀ ꠎꠣꠁꠔ ꠘꠣꠄ।
REV 18:22 ꠎꠦꠞꠣ ꠡꠣꠞꠤꠘ꠆ꠖꠣ ꠛꠣꠎꠣꠄ, ꠉꠣꠘ ꠉꠣꠄ ꠀꠞ ꠛꠣꠡꠤ ꠛꠣ ꠡꠤꠋꠉꠣ ꠛꠣꠎꠣꠄ, ꠔꠣꠞꠣꠞ ꠀꠅꠀꠎ ꠀꠞ ꠇꠥꠘꠥꠖꠤꠘ ꠔꠥꠝꠣꠞ ꠝꠣꠎꠦ ꠢꠥꠘꠣ ꠎꠣꠁꠔ ꠘꠣꠄ। ꠀꠞ ꠇꠥꠘꠥꠖꠤꠘꠃ ꠔꠥꠝꠣꠞ ꠝꠣꠎꠦ ꠇꠥꠘꠥꠎꠣꠔꠞ ꠝꠦꠡ꠆ꠔꠞꠤ ꠝꠤꠟꠔ ꠘꠣꠄ। ꠇꠥꠘꠥ ꠝꠡꠟꠣ ꠙꠤꠡꠣꠞ ꠙꠣꠐꠣꠞ ꠀꠅꠀꠎ ꠇꠥꠘꠥꠖꠤꠘ ꠢꠥꠘꠣ ꠎꠣꠁꠔ ꠘꠣꠄ।
REV 18:23 ꠔꠥꠝꠣꠞ ꠝꠣꠎꠦ ꠇꠥꠘꠥꠖꠤꠘ ꠇꠥꠘꠥ ꠛꠣꠔ꠆ꠔꠤꠞ ꠚꠞ ꠎꠟꠔ ꠘꠣꠄ। ꠖꠣꠝꠣꠘ꠆ꠖ-ꠇꠁꠘꠣꠞ ꠉꠟꠣꠞ ꠀꠅꠀꠎ ꠀꠞ ꠇꠥꠘꠥꠖꠤꠘ ꠔꠥꠝꠣꠞ ꠝꠣꠎꠦ ꠢꠥꠘꠣ ꠎꠣꠁꠔ ꠘꠣꠄ। ꠇꠣꠞꠘ ꠀꠡ꠆ꠔꠣ ꠎꠉꠔꠞ ꠝꠣꠎꠦ ꠔꠥꠝꠣꠞ ꠡꠖꠣꠉꠞ ꠅꠇꠟ ꠘꠣꠝꠇꠞꠣ ꠀꠍꠤꠟ, ꠎꠉꠔꠞ ꠢꠇꠟ ꠎꠣꠔꠤ ꠔꠥꠝꠣꠞ ꠍꠟ-ꠌꠔꠥꠞꠤꠞ ꠎꠣꠖꠥꠄ ꠙꠣꠉꠟ ꠅꠁꠎꠤꠔ।
REV 18:24 ꠀꠞ ꠘꠛꠤ-ꠞꠍꠥꠟ ꠅꠇꠟꠞꠦ, ꠀꠟ꠆ꠟꠣꠞ ꠙꠣꠇ ꠛꠘ꠆ꠖꠣ ꠅꠇꠟꠞꠦ, ꠀꠞ ꠎꠔ ꠝꠣꠘꠡꠞꠦ ꠁ ꠎꠉꠔꠅ ꠈꠥꠘ ꠇꠞꠣ ꠅꠁꠍꠦ, ꠔꠣꠞꠣꠞ ꠟꠃ ꠔ ꠔꠥꠝꠣꠞ ꠅꠃ ꠛꠣꠛꠤꠟ ꠐꠣꠃꠘꠅ ꠝꠤꠟꠍꠦ।”
REV 19:1 ꠄꠞꠛꠣꠖꠦ ꠀꠝꠤ ꠛꠦꠢꠦꠡ꠆ꠔꠞ ꠝꠣꠎꠦ ꠛꠃꠔ ꠝꠣꠘꠡꠞ ꠜꠤꠠꠞ ꠀꠅꠀꠎ ꠢꠥꠘꠟꠣꠝ। ꠔꠣꠞꠣ ꠇꠁꠞꠣ, “ꠀꠟꠢꠣꠝꠖꠥꠟꠤꠟ꠆ꠟꠣ! ꠝꠢꠤꠝꠣ ꠀꠞ ꠈꠦꠝꠔꠣ, ꠀꠈꠦꠞꠣꠔꠞ ꠘꠣꠎꠣꠔ, ꠢꠇ꠆ꠇꠟꠔꠣꠃ ꠀꠝꠞꠣꠞ ꠀꠟ꠆ꠟꠣꠞ।
REV 19:2 ꠔꠣꠘ ꠛꠤꠌꠣꠞ ꠔ ꠢꠇ ꠀꠞ ꠡꠑꠤꠇ। ꠎꠦ ꠐꠣꠃꠘꠦ ꠘꠤꠎꠞ ꠎꠤꠘꠣꠞ ꠇꠣꠝ ꠖꠤꠀ ꠀꠡ꠆ꠔꠣ ꠖꠥꠘꠤꠀꠞꠦ ꠘꠣꠙꠣꠇ ꠛꠣꠘꠣꠁꠍꠤꠟ, ꠢꠃ ꠝꠢꠣ-ꠛꠖꠝꠣꠁꠡꠘꠤꠞꠦ ꠀꠟ꠆ꠟꠣꠄ ꠡꠣꠎꠣ ꠖꠤꠍꠂꠘ। ꠔꠣꠘ ꠝꠣꠄꠀꠞ ꠉꠥꠟꠣꠝ ꠅꠇꠟꠞ ꠟꠃꠞ ꠛꠖꠟꠣ, ꠔꠣꠁꠘ ꠅꠉꠥꠞ ꠉꠦꠍ ꠕꠣꠇꠤ ꠟꠁꠍꠂꠘ।”
REV 19:3 ꠄꠞꠣ ꠢꠤꠞꠛꠣꠞ ꠇꠁꠟꠣ, “ꠀꠟꠢꠣꠝꠖꠥꠟꠤꠟ꠆ꠟꠣ! ꠅꠉꠥꠞ ꠝꠣꠎ ꠕꠣꠇꠤ ꠢꠞ-ꠢꠣꠝꠦꠡꠣ ꠗꠥꠝꠣ ꠛꠣꠞ ꠅꠁꠛ।”
REV 19:4 ꠀꠟ꠆ꠟꠣ ꠙꠣꠇ ꠎꠦꠁꠘ ꠔꠈ꠆ꠔꠅ ꠛꠅꠀꠔ ꠀꠍꠂꠘ, ꠢꠃ ꠌꠛ꠆ꠛꠤꠡꠎꠘ ꠝꠥꠞꠛ꠆ꠛꠤ ꠘꠦꠔꠣꠄ ꠀꠞ ꠢꠃ ꠌꠣꠁꠞꠅ ꠎꠣꠘꠖꠣꠞꠦ ꠔꠣꠘꠞꠦ ꠍꠁꠎꠖꠣ ꠇꠞꠤꠀ ꠇꠁꠟꠣ, “ꠀꠝꠤꠘ! ꠀꠟꠢꠣꠝꠖꠥꠟꠤꠟ꠆ꠟꠣ।”
REV 19:5 ꠅꠃ ꠡꠝꠄ ꠛꠦꠢꠦꠡ꠆ꠔꠤ ꠔꠈ꠆ꠔꠅ ꠕꠣꠇꠤ ꠄꠇꠎꠘꠦ ꠇꠁꠟꠣ, “ꠅ ꠀꠟ꠆ꠟꠣꠞ ꠝꠣꠄꠀꠞ ꠉꠥꠟꠣꠝ ꠅꠇꠟ, ꠔꠥꠝꠞꠣ ꠎꠦꠞꠣ ꠀꠟ꠆ꠟꠣꠞꠦ ꠒꠞꠣꠅ, ꠔꠥꠝꠞꠣ ꠢꠥꠞꠥ-ꠛꠠ ꠢꠇ꠆ꠇꠟꠦ ꠀꠝꠞꠣꠞ ꠀꠟ꠆ꠟꠣꠞ ꠔꠣꠞꠤꠚ ꠇꠞꠅ।”
REV 19:6 ꠛꠣꠖꠦ ꠀꠝꠤ ꠛꠃꠔ ꠝꠣꠘꠡꠞ ꠜꠤꠠꠞ ꠀꠅꠀꠎ ꠛꠣ ꠎꠥꠞꠦ ꠎꠥꠞꠦ ꠇꠟ-ꠇꠟꠣꠁꠀ ꠙꠣꠘꠤ ꠙꠠꠣꠞ ꠀꠅꠀꠎ ꠛꠣ ꠎꠥꠞꠦ ꠑꠣꠐꠣ ꠙꠠꠣꠞ ꠀꠅꠀꠎꠞ ꠟꠣꠈꠣꠘ ꠅꠃ ꠇꠕꠣꠈꠣꠘꠣꠁꠘ ꠢꠥꠘꠟꠣꠝ, “ꠀꠟꠢꠣꠝꠖꠥꠟꠤꠟ꠆ꠟꠣ! ꠀꠝꠞꠣꠞ ꠡꠞ꠆ꠛ-ꠡꠇ꠆ꠔꠤꠝꠣꠘ ꠝꠣꠛꠥꠖ ꠀꠟ꠆ꠟꠣꠄ ꠛꠣꠖꠡꠣꠁ ꠇꠞꠣ ꠡꠥꠞꠥ ꠇꠞꠍꠂꠘ।
REV 19:7 ꠀꠅ, ꠀꠝꠞꠣ ꠝꠘꠞ ꠈꠥꠡꠤꠄ ꠚꠥꠞ꠆ꠔꠤ ꠇꠞꠤ, ꠀꠞ ꠔꠣꠘ ꠔꠣꠞꠤꠚ ꠇꠞꠤ, ꠇꠣꠞꠘ ꠝꠦꠠꠣ-ꠛꠣꠁꠌ꠆ꠌꠣꠄ ꠡꠣꠖꠤ ꠇꠞꠣꠞ ꠡꠝꠄ ꠅꠁꠉꠦꠍꠦ, ꠔꠣꠘ ꠇꠁꠘꠣ ꠎꠥꠁꠔ ꠅꠁꠀ ꠢꠣꠎꠤꠉꠦꠍꠂꠘ।
REV 19:8 ꠔꠣꠘꠞꠦ ꠌꠇꠌꠇꠣ ꠙꠞꠤꠡ꠆ꠇꠣꠞ ꠖꠣꠝꠤ ꠇꠣꠙꠠ ꠚꠤꠘ꠆ꠖꠣꠁꠟ ꠅꠁꠍꠦ।” ꠁ ꠇꠣꠙꠠ ꠅꠁꠟ ꠀꠟ꠆ꠟꠣꠞ ꠙꠣꠇ ꠛꠘ꠆ꠖꠣ ꠅꠇꠟꠞ ꠙꠞꠦꠎꠉꠣꠞꠤ ꠌꠣꠟ-ꠌꠟꠘ।
REV 19:9 ꠛꠣꠖꠦ ꠢꠃ ꠚꠤꠞꠤꠡ꠆ꠔꠣꠄ ꠀꠝꠣꠞꠦ ꠇꠁꠟꠣ, “ꠔꠥꠝꠤ ꠅꠈꠣꠘ ꠟꠦꠈꠅ, ꠝꠦꠠꠣ-ꠛꠣꠁꠌ꠆ꠌꠣꠞ ꠡꠣꠖꠤꠞ ꠝꠎꠟꠤꠍꠅ ꠎꠦꠞꠣꠞꠦ ꠖꠣꠅꠔ ꠖꠦꠅꠀ ꠅꠁꠍꠦ, ꠔꠣꠞꠣ ꠝꠥꠛꠣꠞꠇ।” ꠔꠣꠁꠘ ꠄꠅꠈꠣꠘ ꠇꠁꠟꠣ, “ꠁꠔꠣ ꠅꠁꠟ ꠀꠟ꠆ꠟꠣꠞ ꠇꠣꠟꠣꠝ, ꠁꠔꠣ ꠈꠣꠐꠤ ꠢꠣꠍꠣ।”
REV 19:10 ꠔꠦꠃ ꠀꠝꠤ ꠅꠃ ꠚꠤꠞꠤꠡ꠆ꠔꠣꠞꠦ ꠍꠁꠎꠖꠣ ꠇꠞꠣꠞ ꠘꠤꠅꠔꠦ ꠔꠣꠘ ꠙꠣꠅ-ꠅ ꠙꠠꠟꠣꠝ, ꠅꠁꠟꠦ ꠔꠣꠁꠘ ꠀꠝꠣꠞꠦ ꠇꠁꠟꠣ, “ꠢꠣꠄ, ꠢꠣꠄ! ꠁꠔꠣ ꠇꠤꠔꠣ ꠇꠞꠞꠣꠄ, ꠀꠝꠤꠅ ꠔ ꠔꠥꠝꠣꠞ ꠟꠣꠈꠣꠘ ꠉꠥꠟꠣꠝ, ꠀꠞ ꠔꠥꠝꠣꠞ ꠎꠦ ꠝꠥꠝꠤꠘ ꠜꠣꠁ ꠅꠇꠟꠦ ꠢꠎꠞꠔ ꠁꠍꠣꠞ ꠙꠇ꠆ꠇꠦ ꠎꠛꠣꠘꠛꠘ꠆ꠖꠤ ꠖꠦꠅꠀꠔ ꠞꠄ, ꠀꠝꠤ ꠔꠣꠞꠣꠞ ꠟꠣꠈꠣꠘꠅ ꠉꠥꠟꠣꠝ। ꠔꠦ ꠈꠣꠟꠤ ꠀꠟ꠆ꠟꠣꠞꠦ ꠍꠁꠎꠖꠣ ꠇꠞꠅ। ꠅꠃ ꠁꠍꠣꠞ ꠎꠛꠣꠘꠛꠘ꠆ꠖꠤꠃ ꠅꠁꠟ, ꠘꠛꠤ-ꠞꠍꠥꠟ ꠅꠇꠟꠞ ꠎꠛꠣꠘꠛꠘ꠆ꠖꠤꠞ ꠝꠥꠟ ꠈꠥꠐꠤ।”
REV 19:11 ꠛꠣꠖꠦ ꠀꠝꠤ ꠖꠦꠈꠟꠣꠝ, ꠛꠦꠢꠦꠡ꠆ꠔꠞ ꠖꠥꠀꠞ ꠈꠥꠟꠣ, ꠀꠞ ꠢꠘꠅ ꠗꠟꠣ ꠄꠇꠐꠣ ꠊꠥꠠꠣ ꠀꠍꠦ। ꠢꠃ ꠊꠥꠠꠣꠞ ꠃꠙꠞꠦ ꠎꠦꠁꠘ ꠔꠡꠞꠤꠚ ꠞꠣꠈꠍꠂꠘ, ꠔꠣꠘ ꠘꠣꠝ ꠅꠁꠟ, ꠢꠇ ꠀꠞ ꠢꠇ-ꠢꠣꠟꠣꠟꠤ। ꠔꠣꠁꠘ ꠙꠣꠇ-ꠙꠞꠦꠎꠉꠣꠞꠤꠄ ꠛꠤꠌꠣꠞ-ꠁꠘꠍꠣꠚ ꠀꠞ ꠎꠥꠖ꠆ꠖ ꠇꠞꠂꠘ।
REV 19:12 ꠔꠣꠘ ꠌꠃꠈ ꠅꠁꠟ ꠎꠣꠟꠣꠁꠟ ꠌꠇꠌꠇꠣ ꠀꠉꠥꠘꠤꠞ ꠟꠣꠈꠣꠘ, ꠔꠣꠘ ꠝꠣꠕꠣꠔ ꠛꠃꠔ ꠔꠣꠎ ꠀꠍꠦ। ꠔꠣꠘ ꠡꠞꠤꠟꠅ ꠅꠝꠘ ꠄꠇ ꠘꠣꠝ ꠟꠦꠈꠣ, ꠎꠦ ꠘꠣꠝꠞ ꠝꠣꠘꠤ ꠔꠣꠁꠘ ꠍꠣꠠꠣ ꠖꠥꠍꠞꠣ ꠇꠦꠃ ꠎꠣꠘꠦ ꠘꠣ।
REV 19:13 ꠔꠣꠘ ꠚꠤꠘ꠆ꠘ ꠀꠍꠦ ꠟꠃꠞ ꠝꠣꠎꠦ ꠒꠥꠛꠣꠁꠟ ꠟꠦꠛꠣꠍ, ꠀꠞ ꠔꠣꠘ ꠘꠣꠝ ꠅꠁꠟ, “ꠇꠣꠟꠤꠝꠣꠔꠥꠟ꠆ꠟꠣ, ꠀꠟ꠆ꠟꠣꠞ ꠇꠣꠟꠣꠝ।”
REV 19:14 ꠀꠞ ꠛꠦꠢꠦꠡ꠆ꠔꠞ ꠍꠤꠙꠣꠁ ꠅꠇꠟꠦ ꠖꠣꠝꠤ ꠍꠣꠚ-ꠍꠥꠔꠞꠣ ꠗꠟꠣ ꠟꠦꠛꠣꠍ ꠚꠤꠘ꠆ꠖꠤꠀ, ꠗꠟꠣ ꠊꠥꠠꠣꠞ ꠃꠙꠞꠦ ꠍꠅꠀꠞ ꠅꠁꠀ ꠔꠣꠘ ꠈꠞꠦ ꠈꠞꠦ ꠎꠣꠁꠞꠣ।
REV 19:15 ꠔꠣꠁꠘ ꠎꠣꠔꠦ ꠎꠉꠔꠞ ꠢꠇꠟ ꠎꠣꠔꠤꠞꠦ ꠡꠣꠎꠣ ꠖꠤꠔꠣ ꠙꠣꠞꠂꠘ, ꠅꠔꠣꠞ ꠟꠣꠉꠤ ꠔꠣꠘ ꠝꠥꠈ ꠕꠣꠇꠤ ꠄꠇꠈꠣꠘ ꠗꠣꠞꠣꠁꠟ ꠔꠟꠥꠀꠞ ꠛꠣꠞ ꠅꠁꠀ ꠀꠁꠟ। ꠔꠣꠁꠘ ꠟꠥꠀꠞ ꠟꠣꠑꠤ ꠖꠤꠀ ꠔꠣꠝꠣꠝ ꠎꠣꠔꠤꠞꠦ ꠡꠣꠡꠘ ꠇꠞꠛꠣ, ꠀꠞ ꠀꠋꠉꠥꠞ ꠝꠣꠠꠣꠞ ꠉꠣꠔꠅ ꠝꠣꠘꠡꠦ ꠎꠦꠟꠣ ꠙꠣꠅꠖꠤ ꠀꠋꠉꠥꠞ ꠝꠣꠠꠂꠘ, ꠡꠞ꠆ꠛ-ꠡꠇ꠆ꠔꠤꠝꠣꠘ ꠀꠟ꠆ꠟꠣꠞ ꠟꠣꠘ꠆ꠘꠔꠤ ꠉꠎꠛꠖꠤ ꠔꠣꠁꠘ ꠅꠟꠣ ꠝꠣꠠꠤꠛꠣ।
REV 19:16 ꠔꠣꠘ ꠃꠞꠣꠔꠞ ꠝꠣꠎꠦ ꠀꠞ ꠔꠣꠘ ꠟꠦꠛꠣꠍꠅ ꠅꠃ ꠘꠣꠝ ꠟꠦꠈꠣ ꠀꠍꠦ, “ꠛꠣꠖꠡꠣ ꠅꠇꠟꠞ ꠛꠣꠖꠡꠣ, ꠝꠣꠟꠤꠇ ꠅꠇꠟꠞ ꠝꠣꠟꠤꠇ।”
REV 19:17 ꠛꠣꠖꠦ ꠀꠝꠤ ꠖꠦꠈꠟꠣꠝ, ꠡꠥꠞꠥꠎꠞ ꠝꠣꠎꠦ ꠄꠇꠎꠘ ꠚꠤꠞꠤꠡ꠆ꠔꠣ ꠃꠛꠣꠁ ꠞꠁꠍꠂꠘ। ꠀꠍꠝꠣꠘꠞ ꠝꠣꠎꠦ ꠎꠦꠔꠣ ꠙꠣꠈꠤꠘ꠆ꠔꠦ ꠃꠠꠤꠞꠣ, ꠔꠣꠁꠘ ꠄꠞꠣ ꠢꠇꠟꠞꠦ ꠎꠥꠞꠦ ꠎꠥꠞꠦ ꠒꠣꠇꠤꠀ ꠇꠁꠟꠣ, “ꠀꠅ, ꠀꠟ꠆ꠟꠣꠞ ꠖꠞꠛꠣꠞꠅ ꠝꠢꠣ-ꠖꠣꠅꠔ ꠈꠣꠅꠀꠞ ꠟꠣꠉꠤ ꠄꠇꠈꠣꠘꠅ ꠖꠟꠣ ꠅꠅ,
REV 19:18 ꠎꠣꠔꠦ ꠔꠥꠝꠞꠣ ꠀꠁꠀ ꠉꠥꠡ꠆ꠔ ꠈꠣꠁꠔꠣꠄ ꠙꠣꠞ, ꠛꠣꠖꠡꠣ, ꠙꠞꠗꠣꠘ ꠍꠤꠙꠣꠁ, ꠙꠄꠟꠥꠀꠘ ꠅꠇꠟ, ꠊꠥꠠꠣꠁꠘ ꠀꠞ ꠊꠥꠠꠣꠁꠘ꠆ꠔꠞ ꠍꠅꠀꠞ ꠅꠇꠟ, ꠀꠎꠣꠖ ꠀꠞ ꠉꠥꠟꠣꠝ, ꠢꠥꠞꠥ-ꠛꠠ ꠢꠇꠟ ꠝꠣꠘꠡꠞ ꠉꠥꠡ꠆ꠔ ꠈꠣꠅ।”
REV 19:19 ꠄꠞꠛꠣꠖꠦ ꠀꠝꠤ ꠖꠦꠈꠟꠣꠝ, ꠅꠃ ꠊꠥꠠꠣꠔ ꠎꠦꠁꠘ ꠍꠅꠀꠞ ꠅꠁꠍꠂꠘ, ꠄꠘ ꠟꠉꠦ ꠀꠞ ꠄꠘ ꠍꠤꠙꠣꠁ ꠖꠟꠞ ꠟꠉꠦ ꠎꠥꠖ꠆ꠖ ꠇꠞꠣꠞ ꠟꠣꠉꠤ ꠢꠃ ꠎꠣꠘꠥꠀꠞ, ꠀꠡ꠆ꠔꠣ ꠖꠥꠘꠤꠀꠞ ꠞꠣꠎꠣ ꠅꠇꠟ, ꠔꠣꠞꠣꠞ ꠡꠂꠘ꠆ꠘ-ꠍꠤꠙꠣꠁ ꠖꠟ ꠟꠁꠀ ꠄꠇꠈꠣꠘꠅ ꠖꠟꠣ ꠅꠁꠟꠣ।
REV 19:20 ꠔꠦꠃ ꠢꠃ ꠎꠣꠘꠥꠀꠞꠞꠦ ꠗꠞꠤꠀ ꠀꠐꠇ ꠇꠞꠣ ꠅꠁꠟ, ꠀꠞ ꠎꠦ ꠜꠘ꠆ꠒ ꠘꠛꠤꠄ ꠔꠣꠞ ꠙꠇ꠆ꠇ ꠟꠁꠀ ꠀꠌꠣꠘꠇ ꠇꠣꠝ ꠖꠦꠈꠣꠁꠔ, ꠔꠣꠞꠦꠅ ꠗꠞꠣ ꠅꠁꠟ। ꠎꠦꠔꠣ ꠝꠣꠘꠡꠦ ꠢꠃ ꠎꠣꠘꠥꠀꠞꠞ ꠡꠤꠟ ꠟꠣꠉꠣꠁꠍꠦ, ꠔꠣꠞ ꠝꠥꠞ꠆ꠔꠤꠞ ꠙꠥꠎꠣ ꠇꠞꠍꠦ, ꠅꠃ ꠜꠘ꠆ꠒ ꠘꠛꠤꠄ ꠔꠣꠞ ꠀꠌꠣꠘꠇ ꠇꠣꠝ ꠖꠦꠈꠣꠁꠀ ꠅꠔꠣ ꠝꠣꠘꠡꠞꠦ ꠛꠦ-ꠙꠕꠤ ꠛꠣꠘꠣꠁꠍꠦ। ꠁ ꠖꠥꠁꠅꠐꠣꠞꠦ ꠎꠤꠘ꠆ꠖꠣ ꠢꠣꠟꠔꠦ, ꠎꠣꠟꠣꠁꠟ ꠉꠘ꠆ꠖꠇꠞ ꠀꠉꠥꠘꠤꠞ ꠝꠣꠎꠦ ꠚꠣꠟꠣꠘꠤ ꠅꠁꠟ।
REV 19:21 ꠢꠃ ꠗꠟꠣ ꠊꠥꠠꠣꠞ ꠃꠙꠞꠦ ꠎꠦꠁꠘ ꠛꠅꠀꠔ ꠀꠍꠟꠣ, ꠔꠣꠘ ꠝꠥꠈ ꠕꠣꠇꠤ ꠎꠦ ꠗꠣꠞꠣꠁꠟ ꠔꠟꠥꠀꠞ ꠛꠣꠞ ꠅꠁꠀ ꠀꠁꠍꠤꠟ, ꠅꠈꠣꠘꠖꠤ ꠔꠣꠞꠣꠞ ꠟꠉꠞ ꠡꠣꠋꠉ-ꠙꠣꠋꠉ ꠅꠇꠟꠞꠦ ꠈꠥꠘ ꠇꠞꠣ ꠅꠁꠟ। ꠄꠞꠟꠣꠉꠤ ꠢꠇꠟ ꠙꠣꠈꠤꠘ꠆ꠔꠦ ꠙꠦꠐ ꠜꠞꠤꠀ ꠅꠔꠣꠞ ꠉꠥꠡ꠆ꠔ ꠈꠣꠁꠟꠣ।
REV 20:1 ꠄꠞꠛꠣꠖꠦ ꠀꠝꠤ ꠖꠦꠈꠟꠣꠝ, ꠛꠦꠢꠦꠡ꠆ꠔ ꠕꠣꠇꠤ ꠄꠇꠎꠘ ꠚꠤꠞꠤꠡ꠆ꠔꠣ ꠟꠣꠝꠤꠀ ꠀꠁꠞꠣ। ꠔꠣꠘ ꠀꠔꠅ ꠀꠍꠤꠟ ꠢꠣꠛꠤꠀ ꠖꠥꠎꠈꠞ ꠌꠣꠛꠤ, ꠀꠞ ꠈꠥꠛ ꠛꠠ ꠄꠇꠍꠣ ꠟꠋꠉꠞ।
REV 20:2 ꠔꠣꠁꠘ ꠢꠃ ꠖꠣꠘꠛꠞꠦ ꠗꠞꠟꠣ, ꠁꠉꠥ ꠅꠁꠟ ꠢꠃ ꠙꠥꠞꠣꠘꠣ ꠢꠣꠚ, ꠄꠞ ꠘꠣꠝ ꠅꠁꠟ ꠁꠛꠟꠤꠍ ꠛꠣ ꠡꠄꠔꠣꠘ। ꠔꠣꠞꠦ ꠗꠞꠤꠀ ꠄꠇ ꠀꠎꠣꠞ ꠛꠍꠞꠞ ꠟꠣꠉꠤ ꠛꠣꠘ꠆ꠖꠤꠟꠣ,
REV 20:3 ꠛꠣꠘ꠆ꠖꠤꠀ ꠢꠣꠛꠤꠀ ꠖꠥꠎꠈꠅ ꠚꠣꠟꠣꠁꠟꠣ। ꠛꠣꠖꠦ ꠅꠃ ꠖꠥꠎꠈꠞ ꠖꠥꠀꠞꠅ ꠔꠣꠟꠣ ꠟꠣꠉꠣꠁꠀ ꠄꠞ ꠃꠙꠞꠦ ꠡꠤꠟ-ꠌꠣꠙ꠆ꠙꠠ ꠝꠣꠞꠟꠣ, ꠎꠣꠔꠦ ꠢꠦ ꠅꠃ ꠄꠇ ꠀꠎꠣꠞ ꠛꠞꠍꠞ ꠝꠣꠎꠦ ꠛꠣꠞ ꠅꠁꠀ, ꠖꠥꠘꠤꠀꠞ ꠇꠥꠘꠥ ꠎꠣꠔꠤꠞꠦ ꠛꠦ-ꠙꠕꠤ ꠛꠣꠘꠣꠁꠔ ꠘꠣ ꠙꠣꠞꠦ। ꠢꠦꠡꠦ ꠔꠣꠞꠦ ꠕꠥꠠꠣ ꠇꠄꠖꠤꠘꠞ ꠟꠣꠉꠤ ꠍꠣꠠꠣ ꠅꠁꠛ।
REV 20:4 ꠛꠣꠖꠦ ꠀꠝꠤ ꠖꠦꠈꠟꠣꠝ, ꠛꠃꠔ ꠔꠈ꠆ꠔ ꠀꠍꠦ। ꠎꠦꠞꠣ ꠅꠃ ꠔꠈ꠆ꠔꠞ ꠃꠙꠞꠦ ꠛꠁꠍꠂꠘ, ꠄꠞꠣꠞꠦ ꠛꠤꠌꠣꠞ ꠇꠞꠣꠞ ꠈꠦꠝꠔꠣ ꠖꠦꠅꠀ ꠅꠁꠍꠦ। ꠀꠟ꠆ꠟꠣꠞ ꠇꠣꠟꠣꠝ ꠀꠞ ꠢꠎꠞꠔ ꠁꠍꠣꠞ ꠛꠦꠙꠣꠞꠦ ꠎꠛꠣꠘꠛꠘ꠆ꠖꠤ ꠖꠦꠅꠀꠄ ꠎꠦꠞꠣꠞꠦ ꠉꠞ꠆ꠖꠣꠘ ꠝꠣꠞꠣ ꠅꠁꠍꠤꠟ, ꠄꠞꠣꠞ ꠞꠥꠢꠥ ꠅꠇꠟꠞꠦꠅ ꠀꠝꠤ ꠖꠦꠈꠟꠣꠝ। ꠄꠞꠣ ꠢꠃ ꠎꠣꠘꠥꠀꠞꠞꠦ ꠛꠣ ꠔꠣꠞ ꠝꠥꠞ꠆ꠔꠤꠞꠦ ꠙꠥꠎꠣ ꠇꠞꠍꠦ ꠘꠣ, ꠀꠞ ꠀꠔꠅ ꠛꠣ ꠇꠙꠣꠟꠞ ꠃꠙꠞꠦ ꠔꠣꠞ ꠡꠤꠟꠅ ꠟꠣꠉꠣꠁꠍꠦ ꠘꠣ। ꠄꠞꠣ ꠎꠤꠘ꠆ꠖꠣ ꠅꠁꠀ ꠃꠑꠟꠣ, ꠃꠑꠤꠀ ꠄꠇ ꠀꠎꠣꠞ ꠛꠍꠞ ꠗꠞꠤ ꠀꠟ-ꠝꠍꠤꠞ ꠟꠉꠦ ꠛꠣꠖꠡꠣꠁ ꠇꠞꠟꠣ।
REV 20:5 ꠁꠐꠣ ꠅꠁꠟ ꠙꠄꠟꠣ ꠛꠣꠞ ꠝꠥꠞ꠆ꠖꠣ ꠕꠣꠇꠤ ꠎꠤꠘ꠆ꠖꠣ ꠅꠁꠀ ꠃꠑꠣ, ꠀꠞ ꠅꠃ ꠎꠦꠞꠣ ꠎꠤꠘ꠆ꠖꠣ ꠅꠁꠟꠣ ꠔꠣꠞꠣꠃ ꠗꠁꠘ꠆ꠘ ꠀꠞ ꠙꠛꠤꠔ꠆ꠞ। ꠙꠄꠟꠣ ꠛꠣꠞ ꠎꠦꠞꠣ ꠎꠤꠘ꠆ꠖꠣ ꠅꠁꠀ ꠃꠑꠟꠣ, ꠄꠞꠣꠞ ꠃꠙꠞꠦ ꠔ ꠝꠃꠔꠞ ꠖꠥꠍꠞꠣꠛꠣꠞ ꠇꠥꠘꠥ ꠛꠟ ꠈꠣꠐꠣꠘꠤ ꠌꠟꠔ ꠘꠣꠄ। ꠔꠣꠞꠣ ꠅꠁꠛꠣ ꠀꠟ꠆ꠟꠣ ꠙꠣꠇ ꠀꠞ ꠀꠟ-ꠝꠍꠤꠞ ꠁꠝꠣꠝ। ꠔꠣꠞꠣ ꠢꠃ ꠄꠇ ꠀꠎꠣꠞ ꠛꠍꠞ ꠗꠞꠤ ꠀꠟ-ꠝꠍꠤꠞ ꠟꠉꠦ ꠛꠣꠖꠡꠣꠁ ꠇꠞꠛꠣ। ꠅꠁꠟꠦ ꠅꠃ ꠀꠎꠣꠞ ꠛꠍꠞ ꠚꠥꠠꠣꠘꠤꠞ ꠀꠉ ꠙꠞ꠆ꠎꠘ꠆ꠔ ꠛꠣꠖ-ꠛꠣꠇꠤ ꠇꠥꠘꠥ ꠝꠥꠞ꠆ꠖꠣ ꠎꠤꠘ꠆ꠖꠣ ꠅꠁꠟꠣ ꠘꠣ।
REV 20:7 ꠅꠃ ꠄꠇ ꠀꠎꠣꠞ ꠛꠍꠞ ꠉꠤꠀ ꠢꠣꠞꠟꠦ ꠡꠄꠔꠣꠘꠞꠦ ꠔꠣꠞ ꠎꠦꠟ ꠈꠣꠘꠣ ꠕꠣꠇꠤ ꠈꠣꠟꠣꠍ ꠖꠦꠅꠀ ꠅꠁꠛ।
REV 20:8 ꠔꠦꠃ ꠢꠦ ꠉꠤꠀ ꠀꠡ꠆ꠔꠣ ꠎꠉꠔꠞ ꠢꠇꠟ ꠎꠣꠔꠤꠞꠦ, ꠝꠣꠘꠤ ꠁꠀꠎꠥꠎ-ꠝꠣꠎꠥꠎꠞꠦ ꠛꠦ-ꠙꠕꠤ ꠛꠣꠘꠣꠁꠛ, ꠀꠞ ꠎꠥꠖ꠆ꠖ ꠇꠞꠣꠞ ꠟꠣꠉꠤ ꠔꠣꠞꠣꠞꠦ ꠄꠇꠈꠣꠘꠅ ꠖꠟꠣ ꠇꠞꠛ। ꠔꠣꠞ ꠝꠣꠘꠥꠡ ꠅꠁꠛꠣ, ꠖꠞꠤꠀꠞ ꠌꠞꠞ ꠛꠣꠟꠥꠞ ꠟꠣꠈꠣꠘ, ꠁꠔꠣ ꠉꠘꠤꠀ ꠚꠥꠠꠣꠘꠤ ꠎꠣꠁꠔ ꠘꠣꠄ।
REV 20:9 ꠅꠃ ꠡꠝꠄ ꠀꠝꠤ ꠖꠦꠈꠟꠣꠝ, ꠔꠣꠞꠣ ꠀꠡ꠆ꠔꠣ ꠖꠥꠘꠤꠀ ꠕꠣꠇꠤ ꠛꠣꠞ ꠅꠁ ꠉꠤꠀ ꠀꠟ꠆ꠟꠣꠞ ꠙꠣꠇ ꠛꠘ꠆ꠖꠣ ꠅꠇꠟꠞ ꠞꠅꠀꠞ ꠎꠣꠉꠣ, ꠀꠟ꠆ꠟꠣꠞ ꠝꠣꠄꠀꠞ ꠐꠣꠃꠘꠞꠦ ꠉꠤꠀ ꠛꠦꠞꠤꠟꠤꠟ। ꠅꠁꠟꠦ ꠀꠍꠝꠣꠘ ꠕꠣꠇꠤ ꠀꠟ꠆ꠟꠣꠁ ꠀꠉꠥꠁꠘ ꠟꠣꠝꠤꠀ ꠁꠔꠣꠞꠦ ꠎꠣꠟꠣꠁꠟꠤꠟ।
REV 20:10 ꠀꠞ ꠎꠦ ꠁꠛꠟꠤꠍꠦ ꠄꠞꠣꠞꠦ ꠛꠦ-ꠙꠕꠤ ꠛꠣꠘꠣꠁꠍꠤꠟ, ꠔꠣꠞꠦ ꠗꠞꠤꠀ ꠎꠣꠟꠣꠁꠟ ꠉꠘ꠆ꠖꠇꠞ ꠀꠉꠥꠘꠤꠞ ꠉꠣꠔꠅ ꠚꠣꠟꠣꠁꠟ ꠅꠁꠟ। ꠢꠃ ꠎꠣꠘꠥꠀꠞ ꠀꠞ ꠜꠘ꠆ꠒ ꠘꠛꠤꠞꠦ ꠀꠉꠦꠃ ꠅꠃ ꠉꠣꠔꠅ ꠚꠣꠟꠣꠁꠟ ꠅꠁꠍꠤꠟ। ꠢꠘꠅ ꠔꠣꠞꠣ ꠌꠤꠞꠇꠣꠟ ꠞꠁꠛꠣ, ꠀꠞ ꠖꠤꠘꠦ-ꠞꠣꠁꠔꠦ ꠎꠣꠟꠣ-ꠎꠘꠔ꠆ꠞꠘꠣꠞ ꠀꠎꠣꠛ ꠙꠣꠁꠛꠣ।
REV 20:11 ꠛꠣꠖꠦ ꠀꠝꠤ ꠖꠦꠈꠟꠣꠝ, ꠛꠠ ꠄꠇꠈꠣꠘ ꠗꠟꠣ ꠔꠈ꠆ꠔ, ꠅꠃ ꠔꠈ꠆ꠔꠅ ꠄꠇꠎꠘ ꠛꠅꠀꠔ ꠀꠍꠂꠘ। ꠔꠣꠘ ꠍꠣꠝꠘꠣ ꠕꠣꠇꠤ ꠀꠍꠝꠣꠘ ꠀꠞ ꠖꠥꠘꠤꠀ ꠜꠣꠉꠤ ꠉꠦꠟ, ꠇꠥꠘꠥꠈꠣꠘꠅ ꠄꠞꠣꠞ ꠎꠣꠉꠣ ꠞꠁꠟ ꠘꠣ।
REV 20:12 ꠄꠞꠛꠣꠖꠦ ꠖꠦꠈꠟꠣꠝ, ꠢꠥꠞꠥ-ꠛꠠ ꠔꠣꠝꠣꠝ ꠝꠥꠞ꠆ꠖꠣ ꠅꠇꠟ ꠅꠃ ꠔꠈ꠆ꠔꠞ ꠍꠣꠝꠘꠦ ꠃꠛꠣꠁ ꠞꠁꠍꠂꠘ। ꠛꠣꠖꠦ ꠇꠄꠈꠣꠘ ꠈꠣꠔꠣ ꠈꠥꠟꠣ ꠅꠁꠟ, ꠄꠞꠛꠣꠖꠦ ꠀꠞꠅ ꠄꠇꠈꠣꠘ ꠈꠣꠔꠣ ꠈꠥꠟꠣ ꠅꠁꠟ, ꠁꠈꠣꠘꠞ ꠘꠣꠝ ꠎꠤꠘ꠆ꠖꠦꠉꠤ ꠈꠣꠔꠣ। ꠅꠃ ꠈꠣꠔꠣ ꠅꠇꠟꠞ ꠝꠣꠎꠦ ꠢꠃ ꠝꠥꠞ꠆ꠖꠣ ꠅꠇꠟꠞ ꠎꠦꠔꠣ ꠀꠝꠟ-ꠘꠣꠝꠣ ꠟꠦꠈꠣ ꠅꠁꠍꠤꠟ, ꠢꠃ ꠀꠝꠟ ꠝꠣꠚꠤꠇ ꠔꠣꠞꠣꠞ ꠀꠈꠦꠞꠤ ꠛꠤꠌꠣꠞ ꠇꠞꠣ ꠅꠁꠟ।
REV 20:13 ꠖꠞꠤꠀꠞ ꠝꠣꠎꠦ ꠎꠔ ꠝꠥꠞ꠆ꠖꠣ ꠅꠇꠟ ꠀꠍꠟꠣ, ꠖꠞꠤꠀꠄ ꠄꠞꠣꠞ ꠟꠣꠡ ꠛꠣꠞ ꠇꠞꠤ ꠖꠤꠟ। ꠀꠞ ꠝꠃꠔ ꠀꠞ ꠇꠄꠛꠞꠞ ꠝꠣꠎꠦ ꠎꠦꠔꠣ ꠝꠥꠞ꠆ꠖꠣꠁꠘ ꠀꠍꠟꠣ, ꠝꠃꠔ ꠀꠞ ꠇꠄꠛꠞꠦ ꠔꠣꠞꠣꠞꠦ ꠛꠣꠞ ꠇꠞꠤ ꠖꠤꠟ। ꠙꠞꠔꠦꠇ ꠎꠘꠞꠦ ꠔꠣꠞ ꠘꠤꠎꠞ ꠀꠝꠟ-ꠘꠣꠝꠣ ꠝꠣꠚꠤꠇ ꠛꠤꠌꠣꠞ ꠇꠞꠣ ꠅꠁꠟ।
REV 20:14 ꠢꠦꠡꠦ ꠝꠃꠔ ꠀꠞ ꠇꠄꠛꠞꠞꠦꠅ ꠀꠉꠥꠘꠤꠞ ꠉꠣꠔꠅ ꠚꠣꠟꠣꠁꠟ ꠅꠁꠟ। ꠅꠃ ꠀꠉꠥꠘꠤꠞ ꠉꠣꠔꠅ ꠙꠠꠣꠃ ꠅꠁꠟ ꠖꠥꠍꠞꠣꠛꠣꠞ ꠝꠃꠔ ꠝꠣꠘꠤ, ꠀꠈꠦꠞꠤ ꠝꠃꠔ।
REV 20:15 ꠎꠦꠞꠣꠞ ꠘꠣꠝ ꠢꠃ ꠎꠤꠘ꠆ꠖꠦꠉꠤ ꠈꠣꠔꠣꠔ ꠝꠤꠟꠟ ꠘꠣ, ꠔꠣꠞꠣꠞꠦꠃ ꠀꠉꠥꠘꠤꠞ ꠉꠣꠔꠅ ꠚꠣꠟꠣꠁꠟ ꠅꠁꠟ।
REV 21:1 ꠛꠣꠖꠦ ꠀꠝꠤ ꠄꠇꠈꠣꠘ ꠘꠄꠀ ꠀꠍꠝꠣꠘ ꠀꠞ ꠘꠄꠀ ꠎꠝꠤꠘ ꠖꠦꠈꠟꠣꠝ। ꠙꠄꠟꠣ ꠀꠍꠝꠣꠘ ꠀꠞ ꠙꠄꠟꠣ ꠎꠝꠤꠘ ꠝꠤꠟꠣꠁ ꠉꠦꠍꠦ, ꠇꠥꠘꠥ ꠖꠞꠤꠀꠅ ꠀꠞ ꠞꠁꠟ ꠘꠣ।
REV 21:2 ꠀꠝꠤ ꠖꠦꠈꠟꠣꠝ, ꠢꠃ ꠙꠛꠤꠔ꠆ꠞ ꠐꠣꠃꠘ, ꠝꠣꠘꠤ ꠘꠄꠀ ꠎꠦꠞꠥꠎꠣꠟꠦꠝ। ꠁꠈꠣꠘ ꠛꠦꠢꠦꠡ꠆ꠔꠞ ꠝꠣꠎ ꠕꠣꠇꠤ ꠀꠞ ꠀꠟ꠆ꠟꠣꠞ ꠖꠞꠛꠣꠞꠅ ꠕꠣꠇꠤ ꠟꠣꠝꠤꠀ ꠀꠞ। ꠇꠥꠘꠥ ꠛꠤꠀꠞ ꠇꠁꠘꠣꠞꠦ ꠎꠦꠟꠣ ꠖꠣꠝꠣꠘ꠆ꠖꠞ ꠟꠣꠉꠤ ꠢꠣꠎꠣꠁꠟ ꠅꠄ, ꠅꠃ ꠐꠣꠃꠘꠞꠦꠅ ꠅꠟꠣ ꠡꠥꠘ꠆ꠖꠞ ꠇꠞꠤ ꠢꠣꠎꠣꠁꠟ ꠅꠁꠍꠤꠟ।
REV 21:3 ꠛꠣꠖꠦ ꠀꠝꠤ ꠢꠥꠘꠟꠣꠝ, ꠢꠃ ꠛꠦꠢꠦꠡ꠆ꠔꠞ ꠔꠈ꠆ꠔꠅ ꠕꠣꠇꠤ ꠄꠇꠎꠘꠦ ꠎꠥꠞꠦ ꠎꠥꠞꠦ ꠇꠁꠞꠣ, “ꠅꠈꠘ ꠝꠣꠘꠡꠞ ꠝꠣꠎꠦ ꠞꠅꠀꠞ ꠟꠣꠉꠤ ꠀꠟ꠆ꠟꠣ ꠙꠣꠇꠞ ꠎꠣꠉꠣ ꠅꠁꠍꠦ। ꠔꠣꠁꠘ ꠝꠣꠘꠡꠞ ꠟꠉꠦ ꠛꠡꠔ ꠇꠞꠛꠣ, ꠀꠞ ꠔꠣꠞꠣ ꠅꠁꠛꠣ ꠔꠣꠘ ꠛꠘ꠆ꠖꠣ। ꠔꠣꠁꠘ ꠡ꠆ꠛꠄꠅꠋ ꠔꠣꠞꠣꠞ ꠟꠉꠦ ꠞꠁꠛꠣ, ꠔꠣꠞꠣꠞ ꠀꠟ꠆ꠟꠣ ꠅꠁꠛꠣ।
REV 21:4 ꠔꠣꠁꠘ ꠄꠞꠣꠞ ꠌꠈꠥꠞ ꠙꠣꠘꠤ ꠚꠥꠍꠤꠀ ꠖꠤꠛꠣ। ꠀꠞ ꠇꠥꠘꠥ ꠝꠞꠘ ꠅꠁꠔ ꠘꠣꠄ, ꠖꠥꠈ, ꠇꠣꠘ꠆ꠖꠘ, ꠇꠡ꠆ꠐ ꠀꠞ ꠞꠁꠔ ꠘꠣꠄ, ꠀꠉꠞ ꠁꠔꠣ ꠢꠇꠟꠔꠣꠃ ꠡꠦꠡ ꠅꠁꠉꠦꠍꠦ।”
REV 21:5 ꠔꠈ꠆ꠔꠅ ꠎꠦꠁꠘ ꠛꠅꠀꠔ ꠀꠍꠟꠣ ꠔꠣꠁꠘ ꠇꠁꠟꠣ, “ꠢꠥꠘꠅ, ꠀꠝꠤ ꠢꠇ꠆ꠇꠟꠔꠣꠞꠦ ꠘꠄꠀ ꠇꠞꠤ ꠙꠄꠖꠣ ꠇꠞꠤꠀꠞ।” ꠛꠣꠖꠦ ꠔꠣꠁꠘ ꠢꠤꠞꠛꠣꠞ ꠇꠁꠟꠣ, “ꠀꠝꠣꠞ ꠅꠃ ꠇꠕꠣꠈꠣꠘ ꠟꠦꠈꠅ, ꠇꠣꠞꠘ ꠁꠔꠣ ꠄꠇꠤꠘ ꠇꠞꠣꠞ ꠟꠣꠈ ꠢꠣꠍꠣ।”
REV 21:6 ꠔꠣꠁꠘ ꠀꠝꠣꠞꠦ ꠄꠅꠈꠣꠘ ꠇꠁꠟꠣ, “ꠡꠦꠡ ꠅꠁꠉꠦꠍꠦ। ꠀꠝꠤꠃ ꠀꠟꠤꠚ ꠀꠞ ꠁꠀ, ꠀꠃꠀꠟ ꠀꠞ ꠀꠈꠦꠞ। ꠢꠥꠘꠅ, ꠎꠣꠞ ꠙꠣꠘꠤꠞ ꠙꠤꠀꠍꠦ ꠗꠞꠍꠦ, ꠔꠣꠞꠦ ꠀꠝꠤ ꠀꠛꠦ-ꠢꠣꠄꠀꠔꠞ ꠎꠤꠘ꠆ꠖꠦꠉꠤ-ꠙꠣꠘꠤꠞ ꠏꠞꠘꠣ ꠕꠣꠇꠤ ꠛꠤꠘꠣ ꠙꠄꠡꠣꠄ ꠙꠣꠘꠤ ꠖꠤꠝꠥ।
REV 21:7 ꠎꠦ ꠎꠘ ꠎꠄꠁ ꠅꠁꠛ, ꠢꠦ ꠁꠔꠣ ꠢꠇꠟꠔꠣꠞ ꠅꠗꠤꠇꠣꠞ ꠙꠣꠁꠛ। ꠀꠝꠤ ꠅꠁꠝꠥ ꠔꠣꠞ ꠀꠟ꠆ꠟꠣ, ꠀꠞ ꠢꠦ ꠅꠁꠛ ꠀꠝꠣꠞ ꠙꠥꠔ।
REV 21:8 ꠅꠁꠟꠦ ꠇꠣ-ꠙꠥꠞꠥꠡ, ꠛꠦꠁꠝꠣꠘ, ꠢꠣꠞꠣꠝꠈꠥꠞ, ꠈꠥꠘꠤ, ꠎꠤꠘꠣꠇꠥꠞ, ꠎꠣꠖꠥꠉꠤꠞ, ꠝꠥꠞ꠆ꠔꠤꠙꠥꠎꠣ ꠇꠞꠞꠣ, ꠀꠞ ꠢꠇꠟ ꠘꠝꠥꠘꠣꠞ ꠝꠤꠍꠣ ꠝꠣꠔꠞꠣ ꠅꠇꠟ ꠎꠣꠟꠣꠁꠟ ꠀꠉꠥꠁꠘ ꠀꠞ ꠉꠘ꠆ꠖꠇꠞ ꠉꠣꠔꠅ ꠞꠁꠛꠣ। ꠄꠞ ꠘꠣꠝꠃ ꠅꠁꠟ ꠖꠥꠍꠞꠣꠛꠣꠞꠞ ꠝꠃꠔ।”
REV 21:9 ꠢꠃ ꠎꠦ ꠡꠣꠔꠎꠘ ꠚꠤꠞꠤꠡ꠆ꠔꠣꠞ ꠀꠔꠅ ꠀꠈꠦꠞꠤ ꠡꠣꠔꠅ ꠉꠎꠛ ꠜꠞꠣ ꠡꠣꠔꠐꠣ ꠛꠣꠐꠤ ꠀꠍꠤꠟ, ꠄꠞꠣꠞ ꠝꠣꠎꠞ ꠄꠇꠎꠘꠦ ꠀꠝꠣꠞ ꠇꠣꠘ꠆ꠖꠣꠔ ꠀꠁꠀ ꠇꠁꠟꠣ, “ꠀꠅ, ꠀꠝꠤ ꠔꠥꠝꠣꠞꠦ ꠇꠁꠘꠣ-ꠛꠦꠐꠤ ꠖꠦꠈꠣꠁꠝꠥ, ꠝꠣꠘꠤ ꠝꠦꠠꠣ-ꠛꠣꠁꠌ꠆ꠌꠣꠞ ꠛꠃꠞꠦ ꠖꠦꠈꠣꠁꠝꠥ।”
REV 21:10 ꠛꠣꠖꠦ ꠢꠃ ꠚꠤꠞꠤꠡ꠆ꠔꠣꠄ ꠞꠥꠢꠣꠘꠤ ꠢꠣꠟꠔꠦ ꠀꠝꠣꠞꠦ ꠛꠠ ꠄꠇ ꠃꠌꠣ ꠙꠣꠠꠞ ꠃꠙꠞꠦ ꠟꠁꠀ ꠉꠦꠟꠣ। ꠘꠤꠀ ꠀꠟ꠆ꠟꠣꠞ ꠝꠢꠤꠝꠣꠄ ꠌꠇꠌꠇꠣ ꠎꠦ ꠙꠛꠤꠔ꠆ꠞ ꠎꠦꠞꠥꠎꠣꠟꠦꠝ ꠐꠣꠃꠘ, ꠛꠦꠢꠦꠡ꠆ꠔꠞ ꠝꠣꠎ ꠕꠣꠇꠤ ꠀꠞ ꠀꠟ꠆ꠟꠣꠞ ꠖꠞꠛꠣꠞꠅ ꠕꠣꠇꠤ ꠟꠣꠝꠤꠀ ꠀꠅꠀꠔ ꠀꠍꠤꠟ, ꠅꠃ ꠚꠤꠞꠤꠡ꠆ꠔꠣꠄ ꠀꠝꠣꠞꠦ ꠅꠔꠣ ꠖꠦꠈꠣꠁꠟꠣ।
REV 21:11 ꠁ ꠐꠣꠃꠘꠞ ꠞꠋ ꠈꠥꠛ ꠖꠣꠝꠤ ꠝꠘꠤ-ꠝꠥꠇ꠆ꠔꠣꠞ ꠟꠣꠈꠣꠘ ꠌꠇꠌꠇꠣ, ꠚꠐꠤꠇꠞ ꠉ꠆ꠟꠣꠡꠞ ꠘꠝꠥꠘꠣꠄ ꠖꠣꠝꠤ ꠢꠤꠞꠣꠞ ꠟꠣꠈꠣꠘ।
REV 21:12 ꠢꠃ ꠐꠣꠃꠘꠅ ꠛꠠ ꠄꠇꠈꠣꠘ ꠃꠌꠣ ꠅꠀꠟ ꠀꠍꠤꠟ, ꠅꠃ ꠅꠀꠟꠅ ꠛꠣꠞꠅꠈꠣꠘ ꠉꠦꠁꠐ ꠀꠍꠤꠟ, ꠛꠣꠞꠅ ꠉꠦꠁꠐꠅ ꠛꠣꠞꠅꠎꠘ ꠚꠤꠞꠤꠡ꠆ꠔꠣ ꠀꠍꠟꠣ। ꠅꠃ ꠉꠦꠁꠐꠞ ꠃꠙꠞꠦ ꠛꠘꠤ ꠁꠍꠞꠣꠁꠟꠞ ꠛꠣꠞꠅ ꠈꠣꠘ꠆ꠖꠣꠘꠞ ꠘꠣꠝ ꠟꠦꠈꠣ।
REV 21:13 ꠁ ꠉꠦꠁꠐꠞ ꠔꠤꠘꠈꠣꠘ ꠙꠥꠛꠦꠖꠤ, ꠔꠤꠘꠈꠣꠘ ꠃꠔꠞꠦꠖꠤ, ꠔꠤꠘꠈꠣꠘ ꠖꠃꠇꠘꠦꠖꠤ ꠀꠞ ꠔꠤꠘꠈꠣꠘ ꠙꠁꠌꠝꠦꠖꠤ ꠀꠍꠤꠟ।
REV 21:14 ꠁ ꠐꠣꠃꠘꠞ ꠅꠀꠟꠞ ꠛꠣꠞꠅꠐꠣ ꠙꠤꠟꠣꠞ ꠀꠍꠤꠟ, ꠁꠔꠣꠞ ꠃꠙꠞꠦ ꠝꠦꠠꠣ-ꠛꠣꠁꠌ꠆ꠌꠣꠞ ꠛꠣꠞꠅꠎꠘ ꠍꠣꠢꠣꠛꠤꠞ ꠛꠣꠞꠅꠈꠣꠘ ꠘꠣꠝ ꠟꠦꠈꠣ।
REV 21:15 ꠀꠝꠣꠞ ꠟꠉꠦ ꠎꠦꠁꠘ ꠛꠣꠔꠌꠤꠔ ꠇꠞꠣꠔ ꠀꠍꠟꠣ ꠔꠣꠘ ꠀꠔꠅ ꠡꠥꠘꠣꠞ ꠄꠇꠐꠣ ꠘꠟ ꠀꠍꠤꠟ, ꠎꠣꠔꠦ ꠔꠣꠁꠘ ꠅꠃ ꠐꠣꠃꠘ, ꠐꠣꠃꠘꠞ ꠉꠦꠁꠐ ꠀꠞ ꠅꠀꠟ ꠝꠣꠙꠤꠔꠣ ꠙꠣꠞꠂꠘ।
REV 21:16 ꠁ ꠐꠣꠃꠘ ꠀꠍꠤꠟ ꠌꠣꠁꠞꠇꠥꠘꠤ ꠉꠥꠟ, ꠟꠣꠝ꠆ꠛꠣꠄ ꠀꠞ ꠚꠣꠠꠦ ꠡꠝꠣꠘ। ꠛꠣꠖꠦ ꠔꠣꠁꠘ ꠅꠃ ꠘꠟꠖꠤ ꠐꠣꠃꠘꠈꠣꠘ ꠝꠣꠙꠤꠟꠦ, ꠁꠈꠣꠘ ꠟꠣꠝ꠆ꠛꠣ, ꠚꠣꠠ ꠀꠞ ꠃꠌꠣꠄ ꠅꠁꠟ ꠛꠣꠞꠅ ꠀꠎꠣꠞ ꠡ꠆ꠔꠣꠖꠤꠀ (ꠅꠘꠥꠝꠣꠘ ꠖꠦꠠ ꠀꠎꠣꠞ ꠝꠣꠁꠟ)।
REV 21:17 ꠛꠣꠖꠦ ꠔꠣꠁꠘ ꠅꠀꠟ ꠝꠣꠙꠤꠟꠣ, ꠁ ꠅꠀꠟ ꠀꠍꠤꠟ ꠄꠇ-ꠡ ꠌꠃꠌꠣꠟ꠆ꠟꠤꠡ ꠀꠔ ꠃꠌꠣ। ꠝꠣꠘꠡꠞ ꠀꠔꠞ ꠝꠣꠙꠞ ꠟꠣꠈꠣꠘ ꠁ ꠚꠤꠞꠤꠡ꠆ꠔꠣꠄꠅ ꠝꠣꠙꠤꠟꠣ।
REV 21:18 ꠁ ꠅꠀꠟꠈꠣꠘ ꠢꠤꠞꠣꠖꠤ ꠛꠣꠘꠣꠁꠟ, ꠀꠞ ꠁ ꠐꠣꠃꠘ ꠀꠍꠤꠟ ꠚꠐꠤꠇꠞ ꠉ꠆ꠟꠣꠡꠞ ꠟꠣꠈꠣꠘ ꠈꠣꠐꠤ ꠡꠥꠘꠣꠖꠤ ꠛꠣꠘꠣꠁꠟ।
REV 21:19 ꠐꠣꠃꠘꠞ ꠅꠀꠟꠞ ꠙꠤꠟꠣꠞ ꠅꠇꠟꠞ ꠝꠣꠎꠦ ꠖꠣꠝꠤ ꠖꠣꠝꠤ ꠝꠘꠤ-ꠝꠥꠇ꠆ꠔꠣ ꠟꠣꠉꠣꠁꠟ ꠀꠍꠤꠟ। ꠙꠄꠟꠣ ꠙꠤꠟꠣꠞ ꠢꠤꠞꠣꠞ, ꠖꠥꠍꠞꠣꠐꠣ ꠀꠇꠤꠇ ꠝꠘꠤꠞ, ꠔꠤꠘ ꠘꠝ꠆ꠛꠞꠐꠣ ꠔꠣꠝꠣ ꠝꠘꠤ, ꠌꠣꠁꠞ ꠘꠝ꠆ꠛꠞꠐꠣ ꠙꠣꠘ꠆ꠘꠣ ꠝꠘꠤ,
REV 21:20 ꠙꠣꠌ ꠘꠝ꠆ꠛꠞꠐꠣ ꠡꠥꠞꠥꠎ ꠝꠘꠤ, ꠍꠄ ꠘꠝ꠆ꠛꠞꠐꠣ ꠁꠀꠇꠥꠔ ꠝꠘꠤ, ꠡꠣꠔ ꠘꠝ꠆ꠛꠞꠐꠣ ꠟꠤꠟ ꠝꠘꠤ, ꠀꠐ ꠘꠝ꠆ꠛꠞꠐꠣ ꠛꠂꠖꠥꠞ꠆ꠎ ꠝꠘꠤ, ꠘꠄ ꠘꠝ꠆ꠛꠞꠐꠣ ꠙꠤꠔ ꠝꠘꠤ, ꠖꠡ ꠘꠝ꠆ꠛꠞꠐꠣ ꠃꠙꠟ ꠝꠘꠤ, ꠄꠉꠣꠞꠅ ꠘꠝ꠆ꠛꠞꠐꠣ ꠚꠤꠞꠥꠎ ꠝꠘꠤ, ꠀꠞ ꠛꠣꠞꠅ ꠘꠝ꠆ꠛꠞꠐꠣ ꠙꠖ꠆ꠖꠞꠣꠉ ꠝꠘꠤ।
REV 21:21 ꠛꠣꠞꠅꠈꠣꠘ ꠉꠦꠁꠐ ꠛꠣꠞꠅꠐꠣ ꠝꠥꠇ꠆ꠔꠣꠖꠤ ꠛꠣꠘꠣꠁꠟ। ꠙꠞꠔꠦꠇ ꠉꠦꠁꠐ ꠀꠍꠤꠟ ꠄꠇꠅꠐꠣ ꠖꠣꠝꠤ ꠝꠥꠇ꠆ꠔꠣꠞ। ꠐꠣꠃꠘꠞ ꠞꠣꠡ꠆ꠔꠣ ꠀꠍꠤꠟ ꠚꠐꠤꠇꠞ ꠉ꠆ꠟꠣꠡꠞ ꠟꠣꠈꠣꠘ ꠈꠣꠐꠤ ꠡꠥꠘꠣꠖꠤ ꠛꠣꠘꠣꠁꠟ।
REV 21:22 ꠁ ꠐꠣꠃꠘꠅ ꠀꠝꠤ ꠇꠥꠘꠥ ꠄꠛꠣꠖꠔ ꠈꠣꠘꠣ ꠖꠦꠈꠟꠣꠝ ꠘꠣ, ꠡꠞ꠆ꠛ-ꠡꠇ꠆ꠔꠤꠝꠣꠘ ꠀꠟ꠆ꠟꠣ ꠝꠣꠛꠥꠖ ꠀꠞ ꠝꠦꠠꠣ-ꠛꠣꠁꠌ꠆ꠌꠣꠃ ꠀꠍꠟꠣ ꠁꠘꠞ ꠄꠛꠣꠖꠔ ꠈꠣꠘꠣ।
REV 21:23 ꠁ ꠐꠣꠃꠘꠞꠦ ꠚꠞ ꠇꠞꠣꠞ ꠟꠣꠉꠤ ꠇꠥꠘꠥ ꠌꠣꠘ-ꠡꠥꠞꠥꠎꠞ ꠎꠞꠥꠞ ꠘꠣꠁ। ꠀꠟ꠆ꠟꠣꠞ ꠘꠥꠞꠞ ꠝꠢꠤꠝꠣꠄ ꠚꠞ ꠖꠦꠄ, ꠀꠞ ꠝꠦꠠꠣ-ꠛꠣꠁꠌ꠆ꠌꠣꠃ ꠅꠁꠟꠣ ꠁꠘꠞ ꠛꠣꠔ꠆ꠔꠤ।
REV 21:24 ꠢꠇꠟ ꠎꠣꠔꠤꠞ ꠝꠣꠘꠥꠡ ꠅꠃ ꠘꠥꠞꠞ ꠚꠞꠦ ꠌꠟꠣ-ꠚꠤꠞꠣ ꠇꠞꠛꠣ, ꠖꠥꠘꠤꠀꠞ ꠛꠣꠖꠡꠣ ꠅꠇꠟꠦ ꠔꠣꠞꠣꠞ ꠎꠣꠇ-ꠎꠝꠇ ꠟꠁꠀ ꠅꠃ ꠐꠣꠃꠘꠅ ꠀꠁꠛꠣ।
REV 21:25 ꠖꠤꠘꠞ ꠛꠣꠟꠣ ꠇꠥꠘꠥ ꠡꠝꠄꠃ ꠁ ꠐꠣꠃꠘꠞ ꠉꠦꠁꠐ ꠛꠘ꠆ꠖ ꠅꠁꠔ ꠘꠣꠄ, ꠀꠞ ꠢꠤꠘꠅ ꠇꠥꠘꠥ ꠞꠣꠁꠔ ꠅꠁꠔ ꠘꠣꠄ।
REV 21:26 ꠔꠣꠝꠣꠝ ꠎꠣꠔꠤꠞ ꠁꠎ꠆ꠎꠔ ꠀꠞ ꠉꠃꠞꠛ ꠅꠘꠅ ꠀꠘꠣ ꠅꠁꠛ।
REV 21:27 ꠘꠣꠙꠣꠇ ꠇꠥꠘꠥ ꠌꠤꠎ, ꠢꠣꠞꠣꠝꠈꠥꠞ ꠛꠣ ꠝꠤꠍꠣ ꠝꠣꠔꠞꠣ ꠇꠥꠘꠥ ꠝꠣꠘꠥꠡ, ꠇꠥꠘꠥꠖꠤꠘꠅ ꠁꠘꠅ ꠢꠣꠝꠣꠁꠔ ꠙꠣꠞꠔ ꠘꠣꠄ। ꠈꠣꠟꠤ ꠝꠦꠠꠣ-ꠛꠣꠁꠌ꠆ꠌꠣꠞ ꠎꠤꠘ꠆ꠖꠦꠉꠤ ꠈꠣꠔꠣꠞ ꠝꠣꠎꠦ ꠎꠦꠞꠣꠞ ꠘꠣꠝ ꠟꠦꠈꠣ ꠀꠍꠦ, ꠔꠣꠞꠣꠃ ꠢꠣꠝꠣꠁꠛꠣ।
REV 22:1 ꠄꠞꠛꠣꠖꠦ ꠢꠃ ꠚꠤꠞꠤꠡ꠆ꠔꠣꠄ ꠀꠝꠣꠞꠦ ꠀꠛꠦ-ꠢꠣꠄꠀꠔ, ꠝꠣꠘꠤ ꠎꠤꠘ꠆ꠖꠦꠉꠤ-ꠙꠣꠘꠤꠞ ꠉꠣꠋ ꠖꠦꠈꠣꠁꠟꠣ। ꠁꠇꠐꠣ ꠖꠦꠈꠔꠦ ꠌꠇꠌꠇꠣ ꠇꠣꠌꠞ ꠟꠣꠈꠣꠘ। ꠁꠐꠣ ꠀꠟ꠆ꠟꠣ ꠙꠣꠇ ꠀꠞ ꠢꠃ ꠝꠦꠠꠣ-ꠛꠣꠁꠌ꠆ꠌꠣꠞ ꠔꠈ꠆ꠔꠞ ꠗꠣꠞꠅ ꠕꠣꠇꠤ ꠛꠣꠞ ꠅꠁꠀ,
REV 22:2 ꠐꠣꠃꠘꠞ ꠛꠠ ꠉꠟ꠆ꠟꠤꠞ ꠝꠣꠎꠈꠣꠘꠦꠖꠤ ꠎꠣꠅꠀꠔ ꠀꠍꠤꠟ। ꠀꠞ ꠅꠃ ꠉꠣꠋꠉꠞ ꠖꠥꠁꠅ ꠙꠣꠞꠅ ꠎꠤꠘ꠆ꠖꠦꠉꠤ-ꠉꠣꠍ ꠀꠍꠤꠟ। ꠅꠃ ꠉꠣꠍꠣꠁꠘ꠆ꠔꠅ ꠛꠣꠞꠅ ꠎꠣꠔꠞ ꠚꠟ ꠗꠞꠦ। ꠙꠞꠔꠦꠇ ꠝꠣꠡꠦ ꠝꠣꠡꠦ ꠚꠟ ꠗꠞꠦ, ꠅꠃ ꠉꠣꠍꠞ ꠙꠣꠔꠣꠄ ꠢꠇꠟ ꠎꠣꠔꠤꠞ ꠝꠣꠘꠡꠞ ꠛꠦꠝꠣꠞ ꠡꠤꠚꠣ ꠅꠄ।
REV 22:3 ꠇꠥꠘꠥꠎꠣꠔ ꠟꠣꠘ꠆ꠘꠔ ꠀꠞ ꠞꠁꠔ ꠘꠣꠄ। ꠀꠟ꠆ꠟꠣ ꠙꠣꠇ ꠀꠞ ꠝꠦꠠꠣ-ꠛꠣꠁꠌ꠆ꠌꠣꠞ ꠔꠈ꠆ꠔ ꠅꠃ ꠐꠣꠃꠘꠅ ꠞꠁꠛ, ꠀꠞ ꠔꠣꠘ ꠉꠥꠟꠣꠝ ꠅꠇꠟꠦ ꠔꠣꠘ ꠄꠛꠣꠖꠔ ꠇꠞꠛꠣ।
REV 22:4 ꠔꠣꠞꠣ ꠔꠣꠘ ꠙꠛꠤꠔ꠆ꠞ ꠝꠥꠈ ꠖꠦꠈꠛꠣ, ꠔꠣꠞꠣꠞ ꠇꠙꠣꠟꠅ ꠔꠣꠘ ꠘꠣꠝ ꠟꠦꠈꠣ ꠕꠣꠇꠛ।
REV 22:5 ꠀꠞ ꠇꠥꠘꠥ ꠞꠣꠁꠔ ꠅꠁꠔ ꠘꠣꠄ, ꠔꠣꠞꠣꠞ ꠟꠣꠉꠤ ꠟꠦꠝꠞ ꠛꠣ ꠡꠥꠞꠥꠎꠞ ꠚꠞꠞ ꠎꠞꠥꠞ ꠅꠁꠔ ꠘꠣꠄ, ꠇꠣꠞꠘ ꠀꠟ꠆ꠟꠣ ꠝꠣꠛꠥꠖꠞ ꠘꠥꠞꠃ ꠅꠁꠛ ꠔꠣꠞꠣꠞ ꠚꠞ। ꠔꠣꠞꠣ ꠢꠞ-ꠢꠣꠝꠦꠡꠣ ꠌꠤꠞꠇꠣꠟ ꠗꠞꠤ ꠛꠣꠖꠡꠣꠁ ꠇꠞꠛꠣ।
REV 22:6 ꠛꠣꠖꠦ ꠢꠃ ꠚꠤꠞꠤꠡ꠆ꠔꠣꠄ ꠀꠝꠣꠞꠦ ꠇꠁꠟꠣ, “ꠁꠔꠣ ꠢꠇꠟꠔꠣ ꠄꠇꠤꠘ ꠇꠞꠣꠞ ꠟꠣꠈ ꠢꠣꠍꠣ। ꠀꠟ꠆ꠟꠣ ꠝꠣꠛꠥꠖ, ꠎꠦꠁꠘ ꠀꠉꠦ ꠔꠣꠘ ꠘꠛꠤ ꠅꠇꠟꠞ ꠝꠣꠎꠖꠤ ꠛꠣꠔꠌꠤꠔ ꠇꠞꠍꠂꠘ, ꠔꠣꠁꠘ ꠘꠤꠎꠞ ꠚꠤꠞꠤꠡ꠆ꠔꠣꠞꠦ ꠖꠤꠍꠂꠘ, ꠎꠣꠔꠦ ꠕꠥꠠꠣ ꠇꠄꠖꠤꠘꠞ ꠝꠣꠎꠦ ꠎꠦꠔꠣ ꠊꠐꠤꠛ, ꠅꠃ ꠚꠤꠞꠤꠡ꠆ꠔꠣꠄ ꠁꠔꠣ ꠔꠣꠘ ꠉꠥꠟꠣꠝ ꠅꠇꠟꠞꠦ ꠖꠦꠈꠣꠁꠘ।”
REV 22:7 ꠢꠎꠞꠔ ꠁꠍꠣꠄ ꠇꠁꠞꠣ, “ꠢꠥꠘꠅ, ꠀꠝꠤ ꠈꠥꠛ ꠎꠟꠖꠤꠃ ꠀꠁꠞꠣꠝ। ꠎꠦ ꠎꠘꠦ ꠅꠃ ꠇꠤꠔꠣꠛꠞ ꠢꠇꠟ ꠀꠄꠀꠔꠞ ꠀꠉꠣꠝ ꠈꠛꠞ ꠀꠝꠟ ꠇꠞꠦ, ꠢꠦ-ꠃ ꠘꠦꠇ-ꠇꠙꠣꠟꠤ।”
REV 22:8 ꠔꠦ ꠁꠍꠣ ꠀꠟ-ꠝꠍꠤꠞ ꠍꠣꠢꠣꠛꠤ ꠀꠝꠤ ꠢꠣꠘ꠆ꠘꠣꠘꠦ ꠁꠔꠣ ꠖꠦꠈꠍꠤ ꠀꠞ ꠢꠥꠘꠍꠤ। ꠢꠇꠟꠔꠣ ꠢꠥꠘꠣ ꠀꠞ ꠖꠦꠈꠣꠞ ꠛꠣꠖꠦ, ꠎꠦ ꠚꠤꠞꠤꠡ꠆ꠔꠣꠄ ꠀꠝꠣꠞꠦ ꠁꠔꠣ ꠖꠦꠈꠣꠁꠍꠂꠘ, ꠀꠝꠤ ꠔꠣꠘꠞꠦ ꠍꠁꠎꠖꠣ ꠇꠞꠣꠞ ꠘꠤꠅꠔꠦ ꠔꠣꠘ ꠙꠣꠅ-ꠅ ꠙꠠꠟꠣꠝ।
REV 22:9 ꠅꠁꠟꠦ ꠔꠣꠁꠘ ꠀꠝꠣꠞꠦ ꠇꠁꠟꠣ, “ꠘꠣ, ꠘꠣ! ꠔꠥꠝꠤ ꠀꠝꠣꠞꠦ ꠘꠣꠄ, ꠈꠣꠟꠤ ꠀꠟ꠆ꠟꠣ ꠙꠣꠇꠞꠦ ꠍꠁꠎꠖꠣ ꠇꠞꠅ। ꠀꠝꠤ ꠔ ꠈꠣꠟꠤ ꠔꠥꠝꠣꠞ ꠟꠣꠈꠣꠘ ꠉꠥꠟꠣꠝ, ꠔꠥꠝꠣꠞ ꠜꠣꠁꠀꠁꠘ ꠝꠣꠘꠤ ꠘꠛꠤ ꠅꠇꠟꠞ ꠟꠣꠈꠣꠘ ꠀꠞ ꠁ ꠇꠤꠔꠣꠛꠞ ꠢꠇꠟ ꠀꠄꠀꠔ ꠎꠦꠞꠣ ꠝꠣꠘꠦ, ꠔꠣꠞꠣꠞ ꠟꠣꠈꠣꠘꠃ ꠉꠥꠟꠣꠝ।”
REV 22:10 ꠄꠞꠛꠣꠖꠦ ꠔꠣꠁꠘ ꠀꠝꠣꠞꠦ ꠇꠁꠟꠣ, “ꠅꠃ ꠇꠤꠔꠣꠛꠞ ꠇꠥꠘꠥ ꠀꠉꠣꠝ ꠈꠛꠞ ꠔꠥꠝꠤ ꠟꠥꠇꠣꠁꠀ ꠞꠣꠈꠤꠅ ꠘꠣ, ꠇꠣꠞꠘ ꠡꠝꠄ ꠊꠘꠣꠁꠀ ꠀꠁꠌ꠆ꠍꠦ।
REV 22:11 ꠎꠦꠉꠤꠄ ꠘꠣꠚꠞꠝꠣꠘꠤ ꠇꠞꠦꠞ, ꠢꠦ ꠅꠟꠣ ꠇꠞꠣꠔ ꠞꠃꠇ। ꠎꠦꠉꠥ ꠈꠛꠤꠍ, ꠁꠉꠥ ꠔꠣꠞ ꠈꠛꠤꠍꠤꠔ ꠞꠃꠇ। ꠀꠞ ꠙꠞꠦꠎꠉꠣꠞ ꠎꠘꠦ ꠙꠞꠦꠎꠉꠣꠞꠤ ꠇꠞꠣꠔ ꠞꠃꠇ, ꠙꠣꠇ-ꠙꠛꠤꠔ꠆ꠞ ꠎꠘ ꠙꠣꠇ-ꠙꠛꠤꠔ꠆ꠞ ꠞꠃꠇ।”
REV 22:12 ꠢꠎꠞꠔ ꠁꠍꠣꠄ ꠇꠁꠞꠣ, “ꠢꠥꠘꠅ, ꠀꠝꠤ ꠈꠥꠛ ꠎꠟꠖꠤ ꠀꠁꠞꠣꠝ, ꠀꠞ ꠙꠞꠔꠦꠇ ꠝꠣꠘꠡꠞ ꠀꠝꠟ-ꠘꠣꠝꠣꠞ ꠙꠥꠞꠥꠡ꠆ꠇꠣꠞ ꠀꠝꠣꠞ ꠀꠔꠅ ꠀꠍꠦ।
REV 22:13 ꠀꠝꠤꠃ ꠀꠟꠤꠚ ꠀꠞ ꠁꠀ, ꠀꠃꠀꠟ ꠀꠞ ꠀꠈꠦꠞ, ꠡꠥꠞꠥ ꠀꠞ ꠡꠦꠡ।
REV 22:14 “ꠔꠣꠞꠣꠃ ꠘꠦꠇ-ꠇꠙꠣꠟꠤ, ꠎꠦꠞꠣ ꠘꠤꠎꠞ ꠇꠣꠙꠠ-ꠌꠥꠙꠠ ꠗꠁꠀ ꠙꠞꠤꠡ꠆ꠇꠣꠞ ꠇꠞꠦ, ꠎꠣꠔꠦ ꠎꠤꠘ꠆ꠖꠦꠉꠤ-ꠉꠣꠍꠞ ꠚꠟ ꠈꠣꠅꠀꠞ ꠅꠗꠤꠇꠣꠞ ꠙꠣꠄ, ꠀꠞ ꠉꠦꠁꠐꠦꠖꠤ ꠉꠤꠀ ꠙꠛꠤꠔ꠆ꠞ ꠐꠣꠃꠘꠅ ꠢꠣꠝꠣꠄ।
REV 22:15 ꠇꠥꠇꠞꠞ ꠟꠣꠈꠣꠘ ꠎꠊꠁꠘ꠆ꠘ ꠝꠣꠘꠥꠡ, ꠎꠣꠖꠥꠉꠤꠞ, ꠎꠤꠘꠣꠇꠥꠞ, ꠈꠥꠘꠤ, ꠝꠥꠞ꠆ꠔꠤꠙꠥꠎꠣ ꠇꠞꠞꠣ, ꠀꠞ ꠎꠦꠔꠣꠄ ꠝꠤꠍꠣ ꠝꠣꠔ ꠙꠍꠘ꠆ꠖ ꠇꠞꠦ, ꠝꠤꠍꠣꠞ ꠝꠣꠎꠦ ꠌꠟꠦ, ꠁꠔꠣ ꠢꠇ꠆ꠇꠟꠐꠤ ꠛꠣꠞꠦ ꠙꠠꠤ ꠞꠁꠍꠦ।
REV 22:16 “ꠔꠦ ꠀꠝꠤ ꠁꠍꠣꠄ ꠀꠝꠣꠞ ꠚꠤꠞꠤꠡ꠆ꠔꠣꠞꠦ ꠙꠣꠑꠣꠁꠍꠤ, ꠎꠣꠔꠦ ꠄꠁꠘ ꠎꠝꠣꠔ ꠅꠇꠟꠞ ꠟꠣꠉꠤ ꠔꠥꠝꠞꠣꠞ ꠉꠦꠍꠦ ꠅꠔꠣ ꠢꠇꠟ ꠛꠦꠙꠣꠞꠦ ꠎꠛꠣꠘꠛꠘ꠆ꠖꠤ ꠖꠦꠁꠘ। ꠀꠝꠤ ꠔ ꠛꠣꠖꠡꠣ ꠖꠣꠃꠖꠞ ꠈꠣꠘ꠆ꠖꠣꠘ ꠀꠞ ꠝꠥꠟ ꠎꠠ, ꠚꠎꠞꠞ ꠌꠇꠌꠇꠣ ꠡꠥꠇ-ꠔꠦꠞꠣ।”
REV 22:17 ꠙꠣꠇ ꠞꠥꠢꠦ ꠀꠞ ꠇꠁꠘꠣꠄ ꠇꠁꠞꠣ, “ꠀꠅ।” ꠀꠞ ꠎꠦ ꠎꠘꠦ ꠅꠃ ꠇꠕꠣ ꠢꠥꠘꠦꠞ, ꠢꠦ-ꠅ ꠇꠃꠇ, “ꠀꠅ।” ꠙꠣꠘꠤꠞ ꠙꠤꠀꠍꠦ ꠎꠣꠞꠦ ꠗꠞꠍꠦ, ꠢꠦ ꠀꠃꠇ। ꠎꠦ ꠎꠘꠦ ꠙꠣꠘꠤ ꠈꠣꠁꠔ ꠌꠣꠄ, ꠢꠦ ꠛꠤꠘꠣ ꠙꠄꠡꠣꠄ ꠎꠤꠘ꠆ꠖꠦꠉꠤ-ꠙꠣꠘꠤ ꠈꠣꠃꠇ।
REV 22:18 ꠎꠦ ꠎꠘꠦ ꠅꠃ ꠇꠤꠔꠣꠛꠞ ꠢꠇꠟ ꠀꠉꠣꠝ ꠈꠛꠞ ꠢꠥꠘꠦ, ꠔꠣꠞ ꠉꠦꠍꠦ ꠀꠝꠤ ꠅꠃ ꠎꠛꠣꠘꠛꠘ꠆ꠖꠤ ꠖꠤꠀꠞ, ꠇꠦꠃ ꠎꠥꠖꠤ ꠅꠃ ꠀꠄꠀꠔ ꠅꠇꠟꠞ ꠟꠉꠦ ꠖꠥꠍꠞꠣ ꠇꠥꠘ꠆ꠔꠣ ꠛꠣꠠꠣꠄ, ꠔꠦ ꠀꠟ꠆ꠟꠣꠄꠅ ꠅꠃ ꠇꠤꠔꠣꠛꠅ ꠟꠦꠈꠣ ꠢꠇꠟ ꠘꠝꠥꠘꠣꠞ ꠉꠎꠛ ꠔꠣꠞ ꠎꠤꠘ꠆ꠖꠦꠉꠤꠔ ꠛꠣꠠꠣꠁꠛꠣ।
REV 22:19 ꠀꠞ ꠅꠃ ꠇꠤꠔꠣꠛꠞ ꠀꠄꠀꠔ ꠅꠇꠟ ꠕꠣꠇꠤ ꠇꠦꠃ ꠎꠥꠖꠤ ꠇꠥꠘ꠆ꠔꠣ ꠛꠣꠖ ꠖꠦꠄ, ꠔꠦ ꠀꠟ꠆ꠟꠣꠄꠅ ꠁ ꠇꠤꠔꠣꠛꠅ ꠟꠦꠈꠣ ꠎꠤꠘ꠆ꠖꠦꠉꠤ-ꠉꠣꠍ ꠀꠞ ꠙꠛꠤꠔ꠆ꠞ ꠐꠣꠃꠘꠞ ꠅꠗꠤꠇꠣꠞ, ꠔꠣꠞ ꠎꠤꠘ꠆ꠖꠦꠉꠤ ꠕꠣꠇꠤ ꠛꠣꠖ ꠖꠤꠛꠣ।
REV 22:20 ꠅꠃ ꠛꠦꠙꠣꠞ ꠅꠇꠟ ꠟꠁꠀ ꠎꠦꠁꠘ ꠎꠛꠣꠘꠛꠘ꠆ꠖꠤ ꠖꠤꠞꠣ, ꠔꠣꠁꠘ ꠇꠁꠞꠣ, “ꠢꠣꠍꠣꠃ, ꠀꠝꠤ ꠈꠥꠛ ꠎꠟꠖꠤ ꠀꠁꠞꠣꠝ।” ꠀꠝꠤꠘ। ꠢꠎꠞꠔ ꠁꠍꠣ, ꠀꠙꠘꠦ ꠔꠡꠞꠤꠚ ꠀꠘꠃꠇ꠆ꠇꠣ।
REV 22:21 ꠀꠟ꠆ꠟꠣꠞ ꠔꠣꠝꠣꠝ ꠙꠣꠇ ꠛꠘ꠆ꠖꠣ ꠅꠇꠟꠞ ꠃꠙꠞꠦ, ꠢꠎꠞꠔ ꠁꠍꠣꠞ ꠞꠢꠝꠔ ꠎꠣꠞꠤ ꠞꠃꠇ। ꠀꠝꠤꠘ॥ ꠈꠔꠝ॥
