﻿ꠎꠛꠥꠞ.
20.
ꠄꠛꠣꠖꠔ-ꠛꠘ꠆ꠖꠦꠉꠤ ꠙꠞꠤꠌꠣꠟꠇꠞ ꠟꠣꠉꠤ: ꠢꠎꠞꠔ ꠖꠣꠃꠖꠞ ꠝꠤꠎꠝꠞ। ꠝꠍꠤꠛꠔꠞ ꠡꠝꠄ ꠝꠣꠛꠥꠖꠦ ꠔꠥꠝꠣꠞ ꠚꠞꠤꠀꠖ ꠢꠥꠘꠃꠇ꠆ꠇꠣ, ꠁꠀꠇꠥꠛꠞ ꠀꠟ꠆ꠟꠣꠞ ꠘꠣꠝ ꠔꠥꠝꠣꠞꠦ ꠍꠢꠤ-ꠍꠣꠟꠣꠝꠔꠦ ꠞꠣꠈꠃꠇ꠆ꠇꠣ। 
ꠔꠣꠘ ꠙꠣꠇ ꠝꠥꠇꠣꠝ ꠕꠣꠇꠤ ꠔꠥꠝꠣꠞ ꠟꠣꠉꠤ ꠡꠣꠁꠎ꠆ꠎ ꠙꠣꠑꠣꠃꠇ꠆ꠇꠣ, ꠙꠛꠤꠔ꠆ꠞ ꠍꠤꠅꠘ ꠕꠣꠇꠤ ꠔꠥꠝꠣꠞꠦ ꠛꠟ-ꠔꠣꠇ꠆ꠇꠔ ꠖꠦꠃꠇ꠆ꠇꠣ। 
ꠔꠣꠁꠘ ꠔꠥꠝꠣꠞ ꠢꠇꠟ ꠟꠤꠟ꠆ꠟꠣ-ꠍꠖꠉꠣꠞꠦ ꠝꠘꠅ ꠞꠣꠈꠃꠇ꠆ꠇꠣ, ꠇꠛꠥꠟ ꠇꠞꠃꠇ꠆ꠇꠣ ꠔꠥꠝꠣꠞ ꠎꠣꠟꠣꠁꠟ ꠇꠥꠞꠛꠣꠘꠤ। (ꠍꠦꠟꠣ) 
ꠔꠥꠝꠣꠞ ꠖꠤꠟꠞ ꠀꠞꠎꠤꠞꠦ ꠇꠛꠥꠟ ꠇꠞꠃꠇ꠆ꠇꠣ, ꠝꠘꠞ ꠀꠡꠣ ꠅꠇꠟ ꠙꠥꠞꠘ ꠇꠞꠃꠇ꠆ꠇꠣ। 
ꠔꠥꠝꠤ ꠎꠄꠁ ꠅꠁꠟꠦ ꠀꠝꠞꠣ ꠈꠥꠡꠤ-ꠛꠣꠡꠤꠞ ꠉꠎꠟ ꠉꠣꠁꠝꠥ, ꠀꠝꠞꠣꠞ ꠀꠟ꠆ꠟꠣꠞ ꠘꠣꠝꠦ ꠏꠣꠘ꠆ꠒꠣ ꠃꠠꠣꠁꠝꠥ, ꠝꠣꠛꠥꠖꠦ ꠔꠥꠝꠣꠞ ꠢꠇꠟ ꠝꠤꠘꠔꠤ ꠙꠥꠞꠘ ꠇꠞꠃꠇ꠆ꠇꠣ। 
ꠀꠝꠤ ꠔ ꠅꠈꠘ ꠎꠣꠘꠤꠃ, ꠝꠣꠛꠥꠖꠦ ꠔꠣꠘ ꠘꠤꠎꠞ ꠈꠦꠟꠣꠚꠔꠤ ꠙꠣꠅꠀ ꠎꠘꠞꠦ ꠛꠣꠌꠣꠁꠛꠣ। ꠔꠣꠘ ꠀꠙꠘ ꠒꠣꠁꠘ ꠀꠔꠞ ꠛꠟ-ꠔꠣꠇ꠆ꠇꠔꠦ ꠎꠥꠖ꠆ꠖꠔ ꠎꠤꠔꠣꠁꠛꠣ, ꠘꠤꠎꠞ ꠙꠛꠤꠔ꠆ꠞ ꠀꠞꠡ ꠕꠣꠇꠤ ꠄꠘ ꠝꠤꠘꠔꠤ ꠢꠥꠘꠛꠣ। 
ꠇꠦꠃꠞꠞ ꠜꠞꠡꠣ ꠅꠁꠟ ꠔꠣꠞ ꠎꠥꠖ꠆ꠖꠞ ꠞꠕ, ꠀꠞ ꠇꠦꠃꠞꠞ ꠜꠞꠡꠣ ꠔꠣꠞ ꠊꠥꠠꠣꠁꠘ꠆ꠔꠞ ꠃꠙꠞꠦ, ꠀꠝꠞꠣꠞ ꠜꠞꠡꠣ ꠈꠣꠟꠤ ꠀꠝꠞꠣꠞ ꠀꠟ꠆ꠟꠣ ꠝꠣꠛꠥꠖꠞ ꠃꠙꠞꠦ। 
ꠔꠣꠞꠣ ꠔ ꠃꠘ꠆ꠖꠣ ꠅꠁꠀ ꠟꠦꠐꠤꠎꠣꠁꠘ, ꠅꠁꠟꠦ ꠀꠝꠞꠣ ꠡꠤꠗꠣ ꠅꠁꠀ ꠢꠣꠝꠦꠡꠣ ꠈꠣꠠꠣ ꠞꠁ। 
ꠅ ꠝꠣꠛꠥꠖ, ꠛꠣꠖꠡꠣꠞꠦ ꠎꠄꠁ ꠇꠞꠃꠇ꠆ꠇꠣ, ꠀꠝꠞꠣꠞ ꠒꠣꠇ ꠢꠥꠘꠤꠀ ꠎꠥꠀꠙ ꠖꠦꠃꠇ꠆ꠇꠣ॥ 
