GEN 1:1 Foyla-u Allae asman ar dunia foyda ḳorla.
GEN 1:2 Duniai niraḳar ar ḳali asil, goin fanir ufre fura andair asil. Allar ruhu er ufre solasol ḳorta.
GEN 1:3 Bade Allae formaila for ouk, ar for oilo.
GEN 1:4 Allae deḳla for bala. Tain andair taki forre alga ḳoria
GEN 1:5 er nam raḳla din, ar andairor nam raḳla rait. Hainja gelo, bian-o gelo, ikṭa oilo foyla din.
GEN 1:6 Bade Allae formaila, fanir maze gumbuzor laḳan faḳ zaga ouk, ar fani dui bag oizauk.
GEN 1:7 Ar Allae faḳ zaga foyda ḳoria, tolor ar ufror fani alga ḳorla. Ar oula oilo.
GEN 1:8 Allae gumbuzor laḳan ze zaga banaila, tar nam raḳla asman. Hainja gelo, bian-o gelo, ikṭa oilo dui nombor din.
GEN 1:9 Erbade Allae formaila, asmanor tolor fani eḳ zagat dola ouk, ar hukna zaga deḳa zauk. Ar oula oilo.
GEN 1:10 Allae hukna zagar nam raḳla zomin ar zomail fanir nam doria. Tain deḳla ita bala.
GEN 1:11 Bade Allae formaila, zomino gash folouk; ar hoḳol zator bisala lota-fata gas-gasalir zonom ouk. Ar zominor ufre hoḳol zator folor gas-o ouk, era nizor zatmoto fol dorbo ar folor maze zarzir bis-o taḳbo. Ar oula oilo.
GEN 1:12 Zomino gash folilo, hoḳol zator bisala lota-fata gas-birik zonmilo. Zominor ufre hoḳol zator folor gas oilo zetae zarzir zatmoto fol dore, hi folor maze zarzir bis-o ase. Allae deḳla ita bala.
GEN 1:13 Hainja gelo, bian-o gelo, ikṭa oilo tin nombor din.
GEN 1:14 Bade Allae formaila, asmanor maze oula serag oḳol ouk, zara rait taki dinre alga ḳore. Ita alga alga din, bosor ar id-utshobor nishana oibo.
GEN 1:15 Asman taki tara duniair ufre for dibo. Oula-u oilo.
GEN 1:16 Allae duiṭa boṛo serag banaila, ermaze boṛoṭare dinor ufre bashshai korar lagi ar huruṭare raitor ufre. Ita saṛa tain tera oḳol-o foyda ḳorla.
GEN 1:17 Tain erare asmanor maze boaila zate tara duniait for dey.
GEN 1:18 Era din ar raitor ufre bashshai kore, andair taki forre alga ḳore. Allae deḳla ita bala.
GEN 1:19 Hainja gelo, bian-o gelo, ikṭa oilo sair nombor din.
GEN 1:20 Bade Allae formaila, fanir maze zandar oḳol fale fale bori zauk, ar duniair ufre asmanor maze fakin uṛouk.
GEN 1:21 Ar Allae doriar biraṭ zandar oḳol, ar fanir maze fal bandia gurra hoḳol zator zandar foyda ḳorla, ar hoḳol zator faki-o foyda ḳorla. Tain deḳla ita bala.
GEN 1:22 Tain tara hoḳolre ou laḳan borkot nazil ḳorla, tumra folala oia baṛo ar doriar fani bori zao, duniair maze faki oḳol-o baṛouk.
GEN 1:23 Hainja gelo, bian-o gelo, ikṭa oilo fas nombor din.
GEN 1:24 Erbade Allae formaila, maṭi taki oula zandar ouk zarar nizor zat oḳolre baṛaibo, erar maze fala heman, maṭit solra huru-muru zandar ar zongli zanuar oḳol-o. Oula-u oilo.
GEN 1:25 Allae duniair maze hoḳol zator zongli zanuar, fala heman ar maṭir maze buke solra zandar banaila. Tain deḳla ita bala.
GEN 1:26 Erbade Allae formaila, ao amrar surote amrar loge mil rakia manush banai. Tara doriar mas, asmanor faki, zanuar, maṭir maze buke solra zandar, ar asta duniair ufre bashshai korouk.
GEN 1:27 Tain tan nizor surote manush foyda ḳorla, ekkere nizor moto ḳori foyda ḳorla, foyda ḳorla beṭa ar beṭi.
GEN 1:28 Ar tarare borkot nazil ḳoria ḳoila, tumitain folala oia baṛia duniai borizao. Duniaire shashon ḳoro, ar doriar mas, asmanor faki, maṭir ufre solra hoḳol zandaror ufre bashshai koro.
GEN 1:29 Erbade Allae formaila, huno, duniar ufror hoḳol zator bisala gas-birik, ar hoḳol zator folor gas zarar nizor zatmoto fol dore zar folor maze tarar nizor bis ase, ita hoḳolta ami tumrar ḳanir lagi dilam.
GEN 1:30 Duniar forteḳ zanuar, asmanor fakin, maṭir maze buke solra zandar, ita hokkol zandaror ḳanir lagi ami hoḳol lota-fata ar gash dilam. Oula-u oilo.
GEN 1:31 Allae tan foyda ḳora hoḳolta deḳla, ita hoḳolta-u kub bala oise. Hainja gelo, bian-o gelo. Ikṭa oilo soy nombor din.
GEN 2:1 Ou laḳan asman-zomin ar er mazor hoḳolta foyda ḳora shesh oilo.
GEN 2:2 Allae i hoḳol ḳam shesh ḳoria harle shat nombor din aram ḳorla, tain idin ar kunta foyda ḳorla na.
GEN 2:3 Ou shat nombor dinre borkot nazil ḳoria pak din ḳorla, tan hoḳolta foyda ḳora shesh ḳori tain ou din ziraila.
GEN 2:4 Ou oilo asman ar zomin foydar boyan. Mabud Allae zebla asman ar zomin foyda ḳorsila,
GEN 2:5 i shomoy zominor ufre kunuzator gas-fala asil na ar kunu lota-fata-o folise na, ḳaron tain zominor ufre meg disoin na, ar zomin abad ḳorar manush-o asil na.
GEN 2:6 Ou shomoy maṭir mur taki fani uṭto ar zomin bizto.
GEN 2:7 Bade Mabud Allae feḳ maṭi dia manush banaia tar naḳor maze fu dia zan haraila. Ar ou manush zandar oilo.
GEN 2:8 Mabud Allae fubedi Adan namor zagat eḳ bagan ḳorsila, hono tanor banail ou manushre raḳla.
GEN 2:9 Hikanor maṭit tain ou laḳan gas oḳol folaisla, zeta deḳte kub shundor ar fol-o ḳaite kub moza. Ar baganor mazḳano tain “zindegi-gas” ar “neki-bodir aḳol deora gas” namor duiṭa gas-o raḳsila.
GEN 2:10 Hou bagano fani zugaia dito ek gang asil, zeḳṭa Adanor mazedi bar oia sair bag oigesil.
GEN 2:11 Foyla gangor nam asil Pishun, ikṭa asta Hobila deshor bitre dia gese. Ino shuna faoa zae,
GEN 2:12 ar ou deshor shuna kub ḳaṭi, ita saṛa-o hino meshke-ambor ar akik moni faoa zae.
GEN 2:13 Dui nombor gangor nam Zihun, ikṭa asta Kush deshor bitre dia gese.
GEN 2:14 Tin nombor gangor nam Dojla, ikṭa Ashiria deshor fubedia gese. Ar sair nombor gangor nam oilo Furat.
GEN 2:15 Bade Mabud Allae ou manushre Adan bagano raḳla, hino ḳet-ḳamar ar hefazot ḳorar lagi.
GEN 2:16 Tain Adomre hukum dila, “Tumi tumar kushimoto i bagisar zekunu gasor fol ḳaitae farbae,
GEN 2:17 ḳali neki-bodir aḳolor gasor fol ḳaio na, zedin tumi ou gasor fol ḳaibae idin tumi morbae-u morbae.”
GEN 2:18 Erbade Mabud Allae ḳoila, “Manshor lagi eḳla taḳa bala nae. Ami tar laḳ eḳzon zuṛi banaimu.”
GEN 2:19 Ar Mabud Allae duniair hoḳol zandar ar asmanor hoḳol faki maṭidi banaia ou manshor samne anla, deḳla ein itare kita ḳoia ḍaḳoin, ar tain zare ze name ḍaḳla, tar ou nam oilo.
GEN 2:20 Adome hoḳol fala heman, asmanor faki ar zongli zanuaror nam raḳla, itar maze tan lak kunu zuṛi millo na.
GEN 2:21 Erbade tain Adomor maze behushi gum anla. Ou gumor maze tan fainjoror eḳṭa aḍḍi kulia nia zagaṭa bond ḳori dila,
GEN 2:22 ar ou aḍḍi dia Mabud Allae eḳ beṭimanush banaia Adomor gese anla.
GEN 2:23 Tane dekia Adome ḳoila, “Oḳon oise, tai amar aḍḍir aḍḍi, gustor gust. Tair nam oibo nari, taire nor taki neoa.”
GEN 2:24 Erlagi beṭainte ma-bafre saṛia bour loge roiba, tara duiozon eḳ shoril oiba.
GEN 2:25 Adom ar tan bibir shoril udam taḳto, ita kunu shorom asil na.
GEN 3:1 Mabud Allar foyda ḳora zominor hoḳol zandaror maze haf oilo hoḳol taki fondibaz. Ou hafe eḳdin hi beṭi manshore ḳoilo, “Allae hasau tumatanre ḳoisoin ni, baganor hoḳol gasor fol tumra ḳaitae fartae nae?”
GEN 3:2 Beṭie ḳoila, “Baganor zekunu gasor fol amra ḳaitam fari,
GEN 3:3 ḳali baganor mazḳano ze gasṭa ase, Allae ḳoisoin, tumra er fol ḳaio na, soio-o na, soile-u morbae.”
GEN 3:4 Ou hafe tanre ḳoilo, “Na, kunumonte-u mortae nae.
GEN 3:5 Allae to zanoin, zedin tumra i gasor fol ḳailibae idin tumrar souk kulizibo, ar neki-bodir aḳol faia tumra Allar laḳan oizibae.”
GEN 3:6 Beṭie zebla buzla, ou gasor fol ḳaite moza oibo, deḳte-o shundor, ar aḳoldar-o oizimu, ou tain fol faṛia ḳaila, ar tan zamaire-o dila ar zamaie-o ḳailila.
GEN 3:7 Loge loge tara duio zonor souk kuli gelo, ar buzla tain-tain lemṭa. Ou tara ḍumur gasor ḳoyṭa fata siṛia silai kori lemṭi banaila.
GEN 3:8 Hainja bala tara Mabud Allar aoaz hunla, tain baganor maze faḳanit aira. Teu Adom ar tan bou Mabud Allar samne na foṛar lagi baganor gasor aoṛe luḳaila.
GEN 3:9 Mabud Allae Adomre ḍaḳ dia zikaila, “Tumi kuai?”
GEN 3:10 Tain ḳoila, “Baganor maze ami tumar aoaz hunchi. Ami to lemṭa, erlagi ḍoraia lukai roisi.”
GEN 3:11 Teu Mabud Allae zikaila, “Tumi ze lemṭa ḳe ḳoilo? Ze gasor fol ḳaite tumare na ḳorsilam, ḳailiso na kita?”
GEN 3:12 Adome ḳoila, “Ze beṭimanush tumi amar loge diso, tai ou gasor fol amare ḳaoaise.”
GEN 3:13 Ou Mabud Allae beṭire zikaila, “Tumi ita kita ḳorlae?” Tain ḳoila, “Hafe amare salla dia ḳaoaise.”
GEN 3:14 Teu Mabud Allae hafre ḳoila, “Tumar i kamor lagi hoḳol fala heman ar hoḳol zongli zanuaror maze tumi-u lannoti oilae. Tumi zindegibor feṭo bordi solbae ar dula-balu ḳaibae.
GEN 3:15 Ami tumar ar beṭir maze, tumar bongsho ar beṭi manshor bongshor maze dushmoni foyda ḳormu. Hi bongshe tumar ḳolla guṛa ḳorbo, ar tumi tar faor murat ḳamṛaibae.”
GEN 3:16 Ar tain beṭire ḳoila, “Tumar hurutta oibar shomoy tumar mosibot kub baṛai dimu, tumi kub ḳoshṭo ḳoria hurutta foyda ḳorbae. Zamair bae tumar kub ḳaish taḳbo, ar he tumar ufre beṭagiri korbo.”
GEN 3:17 Tain Adomre ḳoila, “Ze gasor fol ami haram ḳoria dislam, tumi tumar bour ḳota hunia ita ḳaiso, ou ḳarone zominre lannoti kora oilo. Zindegibor zobor toklif ḳoria tumi zominor foshol ḳaibae.
GEN 3:18 Tumar lagi maṭir maze ḳaṭa-gosa ar bishala zongol zonmaibo, ar tumar ḳani oibo ou maṭir foy-foshol.
GEN 3:19 Ze maṭi taki tumare foyda ḳorslam, hou maṭit firia na zaoa forzonto tumar matar gam faot falaia ḳani kaibae. Tumar maṭir shoril, maṭit-u mishizibo.”
GEN 3:20 Adome tan bibir nam raḳla Haoa [mani, zindegi-deora], ḳaron tain hoḳol zinda manshor ma oiba.
GEN 3:21 Adom ar tan bibir lagi Mabud Allae zanuaror samṛadi lebas banaia findaila.
GEN 3:22 Erbade Mabud Allae ḳoila, “Deḳo, neki-bodir aḳol faia manush amrar laḳan oigese, oḳon he zate at baṛaia zindegi-gasor fol ḳaia hamesha zinda na roy.”
GEN 3:23 Ou ḳota ḳoia Mabud Allae ze maṭi dia manshore foyda ḳorsla, hou maṭit ḳet-ḳamar ḳorar lagi tare Adan bagan taki kedai dila.
GEN 3:24 Ḳedai dia tain zindegi-gasor gese zaoar fot fara deoar lagi Adan baganor fubedi Karubi firista oḳol raḳla ar aguinor toluaro guranit raḳla.
GEN 4:1 Adome tan bibi Haoar loge milar bade tan feṭo hurutta ailo, ar Kabil name tan eḳ fuar zonom oilo. Teu Bibi Haoae ḳoila, “Mabudor ges tone ami eḳ manush kobul ḳorsi.”
GEN 4:2 Hirbar tan goro Kabilor bai Habilor zonom oilo. Habile sagol-meṛa raḳto, ar Kabile ḳet ḳorto.
GEN 4:3 Bade eḳdin Kabile Mabudor gese tar ḳetor foy-foshol ania lilla dilo
GEN 4:4 ar Habile-o tar falor maze foyla zonmise oula ḳoyṭa sagol-meṛa zobo ḳoria sorbiala ongsho lilla dilo. Mabude Habil ar tar lilla kobul ḳorla,
GEN 4:5 Kabil ar tar lilla kobul ḳorla na, gotike he kub gusa ḳoria muk kala ḳorlo.
GEN 4:6 Mabude Kabilre ḳoila, “Tumi gusa ḳorrae ḳene, ar kitar lagi tumi muk kala ḳorso?
GEN 4:7 Tumi bala ḳam ḳorle tumar muk for oilo one? Ar na ḳorle to gunae tumare dorar lagi tumar duaro ubai roise. Igur ufre tumi zitte oibo.”
GEN 4:8 Bade Kabile tar bai Habilre ḍakia ḳoilo, “Ao amra bondo zai.” Ar bondo gia tar bai Habilor ufre aḳta hamla ḳoria kun ḳorlo.
GEN 4:9 Heshe Mabude Kabilre zikaila, “Tumar bai kuai?” Kabile ḳoilo, “Ami zani na, amar baire ami deḳa-huna ḳori ni?”
GEN 4:10 Teu Mabude ḳoila, “Tumi ita kita ḳorlae? Deḳo, zomin taki tumar bair loue amar gese foriad ḳorer.
GEN 4:11 Zomine zebla tumar ḳarone tumar bair lou ḳailo, ou shomoy tumi lannoti oia zomin taki kedail oilae.
GEN 4:12 Tumi zebla zomino ḳet ḳorbae, zomine ar tumare foshol dito nae. Tumi boitol oia duniai zuṛi gurbae.”
GEN 4:13 Teu Kabile Mabudre ḳoilo, “I shasti amar angaz oito nae.
GEN 4:14 Aiz tumi amare zomin taki kedai dirae, ami tumar samne tone hori zaimugi. Ar boitol oia zebla ami duniait gurmu, ou shomoy zar samne-u ami foṛmu, he-u amare kun ḳorbo.”
GEN 4:15 Mabude tare ḳoila, “Te tumare ze kun ḳorbo, tar ufre ami shatgun bodla loimu.” Ou ḳota ḳoia Mabude Kabilre eḳṭa sinnot dila, zate ḳeu tare ato faia-o na mare.
GEN 4:16 Erbade Kabil Mabudor samon taki horia Adanor fubedi Nud [mani, gura-fira] desho gelogi.
GEN 4:17 Ar Kabil tar bour loge milae tair feṭo hurutta ailo, ar Honukor zonom oilo. Kabile eḳṭa ṭaun banaia tar fuar name ṭaunor nam raḳlo Honuk.
GEN 4:18 Honukor fua Irod, Irodor fua Mohuayel, Mohuayelor fua Motushayel, Motushayelor fua Lemoḳ.
GEN 4:19 Lemoḳe dui bia ḳorsla, eḳ bour nam Ada, aroḳ bour nam Shilla.
GEN 4:20 Adar goro Zabolor zonom oilo, zara tambut taḳe ar foshu fale, ou Zabol tarar mul baf.
GEN 4:21 Zabolor bair nam Zubol. Zara bashi ar bin bazae, ou Zubol tarar mul baf.
GEN 4:22 Shillar feṭo Tubol-Kabilor zonom oilo. Fitol ar luar atiar banani asil tar ḳam. Tar boinor nam Nayema.
GEN 4:23 Eḳdin Lemoḳe tar dui boure ḳoilo, “O Ada ar Shilla, amar ḳota hun, Lemoḳor bibin, amar ḳotae deo ḳan. Ze beṭae amare ḳorilo zoḳom, ze beṭae amar gat tullo at, here ami korilam nifat.
GEN 4:24 Kabilor kunor bodla zudi shat gun oy, Lemoḳor bodla shatottoir gun nichchoy.”
GEN 4:25 Ermaze Adome hirbar tan bour loge milae, tan feṭo aroḳ fua oilo, Haoae tar nam raḳla Shish. Tain ḳoila, “Kabile Habilre kun ḳorse ḳori Allae Habilor bodla amare eḳ serag zugai disoin.”
GEN 4:26 Bade Shishor-o eḳ fua oilo, he tar nam raḳlo Anush, ou shomoy tone manshe Mabudor nam loa shuru ḳorla.
GEN 5:1 Ita oilo Adomor ḳandanor ḳolombondi boyan. Manush foyda ḳorar shomoy Allae tan nizor surote foyda ḳorla.
GEN 5:2 Foyda ḳorla beṭa ar beṭi, ar tarare Mabude borkot dila, foyda ḳoria nam raḳla Adom.
GEN 5:3 Adomor eḳ-sho tish boros boyosho tan loge mil rakia tan surote eḳ fua oilo. Tain er nam raḳla Shish.
GEN 5:4 Shishor zonmor bade Adom aro aṭ-sho boros basla, er maze tan aro fua-fuṛin oisil.
GEN 5:5 Muṭ noy-sho tish boros zinda taḳar bade Adom mara gela.
GEN 5:6 Shishor eḳ-sho fas boros boyosho tan fua Anushor zonom oilo.
GEN 5:7 Anushor zonmor bade Shish aro aṭ-sho shat boros basla. Er maze tan aro fua-fuṛi oisil.
GEN 5:8 Muṭ noy-sho baro boros basar bade Shish mara gela.
GEN 5:9 Anushor nobboi boros boyosho tan fua Kinanor zonom oilo.
GEN 5:10 Kinanor zonmor bade Anush aro aṭ-sho fonro boros basla. Er maze tan aro fua-fuṛi oisil.
GEN 5:11 Muṭ noy-sho fas boros basar bade Anush mara gela.
GEN 5:12 Kinanor shottoir boros boyosho tan fua Maholailor zonom oilo.
GEN 5:13 Maholailor zonmor bade Kinan aro aṭ-sho sallish boros basla. Er maze tan aro fua-fuṛi oisil.
GEN 5:14 Muṭ noy-sho dosh boros basar bade Kinan mara gela.
GEN 5:15 Maholailor foyshoṭṭi boros boyosho tan fua Iaredor zonom oilo.
GEN 5:16 Iaredor zonmor bade Maholail aro aṭ-sho tish boros basla. Er maze tan aro fua-fuṛi oisil.
GEN 5:17 Muṭ aṭ-sho fosanobboi boros basar bade Maholail mara gela.
GEN 5:18 Iaredor eḳ-sho bashoṭṭi boros boyosho tan fua Idrisor zonom oilo.
GEN 5:19 Idrisor zonmor bade Iared aro aṭ-sho boros basla, er maze tan aro fua-fuṛi oisil.
GEN 5:20 Muṭ noy-sho bashoṭṭi boros basar bade Iared mara gela.
GEN 5:21 Idrisor foyshoṭṭi boros boyosho tan fua Matushalaḳor zonom oilo.
GEN 5:22 Matushalaḳor zonmor bade tin-sho boros forzonto, Allar loge Idrisor ḳas didar asil. Er maze tan aro fua-fuṛi oisil.
GEN 5:23 Idris muṭ tin-sho foyshoṭṭi boros duniait asla.
GEN 5:24 Erbade tane ar deḳa gelo na. Allar loge tan ḳas didar asil gotike Allae tanre zinda halote nizor gese nilagi.
GEN 5:25 Matushalaḳor eḳ-sho shatashi boros boyosho tan fua Lamaḳor zonom oilo.
GEN 5:26 Lamaḳor zonmor bade Matushalaḳ aro shat-sho birashi boros basla. Er maze tan aro fua-fuṛi oisil.
GEN 5:27 Muṭ noy-sho unushottoir boros basar bade Matushalaḳ mara gela.
GEN 5:28 Lamaḳor eḳ-sho birashi boros boyosho tan eḳ fua oilo.
GEN 5:29 Tain er nam raḳla Nuh ar ḳoila, “He amrar ator i duḳ-mosibotor ḳam taki, Mabudor lannoti zomin taki oḳon aram dibo.”
GEN 5:30 Nuhor zonmor bade Lamaḳ aro fas-sho fosanobboi boros basla, er maze tan aro fua-fuṛi oisil.
GEN 5:31 Muṭ shat-sho shatottoir boros basar bade Lamaḳ mara gela.
GEN 5:32 Nuhor fas-sho boros boyoshor bade tan fuain Sham, Ham ar Iafetor zonom oilo.
GEN 6:1 Duniar ufre zebla manush baṛa arombo oilo, ar bout fuṛintor-o zonom oilo,
GEN 6:2 teu gaibi shoktiala oḳole ou fuṛintore ḳubsurot dekia, ze zare kushi taire fosond ḳori nila.
GEN 6:3 Ita dekia Mabude ḳoila, “Amar ruhu hamesha manshor loge taḳto nae. Manush to ḳali gustor ḳaya, oḳon taki ami tarare eḳ-sho bish boros hayat diar.”
GEN 6:4 Ou fuṛintor loge hou gaibi shoktiala oḳlor mila-mishar ḳarone ze aolador zonom oilo, tara asla furana zomanar foyluan oḳol. Hi shomoy ba tar bade-o duniait Nefili zator manush asil.
GEN 6:5 Mabude deḳla, duniait manshor naformani kub baṛi gese, ar tarar dilor ḳaish, kial-kushi kali karafir bae.
GEN 6:6 Ita dekia Mabude kub toklif faila, tain duniait manush foyda ḳorsila ḳori kub bezar oila.
GEN 6:7 Ar ḳoila, “Amar foyda ḳora manshore, ar tarar loge hoḳol zator zanuar, maṭit solra huru-muru zandar ar asmanor faki-o ḳotom ḳori dimu. Itare foyda ḳoria amar dilo duk lager.”
GEN 6:8 Oile Nuhor ufre Mabud kushi asla.
GEN 6:9 Ita oilo Nuhor zindegir boyan. Nuh eḳzon kamil manush, tan amolor manshor maze tain-u asla fak-forezgar. Allar loge tanor ḳas didar asil.
GEN 6:10 Sham, Ham ar Iafet namor tan tin fua asil.
GEN 6:11 I shomoy Allar sokut hara duniai gunae fosi gese ar zur-zulume bori gese.
GEN 6:12 Allae duniar bae saia deḳla, ita gunae fosi gese. Ḳaron duniar manshor ḳaislot be-fote gesegi.
GEN 6:13 Ita dekia Allae Nuhre ḳoila, “Tamam manush zatre ami kotom ḳorilaitam ṭik korsi. Manshor lagi duniai zur-zulume bori gese. Manshor loge loge duniar hoḳolta ami shesh ḳorilitam.
GEN 6:14 Tumi goforor toḳta dia tumar lagi ekkan zaz banao. Er bitre alga alga kuṭa taḳbo. Ar zazor bare-bitore alḳatra lagaio.
GEN 6:15 Zazḳan lambae tin-sho at, fashe foinchash at ar ḳaṛa-ubi tish at banaio.
GEN 6:16 Ar salo taki eḳ at tole sairobae kiṛki raḳbae, ar duar dibae zazor ek kandat. Zazḳan titala banaio.
GEN 6:17 Dekio, ami duniait ola boinna dimu, asmanor tole zoto zandare dom falae hoḳolta-u binash oizibo. Duniair hoḳol zandar-u morizibo.
GEN 6:18 Ḳali tumar loge amar oada zari raḳmu. Tumi gia zazo uṭbae, ar tumar loge tumar fuain, tumar bibi ar tumar fuaintor bou-o.
GEN 6:19 Ar zan basanir lagi tumi hoḳol zator zandaror beṭa-beṭir zuṛa milaia tumar loge zazo tulbae.
GEN 6:20 Forteḳ zator faki, heman-zanuar ar maṭir maze buke solra zandarre basanir lagi zuṛa zuṛa ḳori tumar gese anbae.
GEN 6:21 Ar tumi hoḳol zator lagi kanir zinish zugaṛ ḳori raḳbae. Ita tumar ar tarar ḳani oibo.”
GEN 6:22 Nuhe Allar hukum mafik hoḳolta-u ḳorla.
GEN 7:1 Ar Mabude Nuhre ḳoila, “Tumi ar tumar foribaror hoḳol aia zazo uṭbae. Ami dekiar i zomanar manshor maze tumi-u ḳali dindar.
GEN 7:2 Tumi halal zanuar oḳol taki nor-medi milaia shat zuṛa ḳori ar haram zanuar taki eḳ zuṛa ḳori tumar loge loio.
GEN 7:3 Asmano uṛra fakir maz taki nor-medi milaia shat zuṛa ḳori loio. Duniar maze erar bongsho basanir lagi ikan ḳorio.
GEN 7:4 Ami shat din bade duniair ufre sallish din sallish rait eḳlagare meg dimu, ar hoḳol zandarre dunia taki kotom ḳormu.”
GEN 7:5 Mabudor hukum mafik Nuhe hoḳol ḳam ḳorla.
GEN 7:6 Boinna shurur shomoy Nuhor boyosh asil soy-sho boros.
GEN 7:7 Boinna taki basar lagi Nuh, tan bibi, tan fuain ar fuaintor boure loia zazo gia uṭla.
GEN 7:8 Allar hukum mafik halal-haram zanuar, faki, buke solra zandaror nor-medi milia zuṛa zuṛa oia Nuhor gese aia zazo hamaila.
GEN 7:10 Ou shat din bade duniait boinna oilo.
GEN 7:11 Nuhor soy-sho bosoror shomoy dusra mashor shotro tarik fatalor hoḳol fani bar oito laglo, ar asman zenu faṭi gelo.
GEN 7:12 Sallish din sallish rait duniair ufre meg oilo.
GEN 7:13 Zedin meg shuru oilo, idin Nuh, tan bibi, tan fuain Sham, Ham, Iafet ar tarar bou oḳol-o zazo aia uṭla.
GEN 7:14 Tarar loge zuṛa zuṛa ḳori hoḳol zator zongli zanuar, fala heman, maṭir maze buke solra zandar, faki ar ḍaḳna-ala hoḳolta-o uṭla.
GEN 7:15 Dom falaia base ila hoḳol zator zandar Nuhor gese aia zazo uṭsil.
GEN 7:16 Allar hukum mafik-u nor-medir zuṛa milia tara uṭsil. Erbade Mabude zazor duar bond ḳori dila.
GEN 7:17 Sallish din dori duniait fani baṛte-u taḳlo. Fani baṛi zaoae zazḳan maṭi taki ufre baia uṭlo.
GEN 7:18 Bade fani kub baṛlo ar zazḳan fanir ufre solasol ḳorlo.
GEN 7:19 Ar fani baṛte-u taḳlo. Erlagi zeno zoto boṛo boṛo faṛ asil, hokkolta buṛi gelo.
GEN 7:20 Hoḳol faṛ-forbot buṛia fani aro fonro at ufre uṭlo.
GEN 7:21 Ar duniait solra hoḳol zandar, mani faki, fala heman, zongli zanuar ar fal bandia gurra hoḳolta, manshor loge binash oigelo.
GEN 7:22 Maṭir ufre zoto roḳomor zoto zandar dom falaia base ita hoḳolta-u morigelo.
GEN 7:23 Allae ou nomunae zominor hoḳol zandar duniair ufor taki fusilaila. Ete manush, zanuar, buke solra zandar ar asmanor faki duniai taki saf oigelo. Ḳali Nuh ar tan loge zara asil, tara-u basia roila.
GEN 7:24 Dunia deṛ-sho din fanit buṛail roilo.
GEN 8:1 Zazo Nuh ar tan loge zoto zandar ar fala heman asil, Allae tarar ḳota-o faurila na. Tain duniait batash salaile fani koma shuru oilo.
GEN 8:2 Maṭir tol taki fani baroni ar asman tone meg foṛar faṭa bond oigelo, ar meg-o dom loilo.
GEN 8:3 Maṭir ufror fani hori gelo, ar deṛ-sho din bade deḳa gelo fani bout ḳomse.
GEN 8:4 Shat nombor mashor shotro tarik zazḳan Ararator faṛi elaḳat gia aṭkilo.
GEN 8:5 Erbade-o fani komat taḳlo, ar dosh nombor mashor foyla din faṛ oḳlor mata deḳa gelo.
GEN 8:6 Er sallish din bade Nuhe zazor kiṛki kulla.
GEN 8:7 Ar kiṛkibae ek kaua saṛla. Maṭi taki fani na hukani forzonto ḳauaṭa aoa-zaoat roilo.
GEN 8:8 Maṭir ufor tone fani komse ki na deḳar lagi Nuhe bade eḳṭa faro saṛla.
GEN 8:9 I shomoy-o asta duniait fani asil ḳori fao toibar zaga na faia faroṭa hirbar firia ailo. Tain at baṛaia tare bitre anla.
GEN 8:10 Heshe tain aro shat din bar saia hirbar tare saṛla.
GEN 8:11 Hainja bala he tan gese firia ailo, ar tar ṭuṭo asil zoytun gasor hazma fata, tain buzla maṭir ufor taki fani komi gese.
GEN 8:12 Aro shat din bade tain hirbar faroṭa saṛla, ikṭa ar firia ailo na.
GEN 8:13 Nuhor boyosh soy-sho eḳ bosoror shomoy foyla mashor foyla din maṭir ufor taki fani hori gelo, ar Nuhe zazor sal kulia saia deḳla, maṭi hukani dorse.
GEN 8:14 Dusra mashor shataish dinor din maṭi eḳoibare hukai gelo.
GEN 8:15 Allae tanre ḳoila,
GEN 8:16 “Tumi tumar bibi, tumar fuain ar tumar fuaintor boure loia zaz taki bar oia ao.
GEN 8:17 Ar tumar loge zoto zator zandar ase - faki, zanuar ar maṭir maze buke solra zandar - tarare-o bar ḳori loia ao, zenu hara duniai zuṛi tara sitria gia folala oia baṛe.”
GEN 8:18 Teu Nuhe, tan bibi, tan fuain ar tarar boure loia zaz taki bar oila.
GEN 8:19 Tarar loge duniair hoḳol zanuar, maṭit solra huru-muru zandar, ar faki, ek kotae duniait solra hoḳol zandar, zarzir zatmoto bar oilo.
GEN 8:20 Bade Nuhe Mabudor name ekkan kurbani kana banaila, ar forteḳ zator halal foshu-faki taki eḳ eḳṭa loia zobo ḳoria, zalaia kurbani dila.
GEN 8:21 Mabud i kurbanir dumar gerane kushi oila, ar tain ḳoila, “Manshor lagi ami ar kunu shomoy-o maṭire lannot ditam nae, zudio hurubala taki-u manshor monor kial ḳarafir bae taḳe. Ifira zela hoḳol zandarre marsi, ilaḳan ar kunu din-u martam nae.
GEN 8:22 Zotodin i duniai taḳbo, otodin niommoto bis falani ar foshol ḳaṭa, ṭanḍa ar gorom, barisha ar eot, din ar rait solte-u taḳbo.”
GEN 9:1 Allae Nuh ar tan fuaintore borkot dia ḳoila, “Tumitain folala oia baṛia duniai bori zao.
GEN 9:2 Duniair zanuar, asmanor faki, maṭir maze buke solra zandar ar doriar mas, hoḳole-u tumrare ḍor-boy ḳori solbo. Itare tumrar ato deoa oilo.
GEN 9:3 Zela tumrare ḳetor fol-foshol ar tori-torḳari dislam, oula oḳon zita zandar hoḳolre-o tumrar ḳanir lagi dilam.
GEN 9:4 Ḳali lou shoho gust tumra ḳaio na, lou oilogi zan.
GEN 9:5 Ḳeu zudi manshore kun ḳore te ami oboshsho-u tar kunor bodla loimu. He zanuar ouk ba manush ouk, manshor zan ze ney, tar zan-o deon lagbo.
GEN 9:6 Manshor lou ze bar ḳore, manshe-o tar lou bar ḳorbo, ḳaron Allae manshore nizor surote banaisoin.
GEN 9:7 Tumitain besh ḳori folala oia baṛo ar duniait sitria zao.”
GEN 9:8 Bade Allae Nuh ar tan fuaintore ḳoila,
GEN 9:9 “Huno, ami zoban diar, tumra ar tumrar bador hoḳol manshore,
GEN 9:10 ar faki, fala heman ar duniair zoto zanuar tumrar loge zaz taki bar oise, tarare-o.
GEN 9:11 Zobanṭa oilo, banor fani dia ar kunu shomoy-u hokkol zandarre mara oito nae, ar tamam duniai saf ḳorar lagi ila kunu ban-o oito nae.”
GEN 9:12 Allae aro ḳoila, “Ze zoban ami tumrare ar tumrar logor zandar oḳolre dilam, ikṭa kiamot forzonto boail roibo.
GEN 9:13 Ar megor ḳalnir maze amar rongdenu dilam, ikṭa oilo duniait amar zobanor nishana.
GEN 9:14 Zebla ami duniair ufre ḳalni dimu, i shomoy ou rongdenu deḳbae.
GEN 9:15 Ar ou shomoy-u ami tumrar ar hoḳol zandaror loge amar zobanor ḳota iad ḳormu. Ar kunu shomoy-u boinna oia hoḳol zandarre fani dia doia nito nae.
GEN 9:16 Ḳalnir maze zebla hi rongdenu deḳa zaibo ou shomoy ami duniair hoḳol zandaror loge amar i hameshakur zobanor ḳota iad ḳormu.”
GEN 9:17 Heshe Allae Nuhre ḳoila, “Duniair hoḳol zandaror loge ami ze zoban disi, ikṭa oilo tar nishana.”
GEN 9:18 Zaz tone Nuhor ze fuain bar oisla, tarar nam oilo Sham, Ham ar Iafet. Ou Ham oilo Kenanor baf.
GEN 9:19 Nuhor ou tino fuar ḳandan oḳol hara duniait sitri gela.
GEN 9:20 Nuhe ḳet-ḳamar shuru ḳoria eḳ angur ḳet ḳorla.
GEN 9:21 Ar anguror shorab ḳaia ṭal oia tambur bitre udam oia foṛi roila.
GEN 9:22 Kenanor baf Hame aia tar bafor ou hal dekia bare gia tar duio bair gese ḳoilo.
GEN 9:23 Oile Sham ar Iafete ḳando ḳori ekkan ḳafoṛ loia fise aṭia bafre ou ḳafoṛdi guria dila, tarar souk ulṭabae taḳae bafre be-abru halote deḳla na.
GEN 9:24 Nisha ḳomi zaoar bade Nuhe tan fuar ḳanḍo hunia
GEN 9:25 ḳoila, “Kenanor ufre lannot foṛouk, he tar baiaintor gese gulamor gulam oibo.”
GEN 9:26 Tain aro ḳoila, “Hoḳol tarif Shamor Mabud Allar, Kenan Shamor gulam ouk.
GEN 9:27 Allae Iafetre boutta deukka, he Shamor tambut taḳouk, ar Kenan tar gulam ouk.”
GEN 9:28 Banor bade Nuh aro shaṛe tin-sho boros basla.
GEN 9:29 Muṭ shaṛe noy-sho boros boyosho tain mara gela.
GEN 10:1 Nuhor fuain Sham, Ham, ar Iafetor ḳandanor boyan. Banor bade tarar fua-fuṛi oisla.
GEN 10:2 Iafetor fuaintor nam: Gumor, Mazuz, Madoy, Iaban, Tubol, Meshok ar Tirosh.
GEN 10:3 Gumoror fuain: Oskinosh, Rifot ar Tugormo.
GEN 10:4 Iabanor fuain oila: Ilishah, Torshish, Kittim ar Rudanim.
GEN 10:5 Erar bongshor manshe nanan zator mat-ḳota, foribar ar zat hishabe doriar faror nanan desho sitri gela.
GEN 10:6 Hamor fuaintor nam: Kush, Mishor, Puṭ ar Kenan.
GEN 10:7 Kushor fuain: Soba, Hobila, Softa, Royma ar Softoḳa. Roymar fuain oila: Shaba ar Dodan.
GEN 10:8 Kushor eḳ fuar nam asil Nomrud. Ou Nomrud duniait foyluan oia uṭsil.
GEN 10:9 Mabudor gese he asil foyluan shikari. Erlagi ḍaḳor ḳota ase, manushṭa zen Mabudor samne Nomrudor laḳan foyluan shikari.
GEN 10:10 Shinar deshor Babil, Eroḳ, Okkod ar Kolni namor ṭaun oḳol loia he bashshai shuru ḳorlo.
GEN 10:11 On taki tar raijjo baṛia Ashiria desh forzonto gelo. Hoḳanor Ninob, Rohobotpur, Keloh
GEN 10:12 ar Reshon namor ṭaun oḳol-o tar banail. Reshon asil Ninob ar Kelohor mazḳano, i tinṭae milia eḳ biraṭ shohor oilo.
GEN 10:13 Mishoror bongsho oila ou zat oḳol: Ludi, Onami, Lohabi, Noftuhi,
GEN 10:14 Fotrushi, Kosluhi, ar Kofturi, ou Koftur dif taki Filistini oḳol bar oia aila.
GEN 10:15 Kenanor boṛo fua Sidon, bador fua Hiṭ, Hiṭṭi zatir mul baf.
GEN 10:16 Kenan asla Zibuzi, Amuri, Girgashi,
GEN 10:17 Hibbi, Arki, Sini,
GEN 10:18 Arbadi, Zomari ar Hamati, ou zati oḳlor mul baf. Heshe ou Kenani oḳol sairobae sitri gesla.
GEN 10:19 Sidon ṭaun taki Geraror muka Gaza forzonto, ar Gaza taki Sadum, Amura, Odma ar Soboyim zaoar fote Lasha forzonto Kenani oḳlor razotto asil.
GEN 10:20 Foribar, mat-ḳota, desh ar zat hishabe era asil Hamor ḳandan.
GEN 10:21 Iafetor boṛo bai Shamor-o fua-fuṛin oisla. Sham oila Aber ar tar ḳandanor baf.
GEN 10:22 Shamor fuaintor nam: Ilam, Ashur, Arfaksad, Lud ar Oram.
GEN 10:23 Oramor fuain: Uz, Hul, Getor ar Mosh.
GEN 10:24 Arfaksador fua Shaleḳ, ar Shaleḳor fuar nam Aber.
GEN 10:25 Aberor dui fua oisla, eḳzonor nam Falez [mani, alga], tan shomoy dunia alog oisil ḳori tan ou nam oilo. Falezor bair nam Iaktan.
GEN 10:26 Iaktanor fuain oila: Olmudod, Shelof, Hazramaot, Zeroh,
GEN 10:27 Hoduram, Uzal, Dikla,
GEN 10:28 Obol, Obimayel, Shaba,
GEN 10:29 Ofir, Hobila ar Zubob. Era hoḳol oila Iaktanor fuain.
GEN 10:30 Mesha taki fubedi Sefaro zaoar foto ze faṛi zaga ase, ono tara taḳta.
GEN 10:31 Foribar, mat-ḳota, desh, ar zat hishabe era oila Shamor ḳandan.
GEN 10:32 Zat ar bongsho hishabe era oilo Nuhor fuaintor foribar. Banor bade erar bongsho oḳole nanan zat oia asta duniait sitri gesla.
GEN 11:1 Hi zomanat asta duniait ḳali eḳ bashae matta, ar tarar buli oḳol-o eḳlaḳan-u asil.
GEN 11:2 Tara fubedi aguaia zaite zaite Shinar deshor eḳ homan zaga faia hoḳano-u boshot ḳorla.
GEN 11:3 Tara eḳe-oinnore ḳoilo, “Ao, amra iṭ banaia aguindi zalai.” Ḳoia-u tara fattoror bodla iṭ ar sun-shurkir bodla tartel lagailo.
GEN 11:4 Tara aro ḳoilo, “Ao, amrar nizor lagi eḳṭa shohor banai, ar oula eḳṭa gor-o banai, zeḳṭar minar gia asman lagal faibo. Teu amrar nam-o oibo ar amra duniait sitritam-o nae.”
GEN 11:5 Manshe ze usa gor ar shohor banaira ikṭa deḳat Mabud lami aila.
GEN 11:6 Ar ḳoila, “Era eḳ zator manush, erar mat-ḳota-o eḳ; erlagi tara ou ḳamor maze at dise. Nizor motlob hasilor lagi era ar kunu bada-u manto nae.
GEN 11:7 Te ao, amra lamia gia tarar bulir maze gulmal lagai dei, zate tara eḳzone aroḳzonor mat buzto na fare.”
GEN 11:8 Erbade Mabude hou zaga taki tarare asta duniait sitrai dila. Ar tarar hou shohor bananir ḳam-o bond oigelo.
GEN 11:9 Ou ḳarone hou zagar nam oilo Babil [mani, gulmal], hoḳano-u Mabude hara duniair bulir maze gulmal lagai disla. Hoḳan taki-u tain tarare asta duniait sitrailila.
GEN 11:10 Ou oilo Shamor ḳandanor boyan. Banor dui boros bade Shamor boyosh zebla eḳ-sho boros, ou shomoy tan fua Arfaksador zonom oilo.
GEN 11:11 Arfaksador zonmor bade Sham aro fas-sho boros basia asla. Er maze tan aro fua-fuṛin oisla.
GEN 11:12 Arfaksador faytish bosoror shomoy tan fua Shaleḳor zonom oilo.
GEN 11:13 Shaleḳor zonmor bade tain aro sair-sho tin boros basia asla. Er maze tan aro fua-fuṛi oisla.
GEN 11:14 Shaleḳor tish boros boyoshor shomoy tan fua Aberor zonom oilo.
GEN 11:15 Aberor zonmor bade Shaleḳ aro sair-sho tin boros basia asla. Er maze tan aro fua-fuṛi oisla.
GEN 11:16 Aberor soutish bosoror shomoy tan fua Falezor zonom oilo.
GEN 11:17 Falezor zonmor bade Aber aro sair-sho tish boros basia asla. Er maze tan aro fua-fuṛi oisla.
GEN 11:18 Falezor tish boros boyoshor shomoy tan fua Raur zonom oilo.
GEN 11:19 Raur zonmor bade Falez aro dui-sho noy boros basia asla. Er maze tan aro fua-fuṛi oisla.
GEN 11:20 Raur bottish bosoror shomoy tan fua Saruzor zonom oilo.
GEN 11:21 Saruzor zonmor bade Rau aro dui-sho shat boros basia asla. Er maze tan aro fua-fuṛi oisla.
GEN 11:22 Saruzor tish bosoror shomoy tan fua Nahuror zonom oilo.
GEN 11:23 Nahuror zonmor bade Saruz aro dui-sho boros basia asla. Er maze tan aro fua-fuṛi oisla.
GEN 11:24 Nahuror untish bosoror shomoy tan fua Tareḳor zonom oilo.
GEN 11:25 Tareḳor zonmor bade Nahur aro eḳ-sho unnish boros basia asla. Er maze tan aro fua-fuṛi oisla.
GEN 11:26 Tareḳor shottoir bosoror shomoy tan fuain Abram (tan bador nam Ibrahim), Nahur ar Haronor zonom oisil.
GEN 11:27 Ou oilo Tareḳor ḳandanor boyan. Tareḳor fuar nam asil Abram, Nahur ar Haron. Ar Haronor fuar nam Lut.
GEN 11:28 Haron tan baba zinda taḳte-u, tan zonom-maṭi Babil deshor Ur ṭauno mara gesla.
GEN 11:29 Abram ar Nahur duizone bia ḳorsla. Abramor bour nam asil Sara. Ar Nahuror bour nam Milka. Milka ar Iska asla Haronor fuṛin.
GEN 11:30 Oile Sarar kunu fua-fuṛi asil na, tain niaoladi asla.
GEN 11:31 Tareḳe Abram, Lut ar Sarare loia Kenan desho zaoar lagi Babil deshor Ur ṭaun taki roana oila. Abram oila Tareḳor fua, Haronor fua Lut oila Tareḳor nati, ar Sara oila Tareḳor fua Abramor bou. Foyla tara Haran name eḳ ṭauno gela ar hoḳano boshot ḳorla.
GEN 11:32 Tareḳ dui-sho fas boros boyosho Haran ṭauno mara gela.
GEN 12:1 Bade Mabude Abramre formaila, “Tumi tumar nizor desh, ḳesh-kuṭum, ar babaiti biṭa-maṭi saṛia ami ze desh deḳaimu hou desho zao.
GEN 12:2 Tumar maz taki ami bout boṛo eḳ zati foyda ḳormu. Tumare rohom-borkot dimu. Ami tumare boṛo ijjoti banaimu, ar tumar usillae asta duniar manshe rohom-borkot faiba.
GEN 12:3 Ar huno, tumare zara dua diba, ami Allae tarare rohom-borkot dimu, oile zara tumare boddua diba, ami tarare lannot dimu. Duniar hoḳol zatie tumar usillae rohom-borkot faiba.”
GEN 12:4 Mabudor hukum moto-u Abram bar oigela, tan batiza Lut-o tan loge gela. Haran ṭaun falaia zaoar shomoy Abramor boyosh asil fosottoir boros.
GEN 12:5 Tan bibi Sara ar batiza Lutre loia tain bar oila. Hoḳol mal-samana loia ar ze gulam oḳolre tain-tain Haran elaḳat faisla tarare loia Kenan desho zaita ḳori roana dila. Heshe hono gia fosla.
GEN 12:6 Kenanor mazedi zaite zaite Abram Shikimo aia Murir elon gasor gese ziraila. I shomoy Kenani oḳol hou desho boshot ḳorta.
GEN 12:7 Mabude Abramre doroshon dia ḳoila, i deshḳan ami tumar oarishre dilaimu. Abramre zein deḳa dila, hou Mabudor name tain hono ek kurbani kana banaila.
GEN 12:8 Hon taki tain Betel ṭaunor fubedi faṛi elaḳat aguai gela, gia foisme Betel fube Oy ṭaunor mazḳano tain tambu gaṛila. Mabudor name tain ino ek kurbani kana banaila ar Mabudor nam loila.
GEN 12:9 Bade tain hin taki horte horte Negeb namor douknor morubumir baedi gelagi.
GEN 12:10 I shomoy Kenan desho nidan deḳa dilo. I nidan kub ḳoṭin oae, Abrame musafir oia Mishor desho gelagi.
GEN 12:11 Mishoror ḳandat aia Abrame tan bibi Sarare ḳoila, “Huno, ami zani tumi kub shundori.
GEN 12:12 Tumi zebla Mishori oḳlor souko foṛbae, teu tara buzbo tumi amar bou, ar tumare rakia amare kun ḳorilibo.
GEN 12:13 Erlagi koio, tumi amar boin. Ete tumar lagi amar bala oibo, ar amare basaia raḳbo.”
GEN 12:14 Abram Mishoro aia harle Mishoror manshe deḳla Sara kub shundori.
GEN 12:15 Mishoror bashsha Feraunor guia oḳole tane dekia Feraunor gese gia tan tarif ḳoria boutta ḳoila. Ar Sarare razbaṛir bitre neoa oilo.
GEN 12:16 Sarar lagi Feraune Abramre maya ḳorta lagla. Tain Abramre bout goru-sagol, gada-gadi, uṭ, ar bandi-gulam ufohar dila.
GEN 12:17 Oile Bibi Sarar lagi Mabude Feraun ar tar baṛir hoḳol manshor maze besheba bemar foyda ḳorla.
GEN 12:18 Teu Feraune Abramre nia zikaila, “Afne amar loge ita kita ḳorla? Tanre ḳene afnar bou na ḳoia
GEN 12:19 boin ḳoila? Ar ami to tanre bia ḳorar lagi neoaislam. Ein to afnar bibi, ene loia afne in taki hori zaukkagi.”
GEN 12:20 Ou ḳota ḳoia Feraune tan manshore hukum ḳorla, ar tara Abramor hoḳol mal-samana shoho tane ar tan bibire bidae ḳori dila.
GEN 13:1 Teu Abram ar tan bibie hoḳolta loia Mishor desh falaia Negeb morubumit gelagi, Lut-o tan loge asla.
GEN 13:2 Abram kub doni asla, tan bout heman-zanuar ar shuna-rufa asil.
GEN 13:3 Bade tain Negeb taki horte horte Betel forzonto gela. Gia tain Betel ar Oy ṭaunor mazḳano fosla, ze zagat tain age tambu gaṛisla
GEN 13:4 ar foyla kurbani kana banaisla. Ono gia tain hirbar Mabudor nam loila.
GEN 13:5 Abramor loge musafir asla tan batiza Lut, en-o bout goru-sagol ar tambu asil.
GEN 13:6 Oile zagaṭa ila asil na zen, duiozonor foshur fale eḳloge ḳaita farba. Goru-sagol ar tambu oto beshi asil zen, ita loia tarar taḳar ufae asil na.
GEN 13:7 Erlagi Abram ar Lutor raḳal oḳole hamesha dorbar-ḳaijja ḳorta. Ar hi shomoy Kenani ar Farizi oḳol-o hi desho boshot ḳorto.
GEN 13:8 Teu Abrame Lutre ḳoila, “Huno, amra to duiozon-u afon. Te tumar-amar maze ar tumar-amar raḳalor maze-o dorbar-ḳaijja ḳora ṭik nae.
GEN 13:9 Hara deshṭa-u tumar samne foṛi roise. Te ao, amra alga oizai. Tumi baue fosond ḳorle, ami ḍaine, ar tumi ḍaine gele, ami baue zaimu.”
GEN 13:10 Lute saia deḳla, Zordan gangor tʼol zagar hoḳol bae Suar gau forzonto bout fani ase, Mabudor bagisa ba Mishor deshor laḳan i zaga-o gash-fani ala. Ou shomoy-o Mabude Sadum ar Amura ṭaun binash ḳorsoin na.
GEN 13:11 Erlagi Lute Zordan gangor hoḳol tʼol zaga nizor lagi basia fubedi horia gelagi. Oula tara alga oigela.
GEN 13:12 Abram Kenan desho roila, ar Lut hou tʼol zominor ṭaun oḳlor ḳasat gia boshot ḳorla. Tain Sadum ṭaunor kinaro tambu gaṛilla.
GEN 13:13 Sadumor manush oḳol kub ḳobis asil, Mabudor nozoro tara betaya gunagar.
GEN 13:14 Lut alga oar bade Mabude Abramre ḳoila, “Tumi ze zagat ubaiso, ikan taki utore-douḳne, fube-foisme eḳbar saia deḳo.
GEN 13:15 Ze zaga oḳol tumi deḳrae, ita ami tumare ar tumar oarish oḳolre hameshakur lagi dilaimu.
GEN 13:16 Ami tumar oarishre duniair duil-balur laḳan behishab ḳormu. Duniar duil-balu zudi keu gonia fuṛaito fare, te tumar oarishre-o gonto farbo.
GEN 13:17 Uṭo, asta deshṭa tumi eḳbar guria ao, ou desh-u ami tumare dimu.”
GEN 13:18 Teu Abrame tan tambu tulia, Hebron elaḳat Momrir elon bonor ḳandat nia gaṛila. Hoḳano tain Mabudor lagi kurbani kana banaila.
GEN 14:1 Babil deshor bashsha Omrafel, Illashoror bashsha Ariak, Ilamor bashsha Ḳodor-laumor ar Guimor bashsha Tidiol, era sairozone eḳ oia
GEN 14:2 Sadumor bashsha Bira, Amurar bashsha Birsha, Odmar bashsha Shinab, Soboyimor bashsha Shimebor ar Bilar ba Suaror bashshar birudde zuddo ḳorat gela.
GEN 14:3 Ou faszon bashshae tarar sifai oḳolre ekḳano ḳoria Siddimor tol zagat loia gela. I zagare Luna shagor ḳoin.
GEN 14:4 Hi bashsha oḳole baro boros bashsha Ḳodor-laumoror gulami koria tero bosoror shomoy bidruho ḳorla.
GEN 14:5 Er bador boros bashsha Ḳodor-laumor ar tan logor bashsha oḳole gia Ostorut-Kornoyimo Rofayi oḳolre, Homo gia Zuzi oḳolre, ar Shabi-Kiriataimo gia Eimi oḳolre araila.
GEN 14:6 Bade morubumir ḳasar El-Faron forzonto Seir faṛor Hurio oḳolre-o araila.
GEN 14:7 Heshe ou bashsha oḳole guria gia Oin-Mishpoṭo ba Kadesh gela. Tara Amaleki oḳlor asta desh doḳol ḳorla ar Hazazon-Tamar ṭauno ze Amuri oḳol asil tarare-o doḳol ḳorla.
GEN 14:8 Bade Sadum, Amura, Odma, Soboyim ar Bila ba Suaror bashsha oḳole
GEN 14:9 Ilamor bashsha Ḳodor-laumor, Guimor bashsha Tidiol, Babilor bashsha Omrafel ar Illashoror bashsha Ariakor loge zuddo ḳorar lagi Siddim namor tol zagat tarar sifai oḳol hazaila. Sair bashshar birudde fas bashshae lagla.
GEN 14:10 Siddimor tol zagat tartelor bout gat-gaṛa asil. Sadum ar Amurar bashshain zebla bagia zaira, i shomoy tarar logor ḳeu ḳeu ou tartelor gato foṛi gela, ar baki oḳole bagia faṛo gela.
GEN 14:11 Teu tarar dushmon oḳole Sadum-Amurar hoḳol don-samana ar ḳani-danir hoḳolta luṭia loia gelogi.
GEN 14:12 Ar tara Abramor batiza Lutor hoḳol mal-samana shudda hou Lutre-u doria loia gelagi, ḳaron eine-u Sadum ṭauno roita.
GEN 14:13 Teu eḳzone bagia aia Ibrani Abramre ou ḳobor dilo. Abram i shomoy Amuri Momrir elon bonor ḳasat taḳta. I Momri asla Ashkul ar Aneror bai, Abramor loge erar zuddor shaijjor chukti asil.
GEN 14:14 Tan batizare doria loia gesoingi hunia Abrame laṛai zanra nizor tin-sho aṭaro zon gulamre loia Dan ṭaun forzonto dushmonor ḳore ḳore gela. Ou gulam oḳol tan baṛit-u zonmisil.
GEN 14:15 Raitkur bala dushmon dolor lagal faia era hamla ḳoria herare arailla, ar ḳedaite ḳedaite Damesk ṭaunor utore Huba forzonto gela.
GEN 14:16 Luṭ ḳora hokkol zinish tain firaia anla, mal-samana shudda tan batiza Lutre-o uddar ḳorla. Er loge hoḳol beṭintore ar hoḳol manshore-o uddar ḳori anla.
GEN 14:17 Ḳodor-laumor ar tar logor bashsha oḳolre araia Abram firia aoar shomoy Sadumor bashshae tan loge deḳa ḳorar lagi Shabi ba Bashsha namor tol zagat bar oia aila.
GEN 14:18 Ar Shalemor bashsha Malki-Siddike Abramor lagi ruṭi ar anguror shorbot loia aila, tain oila Allatalar fosondor imam.
GEN 14:19 Tain Abramre dua ḳoria ḳoila, “Zein asman ar zomin foyda ḳorsoin, hou Allatala Abramre borkot dan ḳoroukka.
GEN 14:20 Afnar dushmon oḳolre zein afnar ato shofisoin, tan nam doinno ouk.” Ou Abrame tan hokkoltar doshbaṭor eḳbaṭ Malki-Siddikre dilaila.
GEN 14:21 Ar Sadumor bashshae Abramre ḳoila, “Afne mal-samana hoḳolta raki deukka, ḳali manush guin amare firot dilain.”
GEN 14:22 Abrame Sadumor bashshare ḳoila, “Zein asman-zomin foyda ḳorsoin hou Mabud Allatalar name ami at tulia ḳosom ḳorsi,
GEN 14:23 afnar kunu zinish-u, eḳsa suta-u ba faor zutar eḳsa fita-o ami nitam nae. Arnae bade afne ḳoiba, amar done-u Abram doni oise.
GEN 14:24 Amar manshe zeta ḳailisoin ita saṛa ami ar kichchu nitam nae. Ḳali Aner, Ashkul ar Momri zera amar loge gesla, tarar faona baṭ tara neukkagi.”
GEN 15:1 Ota goṭona oḳlor bade ohir maze Mabudor kalam Abramor gese nazil oilo. Tain ḳoila, “O Abram, ḍoraio na, ami-u tumar hefazotkari, tumar bout boṛo furuskar.”
GEN 15:2 Abrame ḳoila, “O Mabud Moula, amare kita ditae? Ami to niaoladi. Ami morar bade Dameskor Eliezer amar shompottir malik oibo.
GEN 15:3 Tumi to amare kunu aolad dilae na, erlagi amar baṛir gulam amar oarish oibo.”
GEN 15:4 Ou Mabude Abramre ḳoila, “Na, he nae, tumar nizor bour aolad-u tumar oarish oibo.”
GEN 15:5 Mabude Abramre bare ania ḳoila, “Asmanor bae sao, ar farle ou tera oḳol gonia fuṛao, tumar bongshor oarish oula behishab oibo.”
GEN 15:6 Abrame Mabudor ou oadare ekin ḳorla, ar Mabude hou ekinre dindari kam hishabe kobul ḳorla.
GEN 15:7 Ar tain Abramre ḳoila, “Ami-u Mabud. I Kenan deshor odikari oibar lagi ami tumare Babil deshor Ur ṭaun taki bar ḳoria anchi.”
GEN 15:8 Ou Abrame ḳoila, “O Mabud Moula, ami itar malik oimu ḳori kila buzmu?”
GEN 15:9 Tain ḳoila, “Tumi tin bosoror eḳṭa ḳori ḍeki, sagi, ar meṛar faṭa amar samne loia ao, er loge eḳṭa ḍufi faki ar eḳṭa faror baichcha-o anio.”
GEN 15:10 Abrame oula ḳorla. Tain ita hoḳolṭi ania dui ṭukra ḳoria ulṭa-ulṭi kori hazaia raḳla, ḳali faki oḳolre ṭukraila na.
GEN 15:11 Teu hokun aia ou ṭukra oḳlor ufre foṛle, Abrame ḳedaila.
GEN 15:12 Shuruz ḍubar shomoy Abramor eḳ beushi gum ailo. Gumor maze betaya ḍor ar andaire tane asor ḳorlo.
GEN 15:13 Ou Mabude tanre ḳoila, “Tumi nichchoy oia zanio, tumar oarish oḳole oula desho gia roiba zeḳṭa tarar nizor nae. Hono tara kub zulum-mosibotor maze roia sair-sho boros forzonto gulami korba.
GEN 15:14 Ar ze zatie tarare gulam banaiba, ami hi zatir bisar ḳormu. Bade tara bout don-doulot loia hon tone bar oia aiba.
GEN 15:15 Ar tumi shantie tumar baf-dadar gese zaibae. Tumi fura murobbi boyosho ḳoyboro hamaibae.
GEN 15:16 Tumar sair siṛi bade era ono firia aiba, ḳaron Amuri oḳlor guna oḳono fura oise na.”
GEN 15:17 Shuruz ḍubia zebla andair oigelo ou shomoy dumae bora eḳ undal ar agunir mushal hou hazaia raḳa kurbanir ṭukraintor mazedi gelo.
GEN 15:18 Mabude hou din-u Abramor loge oula oada ḳorla, “Mishoror gang tone boṛo gang Furat forzonto asta desh ami tumar oarishre dilam.
GEN 15:19 Ikṭa oilo Keni, Konizi, Kodmuni,
GEN 15:20 Hiṭṭi, Farizi, Rofayi,
GEN 15:21 Amuri, Kenani, Girgashi ar Zibuzi oḳlor desh.”
GEN 16:1 Bibi Sarar feṭo Abramor kunu hurutta oisoin na, oile Hazera name Sarar eḳ Mishori bandi beṭi asla.
GEN 16:2 Eḳdin Sarae Abramre ḳoila, “Huno, Mabude amare niaoladi korsoin. Te tumi amar bandir ḳasat zao, kiba taire dia ami aolad failitam fari.” Ou Abram-o Sarar mate razi oila.
GEN 16:3 Kenan desho Abram dosh boros roar bade Sarae tan Mishori bandi Hazerare nizor zamai Abramor loge bia dila.
GEN 16:4 Bade Abram ar Hazera ekḳano roile tair feṭo hurutta ailo. Hazerae zebla buzlo tair hurutta oita teu tair malik bibir bae boṛai deḳanit laglo.
GEN 16:5 Ou Sarae Abramre ḳoila, “Amar bae tair be-adobir lagi tumi-u dayi. Amar i bandire ami-u tumar bisnat tulia dislam, ar oḳon tair hurutta oita ḳori amare boṛai deḳar. Mabude tumar-amar bisar ḳoroukka.”
GEN 16:6 Abrame Sarare ḳoila, “Deḳo, tumar bandi to tumar ato-u ase. Tumar zela bala mone ḳoy ola-u ḳoro.” Ou Sarae Hazerare oula duk dila, duke tai tan ges taki bagia gelogi.
GEN 16:7 Foto morubumir maze eḳṭa fanir indarar ḳasat Mabudor firistae Hazerare faila. I indara asil Shur namor zagat zaoar foto.
GEN 16:8 Firistae ḳoila, “O Sarar bandi Hazera, tumi koi taki airae ar ḳoi zaitae?” Hazerae ḳoilo, “Ami amar malik Bibi Sarar ges taki bagia zairamgi.”
GEN 16:9 Teu Mabudor firistae ḳoila, “Tumar malik bibir gese firia gia ḳolla nuaia hirbar tan kezmoto lago.”
GEN 16:10 Tain aro ḳoila, “Ami tumar oarish oula baṛai dimu, tarare gonia fuṛaito nae.
GEN 16:11 Huno, tumar feṭo hurutta ase. Tumar eḳ fua oibo, tar nam rakio Ismail [mani, Allae hunoin], ḳaron Mabude tumar duk hunchoin.
GEN 16:12 Ar boṛo oile he lagam saṛa guṛar laḳan oibo. He hokkolor bae at tulbo, ar hokkole tar bae at tulba. Baiaintor loge hamesha tar lag taḳbo.”
GEN 16:13 Ar Hazerar loge Mabude matila ḳori, tai tan nam dilo “Tumi deḳa deneala Alla”; tai koilo, “Zein amare deḳoin, ami ono-u tanre deḳlam nae ni?”
GEN 16:14 Erlagi Kadesh ar Beredor mazor hi kuar nam oilo, Ber-Lohoy-Rui [mani, zein zinda ar amare deḳra, tan kua].
GEN 16:15 Bade shomoy aile Hazerar goro eḳ fua oilo, Abrame ou fuar nam raḳla Ismail.
GEN 16:16 Abramor boyosh zebla siashi bosor oigese, ou shomoy Hazerar goro Ismailor zonom oilo.
GEN 17:1 Abramor nirannobboi borosor shomoy Mabude hirbar tanre didar dia ḳoila, “Ami Shorbo-shoktiman Alla. Tumi amar deoa foto takia kamil o.
GEN 17:2 Ami tumar-amar maze chukti kaim ḳormu ar tumar oarish kub beshi baṛai dimu.”
GEN 17:3 Teu Abram soizdat foṛla, ar Allae tan loge batchit ḳori koila,
GEN 17:4 “Tumar loge ami oada ḳaim ḳoriar, tumi bout zatir mul baf oibae.
GEN 17:5 Tumare ar Abram [mani, boṛo baf] ḳoia ḍaḳa oito nae, oḳon taki tumar nam oilo Ibrahim [mani, bout zatir baf], ami tumare bout zatir mul baf banailam.
GEN 17:6 Ami tumare bout folala ḳormu, ar tumar maz tone bout zati ar bashsha oḳol foyda ḳormu.
GEN 17:7 Ami tumar ar tumar oarishor for oarish oḳlor loge ze chukti kaim ḳormu, ikṭa hor-hamesha boail taḳbo, ou usillae ami tumar ar tumar oarishor for oarish oḳlor Alla oimu.
GEN 17:8 Ar ze Kenan desho tumi oḳon musafir oia taḳrae, i furaṭa-u ami tumare ar tumar oarish oḳolre hor-hameshakur doḳolor lagi dimu. Ami tarar Alla oimu.”
GEN 17:9 Allae Ibrahimre ḳoila, “Tumi amar ḳaim ḳora chukti manio, tumi ar tumar oarishor for oarish oḳole-o mania solio.
GEN 17:10 Tumrar loge ar tumrar oarishor loge amar oula chukti kaim oilo, tumrar hoḳol beṭaintor mosolmani kam ḳoraite oibo.
GEN 17:11 Tumra hoḳole nizor purush ongor mukar samṛa ḳaṭbae. Oḳṭa-u tumrar ar amar maze boail ḳora chuktir nishana.
GEN 17:12 Oarishor for oarish doria tumrar hoḳol fuaintore zonmor aṭ dinor din mosolmani koraibae. Zara tumar oarish nae, ḳali tumrar baṛit zonmise ba tumrar ḳorida gulam, tarar-o mosolmani korani lagbo.
GEN 17:13 Tumrar goro zonmise ba ḳorida gulam oḳolre nisoy mosolmani koraibae. Tumrar shorilo zari kora amar i chukti hor-hameshakur chukti oibo.
GEN 17:14 Ze beṭae purush ongor mukar samṛa ḳaṭto nae, tare tar zatir maz taki fusia falail oibo. He to amar chuktir borkelaf ḳorse.”
GEN 17:15 Allae Ibrahimre ḳoila, “Tumar bibire ar Sara ḳoia ḍakio na. En nam oibo Sayra [mani, rani].
GEN 17:16 Ami taire borkot nazil ḳormu, tair goro tumar eḳ fua dimu. Ar borkot nazil ḳoria bout zatir mul ma banaimu, ar bout mullukor bashsha oḳol-o foyda oiba.”
GEN 17:17 Ou Ibrahime maṭit soizdat foṛi ashia mone mone ḳoila, “Hasau eḳ-sho bosoror buṛar hurutta oito ni! Ta-o nobboi bosoror buṛi Sayrar feṭo?”
GEN 17:18 Tain Allare ḳoila, “Ah! Ismailgu zanu tumar rohomote basia taḳe.”
GEN 17:19 Ou Allae formaila, “Ṭik ase. Oile tumar bibi Sayrar feṭo hasau tumar fua oibo, tumi tar nam raḳbae Isʼhak [mani, he ashe]. Tar loge amar chukti kaim ḳormu, tar oarishor loge ikṭa amar hor-hameshakur chukti oibo.
GEN 17:20 Ar Ismailor lagi-o tumar dua hunchi. Huno, ami tare-o borkot nazil ḳormu ar tare folala ḳoria bout baṛai dimu. He barozon razar baf oibo ar tar mazedi ami biraṭ zati foyda ḳormu.
GEN 17:21 Samnor boros i sando Sayrar goro tumar ze hurutta oibo, hou Isʼhakor loge ami amar chukti kaim ḳormu.”
GEN 17:22 Ibrahimor loge batchit shesh ḳoria Allae tan ges taki uṭia toshrif nilagi.
GEN 17:23 Allar hukum moto Ibrahime hou din-u Ismailre mosolmani koraila. Er loge ḳorida gulam oḳol ar tan baṛit zonmise ila hoḳol gulamre, baṛir hokkol beṭaintore mosolmani koraila.
GEN 17:24 Ibrahimor nizor mosolmani kam ḳoranir shomoy tan boyosh asil nirannobboi boros,
GEN 17:25 ar tan fua Ismailor boyosh tero.
GEN 17:26 Eḳ dine-u Ibrahim ar tan fua Ismailor mosolmani korail oilo.
GEN 17:27 Hi din baṛir hoḳol beṭaintor, zara tan baṛit zonmisil ar zerare bidesh taki loia anchoin, ita hoḳlor-u mosolmani kam eḳloge ḳorail oilo.
GEN 18:1 Bade Momrir elon bonor ḳasat Mabude Ibrahimre deḳa dila. Tain dinor gormor shomoy tambur dorzat boat asla.
GEN 18:2 Oula shomoy souk tulia deḳla, tan samne tinzon manush ubai roisoin. Dekia-u tain dorzar ges taki douṛaia gia, maṭit soizda ḳoria tarare ḳoila,
GEN 18:3 “O munib, ami zudi afnarar mayar kunu manush oi, taile afnarar i gulamre falaia zain na zen.
GEN 18:4 Ami tuṛa fani ania diar afnara at-fao doia, ou gas tolat ziraukka.
GEN 18:5 Ar i gulamor ḳasat zebla aisoin, te tuṛa ḳani ania dei, ota ḳaia zano aram oile afnara hirbar roana dibane.” Tara ḳoila, “Bala, afne zebla ḳoira, te ḳoroukka.”
GEN 18:6 Ibrahime loge loge bitre gia Sayrare ḳoila, “Zoldi koria tin feṭu bala moyda makia fiṭa banao.”
GEN 18:7 Tain douṛaia gia gorur fal tone kub bala eḳṭa ḳosma basur ania tan gulamre dila. He-o zoldi kori oḳṭa randilo.
GEN 18:8 Ou Ibrahime dud, doi ar gust ania tarare ḳaibar dila, tara ḳaoa-daoa ḳorla. Tain tarar ḳandat gas tolat ubaila.
GEN 18:9 Tara Ibrahimre zikaila, “Afnar bibi Sayra ḳoi?” Tain ḳoila, “Ounu, tambur bitre asoin.”
GEN 18:10 Ou erar maze eḳzone ḳoila, “Samnor boros i sando ami oboshsho-u afnar gese aimu. Deḳba, ou shomoy afnar bibi Sayrar kulo eḳ fua taḳbo.” Sayrae Ibrahimor ḳore tambur dorzat ubaia ita hunla.
GEN 18:11 I shomoy Ibrahim ar Sayra buṛa-zoif oigesoin, hurutta oar laḳan boyosh-o Sayrar roisil na.
GEN 18:12 Erlagi Sayrae mone mone ashia ḳoila, “Amar oula heshḳali boyosho ita kushi ar aibo ni? Amar malik-o murobbi oigesoin.”
GEN 18:13 Teu Mabude Ibrahimre ḳoila, “Sayrae kitar lagi ita ḳoia ashlo zen, hasau amar hurutta oibo ni, ami to buṛi?
GEN 18:14 Mabude faroin na ila kunta ase ni? Dekio, ṭik shomoye ami hirbar tumar gese aimu, ar i shomoy Sayrar kulo fua taḳbo.”
GEN 18:15 Sayrae ḍoraia ḳoila, “Ji na, ami to ashchi na.” Ou tain ḳoila, “Na rego, tumi nu ashilae.”
GEN 18:16 Erbade hou tinzone in tone uṭia Sadumor bae saila. Ibrahime tarar loge oia bidae deoat gela.
GEN 18:17 Teu Mabude ḳoila, “Ami zeta ḳortam saiar, ita kunu Ibrahimre lukaitam ni?
GEN 18:18 Ibrahim takia-u to ami eḳ mohan himmot-ala zati foyda ḳormu, duniair hoḳol zatie on tone borkot ḳamaiba.
GEN 18:19 Erlagi-u ami tare ḳatir ḳorsi, he tar oarish ar tar nizor hoḳolre amar morzi mania hok ar insafor ḳam ḳorar hukum dey. Tara-o zudi ou laḳan sole, taile ami Mabude Ibrahimor befare zotota ḳoisi, hoḳolta-u fura ḳormu.”
GEN 18:20 Bade Mabude ḳoila, “Sadum ar Amurar birudde kub nalish ar foriad huniar, tarar guna-o kub bezuita.
GEN 18:21 Erlagi ami tole lamia gia deki, ami zela nalish huniar, ita hasau oula ḳaraf ki na. Ar na oile-o to deḳmu.”
GEN 18:22 Ou hi duiozone firia Sadumor bae roana dila ar Ibrahim Mabudor gese ubai roila.
GEN 18:23 Bade Ibrahime Mabudor bae aguaia gia ḳoila, “Afne gunagaror loge hok manush oḳolre-o marilaita ni?
GEN 18:24 Ṭaunor maze zudi foinchash zon hok manush taḳe taile hou foinchash zonor ḳatire ṭaunre meherbani na ḳoria binash ḳorilaiba ni?
GEN 18:25 Te afnar ḳam to oula nae, hok ar gunagarre eḳloge marilaoa, eḳ homan shaza deoa, afnar lagi to ṭik nae. Zein hara duniar bisar ḳoroin, tain kunu hok insaf ḳorta nae ni?”
GEN 18:26 Mabude ḳoila, “Zudi Sadum ṭauno foinchash zon-o hok manush taḳoin, taile tarar ḳatire ami asta ṭaunre rehai dilaimu.”
GEN 18:27 Ibrahime ḳoila, “Deḳoukka, ami to duil ar sali saṛa kunta nae, ta-o ami shaosh ḳoria amar malikor loge matiar.
GEN 18:28 Doroukka, zudi foinchash zon hok manush na oia fas zon ḳom oy, taile kita ou fas zon ḳomor lagi afne asta ṭaun binash ḳorilaiba ni?” Tain ḳoila, “Ami zudi hino foytallish zonre fai, taile ikṭa binash ḳortam nae.”
GEN 18:29 Ibrahime tanre hirbar ḳoila, “Doroukka, zudi hino sallish zon faoa zae?” Mabude ḳoila, “Hou sallish zonor ḳatire ami binash ḳortam nae.”
GEN 18:30 Ibrahime ḳoila, “Amar malik zanu amar mate naraz na oin. Aichcha, zudi hino tish zonre faoa zae?” Tain ḳoila, “Zudi ami tish zonre-o fai, taile-o ami binash ḳortam nae.”
GEN 18:31 Ibrahime ḳoila, “Ami zebla himmot ḳoria malikor loge batchit ḳoriar te hirbar ḳoiar, zudi hino bish zonre faoa zae?” Mabude zuaf dila, “Hou bish zonor ḳatire-u ami ikṭa binash ḳortam nae.”
GEN 18:32 Heshe Ibrahime ḳoila, “Amar malik zanu naraz na oin, ami kali aro eḳbarta ḳoiar, zudi hino dosh zon taḳoin?” Mabude ḳoila, “Hou dosh zonor ḳatire-u ami ikṭa binash ḳortam nae.”
GEN 18:33 Ibrahimor loge Mabudor bat-soal shesh oia harle roana dilaila, ar Ibrahim-o tan baṛit firia aila.
GEN 19:1 Bade hainja bala hou duizon firista Sadum ṭauno gela. I shomoy Lut ṭaunor mul geiṭor gese boat asla, erare dekia tain ubaila ar maṭit soizda ḳoria ḳoila,
GEN 19:2 “O amar malik oḳol, ami minoti kori koiar, doya ḳori afnarar ou gulamor goro toshrif anilaukka ar at-fao doia raitḳan ḳaṭaukka. Biane hirbar roana oibane.” Era ḳoila, “Na, amra ou ṭaunor moydano rait ḳaṭaimu.”
GEN 19:3 Tain zebla kub minot-ḳajji korra ou shomoy era tan baṛit hamaila. Bade Lute ruṭi banaia erar lagi kana-dana zuit ḳorla, ar tara ḳaila.
GEN 19:4 Erar hutibar age-u Sadum ṭaunor hokkol zuan-buṛa beṭainte aia hi baṛire berilaila,
GEN 19:5 ar Lutre ḍakia ḳoila, “Aiz rait ze duizon manush tor ino aise, tara ḳoi? Otare bar ḳoria amrar gese an. Amra otar loge mouz ḳortam.”
GEN 19:6 Ou shomoy Lute dorzar bare gia tan ḳoror doroza bond ḳoria tarare ḳoila,
GEN 19:7 “Baiainre, ami minot ḳoriar, tumra ila bod ḳam ḳorio na.
GEN 19:8 Deḳo, amar duiṭa shoti fuṛi ase. Ami bar ḳoria tumrar gese loia aiar, tara kunu beṭaintor gese roisoin na, tumrar zeta mone sae ḳoro; ta-o, i manshor loge tumra kunta ḳorio na, era amar goro asroy loisoin.”
GEN 19:9 Oile tara ḳoilo, “Za, za, fot taki hor!” Tara aro ḳoilo, “Oi beṭa, tui eḳla boitol oia aisos ar ḳali amrar ufre netagiri korre. Oḳon erar saite tor loge aro beshi kobisi kormu.” Ḳoia-u tara Lutre ṭelia horaia dorza bangto sailo.
GEN 19:10 Ou shomoy hou duizone at baṛaia, Lutre goror bitre ṭania nia doroza bond ḳori dila.
GEN 19:11 Ar dorzar bare ubail huru-boṛo hoḳol aḳta-u anda oigelo, ar dorza tuḳaite tuḳaite heran oigelo.
GEN 19:12 Bade hou duiozone Lutre zikaila, “Ino tumar ar ḳe ḳe ase? Tumar fua-fuṛi ar damandre loia in tone horia zaogi.
GEN 19:13 Ḳaron amra i zagare sarḳar ḳorilaiar. Inor manshor birudde Mabudor gese oula bezuita nalish oise zen, ikṭa binash ḳorar lagi tain amrare faṭaisoin.”
GEN 19:14 Ou Lute bare gia tan daman oḳolre ḳoila, “Ao, tumra i zaga saṛia baro ḳaron Mabude i ṭaunre binash ḳorar lagi tiar oiroisoin.” Oile tara mone ḳorlo, tain ita tamsha ḳorra.
GEN 19:15 Fotabala hou firistae Lutre tagda dia ḳoila, “Uṭo, zoldi kori tumar bou ar i duio fuṛire loia on tone zaogi. Naile ou gozobor maze foṛia binash oizibae.”
GEN 19:16 Lute zai-zairam oula ḳorra. Oile Mabudor maya tan ufre asil ḳori hou duiozone, tain ar tan bou ar tan duio fuṛintor ato dori ṭania ṭaunor bare loia aila.
GEN 19:17 Hoḳolre bar ḳoria anar bade tara ḳoila, “Baste saile bago, ḳoredi saio na, bagia faṛo zao, i tʼol zagar kunuḳano ubaio na arnae tumra-o morbae.”
GEN 19:18 Ou Lute ḳoila, “O amar malik oḳol, ila ḳoroin na zen;
GEN 19:19 deḳoukka, afnar i gulamre afne meherbani korsoin, ar amar zan basaibar lagi afne amare moha doya deḳaisoin. Oile ami bagia faṛo zaitam fartam nae. Hoyto i bifod aia amare zata mari dorle, ami-o mormu.
GEN 19:20 Deḳoukka, bagia zaite to ou huru gauṭa ḳasat ase. Zan basaibar lagi amare ono faṭai deukka. Gauṭa huru-muru ase.”
GEN 19:21 Tain ḳoila, “Ṭik ase, ami tumar i arzi manlam. Tumi ze gaur ḳota ḳoilae, iṭa ami dongsho ḳortam nae.
GEN 19:22 Zoldi kori hino zao. Tumi hono na fosani forzonto ami kunta ḳortam fariar na.” Lutor ḳotar lagi hou gaur nam oilo Suar [mani, huru].
GEN 19:23 Lute zebla Suaro gia fosla i shomoy shuruz uṭigese.
GEN 19:24 Erbade-u Mabude asman taki Sadum ar Amurar ufre aguin ar gondoḳor gozob saṛila.
GEN 19:25 Tain hi ṭaun oḳol, hoḳol tʼol zaga, hokkol manush ar hi maṭir ufror hokkolta dongsho ḳorilaila.
GEN 19:26 Ermaze Lutor boue ḳoredi firia saoae, tain eḳṭa nunor sakka oigela.
GEN 19:27 Bador din Ibrahime biane uṭia hou zagat gela zeno agor din tain Mabudor gese ubaisla.
GEN 19:28 Tain tole Sadum, Amura ar hoḳol tʼol zagar bae saia deḳla, iṭ-baṭṭa taki zela duma baroy, ou laḳan hou elaḳa taki duma uṛer.
GEN 19:29 Ar Lute zeḳano boshot ḳorta, hou tʼol zagar ṭaun oḳol dongsho ḳorar shomoy, Allae Ibrahimor ḳota mono ḳoria Lutre hinor gozobor maz taki horaia anla.
GEN 19:30 Suar gaut roite ḍoraila ḳori, Lute tan duio fuṛire loia hin taki bar oia faṛo aia, ek gator bitre roila.
GEN 19:31 Eḳdin tan boṛo fuṛie huru boinre ḳoilo, “Baba to murobbi oigesoin. Ar zogotor shomazor niom moto amrare bia ḳorar lagi ino kunu beṭain-o nae.
GEN 19:32 Te ae, amra babare shorab ḳaoaia tan ḳasat roi. Teu babaredi amrar bongsho basaitam farmu.”
GEN 19:33 Ou tara duiozone raitor bala tanre shorab ḳaoaia ṭal banailo. Bade boṛo boin bafor gese hutito gelo, oile kun shomoy hutilo ar kun shomoy uṭilo, bafe kunta-u ṭer faila na.
GEN 19:34 Bador din boṛogue hurugure ḳoilo, “Dek, kail rait ami babar gese hutislam. Ae, aiz rait-o tane oula shorab ḳaoaia ṭal banai, bade tui-o gia tan gese hutis. Te babaredi amrar bongsho basaitam farmu.”
GEN 19:35 Ou laḳan tara hou rait-o tarar bafre shorab ḳaoaia ṭal banailo, ar huru fuṛi tair bafor gese hutilo. Tai kun shomoy hutilo ar kun shomoy uṭilo, ita tain kunta-u ṭer faila na.
GEN 19:36 Ou nomunae Lutor duio fuṛir feṭo bafredi hurutta ailo.
GEN 19:37 Bade boṛo fuṛir goro fua oile, er nam raḳlo Muab [mani, babar ges tone]. Ou Muab-u oḳonkur Muabi oḳlor mul baf.
GEN 19:38 Ar huru fuṛir-o eḳ fua oilo, er nam raḳlo Bin-Ommi [mani, amar mullukor fua]. He oḳonkur Boni-Ammanor mul baf.
GEN 20:1 Ar Ibrahime hin tone Negebor morubumir bae gia Kadesh ar Shuror mazḳano Gerar desho roila.
GEN 20:2 Hono hirbar tan bou Sayrare nizor boin ḳoia forisoy dila. Erlagi hinor bashsha Abimalike manushdi Sayrare tan gese nilagi.
GEN 20:3 Ar rait Allae Abimalikre kuabe ḳoila, “Huno, ou ze beṭire tumi loia aiso, tair to zamai ase, erlagi tumi oḳon moutor muko.”
GEN 20:4 Abimalik oḳono Sayrar gese gesoin na. Erlagi tain ḳoila, “O Malik, ni-oforadi zati oile-o kita afne marilaita ni?
GEN 20:5 Ou manushṭae to nize-u ḳoise, ein tar boin. Ar ou beṭie-o ḳoisoin na ni, ein tan bai? Ami to shorol mone ni-oforadi ate i kam ḳorsi.”
GEN 20:6 Allae kuabe tanre ḳoila, “Ami-o zani, tumi shorol mone i kam ḳorso. Erlagi tumare gunar ḳam taki ami dom loailam. Taire soite dilam na.
GEN 20:7 Oḳon tumi tan bibire tan gese firot dilao. Tain eḳzon nobi. Tain tumar lagi dua ḳorba, teu tumar zan basbo. Ar zudi taire firot na deo, te zanilio, tumi ar tumar hoḳol-u nisoy morbae.”
GEN 20:8 Ou Abimalike fozore uṭia tan nizor uzir-nazir oḳolre ita hoḳolta ḳoila, ita hunia tara kub beshi ḍoraila.
GEN 20:9 Bade Abimalike Ibrahimre anaia ḳoila, “Afne amrar loge ita kun zator bebohar ḳorla? Ami afnar gese kita dush ḳorsi zen, afne amare ar amar bashshaire oto boṛo gunar daye falaila? Afne to amar loge ita oinnae ḳam ḳorla.”
GEN 20:10 Abimalike aro ḳoila, “Afne kita dekia ila ḳam ḳorla?”
GEN 20:11 Ibrahime zuaf dila, “Ami mone ḳorslam, i zagar manshor Allar bae kunu ḍor-boy nae, erlagi amar bour lalose hoyto tara amare kun ḳorba.
GEN 20:12 Ar tai hasau amar boin lage, ḳaron tai amar haton goror boin, ar oḳon amar bou.
GEN 20:13 Allae zebla amare amar bafor baṛi tone bar ḳori anla, ou shomoy ami taire ḳoislam, ‘Tumi amare ou mayaḳan ḳorio, amra zeno-u zai na ḳene, tumi amare tumar bai koia forisoy dio.’ ”
GEN 20:14 Bade Abimalike ḳotoṭa meṛa-goru, bandi-gulam Ibrahimre dila ar tan bibi Sayrare-o firot dilaila.
GEN 20:15 Abimalike ḳoila, “Deḳoukka, amar asta deshṭa-u afnar samne foṛi roise, te afnar zeno fosond ono-u roukka.”
GEN 20:16 Tain Sayrare ḳoila, “Deḳoukka, ami afnar baire eḳ azar rufar ṭeḳa dilam. Ar afnar ijjotor hoḳol bisaror foysala oilo.”
GEN 20:17 Bade Ibrahime Allar gese dua ḳorla, ar Allae Abimalik, tan bou ar tan bandi oḳolre shifa ḳorla ar tarar hurutta-o oila.
GEN 20:18 Ḳaron Ibrahimor bibi Sayrar lagi Mabude Abimalikor baṛir hoḳol beṭintor hurutta oa bond ḳori disla.
GEN 21:1 Mabude tan kalam mutabek Bibi Sayrare hefazot ḳorla, tain zela oada ḳorsla, ola-u ḳorla.
GEN 21:2 Ar Bibi Sayrar feṭo hurutta ailo. Allae ze shomoykur ḳota ḳoisla, hou shomoye-u Ibrahimor murobbi boyosho tan fuar zonom oilo.
GEN 21:3 Ibrahime Sayrar goror tan ou fuar nam raḳla Isʼhak [mani, asha].
GEN 21:4 Allar hukum moto tain aṭ dinor din tan fua Isʼhakor mosolmani kam ḳoraila.
GEN 21:5 Ibrahimor eḳ-sho bosoror shomoy tan fua Isʼhakor zonom oilo.
GEN 21:6 Bibi Sayrae ḳoila, “Allae amar muko ashi bar ḳorla, ar ita ze hunbo, he-o amar loge ashibo.”
GEN 21:7 Tain aro ḳoila, “Sayrae fuaintore bukur dud ḳaoaibo, ita Ibrahimre ḳe ḳoilo one? Ar oḳon to ou buṛa boyosho, amar feṭo tan fua foyda oilo.”
GEN 21:8 Isʼhak boṛo oar bade zedin tane maʼr dud saṛail oilo, houdin Ibrahime eḳ boṛo mezbani korla.
GEN 21:9 Ar Mishori Hazerar feṭo Ibrahimor ze fua oisil, Sayrae deḳla he tamsha ḳorer.
GEN 21:10 Ou tain Ibrahimre ḳoila, “Fua shoho i bandire bar ḳori deo, bandir fua amar Isʼhakor loge ongshidar oito farto nae.”
GEN 21:11 Fuar ita hunia Ibrahime mono kub toklif faila.
GEN 21:12 Ou Allae tanre ḳoila, “Tumar bandi ar tair fuar lagi tumi bezar oio na. Sayrae zela tumare ḳoise oula ḳoro, ḳaron tumar fua Isʼhakor ḳandanre-u tumar ḳandan ḳoia gona oibo.
GEN 21:13 Ar i bandir torofa fua taki-o ami eḳṭa zati toiar ḳormu, ḳaron he-o to tumar aolad.”
GEN 21:14 Ou Ibrahime aguan uṭia kisu ruṭi ar fani bora eḳṭa samṛar toli hazaia Hazerar ḳando tulia dia, fuagure tair ato shofia bidae ḳorla. Hin tone bar oia Hazerae Ber-Shebar morubumir maze sokkor dita lagla.
GEN 21:15 Tolir fani shesh oigele tain fuare eḳṭa zonglar tole hutaia toila.
GEN 21:16 Ar eḳ ḍaḳor foriman duroi gia tain boiroila. “Fuar mout zate amar souke na deki,” mone mone ḳoia, tain hono boia-u sillaia ḳandila.
GEN 21:17 Fuagur ḳandon Allae hunla, ar Allar firistae asman tone ḍakia Hazerare ḳoila, “Hazera, O Hazera, tumar kita oise? Ḍoraio na, fuagu zeno ase, hon taki-u tar ḳandon Allae hunchoin.
GEN 21:18 Tumi uṭia fuagur ato doro, ami taredi eḳ biraṭ zati foyda ḳormu.”
GEN 21:19 Ou Allae Hazerar souk kulia dila, ar tain ek kua deḳla. Hi kua tone samṛar tolit fani bori ania fuare ḳaoaila.
GEN 21:20 Allae hou fuare hefazot ḳorla. He boṛo oilo, ar morubumit takia tir-donuk salanir ustad oilo.
GEN 21:21 He Faran morubumit taḳto. Tar maʼe Mishoror eḳ fuṛire ania tare bia ḳoraila.
GEN 21:22 Hou shomoy Abimalik ar tan shenapoti Fikule Ibrahimre ḳoila, “Afne zeta-u ḳoroin, otat-u Allae afnar loge taḳoin.
GEN 21:23 Erlagi Allar name afne oḳon ono amar gese ḳosom ḳoroukka, amar ba amar aolad oḳlor loge, afne kunu beimani korta nae. Ar ami zela afnare doya deḳaisi, afne-o amar loge ar afnar musafirir zaga, i deshor loge oula doyar nozor raḳba.”
GEN 21:24 Ibrahime ḳoila, “Ji oy, ḳosom ḳorlam.”
GEN 21:25 Ar Abimalikor gulam oḳole eḳṭa fanir kua zure nisilgi kori, tain nalish dila.
GEN 21:26 Abimalike zuaf dila, “Ita ḳam ḳe ḳorse ami to zani na. Afne-o amare ita ḳoisoin na, aiz-u ami ikṭa hunlam.”
GEN 21:27 Bade Ibrahime kisu meṛa ar goru ania Abimalikre dila ar duiozone chukti korla.
GEN 21:28 Ar Ibrahime fal tone shatgu meṛi-baichcha algaila.
GEN 21:29 Abimalike tane zikaila, “I meṛi-baichcha shatgu alga ḳorar mani kita?”
GEN 21:30 Ibrahime ḳoila, “Afne oguintore neukka. I kuaṭa ze ami kudsi ikṭa oilo tar forman.”
GEN 21:31 Erlagi ou zagar nam oilo Ber-Sheba [mani, ḳosmor kua], ono-u tara duio zone ḳosom ḳorsla.
GEN 21:32 Tara Ber-Shebat ou chukti korar bade, Abimalik ar tan shenapoti Fikul uṭia Filistini oḳlor desho firia gelagi.
GEN 21:33 Bade Ibrahime Ber-Shebat eḳṭa zau gas ruila, ar ze Mabudor shuru-o nae shesh-o nae, tan ebadot ḳorla.
GEN 21:34 Ar Ibrahime Filistini oḳlor desho bout din ḳaṭaila.
GEN 22:1 I goṭonar bade Allae Ibrahimor eḳ forikka loila. Allae tanre ḍaḳ dila, “Ibrahim!” Tain zuaf dila, “Ounu ami.”
GEN 22:2 Mabude formaila, “Tumar fuare, zare tumi oto mohobbot ḳoro, hou ḳas mayar fut Isʼhakre loia tumi Muria elaḳat zao. Hoḳano ze faṛor ḳota ami tumare ḳoimu, er ufre tare nia zalail kurbani deo.”
GEN 22:3 Teu Ibrahime fozore uṭia gadar fiṭit goddi lagaia tan fua Isʼhak, duizon gulam ar zalail kurbanir lagi laḳṛi kaṭia loia, ze zagar ḳota Allae tanre ḳoisla, hobaedi roana oila.
GEN 22:4 Tin dinor din Ibrahime souk tulia saite-u duroi taki hou zagaḳan deḳla.
GEN 22:5 Ou tan gulam oḳolre ḳoila, “Tumra gadaṭa loia ono ubao, ami ar amar fua hono gia ebadoti shesh ḳoria harle tumrar gese aimu.”
GEN 22:6 Ibrahime zalail kurbanir laḳṛir aṭa tan fua Isʼhakor ḳando tulia dia nize aguinor fatil ar suri loia, duio zone samnor bae aguaila.
GEN 22:7 Ou Isʼhake tan bafre ḳoila, “Baba.” Tain ḳoila, “Kitare baf ḳo?” Isʼhake ḳoila, “Ino to laḳṛi ar aguin ase, te kurbanir meṛa-baichcha kuai?”
GEN 22:8 Tain zuaf dila, “Babare, kurbanir lagi Allae nize-u meṛa-baichcha zugaiba.” Ota matte matte tara aguai gela.
GEN 22:9 Allar fosondor zagat fosia Ibrahime kurbani kana banaia, laḳṛi hazaila. Bade nizor fua Isʼhakre bandia ou darur ufre hutaila.
GEN 22:10 Ar tain nizor fuare kurbanir lagi suri ato loila.
GEN 22:11 Ou Mabudor firistae asman tone tane ḍaḳ dila, “Ibrahim! O Ibrahim!” Tain ḳoila, “Ounu ami.”
GEN 22:12 Firistae ḳoila, “Fuagur bae tumar at tulio na, tare ar kunta-u ḳorio na. Tumi zen Allare ḍorao ita buza gese, ḳaron amare tumar fua, tumar ḳas mayar fua dan ḳorte-o na-kush oiso na.”
GEN 22:13 Ibrahime souk tuli saia deḳoin, tan ḳore eḳṭa dumba ar tar hing zongolor maze aṭki roise. Ou tain gia dumbaṭa ania, nizor fuar bodla zalail kurbani dila.
GEN 22:14 Tain hi zagar nam raḳla Iaoweh-Zirih [mani, Mabude zugain]. Erlagi oḳono manshe ḳoin, “Mabudor faṛo zugail oibo.”
GEN 22:15 Mabudor firistae asman tone hirbar Ibrahimre ḍakia ḳoila,
GEN 22:16 “Huno, Mabude ḳoira, tumi oula ḳorlae, tumar fuare, tumar ḳas mayar fuare dan ḳorte-o naraz oilae na. Erlagi ami Mabude ḳosom ḳoria ḳoiar,
GEN 22:17 ami nisoy tumare borkot nazil ḳormu, tumar bongshore asmanor tera ar doriar soror balur laḳan behishab ḳormu. Tumar bongshoe tarar dushmonor ṭaun oḳol doḳol ḳorba.
GEN 22:18 Ar tumar bongshor usillae duniar hoḳol zatie borkot hasil ḳorba. Ḳaron tumi amar hukum mancho.”
GEN 22:19 Bade Ibrahime tan gulam oḳlor gese firia aila, ar tara eḳloge Ber-Sheba namor zagat gela. Ou zagat-u tain boshoti korla.
GEN 22:20 I goṭonar bade Ibrahime ḳobor faila, tan bai Nahuror bibi Milkar ḳoygu fuain oisoin.
GEN 22:21 Er boṛo fuar nam Auz, tar baiaintor nam Buz, ar Oramor baf Komuel,
GEN 22:22 erbade Kesod, Hosho, Fildosh, Zidlof ar Botuel. Botuelor fuṛir nam Rebeka.
GEN 22:23 Ibrahimor bai Nahuror bibi Milkar feṭo taki i aṭzon fuar zonom oisil.
GEN 22:24 Nahuror eḳ hangar bou asil, tair nam Rouma. Tair feṭo Ṭeboh, Gohom, Tohosh ar Maḳar zonom oisil.
GEN 23:1 Bibi Sayra eḳ-sho shataish boros basila; Allae tane otodinor hayati disla.
GEN 23:2 Bade Kenan deshor Kiriot-Orbo mani Hebrono inteḳal ḳorla. Ar Ibrahime tan lagi bout ḳanda-ḳaṭi ar ahazari korla.
GEN 23:3 Heshe tan murda bibir ges tone horia gia hou deshor Hiṭṭi oḳolre ḳoila,
GEN 23:4 “Ami to bideshi musafir oia afnarar ono roiar. Meherbani kori kobrostan banaibar lagi amare tuṛa zomi deukka, ami amar samne tone amar murdare dafon ḳori.”
GEN 23:5 Hiṭṭi oḳole tane ḳoila,
GEN 23:6 “Huzur, amrar ḳota hunoukka. Afne to amrar maze Allar mohobbotor buzurg. Amrar gurustanor maze zeno fosond oy, ono-u afnar murdare dafon ḳoroukka. Tanre dafon ḳorar lagi amrar ḳeu-u nizor banail ḳoybor saṛte omot ḳorto nae.”
GEN 23:7 Ou Ibrahime ubaia hinor Hiṭṭi oḳlor samne mata nuaia ijjot ḳori koila,
GEN 23:8 “Amar bibire ino dafon ḳorat zudi afnarar kunu omot na taḳe, te doya ḳori amar arziḳan hunoukka. Afnara amar oia Shuhoror fua Ifrunre ḳoukka,
GEN 23:9 tan zominor hesh matat Moḳfela ze guha ase, oḳanta zenu ḳobrostan bananir lagi tain fura dam loia amar gese besilain.”
GEN 23:10 Aro Hiṭṭi oḳlor loge i shomoy Ifrun-o hono boat asla. Ibrahimor mator zuafe hou Hiṭṭi oḳlor samne Ifrune ḳoila,
GEN 23:11 “Na, na, afne doya ḳori amar matḳan hunoukka. Ami hoḳlor samne-u i zomi ar guha afnare dilailam, afnar murdare dafon ḳorilain.”
GEN 23:12 Teu Ibrahime hirbar hinor hoḳlor samne mata nuaia,
GEN 23:13 hi deshor hokkolre hunaia Ifrunre ḳoila, “Hunoukka, zomiḳanor dam ami dilai. Afne-o zomiḳanor dam neukkagi, bade amar murdare ono dafon ḳormu.”
GEN 23:14 Ifrune tanre zuaf dila,
GEN 23:15 “Huzur, amar ḳota hunoukka, ou zomiḳanor dam oilogi sair-sho tola rufa, te afnar-amar lagi ita kunta-u nae. Afnar murdare ḳoybor dilaukka.”
GEN 23:16 Ou Ibrahime Ifrunor ḳota mania Hiṭṭi oḳlor samne tain, Ifrunor saoa dam mafik, faikari mafe sair-sho tola rufa tanre mafia dila.
GEN 23:17 Ou laḳan Momri ṭaunor gese Moḳfelat Ifrunor ze zomin asil hou zomin ar honor guha ar zominor sairobae zoto gas-gasali asil,
GEN 23:18 ita hoḳolta-u hinor Hiṭṭi oḳol ar ṭaunor mukor hoḳlor samne, Ibrahimor malikanae ailo.
GEN 23:19 Bade Ibrahime Kenan deshor Momri ṭaun ba Hebronor Moḳfelar guhat tan bibi Sayrare dafon ḳorla.
GEN 23:20 Ou laḳan Moḳfelar ou guha shoho asta zominḳan gurustanor lagi, Hiṭṭi oḳlor at tone Ibrahimor ato ailo.
GEN 24:1 Ibrahim i shomoy kub murobbi ar zaoagir foti oigesoin. Mabude tanre hoḳolbae tone borkot nazil ḳorsla.
GEN 24:2 Ar tan ḳas gulam, baṛir furan ze gulamor ufre tan hoḳoltar bar deoa asil tare ḳoila, “Tumar atḳan amar urator tole harao.
GEN 24:3 Ami tumare asman-zominor malik Alla Mabudor name ḳosom ḳoraiar, ami ze Kenani oḳlor maze takiar, tarar kunu fuṛire amar fuar bou banaia tumi anio na.
GEN 24:4 Tumi amar desho gia, amar fua Isʼhakor lagi amar ḳesh-kuṭumor maz taki egu ḳoina saia anbae.”
GEN 24:5 Ou hi gulame tanre ḳoila, “Zudi kunu fuṛie amar loge i desho aite razi na oin, taile ze desh saṛia afne aisoin, afnar fuare ami hono loia zaitam ni?”
GEN 24:6 Tain ḳoila, “Ḳobordar! Tumi amar fuare kunumonte-u hino loia zaio na.
GEN 24:7 Ze asmani Alla Mabude amare, amar bafor baṛi ar zonom maṭi tone bar ḳoria anchoin, tain amar loge bat-soal ḳori kosom ḳoria ḳoisoin, i deshḳan tain amar oarish oḳolre diba. Tain tumar age-u tan firistare hono faṭaiba, zate amar fuar lagi tumi hon tone egu ḳoina antae faro.
GEN 24:8 Zudi kunu fuṛie tumar loge aite razi na oy, te amar i kosom taki tumi kalas; ta-o amar fuare tumi kunu laḳan-u hino loia zaio na.”
GEN 24:9 Ou hi gulame tan munib Ibrahimor urator tole at haraia oula ḳosom ḳorla.
GEN 24:10 Bade hou gulame tan munibor uṭor fal taki doshṭa uṭ loila. Ar munibor bala bala zinish oḳol loia, Oram-Nohoroyim deshor zeno Nahur taḳta hobaedi roana oila.
GEN 24:11 Ar hainja bala zebla beṭinte fani anat bar oin, ou shomoy hi gulame ṭaunor bare ek kuar ḳasat tan uṭ oḳolre toila.
GEN 24:12 Toia ou dua ḳorla, “O Mabud, amar munib Ibrahimor Alla, aroz ḳori, aiz amar samne kamiabi zair ḳoro, ar amar munib Ibrahimre meherbani koro.
GEN 24:13 Deḳo, i ṭaunor fuṛinte fani neoat aira ar ami ino kuar ḳasat ubai roisi.
GEN 24:14 Te ou fuṛintor maze ami zare ḳoimu, ‘Afnar ḳoyla lamaia amare tuṛa fani kaoaukka’, er zuafe zudi hou fuṛie ḳoin, ‘Afne fani kaukka ar afnar uṭ oḳolre-o ami fani kaoaimu’ taile ou fuṛi-u zanu tumar gulam Isʼhakor lagi tumar fosondor fuṛi oin. Teu ami buzmu, tumi amar munibre meherbani korlae.”
GEN 24:15 Tan dua shesh na oite-u Botuelor fuṛi Rebekae ḳaḳo ḳoyla loia ṭaun taki bar oia aila. Ou Botuel oila Ibrahimor bai Nahuror bibi Milkar fua.
GEN 24:16 Rebeka asla kub shundori, abiati, shoti nari. Tain kua taki koyla boria zebla uṭia aira,
GEN 24:17 ou shomoy-u Ibrahimor gulame douṛaia tan gese gia ḳoila, “Doya ḳori afnar ḳoyla taki amare tuṛa fani kaoaukka.”
GEN 24:18 Rebekae ḳoila, “Huzur, fani kaukka.” Ou ḳota ḳoia-u tain zoldi kori koylaṭa ḳaḳo tone ato ania fani kaite dila.
GEN 24:19 Fani kaoaibar bade Rebekae tanre ḳoila, “Ami afnar uṭ oḳolre-o tarar fias miṭaia fani kaoaimu, tara feṭ boria fani kaiba.”
GEN 24:20 Ḳoia-u tain zoldi kori fanir gamlat ḳoylar fani ḍalia hirbar douṛaia kuar gese gela. Ar hoḳol uṭre fani tuli dila.
GEN 24:21 Mabude tan i sofor kamiab ḳorsoin ki na iṭa zanar lagi hi gulame nirobe Rebekar bae sai roila.
GEN 24:22 Uṭ oḳole fani kaia harle, tain ada tolar eḳṭa shunar naḳor not ar dui ato dosh tolar duiṭa shunar bala Rebekare dia zikaila,
GEN 24:23 “Afnar babar nam kita? Afne ḳoukka sain, afnar bafor baṛit amrar rait taḳar zaga oibo ni?”
GEN 24:24 Rebekae ḳoila, “Amar babar nam Botuel. Dadar nam Nahur ar dadir nam Milka.
GEN 24:25 Te afnar uṭor ḳanir lagi amrar baṛit bout ḳer-busi ase ar roibar zaga-o ase.”
GEN 24:26 Ou hi gulame Mabudor soizda ḳoria ḳoila,
GEN 24:27 “Hokkol proshongsha Mabudor, zein amar munib Ibrahimor Alla. Tain amar malikre tan deoa oada raḳte ar imandari deḳaite faurisoin na. Tain amare-o fot sinaia amar munibor kuṭmor baṛit loia aisoin.”
GEN 24:28 Rebekae douṛaia gia tan maʼr baṛir hoḳolre ita zanaila.
GEN 24:29 Rebekar eḳ bair nam asil Labon. Ou Labone douṛaia kuar ḳasat aila enre deḳta ḳori.
GEN 24:30 Bonir ator bala ar naḳor not dekia, ar hi manshe zeta ḳoise ita hunia, tain aia deḳla, manushṭa kuar ḳandat tar uṭor gese ubai roise.
GEN 24:31 Labone tanre ḳoila, “O Mabudor rohomotor manush, aukka. Bare ubai roisoin ḳene? Ami afnarar lagi gor, ar uṭor lagi zaga zuit ḳoria aisi.”
GEN 24:32 Ou hi gulame tarar baṛit gia uṭ oḳlor gaiṭ lamaite-u, Labone ḳer ar busi ania dila. Tane ar tan logor hoḳolre at-fao doar fani-o dila.
GEN 24:33 Bade tan samne ḳani deoa oilo, teu tain ḳoila, “Ami kitar lagi ino aisi, ita na hunaia ḳani kaitam nae.” Labone ḳoila, “Te ḳoilaukka.”
GEN 24:34 Ou tain ḳoila, “Ami Ibrahimor gulam.
GEN 24:35 Amar malikre Mabude bout borkot nazil ḳorsoin, aiz tain bout doni-mani. Mabude tanre bout goru-meṛa, uṭ-gada, shuna-rufa, ar bandi-gulam disoin.
GEN 24:36 Tan bibi Sayrar murobbi boyosho munibor eḳzon fua oisoin, ar ou fuare-u tain, tan hoḳolta dilaisoin.
GEN 24:37 Tain amare ḳosom ḳoraia ḳoisoin zen, tain ze desho boshot ḳorra, hi Kenan deshor kunu fuṛire zate tan fuar bou na banai.
GEN 24:38 Er bodla tan bafor ar tan ḳandanor baṛit gia tan fuar lagi eḳzon ḳoina saia nei.
GEN 24:39 Ou ami amar munibre ḳoilam, ‘Zudi kunu fuṛi amar loge aite razi na oin?’
GEN 24:40 Tain ḳoila, ‘Mabud, zanre ami kezmot ḳori, tain-u tan firistare faṭai diba, zate tumar sofor kamiab oy. Ar tumi amar nizor bongsho ar amar bafor ḳandan tone, egu fuṛire amar fuar lagi saia anbae.
GEN 24:41 Tarar hino gele zudi tara kunu fuṛire na dein, taile tumi amar i kosom taki kalas faibae.’
GEN 24:42 “Ou aiz ami kuar gese aia dua ḳorlam, ‘O Mabud, amar munib Ibrahimor Alla, tumi zudi amar i sofor kamiab ḳoro taile,
GEN 24:43 deḳo, ami ou bora kuar gese ubai roisi, ar kunu fuṛie ono fani neoat aile ami koimu, ḳoyla taki amare tuṛa fani kaoao.
GEN 24:44 Ar zudi tai koy, ‘Tumi-o fani kao ar tumar uṭ oḳolre-o ami fani tulia dimu’, taile ou fuṛi-u zanu amar munibor fuar lagi tumar fosond ḳora fuṛi oy.’
GEN 24:45 “Amar dua shesh na oite-u deki, Rebekae ḳoyla ḳaḳo loia kuat aira fani tulta. Fani tular bade ami koilam, ‘Doya ḳoria amare tuṛa fani kaoaukka.’
GEN 24:46 Tain zoldi kori kaḳo tone ḳoyla lamaia amare ḳoila, ‘Ou nein, fani kain. Ami afnar uṭ oḳolre-o fani kaoaimu.’ Teu ami fani kailam, ar tain amar uṭ oḳolre-o fani kaoaila.
GEN 24:47 Bade ami tane zikailam, ‘Afne ḳar fuṛi?’ Tain ḳoila, ‘Ami Botuelor fuṛi, amar dadar nam Nahur ar dadir nam Milka.’ Ou ami tan naḳo not ar ato bala findaia dilam.
GEN 24:48 Bade ami Mabudor soizda ḳorlam. Ar zein amar munib Ibrahimor Alla, hou Mabudor shukur adae ḳorlam, tain-u amare ṭik fote salaia anchoin zate ami amar munibor batizire, tan fuar lagi tukaia fai.
GEN 24:49 Teu oḳon afnara amar munibor bae dorod ar insaf ḳorba ni, ḳoukka. Zudi na ḳoroin ta-o ḳoukka, zate ami ḍaine-baue zaitam fari.”
GEN 24:50 Ou Labon ar Botuele ḳoila, “Goṭona to Mabud taki-u oise. Oḳon amrar bala-bura matar kunta-u nae.
GEN 24:51 Ou deḳoukka, Rebeka to ono ase, te Mabudor hukum moto afnar munibor fuar bou banaibar lagi ere loia zaita farba.”
GEN 24:52 I mat hunia Ibrahimor gulame Mabudor soizda ḳorla.
GEN 24:53 Erbade tain shuna-rufar goyna-gaṭi ar ḳafoṛ-sufoṛ bar ḳoria Rebekare dila, er loge Rebekar ma-baire-o bout dami dami ufohar dila.
GEN 24:54 Bade tain ar tan logor hoḳole ḳaoa-daoa shesh ḳoria hoḳano-u rait ḳaṭaila. Biane gum taki uṭia tain ḳoila, “Amar munibor gese zaoar lagi amare bidae dilaukka.”
GEN 24:55 Teu Rebekar ma ar baie ḳoila, “Fuṛigu aro doshḳan din amrar gese taḳouk, bade zaibone.”
GEN 24:56 Ou hi gulame tarare ḳoila, “Mabude zebla amar i sofor kamiab ḳorsoin, taile amare deri na ḳoraia bidae dilaukka, amar munibor gese zaigi.”
GEN 24:57 Era ḳoila, “Amra taile fuṛire samne ania zikailai.”
GEN 24:58 Ar Rebekare ḍakia ania zikaila, “Tumi kita tan loge zaibae ni go?” Tain ḳoila, “Aichcha, zaimune.”
GEN 24:59 Ou tara Ibrahimor gulam ar tan logor manshor loge tarar boin ar tan bandi beṭire bidae dila.
GEN 24:60 Ar Rebekare dua ḳoria ḳoila, “Boin go, tumi laḳ laḳ aolador ma o. Tumar aolade dushmon oḳolre gail ḳorouk.”
GEN 24:61 Rebeka ar tan bandi oḳole toiar oia uṭor ufre soṛia, Ibrahimor gulamor ḳore oia roana dila. Ou laḳan hou gulame Rebekare loia bar oila.
GEN 24:62 Isʼhak i shomoy Negebo taḳta. Tain Ber-Lohoy-Rui namor zaga tone firot aila.
GEN 24:63 Eḳdin biali bala tain bondedi aṭat bar oila. Aḳta-u souk tulia saia deḳla, ḳoyṭa uṭ aira.
GEN 24:64 Rebekae-o duroi tone Isʼhakre dekia-u uṭor ufor taki lami gela.
GEN 24:65 Ar hou gulamre zikaila, “Ou zein bondor mazedi amrar bae aira, ein ḳe?” Gulame ḳoila, “Ein to amar munib.” Ou Rebekae burkar forda lamai dila.
GEN 24:66 Ar hi gulame zeta zeta ḳoria aisoin, hoḳolta Isʼhakre zanaila.
GEN 24:67 Isʼhake tan ma Bibi Sayrar tambut Rebekare loia gia tane bia ḳorla. Ar tanre maya ḳorla. Tan maʼr moutor bade, Rebekar mayae-u tan zano shanti faisla.
GEN 25:1 Ibrahime Katura namor aro eḳzon beṭire bia ḳorsla.
GEN 25:2 Tan feṭo Zimron, Zokshon, Modan, Madian, Zishboḳ ar Shuhar zonom oisil.
GEN 25:3 Shaba ar Dodan oila Zokshonor aolad. Ashuri, Loṭushi, Liummi oḳol oila Dodanor aolad.
GEN 25:4 Madianor aolad oila Oifa, Efor, Honuk, Obid ar Ildaya. Era hoḳol-u Katurar aolad.
GEN 25:5 Ibrahime tan hoḳolta Isʼhakre dilaila.
GEN 25:6 Oile tain zinda taḳte-u, tan heshor biar aolad oḳolre-o alga alga dan ḳoria, erare Isʼhakor loge na rakia fubedi, fubor desho faṭai dila.
GEN 25:7 Ibrahim eḳ-sho fosottoir boros basila, Allae tane otodinor hayati disla.
GEN 25:8 Tain murobbi oia furafur buṛa boyosho inteḳal ḳorla, ar tan baf-dadar gese gia azila.
GEN 25:9 Heshe tan fua Ismail ar Isʼhake Momri ṭaunor fubedi, Hiṭṭi Shuhoror fua Ifrunor zomir Moḳfela-guhat, tanre dafon ḳorla.
GEN 25:10 I zomiḳan tain Hiṭṭi oḳlor ges tone loisla. Ono-u tan bibi Sayrare ar tane dafon ḳora oise.
GEN 25:11 Ibrahimor moutor bade Allae tan fua Isʼhakre borkot nazil ḳorla. Tain Ber-Lohoy-Ruir gese roita.
GEN 25:12 Ou oilo Ismailor ḳandanor boyan. Bibi Sayrar bandi Mishori Hazerar feṭo Ibrahimor fua Ismailor zonom oisil.
GEN 25:13 Ou oilo Ismailor aolador nam ar gusṭir boyan. Tan boṛo fuar nam Nabaut, bade Ḳaedar, Odbel, Mibsom,
GEN 25:14 Mishma, Duma, Masa,
GEN 25:15 Hodod, Tema, Ziṭur, Nafish ar Ḳedoma.
GEN 25:16 Ismailor ou barozon fua asla baro gusṭir shordar. Tarar namor laḳan hi gau ar tambu bisail zagar-o ou nam oisil.
GEN 25:17 Ismailor hayat eḳ-sho shaṛtish boros asil, heshe tain mara gela ar tan baf-dadar gese gelagi.
GEN 25:18 Hobila tone Ashiriar bae Mishoror samnor Shur forzonto tan aolad oḳol roita. Ismaile tan hoḳol baiaintor galabae roar zaga faila.
GEN 25:19 Ou oilo Ibrahimor fua Isʼhakor ḳandan-nama. Ibrahimor goro Isʼhakor zonom oilo.
GEN 25:20 Isʼhake sallish boros boyosho tan mamur goror boin Rebekare anaia bia ḳorla. Rebeka oila Foddon-Iram deshor Orami Botuelor fuṛi, Orami Labonor boin.
GEN 25:21 Tan bou niaoladi asla gotike, Isʼhake Mabudor gese dua ḳorla. Mabude tan dua kobul ḳorla, ar Rebekar feṭo hurutta ailo.
GEN 25:22 Bade feṭor bitre huruttae loṛa-soṛa ḳorat lagla. Ou tain ḳoila, “Amar feṭo ila lager ḳene?” Ḳaron zanar lagi tain Mabudor gese dua ḳorla.
GEN 25:23 Mabude tanre ḳoila, “Tumar feṭo duiṭa zati ase, feṭo tone-u tara dui bongsho oia foyda oiba. Eḳ bongsho tone aroḳ bongsho shoktiala oibo, ar boṛogue hurugur kezmot ḳorbo.”
GEN 25:24 Hurutta foydar bala deḳoin, hasau tan feṭo zuṛor fua.
GEN 25:25 Foyla zar zonom oilo he lal rongor ar tar shorilo foshomi kafṛor laḳan rumae bora. Tar nam raḳla Ish [mani, ruma-ala].
GEN 25:26 Bade Ishʼor faor murat dori tar bair zonom oilo, er nam raḳla Iakub [mani, faot dorra]. Isʼhakor shaiṭ boros boyosho era zuṛe foyda oila.
GEN 25:27 Ou fuain boṛo oar bade Ish kub bala shikari ar morubumit faḳaora oila, oile Iakub asla nirai-zirai, tain tambut taḳta.
GEN 25:28 Shikaror gust moza lagto ḳori Isʼhake Ishʼre maya ḳorta, ar Rebekae Iakubre maya ḳorta.
GEN 25:29 Eḳdin Iakube ḍail randisoin, ou shomoy tan boṛo bai Ish morubumi taki feṭor buke kub ḳator oia aila, aia huru bai Iakubre ḳoila,
GEN 25:30 “Baire, amar kub buk lagse. Te ou rongil, rongil ota amare feṭ bori kaite de.” Ou ḳotar lagi tan siṛ laglo Idum [mani, rongil].
GEN 25:31 Iakube ḳoila, “Taile boṛo bai oar malikana, tumi aiz amar gese besilao.”
GEN 25:32 Ishe ḳoila, “Deḳo, amar zan bar oizar, ar boṛo bair malikanadi ar kita ḳortam?”
GEN 25:33 Iakube ḳoila, “Age tumi amar gese ḳosom ḳoro.” Ou Ishe ḳosom ḳoria boṛo bai oar malikana Iakubor gese besilaila.
GEN 25:34 Bade Iakube Ishʼre ḍail ar ruṭi kaite dila. Ḳaoa-daoa ḳoria tain uṭia gelagi. Ou laḳan Ishe boṛo fua oar kunu dam-u raḳla na.
GEN 26:1 Ibrahimor zomanar laḳan ifira-o desho hirbar eḳ nidan deḳa dilo. Teu Isʼhak Gerar ṭauno Filistini oḳlor bashsha Abimalikor gese gelagi.
GEN 26:2 Ar Mabude Isʼhakre didar dia ḳoila, “Tumi Mishoro lamia zaio na. Ami tumare ze deshor ḳota ḳoimu, ono-u takio.
GEN 26:3 Ou desho tumi musafir oia ro. Ami tumar loge roia, tumare borkot nazil ḳormu. I desh oḳol ami tumare ar tumar oarish oḳolre dimu. Ar tumar baf Ibrahimor gese ami ze ḳosom ḳorslam, oḳṭa fura ḳormu.
GEN 26:4 Ami tumar oarish oḳolre asmanor terar laḳan behishab ḳormu, ou desh oḳol-o tarare dimu. Tumar oarishredi, duniair hoḳol zatie borkot faiba.
GEN 26:5 Ibrahime amar mat hunia, amar hukum, amar ain ar amar shoriot oḳol amol ḳorse.”
GEN 26:6 Teu Isʼhak Gerar ṭauno roila.
GEN 26:7 Ar hinor manshe tan bour ḳota zikaile, tain ḳoila ein amar boin. Enre bou ḳoite tain ḍoraila, mone ḳorla, Rebeka shundori koria hinor manshe Rebekare neoar lagi tanre kun ḳoriliba.
GEN 26:8 Isʼhak bout din hono roar bade eḳdin Filistini oḳlor bashsha Abimalike tan kiṛki baedi saia deḳla, Isʼhake tan bibi Rebekare maya ḳorra.
GEN 26:9 Dekia tain Isʼhakre neoaia ḳoila, “Deḳoukka, Rebeka to ashole afnar bibi, te afne ḳene tanre afnar boin ḳoila?” Isʼhake zuaf dila, “Ami mone ḳorslam tair lagi amar zan araimu.”
GEN 26:10 Teu Abimalike ḳoila, “Amrar loge afne ita kita bebohar ḳorla? Zekunu manshe to afnar bibir loge mila-misha ḳorto sailo one ar afne amrare dushi banaila one.”
GEN 26:11 Bade Abimalike hoḳol manshore ou hukum zari korla, ḳeu zudi Isʼhak ba tan bibir shorilo at dey, tare nisoy zane mara oibo.
GEN 26:12 Ar Isʼhake hi boros ḳet ḳoria tan zomino rua bis taki eḳ-sho gun beshi foshol faila, Mabude tanre oula borkot nazil ḳorla.
GEN 26:13 Tan ḳali baṛte-u laglo, aste aste tain kub maldar oigela.
GEN 26:14 Tan goru-sagol ar gulam-bandi oula baṛlo zen, ita dekia Filistini oḳole ingshaita lagla.
GEN 26:15 Ar tan baf Ibrahimor amolo, tan gulam oḳole ze kua oḳol kudisla, Filistini oḳole iguin maṭidi boria bond ḳorilaisla.
GEN 26:16 Bade Abimalike Isʼhakre ḳoila, “Afne amrar ges tone zaukkagi, afne to amra tone beshi shoktiala oigesoin.”
GEN 26:17 Ou Isʼhake hon tone horia gia Gerar mora gangor soro tambu gaṛia roila.
GEN 26:18 Ar tan baf Ibrahimor amolor kuda kuain, tain hirbar kudila, ḳaron Ibrahimor moutor bade Filistini oḳole ita borilaisla. Ar tan bafe ou kuaintor ze nam raḳsla, tain-o ou nam raḳla.
GEN 26:19 Isʼhakor gulam oḳole ou gangor soro kudia fanir futala ek kua faila.
GEN 26:20 Ar Geraror raḳal oḳole tan raḳal oḳlor loge dorbar ḳoria ḳoilo, i fani amrar. Ou tain i kuar nam raḳla Eshok [mani, dorbar].
GEN 26:21 Bade Isʼhakor raḳal oḳole aro ek kua kudila, ar iṭa loia-o tara dorbar ḳorla. Ou tain iṭar nam raḳla Siṭna [mani, dushmoni].
GEN 26:22 Heshe tain hon tone horia gia aro ek kua kudaila, ifira tara ar kunu dorbar ḳorla na. Teu Isʼhake ou kuar nam raḳla Rohobot [mani, bout zaga]. Tain ḳoila, “Oḳon Mabude-u amrare bout zaga dila, amra i desho aro baṛtam farmu.”
GEN 26:23 Bade Isʼhake hon tone horia Ber-Shebat gelagi.
GEN 26:24 Hou rait-u Mabude tanre didar dia ḳoila, “Ami tumar baf Ibrahimor Alla. Tumi ḍoraio na, amar gulam Ibrahimor ḳatire ami tumar loge asi. Ami tumare borkot nazil ḳormu ar tumar bongsho baṛaimu.”
GEN 26:25 Ou Isʼhake hono ekkan kurbani kana banaia Mabudor nam loila. Hono tain tan tambu gaṛila ar tan gulam oḳole ek kua kudila.
GEN 26:26 Bade Abimalike tan uzir Ohuzot ar shenapoti Fikulre loia Gerar taki Isʼhakor gese aila.
GEN 26:27 Isʼhake erare ḳoila, “Afnara amar gese kitar lagi aila? Afnara to ingsha ḳoria amare afnarar ges tone ḳedai dilaisoin.”
GEN 26:28 Tara ḳoila, “Amra oḳon saf buziar zen, Mabud afnar loge asoin. Erlagi afnar loge amrar egu oada oizauk. Aukka, amra eḳ chukti korilai.
GEN 26:29 Amra zela afnare soisi na ar afnar balai saṛa kunu ḳeti korsi na, zela afnare shantie bidae disi, oula afne-o amrare ḳeti korta na. Afne-u to Mabudor borkotor manush.”
GEN 26:30 Bade Isʼhake tarar lagi kana-dana zuit ḳorle, tara ḳana-dana ḳorla.
GEN 26:31 Bador din biane uṭia tara duiozone ḳosom ḳorla. Ar Isʼhake tarare bidae dile, tara dilor maze shanti faia roana oila.
GEN 26:32 Hou din-u tan gulam oḳole aia tarar kuda ek kuar ḳobor zanaila, tara fanir lagal faisoin.
GEN 26:33 Ou tain er nam dila Sheba [mani, ḳosom]. Erlagi aiz-o hinor nam Ber-Sheba roise.
GEN 26:34 Ishe sallish boros boyosho Hiṭṭi Berir fuṛi Zihudit ar Hiṭṭi Elonor fuṛi Bashomotre shadi korla.
GEN 26:35 I duio beṭie Isʼhak ar Rebekar zanor maze kub duk dila.
GEN 27:1 Murobbi boyosho Isʼhakor souḳor zuti komi zaoae tain ar souke deḳta na. Tain tan boṛo fua Ishʼre anaia ḳoila, “Babare.” Ishe zuaf dila, “Ounu ami.”
GEN 27:2 Tain ḳoila, “Deḳo, ami to buṛa oigesi, kundin morizimu ḳoitam fariar na.
GEN 27:3 Tumi egu ḳam ḳoro; tumar atiar, tir-donuk loia zongolo shikaro zao, ar amar lagi kunta shikar ḳoria,
GEN 27:4 amar fosondor bala ḳani toiar ḳori ano, teu morar age ita ḳaia amar zane tumare dua dibo.”
GEN 27:5 Isʼhake zebla tan fua Ishʼor loge ita matira, i shomoy Rebekae ita hunchila. Teu Ish zebla shikaro gelagi,
GEN 27:6 tain aia tan fua Iakubre ḳoila, “Huno, ami hunlam tumar bafe tumar bai Ishʼre ḳoira,
GEN 27:7 ‘Tumi amar lagi kunta shikar ḳori bala ḳani toiar ḳoro, teu ami morar age ota ḳaia, Mabudor samne tumare dua dimu.’
GEN 27:8 Te re fut, ami tumare oḳon zeta ḳortae ḳoimu, tumi oula hunio.
GEN 27:9 Tumi gia fal taki duiṭa taza ḳoshi ano. Ami itadi tumar bafor shoḳor ḳani, asanoḳ moza ḳori randia dei.
GEN 27:10 Teu tumi ota loia tumar bafor gese zaio, tain ita ḳaia morar age tumare dua ḳorba.”
GEN 27:11 Iakube tan maʼre ḳoila, “Huno, amar bai Ishʼor shoril to ruma-ala, amar shorilo to ruma nae.
GEN 27:12 Zudi babae amar shorilo atain, te mono ḳorba ami tane duka diar, taile ami duar bodla aro lannot ḍakia anmu.”
GEN 27:13 Teu tan maʼe ḳoila, “Futre, tumar i lannot amar ufre-u foṛouk. Tumi kali amar matḳan huno ar ḳoshiguin ania deo.”
GEN 27:14 Ou Iakube gia ḳoshi ania tan maʼre dila. Ar tan bafe zela shok koroin, tain oula moza ḳori randila.
GEN 27:15 Bade tain goror maze toa boṛo fua Ishʼor bala bala ḳafoṛ-sufoṛ ania tan huru fua Iakubre findaila.
GEN 27:16 Iakubor ato ar golat ze zagat ruma nae, hou zagat ou ḳoshir samṛa lagai dila.
GEN 27:17 Ar nizor randa hou mozar ḳani ar ruṭi tan fua Iakubor ato dila.
GEN 27:18 Iakube tan bafor gese gia ḍaḳ dila, “Baba.” Isʼhake zuaf dila, “Ounu ami, tumi ke re fut?”
GEN 27:19 Iakube tan bafre ḳoila, “Ami afnar boṛo fua Ish. Afne amare zela ḳoisla, ami oula ḳorsi. Doya ḳori uṭia boukka, amar shikaror gust ḳaukka, ḳaia harle afne amare dua diba.”
GEN 27:20 Isʼhake tan fuare ḳoila, “Babare, tumi oto zoldi shikar failae kila?” Tain ḳoila, “Afnar Mabud Allae milai disoin.”
GEN 27:21 Ou Isʼhake Iakubre ḳoila, “Baba, amar ḳasat ao teu tumar gotro at dia buzmu, tumi hasau amar fua Ish ni.”
GEN 27:22 Iakub tan baf Isʼhakor aro ḳasat gela. Tain shorilo ataia ḳoila, “Golar aoazṭa Iakubor, oile at duioḳan to Ishʼor.”
GEN 27:23 Iakubor at tan bai Ishʼor moto rume bora asil ḳori Isʼhake tanre sinla na. Ou tain Iakubre dua dila.
GEN 27:24 Tain zikaila, “Tumi kita hasau amar fua Ish ni?” Iakube ḳoila, “Ji oy baba.”
GEN 27:25 Ou Isʼhake ḳoila, “Fuar shikaror gust amar gese ano, ita ḳaia harle amar zane tumare dua dibo.” Iakube gust loia aile tain ḳaila. Bade tanre anguror shorbot dile tain eota ḳaila.
GEN 27:26 Heshe tan bafe ḳoila, “O fut ao, ḳasat aia amare hunga deo.”
GEN 27:27 Ou Iakube ḳasat gia hunga dila, ar Isʼhake tan shorilor ḳafoṛor geran hungia tanre dua dila, “Deḳo, amar fuar geran to Mabudor borkoti ketor geranor laḳan.
GEN 27:28 Allae asmanor kua tone ar roshail zomin tone tumare deukka; bout foshol ar anguror shorbot tumare deukka.
GEN 27:29 Hoḳol manush tumar gulam ouk, hoḳol zatie tumar gese mata nuauk. Nizor zator maze tumi boṛo murobbi o, tumar maʼr feṭor baiainte tumar gese mata nuauk. Ze tumare lannot dibo, tar ufre lannot foṛouk. Ze tumare dua ḳorbo, he rohomoti ouk.”
GEN 27:30 Isʼhake Iakubre dua ḳora shesh oile, Iakub tan baf Isʼhakor samne tone horte-u, tan bai Ishe shikar loia goro aila.
GEN 27:31 Tain-o bala ḳani toiar ḳoria bafor gese loia aia ḳoila, “Baba, uṭia boia afnar fuar shikaror gust ḳaukka, ḳaia harle afnar zane amare dua diba.”
GEN 27:32 Ou tan bafe ḳoila, “Tumi ke?” Tain ḳoila, “Baba, ami to afnar boṛo fua Ish.”
GEN 27:33 Ar Isʼhakor shorilo bezuita ḳafa shuru oilo. Ḳafi kafi tain ḳoila, “Taile amar gese shikaror gust loia ze aisil, igu ḳe? Tumi aibar age-u ami ota ḳaia tare dua disi, ar duar fol he-u faibo.”
GEN 27:34 Bafor mat hunia-u Ishe ekebare buk bangia sillaia tan bafre ḳoila, “Bazan, amare, amare-o dua ḳoro!”
GEN 27:35 Isʼhake ḳoila, “Tumar baie aia soturi koria tumar faona dua nisegi.”
GEN 27:36 Ishe ḳoila, “Tar nam Iakub [mani, dukabaz] nae ni? Hasau he duibar amare duka dise. Boṛo fua hishabe amar malikana he age suri kori nisil, ar deḳoukka, ifira amar dua-o loia gelogi.” Tain firia ḳoila, “Afne amar lagi kunu dua-u raḳsoin na ni?”
GEN 27:37 Isʼhake zuaf dila, “Huno, ami tare tumar neta banaisi, ar tar gusṭire tar gulam banaisi, tare foshol ar anguror shorbot dia samani korsi; oḳon tumar lagi ar kita ḳortamre fut?”
GEN 27:38 Ishe firia tan bafre ḳoila, “O bazan, afnar gese kita ou eḳ dua-u asil ni? Bazan reba, afne amare, amare-o dua ḳoroukka!” Ota ḳoia tain zure zure sillaia ḳandat lagla.
GEN 27:39 Ou tan baf Isʼhake ḳoila, “Tumar boshotḳanar maṭi nirosh oibo, hino asmanor kua-o foṛto nae.
GEN 27:40 Toluar-u tumar zindegi oibo, ar nizor bair gulam oibae; oile zebla tumi na-manra oizibae, ou shomoy nizor gordona taki tar zual horaibae.”
GEN 27:41 Iakube tan bafor ges tone dua faisla ḳori Ishe tanre ingshaita lagla. Ishe mone mone ḳoila, “Amar bafor lagi moutor ḳandonor din aichche. Erbade-u tare kun ḳormu.”
GEN 27:42 Rebekae tan boṛo fua Ishʼor ita mata-mati hunla, teu huru fua Iakubre anaia ḳoila, “Huno, tumar bai Ishe tumare kun ḳorar niote dilre bandilaise.
GEN 27:43 Amar fut, tumi amar matḳan huno, tumi Haran ṭauno amar bai Labonor gese horia zaogi,
GEN 27:44 ar tumar bair gusa na ḳoma forzonto tan gese taḳo.
GEN 27:45 Tar gusa ḳomigele, tumi tar loge zeta ḳorso ita he faurilile, ami kobriadi tumare anaimu. Kitallagi ami eḳdine tumra duiozonre araitam?”
GEN 27:46 Bade Rebekae Isʼhakre ḳoila, “Ou Hiṭṭi fuṛintor lagi amar ar basar shad nai. Iakube-o zudi ou laḳan, i deshor kunu Hiṭṭi fuṛire shadi korilae, taile amar ar basia-u lab kita?”
GEN 28:1 Rebekar mat hunia Isʼhake, Iakubre anaia dua ḳorla ar ou hukum dila, “Tumi Kenan deshor kunu fuṛire bia ḳorio na.
GEN 28:2 Tumi Foddon-Iram desho tumar nana Botuelor baṛit zaogi, hono tumar mamu Labonor kunu fuṛire bia ḳorio.
GEN 28:3 Shorbo-shoktiman Allae tumare borkot nazil ḳoroukka ar foldar ḳoria bout baṛaukka, zate ḳori tumi bout gusṭiala zati o.
GEN 28:4 Ze borkot tain Ibrahimre nazil ḳorsla, hou borkot tain tumare ar tumar bongshore dan ḳoroukka. Ar ze desh Allae Ibrahimre disoin, zeḳano tumi oḳon musafir aso, i deshḳan zanu tumar oy.”
GEN 28:5 Bade Isʼhake Iakubre bidae dila, ar tain Foddon-Iramo Orami Botuelor fua Labonor gese roana oila. Labon oila Rebekar bai, Iakub ar Ishʼor mamu.
GEN 28:6 Ishe zebla hunla, Isʼhake Iakubre dua ḳoria bia ḳoranir niote Foddon-Iramo faṭaisoin ar Kenani fuṛintore bia ḳorte nished ḳorsoin,
GEN 28:7 ar Iakube tan ma-bafor hukume Foddon-Iramo gesoingi,
GEN 28:8 ou Ishe buzla zen, tan baf Isʼhak Kenani beṭintor ufre kushi nae.
GEN 28:9 Erlagi dui bou taḳle-o tain Ibrahimor fua Ismailor gese gia tan fuṛi Moholotre bia ḳorla. Moholot oila Nabautor boin.
GEN 28:10 Ar Iakube Ber-Sheba saṛia tan mamur baṛi Haran ṭaunor bae roana dila.
GEN 28:11 Foto eḳ zagat shuruz ḍubi gele tain hono-u rait ḳaṭaila. Honor fattordi hitan dia Iakube gumaita ḳori hutila.
GEN 28:12 Hutia harle kuabe deḳla, duniair ufre ekkan moi ubai roise, i moir mata asmano lagail. Tain deḳla Allar firista oḳole ogubae uṭa-nama ḳorra,
GEN 28:13 ar Mabude er ufre ubaia ḳoira, “Ami Mabud, tumar baf-dadain Ibrahimor Alla ar Isʼhakor Alla. Tumi ou ze zomino hutiso, iṭa ami tumare ar tumar oarish oḳolre dimu.
GEN 28:14 Tumar oarish oḳol duniair duil-balur laḳan behishab oiba. Ar fube-foisme, utore-douḳne sairobae meliziba. Tumi ar tumar bongshor mazedi duniair hokkol zatie borkot hasil ḳorba.
GEN 28:15 Ami tumar loge loge asi, tumi zeno-u zao na ḳene ami tumare hefazot ḳormu ar ou desho hirbar tumare firaia anmu. Ami tumare zeta zeta ḳoisi ita hasil oar age, tumare saṛtam nae.”
GEN 28:16 Bade Iakube gum taki uṭia ḳoila, “Taile hasau Mabud ino asoin, ami to zantam na.”
GEN 28:17 Ou tain ḍoraia ḳoila, “Kizat gorom i zaga! Ikan nichchoy Allar gor, oḳano-u behestor duar.”
GEN 28:18 Tain fozoror shomoy uṭia, ze fattorṭa tan matar tole hitan disla, ikṭa kuṭir moto ḳori gaṛia er ufre tel ḍalila.
GEN 28:19 Ar hi zagar nam raḳla Betel [mani, Baytulla], inor agor nam asil Luz.
GEN 28:20 Bade Iakube ḳosom ḳaia ḳoila, “Allae zudi amar i soforo hefazot ḳoroin, tain amar ḳani-kuraḳ, findar lebas zugai dein,
GEN 28:21 ami hirbar sohi-salamote bafor baṛit firia ai, te ou Mabudre-u amar Alla manmu.
GEN 28:22 Ar ou ze fattor ami kuṭi gaṛia toilam, ono Baytulla Shorif oibo. Ar tumi amare zotota dibae, er dosh baṭor eḳ baṭ ami nichchoy tumare dilaimu.”
GEN 29:1 Bade Iakube aṭi aṭi fubor deshor manshor elaḳat gelagi.
GEN 29:2 Gia honor bondor maze ek kua deḳla. Hou kuar gese tin fal meṛa huti roise; raḳal oḳole on tone tarare fani kaoain. Ar kuar muko boṛo eḳ fattor toa oise.
GEN 29:3 Hoḳol meṛar fal zebla ekḳano oito, teu raḳal oḳole kuar muk tone fattorgu horai dia meṛaintore fani kaoaito. Bade fattorre hirbar kuar muko toito.
GEN 29:4 Iakube tarare zikaila, “Bai oḳol, afnara kun zagar manush?” Tara ḳoila, “Haran ṭaunor.”
GEN 29:5 Ou tain ḳoila, “Afnara Nahuror nati Labonre sinoin ni?” Tara ḳoila, “Ji oy, sini.”
GEN 29:6 Iakube zikaila, “Tain bala asoin ni?” Tara ḳoila, “Ji oy, bala asoin. Ounu tan fuṛi Rahelae meṛar fal loia aira.”
GEN 29:7 Tain ḳoila, “Deḳoukka, oḳono bout beil ase. Te foshu oḳol ekḳano oibar shomoy to oise na. Afnara meṛaintore fani kaoaia hirbar raḳat loia zaingi.”
GEN 29:8 Tara ḳoila, “Na, amra ila ḳortam fari na, hokkol fal ekḳano dola oile bade kuar muk tone fattor horaia amra meṛaintore fani kaoai.”
GEN 29:9 Tain oḳono tarar loge mato roisoin, ou shomoy Rahelae tan bafor meṛar fal loia ono aila, tain i falor raḳalit asla.
GEN 29:10 Iakube tan mamu Labonor fuṛi Rahelare ar tan meṛar fal dekia-u kuar gese gia kuar muk tone fattorṭa horaia meṛaintore fani kaoaila.
GEN 29:11 Bade tain Rahelare maya dia zure zure ḳandita lagla.
GEN 29:12 Ar tain Rahelare ḳoila zen, tain Labonor baigna, Rebekar fua. Ou Rahelae douṛaia gia tan bafre i kobor dila.
GEN 29:13 Labone tan baigna Iakubor ḳobor hunia douṛaia tan loge deḳa ḳorat aila. Tanre ainja ḳori doria hunga dia baṛit loia gela. Gia harle Iakube Labonre tan aibar hokkolta zanaila.
GEN 29:14 Labone ḳoila, “Tumi to amar-u zan ar amar-u gust.” Ar Iakub Labonor baṛit eḳ mash roila.
GEN 29:15 Eḳ mash bade Labone Iakubre ḳoila, “Tumi amar kuṭum oilae ḳori bina betone amar saḳri kortae ni ba? Tumare kita ditam, ḳoilao.”
GEN 29:16 Labonor duiṭa fuṛi asil. Boṛogur nam Lea ar hurugur nam Rahela.
GEN 29:17 Lear ḳali souk-u shundor asil, oile Rahelar goṭon ar sehara-surot, hokkolta shundor asil.
GEN 29:18 Iakube Rahelare fosond ḳorta ḳori tain ḳoila, “Afnar huru fuṛi Rahelar lagi ami shat boros afnar gulami kormu.”
GEN 29:19 Labone ḳoila, “Rahelare manshor ato deoar saite tumar gese deoa-u bala. Tumi amar gese ro.”
GEN 29:20 Teu Iakube Rahelar lagi shat boros gulami korla. Rahelare mohobbot ḳorta ḳori, ita eḳo boros tan gese eḳ dinor homan mono oilo.
GEN 29:21 Heshe tain Labonre ḳoila, “Amar gulamir miad furi gese. Oḳon amar boure amar ato shomzaia deukka, ami tair gese roitam sai.”
GEN 29:22 Teu Labone hou elaḳar hoḳol manshore biar daot ḳoria ḳana-dana ḳaoaila.
GEN 29:23 Heshe rait oile tain tan fuṛi Leare Iakubor gese dila, ar Iakube en loge roila.
GEN 29:24 Labone nizor bandi Zilpare, tan fuṛi Lear bandi girit dila.
GEN 29:25 Oile biane uṭia deḳoin, ein to Lea. Teu Iakube Labonre ḳoila, “Afne amar loge ita kun zator ḳam ḳorla? Oto din ami Rahelar lagi afnar gulami korsi nae ni? Te amare duka dila ḳene?”
GEN 29:26 Labone ḳoila, “Boṛo fuṛir age huru fuṛir bia deoa amrar deshor sol nae.
GEN 29:27 Tumi biar kushi-bashir haftaṭa faroite deo. Teu hi fuṛire-o tumar gese bia dimu, oile tumi aro shat boros amar gulami korte oibo.”
GEN 29:28 Iakube tan ḳota mania ou kushi-bashir hafta far ḳorla. Bade Labone tan fuṛi Rahelare-o Iakubor gese shadi dila.
GEN 29:29 Ar tan bandi Bilhare Rahelar bandigirit dila.
GEN 29:30 Iakube Rahelar loge-o roila, tain Lear saite Rahelare beshi maya ḳorta. Bade tain aro shat boros tan mamu Labonor gulami korla.
GEN 29:31 Oile Leare maya na ḳorae, Mabude Leare hurutta foydar ḳemota dila, ar Rahela niaoladi roila.
GEN 29:32 Ar Lear goro eḳ fua oilo. Tain fuar nam raḳla Ruben [mani, fuare deḳo]. Tain ḳoila, “Mabude amar duk deḳsoin, oḳon nichchoy amar zamaie amare maya ḳorba.”
GEN 29:33 Bade hirbar tan goro eḳ fua oilo. Tain fuar nam raḳla Shimion [mani, hunoin], tain ḳoila, “Amare elami korar ḳota Mabude hunchoin, erlagi tain amare ou fua disoin.”
GEN 29:34 Bade hirbar tan goro eḳ fua oilo. Tain ḳoila, “Oḳon amar zamaie amar loge ashik oiba, tan tinṭa fua amar feṭ tone foyda oilo.” Ou er nam raḳla Lebi [mani, ashik].
GEN 29:35 Bade hirbar tan aro eḳ fua oile tain ḳoila, “Ifira ami Mabudor tarif ḳormu.” Ar tain ou fuar nam raḳla Ehuda [mani, tarif]. Erbade tan hurutta oa bond oigelo.
GEN 30:1 Rahelae zebla deḳla, tan goro Iakubor kunu aolad oira na, ou shomoy tan bonir bae ingsha foyda oilo. Tain Iakubre ḳoila, “Amare aolad deo, naile ami morizimu!”
GEN 30:2 Teu Rahelar loge Iakube kub gusa ḳoria ḳoila, “Ami kunu Alla ni? Tain-u to tumar feṭ bond ḳori disoin.”
GEN 30:3 Rahelae ḳoila, “Hunoukka, amar bandi Bilha ono ase, afne tair gese zaukka, tairedi hurutta faia ami-o hurutta-ala oizitam fari.”
GEN 30:4 Oḳan ḳoia hari Rahelae tan bandi Bilhare Iakubor gese hanga dila, ar Iakub tair gese roila.
GEN 30:5 Teu Bilhar goro Iakubor eḳ fua oilo.
GEN 30:6 Ar Rahelae ḳoila, “Allae amare insaf ḳorsoin, ar amar ahazari hunia egu fua disoin.” Tain i fuar nam raḳla Dan [mani, insaf].
GEN 30:7 Bade Rahelar bandi Bilhar goro hirbar Iakubor dusra fua foyda oilo.
GEN 30:8 Ar Rahelae ḳoila, “Boinor loge moha laṛait ami zitsi.” Ou tain i fuar nam raḳla Noftali [mani, laṛai].
GEN 30:9 Leae zebla deḳla tan goro ar hurutta oira na, teu tain-o tan bandi Zilpare Iakubor gese hanga dila.
GEN 30:10 Teu Lear bandi Zilpar feṭo Iakubor eḳ fua oilo.
GEN 30:11 Ar Leae ḳoila, “Amar ḳofal kulche!” Tain er nam raḳla Sadu [mani, ḳofal].
GEN 30:12 Bade Lear bandi Zilpar goro Iakubor aroḳ fua oilo.
GEN 30:13 Ar Leae ḳoila, “Amar ḳoto shuk! Hoḳol beṭinte amare shuki koiba.” Teu tain i fuar nam raḳla Ashir [mani, shuki].
GEN 30:14 Gom daoar shomoy Rubene bondo gia kisu dutra-guṭa faia, tan ma Lear gese ania dila. Ar Rahelae Leare ḳoila, “Tumar fuar ḳoygu dutra-guṭa amare deo sain.”
GEN 30:15 Leae ḳoila, “Tumi amar zamaire doḳol ḳorso, itae oise na ni? Oḳon amar fuar dutra-guṭa-o sairae ni?” Rahelae ḳoila, “Taile tumar fuar dutora-guṭar bodla aiz rait tain tumar loge roiba ne.”
GEN 30:16 Hainja bala Iakube bondo tone aite-u Leae bar oia tane ḳoila, “Aiz amar loge roibae, ḳaron amar fuar dutora-guṭar bodla ami tumare aolat nisi.” Ou hi rait tain Lear goro hutila.
GEN 30:17 Allae Lear dua kobul ḳorae, tan goro Iakubor fas nombor fuar zonom oilo.
GEN 30:18 Ou Leae ḳoila, “Amar zamair gese amar bandire dislam ḳori, Allae amare er bodla dila.” Erlagi tain i fuar nam raḳla Isaḳor [mani, bodla].
GEN 30:19 Bade hirbar Lear goro Iakubor soy nombor fuar zonom oilo.
GEN 30:20 Leae ḳoila, “Allae amare bout boṛo eḳ niamot dila. Oḳon amar zamaie amare dam diba, ḳaron ami tan soygu fuar zonom disi.” Tain i fuar nam raḳla Sobulon [mani, dam].
GEN 30:21 Heshe Lear eḳ fuṛi oilo, tair nam raḳla Dina.
GEN 30:22 Allae Rahelar bae-o kial ḳorla. Tain Rahelar dua kobul ḳoria, tanre hurutta foydar takkot dila.
GEN 30:23 Ar Rahelar goro eḳ fua oile tain ḳoila, “Allae amar shorom horaisoin.”
GEN 30:24 Tain i fuar nam raḳla Iusuf [mani, baṛani]. Tain ḳoila, “Mabude amare arogu fua baṛai deukka.”
GEN 30:25 Rahelar goro Iusuf oar bade, Iakube Labonre ḳoila, “Oḳon amare bidae dilaukka, ami nizor deshor baṛit zaigi.
GEN 30:26 Afne to zanoin, ami kila afnar gulami korsi, ami amar bouain ar fua-fuṛir lagi afnar gulami korsi. Oḳon tarare loia amare zaite deukka.”
GEN 30:27 Labone tanre ḳoila, “Amar lagi zudi tumar maya taḳe, te zaio na. Ami alamote buziar zen, tumar ḳatire Mabude amare-o borkot nazil ḳorsoin.
GEN 30:28 Tumar beton tumi nize-u ḳoilao. Ami tumare ola-u dimu.”
GEN 30:29 Ou Iakube tanre ḳoila, “Ami kila afnar gulami korsi, ar amar ato afnar foshur fal kilaḳan oise, ita afne-u zanoin.
GEN 30:30 Ami aoar age afne gorib asla. Ar oḳon to baṛia boutta oise. Amar ḳarone Mabude afnare bout borkot disoin. Oile amar nizor foribaror lagi kundin ḳamai kortam?”
GEN 30:31 Teu Labone ḳoila, “Ami tumare kita ditam?” Iakube ḳoila, “Afne amare kunta-u na dia zudi amar egu mat raḳoin, te ami hirbar afnar foshur falor kezmot ḳormu.
GEN 30:32 Ami aiz afnar foshur falor maze gia, fuṭa fuṭa dagala ar ḳala ar sitra meṛain ar sagolor maze sitra ar fuṭa fuṭa rongor hokkolṭi amar beton babot nimugi.
GEN 30:33 Teu afne zebla-u betonor ḳarone aiba, i shomoy deḳba, amar imandarie amar lagi zuaf dibo. Ar fuṭa fuṭa dagala ar ḳala ar sitra meṛain ar sagolor maze sitra ar fuṭa fuṭa rongorta saṛa ar kunta faile mono ḳorba, ami suri korsi.”
GEN 30:34 Ou Labone ḳoila, “Aichcha, tumar ḳota-u ṭik taḳouk.”
GEN 30:35 Labone hou din-u fal taki lamba dagala ar sitra sagol, fuṭa fuṭa dag ar sitra tuṛa tuṛa dola sagin ar ḳala meṛa oḳol algaia nizor fuaintor gese dilaila.
GEN 30:36 Dia tain Iakubor ges taki tin dinor fot duroi horia gelagi ar Iakube Labonor baki fal oḳolre raḳat roila.
GEN 30:37 Iakube libni, lauz ar armun gasor ḳasa ḍal ḳaṭia ufre taki baḳol falaia ḍalor maze lamba lamba dola dag dila.
GEN 30:38 Sagolor fale aia zeḳano fani kain, tain ou baḳol falail dagala ḍal oḳol, hono fanir gamlar samne toila. Ar fani kaoar shomoy era fal ḳaito.
GEN 30:39 Teu ou ḍalor gese aia fal ḳaoae tarar baichchain-o sitra, lamba dagala ar fuṭa fuṭa rongor oita.
GEN 30:40 Bade tain ou baichchain algaita, ar Labonor ḍura-ala ar ḳala meṛaintor bae meṛintor souk raḳaita. Ou laḳan tain, tan nizor falre Labonor falor loge milaita na.
GEN 30:41 Ar zurala meṛi-saginte fal ḳaoar shomoy, tain gamlat tarar souḳor samne ou ḍal oḳol toita,
GEN 30:42 oile ḳomzur foshur samne i ḍalain toita na. Teu Labonor foshuin oita ḳomzur, ar Iakubor foshuin oita zurala.
GEN 30:43 Ou laḳan ḳam ḳoria tain bout doni oila. Tan gulam-bandi, uṭ-gada ar foshur fal bout baṛigelo.
GEN 31:1 Bade Iakubor ḳano ailo Labonor fuainte matira zen, “Iakube amrar bafor hokkolta nisegi, ar amrar bafor mal dia-u he maldar oigese.”
GEN 31:2 Ar Iakube-o kial ḳorla, tanbaedi Labonor agor hi monor bab ar nae.
GEN 31:3 Mabude Iakubre ḳoila, tumi tumar baf-dadar desho nizor manshor gese firia zaogi. Ami tumar loge taḳmu.
GEN 31:4 Ou Iakube ḳobria faṭaia Lea ar Rahelare bondo tan foshur falor gese anaia ḳoila,
GEN 31:5 “Ami tumartanor bafor muk dekia buziar, tan agor hi monor bab amar bae nae, oile amar bafor Mabud Alla amar loge loge roisoin.
GEN 31:6 Tumitain to zano zen, ami amar hoḳol shokti dia-u tan ḳoto gulami korsi,
GEN 31:7 ta-o tain amare ṭogisoin ar dosh-doshbar ḳoria amar beton bodlaisoin, oile Allae amar kunu ḳeti oite disoin na.
GEN 31:8 Tain zebla ḳoila, tumar beton oibo, fuṭa fuṭa rongor foshu, teu falor hoḳol foshue ou laḳan baichcha dilo. Hirbar tain zebla ḳoila, tumar beton oibo ḍura-ala foshu, teu falor hoḳol foshue ḍura-ala baichcha dilo.
GEN 31:9 Allae ou laḳan ḳori tan falor foshu ania amare disoin.
GEN 31:10 “Eḳbar foshuinte fal ḳaoar shomoy ami kuabe deḳlam, meṛi-sagintor ufre ze faṭa oḳol uṭira, iguin ḍura-ala, sitra ar fuṭa fuṭa rongor.
GEN 31:11 Kuabor maze Allar firistae amare ḍakila, ‘Iakub!’ Ami koilam, ‘Ounu ami.’
GEN 31:12 Tain ḳoila, ‘Tumi souk tulia deḳo, meṛi-sagintor ufre zeta faṭain uṭira, hokkolṭi ḍura-ala, sitra ar fuṭa fuṭa rongor. Labone tumar loge zeta zeta ḳorse, ita hoḳolta-u ami deḳsi.
GEN 31:13 Ami hou Betelor Alla, zeno tumi kuṭir ufre tel ḍalia amar name ḳosom ḳorslae. Oḳon solo, i desh saṛia tumar zonom maṭit firot zao.’ ”
GEN 31:14 Ou Lea ar Rahelae ḳoila, “Babar shompottir kunu dabi ar amrar roilo ni?
GEN 31:15 Tain to amrare begana manush mono ḳoria, amrare besilaisoin ar amrar hokkolta-u ḳailisoin.
GEN 31:16 Erlagi Allae amrar babar samana tone zotota nisoin, i hokkolṭi-u oḳon amrar ar amrar aolador oise. Te Allae tumare zela hukum ḳorsoin, tumi-o oula ḳoro.”
GEN 31:17 Bade Iakube tan huruttain ar bibintore uṭor ufre tulia,
GEN 31:18 Foddon-Iramo tan ḳamail foshu oḳol ar mal-samana hokkolta loia, Kenan desho tan baf Isʼhakor gese roana dilaila.
GEN 31:19 Hou shomoy Labone tan meṛaintor ruma ḳaṭar lagi gesla, ar ou faḳe Rahelae tan bafor murti oḳol suri korilila.
GEN 31:20 Iakube tan zaoar ḳota Orami Labonre na zanaia tanre ṭogila.
GEN 31:21 Ar tain hokkolta loia bagia, Furat gang faroia Giliodor faṛor samnedi zaoat roila.
GEN 31:22 Zaoar tin din bade Labone hunla zen, Iakub bagia gesoingi.
GEN 31:23 Ou tain ḳesh-kuṭumre loia, Iakubor ḳore oia shat dinor fot gia, Giliodor faṛo tarar lagal faila.
GEN 31:24 Oile raitor bala Allae kuabe Orami Labonor gese aia ḳoila, “Ḳobordar! Iakubre bala-bura kunta-u ḳoio na.”
GEN 31:25 Iakube faṛor maze tambu gaṛisla, ar Labone gia tanre ono-u lagal failila, teu Labon ar tan ḳesh-kuṭum oḳole-o Giliodor hou faṛor maze tambu gaṛila.
GEN 31:26 Bade Labone Iakubre ḳoila, “Tumi kene ita ḳorlae? Amare ṭogia amar fuṛintore ḳene zuddor bondir laḳan loia ailae?
GEN 31:27 Ḳene tumi duka dia amare na zanaia, lukaia bagia ailae? Amare zanaile to ami kushi-bashi koria, dutara ar mondira bazaia gan gaia, tumare bidae dilam one.
GEN 31:28 Tumi amar fuṛintore ar natinoshare-o hunga dite-o dilae na, be-aḳolor moto ḳam ḳorlae.
GEN 31:29 Oḳon ami to tumrar ḳeti kortam farmu, oile tumrar baf-dadar Allae goto rait amare ḳoisoin, ‘Ḳobordar! Iakubre bala-bura kunta-u ḳoio na.’
GEN 31:30 Tumar bafor baṛit zaoar lagi mone ḳandisil ḳori, tumi bagia aiso manlam, te amar devta oḳol ḳene suri korlae?”
GEN 31:31 Iakube zuaf dila, “Ami ḍoraislam, mono ḳorslam, afne zur ḳoria afnar fuṛintore, amar ges tone ḳaṛia raki diba.
GEN 31:32 Te oḳon zar gese afnar devtain faiba, tare zita raḳtam nae. Amrar ḳesh-kuṭmor samne hokkolta tallash ḳoria zudi afnar kunta fain, taile neukkagi.” Hou murti oḳol zen Rahelae suri korsoin, ita to Iakube zanoin na.
GEN 31:33 Ou Labone Iakub, Lea ar duio bandir tambut hamaia hoḳolta tukaia kunta na faia, heshe Lear tambu tone Rahelar tambut gia hamaila.
GEN 31:34 Rahelae i murti oḳol nia uṭor goddir bitre toia, tain ou goddir ufre boila. Labone tan tambur hoḳolta tukaia hono-o ita faila na.
GEN 31:35 Ar Rahelae tan bafre ḳoila, “Bazan ami uṭia ubaitam fariar na ḳori afne bezar oin na zen, beṭiara bemaror lagi amar shoril ḳaraf.” Ou Labone hi murti oḳol ar tukaia faila na.
GEN 31:36 Heshe Iakube gusa oia Labonre siṛaia ḳoila, “Amar oforad kiano? Ami kita dush ḳorsi, afne amar ḳore oia oula ḳedanit aila?
GEN 31:37 Amar hoḳol mal-samana aulaia afnar goror kun zinishḳan faila? Faile ita afnar-amar ḳesh-kuṭmor samne raḳoukka, tara amrar bisar ḳorba.
GEN 31:38 Ami i bish boros afnar loge aslam. Er maze afnar kunu meṛi ba sagir feṭor baichcha nosṭo oise na ba afnar falor kunu meṛa-o ami kaisi na.
GEN 31:39 Ar zongli zanuare mara kunu foshu-o afnar gese anchi na, ita ami nize-u furia disi. Dino ba rait kunu foshu suri oile, afne amar ges taki boria loisoin.
GEN 31:40 Ami oula din ḳaṭaisi, dino zolchi gorome ar raite ḳafsi shite. Amar sokut gum aito na.
GEN 31:41 Ze bish boros afnar baṛit roisi, er souddo boros ami afnar dui fuṛir lagi gulami korsi, ar soy boros gese afnar foshur lagi. Er maze afne dosh-doshbar amar beton-o bodlaisoin.
GEN 31:42 Alla Pak, zanre amar baf Isʼhake Mabud hishabe ḍoraita, zein amar dada Ibrahimor-o Mabud, tain zudi amar loge na taḳta, te hasau oḳon afne amare ḳali ate bidae dila one. Allae amar menot ar duk deḳsoin. Erlagi-u tain ḳail rait afnare domḳaisoin.”
GEN 31:43 Labone Iakubre zuaf dila, “I fuṛin amar-u fuṛin, ar ou huruttain amar-u natinosha, ar i foshur fal oḳol-o amar. Tumi ono zotota deḳrae, hoḳolta-u amar, ta-o amar fuṛintore ba tarar huruttaintore ami ar kita ḳormu?
GEN 31:44 Ao, amra duiozone eḳ chukti korilai. Ou chuktir nishanaṭa tumar-amar maze shakki roibo.”
GEN 31:45 Ou Iakube eḳ fattor loia kuṭi gaṛila.
GEN 31:46 Ar tan ḳesh-kuṭum oḳolre ḳoila, “Afnara-o fattor anoukka.” Teu tara-o fattor ania eḳ biṭa banaila, heshe ou biṭar gese ḳani kaila.
GEN 31:47 Labone hou biṭar nam raḳla Zigor-Sahoduta [mani, shakki-biṭa] oile Iakube er nam raḳla Gol-ed.
GEN 31:48 Labone ḳoila, “Ou biṭa oḳon tone tumar-amar shakki oilo.” Erlagi ou biṭar nam oilo Gol-ed,
GEN 31:49 ar ou kuṭir nam oilo Mispa [mani, faharar zaga]. Labone ḳoila, “Amra zebla horia zaimugi ou shomoy Mabude-u tumar-amar fahara diba.
GEN 31:50 Tumi zudi amar fuṛintore duk deo ba amar fuṛin saṛa ar ḳeurore bia ḳoro, taile kunu manush amrar loge na roile-o Alla amrar shakki roila.”
GEN 31:51 Labone Iakubre aro ḳoila, “Ou biṭa bae ar ou kuṭir bae sao, iṭa tumar-amar mazḳano ami gaṛlam.
GEN 31:52 I duioṭa tumar-amar shakki roilo. Tumi-o ingsha ḳori ou biṭa ar kuṭi ḍingaia aibae na ar ami-o burair niote ita ḍingaia zaitam nae.
GEN 31:53 Ibrahimor Alla, Nahuror uforala ar tarar bafor uforalae tumar-amar bisar ḳorba.” Ar Iakube, tan baf Isʼhake zanre ḍoraita tan name ḳosom ḳorla.
GEN 31:54 Iakube hou faṛor ufre kurbani koria tan ḳesh-kuṭum oḳolre ḳaoar daoat dila. Ḳaoa-daoa shesh ḳoria hari tara hou faṛor maze rait roila.
GEN 31:55 Bador din fozore Labone tan fuṛintore ar natinoshare hunga dia dua ḳorla, heshe tan baṛi muka fot dila.
GEN 32:1 Iakub-o tan fote roana oile, Allar firista oḳole tanre deḳa dila.
GEN 32:2 Erare dekia tain ḳoila, “Ita Allar fouz.” Ar i zagar nam raḳla Mohonoyim [mani, dui fouz].
GEN 32:3 Iakube tan age ḳori Seir ba Idum desho, tan boṛo bai Ishʼor gese ḳoyzon ḳobria faṭaila.
GEN 32:4 Tain erare hikai dila, “Tumra amar munib Ishʼre ḳoio, tan gulam Iakube ḳoise, ami otodin tone amrar mamu Labonor gese musafirit aslam.
GEN 32:5 Amar goru-gada, sagol-meṛa ar gulam-bandi hoḳolta-u ase. Amar munibor gese doya faoar ashae tumrare faṭailam.”
GEN 32:6 Ḳobria oḳole firia aia Iakubre ḳoila, “Amra afnar bai Ishʼor gese geslam. Tain sair-sho manshore loia afnar loge mulaḳat ḳorat aira.”
GEN 32:7 Ou Iakube ḍoraia kub ostir oigela. Tain logor hoḳol manshore, goru-sagol, meṛa-meṛi ar uṭ-gada oḳolre dui dole algaila.
GEN 32:8 Tain ḳoila, baie aia eḳ dolre hamla ḳorle-o aroḳ dol nirafode roibo.
GEN 32:9 Ar Iakube dua ḳorla, “O Alla, amar dada Ibrahimor Mabud ar amar baf Isʼhakor Mabud, tumi-u amare hukum ḳorso zen, ‘Tumar desho tumar nizor manshor gese firia zao, teu ami tumare rohom ḳormu.’
GEN 32:10 Tumar i gulamor bae ze rohom ar imandari deḳaiso, ami ita kuntar-u laḳ nae. Ami to egu laṭi loia i Zordan gang faroislam, ar oḳon dui dol oigesi.
GEN 32:11 Mabud, ami aroz ḳoriar, amar bai Ishʼor at tone amare basao. Amar ḍor ḳorer, he aia bou fua-fuṛir loge amare-o kun ḳorbo.
GEN 32:12 Tumi-u to oada ḳorso, ‘Ami oboshsho-u tumar balai kormu, tumar oarish oḳolre doriar faror balur laḳan behishab ḳormu, zela gonia fuṛae na.’ ”
GEN 32:13 Iakube i rait hono roila ar tan zotota asil er maz taki kotoḳan loia tan bai Ishʼor lagi eḳ ufohar toiar ḳorla.
GEN 32:14 Ita oilo dui-sho sagi, kuṛiṭa sagol, dui-sho meṛi, kuṛiṭa meṛa,
GEN 32:15 tishgu baichcha-ala dudor uṭ, dui kuṛi gai, doshgu bisal, ek kuṛi gadi ar doshgu gada,
GEN 32:16 bade tain eḳ ek gulamor ato eḳ eḳ fal shomzai dia ḳoila, “Tumra amar age oia zao ar eḳ fal taki aroḳ falor maze faḳ rakio.”
GEN 32:17 Foyla dolor gulamre tain hikai dila, “Amar bai Ishʼor loge deḳa oar bade zebla zikaiba, ‘Ḳoi zaitae ba? Tumi kar manush? Tumar homḳor foshuin ḳar?’
GEN 32:18 Tumi zuaf dio, ‘Ita afnar gulam Iakubor. Tain amar munib Ishʼor lagi, ita ufohar faṭaisoin. Ar tain amrar ḳore oia aira.’ ”
GEN 32:19 Ou laḳan tain dui nombor, tin nombor dolor gulam oḳolre-o hikai dila zen, “Ishʼor loge deḳa oile tumra-o oula ḳoio.
GEN 32:20 Ar heshe ḳoio, afnar gulam Iakub-o amrar ḳore oia aira.” Iakube mono ḳorla, “Age ufohar oḳol faṭaia tane ṭanḍa ḳormu, bade tan loge deḳa-shaikkat ḳormu, te tain amare maya ḳorilita faroin.”
GEN 32:21 Tan age oia ufohar oḳol gelogi, oile tain rait tan ḍerat roila.
GEN 32:22 Heshe rait uṭia tan duio bibin, duio bandi ar egarogu fuare loia faoe aṭia, Zabbuk kalor hofaro toia aila.
GEN 32:23 Tain erare ḳal far ḳoraia tan hoḳol mal-samana-o hono faṭai dila.
GEN 32:24 Ar tain eḳla ono roila, teu gaibi eḳzon manush aia tan loge raitbor kusta-kusti korla.
GEN 32:25 Oile tain Iakubre ḳabu ḳorta na farae en urator zuṛat marla ar Iakubor urator aṛ zaga tone ḍuli gelo.
GEN 32:26 Heshe hi manshe ḳoila, “Fozor oizar, oḳon tumi amare saṛi deo.” Iakube ḳoila, “Afne amare dua na ḳorle saṛtam nae.”
GEN 32:27 Hi manshe zikaila, “Tumar nam kita?” Tain ḳoila, “Iakub.”
GEN 32:28 Ou hein ḳoila, “Tumi Alla ar manshor loge laṛai koria zitso ḳori, tumar nam ar Iakub roito nae, tumar nam oilo Israil [mani, Allar loge kusti korra].”
GEN 32:29 Iakube tanre ḳoila, “Afnar namḳan kita ḳoukka.” Tain ḳoila, “Tumi kitar lagi amar nam zikairae?” Heshe tain Iakubre dua ḳorla.
GEN 32:30 Ou Iakube i zagar nam raḳla Ponuel [mani, Allar surot]. Tain ḳoila, “Ami Alla Pakre mukamuki dekia-o zinda roisi.”
GEN 32:31 Ar Iakube Ponuel faronir bade shuruz uṭigelo. Tan urator mairor lagi lengṛaita lagla.
GEN 32:32 Erlagi Boni Israile oḳono ranor zuṛar gust ḳain na, ḳaron tain urator zuṛar rogor maze Iakubre marsla.
GEN 33:1 Iakube saia deḳla, tan boṛo bai Ishe sair-sho manush loia aguaia aira. Ou tain huruttaintore tan bibin Lea ar Rahela ar duio bandir gese baṭia dilaila.
GEN 33:2 Tain tan bandin ar tarar huruttaintore samnor ḳataro raḳla. Bade Lea ar tan huruttaintore, hoḳol heshe raḳla Rahela ar Iusufre.
GEN 33:3 Ar nize erar age gia shatbar maṭit soizda ḳoria tan bair gese azir oila.
GEN 33:4 Teu Ishe tan gese douṛaia aia ainja ḳori golat doria hunga dila, ar duiozone ḳandita lagla.
GEN 33:5 Bade Ishe muk tulia ou beṭin ar huruttaintore dekia zikaila, “Tumar loge era ḳegu?” Tain ḳoila, “Allae tan rohomote afnar gulamre i huruttain disoin.”
GEN 33:6 Teu foyla bandi oḳole Ishʼor ḳasat aia tarar hurutta loia mata nuaila,
GEN 33:7 bade Leae-o huruttaintore loia aguaia mata nuaila, heshe Iusuf ar Rahelae gia mata nuaila.
GEN 33:8 Teu Ishe ḳoila, “Foto zeta dolbol deḳlam, ita kior lagi?” Tain ḳoila, “Amar munibor gese doya faoar lagi.”
GEN 33:9 Ishe ḳoila, “Baire, amar boutta ase, tumar ita tumar-u taḳouk.”
GEN 33:10 Tain ḳoila, “Ji na, ami minot ḳoria ḳoiar, zudi amar bae afnar doya oy, taile amar deoa i dan-dokkina afne neukka. Afne zebla amare kushi mone kobul ḳorsoin, te afnar muk deḳa ar Allar didar faoa amar lagi homan.
GEN 33:11 Allae amare rohomot dan ḳorsoin, amar boutta ase ar ou zeta ufohar afnar lagi anchi, ita afne neukka.” Tain oula minot-ḳajji korae, Ishe ita kobul ḳorla.
GEN 33:12 Ishe ḳoila, “Solo, amra roana oi, ami tumar loge roimu.”
GEN 33:13 Iakube tanre ḳoila, “Amar munibe to zanra, i hurutta oḳol-o huru ar dudal gaiain-meṛin-o loge ase, bezan oia itare eḳdin-u aṭaile, hokkolṭi moriziba.
GEN 33:14 Te munib, afne amar age zaukkagi, foshur fal ar hurutta oḳlor solar ḳemota buzia ami aste aste Seir elaḳat afnar gese airam.”
GEN 33:15 Ishe ḳoila, “Taile amar logor ota ḳoyzonre tumar gese toia zaigi.” Tain ḳoila, “Itar dorḳar kita? Amar munibor gese ami ze rohom faisi, oṭa-u to boutta.”
GEN 33:16 Ar Ish hou din-u Seiror bae roana dilaila.
GEN 33:17 Oile Iakube Sukkoto fosia nizor lagi ḍera banaia, foshur falor lagi-o ḳoyḳan batan banaila, teu i zagar nam oilo Sukkot [mani, ḍera oḳol].
GEN 33:18 Foddon-Iram tone bar oia Iakube, sohi-salamote Kenan deshor Shikim ṭauno aia, ṭaunor bare tambuin gaṛila.
GEN 33:19 Heshe ou tambuala zominḳan tain, Shikimor baf Homuror fuaintor ges tone, rufar eḳ-sho ṭeḳa dia ḳorid ḳorla.
GEN 33:20 Ar hono ekkan kurbani kana banaia er nam dila El-Iluhe-Israil [mani, Alla, Israilor uforala].
GEN 34:1 Lear goro Dina name Iakubor ze fuṛi oisil, ein eḳdin honor fuṛintor loge deḳa ḳorat gela.
GEN 34:2 Ar Shikim namor eḳzon manshor souko foṛla. I Shikim asil Hibbi zatir shordar Homuror fua. Shikime ere zur ḳori doria nia ḳobisi kam ḳorillo.
GEN 34:3 Dinar bae tar dil ashik oigelo. He ere mohobbot ḳori er loge miṭa miṭa mat matilo.
GEN 34:4 Bade Shikime tar baf Homurre ḳoilo, “Tumi ou ḳoinare amar loge biar bondobost ḳoro.”
GEN 34:5 Iakube ḳobor faila, Shikime tan fuṛire beijjoti korse, oile tan fuain foshur fal loia bondo taḳae, tain na-matia nirai roila.
GEN 34:6 Shikimor baf Homure Iakubor gese biar mat loia ailo,
GEN 34:7 ar i kobor hunia Iakubor fuain-o bondo tone aila. Tara betaya gusa ar gorom oila, ḳaron Iakubor fuṛire beijjoti korae Shikime asta Israilor loge beijjoti ar nazaiz ḳam ḳorse.
GEN 34:8 Teu Homure erare ḳoilo, “Afnarar ḳoinar lagi amar fua ashik oigese. Doya ḳori, amar fuar loge er shadi dilaukka.
GEN 34:9 Amrar loge kuṭumita ḳoroukka, amrar ḳoinaintore afnara neukka ar afnararta amrare deukka.
GEN 34:10 Ar amrar loge taḳoukka, i asta desh-u to samne roise, afnara ono-u taḳoin, ḳay-ḳarbar ḳoria, nizor malikana ḳaim ḳoroin.”
GEN 34:11 Shikime Dinar baf-baire ḳoila, “Amar bae afnara doya ḳoroin, afnara amar gese zeta saiba, ami ota-u dimu.
GEN 34:12 Mohorana ar mal-samana afnara zeta dabi korba ami dimu, zekunu laḳan-u Dinare amar loge bia deukka.”
GEN 34:13 Shikime tarar boinre beijjoti korsil ḳori Iakubor fuainte tare ar tar baf Homurre bana deḳaia ḳoila,
GEN 34:14 “Mosolmani kam na ḳorail kunu damandor loge amrar boinre bia dile amrar beijjoti oibo.
GEN 34:15 Oile ou ḳam ḳorle amra razi oimu, afnara hoḳol beṭainte mosolmani koraia, amrar laḳan oiba.
GEN 34:16 Taile amrar fuṛintore afnarar gese dimu ar afnarar fuṛintore-o amra anmu, amra-o afnarar loge eḳ zati oia boshot ḳormu.
GEN 34:17 Oile afnara i mosolmanir ḳota na manle, amrar ḳoinare loia zaimugi.”
GEN 34:18 Teu tarar i mate Homur ar tar fua Shikim kushi oila.
GEN 34:19 Ou Shikim oilo gusṭir maze hoḳol tone dami manush. He deri na ḳoria ḳota manilailo, ḳaron Iakubor fuṛir bae he ashik asil.
GEN 34:20 Bade ṭaunor duaror gese aia, Homur ar tan fuae hokkol manshor loge matia ḳoila,
GEN 34:21 “I manushguinte amrare kunu zamela ḳorer na. Amrar desho erar taḳar lagi bout zaga-o ase, te era ono-u taḳouk ar ḳay-ḳarbar ḳorouk, amra erar fuṛintore bia ḳoria ani ar amrar fuṛintore-o tarar gese dei.
GEN 34:22 Oile amra ekkan ḳam ḳorle, tara amrar loge eḳ zati oite razi asoin. Ḳamṭa oilo, tarar laḳan amrar-o hokkol beṭaintor mosolmani korani lagbo.
GEN 34:23 Ar tarar goru-meṛa, mal-samana hokkolta-u to amrar oibo, tarar ḳotae razi oile-u tara amrar loge taḳba.”
GEN 34:24 Ou ṭaunor hoḳol beṭain Homur ar tan fua Shikimor mate razi oilo, ar tara hoḳlor mosolmani kam ḳorailo.
GEN 34:25 Heshe tin dinor din zebla hoḳol beṭainte mosolmanir bedonae ḳoshṭo faira, ou shomoy Dinar afon bai Iakubor dui fua Shimion ar Lebi, tarar toluar loia ṭauno hamaia, erare bekialo faia hoḳol beṭaintore marililo.
GEN 34:26 Tara Homur ar tan fua Shikimre-o toluardi zane maria Shikimor gor tone Dinare loia ailo.
GEN 34:27 Era tarar boinre beijjoti korsil ḳori, Iakubor hoḳol fuainte mora lashor gese aia ṭauno luṭ-toraz ḳorla.
GEN 34:28 Ar ṭaunor bitor-bairor goru-gada, sagol-meṛa, ar ḳetor hoḳolta luṭia loia aila.
GEN 34:29 Hoḳol mal-samana, fua-fuṛin, beṭin, ar goror hoḳolta-o luṭ-faṭ ḳorla.
GEN 34:30 Heshe Iakube Shimion ar Lebire ḳoila, “Tumra i deshor Kenani ar Farizi oḳlor gese amare fosa-ginnar manush banaia mosiboto falaiso. Amar manush ḳom, oḳon tara ekḳano oia amare hamla ḳorle, ami foribaror hokkolre loia mormu.”
GEN 34:31 Tara zuaf dila, “He amrar boinre nia ḳanki banailito ni?”
GEN 35:1 Erbade Alla Pake Iakubre ḳoila, “Tumi hirbar Betelo zaogi. Tumar bai Ishʼor ges tone bagibar bala, zein tumare doroshon disla, hou Alla Pakor name tumi hono ekkan kurbani kana banao.”
GEN 35:2 Teu Iakube tan afon manshore ar logor hoḳolre ḳoila, “Tumrar gese devtar zeta murtin ase, ita hokkolṭi falao; ar hoḳole fak-saf oia, saf-sutra lebas findo.
GEN 35:3 Ar solo, amra Betelo zaitamgi. Hono ami Allar name ekkan kurbani kana banaimu, zein mosibotor dino amar dua kobul ḳorsla, ar amar soforor logi oisla.”
GEN 35:4 Teu tarar zoto laḳan devtar murtin ar ḳanor zeorat asil, hoḳolta Iakubor ato dilaila. Tain ita nia Shikim ṭaunor ḳandat elon gasor tole gaṛilaila.
GEN 35:5 Bade tara hon tone roana oila ar Allae sairobae hoḳol gau-geramo eḳ ḍor foyda ḳorla, teu hinor kunu manshe Iakubor fuaintore ḳedanit gelo na.
GEN 35:6 Heshe Iakub ar tan logor hoḳole Kenan deshor Luz namor zaga, mani Betelo aia fosla.
GEN 35:7 Ono tain ek kurbani kana banaia, ou zagar nam dila El-Betel [mani, Betelor Alla], ḳaron bair ges taki bagibar bala Allae ono-u tanre didar-doroshon disla.
GEN 35:8 Ar Rebekar daima Dobura mara gela. Tane Betelor lamat eḳ elon gasor tole maṭi dila, teu i zagar nam oilo Elon-Bakut [mani, ḳandonor gas].
GEN 35:9 Iakube Foddon-Iram taki aoar bade, Allae hirbar tanre didar dia borkot nazil ḳorla.
GEN 35:10 Allae ḳoila, “Tumar nam to Iakub; oile manshe tumare ar Iakub ḳoia ḍakta nae, tumare Israil ḳoiba.” Teu tan nam oilo Israil.
GEN 35:11 Allae tanre ḳoila, “Ami-u Shorbo-shoktiman Alla. Tumi folala oia baṛo. Tuma tone eḳ zati foyda oibo, iṭa oibo bout gusṭiala zati, ar tumar ḳandano bashsha oḳol foyda oiba.
GEN 35:12 Ami Ibrahim ar Isʼhakre ze desh dan ḳorsi, hou desh oḳon tumare ar tumar bador oarishre dimu.”
GEN 35:13 Allae hono Iakubor loge batchit ḳoria harle asmano toshrif nilagi.
GEN 35:14 Iakube hou batchitor zagat fattoror ek kuṭi gaṛia, er ufre tain Allar name shorbot-fanir sodga ḍalila, heshe tel-o ḍalila.
GEN 35:15 Allae zeḳano tanre didar disla, Iakube i zagar nam raḳsla Betel.
GEN 35:16 Bade Iakub ar tan logor hoḳole Betel taki roana ḳoria Ifrato fosar bakka age, Rahelar hurutta oar bishe dorlo, tan kub toklif oilo.
GEN 35:17 Hurutta oar bish aro baṛlo, teu dai beṭie ḳoilo, “Ḍoraio na go, ibar-o tumar goro fua oibo.”
GEN 35:18 Oile Rahela mara gela. Morar shomoy tain fuar nam raḳla Bin-Oni [mani, amar toklifor fua] oile bafe tar nam raḳla Bin-Iamin [mani, amar bolor fua].
GEN 35:19 Rahelar moutor bade Ifrat, mani Betelham, zaoar fotor ḳandat tanre maṭi deoa oilo.
GEN 35:20 Maṭi dia harle Iakube tan ḳoyboror ufre eḳ fattoror kuṭi gaṛla, i kuṭi aiz-o ono ase.
GEN 35:21 On tone Israile hirbar roana dila, ar Edor minar falaia aia tan tambu gaṛila.
GEN 35:22 Israil zebla hono roira, ou faḳo Rubene gia tar bafor bador biar bou Bilhar loge zina ḳorlo ar ita Israilor ḳano gelo.
GEN 35:23 Iakubor barozon fua asla, Lear torofa tan boṛo fua Ruben, bade Shimion, Lebi, Ehuda, Isaḳor ar Sobulon.
GEN 35:24 Rahelar torofa Iusuf ar Bin-Iamin.
GEN 35:25 Rahelar bandi Bilhar torofa, Dan ar Noftali.
GEN 35:26 Lear bandi Zilpar torofa, Sadu ar Ashir. Tan ou hurutta oḳol Foddon-Iramo oisla.
GEN 35:27 Heshe Iakub Kiriot-Orbor, mani Hebronor ḳasat Momri namor zagat, tan baf Isʼhakor gese aila. Ou zagat Ibrahim ar Isʼhake-o boshot ḳorta.
GEN 35:28 Isʼhakor boyosh eḳ-sho ashi boros oisil.
GEN 35:29 Ar Isʼhak furafur buṛa oia, murobbi boyosho mara gia tan baf-dadar gese gia azila. Tan fua Ish ar Iakube tanre dafon ḳorla.
GEN 36:1 Ou oilo Ish ba Idumor ḳandanor boyan.
GEN 36:2 Ishe Kenani dui fuṛire bia ḳorsla. Era oila Hiṭṭi Elonor fuṛi Ada, ar Hibbi Zibionor natin, Onar fuṛi Oholibama.
GEN 36:3 Erar bade-o tain Ismailor fuṛi Nabautor boin Bashomotre bia ḳorsla.
GEN 36:4 Adar feṭo Ilifoz ar Bashomotor feṭo Ruelor zonom oisil,
GEN 36:5 ar Oholibamar feṭo Ziush, Zalom ar Kurohor zonom oisil. Ishʼor i fuaintor zonmo oisil Kenan desho.
GEN 36:6 Bade Ishe tan bouain, fua-fuṛin, goror hoḳol manush ar foshur falain, Kenan desho ḳamai kora hoḳol don-doulot loia, tan bai Iakubor ges tone horia aroḳ desho gelagi.
GEN 36:7 Ish ar Iakubor foshur fal, mal-samana oto beshi asil zen, era ekḳano roite hi deshor i zagae ar kulailo na.
GEN 36:8 Teu Ish Seiror faṛi elaḳat gia boshot ḳorla. Ein-u Idum.
GEN 36:9 Ou oilo Seiror faṛor Idumi oḳlor mul baf Ishʼor ḳandanor boyan.
GEN 36:10 Ishʼor fuaintor nam oilo, Ilifoz ar Ruel. Ilifoz Adar fua, Ruel Bashomotor fua.
GEN 36:11 Ilifozor fuain oila, Toimon, Omar, Zofo, Gatam ar Kenaz.
GEN 36:12 Ishʼor fua Ilifozor Timna namor eḳ hangar bou asil, er goro Amalekor zonom oisil. Era hoḳole-u Ishʼor bou Adar aolad.
GEN 36:13 Ruelor fuain oila Nohot, Zarah, Shommo ar Mijja. Era Ishʼor bou Bashomotor aolad.
GEN 36:14 Zibionor natin, Onar fuṛi Oholibamar torofa Ishʼor fuain oila Ziush, Zalom ar Kuroh.
GEN 36:15 Ishʼor aolador maze era asla gusṭir neta. Ishʼor boṛo fua Ilifozor fuain oila Toimon, Omar, Zofo, Kenaz,
GEN 36:16 Kuroh, Gatam, ar Amalek. Era oila Idum desho, Adar fua Ilifozor aolad.
GEN 36:17 Ishʼor fua Ruelor fuain zera gusṭir neta oisla, tara oila Nohot, Zarah, Shommo ar Mijja. Era oila Idum desho Ishʼor bou Bashomotor fua Ruelor aolad.
GEN 36:18 Ishʼor bou Oholibamar ze fuain gusṭir neta oisla, tara oila Ziush, Zalom ar Kuroh. Era asla Onar fuṛi Oholibamar aolad.
GEN 36:19 Era oila Ish ba Idumor ḳandan ar gusṭir neta.
GEN 36:20 Honor Hurio Seiror fuaintor nam oilo Luṭon, Shubol, Zibion, Ona,
GEN 36:21 Dishun, Etoshor ar Dishan. Era hoḳole Idum desho Seiror fuain, Hurio ḳandanor neta asla.
GEN 36:22 Luṭonor fuar nam oilo Huri ar Hemam, ar bonir nam Timna.
GEN 36:23 Shubolor fuaintor nam oilo Olbon, Manohot, Ibal, Shofo ar Onom.
GEN 36:24 Zibionor fuaintor nam oilo Oya ar Ona. Ou Ona-u tan baba Zibionor gada raḳat gia, morubumir maze gorom fanir indara oḳol tukaia faila.
GEN 36:25 Onar fuar nam Dishun ar fuṛir nam Oholibama.
GEN 36:26 Dishunor fuaintor nam oilo Himdon, Ishbon, Zitron ar Keran.
GEN 36:27 Etoshoror fuaintor nam oilo Bilhon, Zaoan ar Aḳon.
GEN 36:28 Dishanor fuaintor nam oilo Auz ar Oran.
GEN 36:29 Hurio oḳlor neta oila Luṭon, Shubol, Zibion, Ona,
GEN 36:30 Dishun, Etoshor ar Dishan. Era oila Seir deshor Hurio gusṭir neta.
GEN 36:31 Boni Israilor maze bashshai hukumot aibar age, Idum desho era-u raza asla.
GEN 36:32 Bauror fua Bela Idumor raza oila. Tan razdanir nam asil Dinhaba.
GEN 36:33 Bela morar bade, tan zagat Bosra ṭaunor Zarahor fua Zubob raza oila.
GEN 36:34 Zubob morar bade Toimon deshor Hushom honor raza oila.
GEN 36:35 Hushom morar bade tan zagat Bododor fua Hodod raza oila. Tain zuddo ḳori Muab deshor Madiani oḳolre araila. Tan razdanir nam oilo Obit.
GEN 36:36 Hodod morar bade Mosreka ṭaunor Samla honor raza oila.
GEN 36:37 Samla morar bade honor Furat gangor faror Rohobot ṭaunor Shoul raza oila.
GEN 36:38 Shoul morar bade tan zagat Akbaror fua Baal-Hanon raza oila.
GEN 36:39 Akbaror fua Baal-Hanon morar bade tan zagat Hodor raza oila. Tan razdanir nam asil Pau, ar tan bour nam asil Moheṭabel. Ein Moṭredor fuṛi ar Mezahabor natin.
GEN 36:40 Ishʼor zeta aolad oḳol gusṭi ar elaḳar neta asla, tarar nam oilo, Timna, Olba ar Zitet,
GEN 36:41 Oholibama, Ela, Pinun,
GEN 36:42 Kenaz, Toimon, Mibzar,
GEN 36:43 Mogdiel ar Oram. Era asla zarzir deshor, zarzir elaḳar Idumi neta. Idumi oḳlor mul baf Ishʼor boyan ono-u shesh.
GEN 37:1 Iakub Kenan desho-u roila, tan baf-o hono musafir oia asla.
GEN 37:2 Ou oilo Iakubor ḳandanor boyan. Iusufe shotro boros boyosh tone tan baiaintor loge meṛa-sagol raḳta. Tain huruman tone-u tan haton ma Bilha ar Zilpar fuaintor loge roita. Ar erar hoḳol bad sal-cholonor ḳobor bafre zanaita.
GEN 37:3 Iusuf, Israilor buṛa boyoshor fua gotike, tain ere hoḳol tone beshi maya ḳorta. Tain ere ek kandani zubba banai dila.
GEN 37:4 Bafe Iusufre hoḳol tone beshi maya ḳoroin dekia, baiainte tanre ginnaita. Tara en loge bala mone mat-ḳota-o matta na.
GEN 37:5 Iusufe ek kuab dekia tan baiaintore hunaila, teu tara aro beshi ginnaila.
GEN 37:6 Tain ḳoila, “Ami kuabe kita deḳsi huno:
GEN 37:7 ami deḳlam, amra ḳetor maze danor muiṭ bandiar ar amar banda muiṭḳan ubaigelo, teu tumrar muiṭ oḳole amar muiṭre sairobae beria soizda ḳorer.”
GEN 37:8 Ou tan baiainte ḳoila, “Tui hasau amrar raza oite saire ni? Tui raza oia amrar ufre beṭagiri korte ni?” Teu tan kuab ar tan mator lagi tara aro beshi ginnaila.
GEN 37:9 Iusufe hirbar ek kuab dekia tan baiaintore hunaila. Tain ḳoila, “Huno, ami hirbar kuabe deḳsi, san-shuruz ar egaroṭa terae amare soizda ḳorer.”
GEN 37:10 Tain i kuabor ḳota tan baf ar baiaintor gese ḳoia harle, bafe tanre domḳaia ḳoila, “Tuin ita kun zator kuab deḳle, re fut? Tor ma-baiain ar ami-o kita hasau tore soizda ḳortam ni?”
GEN 37:11 Ar Iusufre tan baiainte kub ingshaita. Oile bafe i kuabor ḳota mono raḳla.
GEN 37:12 Ar tan baiainte bafor foshur fal loia Shikimo raḳat gela.
GEN 37:13 Teu Israile Iusufre ḳoila, “Tor baiainte foshur fal raḳat Shikimo gesoin, te ae, ami tore-o hono faṭai.” Tain ḳoila, “Aichcha, ami zaimu.”
GEN 37:14 Israile tane ḳoila, “Tui gia tor baiain ar foshur falor ḳobor-antor hunia aia amare ḳois.” Teu tain Iusufre Hebron tone Shikimo faṭaila. Ar Iusuf-o gia Shikimo azir oila.
GEN 37:15 Aia harle tanre ḳetor maze gura-firat dekia eḳ beṭae zikaila, “Tumi kita tukairae ba?”
GEN 37:16 Iusufe ḳoila, “Ami amar baiaintore tukaiar. Afne zanoin ni, era foshur fal kun zagat raḳra?”
GEN 37:17 Hi beṭae ḳoila, “Tara in tone gesoingi. Ami hunchi tara matira, ao, amra Dutono zaigi.” Ou Iusufe tukai tukai Dutono gia tarare faila.
GEN 37:18 Baiainte duroi tone tanre deḳlo, ar tarar gese fosar age-u tara ene kun ḳorar motlob ḳorlo.
GEN 37:19 Tara eḳzone aroḳzonre ḳoilo, “Ou deḳo, kuab deḳra sab aira.
GEN 37:20 Ao, oḳon-u amra ene ḳotom ḳoria ou gato falai dei; bade ḳoimu, kunu zongli zanuare ḳailaise, heshe deḳmune, tar kuabor dosha kita oy?”
GEN 37:21 Oile Rubene ita hunia tarar at taki enre basaibar lagi koila, “Tare zane mario na.”
GEN 37:22 Tain erare foramish dila, “Kun-ḳarafi korat zaio na, nizor ate na maria ogure emne-u gator maze falai deo.” Oula tain Iusufre tarar at tone basaia, bafor ato faṭanir sesṭa ḳorla.
GEN 37:23 Iusuf tan baiaintor gese aite-u tara, tan gotor tone zubba kulilaila, hou ḳandani zubbaṭa ṭania kulilila.
GEN 37:24 Ar tane doria gator maze falai dila. I gat hukna asil, kunu fani asil na.
GEN 37:25 Heshe tara ḳaoat boia saia deḳla, Giliod taki Ismaili eḳ befarir dol ibae ar. Era uṭor fiṭit ḳori kushboy moshla, agor, ar meshke-ambor loia Mishor desho zaita.
GEN 37:26 Ou Ehudae tar baiainre ḳoilo, “Doro, baire kun ḳoria amra lukaililam, teu amrar kita lab oibo?
GEN 37:27 He to amrar-u bai, amrar afon lou ar gust. Te tar shorilo at na dia ao, Ismaili oḳlor gese tare besilai.” Ou baiain-o razi oigela.
GEN 37:28 Hou Madiani befari oḳol ḳasat aite-u, baiainte Iusufre gato tone ṭania tulla ar ek kuṛi rufar ṭeḳar bodla, Ismaili oḳlor gese tane besilaila. Era Iusufre loia Mishoro gelagi.
GEN 37:29 Bade Rubene hou gator gese aia Iusufre na dekia, tan gotror kurta farilla.
GEN 37:30 Baiaintor gese gia ḳoila, “Fuagu to ino nae. Oḳon ami kita ḳortam?”
GEN 37:31 Ou tara eḳ bokri maria, er lou Iusufor hou zubbat lagaila.
GEN 37:32 Bade manushdi ou zubba tarar bafor gese faṭaia ḳoila, “Iṭa amra foto faisi, te afne bala ḳoria deḳoukka, iṭa afnar fuar zubba ni?”
GEN 37:33 Iakube i zubba sinia ḳoila, “Iṭa to amar fuar-u. Tare kunu zongli zanuare ḳailise, tare nisoy siṛi-biṛilaise.”
GEN 37:34 Tain finnor ḳafoṛ siṛia, ḳomro solar soṭ bandia, fuar lagi bout din mattom ḳorla.
GEN 37:35 Tan hoḳol fua-fuṛie tane buzaita saila, oile kunu buze-u tan buk ṭanḍa oilo na. Tain ḳoila, “Ami mattom ḳori kori amar fuar gese ḳoyboro hamaimu.” Fuar lagi tain ou laḳan ḳanda-ḳaṭit roila.
GEN 37:36 Er maze Madiani oḳole Iusufre Mishoro nia, Feraunor ḳormosari Azizor gese besilaila, i kormosari asla tan fordan gaḍ.
GEN 38:1 Ehudae tar baiaintore toia Odullom gaur Hira namor eḳ manshor loge roat gelo.
GEN 38:2 Hono roia Shua namor ek Kenani manshor fuṛir loge deḳa oilo, dekia he ou fuṛire bia ḳorlo.
GEN 38:3 Biar bade hou beṭir goro eḳ fua oilo, Ehudae tar nam raḳlo Eir.
GEN 38:4 Hirbar beṭir goro aroḳ fua oile, maʼe tar nam raḳlo Onon.
GEN 38:5 Heshe ou beṭir aroḳ fua oile, tar nam raḳlo Shela. I shomoy tara Koshib gaut roita.
GEN 38:6 Ar Ehudae tar boṛo fua Eiror loge Tamar namor eḳ fuṛire bia dilo.
GEN 38:7 Oile tar i fua Mabudor nozoro kub ḳobis asil gotike, Mabude tare marilaila.
GEN 38:8 Ou Ehudae Ononre ḳoilo, “Tumar babire bia ḳorilao. Tair deor oae tumar zeta ḳora zorur ase, ita adae ḳoro ar nizor bair oarish foyda ḳoro.”
GEN 38:9 Onone zanto, i oarish tar nizor oito nae, ar tar bair oarish raḳte tar kial asil na gotike, tair loge mila-mishar shomoy tar biz baire maṭit falai dito.
GEN 38:10 Mabude tar i kame naraz oila, tain Eirre-o marilaila.
GEN 38:11 Ou Ehudae tar fuar bou Tamarre ḳoilo, “Amar fua Shela zotodin boṛo na oy, otodin tumar bafor baṛit gia ṛaṛi oia-u ro.” Ehudae ḍorailo, Shela-o tar baiaintor laḳan morizibo. Ar Tamar bafor baṛit gelogi.
GEN 38:12 Bakka ḳoydin bade Ehudar bou, Shuar fuṛi morigelo, teu ḳanda-ḳaṭi korar bade Ehudae shanti oia Odullom gaur tar dust Hirar loge Timna gaut, tar meṛar falor ruma ḳaṭra manshor gese roana dilo.
GEN 38:13 Ar Tamarre gia ḳeu ḳobor dilo “Tumar houre tan meṛar ruma ḳaṭar lagi Timnat zaira.”
GEN 38:14 Tamare deḳlo, Shela boṛo oile-o houre Shelar loge tair bia dira na, ou tai ṛaṛir ḳafoṛ bodlaia hazi-faṛi muko gumṭa dia, Aynaimor fotor muko gia boilo. Aynaim asil Timnat zaoar foto.
GEN 38:15 Ar tai muk lukaia raḳae, Ehudae mono ḳorlo igu silan beṭi.
GEN 38:16 Teu Ehudae fuar boure na sinae, fotor daro Tamaror gese gia ḳoilo, “Ao, tumar loge mila-misha ḳori.” Tamare ḳoilo, “Te amare kita dibae?”
GEN 38:17 He ḳoilo, “Amar fal tone bokri baichcha egu faṭai dimu.” Tamare ḳoilo, “Iṭa faṭanir age amar gese kunta zimma toia zaukka.”
GEN 38:18 Ehudae ḳoilo, “Kita toitam?” Tai koilo, “Afnar ou fita-ala sil ar afnar ator laṭi toia zaukka.” Teu Ehudae oguin zimma toia tair loge mila-misha ḳorlo ar Tamaror feṭo hurutta ailo.
GEN 38:19 Bade Tamar uṭia gelogi ar hi kafoṛ bodlaia hirbar ṛaṛir ḳafoṛ findilo.
GEN 38:20 Heshe ou beṭir ges taki zimmar mal firot nibar lagi, tar Odullomor dustre dia sagolor baichcha egu faṭailo. He aia taire tukaia failo na.
GEN 38:21 Ou he honor manshore zikailo, “Aynaimor fotor daro eḳ shebok beṭi asil, ogu ḳoi?” Tara ḳoila, “Ino to ila kunu beṭi nae.”
GEN 38:22 Teu he Ehudar gese gia ḳoilo, “Ami gia taire tukaia failam na. Honor manshe-o ḳoila, ino to ila kunu beṭi aise na.”
GEN 38:23 Ehudae ḳoilo, “Te ita ar tair gese-u taḳouk. Naile amra shorminda oimu. Sagolor baichcha to faṭailam, ta-o tumi ere tukaia failae na.”
GEN 38:24 Onuman tin mash bade Ehudae hunlo, tar fuar bou Tamare zina ḳorse, erlagi tair hurutta oita. Ou Ehudae ḳoilo, “Ogure bare nia aguindi zalailao.”
GEN 38:25 Tamarre zebla bare nira, ou shomoy tair hourre ḳobor dilo zen, “Zar hurutta amar feṭo ase, ou mal-samana oḳol tar. Te deḳoukka, ou fita-ala sil ar laṭigu ḳar sinoin ni?”
GEN 38:26 Ehudae ita dekia ḳoilo, “Tai to ama taki bout boṛo forezgar. Amar fua Shelar loge taire bia ḳoraisi na.” Erbade Ehudae ar kunudin-o Tamaror gese hutise na.
GEN 38:27 Hurutta oibar bala deḳoin, Tamaror feṭo zuṛor hurutta.
GEN 38:28 Foyla egue tar at bar ḳorlo ar dai beṭie lal suta eḳsa tar ato bandia ḳoilo, “Igu foyla foyda oilo.”
GEN 38:29 Oile he at ṭan dia bitre nilogi, teu tar bai foyla bar oilo ar dai beṭie ḳoilo, “Tumi kila fak koria bar oilae?” Erlagi er nam oilo Firuz [mani, fak kora].
GEN 38:30 Bade tar bai lal suta ato banda loia bar oilo, tar nam raḳla Zarah.
GEN 39:1 Iusufre Mishor desho loia zaoar bade, Ismaili oḳlor ges tone, Aziz namor Feraunor eḳzon Mishori kormosarie, Iusufre ḳorid ḳorla. Aziz oila Feraunor fordan gaḍ.
GEN 39:2 Mabude Iusufor logi oila, erlagi Iusuf hoḳol ḳamo kamiab oila. Tain hou Mishori munibor baṛit ḳam ḳorta.
GEN 39:3 Mabud tan loge loge asoin ar hoḳol ḳamo tane kamiab ḳorra, tan munibe-o ita buzilaila.
GEN 39:4 Teu munibe Iusufre maya ḳorta lagla, tane munibor ḳas kezmotgar banaila ar tan baṛir hoḳolta deḳa-hunar bar-o Iusufor gese shomzai dila.
GEN 39:5 Iusufre tan baṛir ar hoḳoltar bar shofi deoar bade tone, Mabude Iusufor lagi-u, tan munibor hoḳoltar maze borkot nazil ḳorla. Azizor baṛit ar ḳet-ḳamar, hoḳol zagat Mabude borkot nazil ḳorla.
GEN 39:6 Ita dekia Azize tan hoḳoltar bar Iusufor ufre shofi dila, tan nizor ḳana-dana saṛa ar kuntar-u ḳobor loita na. Iusufor shorilor goṭon ar sehara-o shundor asil.
GEN 39:7 Ita dekia tan munibor boue tan bae lalos ḳorlo. Tai Iusufre ḳoilo, “Amar bisnat ao.”
GEN 39:8 Oile Iusuf razi na oia munibor boure ḳoila, “Deḳoukka, i baṛit kita kita ase, amar munibe kunta-u ḳobor loin na, hoḳoltar bar amar ufre shomzai disoin.
GEN 39:9 I baṛit ama tone boṛo ar ḳeu nae. Afne to tan bibi, erlagi afnare saṛa ar hoḳolre tain amar zimmae raḳsoin, te ami kila oto boṛo eḳ zogoinno ḳam ḳoria Allar birudde guna ḳortam?”
GEN 39:10 Tai hamesha Iusufre oula minot ḳorle-o Iusufe tair gese hutte ba ḳasat roite-o razi oila na.
GEN 39:11 Heshe eḳdin kunu ek kamor lagi Iusuf goror bitre hamaila, ou shomoy ar ḳeu hino asil na.
GEN 39:12 Teu Azizor boue Iusufor ḳafoṛo dori koilo, “Amar bisnat ae.” Oile Iusufe tan ḳafoṛ falaia douṛia gelagi.
GEN 39:13 Iusufe tair ato ḳafoṛ toia douṛaia gelagi kori,
GEN 39:14 Azizor boue goror manshore ḍakia ḳoilo, “Huno, tain amrar loge tamsha ḳorar lagi i Ibrani beṭare anchoin. He amare beijjoti korar motlobe amar bisnat aisil, ou ami sillaia uṭsi.
GEN 39:15 Amar sillani hunia he tar finnor ḳafoṛ amar gese toia bagise.”
GEN 39:16 Iusufor munib baṛit na aoa forzonto, i kafoṛ tai nizor gese raḳlo.
GEN 39:17 Tain aia harle tai nalish dilo, “Tumi ze Ibrani gulamre amrar gese ancho, he amare beijjoti korar motlobe amar goro hamaisil.
GEN 39:18 Oile amar hauka-hauki ar sillanie he amar gese tar ḳafoṛ falai toia bagise.”
GEN 39:19 Bour mat hunia Iusufor munibe gusae aguin oigela. Tan boue ḳoilo, “Tumar gulame amar loge ou laḳan ḳam ḳorse.”
GEN 39:20 Teu Azize Iusufre nia zel ḳanat haraila. Mishoror bashshar bondi oḳolre zeno raḳoin, tane-o hou zel ḳanat toila.
GEN 39:21 Oile Iusufor ufre Mabudor saya asil, tain Iusufre boṛo zelar sabor gese mayar manush banaila.
GEN 39:22 Boṛo zelar sabe zel ḳanar hoḳol bondi oḳlor shordari Iusufor ufre saṛi dila, teu honor hoḳol ḳam-ḳaz Iusufor hukume solto.
GEN 39:23 Ar boṛo zelar sabe kunta-u deḳa-huna ḳora lagto na, ḳaron Mabud Iusufor loge asla, erlagi Iusufe zetat at dita, Mabude ita kamiab ḳorta.
GEN 40:1 Itar bade Mishoror bashshar dorbaror shorab bilai deora ar ruṭi banaora i duiozone bashshar gese ḳosur ḳorla.
GEN 40:2 Teu Feraun tara duiozonor ufre gusa oila,
GEN 40:3 tain erare bondi koria tan boṛo zollador baṛir zelo haraila. Ou zelo Iusuf-o asla.
GEN 40:4 Boṛo zollade i duio ḳoydir bar-o Iusufor ato dila, ar Iusufe tarar kezmot ḳorta lagla. Oula era kisudin zelo roila.
GEN 40:5 Bade Mishoror bashshar hou ruṭi banaora ar shorab bilaora duiozone eḳ raite dukan kuab deḳla, tarar kuabor mani-o asil dui laḳan.
GEN 40:6 Biane Iusufe tarar gese gia deḳla, tara kub mon-mora oiroisoin.
GEN 40:7 Iusufe tarare zikaila, “Kita oise, aiz oto bezar ḳene?”
GEN 40:8 Tara zuaf dila, “Amra to kuab deḳsi, oile er tabir buzai deora ḳeu nae.” Iusufe tarare ḳoila, “Mani buzanir ḳemota kita Allae dein na ni? Deki sain, amare hunaukka.”
GEN 40:9 Ou hi shorab bilaorae, tan shofon Iusufre hunaila. He ḳoilo, “Ami deḳlam, amar samne eḳ anguror gas.
GEN 40:10 Gasor tingu ḍal ase; hou ḍalo kuṛi baronir loge loge ful dorlo, ar soṛa soṛa angur dori faki gelo.
GEN 40:11 Ou shomoy Feraunor shorbotor fiala amar ato asil. Ami hou angur oḳol sifia rosh bar ḳori Feraunor ato dilam.”
GEN 40:12 Iusufe tare ḳoila, “Afnar shofnor mani oilo, tin ḍal mani tin din.
GEN 40:13 Ou tin dinor maze Feraune afnare bar ḳoria hirbar agor ḳamo lagaiba. Afne hirbar agor laḳan Feraunor ato fiala tuli diba.
GEN 40:14 Oile afnare minoti kori koiar, afnar balai oar bade amare mono ḳorba ar doya ḳori Feraunor gese amar ḳota ḳoia, i zelḳana tone amare ḳalas ḳoraiba.
GEN 40:15 Ibrani oḳlor desh tone amare zur ḳori doria ana oise. Ar ono aia-o ami zel ḳaṭar moto emon kunta ḳorsi na.”
GEN 40:16 Bade hi ruṭi banaorae zebla deḳlo zen, shorab bilaorar kuabor mani bala ase, teu he Iusufre ḳoilo, “Ami-o kuabe deḳsi, deḳlam zen amar matat tin ṭukri moydar ruṭi loisi.
GEN 40:17 Ar ufror ṭukrit asil, Feraunor lagi bout zator fiṭa; teu faki oḳole aia, amar matar ufror ṭukri taki ita ḳailira.”
GEN 40:18 Iusufe zuaf dila, “I shofnor tabir oilo, tin ṭukri mani tin din.
GEN 40:19 Ou tin dinor maze, Feraune afnar doṛ tone ḳolla algaia, gasor maze loṭḳaiba, heshe fakinte aia afnar doṛor gust ḳaiba.”
GEN 40:20 Er tin dinor din Feraunor zonom din asil. Feraune tan dorbaror hoḳol manshor lagi, ḳani tiar ḳoraila. Ar hou ruṭi banaora ar shorab bilaora duiozonre anaia tan dorbaror samne azir ḳorla.
GEN 40:21 Tain shorab bilaorare hirbar tan ḳamo lagaila, he Feraunor ato hirbar fiala tulia dilo.
GEN 40:22 Oile ruṭi banaorare gaso loṭḳaila. Iusufe zela ḳoisla, ekkere oula oilo.
GEN 40:23 Ta-o Iusufor ḳota hi shorab bilaorar iad roilo na, he faurililo.
GEN 41:1 Er fura dui boros bade Feraune kuabe deḳla. Tain deḳla, Nil nodor gese tain ubai roisoin,
GEN 41:2 ar Nil nod tone shatgu shundor tortaza goru uṭia aia nol bonor maze aṭia ḳaira.
GEN 41:3 Erbade deḳoin, aro shatgu halaḳ ar ḳobisor laḳan goru uṭia aia, Nil nodor faror hou goruintor ḳasat ubailo.
GEN 41:4 Heshe ou halaḳ ar ḳobisor laḳan goruinte hou shundor ar tortaza shato gorure ḳaililo, teu Feraunor gum bangi gelo.
GEN 41:5 Bade tain hirbar gumaila ar duara kuabe deḳla, ek gomor ḍeṭat shatgu fusṭo ar taza soṛa bar oise.
GEN 41:6 Heshe bar oilo, fubali batashor gorome hukna shatgu ḳom fusṭo susa-ala soṛa,
GEN 41:7 ar ou ḳom fusṭo soṛae hou shato fusṭo-taza soṛare gililailo. Bade Feraunor gum bangi gelo, tain buzla zen ita to kuab.
GEN 41:8 Biane tan mon ostir oigelo, teu Mishor deshor hoḳol zadugir ar fonḍitre ḳobriadi anaia, tan kuab tarare hunaila, oile erar ḳeu er tabir ḳoito farlo na.
GEN 41:9 Heshe Feraunor hou shorab bilaorae ḳoilo, “Huzur, aiz amar eḳ dush mono oise.
GEN 41:10 Bout din age huzure nizor dui gulamor ufre gusa ḳorsla, tain amare ar ruṭi banaorare boṛo zelar sabor baṛir zelo toisla.
GEN 41:11 Ar eḳ raite amra duiozone alog alog kuab deḳlam, duio kuabor dui laḳan tabir asil.
GEN 41:12 I shomoy zelar sabor, eḳ Ibrani zuan gulam-o ono asil. Tare amrar kuabor ḳota hunailam, ar he amrar kuabor tabir ḳoia dilo.
GEN 41:13 He amrar kuabor tabir zela ḳoisil, ekkere ou laḳan-u folilo. Huzure amare hirbar tan ḳamo lagaila, oile ruṭi banaorare gaso loṭḳaila.”
GEN 41:14 Ou Feraune Iusufre anar lagi manush faṭaila, tara gia zoldi kori zelḳana tone tanre bar ḳori anla. Iusufe daṛi-mus ḳamaia, ḳafoṛ bodlaia Feraunor dorbaro azir oila.
GEN 41:15 Feraune tanre ḳoila, “Ami ekkan kuab deḳsi, oile er tabir ḳeu ḳoito farer na. Te ami hunlam zen tumar gese kuab hunaile, tumi er tabir ḳoitae faro.”
GEN 41:16 Iusufe zuaf dila, “Hi kemota to amar nae, Alla Pake moharazor dilor shantir zuaf bataia diba ne.”
GEN 41:17 Feraune Iusufre ḳoila, “Kuabe deḳlam, ami Nil nodor faro ubai roisi.
GEN 41:18 Ar deki, gango tone shatgu shundor, tortaza goru uṭia aia nol bonor maze aṭia ḳaira.
GEN 41:19 Erbade aro shatgu goru uṭia ailo. Ita halaḳ ar ḳobisor laḳan, Mishor deshor kunu ḳano ilaḳan be-surot goru kunu dino deḳsi na.
GEN 41:20 Bade ou halaḳ ar be-surot goruinte, agor hi shato tortaza gorure ḳaililo.
GEN 41:21 Oile tara itare gilar bade, ḳaise ḳori buza-o gelo na, ḳaron tara agor laḳan-u halaḳ ar be-surot roilo. Heshe amar gum bangi gelo.
GEN 41:22 Bade ami hirbar deḳlam, gomor eḳ ḍeṭar maze shatgu boṛo ar fusṭo soṛa bar oilo.
GEN 41:23 Fubali haoar gorome hukna shatgu ḳom fusṭo susa-ala soṛa-o bar oilo.
GEN 41:24 Ar ou shato soṛae, hou taza shato soṛare gilililo. I kuab ami zadugir oḳolre hunaislam, oile ḳeu er mani koito farse na.”
GEN 41:25 Iusufe Feraunre ḳoila, “Huzur, i duio kuab-u adote eḳ. Allae zeta ḳorta saira, ita afnare deḳaisoin.
GEN 41:26 Ou tortaza shato gorur mani shat boros, ar fusṭo shato gomor soṛar mani-o shat boros. Duio kuab-u eḳ.
GEN 41:27 Ar heshe uṭia aoa shato halaḳ ar be-surot goru, ar fubali haoar gorome hukna shato gomor soṛa, erar mani oilo, aḳalor shat boros.
GEN 41:28 Te Allae zeta ḳorta saira, ita moharazre deḳaisoin. Ou ḳota-u ami afnare age ḳoisi.
GEN 41:29 Hunoukka, hara Mishor desho shat boros kub beshi foshol folibo.
GEN 41:30 Erbade-u aibo aḳalor shat boros. Teu agor hi beshi fosholor ḳota manshe fauriliba, ar aḳale deshre shesh ḳori dibo.
GEN 41:31 Ou aḳalor dorun, agor hi fosholor ḳota manshor mono roito nae. I aḳal oibo kub bezuita mosibotor.
GEN 41:32 I kuab afnare duibar deḳanir mani oilo, Allae i dosha goṭaiba, ekkere ṭik korilaisoin, ita kub zoldi kori-u goṭibo.
GEN 41:33 Oḳon huzure eḳzon sotur-buzdar fonḍit manshore tukaia, en gese Mishorre shofi deukka.
GEN 41:34 Ar afne oula ḳoroukka, desho afnar ḳormosari lagain, ou shat bosore zebla kub beshi foshol folbo, i shomoy tara er fas baṭor eḳbaṭ dola ḳorba.
GEN 41:35 Tara ou shudinor bosoror dan dola ḳoria huzuror doḳole, bazare bazare gudamo boria touk ar hefazot ḳorouk.
GEN 41:36 Shat boros dori Mishoro ze aḳal oibo, hou aḳalor lagi dan zomaia raḳba, teu aḳale deshor manush morta nae.”
GEN 41:37 Iusufor i mat, Feraun ar tan dorbaror hoḳlor gese kub bala mono oilo.
GEN 41:38 Feraune tan uzir-nazir oḳolre ḳoila, “I besaṛar laḳan Allar ruh-ala manush ami kuai tukaia faimu?”
GEN 41:39 Ou Feraune Iusufre ḳoila, “Allae zebla tumar gese ita hokkolta zair ḳorsoin, te tumar laḳan buzdar ar bibekman to ar ḳeu nae.
GEN 41:40 Oḳon razbaṛir hokkolta tumi-u salaibae. Amar hoḳol proza tumar hukme solba. Ḳali bashshar toḳto, ami tumar ufre taḳmu.”
GEN 41:41 Tain Iusufre ḳoila, “Huno, ami asta Mishor desh tumar ato shofi dilam.”
GEN 41:42 Ar Feraune nizor anguil taki bashshai silor angṭi kulia Iusufor ato findaila, tan golat shunar har dila ar dami kafoṛor shada lebas-o findaila.
GEN 41:43 Bade tain Iusufre tan raijjor dui nombor rotor maze tulla ar Iusufor age age elan ḳora oilo, “Fornam ḳoro! Fornam ḳoro!” Ou laḳan tain Iusufor ufre asta Mishor deshor bar shomzai dila.
GEN 41:44 Feraune Iusufre ḳoila, “Ami-u Feraun, Mishoror bashsha! Oile tumar hukum saṛa, asta Mishor desho ḳeu ruma-o laṛaito farto nae.”
GEN 41:45 Feraune Iusufor noya nam raḳla, Safonot-Paneh. Tain Oun mondiror babon-ṭakur Puṭiferar fuṛi Asonotre Iusufor loge bia dila ar Iusufe asta Mishor desho guraguri korat lagla.
GEN 41:46 Iusufe tish boros boyosho, Mishoror bashsha Feraunor ḳamo lagla, tain Feraunor dorbar tone bar oia deshor hoḳol zaga sofor ḳorla.
GEN 41:47 Ar beshi fosholor ou shat bosore desho bout foshol folilo.
GEN 41:48 Teu Iusufe i shudinor shat bosore Mishoror hoḳol dan, bazaror gudam gorainto zoma ḳoraia toila. Tain hokkol bazaror sairo galar dan oḳol, hou bazaror gudamo zomaila.
GEN 41:49 Tain doriar balur laḳan oula behishab dan dola ḳorla zen, ita ar mafia fuṛaita farla na, teu mafa-mafi kora bad dilaila.
GEN 41:50 Ar aḳalor age Oun mondiror babon-ṭakur, Puṭiferar fuṛi Asonotor feṭo Iusufor dui fua oila.
GEN 41:51 Iusufe tan boṛo fuar nam raḳla Manosha [mani, faurilaoa]. Tain ḳoila, “Allae amar hoḳol toklif ar bafor baṛir hokkolta, amar dil tone fauraila.”
GEN 41:52 Bade tan dusra fuar nam raḳla Afraim [mani, foldar]. Tain ḳoila, “Ami ze desho toklif faisi, hou desho-u Allae amare foldar banaila.”
GEN 41:53 Ar Mishor deshor kub beshi fosholor hi shat boros furigelo.
GEN 41:54 Teu Iusufe zela ḳoisla, oula aḳalor hou shat boros aia azilo. Er loge ḳanda-ḳasar hoḳol desho-o nidan deḳa dilo oile Mishoror kunu zagat ḳani-kurakir obab oilo na.
GEN 41:55 Heshe asta Mishor desho aḳal deḳa dile, proza oḳole aia Feraunor gese ḳani magila, teu Feraune ḳoila, “Tumra Iusufor gese zao. Ein zela ḳoin, ṭik-u oula ḳoro.”
GEN 41:56 I aḳal asta desh zuṛi deḳa dilo. Bade aro bezuita oae Iusufe hoḳol zagar gudam gorain kulia, Mishori oḳlor gese dan besat lagla.
GEN 41:57 Asta duniait nidan deḳa dilo ar hoḳol deshor manshe dan ḳorid ḳorar lagi Mishor desho Iusufor gese aila.
GEN 42:1 Iakube-o hunla Mishor desho dan ase, ou tan fuaintore ḳoila, “Tumra egue arogur mukor bae sai roiso ḳene?
GEN 42:2 Huno, ami hunchi, Mishor desho dan ase, tumra hono gia amrar lagi kisu dan loia ano, teu amra i moron takia zane basmu.”
GEN 42:3 Ou Iusufor dosho baie dan loia anar lagi Mishoro gela.
GEN 42:4 Oile Iakube Iusufor afon maʼr feṭor bai Bin-Iaminre tarar loge zaite dila na, tain ḳoila, er kunu bifod oizito fare.
GEN 42:5 Dan ḳoridor lagi Kenan desh taki zera Mishoro gelo, Israilor fuain-o tarar dolor logo oia gela, ḳaron Kenan desho-o aḳal asil.
GEN 42:6 I shomoy Iusuf-u asla Mishor deshor hokkoltar malik. Deshor hoḳol manshor gese tain-u dan besta. Teu Iusufor baiain-o tan gese gia, tara matare maṭit lagaia tanre ijjot ḳorla.
GEN 42:7 Iusufe tan baiaintore dekia-u sinilila, oile na sinar ban ḳoria, tain kub ḳoṛa golae tarare zikaila, “Tumra kuai taki aiso?” Tara ḳoila, “Amra Kenan desh tone aisi, dan nibar lagi.”
GEN 42:8 Iusufe tan baiainre hasaror sinle-o, baiainte tanre sinla na.
GEN 42:9 Tain erare loia kuabe zeta deḳsla, hou ḳota tan mono oilo. Ou tain erare ḳoila, “Tumra to guia! Amrar deshor fak-fuḳor ota deḳat aiso.”
GEN 42:10 Tara ḳoila, “Ji na huzur, afnar i gulam oḳole ḳali dan loat aisi.
GEN 42:11 Amra to hoḳol eḳ bafor aolad ar saichcha manush; afnar i gulam oḳol kunu guia nae.”
GEN 42:12 Iusufe hirbar tarare ḳoila, “Na, na, tumra amar deshor fak-fuḳor deḳat aiso.”
GEN 42:13 Tara ḳoila, “Afnar gulam oḳol, hoḳole milia baro bai. Amra Kenan deshor eḳ bafor aolad. Amrar huru bai oḳon babar gese roise, ar aroḳ bai nae.”
GEN 42:14 Iusufe tarare ḳoila, “Na, na, ami ṭik-u ḳoisi, tumra guia-u!
GEN 42:15 Te tumrar forikka ola-u oizauk: ami Feraunor zanor ḳosom ḳori koiar, tumrar huru bai ono na aile, tumra-o in tone saṛa faitae nae.
GEN 42:16 Tumrar eḳzonre faṭaia, tumrar hou baire anao ar baki hoḳole bondi ro. Ou forikkae tumrar mator hasa-misa buzmu. Tare na anle, ami Feraunor zanor ḳosom ḳori koiar, tumra nisoy guia!”
GEN 42:17 Ar Iusufe tin din tarare azot ḳanat bondi kori toila.
GEN 42:18 Heshe tin dinor din, Iusufe tarare ḳoila, “Huno, ami to Allare ḍorai, tumra baste saile, ami zela ḳoi, oula ḳoro.
GEN 42:19 Tumra hasaror saichcha manush oile, tumrar eḳ bai azoto taḳouk ar baki hoḳole tumrar aḳali foribaror lagi dan loia zaogi.
GEN 42:20 Tumrar mat hasa ki na iṭa buzar lagi, tumrar huru baire amar gese loia aio. Teu tumra mortae nae.” Ou tara-o razi oila.
GEN 42:21 Bade tara mata-mati korla, “Hasau to, amrar hi bair loge zeta ḳorsi ita oinnae. He amrar gese ḳaz-minoti korle-o, amra tar mato ḳan disi na. Erlagi amrar ufre i mosibot aise.”
GEN 42:22 Teu Rubene tarare ḳoila, “Ami to tumrare ḳoislam, tar ufre kunu zulum ḳorio na, tumra hunlae na. Deḳo, oḳon tar lour hishab-nikash dite or.”
GEN 42:23 Oile Iusufe zen tarar mat buzra, ita tara zanlo na. Ḳaron tain mat buzaora eḳzonre maze rakia, tarar loge matta.
GEN 42:24 Teu Iusufe tarar ges tone horia gia ḳandita lagla. Bade hirbar aia tarar loge matila ar tain Shimionre doria tarar samne-u bandailla.
GEN 42:25 Bade Iusufe tarar bostar maze dan boraia, zarzir ṭeḳa tar bostat firai dia, erar fotor ḳanir mosa deoar lagi hukum dila. Ar oula ḳora oilo.
GEN 42:26 Heshe tara zarzir gadar fiṭit danor gaiṭ bandia roana oila.
GEN 42:27 Foto ziranir zagat gia zebla eḳzone gadare ḳaoanir lagi bosta kullo, ar deḳlo, bostar muko tar ṭeḳar kuti.
GEN 42:28 Ou he tar baiainre ḳoilo, “Deḳo, deḳo, amar ṭeḳa amar bostat firot deoa oise.” Dekia-u tarar zan uṛi gelo ar ḍoraia ḳafte ḳafte ḳoilo, “Allae amrare ita kita ḳorla?”
GEN 42:29 Bade Kenan desho gia tarar baf Iakubor gese azir oia, ita hoḳolta hunaia ḳoila,
GEN 42:30 “Hi deshor malike, amrare kub ḳoṛa golae ḳoisoin, amra guia oia hi desho gesi.
GEN 42:31 Amra ḳoisi, amra hok manush, kunu guia nae.
GEN 42:32 Amra barozon bai, eḳ bafor baro fua, oile amrar eḳzon nae ar hoḳol tone huru bai oḳon Kenan desho babar gese roise.
GEN 42:33 Ou hi manshe, zein hi deshor malik, tain amrare ḳoila, ‘Ami oula buzmu zen, tumra hok manush. Tumrar eḳ baire amar gese toia, tumrar aḳali foribaror lagi dan loia zao.
GEN 42:34 Ar tumrar huru baire amar gese loia aio. Teu ami buzmu, tumra hok manush, kunu guia nae. Bade ami tumrar baire firai dimu ar tumra i desho ḳay-ḳarbar ḳortae farbae.’ ”
GEN 42:35 Bade tara bosta tone dan ḍalte-u deḳoin, tarar hoḳlor ṭeḳar kuti bostar maze roise. Ita dekia tarar bafe ar tara-o ḍoraigela.
GEN 42:36 Teu bafe tarare ḳoila, “Tumra amare aolad saṛa banaiso. Iusuf nae, Shimion-o nae ar oḳon tumra hirbar Bin-Iaminre-o nitae sairae. Ita hoḳolta-u amar zulum.”
GEN 42:37 Rubene tan bafre ḳoila, “Ami Bin-Iaminre tumar gese firaia ante na farle, tumi amar duio fuare kun ḳorilio. Tare tumi amar ato saṛi deo, ami tare tumar gese firaia anmu.”
GEN 42:38 Iakube ḳoila, “Na, amar i fua tumrar loge ditam nae. Tar bai morigese, ar oḳon he eḳla zita ase. Tumrar zaoar foto zudi tar kunu bifod oy, te ou faḳna sule bout duk dia tumra amare ḳoyboro haraibae.”
GEN 43:1 Kenan deshor aḳalor dosha aro behal oilo.
GEN 43:2 Ar Mishor desh tone zeta dan nisla, ita fuṛai gele Israile ḳoila, “Tumra hirbar gia amrar lagi aro kisu ḳani-kuraki loia anogi.”
GEN 43:3 Teu Ehudae tanre ḳoilo, “Hou manshe amrare kub ḳoṛa bashae ḳoia disoin, ‘Tumrar bai tumrar loge na aile tumra ar amar samne aio na.’
GEN 43:4 Oḳon tumi amrar baire amrar loge ḳori deo, teu amra gia tumar lagi kani loia aimu.
GEN 43:5 Ar tare loge na dile amra-o zaitam nae. Hi manshe amrare ḳoia disoin, ‘Tumrar baire loge na anle, tumra ar amar samne aio na.’ ”
GEN 43:6 Israile ḳoila, “Tumra ḳene amar loge oula fatrami korlae? Tumrar aroḳ bai ase, ita tanre ḳene ḳoilae?”
GEN 43:7 Tara ḳoila, “Hi manshe amrar ar amrar foribaror aga-guṛi hokkolta zikaisoin, ‘Tumrar baf kita oḳono zinda asoin ni? Tumrar ar kunu bai asoin ni?’ Amra ḳali tan soalor zuaf dislam, amra kunu zantam ni, tain ḳoiba tumrar baire-o loia aio?”
GEN 43:8 Ehudae tan bafre ḳoila, “Tare amar loge ḳori dilao, amra zoldi zoldi roana oizai, teu tumi, amra ar amrar huruttain hokkol-u zane basmu, ḳeu mortam nae.
GEN 43:9 Ami nize-u tar lagi zamin roilam, tare amar ges tone shomzia nio. Ami tare tumar gese firaia na anle, tumar gese azir na ḳorle, hara zindegi bora ami tumar gese dayi roimu.
GEN 43:10 Ar oto deri na ḳorle, amra otodine duibar guria aitam farlam one.”
GEN 43:11 Ou tarar baf Israile ḳoila, “Oula oile ek kam ḳoro, tumra zarzir begor maze onor bala bala mal, agor, mou, kushboy moshla, meshke-ambor, pesta ar badam boria hou manshor lagi salami loia zao.
GEN 43:12 Ar tumrar loge ḳori agor ḍabul ṭeḳa neo, bostar muko ze ṭeḳa firot aise, ta-o hirbar loia zao, ki zani kunu bul oigesil.
GEN 43:13 Tumrar i baire loge loia, zoldi kori hou manshor gese zao.
GEN 43:14 Shorbo-shoktiman Allae tumrar lagi hou manshor dilo meherbani foyda ḳoroukka, zate tain tumrar hou bai ar Bin-Iaminre tumrar ato firot dein. Ar amar fua kuani gele, na oy gelo-u.”
GEN 43:15 Teu tara hou salami, ḍabul ṭeḳa ar Bin-Iaminre loia roana oia, Mishor desho fosia Iusufor samne azir oila.
GEN 43:16 Tarar loge Bin-Iaminre dekia Iusufe tan baṛir ḳadimre ḳoila, “Ou manush oḳolre baṛir bitre neo ar ḳoshi zobo ḳoria gust rando. Tara madane amar loge ḳaiba.”
GEN 43:17 Iusufe zela ḳoila, ḳadime-o ṭik oula ḳorlo, he erare baṛir bitre loia gelo.
GEN 43:18 Ar he erare Iusufor baṛir bitre neoae, tara ḍoraia mata-mati korla, “Agor fira ze ṭeḳa amrar bostat ḳori firot gesil, otar lagi-u amrare ono nira, oḳon amrar dush deḳaia mair-doir ḳoria amrare gulam banaiba, ar gada oḳol-o ḳaṛia niba.”
GEN 43:19 Teu Iusufor baṛir dorzar samne aia tara baṛir ḳadimre ḳoila,
GEN 43:20 “Huzur, amra er age-o dan loat aislam,
GEN 43:21 heshe firot zaoar bala, dom loibar zagat fosia, bosta kulte-u deki, amrar fura ṭeḳa-foysha zarzir bostar muko roise, oḳon ou ṭeḳa firot anchi.
GEN 43:22 Ar dan neoar lagi aro ṭeḳa anchi, oile hi ṭeḳa amrar bostar bitre ḳe toisil zani na.”
GEN 43:23 Ou ḳadime ḳoilo, “Tumrar balai ouk, ḍoraio na. Tumrar ar tumrar bafor Allae, i gaibi don tumrar bostar maze disoin. Tumrar ṭeḳa ami faisi.” Bade he Shimionre bar ḳoria tarar gese loia ailo.
GEN 43:24 He hoḳolre Iusufor baṛir bitre nia fani dilo tara fao duila ar he tarar gada oḳolre-o ḳani dilo.
GEN 43:25 Iusuf madane aiba gotike, era tarar salami oḳol zuit ḳorla. Tara hunsla zen, tan loge-u tarar ḳana-dana oibo.
GEN 43:26 Bade Iusuf baṛit aile, tarar hou salami oḳol goror bitre nia tanre dila, dia harle tanre soizda ḳorla.
GEN 43:27 Tarar bala-bura ḳobor hunia tain zikaila, “Tumrar ze murobbi bafor ḳota ḳoislae, tain bala asoin ni? Tain zinda asoin ni?”
GEN 43:28 Tara zuaf dila, “Ji oy, afnar gulam amrar baba oḳono zinda asoin ar bala asoin.” Heshe tara mata nuaia tanre ijjot ḳorla.
GEN 43:29 Iusufe souk tulia tan nizor bai Bin-Iaminre dekia ḳoila, “Ouni tumrar hou huru bai, zar ḳota age ḳoislae?” Tain Bin-Iaminre ḳoila, “Allae tumare rohom ḳoroukka.”
GEN 43:30 Baire dekia Iusufor dil ḳandito laglo. Tain zoldi kori bar oia, nizor kuṭat gia ḳandila.
GEN 43:31 Bade souk-muk doia bar oia aila ar nizore shamlaia ḳani bilaibar hukum dila.
GEN 43:32 Ou Iusufre, tan baiainre ar tan loge ḳaneala Mishori oḳolre alog alog zagat ḳani dila. Ḳaron Mishorinte Ibrani oḳlor loge boia ḳana-dana ḳorto na, ita tara gin ḳoroin.
GEN 43:33 Tara Iusufor samne tan baiainre boṛore boṛor zagat, hurure hurur zagat boaila, teu tara taijjub oia eḳzone aroḳzonor bae sai roila.
GEN 43:34 Ar Iusufe nizor talor ḳani tone tan baiainre deoaila, oile Bin-Iaminre hoḳol tone fas gun beshi deoa oilo. Ḳaia harle tara kushi oia uṭla.
GEN 44:1 Bade Iusufe tan baṛir ḳadimre ou laḳan hukum dila, “I manush oḳlor bostat zoto dan zaga oy, boria dilao ar zarzir ṭeḳa tar bostar muko toio.
GEN 44:2 Oile ou huru zonor bostar muko tar ṭeḳar loge amar rufar baṭi-o toio.” Iusufe tare zela ḳoila, he oula ḳorlo.
GEN 44:3 Bador din biane-u tara gada loia bidae oila.
GEN 44:4 Tara ṭaun taki tuṛa duroi zaite-u Iusufe tan baṛir ḳadimre ḳoila, “Zoldi kori erar ḳore douṛaia gia, erar lagal faia harle ḳoibae, tumra ufoḳaror bodla ḳene ḳeti korlae? Amar munibor rufar baṭi kene suri korlae?
GEN 44:5 Ou baṭit ḳoria to tain shorbot-fani kain ar todbiror ḳam-o ḳoroin. Tumra ita kub oinnae ḳorso.”
GEN 44:6 Hi kadime tarar ḳoredi gia lagal faia ou laḳan ḳoilo.
GEN 44:7 Oile tara ḳoila, “Huzur ila mat ḳene matira? Afnar gulam oḳole kunu laḳan-u ita ḳam ḳorto nae.
GEN 44:8 Deḳoukka, agorbar amrar bostar muko ze ṭeḳa faislam, ita amra Kenan desh tone hirbar afnar gese firot anchi, te amra kunu afnar munibor baṛi tone shuna-rufa suri kormu ni?
GEN 44:9 Afnar i gulam oḳlor maze zar gese ou baṭi faiba, tare marilaiba ar amra-o huzuror gulam oizimu.”
GEN 44:10 Teu ḳadime ḳoilo, “Bala ḳota, te tumra zela ḳoilae, oula-u ouk. Zar gese ou baṭi milbo, ḳali tare amar gulam banaimu ar baki hoḳol ḳalas faibae.”
GEN 44:11 Ou tara zoldi kori hoḳlor bosta maṭit lamaia kullo.
GEN 44:12 Ar ḳadime boṛo bai tone huru bai tori hoḳlor bosta tukaile-o heshe Bin-Iaminor bostat hi baṭi millo.
GEN 44:13 Teu tara zarzir finnor ḳafoṛ faṛilla, bade hirbar gadar fiṭit gaiṭ bandia ṭauno ailo.
GEN 44:14 Teu Ehuda ar tar baiain Iusufor baṛit gela, i shomoy tain hono asla. Tara tan samne gia maṭit foṛla.
GEN 44:15 Iusufe tarare ḳoila, “Tumra ita kita ḳorlae? Ami zen hoḳolta gontam fari, ita tumra zano na ni?”
GEN 44:16 Ehudae ḳoilo, “Huzuror gese amra kita ḳoimu? Kita zuaf dimu? Ar kila amrare be-ḳosur ḳoitam? Allae-u tan gulam oḳlor dush deḳai disoin, te zar gese i baṭi milche, he ar amra hoḳole-u huzuror gulam oilam.”
GEN 44:17 Oile Iusufe ḳoila, “Na, na, ami i kam kunu laḳan-u ḳortam nae. Zar gese ou baṭi milche, he-u amar gulam oibo, baki shob sohi-salamote tumrar bafor gese zaogi.”
GEN 44:18 Teu Ehudae Iusufor ḳasat gia ḳoilo, “Huzur afne to Feraunor homan, te doya ḳori afnar gulamre ekkan mat matar shuzug deukka. Afnar gulamor ufre gusa oin na zen.
GEN 44:19 Huzure age i gulam oḳolre zikaisla, tumrar baf ba kunu bai asoin ni.
GEN 44:20 Amra zuaf dislam, amrar murobbi baba zinda asoin, ar tan heshḳali boyoshor egu fua ase. Tar bai morigese, ar he eḳ maʼr eḳ fut gotike babae tare kub maya ḳoroin.
GEN 44:21 Bade afnar i gulam oḳolre ḳoisla, tare amar gese loia aio, ami tare nizor souke deḳmu.
GEN 44:22 Hi shomoy amra huzurre ḳoislam, babare toia he aito farto nae ar toia aile-o baba mara zaiba.
GEN 44:23 Oile afne i gulam oḳolre ḳoisla, tumrar huru baire loge na anle, tumra ar amar samne aio na.
GEN 44:24 Erlagi amra firia gia afnar gulam, amrar babare huzuror hoḳol ḳota hunaislam.
GEN 44:25 Bade babae ḳoila, tumra hirbar gia amrar lagi aro tuṛa dan loia anogi.
GEN 44:26 Teu amra ḳoilam, amrar huru baire loge dile amra zaimu, arnae amra gia hi manshor samne muk deḳaitam nae.
GEN 44:27 Ou afnar gulam, amrar babae ḳoila, tumra to zano, amar i bibir torofa dugu fua asil.
GEN 44:28 Erar eḳzon amar sokur samon taki bar oia gelo, ar to kunudin tare deḳlam na, ami buzlam zen, nisoy kunu zanuare tare siṛi-biṛilaise.
GEN 44:29 Oḳon tumra ere-o amar ges tone nilegi ar er kunu ḳeti oile, tar duke tumra amare ou faḳna sule ḳoyboro haraibae.
GEN 44:30 Erlagi oḳon zudi afnar gulam, amar babar gese ami zai ar tan i fuare loge na deḳoin, te er zanor loge tan zan ekḳano banda gotike,
GEN 44:31 tare na deḳle, tain nisoy mara zaiba. Afnar gulam, amrar murobbi baf bout duke faḳna sul loia ḳoyboro hamaiba.
GEN 44:32 Ar afnar gulam ami, amar babar gese tar lagi zamin oia ḳoisi zen, tare firaia ante na farle, hara zindegi bora ami tumar gese dabit roimu.
GEN 44:33 Te huzur ami minoti koriar, tar bodla ami afnar gulami kormu ar tare afne erar loge zaibar dilaukka.
GEN 44:34 Ere loge na nia ami kila babar gese zaimu? Naile babar zanor shorbonash amar nizor souke deḳon lagbo.”
GEN 45:1 Iusufe tan ḳormosari oḳlor samne nizore ar ṭik raḳta farla na, tain sillaia ḳoila, “Amar ges tone hokkol hori zao!” Teu baiaintor gese nizor forisoy deoar shomoy tan samne ar ḳeu roilo na.
GEN 45:2 Tain sillaia ḳandon shuru ḳorla, teu Mishori oḳole ita hunla ar Feraunor baṛir manshe-o i kobor faila.
GEN 45:3 Iusufe tan baiaintore ḳoila, “Ami Iusuf; amar baba oḳono zinda asoin ni?” Ou tan baiainte ḍoraia zoban bond oigelo, matta farla na.
GEN 45:4 Teu Iusufe tan baiainre ḳoila, “Tumra amar ḳasat ao.” Tara ḳasat aile tain ḳoila, “Ami tumrar hou bai Iusuf, Mishoro zaora befari oḳlor gese, tumra zare besilaislae.
GEN 45:5 Oile tumra amare besislae ḳori oḳon bezar oio na, ba nizor ufre naraz oio na. Manshor zanor hefazotor lagi, Allae-u tumrar age amare ono faṭaisoin.
GEN 45:6 Aḳal soler ou dui boros dori, te aro fas boros kunu ḳet-ḳamar ba foshol folto nae.
GEN 45:7 Duniait tumrar aolad oḳolre basaia raḳar lagi Allae-u tan kudrote tumrar age amare faṭaisoin.
GEN 45:8 Teu buza zae zen, tumra amare ino faṭaiso na, Allae-u faṭaisoin. Tain amare Feraunor bafor homani koria tan foribaror saloḳdar banaisoin, ar hara Mishor desh shashonor eḳtiar disoin.
GEN 45:9 Oḳon tumra zoldi kori babar gese gia ḳo, tan fua Iusufe ḳoise, Allae amare hara Mishor deshor saloḳdar banaisoin, te tumi ar deri na ḳoria amar gese aio.
GEN 45:10 Tumi, tumar fua-fuṛin, nati-futi, goru-meṛar fal ar tumar zotota ase, hokkolta loia amar gese Gushon elaḳat roibae.
GEN 45:11 Hono ami tumare deḳa-huna ḳormu, aḳal to aro fas boros roibo, arnae tumitain hoḳole i aḳale behalot oizitae faro.
GEN 45:12 Amar afon bai Bin-Iamine ar tumra hoḳole nizor souke deḳrae zen, ami nizor muke tumrar loge matram.
GEN 45:13 Mishor desho amar zeta dafoṭ, man-ijjot deḳrae, tumra amar babare ita ḳoibae, ar tanre zoldi kori oḳano loia aibae.”
GEN 45:14 Heshe Iusufe tan bai Bin-Iaminor golat ainja ḳori doria ḳandon shuru ḳorla ar Bin-Iamine-o golat dori kanda-ḳaṭi korla.
GEN 45:15 Bade Iusufe tan hoḳol baiainre hunga dila ar tarar golat dori-o ḳandila. Teu baiainte-o tan loge mat-ḳota matla.
GEN 45:16 Iusufor baiain aoar ḳobor Feraunor baṛit fosile, Feraun ar tan ḳormosari oḳol kushi oila.
GEN 45:17 Feraune Iusufre ḳoila, “Tumar baiainre ḳo zen, tumra gadar fiṭit danor bosta bandia Kenan desho gia,
GEN 45:18 babare ar tumrar foribaror hokkolre loia amar gese aio. Ami tumrare Mishoror bala bala siz oḳol dimu ar tumra deshor hoḳol tone bala zaga-o faibae.
GEN 45:19 Ar tumrare ami hukum diar, tumra zarzir bou, fua-fuṛintor lagi Mishor desh taki gaṛi loia gia, tarare ar babare loia aio.
GEN 45:20 Ar hono tumrar mal-samanar lagi maya deḳaio na, hara Mishor deshor bala bala siz oḳol to tumrar-u.”
GEN 45:21 Israilor fuainte oula-u ḳorla. Feraunor hukume Iusufe tarar lagi gaṛi ar fotor ḳanir mosa dila.
GEN 45:22 Tain era hokkolre eḳ seṭ ḳoria ḳafoṛ dila, oile Bin-Iaminre dila fas seṭ ḳafoṛ ar tin-sho rufar ṭeḳa.
GEN 45:23 Tain tan bafor lagi doshgu gadar fiṭit ḳori Mishoror bala bala siz oḳol, ar doshgu gadir fiṭit ḳori kanir lagi ruṭi ar dan buzai kori faṭaila.
GEN 45:24 Ou laḳan tan baiaintore bidae dila, bidae bala tain erare ḳoila, “Tumra foto laga-lagi korio na.”
GEN 45:25 Bade tara Mishor tone Kenan desho, tarar baf Iakubor gese gia ḳoila,
GEN 45:26 “Iusuf oḳono zinda ase. He to oḳon asta Mishor deshor ortaḳorta.” Oile ita hunia Iakubor hush uṛi gelo, tan bishash-u oilo na.
GEN 45:27 Bade Iusufe tarare zeta ḳoia disla ita hunia, ar tane neoar lagi Iusufor faṭail gaṛin dekia, tarar baf Iakubor hush ṭik oilo.
GEN 45:28 Israile ḳoila, “Amar fua Iusuf zen oḳono zita ase, oṭa-u to bout, morar age ami gia tare deḳa-u lagbo.”
GEN 46:1 Israile tan hokkolta loia bar oigela. Ar Ber-Shebat aia tan baf Isʼhakor Allar name kurbani korla.
GEN 46:2 Bade raitor bala Allae Israilre didar dia ḳoila, “O Iakub, Iakub!” Tain zuaf dila, “Ounu ami.”
GEN 46:3 Allae formaila, “Ami Alla, tumar bafor Mabud. Tumi Mishoro zaite ḍoraio na, hono ami tumar eḳ biraṭ zati foyda ḳormu.
GEN 46:4 Ami tumar loge loge Mishoro zaimu, ar ami-u tumare hirbar firaia anmu ar tumar fua Iusufe tumar souk muzaia dibo.”
GEN 46:5 Bade Iakube Ber-Sheba taki roana oila. Feraune tarare neoar lagi zeta gaṛin disla, Israilor fuainte otat ḳori tarar bafre ar tarar bou, fua-fuṛinre loia gela.
GEN 46:6 Heshe Iakub, tan fuain ar tan fura gusṭi, foshur fal oḳol ar Kenan desho ḳamai kora hokkol don-doulot loia Mishoro fosla.
GEN 46:7 Ou laḳan Iakube tan fua-fuṛin, nati-natin, fura gusṭir hokkolre loia Mishoro faroigela.
GEN 46:8 Boni Israil, mani Iakub ar tan aolad oḳol zera Mishoro gesla, tarar ḳandan-nama oilo: Iakubor boṛo fua Ruben;
GEN 46:9 ar Rubenor fuain: Honuk, Falu, Hasir ar Kormi.
GEN 46:10 Shimionor fuain: Zimuel, Zamin, Ohod, Zakin, Shuhor, ar Kenani bour torofa Shoul.
GEN 46:11 Lebir fuain: Zarsun, Kahat ar Marari.
GEN 46:12 Ehudar fuain: Eir, Onon, Shela, Firuz ar Zarah. Oile Onon ar Eir Kenan desho-u mori gesla. Firuzor fuain: Hasir ar Hamul.
GEN 46:13 Isaḳoror fuain: Tola, Foa, Zashub ar Shimron.
GEN 46:14 Sobulonor fuain: Sered, Elon ar Zoholel.
GEN 46:15 Tara oila Lear huruttain, Foddon-Iramo Lear torofa Iakubor i huruttain ar tan fuṛi Dinar zonmo oisil, era hokkoltae tetrish zon.
GEN 46:16 Sadur fuain oila: Sifon, Hogi, Shuni, Ishbun, Eiri, Orudi ar Oreli.
GEN 46:17 Ashiror fuain: Imna, Zisba, Zisbi, Boria ar tarar boin Sera. Boriar fuain: Hebor ar Molkiel.
GEN 46:18 Tara oila Zilpar huruttain, Labone tan fuṛi Lear loge ou bandi Zilpare disla, era hoḳol-u tair torofa Iakubor huruttain, ou shullo zon.
GEN 46:19 Iakubor bibi Rahelar fuain oila: Iusuf ar Bin-Iamin.
GEN 46:20 Iusufor fuain Manosha ar Afraim Mishor desho zonmisla. Erar ma oila Oun mondiror babon-ṭakur, Puṭiferar fuṛi Asonot.
GEN 46:21 Bin-Iaminor fuain: Bela, Beḳor, Oshbel, Gera, Naman, Ehi, Rush, Muppim, Huppim ar Ord.
GEN 46:22 Tara oila Rahelar torofa Iakubor huruttain, ou souddo zon.
GEN 46:23 Danor fua: Hushim.
GEN 46:24 Noftalir fuain: Johoshiel, Guni, Izer ar Shillem.
GEN 46:25 Tara oila Bilhar huruttain, Labone tan fuṛi Rahelar loge ou bandi Bilhare disla. Era hoḳol-u tair torofa Iakubor huruttain, ou shat zon.
GEN 46:26 Iakubor nanan torofar zonmor zara Mishoro aila, tan fuaintor bou bad dia era hoḳole milia soyshoṭṭi zon asla.
GEN 46:27 Mishor desho Iusufor duizon fua zonmisla. Era shoho Iakubor foribaror zara Mishoro aila, tara muṭ shottoir zon.
GEN 46:28 Er age Iakube Ehudare Iusufor gese faṭaila, Gushono zaoar fot sinar lagi, teu tara hokkol ono gia fosla.
GEN 46:29 Ar Iusufe-o guṛar gaṛi hazaia tan baf Israilor loge Gushono deḳa ḳorat gela, ar tanre dekia-u ainja ḳori golat doria bout shomoy ḳandila.
GEN 46:30 Teu Israile Iusufre ḳoila, “Tumi zen zinda aso re fut, iṭa nizor souke deḳlam. Oḳon shantie-u mortam farmu.”
GEN 46:31 Ou Iusufe tan baiaintore ar tan bafor logor hoḳolre ḳoila, “Ami gia Feraunre zanaimu, amar baiain ar amar bafor baṛir hoḳol, Kenan desh tone amar gese aichchoin.
GEN 46:32 Tarar ḳam oilo foshu fala. Tara to sagol-meṛa faloin, ar tarar foshur fal oḳol ar hokkol mal-samana loia aichchoin.
GEN 46:33 Feraune zebla tumrare zikaiba, afnara kita ḳam ḳoroin?
GEN 46:34 Ou shomoy tumra ḳoio, afnar i gulam oḳole ar tarar baf-dada oḳole-o huruman tone-u foshu falia basoin. Teu tumra Gushono roitae farbae. Ḳaron foshu falra manshore Mishori oḳole gin ḳoroin.”
GEN 47:1 Iusufe Feraunor gese gia ḳoila, “Amar baba ar baiainte, tarar goru-sagol ar tarar hokkolta loia, Kenan desh saṛia aisoin. Tara aia Gushono fosi gesoin.”
GEN 47:2 Baiaintor maze fas zonre nia tain Feraunor samne azir ḳorla.
GEN 47:3 Feraune tarare zikaila, “Tumra kita ḳam ḳoro?” Tara ḳoila, “Afnar i gulam oḳole baf-dadar amol taki-u foshu fali.”
GEN 47:4 Tara hirbar ḳoila, “Amra i desho musafir oia taḳar lagi aisi. Kenan desho oḳon bezuita nidan soler ḳori, hino amrar foshur falor kuraki nae. Erlagi doya ḳori afnar i gulam oḳolre, Gushono roibar shuzug deukka.”
GEN 47:5 Feraune Iusufre ḳoila, “Tumar baf-baiain tumar gese aisoin;
GEN 47:6 asta Mishor desh-u to tumar samne foṛi roise. Deshor hoḳol taki bala zagat tarare roite deo, tara Gushono-u taḳouk ar erar maze zoiggo manush faile, tarare amar foshur falor saloḳdar banailao.”
GEN 47:7 Bade Iusufe tan baf Iakubre Feraunor samne anaila ar Iakube Feraunre dua dila.
GEN 47:8 Feraune Iakubre zikaila, “Afnar boyosh ḳoto oise?”
GEN 47:9 Iakube ḳoila, “Duniait amar musafirir ayu eḳ-sho tish boros oise, ita to beshi nae, ar kub toklife-u i din ḳaṭse; amar baf-dadar musafirir ayur homan oḳono oise na.”
GEN 47:10 Heshe Iakube Feraunre dua ḳoria bidae loila.
GEN 47:11 Teu Iusufe Feraunor hukum moto, tan baf-baiainre Mishor deshor hoḳol taki bala zaga, Ramashesh elaḳat roita dila.
GEN 47:12 Iusufe tan baf-baiain ar tarar foribarre zarzir dorḳari, ḳani-kuraki hoḳolta zugai dila.
GEN 47:13 Bade aḳal aro betaya oilo, deshor kunu zagat ḳanir kunta asil na. Teu Mishor ar Kenan desh ekkebare ḳahil oigelo.
GEN 47:14 Mishor ar Kenan deshor manshor zoto ṭeḳa-foysha shuna-rufa asil, itadi tara dan ḳorid ḳorae, Iusufe ota dola ḳoria Feraunor banḍaro zomaila.
GEN 47:15 Mishor ar Kenan deshor hoḳol shuna-rufa zebla fuṛai gelo, teu Mishori oḳole aia Iusufre ḳoila, “Amrare ḳanir kunta deukka. Amrar shuna-rufa fuṛai gese ḳori afnar souḳor samne morizitam ni?”
GEN 47:16 Iusufe ḳoila, “Taile tumrar foshu oḳol ania deo, shuna-rufa fuṛai gele-o foshu oḳlor bodla ami tumrare ḳani-kuraki dimu.”
GEN 47:17 Teu tara zarzir goru-sagol, guṛa-meṛa, gada-gadi Iusufor gese anla ar Iusufe er bodla tarare dan dila. Ou laḳan tarar hokkol foshur bodla, hi bosoror kuraki salaila.
GEN 47:18 Ar hi boros gelo, er bador boros manshe aia Iusufre ḳoila, “Huzuror gese amra kunta-u lukaiar na, amrar hoḳol shuna-rufa shesh oigese ar foshu oḳol-o afnare dilaisi. Oḳon amrar ar kunta-u roise na, ḳali ou shoril ar zaga-zomin saṛa.
GEN 47:19 Erlagi afnar souḳor samne zomi-zoma shoho amra kila morizitam? Te afne amrare-o ar amrar hoḳol zomi-zoma-o loilaukka, amra Feraunor gulami kormu, ta-o amrare ḳani deukka ar bis deukka, teu amra-o mora tone basmu ar zomin ḳanain-o borbad oito nae.”
GEN 47:20 Ou Iusufe Mishor deshor hokkol zomin Feraunor name loilila, ḳaron i aḳal oula bezuita oisil zen, Mishoror hoḳole-u tarar zaga-zomin besilaila. Teu deshor hoḳol zomin Feraunor ato aillo.
GEN 47:21 Ar Iusufe Mishor deshor eḳ mata taki aroḳ matar hoḳol manshore ṭauno far ḳorilila.
GEN 47:22 Ḳali babon oḳlor zaga-zomin tain loila na, ḳaron erare Feraune beton dita, ar ota dia-u tara solta.
GEN 47:23 Heshe Iusufe manshore ḳoila, “Huno, Feraunor name ami tumrare ar tumrar hoḳol zaga-zomin-o loililam. Oḳon tumra ou bis oḳol neo ar zomino bain ḳoro.
GEN 47:24 Teu zomino zeta foshol folibo, er fas baṭor eḳ baṭ Feraunre dio ar baki sair baṭ, zominor bis, tumra ar tumrar foribar ar huruttaintor ḳanir lagi niogi.”
GEN 47:25 Teu manshe ḳoila, “Afne amrar zan basaila. Huzure amrare doya ḳorle, amra Feraunor gulami kormu.”
GEN 47:26 Bade Iusufe Mishor deshor zaga-zominor lagi ou ain zari korla, hoḳol fosholor fas baṭor eḳ baṭ Feraune faiba, ḳali babon oḳlor zomin bade. Ou ain oḳono soler.
GEN 47:27 Boni Israile Mishor deshor Gushono boshot ḳorla. Tara honor doḳoldari faia, kub folala oila ar tarar bout aolad oila.
GEN 47:28 Mishor desho aia Iakub shotro boros zinda roila. Teu tain hoḳoltae eḳ-sho shatsallish boros basila.
GEN 47:29 Israilor moutor din ḳasaia aile tan fua Iusufre ḳobor di anaia ḳoila, “Amar bae tumar meherbani oile ekkan osiot ḳoraitam, tumi amar urator tole tumar atḳan harao, tumi amar bae doya ar halali deḳaio, amare Mishoro dafon ḳorio na.
GEN 47:30 Ami zebla amar baf-dadar gese zaimugi, ou shomoy tumi amare Mishor desh taki nia, amar baf-dadar ḳobrostano dafon ḳorio.” Iusufe ḳoila, “Afne zela ḳoila, oula-u ḳormu.”
GEN 47:31 Teu Iakube ḳoila, “Te tumi amar gese ḳosom ḳoro.” Iusufe ḳosom ḳorla. Ou Israile tan bisnar hitan bae ḳait oila.
GEN 48:1 Erbade Iusufe ḳobor faila, tan baf bemar, ou tan duio fua Manosha ar Afraimre loia bafre deḳat aila.
GEN 48:2 Iakube zebla hunla, tan fua Iusuf aisoin, ou tain shorilor hoḳol bol ḳaṭaia, uṭia bisnat boila.
GEN 48:3 Ar tain Iusufre ḳoila, “Shorbo-shoktiman Allae Kenan deshor Luz ṭauno, amare didar dia borkot dan ḳoria ḳoisla,
GEN 48:4 ‘Huno, ami tumare foldar ḳormu ar bout aolad dimu, tuma tone bout gusṭiala eḳ zati foyda ḳormu ar tumar oarish oḳolre, hameshakur lagi i deshor malikana dimu.’
GEN 48:5 Ami tumar gese Mishoro aibar age, tumar ze duio fua Mishoro zonmisoin, tara amar-u. Ruben ar Shimion zela amar, oula Manosha ar Afraim-o amar oiba.
GEN 48:6 Oile erar bade tumar zeta hurutta oisoin, tara tumar-u roiba, ar tarar bair name-u erar malikana ḳaim oibo.
GEN 48:7 Ar Foddon taki amra aoar shomoy, Kenan deshor Ifrat taki tuṛa duroi taḳte-u, Rahela mara gela. Teu ami honor Ifrato, Betelhamor fotor daro tanre dafon ḳorlam.”
GEN 48:8 Bade Iusufor fuaintor bae saia Israile zikaila, “Era ḳe?”
GEN 48:9 Iusufe tanre ḳoila, “Era amar fuain, Allae ou desho-u erare disoin.” Tain ḳoila, “Erare amar ḳasat ano. Ami tarare dua ḳortam.”
GEN 48:10 Murobbi boyosho souḳor zuti komi zaoae Israile bala ḳori deḳta na. Teu era ḳasat aile, Israile tarare ainja ḳori doria hunga dila.
GEN 48:11 Tain Iusufre ḳoila, “Babare, ami mono ḳorslam tumar muk ar kunu din deḳtam nae, oile Allae tumar aolad oḳolre-o deḳailila.”
GEN 48:12 Teu Iusufe tan bafor ges tone, fuaintore horaia maṭit soizda ḳorla.
GEN 48:13 Ar Iusufe tan duio fuare loia, ḍain at dia Afraimre doria Israilor bau galat, ar bau at dia Manoshare doria Israilor ḍain galat ania azir ḳorla.
GEN 48:14 Oile Israilor nizor aḳole, tan at aṛa-aṛi koria, ḍainor at huru fua Afraimor matat ar Iusufor boṛo fua Manoshar matat toila tan bau at.
GEN 48:15 Bade tain Iusufre dua ḳoria ḳoila, “Hou Alla, zan morzie amar baf-dada, Ibrahim ar Isʼhake solta, hou Alla, zein foyla taki aiz forzonto amare falia aira,
GEN 48:16 hou firista, zein amare hoḳol mosibot taki basaisoin, tain-u ou duio fuare borkot nazil ḳoroukka. Erare dia-u Ibrahim ar Isʼhak ar amar nam zinda taḳouk. Duniair maze tarar bout gusṭi ouk.”
GEN 48:17 Bafe tan ḍain at Afraimor matat raḳla ḳori Iusuf bezar oigela. Ar Afraimor mata taki horaia, Manoshar matat deoar lagi, tan bafor at usa ḳorla.
GEN 48:18 Tain ato doria ḳoila, “Baba, i laḳan nae. Ounu amar boṛo fua, te afnar ḍain at tar matat raḳoukka.”
GEN 48:19 Oile tan bafe na-kush oia ḳoila, “Babare, ami ita zani, ami ita zanire fut. Tar-o eḳ zati oibo ar mohan oibo, oile tar huru bai tar saite-o mohan oibo, ar tar aolador bout gusṭi oibo.”
GEN 48:20 Israile erbade ou duio natire dua ḳoria ḳoila, “Boni Israile kunu manshore dua ḳorle oula ḳoiba, Allae tumare Afraim ar Manoshar laḳan ḳoroukka.” Oula tain Manoshar saite Afraimre boṛo banaila.
GEN 48:21 Heshe Hozrot Israile Iusufre ḳoila, “Deḳo, amar moronor oḳt aichche. Alla tumrar loge roiba, ar tumrare hirbar tumrar baf-dadar desho nichchoy firaia niba.
GEN 48:22 Tumar baiaintor saite tumare eḳ baṭ beshi dilam. Ou baṭ to Shikim elaḳa, ita amar toluar-donuk dia Amuri oḳlor ges taki anslam.”
GEN 49:1 Bade Iakube tan fuaintore anaia ḳoila, “Tumra hokkol ekḳano o. Bobishote tumrar zindegi kila zaibo, ita ami tumrare ḳoiram.
GEN 49:2 Iakubor fuain, tumra ekḳano ao; tumrar baf Israilor buli huno.
GEN 49:3 Ruben tumi amar boṛo fua, tumi amar bol, amar zuankir foyla fol; tumi hoḳol taki tezi ar himmoti.
GEN 49:4 Tumi utrail gorom fanir laḳan, tumar boṛai roito nae; tumi afon bafor bisnat geso, haton maʼr loge nafaki kam ḳorso.
GEN 49:5 Shimion ar Lebi dui bai; tarar toluar zalimor atiar.
GEN 49:6 O amar zan, tarar mozliso hamaio na; O amar shan, tarar shomazo zaio na. Tara gusa ḳori kun ḳorlo; aṛuami kori bisalor rog kaṭlo.
GEN 49:7 Tarar gusa to lannoti, ita boṛo bezuita; lannoti tarar zulum, ita to fashan. Ami tarare Iakubor maze baṭimu; Boni Israilor maze sitrai dimu.
GEN 49:8 Ehuda, tumar baiainte tumar tarif ḳorba; tumi dushmonor gordonat dorbae; tumar bafor oarish oḳole, tumar gese mata nuaiba.
GEN 49:9 Tumi to shinghor baichcha Ehuda. Tumi shikaror gust ḳaia horia ailae; he shinghor laḳan leṭia hutia goṛiailo; shinghire ḳegue gum bangaito?
GEN 49:10 Ehudar at tone to raz-laṭi horto nae; tar duio faor maz tone bisaror goda zaito nae; zotodin Shilo na aiba, ar hoḳol zati tan hukume solba.
GEN 49:11 He angur gaso banbo tar gada; anguror shundor ḍalo banbo gadar baichcha; lal anguror roshdi duibo tar zubba, anguror loudi korbo lebas sofa.
GEN 49:12 Tar souk anguror roshe lal ṭoḳṭoḳa, ar tar dat dudor laḳan dola.
GEN 49:13 Sobulon doriar faro boshot ḳoribo, he zaz biṛanir gaṭ oibo, Sidon forzonto tar shimana oibo.
GEN 49:14 Isaḳor egu bolala gada, he kuoṛor bitre hute.
GEN 49:15 He deḳlo ziranir zagaḳan bala, deshḳan shundor; teu gaiṭ boibar lagi kand lamailo, ar zuror gulam oilo.
GEN 49:16 Dane tar nizor proza oḳlor bisar ḳorbo, Israilor ek gusṭir laḳan.
GEN 49:17 He oibo shoṛokor daror haf, fotor bishala alod; zegie guṛar faot ḳamoṛ mare, guṛ-soar ḳoredi ulṭia foṛe.
GEN 49:18 O Mabud, ami tumar nazator muka sai roisi.
GEN 49:19 Sadure luṭra dole hamla ḳorbo, bade he-o tarar ḳoredi luṭibo.
GEN 49:20 Ashiror kub bala foshol folibo, he bashshar zuka ḳani zugaibo.
GEN 49:21 Noftali oilo saṛa horini, tar muko ase miṭa miṭa mat.
GEN 49:22 Iusuf folala gasor ḍal, indarar daror folala gasor ḍal; tar ḍalain beṛ faroizae.
GEN 49:23 Tir-donuk alainte tare bezuita toklif disla, tir maria tare beḳaydat falaisla;
GEN 49:24 oile tar donuk mozbut roilo, tar ator honat bol roilo; Iakubor hou mohan shoktialar at dia, zein Israilor asroy ṭilla, tanre dia.
GEN 49:25 Tumar bafor hou Allare dia, zein tumare shaijjo ḳorba; hou Shorbo-shoktimanre dia, zein tumare borkot nazil ḳorba; ufre toa asman taki lamra borkote, tole bisail fani taki bar oa zornar borkote, bukur dud ar feṭ taki bar oa borkote.
GEN 49:26 Amar baf-dadar dua taki, tumar bafor deoa dua bout bala ouk; ita hameshakur ḳaṛa hazail faṛ-forbot taki lamouk. Hou dua Iusufor matat foṛouk; baiain taki alogor matar talut foṛouk.
GEN 49:27 Bin-Iamin oilo boṛo-bagor laḳan, he biane ḳae shikaror gust, ar hainjae bilae luṭor mal.”
GEN 49:28 Era oila Israilor baro gusṭi, tarar bafe tarar lagi duar shomoy oula ḳoila. Tain era hokkolre zarzir faona dua dila.
GEN 49:29 Bade Iakube tan fuaintore osiot ḳoraila zen, “Amar to baf-dadar gese zaoar shomoy oigese, te Hiṭṭi Ifrunor zominor guhat, amar baf-dadar ḳandat amare dafon ḳorio.
GEN 49:30 I guha Kenan deshor, Momrir daro Moḳfelar zomit. Ibrahime Hiṭṭi Ifrunor ges tone ou zomin loisla ḳobrostan bananir lagi.
GEN 49:31 Ono-u Ibrahim ar tan bibi Sayrare dafon ḳora oise, Isʼhak ar tan bibi Rebekare-o ono dafon ḳora oise, ar ami Leare-o ono dafon ḳorsi.
GEN 49:32 I zomin ar er mazor guha Hiṭṭi oḳlor ges tone loisla.”
GEN 49:33 Iakube tan fuaintore osiot ḳora shesh oile, bisnar ufre tan duio fao ekḳano ḳorla ar aḳeri dom saṛia tan baf-dadar gese gelagi.
GEN 50:1 Iusufe tan bafor mukor ufre muk lagaia ḳandita lagla ar tanre hunga dila.
GEN 50:2 Bade tain nizor odinor hekim oḳolre hukum dila, tara tan bafor lashre momi banaibar lagi. Teu tara tan gotro momir moshla lagaila.
GEN 50:3 Tara i kamo sallish din lagaila, ou ḳamo to sallish din-u lage. Ar Mishori oḳole tan lagi shottoir din boria ahazari korla.
GEN 50:4 Ou ahazarir dinor bade, Iusufe Feraunor baṛir manshore ḳoila, “Afnara zudi amare doya ḳoroin, te Feraunre amar ou ḳotaḳan zanaukka zen.
GEN 50:5 Babae amare ḳosom ḳoraia ḳoisla, ‘Huno, ami to morizimu, te Kenan desho amar lagi zuit ḳora ḳoyboro amare dafon ḳorio.’ Teu oḳon tanre dafonor lagi, doya ḳori amare zaite deukka, babare ḳoybor dia-u ami hirbar aimu.”
GEN 50:6 Feraune zuaf dila, “Tain tumare zela ḳosom ḳoraisoin, tumi gia oula-u ḳoro.”
GEN 50:7 Teu Iusufe tan bafre dafonor lagi roana dila; ar Feraunor hoḳol gulame, tan dorbaror murobbi oḳole ar Mishoror moy-murobbi oḳole,
GEN 50:8 Iusufor nizor foribar, tan baiain ar tan bafor foribaror hoḳole roana dila. Gushono ḳali tarar huruttain ar goru-meṛar falain toia gela.
GEN 50:9 Tara bout guṛar gaṛi ar guṛ-soar oḳol loia eḳ biraṭ dol hazia roana dila.
GEN 50:10 Ar Zordan gangor hofaro Aṭador dan maṛar zagat gia, tara hoḳole shatdin dori Iusufor bafor lagi kub ahazari ar bilaf ḳorla.
GEN 50:11 Aṭador dan maṛar zagat tarare ila ahazari korat dekia, hi deshor bashinda Kenani oḳole ḳoila, Mishori oḳlor lagi iṭa kub bezuita ahazari; erlagi Zordan gangor faror ou zagar nam oigelo, Abel-Mishroyim [mani, Mishori oḳlor ahazari].
GEN 50:12 Israile tan fuaintore zela osiot ḳorsla, tara tanre ola-u ḳorla.
GEN 50:13 Tara tan lash Kenan desho loia gela, ar Momrir gese Moḳfelar zominor, guhar maze tanre dafon ḳorla. Iṭa ḳobrostan bananir lagi Ibrahime, Hiṭṭi Ifrunor ges taki loisla.
GEN 50:14 Bafre dafon ḳorar bade Iusuf, tan baiain ar zoto manush tan bafre dafon ḳorat loge gesla, tara hoḳole Mishoro firia aila.
GEN 50:15 Baf morigesoin dekia Iusufor baiainte mata-mati korla, Iusufe kiba amrare ginnaibo ar amra tar zeta ḳeti korsi, oḳon ita hokkoltar bodla loibo.
GEN 50:16 Teu tara Iusufor gese ḳobria faṭaia ḳoila, “Tumar bafe morar age i osiot ḳorsla zen,
GEN 50:17 tumra Iusufre ou ḳotaḳan ḳoio, tumar baiainte tumar zeta ḳeti korsoin, doya ḳori tumi tarar hi oinnae ar guna maf ḳori dio. Erlagi amra minot ḳoriar, tumar bafor Allar ou gulam oḳolre maf ḳori dilao.” Tarar mat hunia Iusufor ḳandon aillo.
GEN 50:18 Bade tan baiainte tan samne aia maṭit foṛia ḳoila, “Huno, amra to tumar gulam.”
GEN 50:19 Oile Iusufe tarare ḳoila, “Tumra ḍoraio na. Ami kunu Allar ḳolifa ni?
GEN 50:20 Tumra to amar ḳeti kortae saislae, oile Allae itare balai banailla, zela aiz deḳrae, te tan kial asil ou laḳan ḳori bout manshor zan basaita.
GEN 50:21 Tumra oḳon ḍoraio na. Ami tumrare ar tumrar fua-fuṛintore deḳa-huna ḳormu.” Tain ou laḳan ḳori tarare buz dila ar kush dile mat-ḳota matila.
GEN 50:22 Bade Iusuf ar tan bafor aolad oḳole Mishoro boshot ḳorat roila. Iusuf eḳ-sho dosh boros zinda asla.
GEN 50:23 Tain Afraimor natinosha forzonto deḳla ar Manoshar fua Makiror huruttain-o Iusufor ato foyda oila.
GEN 50:24 Bade Iusufe tan baiaintore ḳoila, “Amar to moutor oḳt aichche, nisoy Allae tumrar bae nozor raḳba. Tain Ibrahim, Isʼhak ar Iakubor gese ze desh dita ḳori kosom ḳorsoin, tumrare on taki hou desho loia zaiba.”
GEN 50:25 Ar Iusufe Boni Israilre ou osiot ḳoraila, “Nisoy Allae kunudin tumrar bae nozor ḳorba. Te on taki zaoar bala tumra amar aḍḍi oḳol tulia loia zaio.”
GEN 50:26 Heshe eḳ-sho dosh boros boyosho Iusuf mara gela. Teu manshe tan lashre kushbu-mosholadi makia momi banaia Mishor desho ek kafonor baksor bitre toila.
EXO 1:1 Allae Hozrot Iakubor noya nam disla Israil, erlagi tan bongshor nam oilo Boni Israil. Iakube tan bibin-baichchain ar foribaror hoḳolre loia Mishor desho gelagi. Ou shomoy tan loge oia zera gela, erar nam oilo,
EXO 1:2 Ruben, Shimion, Lebi, Ehuda,
EXO 1:3 Isaḳor, Sobulon, Bin-Iamin,
EXO 1:4 Dan, Noftali, Sadu ar Ashir.
EXO 1:5 Iakubor bongshor hokkoltae milia shottoir zon asla. Ar Iusuf ag taki-u Mishoro taḳta.
EXO 1:6 Bade Iusuf, tan baiain, ar hi amolor hoḳol mara gela.
EXO 1:7 Oile tarar bador bongshodor baṛia kub bolala oila. Era sairobae sitria asta Mishor desh borigela.
EXO 1:8 Ermaze Mishoro eḳzon noya bashsha oila, ein Iusufre sinoin na.
EXO 1:9 Ein nizor proza oḳolre ḳoila, “Saia deḳo, Boni Israil amra taki beshi-o ar bolala-o.
EXO 1:10 Te ao, amra eḳ fondi kori, ita zenu ar na baṛoin. Arnae tara baṛia heshe zuddor ḳalo amrar dushmonor loge milia amrar birudde zuddo ḳorbo, bade amrar desh taki zaibogi.”
EXO 1:11 Teu tara shordar lagaila erare maria-doria zur-zulum ḳoria ḳam ḳoranir lagi. Era Feraunor foshol raḳar lagi Pitum ar Ramashesh namor duiṭa ṭaun-o banaila.
EXO 1:12 Oile erar ufre zoto beshi zur-zulum ḳora oilo, era-o oto beshi baṛila ar sitrila. Erlagi Mishori oḳole Boni Israilre kub ḍoraigela.
EXO 1:13 Ḍoraia eraredi aro ḳoṭin ḳam ḳoraila.
EXO 1:14 Maṭi kam, iṭor ḳam ar ḳetor maze ḳoshṭor ḳam ḳoraia erar zanre titta banaililo. Ar tara zur-zulum ḳoria nisṭur-fashanor laḳan ḳam ḳoraito.
EXO 1:15 Bade Mishoror bashshae Shifra ar Fuah namor duizon Ibrani dai beṭire hukum dila,
EXO 1:16 “Tumra Ibrani beṭintor dai girit gia, itar fuain foyda oile-u marilaio, ḳali fuṛintore zita rakio.”
EXO 1:17 Oile hi dai beṭinte Allare ḍoraita gotike, Mishori bashshar hukum na mania fuaintore-o zita raḳta.
EXO 1:18 Teu bashshae erare nia zikaila, “Ita ḳam ḳene ḳorlae? Fuaintore ḳene zita raḳlae?”
EXO 1:19 Tara zuaf dila, “Ibrani beṭin Mishori beṭintor laḳan nae, tara bout bolala. Daibeṭi tarar ḳasat zaibar age-u tarar hurutta foyda oizae.”
EXO 1:20 Ou duio beṭie Allare ḍoraita ḳori, Allae rohomot ḳoria tarare-o aolad dila. Ar Boni Israil-o aro beshi kori baṛia kub shoktiman oila.
EXO 1:22 Ita dekia Feraune nizor proza oḳolre hukum dila, “Ibrani oḳlor kunu fuain oile-u tumra Nil nodo falai dio, ḳali fuṛintore zita rakio.”
EXO 2:1 Ermaze Lebi kandanor eḳzon manshe, tan nizor ḳandanor ek koinare shadi korla.
EXO 2:2 Ou ḳoinar goro eḳ fuar zonom oilo. Fuagu deḳte kub shundor oae, tin mash dori lukai raḳla.
EXO 2:3 Heshe ar lukaita na faria, tain nol-ḳagṛar eḳ ṭukri loila. Ou ṭukrit maṭia tel ar alḳatra lefia ogur bitre huruttare haraia, gangor soror nol bonor maze toia aila.
EXO 2:4 Ar er kita dosha oy deḳar lagi, tar boin duroi ubailo.
EXO 2:5 Tuṛa bade Feraunor fuṛi gango naoat aila. Gangor faro tan bandi oḳol guragurit asil. Tain soror nol-ḳagṛar maze ou ṭukri dekia, tan bandire ḳoila, “Ou ṭukrigu an.”
EXO 2:6 Ṭukrir ḍala kulia deḳla, er bitre eḳ fuae ḳander. Dekia tan maya lagigelo. Tain ḳoila, “Ish, igu to kunu Ibranir fua.”
EXO 2:7 Ou shomoy fuar boin aia Feraunor fuṛire zikailo, “Rani ma, i huruttare dud ḳaoanir lagi kunu Ibrani beṭire faile afnar gese antam ni?”
EXO 2:8 Feraunor fuṛie ḳoila, “Za angi.” Teu fuṛie gia fuar maʼre loia ailo.
EXO 2:9 Feraunor fuṛie tanre ḳoila, “Ogo, ami tumar beton dimune, tumi amar oia ou fuagure bukur dud ḳaoao.” Ou hi beṭie nia huruttare dud ḳaoaia falila.
EXO 2:10 Fuagu kisu boṛo oar bade tain nia Feraunor fuṛir gese dilaila. Feraunor fuṛie enre nizor fua banaia falila. Tain ḳoila, “Ami tare fani taki ṭania tulchi.” Erlagi tar nam raḳla Musa [mani, ṭania tula].
EXO 2:11 Heshe Musa boṛo oigele eḳdin tan nizor zatir baiaintor gese gia deḳla, tara kub ḳoshṭor ḳam ḳorra. Ermaze deḳla, tan nizor Ibrani zatir eḳ beṭare, eḳ Mishorie mair-doir ḳorer.
EXO 2:12 Dekia sairobae saia ar kunu manush na deḳae, tain hou Mishorire kun ḳoria balur tole gaṛilla.
EXO 2:13 Bador dino tain hirbar bare gela. Gia deḳla, duizon Ibranie nize nize maramari korer. Ou tain dushi zonre ḳoila, “Oba, tumar baire ḳene marrae?”
EXO 2:14 He ḳoilo, “Tumare ḳegie amrar hakim banaia bisar ḳorat faṭailo? Ḳail zela hou Mishorire kun ḳorso, oula amare-o kun ḳoriltae sairae ni?” Ou Musae ḍoraigela. Tain buzla ita to zana-zani oigese.
EXO 2:15 Ar Feraune-o ita hunia Musare marilta saila. Ou shomoy Musa Feraunor ges taki bagi gela. Bagia Madian desho boshot ḳorar lagi aila. Aia honor ek kuar ḳasat boila.
EXO 2:16 Madian desho Shuaib namor eḳ imam sab asla. Tan shatzon fuṛin asoin. Ou fuṛinte kuar faro aia, tarar bafor sagol-meṛare fani kaoanir lagi gamla borat lagla.
EXO 2:17 Ou shomoy oinno raḳal oḳole tarare ḳedaia dilailo. Oile Musa ubaia tarare shaijjo ḳorla, ar tarar falre fani kaoaila.
EXO 2:18 Tara tarar bafor daro gia harle tain zikaila, “Tumra aiz oto zoldi kemne ailae?”
EXO 2:19 Tara ḳoila, “Eḳ Mishori beṭae amrare raḳal oḳlor at taki basaisoin. Ein amrar sagol-meṛare fani tulia ḳaoaisoin.”
EXO 2:20 Teu tain zikaila, “I manushgu kuai? Tumra tare toia aillae ḳene? Ere ḍakia ania ḳana ḳaoao.”
EXO 2:21 Erbade Musae ou imamor baṛit roite razi oila. Imam sabe tan fuṛi Sofurare Musar loge shadi dila.
EXO 2:22 Bade Sofurar goro eḳ fua oile Musae ḳoila, “Ami to boitol bonia bidesho roiram.” Erlagi ou fuar nam raḳla Zarsum [mani, boitol].
EXO 2:23 Bout din bade Mishoror bashsha morigela. Boni Israile gulamir lagi kator oia ḳanda-ḳaṭi korlo. Tarar ḳandon Allar gese kobul oigelo.
EXO 2:24 Allae tarar foriad hunla. Tain Ibrahim, Isʼhak ar Iakubor loge tan oadar ḳota iad ḳorla.
EXO 2:25 Ar Boni Israilor bae muk firaila, doyar nozore tarar bae saila.
EXO 3:1 Ou shomoy Musae tan hour Madian zatir imam sab Hozrot Shuaibor sagol-meṛa raḳta. Eḳdin tan sagolor fal loia morubumir hesh galat Allar hou Tur faṛor ḳasat gela.
EXO 3:2 Hono eḳ zonglar maze Mabudor firistae agunir laḳan nuror maz taki tanre deḳa dila. Musae deḳla, zonglar maze aguin zoler oile zongla zoler na.
EXO 3:3 Ou tain taijjub oia ḳoila, “Zongla ze zoler na, er ḳaron kita? Te aro ḳasat gia deki sain.”
EXO 3:4 Allae zebla deḳla ein deḳar lagi kasat zairagi, ou shomoy tain zonglar maz taki ḍakia ḳoila, “Musa, O Musa!” Musae ḳoila, “Ounu ami.”
EXO 3:5 Allae ḳoila, “Ar samne aguaio na. Tumar fao taki zuta kulilao. Zano ni, tumi oḳon ze zagat ubaiso ikan pak zaga.
EXO 3:6 Huno, ami Alla-u tumar bafor Mabud, Ibrahimor Mabud, Isʼhakor Mabud ar Iakubor-o Mabud.” Ikan hunia-u Musae tan muk lukailla. Allar bae saite tan dilo ḍor hamaigelo.
EXO 3:7 Mabude ḳoila, “Ami Mishor desho amar bonda oḳlor duḳ-mosibot dekiar. Mishori shordar oḳlor zulumor lagi tarar ḳandon huniar. Tarar duk-koshṭo hoḳolta ami deḳsi.
EXO 3:8 Dekia Mishori oḳlor at taki tarare basaitam ḳori ami nize lamia aisi. Te ami tarare Mishor taki horaia nimugi. Nia roshail zomir bout boṛo shundor eḳ desh dimu. Ikan dud ar mour banḍar-ala desh. Ou desh oilo oḳonkur Kenani, Hiṭṭi, Amuri, Farizi, Hibbi ar Zibuzi oḳlor desh.
EXO 3:9 Boni Israilor foriad amar dorbaro aise, Mishori oḳole tarare zela sataira, ita ami dekiar.
EXO 3:10 Erlagi ami tumare Feraunor gese faṭaiar. Tumi zao, gia amar bonda Boni Israilre Mishor taki bar ḳoria ano.”
EXO 3:11 Musae zuaf dila, “Ami aroḳzon ḳe, zein Feraunor samne gia Mishor desh taki tarare horaitam farmu?”
EXO 3:12 Allae ḳoila, “Ami to tumar loge loge roimu. Tumi Mishor taki manshore horaia ania, tarare loia ou faṛo amar ebadot ḳorbae. Teu buzbae ami-u tumare faṭaisi.”
EXO 3:13 Musae aroz ḳorla, “Deḳoukka, ami zebla Boni Israilre gia ḳoimu, tumrar baf-dadar Mabude amare faṭaisoin, ou shomoy tara zudi zikain tan nam kita, te tarare kita zuaf ditam?”
EXO 3:14 Allae ḳoila, “Ami zein asi, asi-u. Boni Israilre oula ḳoio, zen nam ‘Ami asi’ tain amare tumrar gese faṭaisoin.”
EXO 3:15 Tain aro ḳoila, “Tumi gia tarare ḳoio, ‘Hou Alla zein hor-hamesha asoin, ein tumrar baf-dadar Mabud, Ibrahimor Mabud, Isʼhakor Mabud ar Iakubor-o Mabud, ein-u amare tumrar gese faṭaisoin.’ “Amar hor-hameshakur nam ‘Ami zein asi’. Zuge zuge, furushe furushe ou nam ḳaim roibo.
EXO 3:16 Tumi zao, gia Boni Israilor murobbi oḳolre ekḳano dola ḳoria ḳo, hou Alla, zein tumrar baf-dadar Mabud, Ibrahim, Isʼhak ar Iakubor Mabud, tain amare didar dia ḳoisoin, tain tumrar bae kial ḳorsoin, tumrar ufror zulum-mosibot deḳsoin, Mishor desho tumrar bae zeta ḳora or eota tain kial ḳorsoin.
EXO 3:17 Oḳon tain ḳoira, Mishoror gulami taki tumrare basaia Kenani, Hiṭṭi, Amuri, Farizi, Hibbi ar Zibuzi oḳlor dud ar mour banḍar-ala desho tain tumrare nibagi.”
EXO 3:18 Allae aro ḳoila, “Boni Israilor murobbi oḳole tumar ḳota hunba, tumi tarare loge loia Mishoror bashshar gese zaio. Gia ḳoio, ‘Alla zein Ibrani oḳlor Mabud, tain amare doroshon disoin. Erlagi amra tan name ekkan kurbani kortam saiar, amra morubumir bae tin dinor fot gia kurbani dimu, te amrare zaoar onumoti deukka.’
EXO 3:19 Oile ami zani Mishoror bashshae tumrare zaite dito nae, zur-zobordosti korle-o dito nae.
EXO 3:20 Teu ami amar kudroti at lagaimu ar oula asanok gozob nazil ḳormu, zate he tumrare zaite dey.
EXO 3:21 Ar ami Mishori oḳlor dilor maze Boni Israilor bae emon eḳ doyar bab foyda ḳoraimu, era zanu Mishor taki kali ate na zain.
EXO 3:22 Hoḳol Israili beṭinte tarar ari-fori ba zerar baṛit tara roin, oula Mishori beṭintor ges taki tarar shuna-rufar goyna-gaṭi ar bala ḳafoṛ-sufoṛ kuzia nio. Ota dia tumrar fua-fuṛinre-o hazaio, ou nomunae tumra Mishorintor don-samana doḳol ḳorbae.”
EXO 4:1 Musae zuaf dila, “O Mabud, tara zudi amare ekin na ḳoroin, amar mat na hunoin ba tara zudi koin, Mabude tumare doroshon disoin na, te ami kita ḳortam?”
EXO 4:2 Teu Allae tane zikaila, “Tumar ato igu kita?” Tain ḳoila, “Egu laṭi.”
EXO 4:3 Allae ḳoila, “Oḳṭa maṭit falao.” Musae laṭire maṭit falaite-u iṭa haf oigelo. Haf dekia-u tain faldi hori gela.
EXO 4:4 Allae tane hukum ḳorla, “At baṛaia ogur lenjo doro.” Ar tain dorar loge loge ogu hirbar laṭi oigelo.
EXO 4:5 Bade Allae ḳoila, “Tumi-o oula ḳorio, teu tara hasau ekin ḳorba tarar baf-dadaintor Mabud, Ibrahimor Mabud, Isʼhakor Mabud ar Iakubor Mabude tumare doroshon disoin.”
EXO 4:6 Allae aro ḳoila, “Tumar at tumar saddoror tole harao.” Tain at haraila, ar bar ḳorar bade-u tan at kusṭo-dolbeda bemare dudor laḳan dola oigelo.
EXO 4:7 Allae ḳoila, “Tumar at hirbar hono harao.” Tain haraila ar saddoror tol taki bar ḳoria deḳoin, agor laḳan bala oigese.
EXO 4:8 Allae ḳoila, “Tara zudi tumare ekin na ḳoroin, te tumar laṭire haf oa deḳle ekin ḳorba, ar eoṭae ekin na ḳorle tumar ator bemaror keramoti deḳle tara ekin ḳorba.
EXO 4:9 Ar zudi i duio keramotie-o ekin na ḳoroin, tumar ḳota na manoin, te tumi Nil nod taki tuṛa fani ania hukna maṭit falaio, deḳbae maṭit foṛia-u i fani lou oizibo.”
EXO 4:10 Ou Musae Mabudre ḳoila, “O malik, ami to bala ḳori mat-ḳota-u mattam fari na, age-o fartam na ar afne i gulamor loge batchit ḳorar bade-o fari na, amar to zifra baṛua.”
EXO 4:11 Allae ḳoila, “Manshor muk ke banaise, ami nae ni? Ḳe manshore buba, ḳalua ba anda banain? Souke deḳar lagi sokur faoar ḳe dein? Ita to ami Allae-u dei na ni?
EXO 4:12 Te tumi zao, gia kita matitae ami hikaia dimu. Tumar mukor zobanre ami shaijjo ḳormu.”
EXO 4:13 Tain ḳoila, “O malik, ami minot ḳoriar, oinno ḳeurore faṭai deukka.”
EXO 4:14 Ou Musar ufre Mabudor gusa uṭlo. Tain ḳoila, “Tumar bai Harun bin Lebi ase na ni? Ami zani, he bala boktita dito fare. He oḳon tumar loge deḳa ḳorat ar, tumare dekia he kub kushi oibo.
EXO 4:15 Tumi hikaia dio ar ḳoio he kita matito. Ami tumra duiozonor mukor zobanre shaijjo ḳormu. Ar hono gia kita ḳortae ami hikaia dimu.
EXO 4:16 Tumar bai Harunor muk oibo tumar muk, he tumar oia manshor loge matibo. Fegambor oḳole zela Allar kalam ḳoin, Harune oula tumar buli koibo.
EXO 4:17 Ou laṭi tumar ato rakio, iṭa dia hou keramoti-muzeza oḳol zair ḳorbae.”
EXO 4:18 Madian desho taḳte-u Mabude Musare hukum ḳorsla, “Tumi Mishoro zaogi, ḳaron Mishoror zeta manshe tumare kun ḳorta saisla, ita oḳon mori gesoin.” Teu Musae tan hour Shuaibor ḳasat gia ḳoila, “Ami amar zonom maṭi Mishor desho zaitam sairam, amar ḳesh-kuṭum oḳol zita asoin ki na, tarar hal-hokikot deḳat zaitam, te amare zaoar onumoti deukka.” Houre ḳoila, “Aichcha, sohi-salamote zao.”
EXO 4:20 Ou Musae tan bibi ar fuaintore gadar ufre soṛaia Mishoror fote roana oila. Tan ato Allai keramotir hou laṭi raḳla.
EXO 4:21 Allae Musare hukum dila, “Tumi Mishoro gia harle amar deoa keramoti oḳol Feraunor samne deḳaio, oile ami tar dilre fashan banailimu, he manshore saṛto nae.
EXO 4:22 Tumi Feraunre ḳoio, Mabude nize ḳoisoin, ‘Boni Israil to amar foyla futor laḳan.
EXO 4:23 Ami nize tumare hukum ḳorslam, amar ebadoto zaita ḳori tumi amar futre saṛi ditae, oile tumi mancho na. Erdae ami-o tumar foyla futre marilimu.’ ”
EXO 4:24 Bade Mishoro zaoar foto rait ḳaṭaibar zagat aile Mabude Musare marilita ḳori mukamuki oila.
EXO 4:25 Oile tan bibi Sofurae ekkan darail fattor loia tan fuar mosolmani korailla ar oḳṭa tan zamai Musar faor maze soaia ḳoila, “Lour bodla ami tumare zamai hishabe faisi.”
EXO 4:26 Teu Musare Mabude saṛidila. Mosolmani kamor befare Sofurae to ou ḳota-u ḳoisla.
EXO 4:27 Ermaze Mabude Harunre ḳoila, “Tumi morubumit gia Musar loge deḳa ḳoro.” Ou tain gela ar Allar faṛ Turor gese aia Musare faia suma dila.
EXO 4:28 Ar Mabude zeta zeta ḳoibar lagi Musare hukum disla, Musae ita hokkolta Harunre zanaila. Mabude zoto laḳan keramoti-muzeza deḳanir hukum disoin, ita hoḳolta-u tain Harunre buzaila.
EXO 4:29 Bade Musa ar Harun Mishor desho gia Boni Israilor hoḳol murobbire dola ḳorla.
EXO 4:30 Mabude Musare zotota ḳoisla, Harune ita hoḳolta tarare zanaila, ar hou keramoti oḳol-o manshor samne deḳaila.
EXO 4:31 Erlagi manshe ita ekin ḳorla. Tara zebla hunla, Mabude tarar bae kial ḳorsoin, tarar ufror zulum-mosibot deḳsoin, ou tara tanre soizda ḳorla.
EXO 5:1 Musa ar Harune gia Feraunre ḳoila, “Mabud, zein Boni Israilor Alla, tain nize ḳoisoin, amar bonda oḳolre tumi saṛi deo, amar name hoj ḳorar lagi, tara morubumit hizrot ḳorte oibo, tumi tarare saṛo.”
EXO 5:2 Feraune zuaf dilo, “I Mabud aroḳzon ḳe, zen hukum mania ami Boni Israilre saṛi ditam? Ila kunu Mabudre ami sini na, ar Boni Israilre-o ami saṛtam nae.”
EXO 5:3 Tara ḳoila, “Ibrani oḳlor Allae amrare doroshon disoin. Erlagi amra minot ḳoriar amrare morubumir bae tin dinor fot gia, amrar Mabud Allar name kurbani korte deukka, arnae tain amrare gozobi bemar dia ba zuddor maze falaia marilaiba.”
EXO 5:4 Mishoror bashshae zuaf dila, “O Musa ar Harun, tumra manshore ḳene ḳamo taki firairae? Zao, tumra-o gia ḳamo lago.
EXO 5:5 Deḳrae ni, desho tumrar manush bout baṛigesoin, ar tumrar lai faia itae kunu ḳam ḳorra na.”
EXO 5:6 Ou Feraune hou din-u Mishori zalim shordar ar Ibrani subedar oḳolre hukum ḳorla,
EXO 5:7 “Iṭ banaibar lagi tumra manshore agor laḳan ḳer-nera ania dio na, tara gia ita zugaṛ ḳorouk.
EXO 5:8 Oile age tara zotoḳan iṭ banaito oḳono otoḳan banaite oibo, ekkan-o ḳom oito nae. Ita alshia oigesoin ḳori, ono aia tarar Allar namor kurbani korta ḳoia sillaira.
EXO 5:9 Tumra tarare aro ḳoshṭor ḳamo lagao, teu itae kunu laḳan baze mat na hunia ḳamor maze mon diba.”
EXO 5:10 Ou hi shordar ar subedar oḳol baroi gia manshore ḳoila, “Feraune ḳoisoin, oḳon taki tain ar iṭ bananir ḳer zugai dita nae.
EXO 5:11 Tumra zen taki faro ḳer-nera zugaio, oile tumrar ḳam kunta-u ḳomail oito nae.”
EXO 5:12 Ou manshe ḳer-nera tukaibar lagi hara Mishor desho sitri gela.
EXO 5:13 Ar shordar oḳole bare bare tagda dia ḳoilo, “Age ḳer zugaia deoar bala tumra forteḳ din zotoḳan iṭ banaitae, oḳono otoḳan banao.”
EXO 5:14 Feraunor zalim shordar oḳole Boni Israilor ufre ze subedar lagaisil, hou shordar oḳol aia subedar oḳolre mair-doir ḳoria zikailo, “Tumra age zotoḳan iṭ ditae, oḳon otoḳan deo na ḳene?”
EXO 5:15 Ou Boni Israilor subedar oḳole aia Feraunor gese nalish dila, “Afnar i gulam oḳlor loge ila bebohar ḳene ḳorra?
EXO 5:16 Shordar oḳole amrare ḳer-nera zugai dein na, ta-o iṭ banaibar hukum dein ar afnar i gulam oḳolre mair-doir ḳoroin, oile dush to afnar nizor shordaror.”
EXO 5:17 Feraune zuaf dilo, “Tumra alshia, kuṛia, erlagi koirae Mabudor name kurbani korat zaitam.
EXO 5:18 Zao, ḳam ḳoro gia. Tumrare ḳer deoa zaito nae, ta-o forteḳ din zotoḳan iṭ banaibar ḳota asil, otoḳan-u banaite oibo.”
EXO 5:19 Ou Boni Israilor subedar oḳole buzla, tara bifodor maze foṛsoin, ḳaron tarare hukum ḳora oise, age zotoḳan iṭ banani lagto, oḳono otoḳan iṭ banaite oibo, ḳom oito nae.
EXO 5:20 Tara Feraunor ges taki zaoar foto Musa ar Harunor loge deḳa oilo, era ubaia bar saoat asla.
EXO 5:21 Subedar oḳole ḳoila, “Mabude afnarar faona shaza diba, afnara Feraun ar tar uzir-naziror gese amrare fosa-ganda banaia, amrare kun ḳorar lagi toluar nia tarar ato disoin.”
EXO 5:22 Ou Musae hirbar gia Mabudor gese foriad ḳorla, “O din duniar malik, tumi kene tumar bondare mosiboto falailae? Ar amare kitallagi faṭailae?
EXO 5:23 Feraunor gese tumar ḳota hunanir bad taki-u tumar bonda oḳlor ufre zulum to aro baṛise. Oile tumi to kunta-u ḳorlae na.”
EXO 6:1 Mabude Musare ḳoila, “Feraunor kita dosha oy tumi dekio, amar ator zur deḳle-u he manshore saṛi dibo. Zurala ator kudrot deḳle-u he tar desh taki erare ḳedai dibo.”
EXO 6:2 Allae Musar loge batchit ḳori koila, “Amar nam-u ‘Alla zein asoin’.
EXO 6:3 Ami Ibrahim, Isʼhak ar Iakubor gese Shorbo-shoktiman Alla name didar ditam, ‘Alla zein asoin’ name tarare didar ditam na.
EXO 6:4 Ami tarar loge ou oada ḳorslam, ami tumrare Kenan desh dimu, ze desho tumra musafir oia ro, ou desh-u ami tumrare dimu.
EXO 6:5 Ḳas ḳori Mishori oḳole Boni Israilre gulami koranir lagi erar ḳandon hunia, amar hou oada oḳon iad ḳorlam.
EXO 6:6 Erlagi tumi gia Boni Israilre ḳo, Mabude ḳoisoin, ami Mabud, ami tumrare Mishori oḳlor tol taki bar ḳoria anmu, tarar gulami taki azad ḳormu. Tarare deḳar moto shaza dia, amar kudroti atdi tumrare ḳalas ḳormu.
EXO 6:7 Heshe tumrare amar nizor bonda banaimu, ami nize tumrar Alla oimu. Teu tumra buzbae, ami Alla-u tumrar Mabud, ar Mishori oḳlor baror tol taki ami-u tumrare basaisi.
EXO 6:8 Ami Ibrahim, Isʼhak, Iakubor loge ze deshor ḳota oada ḳorsi, hou desho tumrare loia zaimu, tumra hou deshor malik oibae. Ami-u Mabud.”
EXO 6:9 Musae gia ita hoḳolta tarare zanaila, oile hi betaya zulum-toklif ar gulami korte ḳorte mon-mora oizaoae, tara ar Musar mate ḳan dila na.
EXO 6:10 Ou Mabude Musare ḳoila,
EXO 6:11 “Tumi gia Mishoror bashsha Feraunre ḳo, he zanu tar desh taki erare zaite dey.”
EXO 6:12 Musae zuaf dila, “Boni Israile-u zebla amar mat huner na, te Feraune kila hunbo? Ar amar to matte muko lagizae.”
EXO 6:13 Teu Mabude Musa ar Harunre ḳoila, “Tumra Boni Israil ar Mishoror raza Feraunre ḳo, Mabude amrare hukum disoin, Boni Israilre Mishor taki bar ḳori neoar lagi.”
EXO 6:14 Boni Israil zatir mul murobbi oila Hozrot Iakub, Allae ou Iakubor noya nam disla Israil. Tan fuain oila Ruben, Shimion, Lebi shoho muṭ barozon. Musa ar Harun oila ou Hozrot Lebir bongshodor. Israilor boṛo fua Rubenor fuain oila Honuk, Falu, Hasir ar Kormi, era to Ruben ḳandanor nanan gusṭir mul murobbi.
EXO 6:15 Shimionor fuain oila Zimuel, Zamin, Ohod, Zakin, Shuhor ar tar Kenani bour torofa fua Shoul, era Shimion ḳandanor nanan gusṭir mul murobbi.
EXO 6:16 Ḳandan talika hishabe Hozrot Lebir fuain oila Zarsun, Kahat ar Marari. Lebi eḳ-sho shaṛtish boros basisla.
EXO 6:17 Zarzir gusṭir fordan hishabe Zarsunor fuain oila Libni ar Shimei.
EXO 6:18 Kahator fuain oila Imran, Izhar, Hebron ar Ujjol. Kahat eḳ-sho tetrish boros basisla.
EXO 6:19 Mararir fuain oila, Moholi ar Mushi. Era-u oila Lebi kandanor nanan gusṭir mul murobbi.
EXO 6:20 Imranor fuain oila Musa ar Harun. Imrane tan fufu Iukabezre bia ḳorsla, tan feṭo erar zonom oisil. Imran eḳ-sho shaṛtish boros basisla.
EXO 6:21 Izharor fuain oila Kurah, Nefog, Zikri.
EXO 6:22 Ujjolor fuain Mishayel, Elzafon ar Zitri.
EXO 6:23 Ar Harune Aminadabor fuṛi Nahishor boin Ilishebare bia ḳorae, tan hurutta oila Nadab, Abihu, Ali-Azor ar Isamar.
EXO 6:24 Kurahor fuain oila Oshir, Ilkana, Obiashof. Era Kurahi oḳlor nanan gusṭir mul murobbi.
EXO 6:25 Ali-Azoror fua oila Finohosh. Harunor fua Ali-Azore Fuṭielor fuṛire bia ḳorae tair feṭo Finohoshor zonom oisil. Era oila Lebi kandanor nanan gusṭir mul murobbi.
EXO 6:26 Ou Harun ar Musare Mabude hukum ḳorsla, tumra Boni Israilre sifai dolor laḳan hazia Mishor taki bar ḳoro.
EXO 6:27 Musa ar Harune-u Boni Israilre Mishor taki bar ḳori anar ḳota Mishoror bashsha Feraunor loge matisla.
EXO 6:28 Mabude Musar loge zedin Mishor desho batchit ḳorla,
EXO 6:29 hou din tain ḳoila, “Ami Mabud. Te tumare oḳon zeta zeta ḳoimu, ita hoḳolta tumi Mishoror bashsha Feraunre ḳoio.”
EXO 6:30 Musae Mabudor dorbaro aroz ḳorla, “Deḳoukka, amar to matte muko lagizae, Feraune kunu amar mat hunbo ni?”
EXO 7:1 Ou Mabude Musare ḳoila “Huno, ami Feraunor gese tumare Allar laḳan banaimu. Ar tumar bai Harunre banaimu tumar nobi.
EXO 7:2 Ami tumare zela hukum ḳormu, tumi oula Harunre ḳoibae, ar Harune ota Feraunre ḳoibo; zate he Boni Israilre tar desh taki saṛi dey.
EXO 7:3 Oile ami Feraunor dilre fashan ḳorilimu. Mishor desho ami bout keramoti ar kudroti lila-ḳela deḳaimu.
EXO 7:4 Tar bade-o Feraune tumrar mator dam dito nae. Teu ami Mishoror ufre amar at lagaia, deḳar moto shaza dia Mishor desh taki amar nizor bonda Boni Israilre sifair laḳan dole dole bar ḳormu.
EXO 7:5 Mishoror maze amar nizor at lagaimu, Mishori oḳlor maz taki Boni Israilre bar ḳoria anmu, oudin tara buzba ami-u Mabud.”
EXO 7:6 Bade Musa ar Harune oula ḳorla, Mabudor hukum mafik kam ḳorla.
EXO 7:7 Feraunor loge mat-ḳotar shomoy Musar boyosh asil ashi, ar Harunor tirashi boros.
EXO 7:8 Ou shomoy Mabude Musa ar Harunre ḳoila,
EXO 7:9 “Feraune zebla ḳoibo, tumrar nizor kunu keramoti kam deḳao, teu tumi Harunre ḳoio, tar laṭi nia Feraunor samne falaito, falanir loge loge-u iṭa haf oizibo.”
EXO 7:10 Bade Musa ar Harun Feraunor gese gela, gia Mabudor hukum mafik kam ḳorla. Harune Feraun ar tar uzir-naziror samne hou laṭi falanir loge loge-u iṭa haf oigelo.
EXO 7:11 Ou Feraune-o tar gunin ar zadugir oḳolre anailo, tara-o tarar zadu-montro dia oula deḳaila.
EXO 7:12 Tara hoḳole-u zarzir laṭi saṛlo, ar eota haf oigelo, oile Harunor laṭie tarar hokkol laṭire gilililo.
EXO 7:13 Ita dekia-o Feraunor dil fashan roilo, he erar mate ḳan dilo na, zela Mabude age ḳoisla.
EXO 7:14 Bade Mabude Musare ḳoila, “Feraunor dil to fashan, he manshore saṛte razi nae.
EXO 7:15 Te tumi biani bala Feraunor gese zaio, gele deḳbae he fanir gese zaibo, tumi tar loge deḳa ḳorar lagi Nil nodor faro ubaio. Tumar ze laṭi haf oisil, ou laṭi ato ḳori nio.
EXO 7:16 Nia tare ḳoio, ‘Mabud, zein Ibrani oḳlor Alla, tain nize amare faṭaisoin afnare oḳan ḳoitam, tumi amar bonda oḳolre saṛi deo, tara amar bondegi korar lagi morubumit hizrot ḳorouk, ta-o oḳono tumi hunrae na.
EXO 7:17 Erlagi oḳon tumi buzbae, ami-u Mabud.’ Oḳan ḳoia hari tumi koio, ‘Deḳoukka, ami nizor ator laṭi dia ou Nil nodor fanit baṛi marmu, ar hokkol fani lou oizibo.
EXO 7:18 Hokkol mas morizibo ar fosa gondo bar oibo, teu Mishori oḳole ou Nil nodor fani kaita farta nae.’ ”
EXO 7:19 Mabude Musare ḳoila, “Harunre ou ḳota ḳo, tumi nizor laṭi loia Mishori oḳlor hokkol fanir ufre, deshor gang-nala, ḳal-bil, aor-baor sairobae tumar at baṛao, teu itar hokkol fani lou oizibo. Fattor kudia banail ba laḳṛir fatil-ḳoloshor maze toa fani-o lou oizibo.”
EXO 7:20 Ou Musa ar Harune Mabudor hukum mafik oula ḳorla, tain laṭi usa ḳori Feraun ar tar uzir-naziror samne Nil nodor fanit baṛi marla, teu hoḳol fani lou oigelo.
EXO 7:21 Nil nodor hoḳol mas morigelo, hoḳol fanit fosa gondo bar oilo, Mishori oḳole fani ar ḳaita farla na, Mishor deshor hoḳol fani lou oigelo.
EXO 7:22 Mishori zadugir oḳole-o tarar zadu-montro saṛia oula ḳorlo, ete Feraunor dil fashan roilo. He erar mato ḳan dilo na, zela Mabude age ḳoisla.
EXO 7:23 Bade Feraune Musa ar Harunre fis dia tar razbaṛit gelogi, ita kuntat-u ḳan dilo na.
EXO 7:24 Oile kunu Mishorie gangor fani kaite na farae, fani kaoar lagi gangor faror sairobae tara gat kudila.
EXO 7:25 Nil nodor fanit Mabudor gozob nazil oar bade shat din guzori gelo.
EXO 8:1 Ou shat din bade Mabude Musare ḳoila, “Tumi Feraunor gese zao, gia tare ḳo, Mabude nize ḳoira, amar kezmot ḳorar lagi amar bonda oḳolre saṛi deo.
EXO 8:2 Tarare na saṛia kunu bada dile, ami beng dia tumar asta desho gozob ḍalmu.
EXO 8:3 Asta Nil nod benge boriziba, ar ita aia tumar razbaṛit, hutibar goro, tumar bisnat uṭiba. Ar tumar uzir-naziror goro, tumar proza oḳlor goro, tumar undal ar fiṭa banaibar gamlat-o aia hamaiba.
EXO 8:4 Tumar, ar tumar uzir-naziror, ar proza oḳlor gotro beng uṭiba.”
EXO 8:5 Bade Mabude Musare ḳoila, “Harunre ḳo, tumi Nil nod ar ḳal-bilor ufre hou laṭiala at baṛaia asta Mishoro beng anao.”
EXO 8:6 Ou Harune Mishoror hoḳol fanir ufre tan at baṛaila, teu bengainte aia Mishor desh boria jam oigela, kunu zaga ḳali roilo na.
EXO 8:7 Oile zadugir oḳole-o tarar zadu-montro dia Mishoro oula beng anlo.
EXO 8:8 Bade Feraune Musa ar Harunre anaia ḳoila, “Mabudor gese aroz ḳoro, tain amar ges taki ar amar proza oḳlor ges taki i beng oḳol horaia neukka, taile ami manshore saṛi dimu, zate tara gia Mabudor name kurbani korto fare.”
EXO 8:9 Ougi Musae Feraunre ḳoila, “Afne amare ṭik kori koukka, ami kun shomoykur lagi minoti kortam, kun shomoy afnar gor, afnar uzir-nazir ar proza oḳlor gor taki beng oḳol horia zaitagi, gia ḳali gango roita?”
EXO 8:10 Tain ḳoila “Ḳailkur lagi.” Ou Musae ḳoila, “Afnar zoban moto-u ouk, zate afne buzta faroin, amrar Mabud Allar homani ar ḳeu nai.
EXO 8:11 Bengainte afnar ges taki, afnar gor-baṛi taki, afnar uzir-nazir ar proza oḳlor gor taki horia gia ḳali Nil nodo roiba.”
EXO 8:12 Musa ar Harun Feraunor ges taki bare gela, gia Musae Mabudor gese foriad ḳorla, Feraunor ufor taki bengor gozob horanir lagi.
EXO 8:13 Mabude Musar arzi kobul ḳorae, tarar baṛi-gor, uṭan ar bondor hoḳol beng morigelo.
EXO 8:14 Ar manshe itare zagae zagae dola ḳorle, fosia desho gondo bar oilo.
EXO 8:15 Oile Feraune zebla deḳlo, gozob to horigese, ou he tar dil fashan ḳorillo. Erar mato ar ḳan dilo na, zela Mabude age ḳoisla.
EXO 8:16 Bade Mabude Musare ḳoila, “Tumi Harunre ḳo, tumi tumar laṭi baṛaia maṭir dulit baṛi maro, teu i duil mosha oia asta Mishor desh borizibo.”
EXO 8:17 Tara oula ḳorla, Harune tan laṭiala at baṛaia maṭir dulit baṛi marla, teu maṭir hokkol duil mosha oigelo. Ou moshae manush, zanuar ar Mishoror hokkolbae borigelo.
EXO 8:18 Ar zadugir oḳole-o tarar zadu-montro dia oula mosha banaito sailo, oile farlo na. Manush ar zanuaror maze mosha roilo.
EXO 8:19 Teu zadugir oḳole Feraunre ḳoila, “Ita to Allar kudrot.” Ta-o Feraunor dil fashan roilo, he erar mate ḳan dilo na, zela Mabude age ḳoisla.
EXO 8:20 Bade Mabude Musare ḳoila, “Tumi fozore uṭia Feraunor gese azir o, gele deḳbae he fanir gese aibo. Tumi tare oula ḳoio, Mabude nize ḳoira, amar kezmot ḳorar lagi tumi amar bonda oḳolre saṛi deo.
EXO 8:21 Zudi na saṛo taile ami tumar, tumar uzir-nazir, tumar proza oḳlor ufre, ar tumar goraintor maze ḳamṛaora ḍash-masir fal faṭaimu, ita fale fale aia Mishori oḳlor goro ar tarar boshot-biṭa shoho hoḳol zagat jam oiziba.
EXO 8:22 Oile ami amar bonda oḳlor boshot ḳana Gushon elaḳare ita taki basaimu, ino ḍash-masir fal aita nae. Teu tumi buztae farbae, ami Alla i desho asi.
EXO 8:23 Ami to amar bonda ar tumar prozar maze tofat-partokko ḳormu, ḳail i nomuna deḳbae.”
EXO 8:24 Ar Mabude oula ḳorla, Feraun ar tar uzir-naziror goro ḳamṛaora ḍash-masir fal ailo, asta Mishor deshor hokkolbae ḍash-masir lagi shorbonash oigelo.
EXO 8:25 Teu Feraune Musa ar Harunre ḍaḳaia ḳoila, “Tumra zao, deshor bitre tumrar Allar name kurbani korogi.”
EXO 8:26 Musae ḳoila, “Ila ḳora ṭik nae, ḳaron amrar Mabud Allar name Mishori oḳlor ginna ḳora kurbani korte oibo. Ar deḳoukka, Mishori oḳlor samne tarar ginna ḳora kurbani korle tara to amrare fattordi iṭaia mariliba.
EXO 8:27 Te amrar Mabud Allae zela hukum ḳorba, amra morubumir bae tin dinor fot horia gia, tan name oula kurbani kormu.”
EXO 8:28 Feraune ḳoila, “Ami tumrare saṛi diar, tumra morubumit gia tumrar Allar kurbani koro. Oile beshi duroi zaio na, tumra amar lagi-o minot ḳorio.”
EXO 8:29 Ou Musae ḳoila, “Deḳoukka, ami afnar ges taki horia gia Mabudor gese minoti kormu, teu ḳail afnar ges taki, afnar uzir-nazir ar afnar proza oḳlor ges taki ḍash-masir fal horiziba. Oile manshe Mabudor kurbani korat zaite afne ar kunu baotabazi koroin na zanu.”
EXO 8:30 Bade Musae Feraunor ges taki gia Mabudor gese minoti korla.
EXO 8:31 Ar Mabude Musar arzi mafik kam ḳorla. Feraun, tar uzir-nazir ar tar proza oḳlor ges taki hokkol ḍash-masi horigela, egu-o roilo na.
EXO 8:32 Oile hirbar Feraune tar dil fashan ḳorillo, manshore saṛlo na.
EXO 9:1 Bade Mabude Musare ḳoila, “Tumi Feraunor ḳasat gia tare ḳo, Mabud, zein Ibrani oḳlor Alla, tain nize ḳoira, amar ebadot ḳorar lagi amar bonda oḳolre saṛi deo.
EXO 9:2 Tarare saṛte razi na oia oḳono bada dile,
EXO 9:3 hunia raḳo, bondor maze tumar foshuintor ufre, guṛaintor, gadaintor, uṭ, ar goru-sagol, meṛaintor ufre-o ami Mabude at dimu, betaya bemaror morki saṛimu.
EXO 9:4 Oile ami Mabude Mishoror ar Boni Israilor foshur maze tofat ḳormu; Boni Israilor kunu foshu morta nae.”
EXO 9:5 Ar Mabude shomoy-o ṭik koria dilaila, samnor ḳail tain desho i kam ḳorba.
EXO 9:6 Hasau bador din Mabude oula-u ḳorla, teu Mishoror hokkol foshu morigela, oile Boni Israilor egu foshu-o morla na.
EXO 9:7 Feraune manushdi kobor loia deḳlo, Boni Israilor egu foshu-o morsoin na; ta-o tar dil fashan roilo, he manshore saṛlo na.
EXO 9:8 Ou Mabude Musa ar Harunre ḳoila, “Tumra duiozone muiṭ boria undalor sali ano, ania Musae ou salire Feraunor samne ufredi siṭai deo.
EXO 9:9 Deḳbaene, ita hara Mishor deshor maze fatla duil oia hoḳol zagar manush ar foshuintor gotro gozobi bish-furi oibo.”
EXO 9:10 Teu tara undalor sali ania Feraunor samne ubaia, Musae ufredi siṭai dila, ete manshor ar foshuintor gotro bish-furi fuṭilo.
EXO 9:11 Ar ou furir lagi zadugir oḳole Musar samne ubaita farla na, hoḳol Mishori ar zadugir oḳlor gotro-o bish-furi oilo.
EXO 9:12 Oile Mabude Feraunor dil fashan ḳorilla. He erar mate ḳan dilo na, zela Mabude age ḳoisla.
EXO 9:13 Bade Mabude Musare ḳoila, “Tumi biane uṭia Feraunor samne ubaia oula ḳoio, Mabud, zein Ibrani oḳlor Alla, tain nize ḳoira, amar ebadot ḳorar lagi amar bonda oḳolre saṛi deo.
EXO 9:14 Naile ifira ami tumar, tumar uzir-nazir ar tumar proza oḳlor maze amar hokkol zator gozob saṛimu. Teu tumi buzbae, hara duniait amar homani keu nai.
EXO 9:15 Er age-u ami amar at baṛaia betaya morki dia tumare ar tumar proza oḳolre martam farlam one, tumi duniai taki binash oigelae one.
EXO 9:16 Ashole erlagi-u ami tumare duniait otodin basaisi, zate tumare amar lila-ḳela deḳai, ar hara duniait amar nam zair oy.
EXO 9:17 Tumi oḳono amar bonda oḳolre saṛrae na, tumar beṭagiri deḳairae,
EXO 9:18 te dekio, ḳail i shomoye ami ou laḳan hil-tufan ar meg dimu, zeta Mishoror zonom taki aiz forzonto kunudin oise na.
EXO 9:19 Erlagi bondor maze tumar foshuin ar zotota ase, itare ania goro harao; manush ba foshuin zeta goro hamaita nae, itar ufre hil foṛia hokkolṭi morba.”
EXO 9:20 Teu Feraunor uzir-naziror maze zera Mabudor zobane ḍoraila, tara zoldi kori nizor gulam ar foshuintore goror bitre anaila.
EXO 9:21 Oile Mabudor zobanre zetae dam dilo na, tarar gulam ar foshuintore bondor maze toilo.
EXO 9:22 Bade Mabude Musare ḳoila, “Tumi asmanor bae nizor at baṛao, teu Mishoror hokkol zagat hil-tufan oibo, Mishoror manush, foshu ar ḳetor hoḳol gas-gasalir ufre ita foṛbo.”
EXO 9:23 Ou Musae tan ator laṭi ufredi tulla, Mabude Mishor deshor ufre megor ḍak-zilkanir loge hil-tufan deoaila; ar asmani ṭaṭa zomino foṛlo.
EXO 9:24 Ou hilor loge megor zilkani ar ṭaṭa-o asil. I laḳan gozobi hil-tufan Mishor deshor zonom taki kunudin-o oise na.
EXO 9:25 Hara Mishor deshor bondor mazor hokkol manush ar foshuintor ufre-o kub zure zure hil foṛlo, ar ḳetor hoḳol foshol nosṭo oigelo ar hoḳol gas-gasali-o bangi gelo.
EXO 9:26 Ḳali Boni Israilor boshot ḳana Gushon elaḳat hil-tufan oilo na.
EXO 9:27 Bade Feraune manush faṭaia Musa ar Harunre anaia ḳoilo, “Ifira ami oforad ḳorsi. Mabud to fak-fobitro, oile ami ar amar proza oḳol oforadi.
EXO 9:28 Te gozobi megor ḍaḳ ar hil-tufan to bout oise, ar zartam fariar na. Erlagi ami oḳon tumrare saṛi dimu, ar aṭḳaitam nae. Tumra amar lagi Mabudor gese minot ḳoro.”
EXO 9:29 Musae tare ḳoila, “Ami ṭaunor baire gia-u Mabudor gese at tulmu, teu megor ḍaḳ, hil-tufan bond oizibo, zate afne buzta faroin i duniai to Mabudor.
EXO 9:30 Oile ami to zani, afne ba afnar uzir-nazir oḳole oḳono Alla Mabudre ḍoraira na.”
EXO 9:31 I shomoy ḳetor hoḳol nalia gas ar barli foshol nosṭo oigelo, ḳaron nalia gasor ful ar barlir soṛa bar oigesil.
EXO 9:32 Oile kunuzator gomor gas boṛo na oae itar ḳeti oilo na.
EXO 9:33 Teu Musae Feraunor samne taki ṭaunor bare gia Mabudor gese at tulla, loge loge megor ḍaḳ, hil-tufan bond oilo, megor zoṛi-o bond oigelo.
EXO 9:34 Oile Feraun ar tar uzir-nazir oḳole meg, megor ḍaḳ ar hil foṛa bond oigese dekia tarar dil fashan ḳorilla. Feraune hirbar guna ḳorlo.
EXO 9:35 Tar dil fashan oizaoae, he Boni Israilre saṛlo na, Mabude age zela Musare ḳoisla.
EXO 10:1 Mabude Musare ḳoila, “Tumi Feraunor gese zao; ami to tar ar tar uzir-naziror dilre fashan ḳorilisi, zate tarar samne ami amar kudroti lila-ḳela deḳaitam fari.
EXO 10:2 Ami Mishori oḳlor ufre zeta zeta ḳoṭin gozob disi, tarar maze kudroti zeta lila-ḳela zair ḳorsi, tumi ita tumar aolad ar nati-futir gese gof ḳortae faro, ar ami-u zen Mabud iṭa buztae faro.”
EXO 10:3 Teu Musa ar Harune Feraunor gese gia ḳoila, “Alla, zein Ibrani oḳlor Mabud, tain nize ḳoira, tumi amar samne mata nuaite ar ḳotodin horail roitae? Huno, tumi amar bonda oḳolre amar ebadot ḳorar lagi saṛi deo.
EXO 10:4 Tarare saṛte razi na oile dekio, ami kail tumar shimanat fongofal oḳol saṛimu.
EXO 10:5 Itae aia tumar asta zominre oula beriliba, kunu manshe maṭi deḳto farto nae. Hil-tufan taki zotota basigese, ḳetor maze zoto gas-gasali roise, ita hokkolta tara ḳailiba.
EXO 10:6 Tumar nizor gor-baṛi, tumar uzir-naziror gorain, ar hokkol Mishori oḳlor gorain boria jam oiziba. Tumar moy-murobbi ar tarar baf-dada oḳole-o duniait tarar zonom taki aiz forzonto kunudin oula deḳsoin na.” Oḳan ḳoia-u tain muk firaia Feraunor ges taki bare gelagi.
EXO 10:7 Feraunor uzir-nazire tare ḳoila, “I beṭae ar ḳotodin amrare sataito? Otar Mabud Allar ebadotor lagi otare saṛi deukka. Afne oḳono kunta buzra na ni, asta Mishor deshnu sarḳar oizar?”
EXO 10:8 Ou Feraune Musa ar Harunre hirbar anailo, anaia ḳoilo, “Tumra zaogi, gia tumrar Mabud Allar ebadot ḳoro. Oile ḳe ḳe zaitae sairae?”
EXO 10:9 Musae ḳoila, “Amra to Mabudor name hojo zairam. Te amrar huruttain, murobbi, fua-fuṛin ar goru-sagol loia zaimu.”
EXO 10:10 Feraune ḳoilo, “Aichcha, ami zudi hasau tumrare hurutta-murutta dia saṛi dei, te tumrar ou Mabud-o zanu tumrar loge oia zaegi. Ḳobordar! Tumrar motlob to bala nae.
EXO 10:11 Na, ila to oito nae, tumrar hokkolta nite ditam nae. Tumra zebla zaitae-u sairae, te ḳali beṭain zaogi.” Oḳan ḳoia hari Feraune tar samne taki Musa ar Harunre ḳedai dilo.
EXO 10:12 Teu Mabude Musare ḳoila, “Tumi Mishor deshor ufre fongofalor lagi at tulo, fongofale aia Mishoror zominor hoḳol gas-gasali kailibo. Hil-tufan taki zotota basise, ita hokkolta ḳailibo.”
EXO 10:13 Musae Mishoror ufre tan laṭi melia dorla, ar Mabude hara din hara rait deshor maze fubali haoa saṛla, ou fubali haoae biane fongofal loia azilo.
EXO 10:14 Hara Mishor deshor ufre fongofale jam oigela. Mishoror hoḳol zagat fongofale gisgis ḳorla, kub beshi fongofal aila, oto fongofal er age-o kunudin oisoin na ar bade-o kunudin oita nae.
EXO 10:15 Tara asta zominor ufor gurilila, desh andair oigelo, ar zominor zoto ḳet, gas-gasali hil-tufan taki basi gesil, ita hokkolta ḳailila. Asta Mishoror kunu gas-gasali ba ḳetor foshol kunta-u roilo na.
EXO 10:16 Feraune zoldi kori Musa ar Harunre anaia ḳoilo, “Ami to tumra ar tumrar Mabud Allar gese gunagar oigesi.
EXO 10:17 Te minot ḳoriar, ḳali ekkan bar amar guna maf ḳori deo. Amar ges taki i moron afodre horai neoar lagi, tumrar Mabud Allare minot ḳoro.”
EXO 10:18 Ou Musae Feraunor ges taki horia gia Mabudor gese minot ḳorla;
EXO 10:19 ar Mabude kub zure fochchima haoa saṛla, itae fongofal oḳolre ḳedaia saf ḳoria Nil doriat falailo, Mishoror kunu zagat egu fuk-o roilo na.
EXO 10:20 Oile Mabude Feraunor dil fashan ḳorilla, he Boni Israilre saṛlo na.
EXO 10:21 Bade Mabude Musare ḳoila, “Tumi asman muka tumar at baṛao; teu hara desho oto gono andair oibo, i andair at dia soa zaibo.”
EXO 10:22 Musae asman muka at baṛaile tin din forzonto hara Mishor desh kub gono andair oilo.
EXO 10:23 Tin din ḳeu ḳeuror muk-o deḳto farlo na, ḳeu zaga taki loṛto farlo na. Oile Boni Israilor hoḳol goro kunu rushnir obab asil na.
EXO 10:24 Feraune Musare anaia ḳoilo, “Zao, tumra gia tumrar Mabudor ebadot ḳoro, tumrar huruttainre-o neogi, ḳali tumrar goru-sagolor fal taḳouk.”
EXO 10:25 Musae ḳoila, “Amrar Mabud Allar name dibar lagi, foshu kurbani ar zalail kurbanir foshuin amrar loge nite oibo.
EXO 10:26 Amrar loge oia amrar foshuin-o zaiba, foshur ekkan kura-o toia zaitam nae. Amrar Mabud Allar ebadotor lagi on taki kurbani kora lagbo, ar kita kita kurbani kortam, ita amra hono na gele ḳoitam fartam nae.”
EXO 10:27 Oile Mabude Feraunor dil fashan ḳorilla, he erare saṛte razi oilo na.
EXO 10:28 Feraune ḳoilo, “Amar samne taki bago. Ḳobordar! Amar mukor samne ar kunudin aio na. Amar samne zedin aibae, hidin zan kuaibae.”
EXO 10:29 Musae ḳoila, “Balare bala! Ami shok koria kunudin-u afnar muk deḳat aitam nae.”
EXO 11:1 Mabude Musare ḳoila, “Ami Feraun ar Mishor deshor ufre ar matro eḳṭa gozob saṛmu, erbade he tumrare ontone saṛidibo, saṛar bala he tumrare ekkebare ḳedai dibo.
EXO 11:2 Tumi Boni Israilre hikai deo, hokkol beṭain-beṭinte tarar Mishori ari-forir ges taki shuna-rufar goyna-gaṭi kuzia neuk.”
EXO 11:3 Ou haloto Mishori oḳlor nozoro maya faite Mabude shaijjo ḳorla. Ermaze Mishor desho Feraunor uzir-nazir ar proza oḳlor gese Hozrot Musa kub ijjoti bonigela.
EXO 11:4 Musae Feraunre ḳoila, “Mabude nize ḳoira, ami ada raitkur bala Mishor deshor mazdi zaimu.
EXO 11:5 Ete godit boa Feraunor boṛo fua taki bara-banra bandir fua forzonto, Mishor deshor maze roura hokkol foribaror boṛo fuain moriziba. Erloge hoḳol foshuintor foyla meda baichcha-o moriziba.
EXO 11:6 I laḳan dosha Mishor desho kunudin oise-o na ar oito-o nae, asta Mishor desho ou laḳan ḳandon ḳandiba.
EXO 11:7 Oile Boni Israilor kunu manush ba foshur bae egu kuttae-o uh ḳorto nae, zate afnara buzta faroin ami Mabude Mishori ar Boni Israilor maze tofat ḳori.”
EXO 11:8 Heshe Musae Feraunre ḳoila, “Ou shomoy afnar hokkol uzir-nazire aia amar faot foṛia ḳoiba, afne afnar hoḳol manshore loia bidae neingi, erbade ami bar oimu.” Oḳan ḳoia tain gusae aguin oia Feraunor ges taki horia gela.
EXO 11:9 Mabude Musare ḳoisla, “Feraune tumar ḳota manto nae, zate Mishor desho amar keramotir foriman aro baṛe.”
EXO 11:10 Erlagi Musa ar Harune Feraunor samne ou keramoti oḳol deḳaila. Oile Mabude Feraunor dilre fashan ḳorilla, he nizor desh taki Boni Israilre saṛlo na.
EXO 12:1 Bade ou Mishor deshor bitre Mabude Musa ar Harunre ḳoila,
EXO 12:2 “I sandḳan bosoror foyla sand oibo, tumra i sandre bosoror foyla sand gonio.
EXO 12:3 Tumitain tamam Boni Israilre dola ḳori zanai deo, ou sandor dosh tariko tumrar hoḳol foribaror murobbie, zarzir foribaror lagi egu ḳori meṛa ba sagolor baichcha nibae.
EXO 12:4 Oile kunu foribaro er gust ḳaoar manush ḳom oile, laga goror manshor loge milia, duio foribare zotoḳan ḳaita faroin, hou onumane meṛa ba sagolor baichcha nibae.
EXO 12:5 I baichcha oibo nikut, eḳ boros boyoshor faṭa baichcha oite oibo; tumra meṛa ba sagolor baichcha nitae farbae.
EXO 12:6 Ar ou sandor souddo tarik forzonto iṭar zoton ḳorbae, bade tamam Boni Israil eḳloge milia, tara hainja bala zarzir foribare ou baichchain zobo ḳorba.
EXO 12:7 Zobo ḳorar bade tara er kisu lou nia zoto goro er gust ḳaiba, oto goror duaror soukaṭor duio galat ar ufror soukaṭo ou lou lagaiba.
EXO 12:8 Hou rait-u tara i gust aguindi sekia ḳamir saṛa ruṭi ar titta hagor loge milaia ḳaiba.
EXO 12:9 I gust tumra ḳasa, ba fanidi randia ḳaio na. Ḳali aguindi sekia ḳaio, er ṭeng, ḳolla shudda bitoror hokkolta ekḳano sekio, bade ḳaio.
EXO 12:10 Rait fuanir age ḳani shesh ḳorio, bian forzonto kunta-u baki toio na. Zudi kunta baki roizae, te aguindi zalailio.
EXO 12:11 I kani kaoar bala tumrar ḳomror ḳafoṛ mozbut ḳori findio, faot zuta lagaio, ator laṭi loio. Zoldi kori kani kaio. Iṭa oilo Mabudor namor Azadi Id.
EXO 12:12 Hou rait-u ami Mishor deshor mazdi zaimu, deshor hokkol manshor boṛo fuare ar foshur foyla meda baichchare-o marilimu. Mishoror hoḳol deb-debir bisar ḳoria shaza dimu; ami-u Mabud.
EXO 12:13 Oile tumrar duaror soukaṭo lefa lou deḳle ami buzmu i goro tumra ro. Erlagi ami Mishor desho gozob ḍalibar shomoy, lou lefa ou gor bad dia samnedi zaimu. Moutor gozob tone tumra rehai faibae.
EXO 12:14 Ou dinre tumra iad rakio ar ami Mabudor name idor din manio. I idre tumra amar hukum mono ḳoria hor-hamesha oarishor for oarish dori mania zaio.”
EXO 12:15 Mabude ḳoila, “Tumra shat din forzonto ḳamir saṛa ruṭi kaibae. Foyla din-u zarzir gor taki hoḳol ḳamir falai dibae. I shato dinor maze zegue ḳamir ala nan ruṭi kaibo, tare Boni Israil tone fusia falail oibo.
EXO 12:16 Foyla din ar shat nombor din tumra fobitro milon-mahfil adae ḳorbae, i dui din ḳali zoruri kaoa-daoa saṛa dusra kunu ḳam-ḳaz ḳorbae na.
EXO 12:17 Ou laḳan tumra Ḳamir Saṛa Ruṭir i id adae ḳorio, amar hukum mono ḳoria oarishor for oarish dori hor-hamesha i id adae ḳorio. Ou din-u ami tumrare sifai dolor laḳan ḳori Mishor desh taki bar ḳori anmu.
EXO 12:18 Tumra foyla sandor souddo tarikor hainja taki shuru ḳoria, ekuish tarikor hainja forzonto ḳamir saṛa ruṭi kaio.
EXO 12:19 Ou shat din zate tumrar goro ḳamiror kunu nam-nishana na taḳe, ou shomoy ḳeu zudi kamir ala ḳani kae, te he tumrar nizor zatir ouk ba bin zatir ouk, tare Boni Israilor shomaz taki fusia falail oibo.
EXO 12:20 I shat din tumra zeno-u ro na ḳene ḳamir ala kunta-u ḳaio na; ḳali kamir saṛa ruṭi kaio.”
EXO 12:21 Musae Boni Israilor hoḳol moy-murobbire dola ḳoria ḳoila, “Afnara zaukka, gia zarzir foribaror lagi Azadi Idor meṛa-baichcha ania zobo ḳoroukka.
EXO 12:22 Ar ‘esub’ gasor eḳ aṭi ḍeṭa loia, fatilo toa lout buṛaia duaror soukaṭor duio galat ar ufre lagaio. Shabdan! Shuruz uṭar age ḳeu goror bare bar oio na.
EXO 12:23 Mishori oḳolre marar lagi Mabude zebla Mishor deshor mazdi toshrif niba, ou shomoy tumrar soukaṭor ufre ar duio galat lou deḳle, tain i gor bad dia samnedi aguaiba. Azrail firistare tumrar goro hamaia marte dita nae.
EXO 12:24 “Amar batail hukum mono ḳoria tumra ar tumrar aolad oḳole i idre adae ḳorio.
EXO 12:25 Ami amar nizor oada mafik tumrare ze desh dimu, hou desho gia harle-o tumra i id adae ḳorio.
EXO 12:26 Tumrar huruttainte zebla tumrare zikaiba, i idor ḳaron kita? Iṭa kila aise?
EXO 12:27 Te tumra zuaf dio, iṭa Mabudor name Azadi Idor kurbani. Mishori oḳolre marbar bala tain Mishor desho Boni Israilor gor bad dia samnedi aguai gia, amrare azad ḳorsla.” Ikan hunia hoḳol manshe Mabudre soizda ḳorla.
EXO 12:28 Musa ar Harunre Mabude zela batai disla, hoḳol Boni Israil tarar goro gia ou laḳan ḳam ḳorla.
EXO 12:29 Heshe maz raite ou laḳan goṭlo, Mabude godit boa Feraunor fua tone zel ḳanar bondir fua forzonto hokkolre marilila. Mishor deshor hokkol foribaror boṛo fuain ar foshuintor foyla meda baichchare-o tain marilila.
EXO 12:30 Teu Feraun ar tar uzir-nazir oḳol, Mishoror hoḳol manush hozag oia uṭla, asta Mishor desho betaya ḳandonor ruil foṛlo; ḳaron ola kunu gor roisil na, ze goro ḳeu na ḳeu morse na.
EXO 12:31 Hou rait-u Feraune Musa ar Harunre anaia ḳoilo, “Tumra zoldi zao, Boni Israilre loia amar prozar ges tone horo. Tumra zela ḳoiso, oula gia Mabudor ebadot ḳoro.
EXO 12:32 Tumrar zoban moto-u tumrar goru-meṛar fal oḳolre-o neogi. Tumra amare-o nek dua deo.”
EXO 12:33 Mishori oḳole kub ḍoraila, tara mono ḳorla tara-o moriziba. Erlagi tara tagda dita lagla, Boni Israil zoldi kori bidae oita.
EXO 12:34 Boni Israile tarar moydar ḳair maze ḳamir furaibar age-u, ḳai shoho gamlain ḳafoṛdi gaiṭ bandia ḳando loila.
EXO 12:35 Hoḳol Boni Israile Musar foramish moto, Mishori oḳlor shuna-rufar goyna-gaṭi ar ḳafoṛ-sufoṛ kuzia nila.
EXO 12:36 Mabude ag tone-u Mishori oḳlor dilor maze eḳ doya-maya foyda ḳorsla, zate Boni Israile zeta kuziba, ota-u zanu tarare dein. Ou laḳan ḳori tara Mishori oḳlor bout don-doulot-o ḳobza ḳorla.
EXO 12:37 Ota nia Boni Israil Ramashesh elaḳa taki Sukkotor muka roana oila. Tarar maze onuman soy laḳ shobol beṭain aṭia gela. Erar loge beṭin ar huruttain-o asla.
EXO 12:38 Boni Israil bade-o tarar loge roura aro bout manush, goru-meṛar fal hoḳolta milia bout boṛo dol bandia roana dila.
EXO 12:39 Bade tara Mishor taki ana hou moydar ḳai dia ḳamir saṛa ruṭi banaila. Mishor taki tarare zoldi kori bidae deoae i kait ḳamir maḳaibar shomoy-u faisla na, ar fotor lagi kunu mosa-o nita farsla na.
EXO 12:40 Boni Israil Mishoro hokkoltae sair-sho tish boros boshot ḳorsla.
EXO 12:41 Ṭik ou sair-sho tish boros fura oibar dino Mabudor hokkol bonda, sifai dolor laḳan hazia Mishor desh taki bar oila.
EXO 12:42 Ou rait Mabude afon kudroti sayae fahara dia tarare Mishor desh taki bar ḳoria anae, i raitḳan ebadotir rait. Hokkol Boni Israilor lagi oarishor for oarish dori, Mabudor name uzagori korar ek kas rait.
EXO 12:43 Mabude Musa ar Harunre ḳoila, “Azadi Idor kurbanir niom-ḳanun ami tumrare hikai diar. Huno, oinno kunu zatir manshore er gust ḳaite dibae na.
EXO 12:44 Oile ḳorida gulame mosolmani koranir bade ita ḳaito farbo.
EXO 12:45 Oinno zekunu zatir musafir ba betondari kamlare-o ita ḳaoaio na.
EXO 12:46 Tumra zar baṛit foshu zobo ḳorbae hou baṛit-u er gust ḳaite oibo; baṛir bare kunta-u nibae na, foshur kunu aḍḍi bangibae na.
EXO 12:47 Tamam Boni Israile ou id adae ḳorbae.
EXO 12:48 Tumrar loge roura kunu abadie zudi Mabudor namor i id manto sae, te foyla tar foribaror hoḳol beṭaintor mosolmani korani lagbo. Bade he Boni Israilor laḳan id adae ḳorto farbo. Oile mosolmani korani saṛa ḳeu i gust ḳaito farto nae.
EXO 12:49 Boni Israilor lagi ar abadir lagi-o eḳ homan ain zari oilo.”
EXO 12:50 Mabude Musa ar Harunre zela hukum disla, Boni Israile hasaror oula-u amol ḳorla.
EXO 12:51 Mabude hou din-u sifai dolor laḳan ḳori, Boni Israil oḳolre Mishor desh taki bar ḳori anla.
EXO 13:1 Mabude Musare hukum dila,
EXO 13:2 “Tumi Boni Israilor hokkol foribaror boṛo fuainre amar name alog koria shofia deo. Ita kunu manshor fua ouk ba foshur baichcha ouk. Hoḳoltar boṛo fuain ḳali amar-u.”
EXO 13:3 Teu Musae manshore ḳoila, “I din ḳanre tumra iad rakio, ou din-u tumra Mishoror gulami taki azad oiso. Mabude tan kudroti at dia tumrare hon taki bar ḳorsoin. I din kunuzator ḳamir ala ḳana ḳaio na.
EXO 13:4 Abib sandor ou tariko tumra bar oilae.
EXO 13:5 Mabude tumrar baf-dadar gese oada ḳorsoin, Kenani, Hiṭṭi, Amuri, Hibbi ar Zibuzi oḳlor desho tumrare nibagi. I desh dud ar mour banḍar-ala desh. Te hono gia harle-o tumra forteḳ bosor Abib sandor ou id adae ḳorio.
EXO 13:6 “Tumra shat din forzonto ḳamir saṛa ruṭi kaio, bade shat nombor dino Mabudor name id adae ḳorio.
EXO 13:7 I shato din ḳamir saṛa ruṭi kaoa lagbo, tumrar gese ḳamir ala kunuzator ḳana zate na deki, tumrar asta deshor bitre-o zanu kunu ḳamir na mile.
EXO 13:8 I din tumra hoḳole zarzir fuaintore ḳoio, ‘Amra zebla Mishor taki bar oia aislam, ou shomoy Mabude amrare zela rohom ḳorsla, otare mono raḳar lagi ami-o oḳon ola ḳorram.’
EXO 13:9 Ou laḳan tumra zarzir aolad oḳolre Mabudor hukum talim dio, zate tumrar mono roy, Mabude tan kudroti at dia tumrare Mishor desh taki bar ḳori anchoin. Tumrar ator ba ḳofalor tabiz-ḳobzor laḳan, ou talimre-o hamesha sokur samne rakio.
EXO 13:10 Erlagi forteḳ boros ou oḳt aile-u tumra i niom adae ḳorio.
EXO 13:11 “Mabude tumrar gese ar tumrar baf-dadaintor gese zela oada ḳorsoin, ou oada mafik tain tumrare Kenani oḳlor desh dan ḳorsoin. Te Mabude hono nia harle,
EXO 13:12 tumra zarzir boṛo fuare Mabudor name shofia dilaio; erloge tumrar hoḳol foshuintor foyla meda baichchare-o Mabudor name dilaio, ita to Mabudor-u.
EXO 13:13 Oile hoḳol gadintor foyla meda baichchar bodla, tumra egu meṛa-baichcha dia ḳalas ḳoraio. Ḳalas na ḳoraile gada baichchar gordona bangi dio. Mono rakio, tumrar hokkol foribaror boṛo fuainre ḳalas ḳorani lagbo.
EXO 13:14 “Tumrar fuainte zebla zikaiba, ita kitar lagi kora lage? Tumra zuaf dio, ‘Mabude tan kudroti at dia amrare Mishoror gulami taki azad ḳori anchoin.
EXO 13:15 Feraune na-humari koria zebla amrare aite dilo na, ou shomoy Mabude Mishor deshor hoḳol foribaror boṛo fuaintore, manshor fuain ar foshuintor foyla meda baichchainre marilla. Ou ḳarone amrar boṛo fuainre Mabudor ges taki kalas ḳorai, ar foshur foyla meda baichchare kurbani dei.
EXO 13:16 Iṭa omon eḳ iadgarir id, at ba ḳofalo banda tabiz-ḳobzor laḳan zanu hamesha sokur samne roy, ar Mabude tan kudroti at dia amrare Mishor taki bar ḳori anchoin, oḳan mono roy.’ ”
EXO 13:17 Feraune Boni Israilre saṛar bade, Filistini oḳlor deshor mazdi shida fot taḳle-o Allae tarare hi fotedi nila na. Allae ḳoila, heshe zudi kunu zuddor mukabila ḳora lage, te manshe zuddor ḍore hirbar Mishoro firizito fare.
EXO 13:18 Erlagi tain manshore Nil doriar faredi morubumi bae neoaila; tamam Boni Israile sifai dolor laḳan hazi-faṛi Mishor desh taki roana oila.
EXO 13:19 Zaoar bala Musa nobie Hozrot Iusufor ḳoybor taki tan aḍḍi-guḍḍi loge ḳori nila. Iusufe Boni Israilre mozbut ḳori kosom ḳorai koisla, “Allae nisoy tumrare hefazot ḳorba, te tumra zaoar bala amar aḍḍiguin tulia loge ḳori niogi.”
EXO 13:20 Bade tara Sukkot gao taki roana oia morubumir kinaro Etom namor zagat aia tambu gaṛila.
EXO 13:21 Ar Mabude tarare fot sinanir lagi dinor bala megor kuṭir surote roita, ar raitor balae for deḳanir lagi agunir kuṭir surote tarar age age zaita, erlagi tara rait-din homane solta farta.
EXO 13:22 Manshor samne hamesha dinor bala megor kuṭi ar raitor bala agunir kuṭi roito.
EXO 14:1 Mabude Musare ḳoila,
EXO 14:2 “Tumi Boni Israilre ḳo, tara guria aia Fama-Hirut namor zagar ḳandat Migdul ar doriar mazamazi, Baal-Zafon elaḳar samne doriar soror maze tambu gaṛita.
EXO 14:3 Ita deḳle Feraune mono ḳorbo, Boni Israile kunubae fot na faia guraguri korte ḳorte morubumit aṭki gesoin.
EXO 14:4 Ami Feraunor dilre fashan banaimu, he tumrar ḳore ḳore ḳedanit aibo. Teu Feraun ar tar sifai oḳolredi amar nam uzila oibo; ita dekia Mishori oḳole-o buziliba, ami-u Mabud.” Mabudor hukum mafik Boni Israile oula ḳorla.
EXO 14:5 Hasau Mishoror bashsha Feraune zebla ḳobor failo, Boni Israil oḳol bagi gesoin, hunia-u Feraun ar tar uzir-naziror dil firigelo. Tara ḳoila, “Hae, hae! Amra ita kita ḳorsi? Itare amrar gulami taki kene saṛlam?”
EXO 14:6 Oḳan ḳoia-u Feraune tar zuddor guṛar gaṛi hazanir hukum dia, tar sifai oḳolre zuit ḳorailo.
EXO 14:7 He tar ḳas shoktiman soy-sho guṛar gaṛi, Mishoror shob guṛar gaṛin ar erar saloḳdar sifaire-o loge loilo.
EXO 14:8 Mabude Mishoror bashsha Feraunor dilre fashan ḳorilla, he Boni Israilor ḳore ḳore ḳedanit ailo. Era zebla himmot ḳori aṭia zaira, ou shomoy he erare dorat ailo.
EXO 14:9 He Mishor deshor hoḳol guṛ-soar sifai, guṛar gaṛiala sifai shoho asta armi dol loia erare dorar lagi erar ḳandat aillo. Ou shomoy Boni Israil oḳol doriar faro Baal-Zafonor samne Fama-Hirutor ḳandat asla.
EXO 14:10 Tara ḳandat aite-u Boni Israile saia deḳla, tarar ḳore oia Mishori sifai aira; dekia-u zanor ḍore Mabudor dorbaro ḳandon lagaila.
EXO 14:11 Tara Musare ḳoila, “Mishoro ḳoybor dibar zaga nai dekia, amrare martae ḳori ou morubumit loia aiso ni? Tumi ita kita ḳorlae? Ḳene amrare Mishor taki bar ḳorlae?
EXO 14:12 Mishoror bitre amra tumare ḳoisi na ni, amrare ono roite deo, amra Mishorintor gulami kori? I morubumit morar saite Mishorintor gulami kora-u to amrar lagi bala asil.”
EXO 14:13 Musae tarare ḳoila, “Tumra ḍoraio na. Hoḳole nirai oia deḳo, Mabude aiz kila basain. Ou zeta Mishorintore oḳon deḳrae, itare ar kunudin-u deḳtae nae.
EXO 14:14 Tumra oḳon shanti o, deḳo, Mabude-u tumrar fokko oia zuddo ḳorba.”
EXO 14:15 Bade Mabude Musare ḳoila, “Tumi kene amar gese ḳandirae? Boni Israilre ḳo na, samnedi aguaita.
EXO 14:16 Ar tumar ator laṭire baṛaia doriar ufre usa ḳori doro, doriare dui bag korilao. Teu tamam Boni Israil hukna bae aṭia doria faroiba.
EXO 14:17 Kial rakio, ami Mishori oḳlor dil ola fashan banaimu, tara erare dorar niote doriat hamaiba. Erbade Feraun, tar sifai, tar guṛar gaṛin, tar guṛ-soar oḳlor mazdi amar zalal-shan zair oibo.
EXO 14:18 Feraunor hal-hokikot dekia baki Mishori oḳole-o buziliba, ami-u Mabud.”
EXO 14:19 Ermaze Allar ze firista Boni Israilor age oia zaoat asla, ein zaga bodlaia Boni Israilor ḳore gelagi. En loge oia kudroti hou megor kuṭi-o samne taki horia ḳore aillo.
EXO 14:20 Ḳore aia Mishori ar Boni Israili duio dolor mazḳano ubailo. Erlagi ou megor kuṭir andaire Mishori oḳol andarit foṛigela, tara raitor bala Boni Israilor ḳanda loita farla na. Oile Boni Israilor samne raitor bala-o megor kuṭir forsha roilo.
EXO 14:21 Bade Musae doriar ufre tan at baṛaila, ar Mabude hara rait kub zure fubali haoa dia doriar fani horaia dui baṭ ḳorilla, doria hukaia mazedi hukna fot bar oilo.
EXO 14:22 Boni Israil oḳole hukna faoe doriar mazdi roana dila, doriar fani tarar ḍaine-baue oalor laḳan ubai roilo.
EXO 14:23 Ita dekia Mishori oḳole tarare ḳedaia doriar hou hukna fotedi gela. Feraunor hokkol guṛar gaṛi, guṛa, ar guṛ-soar oḳol ḳedai kedai doriar hou foto gia hamaila.
EXO 14:24 Ar fotabala Mabude hou kudroti aguin ar megor kuṭi taki Mishori sifair bae lannoti nozore saila, teu tara bedisha lagigela.
EXO 14:25 Tain erar guṛar gaṛir sakka nosṭo ḳori dila, erlagi tarar kub ḳoshṭo ḳoria-o gaṛi salanit roilo; ermaze tara eḳe-oinnore ḳoilo, “Oise, ar bad deo, amra Boni Israilor ḳor tone hori zai. Mabude nize tarar fokko oia amrar loge zuddo ḳorra.”
EXO 14:26 Ou shomoy Mabude Musare ḳoila, “Tumi doriar ufre hirbar at baṛao. Tumar at baṛaile fani hirbar Mishorintor ufre, tarar guṛar gaṛi ar guṛ-soaror ufre aibbo.”
EXO 14:27 Musae doriar ufre at baṛaila, ar bian oar age-u doriar fani hirbar homan oigelo; Mishorinte ḍaine-baue douṛa-douṛi lagaila, oile Mabude tarare doriar fanidi baoai dila.
EXO 14:28 Fani hirbar zagat aillo, tarar guṛar gaṛin, sifain, ar guṛ-soar oḳol, mani Boni Israilor ḳore oia ḳedanit aora hokkolta fanie buṛigelo, egu-o zita roila na.
EXO 14:29 Oile Boni Israil oḳole hukna fote doriar mazdi gela, tarar ḍaine-baue fani oalor laḳan ubai roilo.
EXO 14:30 Ou nomunae Mabude hi din Mishori oḳlor at taki Boni Israilre basaila, tara nizor souke deḳla, Mishorintor mora lash doriar soro foṛia roise.
EXO 14:31 Mishorintor ufre Mabudor kudroti lila-ḳela dekia, Boni Israile-o Mabudre ḍoraigela. Tara Mabudor ufre ar tan gulam Hozrot Musar ufre furafur iman anla.
EXO 15:1 Allar kudrote Nil doria faroia aia harle, Hozrot Musa ar tamam Boni Israile Mabudor name ou shukurana gozol gaila: “Ami Mabudor name gozol gai, hoḳlor samne tan kudroti mohima baṛise, guṛ-soar shudda guṛainre tain-u doriar fanit falaisoin.
EXO 15:2 Alla-u to amar bol, tain-u amar gozol, amare basanir ḳol-ḳobza tan ato ase. Ou Alla-u amar Mabud, amar baf-dadar Mabud, ami tan hamd gaimu, tan lila-ḳelar boyan ḳormu.
EXO 15:3 Mabud oila foyluan sifai, tan nam-u Mabud.
EXO 15:4 Feraunor guṛar gaṛire ar sifaire tain fanit falaila, tar namḳora subedar oḳol Nil doriat buṛia morla.
EXO 15:5 Goin fanie tarare gilillo, ar bari fattoror laḳan tara doriar tole gelagi.
EXO 15:6 O Mabud, tumar ḍain atḳan kudroti lilae bora, tumar ate nichchoy dushmonre surmar ḳorse.
EXO 15:7 Tumar birudde zetae lagsila, kudroti bole tarare goin gato falailae. Tumar faṭail gozobi aguine, hukna ḳer-nerar laḳan tarare zalaililo.
EXO 15:8 Tumar naḳor dome hoḳol fani dola oigelo, fanir fut oḳol zagat ubai roilo, doriar goin fani sakka bonigelo.
EXO 15:9 Dushmone ḳoisil, ‘Ami itare ḳedaia nimu, douṛaia nia dormu, tarar hoḳolta ḳaṛia ania baṭimu. Tarar maldi ami maldar oimu, itadi amar monor ḳaish furaimu. Amar toluardi maria tarar nam miṭailimu.’
EXO 15:10 Oile tumi fu dia batash dilae, ar doriae tarare gurililo, tara shishar laḳan goin fanit tolaigelo.
EXO 15:11 O Mabud, kun deb-debi tumar homan? Ḳe tumar laḳan oto fobitro mohan, ar tumar moto boyonkor kudroti mohima ḳar ase?
EXO 15:12 Tumar bolala ḍain atḳan baṛailae, ar duniae tarare gilililo.
EXO 15:13 Tumar ḳas mayae zerare basaiso, tarare to tumi-u salairae, tumar afon kudroti bole tumar fobitro boshot ḳanat nirae.
EXO 15:14 Ita hunia hokkol zatie ḳafira, Filistini be-din oḳlor mon soṭfoṭ ḳorer.
EXO 15:15 Idumor shordar oḳol ḍoraia bedisha lagigela, Muabor neta oḳole tor-toraia ḳafila, Kenani oḳol ḍoraia horigela.
EXO 15:16 Tarar bitre ḍor-ḳof aia hamaise, tumar ator ṭelae fattoror laḳan nirai oigese. O Mabud, tumar proza oḳol, tumar ḳorida gulam oḳol, furafur far na oa forzonto tumi oula raḳso.
EXO 15:17 Tumi erare nia gasor serar laḳan, tumar nizor faṛo ruibae. O Mabud, hoḳan-u tumar boshot ḳana, tumar afon ator goṛa Herem Shorif.
EXO 15:18 O Mabud, zug zug dori tumi-u ḳali bashshai korbae.”
EXO 15:19 Feraunor guṛain, tar guṛar gaṛin ar guṛ-soar oḳol zebla doriar maze hamaigelo, Mabude tarar ufre doriar fani firai anla, oile Boni Israil hoḳol to hukna fote doriar mazedi age aṭia geslagi.
EXO 15:20 Harunor boin Hozrot Moriom-o nobi asla, tain ḍugi ato loia bazaila, ar baki hoḳol beṭinte-o tan ḳoredi ḍugi loia nasi nasi baroi aila.
EXO 15:21 Ar Moriome-o manshor samne oula gaila: “Tumra Mabudor name gozol gao, hoḳlor samne tan kudroti mohima baṛise, guṛ-soar shudda guṛainre tain-u doriar fanit falaisoin.”
EXO 15:22 Musae Boni Israilre Nil doria taki samnedi loia roana oila, ar Shur namor morubumit gela. Tarar zaoar foto tin din dori kunu fani faila na.
EXO 15:23 Bade tara Marua namor eḳ zagat aila, oile hinor fani-o ḳaita farla na, hinor fani kub titta. Erlagi ou zagar nam laglo Marua [mani, titta].
EXO 15:24 Ar manshe Musar birudde ḳana-ḳani kori koila, “Amra oḳon fani kaitam kila?”
EXO 15:25 Musae Mabudor gese foriad ḳorla, Mabude tanre egu gas deḳai dila, tain hou gasre nia fanit falaila, ar fani miṭa oigelo. Mabude hou zagat Boni Israilor forikka loila, ar tarar lagi niom-ḳanun batai dila.
EXO 15:26 Tain ḳoila, “Tumra zudi kial ḳoria tumrar Mabud Allar kalam huno ar ou laḳan amol ḳoro, ami zeta fosond ḳori ota ḳoro, amar hukum mano, te ami Mabude Mishori oḳolre zeta bemar-azar disi, ita kunu bemar tumrar ufre ditam nae; zano to, ami Mabud tumrar shifa ḳoroneala.”
EXO 15:27 Heshe tara Elimo gia fosla, hino barogu fanir indara ar shottoirgu ḳezur gas asil. Tara ou fanir ḳandat tambu gaṛila.
EXO 16:1 Bade tamam Boni Israile Elim taki roana dilaila. Mishor desh taki baronir bador sandor fonro tariko tara Sin namor morubumit aia azila. Sin oilo Tur faṛ ar Elimor mazḳano.
EXO 16:2 Ou shomoy tamam Boni Israile Musa ar Harunor birudde ḳana-ḳani lagaila.
EXO 16:3 Era duio zonor birudde Boni Israile ḳoila, “Haere hae, itar ḳotae amra ḳene ailam, Mabude ḳene nizor ate amrare Mishor desho marla na? Hi shomoy amra gustor ḍegor ḳandat boitam, feṭ boria gust-ruṭi kaitam, oile itae amrare ufashe ar feṭor buke marta ḳori ono anchoin.”
EXO 16:4 Ikan hunia Mabude Musare ḳoila, “Ami tarare forikka ḳoria deḳmu, tara amar niom-ḳanun manoin ki na. Ami tumrar ḳani megor zoṛir laḳan asman taki zomino saṛimu. Manshe baire aia haftar forteḳ dinor ḳani forti din tulia niba.
EXO 16:5 Ḳali haftar soy nombor dino tara zeta tulia anba, ita toiar ḳorar bade oinno dinor ḳani taki ḍabul oizibo.”
EXO 16:6 Bade Musa ar Harune hokkol Boni Israilre ḳoila, “Mabudor birudde tumra zebla ḳana-ḳani lagaiso, te aiz hainja bala-u buzbae, ou Mabude-u tumrare Mishor taki bar ḳori anchoin.
EXO 16:7 Bian oile-u tumra Mabudor kudroti nur deḳbae, tain to hunchoin, tumra kita ḳana-ḳani korso. Te amra ar kita zen, tumra amrar birudde otota matirae?”
EXO 16:8 Musae tarare ḳoila, “Mabude hainja bala tumrare gust diba, ar biane feṭ bora ruṭi-o diba. Mabudor birudde tumra zeta ḳana-ḳani korso, ita tain hunchoin. Ashole amra duizon kita zen, tumra amrar birudde otota matirae? I mat to amrar birudde nae, tumra Mabudor birudde-u matirae.”
EXO 16:9 Erbade Musae Harunre ḳoila, “Tumi hokkol Boni Israilre zanai deo, tumra Mabudor birudde zeta matiso, ita tain hunchoin. Oḳon tumra aia Mabudor samne azir o.”
EXO 16:10 Teu Harune tarare ou shongbad zanaira, ou shomoy morubumir bae tarar souk foṛte-u deḳoin, megor ḳalnir maze Mabudor kudroti nur zair oise.
EXO 16:11 Ermaze Mabude Musare ḳoila,
EXO 16:12 “Ami Boni Israilor hokkol mat-ḳota hunchi. Oḳon tumi zanai deo, tara forteḳ din hainja bala ḳaiba gust ar biane ḳaiba feṭ bora ruṭi. Teu tara buzba, ami Alla-u tarar Mabud.”
EXO 16:13 Hasau hainja bala kuel fakir fal aia tarar asta kempo jam oigelo, bador din biane kua foṛia kempor sairobae bizigelo.
EXO 16:14 Beil oar bade ou kua hukaile deḳa gelo, shagur danar laḳan eḳzator fatla zinish maṭir ufre foṛi roise.
EXO 16:15 Ita dekia Boni Israile eḳe-oinne zikaila, “Oba, ita kita? Ita kita foṛse, amra ḳeu to sinram na.” Teu Musae ḳoila, “Ita to behesti kani, tumra ḳaitae ḳori Mabude dan ḳorsoin.
EXO 16:16 Ou ḳanir ḳota-u Mabude hukum disoin, forteḳ zone zarzir foribaror lagi kani tukaia neo. Goror hoḳlor lagi zon-fisu eḳ feṭu ḳori tukaio.”
EXO 16:17 Teu tara oula ḳorla, manush onumane ḳeu besh ḳori nila, ḳeu ḳom nila.
EXO 16:18 Bade feṭudi mafia deḳla, zein beshi tukaisla, tan-o beshi oise na, ar zein tuṛa tukaisla, tan-o ḳom oise na; hoḳole-u zarzir foribaror ḳanir onumane tukaisoin.
EXO 16:19 Musae tarare ḳoila, “Tumra ḳail biankur ḳanir lagi ita muṭe-u zomai toio na.”
EXO 16:20 Ta-o ḳeu ḳeu Musar ḳota na mania bador dinor lagi-o tuṛa toilo. Erlagi ita fosia kiṛa-fuk zonmia gondo bar oilo; ita dekia Musa tarar ufre kub gusa oila.
EXO 16:21 Ola forteḳ din fozore tara zarzir ḳanir onumane tukaito, oile roid gorom oile-u ita golizito.
EXO 16:22 Bade soy nombor dino tarar ḳanir lagi ḍabul ḳani, mani dui feṭu ḳori tukailo, ar gusṭir murobbi oḳole aia Musare zanaila.
EXO 16:23 Musae tarare ḳoila, “Ita ṭik ase, Mabude-u oula hukum disoin; ḳail to haftar shesh din, Zummabar; Mabudor fak-fobitro din. Te tumrar zeta randar dorḳar ase ita aiz randilao, ar biran ḳorar zorur oile biran ḳoro, baki hoḳolta bador din biankur lagi toi deo.”
EXO 16:24 Ou Musar hukum mafik tara bador din forzonto ita goro toilo, itar maze kunu gondo-o bar oilo na, kiṛae-o dorlo na.
EXO 16:25 Bade Musae tarare ḳoila, “Aiz tumra ita ḳao, ḳaron aiz Mabudor fak-fobitro din, Zummabar. Aiz tumra bondor maze i kani faitae nae.
EXO 16:26 Tumra haftat soy din i kani tukaio, oile shat nombor din to Zummabar, i din ita faitae nae.”
EXO 16:27 Ta-o kunu kunu zone shat nombor din-o ou ḳani tukaibar lagi bare gelo, gia kunta failo na.
EXO 16:28 Teu Mabude Musare ḳoila, “Tumra ar ḳotodin amar hukum ar niom-ḳanun bangitae?
EXO 16:29 Huno, tumrar ziranir lagi i Zummabar to Mabude-u tumrare disoin, erlagi tain haftar soy nombor dino tumrare dui dinor ḳani dein; oḳon taki ou shat nombor din, mani Zummabare tumra hoḳole zarzir goro roia ziraio, ḳeu goror bare zaio na.”
EXO 16:30 Erbad taki haftar shat nombor dino manshe ziraito.
EXO 16:31 Boni Israile i kanir nam toilo, manna; ita deḳte dola ḍula bisir laḳan, ar ḳaite mou maḳail fiṭar laḳan moza.
EXO 16:32 Bade Musae tarare ḳoila, “Mabude ou hukum disoin, tumra eḳ feṭu foriman manna tulia tumrar bador bongshodor oḳlor lagi zoma ḳori to, teu tara-o deḳba, Mishor desh taki tumrare bar ḳori neoar ḳalo morubumir maze tain kita ḳaoaisoin.”
EXO 16:33 Musae Harunre ḳoila, “Tumi egu boyamor maze eḳ feṭu foriman manna tulia Mabudor samne to, ita tumrar oarishor for oarish dori zoma roibo.”
EXO 16:34 Mabude Musare zela hukum ḳorsla, ou laḳan Harune ou manna boyamo borla. Bade tain fobitro shondukor bitre shahadot fattoror samne toila.
EXO 16:35 Boni Israile sallish boros dori i manna ḳailo, tara zotodin forzonto manush boshot ḳorar zaga, mani Kenan deshor shimanat aia na fousilo, otodin ou ḳani-u ḳaila.
EXO 16:36 Eḳ feṭu oilogi, eḳ furaror dosh baṭor eḳ baṭ.
EXO 17:1 Bade Mabudor hukume tamam Boni Israil Sin morubumi taki roana dia, eḳ zaga taki aroḳ zagat gia gia heshe Rofidimo aia tambu gaṛila, oile hino manshor ḳaoar fani asil na.
EXO 17:2 Erlagi manshe Musar loge ḳaijja ḳori koila, “Amrare ḳaoar fani deukka.” Musae tarare ḳoila, “Tumra ḳene amar loge ḳaijja ḳorrae? Ḳene Mabudre forikka ḳorrae?”
EXO 17:3 Manshe fanir fiase ḳahil oia Musar birudde gali-galaz ḳori koila, “Tumi amrare martae ḳori Mishor desh taki ancho ni? Amrare, amrar huruttaintore, amrar foshur falre ana-fanie martae ḳori ono ancho ni?”
EXO 17:4 Teu Musae Mabudor gese foriad ḳori koila, “Ami i manshore kita ḳortam? Ar tuṛa deri oile-u to tara fattordi iṭaia amare mariliba.”
EXO 17:5 Mabude zuaf dila, “Tumi ze laṭidi Nil nodo baṛi marslae, hou laṭi ato lo, ar Boni Israilor ḳoyzon murobbire loge loia manshor age age zao.
EXO 17:6 Gia harle ami Tur faṛor ḳandat eḳ fattoror ufre azir oimu, tumi ou fattoro baṛi marle ogu taki fani bar oibo, teu manshe ḳaita farba.” Hasau Musae Israilor murobbi oḳlor samne oula ḳorla.
EXO 17:7 Ou Rofidimo aia manshe ḳaijja ḳori koisla, “Mabud kita amrar loge asoin ni, na hori gesoin?” Oula ḳoia tara Mabudre forikka ḳorsla ḳori, i zagar nam oilo Masa [mani, forikka] ar Meriba [mani, ḳaijja].
EXO 17:8 Ou shomoy Boni Israilor loge zuddo ḳorar lagi Amaleki sifai oḳol Rofidimo aila.
EXO 17:9 Teu Musae tan ḳadim Hozrot Iusare ḳoila, “Tumi amrar manush taki laṛai korra zon basia nia, Amaleki oḳlor loge zuddo ḳorat zao. Ami-o ḳail Allai kudroti laṭi ato loia faṛor ufre ubaimu.”
EXO 17:10 Iusae-o Musar hukum mafik kam ḳorla. Amaleki oḳlor loge zuddo ḳorla, Musa, Harun, ar Hur, ou tino zon gia faṛor ṭillar ufre uṭla.
EXO 17:11 Bade deḳa gelo, Musae zoto shomoy at usa ḳori raḳoin, oto shomoy Boni Israilor dol zitoin, oile Musae at lamaile-u Amaleki dol zitoin.
EXO 17:12 Aste aste Musar at bar oa dorlo. Ou tara ekkan fattor ania Musare boibar bebosta dila. Ou fattoror ufre Musa boila, Harun ar Hur duiozone Musar dui galat ubaia tan at usa ḳori dorla. Teu shuruz ḍubar ag forzonto tan at usa roilo.
EXO 17:13 Erlagi Amaleki sifair loge zuddo ḳoria Iusa zitigela.
EXO 17:14 Bade Mabude Musare ḳoila, “Ita iad raḳar lagi tumi ekkan kitabor maze lekia to ar Iusare-o zanao. Mono rakio, ami duniar buk taki Amaleki oḳlor nam miṭailimu.”
EXO 17:15 Musae ekkan kurbani kana banaia er nam toila, Mabud-u amar zuddor janḍa.
EXO 17:16 Tain ḳoila, “Mabudor zuddor janḍa amra ato loi, teu Mabude-o oarishor for oarish dori Amaleki oḳlor loge zuddo ḳorba.”
EXO 18:1 Allae Hozrot Musare ar tan bonda Boni Israilre zoto laḳan rohom ḳorsoin, ita hoḳolta Musar hour Madian deshor imam Shuaibor ḳano gelo. Mabude Boni Israilre Mishor desh taki kila bar ḳori anchoin, eota tain hunla.
EXO 18:2 Musae age tan bibi Sofurare hour baṛit faṭai disla, erlagi tan houre Musar bibire ar duio fuare nizor gese raḳla.
EXO 18:3 I duio fuar mazor eḳzonor nam asil Zarsum [mani, boitol]. Musae ḳoila, “Ami bin desho boitolor laḳan roiram.”
EXO 18:4 Ar dusra zonor nam asil Eliezer [mani, Alla shohae]. Tain ḳoila, “Amar bafor Alla amar shohae oia amare Feraunor toluar taki hefazot ḳorsoin.”
EXO 18:5 Musar hour Shuaibe Musar bibi ar tan duio fuare loia Musar gese aila. Ou shomoy Boni Israil ar Musar tambu asil Allar faṛ Turor ḳandat.
EXO 18:6 Tan hour ono aia Musare ḳobor dila, “Ami tumar hour Shuaib. Te ami tumar bibi ar duio fuare loia ono aisi.”
EXO 18:7 Ḳobor faia Musae tan houror loge deḳa ḳorat bar oila. Tain maṭit soizda ḳoria tan hourre salam ḳorla ar mayar hunga dila. Bade duiozone bala-bura zikaia hari tambur bitre hamaila.
EXO 18:8 Mabude Boni Israilor fokko loia Feraun ar Mishori oḳlor loge zeta zeta ḳorsoin, ita hokkolta tan hourre hunaila. Mishor taki zaoar bala tarar ḳoto ḳoshṭo oisil ar Allae kila tarare basaisoin eota-o tanre zanaila.
EXO 18:9 Ar Mabude Mishori oḳlor at taki Boni Israilre azad ḳoria tarare zoto laḳan asan ḳorsoin, ita hunia tan hour kub kushi oila.
EXO 18:10 Tain ḳoila, “Hoḳol tarif Mabudor, zein Feraun ar Mishori oḳlor at taki tumrare azad ḳorsoin.
EXO 18:11 Oḳon ami nize-o buziar, hoḳol devtar saite Alla-u mohan. Ḳaron Mishorinte zeta befar loia tumrar birudde bahaduri korta, itar ḳobza taki tain-u tumrare basaisoin.”
EXO 18:12 Bade Musar hour Shuaibe Allar name zalail kurbani ar hoḳol zator kurbani zuit ḳori loia aila. Heshe Harun ar Boni Israilor murobbi oḳol aia, Musar houror loge boia Allar samne ḳana-fina ḳaila.
EXO 18:13 Bador din Musae manshor bisar-salish ḳorat boila. Bisaror lagi manush aia bian taki hainja forzonto haradin tan samne ubai roila.
EXO 18:14 Musae ola ḳorra dekia tan houre ḳoila, “Tumi manshore loia ita kita ḳorrae? Kitar lagi tumi eḳla ono bisaro roiso, ar bian taki hainja forzonto hoḳol manush tumar gese ubai roise?”
EXO 18:15 Musae zuaf dila, “Bisaror befare Allar foysala hunar lagi manush amar gese ain.
EXO 18:16 Tara kunu ḳaijja-fosad ḳorle amar ḳasat ain, aile ami duio dolor bisar ḳori, ar Allar hukum-ahkam tarare batai.”
EXO 18:17 Teu Musar houre ḳoila, “Tumi zelaḳan ita ḳorrae, ita to bala nae.
EXO 18:18 Ila ḳorle tumi ar tumar hoḳol manush-o ḳahil oizibae. I kam tumar takkot taki beshi, tumi eḳla ita kulaitae fartae nae.
EXO 18:19 Te ami tumare ḳoiar, tumi amar foramish huno, ete Alla-o tumar loge roiba. Tumi manshor bisar-asar foysala ḳorar niote, tarar imam hishabe hoḳol befar Allar samne azir ḳorio.
EXO 18:20 Ar manshore-o Allar hukum-ahkam talim dio. Tara kila solta, kita ḳorta na ḳorta, ota tarare buzaio.
EXO 18:21 Ar tumi erar maz taki basia oula zoiggo manush bar ḳoro, zera Allare ḍorain, hok fote soloin, ar gush ḳaoare gin ḳoroin. Erare tumi manshor bisar-asaror dayitto deo. Era kunu zonre azar zonor ufre, ḳeurore sho zon, ḳeurore foinchash zon, ar ḳeurore dosh zonor ufre bisar-asaror bar deo.
EXO 18:22 Era-u hamesha manshor bisar-insaf ḳorba. Huru-muru hoḳol bisar tara ḳorba, ḳali boṛo boṛo bisar tumar gese anba. Teu tumar bar kisu ḳombo, tara-o tumar loge kisu bar boukka.
EXO 18:23 Allar hukum faia tumi zudi oula ḳoro, te tumi kulaitae farbae, ar manshe-o arame zarzir zagat zaita farba.”
EXO 18:24 Musae tan houror foramish manla, tain zela ḳoila Musae oula ḳorla.
EXO 18:25 Musae tamam Boni Israil taki basia ufozukto manush tukaia, tara ḳeurore azar zon, ḳeurore sho zon, ḳeurore foinchash ar ḳeurore dosh zonor ufre neta banaila.
EXO 18:26 Era hamesha manshor bisar-asar ḳorta. Ḳali boṛo boṛo goṭona oḳol Musar ḳasat anta, ar huru huru hoḳolta tara miṭaita.
EXO 18:27 Heshe Musae tan hourre bidae dile, tain nizor desho toshrif nilagi.
EXO 19:1 Mishor desh taki Boni Israil oḳol baronir bade, tin nombor sandor foyla din-u tara Rofidim oia Sinai morubumit fosila. Ono aia tara morubumir Tur faṛor samne tambu gaṛila.
EXO 19:3 Ermaze Hozrot Musa Tur faṛor ufre Allar dorbaro gela. Mabude faṛor ufre taki tanre ḍakia ḳoila, “O Musa, tumi Iakubor aolad oḳolre ḳo, Boni Israilre zanai deo,
EXO 19:4 ami Mabude Mishori oḳlor dosha kita goṭaisi, ita to tumrar nizor souke deḳso. Sile zela tar baichchare ḍaḳnadi boia ney, ami-o ou nomunae tumrare amar gese boia anchi.
EXO 19:5 Oḳon tumra zudi amar tamam hukum-ahkam mano, ar amar logor oada adae ḳoro, te duniar hokkol zatir maz taki tumra-u oibae amar ḳas shompod. Mono rakio, hara duniar hoḳolta-u amar eḳtiaro.
EXO 19:6 Tumrare dia-u ḳaim oibo amar imam oḳlor bashshai, tumra-u oibae amar fobitro zati. Te amar ou buli kanain tumi Boni Israilre zanao.”
EXO 19:7 Ou Musae aia Boni Israilor murobbi oḳolre dola ḳoraila. Dola ḳoraia ḳoila, Mabude tanre kita kita hukum disoin.
EXO 19:8 Teu hoḳol manshe eḳloge ḳoila, “Mabude zela bataisoin, amra ola hokkolta ḳormu.” Manshe zemne zuaf dila, Musae gia Mabudor dorbaro ola zanaila.
EXO 19:9 Ar Mabude Musare ḳoila, “Ami zebla tumar loge batchit ḳormu, ou batchit zate manshe nizor ḳane hunto fare, erlagi ami gono eḳ megor ḳalnir maze roia batchit ḳormu. Teu manshe ita hunba, ar tumar ufre hor-hamesha furafur ekin raḳba.” Bade Musa gia tarar-o hoḳol ḳota Mabudre zanaila.
EXO 19:10 Ikan hunia Mabude Musare ḳoila, “Tumi aiz ar ḳail duio din manshor ḳasat gia tarare fak-saf ḳoro. Tara zarzir ḳafoṛ-sufoṛ doia deuk.
EXO 19:11 Tara forshu dinor lagi toiar ouk, ou din ami Mabud Tur faṛor ufre lamia aia tara hoḳolre didar dimu.
EXO 19:12 Te tumi faṛor sairobae eḳṭa shimana ṭik koria dilao. Dia tarare hushiar ḳori ko, tara zanu i faṛo na uṭe ar faṛor shimanat na soy. Ḳeu zudi i faṛo soy, te tar shaza oilo mout.
EXO 19:13 Marar bala tar gotro at na dia, tare fattor ba tir maria marbae. He manush ouk ba zanuar ouk tare marilibae. Ḳali eḳloge bout shomoy shinga bazanir aoaz hunle, tara ou faṛor ḳandat aita farba.”
EXO 19:14 Teu Musae faṛo taki lamia aia manshore fak-saf ḳorla, manshe tarar ḳafoṛ-sufoṛ doia dilo.
EXO 19:15 Musae tarare ḳoila, “Tumra forshu dinor lagi zuit o, ermaze ḳeu bibir loge mila-misha ḳorio na.”
EXO 19:16 Hasau hou forshu din aile bianku bala faṛor ufre gono megor ḳalni deḳa gelo, kub beshi megor ḍak-zilkani shuru oilo. Zure zure shingar aoaz huna gelo, teu Boni Israilor kempor bitoror hoḳol manush ḍoraia ḳafa dorla.
EXO 19:17 Ou shomoy Musae manshore Allar samne neoar lagi kemp taki bar ḳorla. Tara hoḳol gia faṛor lamat ubaila.
EXO 19:18 Ar asta Tur faṛ dumae bori gelo, Mabud moulae agunir laḳan nuror surote faṛor ufre toshrif anla. Iṭ-baṭṭar dumar laḳan duma uṛa shuru oilo ar asta faṛ zuṛi bezuita ḳaf shuru oilo.
EXO 19:19 Shingar aoaz aro zure zure bazilo. Ou shomoy Musae Allar loge matila, ar Allae-o nizor aoazdi Musar mator zuaf dila.
EXO 19:20 Mabud nize Tur faṛor matat lamia aia Musare ḍakila, teu Musa uṭia faṛor ufre gela.
EXO 19:21 Gia harle Mabude tanre ḳoila, “Tumi lamat zao, gia manshore ḳoṛa ḳori koia ao, arnae amare deḳar lagi tara shimana faroia ufre aibba. Aile bout manush mara zaiba.
EXO 19:22 Ar ze imam oḳol hamesha amar samne azir oin, ashole tarar ḳam-u amar samne azir oa, tara-o nize nizore fak-saf ḳorba. Arnae ami tarar ufre-o gozob ḍalimu.”
EXO 19:23 Musae Mabudre zuaf dila, “Tara to emne-u Tur faṛo aita nae, afne age-u amrare ḳoṛa hushiari disoin. Amra-o faṛor sairobae dag dia afnar lagi pak shimana algaisi.”
EXO 19:24 Oile Mabude tanre ḳoila, “Na, tumi lamat zao. Bade tumi ar Harun duiozone milia ufre aio. Kial rakio, kunu imam ba dusra kunu manush zate shimana saṛia amar ḳasat na ain, aile ami tarar ufre lannoti gozob ḍalmu.”
EXO 19:25 Ikan hunia Musa lamat gela, gia manshore hoḳolta zanaila.
EXO 20:1 Bade Mabude formaila,
EXO 20:2 “O Boni Israil oḳol, ami Alla-u tumrar Mabud. Mishor deshor gulami taki ami-u tumrare ḳalas ḳori anchi.
EXO 20:3 “Amar bodla tumra dusra kunu devta manio na.
EXO 20:4 “Puja ḳorar kiale tumra kunu murti banaio na, asman, zomin ba fanir tole zotota ase, ita kunutar surote murti banaio na.
EXO 20:5 Tumra itar puja ḳorio na, itar sheba-zoton ḳorio na. Mono rakio, ami Alla to la-shorik Mabud, kunu shorik shoijjo ḳori na. Huno, amare zera mane na, ami tarar gunar shaza dei, tarar tin-sair siṛi forzonto shaza dei.
EXO 20:6 Oile zera amar ashik bonia amar hukum-ahkam amol ḳore, ami tarar azar azar oarish forzonto amar obiram maya-mohobbot deḳaimu.
EXO 20:7 “Beḳama kunu ḳarone tumrar Mabud Allar nam muko loio na. Ḳeu zudi kamoḳa Mabudor nam loy, te kunumonte-u amar shaza taki rehai faito nae.
EXO 20:8 “Iad ḳoria Zummabarre fobitro din manio.
EXO 20:9 Haftar soydin tumra ḳam-ḳaz ḳorio, tumrar dorḳari hoḳol ḳam shario.
EXO 20:10 Oile shat nombor din oilo Zummabar, tumar Mabud Allar name ziraibar din. I din tumi, tumar fua-fuṛin, tumar gulam-bandin, tumar foshur fal, tumar gaut ba ṭauno roura musafir ba bin-deshi, ḳeu kunuzator ḳam-ḳaz ḳorio na.
EXO 20:11 Zano to, Mabude soydine asman-zomin, doria ar erar mazor hoḳolta foyda ḳorsoin, bade shat nombor din ziraisoin, kunu ḳam ḳorsoin na. Ou dinre Mabude rohomot dia pak din ḳorsoin.
EXO 20:12 “Tumrar ma-bafre ijjot ḳorio. Teu tumrar Mabud Allae ze desh diba, hou desho tumrar hayati baṛibo.
EXO 20:13 “Kun ḳorio na.
EXO 20:14 “Zina ḳorio na.
EXO 20:15 “Suri korio na.
EXO 20:16 “Ḳeuror birudde misa shakki dio na.
EXO 20:17 “Foror gor-duaror bae lalos ḳorio na, tar bou, gulam-bandi, goru-gada, ba kunu kichchur bae lalos ḳorio na.”
EXO 20:18 Boni Israile zebla faṛ taki megor ḍaḳ, zilkani, shingar aoaz, ar duma baronit deḳla, dekia tara duroi taki-u ḍoraia ḳafa dorla.
EXO 20:19 Tara Musare ḳoila, “Afne-u amrar loge matoukka, amra hunmu; oile Allae amrar loge batchit ḳorle to amra morizimu.”
EXO 20:20 Musae tarare ḳoila, “Tumra ḍoraio na. Allae tumrare forikkat falaisoin, zate tumrar zano Allar ḍor hamae, ḍoraia tumra guna taki basia ro. Erlagi-u tain nize didar disoin.”
EXO 20:21 Hoḳol manush duroi ubai roila, ar Musa Allar hazirar hou megor ḳalnir andarir gese gela.
EXO 20:22 Mabude Musare ḳoila, “Tumi Boni Israilre ḳo, tumra nize-u to deḳlae, ami Mabude asman taki tumrar loge batchit ḳorlam.
EXO 20:23 Erlagi ebadot ḳorar niote, amar bodla dusra kunuzat devta banaio na. Tumra shuna ba rufadi-o nizor kunu deb-debi banaio na.
EXO 20:24 “Amar lagi kali maṭi dia kurbani kana banaio. Er ufre tumrar zalail kurbani ar salamoti kurbanir goru-sagol ania kurbani dio. Zeta zagainto ami amar nam iad ḳorai dimu, hou zagainto ami nize azir oia tumrare dua dimu.
EXO 20:25 Tumra amar lagi fattordi kunu kurbani kana bananit lagle, hi fattorguin ḳaṭio na. Er ufre atiar salaile tumra itare nafak banailibae.
EXO 20:26 Amar kurbani kana oula ḳori banaio, zate er ufre uṭte kunu moi ba siṛi na lage, moi ba siṛi bae uṭat gele kiba tumrar shorom deḳa zaibo.”
EXO 21:1 Mabude Musare aro ḳoila, “Tumi Boni Israilre amar ou niom-ḳanun oḳol zanao.
EXO 21:2 “Tumra zudi kunu Ibrani beṭare ḳorid ḳoria gulam banao, te ou gulame soy bosor tumrar gulami korbo, bade shat bosoror bala tar ges taki kunta na nia, tare emne-u azad ḳori dibae.
EXO 21:3 He zudi eḳla tumrar gese ae te eḳla-u zaibo; ar zudi boure loge loia ae, te bou loia zaibo.
EXO 21:4 Oile tar munibe zudi tare bia ḳorai taḳe, ar tar kunu hurutta-murutta oin, taile i beṭi ar huruttain munibor gese-u roiba; he ḳali eḳla azad oibo.
EXO 21:5 Ar hi gulame zudi saf ḳori koy zen, he tar munib ar tar bou-baichchar mayae, erare saṛia zaito nae,
EXO 21:6 te i malike tare loia Allar dorbaro azir oibo. Tare duaror ḳofaṭ ba soukaṭor loge uba ḳoria munibe shik dia tar ḳano fuṛ ḳorbo. Teu he hara zindegibor munibor gulamit roibo.
EXO 21:7 “Kunu manshe zudi bandigirit dibar lagi tar nizor fuṛire besilae, te gulam oḳol zela soy bosor bade munibor baṛi taki emne-u azad oizain, ou fuṛi to ila azad oito nae.
EXO 21:8 Tair munib zudi tair ufre kushi na oin, te ṭeḳa-foyshar bodla taire azad ḳori dite oibo. Taire dusra kunu zatir manshor gese besibar eḳtiar nai, ḳaron munibe to tan nizor dayitto adae ḳorsoin na.
EXO 21:9 Oile munibe zudi tan nizor fuar lagi taire fosond ḳoria nein, te taire afon fuṛir laḳan hoḳol ḳemota dite oibo.
EXO 21:10 Munibe zudi ou bandire bia ḳorar bade, dusra kunu ḳoinare bia ḳore, ta-o i bandir kuraki, ḳafoṛ-sufoṛ ar shorilor faona hok taire deoa lagbo.
EXO 21:11 He zudi ou tino hok furafur adae na ḳore, te i fuṛire eḳdom bina foyshae azad ḳori dite oibo.
EXO 21:12 “Mair ḳaia zudi kunu manush morizae, te zegie tare marse, tare-o zane mara oibo.
EXO 21:13 Oile he nize zudi kun na ḳorar niote mare, aḳta kunu ḳarone goṭizae ba ami Allar morzie ita oy, te ou kuni zon gia ola kunu zagat bagito farbo, ze zagar ḳota ami tumrare ḳoimu.
EXO 21:14 Ar ḳeu zudi zania-hunia ichcha ḳori keurore kun ḳoria, bade aia amar kurbani kanar gese-o asroy loy, ta-o hon taki doria nia tare zane mara oibo.
EXO 21:15 “Ze manshe tar afon ma ba bafor ufre at tule, tare nisoy zane mara oibo.
EXO 21:16 “Ḳeu zudi kunu manshore suri koria ania besilae, ba ou manshore tar gese faoa zae, te tare nichchoy zane mara oibo.
EXO 21:17 “Ze manshe afon ma ba bafre gali-galaz ḳore, tare-o nichchoy zane mara oibo.
EXO 21:18 “Kunu manshe ḳaijjat lagia zudi logor zonre ṭushi ba fattordi mare, i mair ḳaia ou zon na morle-o bisnat hutia foṛono taḳe,
EXO 21:19 heshe uṭia laṭi bor dia sola-fira ḳorar zorur oy, te zegie tare marse tare zane mario na. Ḳali hou zonor ḳam-ḳazor ḳeti ar tar shullo-ana daoai koros dite oibo.
EXO 21:20 “Ḳeu zudi tar ḳorida gulam-bandire laṭi dia mare ar mair ḳaia ogu morizae, te ere shaza dite oibo.
EXO 21:21 Oile mair ḳaoar dui-eḳdin bade zudi basia roy, te kunu shaza deoa lagto nae, ḳaron ou gulam to tar nizor samana asil.
EXO 21:22 “Mara-mari korat lagia zudi aḳta ḳeu kunu beṭire mare ar tair feṭor baichcha nosṭo oizae, oile ar kunu ḳeti na oy, te ou beṭir zamair dabi ar bisari-salishor bibechona mafik ere ḳeti-furon dite oibo.
EXO 21:23 Oile zudi tair aro kunu ḳeti oy, taile ere ou laḳan shaza dibae:
EXO 21:24 zanor bodla zan, souḳor bodla souk, dator bodla dat, ator bodla at, faor bodla fao,
EXO 21:25 zalanir bodla zalani, zoḳomor bodla zoḳom, dagor bodla dag dite oibo.
EXO 21:26 “Ḳeu zudi tar ḳorida gulam ba bandir kunu sokut marae souk nosṭo oizae, te ou souḳor bodla he i gulamre azad ḳori dite oibo.
EXO 21:27 Zudi maria er dat falai dey, ta-o ere azad ḳori deoa lagbo.
EXO 21:28 “Kunu gorue gutaia zudi kunu beṭa ba beṭire marilae, te gorur malikre kunu shaza deoa lagto nae. Ḳali hi gorure fattordi iṭaia marilite oibo, i gorur gust ḳeu ḳaito farto nae.
EXO 21:29 Oile i gorur zudi hamesha oula gutanir ḳaichchot taḳe, ar hi malikre hushiar ḳorar bade-o he iṭare aṭḳae na, ermaze i gorue kunu beṭa ba beṭire marilae, te i gorure fattor maria marilite oibo, ar tar malikre-o marilite oibo.
EXO 21:30 Zudi i malikor gese kunu ḳeti-furon saoa oy, taile he ou zorimana dia nizor zan basaito farbo.
EXO 21:31 I gorue zudi kunu huruttare gutaia marilae, taile erlagi-o ou homan niom oibo.
EXO 21:32 Kunu gorue zudi keuror gulam ba bandire gutaia marilae, taile gorur malike hi gulamor malikre tish tola foriman rufa dite oibo ar hi gorure-o fattor mari marilite oibo.
EXO 21:33 “Ḳeu zudi kunu gator muk kulia toy ba gat kudia igur muk guria na toy, ar i gator bitre kunu goru ba gada foṛizae,
EXO 21:34 taile gator malike foshur malikre ḳeti-furon dite oibo. Oile i mora foshu faibo gator malike.
EXO 21:35 “Ḳeuror gorue zudi aroḳzonor gorure gutaia marilae, te hou zita gorure besia, er dam ar mora gorur dam-o era duiozone homan homan ḳori baṭia niba.
EXO 21:36 Oile ag taki zudi zana-huna taḳe zen, i gorue ola gutae, ar tar malike tare na aṭḳae, te gorur bodla goru dite oibo, bodla deora zone ou mora goruṭa faibo.
EXO 22:1 “Ḳeu kunu manshor goru ba meṛa-sagol suri koria ania zudi besilae ba zobo ḳorilae, te ek gorur bodla fasgu, eḳ meṛa ba sagolor bodla sairgu firot dite oibo.
EXO 22:2 Sure tar surir malor ḳeti-furon dite oibo, oile tar zudi keti-furon dibar kunu takkot na taḳe, te tare besia er ḳeti-furon adae ḳorte oibo. Suri kora goru-gada ba meṛa-sagol zudi suror gese zita faoa zae, taile he ita egur bodla dugu firot dite oibo. “Kunu sure zudi surit gia goro hamaibar bala dora ḳailae ar zoḳom oia morizae, taile tare marar lagi marra zon dayi oito nae. Oile shuruz uṭar bade zudi dinor bala ila oy, te i kunor lagi he dayi oibo.
EXO 22:5 “Ḳeu zudi tar goru-sagol nizor bagano ba ḳetor maze raḳat gia saṛi dey, ar itae gia manshor ḳetor foshol ḳailae, te tar nizor ḳetor hoḳol taki bala ongsho bodla dia ḳeti-furon dite oibo.
EXO 22:6 “Kunu zaga taki aguin lagia zudi zuf-zongol zole, ar bade ou aguin gia ḳeuror ḳetor maze banda muiṭ, ṭeki ba asta ḳet zoli zae, te aguin zegie zalaisil, he itar ḳeti-furon dibo.
EXO 22:7 “Ḳeu zudi aroḳzonor gese mal-samana ba ṭeḳa-foysha amanot toy, ar amanot-daror gor taki ita suri oizae, te ou sur dora foṛle, sure er ḍabul firot dibo.
EXO 22:8 Oile sur dora na foṛle, hi goror malike nize-u ita lukaise ni, oḳan zanar lagi tare Allar dorbaro azir ḳorbae.
EXO 22:9 “Aroḳ zonor doḳolo ase, oula kunu goru-gada, meṛa-sagol, finnor ḳafoṛ ba zekunu arail samana dekia ḳeu zudi mono ḳore iṭa tar mal, taile iṭar salishir lagi tara duiozon gia Allar dorbaro azir oibo. Allae zare dushi shaibosto ḳorba, he tar birudi zonre er ḍabul firot dibo.
EXO 22:10 “Ḳeu zudi tar goru-gada, sagol-meṛa ba oinno kunu foshure kunu girostor gese raḳat dey, ar ogu morizae, zoḳom oizae ba araizae, oile er kunu shakki na mile,
EXO 22:11 te ou giroste nize-u zen ita ḳorse na, iṭa he Mabudor samne gia ḳosom ḳoria miṭ-maṭ ḳorbo. I foshur malike-o ikan mante oibo, tain kunu ḳeti-furon faita nae.
EXO 22:12 Oile i girostor ges taki zudi iṭa suri oizae, te malike ḳeti-furon faibo.
EXO 22:13 Zudi kunu zongli zanuare doria igure marilae, taile er formanor lagi ogur fara-siṛa ṭukrain ania deḳani lagbo. Teu er kunu ḳeti-furon lagto nae.
EXO 22:14 “Ḳeuror ges taki kuzia ana kunu foshu zudi malikor aforḳe zoḳom oy ba morizae, te zein kuzia anchoin, ein er ḳeti-furon diba.
EXO 22:15 Oile malikor samne-u zudi oula oy, te ḳeti-furon lagto nae. I foshu zudi ṭeḳa dia baṛa ḳori ana oy, te ou baṛar ṭeḳa-u oibo er ḳeti-furon.
EXO 22:16 “Biar aḳt oise na, oula kunu shoti fuṛire ḳeu zudi misa matia ania tair loge zina ḳorilae, taile hou beṭae fuṛir bafre zorimana dia ou fuṛire bia ḳorte oibo.
EXO 22:17 Oile fuṛir bafe zudi tar fuṛire i fuar gese bia dite kunumonte-u razi na oy, ta-o i zorimana dite oibo.
EXO 22:18 “Kunu zadugir beṭire tumi zita rakio na.
EXO 22:19 “Kunu foshur loge ḳeu zina ḳorle, tare nisoy zane mara oibo.
EXO 22:20 “Ḳali Mabud saṛa dusra kuntar name zudi keu kunu boli-foshad dey, te tare-o shesh ḳorilte oibo.
EXO 22:21 “Kunu bin-deshi manshor loge bad bebohar ḳorio na, tare zulum ḳorio na. Mono rakio, tumra-o eḳ shomoy Mishor desho musafir aslae.
EXO 22:22 “Kunu ṛaṛi beṭire ba kunu etim huruttare duk dio na.
EXO 22:23 Tarare duk dile tara zudi kande, te i kandon nisoy ami kobul ḳormu.
EXO 22:24 Ete amar gusa oibo aguin borabor. Tumra zuddot foṛia morbae, tumrar bou-o ṛaṛi oibo, tumrar huruttain-o oula etim oiba.
EXO 22:25 “Tumra zudi amar kunu obabi bondare ḳoroz deo, taile shudkuror laḳan tar ges taki shud nio na.
EXO 22:26 Ḳeuror gotror saddor bondok raḳle, shuruz ḍubar age-u tar saddor firot dilaio.
EXO 22:27 Ḳaron uṛibar lagi oṭa-u tar eḳmatro shombol. Ikan nilegi he kita uṛia hutibo? Huno, he zudi amar gese ḳande, te ami to rohmanur rohim, ami tar ḳandon hunmu-u.
EXO 22:28 “Tumi Allar birudde matio na, tumar kunu bisarok-salishre-o boddua dio na.
EXO 22:29 “Tumrar ḳetor foshol ba anguror shorbotor ze baṭ amare dibar ḳota, amar i baṭ dite deri korio na. Tumra hoḳlor boṛo fuain amare dilaibae.
EXO 22:30 Tumrar goru-basur ar sagol-meṛar lagi-o ou eḳ shoman hukum. Itar hoḳol boṛo meda baichchain shatdin forzonto tarar maʼr gese roiba, aṭ dinor din amare dilaibae.
EXO 22:31 “Tumra-u oibae amar fak-fobitro bonda. Zongli zanuare maria falaise, ila kunu zandaror gust tumra ḳaio na; ita kukurre ḳaoaio.
EXO 23:1 “Tumra misa kunu bodnam bar ḳorio na. Fokkofati kori misa shakki dia kunu ḳobis manshore shaijjo ḳorio na.
EXO 23:2 Shomazor doshzone oinnae ḳorer dekia tumi-o oula ḳorio na. Kunu mamla-mokoddomar shakki deoat gia, shoktiala dolor fokko loia oinnae ḳam ḳorio na.
EXO 23:3 Ar kunu goribor bisaro gia, he gorib gotike-u tar fokko loio na.
EXO 23:4 “Tumar dushmonor kunu goru-gadare be-fote zaoat deḳle, iṭa firaia ania tar gese dio.
EXO 23:5 Tumare ingsha ḳore ila kunu manshor gadare baror tole foṛigese deḳle, tare ila falaia zaio na. Ou gadare tulat tumi oboshshoi shaijjo ḳorbae.
EXO 23:6 “Kunu goribor mamla-mokoddomat oinnae salishi korio na.
EXO 23:7 Hazail misa mamla taki horia roio. Kunu be-ḳosur ba ni-oforadi manshore moutor shaza dio na. Zegie ila oinnae ḳorbo, tare ami saṛtam nae.
EXO 23:8 Gush ḳaio na, ḳaron gushe souk ala manshore-o anda ḳorilae. Gushe bala manshor mator maze-o fes lagai dey.
EXO 23:9 “Kunu bin-deshi manshor ufre zulum ḳorio na. Musafiror hal-hokikot to tumra zano, ḳaron tumra-o Mishor desho musafir aslae.
EXO 23:10 “Tumra eḳlagare soy boros zomino ḳet ḳorio ar foshol ḳaṭio,
EXO 23:11 bade shat nombor boroso zomino kunu ḳet na ḳoria fotit rakio, zominre aram dio. Ete zomino emne-u zeta folibo, ota tumrar gorib oḳole ḳaia basiba. Tara neoar bade zeta foṛi roibo, ita zongli foshu-fakinte ḳaiba. Tumrar anguror bagan ba zoytun baganor lagi-o ou hukum manio.
EXO 23:12 “Tumra haftat soy din ḳam ḳorio, oile shat nombor din to Zummabar, idin kunta ḳorio na. Teu tumrar goru-gadae ziraiba, ar tumrar baṛit zonmise i gulam ar musafir oḳlor zane-o aram faibo.
EXO 23:13 “Ami tumrare zeta hukum dilam, ita kub hushiar oia amol ḳorio. Kunu devtar nam muko loio na, itar nam zanu tumrar muko na huna zae.
EXO 23:14 “Tumra forteḳ boros tinbar amar name id adae ḳorio.
EXO 23:15 Foyla, Ḳamir Saṛa Ruṭir Id adae ḳorio. Ami zela hukum ḳorsi, ekkere ou laḳan Abib sandor shatdin ḳamir saṛa ruṭi kaio, ḳaron ou sando tumra Mishor taki bar oia aislae. Idor shomoy lilla-sodga saṛa tumrar ḳeu zanu ḳali ate amar gese na ae.
EXO 23:16 Dusra, tumra Foshol Daoar Id manio. Ḳetor maze tumra zeta ruiso, ita daoar bade foyla foshol dia-u id ḳorio. Tisra id, bosoror hesh sando baganor faḳna fol baṛit anar bade Ḍera-goror Id ḳorio.
EXO 23:17 Ou tino idor shomoy, bosoro tinbar tumrar hoḳol beṭain aia hoj ḳorar niote ami Alla malikor samne azir oio.
EXO 23:18 “Tumra zebla amar name foshu kurbani deo, ou shomoy ḳamir ala kunuzat ruṭi itar loge furaia lilla dio na. Idor shomoy amar name zeta foshu kurbani dibae, itar sorbiala ṭukrain bian forzonto rakio na.
EXO 23:19 Tumrar ḳetor hoḳol taki bala foshol, tumrar Mabud Allar goro anio. “Ar huno, kunu sagolor baichchar gust tar maʼr dud dia randio na.
EXO 23:20 “Ami tumrar lagi ze zaga zuit ḳori raḳsi, hono tumrare hefazote fosanir lagi, ami tumrar age age eḳzon firista faṭaimu.
EXO 23:21 Tumra en ḳota mon dia hunio ar manio, en loge to ami-o asi. Hushiar roio, en birudde zaio na. Arnae ein tumrar oforad maf ḳorta nae.
EXO 23:22 Oile tumra zudi en hukum mano, ar ami zela ḳoisi oula solo, taile tumrar dushmonor loge ami dushmoni kormu, zera tumrar birudde lagbo, ami tarar birudde lagmu.
EXO 23:23 Amuri, Hiṭṭi, Farizi, Kenani, Hibbi ar Zibuzi oḳlor desho amar firistae tumrare nia haraiba. Ami tara hoḳolṭire binash ḳorilimu.
EXO 23:24 Tumra tarar devtare puja ḳorio na, kezmot-o ḳorio na, ar hinor manshe zeta ḳoroin tumra ita ḳorio na. Tumra tarar deb-debir murtin ar tarar pujar monḍop oḳol bangia surmar ḳorilio.
EXO 23:25 Tumra ḳali tumrar Mabud Alla, mani amar ebadot ḳorio. Teu tumrar rizekor maze rohomot dimu, ar tumrar hokkol bemar-azar dur ḳormu.
EXO 23:26 Tumrar deshor kunu beṭir feṭor hurutta nosṭo oito nae, ḳeu aṭkura roito nae. Ami tumrare furafur hayati forzonto basaia raḳmu.
EXO 23:27 Tumra zoto zatir ḳasat zaibae, tarar dilor maze ag taki amar ḍor-ḳof foyda ḳormu, tarare bedisha banailimu. Tumrar hokkol dushmon ḳoredi bagiba.
EXO 23:28 Hibbi, Kenani ar Hiṭṭi oḳolre tumrar samna taki kedaibar lagi, ami tumrar age ḳori bingulor fal faṭaimu.
EXO 23:29 Oile ami tara hokkolre eḳoi bosoror bitre ḳedaitam nae, arnae asta desh fotit roia zongli zanuare boriziba, bade itae tumrare sataiba.
EXO 23:30 Ami aste aste tarare ḳedaimu, ar tumrar manush baṛia asta desh abad ḳorbae.
EXO 23:31 Ami Nil doria taki Filistini deshor shagor, mani Bumodio shagor forzonto, ar douknor morubumi taki Furat gang forzonto tumrar deshor shimana gaṛmu. I desho zera boshot ḳorer tarare tumrar ato shofimu, ar tumra tarare i desh taki kedai dibae.
EXO 23:32 Tarar loge ba tarar devta oḳlor loge tumra kunu chukti korio na.
EXO 23:33 Tumrar deshor bitre tarare roibar dio na. Arnae tara tumrare amar ges taki horaia gunar fote ṭania nibogi. Tumra zudi tarar deb-debir puja ḳoro, taile nichchit tumra-o tarar fando hamaibae.”
EXO 24:1 Mabude Musare ḳoila, “Tumi ar Harun, Harunor fuain Nadab ar Abihu, ar Boni Israilor shottoir zon murobbi neta amar gese uṭia ao. Aibar bala tumra duroi taki amare soizda ḳorio.
EXO 24:2 Oile ḳali tumi eḳla amar ḳasat ufre aibae, ar ḳeu nae. Erar loge ar kunu Boni Israil zanu na uṭe.”
EXO 24:3 Musae manshor gese aia Mabudor hokkol kalam ar ain-ḳanun hunaila, ita hunia hoḳol manshe eḳloge ḳoila, “Mabude zotota bataisoin ita hokkolta amra manmu.”
EXO 24:4 Mabudor batail hoḳol kalam Musae lekia toila. Bador din fozore uṭia faṛor lamat ekkan kurbani kana banaila, ar Boni Israilor baro gusṭire iad raḳar lagi barogu kuṭa banaila.
EXO 24:5 Bade tain Boni Israilor zuan oḳolre faṭaila ar tara Mabudor name bout zalail kurbani dila, ar bout bisal zobo ḳoria salamoti kurbani-o dila.
EXO 24:6 Musae kurbanir lour ordeḳ nia ḳoyṭa baṭit toila, ar baki ordeḳ nia kurbani kanar ufre siṭai dila.
EXO 24:7 Bade tain Allar loge milonor usillar niom-ḳanun leḳa kitabḳan tilaot ḳori manshore hunaila. Ita hunia manshe zuaf dila, “Amra Mabudor hoḳol hukum hunmu, tain zotota ḳoisoin hoḳolta manmu.”
EXO 24:8 Oḳan hunia Musae lou loia manshor ufre siṭaia ḳoila, “I lou oilo Allai milonor hou usillar lou, ze usilla Mabude tan hoḳol shorto mafik tumrar loge boail ḳorsoin.”
EXO 24:9 Teu Musa, Harun, Nadab, Abihu ar Boni Israilor shottoir zon murobbi neta faṛor ufre uṭla.
EXO 24:10 Tara nizor souke Boni Israilor Alla Pakor didar deḳla. Tara deḳla, Allar fao mubarokor tole ase, soḳsoḳa lil moni fattoror toiari saṭor laḳan, asmanor nomunae saf.
EXO 24:11 Boni Israilor murobbi oḳole Allare deḳle-o tain erare marar lagi at tulla na. Tara tan didar faila ar ḳaoa-daoa ḳorla.
EXO 24:12 Bade Mabude Musare ḳoila, “Tumi ou faṛor ufre amar ḳandat ao, aia ḳoydin ro. Manshore talim dibar lagi amar ze hukum-ahkam fattoror ufre leḳsi, ota ami tumare dimu.”
EXO 24:13 Teu Musae tan ḳadim Iusare loge loia faṛo uṭla, ar Musa Allar faṛo gela.
EXO 24:14 Tain murobbi oḳolre ḳoia gela, “Amra firot aibar ag forzonto afnara amrar lagi ono bar saiba. Harun ar Hur afnarar ḳasat asoin, kunu ḳaijja-fosad lagle erar gese zaiba.”
EXO 24:15 Musa faṛo uṭte-u asta faṛ megor ḳalnie gurigelo,
EXO 24:16 ar Tur faṛor ufre Mabudor nuror tozolli zair oilo. Soy din asta faṛ ḳalnie gura roilo. Shat nombor din ou ḳalni taki Mabude Musare ḍakila.
EXO 24:17 Boni Israile Mabudor nuror tozolli deḳla, tara deḳla faṛor ufre agunir laḳan zoler.
EXO 24:18 Faṛ baia uṭi uṭi Musa hou ḳalnir bitre hamai gela. Tain sallish din sallish rait hou faṛo roila.
EXO 25:1 Mabude Musare ḳoila,
EXO 25:2 “Tumi Boni Israilre ḳo, tara amar gese dan-ḳoyrat loia azir ouk. Tarar nizor kushie zeta dan ḳorba, ota tumi shomzia rakio.
EXO 25:3 Tarar ges taki ou laḳan mal shomzio: shuna, rufa, fitol;
EXO 25:4 lilua, baingoni, lal rongor suta; dami suti kafoṛ ar sagolor ruma;
EXO 25:5 lal rong lagail meṛar samṛa, doriar fuʼ masor samṛa; babla laḳṛi;
EXO 25:6 serag oḳol zalanir lagi zoytunor tel; kelafoti shomzibar telor moshla ar agor-kushboy bananir moshla;
EXO 25:7 imamor lebasor efron ar bukur ufror tolit laganir akik moni ar baki hoḳol zator dami fattor.
EXO 25:8 “Amar roar lagi tumi Boni Israil oḳolredi fak-fobitro ekkan zaga toiar ḳoraibae. Teu ami tarar loge boshot ḳormu.
EXO 25:9 Amar roar gor ar mal-samanar befare ami tumare zela nomuna deḳaimu, ekkere ou laḳan ḳori hoḳolta tiar ḳoraio.
EXO 25:10 “Tara babla laḳṛi dia egu shonduk banaiba. Iṭa lambae aṛai at, deṛ at fash ar deṛ at usa.
EXO 25:11 Er bare-bitore ḳaṭi shunadi lefia dio, ar sairo kinaro shunar noksha lagaio.
EXO 25:12 Aguindi shuna golaia sairṭa ḳoṛa er sairo kunat lagaio, ogalat duiṭa ar hogalat duiṭa lagaio.
EXO 25:13 Babla laḳṛidi dugu benda banaia shunadi lefia dite oibo.
EXO 25:14 Shondukre boia neoar lagi duio galar ḳoṛar mazedi, ou duio benda harani lagbo.
EXO 25:15 Benda duioṭa shondukor ḳoṛar bitre harail roibo, iguin kulio na.
EXO 25:16 Ami amar hukum-ahkam leḳa ze fobitro shahadot fattor tumare dimu, tumi iṭa ou shondukor bitre toio.
EXO 25:17 “Ḳaṭi shunadi shondukor ekkan ḍaḳna banaio, oḳanor ufre gunar kofora adae ḳora oibo. I ḍaḳna lambae aṛai at ar fashe deṛ at oibo.
EXO 25:18 Tumi hou ḍaḳnar kinaro shuna fiṭaia dugu Karubi banaio. Ou Karubi deḳte Duldul guṛar laḳan ḍaḳna ala. Banaia shondukor dui galat lagaio, ogalat eḳṭa, ar hogalat eḳṭa. Duio Karubi ḍaḳnar loge ou laḳan ḳori shunadi banani lagbo, zeṭa astaṭae ḳali eḳ siz oy.
EXO 25:20 Er ḍaḳna duioḳan ufredi melail roibo, ar er sayar tole taḳbo shondukor ḍaḳna. Duio Karubi mukamuki uba taḳbo, ar tarar souk roibo ḍaḳnar bae.
EXO 25:21 I ḍaḳnare shondukor ufre lagaio, ar amar hukum-ahkam leḳa ze shahadot fattor tumare dimu, ou fattor tumi shondukor bitre toio.
EXO 25:22 I shahadot shondukor ḍaḳnar ufre duio Karubir mazḳano, ami tumare didar dimu. Ou didaror shomoy Boni Israilor lagi amar hoḳol ain-ḳanun zanaimu.
EXO 25:23 “Babla laḳṛi dia dui at lamba, eḳ at fash ar deṛ at usa ḳori ekkan ṭebul banaio.
EXO 25:24 Oḳanre ḳaṭi shunadi lefia sairo kinaro noksha lagaio.
EXO 25:25 Ṭebulor sairo kinaro sair angul usa ḳori eḳ haz dibae, hazor maze shunadi noksha ḳorbae.
EXO 25:26 Ṭebulor sairo kunat sairo fayar ufre shunar sairṭa ḳoṛa lagaibae.
EXO 25:27 I sairo ḳoṛain ṭebulor kunar hou usa hazor tole lagaio, zate ṭebul boia neoar bala ḳoṛar bitre benda harail zae.
EXO 25:28 Benda duioṭa babla laḳṛidi banaia shunadi lefibae, ou bendadi ṭebul boia nibae.
EXO 25:29 Ṭebulor ufror tal-bashon, Allar name ḍalia dibar shorbot-fanir sodgar zog ar mog, hoḳolta ḳaṭi shunadi banani lagbo.
EXO 25:30 Ou ṭebulor ufre amar samne hamesha fobitro ruṭi raḳbae, i ruṭi zanu shob shomoy toa oy.”
EXO 25:31 Mabude Musare ḳoila, “Tumi kaṭi shunadi ekkan serag dani banaibae, serag danir tola ar ḍanḍi kaṭi shuna fiṭaia goṛaibae. Ou ḍanḍi, fulor laḳan fiala, kuṛi ar fafṛi oḳol, serag danir hoḳoltae eḳloge eḳ fis oibo.
EXO 25:32 Serag danir ḍanḍir dui galat tinṭa ḳori muṭ soyṭa ḍal taḳbo.
EXO 25:33 Forteḳ ḍalor maze zoba fulor laḳan tingu ḳori fiala taḳbo. Serag danir soyo ḍalo eḳlaḳan ḳam ḳora oibo.
EXO 25:34 Serag danir mul ḍanḍir maze-o zoba fulor laḳan sairṭa fiala taḳbo.
EXO 25:35 Ou mul ḍanḍi taki bar oilo soyṭa ḍalor maze, foyla duio ḍalor zuṛat egu kuṛi, dusra duio ḍalor zuṛat arok kuṛi, ar heshor duio ḍalor zuṛat-o kuṛi dio.
EXO 25:36 Kuṛi ar ḍal hoḳolta serag dani taki bar oibo, hoḳolta milia eḳ siz oibo. Astaṭa-u ḳaṭi shuna fiṭaia banani lagbo.
EXO 25:37 Erbade shatṭa serag banaia ou serag danir ufre ou laḳan ḳori lagani lagbo, zate serag oḳol zalanir bade serag danir samna for oy.
EXO 25:38 Seragor fita saf ḳorar simṭa ar zalail fitar sali toar lagi koygu baṭi, ḳaṭi shunadi banani lagbo.
EXO 25:39 Serag danir hoḳolta bananir lagi eḳ mon ḳaṭi shuna lagbo.
EXO 25:40 “Huno, ou faṛor ufre tumare zela noksha deḳail oilo, ekkere ou laḳan ḳori hoḳolta banaio.”
EXO 26:1 Mabude Musare ḳoila, “Tumi dosh ṭukra fesail sutar dami suti kafoṛdi amar goror fordain banaio. Ar lilua, baingoni, lal sutadi bala ustadredi er maze Karubi oḳlor sobi bain ḳoraio.
EXO 26:2 Hoḳol ṭukrain eḳ mafor oibo, lambae aṭaish at ar faṛe sair at.
EXO 26:3 I ṭukraintor fasḳan fasḳan ḳori ekḳano zuṛa dia, dukan boṛo gilaf banaite oibo.
EXO 26:4 Boṛo gilafor foyla ṭukrar fashor ek kinaro lilua sutadi hukor fuṛ banaite oibo. Dusra ṭukrat-o oula ḳorte oibo.
EXO 26:5 Foyla gilafor kinaro fonchashgu hukor fuṛ ar dusra gilafo oula fonchashgu fuṛ dite oibo. Duio boṛo gilafor hukor fuṛ egu aregur ulṭamuka taḳbo.
EXO 26:6 Bade shunadi fonchashgu huk banaia hou fuṛor mazedi haraia, boṛo duio gilafre aṭḳai dio. Teu i duio ṭukradi ekkan gor tiar oibo.
EXO 26:7 “Amar goror ufor gurar lagi sagolor ruma dia gilafor laḳan egaroḳan ṭukra banani lagbo.
EXO 26:8 Hoḳol ṭukrain eḳ mafor oibo, tish at lamba ar sair at faṛ.
EXO 26:9 On taki fas ṭukra eḳloge zuṛa dia boṛo ek gilaf banaite oibo. Ar baki soy ṭukra zuṛa dia, boṛo arok gilaf banaia harle, ou dusra gilafor ze ṭukra baṛti roibo, oḳanre tambur samnor bae dui bainj ḳori dite oibo.
EXO 26:10 Foyla boṛo gilafor fashor ek kinaro fonchashgu hukor fuṛ banaite oibo, ar dusra gilafo-o oula oibo.
EXO 26:11 Bade fitol dia fonchashgu huk banaia hou hukor fuṛor maze haraia, ou boṛo duio gilaf ekḳano zuṛa dite oibo. Teu i duio gilaf milia ekkan sani oibo.
EXO 26:12 Sagolor rumar boṛo gilafor ze ada ṭukra baṛti oibo, ikan ḳoredi loṭḳail roibo.
EXO 26:13 I gilaf ḳan tolor ḳafoṛ taki eḳ at boṛo oae ikan duio galabae loṭḳail roia hara gorre gurilibo.
EXO 26:14 Er ufor gurar lagi lal rong kora meṛar samṛadi aroḳan gilaf banaia guri dite oibo. Bade er ufre doriar fuʼ masor samṛadi sani toiar ḳori guri dite oibo.”
EXO 26:15 Mabude Musare ḳoila, “Amar goror lagi babla laḳṛidi koʼḳan freim banani lagbo.
EXO 26:16 Forteḳ freim banaibae dosh at lamba ar deṛ at faṛ.
EXO 26:17 Ou freimo dugu ḳori faya taḳbo. Hoḳol freim eḳlaḳan banaite oibo.
EXO 26:18 Dokkin galar lagi bishḳan freim banani lagbo.
EXO 26:19 I freimor fayar tole deoar lagi sallishgu rufar sungi banani lagbo, forteḳ freimor dui fayar lagi dugu sungi lagbo.
EXO 26:20 Amar goror uttor galar lagia-o bishḳan freim lagbo,
EXO 26:21 ar forteḳ freimor fayar tolor lagi dugu ḳori sallishgu rufar sungi banani lagbo.
EXO 26:22 Foismor galar lagi, mani kor galar lagi soyḳan freim,
EXO 26:23 ar ḳoror duio kunar lagi aro dukan freim lagbo.
EXO 26:24 I dui freimre dui kunar duio freimor loge tole-ufre ekḳano zuṛa dite oibo. Fortek kunar dui freim daror freimor loge batti maria eḳloge zuṛa dite oibo. Duio kuna eḳlaḳan oibo.
EXO 26:25 Teu ḳoredi aṭḳan freim oibo, ar forteḳ freimor tole deoar lagi dugu ḳori shullogu rufar sungi lagbo.
EXO 26:26 “Tumi freimre zuṛa dibar lagi babla laḳṛidi koygu lamba batti banaio.
EXO 26:27 Er maze fasgu batti goror ek galar lagi, ar baki fasgu arok galar lagi, ar fasgu lagbo ḳor gala, mani fosim galar freimor lagi.
EXO 26:28 Freimor mazḳano lagail ou battidi hoḳol freimor eḳ mata taki aroḳ mata forzonto aṭḳaibae.
EXO 26:29 Freim ḳanain shunadi lefte oibo, ar batti haranir lagi shunar ḳoṛa banaia freimo lagaite oibo. I batti oḳol-o shunadi lefte oibo.
EXO 26:30 Amar goror ze noksha tumare ou Tur faṛor ufre deḳailam, tumi ekkere ou laḳan ḳori iṭa toiar ḳoraio.”
EXO 26:31 Mabude Musare ḳoila, “Tumi lilua, lal, baingoni suta ar fesail dami suti kafoṛdi ekkan forda banaio. Bala kunu ustadredi er ufre Karubi oḳlor sobi bain ḳoraio.
EXO 26:32 I fordaḳan babla laḳṛidi sairṭa kuṭir loge lagaia shunar ḳoṛadi loṭḳai dibae, kuṭir matat shunar ḳoṛa lagaibae. Ar kuṭiguin shunadi lefaibae, kuṭir tolat rufar sungi lagaibae.
EXO 26:33 Fordar ufror suti kafoṛo lagail hukor loge fordaḳan loṭḳail roibo. I fordar ḳore shahadot shonduk toibae. Fordadi amar goror Herem Shorif, mani kas pak zaga ar pak zagar mazḳano beṛa dio.
EXO 26:34 Ou Herem Shorifor bitre shahadot shondukor ufre er ḍaḳna lagaio.
EXO 26:35 I fordar bare Herem Shorifor uttor galat fobitro ruṭi raḳar ṭebulḳan toio, ar er ulṭamuka dokkin galat toio serag dani.
EXO 26:36 “Amar goror duaror lagi ekkan forda banaio, ikan dami suti kafoṛdi banaia hari, lilua, baingoni, lal rongor sutadi noksha ḳorio.
EXO 26:37 I fordar lagi shunar ḳoṛa ar babla laḳṛir fasṭa kuṭi banaio. Kuṭiguin shunadi lefaio, kuṭir tolat fitolor fasgu sungi lagaio.”
EXO 27:1 Mabude Musare ḳoila, “Tumi babla laḳṛidi fas at lamba, fas at fash ar tin at ubi dia sairkuni kori ekkan kurbani kana toiar ḳoraio.
EXO 27:2 Er sairo kunar ufre laḳṛidi sairṭa hing dio. Ou hing kunar laḳṛi kudia banani lagbo, i astaḳan eḳ siz oibo. Bade fura kurbani kana fitoldi lefaio.
EXO 27:3 Kurbani kanar sali tular boṛo samos ar gamla, lou toar baṭi, gust tular boṛo ḳaṭa-sif, angra toar fatil, hoḳolta fitoldi banaio.
EXO 27:4 Fitoldi ekkan zali banaibae. Er sair kunat sairṭa fitolor ḳoṛa lagaio.
EXO 27:5 Kurbani kanar tola taki ufror mazamazi zagar taṛiar tole ou zali boaio.
EXO 27:6 Kurbani kana boia nibar lagi babla laḳṛidi dugu benda banaio, banaia duiogu fitoldi lefio.
EXO 27:7 I bendain ḳoṛar bitredi harani lagbo. Teu kurbani kana boia neoar bala duio bendain kurbani kanar dui galabae taḳbo.
EXO 27:8 Kurbani kana toḳtadi banaia er bitre faḳ rakio. Ami ou faṛor ufre tumare zela noksha deḳailam, ekkere olaḳan ḳori banani loaio.
EXO 27:9 “Amar goror sairobae uṭan taḳbo. Er dokkin galabae eḳ-sho at rakio, i muka dibae dami suti kafoṛor forda.
EXO 27:10 I forda ṭananir lagi bishgu kuṭi dibae. Kuṭir tolat dibae eḳṭa ḳori fitolor sungi, forda ṭananir lagi rufar ḳoṛa ar bandibar tar lagaibae.
EXO 27:11 Uttor galabae eḳ-sho at uṭan raḳbae. Hono-o forda dio, bishgu kuṭi, bishgu fitolor sungi, kuṭir loge lagaio rufar ḳoṛa ar tar.
EXO 27:12 Foisme foinchash at uṭan rakio, hono-o ḳoyḳan forda, doshgu kuṭi, fortek kuṭir tolat eḳṭa ḳori sungi dio.
EXO 27:13 Fubedi-o foinchash at uṭan rakio;
EXO 27:14 geiṭor ek galat fonro at lamba forda, tinṭa kuṭi ar tinṭa sungi lagaibae,
EXO 27:15 ola dusra galat-o fonro at forda, tinṭa kuṭi ar tinṭa sungi dio.
EXO 27:16 Uṭanor geiṭor lagi sairṭa kuṭi, sairṭa sungi ar bish at lamba ekkan forda. Fordaḳan dami suti kafoṛdi banaia lilua, baingoni, lal sutadi noksha ḳoraio.
EXO 27:17 Uṭanor sairo galar hokkol kuṭire bandibar tar ar ḳoṛa oibo rufar, er tole fitolor sungi taḳbo.
EXO 27:18 Uṭanḳan lambae eḳ-sho at ar fashe foinchash at oibo. Er sairobae fas at ubi forda dio, forda oibo dami suti kafoṛor, ar kuṭintor tole dio fitolor sungi.
EXO 27:19 Amar goror ḳamor hoḳol siz fitoldi banaibae, mul tambu ar uṭanor beṛar ṭanar rosir tolor fereg oḳol fitolor oibo.
EXO 27:20 “Tumi Boni Israil oḳolre hukum dio, tara zoytun sesia tel banaia tumar gese anto, zate serag oḳol hamesha zalail roy.
EXO 27:21 Milon-tambur shahadot shondukor samne ze fordaḳan taḳbo, ou fordar bare Harun ar tar fuainte hainja taki fozor forzonto, Mabudor samne serag guin deḳa-huna ḳorba. Amar ou hukum zanu Boni Israile oarishor for oarish dori hor-hamesha amol ḳore.”
EXO 28:1 Mabude Musare ḳoila, “O Musa, Boni Israilor maze imamoti korar lagi tumar bai Harun, tar fua Nadab, Abihu, Ali-Azor ar Isamarre tumar samne anao.
EXO 28:2 “Tumar bai Harunor ijjot ar shundor baṛanir lagi fobitro lebas toiar ḳorao.
EXO 28:3 Ami Pak Ruhu dia zeta ustad oḳolre ḳarigori kamor aḳol-hekmot disi, tumi hou ḳarigor oḳolre hukum deo, tara Harunor lagi oula fobitro lebas banaukka, ze lebas ḳali amar imamotir ḳamo lage.
EXO 28:4 I lebasor maze bukur ufror toli, efron, alḳella, chekor ḳafoṛor fainjabi, faugṛi ar ḳomror bondoni banaio. Tumar bai Harun ar tar fuainte zate amar imamoti kam ḳorta faroin, erlagi tarar fak-fobitro lebas banaio.
EXO 28:5 Lebas banaite tara lilua, baingoni, lal suta, ar dami suti kafoṛ, er loge shuna-o lagaiba.
EXO 28:6 “Fordan imamor efron banaibae lilua, baingoni, lal suta, dami suti kafoṛ, ar shunadi. Ita bala kunu ustadredi banaio.
EXO 28:7 Efronor ḳandor dui gala zuṛa dibar lagi dukan foṭṭi banaia, efronor ufror kunat lagaio.
EXO 28:8 Efronor loge zuṛa lagail feṭor ufror belṭ ḳan-o efronor laḳan lilua, baingoni, lal suta, dami suti kafoṛ, ar shunadi banaio.
EXO 28:9 “Tumi duiṭa akik fattor ania er ufre Israil, mani Iakubor fuaintor nam kudaia lekaio.
EXO 28:10 Foyla fattoror ufre, tarar zonmor hishabe boṛo taki huru muka soy zonor nam, ar dusra fattoror ufre-o baki soy zonor nam kudaia lekaio.
EXO 28:11 Hunar oḳole dami fattoror ufre kudia zela sil banain, ekkere ou laḳan ḳori dugu fattoror ufre Israilor fuaintor nam kudaio.
EXO 28:12 Fattor duiogu shunar zazoiror maze lagaia efronor ḳandor foṭṭir loge lagaio. Israilor fuaintor bae Mabudor nozor raḳar lagi, i fattor Harune Mabudor samne tar ḳandor maze lagaibo.
EXO 28:13 Duio zazoiror loge shunadi banail duksa chein lagaio. Ou duio chein ḳaṭi shunadi rosir nomunae fesaia banaio.
EXO 28:15 “Amar ray-foysala zanar lagi bukur ufror toli banaio. Bala ustad kunu dorziredi banaio. Efronor ḳamor laḳan iṭa-o lilua, baingoni, lal suta, dami suti kafoṛ, ar shunadi banaio.
EXO 28:16 Iṭa oibo lambae ada at, fashe ada at, sair kuna ala dui bainj ḳora ekkan ḳafoṛ.
EXO 28:17 Er ufre hair doraia sair hair fattor lagaibae. Foyla harit iakut, fit, ar fanna moni.
EXO 28:18 Dusra harit lal moni, lil moni ar hira;
EXO 28:19 tin nombor harit firuz, gumed ar foddorag moni.
EXO 28:20 Sair nombor hairo fukraz, boidurjo ar shuruz moni. I fattor oḳol shunar zazoirdi lagaio.
EXO 28:21 Israilor baro fuar lagi baroṭa fattor lagbo. Ita eḳo fattoro eḳ eḳ fuar nam kudia lekaio, zela kudia sil banail oy.
EXO 28:22 “Bukur ufror tolir lagi kaṭi shunadi rosir laḳan fesaia duksa chein banaio.
EXO 28:23 Shunar duiṭa ḳoṛa banaia bukur ou tolir ufror kunat lagaio.
EXO 28:24 Ar chein duiogesa duio ḳoṛar loge aṭḳaio.
EXO 28:25 Duio ḳandor efronor samnor fitat shunar zazoiror loge cheinor eḳ mata bandio.
EXO 28:26 Aro duiṭa shunar ḳoṛa banaia bukur ufror tolir dui kunat lagaio. I duioṭa efronor loge bukur tolir tole roibo.
EXO 28:27 Bade aro duiṭa shunar ḳoṛa banaia, efronor ḳandor foṭṭir shoi toledi, feṭor ufror belṭor ufror silair ḳasat lagaio.
EXO 28:28 Bade bukur ufror tolir tolor ḳoṛar loge feṭor ufror noksha ḳora belṭor ḳoṛa lilua sutadi bandio. Teu ou toli efronor ufre taki horto nae.
EXO 28:29 “Pak zagat hamaibar bala Harune amar ray-foysala hunar lagi, bukur ufror tolir ufre leḳa Israilor baro fuar nam lagaite oibo, i toliṭae tarare hor-hamesha Mabudor samne raḳbo.
EXO 28:30 Amar ray-foysalar ou tolir bitre Urim ar Tummim namor fobitro fattorguin rakio. Harun zebla Mabudor samne azir oibo, ou shomoy ita tar bukur ufre roibo. Harune Boni Israilor lagi amar ray-foysala zanar ufae hishabe hor-hamesha tar bukur ufre Mabudor deoa ou siz raḳbo.”
EXO 28:31 Mabude Musare ḳoila, “Efronor tole lamba ze alḳella roibo, ikṭa furaṭa-u lilua rongor sutadi banaio.
EXO 28:32 Mata haraibar lagi er mazḳano faḳ rakio. I faḳ zaga zate na siṛe, erlagi er sairo gala mozbut ḳori bain ḳorte oibo.
EXO 28:33 Lilua, baingoni, lal rongor sutadi anuar folor laḳan banaia, ou alḳellar tolor muṛir sairobae lagaio. Ar itar maze maze dio shunar gungur.
EXO 28:34 I muṛit dibae egu ḳori anuar ar egu gungur.
EXO 28:35 Imamoti korar bala Harune i lebas findibo. He zebla pak zagat Mabudor samne azir oibo, ar hon taki bare bar oibo, ou shomoy ou gungur oḳlor aoaz huna zaibo, teu he morto nae.
EXO 28:36 “Ḳaṭi shunadi ekkan fat banaia er ufre silor laḳan kudia ou ayat lekaio, ‘Mabudor name fak-fobitro.’
EXO 28:37 I fatḳan faugṛir samnor galat lagaia lilua sutadi bandio.
EXO 28:38 Iṭa Harunor ḳofalor ufre roibo. Zoto fak-fobitro mal Boni Israile dan-ḳoyrat loia aiba, itar hoḳol nomunar dush-tiruṭir bar Harune boibo. Mabude zate tarare kobul ḳoroin, erlagi Harune ḳofalor ufre i shunar fatḳan hamesha lagaia raḳbo.
EXO 28:39 Imamor fainjabi ar faugṛi toiar ḳoraio chekor dami suti kafoṛdi. Ḳomror bondoni kan sui-sutadi noksha ḳori banaio.
EXO 28:40 “Harunor fuaintor ijjot ar shundoror lagi fainjabi, toki ar ḳomror bondoni toiar ḳoraio.
EXO 28:41 Tumi tumar bai Harun ar tar fuaintore i kafoṛ findaio. Tarar matat fobitro tel ḍalia ḳelafoti shomzaia imamoti kamo lagaio. Tumi tarare fak-fobitro ḳorio, zate tara amar imam oita faroin.
EXO 28:42 Ḳomor taki urat forzonto shoromor zaga gurar lagi suti kafoṛdi haf-penṭor laḳan zangia banaio.
EXO 28:43 Harun ar tar fuain zebla Milon-tambut hamaiba, ba kurbani kanar gese pak zagat hamaia imamotir ḳamo lagba, ou shomoy tara ou zangia finba. Teu tara ni-oforadi roiba, morta nae. Harun ar tar oarishor silsilar lagi i ain hor-hamesha salu roibo.”
EXO 29:1 Mabude Musare ḳoila, “Tumi imam oḳolre ou laḳan fak-saf ḳorio, zate imam bonia tara amar ebadot ḳam salaita faroin. Tumi nikut egu bisal ar dugu meṛar faṭa anaio.
EXO 29:2 Erloge moydadi ruṭi, teldi baza fiṭa, ar tel maḳail safaṭi banaio. Ita kuntat-u ḳamir mishaio na.
EXO 29:3 Ota banaia eḳ ṭukrit loio, erloge hou bisal ar duio meṛar faṭa loia amar samne aio.
EXO 29:4 Bade Harun ar tar fuaintore Milon-tambur duaror ḳasat ania, fanidi naoai dio.
EXO 29:5 Ar hou fobitro lebas oḳol ania Harunre findaio. Fainjabi, alḳella, efron ar bukur ufror toli hoḳolta findaio. Efronor loge ustadi ator banail hou feṭor ufror belṭ ḳan-o bandia dio.
EXO 29:6 Tar matat faugṛi findaio ar shunar fatdi banail fobitro taz ḳan-o lagaio.
EXO 29:7 Bade ḳelafotir tel tar matat ḍalia tare ḳelafoti dio.
EXO 29:8 Tar fuaintore-o ania fainjabi findaio.
EXO 29:9 Harun ar tar fuaintore ḳomror bondoni bandia dio. Fuaintor matat dio toki. Ou laḳan Harun ar tar fuaintore imamor fodo boail ḳorio, zate siroḳalin niom hishabe imamotir fod ḳali tarar bongshot taḳe.
EXO 29:10 “Bade hou bisalre tumi Milon-tambur samne anio, Harun ar tar fuainte ogur ḳolla ataia diba.
EXO 29:11 Atanir bade ou bisalre Milon-tambur duaror ḳasat nia Mabudor samne zobo ḳorio.
EXO 29:12 Zobo ḳoria harle tuṛa lou tumar angulit lagaia kurbani kanar hingor maze lagaio, ar baki lou kurbani kanar tole ḍali dio.
EXO 29:13 Bisalor feṭor bitoror at-boṛor sorbi, ḳoiljar logor maṭia, duio kiḍni ar er sorbi, kurbani kanar ufre nia zalailio.
EXO 29:14 Er gust, ḳal, at-boṛ gufor shudda Boni Israilor kempor bare nia zalailio, ita to gunar koforar kurbani.
EXO 29:15 “Bade hou duio meṛa taki egu meṛa anio, anle Harune ar tar fuainte ogur ḳolla ataia diba.
EXO 29:16 Ar ou meṛare zobo ḳoria er lou nia kurbani kanar sairo galat siṭai dio.
EXO 29:17 Meṛare ḳaṭia ṭukraia tar ṭeng ar feṭor bitoror hoḳolta doia, ḳolla ar baki ṭukraintor loge toio.
EXO 29:18 Heshe i astagu kurbani kanar ufre nia zalailio. Ita oilo Mabudor name zalail kurbani, Mabudor niote agunit deoa geran ala sodga.
EXO 29:19 “Bade dusra meṛare-o ania Harune ar tar fuainte ḳolla atai diba.
EXO 29:20 Atanir bade ogure zobo ḳoria er tuṛa lou nia Harun ar tar fuaintor ḍain ḳanor lotit, ḍain ator ar ḍain faor buṛi angulor maze lagaio. Ar baki lou nia kurbani kanar sairo galabae siṭai dio.
EXO 29:21 Bade ḳelafotir tel ar kurbani kana taki tuṛa lou loia, Harun ar tar fuaintor gotro ar lebasor ufre siṭai dio. Teu lebas shudda Harun ar tar fuain fak-saf oiba.
EXO 29:22 Tumi ou meṛar sorbi, sorbi ala lenguṛ, feṭor bitoror hoḳoltar ufror sorbi, ḳoiljar logor maṭia, duio kiḍni, er sorbi, ar ḍainor ran nio, iṭa oilo imamoti kamo boailor lagi boḳshia dibar meṛa.
EXO 29:23 Bade Mabudor nozoro toa ḳamir saṛa ruṭir ṭukri taki ekkan ruṭi, teldi baza ekkan fiṭa ar tel maḳail safaṭi ekkan loio.
EXO 29:24 Loia ita hoḳolta Harun ar tar fuaintor ato dia, Mabudor samne raḳar niote dulona kurbani hishabe dulaibae.
EXO 29:25 Ar ota tarar at taki nia, Mabudor samne kurbani kanar ufre, hou zalail kurbanir ufre zalailibae. Iṭa oilo Mabudor name agunit deoa sodga. Itar dumar gerane Mabud kushi oin.”
EXO 29:26 Mabude Musare ḳoila, “Tumi Harunre imamotir ḳamo boail ḳorar lagi, ḳelafoti shomzibar meṛar sinar ṭukra loia Mabudor samne dulona kurbani hishabe dulaibae. Iṭa oilo tumar baṭ.
EXO 29:27 Harun ar tar fuaintore imamotir ḳamo boailor lagi dulail ou sina ar ran tumi fak-fobitro ḳorio.
EXO 29:28 Ou laḳan Boni Israilor deoa ou kurbanir ṭukrain hor-hamesha Harun ar tar fuainte faiba. Ita oibo Mabudor name Boni Israilor deoa salamoti kurbanir eḳṭa ongsho.
EXO 29:29 “Harunor bebohar ḳora fobitro lebas oḳol tar oarish oḳole faiba. Ou lebas findia tara ḳelafoti faiba ar imamotir ḳamo boail oiba.
EXO 29:30 Harunor bade tar ze fua imam oia Milon-tambur pak zagat ḳam ḳorbo, he shatdin forzonto i lebas tar gotro raḳbo.
EXO 29:31 “Ḳelafoti shomzibar meṛar ou gust ḳanain nia kunu fobitro zagat randibae.
EXO 29:32 Harun ar tar fuainte Milon-tambur duaror ḳasat boia, ṭukrit toa hou ruṭir loge ou gust ḳaiba.
EXO 29:33 Imamor ḳamo boail ḳorar lagi, tarare fak-saf ḳorar lagi, ḳanir zeta siz oḳol gunar mafir lagi kurbani deoa oibo, ita ḳali Harun ar tar fuainte ḳaiba. Ar ḳeu ita ḳaito farto nae, ḳaron ita oilo fak-fobitro ḳana.
EXO 29:34 Ou boail ḳorar kurbanir meṛar kunu gust ba ruṭi zudi bian forzonto roizae, te ita zalailite oibo, ḳeu ḳaito farto nae, ita to fak-fobitro.
EXO 29:35 “Harun ar tar fuaintor lagi, ami tumare zotota ḳorar hukum disi, tumi oula ḳorio. Boail ḳorar ou ḳam tumi shatdin bora ḳorio.
EXO 29:36 Gunar kofora hishabe tumi forteḳ din egu ḳori bisal kurbani dibae. Ar kurbani kanare fak-fobitro ḳorar lagi-o ou laḳan kurbani dio, ar fak-saf oar lagi fobitro tel ḍalio.
EXO 29:37 Kurbani kanare fak-fobitro ḳorar lagi shatdin bora kurbani dia, guna mafir kofora adae ḳoria fak-fobitro ḳorio. Teu i kurbani kana eḳ moha-fobitro zaga oibo. Zekunu zinish i kurbani kanat soaile, ita fak-fobitro oizibo.
EXO 29:38 “Er bad taki forteḳ din i kurbani kanar ufre, eḳ boros boyoshor dugu meṛa-baichcha kurbani dibae,
EXO 29:39 egu biane ar egu hainja bala.
EXO 29:40 Foyla meṛa-baichchar loge dui sher moyda ar eḳ sher zoytunor fisha tel mishaite oibo. Ar shorbot-fanir sodgar lagi anguror eḳ sher shorbot-o Allar name dibae.
EXO 29:41 Hainja bala ze meṛa kurbani dibae, erloge-o biankur laḳan dan-gomor sodga ar shorbot-fanir sodgar hoḳolta dite oibo. Ita oilo Mabudor niote agunit deoa geran ala kurbani.
EXO 29:42 “Oarishor for oarish dori Milon-tambur duaror gese, mani amar samne forteḳ din i zalail kurbani dite oibo. Hono ami tumrare didar dimu, tumar loge batchit ḳormu.
EXO 29:43 Boni Israilor gese ami hono didar dimu, ar amar kudrote ou zaga fak-fobitro oibo.
EXO 29:44 Ami Milon-tambu ar kurbani kana fobitro ḳormu. Amar imamotir lagi Harun ar tar fuaintore-o ami fobitro ḳormu.
EXO 29:45 Ami Boni Israilor Mabud oia tarar maze boshot ḳormu.
EXO 29:46 Teu tara zanba, ami Alla-u tarar Mabud. Ami tarar loge boshot ḳorar lagi-u to tarare Mishor desh taki bar ḳoria anchi. Ami Alla-u tarar Mabud.”
EXO 30:1 Mabude Musare ḳoila, “Agor-kushboy zalaibar lagi tumi babla laḳṛidi ekkan ṭebul banaio.
EXO 30:2 Igu oibo sairkuna ala, eḳ at lamba, eḳ at fash, dui at ubi. Asta ḳan-u hing shudda ekḳano lagail roibo.
EXO 30:3 Er ufror sani, sanir sairo kinara ar hing, hoḳolta ḳaṭi shunadi lefibae. Sairo kinaro shunar noksha ḳoraibae.
EXO 30:4 Er dui kinaror nokshar tole dugu ḳori shunar ḳoṛa lagaio. I koṛar bitre benda haraia ogu boia neoa oibo.
EXO 30:5 I benda guin babla laḳṛidi banaia shunadi lefaio.
EXO 30:6 Shahadot shondukor ḍaḳnar ḳasat ze fordaḳan ase, ou ṭebul er samne rakio. Ou zagat ami tumare didar dimu.
EXO 30:7 “Forteḳ din biane serag guin zuit-zait ḳorar bala, Harune ou ṭebulor ufre kushboy-ala agor zalaibo.
EXO 30:8 Hainja bala serag zalanir shomoy, he hirbar agor-kushboy zalaibo. Tumrar oarishor for oarish dori Mabudor samne hor-hamesha ou agor-kushboy zolbo.
EXO 30:9 I agor-kushboy zalanir ṭebulor ufre dusra kunuzator kushboy zalaio na. Kunu zalail kurbani, dan-gomor sodga, ba shorbot-fanir sodga dio na.
EXO 30:10 Gunar mafir kofora hishabe, Harune bosoro eḳbar gunar koforar kurbanir lou, ṭebulor hing oḳlor ufre lagaite oibo. Teu ikan Mabudor name moha-fobitro oibo. Oarishor for oarish dori fordan imame bosoro eḳbar ou laḳan ḳorte oibo.”
EXO 30:11 Bade Mabude Musare ḳoila,
EXO 30:12 “Tumi zebla Boni Israilor manshor foriman gonbae, ou shomoy tara hoḳole-u zarzir zanor bodla rufa dite oibo, zate i gonar lagi tarar ufre kunu gozob na ae.
EXO 30:13 Tarare gonar bala oula bodla loio, gona oise dolo zera hamaiba, era ebadot ḳanar mafe ada tola rufa diba. Forteḳ bish rotie eḳ tola gonio. I rufa oibo Mabudor.
EXO 30:14 Bish boros ba er beshi boyoshor zekunu zon gona shesh oa dolo hamaile, en zanor bodla Mabudre ou rufa diba.
EXO 30:15 Zanor bodla deoar shomoy doni oḳole ou ada tolar beshi dita farta nae, ar goribe-o ḳom dile oito nae.
EXO 30:16 Tumi Boni Israilor ges taki zanor bodla ou rufa nia, amar goror ḳamo lagaio. Tumrar zanor bodla i rufae, Boni Israil oḳolre Mabudor dorbaro iad ḳorai dibo.”
EXO 30:17 Mabude Musare ḳoila,
EXO 30:18 “Uzu ḳorar lagi tumi fitolor eḳṭa gamla, ar gamla toar lagi fitolor ekkan soki-kaṭ banaio. Milon-tambu ar kurbani kanar mazḳano fani boria ogu toio.
EXO 30:19 I fanidi Harun ar tar fuainte uzu ḳorba.
EXO 30:20 Tara zate na moroin, erlagi forteḳbar Milon-tambut hamaibar bala ou fanidi uzu ḳorte oibo. Imam hishabe Mabudor name agunit deoa zekunu kurbani adae ḳorar shomoy-o uzu ḳorte oibo.
EXO 30:21 Tara zane basia roar lagi ou uzu ḳorba. I hukum tarar lagi hor-hamesha salu roibo, oarishor for oarish dori boail roibo.”
EXO 30:22 Mabude Musare ḳoila,
EXO 30:23 “Tumar nizor gese kushboydar bala bala moshla oḳol dola ḳoro. Tumi fas-sho tola mura namor ator, aṛai-sho tola kushboy-ala ḍailchini, ar aṛai-sho tola bos,
EXO 30:24 shadaron ḍailchini fas-sho tola, ar zoytunor tel sair sher dola ḳorio. I maf oilo ebadot ḳanar mafe.
EXO 30:25 Ou moshla oḳol dia agor-kushboy moshla bananir ḳarigoror niome tumi kelafoti shomzibar tel banaio, i tel to fobitro.
EXO 30:26 Ou tel dia tumi Milon-tambu, shahadot shonduk,
EXO 30:27 ṭebul, ṭebulor ufror hoḳol samana, serag danir hoḳolta, ar agor-kushboy zalanir ṭebul,
EXO 30:28 kurbani kana ar er mazor hoḳol samana, uzur gamla ar er tolor soki-kaṭ hoḳoltare fusia fak-fobitro ḳorio.
EXO 30:29 Teu i hoḳolta moha-fobitro samana oibo. Ita samana ḳeu soile, he-o moha-fobitro oizibo.
EXO 30:30 “Tumi Harunre ar tar fuainre amar imamotir ḳamor lagi kelafotir tel dia fak-fobitro ḳorio.
EXO 30:31 Ar Boni Israilre zanai dio, oarishor for oarish dori iṭa-u oibo amar ḳelafoti shomzibar fobitro tel.
EXO 30:32 I tel manshor gotro deoa zaito nae. I niome tara zate ar kunu tel na banae. I tel to fobitro. Tumra iṭare fak-fobitro mono ḳoria ijjot ḳorte oibo.
EXO 30:33 Ḳeu zudi i laḳan tel toiar ḳore, ba imam sab saṛa ar ḳeu i tel gotro maḳe, te tare nizor zati taki fusilibae.”
EXO 30:34 Mabude Musare ḳoila, “Tumi nizor gese kisu kushboy-ala moshla: guggulu, noki, kunduru ar ḳaṭi loban dola ḳorio. Dola ḳoria ota homan homan ḳori mishaio.
EXO 30:35 Ar zera agor-kushboy banain, tararedi ou ḳam ḳoraio. Itar loge nun mishaio, ita oibo nirbezal ḳaṭi fak-fobitro agor.
EXO 30:36 Ou agoror tuṛa guṛa nia Milon-tambur shahadot shondukor samne toio. Hono ami tumare didar dimu. Tumra i agorre moha-fobitro samana mono ḳorio.
EXO 30:37 Ou moshla dia i niome ḳeu zate tar nizor lagi kunu agor-kushboy na banae. Ita to Mabudor name fak-fobitro siz, ikan kial rakio.
EXO 30:38 Kushboydar siz mono ḳoria ḳeu zudi ita toiar ḳorilae, te tare i zati taki fusilibae.”
EXO 31:1 Mabude Musare ḳoila,
EXO 31:2 “Huno, ami Ehuda gusṭir Huror nati, Urir fua Batselolre fosond ḳorsi.
EXO 31:3 Ami tare Allai ruhu dia kamil ḳorsi. Hoḳol laḳan ḳarigori kamor aḳol-buddi, biddae ustadi kamor ḳemota disi.
EXO 31:4 Erlagi he shuna, rufa, fitolor ufre shundor shundor noksha banaito farbo.
EXO 31:5 Dami dami fattor ḳaṭia moni-mukta lagani, laḳṛir ufre nokshar ḳam ar hoḳol zator ator ḳam ḳorto farbo.
EXO 31:6 Tar zugali hishabe ami Dan gusṭir Ohisamaḳor fua Aholiabre fosond ḳorsi. Ze ustad oḳole i kam ḳorta farba, ami tarare ḳamor aḳol disi, zate tumare batail amar hukum mafik, ita hoḳolta tara banaita faroin.
EXO 31:7 Tara banaiba, Milon-tambu, shahadot shonduk, er ufror ḍaḳna, tambur hoḳol mal-samana,
EXO 31:8 ṭebul, ṭebulor logor siz oḳol, ḳaṭi shunar serag dani, serag danir logor hoḳolta ar agor-kushboy zalanir ṭebul,
EXO 31:9 kurbani kana ar er hoḳol mal-samana, hanḍi-bashon, uzur fanir gamla ar er soki-kaṭ,
EXO 31:10 imamoti kamor lagi Harunor imamotir lebas ar tar fuaintor lebas,
EXO 31:11 ḳelafotir tel, pak zagar lagi kushboy-ala agor. Ami tumare zela hukum disi, ekkere ou laḳan tara banaiba.”
EXO 31:12 Mabude Musare ḳoila,
EXO 31:13 “Tumi nize Boni Israilre ḳo, tumra amar deoa forteḳ Zummabar manio. I Zummabar oarishor for oarish dori tumra ar amar maze eḳ nishana oibo, zate tumra buzbae, ami-u Mabud, ar ami tumrare amar fobitro bonda oar lagi alada ḳorsi.
EXO 31:14 “Tumra Zummabar manio, ou dinre tumrar lagi pak din ḳora oise. Ḳeu zudi i din na mane, te tare marilite oibo. Ze manshe idin kunuzat ḳam ḳorbo, tare tar zatir maz taki fusilibae.
EXO 31:15 Tumra haftar soydin ḳam ḳorio, oile shat nombor din Mabudor name aramor din, Zummabar. Shukrobar shuruz ḍuba taki Shonibar shuruz ḍubar ag forzonto Zummabar. I din ze manshe ḳam ḳorbo, tare marilibae.
EXO 31:16 Boni Israil oḳole amar deoa siroḳalin niom hishabe, oarishor for oarish dori hor-hamesha i Zummabar mante oibo.
EXO 31:17 I Zummabar to Boni Israil ar amar maze hameshakur lagi siroḳalin eḳ nishana. Ḳaron soydine Mabude asman-zomin hoḳolta foyda ḳorla, oile shat nombor din kunu ḳam na ḳoria ziraila.”
EXO 31:18 Mabude Tur faṛor ufre Hozrot Musar loge ou batchit shesh ḳoria harle, Musar ato dui ṭukra shahadot fattor dila. Ou fattoror maze Alla Pake tan nizor ate tan hukum-ahkam leḳsoin.
EXO 32:1 Musa nobi faṛ taki lamia aite deri or dekia, manshe aia Harunor sairobae dola oia ḳoila, “Amrare fot sinaia neoar lagi, afne amrare devta banai deukka. Ḳaron, ze Musae amrare Mishor taki bar ḳori anche, tar kita goṭse amra to zani na.”
EXO 32:2 Ikan hunia Harune tarare ḳoila, “Tumra zarzir bou ar fua-fuṛintor ḳano taki shunar goyna kulia amar gese ano.”
EXO 32:3 Teu hoḳole tarar ḳanor goyna kulia Harunor gese ania dilo.
EXO 32:4 Manshe zeta shuna ania dila, Harune ota nia aguindi golaia, hunaror atiardi eḳ basuror murti banaila. Ogu dekia Boni Israile ḳoila, “Bai oḳol, ou ein-u tumrar devta, zein tumrare Mishor desh taki bar ḳori anchoin.”
EXO 32:5 I halot dekia Harune hou basuror samne eḳ boli kana banaia zanai dila, “Samnor ḳail Mabudor name kushi-bashi kora oibo.”
EXO 32:6 Teu bador din kub sobre uṭia manshe devtar samne aia mongol boli ar foshu zalaia boli dila. Bade tara ḳaoa-daoa ḳoria hari, hoi-hulla ḳori nas-gan, furti-amud ḳorat lagla.
EXO 32:7 Ou Mabude Musare ḳoila, “Tumi faṛor lamat zao. Tumar ou zeta manshore Mishor desh taki bar ḳori ancho, ita to naforman bonigese.
EXO 32:8 Ami tarare zela solar hukum dislam, tara ita bad dia nizor lagi eḳ basuror murti banaia, maṭit foṛia ogure fornam ḳorer. Ogur name tara foshu boli der ar ḳor, bai oḳol, ou ein-u tumrar devta, zein tumrare Mishor desh taki bar ḳori anchoin.”
EXO 32:9 Mabude Musare ḳoila, “Ami ita manshore sini, ita to gaṛteṛa-ekguia zat.
EXO 32:10 Oḳon tumi amare bada dio na, itar ufre amar gusa aguinor laḳan dau dau ḳori zoler, ami itare sarḳar ḳorilimu. Bade ami tumar maz taki eḳ moha zati foyda ḳormu.”
EXO 32:11 Teu Musae tan Mabud Allare minot-ḳajji koria ḳoila, “O Mabud, tumi tumar kudroti at dia tumar moha kudroti bole zetare Mishor taki bar ḳori ancho, tarar ufre tumi kene oto gusa oilae?
EXO 32:12 Mishori oḳole ḳene ikan matar shuzug faita, faṛia elaḳat ania tarare ḳotom ḳoria, dunia taki tarar nam miṭailibar lagi tumi tarare Mishor taki bar ḳoria ancho? Mabud go, tumar i betaya gusaḳan tumi tamailao. Meherbani kori, tumar bonda oḳlor ufre i gozobḳan anio na.
EXO 32:13 Tumar afon gulam Ibrahim, Isʼhak ar Iakubor ḳota iad ḳoro. Tumi nizor name ḳosom ḳaia tarare ḳoislae, tarar oarish oḳolre tumi asmanor terar laḳan baṛaibae, ar tumar oada ḳora ou asta deshor malikana-o tarare dibae, ar tara hor-hameshakur lagi er doḳol faiba.”
EXO 32:14 Ikan hunia Mabudor meherbani oilo. Tain tan bonda oḳlor ufre ze gozob ḍalita saisla, ita bad dilaila.
EXO 32:15 Erbade Musae Allar deoa duioḳan shahadot fattor loia lamat aila. I fattoror ulṭa-baṭiol duio galat leḳa asil.
EXO 32:16 I duio fattor oilo Alla Pakor nizor ator ḳam, ar i fattoror ufre kudia leḳa ḳano tan nizor ator leḳa.
EXO 32:17 Musar ḳadim Iusae manshor ita hoi-hulla hunia Musare ḳoila, “Sab, amrar kempor maze zuddor aoaz huna zar.”
EXO 32:18 Musae ḳoila, “Ita to kunu zuddor ara-zitar aoaz nae. Ami zeta huniar, ita to ganor aoazor laḳan lager.”
EXO 32:19 Bade Musae kempor ḳasat aia manshor nasa-nasi ar basuror murti deḳla. Dekia-u tain gusae aguin oia, ator fattor duioḳan iṭa mari falai dila. Teu fattor duioḳan faṛor tole foṛia surmar oigelo.
EXO 32:20 Ar Musae tarar banail basuror murti nia agunit falaia zalailila. Bade ogure fishia guṛa banaia fanit mishaia, Boni Israil oḳolre ḳaoai dila.
EXO 32:21 Tain Harunre ḳoila, “Ita manshe tumare kita ḳorsil, tumi kene tararedi shiriki kam ḳorailae?”
EXO 32:22 Harune zuaf dila, “Malik, afne gusa ḳoroin na zanu, afne to zanoin-u, ita manush ḳali karaf ḳamor ashik.
EXO 32:23 Tara aia amare ḳoila, amrare fot sinaia loia zaoar lagi devta banai deukka, ḳaron ze Musae amrare Mishor taki bar ḳori anchoin, en kita oise, amra to zaniar na.
EXO 32:24 Ikan hunia ami tarare ḳoilam, tumrar gese zeta shuna-dana ase, ota kulia amar gese ano. Tara ania amar ato dila, ar ami oḳnain iṭa mari agunit falailam, teu ou basur ogu bar oia ailo.”
EXO 32:25 Musae deḳla, i manush guin beforua oigesoin. Tain buzla, Harune tarare beforua oar shuzug disoin. Erlagi dushmon oḳole ashibar shuzug faisoin.
EXO 32:26 Ou Musae kempor geiṭor gese ubaia ḳoila, “Tumra zoto zon Mabudor fokke aso, hoḳol amar ḳasat ao.” Teu Lebi gusṭir hoḳol manush tan gese ailo.
EXO 32:27 Aia harle Musae tarare ḳoila, “Mabud, zein Boni Israilor Alla, tain nize hukum ḳorsoin, tumra hoḳole zarzir ḳomro toluar bando, ar kempor bitre zare samne fao zane maro. Asta kempor bitre bai-bondu, ari-fori zare fao maro.”
EXO 32:28 Teu Lebi gusṭir manshe Musar hukum mafik kam ḳorla. Hi din onuman tin azar manush mara gela.
EXO 32:29 Bade Musae ḳoila, “Tumra aiz Mabudor name zarzir fua ar bai-biradoror ufre at tulte ḳoredi geso na, Mabudor ḳamor lagi tumra alada oiso, erlagi Mabude tumrare rohomot disoin.”
EXO 32:30 Bador din Musae manshore ḳoila, “Tumra to bezuita guna ḳorso. Te ami oḳon hirbar Tur faṛo Mabudor dorbaro zairam, farle tumrar guna mafir koforar kunu fot bar ḳormu.”
EXO 32:31 Musae Mabudor dorbaro gia aroz ḳorla, “O Mabud, i manush guinte bezuita guna ḳorilise. Tara nizor lagi shunar murti banaise.
EXO 32:32 Te tumi meherbani koria tarar gunare oḳon maf ḳori dilao, ar zudi maf na ḳoro, taile tumar leḳa ḳata taki amar namḳano ḳaṭilao.”
EXO 32:33 Mabude zuaf dila, “Huno, amar birudde zera guna ḳorse, ami kali tarar namre-u amar ḳata taki fusilimu.
EXO 32:34 Te tumi oḳon zaogi, ar ami ze deshor ḳota ḳoisi, tumi tarare loia hou desho roana dilao. Amar firistae tumrare fot deḳaia niba. Bade zebla shaza deoar shomoy aibo, ou shomoy ami tarar gunar shaza dimu.”
EXO 32:35 Harunor ate banail hou basuror murtir lagi manshe zeta ḳorsila, otar lagi Mabude tarar ufre gozob nazil ḳorla.
EXO 33:1 Mabude Musare ḳoila, “Zao, tumi ou zerare Mishor taki ancho, erare loia oḳon-u i zaga saṛia zaogi. Amar oada ḳora hou desho zao. Ami Ibrahim, Isʼhak ar Iakubor gese oada ḳorslam, tarar oarish oḳolre ou desh oḳol dimu, te tumi tarare loia hono zaogi.
EXO 33:2 Ami tumrar age ḳori eḳzon firista faṭaimu. Ein gia honor Kenani, Amuri, Hiṭṭi, Farizi, Hibbi ar Zibuzi oḳolre ḳedai diba.
EXO 33:3 Ita to dud ar mour banḍar-ala desh. Oile ami tumrar loge oia zaitam nae, ḳaron tumra kub gaṛteṛa-ekguia zat, kizanu ami fotor maze-u tumrare nifat ḳorilai.”
EXO 33:4 I bifodor ḳota hunia manshe ḳanda-ḳaṭi lagaila. Tara ḳeu kunuzat goyna-gaṭi finla na.
EXO 33:5 Ḳaron Mabude Musare ḳoisla, “Tumi Boni Israil oḳolre ḳo, tumra oilae gaṛteṛa-ekguia zat. Ami eḳ foloḳor lagi gele-o tumrare nifat ḳorilimu. Tumrar gotro taki hoḳol goyna-gaṭi kulilao, teu ami buzmu, tumrar lagi kita ḳortam.”
EXO 33:6 Teu Boni Israile Tur faṛo-u tarar goyna-gaṭi hoḳolta kulilila, ita ar finla na.
EXO 33:7 Hozrot Musar eḳ tambu asil, tain Boni Israilor kempor bare duroi nia ou tambu fatita, i tambure tain ḳaneka-tambu ḳoia ḍakita. Mabudor ges taki keu kunta zante saile tara ou ḳaneḳar gese zaita.
EXO 33:8 Musa zebla hi kaneḳa shorifo roana dita, ou shomoy hokkol manush zarzir tambur duaro ubaita ar Musa ḳaneḳat na hamani forzonto hoḳole tan bae sai roito.
EXO 33:9 Tain hi kaneḳa shorifo hamanir bade-u Allai megor kuṭi kaneḳar duaror muko lamia aito, ar Mabude zotoboil Musar loge batchit ḳorta, otoboil i kuṭi ono roito.
EXO 33:10 Manshe zebla-u i megor kuṭire ḳaneḳar duaror gese deḳto, ou shomoy tara zarzir duaror ges taki Mabudre soizda ḳorto.
EXO 33:11 Kunu manshe tar dustor loge mukamuki boia zela batchit ḳore, Mabude-o Musar loge oula mukamuki batchit ḳorta. Bade Musa kempo firia aita, oile tan ḳadim Nunor fua Iusa namor i zuan, ḳaneḳa shorif taki bar oita na.
EXO 33:12 Musae Mabudor dorbaro aroz ḳorla, “Mabud, tumi to ḳoirae ami ota manshore loia zaitamgi, oile amar loge ar ḳare dirae, ikan to amare zanailae na. Tumi kali koilae, tumi amare tumar nizor zon mono ḳoro ar amare tumar ḳas mayar nozoro raḳso.
EXO 33:13 Te hasau zudi ami tumar mayar nozoro taki, taile tumi kun kiale kita ḳoro, ota amare zanao, zate ami tumare furafur sini ar tumar rohomotor maze roi. Tumi to zano-u, i Israil zati tumar-u proza.”
EXO 33:14 Mabude zuaf dila, “Huno, ami nize-u tumar loge oia zaimu ar tumare aram dimu.”
EXO 33:15 Ou tain ḳoila, “Tumi zudi amrar loge na zao, te amrare in taki bidae dio na.
EXO 33:16 Tumi na gele manshe kila buzba, amar ufre ar tumar i bonda oḳlor ufre tumar rohomot ase? Amra-u zen duniar hoḳol zati taki alada, ikan kila buzba?”
EXO 33:17 Mabude Musare ḳoila, “Ṭik ase, tumi zela ḳoilae, ami ola ḳormu. Tumi to amar mayar nozoro aso, tumare amar nizor afon mono ḳori.”
EXO 33:18 Teu Musae aroz ḳorla, “Te tumar shan-tozolli amare deḳaona.”
EXO 33:19 Mabude ḳoila, “Ami zare kushi doya ḳormu, ar zare kushi rohom ḳormu. Huno, tumar samnedi ami amar hokkol nek surot zair ḳormu. ‘Mabud, zein asoin’ tumar samne ami amar ou nam elan ḳormu.
EXO 33:20 Oile amar muk deḳar takkot tumar oito nae. Ḳaron amare dekille kunu adom zat base na.
EXO 33:21 Te huno, tumi amar ḳasar ou zaga bae sao, deḳrae ni, fattoror eḳ taḳ ase, ou taḳor ufre tumi ubao.
EXO 33:22 Teu tumar samne dia amar shan-tozolli zaoar bala, ami tumare ou fattoror faṭar bitre haraimu. Ami na zaoa forzonto, amar at dia tumare guria raḳmu.
EXO 33:23 Bade amar at horaile, tumi amar ḳor gala deḳtae farbae, oile ḳeu amar mukor didar faito nae.”
EXO 34:1 Mabude Musare ḳoila, “Agor fattoror laḳan tumi noya dukan fattor tiar ḳoro. Tumi ze dukan bangislae, hi fattoror maze ze hukum leḳa asil, ou hukum oḳol ami hirbar i duio fattoro lekia dimu.
EXO 34:2 Fozor bade-u tumi tiar oia Tur faṛor ufre uṭio. Uṭia faṛor matat amar samne azir oio.
EXO 34:3 Tumar loge kunu manshore anio na, i faṛor kunuḳano zate kunu manush na ae. Faṛor ḳandat kunu goru-sagol ba meṛa-meṛire raḳte dio na.”
EXO 34:4 Teu Musae agor fattoror laḳan dukan fattor banaila, ar Mabudor hukum mafik fozore uṭia fattor duioḳan ato loia Tur faṛor ufre uṭila.
EXO 34:5 Ar Mabud-o megor ḳalnir maze lamia aila. Tain Hozrot Musar daro ubaia tan “Mabud, zein asoin” nam elan ḳorla.
EXO 34:6 Tain Musar samna dia toshrif nila, ar ou kalam elan ḳori kori gela, “Mabud, zein asoin, rohman ar rohim Alla, tain gusa ḳoroin dir gotie, tan obiram maya-mohobbot ar hok-halalir kunu shima nai.
EXO 34:7 Tain azar azar oarish forzonto obiram maya-mohobbot ḳoroin, manshor oinnae-oforad, naformani ar gunar mafi dein, oile dushi zonre shaza-o dein. Baf-dadar naformanir shaza, tarar nati-futi forzonto bortain.”
EXO 34:8 Ikan hunia-u Musa nobi loge loge soizdat foṛia ḳoila,
EXO 34:9 “O malik, ami zudi tumar dorbaro rohomot fai, te meherbani kori tumi-o amrar log kano solo. Ou zati zudio kub gaṛteṛa-ekguia zat, ta-o tumi amrar guna ar ḳosurire maf ḳoria dilao. Amrare tumar afon proza hishabe kobul ḳorilao.”
EXO 34:10 Mabude ḳoila, “Huno, ami eḳ usilla boail ḳoriar, ami tumar hoḳol manshor samne ou laḳan keramoti kam deḳaimu, zeta asta duniar kunu zatir samne kunudin-o ḳora oise na. Tumi ou zeta manshor loge boshot ḳorrae, tara deḳba, ami Mabude tumrar lagi kita ḳoriar, ita dekia tarar zano ḍor hamaibo.
EXO 34:11 Ami aiz tumrare zeta hukum dimu, ita kial ḳori amol ḳoro. Ami Amuri, Kenani, Hiṭṭi, Farizi, Hibbi ar Zibuzi oḳolre tumrar samna taki kedai dimu.
EXO 34:12 Oile ḳobordar! Tumra ze desho zairae, i deshor manshor loge kunuzat chukti korio na, arnae fando hamaibae.
EXO 34:13 Tumra tarar puja-monḍop bangia ṭukra ṭukra ḳorbae, tarar boli kanain bangilibae, ar tarar Ashera-debir nishana kuṭi oḳol ḳaṭia falaibae.
EXO 34:14 Tumra kunu deb-debir puja ḳorio na. Ami Alla to la-shorik Mabud, kunu shorik shoijjo ḳori na, amar faona ebadot ami sai-u sai.
EXO 34:15 “Hou deshor manshor loge kunuzat chukti korio na, arnae tara zebla shiriki kamor niote, tarar deb-debir samne nizore shofia diba, devtar name boli diba, ou shomoy tara tumrare-o daot diba ar tumra gia tarar ou bolir gust ḳaibae.
EXO 34:16 Tumrar fuaintor loge tarar fuṛintor bia-shadi dibae, ar ou fuṛinte tarar devtar gese gia shiriki kam ḳorba, tarar loge tumrar fuaintore-o ṭanba.
EXO 34:17 “Tumra nizor lagi kunuzator murti banaio na.
EXO 34:18 “Tumra Ḳamir Saṛa Ruṭir Id adae ḳorio. Shat din ḳamir saṛa ruṭi kaio. Abib sandor ṭik kora tariko tumrare zela hukum deoa oise, ou laḳan id adae ḳorio. Mono rakio, ou sando tumra Mishor taki bar oia aislae.
EXO 34:19 “Tumrar feṭor foyda hoḳol foyla fua amar oibo. Erloge tumrar goru-sagol ba foshur foyla meda baichcha-o amar oibo.
EXO 34:20 Ḳali gadintor foyla meda baichchar bodla, amare egu meṛa-baichcha bodla dia ogure ḳalas ḳoria nio. Ḳalas na ḳoraile ogur gordona bangilio. Tumrar hokkol boṛo fuainre ola ḳalas ḳorai nio. “Huno, idor shomoy ḳeu ḳali ate amar ḳasat aio na.
EXO 34:21 “Haftar soydin tumra ḳam ḳorio, oile shat nombor din ziraio. Ḳet ḳora ar foshol daoar bala-o ziraio.
EXO 34:22 “Ou tino id tumra manio, Fonchaisha Id, ḳetor foyla daoa gom dia Noya Fosholor Id, ar bosoror hesh masho baganor faḳna fol baṛit ania Ḍera-goror Id adae ḳorio.
EXO 34:23 Bosoro tinbar tumrar hoḳol beṭain aia hoj ḳorar niote amar gese azir oio. Mono rakio, ami-u Mabud, Boni Israilor Alla.
EXO 34:24 Ami hou deshor hoḳol zatire tumrar samon taki kedai dimu. Tumrar deshor shimana baṛaia boṛo ḳormu. Tumra bosoro tinbar nizor Mabud Allar samne azir oio, teu tumrar zaga-zominor bae ḳeu lalos ḳorto nae.
EXO 34:25 “Amar namor kurbanir foshur loge tumra ḳamir ala kunta lilla-kurbani dio na. Azadi Idor kurbanir kunuzat ḳani bian forzonto rakio na.
EXO 34:26 “Tumrar ḳetor daoa foyla fosholor hoḳol taki bala ongsho Alla Mabudor goro loia aio. “Ar huno, sagolor baichchar gust tar maʼr duddi randio na.”
EXO 34:27 Bade Mabude Musare ḳoila, “Tumi i kalam oḳol lekia to. Ami ou kalam mafik tumar loge ar Boni Israilor loge amar milonor usilla boail ḳorlam.”
EXO 34:28 Ou shomoy Musa nobi sallish din sallish rait Mabudor daro faṛor ufre roila. Tain kunuzat dana-fani kaila na. Mabude hou duio fattoror ufre tan loge milonor usillar ou ayat oḳol, mani shoriotor doshṭa hukum-ahkam lekia dila.
EXO 34:29 Teu Musae shahadot fattor duioḳan ato loia Tur faṛ taki lamia aila. Mabudor loge batchit ḳorae Musar mukor surot nurani oigelo, oile Musae ikan ṭer faila na.
EXO 34:30 Ou shomoy Harun ar hoḳol Boni Israile Musar nurani surot deḳla, dekia tara ḳasat aite ḍoraigela.
EXO 34:31 Oile Musae tarare ḍaḳ dila, teu Harun ar Boni Israilor murobbi oḳol tan gese aila, ar Musae tarar loge mat-ḳota matila.
EXO 34:32 Bade hoḳol Boni Israil tan ḳasat aila. Aia harle tain Tur faṛor ufre Mabudor deoa hoḳol hukum-ahkam tarare zanaila.
EXO 34:33 Tarar loge mat-ḳota shesh oigele Musae tan nurani sehara lukanir lagi muko forda lagai dila.
EXO 34:34 Oile Musae zebla Mabudor loge batchitor lagi kaneḳar bitre tan samne zaita, ou shomoy i forda kulilita. Bade bare aia forda lagaita, ar Allar deoa hukum oḳol Boni Israilre zanaita.
EXO 34:35 Hoḳol manshe deḳta Musar muk nurani oigese. Musae tan muk gurilita ar Mabudor samne zaoar ag forzonto tan muk gura roito.
EXO 35:1 Musa nobie Boni Israilor hoḳol gusṭire dola ḳoria ḳoila, “Mabude hukum disoin, tan ou hukum-ahkam amol ḳorar lagi.
EXO 35:2 Tumra haftar soydin ḳam ḳorio, oile shat nombor din Mabudor name fak-fobitro din, aramor din, Zummabar. I din ze manshe ḳam ḳorbo, tare marilibae.
EXO 35:3 Zummabare tumrar ḳeuror goro aguin zalaio na.”
EXO 35:4 Hozrot Musae Boni Israilre ḳoila, “Mabude hukum disoin,
EXO 35:5 tumra zarzir dilor kushi mafik Mabudor name lilla loia ao. Anar shomoy oula siz oḳol lilla anio: shuna, rufa, fitol;
EXO 35:6 lilua, baingoni, lal rongor suta; dami suti kafoṛ ar sagolor ruma;
EXO 35:7 lal rong lagail meṛar samṛa, fuʼr samṛa; babla laḳṛi;
EXO 35:8 serag zalanir lagi zoytunor tel; kelafoti shomzibar telor moshla ar agor-kushboy bananir moshla;
EXO 35:9 imamor efron ar bukur ufror tolit laganir lagi akik moni ar hoḳol nomunar dami fattor.
EXO 35:10 “Tumrar maze zara bala ustad ḳarigor, tara aia ou hoḳolta banaiba, zela Mabude hukum disoin:
EXO 35:11 Allar gor, goror sal, huk, freim, batti, kuṭi, kuṭir tolor sungi;
EXO 35:12 shahadot shonduk, shondukor ḍaḳna, shonduk boia neoar benda; shondukre agla dibar forda;
EXO 35:13 benda shudda ṭebul, ṭebulor ufror hoḳol siz, Mabudor namor fobitro ruṭi;
EXO 35:14 for dibar lagi serag dani, er logor hoḳol siz ar serag oḳol, serag zalanir tel;
EXO 35:15 agor-kushboy zalanir ṭebul, ikan boia neoar benda; kelafotir tel, kushboy-ala agor, Allar goror duaror forda;
EXO 35:16 zalail kurbani dibar kurbani kana; er fitolor zali ar boia neoar benda; kurbani kanar hokkol mal-samana; uzur gamla ar gamla toar soki-kaṭ;
EXO 35:17 uṭanor fordain, kuṭin ar kuṭir tolor sungi; uṭano hamanir geiṭor forda;
EXO 35:18 goror fereg ar doṛi, uṭanor fereg ar doṛi;
EXO 35:19 pak zagat imamoti kamor lagi, imam Harunor fobitro lebas, ar tan fuaintor-o imamotir lebas.”
EXO 35:20 Musa nobir boyan bade Boni Israilor hoḳol gusṭi bidae oigela.
EXO 35:21 Gia tarar dilor eshki mafik zarzir ichchae Allar Milon-tambu bananir lagi, imam Harunor fak-fobitro lebasor lagi ar ebadot ḳamor lagi hoḳol nomunar mal-samana loia aila. Allar name lilla dibar lagi ota loia tara azir oila.
EXO 35:22 Beṭain ba beṭintor maze zarar mone sailo, tara ita dila. Tara zarzir ḳafoṛor fing, ḳanor iaring, angṭi, golar har, ar hoḳol zator shunar goyna ania Mabudor name dulona kurbani hishabe dila.
EXO 35:23 Ar zerar gese lilua suta, baingoni, lal suta, dami suti kafoṛ, sagolor ruma, lal rong kora meṛar samṛa, fuʼr samṛa asil, tara ita hoḳolta loia aila.
EXO 35:24 Zerar gese rufa ar fitol asil, tara-o ita ania Mabudor name lilla dila. Allar goror ḳamo laganir zuka babla laḳṛi zerar gese asil, tara-o ita loia aila.
EXO 35:25 Zeta beṭinte suta bananit ustad, tara nizor ate lilua, baingoni, lal rongor suta, ar dami suti kafoṛ banaia anla.
EXO 35:26 Ar suta banaora zeta beṭintor dilor maze eshki foyda oilo, tara sagolor ruma dia suta banaila.
EXO 35:27 Murobbi oḳole efron ar bukur ufror tolit laganir lagi, akik moni ar dami dami fattor loia aila.
EXO 35:28 Serag zalanir tel, ḳelafoti shomzibar tel, agor-kushboy bananir moshla ar zoytunor tel-o anla.
EXO 35:29 Mabude Musar mazdi zeta zeta ḳorar hukum disla, ita fura ḳorar lagi Boni Israilor hoḳol beṭain-beṭinte, zarzir kushi mafik lilla loia azir oilo.
EXO 35:30 Bade Musae hoḳol Boni Israilre ḳoila, “Mabude Ehuda gusṭir Huror nati, Urir fua Batselolre fosond ḳorsoin.
EXO 35:31 Tain ere nizor ruhu mubarok dia kamil banaia, hoḳol laḳan ḳarigori kamor aḳol-buddi, biddae ustadi kamor ḳemota disoin.
EXO 35:32 Erlagi ein ḳarigori kam ḳorar bala nizor aḳol ḳaṭaia shuna, rufa, fitolor ufre shundor shundor noksha banaita farba.
EXO 35:33 Dami dami fattor ḳaṭa, laḳṛir ufre noksha, ar hoḳol nomunar ator ḳam ḳorta farba.
EXO 35:34 Ar oinno manshore-o ita ḳam hikanir lagi Batselol ar Dan gusṭir Ohisamaḳor fua Aholiabor dilo Mabude aḳol disoin.
EXO 35:35 Tain erare nanan zator nokshar ḳam, lilua, baingoni, lal sutadi kafoṛ bain ḳora, noksha ḳora, silai kora, ar dami suti kafoṛ silai korar-o aḳol disoin. Tara hoḳol nomunar ator ḳam ḳorta farba, ar nizor mon taki nanan nomunar noksha banaita farba.”
EXO 36:1 Musa nobie eoḳan ḳoila, “Mabude Batselol, Aholiab ar oinno ḳarigor oḳolre aḳol-buddi dan ḳorla, zate tara fobitro ebadot ḳanar hoḳol ḳam-ḳaz ḳorta faroin. Mabude zela hukum ḳorsoin, ou laḳan tara zanu ebadot ḳanar hoḳolta banain ar hazain.”
EXO 36:2 Ou ḳam ḳoranir lagi Musae Batselol ar Aholiabre anaila. Mabude zeta ustad ḳarigor oḳolre aḳol-hekmot disoin, ar i kam ḳorar lagi zerar dilo ḳaish foyda oise, Musae tarare-o anaila.
EXO 36:3 Tara aia fobitro ebadot ḳana bananir lagi, Boni Israilor deoa lillar hoḳol mal-samana Musar ges taki shomzia nila. Manshe kushi oia nizor ichchae forteḳ din biane aro siz oḳol ania ono lilla dita.
EXO 36:4 Ze ustad ḳarigor oḳol ebadot ḳanar ḳamo asla, tara ita dekia, nizor ḳam toia aia Musare ḳoila,
EXO 36:5 “Mabude zeta zeta bananir hukum disoin, ita bananir lagi manshe dorḳar taki aro beshi mal-samana loia aira.”
EXO 36:6 Teu Musar hukume manshe hoḳol Boni Israilre zanai dila, ebadot ḳana bananir lagi, ḳeu zanu ar kunu mal-samana lilla na dein. Ougi manshe lilla deoa bond ḳorla.
EXO 36:7 Ḳaron ebadot ḳanar ḳamor lagi dorḳar taki aro beshi siz zugaṛ oigesil.
EXO 36:8 Bade ḳam ḳorra ustad oḳole fesail sutar dami suti kafoṛ, lilua, baingoni, ar lal sutadi banail dosh ṭukra ḳafoṛ dia Allar goror forda banaila. Ar ustad oḳole er ufre Karubi oḳlor noksha bain ḳorla.
EXO 36:9 Forteḳ ṭukrain eḳ mafor asil, lambae aṭaish at ar fashe sair at.
EXO 36:10 Bade fasḳan fasḳan ḳori ekḳano zuṛa dia boṛo ḳori dukan gilaf banaila.
EXO 36:11 Ar duio gilafor fashor ek kinaro, lilua sutadi hukor fuṛ deoa oilo.
EXO 36:12 Oula foyla gilafor kinaro fonchashgu hukor fuṛ ar dusra gilafor kinaro fonchashgu hukor fuṛ lagail oilo. I duio hukor fuṛ egu aregur ulṭamuka ḳora oilo.
EXO 36:13 Bade shunadi fonchashgu huk banaia hou hukor fuṛor mazedi haraia, boṛo duio gilafre zuṛa deoa oilo. Teu ekkan gor tiar oilo.
EXO 36:14 Allar goror salor lagi sagolor ruma dia gilafor laḳan egaroḳan ṭukra banail oilo.
EXO 36:15 Ita fortek kan eḳoi mafor asil, tish at lamba ar sair at fash.
EXO 36:16 On taki fas ṭukra eḳloge zuṛa dia boṛo ek gilaf banaila. Ar baki soy ṭukra zuṛa dia, aroḳan boṛo gilaf banaila.
EXO 36:17 Foyla boṛo gilafor fashor ek kinaro fonchashgu hukor fuṛ lagaila, ar dusra gilafo-o oula lagaila.
EXO 36:18 Bade fitol dia fonchashgu huk banaia hou hukor fuṛor mazedi haraia, ou boṛo duio gilaf ekḳano zuṛa dila. Teu i duio gilaf milia ekkan sani oilo.
EXO 36:19 Lal rong kora meṛar samṛadi er ufror sani banail oilo, bade fuʼr samṛadi aroḳan sani toiar ḳoria er ufre guri deoa oilo.
EXO 36:20 Bade babla laḳṛidi koyḳan freim banail oilo.
EXO 36:21 Forteḳ freim asil lambae dosh at ar faṛe deṛ at.
EXO 36:22 Forteḳ freimo dugu ḳori faya lagaia goror hoḳol freim eḳlaḳan banaila.
EXO 36:23 Ou goror dokkin galar lagi bishḳan freim zuit ḳorla.
EXO 36:24 I bisho freimor fayar tole sallishgu rufar sungi lagaila. Forteḳ freimor dui fayar tole dugu sungi lagail oilo.
EXO 36:25 Allar goror uttor galar lagia-o bishḳan freim zuit ḳorla.
EXO 36:26 I forteḳ freimor fayar tole sallishgu rufar sungi lagaila. Eḳo freimor tole dugu ḳori sungi lagail oilo.
EXO 36:27 Ar fosim galar lagi, mani kor galar lagi soyḳan freim banaila.
EXO 36:28 Ar ḳoror duio kunat dukan freim lagaila.
EXO 36:29 I duio kunar freimre ḳasar freimor loge tole-ufre zuṛa deoa oilo. Fortek kunar duio freimre daror freimor loge batti maria zuṛa deoa oilo.
EXO 36:30 Teu aṭḳan freim ar shullogu rufar sungi laglo, eḳo freimor tole duiṭa ḳori sungi dila.
EXO 36:31 Bade freimre zuṛa dibar lagi babla laḳṛidi koygu lamba batti banaila.
EXO 36:32 Goror ek galar lagi fasgu batti, arok galar lagi aro fasgu, ar fasgu batti kor gala, mani fosim galar lagi banaila.
EXO 36:33 Freimor mazḳano lagail ou battidi hoḳol freimor eḳ mata taki aroḳ mata aṭḳai dila.
EXO 36:34 Bade i freim ḳanain shunadi lefila. Ar batti laganir lagi shunar ḳoṛa lagaia, battire-o shunadi lefila.
EXO 36:35 Ou ustad ḳarigor oḳole dami suti kafoṛdi ekkan forda banaila. Fordar ufre lilua, baingoni, lal suta dia Karubi oḳlor sobi bain ḳorla.
EXO 36:36 I forda ṭananir lagi babla laḳṛidi sairṭa kuṭi banaila, banaia ou kuṭintore-o shunadi lefila, kuṭintor matat shunar ḳoṛa lagaila. Kuṭir tolor lagi rufar sairṭa sungi banail oilo.
EXO 36:37 Tambur duaror lagi lilua, baingoni, lal suta ar dami suti kafoṛdi noksha ḳori ekkan forda banaila.
EXO 36:38 I fordar lagi fasṭa ḳoṛa ar fasṭa kuṭi banail oilo. Kuṭir mata ar tol shunadi lefa oilo, kuṭir tolor lagi fitolor fasgu sungi banaila.
EXO 37:1 Batselole babla laḳṛidi fobitro shahadot shonduk banaila. Iṭa aṛai at lamba, deṛ at fash ar deṛ at usa.
EXO 37:2 Er bare-bitore ḳaṭi shunadi lefila, er sairo kinaro shunar noksha lagaila.
EXO 37:3 Aguindi shuna golaia sairṭa shunar ḳoṛa er sairo kunat lagaila, ogalat duiṭa ar hogalat duiṭa lagaila.
EXO 37:4 Babla laḳṛidi dugu benda banaia shunadi lefila.
EXO 37:5 Shonduk boia neoar lagi i duio benda, shondukor dui galar ḳoṛar bitredi haraila.
EXO 37:6 Bade ḳaṭi shunadi shondukor ekkan ḍaḳna banaila, oḳanor ufre gunar kofora adae ḳorar lagi. I ḍaḳna lambae aṛai at, ar fashe deṛ at.
EXO 37:7 Shuna fiṭaia ḍaḳnar duio galat duiṭa Karubi banaila.
EXO 37:8 Duio Karubi shondukor ḍaḳnar dui kinaro roilo. I duio Karubi ḍaḳnar loge ekḳano ḳori banail oilo, i astaṭa ḳali eḳ siz oilo.
EXO 37:9 Karubi deḳte Duldul guṛar laḳan ḍaḳna ala, er duio ḍaḳna ufredi melia deoae, ou ḍaḳnar sayar tole shondukor ḍaḳna hamaigelo. Iṭa mukamuki uba roilo. Ar tarar souk roilo shondukor ḍaḳnar bae.
EXO 37:10 Batselole bade babla laḳṛidi dui at lamba, eḳ at fash ar deṛ at usa ḳori ekkan ṭebul banaila.
EXO 37:11 Banaia harle ḳaṭi shunadi lefia er sairo kinaro noksha lagaila.
EXO 37:12 Ar er sanir sairo kinaro sair angul usa ḳori eḳ haz dila, hazor maze shunadi noksha lagaila.
EXO 37:13 Ṭebulor sairo kunar fayar ufre shunar sairṭa ḳoṛa lagaila.
EXO 37:14 I sairo ḳoṛain ṭebulor kunar hou usa hazor tole lagani oilo, zate ṭebul boia neoar bala ḳoṛar bitre benda harail zae.
EXO 37:15 Ṭebulre boia neoar lagi babla laḳṛidi dugu benda banaia shunadi lefila.
EXO 37:16 Ṭebulor ufror tal-bashon, Allar name shorbot-fanir sodgar zog ar mog, hoḳolta ḳaṭi shunadi goṛaila.
EXO 37:17 Bade ḳaṭi shunadi ekkan serag dani tiar ḳorla. Serag danir tola ar ufror ḍanḍi kaṭi shuna fiṭaia goṛaila. Er ḍanḍi, fulor laḳan fiala, kuṛi ar fafṛi oḳol serag danir loge ekḳano ḳori banaila.
EXO 37:18 Serag danir ḍanḍir dui galat tinṭa ḳori muṭ soyṭa ḍal deoa oilo.
EXO 37:19 Forteḳ ḍalor maze zoba fulor laḳan tingu ḳori fiala tiar ḳora oilo. Serag danir soyo ḍalo eḳlaḳan ḳam ḳora oilo.
EXO 37:20 Serag danir mul ḍanḍir maze-o zoba fulor laḳan sairṭa fiala deoa oilo.
EXO 37:21 Ou mul ḍanḍi taki bar oilo soyṭa ḍalor maze, foyla duio ḍalor zuṛat egu ḳori kuṛi, dusra duio ḍalor zuṛat arok kuṛi, ar heshor duio ḍalor zuṛat-o kuṛi lagail oilo.
EXO 37:22 Kuṛi ar ḍal hoḳolta serag dani taki bar oilo, hoḳolta milia eḳ siz oilo. Astaṭa-u ḳaṭi shuna fiṭaia banani oilo.
EXO 37:23 Ḳaṭi shunadi shatṭa serag, seragor fita saf ḳorar simṭa, zalail fitar sali toar lagi koygu baṭi banail oilo.
EXO 37:24 Eḳ mon ḳaṭi shunadi i serag dani, ar logor hoḳolta tiar ḳora oilo.
EXO 37:25 Bade babla laḳṛidi sair kuna ala agor-kushboy zalanir ṭebul banail oilo. Eḳ at lamba, eḳ at fash, ar dui at ubi dia i ṭebul banaila. Er sairo kunar sairo hing-o ekḳano ḳori banaila.
EXO 37:26 Sani, sanir sairo kinar ar hing, hoḳolta ḳaṭi shunadi lefia sairo kinaro shunar noksha lagaila.
EXO 37:27 Er dui kinaror nokshar tole dugu ḳori shunar ḳoṛa lagail oilo, zate er bitre benda haraia boia neoa zae.
EXO 37:28 Babla laḳṛidi boia neoar benda banaila, iṭare-o shunadi lefila.
EXO 37:29 Bade kushboy-ala moshla bananir ḳarigoror niome ḳelafoti shomzibar fobitro tel ar kushboy-ala ḳaṭi agor tiar ḳorla.
EXO 38:1 Zalail kurbanir lagi babla laḳṛidi fas at lamba, fas at fash ar tin at ubi dia sairkuni kori ekkan kurbani kana banaila.
EXO 38:2 Er sairo kunar ufre laḳṛidi sairṭa hing dila. Ou hing banaila sanir ufror kunar laḳṛi kudia, erlagi i astaḳan eḳ siz oilo. Bade fura kurbani kana fitoldi lefaila.
EXO 38:3 Kurbani kanar sali tular boṛo samos ar sali toar gamla, lou toar baṭi, gust tular boṛo ḳaṭa-sif, angra toar fatil, hoḳolta fitoldi banaila.
EXO 38:4 Kurbani kanar lagi fitoldi ekkan zali banaila, banaia i zalire kurbani kanar bitoror mazḳanor sairo galar taṛiar tole lagaila.
EXO 38:5 Ar benda haranir lagi zalir sairo kunat sairṭa ḳoṛa lagaila.
EXO 38:6 Boia neoar benda banaila babla laḳṛidi, banaia duiogu fitoldi lefaila.
EXO 38:7 Ar kurbani kanare boibar lagi er kunar ḳoṛar bitre ou benda haraila. Kurbani kana banaila toḳtadi, ar er bitre faḳ raḳla.
EXO 38:8 Uzur fani toar lagi fitolor ek gamla banaila. Ebadoti kamor lagi zeta beṭin Milon-tambur duaror ḳasat aita, tarar fitolor aynadi i gamla ar er soki-kaṭ toiar ḳora oilo.
EXO 38:9 Batselole Allar goror sairo galabae uṭanor zaga raḳla. Uṭanor dokkin galar eḳ-sho at zagar lagi dami suti kafoṛdi forda banaila.
EXO 38:10 I forda ṭananir lagi bishgu kuṭi banaila. Kuṭir tolat dibar lagi fitolor bishgu sungi banaila, ar forda ṭananir lagi rufar ḳoṛa ar bandibar tar banaila.
EXO 38:11 Uṭanor uttor galar eḳ-sho at zagar lagi bishgu kuṭi, kuṭir tole dibar lagi fitolor bishgu sungi, ar forda ṭananir lagi rufar ḳoṛa ar bandibar tar banaila.
EXO 38:12 Fosim galar foinchash at uṭanor lagi forda, doshgu kuṭi, doshgu sungi, forda ṭananir lagi rufar ḳoṛa ar bandibar tar banaila.
EXO 38:13 Fub galar uṭan-o foinchash at asil.
EXO 38:14 Uṭanor geiṭor ek galar lagi fonro at lamba forda, tinṭa kuṭi, kuṭir tolor tingu sungi,
EXO 38:15 ar dusra galat-o ou laḳan ḳori tinṭa kuṭi, tinṭa sungi ar fonro at forda banail oilo.
EXO 38:16 Uṭanor sairo galar hokkol fordain dami suti kafoṛdi banail oilo.
EXO 38:17 Kuṭir tolor hokkol sungi fitolor, forda ṭananir ḳoṛa ar bandibar tar oilo rufar, kuṭir mata-o rufadi fesail oilo. Uṭanor sairo galar hokkol kuṭit rufar tardi banda oilo.
EXO 38:18 Uṭanor geiṭor lagi dami suti kafoṛdi ekkan forda banail oilo. Bade lilua, baingoni, lal sutadi noksha ḳora oilo. Forda ḳan bish at lamba, ar uṭanor baki fordar laḳan iṭa-o fas at usa deoa oilo.
EXO 38:19 Er sairo kuṭi ar sungi fitolor, kuṭir ḳoṛa ar bandar tar rufar, kuṭir mata-o rufadi fesai deoa oilo.
EXO 38:20 Allar gor ar uṭanor sairo galar kuṭir fereg oḳol fitoldi banail.
EXO 38:21 Allar gor mani ou shahadot tambu banaite zeta mal-samana lagsil, imam Harunor fua Isamaror zimmae Lebi kandanor manshe itar hishab raḳla. Musa nobie ou hishab raḳar hukum disla.
EXO 38:22 Mabude Musare zelaḳan hukum disla, i hukum mafik Ehuda gusṭir Urir fua Batselole ita hokkolta banaila, tain asla Huror nati.
EXO 38:23 Dan gusṭir Ohisamaḳor fua Aholiabe Batselolre shaijjo ḳorla. Hoḳol zator ator ḳam ar noksha bananir ḳamo tain ustad asla. Dami suti kafoṛor maze lilua, baingoni, lal sutadi noksha ḳorar ḳamo-o tain ustad asla.
EXO 38:24 Dulona kurbani taki faoa untish mon shat-sho tish tola shuna ou ebadot ḳana banaite lagse. I maf oilo ebadot ḳanar tolar mafe.
EXO 38:25 Boni Israilor manush gonibar bala zerare gona oisil, tarar ges taki eḳ-sho mon eḳ azar shat-sho fosottoir tola rufa faoa gesil, i maf oilo ebadot ḳanar mafe.
EXO 38:26 Gona oise oula manush, mani bish boros ba er saite beshi boyosh ala, hou soy laḳ tin azar shaṛe fas-sho manshe ebadot ḳanar mafe mata fisu ada tola ḳori rufa disil.
EXO 38:27 I rufa taki eḳ-sho mon rufa dia ebadot ḳana ar fordar kuṭir tolor sungi banail oisil. Eḳ eḳ sungit eḳ mon rufa dia muṭ eḳ-shogu sungi banail oise.
EXO 38:28 Ar baki eḳ azar shat-sho fosottoir tola rufa kuṭir ḳoṛa, kuṭir mata fesani, ar bandibar tar bananit lagse.
EXO 38:29 Dulona kurbani taki lillar fitol dola oisil shottoir mon dui azar sair-sho tola.
EXO 38:30 Ita dia Milon-tambur duaror sungi, fitolor kurbani kana, er fitolor zali ar kurbani kanar hokkol siz banail oise,
EXO 38:31 uṭanor sairo galar sungi, geiṭor sungi, tambu ar uṭanor sairo galar kuṭir fereg banail oise.
EXO 39:1 Allar goror pak zagat imamoti kamor shomoy findar lagi, tara lal, baingoni ar lilua sutadi shundor ḳori lebas banaila. Mabude Musare zela hukum disla, ekkere ou laḳan ḳori imam Harunor lagi fobitro lebas banaila.
EXO 39:2 Ou ustad ḳarigor oḳole lilua, baingoni, lal suta, dami suti kafoṛ ar shunadi fordan imamor efron banaila.
EXO 39:3 Shuna fiṭaia fat banaia, sutar laḳan shunar tar tiar ḳorla. Bade lilua, baingoni, lal suta, dami suti kafoṛ ar shunar tar eḳloge milaia ḳafoṛ banaila.
EXO 39:4 Efronor ḳandor gala zuṛa dibar lagi dukan foṭṭi banaia, efronor ufror kunat lagaila.
EXO 39:5 Efronor loge zuṛa lagail feṭor ufror belṭ ḳano efronor sutadi banaila. Tara lilua, baingoni, lal suta, dami suti kafoṛ ar shunar tar dia ṭik efronor nomunae banaila. Mabude Musare zela hukum disla, ekkere ou laḳan ḳori hokkolta banail oilo.
EXO 39:6 Bade tara duiṭa akik fattor ḳaṭia, er ufre shunar zazoir boaila. Hunar oḳole dami fattor kudia zela sil banain, oula fattor kudia Israilor fuaintor nam leḳla.
EXO 39:7 Ar ou duio fattor shunar zazoiror maze lagaia, efronor ḳandor fitar loge bandila. Israilor fuaintor bae Mabudor nozor raḳar lagi ila ḳorla. Mabude Musare zela hukum disla, oula hoḳolta ḳora oilo.
EXO 39:8 Bade efronor laḳan bala ustad dorziredi lilua, baingoni, lal suta, dami suti kafoṛ ar shunadi bukur ufror toli banail oilo.
EXO 39:9 Iṭa oilo lambae ada at, fashe ada at, sairkuni dui bainj ḳora ḳafoṛ.
EXO 39:10 Er ufre tara sair hair ḳori dami fattor lagaila. Foyla harit iakut, fit ar fanna moni;
EXO 39:11 dusra harit lal moni, lil moni ar hira;
EXO 39:12 tin nombor harit firuz, gumed ar foddorag moni;
EXO 39:13 sair nombor harit fukraz, boidurjo ar shuruz moni. I fattor oḳol shunar zazoiror ufre lagail oilo.
EXO 39:14 Israilor baro fuar lagi baroṭa fattor lagaila. Ita eḳo fattoro eḳ eḳ fuar nam kudia leḳa oilo, zela kudia sil banail oy.
EXO 39:15 Bukur ufror tolir lagi kaṭi shunadi rosir laḳan fesaia duksa chein banaila.
EXO 39:16 Ar shunar dukan zazoir ar duiṭa ḳoṛa banaia, bukur ou tolir ufror dui kunat lagaila.
EXO 39:17 Ar chein duiogesa duio ḳoṛar loge aṭḳaila.
EXO 39:18 Duio ḳandor efronor samnor fitat shunar zazoiror loge cheinor eḳ mata bandila.
EXO 39:19 Aro duiṭa shunar ḳoṛa banaia bukur ufror tolir dui kunat lagaila. I duioṭa efronor loge bukur tolir tole roilo.
EXO 39:20 Bade aro duiṭa shunar ḳoṛa banaia, efronor ḳandor foṭṭir shoi toledi, feṭor ufror belṭor ufror silair ḳasat lagai dila.
EXO 39:21 Ar bukur ufror tolir tolor ḳoṛar loge feṭor ufror noksha ḳora belṭor ḳoṛa bandila, ar ou tolie loṛa-soṛa na ḳorar lagi tolor ḳoṛar loge lilua sutadi bandi dila, zela Mabude Musare hukum ḳorsla.
EXO 39:22 Bade tara efronor tolor alḳella lilua rongor sutadi bain ḳorla,
EXO 39:23 ar mata haraibar bala golar faḳ siṛto na ḳori er sairo gala foṭṭi dia doṛo ḳori bain ḳorla, golar ou faḳ raḳla maz borabor.
EXO 39:24 Lilua, baingoni, lal rongor fesail sutadi anuar folor laḳan banaila. Banaia oguinre alḳellar tolor muṛir sairobae lagaila.
EXO 39:25 Bade ḳaṭi shunar gungur banaia ou anuaror faḳe faḳe lagaila,
EXO 39:26 asta tolor muṛit egu ḳori anuar ar egu ḳori gungur lagail oilo. Ebadoti kamor bala imam sabe ou alḳella findita. Mabude Musare zela hukum disla, ekkere oula ḳora oilo.
EXO 39:27 Bade tara Harun ar tan fuaintor lagi dami suti sutadi fainjabi banaila.
EXO 39:28 Matar faugṛi ar tokiguin-o dami suti kafoṛdi banaila, ar haf-penṭor laḳan zangia-o banaila ou ḳafoṛdi.
EXO 39:29 Ḳomror ekkan bondoni banaila, dami suti kafoṛ, lilua, baingoni ar lal sutadi noksha ḳori banaila. Mabude Musare zela hukum disla, ekkere oula ḳora oilo.
EXO 39:30 Ar faugṛir samne laganir lagi, ḳaṭi shunar fatdi ekkan fobitro taz tiar ḳorla. Silor ufre zela kudia leḳa oy, ou fattor ufre ola kudia leḳla, “Mabudor name fobitro.”
EXO 39:31 Mabude Musare zela hukum disla, ou hukum mafik-u i fatre lilua sutadi faugṛir samne bandi dila.
EXO 39:32 Ou laḳan Milon-tambu shoho Allar goror hokkol ḳam-ḳaz shesh oilo. Mabude Musare zela hukum disla, Boni Israile ekkere ou laḳan hoḳolta ḳorla.
EXO 39:33 Bade tara Allar goror lagi banail hokkolta Musar ḳasat loia aila. Tara anla: Milon-tambu, tambur hoḳol mal-samana, huk, freim, batti, kuṭi, kuṭir tolor sungi;
EXO 39:34 lal rong kora meṛar samṛar sani, fuʼr samṛar sani, Herem Shorifor beṛar forda;
EXO 39:35 shahadot shonduk, shonduk boia neoar benda, shondukor ḍaḳna;
EXO 39:36 ṭebul, ṭebulor hoḳol siz, Mabudor namor fobitro ruṭi;
EXO 39:37 ḳaṭi shunar serag dani, er logor hoḳol siz, zalanir tel;
EXO 39:38 shunar agor-kushboy zalanir ṭebul, ḳelafotir tel, kushboy-ala agor, Allar goror duaror forda;
EXO 39:39 fitolor kurbani kana, fitolor zali, kurbani kana boia neoar benda, kurbani kanar hokkol mal-samana, uzur gamla ar er tolor soki-kaṭ;
EXO 39:40 uṭanor fordain, kuṭin, kuṭir tolor sungi, uṭano hamanir geiṭor forda, uṭanor fereg ar doṛi; ek kotae, Milon-tambu shoho Allar goror hokkol mal-samana;
EXO 39:41 ar pak zagat imamoti kamor lagi imam Harunor fobitro lebas, ar tan fuaintor-o imamotir lebas.
EXO 39:42 Mabude Musare zela hukum disla, ou laḳan Boni Israil oḳole hoḳol ḳam ḳorla.
EXO 39:43 Heshe Musae ita hoḳolta dekia buzla, Mabude zela hukum disla, ou laḳan-u ḳora oise. Erlagi tain hoḳol Boni Israilre dua dila.
EXO 40:1 Mabude Musa nobire ḳoila,
EXO 40:2 “Tumi bosoror foyla sandor foyla tariko Milon-tambu shoho amar gorre ḳaṛa ḳorio.
EXO 40:3 Goror bitre shahadot shondukre haraia, maze forda ṭanaia shondukre aoṛe toio.
EXO 40:4 Ṭebulre-o bitre haraia, er ufror siz oḳol hazaio. Bade serag dani bitre ania tar serag oḳol zalai dio.
EXO 40:5 Shunadi banail agor-kushboy zalanir ṭebul shahadot shondukor samne toio, toia amar goror duaror forda lagaio.
EXO 40:6 Amar goror Milon-tambur duaror samne zalail kurbani kana toio.
EXO 40:7 Kurbani kana ar Milon-tambur mazḳano uzur gamla fanidi boria toio.
EXO 40:8 Bade uṭanor sairo galabae forda ṭanaio, ar uṭanor geiṭo-o forda lagaio.
EXO 40:9 “Bade tumi kelafotir tel dia amar gor ar amar goror hoḳol mal-samanare fobitro ḳorio. Teu ita hoḳolta moha fak-fobitro oibo.
EXO 40:10 Ar zalail kurbani kanar ufre-o ḳelafotir tel dia fobitro ḳorio. Kurbani kanar hoḳol mal-samanare-o fobitro ḳorio. Teu i kurbani kana moha-fobitro siz oibo.
EXO 40:11 Uzur fanir gamla ar er tolor soki-kaṭre-o ḳelafotir tel dia fobitro ḳorio.
EXO 40:12 “Bade Harun ar tar fuainre Milon-tambur duaror samne ania fanidi naoai dio.
EXO 40:13 Naoanir bade Harunre fak-fobitro lebas oḳol findaio, ar amar imam oar lagi tare fobitro tel lagaia ḳelafoti dia fobitro ḳorio.
EXO 40:14 Tar fuaintore ania imamotir fainjabi findaio.
EXO 40:15 Tarar bafre zela fobitro teldi imamoti kamor ḳelafoti diso, tarare-o oula ḳelafoti dio, zate tara-o amar imamoti kam ḳorta faroin. I kelafotir mazdi imamotir ze niom salu oibo, ita oarishor for oarish dori salu roibo.”
EXO 40:16 Mabudor hukum mafik Musae ita hoḳolta ḳorla.
EXO 40:17 Dusra bosoror foyla sandor foyla tariko Allar gor ḳaṛa ḳora oilo.
EXO 40:18 Musae i gor ḳaṛa ḳorla, foyla er kuṭir tolor sungi boaila, kuṭin uba ḳorla, beṛar freim lagaila, freimor bitredi batti dila.
EXO 40:19 Mabudor hukum mafik tain sagolor ruma dia goror foyla sani dila, er ufre dila aro duiṭa sani.
EXO 40:20 Bade hou duioḳan fobitro shahadot fattor ania shondukor bitre haraila. Shonduk boia neoar benda lagaila, shondukor ufror ḍaḳna-o lagaila.
EXO 40:21 Ar shondukre nia Allar goror bitre haraila. Haraia forda ṭanaia shondukre aoṛe raḳla, zela Mabude Musare hukum disla.
EXO 40:22 Shondukor ou fordar bare uttor galabae, Milon-tambur maze fobitro ruṭir ṭebul raḳla.
EXO 40:23 Ṭebulor ufre Mabudor namor fobitro ruṭi hazaia toila, zela Mabude Musare hukum disla.
EXO 40:24 Ṭebulor samne tambur dokkin galat serag dani toila.
EXO 40:25 Bade Mabudor samne serag guin zalaila, zela Mabude Musare hukum disla.
EXO 40:26 Milon-tambur mazḳanor fordar samne shunadi banail agor-kushboy zalanir ṭebul toila.
EXO 40:27 Oḳanor ufre kushboy-ala agor zalaila, zela Mabude Musare hukum disla.
EXO 40:28 Bade Musae duaror forda ṭanaila.
EXO 40:29 Tain Allar goror Milon-tambur duaror ḳandat zalail kurbani kana toila. Toia er ufre zalail foshu kurbani ar dan-gomor sodga dila, zela Mabude Musare hukum disla.
EXO 40:30 Bade Milon-tambu ar kurbani kanar mazḳano uzur gamla toila, toia uzur fani boria dila.
EXO 40:31 Ou fani dia Musa, Harun ar Harunor fuainte uzu ḳorta.
EXO 40:32 Mabudor hukum mafik tara Milon-tambut hamanir age, ba kurbani kanar ḳandat zaoar age uzu ḳorta.
EXO 40:33 Bade Musae Allar gor ar kurbani kanar sairobae forda ṭanaia uṭan banaila. Uṭanor geiṭor forda lagaila. Ou laḳan Musae tan hoḳol ḳam shesh ḳorla.
EXO 40:34 Ḳam shesh ḳoria harle, gaibi megor kuṭi aia ou Milon-tambure gurililo, Mabudor mohima ar kudrote asta gor borigelo.
EXO 40:35 Erlagi Musa ar Milon-tambut hamaita farla na, ḳaron er ufre hou megor kuṭi asil, ar Mabudor kudroti mohimae asta gor bori gesil.
EXO 40:36 Boni Israilor ou asta soforor maze, Allar goror ufre taki megor kuṭi horia harle tara aṭia roana dita.
EXO 40:37 Oile megor kuṭi ufre taki na hora forzonto tara bar oita na, ou kuṭi horar lagi bar saita.
EXO 40:38 Ḳaron Boni Israilor ou asta soforor maze-u, dinor bala tarar sokur samne Allar goror ufre megor kuṭi roito, ar raitor bala roito aguinor kuṭi.
LEV 1:1 Ou fobitro Kaba gor mani Milon-tambu bananir bade, Mabude Musa nobire ono anaia ḳoila,
LEV 1:2 “Tumi hoḳol Boni Israilre zanai deo, ḳeu zudi kurbani hishabe Mabudor dorbaro kunu foshu dito sae, te goru ba sagol-meṛar fal taki foshu ania kurbani dilauk.
LEV 1:3 “Kurbani deorae zudi gorur fal taki zalail kurbani adae ḳorto sae, te furafur nikut egu bisal ante oibo. Ania Mabudre kushi korar niote ou bisalre Milon-tambur duaror gese loia aibo.
LEV 1:4 Aia zalail kurbanir niote ana ou bisalor ḳollar ufre at toibo, teu tar gunar kofora hishabe iṭare kobul ḳora oibo.
LEV 1:5 Bade Mabudor samne ou bisalre he zobo ḳorbo. Ar imam Harunor ze fuainte imamoti koroin, tara ou bisalor lou nia Milon-tambur duaror samnor kurbani kanar sairo galat siṭai diba.
LEV 1:6 Bade kurbani deorae ou bisalor ḳal ḳalia hari, ogur gust ṭukra ṭukra ḳorba.
LEV 1:7 Ar imam Harunor fuainte kurbani kanar ufre zalail angra toiba, er ufre daru hazaiba.
LEV 1:8 Hazaia ou darur ufre bisalor ḳolla, sorbi, gustor ṭukrain toiba.
LEV 1:9 Kurbani deorae gorur ṭeng ar feṭor bitoror hokkolta fani dia doia saf ḳoria diba, ar imame ota nia asta bisalor hokkolta kurbani kanar ufre zalailiba. Iṭar nam oilo zalail kurbani, Mabudor name agunit deoa kurbani, ou dumar gerane tain kushi oin.
LEV 1:10 “Ar kunu manshe zudi sagol-meṛar fal taki zalail kurbani adae ḳorar kiali oy, te ikṭa furafur nikut egu faṭa oite oibo.
LEV 1:11 Kurbani deorae ikṭare kurbani kanar uttor galat nia Mabudor samne zobo ḳoria harle, imam Harunor ze fuainte imamoti koroin, tara ogur lou nia kurbani kanar sairo galat siṭai diba.
LEV 1:12 Bade kurbani deorae iṭar gust ṭukra ṭukra ḳori kaṭia dile, imam sabe ogur sorbi, ḳolla ar gustor ṭukrain nia kurbani kanar zalail angrar ufror darur ufre hazaiba.
LEV 1:13 Kurbani deorae iṭar ṭeng, feṭor bitoror hokkolta fani dia doia saf ḳoria diba, ar imam sabe ita hokkolta shomet asta foshure kurbani kanar ufre zalailiba. Iṭa oilo zalail kurbani, Mabudor name agunit deoa geran ala kurbani, ou dumar gerane tain kushi oin.
LEV 1:14 “Ar kunu faki dia zudi Mabudor namor ou zalail kurbani adae ḳorar kial oy, te kurbani deorae ḍufi faki ba faro loia aibo.
LEV 1:15 Aile, imame kurbani kanar daro gia ou fakir ḳolla mura maria siṛia algaia hari kurbani kanar ufre ou ḳollare zalailiba, ar ogur lou nia kurbani kanar ek galat siṭai diba.
LEV 1:16 Imame fakir bitoror gila-toli ar foir nia kurbani kanar fub galar salir ṭekir maze falai diba.
LEV 1:17 Ar ogur ḍaḳnat doria ola baṭe siṛiba, zate iṭar dui ṭukra furafur alog na oy. Bade imam sabe iṭa nia kurbani kanar zalail angrar ufror darur ufre toia zalailiba. Iṭa-o oilo zalail kurbani, Mabudor name agunit deoa geran ala kurbani, ou dumar gerane tain kushi oin.
LEV 2:1 “Kunu manshe zudi dan-gom dia Mabudor name lilla-sodga dito sae, te nireḳ moyda dia adae ḳorbo. Ou moydar ufre he zoytunor tel ar loban-agoror duna dibo.
LEV 2:2 Dia imam Harunor ze fuainte imamoti koroin tarar gese ota loia aibo. Imame ota taki tel mishail eḳ muiṭ moyda ar hoḳol agor loia, tar ana hokkoltar bodla nishana hishabe ou ongshore kurbani kanar ufre zalailiba. Ita oilo Mabudor name agunit deoa kurbani, itar dumar gerane tain kushi oin.
LEV 2:3 Zalanir bade zotoḳan baki roibo, ita imam Harun ar tan fuainte faiba. Mabudor namor agunit deoa kurbanir ongsho oae, basi zaoa ou moyda to ḳas fobitro zinish.
LEV 2:4 “Ar ḳeu zudi tunduri undalo hedia ana kunu dan-gomor sodga adae ḳorto sae, te tel mishail nireḳ moyda dia ḳamir saṛa ruṭi ba banail ruṭit tel maḳaia loia aibo.
LEV 2:5 Ar ou sodgar ruṭi zudi taoat hedia ana oy, te ita tel mishail ḳamir saṛa nireḳ moyda dia banaia ante oibo.
LEV 2:6 Ania ita ṭukra ṭukra ḳoria er ufre tel ḍalia dite oibo, ita-o dan-gomor eḳ nomunar sodga.
LEV 2:7 Ar ou sodgar ruṭi zudi luaṛir maze bazia ana oy, te ita-o tel ar nireḳ moyda dia banaia anbae.
LEV 2:8 Ola zekunu nomunae banail dan-gomor sodgare Mabudor name ania imamor ato shomzai dibae, imame ita kurbani kanar gese niba.
LEV 2:9 Nia tar ana ou hokkoltar bodla nishana hishabe, imame oḳan taki kisu ongsho algaia kurbani kanar ufre zalailiba. Ita oilo agunit deoa kurbani, er dumar gerane Mabud kushi oin.
LEV 2:10 Ou ongsho zalaia harle bad-baki zeta roibo, ita hoḳolta imam Harun ar tan fuainte faiba. Mabudor name agunit deoa kurbanir ongsho oae, basi zaoa ou sodgar ruṭi to ḳas fobitro zinish.
LEV 2:11 “Ar huno, Mabudor name dan-gomor sodgar niote zotota ana oibo, ita hoḳolta-u zanu ḳamir saṛa tiar ḳora oy. Hushiar roio, tumra Mabudor namor agunit deoa lilla-sodgar malor loge kunu ḳamir ba mou zalaio na.
LEV 2:12 Ta-o ḳetor foyla foy-fosholor sodgar loge tumra mou ba ḳamir Mabudor name ditae farbae, oile dumar geran ala sodgar niote ḳamir ba mou kurbani kanat zalail zaito nae.
LEV 2:13 Kial rakio, tumra dan-gomor sodgar niote zotota banaia anbae, ita hokkoltar maze nun mishaibae. Boni Israilor Allar oada-chuktire mono rakia, tumra hoḳol nomunar dan-gomor sodgat nun dite faurio na. Tumrar hokkol kurbanir maze nun dio.
LEV 2:14 “Tumrar ḳetor foyla daoa dan-gomor kunu foshol zudi Mabudor name lilla-sodga hishabe loia ao, te ita maṛa deoa ḳasa noya dan-gom ba asta soṛare aguindi hedia anbae.
LEV 2:15 Itar ufre tel ar loban-agor dibae, ita oilo eḳ nomunar dan-gomor sodga.
LEV 2:16 Ou sodga loia aile, imam sabe nishana hishabe ou zonor ana dan-gomor sodgar kisu ongsho, kisu tel ar hoḳol agor nia kurbani kanat zalailiba, ita oilo Mabudor name agunit deoa kurbani.
LEV 3:1 “Kunu manshe zudi Mabudor name nizor kushie salamoti kurbani adae ḳorar niote kunu gai ba bisalre kurbani dito sae, te i goru furafur nikut oite oibo.
LEV 3:2 Kurbani deorae ou foshur ḳolla ataia dia, Milon-tambur duaror samne iṭare zobo ḳorbo. Bade imam Harunor fuaintor mazor imam oḳole ogur lou nia kurbani kanar sairo galat siṭai diba.
LEV 3:3 Ar kurbani deorae Mabudor name ana salamoti kurbanir foshur ou ongsho oḳol diba. Ogur feṭor bitoror hokkoltar ufror sorbi,
LEV 3:4 duio kiḍni ar otar sorbi, ḳoiljar logor maṭia, ou hoḳolta ania imamor gese diba.
LEV 3:5 Bade Harunor fuainte kurbani kanar ufre hazail daru ar kurbanir foshur ufre ita hoḳolta rakia eḳloge zalailiba. Ita to eḳ nomunar agunit deoa kurbani, itar dumar gerane Mabud kushi oin.
LEV 3:6 “Kunu manshe zudi Mabudor name salamoti kurbani adae ḳorar lagi sagol-meṛar fal taki kunu foshure kurbani dibar niot ḳore, te i foshu meda ba medi oile-o solbo, oile iṭa furafur nikut oite oibo.
LEV 3:7 Kurbani dibar niote zudi meṛa ane, te Mabudor samne iṭa azir ḳorba.
LEV 3:8 Kurbani deorae ou meṛar ḳolla atai dia, Milon-tambur duaror samne iṭare zobo ḳorbo. Bade imam Harunor fuaintor mazor imam oḳole ogur lou nia kurbani kanar sairo galat siṭai diba.
LEV 3:9 Kurbani deorae Mabudor name agunit deoa kurbani hishabe ana, ou salamoti kurbanir meṛar hoḳol sorbi imamor gese diba. Tain sorbi ala lenguṛ, feṭor bitoror hoḳoltar ufror sorbi, itar loge lagail sorbi,
LEV 3:10 duio kiḍni ar otar hoḳol sorbi, ḳoiljar logor maṭia, ota hoḳolta ania imam sabor gese diba.
LEV 3:11 Imame ita nia kurbani kanar agunir ufre zalailiba, ita oilo Mabudor name agunit deoa kurbanir ḳani.
LEV 3:12 “Ar kurbani dibar niote he zudi sagol ane, te he iṭare Mabudor samne azir ḳorbo.
LEV 3:13 He ogur ḳolla atai dia, Milon-tambur duaror samne iṭare zobo ḳorbo, bade Harunor fuainte ogur lou nia kurbani kanar sairo galat siṭai diba.
LEV 3:14 Kurbani deorae foshur ou ongsho oḳol nia, Mabudor name agunit deoa kurbani hishabe imamor gese dibo. He foshur feṭor bitoror hoḳoltar ufror sorbi, itar loge lagail sorbi,
LEV 3:15 duio kiḍni ar otar ufror sorbi, ḳoiljar logor maṭia, ota hoḳolta ania imamor gese dibo.
LEV 3:16 Imame ita hoḳolta nia kurbani kanar ufre zalailiba, ita to agunit deoa kurbanir ḳani, itar dumar gerane Mabud kushi oin. “Mono rakio, kurbanir foshur hokkol sorbi oilo Mabudor.
LEV 3:17 Tumra bongshor for bongsho doria ou niom manio, zekunu zagat boshot ḳoro na ḳene kunudin sorbi ba lou ḳaio na, ita haram.”
LEV 4:1 Bade Mabude Musare ḳoila,
LEV 4:2 “Tumi Boni Israilre ḳo, na zanar ḳarone ḳeu zudi bul ḳoria Allar nished ḳora kunu gunar ḳam ḳorilae, te tain ou nomunae gunar koforar kurbani adae ḳorba.
LEV 4:3 “Ein ḳelafoti faoa fordan imam sab oile, tan gunar dae-bar hoḳol manshor ufre borte, erlagi tain nikut egu bisal ania Mabudor dorbaro tan gunar koforar kurbani diba.
LEV 4:4 Ou bisal loia tain Milon-tambur duaror gese Mabudor samne aiba, aia ogur ḳolla atai dia, Mabudor samne zobo ḳorba.
LEV 4:5 Ḳoria ou bisalor tuṛa lou nia Milon-tambur bitre zaiba.
LEV 4:6 Gia lour maze nizor angul subaia lou lagaia Herem Shorifor fordar bae Mabudor samne shatbar siṭai diba.
LEV 4:7 Bade aro tuṛa lou loia Milon-tambur maze Mabudor samne agor-kushboy zalanir ṭebulor sairo kunar hing oḳlor maze lagaiba. Ar bad-baki lou nia Milon-tambur duaror samnor zalail kurbani kanar tole ḍali diba.
LEV 4:8 Bade gunar koforar lagi deoa kurbanir ou bisalor hoḳol sorbi bar ḳorba, feṭor bitoror hokkoltar ufror sorbi, itar loge lagail hoḳol sorbi,
LEV 4:9 duio kiḍni ar otar ufror sorbi, ar ḳoiljar logor maṭia.
LEV 4:10 Salamoti kurbanir gorur sorbir laḳan, ou kurbanir bisalor hoḳol sorbire-o ola bar ḳorba. Bade imame ou sorbi nia zalail kurbani kanat zalailiba.
LEV 4:11 Oile ou bisalor ḳolla, ḳal, gust, ṭeng, at-boṛ, gufor,
LEV 4:12 hoḳolta nia Boni Israilor kempor bare zeḳano kurbanir salir ṭeki toin, hou fak-saf zagar salir ṭekir ufre ota toia hari, laḳṛir aguindi zalailiba.
LEV 4:13 “Ar asta Boni Israil shomaz na zanar ḳarone zudi bul ḳoria kunu gunar ḳam ḳorilae, Allar nished ḳora kunu ḳam ḳoria dushi bonizae, te na zania ḳorle-o tara hoḳol-u gunagar.
LEV 4:14 Bade zebla tara zanba, zania hari ou gunar koforar lagi hoḳlor torof taki egu bisal kurbani diba, ou bisal loia tara Milon-tambur samne azir oiba.
LEV 4:15 Oia Boni Israilor murobbi oḳole ou bisalor ḳolla atai diba, ar imame Mabudor samne oḳṭa zobo ḳorba.
LEV 4:16 Zobor bade ḳelafoti faoa imam sabe bisalor tuṛa lou loia Milon-tambur bitre hamaiba.
LEV 4:17 Hamaia ou lour maze tan ator anguil subaia, tuṛa lou Herem Shorifor fordar bae shatbar Mabudor samne siṭaiba.
LEV 4:18 Bade aro tuṛa lou loia Mabudor samne toa, Milon-tambur bitoror agor-kushboy zalanir ṭebulor hing oḳol-o lagaiba. Bad-baki lou fuṭain Milon-tambur duaror samnor zalail kurbani kanar tole ḍali diba.
LEV 4:19 Ar bisalor hoḳol sorbi bar ḳoria kurbani kanat zalailiba.
LEV 4:20 Fordan imamor gunar koforar lagi bisalre zela kurbani deoa oy, imame ou bisalre-o ola kurbani korba. Tain ou shomazor gunar koforar kurbani adae ḳorle, tarar gunar mafi milbo.
LEV 4:21 Imam sabe bisalor bad-baki hoḳolta loia kempor bare zaiba. Gia tan nizor gunar koforar hou bisalor laḳan ou bisalor hoḳolta-o kempor bare ola zalailiba. Ita oilo asta shomazor gunar koforar kurbani.
LEV 4:22 “Ar Boni Israilor kunu shordare na zanar ḳarone zudi bul ḳoria ola guna ḳorilain, te Allar nished ḳora ḳam ḳorae tain to dushi.
LEV 4:23 Tain zebla ou gunar befare zaniliba, zanar bade koforar kurbani dibar lagi nikut egu faṭa sagol loia aiba.
LEV 4:24 Aia ou faṭar ḳollar ufre atai dia, zalail kurbanir foshu zobo ḳorar zagat nia ogure Mabudor samne zobo ḳorba. Ita to tan gunar koforar kurbani.
LEV 4:25 Bade imam sabe ou foshur tuṛa lou tan ator angulit ḳori loia, zalail kurbani kanar hing oḳlor ufre lagaiba. Bad-baki lou nia tain kurbani kanar tole ḍali diba.
LEV 4:26 Ar salamoti kurbanir foshur sorbir laḳan ogur hoḳol sorbire kurbani kanar ufre zalailiba. Ou laḳan imame hou shordaror gunar mafir lagi kofora adae ḳorle, tain mafi faiba.
LEV 4:27 “Ar Boni Israilor kunu shadaron zone na zanar ḳarone zudi bul ḳoria kunu gunar ḳam ḳorilae, Mabudor nished ḳora kunu ḳam ḳoria dushi bonizae,
LEV 4:28 te he zebla tar gunar befare zanilibo, zania ou gunar koforar lagi he nikut egu sagi loia aibo.
LEV 4:29 Aia ou sagir ḳollar ufre atai dia, zalail kurbanir zobor zagat nia ogure zobo ḳorbo.
LEV 4:30 Bade imam sabe tan ator angulit ḳori ogur tuṛa lou lagaia, kurbani kanar hing oḳlor ufre lagaiba. Bad-baki lou tain kurbani kanar tole ḍali diba.
LEV 4:31 Ar salamoti kurbanir meṛar sorbir laḳan ogur hoḳol sorbi bar ḳoria kurbani kanar ufre zalailiba. Itar dumar gerane Mabud kushi oin. Ou nomunae imame hou zonor gunar kofora adae ḳorle, tar mafi milbo.
LEV 4:32 “Gunar koforar kurbanir niote ḳeu zudi kunu meṛa ane, te iṭa nikut meṛi-baichcha oite oibo.
LEV 4:33 He ogur ḳollar ufre atai dia, zalail kurbanir foshur zobor zagat nia, gunar koforar kurbanir niote ogure zobo ḳorbo.
LEV 4:34 Bade imam sabe tan ator angulit ḳori ou meṛir tuṛa lou loia, kurbani kanar hing oḳlor ufre lagaiba. Bad-baki lou tain kurbani kanar tole ḍali diba.
LEV 4:35 Ar salamoti kurbanir meṛar sorbi zela bar ḳoroin, ogur hoḳol sorbire-o ola bar ḳorba. Bar ḳoria kurbani kanat kurbani deoa hoḳoltar ufre toia ou sorbire-o zalailiba, ou nomunae imame hou zonor gunar kofora adae ḳoria harle, he mafi faibo.
LEV 5:1 “Kunu manshe zudi nizor souke deḳa ba ḳane huna kunu goṭona zane, ar bisaror ḳalo adaloto shakkir shuzug faia-o shakki na dey, te itar lagi he guna ḳore, tar i oforador shaza he boibo.
LEV 5:2 “Ḳeu zudi na zania kunu nafak zinish soilae, te he nafak ar dushi bonbo. Ita kunuzator zongli haram mora foshu, goro fala kunu mora zandar ba maṭir maze buke solra zekunu mora zandarre na zania soile-o dushi-nafak bonbo.
LEV 5:3 “Manshor shorilre zetae nafak korilae, shoril taki bar oil ou laḳan kunuta ḳeu zudi na zania soilae, te ita zanar bade he dushi oibo.
LEV 5:4 “Aḳol-bibeḳ na ḳaṭaia aḳta zudi keu kunu ḳosom ḳorilae, bala ba bura kunta ḳormu ḳoia monor bekiale ḳeu kunu ḳosom ḳaile-o, he zebla ikan buzilibo ou shomoy he dushi bonbo.
LEV 5:5 “Ou laḳan zekunu oforad ḳoria ḳeu dushi bonigele, he nizor gunare shikar ḳorte oibo.
LEV 5:6 Ar ou gunar zorimana hishabe he Mabudor name, gunar koforar kurbanir niote eḳṭa meṛi ba sagi anbo, ar imame tar gunar kofora adae ḳorba.
LEV 5:7 “Ar he zudi meṛi ba sagi ante ofarog oy, te ou gunar zorimana babot duiṭa ḍufi faki ba faro ania Mabudor name dite oibo. Itar mazor egu oibo gunar koforar kurbani, ar dusraṭa zalail kurbani.
LEV 5:8 Ar he ita ania imamor ato dibo, imame gunar koforar kurbani hishabe foyla egu fakire kurbani diba. Tain ogur ḳolla muraia marba, oile ḳolla algaita nae.
LEV 5:9 Bade ogur tuṛa lou nia kurbani kanar sairo galat siṭai diba, ar bad-baki lou kurbani kanar tole ḍali diba. Ita oilo gunar koforar lagi kurbani.
LEV 5:10 Ar dusra fakiṭare imam sabe niom mafik zalail kurbani diba. Dia, tar gunar kofora adae ḳorba, teu he mafi faibo.
LEV 5:11 “Ar zudi ou gunar koforar lagi duiṭa ḍufi faki ba faro anto na fare, te he dui sher moyda ante oibo. Ita gunar koforar kurbani oae itar ufre kunu tel ba loban-agor dio na.
LEV 5:12 Ou moyda loia he imamor gese zaibo, gele ou asta kurbanir bodla nishana hishabe eḳ muiṭ moyda imam sabe kurbani kanar ufre Mabudor name zalailiba. Ita oilo Mabudor name gunar koforar kurbani.
LEV 5:13 He ze oforad ḳorse, otar mafir lagi imame ola kofora adae ḳorba, teu tar gunar mafi faibo. Ar kurbani deoar bade i moydar zotoḳan roibo, dan-gomor sodgar laḳan ita hoḳolta imame faiba.”
LEV 5:14 Bade Mabude Musa nobire ḳoila,
LEV 5:15 “Ḳeu zudi na zania Mabudor fak-fobitro kunu mal-samanar befare emne-u kunu dush-ḳosuri korilae, te ou gunar zorimana hishabe ebadot ḳanar mafe zoto tola rufadi meṛar dam ṭik kora oy, te he tar nizor fal taki ou foriman damor ba homan damdi kinia nikut egu meṛar faṭa Mabudor name kurbani dite oibo. Ita to dush-ḳosurir koforar kurbani.
LEV 5:16 Ar he ou fak-fobitro mal-samanar befare ze dush-ḳosuri korse, itar ḳeti-furon-o dite oibo. He ou meṛar damor loge aro fas baṭor eḳ baṭ foriman nogod ṭeḳa imam sabor ato dibo. Bade imame tar ḳosuri mafir niote ou meṛare nia dush-ḳosurir koforar kurbani adae ḳoria harle, he mafi faibo.
LEV 5:17 “Ar kunu manshe zudi bul ḳoria na zania Allar nished ḳora kunu dush-ḳosurir ḳam ḳorilae, te itar lagi he dushi. I gunar lagi tare dayi kora oibo.
LEV 5:18 He tar ou dush-ḳosurir kofora hishabe, egu nikut meṛar faṭa ba er dam ania imam sabor gese dibo. He na zania ze dush-ḳosuri korilise, imam sabe otar kofora adae ḳorba, teu tar mafi milbo.
LEV 5:19 Ita to dush-ḳosurir koforar kurbani, he Mabudor dorbaro dush ḳorse.”
LEV 6:1 Mabude Musa nobire aro ḳoila,
LEV 6:2 “Huno, kunu manshe zebla tar ari-forir loge harami koria Mabudor dorbaro guna ḳore, tar gese toa amanot ba bondoki zinishor kianot ḳore, ba suri kori kunu mal ney ba ṭogaṭogi kore, sol-soturi koria beimani mate,
LEV 6:3 tubaia faoa malor befare beimani mate ba ota hokkoltar befare kunu misa ḳosom ḳae, ba ou laḳan aro kunu guna ḳore,
LEV 6:4 te ou nomunar guna ḳoria oforadi bonae, he zeta mal attoshat ḳorse, ba sol-soturi koria nise, ba amanotor kianot ḳorse, tubai faoa mal lukaise,
LEV 6:5 ba zekunu malor befare misa ḳosom ḳaise, ita hoḳolta he firot dibo, erloge zorimana hishabe aro fas baṭor eḳ baṭ beshi dibo. He zedin tar dush shikar ḳorbo, ou din malor malikre ita firai dibo.
LEV 6:6 Ar nizor dush-ḳosuri mafir niote he Mabudor dorbaro kurbani loia azir oibo, imam sabor ṭik kora damor egu nikut meṛar faṭa loia aibo.
LEV 6:7 Imame Mabudor dorbaro tar gunar kofora adae ḳorba. He otar mazor zekunu guna ḳorle, ou nomunae tar gunar mafi faibo.”
LEV 6:8 Bade Mabude Musa nobire ḳoila,
LEV 6:9 “Tumi Harun ar tar fuaintore hikai deo, zalail kurbani adae ḳorar musla oilo, kurbanir foshu fozor forzonto hara rait kurbani kanar agunir ufre roibo, ar aguino zalail roibo.
LEV 6:10 Biani bala imam sabe suti kafoṛdi banail haf-penṭor laḳan nizor zangiaḳan ar tan imamotir baki hoḳol sutir lebas findiba. Findia kurbanir foshu zalanir sali tulia nia kurbani kanar ḳandat toiba.
LEV 6:11 Bade tain ou lebas bodlaia, dusra lebas findia, ou salire kempor bare kunu fak-saf zagat nia falaiba.
LEV 6:12 Oile kurbani kanat aguin zalail roibo, ita nibto na. Forteḳ din biane imame ou agunir ufre zalanir daru diba, dia darur ufre zalail kurbanir foshure hazaiba, hazaia er ufre salamoti kurbanir sorbire zalaiba.
LEV 6:13 Hushiar roio, kurbani kanar aguin hamesha zolat roibo, ita kunu shomoy-u nibto na.
LEV 6:14 “Dan-gom sodgar niom oilo, Harunor fuain taki eḳzon imame ou sodgar moyda ar dorḳari hokkolta loia kurbani kanar gese Mabudor samne azir oiba.
LEV 6:15 Ar imame oḳan taki eḳ muiṭ moyda, kisu tel ar sodgar hoḳol loban-agor nia asta sodgar nishana hishabe ou ongshore kurbani kanar ufre zalaiba. Itar dumar gerane to Mabud kushi oin.
LEV 6:16 Sodgar malor bad-baki ongsho imam Harun ar tar fuainte ḳaiba. Tara itar maze kunu ḳamir na mishaia ruṭi banaiba, banaia Milon-tambur uṭano kunu pak zagat boia ḳaiba.
LEV 6:17 Mono rakio, kunu ḳamir furaia itare sekio na. Amar name deoa zalail kurbanir ou ongsho ami tarare dilam. Gunar koforar kurbani, ar dush-ḳosurir koforar kurbanir laḳan dan-gomor sodgar ou ongsho-o oilo ḳas fobitro.
LEV 6:18 Ḳali imam Harunor bongshor hoḳol beṭa manshe ita ḳaita farba, Mabudor namor zalail kurbanir ou ongsho to oarishor for oarish dori tara-u faiba. Kub kial rakio, zesatae itar loge lagbo, ota-o fak-fobitro bonizibo, mani imam oḳlor baira manshor lagi haram.”
LEV 6:19 Mabude Musa nobire aro ḳoila,
LEV 6:20 “Harune zedin imamotir ḳelafoti shomzia ḳamo boail oiba, ou din Harun ar tar fuainte dan-gomor sodgar niom mafik dui sher moyda Mabudor dorbaro anba. Itar ordeḳ biane ar ordeḳ hainja bala diba.
LEV 6:21 Tara tel dia ḳai banaia taoat sekia harle ita ṭukra ṭukra ḳoria Mabudor samne dan-gomor sodga hishabe azir ḳorba, itar dumar gerane Mabud kushi oin.
LEV 6:22 Harunor bade tar ze fuare fordan imam hishabe ḳelafoti deoa oibo, he-o oula sodga adae ḳorbo. Ita to Mabudor hor-hameshakur faona, ou sodgar fura ongsho zalailite oibo.
LEV 6:23 Imam oḳlor nizor deoa dan-gomor sodgar hokkolta zalailite oibo, ita ḳaoar kunu hukum nae.”
LEV 6:24 Bade Mabude Musa nobire ḳoila,
LEV 6:25 “Tumi Harun ar tar fuaintore gunar koforar kurbanir niom hikao. Zalail kurbanir foshure ze zagat zobo ḳoroin, gunar koforar kurbanir foshure-o ono zobo ḳorba. I kurbanir gust to ḳas fobitro.
LEV 6:26 Ze imame ou kurbani adae ḳorba, ein ou gust ḳaiba. Milon-tambur uṭano fobitro zagat ou gust ḳaite oibo.
LEV 6:27 Zeta zinishe ou gustre soibo, ita fak-fobitro oizibo. Kunu ḳafoṛor maze zudi er lour siṭa lage, te fak-fobitro kunu zagat ita doite oibo.
LEV 6:28 Ar maṭir ze fatilo ou gust randa oibo, ita bade bangilibae. Oile fitolor fatilo randile iṭa manjia fanidi doia fak-saf ḳorbae.
LEV 6:29 Imam bongshor zekunu beṭainte ou kurbanir gust ḳaita farba, ita to ḳas fobitro gust.
LEV 6:30 Oile gunar koforar kurbanir foshur lou zudi Milon-tambur bitre neoa oizae, te i kurbanir gust ḳaoa nished, ita zalailite oibo.
LEV 7:1 “Dush-ḳosurir koforar kurbanir musla oilo, i kurbanir gust to ḳas fobitro.
LEV 7:2 Zalail kurbanir foshure ze zagat zobo ḳora oy, ou kurbanir foshure-o ono zobo ḳorte oibo. Itar lou kurbani kanar sairo galabae siṭai dite oibo.
LEV 7:3 Ar itar hoḳol sorbire loibo, mani sorbi ala lenguṛ, feṭor bitoror hoḳoltar ufror sorbi,
LEV 7:4 er loge duio kiḍni ar otar ufror sorbi, ar ḳoiljar logor maṭia, i hoḳolta algaiba.
LEV 7:5 Algaia imame ou hoḳolta nia Mabudor name agunit deoa kurbani hishabe kurbani kanar ufre zalailiba, ita oilo dush-ḳosurir koforar kurbani.
LEV 7:6 Kurbanir gust imam foribaror zekunu beṭa manshe ḳaita farba. Ita to ḳas fobitro zinish, erlagi tara zekunu pak zagat boia ḳaite oibo.
LEV 7:7 “Gunar koforar kurbani ar dush-ḳosurir koforar kurbanir niom-ḳanun to eḳoi nomunar. Ze imam sabe ou koforar kurbanire adae ḳorba, ein ou gust faiba.
LEV 7:8 Ar ze imame zalail kurbani adae ḳorba, ein ou kurbanir foshur samṛa-o nita farba.
LEV 7:9 Luaṛit, taoat ba tunduri undalo hedia ana dan-gomor sodgar ruṭi kali hou imame faiba, zein i sodga adae ḳorsoin.
LEV 7:10 Oile dan-gomor bad-baki hoḳol sodga, ita tel maḳail ba hukna zekunu laḳan ouk, imam Harunor hoḳol fuainte itar homan baṭ faiba.
LEV 7:11 “Mabudor name deoa salamoti kurbanir niom oilo,
LEV 7:12 kunu manshe zudi Mabudor shukria adae ḳorar kiale salamoti kurbani dey, te ou kurbanir foshur loge tel mishail nireḳ moyda dia ḳamir saṛa ruṭi ba banail ruṭit tel maḳaia loia aibo, ba tel mishail ḳamir saṛa nireḳ moydar fiṭa banaia ante oibo.
LEV 7:13 Shukria adae ḳorar kiale salamoti kurbanir zinishor loge ḳamir ala tuṛa ruṭi-o anbo.
LEV 7:14 Mabudor name deoar lagi he ou forteḳ zinish taki eḳṭa eḳṭa ḳori anbo. Ze imame salamoti kurbanir foshur lou siṭaiba, ein ita faiba.
LEV 7:15 Shukurana adae ḳorar niote deoa ou kurbanir gust ou din-u ḳailite oibo. Ita bador din biankur lagi toa zaito nae.
LEV 7:16 “Ou salamoti kurbani zudi kunu mannot adae ḳorar niote deo, ba emne kushi oia kurbani deo, te itar gust ou din-u ḳaio, ar kisu baki roile bador dino ḳaitae farbae.
LEV 7:17 Oile dui din bade i gust roile, ita zalailite oibo.
LEV 7:18 Tin nombor din i gust ḳaile kurbani kobul oito nae. Kurbani deorar amol-namat ita uṭto nae, ou gust to nafak oigese, kunu manshe ita ḳaile tare naforman hishabe gona oibo.
LEV 7:19 “Salamoti kurbanir gustor maze nafak kunu zinish lagigele, i gustor i ongsho ar ḳaoa zaito nae, ita zalailiba. Oile baki gust ḳaoa zaibo, fak-saf halote ze kunu zone ita ḳaita farba.
LEV 7:20 Ar nafak halote kunu manshe zudi Mabudor name deoa ou salamoti kurbanir gust ḳailae, te shomaz taki tar nam miṭailite oibo.
LEV 7:21 Kunu manshe zudi foshur ba manshor kunu nafak zinish soia hari ba dusra nafak kunta soia hari Mabudor name deoa salamoti kurbanir gust ḳailae, te tar nam-o shomaz taki miṭailite oibo.”
LEV 7:22 Ar Mabude Musare ḳoila,
LEV 7:23 “Tumi Boni Israilre zanai deo, tumra goru-sagol ba meṛar kunuzat sorbi kaio na.
LEV 7:24 Kunu mora foshur ba zongli zanuare mara foshur sorbire tumra oinno kunu ḳamo lagaitae farbae, oile ḳaitae fartae nae.
LEV 7:25 Zoto nomunar foshu dia Mabudor name agunit deoa kurbani adae ḳora oy, ita zator foshur sorbi zegue ḳaibo, tar namre shomaz taki miṭailibae.
LEV 7:26 Tumra zekunu zagat boshot ḳoro na ḳene, kunuzat foshu ba fakir lou ḳaoa zaiz nae.
LEV 7:27 Kunu manshe zudi lou ḳae, te shomaz taki tar nam miṭailite oibo.”
LEV 7:28 Bade Mabude Musare ḳoila,
LEV 7:29 “Tumi Boni Israilre zanai deo, zekunu manshe kunu foshu dia salamoti kurbani adae ḳorle, kurbanir gustor eḳṭa ongsho Mabudor dorbaro dite oibo.
LEV 7:30 Mabudor name agunit deoa kurbanir ou ongsho, mani sina ar sinar ufror sorbi he nizor ate ania imam sabre dibo. Imame itare usa ḳoria Mabudor samne dulaiba.
LEV 7:31 Bade tain sorbire kurbani kanar ufre zalailiba, oile ou sinar gust imam Harun ar tan fuainte faiba.
LEV 7:32 Salamoti kurbanir foshur ḍainor ranor gust imam sabre dilaibae.
LEV 7:33 Imam Harunor bongshor ze ḳeu salamoti kurbanir foshur lou ar sorbire kurbani diba, tan faona hishabe ou ranor gust niba.
LEV 7:34 Boni Israilor deoa hoḳol salamoti kurbanir gust taki dulona kurbanir sina ar ḍainor ranor gust ami imam Harun ar tar fuaintore dilam. Boni Israilor deoa kurbanir i ongsho oilo tarar hameshakur faona hok.”
LEV 7:35 Harun ar tar fuaintore zedin taki imamotir ḳamo boail ḳora oisil, hou din taki Mabudor name agunit deoa hoḳol nomunar kurbanir ou ongshore tarar faona hok hishabe dora oise.
LEV 7:36 Tarare zedin ḳelafoti shomzaia boail ḳora oise, hou din Mabude Boni Israilre hukum disla, kurbanir gustor ou ongsho hor-hamesha erare dibar lagi.
LEV 7:37 Ita oilo zalail kurbani, dan-gomor sodga, gunar koforar kurbani, dush-ḳosurir koforar kurbani, imamoti shomzibar sodga, ar salamoti kurbanir niom.
LEV 7:38 Sinai morubumit Mabude zedin Boni Israilre hukum disla tan name kurbanir zinish anar lagi, hou din tain Tur faṛor ufre Musa nobire ou hokkol niom-ḳanun zanaisla.
LEV 8:1 Bade Mabude Musare ḳoila,
LEV 8:2 “Tumi Harun ar tar fuaintore loia amar gese azir o. Er loge tarar imamotir lebas, ḳelafoti shomzibar tel, gunar koforar kurbanir bisal, dugu meṛar faṭa ar ḳamir saṛa ruṭir ṭukri-o anio.
LEV 8:3 Ar tumi tamam Boni Israilre Milon-tambur duaror ḳandat dola ḳoro.”
LEV 8:4 Teu Mabudor hukum mafik Musa nobie hoḳolta ḳorla, hoḳol Boni Israil Milon-tambur duaror ḳandat dola oila.
LEV 8:5 Ou shomoy Musae erare ḳoila, “Mabude hukum disoin ita ḳorar lagi.”
LEV 8:6 Oḳan ḳoia tain imam Harun ar tan fuaintore samne ania fani dia naoaila.
LEV 8:7 Bade tain Harunre imamoti lebasor fainjabi findaia hari komror bondoni bandia dila. Tain alḳella ar efron findaia feṭor ufror noksha ḳora ḳafoṛre fitadi bandi dila.
LEV 8:8 Bade bukur ufror toli findaia er bitre fobitro Urim ar Tummim haraila.
LEV 8:9 Erbade Harunor matat faugṛi findaia hou fobitro taz, mani shunar fatḳan faugṛir samnabae lagaila. Musae i hoḳolta ḳorla Mabudor hukum mafik.
LEV 8:10 Bade tain Milon-tambu ar er bitoror hoḳol mal-samanare ḳelafotir tel dia fobitro ḳorla.
LEV 8:11 Ou tel taki tuṛa tel nia tain kurbani kanar ufre shatbar siṭaila. Kurbani kana ar er logor hoḳol mal-samana, hanḍi-bashon, ar uzur fanir gamla ar er tolor soki-kaṭre, tel dia fak-fobitro ḳorla.
LEV 8:12 Aro tuṛa tel nia imam Harunor matar maze ḍalia tanre fak-fobitro bonar lagi kelafoti dila.
LEV 8:13 Ar Harunor fuaintore samne ania tarar gotro fainjabi findaila, ḳomror bondoni bandia hari matar toki findaila. Ita hoḳolta ḳorla tain Mabudor hukum mafik.
LEV 8:14 Erbade tain gunar koforar kurbanir bisal anla, anle Harun ar tan fuainte bisalor ḳolla atai dila.
LEV 8:15 Teu Musae ou bisalre zobo ḳoria ogur kisu lou nia, kurbani kanare fak-saf ḳorar kiale oḳanor hing oḳlor maze ator anguildi lou maḳaila. Baki lou tain kurbani kanar tole ḍali dila. Ou nomunae tain gunar koforar kurbanir lou dia kurbani kanare fak-saf ḳorla.
LEV 8:16 Bade tain bisalor feṭor bitoror hoḳol sorbi, ḳoiljar logor maṭia, sorbi shomet duio kiḍni nia kurbani kanar ufre zalailila.
LEV 8:17 Oile bisalor ḳal, gust, gufor nia tain kempor bare zalaila. Musae ita hoḳolta ḳorla Mabudor hukum mafik.
LEV 8:18 Bade tain zalail kurbanir meṛar faṭare anla. Anle Harun ar tan fuainte ogur ḳolla atai dila.
LEV 8:19 Ar Musae ou meṛare zobo ḳoria kurbani kanar sairo galat lou siṭai dila.
LEV 8:20 Tain meṛare ṭukraia ogur ḳolla, gustor ṭukra ar sorbire zalaila.
LEV 8:21 Ar ou meṛar feṭor bitoror hoḳolta, tar sairo ṭeng fani dia doia hari, asta meṛare zalail kurbani hishabe kurbani kanar ufre zalailila. Ita to Mabudor name agunit deoa zalail kurbani, itar dumar gerane tain kushi oin. Musae ita hoḳolta ḳorla Mabudor hukum mafik.
LEV 8:22 Bade tain imamoti kamo boailor niote, dusra meṛare ania harle Harun ar tan fuainte meṛar ḳolla atai dila.
LEV 8:23 Musae ou meṛare zobo ḳoria, ogur tuṛa lou nia Harunor ḍain ḳanor lotit, ḍain ator ar ḍain faor buṛi angulit lagaila.
LEV 8:24 Ar Harunor fuaintore-o samne ania, tarar ḍain ḳanor lotit, ar ḍain at, ḍain faor buṛi angulit tuṛa lou lagai dila. Aro tuṛa lou nia kurbani kanar sairo galat siṭai dila.
LEV 8:25 Tain meṛar sorbi, sorbi ala lenguṛ, ḳoiljar logor maṭia, sorbi shomet duio kiḍni, ar ḍainor ran nila.
LEV 8:26 Ar Mabudor samne toa ḳamir saṛa ruṭir ṭukri taki ekkan ruṭi, ar teldi baza ekkan fiṭa, ar tel maḳail ekkan ruṭi nia hou sorbi ar ranor ufre toila.
LEV 8:27 Toia ita hoḳolta Harun ar tan fuaintor ato dia dulona kurbani hishabe Mabudor samne dulaila.
LEV 8:28 Bade tain ita tarar at taki nia hari kurbani kanar foshur ufre toia zalailila. Ita to ḳelafoti shomzibar kurbani, Mabudor name agunit deoa kurbani, itar dumar gerane tain kushi oin.
LEV 8:29 Bade tain nizor faona ongsho, mani kelafoti shomzibar kurbanir meṛar sina nia dulona kurbani hishabe Mabudor samne dulaila. Tain ita hoḳolta ḳorla Mabudor hukum mafik.
LEV 8:30 Bade Musae ḳelafoti shomzibar tuṛa fobitro tel nila, ar kurbani kana taki tuṛa lou ania Harun ar tan fuaintor ufre ar tarar lebasor ufre siṭai dila. Ou nomunae Harun ar tan fuaintore, ar tarar lebasre-o fak-fobitro ḳora oilo.
LEV 8:31 Bade Musae Harun ar en fuaintore ḳoila, “Tumra Milon-tambur duaror samne ou gust rando, randia hono boia ḳelafoti shomzibar ṭukrir ruṭi dia ota ḳao. Amare to age ou ḳota zanail oise, ita ḳali tumi ar tumar fuainte ḳaibae.
LEV 8:32 Ḳanir bade zeta gust ar ruṭi baki roibo, itare aguindi zalailio.
LEV 8:33 Tumrare ḳelafoti shomzibar ou mahfil shat din dori solbo. I shat din tumra Milon-tambur duaror ḳanda taki horio na.
LEV 8:34 Aiz zeta ḳorlam, ita to tumrar gunar kofora hishabe Mabudor hukum mafik korlam.
LEV 8:35 Te tumra zane basia roar lagi aiz taki shat din forzonto ou Milon-tambur duaror ḳandat roio. Din-rait ono roia Mabudor hukum mafik kam ḳorio. Tumra ola ḳorar lagi to ami hukum faisi.”
LEV 8:36 Musa nobir mazdi Mabude zotota ḳorar hukum disla, Harun ar tan fuainte ita hoḳolta ḳorla.
LEV 9:1 Ḳelafoti shomzibar mahfilor aṭ dinor din Musa nobie imam Harunre, tan fuaintore ar Boni Israilor murobbi oḳolre-o anaila.
LEV 9:2 Anaia Harunre ḳoila, “Tumar gunar koforar kurbanir lagi tumi egu bisal ano, ar zalail kurbanir lagi egu meṛar faṭa loia Mabudor dorbaro azir o. Kurbanir foshu guin furafur nikut oito.
LEV 9:3 Ar tumi Boni Israilre ḳo, tara zanu Mabudor namor kurbani loia azir oy. Tara gunar koforar lagi egu sagol, ar zalail kurbanir lagi eḳ bosor boyoshi nikut egu goru-basur, ar egu meṛa-baichcha ane,
LEV 9:4 ar salamoti kurbanir lagi egu bisal ar egu meṛar faṭa loia azir oy. Itar loge tara tel maḳail dan-gomor sodga-o anba. Mabude tarare aiz didar diba, erlagi tara ota loia azir oukka.”
LEV 9:5 Musa nobir hukum mafik tara hokkolta loia Milon-tambur samne aila. Hoḳol Boni Israil Mabudor samne aia ubaila.
LEV 9:6 Ou shomoy Musae tarare ḳoila, “Mabude tumrare ita ḳorar lagi hukum disoin, ita adae ḳorle tumrar samne tan kudroti nur zair oibo.”
LEV 9:7 Bade tain imam Harunre ḳoila, “Tumi gia kurbani kanar ḳandat zao, gia tumar nizor ar manshor gunar koforar lagi, zalail kurbani ar gunar koforar kurbani adae ḳoro. Ar manshor ana kurbani-o adae ḳoro, Mabude amare ola hukum disoin.”
LEV 9:8 Teu imam Harun kurbani kanar ḳandat gia, tan nizor gunar koforar kurbanir basur zobo ḳorla.
LEV 9:9 Zobor bade tan fuainte ogur lou loia tan daro gela. Tain ou lour maze angul ḍubaia tuṛa lou nia kurbani kanar hing oḳol-o maḳaila, ar baki lou kurbani kanar tole ḍalila.
LEV 9:10 Mabude Musare zela hukum disla, imam Harune ṭik ou laḳan gunar koforar kurbanir basuror sorbi, duio kiḍni ar ḳoiljar logor maṭiare kurbani kanar ufre nia zalailila.
LEV 9:11 Kurbanir gust ar samṛa nia tain kempor bare zalaila.
LEV 9:12 Bade imam Harune zalail kurbanir meṛare zobo ḳorla. Tan fuainte ogur lou nia tan ato dila, tain ou loure kurbani kanar sairo galat siṭaila.
LEV 9:13 Tara zalail kurbanir meṛar ḳolla ar gustor ṭukrain eḳ ek kori Harunor ato dila, tain ita kurbani kanar ufre zalailila.
LEV 9:14 Meṛar ṭeng ar feṭor bitoror hoḳolta fani dia doia saf ḳoria, zalail kurbani foshur loge ita hokkolta-o kurbani kanar ufre zalailila.
LEV 9:15 Bade tain shomazor manshor lagi kurbanir foshu oḳol anaila. Tain manshor gunar koforar kurbanir sagol zobo ḳorla, ar agor laḳan kurbani adae ḳorla.
LEV 9:16 Erbade tain tarar zalail kurbanir foshure-o Mabudor hukum mafik kurbani dila.
LEV 9:17 Ar dan-gomor sodgar lagi ana samana taki eḳ muiṭ nia hari kurbani kanar ufre zalaila. Ita saṛa-o tain biani balar hameshakur zalail kurbani adae ḳorla.
LEV 9:18 Tain manshor salamoti kurbanir ou goru ar meṛare zobo ḳorla. Zobor bade tan fuainte ogur lou ania tan ato dila, lou nia tain kurbani kanar sairo galat siṭai dila.
LEV 9:19 Ar imam Harunre hou goru ar meṛar loge lagail hoḳol sorbi, mani sorbi ala lenguṛ, feṭor bitoror hoḳoltar ufror sorbi, duio kiḍni ar otar ufror sorbi, ḳoiljar logor maṭia-o ania dila.
LEV 9:20 Tara ou hoḳol sorbire hou foshur sinar ufre toila. Ar imam Harune ou sorbi nia kurbani kanar ufre zalaila.
LEV 9:21 Musa nobir hukum mafik Harune bade kurbanir foshur sina ar ḍainor ran nia Mabudor samne dulona kurbani hishabe dulaila.
LEV 9:22 Bade imam Harune manshor baedi tan at baṛaia tarare dua dila. Tain gunar koforar kurbani, zalail kurbani ar salamoti kurbani adae ḳoria harle, kurbani kana taki lamia aila.
LEV 9:23 Erbade Musa nobi ar imam Harun gia Milon-tambur bitre hamaila, bade hon taki bar oia aia hoḳol manshore dua dila. Ou shomoy hoḳol manshor samne Mabude tan kudroti nur zair ḳorla.
LEV 9:24 Mabudor ges taki kudroti aguin aia, kurbani kanar ufror zalail kurbanir foshu ar hokkol sorbire zalaia sali korililo. Ita dekia hoḳol manush kushie Subohan Alla ḳoia sik dia soizdat foṛla.
LEV 10:1 Bade ola oilo, imam Harunor fua Nadab ar Abihue tarar zarzir agor-kushboy danit aguin zalaila, ar ou agunir ufre agor-kushboy dila. Tara Mabudor hukumor ulṭa gia dusra aguin dia Mabudor name agor-kushboy zalaila.
LEV 10:2 Otar lagi Mabudor ges taki aguin lamia aia tarare zalaililo, tara Mabudor samne morigela.
LEV 10:3 Teu Musae Harunre ḳoila, “Mabude to age-u zanai disla, Amar samne zera azir oy, tara amare fak-fobitro ḳoia manbo, hoḳol manshor samne amar gourob-mohima zair ḳorbo.” Ikan hunia Harun sufsaf roila.
LEV 10:4 Bade Musae Harunor sasa Ujjolor fuain Mishayel ar Elzafonre ḳobor dia anaila, anaia ḳoila, “Tumra Herem Shorifor samon taki tumrar duio batizar lashre bar ḳoria kempor bare neo.”
LEV 10:5 Tan hukum faia tara gia Nadab ar Abihur lashre imamoti fainjabir ḳafoṛo dori ṭania kempor bare nila.
LEV 10:6 Bade imam Harun ar tan fuain Ali-Azor ar Isamarre Musae ḳoila, “Tarar moutor duke tumra nizor sulre aula-zaula ḳorio na, ar finnor ḳafoṛ-sufoṛ fario na. Ita ḳorle tumra-o morbae, ar asta shomazor ufre Mabudor gozobi gusa lambo. Oile Mabude zerare aguindi zalai marsoin, tarar duke tumrar kuṭum-ḳesh mani bad-baki Boni Israile mattom-ahazari korta farba.
LEV 10:7 Tumrar gotro to Mabudor namor ḳelafoti shomzibar fobitro tel deoa oise, erlagi tumra Milon-tambur duaror bare zaio na, gele-u morbae.” Tara-o Musar ḳota manla.
LEV 10:8 Erbade Mabude imam Harunre ḳoila,
LEV 10:9 “Tumi ar tumar fuainte anguror shorbot ba shorab ḳaia Milon-tambur bitre hamaio na, hamaile-u morbae. I hukum oarishor for oarish dori hor-hamesha manio.
LEV 10:10 Kunṭa haram ar kunṭa halal, kunṭa fak ar kunṭa nafak, ita buzia-hunia solio.
LEV 10:11 Ar ami Mabude Musar marfote Boni Israilre zoto hukum-ahkam bataisi, ita tarare talim dio.”
LEV 10:12 Bade Harun ar tan baki duio fua Ali-Azor ar Isamarre Musae ḳoila, “Mabudor name agunit deoa kurbanir logor dan-gomor sodgar ze ongsho baki roise, ota dia ḳamir saṛa ruṭi banaia kurbani kanar ḳandat nia tumra ḳaio. Ita to ḳas fobitro zinish.
LEV 10:13 Tumra fobitro Kaba goror shimanar bitre ota ḳaio. Mabudor name agunit deoa kurbanir ou ongsho to tumar ar tumar fuaintor faona. Mabude amare ola hukum disoin.
LEV 10:14 Oile Mabudor name dulona kurbanir sina ar ranor gust tumra ar tumrar fua-fuṛinte-o ḳaitae farbae. Zekunu fak-saf zagat boia tumra ita ḳaio. Boni Israilor hoḳol salamoti kurbanir gustor ou ongsho tumrare ar tumrar fua-fuṛintore deoa oise.
LEV 10:15 Ou kurbanir foshur sorbi zebla ana oibo, ou shomoy dulona kurbanir lagi sina ar ranor gust-o ana lagbo. Mabudor hukum mafik ou ran ar sinar gust tumi ar tumar fua-fuṛintor siroḳalin faona.”
LEV 10:16 Bade Musae kub kiali oia tallashi koria zanla, ze sagol dia gunar koforar kurbani adae ḳora oisil, ogur hoḳol gust tara zalailise. Erlagi Musae Harunor baki duio fua Ali-Azor ar Isamaror ufre gusa ḳoria ḳoila,
LEV 10:17 “Gunar koforar kurbanir gust tumra Kaba goror shimanat ḳailae na ḳene? Ita to ḳas fobitro zinish. Mabudor samne Boni Israilor gunar kofora adae ḳoria, tarar dush-ḳosuri mafir lagi ita to tumrare deoa oisil.
LEV 10:18 Kurbanir sagolor lou zebla Herem Shorifor bitre neoa oise na, te amar hukum mafik itar gust to tumra Kaba goror shimanar bitre ḳaoa zorur asil.”
LEV 10:19 Harune zuaf dila, “Aiz Mabudor samne tarar gunar koforar kurbani ar zalail kurbani adae ḳorar bade amar ufredi otota goṭilo. Te aizkur dino ami ou kurbanir gust ḳaile Mabud kunu kushi oiba ni?”
LEV 10:20 I zuaf hunia Musa nobi kushi oila.
LEV 11:1 Mabude Musa ar Harunre ḳoila,
LEV 11:2 “Tumra Boni Israilre zanai deo, maṭir ufror foshur maze zeta foshu tumrar lagi halal, ota oilo:
LEV 11:3 “Zeta foshur faor kura furafur sira, ar ḳanire fazae, itar gust tumrar lagi halal.
LEV 11:4 Ta-o er mazor kunu kunu foshue ḳali kanire fazae, ar kunu kunu foshur ḳali kura sira, ita to tumrar lagi haram. Uṭe ḳanire fazaileo tar kura sira nae, erlagi uṭ haram.
LEV 11:5 Shafon-undure ḳanire fazaileo, itar kura sira nae, otar lagi ita-o haram.
LEV 11:6 Ḳorgushe-o ḳanire fazae, oile itar kura sira nae, otar lagi haram.
LEV 11:7 Shuoror kura furafur sira, oile itae ḳanire fazae na, erlagi ita tumrar lagi haram.
LEV 11:8 Itar gust tumrar lagi haram, itar mora lashre-o soio na. Ita tumrar lagi nafak.
LEV 11:9 “Fanir maze zeta zandare boshot ḳoroin, itar maze zetar foir ar ḍaḳna ase, ita tumrar lagi halal.
LEV 11:10 Oile zetar foir ar ḍaḳna nai, ita tumrar lagi nazaiz. Ita fanir maze fal bandia gurra zandar ouk ba aro kunu zandar ouk, itare tumra ginnaio.
LEV 11:11 Nazaiz oae itare haram mono ḳorio, ita tumra ḳaio na. Itar mora lashre-o tumra ginnaio.
LEV 11:12 Fanir maze boshot ḳore, oile kunu foir ba ḍaḳna nai, ilaḳan hoḳol zandarre tumra ginnaio.
LEV 11:13 “Ar faki oḳlor mazor ou laḳan fakire tumra ginnaio, ita tumra ḳaio na. Ota oila, boṛo sil, hokun, haf-ḳauri,
LEV 11:14 hoḳol zator sil, hoḳol zat ḳaua,
LEV 11:15 uṭ faki,
LEV 11:16 nim faki, gangsil, hoḳol nomunar baz faki,
LEV 11:17 hoḳol zat fesa, hoḳol zator kuṛa, sola-kak, bolua faki,
LEV 11:18 fani-ḳauri,
LEV 11:19 hoḳol zator zaṭia, hoḳol zator bogla, mon-sura faki ar badur, ita tumrar lagi haram.
LEV 11:20 “Fuk-foring oḳlor maze ou laḳan fuk-foring tumrar lagi nazaiz, zetae faodi aṭe ar uṛal dey, itare tumra ginnaio.
LEV 11:21 Oile itar mazor zetar aṭu ase, ar maṭir ufre falai falai sole, itar mazor kunu kunuṭa tumrar lagi halal.
LEV 11:22 Ita oilo, hoḳol zator fongofal, baga-foring, gash-foring.
LEV 11:23 Oile ita saṛa bad-baki zoto fuk-foringe sair faoe aṭe ar uṛito fare, ita hoḳolta tumra ginnaio.
LEV 11:24 “Tumra ou laḳan ḳam ḳorle nafak oizibae; kunu manshe zudi ou haram foshu, faki, mas, fuk-foring otar mora lash soilae, te he hainja forzonto nafak roibo.
LEV 11:25 Ar ḳeu zudi ota haram zinishor lashor kunu ongshore atdi doria boia ney, te he tar ḳafoṛ-sufoṛ doia dite oibo, ar hainja forzonto nafak roibo.
LEV 11:26 “Ar zeta foshur faor kura furafur sira nae, ba ze foshue ḳanire fazae na, ita to tumrar lagi haram. Ou haram foshure ze zone soibo, he nafak bonizibo.
LEV 11:27 Sair faoe aṭra zanuar oḳlor maze, ze foshue faor talut bor dia aṭe, ita-o tumrar lagi haram. Ḳeu zudi itar mora lash soilae, te hainja forzonto nafak roibo.
LEV 11:28 Ar kunu manshe zudi itar lash atdi doria boia ney, te tar ḳafoṛ-sufoṛ doia dite oibo, ar hainja forzonto he nafak roibo. Ita zanuar oḳol to tumrar lagi haram.
LEV 11:29 “Ar maṭit solra huru-muru zandaror maze neul, undur, hoḳol zator girgiṭi,
LEV 11:30 ṭikṭiki, guil-haf, moi-haf, ainjail ar ḳaklash, tumrar lagi haram.
LEV 11:31 Maṭit solra huru-muru zandaror mazor ou zator zandar to tumrar lagi nazaiz. Itar mora lash ḳeu soile, he hainja forzonto nafak roibo.
LEV 11:32 Otar mazor zekunu egur mora lash zudi oinno zinishor ufre foṛe, zelan laḳṛi, ḳafoṛ-sufoṛ, samṛa ba solar soṭ dia banail zekunu malor ufre foṛle-u ita nafak oizibo. Nafak malre fanit bizaia toibae. Hainja forzonto ita nafak roibo, bade fak-saf oibo.
LEV 11:33 Ar ou nafak zandaror kunuṭar mora lash zudi kunu maṭir bashonor maze foṛe, te igur bitoror hoḳolta nafak oizibo, i bashonre-o bangilibae.
LEV 11:34 Ou bashonor fani ba rosh zudi kunu ḳanir zinishor ufre foṛe, te i kani nafak oizibo. Ikṭar maze zudi fani zatio kunuta toa taḳe, te ita-o nafak oizibo.
LEV 11:35 Ar otar mora lash zudi kunu zinishor ufre foṛe, te ita nafak oizibo. Ita kunu undalo foṛle, i undal bangilibae. I undal to tumrar lagi nafak, itare nafak goinno ḳorio.
LEV 11:36 Oile ita zudi kunu kuar bitre ba indarar maze foṛe, te i kua ba indara nafak oito nae. Ḳali itar mora lash ze zone soibo, he nafak oizibo.
LEV 11:37 Zomino bain dibar niote toa kunuzator bisor ufre zudi otar lash foṛe, te ita nafak oito nae.
LEV 11:38 Oile kunu bisor ufre fani dia bizanir bade zudi ita foṛe, te i bis tumrar lagi nafak.
LEV 11:39 “Tumrar halal kunu foshu morigele, igur lash ze zone soibo, he hainja forzonto nafak roibo.
LEV 11:40 Ḳeu zudi ou mora foshur gust ḳae, te he tar ḳafoṛ-sufoṛ doia dite oibo, ar he hainja forzonto nafak roibo. Ar ḳeu zudi ou foshur lashre at dia tule, te he tar ḳafoṛ-sufoṛ doia dite oibo, he-o hainja forzonto nafak roibo.
LEV 11:41 “Huno, maṭir maze solra hoḳol zator huru-muru zandar ḳaoa tumrar lagi haram, itare tumra ginnaio.
LEV 11:42 Ita buke solra zandar ouk, ba sair faoe aṭra zandar ba bout faoe solra ouk, hoḳol nomunar maṭit solra huru-muru zandar tumra ḳaio na, itare ginnaio.
LEV 11:43 Tumra ita kunutar lagi nizore ginnar zon banaio na, ba otae-o zanu tumrare nafak na banae.
LEV 11:44 Mono rakio, ami Alla-u tumrar Mabud. Amar niote tumra nizore fak-fobitro rakio. Zano to, ami nize-o fobitro. Erlagi maṭit solra kunu huru-muru zandaror lagi tumra nizore nafak banaio na.
LEV 11:45 Ami to Alla, ami tumrar Mabud oar kiale, Mishor desh taki tumrare bar ḳori anchi. Ami nize fobitro, erlagi tumra-o fobitro roio.
LEV 11:46 “Te foshu, faki, fanit boshot ḳorra zandar, ar maṭir maze solra hoḳol nomunar huru-muru zandaror befare tumra amar hukum-ahkam manio.
LEV 11:47 Kunṭa tumrar lagi zaiz ar kunṭa nazaiz, kun foshur gust halal ar kunṭa haram, ita tumra buzia-hunia solio.”
LEV 12:1 Erbade Mabude Musa nobire ḳoila,
LEV 12:2 “Tumi Boni Israilre zanai deo, kunu beṭir goro zudi kunu fuar zonom oy, te beṭiara bemaror shomoykur laḳan i beṭi nafak roibo. Tair ou nafaki halot shat din roibo.
LEV 12:3 Bade aṭ dinor din fuare mosolmani kam ḳoraite oibo.
LEV 12:4 Ar ou beṭir hurutta zonmor lou zaoar ḳarone tetrish din forzonto nafak roibo. Ou miad na fura forzonto tai kunu fobitro zinisho dora-soa zaiz nae. Ar fobitro Kaba goror shimanat zaibar hukum nae.
LEV 12:5 Oile i beṭir goro zudi fuṛir zonom oy, te beṭiara mashik bemaror laḳan tai nafak roibo, ta-o i nafaki halot fura dui hafta solbo. Bade ou bemar taki pak-pakiza oar lagi aro soyshoṭṭi din bar saibo.
LEV 12:6 “Fua ba fuṛir zonmor bade pak-pakiza oar shomoy aile, beṭie kurbani adae ḳorar niote Milon-tambur duaror ḳandat imam sabor gese zaibo. Zaite zalail kurbanir lagi eḳ bosor boyoshi egu meṛa, ar gunar koforar kurbanir lagi egu faro ba ḍufi faki loge nibo.
LEV 12:7 Teu imam sabe Mabudor samne ou kofora adae ḳoria lou zaoa bemar taki beṭire pak-pakiza ḳorba. Beṭintor goro fua ba fuṛir zonmor bade pak-pakiza oar lagi ou niom zari roilo.
LEV 12:8 Ar kurbanir lagi meṛa anar tofik zudi na taḳe, te dugu faro ba ḍufi faki anbo. Ermazor egu oibo zalail kurbani, ar dusraṭa gunar koforar kurbani. Ou nomunae imam sabe kurbani adae ḳoria taire nafaki taki basaiba, teu i beṭi pak-pakiza bonbo.
LEV 13:1 Bade Mabude Musa ar Harunre ḳoila,
LEV 13:2 “Kunu manshor gotror samṛar kunu zaga zudi aḳta fuli zae, ba kunu kulosh uṭe ba kunuzat dag deḳa zae, ar mono shondoy oy zen, ita bade fosa-kusṭo bemar oito fare, te imam Harun ba tan fuaintor mazor kunu imamor gese tare loia zaibae.
LEV 13:3 Imam sabe tar samṛar ou zaga deḳba, hi zagar ruma zudi dola oizae, ar buza zae i bemar samṛar tolor gustor maze lagigese, te buzbae, ita nafak fosa-kusṭo bemar. Ila bemari deḳle imame tare nafak koia elan ḳorba.
LEV 13:4 Oile tar samṛar maze ou dag zudi kali dola oy, ar ita samṛar tolor gustor maze na lage, onor ruma dola na oy, te imam sabe ou zonre shat din dori hoḳol manshor ges taki horai raḳba.
LEV 13:5 Bade shat dinor din tare hirbar deḳba. Zudi deḳa zae, ou bemar samṛar toledi na gia zela asil ola roise, te imame tare aro shat din alga raḳba.
LEV 13:6 Ar hirbar shat dinor din tare deḳba, ermaze zudi tar bemar na baṛia hukaia ḳomi zae, te buzba, ita ḳali kulosh uṭse. Imame tare fak-saf ḳoia elan ḳorba. He tar ḳafoṛ-sufoṛ doia hari fak-saf bonbo.
LEV 13:7 Oile imame tare fak-saf ḳoia elan ḳorar bade zudi tar gotror kulosh aro baṛi zae, te tare hirbar imamor gese deḳaibae.
LEV 13:8 Imame hirbar deḳba, zudi ou bemar samṛar ufre aro baṛi zae, te buza zaibo, ita nafak fosa-kusṭo bemar, tain ere nafak koia elan ḳorba.
LEV 13:9 “Kunu manshor samṛat fosa-kusṭo bemaror laḳan deḳa gele tare nia imam sabor gese deḳaibae.
LEV 13:10 Imame deḳba, tar gotro kunu zagar samṛar ufre zudi dola oia fuli zae, ar honor ruma dola oizae, ou fula zagat ḳasa ga taḳe,
LEV 13:11 te to iṭa eḳṭa furana fosa-kusṭo bemar. Imame tare nafak koia elan ḳorba. Tare forikkar lagi shomazor manshor ges taki kunu miade duroi raḳar zorur nae, he to emne-u nafak halote ase.
LEV 13:12 “Oile i bemar zudi asta shorilo oizae, ar imame shorilor zoto zaga deḳta faroin, ota dekia zudi tan mono oy, i bemar mata taki fao forzonto ase,
LEV 13:13 te tare aro balamonte deḳba, ar dekia zudi buza zae, i bemare tar asta gotor dola oigese, te tare fak-saf ḳoia elan ḳorba. Tar asta gotor dola oae he nafak nae.
LEV 13:14 Oile erbade zudi kunu ḳasa ga deḳa dey, te he nafak.
LEV 13:15 Imame ou ga dekia tare nafak koia elan ḳorba. Ou ga to nafak, tar nafak fosa-kusṭo bemar oise.
LEV 13:16 Bade ou ḳasa ga hukaia zudi dola oizae, te tare hirbar imamor gese niba.
LEV 13:17 Imame tare hirbar deḳba, tar asta gotror bemar zudi furafur dola oizae, te imame tare fak-saf ḳoia elan ḳorba, he ashole-u fak-saf.
LEV 13:18 “Kunu manshor gotro zudi boron oia iṭa bala oizae,
LEV 13:19 ar ou zaga bade dola oia fuli zae, ba lalṭi-dola dag oy, te tare imamor gese niba.
LEV 13:20 Imame tare deḳba, hi bemar zudi samṛar tole gia gustor maze lagizae, ruma dola oizae, te iṭa to boronor zagat zonom loa fosa-kusṭo bemar, imame tare nafak koia elan ḳorba.
LEV 13:21 Oile imame kunu dola ruma na deḳle, ar ou ga zudi samṛar tole na gia hukaizibar laḳan oy, te imame tare shat din forzonto shomaz taki alog raḳba.
LEV 13:22 Bade zudi deḳa zae, ita samṛar ufre sitri zar, te imame tare nafak koia elan ḳorba, ita eḳlaḳan fosa-kusṭo bemar.
LEV 13:23 Oile kunu laḳan ḳom-beshi na oile, na sitrile buza zaibo ita ḳali boronor dag, imame tare fak-saf ḳoia elan ḳorba.
LEV 13:24 “Kunu manshor gotror kunu ongsho zudi aguine zoli zae, ar ou zolar zagat ḳasa gar maze lalṭi ba dola dag deḳa dey,
LEV 13:25 te imame tare forikka ḳori deḳba. Ar zudi deḳa zae, ruma dola oigese, ou ga samṛar tole gia gustor maze lagigese, te iṭa to zalail zagat zonom loa fosa-kusṭo bemar oia bar oise. Ita to nafak fosa-kusṭo bemar, erlagi imame tare nafak koia elan ḳorba.
LEV 13:26 Oile imame forikka ḳoria zudi deḳoin, i zagar ruma dola oise na, ar ga sitria gia gustor maze na lagia mili zar, te imame tare shat din forzonto shomaz taki alog raḳba.
LEV 13:27 Bade imame shat dinor din tare hirbar deḳba, zudi deḳoin, ou bemar baṛi zar, te imame tare nafak koia elan ḳorba. Ita eḳlaḳan nafak fosa-kusṭo bemar.
LEV 13:28 Oile i zaga zudi kunu ḳom-besh na oia zela asil ola taḳe, ar samṛar maze na sitria mili zaoat roy, te ita aguine zolar fula ḳoia dora oibo. Ita to eḳlaḳan zolar dag, ar imame tare fak-saf ḳoia elan ḳorba.
LEV 13:29 “Ar kunu beṭa ba beṭir mata ba daṛi-musor maze zudi kunu gar alamot deḳa dey,
LEV 13:30 te imam sabe tare forikka ḳori deḳba. Tain zudi deḳoin, bemari zagar sul ba rum oldia oia sikon oigese, ar ga samṛar tole gia gustor maze lagigese, te iṭa to eḳlaḳan daud-ḳauzlir muk, ita daṛi-mus ba matar samṛat fosa-kusṭo bemar bar oise. Erlagi imame tare nafak koia elan ḳorba.
LEV 13:31 Oile imame zudi bemar forikka ḳoria deḳoin, i ga samṛar tole gese na, ar onor sul ba rum to ḳala nae, te ou bemarire shat din forzonto shomaz taki alog raḳba.
LEV 13:32 Bade shat dinor din imame hirbar forikka ḳori zudi deḳoin, i daud-ḳauzli bemar baṛse na, ba sul-rumo oldia oise na, ar onor ga samṛar tolor gustor maze lagse na,
LEV 13:33 te ou daud-ḳauzlir zaga bad dia, tar shorilor bad-baki sul ba daṛi-mus ḳamailite oibo. Bade imame tare aro shat din shomaz taki alog raḳba.
LEV 13:34 Ar shat dinor din imame hirbar forikka ḳoria zudi deḳoin, i daud-ḳauzli samṛar ufre sitrise na, ba samṛar toledi gustor maze-o lagse na, te imame tare fak-saf ḳoia elan ḳorba. Ar he ḳafoṛ-sufoṛ doia hari pak-pakiza bonbo.
LEV 13:35 Ta-o imame tare fak-saf ḳoia elan ḳorar bade-o zudi i daud-ḳauzli samṛar ufre sitri zae,
LEV 13:36 te imame tare hirbar deḳba. Tain zudi deḳoin, i daud-ḳauzli sitri gese, te sul ba rum oldia oise ki na ita ar forikka ḳorar zorur nae, he to emne-u nafak.
LEV 13:37 Oile imame zudi mono ḳoroin, ita zela asil ola-u roise, ar i zagat ḳala ruma uṭer, te buzba, ita bala oigese. He to pak-pakiza ase. Imame tare fak-saf ḳoia elan ḳorba.
LEV 13:38 “Kunu beṭa ba beṭir samṛar maze zudi dola soḳsoḳa dag deḳa zae,
LEV 13:39 te imame tare forikka ḳori deḳba. Tain zudi deḳoin, tar dag dola fainsha oigese, te iṭa to ḳali dol-fisti oise. Itae kunu ḳeti oito nae, he to fak-saf ase.
LEV 13:40 “Ar kunu manshor zudi matar sul foṛia ṭaḳ oizae, te he nafak oito nae.
LEV 13:41 Tar matar samnor galar sul foṛia zudi kofalor bae ṭaḳ foṛi zae, te he-o nafak oito nae.
LEV 13:42 Oile i ṭaḳ foṛa mata ba ḳofalor maze zudi lalṭi dag deḳa dey, te buzbae, tar mata ba ḳofalo fosa-kusṭo bemar bar oise.
LEV 13:43 Ar imam sabe tare forikka ḳoria zudi deḳoin, tar ḳofalo ba matat nafak fosa-kusṭo bemarir laḳan hou dag to fuli gese,
LEV 13:44 te buza zaibo, tar nafak fosa-kusṭo bemar oise, he to nafak. Tar matar ou bemaror lagi imame tare nafak koia elan ḳorba.
LEV 13:45 “Ar ou laḳan fosa-kusṭo bemar ze manshor oibo, he fara-sira ḳafoṛ findite oibo. Tar matar sul aula-zaula roibo. Tar mukre hijabor laḳan ḳafoṛdi guria sillai sillai koibo, nafak, nafak.
LEV 13:46 I bemar tar gotro zotodin roibo, otodin he nafak halote roibo. He Boni Israilor kempor bare eḳla eḳla roibo.
LEV 13:47 “Kunu ḳafoṛor maze zudi saba saba dag lage, ulor ḳafoṛ ba suti kafoṛor maze zudi feukni foṛar alamot mile,
LEV 13:48 ita ulor ḳafoṛ ba suti kafoṛ bananir ṭana ba tator maze ouk, ba samṛa ar samṛadi banail zekunu zinishor maze zudi feuknir dag mile,
LEV 13:49 ar finnor ḳafoṛor ṭana ba tator maze, samṛar kunu zinisho zudi lalṭi ba ḳosua kunuzat dag mile, te ita oilo feuknir alamot. Ila oile imam sabor gese deḳani lagbo.
LEV 13:50 Imam sabe ita balamonte forikka ḳori dekia, ou zinishre shat din hoḳolta taki horaia raḳba.
LEV 13:51 Bade shat dinor din imame hirbar deḳba. Tain zudi deḳoin, ou ḳafoṛor ṭanat ba tato, ba samṛar zinisho lalṭi ba ḳosua dag baṛise, te hou feukni bemar boṛo marattoḳ, ou zinish to nafak.
LEV 13:52 Erlagi i kafoṛ, ba samṛar ou zinish, gamsa ba uṛna zetar maze ila feuknir dag milbo, ita hasribo ḳori hoḳolta zalailite oibo.
LEV 13:53 “Oile imame zudi deḳoin, i kafoṛ ba samṛar zinishor dag na sitria eḳoi zagat roise,
LEV 13:54 te tain itare fanidi doia dibar hukum diba. Doia hari ou zinishre shat din dusra hoḳolta taki horai raḳba.
LEV 13:55 Bade imame hirbar deḳba. Tain zudi deḳoin, i feuknir dag kunubae na sitrile-o agor laḳan rong roise, te ita nafak. Igur ulṭa-baṭiol zekunu galabae i dag rouk, igure aguindi zalailite oibo.
LEV 13:56 Oile ita doia deoar bade zudi imame deḳoin, i zagar rong fainsha oigese, te ou zaga siṛia falai dibae.
LEV 13:57 Ar doar bade-o zudi ou zinisho hirbar feuknir dag deḳa zae, te buzbae, ita sitri zaoa bemar, erlagi i zinishre aguindi zalailibae.
LEV 13:58 Ar ou zinish doar bade zudi deḳoin, ou dag milaigese, te ita hirbar doia harle fak-saf buzbae.
LEV 13:59 “Ou niom-ḳanun mania ulor ḳafoṛ, suti kafoṛ ba samṛar kunu zinisho feuknir dag lagle, pak ba nafak koia elan ḳorbae.”
LEV 14:1 Bade Mabude Musare ḳoila,
LEV 14:2 “Fosa-kusṭo bemarire fak-saf ḳorar din ou niom manio. Imam sabe tare deḳar lagi,
LEV 14:3 kempor bare gia forikka ḳoria deḳba. Tain zudi deḳoin he hasau bala oigese,
LEV 14:4 te imame hukum diba, fak-saf oa zonor niote zita duiṭa halal faki, debdaru gasor kisu laḳṛi, esub gasor ḍeṭa ar lal suta loia aita.
LEV 14:5 Bade imame hukum diba, futor fani taki fani ania maṭir gamlat toa fanir ufre, hou duio fakir mazor eḳṭare zobo ḳorar lagi.
LEV 14:6 Zobor bade imame baki hou zita fakire, debdaru gasor laḳṛire, lal sutare ar esub gasor ḍeṭare, futor fanir gamlar ufre zobo ḳora hou fakir lour maze subaiba.
LEV 14:7 Ar ou ze bemarire fak-saf ḳora oito, imame tar ufre hou lou shatbar siṭaia hari, tare fak-saf ḳoia elan ḳorba. Bade imame hou zita fakire kula zagat saṛi diba.
LEV 14:8 Ar fak-saf bonra ou bemarie tar ḳafoṛ-sufoṛ doibo, tar gotror ar matar hoḳol sul-rum ḳamaia hari fani dia naite oibo, teu he fak-saf bonbo. Erbade he aia Boni Israilor kempor bitre hamaito farbo, oile tar nizor tambur bare shat din roite oibo.
LEV 14:9 Bade shat dinor din hirbar tar shorilor hoḳol sul, mani matar sul, daṛi-mus, sokur buri ar gotror hoḳol ruma ḳamaite oibo. Bade tar ḳafoṛ-sufoṛ doia naia harle he furafur fak-saf oibo.
LEV 14:10 “Bador din he furafur nikut duiṭa meṛa-baichcha ar eḳ bosoror egu meṛi loia aibo. Ar er logor dan-gomor sodgar niote he soy sher tel maḳail moyda ar eḳ faoa tel anbo.
LEV 14:11 Ania harle tar fak-safor lagi ze imam sabe ḳam ḳorra, ein ou zonre ar kurbanir mal-samanare Milon-tambur duaror gese Mabudor samne azir ḳorba.
LEV 14:12 “Imam sabe hou duio meṛa-baichcha taki egu meṛa ar hou tel nia dush-ḳosurir koforar kurbani adae ḳorba, ḳoria dulona kurbani hishabe Mabudor samne ita dulaiba.
LEV 14:13 Bade fobitro Kaba goror shimanar ze zagat gunar koforar kurbani ar zalail kurbanir foshu zobo ḳora oy, hou zagat ou foshure-o zobo ḳorba. Gunar koforar kurbanir laḳan dush-ḳosurir koforar kurbanir gust-o imam sabe faiba, ita to ḳas fobitro gust.
LEV 14:14 Ze zonre fak-saf ḳora oibo, imam sabe dush-ḳosurir koforar kurbanir kisu lou nia tar ḍain ḳanor lotit, ḍain ator ar ḍain faor buṛi angulit lagaiba.
LEV 14:15 Bade imame hou tel taki kisu tel tan bau ator talur maze ḍaliba.
LEV 14:16 Ar ḍain ator anguil dia, bau at taki tel tulia Mabudor name shatbar siṭaiba.
LEV 14:17 Bade ator talur bad-baki tel taki kisu tel nia imame hou zonor ḍain ḳanor lotit, ḍain ator ar ḍain faor buṛi angulit dush-ḳosurir koforar kurbanir lour ufre lagaiba.
LEV 14:18 Ar ator talur baki tel tain hou fak-saf oa zonor matat lagaiba. “Ar ou nomunae tar kofora adae ḳorba,
LEV 14:19 ze zonre fak-saf ḳora oibo, tar ana gunar koforar kurbanir foshure imam sabe zobo ḳorba. Bade zalail kurbanir foshu-o zobo ḳoria,
LEV 14:20 dan-gomor sodgar zinishor loge milaia, imam sabe kurbani kanar ufre ita diba. Ou nomunae tar kofora adae ḳoria tar nafaki horaiba.
LEV 14:21 “Oile ou zon zudi gorib oy, ita hoḳolta anar tofik tar na taḳe, te dush-ḳosurir koforar kurbanir lagi kali egu meṛa-baichcha ante oibo, anle imame tar kofora adae ḳorar lagi oḳṭare kurbani dia dulaiba. Ar er logor dan-gomor sodga hishabe tar ana tel maḳail dui sher moyda, eḳ faoa tel
LEV 14:22 ar tar duiṭa ḍufi faki ba faro ante oibo, zela tar takkote kulae. Duio fakir mazor eḳṭa gunar koforar kurbanir lagi, ar eḳṭa zalail kurbanir lagi.
LEV 14:23 Bade aṭ dinor din fak-saf oar niote he ita hoḳolta ania Milon-tambur duaror daro Mabudor samne imamor gese shomzaite oibo.
LEV 14:24 Imame dush-ḳosurir koforar kurbanir meṛa ar ou tel nia Mabudor samne dulona kurbani hishabe dulaiba.
LEV 14:25 Bade imame meṛare zobo ḳoria ogur kisu lou nia hou zonor ḍain ḳanor lotit, ḍain ator ar ḍain faor buṛi angulit lagaiba.
LEV 14:26 Bade hou tel taki kisu tel tan bau ator talur maze ḍaliba.
LEV 14:27 Ar ḍain ator anguil dia imame bau ator kisu tel tulia Mabudor samne shatbar siṭaiba.
LEV 14:28 Erloge tar ḍain ḳanor lotit, ḍain ator ar ḍain faor buṛi angulir ze zagat dush-ḳosurir koforar kurbanir lou lagail oise, hou zagar ufre ou tel-o lagaiba.
LEV 14:29 Mabudor samne hou fak-saf oa zonor koforar niote imamor ator baki tel tar matat ḍali diba.
LEV 14:30 Bade hou zonor takkot mafik ana ḍufi ba faro zuṛa nia,
LEV 14:31 imame egure gunar koforar kurbani hishabe, ar dusraṭare zalail kurbani hishabe kurbani diba. Loge dan-gomor sodgare-o diba. Imame ou nomunae Mabudor samne tar kofora adae ḳorba.
LEV 14:32 Fosa-kusṭo bemari fak-saf oar lagi zelaḳan kurbani adae ḳorar ḳota, ita adae ḳorar takkot zerar nai, tarar lagi ou niom deoa oise.”
LEV 14:33 Bade Mabude Musa ar Harunre ḳoila,
LEV 14:34 “Ami ze deshḳanre tumrar malikanae dimu, ou Kenan desho hamanir bade, ami zudi honor kunu goror maze nafak-feukni bemar faṭai,
LEV 14:35 te goror malike gia imam sabre ḳoiba, amar goro nafak-feuknir laḳan kita zanu dekiar.
LEV 14:36 Teu imame i feukni forikka ḳoria deḳat aia, goror hoḳol mal-samanare zate nafak koia elan ḳora na lage, ou niote tain malikre hukum diba, ami goro hamanir age tumar goror hoḳol mal-samana bare bar ḳorilao. Hoḳolta bar ḳoria harle tain goro hamaia forikka ḳorba.
LEV 14:37 Tain zudi deḳoin, goror oalor kunu feuknir dag gia bitredi hamaise, ar ou dagor rong kosua ba lalṭi,
LEV 14:38 te tain i gor taki baroi aia, goror duar shat din bond ḳori toiba.
LEV 14:39 Ou shat din bade hirbar forikka ḳori deḳba, zudi deḳa zae, i dag oalor maze aro sitrise,
LEV 14:40 te tain hukum diba, ou oalor dag ala fattor ba iṭ kulia hari, gau ba ṭaunor bare nia nafak kunu zagat falai dita.
LEV 14:41 Bade asta goror bitoror hoḳol oal sasia astor tulia hari, ota nia ṭaunor bare nafak kunu zagat falaita.
LEV 14:42 Ar oalor ze zaga taki fattor ba iṭ kula oise, hono noya fattor lagaiba, lagaia asta gor hirbar noya astor ḳorta.
LEV 14:43 “Oalor fattor kulia falaia sasia astor tular bade, noya astor lagaia harle-o zudi oalo hirbar ola dag deḳa zae,
LEV 14:44 te imame hirbar gia ita forikka ḳori deḳba. Tain zudi deḳoin, oalor mazor dag sitria aro baṛse, te buzba, ou goro nafak-feukni bemar ase, erlagi i gor ḳan nafak.
LEV 14:45 Nafak ou goror hoḳol fattor ba iṭ, hoḳol astor, goror laḳṛi, hokkolta bangia ṭaunor bare kunu nafak zagat nia falaite oibo.
LEV 14:46 “Ar hou shat din bond raḳar ḳalo zudi kunu manush gia i goro hamae, te he ou din hainja forzonto nafak halote roibo.
LEV 14:47 Ar ḳeu zudi ou goro ḳana-fina ḳae ba gumae, te tar finnor ḳafoṛ-sufoṛ doia dite oibo.
LEV 14:48 “Oile i gor astor ḳorar bade imame forikka ḳoria zudi deḳoin, oalor dag ar deḳa zar na, te imame i gorre fak-saf ḳoia elan ḳorba. I goro to nafak-feukni bemaror kunu alamot oḳon nai.
LEV 14:49 Ar gorre fak-saf ḳorar lagi imam sabe duiṭa faki, debdaru gasor kisu laḳṛi, esub gasor ḍeṭa, ar lal rongor suta loia ono aiba.
LEV 14:50 Aia futor fani taki ana maṭir gamlat toa ou fanir ufre eḳṭa fakire zobo ḳorba.
LEV 14:51 Ar dusra zita fakire, debdaru gasor laḳṛire, lal suta ar esub gasor ḍeṭare, futor fanir gamlar ufre zobo ḳora hou fakir lour maze imam sabe subaiba, subaia hari ou goror maze shatbar siṭaiba.
LEV 14:52 Fakir lou, futor fani, zita faki, debdaru gasor laḳṛi, esub gasor ḍeṭa ar lal suta dia ou gorre fak-saf ḳora oibo.
LEV 14:53 Erbade ou zita fakire nia gau ba ṭaunor bare kula zagat saṛi diba. Ou nomunae hou goror nafaki horaia harle, ikan fak-saf oibo.”
LEV 14:54 Te hoḳol laḳan fosa-kusṭo bemar, daud-ḳauzli,
LEV 14:55 ḳafoṛ ba goror oalor feuknir dag,
LEV 14:56 gotror samṛat kulosh uṭa, boron ba kunu zator dagor befare ou laḳan hukum zanail oilo.
LEV 14:57 Ita bemare kun shomoy pak, ar kun shomoy nafak, oḳan zananir lagi ou niom-ḳanun deoa oilo.
LEV 15:1 Mabude Musa ar Harunre ḳoila,
LEV 15:2 “Tumra Boni Israilre zanao, kunu beṭa manshor feshabor rastae zudi hamesha datu bar oy, te tar shoril nafak.
LEV 15:3 Tar shoril taki datu baronit roile ba shorilo aṭki roile-o he nafak.
LEV 15:4 Ola nafak halote he ze bisnat hutibo, ba ze zagat boibo, hou bisna ar hou zaga-o nafak oizibo.
LEV 15:5 Ou datu zaora nafak beṭar bisna ze zone soibo, he nizor ḳafoṛ-sufoṛ doia dia fanidi naibo, ta-o hainja forzonto he nafak halote roibo.
LEV 15:6 Olaḳan hou beṭar boar zagat ze zon boibo, he-o tar ḳafoṛ-sufoṛ doia dia fanidi naibo, ta-o hainja forzonto he nafak halote roibo.
LEV 15:7 Ar i datu zaora beṭare ze zone soibo he-o tar ḳafoṛ-sufoṛ doia dia fanidi naibo, ta-o hainja forzonto he nafak halote roibo.
LEV 15:8 Hou datu zaora beṭae zudi kunu fak-saf manshor gotro sef falae, te ou zone-o tar ḳafoṛ-sufoṛ doia dia fanidi naibo, ta-o hainja forzonto he nafak halote roibo.
LEV 15:9 Ou datu zaora beṭae kunu zagat zaibar ḳalo gaṛi-guṛa kunutar siṭo boia gele, i siṭ nafak oizibo.
LEV 15:10 Ou siṭ kunu manshe soile he hainja forzonto nafak halote roibo. Ou siṭ ze zone tulbo, he tar ḳafoṛ-sufoṛ doia dia fanidi naibo, ta-o hainja forzonto he nafak halote roibo.
LEV 15:11 Ou datu zaora beṭae fanidi at na doia zudi kunu manshore soilae, te zare soibo, he tar ḳafoṛ-sufoṛ doia dia fanidi naibo, ta-o hainja forzonto he nafak halote roibo.
LEV 15:12 Ar datu zaora beṭae zudi kunu maṭir bashon soilae, te ita bangilite oibo, ar laḳṛidi banail kunu zinish soile, ita fanidi doite oibo.
LEV 15:13 “Hou datu zaora bemari beṭar bemar zedin ḳomizibo, ou din taki gonia shat dinor din he tar ḳafoṛ-sufoṛ doia dia futor fanit naia hari fak-saf oibo.
LEV 15:14 Bade aṭ dinor din he duiṭa ḍufi faki ba dugu faro loia Mabudor samne Milon-tambur duaror gese azir oia, imam sabor ato dite oibo.
LEV 15:15 Imame hou duiṭar egure dia gunar koforar kurbani, ar dusraṭa dia zalail kurbani adae ḳorba. Datu zaora beṭar nafaki horanir niote, imam sabe Mabudor samne ou nomunae tar kofora adae ḳorba.
LEV 15:16 “Kunu beṭa manshor zoubonor fani bar oigele he tar asta shorilre fanidi doite oibo, ar hainja forzonto he nafak halote roibo.
LEV 15:17 Ou zoubonor fani kunu ḳafoṛ ba samṛar zinisho lagigele, ita fanidi doite oibo, ar hainja forzonto ita nafak halote roibo.
LEV 15:18 Kunu beṭae tar bour loge mila-mishar ḳalo zoubonor fani bar oile, tara duiozone fanidi naite oibo, duiozon hainja forzonto nafak halote roibo.
LEV 15:19 “Kunu beṭir mashik bemaror lou zaoar shomoy tai shat din nafak halote roibo. Ou shomoy i beṭire ze zone soibo, he hainja forzonto nafak halote roibo.
LEV 15:20 Ou beṭiara bemaror shomoy tai zetar ufre boibo ba hutibo, ita hoḳolta nafak oizibo.
LEV 15:21 Tair bisna ze zone soibo, he-o tar ḳafoṛ-sufoṛ doia dia fanidi naibo, ta-o hainja forzonto he nafak halote roibo.
LEV 15:22 Ou bemari beṭi zetar ufre boise, ita zudi keu soilae, te he-o tar ḳafoṛ-sufoṛ doia dia fanidi naibo, ta-o hainja forzonto he nafak halote roibo.
LEV 15:23 Tair bisna ba searo ḳeu soile, ba itar ufre toa kunta soile-o, he hainja forzonto nafak halote roibo.
LEV 15:24 Beṭiara bemari beṭir loge kunu beṭa manush zudi hute, ar tair mashikor lou tar shorilo lage, te ou beṭa-o shat din nafak halote roibo. Ou shat dinor maze he ze bisnat hutibo, ita-o nafak oizibo.
LEV 15:25 “Kunu beṭi manshor zudi bout din dori lou zaoat roy, mashik bemaror shat din faronir bade-o zudi lou zaoat roy, te zotodin forzonto ila lou zaibo, otodin tai nafak roibo.
LEV 15:26 Beṭiara mashik bemaror laḳan ou lou zaibar shomoy tai zetat hutibo ba boibo, ita nafak oizibo.
LEV 15:27 I bisna ba sear ze zone soibo, he-o nafak oizibo. He tar ḳafoṛ-sufoṛ doia dia fanidi naibo, ta-o hainja forzonto he nafak halote roibo.
LEV 15:28 Ou beṭir lou zaoa bond oar bade-o, tai gonia aro shat din bar saite oibo, erbade tai fak-saf oibo.
LEV 15:29 Ar aṭ dinor din tai duiṭa ḍufi faki ba faro loia Milon-tambur duaror gese imam sabor daro zaibo.
LEV 15:30 Imame hou duio fakir mazor egudi gunar koforar kurbani, ar dusraṭa dia zalail kurbani adae ḳorba. Ou nomunae imame tair lou zaibar nafaki horanir kofora Mabudor samne adae ḳorba.
LEV 15:31 “O Musa ar Harun, ou nomunae tumra Boni Israil shomazre hoḳol nomunar nafaki taki basaio, arnae tarar maze roa amar fobitro boshot ḳanare zudi tara nafak banain, te ou nafakir dae to tarar moron oibo.”
LEV 15:32 Te beṭaintor datu zaoa bemar, zoubonor fani baroni, beṭintor mashik bemar, beṭa ba beṭintor zekunu laḳan datu zaoa, nafak bour loge mila-misha ḳora, ita zekunu zonor lagi ou niom zari oilo.
LEV 16:1 Imam Harunor boṛo dui fuae naformani koria Mabudor samne foṛia mara gelo ḳori, Mabude Musa nobir loge batchit ḳorla.
LEV 16:2 Mabude ḳoila, “Tumar bai Harunre ḳo, he zanu zebla mone sae ebla shahadot shondukor ḍaḳnar gese zaoar lagi Herem Shorifor fordar bitre na hamae, arnae he morbo-u. Zano to, ou ḍaḳnar ufror dumar andairor maze ami nize azir oi.
LEV 16:3 “Ino hamanir age he zanu gunar koforar kurbanir lagi egu bisal ar zalail kurbanir lagi egu meṛar faṭa loia ino aia hamae.
LEV 16:4 Shada suti kafoṛdi banail fobitro alḳella ar haf-penṭor laḳan zangia findia bitre hamaibo. Tar ḳomro bandar suti kafoṛor bondoni bandibo ar matat suti kafoṛor faugṛi lagaibo. Ita to fak-fobitro lebas, ita lebas findibar age fanidi naite oibo.
LEV 16:5 Gunar koforar kurbanir lagi he Boni Israilor ges taki duiṭa faṭa sagol ar zalail kurbanir lagi egu meṛar faṭa nibo.
LEV 16:6 Imam Harune tar nizor ar tar aolad oḳlor gunar mafir lagi, gunar koforar bisalre kurbani dibo.
LEV 16:7 Bade hou sagol duioṭa Milon-tambur duaror gese Mabudor samne anbo.
LEV 16:8 Ania he loṭari maria deḳbo, kun sagol Mabudor lagi ar kunṭa Azazilor lagi.
LEV 16:9 Loṭarit Mabudor name ze sagol uṭbo, Harune ogudi gunar koforar kurbani adae ḳorbo.
LEV 16:10 Ar Azazilor name ze sagol uṭbo, ogure zita halote Mabudor samne toibo, zate bade ogure morubumit nia Azazilor name auri saṛi deoa oy. Ou nomunae gunar kofora adae ḳorio.
LEV 16:11 “Imam Harune tar nizor ar tar aolad oḳlor gunar koforar lagi, tar nizor ana hou bisalre zobo ḳorbo.
LEV 16:12 Mabudor samne agor-kushboy zalanir ze ṭebul ase ou ṭebul taki kisu zalail angra loia he agor danir maze borbo, ar dui muiṭ agor-kushboyor guṛa-o loibo, bade fordar bitre Herem Shorifo hamaibo.
LEV 16:13 Hamaia ou angrar ufre agor-kushboy dia Mabudor samne zalaibo, teu otar dumae shahadot shondukor ḍaḳnar ufror gala andaire gurizibo, zate he Mabudor samne na moroin.
LEV 16:14 Bade he kurbanir hou bisalor tuṛa lou nia ator anguil dia ou ḍaḳnar samnor galabae siṭai dibo. Erbade angulir maze aro tuṛa lou lagaia ḍaḳnar samnor bae shatbar siṭaia dibo.
LEV 16:15 “Ar he manshor gunar koforar niote ana sagolṭare zobo ḳorbo, ḳoria ogur lou nia fordar bitre Herem Shorifo gia, bisalor loudi zela ḳora oisil, ogur loudi-o ola ḳorte oibo. Shondukor ḍaḳnar ufre ar samne ou lou siṭaite oibo.
LEV 16:16 Boni Israilor guna, nafaki, ar naformanie Herem Shorifre-o nafak korilae, erlagi tarar maze ze Milon-tambu ase, oḳanor nafaki horanir niote imam Harune ou nomunae gunar kofora adae ḳorba.
LEV 16:17 Herem Shorifor bitre hamaia hari Harune tan nizor, tan aolad oḳlor ar asta shomazor gunar koforar hoḳol ḳam shesh ḳoria zotobil na bar oia ain, otobil dusra kunu manush Milon-tambur bitre hamani nished.
LEV 16:18 Herem Shorif taki bar oia Harune Mabudor samne ze agor-kushboy zalanir ṭebul ase ou ṭebulor ḳandat zaiba, zaia ṭebulor lagi-o kofora adae ḳorba. Hou bisal ar sagolor tuṛa lou nia tain ou ṭebulor hingor maze lagaiba.
LEV 16:19 Boni Israilor gunar ḳarone ṭebulor maze ze nafaki lagail oise, hou nafaki horaia ou ṭebulre fobitro ḳorar lagi Harune tar ator anguil dia ou ṭebulor ufre shatbar lou siṭaibo.
LEV 16:20 “Herem Shorif, Milon-tambu, ar kurbani kanar nafaki horanir koforar ḳam shesh ḳoria harle Harune Azazilor name deoar lagi hou zita sagolre loia aiba.
LEV 16:21 Aia ou sagolor ḳollar ufre tar duio at toia, Boni Israilor hoḳol guna-naformani ar bod ḳamor ḳota shikar ḳoria sagolor ḳollar ufre ota bortai dibo. Bade ag taki zuit oa eḳ beṭare dia ou sagolre he morubumit faṭai dibo.
LEV 16:22 Hou beṭae nia ogure morubumit saṛia aibo. Tarar hoḳol naformanire ou sagole loia nirai nirjon morubumit azibon guribo.
LEV 16:23 “Ar Herem Shorifo hamaibar ḳalo Harune shada suti kafoṛor zoto lebas findisla, tain Milon-tambut firia aia ita kulia toi diba.
LEV 16:24 Kulia tain Kaba goror shimanar bitre fanidi naia tan nizor lebas findiba. Bade tain bare aia tan nizor ar manshor lagi egu ḳori zalail kurbani adae ḳoria, tan nizor ar manshor gunar kofora-o adae ḳorba.
LEV 16:25 Gunar koforar kurbanir sorbire tain kurbani kanar ufre zalailiba.
LEV 16:26 Ze beṭae Azazilor namor sagolre morubumit saṛia aibo, he-o tar ḳafoṛ-sufoṛ doia hari fani dia naia bade kempor bitre hamaito farbo.
LEV 16:27 Guna mafir lagi kurbanir ze bisal ar gunar koforar kurbanir ze sagolor loure Herem Shorifo nibar hukum deoa oise, otar hoḳol gust, ḳal, gufor ar hoḳoltare kempor bare nia eḳzone zalailio.
LEV 16:28 Ze zone ita hoḳolta bare nia zalaibo, he-o tar ḳafoṛ-sufoṛ doia, fanidi naia hari bade aia kempor bitre hamaito farbo.
LEV 16:29 “Erbade ami zeta ḳoiram, ita oilo tumrar lagi hor-hameshakur niom. Forteḳ bosoror shat nombor sandor dosh nombor din, tumrar forteḳ zone hoḳol zator ḳam-ḳaz ar ruzi-ruzgar bad dia, noto oia dil shofia dibae. Boni Israil ba tumrar loge boshot ḳorra bin-deshi hoḳol zone ita mante oibo.
LEV 16:30 Ḳaron oudin tumrar guna mafir lagi gunar kofora adae ḳora oibo, teu tumra Mabudor samne hoḳol nomunar guna taki fak-saf oibae.
LEV 16:31 Oudin tumra hoḳol nomunar ḳam-ḳaz bad dia aram ḳorbae, forteḳe noto oia zarzir dil shofia dibae. Iṭa oilo tumrar lagi siroḳalin niom.
LEV 16:32 Zekunu imamre zebla fordan imam hishabe tar bafor zagat ḳelafoti shomzaia boail ḳora oibo, he-o ola shada suti kafoṛor fobitro lebas findia ou nomunae gunar kofora adae ḳorbo.
LEV 16:33 Herem Shorif, fobitro Kaba gor, kurbani kana, baki imam oḳol, ar asta Boni Israil shomazre fak-saf ḳorar lagi kofora adae ḳorbo.
LEV 16:34 Iṭa oilo tumrar lagi hor-hameshakur niom. Forteḳ bosor eḳbar hoḳol Boni Israilor gunar kofora ola adae ḳorte oibo.” Teu Mabude Musare zela hukum disla, ṭik ou laḳan hoḳolta ḳora oilo.
LEV 17:1 Bade Mabude Musare ḳoila,
LEV 17:2 “Amar ou hukum ḳan tumi imam Harunre, tar fuaintore ar tamam Boni Israilre zanai deo. Tarare ḳo,
LEV 17:3 Boni Israilor ḳeu zudi kunu goru, sagol ba meṛare tarar boshot tambu elaḳat ba kempor bare ze kunu zagat kurbani niote zobo ḳorilae,
LEV 17:4 ou foshure he Mabudor Kaba goror samne, mani Milon-tambur duaror gese Mabudor name kurbanir niote zobo na ḳore, te he ou foshur kunor dayi oibo, erlagi shomaz taki tar nam miṭailibae.
LEV 17:5 Boni Israile oḳon gau-geramor kula zagat zeta foshu kurbani dein, ou foshu zanu tara Mabudor samne Milon-tambur duaror gese ane. Ania imam sabor ato shomzaia salamoti kurbani hishabe ita Mabudor name dilae.
LEV 17:6 Imam sabe foshu zobo ḳoria, Milon-tambur duaror gese Mabudor ze kurbani kana ase, hono ogur lou siṭai diba, ar foshur sorbire tain geran ala kurbani hishabe zalailiba, ou dumar gerane Mabud kushi oin.
LEV 17:7 Ḳobordar! Tara zanu Mabudor loge beimani koria sagolrupi deo-butor name aiz taki ar kunu foshu boli na dey. Ou hukum ami tarar oarishor for oarish dori siroḳalor lagi zari korlam.
LEV 17:8 “Ar tumi tarare zanai deo, Boni Israilor kunu zon ba tarar maze boshot ḳorra kunu bin-deshie zudi zalail kurbani ba zekunu kurbani adae ḳore,
LEV 17:9 ar kurbanir ou foshure Mabudor name shofibar lagi amar Milon-tambur duaror gese na ane, te i zatir maz taki tar nam miṭailito.
LEV 17:10 “Tumi aro zanai deo, kunu Boni Israil ba tarar maze boshot ḳorra kunu bin-deshie zudi kunuzat lou ḳae, te ami Mabude tar ḳeti korat lagizimu, shomaz taki tar nam miṭailimu.
LEV 17:11 Lour maze-u to hoḳol zandaror zan taḳe. Erlagi tumrar zanor bodla kurbanir loure kurbani kanat siṭaia ami tumrar gunar koforar shuzug disi. Lour maze zan ase ḳori-u lour bodla gunar kofora adae oy.
LEV 17:12 Erlagi ami Boni Israilre ḳoiar, tumra ar tumrar loge boshot ḳorra kunu bin-deshie-o zanu lou na ḳae.
LEV 17:13 Boni Israilor zekunu zone ba tumrar loge boshot ḳorra kunu bin-deshi manshe zudi, shikaro gia halal kunu foshu ba faki shikar ḳoria ane, te ogur lou bar ḳoria maṭit gaṛilibae.
LEV 17:14 Zano to, zinda hoḳol zandaror lour maze-u tar zan taḳe. Erlagi ami Boni Israilre ḳoiar, tara zanu kunu zandaror lou na ḳae, lou oilo hoḳol zandaror zan. Ze zone ou lou ḳaibo, tar nam miṭailibae.
LEV 17:15 “Ar kunu manshe zudi mora foshur ba zongli zanuare mara kunu foshur gust ḳailae, te he Boni Israil ouk, ba tarar loge boshot ḳorra bin-deshi ouk, he tar ḳafoṛ-sufoṛ doia dia fanidi naite oibo. Ta-o hainja forzonto he nafak halote roibo, erbade he fak-saf bonbo.
LEV 17:16 Oile he zudi kafoṛ-sufoṛ doia na dey ar fanidi na nae, te i kosurir lagi he dayi roibo.”
LEV 18:1 Ar Mabude Musare ḳoila,
LEV 18:2 “Tumi Boni Israilre ḳo, ami Alla-u tumrar Mabud.
LEV 18:3 Erlagi tumra age ze Mishor desho boshot ḳortae, hinor manshe zeta ḳore tumra ita ḳorio na. Ar ami tumrare ze Kenan desho niram, hou desho gia harle, honor manshe zeta ḳore ita-o tumra ḳorio na. Tara zela sole, tumra ila solio na.
LEV 18:4 Borong amar deoa shoriot mafik tumrar zindegi kaṭaibae. Kub kial ḳoria amar deoa hukum-ahkam amol ḳorbae. Mono rakio, ami Alla-u tumrar Mabud.
LEV 18:5 Amar batail niom-ḳanun ar shoriotor hukum-ahkam tumra amol ḳorbae, ze zone ita amol ḳore he er usillae tar zan basaibo. Ami-u to Mabud.
LEV 18:6 “Afon lour ḳesh-kuṭumor loge shorili mila-misha ba beijjoti kam ḳorio na. Ami-u to Mabud.
LEV 18:7 Tumrar mazor ḳeu zanu nizor maʼr loge shorili mila-misha ḳoria tar bafor man-ijjot na luṭe. Ein to tar ma, en loge mila-misha ḳora haram.
LEV 18:8 Haton maʼr loge-o mila-misha ḳora haram, arnae bafor beijjoti oibo.
LEV 18:9 Nizor boin ba haton boinor loge mila-misha ḳora-o haram, afon bafor torofa boin ba maʼr torofa boin oile-o haram. Tara eḳ baṛit zonom ouk ba alada baṛit zonom oile-o haram.
LEV 18:10 Fua ba fuṛir goror natinor loge shorili mila-misha ḳora haram, itae to nizor beijjoti oy.
LEV 18:11 Haton maʼr goror boinor loge shorili mila-misha ḳora haram, tai to boin.
LEV 18:12 Afon fufur loge shorili mila-misha ḳora haram, ein to bafor lour kuṭum.
LEV 18:13 Afon moir loge shorili mila-misha ḳora haram, ein to maʼr lour kuṭum.
LEV 18:14 Afon sasar man-ijjot luṭia tan bour loge shorili mila-misha ḳora haram, ein to sasi.
LEV 18:15 Afon fuar bour loge shorili mila-misha ḳora haram, tai to nizor bouma.
LEV 18:16 Bair bour loge shorili mila-misha ḳora haram, arnae bair beijjoti oibo.
LEV 18:17 Kunu beṭi manshor loge shorili mila-mishar bade tair fuṛir loge, tair fua ba fuṛir goror natinor loge shorili mila-misha ḳora haram, era to tair lour kuṭum, ita boṛo ḳobisi kam.
LEV 18:18 Ar bou zita taḳa halote hali ba zeṭalire bia ḳoria hotiala ḳora-o haram.
LEV 18:19 “Hayez ba beṭiara mashik bemar taḳa halote kunu beṭintor loge mila-misha ḳora haram.
LEV 18:20 Dusra kunu beṭar bour loge shorili mila-misha ḳoria, nizore nafak banaio na.
LEV 18:21 “Tumrar mazor ḳeu nizor fua ba fuṛire aguindi zalaia, Mulok devtar name boli dia, afon Allar fobitro namre oshomman ḳorio na. Ami-u to Mabud.
LEV 18:22 “Beṭintor loge zela shorili mila-misha ḳoroin, beṭainte-beṭainte ola ḳobisi fungami kora haram.
LEV 18:23 Kunu foshur loge ḳobisi mila-misha ḳoria, kunu beṭain nafak bonio na. Kunu foshur loge kunu beṭinte-o ḳobisi mila-misha ḳorio na. Ilaḳan ḳobisi mila-misha to zogotor niomor ulṭa.
LEV 18:24 “Ou laḳan kunu ḳobisi beijjoti kam ḳoria, tumrar mazor ḳeu zanu nizore nafak na banae. Mono rakio, tumrar samne taki zoto zati oḳolre ami kedai diram, tara to ota ḳobisi koria nizore nafak korsil.
LEV 18:25 Otar lagi tarar deshor maṭi nafak bonigese, tarar naformanir ḳarone ami ou deshre shaza diram, ou deshor maṭie tar proza oḳolre bomi kori falai der.
LEV 18:26 Oile tumra ḳali amar deoa shoriot ar hukum-ahkam mania solio. Tumrar nizor zatir ba tumrar maze boshot ḳorra bin-deshi keu zanu ola ḳobisi beijjotir kunuzat ḳam na ḳore.
LEV 18:27 Age taki zeta zati oḳol hou desho boshot ḳorer, tara ou nomunar ḳobisi beijjoti kam oḳol ḳorae honor maṭire nafak banailise.
LEV 18:28 Oḳon tumra-o hono gia zudi hotar laḳan nafaki kam ḳoro, te tarar laḳan tumrare-o hou deshor maṭie bomi kori falaibo.
LEV 18:29 “Ila ḳobisi kunu ḳam ḳeu ḳorle, tumrar shomaz taki tar nam miṭailibae.
LEV 18:30 Amar hukum-ahkam tumra manio, tumra hou desho gia hari honor furana bashinda oḳlor sal-cholone solio na. Tarar ḳobisi riti-reoaz mania tumra nafak oio na. Mono rakio, ami Alla-u tumrar Mabud.”
LEV 19:1 Mabude Musa nobire aro ḳoila,
LEV 19:2 “Tumi hoḳol Boni Israilre ḳo, ami tumrar Mabud Alla to fak-fobitro, erlagi tumra-o fak-fobitro o.
LEV 19:3 Tumra forteḳe zarzir ma-bafre tazim ḳorio, ar amar deoa hoḳol Zummabar manio. Ami Alla-u tumrar Mabud.
LEV 19:4 Tumra kunuzator deb-debir puja ḳorio na, puja ḳorar niote format ḍalia shuna-rufa, fitol-tamadi kunu deb-debir murti-o banaio na. Mono rakio, ami Alla-u tumrar Mabud.
LEV 19:5 “Tumra zebla nizor kushie Mabudor name kunu salamoti kurbani deo, ou shomoy ola bab loia dio, zate Mabudor dorbaro ita kobul oy.
LEV 19:6 Ar itar hoḳol gust kurbanir din ba bador din ḳailite oibo. Tin dinor din kunu gust baki roile, ita aguindi zalailio.
LEV 19:7 Tin dinor din to i gust nafak bonizae, ita ḳaile tumrar kurbani kobul oito nae.
LEV 19:8 I gust ḳeu ḳaile he naformanir daṛo foṛbo, he to Mabudor namor fak-fobitro zinishre nafak banaise. Te tumrar shomaz taki tar nam miṭailibae.
LEV 19:9 “Ḳetor foshol ḳaṭar shomoy tumra zominor ailor ḳandar foshol saf ḳoria ḳaṭio na, ar ḳaṭar bade zomino falail foshol luria nio na.
LEV 19:10 Angur ḳetor angur faṛibar ḳalo, tole falail angur tubaia tulio na, ar hoḳol angur saf ḳori faṛia nio na. Shomazor gorib-duki ar bideshi musafiror lagi ita kisu toia zaio. Ami Alla-u to tumrar Mabud.
LEV 19:11 “Suri korio na, misa matio na, ar eḳe-oinne ṭogaṭogi korio na.
LEV 19:12 Tumra amar nam loia misa ḳosom ḳaio na, ila ḳorle tumrar Allar namre ofobitro ḳora oy. Ami-u to Mabud.
LEV 19:13 “Kunu ari-forir ufre zur-zulum ḳorio na, tarar kunu zinish ḳaṛia nio na. Ruzi kamlar beton ou dinor maze-u adae ḳorio, bador din forzonto tar beton aṭḳai toio na.
LEV 19:14 Kunu ḳaluare boddua dio na, ḳana ba andae usṭa ḳaibar lagi tar fotor maze kunta toio na. Tumra nizor Mabud Allare ijjot-tazim ḳorio, ami-u to Mabud.
LEV 19:15 “Na-hok bisar ḳorio na, bisaror maze gorib-doni, ba huru-boṛor fokkofati oio na, hoḳlor lagi hok bisar ḳorio.
LEV 19:16 Manshor bodnam gaia gaia gurio na, kunu manshor zanor ḳeti oy, ila kunu ḳam ḳorio na. Ami-u to Mabud.
LEV 19:17 “Afon ari-forir bae ingsha-dushmonir bab monor maze gatia rakio na. Tar oforad tare buzai dio, teu tar gunar bar tumar ufre aito nae.
LEV 19:18 Nizor zatir manshor bodla loio na, tarar bae zid-ingshar bab monor maze gatia rakio na. Ari-forire tumar nizor laḳan maya ḳorio. Ami-u to Mabud.
LEV 19:19 “Tumra amar niom-ḳanun mania solio. Eḳ zator foshur loge aroḳ zator foshure fal ḳabaio na. Eḳ zomino dui zator bis ḳet ḳorio na, ar dui zator sutadi banail ḳafoṛ findio na.
LEV 19:20 “Kunu bandi beṭir bia ṭik kora oise, oile tair mohoranar ṭeḳa deoa oise na, ba malike zegure azad ḳoria disoin na, ila kunu bandir loge ḳeu shorili mila-misha ḳorle, te he ḳeti-furon dite oibo. I duio zonre zane mario na, ḳaron ou bandi fuṛi to azad oise na.
LEV 19:21 Oile ou beṭae tar dush-ḳosurir koforar kurbanir lagi, Mabudor name nikut egu meṛa loia Milon-tambur duaror samne azir oibo.
LEV 19:22 Dush-ḳosurir koforar kurbanir lagi ana hou foshure kurbani dia, imam sabe Mabudor samne tar gunar kofora adae ḳorar bade, he ou gunar mafi faibo.
LEV 19:23 “Tumra nizor desho gia hari kunu folor gas lagaile, tin bosor forzonto i gasor fol tumrar lagi haram. Ou tin bosoror maze i gasor fol ḳaoa nazaiz.
LEV 19:24 Sair nombor bosoro i gasor hoḳol fol Mabudor shukur-guzarir niote tan name dilaibae.
LEV 19:25 Fas nombor bosor taki ou gasor fol tumrar lagi halal. Ita manle tumrar gaso bout fol aibo. Mono rakio, ami Alla-u tumrar Mabud.
LEV 19:26 “Tumra lou shomet kunu gust ḳaio na. Kunu zator zadu-montro ba gona-basa hikio na, ar bebohar-o ḳorio na.
LEV 19:27 Matar duio galar sul saṭa, ba daṛir aga ḳaṭio na.
LEV 19:28 Murdar lagi ahazari korat gia nizor shorilo zoḳom ḳorio na. Gotror maze kunuzat saf-sobi akio na. Ami-u to Mabud.
LEV 19:29 “Ṭeḳa ruzir niote nizor fuṛire silani-bodmaishit lagaio na. Arnae asta desh zinae borizibo, fura desho ḳobisi baṛibo.
LEV 19:30 Amar deoa Zummabare ziraio, ar amar Kaba gorre ijjot ḳorio. Ami-u to Mabud.
LEV 19:31 “Zinnat ba ferot shadok, gonoḳ ba zadu-ṭuna ḳorrar gese zaio na, itar loge mishio na. Arnae itae tumrare nafak banailiba. Mono rakio, ami Alla-u tumrar Mabud.
LEV 19:32 “Murobbi manush daro aile tumra ubaia ijjot dio. Tumra nizor Allar ḍor-ḳofe roio. Ami-u to Mabud.
LEV 19:33 “Tumrar desho tumrar loge boshot ḳorra bin-deshi manshor ufre zulum ḳorio na.
LEV 19:34 Nizor zatir loge zela bebohar ḳoro, tarar loge-o ola bebohar ḳorio, tarare nizor laḳan maya ḳorio. Mono rakio, tumra-o Mishor desho bin-deshi halote aslae, ar ami Alla-u tumrar Mabud.
LEV 19:35 “Tumra kunuzat maf-zuko ar fallar uzono be-insafi korio na.
LEV 19:36 Tumrar falla-fattor, her-fura, nol-doṛi, mafor hoḳolta zanu ṭik-ṭak taḳe. Ami Alla-u tumrar Mabud, ar Mishor desh taki ami-u tumrare bar ḳori anchi.
LEV 19:37 Amar batail hoḳol niom-ḳanun ar furafur shoriot tumra mania solio. Ami-u to Mabud.”
LEV 20:1 Bade Mabude Musare ḳoila,
LEV 20:2 “Tumi Boni Israilre zanai deo, tumrar mazor kunu manshe ba tumrar loge boshot ḳorra bin-deshi kunu manshe zudi tar fua ba fuṛire Mulok devtar name boli dey, te ogure zane marilibae, deshor manshe milia fattordi iṭaia tare marbae.
LEV 20:3 He nizor fua ba fuṛire aguindi zalaia Mulok devtar name boli dia, amar Kaba gorre nafak banaise ar amar fak-fobitro namre oshomman ḳorse. Erlagi ami tar ḳeti korat lagmu, i zatir maz taki tar nam miṭailimu.
LEV 20:4 Ou devtar name tar fua ba fuṛire boli deoar shomoy, i deshor manshe zudi dekia-o na-deḳar ban ḳoroin, ar i boli deorare zane na maroin,
LEV 20:5 te ami nize ou naforman ar tar foribaror ḳeti korat lagizimu. Ami ogur nam ar ogur laḳan aro zeguinte ila naformani korbo, ota hokkolṭir nam Boni Israil shomaz taki miṭailimu. Era to amar loge beimani koria hou Mulok devtar ato nizore shofi dise.
LEV 20:6 “Kunu manshe zudi amar loge beimani koria, zin-but shadok ba gonoḳor loge mishia nizore shofi dilae, te tar-o ḳeti korat lagizimu ar i zatir maz taki tar nam miṭailimu.
LEV 20:7 “Tumra amar lagi nizore alada ḳoro ar fak-fobitro o. Mono rakio, ami Alla-u tumrar Mabud.
LEV 20:8 Amar niom-ḳanun furafur amol ḳorio. Ami-u to Mabud, ami-u tumrare fak-fobitro ḳori.
LEV 20:9 “Ze manshe afon ma-bafre gali-galaz ḳoria beijjot ḳore, tare-o zane marbae. Ou naformanir dae tar moutor lagi he nize-u dayi.
LEV 20:10 “Kunu manshe zudi ari-forir kunu zonor bour loge zina ḳore, te ou beṭa-beṭi duio zonre zane marilibae.
LEV 20:11 Ze manshe tar haton maʼr loge zina ḳore, he tar bafre beijjot ḳore. Erlagi tare ar haton maʼre zane marbae. Tarar moutor lagi to tara-u dayi.
LEV 20:12 “Kunu manshe zudi afon fuar bour loge zina ḳore, te tara duio zonre zane marbae. Tara manob shomazor ulṭa solae, tarar moutor lagi nize-u dayi.
LEV 20:13 Kunu beṭae zudi aroḳ beṭar loge zina-fungami kore, te tara duio zone-u boṛo ḳobisi korse, erlagi duio zonre zane marilibae, tarar moutor lagi tara-u dayi.
LEV 20:14 “Kunu beṭae zudi kunu fuṛire ar tair maʼre-o hanga ḳore, te ou beṭa ar ma-fuṛi tino zonre aguindi zalaia marilibae, zate ila naformani kam tumrar maze na goṭe.
LEV 20:15 Kunu foshur loge kunu manshe zina ḳorle, hou manush ar foshu duiogure zane marbae.
LEV 20:16 Kunu beṭie zudi kunu foshur loge zina ḳorat zae, te hou beṭi ar foshure-o zane marbae. Tarar moutor lagi tara-u dayi.
LEV 20:17 “Kunu beṭae zudi tar afon boin, haton ma ba haton bafor goror boinor loge shorili mila-misha ḳore, ita to shoromor ḳam. Tarare shomaz taki horailibae, ar he shaza faibo.
LEV 20:18 Kunu beṭi manshor mashik bemaror shomoy tair loge ze beṭae shorili mila-misha ḳore, i beṭie to tair mashik kalor ijjot dey na, ar i beṭae-o tair mashikre dam dey na. Erlagi Boni Israil shomaz taki i duiogur nam miṭailibae.
LEV 20:19 Kunu beṭae zanu tar ḳala ba fufur loge zina na ḳore, arnae afon lour kuṭumre beijjoti korae tara duio zone shaza faibo.
LEV 20:20 Ḳeu zudi tar sasi ba mamir loge zina ḳore, te tara duio zone shaza faibo, niaoladi halote tarar moron oibo, he to tar sasa ba mamare beijjot ḳorse.
LEV 20:21 Bai zinda taḳte zudi aroḳ baie tar babire hanga ḳore, te tar baire beijjot ḳorae, iṭa boṛo naformani. Tara kunu aolad faita nae.
LEV 20:22 “Tumra boshot ḳorar lagi ami tumrare ze desho niar, hou deshor maṭie zanu tumrare bomi koria na falae. Erlagi tumra amar batail hoḳol shoriot ar niom-ḳanun oḳol amol ḳorio.
LEV 20:23 Tumrar samne taki ami zeta zati oḳolre ḳedai diram, itar sal-cholone tumra solio na. Tarar hou sal-cholonor lagi-u ami tarare lannot disi,
LEV 20:24 erlagi-u ami tumrare oada dislam tarar deshre ami tumrar doḳole dimu, tarar hou dud ar mour banḍar-ala desh ami tumrare dan ḳormu. Ami Alla-u tumrar Mabud, zogotor hoḳol zati taki ami-u tumrare alada ḳorsi.
LEV 20:25 Erlagi tumra halal ar haram foshuintor maze tofat rakio, halal ar haram fakintor maze tofat rakio. Foshu-faki ar maṭir ufre solra huru huru zandaror maze zetare ami haram ḳoisi, ota dia tumra nizor shorilre nafak banaia lannoti bonio na.
LEV 20:26 Ami Mabud to fak-fobitro, erlagi tumra-o fobitro oite oibo. Amar afon proza oar lagi ami-u tumrare zogotor hoḳol zati taki basia alog korsi.
LEV 20:27 “Zeta beṭa ba beṭinte zin-but shadon, gonoḳ ba zadu-ṭunar ḳam ḳore, itare zane marilibae. Fattordi iṭaia zane marilibae, tarar moutor lagi tara-u dayi.”
LEV 21:1 Erbade Mabude Musare ḳoila, “Tumi Harunor bongshor imam oḳolre ḳoio, tarar kunu kuṭum-ḳeshor moutor ḳarone mattom ḳoria tara zanu nizore nafak na banae.
LEV 21:2 Ḳali tarar nizor ma-baf, fua-fuṛi ba afon bai mara gele tara nizore nafak banani zaiz ase.
LEV 21:3 Ar bair goro roura abiati kunu boin mara gele taire dafon-ḳafonor lagi tair bai nafak bona zaiz.
LEV 21:4 Oile hour baṛir kunu kuṭum-ḳeshor moutor dae kunu imam sabe nizor fobitro halot taki nafak bona zaiz nae.
LEV 21:5 “Imam sab oḳlor matar sul ḳamani, daṛir aga saṭa, ba nizor shorilo kunuzat ḳaṭa-sira ḳora zaiz nae.
LEV 21:6 Tara zanu afon Allar fobitro namre oshomman na ḳoroin, ar pak-pakiza roia zindegi kaṭain. Oḳan mono raḳoin zen, ou imam oḳole-u Mabudor name agunit deoa sodga ar kurbani oḳol adae ḳoroin, ar kurbanir mal to nizor Allar dorbaror rizek.
LEV 21:7 Imam oḳole kunu bodmaish, silan ba talaḳ faoa kunu beṭire bia ḳora zaiz nae. Ḳaron tarar afon Allar name tara fobitro.
LEV 21:8 O Boni Israil, tumra imam sab oḳolre hamesha fobitro hishabe manio, tara-u to tumrar Allar dorbaro kurbanir ḳani shofia dein. Erlagi-u tarare fobitro ḳoia manio, mono rakio, ami-u tumrare fobitro banaisi, ar ami nize to fak-fobitro.
LEV 21:9 Kunu imamor fuṛi zudi silani-bodmaishir fote gia nafak bonizae, te tair bafre-o tai beijjot ḳorilae. Erlagi taire aguindi zalaia marilibae.
LEV 21:10 “Ar imam foribaror baiaintor maze hoḳol boṛo zein, ein-u to fordan imam, en matat ḳelafoti shomzibar tel ḍala oise, ḳelafoti shomzia tain fordan imamor fobitro lebas findibar dayitto faisoin. Erlagi kunu murdar lagia ḳandon-ahazarir niote tan matar faugṛi kulia sul aula-zaula ḳora, ba tan finnor lebas siṛa-o zaiz nae.
LEV 21:11 Ein kunu mora lashor ḳandat zaoa zaiz nae. Nizor ma-baf mara gele-o ein nizore nafak banani zaiz nae.
LEV 21:12 Zekunu murdar lagi tain Allar fobitro Kaba gor saṛia kunuḳano gia Allar ou gorre nafak banani tan lagi haram. Mono rakio, tan afon Allar namor ḳelafoti shomzibar tel ḍalia tanre fobitro banail oise. Ami-u to Mabud.
LEV 21:13 “Kunu abiati shoti koinare shadi kora tan lagi zaiz ase.
LEV 21:14 Oile kunu ṛaṛi beṭi, bodmaish-silan beṭi ba talaḳ faoa kunu beṭire imam sabe shadi kora zaiz nae. Ḳali nizor gusṭir kunu abiati shoti koinare shadi kora tan lagi zaiz.
LEV 21:15 Arnae tan ḳarone tan nizor ḳandanor maze tan aolad oḳol fobitro halot taki nafak bonbo. Ami-u to Mabud, ami-u tanre fak-fobitro banaisi.”
LEV 21:16 Erbade Mabude Musare aro ḳoila,
LEV 21:17 “Tumi imam Harunre zanai deo, tan ḳandanor mazor shorilor kut ala kunu zone-u Allar name kurbani adae ḳorar niote, kurbani kanar ḳandat zaoa nished.
LEV 21:18 Ze zonor shorilo kut ase, mani anda, lengṛa, nak-kaṭa, at-fao niomor beshi lamba-baṭṭi ba anguil ḳom-beshi,
LEV 21:19 at ba fao banga,
LEV 21:20 fiṭ guza, baṭṭi bengai manush, souḳor bemari, daud-ḳauzli, fosa-ga bemari ba onḍokush nosṭo, ila kut ala kunu manush kurbani kanar ḳandat zaoa zaiz nae.
LEV 21:21 Imam Harunor bongshor shorilor kut ala kunu zone Mabudor name agunit deoa kurbani adae ḳora nished. Tar gotro kut taḳae he kurbani kanar ḳandat gia amar namor ḳanire kurbani deoa zaiz nae.
LEV 21:22 Oile ou kurbanir ḳani kaoa tar lagi zaiz, ita fobitro ba ḳas-fobitro oile-o zaiz ase.
LEV 21:23 Tar shorilo kut taḳae he Kaba goror Herem Shorifor fordar ḳandat ba kurbani kanar ḳandat zaoa nished, he zanu amar fak-fobitro zaga oḳolre nafak na banae. Mono rakio, ami-u Mabud, ar ami-u ou zagaintore fobitro ḳori.”
LEV 21:24 Bade Musae gia ita hoḳolta imam Harun, tan fuain ar hoḳol Boni Israilre zanaila.
LEV 22:1 Erbade Mabude Musare ḳoila,
LEV 22:2 “Tumi imam Harun ar tar fuaintore ḳo, Boni Israile amar name lilla ar kurbani dibar niote zotota anoin, ita to fobitro. Erlagi ota hokkoltare imam oḳole ijjot-tazim ḳora zorur. I befare tara zanu amar fak-fobitro namre oshomman na ḳore. Ami-u to Mabud.
LEV 22:3 “Tumi tarare zanai deo, tarar aolador mazor ḳeu zudi nafak halote Mabudor name deoa kurbanir kunu zinishor ḳandat zae, te tare amar samon taki horailibae. Ami-u to Mabud.
LEV 22:4 Harunor aolad oḳlor maze ḳeu zudi fosa-kusṭo bemari ba datu zaoa bemari oy, te fak-saf na oa forzonto he kurbanir kunuta ḳaoa nazaiz. Ar mora lashre ba ou lashor lagi zeta ḳamo lagail oise ita kunuta soia zudi keu nafak bone, ba ḳeuror zoubonor fani bar oy,
LEV 22:5 ar ze zon kunuzat maṭit solra huru-muru nafak zandar ba zekunu ḳarone nafak oa kunu manshore soia he nizore nafak banae,
LEV 22:6 te hainja forzonto he nafak halote-u roibo, ar fanidi naia hari fak-saf na oa forzonto kurbanir kunu fobitro zinish ḳaoa tar lagi haram.
LEV 22:7 Bade shuruz ḍubia harle he zebla fak-saf oibo, ou shomoy he ita ḳaito farbo. Ita to tar-u ḳani.
LEV 22:8 Imame kunu mora foshu ba zongli zanuaror tabae mara kunu foshur gust ḳaia nizore nafak banaio na. Ami-u to Mabud.
LEV 22:9 “Imam oḳlor befare ami zeta ain-ḳanun disi, ita tara mania solouk. Arnae dushi bonbae ar nafakir dorun tarar moron oibo. Mono rakio, ami Mabude-u tarare fobitro ḳori.
LEV 22:10 “Imam foribaror manush saṛa dusra kunu zone kurbanir fobitro zinish ḳaoa nished. Imamor kunu meman ba ḳamlae-o ita ḳaoa haram.
LEV 22:11 Oile imamor ḳorida gulame ba tan baṛit zonmise ilaḳan gulame ita ḳaoa zaiz.
LEV 22:12 Imamor fuṛi zudi aroḳ imam saṛa baira kunu damandor loge bia-shadi oy, te tai-o kurbanir ou fobitro zinish ḳaoa haram.
LEV 22:13 Oile imamor kunu ṛaṛi fuṛi ba talaḳ faoa niaoladi kunu fuṛi zudi bafor baṛit roibar lagi hirbar aioy, te tai to bafor ḳanir ongsho faibo. “Imam foribaror baira kunu zone kurbanir fobitro kunu ḳani kaoa zaiz nae.
LEV 22:14 Ḳeu zudi bul ḳoria ita ḳailae, te i zone imamor gese ḳeti-furon dite oibo. Ou ḳanir damor loge aro fas baṭor eḳ baṭ dam beshi dite oibo.
LEV 22:15 Boni Israile Mabudor name tarar ze zinish fobitro kurbani hishabe dan ḳoroin, imam oḳole zanu itare ofobitro na banain.
LEV 22:16 Tara baira manshore ita ḳaite dia manshore dushi banaia ḳeti-furonor daṛo zanu na falain. Mono rakio, ami Mabude-i tarare fobitro ḳori.”
LEV 22:17 Bade Mabude Musare ḳoila,
LEV 22:18 “Tumi gia imam Harun, tar fuain ar hoḳol Boni Israilre ḳo, tumrar kunu manshe ba tumrar loge boshot ḳorra bin-deshi kunu zone zudi mannot adae ḳorar lagi ba nizor kushie nofol kurbani hishabe Mabudor name zalail kurbani dibar niote kunuta loia ae,
LEV 22:19 te ikṭa oite oibo egu nikut bisal, meṛa ba sagolor faṭa. Ila na oile to Mabude kobul ḳorta nae.
LEV 22:20 Kut ala kunu foshudi zanu kurbani adae na ḳore, ḳorle-o tar kunu fayda oito nae.
LEV 22:21 Kunu mannot adae ḳorar lagi ba nizor kushie nofol kurbani hishabe ḳeu zudi Mabudor name salamoti kurbani dito sae, te itar lagi egu nikut goru, meṛa ba sagol ante oibo. Gotro kut ala kunu foshudi kurbani dile ita kobul oito nae.
LEV 22:22 Kunu manshe zanu kurbanir niote anda, lengṛa, ḳaṭa-sira, kunu ongo ḳaṭa, fuzala ga, ba daud-ḳauzli kunu foshure Mabudor dorbaro na ane, zalail kurbanir lagi ola kut ala kunu foshure kurbani kanar ufre tulio na.
LEV 22:23 Ta-o foshur kunu ongo niomor beshi lamba ba baṭṭi taḳle, olaḳan foshure nizor kushie nofol kurbani hishabe dita farba, oile kunu mannot furonor lagi ilaḳan kurbani kobul oito nae.
LEV 22:24 Kunu foshur onḍokush zudi tetla, sesa, ḳaṭa-sira taḳe, te itare tumra Mabudor name kurbani dio na, nizor desho gia ila ḳorio na.
LEV 22:25 Bin zatir kunu manshor ges taki olaḳan foshu ania tumrar Allar name kurbani dio na. Itar gotro kut taḳae itadi kurbani dile tumrar kunu fayda oito nae.”
LEV 22:26 Bade Mabude Musare ḳoila,
LEV 22:27 “Zonmor bad taki shat din forzonto goru ba sagol ba meṛa-baichchare tar maʼr loge roite dibae. Aṭ nombor din taki itare Mabudor name agunit deoa kurbani hishabe deoa zaibo.
LEV 22:28 Ta-o gai ar tair basurre, meṛi ba sagi ar tair baichchare, eḳoi dine zobo ḳora haram.
LEV 22:29 Tumra Mabudor name kunu shukurana kurbani dite saile, ita ou nomunae adae ḳorio zela tain kushi oin.
LEV 22:30 Kurbanir gust kurbanir dinor maze ḳailite oibo, ita bador din bian forzonto toa haram. Ami-u to Mabud.
LEV 22:31 “Tumra amar hukum manio ar ou laḳan solio. Ami-u to Mabud.
LEV 22:32 Tumra amar fak-fobitro namre oshomman ḳorio na, zate Boni Israilor maze ami fak-fobitro hishabe goinno oi. Ami Allae tumrare fak-fobitro banai.
LEV 22:33 Ami tumrar Mabud oar niote tumrare Mishor desh taki bar ḳori anchi. Ami-u to Mabud.”
LEV 23:1 Bade Mabude Musa nobire ḳoila,
LEV 23:2 “Tumi Boni Israilre zanai deo, ami Mabude tumrar lagi ou id oḳol ṭik korlam, tumra itare fobitro milon-mahfilor din hishabe manbae.
LEV 23:3 “Haftat soy din tumra ḳam-ḳaz ḳorio, ar shat nombor din oilo ziraibar din, fobitro milon-mahfilor Zummabar. I din tumra kunu ḳam-ḳaz ḳorio na, tumra zekunu zagat boshot ḳoro, i din ḳan tumrar Mabudor name fobitro Zummabar hishabe manio.
LEV 23:4 “Tumrar lagi amar ṭik kora zoto id ase, mani fobitro milon-mahfilor din hishabe zeta mantae, ita ami koiram. Ita oilo:
LEV 23:5 “Bosoror foyla sandor souddo tarikor hainja taki Mabudor name Azadi Id arombo oibo,
LEV 23:6 ar ou sandor fonro tariko Mabudor name Ḳamir Saṛa Ruṭir Id arombo oibo. Fura shat din tumra ḳamir saṛa ruṭi kaibae.
LEV 23:7 Ou shat dinor foyla din tumrar fobitro milon-mahfil oibo, ou din duniabi niote kunuzat ḳam-ḳaz ḳora tumrar lagi haram.
LEV 23:8 Ou shat dinor forteḳ din tumra Mabudor name agunit deoa kurbani dibae. Bade shat nombor din tumrar fobitro milon-mahfil oibo, ou din tumra duniabi niote kunu ḳam-ḳaz ḳora haram.”
LEV 23:9 Mabude Musa nobire aro ḳoila,
LEV 23:10 “Tumi Boni Israilre zanai deo, ami Mabude tumrare ze desh oḳlor malikana diram, hono gia harle tumra zotobar zominor foshol daibae, otobar ḳetor foyla ḳaṭa ekkan muiṭ loia imam sabor gese zaio.
LEV 23:11 Gele imame ou muiṭ nia Mabudor samne dulaiba. Zummabaror bador din tain ikan dulaiba, teu Mabud tumrar ufre kushi oiba.
LEV 23:12 Imam sabe zedin ou muiṭ dulaiba, ou din tumra Mabudor name eḳ bosor boyoshi egu nikut meṛa-baichchare zalail kurbani hishabe dibae.
LEV 23:13 Erloge dan-gomor sodgar lagi tel maḳail sair sher moyda dibae. Ita to Mabudor namor agunit deoa sodga, itar dumar gerane tain kushi oin. Ar er logor shorbot-fanir sodgar niote anguror eḳ sher shorbot-o dibae.
LEV 23:14 Tumrar ḳetor foshol daia hari, tumrar Allar namor ou sodga adae ḳorar ag forzonto noya foshol tumra ḳaio na. Itadi ruṭi banaia ba agunit bazia ḳaoa-o nished. Tumra zeno-u ro na ḳene, oarishor for oarish dori siroḳal ou niom manio.
LEV 23:15 “Ar ou Zummabaror bador din, mani zedin dulona kurbani lagi fosholor muiṭ loia aibae, ou din taki shat haftae shat Zummabar gonibae.
LEV 23:16 Ou shat Zummar bador din, mani foinchash dinor din tumra Mabudor name noya fosholor sodga adae ḳorbae.
LEV 23:17 Tumra nizor baṛi taki Mabudor name dulona kurbani dibar niote ḳetor foyla foshol taki kisu foshol anio. Tumra sair sher moydadi banail ḳamir furail dukan nan ruṭi anio.
LEV 23:18 Ou ruṭir loge eḳ bosor boyoshi shatṭa nikut meṛa-baichcha, eḳṭa bisal, meṛar duiṭa faṭa anio. Ou foshu oḳol dia Mabudor name ekkan zalail kurbani adae ḳorbae, otar loge niom mafik dan-gomor sodga ar shorbot-fanir sodga-o dibae. Ita to agunit deoa eḳ nomunar kurbani, itar dumar gerane Mabud kushi oin.
LEV 23:19 Bade tumra gunar koforar kurbani hishabe egu faṭa sagol, ar salamoti kurbanir lagi eḳ bosor boyoshi dugu meṛa-baichcha kurbani dibae.
LEV 23:20 Imam sabe dulona kurbani hishabe Mabudor samne ou duio meṛa-baichcha ar ḳetor foyla fosholdi banail ruṭi nia dulaiba. Ita to Mabudor namor kurbanir fak-fobitro samana, ita imam sabor faona.
LEV 23:21 Ḳetor foshol daoar ou idor din tumra eḳṭa fobitro milon-mahfil ḳorio. Ou din duniabi niote kunu ḳam-ḳaz ḳorio na. Tumra zeno-u ro na ḳene, oarishor for oarish dori hor-hamesha ita amol ḳorio.
LEV 23:22 “Tumra zebla ḳetor foshol daibae, ou shomoy tumra zominor ailor ḳandar foshol saf ḳoria ḳaṭio na, ar daoar bade ou zomino falail foshol lurio na. Gorib-duki ar bideshi musafiror lagi ita toio. Mono rakio, ami Alla-u tumrar Mabud.”
LEV 23:23 Bade Mabude Musa nobire ḳoila,
LEV 23:24 “Tumi Boni Israilre zanai deo, bosoror shat nombor sandor foyla dinre tumra furafur ziranir din hishabe manio. Ou din tumra shinga bazaio ar hoḳole milia idor fobitro milon-mahfil ḳorio.
LEV 23:25 Ou din tumra duniabi niote kunu ḳam-ḳaz ḳorio na, ḳali Mabudor name agunit deoa sodga adae ḳorio.”
LEV 23:26 Mabude Musare ḳoila,
LEV 23:27 “Ou shat nombor sandor dosh nombor din oilo Koforar Idor din. I din tumra eḳṭa fobitro milon-mahfil ḳorio. Forteḳ zone noto oia zarzir dil shofia dia Mabudor name agunit deoa sodga adae ḳorio.
LEV 23:28 Ita oilo Koforar Id, tumrar Mabud Allar samne tumrar gunar kofora adae ḳora oibo, asta i dino kunuzat ḳam-ḳaz ḳora haram.
LEV 23:29 Ze manshe hou din noto oia nizor dil shofia na dey, tar nam i zatir maz taki miṭailibae.
LEV 23:30 Ar hou din zudi keu kunu ḳam-ḳaz ḳore, te tar nam ami i zatir maz taki shesh ḳorilimu.
LEV 23:31 Ou din tumra kunuzat ḳam-ḳaz ḳorio na. Tumra zeno-u ro na ḳene, oarishor for oarish dori hor-hamesha ou niom manio.
LEV 23:32 Ou din oibo tumrar lagi fobitro Zummar din, erlagi noto oia dil shofia dio. Ou sandor noy nombor dinor hainja taki bador din hainja forzonto fobitro ou Zummar din manio.”
LEV 23:33 Erbade Mabude Musa nobire ḳoila,
LEV 23:34 “Tumi Boni Israilre ḳo, ou shat nombor sandor fonro tarik taki Mabudor name Ḍera-goror Id arombo oia, shat din forzonto id solbo.
LEV 23:35 Ou shat dinor foyla din tumrar fobitro milon-mahfil oibo. I din tumra duniabi niote kunu ḳam-ḳaz ḳorio na.
LEV 23:36 Ou idor shato din tumra Mabudor name agunit deoa kurbani adae ḳorbae. Bade aṭ nombor dino tumra hirbar fobitro milon-mahfil ḳorbae ar Mabudor name agunit deoa kurbani dibae. Iṭa oilo shesh dinor aḳeri mahfil, ou dino tumra duniabi niote kunu ḳam-ḳaz ḳorio na.
LEV 23:37 “Asta bosoror maze zoto laḳan id ase, ota hokkol zator id oḳol to Mabude-u dairjo ḳori disoin. Erlagi idor ou din oḳolre tumra fobitro milon-mahfilor din hishabe manio, er forteḳ din zeta zeta ḳora zorur, ita adae ḳorio. Mani, zalail kurbani, dan-gomor sodga, nizor kushie salamoti kurbani, ar er logor shorbot-fanir sodga. Ou kurbani oḳol Allar dairjo ḳora dino tumra adae ḳorio.
LEV 23:38 Oile kial rakio, tumrare batail ota hokkol laḳan id oḳlor kurbani ar lilla-sodgare adae ḳoria, Mabudor name Zummabaror kurbani, hoḳol nomunar lilla-sodga, mannot ar nizor kushie deoa salamoti kurbanire-o adae ḳorio. Hota id oḳlor kurbanir loge itare milaio na, alada rakio.
LEV 23:39 “Ar shat nombor sandor fonro tariko, ḳetor hoḳol fol-foshol tular bade, tumra Mabudor name shat din doria Ḍera-goror ou id adae ḳorio. Ou shat dinor foyla din ar sheshor aṭ nombor din oilo tumrar furafur ziraibar din.
LEV 23:40 Er foyla din tumra tortaza gasor ḍal fala, mani kezur fata, hoḳol nomunar fata-bahar gasor ḍal fala, ar gangor faror izol gasor ḍal loia azir oio. Oia ou shato din tumra nizor Mabud Allar samne kushi-bashi korio.
LEV 23:41 Forteḳ bosoror shat nombor sandor shat din tumra Mabudor name i id adae ḳorio. Oarishor for oarish dori hor-hamesha ita manio.
LEV 23:42 Fura shat din tumra hoḳol gia ḍera-goro roio, Boni Israilor hoḳol manush ou shomoy ḍera-goro takio.
LEV 23:43 Teu ota dekia hari tumrar aolad oḳole-o buzba, Boni Israilre Mishor desh taki bar ḳori ania harle ami morubumir maze tarare ola ḍera-goro boshot ḳoraislam. Mono rakio, ami Alla-u tumrar Mabud.”
LEV 23:44 Erbade Musa nobi gia Mabudor batail ou hoḳol idor ḳota Boni Israilre zanaila.
LEV 24:1 Bade Mabude Musa nobire ḳoila,
LEV 24:2 “Tumi Boni Israilre hukum deo, serag danir serag oḳol hamesha zalaia raḳar niote, tara zoytun sesia ḳaṭi tel banaia tumar gese loia aito.
LEV 24:3 Ar Kaba goror bitre shahadot shondukor fordar bare, imam Harune hainja taki fozor forzonto serag danir serag oḳol zalai raḳba. Oarishor for oarish dori hor-hamesha ita zari roibo.
LEV 24:4 Mabudor samne toa ou ḳaṭi shunar serag danir serag oḳolre tain hamesha zae-zoton ḳorba.
LEV 24:5 “Ar huno, moyda dia baro ḳan ruṭi banaio, forteḳ ruṭi oibo dui sher moydar.
LEV 24:6 Banaia ou ruṭire Mabudor samnor ḳaṭi shunar ṭebulor ufre soyḳan soyḳan ḳori dui laine hazai toio.
LEV 24:7 Forteḳ lainor ruṭir daro ḳaṭi loban-agor toio. Toia nishana hishabe ruṭir bodla ou agordi Mabudor name agunit deoa kurbani adae ḳorio.
LEV 24:8 Forteḳ Zummabare Boni Israilor fokko taki fobitro ou ruṭire imam sabe Mabudor nozoror samne hazaia toiba. Tarar ou ruṭi deoa to hor-hamesha siroḳal zari roibo.
LEV 24:9 Bade imam Harun ar tan bongshodore fobitro Kaba goror shimanar bitre ou ruṭi kaiba, ita oilo Mabudor name agunit deoa kurbanir zinishor maze ek kas fobitro zinish. Ita to imam oḳlor faona, ou niom hor-hamesha zari roibo.”
LEV 24:10 Boni Israilor maze ola eḳ beṭa asil, zegur baf oilo Mishori ar ma Boni Israil zatir. I beṭae ar Boni Israilor aroḳ beṭae kempor bitre maramari laglo.
LEV 24:11 Ou shomoy Boni Israili beṭir fuae Mabudor name kufuri mat matia lannot dilo. Ita hunia manshe tare Musa nobir gese loia gela. Ou beṭar maʼr nam Shalumi, tai asil Dan ḳandanor Dibrir fuṛi.
LEV 24:12 Ar manshe ou befare Mabudor morzi hunar lagi ou beṭare aṭḳaia toila.
LEV 24:13 Bade Mabude Musa nobire ḳoila,
LEV 24:14 “Amar name lannot deora ou beṭare loia kempor bare zao. Gele zeta manshe ou kufuri mat hunche, tara hoḳole ogur mata atai deuk, bade shomazor hoḳol manshe fattor maria tare zane marouk.
LEV 24:15 Ar tumi Boni Israilre zanai deo, ze manshe Allare lannot dey, tar naformanir lagi he nize-u dayi.
LEV 24:16 Ar ze manshe Mabudor name kufuri mat matibo, tare zane marilibae. Boni Israilor shomaze tare fattor maria zane marba. He Boni Israili ouk ba tarar loge boshot ḳorra bin zatir manush ouk, Allar name zegie kufuri mat matibo, tare nichchit zane marbae.
LEV 24:17 “Kunu manshe zudi dusra manshore kun ḳorilae, te tumra tare-o kun ḳorbae.
LEV 24:18 Kunu manshe zudi dusra manshor kunu foshure marilae, te ogur bodla he aroḳ foshur dam dia ḳeti-furon dibo. Zanor bodla zan.
LEV 24:19 Ḳeu zudi aroḳzonre mare, ar ou mairor lagi shorilor kunu ongor ḳeti oy, te he zela ḳeti korse, tar ongore-o ola ḳeti korbae.
LEV 24:20 Aḍḍi bangar bodla aḍḍi bangibae, souḳor bodla souk, dator bodla dat. Hou zonor ze ongore he ḳeti korse, tar-o ola ḳeti korbae.
LEV 24:21 Kunu foshure zane marle er ḳeti-furon dite oibo, oile kunu manushre kun ḳorle tare-u zane marilibae.
LEV 24:22 Boni Israil ba tumrar loge boshot ḳorra bin zatir manshor lagi ou eḳoi ain zari roibo. Mono rakio, ami Alla-u tumrar Mabud.”
LEV 24:23 Bade Musa nobie Boni Israilre ita hoḳolta zanaila. Teu ze beṭae hou kufuri matisil, manshe ogure kempor bare nia fattor maria zane marilila. Mabude Musare zela hukum disla, Boni Israile ṭik ola-u ḳorla.
LEV 25:1 Ar Mabude Tur faṛor ufre Musa nobire ḳoila,
LEV 25:2 “Tumi Boni Israilre zanai deo, ami ze deshḳan tumrare diar, hou desho gia harle tumra kial rakio, honor zomi-maṭie zanu Mabudor name aram ḳorar shomoy fae.
LEV 25:3 Tumra soy bosor zomino ḳet-ḳamar ḳorio, angur gasor ḍal fala saṭia foy-foshol baṛit anio.
LEV 25:4 Oile shat nombor bosor zomi-zomare ziranir shuzug dio. Iṭa oilo Mabudor niote aramor bosor. Ou bosor tumra zomino ḳet ḳorio na, angur gasor ḍal fala saṭio na.
LEV 25:5 Ar zominor maze emne-u zeta folibo, ita nia tumrar ugaro toio na. Bina zotone angur gaso zeta fol dorbo, ita faṛia nia zomaio na. Hoḳol zomi-zomare fura eḳ bosor ziranir shomoy dio.
LEV 25:6 Ziranir bosor zomino emne zeta folibo, ita to tumra nizor, tumrar gulam-bandir, tumrar deshor bin-deshi musafir, tumrar shomazor menoti kamla, hoḳol zator manshor,
LEV 25:7 tumrar fala heman, ar deshor zongli zanuaror ḳani-kuraḳ oibo. Ou bosor zomino emne zeta folibo, ita tumra hoḳole ḳaio.
LEV 25:8 “Ar huno, shat bosor ḳori kori shatḳan ziranir bosorre tumra gonio, gonile shatbar shat bosore unufoinchash bosor oibo.
LEV 25:9 Er bador bosor, mani foinchash nombor bosor, ou bosoror shat nombor sandor dosh nombor din, ita to gunar kofora adae ḳorar din, hou din tumra asta deshor hoḳol zagat shinga bazaio.
LEV 25:10 Ou foinchash nombor bosorre tumra fak-fobitro manio, deshor hoḳol manshore azadir ḳota zanaio. I bosor oilo tumrar zomi-mirash Firot Faoar Bosor. Ou bosor tumra zarzir foribar ar ḳandanor zomi-zomar doḳoldari firot faibae.
LEV 25:11 Forteḳ foinchash nombor bosor oibo, tumrar doḳoldari Firot Faoar Bosor. Ou bosor tumra zomino kunu bisi bain ḳorio na, zomino emne-u zeta zonmibo ita tumra nio na. Ar bina zotone angur gaso zeta fol dorbo, ita-o tumra goro anio na.
LEV 25:12 Ou bosor oilo Firot Faibar Bosor. Tumra ou bosorre fak-fobitro hishabe manio. Zomino zeta foshol faibae, ota-u tumra ḳaio.
LEV 25:13 “Firot Faoar Bosoro tumra forteḳe zarzir foribaror zomi-mirasho firia zaio.
LEV 25:14 Nizor zomi-zoma ḳorid-bikir shomoy tumra afon ba for ḳeuror ufre zur-zobordosti korio na.
LEV 25:15 Zomi korid ḳorar shomoy ḳorid-biki korra duio zone kial raḳbae, firot aoar hou foinchash bosor bade ḳotodin gesegi, ar samnor foinchash bosor furte ḳotodin baki ase, oḳan hishab ḳoria zominor dordam ṭik korbae.
LEV 25:16 Zudi beshi bosor foshol faoar shomoy taḳe te dam-o beshi oibo, ar ḳom oile dam-o ḳombo. Ashole foshol faoar bosoror ufre-u ḳorid-bikir dam ṭik oibo.
LEV 25:17 Tumra nizor shomazor ḳeuror ufre zur-zulum ḳorio na. Forteḳ zon-u Allar ḍor-ḳofe solio. Mono rakio, ami Alla-u tumrar Mabud.
LEV 25:18 “Tumra amar batail shoriot ar hoḳol hukum-ahkam hamesha manio. Teu tumrar desh oibo nirafod boshot ḳana.
LEV 25:19 Ar tumrar ḳetor zomin taki shullo-ana foshol faibae, faia feṭ bori kaia daia hono nirafode boshot ḳorbae.
LEV 25:20 Tumra mone mone ḳoitae faro, shat nombor bosoro zudi kunu ḳet na ḳori ar foshol na ḳaṭi, te amra ḳaimu kita?
LEV 25:21 Er zuaf oilo, soy nombor bosoro ami tumrar zomino ola rohom-borkot dimu, zomino tin bosoror homan foshol faia ḳaia-findia basbae.
LEV 25:22 Erlagi aṭ nombor bosoro ḳet ḳorar bis bain deoar shomoy-o ou furana foshol ḳaibae, ar noy nombor bosoror foshol daibar ag forzonto ou foshole-u tumrar ḳani-kuraki solbo.
LEV 25:23 “Mono rakio, siroḳalor lagi keuror zomi-zoma ḳorid-biki solto nae. Ashole hoḳol zominor malik to ami Alla, tumra amar samne hono ḳali bin-deshi musafir.
LEV 25:24 Tumra forteḳ zonor ḳorida zomi-mirash bikidarre hirbar firot nibar shuzug dio.
LEV 25:25 Tumrar zatir kunu bai obabo foṛia zudi tar foribaror zominor kisu ongsho besilae, te tar hoḳol taki afon zone aia ou besa zomi saṛaia nite oibo.
LEV 25:26 Ḳeuror zudi saṛaia nibar manush na taḳe, te he nize don-samana zomaia hari nize-u zudi saṛaia nito sae,
LEV 25:27 te tar bikir bosor taki saṛani forzonto shomoy hishab ḳoria, malikor faona ṭeḳa dia tar zomi firot nibo.
LEV 25:28 Oile zomi firot nibar samana he zomaite na farle, tar besa zomin Firot Faoar hou foinchash bosor furar ag forzonto ḳoriddare ḳaiba, ar foinchash bosoror ḳalo tare firot diba, he tar zomin emne-u bina foyshae firot faibo.
LEV 25:29 “Ar baunḍori kora nirafod ṭaunor kunu basha-baṛi zudi keu besilae, te besar bade fura eḳ bosoror maze he ou baṛi firot nito farbo. Fura eḳ bosoror maze he firot nibar shuzug faibo.
LEV 25:30 Eḳ bosoror maze iṭa firot na nile, siroḳalor lagi ou baṛi koriddar ar tar oarishor oibo. Firot Faoar Bosoro iṭa firot faito nae.
LEV 25:31 Oile zeta gau-geramo kunu baunḍori nae, ou zagar baṛi-gorre ḳetor zominor laḳan mono ḳorbae. Ita saṛaia ana zaibo, ar Firot Faoar Bosoro firot dite oibo.
LEV 25:32 “Ḳali Lebi kandanor ṭaunor baṛi-gor oḳol hamesha firot ana zaibo.
LEV 25:33 Tarar ṭaunor kunu baṛi-gor besile, Firot Faoar Bosoro iṭa firot faiba. Tumrar to zana ase, ḳali ṭaunor baṛi-gor-u oilo Lebi kandanor shompotti, Boni Israilor maze tara ou shompotti-u faise.
LEV 25:34 Oile tarar ṭaunor daro foshu raḳar bondor zaga tara ḳorid-biki korta farta nae, ita to tarar siroḳalin shompotti.
LEV 25:35 “Tumrar nizor shomazor kunu bai zudi goribi halotor lagi tar nizor ḳaoa-finda zugaito na fare, te bin-deshi musafiror laḳan tare-o shaijjo ḳorio, zate he tumrar loge boshot ḳorto fare.
LEV 25:36 Tumra tar ges taki kunu nomunar shud ḳaio na. Borong he zate hamesha tumrar gese roibar shuzug fae, ou niote tumra nizor Mabud Allar ḍor-ḳof bitre rakio.
LEV 25:37 Tumra shud ḳaibar niote tare ṭeḳa-foysha ḳorzo dio na. Tar gese ḳani-kurakir mal besle itar lab loio na.
LEV 25:38 Mono rakio, ami Alla-u tumrar Mabud. Asta Kenan desh dan ḳorar kiale, ar tumrar afon Mabud oar kiale, ami-u tumrare Mishor desh taki bar ḳori anchi.
LEV 25:39 “Boni Israili shomazor kunu bai zudi goribi haloto foṛia nize nize tumrar ḳeuror gese biki kailae, te tare ḳorida gulamor laḳan ḳaṭaio na.
LEV 25:40 Tumrar musafir ar ruzi kamlar loge zela bebohar ḳoro, tar loge-o ola ḳorio. He hou Firot Faoar Bosor forzonto tumar ḳam-ḳaz ḳorbo.
LEV 25:41 Bade tare ar tar fua-fuṛire azad ḳori dio. Teu he tar nizor ḳandanor moy-murobbir zomino firot zaibo.
LEV 25:42 Huno, Boni Israil to ḳali amar gulam. Ami tarare Mishor desh taki azad ḳori anchi, erlagi dusra ḳeuror gulamir lagi tarare besar eḳtiar nai.
LEV 25:43 Tumra nizor Mabudor ḍor-ḳofe solio, eḳe-oinne fashan-nisṭur bebohar ḳorio na.
LEV 25:44 “Tumrar ari-fori zoto zati asoin, otar maz taki tumrar gulam-bandi nitae farbae.
LEV 25:45 Tumrar maze boshot ḳorra bin zatir manush taki, ar tarar zeta aolad tumrar desho zonmisoin, otar maz taki-o tumra nizor lagi gulam-bandi nitae farbae.
LEV 25:46 Ou laḳan gulam-bandire nizor samana hishabe tumrar fua-fuṛinre-o dia zaitae farbae. Itare hara zindegi tumrar gulami koraitae farbae, oile tumrar nizor zati Boni Israilor ufre fashan malikana ḳaṭaio na.
LEV 25:47 “Tumrar maze boshot ḳorra bin-deshi kunu manush zudi doni bonizae, ar tumrar kunu bai zudi obabo foṛia tar gese ba tar kunu aolador gese nizore besilae,
LEV 25:48 te he nizore azad ḳorar shuzug faibo. Tar nizor kunu baie tare azad ḳorto farbo.
LEV 25:49 Tar sasa ba sasar goror baie, ba tar ḳandanor afon zekunu zone tare azad ḳoraita farba. Nizor halot bodlailite farle, he nizore nize azad ḳorto farbo.
LEV 25:50 Ze bosor nizore besisil ou bosor taki hishab ḳoria firot aoar bosor forzonto zoto bosor baki taḳe ou shomoykur ḳamor betonor hishab-nikash mafik tar azadir dam ṭik kora oibo.
LEV 25:51 Firot Faoar Bosor zudi beshi duroi oy, te ze dame he nizore besisil, ou damor boṛo eḳ ongsho tar azadir bodla hishabe dite oibo.
LEV 25:52 Ar Firot Faoar Bosor aite zudi kom shomoy baki roy, te ou shomoy hishabe ṭeḳa dia he nizore azad ḳorto farbo.
LEV 25:53 Tare bosor chukti kamlar laḳan dekio, ar kial rakio, malike zanu tar loge fashan bebohar na ḳore.
LEV 25:54 Ola kunu laḳan ufaye zudi he azad oito na fare, te tare ar tar fua-fuṛire Firot Faoa Bosoror shomoy emne-u azad ḳori dilaite oibo.
LEV 25:55 Mono rakio, Boni Israil to ḳali amar gulam. Ami tarare Mishor desh taki azad ḳori anchi, tara ḳali amar. Ami Alla-u tumrar Mabud.
LEV 26:1 “Tumra kunu nomunar deb-debir murti banaio na. Laḳṛidi banail murti, ba kunuzat fattorre devta hishabe boail ḳorio na. Pujar niote fattor kudia banail kunuzat murti tumrar deshor maze rakio na. Mono rakio, ami Alla-u tumrar Mabud.
LEV 26:2 Amar deoa forteḳ Zummabar tumra manio, amar fobitro Kaba gorre tumra ijjot ḳorio. Ami-u to Mabud.
LEV 26:3 “Tumra zudi amar hoḳol hukum-ahkam ar niom-ḳanun mania amol ḳoro,
LEV 26:4 te ami tumrare ṭikmoto meg-fani dimu. Teu tumrar zomino foy-foshol folibo ar gas-gasalie-o fol-mul dibo.
LEV 26:5 Tumrar ḳetor foy-foshol oto beshi oibo zen, angur tular shomoy azile-o, tumrar foshol maṛa deoat roibae. Ar zominor maze noya bis bain deoar shomoy azile-o, ou shomoy forzonto angur tulat roibae. Tumra feṭ boria ḳana-fina ḳaibae, ar nirafode nizor baṛit boshot ḳorbae.
LEV 26:6 “Ami tumrar desho shanti dimu, tumra shantie gumaibae, ḳeu aia tumrare kunu ḍor-ḳof deḳaito nae. Tumrar desh taki hoḳol zator hingshro zanuarre ami kedai dimu, ar kunu sifai dole-o tumrar desho hamla ḳorat aito nae.
LEV 26:7 Tumrar dushmon oḳolre ḳedaia nibae, tumrar sokur samne tarar moron oibo.
LEV 26:8 Tumrar ḳali fas zon sifaie eḳ-sho dushmonre, ar eḳ-sho sifaie dosh azar zonre ḳedaia nibae, tumrar dushmon tumrar sokur samne toluaror tole morbo.
LEV 26:9 Ami tumrar bae doyar nozore saimu, tumrar aolad baṛaia tumrar ḳandan boṛo ḳormu, ar tumrar loge amar oada-chukti boail raḳmu.
LEV 26:10 Noya bosoror foshol tular lagi ugar ḳali korar ag forzonto, agor bosoror fosholdi tumrar ḳana-fina solbo.
LEV 26:11 Tumrar bae taki amar muk firaitam nae, tumrar maze-u roibo amar boshot gor.
LEV 26:12 Ami tumrar loge sola-fira ḳormu, ami oimu tumrar Mabud, tumra oibae amar ḳas proza.
LEV 26:13 Kial rakio, ami Alla-u tumrar Mabud. Mishor desh taki ami-u tumrare azad ḳori anchi, zate tumra Mishori oḳlor gulami kora na lage. Tumrar gordona taki zual bangia falaia, mata usa ḳori aṭibar haloto ami-u tumrare anchi.
LEV 26:14 “Oile tumra zudi amar ḳota na huno, amar ou hukum-ahkam na mano,
LEV 26:15 amar batail ain-ḳanunre nafosond ḳoro, amar deoa shoriotre elami koro, ar amar hukum na mania, amar oada-chuktir ulṭa solo,
LEV 26:16 te ami tumrar ufre ola ḳaṛa mosibot dimu, tumrar shoril koy oar bemar dimu, gozobi jokka bemar ar bezuita taf oibo, ota bemare tumrar sokur faoar koy oibo, shorilor ḳomzuri aibo. Tumra zomino ḳet ḳorle-o fayda oito nae, tumrar foshol dushmone ḳaibo.
LEV 26:17 Ami tumrar ḳeti korat lagizimu, ar tumra nizor dushmonor gese aribae. Tumrare zetae ingsha ḳoroin, otae tumrare shashon ḳorba, ar ḳeu tumrare na ḳedaile-o, tumra zanor ḍore emne-u bagibae.
LEV 26:18 “Erbade-o zudi tumra amar ḳota na huno, te ami tumrar gunar shat gun beshi shaza dimu.
LEV 26:19 Ami tumrar bol-shoktir beṭagiri bangia surmar ḳorilimu. Tumrar matar ufror asmanre luar laḳan, ar faor tolor maṭire tamar laḳan shokto ḳormu.
LEV 26:20 Teu tumra oto menot ḳoria-o kunu fol faitae nae. Ḳetor zomino foshol dorto nae, gas-gasalit fol milto nae.
LEV 26:21 “Tumrar dilor maze zudi amar lagi kunuzator dushmoni taḳe, amar batail hukum zudi tumrar ḳano na hamae, te ami tumrar naformanir lagi shat gun beshi shaza dimu.
LEV 26:22 Tumrar maze ami hingshro zanuar faṭaimu, itae tumrar fua-fuṛintore ḳaiba, tumrar foshur falre binash ḳorba, ar tumrar manshor foriman-o ḳomailiba, deshor fot-gaṭ ḳali foṛi roibo.
LEV 26:23 “Ou hoḳol goṭona goṭar bade-o tumra zudi amar ain-ḳanunor ulṭa solo,
LEV 26:24 te ami nize tumrar dushmon bonia, tumrar gunar shat gun beshi shaza dimu.
LEV 26:25 Amar oada-chuktire na manae ami tumrar ufre laṛai-zuddo anaimu. Dushmonre dekia tumra zebla ṭauno gia hamaibae, hono ami tumrar ufre gozobi morki saṛimu, teu tumra dushmonor ato dora foṛbae.
LEV 26:26 Ami tumrar ḳani-kurakir maze obab goṭaimu, teu dosh zon beṭie randite eḳ sular beshi lagto nae. Ḳanit boia tumra ruṭi mafi mafi kaibae, feṭ bora ḳani zuṭto nae.
LEV 26:27 “Ita hoḳoltar bade-o zudi amar ḳota na hunia amar ulṭa solo,
LEV 26:28 te ami gusae aguin oia ami-o tumrar ulṭa solmu, ar tumrar gunar shat gun shaza dimu.
LEV 26:29 Feṭor buke ou shomoy tumra nizor fua-fuṛintore sibaia ḳaibae.
LEV 26:30 Ami tumrar pujar hoḳol manḍob ar duf-duna zalanir zagare-o binash ḳormu, tumrar deb-debir murtir ufre ami tumrar lashor ṭeki toimu, ami tumrar bae kub ginnar nozore saimu.
LEV 26:31 Ami tumrar gau ar ṭaun oḳol, ar hoḳol mosid-mondir binash ḳorilimu. Tumrar sodga-kurbanir dumar geran ami ar kobul ḳortam nae.
LEV 26:32 Ami tumrar deshor ufre ola gozob dimu, zeta dekia tumrar dushmon oḳole-o ḍoraia ḳafiba.
LEV 26:33 Nanan zatir maze ami tumrare sitrai dimu, toluar ato loia ami tumrare ḳedaimu. Tumrar desh binash oibo, tumrar ṭaun ar gau-geram ḳali foṛi roibo.
LEV 26:34 “Tumra dushmonor desho taḳar shomoy, tumrar nizor deshor zomine tar faona ziranir bosor ziraibo. Ou shomoy deshor maṭie tar faona aram faibo.
LEV 26:35 Tumra nize taḳar shomoy zebla ou zomin oḳole ziranir bosor faisil na, oḳon desh binashor shomoy itae hou faona zirani ziraibo.
LEV 26:36 Tumrar mazor zera gia dushmonor desho basia roiba, tarar bitre ami ou laḳan ḍor-ḳof harai dimu, laṛair ḳalo manshe zela dushmonor at taki basar lagi douṛia bage, oula egu fata foṛar aoaz hunle-u tara douṛia bagiba.
LEV 26:37 Toluaror tol taki basar lagi manshe zela zan loia douṛae, ḳeu tumrare na douṛaile-o tumra nize nize douṛaia ola eḳe-oinnor ufre foṛbae. Dushmonor samne tumra ubaitae fartae nae.
LEV 26:38 Tumra nanan zatir manshor maze sitria morbae, ar dushmonor deshe tumrare gilia ḳaibo.
LEV 26:39 Erbade-o zudi tumrar mazor ḳeu hono basia roy, te tara-o nizor ar tarar moy-murobbir naformanir lagi koy oat roiba.
LEV 26:40 “Tara oḳan shikar ḳora lagbo zen, tara ar tarar moy-murobbie amar loge beimani korse, amar hukumor birudita ḳoria guna ḳorse,
LEV 26:41 erlagi ami-o tarar loge dushmonor laḳan bebohar ḳorsi, tarare biṭa-maṭi saṛaia dushmonor desho anaisi. Ota shikar ḳoria tara zudi kator oia norom dile touba ḳoria gunar shaza boite razi oy,
LEV 26:42 te ami Iakubor loge ḳaim ḳora amar oada-chuktir ḳota iad ḳormu, Isʼhakor loge ḳora oada-chuktir ḳotare-o mono ḳormu, ar Ibrahimor loge ḳora amar oada-chuktire iad ḳormu, tarare deoa deshor ḳota-o kial ḳormu.
LEV 26:43 “Tara desh saṛia zaoar bade tarar binash oa desh ḳali foṛi roibo, zominor faona ziranir bosor oḳol-o ziraibo-u ziraibo. Amar hukumor birudita ḳoria naformani korae, amar ainor ulṭa solae tara ola shaza faiba.
LEV 26:44 Oile dushmonor desho taḳar ḳalo ami tarare ola kunu ginna ba elamir souke deḳtam nae, tarare ekkere binash oite ditam nae, zate tarar loge ḳora amar oada-chukti bongo na oy. Mono rakio, ami Alla-u tarar Mabud.
LEV 26:45 Tarar lagi ami tarar moy-murobbir logor oada-chuktire iad ḳormu. Ou moy-murobbi oḳlor Mabud oar niote hoḳol zatir samon dia ami tarare Mishor desh taki bar ḳoria anchi. Ami-u to Mabud.”
LEV 26:46 Ita oilo hou shoriot, hukum-ahkam, ar niom-ḳanun, zeta Tur faṛor ufre Mabude Musa nobir marfote Boni Israilor lagi boail ḳorsoin.
LEV 27:1 Bade Mabude Musa nobire ḳoila,
LEV 27:2 “Tumi tamam Boni Israilre zanai deo, ḳeu zudi kunu manshore Allar name deoar mannot ḳore, te ou zonor bodla olaḳan hadia dite oibo:
LEV 27:3 Bish taki shaiṭ bosor boyoshi beṭaintor lagi, ebadot ḳanar mafe foinchash tola rufa hadia dite oibo,
LEV 27:4 ou boyoshi beṭintor lagi tish tola.
LEV 27:5 Fas bosor taki bish bosor boyoshi fuaintor lagi bish tola rufa, ou boyoshi fuṛintor lagi dosh tola.
LEV 27:6 Eḳ mash taki fas bosor boyoshi fuaintor lagi fas tola rufa, ou boyoshi fuṛintor lagi tin tola rufa.
LEV 27:7 Shaiṭ bosor ba er beshi boyoshi beṭaintor lagi fonro tola, ou boyoshi beṭintor lagi dosh tola rufa dite oibo.
LEV 27:8 “Oile ou mannot ḳorra zon zudi gorib manush oy, tar mannotor hadia dibar takkot na taḳe, te tare loia imam sabor gese zaibae, gele imam sabe tar halot buzia hadia ṭik korba.
LEV 27:9 “Zudi kobul oar zuka kunu foshure Mabudor name mannot ḳora oy, te ou foshure Mabudor samana hishabe fobitro ḳoia goinno ḳorio.
LEV 27:10 Ou foshur bodla dusra kunu foshu dile kobul oito nae. Iṭa bala oile er bodla bad foshu, ba bad oile er bodla bala kunu foshu dile-o kobul oito nae. He zudi eḳṭar bodla aroḳṭa foshure dilae, te ou duioṭare fobitro hishabe goinno ḳorio.
LEV 27:11 Oile Mabudor name kobul oar zuka nae, ila kunu nafak zator foshure ḳeu zudi mannot hishabe manilae, te oḳṭare loia imam sabor gese zaio,
LEV 27:12 gele tain oḳṭar hal-hokikot buzia hari ze dam ṭik korba, ou dam-u oibo iṭar shoṭik dam.
LEV 27:13 Mannot ḳorrae iṭare ḳalas ḳorar kial oile, ou damor loge aro fas baṭor eḳ baṭ dam beshi dite oibo.
LEV 27:14 “Ḳeu zudi tar kunu baṛi-gorre Mabudor name fak-fobitro samana hishabe mannot ḳorilae, te imam sabe ou baṛir hal-hokikot buzia ze dam ṭik korba, iṭa-u oibo er shoṭik dam.
LEV 27:15 Oḳon ou baṛire he ḳalas ḳoria nito saile, ou damor loge aro fas baṭor eḳ baṭ beshi dite oibo. Teu baṛi kan tar oibo.
LEV 27:16 “Kunu manshe zudi tar nizor zomi-mirashor kunu eḳ ongshore Mabudor name mannot ḳoria fak-fobitro ḳoia alog korilae, te ou zomino ze forimane ḳet oy, ou fosholor foriman buzia er dam ṭik korte oibo. Forteḳ fas mon barli bisor dam hishabe ada sher rufa dorbae.
LEV 27:17 Ar zomi-mirash Firot Faoar Bosor zudi he tar zominre fak-fobitro ḳoia mannot ḳore, te ou niom mafik imam sabe ze dam ṭik korba, iṭa-u oibo er shoṭik dam.
LEV 27:18 Oile Firot Faoar Bosoror bade zudi he tar mannot ḳore, te bador Firot Faoar Bosor forzonto hishab ḳoria zoto bosor oy, oto bosoror fosholor hishabe imam sabe er dam ṭik korba, bosor hishabe zominor dam ḳombo.
LEV 27:19 Ar mannot ḳorra zone zudi tar zominre ḳalas ḳoria nito sae, te ṭik kora ou damor loge aro fas baṭor eḳ baṭ beshi dite oibo, teu zomi kan tar oibo.
LEV 27:20 Oile he zudi kalas ḳori na ney, ba dusra zonor gese besilae, te ou zomin ḳan ar ḳalas ḳoria nibar fot nai.
LEV 27:21 Zomi-mirash Firot Faibar Bosor zebla zomi kan emne-u ḳalas oizibo, ou shomoy i zomi kan Mabudor name siroḳalin saf-kobala zominor laḳan fak-fobitro samana hishabe goinno oibo. Ikan oizibo imam sabor zomi.
LEV 27:22 Nizor bafaiti zomi nae ila kunu ḳorida zominre ḳeu zudi mannot mania fak-fobitro hishabe goinno ḳorae,
LEV 27:23 te imam sabe Firot Faoar Bosor forzonto hishab ḳoria ikanor dam ṭik korba, ar hou din-u ou zominor damre he Mabudor name fak-fobitro samana hishabe dilaite oibo.
LEV 27:24 Ar zomi kan he zar ges taki loisil, zomi-mirash Firot Faibar Bosor ikan hirbar hou mul malikor ato zaibo.
LEV 27:25 Hoḳol zinishor dam ṭik korio, ebadot ḳanar mafe. Forteḳ bish rotie eḳ tola gonio.
LEV 27:26 “Kunu foshur foyla meda baichchare ḳeu Mabudor name lilla dibar lagi mannot ḳorto farto nae, iṭa to emne-u Mabudor. Ita goru-sagol, meṛa zetar baichcha-u ouk, iṭa Mabudor.
LEV 27:27 Zudi iṭa kunu haram foshur foyla meda baichcha oy, te imam sabor ṭik kora damor loge aro fas baṭor eḳ baṭ beshi dia iṭare ḳalas ḳori nito farbo. Ar he zudi kalas ḳori na ney, te ou dame iṭare besilite oibo.
LEV 27:28 “Oile kunu manshe zudi tar nizor kunu samana Mabudor name siroḳalin saf-kobala dolilor laḳan mannot ḳorilae, te ou mannot ḳora samana ar ḳalas ḳoria firot nito farto nae, ba besto-o farto nae. Ita zomi-zoma ouk, ba kunu manush, ba foshu oile-o, ita siroḳalor lagi Mabudor name ḳas fobitro samana hishabe goinno oibo.
LEV 27:29 Kunu manshore Mabudor name siroḳalor lagi ola mannot ḳoria dilaile, tare ar ḳalas ḳori neoa zaito nae, tare zane marilite oibo.
LEV 27:30 “Zomino taki zeta fol-foshol mile, itar dosh baṭor eḳ baṭ to Mabudor. Ita ḳetor foshol ouk ba gasor fol ouk, hoḳolta-u Mabudor name fak-fobitro.
LEV 27:31 Ḳeu zudi tar ou dosh baṭor eḳ baṭ ḳalas ḳoria nito sae, te er loge aro fas baṭor eḳ baṭ beshi dite oibo.
LEV 27:32 Forteḳ foshur falor dosh baṭor eḳ baṭ Mabudor, mani fale foshu gonar shomoy forteḳ dosh nombor foshu ogu Mabudor name fak-fobitro.
LEV 27:33 Ou dosh nombor foshu oguin bad ba bala ita deḳar kunu zorur nae, ba iṭa bodlaia dibar shuzug nai. Ḳeu zudi iṭar bodla dey, te ou dosh nombor foshu ar bodla foshu duioṭa-u Mabudor name fak-fobitro oizibo, ita ar ḳalas ḳori neoa zaito nae.”
LEV 27:34 Mabude Tur faṛor ufre Musa nobir gese, Boni Israilor lagi ou hukum-ahkam oḳol dan ḳorsila.
NUM 1:1 Boni Israil zati Mishor desh taki bar oia aoar dui nombor bosoror shomoy, dui nombor sandor foyla din, Mabude Sinai morubumit Milon-tambur bitre Hozrot Musar loge batchit ḳorla. Tain Musare ḳoila,
NUM 1:2 “Oḳon tamam Boni Israilor gusṭi ar foribar mafik eḳ ek kori hoḳol beṭaintor nam leḳo.
NUM 1:3 Tumi ar tumar bai Harune bish bosor ba er beshi boyoshi, mani zuddot zaoar zuka fouzi dol mafik tarare gono.
NUM 1:4 Fortek kandanor eḳzone tumrare shaijjo ḳorba, era oiba nizor gusṭir fordan murobbi.
NUM 1:5 Zara shaijjo ḳorba, erar nam oilo, Ruben ḳandanor Shadiuror fua Alisur,
NUM 1:6 Shimion ḳandanor Shuroshadayor fua Shalumil,
NUM 1:7 Ehuda ḳandanor Aminadabor fua Nahish,
NUM 1:8 Isaḳor ḳandanor Sugaror fua Notonel,
NUM 1:9 Sobulon ḳandanor Helonor fua Iliab,
NUM 1:10 Iusufor fuaintor maz taki: Afraim ḳandanor Amihudor fua Alishama, Manosha ḳandanor Fatoshuror fua Gomoliel,
NUM 1:11 Bin-Iamin ḳandanor Zidaunir fua Abidan,
NUM 1:12 Dan ḳandanor Amishadar fua Akiazar,
NUM 1:13 Ashir ḳandanor Ukranor fua Foziel,
NUM 1:14 Sadu ḳandanor Duelor fua Iliasof,
NUM 1:15 Noftali kandanor Inanor fua Ahir.”
NUM 1:16 Boni Israilor maz taki ou baro zonre fosond ḳori neoa oilo. Era oila tarar baf-dadaintor foribaror fordan, Boni Israilor fouzi dolor shordar.
NUM 1:17 Mabude zerar nam ḳoisla, Musa ar Harune ou shordar oḳolre ḳobordi anaila,
NUM 1:18 ar ou bosoror dusra sandor foyla din hoḳol Boni Israilre ekḳano dola ḳorla. Tara zarzir gusṭi ar foribar mafik tarar nam leḳailo. Bish bosor ba er beshi boyoshor beṭaintor nam eḳ ek kori leḳa oilo.
NUM 1:19 Mabudor hukum mafik Sinai morubumit Musae erare gonila.
NUM 1:20 Iakub urfe Israilor boṛo fuar nam Ruben, ou ḳandan taki zerar boyosh bish bosor ba er beshi, mani zara zuddot zaoar zuka asil, gusṭi ar foribaror forisoy mafik erar nam eḳ ek kori leḳa oilo.
NUM 1:21 Ruben ḳandan taki faoa gelo soysallish azar fas-sho zon.
NUM 1:22 Shimion ḳandanor maze zerar boyosh bish bosor ba er beshi, mani zara zuddot zaoar zuka asil, gusṭi ar foribaror forisoy mafik erar nam eḳ ek kori leḳa oilo.
NUM 1:23 Shimion ḳandan taki faoa gelo onushaiṭ azar tin-sho zon.
NUM 1:24 Sadu ḳandanor maze zerar boyosh bish bosor ba er beshi, mani zara zuddot zaoar zuka asil, gusṭi ar foribaror forisoy mafik erar nam eḳ ek kori leḳa oilo.
NUM 1:25 Sadu ḳandan taki faoa gelo foytallish azar soy-sho foinchash zon.
NUM 1:26 Ehuda ḳandanor maze zerar boyosh bish bosor ba er beshi, mani zara zuddot zaoar zuka asil, gusṭi ar foribaror forisoy mafik erar nam eḳ ek kori leḳa oilo.
NUM 1:27 Ehuda ḳandan taki faoa gelo suattoir azar soy-sho zon.
NUM 1:28 Isaḳor ḳandanor maze zerar boyosh bish bosor ba er beshi, mani zara zuddot zaoar zuka asil, gusṭi ar foribaror forisoy mafik erar nam eḳ ek kori leḳa oilo.
NUM 1:29 Isaḳor ḳandan taki faoa gelo suanno azar sair-sho zon.
NUM 1:30 Sobulon ḳandanor maze zerar boyosh bish bosor ba er beshi, mani zara zuddot zaoar zuka asil, gusṭi ar foribaror forisoy mafik erar nam eḳ ek kori leḳa oilo.
NUM 1:31 Sobulon ḳandan taki faoa gelo shatanno azar sair-sho zon.
NUM 1:32 Iusufor fua Afraim ḳandanor maze zerar boyosh bish bosor ba er beshi, mani zara zuddot zaoar zuka asil, gusṭi ar foribaror forisoy mafik erar nam eḳ ek kori leḳa oilo.
NUM 1:33 Afraim ḳandan taki faoa gelo sallish azar fas-sho zon.
NUM 1:34 Ar tan bai Manosha ḳandanor maze zerar boyosh bish bosor ba er beshi, mani zara zuddot zaoar zuka asil, gusṭi ar foribaror forisoy mafik erar nam eḳ ek kori leḳa oilo.
NUM 1:35 Manosha ḳandan taki faoa gelo bottish azar dui-sho zon.
NUM 1:36 Bin-Iamin ḳandanor maze zerar boyosh bish bosor ba er beshi, mani zara zuddot zaoar zuka asil, gusṭi ar foribaror forisoy mafik erar nam eḳ ek kori leḳa oilo.
NUM 1:37 Bin-Iamin ḳandan taki faoa gelo faytish azar sair-sho zon.
NUM 1:38 Dan ḳandanor maze zerar boyosh bish bosor ba er beshi, mani zara zuddot zaoar zuka asil, gusṭi ar foribaror forisoy mafik erar nam eḳ ek kori leḳa oilo.
NUM 1:39 Dan ḳandan taki faoa gelo bashoṭṭi azar shat-sho zon.
NUM 1:40 Ashir ḳandanor maze zerar boyosh bish bosor ba er beshi, mani zara zuddot zaoar zuka asil, gusṭi ar foribaror forisoy mafik erar nam eḳ ek kori leḳa oilo.
NUM 1:41 Ashir ḳandan taki faoa gelo ekchallish azar fas-sho zon.
NUM 1:42 Noftali kandanor maze zerar boyosh bish bosor ba er beshi, mani zara zuddot zaoar zuka asil, gusṭi ar foribaror forisoy mafik erar nam eḳ ek kori leḳa oilo.
NUM 1:43 Noftali kandan taki faoa gelo teppanno azar sair-sho zon.
NUM 1:44 Hozrot Musa, Harun ar Boni Israilor baro zon murobbi netae ou manshore gonila. Ou baro zon neta asla baro ḳandanor shordar.
NUM 1:45 Asta Boni Israilor maze zerar boyosh bish bosor ba tar beshi, mani zuddot zaoar zuka boyosh, zarzir gusṭi mafik tarare gona oilo.
NUM 1:46 Gonia hokkoltae soy laḳ tin azar fas-sho foinchash zon faoa gelo.
NUM 1:47 Oile Lebi kandanre, mani imam bongshore erar loge gona oilo na.
NUM 1:48 Mabude age-u Musare ḳoisla,
NUM 1:49 “Tumi Lebi kandanre gonbae na, gonar shomoy Boni Israilor oinno manshor loge erare hishab ḳorio na.
NUM 1:50 Tumi tarare shahadot tambu, mani amar goror shaz-shoronjam ar hokkoltar deḳa-hunar bar dibae. Tarar ḳam oibo, amar gor ar er hoḳol shaz-shoronjam boia neoa. Tara er sairo galabae zarzir tambu ṭangaia roiba ar amar goror deḳa-huna ḳorba.
NUM 1:51 Amar gorre eḳ zaga taki aroḳ zagat nite oile, Lebi kandanor manshe ikan kulba, bade aroḳ zagat gia eḳ ek kori zuṛa lagaia hirbar banaiba. Ḳali Lebi kandan saṛa oinno ḳeu itar ḳandat gele tare zane mara oibo.
NUM 1:52 Bad-baki Boni Israile tarar fouzi dol mafik zarzir tambu ṭangaiba. Forteḳe zarzir dolor shimanar maze, dolor nishana lagail fotaḳar tole roite oibo.
NUM 1:53 Boni Israilor ufre zate Mabudor gozob na lame, erlagi Lebi kandanor manshe amar shahadot tambur faradari korar lagi amar goror sairo galabae tarar tambu ṭangaia roiba.”
NUM 1:54 Mabude Musa nobire zela hukum disla, Boni Israile ṭik ola-u ḳorla.
NUM 2:1 Bade Mabude Musa ar Harunre ḳoila,
NUM 2:2 “Milon-tambur sairo galabae tuṛa ḳali zaga toia Boni Israile tarar tambu ṭanaiba. Forteḳe zarzir fouzi dolor shimanat zarzir gusṭir fotaḳar daro roiba.
NUM 2:3 “Milon-tambur fubedi, shuruz uṭar muka, Ehudar fotaḳar tino ḳandanor fouzi dole tarar tambu ṭanaiba. Ehuda ḳandanor shordar oila Aminadabor fua Nahish,
NUM 2:4 ou ḳandano sifair zuka manush oila, suattoir azar soy-sho zon.
NUM 2:5 Erar ek galat Isaḳor ḳandan roiba, ou ḳandanor shordar oila Sugaror fua Notonel,
NUM 2:6 tar ḳandano sifair zuka manush oila, suanno azar sair-sho zon.
NUM 2:7 Dusra galat tambu gaṛiba Sobulon ḳandane, ou ḳandanor shordar oila Helonor fua Iliab,
NUM 2:8 tar ḳandano sifair zuka manush oila, shatanno azar sair-sho zon.
NUM 2:9 Ehudar fotaḳar ou tino ḳandanor gona sifair zuka muṭ manush oila, eḳ laḳ siashi azar sair-sho. Soforor shomoy tarar ḳafela hoḳlor age roana diba.
NUM 2:10 “Milon-tambur dokkin galat tambu gaṛiba, Rubenor fotaḳar tino ḳandanor fouzi dole. Ruben ḳandanor shordar oila Shadiuror fua Alisur,
NUM 2:11 tar ḳandano sifair zuka manush oila, soysallish azar fas-sho zon.
NUM 2:12 Erar ek galat Shimion ḳandan roiba, ou ḳandanor Shuroshadayor fua Shalumil oila tarar shordar,
NUM 2:13 tar ḳandano sifair zuka manush oila, onushaiṭ azar tin-sho zon.
NUM 2:14 Dusra galat tambu gaṛiba Sadu ḳandane, ou ḳandanor shordar oila Duelor fua Iliasof,
NUM 2:15 tar ḳandano sifair zuka manush oila, fachchallish azar soy-sho foinchash zon.
NUM 2:16 Rubenor fotaḳar ou tino ḳandano gona sifair zuka muṭ manush oila, eḳ laḳ eḳanno azar sair-sho foinchash zon. Soforor shomoy tara dusra ḳafelat roana diba.
NUM 2:17 “Bade Lebi kandanor manshe Milon-tambure loia roana diba, hoḳlor mazḳano era roiba. Zarzir tambu ṭananir sirial mafik lain doria roana oiba. Fouzi dolor zarzir fotaḳar manush nizor dolor loge roiba.
NUM 2:18 “Milon-tambur foismor galat tambu gaṛiba, Afraim fotaḳar tino fouzi dolor manshe. Afraim ḳandanor shordar oila Amihudor fua Alishama,
NUM 2:19 ou ḳandano sifair zuka manush oila, sallish azar fas-sho zon.
NUM 2:20 Erar ek galat Manosha ḳandane tambu gaṛiba, Fatoshuror fua Gomoliel oila tarar shordar,
NUM 2:21 ou ḳandano sifair zuka manush oila, bottish azar dui-sho zon.
NUM 2:22 Ar dusra galat roiba Bin-Iamin ḳandan, erar shordar oila Zidaunir fua Abidan,
NUM 2:23 tar ḳandano sifair zuka manush oila, faytish azar sair-sho zon.
NUM 2:24 Afraimor fotaḳar ou tino ḳandanor gona sifair zuka muṭ manush oila, eḳ laḳ aṭ azar eḳ-sho zon. Tara tin nombor ḳafelat roana diba.
NUM 2:25 “Milon-tambur uttor galat tambu gaṛiba Dan fotaḳar tino ḳandanor fouzi dolor manshe, tarar shordar oila Amishadar fua Akiazar,
NUM 2:26 ou ḳandano sifair zuka manush oila, bashoṭṭi azar shat-sho zon.
NUM 2:27 Erar ek galat Ashir ḳandane tambu gaṛiba, ou ḳandanor shordar oila, Ukranor fua Foziel.
NUM 2:28 Tar ḳandano sifair zuka manush oila, ekchallish azar fas-sho zon.
NUM 2:29 Ar dusra galat roiba Noftali kandan, ou ḳandanor shordar oila, Inanor fua Ahir.
NUM 2:30 Tar ḳandano sifair zuka manush oila, teppanno azar sair-sho zon.
NUM 2:31 Danor fotaḳar ou tino ḳandanor gona sifair zuka muṭ manush oila, eḳ laḳ shatanno azar soy-sho zon. Era hoḳol heshor ḳafelat roana diba.”
NUM 2:32 Ou nomunae hoḳol Boni Israilre zarzir gusṭi mafik gona oilo. Gonia harle hoḳol fouzi dole sifair zuka muṭ manush oila, soy laḳ tin azar fas-sho foinchash zon.
NUM 2:33 Ta-o Mabude Musa nobire zela hukum disla, hukum mafik Boni Israilre gonar shomoy Lebi kandanre gonat dora oilo na.
NUM 2:34 Mabude Musare zela hukum disla, Boni Israile hoḳol ḳam-ḳaz ḳorta ou hukum mafik. Tara zarzir dolor zagat tambu ṭanaita, ar soforo roana oita nizor gusṭi ar foribar mafik afon fouzi dolor fotaḳar daro roia.
NUM 3:1 Tur faṛor ufre Mabude zebla Musa nobir loge batchit ḳorsla, hou shomoy Harun ar tan bai Musar bongsho-buniad asla ou eintain:
NUM 3:2 Harunor fuain oila Nadab, Abihu, Ali-Azor ar Isamar. Erar maze Nadab asla boṛo.
NUM 3:3 Imamoti kamor lagi Harunor ou sairo fuainre ḳelafoti dia ebadoti kamo boail ḳora oisil.
NUM 3:4 Oile Sinai morubumit roar ḳalo, Nadab ar Abihue Mabudor batail niom bangia, dusra aguindi agor-kushboy zalanir shomoy Mabudor samne-u tarar moron oigelo. Tarar kunu aolad na taḳae, tarar baf Harun nobir loge roia Ali-Azor ar Isamare imamoti kam ḳorla.
NUM 3:5 Bade Mabude Musa nobire ḳoila,
NUM 3:6 “Tumi Lebi kandanor manshore ania imam Harunor ato shomzao, tara imamoti kamo tanre shaijjo ḳorba.
NUM 3:7 Tara imam Harunor zimmae Milon-tambur samne hoḳol Boni Israilor torof taki amar goror ḳadimdari korba.
NUM 3:8 Tara-u Milon-tambur mal-samana deḳa-huna ar Allar goror kezmot ḳoria Boni Israilor fokke ebadot-bondegir day-dayitto adae ḳorba.
NUM 3:9 Lebi kandanor ḳadim oḳolre tumi Harun ar tar fuaintor ato shomzai deo. Boni Israilor maz taki erare imam Harunor ato shofi deoa oilo.
NUM 3:10 Imamoti kamor lagi tumi Harun ar tar bongshore basia neo. Tara saṛa dusra ḳeu imamoti korat gele ogure zane mara oibo.”
NUM 3:11 Mabude Musare eoḳan ḳoila,
NUM 3:12 “Huno, Boni Israili beṭintor goro zonom loa foyla fuar bodla babot, ami Lebi kandanre fosond ḳorsi. Erlagi Lebi oḳol amar.
NUM 3:13 Ashole hokkol foyla fuain-u amar. Mishori oḳlor hoḳol foyla fuaintore marilibar din, Boni Israilor forteḳ foyla fuare amar lagi fobitro ḳoria raḳsi, ita manshor fut ouk ba foshur baichcha ouk. Tara to amar, ami-u Mabud.”
NUM 3:14 Sinai morubumir maze Mabude Musare ḳoila,
NUM 3:15 “Tumi gusṭi ar foribar mafik Lebi oḳolre gono. Eḳ mash ba er beshi boyoshor hoḳol beṭaintore gono.”
NUM 3:16 Mabudor hukum mafik tain Lebi kandanre gonila.
NUM 3:17 Gonar ḳalo faila, Lebir fuain Zarsun, Kahat ar Marari.
NUM 3:18 Zarsunor fuain Libni ar Shimei asla dui gusṭir murobbi neta.
NUM 3:19 Kahator fuain Imran, Izhar, Hebron ar Ujjol oila sair bai.
NUM 3:20 Mararir fuain Moholi ar Mushi oila dui bai. Era oila bongsho ar foribar hishabe Lebi kandanor nanan gusṭi.
NUM 3:21 Zarsun asla Libnia ar Shimeia gusṭir mul murobbi.
NUM 3:22 Erar maze eḳ mash ar eḳ mashor beshi boyoshor hoḳol fuaintore gonia shaṛe shat azar faoa gelo.
NUM 3:23 Fochchim galabae Allar goror ḳoredi Zarsuni oḳlor tambu ṭangani oito.
NUM 3:24 Zarsun gusṭir fordan asla Layelor fua Iliasof.
NUM 3:25 Milon-tambur befare Zarsuni oḳlor ufre, zeta ḳafoṛain dia Allar gor banani oise ḳali ota ḳafoṛ oḳol, bara bazur gilaf ar sani oḳol ar ou goror bitre hamaibar forda deḳa-huna ḳorar dayitto asil.
NUM 3:26 Ar Allar gor ar kurbani kanar sairobae ze uṭan ase ogur fordain, ar uṭano hamanir lagi ze geiṭ ase ou geiṭor forda, ar shob rosi oḳlor-u deḳa-huna ḳora, ar ota hoḳol ḳam-ḳaz ḳora, ou hokkolta-u tantanor dayitto asil.
NUM 3:27 Kahat asla Imran, Izhar, Hebron ar Ujjol, ou sair gusṭir mul murobbi.
NUM 3:28 Ou gusṭintor maze eḳ mash ba tar beshi boyoshor hoḳol fuaintore gonia aṭ azar soy-sho zon faoa gelo. Erar dayitto asil fobitro ebadot ḳanar deḳa-huna ḳora.
NUM 3:29 Allar goror dokkin galabae Kahati oḳlor tambu ṭangani oito.
NUM 3:30 Kahati gusṭir fordan asla Ujjolor fua Ilizafon.
NUM 3:31 Ou Kahati gusṭir dayitto asil shahadot shonduk, ṭebul, serag dani, kurbani kana, agor-kushboy zalanir ṭebul, fobitro ebadot ḳanar ebadotir hoḳol zinish ar Herem Shorifor fordar deḳa-huna ḳora, loge bad-baki kam ḳora.
NUM 3:32 Lebi kandanor nanan gusṭir murobbi oḳlor fordan asla imam Harunor fua Ali-Azor. Erloge fobitro ebadot ḳanar deḳa-hunar dayitto zerare deoa oisil, erare nozordari korar lagi tanre boail ḳora oisil.
NUM 3:33 Marari asla Moholi ar Mushir ou dui gusṭir mul murobbi.
NUM 3:34 Ou gusṭintor maze eḳ mash ba tar beshi boyoshor hoḳol fuaintore gonia soy azar dui-sho faoa gelo.
NUM 3:35 Mararia gusṭir fordan asla Abielor fua Suriel. Allar goror utoredi tarar tambu ṭangani oito.
NUM 3:36 Erar dayitto asil Allar goror freim, freimor batti, kuṭi, sungi ar er hoḳol chiz,
NUM 3:37 uṭanor beṛar sairo galar kuṭi, sungi, beṛa ṭananir rosi ar feregor deḳa-huna ar er logor hoḳol ḳam-ḳaz ḳora.
NUM 3:38 Milon-tambur samnedi mani Allar goror fubedi Hozrot Musa, Harun ar tan fuaintor tambu oḳol ṭangani oito. Erar dayitto asil Boni Israilor torof taki fobitro ebadot ḳanat hoḳol ebadoti kam adae ḳora. Era saṛa ar ḳeu ebadot ḳanar ḳandat gele tare marilaoa oito.
NUM 3:39 Mabudor hukum mafik Musa ar Harune, Lebi kandanor eḳ mash ba tar beshi boyoshor hoḳol fuaintore gusṭi mafik gonila, gonia baish azar zon faoa gelo.
NUM 3:40 Erbade Mabude Musare ḳoila, “Boni Israilor hoḳol foribaror foyla fuainre gono, zerar boyosh eḳ mash ba er beshi, erare gonia erar nam ek katat leḳo.
NUM 3:41 Boni Israilor hoḳol foyla fuaintor zanor bodla Lebi oḳolre amar ḳoia gona oibo. Ar tarar foshur foyla baichchar bodla Lebi oḳlor foshur foyla baichchare amar ḳoia gona oibo. Ami-u Mabud.”
NUM 3:42 Mabudor hukum mafik Musae Boni Israilor hoḳol foribaror foyla fuainre gonila.
NUM 3:43 Teu eḳ mash ba tar beshi boyoshi fuaintore gonia muṭ baish azar dui-sho teyaṭṭoir zon faoa gelo.
NUM 3:44 Mabude Musare aro ḳoila,
NUM 3:45 “Boni Israilor hoḳol foyla fuaintor bodla Lebi oḳolre, ar tarar foyla foshur baichchar bodla Lebi oḳlor foyla foshur baichchare amar ḳoia dora oibo. Lebi oḳol to amar oiba. Ami-u Mabud.
NUM 3:46 Lebi kandanor muṭ foriman taki Boni Israilor foyla fuaintor foriman dui-sho teyaṭṭoir zon beshi.
NUM 3:47 Ou dui-sho teyaṭṭoir zonre ḳalas ḳorar lagi zanor bodla hishabe, forteḳ zonor lagi ebadot ḳanar mafe fas tola rufa adae ḳorio.
NUM 3:48 Adae ḳora ou rufa nia tumi imam Harun ar tar fuaintore dilaio.”
NUM 3:49 Teu Lebi kandanor bodla Boni Israilre ḳalas ḳoria nibar bade, tarar zoto zon baki roila, erar zanor bodla hishabe Musa nobie rufa adae ḳorla.
NUM 3:50 Tain Boni Israilor foyla fuaintor ges taki ebadot ḳanar mafe eḳ azar tin-sho foyshoṭṭi tola rufa adae ḳorla.
NUM 3:51 Mabudor hukum mafik Musae ou rufa Harun ar tan fuaintore dilaila.
NUM 4:1 Mabude Musa ar Harun nobire ḳoila,
NUM 4:2 “Tumra Lebi kandanor mazor Kahati oḳol alada ḳori gono, tarar hoḳol foribar ar gusṭi mafik gono.
NUM 4:3 Tish taki foinchash bosor boyoshor zeta beṭainte Milon-tambur ḳam-ḳaz ḳorat aiba, ḳali tarare gonio.
NUM 4:4 “Kahati oḳlor ḳam oibo, Milon-tambur ḳas fobitro siz oḳlor deḳa-huna ḳora.
NUM 4:5 Boni Israil soforo baronir shomoy, Harun ar tar fuainte amar goror bitre hamaia, Herem Shorifor forda kulia hari, oḳandi shahadot shondukre guria diba.
NUM 4:6 Er ufre doriar fuʼ masor samṛar gilafdi guriba, bade furafur lilua rongor ekkan ḳafoṛdi guria dia, shonduk boia nibar benda guin zaga moto haraiba.
NUM 4:7 Fobitro ruṭi raḳar ṭebulor ufre tara lilua rongor ekkan ḳafoṛ bisaia, oḳanor ufre huru-boṛo hoḳol tal-bashon, ar shorbot-fanir sodga ḍalibar zog-mog toiba. Fobitro zeta ruṭi hamesha ṭebulor ufre toa taḳe, ita ṭebulor ufre-u roibo.
NUM 4:8 Otar ufre lal ekkan ḳafoṛ bisaia, fuʼr samṛadi oḳanre guriba, ar ṭebul boia nibar benda guin zaga moto harai diba.
NUM 4:9 Bade lilua ekkan ḳafoṛdi asta serag dani, er serag oḳol, seragor fita saf ḳorar simṭa, zalail fitar sali toar baṭi ar telor fifare guria diba.
NUM 4:10 Hoḳol mal-samana shomet serag danire fuʼr samṛadi beraia, boia nibar ḳaṭiar ufre toiba.
NUM 4:11 Ar agor-kushboy zalanir shunar ṭebulor ufre lilua ekkan ḳafoṛ bisaia, fuʼr samṛadi guria diba, bade ou ṭebul boia neoar benda guin zaga moto haraiba.
NUM 4:12 Ebadot ḳanar kezmotor hoḳol mal-samana tara lilua ḳafoṛdi fesaia, fuʼr samṛadi guria hari, ota boia nibar ḳaṭiar ufre toiba.
NUM 4:13 “Kurbani kanar bitoror hoḳol sali falaia, baingoni rongor ekkan gilafdi guria diba.
NUM 4:14 Bade kurbani kanar hoḳol mal-samana oḳol, ortat angra toar fatil, gust tular boṛo ḳaṭa-sif, sali tular boṛo samos, lou toar baṭi, ita hoḳolta kurbani kanar ufre toiba. Toia fuʼr samṛadi guria dia, er benda guin ṭik zagat haraiba.
NUM 4:15 Harun ar tar fuainte zebla ou fak-fobitro zinish oḳol ar ebadot ḳanar mal-samana hoḳolta guriliba, tara tambu tulia soforo baronir lagi zebla tiar oiziba, ou shomoy ota boia nibar lagi Kahati oḳol aiba. Oile tara kunu fak-fobitro sizre atdi soita farta nae, soile-u morba. Milon-tambur ou hokkol zinish tara boia niba.
NUM 4:16 “Ar imam Harunor fua Ali-Azoror ufre serag danir tel, zalanir lagi agor-kushboy, fortidinor dan-gomor sodga ar ḳelafoti shomzibar telor dayitto roibo. Allar gor, goror hoḳol mal-samana, mani ebadot ḳana ar tar hoḳol mal-samanar todarki roibo Ali-Azoror ufre.”
NUM 4:17 Erbade Mabude Hozrot Musa ar Harunre ḳoila,
NUM 4:18 “Tumra kial rakio, Lebi kandanor maze Kahati bongsho taki keu ḳeu zate hor-hamesha taḳoin.
NUM 4:19 Tara zanu ḳas fobitro siz oḳlor ḳasat gia na more borong basia roy, otar lagi Harun ar tar fuainte amar goror bitre gia zarzir ḳam-ḳaz buzai diba. Ar ḳe kita boia nita, ota-o ṭik kori diba.
NUM 4:20 Oile Herem Shorifor bitoror ou fak-fobitro zinish eḳ foloḳor lagi-o deḳar niote Kahati oḳol bitre kunu laḳan-u hamaita farta nae, ou niote hamaile-u mori zaiba.”
NUM 4:21 Mabude Musare ḳoila,
NUM 4:22 “Tumi gusṭi ar foribar mafik Zarsuni oḳolre gono.
NUM 4:23 Tish taki foinchash bosor boyoshor zeta Zarsuni beṭainte Milon-tambur ḳam ḳorta farba, ḳali tarare gonio.
NUM 4:24 “Milon-tambur kezmot ḳora ar bar boar shomoy Zarsuni oḳlor ḳam oilo,
NUM 4:25 amar goror hoḳol fordain, Milon-tambu ar er gilaf, tar ufror fuʼr samṛar sani, ar Milon-tambur duaror forda boia neoa.
NUM 4:26 Erloge Allar gor ar kurbani kanar uṭanor sairo galar forda ar er doṛi oḳol, uṭano hamanir geiṭor forda, otar logor dorḳari hoḳol mal tara boia niba, ar ou befare zoto ḳam-ḳaz ase, ita tara ḳorba.
NUM 4:27 Bar boibar ḳam ouk ba oinno kunu ḳam ouk, hoḳolta Harun ar tar fuaintor hukum mafik Zarsuni oḳole ḳorba. Tara kita kita boia nito, ita tumra-u tarare ḳoia dibae.
NUM 4:28 Ota-u oilo Milon-tambur ḳamo Zarsuni oḳlor day-dayitto. Tarar ḳam-ḳazor todarki korba imam Harunor fua Isamare.
NUM 4:29 “Tumra gusṭi ar foribar mafik Mararia oḳlor foriman gono.
NUM 4:30 Tish taki foinchash bosor boyoshor zeta Mararia beṭainte Milon-tambur ḳam ḳorta farba, tumra ḳali tarare gonio.
NUM 4:31 Milon-tambur maze Mararia oḳlor dayitto oilo, Allar goror hoḳol freim, freimor batti, kuṭi ar kuṭir tolor sungi boia neoa.
NUM 4:32 Erloge sairo galar uṭanor hoḳol kuṭi ar sungi, uṭanor forda ṭananir fereg ar doṛi ar otar logor mal-samana zeta dorḳari ita hoḳolta tara boia niba. Tara ḳe kita boia nito, ita tumra ḳoia dio.
NUM 4:33 Ota-u oilo Milon-tambur maze Mararia gusṭir day-dayitto. Tarar ḳam-ḳazor todarki korba imam Harunor fua Isamare.”
NUM 4:34 Teu gusṭi ar foribar mafik Hozrot Musa, Harun ar Boni Israilor shordar oḳole Kahati oḳolre gonila.
NUM 4:35 Tish taki foinchash bosor boyoshi zeta beṭainte Milon-tambur ḳam-ḳaz ḳorar ḳota, ḳali tarare gonila.
NUM 4:36 Gonia tarar gusṭi mafik dui azar shat-sho foinchash zon faoa gelo.
NUM 4:37 Era-u asla Kahati gusṭir muṭ manush, zera Milon-tambur ḳam-ḳaz ḳorta. Musa nobir marfote Mabudor batail hukum mafik Musa ar Harune tarare gonila.
NUM 4:38 Gusṭi ar foribar mafik Zarsuni oḳolre gona oisil.
NUM 4:39 Tish taki foinchash bosor boyoshor zeta beṭainte Milon-tambur ḳam-ḳaz ḳorar ḳota,
NUM 4:40 gusṭi ar foribar mafik tarare gonia hari dui azar soy-sho tish zon faoa gelo.
NUM 4:41 Era-u asla Zarsuni gusṭir muṭ manush, zera Milon-tambur ḳam-ḳaz ḳorta. Mabudor hukum mafik Musa ar Harune tarare gonila.
NUM 4:42 Gusṭi ar foribar mafik Mararia oḳolre gona oisil.
NUM 4:43 Tish taki foinchash bosor boyoshor zeta beṭainte Milon-tambur ḳam-ḳaz ḳorar ḳota,
NUM 4:44 gusṭi mafik tarare gonia tin azar dui-sho zon faoa gelo.
NUM 4:45 Era-u asla Mararia gusṭir muṭ manush, zera Milon-tambur ḳam-ḳaz ḳorta. Hozrot Musar marfote faoa Mabudor hukum mafik Musa ar Harune tarare gonila.
NUM 4:46 Gusṭi ar foribar mafik Hozrot Musa, Harun ar Boni Israilor murobbi oḳole asta Lebi kandanre gonila.
NUM 4:47 Tish taki foinchash bosor boyoshi zeta beṭainte Milon-tambur kezmot ar mal-samana boia nibar ḳota,
NUM 4:48 gusṭi mafik tarare gonia aṭ azar fas-sho ashi zon faoa gelo.
NUM 4:49 Hozrot Musar marfote Mabudor batail hukum mafik era forteḳ zonor ḳam-ḳaz ar ḳe kita boia nita, hoḳolta buzai deoa oisil. Mabudor deoa hukum mafik Musa nobie Lebi kandanre gonila.
NUM 5:1 Mabude Musare ḳoila,
NUM 5:2 “Tumi Boni Israilre ou hukum deo, tara zanu kemp taki hoḳol fosa-kusṭo bemarire bar ḳori dey, ar hoḳol nomunar datu bemari, mora lash soia zera nafak oise tarare-o kemp taki bar ḳori deuk.
NUM 5:3 Beṭa ba beṭi ouk, ogure kemp taki bar ḳori dibae. Boni Israilor kemp zate era nafak na banae, ou niote otare bar ḳori dibae, zano to, shoyong ami Boni Israilor maze boshot ḳori.”
NUM 5:4 Teu Boni Israile ola ḳorla. Mabude Musare zela hukum disla, tara ṭik oula-u ḳorla. Tara nafak hoḳol manshore kemp taki bar ḳori dila.
NUM 5:5 Bade Mabude Musa nobire ḳoila,
NUM 5:6 “Tumi Boni Israilre zanai deo, kunu manshe zudi Mabudor naformani koria dusra manshor ḳeti kore, te he beṭa ba beṭi oile-o nichchoy dushi.
NUM 5:7 He tar gunar shikarukti dite oibo. Ar he ze manshor ḳeti korse, tare shullo-ana ḳeti-furon dite oibo. Ze zinishor ḳeti korse, ḳeti-furon hishabe ou zinishor mul damor loge aro fas baṭor eḳ baṭ beshi dite oibo.
NUM 5:8 Ḳeti-furon neoar zuka manush zudi na roin ar tar kunu afon zon na taḳoin, te ita Mabudor faona oibo. Ou ḳeti-furon ar gunar koforar kurbanir meṛaṭa imam sabe faiba.
NUM 5:9 Boni Israile fak-fobitro zoto zinish imamor gese loia aiba, ita hokkolta-u imame faiba.
NUM 5:10 Forteḳ zonor kurbani deoa zinish imame faiba. Imamor ato ze zinish deoa oibo, ita imamor-u oibo.”
NUM 5:11 Bade Mabude Musare ḳoila,
NUM 5:12 “Tumi Boni Israilre zanai deo, ḳeuror bou zudi ku-fote zaegi,
NUM 5:13 ar zamaire lukaia aroḳ beṭar loge zina ḳoria oshoti bone, tair zamaie ikan na zane ba itar kunu shakki-o na taḳe, tai kunu dora na-o ḳae.
NUM 5:14 Erbade-o zamaie boure shondoy ḳorilae, tar bitre oshanti korer, kiba boue kunu oshoti kam na ḳorle-o zamaie ḳali taire shondoy ḳore, erlagi tar monor maze oshanti hamaizae,
NUM 5:15 te zamaie tar boure loia imam sabor gese zaite oibo. Zaoar shomoy tar bour torof taki sodga hishabe dui sher barlir moyda nite oibo. Ou moyda oilo shondoyor lagi sodga, Mabudor samne oforad zair ḳorar sodga, erlagi itar maze kunu tel ba kushboydar loban mishani nished.
NUM 5:16 “Imame ou beṭar boure Mabudor samne ḳaṛa ḳoraiba.
NUM 5:17 Ar maṭir ek gamlar maze kisu fobitro fani borba, boria Allar goror bitoror maṭir ufor taki kisu duil tulia ou fanit saṛiba.
NUM 5:18 Beṭire Mabudor samne uba ḳoria harle tain beṭir matar sul kulia diba, ar beṭir oforador hasa-misa zair oar lagi ana sodgar barlir moydare tair ato diba. Dia tan nizor ato loiba hou lannot ḍakia anar titta fani.
NUM 5:19 Fani loia imame ou beṭire ḳosom ḳoraia ḳoiba, ‘Tumar biar bade zudi kunu beṭae tumar loge zina na ḳore, ba ku-fote gia tumi oshoti na o, te ou lannot anar titta fanie zanu tumar kunu ḳeti na oy.
NUM 5:20 Oile biar bade ku-fote gia dusra kunu beṭar loge zina ḳoria zudi oshoti o,’
NUM 5:21 —oḳan ḳoia imame ou beṭire nizor ufre lannot ḍakia anar ḳosom ḳoraia hari hirbar ḳoiba— ‘Te Mabude tumare ou gozob deukka, tumar nari-ongo nistez oizauk, ar tumar feṭ fulia muṭa oizauk. Teu ita dekia tumar shomazor manshe zekunu boddua ar lannoti kosom ḳaoar shomoy tumar nam tara iad ḳorbo.
NUM 5:22 Ar ou lannot anar fani tumar shorilo hamaia zanu ola ḳam ḳore, zate tumar feṭ fulizae ar tumar nari-ongo nistez oizae.’ Teu beṭie ḳoibo, ‘Amin, ola-u ouk.’
NUM 5:23 “Imame ou lannot ana ḳosmor ḳota eḳ samṛar ufre lekia hari, fani ḍalia ou leḳar ḳali titta fanit falaiba.
NUM 5:24 Lannot anar ou titta fani beṭire ḳaoanir bade beṭir feṭo kub zala-zontrona foyda oibo.
NUM 5:25 Imame foyla ou beṭir at taki shondoyor sodgar moyda nia Mabudor samne dulaia kurbani kanat loia zaiba.
NUM 5:26 Bade tain fura sodgar bodla ou moyda taki nishana hishabe eḳ muiṭ foriman nia kurbani kanat zalaiba, ar hou titta fani beṭire ḳaoaiba.
NUM 5:27 Beṭie zudi zamair loge beimani koria oshoti oia taḳe, te i fani kaoar bade-u tair feṭo kub zala-zontrona oibo. Tair feṭ fulia muṭa oibo, ar nari-ongo nistez oia aṭkura bonizibo, manshe lannot dibar niote tair nam loiba.
NUM 5:28 Oile tai zudi oshoti na oia ni-oforadi roy, te tai i lannot taki kalas faibo, ar hurutta zonom deoar ḳemota-o zari roibo.
NUM 5:29 Zamai-bour shondoyor bishoye Allar ain to ola. Kunu bou zudi zamair shongsharo roia ku-fote gia oshoti bone,
NUM 5:30 ba zamaie tar boure bodmaishir shondoy ḳore, te tarar lagi ou ain. Beṭae tar boure Mabudor samne nibo ar imame ita hoḳolta beṭir ufre bortaiba.
NUM 5:31 Teu zamaie tar nalish taki kalas faibo, ar bou hasaror oforadi oile tair shaza boibo.”
NUM 6:1 Mabude Musare ḳoila,
NUM 6:2 “Tumi Boni Israilre zanai deo, kunu beṭa ba beṭie zudi Naziria etekaf ḳorta sain, mani kali Mabudor ebadot-bondegir lagi alada roar mannot ḳorilae,
NUM 6:3 te anguror shorbot ba zekunu nomunar shorab ḳaoa taki tara nichchoy horia taḳte oibo. Anguror shirka ba zekunu nomunar shirka ḳaoa taki-o tara basia roibo. Ar tara taza angur, kismis, ba anguror rosh-o ḳaito nae.
NUM 6:4 Mul ḳota oilo, era zotodin Naziria etekafo roibo, otodin angur to duror ḳota, anguror eḳṭa bisi ba baḳol-o tara kunu laḳan-u ḳaito farto nae.
NUM 6:5 “Ar zotodinor lagi Naziria etekafor niote nizore alada raḳar mannot ḳorsoin, otodin tarar matat kur-beleiṭ lagani nished. Mabudor name alada roar shomoy era pak-pakiza roite oibo. Matar sul lamba ḳorte oibo.
NUM 6:6 I shomoy kunu mora lashor gese zaito farto nae.
NUM 6:7 Tarar ma-baba, bai-boin ḳeu mara gele-o nizore nafak korto farto nae, ḳaron erar matar maze to Allar name alada roar nishana sul lagail.
NUM 6:8 Tarar i alada roar miad na fura forzonto, pak-pakiza roite oibo.
NUM 6:9 “Ar aḳta kunu manush zudi tar samne morizae, te ou morar dae Mabudor name raḳa tar matar sul nafak oizaibo, ar hirbar pak oar lagi shat dinor din tar mata ḳamailite oibo.
NUM 6:10 Ar aṭ dinor din he duiṭa ḍufi faki ba duiṭa faro loia Milon-tambur duaro imamor gese zaibo.
NUM 6:11 Mora lashor gese gia he nafak oae, oḳon tar nafakir guna mafir lagi imame eḳṭa faki dia gunar koforar kurbani, ar dusra faki dia zalail kurbani adae ḳorba. Ou din-u Mabudor name tar matare noya ḳori pak-pakiza raḳte oibo.
NUM 6:12 Ar agor laḳan hirbar Mabudor name alada roar mannot ḳora lagbo. Erloge dush-ḳosurir koforar lagi eḳ bosor boyoshi egu meṛa-baichcha kurbani dibo. Ta-o age zotodin he Mabudor name alada roisil, ita batil oizibo, ḳaron hi shomoy he nafak oigesil.
NUM 6:13 “Zekunu zone Mabudor name Naziria etekafor miad fura ḳoria harle, fobitro Milon-tambur duaror ḳandat zaibo.
NUM 6:14 Gia Mabudor name zalail kurbanir lagi eḳ bosor boyoshi egu nikut meṛa-baichcha, ar gunar koforar kurbanir lagi eḳ bosor boyoshi egu nikut meṛi-baichcha, erloge salamoti kurbanir lagi egu nikut meṛa ante oibo.
NUM 6:15 Otar logor dan-gomor sodga ar shorbot-fanir sodga anbo, erloge nirek guṛidi banail teldi baza eḳ ṭukri fiṭa ar tel maḳail safaṭi banaio. Ita kuntat-u ḳamir mishaio na.
NUM 6:16 Imame ita hoḳolta nia Mabudor samne toia hari, gunar koforar kurbani ar zalail kurbanir loge diba.
NUM 6:17 Ar salamoti kurbanir meṛar loge-o ola ḳamir saṛa ruṭi diba. Erlogor dan-gomor sodga ar shorbot-fanir sodga adae ḳorba.
NUM 6:18 Bade Milon-tambur duaror gese Naziria etekaf ḳorra zonor matar sul ḳamaia, ou sul salamoti kurbanir tolor aguino falaiba.
NUM 6:19 Ar Mabudor name raḳa ou sul ḳamanir bade imame kurbanir meṛar shiddo ḳora ekkan gordona ar ṭukri taki kamir saṛa ekkan fiṭa ar ekkan tel maḳail safaṭi nia Naziria etekaf ḳorra zonor ato diba.
NUM 6:20 Bade imame ota nia Mabudor samne usa ḳori dulaiba. Ita to fak-fobitro zinish, ita hokkolta imamor faona. Dulaia toa sinar ou gust ar kurbanir foshur ran-o imamor faona. Ita hoḳolta ḳorar bade Naziria etekaf ḳorra ou zone anguror shorbot ḳaita farba.
NUM 6:21 “Ita to Naziria etekaf ḳorra zonor lagi ain. Mabudor name alada roia Naziria etekafor niom mafik, ota hoḳolta kurbani dite oibo. Ar zudi tarar shaiddo mafik aro kunta ḳorar niot ḳore, te ota-o ḳorte oibo. Mabudor name alada roar mannot mafik etekafor zoruri hokkolta era adae ḳorbo.”
NUM 6:22 Mabude Musare ḳoila,
NUM 6:23 “Tumi imam Harun ar tar fuainre zanai deo, Boni Israilor lagi dua ḳorar shomoy tara zanu ola ḳoin,
NUM 6:24 Mabude deukka rohom-borkot, ar ḳoroukka tumrare hefazot.
NUM 6:25 Tan nuror rushni tumrar ufre foṛouk, tan meherbani hamesha zari rouk.
NUM 6:26 Mabude tan muk kan zanu tumrar bae firain, ar tumrare shae-shanti dan ḳoroin.
NUM 6:27 Ou laḳan tara Boni Israilor ufre amar nam loiba, teu ami tarare rohom-borkot dimu.”
NUM 7:1 Hozrot Musae Allar gor bananir ḳam shesh ḳoria hari, fobitro tel siṭaia gorre fak-fobitro ḳorla. Ar goror hoḳol mal-samana, kurbani kana ar er logor tal-bashon hokkolta fak-fobitro ḳorla.
NUM 7:2 Ou din Boni Israilor baro ḳandanor shordar oḳol nanan zator ufohar loia aila. Era oila zarzir gusṭir fordan manush, tarar dayitto asil gonia alog kora hoḳol manshor deḳa-huna ḳora.
NUM 7:3 Mabudor name tara sani ala soyḳan gorur gaṛi, barogu goru loia Allar goror samne aila. Forteḳ shordaror torof taki eḳṭa ḳori goru ar dui zonor torof taki ekkan ḳori gorur gaṛi deoa oilo. Tara ita ania Allar goror samne toila.
NUM 7:4 Teu Mabude Musare ḳoila,
NUM 7:5 “Tumi tarar ges taki ota shomzia raḳo, zate Milon-tambur ḳamo lagani zae. Lebi kandanor ḳadim oḳlor ḳam buzia tarar maze ota baṭia deo.”
NUM 7:6 Erlagi Musae ou gaṛi ar goru oguin Lebi kandanor ḳadim oḳolre baṭia dila.
NUM 7:7 Erar maze Lebir foyla fua Zarsunor gusṭir ḳam mafik dukan gorur gaṛi ar sairgu goru tarare dila,
NUM 7:8 ar aroḳ fua Mararir gusṭir ḳam buzia tarare dila sair ḳan gaṛi ar aṭgu goru. Imam Harunor fua Isamare ou ḳamor todarki korla.
NUM 7:9 Oile Lebir fua Kahator gusṭire ita kunta dila na, ḳaron niom asil tara ḳali fak-fobitro siz oḳol deḳa-huna ḳora, ar otare ḳando ḳori boia neoa.
NUM 7:10 Kurbani kanat fobitro tel siṭanir shomoy, ikanre boail ḳorar niote shordar oḳole zarzir boḳshish loia aila. Ania kurbani kanar samne toila.
NUM 7:11 Mabude Musare ḳoila, “Forteḳ din eḳ eḳ shordare kurbani kanare boail ḳorar niote tan boḳshish ania shomzaiba.”
NUM 7:12 Foyla din Ehuda ḳandanor shordar Aminadabor fua Nahishe tan boḳshish loia aila.
NUM 7:13 Tain dan-gomor sodgar lagi ebadot ḳanar mafe eḳ-sho tish tola uzonor rufar ekkan tal, ar shottoir tola uzonor rufar ek gamla ania dila, ou tal ar gamlat bora asil dan-gomor sodgar niote tel maḳail moyda.
NUM 7:14 Agor-kushboye bora dosh tola uzonor shunar eḳṭa baṭi,
NUM 7:15 zalail kurbanir lagi eḳṭa bisal, eḳṭa meṛa, eḳ bosor boyoshi egu meṛa-baichcha,
NUM 7:16 gunar koforar kurbanir lagi egu sagol,
NUM 7:17 salamoti kurbanir lagi dugu goru, fasgu meṛa, fasgu sagol ar eḳ bosor boyoshi fasgu meṛa-baichcha anla. Ita oilo Aminadabor fua Nahishor ufohar.
NUM 7:18 Dui nombor din Isaḳor ḳandanor shordar Sugaror fua Notonele boḳshish loia aila.
NUM 7:19 Tain dan-gomor sodgar lagi ebadot ḳanar mafe eḳ-sho tish tola uzonor rufar ekkan tal, ar shottoir tola uzonor rufar ek gamla ania dila, ou tal ar gamlat bora asil dan-gomor sodgar niote tel maḳail moyda.
NUM 7:20 Agor-kushboye bora dosh tola uzonor shunar eḳṭa baṭi,
NUM 7:21 zalail kurbanir lagi eḳṭa bisal, eḳṭa meṛa, eḳ bosor boyoshi egu meṛa-baichcha,
NUM 7:22 gunar koforar kurbanir lagi egu sagol,
NUM 7:23 salamoti kurbanir lagi dugu goru, fasgu meṛa, fasgu sagol ar eḳ bosor boyoshi fasgu meṛa-baichcha anla. Ota asil Sugaror fua Notonelor ufohar.
NUM 7:24 Tin nombor din Sobulon ḳandanor shordar Helonor fua Iliabe boḳshish loia aila.
NUM 7:25 Tain dan-gomor sodgar lagi ebadot ḳanar mafe eḳ-sho tish tola uzonor rufar ekkan tal, ar shottoir tola uzonor rufar ek gamla ania dila, ou tal ar gamlat bora asil dan-gomor sodgar niote tel maḳail moyda.
NUM 7:26 Agor-kushboye bora dosh tola uzonor shunar eḳṭa baṭi,
NUM 7:27 zalail kurbanir lagi eḳṭa bisal, eḳṭa meṛa, eḳ bosor boyoshi egu meṛa-baichcha,
NUM 7:28 gunar koforar kurbanir lagi egu sagol,
NUM 7:29 salamoti kurbanir lagi dugu goru, fasgu meṛa, fasgu sagol ar eḳ bosor boyoshi fasgu meṛa-baichcha anla. Ota asil Helonor fua Iliabor ufohar.
NUM 7:30 Sair nombor din Ruben ḳandanor shordar Shadiuror fua Alisure boḳshish loia aila.
NUM 7:31 Tain dan-gomor sodgar lagi ebadot ḳanar mafe eḳ-sho tish tola uzonor rufar ekkan tal, ar shottoir tola uzonor rufar ek gamla ania dila, ou tal ar gamlat bora asil dan-gomor sodgar niote tel maḳail moyda.
NUM 7:32 Agor-kushboye bora dosh tola uzonor shunar eḳṭa baṭi,
NUM 7:33 zalail kurbanir lagi eḳṭa bisal, eḳṭa meṛa, eḳ bosor boyoshi egu meṛa-baichcha,
NUM 7:34 gunar koforar kurbanir lagi egu sagol,
NUM 7:35 salamoti kurbanir lagi dugu goru, fasgu meṛa, fasgu sagol ar eḳ bosor boyoshi fasgu meṛa-baichcha anla. Ota asil Shadiuror fua Alisuror ufohar.
NUM 7:36 Fas nombor din Shimion ḳandanor shordar Shuroshadayor fua Shalumile boḳshish loia aila.
NUM 7:37 Tain dan-gomor sodgar lagi ebadot ḳanar mafe eḳ-sho tish tola uzonor rufar ekkan tal, ar shottoir tola uzonor rufar ek gamla ania dila, ou tal ar gamlat bora asil dan-gomor sodgar niote tel maḳail moyda.
NUM 7:38 Agor-kushboye bora dosh tola uzonor shunar eḳṭa baṭi,
NUM 7:39 zalail kurbanir lagi eḳṭa bisal, eḳṭa meṛa, eḳ bosor boyoshi egu meṛa-baichcha,
NUM 7:40 gunar koforar kurbanir lagi egu sagol,
NUM 7:41 salamoti kurbanir lagi dugu goru, fasgu meṛa, fasgu sagol ar eḳ bosor boyoshi fasgu meṛa-baichcha anla. Ota asil Shuroshadayor fua Shalumilor ufohar.
NUM 7:42 Soy nombor din Sadu ḳandanor shordar Duelor fua Iliasofe boḳshish loia aila.
NUM 7:43 Tain dan-gomor sodgar lagi ebadot ḳanar mafe eḳ-sho tish tola uzonor rufar ekkan tal, ar shottoir tola uzonor rufar ek gamla ania dila, ou tal ar gamlat bora asil dan-gomor sodgar niote tel maḳail moyda.
NUM 7:44 Agor-kushboye bora dosh tola uzonor shunar eḳṭa baṭi,
NUM 7:45 zalail kurbanir lagi eḳṭa bisal, eḳṭa meṛa, eḳ bosor boyoshi egu meṛa-baichcha,
NUM 7:46 gunar koforar kurbanir lagi egu sagol,
NUM 7:47 salamoti kurbanir lagi dugu goru, fasgu meṛa, fasgu sagol ar eḳ bosor boyoshi fasgu meṛa-baichcha anla. Ota asil Duelor fua Iliasofor ufohar.
NUM 7:48 Shat nombor din Afraim ḳandanor shordar Amihudor fua Alishamae boḳshish loia aila.
NUM 7:49 Tain dan-gomor sodgar lagi ebadot ḳanar mafe eḳ-sho tish tola uzonor rufar ekkan tal, ar shottoir tola uzonor rufar ek gamla ania dila, ou tal ar gamlat bora asil dan-gomor sodgar niote tel maḳail moyda.
NUM 7:50 Agor-kushboye bora dosh tola uzonor shunar eḳṭa baṭi,
NUM 7:51 zalail kurbanir lagi eḳṭa bisal, eḳṭa meṛa, eḳ bosor boyoshi egu meṛa-baichcha,
NUM 7:52 gunar koforar kurbanir lagi egu sagol,
NUM 7:53 salamoti kurbanir lagi dugu goru, fasgu meṛa, fasgu sagol ar eḳ bosor boyoshi fasgu meṛa-baichcha anla. Ota asil Amihudor fua Alishamar ufohar.
NUM 7:54 Aṭ nombor din Manosha ḳandanor shordar Fatoshuror fua Gomoliele boḳshish loia aila.
NUM 7:55 Tain dan-gomor sodgar lagi ebadot ḳanar mafe eḳ-sho tish tola uzonor rufar ekkan tal, ar shottoir tola uzonor rufar ek gamla ania dila, ou tal ar gamlat bora asil dan-gomor sodgar niote tel maḳail moyda.
NUM 7:56 Agor-kushboye bora dosh tola uzonor shunar eḳṭa baṭi,
NUM 7:57 zalail kurbanir lagi eḳṭa bisal, eḳṭa meṛa, eḳ bosor boyoshi egu meṛa-baichcha,
NUM 7:58 gunar koforar kurbanir lagi egu sagol,
NUM 7:59 salamoti kurbanir lagi dugu goru, fasgu meṛa, fasgu sagol ar eḳ bosor boyoshi fasgu meṛa-baichcha anla. Ota asil Fatoshuror fua Gomolielor ufohar.
NUM 7:60 Noy nombor din Bin-Iamin ḳandanor shordar Zidaunir fua Abidane boḳshish loia aila.
NUM 7:61 Tain dan-gomor sodgar lagi ebadot ḳanar mafe eḳ-sho tish tola uzonor rufar ekkan tal, ar shottoir tola uzonor rufar ek gamla ania dila, ou tal ar gamlat bora asil dan-gomor sodgar niote tel maḳail moyda.
NUM 7:62 Agor-kushboye bora dosh tola uzonor shunar eḳṭa baṭi,
NUM 7:63 zalail kurbanir lagi eḳṭa bisal, eḳṭa meṛa, eḳ bosor boyoshi egu meṛa-baichcha,
NUM 7:64 gunar koforar kurbanir lagi egu sagol,
NUM 7:65 salamoti kurbanir lagi dugu goru, fasgu meṛa, fasgu sagol ar eḳ bosor boyoshi fasgu meṛa-baichcha anla. Ota asil Zidaunir fua Abidanor ufohar.
NUM 7:66 Dosh nombor din Dan ḳandanor shordar Amishadar fua Akiazare boḳshish loia aila.
NUM 7:67 Tain dan-gomor sodgar lagi ebadot ḳanar mafe eḳ-sho tish tola uzonor rufar ekkan tal, ar shottoir tola uzonor rufar ek gamla ania dila, ou tal ar gamlat bora asil dan-gomor sodgar niote tel maḳail moyda.
NUM 7:68 Agor-kushboye bora dosh tola uzonor shunar eḳṭa baṭi,
NUM 7:69 zalail kurbanir lagi eḳṭa bisal, eḳṭa meṛa, eḳ bosor boyoshi egu meṛa-baichcha,
NUM 7:70 gunar koforar kurbanir lagi egu sagol,
NUM 7:71 salamoti kurbanir lagi dugu goru, fasgu meṛa, fasgu sagol ar eḳ bosor boyoshi fasgu meṛa-baichcha anla. Ota asil Amishadar fua Akiazaror ufohar.
NUM 7:72 Egaro nombor din Ashir ḳandanor shordar Ukranor fua Foziele boḳshish loia aila.
NUM 7:73 Tain dan-gomor sodgar lagi ebadot ḳanar mafe eḳ-sho tish tola uzonor rufar ekkan tal, ar shottoir tola uzonor rufar ek gamla ania dila, ou tal ar gamlat bora asil dan-gomor sodgar niote tel maḳail moyda.
NUM 7:74 Agor-kushboye bora dosh tola uzonor shunar eḳṭa baṭi,
NUM 7:75 zalail kurbanir lagi eḳṭa bisal, eḳṭa meṛa, eḳ bosor boyoshi egu meṛa-baichcha,
NUM 7:76 gunar koforar kurbanir lagi egu sagol,
NUM 7:77 salamoti kurbanir lagi dugu goru, fasgu meṛa, fasgu sagol ar eḳ bosor boyoshi fasgu meṛa-baichcha anla. Ota asil Ukranor fua Fozielor ufohar.
NUM 7:78 Baro nombor din Noftali kandanor shordar Inanor fua Ahire boḳshish loia aila.
NUM 7:79 Tain dan-gomor sodgar lagi ebadot ḳanar mafe eḳ-sho tish tola uzonor rufar ekkan tal, ar shottoir tola uzonor rufar ek gamla ania dila, ou tal ar gamlat bora asil dan-gomor sodgar niote tel maḳail moyda.
NUM 7:80 Agor-kushboye bora dosh tola uzonor shunar eḳṭa baṭi,
NUM 7:81 zalail kurbanir lagi eḳṭa bisal, eḳṭa meṛa, eḳ bosor boyoshi egu meṛa-baichcha,
NUM 7:82 gunar koforar kurbanir lagi egu sagol,
NUM 7:83 salamoti kurbanir lagi dugu goru, fasgu meṛa, fasgu sagol ar eḳ bosor boyoshi fasgu meṛa-baichcha anla. Ota asil Inanor fua Ahiror ufohar.
NUM 7:84 Te fobitro tel dia kurbani kanare boail ḳorar shomoy Boni Israilor shordar oḳole zeta dan ḳorsla ita oilo, baro ḳan rufar tal, baroṭa rufar gamla ar baroṭa shunar baṭi.
NUM 7:85 Ebadot ḳanar mafe forteḳ rufar talor uzon asil eḳ-sho tish tola ar gamlar uzon asil shottoir tola. Rufar hoḳol tal-bashonor muṭ uzon asil dui azar sair-sho tola.
NUM 7:86 Agor-kushboye bora forteḳ shunar baṭir uzon asil dosh tola, shunar baroṭa baṭir muṭ uzon asil eḳ-sho bish tola.
NUM 7:87 Zalail kurbanir lagi muṭ barogu bisal, barogu meṛa ar eḳ bosor boyoshi barogu meṛa-baichcha-o era dan ḳorsla. Ar erlogor dan-gomor sodgar hoḳol zinish. Gunar koforar kurbanir lagi muṭ barogu sagol deoa oisil.
NUM 7:88 Salamoti kurbanir lagi muṭ sobbishgu goru, shaiṭgu meṛa, shaiṭgu sagol, eḳ bosor boyoshi shaiṭgu meṛa-baichcha. Fobitro tel siṭaia hari kurbani kanare boail ḳorar shomoy ufohar hishabe i hoḳolta deoa oisil.
NUM 7:89 Erbade Musa nobie zebla-u Mabudor loge batchit ḳorar lagi Milon-tambut hamaita, ou shomoy shahadot shondukor ḍaḳnar ufre ze duio Karubi roin, erar mazḳan taki tan buli hunta. Mabude ou nomunae Musa nobir loge batchit ḳorta.
NUM 8:1 Mabude Musa nobire ḳoila,
NUM 8:2 “Tumi Harunre ḳo, amar goror serag danir mazor shatoṭa serag ou nomunae lagaita, zate seragor for serag danir samna bae foṛe.”
NUM 8:3 Harune ola-u ḳorla. Musare batail Mabudor hukum mafik tain hoḳol serag olaḳan boaila, zate seragor for serag danir samnedi foṛe.
NUM 8:4 Serag danir tol taki agar ful forzonto astaṭa ḳaṭi shuna fiṭaia banail oilo. Mabude Musare zela noksha deḳaisla, ṭik ou laḳan serag dani banail oilo.
NUM 8:5 Mabude Musare ḳoila,
NUM 8:6 “Tumi Boni Israilor maz taki, Lebi kandanre alog koria pak-pakiza ḳoro.
NUM 8:7 I pak-pakiza ḳorar niom oilo, foyla tarar ufre fak-fobitro oar fani siṭaia dibae, siṭaia tara nize asta shorilor sul ḳamaia ḳafoṛ-sufoṛ doia fak-saf bonba.
NUM 8:8 Ar tara kurbanir lagi egu bisal anba, bisalor loge dan-gomor sodgar lagi tel maḳail moyda, gunar koforar kurbanir lagi-o aroḳṭa bisal anaio.
NUM 8:9 Bade tumi Lebi oḳolre loia Milon-tambur samne aibae, aia hokkol Boni Israilre hono dola ḳorbae.
NUM 8:10 Lebi oḳolre tumi Mabudor dorbaro azir ḳorbae ar hoḳol Boni Israile tarare ataia shofia diba.
NUM 8:11 Imam Harune hoḳol Boni Israilor fokko taki, dulona kurbani hishabe Lebi oḳolre Mabudor samne boḳshia diba, teu tara Mabudor kezmoto ḳam-ḳaz ḳorta farba.
NUM 8:12 Bade Lebi oḳole hou duio bisalor ḳollar ufre atai diba, dile tumi er eḳṭa dia gunar koforar kurbani ar dusraṭa dia zalail kurbani adae ḳorio. Olaḳan Lebi oḳlor nafakir kofora adae oibo.
NUM 8:13 Tumi Lebi oḳolre Harun ar tar fuaintor samne uba ḳoraia, Mabudor name tarare dulona kurbani hishabe shofia dibae.
NUM 8:14 Ou laḳan tumi oinno Boni Israil taki Lebi kandanre alog korbae, teu tara ḳali amar oiba.
NUM 8:15 “Lebi oḳolre pak-pakiza ḳoria dulona kurbani hishabe shofia dia harle, tara Milon-tambur kezmoto aiba.
NUM 8:16 Boni Israil taki basia alog kora i Lebi kandan ḳali amar, ar ḳeuror nae. Forteḳ Israili beṭintor foyla fuar bodla ami Lebi kandanre amar nizor banaisi.
NUM 8:17 Boni Israilor goro zonom loa hoḳol foyla fuain amar. Ami Mishori oḳlor foyla fuaintore marilibar ḳalo, Boni Israilor forteḳ foyla fuare amar lagi fobitro ḳoria raḳsi, ita manshor fut ouk ba foshur baichcha ouk, ita to amar.
NUM 8:18 Ar oḳon ami Boni Israilor foyla fuaintor zagat ḳali Lebi oḳolre amar nizor ḳoia kobul ḳorsi.
NUM 8:19 Ou Lebi oḳolre ami Harun ar tar fuaintore shomzaisi, zate tara Boni Israilor oia Milon-tambur kezmot ḳoroin, tarar gunar koforar usilla ḳoroin. Erlagi Boni Israilor ḳeu amar goror ḳandat aile-o tar ufre kunu gozob lamto nae.”
NUM 8:20 Mabude Lebi oḳlor befare Musa nobire zela hukum disla, ou hukum mafik Musa, Harun ar hoḳol Boni Israile ola ḳorla.
NUM 8:21 Lebi oḳole nizore fak-saf ḳoria hari tarar ḳafoṛ-sufoṛ-o toila. Bade Harune tarare Mabudor name dulona kurbani hishabe shofia dila, ar tarare pak-pakiza ḳorar niote tarar gunar koforar bebosta ḳorla.
NUM 8:22 Erbade Lebi oḳol-o Harun ar tan fuaintor zimmae Milon-tambur ḳadimdarit gela. Gele Mabude Musare Lebi oḳlor befare zela hukum disla, ṭik oula ḳora oilo.
NUM 8:23 Bade Mabude Musare ḳoila,
NUM 8:24 “Lebi oḳlor befare ou niom salu oibo, tarar maze fosish bosor ba tar beshi boyoshi manshe Milon-tambur ḳam-ḳaz ḳorba,
NUM 8:25 oile foinchash bosor oia harle tara oboshor failiba, kezmot ḳam bad dilaiba.
NUM 8:26 Ou shomoy tara nizor ate Milon-tambur kunu ḳam ḳora nished, oile tarar mone saile baiaintore Milon-tambur ḳamo shae-shaijjo ḳorba. Ou niome tumi Lebi oḳlor ḳam-ḳaz ṭik kori dibae.”
NUM 9:1 Boni Israil zati Mishor desh taki baronir dusra bosoror foyla sando, Sinai morubumit Mabude Musa nobire bataila,
NUM 9:2 “Boni Israile zanu ṭik shomoye Azadi Id adae ḳoroin.
NUM 9:3 Tara ou sandor souddo tarik hainja bala amar niom-ḳanun mania id adae ḳorte oibo.”
NUM 9:4 Mabudor hukum faia Musae Boni Israilre zanaila Azadi Id adae ḳorar lagi.
NUM 9:5 Erdae tara foyla sandor souddo tarik hainja bala Sinai morubumit ou id adae ḳorla. Mabude Musare zelaḳan hukum disla, tara ṭik olaḳan hoḳolta ḳorla.
NUM 9:6 Oile tarar maze ḳoyzone mora lashre soia nafak oae, ou din Azadi Id ḳorto farlo na. Erlagi ou din-u tara Musa ar Harun nobir gese gia azir oila.
NUM 9:7 Tara Musare zikaila, “Mora lash soae amra nafak oisi, erlagi Boni Israilor loge ṭik shomoy Mabudor name kurbani ditam fartam na ḳene?”
NUM 9:8 Musae zuaf dila, “Tumrar befare Mabudor hukum na zana forzonto tumra bar sao.”
NUM 9:9 Ou shomoy Mabude Musare ḳoila,
NUM 9:10 “Tumi Boni Israilre ḳo, tara ba tarar bongshor ḳeu zudi mora lashre dora-soar ḳarone nafak bonizae, ba musafir halote lamba soforo taḳe, te tara-o Mabudor name Azadi Id adae ḳorta farba.
NUM 9:11 Dusra sandor souddo tarik hainja bala tara ou id ḳorba. Azadi Idor gustor loge ḳamir saṛa ruṭi ar titta hag furaia ḳaiba.
NUM 9:12 Bian forzonto kunuzat ḳani zoma raḳa nished, kurbanir gustor zekunu aḍḍi banga nished. Azadi Idor ou hoḳol niom-ḳanun tara mante oibo.
NUM 9:13 Oile zera pak-pakiza halote ase, ar zera soforor maze nae, ila kunu zone zudi Azadi Idor kurbani na dey, te Mabudor ṭik kora shomoye kurbani na deoae, tar zati taki tar nam miṭailibae. Tar gunar shaza he faite oibo.
NUM 9:14 “Boni Israilor maze boshot ḳorra bideshi kunu manshe zudi Mabudor name Azadi Id adae ḳorto sae, te ḳorto farbo. Oile ou idor niom-ḳanun mania adae ḳorte oibo. Boni Israil ba bin-deshi hoḳole-u eḳoi niom mante oibo.”
NUM 9:15 Allar gor shahadot tambu zedin ḳaṛa ḳora oilo, ou din kudroti megor kuṭi aia asta gorre gurililo. Hainja taki bian forzonto hara rait i megor kuṭire nuror agunir laḳan deḳa gelo.
NUM 9:16 Erbad taki ola oilo, Allar gor dinor bala hamesha megor kuṭie gura roito, ar raitor bala mono oito ita nuror agunir kuṭi.
NUM 9:17 Ar fobitro tambur ufre taki megor kuṭi zebla horto, ou shomoy Boni Israil oḳol soforo bar oita, bade zeno gia ou kuṭi tir oito, tara oḳano-u tambu oḳol gaṛita.
NUM 9:18 Mabudor hukume tara soforo bar oita ar tan hukume-u sofor bond ḳoria tambu gaṛita. Allar goror ufre zotoboil megor kuṭi roito, tara otoboil kempor bitre roita.
NUM 9:19 Allar goror ufre megor kuṭi beshi din roile, Mabudor hukum mania tara kunu soforo bar oita na.
NUM 9:20 Maze maze megor kuṭi Allar goror ufre tuṛa din roito. Boni Israil to Mabudor hukume kempo roita ar tan hukume-u hirbar soforo bar oita.
NUM 9:21 Ar maze maze ḳali hainja taki bian forzonto megor kuṭi roito. Biane megor kuṭi horigele tara soforo bar oita. Dino ba rait zekunu shomoy megor kuṭi horar loge loge-u tara soforo bar oita.
NUM 9:22 Zotodin megor kuṭi Allar goror ufre roito, otodin tara kempo roita, soforo bar oita na. Ita dui din ouk, eḳ mash ba er beshi oile-o bar oita na, ḳali megor kuṭi horar bade tara soforo bar oita.
NUM 9:23 Mabudor hukume tara kemp gaṛita ar tan hukume-u soforo roana oita. Musa nobir marfote faoa hukum mafik, tara Mabudor ou niom mania solta.
NUM 10:1 Mabude Musare ḳoila,
NUM 10:2 “Tumi rufar fat fiṭaia duiṭa sunga banao. Boni Israilre ekḳano dola ḳorar niote ḍakibar lagi ou sunga bazaio, tarar nanan dol soforo roana oar bala-o tumi oguin bazaio.
NUM 10:3 Ou duio sunga zebla eḳloge bazani oibo, ou shomoy hoḳol Boni Israil tumar samne Milon-tambur duaror gese aia dola oiba.
NUM 10:4 Oile eḳṭa sunga bazani oile ḳali Boni Israilor nanan ḳandanor shordar oḳol tumar samne aia dola oiba.
NUM 10:5 Foyla bar sunga bazaile Milon-tambur fubedi zera tambu ṭangaise, tara roana diba.
NUM 10:6 Dusra bar bazaile douknor galar dol oḳol roana diba. Ikṭa to soforo roana dibar shongkeṭ.
NUM 10:7 Te hoḳol manshore dola ḳorar lagi tumi duio sunga bazaio, oile er shur oibo alada roḳomor.
NUM 10:8 Ou sunga bazaiba imam Harunor bongshor imam oḳole. Iṭa tumrar lagi ar tumrar bongshodoror lagi-o siroḳalin niom.
NUM 10:9 “Nizor desho gia harle tumra zebla kunu zulumbaz dushmonor loge laṛait bar oibae, ou shomoy duio sunga bazaia shongkeṭ dibae. Teu tumrar Mabud Allae tumrar bae kial ḳoria dushmonor at taki tumrare basaiba.
NUM 10:10 Tumrar kushi-bashir onusṭano, tumrar hoḳol ido, sandor foyla din zebla zalail kurbani ba salamoti kurbani dibae, ou shomoy-o sunga bazaio. Ou aoaz hunle tumrar Allae tumrar bae souk firaiba. Mono rakio, ami Alla-u tumrar Mabud.”
NUM 10:11 Boni Israil zati Mishor taki baronir dusra bosoror dusra sandor bish tarik shahadot tambu mani Allar goror ufre taki kudroti megor kuṭi horigelo.
NUM 10:12 Ou shomoy Boni Israile Sinai morubumi taki roana dila. Hou megor kuṭi Faran morubumit aia tir na oa forzonto tara solat-u roila.
NUM 10:13 Musa nobir mazdi Mabudor hukum faia, tara foyla bar ou soforo roana oila.
NUM 10:14 Foyla-u Ehudar fotaḳar tino ḳandanor nanan fouzi dole roana dila, erar neta asla Aminadabor fua Nahish.
NUM 10:15 Erar maze Isaḳor ḳandanor manshor dayitto asil Sugaror fua Notonelor ufre,
NUM 10:16 ar Sobulon ḳandanor manshor dayitto asil Helonor fua Iliabor ufre.
NUM 10:17 Bade Allar goror hoḳolta kula oilo, teu Zarsuni ar Mararia oḳole oḳanor hoḳolta boia loia roana dila.
NUM 10:18 Erar bade Rubenor fotaḳar tino ḳandanor fouzi dole roana dila, erar shordar oila Shadiuror fua Alisur.
NUM 10:19 Erar maze Shimion ḳandanor dayitto asil Shuroshadayor fua Shalumilor ufre,
NUM 10:20 ar Sadu ḳandanor dayitto asil, Duelor fua Iliasofor ufre.
NUM 10:21 Erar bade Allar goror fak-fobitro mal-samana loia Kahati oḳole roana dila. Kahati oḳol zagat gia fosar age-u Allar gor ḳaṛa ḳorar ḳota asil.
NUM 10:22 Erbade Afraim fotaḳar tino fouzi dolor manshe roana dila, erar shordar oila Amihudor fua Alishama.
NUM 10:23 Er maze Manosha ḳandanor dayitto asil Fatoshuror fua Gomolielor ufre.
NUM 10:24 Ar Bin-Iamin ḳandanor dayitto asil Zidaunir fua Abidanor ufre.
NUM 10:25 Hoḳol heshe roana oila Dan fotaḳar tino ḳandanor fouzi dolor manshe, tarar shordar oila Amishadar fua Akiazar. Erar samnor hoḳol fouzi dolre fara dia tarar ḳore ḳore roila.
NUM 10:26 Er maze Ashir ḳandanor dayitto asil Ukranor fua Fozielor ufre,
NUM 10:27 ar Noftali kandanor dayitto asil Inanor fua Ahiror ufre.
NUM 10:28 Ou laḳan Boni Israilor nanan fouzi dol eḳe eḳe roana oila.
NUM 10:29 Erbade Musae Madian deshor tan hour Shuaib nobir fua Hubobre ḳoila, “Mabude amrare ze desh dibar oada ḳorsoin, amra hou desho zairamgi. Te tumi-o amrar loge ao. Mabude to oada ḳorsoin, tain Boni Israilre bout meherbani korba. Oḳon tumi amrar loge aile amra tumare kub maya-doya ḳormu.”
NUM 10:30 Hubobe zuaf dila, “Na, ami zaitam nae. Ami amar desho nizor manshor gese firia zaimugi.”
NUM 10:31 Oile Musae ḳoila, “Na, na, tumi amrare falaia zaio na. Tumi-u amrar fot deḳaora zon. Morubumir maze kun zagat amrar tambu gaṛa usit, ita to tumar zana ase, erlagi tumi-u oilae amrar souk.
NUM 10:32 Huno, tumi zudi amrar loge ao, te Mabude amrare zoto meherbani korar oada ḳorsoin, tumare-o otar baṭ dimu.”
NUM 10:33 Ou laḳan Boni Israile Mabudor faṛ taki roana oia tin dinor fot aguai gela. Ar ziraibar lagi ekkan zaga tukaia bar ḳorar kiale, Mabudor hou fobitro shahadot shonduk tin din dori tarar age age gelo.
NUM 10:34 Kemp taki roana oar bade, dinor bela Mabudor gaibi megor kuṭi Boni Israilor ufre roito.
NUM 10:35 Ou shahadot shonduk roana oile-u Musae ḳoita, “O Mabud, soloukka. Tumar dushmon oḳol sairobae sitri zauk, tumare zetae ingshain, ita tumar samon taki bagouk.”
NUM 10:36 Ar zebla ou shonduk tamizito, tain ḳoita, “O Mabud, laḳ laḳ Boni Israilor gese tumi firia ao.”
NUM 11:1 Boni Israile nizor duk-koshṭor lagi bezar oia boḳa-zoḳa ḳorla. Erlagi Mabude tarar ita hunia gusa oigela. Tain gozobi aguin faṭaila ar ou aguin tarar maze zolilo, ete kempor kinarar kisu ongsho aguine zoligelo.
NUM 11:2 Erdae tara Musa nobir gese gia ḳanda-ḳaṭi lagaila, teu Musae Mabudor dorbaro dua ḳorae aguin nibi gelo.
NUM 11:3 Mabudor aguin tarar maze zolchil ḳori, ou zagar nam oigelo Tabera.
NUM 11:4 Boni Israilor loge oinnainno zatir zeta manush asla, tara dusra zator mozar kunu ḳanir lagi fagol bonigela, ar erar deḳa-deki Boni Israile-o hirbar ḳanda-ḳaṭi kori koila, “Ish, amra zudi gust ḳaitam fartam!
NUM 11:5 Mishoro taḳte to bina foyshae magna mas ḳaitam, hono tormuz, fiaz-roshun, kira, hag-torḳari hokkolta ḳaitam, ita oḳono mono foṛer.
NUM 11:6 Oile oḳon amrar ḳoilja hukai gese. Ino to ḳali manna saṛa ḳaoar ar kunta-u nai.”
NUM 11:7 Ou manna deḳte ḍula baḳoror laḳan, er rong oilo kismisor laḳan.
NUM 11:8 Manshe sairobae taki manna tukaia ania gail-siadi kuṭia ba hil-faṭadi sesia guṛa ḳorta. Bade ita fatilo una dia ba fiṭa banaia ḳaita. Ita ḳaite teldi banail fiṭar laḳan moza.
NUM 11:9 Raitor bala Boni Israilor kempor ashe-pashe kua foṛto, ou kuar loge oia behesti kani manna-o foṛto.
NUM 11:10 Musa nobir ḳano ailo, fortek goror manshe zarzir tambur duaror gese ubaia ḳandira. Erdae tain kub bezar oila, ar Mabud-o gusae aguin oigela.
NUM 11:11 Teu Musae Mabudre ḳoila, “Tumi kene tumar i gulamre ila bifodo falailae? Ami kita dush ḳorlam, ze ḳarone ota manshor bar amar ḳando dilae?
NUM 11:12 Ami kunu tarare feṭo loisi ni, ba tara amar feṭ taki zonmise ni? Tumi tarar baf-dadaintor gese ze desh dibar oada ḳorsilae, tarare hono nibar lagi amare ḳene tarar falok-bafor laḳan banaiso, ar tarare kulo ḳori nibar ḳota ḳene ḳoirae?
NUM 11:13 Ita manshor ḳanir lagi ami oḳon gust kuai faitam? Tara amar gese ḳali gust gust ḳoia sillaira.
NUM 11:14 Tarar zimma neoa boṛo moshkil, amar eḳar fokke i zimma neoa shombob nae.
NUM 11:15 Tumi zudi amare i moshkilo falao, te tumar duai dia ḳoiar, oḳon-u amare zane marilao. Ar ḳoiram, ami zudi tumar rohomotor tole taki, te nizor souke nizor behalloti dosha amare deḳaio na.”
NUM 11:16 Teu Mabude Musare ḳoila, “Boni Israilor maze tumi zarare murobbi neta ar ijjoti hishabe sino, erar maz taki shottoir zon murobbi netare loia amar gese ao. Tumi tarare ḳo, tara Milon-tambur gese aia tumar loge ubaita.
NUM 11:17 Ami hono lamia aia tumar loge batchit ḳormu. Tumar maze Allar ze ruhu asoin, ou ruhu ami tarar ufre-o dan ḳormu. Manshor zimmadari boia nite tara-o tumare shaijjo ḳorba. Teu tumar eḳla boa lagto nae.
NUM 11:18 Ar tumi ota manshore zanai deo, tara fak-fobitro oia ḳailkur lagi zuit roita, ḳail-u tara ḳanir gust faiba. Tara to gustor lagi Mabudor dorbaro ḳanda-ḳaṭi koria ḳoisil, Mishoro taḳte-u tara arame asil. Te ḳail Mabude tarare gust diba ar tara ḳaiba.
NUM 11:19 I gust ḳali eḳdin-duidin, fasdin-doshdin, ba bishdin nae,
NUM 11:20 fura eḳ mash bori kaiba. Ḳaite ḳaite tarar naḳedi bar oibo, bade ar zane kulaito nae. Ami ila goṭaimu, ḳaron tumrar loge ze Mabud boshot ḳoroin, ou Mabudre tumra mancho na. Tan samne ḳanda-ḳaṭi koria ḳoiso, Mishor taki horia aoa bule tumrar lagi ṭik oise na.”
NUM 11:21 Ikan hunia Musae ḳoila, “Ḳali zuddo ḳorar zuka-u to soy laḳ manush amar loge asoin, ar tumi koirae fura eḳ mash bori tarare gust ḳabaibae.
NUM 11:22 Te hokkol goru-meṛa zobo ḳorle-o to oto manshor fuito nae, ar doriar hoḳol mas maria anille-o kulaito nae.”
NUM 11:23 Mabude zuaf dila, “O Musa, Mabudor kudroti bol oto ḳomzur ni? Te tumi deḳbae, ami tumare zeta ḳoisi, ita hasa, na misa.”
NUM 11:24 Teu Musa bare gela, gia ota manshore Mabudor hukum zanaila. Ar Boni Israilor shottoir zon murobbi netare ania Milon-tambur sairobae ḳaṛa ḳoraila.
NUM 11:25 Ou shomoy gaibi megor saḳat oia Mabud lamia aila, aia Musa nobir loge batchit ḳorla. Musar ufre Allai ze ruhu asla, Mabude ou shottoir zon netar ufre-o ou ruhur kisu ongsho dila. Ou ruhu tarare dan ḳorar bade, tara kisu shomoy sufi-dorbeshor eshki bab deḳaila, oile bade ar ila oise na.
NUM 11:26 Ar ou shottoir zon murobbi netar mazor duizon murobbi kempor bitre roigela, erar nam Ildad ar Midad, tara Milon-tambur gese gesla na. Tebou Allai ou ruhu tara-o faila, faia tara kempor bitre roia sufi-dorbeshor eshki bab deḳaila.
NUM 11:27 Ita dekia eḳ zuan beṭae douṛaia gia Musare ḳoila, “Huzur, hunchoin ni? Ildad ar Midad namor duio murobbie kempor bitre sufi-dorbeshor eshki bab deḳaira.”
NUM 11:28 Ou shomoy Nunor fua Iusae Musare ḳoila, “O amar malik, afne erare nished deukka.” Ou Iusa zuankir shuru taki-u Musa nobir ḳas ḳadim asla.
NUM 11:29 Musae enre ḳoila, “Amar man-shomman-u tumar gese boṛo oigelo ni? Ami sairam, Mabudor hoḳol bondae-u sufi-dorbeshi faukka, ar Mabude afon ruhu tarare dan ḳoroukka.”
NUM 11:30 Erbade Musa ar Boni Israilor murobbi neta oḳol kempo firia gelagi.
NUM 11:31 Bade Mabudor hukume boṛo eḳ tufan ailo. Ou tufane doriar far taki kuel faki ṭelia ania kempor sairo gala borai dilo. Eḳdinor fot foriman zaga fakie borigelo. Fakir fal maṭi taki dui at usa tub oia, gis lagia foṛi roilo.
NUM 11:32 Teu hou din, hou rait, ar bador asta din manshe bare gia kuel fakin tubaia anla. Tara forteḳe ḳompokke foinchash mon ḳori faki dola ḳorlo. Fakin dola ḳoria kempor sairobae tara boaia toila.
NUM 11:33 Oile fakir gust tarar muko haranir loge loge-u Mabud gusae aguin oigela. Gusa ḳoria tain bezuita gozobi bemar ḍalila.
NUM 11:34 Erlagi i zagar nam deoa oilo Kibrut-Hutaba, mani lalosi oḳlor ḳoybor, ḳaron ou lalosi oḳolre manshe ono ḳoybor disil.
NUM 11:35 Erbade tara Kibrut-Hutaba saṛia gelagi, gia Hazirut namor zagat roila.
NUM 12:1 Hozrot Musae Itiopia deshor eḳzon beṭire bia ḳorsla. Enre bia ḳorae Musar boin Moriom ar bai Harune Musar birudde mat-ḳota matila.
NUM 12:2 Tara ḳoila, “Mabude ḳali Musar marfote matoin ni? Amrar usillae-o matoin na ni?” Ikan Mabude hunla.
NUM 12:3 Ashole Musa nobi to asla eḳzon gorima saṛa manush. Zogotor maze ila gorima saṛa ar kunu manush asil na.
NUM 12:4 Musar birudde Harun ar Moriomor mat-ḳota hunia-u Mabude Musa, Harun ar Moriomre ḳoila, “Tumra tinozon bar oia Milon-tambur gese ao.” Teu era tinozon ono aila.
NUM 12:5 Ou shomoy Mabude-o kudroti megor saḳat oia lamia aila, aia Milon-tambur duaror ges taki Harun ar Moriomre ḍakila. Tara aguaia aile
NUM 12:6 Mabude ḳoila, “Tumra amar ḳota huno. Tumrar maze kunu pir-dorbesh taḳle, ami Mabude doroshonor mazdi amar nizore tar gese zair ḳori ar kuabe tar loge batchit ḳori.
NUM 12:7 Oile amar gulam Musar loge ila ḳori na. He amar asta shongsharor hoḳol taki bishashi zon.
NUM 12:8 Ami tar loge samna-samni oia kula-kuli batchit ḳori, kunuta batuni raki na. Ami Mabude ze surote tare didar dei, he amare ola deḳe. Erbade-o tumra amar gulam Musar birudde matite ḍorailae na ni?”
NUM 12:9 Erlagi Harun ar Moriomor ufre Mabud gusae aguin oigela, oia tain horia gelagi.
NUM 12:10 Megor saḳa zebla Milon-tambu taki ufre uṭigelo, ou shomoy deḳa gelo, Moriomor asta gotro fosa-kusṭo bemare dudor laḳan dola oigese. Harune Moriomor bae saia ou halot deḳla.
NUM 12:11 Dekia tain Musare ḳoila, “O amar malik, amra na buzia ze guna ḳorilisi, i kosuri kan tumi mono rakio na.
NUM 12:12 Maʼr feṭo taki zonom oar bala ze huruttar ordeḳ shoril koy oigese, tumi Moriomre ila banaio na.”
NUM 12:13 Teu Musae ḳandia Mabudor dorbaro aroz ḳorla, “O Alla, tumi amar boinor bemar shifa ḳori deo.”
NUM 12:14 Mabude Musare ḳoila, “Tair bafe zudi tair muko ḳali sef falaita, te shormaia tai shat din goror bare roilo one na ni? Ola shatdin taire kempor bare alog raḳo, bade bitre anbae ne.”
NUM 12:15 Erlagi Moriomre shat din kempor bare horai toila. Enre bitre anar ag forzonto manshor soforo baroni bond roilo.
NUM 12:16 Bade Boni Israil oḳol Hazirut saṛia Faran morubumit gia kemp gaṛila.
NUM 13:1 Erbade Mabude Musare ḳoila,
NUM 13:2 “Boni Israilre ami ze Kenan desh ditam sairam, ou deshor hal-hokikot dekia aoar lagi tumi baro ḳandan taki baro zon shordar faṭao.”
NUM 13:3 Mabudor hukum faia Musae ola-u ḳorla. Tain Faran morubumi taki zerare faṭaila, era hoḳol-u Boni Israilor shordar.
NUM 13:4 Era oila: Ruben ḳandanor Zakuror fua Shammua,
NUM 13:5 Shimion ḳandanor Kurir fua Shofat,
NUM 13:6 Ehuda ḳandanor Zifunnir fua Kalut,
NUM 13:7 Isaḳor ḳandanor Iusufor fua Zigal,
NUM 13:8 Afraim ḳandanor Nunor fua Husia,
NUM 13:9 Bin-Iamin ḳandanor Rofur fua Foloti,
NUM 13:10 Sobulon ḳandanor Soidor fua Goddiel,
NUM 13:11 Iusufor fua Manosha ḳandanor Sushir fua Gaddi,
NUM 13:12 Dan ḳandanor Gomollir fua Ammiel,
NUM 13:13 Ashir ḳandanor Mikailor fua Sotur,
NUM 13:14 Noftali kandanor Boshiror fua Noib,
NUM 13:15 ar Sadu ḳandanor Makir fua Guzoyel.
NUM 13:16 Kenan deshor hal-hokikot zania aibar lagi guia hishabe Musa nobie erare faṭaila. Tain Nunor fua Husiare Iusa ḳoia ḍakita.
NUM 13:17 Kenan desho faṭanir bala Musae tarare ḳoila, “Tumra Negeb morubumir mazedi gia faṛia elaḳat hamaibae.
NUM 13:18 Hamaia deḳbae, ou deshḳan kila. I deshor bashinda manush ḳom na beshi, tara ḳomzur na boloban.
NUM 13:19 Tarar deshḳan bala na mondo? Deshor ṭaun oḳol usa baunḍori oal ḳora, na baunḍori saṛa?
NUM 13:20 Hinor maṭit rosh ase ki na, gas-fala ase ki na? Ar aoar shomoy dekio, farle hou deshor kunu fol-mul loia aio.” Ou shomoy to angur faḳar shomoy aise.
NUM 13:21 Teu tara Zin morubumi taki shuru ḳoria Hamator bae Rahob forzonto gia asta deshor hal-hokikot dekia aila.
NUM 13:22 Zaoar ḳalo tara Negeb morubumi oia Hebron ṭauno gia azila. I Hebron ṭaun banail oisil Mishor deshor Suan ṭaun bananir shat bosor age. Hino foyluan Anaki kandanor tinzon manush asil, erar nam oilo Ahiman, Shisai, ar Talmai.
NUM 13:23 Bade ou guia oḳol Ashkul namor faṛia ḳalor faro taki eḳ soṛi angur shudda asta eḳ lot ḳaṭia loia aila. I anguror soṛi tarar duizone bang dia boia anla. Loge kisu anuar ar ḍumur fol-o anla.
NUM 13:24 Boni Israilor shordar oḳole hon taki ou anguror soṛi kaṭae ou zagar nam oigelo, Ashkulor ḳal, mani soṛir ḳal.
NUM 13:25 Asta Kenan deshor hal-hokikot dekia hari, sallish din bade tara hoḳol firia aila.
NUM 13:26 Ou guia oḳol Faran morubumir Kadesh namor zagat firia aila, ono Musa nobi, imam Harun ar Boni Israil oḳol asla. Era aia hoḳolre honor ḳobor-antor zanaila ar hou deshor fol-mul deḳaila.
NUM 13:27 Tara Musare ḳoila, “Afne amrare ze desho faṭaisla, amra hono gia deḳlam, hi deshḳan hasau dud ar mour banḍar-ala desh. Ou deḳoukka, hou deshor fol.
NUM 13:28 Oile hinor manush kub foyluan ar tarar ṭaun-o boṛo boṛo ar usa baunḍori kora. Amra Anaki foyluan ḳandanor manshore-o hono deḳsi.
NUM 13:29 Amaleki oḳol boshot ḳoroin Negeb morubumit. Hiṭṭi, Zibuzi ar Amuri oḳol faṛi elaḳat roin. Ar Kenani oḳlor ḳeu ḳeu doriar ḳandat ar ḳeu ḳeu Zordan gangor faro roin.”
NUM 13:30 Ou shomoy Musar samne zeta manush dola asla, Kalute erar shurgul tamaia ḳoila, “Amrar lagi zorur oilo hono gia ou desh doḳol ḳora, ar ita amra farmu-o.”
NUM 13:31 Ikan hunia tan logor guia oḳole ḳoila, “Na, na, ita manshor loge laṛai kora amrar lagi oshombob, ita amra taki bout bolala.”
NUM 13:32 Era hou deshor befare mongoṛa misa matia ḳoila, “Amra ze desh deḳat geslam, i deshe tar proza oḳolre gilia ḳailae. Hinor manush kub usa-muṭa foyluan.
NUM 13:33 Amra hino Nefili zator manshore-o deḳsi, ita deḳte doitto-danobor laḳan. Amra to tarar gese tuchcho fifṛar laḳan, tara-o amrare ola fifṛa mono ḳorse.” Zano to, oḳonkur Anaki zati ou Nefili oḳlor bongshodor.
NUM 14:1 Ikan hunia hoḳol Boni Israile silla-silli lagailo. Tara hara rait ḳanda-ḳaṭi korlo.
NUM 14:2 Hozrot Musa ar Harunor birudde bout ḳota-barta matilo. Tara hoḳole milia Musa ar Harunre ḳoilo, “Haere hae! Amra ḳene hou Mishor desho ba morubumit morlam na? Hono mora-u to bala asil.
NUM 14:3 Mabude ḳene amrare zuddor moydano marar niote ou desho nira? Honor dushmon oḳole amrar bou-baichchainre ḳaṛia niba. Er taki Mishoro firia zaoa-u amrar lagi bala nae ni?”
NUM 14:4 Tara eḳe-oinne ḳoilo, “Ao, amra eḳzon neta banaia hirbar Mishoro firia zaigi.”
NUM 14:5 I halot dekia Musa ar Harun asta Boni Israil shomazor samne maṭit soizdat foṛla.
NUM 14:6 Ar ze guia dole ou deshor hal-hokikot dekia aisla, tarar maz taki Nunor fua Iusa ar Zifunnir fua Kalute monor duke nizor gotror ḳafoṛ-sufoṛ siṛilla,
NUM 14:7 siṛia Boni Israil shomazor hokkolre ḳoila, “Huno, amra ze desh deḳat geslam, i deshḳan kub shundor.
NUM 14:8 Mabud zudi amrar ufre kush ar razi taḳoin, te amrare hou desho nia far ḳorba, tain dud ar mour banḍar-ala ou deshḳan amrare dan ḳorba.
NUM 14:9 Huno, tumra Mabudor morzir ulṭa ḳam ḳorio na. Tumra hi deshor manshore ḍoraio na, tarare gilia ḳaite-o amrar deri oito nae. Tumra itare ḍoraio na, tarar matar ufror saya nai, amrar loge to Mabud asoin.”
NUM 14:10 Oile tara hoḳole-u ḳoila Iusa ar Kalutre fattor maria marilta. Ou shomoy Milon-tambu taki asta Boni Israil shomazor samne Mabudor kudroti nur zair oilo.
NUM 14:11 Mabude ḳoila, “O Musa, itae amare ar ḳotodin elami korbo? Tarar samne oto keramoti nishana deḳanir bade-o, tara ar ḳotodin amare ekin ḳorto nae?
NUM 14:12 Te huno, ami tarar ufre boṛo ek gozob ḍalimu, amar oada ḳora hou deshor malikana ḳaṛia nimugi. Bade ami tumar maz taki ita tone aro boloban, aro boṛo noya eḳ zati foyda ḳormu.”
NUM 14:13 Ikan hunia Musae ḳoila, “O Mabud, tumi zudi ila ḳoro, te Mishori oḳole ita hunba. Ar tumi to Mishor taki ita manshore tumar nizor kudrotie bar ḳori ancho.
NUM 14:14 Oḳon Mishori oḳole i deshor manshore-o ita zanai diba. Te O Mabud, inor manshe to emne-u zanilisoin zen, Boni Israilor loge loge tumi aso, tumare kub daro taki deḳa zae. Tara hunchoin, tumar nuror megor saya erar ufre ase, tumi dinor bala megor kuṭi ar rait oile aguinor kuṭir surote erar age age ro.
NUM 14:15 Oḳon tumi zudi era hoḳolre eḳloge marilao, te zoto zatir manshe tumar ita kudroti kamor ḳobor hunche, tara ḳoiba,
NUM 14:16 Mabude Boni Israilre ze desh dibar oada ḳorsla, hi desho loia zaoar ḳemota tan nai, erlagi tain erare morubumit nia marilisoin.
NUM 14:17 “Te, O din-duniar malik, tumi age zela ḳoislae ola kudroti kam zair ḳoro. Tumi nu ḳoislae,
NUM 14:18 Mabude gusa ḳoroin dir gotie, tan maya-mohobbotor kunu shima nai, tain manshor oinnae ar naformanir mafi dein. Oile dushi zonre shaza-o dein, baf-dadar naformanir shaza tar nati-futi forzonto bortain.
NUM 14:19 Te tumar duai dia ḳoiram, Mishor desh saṛia aoa taki oḳon forzonto tumi erare zela mafi dirae, tumar hou mayar ḳatire tarar oḳonkur gunare-o ola maf ḳori dilao.”
NUM 14:20 Teu Mabude ḳoila, “Aichcha, tumar ḳotae ami itare maf ḳori dilam.
NUM 14:21 Oile ami zinda asi ikan zela hasa, asta zogoto amar lila-ḳelae bora iṭa-o zela hasa, ou laḳan aroḳ hasa oilo,
NUM 14:22 ita eḳzone-o amar oada ḳora hi desh deḳar shuzug oito nae, ze desh ditam ḳori ami tarar baf-dadar gese oada ḳorslam. Ḳaron itae amar nuror tozolli deḳsoin, tara Mishoro taḳte ar ou morubumit aia-o amar kudroti lila-ḳela deḳar bade-o itae amare manchoin na, borong dosh-doshbar tara amare forikka ḳorsoin. Te tara zotozone amare elami korse, ita eḳzone-o hi desh deḳar ḳofal oito nae.
NUM 14:24 Oile amar bonda Kalutor dilor bab ila nae, he amar hukum furafur mane. Erlagi ze desh deḳat he gesil, ami tare hou desho nimu, tar aolad oḳol hi deshor malik oiba.
NUM 14:25 Huno, hou deshor faṛia tol zagainto oḳon Amaleki ar Kenani oḳole boshot ḳorra. Te samnor ḳail tumra fisedi gia Akaba shagoror faredi morubumir bae roana oio.”
NUM 14:26 Bade Mabude Musa ar Harunre ḳoila,
NUM 14:27 “Ou naforman zatie amar birudde ar ḳotodin ber-beri korto? Tara amar birudde zeta mat mater, ita to ami hunchi.
NUM 14:28 Oḳon tumra gia Boni Israilre ḳo, ami Mabude nizor zindegir ḳosom ḳaia ḳoiram, ami tumrar mukor zeta mat-ḳota hunchi, ami-o tumrar loge ṭik ola-u ḳormu.
NUM 14:29 Manush gonibar shomoy tumrar bish bosor ba tar beshi boyoshor zetare gona oisil, mani zetae amar birudde ber-beri korse, itar lash ou morubumir maze foṛi roibo.
NUM 14:30 Ami tumrare ze desh ditam ḳori oada ḳorslam, ḳali Zifunnir fua Kalut ar Nunor fua Iusa saṛa ar ḳeu gia hi desho hamanir ḳofal oito nae.
NUM 14:31 Ar tumrar zeta huruttare ḳaṛia neoa oibo ḳoislae, ami ou huruttainre-u hou desho far ḳormu, tara-u oiba hi deshor malik, ze deshre tumra elami korso.
NUM 14:32 Oile tumrar lash ou morubumit foṛi roibo.
NUM 14:33 Ou morubumir feṭo tumrar ekkere aḳeri zon na mora forzonto, tumrar beimanir lagi tumrar aolad oḳole sallish bosor ono goru-sagolor raḳali korba.
NUM 14:34 Kenan deshor hal-hokikot dekia aite ze sallish din lagsil, er eḳ dinor bodla eḳ bosor, oula muṭ sallish bosor tumrar naformanir lagi koshṭo ḳorbae. Teu buzbae, ami zebla ḳeuror birudita ḳori er dosha kila oy.
NUM 14:35 Te ami Mabude ḳoiram, ou naforman zatir zeta manshe amar birudde dol bandise, ita hokkolṭi ou morubumit morba.”
NUM 14:36 Kenan deshor hal-hokikot zanar lagi Musae ze guia dolre faṭaisla, erar mazor zeguin firia aia beimani kobor roṭaia, hoḳol Boni Israilre dia Musar birudde boḳa-zoḳa ḳoraisil,
NUM 14:37 mani zera hou deshor befare aze-baze mat roṭaisil, tara hokkol-u moha gozobi bemare Mabudor samne morigela.
NUM 14:38 Ou guia dolor maz taki kali Nunor fua Iusa ar Zifunnir fua Kalut basia roila.
NUM 14:39 Hozrot Musae Mabudor ḳota hoḳol Boni Israilre zanaila. Ita hunia tara monor duke ḳator oigela.
NUM 14:40 Bador din biane tara hou faṛi elaḳat zaoar lagi tiar oia ḳoilo, “Ou deḳo, amra zairamgi. Amra to guna ḳoria harsi, te oḳon amra Mabudor oada ḳora desho-u zaitamgi.”
NUM 14:41 Oile Musae ḳoila, “Tumra Mabudor hukumor ulṭa zairae ḳene? Tumrar niot fura oito nae.
NUM 14:42 Huno, tumra zaio na, ḳaron Mabud tumrar loge nae. Dushmon oḳlor gese tumra aribae.
NUM 14:43 Hino gia tumra Amaleki ar Kenani oḳlor mukamuki oibae. Ar Mabudor log saṛia gesogi kori, tain tumrar loge roita nae. Erlagi tumra zuddor muko morbae.”
NUM 14:44 Tebou tara tan ḳota ulṭaia hou faṛi elaḳa bae roana dilo. Oile Musa tarar loge gela na ar Mabudor fobitro shahadot shonduk-o kempor bitre roigelo.
NUM 14:45 Tarare dekia-u hou faṛia elaḳar Amaleki ar Kenani oḳol lamia aia hamla salailo, ar honor Horma ṭaun forzonto ḳedaia nilo.
NUM 15:1 Mabude Musare ḳoila,
NUM 15:2 “Tumi Boni Israilre zanai deo, ami ze deshḳanre tumrar nizor desh hishabe dan ḳorram, tumra zebla hou Kenan desho zaibae,
NUM 15:3 gia amare kush raḳar niote agunit deoa geran ala zekunu kurbani hishabe tumrar fal taki zebla gai-goru ba meṛa-sagol ania amar name dibar niot ḳorbae, ar zalail kurbani, kunu mannot furonor kurbani, hoḳol nomunar nofol kurbani, ba zekunu idor kurbani dile,
NUM 15:4 kurbanir forteḳ foshur loge dan-gomor sodga-o dibae. Ou sodgar lagi dui sher moydare eḳ sher teldi maḳaia ḳai banaia anbae.
NUM 15:5 Oile kurbanir foshuṭa zudi meṛa-baichcha oy, te iṭar loge shorbot-fanir sodga hishabe anguror eḳ sher shorbot-o dibae.
NUM 15:6 Ar ou foshu zudi meṛa oy, te tar loge dan-gomor sodga hishabe shua sher teldi maḳaia sair sher moyda dibae.
NUM 15:7 Shorbot-fanir sodgar lagi lagbo anguror shua sher shorbot. Ita ania amare kush ḳorar geran ala kurbani hishabe dite oibo.
NUM 15:8 Tumra zudi zalail kurbani, mannot furonor kurbani ba salamoti kurbanir lagi kunu goru loia ao,
NUM 15:9 te erloge dan-gomor sodga hishabe soy sher moydare dui sher teldi maḳaia ḳai ante oibo.
NUM 15:10 Ar shorbot-fanir sodgar lagi anguror dui sher shorbot-o ante oibo. “Ita oilo agunit deoa kurbani, i kurbanir dumar gerane ami kushi oi.
NUM 15:11 Kurbanir fortek goru, meṛa, meṛa-baichcha ba sagolre ou niome kurbani dibae.
NUM 15:12 Tumra zoto foriman foshu-u kurbani deo na ḳene, forteḳ foshur loge ou niome sodga-o dibae.
NUM 15:13 “Huno, ami Mabudre kush ḳorar niote, zekunu geran ala agunit deoa kurbani adae ḳorar shomoy, forteḳ Boni Israile ou niome kurbani dibae.
NUM 15:14 Oinno zatir kunu musafir ba tumrar loge boshot ḳorra kunu bin-deshie zudi, amare kush ḳorar niote agunit deoa geran ala kurbani dito sae, te he-o tumrar laḳan eḳoi niom mante oibo.
NUM 15:15 Oarishor for oarish dori ou niom zari roibo. Tumrar shomazor hoḳlor lagi ou niom salu roibo, ita tumra o ba tumrar loge boshot ḳorra bin-deshi oile-o, hoḳlor lagi-u oarishor for oarish dori ou eḳoi niom zari roibo. I befare ami Mabudor gese tumra zela, bin-deshi oḳol-o oula, hoḳol homan.
NUM 15:16 Tumrar lagi ar tumrar maze boshot ḳorra bin-deshi oḳlor lagi eḳlaḳan hukum-ahkam ar eḳoi shoriot salu roibo.”
NUM 15:17 Erbade Mabude Musare ḳoila,
NUM 15:18 “Tumi Boni Israilre zanao, ami Mabude tumrare ze desho niar, hono gia harle,
NUM 15:19 tumra zebla hou deshor foy-foshol ḳaibae, ou shomoy tumra itar kisu ongsho amar dorbaro sodga hishabe dibae.
NUM 15:20 Tumrar ḳetor foyla daoa fosholor moyda dia ekkan ruṭi banaia amar name sodga dibae. Girost-baṛir sodgar laḳan dibae.
NUM 15:21 Foyla daoa fosholor ou sodga, oarishor for oarish dori lilla-sodga hishabe tumra amar name dibae.
NUM 15:22 “O Musa, tumi Boni Israilre ḳo, ami Mabude tumar mazdi zoto hukum-ahkam disi, tara zudi na zania ota kunu eḳṭa hukum bangilae,
NUM 15:23 ita hoḳol hukum to deoar shomoy taki oarishor for oarish dori zari roy,
NUM 15:24 te i ozana befarṭa zanar bade-u asta Boni Israil shomaze milia kurbani dite oibo. Tara eḳṭa bisal dia ami Mabudre kush ḳorar niote geran ala zalail kurbani dibo, erloge niom mafik dan-gomor sodga ar shorbot-fanir sodga dibo. Ar gunar koforar lagi egu sagol-o kurbani dibo.
NUM 15:25 Imam sabe asta Boni Israil shomazor ou ozana gunar kofora adae ḳorba, teu tara mafi faiba. Tara to ichcha ḳoria i naformani korse na, tarar bulor lagi Mabudor name agunit deoa kurbani ar gunar koforar kurbani-o adae ḳorse.
NUM 15:26 Teu asta Boni Israil shomaz ar tarar maze boshot ḳorra bin-deshi manshore-o maf ḳora oibo, zudio tara hoḳole-u i bul-ḳosuri korse.
NUM 15:27 “Oile ḳeu zudi kali eḳla bul ḳoria monor ozante kunu naformani korilae, te gunar koforar kurbanir lagi he eḳ bosor boyoshi eḳṭa sagi loia azir oite oibo.
NUM 15:28 Ar ze zone monor ozante ou guna ḳorse, imam sabe Mabudor dorbaro tar gunar koforar bebosta ḳorba. Ou kurbani kobul oile he mafi faibo.
NUM 15:29 Bul ḳoria monor ozante ze manshe naformani korilae, ou laḳan forteḳ manshor lagi i niom salu roibo, he Boni Israil ouk, ba bin-deshi ouk, eḳoi niome solbo.
NUM 15:30 “Oile Boni Israil ba tarar maze boshot ḳorra oinno kunu zatir ḳeu zudi ichcha ḳoria kunu naformani kore, te he shoyong Mabudre beijjot ḳore. Ila naformanir lagi shomaz taki ogur nam miṭailite oibo.
NUM 15:31 Mabudor hukumre elami korae ar naformani korae ogur nam miṭailite oibo, tar i gunar dae-bar tar ufre-u bortaibo.”
NUM 15:32 Boni Israil morubumit soforor ḳalo eḳ Zummabare eḳzon manshore daru tubanit deḳla.
NUM 15:33 Zummabare daru tubanit deḳae ou manshe tare doria Musa nobi, imam Harun ar hoḳol Boni Israilor samne loia aila.
NUM 15:34 Ou laḳan manshore kita ḳorte oibo, i hukum to Allae oḳono zanaisoin na, erlagi ere tara bondi kori toilo.
NUM 15:35 Ou shomoy Mabude Musare zanaila, “Ou manshore zane marilite oibo. Tare kempor bare nia hoḳol Boni Israile fattordi iṭaia marilibae.”
NUM 15:36 Teu Musar marfote faoa Mabudor hukum mafik, Boni Israile tare kempor bare nia fattor maria marilla.
NUM 15:37 Erbade Mabude Musare ḳoila,
NUM 15:38 “Tumi Boni Israilre ḳo, tumra zarzir lebasor faiṛo zazoir lagao, ar zazoiror fortek giṭre lilua sutadi fesaia mul ḳafoṛor loge zuṛa dio. I hukum oarishor for oarish dori manbae.
NUM 15:39 I zazoir laganir ḳaron oilo, otar bae saile tumra amar hokkol hukumor ḳota iad ḳoria ota amol ḳorbae. Teu tumra amar loge kunu beimani kortae nae, tumrar souḳor ar dilor bod ḳaishor ato nizore shofitae nae.
NUM 15:40 Amar hoḳol hukum-ahkam amol ḳorar ḳota tumrar iad roibo, tumrar Allar name tumra fak-forezgar bondar halote roibae.
NUM 15:41 Ami tumrar Mabud Alla. Tumrar Mabud oar kiale, ami tumrare Mishor taki bar ḳori anchi. Ami-u Alla, tumrar Mabud.”
NUM 16:1 Lebi kandanor Kurahe Musa nobir birudde dushmoni lagailo. Ou Kurah oilo Kahati gusṭir Izharor fua. Tar loge Ruben ḳandanor Iliabor fua Daton ar Abiram, ar Foletor fua Oune-o Musa nobir birudita ḳorlo. Erar dolo Boni Israilor aro aṛai-sho zon namḳora murobbi neta-o shorik oila.
NUM 16:3 Oia tara dol bandia Musa ar Harunre ḳoila, “Tumra to kub beshi baṛabaṛi korrae. Asta Boni Israilor forteḳ manush-u zebla fak-fobitro, Mabud-o tarar loge asoin. Te tumra Mabudor bonda oḳlor ufre ustadi korrae ḳene?”
NUM 16:4 Ikan hunia Musa nobi ufoit oia maṭit foṛla.
NUM 16:5 Bade tain Kurah ar tar dolor manshore ḳoila, “Ḳail biane-u Mabude deḳaiba, ḳe tan bonda, ar ḳe fak-fobitro. Tain zare fosond ḳoroin, ḳali tarare-u tan ḳasat aite diba.
NUM 16:6 O Kurah, huno, tumi ar tumar logor hoḳole ek kam ḳoro, samnor ḳail tumra hoḳole eḳṭa ḳori agor dani loia Mabudor samne agor-kushboy zalao. Tain zare fosond ḳorba, buzilio he-u tan fak-fobitro bonda. Tumra Lebi kandanor manush to beshi baṛigese.”
NUM 16:8 Musae tare eoḳan ḳoila, “Tumra Lebi oḳole amar ekkan ḳota huno.
NUM 16:9 Tumra mono ḳorrae ni Mabudor Kaba goro ebadoti kora ar shomazor manshor kezmot ḳora ita ekkere huru-muru befar? Huno, Boni Israilor Allae shomazor oinnainno manush taki tumrare basia nia, tan nizor didaro anchoin, zate tumra ou ḳam ḳoro.
NUM 16:10 Tain to tumare ar oinnainno Lebi oḳolre nizor daro aibar shuzug disoin, oile tumra dekiar imamotir fodre-o doḳol ḳortae sairae.
NUM 16:11 Harun ar kun manush zen, tumra tar birudde boḳa-zoḳa ḳorrae? Tumi ar tumar dolor manshe to Mabudor birudde-u dol bandiso.”
NUM 16:12 Erar bade Musae ḳobor dila, Iliabor dui fua Daton ar Abiram aita ḳori, oile tara zanailo, “Amra oto ṭeḳat nae.
NUM 16:13 Tumi ou morubumit ania martae ḳori, dud ar mour banḍar-ala hou Mishor desh taki amrare bar ḳori ancho, hi desho to kuntar-u obab asil na. Er bade-o amrar ufre beṭagiri deḳanit lagso.
NUM 16:14 Ar tumi to amrare hou laḳan kunu dud ar mour banḍar-ala desho-o niso na, kunu zomi-zoma ba angur baganor malikana-o diso na. Tumi ita manshore anda banaia raḳtae sao ni? Na, amra zaitam nae.”
NUM 16:15 Ita hunia Musa kub gorom oia Mabudre ḳoila, “Mabud, tumi erar kurbani kobul ḳorio na. Ami to tarar kunu ḳeti korsi na, tarar egu gada-o ami nisi na.”
NUM 16:16 Bade Musae Kurahre ḳoila, “Ḳail tumi ar tumar dolor hoḳol aia Mabudor samne azir oibae. Tumrar loge Harun-o azir oiba.
NUM 16:17 Forteḳe aia zarzir agor danit agor-kushboy boria Mabudor name zalaibae. Tumrar aṛai-sho zonor hokkole ola zarzir agor dani zalaio. Erloge tumi ar Harune-o agor-kushboy zalaio.”
NUM 16:18 Musar hukum mafik forteḳe zarzir agor danit agor-kushboy ar aguin loia, Milon-tambur duaror samne, Musa ar Harunor loge gia ubaila.
NUM 16:19 Kurahe zebla shomazor hoḳol manshore uskaia dola ḳorlo, ḳoria Milon-tambur duaror gese Musa ar Harunor birudde ubailo, ou shomoy tara hokkolor samne Mabudor kudroti nur zair oilo.
NUM 16:20 Mabude Musa ar Harunre ḳoila,
NUM 16:21 “Ita manshor ges taki tumra hori zao, ami itare sokur foloḳor loge shesh ḳoriliar.”
NUM 16:22 Oile Musa ar Harun soizdat foṛia ḳoila, “O Alla, tumi to hoḳol manshor bitre zan deo. Oḳon ḳali eḳzonor naformanir dae asta Boni Israilor ufre tumi gozob ḍalitae ni?”
NUM 16:23 Teu Mabude Musare ḳoila,
NUM 16:24 “Tumi Boni Israilre zanai deo, tara zanu Kurah, Daton ar Abiramor tambur ges taki hori zain.”
NUM 16:25 Ikan hunia Musa soizda taki uṭia Daton ar Abiramor gese gela, tan ḳore oia Boni Israilor murobbi neta oḳol-o gela.
NUM 16:26 Tain Boni Israilre ḳoila, “Tumra ou naforman oḳlor tambu taki hori zao, itar kunu mal-samanat soio na. Arnae tarar gunar shazar loge tumrare-o binash ḳora oibo.”
NUM 16:27 Ikan hunia Kurah, Daton ar Abiramor tambur ges taki hoḳol manush hori gela. Ermaze Daton ar Abirame tarar bou-baichchain ar huru-boṛo hoḳol huruttain loia aia zarzir tambur duaror gese ubat asil.
NUM 16:28 Ou shomoy Musae Boni Israilre ḳoila, “Tumra ou alamot dekia buzilibae, ami zeta ḳoriar ita amar mongoṛa kunta nae. Ou ḳamor lagi Mabude-u amare faṭaisoin.
NUM 16:29 Erar moron zudi oinnainno manshor laḳan shababik halote oy, te mono ḳorio, Mabude amare faṭaisoin na.
NUM 16:30 Oile Mabude zudi asanoḳ noya kunu ḳam ḳoroin, ou zomine muk kulia tarare ar tarar hoḳoltare zinda gililae, tara zinda halote-u maṭir tolor fatalo zaegi, te buzilio, era Mabudre elami korse.”
NUM 16:31 Musae oḳan ḳoar loge loge-u erar faor tolor maṭi faṭia dui baṭ oigelo,
NUM 16:32 ar maṭie a ḳoria Kurahor foribaror hoḳolre tarar mal-samana shoho gilililo.
NUM 16:33 Mal-samana shudda zinda halote tara maṭir tole gelogi, bade maṭir faṭa bond oigelo. Oula Boni Israil taki tara eḳdom nifat oigelo.
NUM 16:34 Tarar sik-sillani hunia sairobae taki hoḳol manush douṛaia bagila, itae sillai sillai douṛaia ḳoila, “Maṭie hoyto amrare-o gililibo.”
NUM 16:35 Ar hou ze aṛai-sho zone agor-kushboy zalaia kurbani korsil, Mabudor ges taki gaibi aguin aia itare zalaia sali korillo.
NUM 16:36 Bade Mabude Musare ḳoila,
NUM 16:37 “Tumi imam Harunor fua Ali-Azorre ḳo, ou zalail zaga taki agor dani guin bar ḳoria, er angra-sali nia tuṛa duroi falanir lagi, i agor dani guin fak-fobitro bonigese.
NUM 16:38 Naformanir lagi zeguin morigesoin, ou agor dani to tarar asil. Oile Mabudor samne ita azir ḳora oisil, erlagi i hoḳolṭi fak-fobitro oigese. Te tumi ita bangaia fat banaia fobitro kurbani kanare guria toio. Ita nishana hishabe Boni Israilor gese roibo.”
NUM 16:39 Teu aguine zolia zeguin morsila, otar ana fitolor agor dani guin imam Ali-Azore ekḳano dola ḳorla. Bade ota bangaia kurbani kana guria toar fat banaila.
NUM 16:40 Mabude Musa nobir mazdi zela hukum disla, ein ou laḳan ḳorla. Ikṭa ḳora oilo zate Boni Israilor mono taḳe zen, ḳali Harunor bongsho saṛa dusra kunu zon, agor-kushboy zalanir lagi Mabudor samne zaito farto nae. Zudi zae, te tar dosha ou Kurah ar tar dolor laḳan oibo.
NUM 16:41 Oile bador din-u Boni Israilor manshe Hozrot Musa ar Harunor birudde ber-beri lagailo, tara ḳoilo, “Mabudor bonda oḳolre tumra-u marso.”
NUM 16:42 Ar shomazor hoḳol manshe zebla Musa ar Harunor birudita ḳoria Milon-tambur muka guria ubailo, ou shomoy hou gaibi megor kuṭie aḳta-u Milon-tambu guri gelo, Mabudor kudroti nur zair oilo.
NUM 16:43 Teu Musa ar Harun Milon-tambur samne gela,
NUM 16:44 ar Mabude Musare ḳoila,
NUM 16:45 “Ita manshor ges taki tumra hori zao, ami itare sokur foloḳor loge shesh ḳoriliar.” Ikan hunia-u tara duio zon soizdat foṛla.
NUM 16:46 Bade Musae Harunre ḳoila, “Tumar agor dani ato lo, ar kurbani kana taki aguin neo, nia er ufre agor-kushboy zalaia, zoldi kori ota manshor guna mafir kofora adae ḳoro. Mabud to gusae aguin oigesoin, tan lannoti mohamari shuru oigese.”
NUM 16:47 Teu Musar ḳotamoto Harune agor danit aguin ar agor-kushboy loia tarar gese douṛaia gela. Er maze-u itar ufre gozob shuru oigesil, oile Harune agor-kushboy zalaia tarar gunar kofora adae ḳorla.
NUM 16:48 Tain zinda ar murda zonor mazḳano ubaila, erlagi gozob bond oigelo.
NUM 16:49 Kurahor naformanir lagi zeta mara gesla, iguin bade-o aro souddo azar shat-sho manush gozobi mohamarie morla.
NUM 16:50 Mohamari bond oia harle Harun Milon-tambur duaror gese Musar daro firia aila.
NUM 17:1 Bade Mabude Musare ḳoila,
NUM 17:2 “Tumi Boni Israilre ḳo, tara zanu tarar baf-dadar ḳandan hishabe fortek kandanor shordaror ges taki eḳṭa ḳori muṭ baroṭa laṭi ania tumar gese dey. Dile tumi zarzir laṭir ufre ou zonor nam leḳbae.
NUM 17:3 Lebi kandanor laṭit lekio imam Harunor nam, ola baf-dadar ḳandan mafik fortek kandanor shordaror lagi eḳoṭa laṭi taḳbo.
NUM 17:4 Milon-tambur bitre fobitro shahadot shondukor samne ze zagat tumrar loge amar deḳa oy, ou laṭiguin hono toio.
NUM 17:5 Teu amar fosond ḳora bondar laṭir maze gasor ḳeng fuṭibo. Ou laḳan tumrar birudde Boni Israilor ber-beri kora ami bond ḳormu.”
NUM 17:6 Teu Musae ita hoḳolta Boni Israilre zanaila. Ar tarar baf-dadar ḳandan mafik forteḳ shordare zarzir ḳandanor torof taki egu ḳori, muṭ baro ḳandanor baroṭa laṭi ania dila. Ou laṭintor egu laṭi asil Harun nobir.
NUM 17:7 Musae ou laṭiguin nia shahadot tambur bitre Mabudor samne toila.
NUM 17:8 Bador din Musa gia shahadot tambur bitre hamaia deḳoin, Lebi kandan taki Harunor name ze laṭi raḳa oise, i laṭit ḳali keng nae, kuṛi dia ful fuṭia badam-o dorilise.
NUM 17:9 Teu Musae Mabudor samne taki laṭi guin bar ḳori ania Boni Israilor samne toila. Shordar oḳole laṭi guin deḳla, dekia zarzir laṭi sinia nila.
NUM 17:10 Bade Mabude Musare ḳoila, “Birudi naforman oḳlor mono roar lagi nishana hishabe tumi Harunor laṭiṭa hirbar shahadot shondukor samne to. Teu amar birudde tarar bokbok kora ḳan tumi bond ḳortae farbae, tara-o ar morta nae.”
NUM 17:11 Mabude Musare zela hukum dila, Musae ṭik ola ḳorla.
NUM 17:12 Ita dekia Boni Israile Musare ḳoila, “Amra to morizaiar, binash oiziar, amrar shorbonash oizar!
NUM 17:13 Zekunu manush Mabudor goror daro gele-u morizar, te amra hoḳol-u morizimu ni?”
NUM 18:1 Mabude Harun nobire ḳoila, “Fobitro ebadot ḳanar befare zoto naformani kora oibo, er day-dayitto bortibo tumar ufre, tumar fuain ar tumar gusṭir hoḳlor ufre-o. Ar imamoti kamor bala zoto laḳan naformani kora oibo, itar dayi oibae ḳali tumi ar tumar fuain.
NUM 18:2 Te tumar baf-dadar ḳandan taki aro Lebi oḳolre tumi ano. Tara aia tumare ar tumar fuainre shahadot tambur samnor ebadoti kamo shaijjo ḳorba. Tara tumar zimmae roia shahadot tambur hoḳol ḳam-ḳaz ḳorba.
NUM 18:3 Oile kurbani kana ba Allar goror kunu fobitro zinishor daro zaoa tarar lagi nished. Nished na manle tara ar tumra hoḳol-u morbae.
NUM 18:4 Tara tumar ḳamo shorik oia Milon-tambur ḳadimdari korba, hoḳol zat ḳamor day-dayitto niba. Ta-o ḳali Lebi oḳol saṛa dusra ḳeu tumrar gese zaoa nished.
NUM 18:5 Boni Israilor ufre ami zanu hirbar naraz na oi, erlagi ebadot ḳana ar kurbani kana deḳa-hunar bar tumrar ufre roibo.
NUM 18:6 Ami nize tumrare ufohar hishabe dibar lagi, Boni Israilor mazor Lebi oḳolre fosond ḳorsi. Milon-tambur ḳam ḳorar lagi erare Mabudor name shofi deoa oise.
NUM 18:7 Oile imam hishabe ḳali tumi ar tumar fuainte kurbani kana ar fordar bitoror Herem Shorifo kezmot ḳam ḳorbae. Imamotir fod ḳan ami ufohar hishabe tumrare dilam. Ḳali Lebi oḳol saṛa dusra ḳeu zudi Milon-tambur shimanat ae, te tare zane marilite oibo.”
NUM 18:8 Erbade Mabude Harunre ḳoila, “Amar name zoto laḳan kurbani deoa oy, itar hoḳol zimmadari ami nize-u tumar ato shomzaisi. Te amar name Boni Israilor kurbani kora hoḳol fak-fobitro zinish, ami tumare ar tumar oarishor faona beton hishabe siroḳalor lagi dilailam.
NUM 18:9 Ḳas fobitro kurbanir ze ongsho aguino zalani lagto nae, ou baṭo tumra niogi. Te dan-gomor sodga, gunar koforar kurbani, ar dush-ḳosurir koforar kurbanir lagi Boni Israile amar gese zotota loia aiba, ita tumi ar tumar oarish oḳlor faona hok.
NUM 18:10 Ita nia hari kas fak-fobitro zinish buzia ijjot ḳoria tumra ḳaio. Tumrar hoḳol beṭainte ita ḳaitae farbae. I kani tumrar lagi fobitro.
NUM 18:11 Ar Boni Israilor deoa hoḳol dulona kurbanir zinish-o tumrar oibo. Ita ami tumare ar tumar oarish oḳolre siroḳalin faona hishabe diram. Tumar foribaror zera pak-pakiza halote roiba, tara ita ḳaita farba.
NUM 18:12 “Boni Israile tarar ḳetor hoḳol taki bala ze tel, noya anguror shorbot ar fosholor ze ongsho Mabudor name sodga diba, ita hokkolta ami tumare dilailam.
NUM 18:13 Mabudor gese ana tarar folail foy-fosholor foyla ongsho tumar oibo. Tumar foribaror mazor zera pak-pakiza halote taḳba, tara ita ḳaiba.
NUM 18:14 “Boni Israile furafur dabi-daoa saṛia mannot hishabe zoto zinish diba, ita-o tumi faibae.
NUM 18:15 Mabudor name shofi deoa forteḳ foyla baichcha tumar oibo, ita manshor aolad ouk ba foshur baichcha ouk. Manshor foyla fuare tumi nichchoy ḳalas ḳoria nite dio, ar nafak foshur foyla meda baichchare-o ola ḳalas ḳori nite dio.
NUM 18:16 Manshor foyla fuar boyosh eḳ mash oile ḳalas ḳoranir zanor bodla babot, ebadot ḳanar mafe fas tola rufa nia azad ḳori dio.
NUM 18:17 Oile gai-goru ba meṛa-sagolor foyla baichchare ḳalas ḳorai nite dio na, iguin to halal. Itare kurbani dia tumi kurbani kanar ufre lou siṭaia dio, ar sorbire agunit deoa kurbani hishabe zalaio. I kurbanir dumar gerane ami Mabud kushi oi.
NUM 18:18 Dulona ḳorail sina ar ḍainor ranor gustor laḳan, oguintor gust-o tumi faibae.
NUM 18:19 Mabudor name Boni Israilor kurbani kora hoḳol fobitro zinish tumar faona babot ami tumare ar tumar aolad oḳolre siroḳalor lagi dilailam. Ita oilo Mabudor loge tumi ar tumar oarishor lagi siroḳalin chukti, er kunu rod-bodol oito nae.”
NUM 18:20 Erbade Mabude Harunre ḳoila, “Boni Israilor desho tumi kunu don-doulotor malikana ba zomi-zomar kunu baṭo faitae nae. Erar maze tumar faona baṭ oilam shoyong ami, ami-u tumar don-doulot.”
NUM 18:21 Mabude ḳoila, “Boni Israile tarar ruzi-ruzgaror dosh baṭor eḳ baṭ to amare diba, ami-o ita Lebi kandanor faona beton babot dilailam. Milon-tambut ebadoti kamor mozuri hishabe tara ita faiba.
NUM 18:22 Ar aiz taki Boni Israilor dusra kunu gusṭir manush Milon-tambur daro zaoa nished. Gele tarar naformanir dae tara morba.
NUM 18:23 Milon-tambur ḳam-ḳaz ḳali Lebi kandane ḳorba, ou ḳamo zekunu naformani korle tara nize-u dayi oiba. Ita oibo oarishor for oarish dori eḳṭa siroḳalin niom. Boni Israilor oinnainno ḳandanor loge kunu don-doulotor malikana Lebi kandane faito nae.
NUM 18:24 Er bodla Boni Israile tarar ruzi-ruzgaror ze dosh baṭor eḳ baṭ Mabudor dorbaro azir ḳorba, ita ami erar faona hishabe dilailam. Erlagi erar befare ami Mabude ḳoisi, Lebi oḳole Boni Israilor maze kunu zomi-zomar malikana faita nae.”
NUM 18:25 Bade Mabude Musare ḳoila,
NUM 18:26 “Tumi Lebi oḳolre ḳo, oinnainno Boni Israilor ruzi-ruzgaror ze dosh baṭor eḳ baṭ faona hishabe ami tumrare dilam, ita faia harle tumra-o otar dosh baṭor eḳ baṭre, zoḳator zoḳat babot Mabudor name dilaibae.
NUM 18:27 Ou zoḳatre-u tumrar ḳetor fosholor ar nizor banail anguror shorbotor zoḳat hishabe gona oibo.
NUM 18:28 Boni Israilor baki egaro ḳandanor zoḳat babot ze dosh baṭor eḳ baṭ tumra faibae, oḳan taki tumra-o ola dosh baṭor eḳ baṭ Mabudor name zoḳat dibae. Mabudor namor ou ongsho tumra imam Harunor ato dio.
NUM 18:29 Tumrare zotota deoa oibo, tumra-o otar hoḳol taki bala ar fobitro ongsho, Mabudor faona hishabe tanre dio.
NUM 18:30 “Hoḳol taki bala ongsho Mabudre deoar bade zeta baki roibo, otare tumrar nizor ḳetor foshol, ar tumrar nizor banail anguror shorbot hishabe gona oibo.
NUM 18:31 Ou ongsho tumra ar tumrar foribaror manshe zekunu zagat ḳaitae faro, ita to tumrar ḳamor beton, Milon-tambur kezmotor beton.
NUM 18:32 Hoḳol taki bala ongsho Mabudor name dilaile, bakita ḳaite tumrar kunu dush nai. Ar Boni Israilor deoa fak-fobitro malre tumra ofobitro ḳorio na, teu tumra mortae nae.”
NUM 19:1 Erbade Mabude Musa ar Harunre ḳoila,
NUM 19:2 “Tumra Boni Israilre ḳo, Mabude shoriotor hukum mafik bataisoin, tumra furafur lal rongor egu ḍeki goru loia amrar gese ao, ou ḍeki shullo-ana nikut oito, ar tair ḳando kunudin zual lagani oise na.
NUM 19:3 Ogu ania tumra imam Ali-Azoror gese dibae. Imame iṭare kempor bare nia tan samne zobo ḳoraiba.
NUM 19:4 Zobor bade tan angulo kisu lou loia Milon-tambur samna bae shatbar siṭaiba.
NUM 19:5 Tan samne-u ou gair ḳal, gust, lou ar gufor shudda at-boṛ aguindi zalailio.
NUM 19:6 Ou ḍekire zalanir shomoy imame debdaru gasor kisu daru, esub gasor ḍeṭa, ar lal rongor kisu sutare ou agunir maze falaiba.
NUM 19:7 Bade tain naiba, ar finnor ḳafoṛ-sufoṛ-o doiba. Naia-doia harle tain kempor bitre zaita farba, oile hainja forzonto tain nafak halote roiba.
NUM 19:8 Ze zone ou ḍekir hoḳolta zalaibo, he-o naia hari kafoṛ-sufoṛ doibo ar hainja forzonto nafak roibo.
NUM 19:9 Ou ḍekir zalail sali kanain kunu fak-saf manshe tulia nia, kempor bare kunu pak zagat toibo. Boni Israile fak-saf oar fani tiar ḳorar lagi ou salire zotone toiba. Bade nafak taki fak-saf oar ḳalo ou fani kamo lagaiba.
NUM 19:10 Ze zone ou sali tulbo, he-o tar ḳafoṛ-sufoṛ doite oibo ar hainja forzonto nafak roibo. Iṭa Boni Israil ar tarar maze boshot ḳorra hoḳol zatir lagi siroḳalin niom.
NUM 19:11 “Ḳeu zudi kunu murdar lash soilae, te shat din bora he nafak roibo.
NUM 19:12 Lash soar tin nombor ar shat nombor din, fak-saf oar fobitro fani dia nizore doia harle he fak-saf oibo. Ar i niom na manle he nafak-u roibo.
NUM 19:13 Lash soar bade ḳeu zudi fak-saf na oy, te he Mabudor gorre nafak banae. Ou zonre Boni Israilor shomaz taki fusilibae. Pak-saf oar fani tar shorilo na siṭanie, tar nafaki tar loge roibo.
NUM 19:14 “Ar tambur bitre kunu manush morigele, zera ou tambut hamaiba ar zera tambut asla, tara hoḳol-u shat din bora nafak roiba.
NUM 19:15 Ou boshot tambur bitoror zeta tal-bashon hora dia gura asil na, ota-o nafak oizibo.
NUM 19:16 “Bondor maze kula zagat falail kunu lashre zudi keu soilae, te he shat din bora nafak roibo. I lash kunu laṛair ḳarone ouk, ba emne mora ouk, zera soibo era nafak. Kunu mora manshor aḍḍi ba ḳoyborre soile, he-o shat din bora nafak roibo.
NUM 19:17 “Ola nafak manshore fak-saf ḳorar niote ze lal ḍekir gust zalani oise, ogur kisu sali eḳṭa gamlat loia, ou gamlat futor fani borte oibo.
NUM 19:18 Bade kunu fak-saf manshe esub gasor ḳoyṭa ḍeṭa ania fanit buṛaia hou murdar tambu, er bitoror hoḳol mal-samana ar manshor ufre siṭai diba. Zoto zone emne mora, ba kun oia mora kunu murdar lash, morar aḍḍi-guḍḍi ba ḳoybor soise, tarar ufre-o ou fani siṭai diba.
NUM 19:19 Pak-saf ou zone nafak manshor ufre haftar tin nombor ar shat nombor din fani siṭai diba, ar shat nombor din tara fak-saf oiba. Tara gusol ḳoria finnor ḳafoṛ-sufoṛ doiba, ar ou shat nombor dinor hainja taki fak-saf bonba.
NUM 19:20 Oile nafak oar bade ḳeu zudi nizore fak-saf na ḳore, te tare shomaz taki fusia falaibae. He nizore nafak rakia Mabudor Herem Shorifre-o nafak banaise. Pak-saf oar fani tar ufre na siṭanie, he nafak roise.
NUM 19:21 Ita oibo Boni Israilor lagi eḳṭa siroḳalin niom. “Ze zone ou fak-saf oar fani siṭaiba, ein nize-o tan ḳafoṛ-sufoṛ doite oibo. I fak-saf oar fani kunu manshe soile, he hainja forzonto nafak roibo.
NUM 19:22 Nafak halote i zone zotota soibo, ita hoḳolta nafak oizibo, tar soa kunu zinish zegie soibo, he-o hainja forzonto nafak roibo.”
NUM 20:1 Bosoror foyla sando hokkol Boni Israil Zin morubumit gia Kadesh elaḳat aia roila. Hono Musa nobir boin bibi Moriomor inteḳal oilo ar tanre dafon ḳora oilo.
NUM 20:2 Hino ḳaibar kunu fani na faoae Boni Israile Musa ar Harunor birudde dol bandia erar fise lagla.
NUM 20:3 Tara Musar loge ḳaijja ḳoria ḳoila, “Amrar logor baiain zebla Mabudor samne morsla, hou shomoy amra-o morigele bala asil.
NUM 20:4 Mabudor bonda oḳolre tumi kene ou morubumit anlae, oḳon foshur fal shudda amra hokkole ono zan kuaitam ni?
NUM 20:5 Mishor desh taki tumi kene amrare ola zomor gato loia ailae? I zagat na ase kunu dan-saul ba ḍumur fol, na ase angur ba anuar fol? Ar ḳaibar fani-o nai.”
NUM 20:6 Ita hunia Musa ar Harun manshor ges taki horia Milon-tambur duaror gese gia soizdat foṛla. Teu Mabudor nuror tozolli tarar samne zair oilo.
NUM 20:7 Mabude Musare ḳoila,
NUM 20:8 “Tumi hou laṭiṭa lo, loia tumi ar tumar bai Harune hoḳol Boni Israilre ekḳano dola ḳoro. Ar ou boṛo ze fattorgu deḳrae, tarar samne ou fattorre hukum deo, dile ou fattore fani dibo. Boni Israil ar tarar foshufal hoḳole zate fani kaito fare, erlagi tumi ou fattor taki fani bar ḳorbae.”
NUM 20:9 Mabudor hukum moto tan samne taki Musae laṭiṭa loila.
NUM 20:10 Loia Musa ar Harune manshore ou fattoror gese dola ḳorla. Ar Musae tarare ḳoila, “O beimanor zat, huno, amra ou fattor taki tumrar lagi fani bar ḳortam ni?”
NUM 20:11 Oḳan ḳoia Musae laṭi dia ou fattoro dui baṛi marla, baṛi marar loge loge fattor taki zure zure fani bar oilo, teu tara ar tarar foshur fale fani kaila.
NUM 20:12 Oile Mabude Musa ar Harunre ḳoila, “Tumra to Boni Israilor samne amare fak-fobitro ḳoia manlae na, amar zobanor ufre borosha ḳorlae na. Erlagi ami ze deshḳan Boni Israilre dan ḳormu, tumra tarare loia hino zaitae fartae nae.”
NUM 20:13 Fattor taki ze zagat fani bar oilo, ou zagar nam deoa oilo Meriba, mani kaijja. Ino Boni Israile Mabudor loge ḳaijja ḳorsil, ar Mabude ono-u tan fak-fobitrota tarar samne zair ḳorsoin.
NUM 20:14 Bade Musae Kadesh taki manush faṭaia Idum deshor bashshare ḳoila, “Amra to Boni Israil, afnar silsilar baiain. Afnar dorbaro amrar ekkan arzi ase, afne to amrar duḳ-mosibotor ḳota zanoin.
NUM 20:15 Te amrar baf-dadain to Mishor desho gesla, ar amra bout bosor hono aslam. Mishori oḳole amra ar amrar moy-murobbir ufre zulum-mosibot ḳorae,
NUM 20:16 amra Mabudor dorbaro ḳanda-ḳaṭi korlam. Teu Mabude amrar foriad kobul ḳoria, tan firista faṭaia amrare hou desh taki bar ḳori anchoin. “Erlagi amra oḳon afnar deshor shimanar Kadesh ṭaunor ḳandat aisi.
NUM 20:17 Afne amrare afnar deshor mazdi zaibar shuzug kan deukka. Amra afnar kunu ḳet-kishi ba angur baganor mazedi zaitam nae, kunu kua taki fani-o tulia ḳaitam nae. Amra ḳali Raz Fotedi aṭia zaimu, afnar deshor shimana faronir ag forzonto ḍaine-baue kunubae fao baṛaitam nae.”
NUM 20:18 Oile Idumor bashshae ḳoila, “Na, na, tumra ibae zaitae fartae nae. Zaibar sesṭa ḳorle amra zuddot bar oia tumrar ufre hamla ḳormu.”
NUM 20:19 Teu Boni Israile zuaf dila, “Amra to ḳali Raz Fotedi zaimu. Amra ba amrar foshur fale zudi afnar deshor kunu fani kai, te itar dam dilaimu. Amra faoe aṭia ḳali desh faṛi dia zaitam sairam.”
NUM 20:20 Oile Idum deshor bashshae hirbar ḳoilo, “Na, na, ibaedi tumrar zaoa nished.” Bade Idum deshor bout sifaie beṭagiri deḳaia Boni Israilor loge laṛai korat bar oilo.
NUM 20:21 Tara Boni Israilre deshor bitredi zaite dilo na, erlagi era hoḳol firia aila.
NUM 20:22 Erbade Boni Israil Kadesh taki roana oia Hur faṛor gese gia azila.
NUM 20:23 Hino Idum deshor shimanar daro Mabude Musa ar Harunre ḳoila,
NUM 20:24 “Harun to tar baf-dadar gese ḳoyboro zaitegi oibo. Ar ami Boni Israilre ze desh dimu, he to hi desho zaito farto nae. Mono ase ni, Meriba namor zagat fanir befare tumra amar hukumor ulṭa ḳam ḳorso.
NUM 20:25 Te Harun ar tar fua Ali-Azorre loia tumi Hur faṛor ufre uṭo.
NUM 20:26 Uṭia Harunor gotor taki imamoti lebas kulia tar fuare findao, ḳaron Harun tar baf-dadar gese zaibogi, hono-u tar inteḳal oibo.”
NUM 20:27 Musae Mabudor hukum mafik ola ḳorla. Hoḳol Boni Israilor samne tara Hur faṛor ufre uṭla.
NUM 20:28 Uṭar bade Musae Harunor imamoti lebas kulia hari en fua Ali-Azorre findaila. Hou faṛor ufre Harune inteḳal ḳorla. Bade Musa ar Ali-Azor faṛ taki lamia aila.
NUM 20:29 Boni Israile Harunor moutor ḳobor hunia fura tish din tan lagi mattom ḳorla.
NUM 21:1 Ar Kenani zatir Orad deshor bashsha Negeb morubumit boshot ḳoroin, ein ḳobor faila, Boni Israil zati Otarimor fotedi aṭia aira, oḳan hunia bashshae tarar ufre hamla ḳoria ḳoyzonre doria nilagi.
NUM 21:2 Teu Boni Israile Mabudor dorbaro mannot mania ḳoilo, “O Mabud, tumi zudi Orador ou bashinda oḳolre amrar ato shofia deo, te amra tarar gau-geram ar ṭaun oḳol ekkebare binash ḳorilimu.”
NUM 21:3 Mabude tarar minoti kobul ḳorla, ar onor Kenani oḳolre tarar ato shofi dila. Tara era hokkolre ar erar ṭaun oḳolre ekkebare binash ḳorillo. Erlagi ou zagar nam oilo Horma, mani binash.
NUM 21:4 Erbade Boni Israile Idum deshor galabae guria zaoar lagi Hur faṛor ges taki Nil doriar faredi roana dila. Oile fotor maze tara odoirjo oia,
NUM 21:5 Musa nobi ar Alla Pakor birudde mata-mati lagaila, tara ḳoila, “Amrare Mishor desh taki kene bar ḳori anlae, ou morubumit ania marar lagi ni? Ino to ḳani-o nai, fani-o nai. Ar ola baze ḳani amra dui souke deḳtam fari na.”
NUM 21:6 Ou shomoy Mabude tarar maze bout bishakto haf faṭaila. Hafor ḳamoṛe tarar bout zon mara gela.
NUM 21:7 Teu manshe gia Musare ḳoila, “Amra to afnar ar Mabudor birudde matia guna ḳorilisi. Te afne oḳon Mabudor dorbaro minoti koroukka, zate ou haf guin amrar ges taki horaia neingi.” Teu Musae tarar lagi minoti korla.
NUM 21:8 Mabude Musare ḳoila, “Tumi eḳṭa haf banaia usa ek kuṭir ufre to. Ze manshore hafe ḳamṛaibo, he tumar ou hafor bae saile bala oizibo.”
NUM 21:9 Teu Musae ḳaṭi tamadi eḳ haf banaia kuṭir ufre toila. Kunu zonre hafe ḳamṛaile he ou tamar hafor bae saito, ar basizito.
NUM 21:10 Bade Boni Israile roana dila, ar Obut namor zagat gia tambu gaṛila.
NUM 21:11 Ar Obut taki roana oia Muab deshor fubor shimanat, morubumir Iya-Abarimo aia tambu ṭanaila.
NUM 21:12 Oḳan taki roana oia Zered namor hukna ḳalor faro gia tambu gaṛila.
NUM 21:13 Zered taki roana dia Ornon hukna ḳalor hofaro gia tambu ṭanaila. Amuri oḳlor desho taki ze morubumi shuru oise, i kal asil ou morubumit. Ḳalor eḳ faro Muab desh, oinno faro Amuri oḳlor desh.
NUM 21:14 Mabudor Jihad namor kitabo to ase, “Shufa elaḳar Baheb ar Ornon hukna ḳal,
NUM 21:15 Aur ṭaunor muka zaora usa-nisa nal, ita to Muab deshor eḳ shimana.”
NUM 21:16 Oḳan tone roana oia tara Ber namor ek kuar gese aila. Ono aia harle Mabude Musare ḳoila, “Tumi hoḳol manshore ekḳano dola ḳoro, ami tarare fani dimu.”
NUM 21:17 Ikan hunia Boni Israile ou gozol gailo, “O kua, tumar fani utlia foṛouk. Tumra kuar ḳatire gozol gao.
NUM 21:18 Ikṭa to hou shordar oḳlor kua, raza oḳole tarar laṭir bole kudisoin, ḳandani gollar zure ḳorsoin.” Bade tara morubumi taki Mottana namor zagat gela.
NUM 21:19 Mottana taki Noholiel, Noholiel taki Bamut,
NUM 21:20 Bamut taki Muabor faṛia ek kalor faro gela. Ou ḳalor ḳandar Pisga faṛor usa ṭilla taki morubumi deḳa zae.
NUM 21:21 Boni Israile Amuri oḳlor bashsha Sihunor gese manush faṭaia minot ḳorla,
NUM 21:22 “Amra afnar deshor bitredi faroi zaitam sairam, amrare zaibar diba ni? Amra to Raz Fot saṛia ḳet-kishi bae ba angur baganedi zaitam nae, kunu kuar fani-o ḳaitam nae. Afnar deshor shimana faronir ag forzonto hamesha Raz Fotedi aṭat roimu.”
NUM 21:23 Oile bashsha Sihune tan deshor bitredi tarare zaite dila na. Tain tan sifai dol loia morubumir maze Boni Israilor loge zuddot bar oila. Tain Iyahaz ṭauno aia tarar loge zuddo lagaila.
NUM 21:24 Zuddot Boni Israile hou bashshare toluardi kaṭia Ornon ḳal taki Zabbuk kal forzonto tar asta desh doḳol ḳorilila. Tara Boni-Ammanor shimana forzonto hoḳol zaga doḳol ḳorla, oile Boni-Ammanor shimana asil kub mozbut, ikanre ḍingaia zaoa ḳoṭin.
NUM 21:25 Boni Israile Hishbon ar er ash-fashor gau-geram shudda Amuri oḳlor hoḳol ṭaun doḳol ḳoria hono boshoti gaṛila.
NUM 21:26 Hishbon asil to Amuri bashsha Sihunor razdani. Tain Muab deshor agor bashshar loge zuddo ḳoria Ornon ḳal forzonto asta desh doḳol ḳorsila.
NUM 21:27 Erlagi kobi oḳole ḳoin, “Ao tumra hoḳol, Hishbon ṭauno ao, raza Sihunor ṭaunre noya ḳori banao.
NUM 21:28 Sihunor ou ṭaun taki aguin bar oia, Muabor Aur ṭaunre sarḳar ḳorlo zalaia, Ornon ḳalor usa zaga binash oigelo, honor hoḳol ṭakurre zalaia marillo.
NUM 21:29 Haere Muab, shorbonash! O Komush-devtar bokto oḳol tumra to binash oigelae. Komushor fuain bagia horigese, tar fuṛin oḳol bondi oise, Amuri bashsha Sihunor ato bondi tara.
NUM 21:30 Amra-u to tarar loge zuddo ḳorsi, Diban forzonto asta Hishbon binash ḳorsi, tarar batti amra nibailisi, Nufa ar Medeba forzonto dongsho-lila salaisi.”
NUM 21:31 Erbad taki Boni Israile Amuri oḳlor desho boshot ḳorat roila.
NUM 21:32 Hozrot Musae Zazira ṭauno guia faṭanir bade Boni Israile ou ṭaunor ash-fashor gau-geram hoḳolta doḳol ḳorla, ar honor bashinda Amuri oḳolre ḳedai dila.
NUM 21:33 Bade tara firia Bashon deshor bae roana oila. Teu Bashonor bashsha Uze tar hoḳol sifai loia tarar loge zuddo ḳorar lagi Idri ṭauno aia azilo.
NUM 21:34 Ou shomoy Mabude Musare ḳoila, “Tumi bashsha Uzre ḍoraio na, ami tare, tar asta deshre ar hoḳol sifaire tumar ato tuli disi. Erlagi Hishbonor Amuri oḳlor bashsha Sihunre tumi ze dosha goṭaislae, ogure-o ola ḳorio.”
NUM 21:35 Teu tara bashsha Uz, tar fuain ar hoḳol manshore binash ḳorla. Hesh-mesh tara ḳeu ar zinda roilo na. Boni Israile ou fura desh doḳol ḳorla.
NUM 22:1 Erbade Boni Israil gia Ziriho ṭaunor ulṭabae Zordan gangor daro Muab deshor tol zagat tambu ṭangaila.
NUM 22:2 Boni Israile Amuri oḳlor ze halot ḳorsil, Muab deshor bashsha Balak bin Shipare ita hoḳolta deḳsoin.
NUM 22:3 Boni Israilor oto manush dekia Muabi oḳol ḍoraigela. Ashole-u tara kub beshi gabṛi gela.
NUM 22:4 Tara Madian deshor murobbi neta oḳolre ḳoila, “Gorue zela bondor ḳesma gashre leia-fusi kailae, ou dole-o oula amrar sairo galar hoḳolta leia-fusi kailibo.” Ou shomoy Muab deshor bashsha asla Balak bin Shipar.
NUM 22:5 Bashshae ḍoraia Balam bin Baur namor pir sabre anar lagi kobria faṭaila. Balam to ou shomoy tan nizor deshor Furat gangor faro Fotur ṭauno asla. Balake ḳobriare ḳoia dila, “Tumra gia tanre ḳoio, Mishor desh taki eḳdol manush bar oia aise. Aia asta zomin boria ḳali gisgis ḳorra, tara oḳon amar samne boshot ḳorra.
NUM 22:6 Ita to amra taki beshi boloban. Erlagi afne aukka, aia otare lannot deukka. Teu ami hoyto tarare maria desh taki kedaitam farmu. Ar ami to zani, afne zare dua dein he ṭik-u dua fae, ar zare lannot dein tar ufre hasau lannot foṛe.”
NUM 22:7 Teu Muab ar Madianor murobbi neta oḳole isteḳara-azirat ḳoranir ṭeḳa loia roana oigela. Bashsha Balake zela hikai disla, tara gia Balamor gese ola ḳoila.
NUM 22:8 Teu Balame tarare ḳoila, “Te afnara aiz rait amar ono roukka. Mabude amare zeta zanaiba, ami ota afnarare zanaimu.” Gotike-u tara tan ono roila.
NUM 22:9 Mabude Balamor gese zair oia zikaila, “Tumar loge era ḳara?”
NUM 22:10 Balame zuaf dila, “Muabor bashsha Balak bin Shipare amar gese ḳobria faṭaisoin,
NUM 22:11 ḳoisoin, Mishor desh taki eḳdol manush aia asta desho gisgis ḳorra. Oḳon afne aia tarare lannot deukka. Teu ami zuddo ḳoria tarare bule ḳedaitam farmu.”
NUM 22:12 Oile Mabude Balamre ḳoila, “Tumi erar loge zaio na, ar hita manshore kunu lannot-o dio na. Mono rakio, tara amar rohom-borkot faoa bonda.”
NUM 22:13 Bador din biane Balam gum taki uṭia Balakor ḳobria oḳolre ḳoila, “Afnara zarzir desho firot zaukkagi. Ar Mabude amare mana ḳorsoin, afnarar loge na zaoar lagi.”
NUM 22:14 Teu Muabi neta oḳole firia gia bashsha Balakre ḳoila, “Balam to amrar loge aite razi oisoin na.”
NUM 22:15 Oḳan hunia Balake erar saite aro beshi, aro ijjoti neta oḳolre faṭaila.
NUM 22:16 Tara gia Balamre ḳoila, “Bashsha Balak bin Shipare ḳoisoin, afne tan gese zaite kunuzator kunu bada manta na.
NUM 22:17 Tain afnare bout ijjot-boḳshish diba, ar afne zela ḳoiba, tain ola-u ḳorba. Ḳali afne zanu tan fokko loia ota manshore lannot dein, tain oḳan-u saira.”
NUM 22:18 Balame zuaf dila, “Bashsha Balake zudi tan shuna-rufae bora razbaṛi kan-o amare dilain, ta-o amar Mabudor hukumor ulṭa gia ami ekkan ḳam-o ḳortam nae, ita huru ḳam ouk ba boṛo ḳam ouk.
NUM 22:19 Oile afnara-o agor erar laḳan aizkur rait ḳan ono ḳaṭai laukka. Ami deki, Mabude amare noya kunta ḳoin ni.”
NUM 22:20 Hou rait Allae zair oia Balamre ḳoila, “Era zebla tumare neoat aise, te tumi tarar loge zao. Gele ami tumare zela ḳoimu, tumi kali ola-u ḳorio.”
NUM 22:21 Bador din biane Balam pir gum taki uṭia tan gadir ufre godi bisaia Muabi neta oḳlor loge roana oila.
NUM 22:22 Tan zaoa dekia Alla Pak tan ufre gusae aguin oigela. Tanre bada dibar kiale Allar firistae fot auglia ubai roila. Balam to gadir ufre soṛia zaira, tan duizon saḳor tan loge asil.
NUM 22:23 Mabudor firistae toluar ato loia, fotor maze ubai roisoin dekia, gadiṭa fot saṛia zominedi lami gelo. Gadire hirbar foto tular lagi Balame taire mair-doir ḳorla.
NUM 22:24 Bade Mabudor firista zominor angur baganor dui ketor mazor ailor ufre ubai roila. Ailor duio galabae faḳa oal deoa asil.
NUM 22:25 Mabudor firistare dekia gadie oalor galabae geshia gelo. Erdae Balamor eḳ fao-o kub gosha laglo. Teu tain hirbar gadire marla.
NUM 22:26 Erbade Mabudor firista aguaia gia fotor mazor ola eḳ sifa zagat ubaila, zeno ḍaine-baue kunubae horar ufae nai.
NUM 22:27 Mabudor firistare dekia gadie Balamre loia maṭit huti gelo. Teu Balam aro gorom oia laṭi dia gadire marla.
NUM 22:28 Ou shomoy Mabude gadir mukor zoban kuli dila. Tai Balamre ḳoilo, “Ami afnare kita ḳorsi, afne tin-tinbar amare marla?”
NUM 22:29 Balame gadire ḳoila, “Tui amare aua banaia ḳeiṛ ḳelaire ni? Hun, amar ato zudi ekkan toluar taḳto, te tore sed mari oḳon-u ḳaṭillam one.”
NUM 22:30 Gadie Balamre ḳoilo, “Ami afnar hou gadi nae ni, zegur ufre afne hara zonom dori soṛia aira, ar afnar loge ami kunudin ila ḳorsi ni?” Balame ḳoila, “Na, ila ḳorsot na.”
NUM 22:31 Erbade Mabude Balamor souk kulia dila, tain deḳla, Mabudor firistae toluar loia fot bond ḳori ubai roisoin. Dekia tain mata nuaia nak-kofal maṭit lagaila.
NUM 22:32 Teu Mabudor firistae tanre zikaila, “Tumar gadire ḳene tin-tinbar marlae? Tumi amar samne amar birudde ḳam ḳorat zairaegi dekia, ami tumare aṭḳaibar lagi ono aisi.
NUM 22:33 Tumar gadie amare dekia tin-tinbar horia gesegi. Tai zudi na horto, te ami tumare marillam one, ar taire basai raḳlam one.”
NUM 22:34 Ou shomoy Balame Mabudor firistare ḳoila, “Ami to guna ḳorsi. Ashole ami buzchi na, afne amare aṭḳaibar lagi foto ubat asoin. Te afne naraz oile ami firia zaimugi.”
NUM 22:35 Mabudor firistae Balamre ḳoila, “Ṭik ase, tumi ota manshor loge zao. Oile ami tumare zela hikai dimu, tumi kali ola-u ḳoibae.” Teu bashsha Balakor faṭail neta oḳlor loge Balam pir solat roila.
NUM 22:36 Balam piror aoar ḳobor hunia, tanre aguaia anar lagi bashsha Balak Ornon ḳalor faro Muab deshor eḳ ṭauno gela. I ṭaun asil tan deshor hesh shimanat.
NUM 22:37 Bashsha Balake Balam pirre ḳoila, “Ami to afnare zoruri tolob ḳorlam. Te afne ḳene foyla bar aila na? Afnare zoiggo boḳshish dibar ḳemota kunu amar nai ni?”
NUM 22:38 Balame zuaf dila, “Ami oḳon afnar gese aisi. Oile amar nizor kunu mat matar shaiddo nai. Ḳali Allae amaredi zeta ḳoaiba, ami kali oḳan-u ḳoimu.”
NUM 22:39 Erbade Balak bashshar loge oia Balam pir Kiriot-Husut gaut gela.
NUM 22:40 Gia bashsha Balake goru ar meṛa kurbani dia kisu gust Balam pirre ar tan logor hou neta oḳolre dila.
NUM 22:41 Bador din biane bashsha Balake ou Balamre loia Bamut-Baal faṛo gela. Hono ubaia Balame Boni Israilor eḳ ongshore deḳla.
NUM 23:1 Ar ou bianku bala Balam pire Balak bashshare ḳoila, “Afne amar lagi shatḳan kurbani kana banaukka, banaia kurbanir lagi shatgu bisal ar shatgu meṛa zugai deukka.”
NUM 23:2 Balamor ḳotamoto-u Balake ola ḳorla, ḳoria duiozone milia fortek kurbani kanar ufre egu ḳori bisal ar egu ḳori meṛa kurbani dila.
NUM 23:3 Erbade Balam pire Balakre ḳoila, “Afnar kurbani deoa ou foshur ḳasat afne roukka. Ami tuṛa horia zairam, oito fare Mabude amare doroshon diba. Tain amare zeta zanaiba, ami aia afnare ḳoimune.” Oḳan ḳoia Balam pir gia faṛor hoḳol taki usa ṭillar ufre uṭila.
NUM 23:4 Ou shomoy Mabude tanre doroshon dila. Balam pire Mabudre ḳoila, “O Mabud, tumi to deḳrae, ami shatḳan kurbani kana banaisi ar fortek kurbani kanar ufre egu ḳori bisal ar egu ḳori meṛa kurbani disi.”
NUM 23:5 Teu Mabude Balam pirre eḳ buli hikai dila, dia ḳoila, “Tumi gia Balak bashshare ota ḳoio.”
NUM 23:6 Teu Balam pire Muab deshor bashsha Balakor gese firia aia deḳla, bashsha Balake Muab deshor hoḳol murobbi netare loia tan kurbani kora foshur ono ubai roisoin.
NUM 23:7 Ou shomoy Balam pire Allar hikaia deoa ou buli hoḳol hunaila, ḳoila, “Siria desh taki Balake amare anaisoin, fubor faṛ oḳlor daro taki Muabor bashsha Balake-u more zugaisoin. Zugaia ḳoila, amar fokko loia Iakubor aolad Boni Israilre lannot deukka, otare boddua deukka.
NUM 23:8 Oile Allae lannot disoin na zare, ami kilan dimu lannot tare? Mabude ḳeti korar ḳota na ḳorsoin zar, ami kilan ḳetir ḳota ḳoitam tar?
NUM 23:9 Deḳsi ami tarare usa ṭilla taki, tarar baedi saisi to faṛor suṛa taki, deḳlam ami era oila ola eḳ zati, tara roin alog oia baki hoḳol taki.
NUM 23:10 Iakubor aolad deki balur danar moto, gonia fuṛaito tare ḳar ase shaiddo? Moron zanu oy amar nekkar ou dolor laḳan aḳerato ouk mor tarar-u laḳan.”
NUM 23:11 Ikan hunia bashsha Balake Balamre ḳoila, “Afne ita kita ḳorla? Afnare anaitam amar dushmonre lannot dibar lagi, ar afne ḳali tarare dua dila.”
NUM 23:12 Balam pire zuaf dila, “Mabude amar muko zeta zugai disoin, ita ami koimu na kila?”
NUM 23:13 Bade bashsha Balake Balam pirre ḳoila, “Afne amar loge aroḳ zagat aukka. Hon tone afnar souke Boni Israilor deḳa faiba. Tara hoḳolre deḳa zaito nae, ḳali eḳ ongshore afne deḳba, dekia afne amar fokko loia tarare lannot diba.”
NUM 23:14 Oḳan ḳoia bashsha Balake tanre loia Pisga faṛor ufror Zofim namor bondor maze loia gela. Gia hono shatḳan kurbani kana banaia fortek kurbani kanat egu ḳori bisal ar egu ḳori meṛa kurbani dila.
NUM 23:15 Bade Balam pire bashsha Balakre ḳoila, “Zalail kurbanir niote zeta foshu kurbani deoa oise, afne otar daro roukka. Ami oinnobae zairam, Mabudor didar faoar ashae.”
NUM 23:16 Mabude Balam pirre didar dila, ar tar zobanor maze kisu buli zugai dia ḳoila, “Tumi bashsha Balakor gese amar hikail ou mat matio.”
NUM 23:17 Teu tain bashshar gese gela. Gia deḳla bashshae Muab deshor neta oḳolre loia kurbani kora foshur gese ubai roisoin. Bashshae tanre zikaila, “Mabude afnare kita ḳoisoin?”
NUM 23:18 Balam pire ou shomoy Allar hikail ou buli koila, “Bashsha Balak kial ḳoro, oḳon huno dia mon, ere Shiparor fut Balak, mor ḳotat deo ḳan.
NUM 23:19 Alla Pak to manush nae zen misa matiba, tain kunu Adom shontan nae zen dil bodlaiba. Tain zela ḳota ḳoin ṭik ola-u ḳoroin, tan oada oḳol-u nichchit fura ḳoroin.
NUM 23:20 Nek dua ditam ḳori hukum zela faisi, kila bodlaimu ami munibor ou morzi?
NUM 23:21 Iakubor aolador maze Allae kunu bod-nosib deḳsoin na, Boni Israilor ḳofalo kunu duḳ-mosibot leḳsoin na. Tarar Mabud Alla tarar loge asoin tarar malikor joy gan tarar loge loge ase.
NUM 23:22 Mishor taki tain-u tarare bar ḳori anchoin tarar fokke tain oila zongli boyrar bol.
NUM 23:23 Iakubor aolador ufre kunu zadu-montro solto nae, Israil zatir ufre kunu tabiz-ḳobze ḳam aito nae. Tarar befare oḳon ou buli koa zae, Allae zeta ḳorsoin ota saia deḳo.
NUM 23:24 Ou zati to shinghir laḳan gunjria uṭibo, ar shinghor laḳan uṭia ag baṛibo. Shikaror lou ar gust na ḳaoa forzonto tara dom loita nae.”
NUM 23:25 Ikan hunia bashsha Balake ḳoila, “Bond ḳoroukka, afne tarare dua-o diba na, lannot-o diba na.”
NUM 23:26 Balam pire zuaf dila, “Ami to afnare age-u ḳoisi, Mabude amare zela ḳoiba, amar ola-u ḳora lagbo.”
NUM 23:27 Bade Balak bashshae Balam pirre ḳoila, “Aukka, ami afnare aroḳ zagat loia zaimu. Hono gele oito fare Allae kushi oia amar fokko loiba, ar afnaredi hotar ufre lannot dite diba.”
NUM 23:28 Oḳan ḳoia bashshae tanre loia Piyur namor faṛor ufre gela, ou zaga taki morubumi deḳa zae.
NUM 23:29 Ou shomoy Balam pire ḳoila, “Ono amar lagi shatḳan kurbani kana banaia, shatgu bisal ar shatgu meṛa kurbanir bebosta ḳoroukka.”
NUM 23:30 Pir sabor ḳotamoto bashshae ola-u ḳorla. Tain fortek kurbani kanar ufre egu ḳori bisal ar egu ḳori meṛa kurbani dila.
NUM 24:1 Balam pire zebla buzla, Boni Israilre dua deoa-u oilo Mabudor ichcha, buzia tain agor laḳan ar isteḳara-azirator sesṭa ḳorla na. Borong tan nizor muk morubumir bae firailla.
NUM 24:2 Firaia deḳla, Boni Israilor nanan ḳandanor tambu eḳ ek kori ṭangani oise. Ou shomoy tan ufre Allar ruhu lamia aila,
NUM 24:3 tain Allar deoa ou ohi koila, “Bauror fut Balame ḳoira, Souk zar kula ase ein ou buli koira.
NUM 24:4 Ze zone Allar kalam hunra, Shorbo-shoktimanor didar faira, zein soizdat foṛia batuni kobor deḳoin, ein oḳan ḳoira.
NUM 24:5 O Iakub bongsho, tumar tambu oḳol kub soḳsoḳa! O Boni Israil, tumar roar zaga ḳoto bala!
NUM 24:6 Ita to deḳar moto boṛo ḳezur baganor laḳan, gangor faror hazail-faṛail bonor laḳan, Mabudor lagail agoror gasor laḳan tortaza, fanir daror debdaru gasor laḳan shundor.
NUM 24:7 Tarar bora ḳoloshi taki fani utlia foṛbo, bisi ar serae bout fani faibo. Tarar bashsha oiba Ogag bashsha taki-o himmoti, tarar desh oibo namḳora ijjoti.
NUM 24:8 Allae Mishor taki tarare bar ḳori anchoin, tain oila tarar fokke bolala zongli boyra, tarar loge zoto zatie lagba, itare tara gilia ḳailiba, tarar aḍḍi-guḍḍire guṛa guṛa ḳorba, tir-donukdi tarare gatiba.
NUM 24:9 Shinghor laḳan tara ḳaf dori hutibo, tarare laṛanir shaosh oibo kun beṭar? Tumrare zera dua diba, erar ufre dua lamouk; tumrare zetae lannot diba, itar ufre lannot foṛouk.”
NUM 24:10 Ita hunia bashsha Balake Balam piror ufre gusae aguin oigela. Tan nizor ator fiṭit tabṛai tabṛai kiṛimiṛi kaia ḳoila, “Ami afnare anaitam amar dushmonre lannot dibar lagi, ar afne tarare ou lagaia tin-tinbar dua dila.
NUM 24:11 Afne amar samon taki horoukka, nizor zagat zaukka. Ami afnare bout furuskar dimu ḳoislam, oile Mabude dila na.”
NUM 24:12 Teu Balam pire bashsha Balakre ḳoila, “Afnar faṭail manshore ami age-u ḳoisi na ni,
NUM 24:13 bashshae zudi shuna-rufae bora tan asta razbaṛi kan-u amare dilain, tebou ami amar nizor ichchae bala-bura kunta ḳortam fartam nae, ami Mabudor birudde zaitam nae. Mabude amare zela hukum diba, ami kali ola-u ḳoimu.
NUM 24:14 Te ami oḳon amar manshor gese firot zairamgi, oile ou zatie bobishote afnar zatir loge kita kita ḳorba, afnar hushiarir lagi ita agam zanai diar.”
NUM 24:15 Balam pire Allar deoa ou aroḳ ohi koila, “Bauror fut Balame ḳoira, Souk zar kula ase ein ou buli koira,
NUM 24:16 ze zone Allar kalam hunra, zeinor gese Allatalar aḳol-hekmot ase, zein shorbo-shoktimanor didar faira, zein soizdat foṛia batuni kobor deḳoin, ein oḳan ḳoira.
NUM 24:17 Ami to hou zonre dekiar, oḳon samne na taḳle-o dekiar. Tain amar ḳasat na oile-o, amar souk gia tan ufre foṛse. Iakubor bongshot aiba asmanor eḳ tera, Boni Israilor maze-u eḳ raz-laṭi zonmiba. Ein Muab zatir mata faṭaia dui ṭukra ḳorba, Shish nobir aolador ḳolla surmar ḳorba.
NUM 24:18 Idum deshre enor doḳolo anba, tan dushmonor ou Seir faṛre ḳobza ḳorba, ar Boni Israil zatie foyluani korba.
NUM 24:19 Iakubor bongshor eḳzone raz-godi salaiba, Ir ṭauno zara zinda roiba ein tarare-o binash ḳoriliba.”
NUM 24:20 Oḳnain ḳoar bade Balam pire souk melia Amaleki oḳolre deḳla. Dekia Allar ou ohi koila, “Amalek to hoḳol zatir maze asil fordan, oile tarar shesh dosha oibo shorbonash.”
NUM 24:21 Bade tain Keni oḳolre deḳla, dekia Allar ou ohi koila, “Tumrar boshot ḳana kub mozbut, tumra to fattoror faṛo basha banaiso,
NUM 24:22 oile agedi tumrar binash goṭibo, tumrare bandia Ashiria desho neoa oibo.”
NUM 24:23 Bade Balam pire Allar deoa ou shesh ohi koila, “Haere hae! Allae zebla ota goṭaiba, ou shomoy ḳeu ar zinda roibo ni?
NUM 24:24 Saipras difor zaz oḳol aibo, aia Ashiriare durdosha dibo, Aberor manshore-o domaibo, oile ou dif nize-o bade binash oizibo.”
NUM 24:25 Oḳan ḳoia hari Balam pir uṭia nizor goro gelagi, Balak bashsha-o tan fote roana dila.
NUM 25:1 Boni Israil Muab deshor Shiṭim elaḳat boshot ḳorla, tara ono roia roia Muabi beṭintor loge zina ḳorat lagla.
NUM 25:2 Honor beṭinte tarar deb-debir name boli dibar onusṭano Boni Israilre daot dila, ar era gia ota beṭintor loge ḳana-dana ḳaia hou deb-debir puja ḳorla.
NUM 25:3 Ou nomunae tara honor Piyur faṛor Baal devtar puja-boḳti deoat lagi gela. Erdae Boni Israilor ufre Mabudor gozobor aguin zolia uṭlo.
NUM 25:4 Bade Mabude Musare ḳoila, “Tumi shomazor dushi neta oḳolre doria zane marilao, ar otar lash roidor maze ania loṭḳai to. Teu Boni Israilor ufre taki amar hou lannoti gozob horbo.”
NUM 25:5 Oḳan hunia Musae Boni Israilor hakim-salish oḳolre ḳoila, “Tumrar zimmae taḳa zoto manshe Piyur faṛor Baal devtar pujat shorik oise, ota hokkolṭire tumra zane marilao.”
NUM 25:6 Ermaze ola oilo, Musa nobi ar Boni Israile milia zebla Allar goror duaror gese ḳanda-ḳaṭi korra, ou shomoy tarar samnedi Boni Israilor eḳ beṭae Madiani eḳ beṭire loge loia kempor bitre hamailo.
NUM 25:7 Ita dekia imam Harunor nati Finohosh bin Ali-Azor mozlis taki uṭia ekkan sulfi ato loila.
NUM 25:8 Loia tarar ḳore ḳore gia Boni Israilor hou beṭar tambut hamaia tar ar hou beṭir feṭedi gatilla. Teu Boni Israilor ufor taki Allar gozob horigelo.
NUM 25:9 Oile ou gozobor maze sobbish azar manush morigesil.
NUM 25:10 Ou shomoy Mabude Musare ḳoila,
NUM 25:11 “Imam Harunor nati Finohosh bin Ali-Azor Boni Israilor ufre taki amar gozob horaise. Boni Israilor maze amar faona ijjot adae ḳorar befare he to amar zalae-u zoler. Erlagi amar faona ijjot adae ḳorar lagi monor zala taḳle-o ami tarare ar marlam na.
NUM 25:12 Te oḳon tumi tare ḳo, ami tar lagi eḳṭa ḳas shanti-chukti boail ḳorsi.
NUM 25:13 He tar Allar faona ijjotor befare kiali oia nizor ichchae Boni Israilor gunar kofora adae ḳorae, ami-o tar lagi ou shanti-chukti boail ḳorsi. Erlagi imamotir fod he ar tar aolador maze siroḳal zari roibo.”
NUM 25:14 Madiani hou beṭir loge Boni Israilor ze beṭare mara oisil, he oilo Salur fua Zimri, he to Shimion ḳandanor ek gusṭir neta.
NUM 25:15 Ar ze Madiani beṭire mara oisil, tair nam Kosbi, tai asil Madian deshor Shur namor eḳ netar fuṛi, ou Shur-o oila ek gusṭir neta.
NUM 25:16 Erbade Mabude Musare ḳoila,
NUM 25:17 “Madiani oḳolre tumrar dushmon mono ḳorio, itare zane marilio.
NUM 25:18 Ḳaron Piyuror devtar puja ar Kosbir befare fand fataia tumrare bul fote neoae tara tumrar dushmon bonche. Ar tumi to zano, ou Kosbi asil tarar kuṭum, tai to Madiani eḳ shordaror fuṛi. Piyuror Baal devtare puja ḳorae tumrar ufre zebla lannoti gozob lamsil, ou shomoy taire zane mara oisil.”
NUM 26:1 Lannoti ou gozob tami zaoar bade Mabude Musa ar imam Harunor fua Ali-Azorre ḳoila,
NUM 26:2 “Boni Israilor maze zerar boyosh bish bosor ba er beshi, mani zuddo ḳorar zoiggo zera oigese, erare zarzir gusṭi mafik gono.”
NUM 26:3 Erlagi Ziriho ṭaunor ulṭabae Zordan gangor faro Muab deshor ze tol zaga ase, hono Musa nobie ar imam Ali-Azore neta oḳolre ḳoila,
NUM 26:4 “Mabude Musa nobire zela hukum ḳorsoin, oula tumra bish bosor ba er beshi boyoshi hoḳol beṭaintore gono.” Teu Mishor desh taki Boni Israilor zoto beṭain bar oia aisla, gonar shomoy erar bongshodoror nam leḳa oilo. Era oila:
NUM 26:5 Iakub urfe Israilor boṛo fua Rubenor sairo fuar bongshodor: Rubenor boṛo fua Honuk taki Honuki bongsho, Falu taki Falui bongsho,
NUM 26:6 Hasir taki Hasiri bongsho, ar Kormi taki Kormia bongsho.
NUM 26:7 Era hoḳol-u Ruben ḳandanor nanan bongsho. Erar maz taki gonia tetallish azar shat-sho tish zonre faoa gelo.
NUM 26:8 Falur fuar nam Iliab,
NUM 26:9 Iliabor fuain oila Nomuel, Daton ar Abiram. Daton ar Abiram Boni Israilor duizon neta asla, tara Musa ar Harunor bifokke lagla. Ar Kurahor dol zebla Mabudor birudde asil, ou shomoy era-o Kurahor dolo asla.
NUM 26:10 Kurahor loge ou duizonre-o maṭie a ḳori gililisil ar tar dolor aṛai-sho zon aguine zolia morsil. Ita Boni Israilor lagi hushiarir nishana oia roilo.
NUM 26:11 Oile Kurahor fuain hi shomoy morsoin na, tarar bongsho zari roise.
NUM 26:12 Iakubor fua Shimionor bongshodor oila, Nomuel taki Nomueli bongsho, Zamin taki Zamini bongsho, Zakin taki Zakini bongsho,
NUM 26:13 Zarah taki Zarahi bongsho ar Shoul taki Shouli bongsho.
NUM 26:14 Ita Shimion ḳandanor nanan bongsho. Erar maz taki gonia baish azar dui-sho zon faoa gelo.
NUM 26:15 Iakubor fua Sadur bongshodor oila, Sifon taki Sifoni bongsho, Hogi taki Hogia bongsho, Shuni taki Shunia bongsho,
NUM 26:16 Ozni taki Oznia bongsho, Eiri taki Eiria bongsho,
NUM 26:17 Orud taki Orudi bongsho, ar Oreli taki Orelia bongsho.
NUM 26:18 Era oila Sadu ḳandanor nanan bongsho. Erar maze gona manush oila sallish azar fas-sho zon.
NUM 26:19 Iakubor fua Ehudar dui fuar nam asil Eir ar Onon, Kenan desho taḳar ḳalo era mara gesil.
NUM 26:20 Oile Ehudar aro fuain asla, erar bongshodor oila, Shela taki Shelayi bongsho, Firuz taki Firuzi, Zarah taki Zarahi bongsho.
NUM 26:21 Firuzor bongshodor oila Hasir taki Hasiri bongsho ar Hamul taki Hamuli bongsho.
NUM 26:22 Era hoḳol-u Ehuda ḳandanor nanan bongsho. Erar maz taki gonia siottoir azar fas-sho zonre faoa gelo.
NUM 26:23 Iakubor fua Isaḳoror bongshodor oila, Tola taki Tolayi bongsho, Foa taki Foai bongsho,
NUM 26:24 Zashub taki Zashubi bongsho ar Shimron taki Shimroni bongsho.
NUM 26:25 Era hoḳol Isaḳor ḳandanor nanan bongsho. Erar maz taki gonia soushoṭṭi azar tin-sho zonre faoa gelo.
NUM 26:26 Iakubor fua Sobulonor bongshodor oila Sered taki Seredi bongsho, Elon taki Eloni bongsho ar Zoholel taki Zoholeli bongsho.
NUM 26:27 Era hoḳol Sobulon ḳandanor nanan bongsho. Erar maz taki shaiṭ azar fas-sho zonre faoa gelo.
NUM 26:28 Iakubor fua Iusufor fuain oila Manosha ar Afraim.
NUM 26:29 Erar maze, Manoshar bongshodor oila, Makir taki Makiri bongsho, ar Makiror fua Giliod taki Giliodi bongsho.
NUM 26:30 Giliodor bongshodor oila Iazir taki Iaziri bongsho, Helok taki Heloki bongsho,
NUM 26:31 Osriel taki Osrieli bongsho, Sheḳom taki Sheḳomi bongsho,
NUM 26:32 Shimida taki Shimidayi bongsho ar Hefor taki Hefori bongsho.
NUM 26:33 Heforor fua Zolafḳad, tar kunu fuain asla na, ḳali fuṛin asla. Fuṛintor nam oilo, Mohola, Nua, Hogla, Milka ar Tirza.
NUM 26:34 Era hoḳol-u Manosha ḳandanor nanan bongsho. Erar maz taki gonia bayanno azar shat-sho zonre faoa gelo.
NUM 26:35 Iakubor fua Afraimor bongshodor oila, Shutoloh taki Shutolohi, Beḳor taki Beḳori ar Tohon taki Tohoni bongsho.
NUM 26:36 Shutolohor bongsho, Eron taki Eroni bongsho.
NUM 26:37 Era hoḳol Afraim ḳandanor nanan bongsho. Erar maz taki gonia bottish azar fas-sho zonre faoa gelo. Ḳandan hishabe era hoḳol-u Iusufor bongshodor.
NUM 26:38 Iakubor fua Bin-Iaminor bongshodor oila, Bela taki Belayi bongsho, Oshbel taki Oshbeli bongsho, Ahiram taki Ahirami bongsho,
NUM 26:39 Shufom taki Shufomi bongsho, ar Hufom taki Hufomi bongsho.
NUM 26:40 Belar fuain Ord ar Namanor mazdi Belar bongshodor oila, Ord taki Ordi bongsho ar Naman taki Namani bongsho.
NUM 26:41 Era Bin-Iamin ḳandanor nanan bongsho. Erar maz taki foytallish azar soy-sho zonre faoa gelo.
NUM 26:42 Iakubor fua Danor bongshodor oila, Shuhom taki Shuhomi bongsho. Era-u asla Dan ḳandanor manush.
NUM 26:43 Erar maz taki gonia soushoṭṭi azar sair-sho zonre faoa gelo.
NUM 26:44 Iakubor fua Ashiror bongshodor oila, Imna taki Imnayi bongsho, Zisbi taki Zisbia bongsho ar Boria taki Boriayi bongsho.
NUM 26:45 Boriar bongshodor oila Hebor taki Hebori bongsho, ar Molkiel taki Molkieli bongsho.
NUM 26:46 Ashiror fuṛir nam asil Sera.
NUM 26:47 Era hoḳol-u Ashir ḳandanor nanan bongsho. Erar maz taki gonia teppanno azar sair-sho zonre faoa gelo.
NUM 26:48 Iakubor fua Noftalir bongshodor oila, Zohoshiel taki Zohoshieli bongsho, Guni taki Gunia bongsho,
NUM 26:49 Izer taki Izeri bongsho, ar Shillem taki Shillemi bongsho.
NUM 26:50 Era hoḳol-u Noftali kandanor nanan bongsho. Erar maz taki gonia foytallish azar sair-sho zonre faoa gelo.
NUM 26:51 Te gonar bade Boni Israilor maze zuddot zaoar zuka beṭaintor foriman oilo, muṭ soy laḳ eḳ azar shat-sho tish zon.
NUM 26:52 Mabude Musare ḳoila,
NUM 26:53 “Gona ou manush mafik asta deshor zomin baṭia dite oibo, zate hoḳole zarzir baṭ fae.
NUM 26:54 Ze ḳandanor manush beshi ou ḳandanre beshi ar ze ḳandanor manush ḳom, ou ḳandanre ḳom zaga dibae. Fortek kandanor manshe tar manush hishabe zaga-zomin faibo.
NUM 26:55 Ar kun ḳandane kun zagat zomin faibo, ita loṭari maria ṭik kora oibo. Forteḳ bongshor faona ongsho tar ḳandanor name deoa elaḳar maze-u taḳbo.
NUM 26:56 Ḳandanor manush ḳom ba beshi zeṭa-u ouk, loṭari maria zaga ṭik kora oibo.”
NUM 26:57 Hoḳol heshe Lebi kandanor bongshodor gona oilo. Era oila, Zarsun taki Zarsuni gusṭi, Kahat taki Kahati gusṭi ar Marari taki Mararia gusṭi.
NUM 26:58 Lebi kandanor kisu namḳora foribar asil, erar mul bafor nam oilo Libni, Hebron, Moholi, Mushi ar Kurah. Kahator eḳ fuar nam asil Imran.
NUM 26:59 Imranor bour nam Iukabez, Mishor desho taḳte Lebi kandanor maze en zonom oisil. En feṭ taki Imranor fuain Harun ar Musa ar tarar boin Moriomor zonom oisil.
NUM 26:60 Harunor fuain oila Nadab, Abihu, Ali-Azor ar Isamar.
NUM 26:61 Oile Mabudor hukum bangia dusra aguin dia ebadot ḳorat gia Nadab ar Abihu ou dui zonor moron oisil.
NUM 26:62 Eḳ mash ba er beshi boyoshor Lebi kandanor beṭaintor foriman asil teish azar. Boni Israilor bitre erare kunu zagar malikana deoa oise na gotike Boni Israilor oinnainno ḳandanor loge erare eḳloge gona-o oise na.
NUM 26:63 Ziriho ṭaunor ulṭabae Zordan gangor daro Muabor tol zagat dusrabar manush gonar shomoy Musa nobi ar imam Ali-Azore Boni Israilre gonla.
NUM 26:64 Oile foyla bar Sinai morubumit Musa ar imam Harune Boni Israilor zarare gonisla, ou dusrabar gonar shomoy erar mazor eḳzon-o zinda roisoin na.
NUM 26:65 Ashole ota Boni Israilor befare Mabude age-u ḳoisla, tara nichchoy ou morubumit mara zaiba. Ar hasau ḳali Zifunnir fua Kalut ar Nunor fua Iusa saṛa tarar mazor dusra ḳeu zinda roisil na.
NUM 27:1 Iusufor fua Manoshar ḳandanor Zolafḳador fuṛintor silsila oilo, Manoshar fua Makir, Makiror fua Giliod, Giliodor fua Hefor ar Heforor fuar nam Zolafḳad. Zolafḳador fuṛin oila Mohola, Nua, Hogla, Milka ar Tirza.
NUM 27:2 Ou fuṛin aia Milon-tambur duaror samne ubaia Musa nobi, imam Ali-Azor, murobbi neta ar hoḳol Boni Israilre ḳoila,
NUM 27:3 “Amrar baba to morubumit mara gesoin. Ar Kurahor dolor zeta manshe Mabudor birudde naformani korsla, tain to itar loge asla na. Tain ḳali tan nizor gunar dae mara gesoin. Ar amrar kunu bai zonmisoin na,
NUM 27:4 te bai na taḳae oḳon amrar bafor nam kita i bongsho taki miṭizito ni? Tan shoriḳanor loge amrare-o zaga-zominor baṭ deukka.”
NUM 27:5 Teu Musa nobie tarar befare Mabudor dorbaro aroz ḳorla.
NUM 27:6 Mabude tanre zuaf dila,
NUM 27:7 “Zolafḳador fuṛinte ṭik kota-u ḳoise. Tarar bafor shoriḳanor loge tarare-o zomi-zomar baṭ dite oibo. Tara zate tarar bafaiti zomin fain, ikan tumi kial rakio.
NUM 27:8 Ar tumi Boni Israilre ḳo, morar ḳalo zudi kunu manshe fuain na toia morizae, te tar zomi-zomar baṭ tar fuṛinte faiba.
NUM 27:9 Tar kunu fuṛin na taḳle tar baiainte i shompotti faiba.
NUM 27:10 Tar zudi kunu bai na taḳe, te ita tar sasainte faiba.
NUM 27:11 Ar tar zudi kunu sasa-o na taḳoin, te tar bongshor hoḳol taki afon zone i shompotti faiba, ein itar malik oiba. Musa nobire batail Mabudor ou hukum oilo, Boni Israilor lagi zomi-zomar ainor eḳ dara.”
NUM 27:12 Erbade Mabude Musare ḳoila, “Tumi Abarim faṛor ou usa ṭillar ufre uṭo, uṭia ami Boni Israilre ze desh disi, oḳan dekilao.
NUM 27:13 Ar huno, tumar bai Harun zela tar baf-dadar laḳan ḳoyboro huti roise, ou desh deḳar bade tumi-o ola tumar baf-dadar gese zaibaegi.
NUM 27:14 Mono ase ni, Zin morubumir Kadesh elaḳar Meriba namor zagar hou fanir ḳota? Morubumit Boni Israile zebla fanir lagi amar birudita ḳorsil, tarar samne tumra-o amare fak-fobitro ḳoia na mania amar hukumor ulṭa geslae.”
NUM 27:15 Oḳan hunia Musae aroz ḳorla,
NUM 27:16 “O Mabud, zein hoḳol manshor zindegi dan ḳoroin, hou Alla Mabude Boni Israilor ufre ola eḳzon manshore boail ḳoroukka,
NUM 27:17 ze netae hoḳol manshore gore-bare, maṭo-moydano hoḳol befare salaiba. Teu Mabudor bonda oḳol a-raḳali goru-sagolor laḳan oita nae.”
NUM 27:18 Teu Mabude zuaf dila, “Nunor fut Iusar bitre to Allai ruhu asoin. Tumi tare ania tar ufre tumar at toia ḳelafoti boḳshia deo.
NUM 27:19 Tumi imam Ali-Azor ar hoḳol Boni Israilor samne tare azir ḳoria, tarar samne-u tare dayitto shomzai deo.
NUM 27:20 Tumare ze ḳemota deoa oise, ou ḳemotar kisu baṭ tare deo, teu hokkol Boni Israil tar ḳotae solba.
NUM 27:21 Bade he imam Ali-Azoror gese zaibo, gele Ali-Azore Allar fobitro Urim ar Tummim fattordi loṭari maria Mabudor morzi zanta farba. Ola Iusa ar tamam Boni Israile sola-fira ḳorba.”
NUM 27:22 Musa nobie Mabudor hukum mafik kam ḳorla. Tain imam Ali-Azor ar Boni Israilor samne Iusare nia azir ḳorla.
NUM 27:23 Ar Mabudor hukum mafik tan ufre at toia tanre dayitto shomzaila.
NUM 28:1 Mabude Musa nobire ḳoila,
NUM 28:2 “Tumi Boni Israilre amar ou hukum zanai deo, amare kushi korar niote geran ala zalail kurbani amar ḳanir lagi shoṭik shomoye azir ḳorte oibo.
NUM 28:3 Tarare eoḳan ḳo, tumra Mabudor name fortidinor agunit deoa kurbani adae ḳorar niote ou foshu oḳol anio, fortidin eḳ bosor boyoshi dugu nikut meṛa-baichcha anio.
NUM 28:4 Ania egu biane ar egu hainja bala kurbani dibae.
NUM 28:5 Erlogor fortidinor dan-gomor sodgar lagi dui sher moyda ar eḳ sher zoytunor fisha tel anbae.
NUM 28:6 Iṭa oilo hou fortidinor zalail kurbani, zeta Tur faṛo shaibosto ḳora oisil. Ar ita to amar name agunit deoa kurbani, er dumar gerane ami kushi oi.
NUM 28:7 Forteḳ meṛar loge eḳ sher anguror shorbot dia shorbot-fanir sodga adae ḳorio. Mabudor namor kurbanir ou shorbot ebadot ḳanar uṭano ḍali dibae.
NUM 28:8 Meṛar aroḳ baichchare hainja bala kurbani dibae. Erloge biankur laḳan dan-gomor sodga ar shorbot-fanir sodga adae ḳorbae. Ita oilo agunit deoa kurbani, er dumar gerane ami Mabud kushi oi.
NUM 28:9 “Forteḳ Zummabare eḳ bosor boyoshi dugu meṛa-baichcha kurbani dibae. Erloge shorbot-fanir sodgar samana ar dan-gomor sodgar tel maḳail sair sher moyda-o dibae.
NUM 28:10 Fortidinor zalail foshu kurbani ar er logor shorbot-fanir sodga saṛa-o forteḳ Zummabare ou zalail kurbani adae ḳorbae.
NUM 28:11 “Forteḳ sandor foyla din Mabudor name zalail kurbanir lagi dugu bisal, egu meṛa ar eḳ bosor boyoshi shatgu meṛa-baichcha kurbani dibae, i hoḳol foshu fura nikut oito.
NUM 28:12 Ou forteḳ bisalor loge dan-gomor sodga hishabe tel maḳail soy sher moyda dibae, ar meṛar loge sair sher moyda dio,
NUM 28:13 ar forteḳ meṛa-baichchar loge tel maḳail dui sher moyda dio. Ita oilo amar name agunit deoa kurbani, itar dumar gerane ami Mabud kushi oi.
NUM 28:14 Shorbot-fanir sodgar lagi forteḳ bisalor loge dui sher anguror shorbot dibae. Forteḳ meṛar loge shua sher ar forteḳ meṛa-baichchar loge eḳ sher shorbot dio. Ita oilo mashik zalail kurbani, bosoror forteḳ sando ita adae ḳorbae.
NUM 28:15 Itar loge gunar koforar niote amar name egu sagol kurbani dio. Ta-o forteḳ dinor zalail kurbani, ar er logor shorbot-fanir sodga-o adae ḳorio.
NUM 28:16 “Forteḳ bosoror foyla sandor souddo tarik Mabudor name Azadi Id adae ḳorio.
NUM 28:17 Ou sandor fonro tarik taki shat din bora aroḳ id adae ḳorio, ikṭar nam Ḳamir Saṛa Ruṭir Id.
NUM 28:18 Er foyla din fobitro milon-mahfil ḳorio, i din duniabi niote kunu ḳam-ḳaz ḳora nazaiz.
NUM 28:19 Ou din amar name dugu bisal, egu meṛa ar eḳ bosor boyoshi shatgu meṛa-baichchadi agunit deoa zalail kurbani adae ḳorio. Kurbanir forteḳ foshu nikut oite oibo.
NUM 28:20 Ou foshur logor dan-gomor sodga hishabe tel maḳail moyda dibae, eḳoṭa bisalor loge soy sher, meṛa faṭar loge sair sher,
NUM 28:21 ar meṛa-baichchar loge dui sher dibae.
NUM 28:22 Itar loge tumrar gunar koforar lagi egu faṭa sagol-o kurbani dio.
NUM 28:23 Forteḳ dinor biankur zalail kurbani to dibae-u, erloge ou kurbani-o adae ḳorbae.
NUM 28:24 Ou laḳan fura haftar shatodin amare kushi korar geran ala ḳani hishabe forteḳ din ou agunit deoa kurbani adae ḳorbae. Fortidinor zalail kurbani ar er logor shorbot-fanir sodgar loge ou kurbani-o adae ḳorbae.
NUM 28:25 Heshe shat nombor din-o tumra fobitro milon-mahfil ḳorio, ou din duniabi niote kunu ḳam-ḳaz ḳora nazaiz.
NUM 28:26 “Fonchaisha Idor din, mani ketor foyla daoa foshol dia zedin tumra amar name fobitro milon-mahfil ḳorbae, hi din kunu duniabi niote ḳam ḳorio na.
NUM 28:27 Ou din tumra dugu bisal, egu meṛa ar eḳ bosor boyoshi shatgu meṛa-baichcha dia zalail kurbani adae ḳorio, ou kurbanir dumar gerane ami Mabud kushi oi.
NUM 28:28 Ar otar logor dan-gomor sodga hishabe eḳoṭa bisalor loge tel maḳail soy sher moyda, meṛar loge sair sher,
NUM 28:29 ar meṛa-baichchar loge dui sher dibae.
NUM 28:30 Otar loge egu faṭa sagol-o kurbani dio tumrar gunar koforar lagi.
NUM 28:31 Ou hoḳol kurbani ar itar logor shorbot-fanir sodgar loge fortidinor zalail kurbani ar er logor dan-gomor sodga adae ḳorbae. Kial rakio, kurbanir hoḳol foshu zanu furafur nikut oy.
NUM 29:1 Mabude aro ḳoira, “Forteḳ bosoror shat nombor sandor foyla din oilo, tumrar Shinga Bazanir Idor din. Ou din tumra fobitro milon-mahfil ḳorio. I din duniabi niote kunu ḳam-ḳaz ḳora nazaiz.
NUM 29:2 Ou din tumra amare kushi korar geran ala zalail kurbani hishabe, egu bisal, egu meṛa ar shatgu eḳ bosor boyoshi meṛa-baichchare kurbani dio, hoḳol foshu zanu furafur nikut oy.
NUM 29:3 Ar otar logor dan-gomor sodga hishabe tel maḳail moyda dio. Bisalor loge soy sher, meṛar loge sair sher,
NUM 29:4 ar forteḳ meṛa-baichchar loge dui sher dibae.
NUM 29:5 Itar loge tumrar gunar koforar lagi egu faṭa sagol-o kurbani dibae.
NUM 29:6 Forteḳ sandor ar forti dinor zalail kurbani, itar logor dan-gomor sodga ar shorbot-fanir sodga saṛa-o ou kurbani oḳol adae ḳorio. Ita to amar name agunit deoa kurbani, itar dumar gerane ami Mabud kushi oi.
NUM 29:7 “Ar ou shat nombor sandor dosh tariko eḳṭa fobitro milon-mahfil ḳorbae. Ou din tumra forteḳe noto oia zarzir dil shofia dibae, i din ḳeu kunuzat ḳam ḳorio na.
NUM 29:8 Ami Mabudre kushi korar niote geran ala zalail kurbani hishabe nikut egu bisal, egu meṛa, ar shatgu eḳ bosor boyoshi meṛa-baichchare kurbani dio.
NUM 29:9 Ar otar logor dan-gomor sodga hishabe bisalor loge tel maḳail soy sher moyda dio, meṛar loge sair sher,
NUM 29:10 ar forteḳ meṛa-baichchar loge dui sher dibae.
NUM 29:11 Heshe guna mafir kurbanir lagi egu faṭa sagol-o dibae. Idor ou kurbani oḳol saṛa-o gunar koforar kurbani ar forti dinor zalail kurbani, er logor dan-gomor sodga ar shorbot-fanir sodga-o dio.
NUM 29:12 “Tumra Ḍera-goror Idor haftar foyla din mani, shat nombor sandor fonro tariko, eḳṭa fobitro milon-mahfil ḳorbae, ou din tumra duniabi niote kunu ḳam-ḳaz ḳorio na. Ou shat din Mabudor name idor kushi-bashi korio.
NUM 29:13 “Idor foyla din furafur nikut terogu bisal, dugu meṛa ar souddogu eḳ bosor boyoshi meṛa-baichcha dia zalail kurbani adae ḳorio. Er dumar gerane ami Mabud kushi oi.
NUM 29:14 Otar forteḳ bisalor logor dan-gomor sodga hishabe tel maḳail soy sher moyda, forteḳ meṛar loge sair sher,
NUM 29:15 ar forteḳ meṛa-baichchar loge dui sher dibae.
NUM 29:16 Heshe guna mafir kurbanir lagi egu faṭa sagol-o dibae. Dia forti dinor zalail kurbani, er logor dan-gomor sodga ar shorbot-fanir sodga-o dibae.
NUM 29:17 “Idor dui nombor din furafur nikut barogu bisal, dugu meṛa ar souddogu eḳ bosor boyoshi meṛa-baichcha kurbani dibae.
NUM 29:18 Ou bisal, meṛa ar meṛa-baichcha hokkolṭir loge dan-gomor sodga, shorbot-fanir sodga, foshur foriman mafik adae ḳorio.
NUM 29:19 Heshe guna mafir kurbanir lagi egu faṭa sagol-o dibae. Dia forti dinor zalail kurbani, er logor dan-gomor sodga ar shorbot-fanir sodga-o dibae.
NUM 29:20 “Idor tin nombor dino furafur nikut egarogu bisal, dugu meṛa ar souddogu eḳ bosor boyoshi meṛa-baichcha kurbani dibae.
NUM 29:21 Ou bisal, meṛa ar meṛa-baichcha hokkolṭir loge dan-gomor sodga, shorbot-fanir sodga, foshur foriman mafik adae ḳorio.
NUM 29:22 Heshe guna mafir kurbanir lagi egu faṭa sagol-o dibae. Dia forti dinor zalail kurbani, er logor dan-gomor sodga ar shorbot-fanir sodga-o dibae.
NUM 29:23 “Idor sair nombor din furafur nikut doshgu bisal, dugu meṛa ar souddogu eḳ bosor boyoshi meṛa-baichcha kurbani dibae.
NUM 29:24 Ou bisal, meṛa ar meṛa-baichcha hokkolṭir loge dan-gomor sodga, shorbot-fanir sodga, foshur foriman mafik adae ḳorio.
NUM 29:25 Heshe guna mafir kurbanir lagi egu faṭa sagol-o dibae. Dia forti dinor zalail kurbani, er logor dan-gomor sodga ar shorbot-fanir sodga-o dibae.
NUM 29:26 “Idor fas nombor din nikut noygu bisal, dugu meṛa ar souddogu eḳ bosor boyoshi meṛa-baichcha kurbani dibae.
NUM 29:27 Ou bisal, meṛa ar meṛa-baichcha hokkolṭir loge dan-gomor sodga, shorbot-fanir sodga, foshur foriman mafik adae ḳorio.
NUM 29:28 Heshe guna mafir kurbanir lagi egu faṭa sagol-o dibae. Dia forti dinor zalail kurbani, er logor dan-gomor sodga ar shorbot-fanir sodga-o dibae.
NUM 29:29 “Idor soy nombor din nikut aṭgu bisal, dugu meṛa ar souddogu eḳ bosor boyoshi meṛa-baichcha kurbani dio.
NUM 29:30 Ou bisal, meṛa ar meṛa-baichcha hokkolṭir loge dan-gomor sodga, shorbot-fanir sodga, foshur foriman mafik adae ḳorio.
NUM 29:31 Heshe guna mafir kurbanir lagi egu faṭa sagol-o dibae. Dia forti dinor zalail kurbani, er logor dan-gomor sodga ar shorbot-fanir sodga-o dibae.
NUM 29:32 “Idor shat nombor din furafur nikut shatgu bisal, dugu meṛa ar souddogu eḳ bosor boyoshi meṛa-baichcha kurbani dibae.
NUM 29:33 Ou bisal, meṛa ar meṛa-baichcha hokkolṭir loge dan-gomor sodga, shorbot-fanir sodga, foshur foriman mafik adae ḳorio.
NUM 29:34 Heshe guna mafir kurbanir lagi egu faṭa sagol-o dibae. Dia forti dinor zalail kurbani, er logor dan-gomor sodga ar shorbot-fanir sodga-o dibae.
NUM 29:35 “Idor aṭ nombor din mani, aḳeri din bidayi mahfil ḳorio, i din tumra duniabi niote kunu ḳam-ḳaz ḳorio na.
NUM 29:36 Ar Mabudre kushi korar niote geran ala agunit deoa kurbani hishabe ekkan zalail kurbani dibae. Erlagi nikut egu bisal, egu meṛa ar shatgu eḳ bosor boyoshi meṛa-baichcha kurbani dio.
NUM 29:37 Ou bisal, meṛa ar meṛa-baichcha hokkolṭir loge dan-gomor sodga, shorbot-fanir sodga, foshur foriman mafik adae ḳorio.
NUM 29:38 Heshe guna mafir kurbanir lagi egu faṭa sagol-o dibae. Dia forti dinor zalail kurbani, er logor dan-gomor sodga ar shorbot-fanir sodga-o dibae.
NUM 29:39 “Te forteḳ idor ḳalo Mabudor name tumrar id oḳlor niom mafik kurbani adae ḳorio. Ita saṛa, mannot furonor kurbani, zekunu nofol kurbanir niote zalail kurbani, dan-gomor sodga, shorbot-fanir sodga, ar salamoti kurbani-o adae ḳorio.”
NUM 29:40 Mabude Musa nobire zeta hukum-ahkam zanaisla, tain ita hokkolta Boni Israilre zanaila.
NUM 30:1 Bade Musa nobie Boni Israilor hoḳol ḳandanor murobbire ḳoila, “Mabude hukum disoin,
NUM 30:2 kunu beṭae zudi Mabudor name kunta mannot ḳore ba ḳosom ḳaia kunuta ḳorar oadae bondi oy, te he zanu tar oada bongo na ḳore. He zeta ḳoise, ita furon ḳora lagbo.
NUM 30:3 “Kunu abiati fuṛie zudi bafor baṛit taḳar ḳalo Mabudor name kunta mannot ḳore ba kunuta ḳorar oadae bondi oy,
NUM 30:4 ar bafe ita hunia-o fuṛire kunta na ḳoin, te i mannot ba oada tai furon ḳora lagbo.
NUM 30:5 Oile ikan hunar loge loge bafe zudi fuṛire ita ḳorte nished ḳoroin, te i mannot ba oada batil oizibo. Bafe nished ḳorae Mabude-o i mannot ba oada bangare maf ḳori diba.
NUM 30:6 “Ar kunu fuṛie zudi sinta-babna na ḳoria aḳta kunu mannot ba oada ḳorilae ar bade tair bia oizae,
NUM 30:7 biar bade zamaie ikan hunia loge loge kunta na ḳoin, te i mannot ba oadare tai furon ḳora lagbo.
NUM 30:8 Oile ita hunar loge loge zamaie zudi nished ḳoroin, te i mannot ba oadar bandon taki tai kalas faibo, Mabude-o ita maf ḳori diba.
NUM 30:9 “Ar kunu ṛaṛi beṭi ba talaḳ faoa kunu beṭie zudi mannot ḳoria oadae bondi oy, te ita furon ḳora lagbo-u.
NUM 30:10 “Zamair goror kunu boue zudi ola mannot mane ba ḳosom ḳaia oadae bondi oy,
NUM 30:11 bade tair zamaie ikan hunia kunta na matoin, taire nished na dein, te tai ita furon ḳora lagbo.
NUM 30:12 Oile zamaie hunia zudi loge loge nished dein, te i mannot ba oada batil oizibo. Tair zamaie nished ḳorae, Mabude-o ikan maf ḳori diba.
NUM 30:13 Boue ḳosom ḳaia oada ḳorle ba kunu mannot manle zamair eḳtiar ase ita mana ba batil ḳorar.
NUM 30:14 Oile zamaie zudi beshi din i befare kunta na matia nirai roin, te tar bour mannot ba oadar bandon fakka oizae. Hoḳolta hunar bade-o zamai ou shomoy nirai roae bour mannot ba oadare fakka banailae.
NUM 30:15 Oile hoḳolta hunar bade zamaie zudi hou dinor maze kunta na matia shomoy faronir bade nished ḳore, te boue ou mannot fura na ḳorae er dae-bar tair zamair ufre foṛbo.”
NUM 30:16 Zamai-bour befare, baf ar bafor baṛit roura fuṛir befare Mabude Musa nobire ola ain hikai dila.
NUM 31:1 Mabude Musa nobire ḳoila,
NUM 31:2 “Madiani oḳole Boni Israilor loge zeta ḳorse, tumi otar oforador bodla deo. Erbade tumi tumar baf-dadar gese siroḳalor lagi huti roibae.”
NUM 31:3 Teu Musae Boni Israilre ḳoila, “Madiani oḳlor loge zuddo ḳorar lagi tumrar kisu sifaire zuit ḳoro, tara Mabudor torof taki Madiani oḳlor faona shaza diba.
NUM 31:4 Oḳon tumra Boni Israilor fortek kandan taki eḳ azar ḳori sifaire zuddot faṭao.”
NUM 31:5 Teu Boni Israilor baro ḳandan taki eḳo azar ḳori muṭ baro azar sifaire zuddor lagi zuit ḳora oilo.
NUM 31:6 Musae fortek kandan taki eḳ azar zon sifaire zuddot faṭaila. Erar loge imam Ali-Azoror fua Finohosh-o gela, zaite fobitro Kaba goror kisu samana loge ḳori nila ar tan ato ḳori zuddor aoazor sunga oḳol-o nila.
NUM 31:7 Musa nobire deoa Mabudor hukum mafik tara Madiani oḳlor loge zuddo ḳoria otar hoḳol beṭaintore marilila.
NUM 31:8 Shadaron manshor loge Madiani oḳlor fas zon bashshare-o tara marilila. Ou bashshain oila, Ibi, Reḳom, Shur, Hur ar Reba. Ar erar loge Balam bin Baur namor hou pirre-o tara zane marilila.
NUM 31:9 Tara Madian deshor hoḳol beṭin ar huruttainre bondi korla, tarar goru-sagol ar hokkol mal-samana luṭia anilla.
NUM 31:10 Madiani oḳol zoto ṭauno boshot ḳorta, ou ṭaun oḳol ar ṭaunor baror hoḳol tambu tara aguindi zalailila.
NUM 31:11 Zuddor bade tarar bondi kora hoḳol manush, gonimotor mal-samana, ar foshur fal loia roana oila.
NUM 31:12 Tara Musa nobi, imam Ali-Azor ar Boni Israilor kempo firar niote roana dila. Ou shomoy tarar tambu asil Ziriho elaḳar Zordan gangor daro Muab deshor tol zagat.
NUM 31:13 Tarar ḳobor faia Musa nobi, imam Ali-Azor ar Boni Israilor hoḳol murobbi kemp taki bar oia tarar loge deḳa ḳorat gela.
NUM 31:14 Gia zuddo taki firot aoa hoḳol kamanḍaror ufre mani azar sifair ar sho-sifair kamanḍar oḳlor ufre Musae kub gorom oia
NUM 31:15 ḳoila, “Tumra dushmonor hoḳol beṭintore zinda raḳlae ḳene?
NUM 31:16 Mono nai ni, oguinte Piyur faṛor ufre Balam piror foramishe, Boni Israilre Mabudor ges taki duroi horaisil, erlagi to Mabudor bonda oḳlor ufre gozobi bemar nazil oisil.
NUM 31:17 Te oḳon tumra otar hoḳol fuaintore zane marilao, biati ba oshoti hoḳol beṭintore-o marilao.
NUM 31:18 Ḳali abiati shoti fuṛintore tumrar lagi zita rakio.
NUM 31:19 “Ar tumra zera kunu manshore zane marso ba murdar lash soiso, tumra shatdin bora kempor bare roio. Ermaze tin nombor ar shat nombor din tumra nize ar bondi kori ana manshore-o fak-saf ḳorbae.
NUM 31:20 Tumrar hoḳol ḳafoṛ-sufoṛ, samṛar mal-samana, laḳṛi ar sagolor rumadi banail hokkol samanare-o fak-saf ḳorbae.”
NUM 31:21 Zeta sifai oḳol zuddot gesla, imam Ali-Azore tarare ḳoila, “Ita oilo Musa nobir ate deoa Mabudor shoriotor ekkan ain:
NUM 31:22 Tumra shuna, rufa, fitol, lua, ṭin, shishadi banail hoḳol mal-samana,
NUM 31:23 mani zeta mal agunit dile zole na, ita hoḳolta agunir maze dibae, teu ita fak-saf oibo. Oile zalanir bade itare fak-saf ḳorar fanidi doia pak-pakiza ḳora lagbo. Ar zeta aguine nosṭo oizae, itare ḳali fak-saf ḳorar fanidi doilibae.
NUM 31:24 Bade shat nombor din tumrar ḳafoṛ-sufoṛ doia harle, pak-pakiza bonia kempor bitre hamaibae.”
NUM 31:25 Erbade Mabude Musare ḳoila,
NUM 31:26 “Tumi ar imam Ali-Azor ar shomazor murobbi oḳole milia, bondi kori ana hoḳol manush ar foshuintore gono.
NUM 31:27 Gonia hoḳol mal dui baṭ ḳoro. Itar eḳ baṭ dibae zuddot zeta sifai oḳol gesil tarare, ar dusra baṭ bad-baki manshore dio.
NUM 31:28 Ou sifai oḳlor baṭo zoto manush, goru-sagol foṛbo, itar forteḳ fas-shoṭa taki eḳṭare Mabudor lagi algai toio.
NUM 31:29 Algaia Mabudor faona ou baṭre tumi imam Ali-Azoror ato dibae.
NUM 31:30 Ar Boni Israilor baṭo zeta manush, goru-sagol faiba, itar forteḳ foinchashṭa taki eḳṭare alog kori toio. Toia Allar boshot ḳana, Baytulla tambur ḳadim Lebi oḳlor ato ita shomzaio.”
NUM 31:31 Mabude Musare zela hukum disla, tain ar imam Ali-Azore ola-u ḳorla.
NUM 31:32 Sifai oḳole zitia ana gonimotor mal-samana saṛa-o aro asil, soy laḳ fosottoir azar meṛa ar sagol,
NUM 31:33 baottoir azar goru,
NUM 31:34 eḳshoṭṭi azar gada
NUM 31:35 ar bottish azar abiati shoti fuṛin.
NUM 31:36 Teu zuddo ḳorra sifai oḳlor baṭo foṛlo, tin laḳ shaṛtish azar fas-shoṭa meṛa ar sagol,
NUM 31:37 ita taki Mabudor faona baṭo foṛlo, soy-sho fosottoirgu sagol-meṛa.
NUM 31:38 Ar goru asil soytish azar, ita taki Mabudor baṭo foṛlo baottoirṭa.
NUM 31:39 Ermaze gada asil tish azar fas-shoṭa, ita taki Mabudor baṭo foṛlo eḳshoṭṭigu.
NUM 31:40 Ar abiati shoti fuṛin asla shullo azar, ita taki Mabudor baṭo foṛlo bottishṭa.
NUM 31:41 Mabude Musa nobire zela hukum disla, tain Mabudor faona baṭ nia imam Ali-Azoror ato ola shomzai dila.
NUM 31:42 Ar Musae Boni Israilor bad-baki manshor lagi ze baṭ sifai oḳlor ges taki nisla,
NUM 31:43 i baṭo tin laḳ shaṛtish azar fas-shogu meṛa ar sagol,
NUM 31:44 soytish azar goru,
NUM 31:45 tish azar fas-shoṭa gada,
NUM 31:46 ar shullo azar abiati shoti fuṛin asla.
NUM 31:47 Bade Mabudor hukum mafik Musa nobie Boni Israilor faoa baṭor, forteḳ foinchash zon abiati fuṛin ar foshuin taki-o, egu ḳori fuṛi ar foshu nia Lebi kandanor manshore dila, zerar ufre Mabudor Kaba goror deḳa-hunar zimmadari asil.
NUM 31:48 Erbade sifai dolor azar sifair ar sho-sifair kamanḍar oḳol Musar gese aila,
NUM 31:49 aia ḳoila, “Afnar i gulam oḳole amrar zimmae taḳa sifai oḳolre gonilam. Gonia deḳlam, tara hoḳol fura asoin, zuddot ḳeu morse na.
NUM 31:50 Erlagi amra forteḳor baṭo zeta shunar bazu, bala, ator angṭi, ḳanor dul ar golar har faisi, amra ita hoḳolta loia aisi. Amrar zanor koforar kurbani hishabe ota Mabudor dorbaro dilaitam.”
NUM 31:51 Teu Musa ar imam Ali-Azore tarar ges taki shunar hoḳol goyna shomzia faila.
NUM 31:52 Tara azar sifair ar sho-sifair kamanḍar oḳlor ges taki Mabudor name deoa ze shunar goyna shomzia faila, itar uzon asil shullo azar shat-sho foinchash tola.
NUM 31:53 Musa nobi ar imam Ali-Azore azar sifai ar sho-sifair kamanḍar oḳlor ges taki ou shuna oḳol shomzia raḳla. Rakia Mabudor samne Boni Israilor iadgarir nishana hishabe ota shuna oḳol Kaba goror bitre toila. Ita saṛa-o sifai oḳole gonimotor aro mal-samana zarzir gese raḳsila.
NUM 32:1 Ruben ar Sadu ḳandanor manshor goru-sagolor boṛo boṛo fal asil. Tara deḳla, Zazira ar Giliod elaḳa foshu falibar lagi kub bala zaga.
NUM 32:2 Teu tara Musa nobi, imam Ali-Azor ar Boni Israilor fordan murobbi oḳolre ḳoila,
NUM 32:3 “Afnaintor i gulam oḳole to goru-sagol fali. Ar amrar Mabude Oṭarut, Diban, Zazira, Nimra, Hishbon, Iliali, Sebam, Nobo ar Biun namor zeta zaga Boni Israilor doḳolo anchoin, ita to foshu falibar lagi kub bala zaga.
NUM 32:5 Oḳon afne zudi amrare doya ḳoroin, te ou zaga ḳanain afnar i gulam oḳolre dilaukka. Amrare Zordan gangor hifaro nein na zanu.”
NUM 32:6 Musa nobie tarare zuaf dila, “Tumrar baiain zuddo ḳorat zaiba, ar tumra ono boi roibae ni?
NUM 32:7 Mabude Boni Israilre ze zaga ḳanain disoin, hino zaite tumra ḳene tarar monobol bangi dirae?
NUM 32:8 Huno, age zebla ou desh deḳar lagi tumrar baf-dadainre ami Kadesh-Bornea taki faṭaislam, hou shomoy tara-o ola ḳorsla.
NUM 32:9 Tara Boni Israilor lagi Mabudor dan ḳora desh deḳat gesil, gia Ashkulor faṛia ḳal forzonto deḳsil, dekia aia hou desho zaite erar monobol bangi disil.
NUM 32:10 Erlagi hou din gusae aguin oia Mabude ḳosom ḳaia ḳoisla,
NUM 32:11 ami Mabude ze desh dibar lagi Ibrahim, Isʼhak ar Iakubor gese ḳosom ḳaislam, Mishor taki bar oia aoa manshor maze bish bosor ba er beshi boyoshi kunu zone i desh deḳar shuzug faita nae, ḳenena tara amar ḳota furafur shullo-ana manche na.
NUM 32:12 Ḳali Konizi Zifunnir fua Kalut ar Nunor fut Iusae ou desh deḳar shuzug faiba. Tara to amar ḳotare shullo-ana manche.
NUM 32:13 Hou shomoy Mabude Boni Israilor ufre gusae aguin oigesla, erlagi tan nozoro naformani korra ota manshor binash na oa forzonto, sallish bosor dori morubumir nanan zagat itare sokkor deoaila.
NUM 32:14 “Ar hou gunagar oḳlor aolad oae, oḳon tumra-o zarzir baf-dadar ḳaislot faiso, erlagi Boni Israilor ufre Mabudor gusar aguinre aro baṛairae.
NUM 32:15 Oḳon tumra zudi tan hukum mafik na solo, te tain hirbar ota manshore morubumit falai toiba, tan i lannotor ḳaron oibae tumra-u.”
NUM 32:16 Ita hunia tara Musar daro biṛia ḳoila, “Sab, amra to ḳali foshur fal raḳar zaga banani ar amrar bou-baichchare toar lagi ono ṭaun oḳol bananir izazot saisi.
NUM 32:17 Oile Boni Israilre nizor zagat na fosani forzonto amra zuddor sifair laḳan tarar age age zaimu. Ermaze amrar bou-baichchain baunḍori kora ou ṭauno roile, ota deshor manshor at taki tara nirafode roiba.
NUM 32:18 Hokkol Boni Israilre zarzir zomi-mirash na shomzani forzonto amra nizor goro firia aitam nae.
NUM 32:19 Ar Zordan gangor hofaro Boni Israilor loge amra kunu zomi-zomar baṭo nitam nae, ḳenena amrar baṭ to gangor ou fubor faro-u miligese.”
NUM 32:20 Ikan hunia Musae ḳoila, “Aichcha, tumra zudi hasau ila ḳoro, Allare azir-nazir zania zuddor haze atiar loia zudi hono laṛait zao,
NUM 32:21 ar Allae zotoboil tan dushmon oḳolre tan samne taki kedaia na dein otoboil tumra zuddor haze tan lagi gang faroia hofaro zudi zao,
NUM 32:22 te hou desho Mabudor doḳoldari kaim oia harle tumra ono firot aitae farbae. Teu Mabud ar bad-baki Boni Israilor lagi tumrar ze day-dayitto asil, ita taki kalas oibae; ar Mabudor kushi mafik ou zomino tumrar malikana ḳaim oibo.
NUM 32:23 Oile tumra zudi ila na ḳoro, te tumra Mabudor gese gunagar bonbae. Mono rakio, tumrar fafe tumrare saṛto nae.
NUM 32:24 Oḳon tumrar bou-baichchar lagi ṭaun oḳol ar goru-sagol toar lagi zaga-o banaitae faro, oile tumra zeḳan oada ḳorso, ita furon ḳora lagbo.”
NUM 32:25 Teu Sadu ar Ruben ḳandanor manshe Musa nobire ḳoila, “Afne to amrar malik, afnar i gulam oḳolre afne zela hukum disoin, amra ola-u solmu.
NUM 32:26 Amrar bou-baichchain ar goru-sagolor fal onor Giliod elaḳar ṭaun oḳol-o roiba.
NUM 32:27 Oile amra amrar malikor hukum mafik zuddor shaz-shoronjam loia gang faroia Mabudor name laṛai korat zaimu.”
NUM 32:28 Teu Musae ota manshor befare imam Ali-Azor, Nunor fua Iusa, ar Boni Israilor baro ḳandanor nanan gusṭir murobbi oḳolre hukum dila.
NUM 32:29 Tain erare ḳoila, “Sadu ar Ruben ḳandanor hoḳol beṭain zudi hasau zuddor shaz-shoronjam loia Mabudor name laṛai korar niote tumrar loge Zordan gang faroia zain, te hou desh zebla tumrar doḳolo aibo, ou shomoy tumra Giliod elaḳare tarar malikanae shomzai dio.
NUM 32:30 Oile tara zudi ila na ḳoroin, te hou Kenan desho-u tumrar loge tarar baṭ niba.”
NUM 32:31 Ikan hunia Sadu ar Ruben ḳandanor manshe ḳoila, “Mabude tan i gulam oḳolre zela hukum disoin, amra ola-u ḳormu.
NUM 32:32 Amra Mabudor name zuddor shaz-shoronjam loia Zordan gang faroia Kenan desho zaimu, oile amrar zomi-zomar baṭ gangor ofaro roilo.”
NUM 32:33 Ikan hunia Musa nobi razi oila. Tain Sadu ar Ruben ḳandanre, erloge Iusufor fua Manosha ḳandanor ordeḳ manshore, ou zagain dila. Musae Amuri oḳlor bashsha Sihun ar Bashonor bashsha Uzor asta razottor hoḳol ṭaun ar gau-geram shoho shob zomi-mirash tarar lagi toila.
NUM 32:34 Teu Sadu ḳandanor manshe Diban, Oṭarut, Aruar,
NUM 32:35 Aṭrut-Shufan, Zazira, Zogbia,
NUM 32:36 Bayt-Nimra, Bayt-Haran namor gauain ar ṭaun oḳolre usa usa baunḍori oal gatia mozbut ḳorla. Erloge tarar goru-sagol toibar zaga-o banaila.
NUM 32:37 Ruben ḳandanor manshe Hishbon, Iliali, Kiriataim ṭaun,
NUM 32:38 ar Nobo, Baal-Miyun, Sibma namor gauain ṭik-ṭak korla. Ḳoria tara itar noya nam toila.
NUM 32:39 Manoshar fua Makiror aolad oḳole Giliodo gia age-u ita doḳol ḳorilisil, ar honor bashinda Amuri oḳolre ḳedai disil.
NUM 32:40 Erlagi Musae Manoshar ou aolad Makiri oḳlor baṭo Giliod elaḳare dilaila, tara ono boshot ḳorla.
NUM 32:41 Ermaze Manosha ḳandanor Zayir namor eḳzone gia Amuri oḳlor hoḳol gau-geram doḳol ḳorilisil, ar itar nam disil Habbut-Zayir.
NUM 32:42 Ar Nuba namor eḳzone gia Konat ar er ḳanda-ḳasar gau-geram oḳol doḳol ḳoria, tar nizor name i zagar nam dilo Nuba.
NUM 33:1 Musa ar Harun nobir netagirie Boni Israil zati fouzi dol hazia, Mishor desh taki bar oia aoar bade nanan zagat dom loila.
NUM 33:2 Ar Mabudor hukume Musa nobie tarar dom loar zagaintor nam lekia toila. Ou zagain oilo,
NUM 33:3 bosoror foyla sandor fonro tarik, mani Azadi Idor bador din, tara Mishor deshor Ramashesh elaḳa taki roana oila. Mishoror hoḳol manshor sokur samnedi tara buk fulaia bar oia aila.
NUM 33:4 Ou shomoy Mishori oḳole tarar boṛo fuaintor lash dafon ḳorat asil. Mabude agor rait tarar hoḳol goror boṛo fuainre marilisla. Tain otar deb-debir ufre-o gozob ḍalia tarar faona shaza disla.
NUM 33:5 Boni Israile Ramashesh elaḳa saṛia Sukkoto aia tambu gaṛila.
NUM 33:6 Bade Sukkot taki morubumir ḳandat Etom namor zagat aia tambu gaṛila.
NUM 33:7 Ar Etom taki Baal-Zafonor samne Migdulor ḳandat Fama-Hirut namor zagat aia tambu gaṛila.
NUM 33:8 Bade Fama-Hirut taki doria faroia Etom morubumit gela, ou morubumi bae tin dinor fot faṛi dia Maruat gia tambu gaṛila.
NUM 33:9 Bade Marua taki Elimo gela, ino fanir barogu indara ar shottoirgu ḳezur gas asil.
NUM 33:10 Erbade Elim saṛia Nil doriar faro gia tambu gaṛila.
NUM 33:11 Hono taki Sin morubumit aia roila.
NUM 33:12 Ar Sin morubumi taki Dofka namor zagat gia kemp gaṛila.
NUM 33:13 Bade Dofka saṛia Alusho gia kemp gaṛila.
NUM 33:14 Alush taki Rofidimo gela, ino ḳaibar kunu fani asil na.
NUM 33:15 Teu Rofidim saṛia tara Sinai morubumit gia kemp gaṛila.
NUM 33:16 Erbade Sinai morubumi taki Kibrut-Hutaba.
NUM 33:17 Kibrut-Hutaba taki Hazirut.
NUM 33:18 Hazirut taki Ritma.
NUM 33:19 Ritma taki Rimmon-Perosh.
NUM 33:20 Oḳan taki Libna.
NUM 33:21 Libna taki Rissa.
NUM 33:22 Rissa taki Kohelata namor zagat tambu gaṛila.
NUM 33:23 Bade gela Shefor faṛo.
NUM 33:24 Oḳan taki Horada.
NUM 33:25 Horada taki Moḳelut.
NUM 33:26 On taki Tohot.
NUM 33:27 Bade Tareḳ.
NUM 33:28 Tareḳ taki Mitka.
NUM 33:29 Mitka taki Hoshmuna.
NUM 33:30 Bade Moserut.
NUM 33:31 On taki Boni-Iakan.
NUM 33:32 Bade Hur-Hoggidgod.
NUM 33:33 On taki Zotbata.
NUM 33:34 Zotbata taki Oboruna.
NUM 33:35 Bade Izion-Geber.
NUM 33:36 Ar oḳan taki Zin morubumir ḳandat Kadesh elaḳat gia tambu gaṛila.
NUM 33:37 Bade Kadesh saṛia Idum deshor shimanar gese Hur faṛo roila.
NUM 33:38 Boni Israil Mishor desh taki baroi aoar bade, sallish bosoror fas nombor sandor foyla din imam Harun Mabudor hukume Hur faṛor ufre uṭisla, ar hono tan ufat oilo.
NUM 33:39 Tain eḳ-sho teish bosor boyosho Hur faṛor ufre inteḳal ḳorla.
NUM 33:40 Ermaze Orad elaḳar Kenani bashshae ḳobor faila, Boni Israil ono aisoin. Tain to Kenan deshor Negeb morubumit roita.
NUM 33:41 Bade Boni Israile Hur faṛ saṛia Solmuna namor zagat gia tambu gaṛila.
NUM 33:42 Solmuna taki Punon gela.
NUM 33:43 Punon taki Obut gela.
NUM 33:44 Obut taki Muab deshor shimanat Iya-Abarimo gela.
NUM 33:45 Oḳan taki Diban-Sadu gela.
NUM 33:46 On taki Almun-Diblatimo gela.
NUM 33:47 Bade tara Abarim faṛo uṭia Nobo namor ṭillar ḳandat kemp gaṛila.
NUM 33:48 Erbade Abarim faṛ saṛia Ziriho ṭaunor ulṭabae Zordan gangor ḳandat Muab deshor tol zagat tambu gaṛila.
NUM 33:49 I kempor shimana asil Zordan gangor faro Muab elaḳar tol zaga Bayt-Zishimut taki Abel-Shiṭim ṭaun forzonto.
NUM 33:50 Ar ou shomoy Ziriho elaḳar Zordan gangor daro Muab deshor tol zagat Mabude Musa nobire ḳoila,
NUM 33:51 “Tumi Boni Israilre zanai deo, tumra zebla Zordan gang faroia Kenan desho gia azibae,
NUM 33:52 ou shomoy tumrar samon taki honor hoḳol manshore ḳedai dibae. Ḳedaia tarar fattor kudia banail hoḳol murti bangia surmar ḳorbae. Hunaror atiardi banail hoḳol deb-debir murti binash ḳorbae. Ar ṭillar ufror devtar namor foshur-boli kanain tulia falaibae.
NUM 33:53 Olaḳan tumra asta desh doḳol ḳoria hono boshot ḳorbae. Mono rakio, tumrar doḳoldarir lagi i deshḳan ami tumrare dan ḳorsi.
NUM 33:54 Hono loṭari maria tumrar nanan gusṭir zaga baṭia nio. Ze gusṭit beshi manush tarare beshi zaga, ar ḳom oile ḳom zaga dio. Loṭarit ze gusṭie ze zaga faiba, tara ono-u boshot ḳorba. Ḳandanor mazor nanan gusṭie zarzir ḳandanor elaḳar maze zaga faiba.
NUM 33:55 Oile tumra zudi honor bashinda oḳolre na ḳedao, te tarar zeguin roiba, iguin tumrar sokur ḳaṭa ar bukur sel bonia roiba. Itae tumrar boshoti zomino tumrare zulum-mosiboto falaiba.
NUM 33:56 Hou shomoy ami tumrare ola shaza dimu, ze shaza ḳali tarar lagi-u ṭik koria toislam.”
NUM 34:1 Mabude Musa nobire ḳoila,
NUM 34:2 “Tumi Boni Israilre amar ou hukum zanai deo, tumra gia Kenan desho hamanir bade hono ze zagar malikana faibae, i zagar shimana oilo,
NUM 34:3 Idum deshor boḍaror Zin morubumir kisu elaḳa tumrar deshor douknor shimana. Bade ou douknor shimana taki fubedi gia Luna shagoror hesh mata forzonto.
NUM 34:4 Erloge Akrabbim faṛor fot faroia hari Zin morubumit hamaia Kadesh-Bornear douknedi shimana zaibo. Gia oḳan taki Hazor-Ador oia Ozmun forzonto tumrar shimana.
NUM 34:5 Ar Ozmun taki guria Mishoror shimanar hukna ḳalor faredi Bumodio shagoro gia lagbo.
NUM 34:6 “Tumrar deshor foismor shimana oibo Bumodio shagor. Iṭa-u tumrar foismor ail.
NUM 34:7 “Tumrar utoror shimana oibo, Bumodio shagor taki Hur namor faṛ,
NUM 34:8 ou faṛ taki Hamato zaibar fot forzonto, Hamator fot taki tumrar shimana Zidad gau forzonto zaibo.
NUM 34:9 Ar Zidad taki Zifrun oia Hazor-Onono gia shesh oibo. Iṭa-u oibo tumrar utoror shimana.
NUM 34:10 “Deshor fubor shimana oilo, Hazor-Onon taki Shofam forzonto eḳṭa shimana ail ṭik korio.
NUM 34:11 Ou Shofamor shimana taki Oin gaur fubedi gia Ribla forzonto aia lambo, lamia Galil aoror soredi zaibo,
NUM 34:12 gia Zordan gangor faredi Luna shagoro aia shesh oibo. Ou shob oilo tumrar deshor sairo galar shimana ail.”
NUM 34:13 Ar Musae Boni Israilre hukum dila, “Mabudor hukum mafik tumra loṭari maro, maria tumrar noy ḳandan ar Manosha ḳandanor ordeḳ manshore ou deshor zomi-maṭi baṭia dia, tumrar doḳoldari kaim ḳoro.
NUM 34:14 Zano to, Ruben ḳandan, Sadu ḳandan ar Manosha ḳandanor ordeḳ manshe tarar zarzir gusṭi mafik zomi-zomar baṭ age-u failise.
NUM 34:15 Tara Ziriho elaḳar Zordan gangor fubor faro tarar baṭ age-u basia nisoingi.”
NUM 34:16 Mabude Musare ḳoila,
NUM 34:17 “Ou deshor zomi-maṭire baṭia dite zera matobbori korba, erar nam oilo, imam Ali-Azor ar Nunor fua Iusa.
NUM 34:18 Zomi-zoma baṭibar ḳalo shaijjo ḳorar lagi fortek kandano taki eḳzon ḳori shordar nibae.
NUM 34:19 Ou shordar oila, Ehuda ḳandanor Zifunnir fua Kalut,
NUM 34:20 Shimion ḳandanor Amihudor fua Shamuel,
NUM 34:21 Bin-Iamin ḳandanor Kislunor fua Ilidod,
NUM 34:22 Dan ḳandanor shordar Uzolir fua Bukki,
NUM 34:23 Iusufor fua Manosha ḳandanor shordar Ifador fua Hanniel,
NUM 34:24 Iusufor fua Afraim ḳandanor shordar Shiftonor fua Komuel,
NUM 34:25 Sobulon ḳandanor shordar Fornaḳor fua Ilizafon,
NUM 34:26 Isaḳor ḳandanor shordar Azanor fua Foltiel,
NUM 34:27 Ashir ḳandanor shordar Sholumir fua Ohihud,
NUM 34:28 Noftali kandanor shordar Amihudor fua Fodohel.”
NUM 34:29 Mabude ou shordar oḳolre zimmadari shomzaila, Kenan desho Boni Israilor zomi-zoma baṭia dibar lagi.
NUM 35:1 Bade Ziriho ṭaunor ḳasat Zordan gangor daro Muab deshor tol zagat Mabude Musare ḳoila,
NUM 35:2 “Tumi Boni Israilre ou hukum deo, tara zarzir ḳandanor zomi-zomar baṭ faia harle, ota taki kisu ṭaun Lebi kandanor manshore dilaita, era ono roiba, erloge bondor kisu zomi-o erare dita.
NUM 35:3 Ou ṭauno tara boshot ḳorba, ar bondor zomino tarar foshur fal raḳba.
NUM 35:4 Tumra Lebi kandanre ze ṭaun oḳol dibae, itar baunḍori oalor bare tarare aro eḳ azar at zaga dibae, tarar foshur fal raḳar lagi.
NUM 35:5 Tumra zoto ṭaun tarare dibae, itar sairo galar baunḍori oalor bare, mani utore-douḳne, fube-foisme, hokkolbae aro dui azar at bondor zaga mafia dio. Ono tarar foshur fal raḳba.
NUM 35:6 “Tumra Lebi kandanre zeta ṭaun oḳol dibae, ermazor soyḳan ṭaun oibo kuni manshor asroy ṭaun. Kunu manshe aḳta ḳeurore marilile, he ou ṭauno gia asroy loibo. Ou soy ṭaun bade-o Lebi kandanre aro beyallish ḳan ṭaun dilaibae.
NUM 35:7 Muṭ aṭchallish ḳan ṭaun Lebi oḳolre dibae, ar erloge foshur fal raḳar bondor zaga-o dibae.
NUM 35:8 Boni Israilor zomi-zoma taki Lebi kandanre zebla ṭaun oḳol dibae, ou shomoy hoḳol ḳandane faoa zominor baṭ taki tarare dibae. Ze ḳandane beshi faise era beshi diba, ar zera ḳom faise era ḳom diba.”
NUM 35:9 Erbade Mabude Musare ḳoila,
NUM 35:10 “Tumi Boni Israilre ḳo, tumra zebla Zordan gang faroia Kenan desho gia hamaibae,
NUM 35:11 ou shomoy tumrar nizor lagi koyḳan asroy ṭaun ṭik korio. Teu kunu manshe zudi aḳta ḳoza ḳoria ḳeurore kun ḳorilae, te bagia hono gia asroy loibo.
NUM 35:12 Kunor bodla loura manshor ges taki bagia zan basanir lagi i asroy ṭaun. Ete Boni Israilor adaloto bisaror ag forzonto kunor ashamire ḳeu zane marar shuzug faito nae.
NUM 35:13 Erlagi Lebi kandanre tumra ze ṭaun oḳol dibae, itar mazor soyḳan ṭaun oibo tumrar asroy ṭaun.
NUM 35:14 Ermazor tinḳan ṭaun oibo Zordan gangor fubor faro, ar tinḳan oibo Kenan deshor bitre.
NUM 35:15 Ou soyoḳan ṭaun oibo Boni Israilor lagi, tumrar loge roura bin-deshi oḳlor lagi ar musafir oḳlor lagi asroy ṭaun. Erar mazor ḳeu zudi aḳta bekiale ḳeurore kun ḳorilae, te oḳano gia zan basaibo.
NUM 35:16 “Oile kunu manshe zudi luar kunu atiar dia ḳeurore mare ar hou zon morizae, te ogu kuni. Ou kunire zane marilibae.
NUM 35:17 Ze fattor dia kunu manshore kun ḳora zaibo, ila kunu fattor zudi keuror ato taḳe, ar ogudi keurore marae hou manush morizae, te ogu-o kuni. I kunire zane marilibae.
NUM 35:18 Manush kun oar moto kunu laḳṛir zinish zudi keuror ato taḳe, ar ogu dia ḳeurore marae hou manush morizae, te ogu-o kuni. I kunire zane marilibae.
NUM 35:19 Kun oa zonor afon ze manshe i kunor bodla loar ḳota, ḳali he-u ou kunire zane marilibo. Kunir deḳa faile-u tare zane marilibo.
NUM 35:20 “Ar ingsha ḳoria zudi eḳzone aroḳzonre ḍekka mare, ba kunuzat ostrodi ichcha ḳoria iṭa mare ar hou manush morizae,
NUM 35:21 ba dushmonir babe ḳeurore gushi mare ar he morizae, te ze marse he kuni. I kunire zane marilibae. Kun oa zonor afon ze manshe i kunor bodla loar ḳota, he ou kunir lagal faile-u tare zane marilibo.
NUM 35:22 “Oile mono kunu dushmoni na rakia bule aḳta ḳeurore ḍekka marle, ba mono kunu ḳarafi na taḳle-o bule tar ufre iṭa mari dile,
NUM 35:23 ba na dekia, manush morizibar zuka kunu fattor ḳeuror ufre falai dile he zudi morizae, te kunuzat dushmonir bab na taḳae, ar ḳeti korar kunu ichcha na taḳae,
NUM 35:24 Boni Israilor adalotor manshe, ou kunir ar kunor bodla loura zonor befare ou niom mania bisar ḳorba.
NUM 35:25 Ou shomoy adalotor manshe kunor bodla lourar at taki kuni zonre basaiba, basaia he age zeḳano bagia gesil, hou asroy ṭauno tare hirbar fosai diba. Ar fobitro tel dia ḳelafoti faoa fordan imam sabor moutor ag forzonto he hono roibo.
NUM 35:26 Oile he zudi kunu shomoy hou asroy ṭaunor bare bar oia zaegi,
NUM 35:27 ar bodla lourae tare faia zane marilae, te he kunor dayi oito nae.
NUM 35:28 Ḳaron fordan imamor mout na oa forzonto he asroy ṭauno roar ḳota. Ḳali fordan imamor moutor bade he nizor baṛit firia aito farbo.
NUM 35:29 Tumra deshor zeno-u boshot ḳoro na ḳene, oarishor for oarish dori ita mante oibo, ita to oilo tumrar shoriotor eḳṭa ain.
NUM 35:30 “Shakkir zobanbondir ufre nirbor ḳoria kunire zane marilaoa oibo. Oile ḳali eḳzon shakkir ḳotae ḳeurore marilaoa zaito nae.
NUM 35:31 Mout-u zar faona shaza, ila kunu kunire kunumonte-u ṭeḳar bodla ḳalas deoa zaito nae. Tare zane marilite-u oibo.
NUM 35:32 Ashroy ṭauno roura kunu ashamire ṭeḳar bodla, fordan imamor moutor age tar nizor baṛit firai ana zaito nae.
NUM 35:33 Mono rakio, ita ḳoria tumra nizor deshor maṭire nafak korio na. Zano to, kunor loue desh nafak oizae. Ar ze desho kunor lou zorse, hou kunir lou saṛa ar kunumonte-u hi deshor nafakir kofora oy na.
NUM 35:34 Ar tumra ze desho roibae ami-o to hono roimu, erlagi i deshre nafak banaio na. Ḳaron ami Mabud Boni Israilor maze boshot ḳori.”
NUM 36:1 Iusuf nobir aolador ḳandan oḳol taki, Manoshar nati Makiror fua Giliod gusṭir nanan foribar taki murobbi oḳol aila, aia tara Musa nobi ar Boni Israilor nanan gusṭir shordar oḳlor loge matila.
NUM 36:2 Ḳoila, “Mabude amrar i malikre hukum disla, loṭari maria Boni Israilor maze deshor zaga-zomin baṭia dita. Dibar shomoy amrar bai Zolafḳador zomi-zoma ḳanain tar fuṛintore dibar hukum disoin.
NUM 36:3 Oile Boni Israilor dusra kunu ḳandanor manshor loge zudi ou fuṛintor bia oy, te amrar baf-dadar samana taki tarar samana bar oia gia, tarar zamair ḳandanor zomi-zomat hamaizibo, ete amrar ḳandanor zomi-mirashor kisu ongsho ḳomizibo.
NUM 36:4 Boni Israilor zomi-mirash Firot Faoar hou fobitro foinchash bosoror ḳalo, tarar zomi-zoma gia to tarar zamair ḳandanor samana oizibo. Ou laḳan amrar baf-dadar zomi-mirash taki tarar ongsho bar oia zaibogi.”
NUM 36:5 Ikan hunia Mabudor hukum mafik Musae Boni Israilre ḳoila, “Iusufor aolador ou ḳandanor manshe zeta ḳoira, ita to hasa.
NUM 36:6 Erlagi Zolafḳador fuṛintor befare Mabude hukum dira, tara zare fosond ḳoroin tar gese-u bia boita farba. Oile shorto oilo, tarar bafor ḳandanor bitre bia boite oibo.
NUM 36:7 Boni Israilor zomi-mirash ek kandan taki arok kandano zaito farto nae. Boni Israilor forteḳ zone tar baf-dadar zomi-mirash basani lagbo.
NUM 36:8 Boni Israilor forteḳe zate tarar baf-dadar ges taki faoa zomi-zomar malikana ṭikai raḳto fare, otar lagi fortek kandanor zomi-zomar malikana faoa fuṛinte tarar bafor ḳandanor noshar gese bia boite oibo.
NUM 36:9 Ek kandan taki arok kandano kunu zomi-zoma zaito nae. Boni Israilor fortek kandane tarar zomi-zomar malikana doria raḳte oibo.”
NUM 36:10 Mabude Musare zela hukum disla, Zolafḳador fuṛinte ola manla.
NUM 36:11 Tarar bafor ḳandanor baiaintor gese bia boila. Zolafḳador fuṛintor nam oilo, Mohola, Tirza, Hogla, Milka, ar Nua.
NUM 36:12 Iusufor fua Manoshar ḳandanor gusṭi oḳlor maze-u tara bia boila.
NUM 36:13 Ar huno, Ziriho elaḳar Zordan gangor daro Muab deshor tol zagat, Mabude Musa nobir mazdi Boni Israilre ou hukum-ahkam ar niom-ḳanun oḳol disla.
DEU 1:1 Musa nobie Zordan gangor fub faror Araba namor morubumit Boni Israil zatire ou boyan ḳorsla, tain Suf gaur samne ubaia tarar loge matila. Er eḳbae asil Faran, ar oinnobae asil Tufol, Labon, Hazirut ar Dizahab, ou sair gau.
DEU 1:2 Seiror faṛia fotedi Tur faṛ taki Kadesh-Bornea forzonto aṭia zaite ḳali egaro din lage.
DEU 1:3 Oile Boni Israil Mishor taki bar oia unchallish bosor egaro mash forzonto, ortat soforor sallish boros solar ḳalo, ono gurila. Bade ou mashor foyla tariko Musa nobie tarare zanaila Mabude tanre zeta ḳoisla.
DEU 1:4 Tain laṛai kori Amuri oḳlor bashsha Sihunre ar Bashon deshor bashsha Uzre araia harle ita ḳoila. Ou Sihune bashshai korta Hishbon ṭauno, ar Uze bashshai korta Osṭarut ar Idri ṭauno.
DEU 1:5 Zordan gangor fub faror Muab desho, Musa nobie Allar deoa Tourator talim boyan ḳoria buzaila. Tain ḳoila,
DEU 1:6 “O Boni Israil, huno, amra Tur faṛor galat taḳar ḳalo Mabud Allae amrare ḳoisla, ou faṛor galat tumrar bout din guzori gese.
DEU 1:7 Te oḳon tumra hoḳole tambu tulia Amuri oḳlor faṛia elaḳa ar ou elaḳar ḳanda-ḳasar hoḳol zagat zaoar lagi roana o. I zaga hoḳolta oilo gia: Araba morubumi ar ou morubumir ḳanda-ḳasar usa faṛia zaga ar nisa faṛia zaga, Negeb morubumi ar doriar kinara, mani Kenan desh taki arombo ḳoria Lebanon desh oia Furat gang forzonto ita hoḳol zaga.
DEU 1:8 Mono rakio, ita hoḳol zaga ami tumrare dilaisi. Ami Mabude tumrar baf-dadain Ibrahim, Isʼhak, Iakub ar tarar ḳandanre ze desh deoar oada ḳorslam, tumra oḳon gia ita hoḳol zaga doḳol ḳorilao.
DEU 1:9 “Te baiainre, hou shomoy ami tumrare ḳoislam, tumra hoḳlor bar to ami eḳla boibar shaiddo nai.
DEU 1:10 Tumrar Mabud Allae tumrare oto aolad baṛai disoin, erlagi tumra aiz asmanor terar laḳan oiso, gonia fuṛail zae na.
DEU 1:11 Tumrar baf-dadar Mabud Allae tumrare aro azar azar gun baṛaukka, ar tan oada mafik tumrare rohom-borkot deukka.
DEU 1:12 Oile ami eḳla ḳemne tumrar ḳaijja-fosad miṭaitam, ar tumrar zimmadarir bar boitam?
DEU 1:13 Erlagi tumrar fortek kandan taki koyzon aḳoldar, zanra-hunra ar hoḳol manshor gese ijjoti zonre fosond ḳoro, ami tumrar zimmadari erar ato shomzaimu.
DEU 1:14 “Tumra zuaf dislae, aichcha, afne zela ḳoira, ola-u bala oibo.
DEU 1:15 Teu ami tumrar fortek kandan taki aḳoldar, buddiman ar zanra-hunra zonre nia tumrar azar zonor ufre, sho zonor ufre, foinchash zonor ufre, dosh zonor ufre shordar banai dislam, ar ofisar-o boail ḳorslam.
DEU 1:16 “Hou shomoy ami tumrar hakim oḳolre hukum dislam, ḳoislam, ḳaijja-fosador bisaro badi-bibadi duio fokkor mat hunia hok insaf ḳorio, ita nizor zatir ouk ba bin zatir ouk.
DEU 1:17 Bisaror shomoy tumra ḳeuror fokko loio na, doni-gorib hoḳlor ḳota hunio. Ashole bisaror malik to Alla, erlagi tumra kunu manshore ḍoraio na. Ze bisaror mimangsha ḳora tumrar lagi koṭin oy, ikan amar gese anio, ami deḳmu.
DEU 1:18 Ar tumra kila kita ḳortae, ita to ami hou shomoy ḳoia dislam.
DEU 1:19 “Bade amra Mabud Allar hukum faia, Tur faṛ saṛia Amuri oḳlor faṛia elaḳa muka roana oilam. Tumra to deḳso, ḳoto boṛo ar ḳoto marattoḳ morubumi faroia amra Kadesh-Bornea aia azilam.
DEU 1:20 Azia hari ami koislam, oḳon to tumra Amuri oḳlor hou faṛia elaḳat aia fosi geso, i deshḳan amrar Mabud Allae amrare dilaira.
DEU 1:21 Huno, tumrar Mabud Allar dan ḳora ou asta desh-u tumrar samne foṛi roise. Oḳon zao, gia tumrar baf-dadar Mabud Allar oada ḳora ou deshre doḳol ḳoro. Ḳeu ḍoraio na, nirash oio na.
DEU 1:22 “Ou shomoy tumra hoḳol aia amare ḳoilae, te foyla ḳoyzon guiare ou desho faṭail ouk, tara gia deshḳan dekia aia amrare ḳoiba, kun fote zaoa amrar lagi bala ar zaoar foto kun kun ṭaun foṛbo.
DEU 1:23 “Tumrar foramish amar fosond oilo, erlagi fortek kandan taki eḳzon ḳori muṭ baro zonre alog korlam.
DEU 1:24 Tara tumrare ono toia ou faṛor ufre uṭlo, ar Ashkul namor faṛia ḳalo gia bala ḳori hoḳolta dekia ailo.
DEU 1:25 Tara hou desh taki kisu fol-mul ania amrare deḳaia ḳoilo, amrar Mabud Allae amrare ze deshḳan dan ḳorra, ikan to boṛo bala zaga.
DEU 1:26 “Oile tumra ou desho zaite razi oilae na. Tumra nizor Mabud Allar hukumor birudita ḳorlae.
DEU 1:27 Tumra zarzir tambut hamaia boḳa-zoḳa shuru ḳorlae, ar ḳoilae, Mabude amrar loge dushmoni koroin, erlagi-u amrare binash ḳorar niote, Amuri oḳlor ato falaia marar kiale, Mishor desh taki tain amrare bar ḳori anchoin.
DEU 1:28 Amra kila hino zaimu? Amrar guia baiainte aia zano ḍor harai disoin. Tara ḳoisoin, hinor manush bule amra taki bout usa-muṭa foyluan. Tarar ṭaun oḳol-o boṛo boṛo, itar sairobae usa usa oal dia baunḍori kora, asmano soilar lager. Ar foyluan Anaki oḳolre-o bule hono deḳsoin.
DEU 1:29 “Ita hunia ami tumrare ḳoislam, tumra mon gabṛaio na, itare ḍoraio na.
DEU 1:30 Tumrar Mabud Alla to tumrar age age zaira. Tain tumrar fokko loia tumrar sokur samne Mishor desho zela zuddo ḳorsla, oḳono oula ḳorba.
DEU 1:31 Ar ou morubumir maze-o to tumra deḳso, ono aia fosar ag forzonto, bafe zelaḳan afon futre kulo ḳori boia nein, oulaḳan Alla Mabude tumrare-o asta fot boia anchoin.
DEU 1:32 Otota hunar bade-o tumra tan ufre borosha ḳorlae na.
DEU 1:33 Taine-u to tambu gaṛibar zaga sinanir lagi ar fot sinaia nibar lagi, raitkur shomoy agunir kuṭi ar dinkur shomoy megor kuṭir nomuna oia tumrar age age gesoin.
DEU 1:34 “Oile tumrar ita zuaf hunia Mabude kub gusa ḳorla, tain ḳosom ḳaia ḳoila,
DEU 1:35 ami Mabude tumrar baf-dadar gese ḳosom ḳaislam ou deshḳan ditam ḳori, ta-o oḳonkur ita naforman oḳole i bala zaga ḳan deḳar nosib oito nae,
DEU 1:36 ḳali Zifunnir fua Kalut saṛa. Ikan deḳar shoubaiggo ou Kalute faibo, he amar ḳotare furafur manche, he zeta zaga faodi faṛaia aise, ita zaga ami tare ar tar aolad oḳolre dimu.
DEU 1:37 “Baiainre, tumrar ḳarone Mabude amar ufre-o gusa ḳorla, gusa ḳori amare ḳoila, tumi Musa-o hou desho hamaitae fartae nae.
DEU 1:38 Ḳali tumar ḳadim Nunor fua Iusa gia hono hamaibo. Tumi tare shaosh dio, he Boni Israilre i deshor doḳoldari dia malik banaibo.
DEU 1:39 Tumra ḳoislae, amrar bebuz nabalik huruttaintore hou deshor manshe doria nibogi. Oile ami Mabude erare-u ou Kenan deshor malik banaimu, era ikan doḳol ḳorba.
DEU 1:40 Te oḳon tumra hirbar fisaia gia Nil doriar faredi morubumir bae roana deo.
DEU 1:41 “Ikan hunia tumra ḳoislae, amra to Mabudor dorbaro gunagar oigesi. Ta-o amrar Mabud Allar hukum mafik oḳon gia zuddo ḳormu. Oḳan ḳoia tumra ostro-shostro loilae, ar mono ḳorslae, faṛi elaḳat uṭia zuddo ḳora-o kub shuza.
DEU 1:42 “Oile Mabude amare ḳoila, tumi tarare ḳo, tara zanu zuddor lagi faṛo na uṭe, ḳaron ami tarar loge roitam nae, ar amare saṛia zudi tumrar nizor ichchae zao, te dushmonor gese aribae.
DEU 1:43 Ami tumrare hushiari deoar bade-o tumra ita manlae na. Tumra Mabudor hukumor ulṭa gia buk fulaia ou faṛo uṭat laglae.
DEU 1:44 Teu faṛor bashinda Amuri zatie tumrare dekia fal bandi bar oilo, mousaḳor mou-fukor laḳan fal bandia tumrar ḳore ḳore ailo, ar marte marte Seiror Horma ṭaun forzonto ḳedaia nilo.
DEU 1:45 Bade tumra aia Mabudor gese ḳandon lagailae, oile Mabude ḳan bond ḳorilla, i kandon hunla na.
DEU 1:46 Ou nomunae tumra bout din Kadesh elaḳat roilae, lamba shomoy ono guzrilo.”
DEU 2:1 Hozrot Musae aro ḳoila, “Mabude amare zela hukum disla, oula amra fisaia gia morubumir mazedi Nil doriar muka roana dilam. Seiror faṛia elaḳa sokkor dia zaite amrar bout din gelogi.
DEU 2:2 Bade Mabude amare ḳoila,
DEU 2:3 tumra bakka din taki ou faṛia elaḳat sokkor dirae, oḳon uttor muka roana deo.
DEU 2:4 Erbade tain amare ḳoila, ami tumrare zanaitam tumra oḳon Shek Ishʼor aolador doḳole taḳa Seir deshor bitredi zaite oibo. Gele tumrare dekia tara ḍoraiba, oile tumra kub hushiar roio, era to tumrar baiain.
DEU 2:5 Tarar loge ḳaijja-fosad ḳorio na. Mono rakio, tarar deshor eḳ inchi zomi-o ami tumrare ditam nae. Ḳaron asta Seir faṛor malikana ami Shek Ishʼre dilaisi.
DEU 2:6 Tarar ou desh faroia zaibar ḳalo tumrar ḳani-kuraki lagle ṭeḳadi loia ḳaibae, oula fani-o loia ḳaibae.
DEU 2:7 “Tumrar Mabud Allae hoḳol ḳamor maze-u tumrare rohom-borkot disoin. Ou oto boṛo morubumi faronir bala tain tumrare hefazot ḳorsoin. Ou sallish bosor dori tumrar Mabud Alla tumrar loge loge asoin, erlagi kunu laḳan obab oise na.
DEU 2:8 “Teu amra fatari fote aṭilam, aṭia amrar bai Seiror bashinda Ishʼor aolador desh falaia gelam. Amra Araba tolbumir ze rasta Elat ar Izion-Geber taki bar oia aise, ou fotedi na gia Muabor morubumir muka aṭa dorlam.
DEU 2:9 Ar Mabude amare ḳoila, tumra Muabi oḳolre sataio na, kunu zuddor bab-shab deḳaio na. Mono rakio, tarar deshor kunu zomi-u ami tumrare ditam nae. Tarar razdani Aur ṭaunor malikana ami Lut nobir aolad Muabi oḳolre dilaisi.”
DEU 2:10 (Age Eimi zatir manush ou elaḳat roita, ita asla foyluan zati, tara forimane asla bout zon, ar deḳte Anaki zatir laḳan usa-muṭa lamba.
DEU 2:11 Anaki oḳlor laḳan Eimi oḳolre-o Rofayi name ḍaḳa oito, oile Muabi oḳole itare Eimi koia ḍakita.
DEU 2:12 Seir faṛo Hurio oḳole boshot ḳorta, bade Ishʼor aolad oḳole tarare ḳedaia dia ikan doḳol ḳorla. Mabudor ate Boni Israile zela Kenan deshor malikana faia Kenani oḳolre ḳedaiba, ṭik ola Ishʼor aolad oḳole-o ḳorsla. Tara Hurio oḳolre binash ḳoria hoḳol zomi-maṭi doḳol ḳoria nize hono boshot ḳorla.)
DEU 2:13 Musa nobie aro ḳoila, “Bade Mabude hukum dila, tumra zoldi kori roana o, ar Zered faṛia ḳal faroia hofaro zao. Teu amra faroilam.
DEU 2:14 Ar Kadesh-Bornea taki bar oia hari Zered gulla faroia aite amrar aṭtish bosor lagsil. Ermaze oula oilo, Mabude age ḳosom ḳaia zela ḳoisla, oula Kadesh-Bornea taki baronir ḳalo amrar zoto sifai asla, era hoḳol-u ou aṭtish bosore morigela.
DEU 2:15 Boni Israil shomaz taki tarare binash ḳorar ag forzonto Mabud tarar bifokke asla.
DEU 2:16 “Ou hoḳol sifai moria shesh oia harle,
DEU 2:17 Mabude amare ḳoila,
DEU 2:18 Aiz tumra Muabi oḳlor deshor shimana faroibae, tarar razdani Aur ṭaunor ḳandabae zaibae.
DEU 2:19 Oile tumra zebla Boni-Amman deshor ḳasat zaibaegi, gia tarare sataio na, tarare zuddor bab-shab deḳaio na. Mono rakio, tarar deshor kunu zaga-u ami tumrare ditam nae, ikanor malikana to ami Lut nobir aolad Boni-Ammanre dilaisi.”
DEU 2:20 (Age Rofayi oḳol ono roita, erlagi ikanre Rofayi oḳlor desh ḳoia ḍaḳa oito. Ar Boni-Ammane itare Zam-Zamimi koia ḍakita.
DEU 2:21 Rofayi zati foyluan asla, deḳte Anaki zatir laḳan usa-muṭa lamba ar forimane-o bout beshi asla. Mabude Boni-Amman zatir ato itare binash ḳoraila, Boni-Ammane Rofayi zatire ḳedai dia ou desh doḳol ḳorla.
DEU 2:22 Mabude Ishʼor aolad oḳolredi ou eḳoi kam ḳoraila, tain erar ato Hurio zatire binash ḳorla. Era Hurio oḳolre ḳedaia dia, tarar Seir desh doḳol ḳoria boshot ḳorra.
DEU 2:23 Ermaze Koftur dif taki Kofturi zatie aia Obbi zatire binash ḳorla, tarar maṭire doḳol ḳoria boshot ḳorla. Ou Obbi oḳol Gaza ṭaunor daro boshot ḳorta, honor hoḳol gau-geramo tara roita.)
DEU 2:24 “Erbade Mabude ḳoisla, O Boni Israil, tumra bar o, bar oia Ornon ḳalor hofaro zao. Huno, Amuri zatir bashsha Sihun ar tar Hishbon deshre ami tumrar ato shofi disi. Ikan doḳol ḳorat gia bashshare zuddor filḍo lamao,
DEU 2:25 teu deḳbae, ami Mabude aiz taki zogotor hoḳol zatir dilo ḍor harai dimu, tumrar ḍore tara ḳafiba. Tumrar aoaz hunle-u tarar zano doṛfoṛ shuru oibo.”
DEU 2:26 Musa nobie Boni Israilre aro ḳoila, “Bade ami shanti-chukti korar kiale Ḳadimut morubumi taki Hishbonor bashsha Sihunor gese ḳobria faṭailam, ḳoilam,
DEU 2:27 amra afnar deshor bitredi faroia zaitam sai, onumoti diba ni? Amra atare-fatare kunubae zaitam nae, ḳali mul shoṛokedi aṭia zaimu.
DEU 2:28 Amra nogod ṭeḳadi afnar ges taki kani-kuraki ba fani-o ḳorid ḳoria ḳaimu. Amrar Mabud Allae amrare ze deshḳan dita saira, Zordan gang faroia hou desho zaibar ag forzonto, afnar deshor ufredi amrare aṭia zaite deukka. Seiror faṛia elaḳar bashinda Ishʼor aolad oḳole, ar Aur ṭaunor bashinda Muabi oḳole-o amrare ola faroite disoin.
DEU 2:30 “Oile Hishbonor bashsha Sihun razi oilo na, amrare zaite dilo na. Tumrar Mabud Allae-u tar dilre fashan banailla, tar monor bab luar laḳan oigelo, zate tumrar ato tar binash oy, ar ṭik-u ola oilo.
DEU 2:31 Teu Mabude amare ḳoila, O Musa, Sihun ar tar bashshaire ami tumar ato shofi dilam. Oḳon tumi hono zao, gia ou desh doḳole anat lago, ar hono boshot ḳoro.
DEU 2:32 “Teu Iyahaz elaḳat Sihune tar hoḳol sifai dol loia amrar loge laṛai korat ailo,
DEU 2:33 ou shomoy amrar Mabud Allae tare amrar ato falaila. Amra bashshare, tar fuaintore, tar sifai dolre nifat ḳorlam.
DEU 2:34 Ar amra tar hoḳol ṭaun, gau-geram hoḳolta doḳol ḳorlam, tarar hoḳol beṭain-beṭin ar huruttare binash ḳorlam. Eḳzon-o zinda roise na.
DEU 2:35 Ḳali tarar foshur fal ar gonimotor mal-samana amrar lagi anlam.
DEU 2:36 Ornon ḳalor shimanar Aruar ṭaun, ar ou elaḳar ek gau taki arok gau doḳol ḳori kori, Giliod forzonto kunu zaga amrar doḳolor baire roilo na. Amrar Mabud Allae ita hoḳolta amrar ato dila.
DEU 2:37 Ḳali Boni-Amman zatir desh, Zabbuk faṛia ḳalor ḳanda-ḳasar hoḳol zila, faṛor ufror gau-geram, ar amrar Mabud Allae zeta zaga doḳol ḳorte nished ḳorsoin, ou zaga ḳanain tumrar doḳolor baire roilo.”
DEU 3:1 Hozrot Musae Boni Israilre aro ḳoila, “Hishbon desh taki amra Bashon desho zaoar fote roana oilam. Bashonor bashsha Uze ḳobor faia zuddo ḳorar lagi tar hoḳol sifai dol loia Idri ṭauno ailo.
DEU 3:2 Ar Mabude amare ḳoila, O Musa, i bashshare tumi ḍoraio na. Huno, ami tare, tar asta deshre, tar sifai dolre tumar ato tulia dilaisi. Tumi Hishbon desho Amuri zatir bashsha Sihunor ze dosha goṭaiso, ogure-o oula ḳorio.
DEU 3:3 “Ou nomunae amrar Mabud Allae Bashon deshor bashsha Uzre, tar hoḳol manshore amrar ato shomzai dila. Amra-o ita hokkolṭire binash ḳorlam, kunugure zinda raḳsi na.
DEU 3:4 Amra tar deshor hoḳol gau-geram, ṭaun-bondor doḳol ḳorlam. Tarar shaiṭ ḳan ṭaun-u doḳol ḳorillam, kunta bad roilo na. Asta Orgub elaḳa, mani Bashonor bashsha Uzor fura bashshai amrar doḳolo nilamgi.
DEU 3:5 Ou ṭaun oḳol-o usa usa oal dia baunḍori kora asil, itar geiṭo asil boṛo boṛo kil. Ar baunḍori saṛa-o bout gau-geram asil.
DEU 3:6 Amra hoḳol ṭaun ar gau-geramre ekkebare binash ḳorsi. Age Hishbonor bashsha Sihunor ze dosha goṭaisi, oḳon Bashon deshor beṭain-beṭin, huruttain, hoḳol gau-geram ar ṭaunre-o eḳoi laḳan binash ḳorsi.
DEU 3:7 Oile tarar hoḳol foshur fal ar gonimotor mal-samana amra loia aisi.
DEU 3:8 “Amra ou shomoy Zordan gangor fub faror Amuri zatir duio bashshar doḳolor, Ornon ḳal taki Hormun faṛ forzonto ḳobza ḳorslam.
DEU 3:9 (Sidonor manshe ou Hormun elaḳare Sirion ḳoia ḍaḳoin, ar Amuri zatie ḳoin Sonir.)
DEU 3:10 Faṛia elaḳar ou tʼol zagar hoḳol ṭaun ar gau-geram, asta Giliod elaḳa, bashsha Uzor Suloḳa ar Idri ṭaun shoho asta Bashon deshre amra doḳol ḳorlam.”
DEU 3:11 (Fura Rofayi zatir maze ḳali Bashon deshor bashsha Uz zita roisla. Ou bashsha luar falongo hutita, ikan lambae noy at ar faṛe sair at. Boni-Amman zatir Rabba ṭauno ikan oḳono toa ase.)
DEU 3:12 Hozrot Musae aro ḳoira, “Amrar doḳol ḳora Ornon ḳalor faro Aruar ṭaunor bairor utoror elaḳa, ar faṛia Giliod elaḳar ordeḳ zaga, honor hoḳol ṭaun ar gau-geram oḳol, Boni Israilor Ruben ar Sadu ḳandanre dilailam.
DEU 3:13 Giliod deshor baki ongsho ar bashsha Uzor ges taki ana asta Bashon deshre ami Manosha ḳandanor ordeḳ manshore dilam.” (Bashon deshor asta Orgub elaḳare Rofayi zatir desh ḳoia ḍaḳa oito.
DEU 3:14 Manosha ḳandanor eḳ zonor nam asil Zayir, he asta Orgub elaḳa mani, Goshuri ar Maḳati zatir shimana forzonto doḳol ḳoria tar nizor namor mile ou Bashon deshor nam dilo Habbut-Zayir. Erlagi oḳono ikanre ou name ḍaḳa oy.)
DEU 3:15 “Ar Giliodor faṛia elaḳa ami Makirre dilam.
DEU 3:16 Oile Giliod taki Ornonor faṛia ḳalor mazamazi forzonto hoḳol zaga, ar hon taki Boni-Amman zatir shimana Zabbuk kal forzonto ami Ruben ar Sadu ḳandanre dilam.
DEU 3:17 Tarar deshor foismor shimana asil, Araba morubumit Zordan gangor ze ongsho Galil aoror daredi, Pisga namor faṛia elaḳar Araba shagor ba Luna shagor forzonto gese, ou zaga.
DEU 3:18 “Ou zaga oḳnain shomzai dia tarare ḳoilam, iknain bug-doḳol ḳorar lagi tumrar Mabud Allae tumrare disoin. Oile tumrar zeta beṭaintor shorilo bol ase, zera zuddo ḳorar laḳ, era zuit-zait oia Boni Israilor age gia gang far o.
DEU 3:19 Oile tumrare deoa ṭaun ar gau-geramo tumrar bou, fua-fuṛin ar goru-sagol hoḳolta roiba. Ami zani tumrar bout foshu asoin.
DEU 3:20 Bade Mabude zebla tumrar zatir baiainre tumrar laḳan aramor zaga dilaiba, tumrar Mabud Allae Zordan gangor hofaro tarare ze desh dan ḳorra, oḳanor doḳol faia harle, tumra hirbar amar deoa ou zagat firia aio.”
DEU 3:21 Hozrot Musae tarare ḳoira, “Ou shomoy ami Iusare ḳoilam, tumrar Mabud Allae ou duio bashshar kun dosha goṭaisoin, ita to nizor souke deḳso. Te oḳon Zordan faroia tumra zoto deshainto zairae, Mabude ita hokkol deshaintor dosha-o ou laḳan goṭaiba.
DEU 3:22 Erlagi tumra itare ḍoraio na, shoyong Alla Mabud tumrar fokko oia tarar loge zuddo ḳorba.
DEU 3:23 “Ar ou shomoy ami Mabudor dorbaro aroz ḳorlam,
DEU 3:24 O Mabud Moula, tumar gulamre to oḳon-u deḳani dorso, tumi koto mohan ar ḳoto boloban. Tumi ou zotota ḳorso, ita ḳorar shaiddo ḳar ase, asmano ba zominor kunu devtar takkot ase ni, tumar laḳan dafoṭ deḳaito?
DEU 3:25 Moula go, amar boṛo shoḳ oilo, Zordan gangor hofaro gia tumar oada ḳora ou shundor faṛia elaḳa ar Lebanon desh deḳtam, meherbani kori zaite diba ni?
DEU 3:26 Oile Mabude na ḳorla, tain amar arzi hunla na, tumrar ḳarone-u tain amar ufre naraz asla. Mabude zuaf dila, tumi bout ḳoiso, i befare ar mangio na.
DEU 3:27 Aichcha, tumi ou Pisga ṭillar ufre uṭo, uṭia utore-douḳne ar fube-foisme souk falao. Zordan gang faroni nished oile-o, on taki ubaia hou deshre dekilao.
DEU 3:28 Ar tumar ḳadim Iusare hikai deo, kita kita ḳora lagbo. Tar himmot baṛao, bitre shaosh deo, ḳaron hoḳol manshor age roia he gang far ḳoraibo, ar tumi on taki ze desh deḳrae, he eraredi ou desh doḳol ḳoraibo.
DEU 3:29 Oḳan hunia amra Bayt-Piyuror samnor nisa zagat roigelam.”
DEU 4:1 Hozrot Musae tarare ḳoila, “O Boni Israil, ami oḳon ze shoriot ar hukum-ahkam ḳoimu, ita tumra kial ḳori huno. Teu tumra zane basbae ar tumrar baf-dadar Mabud Allae tumrare ze desh dan ḳorra, hou desho gia doḳol ḳortae farbae.
DEU 4:2 Ami tumrare ze hukum diar, i hukumor loge dusra kunta baṛaio na ba ḳomaio na. Ami zelaḳan ḳoiram, tumra ṭik ola-u tumrar Mabud Allar hoḳol hukum-ahkam mania solio.
DEU 4:3 “Tumra to nizor souke deḳso, age Mabude Baal-Piyuror befare kita ḳorsoin. Tumrar mazor zoto zone Piyur elaḳar Baal devtar puja ḳorsil, Alla Mabude tumrar samne ita hokkolṭire binash ḳorsoin.
DEU 4:4 Oile tumra zera dile-zane Alla Mabudor ashik aslae, tumra hoḳol-u oḳono zinda roiso.
DEU 4:5 “Oḳon huno, amar Mabud Allae amare zelaḳan hukum-ahkam disla, ami tumrare ṭik ou hukum-ahkam ar niom-ḳanun hikaisi. Zate tumra oḳon ze desh doḳol ḳorat zairae, hou desho ita ḳamo lagao.
DEU 4:6 Erlagi tumra kub hushiar oia ita manio, ar ḳamo lagaio. Teu bad-baki tamam zatir gese-u ita tumrar aḳol-buddi hishabe zair oibo. Ou hukum-ahkamor ḳota hunle tara ḳoiba, hasau era kub boṛo zati ar aḳol-buddi ala zati.
DEU 4:7 Ar amrar Mabud Alla zela amrar loge loge roin, tanre ḍakile zela daro fai, ou duniar bukut dusra kunu boṛo zati asoin ni, zetar devta ola loge loge roin?
DEU 4:8 Ba ami oḳon ze shoriotor ḳota ḳoiram, ita dusra kunu boṛo zatir ase ni? Ila niom-ḳanun ar nikut hukum-ahkam tarar ase ni?
DEU 4:9 “Oile tumra zotodin basia roibae, otodin nizor befare kub hushiar roio, nizor dilre shabdane rakio, arnae nizor sokur deḳa goṭona oḳol faurilibae, ita tumrar dil taki kuailibae. Ar ou hukum-ahkam tumrar fua-fuṛinre hikao, tara-o ola tarar aoladre hikaiba.
DEU 4:10 Ar tumra hou dinor goṭona mono ḳoro, ze din tumra Tur faṛo afon Mabud Allar samne azir oislae. Zebla tain amare ḳoisla, amar kalam hunar lagi tumi hokkol manshore dola ḳoria amar samne ano, teu tara hikba, i zogoto tara zotodin zinda roiba, otodin amare ḍoraia roita, ar tarar huruttainre-o ola solar talim dita.
DEU 4:11 Ou shomoy tumra ḳandat gia ou faṛor lamat ubaislae, ubaia deḳlae, asta faṛo dau dau ḳori nuror aguin zoler, aguine gia asman soilise, ar goin gono megor ḳalnie andair asil.
DEU 4:12 Hou nuror agunir bitre taki, Mabude tumrare tan kalam hunaila. Tumra tan mukor aoaz hunlae, oile tan kunu surot-aḳar deḳaisoin na, ḳali tan golar aoaz huncho.
DEU 4:13 Tain nize tumrare tan loge milonor usillar Allai oada-chuktir ḳas doshṭa hukum-ahkam dila, ar ḳoila oguin mania solar lagi. Tan kudroti ate dui ṭukra fattoror ufre ita lekia-o dila.
DEU 4:14 Hou shomoy Mabude amare hukum dila, ami tumrare tan shoriotor hukum-ahkam hikaitam, zate Zordan gangor hofaro tumra ze desh doḳolo zairae, hono gia harle ota mania solo.
DEU 4:15 “Mabude zebla nuror agunir maz taki Tur faṛo tumrar loge batchit ḳorsla, hou din to tumra tan kunu surot-aḳar deḳso na. Erlagi tumra nizor befare kub hushiar roio
DEU 4:16 zate kunu murti na banao, be-foti bonia puja ḳorar kiale kunu beṭa ba beṭir surote murti banaio na.
DEU 4:17 Maṭir ufre solra kunu zib-zanuaror surote, asmano uṛra kunu fakir surote,
DEU 4:18 buk sesraia solra kunu zandaror surote, ba fanit roura kunu zandaror surote murti banaio na.
DEU 4:19 Asmanedi saia hari sand, shuruz, tera oḳol dekia ou namor deb-debi ba firistar puja ḳorio na, erar kezmoto lagio na. Itare to tumrar Mabud Allae asmanor tolor hoḳol zatir lagi dan ḳorsoin.
DEU 4:20 Mono rakio, Mabude tumrare fosond ḳorsoin lua golanir gorom agunir gato taki, tain Mishor desh taki tumrare bar ḳori anchoin, zate tumra tan afon proza o, ar oḳon to hasau tan proza oiso.
DEU 4:21 “O Boni Israil, tumrar ḳarone Mabude amar ufre-o gusa ḳorsoin. Tain ḳosom ḳaia ḳoisoin, amare Zordan gangor hofaro zaite dita nae, tumrar Mabud Allae tumrare ze deshor malikana dira, ou aramor desho amar zaoa nished.
DEU 4:22 Amar mout ono-u oibo. Zordan gang faronir hukum nae. Oile tumra gang faroia hou aramor desh doḳol ḳorat zairae.
DEU 4:23 Te tumra nizor befare hushiar roio, tumrar Mabud Allae tumrar loge ze oada-chukti kaim ḳorsoin, ita faurio na. Tumrar Mabud Allar nished omainno ḳoria kunu zinishor murti banaio na.
DEU 4:24 Mono rakio, tumrar Mabud Alla to moha dongshor agunir laḳan, tain to la-shorik, kunu shorik shoijjo ḳoroin na, tan nizor faona ebadot sain-u sain.”
DEU 4:25 Hozrot Musae tarare eoḳan ḳoila, “Hou aramor desho gia hari, tumra fua-fuṛin, nati-futir zonom dia bout din boshot ḳorar bade-o zudi ku-fote zaogi, ar kunu zinishor surote murti banao, tumrar Mabud Allae zetare ginna ḳoroin, tumra ota ḳoro,
DEU 4:26 te ami oḳon asman-zomin shakki rakia tumrar birudde ḳoiar, Zordan gang faroia ze desh doḳol ḳorat zairae, hino kub zoldi tumrar nam miṭizibo. Beshi din ṭiktae fartae nae, nichchit binash oibae.
DEU 4:27 Mabude tumrare nanan zatir maze sitrai diba, tain ḳedai dia zeḳano faṭaiba, hono tumrar kub ḳom manush zinda roiba.
DEU 4:28 Ou halote tumra manush-ate banail murtir puja ḳorbae, zetae souke deḳe na, ḳane hune na, ḳaito fare na, kunuzat geran-o hungito fare na, laḳṛir ar fattoror ota murtir puja ḳorbae.
DEU 4:29 Ta-o hono roia zudi tumra nizor Mabud Allar tallash ḳoro, te tain tumrare didar diba. Ḳota oilo, dile-zane ḳator oia tane ḍakite oibo.
DEU 4:30 Hesh-mesh tumra mosiboto foṛia hirbar touba ḳoria, tumrar Mabud Allar nam loibae, ar tan kushi mafik solbae.
DEU 4:31 Mono rakio, tumrar Mabud Alla rohmanur rohim, tain tumrare falaita nae ba binash ḳorta nae. Ar tain ḳosom ḳaia tumrar moy-murobbir loge ze oada-chukti korsoin, ita-o faurita nae.”
DEU 4:32 Hozrot Musae tarare eoḳan ḳoira, “Alla Pake zomino manush foyda ḳorar bad taki oḳon forzonto, tumrar agor hokkol zomanar itihash tukao, asta asman-zominor eḳ mata taki aroḳ mata tukaia deḳo, Boni Israilor ufre zoto azob goṭona goṭise, ita laḳan dusra kunu goṭona goṭse ni? Ba ila kunta kunudin huna gese ni?
DEU 4:33 Ar nuror aguin taki Alla Pakor buli hunar bade, ḳali tumra saṛa dusra kunu zati zinda roise ni?
DEU 4:34 Tumra tallash ḳori deḳo, tumrar Mabud Allae tumrar sokur samne Mishor desho tumrar lagi zotota ḳorsoin, asta zogotor kunu deb-debie ila ḳorto farse ni? Ila forikka loa, kudroti nishana deḳani, laṛai-zuddo ḳora, mozbut ator bol deḳani, boṛo boṛo taijjubi lila-ḳela ar ḍor-ḳof deḳaia, zekunu zatire oinno zatir bitre taki bar ḳori ania nizor proza banaito farse ni?
DEU 4:35 “Te tumra zate furafur buzo, ou Alla-u oila Mabud, tain saṛa ar kunu Mabud nai, oḳan buzanir lagi-u tumrare otota deḳani oisil.
DEU 4:36 Tumrare hedayot ḳorar kiale tain behestor arosh taki tan nizor buli hunaila, ar zominor ufre deḳaila nuror agunir kunḍoli. Ou agunir maz taki baroil Allai buli tumra huncho.
DEU 4:37 Tain tumrar moy-murobbi oḳolre mohobbot ḳorta, erlagi erar moutor bade tarar aolad oḳolre-o fosond ḳorsoin. Ar tain shoyong azir oia tan moha kudroti kemota ḳaṭaia tumrare Mishor desh taki bar ḳori anchoin.
DEU 4:38 Tan kial asil, tumatan taki boṛo ar boloban zati oḳolre tumrar samon taki kedaia hari, tarar desho nia hou hoḳol deshor malikana tumrare dita. Oḳon deḳrae ni, tain to ita ḳorsoin.
DEU 4:39 “Te oḳonkur ou talim mono rakio, dilor maze gatia toio, huno, ḳali ou Alla-u ufre asman ar tole zominor malik, tain saṛa dusra kunu Mabud nai.
DEU 4:40 Erlagi ami oḳon ze shoriot ar hukum-ahkam zanairam, tumra ita mania solio, teu tumra ar tumrar aolad oḳlor balai oibo. Tumrar Mabud Allae siroḳalor lagi tumrare ze desh dan ḳorra, ou desho tumrar hayati lamba oibo.”
DEU 4:41 Bade Musa nobie Zordan gangor fub-faror tinḳan ṭaun algaila,
DEU 4:42 zate kunu kuni manush bagia gia ou ṭauno zan basaito fare. Ze manshe kun ḳorar kunu sinta ba dushmoni bab asil na, ḳali aḳta onichchae ḳeurore marilae, he bagia bonobashi bonia ono roito farbo.
DEU 4:43 Tino ṭaun oilo, Ruben ḳandanor lagi morubumir kinarar faṛia tʼol zagar Basir namor ṭaun. Sadu ḳandanor lagi Giliod elaḳar Ramut ṭaun. Manosha ḳandanor lagi Bashon deshor Golan ṭaun.
DEU 4:44 Musa nobie Boni Israilor samne shoriotor ou hukum boyan ḳorla,
DEU 4:45 Mishor desh taki bar oia aoar bade, hoḳol hushiarir ḳota, shoriotor niom-ḳanun ar hukum-ahkam Boni Israilre zanaila.
DEU 4:46 Tain Zordan gangor fubor faro, Hishbon elaḳar Amuri zatir raza Sihunor deshor Bayt-Piyuror samnor tol zagat ita ḳoila. Mishor taki bar oia aia harle Musa nobie ar Boni Israile zuddo ḳori ou bashsha Sihunre araisla.
DEU 4:47 Tara bashsha Sihunor desh ar Bashonor bashsha Uzor desh doḳol ḳorsla. Amuri zatir ou duio bashshar bashshai asil Zordan gangor fubor faro.
DEU 4:48 Ornon ḳalor faror Aruar ṭaun taki Sirion faṛ, mani Hormun faṛ forzonto ou duio razar shimana asil.
DEU 4:49 Er bitre ase Zordan gangor fubor faror asta elaḳa. Ikṭa Pisga faṛor ṭillar toledi Araba shagoror kinara forzonto gese.
DEU 5:1 Musa nobie tamam Boni Israilre dola ḳoraila, tarare ḳoila, “O Boni Israil, ami oḳon zeta hukum-ahkam ar ain-ḳanun tumrare zanaimu, ita tumra kial ḳori hunio, hunia dilo gatia rakio ar amol ḳorio.
DEU 5:2 Amrar Mabud Allae Tur faṛo amrar loge eḳ oada-chukti boail ḳorsoin.
DEU 5:3 Ou chukti tain amrar moy-murobbir loge na ḳoria, amrar loge ḳorsoin, amra zoto zon ono zinda asi, amrar loge ḳorsoin.
DEU 5:4 Mabude ou faṛor ufre nuror agunir maz taki tumrar loge samna-samni batchit ḳorsoin.
DEU 5:5 Tumra agunir ḍore hou shomoy faṛor ufre uṭlae na, erlagi ami tumra ar Mabudor mazḳano ubaia, tan mukor buli tumrare hunaisi. Tain ḳoisla,
DEU 5:6 “Ami Alla-u tumrar Mabud. Mishor deshor gulami taki ami-u tumrare ḳalas ḳori anchi.
DEU 5:7 “Amar bodla tumra dusra kunu devta manio na.
DEU 5:8 “Puja ḳorar kiale tumra kunu murti banaio na, asman, zomin ba fanir tole zotota ase, ita kunutar surote murti banaio na.
DEU 5:9 Tumra itar puja ḳorio na, itar sheba-zoton ḳorio na. Mono rakio, ami Alla-u tumrar Mabud, kunu shorik shoijjo ḳori na. Amare zera mane na, ami tarar gunar shaza dei, tarar foyla siṛi taki sair siṛi aolad forzonto shaza dei.
DEU 5:10 Oile zera amar ashik bonia amar hukum-ahkam amol ḳore, ami tarar azar azar oarish forzonto amar obiram maya-mohobbot deḳaimu.
DEU 5:11 “Beḳama kunu ḳarone tumrar Mabud Allar nam muko loio na. Ḳeu zudi kamoḳa Mabudor nam loy, te kunumonte-u amar shaza taki rehai faito nae.
DEU 5:12 “Ar tumrar Mabud Allar hukum mafik, Zummabarre fobitro din manio.
DEU 5:13 Haftar soydin tumra ḳam-ḳaz ḳorio, tumrar dorḳari hoḳol ḳam shario.
DEU 5:14 Oile shat nombor din oilo Zummabar, tumrar Mabud Allar name ziraibar din. I din tumra, tumrar fua-fuṛin, gulam-bandin, goru-gadain, tumrar gaut ba ṭauno roura musafir ba bin-deshi, ḳeu kunuzator ḳam-ḳaz ḳorio na. Tumar gulam-bandie-o tumar laḳan ziraiba.
DEU 5:15 Mono rakio, Mishor desho taḳte tumra-o ola gulam aslae, ar tumrar Mabud Allae tan bolala-mozbut kudroti atdi tumrare azad ḳori anchoin. Erlagi tain hukum disoin, tumra Zummabarre fobitro din mantae.
DEU 5:16 “Tumrar Mabud Allar hukum mafik tumrar ma-bafre ijjot ḳorio. Teu tumrar Mabud Allae ze desh dira, hou desho tumrar hayati baṛibo ar tumrar balai oibo.
DEU 5:17 “Kun ḳorio na.
DEU 5:18 “Zina ḳorio na.
DEU 5:19 “Suri korio na.
DEU 5:20 “Ḳeuror birudde misa shakki dio na.
DEU 5:21 “Foror bour bae lalos ḳorio na. Foror gor-baṛi, zomi-mirash, gulam-bandi, goru-gada, ba kunu zinishor bae lalos ḳorio na.
DEU 5:22 “Mono rakio, shoyong Mabude tumrare Tur faṛor ufror hou nuror aguin taki, megor ḳalni ar goin andarir bitre taki, kub zure zure ou hukum disoin. Ḳali ou hukum-ahkam saṛa tumrare ar kunuta ḳoisoin na. Bade ou kalam oḳolre dui ṭukra fattoror ufre tan kudroti ate lekia amar ato disla.
DEU 5:23 Oile tan nuror tozollie zebla faṛ zoler, ermaze tumra nizor ḳane hunlae, hou andarir bitre taki Mabudor golar aoaz, hunia tumrar hoḳol ḳandanor amir oḳol, tumrar moy-murobbi oḳol amar gese uṭia aila,
DEU 5:24 aia ḳoila, amrar Mabud Allae didar dia tan zalal ar mohima amrare deḳaisoin, nuror aguin taki baroil tan golar aoaz amra hunchi. Ar oḳon amra buzlam, kunu adom zate Alla Pakor loge batchit ḳorar bade-o, i Adom basia roy.
DEU 5:25 Oile oḳon ḳene amra ino mortam? Kudroti i aguine to amrare zalailibo, amra zudi aro besh ḳori amrar Mabud Allar golar aoaz hunat roi, te to nirgat moron oibo.
DEU 5:26 Amrar laḳan ila ar kunu Adom zat asoin ni, zera nuror aguin taki zinda Alla Pakor golar aoaz hunar bade-o zita ase?
DEU 5:27 Te amrar Mabud Allae zotota bataisoin, tan ḳandat gia afne-u ota hunia aioukka. Tain afnar gese zeta zanaiba, afne aia ota amrare hunaiba. Teu amra ota amol ḳormu.
DEU 5:28 “Ar hou shomoy tumra zebla amar loge matirae, shoyong Mabude ita hunla, hunia amare ḳoila, ou manush oḳlor mat-ḳota to ami hunchi, tara tumare zeta ḳoisoin ita hoḳolta-u bala.
DEU 5:29 Hasau zudi tara amare ola ḍorain, hamesha amar hukum-ahkam mania solar kiali oin, te tara ar tarar aolad oḳlor siroḳalin balai oibo.
DEU 5:30 “Oḳon tumi lamat zao ar tarare ḳo, tarar tambut firia zaitagi.
DEU 5:31 Oile tumi ono amar ḳandat roio. Ami tumare amar hoḳol hukum-ahkam, ain-ḳanun ar shoriot bataimu, tumi gia tarare ota hikaibae. Teu ami tarare ze deshor doḳoldari diar, hou desho gia hari tara ota amol ḳorba.
DEU 5:32 “Erlagi-u tumrar Mabud Allae tumrare zeta hukum-ahkam disoin, ita zoton ḳoria adae ḳorio, itar til foriman her-fer ḳorio na.
DEU 5:33 Tain ze fote solar lagi hukum disoin, ṭik ou fote solio, teu tumra zane basbae, tumrar balai oibo, ar tumra ze deshor doḳoldari faibae, hou desho tumrar hayati bout lamba oibo.
DEU 6:1 “Tumrare hikanir niote tumrar Mabud Allae amare ou hukum-ahkam, shoriot ar ain-ḳanun disoin, zate hou ze desh doḳol ḳorar niote tumra Zordan gang faroia zairae, hono gia hari tumra ita amol ḳoro.
DEU 6:2 Teu tumra, tumrar huruttain ar tarar aolad oḳole hara zindegi Alla Mabudre ḍoraia tan deoa niom ar hukum oḳol amol ḳorio. Ola ḳorle tumra bout din basia roibae.
DEU 6:3 O Boni Israil, tumra amar ḳota huno ar hushiar oia ita amol ḳoro, teu tumrar baf-dada oḳlor Mabud Allar oada mafik, hou dud ar mour banḍar-ala desho tumrar balai oibo ar tumra bout baṛibae.
DEU 6:4 “O Boni Israil, huno, Alla amrar Mabud, tain-u eḳ.
DEU 6:5 Tumra forteḳe tumrar asta dil, asta zan ar hoḳol bol-shokti dia tumrar Mabud Allare mohobbot ḳorio.
DEU 6:6 Aiz ami tumrare ze hukum diar, ita tumrar dilo gatia rakio.
DEU 6:7 Tumra hoḳole tumrar huruttainre ita kial ḳori hikaio. Ar goro boia, fote-gaṭe solar shomoy, gumanir shomoy, gum taki uṭar bade-o ota befare mata-mati korio.
DEU 6:8 Mono raḳar nishana hishabe ita ato bandia rakio ar ḳofalor maze lagaio.
DEU 6:9 Tumrar duaror soukaṭo ar mul geiṭo lekia rakio.
DEU 6:10 “Tumrar baf-dada Ibrahim, Isʼhak ar Iakubor gese tumrar Mabud Allae ḳosom ḳaia ze desh deoar oada ḳorsoin, hou desh tain tumrare niba. Hino shundor shundor ar boṛo boṛo ṭaun oḳol ase, zeta tumra banaiso na, ḳali emne-u faibae.
DEU 6:11 Ar mal-samanae bora hazail-faṛail gor-duar faibae, zeta tumra zugaiso na, fanir kua faibae zeta tumra kudiso na, anguror bagan ar zoytunor bagan faibae zeta tumra lagaiso na.
DEU 6:12 Oile tumra hushiar roio, ita hoḳolta faia hari maldar bonia tumrar hou Alla Mabudre faurio na, zein tumrare Mishor deshor gulami taki kalas ḳoria anchoin.
DEU 6:13 “Tumrar Mabud Allare ḍoraia solio, ḳali tan ebadot ḳorio, ar tan name ḳosom ḳaio.
DEU 6:14 Tumra ari-fori zatir deb-debir puja ḳorio na.
DEU 6:15 Zano to, tumrar Mabud Alla zein tumrar loge asoin, tain to la-shorik Mabud, kunu shorik shoijjo ḳoroin na. Erlagi hushiar roio, itar puja ḳorle tain gusae aguin oia tumrare dunia taki fusiliba.
DEU 6:16 Tumrar Mabud Allare forikka ḳorat lagio na, zela age hou Masa namor zagat ḳorslae.
DEU 6:17 Tumrar Mabud Allae tumrare zoto hukum-ahkam, hushiari ar niom-ḳanun disoin, ita tumra kial ḳori manio.
DEU 6:18 Ar Mabudor nozoro zeta shoṭik, tain zeta bala fain, tumra ota-u ḳorio, teu tumrar balai oibo. Mabude tumrar baf-dadar gese ze desh dibar ḳosom ḳorsoin, hou desh taki tumrar dushmonre tain ḳedaia diba. Ar Mabudor oada mafik hou aramor deshor doḳoldari-o tumra faibae.
DEU 6:20 “Bobishote zebla tumrar aolad oḳole tumrare zikaiba, amrar Mabud Allae ou zeta hukum-ahkam, niom-ḳanun, ar hushiari disoin itar mani kita?
DEU 6:21 Ou shomoy zuaf dio, Mishor desho amra Feraunor gulam aslam, oile Allae tan bolala kudroti at dia amrare bar ḳoria anchoin.
DEU 6:22 Mabude amrar sokur samne Feraun ar tar baṛir hoḳlor ufre, asta Mishor deshor ufre boṛo boṛo gozobi nishana, bezuita bala-mosibot ar kudroti kam deḳaila.
DEU 6:23 Oile amrare tain hou desh taki bar ḳoria anla, zate ze desh dibar lagi amrar baf-dada oḳlor gese ḳosom ḳaisla, hou desho amrare far ḳoria doḳoldari dein.
DEU 6:24 Ar tain hukum dila, amra zanu tan hoḳol hukum-ahkam mani, tanre ḍoraia soli, teu amrar balai oibo ar amra oḳonkur laḳan hamesha basia roimu.
DEU 6:25 Oḳon amra zudi amrar Mabud Allar hukum mafik tan deoa niom-ḳanun kial ḳoria mani, te iṭa-u oilo amrar forezgari.”
DEU 7:1 Hozrot Musae aro ḳoila, “Huno, tumra ze desh doḳol ḳorat zairae, tumrar Mabud Allae-u tumrare hono niba ar bout zatire tumrar samne taki kedaia hari ita doḳol ḳoraiba. Tain Hiṭṭi, Girgashi, Amuri, Kenani, Farizi, Hibbi ar Zibuzi zatire ḳedai diba, i shato zati-u forimane tumra taki boṛo ar bolala.
DEU 7:2 Tumrar Mabud Allae zebla itare tumrar ato shofia diba, ou shomoy tumra tarare ekkebare binash ḳorilio, tarar loge kunu chukti korio na, ar kunu doya-maya deḳaio na.
DEU 7:3 Itar loge bia-shadir befare kunu chukti korio na. Tumrar fuṛintore tarar fuaintor gese bia dio na, ar tarar fuṛinre-o tumrar fuaintor lagi anio na.
DEU 7:4 Ḳaron itae tumrar fua-fuṛinre amar ges taki horaia deb-debir puja ḳoraibo. Teu Alla Mabude tumrar ufre gusa oia, loge loge-u tumrare binash ḳorba.
DEU 7:5 Erlagi tumra tarar hoḳol puja-monḍop bangilio, pujar zaga oḳol binash ḳorio, Ashera-debir nishana kuṭi kaṭia falaio, ar hoḳol zator murtire aguindi zalaio.
DEU 7:6 Mono rakio, tumra-u oilae Alla Mabudor fobitro proza. Duniar hoḳol zatir maz taki tain-u tumrare nizor proza ar ḳas shompod hishabe alog korsoin.
DEU 7:7 “Ḳene alog korsoin? Oinno zati taki tumrar manush beshi, otar lagi ni? Na, muṭe-u na. Tumra to hoḳol zati taki kom aslae.
DEU 7:8 Ta-o tain tumrare kub maya-mohobbot ḳoroin, ar tumrar baf-dada oḳlor gese ze ḳosom ḳorsla, otar lagi-u tumrare alog korsoin. Mabude tan kudroti at lagaia tumrare bar ḳoria anchoin, Mishoror bashsha Feraunor at taki ar gulamir desh taki tumrare azad ḳorsoin.
DEU 7:9 Oḳon tumra mono rakio, tumrar Mabud Alla-u oila asol Mabud. Tain-u siroḳalin hok-halal. Zera ashik oia tane mohobbot ḳore ar tan hukum-ahkam mane, tain tarar azar azar siṛi forzonto nizor oada ḳora zoban ar doya boail raḳoin.
DEU 7:10 Oile zetae bod shaosh ḳoria tan bae fis dilae, tain itare binash ḳoria zoldi kori bodla dein.
DEU 7:11 Erlagi aiz tumrare ze hukum-ahkam, niom-ḳanun ar shoriot diram, ita kub kial ḳoria amol ḳorio.
DEU 7:12 “O Boni Israil, tumra ou hukum-ahkamor ḳota ḳan fatia huno, ar ita kial ḳori amol ḳoro. Teu tumrar Mabud Allae tumrar baf-dadaintor loge, tan doya-mayar befare ḳosom ḳaia ze oada-chukti korsla, ita tumrar loge boail raḳba.
DEU 7:13 Tain tumrare maya-mohobbot ḳorba, rohom-borkot diba ar tumrar manshor foriman baṛaiba. Tumrare ze desh dibar lagi tumrar moy-murobbir gese ḳosom ḳaisla, ou desho tumrare rohom-borkot diba. Tumrare aolad baṛai diba, tumrar baganor fol-mul, ḳetor foshol, anguror rosh, zoytunor tel, goru-basur, meṛa-sagol hoḳoltare baṛai diba.
DEU 7:14 Hoḳol zati taki tumra beshi rohom-borkot faibae, tumrar beṭain-beṭin ba tumrar foshur falor ḳeu aṭkura roito nae.
DEU 7:15 Alla Mabude tumrare hoḳol laḳan bemar taki basaiba. Mishor desho tumra zeta ḳoṭin bemar-azar deḳso, ita tumrare dita nae, ḳali tumrar dushmon oḳolre diba.
DEU 7:16 Tumrar Mabud Allae zoto zatir manshore tumrar ato shofiba, itare tumra ekkebare shesh ḳorilaio, kunu doya ḳorio na, ar tumra itar devtare puja ḳorio na, arnae ita tumrar fotor ḳaṭa oiba.
DEU 7:17 “Tumra hoyto mone mone ḳoibae, amra kilaḳan tarare ḳedaia dimu? Ita zatir manush to forimane amra taki bakka beshi.
DEU 7:18 Oile tumra itare ḍoraio na. Feraun ar asta Mishor deshor ufre tumrar Mabud Allae kita ḳorsoin, ita tumra faurio na.
DEU 7:19 Mabude ḳoto boṛo boṛo gozob-mosibot ḍalia tarare binash ḳorsoin, ita to nizor souke-o deḳso. Tan bout kudroti kam, bout laḳan nishana deḳso, tan bolala mozbut at dia tumrare bar ḳoria anchoin, ita hoḳolta mono rakio. Ar tumra oḳon zeta zati oḳolre dekia ḍorairae, itar ufre-o tumrar Mabud Allae ṭik oula goṭaiba.
DEU 7:20 Erbade-o tumrar ges taki lukaia zeguin zita roiziba, tumrar Mabud Allae bingulor fal faṭaia ita hoḳolṭire binash ḳorba.
DEU 7:21 Te tumra itare ḍoraio na, zano to, tumrar Mabud Alla zein tumrar loge boshot ḳoroin, ein boṛo boyonkor ar mohan.
DEU 7:22 Tumrar Mabud Allae tumrar samne taki aste aste ota zatire ḳedai diba. Oile hoḳolṭire to tumra eḳloge ḳedaitae fartae nae, ḳedaile zongli zanuare tumrar sairobae boriziba.
DEU 7:23 Ta-o tara ekkere binash oar ag forzonto tumrar Mabud Allae tarare bezuita oshantit falaia tumrar ato shofia binash ḳoraiba.
DEU 7:24 Tarar raza-bashsha oḳolre-o tumrar ato shofiba, tumra dunia taki itar nam miṭailibae, itare binash ḳorar ag forzonto ḳeu aia tumrar samne ubanir takkot oito nae.
DEU 7:25 “Tumra itar murti oḳolre agunit falaia zalailio. Tarar gotror shuna-rufar bae lalos ḳorio na, arnae fando foṛbae. Mono rakio, tumrar Mabud Allae itare ginnain.
DEU 7:26 Ginnar kunu zinish tumrar goro haraile tumra-o otar laḳan bonizibae. Borong tumra-o itare kub ginnaio ar tuchcho ḳorio, ita to lannoti.
DEU 8:1 “Oḳon ami tumrare ze hukum diram, tumra kub kiali oia ita amol ḳorio, teu tumra basia roibae, tumrar aolad baṛibo, ar tumrar moy-murobbir gese Mabude ḳosom ḳaia ze desh dibar oada ḳorsoin, hou desho hamaia doḳol ḳortae farbae.
DEU 8:2 Ar tumra mono rakio, tumrar Mabud Allae ou sallish bosore morubumir mazdi tumrare kila loia aisla, tumrar boṛai-beṭagiri bangibar lagi, ar tumra tan hukum-ahkam manbae ki na oḳan forikka ḳorar niote, tumrar dilor ḳobor zanar lagi tain tumrare noto ḳorsoin.
DEU 8:3 Tumrar moy-murobbire ḳani-kuraki na dia ufash raḳla, bade ze ḳani tara sinta na, manna namor ou ḳani kaoaia tain tumrar boṛai-beṭagiri bangisoin. Tain tumrare hikaita saila, ḳali ruṭi kaile-u manush base na, borong Allar fortek kalame-u manshor zan base.
DEU 8:4 Ou sallish bosoror maze tumrar gotror ḳafoṛ-sufoṛ nosṭo oise na, din-rait aṭile-o tumrar fao fulche na.
DEU 8:5 Oḳon tumrar dilo gatia rakio, bafe zela nizor fuare shashon ḳore, tumrar Mabud Allae tumrare-o ola shashon ḳoroin.
DEU 8:6 “Tumra nizor Mabud Allar hukum-ahkam amol ḳorio, tan fote solio, ar tanre ḍoraio.
DEU 8:7 Tumrar Mabud Allae tumrare ze aramor desho nira, i zagat faṛ-forbot, faṛia ḳal, fanir indara ase, ar maṭir tole-o fani ase.
DEU 8:8 Hino gom, barli, angur, ḍumur gas, anuar fol, zoytunor tel ar mou ase.
DEU 8:9 Hi desho bout ḳani-fani faibae, kuntar obab tumrar oito nae. Hinor fattoror maze lua ase, honor faṛ kudile tumra tama-fitol faibae.
DEU 8:10 Hou desho feṭ boria ḳana-fina ḳaia harle tumrar Mabud Allar deoa ou aramor deshor lagi tan shukria adae ḳorio.
DEU 8:11 “Ta-o tumra hushiar roio, tumrar Mabud Allare kunu shomoy faurio na, ar ami oḳon tumrare zeta hukum-ahkam, niom-ḳanun, ar shoriot zanairam, ita amol ḳorte kunu gafloti korio na.
DEU 8:12 Hono gia feṭ bori kana-fina ḳaia, shundor ḳori gor-baṛi banaia,
DEU 8:13 tumrar goru-sagolor fal baṛile, shuna-rufa zomaia, hoḳol monte don-samana baṛia harle hushiar roio.
DEU 8:14 Tumrar dilre boṛai-beṭagiri korte dio na. Ar hou Alla Mabudre faurio na, zein tumrare Mishor desh taki, hou gulami taki bar ḳoria anchoin.
DEU 8:15 Tain to tumrare bezuita bifod-afode bora biraṭ morubumi taki, ḳoṭin bishakto haf, bishakto ḳakṛa-bisae bora fotedi tumrare far ḳori anchoin. Shokto fattoror bitor taki tumrar lagi fani bar ḳorsoin.
DEU 8:16 Tain hou morubumir maze tumrare manna ḳabaisoin, zetar nam tumrar moy-murobbi oḳole hunchoin-o na. Tumrar bitoror boṛai-beṭagiri bangibar lagi, ar tumrare forikka ḳorar niote-u ita ḳorsoin, zate heshe tumrar balai oy.
DEU 8:17 Tumra mone mone ḳoio na, amar nizor bol-shoktie nizor ḳamai dia doni oisi.
DEU 8:18 Oile tumrar nizor Mabud Allae tumrar moy-murobbir gese ḳosom ḳaia zeta oada-chukti korsla, ota oḳon furafur ḳorar lagi tumrare i don-samana disoin, erlagi tanre mono rakio.
DEU 8:19 “Tumra zudi kunu din tumrar Mabud Allare faurilao, ar deb-debir puja ḳorat lago, otar kezmot ba bozona ḳoro, te ami oḳon tumrare hushiari diar, tumra nichchit binash oizibae.
DEU 8:20 Tumrar Mabud Allar hukum-ahkam na manle, tumrar samne hou zeta zati oḳolre tain binash ḳorsoin, tumrare-o ola binash ḳorba.”
DEU 9:1 Hozrot Musae aro ḳoila, “O Boni Israil huno, tumra taki bolala ar forimane-o bout beshi, boṛo boṛo zatir deshre doḳol ḳorar lagi oḳon Zordan gang faroia zaibae, tarar ṭaun oḳol-o boṛo boṛo, ou ṭaunor baunḍorir oal asmano soilise.
DEU 9:2 Tara oila usa-muṭa foyluan, era hoḳol-u Anaki bongshor manush. Tumra to age-u tarar befare huncho, Anaki oḳlor loge lagar takkot ḳar ase?
DEU 9:3 Oile tumra oḳan mono rakio, tumrar Mabud Alla to tumrar age age zaira, tain zalaia sarḳar ḳorra agunir laḳan. Tain-u itare domaia tumrar tolua banaiba. Teu Mabude age zelaḳan ḳoisla, tumra ola-u tarare ḳedai dia zoldi kori binash ḳorbae.
DEU 9:4 “Tumrar Mabud Allae zebla tumrar samne taki tarare ḳedaia diba, hou shomoy tumra mone mone ḳoio na, amrar forezgarir fol hishabe Mabude amrare ou desh doḳol ḳorar lagi anchoin. Ashole hou zati oḳlor naformanir lagi-u Mabude tarare tumrar samne taki kedai diba.
DEU 9:5 Tumrar forezgari ba shototar lagi to hi deshor doḳoldari fairae na, borong hou zatir naformanir lagi, ar tumrar Mabud Allae tumrar moy-murobbi Ibrahim, Isʼhak ar Iakubor gese ze oada ḳorsla, oḳan furon ḳorar lagi, tain-u tumrar samne taki itare ḳedaia diba.
DEU 9:6 Erlagi tumra zania rakio, tumrar forezgari dekia to tumrar Mabud Allae ou aramor deshor doḳoldari tumrare dira na, tumra oilae gaṛteṛa-ekguia zati.
DEU 9:7 “Ar hou morubumir maze tumra kila nizor Mabud Allar gusa tulaislae, ikan mono rakio, kunudin faurio na. Mishor desh saṛia aoar din taki oḳano aoa forzonto, hamesha tumrar monor bitre Mabudor birudita ase.
DEU 9:8 Tur faṛor maze-o tumra Mabudor gusa tulaislae, erlagi tain tumrare binash ḳorilta saila.
DEU 9:9 Mabude tumrar loge ze oada-chukti boail ḳorsoin, ou chukti nama leḳa duio ḳan fattor anar lagi ami faṛo uṭislam, sallish din sallish rait kunu dana-fani na ḳaia ami ruza aslam.
DEU 9:10 Ar Mabude tan fobitro ator anguildi leḳa hou duio ḳan fattor amare dila. Tumra hoḳol zedin Tur faṛo aia dola oilae, ou din Mabude zalail agunir maz taki tumrare zeta bataisla, ou duio fattoror maze to ota leḳa asil.
DEU 9:11 “Hou sallish din ar sallish raitor bade Mabude ou chukti nama leḳa fattor duio ḳan amar ato dila.
DEU 9:12 Dia ḳoila, zao, tumi zoldi kori lamat zao, ḳaron tumi zeta manshore Mishor taki bar ḳoria ancho, ita ku-fote gesoingi. Amar batail fot taki tara oto zoldi be-foti oigese, tara puja ḳorar lagi shuna golaia eḳ murti banaise.
DEU 9:13 Mabude amare aro ḳoila, ami to ita manshore deḳlam, ita boṛo gaṛteṛa-ekguia zati.
DEU 9:14 Oḳon tumi amar ges taki hori zao, kunu bada dio na, ami itare binash ḳorilimu, dunia taki itar nam miṭailimu. Ar tumar maz taki eḳ noya zati foyda ḳormu, ita aro boṛo aro bolala zati oibo.
DEU 9:15 “Teu ami faṛ taki lamia ailam, faṛor ufre aguin zoler, ar amar ato asil chukti nama leḳa hou duio ḳan fattor.
DEU 9:16 Bade ami sailam, saia deki tumra nizor Mabud Allar dorbaro guna ḳorrae. Tumra puja ḳorar lagi shuna golaia format ḍalia ek gorur basur banailae. Mabudor batail fot saṛia tumra oto zoldi be-fote gelaegi!
DEU 9:17 Erlagi ami ou duio ḳan fattor amar at taki falai dilam, teu ita bangia tumrar sokur samne ṭukra ṭukra oigelo.
DEU 9:18 “Mabude zetare nafosond ḳoroin, olaḳan guna ḳoria tumra tan gusa tulailae, erlagi ami agor laḳan hirbar sallish din sallish rait kunu dana-fani na ḳaia, tan samne soizdat foṛi roilam.
DEU 9:19 Mabudor bezuita gusare ami kub ḍorailam, tain gusae aguin oia tumrare binash ḳorilta saila, oile oubar-o tain amar foriad hunla.
DEU 9:20 Mabude Harunor ufre-o kub gusa oia tanre shesh ḳorilta saila, teu ami Harunor lagi-o tan dorbaro minoti korlam.
DEU 9:21 Ar tumrar gunar atiar mani tumrar banail hou basuror murtire agunit falaia zalaia sarḳar ḳorlam. Ogur zalail ṭukrare fishia sali banaia faṛia gangor fanir futor maze falailam.
DEU 9:22 “Tumra to Taberat, Masat ar Kibrut-Hutaba namor zagat Mabudor gusa tulaislae.
DEU 9:23 Erbade Kadesh-Bornea taki roana oar ḳalo Mabude zebla ḳoila, ami tumrare aramor ze desh dan ḳorsi, tumra gia oḳan doḳol ḳoro, hou shomoy-o tumra nizor Mabud Allar hukumor birudita ḳorlae, tanre manlae na, tan ḳotare-o ekin ḳorlae na.
DEU 9:24 Ashole ami zedin taki tumrare sini, hou din taki-u dekiar, tumra hamesha Mabudor hukumor ulṭa solrae.
DEU 9:25 “Zai ouk, Mabude tumrare binash ḳorar ḳota ḳoae ami sallish din sallish rait, tan samne soizdat foṛi roilam.
DEU 9:26 Ami tan dorbaro minot ḳori koilam, O Mabud Moula, tumi erare binash ḳorio na, era to tumar-u bonda, tumar-u ḳas shompod. Tumar kudroti kam dia, tumar nizor bolala atdi zetare Mishor desh taki bar ḳori ancho, itare mario na.
DEU 9:27 Itar gaṛteṛami, naformani ar gunar bae na saia, tumi kali tumar gulam Ibrahim, Isʼhak ar Iakubor ḳota mono ḳoro.
DEU 9:28 Oḳon tumi zudi itare marilao, te tumi ze desh taki amrare bar ḳoria ancho, hou deshor manshe ḳoibo, Mabude tan oada ḳora desho itare nita farsoin na, ba tarare ingsha ḳoria zane marar lagi ou morubumit nisoin.
DEU 9:29 Ashole era to tumar-u bonda, tumar nizor shompod. Tumar afon kudroti at lagaia, tumar bol-takkot ḳaṭaia erare Mishor taki bar ḳoria ancho.”
DEU 10:1 Hozrot Musae tarare ḳoira, “Hou shomoy Mabude ḳoila, tumi fattor ḳaṭia agor laḳan dukan ṭukra banao, ar oḳnain loia faṛor ufre uṭia amar daro ao. Erloge laḳṛidi eḳṭa shonduk-o banaio.
DEU 10:2 Tumi age ze dui ṭukra fattor bangiliso, hou fattoror ufre zeta leḳa asil, ota ami ou duio fattor ṭukrar ufre hirbar lekia dimu, bade tumi oḳnain nia hou shondukor bitre toibae.
DEU 10:3 “Hukum faia ami babla laḳṛidi eḳ shonduk banailam, ar dugu fattor ḳaṭia agor laḳan dui ṭukra ḳorlam, bade ou duio ṭukra ato loia ami faṛor ufre uṭlam.
DEU 10:4 Uṭia harle Mabude hou foyla duio fattor ṭukrar ufre zeta lekisla, ota hirbar ou duio ṭukrar ufre lekia amare dila, ou leḳa ayat oilo, shoriotor ḳas dosh hukum. Age zedin tumra hoḳol Tur faṛo aislae, hou din Mabude zalail agunir maz taki tumrare ou hukum-ahkam bataisla.
DEU 10:5 Bade ami faṛ taki lamat lamia aia amar banail hou shondukor bitre duio ḳan fattor toilam, zela Mabude hukum disla. Ita oḳono hono ase.”
DEU 10:6 Boni Israile Birut-Boni-Iyakan taki roana oia Muserat gelagi. Ou zagat Harun nobir ufat oae, tanre ono dafon ḳora oilo. Bade tan bodla tan fua Ali-Azor fordan imam oila.
DEU 10:7 Bade Boni Israilor ḳafela Gudgudat gelagi, hon taki Zotbatat gela, i zagat fanir fut ala bout ḳal-nala asil.
DEU 10:8 Ou shomoy taki Mabude Lebi kandanre fosond ḳorla shahadot shonduk boia nibar lagi, Mabudor ebadot-bondegi korar niote tan samne azira dibar lagi, ar tan name manshore dua dibar lagi. Ou imamoti kam tara oḳono ḳorra.
DEU 10:9 Otar lagi Lebi kandanor manshe Boni Israilor dusra ḳandan oḳlor laḳan zomi-zomar kunu baṭ ba kunu mirashdari faila na. Tumrar Mabud Allar zoban mafik shoyong Mabud-u oila tarar mirash.
DEU 10:10 Hozrot Musae tarare ḳoila, “Agor baror laḳan ibar-o ami sallish din sallish rait Tur faṛor ufre aslam, ibar-o Mabude amar foriad kobul ḳorla, tain tumrare binash ḳora bad dilaila.
DEU 10:11 Bade Mabude amare ḳoila, ‘Tumi uṭo, uṭia agedi aguanir lagi ota manshore zuit ḳoria tarar ag oia roana deo, ami tarar moy-murobbi oḳlor gese ze desh dibar lagi kosom ḳaia oada ḳorsi, tara hou desho gia ita doḳol ḳorouk.’
DEU 10:12 “O Boni Israil, huno, tumrar Mabud Allae tumrar gese kita sain. Tain saira, tumra ḳali tan ḍor-ḳof bitre raḳo, tan fote solo, tanre mohobbot ḳoro, tumrar asta dil-mon dia tan ebadot-bondegi koro.
DEU 10:13 Ar tumrar balair lagi aiz ami tumrare Mabudor deoa ze hukum-ahkam ar shoriot zanairam, ita furafur amol ḳoro.
DEU 10:14 “Zano to, asman ar asmani hokkolta, zomin ar zominor tamam samana to tumrar Mabud Allar.
DEU 10:15 Ta-o tumrar moy-murobbir bae tan ṭan taḳae, tain erare mohobbot ḳorta. Tarar bade tarar aolad oḳolre mani, oḳonkur zomanar duniar hoḳol zatir maz taki kali tumrare fosond ḳorsoin.
DEU 10:16 Erlagi tumrar zarzir dilor mosolmani korao, gaṛteṛa naforman bonia roio na.
DEU 10:17 Mono rakio, tumrar Mabud Alla to hoḳol deb-debir ufre, munib oḳlor munib, tain-u mohan, boloban ar ḍor-ḳof foyda ḳorra Alla. Tain kunu fokkofati koroin na, gush ḳain na.
DEU 10:18 Etim oḳol ar ṛaṛi beṭintor bae hok insaf ḳoroin, ar tumrar loge boshot ḳorra bin-deshi oḳolre ḳaoa-findar hoḳolta dia tan mohobbotor forman deḳain.
DEU 10:19 Age to Mishor desho tumra-o ola bin-deshi aslae, erlagi bin-deshi manshore tumra maya-mohobbot ḳorio.
DEU 10:20 Tumra nizor Mabud Allare ḍoraia solio, tan ebadot-bondegi korio, tan ashik bonia roio, ar ḳali tan name ḳosom ḳaio.
DEU 10:21 Tain-u tumrar tarifor kuṭi, tain-u tumrar Alla. Tumra nizor souke zoto asanoḳ taijjubi ar bezuita kudroti kam deḳso, ita hokkolta to tumrar lagi tain-u ḳorsoin.
DEU 10:22 Tumrar zeta moy-murobbi Mishor desho gesla, era asla muṭ shottoir zon, ar oḳon tumrar Mabud Allae tumrare asmanor terar laḳan ḳorsoin, zeta gonia fuṛail zae na.
DEU 11:1 “Erlagi, O Boni Israil, tumra nizor Mabud Allare mohobbot ḳorio, ar tan morzi zugaia solio, tan deoa shoriot, hoḳol niom-ḳanun, hukum-ahkam hor-hamesha manio.
DEU 11:2 Tumra oḳon mono rakio, ita ami tumrar huruttaintore na ḳoia ḳali tumrar gese ḳoiar, tara to tumrar Mabud Allar hedayot deḳse na, ita sine-o na. Tumrar gese tan afon mohima, tan kudroti ator bahaduri,
DEU 11:3 ar Mishoror bashsha Feraunor ufre, tar asta deshor ufre tain zoto nomunar kudroti lila-ḳela deḳaisoin ita to tara deḳse na.
DEU 11:4 Tara Mishoror sifai dol, itar guṛa, guṛar gaṛin ar itare tain kila Nil doriat buṛaia maria ekkere binash ḳorsoin, ita-o to deḳse na,
DEU 11:5 ou zagat aia tumra fousibar age morubumir maze tain tumrar ufre zotota goṭaisoin, tumrar huruttainte ita-o deḳse na.
DEU 11:6 Tain Ruben ḳandanor Iliabor fua Daton ar Abiramre ze shaza disoin mani, duniar maṭi faṭia a ḳoria asta Boni Israilor mazḳan taki tarare gilililo, tarar bou-baichchain shudda asta foribar, tarar gor-duar, ar heman-zanuar shoho hoḳol mal-samana maṭir tole hamaigelo, ita-o era deḳse na.
DEU 11:7 Oile tumra nizor souke Mabudor hoḳol kudroti lila-ḳela deḳso.
DEU 11:8 “Te oḳon ami tumrare zela hukum diram, tumra ita hokkolta manio, teu Zordan gang faroia ze desh doḳolor lagi zairae, tumra bolala bonia honor doḳoldari faibae.
DEU 11:9 Mabude tumrar moy-murobbi oḳolre ar tarar aolad oḳolre ze desh dibar lagi kosom ḳaisla, dud ar mour banḍar-ala hou aramor desho tumrar hayati lamba oibo.
DEU 11:10 I deshḳan to hou Mishor deshor laḳan nae zeḳan taki tumra bar oia aiso, mono or ni, hag-torḳarir ḳeto zela fani dein, hou desho bisi bain dia harle tumra faor naoṛa dia ola fani hisitae?
DEU 11:11 Oile gang faroia ze desh tumra doḳol ḳorat zairae, i desho faṛia tol zaga ar faṛ-forbote bora, i zomine Allar deoa megor fani kae.
DEU 11:12 Tumrar Mabud Allae i deshor kial raḳoin. Bosoror foyla taki hesh forzonto tan doyar nozor taḳe i zominor ufre.
DEU 11:13 “Te ami aiz tumrare zela hukum diar, ita tumra kub kiali oia manio, tumrar Mabud Allare mohobbot ḳorio, ar furafur dile-zane tan ebadot-bondegi korio.
DEU 11:14 Teu Mabude zorur mafik bosoror foyla ar sheshe-o rohomoti meg dia, tumrar ḳetor foshol, anguror rosh, zoytunor tel hokkolta zugan diba.
DEU 11:15 Tumrar foshur falor lagi zomino gash diba, tumra tusṭo oia ḳani-fani kaibae.
DEU 11:16 “Ta-o tumra hushiar roio, arnae tumrar mon ku-fote zaibogi, ar tumra be-foti bonia deb-debir puja ḳorbae, itare boḳti korbae.
DEU 11:17 Ila ḳorle tumrar ufre Mabudor gusar aguin gorom oibo, tain asmanor rohomoti duar bond ḳoriliba, teu meg-fani bond oia zomino ar foshol folito nae, ar Mabude tumrare ze desh dan ḳorra, hou aramor desh taki tumrare zoldi kori fusia falail oibo.
DEU 11:18 Erlagi tumrar monor maze, tumrar dilor bitre amar ou hukum ḳan gatia rakio, tumrar duio ato ita nishana hishabe bandia toio, ar ḳofalor maze-o lagaio.
DEU 11:19 Tumrar huruttaintore-o ita hokkolta talim dio. Tumra goro roar shomoy, fote-gaṭe aṭibar shomoy, hutibar shomoy ar hutono taki uṭia harle hamesha ota befare batchit ḳorio.
DEU 11:20 Ita lekia tumrar baṛir geiṭo ar duaror soukaṭo lagaio.
DEU 11:21 Ita manle Mabude tumrar moy-murobbir gese ze desh dibar ḳosom ḳaisla, hou desho tumra ar tumrar aolador hayati otodin roibo, zotodin i duniar ufre asman roibo.
DEU 11:22 “Aiz ami tumrare zeta hukum-ahkam diar, tumra zudi kub kiali oia ita mano, tumrar Mabud Allare mohobbot ḳoro, tan batail fote solo ar tan ashik bonia ro,
DEU 11:23 te Mabude tumrar samne taki hou deshor hoḳol zatire bar ḳori diba, teu tumra nizor taki aro boṛo boṛo ar bolala zatire ḳedaia honor doḳoldari faibae.
DEU 11:24 Tumrar faodi zeta zagar ufre aṭibae, ita hoḳol zaga tumrar doḳolo aibo. Douknor morubumi taki Lebanon forzonto, Furat gang taki foismor doria forzonto doḳoldari faibae.
DEU 11:25 Kunu beṭa tumrar samne ubanir takkot oito nae, tumra hou deshor zeḳano zaibae, oḳanor manshe-u tumrare ḍoraiba, tarar bitre ḳafibo, ita tumrar Mabud Allae tan nizor oada mafik-u ḳoraiba.
DEU 11:26 “Huno, aiz ami tumrar samne rohomot ar lannot duiota deḳailam.
DEU 11:27 Ami oḳon tumrare zela hukum dilam, tumrar Mabud Allar ou hukum-ahkam zudi tumra mano, te tumra ou rohomot faibae.
DEU 11:28 Ar ita na mania tumra zudi tumrar Mabud Allar hukumor ulṭa solo, i fot taki horia kunu deb-debir ḳore ḳore zao, te tumra lannoti oibae.
DEU 11:29 “Tumra ze desh doḳol ḳorar lagi zairae, tumrar Mabud Allae zebla tumrare hou desho nia haraiba, haraia harle tumra ou rohomotor ḳota Gorisim faṛor ufre uṭia elan ḳorbae, ar ou lannotor ḳota elan ḳorbae Ibal faṛor ufre uṭia.
DEU 11:30 Tumra to sino, Zordan gang faroia fotor foismedi Gilgolor daro ou duio faṛ ase, Araba namor tol zagar bashinda Kenani oḳlor deshor Murir elon bonor ḳandar ou duio faṛ sino na ni?
DEU 11:31 Mono rakio, tumrar Mabud Allae tumrare ze deshor doḳoldari dira, Zordan gang faroia hou desho hamaia hari tumra zebla hono boshot ḳorbae,
DEU 11:32 hou shomoy tumra ou hukum-ahkam ar niom-ḳanun kub kial ḳoria amol ḳorio, zeta oḳon tumrare ḳoilam.
DEU 12:1 “O Boni Israil, tumrar moy-murobbir Mabud Allae tumrare ze deshor doḳoldari disoin, hou desho gia amar batail ou hukum-ahkam ar niom-ḳanun hor-hamesha mania solio.
DEU 12:2 Honor zoto zatire ḳedaia hari tumra doḳoldari fairae, tarar huru-boṛo hoḳol faṛ-forbotor ufre, ḍal-fala melail tortaza hoḳol gasor tole tara zeta deb-debir puja ḳoroin, tumra ita deb-debir astana bangia ekkebare surmar ḳorilaio.
DEU 12:3 Tarar hoḳol boli kana bangilio, pujar fattor oḳol surmar ḳorio, Ashera-debir nishana kuṭi oḳol aguindi zalailio, tarar banail murti oḳol bangilio, itar nam hi zomin taki furafur fusia falaio.
DEU 12:4 “Ar tarar deb-debir pujar nomunae tumrar Mabud Allar ebadot-bondegi korio na.
DEU 12:5 Oile tumrar Mabud Allae tumrare didar-doroshon dibar kiale, tan nizor Baytulla Shorif hishabe, tumrar hoḳol ḳandanre deoa zaga taki tain ze zagare fosond ḳorba, tumra tan ebadotir lagi hou zagat azir oio.
DEU 12:6 Tumra zarzir zalail kurbani, hoḳol zator foshu kurbani, hoḳol ruzi-ruzgaror dosh baṭor eḳ baṭ, lilla-sodga, mannotor kurbani, dan-ḳoyrat ar tumrar foshur foyla baichchare ou zagat anio.
DEU 12:7 Oḳano tumrar foribaror hoḳolre loia, tumrar Mabud Allar samne ḳana-fina ḳorio, ar tan rohom-borkot faoa hoḳol laḳan ḳamai-ruzgaror lagi kushi-bashi korio.
DEU 12:8 “Ar oḳon amra zela zemne kushi omne-u solram, hono gia harle tumra ila ḳorio na.
DEU 12:9 Tumra shuḳ-shantie boshot ḳorar lagi tumrar Mabud Allae ze zagar doḳoldari dira, tumra to oḳono hino geso na.
DEU 12:10 Ta-o tumra zebla Zordan gang faroia, tumrar Mabud Allar deoa desho gia boshoti korbae, hou shomoy Mabude tumrar sairo galar dushmonor at taki shanti dia harle,
DEU 12:11 tain nizor Baytulla Shorif hishabe ze zagare fosond ḳorba, hou zagat tumra amar batail hoḳolta loia azir oio. Tumrar zalail kurbani, hoḳol zator kurbanir foshu, hoḳol ruzi-ruzgaror dosh baṭor eḳ baṭ, lilla-sodga, dan-ḳoyrat ar hoḳol nomunar mannotor kurbani loia ono aio.
DEU 12:12 Aia tumrar Mabud Allar samne tumra nize, tumrar fua-fuṛin, tumrar bandi-gulam, tumrar gau ar ṭaunor Lebi kandanor manush oḳol, zera tumrar laḳan kunu zaga-zomi faise na, tumra hoḳole milia kushi-bashi korio.
DEU 12:13 Ar kub hushiar roio, tumra nizor fosond moto zesa zagat zalail kurbani dio na.
DEU 12:14 Borong tumrar ḳandan oḳolre deoa zomin taki tain ze ḳandanor zaga fosond ḳorba, ḳali hou zagat zalail kurbani adae ḳorio, ar hou zagar lagi amar batail hoḳol ḳam-ḳaz ḳorio.
DEU 12:15 “Ta-o tumrar monor shoḳ oile fak-nafak halote-o hoḳole-u zekunu zator zongli orinor gust ḳaoa zela zaiz ase, ola tumrar Mabud Allar rohom-borkote faoa foshure zobo ḳoria, tumrar elaḳar gau ba ṭauno ḳaitae farbae.
DEU 12:16 Ḳali tumra kunu lou ḳaio na, loure fanir nomunae maṭit ḍali dibae.
DEU 12:17 “Tumrar hoḳol zator foy-fosholor, anguror shorbotor ar telor dosh baṭor eḳ baṭ, tumrar goru-sagolor foyla baichcha, tumrar mannotor hoḳolta, tumrar lilla-sodga, dan-ḳoyrat, ita kunta-u tumrar boshoti elaḳar kunu gaut ba ṭauno ḳaio na.
DEU 12:18 Ita ḳali tumrar Mabud Allar fosond ḳora zagat nia tan samne ḳaio. Tumra nize, tumrar fua-fuṛin, tumrar gulam-bandi, ar tumrar gau ba ṭaunor Lebi kandanor manshe ḳaiba. Tumrar hoḳol nomunar ḳam-ḳazor maze nizor Mabud Allar samne kushi-bashi korio.
DEU 12:19 Ta-o tumrar desho zotodin boshot ḳorbae, otodin Lebi kandanor manshor ufre kial-nozor rakio.
DEU 12:20 “Tumrar Mabud Allae tan oada mafik tumrar deshor shimana baṛaia harle, tumra zebla gust ḳaibar niote ḳoibae, gust ḳaitam mone sar, hou shomoy tumrar monor shoḳ miṭaia gust ḳaio.
DEU 12:21 Tumrar Mabud Allae Baytulla Shorif hishabe ze zaga fosond ḳorba, hi zaga zudi tumrar boshot ḳana taki bakka duroi oy, te tumra amar batail hukum mafik tumrar Mabudor deoa goru-sagolor fal taki foshu nia zobo ḳorio, ar zarzir gau ba ṭauno nizor kushie gust ḳaio.
DEU 12:22 Shikaror zongli orinor gustor laḳan tumra ita ḳaio, fak-nafak halote hoḳole-u ḳaio.
DEU 12:23 Oile hushiar roio, lou ḳaio na, lou oilogi zan, tumra gustor loge zan ḳaio na.
DEU 12:24 Tumra kunumonte-u lou ḳaio na, itare fanir nomunae maṭit ḍali dio.
DEU 12:25 Tumra lou ḳaio na, Mabudor nozoro zeḳṭa shoṭik, oḳṭa amol ḳorle tumra ar tumrar bobishot aolad oḳlor balai oibo.
DEU 12:26 “Mabudor fosond ḳora zagat tumrar fak-fobitro zinish ar mannotor zinish loia zaio.
DEU 12:27 Tumrar Mabud Allar kurbani kanar ufre tumrar zalail kurbanir gust ar lou zalaio. Oile tumrar oinno hoḳol kurbanir lou kurbani kanar maze ḍalio ar i kurbanir gust tumra ḳaio.
DEU 12:28 Tumra ar tumrar bobishot aolad oḳlor zate hor-hamesha ay-unnoti oy, otar lagi tumra amar batail ou hukum ḳanain zoton ḳori manio, ila solle tumra Alla Mabudor nozoro zeta shoṭik ar bala, oṭa-u tumra ḳorbae.
DEU 12:29 “Tumra zoto zatire be-doḳol ḳorbae, tarare tumrar Mabud Allae tumrar samon taki kedaia harle, tumra zebla hou deshor doḳoldari faia hono boshot ḳorbae,
DEU 12:30 hou shomoy tumra hushiar roio, arnae tumra-o tarar fando foṛia tarar devtar bozona ḳoria zudi ko, ota manshe zela tarar deb-debir puja ḳoroin, amra-o ola tarar laḳan puja ḳortam.
DEU 12:31 Ḳobordar! Tumrar Mabud Allar ebadot-bondegi tarar pujar nomunae ḳorio na. Tara to zarzir deb-debir name Mabudor nafosondor hoḳol nomunar aḳam-kuḳam ḳore, emonki tarar deb-debir name nizor fua-fuṛinre agunit zalaia boli dilae.
DEU 12:32 “Te ami tumrare zeta hukum-ahkam zanailam, tumra ḳali ota-u manio. Itar loge dusra kunta baṛaio na, ar kunta bad-o dio na.
DEU 13:1 “Oḳon tumrar mazor kunu pir-dorbeshe ba isteḳana ḳorrae kunta goṭibo ḳoia zudi agam ḳobor zanae, ar kunu keramotir ḳota ḳoy,
DEU 13:2 ḳoar bade hasau zudi ola foli zae, ar ou zone-u kunu deb-debir ḳota hunaia tumrare ḳoy, solo, amra gia hou devtar puja ḳori,
DEU 13:3 te tumra ou pir-dorbesh ba isteḳana ḳorrar ḳota manio na. Mono rakio, tumra zane-forane tumrar Mabud Allare mohobbot ḳorrae ki na, ouḳan zasai korar lagi tumrar Mabud Allae tumrare forikka ḳoroin.
DEU 13:4 Tumra nizor Mabud Allar hukum mafik solio, ḳali tanre-u ḍoraio, tan hukum-ahkam manio, tan kalam hunia amol ḳorio, tan ebadot-bondegi korio, ar tan ashik bonia roio.
DEU 13:5 Erlagi hou bonḍo pir-dorbesh ba isteḳana ḳorrare zane marilaio. Mono rakio, tumrar ze Alla Mabude tumrare Mishor desh taki bar ḳoria anchoin, gulami taki tumrare azad ḳorsoin, ou bonḍoe to tumrare hou Mabudor birudde naformanir lagi ṭaner, tumrar Mabud Allar batail fot taki be-foti banaito sar. Erlagi tumrar maz taki ou ḳarafire binash ḳorilaibae.
DEU 13:6 “Oḳon tumrar afon bai, tumrar nizor fua ba fuṛi, tumrar zanor ṭukra bou, ba tumrar mayar bondu aia zudi niralae ḳoy, ‘Solo, amra gia deb-debir bozona ḳori.’ Ita devtain tumar ba tumar baf-dadar osina,
DEU 13:7 tumar ash-fash elaḳar ba duroir deshor kunu devta ouk, duniar eḳ shimana taki areḳ shimanar zekunu zatir zekunu devta ouk,
DEU 13:8 he zudi tumare hono nito sae, te tumi zaio na, tar ḳota hunio na, tare doya deḳaio na, tar zan basaio na, ar lukanir zaga dio na.
DEU 13:9 Tare nichchit zane marilaio. Zane marilaoar lagi foyla tumar nizor atdi shuru ḳoro, bade hoḳole aia shorik oiba.
DEU 13:10 Ogure fattordi iṭaia zane marilio, he to tumare hou Alla Mabudor ebadoti taki horaia ku-fote nito sar, zein tumare Mishor deshor gulami taki azad ḳoria anchoin.
DEU 13:11 Ogure marilaoar ḳobor hunia hoḳol Boni Israile ḍoraiba, erbade ila naformani korar shaosh ar ḳeuror oito nae.
DEU 13:12 “Tumrar Mabud Allae tumrar boshot ḳanar lagi ze gau ar ṭaun oḳol dan ḳorra, ita kunu zagar befare tumra zudi huno,
DEU 13:13 honor Boni Israilor mazor kunu naformanor dol bar oia, hou zagar manshore be-fote nibar lagi kor, solo, amra gia noya noya deb-debir puja ḳori.
DEU 13:14 Te tumra kub balamonte kuz-ḳobor loio ar todonto ḳorio. Todonto ḳoria zudi ita zogoinno ḳamor forman mile,
DEU 13:15 te honor hoḳol bashindare zane marilio. Hou gau ba ṭaunor hoḳol manush ar foshu-fongkire toluardi kaṭilio.
DEU 13:16 Hin taki ana hoḳol mal-samana ṭaunor moydano nia zalailio. Hou asta gaure ba ṭaunre-o zalail kurbanir laḳan zalaia sali korio. Hou zagare siroḳalor lagi binash ḳorio, ḳeu zanu kunudin hino kunta banaito na fare.
DEU 13:17 Mabudor bezuita gusa taki rehai faoar lagi, honor kunu mal-samana zanu tumrar gese na roy, ita to lannoti mal. Teu Mabude tumrare rohom-borkot ar doya-maya ḳorba, tumrar baf-dadar logor oada mafik tain tumrar aolad-oarish baṛaiba.
DEU 13:18 Ḳali aiz ami tumrare zeta hukum-ahkam zanaiar, ota hoḳolta manio, Alla Mabudor kushi mafik solia tumrar zindegi kaṭaio.
DEU 14:1 “Tumra to tumrar Mabud Allar ḳas proza. Erlagi tumra kunu murdar lagi kanda-ḳaṭi ba ahazari korat gia, nizor shorilre ḳaṭa-sira ḳorio na, ar matar samnor galar sul ḳamaio na.
DEU 14:2 Mono rakio, tumra oilae nizor Mabud Allar ḳas fobitro zati. Duniar hoḳol zatir maz taki, Mabude tan ḳas proza ar tan nizor shompod hishabe tumrare alog korsoin.
DEU 14:3 “Te kunuzat noforoti kani tumra ḳaio na.
DEU 14:4 Ou laḳan foshur gust ḳaitae farbae: goru, meṛa, sagol, ita to halal.
DEU 14:5 Ar orin, maya-orin, sitra-orin, zongli sagol, lamba hingi ram-sagol, fisone dola orin ar faṛia meṛa ḳaio.
DEU 14:6 Zeta foshur kura furafur dui ongsho laḳan sira, ar zeta foshuinte ḳanire fazain, itar gust zaiz.
DEU 14:7 Oile zeta foshur ḳali kura sira oile fazain na, ba zeta foshuinte ḳali kanire fazain oile kura sira nai, ota foshur gust tumra ḳaio na. Te tumra uṭ, ḳorgush ba shafon-unduror gust ḳaio na, itae ḳanire fazain oile itar kura sira nae, erlagi haram.
DEU 14:8 Ar shuoror gust-o haram, itar kura sira oile-o itae ḳanire fazain na. Ita foshu oḳlor mora lash dora-soa nazaiz.
DEU 14:9 “Fanir maze boshot ḳorra zeta zandaror foir ar ḍaḳna ase, ita tumrar lagi halal.
DEU 14:10 Oile zetar foir ar ḍaḳna nai, ita nazaiz. Ita tumrar lagi haram.
DEU 14:11 “Hoḳol zator fak-fobitro faki tumrar lagi halal.
DEU 14:12 Oile boṛo sil, hokun, haf-ḳauri,
DEU 14:13 hoḳol zator sil,
DEU 14:14 hoḳol zat ḳaua,
DEU 14:15 uṭfaki, nim faki, gangsil, hoḳol nomunar baz faki,
DEU 14:16 hoḳol zat fesa, hoḳol zator kuṛa,
DEU 14:17 sola-kak, bolua faki, fani-ḳauri,
DEU 14:18 hoḳol zator zaṭia, hoḳol zator bogla, mon-sura faki ar badur tumrar lagi haram.
DEU 14:19 “Ar ḍaḳna ala hoḳol zator fuk-zuk, zetae ṭeng dia aṭoin, ita tumrar lagi haram, ita to nafak.
DEU 14:20 Oile ḍaḳna ala hoḳol zator fak-fobitro foring tumrar lagi halal.
DEU 14:21 “Tumra oilae to tumrar Mabudor name eḳṭa fak-fobitro zati, erlagi omne omne mori zaoa kunu zib-zanuaror gust tumra ḳaio na, ita tumrar lagi haram. Oile tumrar gaut ba ṭauno boshot ḳorra dusra zekunu zatir manshore ita ḳabaitae farbae, bin zatir gese bestae-o farbae. “Ar huno, tumra bokrir baichchare tar maʼr dud dia randio na.
DEU 14:22 “Forteḳ bosor tumrar zomino zeta foy-foshol fao, itar dosh baṭor eḳ baṭ atra ḳori toio.
DEU 14:23 Ar tumrar Mabude tan Baytulla Shorif hishabe ze zagare fosond ḳorba, hou zagat ota loia aio. Tumrar ḳetor foshol, anguror shorbot, zoytunor telor dosh baṭor eḳ baṭ anio. Ita fosholor loge tumrar fala goru-sagolor foyla baichchare zobo ḳoria hokkolta Mabudor samne ḳaio, ou laḳan tumra hamesha nizor Mabud Allare ḍoraia sola hikio.
DEU 14:24 Oile tumrar Mabud Allar fosond ḳora zaga zudi bakka duroi oy, ar Mabudor rohom-borkote faoa ou samana loia hino zaitae na faro,
DEU 14:25 te ou samana besia itar ṭeḳa loia tumrar Mabud Allar fosond ḳora hou zagat zaio.
DEU 14:26 Gia ou ṭeḳadi tumrar kushi mafik goru-sagol, anguror shorbot, taṛi, ba tumrar fosondor zekunuta kinilaio. Bade foribaror hoḳolre loia ita ḳani-dani kaia hari, Alla Mabudor samne kushi-bashi korio.
DEU 14:27 Ou shomoy tumrar gau ba ṭauno boshot ḳorra Lebi kandanor manshore faurio na. Ḳaron tumrar to zaga-zomin ase, oile tarar ita kunta nai.
DEU 14:28 “Forteḳ tin bosor bade bade tumrar ḳetor fosholor dosh baṭor eḳ baṭ ania ṭauno dola ḳorio.
DEU 14:29 Teu Lebi kandanor manshe, zera zaga-zomin ba don-samanar baṭ faise na era, ar bideshi musafir oḳole, etim oḳole, ṛaṛi beṭinte ita feṭ boria ḳaiba. Ar tumrar Mabud Allae tumrar hoḳol ḳamor maze rohom-borkot diba.
DEU 15:1 “Tumrar hoḳol zator faona forteḳ shat boros bade bade maf ḳori dio.
DEU 15:2 Ita ou laḳan mafi dio, Boni Israilor maze forteḳe eḳe-oinnor faonare mafi dio. Mabude hukum disoin faona mafi dibar lagi, erlagi ar kunu faona dabi korio na.
DEU 15:3 Bin zatir manshor gesor faona dabi boail taḳto fare, oile nizor zatir bair gese hoḳol zator faona maf ḳori dio.
DEU 15:4 Ashole tumrar Mabud Allae tumrare ze deshor doḳoldari dira, hou zomino tain nichchit tumrare rohom-borkot diba, erlagi tumrar maze ḳeu gorib roar ḳota nae.
DEU 15:5 Tain to ila rohom-borkot diba tumra Mabud Allare kushi korar kiale aiz amar batail ita hukum oḳol ḳali tumra zudi furafur mania solo.
DEU 15:6 Tumrar Mabud Allae tan oada mafik ze shomoy rohom-borkot diba, ou shomoy tumra bout zatire aolat dibae, oile tumrar aolat ḳorar kunu dorḳar oito nae. Ar tumra hoḳol zatir ufre razotto ḳorbae, oile tumrar ufre ḳeu razotto ḳorto nae.
DEU 15:7 “Tumrar Mabud Allae tumrare ze desh dira, hou deshor kunuḳano tumrar baiaintor maze ḳeu zudi gorib oy, te tar bae tumrar dil fashan ḳorio na, tar lagi tumrar at muiṭ ḳoria rakio na.
DEU 15:8 At kula rakia tar zorur buzia aolat dio.
DEU 15:9 Hushiar roio, shat nombor bosor mani, aolat mafir bosor ḳandat aichche dekia monor ku-motlobe tumrar obabi baire ḳali ate firai dio na, arnae he Mabudor dorbaro foriad ḳorle tumra gunar bagi oibae.
DEU 15:10 Monor maze kunuzat bezari na ania tare dio, teu tumrar Mabud Allae tumrar hoḳol ḳamo rohom-borkot diba, tumra ze ḳamo at dibae, ou ḳamo-u rohom-borkot faibae.
DEU 15:11 Deshor maze to hor-hamesha gorib manush roiba, erlagi ami tumrare ou hukum diram, tumrar baiaintor bae, deshor gorib-duki, obabi manshor bae nizor at kula rakio.
DEU 15:12 “Tumrar shomazor kunu Ibrani beṭa ba beṭie zudi nizore tumrar gese besilae, te soy boros ḳam ḳoranir bade shat nombor boros arombo oar ḳalo tare azad ḳori dio.
DEU 15:13 Azad ḳorbar ḳalo tare ḳali ate bidae dio na.
DEU 15:14 Tumra tare kula ate tumrar falo taki meṛa-sagol, ḳet-ḳamar taki foshol ar angur maṛar zaga taki anguror shorbot dio. Tumrar Mabud Allae tumrare zela rohom-borkot disoin, tumra-o tare ola ḳorio.
DEU 15:15 Mono rakio, tumra-o age Mishor desho gulam aslae, ar tumrar Mabud Allae tumrare azad ḳorsoin. Erlagi-u aiz ami tumrare ola hukum diram.
DEU 15:16 “Oile hou gulame tumrar gese shuk faia, tumrar foribaror manshore bala faoae zudi koy, tumrar ges taki zaito nae,
DEU 15:17 te tumra tar ḳanor lotire duaror ḳofaṭo lagaia shik dia fuṛ ḳori dibae, teu he zindegibor tumrar gulamit roibo. I hukum gulam ba bandir lagi eḳ homan.
DEU 15:18 Gulam ba bandire azad ḳori dite tumrar mono ḳoshṭo ana ṭik nae, he to soy boros dori betondari kamlar saite-o ḍabol ḳam ḳorse. Oḳon tare azad ḳorle tumrar Mabud Allae tumrar hoḳol ḳamo rohom-borkot diba.
DEU 15:19 “Tumrar goru-sagolor forteḳ foyla meda baichchare tumrar Mabud Allar name algaia toio. Gorur foyla baichchadi kam-ḳaz ḳoraio na, meṛa-sagolor foyla baichchar ruma ḳaṭio na.
DEU 15:20 Itare tumrar Mabud Allar fosond ḳora zagat nia, foribaror hoḳolre loia tan samne forteḳ bosor otar gust ḳaio.
DEU 15:21 Oile itar maze zudi kunu laḳan kut taḳe, ita lengṛa, anda ba aro kunu zator kut taḳe, te igure-u tumrar Mabud Allar name kurbani dio na,
DEU 15:22 oile ita kutala foshu tumrar nizor elaḳat zobo ḳori kaitae farbae. Shikaror orinor laḳan zobo ḳoria fak-nafak halote zekunu zone ḳaitae farbae.
DEU 15:23 Ḳali lou ḳaio na, loure fanir laḳan maṭit ḍali dio.
DEU 16:1 “O Boni Israil, Abib mashor sando tumra Mabud Allar name Azadi Id adae ḳorio. Ḳaron ou sandor eḳdin tumrar Mabud Allae raitkur bala Mishor desh taki tumrare bar ḳoria anchoin.
DEU 16:2 Tumrar Mabud Allae nizor Baytulla Shorif hishabe ze zagare fosond ḳorba, ou zagat tumra tan name goru-sagolor fal taki foshu nia Azadi Idor kurbani dio.
DEU 16:3 Kurbanir foshur gust tumra ḳamir ala nan ruṭidi kaio na. Mishor desh taki taṛa-uṛa ḳori zemne ḳamir saṛa halote bar oia aislae, oḳon tumra Mishor deshor duḳ-mosibotor ḳota iad ḳorar lagi fura shat din tumra ola ḳamir saṛa ruṭi kaio. Hou dinre hara zindegibor mono raḳar lagi tumra ola ḳorio.
DEU 16:4 Ou shato din tumrar kunu zagat zanu ḳamir ala kunuzat ḳani na mile. Foyla din hainja bala ze foshu kurbani dibae, itar gust zanu fozoror shomoy forzonto na roy.
DEU 16:5 “Tumrar Mabud Allae tumrare ze ṭaun oḳol dan ḳorba, ita kunu ṭaunor maze tumra Azadi Idor kurbani dio na.
DEU 16:6 Ḳali Baytulla Shorif hishabe tain ze zagare fosond ḳorba, hou zagat kurbani dio. Sandor ze tariko tumra Mishor desh taki bar oia aislae, forteḳ bosor ou tarikor hainja bala tumra Azadi Idor foshu kurbani dio.
DEU 16:7 Tumrar Mabud Allar fosond ḳora zagat kurbanir gust randia ḳaio. Bade bian oile zarzir goro firia zaio.
DEU 16:8 Fura soy din tumra ḳamir saṛa ruṭi kaio, ar shat nombor din tumra Alla Mabudor name milon-mahfil ḳorio, ou din kunuzat ḳam-ḳaz ḳorio na.
DEU 16:9 “Ḳetor foshol ḳaṭat foyla ḳasi laganir din taki tumra shat hafta gona shuru ḳorio.
DEU 16:10 Bade tumrar Mabud Allar rohom-borkote zoto foshol faiso, ota taki nize kush oia lilla dia tan name Fonchaisha Id adae ḳorio.
DEU 16:11 Tumrar Mabud Allae Baytulla Shorif hishabe ze zagare fosond ḳorba, tumra hou zagat tan samne tumrar fua-fuṛin, gulam-bandi, tumrar loge boshot ḳorra Lebi kandanor manush, bin-deshi oḳol, etim huruttain ar ṛaṛi beṭin, hokkole milia idor kushi-bashi korio.
DEU 16:12 Tumra mono rakio, age tumra Mishor desho gulam aslae, te kub kiali oia ou niom-ḳanun adae ḳorio.
DEU 16:13 “Tumrar ḳetor foshol ar angur maṛar zaga taki hoḳolta ugaro tulia harle, fura shat din tumra Ḍera-goror Id adae ḳorio.
DEU 16:14 Idor ḳalo tumrar fua-fuṛin, gulam-bandi, tumrar loge boshot ḳorra Lebi kandanor manush, bin-deshi musafir, etim huruttain ar ṛaṛi beṭin hoḳole milia kushi-bashi korio.
DEU 16:15 Mabudor fosond ḳora zagat gia Alla Mabudor name fura shat din tumra ou id adae ḳorio. Mabude to tumrar hoḳol zator fosholor maze, tumrar hoḳol ḳam-ḳazo rohom-borkot disoin, erlagi tumra hoḳole kushi-bashi korbae.
DEU 16:16 “Tumrar mazor hoḳol beṭainte tumrar Mabud Allar fosond ḳora zagat gia bosoro tin bar tan didaro azir oio. Ḳamir Saṛa Ruṭir Id, Fonchaisha Id, Ḍera-goror Id, ou tino idor ḳalo azir oio. Kial rakio, ḳeu zanu ḳali ate Mabudor samne na ae.
DEU 16:17 Tumrar Mabud Allae zare ze laḳan rohom-borkot disoin, ou hishabe nizor tofik anman forteḳ zone Mabud Allar name lilla dio.
DEU 16:18 “Tumrar Mabud Allae tumrare zeta ṭaun oḳol dan ḳorra, ita hoḳol ṭauno tumrar hoḳol ḳandan taki hakim-salish ar ofisar boail ḳorio. Era hok bisar-salish ḳorba.
DEU 16:19 Tumra hok bisar taki loṛio na, ḳeuror muk saia mosolmani korio na. Gush ḳaio na, gushe to aḳoldaror soukre-o anda banailae, ar forezgaror mukor zoban-o bodlailae.
DEU 16:20 Hoḳol nomunae zeṭa shoṭik, tumra ḳali ou fote solio. Teu tumrar Mabud Allae tumrare ze desh dan ḳorra, ota doḳol ḳoria lamba hayati faibae.”
DEU 16:21 Hozrot Musae aro ḳoila, “Tumrar Mabud Allar name tumra ze kurbani kana banaibae, er ḳanda-ḳasat laḳṛidi banail Ashera-debir kunu nishana kuṭi toio na.
DEU 16:22 Pujar niote fattoror kunu kuṭi gaṛio na, ḳaron tumrar Mabud Allae itare gin ḳoroin.”
DEU 17:1 Hozrot Musae aro ḳoila, “Ar tumrar Mabud Allar name ilaḳan kunu goru-sagolre kurbani dio na, zetar gotro kut ase, tain to kut ala kurbanire gin ḳoroin.
DEU 17:2 “Tumrar Mabud Allae tumrare ze gau ar ṭaun oḳol dan ḳorba, ou zagat zudi ilaḳan kunu beṭa ba beṭi mile, zegue tumrar Mabud Allar oada-chuktir ulṭa gia tain zeta ḳam gin ḳoroin ota ḳam ḳore,
DEU 17:3 ogue zudi Alla saṛa dusra kunu deb-debir puja ḳore, sand, shuruz, terar puja ḳore,
DEU 17:4 ar ita tumrare zanail oy, te tumra kub shabdane tallash ḳoria dekio ita hasa na misa. Hasa oile Boni Israilor bitre ila lannoti kam ḳorae,
DEU 17:5 hou beṭa ba beṭire shaza dio. Ogure doria gau ba ṭaunor fainchaiti boiṭok kanat anio, ania fattor maria marilio.
DEU 17:6 Oile morar zuka oforad formanor lagi dui ba tin zonor shakki lagbo, eḳla eḳ zonor shakkie mara zaito nae.
DEU 17:7 Tare marar bala foyla shakki oḳole fattor marba, bade hoḳol manshe marba. Ou nomunae tumrar shomazor bitor taki olaḳan naformanire ḳedaibae.
DEU 17:8 “Tumrar gese zudi ilaḳan ḳoṭin kunu nalish ae, zetar bisar ḳorar ḳemota tumrar adalotor nai, te ita loia Alla Mabudor fosond ḳora zagat zaio. Dorilao, kunu kun-ḳarafi, maramari, zobor-doḳoldarir forman-todontor bisar-asar.
DEU 17:9 Gia Lebi kandanor imam oḳol ar hou amolor fordan hakim sabor dorbaro nalish hunaio, hunaile tara tumrare bisaror ray batai diba.
DEU 17:10 Ar Mabudor fosond ḳora zagat tara ze ray zanaiba, ou rayor mormo buzia tumra ḳam ḳorbae, tara zeta hikai diba, kub kial ḳoria ita manio.
DEU 17:11 Allai shoriotor hukumor befare tara zela talim diba, tara zelaḳan bisaror ray diba, otar mormo buzia tumra ḳam ḳorio, tarar ḳota taki unnish-bish kichchu ḳorio na.
DEU 17:12 Kunu manshe beṭagiri deḳaia zudi hou hakimor ray na mane, ba Alla Mabudor ḳadim ou imam sabor hukum na mane, te tare nichchit zane marilio. Boni Israilor bitre taki ou nomunae naformani kedaio.
DEU 17:13 Teu ita hunia hoḳol manshe ḍoraiba, tara ar beṭagiri deḳanir shaosh faita nae.
DEU 17:14 “Tumrar Mabud Allae tumrare ze deshor doḳoldari dira, hono gia boshot ḳoria harle tumra ḳoibae, ao, amrar ash-fashor zati oḳlor laḳan amrar nizor zatir lagi-o eḳzon bashsha banai.
DEU 17:15 Hou shomoy tumrar Mabud Allae zare fosond ḳorba, tare-u tumrar bashsha banaio. He zanu tumrar nizor zatir bai oy, kunu bin zatir manshore tumrar bashsha banaio na.
DEU 17:16 I bashshae tar nizor lagi bout guṛa zanu na zomae, guṛa zuganir niote he zanu Boni Israilor manshore Mishor desho na faṭae. Mono rakio, Mabude age hukum disoin, tumra ar kunudin hi fotedi zaio na.
DEU 17:17 I bashshae zanu bout bia-shadi na ḳore, arnae tar dil be-fote zaibogi. He zanu nizor lagi besh ḳori shuna-rufa na zomae.
DEU 17:18 “Tare raz-godit boanir ḳalo Lebi kandanor imam sab oḳlor gese ze Tourat Kitab taḳbo, ou kitabor aro ek kofi lekia tar nizor lagi nite oibo.
DEU 17:19 Ikan tar nizor gese roibo, tar dilo Alla Mabudor ḍor-ḳof raḳar lagi ou Tourat ar er bitoror hoḳol hukum-ahkam furafur mania solar niote, he zindegibor ou kitab tilaot ḳorbo.
DEU 17:20 Teu tar zatir baiain taki nizore boṛo mono ḳorto nae, he Tourator hukum-ahkamor unnish-bish ḳorto nae. Teu he ar tar aolad oḳlor godi stayi oibo, tara bout din Boni Israilor ufre bashshai korba.
DEU 18:1 “Lebi kandanor imam oḳole ar asta Lebi kandanor manshe, Boni Israilor aro ḳandanor laḳan kunu zomi-mirash ba don-samana faita nae. Mabudor name deoa hoḳol zator kurbanir gust ar hoḳol lilla-sodgar baṭo tara ḳaiba.
DEU 18:2 Tara nizor Boni Israilor zatir baiaintor laḳan kunu zomi-mirash faita nae. Shoyong Alla Mabud-u tarar mirash, tain nize-o tarare i oada disoin.
DEU 18:3 “Manshe zoto goru-sagol kurbani diba, itar ḳandor gust, duio gal ar feṭor bitoror hokkolta imam sabre dibae, ita tan faona.
DEU 18:4 Tumrar ḳetor foyla foshol, baganor angur taki banail foyla shorbot ar zoytun taki banail telor foyla ongsho, sagol-meṛar foyla bar ḳaṭa ruma imam sabre dibae.
DEU 18:5 Zano to, tumrar Mabud Allae tumrar hoḳol ḳandanor maz taki Lebi kandanre fosond ḳoria alog korsoin, zate tara hor-hamesha Mabudor ebadot-bondegir ḳamo roin.
DEU 18:6 “Ar Israil deshor zekunu ṭaun taki Lebi kandanor kunu aolad zudi Mabudor ashik bonia Mabudor fosond ḳora zagat ae,
DEU 18:7 te he-o tar ḳandanor baiaintor laḳan Alla Mabudor dorbaro ebadot-bondegir ḳam ḳorbo.
DEU 18:8 Baki imam oḳlor laḳan he-o tar ḳana-finar baṭ faibo, erloge tar mouroshi samana besar ṭeḳa-foysha-o faibo.
DEU 18:9 “Tumrar Mabud Allae tumrare ze desh dira, hou deshor bashinda oḳole zela zogoinno naformani koroin, tumra ita hikio na.
DEU 18:10 Tumrar maze zanu ila kunu manush na mile, zegue tar nizor aoladre agunit falaia boli dey, tabzati montro foṛe, gona-basa ḳore, zadu-ṭuna ḳore,
DEU 18:11 zegue tontro-montro salae, zin-but-ferot shadon ḳore ar murdar ruhdi azirat ḳore.
DEU 18:12 Ita naformani kam zegue ḳore, Mabude tare gin ḳoroin. Ota ḳam ḳorae Mabude hou zati oḳolre, tumrar samne taki kedai dira.
DEU 18:13 Erlagi tumra nizor Mabud Allar samne nirdushi roio.”
DEU 18:14 Hozrot Musae aro ḳoila, “Mono rakio, tumra zeta zati oḳolre ḳedaia dirae, ita to zadugir ar gonoḳ oḳlor ḳotae sole, oile tumrar Mabud Allae tumrar lagi ita nished ḳorsoin.
DEU 18:15 Tumrar Mabud Allae tumrar shomaz taki, tumrar baiaintor maz taki, amar laḳan eḳzon nobi faṭaiba, tumra hoḳol en hukume solte oibo.
DEU 18:16 Hou Tur faṛor daro tumra hoḳol ze din Mabudor samne azir oislae, hou din to tumra Alla Mabudor gese mangia ḳoislae, amra ar Alla Mabudor mukor aoaz huntam sai na, tan nuror aguino ar deḳtam sai na, arnae amra morizimu.
DEU 18:17 “Teu Mabude amare ḳoila, tara ṭik mat-u matisoin.
DEU 18:18 Ami tarar lagi tarar nizor baiain taki tumar laḳan eḳzon nobi faṭaimu, en muko amar kalam shorif dimu, ar ami enre zeta zeta hikai dimu, ein tumrare ota zanaiba.
DEU 18:19 Ar amar nam loia tain amar kalam oḳol bataiba, na-manra oḳolre ami dayi kormu.
DEU 18:20 Oile ami zeta ḳoisi na kunu nobie zudi bod shaosh ḳori amar name ila kunu kalam batae, ba kunu deb-debir nam loia ilaḳan mat mate, te he morte-u oibo.
DEU 18:21 “Oḳon kunu buli hunar bade tumrar monor maze sinta aito fare, ikan Mabude bataisoin ki na, kila buzmu?
DEU 18:22 Erlagi huno, Mabudor nam loia kunu nobie kunta ḳoar bade zudi ita na fole, ba ola na goṭe, te buzilio ikan Mabudor ḳota nae. Hou nobie tar bod shaoshe ita ḳoise, ilaḳan zonre tumra ḍoraio na.”
DEU 19:1 Musa nobie tarare aro ḳoila, “Tumrar Mabud Allae zeta deshor doḳoldari dira, honor bashinda oḳolre tain binash ḳoria harle, tumra zebla tarar baṛi-gor ar ṭauno hamaia boshot ḳorbae,
DEU 19:2 hou shomoy tumrar Mabud Allar deoa ou zominre tin baṭe baṭio, ar eḳṭa eḳṭa ḳori muṭ tinṭa ṭaunre fosond ḳoria alog korio, ar ota ṭauno zaibar lagi rasta zuit-zait rakio. Teu tumrar mazor ḳeu zudi onichchae ḳeurore kun ḳorilae, te ou nomunar kuni bagia gia hou ṭauno bonobashi oia asroy loibo.
DEU 19:4 “Monor maze kunuzat ingsha-dushmoni saṛa ichcha na ḳoria aḳta zudi eḳzone aroḳzonre kun ḳorilae, te zan basanir lagi ou kuni bagia gia tar ḳanda-ḳasar bonobashi ṭauno asroy loibo.
DEU 19:5 Mono ḳoro, eḳzon manush dusra zonor log oia zongolo laḳṛi kaṭat gelo, gia kuṛaldi gas ḳaṭibar bala aḳta-u kuṛalor asaṛi taki kuṛal suṭia, dusra zonor gotro lagia he morigelo, ou halote kuni gia tar ḳanda-ḳasar asroy ṭauno zan basanir shuzug faibo.
DEU 19:6 Arnae kunor bodla lourae gusa ḳoria bodla loibar niote ou manshore dorto saibo, ar zan basanir asroy ṭaun daro na roile tare doria marilto fare. Ashole to hi beṭae ichcha ḳoria kun ḳorse na, he shaza faibar ḳota nae.
DEU 19:7 Erlagi ami tumrare hukum diram, tumrar lagi tinṭa asroy ṭaun alog kori rakio.
DEU 19:8 “Tumrar Mabud Allae tumrar baf-dadar loge ḳosom mafik zaga baṛaia zebla tumrare asta deshor malikana diba,
DEU 19:9 ou shomoy tumra aro tinḳan asroy ṭaun alog kori raḳbae. Ḳali aiz ami tumrare zeta hukum disi tumra zudi kub kiali oia ita mania solo ar zudi hor-hamesha Allare mohobbot ḳoro ar tan fote solo, te tain nichchoy tumrare asta deshor malikana diba-u.
DEU 19:10 Ou asroy ṭaun raḳar ḳaron oilo, tumrar Mabud Allae tumrare ze deshor malikana dira, hou zomino zanu kunu ni-oforadir lou na foṛe, ar tumra kunuzat kunor dayi na o.
DEU 19:11 “Oile ḳeu zudi rag-gusa, ingsha ḳoria aroḳzonre kun ḳorar niote ut fatia roy, bade hamla ḳoria kun ḳorilae, ar ou kuni gia kunu asroy ṭauno hamai zae,
DEU 19:12 te tar gau ba ṭaunor murobbi-salish oḳole, manush faṭaia tare dorai ania, ogure marilaoar lagi kunor bodla lourar ato shofi diba.
DEU 19:13 Ou kunire tumra kunu doya-maya ḳorio na. Tumra Boni Israilor maz taki ni-oforadire kunor dae-bar fusia falaio, teu tumrar balai oibo.
DEU 19:14 “Tumrar Mabud Allae tumrare ze deshor doḳoldari dira, hou deshor zominor furan amolo gaṛa ari-forir kunu shimana kuṭi unnoish-bish ḳorio na.
DEU 19:15 “Ḳeuror befare kunuzat guna ba oforador nalish aile, te ḳali eḳzonor shakki hunia ray dio na, dui ba tin zonor shakki forman loia bisar-salishor ray dio.
DEU 19:16 “Kunu manshe zudi aroḳzonor ḳeti korar niote kunu nalish dey,
DEU 19:17 te ou badi ar bibadi duio fokko hou amolor hakim ar imam sab oḳlor gese gia Mabudor samne azir oiba.
DEU 19:18 Bade salish oḳole kub kial ḳoria itar tallash ḳorba, tallashi kalo zudi dora foṛe he tar afon zatir bair befare misa nalish dise,
DEU 19:19 te ou nalish dia he hou zonor zeta ḳeti korto saisil, tumra ogur oula ḳeti korio. Ou nomunae tumra nizor shomaz taki naformanire fusia falaio.
DEU 19:20 Ita hunia baki hoḳol Boni Israile ḍoraiba, teu ila ḳam ar ḳeu ḳorto nae.
DEU 19:21 Ila oforadire tumra kunu laḳan doya-maya ḳorio na, zanor bodla zan, souḳor bodla souk, dator bodla dat, ator bodla at, faor bodla fao adae ḳorio.
DEU 20:1 “Tumrar dushmonor loge laṛai korat gia zudi deḳo, tarar guṛa, guṛar gaṛi, tarar sifai tumra taki beshi, te ḍoraio na. Zano to, tumrar Mabud Alla, zein tumrare Mishor desh taki bar ḳoria anchoin, tain nize tumrar loge asoin.
DEU 20:2 Laṛair niote baronir age imam sabe aia sifai oḳolre ḳoiba,
DEU 20:3 O Boni Israil, huno, tumra aiz tumrar dushmonor loge laṛai korat zairae, oḳon tumrar monre ḳomzur banaio na, ḍoraio na, ḍoraia nirash oio na, dushmonor ḍore ḳafio na.
DEU 20:4 Dushmonor loge laṛait zitanir lagi, tumrar Mabud Alla to tumrar loge oia zaira.
DEU 20:5 “Bade tarar ofisar oḳol aia sifai oḳolre zikaiba, tumrar maze ila kunu sifai ase ni, zegue noya gor banaia hari, ou goro boshot ḳorar lagi duar onusṭan baki raḳse? Te tumi nizor baṛit zaogi, arnae laṛait gia morigele dusra manush aia ou onusṭan ḳorilaibo.
DEU 20:6 Ar kunu sifai ase ni, zegue anguror bagan ḳoria foylakur fol na ḳaia laṛait aise? Te tumi-o baṛit zaogi, arnae laṛait gia morigele dusra manshe aia tumar baganor fol ḳailibo.
DEU 20:7 Ar tumra ḳeuror aḳt ḳoria hari bashor rait baki roise ni? Te tumi-o baṛit zaogi, arnae laṛait gia morigele dusra beṭae aia ou ḳoinare bia ḳorilibo.
DEU 20:8 Ou ofisar oḳole aro zikaiba, tumrar maze ila kunu sifai ase ni, zegur zano ḍor ḳorer, mone ḳafer? Te tumi-o tumar baṛit zaogi, arnae tumare dekia logor sifai oḳol-o ḳomzur oiziba.
DEU 20:9 Ou nomunae ofisar oḳlor zikani shesh oile, tara sifai dol oḳlor ufre kamanḍar boail ḳorba.
DEU 20:10 “Tumra kunu gau ba ṭaunor loge laṛai korar niote zebla hou zagar daro zaibae, gia honor manshor gese ḳobria faṭaia ḳoio, tara zanu afushe tumrar tabedari manilain.
DEU 20:11 Tara zudi razi oia ṭauno hamanir geiṭ kulia dilain, te tara hoḳol tumrar raiot bonia ḳazna diba ar tumrar gulami korba.
DEU 20:12 Ar razi na oia laṛai korto saile, tumra ou ṭaunre beria rakio.
DEU 20:13 Bade tumrar Mabud Allae hou zagare tumrar ato shofia harle, tumra hoḳol beṭaintore zane marilio.
DEU 20:14 Oile honor beṭi manush, huruttain, foshur fal ar hou zagar hokkolta gonimotor mal hishabe tumra nitae farbae. Dushmonor zomin taki gonimotor mal hishabe tumrar Mabud Allae tumrare zotota dan ḳorba, ita tumra bug-doḳol ḳortae farbae.
DEU 20:15 Zeta ṭaun oḳol tumrar desh taki bakka duroi ar tumrar ḳanda-ḳasar zati oḳlor ṭaun nae, ota ṭaunor manshor loge ou laḳan bebohar ḳorio.
DEU 20:16 “Oile tumrar ḳanda-ḳasar zeta zati oḳolre tumrar Mabud Allae tumrar ato dira, ita kunugure-u zinda rakio na.
DEU 20:17 Tumra nizor Mabud Allar hukum mafik, Hiṭṭi, Amuri, Kenani, Farizi, Hibbi ar Zibuzi oḳolre furafur nifat ḳorbae.
DEU 20:18 Arnae tara nizor deb-debire puja ḳorar bala zoto zogoinno naformani koroin, tarar ota tumra-o hikibae, hikia nizor Mabud Allar dorbaro gunar ḳam ḳorbae.
DEU 20:19 “Kunu gau ba ṭaunor loge laṛait gia tumra zebla bout lamba shomoy dori beria raḳo, ou shomoy honor foldar kunuzat gas-fala kuṛaldi kaṭio na. Tumra itar fol ḳaio, oile gas ḳaṭio na. Gas-gasali to tumrar dushmon nae zen otare hamla ḳortae.
DEU 20:20 Ta-o zeta gas kunu fol-foladir gas nae, ita ḳaṭia honor bashinda oḳolre laṛait aranir ag forzonto, ota dia atiar banaia hamla ḳortae farbae.
DEU 21:1 “Tumrar Mabud Allae tumrare ze deshor doḳoldari dira, hono bondor maze zudi kunu manshor lash foṛi roise deḳa zae, ar tar kunir kunu forisoy na mile,
DEU 21:2 te tumrar moy-murobbi ar hakim-salish oḳol baroi aia, mafia deḳba ou lashor ges taki kun gau ḳotoḳan duroi.
DEU 21:3 Dekia hoḳol taki kasar gaur murobbi oḳole ou laḳan ek gai-basur fosond ḳorba, zeṭa dia kunuzat ḳam-ḳaz, al-chash ḳora oise na.
DEU 21:4 Bade honor murobbi oḳole ou basur loia omon eḳ zagat zaiba, zeḳano fanir fut ala ḳal ase, ar ḳalor faror zomino kunuzat al-chash ba ali falail oise na. Hono gia ou basuror gordona bangiliba.
DEU 21:5 Bade Lebi kandanor imam oḳol ou zagat aiba. Ḳaron tumrar Mabud Allae tarare fosond ḳorsoin, tan ebadot-bondegi kora, tan name manshor lagi dua-durud ḳora, ar hoḳol nomunar fitna-fosad, maramarir bisar ḳorar lagi.
DEU 21:6 Basuror gordona bangia harle ḳanda-ḳasar gaur hou murobbi oḳole, ou ḳalor fanidi basuror ufre tarar at doiba.
DEU 21:7 Doia ḳoiba, ou manush kun oite amra ḳeu deḳsi na, amrar ate tare marsi-o na.
DEU 21:8 O Mabud, tumar azad ḳora Boni Israilre tumi oḳon mafi deo, kun oa ou ni-oforadi zonor lagi tumar i bonda oḳolre tumi dayi korio na. Oḳan ḳoia harle hou kunor dae taki tara rehai faiba.
DEU 21:9 Ou nomunae tumrar shomaz taki ni-oforadi manshor kunor dae-bar horaitae farbae, ḳaron Alla Mabude zela fosond ḳoroin, tumra ola-u ḳorso.
DEU 21:10 “Dushmonor loge laṛait gia harle, tumrar Mabud Allae zebla dushmon oḳolre tumrar ato shofia diba, ar tumra tarare bondi korbae,
DEU 21:11 ou shomoy tarar mazor kunu shundori beṭire dekia tumrar maze ḳeu zudi ashik bonizae, ar ou beṭire bia ḳorar kial oy,
DEU 21:12 te taire nizor baṛit anbae. Bade tai nizor matar sul ḳamaibo, nouk kaṭibo,
DEU 21:13 ar bondi kalin halotor ḳafoṛ-sufoṛ falaia, tumar baṛit roia tair ma-bafor lagi fura eḳ mash ḳanda-ḳaṭi, ahazari korbo. Ou eḳ mash bade taire bia ḳoria harle, tumra zamai-bou oibae.
DEU 21:14 Bia-shadir bade zudi tumi ou beṭir ufre kushi na o, te taire tair kushi mafik saṛi dite oibo. Taire bandi hishabe raḳa ba besar eḳtiar tumar nai, ḳaron tumi tair ijjot nosṭo ḳorso.
DEU 21:15 “Kunu beṭar zudi dui bou oy, ar beṭae eḳ boure maya ḳore, dusra boure maya na ḳore. Ou duio bour goro zudi fuain oin, er mazor boṛo fua zudi hou maya na ḳora bour goro oy,
DEU 21:16 te tan zomi-mirash baṭia dibar ḳalo, tan mayar bour goror fuare boṛo fuar hok dita farta nae.
DEU 21:17 Borong boṛo fuare tan oinno fuain taki ḍabol dite oibo. He to oilo tan zuankir foyla fol, boṛo futor dabidar ḳali he-u.
DEU 21:18 “Ḳeuror kunu fuae zudi ma-bafor ḳota na hune, ma-bafor hukumor ulṭa sole, tarar buz-shashon na mania ku-fote zaegi,
DEU 21:19 te tar ma-bafe tare doria murobbi oḳlor gese niba, tarar gau ba ṭauno hamanir geiṭor gese fainchaiti boiṭok kanat niba.
DEU 21:20 Nia hou murobbi oḳolre ḳoiba, amrar ou fua kub naforman ar ku-foti bonigese, he amrar ḳota mane na, mod ḳaia matlami kore, ar ṭeḳa-foysha uṛae.
DEU 21:21 Teu hou ṭaunor hoḳol beṭainte fattor maria tare zane mariliba. Ou nomunae tumrar maz taki olaḳan naformani fusia falaibae. Ar ita hunia hoḳol Boni Israile ḍoraiba.
DEU 21:22 “Kunu manshe zudi moutor shaza faoar zuka oforad ḳore, ar tare marar bade lash gaso loṭḳail oy,
DEU 21:23 te tar lashre rait forzonto gaso loṭḳaia rakio na, din taḳte-u tare maṭi dilaio. Zano to, gaso loṭḳail manush Allar lannoti. Kial rakio, tumrar Mabud Allae tumrare ze deshor malikana dira, ita tumra nafak banaio na.
DEU 22:1 “Tumrar zatir kunu bair goru-sagol zudi fot araia zaoat deḳo, te tumra nirai na takia, iṭare firaia ania tar malikor gese dio.
DEU 22:2 Ou malik zudi tumrar daro-ḳasor na oy, ba osina kunu zon oy, te iṭa tumra nizor baṛit nibaegi, bade he zebla tukanit aibo ou shomoy tare dibae.
DEU 22:3 Tumrar zatir kunu bair gada, tar finnor ḳafoṛ, ba tar arail zekunu samana faile tumra ola ḳorio, nirai horia zaio na.
DEU 22:4 “Tumar zatir bair kunu goru-gada fotor maze foṛigese dekia tumi horia zaio na, iṭa ubanir lagi tumi doria shaijjo ḳorio.
DEU 22:5 “Beṭinte beṭaintor ḳafoṛ ar beṭainte beṭintor ḳafoṛ findio na. Zegie ila ḳam ḳore, tumrar Mabud Allae tare gin ḳoroin.
DEU 22:6 “Fotedi aṭia zaite shomoy kunu gasor ḍalo, ba maṭir ufre kunu fakir bada deḳle, badat kunu fakie ḍimo um der, ba tar baichchar loge ase, te baichchar loge tar maʼre doria nio na.
DEU 22:7 Shoḳ oile baichcha niogi, oile tar maʼre nichchit saṛia zaio. Teu tumar balai oibo, tumar hayati baṛibo.
DEU 22:8 “Noya gor banaile tumra goror saṭor ufre sairo galabae beṛa dibae, arnae saṭor ufre taki keu foṛia morigele tumra kunor dayi oibae.
DEU 22:9 “Tumrar anguror bagano dui zator bisi lagaio na, ila ḳorle angur fol ar dusra zator bisir fol-o tumrar lagi haram oizibo.
DEU 22:10 “Goru ar gadare eḳ zualo lagaia al-chash ḳorio na.
DEU 22:11 “Tumra dui zator sutadi banail ḳafoṛ findio na.
DEU 22:12 “Tumrar uṛibar saddoror sairo kunat sutagesa dio.
DEU 22:13 “Kunu beṭae bia ḳoria bashor gor ḳorar bade zudi boure fosond na oy,
DEU 22:14 he zudi bour name bodnam roṭaia tair gibot gaia ḳoy, ami to ou beṭire bia ḳorsi ṭik-u, oile tair shotittor kunu sinnot faisi na.
DEU 22:15 Te ou ḳoinar ma-bafe tarar fuṛir shotittor sin lagail bisnar ḳafoṛ loia, honor gau ba ṭauno hamanir geiṭor muko murobbi-salish oḳlor gese zaiba.
DEU 22:16 Gia ḳoinar bafe murobbi oḳolre ḳoiba, ami to ou damandor loge amar fuṛire shadi dislam, oḳon he amar fuṛire fosond ḳore na.
DEU 22:17 Ar he bodnam roṭaia ḳoise, he bule amar fuṛir shotittor sinnot faise na, oile afnara deḳoukka, amar fuṛir shotittor sinnot loia ami azir oisi. Oḳan ḳoia he ou bisnar ḳafoṛ melia murobbi oḳolre sinnot deḳaibo.
DEU 22:18 Teu hi murobbi oḳole ou damandre shaza diba.
DEU 22:19 Tar zorimana babot eḳ-sho tola rufa adae ḳoria ḳoinar bafre diba, ḳaron ou damande Boni Israili eḳ shoti koinar bodnam roṭaise. Ar ou ḳoinare loia he shongshar ḳorte oibo, zindegie kunudin taire saṛar kunu fot nai.
DEU 22:20 “Ar damandor ḳota hasa oile, ou ḳoinar shotittor sinnot na faile,
DEU 22:21 ḳoinare tair bafor baṛir geiṭor gese nia, honor beṭainte fattor maria taire mariliba. Tai to bafor baṛit taḳar ḳalo zinar ḳam ḳoria, Boni Israilor maze zogoinno naformani korse. Ou nomunae tumra nizor shomaz taki ola naformanire fusia falaibae.
DEU 22:22 “Kunu beṭae zudi aroḳ beṭar bour loge zina ḳorat dora ḳae, te ou beṭa-beṭi duio zonre marilite oibo. Boni Israil taki tumra i laḳan naformanir nam miṭaibae.
DEU 22:23 “Bia ṭik oigese ila kunu fuṛire ḳeu ṭaunor maze faia zudi tair loge zina ḳore,
DEU 22:24 te tara duiogure hou zagar mein geiṭor gese nia fattor maria marilibae. Fuṛire marilibar ḳaron oilo, tai to hono taki shaijjor lagi kunu sik-sillani dise na, ar beṭare zane marar ḳaron oilo, he aroḳ beṭar bour ijjot marse. Ou nomunae tumra Boni Israil taki ola naformani fusia falaibae.
DEU 22:25 “Bia ṭik oigese omon kunu fuṛire ḳeu kunu nirai zagat faia hari, zur ḳoria tair loge mila-misha ḳorle, ḳali ou beṭa morbo.
DEU 22:26 Ar ou fuṛire saṛi dibae, tai to morar zuka guna ḳorse na. Ita to eḳzone dusra zonre kun ḳorar laḳan-u.
DEU 22:27 Ḳaron ou beṭae taire nirai zagat dorse, sik-sillani dile-o taire basanir ḳeu to ino asil na.
DEU 22:28 “Bia-shadi ṭik oise na, omon kunu fuṛire faia ḳeu zudi zur ḳoria tair loge mila-misha ḳore, ar tara dora ḳae,
DEU 22:29 te ou beṭae fuṛir bafre foinchash tola rufa dibo, ar fuṛir ijjot marae taire bia ḳorte oibo. Zindegie kunudin taire talaḳ dito farto nae.
DEU 22:30 “Kunu beṭae tar haton maʼre bia ḳora zaiz nae, ila ḳorle he tar bafor bour loge zina ḳoria bafre beijjot ḳorbo.”
DEU 23:1 Hozrot Musae aro ḳoira, “Kunu beṭar zudi onḍokush sesa oy, ba tar furushali nofs ḳaṭia falail oy, te hi beṭa Mabudor bonda oḳlor mahfilo hamanir shuzug nai.
DEU 23:2 “Kunu funga manush Mabudor bonda oḳlor mahfilo hamanir shuzug nai, tar souddo siṛir ḳeuror hamanir fot nai.
DEU 23:3 “Boni-Amman ba Muabi zatir kunu manush Mabudor bonda oḳlor mahfilo hamanir shuzug nai, tarar souddo siṛir ḳeu hamanir fot faito nae.
DEU 23:4 Mono ase ni, tumra Mishor desh taki bar oia aibar ḳalo, fotor maze tara tumrar ḳani-fani loia aguai aise na, borong tumrare boddua dibar lagi Balam bin Baur namor eḳ pirre tara gush disil, dia Oram-Nohoroyim deshor Fotur ṭaun taki tare baṛa ḳori anchil.
DEU 23:5 Oile tumrar Mabud Allae ou Balamor arzit shae disoin na, tain to tumrare mohobbot ḳoroin, erlagi hou Balam piror bodduare bodlaia tain nek-dua banaila.
DEU 23:6 Oḳon tumra zindegie kunudin itar kunu balai ba ufoḳar ḳorio na.
DEU 23:7 “Ta-o Idumi oḳolre tumra ingsha ḳorio na, era to tumrar bai. Mishori manshore ingsha ḳorio na, tumra musafir halote age tarar desho boshot ḳorso.
DEU 23:8 Tumrar loge boshot ḳorar tin siṛi taki tara Mabudor bonda oḳlor mahfilo hamaita farba.
DEU 23:9 “Dushmonor loge laṛait bar oia tumra hoḳol nomunar nafaki taki basia roio.
DEU 23:10 Raitor bala kunu sifair zoubonor fani bar oia nafak bonigele, he kempor bare zaite oibo.
DEU 23:11 Bade biali bala he naia hari, shuruz ḍubia harle kempo aia hamaibo.
DEU 23:12 “Faeḳana ḳorar lagi tumra kempor bare eḳ zaga banaibae.
DEU 23:13 Tumrar atiar-fotror loge maṭi kuṛibar kudal rakio. Faeḳana ḳoria harle kudaldi gat kudia maṭir tole haraio.
DEU 23:14 Kial rakio, tumrare basanir lagi, ar dushmonre tumrar ato shofibar kiale tumrar Mabud Alla tumrar kempor bitre gura-fira ḳoroin. Erlagi tumrar kempre fak-fobitro rakio, arnae tumrar nafaki dekia Mabude tumrar ufre taki muk firailiba.
DEU 23:15 “Kunu manshor kina gulam bagia aia zudi tumrar gese asroy loy, te tare tar malikor gese firai dio na.
DEU 23:16 He tumrar deshor zeḳano roito sae, ono-u tare zaga dio, tare duk dio na.
DEU 23:17 “Boni Israilor kunu beṭinte zanu mondir-aḳṛar noṭigiri na ḳore. Kunu beṭae-o zanu ola noṭagiri na ḳore.
DEU 23:18 Noṭi beṭi ba noṭa beṭar ruzi-ruzgaror ṭeḳa-foyshar kunuzat mannot-kurbani tumrar Mabud Allar goro anio na. Ilaḳan beṭa-beṭintore to Mabude gin ḳoroin.
DEU 23:19 “Tumrar zatir kunu bair ges taki shud ḳaio na, ita ṭeḳa-foysha, ḳani-kurakir zinish ba aro kunuta oile-o kunuzat shud loio na.
DEU 23:20 Oinno zatir ges taki shud nitae farbae, oile Boni Israil taki shud ḳaoa haram. Ita mania solle tumra ze deshor doḳoldari fairae, hou zagat gia harle tumrar Mabud Allae tumrar hoḳol ḳam-ḳazo rohom-borkot diba.
DEU 23:21 “Tumra nizor Mabud Allar name kunuta mannot ḳorle, ita zoldi kori adae ḳorio, ita adae na ḳorle tumrar guna oibo. Ar i hishab to tumrar Mabud Allae bad dita nae.
DEU 23:22 Oile kunuzat mannot na ḳorle guna nae.
DEU 23:23 Tumrar zoban taki ze mannot ḳorso, iṭa nichchit adae ḳorbae, ḳaron tumar nizor zobane, nizor kushie Alla Mabudor name ita mancho, erlagi adae-o ḳorbae.
DEU 23:24 “Tumrar ari-forir anguror bagano hamaile nizor haus miṭaia angur ḳaio, oile kunu boul ba bostat ḳori kunta nitae fartae nae.
DEU 23:25 Ḳeuror zomino gia atdi kunuzat foy-fosholor soṛa siṛitae farbae, oile ḳasi dia daia nitae fartae nae.”
DEU 24:1 Hozrot Musae aro ḳoira, “Biar bade zudi kunu zamaie tar bour maze kut fae, faia tair ufre naraz oy, ar talaḳ nama lekia tair ato dia bidae ḳori dey.
DEU 24:2 Ar ou boue gia zudi dusra zamair gese bia boy,
DEU 24:3 bade hou dusra zamaie-o taire nafosond ḳoria zudi ola talaḳ dilae, ba hou zamai morizae,
DEU 24:4 te tair hou foyla zamaie taire ar bia ḳorto farto nae, tai to en lagi nafak oigese. Ilaḳan bia-shadire Mabude gin ḳoroin. Tumrar Mabud Allae tumrare ze deshor malikana dira, tumra ila guna ḳoria i deshre nafak banaio na.
DEU 24:5 “Noya bia ḳora kunu beṭare zuddot faṭaio na, zur-zobordosti koria tare kunu ḳamor bar dio na. He fura eḳ bosor ḳam-ḳaz na ḳoria, tar bour loge kushi-bashi korar shuzug dio.
DEU 24:6 “Aolati malor bondok hishabe tumra ḳeuror gail-sia, ba ḳali sia bondok rakio na. Ila ḳorle tar zan basanir ḳani-kurakir fot bond oizibo.
DEU 24:7 “Kunu manshe zudi Boni Israilor aroḳ baire suri koria nia gulam banailae, ba dusra zagat besia hari dora ḳae, te tare zane marbae. Ou nomunae tumrar shomaz taki ila naformanire fusia falaibae.
DEU 24:8 “Ḳeuror gotro fosa-kusṭo bemar deḳa dile, Lebi kandanor imam oḳlor foramish mafik solio. Ami tarare zeta hukum disi, tumra kub kiali oia ita manio.
DEU 24:9 Mishor desh taki bar oia aibar foto, tumrar Mabud Allae amar boin Moriomor ze dosha goṭaisla, ita tumra mono rakio.
DEU 24:10 “Tumar ari-forire kunta aolat dile, tar ges taki kunu mal bondok nibar niote, tumi tar goro hamaio na.
DEU 24:11 Tumi goror bare ubaio, ar zare aolat diso, he tar gor taki bondoki mal ania tumare dibo.
DEU 24:12 Aolat neora zon gorib-duki oile, tar deoa bondoki keta-ḳomli nia tumi rait gumaio na.
DEU 24:13 Hainja bala tumi tar mal firai dio, ota uṛia he rait gumaia tumare dua dibo. Teu tumar balai oibo, ar bondoki samana firot deoa to, tumrar Mabud Allar nozoro nekir ḳam.
DEU 24:14 “Tumrar Boni Israil shomazor kunu bai ba tumrar desho roura bin zatir kunu manshor gese faona taḳle, ar he gorib-duki, ruzi kamla zon oile, tar ufre zulum ḳorio na.
DEU 24:15 Shuruz ḍubar age tumra tar faona mozuri dilaio, he to gorib manush, ou mozuri dia-u tar zindegi sole. Arnae mozurir lagi he Mabudor dorbaro foriad ḳorle, tumra gunar bagi oibae.
DEU 24:16 “Fua-fuṛir oforador lagi tarar ma-bafre, ba ma-bafor oforade fua-fuṛire zane mara zaito nae. Forteḳ zone nizor oforador shaza nize faibo.
DEU 24:17 “Kunu bideshi musafir ba etimor ufre na-hok bisar oite dio na. Kunu ṛaṛi beṭir findibar ḳafoṛ bondok rakio na.
DEU 24:18 Mono rakio, Mishor desho tumra gulam aslae, tumrar Mabud Allae tumrare hon taki azad ḳori anchoin. Erlagi ami tumrare ita ḳam ḳorar hukum diram.
DEU 24:19 “Tumrar zominor dan ḳaṭar bade, danor kunu muiṭ fauria gelegi, iṭa anar lagi ar firot zaio na. Bideshi musafir, etim ar ṛaṛi beṭintor lagi iṭa dilaio, teu tumrar Mabud Allae tumrar hoḳol ḳam-ḳazo rohom-borkot diba.
DEU 24:20 Zoytun gasor fol faṛibar ḳalo eḳoi ḍalor fol duibar faṛio na. Eḳbar faṛar bade zeta roy, ita bideshi musafir, etim ar ṛaṛi beṭintor lagi toio.
DEU 24:21 Tumrar angur baganor eḳ lot taki dui bar angur faṛio na, eḳbar faṛar bade zeta roy, ita bideshi musafir, etim ar ṛaṛi beṭintor lagi toi dio.
DEU 24:22 Faurio na, tumra to age Mishor desho gulam aslae. Erlagi ami tumrare ita ḳorar hukum diram.”
DEU 25:1 Musa nobie tarare aro ḳoira, “Manshor maze ḳaijja-fosad lagia zudi ita hakimor adaloto zae, te hakim oḳole oforadi zonre dushi shaibosto ḳorba, ar ni-oforadire ḳalas diba.
DEU 25:2 Ou bisaro dushi zonre singladi marar ray dile, hakime tare maṭit hutaia tar faona mair tan nizor samne maraiba,
DEU 25:3 oile sallishṭar beshi mara zaito nae. Arnae nizor zatir eḳ baire shomazor samne beijjot ḳora oibo.
DEU 25:4 “Dan maṛa dibar ḳalo gorur muko hufi lagaio na.
DEU 25:5 “Eḳ foribaror hoḳol baiain ekḳano roar ḳalo zudi biati kunu bai morizae, ar tar kunu fuain na taḳe, te tar ṛaṛi boue tair deor saṛa dusra ḳeuror gese bia boito farto nae. Tair deore taire bia ḳoria tar ufre bortail dayitto adae ḳorbo.
DEU 25:6 Tarar foyla fuar zonom oile, i fua ou mora bair oarish hishabe goinno oibo, teu ou bair nam Boni Israil taki musi zaito nae.
DEU 25:7 Oile tair deore zudi taire bia ḳorto razi na oy, te tai hou gau ba ṭaunor fainchaitor gese gia honor murobbi oḳolre ḳoibo, amar deore amare bia ḳorto razi nae, he tar mora bair nam Boni Israilor maze zinda raḳto sae na. Amar befare tar ufre bortail day-dayitto adae ḳorer na.
DEU 25:8 Teu hou murobbi oḳole tare anaia buzaiba, erbade-o he nika ḳorte razi na oile,
DEU 25:9 ou ṛaṛi beṭie hou murobbi oḳlor samne, tar ḳasat gia tar faor ekkan zuta nize kulia nibogi, ar tar muko sef falaia ḳoibo, afon bair bongsho zegie basaito sae na, ogur dosha ola ouk.
DEU 25:10 Bade ou beṭar bongshore Boni Israilor maze, zuta araorar bongsho name ḍaḳa oibo.
DEU 25:11 “Dui beṭae maramarir ḳalo zudi, eḳzonor bou gia tair zamaire hou beṭar at taki basanir niote, hou beṭar furushali nofso sifia dore,
DEU 25:12 te tumra hou beṭir at ḳaṭia falai dio. Taire kunu doya ḳorio na.
DEU 25:13 “Mafo ṭogibar lagi tumrar tolir maze eḳoi mafor huru-boṛo dui fattor rakio na.
DEU 25:14 Tumrar goro eḳoi mafor huru-boṛo duiṭa her-feṭu rakio na.
DEU 25:15 Tumrar Mabud Allae tumrare ze deshor doḳoldari dira, hono lamba hayati faibar lagi, tumrar mafibar fattor ar her-feṭur uzon shoṭik rakio.
DEU 25:16 Ḳaron zegie mafor maze ṭogaṭogi kore, tumrar Mabud Allae tare gin ḳoroin.
DEU 25:17 “Mishor desh taki tumra bar oia aibar foto, Amaleki oḳole tumrar loge ze bebohar ḳorsil, ita faurio na.
DEU 25:18 Aṭite aṭite tumrar ḳeu ḳeu zebla heran oia fise foṛi gesil, ou shomoy Amaleki oḳole aia hamla ḳorsil, tara to Allare-o ḍoraise na.
DEU 25:19 Tumrar Alla Mabude tumrare ze deshor malikana dira, hou deshor ash-fashor dushmon oḳol taki tain zebla tumrare shanti diba, hou shomoy tumra dunia taki Amaleki oḳlor nam miṭailibae. I hukum ḳan tumra kunu din-u faurio na.
DEU 26:1 “O Boni Israil huno, tumrar Mabud Allae tumrare ze deshor malikana dira, tumra zebla hou deshor doḳol faia hono boshoti korbae,
DEU 26:2 ou shomoy tumrar Mabud Allar deoa zominor hoḳol zator foshol taki, foyla faoa fosholor eḳṭa ongsho eḳ ṭukrit boria algaia toio. Ar tumrar Mabud Allae nizor Baytulla Shorif hishabe ze zagare fosond ḳorba, ou foshol loia hono zaio.
DEU 26:3 Gia hono azir imam sabre ḳoio, amrar Mabud Allae amrar moy-murobbir gese ḳosom ḳaia ze deshḳan dibar oada ḳorsla, amra oḳon ono aisi, aia tan samne azir oisi.
DEU 26:4 Teu imam sabe tumrar at taki folor ṭukri nia Alla Mabudor kurbani kanar samne toiba.
DEU 26:5 Bade tumra forteḳe tumrar Mabud Allar samne ubaia ḳoio, amrar ḳandanor mul murobbi Hozrot Iakub asla eḳzon Orami musafir, tain tuṛa ḳoyzon manshore loge loia Mishor desho geslagi. Gia Mishor desho musafir halote boshot ḳorar ḳalo tan usillae tara eḳ mohan zati, ar bout boṛo bolala zati bonla.
DEU 26:6 Bade Mishoror manshe amrar loge bojjati korla, amrare duk-koshṭo dia, amraredi koṭin gulami korailo.
DEU 26:7 Amra duk faia amrar moy-murobbir Mabud Allar dorbaro ḳandilam. Teu Mabude amrar foriad hunia, amrar duk-koshṭo, ḳoṭin gulami, ar amrar ufror zulumor bae nozor dila.
DEU 26:8 Ar tan bolala-mozbut at baṛaia, kub ḍor-ḳof deḳaia, kudroti lila-ḳela dia ar asanok gozob ḍalia Mishor desh taki amrare bar ḳori anla.
DEU 26:9 Tain-u amrare ou desho anchoin, dud ar mour banḍar-ala aramor ou desh amrare dan ḳorsoin.
DEU 26:10 Erlagi O amrar Mabud, tumar deoa zominor fosholor foyla baṭ loia ami tumar samne azir oisi. Oḳan ḳoia, tumrar Mabud Allar samne ou ṭukri toio, toia tanre soizda ḳorio.
DEU 26:11 Tumrar Mabud Allae tumrare ar tumrar foribarre zoto nomunar balai korsoin, ota mono ḳoria tumra nize, Lebi kandanor hoḳole, ar tumrar loge roura bideshi musafir oḳole kushi-bashi korio.
DEU 26:12 “Forti tin bosor bade bade tumra foy-fosholor dosh baṭor eḳ baṭ Lebi kandanor manshore, bideshi musafir oḳolre, etim ar ṛaṛi beṭintor maze bilai dio. Teu era feṭ bori kaia tumrar deshor maze arame roiba. Erlagi ikṭar nam oilo Doshomangshor Bosor.
DEU 26:13 Bade tumra forteḳe tumrar Mabud Allare ḳoio, Mabud, ami tumar hukum mafik amar ruzir fobitro baṭre, amar gor taki nia Lebi kandanre, musafir oḳolre, etim ar ṛaṛi beṭintore bilai disi. Ami tumar kunu hukumor ḳelaf ḳorsi na, ba faurisi na.
DEU 26:14 Murdar lagi kanda-ḳaṭi ar ahazari korar shomoy ami ou fobitro ongshor kunuta ḳaisi na, ba nafak halote ita baṛir bare nisi na, ar itar kunu ongsho murdar name dan-ḳoyrat-o ḳorsi na. Ami amar Mabud Allar hukum mafik solchi, tumar hukum mafik hoḳol ḳam ḳorsi.
DEU 26:15 Oḳon, O Mabud, tumar fobitro boshot ḳana taki, tumar arshe-azim taki toledi saia deḳo, ar tumar ḳas proza Boni Israilre rohom-borkot deo. Amrar moy-murobbir loge ḳosom ḳora oada mafik, tumi amrare dud ar mour banḍar-ala ou ze deshḳan dan ḳorso, er maṭit tumi rohom-borkot nazil ḳoro.
DEU 26:16 “Tumrar Mabud Allae aiz tumrare ou hukum dira, tumra tan batail niom-ḳanun ar hukum-ahkam mania solio. Tumra dile-zane ashik bonia ita amol ḳorio.
DEU 26:17 Tumra to aiz shikar ḳorso, ou Alla-u oila tumrar Mabud, tumra tan fote solbae, tan hukum-ahkam, tan shoriot ar niom-ḳanun manbae, tan ḳota hunbae.
DEU 26:18 Erlagi Mabude-o aiz shikar ḳorsoin, tan oada mafik tumra oḳon tan proza, tumra-u tan ḳas shompod, tumra tan hoḳol hukum-ahkam amol ḳorbae.
DEU 26:19 Tain aro ḳoira, tan foyda ḳora tamam zatir ufre tumrare boṛo ḳorba. Tumrar ijjot, shunam ar tarif, hoḳol zatir ufre roibo. Tan oada mafik tumra oibae tumrar Mabud Allar name eḳ fobitro proza.”
DEU 27:1 Musa nobie Boni Israilor murobbi oḳolre loia manshore ḳoila, “Ami tumrare aiz zeta zeta hukum diram, tumra ita furafur amol ḳorio.
DEU 27:2 Tumrar Mabud Allae tumrare ze desh dan ḳorra, Zordan gang faroia hari tumra zebla hou desho zaibae, zaoar bade ḳoyeḳṭa boṛo boṛo fattor ḳaṛa ḳori hazaia, itare suna dia faḳa ḳorio.
DEU 27:3 Ar otar ufre ou Tourator tamam hukum-ahkam lekio. Buzrae ni, tumrar moy-murobbir Mabud Allae, dud ar mour banḍar-ala ze deshḳan tumrare dibar oada ḳorsoin, in taki hou desho gia harle,
DEU 27:4 Zordan gang faroia Ibal faṛor ufre uṭia, amar batail aizkur hukum mafik tumra hou fattor oḳol hazaia ḳaṛa ḳorio, ar itare suna dia faḳa ḳorio.
DEU 27:5 Ar hono tumrar Mabud Allar name fattordi ekkan kurbani kana banaio. Ou fattoror maze luar kunu atiar lagaio na.
DEU 27:6 Asta asta fattor dia tumrar Mabud Allar ou kurbani kana banaio, banaia er ufre tumrar Mabud Allar name zalail kurbani adae ḳorio.
DEU 27:7 Ar salamoti kurbani-o adae ḳorio. Ou kurbanir gust ḳaia tumrar Mabud Allar samne kushi-bashi korio.
DEU 27:8 Ar suna lefa hou fattoror ufre Tourator ou hukum-ahkam oḳol kub shundor ḳori lekio.”
DEU 27:9 Bade Musa nobie Lebi kandanor imam oḳolre loia hoḳol Boni Israilre ḳoila, “O Boni Israil, nirai o, ar amar ḳota huno, oḳon to tumra nizor Mabud Allar ḳas proza bonigeso.
DEU 27:10 Te tumra tan hukume solio, ar ami aiz zeta niom-ḳanun, hukum-ahkam zanailam, ita amol ḳorio.”
DEU 27:11 Musa nobie ou din manshore hukum dila, ḳoila,
DEU 27:12 “Zordan gang faroia harle ou shomoy Shimion, Lebi, Ehuda, Isaḳor, Iusuf, ar Bin-Iamin ḳandanor manush oḳol gia nek duar nishana hishabe Gorisim faṛor ufre uṭio.
DEU 27:13 Ar bodduar nishana hishabe Ruben, Sadu, Ashir, Sobulon, Dan ar Noftali kandanor manush gia Ibal faṛor ufre uṭio.
DEU 27:14 Bade Lebi kandanor manush oḳol ubaia, Boni Israilor tamam manshore zure zure sillaia ḳoibae,
DEU 27:15 “Ze manshe laḳṛi ba fattor kudia, shuna-rufa ba fitol golaia kunu murti banae, ar puja ḳorar niote ogure nia lukail zagat toy, he to lannoti. I murtire to Mabude gin ḳoroin, ita ḳali kamaror ator ḳam. Ikan hunia hoḳole ḳoio, Amin.
DEU 27:16 “Ma-bafre zegie beijjot ḳore, he lannoti. Ikan hunia hoḳole ḳoio, Amin.
DEU 27:17 “Doḳoldarir niote zominor ail ba shimana kuṭi zegie horae, he lannoti. Ikan hunia hoḳole ḳoio, Amin.
DEU 27:18 “Anda manshore zegie bul fot deḳai dey, he lannoti. Ikan hunia hoḳole ḳoio, Amin.
DEU 27:19 “Bideshi musafir, etim, ar ṛaṛi beṭintor bisar-salishit zegie be-insafi kore, he lannoti. Ikan hunia hoḳole ḳoio, Amin.
DEU 27:20 “Haton maʼr loge zegie zina ḳore, he afon bafre beijjot ḳore. He to lannoti. Ikan hunia hoḳole ḳoio, Amin.
DEU 27:21 “Kunu foshur loge zegie zina ḳore, he to lannoti. Ikan hunia hoḳole ḳoio, Amin.
DEU 27:22 “Zegie nizor boinor loge, haton maʼr, ba haton bafor torofa boinor loge zina ḳore, he to lannoti. Ikan hunia hoḳole ḳoio, Amin.
DEU 27:23 “Nizor hoṛir loge zegie zina ḳore, he to lannoti. Ikan hunia hoḳole ḳoio, Amin.
DEU 27:24 “Zegie lukaia kunu manshore kun ḳore, he to lannoti. Ikan hunia hoḳole ḳoio, Amin.
DEU 27:25 “Ni-oforadi manshore kun ḳorar chuktie zegie ṭeḳa ḳae, he to lannoti. Ikan hunia hoḳole ḳoio, Amin.
DEU 27:26 “Ou shoriotor kunu hukum-ahkam zegie mane na, zegie ita amol ḳore na, he to lannoti. Ikan hunia hoḳole ḳoio, Amin.
DEU 28:1 “O Boni Israil, ami aiz tumrare zeta hukum-ahkam diram, ota amol ḳorar niote tumra zudi nizor Mabud Allar kalamre kial ḳori mano, te tumrar Mabud Allae duniar hokkol zatir ufre tumrare usa ḳorba.
DEU 28:2 Tumrar Mabud Allar kalam mania solle, tumra ou rohomot faibae, ar ou rohomot oḳol hamesha tumrar loge loge roibo,
DEU 28:3 “Tumrar boshot-baṛi ar ḳet-ḳamaror maze rohom-borkot faibae.
DEU 28:4 “Tan rohomote tumra bout aolad faibae, zomino bout foshol folibo, goru-sagole bout baichcha diba.
DEU 28:5 “Tumar ugaro ar tumar saulor moṭkit borkot faibae.
DEU 28:6 “Hoḳol halote hoḳol ḳamo tumi rohom-borkot faibae.
DEU 28:7 “Dushmonir niote zetae tumrar loge lagba, Mabude itare tumrar gese araiba. Tara eḳ duaredi tumrare marat aile, shat duaredi bagiba.
DEU 28:8 “Tumrar ugaror maze Mabude borkot diba, tumra ze ḳamo at dibae, ou ḳamo-u tain borkot diba. Tumrar Mabud Allae tumrare ze desh dan ḳorra, hono tumrare rohom-borkot diba.
DEU 28:9 “Tumra zudi tumrar Mabud Allar hukum-ahkam mania, tan batail fote solo, te tain ḳosom ḳaia zela oada ḳorsoin, ola tan nizor fobitro proza hishabe tumrare ḳaim ḳorba.
DEU 28:10 Ar asta duniar hoḳol zatie deḳba, tumra-u oilae Mabudor ḳas manush, dekia tara hoḳole tumrare ḍoraiba.
DEU 28:11 “Tumrar Mabud Allae tumrar moy-murobbir gese ze desh dibar lagi kosom ḳaisla, ou desho tain tumrar bout balai korba, tumrare bout aolad diba, tumrar foshur falainte bout baichcha diba, zomino bout foshol folibo.
DEU 28:12 Tumrar Mabud Allae tan asmani rohomotor duar kulia diba, zorur mafik meg-fani dia tumrar ator hoḳol ḳamor maze rohom-borkot diba, bout zatire tumra ṭeḳa-foysha aolat dibae, oile tumra kunu aolat nibar dorḳar oito nae.
DEU 28:13 Mabude tumrare ola banaiba, zate tumra hoḳlor matar ufre ro, ḳeuror faor tolat na taḳo. Tumra ḳali tumrar Mabud Allar ou hukum-ahkam oḳol kub zoton ḳoria amol ḳorio, zeta aiz ami tumrare ḳoiar, teu tumra hoḳlor ufre roibae, tole foṛtae nae.
DEU 28:14 Ar aiz ami tumrare zeta hukum diar, amar ou talim taki tumra ḍaine-baue horio na. Kunu deb-debir ḳoredi douṛaia itar puja ḳorat lagio na.
DEU 28:15 “Oile tumra zudi tumrar Mabud Allar hukum na mano, tan zeta hukum-ahkam ar niom-ḳanun aiz ami zanaisi, tumra kub kiali oia ita na manle, tumrar ufre ou lannot oḳol foṛbo, ita hamesha tumrar loge loge roibo:
DEU 28:16 “Tumrar boshot-baṛi, ḳet-ḳamar hoḳol zagat lannot foṛbo.
DEU 28:17 “Tumrar ugaro ar saulor moṭkit lannot foṛbo.
DEU 28:18 “Tumrar hurutta ḳom zonmiba, zomino foy-foshol ḳomizibo, goru-sagole baichcha ḳom diba, ou nomunae tumrar ufre lannot foṛbo.
DEU 28:19 “Goro ba baira hoḳol ḳano tumra forti din lannot faibae.
DEU 28:20 “Naformani kam ḳoria Mabudor ges taki hori zaoae, tumrar hoḳol ḳam-ḳazor maze tain lannot diba. Bala-mosiboto foṛia, Allai gozobor zatae, tumra ekkere binash oar ag forzonto, aste aste ḳali koy oibae.
DEU 28:21 Tumra ze deshor doḳoldari fairae, Mabude hono tumrar ufre bemar saṛiba, bemare tumra morte morte hou desho taki binash oibae.
DEU 28:22 Mabude tumrar shorilo nosṭo oa bemar, bakka taf ar zola-fuṛa, ota bemardi tumrar ufre gozob diba. Ar morki, hukna gorom batash, fosholor huna-ḳani hukai zaoar bemar ar fata mora, ota gozob oḳol tumrar zomino diba. Tumra moria fuṛanir ag forzonto i gozob tumrar ḳore ḳore roibo.
DEU 28:23 Tumrar matar ufror asman oibo fitolor laḳan shokto, ar faor tolor zomin oibo luar laḳan ḳoṭin.
DEU 28:24 Mabude megor bodla tumrar desho asman taki duil saṛiba, tumra binash oar ag forzonto ita hamesha foṛat roibo.
DEU 28:25 “Mabude tumrar dushmon oḳlor mukabilat tumrare araiba, erare eḳ fotedi marat gele shat fotedi bagibae. Tumrar dosha dekia zogotor hoḳol zatie ḍoraia ḳafiba.
DEU 28:26 Tumrar lash oibo foshu-fakintor kuraḳ. Itare ḳedanir lagi keu roito nae.
DEU 28:27 Mabude hou Mishori oḳlor laḳan tumrar gotro gozobi bish-furi, ṭiumar, fuṭ-ḳauzli bemar diba, ita taki keu tumrare shifa ḳorar ḳemota nai.
DEU 28:28 Tain tumrare fagol, anda ar bedisha banaiba.
DEU 28:29 Andae zela andarir maze atai atai aṭe, tumra dinor bala ola aṭibae, tumrar kunu ḳam-u kamiab oito nae. Tumrar ufre hamesha zulum ar luṭ-toraz solbo, ita taki basanir lagi keu aito nae.
DEU 28:30 “Shadi korar lagi ze ḳoinar loge tumar aḳt oibo, aroḳ beṭae aia ou ḳoinar ijjot luṭibo. Tumi gor banaibae, oile goro boshot ḳortae fartae nae. Anguror bagan ḳoria, fol ḳaoa ḳofalo zuṭto nae.
DEU 28:31 Tumrar sokur samne tumrar goru zobo ḳora oibo, oile eḳ ṭukra gust-o tumrar feṭo zaito nae. Tumrar gadare tumrar at taki kaṛia neoa oibo, ita ar firot faitae nae. Tumrar meṛa-sagol tumrar dushmonor ato zaibo, ota bifod taki basanir lagi keu aguai aito nae.
DEU 28:32 Tumrar fua-fuṛin dusra zatir ato aṭoḳ oiba, tarar ashae bar saite saite tumrar sokur zuti nosṭo oibo, oile kunta ḳorar shuzug oito nae.
DEU 28:33 Tumrar osina bin zatie tumrar ḳetor foy-foshol, ar tumrar menotor hoḳol mozuri luṭia nibogi, tumra hara zindegi kali zulum-mosibot faibae ar surmar oibae.
DEU 28:34 Tumrar souke i laḳan aro zeta deḳbae, dekia mata ḳaraf oibo.
DEU 28:35 Mabude tumrar urato ar aṭut shuru ḳoria, faor tola taki matar talu forzonto asta gotro bish-furi diba, itar kunu shifa nai.
DEU 28:36 “Tumrar ufre bashshai korar lagi tumra zare godit boaibae, Mabude hou bashsha ar tumrare bondi koraia omon eḳ zatir ato falaiba, zetar nam-u tumra huncho na, tumrar moy-murobbie-o hunchoin na. Hono gia tumra fattor ar laḳṛidi banail murtir puja ḳorbae.
DEU 28:37 Mabude tumrare zeta zatir maze ḳedai diba, hotae tumrare dekia somkiziba, tumrar dosha siṛ ar ṭaṭṭa-moshkorar bishoy oibo.
DEU 28:38 “Tumra ḳet ḳorbae bout, oile foshol faibae tuṛa, ḳaron fongofale ḳailiba.
DEU 28:39 Tumra anguror bagan ḳoria zae-zoton ḳorbae, oile kiṛa ar fuke bagan ḳailibo, erlagi tumra angur-o faitae nae, er shorbot-o ḳaitae fartae nae.
DEU 28:40 Tumrar hara desh zoytun gase bora roile-o, zoytun fol zoria foṛizibo, erlagi tumrar shorilo tel maḳa oito nae.
DEU 28:41 Tumrar zoto aolad oiba, ita tumrar gese roita nae, itare bondi kori neoa oibo.
DEU 28:42 Gozobi moua-fukor fal aia tumrar gas-gasali ar foshol ḳailiba.
DEU 28:43 “Tumrar maze boshot ḳorra bin zatir manush oḳol aste aste ufredi uṭba, ar tumra toledi lambae.
DEU 28:44 Tara tumrare ṭeḳa-foysha aolat diba, tumra tarare aolat dibar shaiddo oito nae. Tara roiba tumrar matar ufre, tumra roibae tarar faor tolat.
DEU 28:45 “Ou tamam lannot tumrar ufre foṛbo. Tumrar Mabud Allar kushi mafik na solae, tan hukum-ahkam ar niom-ḳanun na manae ou lannot oḳol tumrar loge lagail roibo. Itae tumrare zatia doria binash ḳorilaibo.
DEU 28:46 Ou lannot oḳol tumra ar tumrar aolador ufre, zug zug dori kudroti hushiari hishabe roibo.
DEU 28:47 Tumra nizor shudinor ḳalo monor kushie ashik bonia nizor Mabud Allar gulami korso na,
DEU 28:48 erlagi Mabude tumrar ḳoredi dushmon lagaiba, tumra feṭor buke, fanir fiase, obab-onoṭone hokir bonia tarar gulami korbae. Mabude tumrar ḳando luar zual findaiba, ou zualir tole tumrar binash oibo.
DEU 28:49 “Mabude bout duroi taki, zogotor hesh shimana taki, ola eḳ zatire silor nomunae uṛaia anba, zetar mukor buli tumra buztae nae.
DEU 28:50 Itar goṭon oibo bodsurot, itae kunu buṛa-buṛire ijjot dita nae, ar huruttare-o maya ḳorta nae.
DEU 28:51 Tara tumrar foshur baichcha ar ḳetor foshol ḳailiba, hesh-mesh tumra binash oibae. Tara kunuzat foshol, noya kunu anguror shorbot, tel, goru-sagolor baichcha, kunta-u tumrar lagi toita nae, hesh-mesh tumra binash oizibae.
DEU 28:52 Tara tumrar ṭaun oḳol beria raḳba, ar tumra zetar ufre borosha ḳorrae, tumrar hou usa usa mozbut baunḍorir oal oḳol hesh-mesh bangia foṛizibo. Tumrar Mabud Allae tumrare ze deshor doḳoldari dira, hou deshor hokkol gau ar ṭaun tara beriliba.
DEU 28:53 “Ar dushmone beria raḳar ḳalo tumra oto boṛo mosiboto foṛbae, erlagi tumrar nizor fua-fuṛire ḳailibae, tumrar Mabud Allar deoa aolador gust nize ḳaibae.
DEU 28:54 Hou shomoy tumrar maze zera bala manush, zera shuke ar aram-ayeshe ase, tarar mon-mizazo olaḳan oizibo, tara afon baire, nizor boure ar baki fua-fuṛire kunu doya-maya ḳorto nae.
DEU 28:55 He tar ze aolador gust ḳaibo, itar ekkan ṭukra-o tarare dito nae. Ḳaron dushmone zebla tumrar ṭaun oḳol beria raḳba, ou shomoy tumrar feṭor buk miṭanir lagi nizor huruttar gust saṛa ar kunuta-o milto nae.
DEU 28:56 Tumrar mazor kub norom dilor ze beṭi manush ase, ze beṭie shukila zindegir dae kunudin maṭit fao falaise na, hou beṭie-o tair zanor ṭukra zamai ba aolador bae kunu doya-maya ḳorto nae.
DEU 28:57 Dushmone tumrare beria raḳae feṭor bukor zalae aolador zonom deoar loge loge, ou maʼe nizor aolador gust, ar feṭo taki baroil fuati-ful forzonto nize nize lukaia ḳailibo.
DEU 28:58 “Ou kitabor maze shoriotor zoto hukum-ahkam leḳa ase, ita zudi tumra kub kial ḳoria amol na ḳoro, tumrar Mabud Allar mohima ar ḍor-ḳof ala namor ijjot na ḳoro,
DEU 28:59 te Mabude tumra ar tumrar aolad oḳolre bezuita bemar diba, ou bemare tumra lamba shomoy buganti korbae.
DEU 28:60 Mishoro taḳte bezuita zoto bemar-azar dekia tumra ḳafitae, hou bemar-azar oḳon tumrar ufre diba, itae tumrar fis saṛto nae.
DEU 28:61 Ar ou Tourat Kitabo zeta bemaror nam leḳa nai, ola ḳoṭin gozobi aro bout bemar-azar Mabude tumrar ufre saṛiba, tumra binash oar ag forzonto ita salu roibo.
DEU 28:62 Tumra nizor Mabud Allar hukum na manae, tumrar manshor foriman oḳon asmanor terar laḳan bout beshi oile-o, ita moria kub tuṛa basia roiba.
DEU 28:63 Mabude kushi oia tumrare zela ay-unnoti dia baṛaisla, tumrar manshor foriman boṛo ḳorsla, hou laḳan kushi koria oḳon hirbar tumrare binash ḳoria nifat ḳorba. Tumra oḳon ze deshor doḳoldari fairae, hou desh taki tumrare ḳaṛia neoa oibo.
DEU 28:64 “Bade zogotor ek kinara taki arok kinara forzonto, hoḳol zatir maze tumrare sitrai diba. Hono roia tumra ar tumrar moy-murobbir osina deb-debir sheba ḳorbae, laḳṛi ar fattoror murtire puja dibae.
DEU 28:65 Hou zati oḳlor loge roia tumrar shanti milto nae, tumrar aramor lagi kunu zaga roito nae. Hono Mabude tumrar monor maze hae-hutash baṛaiba, tumrar sokur hoḳol asha-borosha, ar dilor shoḳre tain nirash, nistez ḳorba.
DEU 28:66 Kita goṭibo ba na goṭibo ota sintae tumrar din guzoribo, din-rait hamesha ḳali zanor ḍor-boye oshantit roibae, basia roar kunu nichchoyota faitae nae.
DEU 28:67 Tumra monor ḍore, zanor maire, souke kunu kul-kinar na dekia ḳali hae hae ḳorbae. Bian oile ḳoibae zoldi rait ouk, ar rait oile ḳoibae zoldi din ouk.
DEU 28:68 Hou ze Mishor deshor befare ami koislam, tumra hino ar zaoa oito nae. Oile hou gozobor shomoy Mabude tumrare zazo ḳori hirbar Mishor desho neoaiba, nia harle tumra gulami korar lagi hono biki kaitae saibae, oile ḳeu tumrare kinto nae.”
DEU 29:1 Mabude Musa nobir marfote Tur faṛor ufre, Boni Israil zatir loge age eḳ oada-chukti korsla, oḳon Muab desho Mabude dusra oada-chukti boail ḳorla. Ita oilo ou oada-chuktir shorto oḳol.
DEU 29:2 Musa nobie hoḳol Boni Israilre anaia ḳoila, “Alla Mabude Mishoror Feraunor loge, tar uzir-naziror loge, ar Mishoror hokkoltar loge zeta ḳorsila, ita to tumra deḳso.
DEU 29:3 Boṛo boṛo azob goṭona, Mabudor nanan laḳan nishana, ar kudroti kam to tumra nizor souke deḳso.
DEU 29:4 Oile itar mormo buzar moto mon, deḳar moto souk, hunar moto ḳan, Mabude oḳono tumrare disoin na.
DEU 29:5 Ami sallish bosor dori tumrare ou morubumir maze sofor ḳoraisi, ermaze tumrar finnor ḳafoṛ nosṭo oise na, faor zuta-o siṛse na.
DEU 29:6 Kunu bat-ruṭi-o ḳaiso na, anguror shorbot ba kunuzat shorab tumra ḳaitae faiso na. Ita hoḳolta to tain-u ḳorsoin, zate tumra buzo, tain-u tumrar Mabud Alla.
DEU 29:7 “Tumra hou zagat zaoar bade, Hishbonor bashsha Sihun ar Bashonor bashsha Uze amrar loge laṛai korat aisla, aile amra tarare arai dilam.
DEU 29:8 Tarar deshre doḳolo ania amra asta Ruben ḳandan, asta Sadu ḳandan ar Manosha ḳandanor ordeḳ manshore baṭia dilam.
DEU 29:9 Erlagi tumra ou oada-chuktir hoḳol hukum-ahkam kub kiali oia manio, manle hoḳol ḳam-ḳazo tumrar fayda oibo.
DEU 29:10 “Tumrar Mabud Allar samne aiz tumra hoḳol aia azir oiso, tumrar ḳandanor amir oḳol, moy-murobbi oḳol, ofisar oḳol, ar Boni Israilor hoḳol beṭain.
DEU 29:11 Tumrar loge oia tumrar bou, fua-fuṛin, ar bin zatir hou manush oḳol zetae tumrar daru faṛoin ar fani boia anoin tara-o aisoin.
DEU 29:12 Tumra hoḳol ono aia azir oiso, tumrar Mabud Allae ḳosom ḳaia ze oada-chukti aiz boail ḳorra, ou oada-chuktit tumra nize nize aiz hamaira.
DEU 29:13 Ar Mabude agor amolor tumrar moy-murobbi Ibrahim, Isʼhak, ar Iakub nobir loge ḳosom ḳaia ze oada ḳorsla, hou oada mafik oḳon taki tain tumrar Alla, ar tumra tan ḳas proza bonia roite razi aso, oḳan manat aiso.
DEU 29:14 Te ami oḳon ze oada-chukti boail ḳorram, ita ḳali tumrar loge nae, borong tumra zoto zon oḳon amrar Mabud Allar samne azir aso, tumrar loge, ar tumrar zeta aolador zonom oḳono oise na, tarar loge-o ou oada-chukti zari roibo.
DEU 29:16 “Tumra nize-u to zano, Mishor desho amra kila din ḳaṭaisi, bade ḳoto desh ar ḳoto fot-gaṭ faroia ono aia azisi.
DEU 29:17 Tumra to ota deshor manshore shuna, rufa, fattor ar laḳṛidi banail zogoinno deb-debir murti oḳlor puja ḳorte deḳso.
DEU 29:18 Tumra kuz-ḳobor loia deḳo, tumrar maze zanu ou laḳan kunu beṭa ba beṭi, kunu bongsho ba ḳandan na taḳe, zetae tumrar Mabud Allare bad dia hota deb-debir puja ḳorar lagi kiali oizae. Zudi ila kunugu taḳe, te ogu oilo ola bishakto gasor zoṛ, ze zoṛor ḍem ou bishakto titta gas bonbo.
DEU 29:19 Zeta manshe ou ḳosom ḳaoar ḳota hunia-o zudi tar nizore kub ḳofali mono ḳore, ar beforua oia solle-o kunu shomoshsha nai ila mono ḳore, te tumrar bala-bura duioṭar ufre ota manshe shorbonash ḍakia anbo.
DEU 29:20 Mabude kunumonte-u erare mafi dita nae, erar ufre tan gusar aguin dau dau ḳori zolia uṭbo. Ar ou kitabor maze zoto laḳan lannotor ḳota leḳa ase, ita hokkolta erar ufre ḍaliba, Mabude asta dunia taki tarar nam miṭailiba.
DEU 29:21 Tain duḳ-mosiboto falanir lagi hokkol Boni Israil taki tarare basia alog korba, ou Tourat Kitabor oada-chuktir maze zoto laḳan lannotor ḳota leḳa ase, ita ota manshor ufre saṛiba.
DEU 29:22 “Ar Mabude ou deshor ufre zoto nomunar lannoti gozob ar bemar-azar ḍaliba, ita dekia tumrar aolad oḳole ar bin desh taki aoa musafir oḳole tumrar i dosha dekia ḳaron zikaiba.
DEU 29:23 Nun ar gondoḳe asta deshor maṭi zolizibo, i maṭit kunta folito nae, kunta lagaile oito nae, maṭir ufre kunuzator gash, lota-fata zonmito nae. Ikan hou lannoti desh Sadum, Amura, Odma ar Soboyimor laḳan bonizibo, Mabudor gusar aguin zolia uṭae tain to itare binash ḳorilisla.
DEU 29:24 Ota dekia hoḳol zatir manshe zikaiba, Mabude i deshor halot ḳene ila ḳorla? Tain ḳene oto boṛo gusa ḳorla?
DEU 29:25 “Teu manshe zuaf diba, ou zatir manshe tarar moy-murobbir Mabud Allar boail ḳora hou oada-chukti bad dilaise, Mishor desh taki tarare bar ḳori anar bade ze chukti boail ḳora oisil.
DEU 29:26 Tara hou Mabudre bad dia tarar gese noya, ota deb-debir pujat lagse, zeta deb-debir ḳota Mabude ḳoisoin na, otar gese mata nuaia soizda ḳorat lagse.
DEU 29:27 Erlagi ou deshor ufre Mabudor gusar aguin zolia uṭse, tain ou kitabo leḳa hoḳol nomunar lannoti gozob i desho nazil ḳorsoin.
DEU 29:28 Gusar aguine zolia, tarar ufre bezuita gozob ḍalia tarare ou desh taki zoṛe-foṛe tulia tarare bin desho nia asaṛ mari falaisoin, ar oḳono tara hono asoin.
DEU 29:29 “Batuni hoḳolta-u to amrar Mabud Allar ato, oile zair ḳora hoḳolta siroḳalor lagi amra ar amrar aolad oḳlor ato, zate amra ou shoriotor hoḳol hukum-ahkam amol ḳortam fari.”
DEU 30:1 Hozrot Musae ḳoira, “O Boni Israil huno, ami tumrar samne ze rohomot ar lannotor fot deḳaisi, ita hoḳolta tumrar ufre folibo. Folia harle tumrar Mabud Allae tumrare zeta zati oḳlor maze sitrai diba, tarar loge boshot ḳorar bala tumra ita kial ḳorio.
DEU 30:2 Hou shomoy tumra ar tumrar aolad oḳol zudi tumrar Mabud Allar gese firia ao, ar aiz ami tumrare zeta hukum-ahkam zanairam, ita dile-zane amol ḳoro,
DEU 30:3 te hou shomoy Mabude tumrare bondi halot taki azad ḳorba. Tain tumrare maya-momota ḳorba, ar tain zeta zatir maze tumrare sitraia disla, ota taki hirbar tumrare tukaia anba.
DEU 30:4 Duniar aḳeri kinarat-o zudi tumrare falail oy, te hono taki tumrar Mabud Allae tumrare tukaia anba.
DEU 30:5 Tumrar moy-murobbir desho tumrare firaia anba, ita hirbar tumra doḳol ḳorbae. Tain tumrare bout baṛai diba, ar tumrar moy-murobbir saite-o tumrar aolador foriman aro baṛaiba.
DEU 30:6 Tumra zate furafur dile-zane Allar mohobbotor ashik bonia basia ro, ou niote tumra ar tumrar aolad oḳlor dilor mosolmani tain nize diba.
DEU 30:7 Ar ou lannot oḳol tumrar Mabud Allae tumrar hou dushmonor ufre falaiba, zetae tumrare ingsha ar zulum ḳoroin.
DEU 30:8 Hou shomoy tumra hirbar tumrar Mabudor hukum mafik zindegi kaṭaibae, tan batail zeta hukum-ahkam aiz ami tumrare zanairam, ota hoḳolta amol ḳorbae.
DEU 30:9 “Hou shomoy tumrar Mabud Allae hoḳol nomunae tumrare ay-unnoti diba, tain tumrar ḳam-ḳazo borkot diba, tumrar aolador foriman baṛaiba, tumrar goru-sagolor baichchain ar zominor foshol baṛai diba. Tumrar moy-murobbir ufre tain zela kushi asla, tumrar ufre-o ola kushi oia tumrare hoḳol nomunae baṛaiba.
DEU 30:10 Ḳali tumra nizor Mabud Allar kushi mafik solia, ou Tourat Kitabo leḳa tan hoḳol hukum-ahkam ar niom-ḳanun manle, asta dile-zane tan bae firle, tain ou rohom-borkot diba.
DEU 30:11 “O Boni Israil huno, aiz ami tumrare zeta hukum diram, ita mania sola tumrar lagi beshi koshṭor kunu ḳam nae, ita tumrar lagalor bare-o nae.
DEU 30:12 Ita to behesto tulia toa kunu siz nae zen tumra ḳoitae, behesto taki kegie lamai ania ita amrare hunaito, ar amra amol ḳortam?
DEU 30:13 Ita doriar hofaror kunu siz-o nae zen tumra ḳoitae, doria faroia ḳegie gia ita ania amrare hunaito, ar amra amol ḳortam?
DEU 30:14 Borong Mabudor kalam to tumrar loge-u ase, tumrar mukor maze ar dilor bitre ita ase, zate ita amol ḳoro.
DEU 30:15 “Huno, aiz ami tumrar samne zeta tulia dorsi, ita oilo zindegi ar balai, ba mout ar duḳ-mosibot.
DEU 30:16 Aiz ami tumrare ou hukum diram, tumra nizor Mabud Allare mohobbot ḳorio, tan morzi zugaia solio, tan deoa shoriot, hoḳol niom-ḳanun, hukum-ahkam hor-hamesha manio. Teu tumra zane basbae, forimane baṛbae, ar ze deshḳan tumra doḳol ḳorat zairae, hou desho tumrar Mabud Allae tumrare rohom-borkot diba.
DEU 30:17 “Oile tumrar mon zudi Alla Mabudor bae taki firizae, tan hukum na mania tumra zudi kunu deb-debir pujat lagia otare fornam ḳoro,
DEU 30:18 te aiz ami tumrare zanai diram, tumra nischit binash oizibae. Zordan gangor hofaro ze desh tumra doḳol ḳorat zairae, hino tumra beshi din bastae nae.
DEU 30:19 “Ou asman-zominre tumrar birudde shakki rakia ḳoiar, aiz ami tumrar samne zindegi ar mout, rohomot ar lannotre tulia dorsi. Erlagi O baiain, tumra zindegire fosond ḳorilao, teu tumra ar tumrar aolad oḳlor zan basibo.
DEU 30:20 Tumra nizor Mabud Allare mohobbot ḳorio, tan hukum-ahkam manio, tan ashik bonia tanre ainja ḳori doria rakio, otar maze-u tumrar zindegi. Tain ze deshor doḳoldari dibar lagi tumrar moy-murobbi Ibrahim, Isʼhak, ar Iakubor loge ḳosom ḳaia oada disoin, hou desho ota hukum-ahkam manar maze-u tumrar zindegi.”
DEU 31:1 Erbade Musae hoḳol Boni Israilre ḳoila,
DEU 31:2 “O Boni Israil huno, amar boyosh to eḳ-sho bish bosor oigese, ami ar amar ḳam ḳortam fariar na, ḳaron Mabude amare zanaisoin, ami Zordan gangor hifaro zaitam fartam nae.
DEU 31:3 Te tumrar Mabud Alla nize tumrar age age roia Zordan gang faroia zaiba. Tain tumrar samne taki honor hoḳol zatire binash ḳorba, teu tumra hou desh doḳol ḳorbae. Ar Mabudor ḳota mafik Hozrot Iusae tumrare loia hofaro tumrar age age zaiba.
DEU 31:4 Mabude Amuri oḳlor bashsha Sihun ar Uzre zelaḳan binash ḳorsila, hou zati oḳolre-o ola binash ḳorba.
DEU 31:5 Tain hitare tumrar ato shofia diba, hou shomoy tumra amar batail hukum mafik kam ḳorio.
DEU 31:6 Tumrar bukut bol raḳo ar shaosh ḳoro. Ḍoraio na, tarare dekia gabṛaio na. Mono rakio, tumrar Mabud Alla tumrar loge loge zaira, tain kunumonte-u tumrare saṛta nae, kunu halote-u tumrare falaita nae.”
DEU 31:7 Bade Musa nobie hoḳol Boni Israilor samne Iusa nobire anaila, anaia ḳoila, “Tumi bukut bol raḳo ar shaosh ḳoro. Ou manush oḳolre loia tumi gang faroia hou desho zaibae, hou desh dibar lagi Mabude to tarar moy-murobbir gese oada ḳorsla. Tumi tarare hono nia honor zomi-zoma tarare baṭia dio.
DEU 31:8 Shoyong Mabud tumar age age roiba, tumare shaijjo ḳorba, tain tumare-o saṛta nae ar tumare falaita-o nae, te tumi ḍoraio na, shaosh araio na.”
DEU 31:9 Bade Musa nobie Tourator ou hukum-ahkam oḳol leḳla, lekia Lebi kandanor hou imam oḳol, zara Mabudor shahadot shonduk boia nita, tarar ato ar Boni Israilor moy-murobbir ato dila.
DEU 31:10 Dia tarare hukum dila, “Forteḳ shat bosor bade bade, aolat mafir bosoror ḳalo, Ḍera-goror Idor oḳto,
DEU 31:11 hoḳol Boni Israil zebla tumrar Mabud Allar fosond ḳora zagat gia tan samne azir oiba, hou shomoy tumi tara hoḳlor samne ou Tourat Kitab tilaot ḳoria hunaio.
DEU 31:12 Beṭain, beṭin, huruttain, ar tumrar loge boshot ḳorra gau ba ṭaunor bin zatir hoḳol manshore eḳ zagat dola ḳoria ita hunaio, ita hunia tara tumrar Mabud Allare ḍoraiba, ar ou shoriotor hoḳol hukum-ahkam zoton ḳori amol ḳorba.
DEU 31:13 Ar tarar zeta huruttae Tourator ou hukum-ahkam hunchoin na, Zordan gangor hofaro tumra ze deshor doḳoldari fairae, tumra hono gia harle tara-o hara zindegibor tumrar Mabud Allar ḍor-ḳofe sola hikba.”
DEU 31:14 Bade Mabude Musa nobire ḳoila, “Tumar hayati to ar beshi nai, mout daro aichche, te tumi Iusare anao, anaia duio zon Milon-tambur samne ao, ami tar ufre tar noya ḳam shomzai dimu.” Teu tara duio zon gia Milon-tambur samne azir oila.
DEU 31:15 Ou shomoy Mabude megor kuṭir maze takia Milon-tambur duaror samne aia tarare doroshon dila, ou kuṭi tambur duaror ufre ubai roilo.
DEU 31:16 Ar Mabude Musare ḳoila, “Huno, tumi to tumar baf-dadaintor gese aram ḳorat zairaegi, oile ou manush oḳol ze desho hamaira, hamanir tuṛa bade-u amar loge tarar oada-chuktire tara bongo ḳorba, tara amare bad dia honor deb-debir ato nizore shofi diba.
DEU 31:17 Tara ita ḳoria harle amar gusar aguin zolibo, ami tarar log saṛi dimu, tarar bae taki amar muk firailimu, teu tara binashor foto zaiba. Tarar ufre nanan bala-mosibot aibo. Hou shomoy tara ḳoiba, amrar dosha ila oilo ḳene? Nischoy, amrar Alla amrar loge nae ḳori-u, ita goṭer.
DEU 31:18 Ashole tarar hou deb-debintor gese gia zeta ku-ḳam ḳorsoin, otar lagi-u ami hou shomoy tarar ges taki amar muk firailisi.
DEU 31:19 “Te tumra ou gozolṭa lekilao, lekia Boni Israilre hikao ar tara gaiba. Ou gozol to tarar birudde amar shakki oia roibo.
DEU 31:20 Buzrae ni, ami tarare ze desh dibar lagi tarar moy-murobbir gese oada ḳorsi, dud ar mour banḍar-ala aramor hou desho tarare nia harle-u, tara ḳana-fina ḳaia muṭa-taza oiba. Oia honor deb-debir puja ḳorat lagba, hotar bozona ḳorba, amare elami koria amar logor oada-chukti bangiba.
DEU 31:21 Teu tarar ufre zebla nanan nomunar bala-mosibot ar bifod-afod aibo, hou shomoy ou gozole tarar samne shakki dibo, ou gozol to tarar aolad oḳole faurita nae. Hasa ḳota oilo, amar oada ḳora hou desho nibar age-u, tara mone mone kita sinta ḳorer, ita to amar zana ase.”
DEU 31:22 Musae loge loge ou gozol lekia Boni Israilre hikaila.
DEU 31:23 Ar Mabude Nunor fua Iusare tan noya ḳamor lagi oula hukum dila, “Tumi bukut bol raḳo ar shaosh ḳoro. Ami kosom ḳaia Boni Israilre ze desh dibar lagi oada ḳorsi, tumi tarare loia hou desho zaibae, ami tumar loge loge roimu.”
DEU 31:24 Shoriotor ou hukum-ahkamor hoḳolta Musae shullo-ana leḳla,
DEU 31:25 lekia Mabudor shahadot shonduk boia neora Lebi kandanor manshore hukum dila,
DEU 31:26 “Ou Tourat Kitab ḳan nia tumra Alla Mabudor shahadot shondukor ḳasat toio. Ikan Boni Israilor birudde shakki hishabe hono roibo.
DEU 31:27 Tumra ḳoto boṛo gaṛteṛa ar naforman, ita amar zana ase. Ami zinda halote tumrar loge roite-u tumra zebla Mabudor naformani korso, te amar moronor bade tumra ar kita na ḳorbae!
DEU 31:28 Tumra hoḳole zarzir ḳandanor murobbi ar ofisar oḳolre amar gese ano, ami nize tarar gese ota kulasa ḳoria ḳoia zaimu, asman-zominre tarar birudde shakki raḳtam sai.
DEU 31:29 Ami to zani, ami souk muzar bade tumra ekkebare be-foti bonizibae, amar batail fot taki tumra horizibae, teu tumrar ufre gozob lambo. Ḳaron Mabude zeta gin ḳoroin, tumra ota ḳam ḳoria, nizor ate murti banaia, tan gusa tulaibae.”
DEU 31:30 Bade Musa nobie hoḳol Boni Israilor samne ou gozolor foyla taki aḳer forzonto hunaila; tain gaila,
DEU 32:1 O asman, ḳan fatia huno ami zeta gai, O zomin, tumi-o huno ami za batai.
DEU 32:2 Amar talim lamouk megor fuṭar laḳan, kuar moton foṛouk amar mukor boyan. Ḳesma gashor ufre fuṭa fuṭa meg oia foṛouk, noya sera gasor ufre shantir meg oia lamouk.
DEU 32:3 Ami to elan ḳormu amar Mabudor nam, tumra-o gaio Allar mohima gan.
DEU 32:4 Tain-u to asroy ṭilla, nikut tan ḳam, hok-hasa tan fot shoṭik tamam. Sol-soturi nai tan, hok-halal ase shorboda, hok insaf forezgari ase shotota.
DEU 32:5 Ta-o tan ḳobis bondae ḳorse beimani, dilor ḳarafie tara bonche ḳolonkini.
DEU 32:6 Haere ammok nadan, haere be-aḳol, ouni tumra bodla dilae, Mabudor danor? Taine-u tumrar foyda ḳorra Foroar digar ni? Boail ḳorla tumrar Israil zati.
DEU 32:7 Iad ḳoro tumra hou agor amolor mat, mono raḳo kita oisil furan zomanat. Baf-dadare zikar ḳori itihash huno, buṛa-buṛir muk taki hoḳolta zano.
DEU 32:8 Allatalae dila zebla zomin baṭia, nanan zatire dila bag-baṭura ḳoria. Boni Israilor foriman to zana asil tan, erar ongsho algai toia baki korla dan.
DEU 32:9 Mabudor ḳas shompotti to tan nizor proza, Iakub bongsho Israil zati afon samana.
DEU 32:10 Tarare tain tukai faila morubumir desho, nirai-nirzon desh ar bag-shinghor gorzono. Kudroti ḍaḳnadi guria zoton ḳorila, sokur monir laḳan-u tarare basaila.
DEU 32:11 Sile zela nizor badar baichchare nasae, aste aste uṛi uṛi ḍaḳnare laṛae, ḍaḳna melia baichchainre ufre tule, tulia hari uṛal dia loia loia gure,
DEU 32:12 Mabude eḳla oula ḳori tarare nila, kunuzator deb-debi tan loge asil na.
DEU 32:13 Faṛe faṛe uṛai uṛai nila tarare, faṛia deshor doḳol dila Boni Israilre. Ḳetor bala foshol dila ḳaibar lagi, faṛia saḳor mou ḳabaila faṭa-sifa taki. Ḳabaila malike zoytunor tel, luar laḳan shokto maṭit tel foli gelo.
DEU 32:14 Ḳabaila tarare tain gorur dudor doi, sagol-meṛar dud-o ḳaila zanio nichchoy. Muṭa-taza meṛar gust ḳaila moza ḳori, Bashon deshor goru-ḳoshi kaila ruṭidi. Taza-fusṭo gomor ruṭi anguror shorbot, ḍemdi uṭa angur oilo Allar niamot.
DEU 32:15 Bade tara lat marila feṭla bonia, Boni Israile lat marla tarar fao dia. Ḳaia ḳaia feṭ fulaia marlo oḳon lat, faurililo hou Allare zein dila bat. Foyda ḳorra Allar log tara saṛi dilo, asroy ṭilla Allare tara huru mono ḳorlo.
DEU 32:16 Deb-debir puja ḳoria zalailo aguin, eḳ Alla saṛia tara bozilo hoguin. Gusar aguin zalailo tan arshor maze, murti puja gin ḳoroin mohan Alla Pake.
DEU 32:17 Butor name boli dilo tanre saṛia, but to kunu Alla nae ta-o failo puja. Noya noya devta zeta ḳoydin taki sine, baf-dadar osin devta oḳon tara boze.
DEU 32:18 Zonom data bafor laḳan zein asroy ṭilla, tanre tumra fauria hari korlae obohela.
DEU 32:19 Aolador ou halot dekia muk firailla Mabude, rage-gusae aguin oila tarar-u bod amole.
DEU 32:20 Gusa ḳori Mabude ḳoila muk firailam ami, tarar hesh dosha kita ami nichchit zani. Deḳmu saia tarar hoḳol beimanir shaza, be-foti beiman zate buzba nizor dosha.
DEU 32:21 Zeṭa Alla nai ila devtar puja ḳoria, amar bitre dise tara gusa tulia. Zeṭa zati nai ila zati dia ingsha ḳoraimu, ammok zati dia tarar gusa tulaimu.
DEU 32:22 Amar gusar aguin oḳon dau dau ḳori zoler, maṭir tolor fatalre-o zalaia sarḳar ḳorer. Hara zogot ar foy-foshol zalai korbo sali, faṛor tolat aguin zolbo, zolbo duil bali.
DEU 32:23 Laḳo laḳo bifod dimu hoḳoltar ufor, amar tamam tir marmu feṭor buke ḳormu ḳator.
DEU 32:24 Ufashi nidane tara hukai hukai morba, gozobi bemaror loge duk-toklif faiba. Dat ala zongli foshu faṭaimu ami, bishakto shob hafor fale diba ḳamṛani.
DEU 32:25 Bare gele morba tara toluaror tole, goro roile morba hoḳol zanor ḍor-ḳofe. Zuan fua zuan fuṛin dudor hurutta, binashi gozobe morba daṛi sul faḳna.
DEU 32:26 Ḳoislam ami uṛai marmu Boni Israilre, itar nam fusilaimu manshor mon tone.
DEU 32:27 Oile amar zana ase dushmonor bab-shab, beṭagiri korba tara oibo tarar lab. Na buzia ḳoibo tara zitse nizor bole, Mabud ita kuntat nae zitsi kole-bole.
DEU 32:28 Bisar-bibek kuaia oḳon name Israil zati, aḳol-buddi araia tara oise be-foti.
DEU 32:29 Aḳol taḳle buzto tarar nizor durdosha, bibek kaṭai zan basaia roito hamesha.
DEU 32:30 Eḳ dushmone aia kila azar zon ḳedae, dui sifaire dekia ḳene dosh azar douṛae. Nizor asroy ṭilla zudi tarare na besita, shoyong Mabude zudi saṛia na dita.
DEU 32:31 Dushmonor asroy ṭilla oto mozbut nae, tara-u ikan shikar ḳori hoḳolre hunae. Amrar asroy ṭilla to bout boṛo boloban, tarar muke gaia ita zofe tan shunam.
DEU 32:32 Mabude bataira oḳon tarar ḳetor ḳota, Sadum ṭaun taki aise itar anguror lota, Amura shohor taki itae angur fol faise, bish ar tittae i folor soṛi furafur oise.
DEU 32:33 Anguror shorbot zela nag-naginir bish, alod hafor bish-o ola marattoḳ zinish.
DEU 32:34 Amar gese ita gozob tumrar lagi kaṛa, amar banḍaro toa shob sil-sappoṛ mara.
DEU 32:35 Naformanir shaza deoa amar-u ḳam, amol mafik bodla dimu tamam insan. Shomoy oile fislizibo dushmonor fao, mosibotor din tarar nozdik zanilao. Ṭik kori toa ase tarar ḳamor bodla, zoldi kori faiba nizor amol-nama zela.
DEU 32:36 Mabude deḳba zebla bol-shokti nai, tan bondar bol-takkot gesegi fuṛai. Gulam kiba azad bonda hoḳol-u mazur, dekia tain fokko loiba afon gulamor. Maya-doya ḳorba Allae tan gulamre, mazur taki shobol ḳorba doya-rohome.
DEU 32:37 Ḳoiba tain hou shomoy kuai gela hita, otodin bozisla tara zeta devta. Bagia gelogi kuai tarar asroy fahaṛ, tarar hoḳol deb-debi oshaṛor oshaṛ.
DEU 32:38 Ḳoi gela hou deb-debi zetae ḳaisla sorbi, sorbi ala bolir gust ḳaisil besh ḳori. Zeta devtain ḳaisil sodgar shorbot, oḳon tara basauk aia tarar ummot. Shaijjo ḳorouk na aia tumrar hou ṭakur, asroy dey na ḳene naforman bodkur.
DEU 32:39 Sinta-babna ḳoria deḳo hou tain-u ami, ami saṛa Mabud nai ikan zancho ni. Ami-u marilai ami-u basai, ami-u to zoḳom ḳori ami dei balai. Ama taki basailito shaiddo ase ḳar, hayat moutor malik ami Allahu Akbar.
DEU 32:40 Arshor bae at tulia ḳosom ḳaia ḳoi, siroḳalin zinda ami zanio nichchoy.
DEU 32:41 Dar zebla dimu amar soḳsoḳa toluar, ḳaim ḳorat lagmu zebla amar ray-bisar. Hou shomoy shaza dimu amar hoḳol dushmonre, amare ginnanir bodla dimu tarare.
DEU 32:42 Tir-donuke lou ḳaia ḳorbo matlami, amar toluare-o to lou ḳaibo zani. Murda ar bondi oḳlor lou he ḳaibo, dushmonor gust ḳaia feṭ fulaibo. Lamba-suli sifair ḳolla ḳaibore muke, tarar ḳolla sibai kaibo amar donuke.
DEU 32:43 Mayar prozar loge oia asman kushi o, behestor hoḳol firistae tane soizda deo. Zogotor tamam zatie gao gunogan, Allar hoḳol bondar loge lo tan moha nam. Tan gulamor lour bodla oḳon loiba tain, dushmonre shaza dia saf ḳorba zomiḳan. Tan bondae Kenan desho failiba rehai, gunar kofora dia diba tar bodlai.
DEU 32:44 Musa nobi ar tan ḳadim Nunor fua Iusa gia hoḳol manshor gese ou gozolor shob ḳota zanaila.
DEU 32:45 Musae hoḳol Boni Israilor gese gia ita hoḳolta ḳoia hari,
DEU 32:46 ḳoila, “Ami ou zoto hushiarir ḳota tumrare zanaisi, ita tumrar dilo gatia rakio, ita to tumrar birudde shakki bonia roibo. Ar tumrar aolad oḳolre hukum dio, ou shoriotor hoḳol hukum-ahkam kiali oia amol ḳorta.
DEU 32:47 Ita to aze-baze kunu mat-ḳota nae, ita oilo tumrar zindegi! Zordan gang faroia hari tumra ze deshor doḳoldari fairae, ota amol ḳorle hono tumra lamba hayati faibae.”
DEU 32:48 Hou din-u Mabude Musa nobire ḳoila,
DEU 32:49 “Tumi gia ou Abarim faṛo uṭo, iṭa to Muab deshor Ziriho ṭaunor samne ase. Hono uṭia Nobo namor hou usa ṭillar ufre zao, ar Boni Israilre ami ze deshor malikana diram, ou Kenan desh eḳbar dekilao.
DEU 32:50 Tumar bai Harun zela Hur faṛor ufre uṭia harle ufat oisil, bade tar baf-dadar ḳataro gia azisil, ou Nobo faṛo uṭar bade oula tumar-o ufat oibo, ar tumar baf-dadar gese gia oulaḳan tumi-o azibae.
DEU 32:51 Mono ase ni, hoḳol Boni Israilor samne tumra duio baie amare fak-fobitro ḳoia mainno ḳorso na, hou Zin morubumir Kadesh elaḳar Meriba namor zagat fanir gese tumra amar name zaliati korslae.
DEU 32:52 Hono uṭia harle tumar sokur samne hou desh deḳbae, ze deshḳan ami Boni Israilre dan ḳorram, tumi kali soukdi deḳbae, oile hi desho hamaibar shuzug tumar oito nae.”
DEU 33:1 Allar ḳas bonda Musa nobir ufator age, Boni Israilre tain ou dua dila:
DEU 33:2 Toshrif anla Mabud Allae Tur faṛ taki, amra hoḳole deḳa failam nure elahi. Seir ar Faran faṛ taki deḳain nuror tez, laḳo laḳo firista kiba aro besh. Didar dila Mabude erar maz tone, ḍain ato bora asil nuror aguine.
DEU 33:3 Hasau tain maya ḳoroin nizor bondare, tamam forezgar bonda tan hukume sole. Soizda ḳorat asoin tara tan faor tolat, hukum faile tamil ḳoroin roin tan ḳotat.
DEU 33:4 Musa nobie ze shoriot disla amrare, Boni Israilor don ita zane hoḳole.
DEU 33:5 Dola oia aila zebla moy-murobbir dol, log oia aisla Israilor ḳandanor hoḳol, hou shomoy to Mabud asla tarar ufror bashsha, era hoḳol tan proza tain-u Shahansha.
DEU 33:6 Ruben ḳandanor befare Hozrot Musae ḳoila: Ruben ḳandan zinda rouk, nifat nae kunudin, ta-o tar goro foyda oibo ḳom fua-fuṛin.
DEU 33:7 Ehuda ḳandanor befare ḳoila: O Mabud, tumi oḳon Ehudar foriad huno, bai-biradoror daro tare firaia ano. Duio at tar shobol raḳo laṛair shomoy, shaijjo ḳoro tumi tare dushmonre deo arai.
DEU 33:8 Lebi kandanor befare ḳoila: Tumar ashikor ato ase Tummim ar Urim, kudroti hou dui samanar malik kali ou Lebin. Masa namor zagat loiso tar forikka, Meriba namor fanir zagat oisil ou ḳaijja.
DEU 33:9 Ma-bafore-o tulche na he tumar ufre, gunar shaza dise tar maʼr feṭor baire. Dabi saṛia shofi dise afon fua-fuṛi, zindegi kurbani dise tumar ain mani. Tumar kalam fara dise manche shoriot, oada-chukti mania solche, na ḳori kianot.
DEU 33:10 Tumar hukum tara hikae Iakub bongshore, tumar shoriot buzae tara Israil zatire. Agor-kushboy zalae tara tumar samne aia, zalail kurbani dey kurban-gat gia.
DEU 33:11 Tar samanat borkot deo go O amar Mabud, razi-kushi ro tumi tar ufre bout. Tar dushmonor ḳomor tumi bangi-suri deo, ginna ḳorrar ḳomor bangi borbad ḳorilao.
DEU 33:12 Bin-Iamin ḳandanor befare tain ḳoila: Mabudor mayar bonda shae-shantie roibo, nirafode roibo he tan ḍaḳnar tolo. Hara din hara rait sayat raḳba tare, zindegi guzoribo tar tan bogol tole.
DEU 33:13 Iusuf ḳandanor befare tain ḳoila: Rohom-borkot ḳoro Mabud tar deshḳanre, asman taki dami dami zinish deo tare. Kua dia bizai deo ufror asman taki, aro deo tar zomino maṭir muror fani.
DEU 33:14 Shuruzor teze faḳaia deo bala fol, sande sande deo tare mozar foshol.
DEU 33:15 Furana faṛ taki don-samana deo, siroḳalin faṛia mal tar zomino neo.
DEU 33:16 Zomin taki deo go Mabud bala bala mal, zalail zonglar nuror malik rohom ḳoro siroḳal, Iusufor matat lamouk amar ou dua, baiain taki mohan zonor talut lamouk ita.
DEU 33:17 Ḍeḳa baichchar moto ouk tar bol-shokti ar shan, tar matar hing zuṛa to zongli boyrar laḳan. Hing dia gutaibo he hara zogotre, fub fosim uttor dokkin douṛaibo hoḳolre. Afraimor oiba ola laḳo laḳo zon, azar azar zon oiba Manoshar mul don.
DEU 33:18 Sobulon ar Isaḳoror ḳandanor befare tain ḳoila: Sobulone kushi korouk bairor ḳam-ḳaz loia, Isaḳor kushi rouk goror ḳamo roia.
DEU 33:19 Ḍaki ḍaki faṛor daro anbo manshore, kurbani dibo hono ḳas sohi dile. Doria taki tulba tara doriar feṭor don, bali taki tulia anba lukail shob roton.
DEU 33:20 Sadu ḳandanor befare tain ḳoila: Mubarok hou zon, Sadur zaega baṛai diba zein, Sadu to shinghor laḳan ḳaf dori roy, dushmonor at ar ḳolla siṛia falae.
DEU 33:21 Hoḳol taki shorosh zomi nizor lagi nise, zoiggo murobbir ashon tar lagi toa oise. Zatir shordar oḳol dola oar ḳalo, Mabudor niae bisar he tamil ḳorilo, Boni Israilre deoa hukum fura mainno ḳorlo.
DEU 33:22 Dan ḳandanor befar tain ḳoila: Furfura shinghor baichcha oilo Dan ḳandan, Bashon desh ton faldi aia ḳore boṛai shan.
DEU 33:23 Noftali kandanor befare tain ḳoila: Noftali to Mabudor maya-momotat habuḍubu ḳar, tan rohom-borkoto he hatar ḳaṭer. Tumi tare tar afon shimanat ano, soi-salamote Galil aor ar douknor desho neo.
DEU 33:24 Ashir ḳandanor befare tain ḳoila: Ashire faibo rohomot oinno taki beshi, hoḳol baie maya ḳorba tare rashi rashi. Oto rohom-borkot faia kushi taḳar ḳalo, dui fao tar ḍubail roibo zoytunor telo.
DEU 33:25 Tar geiṭ oḳol bandail ouk lua ar tamadi, he bolala mozbut rouk tar fura zindegi.
DEU 33:26 Musa nobie aro ḳoila: Boni Israilor Allar homani dusra ḳeu nai, tumrare shaijjor lagi asmano beṛain. Tan nizor shan-mohimae megor saḳat soṛia, shaijjoḳari oita sain tumrar lagia.
DEU 33:27 Hoḳol foylakur eḳ Alla-u oila asroy ṭikana, tan siroḳalin at dia tumrare raḳsoin doria. Tumrar samnor hoḳol dushmon tain-u ḳedai dein, itare binash ḳoro hukum disoin tain.
DEU 33:28 Erlagi Israil zati bala-afta roin, Iakub bongshor fanir zorna nirafod taḳoin. Hino roibo foy-foshol ar angur roshe bora, tar ufre lambo asmani kua.
DEU 33:29 O Boni Israil, mubarok aolad tumi! Tumi oilae Mabud Allar azad ḳora zati. Shoyong Mabud oila tumar zan basanir ḍal, tain-u oila tumar joyor darail toluar. Dushmon tumar samne aile tor-toraia ḳafe, tumi tarar bukur ufre maṛa dibae ne.
DEU 34:1 Bade Musa nobi Muab deshor tol zaga taki, Nobo faṛor ṭillar ufre uṭila, ou ṭilla to Ziriho ṭaunor samne Pisga faṛor hoḳol taki usa ṭilla. Hono Mabude tanre hoḳol desh deḳaila, Giliod taki Dan forzonto,
DEU 34:2 asta Noftali desh, Afraim ar Manosha desh, ar foismor doriar far forzonto fura Ehuda desh,
DEU 34:3 douknor Negeb morubumi, ḳezuri ṭaun Ziriho, ar er ḳandar Zordan gangor douknor morubumi taki Suar gau forzonto hoḳol zaga.
DEU 34:4 Ota deḳanir bade Mabude tanre ḳoila, “Ikan oilo hou desh, zeḳanor befare ami Ibrahim, Isʼhak ar Iakubor gese ḳosom ḳaislam. Tarare ḳoislam, deshḳan ami tumar oarishre dimu. Te ita ami tumare shorashori deḳailam, oile tumi Zordan gang faroia hino hamaitae fartae nae.”
DEU 34:5 Mabudor zoban mafik, tan gulam Musa nobir ufat ou Muab desho-u oilo.
DEU 34:6 Muab deshor Bayt-Piyuror daro faṛia tol zagat Allar kudroti ate tanre dafon ḳorla. Oile tan rouza shorifre oḳono ḳeu sine na.
DEU 34:7 Ufator ḳalo tan boyosh asil eḳ-sho bish bosor. Hou shomoy-o tan souḳor faoar ḳomse na, tan shoril ḳomzur oise na.
DEU 34:8 Ufator bade Boni Israile tish din dori Muab deshor nisa tol zagat tan lagi kanda-ḳaṭi ar ahazari korla. Ou tish din bade tarar duk-ahazari shesh oilo.
DEU 34:9 Hozrot Musae Nunor fua Iusar matar ufre at raḳar ḳarone, ou shomoy tone Iusa aḳolor ruhe furafur kamil oigela. Teu Boni Israil oḳol tan foramishe solla, ar Musa nobir marfote Mabudor batail hukum mafik tara zindegi kaṭaila.
DEU 34:10 Hozrot Musar laḳan ila kunu nobi oḳon forzonto Boni Israilor maze zonom loisoin na, zan loge Mabude samna-samni oia batchit ḳorta.
DEU 34:11 Mabude Musa nobire bezia Mishoror bashsha Feraun ar tar uzir-nazir, tar asta deshor ufre zoto laḳan kudroti nishana ar keramoti kam deḳaisoin, ita-o ar ḳeu ḳorsoin na.
DEU 34:12 Tamam Boni Israilor souḳor samne Musa nobie zela kudroti moha taijjubi ar ḍor-ḳofor nanan keramotir ḳam ḳorsoin, ila ḳam dusra ḳeu ḳorar takkot oise na. Ḳotom
RUT 1:1 Hozrot Daud nobir tin siṛi age amir oḳlor hukumotor amolo, Ehuda desho Ali Malik name eḳ beṭa asla, tan bibir nam Noyomi, Moholun ar Kilion namor tarar dui fua asla. Ou shomoy desho kub bezuita nidan deḳa dilo. Nidanor ṭelae Betelham gaur Ifrata gusṭir ou Ali Malike tan bibi ar fuainre loia Muab desho gelagi.
RUT 1:3 Hono zaoar ḳoydin bade Ali Malik morigela, tan bou Noyomi ar duio fua etim oilo.
RUT 1:4 Bade Bibi Noyomie duio fuare ou Muab deshor dui koinar loge shadi dila. Ek koinar nam Rut, arok koinar nam Orpa. Shadir ḳoydin bade duio fua-o morigela. Oula eḳ dosh boros gelo. Bibi Noyomie tan duio boure loia ṛaṛi halote hou Muab desho-u roila.
RUT 1:6 Aḳta eḳdin tain ḳobor faila, tan nizor hou Ehuda desho Mabude borkot nazil ḳoria ḳani-kuraki dan ḳorsoin.
RUT 1:7 Ou ḳobor faia tain duio fuar boure loia hirbar desho zaitagi kori tiar oila.
RUT 1:8 Foto bar oia Bibi Noyomie tan fuar bouainre ḳoila, “O beṭin, tumitain tumartanor maʼr gese zaogi, hono gele tumra shuk faibae. Ma-bafe tumrare bia-shadi diba, tumra noya gor-shongshar ḳorbae. Ar mai oḳolre, amar foribaror loge tumra zela bala bebohar ḳorso, Allae-o tumrar oula balai koroukka,
RUT 1:9 tumrare bala beṭa milai deukka, tumra zate shuḳ-shantie zindegi kaṭaitae faro.” Ḳoia tain tarare ainja ḳori doria maya dila. Teu tara duiozone au au ḳori ḍaḳaia ḳandi kandi koila,
RUT 1:10 “Mai go, amrare-o afnar logkano afnar desho neukkagi.”
RUT 1:11 Hoṛie ḳoila, “Na rego mai, tumra kitallagi amar loge zaitae? Tumrar baf-maʼr gese zaogi. Amar loge gele to lab-ub oito nae. Ila to nae zen amar aro fuain asoin, otar loge tumrare raḳmu,
RUT 1:12 ba ami aroḳ shongshar fatia hou torofa fuar loge tumrare raḳtam farmu. Amar to ar i boyosh-o roise na. Ar roile-o ami aiz rait-u aroḳ shongshar fatia hari amar goro kunu fut zonmile-o,
RUT 1:13 tumra kunu otodin baṛ saibae ni? Tumra zarzir baṛit zaogi, ami to obagi, ḳofal-fuṛa. Shoyong Mabude amar ufre ṭaṭa falai disoin.”
RUT 1:14 Ikan hunia tara au au ḳori kandon dorla. Ḳoto shomoy ḳandia hari Orpae tan hoṛire maya dia bidae loia bafor baṛit gelagi. Oile Rut tan hoṛir loge-u roigela.
RUT 1:15 Ein gia harle hoṛie Rutre ḳoila, “O beṭi, tumar zal to tair nizor baṛi ar devtar gese zargi, te tumi-o tair loge zaogi.”
RUT 1:16 Rute zuaf dila, “Ji na amma, afne ila matoin na zanu, afnar ḳor oia roite amare nished ḳoroin na zanu. Afne zeno-u zain na ḳene ami-o zaimu, afne zeno roiba ami-o ono roimu. Afnar zati-u oibo amar zati, afnar Mabud-u oiba amar Mabud.
RUT 1:17 Ze zagat afne morizibae, ono ami-o morizimu, ar ono-u amar ḳoybor oibo. Ḳali moron saṛa dusra kunutae zudi amare afnar log saṛaito fare, te Allae zanu amare gozobi shasti dein.”
RUT 1:18 Ikan hunia hoṛie ar kunta ḳoila na, tain buzilila Rute tan loge zaito ḳori dil bandilise.
RUT 1:19 Bade tara duiozone aṭa dorla, aṭi aṭi tara Betelham gaut aia fosila. Gaut aite-u gaur beṭinte aia uloistol lagaia ḳoila, “Iyallare, Noyomir ou halot oise ni?”
RUT 1:20 “Oy go shuna, amare ar Noyomi [mani, shuki] ḳoia ḍakio na, Marua [mani, titta] ḳoia ḍakio, Shorbo-shoktiman Allae to amar zindegire titta banailise.
RUT 1:21 Ami obagini kofal-fuṛa. Amare ar kitallagi Noyomi koia ḍakirae? Desh taki geslam bora ate, ar Mabude anla ḳali ate. Shoyong Shorbo-shoktimane-u amar bora ḍubi korilisoin.”
RUT 1:22 Olaḳan ḳori Muabi Rutre loia Noyomie Muab desh saṛia nizor baṛit Betelham gia hamaila. Ou shomoy barli foshol ḳaṭar mousum asil.
RUT 2:1 Baṛit aia harle eḳdin Muabi Rute tan hoṛire ḳoila, “Maiji, ami saislam bondo zaitam, ar ḳeu zudi meherbani koria amare tar zomino lurite dey, te lurilam one. Te afne kita mono ḳoroin?” Noyomie zuaf dila, “Aichcha, tumar bala lagle zao.” Teu Rut lurat gela. Bondo bout manshe barli daira, oile taijjubi mamela oilo, Rute ze zagat lurita gela, i ketor malik asla tan hour Ali Malikor kuṭum Buaz. Ein oila hi elaḳar nami-dami kandani manush. Rute hino ḳamlaintor ḳore ḳore lurira,
RUT 2:4 ou shomoy aḳta-u ḳetor malik Buaz Betelham gau taki aia ḳoila, “Assalamu alaikum, kita ba tumra bala aso ni?” Salamor alek loia tara ḳoila, “Ji oy sab, bala asi.”
RUT 2:5 Teu Buaze tan fordan ḳamlare zikaila, “Oba, ou zen lurer i beṭigu ḳe?”
RUT 2:6 Ou he ḳoilo, “Sab, enre sinchoin na ni? Ein to afnarar kuṭum Noyomi beṭir fuar bou, i beṭir bafor baṛi asil Muab desho.
RUT 2:7 Beṭie aia amare ḳoila, ou zera barli daira, meherbani koria amare erar ḳore ḳore lurite diba ni? Beṭi to bian taki oḳon forzonto ono asoin, mazḳano ḳali uṛar tole tuṛa ziraisoin.”
RUT 2:8 Ou Buaze Rutre ḳoila, “O boin, tumi hamesha amar zomino lurio, amar ota beṭintor loge loge roio, bara manshor zomino zaio na,
RUT 2:9 ami amar ḳamlaintore ḳoisi, tara tumare sataito nae, kial rakio tara kundin kun zagat daira. Ar ḳamlainte ḳaoar lagi zeta fani-uni anchoin, fiase dorle tumi-o on tone ḳaio.”
RUT 2:10 Ikan hunia Rute Buazor faot doria ḳodombusi koria ḳoila, “Sab, ami to eḳ bideshi beṭi, tebou afne ḳene amare oto maya-doya ḳorra?”
RUT 2:11 Teu Buaze zuaf dila, “Tumi ṛaṛi beṭi oia-o tumar hoṛir lagi zeta ḳorrae ita hoḳolta-u ami hunchi, tumar ma-baf ar zonom-maṭi saṛia i osin zagat aiso.
RUT 2:12 Allae tumare rohom ḳorouk. Boni Israilor Mabud, zen ḍaḳnar tole aia tumi asroy loiso, ein tumar shullo-ana faona hok dan ḳoroukka.”
RUT 2:13 Ou Rute ḳoila, “Sab, afne zen amare oto mayadari mat matia afnar i bandire shaosh zugai disoin, ami to afnar ita ek kamla beṭiro homani nae.”
RUT 2:14 Bade ḳanir oḳt aia harle, Buaze Rutre ḍaḳdi ania ḳoila, “O boin, aio, on taki ruṭi nia talo bizaia ḳao.” Rut aia ḳamla beṭintor galat ḳanit boila, boia harle Buaze tanre kisu chiṛa-muṛi dila. Teu Rute ita hoḳolta ḳaila, ḳaia harle zeta ufrilo ita tan bego haraia toila.
RUT 2:15 Bade Rut uṭia hirbar lurat zaita tiar oisoin, ou shomoy Buaze tan ḳamlaintore ḳoila, “Oba, tumra barli daoar bala tuṛatuṛi soṛain toia zaio, teu ein lurile ota faiba. Ein ḳaṭa muiṭ taki soṛain siṛia nile-o enre domoḳ-ṭomoḳ dio na.”
RUT 2:17 Rute hainja forzonto ono luria maṛa dia zaṛia saf ḳoria onuman eḳ furar barli loia tain baṛit gela.
RUT 2:18 Gia harle tan begor mosa bar ḳoria hoṛire dila, ar lurar barlir gaiṭ kulia tanre deḳaila.
RUT 2:19 Barli dekia Noyomie ḳoila, “Tumi kar zomino lurat geslae go? Tumare zar zomino lurite dise, Allae tar bala ḳorouk.” Teu Rute ḳoila, “Maiji, ze girostor zomino ami lurisi, en nam oilo Buaz.”
RUT 2:20 Ikan hunia Noyomie ḳoila, “Tamam zinda ar murdar ufre hok insaf ḳoroneala Mabude ere rohomot deukka. Ein to tumar houror korib manush. Amrar foribarre deḳa-huna ar ḳalas ḳorar eḳtiar zerar ase, ein oila erar mazor eḳzon.”
RUT 2:21 Rute ḳoila, “Maiji, emon ki ou sabe amare ḳoisoin, O boin, zotodin amar daoa-ḳaṭi ase, otodin tumi amar zomino aia amar bandintor loge roia lurio.”
RUT 2:22 Noyomie ḳoila, “Ikan to bala oibore mai, tumi en zomino gia tan bandintor loge roia lurio. Bara zomino zaio na, teu ḳeu tumare sataito nae.”
RUT 2:23 Barli ar gom daoa zotodin asil otodin-u Rute gia Buazor ḳamla beṭintor loge roia lurila, ar tan hoṛir loge mili-mishi roila.
RUT 3:1 Ḳoydin bade Bibi Noyomie Rutre ḳoila, “Ami mono ḳorram tumi hirbar shuki-shongshari o.
RUT 3:2 Tumi zar ḳamla beṭintor loge roia lurirae, ou Buaz to emne-u amrar kuṭum. Aiz rait tain ḳolat aia barli maṛa diba.
RUT 3:3 Te tumi ek kam ḳoro, tumi naia-doia, tel-tul makia, hazi-faṛi tan ḳolat zaogi. Oile tain tumare deḳoin na zanu.
RUT 3:4 Raitkur ḳaoa-daoa bade ein zebla hutiba, ou shomoy tumi en bisna sinia rakio. Bade hono gia tan faor ufror ḳeta horaia hono hutiroio. Hutia harle kita oibo, tain emne-u ḳoia diba.”
RUT 3:5 Rute ḳoila, “Ji aichcha, afne zela ḳoira ola-u ḳormune.”
RUT 3:6 Bade shomoy moto tain ḳolat gela, ar hoṛie zela ḳoisla ola-u ḳorla.
RUT 3:7 Ḳaoa-daoa bade Buaz zebla kush mizaze tan ḳolar uṛar tole gia hutila, Ruto lae lae hono gia Buazor faor ufor tone ḳeta horaia faor ḳandat hutiroila.
RUT 3:8 Ada raitkur bala Buaze ḳoroṭ firaia enre dekia somkia uṭia ḳoila, “Tumi ke go?” Rute ḳoila, “Sab, ami afnar bandi Rut, afne afnar ḳetar tolḳano bandire eḳzora ṭai deukka. Amrare deḳa-huna ḳorra kuṭum oḳlor maze afne to eḳzon.”
RUT 3:10 Buaze zuaf dila, “Boinre, Allae tumare rohom ḳoroukka, tumi foyla taki-u zela horir bishashi aslae, tair balair lagi aiz aro beshi bishashi zair ḳorlae, tumi to doni-gorib kunu zuan beṭar loge zaoar lagi sinta ḳorso na.
RUT 3:11 Asta gaur hoḳol manshe-u tumare bala fae. Tumi sinta ḳorio na, tumi zela sairae, ami ola-u ḳormu.
RUT 3:12 Oile ama tone aro korib tumatanor eḳzon asoin,
RUT 3:13 ḳail bianku bala ami tan loge matimu, tain zudi tumare shadi korte razi oin te to bala, tain-u shadi korilla. Ar na oile ami Allar ḳosom ḳaia ḳoiar, ami tumare shomzia loimu. Oḳon tumi ono-u rait ḳaṭailao, raitḳal ar zaio na.”
RUT 3:14 Fozoror ag forzonto Rut Buazor faor ḳandat hutiroila. Buaze Rutre ḳoila, “Tumi zen ino aiso, ikan zanu ḳeu na zane.” Teu andair roite-u Rut baṛit zaitagi kori zuit oila.
RUT 3:15 Ar Buaze tanre ḳoila, “Hoṛir samne ḳali ate kila zaitae? Deki, tumar saddorḳan melao.” Rute saddor melia kunat dorla ar Buaze soy feṭu barli ania saddordi bandia tan ḳando tulia dila. Rute ou gaiṭ loia baṛit gelagi.
RUT 3:16 Gia harle tan hoṛie zikaila, “Kita go mai, ḳobor kita?” Teu Buaze zeta zeta ḳoisoin ota tan hoṛir gese kulia ḳoila,
RUT 3:17 loge eoḳan-o ḳoila, “Buaze ḳoisoin tumi hoṛir gese ḳali ate kila zaitae, ḳoia tain amare soy feṭu barli-o bandia disoin.”
RUT 3:18 Ita hunia hoṛie ḳoila, “Te hesh forzonto kita oy deḳo, i manshe aizkur maze-u er ek gala na lagaia dom loita nae.”
RUT 4:1 Biane uṭia Buaz gaur fainchaiti boiṭok kanat aia boiroila, mone mone, hou kuṭumor bar saira zar ḳota tain ḳoisla. Aḳta-u deḳla, hou manush fotedi aṭia zaira, dekia tain enre ḍaḳ dia ḳoila, “O bai sab, obae tuṛa huni zao.” Teu hein aila,
RUT 4:2 ar Buaze gaur buzdar moy-murobbi dosh zonre ania boaila.
RUT 4:3 Boia harle Buaze hoḳlor samne hou zonre ḳoila, “Noyomi beṭie Muab desh taki firia aia oḳon amrar kuṭum Ali Malikor zaga-zomin ota besilaita saira.
RUT 4:4 Ami hoḳolre eḳloge dola ḳorsi, te tumi oilae tan korib manush, erlagi ou murobbi oḳol ar gusṭir hoḳlor samne oḳnainta ḳalas ḳorar lagi tumi loilao. Ar tumi zudi na neo, te amare ḳo, ami nimu. I foribaror lagi tumi-u boṛo korib, erbade oilam ami.” Ikan hunia hein ḳoila, “Aichcha, ami loimune.”
RUT 4:5 Teu Buaze uṭia ḳoila, “Te tumi aro ekkan ḳam ḳorte oibo, tumi Noyomi beṭir zominor loge ḳori morar ḳandanḳan ḳaim raḳar lagi, tar ṛaṛi bou Muab deshor Rutre-o shadi kora lagbo.”
RUT 4:6 Teu hein zuaf dila, “Na, te ami fartam nae. Arnae amar nizorta loia-u bezal lagizibo. Ar ami zebla fariar na, te afne-u ita gosilaukka.”
RUT 4:7 Oḳan ḳoia hari hi amolor shoriotor ain, ar Israil shomazor kuṭmor zaga-zomin ḳorid-bikir reoaz mafik hein tan faor zuta kulia Buazre dilaila, ar ḳoila, “Afne-u ita loilaukka.”
RUT 4:9 Teu Buaze ḳoila, “Te ami moy-murobbi ar baki hoḳolre shakki rakia ḳoiar, ami Noyomi beṭir ges tone Ali Malikor hokkolta ar tan dui fua Moholun ar Kilionor hokkolta-o loililam.
RUT 4:10 Ar mora manshor nam zinda raḳar lagi, tar don-samana ar zomi-mirash basanir lagi ami Moholunor ṛaṛi bou Muab deshor Rutre-o kobul ḳorillam, zate i gau ar gusṭir maze morar namḳan ḳaim roy. Aiz afnara ita hokkoltar shakki roila.”
RUT 4:11 Teu mozlisor hoḳole ḳoila, “Oy, amra itar shakki roilam.” Oḳan ḳoia-u tara dua ḳorla, “Ou ze ḳoinare afne kobul ḳorla, Mabude Iakub nobir dui bibi Rahela ar Lea, ze duizone asta Boni Israil zatire goṛia tulche, erar laḳan-u i koinare uzila ḳoroukka. Asta Betelham gaut afnar shunam baṛouk, Ifrata gusṭir maze Allae afnare doni-samani banauk.
RUT 4:12 Rutor feṭo taki Allae afnare zoto aolad diba, era zanu Tamar ar Ehudar fut Firuzor ḳandanor laḳan oin.”
RUT 4:13 Buaze Bibi Rutre shadi koria tan baṛit loia gela, tara duiozone gor-shongshar ḳorla, bade Mabudor rohomote tarar eḳ fua oilo.
RUT 4:14 Teu ari-forir beṭinte aia hurutta dekia Noyomire ḳoila, “Alhamdulilla, tumare go shuna, Allae aiz azad ḳorar lagi eḳ noya zamai disoin. Asta Israil desh zuṛi en shunam ouk.
RUT 4:15 Ein tumare buṛa ḳalo furfura ḳori tuloukka, buṛir kezmot ḳoroukka. Tumar futor ou bou to tumar lagi shat fua taki-o dami, tai tumare dile-zane maya ḳore, ou bour feṭ tone-u i aolador zonom oise.”
RUT 4:16 Teu Bibi Noyomie i natire uro loia tar zoy-zoton ḳorla.
RUT 4:17 Ar ari-forir beṭinte ḍong kori koitra, “Oḳon Noyomie eḳ noya hai faise.” Ḳoia tara i geda baichchar nam raḳla Ubayed. Ubayedor fuar nam Ias, ar Iasor fuar nam Hozrot Daud.
RUT 4:18 Ou oilo Iakubor nati Firuzor ḳandan-nama. Firuzor fuar nam Hasir,
RUT 4:19 Hasiror fua Rayam, Rayamor fua Aminadab,
RUT 4:20 Aminadabor fua Nahish, Nahishor fua Selim,
RUT 4:21 Selimor fua Buaz, Buazor fua Ubayed,
RUT 4:22 Ubayedor fua Ias, Iasor fua Hozrot Daud.
PSA 1:1 Shuki hou zon, naformanor sallae ze sole na, fafir foto ze ubae na, moshkora ḳorrar aḍḍat boy na.
PSA 1:2 Oile Mabudor deoa hedayot-u tar kushi, i hedayotre dian ḳore he din-rait dori.
PSA 1:3 Tar zindegi to fanir futor daror gasor laḳan, ze gase shoṭik shomoye fol dore, ḳorar dino tar fata hukae na, he zetat-u at dey, otat-u laboban oy.
PSA 1:4 Oile ḳobis-bojjator sola to ola nae, itar zindegi danor susar laḳan batashe uṛe.
PSA 1:5 Hashoror din ubaito tarar ola shaosh nai, fak-forezgaror mozliso naformanor nai kunu ṭai.
PSA 1:6 Forezgar bondar sola-firar foto Mabude nozor raḳoin, oile ḳobis-bojjator foto ase shorbonash.
PSA 2:1 Hokkol zatie ḳene ostir oia sillaira, kior lagi manshe behuda fondi korer?
PSA 2:2 Zogotor bashsha oḳol bigṛi gelo, raza oḳol ekkano dola oilo, Mabudor birudde ar tan al-Mosir birudde.
PSA 2:3 Era dola oia ḳoilo, ao, siṛia falai tarar ḍanḍa-beṛi, tarar bandon kulia shadin boni.
PSA 2:4 Arshe-azimor kursit boia Mabude ashoin, tain itare loia moshkora ḳoroin.
PSA 2:5 Tan gorom deḳaia befana lagaiba, ar gusae aguin oia otare ḳoiba,
PSA 2:6 ami shoyong amar bashshare boail ḳorsi, amar fobitro Sion faṛor ufre.
PSA 2:7 Ar hou bashshae ḳoira, ami kali Mabudor ou hukum zanai, tain amare ḳoisoin, tumi to amar fut, aiz-u ami tumar bafor laḳan oilam.
PSA 2:8 Tumi amar gese sao, saile zogotor hokkol zati tumar-u oibo, duniar hesh matar doḳol-o faibae,
PSA 2:9 tumi luar laṭi dia itare bangibae, maṭir fatilor laḳan surmar ḳorbae.
PSA 2:10 O raza oḳol, shoṭik aḳol ḳaṭao, zogotor shashok oḳol, hushiar ro,
PSA 2:11 dilor ḍor-ḳofe Mabudor ebadot ḳoro, ḳafi ḳafi
PSA 2:12 tan kudroti ḳodomo suma deo, tain to sokur foloke gusae zolia uṭoin, gusae tan gozob nazil ḳorle, tumra maz-foto aḳta-u binash oibae. Tara-u to boṛo ḳofali, zera tan sayat asroy loin.
PSA 3:1 Afon fua Absalomor samon taki bagibar ḳalo Hozrot Daudor mizmor. O Mabud, amar dushmonor foriman ḳoto baṛigese, deḳra ni, ḳoto manshe amar loge lager.
PSA 3:2 Amar befare ḳoto zone matira, ḳoira, Allar dorbaro tar zan basanir fot nai. (Sela)
PSA 3:3 Oile O Mabud, ḳoror dushmon taki tumi-u amar roikkaḳari, tumi-u amar shan-boṛai, bifodor maze amare shaosh dirae.
PSA 3:4 Ami zure zure Mabudre ḍaki, nizor fobitro faṛo taki amar arzi hunoin. (Sela)
PSA 3:5 Ami hutilam, hutia gumailam, bade hozag-o oilam, shoyong Mabude-u amare tan kulo ṭai dein.
PSA 3:6 Amar sairobae hazare hazar dushmone beria ubai roise, ubaile-o ami itare ḍorai na.
PSA 3:7 O Mabud, zoldi ḳoro! O amar Alla, amar zan basao! Tumi to amar hokkol dushmonor muko gushi marbae, bojjat oḳlor dat bangilibae.
PSA 3:8 Zan basani to Mabudor-u ḳam, afon prozar ufre tumar rohom-borkot zari rouk. (Sela)
PSA 4:1 Gan-baznar forisaloḳor lagi: tarala baznadi gaite oibo. Hozrot Daudor mizmor. O Alla, amar ḍaḳo ḳan dio, amare nirdush ḳoia tumi to zair ḳorso. Mosibotor ḳalo tumi amar zano aram diso, meherbani koria amar dua kobul ḳoro.
PSA 4:2 O manush oḳol, amar ijjotre tumra ar ḳotodin beijjot ḳortae, ḳotodin beḳama mator mayat roitae, misa mator ḳore ḳore gurtae? (Sela)
PSA 4:3 Mono rakio, Mabude tan ashik bondare nizor lagi alog korsoin, te ami ḍaḳle-u tain hunoin.
PSA 4:4 Tumrar rag-gusar shomoy kunu guna ḳorio na, bisnat hutia dil di sinta ḳoro, ar nirai taḳo. (Sela)
PSA 4:5 Fak-forezgarir kurbani adae ḳoro, Mabudor ufre shullo-ana borosha raḳo.
PSA 4:6 Bout zone ḳoy, “Amrare ḳegie balair fot deḳaibo?” O Mabud, tumar fobitro mukor nuror didar ḳan amrar nosib ouk.
PSA 4:7 Besh ḳori foy-foshol faia tarar zoto furti zugae, ita taki bout beshi furti to tumi amar dilo diso.
PSA 4:8 Ami to shae-shanti ar arame gumai, O Mabud, ḳali tumi-u amare boshot ḳorao sohi-salamote.
PSA 5:1 Ebadot-bondegi forisaloḳor lagi: bashir shure. Hozrot Daudor mizmor. O Mabud, amar foriad ḳobul ḳoro, dilor ḳandon amar tumar ḳane huno.
PSA 5:2 O amar Alla, amar bashsha tumi, amar aoaz huno tumi doya ḳori, dua-minoti ḳori tumar gese-u ḳali.
PSA 5:3 Tumi forti din fozore amar buli to huno, dilor hokkolta hazai raki tumar didaro.
PSA 5:4 Tumi to ila Alla nae ḳarafi zar fosond, tumar meman oito nae kunu fafi zon.
PSA 5:5 Boṛai-beṭagiri deḳaorar ṭai nai tumar samne, hoḳol laḳan naformani tumi ginna ḳoro nize.
PSA 5:6 Misa ḳota matrare nichchoy binash ḳoro tumi, Mabude to ginnain beshi kun-ḳarafi sol-soturi.
PSA 5:7 Oile tumar doya-mayae tumar goro hamaimu ami, noto oia soizda ḳormu tumar fobitro gor muki.
PSA 5:8 O Mabud, amar sairobae to dushmone bora, tumar forezgarir fote more neo salaia, amar samne tumar fot ḳoro sohi-shuza.
PSA 5:9 Tarar mukor kunu ḳota-u ekinor zuka nae, tarar dil-mon bora ḳali binashor sintae, kula ḳoyboror fosa lashor laḳan tarar gola, fam-foṭṭi marar ustad to tarar zifra.
PSA 5:10 O Alla, tumi itare dushi shaibosto ḳoro, tarar shorbonash ouk tarar fatail fando, shima saṛa naformanir dae ḳedao otare, birudita ḳorra to otae tumi Allar loge.
PSA 5:11 Oile tumar sayat boshotḳari kushe-bashe rouk, hor-hamesha kushir gozol tara hoḳole gauk. tumi basao tarare tumar ashik zara, amud-furti ḳorouk shobe tumar name tara.
PSA 5:12 Tumi-u Mabude forezgarre deo rohom-borkot, rohomotor beṛadi tumi tarare raḳo nirafod.
PSA 6:1 Ebadot-bondegi forisaloḳor lagi: tarala baznadi gaite oibo, bazona shur ‘Sheminit’. Hozrot Daudor mizmor. Damki dio na go Mabud gusa ḳoria, shaza dio na more rag ḳoria.
PSA 6:2 Doya ḳoro amae Mabud hukai zaiar ami, bemar shifa ḳoro tumi ḳafer mor aḍḍi.
PSA 6:3 Ḍoror suṭe amar zan doṛfoṛ doṛfoṛ ḳore, ar ḳotodin solbo ila mor zibone?
PSA 6:4 Firia sao go Mabud basao amar zan, tumar doyar duai lage ḳoro mor asan.
PSA 6:5 Morar bade tumare to ḍaḳar nai ufae, fatalo hamanir bade tumar gunogan ḳe gae?
PSA 6:6 Ḳandi ḳandi amar bisna forti rait bizailai, amar souḳor fanie bisna-balish bizia zae,
PSA 6:7 dilor duke amar souk hukai zar, dushmonor ḍore souk amar ḳomzur boniar.
PSA 6:8 Amar ges taki bago hoḳol naforman, Mabude to hunchoin amar dilor ḳandon.
PSA 6:9 Furafur hunchoin tain amar minoti, ḳobul ḳorsoin tain amar arzi.
PSA 6:10 Amar hokkol dushmon ḍoror suṭe ḳafouk, shorom faia oḳon-u amar fis saṛouk.
PSA 7:1 Hozrot Daudor mizmor. shur ‘Shiggayon’. Bin-Iamin ḳandanor shordar Kushe tanre gali deoae Mabudor dorbaro tan foriad. Ogo amar Mabud Elahi tumar sayat asroy loisi, ḳore oia ḳedaira zara amare, tarar at taki basao more.
PSA 7:2 Naile shinghor laḳan ṭukra ṭukra ḳorbo more, faria-siria marbo to basanit ḳeu na aile.
PSA 7:3 Ogo amar Mabud Elahi, zudi ḳoria taki kunu ḳarafi, amar ato roy zudi kunu naformani,
PSA 7:4 mor birudi nae tebuo zudi ḳeti ḳoria taki, —borong bina ḳarone ze dushmon oise tar-o ufoḳar ḳorsi—
PSA 7:5 te dushmone amare dorilauk ḳedaia, maṭit falaia faodi faṛaia, dulat mishailauk amar ḳaya. (Sela)
PSA 7:6 Mabud go, tumar moha gusae amar fokke ubao, zara more ingshae ota dushmonor bifokke ḳaṛa o, O amar Alla, tumar hok bisar zari ḳorilao.
PSA 7:7 Tumar sairo galat zoma ouk duniar hoḳol zati, arsho boia deḳo tarar hoḳol ku-kirti.
PSA 7:8 Mabud ota hoḳol zatir bisarok to tumi, ray dio dekia mor forezgari ar hok-halali.
PSA 7:9 Naformanor zulum bond ḳorilaukka, forezgarre mozbut banao O hok Alla, dil-monor bitor tumi zasai ḳoro hoḳolta.
PSA 7:10 Alla pak mor rokkaḳari, zan basain amar, tain-u basaneala shorol monor bondar.
PSA 7:11 Alla pake ḳoroin hok bisar, naformanor ufre gusa ḳoroin borabor,
PSA 7:12 manshe touba na ḳorile tan toluar daraiba, tir-donuk loia tain donuko tir lagaiba.
PSA 7:13 Zane marar atiar tain zuit ḳorsoin, tan tir oḳolre tain aguindi hazaisoin.
PSA 7:14 Naformane bod ḳamre feṭor bitre raḳe, bod ḳame feṭ bori gele zonom dey misare.
PSA 7:15 Maṭi kuṛia kuf kude he goin ḳoria, tar banail ou kufo nize zae foṛia.
PSA 7:16 Tar naformani to tar matat firia ae, tar zulum aia nizor talut foṛi zae.
PSA 7:17 Mabudor hok bisaror lagi shukur-guzar ḳormu tan, Rabbul alaminor name ami ḳormu gunogan.
PSA 8:1 Ebadot-bondegi forisaloḳor lagi: shur ‘Gittit’. Hozrot Daudor mizmor. O Mabud amrar malik, tumar shan-shouḳote bora hara dunia! Tumar nuror tozolli ḳaim ḳorso asman geria!
PSA 8:2 Tumar birudi oḳlor bifokke, geda ar nabalik huruttar mukor zobandi tumi shoktir banḍar banaiso. Ola ḳoria dushmon ar zidkurre tumi leṭaililae.
PSA 8:3 Tumar ator banail asmanor baedi ami zebla sai, hono tumar boail ḳora sand-tera deḳtam fai,
PSA 8:4 dekia mone mone ḳoi, manush aroḳta kita zen, tumi tarare iad ḳoro? Adom zati oto kita zen, tumi tarar kial raḳo?
PSA 8:5 Manushre banaiso ḳali firista taki tuṛa ḳom guni, oile gourob-ijjotor mala to tarare findaiso tumi.
PSA 8:6 Tumar foyda hokkoltare shashonor ḳemota erar ato diso, hokkolta-u erar faor tolat, erar aotae raḳso—
PSA 8:7 goru-sagolor fal ar zogotor tamam zanuar,
PSA 8:8 asmano uṛra faki ar doriar hokkol mas, shagoror fanit solra hoḳol nomunar zandar.
PSA 8:9 O Mabud amrar malik, tumar shan-shouḳote bora hara dunia.
PSA 9:1 Ebadot-bondegi forisaloḳor lagi: shur ‘Mout-Labben’. Hozrot Daudor mizmor. Ami furafur dile-zane Mabudor gunogan gaimu, tumar kudroti ḳam-ḳazor ḳota ami toblig ḳormu.
PSA 9:2 Ami tumare loia-u furti-amud ḳormu, O Rabbul alamin, tumar namor tarif git gaimu.
PSA 9:3 Dushmon oḳol zebla amar ḳor taki firia zae, zaoar ḳalo usṭa ḳaia foṛia tara morizae.
PSA 9:4 Nalish hunia tumi amar fokke ray diso, raz-godit boia tumi to hok bisar ḳorso.
PSA 9:5 Tumi bin zatire damki dia ou naforman binash ḳorso, tumi siroḳalor lagia itar nam miṭailiso.
PSA 9:6 Ita dushmon oḳol gese nifat oia, tarar baṛi-gor binash siroḳalor lagia, tarar ṭaun oḳol tumi falaiso tulia, kunu sin nam-nishana na rakia.
PSA 9:7 Oile Mabud to roin siroḳal, tain ḳorsoin bisaror godi boail,
PSA 9:8 hok-insafe zogotor bisar-foysala ḳorba, hok-halalie tamam zatir bisar ḳorba.
PSA 9:9 Zulumo foṛa zonor lagi Mabud-u tar asroy, mosibotor ḳalo tain nirafod ṭikana oy.
PSA 9:10 Tumare sine zara, tumar ufre borosha ḳore tara, Mabud go, tumar tallash ḳorra ashikor log tumi saṛso na.
PSA 9:11 Sion nogoro boshot ḳari Mabudor tarif-gozol gao, tan kudroti lila-ḳelar boyan hokkol zatire zanao.
PSA 9:12 Kun-ḳarafir bodla deorae mono raḳoin hoḳolta, duki-kangalor ḳandon tain kunudin fauroin na.
PSA 9:13 Dushmonor ato durdosha dekia rohom ḳoro Mabud go, moutor duar taki tumi amare tulia neo go,
PSA 9:14 zate tumar shukria-tarif ami gaitam fari, tumi amar zan basanie ami ḳormu kushi-bashi, Sion nogrir faṛae faṛae ḳormu nasa-nasi.
PSA 9:15 Nizor kuṛa gato foṛia bin zati buṛigese, tarar fatail lukail fando tarar-u fao hamaise.
PSA 9:16 Mabude nizore zair ḳoria hok bisar ḳorsoin, naforman dolor banail fando tara-u aṭkisoin. (Higgayon-Sela)
PSA 9:17 Naforman oḳol hamauk gia goin fatale, otar loge bin zati-o buli zain zetae Allare.
PSA 9:18 Nirasroyre fauroin na tain siroḳalor dae, duki-kangalor asha-o kunudin bifole zaito nae.
PSA 9:19 Zoldi ao go Mabud! manshe zanu na deḳae baṛti bahaduri, tumar samne bisar ouk hoḳol bin zati.
PSA 9:20 Ḍor-boy deḳao Mabud tumi tarare, tara ḳali maṭir manush zanouk bin zatie. (Sela).
PSA 10:1 Mabud go, tumi kene duroi roirae? Bifodor ḳalo kitallagi lukairae?
PSA 10:2 Zalimor bahadurie duki-ḳangal buge, heshe tarar soturir fando tara-u dora foṛe.
PSA 10:3 Mondo zone tar monor bojjatir bahaduri deḳae, lubi manshe Mabudre tuchcho mono ḳoria galiae.
PSA 10:4 Beṭagiri koria mondo luke sae na tan didar, Alla bolte ḳeu nai, ola ekin tarar.
PSA 10:5 Duniabi zindegi hamesha laboban tarar, tarar souke deḳe na to hok insaf tumar, “Ita bule bout ufre,” oḳan tara ḳoy, “Amar birudire fu dia uṛailimu nichchoy.”
PSA 10:6 Mone mone ḳoy tara, “Amar kunu foton nai, kunu zuge kunu din-u bifod-afod aito nae.”
PSA 10:7 Tar mato lannot ar danda, zur-zulume bora, zifra bora naformani bojjatir boshot ḳana.
PSA 10:8 Nirai zonglar maze he ut fatia boy, nirjon zagat ni-oforadire kun ḳorat roy. Oshohae-obaga oḳol tarar duio souḳor nishana, shinghoe zela ḳaf doria zonglat boy lukaia, duki zonre dorar lagi tara-o ola boy, doria tare ṭania ani fando harai toy.
PSA 10:10 Fando harai norom ḳori fishia surmar ḳore, oshohae-obaga zon tarar nokur tabat foṛe.
PSA 10:11 Mone mone ḳoy tara, “Allae ita deḳoin na, tan muk to lukailisoin, itar baedi sain-o na.”
PSA 10:12 O Mabud zoldi ao, tumar atḳan baṛao, duki-ḳangalre na fauria zan ḳan basao.
PSA 10:13 Naformane ḳene ḳore Alla Pakre elami? Mone mone ḳene ḳoy, “Tain hishab loiba ni?”
PSA 10:14 Otoso tumi to duḳ-mosibot deḳrae, erar zimmadari tumar ator ḳobzae. Oshohae zone to tumar ato-u nizore shofe, tumar gese-u asroy fae etim-miskine.
PSA 10:15 Naforman bojjator bol oḳon bangilao, tarar hoḳol bod ḳamor hishab tumi loilao.
PSA 10:16 Sirodin siroḳal Mabud-u oila bashsha, tan zomin taki bidormi zati shorbonash oiba.
PSA 10:17 Mabud go, ḳangal-dukir asha tumi fura ḳoro, tarar mono shaosh zugai dilor foriad huno.
PSA 10:18 Etimor bae sao go Alla, bisar ḳoro shob zalimor, ḍor deḳani bond ḳorilao maṭir foyda manushor.
PSA 11:1 Gan-baznar forisaloḳor lagi: Hozrot Daudor mizmor. Ami to Mabudor gese-u asroy loisi, te tumra ḳene amare ḳoirae, “O faki, tumar asroy faṛedi bagia zao.
PSA 11:2 Bojjator dole donukre furafur zuit ḳori dorse, shorol manshore andarit marto ḳori tir lagaise.
PSA 11:3 Bangia foṛi zae zudi shomazor mul filar, ila oile kita ḳorbo zara forezgar?”
PSA 11:4 Mabud to roin tan fobitro mukamo, tan arosh-kursi boail ase asmano, adom zatire raḳoin tan sokur nozoro.
PSA 11:5 Bala-bura hoḳolre zasai koroin Mabude, zalim oḳol tan dushmon, gin ḳoroin tarare.
PSA 11:6 Bojjator ufre ḍaliba tain zalail gondoḳ ar angra, gorom agunir gulla-u oibo tarar ḳani-fani hamesha.
PSA 11:7 Mabud nize forezgar, fosond ḳoroin forezgarre, hok-nikut bondae faiba tan mukor didarre.
PSA 12:1 Ebadot-bondegi forisaloḳor lagi: shur ‘Sheminit’. Hozrot Daudor mizmor. O Mabud, zane basaukka, oḳon ar nai kunu ashik bonda, adom zatir maze hok kunu zon tukaia miler na.
PSA 12:2 Forteḳe-u eḳe-oinne misa mat mate, ḳali fam-foṭṭi mare ar munafiki kore.
PSA 12:3 O Mabud, fam-foṭṭi marra hokkol ṭuṭ ḳaṭia falao, boṛai-beṭagiri deḳaorar zifra tumi kaṭilao.
PSA 12:4 Tara ḳoy, “Zitimu nichchit amrar zifrar bole, ar ḳegu oibo saloḳdar nizor ṭuṭ taḳte?”
PSA 12:5 “Gorib-dukir zulum dekia ami Mabud ubaimu, nirufayor dilor ḳandon ami nichchit hunimu. Shay-shantie din ḳaṭaito zara dile-zane sae, tarar asha ḳormu furon ami Allae.”
PSA 12:6 Mabudor zobano to kunu ḳad nai, ḳosṭi-fattoro zela rufa oy zasai, shatbaror aguindi saf ḳora rufa, tan zoban ḳaṭi nikut-nikad ola.
PSA 12:7 O Mabud, tumi nichchoy amrar bae saibae, ola manshor at taki siroḳal basaibae.
PSA 12:8 Naforman-bojjate zebla sairobaedi gure, adom zatir maze obola ḳarafi ḳam baṛe.
PSA 13:1 Ebadot-bondegi forisaloḳor lagi: Hozrot Daudor mizmor. O Mabud, ar ḳotodin? Tumi amare siroḳal-u fauria roitae ni? Tumar fobitro muk kan ar ḳotodin amar ges taki lukai raḳtae?
PSA 13:2 Ar ḳotodin ami monor sintar bar, dilor ḳoshṭor buza fortidin shoitam ni? Amar dushmon oḳol ḳotodin amar ufre nasito?
PSA 13:3 O Alla, amar baedi sao, Mabud go, amar minotir zuaf deo, amar souko bol-rushoni deo, arnae ami hoyto aḳeri gumo foṛizimu.
PSA 13:4 Bade dushmone ḳoiba, “Oḳon to amra ziti gesi,” ar ami oshohae-mazur bonigele amar birudi oḳole to furti-amud ḳorba.
PSA 13:5 Oile ami borosha ḳori tumar doyar ufre-u, tumi zan basaibae, otar lagi amar dil kushie borigese.
PSA 13:6 Ami Mabudor name gozol gaimu, amar balai to tain-u ḳorsoin.
PSA 14:1 Gan-baznar forisaloḳor lagi: Hozrot Daudor mizmor. Beaḳole mone mone ḳoy, “Alla bolte ḳeu nai.” Ashole tara bedin-beiman, ḳorer ḳali zogoinno ḳam, hok kam ḳore ila ḳeu nai.
PSA 14:2 Arshe-azim taki Alla Pake adom zatir bae sain, saia deḳoin, hasaror aḳoldar kunu manush ase ni, Allar ashik-deoana ḳeu ase ni.
PSA 14:3 Tain deḳla, hoḳol manush be-foti oigese, hokkol eḳloge naforman bonigese, hok kam ḳore ila ḳeu nai, eḳzon-o nai.
PSA 14:4 Ou bojjat oḳlor maze kunu aḳol nai ni? Manshe zela ḳana-ḳaiddo ḳain, tara ola amar bondare ḳailae, Alla Mabudor nam-o ae na tarar mukedi.
PSA 14:5 Tara ḍoror suṭe tor-toraia ḳafiba, Alla Pak to tan ashikor maze boshot ḳoroin.
PSA 14:6 Tumrar sinta oilo binash ḳora duki-kangalor asha-borosha, oile Mabud-u tarar asroy ṭikana.
PSA 14:7 Boni Israilor basar fot Sion faṛ taki lamia auk! Mabude zebla tan proza oḳlor halot bodlaiba, Iakubor ḳandane ou shomoy furti-amud ḳorba, Boni Israile kushir shukur-guzari gaiba.
PSA 15:1 Hozrot Daudor mizmor. O Mabud, tumar dorbaro meman oar ḳe zoiggo, kun manush tumar fobitro faṛo roar zoiggo?
PSA 15:2 Ze zone nikut zindegi kaṭae, nek amole din guzrae, zar dil taki hok mat bar oy.
PSA 15:3 Oinno manshor bodnam ze zone gae na, tar kunu dustor ḳeti he ḳore na, ari-forir durnam-o he roṭae na.
PSA 15:4 Ku-foti naforman taki horia roy ze, borong Allar fiara bondare ijjot ḳore he, ar nizor ḳeti mania-o oada furon ḳore.
PSA 15:5 Ṭeḳa-foysha ḳorzo dey shud na loia, ni-oforadir fokko loy gush na ḳaia. Ou laḳan amole sole zei zon, kunudin-u gabṛito nae hou sadu mon.
PSA 16:1 Hozrot Daudor foriad. Tumi amare hefazote raḳo Alla go, ami to asroy loisi tumar-u dorbaro.
PSA 16:2 Mabudre ḳoisi ami, “Amar-u munib tumi, tumi saṛa nai to balai ami nichchit zani.”
PSA 16:3 Zominor forezgar bondain tumar sokut ijjoti, tarar loge-u amar dusti ar firiti.
PSA 16:4 Oile Alla saṛa oinno nam zeta zone loy, tarar boṛo duḳ-mosibot baṛibo nichchoy. Zetar name dey tara bolir lou bilaia, itar nam to loitam nae amar muke dia.
PSA 16:5 Mabud-u amar don, amar fiasor fani, amar ḳofal ase to tan ato-u zani.
PSA 16:6 Amar baṭo foṛse zeta doulotor shimana, mirashdari dekia souke dil deoana.
PSA 16:7 Mabudor shukria zanai! Buddi-foramish to dein tain-u amare, raitor bala hushiar raḳe amar bibeḳe.
PSA 16:8 Amar souk hamesha roy Mabudor bae ḳali, tain-u amar ḍain galat, alitam nae ami.
PSA 16:9 Te kushie bora amar dil, furti korer foran, amar ḳayae borosha faia ḳore shanti-aram.
PSA 16:10 Amare falaitae nae tumi goin fatalo, tumar ashik bondar koy nai to ḳoyboror gato.
PSA 16:11 Deḳairae zindegir fot amare tumi, tumar didaror maze ase furafur furti, tumar ḍain ḳandat ase siroḳalin shuk-shanti.
PSA 17:1 Hozrot Daudor dua O Mabud, tumi hok foriad huno, amar minotir bae kial ḳoro, amar dua kobul ḳoro go tumi, amar muko nae kunu sol-soturi.
PSA 17:2 Amar hok insaf tumar arosh taki auk, tumar fobitro souke hok-halalir bae sauk.
PSA 17:3 Tumi amar dilor ḳobor loile, raitor bala-o zasai korle, hunaror laḳan tukaile-o ḳad faitae nae, niot ḳorsi mukdi to gunar ḳam ḳortam nae.
PSA 17:4 Manshe zela ḳore bod ḳam ami ila ḳori na, zalimor fot horaia toi tumar fak buli hunia.
PSA 17:5 Amar faore shokto ḳorsi tumar foto roito, loṛse na mor fao dukan eḳ sul foriman-o.
PSA 17:6 Alla tumi hunbae ḳori-u tumare ḍakiar, ḳan fatia huno bondu foriad amar.
PSA 17:7 Ḳoto asanoḳ deki ami tumar doya-maya, ou minoti koro kobul ogo doyal Alla, basar lagi tumar gese asroy loy zara, dushmon taki basao tare tumar ḍain at dia.
PSA 17:8 Sokur moni zela nirafod ola raḳo amare, amare lukao tumar ḍaḳnar tole.
PSA 17:9 Marar lagi zeguin aia berilisoin more, ola zalim-bojjat taki basao amare.
PSA 17:10 Tarar oshaṛ dilor duar tala mari raḳe, tarar zoban bora ḳali beṭagirir mate.
PSA 17:11 Ḳore ḳore aia tara berilise more, maṭit falai marto ḳori koṛa nozor raḳe.
PSA 17:12 Shikari shinghoe zela ḳaf doria roy bono, tara ola lukai boise amar zan nito.
PSA 17:13 Ao go Mabud, zalimre aṭḳaia maṭit hutailao, tumar kudroti toluar dia amare basao.
PSA 17:14 Tumar ate basao Mabud ota manush taki, duniakuror ḳobza taki zan basao tumi. Tarar monor asha ḳali ou zogotor ufore, tarar feṭ borao tumar lannoti gozobe. Ota ḳaia tarar aolade feṭ borilauk, otar huruttar lagi baki ongsho besh ḳori toia zauk.
PSA 17:15 Oile ami zanu ni-oforadi roi tumar dorbaro, hozag oia shad miṭaia roimu tumar didaro.
PSA 18:1 Ebadot-bondegi forisaloḳor lagi: Mabudor bonda Hozrot Daudor mizmor. Mabude zebla bashsha Talut ar bad-baki hoḳol dushmonor at taki Daudre hefazot ḳorla, ou shomoy Daude Mabudor name ou mizmor gaila. O Mabud, amar bol-shokti, ami tumar-u ashik.
PSA 18:2 Alla-u amar nirafod minar, amar zan basanir malik, amar Mabud, amar faṛ, tan sayat asroy loisi. Zuddor moydano tain-u amar ḍal, zan basanir bol-takkot, amar asroy mukam.
PSA 18:3 Gunogan faoar laḳ Mabudor nam loimu, teu dushmonor at taki ami zane basimu.
PSA 18:4 Moronor doṛie fesailisil amare, shorbonasha futor fanit ḍubailisil more,
PSA 18:5 Fatalor doṛi dia oisil more banda, amar lagi oisil ḳoyboror gat kuda.
PSA 18:6 Olaḳan bifodo foṛia Mabudre ḍakilam, zure zure tan shaijjo ami mangilam, tain nizor arosh taki hunla amar ḍaḳ, tan dorbaro azilo amar foriad.
PSA 18:7 Asta dunia ḳafia tor-torani dorlo, faṛ-ṭillar bit oḳol loṛa-soṛa ḳorlo, gusar aguine tan itae to ḳafilo.
PSA 18:8 Naḳedi bar oilo tan gusar gorom duma, muk taki ailo tan agunir lukka, aro to bar oia ailo zalail angra.
PSA 18:9 Asmanre lamaia tain tole lamia aila, tan ḳodomor tole asil gono ḳala megor saḳa.
PSA 18:10 Tain Karubir ufre soṛia uṛal dila, batashor ḍaḳnat bor dia uṛia aila.
PSA 18:11 Tain andairor bitre nizore aoṛ ḳorilla, gono megor saḳae tan fobitro tambu gurilla.
PSA 18:12 Nuror zilkie tan andair meg hori gelo, megor hil ar zalail angra zomino foṛlo.
PSA 18:13 Mabude asman taki gorzia uṭila, Allatalae tan golar aoaz hunaila.
PSA 18:14 Tan donukor tir maria dushmonre sitrailla, megor zilkanie tarare befana banaila.
PSA 18:15 Tumar domoḳe ar naḳor shashe, Mabud go, doriar muror fanir fut oḳol deḳa dilo, zogotor mul bit oḳol-o udla oigelo.
PSA 18:16 Ufre taki at baṛaia tain more dorla, goin fani tone amare ṭania tulla.
PSA 18:17 Basaila amare tain foyluan dushmon taki, basaila dushmon-rifu oḳlor ḳobza taki, zetar bol-takkot to amar taki-o bout beshi.
PSA 18:18 Amar mosibotor dino-o tara more marat aila, oile Mabud Alla to amar shohae oila.
PSA 18:19 Kula moydano tain amare bar ḳori anla, amar ufre kush oae amare basaila.
PSA 18:20 Mabude dila amar forezgarir bodla, amar ator nek kamor boḳshish tain dila.
PSA 18:21 Mabudor fote-u solchi ami, ḳorsi na naformani, ila ḳam ḳorsi na zetae horae Allar didar taki.
PSA 18:22 Tan tamam hok-foysala amar sokur ayna, ami to tan hukumor kunu ḳelaf ḳorsi na.
PSA 18:23 Tan nozoro ami nikut roisi hor-hamesha, guna-naformani taki nizore raḳsi horaia.
PSA 18:24 Erdae Mabude amar forezgarir disoin furushkar, amar nek kam dekia tain ḳorsoin ou bisar.
PSA 18:25 Doya-maya ḳorrare tumi-o doya-maya ḳoro, ḳaṭi bondar loge tumi-o ḳaṭi ro.
PSA 18:26 Nirbezalir bae tumi-o nirbezal, ar ḳominre deḳao tumar fesor fand.
PSA 18:27 Norom dilor manshore tumi-u basao, oile boṛai-gorima deḳaorare toledi lamao.
PSA 18:28 Ḳali tumi Allae for ḳoro amar mushalre, amar Mabude uzila ḳoroin amar andairre.
PSA 18:29 Tumare loge loia dushmonor sifai dolre araimu, amar Mabudor loge usa deoal-o faldi faroimu.
PSA 18:30 Tain-u Alla, tan fot to nikut, Mabudor zoban okkoy. Tan gese zoto zone asroy loin, tain-u tarar zan basanir atiar oin.
PSA 18:31 Ḳali Alla saṛa ar dusra kunu Mabud ase ni? Amrar Alla bade dusra kunu asroy faṛ mile ni?
PSA 18:32 Allae-u amar ḳomro bol-shokti bandia disoin, tain to amar solar fot nikut ḳorsoin.
PSA 18:33 Tain amar faore disoin orinor laḳan hekmot, tain amare ṭikai raḳoin faṛia ḳoṭin ṭillat.
PSA 18:34 Tain-u amar atre laṛai ḳorar ḳola-ḳoushol hikain, erlagi amar ate fitolor tir-donukre-o beḳa ḳorilae.
PSA 18:35 Tumi amare zan basanir atiar dan ḳorso, tumar ḍain atdi amare doria raḳso, tumar deoa norom mone ami oisi boṛo.
PSA 18:36 Tumi amar solar fotre ḳorso shuza, erlagi amar fao to fislise na.
PSA 18:37 Amar dushmon dolor ḳore douṛaia itare dorsi, otar shorbonash na ḳoria ami firot na aisi.
PSA 18:38 Surmar ḳorsi tarare, ubaito ar farto nae, fishisi tarare amar faor tolae.
PSA 18:39 Zuddor lagi tumi-u amar ḳomro bol-shokti bandia diso, amar birudi sifaire amar faot falaiso.
PSA 18:40 Tumi amar dushmon dolre bagaiso samon taki, amare zetae ingshain ami tarar binash ḳorsi.
PSA 18:41 Basar lagi tara sillaisil, basanit ḳeu aisil na, Mabudor gese shaijjo saisil, tain-o ita hunla na.
PSA 18:42 Ami itare maria duil-balur laḳan batasho uṛailam, fotor bada-sadar laḳan itare horaia falailam.
PSA 18:43 O Mabud, manshor gonḍogul taki tumi-u basaiso amare, amare saloḳdar banaiso hoḳol zatir ufre, oḳon amar kezmot ḳorer osina zatie.
PSA 18:44 Amar nam hunle-u tara aioin amar tole, bin-deshi oḳole amar gese minot-ḳajji kore.
PSA 18:45 Hou bin-deshi oḳol nirash oia zae, tara bankar taki bar oia ḳafi kafi ae.
PSA 18:46 Mabud to zinda! Amar asroy faṛor tarif ouk! Amare basaora Allar ijjot-tazim baṛouk!
PSA 18:47 Zati oḳolre zein amar odine anoin, tain-u Alla, amar fokko loia tarare bodla dein.
PSA 18:48 Dushmonor at taki zein amare basain, tumi-u Alla, bifokko oḳlor ufre tumi-u amare tulcho, ingsha-gonḍogul ḳorrar at taki tumi amare basaiso.
PSA 18:49 Erlagi O Mabud, hokkol zatir gese ami tumar tarif ḳormu, hamesha tumar fak namor gunogan gaimu.
PSA 18:50 Mabude tan bashshare bout bar moha joyi ḳorsoin, tan ḳelafoti faoa bashsha Daud ar tan ḳandanre hor-hamesha doya-mayat raḳsoin.
PSA 19:1 Gan-baznar forisaloḳor lagi: Hozrot Daudor mizmor. Asman oḳole boyan ḳore Alla Pakor mohima, san-shuruz groho-terae deḳae tan lila-ḳela.
PSA 19:2 Dine dine gae tan zalal ar shan, raite raite hikae tan aḳolor boyan.
PSA 19:3 Nai kunu mat-ḳota nai kunu buli, aoaz-shur zae na huna erar muko taki.
PSA 19:4 Ta-o tarar aoaz mile duniai zuṛi, fub fosim uttor dokkin hara zogot bori. Gaṛila Allae ono shuruzor boshot gor, tambur maze roia shuruz ḳore zogot for.
PSA 19:5 Bashor taki bar oin zela noya biati daman, douṛai douṛai furti koroin zoyi zonor laḳan.
PSA 19:6 Asmanor ek kinar taki zain arok kinaro, iṭar gorom taki shaiddo nai kunu kichchu lukaito.
PSA 19:7 Allar deoa hedayot furafur nikut, bondar zanre ḳore ikan tortaza mozbut. Allar forman hok ar shoṭik siroḳal boail, be-aḳol zonre banae furafur aḳoldar.
PSA 19:8 Allar deoa niom-niti shoṭik hamesha, monor maze zugae itae kushir fuara. Allar hukum-ahkam to kula-mela forishkar, uzila ḳore itae dilor souk amrar.
PSA 19:9 Allar ḍor-ḳof to nikut, hor-hamesha zari, furafur shoṭik ray dein hok-insafḳari,
PSA 19:10 shuna taki-o bout dami, mulloban ar ḳaṭi, mousaḳor fuṭa foṛa mou taki-o mishṭi.
PSA 19:11 Tumar i gulame ota hunia hushiar roy, amol ḳorle ita nichchoy bout fayda oy.
PSA 19:12 Bondae kunu nizor bul nize-u buze ni? Bekiale ḳora gunar lagi ami mafi mangi.
PSA 19:13 Monor gorimae ḳora guna taki basao amare, itae zanu ḳobza ḳorto na fare more. Teugi ami nekkar bonda bonitam farmu, boṛo boṛo guna taki mor zan basaimu.
PSA 19:14 Toraneala O Mabud, amar asroy ṭilla, dilor dian mukor zoban kobul ḳoro go Alla.
PSA 20:1 Ebadot-bondegi forisaloḳor lagi: Hozrot Daudor mizmor. Mosibotor shomoy Mabude tumar foriad hunoukka, Iakubor Allar nam tumare sohi-salamote raḳoukka.
PSA 20:2 Tan fak mukam taki tumar lagi shaijjo faṭaukka, fobitro Sion taki tumare bol-takkot deukka.
PSA 20:3 Tain tumar hoḳol lilla-sodgare mono raḳoukka, kobul ḳoroukka tumar zalail kurbani. (Sela)
PSA 20:4 Tumar dilor arzire kobul ḳoroukka, monor asha oḳol furon ḳoroukka.
PSA 20:5 Tumi zoyi oile amra kushi-bashir gozol gaimu, amrar Allar name janḍa uṛaimu, Mabude tumar hoḳol minoti furon ḳoroukka.
PSA 20:6 Ami to oḳon zani-u, Mabude tan nizor ḳelafoti faoa zonre basaiba. Tan afon ḍain ator bol-takkote zuddot zitaiba, nizor fobitro arosh taki en minoti hunba.
PSA 20:7 Ḳeuror borosha oilo tar zuddor rot, ar ḳeuror borosha tar guṛaintor ufre, amrar borosha ḳali amrar Alla Mabudor ufre.
PSA 20:8 Tara to unda oia leṭizain, oile amra shida oia hamesha ḳaṛa roi.
PSA 20:9 O Mabud, bashshare zoyi koroukka, amrar ḍaḳ hunia zuaf deukka.
PSA 21:1 Gan-baznar forisaloḳor lagi: Hozrot Daudor mizmor. O Mabud, tumar bol-takkote bashshae kushi korra, tumi zuddot zitanie tain kub kushi-bashi korra.
PSA 21:2 Tan monor asha tumi furaiso, tan mukor abdarre tumi firai diso na. Sela
PSA 21:3 Bout rohom-borkot loia tumi tan gese aiso, ḳaṭi shunar mukuṭ-taz tan matat findaiso.
PSA 21:4 Bashshae tumar dorbaro saila zindegi, ar tanre dilae tumi siroḳalor hayati.
PSA 21:5 Tumar deoa zoye baṛaise tan ijjot, gourob-mohima diso tane tumar-u rohomot.
PSA 21:6 Tanre diso tumi siroḳalin borkot, tumar fak didaro diso tanre kushir niamot.
PSA 21:7 Bashshae to Mabudor ufre-u borosha ḳoroin, Allatalar doya-mayae tain mozbut roin.
PSA 21:8 O bashsha, tumar ate dushmon falre dorbo, ḍain ate tumar birudire tallash ḳori anbo.
PSA 21:9 Tumi aibar ḳalo itare agunir kunḍoli banaibae, aguine tarare a ḳori gilbo Mabudor gusae.
PSA 21:10 Dunia taki miṭailibae itar aolad oḳlor nam, Adom zat taki fusilibae tarar shob ḳandan.
PSA 21:11 Tumar bifokke ku-motlobe fand fatise tara, tarar ita hoḳolta-u oibo beḳama.
PSA 21:12 Tarar mukre nishan ḳoria tumar donuko marle ṭan, fiṭ guraia bagia tara basaito saibo zan.
PSA 21:13 Tumar bol-shokti zair ḳoro ogo amar Alla, gan-baznae gaimu amra tumar lila-ḳela.
PSA 22:1 Gan-baznar forisaloḳor lagi: ‘Biankur horini’ shure. Hozrot Daudor mizmor. O amar Alla, amar Moula, tumi kene amar log saṛi dilae? Amare na basaia amar ḳandon na hunia ḳene duroi horia roilae?
PSA 22:2 O amar Alla, ami dinor bala ḍakilam tumi kunu zuaf na dilae, raitor bala-o na ḍakia ami roi na nirai.
PSA 22:3 Oile tumi-u to fak-fobitro, Boni Israilor gaoa proshongsha-tarif-u tumar raz-godi.
PSA 22:4 Amrar moy-murobbie tumar ufre ekin raḳsoin, tara tumar ufre borosha ḳorae tumi-o tarare basaitae.
PSA 22:5 Tumar dorbaro foriad ḳoria zan-man basaita, tara borosha ḳoria to shorom faisoin na.
PSA 22:6 Oile ami to manush nae, ḳali elamir ek kiṛa-fuk, manshe amare loia ḳauri kae ṭaṭṭa ḳoria siṛae.
PSA 22:7 Zoto zone amare deḳe, hokkole ṭuṭ bekaia ṭiṭkari maria ḳoy,
PSA 22:8 “He zebla Mabudor ufre ḳore borosha, te oḳon deki tain tare basaukka, tain zebla tar ufre kushi ar razi, oḳon tare rokka ḳoroin ni deki.”
PSA 22:9 Maʼr feṭo taki tumi-u amare zogoto anlae, maʼr dud ḳaoar shomoy-o amare borosha dilae.
PSA 22:10 Zonom taki amare tumar ato shofi deoa oise, maʼr feṭo taki-u tumi amar Alla.
PSA 22:11 Oḳon amare falaia tumi horia roio na, samne bout boṛo bifod, amare basanir dusra ḳeu nai.
PSA 22:12 Zongli bisalor falor laḳan tara amare berilisoin, Bashon deshor foyluan bolod oḳole amare aṭḳaisoin.
PSA 22:13 Gorzon ḳorra fashan shinghor laḳan tara, a ḳoria amare gililita saira.
PSA 22:14 Borbad fanir laḳan amare ḍalia falai deoa oise, amar asta shorilor aḍḍi-guḍḍir zuṛa suṭi gese, amar ḳoilja-gurda momor laḳan golia, feṭor at-boṛo hamaise.
PSA 22:15 Amar bol-shokti hukaia maṭir saṛor laḳan oise, ar zifra hukaia talut lagigese, tumi amare dula-balur ḳoyboro harai toiso.
PSA 22:16 Ḳobis oḳole amare kuttar falor laḳan berilisoin, amar at-faore gatilisoin.
PSA 22:17 Ami to amar hokkol aḍḍi gonitam fari, otae amar bae souk melia sai roisoin.
PSA 22:18 Tara nizor maze amar ḳafoṛ-sufoṛ baṭa-baṭi korse, amar kurtar lagi tara loṭari-o marse.
PSA 22:19 Oile O Mabud, tumi duroi horia roio na, O amar ḳanḍari, amare shaijjor lagi zoldi aguai ao.
PSA 22:20 Toluaror tol taki basao amar zan, ota kukror muk taki basao mor foran.
PSA 22:21 Shingho falor muk taki rokka ḳoro more, zongli bisalor darail hingre horao bout dure! Ou foriad hunia tumi amar zan basaiso,
PSA 22:22 te ami-o amar baiaintor gese tumar nam toblig kormu, shomazor maze tumar tarif-gozol gaimu.
PSA 22:23 Tumra zara Mabudor ḍor-ḳofe ro, tumra tan tarif-gozol gao. O Iakubor aolad oḳol huno, Mabud Elahire tazim ḳoro. Ebadot-bondegi koro tumra hoḳole, Boni Israilor hoḳol ḳandan ekḳano mile.
PSA 22:24 Duki zonor duk dekia tain horoin na, ḳangalre deḳle tain horia zain na, afon fak muk lukain na tarare deḳle, minot-ḳajji hunia tain shaijjo ḳorla tarare.
PSA 22:25 Tumar name moha mahfilo zoto tarif-gozol gai, tumare ḍoraora zonor samne mor mannot ḳormu adae.
PSA 22:26 Feṭ bora ḳani kaiba duki-ḳangal zone, Mabud Moular tarif gaiba tan ashik dole. Siroḳal zinda rouk ashikor ontor!
PSA 22:27 Zogotor hesh shimanar manshe-o touba ḳori firia aiba, zati oḳlor hokkol gusṭie Mabudor samne ḳorba soizda.
PSA 22:28 Raz-shinghashon nichchit Mabud Moular-u, tain-u hoḳol zatir ufre bashshai koroin.
PSA 22:29 Zogotor boloban oḳole ḳaoa-daoa ḳorba, tan samne aia ebadot ḳorba, ar zarar nizor zan basanir ufae nai, tara-o aia noto oia tanre soizda ḳorba.
PSA 22:30 Tan ebadot-bondegi korba samnor zugor ḳandane, Malik Moular ḳobor hunba hou zomanar hoḳole.
PSA 22:31 Bobishote zonom oibo duniait zarar, tarar gese zanail oibo ou kudroti karbar.
PSA 23:1 Hozrot Daudor mizmor. Amar Mabude amare faloin, amar to ar obab nai.
PSA 23:2 Ḳesma gasho tain amare hutain, aramor ḳalor faredi amare aṭain,
PSA 23:3 amar zanre tortaza ḳoroin, tan ijjotor lagi sohi fote amare salain.
PSA 23:4 Goin gono andarit aṭile-o ami ḍorai na, tumar atdi to amare doria raḳso, tumar muṭit to ase munib raḳalor laṭi-sulfi, ami ar ḍoraitam ḳene?
PSA 23:5 Dushmon dolor samne-u amare feṭ bori kaoaiso, amar matat kushboy tel maḳaiso, shorbotor fiala boria utlia foṛer.
PSA 23:6 O munib, tumar oshim maya-doya ar balai amar loge hara zibon roibo, ami siroḳal Mabudor goro boshot ḳormu.
PSA 24:1 Hozrot Daudor mizmor. I zogot ar zogotor hokkolta-u Mabudor, dunia ar duniar bashinda oḳol to tan.
PSA 24:2 Tain doriar fanir ufre duniar bit boail ḳorla, gang-kalor ufre ian kuṭi boaila.
PSA 24:3 Ḳe gia Mabudor faṛor ufre uṭito, tan fak-fobitro mukamo kun jon ḳaṛa roibo?
PSA 24:4 Hou zon-u to, zar at ni-oforadi, zar dil fak-saf; he zogotor maya zalo bondi nae, ar ṭogaṭogir niote ḳosom ḳae na.
PSA 24:5 He-u faibo Allar torof taki rohom-borkot, tar zan basaora malikor ges taki be-ḳosur ḳalas faibo.
PSA 24:6 Era-u oila tan ashik bondar dol, tumar didar faito sae, O Iakubor Alla. (Sela)
PSA 24:7 O geiṭ oḳol, mata usa ḳoro, usa oizao, O sirostayi duar oḳol, zalal-shanor bashshae toshrif anilaukka.
PSA 24:8 Ou zalal-shanor bashsha ḳe? Boloban ar foyluan Mabud, laṛai-zuddot foyluan Mabud.
PSA 24:9 O geiṭ oḳol, mata usa ḳoro, usa o, O sirostayi duar oḳol, zalal-shanor bashshae toshrif anilaukka.
PSA 24:10 Zalal-shanor ou bashsha ḳe? Sifai dol oḳlor kamanḍar Mabud, tain-u zalal-shanor bashsha. (Sela)
PSA 25:1 Hozrot Daudor mizmor. O Mabud, amar zanre tumar dorbaro dilaisi shofia,
PSA 25:2 ḳali tumar ufre-u borosha ḳori, ogo amar Alla. Shorminda ḳorio na more dushmonor samne, bahaduri na ḳorouk tara amar ufre.
PSA 25:3 Tumar ufre ḳore zara asha-borosha, tarar mazor kunu zon oito nae to shorminda, shorom faibo tara, ḳamoḳa beimani ḳore zara.
PSA 25:4 O Alla, tumar fot oḳol amare sinao, tumar shoṭik rasta amare deḳao.
PSA 25:5 Tumar hoke amare salao ar hikao, amar zan basanir malik to tumi-u, hor-hamesha tumar ufre asha raki.
PSA 25:6 Ogo Mabud, iad ḳoro tumar doya-maya, shuru taki to ebo ḳorat aso ota.
PSA 25:7 Amar zuan ḳalor guna-naformani na rakio mono, O go Mabud, tumar doya-mayae more iad ḳoro, tumar oṭol meherbanir ḳatire tumi ola ḳoro.
PSA 25:8 Mabud to doyalu, oti hok tain, erlagi gunagarre-o tan fot sinain.
PSA 25:9 Hok fote salain tain norom dilor manshore, tan fot deḳai dein tara hoḳolre.
PSA 25:10 Tan oada-chukti hukum-ahkam mania sole zara, tarar lagi tan fot oḳol hok ar doyae bora.
PSA 25:11 Bout bod ḳam naformani ḳorilisi ami, tumar namor duai go Mabud, dilao more mafi.
PSA 25:12 Mabudre hasau ḍoraia soler ola adom ḳe? Kun fot basia nito, Mabude-u deḳain tare.
PSA 25:13 Shuk-shanti arame ḳaṭain tarar zindegani, tarar aolade-o faiba deshor mirashdari.
PSA 25:14 Mabudor ḍor-ḳofe zara zindegi ḳaṭain, tarare-u tan dilor gufon ḳota zanain, tan oada-chuktir befar tarare hikain.
PSA 25:15 Amar souke hor-hamesha Mabudor bae sai roise, shikarir zal taki tain basain amar faore.
PSA 25:16 Rohom ḳoro tumi more, amar baedi saia, ami oilam duki-ḳangal, asi boṛo eḳla.
PSA 25:17 Amar dilor duḳ-zontrona dilao horaia, hokkol bala-mosibot taki raḳo basaia.
PSA 25:18 Deḳo mor duḳ-mosibot behalot dosha, maf ḳoria dilao mor zindegir guna.
PSA 25:19 Deḳrae ni ḳoto dushmon lagse amar ḳore, tara sorom ingsha-ginna ḳorer amare.
PSA 25:20 Fana deo amare, basao amar zan ḳan, asroy loisi tumar gese, raḳo amar man-shomman.
PSA 25:21 Hok-halali shorolota ḳorouk amare rokka, ami to tumar-u ufre ḳorsi borosha.
PSA 25:22 O go Alla, ḳalas ḳoro Boni Israilre, tarar hoḳol mosibot taki basao tarare.
PSA 26:1 Hozrot Daudor mizmor. Ami zen nirdushi Mabud, tumi ta ḳoro go zair, ami to hok fote-u soliar, Mabudor ufre-u borosha ḳoriar, bodlaitam nae niot amar.
PSA 26:2 Mabud go, amare azmaia deḳo, amar dil forikka ḳoria zasai ḳoro.
PSA 26:3 Tumar doya-maya to amar sokur samne, ami soli tumar deḳail hok fote.
PSA 26:4 Misa matrar aḍḍat ami boi na, beiman-munafikor daro ḳase zai na.
PSA 26:5 Ḳobis-naformanor shong taki horia roi, bojjat oḳlor aḍḍat ami na boi.
PSA 26:6 Ḳalasor ray faia go Mabud, at doisi ami, tumar gor toaf ḳoria adae ḳori kurbani.
PSA 26:7 Zure zure tumar shukria zanairam, tumar hokkol keramotir ḳota ḳoiram.
PSA 26:8 Mabud, tumar boshot gor ami balobashi, ze zagat tumar gourob-mohimar boshoti.
PSA 26:9 Gunagaror loge amar zan na nio, kuni oḳlor loge amar moron na dio.
PSA 26:10 Tarar ato ase ḳali naformani, ḍain at bora tarar gushor ṭeḳadi.
PSA 26:11 Ami to soli hok-halal fote, doya-maya ḳoria ḳalas ḳoro more.
PSA 26:12 Homan zagat mozbut ase amar duio fao, Mabudor tarif ḳormu ami moha mozliso.
PSA 27:1 Hozrot Daudor mizmor. Mabud-u amar rushni, amare basaneala, ami ḳare ḍoraitam? Mabud-u amar asroy ṭikana, ḳar ḍore ami ḳafitam?
PSA 27:2 Amare gilibar lagi naforman oḳol, aguia ae zebla ou dushmon dol, ou shomoy usṭa ḳaia tara foṛi zae, foṛi zaoae tara bifol bonizae.
PSA 27:3 Shena bahinie zudi berilae more, amar dile ḍoraito nae tarare. Amar birudde zudi zuddo lagae, ami to roimu tumar-u boroshae.
PSA 27:4 Mabudor gese amar ou minoti zanai, tan dorbaro ḳali otoḳan-u sai— roitam sai ami Mabudor goro, amar hara zindegi ḳaṭouk hono, tan shundor surot ḳan ami zanu deki, tan mukamo roia ami zikir ḳori.
PSA 27:5 Mosibotor dino tain-u to more lukaia raḳba tan asroy bankare, tulia raḳba more faṛor usa ṭillat, nirafode raḳba more tan boshot ḳanat.
PSA 27:6 Ou shomoy more beria raḳse zeta dushmone, amar ijjot baṛibo ota zonor ufre. Kushir suṭe zure zure gozol gaimu ami, tan goro dan ḳormu lilla-kurbani, baznar tale tale tan name gaimu ami, usa golae gaimu ami gozol-ḳaoali.
PSA 27:7 Amar aoaz huno Mabud, ḳori minoti, doya ḳoria amar ḍaḳor zuaf deo tumi.
PSA 27:8 Tuma taki ou kalam dilo aise mor, “Amar ashik bonia tumra tallash ḳoro mor didar.” Mabud go, erlagi-u tumare ḍakiar,
PSA 27:9 na lukaia deḳao go amare muk kan tumar. Gusa ḳoria ḳedai dio na tumar i gulamre, tumi-u amar borosha, horai dio na more, saṛia zaio na tumi amare falaia, Mabud go tumi-u ḳali amar basaneala.
PSA 27:10 Ma-bafe amare falai dile-o, Mabude to loisoin more tan-u kulo.
PSA 27:11 O Mabud, tumar afon fot sinao amare, shorol fote salao more, basao dushmon tone.
PSA 27:12 Dushmon dolor morzir ato dio na shofia, misa shakkir dol aia dome dome saṛer ingsha.
PSA 27:13 Amar mozbut ekin ase monor bitre, Mabudor asan deḳmu ami zinda halote.
PSA 27:14 Mozbut o Mabudor ashae, ore zan amar, dilor maze shaosh ano, ro ashae Mabudor.
PSA 28:1 Hozrot Daudor mizmor. O Mabud amar asroy faṛ, tumare ḍakiar, amar lagi bond ḳorio na duio ḳan tumar, nirai roile tumi amar lagia, roshatolo zaorar laḳan oibo mor dosha.
PSA 28:2 Ami zebla tumar gese zure zure ḳandi, tumar ḳas pak zagar bae duio at tuli, ou shomoy hunio go doyal amar minoti.
PSA 28:3 Naforman bodḳuror loge ḳori nio na more ṭania, tara muke muke deḳae bala dilo ḳarafi rakia.
PSA 28:4 Tarar ḳam mafik fol tarare deo, tarar ḳaraf ḳamor fol tarare deo, tarar ator bod ḳamor bodlai tarare deo, tarar faona shoṭik shaza tarare dilao.
PSA 28:5 Mabudor ḳam-ḳaz tarar dilo zaga na fae, tan ator ḳamor bae tarar kunu kial nae, erlagi Mabude itare ḳoriliba surmar, bade kunu din-u itare goṛita nae ar.
PSA 28:6 Hoḳol tarif-gunogan ḳali Mabudor, tain-u to hunchoin minoti mor!
PSA 28:7 Mabud amar bol-shokti, zan basanir atiar, tan ufre borosha ḳore dil-zan amar, tan shaijjo faia hari kushie borse mor dil, amar golae shukria zanai ḳori tan zikir.
PSA 28:8 Mabud-u to bol-shokti tan afon prozar, tan ḳelafoti faoa zonor zan basanir bankar.
PSA 28:9 Tumar afon prozare tumi basao go, tara tumar don-doulot, rohom-borkot deo, tumi to tarar raḳal, siroḳal boia neo.
PSA 29:1 Hozrot Daudor mizmor. O firista oḳol, zanao Mabudor gunogan, gourob ar bol-shoktir ḳota zanao tan,
PSA 29:2 Mabudor name tan faona gourob zanao, fobitrotar haze hazia soizdat foṛi zao.
PSA 29:3 Mabudor golar aoaz doriar ufre zari ase, boṛai-shanor Allar gorzon baz foṛar laḳan ḍaḳe. Allar hunkar zari ase goin doriar ufre.
PSA 29:4 Mabudor golar aoaz bout boloban, tan golar aoaz oti mohan.
PSA 29:5 Mabudor golar shure debdaru gas bangizae, Lebanonor debdaru gas-o bangia foṛizae.
PSA 29:6 Tan shure basuror laḳan nase Lebanon, zongli boyrar baichchar laḳan falae Sirion.
PSA 29:7 Tan golar aoaz hunia, asman uṭe zilḳaia.
PSA 29:8 Mabudor golar shure morubumi kafia uṭe, Kadesh deshor morubumi kafain Mabude.
PSA 29:9 Elon gas-o alizae Mabudor aoaz hunia, zonglar fata-sata foṛi zae siṛia, Kaba goror hoḳole ḳoy, Subohan Alla!
PSA 29:10 Moha boinnar fani asil Mabudor zimmae, siroḳalin bashsha tain, boisoin arosh ḳanae.
PSA 29:11 Bol-shokti dein Mabud tan afon prozare, shanti dia rohom ḳoroin tara hoḳolre.
PSA 30:1 Allar goror ian dibar ḳalo hozrot Daudor mizmor. Tumar tarif ḳormu Mabud tulia ancho more, dushmonre diso na shuzug furti korto mor ufre.
PSA 30:2 Ogo Mabud Alla zure zure fana saisi tumar dorbare, foriad hunia tumi-u bemar taki shifa ḳorso amare.
PSA 30:3 Fatal takia Mabud tulia ancho more, hamai geslam goin gato basaiso amare.
PSA 30:4 Mabudor ashik bondae gao tan gunogan, fak-fobitro zania tane shukur-guzar ḳoro tan.
PSA 30:5 Tan gusa roy na to beshi shomoy, hara zibon-u tan doya-rohom roy, raitor bala zae ḳali ḳanda-ḳaṭi kori, bian oite-u ae kushi ar furti.
PSA 30:6 Shudinor ḳalo ḳoislam to ami-u, amar binash oito nae kunu din-u.
PSA 30:7 Tumar rohomote Mabud faṛor laḳan mozbut ḳorse more, zebla tumar muk lukailae ḍor hamaise mor bitre.
PSA 30:8 Zure zure ḍaḳsi go Mabud ami tumare, doya mangisi ami amar Allar dorbare.
PSA 30:9 Ami zudi hamai zai goin roshatole, lab kita oibo tumar ami morigele? Murdar ḳayar duil-balue ḳorbo ni tumar gunogan, gaibo ni itae tumar hok-halalir boyan?
PSA 30:10 Hunia mor foriad Mabud rohom ḳoro more, shaijjo ḳoro ogo Mabud tumi amare.
PSA 30:11 Duk-koshṭor halot taki oḳon amare tulia ancho tumi-u more kushir mahfile, solar soṭor lebas mor tumi bodlaiso, kushi-bashir shundor lebas more findaiso.
PSA 30:12 Amar dile hor-hamesha gunogan gaibo tumar, shukria zanaimu siroḳal Alla Mabud amar.
PSA 31:1 Ebadot-bondegi forisaloḳor lagi: Hozrot Daudor mizmor. Asroy loisi go Mabud tumar sayae, more zanu na fae kunudin shorom-lojjae, tumar hok bisare rehai deo amae.
PSA 31:2 Amar minoti hunia zoldi basao more, faṛor shuṛong oia tumi basao amar zanre, asroy bankar o go tumi nirafode raḳo more.
PSA 31:3 Tumi amar asroy-shuṛong, mozbut bankar, fot deḳaia salao more duai lage tumar.
PSA 31:4 Lukaia fatail fando taki more ḳoro uddar, tumi-u ḳali amar asroy, amar bankar.
PSA 31:5 Amar ruhu tumar ato shofia dilailam, O Mabud, hok Alla, basaiso to amar zan.
PSA 31:6 Oshaṛ murtir pujarire ginnai ami, Mabudor ufre-u ami borosha ḳori ḳali.
PSA 31:7 Amar zanor shob mosibot behal dosha deḳso tumi, tumar doya-maya faia kushi-furti ḳormu ami.
PSA 31:8 Dushmonor ato tumi diso na more tulia, kula-mela maṭo more raḳso uba ḳoraia.
PSA 31:9 Doya ḳoro ogo Mabud mosiboto asi, souk ar deho-ḳayae kunumonte zita roisi.
PSA 31:10 Zindegi mor koy oilo duk-ḳoshṭoe ḳandi kandi, gunar dae bol ḳomia hukai gese mor aḍḍi.
PSA 31:11 Dushmon oḳole more ginnae, amar ari-forie-o nindae, sina-zana zone deḳle ḍoraia hore, douṛaia bage manshe fote-gaṭe deḳle more.
PSA 31:12 Murda zonor laḳan to faurilise more, banga-nosṭo malor laḳan mono ḳore amare.
PSA 31:13 Boutor ḳana-ḳani ami huniar, ḍor-ḳofe bora sairobae amar, amar birudde tara hoḳol ekḳano oise, zan ḳaṛia nitogi ḳori fondi korise.
PSA 31:14 Ami to borosha ḳorsi Mabud tumar ufre, tumi-u amar Mabud Alla zanai hoḳolre.
PSA 31:15 Amar hayati to tumar-u ato, ḳedaora dushmon taki hefazot ḳoro.
PSA 31:16 Tumar nuror didar deḳao ami gulamre, tumar afon doya-mayae basao amare.
PSA 31:17 Shorom dio na more Mabud zanai minoti, naformane shorom faia roshatole zaukgi.
PSA 31:18 Duio ṭuṭ bond oizauk beimani ze mate, boṛai-gorima deḳae zara forezgaror loge.
PSA 31:19 Tumar ashik bondar lagi zoma ase ḳoto doya, asroy loise zara tumar sayat aia, hoḳlor samne tarare deḳaiso tumar oto maya.
PSA 31:20 Tarare lukaia raḳo tumar-u pak didaro, dushmonor zifrar dafoṭ taki raḳo tumar boshot goro.
PSA 31:21 Mabud-u mubarok, dushmonor gerao ḳora nogoro, asanoḳ doya-mayae raḳsoin more nirafodo.
PSA 31:22 Ḍoror suṭe ḳoislam to ami, “Hori gesi duroi tumar nozor taki,” ami zebla ḍakislam shaijjor lagi, ḍakor zuaf dilae tumi hunlae minoti.
PSA 31:23 Mabudor ashik bono ore forezgar hoḳol bonda, hok manshore basaia tain ohonkarire dein ḳoṭin shaza.
PSA 31:24 Bukut shaosh raḳo dilo zugao bol, aso zoto Mabudor ashik bonda oḳol.
PSA 32:1 Hozrot Daudor maskil-ḳaoali. Nek-kofali ḳoy tarare, maf ḳora oise zarar naformanire, Mabud moulae zerar gunare amol-namar hishabo dorta naere.
PSA 32:2 Hou zon-o nek-kofali, Allae zar gunare ḳaṭi disoin ḳata taki, zar maze nai kunu dukabazi.
PSA 32:3 Touba ḳorslam na zebla amar gunar lagi, hara din kukai kukai koy oisil mor aḍḍi-guḍḍi.
PSA 32:4 Tumar ate zatia dorsil din-rait amare, ḳomi gesil mor ḳayar shokti Soit-maia gorome. (Sela)
PSA 32:5 Ami zebla touba ḳorlam tumar dorbare, oforad shikar ḳorlam lukailam na kunutare, ḳoilam ami zebla shikar ḳormu oforadre, loge loge-u mafi dilae tumi amar shob shazare. (Sela)
PSA 32:6 Te mosibotor ḳalo forteḳ forezgare dua ḳorouk tumar-u dorbare, moha boinna oile-o faito nae to tarare.
PSA 32:7 Mor lukanir bankar tumi, basaiso more mosibot taki, ami uddar faoae beria raḳso tumi mor sairobae kushir ḳaoali. (Sela)
PSA 32:8 Ami Allae talim dimu, tumare solar fot deḳaimu, ami to soukdi nozor raḳmu, aḳol-buddi tumare dimu,
PSA 32:9 gada kiba guṛar laḳan obuz oio na, itare shamlaite oy doṛi-lagam dia, na dile manto nae ita tumar kunu ḳota.
PSA 32:10 Naformanor lagi bout zala-zontrona ase, Mabudor ufre borosha ḳorle doya-mayae beria raḳe.
PSA 32:11 Mabudor name anondo-ullash ḳoro shob forezgar, zur golae gao gozol-git nikut dil zar.
PSA 33:1 Mabudor name gozol gao ore dindar bonda, nikut muminor ḳam oilogi shukur-guzar ḳora.
PSA 33:2 Dutarar tale tale shukria zanao tan, dosh taror bina bazaia ḳoro tan gunogan.
PSA 33:3 Mabudor name noya noya git boṛo golae gao, nikut ate tan niote bazona bazao.
PSA 33:4 Mabudor kalam to hok siroḳal, tan hoḳol ḳam hamesha hok-halal.
PSA 33:5 Forezgari ar hok-insaf Mabude fain bala, asta zogot bora ase tan doya-maya.
PSA 33:6 Asman tiar oise Mabudor ou kalame, er mazor shobta-u oise tan mukor fue.
PSA 33:7 Doriar hoḳol fanire ḳoloshit raḳoin tain, fatalor fanire-o tain banḍaro zomain.
PSA 33:8 Asta duniae Mabudre ḍorauk, duniar bashinda oḳol tan ḍore ḳafouk,
PSA 33:9 tan ḳotae to hokkoltar oise foyda, tan hukumor loge loge boail oise hoḳolta.
PSA 33:10 Zati oḳlor forikolpona Mabude ḳoroin beḳama, binash ḳoroin tain tarar sinta-babna.
PSA 33:11 Mabudor-u forikolpona siroḳal ṭikia taḳe, tan monor sinta-babna zug zug dori boail taḳe.
PSA 33:12 Shuki hou zati, Alla zar afon Mabud, tain zare fosond ḳorsoin ḳoia afon doulot.
PSA 33:13 Asman taki Mabude saia deḳoin, hokkol adom shontanor ufre tain souk raḳoin.
PSA 33:14 I duniat zein-tain boshot ḳoroin, arosh taki tarar bae kial raḳoin,
PSA 33:15 forteḳ zonor dil to tain goṛisoin, zegie zeta ḳore ita buzita faroin.
PSA 33:16 Boṛo sifai dol taḳle-o razar rokka nai, mohashokti dia-o kunu bir zuddae fae na rehai,
PSA 33:17 joyor lagi guṛar ufre borosha ḳora beḳama, guṛar shokti zoto-u taḳouk basaito fare na.
PSA 33:18 Mabudre zara ḍorae, taḳe tan doya-mayar ashae, tain kial raḳoin tarar bae,
PSA 33:19 moron taki tarar zibon rokka ḳoroin tain, boṛo boṛo nidan ḳalo tarare basain.
PSA 33:20 Mabudor ofekkat asi to amra, tain-u zan basanir malik, amrar borosha.
PSA 33:21 Tanre loia-u amrar dilor furti, tan pak namor ufre borosha ḳori.
PSA 33:22 Ogo Mabud, tumar maya-doya rouk amrar ufre, amrar asha-borosha tumar-u ufre.
PSA 34:1 Hozrot Daudor mizmor, raza Abimalikor samne zebla fagol besh dorsla ar tane ḳedai dila, tain-o gelagi, ou shomoykur mizmor. Hor-hamesha ami Mabudor tarif ḳormu, tan gunogan hamesha roibo mor muko.
PSA 34:2 Amar zane boṛai ḳore Mabudre loia, duki zone ḳorouk furti ita hunia.
PSA 34:3 Amar loge Mabudor gunogan ḳoro, ao hokkole eḳloge tan name tarif ḳori.
PSA 34:4 Ami Mabudre ḍakisi, tain zuaf disoin, shob ḍor-ḳof taki tain amare rokka ḳorsoin.
PSA 34:5 Tan bae sao, tumra nurani oizibae, tumrar muk shorom faito nae.
PSA 34:6 I kangalor ḍaḳ Mabude hunchoin, shob mosibot taki tain basaisoin.
PSA 34:7 Mabudor ashikor sairobae hefazot ḳoroin tan firistae, dia erar zan basae.
PSA 34:8 Zasai ḳoria deḳo Mabud ḳoto meherban, boṛo ḳofali hou zon ze asroy loy sayat tan.
PSA 34:9 O Mabudor pak bonda oḳol, tanre ḍorao, tarar kunutar obab nai zara ḍorae.
PSA 34:10 Bolala shinghor fal ḳanir obabe ufash, Mabudor ashik oḳlor balair kunu obab nai.
PSA 34:11 Ore fua-fuṛin ao, amar ḳota huno, tumrare Mabudor ḍor-ḳofor ḳota hikaimu.
PSA 34:12 Zindegit shuk sae kun zone, shudin deḳar asha ḳore ḳe?
PSA 34:13 Te he bad ḳota taki zifrare shamlauk sol-soturi taki ṭuṭre,
PSA 34:14 bad ḳam taki firia bala ḳam ḳorouk, shantir ashik oia er ḳore ḳore rouk.
PSA 34:15 Mabudor nozor to forezgaror ufre, tarar dua hunar lagi tan ḳan ḳaṛa taḳe.
PSA 34:16 Bad ḳam ḳorrar ufor Mabudor bod nozor, dunia taki fusiliba nam-nishana tarar.
PSA 34:17 Dindare foriad ḳorle hunoin Mabude, bala-mosibot taki rokka ḳoroin tarare.
PSA 34:18 Mon zarar bangi gese Mabud roin tarar loge loge, dil zarar surmar oise Mabude-u basain tarare.
PSA 34:19 Hok fote ze sole tar bout mosibot, ita taki Mabude-u tare ḳoroin hefazot.
PSA 34:20 Nirafod raḳoin tain tar shob aḍḍire, banga oito nae to ita kunuṭare.
PSA 34:21 Ḳaraf ḳamor dae oy naformanor moron dosha, forezgarre ingshae zara, shaza faibo tara.
PSA 34:22 Mabude uddar ḳoroin tan gulam oḳolre, tan asroy loy zara, shaza dein na ita ḳeurore.
PSA 35:1 Hozrot Daudor mizmor. Amar birudita ḳorer zara, tumi Mabude ḳoro tarar birudita, laṛai ḳorer zara amar loge, tumi-o laṛai ḳoro tarar loge.
PSA 35:2 Zan basanir atiar lo tumar ato, amar shaijjor lagi zoldi ao go.
PSA 35:3 Amare ḳedaorar lagi ato lo sulfi-kusa, amar zanre ḳo go, “Ami-u tumar basaneala.”
PSA 35:4 Amare kun ḳorto sae zara, beijjot-shorminda ouk tara, amar ḳeti ḳorto sae zara, bagia zauk tara mata nuaia.
PSA 35:5 Danor susare zela tufane ney uṛaia, Mabudor firistae ola tarare deukka ḳedaia.
PSA 35:6 Tarar fot ouk andair ar fisla, ḳedaia neukka tarare Mabudor firista.
PSA 35:7 More dorar lagi tara fatise zal lukaia, amar zan nibar lagi kudise gat ḳamoḳa.
PSA 35:8 Aḳta ḳori tarar ufre shorbonash lamouk, tarar fatail zalo tara-u hamauk.
PSA 35:9 Teugi amar dile gaibo Mabudor kushir gan, tain amar zan basanie gaimu tan shan.
PSA 35:10 Amar mone-tone ḳouk, “O Alla, tumar homan ar ḳe ase zogote? Bolobanor at taki uddar ḳoro nirasroyre, luṭḳarir ges taki tumi basairae duki-kangalre.”
PSA 35:11 Ingshakur misa shakkir dol lagsil amar birudde, ami zeta zani na ota bishoy more zikaise.
PSA 35:12 Ufoḳaror bodla tara ḳorse amar ḳeti, ḳoto ḳofal fuṛa ami, hay-hutash ḳori.
PSA 35:13 Bemar-azar oile tarar solar soṭ finditam, ḳoshṭo ḳori ruza rakia dile-zane dua ḳortam.
PSA 35:14 Bai-birador dust morle manshe ḳande zela, tarar lagi ami-o to ḳanditam ola, ma morle ḳandi ḳandi mata zela oizae nisa.
PSA 35:15 Ami kunu usṭa ḳaile kushir ṭelae tara zome, osina manshe mor bodnam gaite ar mair-doir ḳorte na tame.
PSA 35:16 Beimanor dole mili ashi-tamsha ḳorlo more, dat kiṛimiṛi ḳailo tara amar birudde.
PSA 35:17 Saia saia ḳotodin deḳtae Mabud tarar ingsha-ginna? Shinghor dato taki amar zanḳan tumi basao na.
PSA 35:18 Moha mozliso ami adae ḳormu shukria, tumar tarif gaimu ami bout manshor samne dia.
PSA 35:19 Misa matra dushmon fale na ḳorouk kushi-bashi more loia, ḳamoḳa ginnae more zara souk ṭifaṭifi koria,
PSA 35:20 tara to shantir mat mate na, deshor ni-oforadi manshor loge ḳore solona.
PSA 35:21 Muk bengaia amar bae tamsha ḳori koy tara, “Ḳoto moza, ḳoto moza, nizor souke deḳlam amra.”
PSA 35:22 Nirai roio na Mabud go deḳrae to hoḳolta, amare saṛia Mabud horia roio na.
PSA 35:23 Zoldi ḳori aguai ao ḳoro amar hok bisar, amar fokke ro go Alla tumi-u Mabud amar.
PSA 35:24 Amar bisar ḳoro Alla nizor pak forezgarie, ogo amar Alla Mabud, more loia tara zanu kushi-furti na ḳore.
PSA 35:25 Tarar dio na mone mone ḳoite, “Amra zeta saisi ota-u to oise.” Eoḳan ḳoite dio na tumi tarare, “Zinda gilia haraisi ogure feṭor bitre.”
PSA 35:26 Mosibot dekia amar ḳoroin zetae kushi-furti, shorminda bonia tara ouk nisa muki, amar ufre zetae ḳore boṛai-beṭagiri, shorom ar beijjotit ḍubouk ita hokkolṭi.
PSA 35:27 Fak-forezgari dekia mor oy zara kush-bash, kushir suṭe tara ḳorouk anondo-ullash. Hor-hamesha ḳouk tara Alhamdulilla, nizor bondar shanti dekia kushi oin to Alla.
PSA 35:28 Tumar hok bisaror gun gaimu amar zifradi, gunogan gaimu tumar din-rait bori.
PSA 36:1 Ebadot-bondegi forisaloḳor lagi: Mabudor bonda Hozrot Daudor mizmor. Naformanor ḳarafir befare, Mabudor kalam faise amar dile, tarar sokut Allar ḍor-ḳof naire.
PSA 36:2 Tara nizor souke deḳe nizor bahaduri, nizore ginnae na oforad ḳam ḳori.
PSA 36:3 Sol-soturi karafie bora tarar mukor ḳota, aḳol ḳaṭai sola, nek kam taki roy horia.
PSA 36:4 Bisnat hutia tara ku-ḳamor danda ḳore, bod ḳam na saṛia mondo fote sole.
PSA 36:5 Ogo Mabud tumar doya-mayae asman soilaise, tumar hok-halali megor ḳalnit lagi gese.
PSA 36:6 Faṛ-forbotor laḳan usa forezgari tumar, goin doriar laḳan tumar hok bisar, Mabude-u basao to shob manush ar zanuar.
PSA 36:7 Ogo Alla tumar maya-momota moha mulloban, adom zatie asroy fae tumar ḍaḳnar sayat.
PSA 36:8 Tumar goror don-samanae tarar feṭ bori zae, tumar omrit fanie tarar tirash miṭae.
PSA 36:9 Tumar maze ase zindegi-fanir indara, tumar nure-u to deki nur amra.
PSA 36:10 Tumare zara sine tarare tumi bilai deo tumar doya-maya, shorol dilor manshe fae tumar maya-momota.
PSA 36:11 Ohonkari zone zanu fao na baṛae amar bae, naformanor ate zanu amare na ḳedae.
PSA 36:12 Deḳrae ni naformani zetae ḳorse ita to leṭi gese, uṭito farer na tara, falai disoin itare.
PSA 37:1 Hozrot Daudor mizmor. Naformanor unnoti dekia mon ḳaraf ḳorio na, tarar balai dekia hari ḳorio na ingsha.
PSA 37:2 Tara to gashor laḳan zoldi hukai zibo, bondor fata-satar laḳan itar behalot oibo.
PSA 37:3 Mabudor ufre borosha ḳori nek kam ḳoro, hok-halal roia hari boshot ḳoro desho.
PSA 37:4 Kushi-bashi ḳoro tumi Mabudre loia, tain-u tumar monor asha furon ḳoriba.
PSA 37:5 Tumar zindegir hoḳol bar Mabudor ato saṛo, tain-u salaiba hoḳolta, nichchit borosha raḳo.
PSA 37:6 Tain tumar forezgarire ḳorba uzila, tumar nirdushita zair ḳorba duiforor laḳan soḳsoḳa.
PSA 37:7 Mabudor samne nirai roia tan lagi bar saio, fondibazor unnoti dekia bezar na oio.
PSA 37:8 Gusare domon ḳoria tamao mizaz deḳani, bezar oio na tumi, ḳarafi-u itar fol ḳali.
PSA 37:9 Mabudor borosha ḳorrae deshor mouroshi-malik bonibo, naforman oḳlor to nichchit shorbonash oibo.
PSA 37:10 Tuṛa din bade-u naforman oibo nifat, tukaile-o milto nae ar tarar zagat.
PSA 37:11 Norom dilor manshe faiba deshor malikana, shay-shantie roia tara zindegi ḳaṭaiba.
PSA 37:12 Naformane sol-soturi ḳore forezgaror bifokke, dushmoni ḳoria tara dat kiṛimiṛi ḳore.
PSA 37:13 Tarar halot dekia hari Mabude to ashoin, naformanor din shesh ita tain deḳoin.
PSA 37:14 Duki-kangalre faodi uṛia kunor kiale, naformane toluar kulia tir-donuk hazai raḳe.
PSA 37:15 Ou toluar tarar nizor ḳolijat-u hamaibo, tarar tir-donuk-o bangia hari beḳama oibo.
PSA 37:16 Naformanor beshi don-doulot takia, forezgaror tuṛa don-u bout bala.
PSA 37:17 Naformanor at to zaibogi bangia, forezgarre basain nichchoy Mabude doria.
PSA 37:18 Mabude deḳoin dindaror zindegir halot, siroḳal zari roibo tarar mouroshi doulot.
PSA 37:19 Mosibotor dino tara oito nae shorminda, aḳal-nidanor ḳalo tara feṭ bora ḳani faiba.
PSA 37:20 Nam-nishana miṭizibo zara naforman, Mabudor dushmon hukai zibo aori fulor laḳan, deḳbae tarar hokkolta fuṛai zibo, dumar laḳan ita batasho mishibo.
PSA 37:21 Naformane ḳorzo nia firot na dilae, forezgare dan bilae maya-momotae.
PSA 37:22 Mabudor rohomoti zon zara deshor malik oibo tara, tan lannoti zonor to miṭizibo nam-nishana.
PSA 37:23 Zarar sal-cholon dekia Mabud oin kushi, tain-u mozbut ḳoroin tarar solar goti.
PSA 37:24 Shoyong Mabude tarar ato doria raḳae, usṭa ḳaile-o tara foṛia roito nae.
PSA 37:25 Ami age zuan aslam oḳon buṛa oisi, forezgarre saṛia zaite ami na deḳsi, tarar aoladre-o kunudin bik korat na faisi.
PSA 37:26 Doya-maya ḳore manshore rin dey hamesha, tarar aolade-o to rohom-borkot faiba.
PSA 37:27 Bod ḳam saṛo nek kam ḳoro, teu tumi siroḳal boshot ḳorbae ono.
PSA 37:28 Mabude to bala fain hok insaf, tain nizor ashikanre ḳoroin na to tiag. ע Ain Naformanor binash oibo siroḳalor lagi, tarar bongsho-buniad miṭizibo dunia taki.
PSA 37:29 Deshor malikana faiba forezgare, siroḳal roiba tara ou zagar maze.
PSA 37:30 Forezgaror mukdi bar oy gianor buli, hok bisaror mat bar oy tarar zifradi.
PSA 37:31 Allar hukum gata ase tarar dilo, fislito nae tarar fao mozbut roibo.
PSA 37:32 Naformane ut fatia roy forezgaror bae, enre kunor ashae he shuzug tukae.
PSA 37:33 Mabude tanre saṛta nae naformanor ato, tan shaza oite dita nae adalotor bisaro.
PSA 37:34 Mabudor lagi bar sao, tan deḳail fote solo, tain tumrare ḳorba boṛo, deshor doḳol faibae, naforman dolor binash nizor souke deḳbae.
PSA 37:35 Fashan naformanre deḳlam bout boṛo ijjoti, tortaza gasor laḳan ḍal-fala tar sairobaedi.
PSA 37:36 Hirbar gelam ami tare ar failam na, tukailam bout ami kuz-ḳobor millo na.
PSA 37:37 Ni-oforadir bae sao deḳo hok manshor bae, ṭikia roy tar aolad shae-shanti ze bala fae.
PSA 37:38 Hokkol ḳaraf manshor oibo shorbonash naformanor bongsho-buniad oibo binash.
PSA 37:39 Forezgaror nazat ae Mabudor ges taki, tarar mosibotor ḳalo tain roin bankar boni.
PSA 37:40 Mabude shaijjo ḳoria nistar dein tarare, tan asroy loae naformanor ḳobza taki zane basain erare.
PSA 38:1 Hozrot Daudor mizmor. Iadgari. Damki dio na go Mabud gusa ḳoria, shaza dio na more rag koria.
PSA 38:2 Tumar tiror folae to gatilise more, tumar ate go Mabud zatia dorse amare.
PSA 38:3 Tumar gusar suṭe amar ḳayar hoḳol ongo bemar, egu aḍḍi-o bala nae to gunar dae amar.
PSA 38:4 Amar nizor bod ḳamo ami habuḍubu ḳaiar, ita boṛo ḳoṭin buza-bar lager amar.
PSA 38:5 Amar beaḳolir lagia zoḳom oḳol takia, fosa durgondo bar or fosa ga oia.
PSA 38:6 Ami unda oia guza bonigesi, monor duke haradin ḳori guraguri.
PSA 38:7 Amar ḳomoror maze ḳoto zala-zontrona, amar ḳayar kunu ongo-u nae to bala.
PSA 38:8 Sinta ḳorte ḳorte ami bangia surmar, dilor zalae ami hamesha ḳatraiar.
PSA 38:9 Mabud go tumar dorbaro-u amar dilor saoa-faoa, amar bitoror ahazari to tumar gese lukail na.
PSA 38:10 Amar dile ḍoraia ḳafer, shorilor bol gesegi saṛia, souke deḳar ḳemota mor muṭe-u nae bala.
PSA 38:11 Afon zon ar dust oḳole mor ḳoshṭo dekia horia taḳe, amar ari-fori forisito zone-o duroi ubai tamsha deḳe.
PSA 38:12 Amare kun ḳorar motlob zarar tara fand fate, shorbonash sae zara mor tara amar birudde mate. Sol-soturir dandae tara haradin taḳe.
PSA 38:13 Ḳaluar laḳan to ami kane kunta huni na, bubar laḳan dosha amar muk kuli na.
PSA 38:14 Olan manush oisi ami zegue kunta hune na, mukedi zar kunu soalor zuaf bar oy na.
PSA 38:15 Mabud go bar saoat asi ami tumar-u ashae, ogo Mabud Elahi mor minotir zuaf tumi to dibae.
PSA 38:16 Ami to ḳoisi, “Amar fao fisli gele, amare loia tara zanu boṛai korto na fare.”
PSA 38:17 Foṛi zaiar foṛi zaiar amar halot ola, amar sokur samne gurer ḳali dilor zala-zontrona.
PSA 38:18 Amar hoḳol oforad ami korsi shikar, amar gunar buza loia oshanti koriar.
PSA 38:19 Amar dushmon oḳol bout tortaza boloban, tara bout bina ḳarone more zara ginnain.
PSA 38:20 Ami tarar balai korle tara ḳore ḳeti, tara more dushi koy balair fote soli kori.
PSA 38:21 O amar Mabud amare saṛia zaio na, horia zaio na ama taki ogo amar Alla.
PSA 38:22 Amare shaijjo ḳorat zoldi ao tumi, O amar Mabud amar zan basanir ḳanḍari.
PSA 39:1 Ebadot-bondegi forisaloḳ Zidutunor lagi. Hozrot Daudor mizmor. Ami ḳoisi, “Hushiar roimu ami solar fotor befare, guna taki hefazot ḳormu amar zifrare, naforman zoto shomoy roibo amar samne, lagam lagai raḳmu to amar mukor maze.”
PSA 39:2 Zoban bond ḳoria ami nirai roilam, bala-bura kunuta-u na matilam, erlagi mor monor duk roilo aro baṛat.
PSA 39:3 Dilor ḳoshṭoe sinta ḳorae aguin laglo buko, teu zifradi ḳoilam, “Ami kita ḳortam go,
PSA 39:4 amare zanao go Mabud amar dosha oibo kita? Ḳotodin basimu ami shango oibo ayu kila?”
PSA 39:5 Eḳ muiṭ ḳorso tumi mor hayati, tumar samne shuinno zanu mor zindegi, duniar forteḳ manush oilo eḳṭa nishash ḳali. (Sela)
PSA 39:6 Sayar moto ḳori manush ḳore aoa-zaoa, beḳama fereshani kore don-doulotor lagia, oile ita ḳe ḳaibo ikan zane na.
PSA 39:7 Mabud go, kitar ashae roitam ami ofekkat? Amar hoḳol asha to tumare faoat.
PSA 39:8 Ḳoro go uddar more hoḳol onnae taki, beaḳolor ato ḳorio na more beijjoti.
PSA 39:9 Muk kulchi na ami roisi nirai, ita ḳoshṭo to oise mor tumar isharae.
PSA 39:10 Tumar shasti horailao amar ufor taki, tumar ator agat ḳaia mui shesh oigesi.
PSA 39:11 Gunar daye damki dia zebla manshore shongshudon ḳoro tumi, tarar mayar don fukor laḳan deo nosṭo ḳori, manush to oilo eḳṭa nishash ḳali. (Sela)
PSA 39:12 Amar foriad Mabud tumi huno, ḳan deo tumi mor ḳandono, dekia mor ḳandon nirai roio na tumi, tumar goro to ami bideshi, amar baf-dadar laḳan ami-o probashi.
PSA 39:13 Ḳoṛa nozor horailao tumar amar ufor taki, zaibar age, shesh oibar age ami, hirbar zanu mui kushi oitam fari.
PSA 40:1 Ebadot-bondegi forisaloḳor lagi: Hozrot Daudor mizmor. Sobor ḳoria sai roislam amar Allar lagi, kial ḳori tain zuaf dila amar foriad huni.
PSA 40:2 Golaima gaṛa taki tulia anla more, feḳor gator moron doshat basaila amare. Amar faore bor deoaila fattoror ufor, shokto maṭit ṭai zugaila amar dui faor.
PSA 40:3 Zugai dila amar muko noya gozol tan, oḳon ami gai amar Allar gunogan. Deḳbo ita bout zone, dekia ḍoraibo, teu tara Allar ufre iman anibo.
PSA 40:4 Doinno ḳali hou bonda, Mabud-u zar ṭikana, bul fote gia zetae ḳore boṛai-gorima, itar baedi he to firia-o sae na.
PSA 40:5 Ogo amar Mabud Alla gonia fuṛail zaito nae, tumar kudroti kamor hishab aro nanan sinta-ufae, zanaia ba ḳoia ami fuṛanir shaiddo nai, tumar tulyo ḳe ase, ḳeu nai ḳeu nai.
PSA 40:6 Kurbani ar lilla-sodgae kushi o na tumi, kushi o na tumi go, kushi o na tumi, sao na tumi zalail kiba koforar foshu kurbani, hunar laḳ dui kan diso more hunia zanu mani.
PSA 40:7 Teu ami ḳoilam Alla, aisi ami ono, leḳa ase amar befar zela kitabo,
PSA 40:8 ogo amar Alla, ami kushi tumar morzi furone, hokkol hukum gata amar dilor bitre.
PSA 40:9 Moha zon-shomabesho ami zanaisi, tumar hoḳol hokkani kamor kush-ḳobri, amar aoaz bond ḳori na ita to zano, tumi shoyong shakki amar, O Mabud go.
PSA 40:10 Lukaia raḳsi na mor dilor bitor, tumi ze shoṭik hokkani zanaisi kobor, tumar deoa nazat ar hok-halali koisi hoḳolre, doya-maya ar hok tumi zanaisi moha shomabeshe.
PSA 40:11 O Mabud! Bond ḳorio na mor lagi tumar rohomotor duar, tumar doya ar hok ouk mor siroḳalor ḳanḍar.
PSA 40:12 Deḳrae ni! Hishab saṛa mosibote berilise more, fesailise aia amar hoḳol oforade, dekiar na kunta ami amar soukedi, amar matar sul taki-o ita to beshi, mor finjirar mon moyna-o saṛia gesoingi.
PSA 40:13 O Alla, tumar duai diar amar zan basao, Mabud go, amare shaijjo ḳorat zoldi ao.
PSA 40:14 Amar zanre zetae nita saira ḳaṛia, nisa ouk tarar mata shorminda bonia, amar ḳeti oile zetae ḳorba kushi, beijjot bonia tara bagi zauk koredi.
PSA 40:15 Amar ḳetie zetae ḳoin, oisere oise, muk lukaia horouk ota nizor laj-shorome.
PSA 40:16 Oile kushi-bashi korouk tumar ashik bondar dole, tumar deḳail basar fot bala fain zeta zone, hor-hamesha zofi zofi furti korouk tara, tumi-u mohan Moula, tumi-u mohan Alla!
PSA 40:17 Duki kangal zon to ami boṛoi obabi, amar lagi to sinta ḳoroin Mabud Elahi. Tumi-u mor shaijjoḳari zan basanir ṭikana, amare basao go Malik deri korio na.
PSA 41:1 Ebadot-bondegi forisaloḳor lagi: Hozrot Daudor mizmor. Hou manush doinno, duki-kangalor ḳota sinta ḳore ze, mosibotor dino Mabude nichchit uddar ḳorba tare.
PSA 41:2 Mabude tare rokka ḳoria raḳba basaia, deshor manshe tare shukila manush ḳoiba, dushmonor ato Mabude tare shofia na diba.
PSA 41:3 Bemare bisnat foṛi gele Mabude tar asan ḳoroin, shifa ḳoria bisna taki tare tulia anoin.
PSA 41:4 Ami ḳoisi, “Ami to ḳorsi tumar birudde guna, ogo Mabud, doya ḳoria ḳoro more shifa.”
PSA 41:5 Amar ḳeti saia dushmone ḳoy, “Ogu kun shomoy morbo? Kun shomoy tar nam-nishana zomin taki musi zibo?”
PSA 41:6 Tara more deḳat aile baotabazi mate, tarar mono zomail bodnam roṭae gia bare.
PSA 41:7 Amar birudi oḳol milia ḳana-ḳani kore, amar ḳeti korto kila ou dandae taḳe.
PSA 41:8 Ḳoy tara, “Bout boṛo ḳarafie tare zatia dorse, uṭito farto nae ar zeḳano he hutail ase.”
PSA 41:9 Eḳ talo boia zegie ḳaito, borosha ḳortam zar ufre, oḳon ou mayar duste-o amar birudde lagigese
PSA 41:10 Ogo Mabud rohom ḳoro tumi nize more, tarar bodla nibar lagi tulilao amare.
PSA 41:11 Amar ufre kushi tumi ikan ami zani, dushmone to mor birudde sillae na ar joyor sillani.
PSA 41:12 Tumi doria raḳso more hok-halal dekia, tumar didaro zaga diso siroḳalor lagia.
PSA 41:13 Hokkol proshongsha Boni Israilor Mabud Allar ouk, shuru taki aḳer forzonto siroḳal zari rouk. Amin Summa-Amin.
PSA 70:1 Ebadot-bondegi forisaloḳor lagi: Hozrot Daudor iadgarir mizmor. O Alla, tumar duai diar amar zan basao, Mabud go, amare shaijjo ḳorat zoldi ao.
PSA 70:2 Amar zanre zetae nita saira, nisa ouk tarar mata shorminda bonia, amar ḳeti oile zetae ḳorba kushi, beijjot bonia tara bagi zauk koredi
PSA 70:3 Amar ḳetie zetae ḳoin, oisere oise, muk lukaia horouk ota nizor laz-shorome.
PSA 70:4 Oile kushi-bashi korouk tumar ashik bondar dole, tumar deḳail basar fot bala fain zeta zone, hor-hamesha zofi zofi furti korouk tara, tumi-u mohan Moula, tumi-u mohan Alla!
PSA 70:5 Duki kangal zon to ami boṛoi obabi, amar ḳasat zoldi ao Mabud Elahi. Tumi-u mor shahaijjoḳari, zan basanir ṭikana, amare basao go Malik deri korio na.
PSA 95:1 Ao amra kushir gozol gai Mabudor name, rokkaḳari ṭilla tain, furti kori zure zure.
PSA 95:2 Solo amra shukur-guzar ḳori kori tan samne zai, baznar tale tale tan name zure-shure gai.
PSA 95:3 Mabud-u to uforala, shorbo mohan Allatala, dui jahanor bol-shoktir tain-u boṛo bashsha.
PSA 95:4 Zomin ar fatal shob-u tan ato, faṛ-forbotor usa ṭilla-o tan-u to.
PSA 95:5 Tain-u doriar malik banaisoin ita, hukna zomin-o tan duio ate goṛa.
PSA 95:6 Ao amra soizda dia tan ebadot ḳori, amrare foydaḳari Mabudor samne notozanu boni.
PSA 95:7 Tain-u to amrar Allatala, amra tan meṛar fal, tan zominor bonda. Ah! Tan golar aoaz zudi huntae tumra!
PSA 95:8 Dilre fashan ḳorio na tumra zela ḳorslae Meribat, hou din ḳorslae zeta morubumir Masa namor zagat.
PSA 95:9 Tumrar baf-dadainte hono to deḳsil more azmaia, amar kudroti lila-ḳela dekia-o tara ḳorla more forikka.
PSA 95:10 Hou zomanar manshor zala shoilam ami sallish bosor doria, heshe ḳoilam, itar dil to be-foti amar fotre sinlo na,
PSA 95:11 teugi amar gusar suṭe ḳoilam ḳosom ḳoria, mor deoa aramor desho hamanir shuzug faito nae tara.
PSA 96:1 Mabudor name noya git gao, O hara dunia, Mabudor git gao,
PSA 96:2 Mabudor name git gao, tan tarif ḳoro, dine dine tan deoa nazator toblig ḳoro.
PSA 96:3 Hoḳol zatire zanao tan gourobor ḳota, hoḳol manshore ḳo tan kudroti kamor mohima.
PSA 96:4 Mabud-u mohan, moha tarif tan, hoḳol deb-debi taki boṛo boyonkor tain,
PSA 96:5 zati oḳlor deb-debi to beḳama futul ḳali, Mabude-u banaisoin hoḳol asman monḍoli.
PSA 96:6 Shan-shouḳot ar mohima tan samne roise, bol-shokti ar zak-zomoḳe tan gor hazaise.
PSA 96:7 O zogotor ḳandan oḳol, zanao Mabudor gunogan, gourob ar bol-shoktir ḳota zanao tan,
PSA 96:8 Mabudor name tan faona gourob zanao, lilla-sodga ato loia tan dorbaro hamao.
PSA 96:9 Fak-saf dile Mabudor samne soizdat foṛo, hara dunia tan samne tor-toraia ḳafia uṭo.
PSA 96:10 Zati oḳlor maze elan ḳoro, Mabud-u bashsha. Zogotre banaisoin mozbut, ḳorto nae kunu loṛa-soṛa, tain nichchit hoḳol zatir hok bisar ḳorba.
PSA 96:11 Asman oḳol furti korouk, dunia kushi-o ouk, doria ar tar mazor shob zandar gorzia uṭouk,
PSA 96:12 zomin ar er hokkolta kushi-bashi ḳorouk, bon-baganor shob gas-fala-o anondo-ullash ḳorouk.
PSA 96:13 Mabudor samne ola-u ḳorouk ita hoḳolta, tain to aira duniar bisar ḳorta. Zogotor bisar-foysala ḳorba hok-insafe, tamam zatir bisar-foysala ḳorba hok-halalie.
PSA 97:1 Mabude bashshai ḳoroin, duniae ḳorouk furti, dur-durantor dif oḳol ouk moha kushi.
PSA 97:2 Tan sairobae ase to goin andair ar ḳalni, tan godir bit oilo hok bisar ar forezgari.
PSA 97:3 Aguin zae tan age age, zalaia mare tan sairo galar dushmonre.
PSA 97:4 Tan zilkie for oizae hara dunia, ita dekia asta zogot uṭe ḳafia.
PSA 97:5 Din-duniar malik Allar samne, faṛ-forbot oḳol momor laḳan gole.
PSA 97:6 Asman oḳole elan ḳore tan forezgari, hoḳol zatie deḳe tan mohimar bahaduri.
PSA 97:7 Oshaṛ deb-debir boṛai ḳore zara, shorom-loijja fauk ota murti pujarira, Allar samne soizda ḳorouk ou deb-debira.
PSA 97:8 Tumar hok bisaror ḳota hunia Sion oilo kushi, Ehuda deshor gau-gerame ḳorer to furti.
PSA 97:9 Tumi Mabud to hara zogotor uforala, hoḳol deb-debir bout ufre tumar ṭikana.
PSA 97:10 Naformanire ginnao tumra Mabudor ashik zara, allaoalar zan basain naformanor at takia.
PSA 97:11 Forezgaror lagi baṛe nuror kuṛi-fata, ḳaṭi dilor bitre to oy kushi-furti deoa.
PSA 97:12 Forezgar zon furti koro Mabudor name, tan fak-fobitrotar gunogan gao hoḳole.
PSA 98:1 Mabudor name git-gozol gao noya noya, tain to ḳorsoin taijjubi kam zotota. Nizor ḍain ator kudroti bol dia, ḳorsoin ḳoto asanoḳ joyor lila-ḳela.
PSA 98:2 Mabud tan uddar ḳam zanaisoin hoḳolre, tan hok kam deḳaisoin zati oḳlor sokur samne.
PSA 98:3 Tan doya-maya ar hok-halali, iad raḳsoin Boni Israilor lagi, dekise zogotor hesh shimanar manshe, amrar Mabudor uddar ḳora ḳamre.
PSA 98:4 Ore zogotbashi gao kushir gan Mabudor name, baiddo-baznar tale tale zure zure, tan gunogan gao tumra boṛo golaye.
PSA 98:5 Bina-behala bazaia tale tale gao gan, Mabudor tarif ḳori gozol-gan gao tan.
PSA 98:6 Tumra zure zure sunga ar shinga bazaia, Alla malikor samne gao kushi koria.
PSA 98:7 Tan tarife gorzia uṭouk boṛo golae, doria ar tar mazor hoḳoltae, erloge furti koro zogotor shob bashindae.
PSA 98:8 Gang oḳole kushi koro ator tali dia, furti koro eḳloge faṛ-forbot milia.
PSA 98:9 Mabudor samne gao kushie gola faṭaia, duniar bisar ḳorat shoyong Mabud aira, hok bisar ḳorba tain hok-halal roia, hoḳol zatir bisar ḳorba hok-insaf dia.
PSA 99:1 Mabude bashshai ḳoroin, zati oḳol ḳafouk, duio Karubimor maze tan ashon, duniae tortor ḳorouk.
PSA 99:2 Fobitro Sion nogrir maze Mabud-u mohan, hoḳol zatir ufre tan ijjot-shomman.
PSA 99:3 Tara ḳorouk tumar gunogan, mohan ar boyonkor tumar nam, tara ḳouk, moha fobitro tain.
PSA 99:4 O bolala bashsha, hok bisarre bala fao tumi, hok-halali gatiso to mozbut ḳori, Iakubor bongshot boail ḳorso hok bisar ar forezgari.
PSA 99:5 Amrar Mabud Allar tarif ḳoro, soizda ḳoro tan ḳodom mubaroko, ḳo, moha fobitro tain.
PSA 99:6 Musa ar Harun asla tan imamotir ḳamo, Shamuel nobi-o roita tan dua-munazato, zuaf faita tara ḍakile Mabudor dorbaro.
PSA 99:7 Megor kuṭit roia tain matita tarar loge, tan kalam mania tara solta tan hukume.
PSA 99:8 O Alla amrar Mabud, tarar minoti tumi huntae, tarar ḳosurir bodla dile-o tumi Allae mafi ditae.
PSA 99:9 Amrar Mabud Allar tarif ḳoro, soizda ḳoro tan fobitro faṛo, amrar Mabud Alla to fak-fobitro.
PSA 100:1 Shukurana git Ore zogotbashi kushi-bashi koro, Mabudor name zur golae ḳoro.
PSA 100:2 Mabudor ebadot ḳoro kush dile, kushir gozol gaia gaia ao tan dorbare.
PSA 100:3 Alla-u asol Mabud, mono rakio tumra, amrare banaila tain, tan bonda to amra, amra tan meṛar fal, tan zomino ḳani kaora.
PSA 100:4 Shukur-guzar ḳori kori hamao tan duaro, tarif-git gaia gaia ao tan uṭano, tan name shukria tarif adae ḳoro.
PSA 100:5 Mabud-u asol bala, siroḳal zari tan doya-maya, tan hok-halali salu roy bongshor for bongsho doria.
PSA 117:1 Hoḳol zatie Allar tarif ḳoro, desh ar gusṭie tan nam zofo,
PSA 117:2 amrar bae to Allar ḳoto maya-momota, tain roin hok-halal hor-hamesha, Alhamdulilla!
PSA 118:1 Allar shukria zanao, tain to bala, siroḳal zari tan doya-maya.
PSA 118:2 Boni Israile ḳouk, siroḳal zari tan doya-maya.
PSA 118:3 Harunor silsilae ḳouk, siroḳal zari tan doya-maya.
PSA 118:4 Mabudor ashike ḳouk, siroḳal zari tan doya-maya.
PSA 118:5 Mabudre ḍakilam ami foṛia bifodo, tain uddar ḳori more nila kula moydano.
PSA 118:6 Mabud to amar fokke, ami ḍoraitam nae, adome amar kita ḳorto?
PSA 118:7 Mabud amar fokke, tain-u amar shohae, dushmonor behal dosha deḳaiba Allae.
PSA 118:8 Adomor ufre borosha ḳora taki, Mabudor sayat asroy loa bala.
PSA 118:9 Boṛolukor ufre borosha ḳora taki, Mabudor sayat asroy loa bala.
PSA 118:10 Hoḳol deshe mili berilisil amare, Mabudor name ami shesh ḳorilisi tarare.
PSA 118:11 Hasau tara more berilisil sairobae, Mabudor name ami shesh ḳorilisi tarare.
PSA 118:12 Bingulor falor laḳan amare berisil, hukna bon-jonglar laḳan zolia uṭsil tara, Mabudor name ami shesh ḳorilisi tarare.
PSA 118:13 Zure zure dakka marsil ami zanu foṛi zai, oile Mabud-u amar shohae oila.
PSA 118:14 Mabud-u amar bol, amar kushir git, amare basanir ufae tan ato nichchit.
PSA 118:15 Forezgaror goro goro zuddor zoyor gan, Mabudor kudroti ate ḳorsoin azob ḳam.
PSA 118:16 Mabudor ḍain at ufre tulchoin tain, Mabudor kudroti ate ḳorsoin azob ḳam.
PSA 118:17 Ami to mortam nae, zinda roimu, Mabude zeta ḳorsoin hoḳolre zanaimu.
PSA 118:18 Mabude amare ḳoṭin shaza disoin, oile moronor ato more nahi shofisoin.
PSA 118:19 Amar lagi kulia deo Allar goror duar, bitre hamaia shukria Mabudor zanai.
PSA 118:20 Ita to shoyong Mabudor duar, ḳali forezgar oḳol ono hamae.
PSA 118:21 Tumar shukria zanai amar abdar hunae, tumar ato-u nichchit amare basanir ufae.
PSA 118:22 Beḳama ḳoia falai disil raz mestorinte ze fattor, oḳṭa dia-u ian kuṭi oilo tan goror.
PSA 118:23 Mabud nize-u i kam ḳoraila, dekia to amrar taijjubi lager.
PSA 118:24 Iṭa to hou din Mabudor banail din, ao kushi kori furti kori shobe ou din.
PSA 118:25 Minoti kori go Mabud basao amrare, minoti kori tumi kamiab ḳoro amrare.
PSA 118:26 Mabudor name zein aira tan tarif ouk, Mabudor goro taki koi tumrar ufre borkot lamouk.
PSA 118:27 Alla-u to Mabud, amrare disoin nur, idor kurbanir foshu doṛidi bandia ano, kurbani kanar hing oḳol-o ogu bandia raḳo.
PSA 118:28 Tumi-u amar Alla, tumar shukria zanai, tumi-u amar Alla, tumar gunogan gai.
PSA 118:29 Allar shukria zanao, tain-u to bala, siroḳal zari tan doya-maya.
PSA 121:1 Hojo zaora kafelar ḳaoali Ami souk tulia faṛ-forbotor bae saimu, amar shae-shaijjo kuai taki aibo?
PSA 121:2 Hou Mabudor ges taki-u amar shaijjo aibo, zein asman-zomin foyda ḳorsoin.
PSA 121:3 Tumar faore tain fisla ḳaite dita nae, tumar basaneala to gumaita nae.
PSA 121:4 Mono rakio, Boni Israilre zein basain, tain gumaita nae, ungaita-o nae.
PSA 121:5 Mabud-u tumar hefazotḳari, tumar asroy saya, tumar ḍain ato doria tain asoin ḳaṛa.
PSA 121:6 Dinor balae shuruze ar raitor balae sande, kunutae-u tumar ḳeti korto nae.
PSA 121:7 Hokkol nomunar bifod taki Mabude-u basaiba, tain-u tumar zanor hefazot ḳorba.
PSA 121:8 Tumar sola-firar shomoy goro-baire Mabude-u basaiba, oḳon taki zuge zuge hor-hamesha.
PSA 150:1 Hoḳole milia ḳo re mumin Alhamdulilla, dile-zane ḳo bonda Alhamdulilla! Allar Heremo hamaia ḳo Subohan Alla, tan arshe-azimo gao Subohan Alla!
PSA 150:2 Tan lila-ḳela dekia tarif ḳoro, tan shan-mohimar lagi-o tarif ḳoro!
PSA 150:3 Shinga bazaia tan tarif ḳoro, bashi-behalar shure tan tarif ḳoro,
PSA 150:4 toblar tale nasi nasi tarif ḳoro, dutara ar bashir shure tarif ḳoro,
PSA 150:5 mondirar jun-junanie tan tarif ḳoro, ḍul ar kul-ḳortal bazaia tarif ḳoro.
PSA 150:6 Hokkol zandare Mabudor tarif ḳoro, Alhamdulilla! Tan tarif ḳoro! Ḳotom.
JON 1:1 Mattar fua Iunusor gese Mabudor ou ohi nazil oilo,
JON 1:2 “Tumi roana deo, ar Ninob namor hou boṛo ṭauno zao, gia amar gozobor ḳota zanao. Tarar naformani amar dorbaro zair oigese.”
JON 1:3 Oile Iunuse Mabudor hukumor borkelaf ḳoria bagia Spen desho zaoar lagi roana oigela. Tain Jafa namor zazor gaṭo gia Spen desho zaora ekkan zaz faia, zazor baṛa adae ḳoria bitre hamaia Mabudor samne tone bagita ḳori naiaintor loge oia roana dilaila.
JON 1:4 Oile Mabude doriar maze eḳ bezuita tufan saṛila. Tufanor ṭelae zazḳan bangi zaoar dosha oilo.
JON 1:5 Naiainte ḍoraia zarzir devtar gese ḳanda-ḳaṭi korat lagla. Ar zazor bar ḳomanir lagi mal-samana doriat falai dilo. Oile Iunus zazor tolor talat lamia huti roila, hutia bedum gumo foṛla.
JON 1:6 Ou shomoy zazor sharong Iunusor gese gia ḳoila, “Oi mia! Tumi kemne gumairae? Kunta hunrae nae ni? Uṭo, tumar devtare ḍaḳo. Oito fare tain amrar bae kial ḳorba, amrar zan binash oito nae.”
JON 1:7 Bade naiainte eḳe-oinne ḳoilo, “Ao amra loṭari maria deki, ḳar dushe i mosibot aise.” Teu tara loṭari marlo ar loṭarir maze Iunusor nam uṭlo.
JON 1:8 Ou tara tanre zikaila, “Ḳo sain, ḳar dushe amrar ufre i mosibot aise? Tumi kita ḳam ḳoro? Kuai taki aiso? Kun deshor manush? Tumi kun zator manush?”
JON 1:9 Iunuse zuaf dila, “Baiainre, ami eḳzon Ibrani, Israil zatir manush. Ami behestor malik Alla Mabudor ebadot ḳori, tain-u doria ar zomin foyda ḳorsoin.”
JON 1:10 Tain aro ḳoila, Mabudor samne tone bagibar niote tain aia zazo uṭsoin. Ikan hunia tara kub ḍoraia ḳoila, “Hae, hae! Tumi ita kun zator ḳam ḳorlae?”
JON 1:11 Doriar tufan zebla aro bezuita bab dorlo, ou shomoy tara tanre zikailo, “Amra tumare kita ḳorle doria tir oibo?”
JON 1:12 Iunuse zuaf dila, “Amare doria doriat falai deo, teu doria shanti oizibo. Ami to zani, amar dushe-u afnaintor ufre i gozobi tufan aise.”
JON 1:13 Oile naiainte tane na falaia zazḳan kinaro biṛanir lagi zan-foran shofia daṛ baila, tufanor zur ḳali baṛte-u roilo, erdae tara zazḳan kinaro nita farla na.
JON 1:14 Teu tara Allar gese foriad ḳorlo, ḳoilo “O Mabud, rohom ḳoro, ou manshor zanor lagi tumi amrare mario na, i ni-oforadir zanor ḳarone amrare dayi korio na. O Mabud, ita hoḳolta-u to tumar munsha.”
JON 1:15 Bade tara Iunus nobire doria doriat falai dilo, ar doriar tufanor ḍeu dom loililo.
JON 1:16 I halot dekia tara Mabudre kub ḍoraila. Tara Mabudor name foshu-kurbani dila ar mannot manla.
JON 1:17 Mabude kub boṛo eḳ masre zugai toisla Iunusre gililibar lagi, tain tin din, tin rait hou masor feṭo roila.
JON 2:1 Iunuse masor feṭo tone Mabud Allar dorbaro dua ḳorla.
JON 2:2 Mosiboto foiṛa Moula ḍakilam tore, rohom ḳoria tui zuaf dile more. Fatalor feṭo boia ami kandilam, kobul ḳorilae aroz Rohim Rohman.
JON 2:3 Doriar muro bondu more falailae, tumar fanir ḍeue amae bashai loia zae.
JON 2:4 Mile na didar tumar nai kanḍari, tallashi koria mukam zikir ḳori.
JON 2:5 Ḍeuor mazete foṛi zan doṛfoṛ ḳore, doriar lota-fatae fesililo more.
JON 2:6 Fatalor tole gia miler na kinar, ḳoredi saia deki duar nai ar. Bondi oia ḳandi ami nirash bodone, azad ḳorilae Moula goin gaṛa tone.
JON 2:7 Zan amar zae zae oilo zoḳon, ḳator oia go bondu ḳorinu shoron. Bikka mangilam ḳangal dorbare tumar, arsho takia doyal deḳailae didar.
JON 2:8 Murtipuja ḳore zara na faibo rohomot, elami koria tara arailo kudrot.
JON 2:9 Shukur-guzar ḳoro Iunus Mabud meherban, tumar dorbare ami korimu kurban. Lilla-sodga dan-ḳoyrat shofimu tore, nazator Malik Moulae basao amare.
JON 2:10 Bade Mabude hou masre hukum dila, mase Iunusre nia hukna zominor ufre bait ḳori falai dilo.
JON 3:1 Bade Iunusor ufre dusrabar Mabudor ou ohi nazil oilo.
JON 3:2 Tain ḳoila, “Tumi roana deo, oḳon hou boṛo ṭaun Ninob zao, ar ami tumare zeta batai dimu tumi outa tarar gese elan ḳoro.”
JON 3:3 Mabudor hukum mafik Iunus roana oia Ninob gela. Ninob oilo kub boṛo ṭaun, i ṭaunor eḳ mata taki aroḳ matat zaite tin din lagto.
JON 3:4 Iunus hou ṭauno hamaia eḳdinor fot gela, gia elan ḳorla, ḳoila, “O Ninobor bashinda oḳol, ar sallish din bade Ninob ṭaun uloṭ-faloṭ oizibo.”
JON 3:5 Ikan hunia Ninobor manshe Allar ufre iman anla, tara ruza raḳar lagi elan ḳorla, ar huru-boṛo hoḳole duk zair ḳorar lagi solar soṭ findila.
JON 3:6 I kobor gia bashshar dorbaro azilo, tain-o bashshai godi saṛia finnor lebas kulia, solar soṭ findia salir maze boila.
JON 3:7 Ar tain asta Ninob ṭauno ou elan ḳoraila, “Bashsha ar tan uzir-nazir oḳlor hukum oilo: manush ba foshu, goru-sagol ḳeu kunuzat dana-fani kunta-u muko dio na.
JON 3:8 Manush ar foshu, hoḳole milia solar soṭ findia dile-zane Allar nam lo, hoḳole zarzir naformanir fot saṛo ar zur-zulum bad dia Allar bae firo.
JON 3:9 Oito fare Allae rohom ḳorba, gozobor kial bodlailiba, tan dau dau ḳora gusa one ṭanḍa oizibo, ar amra binash oitam nae.”
JON 3:10 Allae tarar i halot deḳla, tara zarzir naformanir fot bad dia touba ḳorsoin. Dekia tain-o tan agor sinta bodlailila, tarare binash ḳorar ḳota ḳoile-o oḳon ar binash ḳorla na.
JON 4:1 Oile Iunuse itar lagi teḳto oia kub gusa ḳorla.
JON 4:2 Tain Mabudor dorbaro foriad ḳorla, “O Mabud, ami desho taḳte-u to zantam ilaḳan oibo. Erdae ami age-u Spen desho horia zaitamgi saislam. Ami to zani, tumi doya-momotae bora Alla, gusa ḳoro dir gotie, rohom ḳoro behishab, ar gozob nazilor befare tumar morzi bodlailao.
JON 4:3 O Mabud, ami oḳon aroz ḳorram, tumi amar zanḳan neogi, amar to basa taki mora-u bala.”
JON 4:4 Mabude zuaf dila, “Tumar gusa ḳora ṭik or ni?”
JON 4:5 Bade Iunus ṭaunor bara gela, gia fubedi eḳ zagat ḍera ṭangaia, ḍerar sebat boiroila. Ar ṭaunor kita dosha oy outa deḳar lagi bar saoat roila.
JON 4:6 Mabud Allae hono ek gas zugaila. I gasor lot baṛia lamba oia, Iunusor ḳoshṭo ḳomanir lagi tan matar ufre aramor seba dilo. Ar Iunuse-o i gasor seba faia kub allade godgod ḳorla.
JON 4:7 Oile bador din fozor oḳto Allae egu fuk zugaila. Fuke aia gasor guṛi kaṭidilo, ḳaṭar bade igu hukaigelo.
JON 4:8 Bade zebla shuruz uṭlo, ou shomoy Allae fubali gorom haoa zugaila. Roide Iunusor matat kub gorom laglo, tain beush oizibar dosha. Teu Iunuse moron mangila, ḳoila, “Amar to basa taki moron-u bala.”
JON 4:9 Oile Allae Iunusre ḳoila, “I gasor lagi tumar gusa ḳora kunu ṭik or ni?” Tain ḳoila, “Itar ḳaron ase. Ami gusa ḳoria-u mormu.”
JON 4:10 Mabude ḳoila, “Tumi to i gasor lagia kunu ḳoshṭo ḳorso na, ar igu boṛo-o ḳorso na. Igu to ḳali eḳ raite oise, ar eḳ raite-u morigese, tebou igur lagi tumar maya lagse.
JON 4:11 Oile i Ninob ṭauno to eḳ laḳ bish azaror-o beshi manush asoin, zera nizor ḍain-bau kita sine na. Ar bout heman-zanuar-o asoin, te oto boṛo ṭaunor bae ami kita maya-momota ḳortam na ni?” Ḳotom
MAL 1:1 Malaki nobir usillae Boni Israilor gese Mabudor ohi.
MAL 1:2 O Boni Israil, ami Mabude ḳoiram, ami to hamesha tumrare mohobbot ḳori. Oile tumra ḳoirae, “Tumi kila amrare mohobbot ḳorlae?” Te huno, Ish kita Iakubor bai asil na ni? Oile ami to tumrar ḳandanor murobbi Iakubre mohobbot ḳorsi,
MAL 1:3 ar Ishʼre horaia raḳsi. Ami tar faṛ oḳol binash ḳorsi, tar biṭa-maṭi morubumir hialor aḳra banaisi.
MAL 1:4 Ishʼor aolad Idumi oḳole ḳoito fare, “Amrare surmar ḳora oile-o amra i surmar ḳora hoḳolta hirbar banailimu.” Oile ami Alla Rabbul Alamine ḳoiar, tara ita banaile-o ami bangilimu, ikanre ḳoa oibo, ‘Naformanir desh, ze deshor manshor loge Mabude hamesha gusa ḳoroin.’
MAL 1:5 I halot tumrar nizor souke dekia ḳoibae, “Israil deshor shimanar bare-o Mabudor takkot ḳaim ase.”
MAL 1:6 O imam oḳol huno, ami Alla Rabbul Alamine ḳoiar, fuainte tarar bafre ijjot ḳoroin, saḳore-o tarar malikre ḍorain. Ou laḳan ami eḳzon malik oile, amar bae ḍor-ḳof kuai? Ar ami eḳzon baf oile amar faona ijjot kuai? Tumra-u to amare beijjot ḳorso. Oile tumra hirbar ḳoirae, “Amra kila tumare beijjot ḳorlam?”
MAL 1:7 Tumra to amar kurbani kanar ufre nafak kurbani dirae. Dia ḳoirae, “Amrar kurbani nafak oilo kila?” Tumra buzairae Mabudor kurbani kana kunta-u nae.
MAL 1:8 Ami Alla Rabbul Alamine zikairam, kurbanir niote tumra zebla anda foshu loia ao, ita kunu ṭik oy ni? Ar lula-lengṛa, bemari foshu kurbani deo, ita ṭik ni? Tumrar deshor razare oula foshu ufohar dia deḳo sain, tain kushi oin ni? Ar tumrar abdar raḳoin ni?
MAL 1:9 Huno, Alla Rabbul Alamine ḳoiram, tumra amar dorbaro rohomot mangile kunu lab oibo ni? Tumra zebla nizor ate-u olaḳan kurbani deo, te ami ar tumrare rohom ḳormu kila?
MAL 1:10 Haere hae! Tumrar maze eḳzone-o zudi amar Baytul-Mukaddosor geiṭ ḳanain bond ḳorilto, tumra amar kurbani kanar ufre beḳamaya aguin na zalaitae, te ami kushi oilam one. Oḳon to ami Mabud tumrar ufre kushi nae, ar tumrar at tone kunu lilla-sodga-o kobul ḳortam nae.
MAL 1:11 Huno, Alla Rabbul Alamine ḳoiar, duniar eḳ mata taki aroḳ mata forzonto tamam zatir maze amar kudroti shan ḳaim or. Tamam zomino amar name agor batti zalani or, manshe faḳ-saf lilla-sodga dira. Hoḳol zatir maze-u to amar shan-shouḳot ḳaim ase.
MAL 1:12 Oile tumra amar namre beijjot ḳorrae. Tumra to ḳoirae, “Mabudor kurbani kana kunta-u nae, i kurbanir kunu dam-u nai.”
MAL 1:13 Amare beijjotir niote ḳoirae, “Ita to ḳamoḳa ḳoshṭo deoa!” Te Alla Rabbul Alamine ḳoiar, tumra ḍaḳati kora, ar lula-lengṛa, bemari foshu ania kurbani dirae, ami kunu ota kurbani tumrar at tone kobul ḳormu ni?
MAL 1:14 Ami Alla Rabbul Alamine ḳoiar, ḳeuror falor maze nikut meda foshu ase, ogure kurbani korar lagi he nioto ḳorse, oile bade ṭogami kori kunu kut-ala foshu Mabudor name kurbani dey, tar ufre lannot foṛouk! Ami to mohan bashsha, tamam zatie amare tazim ḳore.
MAL 2:1 Ami Alla Rabbul Alamine imam oḳolre hushiar ḳori koiram,
MAL 2:2 tumra zudi amar ḳota na huno ar amar ijjot-tazimor bae furafur kial na ḳoro, te ami tumrar ufre lannot falaimu. Tumrar hoḳol rohomotre-o gozob banailimu. Ashole tumra amar ḳota mancho na ḳori ou laḳan gozob oḳono ḍalia aiar.
MAL 2:3 Tumrar lagi tumrar aolad oḳolre-o shaza dimu. Tumrar idor kurbanir foshur gufor-sena ami tumrar muko maḳaimu, ota maḳail halote manshe tumrare horaia falaiba.
MAL 2:4 Ami Alla Rabbul Alamine ḳoiram, buzilao, ami tumrar gese ou hushiari faṭailam, zate tumrar ḳandanor murobbi Lebir loge amar ḳaim ḳora niom zari roy.
MAL 2:5 Tan loge ami ze niom ḳorslam, ikṭa oilo zindegi ar shantir niom. Ermaze ḍor-ḳofor befaro asil, zate tain amare tazim ḳoroin, ashole-o tain amare tazim ḳorta.
MAL 2:6 Tan muko asil hok talim, misa na-hok kunta ḳoita na. Shullo-ana ḳaṭi roia amar ebadoti korta, boutre naformani taki firaita.
MAL 2:7 Ashole imamor ḳam oilo Pak Kalam hefazote raḳa, zate manshe gia tan ges taki ou kalam talim ḳore. Imam oḳol to Alla Rabbul Alaminor foygambor.
MAL 2:8 Oile ami Alla Rabbul Alamine ḳoiram, tumra to i fot saṛia, mongoṛa talim dia bout manshore asaṛ ḳaoaiso. Ita ḳoria tumra Lebir ḳandanor lagi kaim ḳora amar niom borkelaf ḳorso.
MAL 2:9 Tumra amar fote na solia manshor muk saia bisar ḳorso. Erdae ami-o tumrare tamam manshor samne nisa ar beijjot ḳorsi.
MAL 2:10 Amra hoḳol eḳ bafor aolad nae ni? Eḳ Allae-u amrare foyda ḳorsoin na ni? Te amra ḳene eke-oinor loge beimani koria, amrar moy-murobbir ufre ḳaim ḳora niomor borkelaf ḳori?
MAL 2:11 Ehuda gusṭie to beimani korse. Zeruzalem ṭaun shoho asta Israil desho bezuita noforoti kam ḳoraise. Ehudar manshe murtipuja ḳorra furintore bia ḳoria, Mabudor mayar zagare-o nafak banaise.
MAL 2:12 Zoto zone ita ḳam ḳore, tara Alla Rabbul Alaminor name lilla-kurbani loia aile-o, Mabude tan ḳas bonda oḳol ḳata tone tarar nam miṭailiba.
MAL 2:13 Ar tumra to aroḳṭa ḳam ḳoro. Soukor fanie ḳali kurbani kanare bizao, ḳanda-ḳaṭi ar ahazari koro. Oile tumra zeta lilla-sodga deo, itar bae Mabude to kial ḳoroin na, kushi mone ḳobulo ḳoroin na.
MAL 2:14 Erbade-o tumra zikao, “Ḳene kobul ḳoroin na?” Ḳaron oilo, tumrar zuanki kalor bibir biar aḳto Mabud to shakki oisla. Ou bibi-u tumrar zindegir logi, tumrar ḳabin ḳora bou. Otota bade-o tumrar i bour loge beimani korso.
MAL 2:15 Mabude kita zamai-boure ek kaya banaisoin na ni? Ruhe ar ḳayae tara to tan-u saman. Tarare ḳene ekḳano ḳora oise? Tan kial asil, tarar mazdi allaoala ek kandan ḳaim roito. Erdae tumrar dilor befare hushiar o, zuankir bibir loge beimani korio na.
MAL 2:16 Boni Israilor Mabud Allae ḳoira, “Boure talaḳ deoa ami gin ḳori.” Alla Rabbul Alamine aro ḳoira, “Zulumre finnor ḳafoṛor laḳan findia, zalimi surote ze manush haze, tar ḳamre-o ami gin ḳori. Erdae tumra tumrar dilor befare hushiar o, bour loge beimani korio na.”
MAL 2:17 Tumra nizor zobandi Mabudre teḳto ḳoriliso. Erbade-o tumra zikairae, “Amra ḳemne tanre teḳto ḳorsi?” Tumra to ḳoiso, zetae naformani koroin, ita hokkolti Mabudor nozoro bala manush, tain otar ufre kushi. Arnae ḳoiso, kuai hou Alla, zein hok insaf ḳoroin?
MAL 3:1 Huno, ami Alla Rabbul Alamine oada ḳoriar, ami amar foygamborre bezimu, tain aiba, aia amar age gia fot ṭik-ṭak korba. Ar tumra ze malikor lagi bar sairae, tain-o aḳta-u tan goro toshrif anba. Ze zonor lagi tumra ashik oigeso ḳoirae, amar niomor hou foygambore toshrif anra.
MAL 3:2 Oile tan toshrif anar din, shoijjo ḳorar himmot oibo ḳar? Tan shamne ubanir ḳemota ḳar? Tain to hunaror agunir laḳan, dufar sabonor laḳan.
MAL 3:3 Hunare zela shuna-rufare zalaia ḳaṭi banae, tain-o ou beshe boiba. Ar shuna-rufar nomunae Lebir ḳandanre faḳ-saf ḳorba, ḳaṭi banaiba. Bade oula manush taḳba, zara Mabudor name sohi niote faḳ-saf lilla-kurbani adae ḳorba.
MAL 3:4 Teu agor amolor laḳan Zeruzalem ar Ehuda deshor manshor lilla-kurbani Mabude kushi oia kobul ḳorba.
MAL 3:5 Ami Alla Rabbul Alamine ḳoiar, hou shomoy ami bisar ḳorar lagi tumrar gese aimu. Aia zadugir, zinakur, misa shakki deora, ḳamlar beton ṭogra, ṛaṛi beṭin ar etimor ufre zulum ḳorra, musafiror bae hok insaf na ḳorra, mani zoto zone amare ḍorae na, tara hokkolor bifokke shakki dite ami kunu deri kortam nae.
MAL 3:6 O Iakubor aolad oḳol, ami Mabud, amar zobanor kunu rod-bodol nai, erdae-u tumra binash oirae na.
MAL 3:7 Tumrar baf-dadar zomana taki-u amar hukum-ahkam mancho na, ar amolo ḳorso na. Tumra amar gese firia aio, ami-o tumrar gese aimu. Oile tumra ḳoirae, “Amra kila firia aitam?”
MAL 3:8 Kunu manshe kita Allare ṭogito fare ni? Oile tumra to amare ṭogirae. Ṭogia hirbar ḳoirae, “Amra ḳemne tumare ṭogailam?” Huno, tumra to zoḳat adae ar lilla-kurbanir befare amare ṭogirae.
MAL 3:9 Tumrar asta zatie milia amare ṭogirae, erdae-u tumra lannotor maze gaṛi roiso.
MAL 3:10 Tumrar hoḳol ruzir dosh baṭor eḳ baṭ amar banḍaro deo, zate amar goro ḳani-kuraki roy. I befare tumra amare forikka ḳoria dekilao, ami Alla Rabbul Alamine asmanor hoḳol duar kulia, tumrar dorḳaror saite-o beshi, behishab boroḳot dei ki na.
MAL 3:11 Ami keti korra fuk oḳolre bada dimu, itae tumrar zominor foshol ḳaia binash ḳorta nae. Ar tumrar ḳetor angur folo zoria foṛto nae.
MAL 3:12 Ami Alla Rabbul Alamine ḳoiar, ola ḳorle duniar hoḳol zatie tumrare mubarok koibo, tumrar desh oibo aram ar kushi-bashir desh.
MAL 3:13 Oile ami Mabude ḳoiar, tumra to amar bifokke ḳoṛa-ḳoṛi mat matiso. Matia hirbar ḳoirae, “Amra tumar bifokke kita matilam?”
MAL 3:14 Te huno, tumra ḳoirae, “Allar ebadot ḳora to ḳamoḳa ḳoshṭo ḳora. Tan hukum-ahkam amol ḳorle, Alla Rabbul Alaminor gese mata nuaia solle amrar lab kita?
MAL 3:15 Te oḳon ao, amra beṭagiri deḳaora manshore doinno dei. Oe, oy, ḳaraf manshe-u to unnoti korra. Tara Allare forikka ḳoriao to rehai failira.”
MAL 3:16 Bade tarar maze zara Mabudre ḍoraito, tara eḳe-oinnoe batchit ḳorlo, ar Mabude ita kial ḳori hunla. Mabudor ḍor-ḳof zerar bitre asil, zera ḳas dile tan dian ḳorto, tarar nam Mabudor samne ek katat leḳa oilo.
MAL 3:17 Ami Alla Rabbul Alamine tarar befare ḳoiram, amar ṭik kori raḳa din aile tara amar ḳas samana oiba, tara amar-u bonda oiba. Bafe tar kezmot ḳorra fuare zela maya ḳore, ou laḳan ami-o tarare maya ḳormu.
MAL 3:18 Hou shomoy aroḳbar tumra deḳbae, forezgar ar naformanor maze, amar ebadot ḳorra, ar na ḳorrar maze ḳoto bebodan ḳori.
MAL 4:1 Huno, ami Alla Rabbul Alamine ḳoiram, hou din aior, zedin ḍomḳar agunir laḳan dau dau ḳori zolbo. I din hokkol boṛai korra ar naforman oḳol nerar laḳan zolba, tarar zoṛ ba dal-pala kunta-u zolar baki roito nae.
MAL 4:2 Oile tumra zera amare ḍorao, tumrar ufre dindarir shuruz uṭibo, i shuruzor tezor maze taḳbo shifa. Tumra guala tone saṛa faoa gorur baichchar laḳan nasibae.
MAL 4:3 Ami zedin ou ḳam ḳormu, i din tumra naforman oḳolre faodi uṛibae, tara oiba tumrar faor tolor sali. Iḳan ami Alla Rabbul Alamine ḳoilam.
MAL 4:4 Tumra amar bonda Musar shoriotor ḳota iad raḳo, ami Tur faṛor ufre tamam Boni Israilor lagi ze hukum-ahkam tan gese dislam, ota mono rakio.
MAL 4:5 Huno, Mabudor hou mohan ar bezuita ḍor-ḳofor din aibar age, ami Mabude Ilias nobire tumrar gese bezimu.
MAL 4:6 Tain aia ma-bafor dil tarar fua-fuṛintor bae, ar fua-fuṛintor dil tarar ma-bafor bae firaiba, zate ami aia hari tarar deshre lannot ḍalia binash na ḳori. Ḳotom.
MAT 1:1 Hozrot Isa al-Mosi oila Daud nobir bongshodor, ar Daud oila Hozrot Ibrahimor bongshodor. Isa al-Mosir ḳandanor forisoy oilo,
MAT 1:2 Hozrot Ibrahimor fua Hozrot Isʼhak, Isʼhakor fua Hozrot Iakub, Iakubor fua Ehuda ar tan baiain,
MAT 1:3 Ehudar fuain Firuz ar Zarah, erar maʼr nam Tamar. Firuzor fua Hasir, Hasiror fua Rayam,
MAT 1:4 Rayamor fua Aminadab, Aminadabor fua Nahish, Nahishor fua Selim,
MAT 1:5 Selimor fua Buaz, tan maʼr nam Rahba. Buazor fua Ubayed, tan ma oila Rut. Ubayedor fua Ias,
MAT 1:6 Iasor fua Bashsha Daud. Daudor fua nobi Sulaiman, en ma asla Uriar ṛaṛi bou Batseba.
MAT 1:7 Sulaimanor fua Rohbiam, Rohbiamor fua Abia, Abiar fua Asa,
MAT 1:8 Asar fua Zihusafoṭ, Zihusafoṭor fua Uram, Uramor fua Uzia,
MAT 1:9 Uziar fua Zutom, Zutomor fua Ahaz, Ahazor fua Hizkia,
MAT 1:10 Hizkiar fua Manosha, Manoshar fua Amon, Amonor fua Iushia,
MAT 1:11 Iushiar fua Iakunia ar tar baiain. Israil zatire Babil desho bondi kori neoar bala erar zonom oisil.
MAT 1:12 Israil zatire Babil desho bondi kori neoar bade Iakuniar fua Saltielor zonom oisil. Saltielor fua Zerbabil,
MAT 1:13 Zerbabilor fua Abihud, Abihudor fua Iliakim, Iliakimor fua Azor,
MAT 1:14 Azoror fua Sadik, Sadikor fua Akim, Akimor fua Elihud,
MAT 1:15 Elihudor fua Ali-Azor, Ali-Azoror fua Motin, Motinor fua Iakub,
MAT 1:16 Iakubor fua Iusuf, ou Iusuf oila Bibi Moriomor zamai. Bibi Moriomor feṭo Hozrot Isar zonom oisil, enre ḍaḳa oy al-Mosi.
MAT 1:17 Ou laḳan Hozrot Ibrahim taki Daud nobi forzonto souddo siṛi. Daud nobi taki Babilo bondi kori neoa forzonto souddo siṛi. Babilo bondi oa taki al-Mosi forzonto souddo siṛi.
MAT 1:18 Isa al-Mosir zonom oisil ou laḳan. Iusuf namor eḳ zonor loge Bibi Moriomor shadi ṭik oisil, oile tara eḳloge mila-misha ḳorar age-u Allar Pak Ruhur kudroti bole Moriomor feṭo hurutta ailo.
MAT 1:19 Iusuf asla hok manush, Moriomor feṭo hurutta ase, i kobor hunia tain Moriomre manshor samne shorom dita saila na, erdae mone mone ṭik korla, lukaia i bia bangilita.
MAT 1:20 Tain zebla olaḳan sinta ḳorra, ou shomoy Mabudor eḳ firistae kuabor maze tanre doroshon dia ḳoila, “O Iusuf bin Daud, tumi Moriomre shadi korte ḍoraio na. Tan feṭo ze hurutta aise, ita to Pak Ruhur kudroti bole-u oise. Tan goro eḳ fuae zonom loiba.
MAT 1:21 Tumi i fuar nam rakio Isa. Ḳaron i namor mani toraneala, ein nizor ummot oḳolre guna taki toraiba.”
MAT 1:22 Agor zomanar nobir mazdi Mabude zela bataisla, oḳan folibar lagi-u ita oibo.
MAT 1:23 Mabude bataisla, “Huno, eḳzon abiati shoti narir feṭo hurutta aibo, tain eḳ fuar zonom diba, i fuare ḍaḳa oibo Immanuel.” I namor mani oilo, Alla amrar loge asoin.
MAT 1:24 Bade gum taki uṭia Iusufe firistar hukum mafik Bibi Moriomre shadi korla.
MAT 1:25 Oile ou fuar zonmor ag forzonto tain Moriomor loge kunu mila-misha ḳorla na. Shomoy moto ou fuar zonom oilo, tain ou fuar nam raḳla Isa.
MAT 2:1 Raza Herudor amolo Ehudia zilar Betelham gaut Hozrot Isar zonom oisil. Zonmor bade fubor deshor ḳoyzon gonoḳ Zeruzalem ṭauno aia zikaila,
MAT 2:2 “Ihudi zatir ze bashshar zonom oise, ein kuai? Amra asmanor fubedi tan zonmor tera deḳsi, dekia tanre boḳti deoat aisi.”
MAT 2:3 Noya bashshar ḳota hunia Raza Herud ar Zeruzalemor bad-baki hoḳol manush kub sintat foṛigela.
MAT 2:4 Erlagi Herude deshor boṛo imam ar moulana oḳolre ekḳano dola ḳori zikaila, “Afnara zanoin ni, al-Mosi kuai zonom loiba?”
MAT 2:5 Era ḳoila, “Tan zonom oibo Ehudia zilar Betelham gaut. Agor zomanar eḳ nobir kitabo leḳa ase,
MAT 2:6 O Ehudia zilar Betelham, Ehudiar nami-dami zagar maze tumi kunumonte-u huru nae, tumar maz taki-u to ola eḳzon bashsha foyda oiba, zein amar Israil zatire salaiba.”
MAT 2:7 Teu Herude hou gonoḳ oḳolre niralae nia zikaia zanla, ṭik kun shomoy hou zonmor tera deḳa gesil.
MAT 2:8 Tain ou gonoḳ oḳolre ḳoila, “Afnara Betelham zaukka, gia bala ḳori ou huruttar tallash ḳoroukka. Tan kunu ḳobor faile amare zanaiba, teu ami-o gia tanre boḳti dimu.”
MAT 2:9 Razar hukum faia gonoḳ oḳol roana dila. Tara fubor asmano ze zonom tera deḳsila, ou tera tarar age age gelo. Ar ou hurutta ze zagat asla, ṭik ou zagat aia tera tami gelo.
MAT 2:10 Tera tami gese dekia gonoḳ oḳlor bitre kushir ḍeu uṭlo, kushir maire tara goror bitre hamaila.
MAT 2:11 Goro hamaia ou huruttare tan ma Moriomor ḳandat deḳla. Dekia tara maṭit foṛi tanre boḳti dila, ar tarar beg kulia dami dami ufohar dila. Ou ufohar oilo shuna, loban-agor ar mura-ator.
MAT 2:12 Oile Allae kuabor maze tarare hushiar ḳori dila, tara zanu Raza Herudor gese ar firia na zain. Teu tara dusra fote nizor desho gelagi.
MAT 2:13 Gonoḳ oḳol gia harle Allar eḳ firistae kuabor maze Iusufre doroshon dia ḳoila, “O Iusuf uṭo, fua ar tan maʼre loia Mishor desho bagia zaogi, bade ami zotodin na ḳoi, otodin hono-u roio. I fuare marilito ḳori Herude tukaibo.”
MAT 2:14 Teu Iusuf uṭia ou rait-u tarare loia Mishoro roana dila,
MAT 2:15 ar Raza Herud morar ag forzonto hono roila. Ita goṭisil, zate agor eḳ nobir mazdi Mabude zeta zanaisla, ota fura oy. Mabude bataisla, “Ami amar futre Mishor taki ḍakia anlam.”
MAT 2:16 Gonoḳ oḳole Raza Herudre ṭogisoin ḳoria tain kub gusa ḳorla. Erlagi gonoḳ oḳlor ges taki tain ze shomoyor ḳota hunsla, ou shomoy mafik Betelham gau ar er ash-fash elaḳat dui bosor ba tar ḳom boyoshi zoto fuain asla, ita hoḳolre marilibar hukum dila.
MAT 2:17 Ete nobi Iaromiar mazdi Mabude zeta zanaisla, ota foligelo. Mabude bataisla,
MAT 2:18 Ramat kub ḳanda-ḳaṭir aoaz huna zar, Rahelae tair huruttaintor lagi kander, kunumonte-u shanti or na, tair huruttain shesh oigesoin.
MAT 2:19 Bade Raza Herud moria harle Mabudor eḳ firista aia, Mishor desho Iusufre kuabor maze ḳoila,
MAT 2:20 “O Iusuf, uṭo, ou fua ar tan maʼre loia Israil desho zaogi. Fuare zetae marilita saisla, ita to morigesoin.”
MAT 2:21 Teu Iusuf uṭia fua ar fuar maʼre loia Israil deshor shimanat aila.
MAT 2:22 Aia hunla, hou Herudor fua Arkilaus oḳon Ehudia zilar raza oigese. Erlagi tain hino zaite ḍoraila. Bade kuabe hukum faia Galil zilat gelagi.
MAT 2:23 Galilo gia Nasarot namor ek gaut boshot ḳorla. Ita goṭilo, zate agor nobi oḳlor mazdi zeta zanail oisil, ota oḳon fura oy. Zanail oisil, “Tanre Nasaroti koia ḍaḳa oibo.”
MAT 3:1 Ou shomoy Ehudia zilar morubumit aia Ehia nobie toblig korla,
MAT 3:2 “Touba ḳoro, duniar maze behesti bashshai salu oite ar beshi deri nae.”
MAT 3:3 Ou Ehia nobir befare-u Ishaya nobie age bataisla, Morubumir maze eḳzon manshe zure zure elan ḳorra, ‘Tumra malikor fot sohi koro, tan solar rasta oḳol shida ḳoro.’
MAT 3:4 Ehia nobie to uṭor rumor ḳafoṛ findita ar ḳomro samṛar belṭ bandita. Tain faṛia mou ar foring kaita.
MAT 3:5 Tan toblig hunar lagi asta Ehudia zila, Zeruzalem ṭaun ar Zordan gangor sairobae taki bout manush tan gese aila.
MAT 3:6 Aia zarzir guna shikar ḳorla, bade tain erare Zordan gango toubar gusol ḳoraila.
MAT 3:7 Tain deḳla, toubar gusol ḳorar lagi bout Forishi ar Siddekia mozobor manush-o tan gese aira. Ou tain ḳoila, “O hafor baichchain, asmani gozob aior dekia zan basanir fot tumrare ḳegie batai dilo?
MAT 3:8 Tumra zudi hasaror touba ḳoria taḳo, te er fol-o deḳao.
MAT 3:9 Mone mone ḳoio na, tumra Ibrahimor aolad. Huno, ami koiram, Allae saile to ou fattor oḳol taki-u Ibrahimor aolad banaita farba.
MAT 3:10 Gasor guṛit to kuṛal lagail-u ase. Ze gaso bala fol dore na, i gas ḳaṭia agunit falail oibo.
MAT 3:11 “Touba ḳorso gotike ami tumrare fanidi gusol ḳorailam, oile amar bade aro eḳzon aira, ein ama tone-o himmot-ala, tan faor zuta boar laḳ-o ami nae. Tain aia tumrare Pak Ruhu ar aguindi gusol ḳoraiba.
MAT 3:12 Tan kula to tan ato-u ase, ikan dia tain dan uaia ugaro tulba, ar susare ou agunit falaia zalaiba, ze aguin kunu shomoy nibto nae.”
MAT 3:13 Ou shomoy Galil zila taki Hozrot Isa-o pak gusol ḳorar lagi, Zordan gango Ehia nobir gese aila.
MAT 3:14 Oile Ehiae tanre oḳan ḳoia na ḳorla, “Afne aisoin ni amar gese, amar-u zorur asil afnar gese gia gusol ḳora!”
MAT 3:15 Isae zuaf dila, “Aichcha, oḳon ola-u ouk, karon amrar usit oilo Allar morzi furon ḳora.” Ikan hunia Ehia razi oigela.
MAT 3:16 Pak gusol ḳoria fani taki uṭte-u Isae deḳla, asman dui bag oigese, ar Allar Ruhu faror surot doria tan ufre lamia aira.
MAT 3:17 Ou shomoy asman tone gaibi aoaz oilo, “Ein-u amar ḳas mayar zon Ibnulla, en ufre ami kub kushi.”
MAT 4:1 Pak gusol ḳorar bade, Allar Pak Ruhur isharae Isare morubumit neoa oilo, zate ou shomoy Iblise tane forikka ḳorar shuzug fae.
MAT 4:2 Morubumir maze tain eḳlagare sallish din sallish rait ruza asla. Erbade tan kub feṭo buk laglo.
MAT 4:3 Ou shomoy Iblise aia tanre ḳoilo, “Tumi zudi Ibnulla, Allar ḳas mayar zon o, te ota fattorre ḳo na ruṭi oizito.”
MAT 4:4 Isae zuaf dila, “Allar kalamo leḳa ase, ḳali ruṭi kaile-u manush base na, borong Allar fortek kalame-u manush base.”
MAT 4:5 Teu he Isare loia fobitro ṭaun Zeruzalemo gelo, gia Baytul-Mukaddos Kaba goror minarar ufre tane uba ḳoraia ḳoilo,
MAT 4:6 “Tumi zudi Allar ḳas mayar zon o, te deki sain, on taki fal dia lamat foṛo, kitabo to leḳa ase, Allae tan firista oḳolre hukum diba; ar tara nizor atdi tumare doriliba, zate tumar fao-o kunu fattoror suṭ na lage.”
MAT 4:7 Isae tare ḳoila, “Kitabo ou ḳota-o leḳa ase, Tumi tumar Mabud Allare forikka ḳorat lagio na.”
MAT 4:8 Bade Iblise tanre kub usa eḳ faṛor ufre loia gelo, nia eḳ foloḳe duniar tamam mulluk ar otar hoḳol zak-zomoḳ deḳailo ar ḳoilo,
MAT 4:9 “Tumi zudi amare soizda ḳorilao, te i hokkolta ami tumare dilaimu.”
MAT 4:10 Isae zuaf dila, “Dur Shoytan, bag! Allar kalamo ase, tumi kali tumar Mabud Allare-u ḍoraio, ḳali tan ebadot ḳorio.”
MAT 4:11 Oḳan hunia Iblis tan ges taki horia gelogi, ar Allar firista oḳol aia tan kezmot ḳorla.
MAT 4:12 Bade Isae ḳobor faila, Ehia nobire aṭok koria zelo harail oise, oḳan hunia tain Galil zilat gelagi.
MAT 4:13 Hono gia Nasarot gau saṛia Sobulon-Noftali elaḳar aoror faror Kofornaum ṭauno gia roila.
MAT 4:14 Ita hoḳolta oilo, zate Ishaya nobir mazdi Allae zeta bataisla, ota oḳon folizae. Ishaya nobie ḳoisla,
MAT 4:15 Bidormi manshor boshot ḳana Galil zilar aoror faror Sobulon-Noftali elaḳar manush, ar Zordan gangor dusra faror manshor gese Allar nur zair oibo.
MAT 4:16 Zeta manush be-foti bonia andarir maze zindegi kaṭaira, tara Allar nuror moha rushni deḳba. Ar zera goin andarir maze boshot ḳore, tarar gese-o Allar nur zair oibo.
MAT 4:17 Ou shomoy taki Isae toblig korla, ḳoila, “Touba ḳoro, ḳaron duniar maze behesti bashshai salu oite ar beshi deri oito nae.”
MAT 4:18 Hozrot Isa Galil aoror faredi aṭia zaira, ou shomoy deḳla, Saimon urfe Fitor ar en bai Andriase aoro zal baira, era to zalua asla.
MAT 4:19 Isae erare ḳoila, “Amar loge ao, ami tumrare manush dorar zalua banaimu.”
MAT 4:20 Loge loge era zal falaia Isar loge roana oigela.
MAT 4:21 On tone tuṛa age gia deḳla, Iakub ar Hannan tara duio baie bafor loge nao-o boia zal zuit-zait ḳorra. Erar bafor nam Zibudia. Isae erare dekia ḍaḳ dila,
MAT 4:22 ḍaḳ hunia era-o tarar bafre nao-o toia Isar loge aila.
MAT 4:23 Bade Isa Galil zilar hoḳol zagat guri guri, honor nanan mosido gia nosiot ḳorla, ar behesti bashshair kush-ḳobri toblig korla. Erloge bout nomunar bemarire bala ḳorla.
MAT 4:24 Asta Siria deshor maze tan ḳobor roṭi gelo. Ete nanan nomunar bemar-azar ar zala-zontronae zeta manshe ḳoshṭo faisil, zerare zin-bute dorsil, mirgi ar ordong bemari zoto manush asil, manshe otare Isar gese loia aila. Tain era hoḳolre bala ḳorla.
MAT 4:25 Galil, Dikafoli, Zeruzalem, Ehudia ar Zordanor oinno far taki bout manush Isar ḳore ḳore roana oila.
MAT 5:1 Bout manush aisoin dekia Isa gia eḳ faṛor ufre uṭila. Uṭia boar bade tan shagrid oḳol ḳandat aila.
MAT 5:2 Shagrid oḳolre dekia tain ou talim dila, ḳoila,
MAT 5:3 “Nek-kofali ou manush-u zara dil taki nizore gorib mono ḳore, behesti bashshai to tara-u faiba.
MAT 5:4 Tara-u ḳofali zarar mono oḳon duk ase, tara-u to shuk faiba.
MAT 5:5 Tara-u ḳofali zarar sal-cholon norom, i dunia to tarar-u oibo.
MAT 5:6 Tara-u ḳofali zara dile-zane fak-forezgarir lagi kande, tarar ou asha fura oibo.
MAT 5:7 Tara-u ḳofali zara manshore doya ḳore, tara-u to doya faiba.
MAT 5:8 Tara-u ḳofali zarar dil ḳaṭi, ḳaron tara-u Allar didar faiba.
MAT 5:9 Tara-u ḳofali zara manshore shantie raḳar lagi menot ḳore, Allae tarare tan afon aolad ḳoia ḍakiba.
MAT 5:10 Tara-u ḳofali zara Allar hukum mafik solat gia zulum-mosibot shoijjo ḳore, behesti bashshai to tara-u faiba.
MAT 5:11 “Ar tumra-u ḳofali zarare amar lagi manshe ginnae, manshe tumrare zulum ḳore ar nanan nomunar misa bodnam gae.
MAT 5:12 Ila oile mono rakio, tumrar age ze nobi oḳol aisla, ita manshe ou nobir ufre-o ola zulum ḳorta. Te tumra kushi-bashi ar furti korio, ḳaron tumra-o ou nobi oḳlor laḳan behesto bout boṛo furuskar faibae.
MAT 5:13 “Tumra oilae duniar nun, oile nunor gun zudi nosṭo oizae, te ar nunta ḳora zae ni? I nun to ar kunu ḳamo lage na. Manshe ita bare falai dein ar itar ufredi aṭoin.
MAT 5:14 “Huno, tumra oilae duniar batti. Faṛor ufror kunu ṭaun to lukail raḳa zae na.
MAT 5:15 Ar kunu manshe lem zalaia ṭukrir tole toy na, ikṭa lem-danir ufre-u toy, zate goror hoḳole for deḳoin.
MAT 5:16 Ou laḳan tumrar for-o manshor samne zolouk, zate tumrar bala ḳam dekia manshe tumrar behesti baf, Alla Pakor tarif ḳoroin.
MAT 5:17 “Tumra ikan mono ḳorio na, ami Tourat Kitab ar nobi oḳlor sohifa batil ḳorat aisi. Ami to ita batil ḳorat nae, borong fura ḳorat aisi.
MAT 5:18 Ami hasa ḳota ḳoiram, Tourat Kitabor hoḳol ḳota zotodin na folise, oto din i kitabor eḳṭa horof ba zer-zobor-o batil oito nae. Asman-zomin koy na oa forzonto, ikan batil oito nae.
MAT 5:19 Tourat Kitabor kunu huru-muru hukum-o zudi keu na mane, ba i hukum na manar lagi manshore foramish dey, te behesti bashshait tare-o hoḳol taki huru ḳoa oibo. Oile ze zone i hukum-ahkam amol ḳore ar manshore-o hikae, behesti bashshait tare bout dam deoa oibo.
MAT 5:20 Ami tumrare ḳoiram, alim-ulama ar Forishi oḳlor amol taki-o, tumrar amol zudi aro bala na oy, te kunumonte-u behesti bashshait hamaitae fartae nae.
MAT 5:21 “Tumra huncho, agor amolor manshor gese ḳoa oise, ‘Kun ḳorio na, zegie kun ḳorbo, he i kunor daṛo foṛbo.’
MAT 5:22 Oile ami tumrare ḳoiram, ze manshe tar bai-biradoror loge rag-gusa ḳore, he bisaror daṛo foṛbo. He zudi tar baire ḳoy, ‘Tumi to be-aḳol’ te aro boṛo bisaror daṛo foṛbo. Ar ze zone tar baire ḳoy, ‘Tumi beokuf,’ he duzoḳor aguino zolbo.
MAT 5:23 “Erdae kurbani kanat gia Allar name lilla-sodga dibar shomoy zudi tumar mono oizae, tumar loge tumar kunu bair bibad ase,
MAT 5:24 te tumar lilla-sodga ou zagat toia, age gia tumar bair loge miṭ-maṭ ḳoro, bade gia tumar kurbani deo.
MAT 5:25 “Ḳeu tumar birudde kunu mamla ḳorle adaloto zaoar age-u tar loge zoldi miṭ-maṭ ḳorilio. Ila na ḳorle, he tumare hakimor ato dibo, hakime tumare fulishor haola ḳorba, ar fulishe tumare zelo haraiba.
MAT 5:26 Heshe tar shullo-ana faona adae na ḳora forzonto, tumi kunumonte-u saṛa faitae nae. Ami tumrare asol ḳota ḳoilam.
MAT 5:27 “Tumra huncho, age batail oise, ‘Zina ḳorio na.’
MAT 5:28 Oile ami tumrare ḳoiram, kunu beṭae zudi kunu beṭi manshor bae ku-nozore sae, te he ou shomoy mone mone tair loge zina ḳorlo.
MAT 5:29 “Tumar ḍain souke zudi tumare gunar fote ṭane, te i souk tulia falai deo. Asta shoril loia duzoḳo zaoa taki, eḳṭa ongo binash ḳorilaoa tumar lagi bala.
MAT 5:30 Tumar ḍain ate zudi tumare gunar fote ṭane, i at ḳaṭia falai deo. Asta shoril loia duzoḳo zaoa taki, eḳṭa ongo binash ḳorilaoa tumar lagi bala.
MAT 5:31 “Aro ḳoa oise, ‘Ze manshe tar boure talaḳ dey, he boure talaḳ nama deuk.’
MAT 5:32 Oile ami tumrare ḳoiram, ze manshe zina saṛa oinno kunu ḳarone nizor boure talaḳ dey, he to tar boure zinakur banae. Ar talaḳ faoa beṭire zegie bia ḳore, he-o zinakur bone.
MAT 5:33 “Tumra to zano, agor zomanar manshor gese batail oise, ‘Misa kunu ḳosom ḳorio na, ar zekunu ḳosom ḳorle iṭa Allar name adae ḳorio.’
MAT 5:34 Oile ami tumrare ḳoiram, kunuzat ḳosom ḳorio na. Behestor name ḳosom ḳorio na, ikan to Allar arosh.
MAT 5:35 Duniar name ḳorio na, ikan to Allar ḳodom mubarok toar zaga. Zeruzalemor name-o ḳosom ḳorio na, ikan oilo mohan bashsha Allar ṭaun.
MAT 5:36 Tumar nizor matar name ḳosom ḳorio na, i matar eḳsa sulre dola ba ḳala ḳorar ḳemota to tumar nai.
MAT 5:37 Tumrar mator oy ḳan oy, ar na ḳan na ouk. Huno, itar bare ar zotota-u oy, ita Iblis taki oy.
MAT 5:38 “Tumra to huncho, age batail oise, ze forimane ḳeti oise, ou forimane shaza dio, ‘Souḳor bodla souk ar dator bodla dat.’
MAT 5:39 Oile ami koiram, ḳeu zudi tumrar loge ḳaraf bebohar ḳore, te tumra er bodla loio na, borong kunu manshe tumar ḍain galo soṛ marle, tare bau gal-o fatia dilaio.
MAT 5:40 Ḳeu zudi mamla-mokoddoma ḳoria tumar kurta nitogi sae, te tumar saddor-o dilaio.
MAT 5:41 Ḳeu zudi tumare ḳoy, tar gaiṭ boia loia eḳ mail zaitae, te tumi tar loge dui mail zaiogi.
MAT 5:42 Ḳeu tumar gese kunta kuzile tare dio. Ḳeu aolat saile, tare firai dio na.
MAT 5:43 “Tumra zano, age to batail oisil, ‘Tumar ari-forire maya ḳorio ar dushmonre ginnaio.’
MAT 5:44 Oile ami tumrare ḳoiram, tumrar dushmonre-o maya ḳorio. Zera tumrare zulum ḳore, tarar lagi dua ḳorio.
MAT 5:45 Ita dekia manshe buzba, tumra hasau tumrar behesti baf Alla Pakor mayar aolad bonigeso. Tain to bala-bura hoḳlor ufre tan shuruz uṭain, dindar ar naforman hoḳlor ufre-u meg-fani dein.
MAT 5:46 Zara tumrare mohobbot ḳore, tumra zudi kali tarare-u mohobbot ḳoro, te tumra kita furuskar faibae? Gushkur toshildar oḳole-o ila ḳore na ni?
MAT 5:47 Tumra zudi kali nizor baire salam deo, te oinno manush taki beshi ar kita ḳorrae? Bidormi oḳole-o ila ḳoroin na ni?
MAT 5:48 Erlagi ami koiram, tumrar behesti baf Alla Pak zela ḳaṭi, tumra-o ola ḳaṭi o.
MAT 6:1 “Tumra hushiar roio, manshore deḳanir lagi ebadot-bondegi korio na, ila ḳorle tumrar behesti baf Alla Pakor ges taki kunu furuskar faitae nae.
MAT 6:2 “Kunu manshore dan-ḳoyrat dile bonḍo oḳlor laḳan dio na. Tara to manshor ges taki tarif faita ḳori mosido-mondiro ar fote-gaṭe, ḍul-ḍofki bazaia lilla-zoḳat dein. Ami tumrare hasau ḳoiram, tarar furuskar to tara failise.
MAT 6:3 Oile tumi kunu dan-ḳoyrat dile, tumar ḍain ate bilaile bau ate zanu na zane.
MAT 6:4 Oula lukaia dan ḳorio. Teu tumar behesti baf Alla, zein lukaia hoḳolta deḳoin, tain-u tumare furuskar diba.
MAT 6:5 “Tumra zebla dua ḳoro, ou shomoy bonḍo oḳlor bab dorio na. Tara manshore deḳanir lagi mosido-mondiro ar fotor muko ubaia dua ḳore. Ami tumrare hasau ḳoiram, itae to tarar furuskar failise.
MAT 6:6 Oile tumi dua ḳorar bala goror dorza-zanala lagaia dua ḳorio, ar tumar niraḳar baf, zenre deḳa na gele-o azir asoin, hou Allar gese saio. Tain to gufon hoḳolta deḳoin, tain-u tumare fol diba.
MAT 6:7 “Tumra zebla dua ḳoro, ou shomoy duniar manshor laḳan ḳamoḳa ber-beri korio na. Tara mono ḳoroin, beshi beshi koile Allae tarar dua kobul ḳorba.
MAT 6:8 Tumra tarar laḳan oio na, tumrar behesti baf Allar gese saoar age-u, tain zanoin tumrar kita dorḳar.
MAT 6:9 Erlagi tumra olaḳan dua ḳorio, O baba, amrar behesti baf, tumar nam fak-fobitro mana ouk.
MAT 6:10 Duniait tumar bashshai zoldi auk, shob tumar morzi mafik kora zauk, behesto zela oula duniait, behesto zela oula duniait.
MAT 6:11 O baba, aizkur ḳani aizku deo, maf ḳoro amrar hoḳol oforad,
MAT 6:12 zara amrar birudde ḳorse faf, amra to tarare dilaisi maf.
MAT 6:13 Falaio na amrare forikkat, Shoytanor ḳobza taki koro ḳalas.
MAT 6:14 Huno, tumra zudi aroḳzonor oforad maf ḳoro, te tumrar behesti baf Allae-o tumrar oforad maf ḳori diba.
MAT 6:15 Oile tumra zudi oinnore maf na ḳoro, te tumrar behesti bafe tumrare-o maf ḳorta nae.
MAT 6:16 “Tumra zebla ruza raḳo, ou shomoy bonḍo oḳlor laḳan muk kala ḳorio na. Tara ruza raḳsoin, oḳan deḳanir lagi souk-muk kala ḳori raḳoin. Ami tumrare hasau ḳoiram, itae to tarar furuskar failise.
MAT 6:17 Oile tumi ruza raḳle muk-at doio, matat tel-fani dio,
MAT 6:18 zela manshe buzto na fare, tumi ruza raḳso. Teu tumar niraḳar baf, zenre deḳa na gele-o azir asoin, hou Allae-u ita deḳba. Tain to gufon hoḳolta deḳoin, tain-u tumare fol diba.
MAT 6:19 “I zindegit tumra nizor lagi oto don-shompod zomaio na. Duniar shompodor maze zongare dore, fuke ḳae ar hing kudia sure ney.
MAT 6:20 Oile behestor maze nizor lagi samana zomao, hino zongare dore na, fuke-o ḳae na ar suri-o oy na.
MAT 6:21 Mono rakio, tumar don zeno, mon-o hono roy.
MAT 6:22 “Zano to, souk oilo shorilor batti. Tumar souk zudi bala oy, te tumar asta shorilo soḳsoḳa for oibo.
MAT 6:23 Oile tumar souk zudi karaf oy, te asta shoril-u ḳala andair oizibo. Tumar dilor batti andair oile, i andair boṛo bezuita.
MAT 6:24 “Zano ni, kunu gulame-u dui munibor kezmot ḳorto fare na, he eḳzonre ginnaibo aroḳzonre bala faibo. Arnae eḳzonor bae kial ḳorbo, aroḳzonre elami korbo. Te tumra-o Alla Pak ar don-samana, duiotar kezmot eḳloge ḳortae faro na.
MAT 6:25 “Erdae ami tumrare ḳoiram, kila ḳaitam ar kila finditam, ita loia sinta ḳorio na. Ḳani taki zan boṛo, ḳafoṛ-sufoṛ taki shoril boṛo.
MAT 6:26 “Asmanor ou fakintor bae sao, tara zala-o bain ḳore na, foshol-o ḳaṭe na, ugaro kunta zomae na, ḳali tumrar behesti baf Allae tarar kuraḳ dein. Te tumra kunu ita taki aro dami nae ni?
MAT 6:27 Ḳo sain, tumrar maze ḳeu sinta-babna ḳoria tar hayati ekkan gonṭa baṛaito farbo ni?
MAT 6:28 “Finnor ḳafoṛor lagi sinta ḳoro ḳene? Tumra ou zongli fulor bae saia deḳo, ita ḳoto beshi shundor! Itae to nizor shundoror lagi kunta-u ḳore na, kunu rong-o silai kore na, bain-o ḳore na, emne-u oy.
MAT 6:29 Te ami koiram, Bashsha Sulaiman oto zak-zomoḳor maze roile-o tan lebas to ota egu zongli fulor laḳan-o shundor asil na.
MAT 6:30 Deḳrae ni, zongolor maze ou zeta shundor ful oḳon ase, ḳail oile-u manshe ita daru banaia aguindi zalaibo. Allae zudi ou zongolre ola shundor ḳori hazaisoin, te O ḳomzur imandar oḳol, tumrare-o tain shundor ḳori hazaita nae ni?
MAT 6:31 Erdae kita ḳaitae ar kita finditae, ita loia sinta ḳorio na.
MAT 6:32 I duniar manshe ḳali ota loia-u danda ḳore. Tumrar behesti baf Allae to zanoin-u, ita hoḳolta tumrar zorur ase.
MAT 6:33 Erlagi tumra foyla-u Allar morzi zugaia solo, tan bashshair dandat ro. Teu ita hokkolta-o tumra faibae.
MAT 6:34 Ḳailkur sinta ḳorio na, ḳailkur befar ḳailkur ufre saṛi deo. Dinor azab dinor lagi zotesṭo.
MAT 7:1 “Tumra manshor dush tukanit roio na, teu tumrar dush-o tukail oito nae.
MAT 7:2 Tumra zela manshor dush tukao, Allae-o oula tumrar dush tukaiba. Tumra zela falladi mafibae, tumrar lagi-o ola mafa oibo.
MAT 7:3 “Tumar bair souḳor bitre guṛa ase ikan deḳrae, oile nizor souko gasor seli ase ikan deḳrae na ḳene?
MAT 7:4 Tumar sokut seli hamaise ikan zebla deḳrae na, te tumar baire kila ḳoibae, bai, tumar sokut guṛa hamaise, ao, bar ḳoria dei?
MAT 7:5 Haere bonḍo, foyla nizor souk taki seli bar ḳoro, bade tumar bair souk taki guṛa bar ḳorat lagle bala ḳori deḳtae farbae.
MAT 7:6 “Huno, kuttar samne fak-fobitro kunu siz dio na. Shuoror samne moni-mukta siṭaio na. Arnae ou sizre tarar faodi uṛia, ulṭa aia tumrare-o hamla ḳorta faroin.
MAT 7:7 “Ami tumrare ḳoiram, sao, tumrare deoa oibo. Tallash ḳoro, teu faibae. Duaro ṭuka deo, teu duar kula oibo.
MAT 7:8 Zara sae, tara-u to fae. Ze tallash ḳore he fae. Ze duaro ṭukae, tar lagi duar kula oy.
MAT 7:9 Tumrar maze ila kunu ma-baf ase ni, zar fute ruṭi saile maṭi dibo?
MAT 7:10 Mas saile haf dibo?
MAT 7:11 Tumra ḳaraf oia-o zudi tumrar huruttainre bala bala siz ditae zano, te zara behesti baf Alla Pakor gese saibo, tain to nisoy tarare bala bala siz dan ḳorba, ita to shababik.
MAT 7:12 Huno, tumra manshor ges taki zelaḳan bebohar faitae sao, tumra-o hoḳlor loge ou laḳan bebohar ḳoro. Ota-u oilo Tourat Kitab ar nobi oḳlor sohifar mul talim.
MAT 7:13 “Huno, tumra sifa duaredi hamaio, ḳaron ze fote binashor bae ṭane, i fot muṭa, fotor duar-o boṛo, bout manush ou duaredi hamain.
MAT 7:14 Oile ze fote gele zindegi mile, i fotor duar sifa, fot-o huru-muru. Kub ḳom manshe-u i duaror kuz fain.
MAT 7:15 “Bonḍo nobi oḳol taki hushiar roio. Tara tumrar gese meṛar surote ae, oile bitre bitre tara raikkosh bagor laḳan.
MAT 7:16 Tarar zindegi dekia-u sintae farbae. Zano to, gosa-ḳaṭar maze kunu angur dore ni ba bon-jonglar maze kunu ḍumur fol dore ni?
MAT 7:17 Ṭik ou laḳan, bala gase to bala fol-u dore ar mondo gase mondo fol-u dore.
MAT 7:18 Bala gase to mondo fol dore na, ar mondo gase bala fol dore na.
MAT 7:19 Ze gase bala fol dore na, igure ḳaṭia daru zalail oy.
MAT 7:20 Ola-u bonḍo nobi oḳlor zindegir fol deḳle-u itare sinbae.
MAT 7:21 “Mono rakio, amare ‘Huzur, huzur!’ ḳoile-u zen behesti bashshait hamaizibae, ikan ṭik nae. Borong ze zone amar behesti baf Alla Pakor morzi zugaia sole, ḳali he-u hamaito farbo.
MAT 7:22 Hou din aile boute ḳoiba, ‘Munib, munib, amra tumar name gaibi kobor ḳoisi na ni? Tumar name zin-but saṛaisi na ni? Tumar name bout keramoti deḳaisi na ni?’
MAT 7:23 Oile ami tarare zuaf dimu, ‘Dur, Iblisor dol! Ami to tumrare sini-u na, amar ges taki bago.’
MAT 7:24 “Ze manshe amar ou talim hunia amol ḳore, he aḳoldar manshor laḳan mozbut kuṭir ufre tar gor banae.
MAT 7:25 Bade meg-tufan ar zuar aia ou gorre ṭela dile-o falaito fare na, ḳaron ikan to mozbut kuṭir ufre banail oise.
MAT 7:26 Oile ze amar talim hunia-o amol ḳore na, he be-aḳolor laḳan norom maṭir ufre gor banae.
MAT 7:27 Bade zebla meg-tufan ar zuar aia ou gorre ṭela dey, ou shomoy ikan foṛia sefṭa oizae.”
MAT 7:28 Isar ita talim hunia manush taijjub bonigela.
MAT 7:29 Ḳaron tain to tarar moulana oḳlor laḳan talim na dia, ḳemotaban manshor laḳan talim dita.
MAT 8:1 Hozrot Isa faṛ taki lamia aile bout manush tan ḳore ḳore aila.
MAT 8:2 Ou shomoy eḳ fosa-kusṭo bemarie tan ḳandat aia faot foṛia ḳoilo, “Huzur, afnar morzi oile amare ou nafak bemar taki bala ḳorta faroin.”
MAT 8:3 Teu tain at baṛaia tare soia ḳoila, “Oy ami sairam, tumi fak-saf o.” Ḳoar loge loge-u tar bemar shifa oigelo.
MAT 8:4 Isae tare ḳoila, “Huno, ita ḳeurore hunaio na, ḳali imam sabor gese gia deḳao. Musa nobir shoriot mafik fak-saf oar lagi zela kurbani kora zorur, ou kurbani dile-u shomaze zaniliba tumi bala oigeso.”
MAT 8:5 Erbade Isa gia Kofornaum ṭauno hamaila. Hino Ruman sifair eḳ subedare tan gese aia minot-ḳajji lagaila,
MAT 8:6 “Huzur, amar gulamor obosh bemar oia bisnat foṛi roise, he kub ḳoshṭo ḳorer.”
MAT 8:7 Isae enre ḳoila, “Aichcha, ami zaimune, gia tare bala ḳormu.”
MAT 8:8 Teu subedare ḳoila, “Huzur, afnar moto zone amar baṛit toshrif nita, ami to er laḳ nae. Afne ḳali mukkandi koile-u he bala oizibo.
MAT 8:9 Afne to buzra, ami-o amar kamanḍaror hukume soli, oula amar sifai oḳol-o amar hukume soloin. Ami era eḳzonre ao ḳoile ae, zao ḳoile zae. Amar gulamre zudi koi, oḳan ḳoro, he ikan ḳore, te afne-o ola mukdi hukum dile-u he bala oizibo.”
MAT 8:10 Ikan hunia Isa ekkere taijjub oigela, tan ḳore oia zoto manush aoat asil, erare ḳoila, “Ami tumrare hasau ḳoiram, i subedar to bidormi Ruman manush, oile amar Boni Israilor maze-o oto boṛo mozbut imandar ami ar deḳsi na.
MAT 8:11 Huno, fub ar foismor desh taki bout zon aiba, tara Hozrot Ibrahim, Isʼhak ar Iakub nobir loge behesti bashshait ḳanit boiba.
MAT 8:12 Oile behesti bashshait zara taḳar ḳota, tarare bare andair gato falai deoa oibo. Hino tara ḳanda-ḳaṭi korba ar zala-zontronae dat kiṛimiṛi kaiba.”
MAT 8:13 Bade Isae ou subedarre ḳoila, “Tumi zaogi. Tumi zela ekin ḳorso, ola-u ouk.” Hasau, loge loge-u hou gulam bala oigelo.
MAT 8:14 Erbade Hozrot Isa Hozrot Fitoror baṛit gela, gia deḳla, Fitoror hoṛir kub taf uṭse, tain bisnat foṛono.
MAT 8:15 Tane dekia Isae tan ato soila, ar loge loge taf saṛi dilo. Beṭie uṭia Isar memandarit lagla.
MAT 8:16 Ou din hainja bala manshe zinor asor-ala bout zonre Isar gese loia aila. Isae tan mukor ḳotae-u erar zin saṛaila, ar hokkol bemarire bala ḳorla.
MAT 8:17 Ita goṭlo, zate Ishaya nobir mazdi bout age zeta batail oisil, ota oḳon fura oy. Hono batail oisil, Amrar hoḳol ḳomzuri tan ḳando nila, amrar bemar-azar horaila.
MAT 8:18 Isar sairo galabae biṛ lagi gese dekia, tan shagrid oḳolre hukum dila aoror hofaro zaitagi.
MAT 8:19 Ou shomoy eḳzon moulana aia Isare ḳoila, “Huzur, afne zeno zaiba, ami-o hono zaimu.”
MAT 8:20 Isae enre ḳoila, “Hunoukka, hialor gat ase, fakir-o bada ase, oile ami bin-Adomor mata toar ṭai nai.”
MAT 8:21 Aroḳzon shagride aia ḳoila, “Huzur, amare baṛit zaite deukka, ami foyla gia amar babar dafon-ḳafon ḳoria ai.”
MAT 8:22 Tain ḳoila, “Mora oḳole-u tarar morare maṭi deuk, tumi amar loge solo.”
MAT 8:23 Isa aoror hofaro zaita ḳori, tan shagrid oḳolre loia eḳ nao-o uṭla.
MAT 8:24 Isa naor maze gumaira, ou shomoy aḳta-u aoror maze boṛo eḳ tufan ailo, tufane naoḳan buṛizibar dosha oigelo.
MAT 8:25 I dosha dekia shagrid oḳole Isare hozag kori koila, “Huzur, amrare basaukka, amranu mori zairam.”
MAT 8:26 Isae zuaf dila, “O ḳomzur imandar oḳol, tumra ḍorairae ḳene?” Oḳan ḳoia tain uṭia tufan ar aorre domoḳ dila, teu hokkolta tir oigelo.
MAT 8:27 I keramoti dekia tara taijjub oia ḳoila, “Ein ashole ḳe? Tufan ar aore-o deki tan hukum mane!”
MAT 8:28 Erbade Isa aor faṛi dia Zerasini oḳlor desho aila. Ou shomoy bute dora duizon manush ḳobrostan taki bar oia tan gese ailo. Tara ola zonun fagol asla zen, tarare ḍoraia ḳeu ou fotedi zaito farto na.
MAT 8:29 Tara sillaia Isare ḳoilo, “O Allar ḳas mayar zon Ibnulla, amrar loge afnar kita dorḳar? Shomoy oar age-u afne amrare satanit aichchoin ni?”
MAT 8:30 Ou shomoy tarar ges taki tuṛa duroi boṛo eḳ shuoror fale ḳaoat asla.
MAT 8:31 But oḳole Isare minot ḳori koilo, “Afne amrare ḳedaite saile, ou shuoror falor maze faṭai deukka.”
MAT 8:32 Isae tarare izazot dia harle tara gia ou shuoror falor maze hamaigelo. Ar shuoror fale aoror ḳaṛa soredi kub zure douṛaia gia fanir maze buṛia morla.
MAT 8:33 Ita dekia shuoror raḳal oḳole douṛaia gia gaur hoḳol manshore ḳobor zanaila, erloge ou bute dora manshor ḳota-o ḳoila.
MAT 8:34 I goṭona hunia gaur hoḳol manush Isar loge deḳa ḳorat aila. Tan loge deḳa ḳoria tara minot ḳori koila, “Meherbani kori amrar desh taki zaukkagi.”
MAT 9:1 Bade Hozrot Isa nao-o ḳori aor faṛi dia nizor ṭauno aila.
MAT 9:2 Aia harle ḳoyzon manshe eḳzon obosh bemarire folodi boia loia tan gese ailo. Tarar imanor bol dekia Isae ou bemarire ḳoila, “Mono bol raḳo re fut, tumar guna maf ḳora oise.”
MAT 9:3 Ikan hunia ḳoyzon moulanae mone mone ḳoila, “I beṭae to shiriki korer.”
MAT 9:4 Isae tarar dilor bab buzia ḳoila, “Afnara ḳene ila ku-sinta ḳorra?
MAT 9:5 Amar lagi kunḳan ḳoa shuza, tumar guna maf ḳori dilailam, na uṭo, tumar bisna loia baṛit zaogi?
MAT 9:6 Te oḳon afnara forman deḳoukka, i duniat guna mafir ḳemota ami bin-Adomor ase.” Oḳan ḳoia-u tain bemari beṭare ḳoila, “Oba uṭo, tumar ḳeta-balish loia baṛit zaogi.”
MAT 9:7 Ḳoite-u hi bemari beṭa uṭia tar baṛit gelogi.
MAT 9:8 Ita dekia manush taijjub oigela, Allae manshore oto ḳemota disoin ḳori tara Allar tarif ḳorla.
MAT 9:9 Isae fotedi aṭia zaira, ou shomoy deḳla, Moti namor eḳzon manush ḳazna tular ofiso boiroisoin. Dekia tanre ḳoila, “Ao, amar ummot o.” Teu Moti uṭia Isar ḳore ḳore gela.
MAT 9:10 Erbade Isae tan shagrid oḳolre loia Motir baṛit gia ḳaoat boila. Tan loge bout ḳazna tulra ar naforman oḳol-o ḳanit asla.
MAT 9:11 Ita dekia Forishi mozobor manshe Isar shagrid oḳolre ḳoila, “Tumrar murshide gushkur ḳazna tulra ar ḳobis oḳlor loge ḳaoa-daoa ḳoroin ḳene?”
MAT 9:12 Ikan hunia Isae ḳoila, “Bala manshor lagi kobiraz lage na, oile bemarir lagi to lage.
MAT 9:13 Allar kalamo batail oise, ‘Ami kunu foshu kurbani nae, ḳali doya deḳtam sai.’ Te ou ayator mani kita, oḳan tallash ḳoroukka. Mono raḳba, ami kunu forezgarre daot deoat aisi na, ḳali gunagar oḳolre-u daot ditam aisi.”
MAT 9:14 Erbade Ehia nobir ummot oḳole aia Isare zikaila, “Huzur, amra ar Forishi mozobor manshe hamesha ruza raki, oile afnar ummot oḳole ruza raḳoin na ḳene?”
MAT 9:15 Tain zuaf dila, “Nosha loge taḳle logor boiratire kunu duk deoa zae ni? Deḳbane, ila shomoy aibo, zebla noshare tarar ges taki horail oizibo, hou shomoy tara ruza raḳba.
MAT 9:16 “Ana-doa noya ḳafoṛor ṭukradi keu furan kurtat tali dey na. Ila ḳorle doia harle furan ḳafoṛ taki noya tali kus oia siṛizae, ar siṛaḳan aro boṛo oy.
MAT 9:17 Furan samṛar tolit ḳeu noya anguror rosh bore na. Borle ou taza roshor fafe toli faṭia rosh ar toli duiota borbad oy. Erlagi manshe taza rosh noya tolit toin. Teu duiota base.”
MAT 9:18 Hozrot Isae zebla ota befare talim dira, ou shomoy eḳ neta aia tan fao-o foṛia ḳoila, “Huzur, amar fuṛigu ou matro mara gese. Te afne aia meherbani kori taire atai dile-u fuṛigu zinda oizibo.”
MAT 9:19 Teu Isae tan shagrid oḳolre loia en loge roana dila.
MAT 9:20 Zaoar fote eḳ beṭie ḳoredi aia Isar saddoror kunat soilo. Baro bosor dori i beṭir beṭiara bemaror lou zaito.
MAT 9:21 Beṭir ekin asil, tai zudi kali tan saddoror kunat soilito fare, te bemar bala oizibo.
MAT 9:22 Isae ṭer faia ḳoredi saia ou beṭire ḳoila, “Ḍoraio na go mai, tumar imanor bole-u tumi bala oilae.” Oḳan ḳoar loge loge beṭi bala oigelo.
MAT 9:23 Erbade Isa hou netar baṛit gela. Gia deḳla, asta baṛir manshe hoi-hulla ḳorra, ar tarar shomazor reoaz mafik mora baṛit bashi-bazona bazaira.
MAT 9:24 Tain ḳoila, “Tumra hoḳol gor taki bare zao. Fuṛigu morse na, tai to gumar.” Ikan hunia manshe tanre loia asha-ashi lagaila.
MAT 9:25 Manshore bar ḳoria harle, tain gia goror bitre hamaia fuṛir ato dorla, dorte-u tai uṭia boigelo.
MAT 9:26 Ar i goṭonar ḳota ou elaḳar hoḳolbae roṭi gelo.
MAT 9:27 Isa ou netar baṛi taki bidae oia harle duizon anda beṭa tan ḳore ḳore gelo. Tara zure zure ḳoilo, “O Daudor aolad, amrare rohom ḳoroukka.”
MAT 9:28 Bade tain aia goro hamaile, hou duio anda-o tan gese ailo. Tain zikaila, “Tumra ekin ḳorrae ni, ami tumrare bala ḳortam farmu?” Tara ḳoilo, “Ji oy huzur, afne-u farba.”
MAT 9:29 Teu tain erar souk atai dia ḳoila, “Tumra zela ekin ḳorso, ola-u ouk.”
MAT 9:30 Oḳan ḳoite-u tarar souk bala oigelo. Bade Isae tarare kub doṛaia ḳoila, “Huno, ita ḳeurore hunaio na.”
MAT 9:31 Oile tara bar oia gia ash-fash hoḳol zagat tan i kobor roṭai dilo.
MAT 9:32 Hou duio anda zebla bala oia zairagi, ou shomoy manshe bute dora eḳ buba beṭare Isar gese loia ailo.
MAT 9:33 Tain i beṭar but saṛanir bade tar zoban kuligelo, he mat-ḳota matilo. Ita dekia hoḳole taijjub oia ḳoila, “Asta Israil deshor maze ila ḳam to kunudin deḳsi na.”
MAT 9:34 Oile Forishi oḳole ḳoila, “Igie to butor bashshar shaijjoe but saṛae.”
MAT 9:35 Hozrot Isae gaue gaue ar ṭaune ṭaune gia tarar mosido hamaia talim dila. Tain behesti bashshair kush-ḳobri toblig korla, ar hoḳol nomunar bemarire bala ḳorla.
MAT 9:36 Ou shomoy manshor biṛ dekia tan kub duk laglo, ita manush to a-raḳali meṛar laḳan befana lagi gurira.
MAT 9:37 Teu Isae shagrid oḳolre ḳoila, “Zomino to foshol bout ase, oile ḳamla kub ḳom.
MAT 9:38 Erlagi zominor malikor gese dua ḳoro, tan foshol tular lagi tain ḳamla faṭaiba.”
MAT 10:1 Bade Isae tan barozon sahabire ḍaḳaia anla, ania zin-but saṛani, ar hoḳol zator bemarire bala ḳorar ḳemota dila.
MAT 10:2 Ou barozon sahabi oila, Saimon urfe Fitor ar tan bai Andrias, Zibudiar fuain Iakub ar Hannan, Filif ar Bortolmoy,
MAT 10:3 Tumas ar ḳazna tulra Moti, Alfir fua Iakub ar Toddey,
MAT 10:4 muktizudda Saimon ar Ihuda Iskariat. Ou Ihudae bade beimani koria Isare dushmonor ato dorai disil.
MAT 10:5 Ou barozon sahabire Isae hukum dila, ḳoila, “Tumitain tobligo zao, oile kunu bidormir gese ba Shomoria zatir kunu gaut zaio na,
MAT 10:6 ḳali Boni Israilor arail meṛa oḳlor gese zao.
MAT 10:7 Zaoar fote toblig kori kori zaio, ḳoio, Behesti bashshai daro aichche.
MAT 10:8 Ar tumra bemari oḳolre bala ḳorio, morare zinda ḳorio, fosa-kusṭo bemarire bala ḳorio, ar zin-but saṛaio. Tumra zela bina ṭeḳae faiso, oula bina ṭeḳae-u dio.
MAT 10:9 Zaoar shomoy loge ḳori ṭeḳa-foyshar toli, shuna-rufa ba eḳṭa shiki-o nio na.
MAT 10:10 Tumra fotor lagi laṭi, gaiṭ-buski, zuta, ba duiṭa kurta-o loge nio na. Ze zone ḳam ḳore, he ḳaoa-finda faoar zuka.
MAT 10:11 Tumra ze gaut hamaibae, ou gaur eḳzon zoiggo manshore tukaia bar ḳorio, i gau saṛia zaoar ag forzonto en baṛit-u roio.
MAT 10:12 Baṛir bitre hamanir bala tarare salam dio.
MAT 10:13 I baṛi zudi salam faoar zuka oy, te tumrar deoa ou shanti tara faiba, ar zuka na oile tumrar shanti tumrar gese-u firia aibo.
MAT 10:14 I zagar ḳeu zudi tumrare kobul na ḳore, tumrar ḳota na hune, te i baṛi ba gau taki baronir bala tumrar faor duil zaṛia falaia aio.
MAT 10:15 Ami tumrare hasa ḳota ḳoiram, Hashoror din ou gaur dosha taki, hou lannoti Sadum ar Amura ṭaunor dosha bout bala oibo.
MAT 10:16 “Huno, raikkosh bagor samne meṛar laḳan ami tumrare faṭairam. Erlagi tumra hafor laḳan salaḳ-sotur ar faro fakir laḳan shorol o.
MAT 10:17 Hushiar roio, manshe tumrare doria adaloto shomzaiba, ar tarar mosido nia tumrare singladi marba.
MAT 10:18 Amar nam loar lagi tumrare raza-bashshar samne neoa oibo. Tumra erar samne ar bidormi oḳlor gese amar befare shakki dibae.
MAT 10:19 Manshe zebla tumrare dorai dibo, ou shomoy kita mattae ba kita ḳoitae, ita loia kunu sinta ḳorio na. Hou shomoy tumrare ita hikai deoa oibo.
MAT 10:20 Ashole tumrar mukdi zen tumra nize matbae, ikan nae, tumrar batuni bafor ze ruhu tumrar bitre ase, hou ruhe-u itar zuaf diba.
MAT 10:21 “Baie baire ar bafe fuare kun ḳoranir lagi dorai dibo. Fua-fuṛie-o tarar ma-bafor bifokke gia tarare kun ḳoraibo.
MAT 10:22 Amar ḳarone hoḳol manshe tumrare ginnaibo, oile hesh forzonto ze ṭikia roibo, he-u rehai faibo.
MAT 10:23 Kunu gaur manshe tumrare zulum ḳorle, i gau saṛia oinno gaut zaiogi. Huno, ami hasa ḳota ḳoiram, Israil deshor hokkol ṭaun ar gaut tumrar toblig shesh oar age-u bin-Adom hirbar aiba.
MAT 10:24 “Mono rakio, ustad taki shagrid boṛo nae, ar munib taki tar gulam boṛo nae.
MAT 10:25 Te shagrid tar ustador shoman, ar gulam tar munibor shoman oa-u zotesṭo. Hunrae ni, goror munibre zebla butor bashsha Bel-Sobul ḳoira, te goror baki hoḳolre tara aro ḳotota ḳoiba!
MAT 10:26 “Oile tumra tarare ḍoraio na, ḳaron ila gufon kunta-u nai zeta zair oito nae. Ila lukail-o kunta nai zeta ḳeu hunto nae ba zanto nae.
MAT 10:27 Ami andarir maze zeta tumrare ḳoisi, tumra ita foror maze ḳoio. Zeta ḳane ḳane huncho, ita saṭor ufre gia zure zure elan ḳorio.
MAT 10:28 Zara manshor ḳayare binash ḳorto fare, oile ruhre kunta ḳorto fare na, tarare ḍoraio na. Zein ḳaya ar ruhu duiotare duzoḳo zalaita faroin, ḳali tanre-u ḍoraio.
MAT 10:29 Huno, duiṭa soṛa faki kali dui ṭeḳae bike na ni? Oile tumrar batuni baf Allar hukum na oile ota egu soṛa faki-o maṭit foṛe na.
MAT 10:30 Zano to, tumrar matar sul gesain-o gona ase.
MAT 10:31 Erdae tumra ḍoraio na. Tumrar dam to bout soṛa taki-o beshi.
MAT 10:32 “Shomazor samne ze zone amare kobul ḳore, ami-o amar behesti baf Alla Pakor samne tare kobul ḳormu.
MAT 10:33 Oile ze manshe shomazor samne amare oshikar ḳorbo, ami-o tare amar behesti baf Allar samne oshikar ḳormu.
MAT 10:34 “Tumra mono ḳorrae ni, ami duniat shanti ditam aisi? Na, muṭe-u nae, ami to duniat eḳ motobed laganit aisi.
MAT 10:35 Ami bafe-fuae, mae-fuṛie, ar hoṛie-boue bibad laganit aisi.
MAT 10:36 Manshor nizor foribaror zone-u tar loge dushmoni korbo.
MAT 10:37 “Ze manshe ama taki tar ma-bafre beshi maya ḳore, he amar ummot oito farto nae. Ar ze zone ama taki tar fuare ba tar fuṛire beshi maya ḳore, he-o amar ummotor zuka nae.
MAT 10:38 Ze zone nizor duk-koshṭor solib boia loia amar ḳore na ae, he-o amar zuka nae.
MAT 10:39 Ze zone tar nizor zan basaito sae, he tar asol zindegi kuaibo. Oile ze zone amar lagi tar zan kurbani dilae, he asol zindegi faibo.
MAT 10:40 “Ze zone tumrare kobul ḳore, he amare-u kobul ḳore, ar ze amare kobul ḳore, he ashole hou Allare-u kobul ḳore, zein amare faṭaisoin.
MAT 10:41 Ḳeu zudi kunu nobire nobi koia kobul ḳore, te ou nobie ze furuskar faiba, he-o ou furuskar faibo. Kunu Allaraia manshore ḳeu zudi Allaraia ḳoia kobul ḳore, te ou Allaraia manshe ze furuskar faiba, he-o ou furuskar faibo.
MAT 10:42 Ar amar ummot zania ḳeu zudi tumrar mazor eḳ nogoinno zonre-o ek gelas fani kaoae, te he kunumonte-u er furuskar taki bad foṛto nae.”
MAT 11:1 Hozrot Isae tan barozon sahabire ou talim dia harle, tain gaue gaue gia toblig ar talim deoar lagi roana oigela.
MAT 11:2 Ehia nobie zelo taki zebla al-Mosir ḳamor ḳota hunla, ou shomoy tan ḳoyzon shagridre faṭaila ḳobor zanar lagi. Era gia Isare zikaila,
MAT 11:3 “Huzure ḳoisoin, zein aibar ḳota asil, afne-u hein ni? Na amra ar ḳeuror lagi bar saitam?”
MAT 11:4 Isae ḳoila, “Huno, ono aia tumrar nizor souke zeta deḳso ar huncho, ota gia Ehiare ḳo.
MAT 11:5 Tanre ḳoio, anda manshe souke deḳra, lengṛae-o aṭira, fosa-kusṭo bemari bala oira, ḳalua oḳole hunra, mora manush zita oira, ar gorib oḳlor gese Allai kush-ḳobri toblig kora or.
MAT 11:6 Huno, he-u nek-kofali, zar dilo amar befare kunu bada ae na.”
MAT 11:7 Ehia nobir shagrid oḳol zairagi, ou shomoy Ehiar befare Isae manshore ḳoila, “Kita ba, morubumit kita deḳat geslae? Batash aile zeta nol-ḳagṛae loṛe, ota deḳat geslae ni?
MAT 11:8 Na, kita deḳat geslae? Shundor ḳafoṛ finno kunu manshore ni? Ashole, zera dami dami kafoṛ findoin, tara to razbaṛit taḳoin.
MAT 11:9 Te tumra kita deḳat geslae? Kunu nobire deḳat ni? Huno, ami koiram, Ehia to ḳali nobi nae, nobi taki-o boṛo.
MAT 11:10 Ein to hou zon, zen befare Asmani Kitabo leḳa ase, Huno, tumar age faṭaiar ami, amar fegambor, ein gia ṭik-ṭak korba tumar solar fot.
MAT 11:11 Te ami tumrare hasa ḳota ḳoiram, Ehia taki boṛo asta duniat-u kunu adom asla na. Oile behesti bashshair maze hoḳol taki huru zon-o, Ehia taki mohan.
MAT 11:12 Ehia nobir amol taki oḳon forzonto behesti bashshai kub mozbut oia aguar, ar zera imane mozbut, tara dile-zane aia er bitre hamaira.
MAT 11:13 Huno, Ehia nobir amol forzonto Hozrot Musar Tourat Kitab ar shob nobir sohifar maze, Allar bashshai aoar ḳota zanail oise.
MAT 11:14 Oḳon zudi afnara amar mat ekin ḳoroin, te hunoukka, ze Ilias nobie hirbar aibar ḳota asil, ou Ehia-u oila hou Ilias.
MAT 11:15 Zar ḳan ase, he hunouk.
MAT 11:16 “I zomanar manshore ami kitar loge tulona ḳortam? Tara to omon huruttar laḳan, zetae bazaro boia eḳe-oinnore ḍakia ḳoin,
MAT 11:17 ‘Hoi, amra tumrar lagi bashi bazailam, tumra to naslae na, ahazarir gan gailam, tumra to ḳanlae na.’
MAT 11:18 Ṭik olaḳan, Ehia nobie aia shomazor loge ḳaoa-daoa na ḳorae, manshe ḳoira tane bute dorse.
MAT 11:19 Oile ami bin-Adom aia ḳaoa-daoa ḳorae tumra ḳoirae, ‘Deḳoukka, i beṭa to feṭua, modkur, he gushkur ḳazna tulra ar naforman oḳlor loge dusti kore.’ Te aḳol ḳaṭaia zera sole, tarar sal-cholon taki-u forman mile, aḳol-u oilo ḳaṭi-nikut siz.”
MAT 11:20 Hozrot Isae zeta gauainto ar ṭauno beshir bag keramoti deḳaisla, itar manshe touba ḳorsoin na. Erlagi tain i gau ar ṭaunor ufre bezar oia ḳoila,
MAT 11:21 “Haere Bayt-Soyda ar Kurasin gau, tumra to lannoti. Tumrar maze zeta kudroti kam deḳail oise, ita zudi Shur ar Sidon elaḳat deḳail oito, te bout age-u tara ḳator oia touba ḳorlo one.
MAT 11:22 Oile ami tumrare ḳoiram, kiamotor din Shur ar Sidon elaḳar dosha taki-o, tumrar dosha bout ḳoṭin oibo.
MAT 11:23 O Kofornaum ṭaun, huno, tumi bule usa oia asmano gia lagtae? Na, fartae nae! Tumare fatalo lamani oibo. Tumar maze zeta kudroti muzeza deḳail oise, ita zudi Sadum ṭauno deḳail oito, te i ṭaun oḳono ṭikia roilo one.
MAT 11:24 Oile ami tumrare ḳoiram, Hashoror din Sadum ṭaunor halot-o tumrar taki bout bala oibo.”
MAT 11:25 Erbade Isae ḳoila, “O amar gaibi baf Alla, tumi to asman-zominor malik. Ami tumar shukria zanairam, ḳaron tumi aḳoldar ar buddiman oḳlor gese ita zair na ḳoria, bebuz-huruttar laḳan manshor gese zair ḳorso.
MAT 11:26 Baba, ashole ita hoḳolta-u tumar morzi.
MAT 11:27 “Amar gaibi babae hoḳolta-u amar ato shofi disoin. Baf saṛa dusra ḳeu ou futre sine na, ar fut saṛa dusra ḳeu ou bafre sine na. Fute bafre zar gese zair ḳorar kial oy, ḳali he-u bafor forisoy fae.
MAT 11:28 “Bar-buza boite boite tumra zera heran oigeso, tumra hoḳol amar gese ao, ami tumrare aram dimu.
MAT 11:29 Amar zual tumrar ḳando tulo ar amar ges taki talim lo, teu tumrar aram oibo. Amar zual boia neoa shuza, amar deoa bar kub fatla. Amar mizaz kub norom ar ṭanḍa.”
MAT 12:1 Eḳ Zummabare Hozrot Isa ḳetor ailedi aṭia zaoat asla. Tan shagrid oḳlor feṭo buk lagae, tara danor soṛa siṛi siṛi kaoat lagla.
MAT 12:2 Ita dekia Forishi mozobor manshe Isare ḳoila, “Amrar shoriote ḳoy, Zummabare kunu ḳam ḳora zaiz nae, te afnar shagrid oḳole danor soṛa siṛira ḳene?”
MAT 12:3 Isae zuaf dila, “Daud nobi ar tan logor manshe eḳbar feṭor buke zeta ḳorsla, ita afnara foṛsoin na ni?
MAT 12:4 Tain Allar Kaba goro hamaia hou fobitro ruṭi kaisla, i ruṭi kaoa to tain ar tan logor manshor lagi nazaiz, ita ḳali imam sabor lagi zaiz asil.
MAT 12:5 Ar afnara Tourat Shorifo foṛsoin na ni, Baytul-Mukaddosor imam oḳole Zummabare zummar dinor niom bangle-o tarar kunu guna oy na.
MAT 12:6 Oile ami afnarare ḳoiram, Baytul-Mukaddos taki-o dami eḳ manush ono asoin.
MAT 12:7 Allar kalamor ou ayator bed zudi afnara buzta, ze ayato ase, ‘Ami doya deḳtam sai, foshu-kurbani nae.’ Te afnara ni-oforadire oforadi banaila na one.
MAT 12:8 Hunoukka, Zummabaror tamam eḳtiar ami bin-Adomor ato.”
MAT 12:9 Bade Hozrot Isa intone gia ou Forishi oḳlor mosido hamaila.
MAT 12:10 Hono ola eḳ beṭa asil, tar eḳ at bemare hukai gese. Isar kunu kut bar ḳoria tanre dushi bananir niote, ou mosidor manshe tanre zikailo, “Sab, Musar shoriot mafik Zummabare ḳeuror bemar shifa ḳora zaiz ni?”
MAT 12:11 Isae zuaf dila, “Doroukka, afnara eḳzonor egu meṛa zudi Zummabare gator maze foṛizae, te ou din i meṛare gato taki tulta nae ni?
MAT 12:12 Ar manshor dam to meṛa taki bout beshi. Erlagi buza zae, Zummabare-o nek kam ḳora zaiz ase.”
MAT 12:13 Bade tain ou hukna at-ala beṭare ḳoila, “Tumar atḳan baṛao.” He tar at baṛaite-u hukna at oinno ator laḳan furafur bala oigelo.
MAT 12:14 Bade hou Forishi oḳole bare gia foramish ḳorla, Isare kila zane mara zae.
MAT 12:15 Tarar ou foramishor ḳobor Isae zanilila, erlagi tain hintone hori gela. Ou shomoy bout manush tan ḳore ḳore aila. Erar maze zoto bemari asla, tain era hoḳolre bala ḳorla.
MAT 12:16 Tain erare doṛaia ḳoila, “Ḳobordar, tumra amar forisoy zair ḳorio na.”
MAT 12:17 Ita oisil zate agor amolor nobi Ishayar mazdi zeta batail oisil, ota folizae. Tain ḳoisla,
MAT 12:18 Huno, ami amar ou gulamre fosond ḳorsi. Ein-u amar mayar zon, tan ufre ami kub kushi. En ufre ami amar ruhu dimu, hoḳol zatir gese tain amar hok bisaror ḳota zanaiba.
MAT 12:19 Tain kunu torka-torki ba silla-silli korta nae, fote-gaṭe kunu manshe tan aoaz hunto nae.
MAT 12:20 Hok bisar ḳaim oar ag forzonto, tain sesa nol-ḳagṛa bangita nae, ar miṭ miṭ ḳori zolra lemor fita-o limaita nae.
MAT 12:21 Duniar hoḳol zatie tan ufre-u borosha ḳorba.
MAT 12:22 Bade manshe zinor asor-ala eḳ beṭare Isar gese loia ailo. I beṭa asil anda ar buba. Tain ou beṭare bala ḳorla. He bala oia mat-ḳota matilo ar souke-o deḳlo.
MAT 12:23 Ita dekia hoḳol manush taijjub oia ḳoila, “Daud nobir ḳandano zein zonom oar ḳota, ein-u hein ni?”
MAT 12:24 Ikan hunia Forishi oḳole ḳoila, “Igie to zinor bashsha Bel-Sobulor bole zinnat saṛae.”
MAT 12:25 Tarar monor sinta buzia Isae ḳoila, “Kunu deshor bitre doladoli lagigele, i desh to binash oizae. Ou laḳan kunu foribaror maze ba kunu ṭauno zebla doladoli lagizae, ita-o ar ṭike na.
MAT 12:26 Oula Shoytane zudi Shoytanre ḳedai dey, te to tar nizor maze-u doladoli lagigelo. Tar razotto ar kila ṭikbo?
MAT 12:27 Ami zudi Bel-Sobulor bole zinnat saṛai, te tumrar manshe ḳar bole saṛae? Tumrar mator bisar tumrar manshe-u ḳorba.
MAT 12:28 Oile ami zudi Allar ruhur bole zinnat saṛai, te to Allar bashshai tumrar daro aichche.
MAT 12:29 “Kunu bolala manshor baṛit luṭ-toraz ḳorat aia, foyla bolala zonre na bandile, ḳemne luṭ-toraz ḳorbo? Oile tare bandia harle luṭ-faṭ ḳorto farbo.
MAT 12:30 “Ḳeu zudi amar fokke na taḳe, he to amar bifokke. Ze zone amar loge tukae na, he to sitrae.
MAT 12:31 Ami tumrare ḳoiram, manshor tamam nomunar guna ar kufurir mafi ase, oile Pak Ruhur befare kufuri korle, i kufurir kunu mafi milto nae.
MAT 12:32 Ami bin-Adomor birudde ḳeu kunta matile-o he mafi faibo, oile Pak Ruhur birudde matile tar kunu mafi nai, i zindegit-o nai, aḳero-o nai.
MAT 12:33 “Mono raḳba, gas bala oile tar fol-o bala oy, ar gas bura oile tar fol-o bura oy. Fol dia-u gas sina zae.
MAT 12:34 O hafor baichchain, tumra nize-u to ḳaraf, te tumrar muk tone bala buli kemne bar oibo? Manshor dil zetadi bora, muk taki to ota-u baroy.
MAT 12:35 Bala manshor dilor bitoror balai tone bala buli baroy, ar bad manshor dilor burai tone bad buli baroy.
MAT 12:36 Oile ami tumrare ḳoiram, ze manshe aze-baze ber-beri kore, Hashoror moydano tar forteḳ mator hishab dite oibo.
MAT 12:37 Tumar zobane-u tumare dushi banaibo, ar ou zobane-u tumare nirdushi-o banaibo.”
MAT 12:38 Bade ḳoyzon moulana ar Forishie Isare ḳoila, “Huzur, amra afnar ekkan keramoti deḳtam sai.”
MAT 12:39 Isae zuaf dila, “I zomanar naforman ar beiman oḳole ḳali keramoti deḳta sain, oile Iunus nobir keramoti saṛa dusra kunu keramoti tarare deḳail oito nae.
MAT 12:40 Iunus nobi zela masor feṭo tin din, tin rait asla, ami bin-Adom-o oula tin din, tin rait maṭir tole roimu.
MAT 12:41 Kiamotor din hou Ninob ṭaunor murda oḳol uṭia hari, i zomanar manshor dush zair ḳorba. Ḳaron Iunus nobir toblig hunia tara touba ḳorsila. Oile oḳon to Iunus taki-o aro mohan eḳzon ino asoin, ta-o manshe touba ḳorer na.
MAT 12:42 Ruz kiamotor din douknor deshor rani uṭia aia ou zomanar manshor dush zair ḳorba. Ḳaron Bashsha Sulaimanor aḳolor ḳota hunar kiale tain duniar hesh mata taki aisla. Oile oḳon to Sulaiman taki-o aro mohan eḳzon ono asoin.
MAT 12:43 “Huno, kunu bute zebla manshor log saṛia zaegi, ou shomoy he arame taḳar kiale hoḳol hukna zagat asroy tukae. Oile aramor zaga na faia bade ḳoy,
MAT 12:44 ‘Dur, amar agor gor-u bala, zegur ges taki aisi, ogur gese-u firia zaigi.’ Firia aia deḳe i gorḳan ḳali, saf-sofa ar hazail-faṛail.
MAT 12:45 Dekia he gia tar tone aro ḳaraf shatgu but loge loia ae, aia ou goro roy. Erdae ou manshor dosha foyla taki heshe aro beshi karaf oy. Te i zomanar naforman oḳlor dosha-o olaḳan oibo.”
MAT 12:46 Isae zebla manshor loge matira, ou shomoy tan ma ar baiain bare aia, tan loge deḳa ḳorar lagi bar saoat asla.
MAT 12:47 Teu eḳzon manshe aia tanre ḳoilo, “Huzur, afnar ma ar baiain afnar loge matar lagi bare ubai roisoin.”
MAT 12:48 Ikan hunia Isae tare ḳoila, “Amar ma ḳe, ar amar baiain-u ba ḳe?”
MAT 12:49 Bade tan shagrid oḳolre deḳaia ḳoila, “Era-u amar ma ar baiain.
MAT 12:50 Zara amar behesti baf Alla Pakor morzi zugaia soloin, tara-u amar ma ar bai-boin.”
MAT 13:1 Hozrot Isa ou din gor taki bar oia aoror faro gia boila.
MAT 13:2 Boia harle bout manush tan gese aia biṛ lagai dila, biṛ dekia tain gia eḳ nao-o uṭia boila ar hoḳol manush faro ubai roila.
MAT 13:3 Ou shomoy tain kichcha hunai hunai nanan nomunar talim dila. Tain ḳoila, “Mono ḳoro, ek giroste zala bain ḳorat gelo.
MAT 13:4 Gia bain ḳorar bala kisu zala ailor maze foṛlo, ar fakinte aia ita ḳaililo.
MAT 13:5 Tar kisu zala hukna-shokto maṭir ufre foṛlo, i zala fuṭia ali bar oile-o tole beshi maṭi na taḳae, zoldi baṛilo.
MAT 13:6 Bade shuruz uṭia harle zoir ḳaililo, ar tolor zoṛe rosh na faoae hukaia morigelo.
MAT 13:7 Kisu zala bon-jonglar maze foṛlo, ar ou bon-jongla baṛia itare zatia dorlo.
MAT 13:8 Oile kisu zala bala zomino foṛlo, i zalae bala dan oilo, itar kunu soṛae tish, kunu soṛae shaiṭ, kunu soṛae eḳ-sho gun beshi dan dorlo.”
MAT 13:9 Ou kichcha hunanir bade Isae ḳoila, “Zar ḳan ase, he hunouk.”
MAT 13:10 Bade tan shagrid oḳole ḳoila, “Afne ḳali kichcha ḳoia manshore talim dira ḳene?”
MAT 13:11 Tain ḳoila, “Behesti bashshair gufon rohoisho zanar shuzug tumrare deoa oise, oile baki manshor gese ita batuni roise.
MAT 13:12 Huno, zar ase, tare aro deoa oibo, tar aro baṛibo. Oile zar nai, tar zeta ase, ota-o ḳaṛia neoa oibo.
MAT 13:13 Erlagi ami kichchar mazdi erare talim diram, era to dekia-o deḳe na, hunia-o hune na ar kunta buze-o na.
MAT 13:14 Erar mazdia-u Ishaya nobir batail ou ayat fura oise, tain ḳoisla, Tumra ḳane hunle-o kunta buztae nae, souke deḳle-o kunta sintae nae.
MAT 13:15 Ita manshor dil oshaṛ oigese, tarar ḳano tala lagigese. Tara zarzir souk muzi boiroise, zate souke na deḳe, ḳane na hune, dil dia na buze. Kizanu tara touba ḳoria amar bae firizain, ar ami tarar shifa ḳorilai.
MAT 13:16 Oile nek-kofali to tumra, tumrar souke deḳe, ar ḳane hune.
MAT 13:17 Ami tumrare hok kota ḳoiram, tumrar souke zeta deḳrae ar ḳane zeta hunrae, ita bout nobi ar oli-auliae deḳar asha ḳorle-o deḳar ḳofal oise na, ar hunar asha ḳorle-o hunar ḳofal oise na.
MAT 13:18 “Oḳon tumrare ou girostor kichchar mani buzai diram,
MAT 13:19 Huno, ailor maze foṛa zala dia olaḳan manshor befare buzail oise, ze manshe behesti bashshair ḳota hunia-o buze na, erlagi Iblise aia ou zonor dilo Allar ze kalam bain ḳora oisil, ota ḳaṛia neygi.
MAT 13:20 Hukna-shokto maṭir ufre foṛa zaladi buzail oise, zera i kalam hune ar kub kushi oia kobul ḳore,
MAT 13:21 oile tarar dilo balamonte hamae na, erlagi ita tuṛa ḳoydin roy, bade i kalamor lagi kunu zulum-mosibot aile-u tara ḳorlami zae.
MAT 13:22 Bon-jonglar maze foṛa zaladi buzail oise, zera i kalam hune, oile duniabi sinta-babna ar don-samanar mayae i kalamre zatia dorilae, erdae kalame kunu fayda oy na.
MAT 13:23 Ar bala zomino foṛa zaladi buzail oise, zera i kalam hune, hunia buze ar amol ḳore. Ḳeu zindegit tish gun, ḳeu shaiṭ gun, ḳeu eḳ-sho gun beshi fol dey.”
MAT 13:24 Bade Isae talim dibar lagi arok kichcha hunaila. Ḳoila, “Behesti bashshai ola ek girostor laḳan, zein nizor zomino bala danor zala bain dila.
MAT 13:25 Bade rait oia harle zebla hoḳol manush gumai gesoin, ou shomoy tan eḳ dushmone aia bain deoa ou zominor maze fufra gasor bisi siṭaia gelogi.
MAT 13:26 Heshe danor gas zebla boṛo oia soṛa saṛlo, ou shomoy ermaze fufra gaso deḳa gelo.
MAT 13:27 Ita dekia baṛir saḳor oḳole tarar munibre ḳoila, ‘Afne zomino ḳali bala dan bain disla na ni? Oḳon fufra gas oilo kuai taki?’
MAT 13:28 “Tain ḳoila, ‘Kunu dushmone i kam ḳorse.’ Saḳor oḳole tanre zikailo, ‘Te amra gia ou fufra gas saf ḳoriltam ni?’
MAT 13:29 Munibe ḳoila, ‘Na, na, tumra fufra gas saf ḳorat gia, danor gaso tulilibae.
MAT 13:30 Erlagi dan daoar ag forzonto ita taḳouk. Bade daoar bala ami manshore ḳoimu, foyla hoḳol fufra gas tulta, ar daru zalanir lagi aṭi bandita, bade dan daia amar ugaro tulba.’ ”
MAT 13:31 Hozrot Isae arok kichcha hunaila. Ḳoila, “Behesti bashshai oilo egu ḍenga bisir laḳan. Eḳzon manshe egu ḍengar bisi tar zomino bain dilo.
MAT 13:32 I bisi to hoḳol zator bisi taki huru. Oile bain deoar bade i gas hokkol zator hag-torḳari taki boṛo oy, ar fakinte aia tar ḍal-falat bada banae.”
MAT 13:33 Erbade arok kichchar maze ḳoila, “Behesti bashshai oilo ḳamiror laḳan. Eḳzon beṭi manshe tin bosta moydar maze tuṛa ḳamir mishailo. Ḳamiror fafe hoḳol moyda fulia uṭlo.”
MAT 13:34 Hozrot Isae kichcha hunai hunai hoḳol nomunar talim dila. Kichcha saṛa tain kunu talim dila na.
MAT 13:35 Ita hokkolta oilo, zate nobir mazdi zeta batail oisil, ota oḳon fura oy, Talime bora kichcha hunai hunai ami matimu, duniar foyla taki zotota batuni asil, ota oḳon kulmu.
MAT 13:36 Bade Isae manshore bidae dia goro hamaila. Ou shomoy tan shagrid oḳole aia ḳoila, “Huzur, fufra gasor kichchar manikan amrare buzai deukka.”
MAT 13:37 Tain ḳoila, “Bala danor zala zein bain ḳoroin, ein oilam ami bin-Adom.
MAT 13:38 Zomin oilo ou zogot, ar behesti bashshair manush oila bala bis. Iblisor ḳandan oilo ou fufra gas.
MAT 13:39 Ze dushmone fufra gas bain disil, he oilo Iblis. Dan daoar shomoy oilo kiamot, ar daora oḳol oila Allar firista.
MAT 13:40 Fufra gas aṭi bandia zela daru zalani oy, kiamotor shomoy ṭik ola-u oibo.
MAT 13:41 Bin-Adome tan firista oḳol faṭaiba. Ze manshe nize guna ḳore ar aroḳzonre gunar fote ṭane, tara hoḳolre firista oḳole bin-Adomor bashshair maz taki ekḳano dola ḳoria,
MAT 13:42 duzoḳor agunit falaiba. Hino manshe ḳanda-ḳaṭi korba ar zala-zontronae dat kiṛimiṛi diba.
MAT 13:43 Hi shomoy Allaraia manshe tarar behesti baf Alla Pakor bashshait nurani surote shuruzor laḳan jilmil ḳorba. Hunar lak kan zar ase, he hunouk.
MAT 13:44 “Huno, behesti bashshai oilo, maṭir tole lukail kunu donor laḳan. Kunu manshe ou don tukaia failo, faia hirbar gaṛia toi dilo. I don faia kushi oia he tar hoḳol samana besia, ou zominḳan ḳorid ḳorlo.
MAT 13:45 “Hirbar, behesti bashshai oilo ola eḳ shodagoror laḳan, i shodagore ḳaṭi moni-mukta tukanit asil.
MAT 13:46 He eḳṭa dami muktar ḳobor faia, tar hokkolta besia ou mukta ḳorid ḳorlo.
MAT 13:47 “Ba behesti bashshai ola eḳ zalor laḳan, i zaldi aoro ṭan dile er bitre hokkol zator mas hamailo.
MAT 13:48 Mase zal borigele zalua oḳole ikanre ṭania faro tullo. Bade tara bala bala mas basia sangat toilo ar badguin falai dilo.
MAT 13:49 Te Hashoror moydano ou halot oibo. Firista oḳole aia Allaraia manshor dol taki, naforman oḳolre algaia duzoḳor agunit falaiba.
MAT 13:50 Hino tara ḳanda-ḳaṭi korba ar zala-zontronae dat kiṛimiṛi diba.”
MAT 13:51 Erbade Isae tan shagrid oḳolre zikaila, “Tumra ita hoḳolta buzcho ni?” Tara ḳoila, “Ji oy, buzchi.”
MAT 13:52 Teu Isae tarare ḳoila, “Ze moulana oḳole behesti bashshair talim faisoin, tara ola ek girostor laḳan, ze giroste tan shonduk taki noya ar furana mal bar ḳoroin.”
MAT 13:53 Hozrot Isae kichcha ḳoia ḳoia talim dia harle intone gelagi.
MAT 13:54 Gia tan nizor gaur mosido hamaia oaz-nosiot ḳorla. Tan boyan hunia manshe taijjub oia ḳoila, “I beṭae ḳemne oto ilim ar keramoti failo?
MAT 13:55 E kita hou ḳaṭ mestorir fua nae ni? Tar maʼr nam Moriom nae ni? He Iakub, Iusuf, Saimon ar Ehudar bai nae ni?
MAT 13:56 Tar boinain to amrar gaut-u roira? Te he ita ilim ḳoi taki failo?”
MAT 13:57 Ou laḳan Isare loia manshor dilo bitishona ailo. Ou shomoy Isae tarare ḳoila, “Nizor baṛi-gor ba gau-desh saṛa ar hoḳol zagat-u nobi oḳole shomman fain.”
MAT 13:58 Gaur manshor iman nai dekia, tain hikano beshi keramoti deḳaila na.
MAT 14:1 Ou shomoy Galil zilar Raza Herude Isar befare hunla,
MAT 14:2 hunia tan uzir-nazirre ḳoila, “Ein to toubar gusol ḳoraora Ehia. Ein mora taki zinda oia uṭae ou keramoti deḳaira.”
MAT 14:3 Ou Herude tar bai Filifor bou Herudiare hanga ḳorsil. Tair mon zuganir lagi he Ehia nobire zelo bondi koria toisil,
MAT 14:4 ḳaron Ehiae Herudre ḳoita, “Taire hanga ḳora to tumar ṭik oise na.”
MAT 14:5 Erlagi he Ehia nobire marilito sailo, oile manshor ḍore marto farlo na, manshe zanta ein eḳzon nobi.
MAT 14:6 Bade Raza Herudor zonom dinor onusṭano Herudiar fuṛie nasia razare kushi korlo.
MAT 14:7 Erdae razae ḳosom ḳaia ḳoilo, “Ou fuṛie zeta saibo, ota dimu.”
MAT 14:8 Fuṛie tair maʼr loge foramish ḳori koilo, “Toubar gusol ḳoraora Ehiar ḳolla ḳaṭia ekkan talo ḳori, oḳon ania amare deukka.”
MAT 14:9 Ikan hunia razar mon kub bezar oigelo. Oile tar loge boa meman-musafiror samne nize ḳosom ḳorse, erlagi he ou ḳolla ḳaṭibar hukum dilo.
MAT 14:10 Tar zollad faṭaia zelor bitre Ehia nobir ḳolla ḳaṭailo.
MAT 14:11 Bade ou ḳolla eḳ talo ḳori ania ou fuṛire deoa oilo, fuṛie nia tair maʼr gese dilo.
MAT 14:12 Erbade Ehia nobir ummot oḳole tan lash nia dafon ḳorla, ar Hozrot Isar gese gia ou ḳobor zanaila.
MAT 14:13 Ehiar moutor ḳobor hunia Isae ekkan naot uṭia nirai eḳ zagat gelagi. Tain gesoingi hunia, nanan zagar manush hukna bae aṭi aṭi tan ḳore roana oila.
MAT 14:14 Tain nao tone lamar bade manshor biṛ dekia tan bitre doya hamaigelo. Erdae tarar maze zoto bemari asla, tain erare bala ḳorla.
MAT 14:15 Biali bala sahabi oḳol ḳandat aia ḳoila, “Huzur, ikan to kub nirai zaga, ar beil-o zargi. Te ota manshore bidae dilaukka, era ḳanda-ḳasar gauainto gia tarar ḳani-kuraki louk.”
MAT 14:16 Isae ḳoila, “Na, tara zaoar dorḳar nai, tumra-u erare ḳani deo.”
MAT 14:17 Sahabi oḳole ḳoila, “Amrar gese to ḳali fasḳan ruṭi ar duiṭa biran mas saṛa ar kunta-u nai.”
MAT 14:18 Tain ḳoila, “Oḳnain amar gese ano.”
MAT 14:19 Bade tain manshore ḳoila, gashor ufre boizita. Tain hou fasḳan ruṭi ar duiṭa biran mas ato loila, ar asmanedi saia shukria adae ḳorla. Bade ou ruṭi ṭukraia sahabi oḳlor ato dile, era baṭia dilaila.
MAT 14:20 Otadi hoḳol manshe feṭ bori kaila. Ḳaia harle baṛti zeta roilo, oḳnain dola ḳorle baro ṭukri borigelo.
MAT 14:21 Onuman fas azar beṭa manshe ou ḳana ḳaila, erar loge beṭin ar huruttain-o asla.
MAT 14:22 Ḳanir bade-u tan sahabi oḳolre hukum dila, tain zaibar age tara nao-o uṭia aoror hofaro zaitagi. Ḳoia tain onor manshore bidae dilaila.
MAT 14:23 Era gia harle tain dua ḳorar lagi faṛor ufre uṭila. Hainja bad forzonto hono eḳla roila.
MAT 14:24 Ou shomoy sahabi oḳlor nao aoror mazḳano gesegi, ar ufta batashor ḍeue nao kub ilkani dorlo.
MAT 14:25 Fotabala Hozrot Isa aoror fanir ufredi aṭia sahabi oḳlor ḳandat aira.
MAT 14:26 Ou shomoy sahabi oḳole tanre dekia kub ḍoraila, tara but mono ḳoria but, but ḳoia sillaia uṭla.
MAT 14:27 Ou tain ḳoila, “Ḍoraio na, shaosh ḳoro, i to ami.”
MAT 14:28 Teu sahabi Fitore ḳoila, “Huzur, afne-u zudi oin, te amare izazot deukka, ami-o fanir ufredi aṭia afnar gese aitam.”
MAT 14:29 Isae ḳoila, “Ao.” Teu Fitor nao taki lamia fanir ufredi aṭa dorla.
MAT 14:30 Oile batashor zur dekia tain ḍoraigela, ar buṛizira dekia zure zure Isare ḍaḳ dila, “Huzur, huzur, amare basaukka.”
MAT 14:31 Loge loge Isae at baṛaia tanre doria ḳoila, “Ouni tumar iman? Mono shondoy anlae ḳene?”
MAT 14:32 Bade Isa ar Fitor nao-o uṭte-u batash tamigelo.
MAT 14:33 Teu naor hoḳole tanre soizda ḳoria ḳoila, “Huzur, ashole-u afne Alla Pakor ḳas mayar zon, Ibnulla.”
MAT 14:34 Aor faṛi dia tara Gineshorot elaḳat aia nao taki lamla.
MAT 14:35 Lamte-u honor manshe tanre dekia sairobae ḳobor faṭaila. Ḳobor faia manshe hoḳol zator bemarire loia tan gese ailo,
MAT 14:36 tara minot ḳori koilo, ou bemari oḳole zanu tan gotror saddoror kunaḳano soita faroin. Ar zoto manshe soila, tara hokkol-u bala oigela.
MAT 15:1 Zeruzalem ṭaun taki koyzon moulana ar Forishi mozobor kisu manush Isar gese aila, aia tanre zikaila,
MAT 15:2 “Afnar ummot oḳole agor zomanar moulana oḳlor batail rosumot manoin na ḳene? Tara to uzu na ḳoria-u ḳani kailain.”
MAT 15:3 Isae zuaf dila, “Ou moulana oḳlor rosumot manar lagi afnara ḳene Allar hukumor borkelaf ḳorra?
MAT 15:4 Allae hukum disoin, ‘Ma-bafre ijjot ḳorio, ar ze manshe tar ma-bafor bodnam gae, tare nisoy marilite oibo.’
MAT 15:5 Oile afnara ḳoin, kunu manshe zudi tar ma-bafre ḳoilae, ‘Amar zeta samana dia afnaintor kezmot ḳortam asil, ita ami Allar name lilla dilaisi,’
MAT 15:6 te tar ma-bafre ar kunta ḳora lage na. Ou laḳan afnarar baf-dadar mongoṛa niom dia Allar kalam batil ḳorilisoin.
MAT 15:7 O bonḍo oḳol! Hozrot Ishaya nobie tumrar befare ṭik-u ḳoisoin,
MAT 15:8 Ita manshe muk dia ḳali amare ijjot ḳore, oile tarar dil ama taki bout duroi.
MAT 15:9 Tara hudar ḳamoḳa amar ebadot ḳore, tarar talim oḳol to manshor banail mongoṛa rosumot.”
MAT 15:10 Bade Isae manshore ḍakia ḳoila, “Amar talim ḳanain kial ḳori hunoukka.
MAT 15:11 Baire taki zeta zinish manshor mukor bitre hamae, itae to tare nafak banae na. Borong manshor muk taki zeta baroy, otae-u tare nafak banae.”
MAT 15:12 Teu tan shagrid oḳole ḳoila, “Huzur, afne buzchoin ni, Forishi oḳole mono ḳorra, ou talim dia afne tarare beijjot ḳorsoin?”
MAT 15:13 Tain ḳoila, “Itar mat falao. Amar behesti baf Allae ze gas lagaisoin na, i gas tan bagan taki huria falail oibo. Tarar dayitto asil anda manshore fot deḳaito, oile tara nize-u anda bonigese. Kunu andae aroḳ andare fot deḳanit gele, duio anda-u gato foṛi morbo.”
MAT 15:15 Teu sahabi Fitore ḳoila, “Afne zeta bataira, ota amrare buzai deukka.”
MAT 15:16 Isae ḳoila, “Tumra oḳono bebuz roiso ni?
MAT 15:17 Tumra buzo na ni, baire taki zeta zinish manshor muko hamae, ita to ḳali feṭo hamae, ar feṭ taki hirbar bar oizae.
MAT 15:18 Oile manshor muk taki zeta baroy, ita dilo taki ae, ar otae-u manshore nafak banae.
MAT 15:19 Manshor dil taki-u to hoḳol nomunar ku-sinta baroy, zemon kun, zina, suri, misa shakki, ar ingsha-ninda baroy.
MAT 15:20 Otae-u manshore nafak banae, oile uzu saṛa ḳani kaile ḳeu nafak oy na.”
MAT 15:21 Bade Hozrot Isa nizor desh saṛia Shur ar Sidon desho gelagi.
MAT 15:22 Hono gia harle Kenani zatir eḳ bidormi beṭi tan gese aia zure zure ḳoilo, “O huzur, Daudor aolad, amare rohom ḳoroin. Amar fuṛigure zine dorae tai boṛo ḳoshṭo ḳorer.”
MAT 15:23 Oile Isae kunta matila na. Teu tan sahabi oḳole tanre minot ḳori koila, “Huzur, ou beṭigure bidae dilaukka, tai amrar ḳore oia sillar.”
MAT 15:24 Isae ḳoila, “Amare to faṭail oise, ḳali Boni Israilor arail meṛa oḳlor lagi.”
MAT 15:25 Oile ou beṭi tan ḳandat aia ḳodombusi koria ḳoilo, “Huzur, amare ou asanḳan ḳoroukka.”
MAT 15:26 Tain ḳoila, “Nizor huruttar rizek kuttar samne deoa ṭik nae.”
MAT 15:27 Beṭie ḳoilo, “Ji oy huzur, afnar ḳota-u ṭik, oile munibor ḳani taki zeta guṛa-gaṛa galabae foṛe, ita to kukre ḳae.”
MAT 15:28 Teu tain beṭire ḳoila, “Ashole go mai, tumar iman boṛo mozbut. Aichcha, tumi zela sairae, ola-u ouk.” Oḳan ḳoar loge loge-u fuṛi bala oigelo.
MAT 15:29 Bade Isa hon tone Galil aoror faredi aṭia gela, gia eḳ faṛor ufre uṭia boila.
MAT 15:30 Boia harle manshe lula-lengṛa, atur, anda, buba, olaḳan aro bout zator bemarire dole dole tan gese loia ailo. Ania tan faor ḳandat toilo, tain era hoḳolre bala ḳorla.
MAT 15:31 Manshe zebla deḳla, lula-lengṛa bala oizira, buba oḳole matira, atur manshe aṭira, andae souke deḳra, dekia tara hoḳol taijjub oigela, ar Boni Israilor Mabud Allar shukria adae ḳorla.
MAT 15:32 Erbade Isae tan sahabi oḳolre ḳandat ania ḳoila, “Ita manshor lagi amar boṛo dorod lager, aiz tin din dori tara amar ḳore ḳore gurira, oile tarar loge ḳanir kunta nai. Te ou halote erare bidae ditam sai na, arnae ita foto-u beush oiziba.”
MAT 15:33 Sahabi oḳole ḳoila, “Huzur, i nirai morubumir maze oto manshore ḳaoanir lagi ruṭi amra kuai faimu?”
MAT 15:34 Tain ḳoila, “Tumrar gese ḳoyḳan ase?” Era ḳoila, “Shatḳan ruṭi ar biran ḳora ḳoyṭa huru mas ase.”
MAT 15:35 Teu Isae manshore maṭit boar lagi koila.
MAT 15:36 Ḳoia tain ou shatoḳan ruṭi ar biran mas ato loia, Allar shukria adae ḳoria oḳnain ṭukraila, bade sahabi oḳolredi baṭaila.
MAT 15:37 Hokkol manshe feṭ bori kaila. Ḳaia zeta roisil, sahabi oḳole ota dola ḳorar bade shat ṭukri borigelo.
MAT 15:38 Onuman sair azar beṭa manshe ou ḳana ḳaila, erar loge beṭin ar huruttain-o asla.
MAT 15:39 Bade tain erare bidae dia nao-o uṭia Mogodon elaḳat gelagi.
MAT 16:1 Bade Isare forikka ḳorar lagi Forishi ar Siddekia mozobor kisu manush aila, aia asmani kunu nishana deḳta saila.
MAT 16:2 Isae ḳoila, “Biali bala asmanor lal rong dekia afnara ḳoin, ḳailkur din to bala oibo.
MAT 16:3 Ar biani bala asmano ḳalni dekia ḳoin, aiz meg-tufan oibo. Te asmanor halot afnara ṭik-u buzoin, oile zomanar halot afnara buzoin na.
MAT 16:4 Ou zomanar beiman ar naforman oḳole ḳali keramoti deḳta sain, oile Iunus nobir nishana saṛa dusra kunu nishana tarare deḳail oito nae.” Oḳan ḳoia tain erare toia hori gela.
MAT 16:5 Bade aor faṛi dia zaoar ḳalo sahabi oḳole loge ḳori ruṭi nita faurilila.
MAT 16:6 Isae tarare ḳoila, “Tumra shabdan o, Forishi ar Siddekia dolor ḳamir taki hushiar roio.”
MAT 16:7 Ikan hunia sahabi oḳole ḳana-ḳani kori koila, “Amra ruṭi anchi na ḳori monoloy tain oḳan ḳoira.”
MAT 16:8 Isae tarar bab buzilila, buzia ḳoila, “Haere ḳomzur imandar oḳol, tumrar gese ruṭi nai, ikan ḳoirae ḳene?
MAT 16:9 Tumra oḳono kunta buzo na ni, kunta mono or na ni? Ami zebla fasḳan ruṭidi fas azar manshore ḳaoaislam, ḳanir bade tumra ḳoto ṭukri guṛa-gaṛa dola ḳorslae?
MAT 16:10 Ar hou ze shatḳan ruṭidi sair azar manshe ḳaisla, ḳaia harle ḳoto ṭukri dola ḳorslae?
MAT 16:11 Te oḳon tumra buzo na ḳene, ami ou ruṭir befare ḳoiar na? Huno, Forishi ar Siddekia oḳlor ḳamir taki hushiar o.”
MAT 16:12 Teu sahabi oḳole buzla, tain ashole ḳaibar ḳamir taki hushiaror ḳota ḳoira na, borong Forishi ar Siddekia oḳlor talim taki hushiar oite ḳoisoin.
MAT 16:13 Bade tan sahabi oḳolre loia Ḳoisoria-Filifi ṭaunor ḳanda-ḳasat gela. Foto sahabi oḳolre zikaila, “Ḳo sain, manshe kita mono ḳoroin, ami bin-Adom ḳe?”
MAT 16:14 Era zuaf dila, “Kunu kunu manshe ḳoin, afne Ehia nobi. Kunu zone ḳoin Ilias nobi. Ḳeu ḳeu ḳoy Iaromia nobi, ba oinno kunu nobi.”
MAT 16:15 Ou tain ḳoila, “Oile tumra kita mono ḳoro, ami ke?”
MAT 16:16 Sahabi Saimon-Fitore zuaf dila, “Afne to Allar oada ḳora hou al-Mosi Ibnulla, zinda Allar ḳas mayar zon.”
MAT 16:17 Isae ḳoila, “O Saimon bin Iunus, tumi boṛo nek-kofali, ḳaron, duniar kunu manshe tumare ita zanaise na, oile amar behesti baf Allae-u zanai disoin.
MAT 16:18 Te ami tumare ḳoiram, tumi to fattor, erlagi tumar nam dislam Fitor, ar ou fattoror ufre-u amar torikar tamam zomat goṛia tulmu. Duzoki kunu shoktie-u er loge farto nae.
MAT 16:19 Tumar ato ami behesti bashshair sabi dimu, ou duniat tumi zetare nazaiz ḳoibae, ita Allar dorbaro nazaiz oizibo, ar tumi zetare zaiz ḳoibae, Allar dorbaro-o ita zaiz oizibo.”
MAT 16:20 Bade Isae tarare doṛaia ḳoila, “Ami-u zen hou al-Mosi, ita ḳeurore hunaio na.”
MAT 16:21 Ou shomoy taki Isae tan sahabi oḳolre zanani dorla, tain Zeruzalemo zaite oibo. Honor murobbi oḳole, boṛo imam oḳole ar moulana oḳole tanre bout duḳ-mosiboto falaiba. Bade tanre zane mara oibo, oile moutor tin dinor din hirbar zinda oia uṭba.
MAT 16:22 Ikan hunia sahabi Fitore tanre tuṛa horaia nia ḳoila, “Huzur, oshombob, afnar ufre kunumonte-u ita oite fare na.”
MAT 16:23 Isae Fitoror bae firia ḳoila, “Dur Iblis, amar ges taki bag! Tui amar fotor zoinjal. Tui Allai munshare bad dia, manshor laḳan sinta ḳorre.”
MAT 16:24 Bade tain erare ḳoila, “Ḳeu zudi amar torikat aito sae, te he tar nizor kushie sola bad deuk, tar afon duk-koshṭor solib boia loia amar ḳore auk.
MAT 16:25 Ze manshe tar nizor zan basaito sae, he tar asol zindegi kuaibo. Oile ze zone amar lagi tar zan kurbani dey, he asol zindegi faibo.
MAT 16:26 Kunu manshe asta dunia faia-o zudi tar asol zindegi kuailae, te tar kunu fayda oilo ni? Heshe asol zindegi faoar lagi he kun don bilaibo?
MAT 16:27 Ami bin-Adome zebla amar firista oḳolre loge loia amar gaibi bafor kudroti mohimae zogoto hirbar aimu, ou shomoy forteḳ manshore tar amol mafik fol dimu.
MAT 16:28 Huno, ami tumrare hasa ḳota ḳoiram, ono ilaḳan ḳoyzon azir asoin, ami bin-Adom bashsha halote na aoa forzonto, kunumonte-u erar mout oito nae.”
MAT 17:1 Er soydin bade Hozrot Isae ḳali Fitor, Iakub ar Iakubor bai Hannanre loia usa eḳ faṛor ufre uṭla.
MAT 17:2 Uṭia harle erar souḳor samne tan nizor surot bodli gelo. Tan muk oigelo shuruzor laḳan zolmol, ar finnor lebas oilo dola soḳsoḳa.
MAT 17:3 Sahabi oḳole deḳla, Hozrot Musa ar Ilias nobie aia tan loge batchit ḳorra.
MAT 17:4 Ou shomoy Fitore ḳoila, “Huzur, amra to ono asi, kub bala oise. Afne saile ami tinḳan ḍera-gor banailai, ekkan afnar, ekkan Musa nobir ar ekkan Ilias nobir lagi.”
MAT 17:5 Tain Isar loge matira, aḳta-u dola dobdoba megor eḳ ṭukrae aia erare gurililo, ar ou ṭukra taki gaibi aoaz ailo, “Ein-u amar ḳas mayar zon Ibnulla, en ufre ami kub kushi, tumra en nosiot huno.”
MAT 17:6 Ikan hunia sahabi oḳol kub ḍoraila, ḍoraia maṭit foṛigela.
MAT 17:7 Ou shomoy Isa aia tarare soia ḳoila, “Uṭo, ḍoraio na.”
MAT 17:8 Teu tara souk tuli saila, saia ḳali Isa saṛa ar ḳeurore ino deḳla na.
MAT 17:9 Faṛ taki lamia aoar bala Isae erare hukum dila, “Aiz zeta deḳlae, ami bin-Adom mora taki zinda oia uṭar ag forzonto ita ar ḳeurore hunaio na.”
MAT 17:10 Sahabi oḳole Isare zikaila, “Huzur, moulana oḳole ḳene ḳoin, al-Mosi aibar age, foyla Ilias nobir aoa zorur?”
MAT 17:11 Tain ḳoila, “Ikan hasa ḳota, foyla Hozrot Iliase aia hokkolta agor haloto firaia anba.
MAT 17:12 Oile ami tumrare ḳoiram, Ilias nobi ṭik-u aisla. I duniar manshe tanre na sinae, tan loge zeta monoloy ota ḳorse. Ar ami bin-Adome-o ou laḳan duḳ-mosibot fuani lagbo.”
MAT 17:13 Teu sahabi oḳole buzilila, tain oḳon Ehia nobir ḳota ḳoira.
MAT 17:14 Bade tara faṛ taki lamia aila. Ono manshor biṛ asil, ou biṛor maze eḳ beṭa aia Isar samne aṭu galadi boia ḳoilo,
MAT 17:15 “Huzur, amar fuagure basaukka, he mirki bemare kub ḳoshṭo ḳorer. Ou bemar uṭle he hamesha agunit ar fanit foṛizae.
MAT 17:16 Ami tare loia afnar sahabi oḳlor gese aislam, oile tara bala ḳorta farsoin na.”
MAT 17:17 Isae ḳoila, “Haere beiman ar naformanor zat, ami ar ḳotodin tumrar loge roimu, tumrar zala ḳotodin shoijjo ḳormu? Deki, tumar fuare ono ano.”
MAT 17:18 Isae fuar logor hou zinnatre damki dila, damki kaia zine fuare saṛia gelogi, loge loge he bala oigelo.
MAT 17:19 Bade sahabi oḳole niralae Isare zikaila, “Huzur, amra ḳene ou zinnat saṛaitam farlam na?”
MAT 17:20 Tain ḳoila, “Tumrar imanor ḳomzurir lagi-u farso na. Ami hasau ḳoiram, tumrar dilo zudi egu ḍenga bisi foriman iman taḳe, ar tumra ou faṛre ḳo, ‘On taki ḍulia hono zaogi,’ te ou faṛ-o ḍulizibo. Tumrar oshaiddo kunta-u roito nae.
MAT 17:21 Huno, dua ar ruza raḳa saṛa i-zat zin saṛail zae na.”
MAT 17:22 Bade Galil zilat aia Isae tan sahabi oḳolre ḳoila, “Ami bin-Adomre manshor ato dorai deoa oibo.
MAT 17:23 Tara amare zane mariliba, morar tin dinor din ami hirbar zinda oia uṭmu.” Ikan hunia sahabi oḳol kub bezar oigela.
MAT 17:24 Erbade Isae sahabi oḳolre loia Kofornaum ṭauno gela, ou shomoy Baytul-Mukaddosor ḳazna tulra oḳole sahabi Fitorre ḳoila, “Afnarar ustade Baytul-Mukaddos Kaba Shorifor sanda dein na ni?”
MAT 17:25 Fitore zuaf dila, “Ji oy, dein to.” Oḳan ḳoia Fitor goro hamaia kunta matar age-u Isae ḳoila, “Fitor, tumi kita mono ḳoro? Duniar bashsha oḳole ḳar ges taki kazna-sanda adae ḳoroin? Nizor manshor ges taki, na bara manshor ges taki?”
MAT 17:26 Fitore ḳoila, “Bara manshor ges taki.” Teu Isae ḳoila, “Te to nizor manush ita taki basi gelo, ar amra-o Allar afon manush oae Allar goror ḳazna taki basi gesi.
MAT 17:27 Oile amra erare bezar ḳortam nae, erlagi tumi aoro zao, gia mas marar lagi bori falao, borit foyla ze mas lagbo, ogur mukor bitre eḳṭa rufar ṭeḳa faibae. Ou ṭeḳa nia tumar ar amar sanda dilao.”
MAT 18:1 Ou shomoy sahabi oḳole Hozrot Isar ḳandat aia zikaila, “Huzur, behesti bashshair maze hokkol taki boṛo ḳe?”
MAT 18:2 Teu Isae eḳ huruttare ḍakia ania tarar maze uba ḳorai koila,
MAT 18:3 “Ami tumrare hasau ḳoiram, tumra zudi mon firaia ou huruttar laḳan na o, te kunumonte-u behesti bashshait hamaitae fartae nae.
MAT 18:4 Ze zone nizore ou huruttar laḳan huru mono ḳore, behesti bashshait he-u hoḳol taki dami.
MAT 18:5 Ar ze zone amar lagi ou huruttar laḳan kunu sabalre kobul ḳore, he amare-u kobul ḳore.
MAT 18:6 “Huno, amar torikar ou huru-muru eḳzonre zegie gunar fote ṭania ney, ogur lagi aro bala oilo one, ogur golat fattor bandia doriat falai deoa.
MAT 18:7 Haere dunia, gunar fote neoar lagi tumar maze ḳoto uskani ase! Uskani to aibo-u aibo. Oile lannot hou zonor ufre, zegie guna ḳoranir lagi uskani dey.
MAT 18:8 Tumar at ba fao zudi tumare gunar fote ṭane, te i at-fao ḳaṭia falai deo. Duio at-fao loia duzoḳo zola taki, atur oia-o behesto zaoa tumar lagi bala.
MAT 18:9 Tumar souke zudi tumare gunar fote ṭane, te i souk tulia falai deo. Duio souk loia duzoḳo zola taki, ḳana oia-o aḳer faoa tumar lagi bala.
MAT 18:10 “Huno, ami koiram, tumra ou huruttar laḳan kunu sabalre-o elami korio na. Tarar firista oḳole behestor maze hor-hamesha amar behesti baf Alla Pakor muk deḳra.
MAT 18:11 Zano ni, zera be-fote gesegi, erare basanir lagi-u ami bin-Adom i duniat aisi.
MAT 18:12 “Mono ḳoro, kunu manshor eḳ-shogu meṛa ase, er mazor egu meṛa arai gele he baki nirannobboiṭa bondo toia, hou arail ogu tukanit zae na ni?
MAT 18:13 Ami tumrare hasau ḳoiram, he zudi ikṭa tukaia fae, te ze nirannobboigu arsil na, oguin toia zegu ari gesil, ogur lagi-u he kub kushi-bashi kore.
MAT 18:14 Ṭik ou laḳan, tumrar behesti baf Allae-o sain na, ou huruttaintor mazor egu hurutta-o binash ouk.
MAT 18:15 “Tumar kunu baie zudi tumar gese dush ḳorilae, te he zebla niralae taḳe, ou shomoy tumi eḳla gia tare buzaio. Tumar buz zudi manilae, te ou bair loge tumar baiali basaililae.
MAT 18:16 Oile he zudi tumar buz na mane, te aro dui-eḳzon mazor manush loia zaio. Gia tarar samne tare buzaio. Teu Musar shoriotor ou hukum fura oibo, ‘dui-tinzon shakkir ḳotae zekunu befar forman oy.’
MAT 18:17 Erar buz-o zudi he na mane, te tar befare zomato nalish deo. Zomator ḳota zudi manilae te bala, ar na manle tare bidormi ba gushkur toshildar mono ḳoria, tare tar fote saṛi deo.
MAT 18:18 Te ami tumrare hasa ḳota ḳoiram, ou duniait tumra zetare nazaiz ḳoibae, ita Allar dorbaro nazaiz oizibo, ar tumra zetare zaiz ḳoibae, Allar dorbaro-o ita zaiz oibo.
MAT 18:19 “Huno, ami tumrare aro ḳoiram, tumrar mazor duizon zudi eḳmot oia kunu befare dua ḳore, te amar behesti baf Allae ou dua kobul ḳorba.
MAT 18:20 Amar name ze zagat dui ba tin zon zoma oy, hou zagat ami-o azir taki.”
MAT 18:21 Ou shomoy Fitore aia Isare ḳoila, “Huzur, amar baie zudi amar gese bar bar dush ḳore, te ami kotobar tare maf ḳortam? Shatbar ni?”
MAT 18:22 Isae ḳoila, “Ḳali shatbar nae, ami koiram, tare shottoir gun shatbar maf ḳorio.
MAT 18:23 “Huno, behesti bashshai ola eḳ bashshar laḳan, zein tan uzir-naziror gese hishab-nikash saila.
MAT 18:24 Bashshae hishab loat boile erar mazor ola eḳzonre tan samne ana oilo, bashshae er gese laḳ laḳ ṭeḳa faona asla.
MAT 18:25 Ou faona firot dibar ḳemota er nai. Erdae bashshae hukum dila, he shudda tar bou, fua-fuṛin gulam hishabe biki kaia, hoḳol shoy-shompotti besia tan faona adae ḳorar lagi.
MAT 18:26 Ou hukum hunia he bashshar faot doria ḳandia ḳoilo, ‘Huzur, amare tuṛa shuzug deukka, ami afnar hoḳol faona dilaimu.’
MAT 18:27 Ou tain doya ḳoria tare saṛi dila, ar hoḳol dena maf ḳori dilaila.
MAT 18:28 “Bade he bare gia tar logor aroḳ saḳrianre failo. Ou zonor gese he eḳ-sho ṭeḳa faona asil. Faia tare golat ṭifa mari doria ḳoilo, ‘Oi, tui amar faona ṭeḳa de.’
MAT 18:29 Hou zone tar fao-o foṛi minot ḳori koilo, ‘Amare tuṛa shuzug deo, ami tumar hoḳol faona dilaimu.’
MAT 18:30 Oile he er ḳota manlo na. Tar ṭeḳa na deoa forzonto tare zelo harai toilo.
MAT 18:31 “Ita dekia tar logor uzir-nazir oḳol kub bezar oila. Tara gia ita bashshare zanaila.
MAT 18:32 Bashshae hou saḳrianre anaia ḳoila, ‘Haere naforman, tumi amare minot ḳorae ami tumar hoḳol dena maf ḳori dilaislam.
MAT 18:33 Te ami zela tumare doya ḳorslam, tumi-o oula tumar logor saḳrianre doya ḳora usit asil na ni?’
MAT 18:34 Bade bashshae gusa ḳoria tare zelo haraila, tan faona adae oar ag forzonto zelor zollad sifaie tare ḳoṛaḳoṛi shaza dila.
MAT 18:35 “Ṭik ou laḳan, tumra-o zudi tumrar baire dil taki maf ḳori na deo, te amar behesti baf Allae-o tumrare oula shaza diba.”
MAT 19:1 Ou talimor bade Hozrot Isa Galil zila taki Zordan gangor hofaro Ehudia zilar fub elaḳat aila.
MAT 19:2 Ou shomoy bout manush tan ḳore ḳore aila, tain era hoḳlor bemar bala ḳorla.
MAT 19:3 Ar Forishi mozobor ḳoyzon manush aia Isare forikka ḳorar lagi zikaila, “Ḳoukka sain, Musa nobir shoriot mafik kunu manshe zekunu ḳarone tar boure talaḳ deoa zaiz ni?”
MAT 19:4 Isae ḳoila, “Afnara Allar kalamo faisoin na ni, Allae foyla Adom ar Haoare beṭa ar beṭi banai foyda ḳorsoin, tain ḳoisoin,
MAT 19:5 ‘Erlagi-u beṭainte tarar ma-bafre saṛia bour loge taḳba, tara duiozon eḳ shoril oiba.’
MAT 19:6 Erdae tara dui roita nae, ek kaya oiba. Te Allae zerare zuṛa bandia disoin, manshe itare alog na ḳorouk.”
MAT 19:7 Teu Forishi oḳole tanre ḳoila, “Te Musa nobie ḳene bataisoin, talaḳ nama lekia boure talaḳ deoa zaiz?”
MAT 19:8 Tain ḳoila, “Tumrar dil fashan gotike-u Musae i onumoti disoin. Oile foyla taki ila niom asil na.
MAT 19:9 Ami tumrare ḳoiram, ze manshe zinar dush saṛa oinno zekunu ḳarone tar boure talaḳ dia aroḳ beṭire hanga ḳore, he nize-u zina ḳore.”
MAT 19:10 Teu sahabi oḳole tanre ḳoila, “Zamai-bour maze-o zudi ola goṭona goṭe, te to bia na ḳora-u bala.”
MAT 19:11 Isae tarare ḳoila, “Hoḳol manush to ila roito fare na, ḳali Allae zerare i kemota disoin, tara-u fare.
MAT 19:12 Kunu kunu manush na-mord halote-u duniat zonom loy, erlagi tara bia ḳore na. Ar kunu kunu zonre manshe-u na-mord banailae, erdae tara-o bia ḳore na. Hirbar ḳeu ḳeu ase bia-shadi na ḳoria, ḳali behesti bashshair kezmoto zindegi kaṭanir niot ḳorilae. Te ikan zera amol ḳorto fare, tara amol ḳorouk.”
MAT 19:13 Bade manshe huru huru huruttainre loia Isar gese aila, tara saila tain zanu huruttaintor matagu atai dia dua ḳoroin. Oile sahabi oḳole erare boḳa-zoḳa ḳorla.
MAT 19:14 Ita dekia tain ḳoila, “Huruttainre aṭḳaio na, tarare amar gese aite deo. Allar bashshai to erar laḳan manshor lagi-u.”
MAT 19:15 Huruttaintor mata ataia dua ḳoria harle, tain hin taki gelagi.
MAT 19:16 Bade eḳ zuan beṭae aia tanre zikailo, “Huzur, aḳerat faoar lagi ami kun hok kam ḳortam?”
MAT 19:17 Isae ḳoila, “Hok kamor befare amare ḳene zikairae? Hok to ḳali eḳzon-u asoin, tumi aḳerat faite saile, tan hoḳol hukum-ahkam amol ḳoro.”
MAT 19:18 Hou zuane ḳoilo, “Huzur, kun kun hukum mantam?” Tain ḳoila, “Kun ḳorio na, zina ḳorio na, suri korio na, misa shakki dio na,
MAT 19:19 ma-bafre ijjot ḳorio ar ari-forire nizor laḳan maya ḳorio.”
MAT 19:20 Beṭae ḳoilo, “Sab, ita to ami emne-u amol ḳoriar, oile ar kita ḳortam ḳoukka?”
MAT 19:21 Teu Isae tare ḳoila, “Tumi zudi shullo-ana ḳaṭi oitae sao, te tumar baṛit zao, gia tumar hoḳol don-samana besia gorib-dukire bilai deo. Teu tumi behesto don-samana faibae. Erbade aia amar ummot oio.”
MAT 19:22 Ikan hunia beṭa bezar oia gelogi, tar to bout don-samana asil.
MAT 19:23 Teu Isae tan sahabi oḳolre ḳoila, “Ami hasa ḳota ḳoiram, doni manush Allar bashshait hamani boṛo moshkil.
MAT 19:24 Huno, doni manush Allar bashshait hamanir saite, suir furedi uṭ hamani aro shuza.”
MAT 19:25 Ikan hunia sahabi oḳol taijjub oia ḳoila, “Te kun manush nazat hasil ḳorbo, ḳe rehai faibo?”
MAT 19:26 Tain erar bae saia ḳoila, “Manshor lagi oshombob oito fare, oile Allar nozoro ita to mamuli. Tain hoḳolta-u faroin.”
MAT 19:27 Ou shomoy Fitore zikaila, “Huzur, amra to hokkolta falai toia afnar ḳore aisi. Te amra kita faimu?”
MAT 19:28 Isae ḳoila, “Ami tumrare hasa ḳota ḳoiram, tumra zara amar ummot oiso, ami bin-Adom zinda oia zebla Allar bashshair godit boimu, ou shomoy tumra-o amar loge oia baroṭa toḳto boibae, boia Boni Israilor baro gusṭir bisar ḳorbae.
MAT 19:29 Huno, ze manshe amar lagi nizor baṛi-gor, ma-baf, bai-boin, fua-fuṛi, ar zomi-mirash falaia aise, he ou duniat itar eḳ-sho gun beshi faibo, erloge aḳer-o faibo.
MAT 19:30 Oile oḳon zera agor ḳataro ase, erar bout zon ḳore foṛizibo, ar ḳoror ḳataror bout zon age aibo.”
MAT 20:1 Hozrot Isae aro ḳoila, “Behesti bashshai to ola ek girostor laḳan. I giroste tan ḳetor ḳamor lagi kub biane uṭia ḳamla tukanit gela.
MAT 20:2 Gia ḳamla saia tarare eḳ-sho ṭeḳa ruz fuṛaia tan angur bagano ḳamo lagaila.
MAT 20:3 Kisu beil oia harle tain hirbar bar oila, bar oia deḳla aro ḳoyzon ḳamla beḳar ubai roisoin.
MAT 20:4 Dekia ḳoila, ‘Tumra-o gia amar bagano ḳamo lago, ami tumrare usit ṭeḳa dimu.’
MAT 20:5 Teu tara gia ḳamo lagla. Olaḳan beil duifori bala ar zuhoror bade girost hirbar bar oia gia aro ḳamlain ania ḳamo lagaila.
MAT 20:6 Heshe biali bala tain bare gia, aro ḳamlain ubai roisoin dekia ḳoila, ‘Tumra haradin dori ino ubai roiso ḳene?’
MAT 20:7 Era ḳoila, ‘Sab, amra kunu ḳam faisi na.’ Giroste ḳoila, ‘Tumra-o gia amar bagano ḳamo lago.’
MAT 20:8 “Hainja bala giroste tan nizor saḳorre ḳoila, ‘Oba, baganor ou ḳamlaintore ania, sheshor zon taki foyla zon forzonto hoḳlor ruz dilao.’
MAT 20:9 Biali bala zera ḳamo lagsil, tara eḳ-sho ḳori failo.
MAT 20:10 Ita dekia foyla zara ḳamo lagsil, tara mono ḳorlo tara aro beshi ṭeḳa faibo, oile giroste era hoḳolre eḳ homan ruz dila.
MAT 20:11 Erdae foyla dol ou girostor ufre bezar oia ḳoila,
MAT 20:12 ‘Amra hara din dori roide zoli-fuṛi kam ḳoria eḳ-sho ṭeḳa failam. Oile tara heshe aia tuṛa shomoy ḳam ḳorae-o, afne tarare amrar homan ṭeḳa dila.’
MAT 20:13 “Teu giroste tarar eḳzonre ḳoila, ‘Oba, ami oinnae kunta ḳorsi ni, tumi nize-u to eḳ-sho ṭeḳae ḳam ḳorte razi oiso na ni?
MAT 20:14 Oḳon tumar faona loia tumi zao. Ami amar nizor ichchae hoḳolre eḳ homan disi.
MAT 20:15 Amar nizor samana, nizor ichchamoto ḳoros ḳorar odikar nai ni? Ami tarare doya ḳorae tumar sokut zoler ni?’ ”
MAT 20:16 Ou kichcha hunanir bade Isae ḳoila, “Buzcho ni, zera ḳoror ḳataro ase tara age aibo, ar agor ḳataror tara ḳore zaibo.”
MAT 20:17 Bade tain zebla Zeruzalem muka roana oizita, ou shomoy tan barozon sahabire alga horaia nia ḳoila,
MAT 20:18 “Huno, amra oḳon Zeruzalem zairam. Hono ami bin-Adomre doria boṛo imam ar moulana oḳlor ato shofi deoa oibo. Tara bisar ḳoria amare zane marar ray diba.
MAT 20:19 Amare bin-deshi oḳlor ato shomzaiba. Tara amare ṭaṭṭa-moshkora ḳoria, bezuita sabuk maria, laḳṛir solibo loṭḳaia zane mariliba. Moutor tin dinor din ami hirbar zinda oia uṭmu.”
MAT 20:20 Bade Zibudiar duio fuare loia tarar maʼe Isar gese aila. Aia kunta saoar ashae tan fao-o foṛla.
MAT 20:21 Isae beṭire zikaila, “Afne kita sain?” Beṭie ḳoila, “Huzur, amar egu fuare afnar razottor ḍainor godi, ar arogure baur godikano boibar shuzug diba ni?”
MAT 20:22 Isae tarare zuaf dila, “Tumra to buzrae na, tumra kita sairae. Ami ze duḳ-mosibotor fialadi kaimu, ita kunu tumra ḳaitae farbae ni?” Tara ḳoila, “Ji oy, farmu.”
MAT 20:23 Tain ḳoila, “Aichcha, ami ze fialadi kaimu tumra-o ou fialadi kaibae, oile amar ḍaine ba baue boanir eḳtiar to amar ato nae. Amar behesti baf Allae zarar lagi i godi ṭik korsoin, ḳali tara-u faiba.”
MAT 20:24 Zibudiar duio fuar arzi hunia, baki doshozon sahabi erar ufre kub biroḳto oila.
MAT 20:25 Teu Isae era hoḳolre ḳandat ania ḳoila, “Tumra to zano, bidormi zatir raza oḳol tarar prozar ufre hukum zari kore, ar tarar zomidar oḳole gulamor ufre beṭagiri kore.
MAT 20:26 Oile tumrar maze to ila oa ṭik nae. Tumrar ḳeu dami bonte saile, he tumrar kezmot ḳorouk.
MAT 20:27 Ar ḳeu boṛo oite saile, he hoḳlor gulami korouk.
MAT 20:28 Mono rakio, ami bin-Adome-o kezmot faoat aisi na, aisi to kezmot ḳorat. Ar bout manshor zan basanir lagi, nizor zan bilai deoat aisi.”
MAT 20:29 Hozrot Isae tan sahabi oḳolre loia Ziriho ṭaun taki roana oigela, ou shomoy bout manush tan ḳore ḳore gela.
MAT 20:30 Zaoar shomoy fotor ḳandat dui anda beṭa boat asil. Tain ou fotedi zaira hunia tara zure zure sillaia ḳoilo, “O huzur, O Daud nobir aolad, amrare rohom ḳoroin.”
MAT 20:31 Sillani hunia onor manshe tarare domoḳ dila. Oile tara aro zure zure sillaia ḳoilo, “O huzur, O Daud nobir aolad, amrare rohom ḳoroin.”
MAT 20:32 Erar sillani hunia tain ubai gela, ubaia ou duio andare ḳandat anaia zikaila, “Kita ba, kita sao? Ami tumrare kita ḳortam?”
MAT 20:33 Tara ḳoilo, “Huzur, amrar soukguin bala ḳori deukka.”
MAT 20:34 Ikan hunia tan dorod hamaigelo. Tain tarar souk atai dila, loge loge-u tarar souk bala oigelo. Bade tara-o tan ḳore ḳore roana oilo.
MAT 21:1 Hozrot Isae tan sahabi oḳolre loia Zeruzalemor ḳasat, Zoytun faṛor loge Bayt-Faijja gaut aia azila. Ono aia tan duizon sahabire ḳoila,
MAT 21:2 “Tumra ou samnor gaut zao. Gaut hamaite-u deḳbae egu gada banda ase, loge tar baichcha-o banda. Oguintor golar doṛi kulia ono loia aio.
MAT 21:3 Ḳeu kunta zikaile ḳoio, huzuror dorḳar ase, erdae niram. Teu he loge loge razi oizibo.”
MAT 21:4 Ita oilo zate agor zomanar hou nobir mazdi zeta batail oise, ota oḳon folizae.
MAT 21:5 Tain ḳoisla, “Sion-ḳoina Zeruzalemre tumra ḳoio, tumar bashsha tumar gese aira. Tain kub norom mizazi. Tain gada soṛia, gadir baichcha soṛia aira.”
MAT 21:6 Teu Isae zela hikai disla, duio sahabie gia ola ḳorla.
MAT 21:7 Ou gada ar tar baichcha anar bade sahabi oḳole nizor gotror saddor kulia gadar fiṭit bisai dila, teu Isa er ufre soar oila.
MAT 21:8 Aro bout manshe tarar gotror saddor kulia fotor maze bisai dila, ar boute shundor shundor gasor fatain siṛia ania foto bisaila.
MAT 21:9 Isar age-ḳore aro bout manush zaoat asil, era zure zure misil dila, “Bashsha Daudor aolad, marhaba! Mabudor name zein aira, tan tarif ouk. Behesto-o marhaba!”
MAT 21:10 Hozrot Isa Zeruzalem aia harle asta ṭauno uloistol lagigelo. Hoḳole zikaila, “Oba, ein ḳe?”
MAT 21:11 Manshe ḳoila, “Ein to hou Isa nobi, en baṛi Galilor Nasarot gaut.”
MAT 21:12 Bade Zeruzalem aia tain fobitro Baytul-Mukaddoso hamaila. Hono Kaba goror shimanat zera ḳorid-bikir ḳarbari asil, itare ḳedai dila. Tain ṭeḳar baṭṭar ḳarbari oḳlor kesh bakso, ar ḍufi-faro besra oḳlor ashon ulṭaia falai dila.
MAT 21:13 Tain ḳoila, “Allar kalamo batail oise, amar gor oibo ebadotor gor, oile tumra ikanre ḍaḳaitor aḍḍaḳana banailiso.”
MAT 21:14 Erbade anda, lula-lengṛa manush oḳol Isar gese Baytul-Mukaddoso aila, tain era hoḳolre bala ḳorla.
MAT 21:15 Hozrot Isae ze kudroti muzeza ḳam ḳorsla, boṛo imam ar moulana oḳole ita deḳla. Tara hunla, Baytul-Mukaddosor bitre huruttainte ḳoira, “Marhaba, Daudor aolad, marhaba.” Ikan hunia tara zoli-fuṛi uṭla.
MAT 21:16 Tara Isare ḳoila, “Ou huruttainte kita sillaira, ita tumi hunrae na ni?” Tain ḳoila, “Oy, huniar to. Allar kalamo foṛsoin na ni, ‘Nabalik huruttaintor muk taki tumi tumar tarif adae ḳorso’?”
MAT 21:17 Bade Hozrot Isa tarar ges taki gelagi, gia ṭaunor bare Bayt-Ania gaut rait roila.
MAT 21:18 Bador din biane Bayt-Ania taki Zeruzalem ṭauno aoar shomoy tan feṭo buk laglo.
MAT 21:19 Ou tain fotor ḳandat egu ḍumur gas dekia, ogur fol ḳaoar kiale gasor daro gela. Gia deḳla, gasor maze ḳali fata, kunu fol nai. Tain ou gasre ḳoila, “Tumar maze zanu ar kunudin fol na dore.” Oḳan ḳoar loge loge-u gasṭa hukaia morigelo.
MAT 21:20 Sahabi oḳole ita dekia taijjub oia ḳoila, “Gasṭa oto zoldi hukai gelo kila?”
MAT 21:21 Isae zuaf dila, “Ami tumrare hasau ḳoiram, tumra zudi dilor maze shondoy na ḳoria, furafur imane mozbut taḳo, te ami ou ḍumur gasre zeta ḳorsi, tumra-o ola farbae. Ḳali ikan nae, tumra zudi ou faṛore ḳo, ‘Uṛia gia doriat foṛo,’ te ola-u oibo.
MAT 21:22 Tumra zudi kalis niote ekin ḳoria dua ḳoro, te tumra zeta saibae, ota-u faibae.”
MAT 21:23 Bade Hozrot Isa hirbar Baytul-Mukaddoso aia oaz-nosiot ḳorat asla. Ou shomoy boṛo imam ar murobbi oḳol aia tanre zikaila, “Aichcha, ḳo sain, tumi kun eḳtiare ita ḳorrae? Ḳe tumare i kemota dise?”
MAT 21:24 Isae zuaf dila, “Ami-o afnarare ekkan soal ḳoriar, afnara er zuaf dilaile ami-o ḳoimu, kun eḳtiare ami ita ḳorram.
MAT 21:25 Afnara ḳoukka sain, Hozrot Ehiae torikar gusol deoar eḳtiar ḳar ges taki faisla? Manshor ges taki, na Allar ges taki?” Ikan hunia tara ḳane ḳane matila, “Amra zudi koi, Allar ges taki, te he ḳoibo, taile tumra tan ufre iman anlae na ḳene?
MAT 21:26 Ar zudi koi, manshor ges taki, te manshe amrare marba, ḳaron manshe to Ehiare nobi koia manoin.”
MAT 21:27 Erlagi-u tara zuaf dila, “Amra ikan zani na.” Isae ḳoila, “Te ami-o ḳoitam nae, kun ḳemotae ami ita ḳorram.”
MAT 21:28 Erbade Isae ḳoila, “Aichcha, afnara kita mono ḳoroin? Doroukka, eḳ beṭar dui fua asil. Beṭae tar boṛo fuare ḳoilo, ‘Tumi aiz anguror bagano ḳamo zao.’
MAT 21:29 Fuae foyla ḳoilo, ‘Ami fartam nae.’ Oile bade tar mon bodlaia ḳamo gelo.
MAT 21:30 Bade beṭae tar huru fuar gese gelo, gia ou ḳamor ḳota ḳoilo. He zuaf dilo, ‘Aichcha ami zaimune,’ oile bade gelo na.
MAT 21:31 Te ḳoukka sain, ou duio fuar maze ḳe bafor hukum manlo?” Tara ḳoila, “Boṛo fuae.” Teu Isae ḳoila, “Ami afnaintore hasa ḳota ḳoiram, gushkur toshildar ar silan beṭin afnaintor age oia Allar bashshait hamaizira.
MAT 21:32 Ḳaron Ehia nobie hok fot bataia deoat aisla, ta-o afnara tan ḳotae iman anchoin na. Oile gushkur toshildar ar silan beṭinte iman anla. Ota deḳar bade-o afnara iman anchoin na, touba-o ḳorsoin na.”
MAT 21:33 Bade Hozrot Isae ḳoila, “Afnara oḳon arok kichcha hunoukka. Eḳzon giroste anguror bagan ḳoria sairobae beṛa dilo. Bade sokidaror lagi usa ḳori ekkan ṭong-gor banailo ar anguror rosh bar ḳorar lagi gat kudilo. Heshe ḳet bagi dia girost bidesh gelogi.
MAT 21:34 Angur fakia harle giroste tar baṭ nibar lagi, bagidar oḳlor gese tar saḳor oḳol faṭailo.
MAT 21:35 Oile bagidare girostor eḳ saḳorre doria kub mair-doir ḳorlo, dusra saḳorre fattordi maria zoḳom ḳorlo ar aroḳ saḳorre zane marililo.
MAT 21:36 Bade tain aro besh ḳori eḳ dol saḳor faṭaila, oile bagidar oḳole tarar loge-o oula bebohar ḳorlo.
MAT 21:37 Hesh-mesh giroste tan nizor fuare tarar gese faṭaila, mono ḳorla, tara tan fuare dam dibo.
MAT 21:38 Oile bagidar oḳole fuare dekia, eḳe-oinne foramish ḳori koilo, ou fua-u to bade i shompottir malik oibo. Te ao, ogure marilai, teu amra-u itar malik bonizimu.
MAT 21:39 Ḳoia-u tara fuare doria angur baganor bare nia zane marililo.
MAT 21:40 Oḳon ḳoukka sain, baganor malik zebla aiba, aia ou bagidar oḳolre kita ḳorba?”
MAT 21:41 Tara ḳoila, “Tain aia to ou naforman oḳolre kun ḳorba ar shomoy moto zera fosholor baṭ dibo, tarar gese ḳet bagi diba.”
MAT 21:42 Hozrot Isae ḳoila, “Afnara Allar kalamo foṛsoin na ni, Raz mestoir oḳole ze fattorre beḳama ḳoia falai disil, oḳṭa dia-u goror ian kuṭi oilo. Mabude nize-u ita oaila, ita dekia to amrar taijjubi lager.
MAT 21:43 Erlagi koiram, Allar bashshai afnarar ges taki kaṛia neoa oibo. Ar zerar zindegit ou bashshair fol deḳa zaibo, tarare-u ou bashshai deoa oibo.
MAT 21:44 Huno, ou fattoror ufre ze zon foṛbo, he ṭukra ṭukra oizibo. Ar ou fattoro zar ufre foṛbo, he-o surmar oizibo.”
MAT 21:45 Isar ou talim hunia boṛo imam ar Forishi oḳole buzilila, tain ita tarar bifokke-u ḳoira.
MAT 21:46 Erdae tara Isare dorilito sailo. Oile manshore ḍoraia tanre kunta ḳorlo na. Manshe to Hozrot Isare nobi hishabe manta.
MAT 22:1 Hozrot Isae hirbar tarare aro kichcha hunaila. Tain ḳoila,
MAT 22:2 “Behesti bashshai ola eḳ bashshar laḳan, ze bashshae tan fuar biar ḳanir bebosta ḳorla.
MAT 22:3 Ar daoti meman oḳolre anar lagi tan ḳoyzon saḳorre faṭaila, oile tara ḳeu ailo na.
MAT 22:4 Bade tan aro saḳorre oḳan hikai dia faṭaila, ḳoila, ‘Tumra gia meman oḳolre ḳoio, ami amar taza bisal ar ḍeḳain zobo ḳoria ḳani zuit ḳorsi. Oḳon ḳani tiar oigese, afnara aia ḳailaukka.’
MAT 22:5 “Daoti oḳole erar ḳota-o na hunia, ḳeu tar nizor ḳamaro ar ḳeu tar dukano gelogi.
MAT 22:6 Ar baki manshe ou saḳor oḳolre doria beijjot ḳoria kun ḳorillo.
MAT 22:7 Bashshae ita hunia gusae aguin oigela. Tain nizor sifai dol faṭaia hou kuni oḳolre binash ḳorla, tarar asta ṭaun aguindi zalailila.
MAT 22:8 Bade tan saḳor oḳolre ḳoila, ‘Ḳani to tiar oigese, oile zetare daot dislam, ita to i daotor zuka nae.
MAT 22:9 Te huno, tumra oḳon rastar muṛae muṛae zao, gia zoto manshore faibae, tara hokkolre biar ashoro loia ao.’
MAT 22:10 Bashshar hukum faia tara bar oia gia bad-bala zoto zonre failo, hoḳolre anlo. Erlagi memane asta bia baṛi bori gelo.
MAT 22:11 “Erbade bashshae memanor loge deḳa ḳorat aila, aia mozlisor bitre hamaia deḳoin, eḳ beṭae shadaron ḳafoṛ findia ḳanit aichche.
MAT 22:12 Tain ere zikaila, ‘Oba, bia baṛir zuka ḳafoṛ na findia ino hamaile kila?’ Oile he kunu zuaf dito farlo na.
MAT 22:13 Teu bashshae tan gulam oḳolre hukum dila, ‘Ogur at-fao bandia bare nia andair gato falai deo.’ Hono manshe ḳanda-ḳaṭi korba ar zala-zontronae dat kiṛimiṛi kaiba.”
MAT 22:14 Kichchar bade Isae ḳoila, “Erlagi-u ami koiram, daot faisoin boute, oile fosond oisoin ḳom.”
MAT 22:15 Oḳan hunia Forishi dolor manush Isar ges taki horia gelagi, gia foramish ḳorla tanre kila ḳotar fando falail zae.
MAT 22:16 Teu tara nizor ḳoyzon shagrid ar Raza Herudor dolor kisu manshore Isar gese faṭaila. Otae aia ḳoila, “Huzur, amra to zani, afne eḳzon hok manush. Hok-halal fote manshore Allar rasta batai dira. Ḳe kita mono ḳore ba na ḳore, itae afnar kunta-u zae ae na, afne to muk saia kunta ḳoroin na.
MAT 22:17 Te amrare batai deukka, Hozrot Musar shoriot mafik Ruman bashshare ḳazna deoa zaiz ni? Amra tanre ḳazna ditam ni, na ditam na?”
MAT 22:18 Itar ku-foramish tain buzilila, buzia ḳoila, “O bonḍo oḳol, tumra ḳene amare forikka ḳorrae?
MAT 22:19 Ze ṭeḳadi kazna dein, ota egu ṭeḳa amare deḳao.” Ou tara eḳṭa dinar ania Isar ato dila.
MAT 22:20 Tain zikaila, “I foyshar ufre ḳar nam ar sobi?”
MAT 22:21 Tara ḳoila, “Ruman bashshar.” Tain ḳoila, “Te huno, bashshar zeta ita bashshare deo, ar Allar zeta ita Allare deo.”
MAT 22:22 Ikan hunia tara taijjub bonia tan ges taki gelagi.
MAT 22:23 Ou din Siddekia mozobor ḳoyzon manush Isar ḳandat aila. Era ekin ḳoroin, moutor bade kunu manush ar zinda oia uṭoin na. Erdae tara Isare fando falaibar lagi zikaila,
MAT 22:24 “Huzur, Hozrot Musae ḳoisoin, ḳeu zudi tar boure niaoladi halote toia mara zae, te tar baie ou ṛaṛi beṭire bia ḳoria tar bair bongsho basaite oibo.
MAT 22:25 Te amrar ono eḳ foribaro shat bai asil. Boṛo zone bia ḳoria niaoladi halote mara gelo.
MAT 22:26 Bade dusra baie tar ou ṛaṛi babire bia ḳori mara gelo. Ou nomunae tisra bai taki shuru ḳoria shato baie ou beṭire bia ḳorlo.
MAT 22:27 Heshe ou beṭi-o mara gelo.
MAT 22:28 Te ḳoukka sain, moron bade zebla tara zinda oia uṭba, ou shomoy i beṭi, era kun bair bou oibo? Tara hoḳole-u to i beṭire bia ḳorsil.”
MAT 22:29 Tain zuaf dila, “Afnara to Allar kalam zanoin na, Allar kudroti befar-o buzoin na. Erdae afnara i bul ḳorra.
MAT 22:30 Hunoukka, murda oḳol zebla zinda oia uṭba, ou shomoy tara bia-shadi korta nae, ḳeu tarare bia dito-o nae. Era to firistar laḳan boniziba.
MAT 22:31 Murda oḳol zinda oar befare Allae kita bataisoin, ita afnara kitabo foṛsoin na ni?
MAT 22:32 Kitabo leḳa ase, ‘Ami Ibrahimor Alla, Isʼhakor Alla ar Iakubor Alla.’ Oḳan taki buza zae, ou nobi oḳlor ufat oile-o era to Allar sokut oḳono zinda asoin. Alla to murda oḳlor Mabud nae, tain zinda oḳlor Mabud.”
MAT 22:33 I talim hunia tara taijjub oigela.
MAT 22:34 Forishi oḳole zebla hunla, Siddekia mozobor manshe Isar mator kunu zuaf dita farsoin na, teu tara hoḳol ekḳano oila.
MAT 22:35 Tarar dolor eḳzon moulana aia Isare forikka ḳorar lagi zikaila,
MAT 22:36 “Huzur, Musar shoriotor maze hoḳol taki boṛo hukum kunṭa?”
MAT 22:37 Isae zuaf dila, “Hoḳol taki boṛo hukum oilo, ‘Tumrar asta dil, asta zan, asta mon ar hoḳol shokti dia tumrar Mabud Allare mohobbot ḳorio.’
MAT 22:39 Dusra hukum-o ou laḳan, ‘Tumrar ari-forire nizor laḳan maya ḳorio.’
MAT 22:40 Ou duio hukumor ufre asta Tourat Shorif ar Asmani Kitab oḳol nirbor ḳore.”
MAT 22:41 Forishi oḳol ekḳano dola roisoin, ou shomoy Isae tarare zikaila,
MAT 22:42 “Al-Mosir befare afnara kita zanoin? Tain ḳar aolad?” Tara ḳoilo, “Daud nobir aolad.”
MAT 22:43 Teu Isae tarare ḳoila, “Te Pak Ruhur bole Daud nobie kila al-Mosire tan nizor munib ḳoisoin? Daude to ḳoisoin,
MAT 22:44 Mabude amar munibre ḳoila, ‘Ami zoto shomoy tumar dushmon oḳolre tumar faor tolat na falai, oto shomoy tumi amar ḍainor toḳto bo.’
MAT 22:45 Daude zebla nize-u al-Mosire tan munib ḳoisoin, te al-Mosi kemne Daudor aolad oiba?”
MAT 22:46 Tara er kunu zuaf dita farla na, ar ou din taki keu tanre kunta zikanir-o shaosh failo na.
MAT 23:1 Hozrot Isae tan logor manshore ar sahabi oḳolre ḳoila,
MAT 23:2 “Musa nobir shoriot talim dibar eḳtiar to moulana ar Forishi oḳlor ato.
MAT 23:3 Erlagi tara zeta ḳoin, ota manio, ar zeta amol ḳorar hukum dein, ota amol ḳorio. Oile tara nize zeta ḳoroin, tumra ita ḳorio na. Ḳaron, tara muk dia zela ḳoin, ila ḳam ḳoroin na.
MAT 23:4 Tara am manshor ḳando boṛo boṛo gaiṭ tulia dein, oile shaijjor lagi tara eḳṭa angul-o laṛain na.
MAT 23:5 Tara ḳali manshore deḳanir lagi hoḳolta ḳoroin. Allar kalamor ayat dia boṛo boṛo tabiz bandoin ar nizor forezgari deḳanir lagi lamba lamba faugṛi bandoin.
MAT 23:6 Tara ḳanir mozliso bala bala zaga tukain ar mosido hamaia samnor ḳataro boita sain.
MAT 23:7 Bazar-aṭo gia salam faite kub fosond ḳoroin, ar sain manshe tarare huzur huzur ḳorouk.
MAT 23:8 “Oile tumrare ḳeu huzur huzur ḳorouk, ita asha ḳorio na. Tumrar asol huzur to ḳali eḳzon-u asoin, tumra ḳali bai bai roio.
MAT 23:9 I duniat ḳeurore baba ḳoia ḍakio na, ḳaron tumrar batuni baf to eḳzon-u, tain behesto asoin.
MAT 23:10 Ḳeu tumrare neta ḳoia ḍaḳouk, ita asha ḳorio na. Tumrar neta to eḳzon-u, tain oila al-Mosi.
MAT 23:11 “Tumrar maze zein hoḳol taki boṛo, ein tumrar kezmot ḳorouk.
MAT 23:12 Ze zone nizore boṛo mono ḳore, tare huru ḳora oibo. Ar ze nizore huru mono ḳore, tare boṛo ḳora oibo.
MAT 23:13 “Haere moulana ar Forishir dol, afsus tumrar lagi, tumra bonḍo! Tumra manshor samne behesti bashshair duar bond ḳori toiso. Tumra nize-o ono hamairae na, manshore-o hamaite dirae na.
MAT 23:14 Haere bonḍo moulana ar Forishir dol, manshore deḳanir lagi tumra lamba lamba dua ḳoro, hirbar ṛaṛi beṭintor zaga-mirasho doḳol ḳoro. Erlagi tumrar ḳoṭin shaza oibo.
MAT 23:15 Haere bonḍo moulana ar Forishir dol! Eḳzon manshore tumrar dolo nibar lagi shat shomudro tero nodi faroia tumra douṛao. Oile he tumrar dolo hamaia harle, tare tumra taki aro boṛo duzoki banao.
MAT 23:16 “Haere anda fot deḳaora! Tumra nize anda oia oinnore kila fot deḳao? Tumra to ḳo, Baytul-Mukaddosor name ḳosom ḳaile kunta oy na, oile Baytul-Mukaddosor shunar name ḳosom ḳaile mante oibo.
MAT 23:17 Haere anda be-aḳolor dol, kunḳan boṛo? Baytul-Mukaddos, na shuna? Baytul-Mukaddose-u to ou shunare fak-fobitro ḳore.
MAT 23:18 Hirbar tumra ḳo, kurbani kanar name ḳeu ḳosom ḳorle kunta oy na, oile kurbanir sizor name ḳosom ḳorle mante oibo.
MAT 23:19 O anda oḳol, kunḳan boṛo? Kurbani kana, na kurbanir siz? Ou kurbani kanae-u ou sizre fak-fobitro ḳore na ni?
MAT 23:20 Erlagi ze zone kurbani kanar name ḳosom ḳore, he kurbani kana ar kurbanir siz, i duiotar name-u ḳosom ḳore.
MAT 23:21 Ola-u Baytul-Mukaddosor name ze zone ḳosom ḳore, he-o Baytul-Mukaddos ar er bitre zein taḳoin, tan name-u ḳosom ḳore.
MAT 23:22 Ze zone behestor name ḳosom ḳore, he Allar arosh ar arsho zein asoin, tan name-u ḳosom ḳore.
MAT 23:23 “Haere bonḍo moulana ar Forishir dol! Tumra guamuri, fodina fata, ar zirar dosh baṭor eḳ baṭ Allar oaste zoḳat dirae, oile Musa nobir shoriotor hukum mafik aro zoruri befar, mani hok insaf, doya ar Allar mohobbot tumra bad dilaiso. Te foyla hukum amol ḳorar loge loge badorta-o amol ḳora zorur.
MAT 23:24 Tumra nize-u anda, otoso aroḳzonre fot deḳairae. Tumra egu mosha-o sakia tulo, oile uṭre gililao.
MAT 23:25 “Haere bonḍo moulana ar Forishir dol! Tumra to bashon-bortonor bargala bala ḳori saf ḳoro, oile itar bitor gala zulum ar lub-lalose bora.
MAT 23:26 Haere anda Forishir dol, tumra foyla otar bitor saf ḳoro, teu bargala emne-u saf oibo.
MAT 23:27 “Haere bonḍo moulana ar Forishir dol! Tumra oilae sun-ḳam ḳora ḳoyboror laḳan, er bargala soḳsoḳa oile-o bitre to ḳali mora manshor aḍḍi-guḍḍi ar ḳasrae bora.
MAT 23:28 Ṭik ou laḳan, manshe mone ḳoroin tumra kub forezgar, ashole tumrar dil to bonḍami ar naformanie bora.
MAT 23:29 “Haere bonḍo moulana ar Forishir dol! Tumra nobi oḳlor rouzare shundor ḳori fakka ḳoro, ar oli-auliar mazarre soḳsoḳa ḳori hazao.
MAT 23:30 Ar tumra ḳo, ‘Ish, amra zudi amrar baf-dadar zomanat duniat aitam, te nobi oḳolre zane marar ḳalo baf-dadar loge gelam na one.’
MAT 23:31 Ou mate tumra forman dirae, nobi oḳolre zetae zane marsla, otar bongshodor-u tumra.
MAT 23:32 Te tumrar baf-dadainte zeta shuru ḳoria gesoin, tumra otar baki gala fura ḳorrae.
MAT 23:33 “O hafor baichchain, duzoḳor azab taki tumra kila bastae?
MAT 23:34 Erlagi ami tumrar gese nobi-rosul, ar alim-ulama faṭaiar. Erar mazor ḳoyzonre tumra zane marilibae, ḳoyzonre duk-koshṭor solibo loṭḳaia marbae. Ar ḳoyzonre tumrar mosido haraia sabuk maria, ek gau taki arok gaut ḳedaia nibae.
MAT 23:35 Erdae-u nirdushi hou Habilor kun taki shuru ḳoria Barakiar fut Zakariar kun forzonto, duniat zoto kun oise, ita hoḳol kunor dayi oibae tumra. Ou Zakariare to Baytul-Mukaddosor bitoror kurbani kana ar Herem Shorif ou dui zagar mazḳano kun ḳora oisil.
MAT 23:36 Ami tumrare hasa ḳota ḳoiram, ou tamam kunor dayi oibae i zomanar manush.
MAT 23:37 “Zeruzalem! Haere Zeruzalem ṭaun! Tumi nobi oḳolre zane maro, tumar gese zarare faṭail oy, tumi tarare fattor maro. Murgie zela tair baichchare ḍaḳnar tole asroy dey, ami-o oula tumar manshore asroy ditam saisi, oile tara hunla na.
MAT 23:38 O Zeruzalemor bashinda oḳol, tumrar sokur samne-u tumrar boshot ḳana ḳali baṛi oibo.
MAT 23:39 Ami tumrare ḳoiram, zotodin tumra ikan na ḳoibae, ‘Mubarok tain-u, Allar nam loia zein aira,’ oto din tumra ar amare deḳtae nae.”
MAT 24:1 Hozrot Isa Baytul-Mukaddos taki bar oia zairagi, ou shomoy tan sahabi oḳol tan gese aila, tanre Baytul-Mukaddosor shundor shundor dolan deḳanir lagi.
MAT 24:2 Tain ḳoila, “Ami tumrare hok kota ḳoiram, tumra ou zeta boṛo boṛo dolan deḳrae, itar dui iṭ ekḳano roito nae, hoḳolta maṭit mishizibo.”
MAT 24:3 Bade tain zebla Zoytun faṛor ufre boat asla, ou shomoy sahabi oḳole aia tanre niralae zikaila, “Huzur, amrare ḳoiba ni, ita kun shomoy oibo? Kun alamot dekia amra buzmu, afnar aoar shomoy ar kiamotor-o shomoy aichche?”
MAT 24:4 Isae ḳoila, “Dekio, ḳeu zanu tumrare na ṭoge.
MAT 24:5 Bout zone amar nam doria aibo, aia ḳoibo, ami-u al-Mosi, ḳoia boutre ṭogibo.
MAT 24:6 Huno, zuddor aoaz ar laṛair ḳobor tumra faibae, oile itae ḍoraio na. Ita nisoy goṭbo, goṭle-o ita to shesh nae.
MAT 24:7 Eḳ zatie aroḳ zatir loge, eḳ deshe aroḳ deshor loge laṛai korbo. Bout zagat boisal ar nidan deḳa dibo.
MAT 24:8 Oile ita to ḳali mosibotor shuru.
MAT 24:9 “Ou shomoy aile manshe tumrare zulum ḳorar lagi dorai dibo ar kun ḳoraibo. Amar lagi hoḳol zatie tumrare ginnaibo.
MAT 24:10 Teu bout zon fislizibo, eḳe-oinnore ginnaibo ar dorai dibo.
MAT 24:11 Bout bonḍo nobi aia manshore ṭogiba.
MAT 24:12 Naformanir foriman baṛizibo, erlagi bout manshor maya-momota ḳomizibo.
MAT 24:13 Oile hesh forzonto zera ṭikia roiba, era-u rehai faiba.
MAT 24:14 Hoḳol zatir gese shakki hishabe behesti bashshair kush-ḳobri toblig kora oibo, erbade-u kiamot aibo.
MAT 24:15 “Hozrot Danial nobir muk taki ze bezuita noforoti zinishor ḳota zanail oise, tumra ou pak zagat i zinish deḳbae. Ze zone tilaot ḳorer, he buzouk.
MAT 24:16 Ou shomoy zera Ehudia zilat taḳba, tara faṛedi gia bagouk.
MAT 24:17 Hidin ḳeu zudi goror salor ufre taḳe, he tar goror mal-samana nibar lagi, lamat lamia goror bitre na hamauk.
MAT 24:18 Zera bondor maze ase, tarar gotror saddor nibar lagi baṛit na auk.
MAT 24:19 Ou shomoy zeta beṭintor feṭo hurutta, ar zera huruttare bukur dud ḳaoaira, tarar boṛo mosibot oibo.
MAT 24:20 Tumra dua ḳoro, shitor dino ba Zummabare zanu tumrar bagia zaoa na lage.
MAT 24:21 Ou shomoy oto bezuita ḳoshṭo oibo, zeta duniar foyla taki aiz forzonto kunudin oise na, ar oito-o nae.
MAT 24:22 Mabude zudi i shomoyre ḳomaia na dita, te ḳeu zinda roilo na one. Oile Allae tan fosond ḳora bonda oḳlor lagi i shomoy ḳomaia diba.
MAT 24:23 “Hi shomoy ḳeu zudi tumrare ḳoy, ‘Huncho ni, al-Mosi bule ono aisoin’ ba ‘Hono aisoin’ te tumra ekin ḳorio na.
MAT 24:24 Ḳaron al-Mosi nam loia bout bonḍo aiba, nobi hazia-o bout bonḍo aiba. Itae bout boṛo boṛo asanok keramoti kam deḳaiba. Tara saiba, shuzug faile Allar fosond ḳora bondare duka dia be-fote nitagi.
MAT 24:25 Dekio, ami ita hokkolta tumrare age-u zanai dilam.
MAT 24:26 “Huno, ḳeu zudi tumrare ḳoy, ‘al-Mosi bule morubumit asoin,’ te tumra zaio na. Zudi koy, ‘Tain goror bitre asoin,’ te ekin ḳorio na.
MAT 24:27 Megor zilkir loge fube-foisme hoḳolbae zela for oizae, ami bin-Adom aile-o ola oibo.
MAT 24:28 Huno, lash zeno taḳe, hokun emne-u hono dola oy.
MAT 24:29 “Ou mosibotor shomoy shesh oar bade-u, ‘shuruz andair oizibo, sande ar for dito nae. Tera oḳol asman taki foṛizibo, asmanor kunu shoktiala siz-u ṭik-ṭak roito nae.’
MAT 24:30 Ou shomoy asmanor maze ami bin-Adomor nishana deḳa zaibo. Duniar hoḳol manshe ahazari korba. Tara deḳba, Allar kudroti shokti ar nuror mohimae, ‘megor kuṭit oia bin-Adom duniat aira.’
MAT 24:31 Ou shomoy zure zure shingar aoaz oibo, er loge loge-u duniar eḳ mata taki aroḳ matat tain firista oḳolre faṭaiba, era Allar fosond ḳora bonda oḳolre sairobae tone dola ḳorba.
MAT 24:32 “Ou ḍumur gasor bae saia talim lo. Gasor ḍal-fala norom oia zebla noya kuṛi baroy, ou shomoy tumra buzilao gormor din aichche.
MAT 24:33 Te ou laḳan tumra zebla deḳbae ita hoḳolta goṭer, dekia buzilio, bin-Adom-o daro aichchoin. Ḳali daro nae, tain aia duaro ṭukaira.
MAT 24:34 Ami tumrare hasa ḳota ḳoiram, ita na goṭa forzonto i zomanar manush fuṛaita nae.
MAT 24:35 Asman-zomin hoḳolta binash oizibo, oile amar kalam hamesha zari roibo.
MAT 24:36 “Hou din ar hi shomoyor befare ḳali amar gaibi baf Alla saṛa ar ḳeu zanoin na. Asmani firista ba Ibnullae-o zanoin na.
MAT 24:37 Nuh nobir amolo ze halot oisil, ami bin-Adom dusrabar aoar shomoy ṭik olaḳan-u oibo.
MAT 24:38 Boinna shuru oar age Nuh nobi zazo uṭar ag forzonto manshe ḳaoa-daoa ḳorse, eḳe-oinnore bia-shadi korse.
MAT 24:39 Nuh nobir boinnar fanie itare bashaia neoar ag forzonto tara kunta-u ṭer faila na. Ami bin-Adom aibar shomoy-o ṭik olaḳan oibo.
MAT 24:40 Ou shomoy duizon manush eḳloge bondo taḳle, eḳzonre neoa oibo ar dusra zonre bad deoa oibo.
MAT 24:41 Dui beṭie eḳloge bara-banat taḳle-o, erar eḳzonre neoa oibo, aroḳzon bad foṛizibo.
MAT 24:42 Erlagi koiram, tumra hushiar roio, tumrar malik kun din aiba, ita to tumra zano na.
MAT 24:43 Oile ikan mono rakio, sur kun shomoy aibo, ikan zudi giroste zanto, te to he hozag roilo one ar surre goro hamaite dilo na one.
MAT 24:44 Erlagi tumra-o hamesha tiar roio, ze shomoyor ḳota tumra sinta-o ḳortae nae, hou shomoy bin-Adom aiba.
MAT 24:45 “Ila hok-halali ar aḳoldar saḳor ḳe ase, zar ato tar munibe dayitto dila he oḳtor ḳalo oinno saḳor oḳolre ḳani baṭia dibo.
MAT 24:46 Ḳofali to hou saḳor, zare tar munibe aia hok-halal faiba.
MAT 24:47 Ami tumrare hasa ḳota ḳoiram, munibe ou saḳoror ato-u tan nizor hoḳol don-samanar bar diba.
MAT 24:48 Oile doro, hou saḳore mone mone ḳoilo, amar munib aite to bout deri ase,
MAT 24:49 ar ou faḳe he hokkol saḳor-baḳorre mair-doir ḳorlo, ar modkuror loge ḳana-dana ḳoria mod ḳailo.
MAT 24:50 Bade ze din ar ze oḳtor ḳota he sinta-u ḳorto nae, hou din ar hou oḳto tar munib aia azir oiba.
MAT 24:51 Tain aia tare ḳaṭia ṭukraia bonḍo oḳlor loge mishaiba. Hino manshe ḳanda-ḳaṭi korba, ar zala-zontronae dat kiṛimiṛi diba.”
MAT 25:1 Erbade Isae ḳoila, “Behesti bashshai oilo ola doshgu fuṛir laḳan, zeta fuṛinte biar damandre aguaia anar lagi lem-lemṭon loia bar oilo.
MAT 25:2 Erar maze fas zon asil aḳoldar ar fas zon asil be-aḳol.
MAT 25:3 Be-aḳol fuṛinte ḳali lem loia bar oilo, lemor kunu tel nilo na.
MAT 25:4 Oile aḳoldar fuṛinte lemor loge fifat ḳori tel-o nilo.
MAT 25:5 Daman aite deri oae tara hoḳol-u ungaite ungaite gumai gelo.
MAT 25:6 “Bade ada-raitkur bala sillani huna gelo, ‘Daman aichchoin, daman aichchoin, zoldi baro.’
MAT 25:7 Sillani hunia ou fuṛin uṭia lem-lemṭon ṭik korat lagla.
MAT 25:8 Hou be-aḳol fuṛinte aḳoldar fuṛinre ḳoila, ‘Amrare tuṛa tel deo na, amrar lem limizargi.’
MAT 25:9 Tara ḳoila, ‘Amrar gese zeta tel ase, ita to amrar-u lagbo. Te tumra dukan taki tel anailao.’
MAT 25:10 Ou be-aḳol fuṛin tel anat gia harle-u daman ailla. Ou shomoy aḳoldar ou fuṛin zuit asla, tara damandre loia bia baṛit hamailo. Tara hamanir bade-u duar bond ḳora oilo.
MAT 25:11 Bade ou be-aḳol fuṛinte aia duar bond dekia ḳoila, ‘Hunra ni, duarḳan kuloukka.’
MAT 25:12 Damande zuaf dila, ‘Ami hasau ḳoiram, ami to tumrare sini na.’ ”
MAT 25:13 Ou kichchar bade Isae ḳoila, “Erdae tumra hushiar roio, hi din ar hi shomoyor ḳota to ḳeuror zana nai.”
MAT 25:14 Tain aro ḳoila, “Behesti bashshai ola eḳzon manshor laḳan, ein bidesh zaoar bala tan saḳor oḳlor ato asta shompottir bar shomzai dila.
MAT 25:15 Erar zoiggota mafik tain eḳzonre fas azar ṭeḳa, dusra zonre dui azar ar aroḳzonre eḳ azar ṭeḳa dila.
MAT 25:16 Fas azar ṭeḳa ze faisil, he ou ṭeḳadi karbar ḳoria aro fas azar lab ḳorlo.
MAT 25:17 Dui azar ṭeḳa ze faisil, he-o aro dui azar lab ḳorlo.
MAT 25:18 Oile eḳ azar ṭeḳa ze faisil, he tar malikor i ṭeḳa ḳamo na lagaia gat kudia maṭir tole toilo.
MAT 25:19 “Bout din bade hou malik desho aia tarar hishab-nikash saila.
MAT 25:20 Teu fas azar ṭeḳa ze faisil, he aro fas azar loia aia malikre ḳoilo, ‘Sab, afne amare fas azar ṭeḳa disla, ou ṭeḳadi ami aro fas azar lab ḳorsi.’
MAT 25:21 Ikan hunia malike ḳoila, ‘Shabbash, tumi kub hok-halali manush. Tumi huru-muru befare-u hok-halal roiso, erlagi ami tumare aro bout boṛo dayitto dimu. Ao, amar kushir bagi o.’
MAT 25:22 Bade dui azar ṭeḳa ze faisil, he aia ḳoilo, ‘Sab, afne amare dui azar ṭeḳa disla. Ami to aro dui azar lab ḳorsi.’
MAT 25:23 Teu malike ḳoila, ‘Shabbash, tumi kub hok-halali manush. Tumi tuṛa befare-u hok-halal roiso, erlagi ami tumare aro bout boṛo dayitto dimu. Ao, amar kushir bagi o.’
MAT 25:24 Oile eḳ azar ṭeḳa zare disla, he aia ḳoilo, ‘Sab, ami zani afne kub ḳoṛa manush. Afne ḳet na ḳoria-o dan ḳaṭoin ar bain na dile-o ali huroin.
MAT 25:25 Erdae ami ḍoraia afnar ṭeḳa maṭir tole lukaia toislam. Ou neukka afnar ṭeḳa.’
MAT 25:26 Malike ḳoila, ‘Haere ḳobis, tuin to kuṛia. Tui zudi ikan mono ḳorle, ami ket na ḳorle-o dan ḳaṭi ar bain na dile-o ali huri,
MAT 25:27 te amar ṭeḳa tui befarir gese dile na ḳene? Te to ami aia mul ṭeḳar loge kisu lab failam one.’
MAT 25:28 Bade tain oinno saḳor oḳolre ḳoila, ‘Tumra ogur ges taki ou ṭeḳa nia, dosh azar zar gese ase tare deo.
MAT 25:29 Huno, zar ase tare aro deoa oibo, tar aro baṛibo. Oile zar nai, tar zeta ase ota-o ḳaṛia neoa oibo.
MAT 25:30 Ou bojjat saḳorre nia tumra andair gato falai deo. Hou gato manshe ḳanda-ḳaṭi korbo ar zala-zontronae dat kiṛimiṛi dibo.’
MAT 25:31 “Bin-Adome zebla firista oḳolre loia nizor mohimae hirbar aiba, aia nizor bashshair godit boiba.
MAT 25:32 Ou shomoy duniar tamam zatir manshore tan samne ana oibo. Raḳale zela meṛa ar sagolre alada ḳore, tain-o oula hoḳol manshore algaia dui bag korba.
MAT 25:33 Tan ḍain galabae meṛa ar bau galabae sagolre raḳba.
MAT 25:34 “Erbade bashshae tan ḍain galar manshore ḳoiba, ‘Tumra zara amar batuni bafor rohom faiso, tumra ao. Ar duniar foyla taki tumrar lagi ze bashshai tiar ḳori raḳa oise, ou bashshair doḳol shomzia neo.
MAT 25:35 Mono ase ni, amar zebla feṭo buk lagsil, tumra amare ḳani dislae, fiasor shomoy fani dislae, ar musafir halote amare asroy dislae.
MAT 25:36 Ami zebla udla aslam, tumra ḳafoṛ dislae, bemaror shomoy kezmot ḳorslae, ar zel ḳanat amare deḳat geslae.’
MAT 25:37 “Ou shomoy hou allaoala manshe ḳoiba, ‘Malik, afnar buk lagae amra kun shomoy afnare ḳaoailam? Kun shomoy afnare fani dilam?
MAT 25:38 Ar kun shomoy musafir halote afnare asroy dilam, ḳali ga dekia kun shomoy ḳafoṛ dilam?
MAT 25:39 Ar kun shomoy-u ba bemari haloto afnar kezmot ḳorlam, ba zel ḳanat deḳat gelam?’
MAT 25:40 Ou shomoy bashshae tarare ḳoiba, ‘Ami hok kota ḳoiram, amar ou huru-muru eḳzon manshor lagi tumra zebla ita ḳorso, er mani amare-u ḳorso.’
MAT 25:41 “Bade bashshae tan bau galar manshore ḳoiba, ‘O lannotir dol, amar samon taki bago. Iblis-Shoytan ar tar samsa zinnat oḳlor lagi duzoḳor ze aguin tiar ḳora oise, hono zao.
MAT 25:42 Amar feṭo bukor ḳalo tumra amare ḳaoaiso na, fiasor shomoy fani diso na.
MAT 25:43 Amar musafir haloto roibar asroy diso na, ami zebla udla aslam, ḳafoṛ diso na, bemaror shomoy saiso na, amare deḳar lagi zelḳanat-o geso na.’
MAT 25:44 “Ou shomoy tara ḳoiba, ‘Huzur, amra kun shomoy ita ḳorlam? Afnare bukashi, fiasi, musafir, udla gotor, bemari ar zel ḳanat dekia-o shaijjo ḳorlam na?’
MAT 25:45 Bashshae tarare ḳoiba, ‘Ami hok kota ḳoiram, amar ou huru-muru eḳzon manshor lagi-u tumra zebla ita ḳorso na, er mani amare-u ḳorso na.’ ”
MAT 25:46 Heshe Isae ḳoila, “Ou naforman oḳole aḳerato siroḳal shaza faiba, oile allaoala manshe aḳeri zindegi faiba.”
MAT 26:1 Ou boyan shesh oia harle, Isae tan sahabi oḳolre ḳoila,
MAT 26:2 “Tumrar to zana ase, ar dui din bade-u Azadi Id. Idor shomoy ami bin-Adomre solibo loṭḳaia marar lagi dorai deoa oibo.”
MAT 26:3 Ou shomoy boṛo imam ar murobbi oḳol aia, tarar fordan imam Kayafar baṛit dola oila.
MAT 26:4 Dola oia ou foramish ḳorla, Isare kila lukaia aṭok koria zane mara zae.
MAT 26:5 Oile tara ḳoila, “Idor shomoy tare dortam nae. Dorle manshe gonḍogul lagai dito fare.”
MAT 26:6 Isa zebla Bayt-Ania gaur fosa-kusṭo bemari Saimonor baṛit asla,
MAT 26:7 ou shomoy eḳ beṭi manush tan gese aila. Beṭie sinor eḳ boyamo ḳori kub dami kaṭi ator anchila. Isa ḳaoat boia harle beṭie hoḳol ator tan matat ḍali dila.
MAT 26:8 Ita dekia sahabi oḳol biroḳto oia ḳoila, “Ou ator fuṭain ḳene borbad ḳora oilo?
MAT 26:9 I fuṭin besile to bout ṭeḳa faia gorib oḳolre bilai deoa gelo one.”
MAT 26:10 Ikan buzia Isae ḳoila, “Tumra i beṭigure duk dirae ḳene? Tain to amar lagi ṭik kam-u ḳorsoin.
MAT 26:11 Gorib oḳol to hamesha-u tumrar loge roiba. Oile amare to hamesha faitae nae.
MAT 26:12 Ein aia amar gotro ator maḳaia, dafon-ḳafonor lagi amare zuit ḳorsoin.
MAT 26:13 Ami tumrare hasa ḳota ḳoiram, duniar zekunu zagat Allar kush-ḳobri toblig korar shomoy, ou besaṛire mono ḳorar lagi, tan i nek kamor ḳotaḳan-o ḳoa zaibo.”
MAT 26:14 Bade tan barozon sahabir mazor eḳzon, en nam Ihuda Iskariat, ein boṛo imam oḳlor gese gia ḳoila,
MAT 26:15 “Isare afnarar ato doraia dile amare kita diba?” Teu boṛo imam oḳole tare rufar tish ṭeḳa dila.
MAT 26:16 Erbad taki-u Ihudae Isare doraia deoar shuzug tukanit roilo.
MAT 26:17 Ḳamir Saṛa Ruṭi Kaoar Idor foyla din, sahabi oḳole aia Isare zikaila, “Huzur, amra kun zagat gia afnar lagi Azadi Idor ḳana tiar ḳortam?”
MAT 26:18 Tain zuaf dila, “Tumra ṭauno zao. Gia omuk manshore ḳoio, ‘Huzure ḳoisoin, amar shomoy gonaia aichche, te ami amar sahabi oḳolre loia tumar baṛit id ḳormu.’ ”
MAT 26:19 Isar hukum mafik sahabi oḳole gia Azadi Idor ḳani tiar ḳorla.
MAT 26:20 Bade hainja bala Isae tan barozon sahabire loia ḳanit boila.
MAT 26:21 Boia ḳoila, “Ami tumrare hasa ḳota ḳoiram, tumrar mazor eḳzone-u to amare dushmonor ato dorai dibo.”
MAT 26:22 Ikan hunia tara kub bezar oigela. Erlagi tara eḳ ek kori zikaila, “Huzur, i zon kita ami ni?”
MAT 26:23 Tain ḳoila, “Oḳon ze zone amar loge oia talo at harar, he-u amare doraia dibo.
MAT 26:24 Ami bin-Adomor moutor befare Asmani Kitabo zela leḳa ase, amar mout to oula-u oibo. Oile afsus hou zonor lagi, zegie amare doraia dibo. Duniat tar zonom na oa-u, tar lagi bout bala asil.”
MAT 26:25 Ze Ihudae Isare dorai dito sar, he tanre zikailo, “Huzur, hi zon kita ami ni?” Isae tare ḳoila, “Tumi ṭik-u ḳoirae.”
MAT 26:26 Tara ḳana ḳaira, ou shomoy Isae ruṭi ato loia Allar shukria adae ḳorla. Tain ruṭi siṛia ṭukra ṭukra ḳori sahabi oḳolre dila. Dia ḳoila, “Ou neo, ḳao, mono ḳoro ita amar ḳaya.”
MAT 26:27 Bade tain shorbotor fiala loia Allar shukria zanaila, ar erare dia ḳoila, “Tumra hoḳole ou fiala taki anguror shorbot ḳao.
MAT 26:28 Mono ḳorio, ita amar lou. Ou lour zoriae adom zatir boutor guna mafi oibo. Allar loge manshor milonor usilla oilo ou lou.
MAT 26:29 Ami hasa ḳota ḳoiar, ami amar gaibi bafor bashshait dakil oia hari, tumrare loge loia zotodin noya halote anguror shorbot na ḳaisi, oto din i shorbot ar ḳaitam nae.”
MAT 26:30 Heshe tara hoḳole mili ek gozol gaia, gor taki bar oia Zoytun faṛo gelagi.
MAT 26:31 Bade Isae tan sahabi oḳolre ḳoila, “Huno, aiz rait tumra hoḳole-u to amare falaia bagibae. Allar kalamo ase, ‘Ami meṛar falor raḳalre marmu, teu falor meṛain sairobae sitriziba.’
MAT 26:32 Oile amare murda taki zinda ḳorar bade, tumrar age-u ami Galil zilat zaimugi.”
MAT 26:33 Teu sahabi Fitore tanre ḳoila, “Huzur, hoḳol bagi gele-o ami bagitam nae.”
MAT 26:34 Isae ḳoila, “Te huno, ami tumare hasa ḳota ḳoiram, aiz fotabala murgae bang dibar age-u tumi tinbar ḳoibae, tumi amare sino na.”
MAT 26:35 Oile Fitore ḳoila, “Huzur, ou kita ḳoin, afnar loge zudi amar moron-o oy, ta-o ami kunumonte-u afnare oshikar ḳortam nae.” Hoḳol sahabie ou eḳlaḳan ḳoila.
MAT 26:36 Bade Hozrot Isae tan sahabi oḳolre loia Getshimani namor eḳ bagano aila. Aia erare ḳoila, “Tumra ono bo, ami hogalat gia dua ḳormu.”
MAT 26:37 Oḳan ḳoia tain Fitor ar Zibudiar dui fuare tan loge nila. Aste aste tan dilor maze duk ar hae-hutash baṛilo.
MAT 26:38 Tain erare ḳoila, “Baiainre, duke amar ḳoilja faṭizar. Tumra ono boiro ar amar loge hozag roio.”
MAT 26:39 Oḳan ḳoia tuṛa horia gia tain maṭit soizdat foṛia ḳoila, “O amar behesti abba, amar ufre ou ze zulum-mosibot aior, dusra kunu ufae taḳle ikanta horailao. Oile ita amar ichchae nae, tumar morzi mafik-u ouk.”
MAT 26:40 Soizda taki uṭia tain sahabi oḳlor gese aia deḳla, era gumai gesoin. Ou tain Fitorre hozag kori koila, “Tumra ekkan gonṭa-o hozag roitae farlae na ni?
MAT 26:41 Hozag ro dua ḳorar lagi, ar dua ḳoro forikka taki basar lagi. Tumrar dilor maze nisoy kial ase, oile ḳaya to ḳomzur.”
MAT 26:42 Bade tain dusrabar gia dua ḳorla, “O amar behesti abba, ou zulum-mosibot ami shoijjo na ḳorle, zudi dusra kunu fot na taḳe, taile tumar morzi mafik-u ouk.”
MAT 26:43 Bade tain hirbar aia deḳla, era gumai gesoin, gume tarar souk falai der.
MAT 26:44 Dekia tarare toia tain tisra bar gia eḳoi dua ḳorla.
MAT 26:45 Erbade tain sahabi oḳlor gese aia ḳoila, “Tumra deki oḳono arame gumairae. Huno, shomoy aichche, ami bin-Adomre gunagar oḳlor ato shomzai deoa oibo.
MAT 26:46 Uṭo, amra roana dei. Amare zegie dushmonor ato dorai dibo, he aia azigese.”
MAT 26:47 Tain erar loge mato roisoin, ou shomoy Ihuda hono ailo. He asil barozon sahabir mazor eḳzon. Tar loge oia aro boute laṭi-soṭa, toluar loia ailo. Boṛo imam ar murobbi oḳole erare faṭaisoin.
MAT 26:48 Tanre zegie doraia dito, ou Ihudae tar logor erare age hikaia disil, “Ami gia zar galo hunga dimu, he-u hou zon. Tumra ere aṭok korio.”
MAT 26:49 Erlagi Ihudae shuza-shuzi Isar gese gia ḳoilo, “Huzur, assalamu alaikum.” Ḳoia he tanre hunga dilo.
MAT 26:50 Isae tare ḳoila, “Baire, zeta ḳorat aiso, ḳorilao.” Loge loge-u tara aia Isare dorililo.
MAT 26:51 Ou shomoy Isar logor eḳzone nizor toluar bar ḳoria fordan imamor gulamre sed marla, sedor loge tar ek kan ḳaṭia foṛigelo.
MAT 26:52 Teu Isae enre ḳoila, “Tumar toluar bego harailao. Toluardi zara ḳelae, toluaror tole-u tarar zan zae.
MAT 26:53 Tumi ikan sinta ḳoro na ni, ami amar batuni bafor dorbaro aroz ḳorle, tain ḳoyeḳ azar firista faṭaita nae ni?
MAT 26:54 Oile ami ila ḳorle kitabor ḳota kila folibo? Kitabo zotota batail oise, ita to goṭbo-u.”
MAT 26:55 Bade tain ota manshore ḳoila, “Kita ba, ami kunu sur-ḍaḳait ni, tumra deki laṭi-soṭa, toluar loia amare dorat aiso. Ami to forteḳ din Baytul-Mukaddoso boia talim ditam. Ou shomoy to tumra amare dorlae na.
MAT 26:56 Ashole ita hokkolta goṭer, zate Asmani Kitabo nobi oḳole zela bataisoin, ota fura oy.” Ou shomoy sahabi oḳole Isare toia bagi gela.
MAT 26:57 Hozrot Isare doria hari ou manshe fordan imam Kayafar gese loia gelo. Hono moulana ar murobbi oḳol ekḳano dola oila.
MAT 26:58 Sahabi Fitor Isar ges tone duroi hori hori roia tan ḳore ḳore fordan imamor baṛir uṭanor ḳandat gela. Gia hesh-mesh kita oy, oḳan deḳar lagi uṭanor bitre hamaia, honor faradar oḳlor loge boila.
MAT 26:59 Hozrot Isare zane marilibar lagi boṛo imam oḳole ar mozlisor hoḳol manshe Isar bifokke kunu nalish tukaila,
MAT 26:60 oile faila na. Mozliso Isar bifokke boute misa shakki dile-o, tarar shakkir mil oilo na. Bade duizon manshe aia tan birudde misa shakki dia ḳoilo,
MAT 26:61 “Amra hunchi, he ḳoise, Allar Kaba Shorif, mani Baytul-Mukaddosre he bangilibo, ar tin dinor bitre hirbar banaibo.”
MAT 26:62 Teu fordan imam ubaia hoḳlor samne Isare zikaila, “Oba, tumi kunu mator zuaf ditae na ni? Ita manshe tumar befare kita shakki dira, hunrae ni?”
MAT 26:63 Oile tain kunu zuaf na dia nirai roila. Fordan imame tanre hirbar ḳoila, “Tumi zinda Allar ḳosom ḳaia ḳo sain, tumi kita Allar oada ḳora hou al-Mosi ni, tumi-u Allar ḳas mayar zon Ibnulla ni?”
MAT 26:64 Tain zuaf dila, “Afnara-u to ḳoira. Oile ami koiram, afnara deḳbane, ami bin-Adom arshe-azimo Alla Rabbul Alaminor ḍainor toḳto boat asi. Aro deḳba, ami behesti megor kuṭit oia duniat aiar.”
MAT 26:65 Ikan hunia-u fordan imame nizor finnor ḳafoṛ siṛia ḳoila, “He to shiriki korlo, te ar kunu shakkir zorur ase ni? Afnara nizor ḳane-u to hunla, he shiriki korlo.
MAT 26:66 Te oḳon afnara kita ray diba?” Tara ḳoila, “Ere to marilaoa dorḳar.”
MAT 26:67 Ou shomoy tara tan muko sef dilo, ar tanre soṛ-taboṛ marlo. Ḳeu ḳeu gushi maria ḳoilo,
MAT 26:68 “Hoi al-Mosi, gaibi ko sain, tore ḳegie marlo?”
MAT 26:69 Fitor uṭano boat asla, ou shomoy eḳ bandi beṭi tan ḳandat aia ḳoilo, “Galilor ou Isar loge to afne-o asla.”
MAT 26:70 Oile Fitore hoḳlor samne oshikar ḳoria ḳoila, “Na go, tumi ita kita mato? Ita kunta-u ami zani na.”
MAT 26:71 Oḳan ḳoia Fitor geiṭor daro gelagi. Tanre dekia aroḳ bandi beṭie ḳoilo, “Ou beṭa-o to Nasarot gaur Isar loge asil.”
MAT 26:72 Oile Fitore hirbar ḳosom ḳori koila, “Na, na, ami tare sini-u na.”
MAT 26:73 Ou shomoy tan ḳandat zera uba asil, tuṛa bade tara ḳoila, “Oba, tumi-o nichchoy erar logor, tumar mat-ḳotae-u to buza zar.”
MAT 26:74 Teu Fitore ḳoila, “Allar gozob foṛouk, ami kosom ḳaia ḳoiar, ami muṭe-u tare sini na.”
MAT 26:75 Oḳan ḳoite-u murgae bang dilailo. Bang hunte-u Fitoror mono oigelo, Isae age ḳoisla, “Murgae bang dibar age-u tumi tinbar ḳoibae, tumi amare sino na.” Erlagi tain bare gia au au ḳori kandon dorla.
MAT 27:1 Biane uṭia boṛo imam ar murobbi oḳole Hozrot Isare zane marar foramish ḳorla.
MAT 27:2 Tara tanre bandia Ruman hakim Filator gese loia gela.
MAT 27:3 Ze zone Hozrot Isare dushmonor ato dorai disil, hou Ihudae zebla deḳlo bisaro tanre dushi shaibosto ḳora oise, ou tar bitre kub duk hamailo. He boṛo imam ar murobbi oḳlor gese hou rufar tish ṭeḳa loia aia ḳoilo,
MAT 27:4 “Ami to eḳzon ni-oforadi manshore zane marilibar lagi dorai dia guna ḳorsi.” Ikan hunia tara ḳoila, “Teu amrar kita oilo? Ita to tumar befar.”
MAT 27:5 Ou shomoy Ihudae hou tish ṭeḳa Baytul-Mukaddoso iṭa mari falaia gelogi, gia nize nize-u fash lagia morigelo.
MAT 27:6 Boṛo imam oḳole i ṭeḳa ato loia ḳoila, “Iguin to Baytul-Mukaddosor tohbilo raḳa ṭik nae, ḳaron ita oilo lour dam.”
MAT 27:7 Bade tara foramish ḳoria ou ṭeḳadi musafir manshor ḳobrostanor lagi ek kumaror ges taki zaga loila.
MAT 27:8 Erlagi ou zagare oḳono ‘lour zaga’ ḳoa oy.
MAT 27:9 Ita oae, Iaromia nobir mazdi zeta batail oisil, ota foligelo. Tain ḳoisla, “Tara ze tish ṭeḳa nilo, ikṭa oilo tan dam. Boni Israile tan ou dam shaibosto ḳorsil.
MAT 27:10 Allae amare zela hukum disoin, ola-u tara kumaror zaga loar lagi ṭeḳaguin dilo.”
MAT 27:11 Hozrot Isare Ruman fordan hakim Filator adaloto azir ḳora oilo. Hakime tanre zikaila, “Kita ba, tumi Ihudi oḳlor bashsha ni?” Tain ḳoila, “Ji oy, afne ṭik-u ḳoira.”
MAT 27:12 Boṛo imam ar murobbi oḳole tan name bout nalish dila. Oile Isae kunu zuaf dila na.
MAT 27:13 Ou shomoy Filate zikaila, “Tumi kunu zuaf ditae na ni? Deḳrae ni, tara tumar birudde ḳoto nalish dira.”
MAT 27:14 Oile Isae itar ekkan-o zuaf na deoae Filat kub taijjub oigela.
MAT 27:15 Deshor fordan hakimor niom asil, Azadi Idor shomoy manshor fosond mafik eḳzon azotire ḳalas dita.
MAT 27:16 Ou shomoy Isa-Barabba namor eḳ namḳora azoti zelo asil.
MAT 27:17 Hoḳol manush ekḳano dola oar bade hakim Filate tarare zikaila, “Tumra kita ḳo? Ami kare saṛtam, Isa-Barabbare, na hou Isare, zare al-Mosi koa oy?”
MAT 27:18 Filate zanta, boṛo imam oḳole ingsha ḳoria Hozrot Isare nia tan ato disoin.
MAT 27:19 Filat zebla hakimor ashono boat, ou shomoy tan bibie ḳobor faṭaia zanaila, “Ou ni-oforad manshore tumi kunta ḳorio na, tan befare ami aiz eḳṭa kuab dekia boṛo duk lagse.”
MAT 27:20 Oile boṛo imam ar murobbi oḳole manshore uskaia dila, tara zanu Barabbar mukti sain ar Isare zane marilibar lagi koin.
MAT 27:21 Bade fordan hakim Filate onor manshore zikaila, “Ou duio zonor maze ami kare saṛtam?” Tara ḳoila, “Barabbare.”
MAT 27:22 Teu Filate tarare zikaila, “Te tumra zare al-Mosi ko, hou Isare kita ḳortam?” Tara hoḳole sillani lagailo, “Tare solibo gatia maro.”
MAT 27:23 Tain ḳoila, “Ḳene, he kita dush ḳorse?” Oile manshe aro zure zure misil lagailo, “Solibo deo, solibo deo.”
MAT 27:24 Filate zebla deḳla, tain kunumonte-u Isare basaita farra na, borong gonḍogul aro baṛer. Ou tain fani dia hoḳlor samne tan at doia ḳoila, “I manshor lour dayi ami nae, tumra-u er zuaf dibae.”
MAT 27:25 Teu hoḳol manshe ḳoila, “Ṭik ase, amra ar amrar aolad oḳol i lour dayi oimu.”
MAT 27:26 Teu Filate tarare kushi korta ḳori Barabbare ḳalas dilaila. Ar Isare besh ḳori sabuk maria, solibo deoar hukum dila. (Solib oilo laḳṛidi banail manshore loṭḳaia marar eḳ zinish.)
MAT 27:27 Bade Filator sifai oḳole Isare doria tarar kempor bitre loia gelo. Hono asta sifai dol dia tanre ber ḳori raḳlo.
MAT 27:28 Tara tan finnor ḳafoṛ-sufoṛ kulia, lal-baingoni rongor bashshai lebas findailo.
MAT 27:29 Ar gosa-ḳaṭa dia raz-mukuṭ banaia tan matat dilo. Tan ḍain ato dilo eḳṭa raz-laṭi. Tane ijjot deḳanir ban ḳoria tan samne aṭu gaṛia boia ḳoilo, “Ihudir bashsha, marhaba.”
MAT 27:30 Ou shomoy tara tan ufre sef dilo ar ou laṭi dia bare bare tan matat marlo.
MAT 27:31 Ou laḳan ṭaṭṭa-moshkora ar bettomizi korar bade tan finnor baingoni lebas kulia, tan nizor ḳafoṛ findailo. Tanre solibo nia zane marilita ḳori roana dilo.
MAT 27:32 Sifai dole Isare loia zaira, ou shomoy tara Kurini elaḳar Saimon namor eḳzon manshore deḳlo. Sifai oḳole zur ḳoria enedi hou solib boaia neoailo.
MAT 27:33 Tara Isare loia Golgata, mani ‘Kollar Saṛ’ namor zagat gelo.
MAT 27:34 Hono nia hari mura namor oshud furail anguror shorbot tan muko dilo, oile tain ita ḳaila na.
MAT 27:35 Bade tara Isare nia ou solibo gatilo. Sifai oḳole tan ḳafoṛ-sufoṛ baṭia neoar lagi loṭari maria baiggo forikka ḳorlo.
MAT 27:36 Ar tara ono boia tanre fara dilo.
MAT 27:37 Solibo tan matar ufre oforad-namar maze leḳlo, “En nam Isa, Ihudir bashsha.”
MAT 27:38 Duizon ḍaḳaitre-o tan loge loṭḳail oilo, eḳzon ḍain galat, oinnozon bau galat.
MAT 27:39 Fotedi zera zaoat asil tara mata laṛaia Isare siṛaia ḳoilo,
MAT 27:40 “Oi mia, tumi bule Baytul-Mukaddos Kaba gor bangia tin dinor maze hirbar banailibae! Te oḳon nizor zan basao na. Tumi bule Allar ḳas mayar zon Ibnulla, te solib taki lamia ao na.”
MAT 27:41 Boṛo imam, moulana ar murobbi oḳole-o tanre siṛaia ḳoila,
MAT 27:42 “He bule manshor zan basaito, oḳon to nizor zan-u basaito farer na. Hirbar Boni Israilor bashsha-o bule he! Te oḳon farle solib taki lamia auk, teu amra-o ota dekia tar ufre iman anmu.
MAT 27:43 He to Allar ufre borosha ḳore. Oḳon Alla zudi tar ufre kushi taḳoin, te tare basaukka. He to dabi korto, he Ibnulla, Alla Pakor ḳas mayar zon.”
MAT 27:44 Tan ḍaine-baue ze dui ḍaḳaitre solibo loṭḳail oisil, tara-o tanre ota ḳoia siṛailo.
MAT 27:45 Ou din duifor taki zuhoror bad forzonto tin gonṭa asta desh andair oigelo.
MAT 27:46 Ar Isae kub zure zure ḳoila, “Eloi, eloi, lama sabaktani?” Mani, “O amar Alla, amar Moula, tumi kene amar log saṛi dilae?”
MAT 27:47 Ou shomoy tan daro zara uba asil, tara ikan hunia ḳoila, “Huno, huno, he Hozrot Iliasre ḍaḳer.”
MAT 27:48 Tara eḳzone douṛaia gia ekkan tena ania ṭenga anguror shorbotor maze bizaia, eḳ laṭir matat bandia usa ḳori tanre ḳaite dilo.
MAT 27:49 Baki hoḳole ḳoilo, “Aichcha, deki na, Ilias nobi tare basanit ain ni.”
MAT 27:50 Heshe Isae hirbar zure aoaz ḳoria aḳeri dom falaia inteḳal ḳorla.
MAT 27:51 Loge loge Baytul-Mukaddos mani Kaba goror Herem Shorifor fordaḳan, ufre taki tol forzonto siṛia dui ṭukra oigelo. Ar boisalor loge boṛo boṛo fattor oḳol faṭigelo.
MAT 27:52 Bout ḳoyboror muk kuligelo, ar Allar mayar ze bonda oḳol mara gesla, era bout zon zinda oia uṭla.
MAT 27:53 Tara ḳoybor taki bar oia aila. Isa murda taki zinda oia harle, tara fobitro ṭauno gia hamaila, ar bout zonre deḳa dila.
MAT 27:54 Fordan sifair loge aro zeta sifai oḳole Isare fara deoat asla, tara ou boisal ar hoḳol halot dekia kub ḍoraia ḳoila, “Nichchoy, ein-u asla Allar ḳas mayar zon, Ibnulla.”
MAT 27:55 Galil zila taki zeta beṭinte Isar kezmot ḳorar lagi tan loge oia aisla, tara-o duroi ubaia ita deḳla.
MAT 27:56 Erar maze asla Mogdilini Moriom, Iusi ar Iakubor ma Moriom, ar Zibudiar bou.
MAT 27:57 Ou din hainja bala Arimatia gaur Iusuf namor eḳzon doni manush hono aila. Tain Isar eḳ shagrid asla.
MAT 27:58 Tain hakim Filator gese aia, Hozrot Isar lash nita saila. Teu Filate tanre lash neoar izazot dila.
MAT 27:59 Iusufe Isar lash solib taki lamaia ḳafon findaila.
MAT 27:60 Tain faṛ ḳaṭia nizor lagi ze ḳoybor kudisla, ou ḳoyboror maze Isare dafon ḳorla. Bade boṛo eḳ fattor ṭelia ania ḳoyboror muko dia gelagi.
MAT 27:61 Oile Mogdilini Moriom ar aroḳ Moriom ou ḳoyboror daro boi roila.
MAT 27:62 Bador din Zummabare boṛo imam ar Forishi oḳol aia hakim Filator gese ḳoila,
MAT 27:63 “Huzur, amrar mono ase, ou ṭoge zinda taḳte ḳoisil, he bule morar tin din bade hirbar zinda oia uṭbo.
MAT 27:64 Erlagi afne hukum deukka, ḳoyborṭa zanu tin din forzonto ḳoṛa fara dia raḳa oy. Arnae tar ummot oḳole tar lash suri kori nia manshore ḳoito fare, tain to zinda oigesoin. Taile age zeta ḳoia duka dise, oḳon aro beshi duka dibo.”
MAT 27:65 Filate ḳoila, “Tumra faradar oḳolre neo, nia zela faro, ola fara deoar bebosta ḳoro.”
MAT 27:66 Ou tara gia ḳoyboror muko ze fattor asil, ou fattoror ufre sil-sappoṛ mari toila ar ḳoṛaḳoṛi fara deoar bebosta ḳorla.
MAT 28:1 Zummabar shesh oia haftar foyla din fozor oḳto, Mogdilini Moriom ar oinno Moriome Hozrot Isar ḳoybor deḳat gela.
MAT 28:2 Ou shomoy aḳta-u boṛo eḳ boisal oilo ar asman taki Allar eḳ firista lamia aila. Aia tain ḳoyboror mukor fattorṭa horaia, er ufre boila.
MAT 28:3 Tan surot asil kub nurani ar finnor ḳafoṛ asil dola soḳsoḳa.
MAT 28:4 Tanre dekia faradar oḳole ḍoraia ḳafa dorla ar tara beush oia foṛi roila.
MAT 28:5 Firistae ou beṭintore ḳoila, “Ḍoraio na go. Ami zani, solibo loṭḳaia zare zane mara oise, tumra hou Isare-u tukairae.
MAT 28:6 Oile tain to ino nae. Tain zela ḳoisla, ola-u zinda oia uṭi gesoin. Ao, tanre ze zagat hutaia raḳa oisil, oḳan aia deḳo.
MAT 28:7 Ar tumra zoldi zao, gia tan sahabi oḳolre ḳo, tain murda taki zinda oia tarar age oia Galilo zairagi. Hono-u tan loge tarar deḳa oibo. Huno, ami age-u tumrare ikan zanai dilam.”
MAT 28:8 Beṭinte zudio ḍoraisla, tebou tara kushir suṭe tan sahabi oḳolre i kobor zananir lagi douṛaia roana oila.
MAT 28:9 Ou shomoy aḳta-u Hozrot Isa aia erare salam dila. Loge loge tara tan samne aia faot doria ḳodombusi korla.
MAT 28:10 Isae tarare ḳoila, “Ḍoraio na go. Tumra gia amar baiainre ḳo, tara Galilo zaitagi. Hono tarar loge amar deḳa oibo.”
MAT 28:11 Isar logor batchit shesh ḳoria tara zebla zairagi, ou shomoy hou faradaror ḳoyzone ṭauno gia boṛo imam oḳolre ita hokkolta zanaila.
MAT 28:12 Teu boṛo imam ar murobbi oḳol ekḳano dola oia foramish ḳorla, ou faradar sifai oḳolre bout ṭeḳa dibar lagi.
MAT 28:13 Tara sifai oḳolre ḳoila, “Tumra ḳoio, ‘Amra zebla gumo aslam, ou shomoy shagrid oḳole aia tan lash suri kori nisoingi.’
MAT 28:14 Ikan zudi deshor fordan hakim sabe hunilain, te amra tanre buz dimu, tan at taki tumrare basaimu.”
MAT 28:15 Teu faradar oḳole ou ṭeḳa nila, ar tarare zela hikail oisil, ola ḳoila. Oḳon forzonto i misa ḳota Ihudi shomazo roṭail ase.
MAT 28:16 Isae tan sahabi oḳolre Galilor ze faṛo zaoar ḳota ḳoisla, hou egaro zon sahabi ou faṛo aila.
MAT 28:17 Aia Isare dekia tara soizda ḳorla, ermaze ḳoyzonor bitre shondoy asil.
MAT 28:18 Ou shomoy Isa tarar ḳandat aia ḳoila, “Behest ar duniar hokkol ḳemota amare deoa oise.
MAT 28:19 Erlagi tumra gia tamam zatir manshore amar ummot banao. Behesti baba Alla Pak, tan ḳas mayar zon Ibnulla, ar Pak Ruhur name manshore torikar gusol ḳorao.
MAT 28:20 Ami tumrare zeta hukum disi, ota amol ḳorar lagi tarare talim deo. Mono rakio, kiamotor ag forzonto shob shomoy ami tumrar loge loge asi.” Amin.
MAR 1:1 Alla Pakor ḳas mayar zon Ibnulla Hozrot Isa al-Mosir Injil, mani kush-ḳobri boyanir shuru.
MAR 1:2 Bout din age, Hozrot Ishaya nobir kitabo Alla Pake bataisoin, Huno, ami tumar age amar fegamborre beziar, ein tumar fot sohi korba.
MAR 1:3 Morubumir maze zure zure eḳzone elan ḳorra, tumra malikor fot sohi koro, tan solar rasta oḳol shida ḳoro.
MAR 1:4 Ou ayat mafik Hozrot Ehia nobie morubumit gia toblig korta ar toubar gusol ḳoraita. Tain elan ḳorta, “Gunar mafir lagi touba ḳoro, torikabondi lo.”
MAR 1:5 Teu asta Ehudia zila ar Zeruzalem ṭaunor hoḳol manush bar oia Ehiar gese aia, zarzir gunar lagi touba ḳorla, ar Ehiae tarare Zordan gangor fanit toubar gusol ḳoraita.
MAR 1:6 Ehia nobie uṭor rumor ḳafoṛ findita ar ḳomro samṛar belṭ bandita. Tain faṛia mou ar foring kaita.
MAR 1:7 Tain manshore ḳoita, “Amar bade aro eḳzone toshrif anra, ein ama tone-o himmot-ala. Unda oia tan faor zutar fita kular laḳ-o ami nae.
MAR 1:8 Ami tumrare fanidi toubar gusol ḳorailam, oile tain tumrare Pak Ruhu dia gusol ḳoraiba.”
MAR 1:9 Ou shomoy Hozrot Isa Galil zilar Nasarot gau tone Ehiar gese aia, Zordan gango torikabondi loila.
MAR 1:10 Ar fanit buṛ dia uṭte-u Isae loge loge deḳla asman dui bag oigese, Allar ruhu faror surot doria tan ufre lamia aira.
MAR 1:11 Ou shomoy asman tone aoaz oilo, “O fut, tumi-u amar ḳas mayar zon, tumar ufre ami kub kushi.”
MAR 1:12 Erbade-u Allai Pak Ruhur tagide tanre morubumit beza oilo.
MAR 1:13 Ou morubumit Shoytane sallish din dori Isare lalos deḳaia guna ḳoraito sailo. Hino zongli zanuaror loge tain roila ar Allar firista oḳole tan kezmot ḳorta.
MAR 1:14 Hozrot Ehia zelḳanat bondi oar bade Isa Galil zilat aia Allar batail ou kush-ḳobri toblig korla,
MAR 1:15 “Shomoy fura oigese, Allar bashshai nozdik aichche. Afnara touba ḳoroukka ar ou kush-ḳobrir ufre iman anoukka.”
MAR 1:16 Bade tain Galil aoror faredi aṭia zaira, ou shomoy deḳla, Saimon ar tan bai Andriase aoro zal baira. Era to maimol asla.
MAR 1:17 Isae erare ḳoila, “Amar loge ao, ami tumrare manush dorar zalua banaimu.”
MAR 1:18 Loge loge era zalor log saṛia Isar loge log dorla.
MAR 1:19 On tone tuṛa age gia tain deḳla, Iakub ar Hannan duio baie nao-o boia zal zuit-zait ḳorra, erar bafor nam Zibudia.
MAR 1:20 Isae erare dekia-u ḍaḳ dila, ḍaḳ hunia era-o nizor baf Zibudiare ḳamlaintor loge nao-o toia Isar log dorla.
MAR 1:21 Bade era hoḳole milia Kofornaum ṭauno gela, ar Ihudir Zummabare tarar mosido hamaia Isae talim dila. Hozrot Musar reoaz mafik Ihudir Zummabar oilo Shukrobar shuruz ḍuba taki Shonibaror shuruz ḍuba forzonto. I din kunuzat ḳam ḳora haram.
MAR 1:22 Tan talim hunia manush taijjub bonigela, tain to tarar alim-ulamar laḳan boyan ḳorra na, tain ḳemota-ala manshor laḳan talim dira.
MAR 1:23 Ou shomoy zinor asor-ala eḳ beṭa-o ou mosidor bitre asil.
MAR 1:24 He sillaia ḳoilo, “O Nasarotor Isa, amrar loge afnar kunu zae-zorur ase ni? Afne kita amrare binash ḳorat aisoin ni? Ami to afnare sini, afne-u Allar hou pak zon.”
MAR 1:25 Ikan hunia Isae tare damki dila, “Chup, oḳon-u ere saṛia za.”
MAR 1:26 Ou hi zine beṭare murani maria zure sik dia saṛia gelogi.
MAR 1:27 Ita dekia hoḳole taijjub oia eḳe-oinne ḳoilo, “Deḳrae ni! Asanok karbar! Ita kun zator noya talim? Tan ḳemota ḳaṭaia zinnatre hukum dein, ar tara-o mane.”
MAR 1:28 Erdae Isar nam asta Galil zilar sairobae kub zoldi uṛi gelo.
MAR 1:29 Mosid taki bar oia tain-tain Iakub ar Hannanor loge oia Saimon ar Andriasor baṛit gela.
MAR 1:30 Saimonor hoṛir kub taf oisil, tain bisnat foṛono asla. Isae toshrif ante-u tanre bemarir ḳota zanail oilo.
MAR 1:31 Bemar hunia tain ou beṭir ato dori tulla, ar loge loge tafe saṛi dilo, beṭi uṭia gia erar memandari korat lagla.
MAR 1:32 Ou zummar din sheshe hainja bala, shuruz ḍubar bade manshe hoḳol bemarire ar zinor asor-ala manshore Isar gese loia ailo.
MAR 1:33 Asta ṭaunor manush aia ou baṛir uṭano dola oigelo.
MAR 1:34 Teu Isae nanan nomunar bout bemarir shifa ḳorla ar boutor log tone zinnat saṛaila. Oile zinnate tan forisoy zanai diba ḳori, tain itare kunu mat matar shuzug dila na.
MAR 1:35 Bade fotabala uṭia tain nirai zagat gia dua ḳorat boila.
MAR 1:36 Teu Saimon ar tan logor hoḳole Isare tallash ḳorat bar oila.
MAR 1:37 Baroia tanre faia ḳoila, “Huzur, hokkol manshe afnar tallash ḳorer.”
MAR 1:38 Isae ḳoila, “Ao, amra ou ḳanda-ḳasar gauainto gia toblig kori. Erlagi-u to ami aisi.”
MAR 1:39 Bade tain hara Galil zilar mosidainto gia toblig korla ar zinnat saṛaila.
MAR 1:40 Eḳdin eḳ fosa-kusṭo bemarie Hozrot Isar ḳandat aia tan faot foṛia minot ḳoria ḳoilo, “Huzur, afnar morzi oile amare shifa ḳoria fak-saf ḳoroukka.”
MAR 1:41 Beṭar bae tan kub doya hamailo. Tain nizor at baṛaia tare soia ḳoila, “Oy ami sairam, tumi fak-saf o.”
MAR 1:42 Ḳoar loge loge tar bemar bala oia he fak-saf oigelo.
MAR 1:43 Isae ou shomoy-u tare bidae dila ar doṛaia ḳoila,
MAR 1:44 “Huno, ita ḳobor ḳeurore hunaio na. Ḳali imam sabor gese gia deḳao ar fak-saf oar lagi Hozrot Musar kitabor hukum mafik, kurbani adae ḳoro. Teu shomaze-o zanilibo, tumi bala oigeso.”
MAR 1:45 Oile he bare gia-u ita hokkol bae roṭai dilo. Erdae Isa ar kula-mela kunu gaut zaita farla na. Tain bara nirai zagat gia roa laglo, ono-o sairobae tone manush tan gese aila.
MAR 2:1 Ḳoydin bade Hozrot Isa hirbar Kofornaum ṭauno firia aile manshe hunilila tain goro asoin.
MAR 2:2 Teu oto manush ino zoma oila, goro to duror ḳota, goror bare-o ar zaga roilo na. Tain era hoḳlor gese Allar kalam toblig korat asla.
MAR 2:3 Ou shomoy sairzon manshe eḳzon ordong bemarire boia loia Isar gese ailo, erar loge aro manush asla.
MAR 2:4 Oile biṛor lagi tare Isar gese loia zaita farla na. Erdae tain ze zagat boat asla, ṭik tar ufror sal fuṛ ḳoria folo shudda ou bemarire lamat lamai dilo.
MAR 2:5 Tarar imanor bol dekia tain ou ordong bemarire ḳoila, “Baba, tumar tamam guna maf ḳori dilailam.”
MAR 2:6 Oile hikano ḳoyzon moulana boat asla. Tain-tain mone mone ḳoila,
MAR 2:7 “I manshe ilaḳan mater ḳene? He to shiriki korer. Eḳmatro Alla saṛa ar ḳe guna maf ḳorto fare?”
MAR 2:8 Tanre loia moulana oḳole ze olaḳan sinta ḳorra, Isae tan gaibi bole ikan buzilila, buzia erare ḳoila, “Afnara ḳene mone mone ila sinta ḳorra?
MAR 2:9 I ordong bemarire kunḳan ḳoa amar lagi shuza, tumar guna maf ḳora oilo, na, uṭo tumar folo loia aṭia zaogi?
MAR 2:10 Te oḳon afnara forman deḳoukka, i duniat guna maf ḳorar ḳemota ami bin-Adomor ase,” oḳan ḳoia-u tain bemari beṭare ḳoila,
MAR 2:11 “Ami tumare ḳoiar, uṭo, tumar folo loia tumar baṛit zao.”
MAR 2:12 Teu loge loge ou bemari beṭa uṭia tar folo loia hoḳlor samne-u bar oia gelo. Ikan dekia hoḳole taijjub oia ḳoila, “Subohan Alla, zindegie kunudin ilaḳan ḳam deḳsi na.”
MAR 2:13 Bade Hozrot Isa hirbar bar oia Galil aoror daro gela, teu hokkol manush tan ḳandat ailo, tain tarare talim deoat lagla.
MAR 2:14 Talim dia fotedi zaite zaite deḳla, Alfir fua Lebi kazna tular ofiso boi roisoin. Dekia tanre ḳoila, “Ao amar ummot o.” Teu Lebi uṭia Isar loge loge gela.
MAR 2:15 Bade tain Lebir baṛit gia ḳaoat boila. Bout ḳazna tulra ar gunagar manush-o Isa ar tan ummot oḳlor loge ḳanit asla. Ou shomoy bout manush tan ḳore ḳore gurat asil.
MAR 2:16 Oile tain gunagar oḳlor loge boia ḳani kaira dekia Forishi mozobor moulana oḳole tan ummot oḳolre ḳoila, “Ein gushkur ḳazna tulra ar ḳobis oḳlor loge ḳaoa-daoa ḳoroin ḳene?”
MAR 2:17 Ikan hunia Isae ou moulana oḳolre ḳoila, “Bala manshor ḳobiraz lage na, oile bemarir to lage. Ami forezgaror gese aisi na, gunagar oḳolre-u daot ditam aisi.”
MAR 2:18 Eḳbar Hozrot Ehiar ummot ar Forishi oḳol ruza asla, ita dekia kisu manshe Isar gese aia ḳoila, “Ehia nobir ummot ar Forishi oḳole ruza raḳoin, oile afnar ummot oḳole ruza raḳoin na ḳene?”
MAR 2:19 Isae tarare ḳoila, “Nosha loge taḳte kita boirati oḳole ruza raḳto fare ni? Na, ḳeu ruza roy na, zotodin nosha loge taḳoin, oto din tara ruza raḳto fare na.
MAR 2:20 Oile ola oḳt aibo, zebla noshare tarar ges tone horail oizibo, ou shomoy tara ruza raḳba.
MAR 2:21 Furan ḳafoṛor maze ḳeu noya ḳafoṛ zuṛa dey na. Zuṛa dile ou ḳafoṛ doia harle kus oia siṛia i fuṛ aro boṛo oizae.
MAR 2:22 Furan samṛar tolit ḳeu taza anguror rosh bore na. Borle ou taza roshor fafe toli faṭia rosh ar toli duiota borbad oy. Taza rosh noya tolit toite oy.”
MAR 2:23 Eḳ Zummabare Hozrot Isa ḳetor ailedi aṭia zaoat asla. Aṭi aṭi tan ummot oḳole danor soṛa siṛat lagla.
MAR 2:24 Ita dekia Forishi dole Isare ḳoila, “Amrar Musa nobir shoriot mafik to Zummabare kunuzat ḳam ḳora zaiz nae, te tara i danor soṛa siṛira kitar lagi?”
MAR 2:25 Isae zuaf dila, “Daud nobi ar tan logor hoḳole eḳbar feṭor buke zeta ḳorsla, ita kita tumitain kunu shomoy foṛso na ni?
MAR 2:26 Tain to fordan imam Abiatoror amolo Allar goro hamaia, ze fobitro ruṭi imam sab bade ar ḳeu ḳaoa zaiz nae, ou ruṭi kaisla ar tan logor manshore-o disla.”
MAR 2:27 Isae tarare aro ḳoila, “Zummabaror balair lagi to manshore banail oise na, oile manshor balair lagi-u Zummabar banail oise.
MAR 2:28 Huno, Zummabaror tamam eḳtiar ami bin-Adomor ato ase.”
MAR 3:1 Hozrot Isa hirbar mosido gia hamaila, hono ola eḳ beṭa asil, tar eḳ at bemare hukai gese.
MAR 3:2 Tain Zummabare ou beṭare bala ḳoroin ki na deḳar lagi Forishi mozobor ḳoyzon manshe tan bae kub kial raḳla, tara saila tan kunu kut bar ḳoria fando falaita.
MAR 3:3 Isae ou hukna at-ala beṭare ḳoila, “Oba, hoḳlor samne aia ubao sain.”
MAR 3:4 Beṭa aia harle tain hoḳol manshore zikaila, “Sab oḳol, Zummabare kita ḳora zorur, nek kam, na bod ḳam? Zanor hefazot ḳora, na zane mara?” Ikan hunia tara muk bond ḳori boiroila.
MAR 3:5 Tarar monor i fashan halot dekia, Isar dilo kub duk hamailo. Tain tarar bae saia gusa ḳori hou bemari beṭare ḳoila, “Tumar atḳan baṛao.” He tar at baṛaite-u agor laḳan fura bala oigelo.
MAR 3:6 Ikan dekia-u Forishi oḳol loge loge bar oigela, gia Raza Herudor manshor loge milia Isare zane marilibar foramish ḳorla.
MAR 3:7 Bade Isae tan shagrid oḳolre loia aoror faro gelagi, hono-o bout manush tan ḳore ḳore gela. Tan nanan muzeza ar keramotir ḳobor faia, Ehudia zila, Galil, Zeruzalem, Idum, Zordan gangor hofar, Shur ar Sidon elaḳa taki ou manush oḳol aisla.
MAR 3:9 Manshor biṛ dekia tain shagrid oḳolre ḳoila, “Tumra amar lagi ekkan nao zuit ḳoro, arnae manshe ṭela-dakka ḳaia amar ufre aia foṛiziba.”
MAR 3:10 Tain bout bemarire shifa ḳorae bemari manshe tane soita ḳori ṭelia dakkaia aia tan ufre foṛizita.
MAR 3:11 Ar zin-but oḳole tane deḳle-u tan samne maṭit foṛia soizda ḳoria sillaia ḳoito, “Afne-u Allar ḳas mayar zon Ibnulla.”
MAR 3:12 Oile Isae tarare kub ḳoṛaḳoṛi hukum dita, “Ḳobordar! Tumra amar forisoy zair ḳorio na.”
MAR 3:13 Bade Hozrot Isa faṛor ufre gelagi, gia tan fosond ḳora kisu shagridre tan ḳandat ḍaḳaia nila.
MAR 3:14 Era aia harle erar maz tone barozonre tain alog korla, era zanu tan loge loge roin, ar zin-but saṛanir ḳemota dia erare toblig kamo bezita faroin. Ou barozon oila tan sahabi.
MAR 3:16 Tain Saimonor noya nam raḳla Fitor.
MAR 3:17 Zibudiar dui fua Iakub ar Hannan, tain erar noya nam dila Bunergosh, mani megor ḍaḳor fua.
MAR 3:18 Andrias, Filif, Bortolmoy, Moti, Tumas, Alfir fua Iakub, Toddey, muktizudda Saimon,
MAR 3:19 ar Ihuda Iskariat, ou Ihudae bade beimani koria Isare dushmonor ato doraia disil.
MAR 3:20 Hozrot Isa eḳ baṛit gela. Ono aia-o oto beshi manshe biṛ bandila, biṛor lagi Isae ar sahabi oḳole-o ḳana ḳaita farla na.
MAR 3:21 Tan bai-biradore i kobor hunia tanre on taki bar ḳori neoat aila, era ḳoila, “Tar to mata ḳaraf oigese.”
MAR 3:22 Zeruzalem taki koyzon moulana aisla, tara ḳoila, “Zinor bashsha Bel-Sobule tare asor ḳorse. Ou Bel-Sobulor bole he zin-but saṛae.”
MAR 3:23 Ikan hunia Isae ou moulana oḳolre daro anaia kichcha dia ḳoila, “Shoytane kila Shoytanre ḳedae?
MAR 3:24 Kunu deshor bitre doladoli lagigele i desh to ar ṭike na.
MAR 3:25 Oula kunu foribaror maze-o zebla doladoli lagi zae, ou foribar-o ar ṭike na.
MAR 3:26 Te Shoytane-o zudi nizor maze doladoli lagai dey, he-o to ṭikto nae, binash oizibo.
MAR 3:27 Asol hasa ḳota oilo, kunu ḍaḳait ḍaḳatit aia foyla ou baṛir bolala mul girostre na bandile, he luṭ-toraz ḳorto farto nae. Oile tare bandia harle luṭ-toraz ḳorto farbo.
MAR 3:28 Hunoukka, ami hasa ḳota ḳoiram, manshor tamam nomunar guna ar kufurir mafi ase,
MAR 3:29 oile Pak Ruhur befare kufuri korle, kunumonte-u i gunar mafi milto nae. I guna Ruz Hashor forzonto zari roibo.”
MAR 3:30 Isar ufre zine asor ḳorse, moulana oḳole ou ḳota ḳoae tain tarare oula zuaf dila.
MAR 3:31 Ou shomoy Hozrot Isar ma ar baiain aia bare tone tan gese ḳobor faṭaila.
MAR 3:32 Oile sairo galabae manshor biṛ lagail asil, manshe tanre ḳoila, “Huzur, afnar amma ar baiain aia bare afnar tallash ḳorra.”
MAR 3:33 Tain ḳoila, “Amar ma ar baiain ḳe?”
MAR 3:34 Ḳoia tain sairo galar manshor bae saia ḳoila, “Huno, era-u to amar ma ar baiain.
MAR 3:35 Zera Allar morzi zugaia soloin, tara-u to amar ma, ar bai-boin.”
MAR 4:1 Hozrot Isa hirbar Galil aoror faro aia manshore talim dita lagla. Tan sairo galabae bout manshe biṛ bandilla, erdae tain eḳ naot uṭia boila, ar manshe faro tone tan boyan hunla.
MAR 4:2 Tain kichcha hunai hunai manshore talim deoat asla, ermaze tain ḳoila,
MAR 4:3 “Doroukka, ek giroste zala bain ḳorat gelo.
MAR 4:4 Gia bain ḳorar shomoy kisu zala fotor ḳandat foṛlo, ar fakinte aia ita ḳaililo.
MAR 4:5 Kisu zala fattorala maṭit foṛlo, itar tole beshi maṭi asil na, erdae toledi bol na ḳoria-u zoldi kori fuṭigelo.
MAR 4:6 Bade shuruz uṭia harle zoir ḳaililo, ar tolor zoṛe rosh na faoae hukaia morigelo.
MAR 4:7 Kisu zala zonglar maze foṛlo, teu zongla boṛo oia itare zatia dorlo, erdae kunu soṛa saṛlo na.
MAR 4:8 Oile kisu zala bala zomino foṛlo, itae ali bar oia boṛo oia soṛa saṛlo, kunu soṛae tish, kunu soṛae shaiṭ, kunu soṛae eḳ-sho gun beshi dan dorlo.”
MAR 4:9 Heshe Isae ḳoila, “Hunar lak kan zar ase, he hunouk.”
MAR 4:10 Bade biṛ ḳomia harle tan logor manshe ar barozon sahabie tanre zikaila, “Huzur, i kichchar mul mani kita?”
MAR 4:11 Isae zuaf dila, “Allar bashshair gufon rohoisho zanar shuzug tumrare deoa oise, oile baira manshor gese kichchar mazdi koa oise.
MAR 4:12 Er ḳaron oilo, Allar kalamor ou ayat folite oibo, Tara saia taḳle-o kunta-u deḳto nae, hunle-o kunta buzto nae. Kizanu tara zudi Allar bae firizain, ar mafi failain.”
MAR 4:13 Bade Isae tarare ḳoila, “Tumra ou kichchar maniḳan-o buzlae na ni? Te baki kichchar mani kila buzbae?
MAR 4:14 Huno, giroste ze zala bain ḳorer, i zala oilogi Allar kalam.
MAR 4:15 Fotor ḳandat foṛa zala dia tarar befare buzail oise, zera i kalam hune, oile loge loge Iblis aia tarar dil taki i kalamre ḳaṛia neygi.
MAR 4:16 Fattoror ufre foṛa zaladi buzail oise, zera i kalam hune ar kub kushi oia loge loge kobul ḳorilae,
MAR 4:17 oile tarar dilo balamonte hamae na ḳoria, ita ḳali tuṛa ḳoydin ḳaim roy, bade i kalamor lagi kunu zulum-mosibot azir oile tara fislai zae.
MAR 4:18 Zonglar maze foṛa zalar mani oilo, zera i kalam hune,
MAR 4:19 oile zogotor sinta-babna, don-samanar maya ar duniabi lalose i kalamre zatia dorilae, erdae kalame kunu amol ḳore na.
MAR 4:20 Ar bala zomino foṛa zalar mani oilo, zera i kalam hune, kobul ḳore ar bala fol dore, ḳeu tish, ḳeu shaiṭ, ḳeu eḳ-sho gun fol dore.”
MAR 4:21 Isae aro ḳoila, “Kunu manshe lem zalaia ṭukrir tole ba sokir tole toy ni? Lem zalaia gasar ufre toin na ni?
MAR 4:22 Te ila lukail kunta-u nai, zeta bar oito nae. Ar ila kunu batuni befar-o nai, zeta zair oito nae.
MAR 4:23 Hunar lak kan zar ase, he hunouk.”
MAR 4:24 Bade tain ḳoila, “Tumra kial ḳoria huno, tumra zela mafia deo, tumrar lagi oula mafa oibo. Dorilao, tumrar lagi aro besh ḳori mafa oibo.
MAR 4:25 Zar ase tare aro deoa oibo, oile zar nai, tar zeta ase eota neoa oizibo.”
MAR 4:26 Tain aroḳbar ḳoila, “Huno, Allar bashshai oilo ou laḳan. Dorilao, ek giroste tar zomino zala bain ḳorlo.
MAR 4:27 Bade he rait oile gumailo ar dinor bala guraguri korlo. Oile zala fuṭia ḳemne gas oilo, he to kunta zane na.
MAR 4:28 Zomine nize nize-u ita folailo, foyla sera, bade soṛa ar soṛar maze fusṭo dan dorlo.
MAR 4:29 Dan fakia harle he buzilae daoar shomoy oigese, teu ḳasi lagaia dae.”
MAR 4:30 Hozrot Isae ḳoila, “Allar bashshaire amra kitar loge tulona ḳortam? Kitadi buzaitam?
MAR 4:31 Aichcha, mone ḳoro, Allar bashshai oilo egu ḍenga bisir laḳan. I bisi bain ḳorar bala deḳa zae, hoḳol zator bisi tone iṭa huru-muru.
MAR 4:32 Oile bain ḳorar bade iṭa hokkol zator hag tone-o boṛo boṛo fata ar gas oy. Ar muṭa muṭa ḍal baroy, i ḍalor sayat fakinte aia asroy loin.”
MAR 4:33 Ou laḳan bout nomunar kichcha ḳoita, ar ze zela buzto fare, tar buz mafik tare Allar kalam hunaita.
MAR 4:34 Kichcha saṛa tarare kunu talim dita na. Oile ḳali sahabi oḳol zebla tan loge roita, ou shomoy tain hoḳol bed bangia buzaita.
MAR 4:35 Ou din hainja bala Hozrot Isae tan sahabi oḳolre ḳoila, “Ao, amra aoror hofaro zaitam.”
MAR 4:36 Teu sahabi oḳole manshor ges taki bidae loia, Isa ze nao-o boat asla ou nao-o uṭia roana dilaila, erloge aro naoain-o asil.
MAR 4:37 Nao soler, ou shomoy aḳta-u kub boṛo eḳ tufan ailo, tufanor dae afalor fani hamaia nao buṛizibar dosha.
MAR 4:38 Isa naor ḳor galat eḳ balisho hitan dia gumo asla. Sahabi oḳole tanre hozag koria ḳoila, “Huzur, afne kial ḳorra na ni, amra to morizaiar.”
MAR 4:39 Tain uṭia tufanre domoḳ dila ar aorre ḳoila, “Dom lo, tir o.” Ḳoar loge loge tufan bond oigelo, ar hokkolta tir oilo.
MAR 4:40 Bade tain sahabi oḳolre ḳoila, “Tumra oto ḍoraluk kene? Tumra oḳono iman ancho na ni?”
MAR 4:41 Ita dekia sahabi oḳole kub ḍoraila, ar eḳe-oinne ḳoila, “Ein ashole ḳe? Fanie ar batashe-o deki tan hukum mane.”
MAR 5:1 Hozrot Isae tan sahabi oḳolre loia Galil aor faṛi dia Zerasini oḳlor desho aila.
MAR 5:2 Tain nao taki lamte-u bute dora eḳ beṭa, ḳobrostan taki bar oia tan samne ailo.
MAR 5:3 He ḳoyboror maze roito, kunu manshe luar zinjurdi bandia-o tare aṭḳaita farta na.
MAR 5:4 Tar at-fao bout bar zinjurdi bandile-o he ita siṛia, faor beṛi-o bangilito. Tare ḳeu shamlaita farta na.
MAR 5:5 He faṛor ṭillae ṭillae, ḳoybore ḳoybore hara din-rait gurto ar sillaito, fattor dia tar nizor shorilo marto.
MAR 5:6 Isare he duroi taki dekia-u douṛaia aia tan faot foṛia soizda ḳorlo,
MAR 5:7 ar sillaia ḳoilo, “O Isa, Allatalar ḳas mayar zon Ibnulla, afne ḳene amar gese aisoin? Ami Allar ḳosom ḳaia ḳoiar, afne amare satain na zanu.”
MAR 5:8 Isae age ou butre ḳoisla, “Tui ou beṭare saṛia bar oia za,” erdae he Isare ou minoti korlo.
MAR 5:9 Tain ou butre zikaila, “Tor nam kita?” He ḳoilo, “Amar nam fouz, ḳaron amra bout zon asi.”
MAR 5:10 Oḳan ḳoia he Isar gese bare bare minot ḳori koilo, “Afne amrare i elaḳa taki kedain na zanu.”
MAR 5:11 Ou shomoy hono faṛor galat boṛo eḳ shuoror fale ḳaoat asil.
MAR 5:12 Butor fale Isare minot ḳori koilo, “Huzur, amrare ou shuoror falor maze faṭai deukka, amra gia otar bitre hamai.”
MAR 5:13 Isae izazot dia harle tara gia ou shuoror falor maze hamaigelo. Teu shuoror fale faṛor ṭillar feṭedi kub zure douṛaia gia aoror maze buṛia morla. I falo onuman dui azar shuor asil.
MAR 5:14 Ita dekia shuoror raḳal oḳole douṛaia gia gaut ar ḳanda-ḳasar hoḳolre ḳobor zanaila. Ḳobor hunia manshe ita deḳat aila.
MAR 5:15 Tara Isar ḳandat aia deḳla, butor fouze ze beṭare dorsil, i beṭa bala oia ḳafoṛ-sufoṛ findia boiroise. Ita dekia tarar mono ḍor hamaigelo.
MAR 5:16 Teu zera ou goṭona deḳsil, tara hou bute dora beṭar ḳota ar shuoror goṭona erare zanailo.
MAR 5:17 Erdae manshe Hozrot Isare minot ḳori koila, “Meherbani kori amrar elaḳa taki toshrif neukkagi.”
MAR 5:18 Tain zebla naot uṭizira, ou shomoy bute dora beṭa-o tan loge oia zaito ḳori minot lagailo.
MAR 5:19 Oile Isae tare oḳan ḳoia bidae ḳori dila, “Tumi tumar baṛit zao, gia baṛir manshore deḳao, Mabude tumare ḳoto meherbani ar boṛo taijjubi kam ḳorsoin.”
MAR 5:20 Tan ḳota hunia beṭa gelogi ar asta Dikafoli elaḳar manshore ḳoilo, Isae tar lagi koto boṛo ḳam ḳorsoin. Ikan hunia tara-o taijjub oigela.
MAR 5:21 Hozrot Isa naot ḳoria hirbar aoror hofaro gia harle, sairobae tone manshe aia ou aoror faro-u biṛ lagai dila.
MAR 5:22 Ou shomoy mosid komiṭir Zayir namor eḳ neta aia Isare dekia tan faot foṛia,
MAR 5:23 kub minot ḳori koila, “Huzur, amar fuṛigu morar foti oigese. Afne toshrif ania amar fuṛigure atai dile-u tai bala oizibo.”
MAR 5:24 Teu tain ou netar baṛit roana dilaila. Tan sairo galabae biṛ bandia ṭela-ṭeli koria aro bout manush tan loge oia zaira.
MAR 5:25 Ou biṛor maze eḳzon beṭi manush asla, baro boros dori tan beṭiara bemaror lou zaito.
MAR 5:26 Bout ḍaktor ḳobiraz deḳaia ḳoshṭo ḳori niom-ḳanun mania, hoḳol ṭeḳa-foysha kuaia-o kunu fayda oise na. Dine dine bemar aro baṛise.
MAR 5:27 Isar befare hunia beṭie ou biṛor maze ṭik tan ḳoredi aia, tan finnor saddor ḳanor ek kunat soilo.
MAR 5:28 Tai ekin ḳorsil zen, Isar finnor kunu ḳafoṛor maze soite farle-u bemar shifa oizibo.
MAR 5:29 Hasau, Isar saddoror kunat soite-u, beṭir lou zaoa ekkere ḳomigelo. Beṭie nizor shorilor halot buzililo, bemar ḳomigese.
MAR 5:30 Isae-o ṭer faila, tan shoril mubarok taki bol bar oise. Ou tain biṛor maze sairobae saia zikaila, “Amar ḳafoṛo ḳe soilo?”
MAR 5:31 Tan shagrid oḳole ḳoila, “Huzur, afne to deḳra, manshe kila sairobae ṭela-ṭeli korra, te ar ḳene zikaira, ḳe afnare soilo?”
MAR 5:32 Oile Isae sairobae soukdi tallashit roila, ḳe tane soilo.
MAR 5:33 Teu bemar shifa oa beṭie nizor halot buzia ḍoraia ḳafi kafi tan samne aia faot foṛlo, ar hoḳolta kulia ḳoilo.
MAR 5:34 Isae beṭire ḳoila, “Mai go, tumar imane tumi baslae. Oḳon shantie baṛit zao, ar i bemar taki hefazot ro.”
MAR 5:35 Tain ota mato roisoin, ou shomoy mosidor hou netar baṛi taki kobria aia netare ḳoilo, “Sab, afnar fuṛi to ar nai, dunia saṛia gesoingi. Te huzurre ar toklif dibar ḳam nai.”
MAR 5:36 Oile ikan hunia Isae hou netare ḳoila, “Ḍoraiba na, ḳali ekin ḳoroukka.”
MAR 5:37 Ḳoia tan sahabi Fitor, Iakub, ar Iakubor bai Hannan, ḳali ou tinzon bade ar ḳeurore tan loge nila na.
MAR 5:38 Erare loia tain hou netar baṛit aia deḳla, manshe ḳanda-ḳaṭi, bilaf ar mattom ḳorra.
MAR 5:39 Tain bitre gia manshore ḳoila, “Tumra i kanda-ḳaṭi ar mattom ḳorrae ḳene? I fuṛi to morse na, ḳali gumaise.”
MAR 5:40 Ikan hunia manshe tanre siṛaila. Teu tain murdar kuṭa taki hoḳolre bar ḳori dia, ḳali fuṛir ma-baf ar sahabi oḳolre loia kuṭat hamaila.
MAR 5:41 Tain fuṛir ato doria ḳoila, “Ṭalita kum,” mani, “O fuṛi, tumare ḳoiar, uṭo.”
MAR 5:42 Hasau, murda fuṛi loge loge uṭia aṭa dorlo, fuṛir boyosh asil baro bosor. Ita dekia era asanoḳ taijjub oigela.
MAR 5:43 Isae erare hukum dila, ita ḳeurore hunaio na. Ar ou fuṛire oḳon ḳaibar kunta deo.
MAR 6:1 Hozrot Isa hon tone nizor gau Nasaroto toshrif anla. Tan sahabi oḳol-o loge asla.
MAR 6:2 Zummabare tain mosido gia talim dila. Bout manshe tan talim hunla, hunia taijjub oia ḳoila, “I beṭae ita talim kuai taki failo? He ḳemne ita ilim hasil ḳorse, ar zeta muzeza oḳol deḳar, itar bed kita?
MAR 6:3 E to hou Moriomor fua ḳaṭ-mestoir nae ni? He Iakub, Iusi, Ehuda ar Saimonor bai nae ni? Tar bonin to amrar gaut-u roira.” Isar befar loia manshor dilor maze bitishona deḳa dilo.
MAR 6:4 Teu Isae tarare ḳoila, “Zekunu nobi-u nizor gau, nizor desh, nizor baṛi, ḳesh-kuṭumor bairaḳano ijjot fain.”
MAR 6:5 Bade tain ḳoyzon bemarire atai dia bemar shifa ḳorla. Oile hino ar kunu muzeza zair ḳorar ufae oilo na.
MAR 6:6 Manshe tan ufre iman na anae tain kub taijjub oigela. Bade tain gaue gaue sairobae sofor ḳoria manshore talim dila.
MAR 6:7 Isae tan barozon sahabire nizor daro ania, zin-butor ufre ḳemota dia, duizon duizon ḳori toblig kamo faṭaila.
MAR 6:8 Soforor shomoy ḳali ator laṭi saṛa ar kunta-u erare loge nite dila na. Ḳani-kuraki, beg ba ḳomror tolit bandia kunu foysha-ḳoṛi nite-o na ḳorla.
MAR 6:9 Tain ḳoila, “Faot zuta finditae farbae, oile finnor ek kafoṛ bade ar kunu ḳafoṛ-sufoṛ nio na.”
MAR 6:10 Ar hukum dila, “Tumra gia foyla ze baṛit hamaibae, i gau saṛia zaoar ag forzonto ou baṛit-u roio.
MAR 6:11 Kunu zagar manshe zudi tumrare kobul na ḳore, ar tumrar boyan na hune, te hon taki baronir bala tumrar faor duil zaṛia falaio, ou duil tarar naformanir shakki roibo.”
MAR 6:12 Teu sahabi oḳole gia toblig korla, manshore tagid dila touba ḳorar lagi.
MAR 6:13 Era bout but saṛaila, ar bout bemari manshor matat tel maḳaia bemarre shifa ḳorla.
MAR 6:14 Hozrot Isar shunam sairobae roṭi zaoae Raza Herudor ḳano-o gia azilo. Kunu kunu manshe ḳoila, tain oila Ehia nobi, ein hirbar zinda oia uṭia aisoin ḳori-u ou keramoti deḳaira.
MAR 6:15 Ḳeu ḳoilo, ein oila Hozrot Ilias nobi. Ar ḳeu ḳeu ḳoilo, ein furana zomanar kunu nobir laḳan noya eḳ nobi.
MAR 6:16 Ita hunia Herude ḳoilo, “Ein to hou Ehia, zen ḳolla ami kaṭaislam. Tain hirbar zinda oia uṭsoin.”
MAR 6:17 Er age Herude tar babi Herudiar mon zuganir lagi, Ehia nobire aṭok koraia zelo harai toisil. He tar bai Filifor boure hanga ḳorae nobie tare hamesha ḳoita, “Afon bair boure nia hanga ḳora tumar zaiz oise na.”
MAR 6:19 Erdae Ehia nobir bae Herudiar kub gusa asil. Tai enre zane marilibar niot ḳorlo, oile farlo na.
MAR 6:20 Herude enre ḍoraito ar zanto, ein eḳzon fak-forezgar kamil manush, erdae hamesha enre tair at taki basaito. En nosiot hunte tar bitre doṛfoṛ ḳorle-o he ita kub fosond ḳorto.
MAR 6:21 Heshe tai eḳ shuzug failo, Herudor zonom dinor onusṭano tar uzir-nazir, sifair ofisar oḳol, ar Galil zilar goinno-mainno hoḳol manshor lagi kani zuit ḳora oilo.
MAR 6:22 Ou onusṭano Herudiar fuṛie aia nas deḳaia hoḳol meman ar Herudre kushi korlo. Kushi oia Herud razae fuṛire ḳoilo, “O ma, tumi amar gese kita sao? Zeta saibae, ota-u faibae.”
MAR 6:23 He ḳosom ḳaia ḳoilo, “Tumi amar gese zeta saibae, ota-u dimu. Amar raijjor ordeḳ saile-o dilaimu.”
MAR 6:24 Ou fuṛie tair maʼr gese gia zikailo, “Mai go, ami kita saitam?” Ma Herudiae hikai dilo, “Tumi hou Ehiar ḳolla saio.”
MAR 6:25 Fuṛie zoldi kori aia razare ḳoilo, “Ami sairam, afne hou Ehiar ḳolla ḳaṭia eḳ talo ḳori amare deukka.”
MAR 6:26 Ikan hunia raza kub bezar oigelo, oile onusṭanor meman oḳlor samne ḳosom ḳorae ou fuṛire na ḳorar kunu ufae asil na.
MAR 6:27 Teu loge loge razae zolladre hukum dilo Ehiar mata ḳaṭia anar lagi. Zollade gia zel ḳanat bondi Hozrot Ehiar mata ḳaṭia eḳ talo ḳori loia ailo. Razae i tal ou fuṛir ato dile, tai nia tair maʼr gese dilo.
MAR 6:29 Ehia nobir shagrid oḳole i kobor hunia zel tone tan lash nia dafon ḳorla.
MAR 6:30 Hozrot Isar barozon sahabie toblig tone firia aia tanre zanaila, tobligo gia kita kita ḳorsoin, kilaḳan talim disoin.
MAR 6:31 Ou shomoy bout manush Isar gese aoa-zaoat taḳae sahabi oḳole kunu ḳana-finar-o shuzug faila na. Erdae tain sahabi oḳolre ḳoila, “Tumra amar loge kunu nirai zagat aia tuṛa zirao.”
MAR 6:32 Ḳoia naot uṭia eḳ nirai zagat roana oila.
MAR 6:33 Erare zaoat dekia bout manshe sinilila, teu era fosar age-u ash-fashor gauain taki manush douṛaia gia hono fosigela.
MAR 6:34 Isa nao taki lamia-u deḳla, bout manshe tan bar saira. Dekia erar bae tan boṛo dorod hamailo. Era asil a-raḳali meṛar laḳan. Ou Isae erare bout laḳan talim dila.
MAR 6:35 Hainja oia harle tan sahabi oḳole ḳoila, “Huzur, ikan kub nirai zaga, ar hainja-o oigese,
MAR 6:36 te ota manshore bidae dilaukka, era ḳanda-ḳasar ota gauainto gia tarar ḳani-kuraki louk.”
MAR 6:37 Isae ḳoila, “Tumra-u erar ḳanir intezam ḳoro.” Sahabi oḳole zuaf dila, “Amra kita dui-sho dinaror ḳani loia ania erare ḳaoaitam ni?” Dui-sho dinar to foinchash azar ṭeḳar homan.
MAR 6:38 Tain ḳoila, “Tumra saia deḳo, tumrar gese ki foriman ruṭi ase.” Tara dekia ḳoila, “Sab, fasḳan ruṭi ar duiṭa biran mas ase.”
MAR 6:39 Tain sahabi oḳolre hukum dila, “Tumra ou gashor ufre lain doraia manshore boai deo.”
MAR 6:40 Teu manshe eḳ-sho zon ḳori katar bandia foinchash ḳatar boila.
MAR 6:41 Isae hou fasḳan ruṭi ar duiṭa biran mas ato loia Allar arshor bae saia shukria adae ḳoria, manshore baṭia dibar lagi ou ruṭi ṭukra ṭukra ḳori sahabi oḳlor ato dila. Ou laḳan mas duiṭa-o baṭia dila.
MAR 6:42 Hoḳol manshe feṭ bori kaila.
MAR 6:43 Ḳaia harle baṛti ruṭi ar masor ṭukrain nia baroṭa ṭukri borla.
MAR 6:44 I dolor maze ḳali beṭa manush-u fas azar zone boia ḳaila.
MAR 6:45 Ḳanir bade-u Hozrot Isae sahabi oḳolre tagda dila, tara naot ḳori aoror hofaro Bayt-Soyda gaut zaoar lagi, tain onor manshore-o bidae dila.
MAR 6:46 Manush bidae oia harle tain dua ḳorar lagi faṛor ufre uṭila.
MAR 6:47 Raitor bala sahabi oḳlor nao aoror mazḳano asil, oile Isa eḳla huknat asla.
MAR 6:48 Tain deḳla, ufta batashor maze era kub ḳoshṭo ḳori daṛ baira. Fotabala Isae ou aoror fanir ufredi aṭia, sahabi oḳlor galabae tarare faroia agedi zaira.
MAR 6:49 Tanre aoror fanir ufredi aṭia zaoat dekia, but mono ḳoria ḍoraia era hoḳole sik-sillani lagaila. Ou tain ḳoila, “Ḍoraio na, himmot ḳoro, i to ami.”
MAR 6:51 Tain aia sahabi oḳlor naot uṭte-u ufta batash dom loililo. Ita dekia era asanoḳ taijjub bonigela.
MAR 6:52 Oile agor hou ruṭi-masor gaibi kanir bed era buzla na. Erar dilor duar to bond asil.
MAR 6:53 Aor faṛi deoar bade era Gineshorot elaḳat aia nao biṛaila.
MAR 6:54 Nao taki lamte-u tane dekia manshe sinilila, ar sairobae douṛa-douṛi lagaila. Douṛaia tara zarzir bemari oḳolre folodi boia ania, tain ze zagat asla ou zagat loia ailo.
MAR 6:56 Ṭauno ba gaut, ollie-gollie tain zeno-u toshrif nita, ono-u manshe bemari oḳolre ania bazaro dola ḳorta. Ar tanre minot-ḳajji koria ḳoita, bemari oḳole zanu tan saddoror kunaḳano soita faroin. Ar zera soita, hasau erar bemar shifa oizito.
MAR 7:1 Bade Zeruzalem taki koyzon moulana ar Forishi mozobor kisu manush Hozrot Isar gese aila.
MAR 7:2 Aia deḳla, Isar ḳoyzon ummote at na doia emne-u ḳanit boigesoin.
MAR 7:3 Ashole agor zomanar moulana oḳlor batail rosumot mafik, hokkol Ihudi ar Forishi oḳole-o uzu na ḳoria kunu ḳani kain na.
MAR 7:4 Bazar-aṭ taki kunu zinish anle fak-saf na ḳoria muko dein na, tal-bashon doia saf-sutra ḳora, ou laḳan bout riti-reoaz tara mane.
MAR 7:5 Erdae ou moulana ar Forishi oḳole Isare zikaila, “Afnar ummot oḳole agor zomanar moulana oḳlor batail rosumot ḳene manoin na? Tara to nafak ate ḳani kain.”
MAR 7:6 Tain zuaf dila, “Afnara to bonḍo! Hozrot Ishaya nobie afnaintor befare ṭik-u ḳoisoin, Ita manshe muk dia ḳali amare ijjot ḳore, oile tarar dil ama tone bout duroi.
MAR 7:7 Tara hudar ḳamoḳa amar ebadot ḳore, tarar talim oḳol to manshor banail mongoṛa shoriot.
MAR 7:8 Te afnara to Allar deoa hukum-ahkam bad dia, manshor banail rosumot amol ḳorra.”
MAR 7:9 Isae tarare aro ḳoila, “Allar deoa hukum bad dia, nizor mongoṛa rosumot ḳaim ḳorar danda to afnara kub bala ḳori-u zanoin.
MAR 7:10 Zela Hozrot Musae ḳoisoin, ma-babare ijjot ḳorio, ze manshe afon ma-bafor bodnam gae, tare zane mara oibo.
MAR 7:11 Oile afnara manshore talim dira, kunu manshe zudi tar ma-bafre ḳoilae, amar zeta samana dia afnaintor kezmot ḳortam asil, ita Allar name lilla dilaisi,
MAR 7:12 te tar ma-bafor lagi ar kunta-u ḳora lage na.
MAR 7:13 Ou laḳan afnarar baf-dadar mongoṛa niom dia Allar kalam batil ḳorilisoin. Ikan bade-o afnara oula aro bout ḳam ḳorra.”
MAR 7:14 Bade Isae manshore tan ḳandat nia ḳoila, “Afnara hoḳole amar ḳota kial ḳori hunoukka ar buzoukka.
MAR 7:15 Baire taki zeta zinish manshor bitre hamae, itae to tare nafak banae na. Borong manshor bitre taki zeta baroy, otae-u tare nafak banae.”
MAR 7:17 Boyan bade tain manshor ges taki horia gia goro hamaila, teu sahabi oḳole tanre er mani zikaila.
MAR 7:18 Isae ḳoila, “Tumra kita oula-u be-akkol ni? Tumra buzo na ni, bare taki zeta zinish manshor bitre hamae, itae manshore nafak korto fare na.
MAR 7:19 Ita to tar dilor bitre hamae na, ḳali feṭor maze hamae, ar feṭ taki hirbar baroi zae.” Isae ou talim dia buzaila, kunuzat ḳani-u nafak nae.
MAR 7:20 Tain ḳoila, “Manshor bitre taki zeta baroy, otae-u manshore nafak kore.
MAR 7:21 Manshor dil taki-u to hoḳol nomunar ku-sinta ae; zina, suri, kun,
MAR 7:22 lub-lalos, foror ḳeti korar danda, sol-soturi, bodmaishi, bod-nozor, ingsha-ninda, boṛai-beṭagiri ar shoytani baroy.
MAR 7:23 Ou tamam naformani manshor dil taki bar oia tarare nafak banae.”
MAR 7:24 Bade Isa ou elaḳa tone Siria deshor Shur ṭaunor ḳandat toshrif nilagi. Ono aia tain ek goror bitre lukai roila, saila manshe zanu na zanoin tain aisoin ḳori. Oile tan ḳobor roṭi gelo.
MAR 7:25 Hono eḳ beṭi manshor fuṛire bute dorae, Isae toshrif anchoin hunia ou beṭie, zoldi kori aia tan faot foṛlo.
MAR 7:26 I beṭir baṛi Siria deshor Foinikia elaḳat, oile matito Iunani bashae. Tai Isar gese minot-ḳajji koria ḳoilo, “Huzur, butor ḳobza taki amar fuṛigure basaukka.”
MAR 7:27 Isae ḳoila, “Age nizor huruttainte feṭ bori kaukka, nizor sabalor ḳani kukror samne falani ṭik nae.”
MAR 7:28 Beṭie ḳoilo, “Ji oy huzur, afnar ḳota-u ṭik, oile nizor sabalor ḳanir zeta guṛa-gaṛa galabae foṛe, ita to kukre ḳae.”
MAR 7:29 Tain ḳoila, “Tumi to ḳaṭi mat-u matso. Te zao, gia deḳo, bute tumar fuṛire saṛia gesegi.”
MAR 7:30 Hasau beṭie baṛit gia deḳlo, tair fuṛi bala oia bisnat hutiroise.
MAR 7:31 Bade Isae Shur elaḳa tone Sidon ṭaun oia, Galil aoror hofaro Dikafoli elaḳat aila.
MAR 7:32 Ono aia harle manshe ek kalua tutla beṭare tan gese ania minot lagaila, tare atai dibar lagi.
MAR 7:33 Tain ere manshor biṛ tone bare nirai zagat nia, tar duio ḳano tan ator anguil haraila, tan mukor sef lagaia tar zifra atai dila.
MAR 7:34 Ar ufre asmanedi saia lamba ḳori shash falaia ḳoila, “Iffata,” mani, “Kuli zauk.”
MAR 7:35 Loge loge-u beṭar ḳan kuligelo. Tutlami saṛi gelo, he forishkar mata dorlo.
MAR 7:36 Heshe tain erare hukum dila, “Ḳobordar, tumra ita ḳeurore hunaio na.” Oile tain zoto beshi na ḳorla, tara oto besh ḳori ita roṭailo.
MAR 7:37 Tara asanoḳ taijjub oia ḳoila, “Ein to hoḳol ḳam-u kub nikut ḳori koroin. Deḳrae ni, tain ḳaluare hunar shokti, ar bubare matibar takkot disoin.”
MAR 8:1 Bade aroḳbar bout manush aia tan gese dola oila. Erar gese kunu ḳani-kuraki na taḳae, Isae tan sahabi oḳolre daro nia ḳoila,
MAR 8:2 “Ita manshor lagi amar boṛo dorod lager, aiz tin din dori tara amar loge loge asoin, oile oḳon tarar ḳanir kunta nai.
MAR 8:3 Ou halote erare bidae ḳori baṛit faṭai dile, ita foto-u beush oiziba, era ḳeu ḳeu to bout duroi taki aise.”
MAR 8:4 Sahabi oḳole ḳoila, “Huzur, i nirai-morubumir maze ḳe kuai taki oto ruṭi zugaia erare ḳaoaibo?”
MAR 8:5 Tain ḳoila, “Tumrar gese ruṭi koyḳan ase?” Era ḳoila, “Sab, shatḳan ase.”
MAR 8:6 Tain manshore ḳoila, “Afnara ḳanir lagi maṭit boizain.” Ḳoia ruṭi shatoḳan nia Alla Pakor shukria adae ḳori oḳnain siṛila, ar sahabi oḳolre dia baṭia deoaila.
MAR 8:7 Sahabi oḳlor gese huru huru ḳoyṭa biran mas-o asil, tain ou masor lagi shukria adae ḳorla, ar erare ḳoila manshore baṭia dita.
MAR 8:8 Hoḳol manshe feṭ bori kaila. Ḳanir bade zeta roisil, sahabi oḳole ota dola ḳoria harle shat ṭukri borigelo.
MAR 8:9 I dolor maze ḳali beṭa manush-u onuman sair azar zone ḳaila. Bade tain erare bidae dia,
MAR 8:10 sahabi oḳolre loia naot ḳori Dalmanuta zilat gelagi.
MAR 8:11 Ono aia harle Forishi oḳole tan loge torka-torki lagaila, ar tanre zasai korar lagi tara asmani kunu muzeza deḳta saila.
MAR 8:12 Ikan hunia Isae lamba ḳori shash falaia ḳoila, “I zomanar manshe ḳali muzeza tukain ḳene? Ami hok kota ḳoiar, erare kunuzat muzeza deḳail oito nae.”
MAR 8:13 Ḳoia tain erar ges taki horigela, ar naot uṭia hirbar aoror hofaro gelagi.
MAR 8:14 Sahabi oḳole loge ḳori ruṭi nite faurilila. Naor maze erar loge ḳali ekkan ruṭi asil.
MAR 8:15 Ou shomoy Isae ḳoila, “Tumitain hushiar o, Raza Herud ar Forishi mozobor ḳamir taki hushiar roio.”
MAR 8:16 Ikan hunia sahabi oḳole ḳana-ḳani kori koila, “Amra loge ḳori ruṭi na anae tain monoloy oḳan ḳoira.”
MAR 8:17 Oile sahabi oḳole kita matira, Isae ikan buzia tain erare ḳoila, “Tumitain ḳene ḳoirae, ruṭi ancho na ḳori ami ikan ḳoisi? Tumra kita oḳono kunta zano na ni, kunta-u buzo na ni? Tumrar dil fashan oigese ni?
MAR 8:18 Tumrar souk taḳte-o deḳrae na ni? Ḳan taḳte-o hunrae na ni? Tumrar mono foṛer na ni,
MAR 8:19 zebla ami fas azar manshor lagi kali fasḳan ruṭi siṛislam, ou manshe ḳaia harle tumra ḳoto ṭukri guṛa-gaṛa dola ḳorslae?” Era ḳoila, “Huzur, baro ṭukri.”
MAR 8:20 Tain hirbar ḳoila, “Aichcha, ami zebla sair azar manshor lagi shatḳan ruṭi siṛislam, manshe ḳaia harle tumra ḳoy ṭukri dola ḳorslae?” Era ḳoila, “Shat ṭukri.”
MAR 8:21 Ou tain ḳoila, “Erbade-o tumra buzlae na ni?”
MAR 8:22 Bade Isae tan sahabi oḳolre loia Bayt-Soyda gaut aila, aia harle manshe eḳ anda beṭare tan gese ania ḳoilo beṭagure atai dibar lagi.
MAR 8:23 Isae ou beṭar ato dori gaur bare loia gela. Gia tan mukor sef beṭar sokut lagaia tar gotro at dia ḳoila, “Oba, tumi kunta deḳrae ni?”
MAR 8:24 Beṭae souk kulia saia ḳoilo, “Ji oy huzur, ami to manush deḳram, oile itare gasor laḳan lager, era aṭa-uṭi korer.”
MAR 8:25 Teu Isae aroḳbar tar sokur ufre atai dile, he bala ḳori sailo ar hokkolta forishkar deḳlo.
MAR 8:26 Isae tare tar baṛit faṭai dia ḳoila, “Huno, Bayt-Soyda gaut ar zaio na.”
MAR 8:27 Bade tain ar sahabi oḳol Ḳoisoria-Filifi ṭaunor ḳanda-ḳasar gauainto gela. Foto tan sahabi oḳolre zikaila, “Ḳo sain, manshe amar befare kita mono ḳoroin, ami ke?”
MAR 8:28 Era zuaf dila, “Ḳeu ḳoy, afne Hozrot Ehia. Ḳeu ḳoy Ilias nobi. Ḳeu ḳeu ḳoin, afne oinno kunu nobi.”
MAR 8:29 Ou tain ḳoila, “Oile tumra kita mono ḳoro, ami ke?” Sahabi Fitore zuaf dila, “Afne-u Allar oada ḳora hou al-Mosi.”
MAR 8:30 Tain erare hushiar ḳori koila, “Tumra amar befare ḳeurore hunaio na.”
MAR 8:31 Bade tan sahabi oḳolre ou boyan hunaila, “Ami bin-Adome bout duḳ-mosibot fuani lagbo. Murobbi oḳole, boṛo imam oḳole, ar moulana oḳole-o amare manta nae. Amare zane mara oibo, oile moutor tin din bade hirbar zinda oia uṭa lagbo.”
MAR 8:32 Tain kub kula-mela ḳori ita ḳoila. Erdae Fitore tanre alga horaia nia ḳoila, “Huzur, shabdan, ila mat matoin na zanu.”
MAR 8:33 Isae sahabi oḳlor bae muk firaia Fitorre damki dia ḳoila, “Dur Iblis, amar ges taki bag! Tui Allai munshare bad dia, manshor laḳan sinta ḳorre.”
MAR 8:34 Bade tan sahabi ar am manshore-o tan daro nia ḳoila, “Huno, amar torikae ḳeu zindegi kaṭaite saile, he tar nizor kushie sola bad deuk. Tar afon duk-koshṭor solib boia loia amar ḳore auk.
MAR 8:35 Ze zone tar nizor shadine solto sae, he tar hasaror zindegi kuailibo. Oile ze zone amar lagi ar Allar deoa kush-ḳobrir lagi tar zan bilae, he tar hasaror zindegi basaibo.
MAR 8:36 Ḳeu zudi asta duniar malik bonia-o tar hasaror zindegi, mani aḳer kuailae, te tar kunu fayda oilo ni?
MAR 8:37 Heshe hasaror zindegi faoar lagi he kun don bilaibo?
MAR 8:38 Hunoukka, i zomanar beiman ar gunagar oḳlor maze, ḳeu zudi amar lagi ba amar talimor lagia muk lukae, te ami bin-Adom zebla fobitro firista oḳolre loge loia, amar gaibi bafor shan-tozollie zogoto hirbar aimu, ou shomoy ami-o erare deḳle muk lukaimu.”
MAR 9:1 Hozrot Isae tan sahabi oḳolre ḳoila, “Ami tumrare hasau ḳoiram, ino ilaḳan ḳoyzon azir asoin, zera Allar bashshair shan-tozollire nizor souke na deḳar age mout oito nae.”
MAR 9:2 Ikan ḳoar soydin bade tain ḳali Hozrot Fitor, Iakub ar Hannanre loia usa eḳ faṛor ufre uṭila. Ou tino zonor souḳor samne tan nizor surot bodli gelo.
MAR 9:3 Tan finnor lebas oto beshi dola soḳsoḳa oilo zen, duniar kunu dufae-u ila soḳsoḳa ḳori doar takkot nai.
MAR 9:4 Sahabi oḳole Hozrot Musa ar Ilias nobire deḳla, era aia Hozrot Isar loge batchit ḳorra.
MAR 9:5 Teu Fitore ḳoila, “Huzur, amra to ono asi, kub bala oise. Amra tinḳan ḍera-gor tiar ḳorilai, ekkan afnar lagi, ekkan Hozrot Musa ar ekkan Ilias nobir lagi.”
MAR 9:6 Era kub beshi ḍoraigesla, erdae kita matita kunu tal faila na.
MAR 9:7 Ou shomoy gaibi eḳ megor ṭukrae aia erare gurililo, ar ou ṭukra taki gaibi aoaz oilo, “Ein-u amar ḳas mayar zon, tumra en nosiot huno.”
MAR 9:8 Ṭik ou shomoy tara sairobae saia ḳali Isa saṛa ar ḳeurore ino deḳla na.
MAR 9:9 Bade faṛ taki lamia aibar bala Isae erare hukum dila, “Aiz zeta deḳlae, ami bin-Adom mora taki zinda oia uṭar ag forzonto ita ar ḳeurore hunaio na.”
MAR 9:10 Era tan hukum manla, oile mora taki zinda oar bed kita oḳan na buzae, tara eḳe-oinne zikaila.
MAR 9:11 Bade Isar gese aroz ḳorla, “Huzur, moulana oḳole ḳene ḳoin, Hozrot Ilias nobie foyla toshrif ana zorur?”
MAR 9:12 Tain ḳoila, “Ikan hasa ḳota, foyla Hozrot Iliase aia hokkolta agor haloto firai anba. Oile bin-Adomor befare Allar kalamo ḳene leḳa oise, tain kub duḳ-mosibot fuani lagbo, manshe tanre kobul ḳorta nae?
MAR 9:13 Ami tumrare ḳoiar, Ilias nobir befare Pak Kitabo zela leḳa ase, olaḳan-u tain aisla. Manshe-o tan loge zeta monoloy ota ḳorse.”
MAR 9:14 Isae ou tino zonre loia faṛ tone lamia baki sahabi oḳlor gese aia deḳla, bout manush aia sairobae dola oisoin, ar ḳoyzon moulanae erar loge torka-torki korra.
MAR 9:15 Isare dekia-u manush taijjub oia, douṛaia aia tanre salam ḳorla.
MAR 9:16 Tain ou moulana oḳolre zikaila, “Afnara kita loia erar loge torko ḳorra?”
MAR 9:17 Biṛor maz taki eḳzone ḳoilo, “Sab, amar fuagure loia afnar gese aislam, ogure buba zine asor ḳorse.
MAR 9:18 Ou zine tare zebla-u dore, tare asaṛ maria maṭit falae. Tar muk taki fena baroy, dato ḳoboṭ lagia ḍaṭṭa oizae. Ami tare loia afnar sahabi oḳlor gese aislam, oile era farsoin na.”
MAR 9:19 Teu Isae ḳoila, “Haere beiman oḳol! Ami ar ḳotodin tumrar loge roimu, tumrar zala ḳotodin shoijjo ḳormu? Aichcha, fuare ono ano.”
MAR 9:20 Manshe fuare tan gese anla. Tane dekia-u zine tare kub zatia dorlo. Fuae maṭit foṛia mukor fena bar ḳori goṛagoṛi lagailo.
MAR 9:21 Isae tar bafre zikaila, “Tar i dosha ḳotodin taki?” Beṭae ḳoilo, “Huruman taki-u.
MAR 9:22 Ar i zine tare marilito ḳori bout bar tare agunit ar fanit falaise. Oḳon afne zudi faroin, te amrare doya ḳoroukka.”
MAR 9:23 Isae ḳoila, “Zudi faroin, i kotar mani kita? Ze ekin ḳore tar lagi hokkolta-u oy.”
MAR 9:24 Ou beṭae zure zure ḳoilo, “Huzur, ami ekin ḳorsi. Amar imanor ḳomzuri horai deukka.”
MAR 9:25 Aro bout manush douṛaia tan gese aira dekia, tain zinre damki mari koila, “Oi kalua ar buba zin, ami hukum diar, er ges taki baroi za. Tare ar kunudin doris na.”
MAR 9:26 Ikan hunia zine tare kub zure sik dia zata mari saṛia gelogi. Teu i fua murdar laḳan maṭit foṛi roise dekia manshe ḳoila, “E to mara gese.”
MAR 9:27 Oile Isae tare ato dori tulte-u he ubai gelo.
MAR 9:28 Bade tain goro hamaia harle sahabi oḳole tanre niralae zikaila, “Huzur, amra farlam na ḳene?”
MAR 9:29 Tain zuaf dila, “Dua na ḳorle ar kunumonte-u i laḳan zin saṛail zae na.”
MAR 9:30 Bade hoḳole mili i zaga saṛia Galil zilar mazedi roana oila. Saila, manshe zanu ita na zanoin.
MAR 9:31 Ou shomoy to tan sahabi oḳolre talim deoat asla, tain ḳoila, “Ami bin-Adomre manshor ato dorai deoa oibo, zane mara oibo, ar moutor tin din bade hirbar zinda oia uṭmu.”
MAR 9:32 Sahabi oḳole tan i talimor kunu bed buzla na, ar tan gese zikanir-o shaosh faila na.
MAR 9:33 Bade Isae tan sahabi oḳolre loia Kofornaum ṭauno aila. Aia goro hamaia erare zikaila, “Foto tumra kita loia torko ḳorlae?”
MAR 9:34 Era muk bond ḳori boiroila. Ashole foto tara torko ḳorsla, tarar maze ḳe hoḳol taki dami manush.
MAR 9:35 Isa boigela, boia era barozonre tan daro nia ḳoila, “Ḳeu zudi dami manush oito sae, te he hoḳlor ḳore roite oibo. Ar hoḳlor kezmot ḳora lagbo.”
MAR 9:36 Bade eḳ huruttare ania erar samne uba ḳoraila. Tare kulo loia ḳoila,
MAR 9:37 “Ze zone amar lagi ou huruttar laḳan kunu sabalre kobul ḳore, he amare-u kobul ḳore. Ar amare ze kobul ḳore, he ḳali amare nae, amare zein bezisoin tanre-o kobul ḳorlo.”
MAR 9:38 Tan sahabi Hannane ḳoila, “Huzur, amra eḳ beṭare deḳsi, he afnar nam loia zinnat saṛae. Dekia amra tare nished ḳorsi, he to amrar torikar manush nae.”
MAR 9:39 Tain ḳoila, “Ere nished ḳorio na. Amar nam loia ḳeu keramoti deḳanir bade, he oto zoldi amar gibot gaito farto nae.
MAR 9:40 Zera amrar bifokke nae, tara to amrar fokke.
MAR 9:41 Huno, ami hasa ḳota ḳoiar, al-Mosir torikar manush oar ḳatire, ḳeu zudi tumrare ek gelas fani kaoae, te he er furuskar faibo-u faibo.
MAR 9:42 “Ar amar torikar ou huru-muru eḳzonre zudi keu tar imanor fote bada dey, te er saite tar lagi aro bala oibo, tar golat fattor bandia doriat falai deoa.
MAR 9:43 Tumar at zudi tumar rifu oizae, te at ḳaṭia falai deo.
MAR 9:44 Duio at loia Zahannami oa taki, eḳ at loia Zannato zaoa tumar lagi bala. Zahannamor aguin to kunudin nibe na.
MAR 9:45 Tumar fao zudi tumar rifu oizae, te fao ḳaṭia falai deo. Duio fao loia Zahannamo zola taki, lengṛa oia Zannato zaoa tumar lagi bala.
MAR 9:46 Tumar souk zudi tumar rifu oizae, te souk tulia falai deo. Duio souk loia Zahannamo zola taki, ḳana oia Allar bashshait dakil oa tumar lagi bala.
MAR 9:48 I Zahannamor bichchu oḳol more na, ar hinor aguino kunudin nibe na.
MAR 9:49 “Huno, forteḳ manush-u agunit nunta oibo.
MAR 9:50 Nun to bala zinish, oile nune zudi tar nunta gun kuailae, te tare ar nunta banail zaibo ni? Tumra zarzir dilor maze i nun ḳaim raḳo, ar eḳe-oinne shantie boshot ḳoro.”
MAR 10:1 Kofornaum taki Hozrot Isa Ehudia zilat aila, ar Zordan gangor hofaro gela. Ono aile hirbar bout manush aia tan gese dola oila. Tain-o tan reoaz mafik erare talim dila.
MAR 10:2 Ou shomoy tanre forikka ḳorar niote Forishi mozobor ḳoyzone aia zikailo, “Sab, ḳoukka sain, boure talaḳ deoa zaiz ase ni?”
MAR 10:3 Tain zuaf dila, “Hozrot Musae afnaintore kita bataisoin?”
MAR 10:4 Tara ḳoila, “Tain ḳoisoin, talaḳ nama lekia hari bou talaḳ deoa zaiz ase.”
MAR 10:5 Isae ḳoila, “Tumrar dil fashan, erlagi-u Musa nobie i musla leḳsoin.
MAR 10:6 Oile eoḳan to leḳa ase, Allae foyla Adom ar Haoare mordo ar aorot banai foyda ḳorsoin.
MAR 10:7 Erdae manshe-o tarar ma-bafre toia bour loge ashik oiba.
MAR 10:8 Zamai ar bou ek kaya oiba. Tara dui roita nae, eḳ oiba.
MAR 10:9 Te Allae zeta zuṛa lagaisoin, manshe itare alog na ḳorouk.”
MAR 10:10 Bade sahabi oḳole goro hamaia, hirbar tanre ou musla zikaila.
MAR 10:11 Teu Isae ḳoila, “Ze manshe tar boure talaḳ dia aroḳ beṭire nika ḳore, he to ou bour loge zina ḳore.
MAR 10:12 Oula boue-o zudi nizor zamaire talaḳ dia aroḳ beṭar gese nika boy, te tai-o zina ḳore.”
MAR 10:13 Bade manshe huru huru huruttaintore loia Isar gese aila tarare atai dibar lagi. Oile sahabi oḳole erare boḳa-zoḳa ḳorla.
MAR 10:14 Ita dekia Isa naraz oia tarare ḳoila, “Huruttaintore amar gese aite mana ḳorio na, Allar bashshai to erar laḳan manshor lagi-u.
MAR 10:15 Ami hok kota ḳoiram, huru huruttainte zela boṛor shashon manoin, Allar shashonre ou laḳan na manle, manush kunumonte-u Allar bashshait hamaito farto nae.”
MAR 10:16 Bade tain tarare kulo loia tarar matat at rakia dua ḳorla.
MAR 10:17 Hozrot Isa zebla bar oia roana oila, ou shomoy eḳ beṭa douṛaia aia aṭu gaṛia tan samne boia ḳoilo, “Ustad, afne to meherban. Te amare batai deukka, aḳer faoar lagi ami kita ḳortam?”
MAR 10:18 Tain ḳoila, “Amare ḳene meherban ḳoirae? Eḳ Alla saṛa ar ḳeu meherban nae.
MAR 10:19 Tumi to Tourat Kitabor hukum zano. Kun ḳorio na, zina ḳorio na, suri korio na, misa shakki dio na, ṭogaṭogi korio na, ma-bafre ijjot ḳorio.”
MAR 10:20 Beṭae ḳoilo, “Sab, ami to huruman tone-u ita amol ḳoriar.”
MAR 10:21 Teu Isae mayar nozore tar bae saia ḳoila, “Ḳali ekkan zinish tumar baki roise. Tumi zao, gia tumar hoḳol don-samana besia gorib oḳolre bilai deo. Teu tumi behesto tumar samana ḳamaibae. Bade aia amar ummot oio.”
MAR 10:22 Ikan hunia beṭar muk kala oigelo. Tar bout don-samana asil ḳori mono duk loia gelogi.
MAR 10:23 Teu Isae sairobae saia tan sahabi oḳolre ḳoila, “Doni manush Allar bashshait hamani boṛo moshkil.”
MAR 10:24 Ikan hunia era taijjub oigela. Isae hirbar ḳoila, “Baba oḳol, deḳrae ni, duniabi don-samanar ufre zera borosha ḳore, Allar bashshait hamani tarar lagi bout moshkil.
MAR 10:25 Doni manush Allar bashshait hamanir saite, suir furedi uṭ hamani aro shuza.”
MAR 10:26 Ikan hunia sahabi oḳol aro taijjub oia eḳe-oinne ḳoila, “Te kun manshe nazat hasil ḳorbo, ḳe rehai faibo?”
MAR 10:27 Isae erar bae saia ḳoila, “Manshor lagi oshombob oito fare, oile Allar nozoro ita to mamuli. Tain hoḳolta-u faroin.”
MAR 10:28 Sahabi Fitore ḳoila, “Huzur, amra to hoḳolta falai toia afnar ḳore aisi.”
MAR 10:29 Tain ḳoila, “Ami tumrare hok kota ḳoiram, ze manshe amar lagi ar Allar batail kush-ḳobrir lagi nizor baṛi-gor, ma-baf, bai-boin, fua-fuṛi, zomi-mirash saṛi dise,
MAR 10:30 he ou duniat itar eḳ-sho gun beshi baṛi-gor, ma-baf, bai-boin, fua-fuṛi, zomi-mirash faibo. Itar loge he zulum-toklif-o faibo. Bador zindegit he aḳer-o faibo.
MAR 10:31 Oile zera foyla ḳataro asoin, erar maze bout zon ḳore foṛiziba, ar zera ḳoror ḳataro asoin, tarar bout zon foyla ḳataro aiba.”
MAR 10:32 Hozrot Isae sahabi oḳolre loia Zeruzalemo zaira. Tain age oia aṭira, ar sahabi oḳol ḍorai ḍorai kore ḳore zaira. Aro zera tan ḳore oia zaira tarar zano-o ḍor asil. Isae tan barozon sahabire alga horaia nia hirbar ḳoila, tan kun dosha goṭibo.
MAR 10:33 Tain ḳoila, “Huno, amra oḳon Zeruzalem zairam. Hono ami bin-Adomre doria boṛo imam ar moulana oḳlor ato shofi deoa oibo. Tara bisar ḳoria amare zane marar ray diba. Amare bidormi zatir ato shomzai diba.
MAR 10:34 Ou bidormi oḳole ṭaṭṭa-moshkora ḳoria, shorilo sef siṭaia, bezuita sabuk marba, ar zane mariliba. Moutor tin din bade hirbar zinda oia uṭmu.”
MAR 10:35 Bade Zibudiar dui fut Iakub ar Hannan namor duio sahabi Hozrot Isar gese aia ḳoila, “Huzur, amra ekkan arzi loia aisi, mono ḳorram, afne amrar arzikan raḳba.”
MAR 10:36 Tain ḳoila, “Ami tumrar lagi kita ḳortam, tumra kita sairae?”
MAR 10:37 Era ḳoila, “Afne zebla furafur dafoṭor loge raz-godit boiba, ou shomoy amra eḳzonre afnar ḍainor godi, oinno zonre bauor godiḳan diba.”
MAR 10:38 Isae ḳoila, “Tumra to buzrae na tumra kita sairae. Ami ze toklifor fialadi kaimu, ita kunu tumra ḳaitae farbae ni? Ami ze toklifor gusol ḳormu, tumra ita farbae ni?”
MAR 10:39 Tara ḳoila, “Ji oy farmu.” Tain ḳoila, “Aichcha, ami ze fialadi kaimu, tumra-o ogudi kaibae. Ami ze gusol ḳormu, tumra-o oula ḳorbae.
MAR 10:40 Oile amar ḍain ba bau galat boanir eḳtiar amar ato nae. I godi oḳol zerar lagi zuit ḳora oise, ḳali tara-u faiba.”
MAR 10:41 Baki doshzon sahabie Iakub ar Hannanor i arzi hunia kub biroḳto oila.
MAR 10:42 Teu Isae era hoḳolre ekḳano dola ḳoria ḳoila, “Tumra to zano, bidormi zatir raza oḳol tarar prozar munib oy. Tarar zomidar oḳole nizor gulamor ufre beṭagiri kore.
MAR 10:43 Oile tumrar maze ila oa ṭik nae. Tumrar ḳeu dami bonte saile, he tumrar kezmot ḳorouk.
MAR 10:44 Ar ḳeu boṛo oite saile, he hoḳlor gulami korouk.
MAR 10:45 Mono rakio, ami bin-Adome-o kezmot faoat aisi na, aisi to kezmot ḳorat. Ar bout manshor zan basanir lagi nizor zan bilai deoat aisi.”
MAR 10:46 Hozrot Isae tan sahabi oḳol loia Ziriho ṭauno aila. Bade erare ar aro bout manshore loia ṭaun taki baronir bala, Timoyor fua Bortimoy namor eḳ anda beṭae fotor daro boia bik korat asil.
MAR 10:47 Ein-u Nasarot gaur Isa, ikan hunia beṭae zure sillai sillai koilo, “O Isa, Hozrot Daudor aolad, amare rohom ḳoroin.”
MAR 10:48 Sillani hunia boute ḳoila, “Chup, sillais na.” Oile he aro zure sillaia ḳoilo, “Daudor aolad, amare rohom ḳoroin.”
MAR 10:49 Tar sillani hunia Isae dom loia ḳoila, “Ere ono ano.” Manshe ou anda beṭare ḳoila, “Ḍoraio na, ao. Huzure tumare ḍakira.”
MAR 10:50 Teu beṭae tar shorilor saddor kulia, faldi uṭia tan ḳandat gelo.
MAR 10:51 Isae tare zikaila, “Tumi kita sao ba? Ami tumare kita ḳortam?” Beṭae ḳoilo, “Huzur, ami souke deḳtam sai.”
MAR 10:52 Tain ḳoila, “Aichcha zao, tumar imanor bole-u tumi bala oilae.” Ḳoite-u tar deḳar shokti ailo ar Isar ḳore ḳore roana oilo.
MAR 11:1 Hozrot Isae tan sahabire loia Zeruzalemor ḳasat, Zoytun faṛor loge Bayt-Ania ar Bayt-Faijja gaut aia azila. Ono aia tain duizon sahabire ḳoila,
MAR 11:2 “Tumra duio zon samnor ou gaut zao. Gia gaut hamaite-u deḳbae egu gadar baichcha banda ase. Er ufre ḳeu kunudin soar oise na. Ogur golar doṛi kulia ono loia aio.
MAR 11:3 Ḳeu zikaile ḳoio, huzuror dorḳar ase, erdae niram. Tain zoldi kori firot dilaiba.”
MAR 11:4 Tan hukum mafik era gela. Gia deḳla, hasau fotor ḳandat eḳ baṛir uṭano gadar baichcha banda ase. Dekia era tar band kulita saila,
MAR 11:5 ou shomoy hono uba ḳoyzon manshe zikaila, “Oba, tumra i baichchar doṛi kulrae ḳene?”
MAR 11:6 Teu Isae zela hikai disla, era oula-u zuaf dila. Ikan hunia manshe ar kunta ḳoila na.
MAR 11:7 Gadar baichcha loia Isar gese aia harle, manshe nizor gotror saddor kulia gadar fiṭit bisaila. Bade tain er ufre soṛila.
MAR 11:8 Aro bout manshe tarar gotror saddor kulia fotor maze bisai dila, ar boute gasor fatain siṛia ania foto bisaila.
MAR 11:9 Isar loge oia age-ḳore zera zaoat asil, era zure zure elan dila, “Marhaba! Mabudor name zein toshrif anra, tan tarif ouk.
MAR 11:10 Amrar mul murobbi Daudor bashshai kaim or, Alhamdulilla! Behesto-o marhaba!”
MAR 11:11 Zeruzalem aia tain fobitro Baytul-Mukaddoso hamaila ar sairobae saia hoḳolta deḳla. Bade hainja oizaoae tan barozon sahabire loia Bayt-Aniat gelagi.
MAR 11:12 Bador din Bayt-Ania taki bidae oar shomoy tan feṭo buk laglo.
MAR 11:13 Ou tain duroi taki fatae bora egu ḍumur gas dekia, ogur fol ḳaibar niote gasor daro gela. Ou shomoy ḍumur gaso fol dorar din nae. Tain gia deḳla, gasor maze ḳali fata, kunu fol nai.
MAR 11:14 Tain ou gasre ḳoila, “Ar kunudin ḳeu zanu tumar fol na ḳae.” Tan i buli sahabi oḳole hunilila.
MAR 11:15 Bade Zeruzalem aia tain fobitro Baytul-Mukaddoso hamaila. Ar Kaba goror shimanat zoto ḳorid-bikir ḳarbari asil, itare ḳedai dila. Tain ṭeḳar baṭṭar ḳarbari oḳlor kesh bakso, ar faro besra oḳlor ashon ulṭaia falai dila.
MAR 11:16 Baytul-Mukaddosor uṭanedi kunuzat mal-samana loia solasol ḳorte nished dila.
MAR 11:17 Tain talim dila, “Allar kalamo batail oise na ni, amar gorre duniar tamam zatir ebadot ḳana ḳoia ḍaḳa oibo? Oile tumra i gorre ḍaḳaitor aḍḍaḳana banailiso.”
MAR 11:18 Ikan hunia boṛo imam ar moulana oḳole tanre zane marilibar dandat lagla. Oile tara Isare kub ḍoraita, ḳaron tan talim hunia manshor maze asanoḳ eshki foyda oisil.
MAR 11:19 Hainja bala tain sahabi oḳolre loia ṭaunor bare gelagi.
MAR 11:20 Biane sahabi oḳole fotedi aṭia aoar bala deḳla, ou ḍumur gas ekkere zoṛe-foṛe hukaia morigese.
MAR 11:21 Dekia sahabi Fitoror mono oigelo. Ou tain ḳoila, “Huzur, afne ze gasre boddua disla, deḳoukka, igu morigese.”
MAR 11:22 Tain erare ḳoila, “Allar ufre ekin raḳo.
MAR 11:23 Ami tumrare hasau ḳoiram, kunu manshe tar dilor maze shondoy na ḳoria, furafur imane zudi ou faṛore ḳoy, ‘Zao, uṛia gia doriat foṛo,’ te he zela ḳoibo tar lagi ola ḳora oibo.
MAR 11:24 Erdae ami tumrare ḳoiram, dua ḳorar shomoy tumra zeta mango, ekin ḳorio tumra ita failiso. Teu hasau ita faibae.
MAR 11:25 Tumra zebla-u dua ḳorat ubao, ou shomoy ḳeuror birudde tumrar kunu nalish taḳle, tare maf ḳori dio. Teu tumrar behesti baf Allae-o tumrar tamam guna maf ḳori diba.”
MAR 11:27 Bade Hozrot Isae tan sahabi oḳolre loia hirbar Zeruzalem aila. Tain Kaba goror uṭano aṭira, ou shomoy boṛo imam oḳole, murobbi ar moulana oḳole tan daro aia zikaila,
MAR 11:28 “Tumi kun eḳtiare ita ḳorrae? Ḳe tumare i kemota dise?”
MAR 11:29 Tain ḳoila, “Ami afnarare ekkan soal ḳormu. Afnara er zuaf dilaile, ami-o ḳoimu, ḳar eḳtiare ami ita ḳoriar.
MAR 11:30 Aichcha ḳoukka sain, Hozrot Ehiae torikar gusol deoar eḳtiar ḳar ges taki faisla, Allar ges taki, na manshor ges taki?”
MAR 11:31 Ikan hunia tara ḳane ḳane matila, “Amra zudi koi Allar ges taki, te tain ḳoiba, tumra tan ufre iman anlae na ḳene?
MAR 11:32 Ar zudi koi manshor ges taki, te to?” Tara manshore kub ḍoraita, ḳaron hoḳol manshe-u manta, Hozrot Ehia eḳzon nobi.
MAR 11:33 Erdae tara zuaf dila, “Amra ikan zani na.” Teu Isae-o ḳoila, “Te ami-o afnarare ḳoitam nae, ḳar eḳtiare ami ita ḳoriar.”
MAR 12:1 Teu Hozrot Isae hou moulana oḳolre kichcha hunaia buzaila, “Eḳzon manshe angur ḳet ḳoria tar sairobae beṛa dila. Bade anguror rosh bar ḳorar lagi ek gat kudila ar sokidaror lagi usa ḳori ekkan ṭong-gor banaila. Heshe manshor gese ḳet bagi dia malik bidesh gelagi.
MAR 12:2 Angur fakia harle malike tan ek gulamre bagidaror gese faṭaila, tan baṭ anar lagi.
MAR 12:3 Oile bagidar oḳole i gulamre dori mair-doir ḳori, ḳali ate bidae ḳori dilo.
MAR 12:4 Teu malike tan aro ek gulamre faṭaila. Bagidar oḳole tare-o gala-gali koria maria tar mata faṭaililo.
MAR 12:5 Erbade tain aro eḳzonre faṭaila. Enre tara zane marililo. Olaḳan ḳori tain aro bout zonre faṭaila. Erar mazor ḳoyzonre tara mair-doir ḳorlo, ar ḳoyzonre zane marililo.
MAR 12:6 Heshe malikor ḳali eḳzon manush baki roisil, he oilo tan mayar fut. Hesh-mesh tain ou fuare-u tarar gese faṭaila, mono ḳorla, amar fuare tara ijjot dibo.
MAR 12:7 Oile bagidar oḳole eḳe-oinne foramish ḳori koilo, ‘Ou fua-u to bade i shompottir malik oibo. Te ao, ere-o amra marilai, teu amra-u itar malik bonizimu.’
MAR 12:8 Ḳoia-u tara fuare doria zane maria, angur ḳetor bare nia falai dilo.
MAR 12:9 “Te oḳon ḳoukka sain, ḳetor malike kita ḳorba? Tain aia to ou bagidar oḳolre mariliba ar ḳet oinno manshor gese bagi diba.
MAR 12:10 Afnara Allar kalamo foṛsoin na ni, Raz mestoir oḳole ze fattorre beḳama ḳoia falai disil, oḳṭa dia-u goror ian kuṭi oilo.
MAR 12:11 Mabude nize-u ita oaila, ita dekia to amrar taijjubi lager.”
MAR 12:12 Ita hunia tara Isare dorilito sailo. Tara buzililo, tain i kichcha tarar bifokke-u ḳoira. Oile manshore ḍoraia tanre saṛia gelogi.
MAR 12:13 Bade ou murobbi ar moulana oḳole Isare fando falanir lagi, Forishi ar Raza Herudor dolor ḳoyzon manshore tan gese faṭailo.
MAR 12:14 Tara aia ḳoilo, “Huzur, amra to zani, afne eḳzon hok manush. Manshe kita mono ḳore ba na ḳore, itae afnar kunta-u zae ae na, afne to ḳeuror mukor bae saia kunta ḳoroin na. Hok-halal niome manshore Allar rasta batai dira. Te amrare batai deukka, Hozrot Musar shoriot mafik Ruman bashshare ḳazna deoa zaiz ni?
MAR 12:15 Amra tanre ḳazna ditam ni, na ditam na?” Tain tarar bonḍami buzilila, buzia ḳoila, “Tumra ḳene amare forikka ḳorrae? Deki, eḳṭa dinar ania amare deḳao.”
MAR 12:16 Tara dinar loia tan gese aile, tain zikaila, “I foyshar ufre ḳar nam ar sobi?” Tara ḳoila, “Ruman bashshar.”
MAR 12:17 Tain ḳoila, “Te huno, bashshar zeta ita bashshare deo, ar Allar zeta ita Allare deo.” Ikan hunia tara ammok bonigela.
MAR 12:18 Bade Siddekia mozobor ḳoyzon manush Isar ḳandat aila. Era ekin ḳoroin, moutor bade kunu manush ar zinda oia uṭoin na. Erdae tara Isare zikaila,
MAR 12:19 “Huzur, Hozrot Musae amrar lagi ou musla lekia gesoin, kunu manshe bia ḳoria, tar boure niaoladi halote toia he zudi mara zae, te tar baie ou beṭire bia ḳoria tar bair bongsho basaite oibo.
MAR 12:20 Te doroukka, eḳ foribaro shat bai asil. Boṛo zone bia ḳoria niaoladi halote mara gelo.
MAR 12:21 Bade dusra baie tar ou ṛaṛi babire bia ḳorlo. Oile he-o niaoladi roia mara gelo. Bade tin nombor baie bia ḳoria he-o oula mara gelo.
MAR 12:22 Ou nomunae tara shato bair ḳeuror-u hurutta oilo na. Heshe ou beṭi-o mara gelo.
MAR 12:23 Te moron bade zebla manush zinda oia uṭba, ou shomoy i beṭi, era kun bair bou oibo? Tara hoḳole-u to i beṭire bia ḳorsil.”
MAR 12:24 Tain zuaf dila, “Afnara to Allar kalam-o zanoin na, Allar kudroti takkot-o buzoin na. Erdae afnara i bul ḳorra.
MAR 12:25 Hunoukka, murda oḳol zebla zinda oia uṭba, ou shomoy tara bia-shadi korta nae, ḳeu tarare bia dito-o nae. Era to firistar laḳan boniziba.
MAR 12:26 Tourat Kitabo Tur faṛor zongla zolar boyanir maze, murda oḳol zinda oar befare kita leḳa ase, ita afnara foṛsoin na ni? Allae Musa nobire ḳoila, ‘Ami-u Ibrahim, Isʼhak ar Iakubor Alla’.
MAR 12:27 Te Alla to murda oḳlor Alla nae, tain zinda oḳlor Alla. Afnara to bout boṛo bul ḳorsoin.”
MAR 12:28 Ou shomoy eḳzon moulana aia erar torka-torki hunla. Ar Isae zen ṭik zuaf disoin ikan buzia ein zikaila, “Ḳoukka sain, Tourat Shorifor maze hoḳol taki boṛo hukum kunṭa?”
MAR 12:29 Isae zuaf dila, “Hoḳol taki boṛo hukum oilo, O Boni Israil, amrar Mabud Alla eḳ.
MAR 12:30 Tumrar asta dil, zan, mon ar hoḳol shokti dia tumrar Mabud Allare mohobbot ḳorio.
MAR 12:31 Dusra hukum oilo, tumrar ari-forire nizor laḳan maya ḳorio. Ou duio hukum taki boṛo ar kunu hukum nae.”
MAR 12:32 Ikan hunia hi moulanae ḳoila, “Huzur, marhaba! Afne to ṭik-u ḳoisoin, Alla eḳ, tain saṛa ar kunu Mabud nai.
MAR 12:33 Ar asta dil, bibeḳ-buddi, hoḳol shokti dia tanre mohobbot ḳora, ari-forire nizor laḳan maya ḳora oilo, hoḳol nomunar foshu kurbani ar lilla-sodga taki-o zoruri.”
MAR 12:34 Isae zebla deḳla, ou moulanae kub shundor ḳori zuaf disoin, ou tain ḳoila, “Allar bashshai taki afne to beshi duroi nae.” Erbade tone Isare kunu soal ḳorar shaosh ar ḳeuror oilo na.
MAR 12:35 Isae Baytul-Mukaddoso talim deoar shomoy zikaila, “Moulana oḳole ḳemne ḳoin, al-Mosi oila Hozrot Daudor aolad?
MAR 12:36 Daude to Pak Ruhur bole ḳoisoin, Mabude amar munibre ḳoila, Ami zoto shomoy tumar dushmon oḳolre tumar faor tolat na falai, oto shomoy tumi amar ḍainor toḳto bo.
MAR 12:37 Daude zebla nize-u al-Mosire tan munib ḳoisoin, te al-Mosi kemne Daudor aolad oiba?” Bout manshe kushi oia Isar boyan hunat asil.
MAR 12:38 Boyanor maze tain ḳoila, “Moulana oḳlor befare hushiar roio. Tara ḳali lamba lamba zubba findia bazar-aṭo gura-fira ḳoroin ar ijjot faita sain.
MAR 12:39 Tarar shoḳ oilo kunu mozliso gele dami zagat boa, ḳanir shomoy samnor ḳataro boia ḳaoa.
MAR 12:40 Eḳbae tara lamba lamba dua ḳoria manshor mon golain, aroḳbae ṛaṛi beṭintor zomi-mirash doḳol ḳori nein. Hashoror moydano erar hoḳol taki boṛo mosibot oibo.”
MAR 12:41 Bade tain Baytul-Mukaddosor lillar ḍegor ḳandat boia deḳla, manshe aia ḳemne lilla-sodga dira. Tain deḳla, bout doni manshe besh ḳori ṭeḳa-foysha dan ḳorra.
MAR 12:42 Bade ek gorib ṛaṛi beṭie aia ḳali duiṭa foysha dan ḳorlo.
MAR 12:43 Dekia tan sahabi oḳolre ḳoila, “Ami tumrare hok kota ḳoiram, hoḳol manush tone ou beṭie beshi dan ḳorlo.
MAR 12:44 Hoḳol manshe tarar bout don-saman taki kisu ongsho dan ḳorse, oile i beṭi obabi oile-o, beṭie nizor lagi kunta na rakia, hoḳolta-u dan ḳori dilo.”
MAR 13:1 Hozrot Isa Baytul-Mukaddos taki bar oia zaoar bala tan eḳzon sahabie ḳoila, “Huzur, ou deḳoukka, ḳoto boṛo boṛo fattoror oal ar shundor shundor dolan.”
MAR 13:2 Tain ḳoila, “Tumi ou zeta boṛo boṛo dolan deḳrae, itar dui fattor ekḳano lagail roito nae, hoḳolta banga oizibo.”
MAR 13:3 Bade tain zebla Zoytun faṛor ufre Baytul-Mukaddos Kaba Shorif muka boat asla, ou shomoy sahabi Fitor, Iakub, Hannan ar Andriase tanre niralae zikaila,
MAR 13:4 “Huzur, amrare zanaukka, ita kun shomoy oibo? Kun alamot dekia amra buzmu, ita binash oar shomoy aichche?”
MAR 13:5 Tain ḳoila, “Dekio, ḳeu zanu tumrare na ṭoge.
MAR 13:6 Bout zone amar nam doria aia ḳoibo, ami-u hein, ḳoia boutre ṭogibo.
MAR 13:7 Oile zuddor aoaz ar laṛair ḳobor hunia tumra ḍoraio na. Ita nisoy goṭbo, goṭle-o ita to shesh nae.
MAR 13:8 Eḳ zatie aroḳ zatir loge, eḳ deshe aroḳ deshor loge laṛai korbo. Bout zagat boisal ar nidan deḳa dibo. Oile ita to ḳali mosibotor shuru.
MAR 13:9 “Tumra nizor befare hushiar roio. Manshe tumrare doria bisaror adaloto shomzaibo. Mosidor bitre tumrare singladi mara oibo. Amar lagi tumrare deshor raza-bashshar samne neoa oibo. Tumra erar samne amar befare shakki dibae.
MAR 13:10 Foyla duniar tamam zatir gese Allar deoa kush-ḳobri toblig kora zorur.
MAR 13:11 Tumrare doria zebla bisaro neoa oibo, ou shomoy kita zuaf ditae, ita loia age kunu sinta ḳorio na. Hou shomoy tumrare zeta hikaia deoa oibo, tumra ota-u ḳoio. Ashole tumra to hino mattae nae, Pak Ruhe-u matiba.
MAR 13:12 Baie baire, bafe fuare zane marar lagi dorai dibo. Fua-fuṛie afon ma-bafor birudde gia, ma-bafre kun ḳoraibo.
MAR 13:13 Ar amar lagi hoḳole tumrare ginnaibo, oile hesh forzonto ze ṭikia roibo, he rehai faibo.
MAR 13:14 “Ze tilaot ḳorer he buzouk, bezuita mosibotor ginnar i siz ze zagat aoar ḳota nae, i sizre zebla ono deḳbae, ou shomoy zera Ehudia zilat asoin, tara bagia faṛia elaḳat zauk.
MAR 13:15 Sator ufre zera roiba, tara lamat lamia kunta neoar lagi goror bitre ar na hamauk.
MAR 13:16 Ḳetor maze zera roiba, tarar gotror saddor neoar lagi baṛit na auk.
MAR 13:17 Ou shomoy zeta beṭintor hurutta oita, ar zera huruttare bukur dud ḳaoaira, tarar boṛo zobor mosibot oibo.
MAR 13:18 Tumra dua ḳoro, ita zanu shitor dino na oy.
MAR 13:19 Ou shomoy to oto bezuita ḳoshṭo oibo, zeta duniar foyla tone aiz forzonto kunudin oise na, ar kunudin oito-o nae.
MAR 13:20 Mabude zudi i shomoyre ḳomaia na dita, te ḳeu zinda roilo na one. Oile Allae tan fosond ḳora bonda oḳlor lagi i shomoy ḳomai disoin.
MAR 13:21 Hi shomoy ḳeu zudi tumrare ḳoy, ‘Huncho ni, al-Mosi ono aisoin,’ ba ‘Deḳo, ounu tain,’ te tumra ita ekin ḳorio na.
MAR 13:22 Ḳaron bout bonḍoe aia ḳoibo, ami-u al-Mosi, ar bout bonḍo nobi-o aiba. Shombob oile tara Allar fosond ḳora bonda oḳolre-o duka dia be-fote nita ḳori bout keramoti-muzeza deḳaiba.
MAR 13:23 Oile tumra hushiar roio, ami to tumrare age-u ita hal-hokikot zanai dilam.
MAR 13:24 “Ou mosibotor shomoy faronir bade, Shuruz andair oizibo, sande ar for dito nae.
MAR 13:25 Tera oḳol asman taki kulia foṛizibo, asmanor kunu shoktiala siz-u ṭik-ṭak roito nae.
MAR 13:26 Ou shomoy manshe deḳba, bin-Adome Allar kudroti zalal ar shan-tozollie, megor ṭukrat oia duniat toshrif anra.
MAR 13:27 Tain firista oḳolre duniar eḳ mata taki aroḳ matat faṭaia, Allar fosond ḳora bonda oḳolre sairobae tone dola ḳorba.
MAR 13:28 “Ḍumur gasor bae saia ilim ḳamai koro. Gasor ḍal-fala norom oia zebla noya kuṛi baroy, ou shomoy tumra buzilao gormor din aichche.
MAR 13:29 Te ou laḳan tumra zebla deḳbae ita hoḳolta goṭer, dekia buzilio, bin-Adom-o daro aichchoin. Ḳali daro nae, tain aia duaro ṭukaira.
MAR 13:30 Ami tumrare hok kota ḳoiram, ita na goṭa forzonto i zomanar manush fuṛaita nae.
MAR 13:31 Asman-zomin hoḳolta binash oizibo, oile amar kalam hamesha ḳaim roibo.
MAR 13:32 “Hou din ar hi shomoyor befare ḳali amar gaibi baf bade ar ḳeu zanoin na. Asmani firista ba ḳas mayar zone-o zanoin na.
MAR 13:33 Tumra hushiar o, kial ḳori solo ar dua ḳoro. Hi din kun shomoy aibo, tumra ḳeu to zano na.
MAR 13:34 Ola eḳ manshor laḳan hi din aibo, zein bidesh zaoar shomoy tan gulam oḳlor ato hoḳolta shomzai dia zarzir ḳam buzai dila. Ar sokidarre ḳoila hozag roito.
MAR 13:35 Tumra-o oula hozag roio. Baṛir malik kun shomoy aiba, hainja bala, maz raite, fotabala na fozore aiba, ikan to tumra ḳeu zano na.
MAR 13:36 Tain aḳta aile zanu na deḳoin, tumra gumai roiso.
MAR 13:37 Ami tumrare zela ḳoilam, hoḳolre-u oula ḳoiram, hozag ro.”
MAR 14:1 Azadi Id ar Ḳamir Saṛa Ruṭir Idor ḳali dui din baki roise. Boṛo imam ar moulana oḳole, Hozrot Isare manshor aforḳe doria zane marilibar danda lagaila.
MAR 14:2 Tara ḳoila, “Idor shomoy tare dortam nae. Dorle manshe gonḍogul lagai dito fare.”
MAR 14:3 Isa ou shomoy Bayt-Ania gaur fosa-kusṭo bemari Saimonor baṛit asla. Ono boia tain ḳana ḳaira, aḳta-u eḳ beṭi manshe sinor eḳ butolo ḳori kub dami kaṭi ator loia aia, butol bangia hoḳol ator tan matat ḍali dilo.
MAR 14:4 Ita dekia hino azir kunu kunu zone na-kush oia eḳe-oinne ḳoilo, “I ator fuṭain ḳene borbad ḳora oilo?
MAR 14:5 I fuṭin besile to tin-sho dinar faia gorib oḳolre bilai deoa gelo one.” Otar lagi tara beṭire boḳa-zoḳa ḳorla.
MAR 14:6 Oile Isae ḳoila, “Oise, tanre ar kunta ḳoio na. Tain to amar lagi kub shundor ḳam ḳorsoin.
MAR 14:7 Gorib oḳol to hamesha-u tumrar loge roiba. Tumrar zebla mone sae tarare shaijjo ḳortae farbae. Oile amare to hamesha faitae nae.
MAR 14:8 Besaṛie zeḳan farsoin oḳan-u ḳorsoin. Ein aia amar gotro ator ḍalia, dafon-ḳafonor lagi amare age-u zuit ḳorsoin.
MAR 14:9 Ami tumrare hok kota ḳoiar, duniar zekunu zagat Allar kush-ḳobri toblig korar shomoy, ou besaṛire mono ḳorar lagi, tan i kamor ḳota ḳan-o ḳoa zaibo.”
MAR 14:10 Bade tan barozon sahabir mazor eḳzon, en nam Ihuda Iskariat, ein Isare doraia deoar lagi boṛo imam oḳlor gese gela.
MAR 14:11 Imam oḳole hunia kub kushi oia ḳoila, “Tare doraia dile tumare ṭeḳa dimu.” Teu Ihudae tanre dorai deoar shuzug tukanit roilo.
MAR 14:12 Ḳamir Saṛa Ruṭir Idor foyla din, Azadi Idor lagi meṛa-baichcha zobo ḳora oito. Erdae sahabi oḳole Isare zikaila, “Huzur, amra kun zagat gia afnar lagi idor ḳana tiar ḳortam?”
MAR 14:13 Ou Isae tan duizon sahabire ḳoila, “Tumra ṭauno zao. Gia deḳbae hono eḳ beṭa manshe ḳoyladi fani boria nira. Tumra tan ḳore ḳore zaio.
MAR 14:14 Tain ze baṛit gia hamaiba, hou baṛir malikre tumra ḳoio, ‘Sab, murshide ḳoisoin, sahabi oḳolre loia ami zeḳano Azadi Idor ḳana ḳaitam, hou musafirḳana ḳan deḳai deukka.’
MAR 14:15 Tain tumrare ufor talat hazail-faṛail eḳ boṛo kuṭa deḳai diba. Tumra ono hoḳolta tiar ḳorio.”
MAR 14:16 Teu sahabi oḳol gia ṭauno hamaila. Hamaia Isae zelaḳan ḳoisla, ṭik ou laḳan hoḳolta faila ar idor ḳana tiar ḳorla.
MAR 14:17 Hainja bala Isae tan barozon sahabire loia ono aila.
MAR 14:18 Aia ḳani kaoar shomoy tain ḳoila, “Ami tumrare hok kota ḳoiram, tumrar mazor eḳzone-u beimani koria amare dorai dibo, he oḳon amar loge boia ḳar.”
MAR 14:19 Ikan hunia tara kub bezar oigela. Ar eḳ ek kori zikaila, “Huzur, i zon kita ami ni?”
MAR 14:20 Tain ḳoila, “He ou barozonor mazor-u eḳzon. He oḳon amar loge talo at harar.
MAR 14:21 Bin-Adomor moutor befare Asmani Kitabo zela leḳa ase, tan mout to oula-u oibo, oile afsus hou manshor lagi, ze tanre doraia dibo. Duniat tar zonom na oa-u, tar lagi bout bala asil.”
MAR 14:22 Ḳanat roisoin, ou shomoy Isae ruṭi ato loia Allar shukria adae ḳoria, siṛia ṭukra ṭukra ḳori sahabi oḳlor ato dia ḳoila, “Ou neo, mono ḳoro ita amar shoril.”
MAR 14:23 Bade tain anguror shorbotor fiala loia Allar shukria zanaia erare dila. Era hoḳole ou fiala taki shorbot ḳaila.
MAR 14:24 Isae ḳoila, “Ḳao, mono ḳoro ita amar lou. Ou lour zoriae Adom zatir boutor basibar lagi noya usilla ḳaim ḳora oibo.
MAR 14:25 Ami hasa ḳota ḳoiram, zei forzonto Allar bashshait dakil oia ami anguror shorbot na ḳaisi, oto din i laḳan shorbot ar ḳaitam nae.”
MAR 14:26 Heshe hoḳole mili ek gozol gaia, gor taki bar oia Zoytun faṛo gelagi.
MAR 14:27 Faṛo gia Isae tan sahabi oḳolre ḳoila, “Tumra hoḳole-u to amare falaia bagibae. Allar kalamo ase, ‘Ami falor raḳalre marilimu, teu falor meṛain sairobae sitriziba.’
MAR 14:28 Oile amare murda taki zinda ḳorar bade, tumrar age-u ami Galilo zaimugi.”
MAR 14:29 Fitore tanre ḳoila, “Huzur, hoḳol bagi gele-o ami bagitam nae.”
MAR 14:30 Isae ḳoila, “Te huno, ami tumare ḳoiram, aiz fotabala murgae duibar bang dibar age-u, tumi tinbar ḳoibae, tumi amare sino na.”
MAR 14:31 Oile Fitore aro boṛo golae ḳoila, “Huzur ou kita ḳoin, afnar loge zudi amar moron-o oy, ta-o ami kunumonte-u ḳoitam nae ami afnare sini na.” Hoḳol sahabie-o ou laḳan ḳoila.
MAR 14:32 Bade Hozrot Isae tan sahabi oḳolre loia Getshimani namor eḳ bagano aila. Aia tain erare ḳoila, “Ami zoto shomoy dori dua ḳormu, oto shomoy tumra ono boat roio.”
MAR 14:33 Oḳan ḳoia tain Fitor, Iakub ar Hannanre tan loge raḳla, monor duk ar zalae tain boṛo toklif faila.
MAR 14:34 Tain erare ḳoila, “Duke amar zan baroi zargi. Tumra hoḳol ono ro ar hozag taḳo.”
MAR 14:35 Ḳoia tuṛa horia gia tain maṭit soizdat foṛia aroz ḳorla, shombob oile i mosibotor oḳtḳan horizibar lagi.
MAR 14:36 Tain ḳoila, “O abba, amar oli, tumi to hoḳolta-u ḳortae faro. Tumi amar ufor taki aneoala ou mosibotḳan horailao. Oile ita amar ichchae nae, tumar morzi mafik-u ouk.”
MAR 14:37 Soizda taki uṭia tain sahabi oḳlor gese aia deḳla, era gumai gesoin. Ou tain Fitorre hozag kori koila, “Saimon, tumi gumai gelae ni? Ekḳan gonṭa-o hozag roitae farlae na ni?
MAR 14:38 Hozag ro, forikka taki bastae ḳori dua ḳoro. Dilor maze nisoy kial ase, oile ḳaya to ḳomzur.”
MAR 14:39 Bade tain hirbar gia hou eḳoi dua ḳorla.
MAR 14:40 Firia aia deḳla, era hirbar gumai gesoin, gume tarar souk falai der. Tara Isare kita zuaf dita, kunta buzla na.
MAR 14:41 Tin nombor bar tain aia erare ḳoila, “Tumra deki oḳono arame gumairae. Aichcha oise, shomoy aichche to. Deḳrae ni, bin-Adomre gunagar oḳlor ato shomzai deoa or.
MAR 14:42 Uṭo, amra roana dei. Amare zegie dushmonor ato dorai dibo, he aia azigese.”
MAR 14:43 Tain erar loge mato roisoin, ou shomoy Ihuda hono ailo. He asil barozon sahabir mazor eḳzon. Tar loge oia aro boute laṭi-soṭa-toluar loia ailo. Boṛo imam, moulana ar murobbi oḳole erare faṭaisoin.
MAR 14:44 Tanre zegie doraia dito, he tar logor erare age hikaia disil, “Ami gia zen galo hunga dimu, ein-u hou zon. Tumra enre bondi koria kub shabdane loia zaio.”
MAR 14:45 Teu Ihudae shuza-shuzi Isar gese gia ḳoilo, “Huzur!” Ḳoia he tanre hunga dilo.
MAR 14:46 Loge loge tara aia Isare dorililo.
MAR 14:47 Tan ḳandat zera ubat asla, era eḳzone nizor toluar bar ḳoria fordan imamor gulamre sed marla, sedor loge tar ek kan ḳaṭia foṛigelo.
MAR 14:48 Isae ota manshore ḳoila, “Kita ba, ami kunu sur-ḍaḳait ni, tumra deki laṭi-soṭa-toluar loia amare dorat aiso?
MAR 14:49 Ami to forteḳ din Baytul-Mukaddoso gia tumrar samne-u talim ditam. Ou shomoy to tumra amare dorlae na. Nisoy Allar kalamor ayat to folite oibo.”
MAR 14:50 Tanre bondi korte-u tan hoḳol sahabi tane toia bagi gela.
MAR 14:51 Ḳali eḳzon zuane ekkan longi findia tan ḳore ḳore gelo. Oile manshe zebla tare-o dorta saila,
MAR 14:52 he tar longi falaia lemṭa oia douṛaia bagilo.
MAR 14:53 Ou manshe Hozrot Isare doria hari fordan imamor gese loia gelo. Hono boṛo imam oḳol, murobbi ar moulana oḳol-o ekḳano dola oila.
MAR 14:54 Sahabi Fitor Isar ges tone duroi hori hori roia tan ḳore ḳore gia fordan imamor baṛir uṭano gela. Gia hono faradar oḳlor loge milia aguin tabanit boila.
MAR 14:55 Boṛo imam oḳole ar fotua komiṭir hoḳol manshe Isare zane marar lagi kunu nalish tukaila, oile faila na.
MAR 14:56 Mozliso Isar birudde boute misa shakki dile-o, tarar shakkir mil oilo na.
MAR 14:57 Teu aro ḳoyzone tan birudde ou misa shakki dilo. Tara ḳoilo,
MAR 14:58 “Amra hunchi, he ḳoise, manshor ator banail Zeruzalemor ou Kaba Shorif, ami bangilimu, ar tin dinor maze kunu manshor at na lagaia ami arokkan banaimu.”
MAR 14:59 Oile erar shakki-o millo na.
MAR 14:60 Heshe fordan imam ubaia hoḳlor samne Isare zikaila, “Oba, tumi kunu mator zuaf ditae na ni? Ita manshe tumar befare kita shakki dira, hunrae ni?”
MAR 14:61 Oile tain kunu zuaf na dia nirai roila. Fordan imame tanre hirbar zikaila, “Tumi kita Allatalar oada ḳora hou al-Mosi ni, tan ḳas mayar zon Ibnulla ni?”
MAR 14:62 Tain zuaf dila, “Ji oy, ami-u hein. Afnara deḳba, ami bin-Adom arshe-azimo Alla Rabbul Alaminor ḍainor toḳto boat asi. Ar deḳba, ami behesti megor kuṭit oia duniat toshrif aniar.”
MAR 14:63 Ikan hunia-u fordan imame nizor finnor ḳafoṛ siṛia ḳoila, “Ar kunu shakkir zorur ase ni?
MAR 14:64 Afnara nizor ḳane-u to hunla, he shiriki korlo. Te oḳon afnara kita ray diba?” Ou tara hoḳole tane dushi shaibosto ḳoria, zane marilibar hukum dilo.
MAR 14:65 Ḳeu ḳeu tan ufre sef dilo. Tan muk bandia gushi maria ḳoilo, “Hoi, tuin bule nobi, te oḳon ohi kos na.” Bade sifai oḳole-o tane nia mair-doir ḳorlo.
MAR 14:66 Fitor zebla lamat uṭano asla, ou shomoy fordan imamor eḳ bandi beṭi tan ḳandat gelo.
MAR 14:67 Gia tanre aguin tabanit dekia, bala ḳori tan bae saia hari koilo, “Afne-o to ou Nasarotor Isar loge asla.”
MAR 14:68 Fitore oshikar ḳoria ḳoila, “Na go, tumi ou kita ḳoirae? Ami ita kunta-u zani na, buzi-o na.” Oḳan ḳoia Fitor geiṭor daro gela, ar ou shomoy murgae bang dilailo.
MAR 14:69 Bandi beṭie zebla deḳlo, Fitor ono gia ubaisoin, ou tan ḳasat uba manshore gia tai koilo, “Ou beṭa-o erar logor eḳzon.”
MAR 14:70 Fitore hirbar na ḳorla. Oile tan ḳandat zera uba asil, tuṛa bade tara ḳoila, “Tumi nichchoy erar logor, tumar baṛi-o to Galil zilat.”
MAR 14:71 Fitore ḳoila, “Allar gozob foṛouk, ami kosom ḳaia ḳoiar, tumra ou zar ḳota ḳoirae, tare ami sini-o na.”
MAR 14:72 Oḳan ḳoite-u murgae duara bang dilo. Bang hunia-u Fitoror mono oigelo, Isae ḳoisla, “Murgae duibar bang dibar age-u tumi tinbar ḳoibae, tumi amare sino na.” Oḳan mono oite-u tain au au ḳori kandon dorla.
MAR 15:1 Boṛo imam oḳole sobre uṭia murobbi oḳol, moulana ar fotua komiṭir hoḳlor loge foramish ḳoria, Hozrot Isare bandia Ruman hakim Filator gese loia gela.
MAR 15:2 Gia harle hakim Filate Isare zikaila, “Tumi kita Ihudi oḳlor bashsha ni?” Tain ḳoila, “Afne ṭik kota-u ḳoira.”
MAR 15:3 Boṛo imam oḳole tan name bout nalish dila.
MAR 15:4 Filate hirbar ḳoila, “Tumi kunta zuaf ditae na ni? Deḳrae ni, tara tumar birudde ḳoto nalish der.”
MAR 15:5 Oile Isae kunu zuaf na deoae Filat taijjub oigela.
MAR 15:6 Azadi Idor shomoy hakime deshor manshor fosond mafik, eḳzon azotire ḳalas dita.
MAR 15:7 Ou shomoy Barabba namor eḳzon manush zelo asil. Shongramor shomoy he fouzor loge roia manush kun ḳorsil.
MAR 15:8 Manshe Filator gese aia dabi zanaila, “Afne afnar nizor reoaz mafik kam ḳoroukka.”
MAR 15:9 Tain zikaila, “Tumra sairae ni, ami Ihudi oḳlor bashshare saṛi ditam?”
MAR 15:10 Filate zanta, boṛo imam oḳole ingsha ḳoria Isare nia tan ato disoin.
MAR 15:11 Boṛo imam oḳole manshore uskaia dila, manshe Isar mukti na saia Barabbar mukti sain.
MAR 15:12 Erdae Filate hirbar manshore zikaila, “Te tumra zare Ihudir bashsha ḳo, tare ami kita ḳortam?”
MAR 15:13 Tara hoḳole sillani lagailo, “Tare solibo deo.”
MAR 15:14 Tain ḳoila, “Ḳene, he kita dush ḳorse?” Oile manshe aro zure zure sillaia ḳoilo, “Solibo deo.”
MAR 15:15 Teu Filate tarare kushi korta ḳori Barabbare ḳalas dilaila, ar Isare besh ḳori sabuk maria, solibo loṭḳaia zane marar hukum dila. (Solib oilo laḳṛidi banail manshore loṭḳaia marar eḳ zinish.)
MAR 15:16 Bade sifai oḳole Isare doria fordan hakimor baṛir bitre loia gela. Hono tara aro sifai oḳol dola ḳorla.
MAR 15:17 Tara Isare baingoni rongor bashshai lebas findaila, ar gosa-ḳaṭa dia mukuṭ banaia tan matat dila.
MAR 15:18 Bade tara moshkora ḳori misil dilo, “Ihudir bashsha, marhaba.”
MAR 15:19 Ar eḳ laṭi ania bare bare tan matat marlo, gotro sef dilo, tane ijjot deḳanir ban ḳoria tan samne aṭu gaṛia boilo.
MAR 15:20 Ou laḳan ṭaṭṭa-moshkora ar bettomizi korar bade tan finnor baingoni lebas kulia, tan nizor ḳafoṛ findailo ar solibo nia zane marilito ḳori roana dilo.
MAR 15:21 Tara loia zaira ou shomoy Kurini elaḳar Sikondor ar Roufor baf, Saimon namor eḳzon manush gau taki ou fotedi aṭia zaoat asla. Sifai oḳole zur ḳoria enedi hou solib boaia nila.
MAR 15:22 Tara Isare Golgata, mani ‘Kollar Saṛ’ namor zagat loia gela.
MAR 15:23 Hono nia tanre mura namor oshud furail anguror shorbot ḳaite dila, oile tain ita ḳaila na.
MAR 15:24 Bade tara tanre solibo, mani gaso loṭḳailo. Sifai oḳole tan ḳafoṛ-sufoṛ baṭia neoar lagi loṭari maria baiggo forikka ḳorlo.
MAR 15:25 Biane noyṭar shomoy tara tanre zane marar lagi solibo gatilo.
MAR 15:26 Ar tan oforad-namar maze leḳlo, “Ihudir bashsha.”
MAR 15:27 Tara duizon ḍaḳaitre-o tan loge solibo loṭḳailo, eḳzon ḍain galat, oinnozon bau galat.
MAR 15:28 Erdae Allar kalamor ou ayat-o foligelo, “Tanre naforman oḳlor loge gona oise.”
MAR 15:29 Hou fotedi zera zaoat asil tara mata laṛaia Isare siṛaia ḳoilo, “Oi mia, tumi bule Kaba gor bangia tin dinor maze hirbar banaitae farbae!
MAR 15:30 Te oḳon solib taki lamia aia nizor zan basao na.”
MAR 15:31 Boṛo imam ar moulana oḳole-o tanre siṛaia mata-mati korla, “He to manshor zan basaito, oḳon nizor zan basaito farer na.
MAR 15:32 He bule oada ḳora hou al-Mosi, Boni Israilor bashsha! Te farle oḳon solib taki lamia auk, teu amra-o ota dekia iman anmu.” Tan ḍaine-baue zerare solibo loṭḳail oisil, tara-o tanre siṛailo.
MAR 15:33 Bade beil duifor taki zuhoror bad forzonto tin gonṭa asta desh andair oigelo.
MAR 15:34 Erbade-u tain kub zure zure ḳoila, “Eloi, eloi, lama sabaktani,” mani, “O amar Alla, amar Moula, tumi kene amar log saṛi dilae?”
MAR 15:35 Ou shomoy zera tan daro uba asil, tara ikan hunia ḳoila, “Huno, huno, he Hozrot Ilias nobire ḍaḳer.”
MAR 15:36 Oḳan hunia eḳzon manshe douṛaia gia ekkan tena ania ṭenga anguror shorbotor maze bizaia, eḳ laṭir matat bandia usa ḳori tanre ḳaite dilo. He ḳoilo, “Ouk, deki na Iliase tare lamaia neoat ain ni.”
MAR 15:37 Heshe Isae zure aoaz ḳoria aḳeri dom falaia inteḳal ḳorla.
MAR 15:38 Loge loge Zeruzalemo Kaba goror Herem Shorifor fordaḳan, ufre taki tol forzonto siṛia dui ṭukra oigelo.
MAR 15:39 Sifair ze ofisar hono fara deoat asla, ein Isar moutor i halot dekia ḳoila, “Nichchoy, ein-u asla Allar ḳas mayar zon Ibnulla.”
MAR 15:40 Ḳoyzon beṭi manshe-o duroi ubaia ita deḳla, erar maze asla Mogdilini Moriom, Iusi ar huru Iakubor ma Moriom, ar Bibi Salumi.
MAR 15:41 Isa zebla Galilo asla, ou shomoy ou beṭin hamesha tan loge loge roita ar tan kezmot ḳorta. Aro bout beṭi manush, zera tan loge oia Zeruzalemo aisla, tara-o ita deḳla.
MAR 15:42 I din asil intezamor din, mani Ihudir Zummabaror agor din, ou din shuruz ḍubar bade tone kunuzat ḳam ḳora haram asil.
MAR 15:43 Erdae ou biali bala fotua komiṭir ijjoti montri, Arimatia gaur Iusuf namor eḳzon manshe, shaosh ḳoria hakim Filator gese aia, Hozrot Isar lash nita saila. Allar bashshai kaim oar lagi ein bar saoat asla.
MAR 15:44 Filate hunia kub taijjub oigela zen, Isae oto zoldi kori inteḳal formaisoin. Erdae tain sifair subedarre ania zikaila, hasau Isar ruhu baroi gese ni.
MAR 15:45 Subedare zebla ḳoila, “Ji oy, tain mara gesoin”, ou Filate Isar lash Iusufor zimmae shomzai dila.
MAR 15:46 Iusufe gia ḳafonor ḳafoṛ ḳorid ḳori ania, Isar lash solib taki lamaia, ḳafon findaia, fattor ḳaṭia banail ek koyboror maze tanre dafon ḳorla, i laḳan ḳoyboro maṭi deoa lage na. Erdae tara boṛo eḳ fattor goṛiaia ania ḳoyboror muko dila.
MAR 15:47 Ou shomoy Mogdilini Moriom ar Iusir ma Moriome deḳla, tanre kun zagat dafon ḳorsoin.
MAR 16:1 Tarar zummar din shesh oia harle Mogdilini Moriom, Iakubor ma Moriom ar Bibi Salumie, Hozrot Isar lasho maḳanir lagi kushboy-ala moshla loia anaila.
MAR 16:2 Haftar foyla din biane, mani Robibare fozore shuruz uṭar loge loge-u era tan ḳoyboror ḳasat gela.
MAR 16:3 Ou shomoy tara eḳe-oinne zikaila, “Ḳoyboror mukor ou fattor ḳe horaiba?”
MAR 16:4 Mati mati tara saia deḳla, i fattor horail oigese. Fattorṭa asil kub boṛo.
MAR 16:5 Bade tara ḳoyboro hamaia deḳla, eḳ zuan beṭae dola ḳafoṛ findia ḍain galat boi roisoin. Ene dekia tara kub taijjub oigela.
MAR 16:6 Ou hein ḳoila, “Taijjub oio na go. Tumitain to Nasarot gaur Isare-u tallash ḳorrae, zenre solibo gatia zane mara oise? Tain oḳon ino nae, tanre zinda ḳora oise. Dekizao, ou zagat-u tanre dafon ḳora oisil.
MAR 16:7 Te tumitain oḳon zao, gia tan sahabi oḳolre ar Fitorre-o ḳo, tain age zelaḳan ḳoisla, oula tumrar age Galilo zaira. Tumra hono gele tan doroshon faibae.”
MAR 16:8 Ikan hunia beṭinte ḳoybor taki bar oia douṛaia bagila. Tara taijjub bonigela, ḍoror suṭe ḳeurore kunta ḳoila na.
MAR 16:9 Haftar foyla din fozor oḳto Isa murda taki zinda oia uṭla, ar foyla-u Mogdilini Moriomre doroshon dila. Ou Moriomor log taki tain shatgu zinnat saṛaisla.
MAR 16:10 Tan doroshon faia-u Moriome gia Isar logor hoḳolre ḳobor zanaila. Ou shomoy tara ḳanda-ḳaṭi ar ahazari korat asil.
MAR 16:11 Oile tain zinda oisoin ar Moriomre doroshon-o disoin, ita tara ḳeu ekin ḳorla na.
MAR 16:12 Bade tan duizon ummote aṭi aṭi gau baedi roana oila, ou shomoy Isae tan surot bodlaia tarare doroshon dila.
MAR 16:13 Tara gia baki hoḳolre ou ḳobor zanaila. Oile tarar ḳota-o era ekin ḳorla na.
MAR 16:14 Heshe Hozrot Isae tan egaro zon sahabire doroshon dila. Ou shomoy era ḳaoat asla. Murda taki zinda oar bade zera tanre deḳsil, tarar ḳota ekin na ḳorae, erar imanor ḳomzuri ar dilor na-humarir lagi tain erare domḳaila.
MAR 16:15 Ar ou sahabi oḳolre ḳoila, “Tumra duniar tamam zagat zao, gia hoḳol manshor gese Allar batail kush-ḳobri toblig koro.
MAR 16:16 Ze manshe iman ania toubar gusol ḳore, he-u rehai faibo. Ze manshe iman anto nae, he Allar dorbaro dushi bonia shaza faibo.
MAR 16:17 Zera iman anbo, erar maze ou nishana deḳa zaibo: amar name tara zinnat saṛaibo, noya noya bashae gaibi buli matibo.
MAR 16:18 Tara zati hafre ato loiba, bezuita bishakto kunta ḳaile-o tarar kunu ḳeti oito nae. Ar kunu bemarire ataia dile bemar shifa oizibo.”
MAR 16:19 Sahabi oḳlor loge batchit ḳorar bade Hozrot Isare arshe-azimo tulia neoa oilo. Hono tain Alla Pakor ḍainor toḳto toshrif raḳsoin.
MAR 16:20 Bade sahabi oḳole hoḳol zagat gia toblig korla. Hozrot Isae erar mazdi kam ḳorla, ar erare keramoti kamor takkot dia forman deḳaila, era zeta toblig korra, ita hasa. Amin.
LUK 1:1 Mohamainno Tiofilas, Afnar to zana ase, amrar maze zeta zeta goṭise, ita zera foyla taki-u nizor souke deḳsoin ar toblig-o ḳorsoin, erar mukor ḳota hunia balamonte shomzia hari, bout mumine leḳat lagsoin.
LUK 1:3 Erlagi oḳon ami-o adi-onto hokkolta tallash ḳoria, eḳ ek kori lekia afnare zanani kan bala mono ḳorlam.
LUK 1:4 Oḳan taki afne shomzita farba, afne age zeta talim hunchoin, ita ekkebare ṭik.
LUK 1:5 Raza Herude zebla Ehudia zila salaira, ou shomoy Zeruzalem ṭauno Baytul-Mukaddosor imam oḳlor mazor eḳzonor nam asil Zakaria. Tain Boni Israilor mul imam Harunor ḳandanor Abia dolor manush. Tan bibir nam Elisabet, ein-o Harunor bongshor manush.
LUK 1:6 Era duiozon-u Allar nozoro kamil dindar asla. Mabudor hoḳol hukum-ahkam shullo-ana adae ḳorta.
LUK 1:7 Oile era asla niaoladi, Bibi Elisabet oila aṭkura bemari. Ou halote duiozon murobbi oigesoin.
LUK 1:8 Ermaze oinno dolor imamotir din shesh oia tan nizor dolor imamotir bari ailo, teu Zakaria Allar goro imamotit asla.
LUK 1:9 Imamoti kamor niom mafik loṭari maria tane fosond ḳora oilo, zate tain Baytul-Mukaddosor fobitro Herem Shorifo hamaia agor-kushboy zalain.
LUK 1:10 Tain bitre ota zalaira, ar bare bout manshe dua-durud ḳorra.
LUK 1:11 Aḳta-u agor-kushboy zalanir ṭebulor ḍainedi Allar eḳzon firistae tanre doroshon dila.
LUK 1:12 Firistare dekia-u tan dil ḳafigelo, zano ḍor ailo.
LUK 1:13 Firistae ḳoila, “O Zakaria, ḍoraio na. Huno, Allar dorbaro tumar dua kobul oise. Tumar bibi Elisabetor goro eḳ fua oiba, tumi en nam rakio Ehia.
LUK 1:14 Ou fute tumar zindegit bout kushi baṛaiba, tain zonom loae aro bout zon kushi oiba.
LUK 1:15 Ein to Mabudor nozoro bout boṛo ijjoti oiba. Zindegie kunudin-u anguror shorab ba kunuzat nisha ḳaita nae. Tan maʼr feṭo taḳte-u Pak Ruhe kamil oiba.
LUK 1:16 Ar Boni Israilor bout manshore tarar Mabud Allar bae firaia anba.
LUK 1:17 Tain Ilias nobir laḳan himmot ar takkote malikor age oia aiba. Aia baf oḳlor dilre aolador bae, ar naforman oḳlor dilre forezgarir bae firaiba. Ou laḳan Mabudor lagi eḳ dol bondare tain furafur tiar ḳorba.”
LUK 1:18 Ita hunia Zakariae firistare ḳoila, “Er forman kita, ami kemne ekin ḳortam? Ami to buṛa oigesi, amar bou-o ekkere murobbi oigesoin.”
LUK 1:19 Firistae ḳoila, “Ami Zibrail, ami Allar samne azir taki. Tumar loge batchit ḳoria, ou kush-ḳobri tumare zananir lagi-u Allae amare bezisoin.
LUK 1:20 Dekio, amar ḳota shomoy moto folibo. Oile amar mat ekin na ḳorae, ikan folibar ag forzonto tumi buba bonizibae, kunta mattae fartae nae.”
LUK 1:21 Ibae manshe Zakariar lagi bar saira. Baytul-Mukaddosor bitoror ou pak zagat tan deri or dekia, tara hoḳol sintat foṛigela.
LUK 1:22 Bade Zakaria bar oia aila, oile tain kunta-u matta farla na. Tain buba oigela ar ishara-asharae buzaila. I halot dekia manshe buzilila, pak zagar bitre tain kunu doroshon faisoin.
LUK 1:23 Imamoti kamor bari shesh oia harle, tain nizor baṛit gelagi.
LUK 1:24 Erbade tan bibi Elisabetor feṭo hurutta ailo, erdae Elisabet fas mash baṛir bare bar oila na.
LUK 1:25 Tain ḳoila, “Ita to Allai lila-ḳela. Manshor gese ami ze kuṭar bagi oisi, ou kuṭar shorom horanir lagi tain amar bae kial ḳorsoin.”
LUK 1:26 Elisabetor feṭo zebla soy mashor hurutta, ou shomoy Galil zilar Nasarot gaut eḳzon abiati shoti nari asla, en nam Bibi Moriom. Allae Zibrail firistare tan gese bezila. Tan bia ṭik oisil, Bashsha Daudor ḳandanor Iusuf namor eḳzonor loge.
LUK 1:28 Firistae aia Bibi Moriomre ḳoila, “Assalamu alaikum; Alla Pake afnare rohomot ḳorsoin, tain afnar loge asoin.”
LUK 1:29 Ikan hunia Moriomor mon fereshan oigelo. Tain mone mone ḳoila, i salamor mani kita?
LUK 1:30 Firistae ḳoila, “O Moriom, afne ḍoraiba na, Allae afnare rohomot ḳorsoin.
LUK 1:31 Hunoukka, afnar goro eḳ fua foyda oiba, afne en nam raḳba, Isa.
LUK 1:32 Tain bout boṛo ijjoti oiba. Tanre ḳoa oibo Ibnulla, Allatalar ḳas mayar zon. Alla Mabude tan ḳandanor murobbi Bashsha Daudor godi tanre diba.
LUK 1:33 Tain dunia aḳerato Boni Israilor ufre bashshai korba, tan bashshai kunudin-u fuṛaito nae.”
LUK 1:34 Teu Bibi Moriome firistare ḳoila, “Ita kilan oibo? Amar to bia-shadi-u oise na.”
LUK 1:35 Firistae ḳoila, “Pak Ruhu afnar ufre nazil oiba, ar Allar kudroti saya afnar ufre aibo. Erdae-u afnar goro ze pak aolade zonom loiba, tanre Ibnulla, mani Allar ḳas mayar zon ḳoia ḍaḳa oibo.
LUK 1:36 Hunoukka, afnar kuṭum Bibi Elisabetor befare manshe ḳoita na ni, tan kunu hurutta-u oita nae? Oile oḳon to ou murobbi boyosho tan feṭo-o soy mashor fua ase.
LUK 1:37 Te Allae faroin na, ila kunta-u nai.”
LUK 1:38 Moriome ḳoila, “Ami to Allar bandi; afnar ḳotamoto-u hoḳolta folouk.” Bade firista tan ges taki bidae oigela.
LUK 1:39 Erbade Bibi Moriom uṛa-taṛa ḳori, Ehudia zilar eḳ faṛia gaut gela.
LUK 1:40 Gia hono imam Zakariar baṛit hamaia, tan bibi Elisabetre salam ḳorla.
LUK 1:41 Elisabete Moriomor aoaz hunar loge loge-u, tan feṭor hurutta aḳta loṛia uṭila. Tain Pak Ruhe kamil oia,
LUK 1:42 zure zure ḳoila, “Duniar tamam beṭintor maze tumi-u ḳofali, tumar feṭor sabal-o ḳofali.
LUK 1:43 Amar munibor ma amar goro toshrif anchoin, amar oto boṛo ḳofal kila oilo?
LUK 1:44 Ami tumar aoaz hunar loge loge-u, amar feṭor gedae-o kushie loṛia uṭisoin.
LUK 1:45 Tumi to ḳofali beṭi, ḳaron Mabude tumare zeta zanaisoin, tumi dile-zane ita ekin ḳorso.”
LUK 1:46 Ou Bibi Moriome ḳoila, “Amar ḳolbe tarif ḳorer amar Mabudor,
LUK 1:47 behesti kushie borigese amar ontor, toraora sand aisoin, obaginir gor.
LUK 1:48 Souk tulia saisoin doyal, ḳangal bandir bae, erdae-u tamam zatie shabash shabash gae, boṛo ḳofali koiba more, zug-zugantor.
LUK 1:49 Shoktimane ḳorla more oto boṛo ḳam, amar lagi oisoin tain kudroti asan, tain-u to Subohan Alla, fak-fobitro tain.
LUK 1:50 Zera tane tazim ḳori roin ḍoraia, rohom ḳoroin tain itare nizor zania, oarishe oarishe rohom, tain-u bilain.
LUK 1:51 Tan-u kudroti ate ḳorsoin moha ḳam, monor gorimae zetae ḳore boṛai shan, itare ḳedaia dia, boitol banaisoin.
LUK 1:52 Raza-bashshain hokir oila godi kuaia, hokir oḳol bashsha oila rohomot faia, usa-nisa hokir-bashsha, tain-u banaisoin.
LUK 1:53 Ufashi kangalre dila bala bala ḳani, bukashir feṭo gelo dami dana-fani, doni zonre ḳali ate, ḳedaia disoin.
LUK 1:54 Tain zela oada ḳorsla moy-murobbir loge, ola-u to asan ḳorsoin Boni Israilre, Boni Israil oila Allar afon gulam.
LUK 1:55 Ibrahimre iad raḳsoin rohom-borkot diba, loge tan ḳandane-o ou doya faiba, siroḳalin ou oada mono rakisoin.”
LUK 1:56 Bibi Moriom tan kuṭum Elisabetor gese tin mash roila, heshe tan nizor baṛit gelagi.
LUK 1:57 Bade miad fura oia harle Elisabetor goro eḳ fua oila.
LUK 1:58 Mabude tanre oto boṛo rohom ḳorsoin hunia, ari-fori ar ḳesh-kuṭum oḳol aia tan loge kushi-bashi korla.
LUK 1:59 Ihudi oḳlor reoaz mafik zonmor aṭ dinor din, fuar mosolmani ar akika ḳoranir lagi tara hoḳol dola oila. Tara saila, bafor namor laḳan fuar nam-o ouk.
LUK 1:60 Oile maʼe ikan manla na, tain ḳoila, “Na, er nam oibo Ehia.”
LUK 1:61 Tara ḳoila, “Tumar ḳesh-kuṭumor maze to ila nam ḳeuror nai.”
LUK 1:62 Teu tara isharae fuar bafre zikaila, tain kun nam fosond ḳoroin.
LUK 1:63 Zakariae tarar ges taki kata-ḳolom nia leḳla, “Tar nam Ehia.” Ou tara hoḳol taijjub oigela.
LUK 1:64 Ar loge loge-u Zakariar zoban kuligelo, tain mat-ḳota matila ar Allar shukria adae ḳorla.
LUK 1:65 Ita dekia ari-fori hoḳole ḍoraigela. Ehudia zilar faṛia oncholor hoḳol manshor muke muke ou ḳobor roṭigelo.
LUK 1:66 Zoto manshe i goṭona hunchil, tara hoḳole-u mone mone sinta ḳori koilo, boṛo oia harle i fua kita oibo. Ḳaron Mabudor kudroti at tan ufre asil.
LUK 1:67 Bade fuar baf Zakaria, Pak Ruhe kamil oia ou gaibi kobor ḳoila,
LUK 1:68 “Shukria zanai ami bondae Alla Mabudor, asan ḳorsoin tain nize afon Israilor, kial ḳori korla azad nizor gulam dol.
LUK 1:69 Amrar lagi fosond ḳorla Daud ḳandanre, bol-takkoti kanḍarire anla oḳan tone, deḳailae doyal more nazat ḳorra zon.
LUK 1:70 Nobi oḳole zobandi koisla bout age, tain-u ḳoaisla ita nobi oḳlor muke, takkoti kanḍari-u oiba Daud kulor bol.
LUK 1:71 Dushmon oḳlor ḳobza taki tain basaila, gin-ingsha ḳorra taki oḳon fana dila, amrare basaila aia doyal Moular zon.
LUK 1:72 Basaila amrare ḳali moy-murobbir ḳatire, ḳosom ḳora pak oada furanir niote, moy-murobbire zoban deoae amra basilam.
LUK 1:73 Ḳosom ḳori oada ḳorsla doyal Allae, Ibrahimre zanaila tain nazator ufae, Ibrahim nobi-u oila amrar asol baf.
LUK 1:74 Amrare basaita ḳori Moular ou ḳosom, dushmon taki basar lagi batai dila niom, zinda zudin asi amra nisinta roitam. Ḍor-ḳof saṛa amra zanu ḳori ebadot, forezgar ar sohi fote taki nirafod, tan samne roia zate ḳori tan kezmot.
LUK 1:76 Ore amar mayar fut Ehia babaji, tumare to ḍaḳa oibo Allatalar nobi, munibor age roia sohi korbae fot.
LUK 1:77 Batai dibae tumi tan bonda oḳolre, guna mafir fot sinba tumar talime, bataia dibae baba nazat faoar fot.
LUK 1:78 Amrar Allar rohom ar hou mohobbote, behesti nuror eḳ shuruz aiba ufrete, amrar ufre aia hari rakiba nozor.
LUK 1:79 Mout ar andarir gato zera ḳaṭae din, nuror fot deḳba tara ḳoria ekin, amrare-o shantir fote salaiba ou zon. Ou huzur nazil oia deḳaiba kudrot, tain-u hou oada ḳora Allai rohomot.”
LUK 1:80 Bade Ehia aste aste boṛo oila, loge oia tan ruhani bol-o baṛilo. Boni Israilor samne kula-mela zair oibar ag forzonto, tain morubumir maze din ḳaṭaila.
LUK 2:1 Ou shomoy Ruman bashsha Agosto Ḳoisore hukum dila, tan asta bashshair hoḳol prozae zarzir nam leḳanir lagi.
LUK 2:2 Siriar hakim Kuriniasor amolo, ou foyla bar manush gonar lagi nam leḳail oilo.
LUK 2:3 Teu nam leḳanir lagi hoḳol manush zarzir buniadi gaut gela.
LUK 2:4 Ou laḳan Iusuf-o nam leḳanir lagi Galil zilar Nasarot gau taki Bashsha Daudor gaut aila. Tain to Daudor ḳandanor manush. Gaur nam Betelham, iṭa Ehudia zilat.
LUK 2:5 Bibi Moriom-o ou Iusufor loge oia nam leḳanit gela. Ou Iusufor loge-u tan shadi ṭik oisil, ar tan feṭo ou shomoy hurutta asil.
LUK 2:6 Betelhamo taḳte-u Moriomor hurutta oibar bishe dorlo.
LUK 2:7 Ar tan foyla fuar zonom oilo. Oile hino kunu meman ḳanat taḳar zaga millo na, erdae Moriome ou huruttare tenadi beraia gual goror ḳeror gamlat hutai toila.
LUK 2:8 Ou Betelham gaur ḳandat bondor maze, meṛar raḳal oḳole raitkur bala tarar meṛa fara deoat asil.
LUK 2:9 Aḳta-u Allar eḳ firista tarar samne aia doroshon dila, ar Mabudor nuror teze sairobae for oigelo. Ita dekia raḳal oḳol ḍoror suṭe bedisha bonigela.
LUK 2:10 Oile firistae tarare ḳoila, “Tumra ḍoraio na. Ami tumrar lagi kub kushir ḳobor loia aisi. I kush-ḳobri duniar tamam manshor lagi.
LUK 2:11 Huno, tumrar toraneala aiz Daudor gaut zonom loisoin. Tain-u al-Mosi, tain-u Malik.
LUK 2:12 Tumra gia er forman deḳbae, deḳbae ek kasa huruttare tenadi beraia, gual goror ḳeror gamlat hutaia toa oise.”
LUK 2:13 Ou shomoy aḳta-u hou firistar loge aro bout firistare deḳa gelo. Era Allar zikir-azkar ḳori kori koila,
LUK 2:14 “Asmano Allar lila-ḳela deḳa zauk, duniar bukut tan fiara bondar shanti ouk.”
LUK 2:15 Bade firista oḳol tarar ges taki asmano gia harle, raḳal oḳole eḳe-oinnore ḳoilo, “Ao, amra Betelhamo zai. Mabude amrare ze ḳobor zanaila, ota dekia ai.”
LUK 2:16 Mati mati tara zoldi kori gela, gia Moriom, Iusuf ar ḳeror gamlat hutail ou huruttare faila.
LUK 2:17 Faia ou huruttar befare tarare ze ḳobor zanail oisil, ita tara hoḳolre ḳoila.
LUK 2:18 Tarar mat hunia hoḳole-u taijjub oigela.
LUK 2:19 Oile Moriome hoḳolta dilor maze gatia raḳla, ar mone mone sintat roila.
LUK 2:20 Firista oḳole raḳal oḳolre zela ḳoisla, era ita dekia hunia Allar zikir tarif ḳori kori firot gelagi.
LUK 2:21 Bade zonmor aṭ dinor din akika ar mosolmani koranir bala, tan nam raḳa oilo Isa. Maʼr feṭo aibar age-u firistae ou nam toisla.
LUK 2:22 Ermaze Musa nobir shoriot mafik tarar fak-saf oar shomoy oilo. Teu Isare Mabudor ato shofia dibar niote, Iusuf ar Moriome tane loia Zeruzalem ṭauno aila.
LUK 2:23 Mabudor shoriotor hukum asil, forteḳ zandaror foyla fuare Allar name shofia dite oibo.
LUK 2:24 Erloge, eḳ zuṛa ḍufi faki ba faror duiṭa baichcha kurbani dite oibo, shoriotor ou hukum mafik tara kurbani deoat aila.
LUK 2:25 Ou shomoy Zeruzalem ṭauno Samaun namor eḳzon Allaraia buzurg asla, tain Pak Ruhe kamil. Tain mone mone bar saoat asla, Allae kun shomoy Boni Israilre shanti diba.
LUK 2:26 Pak Ruhu tan loge asla, ou ruhe tanre bataisla, tan moutor age-u Allar oada ḳora al-Mosire tain deḳba.
LUK 2:27 Pak Ruhur isharae Samaun ou din Baytul-Mukaddoso azir oila. Isar ma-bafe-o shoriotor hukum adae ḳorar niote, geda Isare loia ono aila.
LUK 2:28 Ou kamil buzurg Samaune Isare kulo loia Allar shukria adae ḳorla. Tain ḳoila,
LUK 2:29 “O malik, tumar zoban mafik tumar i gulamre oḳon shantie bidae deo.
LUK 2:30 Adom zatire toranir lagi, tamam manshor souḳor samne, tumi ze usilla ḳaim ḳorso hou al-Mosire amar niz souke dekia gelam.
LUK 2:32 Tumar ḳas proza Boni Israilor gourob to ein-u, bad-baki tamam zatire-o fot deḳanir nur.”
LUK 2:33 Samaune Isar befare ou zeta ḳoila, ita hunia Isar ma-baf taijjub oigela.
LUK 2:34 Samaune tarare dua dila, tain Isar ma Moriomre ḳoila, “Huno, Alla Pakor kial oilo, ou huruttar dorun Boni Israilor bout zone nazat hasil ḳorba, ar bout zon lannoti oiba. Tain ou laḳan eḳ nishana, tan bifokke boute-u matibo.
LUK 2:35 Ota taki tarar dilor hal-hokikot buza zaibo. Ar huno, toluare ḳaṭile zela oy, tumar dilo-o ola dukor sel hamaibo.”
LUK 2:36 Ou shomoy Hanna namor eḳzon beṭi manush-o asla, tain Allar nobi. Tan bafor nam Fanuel, ar ḳandanor nam Ashir. Tan bout boyosh oigese, shat bosor zamair gor ḳoria hari,
LUK 2:37 sourashi bosor forzonto ṛaṛi halote asla. Tain Baytul-Mukaddosor bitre ruza raḳta ar dua ḳorta. Ebadot-bondegir maze rait-din ḳaṭaita, bare bar oita na.
LUK 2:38 Ṭik ou shomoy tain-o ono aia Allar shukria adae ḳorla. Ar zerar dilo ou asha asil, Alla Pake Zeruzalemre azad ḳorba, tarar loge-o tain Isar befare batchit ḳorla.
LUK 2:39 Moriom ar Iusufe Mabudor shoriot mafik hoḳol ḳam shesh ḳoria harle, tarar boshot baṛi Galil zilar Nasarot gaut gelagi.
LUK 2:40 Nabalik Isar boyosh baṛilo, erloge tain shorilor bol ar ilim-aḳole-o mozbut oila. Allar rohomot to tan loge asil.
LUK 2:41 Ihudi oḳlor Azadi Idor shomoy aile Isar ma-baf forti bosor-u Zeruzalemo zaita.
LUK 2:42 Isar boyosh zebla baro bosor, ou shomoy-o hou reoaz mafik tara Zeruzalemo aila.
LUK 2:43 Id shesh oia harle tara baṛit roana dila, oile Isa ou shomoy i dolor loge na gia Zeruzalemo roigela. Tan ma-bafe ikan ṭer faila na.
LUK 2:44 Isa-o dolor bitre asoin mono ḳoria tara eḳdinor fot aguai gela. Gia tarar ḳesh-kuṭum ar logor manshor gese tallash ḳoria tanre faila na.
LUK 2:45 Na faia tanre tukai tukai hirbar Zeruzalemo aila.
LUK 2:46 Tin din tallash ḳoria tanre Baytul-Mukaddoso faila. Tara deḳla, tain moulana oḳlor loge boia tarar boyan hunra, ar nanan musla zikaira.
LUK 2:47 Ar zoto manshe tan mat hunla, tara hoḳole-u tan aḳoldari batchit hunia taijjub bonigela.
LUK 2:48 Tan ma-bafe-o tanre dekia ekkere somkigela. Maʼe tanre zikaila, “Futre, tumi amrar loge ita ḳorlae ḳene? Ami ar tumar bafe ḳoto fereshan oia tumare tukairam.”
LUK 2:49 Isae zuaf dila, “Tumitain ḳene amare tukairae? Zano na ni, ami to amar gaibi bafor goro-u roite oibo?”
LUK 2:50 Tan ma-bafe i mator kunu bed buzla na.
LUK 2:51 Bade tain bar oia ma-bafor loge oia Nasaroto gela, ar tarar ḳotamoto solla. Oile tan maʼe ita hokkolta dilo gatia raḳla.
LUK 2:52 Ermaze Allar mohobbot, manshor maya, boyosh ar ilim-aḳole tain aste aste boṛo oila.
LUK 3:1 Ruman bashsha Tibirio Ḳoisoror bashshair fonro bosor soler. Ou shomoy Fontio Filat asla tan odinor Ehudia zilar hakim, ar Herud asla Galil zilar raza, Herudor bai Filif asla Zituria ar Takuniti zilar raza, ar Lusanias asla Abilini zilar raza. Era hoḳol-u asla Ruman bashshar odine.
LUK 3:2 Ou amolor Ihudi zatir fordan imam asla, imam Hanon ar Kayafa. Ṭik ou shomoy Zakariar fut Ehiar gese morubumi elaḳat Allae tan kalam nazil ḳorla.
LUK 3:3 Teu Ehia nobie Zordan gangor ḳanda-ḳasar hoḳol ḳano gia toblig korla. Ḳoila, guna taki mafi faoar lagi touba ḳoria torikar gusol ḳora zorur.
LUK 3:4 Ehia nobir befare Ishaya nobir kitabo zela leḳa asil, tain oula ḳorla. Leḳa ase, Morubumir maze eḳzone elan ḳorra, tumra malikor fot sohi koro, tan solar rasta oḳol shida ḳoro.
LUK 3:5 Faṛia hokkol nisa zaga boraṭ oibo, usa-nisa ṭillain homan ḳora oibo. Teṛa-beḳa hoḳol fot shuza oibo, gat-gaṛa hoḳolta homan ḳora oibo.
LUK 3:6 Ar duniar manshore toranir lagi Allae nazator ze usilla ḳorsoin tamam manshe-u ita deḳba.
LUK 3:7 Ehia nobir toblig hunia toubar gusol ḳorar niote zera ailo, tain erare ḳoila, “O hafor baichchain, asmani gozob aior dekia zan basanir fot tumrare ḳegie batai dilo?
LUK 3:8 Hasau zudi tumra touba ḳoria taḳo, te er fol-o deḳao. Mone mone ḳoio na, tumra Ibrahimor aolad. Huno, ami koiram, Allae saile to ou fattor oḳol taki-u Ibrahimor aolad banaita farba.
LUK 3:9 Gasor guṛit to kuṛal lagail-u ase. Ze gaso bala fol dore na, i gas ḳaṭia agunit falail oibo.”
LUK 3:10 Ita hunia manshe Ehiare zikaila, “Te amra kita ḳortam?”
LUK 3:11 Tain ḳoila, “Ḳeuror zudi duiṭa kurta taḳe, te zar nai tare eḳṭa deuk. Zar goro dan-saul ase, he-o oula bilauk.”
LUK 3:12 Ḳazna tulra ḳoyzon toshildare toubar gusol ḳorat aia zikaila, “Murshid, amra kita ḳortam?”
LUK 3:13 Tain ḳoila, “Niom taki beshi ṭeḳa adae ḳorio na.”
LUK 3:14 Ḳoyzon sifaie-o zikaila, “Huzur, te amra kita ḳortam?” Tain ḳoila, “Ḳeurore zur-zulum ḳoria ba fando falaia kunta adae ḳorio na. Zarzir betone kushi roio.”
LUK 3:15 Manshe mone mone al-Mosir lagi bar saoat asil, Ehiare dekia tara kub asha ḳorlo, ein-u monoloy al-Mosi.
LUK 3:16 Oile Ehiae tarare ḳoila, “Ami kali fanidi toubar gusol ḳoraiar, te amar bade zein toshrif anra, tain ama taki-o takkot-ala. Tan faor zutar fita gesa kular zuka-o ami nae. Tain aile Pak Ruhu ar aguin dia tumrare gusol ḳoraiba.
LUK 3:17 Tan kula to tan ato-u ase, maṛa deoa dan ou kuladi uaia hari dan nia ugaro tulba, ar susare omon agunit falai zalaiba, ze aguin kunudin nibe na.”
LUK 3:18 Ou laḳan aro bout nosiot ḳoria Ehiae manshor gese kush-ḳobri toblig korla.
LUK 3:19 Oile Raza Herude bout nomunar ḳaraf ḳam ḳorae, ar tar bair bou Herudiare hanga ḳorae, Ehiae tare dushi shaibosto ḳorla.
LUK 3:20 Erdae he tar hoḳol ku-ḳamor loge eoḳan-o baṛailo, he nobi Ehiare zelo haraililo.
LUK 3:21 Ehia nobi zelo hamanir age, tan gese aia zebla bout manshe toubar gusol ḳorra, ou shomoy Isa-o ono aia tarar loge gusol ḳorla. Gusolor bade Isae zebla dua ḳorra, aḳta-u Allar arshor duar kuligelo,
LUK 3:22 ar Pak Ruhu faror surot doria tan ufre nazil oila. Loge loge behesti ou aoaz-o huna gelo, “Tumi-u amar ḳas mayar zon, tumar ufre ami kub kushi.”
LUK 3:23 Onuman tish bosor boyoshor ḳalo Isae toblig kam shuru ḳorla. Manshe zanta tain Iusufor fua. Iusufor moy-murobbi oila,
LUK 3:24 Ali, Mattat, Lebi, Malki, Iyannai, Iusuf,
LUK 3:25 Mattatia, Amuz, Naum, Isli, Naggai,
LUK 3:26 Mahat, Mattatia, Shimio, Iuseḳ, Iyuda,
LUK 3:27 Iuhannan, Risha, Zerbabil, Saltiel, Niri,
LUK 3:28 Malki, Addi, Kasam, Ilmadam, Iyer,
LUK 3:29 Iusa, Eliezer, Iurim, Mattat, Lebi,
LUK 3:30 Shimion, Ehuda, Iusuf, Iunan, Iliakim,
LUK 3:31 Malia, Manna, Mattata, Natan, Daud nobi,
LUK 3:32 Ias, Ubayed, Buaz, Selim, Nahish,
LUK 3:33 Aminadab, Admin, Arni, Hasir, Firuz, Ehuda,
LUK 3:34 Iakub nobi, Isʼhak nobi, Ibrahim nobi, Tareḳ, Nahur,
LUK 3:35 Saruz, Rau, Falez, Aber, Shaleḳ,
LUK 3:36 Kinan, Arfaksad, Sham, Nuh nobi, Lamaḳ,
LUK 3:37 Matushalaḳ, Idris nobi, Iared, Maholail, Kenan,
LUK 3:38 Inush, Shish nobi, Adom, Alla Pak.
LUK 4:1 Isa Pak Ruhe kamil oia, Zordan gango taki uṭia morubumit gelagi. Gia Pak Ruhur isharae eḳlaga sallish din morubumit gurila.
LUK 4:2 Ar Iblis aia tanre forikka salailo. Ou sallish din eḳlagare ruza asla, kunuzat ḳana ḳaisoin na. Erbade tan feṭo buk laglo.
LUK 4:3 Teu Iblise tanre ḳoilo, “Tumi zudi Ibnulla, Allar ḳas mayar zon o, te ou fattorre ḳo na ruṭi oizito.”
LUK 4:4 Isae zuaf dila, “Allar kalamo batail oise, ḳali ruṭi kaile-u manush base na.”
LUK 4:5 Bade Iblise tanre kub usa eḳ zagat loia gelo, nia hari eḳ foloḳe duniar tamam mulluk tanre deḳailo ar ḳoilo,
LUK 4:6 “I tamam mullukor bashshai ar zak-zomoḳ ami tumare dilaimu. Ita hokkoltar malikana amare deoa oise. Ami zare kushi tare ditam fari;
LUK 4:7 ḳali tumi amare soizda ḳorilao, teu i hokkolta tumar oizibo.”
LUK 4:8 Isae tare ḳoila, “Allar kalamo ase, tumi kali afon Mabud Allare soizda ḳorbae, ḳali tan ebadot ḳorbae.”
LUK 4:9 Teu he Isare loia Zeruzalem ṭauno gelo, gia fobitro Kaba gor Baytul-Mukaddosor minarar ufre tane uba ḳoria ḳoilo, “Tumi zudi Ibnulla, Allar ḳas mayar zon o, te deki sain, on taki fal dia lamat foṛo.
LUK 4:10 Kitabo to leḳa ase, Allae tan firista oḳolre hukum diba, ar tara tumare basaiba.
LUK 4:11 Tara nizor atdi tumare doriliba, zate tumar faot kunu fattoror suṭ na lage.”
LUK 4:12 Isae tare ḳoila, “Kitabo leḳa ase, tumi tumar Mabud Allare forikka ḳorat lagio na.”
LUK 4:13 Iblise tar hoḳol nomunar forikka shesh ḳoria, afatoto tan ges taki horia gelogi.
LUK 4:14 Bade Pak Ruhur kudrote Isa Galil elaḳat gela, gia harle tan nam sairobae roṭigelo.
LUK 4:15 Tain honor mosido mosido gia boyan-talim dila, teu hoḳol manshe tan tarif ḳorlo.
LUK 4:16 Ar Isa hou Nasarot gaut aila, ze gaut tain huru taki boṛo oisoin. Ono aia tain nizor niom mafik Zummabare mosido gia kutba foṛat ubaila.
LUK 4:17 Ishaya nobir sohifaḳan tan ato deoa oilo. Tain kitab kulia ou ayat bar ḳorla, ze ayato leḳa ase,
LUK 4:18 Amar dilo Mabudor ruhu boshot ḳoroin, tain-u amare ḳelafoti dia bezisoin, gorib oḳlor gese kush-ḳobri zananir lagi. Ar bondi oḳlor gese azadir ḳota, anda oḳlor gese souke deḳar ḳota, zerar ufre zulum or tarare basanir ḳota elan ḳorar lagi bezisoin.
LUK 4:19 Ar ou ḳota elan ḳorar lagi-o bezisoin, oḳon Mabudor rohomot deḳanir shomoy oigese.
LUK 4:20 Kutba tilaot ḳoria harle, tain kitabḳan aṭaia mosidor motollir ato dia boila, mosidor hoḳol manshe tan bae dian dori sai roise.
LUK 4:21 Tain ḳoila, “Asmani Kitabor i ayat ḳanain, aiz afnara hunar loge loge-u foligelo.”
LUK 4:22 Hoḳol manshe tan tarif ḳorlo, tan muk taki oto shundor boyan hunia taijjub oigelo. Tara ḳoilo, “Ein Iusufor fua nae ni ba?”
LUK 4:23 Ermaze Isae tarare ḳoila, “Afnara nisoy amare ou silleḳ hunaiba, ‘Ḍaktor sab, nizor bemar shifa ḳoro. Kofornaumo bule bout keramoti-muzeza deḳaiso, te oḳon nizor gaut-o ota deḳao na.’
LUK 4:24 Hunoukka, ami afnaintore hok kota ḳoiram, kunu nobire-u tan nizor gaur manshe manoin na.
LUK 4:25 Ar ikan-o hasa ḳota, Ilias nobir zomanat eḳlaga shaṛe tin bosor kunu meg oisil na, asta desho bezuita nidan asil. Hou shomoy to Israil desho bout ṛaṛi beṭin asla,
LUK 4:26 oile Ilias nobire era ḳeuror gese na bezia, ḳali Sidon deshor Sarifot gaur eḳ ṛaṛi beṭir gese beza oisil.
LUK 4:27 Ar Aliasha nobir amolo Israil desho bout fosa-kusṭo bemari asla, oile era ḳeurore bala na ḳoria, ḳali Siria deshor Namanre bala ḳora oisil.”
LUK 4:28 Ikan hunia-u mosidor shob manush gusae aguin oigela.
LUK 4:29 Tara uṭia tanre ṭelia ḳedaia gaur bare loia gelo, gia gaur kunar ḳaṛa ṭillar ufre nia, dakkadi tole falaito sailo.
LUK 4:30 Oile biṛor maz tone tain aṭia horia gelagi.
LUK 4:31 Bade Isa Galil elaḳar Kofornaum ṭauno gela, gia Zummabare manshore oaz-nosiot ḳorla.
LUK 4:32 Tan oaz hunia manush taijjub oigela, tain to fura himmot-ala zonor laḳan talim dita.
LUK 4:33 Hou mosido zinor asor-ala eḳ beṭa asil. He zure zure sillaia ḳoilo,
LUK 4:34 “O Nasarotor Isa, amrar gese ḳene aisoin? Amrare binash ḳorat aisoin ni? Ami zani afne ḳe, afne-u Allar hou fak-fobitro zon.”
LUK 4:35 Isae tare damki dia ḳoila, “Chup, er bitre taki baroi za.” Zine loge loge-u tare asaṛ mari hoḳlor mazḳano falaia, kunuzat ḳeti na ḳoria saṛia gelogi.
LUK 4:36 Ita dekia manush taijjub bonia mata-mati lagaila, “Ita kita deḳlam? Tain himmot ar ḳemota ḳaṭaia zin oḳolre hukum dein, tara-o deki bar oia zaegi.”
LUK 4:37 Bade hinor hokkol zagat Isar keramotir ḳobor roṭigelo.
LUK 4:38 Mosid taki bar oia tain Saimonor baṛit gela. Saimonor hoṛir kub beshi taf uṭsil, erdae hoḳole Isare kub minot ḳorla.
LUK 4:39 Tain Saimonor hoṛir ḳandat ubaia tafre domoḳ dila. Domoḳor loge loge-u tafe saṛidilo. Beṭie uṭia tarar memandarit lagla.
LUK 4:40 Hainja bala manshe bout zator bemarire loia Isar gese aila. Isae tara hoḳlor gotro atai dia bemar bala ḳorla.
LUK 4:41 Zinor asor-ala-o bout bemari asla, tara-o bala oila. Zin oḳole zure zure sillaia ḳoila, “Afne-u Ibnulla, Allar ḳas mayar zon.” Oile tain itare damki dia muk bond ḳorla. Tarar to zana asil, tain-u Allar oada ḳora hou al-Mosi.
LUK 4:42 Biane uṭia hari, Isa hi gau saṛia eḳ nirai zagat aila. Manshe tanre tukai tukai tan daro ailo, aia minot-ḳajji korlo zate tain tarar gese roin.
LUK 4:43 Oile tain zuaf dila, “Ami aro bout zagat gia Allar bashshair kush-ḳobri toblig kora zorur, ou ḳamor lagi-u Allae amare bezisoin.”
LUK 4:44 Bade tain asta Ihudi deshor mosidainto gia toblig korla.
LUK 5:1 Eḳ din Isa Galil aoror faro uba asla, ou shomoy bout manush Allar kalam hunar lagi tan ḳandat aia ṭelaṭeli lagaila.
LUK 5:2 Isae deḳla, aoror kinaro dukan zalua nao lagail. Nao taki lamia zalua oḳole tarar zal doira.
LUK 5:3 Isa gia Saimon namor eḳ zaluar nao-o uṭia tare ḳoila, naoḳan bashaia kisu fanit nibar lagi. Ḳoia tain nao-o boia manshore oaz-nosiot ḳorat lagla.
LUK 5:4 Nosiot bade tain zalua Saimonre ḳoila, “Naoḳan goin fanit neo ar zal falao.”
LUK 5:5 Saimone ḳoila, “Huzur, asta rait ḳoshṭo ḳoria-o kunu mas faisi na, ta-o afnar ḳotae zal falairam.”
LUK 5:6 Zal falanir bade oto beshi mas zalo hamaila, masor ṭelae zal farizibar dosha.
LUK 5:7 Ou tara shaijjor lagi logor naor zaluare ḍaḳ dila. Tara aia mas doria nao borilila, zalo oto mas hamaisil zen, masor bare duio nao ḍubuḍubu oigelo.
LUK 5:8 Ita dekia, Saimon-Fitore Isar fao-o foṛia ḳoila, “Huzur, ami to gunagar manush, amar ges taki toshrif ḳan neukkagi.”
LUK 5:9 Ḳaron, oto mas dekia Saimon-Fitor ar tan logor hokkole taijjub bonigela.
LUK 5:10 Saimonor logor zalua Zibudiar duio fua Iakub ar Hannane-o ita dekia taijjub oila. Teu Isae Saimonre ḳoila, “Ḍoraio na, oḳon taki ar mas nae, tumi Allar name manush dorbae.”
LUK 5:11 Bade tara nao loia kinarat aila, ar hokkolta toia Isar loge roana oigela.
LUK 5:12 Eḳbar Isa ek gaut gela. Hou gaur eḳ beṭar asta gotor zuṛi nafak fosa-kusṭo bemar asil. Isare dekia-u he tan fao-o foṛia minot-ḳajji lagailo, “Huzur, afnar mone saile to amare ou nafak bemar taki bala ḳorta farba.”
LUK 5:13 Isae at baṛaia tare soia ḳoila, “Oy, ami-o sairam, tumi fak-saf o.” Ḳoar loge loge-u tar bemar ḳomigelo.
LUK 5:14 Bala oia harle Isae tare hukum dila, “Ita ar ḳeurore hunaio na, tumi gia ḳali imam sabre deḳao. Musa nobir shoriot mafik fak-saf oar lagi zela kurbani kora zorur, ou kurbani dile-u manshe zaniliba, tumi bala oiso.”
LUK 5:15 Oile Isar ḳobor sairobae roṭigelo. Erdae tan mukor buli hunar lagi ar bemari oḳol bala oar niote, bout manush tan gese aila.
LUK 5:16 Oile tain kunu na kunu nirai zagat gia hamesha dua ḳorta.
LUK 5:17 Eḳdin Isa talim deoat asla, ou mozliso alim oḳol ar Forishi mozobor bout mullain boat asla. Tara Zeruzalem ṭaun, Galil ar Ehudia zilar nanan gauain taki aisoin. Isar maze Mabudor kudroti bol asil, ou bole-u bemari oḳolre shifa ḳorta.
LUK 5:18 Ermaze ḳoyzon manshe eḳzon obosh bemarire folodi boia loia aila. Tara saila tare nia goror bitre Isar samne toita.
LUK 5:19 Oile biṛor lagi goro hamanir fot faila na. Ou tara salor ufre uṭia, salor sani kulia folo shudda bemarire Isar samne manshor mazḳano lamai dila.
LUK 5:20 Tarar imanor bol dekia Isae ḳoila, “Baire, tumar guna maf ḳori dilam.”
LUK 5:21 Ikan hunia alim oḳole ar Forishi dolor mullainte mone mone ḳoila, “I manushgu ḳegu, he ola shiriki korer? Ḳali Alla saṛa ar ḳeu guna maf ḳorto fare ni?”
LUK 5:22 Tarar dilor sinta Isae buzilila, buzia ḳoila, “Afnara ḳene ila sinta ḳorra?
LUK 5:23 Ami kunḳan ḳoa shuza, tumar guna maf ḳori dilam? Ba tumi uṭia aṭia tumar bisna loia baṛit zaogi? Kunḳan shuza?
LUK 5:24 Te oḳon afnara forman deḳoukka, i duniat guna mafir ḳemota ami bin-Adomor ase.” Oḳan ḳoia-u tain bemari beṭare ḳoila, “Oba, ami tumare ḳoiram, uṭo, tumar ḳeta-balish loia baṛit zaogi.”
LUK 5:25 Ḳoite-u hi bemari beṭa hoḳlor samne ubaia, tar ḳeta-balish loia Allar tarif ḳori kori nizor baṛit gelogi.
LUK 5:26 Ita dekia hoḳol taijjub bonia, Allar tarif ḳori ḍorai ḍorai koila, “Aiz ita kizat keramoti kam deḳlam.”
LUK 5:27 Bade Isa bare gela, gia toshil ofiso Lebi namor ek kazna tulrare boat deḳla. Dekia tare ḳoila, “Ao, amar ummot o.”
LUK 5:28 Daot hunia-u Lebie tan hoḳolta falaia Isar loge oia roana dilaila.
LUK 5:29 Bade Lebie tan nizor baṛit Isar lagi boṛo ek kaoa-daoar bebosta ḳorla. Tarar loge bout gushkur ḳazna tulra ar aro manush ḳaoat boila.
LUK 5:30 Teu Forishi ar tarar dolor alim oḳole na-kush oia Isar shagrid oḳolre ḳoila, “Tumra ḳazna tulra ṭogbaz ar naforman oḳlor baṛit ḳana-fina ḳao ḳene?”
LUK 5:31 Isae tarare zuaf dila, “Bala manshor lagi to ḍaktoror zorur nai, oile bemari oḳlor lagi zorur ase.
LUK 5:32 Te ami-o forezgar oḳolre daot deoat aisi na, ḳali gunagar oḳolre daot deoat aisi, zate tara touba ḳoroin.”
LUK 5:33 Bade hou alim ar Forishi oḳole ḳoila, “Ehiar shishio oḳole hamesha ruza raḳoin, dua ḳoroin, ar Forishir shishio oḳole-o ola ḳoroin, te afnar shishio oḳole kunu shomoy-u ḳani bad dein na ḳene?”
LUK 5:34 Isae zuaf dila, “Nosha loge taḳle logor boiratire kunu ufash raḳa zae ni?
LUK 5:35 Oile omon eḳ din aibo, zebla noshare tarar ges taki neoa oizibo. Hou shomoy tara ruza raḳba.”
LUK 5:36 Isae tarare talim dibar lagi ou misal hunaila, ḳoila, “Noya kurtar ṭukra siṛia, ḳeu furan kurtat tali dey na. Ila ḳorle to noyaṭa-o nosṭo oibo, ar noya ḳafoṛor tali to furan ḳafoṛor loge milto-o nae.
LUK 5:37 Furan samṛar tolit ḳeu taza anguror rosh bore na. Borle ou taza roshor fafe toli faṭia rosh ar toli duiota borbad oy.
LUK 5:38 Taza rosh noya tolit toite oy.
LUK 5:39 Ar anguror furan rosh ḳaia hari kunu manshe noya rosh ḳaito sae na. Tara ḳoin, furanta-u moza.”
LUK 6:1 Eḳ Zummabare Isa gom ḳetor ailedi aṭia zaira. Ou shomoy tan shagrid oḳole gomor soṛa siṛia ato goshi goshi kaira.
LUK 6:2 Ita dekia Forishi mozobor ḳoyzone ḳoila, “Musa nobir shoriot mafik to Zummabare zekunu ḳam ḳora haram, te tumra i soṛa siṛirae ḳene?”
LUK 6:3 Isae zuaf dila, “Te Daud nobi ar tan logor hoḳlor zebla feṭo buk lagsil, hi shomoy tara kita ḳorsla, ita afnara foṛsoin na ni?
LUK 6:4 Tain nize Allar goro hamaia fobitro ruṭi kaisla, ar tan logor oḳolre-o ḳaoaisla. Ashole ḳali imam oḳol saṛa ar ḳeu i ruṭi kaoa zaiz asil na.”
LUK 6:5 Bade Isae tarare ḳoila, “Huno, ami bin-Adom-u Zummabaror malik.”
LUK 6:6 Aroḳ Zummabare Isa mosido gia oaz-nosiot ḳorat asla. Hono eḳ bemari beṭa asil, tar ḍainor at bemare hukai gese.
LUK 6:7 Moulana ar Forishi dolor manshe Isare fando falaita ḳori bana tukanit asla. Tara deḳta saila, zummar din tain ḳeurore bala ḳoroin ni, ḳorle tanre dushi banaita farba.
LUK 6:8 Isae-o tarar dilor ku-motlob buzilila. Buzia tain hukna at-ala beṭare ḳoila, “Oba, tumi aia hoḳlor samne ubao sain.” Teu beṭa aia ubailo.
LUK 6:9 Isae tarare zikaila, “Ami afnaintore ekkan ḳota zikairam, Zummabare kun ḳam ḳora zaiz, bala ḳam na bad ḳam? Zan basani, na zanor binash ḳora?”
LUK 6:10 Bade tain sairo galar hoḳlor bae saia hou beṭare ḳoila, “Tumar atḳan baṛao.” Beṭae tar at baṛailo, ar furafur bala oigelo.
LUK 6:11 Ita dekia hou mulla oḳlor kub gusa uṭlo. Tara foramish salaila, Isare ḳemne tamail zae.
LUK 6:12 Bade Isa dua ḳorar lagi eḳ faṛo uṭila, ar asta rait Allar gese dua ḳorla.
LUK 6:13 Biani bala tan shagrid oḳolre ḍakia ḳandat anla, erar mazor baro zonre fosond ḳoria, tan ḳas sahabi banaila.
LUK 6:14 Ou baro zon oila, Saimon—Isae en noya nam dila Fitor, Saimonor bai Andrias, Iakub, Hannan, Filif, Bortolmoy,
LUK 6:15 Moti, Tumas, Alfir fua Iakub, muktizudda Saimon,
LUK 6:16 Iakubor fua Ihuda, ar Ihuda Iskariat—ou Ihudae bade beimani korsil.
LUK 6:17 Ermaze Isae tan sahabi oḳolre loia ufre taki lamia faṛor feṭo homan eḳ zagat aia ubaila. Hino tan bout ummot dola oisla, Zeruzalem ṭaun ar Ehudia zila taki, doriar faror Shur ar Sidon elaḳa taki-o dol bandi bandi manush aisla.
LUK 6:18 Tara tan boyan hunar kiale ar bemar taki shifa oar niote aila. Ar zarar ufre zinor asor asil, tara-o bala oila.
LUK 6:19 Hoḳol manshe-u tanre at dia soito sailo, ḳaron tan bitor taki kudroti shokti baronie, era hoḳlor bemar ḳomsil.
LUK 6:20 Teu Isae afon shagrid oḳlor bae saia ḳoila, “Tumra zera gorib tumra-u ḳofali, Allar bashshai to tumrar lagi-u.
LUK 6:21 Tumra zoto zonor feṭo buk ase, tumra-u ḳofali, tumra feṭ boria ḳaibae. Tumra zera ḳandirae tumra-u ḳofali, bade to ashibae.
LUK 6:22 “Tumra-u ḳofali, zebla bin-Adomor dae manshe tumrare ginnae, gau taki basia ekgori kore, bodnam gae, ar tumrar nam hunle mukor tu falae.
LUK 6:23 Ila ḳorle tumra kushi oio, furtie nasio, ḳaron behesto tumra bout boṛo furuskar faibae. Zano ni, ou naforman oḳlor baf-dadainte-o Allar nobi oḳlor ufre ola zulum ḳorta.
LUK 6:24 “Haere doni oḳol, tumrar shuk to duniat-u ḳamailirae.
LUK 6:25 Haere feṭ boria ḳaora oḳol, tumra-o buke soṭfoṭ ḳorbae. Haere hae zera oḳon ashirae, tumra ḳanda-ḳaṭi ar ahazari korbae.
LUK 6:26 Haere hae, manshe zebla tumrar shunam gae, zano ni, ota manshor baf-dadainte-o agor amolor bonḍo nobi oḳlor ola shunam gaito.
LUK 6:27 “Tumra zotozon amar torikae soltae sao, ami tumrare ḳoiram, tumra zarzir dushmonre-o mohobbot ḳorio. Zera tumrare ginnae, tumra tarar balai korio.
LUK 6:28 Zera tumrar lagi lannot mange, tumra tarar lagi rohomot saio. Ar zera tumrar bodnam ḳore, tumra tarar lagi dua ḳorio.
LUK 6:29 Ze tumar ek galo soṛ mare, tare arok gal fatia dio. Ze tumar saddor ḳaṛia nito sae, tare kurta-o kulia dio.
LUK 6:30 Zara tumar gese sae, tarare dio. Ḳeu tumar kunu siz nilegi, tar gese ar firot saio na.
LUK 6:31 Huno, tumra manshor ges taki zelaḳan bebohar faitae sao, tumra-o hoḳlor loge ou laḳan bebohar ḳoro.
LUK 6:32 “Zara tumrare maya ḳore, tumra zudi kali tarare-u maya ḳoro, te tumra bahba faitae kila? Ila to naforman oḳole-o eḳe-oinnore maya ḳore.
LUK 6:33 Ar zara tumrar balai kore, tumra zudi kali tarar balai koro, te bahba faibae kila? Naforman oḳole-o to ila ḳore.
LUK 6:34 Ze manshor ges taki tumra ḳorzo faibar asha ase, tumra zudi kali tare-u ḳorzo deo, te kila bahba faibae? Naforman oḳole-o eḳe-oinnore ila ḳorzo dey, he asha ḳore bifodo foṛle he-o hon taki korzo faibo.
LUK 6:35 Te ami tumrare ḳoiram, tumra zarzir dushmonre-o maya ḳorio, tarar balai korio. Bodla faoar asha na ḳoria ḳorzo dio, teu tumrar lagi boṛo boḳshish ase. Tumra Alla Pakor aolad bonbae. Tain to nimoḳ-haram ar ḳaraf manshore-o doya ḳoroin.
LUK 6:36 Tumrar niraḳar baf zela doyal, tumra-o olan doyal o.
LUK 6:37 “Manshor bisar ḳorio na, teu tumra-o bisaror daṛo foṛtae nae. Ḳeurore dushi shaibosto ḳorio na, teu tumra-o dushi oitae nae. Maf ḳoria dio, teu tumra-o mafi faibae.
LUK 6:38 Dan-ḳoyrat deo, teu tumrare-o deoa oibo. Manshe zatai zatai boria ania tumrar gaṭit bandia diba. Tumra zela mafia dibae, tumrar lagi-o ola mafa oibo.”
LUK 6:39 Bade Isae tarare ou kichcha hunaila, “Eḳ andae kunu aroḳ andare fot deḳaito fare ni? Te duiozon-u gato foṛto nae ni?
LUK 6:40 Shagrid ustad taki boṛo nae, oile ze shagride furafur talim loy, he-o ustador laḳan bonizae.
LUK 6:41 Tumar bair sokut guṛa hamaise oḳan-u deḳrae, oile nizor souko gasor seli ase ita deḳrae na?
LUK 6:42 Tumar sokut seli hamaise ikan na saia tumar baire kila ḳoibae, ‘Baisab, tumar souko ze guṛa foṛse, ao, ogu bar ḳoria dei.’ Tumar nizor sokur seli-u to deḳrae na. O bonḍo, foyla tumar nizor souk taki seli horao, teu bair souk taki guṛa bar ḳorat lagle bala ḳori deḳtae farbae.
LUK 6:43 Bala gase to mondo fol dore na, ar mondo gase bala fol dore na.
LUK 6:44 Fol dekia gas sina zae. Manshe to rifuzi lot taki boroi faṛe na, ba sutra gas taki angur faṛe na.
LUK 6:45 Bala manshor dilor nek banḍar taki balai baroy, ar bod manshor bod dil taki bod-u baroy. Manshor dilor banḍaro zeta zoma ase, ota taki-u to zobanor buli baroy.
LUK 6:46 “Tumra ḳene amare ḳali huzur huzur ḳoirae, otoso ami zeta ḳoi, ita mano na?
LUK 6:47 Amar ḳandat aia amar boyan hunia ze zone amol ḳore, he ḳar laḳan, ami tumrare ḳoiram.
LUK 6:48 He ou manshor laḳan, ze gor bananir niote goin ḳori maṭi kudia mozbut ḳori goror kuṭi banailo, bade boinna ailo ar fanir fute ou gorre ṭelilo, oile ikan loṛaito farlo na, ikan to mozbut ḳori banail.
LUK 6:49 Ar amar boyan hunia ze zone amol na ḳore, he ou laḳan manush, zegie gat na kudia ḳali norom maṭir ufre gor banailo, bade banor futor dakkae tar gor foṛia bangia surmar oigelo.”
LUK 7:1 Isae tan boyan shesh ḳoria manshor ges taki bidae loia Kofornaum ṭauno gelagi.
LUK 7:2 Hino Ruman sifair eḳ subedaror gulam bemar foṛia morar foti oigesil, subedar sabe i gulamre kub maya ḳorta.
LUK 7:3 Tain Isar ḳobor hunia ḳoyzon Ihudi murobbire Isar gese faṭaila, tan gulamre bala ḳorta sufarishor lagi.
LUK 7:4 Murobbi oḳol aia Isare minot-ḳajji kori koila, “Sab, ze zone amrare afnar gese faṭaisoin tan gulamor lagi minot ḳortam, ein ashole-o doya faoar laḳ.
LUK 7:5 Tain bideshi oile-o amrar Ihudi zatire kub maya ḳoroin. Amrar mosid ḳan-o tain banai disoin.”
LUK 7:6 Isa tarar loge oia roana dila, tain subedaror baṛir ḳandat aite-u subedare nizor dust oḳolre faṭaia zanaila, “Huzure ar ḳoshṭo ḳoroin na zanu, afnar moto zone amar baṛit toshrif anra, ami to itar laḳ nae.
LUK 7:7 Afnar samne ubanir zoiggo-o ami nae, erdae ami airam na. Te afne ḳali zobandi koile-u, amar gulamor bemar shifa oizibo.
LUK 7:8 Afne to buzra, ami amar kamanḍaror hukume soli, oula amar sifai oḳol-o amar hukume soloin. Ami era eḳzonre ao ḳoile ae, zao ḳoile zae, amar gulamre ou ḳam ḳoro ḳoile, he ḳore. Te afne-o ola ḳali mukdi koile-u, hokkoltae manbo.”
LUK 7:9 Ikan hunia Isa ekkere taijjub bonigela, dole dole zoto manush tan ḳore oia aoat asil, erar bae firia ḳoila, “Ami tumrare ḳoiram, i subedar to bidormi Ruman manush, oile amar Boni Israilor maze-o to oto mozbut imandar ami kunuḳano deḳsi na.”
LUK 7:10 Hasau subedare zarare faṭaisla, tara goro aia deḳla, hi gulamor bemar ḳomigese.
LUK 7:11 Tuṛa ḳoy din bade Isae tan shagrid oḳol ar aro bout manush loia Nayin namor ek gaut aila.
LUK 7:12 Tain zebla hou gaut aia hamaira, ou shomoy manshe ḳoraro ḳori eḳ moiot loia zaira. I moiot asil eḳ ṛaṛi beṭir eḳmatro fua. Gaur bout manush ou ḳoraror loge asla.
LUK 7:13 Ou ṛaṛi beṭire dekia Isar dilo doya hamailo, tain ḳoila, “Ogo, ḳandio na.”
LUK 7:14 Ḳoia tain ḳoraror ḳandat gia ḳoraro soila, teu moiot boia neora beṭain ubai gela. Isae ḳoila, “O beṭa, ami koiram, tumi uṭo.”
LUK 7:15 Teu hi murda beṭa uṭia boigelo, boia mat-ḳota matilo. Isae tare tar maʼr ato shomzai dila.
LUK 7:16 Ita dekia hoḳlor bitre ḍor hamaigelo. Tara ḳoila, “Subohan Alla, eḳzon mohan nobie amrar maze toshrif anchoin, Allae meherbani koria tan bonda oḳlor bae souk firaisoin.”
LUK 7:17 Isar ou keramotir ḳota asta Ehudia zilat ar ash-fash hokkol zagat mashur oigelo.
LUK 7:18 Ehia nobir shagrid oḳol gia ou hokkolta Ehiare zanaila.
LUK 7:19 Ou Ehiae tan duizon shagridre Isar gese faṭaila. Tara aia Isare ḳoita, “Huzure ḳoisoin amra zania zaitam, zein toshrif anar ḳota, afne-u hein ni? Na amra ar ḳeuror lagi bar saitam?”
LUK 7:20 Teu duio shagrid aia Isare ḳoila, “Ehia nobie amrare faṭaisoin, afnare zikaitam, zein toshrif anar ḳota, afne-u hein ni? Na amra ar ḳeuror lagi bar saitam?”
LUK 7:21 Ṭik ou shomoy Isae bout manshore bemar-azar ar zin-butor asor taki bala ḳorla. Bout andare-o deḳar ḳemota dila.
LUK 7:22 Ota ḳoria harle Ehiar duio shagridre Isae ḳoila, “Tumra zaogi, tumra ono aia nizor souke zeta deḳlae ar hunlae, ota gia Ehiare zanao. Tanre ḳoio, andae-o souke deḳra, lengṛa oḳole aṭira, fosa-kusṭo bemari bala oira, ḳaluae-o hunra, murda manush zinda oira, ar gorib oḳlor gese-o Allai kush-ḳobri toblig kora or.
LUK 7:23 Ar era-u ḳofali manush, amar befare zerar dilo kunu bada na fae.”
LUK 7:24 Ehiar shagrid oḳol gia harle, Ehiar befare Isae manshore ḳoila, “Tumra morubumit kita deḳat geslae? Batashe loṛe-soṛe ota ḳagṛa-bon deḳat geslae ni?
LUK 7:25 Na, kita deḳat geslae? Shundor ḳafoṛ finno kunu manshore ni? Zera dami dami kafoṛ findia zak-zomok kore, ar shukirta din ḳaṭae, tara to razbaṛit taḳoin.
LUK 7:26 Te tumra kita deḳat geslae? Kunu nobire deḳat geslae ni? Oy, hasau ami tumrare ḳoiram, i Ehia to ḳali nobi nae, nobi taki-o boṛo zon.
LUK 7:27 Ein to hou zon, zen ḳota Asmani Kitabo leḳa ase, Huno, tumar age beziar ami amar fegambor, ein gia ṭik-ṭak korba tumar solar fot.
LUK 7:28 Te ami tumrare ḳoiram, asta duniar kunu adom-u Ehia taki boṛo nae. Oile Allar bashshair hoḳol taki huru zon-o, Ehia taki mohan.”
LUK 7:29 Shomazor hoḳol doronor am manshe ar gushkur ḳazna tulra oḳole-o Ehiar toblig hunla, tara toubar gusol ḳoria Alla Pakre hok-insafḳari hishabe manla.
LUK 7:30 Oile Forishi dolor manshe ar moulana oḳole Ehiar gese toubar gusol na ḳoria, tarar befare Alla Pakor ze kial asil, iṭare kunu dam dilo na.
LUK 7:31 Teu Isae hirbar ḳoila, “Ḳo sain, oḳon i zomanar manshore ami kitar loge tulona ḳortam? Tara ḳar laḳan?
LUK 7:32 Tara to omon huruttar laḳan, zetae bazaro boia eḳe-oinnore ḍakia ḳoy, Bashi to bazailam dust tumrar lagia, tumra ḳeu nasilae na bashi hunia. Mattomor zari-gan gailam amra shobe, ḳandilae na tumra ḳeu mattomor shure.
LUK 7:33 Te Ehia nobi aia hari bat-ruṭi ar anguror shorbot na ḳaoae, tumra ḳoilae tanre bute dorilise.
LUK 7:34 Ar bin-Adom aia ḳana-fina ḳorra dekia tumra ḳoirae, deḳrae ni, i beṭa to feṭua ar modkur. He gushkur ḳazna tulra ar naforman manshor loge dusti kore.
LUK 7:35 Ta-o aḳol ḳaṭaia zera sole, tarar sal-cholon taki-u forman mile, aḳol-u oilo ḳaṭi-nikut siz.”
LUK 7:36 Forishi dolor eḳzon manshe Isare tan baṛit ḳanir daot dila, Isa ou baṛit gia ḳanit boila.
LUK 7:37 Oile ou gaut ek kobis beṭi asil. Isa ono daoto aisoin hunia hou ḳobis beṭie dami eḳ fattoror boyamo ḳori ator loia ono ailo.
LUK 7:38 Aia Isar fison galabae tan faor ḳandat ubaia, ḳandia souḳor fanidi tan faor fata bizaililo. Bade tair matar suldi fao fusia dilo, faor maze hunga dite dite ator maḳailo.
LUK 7:39 Ita dekia Isare zein daot disla, ein mone mone ḳoila, “I beṭa kunu nobi oile to emne-u buzlo one i beṭi kegu, igu ḳoto boṛo ḳobis gunagar beṭi.”
LUK 7:40 Isae tare ḳoila, “Saimon, tumar loge amar kisu ḳota ase.” Saimone ḳoila, “Ḳoukka huzur.”
LUK 7:41 Isae tanre ḳoila, “Mone ḳoro, eḳ mazonor ges taki duizon manshe kisu ṭeḳa ḳoroz nisil, eḳzone fas-sho, aroḳzone foinchash dinar.
LUK 7:42 Tarar ḳeuror-u takkot asil na i ṭeḳa firot deoa, teu mazone era duio zonre maf ḳori dilaila. Oḳon ḳo sain, era kun zone mazonre beshi bala faibo?”
LUK 7:43 Saimone ḳoila, “Amar mone ḳoy, zar beshi ṭeḳa maf deoa oise.” Isae ḳoila, “Tumi ṭik-u ḳoiso.”
LUK 7:44 Teu Isae ou beṭir bae saia ḳoila, “Saimon, ou beṭi bae kial ḳoro ar huno, ami tumar goro aia harle tumi to amare fao doar-o fani diso na, oile tair souḳor fanidi amar fao bizaia, matar suldi fusia dise.
LUK 7:45 Tumi to amar loge ainja ḳori doria hunga diso na, oile deḳrae ni ami tumar baṛit hamanir bad one-u tai amar faot hunga deoat-u ase.
LUK 7:46 Tumi kunuzat tazim ḳori amare aguai ancho ni? Oile tai amar faot ator ḍalia tazim ḳorse.
LUK 7:47 Te ami tumare ḳoiram, tai beshi maya ḳorse ḳori buza zar, tai boṛo gunagar oile-o gunar mafi faise. Zar tuṛa guna maf ḳora oy, he tuṛa maya ḳore.”
LUK 7:48 Bade Isae beṭire ḳoila, “Ogo, tumar tamam guna maf ḳora oise.”
LUK 7:49 Zara Isar loge ḳanit boisla tara mone mone ḳoila, “Ein ḳe, zein guna-o maf ḳorilain?”
LUK 7:50 Isae hi beṭire ḳoila, “O beṭi, tumar imanor bole-u tumi nazat failae, oḳon shanti oia baṛit zao.”
LUK 8:1 Bade Isae ou barozon sahabire loia gaue gaue, ṭaune ṭaune guria Allar bashshair toblig korat roila.
LUK 8:2 Tarar loge ḳoyzon beṭin-o asla. Ou beṭin zinor asor ar bout zator bemar taki bala oia tan log dorsla. Erar nam oilo: Mogdilini Moriom, en ges taki shatgu zin saṛail oisil;
LUK 8:3 Raza Herudor uzir Kuzair bou Iuhanna; Susanna; ar aro bout beṭin asla. Ou beṭinte tarar nizor samana dia Isa ar tan shagrid oḳlor ḳoros-fati salaita.
LUK 8:4 Bade zebla nanan zaga taki bout manush aia Isar gese dola oila, ou shomoy tain ek kichcha hunaila.
LUK 8:5 Tain ḳoila, “Ek giroste danor zala bain deoat gelo. Gia bain deoar bala kisu zala ailor maze foṛigelo, manshe faodi uṛia i zala nosṭo ḳorillo, ar fakinte-o aia ḳaililo.
LUK 8:6 Girostor kisu zala hukna-shokto maṭir ufre foṛlo, itae ali bar oile-o heshe rosh na faia hukaia morigelo.
LUK 8:7 Kisu zala bon-jonglar maze foṛlo, i zalae ali fuṭle-o itare bon-jonglae zatia dorlo.
LUK 8:8 Oile kisu zala bala zomino foṛlo, i zalae bala dan oilo, ar eḳ-sho gun beshi dan dorlo.” Ou kichcha ḳoia-u tain zure zure ḳoila, “Zar ḳan ase, he hunouk.”
LUK 8:9 Shagrid oḳole aroz ḳorla, “Huzur, i kichchar mani kita?”
LUK 8:10 Tain ḳoila, “Allar bashshair gufon rohoisho zanar shuzug kali tumrare deoa oise, oile baki manshor gese to ita kichchar laḳan ḳoiram, zate tara dekia-o na deḳe, hunia-o na buze.
LUK 8:11 “Te i kichchar mani oilo, i danor zala oilo Allar kalam.
LUK 8:12 Ailor maze foṛa zaladi buzail oise, zera Allar kalam hune, bade Iblise aia tarar dil taki ita ḳaṛia neygi. Iblise sae na manshe iman ania nazat hasil ḳorouk.
LUK 8:13 Ar hukna-shokto maṭir ufre foṛa zaladi buzail oise, zara i kalam besh kushi oia hune, oile kalame tarar dilo balamonte zoṛ ḳore na. Erdae i iman tuṛa ḳoydin ṭike, kunu forikkat foṛle-u tarar iman kuailae.
LUK 8:14 Bon-jonglat foṛa zaladi buzail oise, zera imanor daot hune, oile duniabi dandat foṛia don-samanar lalos, ar aram-ayeshor bae saia ita faurilae. Erdae tarar zindegit kunu bala fol dore na.
LUK 8:15 Bala zomino foṛa zaladi buzail oise, zera hok ar sohi dile Allar kalam hune, hunia nizor dilo balamonte gatia raḳe, ar imane mozbut roia zindegit bala fol dore.
LUK 8:16 “Kunu manshe lem zalaia hari sokir tole toy ni ba ṭukridi gurilae ni? Nisoy na, tara gasar ufre toy, zate goror bitre for deḳa zae.
LUK 8:17 Te ila gaibi kunta-u nai zeta zair oito nae. Ila lukail-o kunta nai zeta ḳeu hunto nae ba zanto nae.
LUK 8:18 Erdae tumra kila hunrae kial ḳorio, zar ase tare aro deoa oibo, ar zar nai, tar zeta ase bolia he mone ḳorer, ota-o neoa oizibo.”
LUK 8:19 Ermaze Isar ma ar baiain tan gese aia azila, oile biṛor lagi tara ḳasat aita farla na.
LUK 8:20 Teu eḳzon manshe aia Isare ḳoila, “Afnar ma ar baiain afnar loge deḳa ḳorat aia bare ubai roisoin.”
LUK 8:21 Isae zuaf dila, “Amar ma-bai to era-u, zera Allar kalam hunoin ar amol ḳoroin.”
LUK 8:22 Eḳdin Isa ar tan sahabi oḳol gia nao-o uṭla, uṭia tain sahabi oḳolre ḳoila, “Ao, amra aoror hofaro zai.” Teu sahabi oḳole nao bashaila.
LUK 8:23 Nao soltir maze Isa gumai gela. Aḳta-u aoror maze omon tufan ailo, tufane naot fani hamaia borizar, tara deḳla boṛo mosibot aise.
LUK 8:24 Sahabi oḳol Isar daro gia tane hozag koria ḳoila, “Huzur, huzur, amranu moriziram.” Isa uṭia fanir ḍeu ar batashre damki dila. Loge loge-u ḍeu ar tufan tamia hoḳolta tir oigelo.
LUK 8:25 Isae tarare ḳoila, “Ou ota ni tumrar iman?” Tara ḍoraia taijjub oia eḳe-oinnore ḳoila, “Ein ashole ḳe, deḳrae ni batashe ar fanie-o tan hukum mane?”
LUK 8:26 Isae tan sahabi oḳol loia Galil aor faroia Zerasini elaḳat gela.
LUK 8:27 Gia hari tain nao taki lamla, ou shomoy hou gaur zinor asor-ala eḳ beṭa tan gese ailo. Zinor fale asor ḳorae he bout din dori lemṭa ar kunu baṛi-goro roito na, ḳali kobrostano roito.
LUK 8:28 Isare dekia-u he sillaia uṭlo, tan samne foṛia zure zure ḳoilo, “O Allar ḳas mayar zon, afne ḳene amar ino toshrif anla? Meherbani kori amare satain na zanu.”
LUK 8:29 Ikan ḳoar ḳaron oilo, Isae hi zinre hukum disla ou beṭare saṛia zaoar lagi. I zine tare bout din taki asor ḳorsil, beṭare ḍanḍa-beṛi ar shikoldi bandia raḳle-o, he ita siṛilito, hou zine tare nirai zagat nitogi.
LUK 8:30 Isae tare zikaila, “Tor nam kita?” He ḳoilo, “Fouz fal” ḳaron tara bout zin eḳloge asil.
LUK 8:31 Teu hi fouz fale Isare minot-ḳajji koria ḳoila, tain zanu tarare roshatole na gaṛoin.
LUK 8:32 Hino faṛor ek galat boṛo eḳ shuoror fal asil. Fouz fale tanre minot ḳoria ḳoila, tarare hou shuoror bitre hamanir izazot dita. Tain izazot dila.
LUK 8:33 Ou tara hi beṭare saṛia shuoror bitre gia hamailo, ete shuoror fal faṛor ḍaledi douṛia gia aoror fanit buṛia morla.
LUK 8:34 Ita dekia shuoror raḳal oḳol douṛia gia ṭauno ar gaue gaue ḳobor dilo.
LUK 8:35 Ḳobor faia sairobae tone manush aila, aia deḳla, ze beṭar log taki fouz fal bar oia gesoin, he furafur bala oia ḳafoṛ-sufoṛ findia Isar faor ḳandat boiroise. Dekia tara somki gela.
LUK 8:36 Ar ou goṭona goṭite zera deḳsil, tara hoḳol manshore hunaila, i beṭa kila bala oise.
LUK 8:37 Hunia Zerasini elaḳar hoḳol manush ḍoraigela. Ḍoror suṭe tara Isare minot-ḳajji koria ḳoila, tain tarar ges taki toshrif nitagi. Teu Isa nao-o uṭia hirbar Galilo aila.
LUK 8:38 Oile ze beṭare zine dorsil, he aroz ḳorlo tan loge roibar lagi. Isae tare oḳan ḳoia baṛit faṭai dila,
LUK 8:39 ḳoila, “Tumi tumar baṛit zao, ar Allae tumar lagi ze kudroti kam ḳorsoin, ota gia ḳo.” Teu he gelogi, gia ṭaunor hoḳol manshore zanailo, Isae tar lagi oto boṛo ḳam ḳorsoin.
LUK 8:40 Isa Galilo aia harle hinor manshe kushi oia tanre kobul ḳorla, tara tan lagi bar saoat asil.
LUK 8:41 Ou shomoy Zayir name mosid komiṭir eḳ motolli aia Isar fao-o foṛia minot lagaila, huzurre tan baṛit nibar lagi.
LUK 8:42 Ḳaron tan eḳmatro fuṛi sorḳato asil, fuṛir boyosh baro bosor. Isa zebla ou baṛit zaibar lagi roana dila, manshe aia tan sairobae biṛ ḳoria ṭelaṭeli lagaila.
LUK 8:43 Biṛor maze eḳ beṭi manush-o asla, ein baro bosor doria mashik bemari. Tan hoḳol don-samana ḍaktoror tole kuaia-o bala oita farsoin na.
LUK 8:44 Tain Isar ḳoredi aia Isar saddoror kunat soar loge loge-u tan bemar ḳomigelo.
LUK 8:45 Teu Isae zikaila, “Amare ḳe soilo?” Ḳeu shikar na ḳorae Fitor ar tan logor manshe Isare ḳoila, “Huzur, afnar sairobae ḳoto manshe ṭelaṭeli koria afnar gat lager.”
LUK 8:46 Oile Isae ḳoila, “Ḳeu amare soise, ḳaron ami buzram, amar bitor taki gaibi bol bar oise.”
LUK 8:47 Ou beṭie zebla deḳlo dora foṛigese, tai kafi kafi Isar samne aia tan fao-o foṛia hoḳlor samne-u ḳoilo, ḳene tai Isare soisil ar kilan loge loge-u bala oigese.
LUK 8:48 Isae beṭire ḳoila, “Mai go, tumi ekin ḳorso ḳori bala oiso. Oḳon shantie baṛit zao.”
LUK 8:49 Isae ota matira, omon shomoy mosidor motollir baṛi taki kobria aia tanre ḳoilo, “Sab, afnar fuṛi dunia taki gesoingi, te huzurre ar ḳoshṭo dibar ḳam nai.”
LUK 8:50 Ikan hunia Isae ḳoila, “Ḍoraio na, ḳali ekin ḳoro. Deḳbaene, tai bala oizibo.”
LUK 8:51 Isa hou baṛit gela, gia Fitor, Hannan, Iakub ar fuṛir ma-baf saṛa oinno ḳeurore goror bitre hamaite dila na.
LUK 8:52 Hoḳole zebla fuṛir lagi kanda-ḳaṭi ar ahazari korra, ou shomoy Isae ḳoila, “Ḳandio na-re, tai to morse na, gumar.”
LUK 8:53 Ikan hunia tara tanre siṛaila. Tara hoḳole-u zanto fuṛi morigese.
LUK 8:54 Teu Isae fuṛir ato doria ḍaḳ dila, “Mai go, uṭo.”
LUK 8:55 Loge loge-u fuṛir zan firot ailo. Tai uṭia boigelo. Isae ḳoila, fuṛire kunta ḳaibar dita.
LUK 8:56 Fuṛir ma-baf ekkere taijjub bonigela. Bade Isae ḳoila, “Huno, ita ḳeurore hunaio na.”
LUK 9:1 Bade Isae hou barozon sahabire ekḳano dola ḳorla, tarare hoḳol zator zin-but saṛani, bemarire bala ḳorar izazot ar ḳemota dila.
LUK 9:2 Bade tain Allar bashshair toblig ar bemarintore shifa ḳorat erare faṭaila.
LUK 9:3 Tain ḳoila, “Tumra fotor lagi laṭi, gaiṭ-buski, ḳani-kuraki, ṭeḳa-foysha, ba duiṭa kurta-o loge nio na.
LUK 9:4 Kunu gaut gele tumra ze baṛit hamaibae, ou baṛit-u roio, ar on taki hirbar bidae oio.
LUK 9:5 Manshe zudi tumrare zaga na dein, te hon taki bar oibar age tumrar faor duil fusia falaio, ou duile-u tarar bifokke shakki dibo.”
LUK 9:6 Sahabi oḳol roana oia gaue gaue gia, Allar kush-ḳobri toblig ar bemarintore shifa ḳorat lagla.
LUK 9:7 Raza Herude Isar ou ḳam-ḳazor ḳobor hunia kub gabṛi gela. Kunu kunu manshe tanre ḳoila, Ehia nobi hirbar zinda oia uṭi gesoin.
LUK 9:8 Ar kunu kunu zone ḳoila, Ilias nobie doroshon disoin. Hirbar ḳeu ḳeu ḳoilo, furana zomanar kunu nobi zinda oia aisoin.
LUK 9:9 Teu Herude ḳoila, “Ami nize-u to Ehiar mata ḳaṭaisi, te ou zeta hunram, ein ashole ḳe?” Erdae Herude Isare deḳar kial oilo.
LUK 9:10 Isae ze barozon sahabire tobligo faṭaisla, tara firia aila. Aia tanre zanaila, tobligi soforo kita kita ḳorsoin, ou tain erare loia kub niribili halote Bayt-Soyda namor ek gaut gela.
LUK 9:11 Oile manshe i kobor hunia dole dole Isar ḳore oia roana dilaila. Tain erare kushi mone kobul ḳorla. Tarar gese Allar bashshair boyani toblig korla, ar zeta bemarir bemar shifa oa zorur asil, tain erare shifa ḳorla.
LUK 9:12 Hainja bala hou barozon sahabi aia Isare ḳoila, “Huzur, amra ze zagat asi, ikan kub niribili zaga. Te ota manshore bidae dilaukka, tara ḳanda-ḳasar gaut gia raitkur taḳa-ḳaoar bebosta ḳorouk.”
LUK 9:13 Isae zuaf dila, “Tumra tarare ḳana ḳaoao.” Tara ḳoila, “Amrar gese to ḳali fasḳan ruṭi, duiṭa biran mas ase, ar kunta nai. Te amra bazaro gia erar lagi kana loia antam ni?”
LUK 9:14 Isae ḳoila, “Erare foinchash-zon, foinchash-zon ḳori boai deo.” Ino ḳali beṭa manush-u asla fas azaror laḳan.
LUK 9:15 Teu sahabi oḳole tarare boaila.
LUK 9:16 Isae ou fasoḳan ruṭi ar duio mas loia asmanor bae saia Allar shukria adae ḳorla. Bade ruṭi ar mas ṭukra ṭukra ḳori bangia, sahabi oḳlor ato dia ḳoila baṭia dilaita.
LUK 9:17 Ou ḳanae hoḳol manshe feṭ boria ḳaila. Ḳaia harle zeta guṛa-gaṛa roisil ota dola ḳorle baro ṭukri borigelo.
LUK 9:18 Eḳdin Isa eḳ nirai zagat dua ḳorat boira, ḳali sahabi oḳol tan loge asla. Tain erare zikaila, “Ḳo sain, manshe kita mono ḳoroin, ami ke?”
LUK 9:19 Tara zuaf dila, “Kunu kunu manshe ḳoin, afne Ehia nobi. Kunu zone ḳoin Ilias nobi, ar ḳeu ḳeu ḳoy bout agor zomanar kunu nobi hirbar zinda oia uṭisoin.”
LUK 9:20 Isae erare zikaila, “Oile tumra kita mono ḳoro, ami ke?” Sahabi Fitore ḳoila, “Afne-u Allar oada ḳora hou al-Mosi.”
LUK 9:21 Isae tarare ḳoila, “Ḳobordar! Ita ar ḳeurore hunaio na.”
LUK 9:22 Bade tain ḳoila, “Ami bin-Adome bout ḳoshṭo shoijjo ḳora lagbo. Shomazor murobbi oḳole, boṛo imam, ar moulana oḳole amare ela ḳorba. Amare zane mara oibo, oile moutor tin dinor din amar hirbar zinda oia uṭa zorur.”
LUK 9:23 Tain era hoḳolre ḳoila, “Amar torikae ḳeu zindegi kaṭaite saile, he tar nizor kushie sola bad deuk. Tar afon duk-koshṭor solib forteḳ din boia loia amar ḳore ḳore auk.
LUK 9:24 Ze manshe nizor zan basaito sae, he tar hasaror zindegi kuaibo. Oile ze zone amar lagi nizor zan kurbani dey, he hasaror zindegi faibo.
LUK 9:25 Kunu manush zudi asta duniar malik bonia-o tar hasaror zindegi mani aḳer kuailae, te tar kunu fayda oilo ni?
LUK 9:26 Hunoukka, ḳeu zudi amar lagi ba amar talimor lagia muk lukae, te ami bin-Adom zebla amar nizor, ar fobitro firista oḳlor, ar gaibi bafor shan-tozollie duniat hirbar aimu, ou shomoy ami-o erare deḳle muk lukaimu.
LUK 9:27 Ami tumrare hasa ḳota ḳoiram, ou mozliso oula ḳoyzon manush azir asoin, Allar bashshai na dekia erar mout oito nae.”
LUK 9:28 Ou talimor eḳod hafta bade, Isa dua ḳorar lagi tan sahabi Fitor, Hannan, ar Iakubre loia eḳ ṭillar ufre uṭla.
LUK 9:29 Tain dua ḳorra, omon shomoy aḳta-u tan mukor rong bodligelo, tan finnor ḳafoṛ-sufoṛ dola soḳsoḳa oigelo.
LUK 9:30 Ou shomoy deḳa gelo, duizon manshe aia tan loge batchit ḳorra, erar eḳzon oila Musa nobi, dusra zon Ilias nobi.
LUK 9:31 Tara Allai zalal ar shane deḳa dila. Zeruzalem soforor ḳalo Isa zen Allar morzi mafik moutor mukamuki oira, ou befare-u tara batchit ḳorla.
LUK 9:32 Sahabi Fitor ar tan logor oḳol be-malum gumo asla. Aḳta-u gum bangi zaoae tara Isar zalal-shan deḳla, ar tan ḳandat uba ou duio zonre-o deḳla.
LUK 9:33 Hou duiozon zebla Isar ges taki roana dilaira, ou shomoy Fitore ḳoila, “Huzur, amra-o to ono asi, kub bala oise, te ek kam ḳorilai, amra ono tinḳan ḍera-gor banailai, ekkan afnar, ekkan Ilias nobi, ar ekkan Musa nobir lagi.” Fitore zen kita ḳoira, ita tain nize-u buzla na.
LUK 9:34 Fitore ota matira, ou shomoy aḳta-u megor ḳalni aia tarare gurililo. Tara ḳalnir aoṛe hamanir bade sahabi oḳol ḍoraigela.
LUK 9:35 Ar ḳalnir bitor taki ou aoaz ailo, “Ein-u amar ḳas mayar zon, tumra en ḳota mano.”
LUK 9:36 I aoazor bade-u deḳa gelo, Isa hono eḳla ubai roisoin. Sahabi oḳol nirai oigela, tara zeta deḳsila ou shomoy ita ar ḳeurore hunaila na.
LUK 9:37 Bador din Isa ar sahabi oḳol faṛor ṭilla taki lamia aile, bout manush tan loge deḳa ḳorat aia biṛ bandilla.
LUK 9:38 Ou biṛor mazor eḳzone sillaia ḳoilo, “Huzur, amar fuagur bae kial ḳoroukka, ogu amar eḳmatro aolad.
LUK 9:39 Tare eḳṭa zine dore, igie tare saṛto sae na, he aḳta-u sik dia uṭe ar maṭit foṛia saṭiae. Tar mukedi fena baroy, heshe tare asaṛia ad-mora ḳori falai toia zae.
LUK 9:40 Ami afnar sahabi oḳlor gese minot-ḳajji korslam ogutare ḳedaibar lagi, oile tara farsoin na.”
LUK 9:41 Isae ḳoila, “O beiman ar naformanor zat, ami ar ḳotodin tumrar loge roimu, tumrar satani shoijjo ḳormu? Deki sain, tumar fuare ono ano.”
LUK 9:42 Beṭae fuare loia aguar, ou shomoy zinnate tare maṭit falaia zatia dorlo, he hutia saṭiani lagailo. Teu Isae zinnatre damki dila, tain ou fuare bala ḳoria tar bafor ato shomzai dila.
LUK 9:43 Allar kudroti lila-ḳela dekia hoḳol manush taijjub oigela. Isar keramoti kam-ḳaz dekia hokkole taijjub bonia sinta ḳorra, ou shomoy tain sahabi oḳolre ḳoila,
LUK 9:44 “Amar ḳota ḳanain tumra mon dia huno, ami bin-Adomre to manshor ato dorai deoa oibo.”
LUK 9:45 Sahabi oḳole i mator kunu mani buzla na. Allae tarar gese ikan gaib raḳla, zate tara na buzoin. Ar ou befare Isare-o kunta zikaite tarar shaosh oilo na.
LUK 9:46 Sahabi oḳlor maze ḳe hoḳol taki boṛo, ota loia tara torka-torki korra,
LUK 9:47 ermaze Isae tarar dilor bab buzilila. Tain eḳ nabalik huruttare ḳandat ania ḳoila,
LUK 9:48 “Ze zone amar lagi ou huruttar laḳan kunu sabalre kobul ḳore, he amare-u kobul ḳore. Ar amare ze kobul ḳore, he ḳali amare nae, amare zein bezisoin tanre-o kobul ḳorlo. Tumrar maze ze zon hoḳol taki huru, he-u hoḳol taki boṛo.”
LUK 9:49 Bade sahabi Hannane ḳoila, “Huzur, amra deḳlam afnar nam loia eḳzone but saṛar. Dekia amra tare mana ḳorsi, he to amrar torikar nae.”
LUK 9:50 Isae tanre ḳoila, “Ar mana ḳorio na, ze tumrar bifokke nae, he to fokke-u ase.”
LUK 9:51 Isae behesto toshrif nibar din gonaia ailo, ou tain Zeruzalemo zaita ḳori niot ḳorla.
LUK 9:52 Tan age oia ḳobria oḳol faṭaila. Tara age gia hoḳolta zuit-zait ḳorar kiale Shomoria zatir ek gaut gia hamaila.
LUK 9:53 Oile hi gaur manshe zebla hunla, Isa Zeruzalem zaita, hunia tara tanre asroy dilo na.
LUK 9:54 Erdae tan sahabi Iakub ar Hannane ḳoila, “Huzur, Ilias nobir laḳan amra-o oḳon aroz ḳortam ni, asmani aguin lamia otare binash ḳorilauk?”
LUK 9:55 Isae tarar bae firia damki dia ḳoila, “Tumra zano na ni tumra kun laḳan ruhur goṛa? Amare kunu beza oise ni manshor binash ḳortam? Amare to beza oise manshor zan basaitam.”
LUK 9:56 Oḳan ḳoia era arok gaut gelagi.
LUK 9:57 Tara zebla fotedi zaira, ou shomoy eḳ beṭa aia Isare ḳoilo, “Sab, afne zeḳano zaiba, ami-o afnar loge hono zaimu.”
LUK 9:58 Isae tare ḳoila, “Babare, hialor gat ase, fakintor bada ase, oile ami bin-Adomor mata guzar kunu ṭai nai.”
LUK 9:59 Bade Isae aroḳzonre deḳla, dekia tare ḳoila, “Oba, amar loge solo.” He zuaf dilo, “Huzur, amar bafor moutor bade tanre maṭi dia harle ami aimu.”
LUK 9:60 Isae tare ḳoila, “Mora oḳole tarar morare maṭi deuk, tumi aia Allar bashshair daot deo.”
LUK 9:61 Aro eḳzone ḳoilo, “Huzur, ami afnar loge zaimu, te amar baṛit gia bidae loia ai.”
LUK 9:62 Isae tare ḳoila, “Langolor kuṭit doria zegue ḳoredi firia sae, he Allar bashshair laḳ nae.”
LUK 10:1 Bade Hozrot Isae aro shottoirzon shagridre tobligo faṭaita ḳori fosond ḳorla. Tain nize zeta ṭaun ba gauainto zaoar irada ḳorsila, hono zaibar age erare duizon duizon ḳoria faṭaila.
LUK 10:2 Faṭanir bala erare ḳoila, “Huno, zomino to foshol bout ase, oile ḳamla kub ḳom. Erlagi zominor malikor gese dua ḳoro, tan foshol tular lagi tain ḳamla faṭaiba.
LUK 10:3 Tumra oḳon roana oizao. Kial rakio, bagor falor maze meṛa-baichchar laḳan ami tumrare faṭailam.
LUK 10:4 Tumra zaoar ḳalo ṭeḳar toli, gaiṭ-buski, faor zuta ita kunta-u loge nio na, ar fotor maze ḳeurore salam-o ḳorio na.
LUK 10:5 Ze baṛit gia hamaibae, hamaia-u ḳoio, assalamu alaikum.
LUK 10:6 Salam loar zuka ḳeu hino taḳle, tumrar salam tar ufre bortibo, ar ila ḳeu na taḳle, tumrar salam tumrar gese-u firot aibo.
LUK 10:7 Foyla ze baṛit hamaibae, hou baṛit-u roio. I baṛi saṛia dusra baṛit zaio na. Tara zeta dein ota ḳaio, ḳaron ḳamlae tar beton faoar zoiggo.
LUK 10:8 “Zebla kunu gaut zaibae, hinor manshe tumrare kobul ḳoria, tara zeta ḳaite dein, ota-u ḳaio.
LUK 10:9 Tarar bemari oḳlor bemar bala ḳorio. Tarare ḳoio, Allar bashshai to tumrar daro aichche.
LUK 10:10 Oile kunu gaut gele honor manshe zudi tumrare kobul na ḳoroin, te gaut aṭi aṭi oḳan ḳoio,
LUK 10:11 Hoba, tumrar gaur ze duil amrar faot lagse, ita amra fusia falai diram, ou duile-u tumrar bifokke shakki dibo. Oile mono rakio, Allar bashshai kandat aichche.
LUK 10:12 Ami tumrare ḳoiram, kiamotor din lannoti Sadum ṭaunor dosha taki, hi gaur dosha aro ḳoṭin oibo.
LUK 10:13 “Haere Bayt-Soyda ar Kurasin gau, tumra to lannoti. Tumrar maze zeta kudroti kam deḳail oise, ita Shur ar Sidon elaḳat deḳail oile, tara ḳator oia touba ḳorlo one.
LUK 10:14 Ashole kiamotor din Shur ar Sidon elaḳar dosha taki-o, tumrar dosha bout ḳoṭin oibo.
LUK 10:15 Ar O Kofornaum ṭaun, tumi bule usa oia asmano gia lagtae? Na, fartae nae! Tumare fatalo lamail oibo.
LUK 10:16 “Tumra mono rakio, zera tumrar ḳota mane, tara ashole amar ḳota-u mane. Ar zera tumrare mane na, tara amare-o mane na. Zera amare mane na, tara ashole hou Allare-o mane na, zein amare bezisoin.”
LUK 10:17 Bade hi shottoirzon shagride toblig koria kub kush mizaze firot aila. Aia ḳoila, “Huzur, afnar nam hunle zin-bute-o amrar ḳota mane.”
LUK 10:18 Isae tarare ḳoila, “Huno, ami deḳsi, Iblis-Shoytan megor zilkir laḳan behest taki foṛizar.
LUK 10:19 Te ami tumrare haf-bichchur ufredi aṭar ḳemota disi, ar tumrar dushmon, Iblisor hoḳol shoktir ufre tumrare ḳemota disi. Kunuzat kuntae-u tumrar ḳeti korto farto nae.
LUK 10:20 Ar zin-bute tumrar ḳota huner dekia kushi na oia, borong behesti katat tumrar nam leḳa oise ḳori-u kushi koro.”
LUK 10:21 Ou shomoy Isa-o Pak Ruhur bole kushi oia ḳoila, “O gaibi baba, tumi-u to asman-zominor malik. Ami tumar shukria adae ḳorram, ḳaron tumi aḳoldar-buddiman oḳlor gese ita zair na ḳoria, bebuz-huruttar laḳan manshor gese zair ḳorso. Baba, ashole to ita hoḳolta-u tumar morzi.
LUK 10:22 Amar gaibi babae hoḳolta-u amar ato shofi disoin. Baf saṛa dusra ḳeu zane na ou fut ḳe, ar fut saṛa dusra ḳeu zane na ou baf ḳe. Fute bafre zar gese zair ḳorar kial oy, ḳali he-u bafor forisoy fae.”
LUK 10:23 Bade tain shagrid oḳlor bae firia ḳane ḳane ḳoila, “Tumra zeta zeta deḳso, ita deḳar shuzug zar oy, he-u nek-kofali.
LUK 10:24 Ami tumrare ḳoiram, tumra zeta deḳrae, ita bout nobie ar raza-bashshae deḳar asha ḳorle-o, deḳar ḳofal oise na. Tumra zeta hunrae, ita tara hunte saile-o hunar ḳofal oise na.”
LUK 10:25 Eḳbar eḳ alim sab Isar gese aila. Aia tanre forikka ḳorar lagi zikaila, “Huzur, kita ḳam ḳorle ami behest faimu?”
LUK 10:26 Isae ḳoila, “Musa nobir kitabo kita leḳa ase? Afne kita faisoin?”
LUK 10:27 Alime zuaf dila, “Leḳa ase, Tumi tumar asta dil dia, zan dia, hoḳol bol-shokti dia, tumar shullo-ana mon dia, tumar Mabud Allare mohobbot ḳorbae. Ar, Tumar ari-forire nizor laḳan maya ḳorbae.”
LUK 10:28 Isae tanre ḳoila, “Afne ṭik kota ḳoisoin. Te afne-o oula ḳoroukka, teu behest faiba.”
LUK 10:29 Ou alime nizor dam baṛanir lagi Isare ḳoila, “Aichcha, te amar ari-fori ke?”
LUK 10:30 Isae ḳoila, “Hunoukka, eḳzon manush Zeruzalem taki Ziriho ṭauno zaoat asil. Foto ḍaḳaite faia tar ḳafoṛ-sufoṛ hoḳolta ḳaṛia nia, tare maria ad-mora ḳori falai toia gelogi.
LUK 10:31 Bade eḳ imam sab ou fotedi zaira, tain ou beṭare dekia galabae horia gelagi.
LUK 10:32 Ou laḳan Lebir ḳandanor ek kadim sab-o ou fotedi aila, tain-o ere dekia galabae gelagi.
LUK 10:33 Heshe Shomoria zatir eḳ beṭa ou fotedi ailo, he bidormi zatir oile-o er halot dekia tar dilo dorod hamailo.
LUK 10:34 Ou he er zoḳomor ufre tel ar anguror rosh malish ḳoria foṭṭi bandia dilo. Bade tar nizor gadar ufre tulia, eḳ musafir ḳanat nia tar zoton ḳorlo.
LUK 10:35 Bador din ou Shomorio beṭae musafir ḳanar malikor ato duiṭa dinar dia ḳoilo, ou manushgur zoton ḳorba. Er beshi koros oile-o, ami aia dimu.
LUK 10:36 “Te alim sab, afnar kita mono oy, ou tinzonor maze kun zon, ḍaḳaitor ato fiṭa ḳaora beṭar ari-fori?”
LUK 10:37 Alime ḳoila, “Ze manshe tare dorod ḳorlo he-u to.” Teu Isae ḳoila, “Te afne-o gia oula ḳoroukka.”
LUK 10:38 Bade Isa ar tan sahabi oḳol aṭi aṭi ek gaut gela. Hou gaur eḳ beṭi manshe kushi oia Isare tan baṛit nia memandari korla. Ou beṭir nam Marta.
LUK 10:39 Beṭir eḳ boinor nam oilo Moriom, ein huzuror faor ḳandat boia nosiot hunra.
LUK 10:40 Ar Marta gia randa-baṛa ar ḳatir-zoton ḳorat fereshanit roila. Ermaze Marta aia huzur Isare ḳoila, “Huzur, deḳra ni amar boine hokkol ḳam-ḳaz eḳla amar ufre toia ono aise? Te afne ḳoukka, amare shaijjo ḳorto.”
LUK 10:41 Huzure ḳoila, “Marta, tumi bout befare sinta ḳoria fereshan oigeso.
LUK 10:42 Huno, ashole eḳṭa befar-u ḳali zorur ase. Tumar boin Moriome hou zoruri befarre fosond ḳorse. Ita to tair ges taki kaṛia neoa zaito nae.”
LUK 11:1 Eḳdin huzur Isae kunu eḳ zagat dua ḳorat asla. Dua shesh oia harle tan eḳ sahabie ḳoila, “Huzur, Ehia nobie to tan sahabire dua ḳora hikaita, te afne-o amrare dua ḳora hikaukka.”
LUK 11:2 Isae erare ḳoila, “Dua ḳorar shomoy tumra oula ḳoio, O asmani baba, tumar nam fobitro ḳoia mana ouk, duniat tumar bashshai kaim ouk.
LUK 11:3 Amrar forteḳ dinor rizek fortidin zugai dio;
LUK 11:4 Baba, amrar tamam gunare maf ḳoria dilao, zela amra-o mafi dilaisi amrar oforadi oḳolre; ar forikka taki hefazot ḳoro amrare.”
LUK 11:5 Bade Isae tarare ḳoila, “Dorilao, ada raitkur bala tumrar kunu dustor baṛit gia ḳoilae, dust, amare tinḳan ruṭi koroz deo.
LUK 11:6 Amar eḳ bondu fotedi zaoar bala aḳta-u amar baṛit uṭsoin. Oḳon tane kita ḳaoaitam, amar goro to kunta nai.
LUK 11:7 Teu duste goro tone zuaf dila, ami dorza bond ḳoria amar huruttain loia hutiroisi, amare ḳoshṭo dio na. Oḳon uṭia kunta ditam fartam nae.
LUK 11:8 Oile ami koiram, ou duste uṭia bondu hishabe kunta dite na saile-o, tumi bar bar minot ḳorle he uṭbo-u. Uṭia tumi zeta sairae, ita ṭik-u dibo.
LUK 11:9 “Te ami tumrare ḳoiram, tumra sao, teu deoa oibo. Tallash ḳoro, teu faibae. Duaro ṭuka deo, tumrar lagi duar kula oibo.
LUK 11:10 Zara sae, tara-u to fae. Ze tallash ḳore he fae. Ze duaro ṭuka dey, tar lagi duar kula oy.
LUK 11:11 Tumrar maze ila kunu baf ase ni, zar fute ruṭi saile tare maṭi dibo, mas saile haf dibo,
LUK 11:12 ba enḍa saile bisa dibo?
LUK 11:13 Te tumra naforman oia-o zudi tumrar huruttainre bala bala siz ditae zano, te zara behesti bafor gese saibo, tain nisoy tarare Pak Ruhu dan ḳorba-u.”
LUK 11:14 Eḳdin eḳ beṭar log takia Isae eḳ buba zinnat saṛaila. Zinnate saṛar bade hi beṭar zoban kuligelo, mat-ḳota matilo. Ita dekia manush taijjub bonigela.
LUK 11:15 Oile kunu kunu manshe ḳoilo, “I beṭae zinor bashsha Bel-Sobulor bole zin saṛae.”
LUK 11:16 Aro ḳoyeḳ zone tanre forikka ḳorar niote, tan ator kunu keramoti deḳto sailo.
LUK 11:17 Isae tarar dilor bab buzilila. Buzia ḳoila, “Kunu raijjo nize nize bag oigele, i raijjo binash oizae. Oula kunu foribaro zebla bibad lagizae, i foribar-o ar ṭike na.
LUK 11:18 Te zinnat zudi tar nizor bifokke lagizae, taile tar raijjo ḳemne ṭikbo? Tumra to ḳoirae, ami Bel-Sobulor bole zinnat saṛai.
LUK 11:19 Kub bala ḳota, ami zudi Bel-Sobulor bole zinnat saṛai, te tumrar manshe kitadi saṛae? Tumrar mator bisar tumrar manshe-u ḳorbo.
LUK 11:20 Oile ami zudi Allai kudrote zinnat saṛai, te to Allar bashshai tumrar nozdik aichche.
LUK 11:21 “Huno, kunu bolala manshe ostro-shostro loia tar baṛi fahara dile, tar samana nirafod taḳe.
LUK 11:22 Oile tar taki zobordosto aroḳzon aia hamla ḳoria tare arailile, he zeta ostro-shostror boṛai korsil, i ostro-o ḳaṛia nibogi. Tar hoḳol mal-samana-o luṭia nia ḳaṭilibo.
LUK 11:23 “Te ze zon amar fokke nae, he to amar bifokko. Ze amar oia ḳam na ḳore, he to amar birudde ḳam ḳore.
LUK 11:24 “Kunu zine zebla eḳ bemarir log saṛia zaegi, gia boshot ḳorar lagi morubumit guraguri kore. Bade kunuḳano roibar zaga na faia mone mone ḳoy, dur! Ami zen taki aisi ono-u hirbar zaigi.
LUK 11:25 Firot aia hari deḳe, hi zaga shundor ḳori hazai-faṛai toa.
LUK 11:26 Ou he gia tar taki aro bod shatgu zin loge ḳori ane. Ania ono hamaia basha banae. Erdae ou bemarir dosha foyla taki heshe aro ḳaraf oy.”
LUK 11:27 Isae ota boyan ḳorra, aḳta-u biṛor maz taki eḳ beṭie zure zure ḳoilo, “Huzur, ze maʼe afnare feṭo loisoin ar dud ḳaoaisoin, ein boṛo ḳofali ma.”
LUK 11:28 Isae ḳoila, “Ikan hasa ḳota, oile er saite-o boṛo ḳofali tara, zara Allar kalam hune, hunia ola amol ḳore.”
LUK 11:29 Bade aro bout manush Hozrot Isar gese aila. Tain erare ḳoila, “I zomanar manush to naforman. Tara ḳali keramoti tukae, oile Iunus nobir alamot saṛa dusra kunu keramoti tarare deḳail oito nae.
LUK 11:30 Iunus nobi nize nize-u zela Ninob ṭaunor manshor gese eḳ alamot oisla, bin-Adom-o oula i zomanar manshor gese nize-u alamot oiba.
LUK 11:31 Ruz kiamotor din douknor deshor rani uṭia ou zomanar manshor dush zair ḳorba. Ḳaron Bashsha Sulaimanor aḳolor ḳota hunar niote tain duniar hesh mata taki aisla. Oile oḳon to Sulaiman taki-o aro mohan eḳzon ono asoin.
LUK 11:32 Kiamotor din Ninob ṭaunor murda oḳol uṭia i zomanar manshor dush zair ḳorba. Ḳaron Iunus nobir toblig hunia tara touba ḳorsila. Oile oḳon to Iunus taki-o aro mohan eḳzon ino asoin, ta-o manshe touba ḳorer na.
LUK 11:33 “Kunu manshe to lem zalaia hari sokir tole ba ṭukrir tole toy na, borong gasar ufre-u toy, zate goror manshe for deḳe.
LUK 11:34 Tumar souk-u oilo tumar ḳayar batti. Souk zudi bala oy, te tumar asta shorilo for oibo. Ar souk karaf oile, tumar shoril-o andarit roibo.
LUK 11:35 Te kial rakio, tumar dilo ze nur ase, ita andair oizar ki na?
LUK 11:36 Tumar asta shorilo zudi for taḳe, kunu ongo andair na taḳe, te leme zela tar nizor teze tumare for dey, oula i nure-o tumar asta shorilre for ḳorilibo.”
LUK 11:37 Isae boyan ḳorra ou shomoy Forishi dolor eḳzone tanre ḳaibar daot dila. Tain gia en goror bitre ḳanit boila.
LUK 11:38 Forishie deḳla, ḳaoat boibar ḳalo Isae Ihudi niom mafik at doisoin na, ou tain taijjub bonigela.
LUK 11:39 Teu Isae tanre ḳoila, “Hunoukka, afnara Forishi oḳole to bashon-bortonor bair gala kub shundor ḳoroin, oile afnarar bitre to naformani ar lalose bora.
LUK 11:40 O be-aḳolor dol, zein bargala banaisoin, tain-u kita bitor gala-o banaisoin na ni?
LUK 11:41 Erlagi afnarar bitre zeta ase, ota age Allar oaste lilla-sodga deukka. Teu deḳbane, afnarar hoḳolta-u fak-saf oizibo.
LUK 11:42 “Haere Forishi oḳol, lannot tumrare, tumra ḳali tezfata, fodina fata ar hokkol hag-torḳarir dosh baṭor eḳ baṭ Allar name zoḳat deo, oile Allar mohobbot ar hok insafor bae tumrar kunu kial-u nai. Ashole ou foylata manar loge loge badorta-o amol ḳora forz.
LUK 11:43 O lannoti Forishi oḳol! Mosido hamaia samnor ḳataro boa, ar bazar-aṭo gia salam faite tumra kub fosond ḳoro.
LUK 11:44 Lannot tumrar ufre, tumra oilae osina ḳoyboror laḳan. Manshe na sinia er ufredi aṭa-fira ḳore.”
LUK 11:45 Ikan hunia eḳzon alime Isare ḳoila, “Huzur, oḳan ḳoia to afne amrare-o beijjot ḳorra.”
LUK 11:46 Isae ḳoila, “Nisoy, afnara-o lannoti, afnara manshor ḳando bar buzai koria dein, oile tarar asanor lagi angulṭa-o laṛoin na.
LUK 11:47 “Haere lannoti oḳol, tumra nobi oḳlor rouzare shundor ḳoria fakka ḳoro, oile tumrar moy-murobbie-u to erare zane marsla.
LUK 11:48 Ota dekia-u buza zae, tumra tumrar moy-murobbir ḳamor shakki oirae, tumra-o ola oirae. Tara nobi oḳolre zane marsil, ar tumra hou nobir rouzare fakka ḳorrae.
LUK 11:49 Erdae Alla Pake-o tan nizor morzie ḳoila, ami tarar gese amar nobi-rosul bezimu, erar ḳeurore tara zulum ḳorbo, ar ḳeurore zane marbo.
LUK 11:50 Ete duniar foyla taki oḳon forzonto zoto nobire zane mara oise, era hokkolor dayi oiba ou zomanar manush.
LUK 11:51 Hunoukka, ami afnaintore ḳoiram, foyla Adomor fut Habilor kun taki shuru ḳoria, nobi Zakariar kun forzonto hoḳol lour shaza ou zomanar manshor ges taki adae ḳora oibo. Nobi Zakariare to Zeruzalemor fobitro Kaba Shorifor kurbani kana ar Herem Shorifor mazḳano kun ḳora oise.
LUK 11:52 Haere lannoti alim oḳol, tumra manshore-o Allar fot sinairae na, nize-o Allar bashshait hamairae na, ar zera hamaito sar, tarare-o bada dirae.”
LUK 11:53 Boyan bade Isa ikan taki roana dilaila. Teu alim ar Forishi oḳole mizaz gorom ḳoria Isare fando falaita ḳori kusai-faṛai matila. Nanan nomunar soal ḳoria tanre aṭḳanir shuzug tukaila.
LUK 12:1 Ou shomoy azar azar manush dola oigela, tara ṭelaṭeli kori eḳe-oinnor ufre foṛla. Isae foyla tan sahabi oḳolre ḳoila, “Tumra Forishi mozobor ḳamir taki hushiar roio, ou ḳamir oilo tarar bonḍami.
LUK 12:2 Ṭik ou ḳamiror laḳan, ila lukail kunta-u nai, zeta zair oito nae. Ila gufon kunta-u nai, zeta zana zaito nae.
LUK 12:3 Tumra andair goro zeta matiso, manshe ita foror maze hunbo. Goror bitre ḳane ḳane zeta ḳoiso, ita salor ufre roṭail oibo.
LUK 12:4 “O amar dust oḳol, ami tumrare ḳoiar, zara ḳali shorilre binash ḳora saṛa ar kunta-u ḳorto fare na, tarare ḍoraio na.
LUK 12:5 Te ḳare ḍoraitae eoḳan-o ḳoiram, marar bade duzoḳo haranir ḳemota-o zan ase, ḳali tanre-u ḍoraio. Ami hirbar ḳoiram, tumra ḳali tane-u ḍoraio.
LUK 12:6 Matro dui anae fasgu soṛa faki mile na ni? Allae to ou soṛar ḳota-o fauroin na.
LUK 12:7 Ar kita ḳoitam, tumrar matar sulor hishab-o tan gese ase. Tumra ḍoraio na, bout soṛa faki tone-o tumrar dam tan gese beshi.
LUK 12:8 “Huno, ami tumrare ḳoiram, ze manshe shomazor samne amare kobul ḳore, ami bin-Adome-o Allar firista oḳlor samne tare kobul ḳormu.
LUK 12:9 Oile ze manshe shomazor samne amare oshikar ḳorbo, ami-o tare Allar firista oḳlor samne oshikar ḳormu.
LUK 12:10 Ami bin-Adomor birudde ḳeu kunta matile-o mafi faibo. Oile ḳeu zudi Pak Ruhur birudde kufuri kore, te tar kunu mafi nai.
LUK 12:11 “Manshe zebla tumrare mosidor fainchaito, bisari oḳlor samne, ba tanat nibo, ou shomoy kita zuaf ditae ba kita ḳoitae, ita loia kunu sinta ḳorio na.
LUK 12:12 Kita matitae ita Pak Ruhe tumrare hou shomoy batai diba.”
LUK 12:13 Biṛor maz taki eḳzone Isare ḳoilo, “Huzur, afne amar baire ḳoukka, amar babae zeta don-samana toia gesoin, ota baṭ-baṭura ḳoria dita.”
LUK 12:14 Isae tare ḳoila, “Oba, tumrar bisar ḳortam ar don-samana baṭitam, ita eḳtiar amare ḳegue dise?”
LUK 12:15 Tain manshore ḳoila, “Ḳobordar! Hokkol nomunar lub-lalos tone nizore basao. Ḳaron don-samana baia gele-o itae manshor zan basae na.”
LUK 12:16 Bade Isae tarare ou kichcha hunaila, ḳoila, “Eḳ doni beṭar zomino bout dan folisil.
LUK 12:17 Dan dekia he mone mone ḳoilo, oto dan oḳon kita ḳortam? Amar to toibar-u zaga nai.
LUK 12:18 Te ami ek kam ḳori, amar ugar bangia boṛo ḳori koyṭa ugar banailai. Teu amar hoḳol dan ar mal-samana zaga oibo.
LUK 12:19 Heshe amar zanre ḳoimu, O zan, bout bosoror mal-samana ar ḳani-kurakir lagi nisinta oigeso. Oḳon aram-ayeshe tumi kaia findia furti koro.
LUK 12:20 Oile Allae tare ḳoila, ore be-aḳol, tor zan to aiz rait-u ḳoboz ḳora oibo. Te tui zeta zomaisos, ita ḳegue ḳaibo?”
LUK 12:21 Heshe Isae ḳoila, “Ze manshe ḳali duniabi don-samana dola ḳore, oile aḳeror don na zomae, tar halot oula-u oy.”
LUK 12:22 Bade Isae tan shagrid oḳolre ḳoila, “Erdae-u ami tumrare ḳoiram, kita ḳaia bastam, ar kita finditam, ita loia tumra sinta ḳorio na.
LUK 12:23 Zan taki to ḳani boṛo nae, ar shoril taki kafoṛ boṛo nae.
LUK 12:24 Ou ḳauaguintor bae kial ḳoro, tara to ḳet-o ḳore na, foshol-o ḳaṭe na. Tarar ugar-o nai, banḍar-o nai. Allae tarar rizek zugaia dein. Te tumra to ou ḳaua taki bout dami.
LUK 12:25 Ḳo sain, tumrar maze ḳeu sinta-babna ḳoria tar hayati ekkan gonṭa-o baṛaito farbo ni?
LUK 12:26 Ar ou huru ḳamḳan-u zebla faro na, te ḳene baṛti sinta ḳoro?
LUK 12:27 “Tumra ou zongli fulor bae sao, ita ḳoto shundor! Itae to nizor shundoror lagi kunta-u ḳore na, kunu rong silai-o ḳore na, bain-o ḳore na, emne-u oy. Te ami koiar, Bashsha Sulaiman oto zak-zomoḳor maze roile-o tan lebas to ota egu zongli fulor laḳan-o shundor asil na.
LUK 12:28 Deḳrae ni, zongolor maze ou zoto shundor ful oḳon ase, ḳail oile-u manshe ita daru banaia aguindi zalaibo. Allae zudi ou zongolre ola shundor ḳori hazaisoin, te O ḳomzur imandar oḳol, tumrare-o tain shundor ḳori hazaita nae ni?
LUK 12:29 Te kila ḳaitam, kila soltam, ita befare sinta ḳorio na, ba ostir oio na.
LUK 12:30 I duniar manshe ḳali ota loia-u danda ḳore. Oile tumrar batuni bafe to emne-u zanoin, tumrar kita kita lagbo.
LUK 12:31 Erdae-u tumra ita bad dia, ḳali Allar bashshair dandat ro, teu ita hokkolta-u tain zugaiba.
LUK 12:32 “Tumra-u amar meṛar fal, tumrar dol huru-muru oile-o ḍoraio na, tumrar batuni bafor morzi oilo, tumra tan bashshair bitoro hamao.
LUK 12:33 Tumrar zotota ase, hokkolta besia gorib oḳolre bilai deo, ar nizor lagi kali oula ek kuti-beg tiar ḳoro, ze kuti kunudin furan oy na. Ou behesto samana zoma ḳoro, zeḳano samana koy oy na, sure-o ney na, fuke-o ḳae na.
LUK 12:34 Ḳaron tumrar don zeno roy, mon-o hono roibo.
LUK 12:35 “Tumra ḳafoṛ-sufoṛ findia ar batti zalaia tiar roio.
LUK 12:36 Tumra ou zat ḳamlar laḳan o, zara tarar munibor lagi bar sae, tain biar daot taki firot aia duaro ṭuka dile-u, loge loge duar kulto fare.
LUK 12:37 Hou gulam oḳol-u ḳofali, zerare tarar munibe aia hozag faiba. Ami hasa ḳota ḳoiram, munibe aia hari tan nizor ḳomro gamsa bandia tarare ḳanit boaiba, ar nizor ate baṛia ḳaoaiba.
LUK 12:38 Tara-u boṛo ḳofali, zerare tarar munibe ada rait ba hesh raite aia ḍaḳ dile-u hozag faiba.
LUK 12:39 Mono rakio, sur kun shomoy aibo, giroste ikan zanle to he hozag roilo one, tar goro hing kaṭte dilo na one.
LUK 12:40 Tumra-o ola tiar roio, ḳaron ze oḳtor ḳota tumra sinta-u ḳortae nae, hou shomoy-u bin-Adome toshrif anba.”
LUK 12:41 Teu sahabi Fitore ḳoila, “Huzur, i nosiot ḳali amrar lagi, na hoḳol manshor lagi?”
LUK 12:42 Huzure zuaf dila, “Aḳoldar ar hok-halali ou zon ḳe, zar ato malike tan gulam-bandire deḳa-hunar bar diba, he oḳtor ḳalo tarar ḳani baṭia dibo?
LUK 12:43 Hou gulam-u ḳofali, zare tar munibe aia ou laḳan ḳam ḳorat deḳba.
LUK 12:44 Ami tumrare hasa ḳota ḳoiram, hou munibe tare tan nizor hoḳol don-samana todarkir eḳtiar diba.
LUK 12:45 Oile dorilao, hou gulame mone mone ḳoilo, amar munib aite to bout deri ase, ar ou faḳe he hokkol bandi-gulamre mair-doir ḳorlo, ḳaia-daia furti koria, mod ḳaia ṭal oia foṛi roilo.
LUK 12:46 Bade ze din ar ze oḳtor ḳota he sinta-u ḳorto nae, hou din ar hou oḳto tar munib aia azir oiba. Tain tare eḳ sede dui ṭukra ḳoria naforman oḳlor ḳataro mishaiba.
LUK 12:47 “Ar ze gulame tar munibor morzire buzia-o tiar oise na, tan hukum mafik kam ḳorse na, tare bezuita mair mara oibo.
LUK 12:48 Oile na zania zudi he shaza faibar ḳam ḳorilae, te tar shaza ḳom oibo. Zare beshi deoa oise, tar ges tone beshi saoa oibo, ar zar gese beshi forimane toa oise, tar gese-u beshi dabi kora oibo.
LUK 12:49 “Ami to duniat aguin laganit aisi. Oḳon zudi i aguinḳan zolizito, te boṛo bala oilo one.
LUK 12:50 Ami to ek kas gusol ḳora-u lagbo. Te amar duk-koshṭor i gusol zotodin na oise, otodin amar fereshanir kunu shima nai.
LUK 12:51 Tumra mono ḳorrae ni, ami duniat shanti ditam aisi? Na, muṭe-u nae, ami koiram, ami to duniat eḳ motobed laganit aisi.
LUK 12:52 Oḳon taki ek goror faszon zarzir alog oizibo. Tinzon duizonor bifokke, ar duizon tinzonor bifokke lagbo.
LUK 12:53 Bafe fuar bifokke ar fua bafor bifokke. Ma fuṛir bifokke ar fuṛie maʼr bifokke. Hoṛi bour bifokke ar boue hoṛir bifokke lagbo.”
LUK 12:54 Bade Isae manshore ḳoila, “Tumra to foismedi kalni deḳle-u ḳo, meg aior. Ar hasau meg ae.
LUK 12:55 Hirbar dokkina batash salu oile tumra ḳo, ḳora oibo, ar ola-u oy.
LUK 12:56 O bonḍo oḳol! Tumra asman ar zominor surot buztae faro, te aḳeri zomanar hal-hokikot ḳene buzo na?
LUK 12:57 “Kunḳan ṭik, ita tumra nize nize-u bisar ḳoro na ḳene?
LUK 12:58 Kunu nalish loia hakimor samne zaibar age, bifokkor loge foto boia-u miṭ-maṭ ḳorar sesṭa ḳorio. Arnae he tumare doria hakimor samne nibo, hakime fulishor ato dibo, ar fulishe nia zelo haraibo.
LUK 12:59 Heshe shesh foyshaṭa adae na ḳora forzonto, kunumonte-u zel taki saṛa faitae nae, ita ami tumrare ḳoiram.”
LUK 13:1 Hozrot Isae boyan ḳorra, ou shomoy honor ḳoyzon manshe tanre ḳoila, “Huzur, Galil zilar kisu manshe Allar pak zagat gia foshu kurbani deoat asla, ou shomoy hakim Filate tarare hou pak zagat zane maria, tarar lou ar kurbanir lou eḳloge mishaisoin.”
LUK 13:2 Ikan hunia Isae ḳoila, “Ou kurbani deorar mout ola oae, tumra mono ḳorrae ni, Galilor oinno manush taki era beshi gunagar asil?
LUK 13:3 Ami tumrare ḳoiram, na, ila nae, oile tumra zudi guna taki touba na ḳoro, te tumra-o ola binash oibae.
LUK 13:4 Huno, Zeruzalemor Siloa elaḳar hou usa minara bangae ze aṭaro zon mara gesil, tarar befare kita mono ḳoro? Zeruzalemor baki manush taki era beshi gunagar ni?
LUK 13:5 Ami tumrare ḳoiram, na, ikan ṭik nae, oile tumra zudi guna taki touba na ḳoro, te tumra-o ola binash oibae.”
LUK 13:6 Bade tain ou kichcha hunaila, “Ek giroste tan bagano ḍumuror eḳṭa gas lagaila. Shomoy aile ein aia gaso fol tukaila, oile kunu fol faila na.
LUK 13:7 Na faia baganor malire ḳoila, huno, aiz tin bosor dori ou ḍumur gaso fol tukairam, oile kunta-u fairam na. Te tumi gasgu ḳaṭilao, igue ḳamoḳa zominor rosh ṭaner.
LUK 13:8 Malie ḳoilo, Sab, i bosorḳano taḳouk. Ami ogur sairo galar maṭi kuṛia shar dimu.
LUK 13:9 Samnor bosor zudi fol dorilae, te to bala, naile ḳaṭilimu.”
LUK 13:10 Eḳ Zummabare Isa mosidor bitre nosiot ḳorat asla.
LUK 13:11 Hono eḳ beṭi manush asil, i beṭir ufre aṭaro bosor dori atoshi-deoe asor ḳorsil. Deoe beṭire guza banailisil, beṭi shida oia ubaito farto na.
LUK 13:12 Isae beṭire ḍaḳdi kandat ania ḳoila, “Mai go, tumi oḳon i bemar taki rehai faiso.”
LUK 13:13 Oḳan ḳoia-u tain beṭire atai dila. Loge loge-u beṭi shida oia ubailo, ar Allar shukur-guzar ḳorlo.
LUK 13:14 Oile Zummar din tain i beṭire bala ḳorae, mosidor motollie gusa ḳoria ḳoila, “Ḳam ḳorar lagi to baki soydin-u ato ase. Tumra Zummar din na aia oinno zekunu din aia bala oio.”
LUK 13:15 Teu Isae hi motollire ḳoila, “O bonḍo oḳol! Zummar din afnarar goru-gadare gualar bare nia fani kabain na ni?
LUK 13:16 Aiz aṭaro bosor dori Ibrahimor ou aoladre Shoytane bandia raḳsil. Oḳon Zummabare i beṭire azad ḳora zaiz oise na ni?”
LUK 13:17 Ikan hunia zera tan bifokke asil tara hoḳole-u shorminda oilo. Oile baki musolli oḳole tan hoḳol keramoti dekia kushi oila.
LUK 13:18 Bade Isae ḳoila, “Allar bashshaire ami kitar loge tulona ḳortam?
LUK 13:19 Mono ḳoroukka, Allar bashshai oilogi egu ḍenga bisir laḳan, kunu giroste tar zomino nia ou bisi bain dilo, bade iṭa boṛo oia gas oigelo, ar fakinte aia gasor ḍalo bada banailo.”
LUK 13:20 Tain hirbar ḳoila, “Allar bashshair tulona ami kitar loge ḳortam?
LUK 13:21 Doroukka, Allar bashshai oilogi kamiror laḳan, kunu eḳ beṭie tuṛa ḳamir nia eḳ mon moydar loge makilo, ar ḳamiror fafe hoḳol moyda fulia uṭilo.”
LUK 13:22 Hozrot Isae aṭi aṭi gaue gaue ar ṭaune ṭaune gia toblig koria Zeruzalemor bae aguaila.
LUK 13:23 Ermaze eḳzon manshe tane zikailo, “Huzur, zera nazat faiba, era forimane kub ḳom ni?” Ou Isae manshore ḳoila,
LUK 13:24 “Sifa duaredi hamanir lagi dile-zane fikir ḳoro. Huno, ami tumrare ḳoiram, bout zon ino hamaite saile-o, hamaito farto nae.
LUK 13:25 Goror malike zebla duar bond ḳoriliba, tumra bare ubaia duaro ṭukaite ṭukaite ḳoibae, ‘Huzur, amrare duarḳan kulia deukka.’ Oile tain zuaf diba, ‘Tumra kuai taki aiso, ami to sini-u na.’
LUK 13:26 Teu tumra ḳoibae, ‘Amra afnar loge ḳaisi-boisi, afne to amrar foto-gaṭo aia amrare nosiot ḳorta.’
LUK 13:27 Oile tain ḳoiba, ‘Haere naforman oḳol, amar ges taki bago. Tumra kuai taki aiso, ami to sini-u na.’
LUK 13:28 “Tumra deḳbae Ibrahim, Isʼhak, Iakub ar tamam nobi oḳol Allar bashshait dakil oisoin, oile tumrare horaia falani oise. Tumrar maze ḳeu ḳanda-ḳaṭi korbae ar ḳeu dat kiṛimiṛi kaibae.
LUK 13:29 Aro deḳbae, duniar sairobae taki manush aia Allar bashshait dakil oia ḳana-dana ḳaira.
LUK 13:30 Te zera oḳon ḳoror ḳataro ase, tara ḳeu ḳeu age aibo, oile oḳon zera agor ḳataro ase tara ḳeu ḳeu ḳore zaibogi.”
LUK 13:31 Tain ota matira, ermaze aḳta-u Forishi dolor ḳoyzon aia Isare ḳoila, “Afne in taki horia zaingi, ḳaron Raza Herude afnare marilita saira.”
LUK 13:32 Isae tarare ḳoila, “Afnara gia hou hialor saore ḳoukka, aiz ar ḳail ami zinnat saṛaimu, bemari oḳlor shifa ḳormu, foru din amar ḳam shesh oibo.
LUK 13:33 Te zela-u ouk, aiz, ḳail ar foru, ou tin din amar sola-u lagbo. Ami to zani-u, Zeruzalemor bare kunu nobire zane mara oy na.
LUK 13:34 “Zeruzalem! Haere Zeruzalem! Tumi nobi oḳolre zane maro. Tumar gese zarare beza oise, tumi tarare fattor marso. Murgie zela tair saore ḍaḳnar tole asroy dey, ami oula tumar manshore asroy ditam saisi, oile tumi razi oilae na.
LUK 13:35 Te huno, tumar baṛi kali-baṛi oibo. Ami tumrare ḳoiram, zotodin tumra na ḳoibae, Allar nam loia zein aira tain-u mubarok, otodin tumra ar amare deḳtae nae.”
LUK 14:1 Hozrot Isa Forishi dolor eḳ murobbir baṛit kunu eḳ Zummabare daoto gela, gia harle tara tan bae kub bala ḳori souk raḳlo.
LUK 14:2 Aḳta-u tan samne eḳ bemari beṭa ailo, tar asta shoril bemare fuligesil.
LUK 14:3 Teu Isae honor alim ar Forishi oḳolre zikaila, “Musa nobir shoriot mafik Zummabare kunu manshor bemar shifa ḳora zaiz ni?”
LUK 14:4 Ikan hunia tara hoḳol nirai roila, ar Isae hi bemarire shifa ḳoria bidae dilaila.
LUK 14:5 Bade tarare ḳoila, “Tumrar maze ila kunu zon ase ni, zar kunu hurutta ba goru-sagol zummar din fanit foṛigele, he igure fani taki tule na?”
LUK 14:6 Ikan hunia tara kunu zuaf dita farla na.
LUK 14:7 Ar ze meman oḳol daoto aisoin, tara hoḳole bala bala zaga tukai boira dekia, Isae tarare ou talim dila,
LUK 14:8 “Kunu manshe tumare biar daot dile, tumi mozliso hamaia dami zagat boa ṭik nae. Ḳaron malike kiban tumar taki aro ijjoti keurore daot disoin.
LUK 14:9 Te oile zein tumare daot disoin tain aia ḳoiba, ou siṭ taki uṭia amar dami memanre boibar dein. Teu tumi shorminda oia emne-u hoḳol taki nisa zagat gia boibae.
LUK 14:10 Erdae tumi kunu daoto gele foyla nisa zagat gia boio. Teu zar baṛit daoto geso tain aia ḳoiba, baisab, ino ḳene boisoin, bala zagat toshrif anoukka. Ete aro meman oḳlor samne tumar ijjot baṛbo.
LUK 14:11 Ashole ze nizore boṛo mono ḳore, tare huru ḳora oibo. Ar ze nizore huru mono ḳore, tare boṛo ḳora oibo.”
LUK 14:12 Ze moulanae Hozrot Isare daot disla, Isae enre ḳoila, “Dinor ba raitkur ḳanir lagi tumi kunu onusṭan ḳorle, tumar bondu-bandob, bai-birador, ḳesh-kuṭum, ar daro ḳasor doni manshore daot dio na. Tarare ḳaoaile bade tara-o tumare ḳaoaia bodla dilaiba.
LUK 14:13 Erlagi tumi kunu memandari korte saile, ḳali gorib manush, atur, anda, lula-lengṛare daot dio.
LUK 14:14 Era to firia tumare ḳaoaito farto nae. Ete kiamotor din tumi forezgar oḳlor loge itar bodla faibae.”
LUK 14:15 Ita hunia hou ḳanir mozlisor eḳzone ḳoila, “Mubarok hou bonda, zein Allar bashshait boia ḳana-fina ḳaiba.”
LUK 14:16 Teu Isae ḳoila, “Kunu eḳzon manshe kub boṛo eḳ mezbani koria, bout manshore daot dila.
LUK 14:17 Ḳaoar shomoy oile tan gulamredi koaila, ‘Afnara aioukka, ḳana tiar oigese.’
LUK 14:18 Oile hoḳol daotie eḳ eḳṭa uzor deḳailo. Foyla zone ḳoilo, ‘Ami tuṛa zomin ḳorid ḳorsi, oḳon deḳat zaitam, te hono na gele oito nae, erlagi amare maf ḳoroukka.’
LUK 14:19 Dusra zone ḳoilo, ‘Ami alor lagi fas zuṛa bisal loisi. Oḳon gia deḳtam, itae al bain ki na, amare maf ḳoroukka.’
LUK 14:20 Aroḳzone ḳoilo, ‘Ami to noya bia ḳorsi. Oḳon zaitam fartam nae.’
LUK 14:21 Hi gulame aia tar malikre hoḳolta zanailo. Ita hunia malike gusa ḳoria ḳoila, ‘Tui zoldi kori ṭaunor ollie-gollie za, gia gorib, atur, anda, lula-lengṛare angi.’
LUK 14:22 Teu he ola ḳoria hari bade aia ḳoilo, ‘Huzur, afnar hukume hoḳolta ḳora oise, oile oḳono zaga ḳali roise.’
LUK 14:23 Ou tain ḳoila, ‘Te ṭaunor bare foto-gaṭo, ar sifae-safae za, gia minot-ḳajji kori manshore an. Manush aia mozlis bori zaukka.
LUK 14:24 Ar tumra kial ḳori huno, age zetare daot dislam, ita kunugie zanu amar ḳani na fain.’ ”
LUK 14:25 Bade Hozrot Isar loge oia bout manush aṭat asla. Ou shomoy tain erar bae saia ḳoila,
LUK 14:26 “Ḳeu zudi amar torikat aito sae, te tar nizor ma-baf, bou-baichcha, bai-birador, ar nizor zanre-o amar taki huru mone ḳorte oibo. Arnae he amar ummot oito farto nae.
LUK 14:27 Ze manshe nizor duk-koshṭor solib ḳando loia amar ḳore ḳore roy na, he amar ummot oito fare na.
LUK 14:28 “Tumrar ḳeu zudi usa kunu dolan banaito sae, te he foyla tar ḳorosor hishab milaia deḳe, dolanor ḳam shesh ḳorar lagi tar ṭeḳa ase ki na.
LUK 14:29 Na oile, ian dia hari kam shesh ḳorte na farle, manshe ṭaṭṭa ḳorba,
LUK 14:30 tara ḳoiba, beṭae dolan tulia oḳon shesh ḳorto farer na.
LUK 14:31 “Ar zudi eḳ raza aroḳ razar bifokke zuddo ḳorat lagoin, te foyla boia foramish ḳorba, tain ḳoiba, bish azar fouz loia zera amar bifokke aira, ami dosh azar fouz loia er mukabila ḳortam farmu ni?
LUK 14:32 Zudi na faroin, te hamla ḳorra raza duroi taḳte-u afushor lagi koyzon tiait faṭaiba.
LUK 14:33 Ṭik oula, tumrar maze ḳeu zudi tar hokkoltar maya saṛto na fare, te he amar ummot oito farto nae.
LUK 14:34 “Nun to bala zinish, oile nunor zudi shad nosṭo oizae, te ar nunta ḳora zae ni?
LUK 14:35 Itadi shar-o banail zae na, zomino deoa zae na, erlagi manshe ita bare falai dein. Hunar moto ḳan zar ase, he hunouk.”
LUK 15:1 Hozrot Isar boyan hunar lagi bout gushkur ḳazna tulra ar be-shorioti am manush tan gese dola oila.
LUK 15:2 Ita dekia Forishi dolor manshe ar moulana oḳole ḳana-ḳani kori koila, “I manushgu ḳali naforman oḳlor loge uṭa-boa ar ḳana-fina ḳae.”
LUK 15:3 Teu Isae tarare ou kichchain hunaila. Tain ḳoila,
LUK 15:4 “Mono ḳoroukka, afnara kunu eḳzonor eḳ-shoṭa meṛa ase. Ermazor egu meṛa arai gele, he baki nirannobboiṭa bondo toia hou arail ogu tukanit zae na ni?
LUK 15:5 Gia ogu tukaia faile, kushie iṭare ḳando ḳori ane.
LUK 15:6 Bade baṛit gia bondu-bandob ar ari-forire ḳoy, ‘Ao, amar loge furti koro. Amar arail meṛagu tukaia failisi.’
LUK 15:7 Ami afnarare ḳoiram, ekkere ou laḳan-u, zara guna taki touba ḳorar zorur mono ḳore na, ila nirannobboi zon forezgar taki eḳzon gunagare mon bodlaia touba ḳorle, behesto aro beshi kushi-bashi oy.
LUK 15:8 “Ba doroukka, kunu eḳ beṭir gese rufar doshṭa ṭeḳa asil. Er taki egu ṭeḳa zudi araizae, te beṭie hi ṭeḳar lagi lem zalaia huruindi huria asta gor tukae na ni?
LUK 15:9 Bade tukaia failile bondu-bandob ar ari-forire ḍakia ḳoy, ‘Ao na, amar loge kushit shamil o. Amar arail ṭeḳagu tukaia failisi.’
LUK 15:10 Ami afnarare ḳoiram, ekkere ou laḳan-u, eḳzon gunagar manshe mon bodlaia touba ḳorle, Allar firista oḳole oula kushi koroin.”
LUK 15:11 Bade Isae ḳoila, “Ek girostor dui fua asil.
LUK 15:12 Eḳdin huru fuae tar bafre ḳoilo, baba, ami babaiti zomi-zoma ar don-samana zeta faitam, amar ou baṭḳan oḳon-u algaia dilaukka. Ou bafe tan samana duio fuar name baṭia dilaila.
LUK 15:13 Er ḳoydin bade huru fuae tar hokkol samana besia bidesh gelogi. Bidesh gia bad fote solia tar ṭeḳa-foysha hokkolta kuaililo.
LUK 15:14 Hoḳolta kuaia harle hou deshor hoḳol zagat kub nidan deḳa dilo erdae he kub ḳoshṭot foṛlo.
LUK 15:15 He hou deshor ek girostor baṛit gia saḳri sailo. Malike tare saḳri dia shuoror fal raḳar lagi bondo faṭailo.
LUK 15:16 Bondo gia shuore zeta ḳae, he-o ota ḳaia feṭor buk miṭaito sailo, oile ota-o ḳeu tare dito na.
LUK 15:17 “Bade aḳta eḳdin tar hush oilo. He mone mone ḳoilo, amar babar baṛit to bout saḳor-baḳore feṭ bori bat ḳaira. Te ami ono ufashe morram ḳene?
LUK 15:18 Ami gia amar babare ḳoimu, Baba, ami to Allar gese ar tumar gese-o naforman bonigesi.
LUK 15:19 Tumar fua ḳoia ami ar forisoy dibar laḳ nae. Ḳali tumar saḳoror laḳan amare eḳzora asroy deo.
LUK 15:20 Oḳan ḳoia he tar baṛit roana dilailo. Baṛir ḳandat aite-u tar bafe tare dekilila. Dekia tan dil goli gelo. Tain douṛia gia tare ainja ḳori doria hunga dila.
LUK 15:21 Teu fuae ḳoilo, ‘Baba, ami to tumar fua ḳoia forisoy dibar laḳ roisi na. Ami Allar gese ar tumar gese-o naforman bonigesi.’
LUK 15:22 Oile bafe loge loge ḳamlaintore ḳoila, ‘Hoi, zoldi kori gor taki bala zubbaṭa ania amar fuagure findao. Tar ato angṭi ar faot zuta findai deo.
LUK 15:23 Ar huno, falo taki taza ḍeḳa-basurgu ania zobo ḳoro. Ao, amra hoḳole milia kushi-bashi kori kana ḳai.
LUK 15:24 Amar i fuagu to morigesil, oḳon hirbar zinda oise. Ogu nai oigesil, oḳon firot faisi.’ Teu hoḳole milia kushi-bashit lagla.
LUK 15:25 “Ou shomoy beṭar boṛo fua bondo asil. He baṛir ḳandat aia nas-gan ar ḍul-ḍofkir aoaz hunia,
LUK 15:26 tarar eḳ saḳorre zikailo, ‘Kitare, ita kita or?’
LUK 15:27 Saḳore ḳoilo, ‘Sab, afnar huru bai baṛit aisoin. Afnar abbae tanre sohi-salamote faia, taza ou ḍeḳa-basur zobo ḳorsoin.’
LUK 15:28 Ikan hunia boṛo fuae gusa ḳoria baṛir bitre aito sailo na. Teu tar baf bar oia aia tare minot-ḳajji korla.
LUK 15:29 He tar bafre ḳoilo, ‘Deḳoukka, ami otodin doria afnar kezmot ḳorram, kunudin-u afnar hukum ulṭaisi na. Oile amar bondu-bandob loia kushi korar lagi egu bokrir baichcha-o kunudin disoin na.
LUK 15:30 Ar afnar ze fuae noṭi beṭintor tole hoḳol samana kuaise, he aite-u taza ḍeḳa-basurgu ania zobo ḳorilaila!’
LUK 15:31 Bafe ḳoila, ‘Futre, tumi to hamesha-u amar loge aso. Amar zeta samana roise, ita hokkolta-u to tumar.
LUK 15:32 Oḳon amra hoḳole dil saf ḳoria kushi-bashi kora zorur. Tumar i bai to mori-u gesil, oḳon hirbar zinda oise. Ogu ekkere nai oigesil, oḳon firot faisi.’ ”
LUK 16:1 Bade Hozrot Isae tan shagrid oḳolre ḳoila, “Huno, kunu eḳ zomidaror eḳ menezar asil. Ou menezaror bodnam bar oilo, he bule tar munibor don-samana binash ḳorilar.
LUK 16:2 Bodnam hunia munibe tare anaia ḳoila, ‘Tumar name ita kita hunram? Tumar hishab-nikash hoḳolta shomzai deo. Tumare ar saḳrit raḳtam nae.’
LUK 16:3 Ikan hunia menezare mone mone ḳoilo, ‘Oḳon ami kita ḳortam? Munibe to amare bidae dilaira. Ami to maṭi kam-o ḳortam fartam nae, bik korte-o shorom lage. Oḳon ḳaimu kila?
LUK 16:4 Aichcha, ek kam ḳori, zate amar menezari gelegi-o manshor goro asroy fai.’
LUK 16:5 Ou he kita ḳorlo, zarar gese tar munibor faona asil, eḳ ek kori erare anailo. Anaia foyla zonre ḳoilo, ‘Tumar gese amar munibor ḳoto faona ase?’
LUK 16:6 Hein ḳoila, ‘Eḳ-sho mon tel.’ Menezare ḳoilo, ‘Zoldi kori tumar ḳata bar ḳoro, ar eḳ-shor bodla foinchash mon lekilao.’
LUK 16:7 Bade menezare dusra zonre zikailo, ‘Tumar gese ḳoto fain?’ Hein ḳoila, ‘Eḳ-sho furar gom.’ Menezare ḳoilo, ‘Tumar hishabo ashi furar lekilao.’
LUK 16:8 Ita hunia hi zomidare ou beiman menezaror tarif ḳorla. Tain ḳoila, ‘He dandabaz oile-o bout boṛo buddimanor ḳam ḳorse.’ Te kita mono ḳoro, itae buza zae na ni, Allaraia manshor aḳol taki-o, i zomanar duniabi manshor fes-faichcha beshi.
LUK 16:9 Huno, ami kita ḳoiram, tumra-o naforman ou zogotor samana dia manshor loge dusti fatao, zate i samana fuṛaigele-o tumrare behestor bagano fulor mala deoa oy.
LUK 16:10 “Ze manush shamainno befare hok-halal roy, he boṛo befare-o hok-halal roy. Oile ze zone shamainno befare beimani kore, he boṛo befare-o beimani kore.
LUK 16:11 Te tumra zudi duniabi don-samanar befare hok na ro, taile ḳe tumrare bishash ḳoria asol don dibo?
LUK 16:12 Foror samana zudi tumra ṭik-ṭak moto bebohar ḳortae na faro, te ḳe tumrar nizor samana tumrar ato dibo?
LUK 16:13 Kunu gulame eḳloge dui munibor gulami korto fare na. Te oile he eḳzonre ingshaibo, aroḳzonre maya ḳorbo. Eḳzonre ijjot dibo ar aroḳzonre elami korbo. Tumra-o oula, Allatala ar don-samana duiotar gulami eḳloge ḳortae fartae nae.”
LUK 16:14 Ikan hunia Forishi mozobor manshe Isare loia ḍong-tamsha lagaila, tara to ṭeḳa-foyshare kub maya ḳorta.
LUK 16:15 Isae tarare ḳoila, “Tumra-u to manshor samne nizor forezgari deḳao, oile Allae tumrar dilor ḳobor zanoin. Manshor gese zeta kub dami, Allae itare ginnain.
LUK 16:16 Huno, Ehia nobir shomoy forzonto Musar shoriot, ar nobi oḳlor sohifa zari asil. Oile oḳon Allar bashshair kush-ḳobri toblig kora or, ar manshe-o dile-zane ono dakil oita saira.
LUK 16:17 I shoriotor eḳṭa horof batil oar saite, asman-zomin binash oaḳan bout shuza.
LUK 16:18 Te huno, ze beṭae nizor boure talaḳ dia aroḳ beṭire hanga ḳore, he zinakur. Oula talaḳ faoa kunu beṭire zegie bia ḳore, he-o zinakur.”
LUK 16:19 “Eḳ doni beṭa asil, he raza-bashsha oḳlor laḳan dami dami kafoṛ-sufoṛ finto, ar hamesha zak-zomok koria furti-amud ḳorto.
LUK 16:20 Manshe Lasar namor eḳ hokir beṭare hamesha ou donir duaror samne boaia toita, tar asta gotro fosa-ga asil,
LUK 16:21 ar fotor kuttainte aia tar ga zifradi leita. Ou donie bat ḳaia hari aḍḍi-guḍḍi guṛa-gaṛa zeta tole falaita, ota ḳaoar lagi tar kub ichcha asil.
LUK 16:22 Eḳdin ou hokir beṭa morigelo, morar bade Allar firista oḳole tare Ibrahim nobir kulo nia boaila. Ermaze hou doni beṭa-o morigelo, tare dafon ḳora oilo.
LUK 16:23 Bade he duzoḳor azab taki aḳta ufredi saia deḳlo, duroi behestor maze Ibrahim nobi boi roisoin, tan kulo hou Lasar.
LUK 16:24 Dekia-u he sillaia ḳoilo, ‘Baba Ibrahim! Amare rohom ḳoroukka. Lasarre amar gese faṭaukka, he tar angulir agaḳan fanit buṛaia amar zifrare ṭanḍa ḳorouk. Duzoḳor i agunit amar boṛo azab or.’
LUK 16:25 Ibrahime ḳoila, ‘Babare, mono ḳoria deḳo, tumar shuk tumi duniat-u ḳamailiso, ar Lasare bout ḳoshṭo ḳorse. Oḳon ino aia he arame ase, ar tumi azabo aso.
LUK 16:26 Huno, ita saṛa-o tumrar ar amrar maze oḳon bout boṛo faḳ raḳa oise. Inor ḳeu ichcha ḳorle-o tumrar gese zaito farto nae, ar tumra-o ḳeu ichcha ḳorle ino aitae fartae nae.’
LUK 16:27 Ou hi doni beṭae ḳoilo, ‘Baba, te doya ḳori Lasarre amar babar baṛikano faṭaukka.
LUK 16:28 Hono amar aro fasgu bai roisoin. He gia amar baiainre hushiar ḳorouk, tara zanu i duzoḳor azab taki basoin.’
LUK 16:29 Ibrahime zuaf dila, ‘Tarar gese to Hozrot Musa ar nobi oḳlor usillae bout kitab beza oise, tara ou talim hunouk.’
LUK 16:30 Hou donie ḳoilo, ‘Na, na, baba Ibrahim! Murda taki keu zinda oia tarar gese gele-u, tara touba ḳorba.’
LUK 16:31 Ibrahime ḳoila, ‘Tara zudi Hozrot Musa ar nobi oḳlor ḳota na hune, te murda taki zinda oia gele-o tara manto nae.’ ”
LUK 17:1 Hozrot Isae tan shagrid oḳolre ḳoila, “Gunar fote neoar lagi uskani aibo-u aibo. Oile lannot hou zonor ufre, zegie guna ḳorar lagi uskani dey.
LUK 17:2 Ou bebuz oḳlor eḳzonre-o zegie gunar fote ṭania ney, ogur lagi aro bala oilo one, ogur golat fattor bandia doriat falai deoa.
LUK 17:3 Tumra-o zarzir befare hushiar roio. Tumar kunu baie tumar gese dush ḳorle tare buzaio. He dil bodlaia maf saile tare mafi dio.
LUK 17:4 He dinor maze shatbar dush ḳoria, shatbar aia tumar gese maf saile, tare maf ḳori dio.”
LUK 17:5 Sahabi oḳole Hozrot Isar gese abdar ḳorla, “Huzur, amrar imani bol baṛai deukka.”
LUK 17:6 Tain ḳoila, “Tumrar dilo zudi egu ḍengar bisir foriman iman taḳe, ar tumra ou heora gasre ḳo, zoṛ shudda huria gia doriat gaṛizao, te he tumrar ḳota hunbo.
LUK 17:7 “Tumrar maze ila kunu girost ase ni, zar ḳamlae al baia ba goru rakia bondo taki baṛit aite-u, he tar ḳamlare ḳoy, tumi zoldi aia ḳana ḳao?
LUK 17:8 Na, ḳeu ila ḳoy na. Borong oula ḳoy, oba, tui amar ḳana zuit ḳor. Ami zoto shomoy ḳana ḳai, tui ono ubaia balamonte amare batash de. Bade tui kais.
LUK 17:9 Ar hou gulame tan hukum manche ḳori tain tare kunu doinnobad dein ni? Nisoy na.
LUK 17:10 Ou laḳan tumra-o hoḳol hukum-ahkam adae ḳorle-o ḳoio, Malik, amra to tumar na-layek gulam. Amra zeta ḳam ḳora zorur asil, ḳali ota-u kunu roḳome adae ḳorsi.”
LUK 17:11 Hozrot Isa Zeruzalem ṭauno zaoar bala Shomoria ar Galil zilar mazedi aṭia zaira.
LUK 17:12 Ou shomoy ek gaut hamanir fotor muko doshzon fosa-kusṭo bemarie tanre deḳat aila. Tara duroi ubaia zure zure ḳoila,
LUK 17:13 “O huzur Isa, amrare rohom ḳoroukka.”
LUK 17:14 Tarare dekia tain ḳoila, “Zao, imam sab oḳolre gia tumrar halot deḳao.” Fotedi zaite zaite tara hoḳlor bemar ḳomigelo.
LUK 17:15 Tarar maze eḳzone zebla deḳlo, he bala oigese, dekia-u zure zure Allar tarif ḳori kori he firia ailo.
LUK 17:16 Aia Isar faot foṛia tanre shukria zanailo. He oilo Shomoria zatir manush.
LUK 17:17 Teu Isae ḳoila, “Dosho zonre-u kunu bala ḳora oise na ni? Te baki noyzon kuai?
LUK 17:18 Allar tarif ḳorar lagi ou bideshi beṭa saṛa ar ḳeu firia ailo na ni?”
LUK 17:19 Bade Isae tare ḳoila, “Bai, tumar imanor bole-u tumi bala oiso. Oḳon sohi-salamote zao.”
LUK 17:20 Forishi mozobor ḳoyzon aia Hozrot Isare zikaila, Allae kun shomoy tan bashshai salu ḳorba. Tain ḳoila, “Allar bashshai to ḳeurore zanai-hunai ae na.
LUK 17:21 Ḳeu ḳoar shaiddo nai, Allar bashshai ono ba hono deḳsi. Hunoukka, Allar bashshai to oḳon-u afnarar maze salu ase.”
LUK 17:22 Bade tan shagrid oḳolre ḳoila, “Omon eḳ shomoy aibo, zebla tumra ami bin-Adomor ekkan din deḳtae saibae, oile fartae nae.
LUK 17:23 Manshe tumrare ḳoiba, ono deḳo, hono deḳo. Oile tumra tarar ḳotae douṛio na, kunuḳano zaio na.
LUK 17:24 Huno, megor zilkir loge asmanor eḳ mata taki aroḳ mata zebla for oy, ou shomoy to hoḳole deḳe. Te ami bin-Adom zebla aimu hou shomoy-o ola hoḳole deḳbo.
LUK 17:25 Oile-o foyla i zomanar manshor ato ami bout ḳoshṭo faitam oibo, tara amare dur dur ḳorba.
LUK 17:26 “Zela Nuh nobir amolo oisil, ami bin-Adomor zomanat-o ola oibo.
LUK 17:27 Nuh nobi zazo uṭar ag forzonto manshe ḳana-fina, bia-shadi ar gor-shongshar ḳorta, Nuh nobir boinna aia itare nifat ḳorlo.
LUK 17:28 Oula Lut nobir amolo-o manshe ḳana-fina, ḳorid-biki, ḳet-girosti ar baṛi-gor bananit besto asla.
LUK 17:29 Oile Lut nobi zedin Sadum ṭaun saṛia bidae oigela, hou din-u asman taki aguin ar gondoḳor gozob lamia ita hokkolṭire nifat ḳorlo.
LUK 17:30 Ṭik oula, ami bin-Adom zedin zaira oimu, houdin-o ola aḳta aibo.
LUK 17:31 “Hidin ḳeu zudi goror salor ufre taḳe, te tar goror mal-samana nibar lagi, lamat lamia goror bitre na hamauk. Ou laḳan ḳeu zudi bondo taḳe, he-o ar baṛit na auk.
LUK 17:32 Lut nobir bibir goṭona iad ḳoro.
LUK 17:33 Mono rakio, ze zone zan basaito sae, he nizor zindegi kuaibo, oile ze zone zan shofia dey, he zindegi faibo.
LUK 17:34 Hi rait eḳoi bisnat duizon hutile-o, eḳzonre neoa oibo, dusra zon bad foṛizibo.
LUK 17:35 Dui beṭie eḳloge bara-banat taḳle-o, erar eḳzonre neoa oibo, aroḳzon bad foṛizibo.”
LUK 17:37 Sahabi oḳole ḳoila, “Huzur, ita kuai oibo?” Tain zuaf dila, “Mora lash zeḳano, hokun-o hono dola oy.”
LUK 18:1 Munazator befare shagrid oḳol nirash na oia hamesha zate munazat ḳoroin, oḳan buzanir lagi Isae ek kichcha hunaila.
LUK 18:2 Ḳoila, “Kunu eḳ ṭauno eḳzon hakim asla. Ein Allare-o ḍoraita na, kunu manshore-o toakka ḳorta na.
LUK 18:3 Hou ṭauno eḳ ṛaṛi beṭi asil. Ou beṭie aia hamesha tanre ḳoito, ‘Hakim sab, amare dushmonor at taki basaukka, doya ḳori ou niajjo bisarḳan ḳoroukka.’
LUK 18:4 I hakime ḳoydin kunta ḳoila na. Bade mone mone ḳoila, ‘Ami to Allare ḍorai na, manshore-o toakka ḳori na,
LUK 18:5 oile i ṛaṛie aia to hamesha satae, oḳon ogur niajjo bisarḳan ḳorilai. Naile tai aia bar bar sataibo.’ ”
LUK 18:6 Bade huzure ḳoila, “Deḳlae ni, ou naforman hakime kita ḳorse?
LUK 18:7 Te zera hamesha dine-raite Allar gese ḳande, Allae kita tan i mayar bonda oḳlor hok foriad hunta nae ni? Tain hunte kunu ar deri korba ni?
LUK 18:8 Ami koiram, tain zoldi kori-u erar hok foriad hunba. Oile ami bin-Adom dusrabar zebla i duniat aimu, hou shomoy duniat kunu iman faimu ni?”
LUK 18:9 Zeta manshe nizore kub forezgar, ar bad-baki hoḳol manshore huru mono ḳorto, Hozrot Isae tarare ou kichcha hunaila.
LUK 18:10 Ḳoila, “Duizon manush dua ḳorar lagi Baytul-Mukaddoso gelo. Erar eḳzon Forishi dolor ar dusra zon gushkur ḳazna tulra.
LUK 18:11 Forishi beṭae alga ubaia oula dua ḳorlo, ‘O Alla, ami tumar shukria adae ḳorram, ami to shomazor manshor laḳan naforman, zalim, ar zinakur nae, ba ou gushkur ḳazna tulrar laḳan-o nae.
LUK 18:12 Ami haftat duidin ruza raki, ar amar hokkol ruzir dosh baṭor eḳ baṭ tumar name zoḳat dei.’
LUK 18:13 Oile ou ḳazna tulra beṭae duroi ubai roilo, Allar arshor bae souk tular shaosh-o tar oilo na. He bukut mari mari kandi kandi koilo, ‘O Alla, ami boṛo gunagar, amare rohom ḳoro.’
LUK 18:14 “Ami tumrare ḳoiram, ou ḳazna tulra beṭa-u forezgar bonia tar goro gelo, hi Forishi nae. Ashole ze nizore boṛo mono ḳore, tare huru ḳora oibo. Ar ze nizore huru mono ḳore, tare boṛo ḳora oibo.”
LUK 18:15 Manshe tarar huru huruttainre loia Isar gese ailo, tain zanu huruttainre atai dia dua ḳoroin. Ita dekia sahabi oḳole manshor ufre biroḳto oia na ḳorla.
LUK 18:16 Oile Isae huruttainre tan ḳandat nila, nia ḳoila, “Huruttainre amar ḳandat aibar deo, tarare bada dio na. Allar bashshai to ou nomunar manshor lagi-u.
LUK 18:17 Ami hok kota ḳoiar, huru hurutta bonia Allar shashon na manle, kunu zon-u Allar bashshait hamaito farto nae.”
LUK 18:18 Hozrot Isar gese fainchaitor eḳ murobbi aila, aia ḳoila, “O hok ustad, amare batai deukka, kita ḳorle ami aḳer faimu?”
LUK 18:19 Isae ḳoila, “Amare ḳene hok koira? Ḳali eḳ Alla bade ar ḳeu hok nae.
LUK 18:20 Afne to shoriotor hukum-ahkam zanoin, Zina ḳorio na. Kun ḳorio na. Suri korio na. Misa kunu shakki dio na. Tumar ma-bafre ijjot ḳorio.”
LUK 18:21 Hi murobbie ḳoila, “Huzur, i hokkolta to huruman tone-u adae ḳorram.”
LUK 18:22 Ikan hunia Isae ḳoila, “Oḳon ḳali ekkan ḳam baki ase, afnar hoḳol don-samana besia gorib oḳolre lilla dilaukka. Teu afne behesto don faiba. Bade aia amar ummot oukka.”
LUK 18:23 Ikan hunia hi murobbi kub bezar oigela, tain ashole bout boṛo doni asla.
LUK 18:24 Tain bezar oigesoin dekia Isae ḳoila, “Doni manush Allar bashshait hamani boṛo moshkil.
LUK 18:25 Doni manush Allar bashshait hamanir saite, suir naʼ baedi uṭ hamani aro shuza.”
LUK 18:26 Ikan zara hunla, tara aroz ḳorla, “Te ar ḳegie rehai faibo?”
LUK 18:27 Tain ḳoila, “Manshor gese zeta oshombob, Allar gese to ita shombob.”
LUK 18:28 Ou shomoy Fitore ḳoila, “Huzur, amra to hoḳolta falai toia afnar ummot oisi.”
LUK 18:29 Teu Isae sahabi oḳolre ḳoila, “Ami tumrare hasa ḳota ḳoiram, Allar bashshair lagi zera nizor baṛi-gor, ma-baf, bou, fua-fuṛi, bai-birador falaia aise,
LUK 18:30 tara ou duniat-u er bout beshi faiba, ar bador zindegit aḳer-o faiba.”
LUK 18:31 Bade Isae tan barozon sahabire daro boaila. Boaia ḳoila, “Huno, amra oḳon Zeruzalemo zairam, te ami bin-Adomor befare nobi oḳole zotota lekia gesoin, ita oḳon fura oibo.
LUK 18:32 Amare bidormi zatir ato shofi deoa oibo. Manshe loia ḍong-tamsha ḳorba, beijjot ḳorba, ar tutu ḳori muko sef diba.
LUK 18:33 Amare sabuk marba bade zane marba. Moutor tin dinor din ami hirbar zinda oia uṭmu.”
LUK 18:34 Oile tan sahabi oḳole ou mator kunu bed buzla na. Tain kita ḳoira tara shomzita farla na, ḳaron tarar gese gufon raḳa oisil.
LUK 18:35 Isa zebla Ziriho ṭaunor ḳandat aila, ou shomoy eḳ anda beṭae fotor ḳandat boia bik korat asil.
LUK 18:36 Aḳta-u bout manshor faor tali hunia beṭae zikailo, “Kita ba, kita or?”
LUK 18:37 Manshe ḳoila, “Nasarotor Isae ou fotedi toshrif nira.”
LUK 18:38 Ou he sillaia uṭlo, “O Daudor aolad Isa, amare doya ḳoroukka.”
LUK 18:39 Sillani hunia biṛor samnor ḳataror manshe tare domoḳ dila, “Chup ḳoro, nirai ro.” Oile he aro zure sillaia ḳoilo, “O Daudor aolad, amare rohom ḳoroukka.”
LUK 18:40 Teu Isa ubai gela. Ubaia anda beṭare tan ḳandat anaila. Beṭa daro aia harle tain zikaila,
LUK 18:41 “Kita ba, tumare kita ḳortam?” Beṭae ḳoilo, “Huzur, ami kali souke deḳtam sai.”
LUK 18:42 Isae tare ḳoila, “Aichcha te deḳo. Tumar imanor bole-u tumi bala oilae.”
LUK 18:43 Loge loge-u beṭar souk kuligelo, deḳar shokti failo. Beṭae Allar shukria adae ḳori kori tan ḳore oia roana dilailo. Ita dekia hoḳol manshe Allar tarif ḳorla.
LUK 19:1 Hozrot Isa Ziriho ṭaunor mazedi aṭia zaira,
LUK 19:2 hono Zakir namor boṛo eḳ doni manush asla. Ein oila ḳazna tulra oḳlor fordan.
LUK 19:3 Isare deḳar lagi tan kub ḳaish asil, oile tain baṭṭi manush, erdae oto biṛor maze deḳar ufae oilo na.
LUK 19:4 Ou douṛia agedi gela, gia Isa ze fotedi aira ou fotor ḳandar eḳ ḍumur gaso uṭla.
LUK 19:5 Isa zebla hou ḍumur gasor tole aila, tain ufredi saia Zakirre ḍaḳ dila, “Zakir, zoldi lamia ao. Ami aiz tumar baṛit roite oibo.”
LUK 19:6 Zakir loge loge-u lamia aila. Tain kushi oia Isare tazim ḳoria tan baṛit nila.
LUK 19:7 Ita dekia hoḳole ḳana-ḳani kori koila, “Tain ḳene eḳ naforman beṭar baṛit rait ḳaṭanit gela?”
LUK 19:8 Zakire hoḳlor samne ubaia ḳoila, “Huzur deḳoukka, ami oḳon-u amar don-samanar ordek goribre lilla dilairam. Ar zerar hok ṭogia anchi, tarare sair otoḳan firot dilaimu.”
LUK 19:9 Teu Isae ḳoila, “Aiz taki i baṛit nazat aise. Ein-o to Ibrahimor ḳandanor eḳzon.
LUK 19:10 Ou laḳan be-foti oḳolre tukaia bar ḳoria, tarare basanir lagi-u to ami bin-Adom i duniat aisi.”
LUK 19:11 Hozrot Isae tarar loge ota matira, ou shomoy tain Zeruzalem taki tuṛa duroi roisoin. Tara mono ḳorla, Zeruzalem fosia-u tain Allar bashshai zair ḳoriliba. Erlagi Isae tarare ou kichcha hunaila,
LUK 19:12 “Nobab foribaror eḳzon beṭa manush bout duroi eḳ desho soforo gela. Tan kial asil hono gia raza oia firot aiba.
LUK 19:13 Zaibar age tan doshzon gulamre ania forteḳ zonre eḳṭa ḳori shunar mohor dia ḳoila, ‘Ami aibar ag forzonto oguindi tumra ḳay-ḳarbar ḳoro.’
LUK 19:14 “Oile tan proza oḳole tanre fosond ḳorta na. Erlagi tara tan ḳore oia guia faṭaia hou bashshare zanaila, ‘Amra sai na, ein amrar raza oukka.’
LUK 19:15 Oile-o tain raza bonia firot aila. Aia hou ze doshzon gulamre tain mohor disla, tarare anaia zikaila, ḳay-ḳarbar ḳoria tara ḳe ḳoto lab ḳorsoin.
LUK 19:16 Foyla zone aia ḳoilo, ‘Huzur, afnar eḳ mohordi ami dosh mohor ruzi korsi.’
LUK 19:17 Razae tare ḳoila, ‘Bala ḳorso! Tumi to bala gulam, tumi kub shamainno befare-o hok aso. Te tumi ou dosh forgonar ufre zomidari koro.’
LUK 19:18 Dusra zone ḳoilo, ‘Huzur, afnar mohordi ami fas mohor ruzi korsi.’
LUK 19:19 Tain ḳoila, ‘Tumi-o fas forgonar ufre zomidari koro.’
LUK 19:20 Bade aroḳzone ḳoilo, ‘Huzur, ou neukka, afnar hi mohor. Ami afnare ḍoraia afnar mohor rumalo bandia toi disi.
LUK 19:21 Afne to ḳoṛa mizazor manush. Zoma na ḳoria-o adae ḳoroin, ḳet na ḳoria-o foshol ḳaṭoin.’
LUK 19:22 “Teu razae ḳoila, ‘O ḳobis gulam! Tor mukor ḳotae ami tor bisar ḳormu. Tui to zanos-u ami koṛa mizazor manush, zoma na ḳoria-o adae ḳori, ḳet na ḳoria-o foshol ḳaṭi!
LUK 19:23 Te amar mohor tui befarir gese toile na ḳene? Te to ami aia mul mohoror loge kisu lab-o failam one.’
LUK 19:24 Razae tan uzir-nazirre ḳoila, ‘Ogur ges taki ou mohor firot ano, ar zar dosh mohor ase tare deo.’
LUK 19:25 Teu hoḳole ḳoila, ‘Huzur, tar to emne-u dosh mohor ase.’
LUK 19:26 Razae ḳoila, ‘Ami tumrare ḳoiram, zar ase tare aro deoa oibo. Zar nai, tar zeta ase ota-o ḳaṛia neoa oibo.
LUK 19:27 Ar amar zeta dushmone saisoin na ami raza oitam, otare ono doria ania amar samne marilao.’ ”
LUK 19:28 Oḳan ḳoia hari Isae tarar age oia Zeruzalemor bae toshrif nila.
LUK 19:29 Tain Zoytun faṛor ḳandat Bayt-Faijja ar Bayt-Ania gaur galat aia harle, tan duizon sahabire oḳan ḳoia faṭaila, “Tumra ou samnor gaut zao.
LUK 19:30 Gaut hamaia-u deḳbae, egu gadar baichcha banda ase. Ogur ufre ḳeu kunudin soṛse na. Tumra ogur ban kulia ono loia aio.
LUK 19:31 Ḳeu zudi zikae, ‘Igur ban kulo ḳene ba?’ te ḳoio, ‘Huzuror goroz ase.’ ”
LUK 19:32 Ze sahabi oḳolre faṭaisla, tara gia tan ḳotamoto hoḳolta faila.
LUK 19:33 Tara zebla gadar baichchar ban kulra, ou shomoy malike zikaila, “Oba, doṛi kulrae ḳene?”
LUK 19:34 Tara ḳoila, “Huzuror goroz ase ḳori kulram.”
LUK 19:35 Bade gadar baichcha loia Isar ḳandat aia, erar gotror saddordi gadar fiṭit godi banaia Isare boaila.
LUK 19:36 Tain zebla gada soṛia fotedi roana dila, fotor maze manshe tarar zarzir saddor bisai dila.
LUK 19:37 Isa Zeruzalemor ḳandat Zoytun faṛ tone lamar foto aia azila, ou shomoy tan ummot oḳol-o loge asla, era tan zeta keramoti kam deḳsila, otar lagi tara kushie zure zure sillaia Allar tarif ḳoria ḳoila,
LUK 19:38 “Mubarok hou bashsha, zein Mabudor name toshrif anra. Behesto shanti, Allar arsho gourob!”
LUK 19:39 Biṛor maze Forishi dolor ḳoyzone Isare ḳoila, “Huzur, afnar ummot oḳolre domoḳ deukka.”
LUK 19:40 Isae ḳoila, “Ami afnarare ḳoiram, erar muk bond ḳorille-o, fattor oḳole sillaia uṭbo.”
LUK 19:41 Tain zebla Zeruzalemor ḳandat aila, ou shomoy Zeruzalem ṭaun dekia ḳandi dila.
LUK 19:42 Tain ḳoila, “Haere hae! Aiz zudi tumi buztae, shanti kila ḳaim oy! Oile oḳon ita tumar sokur aoṛe roise.
LUK 19:43 Tumar ufre ila shomoy azir oibo, zebla dushmon oḳole deoalor sairo galabae maṭir ṭeki bandibo. Tumare berilibo, ar hokkolbae aṭok korbo.
LUK 19:44 Tara tumare ar tumar feṭor aolad oḳolre maṭir loge mishaibo. Tumar eḳ fattoror ufre aroḳ fattor roito nae. Ḳaron Allae tumare basaita ḳori ze shuzug disoin, tumi i shomoy-shuzugre sinlae na.”
LUK 19:45 Bade tain Baytul-Mukaddoso hamaila. Hamaia hono zetae bebsha ḳorat asla, ota hokkolṭire ḳedai dila.
LUK 19:46 Tain ḳoila, “Pak kalamo leḳa ase, amar gor oibo munazator gor, oile tumra ikanre ḍaḳaitor aḍḍaḳana banailiso.”
LUK 19:47 Hozrot Isa forteḳ din Baytul-Mukaddoso gia nosiot ḳorta. Ou shomoy boṛo imam, moulana ar shomazor murobbi oḳole tanre marilita saila.
LUK 19:48 Oile kila tanre mara zae, er kunu fondi tara failo na. Ḳaron hoḳol manshe ashik oia dile-zane tan boyan hunta.
LUK 20:1 Ou soforor ḳalo eḳdin Hozrot Isa Baytul-Mukaddosor maze, manshor gese Allai kush-ḳobri toblig korat asla. Aḳta-u boṛo imam ar alim oḳol tarar murobbi oḳolre loia aia ḳoila,
LUK 20:2 “Aichcha ḳo sain, tumi kun ḳemotae ita ḳam ḳorrae, tumare itar eḳtiar ḳegie dise?”
LUK 20:3 Isae zuaf dila, “Te ami-o afnaintore zikairam, ḳoukka sain,
LUK 20:4 Ehia nobie toubar gusol ḳoranir ḳemota faisla, manshor ges taki na Allar ges taki?”
LUK 20:5 Ou tara eḳe-oinne zukti-foramish ḳorlo, “Zudi koi Allar ges taki, te he ḳoibo, taile tan ufre iman anlae na ḳene?
LUK 20:6 Ar zudi koi manshor ges taki, te manshe amrare fattordi marba. Ehiare to tara Allar nobi koia manoin.”
LUK 20:7 Ou tara ḳoilo, “I ḳemota kuai taki faisla, amra zani na.”
LUK 20:8 Isae tarare ḳoila, “Te ami-o ḳoitam nae, kun ḳemotae ita ḳorram.”
LUK 20:9 Bade Isae manshore ou kichcha hunaila, “Ek giroste anguror bagan ḳorla, bade tan baganre ḳetal oḳlor gese bagi dia bout dinor lagi bidesh gelagi.
LUK 20:10 Angur faḳar shomoy oile malike tan baṭ nibar lagi ek gulamre faṭaila. Oile ḳetal oḳole tare mair-doir ḳoria ḳali ate firai dilo.
LUK 20:11 Bade tain arok gulamre faṭaila. Tara i gulamre-o mair-doir ḳori beijjot ḳoria ḳali ate firai dilo.
LUK 20:12 Bade tin nombor gulamre faṭaile, tara eo gulamre maria zoḳom ḳoria bare falai dilo.
LUK 20:13 Teu baganor malike ḳoila, ‘Ami kita ḳortam? Oḳon ami amar mayar futre faṭaimu, teu tara manto fare.’
LUK 20:14 Oile malikor fuare dekia ḳetal oḳole ḳoilo, ‘Ou fua-u to tar bafor hoḳoltar malik oibo. Ao, ere maria falai dei. Teu malikor hoḳolta amra failimu.’
LUK 20:15 Oḳan ḳoia hari tare baganor bare nia kun ḳorilailo. “Oḳon ḳoukka sain, baganor malike i bagidar oḳolre kita ḳorba?
LUK 20:16 Tain aia tarare nifat ḳoriliba na ni? Ar tan bagan dusra manshor gese diba na ni?” Ita hunia tara ḳoila, “Nauzubilla! Allae fana deuk!”
LUK 20:17 Teu Isae tarar bae saia ḳoila, “Te Allar kalamo ḳene ila leḳa ase, Raz mestoir oḳole ze fattorre beḳama ḳoia falai disil, oḳṭa dia-u goror ian kuṭi oilo.
LUK 20:18 I fattoror ufre ḳeu foṛle, i zon bangia ṭukra ṭukra oizibo, ar i fattoro ḳeuror ufre foṛle, he-o zon surmar oizibo.”
LUK 20:19 Oḳan hunia-u moulana ar boṛo imam oḳole Isare dorilta saila. Tara buzilila, Isae i kichcha tarar niote-u ḳoira. Oile manshore ḍoraia tara kunta ḳorla na.
LUK 20:20 Erlagi tara Isare souke souke raḳla, tan ḳore ḳoyzon guia lagaila. Guia oḳole mumini besh doria solle-o, tarar niot oilo Isare ḳotar fando falaita, zate tane deshor fordan hakimor adaloto salan ḳorail zae.
LUK 20:21 Ou guia oḳole Isare ḳoila, “Huzur, afne to hoḳolre homan souke deḳoin. Afne hok mat matoin, hok talim dein. Ḳeurore toakka na ḳoria, manshore Allar hok fot deḳain.
LUK 20:22 Te ḳoukka sain, Ruman bashsha Ḳoisorre ḳazna deoa zaiz ni, na nazaiz?”
LUK 20:23 Isae tarar ku-motlob buzilila. Buzia ḳoila,
LUK 20:24 “Deki, amare eḳṭa dinar deḳao.” Dinar dekia ḳoila, “Igur ufre ḳar sobi ar nam ase?” Tara ḳoila, “Bashsha Ḳoisoror.”
LUK 20:25 Isae ḳoila, “Te Ḳoisororta Ḳoisorre deo, ar Allarta Allare deo.”
LUK 20:26 Tan zuaf hunia tara taijjub bonia nirai oigela. Guia oḳole manshor samne tanre ḳotar fando falaito farlo na.
LUK 20:27 Bade Siddekia mozobor kisu manush Isar gese aila. Ou mozobor manshe mono ḳoroin, morar bade kunu zandar-u ar zinda oita nae.
LUK 20:28 Tara Isare zikaila, “Huzur, Musa nobie amrar lagi ou niom lekia gesoin, kunu manshe tar bou toia niaoladi halote morigele, tar baie ou boure bia ḳoria mora bair oarish foyda ḳorbo.
LUK 20:29 Oḳon mono ḳoroukka, ek goro shat bai asil. Foyla zone bia ḳoria niaoladi halote morigelo.
LUK 20:30 Bade dui nombor ar tin nombor baie ou beṭire bia ḳorlo. Ou laḳan tara shato baie-u ou beṭire bia ḳoria niaoladi halote morigelo.
LUK 20:32 Heshe ou beṭi-o morigelo.
LUK 20:33 Te kiamotor din i beṭi kar bou oibo? Shato zone-u to i beṭire bia ḳorsil.”
LUK 20:34 Isae ḳoila, “I duniar manshe bia-shadi koroin, ar bia-shadi dein.
LUK 20:35 Oile moutor bade zinda oia zera aḳerato kamiabir laḳ oizae, tara ar bia-shadi korta nae, ba bia-shadi boita-o nae.
LUK 20:36 Tarar kunu mout-o oito nae, tara firistar laḳan oiziba. Moutor bade aḳer faoae tara Alla Pakor aolad boniziba.
LUK 20:37 Tur faṛor zalail zonglar boyanir maze Musa nobie buzaisoin, murda oḳol to zinda oia uṭoin, erlagi-u bout age ze nobi oḳol mara gesoin Musae Mabudre hou nobi oḳlor Alla ḳoia ḍakila. Tain Mabudre ḳoila, Ibrahimor Alla, Isʼhakor Alla ar Iakubor Alla.
LUK 20:38 Te Alla to murda oḳlor Alla nae, tain zinda oḳlor Alla. Tan nozoro hokkol manush-u zinda asoin.”
LUK 20:39 Teu ḳoyzon alime ḳoila, “Huzur, afne to ḳaṭi mat matsoin.”
LUK 20:40 Heshe tara Isare ar kunu soal ḳorar shaosh failo na.
LUK 20:41 Ermaze Isae ou alim oḳolre zikaila, “Manshe ḳene al-Mosire Daud nobir aolad ḳoin?
LUK 20:42 Zobur Shorifor maze Daude nize-u to oḳan ḳoira, Mabude amar munibre ḳoila, zotodin tumar dushmon oḳolre tumar faor tole na falai, otodin tumi amar ḍain galat boiro.
LUK 20:44 Daude to al-Mosire tan munib ḳoia ḍakila, te al-Mosi kemne Daudor aolad oiba?”
LUK 20:45 Manshe Isar boyan hunra, ou shomoy tain shagrid oḳolre ḳoila,
LUK 20:46 “Alim oḳlor befare hushiar o. Tara lamba lamba zubba findia gurite kub bala fain. Bazar-aṭo gia salam faite fosond ḳoroin. Mosido gia samnor ḳataro boite ar mozliso gia dami zagat boite fosond ḳoroin.
LUK 20:47 Tara manshore deḳanir lagi lamba lamba dua ḳoroin. Hirbar ṛaṛi beṭintor gor-baṛi doḳol ḳoroin. Kiamotor din erar boṛo ḳoṭin shaza oibo.”
LUK 21:1 Hozrot Isae saia deḳla, doni oḳole Baytul-Mukaddosor lillar ḍegor maze dan-ḳoyrat dira.
LUK 21:2 Ermaze deḳla, kub gorib eḳ ṛaṛi beṭie-o aia ḍegor maze duiṭa foysha dan ḳorlo.
LUK 21:3 Dekia tan sahabi oḳolre ḳoila, “Ami tumrare hasa ḳota ḳoiram, ou gorib ṛaṛi beṭie hoḳol taki beshi dan ḳorse.
LUK 21:4 Ḳaron baki hoḳole ḳoros ḳorar bade zeta deṛia roise, on taki tuṛa ongsho ḍegor maze dan ḳorse. Oile i beṭie nizor obab-onoṭon taḳle-o, tair ḳamail hokkolta-u dan ḳorilise.”
LUK 21:5 Ḳoyzon sahabie Baytul-Mukaddos Kaba Shorifor befare matila, ḳoila, “Deḳra ni, oto shundor shundor fattordi ar dan-ḳoyratdi gorḳanre hazail oise.”
LUK 21:6 Isae tarare ḳoila, “Tumra ou zotota deḳrae, ola eḳ din aibo, zebla ita eḳ fattoror ufre aroḳ fattor roito nae. Hoḳolta maṭir loge mishizibo.”
LUK 21:7 Sahabi oḳole tanre zikaila, “Huzur, ita kun zomanat oibo? Kun alamot deḳle buza zaibo, hi shomoy oigese?”
LUK 21:8 Tain ḳoila, “Hushiar roio, ḳeu zanu tumrare be-fote na ney. Bout zone amar nam dori aia ḳoibo, shomoy oigese, ami-u al-Mosi. Oile tumra itar ḳore zaio na.
LUK 21:9 Tumra zebla zuddo ar gonḍogulor ḳobor hunbae, ḍoraio na. Ḳaron foyla ita oibo-u oibo, oile ita to shesh nae.”
LUK 21:10 Bade tain ḳoila, “Zatie zatir bifokke, razae razar bifokke zuddo ḳorbo.
LUK 21:11 Boṛo boṛo boisal oibo, zagae zagae nidan ar bezuita bemar-azare manush morba. Asmano-o kub ḍor-ḳofor nishana ar azob azob kudroti lila zair oibo.
LUK 21:12 “Oile ita goṭar age manshe tumrare ḳedaibo, dorbo. Bisaror lagi mozlisor samne azir ḳorbo, zelo haraibo. Amar namor lagi tumrare raza-bashsha ar hakim oḳlor samne neoa oibo.
LUK 21:13 Teu amar name toblig korar lagi tumra shuzug faibae.
LUK 21:14 Oile tumra mono rakio, kita zuaf ditae, ita age sinta ḳorar kunu zorur nae.
LUK 21:15 Ḳaron ami tumrare oula zoban ar hekmot zugaia dimu, tumrar bifokko oḳole ita firaito farto nae, er zuaf dibar-o takkot oito nae.
LUK 21:16 Tumrar ma-baf, bai-birador, ḳesh-kuṭum ar dust oḳole-o tumrare doraia diba. Tara tumrar kunu kunu zonre zane marailiba.
LUK 21:17 Ar amar namor lagi tumrare hokkole ginnaibo.
LUK 21:18 Oile-o kunumonte-u tumrar matar eḳsa sulor-o ḳeti oito nae.
LUK 21:19 Tumra imane mozbut roile, nizor hasaror zindegi hasil ḳorbae.
LUK 21:20 “Tumra deḳbae, sifai oḳole aia sairobae tone Zeruzalemre gerao ḳorilira, teu buzilio, Zeruzalemor binash aichche.
LUK 21:21 Hi shomoy zara Ehudia zilat taḳba, tara faṛedi gia bagouk. Zara ou Zeruzalemo taḳba, tara ṭaunor bare zauk. Zara gau-geramo taḳba, tara zanu kunumonte-u ṭauno na ain.
LUK 21:22 Ḳaron i oḳt oilo Allai gozobor oḳt, Allar kalamor ayat oḳol fura oibar oḳt.
LUK 21:23 Ish! I shomoy zeta beṭintor feṭo hurutta taḳba, zera huruttare bukur dud ḳaoaiba, erar bout ḳoshṭo oibo! Deshor ufre bezuita durgoti, ar Ihudi oḳlor ufre gozob nazil oibo.
LUK 21:24 Toluaror tole tara zan kuaiba, bondi oia hokkol zatir maze zaiba. Ou bidormi zatir ḳemotar shomoy fura oar ag forzonto, i Zeruzalem tarar faor tole roibo.
LUK 21:25 “San-shuruz ar asmanor terar maze nanan alamot deḳa zaibo. Duniar hoḳol deshor manshor ḳoshṭo oibo. Doriae utal-fatal ḳorbo. Ḍeur aoaze manush bedisha lagba.
LUK 21:26 Duniat kun dosha goṭibo ota sinta ḳoria ḍoror suṭe manush beush oizibo, asmani san-shuruz, tera hokkolta aula-zaula oizibo.
LUK 21:27 Ou shomoy deḳbae, ami bin-Adome Allar kudroti shokti ar nuror mohimae megor kuṭit oia duniat toshrif aniar.
LUK 21:28 Ita hal-hokikot deḳle tumra mozbut oio, mata usa ḳorio, buzilio tumrar nazat daro aichche.”
LUK 21:29 Isae tarare ou misal hunaila, ḳoila, “Tumra ḍumur gas ar oinno gasaintor bae deḳo,
LUK 21:30 itar noya kuṛi-fata baroni deḳle-u tumra buzilao, gormor din aichche.
LUK 21:31 Oula tumra zebla deḳbae, ita hal-hokikot goṭer, te buzilio Allar bashshai nozdik aichche.
LUK 21:32 Ami tumrare hasau ḳoiram, ita hokkolta na goṭar age, i zomanar manush koy oita nae.
LUK 21:33 Asman-zomin koy oizibo, oile amar kalam kunudin-o koy oito nae.
LUK 21:34 “Tumra nize hushiar roio, zate mozar mozar ḳani, mod ḳaia ṭal oa ar ruzi-ruzgaror neshae aula-zaula na o, arnae hou din aia aḳta-u tumrare fando haraito fare.
LUK 21:35 Duniar tamam manshor ufre-u hi din azir oibo.
LUK 21:36 Oile tumra hamesha hozag roio, ar dua ḳorio, zate ou zeta zair oibo ota faroia hari amar samne ubanir bol fao.”
LUK 21:37 Isae forteḳ din Baytul-Mukaddoso aia nosiot ḳorta. Bade rait oile tain bar oia Zoytun faṛo zaitagi.
LUK 21:38 Hoḳol manshe tan boyan hunar niote bian-sobre Baytul-Mukaddoso aita.
LUK 22:1 Ihudi oḳlor Ḳamir Saṛa Ruṭir Id ḳasat ailo, ou idor nam Azadi Id.
LUK 22:2 Ibae moulana ar boṛo imam oḳole foramish ḳorla, Hozrot Isare am manshor ges taki lukaia kila zane marta. Tara am manshore kub ḍoraita.
LUK 22:3 Ou shomoy tan barozon sahabir mazor eḳzon, en nam Ihuda Iskariat, en bitre Shoytan hamailo.
LUK 22:4 Ein Isare doraia deoar lagi lukaia Baytul-Mukaddoso gela. Gia honor daroga ar boṛo imam oḳlor loge foramish ḳorla, kun nomunae Isare tarar ato dorai deoa zae.
LUK 22:5 Teu imam oḳol kub kushi oia oada ḳorla, tanre doraia dile tare boḳshish diba.
LUK 22:6 Ete Ihuda-o razi oia manshor aforḳe, tanre dorai deoar shuzug tukanit roilo.
LUK 22:7 Bade Azadi Id ailo, ou idor din meṛa-baichcha kurbani deoa oy.
LUK 22:8 Teu Isae sahabi Fitor ar Hannanre hukum dila, “Tumra gia amrar lagi idor ḳani tiar ḳoro, amra hoḳol aia eḳloge ḳaimu.”
LUK 22:9 Era zikaila, “Huzur, afnar kial kita, amra kunano gia ḳana tiar ḳortam?”
LUK 22:10 Tain ḳoila, “Huno, ṭauno hamaia harle tumra deḳbae, eḳ beṭae fanir ḳoyla boria loia zaira. Tumra en ḳore ḳore zaio, gia ein ze goro hamaiba,
LUK 22:11 hou goror malikre ḳoio, ‘Huzure zikaisoin, tan sahabi oḳolre loia Azadi Idor ḳani ze goro ḳaita, i musafir ḳana kuai?’
LUK 22:12 He tumrare ufror talat hazail-faṛail boṛo ek kuṭa deḳaia dibo. Hono gia tumra randa-baṛa ḳorio.”
LUK 22:13 Hasau tara gia tan ḳota mafik hoḳolta faila, faia Azadi Idor ḳani-o tiar ḳorla.
LUK 22:14 Bade shomoy aile Isae tan barozon sahabi loia ḳanit boila.
LUK 22:15 Boia ḳoila, “Amar boṛo kial asil mosibotor mukamuki oibar age, aḳeri idor ḳani kan tumrare loia ḳaitam.
LUK 22:16 Ami tumrare ḳoiram, Allar bashshair asol morzi-munsha furafur hasil na oa forzonto, ami ar kunu idor ḳani kaitam nae.”
LUK 22:17 Bade tain shorbotor fiala loia Allar shukria zanaia ḳoila, “Ou fuṭain tumra baṭia ḳailao.
LUK 22:18 Ar huno, ami tumrare ḳoiram, Allar bashshai na aoa forzonto, ami ar anguror kunu shorbot ḳaitam nae.”
LUK 22:19 Erbade ruṭi ato loia Allar shukria zanaila. Ruṭi ṭukraia sahabi oḳolre dila, ḳoila, “Mono ḳorio iṭa amar ḳaya, ou ḳaya ami tumrar lagi shofi dimu. Amare mono ḳorar lagi tumitain-o ola ḳorio.”
LUK 22:20 Ḳaoar bade shorbotor fiala ato loia ḳoila, “Amar lour zoriae Allar loge manshor milonor ze noya usilla nazil or, ou fiala oilo er nishana. Amar ou lou tumrar nazator lagi dimu.
LUK 22:21 Te deḳrae ni! Amare zegie doraia dibo, he oḳon amar loge ou dostarḳanat boia ḳar.
LUK 22:22 Allae zela hukum ḳorsoin, ami bin-Adomor mout to ola-u oibo. Haere hae! Lannoti hou adom, zegie amare doraia dibo.”
LUK 22:23 Sahabi oḳole eḳe-oinnore zikaila, “Te amrar mazor kun manshe ila ḳam ḳorbo?”
LUK 22:24 Ou shomoy sahabi oḳlor maze kun zon hoḳol taki boṛo, ota loia tarar maze torka-torki lagigelo.
LUK 22:25 Teu Isae tarare ḳoila, “Bidormi deshor raza oḳole tarar prozar ufre munibgiri deḳain. Tarar zomidarre ḳoa oy zongonor dust.
LUK 22:26 Oile tumra ilan oio na. Tumrar maze zein hoḳol taki boṛo, ein hoḳlor huru ouk. Ar zein neta, ein ḳadimdaror laḳan ouk.
LUK 22:27 Ḳo sain kun zon boṛo? Zein ḳana ḳain, na ze ḳadimdari kore? Zein ḳana ḳain ein-u nae ni? Te ami nize-u to tumrar ḳadimdari koriar.
LUK 22:28 “Huno, amar hoḳol bala-mosiboto tumra amar loge loge aslae.
LUK 22:29 Ar amar batuni bafe amare zela godi ar ḳemota dan ḳorsoin, ami-o oula tumrare ḳemota dan ḳorram.
LUK 22:30 Ou ḳemota faia, tumra-o amar bashshait dakil oia amar loge boia ḳana-fina ḳaibae, amar loge godit boia Boni Israilor baro gusṭir bisar-adalot ḳorbae.
LUK 22:31 “Saimon, Saimon, huno, dan-saul zela saindi saniain, Shoytane-o tumrare ola saniaito saise.
LUK 22:32 Oile tumar lagi ami aroz ḳorsi, tumar iman zanu ḳomzur na oy. Te tumi eḳbar gelegi-o touba ḳoria zebla firot aibae, ou shomoy tumar ou baiaintor imani bol-o mozbut ḳorio.”
LUK 22:33 Fitore ḳoila, “Huzur, ami to afnar loge oia zelo zaite, ba zan dite-o tiar asi.”
LUK 22:34 Tain ḳoila, “Fitor, ami tumare ḳoiram, aiz fotabala murgae bang dibar age-u, tumi tin-tinbar ḳoibae, tumi amare sino na.”
LUK 22:35 Bade tan sahabi oḳolre zikaila, “Ḳo sain, ami zebla tumrare ṭeḳar toli, gaiṭ-buski ita kunta na dia ḳali faoe faṭaislam, hi shomoy tumrar kuntar obab oisil ni?” Tara ḳoila, “Ji na, kunu obab oise na.”
LUK 22:36 Isae ḳoila, “Te oḳon ami koi, oḳon zar ṭeḳar toli ba gaiṭ-buski ase, he ota loge raḳouk. Zar toluar nai, he tar saddor besia toluar ḳorid ḳorouk.
LUK 22:37 Pak Kalamor ayato to leḳa ase, tanre naforman oḳlor ḳataro milail oibo. I ayat to amar ufor dia-u folibo. Amar befare zotota leḳa ase, ita hokkolta oḳon folizar.”
LUK 22:38 Teu sahabi oḳole ḳoila, “Huzur deḳoukka, ino dukan toluar ase.” Tain ḳoila, “Ota-u to bout.”
LUK 22:39 Ḳana-finar bade Isa bar oia boraborkur laḳan hou Zoytun faṛo gela, sahabi oḳol-o tan ḳore ḳore gela.
LUK 22:40 Hono gia harle Isae tarare ḳoila, “Tumra dua ḳoro, zate kunu forikkat na foṛo.”
LUK 22:41 Ḳoia hari sahabi oḳlor ges taki sair nol foriman duroi gia, zanu fatia dua ḳorat boila.
LUK 22:42 Tain ḳoila, “Behesti baba, tumar ichcha oile mosibotor i fialaṭa amar ges tone horailao. Oile amar ichchae nae, tumar ichchae-u ouk.”
LUK 22:43 Teu behest taki eḳ firista aia Isare doroshon dia tan bol baṛaila.
LUK 22:44 Bade tain monor duke fereshan bonia aro ḳator oia dua ḳorla. Erlagi tan gotror gam lour fuṭar laḳan maṭit foṛto laglo.
LUK 22:45 Dua shesh ḳoria sahabi oḳlor ḳandat aia deḳla, monor duke ḳator oia tara gumai gesoin.
LUK 22:46 Dekia tarare ḳoila, “Gumairae ḳene? Uṭia dua ḳoro, zate forikkat na foṛo.”
LUK 22:47 Isa mato roisoin, ou shomoy aḳta-u hikano bout manush aila. Erar hokkolor age asil Ihuda, he Isar barozon sahabir mazor eḳzon. Ihudae tanre hunga dibar lagi kandat ailo.
LUK 22:48 Isae tare ḳoila, “Ihuda, ami bin-Adomre hunga dia dorai dirae ni?”
LUK 22:49 Ou shomoy Isar ḳandat zera asla, tara buzilila kita or. Buzia ḳoila, “Huzur, otare amrar toluardi martam ni?”
LUK 22:50 Ḳoia-u eḳ sahabie toluardi sed mari fordan imamor gulamor ḍainor ḳan ḳaṭilila.
LUK 22:51 Oile Isae ḳoila, “Bad deo, ar mario na.” Oḳan ḳoia tain hi gulamor ḳan atai dia tare bala ḳorilla.
LUK 22:52 Hozrot Isare aṭok korat zoto boṛo imam, Baytul-Mukaddosor daroga, ar murobbi oḳol aisla, Isae tarare zikaila, “Manshe sur-ḍaḳait dorte zela laṭi-sulfi loia zain, tumra amare dorat oula aiso ni?
LUK 22:53 Ami to forteḳ din-u Baytul-Mukaddoso tumrar samne aslam, hi shomoy amare dorlae na ḳene? O, oḳon nisoy tumrar shomoy, andairor razotto salu oise.”
LUK 22:54 Dushmonor dole Isare aṭok koria fordan imamor baṛit loia gelagi. Sahabi Fitor duroi hori hori Isar ḳore oia gela.
LUK 22:55 Uṭanor maze bakka manshe aguin doraia tabanit lagla, Fitor-o ono aia shorik oila.
LUK 22:56 Ou shomoy eḳ bandi beṭie agunir foror maze Fitorre dekia bala ḳori saia ḳoilo, “Ou beṭa-o hogur loge asil.”
LUK 22:57 Fitore ḳoila, “Na beṭi, ami ere sini-u na.”
LUK 22:58 Tuṛa bade aroḳzone Fitorre dekia ḳoilo, “Tumi-o otar logor eḳzon.” Tain ḳoila, “Na ba, ami nae.”
LUK 22:59 Aro eḳod gonṭa bade aroḳzone boṛo golae ḳoilo, “Oy, oy, ogu-o er loge asil, e-o to Galilor manush.”
LUK 22:60 Tain ḳoila, “Dur beṭa! Tumi ita kita mato, kunta buzi na.” Fitore ota ḳoira, ermaze aḳta-u murgae bang dilailo.
LUK 22:61 Teu Isae muk firaia Fitoror bae saila. Saite-u Fitoror mono oigelogi, huzure to age-u ḳoisla, “Aiz fotabala murgae bang dibar age-u, tumi tinbar ḳoibae, tumi amare sino na.”
LUK 22:62 Teu Fitor bare gia kub ḳandon ḳandila.
LUK 22:63 Hozrot Isare doria ania faradar oḳole tanre ṭaṭṭa-moshkora ar mair-doir ḳorlo.
LUK 22:64 Tan souk bandia ḳoilo, “Hoi, tui bule nobi, te oḳon gaibi ko sain, tore ḳegie marlo?”
LUK 22:65 Oula aro boutta ḳoia tanre beijjot ḳorlo.
LUK 22:66 Rait fuanir bade deshor fotua komiṭir murobbian, boṛo imam ar alim oḳol dola oila, ar Isare tarar samne anaia ḳoila,
LUK 22:67 “Tumi zudi Allar oada ḳora hou al-Mosi o, te amrare ḳo.” Isae ḳoila, “Ami koile-o to tumitain ekin ḳortae nae.
LUK 22:68 Kunta zikaile-o zuaf ditae nae.
LUK 22:69 Oile ami bin-Adom oḳon taki-u arshe-azimo Allar ḍainor kursit boimu.”
LUK 22:70 Teu hokkole zikailo, “Te tumi-u kita Allar ḳas mayar zon Ibnulla ni?” Tain ḳoila, “Oy, tumitain-u to ḳoirae, ami-u hein.”
LUK 22:71 Teu tara hokkole ḳoilo, “Te ar shae-shakkidi kita ḳortae? Amra nizor ḳane-u to tar zobanbondi hunlam.”
LUK 23:1 Tara hoḳole eḳloge dol bandia Isare loia Ruman hakim Filator gese gela.
LUK 23:2 Gia Isar bifokke nalish dila. Tara ḳoila, “Amra deḳsi, ou beṭae amrar deshor manshore bigṛai der, he manshore nished ḳore amrar bashsha Ḳoisorre ḳazna dita na. He nize-u bule al-Mosi namor eḳ bashsha.”
LUK 23:3 Filate Isare zikaila, “Tumi kita Ihudi oḳlor bashsha ni?” Tain zuaf dila, “Afne zela ḳoin, ola-u.”
LUK 23:4 Teu Filate boṛo imam ar hoḳol manshore ḳoila, “Ami to i ashamir kunu dush-u fairam na.”
LUK 23:5 Oile tara zid ḳoria ḳoilo, “I beṭae Galil zila taki arombo ḳoria asta Ehudia zilar manshore bigṛaia, oḳon amrar ono aia-o hokkolre bigṛailar.”
LUK 23:6 Ikan hunia Filate zikaila, “He kita Galilor manush ni?”
LUK 23:7 Hakime zebla hunla, Isar baṛi oilo Raza Herudor odinor Galil zilat, hunia tain Isare Herudor gese faṭai dila, ḳaron Herud-o ou shomoy Zeruzalemo asla.
LUK 23:8 Isare dekia Herud kub kushi oila. Tain bout din dori Isare deḳta saira. Age tain Isar befare boutta hunchila, erlagi tan monor asha asil, Isae tanre kunu keramoti-muzeza deḳaiba.
LUK 23:9 Tain Isare bout nomunar prosno ḳorla, oile Isae itar kunu zuaf dila na.
LUK 23:10 Adaloto ubaia-o boṛo imam ar moulana oḳole kub gorom oia Isar bifokke nalish hunanit roila.
LUK 23:11 Erloge Herude ar tan sifai oḳole-o Isare ṭaṭṭa-moshkora, beijjoti korla, hesh-mesh tanre bashshai soḳsoḳa lebas findaia hakim Filator gese firot faṭai dila.
LUK 23:12 Er age Raza Herud ar hakim Filator maze dushmoni asil, oile ou din taki-u tarar maze dusti oigelo.
LUK 23:13 Bade Filate boṛo imam, murobbi oḳol, ar am manshore ekḳano dola ḳoria,
LUK 23:14 ḳoila, “Ou ashamire tumra doria ania amar gese nalish dilae, he hokkol manshore bigṛailar, oile ami to tumrar samne-u tare zera ḳorlam, te tumra zela nalish diso, tar maze to ila kunu dush-u failam na.
LUK 23:15 Ar Raza Herude-o nisoy tar kunu dush faisoin na, erlagi-u tain tare amar gese firot faṭaisoin. Ami deḳram, moutor shazar zuka kunu dush-u he ḳorse na.
LUK 23:16 Te ami tare singladi maria saṛi dimu.”
LUK 23:17 Ashole hakim Filator reoaz-o asil, tain Azadi Idor oḳto eḳzon ḳoydire ḳalas dita.
LUK 23:18 Oile manshe eḳloge sillaia ḳoilo, “Na, na, ogure marilao. Barabbare saṛi deo.”
LUK 23:19 Ou Barabbare age zelo harail oisil, he Zeruzalem ṭauno kun ar shontrash ḳorsil.
LUK 23:20 Oile Filate Isare saṛi deoar niote hirbar tarar loge batchit ḳorla.
LUK 23:21 Ta-o tara eḳloge sillaia uṭlo, “Ogure solibo deo, solibo deo.” (Solib oilo laḳṛidi banail manshore loṭḳaia marar eḳ zinish.)
LUK 23:22 Filate tin-tinbar tarare zikaila, “Ḳene? I ashamie kita dush ḳorse? Moutor shazar zuka tar kunu dush-u ami fairam na. Ami kali singladi maria tare saṛi dimu.”
LUK 23:23 Oile tara mairmuki oia, sillaia, misil lagaila, “Ogure solibo loṭḳao, solibo loṭḳao.” Sillanir suṭe tarar dabi fura oilo.
LUK 23:24 Tarar dabi mafik-u Filate ray dilaila.
LUK 23:25 Tain Hozrot Isare tarar bod ḳaish mafik tarar ato saṛi dila ar hou kuni-shontrashire ḳalas dilaila.
LUK 23:26 Hakimor ray faia sifai oḳole Isare zane marilita ḳori Isare loia zaira. Ou shomoy Saimon namor Kurini elaḳar eḳzon manush gau taki ṭauno aoat asil. Tara ou beṭare doria laḳṛidi banail solib tar ḳando tulia dia ḳoilo, he ogu loia Isar ḳore ḳore zaito.
LUK 23:27 Isar ḳore ḳore bout manush asil, erar loge bout beṭin-o asla. Tara tan lagi bilaf ar ahazari koria bukut tabaia ḳandon lagaila.
LUK 23:28 Oile Isae tarar bae saia ḳoila, “O Zeruzalemor mai oḳol, amar lagi kandio na. Tumra nizor lagi ar nizor fua-fuṛir lagi kando.
LUK 23:29 Huno, omon eḳ din aibo, zebla manshe ḳoiba aṭkura beṭin-u boṛo ḳofali. Zerar kunu hurutta-u oise na, bukor dud-o kunudin ḳaoaise na, tara-u ḳofali.
LUK 23:30 Hi shomoy manshe boṛo boṛo faṛre ḳoibo, tumra aia amrar ufre foṛo. Faṛor ṭilla oḳolre ḳoibo, amrare lukaia raḳo.
LUK 23:31 Tumra deḳrae na ni, taza gasre-u itae ou halot ḳorra, te hukna gasor kun dosha oibo.”
LUK 23:32 Hozrot Isar loge ḳori marar lagi sifai oḳole duizon dagi ashamire loia ailo.
LUK 23:33 Bade Matar-Kuli namor zagat ania, tara Isare ar hou duio dagi ashamire gasor ṭukradi banail solibo loṭḳailo, eḳzonre tan ḍain galat, aroḳzonre bau galat loṭḳailo.
LUK 23:34 Ou shomoy Isae ḳoila, “Baba, erare maf ḳori dilao. Tara to buzer na tara ita kita ḳorer.” Bade tara tan ḳafoṛ-sufoṛ nita ḳori loṭari maria baṭa-baṭi korla.
LUK 23:35 Bout manshe ubaia ita deḳla, oile tarar murobbi oḳole Isare ṭiṭkari maria ḳoila, “He to bout manshor zan basaito, he zudi hasau Allar oada ḳora hou al-Mosi oy, te oḳon tar nizor zan-o basauk.”
LUK 23:36 Ruman sifai oḳole-o tanre loia moshkari korlo, tara ṭenga anguror shorbot loia tan ḳandat gia ḳoila,
LUK 23:37 “Tumi zudi Ihudi oḳlor hasaror bashsha o, te oḳon nizor zan basao na.”
LUK 23:38 Tan matar ufre ekkan sainborḍ lagail oilo, hono leḳa asil, “He Ihudir bashsha.”
LUK 23:39 Ou shomoy tan loge aro ze duizon ashamire solibo loṭḳail oisil, ota eḳzone tanre ṭiṭkari maria ḳoilo, “Tumi bule hou al-Mosi? Te oḳon amrare ar tumare-o basao na.”
LUK 23:40 Oḳan hunia dusra zone ere damki dia ḳoilo, “Tumi kita Allare-o ḍorao na ni? Tumi-o to ou homan shaza fairae.
LUK 23:41 Ar amra to fairam amrar usit shaza, amra zelan ḳam ḳorsi oulan fairam. Oile ein to kunu dush-u ḳorsoin na.”
LUK 23:42 Bade he ḳoilo, “O Isa, afne firia aia zebla nize bashshai korba, ou shomoy ḳano amare iad raḳoin zanu.”
LUK 23:43 Tain ḳoila, “Ami tumare hok kota ḳoiram, tumi aiz taki-u amar loge arshe-azimo taḳbae.”
LUK 23:44 Ou shomoy beil onuman duifor, erbad taki zuhoror bad forzonto tin gonṭa dori asta desh andair oigelo.
LUK 23:45 Shuruzor for nibigelo. Ermaze Zeruzalemo Kaba goror fobitro Herem Shorifor fordaḳan, ufre taki tol forzonto siṛia dui ṭukra oigelo.
LUK 23:46 Heshe Isae zure aoaz ḳoria ḳoila, “Baba, amar ruhu tumar ato shofia dilailam.” Oḳan ḳoia-u aḳeri dom falaia inteḳal ḳorla.
LUK 23:47 Ruman sifair ze boṛo ofisar hono fara deoat asla, ein Isar moutor i halot dekia Allar tarif ḳoria ḳoila, “Nichchoy, i besaṛa ḳaṭi dindar manush asla.”
LUK 23:48 Ar ita deḳar lagi zoto manush dola oisla, tara-o i halot dekia bukut mari mari ahazari koria firia gela.
LUK 23:49 Isar forisito zon oḳole, ar Galil zila taki zeta beṭin tan loge oia aisla, tara hokkole duroi ubaia ita deḳla.
LUK 23:50 Deshor fotua komiṭir eḳzon ijjoti membar asla, en nam Iusuf, en baṛi Arimatia gaut. Ein to forezgar ar hok manush, Isare zane marar ou ku-dandat tain tarar loge razi oila na. Tain Allar bashshair lagi bar saoat asla.
LUK 23:52 Ou Iusuf hakim Filator gese gela, gia Isar lash nita saila.
LUK 23:53 Bade Hozrot Isar lash solib taki lamaia, ḳafon findaila, ar fattor kudia banail oula ek koyboror maze dafon ḳorla, i koyboro kunudin ar ḳeurore dafon ḳora oise na.
LUK 23:54 I din asil Ihudir zummar agor din, tuṛa bade-u Zummabar shuru oizibo.
LUK 23:55 Ar zeta beṭin Galil taki Isar loge oia aisla, tara Iusufor ḳore ḳore gia hou ḳoybor deḳla, ar kilaḳan tan lash dafon ḳora oilo eota deḳla.
LUK 23:56 Bade tara firia gia hari ator-gulaf ar sondon-molom banaila, heshe shoriotor hukum mafik zummar din ziraila.
LUK 24:1 Ou beṭinte zeta ator-gulaf tiar ḳorsla, haftar foyla din kub sobre tara ota loia, Isar ḳoyboror ḳandat aila.
LUK 24:2 Aia deḳla, ḳoyboror mukor fattorḳan horail oigese.
LUK 24:3 Dekia tara ḳoyboror bitre hamaia deḳoin, Isar lash to ḳoyboro nai.
LUK 24:4 Teu tara sintat foṛigela. Ou shomoy dola soḳsoḳa ḳafoṛ finno duizon aia tarar ḳandat ubaila.
LUK 24:5 Erare dekia beṭinte ḍoraia mata nuailila. Ou duiozone tarare ḳoila, “Ogo, tumitain zindare ḳene murda oḳlor maze aia tukairae?
LUK 24:6 Tain to ono nai, tain zinda oigesoin. Tain Galilo taḳte tumrar gese kita ḳoisla, mono ḳoria deḳo.
LUK 24:7 Tain ḳoisla na ni, bin-Adomre naforman manshor ato dorai deoa oibo. Tanre solibo loṭḳaia zane mara oibo, oile moutor tin dinor din hirbar zinda oia uṭba?”
LUK 24:8 Oḳan hunte-u Isar agor ḳota oḳol tarar mono oigelo.
LUK 24:9 Tara ḳobrostan taki firia gia, hou egaro zon sahabire ar baki hoḳlor gese ḳobor zanaila.
LUK 24:10 Mogdilini Moriom, Iuhanna, Iakubor ma Moriom ar tarar loge zeta beṭin asla, era hoḳole gia i kobor ḳoila.
LUK 24:11 Oile zera ita hunla, era mono ḳorla ita nisoy baze mat, ita beṭintor mat tara ekin ḳorla na.
LUK 24:12 Oile Fitor douṛaia ḳoyboror ḳandat gela. Gia unda oia deḳla, ḳali kafonḳan foṛi roise. Ita dekia tain taijjub bonia firot aila.
LUK 24:13 Ou din-u duizon shagrid Zeruzalem taki shat mail duroi Imuas namor ek gaut zaoat asla.
LUK 24:14 Foto tara ota befar oḳol loia-u mati mati zaira.
LUK 24:15 Tara mato roisoin ou shomoy aḳta-u Isa nize tarar ḳandat aia eḳloge aṭa dorla.
LUK 24:16 Oile tarar sokut saṭa lagigesil, tara Isare dekia-o sinla na.
LUK 24:17 Isae tarare zikaila, “Aṭi aṭi afnara ita kitar batchit ḳorra?” Ikan hunia era muk bezar ḳori ubai gela.
LUK 24:18 Ermaze Kiliofas name eḳzone Isare ḳoila, “Afne-u eḳmatro zon, zein hunchoin na i koydine Zeruzalemo kita goṭise?”
LUK 24:19 Isae tarare zikaila, “Kita goṭise ba?” Tara ḳoila, “Nasarotor Isare loia zotota goṭise. Tain to Allar nobi, tan mukor zoban ar ḳame-ḳaze Allar nozoro ar hoḳol manshor sokut-o kub takkoti ar mortuba-ala nobi asla.
LUK 24:20 Amrar boṛo imam ar murobbi oḳole tanre zane marar lagi Ruman oḳlor ato doraia dilaila, tara tanre nia solibor ufre zane marilise.
LUK 24:21 Oile amrar asha asil, tain Boni Israilre azad ḳorba. Aiz tin din oilo i goṭona goṭise.
LUK 24:22 Ar amrar logor ḳoyzon beṭi manshe aia amrare taijjub banailisoin. Tara kub sobre Isar ḳoyboro gesla,
LUK 24:23 gia deḳsoin, tan lash nai. Tara firot aia ḳoila, tara firistar doroshon faisoin, ar firista oḳole tarare ḳoisoin, Isa zinda asoin.
LUK 24:24 Bade amrar loge zara asla, tarar maze-o ḳeu ḳeu ḳoyboro gia deḳla, beṭintor ḳota-u hasa, Isar lash ḳoyboro nai.”
LUK 24:25 Hoḳolta hunia Isae tarare ḳoila, “Afnara to kunta-u buzoin na. Afnaintor dil ola oshaṛ bonigese ni? Allar nobi oḳole zeta bataia gesoin, otare-o afnara ekin ḳorra na.
LUK 24:26 Nobi oḳole ḳoisoin na ni, Allar oada ḳora al-Mosie duḳ-mosibot shoijjo ḳoria hari tan zalal ar gourob hasil ḳorba?”
LUK 24:27 Bade tain Musa nobir Tourat Kitab taki shuru ḳoria, hokkol nobir kitabor maze tan befare zotota leḳa ase, ota tarare buzaila.
LUK 24:28 Ar ze gaut zaita ḳori tara roana disla, hou gaur ḳandat aile Isae aro duroi zaoar bab deḳaila.
LUK 24:29 Oile tara kub minot-ḳajji koria tanre ḳoila, “Oḳon to beil gesegi, hainja oizar, te raitḳan afne amrar gese roi zaukka.” Ou tain roar lagi baṛit hamaila.
LUK 24:30 Bade zebla ḳanit boila, ou shomoy Isae ruṭi loia ṭukraia Allar shukria adae ḳoria tarare dila.
LUK 24:31 Teu tarar souk kuligelo, tara Isare sinilila. Sinar loge loge-u tain erar ges taki auṛi dilaila.
LUK 24:32 Bade tara eḳe-oinnore ḳoila, “Foto zebla tain amrar loge batchit ḳorsla, amrare Allar kalam buzaia disla, hou shomoy amrar dilor maze eḳ eshki foyda oisil na ni?”
LUK 24:33 Loge loge tara duiozon bar oia Zeruzalem aila. Aia hou egaro zon sahabi ar baki hokkolre ekḳano boat faila.
LUK 24:34 Tara ono boia ota matira, Hozrot Isa ashole-u zinda oigesoin, zinda oia Saimon-Fitorre deḳa disoin.
LUK 24:35 Ou shomoy hou duio zone-o erare ḳoila, fotor maze tara kila Isar deḳa faila, ruṭi ṭukraibar shomoy kila tanre sinla, ita hoḳolta zanaila.
LUK 24:36 Sahabi oḳole to ota loia batchit ḳorra, ou shomoy aḳta-u Isa nize ono aia tarar mazḳano ubaia ḳoila, “Assalamu alaikum.”
LUK 24:37 Tane dekia tara kub ḍoraigela, mono ḳorla but aise.
LUK 24:38 Isae tarare ḳoila, “Tumra oto ostir oigelae ḳene? Ḳene tumrar dilo shondoy hamailo?
LUK 24:39 Amar at-fao balamonte deḳo, deḳo na, i to ami. Amare ataia deḳo, butor to amar laḳan aḍḍi-mangsho nai.”
LUK 24:40 Oḳan ḳoia tain nizor at-fao tarare deḳaila.
LUK 24:41 Oile tara tane dekia oto beshi kushi oila, kushir suṭe bedisha bonigela, kunta bishash ḳorta farla na. Teu Isae tarare ḳoila, “Ino ḳaibar kunta ase ni?”
LUK 24:42 Tara eḳ ṭukra biran mas tanre dila.
LUK 24:43 Ou mas tain hoḳlor samne ḳaila.
LUK 24:44 Ḳaia erare ḳoila, “Ami zebla tumrar loge aslam, hou shomoy tumrare ḳoislam na ni, Musa nobir Tourat Shorif, nobi oḳlor sohifa, ar Zobur Shorifor maze zeta leḳa ase, ita hoḳolta nichchit folibo.”
LUK 24:45 Oḳan ḳoia hari, tain sahabi oḳlor dilor duar kuli dila, zate Allar kalamor mani era buzta faroin.
LUK 24:46 Tain ḳoila, “Allar kalamo leḳa ase, al-Mosie bout ḳoṭin duk-toklif faiba, moutor tin dinor din tain murda taki zinda oiziba.
LUK 24:47 Zekunu manshe tan name touba ḳorle, gunar mafi magile mafi faibo, ou boyani Zeruzalem taki shuru oia asta duniar hoḳol zatir ḳano fosani lagbo.
LUK 24:48 Tumra-u i hokkoltar shakki.
LUK 24:49 Ar huno, amar batuni bafe zeta dan ḳorar oada ḳorsoin, ami ita tumrar gese bezimu. Oile behest taki bol-takkot na faoa forzonto, tumra ou Zeruzalemo roio.”
LUK 24:50 Bade Isae sahabi oḳolre loia Bayt-Ania gaur muko gela, gia tain at tulia tarare dua dila.
LUK 24:51 Ar ou duar halote-u tain tarar ges tone alog oigela, tanre behesto tulia neoa oilo.
LUK 24:52 Tara hoḳole tanre soizda ḳoria, kub kushi oia Zeruzalemo firot aila.
LUK 24:53 Ar Baytul-Mukaddosor maze hamesha Allar hamd-tarif ḳorat roila. Amin.
JOH 1:1 Foyla-u kalam asla, kalam Allar loge asla ar ou kalam nize-u Alla asla.
JOH 1:2 Hoḳol foyla ou kalam Allar loge asla.
JOH 1:3 Ou kalamor mazdi hokkolta foyda ḳora oisil, zotota foyda ḳora oise, er kunuta-u tanre saṛa foyda oise na.
JOH 1:4 Tan maze zindegi asil, hou zindegi-u oilo manshor nur.
JOH 1:5 Ou nur andarir maze zoler, oile andaire i nurre ḳobza ḳorto farse na.
JOH 1:6 Allae Ehia namor eḳzon manshore duniat faṭaila.
JOH 1:7 Ou nuror befare shakki dibar lagi tanre faṭail oilo, zate tan zobanbondi hunia manshe iman ane.
JOH 1:8 Tain nize hi nur asla na, oile nuror befare shakki dibar lagi duniat aisla.
JOH 1:9 Asol nur oila hou zon, zein hokkol manshore nur dan ḳoroin, tain duniat toshrif anra.
JOH 1:10 Ou duniat tain asla, dunia tan usillae foyda oise, ta-o duniar manshe tanre sinlo na.
JOH 1:11 Tain nizor zomino aila, tan nizor manshe-u tanre kobul ḳorlo na.
JOH 1:12 Oile zoto zone tan ufre iman ania tanre kobul ḳorla, era forteḳ zonre tain Allar ḳas aolad, mani mayar zon bonar eḳtiar dila.
JOH 1:13 Ashole ou zon oḳlor zonom to manshor lou taki oise na, shorilor ḳaish ba manshor ichchae-o oise na, iṭa ḳali Alla taki-u oise.
JOH 1:14 Ou kalam-u manush surote zonom loila ar amrar maze boshoti korla. Bafor ḳas aolad hishabe tain ze zalal ar mohima faisoin, hou zalal ar mohima amra deḳsi. Tain to hok ar rohomote shullo-ana kamil.
JOH 1:15 Ehia nobie tan befare boṛo golae shakki dila, ḳoila, “Ein-u to hou zon, zen befare ami age ḳoislam, amar bade eḳzone toshrif anra, tain ama taki-o mohan, amar bout ag taki-u to tain asoin.”
JOH 1:16 Tain shullo-ana kamil oae amra hoḳole rohomotor ufredi aro rohomot faisi.
JOH 1:17 Musa nobir marfote Allae shoriot dan ḳorsila, oile Isa al-Mosir marfote hok ar rohomot aise.
JOH 1:18 Allare to ḳeu kunudin deḳse na. Tan loge roura hou eḳmatro fut, mani tan ḳas mayar zon, zein shoyong Moula, tain-u Allare zair ḳorsoin.
JOH 1:19 Ihudi neta oḳole Zeruzalem ṭaun taki zebla ḳoyzon imam ar Lebi shomazor kisu manshore Ehia nobir gese faṭaila, ou shomoy Ehiae erar gese shakki dila. Tara zebla zikaila, “Sab, afne ashole ḳe?”
JOH 1:20 Ehia nobie kunta na lukaia shikar oia ḳoila, “Ami to al-Mosi nae.”
JOH 1:21 Teu tara tanre zikaila, “Te afne ḳe? Afne Ilias nobi ni?” Tain ḳoila, “Na, ami Ilias nae.” Ou tara zikaila, “Te afne kita agor zomanar hou nobi ni?” Tain zuaf dila, “Ji na.”
JOH 1:22 Tara hirbar tanre zikaila, “Taile afne ḳe? Amrare zera faṭaisoin, amra firia gia kita ḳoitam, afnar nizor forisoy kita?”
JOH 1:23 Ehiae zuaf dila, “Ami oilam hou aoaz, zen befare Hozrot Ishaya nobie batai gesoin, Morubumir maze zure zure eḳzone elan ḳorra, tumra Malikor fot sohi koro.”
JOH 1:24 Ehia nobir gese zerare faṭail oisil, era asla Forishi shomazor manush.
JOH 1:25 Tara tanre zikaila, “Afne zebla al-Mosi-o nae, Ilias nobi-o nae ba agor zomanar hou nobi-o nae, te afne ḳene manshore toubar gusol dira?”
JOH 1:26 Ehia nobie tarare zuaf dila, “Ami to manshore fani dia toubar gusol ḳorairam, oile afnarar maze oula eḳ buzurg zon asoin, zenre afnara sinoin na.
JOH 1:27 I buzurg hou zon, zein amar bade toshrif anar ḳota asil. Tan faor zutar fitagesa kular laḳ-o ami nae.”
JOH 1:28 Zordan gangor aroḳ faro Bayt-Ania gaut, Ehia nobi ze zagat toubar gusol ḳoranit asla, hou zagat ou soal-zuaf oilo.
JOH 1:29 Bador din Ehia nobie deḳla Huzur Isa tan gese aira, dekia ḳoila, “Ou deḳrae ni Allai meṛa-baichcha, zen usillae hokkol manshor gunar mafi oy.
JOH 1:30 Ein oila hou zon, zen befare ami age ḳoislam, amar bade eḳzone toshrif anra, ashole tain amar ag taki-u asoin, ar tain ama taki-o ijjoti zon.
JOH 1:31 Age to ami tanre sintam na, oile Boni Israilor maze tain zate forisiti fain, otar lagi ami age aia manshore fanidi toubar gusol ḳorairam.”
JOH 1:32 Bade Ehia nobie ou shakki dila, ḳoila, “Ami deḳlam ḳoitoror surote Pak Ruhu asman taki lamia aila, aia en ufre azila.
JOH 1:33 Ami to tanre sintam na, oile toubar gusol ḳoranir lagi zein amare bezisoin, tain amare batai disoin zen, Allai Pak Ruhre zar ufre lamia aite deḳbae, ein-u hou zon, zein manshore Pak Ruhdi torikabondi diba.
JOH 1:34 Te ami ita deḳlam, dekia hari shakki diram, ein-u Ibnulla, Allar ḳas mayar zon.”
JOH 1:35 Bador din Ehia nobi ar tan duizon ummot hirbar hou zagat aila.
JOH 1:36 Ou shomoy Hozrot Isa aṭia zaira, tanre dekia Ehiae ḳoila, “Ou deḳrae ni Allai meṛa-baichcha.”
JOH 1:37 Ehia nobir ou ḳota hunia hou duiozon Isar ḳore ḳore roana oigela.
JOH 1:38 Isae ḳoredi firia erare deḳla, dekia ḳoila, “Kita ba, tumra kita sao?” Tara zuaf dila, “Robbi, (mani ustad), afne kuai taḳoin?”
JOH 1:39 Isae tarare ḳoila, “Ao na, aia dekia zao.” Teu tara tan loge gela, gia deḳla tain kun zagat taḳoin, ar tara-o asta din tan loge roila. Ou shomoy asoror oḳt aichche.
JOH 1:40 Ehia nobir ḳota hunia ze duizon Isar ḳore ḳore gesla, erar eḳzonor nam oilo Andrias, en bair nam Saimon-Fitor.
JOH 1:41 Ou Andriase foyla tan bai Saimonre tukaia bar ḳoria ḳoila, “Baisab huncho ni, amra to al-Mosire deḳsi.” Al-Mosir mani oilo Allar ḳelafoti faoa zon.
JOH 1:42 Andriase Saimonre loia Isar gese aila. Isae Saimonor bae saia ḳoila, “Tumi to Saimon bin Iuhanna, oile oḳon taki tumare Koifa name ḍaḳa oibo.” Koifa mani Fitor, ba fattor.
JOH 1:43 Bador din Isae niot ḳorla, Galil zilat zaitagi. Ou shomoy tain Filifre deḳla, dekia ḳoila, “O Filif ao, aia amar ummot o.”
JOH 1:44 Filif asla Bayt-Soyda gaur manush. Andrias ar Fitoror baṛi-o asil ou gaut.
JOH 1:45 Filife Notonelre tukaia bar ḳoria ḳoila, “Musa nobir Tourat Kitabo ar asmani nobi oḳlor sohifat zen ḳota leḳa ase, amra to tanre deḳsi. Tain to Nasarot gaur Isa, tan bafor nam Iusuf.”
JOH 1:46 Ikan hunia Notonele Filifre ḳoila, “Dut! Nasarot taki bala kunta baroy ni?” Filife ḳoila, “Te aia deḳo.”
JOH 1:47 Isae deḳla, Notonel tan gese aira, dekia ḳoila, “Ou deḳrae ni eḳzon ḳaṭi Boni Israili. Tar maze kunu dundur-mundur nai.”
JOH 1:48 Teu Notonele Isare zikaila, “Afne amare ḳemne sinla?” Isae zuaf dila, “Huno, tumare ḍakibar age tumi zebla hou ḍumur gasor tole aslae, hou shomoy ami tumare deḳsi.”
JOH 1:49 Ikan hunia Notonele Isare ḳoila, “Huzur, afne-u to Ibnulla, Allar ḳas mayar zon. Afne-u Boni Israilor bashsha.”
JOH 1:50 Isae tanre ḳoila, “Tumare hou ḍumur gasor tole deḳsi oḳan ḳoae tumi iman anlae ni? Huno, er taki-o aro bout boṛo boṛo keramoti tumi deḳbaene.”
JOH 1:51 Bade Isae ḳoila, “Ami tumrare hok kota ḳoiram, tumra deḳbae behest kuligese, ar Allar firista oḳol ami bin-Adomor ufre uṭa-nama ḳorra.”
JOH 2:1 Er duidin bade Galil zilar Kanna gaut eḳ bia asil. Hozrot Isar ma ou biat asla.
JOH 2:2 Ou biat Isa ar tan sahabi oḳole-o daot faisla.
JOH 2:3 Biar onusṭano zebla anguror shorbot fuṛai gelo, ou shomoy Isar maʼe Isare ḳoila, “Erar anguror shorbot shesh oigese.”
JOH 2:4 Isae tan maʼre ḳoila, “Mai go, ita to amar bishoy nae. Oḳono amar shomoy oise na.”
JOH 2:5 Oile tan maʼe ḳadimdar oḳolre ḳoila, “Oba, tain zeta ḳoin, ota-u ḳoro.”
JOH 2:6 Ihudir shoriot mafik uzu ḳorar lagi hino fattoror soyṭa gamla asil. Ita eḳoṭat onuman dui-tin mon fani dorto.
JOH 2:7 Isae ḳadimdar oḳolre ḳoila, “Ou gamlainto fani boro.” Teu tara iguin ṭefe ṭefe bori dilo.
JOH 2:8 Bade tain ḳoila, “On taki tuṛa fani nia fordan baburchire deo.” Teu tara ola-u ḳorlo.
JOH 2:9 Baburchie ou fani kaia deḳla, ita to anguror shorbot. Oile i shorbot kuai taki ailo, ikan tain zanta na. Ḳali kadimdar oḳole zanto. Erlagi baburchie biar noshare ḍakia ḳoila,
JOH 2:10 “Foyla hoḳole-u manshore ḳaṭi shorbot ḳaite dey. Manshe ichchamoto ḳaoar bade zebla shesh oizae, ou shomoy ze shorbot dey, ita foyla taki kisu bezal taḳe. Oile tumi kaṭi shorbot oḳono raḳso.”
JOH 2:11 Hozrot Isae Galil zilar Kanna gaut nishana hishabe ou foyla keramoti deḳaia nizor mohima zair ḳorla. Ita dekia sahabi oḳole tan ufre iman anla.
JOH 2:12 Erbade Isae tan ma, baiain ar sahabi oḳolre loia Kofornaum ṭauno gela, gia ḳoydin hono roila.
JOH 2:13 Ihudir Azadi Id gonai gele Isa Zeruzalem ṭauno aila.
JOH 2:14 Zeruzalemo aia tain deḳla, fobitro Baytul-Mukaddos Kaba goror shimanat kurbanir goru, meṛa ar faro besa-kina soler, ar ṭeḳar baṭṭar ḳarbari oḳol-o boi roisoin.
JOH 2:15 Ita dekia tain doṛi dia eḳṭa sabuk banaila, ar sabuk dia hoḳol goru-meṛa ar manshore intone ḳedai dila. Ar ṭeḳar baṭṭar ḳarbari oḳlor ṭeḳa-foysha sitraia, tarar kesh bakso ulṭaia falaila.
JOH 2:16 Faro besra oḳolre Isae ḳoila, “In tone hokkolta horao. Amar bafor gorre bazar banaio na.”
JOH 2:17 Ou shomoy Pak Kitabor ou ḳota sahabi oḳlor mono oigelo, “Tumar goror lagi amar ze mohobbot, ou mohobbote-u amar dilor maze agunir laḳan zoler.”
JOH 2:18 Isar i kamor lagi Ihudi neta oḳole tanre zikaila, “Ita ḳorar odikar ze tumar ase, tar forman hishabe tumi kun keramoti deḳaibae?”
JOH 2:19 Tain zuaf dila, “Afnara ou Kaba gor bangilaukka, ami tin dinor bitre hirbar tulmu.”
JOH 2:20 Ikan hunia tara ḳoila, “I ebadot ḳana banaite soysallish bosor lagsil, ar tumi kita tin dinor bitre banailibae ni?”
JOH 2:21 Oile Isae ino Allar gor bolte nizor shorilor ḳota-u ḳoisoin.
JOH 2:22 Erlagi Isa mora taki zinda oar bade sahabi oḳlor mono oisil, tain ou ḳota-u ḳoisla. Teu sahabi oḳole Pak Kitabor ḳota ar Isae zeta ḳoisla, ota ekin ḳorla.
JOH 2:23 Azadi Idor shomoy Isae Zeruzalem roia zeta keramoti kam ḳorsila, ita dekia bout manshe tan ufre iman anlo.
JOH 2:24 Oile Isae nizore tarar gese dora dila na, ḳaron tain hoḳol manshore sinta.
JOH 2:25 Manshor befare tan kunu shakkir zorur asil na, tain erar dilor ḳobor zanta.
JOH 3:1 Forishi oḳlor maze Nikodim name Ihudi oḳlor eḳzon neta asla.
JOH 3:2 Eḳdin rait tain aia Isare ḳoila, “Huzur, amra zani, afne eḳzon ustad hishabe Allar ges taki aisoin. Afne zeta keramoti kam ḳorra, Alla loge na taḳle ḳeu ita ḳorto fare na.”
JOH 3:3 Tain Nikodimre ḳoila, “Ami afnare hasau ḳoiram, noya ḳori zonom na loile ḳeu Allar bashshai deḳe na.”
JOH 3:4 Teu Nikodime tanre ḳoila, “Manush buṛa oigele hirbar zonom loy kila? Dusrabar maʼr feṭo hamaia zonom loy ni?”
JOH 3:5 Isae zuaf dila, “Ami afnare hasau ḳoiram, fani ar Pak Ruhu taki zonom na oile ḳeu Allar bashshait hamaito fare na.
JOH 3:6 Roḳto-mangsho taki zetar zonom oy, ita to ḳali roḳto-mangsho. Ar Pak Ruhu taki zetar zonom, ita ruhu.
JOH 3:7 Ami ze afnare ḳoilam, noya ḳori zonom loa zorur, ete taijjub oiba na.
JOH 3:8 Batash tar zebae ichcha obae zae, ar afne tar aoaz hunoin, oile ḳoi taki ae ar ḳoi zae, ikan zanoin na. Te Pak Ruhu taki zerar zonom oise, tarar belae-o olaḳan oy.”
JOH 3:9 Nikodime Isare zikaila, “Ikṭa kila oito fare?”
JOH 3:10 Isae zuaf dila, “Afne Boni Israilor ustad oia-o ita buzoin na ni?
JOH 3:11 Afnare hasau ḳoiram, amra zeta zani oḳan-u ḳoi, ar zeta deḳsi ou befare shakki dei. Oile afnara amrar shakki manoin na.
JOH 3:12 Ami afnarare duniabi befare ḳoile zebla ekin ḳoroin na, te behesti befar ḳoile kila ekin ḳorba?
JOH 3:13 Zein behesto taḳoin ar behest taki aisoin, hou bin-Adom saṛa ar ḳeu behesto uṭsoin na.
JOH 3:14 “Morubumir maze Musa nobie zela hafre usat tulchila, ola ami bin-Adomre-o usat tula oibo.
JOH 3:15 Zate ze zone amar ufre iman ane, he aḳeri zindegi hasil ḳore.
JOH 3:16 Alla Pake duniar manshore oto beshi maya ḳorla, i mayar ḳatire tan ḳas mayar zonre dan ḳorla. Ze manshe ou mayar zonor ufre iman ane, he binash oy na, borong aḳeri zindegi hasil ḳore.
JOH 3:17 “Allae manshore dushi forman ḳorar lagi tan mayar zonre duniat faṭaisoin na. Ou mayar zonor ḳatire manshe zate nazat fae, erlagi-u faṭaisoin.
JOH 3:18 Ze zone ou mayar zonor ufre iman ane, tar kunu bisar oy na, oile ze iman ane na, tare age-u dushi shaibosto ḳora oigese. Ḳaron Allar eḳmatro mayar zon Ibnullar ufre he iman anche na.
JOH 3:19 Tare dushi shaibosto ḳora oise, ḳaron duniat nur zair oise. Oile manshor bod ḳamor lagi nur taki andairre beshi bala faise.
JOH 3:20 Ze manshe bod ḳam ḳore, he nurre ginnae, tar bod ḳam oḳol zair oizibo ḳori he nuror gese ae na.
JOH 3:21 Oile ze zon hok-halalir fote sole, he nuror gese ae, zate tar hoḳol ḳam Allar munsha mafik oise ḳori forman oy.”
JOH 3:22 Erbade Hozrot Isa ar sahabi oḳol Ehudia elaḳat aila. Hino tain sahabi oḳlor loge kisu din ḳaṭaila ar manshore toubar gusol ḳoraila.
JOH 3:23 Ou shomoy Salim namor ek gaur ḳandat Oinun namor eḳ zagat Ehiae-o toubar gusol ḳoranit asla. Hou zagat bout fani taḳae dole dole manush aia toubar gusol loila.
JOH 3:24 Ehia nobire ou shomoy-o zelo bondi kora oise na.
JOH 3:25 Ou shomoy shoriot mafik fak-saf oar befar loia, Ehia nobir ummot oḳole Ihudir eḳ alimor loge torko lagai dila.
JOH 3:26 Bade tain-tain Hozrot Ehiar gese aia ḳoila, “Huzur, zein Zordan gangor hofaro afnar loge asla, ar zar befare afne shakki disla, deḳra ni, hoḳol manush tan gese zairagi ar tain erare toubar gusol dira.”
JOH 3:27 Ikan hunia Ehiae ḳoila, “Behest taki deoa na oile ḳeu kunta fae na.
JOH 3:28 Tumra-u to huncho, ami koisi, ami al-Mosi nae, oile tan age amare faṭani oise.
JOH 3:29 Zar gese ḳoinare bia deoa oy, ein-u nosha. Noshar duste ḳali ubaia noshar mat hunoin ar tan golar aoaz hunia kushi oin. Ou laḳan amar kushi-o aiz fura oilo.
JOH 3:30 Tanre boṛo oite oibo ar ami hori zaitam oibo.”
JOH 3:31 Zein ufor taki ain, ein hoḳlor ufre. Oile ze dunia taki ae, he to duniar, he duniabi mat-u mate. Zein behest taki ain, tan ashon hoḳlor ufre.
JOH 3:32 Tain hono zeta deḳsoin ar hunchoin, otar shakki-u dein. Ḳeu tan shakki mane na.
JOH 3:33 Oile ze zone tan shakki kobul ḳorse, he oḳan dia-u forman ḳore, Allar kalam-u hasa.
JOH 3:34 Allae zenre faṭaisoin, tain Allar kalam-u batain, ḳaron Allae tanre furafur ḳoria Pak Ruhu dan ḳoroin.
JOH 3:35 Bafe tan futre, mani tan ḳas mayar zonre maya ḳoroin ar tan ato-u hoḳolta disoin.
JOH 3:36 Ze manshe Allar ḳas mayar zonor ufre iman anche, he aḳeri zindegi failise. Oile ze tanre mane na, he kunumonte-u aḳer faito nae borong tar ufre Allar gozob foṛbo.
JOH 4:1 Forishi oḳole hunla, Hozrot Isae Ehia nobi taki beshi manshore tan ummot banaisoin, ar toubar gusol ḳoraira.
JOH 4:2 Oile Isae nize toubar gusol ḳoraira na, tan ummot oḳole-u ḳoraira.
JOH 4:3 Hozrot Isae i kobor faia, Ehudia zila saṛia hirbar Galil zilat zaoar lagi roana oila.
JOH 4:4 Zaoar ḳalo tanre Shomoriar mazdi zaoa lagsil.
JOH 4:5 Foto tain Shomoriar Shukar namor ek gaur daro aila. Hozrot Iakube tan fua Iusufre ze zomin dan ḳorsla, ou zominḳan asil hou gaur daro.
JOH 4:6 I zomino Hozrot Iakubor kua asil. Isa aṭte aṭte heran oia ou kuar ḳasat ziraila. Ou shomoy onuman duifor oigese.
JOH 4:7 Ermaze Shomoria zatir eḳ beṭie fani tulat ailo, ar kuar ḳasat Isa eḳla asla, ḳaron tan sahabi oḳol ḳani-fani loar lagi bazaro geslagi. Isae taire ḳoila, “O mai, amare tuṛa fani kaoaukka.”
JOH 4:9 Beṭie ḳoilo, “Ami to Shomoria zatir manush. Afne eḳzon Ihudi oia amar gese fani saira kila?” Beṭie ikan ḳoilo, ḳaron Shomoria zatir loge Ihudi manshor kunuzat mil-mish ba sola-fira asil na.
JOH 4:10 Isae taire ḳoila, “Tumi zudi zantae Allar dan kita, ar ḳe tumar gese fani saira, te tumi nize-u tan gese fani sailae one, ar tain tumare zinda fani dila one.”
JOH 4:11 Beṭie ḳoilo, “Sab, afnar gese to fani tular kunta nai, ar i kua-o goin. Te zinda fani kuai taki faila?
JOH 4:12 Afne kunu amrar mul murobbi Iakub nobi taki boṛo ni? Tain-u amrar lagi i kua kudisla. Tain ar tan fuainte-o ou kuar fani kaita, ar tan foshur falre-o ḳaoaita.”
JOH 4:13 Teu Isae ḳoila, “Ze zone i kuar fani kaibo, tar hirbar fias lagbo.
JOH 4:14 Oile amar deoa fani ze ḳaibo, tar kunu shomoy-u fias lagto nae. Borong i fani tar dilor maze zornar laḳan utlia uṭbo ar aḳeri zindegi dan ḳorbo.”
JOH 4:15 Teu beṭie Isare ḳoilo, “Huzur, te amare-o hou fani deukka, zate amar fias na lage, ar fanir lagi ino aoa na lage.”
JOH 4:16 Isae beṭire ḳoila, “Te zao, tumar zamaire ono loia ao.”
JOH 4:17 Beṭie ḳoilo, “Sab, amar to kunu zamai nai.” Isae ḳoila, “Tumi ṭik-u ḳoiso, tumar zamai nai.
JOH 4:18 Ḳaron er age to tumar faszon zamai oigesoin, ar oḳon ze tumar loge ase, he tumar zamai nae. Tumi hasa ḳota-u ḳoilae.”
JOH 4:19 Ikan hunia beṭie Isare ḳoilo, “Huzur, oḳon ami buzlam, afne eḳzon nobi.
JOH 4:20 Amrar baf-dadainte ou faṛor ufre-u ebadot ḳorta, oile afnara ḳoin, Zeruzalemo-u manshor ebadot ḳora usit.”
JOH 4:21 Isae tanre ḳoila, “Huno, amar matḳan ekin ḳoro. Dekio, oula shomoy aibo zebla tumra i faṛor ufre, ba Zeruzalemor kunuḳano, gaibi baf Allar ebadot ḳortae nae.
JOH 4:22 Tumra zare sino na, tar ebadot ḳoro, oile amra zan ebadot ḳori, tanre amra sini. Zano ni, nazator fot to Ihudi oḳlor mazdi-u aise.
JOH 4:23 Huno, ola shomoy aibo, borong oḳon-u aichche, zebla asol ebadotḳari oḳole hokkani ruhe gaibi baf Allar ebadot ḳorba. Gaibi bafe-o olaḳan ebadotḳarir tallash ḳoroin.
JOH 4:24 Allatala oilagi ruhu, erlagi zara tan ebadot ḳorba, tara hokkani ruhe tan ebadot ḳora lagbo.”
JOH 4:25 Bade ou beṭie ḳoilo, “Ami zani, al-Mosi aira. Tain aia hoḳolta amrare zanaiba.”
JOH 4:26 Isae ou beṭire ḳoila, “Ami-u hein, zein oḳon tumar loge matira.”
JOH 4:27 Ou shomoy sahabi oḳole aia deḳla, Isae eḳ beṭir loge matira, dekia tara taijjub oigela. Ta-o tara ḳeu zikaila na, afne kita saira ba en loge matira ḳene.
JOH 4:28 Bade beṭie tair fanir ḳoyla toia gaur manshore gia ḳoilo,
JOH 4:29 “Tumra aia eḳzonre deki zao. Amar zindegit zeta ḳorsi, ita hoḳolta-u tain ḳoilisoin. Te tain-u kita hou al-Mosi ni?”
JOH 4:30 Ita hunia gaur manush bar oia Isar gese aoa dorla.
JOH 4:31 Bade tan sahabi oḳole tanre onurud ḳori koila, “Huzur, kunta ḳaukka.”
JOH 4:32 Tain ḳoila, “Amar gese ila ḳani ase, ze ḳanir befare tumra zano na.”
JOH 4:33 Ikan hunia sahabi oḳole eḳe-oinne zikaila, “Te tanre ḳeu kunu ḳani ania dise na kita?”
JOH 4:34 Teu Isae tarare ḳoila, “Zein amare bezisoin, tan morzi mafik tan ḳam fura ḳora-u amar ḳani.
JOH 4:35 “Tumra ḳo na ni, ‘Ar sair mash bade-u foshol ḳaṭar shomoy aibo’? Oile ami tumrare ḳoiram, bala ḳori eḳbar ḳetedi saia deḳo, foshol fakia ḳaṭar zuka oigese.
JOH 4:36 Foshol ḳaṭrae oḳon-u beton faira ar aḳeror lagi foshol dola ḳorra. Erlagi zein zala bain dein ar zein foshol ḳaṭoin, duiozon-u homan kushi oin.
JOH 4:37 Ete ou silleḳor forman oy, ‘Eḳzone bain dein, aroḳzone ḳaṭoin.’
JOH 4:38 Ami-o tumrare ola foshol ḳaṭat faṭaisi, ze fosholor lagi tumra menot ḳorso na. Oinno manshe menot ḳorse ar tumra ou menotor foshol ḳaṭiso.”
JOH 4:39 Ze beṭir zindegir hoḳolta Isae ḳoilisoin, ou beṭir shakki hunia hou gaur bout Shomoria manshe Isar ufre iman anla.
JOH 4:40 Tara Isare gia minot ḳori koila, tarar oḳano roibar lagi. Erdae tain dui din hono roila.
JOH 4:41 Ou shomoy tan talim hunia aro bout manshe iman anla.
JOH 4:42 Ar gaur manshe ou beṭire ḳoila, “Tumar ḳotae amra iman anchi na, amra nize-u tan mat hunia buztam farsi, ein-u zogotor asol toraneala.”
JOH 4:43 Shomoriat duidin roia hari Hozrot Isa nizor baṛi Galil zilat gelagi.
JOH 4:44 Zudio tain age ḳoisla, kunu nobire-u nizor desho dam deoa oy na,
JOH 4:45 tebou ou shomoy tara tanre kobul ḳorla. Ḳaron idor shomoy Isae Zeruzalemo zeta keramoti deḳaisla, Galilor manush hono taḳae tara ita deḳsla ḳori tain Galilo aile tara kobul ḳorla.
JOH 4:46 Bade Isa hirbar Galilor Kanna gaut gela. Ono-u tain fanire anguror shorbot banaisla. Kofornaum ṭauno eḳ shorḳari ofisaror fua kub bemar asil.
JOH 4:47 Hozrot Isa Ehudia taki Galil aisoin hunia, ou ofisar tan gese gia minot ḳorla, tain zanu Kofornaum gia en fuagure bala ḳoroin. Ou shomoy tan fua morar foti oigesil.
JOH 4:48 Isae ou ofisarre ḳoila, “Kunu nishana ba keramoti kam na deḳle afnara kunumonte-u iman anta nae.”
JOH 4:49 Teu ofisare ḳoila, “Huzur, doya ḳori zoldi aukka, fuagur zan taḳte aukka.”
JOH 4:50 Isae tanre ḳoila, “Afne zaukkagi, afnar fua bala oigese.” Isar ḳota ekin ḳoria ein gelagi.
JOH 4:51 Hasau, hou ofisar baṛit zaoar fote tan gulam oḳole aia ḳobor ḳoilo, “Sab, afnar fuar bemar ḳomigese.”
JOH 4:52 Tain erare zikaila, “He kun shomoy bala oise?” Tara ḳoila, “Ḳail duifor taki tan taf saṛi dise.”
JOH 4:53 Teu ofisaror mono oilo, ṭik duifori bala Isae tanre ḳoisla, “Afne zaukkagi, afnar fua bala oigese.” Erlagi ou ofisar ar tan foribaror hoḳole Isar ufre iman anla.
JOH 4:54 Hozrot Isa Ehudia tone Galilo aoar bade ou dusra keramoti nishana deḳaila.
JOH 5:1 Itar bade Ihudi oḳlor idor shomoy aile Isa Zeruzalemo gelagi.
JOH 5:2 Zeruzalemo meṛa-dorzar ḳandat eḳṭa furki asil, ou furkit siṛi banda fasḳan gaṭ asil, faso gaṭor ufre fasḳan sauni. Ibrani bashae i furkir nam Bayt-Soda.
JOH 5:3 Ou gaṭo bout zator bemari foṛi roito. Lula-lengṛa, anda, ar bemare zerar shoril ekkebare hukai gese, tara-o ono roito.
JOH 5:4 Maze maze eḳzon firista aia ou furkir fani laṛaita, laṛanir bade-u foyla ze zon fanit lamto, tar zoto boṛo bemar ouk bala oizito. Erdae ou bemari oḳole fani laṛanir ashae ono foṛi roito.
JOH 5:5 Erar maze ola eḳzon bemari asil, ze beṭa aṭtish bosor taki bemar.
JOH 5:6 Bout din taki he ono foṛi roise hunia Isae tare zikaila, “Kita ba, tumar ichcha ni tumi bala oizitae?”
JOH 5:7 Beṭae ḳoilo, “Huzur, amar to ila ḳeu nai, zein fani laṛanir loge loge-u amare furkit lamaito. Ami lamte lamte aroḳzon gia lami zae.”
JOH 5:8 Isae ere ḳoila, “Te uṭo, tumar bisna loia aṭa-sola ḳoro.”
JOH 5:9 Loge loge-u ou bemari bala oigelo, ar tar bisna tulia sola-fira ḳorlo. Hi din asil Zummabar, Zummabare kunuzat ḳam ḳora zaiz nae.
JOH 5:10 Erdae Ihudi neta oḳole ou beṭare ḳoila, “Aiz to Zummabar, te aiz tumar bisna tulia neoa zaiz nae.”
JOH 5:11 Oile he ḳoilo, “Zein amare bala ḳorsoin, tain-u amare ḳoila, uṭo, tumar bisna loia aṭa-sola ḳoro.”
JOH 5:12 Teu neta oḳole beṭare zikaila, “Ou manushgu ḳegu, zegie tumare ḳoise, bisna loia sola-fira ḳortae?”
JOH 5:13 Oile ou beṭae to zanto na, tain ḳe, hi zagat bout manshe biṛ ḳorilisoin dekia, Isa hin tone geslagi.
JOH 5:14 Bade Isae ou beṭare Baytul-Mukaddoso faia ḳoila, “Huno, tumi to bemar taki bala oigeso. Te ar kunu guna ḳorio na, zate tumar shorbonash na oy.”
JOH 5:15 Teu ou beṭae gia Ihudi neta oḳolre ḳoilo, tare zein bala ḳorsoin en nam Isa.
JOH 5:16 Isae Zummabare bemarire bala ḳorae Ihudi neta oḳole tanre marilita saila.
JOH 5:17 Oile Isae tarare ḳoila, “Huno, amar gaibi bafe hamesha ḳam ḳorra ar ami-o ḳorram.”
JOH 5:18 Ikan hunia tara tanre zane marar lagi aro gorom oia fot tukanit roila. Tara mono ḳorsil, tain ḳali Zummabaror niom bangisoin na, tain Alla Pakre baf ḍakia shiriki-o ḳorsoin.
JOH 5:19 Erlagi tain ou neta oḳolre ḳoila, “Ami nichchit hok kota ḳoiram, fute to nize nize kunta ḳorta faroin na, oile tan bafre zeta ḳam ḳorat deḳoin, tain ḳali ota-u ḳoroin, bafe zeta ḳoroin, fute-o to ota ḳoroin.
JOH 5:20 Bafe tan futre maya ḳoroin ar tain nize ze ḳam ḳoroin, ita hoḳolta-u futre deḳain. Ar ita taki aro boṛo boṛo kudroti kam futre deḳaiba, zeta dekia afnara taijjub oiziba.
JOH 5:21 Bafe zela murdare zinda ḳori tuloin, fute-o oula zerare ichcha zindegi dan ḳoroin.
JOH 5:22 Bafe ḳeuror bisar-o ḳoroin na, tan hoḳol bisaror bar futor ato disoin,
JOH 5:23 zate bafre zela hoḳole ijjot ḳore, oula futre-o ijjot ḳore. Futre ze ijjot ḳore na, he ashole hou bafre-o ijjot ḳore na, zein i futre bezisoin.
JOH 5:24 “Ami afnarare hasa ḳota ḳoiram, ze zone amar kalam hune ar zein amare faṭaisoin tan ufre iman ane, he to aḳeri zindegi failise. Tare ar dushi shaibosto ḳora oito nae. He to mout taki zindegit faṛi dilaise.
JOH 5:25 Ar ami hasau ḳoiram, ila eḳ zomana aibo, borong oḳon-u aichche, zebla murda oḳole ami Ibnullar golar aoaz hunba, ar zara hunba tara zinda oiba.
JOH 5:26 Itar ḳaron oilo, baf nize zela zindegir malik, tan futre-o oula zindegir malikana disoin.
JOH 5:27 Bafe futre manshor bisar ḳorar eḳtiar disoin, ḳaron ein-u to bin-Adom.
JOH 5:28 Te ita hunia afnara taijjub oiba na, zanoin ni, oula shomoy aior, zebla Allar futor golar aoaz hunia murda oḳol ḳoybor taki bar oia aiba.
JOH 5:29 Ar zera nek kam ḳorsoin, tara behesti zindegi faoar lagi uṭba, oile zera naformanir maze zindegi kaṭaise, tara uṭba shaza faoar lagi.
JOH 5:30 “Ami to nize nize kunta ḳortam fari na, ami zela huni ola bisar ḳori. Ami hok bisar ḳori, ḳaron ami amar nizor ichchae ḳam ḳortam sai na, ḳali zein amare faṭaisoin tan morzi fura ḳortam sai.
JOH 5:31 “Ami zudi nizor befare nize shakki dei, te i shakki shoṭik nae.
JOH 5:32 Oile dusra zone-o amar befare shakki dira, ar ami zani, tain ze shakki dira, ita hasa.
JOH 5:33 Afnara to Ehia nobir gese ḳobria faṭaia zikaisoin, tain-o hokor fokke shakki disoin.
JOH 5:34 Ar ami kunu manshor shakkir ufre borosha ḳori na, oile afnara zate nazat faia zan basaita faroin, erdae ita ḳoiram.
JOH 5:35 Hozrot Ehia-u asla hou zalail mushal, ze mushale for disil. Afnara-o tuṛa ḳoydin ou mushalor foror maze kushi korte razi oisla.
JOH 5:36 “Oile Ehia nobir shakki tone-o aro boṛo shakki amar ase, ḳaron amar gaibi bafe ze ḳamor lagi amare faṭaisoin, ami ota-u ḳorram. Ar ou ḳamor shakkie-u buza zae, amare amar gaibi bafe bezisoin.
JOH 5:37 Tain-u to hou baba, zein amare faṭaisoin, tain nize-o amar befare shakki disoin. Afnara kunu shomoy tan golar aoaz hunchoin na, ar tanre deḳsoin-o na.
JOH 5:38 Esaṛa tan kalam to afnarar dilo roy na, ḳaron tain zare faṭaisoin, en ufre afnara iman anoin na.
JOH 5:39 “Afnara to kub mon dia Asmani Kitab tilaot ḳoroin, mono ḳoroin ita tilaot ḳorle aḳeri zindegi faiba. Oile ou kitab to amar befare shakki dey.
JOH 5:40 Erbade-o afnara zindegi faoar lagi amar gese aita sain na.
JOH 5:41 “Ami to manshor ges taki tarif faoar ashae aisi na,
JOH 5:42 oile ami zani, Allar bae afnarar kunu mohobbot nai, ami to afnarare sini.
JOH 5:43 Ami amar gaibi bafor nam loia aisi, ta-o afnara amare ekin ḳorra na. Oile dusra ḳeu zudi tar nizor name ae, te tare afnara ekin ḳorba.
JOH 5:44 Afnara eḳe-oinnor ges taki tarif faita sain, oile ze tarif Allar ges tone faoa zae, itar lagi kunu sesṭa ḳoroin na. Te afnara ḳemne ekin ḳorba?
JOH 5:45 Afnara mono ḳorba na, ami amar babar gese afnaintore dushi banaimu. Oile ze Musa nobir ufre afnara borosha ḳori asoin, hou Musae-u afnaintore dushi koira.
JOH 5:46 Afnara zudi Musa nobire ekin ḳorta, te amare-o ekin ḳorla one, i Musa nobie to amar befare-u leḳsoin.
JOH 5:47 Oile afnara zebla tan leḳare-u ekin ḳoroin na, te amar mukor ḳotare kila ekin ḳorba?”
JOH 6:1 Erbade Hozrot Isa Galil aoror hofaro gelagi, ou aoror aroḳ nam Tibiria aor.
JOH 6:2 Bout manush tan ḳore oia zaoat asla, tara to deḳsila, bemari oḳlor ufre tain kila keramoti kam ḳorsoin.
JOH 6:3 Hono gia hari tan sahabi oḳolre loia eḳ faṛor ufre boila.
JOH 6:4 Ou shomoy Ihudi oḳlor Azadi Id gonai aise.
JOH 6:5 Isae saia deḳla, bout manush tan gese uṭia aira, ou tan sahabi Filifre ḳoila, “Ita manshore ḳaoanir lagi amra ruṭi faimu kun zagat?”
JOH 6:6 Ashole Filifre forikka ḳorar lagi tain ikan zikaila, oile kila kita ḳorba, ikan tain age-u zanta.
JOH 6:7 Filife zuaf dila, “Erare tuṛa tuṛa ḳani dile-o dui-sho dinaror ruṭie kulaito nae.”
JOH 6:8 Hono Andrias name Hozrot Isar eḳ sahabi asla. Tain oila Saimon-Fitoror bai.
JOH 6:9 Tain Isare ḳoila, “Huzur, ono huru eḳ fuar gese fasḳan aṭar ruṭi ar duiṭa biran mas ase, oile oto manshor maze itae kita oibo?”
JOH 6:10 Isae hukum dila, “Tumra ota manshore gashor ufre boai deo.” Teu tara gashor ufre boigela. Ino ḳali beṭa manush-u asla onuman fas azar zon.
JOH 6:11 Bade tain ou fasḳan ruṭi ato loia Allar shukria adae ḳoria erare baṭia dila. Oula biran mas-o baṭia dila. Ze zoto sailo, he otoḳan failo.
JOH 6:12 Hoḳol manshe feṭ bori kailo. Ḳaia harle Isae tan sahabi oḳolre ḳoila, “Ḳanir bade zeta roise, tumra ota ekḳano dola ḳoro, kunta falaio na.”
JOH 6:13 Era ou fasḳan ruṭir baṛti ṭukrain dola ḳoria baro ṭukri borla.
JOH 6:14 Hozrot Isar i keramoti dekia manshe mata-mati lagaila, “Nichchoy ein-u hou nobi, zein duniat toshrif anar ḳota.”
JOH 6:15 Teu Isae buzilila, manshe zur ḳoria tanre tarar bashsha bananir lagi dorto sar. Oḳan buzia tain hirbar eḳla-u faṛor ufre gelagi.
JOH 6:16 Hainja bala Isar sahabi oḳol aoror faro gela.
JOH 6:17 Ar Kofornaum ṭauno zaita ḳori nao loia aor faṛi deoat lagla. I shomoy andair oigesil ar Isa-o tarar loge asla na.
JOH 6:18 Aoror mazḳano zaite-u kub tufani batash ar boṛo boṛo ḍeu shuru oilo.
JOH 6:19 Onuman tin-sair mail nao baia zaoar bade tara deḳla, Hozrot Isa fanir ufredi aṭia tarar gese aira. Ita dekia sahabi oḳole kub ḍoraigela.
JOH 6:20 Ou shomoy Isae tarare ḳoila, “Ḍoraio na, i to ami.”
JOH 6:21 Sahabi oḳole tanre nao-o tulta saila, ar tara ze zagat zaoar ḳota, loge loge nao gia hono fosi gelo.
JOH 6:22 Aoror hofaro zeta manush uba asla, bador din tara buzla, agor din ino ekkan nao saṛa dusra kunu nao asil na. Tara eoḳan-o buzla, Isa tan sahabi oḳlor loge nao-o uṭsoin na, borong tara eḳla-u aor far oisoin.
JOH 6:23 Oile ze zagat Isae Allar shukria adae ḳoria hari manshore ruṭi kaoaisla, ou zagar gese Tibiria ṭaun taki koyḳan nao ailo.
JOH 6:24 Manshe zebla deḳla, Isa ba tan sahabi oḳol ḳeu i zagat nai, ou tara ota naoainto uṭia Isar tallashe Kofornaum ṭauno gelagi.
JOH 6:25 Hono gia tara Isare faia ḳoila, “Huzur, afne ino kun shomoy aila?”
JOH 6:26 Tain zuaf dila, “Ami tumrare hasa ḳota ḳoiram, tumra amar keramoti nishanar mani buzia amare tukairae na, borong feṭ bori ruṭi kaiso ḳori-u tukairae.
JOH 6:27 Oḳon huno, duniabi ze ḳani nosṭo oizae, tar ḳore guria lab kita? Ze ḳani kunudin nosṭo oy na, borong aḳeri zindegi dan ḳore, tar ḳore oia guro. I kani to ami bin-Adome tumrare dimu. Ou eḳtiar ḳali amar ase, amar gaibi baf Allae-u itar forman deḳaisoin.”
JOH 6:28 Ikan hunia tara Isare zikaila, “Te Allar ḳam ḳorar lagi amra kita ḳortam?”
JOH 6:29 Tain ḳoila, “Allae zare faṭaisoin, tan ufre iman ana-u oilo Allar ḳam.”
JOH 6:30 Erbade tara tanre zikailo, “Te afne omon kita nishana deḳaiba, zeta dekia amra afnar ufre iman anmu? Afne kun ḳam ḳorba?
JOH 6:31 Amrar baf-dadae to morubumit manna ḳaisla. Pak Kitabo leḳa ase, Allae tarare behesti kani kaoaila.”
JOH 6:32 Isae zuaf dila, “Ami tumrare hok kota ḳoiram, behesti ze ruṭi tumra faislae, ita to Musa nobie disoin na, borong amar gaibi bafe-u tumrare asol behesti ruṭi dan ḳoroin.
JOH 6:33 Ar Allar deoa hou ruṭi oila ou zon, zein behest taki lamia aia hara zogotre zindegi dein.”
JOH 6:34 Teu tara ḳoilo, “Huzur, te ou ruṭi-u amrare hor-hamesha deukka.”
JOH 6:35 Isae ḳoila, “Ami-u hou zindegi-ruṭi. Ze zon amar gese ae, tar kunu shomoy buk lage na, ar ze amar ufre iman ane, tar kunu shomoy fiase-o dore na.
JOH 6:36 Ami to tumrare mukdi koisi-o, ar tumra amare dekia-o iman anlae na.
JOH 6:37 Amar gaibi bafe zerare amar ato dein, tara hoḳol-u amar gese aibo. Ze zon amar gese ae, ami kunumonte-u tare bare falaitam nae.
JOH 6:38 Ami kunu amar morzi mafik kam ḳorat aisi ni? Na, borong zein amare faṭaisoin, tan morzi zugaia ḳam ḳorar lagi-u ami behest taki lamia aisi.
JOH 6:39 Huno, ze bafe amare faṭaisoin, tan munsha oilo, tain zerare amar ato disoin, ami zanu era eḳzonre-o na arai borong Ruz Hashoro erare zinda halote tuli.
JOH 6:40 Amar bafor munsha oilo, zara tan futre dekia tan ufre iman ane, tara zanu aḳer fae. Ar ami-u tarare Ruz Hashoro zinda ḳori tulmu.”
JOH 6:41 Ikan hunia Ihudi neta oḳole Isare loia ḳana-gusha lagaila. Ḳaron tain age ḳoisla, “Behest taki ze ruṭi lamia aise, ami-u hou ruṭi.”
JOH 6:42 Erlagi tara nize nize ḳoila, “Ogu to Iusufor fua Isa nae ni ba? Amra to tar ma-bafore-o sini. Te he ḳemne ḳoy, he bule behest taki lamia aise?”
JOH 6:43 Isae tarare ḳoila, “Tumra nizor maze ḳana-gusha ḳorio na.
JOH 6:44 Amar ze gaibi bafe amare faṭaisoin, tain ashik na banaile kunu manush-u amar gese aito fare na. Ar ami-u tare Ruz Hashoro zinda halote tulmu.
JOH 6:45 Zano ni, nobi oḳlor kitabo leḳa ase, ‘Tara hoḳole Allar ges taki talim loiba.’ Ar ze zone gaibi bafor ges taki talim faise, hou zon-u amar gese ae.
JOH 6:46 “Ou bafre to kunu manshe deḳse na, ḳali Allar ges taki zein aisoin, tain-u i bafre deḳsoin.
JOH 6:47 Ami tumrare nichchit hasa ḳota ḳoiram, ze zone amar ufre iman anche, he loge loge-u aḳer failise.
JOH 6:48 Ami-u zindegi-ruṭi.
JOH 6:49 Tumrar baf-dadainte to morubumit manna ḳaisla, ta-o tarar mout oise.
JOH 6:50 Oile ikan oilo hou ruṭi, ze ruṭi behest taki lamia aise, zate ou ruṭi kaia manush moron taki rehai fae.
JOH 6:51 Huno, ami-u oilam hou zinda ruṭi, ze ruṭi behest taki lamia aise. Ze zone i ruṭi kaibo, he siroḳalin zindegi faibo. Amar ḳaya-u oilo ou ruṭi. Manshore siroḳalin zindegi dibar niote ami amar deho-ḳaya bilai dimu.”
JOH 6:52 Ikan hunia Ihudi neta oḳlor maze torka-torki lagigelo. Tara eḳe-oinne ḳoilo, “I beṭae ḳemne tar shorilor gust amrare ḳaoaibo?”
JOH 6:53 Isae ḳoila, “Te huno, ami nichchit hok kota ḳoiram, tumra ami bin-Adomor lou ar gust na ḳaile to tumrar maze zindegi-u nai.
JOH 6:54 Ḳeu zudi amar lou ar gust ḳae, te he aḳeri zindegi failise, ar Ruz Hashoror dino ami tare zinda ḳori tulmu.
JOH 6:55 Amar gust-u oilo asol ḳani ar amar lou-u oilo asol fani.
JOH 6:56 Ze zone amar lou ar gust ḳae, he amar bitre taḳe ar ami-o tar bitre taki.
JOH 6:57 Zela amar gaibi zinda bafe amare faṭaisoin, erlagi-u ami-o zinda asi. Oula ze zone amare ḳae, he-o amar lagi zinda roibo.
JOH 6:58 Deḳrae ni, ou ruṭi to behest taki lamia aise. Ze ruṭi kaia tumrar baf-dadain mara gesoin, i ruṭi to amar laḳan nae. Amar ou ruṭi ze zone ḳaibo, he siroḳal zinda roibo.”
JOH 6:59 Hozrot Isae Kofornaum ṭaunor mosido talim deoar shomoy ita hoḳolta ḳoila.
JOH 6:60 Talim hunia hari tan ummotor mazor boute ḳoila, “Ita to boṛo gorom talim. Ita ḳegie manbo?”
JOH 6:61 Oile Isae tan gaibi bole buzilila, kita loia era ḳana-gusha ḳorra. Buzia erare ḳoila, “Ou talim hunia tumra gabṛi gelae ni?
JOH 6:62 Te ami bin-Adom age ze zagat aslam, amare zebla hono uṭi zaoat deḳbae, ou shomoy tumra kita ḳoibae?
JOH 6:63 Tumra buzrae ni, manshor shoril to beḳama, ashole ruhu oilogi zindegi. Ami tumrare ze boyani koilam, ita oilogi manshor ruhu ar zindegir befar.
JOH 6:64 Oile tumrar maze ḳeu ḳeu oḳono amar ufre iman anche na.” Ḳe tan ufre iman anche na, ar ḳe tanre dushmonor ato dorai dibo, Isae foyla taki-u ita zanta.
JOH 6:65 Ou tain ḳoila, “Ou ḳarone ami tumrare ḳoisi, gaibi bafe bol na dile, kunuzon-u amar gese aito fare na.”
JOH 6:66 Isar ita talim hunia tan bout ummot firia gelagi, tara tan loge sola-fira bad dilaila.
JOH 6:67 Erlagi Isae tan barozon sahabire zikaila, “Kita ba, tumitain-o zaitaegi ni?”
JOH 6:68 Saimon-Fitore zuaf dila, “Huzur, amra ar ḳar gese zaitam? Aḳeri zindeganir talim to ḳali afnar gese-u ase.
JOH 6:69 Amra to zanchi ar afnar ufre iman-o anchi, afne-u Allar oada ḳora hou fobitro zon.”
JOH 6:70 Teu Isae erare ḳoila, “Ami to tumra barozonre fosond ḳorsi, oile tumrar maze-u eḳzon shoytan ase.”
JOH 6:71 Ino tain Saimon Iskariator fua Ihudar befare ḳoila, ou Ihudae bade tane dorai dibo. He asil ou barozon sahabir mazor eḳzon.
JOH 7:1 Erbad taki Hozrot Isa Galil zilar bitre-u sola-fira ḳorla. Ihudi neta oḳole tanre zane marilito saisil, erlagi tain ar Ehudia zilat zaita saila na.
JOH 7:2 Ou shomoy Ihudi oḳlor Ḍera-goror Idor din gonai aisil.
JOH 7:3 Erlagi Isar baiainte tanre ḳoila, “Tumi in tone Ehudia zilat zaogi, teu tumi zeta ḳam ḳorso, ota tumar ummot oḳole-o deḳba.
JOH 7:4 Ḳeu zudi nizore manshor gese zair ḳorto sae, te he lukaia kunta ḳore na. Tumi-o zebla omon ḳam ḳorrae, te nizore manshor gese zair ḳoro.”
JOH 7:5 Ashole Isar baiainte-o tan ufre iman anchoin na.
JOH 7:6 Isae tarare ḳoila, “Amar shomoy oḳono oise na, oile tumrar to shomoy oshomoy kunta nai.
JOH 7:7 Duniar manshe tumrare ginnaito nae, oile amare gin ḳore. Ami to tarar befare ḳoiar, tarar hoḳol ḳam-u ḳaraf.
JOH 7:8 Te tumra zaogi, gia id ḳoro. Amar shomoy oḳono fura oise na, erlagi ami oḳon zaitam nae.”
JOH 7:9 Oḳan ḳoia tain Galil zilat roigela.
JOH 7:10 Tan baiain idor mahfilo gia harle tain-o gela, oile kula-mela na gia lukaia gela.
JOH 7:11 Idor ḳalo Ihudi neta oḳole tan tallash ḳorat roila, ar ḳoila, “Hou manushṭa kuai.”
JOH 7:12 Biṛor maze Isar befare manshe mata-mati korla. Ḳeu ḳeu ḳoilo, “Ein to boṛo bala manush.” Ar ḳeu ḳeu ḳoilo, “Na, na, he to manshore be-foti banailar.”
JOH 7:13 Oile Ihudi neta oḳolre ḍoraia, muk kulia tan befare ḳeu kunta matilo na.
JOH 7:14 Ou idor mazamazi shomoy Hozrot Isa Baytul-Mukaddos Kaba Shorifo gia talim dila.
JOH 7:15 Tan talim hunia taijjub oia Ihudi neta oḳole ḳoila, “I manshe madrashat na foṛia oto ilim failo kila?”
JOH 7:16 Isae zuaf dila, “Ami ze talim dei, ita amar nizor nae, zein amare bezisoin, ita to tan-u talim.
JOH 7:17 Ḳeu zudi tan morzi zugaia solto sae, te he buzbo, i talim Allar ges taki aise, na amar muk taki diram.
JOH 7:18 Ze zone nizor mon taki mate, he ḳali nizor tarif faito sae. Oile ze zone tar faṭaneala malikor tarif ḳorar sesṭa ḳore, he hamesha hok-halal taḳe, tar mono kunu dukabazi nai.
JOH 7:19 “Tumra kunu Musa nobir shoriot faiso na ni? Oile tumra eḳzone-o to shoriotor hukum-ahkam manrae na. Te tumra ḳene amare marilitae sairae?”
JOH 7:20 Teu tara ḳoila, “Tumare bute faise, tumare ḳe marto sar?”
JOH 7:21 Isae tarare ḳoila, “Ami kali ekkan ḳam ḳorlam, ar tumra taijjub oigelae.
JOH 7:22 Hozrot Musae to tumrare mosolmani kam ḳoranir niom disla, ar Zummabare-o tumra ou ḳam ḳorao. Ashole, i niom Musa nobir ges taki aise na, borong agor moy-murobbir ges taki-u aise.
JOH 7:23 Ṭik ase, Musa nobir niom salu raḳar lagi Zummabare-o zudi mosolmani kam ḳorail zae, te ami Zummabare eḳzon bemarire bala ḳorsi dekia amar ufre gusa ḳorrae ḳene?
JOH 7:24 Hok-insaf ḳoro, ḳali bargala dekia bisar ḳorio na.”
JOH 7:25 Ou shomoy Zeruzalem ṭaunor kisu manshe ḳoilo, “Neta oḳole zare marilta saira, ogu kita hou manush nae ni?
JOH 7:26 Te he to deki kula-mela mater, ta-o tara deki kunta ḳoira na. Taile tara kita hasa ḳota buzilisoin ni, ou manush-u al-Mosi?
JOH 7:27 Ar amra to zani, ogu kuai taki aise. Oile al-Mosi zebla aiba, ou shomoy ḳeu zanto nae, tain kuai taki aisoin.”
JOH 7:28 Erbade Isae Baytul-Mukaddoso talim deoar shomoy zure zure boyan ḳorla, “Afnara amare-o sinoin, ar ami kuai taki aisi ikan-o zanoin. Hunoukka, ami niz taki aisi na, hok Alla Pake-u amare faṭaisoin.
JOH 7:29 Afnara tanre sinoin na, oile ami sini. Ḳaron ami tan ges taki-u aisi ar tain-u amare faṭaisoin.”
JOH 7:30 Ikan hunia manshe Isare dorilito sailo, oile tan shomoy fura oise na gotike ḳeu tan gotro at tullo na.
JOH 7:31 Ar erar mazor boute tan ufre iman ania ḳoilo, “Ein to bout keramoti deḳaisoin, al-Mosi aia kunu er saite beshi keramoti deḳaiba ni?”
JOH 7:32 Ita loia manshe ḳana-ḳani korra, ikan Forishi oḳole hunla. Hunia boṛo imam ar Forishi oḳole Isare dorar lagi koyzon faradar-sifai faṭaila.
JOH 7:33 Isae ḳoila, “Huno, ami ar beshi din tumrar maze nae. Ami to tan gese zaimugi, zein amare faṭaisoin.
JOH 7:34 Tumra amare tukaia faitae nae, ar ami ze zagat roimu, tumra ḳeu hino aitae-o fartae nae.”
JOH 7:35 Hozrot Isar ita mat hunia Ihudi neta oḳole eḳe-oinne zikaila, “He kuai zaibogi, zeḳano amra tare tukaia faitam nae? He kita Iunani oḳlor desho zeta Ihudi asoin, hono roia Iunani otare-o talim dibo ni?
JOH 7:36 He to ḳoilo, tumra amare tukaia faitae nae, ar ami zeḳano zaimu, tumra hino aitae fartae nae. Tar i mator mani kita?”
JOH 7:37 Idor aḳeri din Hozrot Isa ubaia zure zure boyan ḳorla, “Kunu manshor fiase dorle, he amar gese aia fani kauk.
JOH 7:38 Ze zone amar ufre iman ane, Pak Kitabor ayat mafik tar dil taki zinda fanir gang bar oibo.”
JOH 7:39 Isar ufre iman ania zera Pak Ruhre faiba, hou Pak Ruhur befare tain ou ḳota ḳoila. Tarar gese Pak Ruhre oḳono deoa oise na, ḳaron Isae tan mohima oḳono hasil ḳorsoin na.
JOH 7:40 Ita hunia kisu manshe ḳoilo, “Ashole ein-u hou oada ḳora nobi.”
JOH 7:41 Ar ḳoyzone ḳoilo, “Ein-u al-Mosi.” Oile ḳeu ḳeu ḳoilo, “Al-Mosi kunu Galil zila taki aiba ni?
JOH 7:42 Pak Kitabe to batae, al-Mosie zonom loiba Daud nobir bongshot, Daud nobir Betelham gaut.”
JOH 7:43 Ou laḳan Isare loia manshor maze doladoli lagigelo.
JOH 7:44 Ermaze ḳoyzone tanre dorilito sailo, oile ḳeu tan gotro at tullo na.
JOH 7:45 Isare dorar lagi ze faradar-sifai oḳolre faṭani oisil, tara firot aile boṛo imam ar Forishi oḳole zikaila, “Tare doria anlae na ḳene?”
JOH 7:46 Era ḳoila, “I manshe zela mat mate, ila mat ḳeu kunudin matise na.”
JOH 7:47 Teu Forishi oḳole sifai oḳolre ḳoila, “He tumrare-o ṭogililo ni?
JOH 7:48 Deḳso ni, neta ba Forishi shomazor ḳeu tar ufre iman anche ni?
JOH 7:49 Ḳali ou zetae shoriotor kunta-u zanoin na, ota-u to. Itar ufre lannot ase.”
JOH 7:50 Forishi oḳlor maze eḳzonor nam asil moulana Nikodim, ein age Isar gese gesla.
JOH 7:51 Nikodime ḳoila, “Ḳeuror mukor ḳota na hunia ba tar oforad na zania, tare shaza deoar niom kunu amrar shorioto ase ni?”
JOH 7:52 Ikan hunia Forishi oḳole Nikodimre ḳoila, “Tumi-o kita Galil zilar manush ni? Pak Kitabo saia deḳo na, Galilo kunu nobir zonom oy na.”
JOH 8:1 Bade hoḳol manush zarzir baṛit gelagi, ar Hozrot Isa eḳla Zoytun faṛo gia uṭla.
JOH 8:2 Bador din fozor oḳto Isa hirbar Baytul-Mukaddoso gela, gia harle hoḳol manush tan gese ailo. Tain ono boia tarare talim dila.
JOH 8:3 Ou shomoy moulana ar Forishi shomazor manshe eḳ zinakur beṭire loia tan gese ailo. Aia beṭire mozlisor mazḳano uba ḳoraia ḳoilo,
JOH 8:4 “Huzur, ou beṭi ogu zinar ḳamo dora ḳaise.
JOH 8:5 Te Tourat Shorifor maze to Musa nobie zinakur beṭintore fattor maria marilibar hukum disoin. Oḳon afne kita ḳoin?”
JOH 8:6 Tara Isare forikka ḳorar niote-u ila ḳoila, zate tanre dushi bananir lagi kunu kut fain. Teu Isae-o mata nisa ḳori angul dia maṭit leḳat lagla.
JOH 8:7 Oile tara zebla bar bar tanre zikaira, ou shomoy tain mata tulia ḳoila, “Afnaintor maze ze zone kunudin guna ḳorsoin na, ein foyla ou beṭire fattor maroukka.”
JOH 8:8 Oḳan ḳoia tain hirbar mata nisa ḳori maṭit leḳat lagla.
JOH 8:9 Ikan hunia neta oḳlor maze buṛa taki shuru ḳoria eḳe eḳe hoḳol-u gelagi. Ḳali Isa ar hou beṭi saṛa dusra ḳeu roilo na.
JOH 8:10 Teu Isae mata tulia ou beṭire zikaila, “Kita go mai, ita manush kuai? Ḳeu tumare shazar zuka mono ḳorlo na ni?”
JOH 8:11 Beṭie ḳoilo, “Ji na huzur, tara ḳeu to shaza disoin na.” Ou shomoy Isae ḳoila, “Te ami-o tumare kunu shaza ditam nae. Oḳon zaogi, gunar fote ar zindegi kaṭaio na.”
JOH 8:12 Bade Hozrot Isae manshore ḳoila, “Ami-u duniar nur. Ze zon amar fote ae, he kunu shomoy andarit fao falaito nae, borong nuror zindegi faibo.”
JOH 8:13 Ikan hunia Forishi oḳole ḳoila, “Tumar shakki loa zaito nae, tumi tumar nizor fokke shakki dirae.”
JOH 8:14 Teu Isae zuaf dila, “Ami amar nizor fokke shakki dile-o amar shakki to hasa. Ḳaron ami kuai taki aisi ar kuai zairam, ita to tumra zano na, ḳali ami-u zani.
JOH 8:15 Tumra to duniabi manshor laḳan bisar ḳoro, oile ami keuror bisar ḳori na.
JOH 8:16 Ami keuror bisar ḳorle-o hok bisar ḳormu, ḳaron ami eḳla nae, amar loge amar gaibi baf-o asoin, ou bafe amare bezisoin.
JOH 8:17 Tumrar shoriotor maze leḳa ase, duizone zudi eḳ homan shakki dey, te i shakki hasa.
JOH 8:18 Olaḳan ami-o amar fokke shakki dei, ar ze bafe amare faṭaisoin, tain-o amar fokke shakki dein.”
JOH 8:19 Forishi oḳole tanre ḳoila, “Tumar baf kuai?” Isae zuaf dila, “Tumra amare-o sino na, ar amar bafre-o sino na. Amare sinle amar bafre-o sinlae one.”
JOH 8:20 Fobitro Baytul-Mukaddosor dan-baksor gese ubaia Hozrot Isae ou talim dila. Oile tan shomoy fura na oae ḳeu tanre dorlo na.
JOH 8:21 Hozrot Isae Forishi oḳolre hirbar ḳoila, “Ami to zaiargi. Gia harle tumra amare tukaibae, oile ar faitae nae, ami zeno zairam, tumra hino aitae-o fartae nae, tumra nizor gunar maze-u morbae.”
JOH 8:22 Ihudi neta oḳole ḳoila, “He ḳene ḳoilo, ami zeno zairam, tumra hino aitae fartae nae? He kita nize nize morizito ni?”
JOH 8:23 Isae ḳoila, “Ami aisi ufre taki, ar tumra tole taki. Tumra i zogotor, oile ami to i zogotor nae.
JOH 8:24 Erlagi ami koiram, tumra nizor gunar maze-u morbae. Tumra zudi ekin na ḳoro, ami-u hein, te gunagar halote-u morbae.”
JOH 8:25 Ikan hunia neta oḳole tanre ḳoila, “Tumi ke?” Tain zuaf dila, “Foyla taki ami zela ḳoiram, ami-u hein.
JOH 8:26 Tumrar befare matar ar bisar ḳorar boutta ase. Huno, zein amare faṭaisoin tan maze to misa kunta nai. Ami tan ges taki zeta huni, ota-u i duniare zanai.”
JOH 8:27 Isae zen tan gaibi bafor ḳota ḳoira, tara ita buzla na.
JOH 8:28 Erdae Isae ḳoila, “Tumra zebla ami bin-Adomre ufre tulbae, ou shomoy buzbae ami-u hein. Ar eoḳan buzbae, ami nize nize kunta ḳori na, amar gaibi bafe amare ze talim disoin, ou talim-u ami batai.
JOH 8:29 Zein amare faṭaisoin, tain nize amar loge asoin. Tain amar log saṛsoin na, ami to hamesha ou ḳam-u ḳori, ze ḳam ḳorle tain kushi oin.”
JOH 8:30 Isar i boyan hunia bout manshe tan ufre iman anla.
JOH 8:31 Erar maze zeta Ihudi oḳole tan ufre iman anchila, tain erare ḳoila, “Tumra zudi amar ḳotamoto solo, te tumra amar hasaror ummot.
JOH 8:32 Tumra hok sinbae ar ou hoke-u tumrare azad ḳorba.”
JOH 8:33 Ikan hunia tara ḳoila, “Amra to Hozrot Ibrahimor bongshor manush, amra kunu shomoy-o ḳeuror gulam aslam na. Te tumi kila ḳoirae, amrare azad ḳora oibo?”
JOH 8:34 Hozrot Isae ḳoila, “Ami tumrare hok kota ḳoiram, zera gunar maze zindegi kaṭae, tara gunar gulam.
JOH 8:35 Kunu gulam siroḳal tar munibor baṛit taḳe na, oile fut to siroḳal taḳe.
JOH 8:36 Erlagi fute zudi tumrare azad ḳoroin, te tumra hasaror azad oibae.
JOH 8:37 Ami zani, tumra Ibrahim nobir bongshor manush, tebou amare marilitae sairae, ḳaron amar nosiot tumrar bitre hamae na.
JOH 8:38 Ami amar gaibi bafor gese zeta deḳsi ota ḳoiram, ar tumra nizor bafor ges taki zeta hikso ota-u ḳorrae.”
JOH 8:39 Ou shomoy tara Isare ḳoila, “Huno, Hozrot Ibrahim-u amrar baf.” Tain ḳoila, “Tumra zudi Ibrahim nobir aolad oitae, te Ibrahimor laḳan ḳam ḳorlae one.
JOH 8:40 Ami Allar ges taki ze hok kalam faisi, ota-u tumrare ḳoiram. Tebou tumra amare marilitae sairae, oile Ibrahime to ila ḳorsoin na.
JOH 8:41 Tumrar nizor bafe zeta ḳore, tumra-o ota ḳorrae.” Ou tara Isare ḳoila, “Amra to funga fua nae. Amrar eḳzon-u baf asoin, ein oila Alla.”
JOH 8:42 Isae tarare ḳoila, “Ashole-u Alla zudi tumrar gaibi baf oita, te amar bae tumrar maya taḳlo one. Ḳaron ami Allar ges taki aisi ar oḳon tumrar maze asi. Ami nize aisi na, tain-u amare faṭaisoin.
JOH 8:43 Tumra amar ḳota buzrae na, ḳaron tumra amar ḳota shoijjo ḳortae faro na.
JOH 8:44 Iblis-u tumrar baf ar tumra tar aolad, erdae tumra tar ḳaish fura ḳortae sairae. Iblis to foyla taki-u kuni. He kunudin hokor maze boshot ḳorse na, ḳaron tar maze kunu hok nai. He zebla misa mate, ou shomoy he niz taki-u mate. Ḳaron he beiman, ar hoḳol beimani tar maz taki-u foyda oise.
JOH 8:45 Ami hok mat matiar erlagi tumra amare ekin ḳorrae na.
JOH 8:46 Tumrar maze ḳeu amare gunagar forman ḳorto farbo ni? Ami zudi hok mat mati, te amare ekin ḳorrae na ḳene?
JOH 8:47 Ze manush Allar bonda, he Allar kalam hune. Tumra Allar nae gotike Allar kalam huno na.”
JOH 8:48 Ou shomoy tara Isare ḳoila, “Amra to ṭik kota ḳoisi, tui Shomoria zator manush, tore bute dorse.”
JOH 8:49 Tain ḳoila, “Na, amare bute dorse na. Ami amar bafre ijjot ḳori, oile tumra amare beijjot ḳorrae.
JOH 8:50 Ami nize kunu ijjot faitam ḳori kam ḳori na. Oile eḳzon asoin zein amar ijjotor lagi kam ḳoroin, tain-u amar bisarok.
JOH 8:51 Ami tumrare hok kota ḳoiram, ḳeu zudi amar ḳota mane, he kunu shomoy-u morto nae.”
JOH 8:52 Tara tanre ḳoila, “Oḳon amra buzlam, tore ṭik-u bute dorse. Ibrahim nobi ba aro nobi oḳol to mara gesoin, ar tui koire, ḳeu zudi amar ḳota mane, he kunu shomoy-o morto nae.
JOH 8:53 Tui kunu baba Ibrahim taki-o boṛo ni? Tain nize ar baki tamam nobi oḳol-u mara gesoin. Te tui nizore kita mono ḳoros?”
JOH 8:54 Isae zuaf dila, “Ami zudi nizor tarif nize-u ḳori, te er kunu dam nai. Amar gaibi baf, zanre tumrar Alla ḳoia dabi koro, tain-u amare ijjot dan ḳoroin.
JOH 8:55 Tumra tanre sincho na, oile ami tanre sini. Ami zudi koi ami tanre sini na, te to tumrar laḳan ami-o beiman oimu. Ami tanre sini ar tan hukum-ahkam mania soli.
JOH 8:56 Tumrar baf Ibrahim nobie amar din deḳar ashae kushi korsoin. Tain ita deḳsoin ar kushi-o oisoin.”
JOH 8:57 Ihudi neta oḳole tanre ḳoila, “Tumar boyosh to oḳono foinchash bosor oise na, te tumi Ibrahim nobire deḳlae kila?”
JOH 8:58 Isae ḳoila, “Ami tumrare hok kota ḳoiram, Ibrahim nobir zonmor ag taki-u ami asi.”
JOH 8:59 Ikan hunia neta oḳole tanre marar lagi fattor tukaia loila. Oile Hozrot Isae auṛi dia Baytul-Mukaddos taki bar oia gelagi.
JOH 9:1 Hozrot Isa fotedi aṭia zaoar shomoy eḳ anda beṭare faila. He zonmo taki-u anda asil.
JOH 9:2 Ere dekia tan sahabi oḳole tanre zikaila, “Huzur, ou manushgu ḳar gunae anda oia zonmise? Tar nizor gunar lagi, na tar ma-bafor?”
JOH 9:3 Tain zuaf dila, “Tar nizor lagi-o nae, ar tar ma-bafor gunar lagi-o nae. Tar mazdi Allar lila-ḳela zair oar lagi-u ila oise.
JOH 9:4 Huno, zein amare bezisoin, shomoy taḳte taḳte tan ḳam ḳora amrar zorur. Rait gonaia ar, hi shomoy ḳeu ḳam ḳorar ufae nai.
JOH 9:5 Buzrae ni, ami zotodin duniat asi, otodin ami-u duniar nur.”
JOH 9:6 Oḳan ḳoia-u tain maṭit sef falaia feḳ banaila, bade ou feḳ anda beṭar sokut lagaia ḳoila,
JOH 9:7 “Zao ba, Siloar furkit gia doilao.” Siloa mani faṭani. He gia souk doilo ar bala oia ailo.
JOH 9:8 Ikan dekia ari-fori ar zoto manshe tare age bik korat deḳsila era ḳoila, “Ogu kita hou beṭa nae ni, zegie ono boia bik korto?”
JOH 9:9 Ḳeu ḳeu ḳoilo, “Oy, he to ou beṭa-u.” Ar ḳeu ḳeu ḳoilo, “Deḳte zudio tar laḳan, oile he nae.” Teu he nize ḳoilo, “Ji oy, ami-u hou zon.”
JOH 9:10 Ou tara ere zikaila, “Ḳo sain, tumar souk bala oilo kila?”
JOH 9:11 He ḳoilo, “Isa namor ou manshe feḳ banaia amar sokut lagaia ḳoila, zao ba, Siloar fukrir maze doia aogi. Ami gia doilam ar bala oigelam.”
JOH 9:12 Tara ḳoila, “Ou manushgu kuai?” He ḳoilo, “Ami zani na.”
JOH 9:13 Ou ze beṭa anda asil, manshe tare doria Forishi oḳlor gese loia gela.
JOH 9:14 Ḳaron Isae zedin feḳ lagaia tar souk bala ḳorsla, i din asil tarar Zummabar.
JOH 9:15 Erlagi Forishi oḳole hirbar tare zikaila, “Tumar souk bala oilo kila?” He ḳoilo, “Hou zone amar sokut feḳ lagaia dila, ar ami gia doia-u souke deḳlam.”
JOH 9:16 Ou shomoy ḳoyzon Forishie ḳoila, “I manushgu to Allar ges taki aise na. Deḳrae ni, he Zummabar-o mane na.” Oile ḳeu ḳeu ḳoila, “Gunagar manshe ilaḳan keramoti kam ḳorbo kila?” Ota loia tarar maze doladoli lagigelo.
JOH 9:17 Tara hirbar ou manshore zikaila, “Ṭik ase, he to tumar souk bala ḳorse, erlagi tumi tar befare kita ḳo.” He ḳoilo, “Tain eḳzon nobi.”
JOH 9:18 Oile ou beṭa zen age anda asil ar oḳon souke deḳer, Ihudi neta oḳole tar ma-bafre na zikani forzonto ita ekin ḳorla na.
JOH 9:19 Tara tar ma-bafre zikaila, “Deḳo sain, ogu tumrar hou anda fua ni, zegure tumra zonmor anda ḳo? Te he oḳon souke deḳer kila?”
JOH 9:20 Tar ma-bafe ḳoila, “Ji oy, he amrar-u fua ar he anda oia zonmisil.
JOH 9:21 Oile oḳon kila souke deḳer, ikan amra zani na. Ar ḳe tar souk bala ḳorsoin, ta-o ḳoitam fari na. He to boṛo oigese, tare-u zikaukka, tar befar he ḳouk.”
JOH 9:22 Tar ma-bafe Ihudi neta oḳlor ḍore ola matila, ḳaron Ihudi neta oḳole ag taki-u ain ḳorsila, ḳeu zudi Isare al-Mosi koia kobul ḳore, te tare shomaz taki bar ḳori deoa oibo.
JOH 9:23 Erlagi-u tar ma-bafe ḳoila, “He boṛo oigese, tare-u zikaukka.”
JOH 9:24 Neta oḳole dusrabar tare ania zikaila, “Tumi Allar name hasa mat mato. Amra to zani i manushṭa gunagar.”
JOH 9:25 He zuaf dilo, “Tain gunagar na kita, ikan ami zani na. Ḳali oḳan zani, ami age anda aslam, oḳon souke dekiar.”
JOH 9:26 Neta oḳole ḳoila, “Ḳo sain, he tumare kita ḳorse? Tumar souk kila bala ḳorlo?”
JOH 9:27 Ou beṭae zuaf dilo, “Ami to age-u ḳoilam, oile afnara hunla na. Te oḳon ḳene ar hunta saira? Afnara-o tan ummot oita saira ni?”
JOH 9:28 Ikan hunia tara beṭare kub gala-gali koria ḳoila, “Hoi, tui gia ogur ummot oisot, oile amra oilam Musa nobir ummot.
JOH 9:29 Amra zani, Allae nize Musa nobir loge batchit ḳorsoin, oile i beṭa kuai taki aise, ita to amra zani-u na.”
JOH 9:30 Teu beṭae ḳoilo, “Ki taijjubi! Afnara zanoin na tain kuai taki aisoin, otoso tain-u amar souk bala ḳorla.
JOH 9:31 Amra zani, naforman oḳlor ḳota Allae hunoin na. Oile ḳeu zudi Allar ashik bonia tan morzi zugaia sole, te Allae tar foriad hunoin.
JOH 9:32 Ar aiz forzonto ila huna gese na zen, zonmo taki anda kunu manshor souk keu bala ḳorse.
JOH 9:33 Tain zudi Allar ges taki na aita, te ila ḳorta farla na one.”
JOH 9:34 Neta oḳole tare ḳoila, “Tor zonom oise naformanir maze, ar tui amrare talim dire ni?” Oḳan ḳoia tara tare shomaz taki ekgori korla.
JOH 9:35 Isae hunla, neta oḳole ou beṭare ekgori korsoin. Tain ou beṭare tukaia bar ḳoria ḳoila, “Oba, tumi kita bin-Adomor ufre iman ancho ni?”
JOH 9:36 He ḳoilo, “Huzur, tain ḳe? Amare ḳoukka, ami zate tan ufre iman antam fari.”
JOH 9:37 Isae tare ḳoila, “Tumi tanre deḳso, ar tain-u tumar loge matira.”
JOH 9:38 Ou beṭae ḳoilo, “Huzur, ami iman anlam.” Oḳan ḳoia-u he Hozrot Isare soizda ḳorlo.
JOH 9:39 Isae ḳoila, “Huno, ami aisi i duniat bisar ḳorar lagi, zera anda asoin tara zanu bala oin, ar bala oḳol anda oin.”
JOH 9:40 Ou shomoy ḳoyzon Forishi-o Isar ḳandat asla. Ikan hunia tara ḳoila, “Te afne kita ḳoita saira, amra anda ni?”
JOH 9:41 Isae ḳoila, “Tumra zudi anda oitae, te tumra kunu dushi oilae na one. Oile tumra-u ḳoirae anda nae, erlagi-u tumrar maze dush ase.”
JOH 10:1 Hozrot Isae aro ḳoila, “Ami tumrare nichchit hasa ḳota ḳoiram, ze manush meṛar gual-goror duaredi na hamaia, oinno fote hamae, he to sur-ḍaḳait.
JOH 10:2 Oile ze zon duaredi hamae, he-u meṛar raḳal.
JOH 10:3 Gual-goror sokidare raḳalre duar kulia dey. Meṛainte-o raḳalor ḍaḳ hunoin ar raḳale tarar nam dori ḍaki ḍaki bar ḳori ney.
JOH 10:4 Gor taki nizor meṛaintore bar ḳoria harle, raḳal tarar age age zae, ar tar meṛain zae ḳore ḳore, ḳaron tar golar aoaz tara sine.
JOH 10:5 Tara kunubala osina kunu raḳalor loge zaito nae borong tar ges taki bagibo, ḳaron osina kunu raḳalor golar aoaz tara sine na.”
JOH 10:6 Isae Forishi oḳolre hikanir lagi ou udahoron dila, oile tain kita buzaira, tara shomzita farla na.
JOH 10:7 Erlagi tain hirbar ḳoila, “Ami tumrare nichchit hok kota ḳoiram, meṛar falor lagi ami-u duar.
JOH 10:8 Amar age raḳalor bab doria zeta aisla, iguin to sur-ḍaḳait asla, meṛainte-o tarar ḳota hunchoin na.
JOH 10:9 Ami-u duar. Amar mazdi ze hamaibo, he tar zan basaibo. He bitre aoa-zaoa ḳorbo ar aṭia-soria ḳaibo.
JOH 10:10 Sure to ḳali suri, kun-ḳarafi ar binash ḳorar niote-u ae. Oile ami aisi zate tara zindegi fae, ar ou zindegi furafur bug kore.
JOH 10:11 “Ami-u asol raḳal. Asol raḳale tar meṛar lagi nizor zan bilai dey.
JOH 10:12 Ḳali betonor lagi ze zone raḳali kore, he ḳaṭi raḳal nae ar i meṛain-o tar nizor nae. Bag aoat deḳle-u he meṛain falaia nizor zan basae.
JOH 10:13 Ḳaron he ḳali betonor ashae raḳali kore, meṛaintor ḳota sinta-o ḳore na. Bage aia meṛain doria neygi, teu tara fal bangia sitri zae.
JOH 10:14 Te ami-u bala raḳal. Amar gaibi bafe amare sinoin, ar ami-o amar bafre sini. Ṭik oula, ami amar meṛaintore-o sini, ar amar meṛainte-o amare sinoin. Ami amar meṛa falor lagi nizor zan dilairam.
JOH 10:16 Amar to aro meṛain asoin, zeta i gual-goro nai, tarare-o ami ante oibo. Tara nichchoy amar ḍaḳ hunba, teu ḳali eḳzon raḳal ar eḳṭa fal oibo.
JOH 10:17 “Bafe amare maya ḳoroin, ḳaron ami amar zan bilaimu zate hirbar firot nei.
JOH 10:18 Amar zan ḳeu amar ges taki kaṛia nito nae, oile ami nize-u zan bilaimu. Mono rakio, zan deoar ḳemota zela amar ase, oula firot neoar ḳemota-o ase. I dayitto ami amar gaibi bafor ges taki faisi.”
JOH 10:19 Hozrot Isar ita mat-ḳota hunia Ihudi neta oḳlor maze hirbar doladoli lagigelo.
JOH 10:20 Tarar mazor boute ḳoilo, “Ogure bute dorse, he fagol, tumra ogur mat hunrae ḳene?”
JOH 10:21 Ar boute ḳoilo, “Bute dora manshor mat to ila nae. Bute kunu andar souk bala ḳore ni?”
JOH 10:22 Bade Zeruzalem Kaba goror doḳol faoar idor shomoy aia azilo. Ou shomoy asil shitor din.
JOH 10:23 Hozrot Isa Baytul-Mukaddosor Bashsha Sulaimanor barindat aṭa-uṭi korra.
JOH 10:24 Ermaze Ihudi neta oḳol Isar sairobae dola oia ḳoila, “Ar ḳotodin tumi amrare loṭḳaia raḳtae? Tumi zudi hasaror al-Mosi o, te forishkar ḳori amrare ḳo.”
JOH 10:25 Teu Isae zuaf dila, “Ami to ḳoilam, oile afnara ekin ḳorra na, ar amar gaibi bafor name ami ze ḳam ḳori, itae-o amar befare shakki der,
JOH 10:26 ta-o afnara ekin ḳorra na, ḳaron afnara amar falor meṛa nae.
JOH 10:27 Amar meṛainte amar ḍaḳ hunoin. Ami to tarare sini ar tara-o amar ḳore ḳore roin.
JOH 10:28 Ami tarare aḳeri zindegi dan ḳori, tara kunu shomoy binash oita nae. Ḳeu amar ges tone tarare ḳaṛia nito nae.
JOH 10:29 Amar ze gaibi bafe tarare amar ato disoin, tain hoḳol taki mohan. Tan at taki keu kunta ḳaṛia nito fare na.
JOH 10:30 Ami ar baba, amra eḳ.”
JOH 10:31 Teu Ihudi neta oḳole hirbar fattor loila tanre marar lagi.
JOH 10:32 Isae tarare ḳoila, “Gaibi bafor hukum mafik bout bala bala ḳam ami afnaintore deḳaisi. Itar maze kun ḳamor lagi afnara amare fattor marta saira?”
JOH 10:33 Tara ḳoila, “Bala kunu ḳamor lagi amra tore fattor mariar na, tui to shiriki korre, erlagi-u fattor marmu. Manush oia tui nizore Alla hishabe dabi korre.”
JOH 10:34 Tain ḳoila, “Afnarar shorioto leḳa ase na ni, ‘Ami koilam, tumra-u elahi’?
JOH 10:35 Te Allar kalam zerar gese nazil oisil, erare to tain nize-u Allar laḳan ḳoia ḍakisoin. Ar Pak Kitabor ḳota to bad deoa zae na.
JOH 10:36 Te gaibi bafe zanre nizor lagi basia fosond ḳorla ar duniat faṭaila, ou ami zebla ḳoilam, ami Ibnulla, te afnara kila ḳoira, tui shiriki korre?
JOH 10:37 Ami zudi amar gaibi bafor ḳam na ḳori, te afnara amar ufre iman anba na.
JOH 10:38 Oile ami zudi amar bafor hoḳol ḳam ḳoria taki, te amar ufre iman na anle-o ita ekin ḳoroukka. Teu afnara zanba, gaibi baf amar maze-u asoin, ar ami-o tan maze asi.”
JOH 10:39 Ou shomoy hirbar tara Isare dorar sesṭa ḳorla, oile tain in tone gaib oigela.
JOH 10:40 Bade tain hirbar Zordan gangor hofaro gia roila. Age ou zagat Hozrot Ehiae manshore toubar gusol dita.
JOH 10:41 Hono bout manush tan gese ailo ar mata-mati korlo, “Ehia nobie to kunu keramoti nishana deḳaisoin na, oile tain Hozrot Isar befare zotota ḳoisla, ita furafur hasa.”
JOH 10:42 Oḳan buzia honor bout manshe Hozrot Isar ufre iman anla.
JOH 11:1 Lasar name eḳzon manush bemar asla. Tan baṛi Bayt-Ania gaut, Moriom ar Marta namor tan dui boin-o ou gaut roita.
JOH 11:2 Ḳoydin bade ou Moriome-u Isar fao-o kushboy-ala ator maḳaia, nizor matar suldi fao fusai diba. Ou Moriomor bai oila bemari Lasar.
JOH 11:3 Erlagi tan boinainte oḳan ḳoia Hozrot Isar gese ḳobor faṭaila, “Huzur, afnar mayar manush kub bemar.”
JOH 11:4 Ḳobor faia Isae ḳoila, “I bemar to tar moutor lagi oise na, borong Allar mohima zairor lagi-u oise, zate er mazdi ami Ibnullar mohima-o zair oy.”
JOH 11:5 Hozrot Isae Bibi Marta, tan boin ar Lasarre kub maya ḳorta.
JOH 11:6 Lasaror bemaror ḳota hunar bade-o Isa ze zagat asla, hono aro duidin roila.
JOH 11:7 Bade tan sahabi oḳolre ḳoila, “Ao, amra hirbar Ehudia zilat zai.”
JOH 11:8 Sahabi oḳole ḳoila, “Huzur, ou ḳoydin age honor manshe afnare fattor marta saila, oḳon afne hirbar hono zaita ni?”
JOH 11:9 Tain ḳoila, “Dinor bela to baro gonṭa ase, ḳeu zudi dinor bela sola-fira ḳore, he usṭa ḳae na, ḳaron he ou duniar for deḳe.
JOH 11:10 Ar ḳeu zudi raitor bela sola-fira ḳore, he usṭa ḳae, ḳaron tar maze kunu for nai.”
JOH 11:11 Oḳan ḳoia hari tan sahabi oḳolre ḳoila, “Huno, amrar dust Lasar gumai gesegi, ami tare hozag korat zaiar.”
JOH 11:12 Ikan hunia sahabi oḳole ḳoila, “Huzur, he zudi gumo taḳe, te to bala oizibo.”
JOH 11:13 Isae Lasaror moutor ḳota ḳoisla, oile tara mono ḳorla, tain emne gumor ḳota ḳoisoin.
JOH 11:14 Teu Isae forishkar ḳori koila, “Lasar mara gese.
JOH 11:15 Oile ami tumrar ḳota mono ḳoria kushi oisi, ami hino aslam na, zate tumra ekin ḳortae faro. Oḳon ao, amra Lasaror gese zai.”
JOH 11:16 Teu tan sahabi Tumase logor sahabi oḳolre ḳoila, “Ao na, amra-o zai, zate tan loge mortam fari.” Ou Tumasre Zomoz ḳoia ḍaḳa oy.
JOH 11:17 Hono gia harle Hozrot Isae hunla, tain zaoar sair din age-u Lasarre dafon ḳora oigese.
JOH 11:18 Zeruzalem ṭaun taki ou Bayt-Ania gau onuman dui mail duroi asil.
JOH 11:19 Lasaror moutor bade tan boin Bibi Marta ar Moriomre buz deoar lagi Ihudi shomazor bout manush aila.
JOH 11:20 Ermaze Hozrot Isae toshrif anra hunia Bibi Marta tan loge deḳa ḳorat gela, oile Moriom goro boi roila.
JOH 11:21 Bibi Martae Isare ḳoila, “Huzur, afne zudi ono roita, te amar baigu morlo na one.
JOH 11:22 Oile erbade-o ami zani, afne Allar gese zeta saiba, tain afnare ota diba.”
JOH 11:23 Isae ḳoila, “Huno, tumar bai hirbar zinda oia uṭbo.”
JOH 11:24 Teu Martae ḳoila, “Ji oy, ami zani kiamotor din zebla murda oḳol zinda oiba, ou shomoy he-o zinda oia uṭbo.”
JOH 11:25 Isae Martare ḳoila, “Ami-u to kiamot ar zindegi. Ze zone amar ufre iman ane he morle-o zinda oibo.
JOH 11:26 Ar ze zone asol zinda oia amar ufre iman ane, he kunudin-o morto nae. Tumi ikan ekin ḳoro ni?”
JOH 11:27 Martae ḳoila, “Ji oy huzur, ami iman anchi, Allar oada ḳora ze zone duniat toshrif anar ḳota, afne-u hou al-Mosi Ibnulla, Allar ḳas mayar zon.”
JOH 11:28 Oḳan ḳoia Martae gia tan boin Moriomre sufte ḍakia nia ḳoila, “Huno, huzur ono asoin, tain tumare ḍakira.”
JOH 11:29 Teu Moriom zoldi kori Isar ḳandat gela.
JOH 11:30 Isa ou shomoy-o gaur bitre hamaisoin na, Martae tan loge zeno deḳa ḳorsla, tain hono-u ubai roisla.
JOH 11:31 Ar goror bitre zeta Ihudi oḳole Moriomre buz deoat asla, Moriome aḳta-u bare zaoat dekia tara tan ḳore ḳore gela. Tara mono ḳorlo, Moriom ḳoyboror gese ḳanda-ḳaṭi korat zaira.
JOH 11:32 Isa ze zagat asla, Moriom-o hono gela ar Isare dekia tan fao-o foṛia ḳoila, “Huzur, afne zudi ono taḳta, te amar baigu morlo na one.”
JOH 11:33 Moriom ar tan logor Ihudi oḳlor ḳandon-ahazari dekia Hozrot Isar dilor ruhu gorom oigelo, tain ḳator oigela.
JOH 11:34 Tain erare zikaila, “Lasarre kuai dafon ḳorso?” Tara ḳoila, “Huzur aukka, deki zaukka.”
JOH 11:35 Ou shomoy Isae ḳandi dila.
JOH 11:36 Tan ḳandon dekia honor era ḳoila, “Deḳrae ni, tain Lasarre ḳoto maya ḳorta!”
JOH 11:37 Oile kunu kunu zone ḳoila, “Zein andar souk bala ḳorsoin, tain ila kunta ḳorta farla one na ni, zate Lasargu na more?”
JOH 11:38 Ita hunia Hozrot Isar dilor ruhu hirbar gorom oigelo, tain Lasaror ḳoyboror daro gela. I koybor asil guhar laḳan ek gato ar ḳoyboror muko eḳ fattor deoa asil.
JOH 11:39 Tain manshore ḳoila, “Fattorṭa horao.” Lasaror boin Martae ḳoila, “Huzur, oḳon to lash fosia gondo bar oigese, tain sair din age mara gesoin.”
JOH 11:40 Isae enre ḳoila, “Ami to tumare ḳoisi, tumi zudi ekin ḳoro, te Allar kudroti mohima deḳbae.”
JOH 11:41 Teu manshe ḳoyboror mukor fattorṭa horaila. Isae asmanor bae saia dua ḳorla, “O gaibi baba, tumi amar ḳota huncho, erlagi ami tumar shukria adae ḳori.
JOH 11:42 Ami zani, tumi hamesha amar ḳota huno. Oile amar sairobae zeta manush asoin, tara zate ekin ḳoroin, tumi amare faṭaiso, erdae-u oḳan ḳoilam.”
JOH 11:43 Oḳan ḳoia tain zure ḍaḳ dia ḳoila, “Lasar, bar oia ao.”
JOH 11:44 Teu murda Lasar ḳoybor taki bar oia aila. Tan at-fao ḳafondi fesail asil, ar muk asil rumal dia banda. Isae manshore ḳoila, “Tar band kulo ar tare zaite deo.”
JOH 11:45 Bibi Moriomor gese zeta Ihudi manush aisla, Hozrot Isar ou keramoti kam dekia erar mazor boute tan ufre iman anla.
JOH 11:46 Oile ḳeu ḳeu Forishi oḳlor gese gia Isar ou ḳamor ḳota zanailo.
JOH 11:47 Ita hunia boṛo imam oḳole ar Forishi dolor manshe deshor fotua komiṭire loia ekḳano boila, boia ḳoila, “Amra oḳon kita ḳortam? I beṭae to bout keramoti kam deḳar.
JOH 11:48 Amra zudi tare emne solte dei, te hoḳol manshe tar ufre iman anbo, ar ita hunia Ruman shorḳaror manshe amrar ṭikana ar amrar zatire-o binash ḳorba.”
JOH 11:49 Ou mozlisor maze ou bosoror fordan imam, Kayafa namor eḳzon asla. Tain erare ḳoila, “Tumra to kunta-u zano na.
JOH 11:50 Buzo na ni, asta zati binash oar saite, hoḳlor bodla eḳzonor moron aro bala.”
JOH 11:51 Imam Kayafae ashole nizor mon taki ou ḳota ḳoisoin na, tain ou bosoror fordan imam oae gaibi buli tan muk taki bar oise ze, Ihudi zatire basanir lagi Isar moron oibo.
JOH 11:52 Ḳali Ihudi zatir lagi nae, Allar zoto bondain sairobae sitria asoin, tarare dola ḳoria ekḳano ḳorar lagi-o tain zan bilai diba.
JOH 11:53 Hou din taki tara Isare marar faetara ḳorat lagla.
JOH 11:54 Erlagi Isae tarar maze kula-mela sola-fira bad dilaila, ar ou zaga saṛia morubumir ḳandat Afraim namor ek gaut gia tan sahabi oḳolre loia roila.
JOH 11:55 Ou shomoy Ihudi oḳlor Azadi Id gonai aisil. Idor age nizore fak-saf ḳorar lagi bout manush gau taki Zeruzalem ṭauno gela.
JOH 11:56 Hino gia tara Hozrot Isare tukaila. Tara Baytul-Mukaddoso ubaia eḳe-oinne zikaila, “Kita mono ḳoroin, tain i ido aita nae ni?”
JOH 11:57 Boṛo imam ar Forishi oḳole hukum disla, ḳeu zudi Isar kuz fae, te tarare zananir lagi, zate tara Isare dorta faroin.
JOH 12:1 Azadi Idor soydin age, Hozrot Isa hou Lasaror gau Bayt-Aniat aila, ze Lasarre tain mora taki zinda ḳorsla.
JOH 12:2 Ino tara Hozrot Isar lagi kanir mezbani zuit ḳorla. Isar loge ḳaoat zera boisil, erar loge Lasar-o asla ar Bibi Martae ḳadimdari korla.
JOH 12:3 Ou shomoy Lasaror boin Moriome ada sher kub dami kaṭi ator loia aila, aia ou ator Isar fao-o ḍalia nizor matar suldi fao fusia dila. Atoror kushboye asta gor borigelo.
JOH 12:4 Ihuda Iskariat name Isar eḳ sahabi, zein tanre dushmonor ato dorai diba, ein ḳoila,
JOH 12:5 “Ish, i ator fuṭin besile to tin-sho dinar faia gorib oḳolre bilai deoa gelo one.”
JOH 12:6 Ashole Ihudae gorib oḳlor ḳota sinta ḳoria ikan ḳoise na. He asil sur. Ṭeḳar toli tar gese taḳto, ar zoma ṭeḳa taki he suri korto, erlagi ola ḳoise.
JOH 12:7 Isae ḳoila, “Tumra i beṭigur mono duk dio na. Amar dafon-ḳafonor lagi tain i fuṭain toisla.
JOH 12:8 Gorib oḳol to hamesha-u tumrar maze asoin, oile amare hamesha faitae nae.”
JOH 12:9 Hozrot Isa Bayt-Aniat aisoin hunia, Ihudi zatir bout manush ono aila. Tara ḳali Isar lagi nae, hou ze Lasarre Isae mora taki zinda ḳorsla, tare-o deḳat aila.
JOH 12:10 Ou shomoy boṛo imam oḳole niot ḳorla Lasarre-o marilita.
JOH 12:11 Ḳaron Lasaror lagi bout Ihudi manshe neta oḳlor log saṛia, Isar ufre iman anchila.
JOH 12:12 Idor niote dole dole zoto manush aisoin, tara bador din hunla, Hozrot Isae Zeruzalemo toshrif anra.
JOH 12:13 Ou tara ḳezuror ḳesma ḍal loia tanre aguaia anat gela ar misil dia ḳoila, “Marhaba! Mabudor name zein toshrif anra, tan tarif ouk, tain-u Israilor bashsha!”
JOH 12:14 Allar kalamor ayat mafik Hozrot Isae eḳṭa gada dekia tar ufre soar oila. Kitabo leḳa ase,
JOH 12:15 “O Sion-ḳoina Zeruzalem, ḍoraio na. Saia deḳo, gadar baichcha soṛia tumar bashsha aira.”
JOH 12:16 Sahabi oḳole foyla itar kunu mani buzla na. Bade Hozrot Isar kudroti mohima zair oia harle, Pak Kitabor ḳota tarar mono oilo, ou ayato tan befare-u leḳa asil, ar manshe tan lagi-u otota ḳorse.
JOH 12:17 Ḳoybor taki Lasarre ḍakia zinda ḳori tular shomoy zeta manush Isar loge asla, tara-o ou befare hamesha mat-ḳota matita.
JOH 12:18 Erlagi manshe tan ou keramoti kamor ḳobor hunia tanre aguaia anat gesla.
JOH 12:19 Ita dekia Forishi oḳole eḳe-oinne ḳoilo, “Amrar to kunu lab or na. Deḳrae ni, asta dunia-u tar ḳore gesegi.”
JOH 12:20 Azadi Ido zera ebadot ḳorat aisla, tarar maze ḳoyzon Iunani manush-o asla.
JOH 12:21 Tara Galil zilar Bayt-Soyda gaur Filifre aia minot ḳorla, “Sab, amra huzur Isare deḳtam sai.”
JOH 12:22 Filife ikan Andriasre ḳoila. Bade Andrias ar Filife gia Isare zanaila.
JOH 12:23 Isae tarare ḳoila, “Ami bin-Adomor mohima zair oar shomoy aichche.
JOH 12:24 Ami tumrare hasau ḳoiram, danor bis maṭit foṛia zudi na more, te eḳṭa-u taḳe, ar maṭit morle bout foshol fole.
JOH 12:25 Ola ze zone nizor zanre beshi maya ḳore, he tar asol zindegi kuailae, oile ze zone i duniat nizor zanre tuchcho mono ḳore, he tar asol zindegi, mani aḳerator lagi zan basae.
JOH 12:26 Ḳeu zudi amar kezmot ḳorto sae, te amar fote solouk. Teu ami zeḳano roimu amar kezmotḳari-o ono roibo. Ze zone amar kezmot ḳore, amar gaibi bafe tare ijjot diba.
JOH 12:27 “Amar mon oḳon fereshan oigese. Te ami oḳan ḳoitam ni, baba, ze shomoy aia azise, ou shomoyor at taki amare basao? Oile otar lagi-u to ami ou shomoy forzonto aisi.
JOH 12:28 Baba, tumi tumar mohima zair ḳoro.” Ou shomoy asman taki gaibi aoaz ailo, “Ami amar mohima zair ḳorsi ar hirbar zair ḳormu.”
JOH 12:29 I aoaz hunia hino zoto manush asla, tara ḳoila, “Ita to megor ḍaḳ.” Ḳeu ḳeu ḳoilo, “Kunu firistae tan loge batchit ḳorsoin.”
JOH 12:30 Ikan hunia Isae ḳoila, “I aoaz to amar lagi aise na, afnarar lagi-u aise.
JOH 12:31 I zogotor manshor bisaror shomoy aichche, duniar munib Iblisor at taki oḳon ḳemota ḳaṛia neoa oibo.
JOH 12:32 Amare zebla zomin taki ufre tula oibo, ou shomoy ami hoḳolre amar gese ṭania tulmu.”
JOH 12:33 Tan kilaḳan mout oibo, oḳan buzanir lagi tain ita ḳoila.
JOH 12:34 Ou shomoy manshe Isare ḳoila, “Amra Pak Kitab taki hunchi al-Mosi siroḳal roiba. Te afne kila ḳoira, bin-Adomre usat tula oibo? Taile i bin-Adom ḳe?”
JOH 12:35 Tain zuaf dila, “Ar kisu shomoy nur afnarar loge ase, nur taḳte taḳte-u aṭa doroukka, zela andaire aia afnaintore na bere. Ze zon andair fote aṭe, he zane na he kuai zar.
JOH 12:36 Nur afnarar loge taḳte taḳte-u nuror ufre iman anoukka, zate afnara-o ou nuror manush oita faroin.” Erbade Isa in tone horia gia, erar souk taki nizore lukailila.
JOH 12:37 Hozrot Isae manshor samne oto beshi keramoti nishana deḳanir bade-o tara tan ufre iman anlo na.
JOH 12:38 Ita hokkolta goṭisil zate agor zomanar nobi Ishayar ḳota fura oy, tain bataisla, Mabud go, amrar tobligor ufre ḳe ekin ḳorse? Tumar kudroti at ḳar gese-u ba zair oise?
JOH 12:39 Erlagi-u to ita manshe iman anche na, ḳaron Ishaya nobie eoḳan ḳoisla,
JOH 12:40 Allae tarar souk anda banailisoin, tarar dil fashan banailisoin, zate soukdi na deḳe ar dildi na buze. Arnae kizanu tara touba ḳorilain, Allar bae firizain, ar ami tarare shifa ḳorilai.
JOH 12:41 Ishaya nobie Isar mohima deḳsla gotike, tan befare ou ḳota ḳoisla.
JOH 12:42 Tebou Ihudi neta oḳlor maz taki boute tan ufre iman anla, oile Forishi oḳole tarare shomaz taki bar ḳori dilaibo, oḳan ḍoraia tara shikar ḳorla na.
JOH 12:43 Tara Allar tarif taki manshor tarif faite beshi fosond ḳorta.
JOH 12:44 Bade Isae zure zure ḳoila, “Ze zone amar ufre iman ane, he ḳali amar ufre nae, zein amare faṭaisoin tan ufre-o iman ane.
JOH 12:45 Ze zone amare deḳe, he ashole tanre-u deḳe, zein amare faṭaisoin.
JOH 12:46 Ami i duniat nur hishabe aisi, zate amar ufre ze iman ane, he ar andarit na roy.
JOH 12:47 Ḳeu zudi amar ḳota hunia, ou mafik amol na ḳore, te ami nize tar bisar ḳori na, ḳaron ami manshore dushi shaibosto ḳorat aisi na, borong manshore toranit aisi.
JOH 12:48 Ze zone amare mane na ar amar ḳota hune na, tar bisaror lagi to eḳzon asoin. Ami tare ze ḳota ḳoisi, ou ḳotae-u kiamotor din tare dushi shaibosto ḳorbo.
JOH 12:49 Ami to nize taki kunta ḳoisi na, ḳali amar ze gaibi bafe amare bezisoin, tain nize-u hukum disoin, ami kita kita ḳoitam.
JOH 12:50 Ami zani, tan hukum mana-u oilo aḳeri zindegi. Erlagi ami zeta ḳoi, ita amar gaibi bafor hukme-u ḳoi.”
JOH 13:1 Azadi Idor tuṛa agor goṭona. Isae buzilila, tain i dunia saṛia tan gaibi bafor gese zaibar shomoy aichche. Duniat zera tan afon manush asla, tarare tain kub maya ḳorta ar hesh forzonto ola maya ḳoria-u gesoin.
JOH 13:2 Raitkur ḳanit boibar agor ḳota, Hozrot Isare dushmonor ato dorai dibar lagi, Iblise aia Saimon Iskariator fua Ihudar mono ḳaish zagai dilo.
JOH 13:3 Isae zanta, tan gaibi baf Allae tan ato hoḳolta shofi disoin, tain Allar ges taki aisoin ar tan gese-u firia zaira.
JOH 13:4 Erlagi tain ḳaoa taki uṭla ar finnor fainjabi kulia ekkan gamsa ḳomro bandila.
JOH 13:5 Bade tain gamlar maze fani loia sahabi oḳlor fao doai dila, ar ḳomror gamsadi fao fusia deoat lagla.
JOH 13:6 Ou laḳan tain zebla Saimon-Fitoror gese aila, Fitore ḳoila, “Huzur, ita kita ḳoroin, afne amar fao doaia dita ni?”
JOH 13:7 Tain ḳoila, “Ami zeta ḳoriar, oḳon tumi itar mani buztae nae, bade buzbae.”
JOH 13:8 Ou Fitore tanre ḳoila, “Ji na, afne kunumonte-u amar fao doai diba na.” Isae ḳoila, “Ami zudi tumar fao doia na dei, te tumar loge amar kunu ḳatir nai.”
JOH 13:9 Teu Saimon-Fitore ḳoila, “Huzur, te ḳali fao nae, amar mata ar at-o doaia deukka”.
JOH 13:10 Tain ḳoila, “Ze manshe gusol ḳorse, tar fao saṛa ar kunta doar zorur nae, tar to hoḳolta forishkar ase. Tumra-o nichchoy forishkar aso, oile hoḳol nae.”
JOH 13:11 Ashole dushmonor ato ḳe tanre dorai dibo, ikan tain zanta. Erdae tain ḳoila, “Tumra hoḳol forishkar nae.”
JOH 13:12 Sahabi oḳlor fao doaia harle Isae tan fainjabi findia hirbar boila ar tarare ḳoila, “Ami kita ḳorlam, tumra ita buzcho ni?
JOH 13:13 Tumra amare ustad ar malik koia ḍaḳo, ikan ṭik-u, ami-u tumrar ustad ar malik.
JOH 13:14 Ar ami tumrar ustad ar malik oia-o zebla tumrar fao doaia dilam, te tumra-o ola eḳe-oinnor fao doai deoa zorur.
JOH 13:15 Ami ila ḳoria deḳailam, zate ami zela ḳorlam tumra-o ola ḳoro.
JOH 13:16 Ami tumrare hasau ḳoiram, gulam tar munib taki boṛo nae. Ar zare faṭani oise, he tar faṭaora taki boṛo nae.
JOH 13:17 Ita zania zudi amol ḳoro, te tumra doinno.
JOH 13:18 “Ami tumra hoḳlor befare ḳoiram na. Ami zerare fosond ḳorsi tarare to sini. Huno, Allar kalamor ayat to folite oibo, leḳa ase, ‘Amar loge boia zegue ḳaoa-daoa ḳore, hogue amar ufre fao tulche.’
JOH 13:19 Ita goṭar age-u ami tumrare zanai dilam, teu goṭar bade tumra buzbae, ami-u hein.
JOH 13:20 Ami tumrare hasau ḳoiram, ami zare faṭai, tare ze zone kobul ḳore, he ashole amare-u kobul ḳore. Ar ze zone amare kobul ḳore, he tanre-u kobul ḳore, zein amare faṭaisoin.”
JOH 13:21 Oḳan ḳoia harle Hozrot Isar dil fereshan oigelo. Tain kulia ḳoila, “Ami hok kota ḳoiram, tumrar mazor eḳzone-u amare dushmonor ato dorai dibo.”
JOH 13:22 Tain ḳar ḳota ḳoira, sahabi oḳole ikan na buzae eḳe-oinnor bae sai roila.
JOH 13:23 Erar mazor ze sahabire Isae maya ḳorta, ein Isar kulo elain dia boat asla.
JOH 13:24 Saimon-Fitore enre ishara dia ḳoila, tumi zikao, tain ḳar ḳota ḳoira.
JOH 13:25 Teu ou sahabie Isar bae zukia ḳoila, “Huzur, ḳe ou zon?”
JOH 13:26 Isae zuaf dila, “Ou ruṭir ṭukra boulo bizaia zare dimu, he-u ou zon.” Ar ou ruṭi tain Saimon Iskariator fua Ihudare dila.
JOH 13:27 Ruṭir ṭukra loar loge loge-u Iblis Ihudar bitre hamailo. Isae tare ḳoila, “Zeta ḳortae sao, zoldi korilao.”
JOH 13:28 Isar loge zara ḳaoat boisla, tara ḳeu buzla na, tain Ihudare ḳene ikan ḳoisoin.
JOH 13:29 Ḳeu ḳeu mono ḳorlo, idor bazar ḳorar lagi Isae Ihudare oḳan ḳoisoin ba gorib oḳolre kunta deoar ḳota ḳoisoin, ḳaron ṭeḳar toli to Ihudar gese-u taḳto.
JOH 13:30 Ruṭir ṭukra loar loge loge Ihuda bar oia gelogi. I shomoy rait asil.
JOH 13:31 Ihuda bare gia harle Isae ḳoila, “Bin-Adomor mohima zair ḳorar shomoy aichche, tan mazdi Allar mohima zair oibo.
JOH 13:32 Ar Allar mohima zebla tan mazdi zair oibo, ou shomoy Allae-o nizor maze bin-Adomor mohima zair ḳorba, ita tain kub zoldi-u ḳorba.
JOH 13:33 O aolad oḳol, ami ar beshi din tumrar gese roitam nae. Te Ihudi neta oḳolre age zela ḳoislam, tumra amare tallash ḳorbae, oile ami zeḳano zaimu tumra hino zaitae fartae nae, oḳon ou ḳota tumrare-o ḳoiram.
JOH 13:34 Ami tumrare ekkan noya hukum diram, tumra eḳe-oinnore maya ḳorio. Ami zela tumrare maya ḳorsi, tumra-o ola eḳe-oinnore maya ḳorio.
JOH 13:35 Tumra zudi eḳe-oinnore maya ḳoro, te hoḳole buzbo tumra amar ummot.”
JOH 13:36 Saimon-Fitore Isare ḳoila, “Huzur, afne kuai zaira?” Tain ḳoila, “Ami zeno zairam, tumra oḳon amar loge hino aitae fartae nae, oile bade aibae.”
JOH 13:37 Fitore ḳoila, “Oḳon ḳene zaitam fartam nae? Afnar lagi ami amar zan-o bilai dimu.”
JOH 13:38 Ou shomoy Isae ḳoila, “Amar lagi hasau tumar zan dibae ni? Te hasa ḳota ami tumare ḳoiram, murgae bang dibar age-u, tumi tinbar ḳoibae, tumi amare sino na.”
JOH 14:1 Hozrot Isae ḳoila, “Tumra ar fereshan oio na. Allar ufre to tumrar ekin ase, te amar ufre-o ekin raḳo.
JOH 14:2 Amar bafor baṛit roar bout zaga ase, na taḳle ami koilam one. Ami to tumrar lagi zaga ṭik korat zairam.
JOH 14:3 Zaga ṭik koria hirbar aimu, aia tumrare amar gese nimu. Teu ami zeno roimu, tumra-o hono roibae.
JOH 14:4 Ar ami kuai zairam, i fot to tumrar sina ase.”
JOH 14:5 Ou shomoy sahabi Tumase Isare ḳoila, “Huzur, afne kuai zaira, oḳan-u amra zani na, te fot kila sinmu?”
JOH 14:6 Isae ḳoila, “Ami-u fot, ami-u hok ar ami-u zindegi. Amar usilla saṛa kunu manush-u gaibi bafor gese zaito fare na.
JOH 14:7 Tumra amare sinle amar gaibi bafre-o sinlae one. Te oḳon tumra tane sincho ar deḳso-o.”
JOH 14:8 Filife ḳoila, “Huzur, ou gaibi baf amrare deḳaukka, teu amra shanti oimu.”
JOH 14:9 Isae ḳoila, “Filif, otodin taki ami tumrar loge loge asi, erbade-o tumi amare sinlae na ni? Ze zone amare deḳse, he amar gaibi bafre-o deḳse. Te tumi kilan ḳoilae, gaibi bafre deḳaukka?
JOH 14:10 Tumi ekin ḳoro na ni, ami gaibi bafor maze asi, ar gaibi baf-o amar maze asoin? Ami tumrare zeta ḳoi, ita amar nizor mukor buli nae, ze gaibi baf amar bitre asoin, tain-u tan nizor ḳam salaira.
JOH 14:11 Amar ḳota ekin ḳoro, ami amar bafor maze asi, ar tain amar maze asoin. Arnae ontoto amar ota keramoti kam dekia amare ekin ḳoro.
JOH 14:12 “Ami tumrare hasau ḳoiram, ḳeu zudi amar ufre iman ane, te ami zeta ḳam ḳori, he-o ota ḳorbo. Ar ami amar bafor gese zaiargi kori he aro boṛo boṛo ḳam ḳorbo.
JOH 14:13 Tumra amar name zeta saibae, ami ita fura ḳormu zate bafor mohima futor mazdi zair oy.
JOH 14:14 Amar nam loia amar gese kunta saile, ami dimu.
JOH 14:15 “Tumra zudi amare maya ḳoro, te amar hoḳol hukum-ahkam amol ḳorio.
JOH 14:16 Ami gaibi bafor gese saimu, ar tain tumrar lagi aroḳ shaijjogir faṭaiba, ein siroḳal roiba.
JOH 14:17 Ou shaijjogir oila hok ruhu. I duniar manshe ou hok ruhre kobul ḳore na, ḳaron tara ere deḳe-o na, sine-o na. Oile tumra ene sino, ein to tumrar loge loge roin ar samnedi tumrar dilor maze boshot ḳorba.
JOH 14:18 “Ami tumrare etim halote falaia zaitam nae, ami hirbar tumrar gese aimu.
JOH 14:19 Tuṛa bade duniar manshe amare ar deḳto nae, oile tumra deḳbae. Ami zinda asi gotike tumra-o zinda roibae.
JOH 14:20 Ami zinda oia uṭia harle tumra buzbae, ami amar gaibi bafor maze asi ar tumra amar maze aso, ami tumrar maze asi.
JOH 14:21 Ze zone amar hukum-ahkam sine ar amol ḳore, he-u amare maya ḳore. Ar ze zone amare maya ḳore, amar gaibi baf Allae-o tare maya ḳorba. Ami-o tare maya ḳormu, ar amar nizore tar gese zair ḳormu.”
JOH 14:22 Sahabi oḳlor maze Ihuda Iskariat saṛa aroḳ sahabir nam asil Ihuda, ein ḳoila, “Huzur, duniar hoḳol manshor gese zair na ḳoria, ḳali amrar gese-u afnare ḳene zair ḳorba?”
JOH 14:23 Isae zuaf dila, “Ḳeu zudi amare maya ḳore, te he amar ḳota manbo. Amar gaibi bafe tare maya ḳorba, amra tar gese aimu, aia tar loge boshot ḳormu.
JOH 14:24 Oile ze zone amare maya ḳore na, he kunumonte-u amar ḳotae sole na. Ami tumrare zeta ḳoilam, ita amar mukor ḳota nae, zein amare bezisoin hou bafor ḳota.
JOH 14:25 “Ami tumrar loge taḳte taḳte-u ita ḳoilam.
JOH 14:26 Ou shaijjogir Pak Ruhu, zanre amar bafe amar name faṭaiba, tain-u hoḳol befare tumrare talim diba, ar ami tumrare zeta ḳoisi ota iad ḳorai diba.
JOH 14:27 “Ami tumrar lagi shanti rakia zaiar, amar shanti-u ami tumrare dia zaiargi. I duniae zemne shanti dey, ami ila dei na. Tumrar dilo zanu kunu fereshani ba ḍor-ḳof na ae.
JOH 14:28 Ami to age-u tumrare ḳoisi, ami zaiargi, ar hirbar tumrar gese aimu. Tumra zudi amare maya ḳortae, te ami amar bafor gese zaiar ḳori kushi oilae one, ḳaron i baf to amar taki-o mohan.
JOH 14:29 Ita goṭar age-u tumrare zanai dilam, zate goṭia harle tumra ekin ḳortae faro.
JOH 14:30 Ami tumrar loge ar beshi shomoy mattam nae, ḳaron duniar munib Iblis aior. Amar ufre tar kunu ḳemota nai.
JOH 14:31 Oile ami amar bafor hukum mania ita hoḳolta ḳori, zate duniar manshe buzoin, ami amar bafre maya ḳori. Te ao, amra oḳon i zaga taki zaigi.”
JOH 15:1 Hozrot Isae ḳoila, “Ami-u asol angur gas ar amar baba girost.
JOH 15:2 Amar zeta ḍalainto fol dore na, tain itare ḳaṭia falai dein. Ar zeta ḍalainto fol dore, tain itare saṭia saf-sutra ḳori raḳoin, zate aro beshi fol dore.
JOH 15:3 Te ami tumrare ze kalam talim disi, erlagi to tumra ag taki-u saṭa oia saf-sutra oiso.
JOH 15:4 Tumra amar maze ro, ami-o tumrar dilo roimu. Angur gasor loge ḍal zudi lagail na taḳe, te ḍale zela nize nize fol doraito fare na, oula tumra-o amar maze na roile nize nize folala oitae faro na.
JOH 15:5 Ami-u angur gas, ar tumra oilae ḍal-fala. Ze zon amar loge lagail taḳe, ami-o tar loge lagail roi, teu tar zindegit bout fol dore. Ar, amare saṛa to tumra kunta-u ḳortae faro na.
JOH 15:6 “Amar loge ḳeu lagail na roile, tare ḳaṭa ḍalor laḳan falai deoa oy ar roide hukai zae. Bade hukna ḍalain tubaia aguino dein, teu ita zoli-fuṛi zae.
JOH 15:7 Tumra zudi amar loge lagail taḳo ar amar kalam ḳanain tumrar dilo taḳe, te tumrar zeta ichcha ota-u saio, ita tumrare deoa oibo.
JOH 15:8 Tumrar zindegit zudi bout fol dore, ar olaḳan tumra nizore amar ummot hishabe forman ḳorilao, te amar gaibi bafor tarif oibo.
JOH 15:9 Bafe amare zela maya ḳorsoin, ami-o oula tumrare maya ḳorsi. Tumra amar mayar maze ro.
JOH 15:10 Ami amar bafor hoḳol hukum-ahkam mania zela tan mayar maze roisi, tumra-o oula amar hukum-ahkam manle amar mayar maze roibae.
JOH 15:11 “Ami tumrare ita ḳoilam, zate amar kushi tumrar dilo taḳe ar tumrar kushi fura oy.
JOH 15:12 Amar hukum oilo, ami zela tumrare maya ḳorsi, tumra-o oula eḳe-oinnore maya ḳoro.
JOH 15:13 Ḳeu zudi nizor dustor lagi zan bilai dey, te tar taki ar beshi maya ḳar ase?
JOH 15:14 Amar deoa hukum zudi tumra amol ḳoro, te tumra amar dust.
JOH 15:15 Ami tumrare ar gulam ḳoiram na, ḳaron munibe kita ḳoroin gulame to ita zane na, borong ami tumrare dust ḳoisi, ḳaron gaibi bafor ges taki ami zotota hunchi, hoḳolta-u tumrare zanaisi.
JOH 15:16 “Amare to tumra fosond ḳorso na, borong ami-u tumrare fosond ḳorsi ar ḳamo lagaisi, zate tumrar zindegi folala oy ar ou fol ṭikia roy. Teu amar name gaibi bafor gese zeta saibae, tain tumrare diba.
JOH 15:17 Ami tumrare ou hukum diar, tumra eḳe-oinnore maya ḳoro.
JOH 15:18 “Duniar manshe tumrare ginnain, oile mono rakio, er age tara amare-u ginnaise.
JOH 15:19 Tumra zudi ou duniar oitae, te tara tumrare nizor hishabe bala failo one. Tumra to i duniar nae, ami tumrare duniar maz taki fosond ḳorsi gotike tara tumrare ginnae.
JOH 15:20 Amar ḳotaḳan mono rakio, gulam tar munib taki boṛo nae. Erlagi manshe zudi amare zulum ḳore, te tumrare-o ola ḳorbo. Tara amar ḳota manle tumrar ḳota-o manlo one.
JOH 15:21 Amar ḳarone-u tara tumrar loge ola ḳorbo, ḳaron amare zein bezisoin, enre tara sine na.
JOH 15:22 “Ami zudi na aitam ar tarar gese nosiot na ḳortam, te tara gunagar oilo na one, oile oḳon to tarar kunu ozuat nai.
JOH 15:23 Ze zone amare ginnae, he amar gaibi bafre-o ginnae.
JOH 15:24 Huno, zeta keramoti keu kunudin deḳaise na, ota keramoti zudi ami na deḳaitam, te tara gunagar oilo na one. Oile tara to amare ar amar gaibi bafre deḳse, dekia-o ginnaise.
JOH 15:25 Ita oilo, zate tarar kitabor ou ḳota fole, kitabo ase, tara bina ḳarone amare ginnaise.
JOH 15:26 “Ami amar gaibi bafor ges taki ze shaijjogir ruhre tumrar gese faṭaimu, tain aia amar befare shakki diba. Tain oila hok ruhu, tain gaibi bafor ges taki aiba.
JOH 15:27 Ar tumra-o amar befare shakki dibae, tumra to foyla taki-u amar loge loge aso.”
JOH 16:1 Hozrot Isae aro ḳoila, “Ami ita zanai dilam, zate tumra ḳorlami na zao.
JOH 16:2 Manshe tumrare shomaz taki bar ḳori diba. Ola shomoy aibo, zara tumrare kun ḳorbo, tara mono ḳorbo ita Allar ebadot ḳorer.
JOH 16:3 Tara ita ḳorbo, ḳaron tara gaibi bafre-o sinche na, amare-o sinche na.
JOH 16:4 Ami ita age-u ḳoia raḳlam, zate shomoy aile mono oy, ami tumrare ota ḳoislam. Ami foyla taki ita ḳoisi na, ḳaron ami to tumrar loge loge-u aslam.
JOH 16:5 “Huno, amare zein faṭaisoin, ami oḳon tan gese zaiargi, ta-o tumra ḳeu amare zikairae na, ami koi zairam.
JOH 16:6 Borong ami tumrare ita ḳoisi, erlagi tumrar mono kub duk aise.
JOH 16:7 Tebou ami hok kota ḳoiram, amar zaoaḳan tumrar lagi bala, ami na gele to hou shaijjogir ruhu aita nae. Ami gelegi tanre tumrar gese faṭaimu.
JOH 16:8 Tain aia gunar befare, Allar morzi mafik solar befare ar Allar bisaror befare manshore hozag korba.
JOH 16:9 Tain gunar befare hozag korba, ḳaron manshe amar ufre iman ane na.
JOH 16:10 Allar morzi mafik solar befare hozag korba, ḳaron ami amar gaibi bafor gese zaiargi, tumra amare ar deḳtae nae.
JOH 16:11 Bisaror befare hozag korba, ḳaron duniar munib Iblisor bisar oigese.
JOH 16:12 “Tumrare aro boutta ḳoar ase, oile oḳon ita ḳoile shoijjo ḳortae fartae nae.
JOH 16:13 Hou hok ruhu aia hari fot deḳaia tumrare furafur hokkan zanaiba. Tain to niz taki kunta ḳoita nae, ḳali zeta hunoin, ota-u ḳoiba. Ar zeta goṭbo, ota-u zanaiba.
JOH 16:14 Ami zeta ḳoi, tain aia ota-u tumrar gese zair ḳorba. Olaḳan tain amar mohima zair ḳorba.
JOH 16:15 Gaibi bafor zeta ase, ita hoḳolta-u amar. Erlagi ami koiram, ami zeta ḳoi, tain ota-u tumrar gese zair ḳorba.”
JOH 16:16 Hozrot Isae ḳoila, “Tuṛa bade tumra ar amare deḳtae nae, hirbar tuṛa bade deḳbae.”
JOH 16:17 Ikan hunia ḳoyzon sahabie mata-mati korla, “Tain ita kita matoin, ‘Tuṛa bade tumra ar amare deḳtae nae, hirbar tuṛa bade deḳbae’, tain hirbar ḳoira, ‘Ami bafor gese zairamgi.’
JOH 16:18 Te tain ze tuṛa shomoyor ḳota ḳoira, ikan kita? Tain kita matira, amra to buzram na.”
JOH 16:19 Hozrot Isae buzilila, tan sahabi oḳole ou befare tanre kunta zikaita saira, buzia tain ḳoila, “Ami ze ḳoisi, ‘Tuṛa bade tumra ar amare deḳtae nae, hirbar tuṛa bade deḳbae’ ota loia tumra mata-mati korrae ni?
JOH 16:20 Huno, ami tumrare hasau ḳoiram, tumra ḳandibae ar ahazari korbae, oile i duniar manshe kushi korba. Tumra oḳon duk-koshṭo ḳorbae, oile bade i duk roito nae, er bodla kushi korbae.
JOH 16:21 Baichcha oar shomoy beṭintor kub ḳoshṭo oy, oile oia harle noya aolador furtie mon bori zae, hi koshṭor ḳota ar mono taḳe na.
JOH 16:22 Ou laḳan tumra-o oḳon duk-koshṭo ḳorrae, oile hirbar zebla tumrar loge amar deḳa oibo, hou shomoy kushie tumrar dil borizibo, i kushi keu ḳaṛia nito farto nae.
JOH 16:23 “Hi shomoy tumra amar gese kunta saitae nae. Ami tumrare hasa ḳoiram, tumra amar name amar gaibi bafor gese zeta saibae, tain tumrare diba.
JOH 16:24 Oḳono to tumra amar name kunta saiso na. Sao, teu faibae, zate tumrar kushi fura oy.
JOH 16:25 “Ami tumrare udahoron dia ou talim dilam. Oile olaḳan shomoy aibo, zebla ami kunu udahoron saṛa, amar gaibi bafor befare kula-mela buzaimu.
JOH 16:26 Hou din-u tumra amar name saibae. Ami to ikan ḳoiram na, ami tumrar oia gaibi bafor gese minot ḳormu.
JOH 16:27 Tain nize-u tumrare maya ḳoroin, ḳaron tumra amare maya ḳorso ar ekin ḳorso ze, ami Allar ges taki aisi.
JOH 16:28 Ashole, ami amar gaibi baf Allar ges taki ou duniat aisi ar dunia saṛia tan gese-u zairam.”
JOH 16:29 Ou shomoy sahabi oḳole tanre ḳoila, “Huzur deḳoukka, oḳon to afne kula-mela-u matira, kunu udahoron dira na.
JOH 16:30 Oḳon amra buzlam, afnar ozana kunta nai, ar afnare ḳeu kunta zikanir-o nai. Gotike-u amra ekin ḳorlam, afne Allar ges taki-u aisoin.”
JOH 16:31 Isae tarare ḳoila, “Oḳon ekin oise ni?
JOH 16:32 Huno, ola shomoy aior, emonki aichche, zebla tumra dol saṛia amare toia zarzir zagat bagibae. Oile ami to eḳla nae, amar gaibi baf amar loge loge asoin.
JOH 16:33 Ami tumrare ita ḳoilam, zate tumra amar loge mishia aso gotike mono shanti fao. I duniat tumra duḳ-mosiboto aso, ta-o monobol rakio, ami-u duniare joy ḳorsi.”
JOH 17:1 Oḳan ḳoia hari Hozrot Isae asmanor bae saia dua ḳorla, “Baba, shomoy oigese. Tumi tumar futor mohima zair ḳoro, zate fute-o tumar mohima zair ḳorta faroin.
JOH 17:2 Tumi tanre hoḳol manshor ufre ḳemota diso, zate tumi zerare tan ato shofiso, erare tain aḳeri zindegi dein.
JOH 17:3 Eḳmatro hok Allare mani tumare ar tumi zenre faṭaiso, hou Isa al-Mosire sina-u oilo aḳeri zindegi.
JOH 17:4 Tumi amare ze ḳam diso, i kam adae ḳoria duniat tumar mohima zair ḳorsi.
JOH 17:5 Te baba, dunia foyda ḳorar age tumar dorbaro amar ze mohima asil, tumar gesor ou mohima oḳon amare hirbar deo.
JOH 17:6 “I duniar mazor zerare amar ato shofiso, ami erar gese tumare zair ḳorsi. Tara to tumar-u asla, tumi-u tarare amar ato shofiso. Tara tumar hukum mania solche.
JOH 17:7 Tara oḳon buzche, tumi zeta amare diso, ita to tumar ges taki-u aise.
JOH 17:8 Ḳaron oilo, tumi zeta toblig korar hukum diso, ami ota zanaisi. Ar tara-o itare kobul ḳoria asolḳan buzilise zen, ami tumar ges taki-u aisi. Tara ekin-o ḳorse, tumi-u amare faṭaiso.
JOH 17:9 Te ami to hoḳlor lagi minot ḳoriar na, ḳali tumi zarare amar ato diso, erar lagi-u minot ḳorram, tara to tumar-u.
JOH 17:10 Amar zotota ase hokkolta-u tumar, ar tumar hokkolta-u amar. Erar mazdi-u amar mohima zair or.
JOH 17:11 “O fobitro baba, i duniat ami ar beshi shomoy nae, oile tara i duniat asoin, ami to tumar gese airam. Tumi amare tumar ze nam diso, ou namor bole erare basao, zate amra zela eḳ, tara-o ola eḳ oita faroin.
JOH 17:12 Ami zotodin tarar loge aslam, otodin tumar deoa ou namor gune tarare basaisi. Tarare fara dia raḳsi, tara ḳeu binash oise na. Ḳali zar binash oar ḳota, he-u binash oise, zate Allar kalamor ḳota fole.
JOH 17:13 “Te oḳon ami tumar gese airam, duniat roite-u ita tarare zanai dilam, zate amar kushie tarar dil bori zae.
JOH 17:14 Tumi amare zeta zanaiso, ami-o tarare ota zanaisi. Ami zela i duniar nae, tara-o ola i duniar nae, erlagi duniar manshe tarare ginnaise.
JOH 17:15 Ami tumar gese abdar ḳorram na, tumi tarare dunia taki nitaegi, borong ou abdar ḳorram, tumi tarare Iblisor at taki hefazot ḳoro.
JOH 17:16 Ami zela ou duniar nae, oula tara-o i duniar nae.
JOH 17:17 Tumi tarare tumar hok dia ḳas hishabe raḳo. Tumar kalam-u oilo ou hok.
JOH 17:18 Tumi zela amare duniat faṭaiso, oula ami-o tarare duniar maze faṭaisi.
JOH 17:19 Ami tarar lagi nizore ḳas ḳori raḳsi, zate tarare-o hok dia ḳas hishabe raḳa oy.
JOH 17:20 “Te ami kali erar lagi minot ḳoriar na, tarar lagi-o minot ḳorram, zera erar ḳota hunia amar ufre iman anbo.
JOH 17:21 Ami minot ḳoriar tara hoḳol zanu eḳ oy. Baba, tumi zela amar loge aso ar ami-o zela tumar loge asi, oula tara-o zanu amrar loge milia roin. Teu duniar manshe ekin ḳorba, tumi-u amare faṭaiso.
JOH 17:22 Tumi amare ze mohima dan ḳorso, ami ita tarare dan ḳorsi, zate amra zela eḳ, oula tara-o eḳ oita faroin.
JOH 17:23 Tumi zela amar maze aso, ola ami-o tarar maze asi. Ou laḳan tara zanu furafur eḳ oita faroin. Teu duniar manshe buzbo, tumi-u amare faṭaiso, ar tumi amare zela maya ḳoro, oula tarare-o maya ḳoro.
JOH 17:24 Baba, ami sairam, tumi zerare amar ato shofiso, ami zeḳano asi, tara-o zanu amar loge hono roin ar amar mohima deḳoin. I mohima to tumi-u amare dan ḳorso, ḳaron dunia foyda ḳorar ag taki-u tumi amare maya ḳorso.
JOH 17:25 “O hok insafḳari baba, duniar manshe tumare sine na, oile ami to sini. Ar tumi-u zen amare faṭaiso, ikan era buzilise.
JOH 17:26 Erar gese ami tumar nam zair ḳorsi, agedi aro ḳormu, zate tumi amare zela maya ḳoro, ola maya tarar bitre-o taḳe ar ami tarar loge mishia taki.”
JOH 18:1 Ou munazator bade Hozrot Isae tan sahabi oḳolre loia Kidrun namor eḳ faṛia ḳal faroia gela. Gia tarare loia eḳ baganor bitre hamaila.
JOH 18:2 Beiman Ihudae i zaga sinto, ḳaron Isae age bout bar sahabi oḳolre loia ono boisoin.
JOH 18:3 Ermaze boṛo imam ar Forishi oḳole ou Ihudar loge eḳ dol sifai ar Baytul-Mukaddosor ḳoyzon fulish faṭaila. Ihudae tarare loia ono ailo, ou shomoy tarar ato lem, mushal, ar ostro-shostro asil.
JOH 18:4 Isae ag taki-u hoḳolta zanta, tan ufre kita goṭbo. Erlagi tain aguaia aia tarare zikaila, “Afnara ḳare tukaira?”
JOH 18:5 Tara ḳoila, “Nasarot gaur Isare.” Tain ḳoila, “Ami-u hein.” Ou shomoy beiman Ihuda-o tarar loge asil.
JOH 18:6 Isae zebla ḳoila, “Ami-u hein,” ikan hunia-u tara ḳoredi gia maṭit foṛigela.
JOH 18:7 Tain hirbar tarare zikaila, “Afnara ḳare saira?” Tara ḳoila, “Nasarot gaur Isare.”
JOH 18:8 Tain ḳoila, “Ami to ḳoilam, ami-u hein. Afnara zudi amare-u tukanit ain, te amar logor erare saṛi deukka.”
JOH 18:9 Ashole ila goṭlo, zate Isae age zeta ḳoisla ota fura oy. Tain ḳoisla, “Baba, tumi zerare amar ato shofiso, era eḳzonre-o ami kuaisi na.”
JOH 18:10 Ou shomoy Saimon-Fitoror loge ekkan toluar asil, oḳan bar ḳoria, tain fordan imamor gulamor ḍain ḳan ḳaṭilila. I gulamor nam asil Malkus.
JOH 18:11 Erlagi Isae Fitorre ḳoila, “Tumar toluar ḳafo harao. Gaibi bafe amare ze mosibotor fiala disoin, ikṭar shad ami loitam na ni?”
JOH 18:12 Ou shomoy sifai oḳole, fordan sifaie ar Baytul-Mukaddosor fulish oḳole Isare doria bandililo.
JOH 18:13 Bandia foyla tara Hanonor gese loia gelo. I Hanon asla hou bosoror fordan imam Kayafar hour.
JOH 18:14 Ou Kayafae age Ihudi neta oḳolre ḳoisla, “Asta zati binash oar saite, hoḳlor bodla eḳzonor moron aro bala.”
JOH 18:15 Ou shomoy Fitor ar aroḳzon sahabi Isar ḳore ḳore gela. Ou sahabire fordan imame sinta. Ein Isar loge oia fordan imamor baṛir uṭano hamaila.
JOH 18:16 Oile Fitor baire geiṭor gese ubai roila. Teu fordan imamor forisito Isar ou sahabi bare gia faradar beṭire ḳoia Fitorre bitre anaila.
JOH 18:17 Ou beṭie Fitorre ḳoilo, “Tumi-o en murid ni?” Fitore ḳoila, “Na, na, ami nae.”
JOH 18:18 Ou shomoy kub shit foṛsil, erdae sifai ar gulam oḳole uṭano angradi aguin doraia aguin tabanit lagla. Fitore-o tarar daro ubaia aguin tabaila.
JOH 18:19 Ou shomoy fordan imame Isare tan ummot ar tan talimor befare zikaila.
JOH 18:20 Isae zuaf dila, “Ami manshor samne kula-mela matisi. Ihudi oḳol zeḳano zoma oin, ota mosido ar Baytul-Mukaddoso hamesha talim disi. Ami to lukaia kunta ḳoisi na.
JOH 18:21 Te amare ar ḳene zikaira? Amar talim zera hunche, tarare-u zikaukka. Ami ze talim disi, ita tarar zana ase.”
JOH 18:22 Isar i zuaf hunia, ḳandat ze sifai oḳol uba asla, era eḳzone tanre soṛ maria ḳoilo, “Tui fordan imamre ola zuaf dire ni?”
JOH 18:23 Tain ḳoila, “Ami zudi bad kunta ḳoia taki te ḳoukka, ar bala mat matile amare marra ḳene?”
JOH 18:24 Ou shomoy Hanone banda halote Isare fordan imam Kayafar gese faṭai dila.
JOH 18:25 Sahabi Saimon-Fitore zebla aguin tabaira, ou shomoy manshe tanre ḳoilo, “Tumi-o tar logor eḳzon sahabi ni?” Fitore dusrabar oshikar ḳori koila, “Na, na, ami nae.”
JOH 18:26 Fitore zar ḳan ḳaṭisla, tar ek kuṭum asil fordan imamor gulam. He ḳoilo, “Ami baganor bitre ogur loge tumare-o deḳlam na ni?”
JOH 18:27 Fitore hirbar oshikar ḳorla, ar loge loge-u murgae bang dilailo.
JOH 18:28 Ihudi neta oḳole biane Isare Kayafar ges taki, Ruman bashshar fordan hakim Filator ṭongit loia gela. Oile tara baṛir bitre hamaila na, zate be-din hakimor baṛit hamaia nafak na oin, borong fak-saf roia Azadi Idor ḳani kaita faroin.
JOH 18:29 Erlagi Ruman hakim Filat bare aia zikaila, “I beṭar birudde tumrar nalish kita?”
JOH 18:30 Tara ḳoila, “He oforad na ḳorle to afnar gese anlam na one.”
JOH 18:31 Filate tarare ḳoila, “Tumra tare loia zaogi, gia tumrar shoriot mafik bisar ḳorilao.” Ikan hunia tara Filatre ḳoila, “Kunu manshore zane marar moto shaza deoar ḳemota amrar ato nai, ḳali Ruman oḳlor ato ase.”
JOH 18:32 Nizor mout kilan oibo, Isae ikan age-u ḳoisoin. Te ita oilo, zate tan ou ḳota fole.
JOH 18:33 Teu Filat hirbar ṭongir bitre hamaila ar Isare ḍaḳ dia ḳoila, “Oba, tumi kita Ihudi oḳlor bashsha ni?”
JOH 18:34 Tain zuaf dila, “Afne nize ou ḳota ḳoira, na manshe amar befare afnare ḳoise?”
JOH 18:35 Filate zuaf dila, “Ami kita Ihudi ni? Tumar nizor zatir manshe ar boṛo imam oḳole tumare amar ato dise. Ḳo, tumi kita ḳorso?”
JOH 18:36 Isae ḳoila, “Amar bashshai i duniar nae. Amar bashshai zudi ou duniar oito, te Ihudi neta oḳlor ato ami na foṛar lagi amar manshe laṛai korlo one, oile amar bashshai to inor nae.”
JOH 18:37 Ikan hunia Filate Isare zikaila, “Taile tumi kita bashsha ni?” Isae ḳoila, “Afne-u to ḳoira, ami bashsha. Hunoukka, hokor fokke shakki deoar lagi ami duniat aisi. Zara hokor loge ase, tara amar ḳota hune.”
JOH 18:38 Filate tanre ḳoila, “Te hokkan kita?” Oḳan ḳoia tain hirbar bare gia Ihudi neta oḳolre ḳoila, “Ami to er kunu dush faisi na.
JOH 18:39 Oile tumrar to eḳṭa reoaz ase, Azadi Idor shomoy ami eḳzon ḳoydire ḳalas dei. Te tumra sao ni, ami Ihudir ou bashshare saṛi ditam?”
JOH 18:40 Ikan hunia tara sillaia ḳoilo, “Na, na, ere na, Barabbare saṛi deukka.” Ou Barabba asil eḳ ḍaḳait.
JOH 19:1 Bade Ruman hakim Filate Isare sabuk marar hukum dila.
JOH 19:2 Ar sifai oḳole gosa-ḳaṭa dia eḳ mukuṭ banaia tan matat dilo, ar baingoni rongor bashshai lebas findailo.
JOH 19:3 Bade tara tan samne aia ḳoilo, “O Ihudir bashsha, marhaba!” Oḳan ḳoia ḳoia tara tan galo soṛailo.
JOH 19:4 Teu Filat hirbar bare aia ḳoila, “Huno, ami ere tumrar gese bar ḳoria aniar, teu tumra buzbae, ami er kunu dush-u fairam na.”
JOH 19:5 Hou gosa-ḳaṭar mukuṭ ar baingoni lebas finda halote Isa bar oia aila, ar Filate ḳoila, “Ou deḳo, hou manush.”
JOH 19:6 Isare dekia boṛo imam ar Baytul-Mukaddosor fulish oḳole sillaia ḳoila, “Tare solibo deo, solibo deo.” Filate ḳoila, “Ami to tar kunu dush faisi na, te tumra-u tare nia solibo gatilao.” (I solib oilo laḳṛidi banail, manshore loṭḳaia marar eḳ zinish.)
JOH 19:7 Ihudi neta oḳole Filatre ḳoila, “Amrar shoriot mafik tar moron oa usit, ḳaron he nizore Allar ḳas mayar zon, Ibnulla ḳoise.”
JOH 19:8 Ikan hunia Filate aro beshi ḍoraigela.
JOH 19:9 Tain hirbar ṭongi-goror bitre hamaia Isare zikaila, “Tumi kuai taki aiso?” Oile Isae kunu zuaf dila na.
JOH 19:10 Erdae Filate Isare ḳoila, “Tumi amar mator kunu zuaf ditae na ni? Tumi zano ni, tumare ḳalas dibar ba solibor ufre loṭḳaia marar ḳemota amar ase?”
JOH 19:11 Teu Isae ḳoila, “Ufre taki afnare ḳemota na deoa oile, amar ufre afnar kunu ḳemota-u taḳto na. Erlagi ze manshe amare afnar ato dorai dise, he-u boṛo gunagar.”
JOH 19:12 Ikan hunia Filate Isare ḳalas dilaita saila, oile Ihudi neta oḳole sillaia ḳoila, “Afne zudi ere ḳalas dilain, te afne Ruman bashshar dust nae. Ze manshe nizore bashsha ḳoia dabi kore, he to Ruman bashshar dushmon.”
JOH 19:13 Ikan hunia Filate Isare bar ḳori anla ar Fattordi-Banda namor eḳ uṭano bisaror ashono boila. Ibrani bashae i uṭanre Gabbata ḳoa oy.
JOH 19:14 I din asil Azadi Idor ayozonor din. Ou shomoy beil onuman duifor oigese. Filate Ihudi neta oḳolre ḳoila, “Ou deḳo, tumrar bashsha.”
JOH 19:15 Isare dekia tara sillaia ḳoilo, “Ogure horao, horao, tare solibo deo.” Filate ḳoila, “Tumrar bashshare ami solibo dilaitam ni?” Boṛo imam oḳole ḳoila, “Ḳali Ruman bashsha saṛa, amrar ar kunu bashsha nai.”
JOH 19:16 Teu hakim Filate solibor ufre loṭḳaia marar lagi Isare tarar ato shomzai dila, ar sifai oḳole tanre loia gela.
JOH 19:17 Bade Isae tan solib nize boia ‘Ḳollar Saṛ’ namor zagat gela. Ibrani bashae i zagar nam Golgata.
JOH 19:18 Hino nia tara tanre solibo loṭḳailo. Isare mazḳano, ar tan dui galar duio solibo oinno duizonre loṭḳailo.
JOH 19:19 Ar Filate ekkan oforad-nama lekia Isar solibor ufre lagaila. Ikano leḳa asil, “Nasarot gaur Isa, Ihudir bashsha.”
JOH 19:20 Ze zagat tanre solibo loṭḳail oisil, ou zaga ṭaunor ḳandat asil gotike bout Ihudie ou oforad-nama foṛlo. Ikan Ibrani, Iunani ar Ruman bashae leḳa asil.
JOH 19:21 Ihudir boṛo imam oḳole hakim Filatre ḳoila, “Ihudir bashsha na lekia, afne ola leḳoukka, he ḳoito, ami Ihudir bashsha.”
JOH 19:22 Filate ḳoila, “Ami zeta leḳsi, leḳsi-u.”
JOH 19:23 Isare solibo loṭḳanir bade sifai oḳole tan ḳafoṛ-sufoṛ sair baṭ ḳori baṭia nila. Bade tan kurtaṭa-o nila. I asta kurtar gola taki bain ḳora, kunu silai asil na.
JOH 19:24 Erlagi sifai oḳole eḳe-oinne ḳoilo, “Ikṭa na siṛia borong loṭari mari deki, ḳar baiggot foṛe.” Ita goṭsil, zate Asmani Kitabor ḳota fole, kitabo leḳa ase, Tara nizor maze amar ḳafoṛ-sufoṛ baṭa-baṭi korse, amar kurtar lagi tara loṭari marse.
JOH 19:25 Ar hasau tara ola ḳorlo. Hozrot Isar solibor ḳandat tan ma, ḳala, Kulufar bou Moriom ar Mogdilini Moriom uba asla.
JOH 19:26 Isae deḳla, tan ma ar mayar hou sahabi daro ubai roisoin. Dekia foyla tan maʼre ḳoila, “Mai go, ounu tumar fua.”
JOH 19:27 Ar sahabire ḳoila, “Bai, ounu tumar ma.” Ou shomoy taki i sahabie Isar maʼre tan nizor goro loia gelagi.
JOH 19:28 Erbade hokkolta shesh oigese zania, al-Zobur kitabor ayat zate fole, otar lagi Isae ḳoila, “Amar fiase dorse.”
JOH 19:29 Ou shomoy hino eḳ zog ṭenga anguror shorbot asil. Tara ekkan tena ania ou shorbotor maze bizaia, esub gasor ḍeṭar matat lagaia usa ḳori tan mukor gese dilo.
JOH 19:30 I shorbot ḳaia harle tain ḳoila, “Shesh oigese.” Oḳan ḳoia, tain mata nuaia aḳeri dom falaila.
JOH 19:31 Azadi Idor agor din Hozrot Isae inteḳal ḳorla. Bador din asil ḳas fobitro eḳ Zummabar. Erlagi Ihudi neta oḳole saila, i din zanu kunu lash solibor ufre na taḳe. Ou tara hakim Filator gese saila, zate solibo zera ase, tara zoldi morar lagi tarar fao bangia solib taki lamani oy.
JOH 19:32 Teu Isar loge zerare solibo loṭḳail oisil, sifai oḳole era duiozonor fao bangi dilo.
JOH 19:33 Tara Isar gese aia deḳlo, tain mara gesoin, erlagi tan fao banglo na.
JOH 19:34 Oile eḳ sifaie sulfi dia tan fatti-aṛor mazedi faṛ marlo, faṛor loge lou ar fani bar oia ailo.
JOH 19:35 Ze zone nizor souke i goṭona deḳsoin, tain-u shakki disoin ar tan shakki hasa. Tain zanoin, tain zeta ḳoira ita hasa, zate tumra-o ekin ḳoro.
JOH 19:36 Ita oisil zate Pak Kitabor ou ḳota fura oy, kitabo ase, ‘Tan eḳṭa aḍḍi-o banga oito nae.’
JOH 19:37 Eoḳan ase, ‘Zara tanre gatise, tara tan bae sai roibo.’
JOH 19:38 Ita goṭonar bade Arimatia gaur Iusufe Isar lash nita ḳori hakim Filator onumoti saila. Iusuf asla Isar eḳzon lukail ummot, ḳaron tain Ihudi neta oḳolre ḍoraita. Filator onumoti faia tain Isar lash nila.
JOH 19:39 Age raitor bala zein Isar gese aisla, hou Nikodime-o mura-ator ar oguru mishaia onuman eḳ mon kushboy moshla loia aila.
JOH 19:40 Ar Isar lash nia Ihudi oḳlor niom mafik ou kushboy-ala moshla maḳaia ḳafon findaila.
JOH 19:41 Isare zeḳano solibo gata oisil, hono eḳ baganor bitre faṛor guhar maze noya eḳṭa ḳoybor kudia raḳa asil. I koyboro ḳeurore dafon ḳora oise na.
JOH 19:42 Ou din Ihudi oḳlor idor agor din oae ar ḳoyborṭa-o ḳandat taḳae, tara taṛa-uṛa ḳori Isare ono-u dafon ḳorla.
JOH 20:1 Haftar foyla din fozor oḳto andair roite-u Mogdilini Moriom Hozrot Isar ḳoyboror ḳandat gela. Gia deḳla, ḳoyboror muk taki fattorṭa horail oigese.
JOH 20:2 Dekia tain Saimon-Fitor ar ze sahabire Isae kub maya ḳorta, erar gese douṛaia gia ḳoila, “Hunchoin ni, huzuror lash manshe ḳoybor taki tulia nisoingi. Nia ḳoi raḳsoin amra zani na.”
JOH 20:3 Ḳobor faia Fitor ar ou sahabi koyboror bae roana oila.
JOH 20:4 Duiozone eḳloge douṛaira. Fitorre ḳore falaia hou sahabi age ḳoyboror ḳandat gela.
JOH 20:5 Gia unda oia deḳla, ḳoyboror bitre ḳafon foṛi roise, oile tain ḳoyboror bitre hamaila na.
JOH 20:6 Fitor-o tan ḳore ḳore aila, aia ḳoyboror bitre hamaia deḳla, ḳali kafon ḳan foṛi roise.
JOH 20:7 Ze ḳafonor ṭukra dia tan mata banda oisil, ikan oinno ṭukrar loge nae, alga foṛi roise.
JOH 20:8 Ze sahabi foyla ḳoyboror ḳandat gesla, bade tain-o bitre hamaila, hamaia hoḳolta dekia ekin ḳorla.
JOH 20:9 Isar to murda taki zinda oa zorur, Pak Kitabor ou talimor mani age to era ḳeu buzchoin na.
JOH 20:10 Erbade sahabi oḳol zarzir baṛit gelagi,
JOH 20:11 oile Moriome ḳoyboror ḳandat ubaia ḳandon lagaila. Tain ḳandi kandi unda oia ḳoyboror bitredi saia deḳla,
JOH 20:12 Isar lash zeno hutaia raḳa oisil, hono dola ḳafoṛ finno duizon firista boi roisoin, eḳzon hitanedi, aroḳzon fao galabae.
JOH 20:13 Firista oḳole Moriomre ḳoila, “Tumi kandirae ḳene go?” Tain ḳoila, “Manshe amar malikor lash tulia nisoingi, nia ḳoi toisoin zani na.”
JOH 20:14 Oḳan ḳoia tain ḳoredi saite-u deḳla, Hozrot Isa ubai roisoin. Oile tain-u ze Isa, Moriome ikan buzla na.
JOH 20:15 Isae Moriomre ḳoila, “Ogo, tumi kando ḳene? Ḳare tukairae?” Isare baganor mali mono ḳoria tain ḳoila, “Deḳoukka, afne zudi tan lash nia taḳoin, te kuai nisoin, ḳoukka. Ami tan lash nimu.”
JOH 20:16 Isae ḳoila, “Moriom.” Teu Moriom firia ubaia Ibrani bashae tanre ḳoila, “Rabbuni” mani ustad.
JOH 20:17 Isae tanre ḳoila, “Amare doria rakio na, ami to oḳono gaibi bafor gese ufre gesi na. Tumi borong amar baiainre gia ḳo, zein amar ar tumrar gaibi baf, amar ar tumrar Alla, ami ufre tan gese-u zairam.”
JOH 20:18 Teu Mogdilini Moriome sahabi oḳolre gia ḳoila, Isar loge tan deḳa oise ar Isae-u tanre ita hoḳolta ḳoisoin.
JOH 20:19 Hou din, mani haftar foyla din hainja bala sahabi oḳol ekḳano dola oila. Oile Ihudi neta oḳlor ḍore goror duar-kiṛki hoḳolta bond asil. Ermaze aḳta-u Hozrot Isa aia erar mazḳano ubaia ḳoila, “Assalamu alaikum.”
JOH 20:20 Oḳan ḳoia hari tain nizor duio at ar fatti-aṛor zoḳomor dag erare deḳaila. Huzurre dekia sahabi oḳol kub kushi oila.
JOH 20:21 Bade Isae hirbar erare ḳoila, “Assalamu alaikum. Huno, amar gaibi bafe zela amare faṭaisoin, ami-o oula tumrare faṭairam.”
JOH 20:22 Oḳan ḳoia tain sahabi oḳlor ufre fu dia ḳoila, “Allar Pak Ruhre kobul ḳoro.
JOH 20:23 Huno, tumra zudi keure maf ḳori deo, te tar guna maf ḳora oibo, ar zudi maf na ḳoro, te tar gunar mafi milto nae.”
JOH 20:24 Hozrot Isa zebla sahabi oḳlor samne aila, ou shomoy barozon sahabir mazor Tumas namor eḳzon sahabi ino asla na. Ou Tumasre Zomoz ḳoia ḍaḳa oito.
JOH 20:25 Erlagi baki sahabi oḳole Tumasre ḳoila, “Amra to huzurre deḳsi.” Tumase ḳoila, “Hunoukka, ami amar nizor souke zudi tan duio ator feregor dag na deki, ou zoḳomo angul na lagai, ar tan fatti-aṛor zoḳomo at na dei, te kunumonte-u ami ita ekin ḳortam nae.”
JOH 20:26 Er eḳ hafta bade hirbar sahabi oḳol ou goro dola oila, erar loge Tumas-o asla. Ou shomoy goror hoḳol duar-kiṛki bond taḳle-o aḳta-u Isa aia tarar mazḳano ubaia ḳoila, “Assalamu alaikum.”
JOH 20:27 Bade tain Tumasre ḳoila, “Tumar angul lagaia amar duio at deḳo, ar tumar at baṛaia amar fatti-aṛor zoḳomo harao, ekin ḳoro, shondoy ḳorio na.”
JOH 20:28 Teu Tumase ḳoila, “Malik amar, Alla amar.”
JOH 20:29 Isae tanre ḳoila, “Tumas, amare deḳso ḳori tumi iman anlae ni? Huno, doinno tara, zera na dekia-o amar ufre iman ane.”
JOH 20:30 Hozrot Isae sahabi oḳlor samne aro bout keramoti nishana deḳaisoin, ita hoḳolta to ou kitabo leḳa oise na.
JOH 20:31 Ḳali ou goṭona oḳol leḳa oise, zate ota tilaot ḳoria tumra iman ano, Hozrot Isa-u Alla Pakor oada ḳora hou al-Mosi, tain-u Ibnulla, Allar ḳas mayar zon, ar iman ania zate tan usillae tumra aḳeri zindegi hasil ḳoro.
JOH 21:1 Erbade Tibiria namor aoror faro Hozrot Isae sahabi oḳolre hirbar deḳa dila. Goṭona ou laḳan oilo.
JOH 21:2 Saimon-Fitor, Tumas zare Zomoz ḳoa oito, ar Galil zilar Kanna gaur Notonel, Zibudiar fuain shoho aro duizon sahabi eḳloge asla.
JOH 21:3 Sahabi Saimon-Fitore logor erare ḳoila, “Ami mas marat zaiargi.” Tara ḳoila, “Amra-o tumar loge zaimu.” Teu tara nao loia mas marat bar oila, oile i rait kunu mas faila na.
JOH 21:4 Fozor oḳto Isa aia aoror faro ubaila. Oile tain-u ze Isa, era ikan buzla na.
JOH 21:5 Tain sahabi oḳolre ḳoila, “O beṭain, tumra kunu mas faiso na ni?” Tara ḳoila, “Ji na, faisi na.”
JOH 21:6 Isae tarare ḳoila, “Te naor ḍain galabae zal falao, teu faibaene.” Tan ḳotamoto tara zal falaila ar zalo oto mas hamaila, ikan ṭania tulta farla na.
JOH 21:7 Ze sahabire Isae maya ḳorta, tain Fitorre ḳoila, “Ein to malik.” I shomoy Saimon-Fitoror gotro ḳafoṛ asil na. “Ein to malik” oḳan hunia-u tain ḳafoṛ findia faldi fanit foṛla.
JOH 21:8 Oile baki sahabi oḳole mase bora zalḳan ṭani ṭani nao loia faro azila. Ḳaron tara far taki beshi duroi nae, onuman dui-sho at duroi asla.
JOH 21:9 Tara faro uṭia deḳla angrar aguin, ou aguinor ufre mas ar ruṭi.
JOH 21:10 Isae tarare ḳoila, “Oḳon zeta mas marso, on tone ḳoyṭa ano.”
JOH 21:11 Saimon-Fitore nao taki zalḳan faro ṭania tulla. Zalor bitre eḳ-sho teppannoṭa boṛo mas asil, tebou zal faṛlo na.
JOH 21:12 Isae tarare ḳoila, “Ao, ḳao aia.” Oile kunu sahabie zikanir shaosh oilo na “Afne ḳe?” Ḳaron tara zanta, tain-u Malik.
JOH 21:13 Bade tain aia tarare ruṭi kaite dila, oula biran mas-o dila.
JOH 21:14 Murda taki zinda oar bade, ou tin nombor bar tain sahabi oḳolre deḳa dila.
JOH 21:15 Tarar ḳaoa-daoar bade Isae Saimon-Fitorre zikaila, “O Saimon bin Iuhanna, era zela amare maya ḳoroin, tumi amare er taki beshi maya ḳoro ni?” Tain ḳoila, “Ji oy malik, afne to zanoin, ami afnare ḳoto maya ḳori.” Teu Isae ḳoila, “Te amar meṛa-baichchar raḳali koro.”
JOH 21:16 Isae hirbar tanre zikaila, “Saimon bin Iuhanna, tumi amare maya ḳoro ni?” Fitore ḳoila, “Ji oy malik, afne to zanoin, ami afnare ḳoto maya ḳori.” Isae ḳoila, “Te amar meṛar fal deḳa-huna ḳoro.”
JOH 21:17 Bade tain tisrabar zikaila, “O Saimon bin Iuhanna, hasau ami tumar mayar manush ni?” Isae tisrabar zikanie Fitor mone mone kisu dukito oia ḳoila, “Malik, afne to hoḳolta-u zanoin, afne zanoin-u afne amar kub mayar zon.” Teu Isae ḳoila, “Te amar meṛa falor raḳali koro.
JOH 21:18 Ami tumare hasau ḳoiram, tumar zuankir shomoy tumi nize-u tumar ḳomor bandia zeno kushi ono zaitae. Oile buṛakir shomoy tumar at baṛai dibae, ar oinno zone tumare bandia, tumi zeno zaitae sao na, hono loia zaibo.”
JOH 21:19 Allar gourob zair oar lagi Fitoror mout kilan oibo, oḳan buzanit gia Isae ou ḳota ḳoila. Bade tain Fitorre ḳoila, “Ao, amar loge taḳo.”
JOH 21:20 Ou shomoy Fitore ḳoredi saia deḳla, Isar hou mayar sahabi kore ḳore aira. Ou sahabie ḳoydin age ḳanit boia Isar bae zukia ḳoisla, “Huzur, afnare dushmonor ato ze dorai dibo, he ḳe?”
JOH 21:21 Fitore enre dekia Isare ḳoila, “Huzur, en kita oibo?”
JOH 21:22 Isae Fitorre ḳoila, “Ami zudi sai, ami dusrabar duniat na aoa forzonto he ono rouk, te tumar kita? Tumi amar loge taḳo.”
JOH 21:23 Erlagi ummot oḳlor maze ḳobor roṭi gelo, ou sahabi morta nae. Oile Isae Fitorre ikan ḳoisoin na. Borong tain ḳoisla, “Ami zudi sai, ami hirbar toshrif na ana forzonto he ono taḳouk, te tumar kita?”
JOH 21:24 Ou sahabie ita hoḳol befare shakki disoin ar leḳsoin. Amra zani, tan shakki hasa.
JOH 21:25 Hozrot Isae aro bout ḳam ḳorsoin. Ita zudi eḳ ek kori leḳa oito, te oto kitab oito, ita asta duniaiye dorlo na one.
ACT 1:1 11Mohamainno Tiofilas, Hozrot Isare behesto tulia neoar ag forzonto tain zeta talim disoin ar zeta zeta ḳorsoin i hoḳolta-u ami agor kitabo leḳsi.
ACT 1:2 Ze sahabi oḳolre tain basia loisla, tanre tulia neoar age Pak Ruhu dia erar gese osiot ḳorai gesoin.
ACT 1:3 Tan toklif ḳaimor bade tain zen zinda asoin iṭar bout kisimor alamot deḳaisoin. Sallish din dori tain sahabi oḳolre deḳa dia Allar bashshair bishoye batchit ḳorsoin.
ACT 1:4 Isae tara hokkolor loge ekḳano shorik oia ou hukum dila, “Tumra Zeruzalem taki zaio na, amar gaibi bafor oada ḳora ze danor ḳota tumra age amar gese huncho, er lagi ono bar sao.
ACT 1:5 Hozrot Ehiae to fanir maze toubar gusol ḳoraita, oile besh deri oito nae Allae tumrare Pak Ruhu dia gusol ḳoraiba.”
ACT 1:6 Tara hokkol ekḳano dola oia Isare zikaila, “Huzur, i shomoy kita Boni Israil oḳlor ato raijjo firot anba ni?”
ACT 1:7 Isae zuaf dila, “Ze oḳt ba zomana amar gaibi bafe tan nizor eḳtiaro raḳsoin, ita tumra zanar goroz nai.
ACT 1:8 Oile Pak Ruhu tumrar ufre ḳaim oia harle tumra gaibi bol faibae, ou bole Zeruzalem, asta Ehudia ar Shomoria elaḳa, ar duniar hesh shimana forzonto amar shakki oibae.”
ACT 1:9 Ou mator bade-u sahabi oḳlor souḳor samne Isare tulia neoa oilo, ar tain megor ṭukrar aoṛ oigela.
ACT 1:10 Isa zebla asmano uṭira i shomoy sahabi oḳole souk na firaia asmanor bae sairoila, ou shomoy dola ḳafoṛ finda duizon beṭa manush tarar ḳandat ubaia
ACT 1:11 ḳoila, “O Galilor manush oḳol, ikano ubaia asmanor bae sairiso ḳene? Zare tumrar ges taki tulia neoa oilo, ou Isare zelaḳan tumra behesto zaite deḳlae, ou laḳan tain firia-o aiba.”
ACT 1:12 Ou sahabi oḳol Zoytun namor faṛo taki Zeruzalemo firia aila. I faṛ Zeruzalem ṭaun tone tuṛa duroi.
ACT 1:13 Ṭauno firia tara ze goror ufror talat roita hou goro gela. Tara oila Fitor, Hannan, Iakub, Andrias, Filif, Tumas, Bortolmoy ar Moti, Alfir fua Iakub, muktizudda Saimon, ar Iakubor fua Ihuda.
ACT 1:14 Goro hamaia hoḳole milia ḳas dile dua ḳorat roila, erar loge asla imandar beṭin, Isar ma Moriom ar tan baiain.
ACT 1:15 Hou shomoy eḳdin Fitore onuman eḳ-sho bishzon mumin oḳlor maze ubaia ḳoila,
ACT 1:16 “Bai oḳol, Isare zera dorat aisil tarare fot sinaia nisil Ihuda, tar befare bout age Daud nobir muko Pak Ruhe zeta ḳoisla, Pak Kalamor i kota fura oar dorḳar asil.
ACT 1:17 He to amrar-u eḳzon asil, ar amrar loge torikar kezmotor lagi tare-o sahabi hishabe fosond ḳora oisil.”
ACT 1:18 Ou nafaki kamor ṭeḳa dia he eḳzora zomi loisil, ar ou zomino ufoit oia foṛia tar feṭ faṭia at-boṛ bar oilo.
ACT 1:19 Zeruzalemor hoḳol manshe ita hunchil, erlagi hoḳole ou zominre ḍaḳoin Akeldama ba ‘Lour Zomin’. Fitore aro ḳoila,
ACT 1:20 “Ou ḳota fobitro Zobur Shorifo ase: Tar boshot ḳana ḳali rouk, hono roar ḳeu na taḳouk. Tar godi aroḳzone fauk.
ACT 1:21 Erlagi Ehiae zebla toubar gusol ḳoraita hou shomoy taki, Isare amrar ges tone tulia neoar ag forzonto, zotodin Isa amrar loge sola-fira ḳorsila, otodin zera amrar dolo asil, erar maz tone Isa zen murda taki zinda oia uṭsoin, er shakki hishabe oinno aroḳzonre amra sahabi oḳlor dolo harani lagbo.”
ACT 1:23 Teu tara ou duizonre uba ḳoraila, Iusuf Barshabba, tan aroḳ nam Iustus; ar Matias.
ACT 1:24 Bade tara dua ḳorla, “O Mabud, tumi hoḳlor dilor ḳobor zano, Ihudae to tar nizor zagat zaoar lagi kezmot ar sahabi fodor ḳam bad dilaise, Ihudar bodla i duizonor maze tumi kare fosond ḳoro amrare sinaia deo.”
ACT 1:26 Heshe tara duizonor name loṭari marle Matiasor nam uṭlo; teu Matias ou egarozon sahabir loge zug oila.
ACT 2:1 Fonchaisha Idor din tara hoḳol eḳ zagat dola asla.
ACT 2:2 Ou shomoy asman taki tufanor laḳan eḳ aoaz oilo, tara ze goro boat asla i aoaze asta gor borigelo.
ACT 2:3 Tara deḳla, aguinor lukkar laḳan kitar ṭukrain aise, ar i lukkain tara hoḳlor ufre aia boilo.
ACT 2:4 Teu tara hoḳole Pak Ruhe kamil oila, ar ruhur gaibi bole tara alog alog bashae matta lagla.
ACT 2:5 I shomoy duniar hokkol deshor forezgar Ihudi oḳol Zeruzalemo asla.
ACT 2:6 I aoazor loge loge-u tara aia biṛ ḳorilla ar be-aḳol oigela, ḳaron erare zarzir nizor bashae mat-ḳota matte deḳla.
ACT 2:7 Dekia tara taijjub oia mata-mati korla, “Ou zera matra era hoḳol-u kita Galilor manush nae ni?
ACT 2:8 Zudi oy te amra kila zarzir nizor bashar buli erar ges taki hunram?
ACT 2:9 Amra to Partio, Madio, Ilamio, ar Meshofotamiar bashinda, Ehudia, Kappadokia, Fonto, Asiya,
ACT 2:10 Forugia, Pamfulia ar Mishor deshor manshe-o; Libiar Kurini elaḳar manshe, ino gurat aisoin oula Ruman oḳole,
ACT 2:11 zera Ihudi zati ba Ihudi dormor manush, ar Kritio, Arobi, amra hoḳole-u to zarzir nizor bashae Allar kudroti kamor ḳota erar muk taki hunram!”
ACT 2:12 Ou laḳan tara taijjub ar be-aḳol bonia eḳe-oinne zikaila, “Er mani kita?”
ACT 2:13 Ar baki oḳole ṭaṭṭa ḳoria ḳoilo, “Era to mod ḳaia matlami korer!”
ACT 2:14 Ita hunia Fitore ou egaro zon sahabir loge ubaia zure zure tarare ḳoila, “O Ihudi oḳol ar Zeruzalemor bashinda oḳol, afnara zania raḳoukka ar mon dia amar boyan hunoukka.
ACT 2:15 Afnara mono ḳorra era matal oigese, na, ashole ṭik nae, oḳon to ḳali shoḳal noyṭa bazer.
ACT 2:16 Iṭa to ou goṭona zar befare nobi Zuele ḳoisla:
ACT 2:17 Allae formaira, aḳeri zomanat oula goṭbo, ami amar ruhu hokkolor maze bezimu; teu tumrar fua-fuṛinte nobir laḳan batuni mat matba, tumrar zuan oḳole gaibi alamotor deḳa faiba, murobbi oḳole kuab deḳba.
ACT 2:18 Ou shomoy amar bonda-bandir ufre amar ruhu bezimu, tara nobir laḳan ohi koiba.
ACT 2:19 Ami ufre asmano bout keramoti deḳaimu, ar tole duniat bout nishana goṭaimu, lou, aguin ar ḳala-duma deḳaimu.
ACT 2:20 Mabudor i mohan ar ḳas din aibar age, shuruz andair oizibo, sand lour laḳan oizibo.
ACT 2:21 Ar oulan oibo, zekunu manshe Mabudor name ḍakile, he nazat hasil ḳorbo.
ACT 2:22 O Boni Israil oḳol, hunoukka, Nasarotor Isar mazdia Allae tan kudroti ar keramoti kam ḳoraia, afnaintor gese forman ḳorsoin, tain-u Isare faṭaisla, ar ita to afnara-o zanoin.
ACT 2:23 Alla, zein age-u zanoin ar foysala-o ḳoria raḳsoin, Isare afnaintor ato shofiba. Ar afnara be-din oḳlor atane tanre duk-koshṭor solibo dia zane marsoin.
ACT 2:24 Oile Allae moutor azab taki tanre ḳalas ḳoria zinda ḳorsoin, ḳaron moutor ḳemota asil na tanre ḳobza ḳorar.
ACT 2:25 Daude-o tan ḳota ḳoisoin: Ami hamesha munibre amar samne deḳtam, tain amar ḍain galat asoin, ami zanu ostir na oi.
ACT 2:26 Erlagi amar dil kushi oy, amar muk taki furti baroy, amar ḳaya ou ashae zita roibo,
ACT 2:27 ḳaron tumi amar zanre fatalo falaia toitae nae, tumar pak bondar shorilre fosa-gola oite ditae nae.
ACT 2:28 Tumi amare zindegir fot zanaiso. Tumar didaror maze ase furafur furti.
ACT 2:29 Bai oḳol, ou mohan-baf Daudor befare ami afnarare kula-kuli koiram, tain mara gesoin, tanre dafon ḳora oise, ar tan ḳoybor aiz-o oḳano ase.
ACT 2:30 Tain eḳzon nobi asla ar tain zanta, Allae ḳosom ḳoria i oada ḳorsoin zen, tan-u oarishor eḳzonre tan godit boaiba.
ACT 2:31 Erlagi ag tone dekia-u tain Allar oada ḳora bashsha, mani al-Mosir murda taki zinda oia uṭar befare ou ḳota ḳoisla, enre fatalo falaia toa oito nae, en ḳaya-o fosto nae.
ACT 2:32 Allae ou Isare-u zinda ḳoria tulchila, amra hokkol er shakki.
ACT 2:33 Allar ḍainor toḳto boibar takkot tanre-u deoa oise, gaibi bafor oada ḳora Pak Ruhu tain-u faisla, ar oḳon afnara zeta deḳra ar hunra ita tain-u ḳorsoin.
ACT 2:34 Daud to nize behesto hamaisoin na, oile tain ḳoisoin: Mabude amar munibre ḳoila, tumi amar ḍain galat bo,
ACT 2:35 ami tumar dushmon oḳolre tumar faor tolat falani forzonto bo.
ACT 2:36 Erlagi hokkol Boni Israile ou ḳota bala ḳori zanoukka, afnara zenre solibo gatisla, Allae ou Isare-u malik ar al-Mosi duio toḳt disoin.”
ACT 2:37 Ita hunia manshor dilo sel hamailo, tara Fitor ar sahabi oḳolre zikailo, “Baiainre, amra kita ḳortam?”
ACT 2:38 Fitore zuaf dila, “Mon firaukka, afnara hoḳole gunar mafir lagi Isa al-Mosir name toubar gusol ḳoroukka, teu afnara dan hishabe Pak Ruhu faiba.
ACT 2:39 I oada afnaintor lagi, afnaintor aolador lagi, zera duroi ase tarar lagi, zoto manshore amrar Mabud Allae tan ḳas bonda oibar lagi daot diba tara hokkolor lagi.”
ACT 2:40 Aro boutta ḳoia Fitore hushiar ar minot ḳori koila, “I zomanar naforman oḳlor ges taki afnaintor zan basaukka.”
ACT 2:41 Tan boyan hunia zera iman anla tara toubar gusol ḳorla, onuman tin azar manush i din ummot oḳlor loge shorik oila.
ACT 2:42 Tara sahabi oḳlor talim huna, tarar loge shorik oia al-Mosir mezbani kaoa, ar dua ḳorat hamesha ḳaim roita.
ACT 2:43 Teu hoḳole ḍoraito ḳaron sahabi oḳole bout keramoti ar muzeza ḳam deḳaita.
ACT 2:44 Hokkol imandar oḳol ekḳano roita ar zarzir dorḳari samana on taki nita.
ACT 2:45 Tarar zomi-zoma don-doulot besia zar zela dorḳar oula baṭia dita.
ACT 2:46 Tara forteḳ din Baytul-Mukaddoso ekḳano milta, ar kushi oia eḳloge shorol mone goro goro gia ḳana-fina ḳorta.
ACT 2:47 Tara Allar tarif ḳorat roita ar hokkol manshor mohobbotor manush oila. Zera nazat hasil ḳorta, Allae tarare-o ania dine dine erar loge shorik korta.
ACT 3:1 Eḳdin asor oḳtor nomazor lagi Fitor ar Hannan Baytul-Mukaddoso zaoat asla;
ACT 3:2 manshe forteḳ din eḳzon manshore boia ania Baytul-Mukaddosor ‘Shundor’ namor geiṭor gese toita, he zonmogoto lengṛa-atur asil, zera Baytul-Mukaddoso zain tarar gese bik saoar lagi tare hikano toa oito.
ACT 3:3 Fitor ar Hannanre Baytul-Mukaddoso hamanit dekia he tarar gese minot-ḳajji kori bik kuzilo.
ACT 3:4 Fitor ar Hannan tar bae dian dori saia ḳoila, “Amrar bae sao.”
ACT 3:5 Teu he tarar ges taki kunta faoar lalose dian dori sairoilo.
ACT 3:6 Fitore tare ḳoila, “Amrar gese to shuna-rufa kunta nai reba, oile zeta ase tumare dan ḳorram. Nasarotor Isa al-Mosir name aṭia zao.”
ACT 3:7 Ḳoia hari tain er ḍain ato doria usa ḳorla, ar loge loge-u tar fao ar gusit bol ailo.
ACT 3:8 He faldi uṭia ubailo ar aṭa shuru ḳorlo, aṭi aṭi falai falai Allar tarif ḳorte ḳorte erar loge oia Baytul-Mukaddoso hamaigelo.
ACT 3:9 Hokkol manshe tare aṭat ar Allar tarif ḳorat dekia
ACT 3:10 ere sinililo, igu deki ou manush, zegue Baytul-Mukaddosor Shundor namor geiṭo boia bik korto! Tar halot dekia manush asanoḳ taijjub oigelo.
ACT 3:11 Oile lengṛa hokire Fitor ar Hannanor ḳore oia gurae, manshe Fitoror i kame taijjub oia douṛia Sulaiman namor barindat tan gese ailo.
ACT 3:12 Ita dekia Fitore manshore ḳoila, “O Boni Israil oḳol, ere dekia afnara taijjub oigela ḳene? Amrar nizor firaki ba forezgarir gune tare solar shokti disi mone ḳoria, ḳene amrar bae dian dori sairoiso?
ACT 3:13 Ibrahim, Isʼhak ar Iakubor Alla, amrar baf-dada oḳlor Alla, tan afon bonda Isar mohima zair ḳorsoin, zenre afnara dushmonor ato shofi disla. Ar hakim Filate zebla tanre saṛi dita ḳori niot ḳorsla, i shomoy afnara Isare duroi horai disoin.
ACT 3:14 Afnara ou fak-forezgar manshore horai dia eḳzon kunire saṛanir lagi sufarish disoin.
ACT 3:15 Zein zindegi dan ḳoroin tanre afnara zane marilisoin, oile Allae tanre murda taki zinda ḳorsoin, amra er shakki.
ACT 3:16 Ar tan ufre iman anae, ou ze beṭare afnara sinra ar deḳra, hou Isar nam-u tare bolala ḳorse. Isar mazedi zeta iman foyda oy, ou imanor bole-u afnara hoḳlor samne tare bala ḳora oise.
ACT 3:17 “O bai oḳol, ami oḳon zani afnaintor murobbi-salish oḳlor laḳan afnara-o na-buzia i kam ḳorilisoin.
ACT 3:18 Oile Allae tan tamam nobi oḳlor mazdi al-Mosir toklifor befare age zotota zanaisoin, i hokkolta ou laḳan ḳori fura ḳorsoin.
ACT 3:19 Erlagi afnara mon firaukka ar Allar muki oukka, zate afnaintor guna oḳol fusia saf ḳora oy.
ACT 3:20 Te ou laḳan oḳt aibo, zebla Mabude hou Isare mani tan fosond ḳora al-Mosire bezia afnaintore tortaza ḳorba.
ACT 3:21 Allae hoḳoltare agor haloto firaiba, ita bout din age-u pak nobi oḳlor zoban dia ḳoisoin. Zotodin tan i oada fura na ḳorba, otodin Isa-o behestor maze roiba.
ACT 3:22 Musae to ḳoisla, ‘Mabud Allae tumrar lagi tumrar nizor manush oḳol taki amar laḳan eḳ nobi foyda ḳorba, tain tumrare zeta ḳoiba, tumra i hoḳolta-u amol ḳorio.
ACT 3:23 Zegue tan ḳota hunto nae, Allae ere nizor bondar ḳata taki fusia falai diba.’
ACT 3:24 Ar [Bashsha Daudor amolor] Shamuel nobi taki shuru ḳori zoto nobi oḳole kalam bataisoin, era hoḳole-u i oḳtor ḳota ḳoisoin.
ACT 3:25 Afnara to i nobi oḳlor oarish, ar hou ḳanunor-o oarish zeta Allae afnaintor baf-dada oḳlor loge ḳaim ḳorsila. Allae Hozrot Ibrahimre ḳoisla, ‘Tumar oarishor mazedi duniar hokkol zatie borkot faiba.’
ACT 3:26 Hou oarish, mani tan ḳas gulam Isare, Allae foyla-u afnaintor gese bezisoin, zate tain afnarare be-dini kam oḳol taki firaia hari borkot dein.”
ACT 4:1 Fitor ar Hannane zebla manshore boyan ḳorra ou shomoy imam oḳol, Baytul-Mukaddosor boṛo daroga ar Siddekia mozobor manush aḳta-u tarar gese aila.
ACT 4:2 Fitor ar Hannane manshore talim dira ar Isar mazdia-u murda oḳol hirbar zinda oia uṭar befare toblig korra dekia tara kub naraz oisla.
ACT 4:3 Tara Fitor ar Hannanre aṭok korla ar hainja oigesil ḳori erare bador din forzonto bondi kori toila.
ACT 4:4 Zera Fitoror boyan hunchila erar maze boute iman anla, teu imandar beṭaintor foriman fas azaror laḳan oilo.
ACT 4:5 Bador din Ihudir neta oḳol, murobbi-salish ar moulana oḳol eḳloge Zeruzalemo dola oila.
ACT 4:6 Hikano fordan imam Hanon, Kayafa, Iuhonna, Sikondor ar fordan imamor ḳesh-kuṭum oḳol-o azir asla.
ACT 4:7 Tara Fitor ar Hannanre tarar mazḳano uba ḳoraia zikaila, “Tumra kun bole ar ḳar name i kam ḳorrae?”
ACT 4:8 Teu Fitore Pak Ruhe kamil oia tarare ḳoila, “O murobbi saebain ar deshor buzurg oḳol,
ACT 4:9 eḳzon lengṛa-atur manshor balai korsi kori afnara aiz amrare zera ḳorra, manushgu kila bala oilo.
ACT 4:10 Te afnara hoḳole ar Boni Israil oḳole-o hunoukka, Nasarotor Isa al-Mosir name, zenre afnara solibo gatia zane marsla, zenre Allae murda taki zinda ḳorsoin, tan bole-u i manushgu afnaintor samne bala oia ubaise.
ACT 4:11 Tain hou fattor, zeṭare raz mestoir oḳole, mani afnara elami kori bad dilaisla, Pak Kitabor ḳota mafik hou fattor-u aiz ian kunar hoḳol taki zoruri kuṭi oise.
ACT 4:12 Toranir ḳemota ar ḳeuror gese nai, ḳaron asmanor tole ar zominor ufre oula ar kunu nam deoa oise na, zen name amra rehai faimu.”
ACT 4:13 Fitor ar Hannanor shaosh dekia, era zen oshikkito shamainno manush ita zania tara taijjub oigela, ar era Isar loge asla ḳorio sinla.
ACT 4:14 Ze beṭa bala oisil, he erar loge ubairoise dekia erare ar kunta ḳoar shaosh oilo na.
ACT 4:15 Bade mozlis taki erare bare zaoar hukum dia tara hoḳole foramish ḳorat boia
ACT 4:16 ḳoila, “I manshore loia amra kita ḳortam? Era to bout boṛo ek keramoti kam ḳorse ar ita to asta Zeruzalemor hoḳole zane, ar amra-o iṭare oshikar ḳortam fariar na.
ACT 4:17 Oile manshor gese zanu i kota ar zana-zani na oy, erlagi erare ḍor deḳail ouk, zate i zonor name tara ar ḳeuror gese kunta na ḳoy.”
ACT 4:18 Bade tara Fitor ar Hannanre hirbar anaia ou hukum dila, “Tumra Isar name ar kunudin eḳdom kichchu ḳoio na, kunuzat nosiot-o ḳorio na.”
ACT 4:19 Fitor ar Hannane tarare zuaf dila, “Amra afnaintor hukum mantam, na Allar hukum mantam? Allar nozoro kunḳan ṭik, ita afnara-u bisar ḳoroukka.
ACT 4:20 Amra zeta deḳsi ar hunchi, ita na ḳoia to taḳtam fari na.”
ACT 4:21 Teu tara Fitor ar Hannanre aro ḍor deḳaia saṛi dila. Manshore ḍoraia tara erare kunu shaza dita farla na, ḳaron zeta goṭsil ita dekia hoḳol manshe Allar proshongsha ḳorat asil.
ACT 4:22 Ze manushgu keramoti kamor mazdi bala oisil tar boyosh sallish bosoror beshi asil.
ACT 4:23 I bisar taki tarare saṛar bade Fitor ar Hannan tarar afon manshor gese gelagi, gia boṛo imam oḳole ar murobbi-salish oḳole-o tarare zeta zeta ḳoisla, ita hokkolta zanaila.
ACT 4:24 Ita hunar bade tara hoḳole eḳ dile Allar gese zure zure dua ḳorla, “O malik, tumi asman, zomin, doria ar itar maze zotota ase hokkolta foyda ḳorso.
ACT 4:25 Tumi tumar gulam, amrar ḳandanor baf Daudor zobano Pak Ruhur mazdia oula ḳoiso, Hokkol zatie ḳene ostir oia sillaira? Kior lagi manshe behuda fondi korer?
ACT 4:26 Zogotor bashsha oḳol bigṛi gelo, raza oḳol ekḳano dola oilo, Mabudor birudde ar tan al-Mosir birudde.
ACT 4:27 Tumar fobitro gulam Isa, zenre tumi al-Mosi koria duniat faṭaiso, tan birudde Raza Herud ar Fontio Filat, ou shohoro o-Ihudi ar Boni Israilor loge ekḳano oisil.
ACT 4:28 Tumar morzi ar tumar kudrote zeta goṭar lagi tumi age-u ṭik kori raḳsilae, tara outa-u goṭaise.
ACT 4:29 Oḳon O malik, tara amrare kila ḍor deḳaira, tumi kial ḳoro, tumar gulam oḳolre oula takkot deo zate, furafur shaosh ḳoria tumar kalam toblig kortam fari.
ACT 4:30 Bemari oḳlor shifar lagi tumar at mubarok baṛai deo, ar tumar pak gulam Isar name muzeza ar keramoti deḳanir tofik deo.”
ACT 4:31 Tarar dua ḳorar bade ze zagat tara dola oisla, hi zaga ḳafia uṭlo. Ar tara hoḳole Pak Ruhe kamil oia shaosh ḳoria Allar kalam toblig korat roila.
ACT 4:32 Zera al-Mosir ufre iman anchila, tarar eḳ mon ar eḳ dil asil. Tara eḳzone-o nizor don-doulotre nizor ḳoia dabi korta na, hokkolta-u hoḳlor dorḳar moto ḳoros ḳorta.
ACT 4:33 Sahabi oḳole kub himmot ḳoria, Hozrot Isar murda taki zinda oia uṭar bishoye toblig korta, ar tara hokkolor ufre Allar ḳas rohomot asil.
ACT 4:34 Tarar maze ḳeu obabi asla na, ḳaron zerar zomin ba baṛi asil tara ita hoḳolta besia,
ACT 4:35 sahabi oḳlor gese ania dan ḳorilita, bade zar zela goroz tare oula deoa oito.
ACT 4:36 Ar Iusuf name Lebir bongshor eḳzon manush asla, tan baṛi Saipras dif, sahabi oḳole tanre ḍakita Barnabas, mani utshaho zugaora,
ACT 4:37 tan eḳzora zomin asil, tain-o tan zominḳan besia ṭeḳa ania sahabi oḳlor ḳodomo dan ḳorla.
ACT 5:1 Ou shomoy Ononio name eḳzon manush ar tar bou Safirae tarar-o eḳzora zomin besila,
ACT 5:2 besia tar bour zana monte-u zominor kisu ṭeḳa nizor lagi lukaia, baki ṭeḳa sahabi oḳlor faot dila.
ACT 5:3 Teu Fitore ḳoila, “Ononio, Shoytane ḳemne tumar dilre doḳol ḳorlo, tumi Pak Ruhur gese kila misa matlae, ar zomin besar ṭeḳa kisu lukai raḳlae?
ACT 5:4 Besar age zominḳan kita tumar asil na ni? Ar besar bade-o to i ṭeḳa tumar eḳtiaro asil, te ḳene tumar bitre ita hamailo? Tumi to manshor gese misa matso na, Allar gese-u misa matlae.”
ACT 5:5 Ita hunar loge loge-u Ononio maṭit foṛia morigelo. Ar zera i goṭona hunlo tara hoḳole-u kub ḍoraigelo.
ACT 5:6 Bade zuan oḳole aia tare ḳafon findaia bare nia maṭi dila.
ACT 5:7 Onuman tin gonṭa bade tar bou-o hono ailo, oile age kita goṭse tai zanto na.
ACT 5:8 Teu Fitore taire zikaila, “Amare ḳo sain, tumra i zomin oto ṭeḳae besislae ni?” Tai koilo, “Ji oy oto ṭeḳae-u.”
ACT 5:9 Ou Fitore ḳoila, “Mabudor ruhre forikka ḳorar lagi tumra ḳene eḳmot oilae? Deḳo, zera tumar zamaire dafon ḳorse tara oḳon dorzar samne aior, tara tumare-o bare loia zaibo.”
ACT 5:10 Loge loge-u Safira Fitoror faot foṛia morigelo, ar ou zuan oḳole goro aia taire mora dekia bare nia zamair ḳandat maṭi dila.
ACT 5:11 Teu hokkol zomat, ar zoto manshe ita hunlo, hoḳole-u kub ḍorailo.
ACT 5:12 Sahabi oḳlor atane manshor maze bout muzeza ar keramoti nishana zair oito, tara hoḳole eḳ dil oia Baytul-Mukaddosor Sulaimanor barindat dola oita.
ACT 5:13 Zudio manshe tarare ijjot ḳorta, ta-o ar ḳeu tarar loge mishte shaosh ḳorlo na.
ACT 5:14 Ar dine dine bout beṭain-beṭinte iman ania Allar dolo hamanit lagla.
ACT 5:15 Ar manshe bemari oḳolre bare ania fotor ḳandae ḳandae hutaia ar bisna fatia boaia toita, zate Fitore sola-firar shomoy ontoto tan seba ḳan-o tara ḳeuror ufre foṛe.
ACT 5:16 Ar Zeruzalemor ḳanda-ḳasar gauain taki manshe tarar bemari oḳolre ar zinor asor-ala manshore loia aia biṛ zomaito, tara hokkol-u bala oito.
ACT 5:17 Ita dekia fordan imam ar tan logor Siddekia oḳol ingshae zoli-fuṛi uṭla,
ACT 5:18 ar sahabi oḳolre doria shorḳari zelo haraila.
ACT 5:19 Oile raitku Mabudor eḳzon firistae zelor duar kulia tarare bare ania ḳoila,
ACT 5:20 “Tumra zao, Baytul-Mukaddoso ubaia manshor gese noya zindegir ḳota ḳo.”
ACT 5:21 Ita hunia tara kub shoḳale Baytul-Mukaddoso hamaia manshore nosiot ḳorat lagla. Ibae fordan imam ar tan logor hoḳole aia deshor fotua komiṭire ar Boni Israilor murobbi oḳolre ekḳano dola ḳorla, ar sahabi oḳolre anar lagi zel ḳanat manush faṭaila.
ACT 5:22 Oile tara gia erare zel ḳanat faila na. Ou tara firia aia ḳobor ḳoila,
ACT 5:23 “Amra deḳsi, zelor dorza shokto ḳori lagail, ar duaro duaro faradar ubai roisoin, oile duar kulia bitre ḳeurore failam na.”
ACT 5:24 Ita hunia Baytul-Mukaddosor boṛo darogae ar boṛo imam oḳole beokuf oia sintat foṛla, er fol kita oibo.
ACT 5:25 Ermaze kunu eḳzone aia tarare ḳobor dilo, “Deḳoukka, afnara ze manshore zelo haraisla, tara Baytul-Mukaddoso ubaia manshore nosiot ḳorer.”
ACT 5:26 Teu boṛo darogae tan sifai dolre loia hono gia sahabi oḳolre doria anla, oile zur-zobordosti korla na ḳaron tara ḍoraigela, manshe tarare fattordi marta faroin.
ACT 5:27 Bade sahabi oḳolre ania tara fotua komiṭir samne uba ḳoraila, ar fordan imame erare zikaila,
ACT 5:28 “Amra tumrare doṛaia hukum dislam, i name kunu nosiot na ḳorar lagi, ta-o asta Zeruzalem zuṛi tumrar talime boriliso, ar ou zonor kunor bar amrar ufre falaitae sairae.”
ACT 5:29 Teu Fitor ar tan logor sahabi oḳole zuaf dila, “Manshor hukum manar saite Allar hukum mana to forz.
ACT 5:30 Amrar baf-dadar Allae hou Isare murda taki zinda ḳorsoin, zenre afnara gaso loṭḳaia zane marsla,
ACT 5:31 Allae tanre-u toraneala ar bashsha banaia nizor ḍain galat boibar ijjot dan ḳorsoin, zate tain Boni Israil oḳolre touba ḳorar shuzug, ar gunar mafi dita faroin.
ACT 5:32 Amra i hoḳoltar shakki, ar Allae tan nizor hukum manra bonda oḳolre ze Pak Ruhu disoin, hou Pak Ruh-o er shakki.”
ACT 5:33 Ita hunia tara gusae aguin oigela, ar sahabi oḳolre zane marar lagi niot ḳorla.
ACT 5:34 Oile ou mozlis taki Gomoliel name Forishi mozobor eḳzon manush ubaila, tain eḳzon namḳora moulana asla, hokkole tanre ijjot ḳorto, tain sahabi oḳolre tuṛa bare neoar hukum dila.
ACT 5:35 Bade tain fotua komiṭir manshore ḳoila, “O Boni Israil oḳol, i manush oḳolre tumra zeta ḳortae sairae i befare hushiar o.
ACT 5:36 Huno, ou ḳoydin age Tuda name eḳzon manush aia kub boṛo-manshi deḳaisil, ar onuman sair-sho manush tar dolo hamaisil. Tare kun ḳora oilo, ar tar dolor hoḳol manush sairobae sitrigese, ḳeu dolo roise na.
ACT 5:37 Bade Galilor Ehuda aia deshor manush gononar bosor, eḳdol manshore tar dolo haraia fitna ḳaṛa ḳorlo, he-o morigelo, ar tar logor hokkol-o sitrigese.
ACT 5:38 Ita dekia ami tumrare ḳoiram, tumra i manush oḳolre kunta ḳorio na, tarare saṛi deo, tarar ḳam-ḳaz ar niot zudi manush taki oy, te ita emne-u binash oizibo.
ACT 5:39 Ar zudi Alla taki oy, te tumra tarare tamaitae fartae nae, ki zani heshe deḳa zaibo zen, tumra-u Allar birudde jihad ḳorrae.” Gomolielor mate neta oḳol razi oila,
ACT 5:40 tara sahabi oḳolre ḳasat anaia singladi marla ar ḳoila, “Tumra Isar name kunta matio na.” Heshe tarare saṛi dila.
ACT 5:41 Teu sahabi oḳole, Isar namor lagi beijjoti kamanir zuka oisoin gotike kushi oia furti kori kori mozlis taki bar oia gela.
ACT 5:42 Sahabi oḳole forteḳ din Baytul-Mukaddoso ar baṛie baṛie gia nosiot ḳorta, ar Isa-u zen al-Mosi ikan toblig kora bad dita na.
ACT 6:1 Hi shomoy ummot oḳlor foriman baṛte-u asil, ar ummot oḳlor maze zeta Ihudi oḳole Iunani bashae matta, tara Ibrani bashae matra Ihudi oḳlor loge ḳaijja ḳorta lagla. Tara dush deḳaila, forteḳ din ḳani bilanir shomoy tarar ṛaṛi beṭinte kunta fain na.
ACT 6:2 Teu hou barozon sahabie hoḳol ummotre eḳ zagat dola ḳoria ḳoila, “Amra Allar kalamor toblig bad dia, ḳana-finar befare besto oaḳan ṭik nae.
ACT 6:3 Oile bai oḳol, tumrar maz taki oula shatzon shunam-ala manshore fosond ḳoro, zera Pak Ruhe ar hekmote fura kamiab ase, amra tarar ufre i kamor zimma dilaimu.
ACT 6:4 Ar amra kalamor kezmot ar dua ḳorar ḳamo ḳaim roimu.”
ACT 6:5 Teu hokkol manush shanti oila, tara Pak Ruhu ar imane kamil Stifanre fosond ḳorla, tan loge Filif, Foḳor, Nikanor, Timun, Farmina ar Antiokia ṭaunor noya Ihudi Nikulaere basia nila.
ACT 6:6 Bade tara ou shatzonre sahabi oḳlor gese loia aile, sahabi oḳole dua ḳoria tarar ufre at raḳla.
ACT 6:7 Ar Allar kalam sitria sairobae fosigelo, teu Zeruzalemo ummotor foriman kub zoldi kori baṛto laglo, Ihudi imam oḳlor maze-o bout zone al-Mosir ufre iman anla.
ACT 6:8 Stifan Allar rohomot ar himmote kamil oia, manshor maze bout keramoti ar muzeza ḳam ḳorta lagla.
ACT 6:9 Ihudir ze mosidre azad-oa gulam oḳlor mosid ḍaḳa oito, hou mosidor ḳoyzon manush, kunu kunu Kurini, Alekzandria, Kilikia ar Asiya deshor kisu manshe Stifanor loge ḳaijja-torko ḳorat lagla.
ACT 6:10 Oile Stifane Pak Ruhur bole kub aḳoldar manshor laḳan tarar loge matae, tara tan loge matia kulaito farsil na.
ACT 6:11 Teu tara ḳoyzon baze manshore gush dia oḳan hikai dilo, “Tumra ḳoio, amra hunchi ou beṭae Hozrot Musa ar Allar birudde kufuri mat mater.”
ACT 6:12 Ota ḳori tara manshore, murobbi oḳolre, ar alim shomazre Stifanor birudde bigṛailo, ar tanre zobordosti kori doria deshor fotua komiṭir samne bisaro anlo.
ACT 6:13 Ar misa shakki oḳole ḳoila, “Ou beṭae hamesha Musar shoriotor birudde ar ou fobitro mukamor birudde-o mate.
ACT 6:14 Amra hunchi he ḳor, hou Nasarotor Isae i Baytul-Mukaddos bangilibo ar Musa nobie amrar lagi ze shoriot toia gesoin, ita bodlailibo.”
ACT 6:15 I shomoy zera fotua komiṭit boat asla tara hoḳole dian dori Stifanor bae saia deḳla, tan muk firistar mukor laḳan oigese.
ACT 7:1 Teu fordan imame Stifanre zikaila, “Ita kita hasau ni?”
ACT 7:2 Stifane zuaf dila, “O bai oḳol, baba oḳol, hunoukka, amrar mul baf Ibrahim zebla Haran shohoro roar age Meshofotamiat asla, hou shomoy Allae tanre didar dia ḳoisla,
ACT 7:3 ‘Tumi tumar desh ar ḳesh-kuṭum saṛia roana deo, ami tumare ze desh deḳaimu hou desho zao.’
ACT 7:4 Ou tain Kolodio oḳlor Babil desh taki bar oia, Haran shohoro boshot ḳorla; ar tan bafor moutor bade Allae tanre hon taki i desho anchoin, zeḳano afnara oḳon boshot ḳorra.
ACT 7:5 Ta-o Allae ino Ibrahimre tan nizor bolte kunta-u dila na, fao toibar zaga ḳan-o na, oile Allae tan loge oada ḳorla, tanre ar tan oarish oḳolre ou zominor malikana diba, zudio i shomoy Ibrahimor kunu aolad oisoin na.
ACT 7:6 Allae tanre ḳoila, ‘Tumar aolad oḳol bidesho musafir roiba, manshe tararedi gulami koraiba, ar sair-sho boros tarar ufre zulum solbo.’
ACT 7:7 Allae eoḳan-o ḳoila, ‘Ze zatie tararedi gulami koraiba, ami hi zatir bisar foysala ḳormu; bade tara hi desh taki bar oia aia, ou zagat amar ebadot ḳorba.’
ACT 7:8 Allae tanre mosolmani korar hukum dila; heshe Ibrahimor fua Isʼhakor zonom oilo, ar tain aṭ dinor din tar mosolmani koraila. Bade Isʼhake Iakubre, ar Iakube tan fuain baro ḳandanor barozon bafor mosolmani koraila.
ACT 7:9 “Hou ḳandanor baf oḳole ingsha ḳoria Iusufre besilaile, tanre Mishor desho neoa oilo. Oile Alla Iusufor loge loge asla,
ACT 7:10 tain Iusufre hoḳol toklif taki hefazot ḳorla, Mishoror bashsha Feraunor nozoro doya ar kamiabi dan ḳorla; teu Feraune tanre Mishoror hakim ar asta razbaṛir deḳa-hunar bar dila.
ACT 7:11 Bade fura Mishor ar Kenan desho nidan deḳa dilo erlagi manshor kub durgoti oisil, ar amrar baf-dada oḳol-o ḳanir obabo foṛla.
ACT 7:12 Oile Mishoro foshol ase hunia, Iakube amrar baf-dada oḳolre foyla bar hikano faṭaila.
ACT 7:13 Bade dusrabaror bala Iusufe tan baiainre zanaila tain ḳe, ar Feraune Iusufor foribarre sin faila.
ACT 7:14 Iusufe tan baba Iakub ar nizor ḳesh-kuṭum milaia hokkoltae fosottoir zonre ḳobordi anaila.
ACT 7:15 Iakub Mishoro aila, heshe tain ar amrar baf-dada oḳol-o mara gela.
ACT 7:16 Tarar lash Shikimo ania ḳoybor deoa oilo, i kobrostan Ibrahime Shikim shohoror Homuror ḳandanor ges taki rufar ṭeḳa dia ḳorid ḳorsla.
ACT 7:17 “Ibrahimor gese Allae zeta oada ḳorsila, hi oada furon oar shomoy zebla ḳasai gelo, i shomoy Mishoro amrar manshor foriman bout oigese.
ACT 7:18 Heshe Mishoro eḳ noya bashsha oila, ein Iusufor befare kunta zanta na.
ACT 7:19 Hi bashshae amrar manshore ṭogaita ar amrar baf-dada oḳlor ufre kub zulum ḳorta, tan niot asil erar huruttain zonmor bade-u zate bare falai deoa oy, ar tara mori zain.
ACT 7:20 Hou shomoy Hozrot Musar zonom oilo, Allar nozoro tain kub shundor asla. Tin mash forzonto tain tan ma-bafor baṛit asla.
ACT 7:21 Bade tanre bare falai deoa oile, Feraunor fuṛie tanre nia nizor fua banaia falia boṛo ḳorla.
ACT 7:22 Musa Mishorio ilim ar adob-ḳaislote boṛo oila, tain ḳotae ar ḳame himmoti asla.
ACT 7:23 Bade Musar boyosh zebla sallish boros oilo, ou tan dilor maze nizor Boni Israili bai oḳolre deḳa-huna ḳorar kial oilo.
ACT 7:24 Tain bar oia deḳla, eḳzon Mishorie eḳ Israilir ufre zulum ḳorer, tain hou Israilire shaijjo ḳorat gela, ar Mishorire zane maria er bodla loila.
ACT 7:25 Musae mone ḳorsila tan zatir manshe buzba zen, Allae tanre dia-u tarare uddar ḳorba; oile tara ita buzla na.
ACT 7:26 Bador din Musae duizon Israilire mair ḳorat dekia, tarare mil-mish ḳorar niote ḳoila, ‘Oi tumra to bai bai, te tumra ḳene eḳzone aroḳzonor loge maramari korrae?’
ACT 7:27 Oile ze manshe bad bebohar ḳorat asil, he Musare ṭela mari falaia ḳoilo, ‘Oba, tumare ḳegie amrar ufre salish ar hakim banaise?
ACT 7:28 Ḳail zela hou Mishorire kun ḳorso, amare-o ola ḳortae sao ni?’
ACT 7:29 Ikan hunia-u Musae bagia Madian desho gelagi, ar hikano tan dui fuar zonom oilo.
ACT 7:30 “Bade aro sallish boros guzori gele, Tur faṛor ḳandat morubumit, aguin zalail zonglar maz tone eḳ firistae Musare doroshon dila.
ACT 7:31 Musae ita dekia ekkere taijjub bonigela, ar bala ḳori deḳar niote ḳandat zaira, ou shomoy Mabudor aoaz hunla,
ACT 7:32 ‘Ami tumar baf-dadar Alla, Ibrahim, Isʼhak ar Iakubor Alla.’ Teu Musae ḍoraia ḳafa shuru ḳorla, ar bala ḳori deḳar shaosh faila na.
ACT 7:33 Mabude tanre ḳoila, ‘Tumar faor zuta kulilao, ḳaron tumi zeno ubaiso ikan pak zaga.
ACT 7:34 Huno, ami Mishor desho amar proza oḳlor toklif deḳsi, ami tarar ahazari hunchi, tarare uddar ḳorar lagi lamia aisi, oḳon ami tumare Mishor desho firot faṭaimu.’
ACT 7:35 “Ein hou Musa, zare Israili oḳole ou ḳota ḳoia firot disil, ḳe tumare salish ar hakim banaise? Tanre-u Allar ze firistae zonglar maze deḳa disla, hou firistar atane Boni Israilor salish ar toraneala banaia faṭaila.
ACT 7:36 Ar ou Musae-u Mishoror Nil doria ar morubumit sallish boros bout keramoti ar muzeza ḳam ḳoria, Mishor desh taki Israili oḳolre bar ḳori ansla.
ACT 7:37 “Ein hou Musa, zein Boni Israilre ḳoisla, Allae tumrar lagi tumrar nizor manush taki, amar laḳan eḳzon nobire beziba.
ACT 7:38 Ou Musa-u to morubumit amrar baf-dada Boni Israilor loge asla. Ar ze firistae Tur faṛo batchit ḳorsila, ou Musar loge-u tain matisla. Ar amrare dibar lagi zinda-kalam ou Musar gese-u deoa oisil.
ACT 7:39 “Oile amrar baf-dada oḳole Musar hukum manta saila na, tara Musare horai toia mone mone hirbar Mishoror bae niot ḳoria Harunre ḳoila,
ACT 7:40 ‘Amrare fot sinaia loia zaoar lagi devta banai deukka. Ḳaron ze Musae Mishor desh taki amrare bar ḳori anchoin, tan dosha kita oise, amra to zani na.’
ACT 7:41 Ou shomoy tara gorur basuror laḳan eḳ murti banaila, ar ou murtir name boli dila, nizor ator banail murtire loia tara furti-amud ḳorla.
ACT 7:42 Oile Allae naraz oia tarar log saṛi dila, ar tarare asmanor san-shuruz, terar pujat buṛai toila; zela nobi oḳlor kitabo leḳsoin: O Israil zati, morubumit hi sallish boros, tumra amar name kunu foshu kurbani dislae ni?
ACT 7:43 Na, tumra to Mulok devtar murti, ar Rifon devtar tera banai kando loia gurso. Hou duio futul to puja ḳorar niote banaislae, erlagi ami tumrare Babil deshor hofaro bonobash dimu.
ACT 7:44 Te shahadot tambur Kaba Shorif morubumit amrar baf-dadaintor gese asil. Tain Musare hukum disla, tumi zelaḳan noksha deḳlae, ou laḳan ḳori iṭa tiar ḳoro.
ACT 7:45 Amrar baf-dada oḳole hi Kaba Shorif faia, tarar amir Iusar atane nizor loge ḳori amrar i desho anchila, tara zebla hi desho hamaisil i shomoy Allae tarar samon taki hinor manshore ḳedai disla. Hi tambu Hozrot Daudor amol forzonto ou desho asil.
ACT 7:46 “Daude Allar rohomot hasil ḳorsila, ar Iakubor Allar name ekkan gor banaibar arzi korsla.
ACT 7:47 Oile Hozrot Sulaimane tan lagi hi gor banaisla.
ACT 7:48 Ta-o Allatala to manshor ator banail goro boshot ḳoroin na; zela nobie ḳoisoin,
ACT 7:49 Mabude ḳoin, Behest amar toḳt, dunia amar fao toibar zaga, tumra amar lagi kizat gor banaibae? Amar ziranir zaga kuai?
ACT 7:50 I hokkolta kita amar nizor ate banaisi na ni?
ACT 7:51 “O gaṛteṛar zat! Ḳan ar dilor mosolmani na ḳorail zat! Tumra hamesha Pak Ruhur duar bond ḳori to. Tumrar baf-dadain zela asla, tumra-o oula oiso.
ACT 7:52 Tumrar baf-dadainte kun nobir ufre zulum ḳorsoin na? Tara to hou nobi oḳolre zane-o marse, zera age i dindar zon aibar ḳota elan ḳorsoin. Ou dindar zonre oḳon tumra-o dushmonor ato shofia zane maraiso.
ACT 7:53 Firista oḳlor mazdi nazil oa shoriot tumrare deoa oisil, oile ita amol ḳorso na.”
ACT 7:54 Ita hunia-u tara gusae aguin oigela, ar dat kiṛi-miṛi kora dorla.
ACT 7:55 Oile Stifane Pak Ruhe kamil oia behestor bae dian dori saia Allar shan-tozolli deḳla, ar Isare Allar ḍain bazut uba deḳla.
ACT 7:56 Teu tain ḳoila “Deḳoukka, ami deḳram behest kula ase, ar Isa bin-Adom Allar ḍaine ubai roisoin.”
ACT 7:57 Ar tara ḳano angul dia eḳloge sillaia Stifanor ufre uṛia gia foṛla.
ACT 7:58 Tanre ṭania shohoror bare nia fattor marat lagla; ar badi oḳole zarzir ḳafoṛ kulia Shoul namor eḳ zuanor faor ḳandat toila.
ACT 7:59 Manshe zebla Stifanre fattor marra, ou shomoy tain dua ḳoria ḳoila, “O Malik Isa, amar ruhre kobul ḳoroukka.”
ACT 7:60 Ḳoia-u tain aṭu gala dia zure sillaia ḳoila, “Malik, erar i gunare amolo dorio na.” Oḳan ḳoia-u tain aḳeri dom saṛi dila. Ar Shoule hono Stifanor kunor hukumor loge shae dila.
ACT 8:1 Hidin taki Zeruzalemor zomator ufre kub zulum-mosibot ḳaṛa oilo, erlagi kali sahabi oḳol bade ar hoḳole-u Ehudia ar Shomoria elaḳar zagae zagae sitri gela.
ACT 8:2 Ḳoyzone milia Allaraia manush Stifanre dafon ḳorla ar tan lagi bout ahazari korla.
ACT 8:3 Oile Shoule zomatre binash ḳorar niote, goro goro hamaia imandar beṭain-beṭinre bondi kori ṭania sesraia zel ḳanat haranit lagla.
ACT 8:4 Teu zera sairobae sitri gesil, tara hokkol zagat guri guri Injilor kush-ḳobri toblig korla.
ACT 8:5 Ar Filif Shomoriar eḳ shohoro gia al-Mosir befare toblig korla.
ACT 8:6 Manshe Filifor boyan hunia ar tan keramoti kam oḳol dekia, dian dori eḳ dile tan nosiot hunla.
ACT 8:7 Ḳaron boutor ges taki but oḳol zure zure sillaia saṛia gelo, ar bout ordong bemari ar lengṛa oḳol bala oila.
ACT 8:8 Ita dekia hi shohoror manush kub kushi oila.
ACT 8:9 Oile hikano Saimon namor eḳzon manshe bout din dori zadu-ṭunar ḳam ḳorto, Shomoriar manshore danda lagaia he nizore eḳzon kamil pir ḳoia dabi korto.
ACT 8:10 Ar huru-boṛo hoḳole tar ḳotar dam dito, manshe ḳoito, Allar ze kudrotre ḳas kudrot ḳoin, i beṭa oilo hou ḳas kudroti beṭa.
ACT 8:11 Manshe-o tar ḳotamoto solto ḳaron bout din dori he tar zadu-ṭuna deḳaia tarare taijjub banaisil.
ACT 8:12 Oile Filife zebla Allar bashshai ar Isa al-Mosir befare kush-ḳobri toblig korla, ar manshe tan toblige iman anla, i shomoy beṭain-beṭinte aia toubar gusol ḳorla.
ACT 8:13 Hou Saimon-o iman ania toubar gusol ḳoria Filifor ḳore ḳore roila, bout keramoti ar boṛo boṛo kudroti kam hasil or dekia taijjub oigela.
ACT 8:14 Zeruzalemor sahabi oḳole zebla hunla, Shomoriar manush oḳole Allar kalamor ufre iman anchoin, teu tara Fitor ar Hannanre erar gese faṭaila.
ACT 8:15 Fitor ar Hannan aia tarar lagi dua ḳorla, zate tara Pak Ruhu fain.
ACT 8:16 Ḳaron oḳono tarar ufre Pak Ruhu nazil oise na, tara ḳali Hozrot Isar name toubar gusol ḳorsoin.
ACT 8:17 Fitor ar Hannane tarar ufre at raḳla, teu tara Pak Ruhu faila.
ACT 8:18 Ar Saimone zebla deḳla, sahabi oḳlor at raḳar ḳarone Pak Ruhu miler, ou tain ṭeḳa ania erar gese dia ḳoila,
ACT 8:19 “Amare-o ou ḳemota deukka, zate ami keuror ufre at raḳle he-o ou Pak Ruhu fae.”
ACT 8:20 Fitore tare ḳoila, “Tumar rufa tumar loge-u binash ouk, tumi mono ḳorso Allar dan ṭeḳadi korid ḳora zae.
ACT 8:21 Amrar i kamo tumar kunu bag nai, ḳaron Allar nozoro tumar dil shorol nae.
ACT 8:22 Erlagi i nazaiz ḳam taki tumar dil firao. Ar Allar gese minot-ḳajji koro, kiba tumar dilor i nazaiz kial tain maf ḳorilita faroin.
ACT 8:23 Ami deḳram, tumar dil lifshae bora ar tumi gunar maze bondi oiroiso.”
ACT 8:24 Teu Saimone ḳoila, “Afnara Allar gese amar lagi dua ḳoroukka, zate afnara zeta zeta ḳoisoin ita zanu amar ufre na ae.”
ACT 8:25 Bade Fitor ar Hannane malikor kalam toblig koria Zeruzalemo firot zaoar foto, Shomoriar bout gaut kush-ḳobri toblig kori kori gela.
ACT 8:26 Eḳdin Allar eḳ firistae Hozrot Filifre ḳoila, “Uṭo, douknor ze fot Zeruzalem taki Gaza ṭaunor bae gese hou fote roana deo.” I fot asil morubumit.
ACT 8:27 Teu Filif uṭia hobae roana dila, zaite zaite foto Itiopia deshor Kandaki ranir eḳzon boṛo raz ḳazanchir loge tan mulaḳat oilo, hi kazanchi asla na-mord, ar ranir hokkol don-rotnor zimmadar. Allar ebadot-bondegi korar lagi ein Zeruzalemo aisla.
ACT 8:28 Bade baṛit zaoar bala foto tan nizor guṛar garit boia Ishaya nobir kitab tilaot ḳorat asla.
ACT 8:29 Ou shomoy Pak Ruhe Filifre ḳoila, “Ou gaṛir ḳandat zao, ar en loge log doro.”
ACT 8:30 Teu Filife douṛia ou gaṛir ḳandat gia hunla, ein Ishaya nobir kitab tilaot ḳorra; Filife tanre zikaila, “Afne zeta tilaot ḳorra itar mani buzra ni?”
ACT 8:31 Hein ḳoila, “Ḳeu buzaia na dile ami kemne buzmu?” Ou tain Filifre garit uṭia tan ḳandat boar lagi minot ḳorla.
ACT 8:32 Hein kitabor ze ayat tilaot ḳorat asla, ita oilo, Zobo ḳorar lagi meṛare zela nein, marar niote tanre oula neoa oilo, ruma ḳaṭrar samne meṛa-baichcha zela nirai roy, oula tain-o zoban kulla na.
ACT 8:33 Tain beijjot oila, tanre be-insaf ḳora oilo. Tan oarishor ḳota ḳegie ḳoito farbo? Tan zanre dunia taki kaṛia neoa oisil.
ACT 8:34 Hou ḳazanchie Filifre ḳoila, “Ḳoukka sain, nobie ḳar befare ita ḳoisoin? Nizor befare na ar ḳeuror?”
ACT 8:35 Filife zoban kulia Pak Kalamor ou ayat taki loia Isar kush-ḳobri forzonto tan gese toblig korla.
ACT 8:36 Foto zaite zaite tara faniala eḳ zagat aia fosla, teu hi kazanchie ḳoila, “Ou deḳoukka ono fani ase, te ami toubar gusol ḳorte kunu bada ase ni?”
ACT 8:38 Ḳoia tain guṛar gaṛi uba ḳorar hukum dila, Filif ar hou na-mord ḳazanchi duiozon fanit lamla, ar Filife tanre toubar gusol ḳoraila.
ACT 8:39 Tara zebla fani taki uṭia aila, ou shomoy Mabudor ruhe aḳta-u Filifre aoṛe nilagi. Hi na-morde ar Filifre deḳla na, teu tain furti kori kori tan nizor fote gelagi.
ACT 8:40 Oile Filifre Ashdud ṭauno deḳa millo; tain gaue gaue kush-ḳobri toblig kori kori heshe Ḳoisoria ṭauno gela.
ACT 9:1 I shomoy-o Shoule al-Mosir ummot oḳolre zane marta ḳori ḍor deḳanit roisoin. Ar Damesk shohoror Ihudir mosidainto deoar lagi tain fordan imamor ges taki siṭi saila, zoto beṭain-beṭin Isar fote soloin, tarare bandia Zeruzalemo anta ou ḳemota faoar lagi siṭi saila.
ACT 9:3 Foto zaite zaite zebla Damesk ṭaunor ḳandat aila, teu aḳta-u asman taki tan sairo galabae for oia somḳaia uṭlo.
ACT 9:4 Ou tain maṭit foṛigela ar gaibi aoaz hunla, ḳe zanu tanre ḳor, “Shoul, Shoul, ḳene amare zulum ḳorrae?”
ACT 9:5 Shoule zikaila, “Malik, afne ḳe?” Tain ḳoila, “Ami Isa, zenre tumi zulum ḳorrae.
ACT 9:6 Tumi oḳon uṭia shohoro zao, tumi kita ḳortae tumare zanail oibo.”
ACT 9:7 Oile zera Shoulor loge zaoat asla tara somki gela, tara i aoaz ṭik-u hunchila, oile ḳeurore deḳla na.
ACT 9:8 Bade Shoul maṭi taki uṭla, ar souk melia harle kunta-u deḳla na; tan logor manshe tanre ato doria Damesko loia gela.
ACT 9:9 Shoule tin din dori souke kunta-u deḳla na ar kunuzat ḳana-fina-o ḳaila na.
ACT 9:10 Damesk shohoro Ononio name eḳzon mumin asla,
ACT 9:11 Mabude tanre doroshon dia ḳoila, “Ononio!” Tain zuaf dila, “Malik, ounu ami.” Mabude tanre ḳoila, “Shuza namor ze shoṛok ase, tumi hou shoṛoke zao, gia honor Ehudar baṛit Tarsho shohoror Shoul namor eḳzon manshor tallash ḳoro.
ACT 9:12 Hono he dua ḳorer, ar he doroshon faise, Ononio namor eḳzon manush aia tar shoril ataia dibo, teu he hirbar souke deḳbo.”
ACT 9:13 Ononioe ḳoila, “Malik, ami bout manshor gese i manushgur ḳaislot hunchi, he Zeruzalemo tumar pak bonda oḳlor ufre bout zulum ḳorse.
ACT 9:14 Ar ou zagat-o zoto manshe tumar fote sole, erare bandia neoar ḳemota he boṛo imam oḳlor ges taki faise.”
ACT 9:15 Oile malike tanre ḳoila, “Tumi zao, ḳaron o-Ihudi oḳol, tarar raza oḳol, ar Boni Israilor gese amar nam tobligor lagi ami tare fosond ḳorsi.
ACT 9:16 Ami tare deḳaimu, amar namor lagi tare ḳoto zala-zontrona shoijjo ḳora lagbo.”
ACT 9:17 Teu Ononio bar oia hou baṛit gia hamaila, ar Shoulor gotro at dia ḳoila, “Bai Shoul, ono aoar foto zein tumare doroshon disoin tain Hozrot Isa, tain amare faṭaisoin, zate tumi hirbar souke deḳtae fao ar Pak Ruhe kamil o.”
ACT 9:18 Ar loge loge-u tan souk taki masor-foiror laḳan kita foṛigelo, tain deḳta farla ar uṭia fanit gia toubar gusol ḳorla;
ACT 9:19 ḳaoa-daoar bade shorilo hirbar bol faila. Ar tain kisudin Dameskor ummot oḳlor loge roila.
ACT 9:20 Shoule ar deri korla na, tain zagae zagae mosidainto gia toblig korat lagla, Hozrot Isa-u Allar hou ḳas mayar zon, Ibnulla.
ACT 9:21 Zera tan boyan hunto tara hoḳole-u taijjub oia mata-mati korto, “Ein hou manush nae ni zein Zeruzalemo Isar ummot oḳolre zulum ḳorta? Ar ono-o to otar lagi-u aisoin, zera Isar fote sole tarare bandia boṛo imam oḳlor gese loia zaita?”
ACT 9:22 Oile Shoul din din aro himmot-ala oila, ar Dameskor Ihudi oḳolre la-zuaf banaita lagla, tain forman deḳaila, ou Isa-u hi al-Mosi.
ACT 9:23 Er bout bade Ihudi oḳole tanre marar lagi solla-foramish ḳorla,
ACT 9:24 ar Shoule i kobor faila. Tara tanre marar lagi shohoro hamani baronir hokkol duaro dine-raite sokidar boaila.
ACT 9:25 Eḳdin rait ummot oḳole Shoulre eḳ ṭukrir bitre haraia, baunḍori oalor kiṛkibae far ḳori bare lamaia dila.
ACT 9:26 Bade tain Zeruzalemo aia ummot oḳlor loge shorik oita saila; oile hokkole tanre ḍorailo, tain zen hasau iman anchoin tara bishash ḳorla na.
ACT 9:27 Teu Barnabase tanre ato doria sahabi oḳlor gese loia gela, ar Damesk zaoar foto kila tain al-Mosir didar faila, ar kila malike tan loge batchit ḳorla, Damesko kila tain shaosh ḳori Isar name toblig korsoin hoḳolta erare zanaila.
ACT 9:28 Bade Shoul Zeruzalemo erar loge loge roita, tain Zeruzalemor hoḳol zagat guria firia shaosh ḳori Isar name toblig korta.
ACT 9:29 Tain Iunani bashae matra Ihudi oḳlor loge dini batchit ar torko ḳorta; Ihudi oḳole tanre zane marilta saila.
ACT 9:30 Mumin oḳole i kobor hunia tanre Ḳoisoria shohoro loia gela, hon taki tanre Tarsho shohoro faṭai dila.
ACT 9:31 Hi shomoy Ehudia, Galil ar Shomoria elaḳar zomat oḳol shantir maze toiar oilo, i zomat oḳol Mabudor ḍore ar Pak Ruhur isharae soli soli bout forimane baṛlo.
ACT 9:32 Fitore hokkol zagat gurte gurte Ludda gaur mumin oḳlor gese aia azila.
ACT 9:33 Hou gaut Oinio name eḳzon manush asil; he ordong bemare aṭ boros dori bisnat foṛono asil.
ACT 9:34 Fitore tare dekia ḳoila, “Oinio, Isa al-Mosi tumare bala ḳorla, uṭo, tumar bisna tulilao.” Ar loge loge-u Oinio uṭia ubai gelo.
ACT 9:35 Teu Ludda gau ar Sharun elaḳar hoḳol manshe Oinior halot dekia Allar bae firla.
ACT 9:36 Jafa shohoro Ṭabita name eḳzon mumin beṭi asla, Iunani bashae Ṭabita namor orto Dorka, mani horini, tain hoḳol shomoy bala ḳam ḳorta ar goribre shaijjo ḳorta.
ACT 9:37 Tain bemar foṛia mara gela, ar manshe tanre gusol deoaia ufror kuṭat nia toila.
ACT 9:38 Jafa shohor Luddar ḳasat asil gotike, ummot oḳole zebla hunla, Fitor Luddat asoin, ou tara duizon manshore tan gese faṭaia minot ḳorla, “Afne zoldi kori amrar gese aukka.”
ACT 9:39 Teu Fitor tarar loge roana dila, tain hono zaoar bade tara tanre ufror kuṭat loia gelo, hoḳol ṛaṛi beṭinte Fitoror sairobae ubaia ḳandon shuru ḳorla ar Dorka zita taḳte zeta ḳafoṛ-sufoṛ banaisla, ota Fitorre deḳaila.
ACT 9:40 Fitore tara hokkolre kuṭa taki bar ḳori dia zanu faṛia dua ḳorla; bade mora beṭir lashor bae firia ḳoila, “Ṭabita, uṭo.” Loge loge Dorkae souk kulla, ar Fitorre dekia uṭia boila.
ACT 9:41 Fitore tan ato doria uba ḳorla, bade hi ṛaṛi beṭin ar mumin oḳolre ḍakia deḳaila, Dorka zita oisoin.
ACT 9:42 I kobor Jafa shohoror hoḳol zagat uṛigelo ar bout manshe al-Mosir ufre iman anla.
ACT 9:43 Fitor bout din Jafa shohoro Saimon namor eḳ samaror baṛit roila.
ACT 10:1 Ḳoisoria shohoro Kornilus name eḳzon manush, Itali namor sifai dolor subedar asla.
ACT 10:2 Tain eḳzon forezgar manush, tan foribaror hoḳole-o Allare ḍoraita. Tain gorib oḳolre bout ṭeḳa-foysha dan-ḳoyrat ar hamesha Allar gese dua ḳorta.
ACT 10:3 Eḳdin onuman tinṭar shomoy tain eḳ saf doroshon faila. Deḳla, Allar eḳ firistae tan gese aia ḍakira, “Kornilus!”
ACT 10:4 Korniluse ḍoraia hi firistar bae saia ḳoila, “Malik, ḳoukka, hunram.” Firistae tanre ḳoila, “Tumar munazat ar gorib oḳolre danor ḳota behesto fosise ar Allae ita kobul ḳorsoin.
ACT 10:5 Oḳon tumi Jafa shohoro manush faṭao, ar Saimon urfe Fitorre tallash ḳorai anao.
ACT 10:6 Ein doriar faro aroḳ Saimonor baṛit taḳoin, hi Saimone samṛar ḳarbar ḳore.”
ACT 10:7 Ze firistae Kornilusor loge batchit ḳorsila, tain zaoar bade Korniluse tan baṛir duizon ḳamla ar tan shaijjoḳari eḳzon forezgar sifaire ḍaḳ dila.
ACT 10:8 Tain erare hoḳolta buzai dia Jafa shohoro faṭaila.
ACT 10:9 Bador din zebla hou manush oḳol zaite zaite Jafa shohoror ḳasat aila, i shomoy beil onuman duifor, Fitore dua ḳorar lagi hou shomoy sato uṭsoin.
ACT 10:10 Tan kub buk lagsil, teu kunta ḳaita saila ar manshe ḳani tiar ḳorra, ou shomoy gume tan ungani ailo.
ACT 10:11 Ou haloto tain deḳla, asman kuligese ar kub boṛo saddoror laḳan eḳ sizor sair kunat doria duniat lamai deoa or;
ACT 10:12 ar i saddoror maze duniar hokkol zator foshu, buke solra zandar ar fakin ase.
ACT 10:13 Bade tain ou aoaz hunla, ḳe zanu tanre ḳor, “Fitor, uṭo, maria ḳao.”
ACT 10:14 Fitore ḳoila, “Na, na, malik, kunumonte-u na, ami kunu shomoy-u nafak ar haram kunta ḳai na.”
ACT 10:15 Tain hirbar ou aoaz hunla, “Allae zeta halal ḳorsoin, itare tumi haram ḳoio na.”
ACT 10:16 Oula tinbar oar bade hou saddorḳan asmano tulia nilagi.
ACT 10:17 Fitore ze batuni doroshon deḳla, er mani kita oito fare tain dian ḳorra, ou shomoy Kornilusor faṭail hi manush oḳol Saimonor baṛi tukaia faia, baṛir duaror samne aia ubaila.
ACT 10:18 Tara ḍakia zikaila, “Saimon zenre Fitor ḳoia ḍaḳoin, tain ikano asoin ni?”
ACT 10:19 Fitore hou doroshonor ḳota sinta ḳorra, ou shomoy Pak Ruhe tanre ḳoila, “Deḳo, tinzon manshe tumare tukanit aisoin.
ACT 10:20 Tumi lamat lamo ar tarar loge roana deo, kunu shondoy ḳorio na, tarare ami-u faṭaisi.”
ACT 10:21 Teu Fitor lamia gia tarare ḳoila, “Afnara zare tukaira ami-u hein; ḳoukka sain, kitallagi aisoin?”
ACT 10:22 Tara ḳoila, “Sho-sifair subedar Korniluse Allar firistar hukum faia amrare faṭaisoin, tain eḳzon forezgar manush, Allar hukum mafik soloin, Ihudi oḳole tanre kub tazim ḳoroin. Firistae tanre ḳoisoin, zate afnare tan baṛit neoaia afnar nosiot hunoin.”
ACT 10:23 Ou Fitore tarare bitre ḍakia nia, tarar memandari korla. Bador din uṭia Fitor tarar loge roana dila, ar Jafa shohoror ḳoyzon imandar-o tan loge gela.
ACT 10:24 Er bador din tara Ḳoisoriat fosla; ou shomoy Korniluse tan ḳesh-kuṭum ar bondu-bandob oḳolre dola ḳoria tarar bar saira.
ACT 10:25 Ar Fitor gia zebla goro hamaila, i shomoy Korniluse tan ḳasat gia faot foṛia soizda ḳorla.
ACT 10:26 Oile Fitore tanre tulia ḳoila, “Uṭoukka, ami nize-o to eḳzon manush.”
ACT 10:27 Bade Kornilusor loge mati mati bitre hamaia Fitore deḳla, bout manush dola oiroise.
ACT 10:28 Ou tain ḳoila, “Afnara to zanoin, eḳzon Ihudi manshe kunu o-Ihudir ḳasat zaoa ba mila-misha ḳora amrar shoriotor nazaiz. Oile Allae amare deḳaisoin zen, kunu manshore nafak ba ofobitro ḳoa amar lagi nazaiz.
ACT 10:29 Erlagi afnara zebla amare ḳobor disoin, te ami kunu omot na ḳoria-u aisi. Oḳon ami afnarare zikairam, amare kitallagi anaisoin?”
ACT 10:30 Korniluse zuaf dila, “Aiz taki sair din age omon bala mani tinṭar shomoy ami amar goro dua ḳorat aslam, ou shomoy somḳail ḳafoṛ finda eḳ beṭa manush amar samne aia ubaila,
ACT 10:31 tain ḳoila, ‘Kornilus, Allae tumar dua kobul ḳorsoin. Ar tumar dan-ḳoyrat-o kobul ḳorsoin.
ACT 10:32 Oḳon tumi Jafa shohoro manush faṭao ar Saimon urfe Fitorre anao. Tain doriar faro Saimon namor eḳ samṛar ḳarbarir baṛit asoin.’
ACT 10:33 Erlagi ami zoldi kori afnare anat manush faṭailam. Afne toshrif anchoin dekia kub kushi oilam. Oḳon amra hoḳol Allar samne azir asi, Allae afnare zeta hukum ḳorsoin, amra hokkolta zanmu.”
ACT 10:34 Teu Fitore zoban kulia ḳoila, “Ami oḳon hasaror buzlam, Allar nozoro hoḳol-u homan.
ACT 10:35 Hoḳol zatir maze zera tanre ḍorae ar tan hukum mania sole, tarare tain kobul ḳoroin.
ACT 10:36 Afnara to zanoin, tain Boni Israilor gese kushir ekkan ḳobor zanaisoin. Hozrot Isa al-Mosi, zein hoḳlor malik, tan usillae shanti faoa zae.
ACT 10:37 Manshor lagi toubar gusol ḳora zorur, Ehiae ikan toblig korar bade-u Galil taki asta Ehudia zuṛi zeta goṭsil, ita hoḳolta-u afnara hunchoin.
ACT 10:38 Allae Nasarotor Isare Pak Ruhu ar kudrote kila ḳas kolifa banaisla; tain bala ḳam ḳori kori sofor ḳorta, ar zine dora bemari oḳolre bala ḳorta, Alla Pak to tan loge asla.
ACT 10:39 Tain Ihudi oḳlor zomino ar Zeruzalemo zeta ḳorsila, amra ita hoḳoltar shakki; ar manshe tanre gaso loṭḳaia marlo.
ACT 10:40 Allae tanre tin din bade zinda ḳori uṭaila, ar manshe-o tanre deḳla.
ACT 10:41 Ta-o hokkole tane deḳar nosib oise na, ḳali Allae zerare age fosond ḳorsila, hou shakki oḳolre, mani amrare deḳaila, ar murda taki tain zinda oia uṭar bade amra tan loge ḳana-fina-o ḳaisi.
ACT 10:42 Tain amrare hukum disoin, amra zanu Ihudi oḳlor gese toblig kori ar shakki dei zen, tanre-u Allae zinda ar murda oḳlor hakim banai faṭaisoin.
ACT 10:43 Hoḳol nobie-o tan befare oula shakki disoin zen, zera tan ufre iman ane, tara hoḳole-u tan namor usillae gunar mafi fae.”
ACT 10:44 Fitore boyan ḳorra, i shomoy zera tan boyan hunat asil, tara hoḳlor ufre Allai Pak Ruhu nazil oilo.
ACT 10:45 Ar Fitoror loge oia mosolmani korail zeta imandar oḳol aisla, tara ita dekia somkia uṭla, ḳaron o-Ihudi oḳlor ufre-o Pak Ruhu borshisoin.
ACT 10:46 Tara deḳla, ou o-Ihudi oḳole nanan gaibi bashae matira, ar Allar tarif ḳorra.
ACT 10:47 Teu Fitore ḳoila, “Ou zeta manshe amrar laḳan Pak Ruhu hasil ḳorsoin, era fanit toubar gusol ḳorte kita ḳeu bada dito farbo ni?”
ACT 10:48 Bade tain erare Isa al-Mosir name toubar gusol ḳorar hukum dila. Ar tara Fitorre minot ḳorla, tarar gese ḳoyḳan din roar lagi.
ACT 11:1 Bade sahabi oḳole ar Ehudia zilar hokkol mumin baiainte hunla, o-Ihudi oḳole-o Allar kalamor ufre iman anchoin.
ACT 11:2 Erlagi Fitor zebla Zeruzalemo aila, i shomoy mosolmani korail imandar oḳole tane dushi shaibosto ḳoria ḳoila,
ACT 11:3 “Afne to mosolmani na ḳorail manshor goro hamaisoin, ar tarar loge ḳana-o ḳaisoin.”
ACT 11:4 Teu Fitore foyla taki zeta zeta goṭsil, tarar gese eḳ ek kori buzaia ḳoila,
ACT 11:5 “Ami Jafa shohoro dua ḳorat aslam, omon shomoy Pak Ruhur doroshon failam, ami deḳlam, asman taki boṛo saddoror laḳan ekkan sizor sair kunat doria amar gese lamaia deoa or.
ACT 11:6 Ami dian dori saia sintat foṛigelam, ar deḳlam, ermaze hoḳol zator foshu, faki, zongli zanuar ar buke solra zandar oḳol asoin.
ACT 11:7 Bade eḳ aoaz hunlam, Fitor, uṭo, maria ḳao.
ACT 11:8 Ami koilam, na, na malik, kunumonte-u na, nafak ba haram kunta ami kunudin muko disi na.
ACT 11:9 Bade dusrabar asman taki ou aoaz hunlam, Allae zeta halal ḳorsoin, tumi itare haram ḳoio na.
ACT 11:10 Oula tinbar ḳoar bade hoḳolta asmano tuli neoa oilo.
ACT 11:11 Ar er loge loge-u, ami ze baṛit aslam ou baṛit aia tinzon manush hamailo, tarare Ḳoisoria taki faṭail oisil.
ACT 11:12 Teu Pak Ruhe amare ḳoila, kunu shondoy na ḳoria tarar loge oia zaoar lagi. Ar ou soyzon bai-o amar loge gesla. Bade amra ou o-Ihudir baṛit hamailam.
ACT 11:13 Tain kila tan baṛit eḳzon firistar doroshon faisla ita amrare hunaila. Hou firistae to tanre ḳoisla, Saimon urfe Fitorre anar lagi Jafa shohoro manush faṭao.
ACT 11:14 He tumare oula nosiot ḳorbo, zeta mania tumi ar tumar foribaror hoḳole nazat faibae.
ACT 11:15 Ar ami boyan shuru ḳorar bade, Pak Ruhu foyla zela amrar ufre aisla, ekkere oula tarar ufre-o aila.
ACT 11:16 Ougi al-Mosir talim amar mono oilo, tain ḳoisla, Ehiae toubar gusol ḳoraisoin fanit, ar tumrar gusol oibo Pak Ruhe.
ACT 11:17 Te bai oḳol, Isa al-Mosir ufre iman anae Allae amrare zela dan disoin, hou eḳoi dan zebla tarare-o dila, te ami aroḳzon ḳe, Allare na ḳortam?”
ACT 11:18 Ikan hunar bade Ehudiar imandar oḳole ar kunu afotti na ḳoria, Allar tarif ḳora dorla, tara ḳoila, “Te Allae o-Ihudi oḳolre-o guna taki mon bodlaia, zindegi faoar tofik disoin.”
ACT 11:19 Stifanor moutor goṭonar bade zeta imandar oḳol zulumor lagi sitri gesla, tara Foinikia, Saipras ar Antiokia forzonto gia ḳali Ihudi oḳlor gese Allar kalam toblig korla.
ACT 11:20 Oile erar maze ḳoyzon asla Saipras dif ar Kurini elaḳar manush, era Antiokiat gia Iunani oḳlor gese-o Hozrot Isar kush-ḳobri toblig korla.
ACT 11:21 Ar Allae tan kudroti bole tarare shaijjo ḳorla, teu bout manush iman ania tan muki oila.
ACT 11:22 I kobor Zeruzalem zomator mumin oḳlor ḳano ailo, ḳobor hunia tara Barnabasre Antiokiat faṭaila.
ACT 11:23 Tain hono fosia Antiokiat Allar meherbani dekia kub kushi oila, ar manshore asha dita taḳla, zate tara dile-zane malikor name imane mozbut roin.
ACT 11:24 Barnabas eḳzon hok manush, tain Pak Ruhu ar imane kamil asla. Ar bout manush malikor muki firia aisil.
ACT 11:25 Bade Barnabas Shoulor tallashe Tarsho ṭauno gela,
ACT 11:26 ar tanre faia Antiokiat loia aila. Barnabas ar Shoul fura eḳ boros hono zomator loge milia bout manshore talim dila. Ou Antiokiat-u al-Mosir ummot oḳolre foyla Isayi name ḍaḳa oilo.
ACT 11:27 Ou shomoy ḳoyzon nobi Zeruzalem taki Antiokiat aila.
ACT 11:28 Erar maze Agabus namor eḳ nobie Pak Ruhur zoriae ḳaṛa oia ḳoila, asta duniai zuṛia eḳ bezuita nidan deḳa dibo; Bashsha Keladusor razottor ḳalo ikan fura oilo.
ACT 11:29 Erlagi mumin oḳole niot ḳorla, Ehudia zilar imandar oḳlor kezmotor lagi, tara zarzir ḳemota mafik shaijjo faṭaita.
ACT 11:30 Ar niot mafik kam-o tara ḳorla, tara Barnabas ar Shoulor atane Ehudiar zomator murobbi oḳlor gese shaijjo faṭaila.
ACT 12:1 Hi shomoy Raza Herude zomator ḳoyzon manshore dorai ania zulum ḳorla.
ACT 12:2 Tain Hannanor bai Iakubre toluar dia ḳaṭilila.
ACT 12:3 Erlagi Ihudi oḳol kushi oisoin dekia, tain Ḳamir Saṛa Ruṭir Idor oḳto Fitorre-o aṭok korla.
ACT 12:4 Ar tanre zelo haraila, zelo-o fahara deoar lagi sairzon ḳori, sair dol sifaire hukum dila. Herudor niot asil Azadi Idor bade Fitorre manshor samne bar ḳori bisar ḳorba.
ACT 12:5 Fitor zel ḳanat bondi roila, oile zomator manshe Fitoror lagi dile-zane Allar dorbaro dua ḳorat roila.
ACT 12:6 Bisaror lagi zedin Fitorre bare anaita, er agor rait tain duizon sifair mazḳano duigesa cheindi banda halote gumo asla, ar bare sifai oḳole duaro fahara dira.
ACT 12:7 Omon shomoy aḳta-u Mabudor eḳzon firista hono aia ubaila, ar zelor bitor for oigelo. Firistae Fitoror gotro ṭela dia tanre hozag kori koila, “Zoldi uṭo!” Teu Fitoror duio at taki chein kulia foṛigelo.
ACT 12:8 Bade firistae tanre ḳoila, “Tumar ḳomro ḳafoṛ findo ar zuta faot deo.” Tain oula ḳorla. Firistae ḳoila, “Tumar saddor gotro dia amar ḳore ḳore ao.”
ACT 12:9 Fitor firistar ḳore ḳore zelḳana taki baroi aila, oile firistae zeta ḳorla, ita zen hasaror-u or, ita kunta-u Fitore buzta farla na, tain mono ḳorla ita kunu doroshon deḳra.
ACT 12:10 Tara foyla ar dui nombor faradaror dolre faroia zebla shohoro hamaibar luar geiṭor gese aila, geiṭ nize nize-u kuligelo. Tara bar oia ek gollir hesh galat aia azila, ar ou shomoy firista Fitoror log taki gelagi.
ACT 12:11 Teu Fitoror hush oilo ar tain ḳoila, “Oḳon ami hasaror-u buzlam zen, Mabude tan firistare faṭaia, Herudor at taki ar Ihudi oḳlor bod ḳaish taki amare hefazot ḳorsoin.”
ACT 12:12 Tain mone mone ita mati mati Moriomor baṛir muka gela, i Moriom oila Hannan urfe Markusor ma. Ono bout manush dola oia dua ḳorat asla.
ACT 12:13 Fitore geiṭo ṭuka marar bade Ruda namor eḳ bandi beṭie geiṭ kulat ailo;
ACT 12:14 ar Fitoror golar shur hunia kushie tai geiṭ na kulia douṛia gia hoḳlor gese ḳoilo, “Fitor aia bare geiṭo ubai roisoin.”
ACT 12:15 Tara ita hunia hi beṭire ḳoila, “Tumar mata ḳaraf oise ni?” Beṭie tarar loge niae ḳoria ḳoilo, “Na, hasau Fitoror gola hunchi!” Teu hoḳole ḳoila, “Te ein mone oy Fitoror surote kunu firista.”
ACT 12:16 Ibae Fitore geiṭo ṭukanit roila. Ou tara kulia Fitorre dekia taijjub oigela.
ACT 12:17 Fitore atdi ishara dila tarare nirai oar lagi, ar zelḳana taki Mabude kila tanre bar ḳori anla, outa hoḳolta ḳoila. Bade tain ḳoila, “I koborḳan tumra Iakub ar baki baiaintore-o zanaio.” Heshe tain on taki bar oia aroḳ zagat gelagi.
ACT 12:18 Rait fuanir bade Fitor kuai gela, i mat loia sifai oḳlor maze ulustul foṛigelo.
ACT 12:19 Herude tanre tukaia na faoae faradar oḳolre zera ḳorla, ar tarare zane marar hukum dila, bade Herud nize-o Ehudia saṛia ḳoydinor lagi Ḳoisoriat gelagi.
ACT 12:20 Hi shomoy Herude Shur ar Sidonor manshor ufre kub gusa asla. Oile Raza Herudor desh taki tarar desho ḳanir samana aito ḳori, hinor hoḳol manshe eḳloge milia Herudor gese aila, tara razar hutibar goror Belastos namor eḳ boṛo gulamre at ḳoria razar loge afush ḳorat aila.
ACT 12:21 Ar Herude eḳ din ṭik koria, hidin tan raz lebas findia shinghashono boia tarar samne bashon deoat asla.
ACT 12:22 Tan ḳota hunia tara sillaia ḳoila, “Ita to manshor buli nae, kunu devtar buli!”
ACT 12:23 Ar loge loge Mabudor eḳ firistae tanre marla, ḳaron Herude Allar ijjot raḳla na. Teu kirmir kuraḳ bonia tan dom bar oilo.
ACT 12:24 Oile Allar kalam hoḳolbae aro beshi sitrilo, ar bout manshe iman anla.
ACT 12:25 Ibae Barnabas ar Shoulor toblig kam shesh oae tara Hannan urfe Markusre loge loia Zeruzalemo firot gela.
ACT 13:1 Antiokia zomato ḳoyzon nobi ar ustad asla, erar nam Barnabas, Samaun urfe Ḳalabai, Kurini shohoror Lukias, Raza Herudor ḳatiror manush Monohem, ar Shoul.
ACT 13:2 Era zebla ruza rakia Mabudor ebadot ḳorat asla, ou shomoy Pak Ruhe erare ḳoila, “Barnabas ar Shoulre ami ze ḳamor lagi fosond ḳorsi, ou ḳamor lagi tarare alog kori deo.”
ACT 13:3 Teu era ruza rakia, hou duiozonor ufre at toia dua ḳoria bidae dila.
ACT 13:4 Ou laḳan ḳori Pak Ruhe Barnabas ar Shoulre Silukiat faṭai dila, ar hikan taki zazo ḳoria tara Saipras difo gela.
ACT 13:5 Ar Salamis gia harle tara Ihudi oḳlor mosidainto hamaia Allar kalam toblig korla. Tarar ḳam ḳorar lagi Hannan urfe Markus tarar loge asla.
ACT 13:6 Tara asta dif guria harle Fafus ṭauno aila, ar hino Bor-Jishu namor eḳ Ihudi zadugiror loge deḳa oilo, he asil bonḍo nobi.
ACT 13:7 Tar aroḳ nam asil Iluma, mani zadugir. He oilo hi deshor hakim Sergio Paulusor dust, oile hi hakim asla eḳzon aḳoldar manush, tain Allar kalam hunar lagi Barnabas ar Shoulre ḳobordi anaila. Ilumae hakimre iman ante dito na ḳori Barnabas ar Shoulre bada dilo.
ACT 13:9 Ar Shoul, zenre Paulus ḳoia-o ḍaḳoin, tain Pak Ruhe kamil oia Ilumar bae dian dori saia ḳoila,
ACT 13:10 “O Iblisor baichcha, hoḳol mumini kamor dushmon, tor bitre hoḳol laḳan sol-soturi ar naformanie bora, tui Mabudor sohi fotre teṛa ḳorar fikir bad dite nae ni?
ACT 13:11 Hun, Mabudor at tor birudde lagse. Tui anda oizibe, ar ḳoydin shuruz deḳte nae.” Loge loge-u kua ar andaire tare gurililo, ar he at baṛaia ḍaine-baue ḳeurore tukailo, tare ato doria neoar lagi.
ACT 13:12 Ita dekia hi hakime malikor bishoye ze talim faila, ete tain taijjub oia iman anla.
ACT 13:13 Bade Hozrot Paulus ar tan logor hoḳole Fafus saṛia zazo ḳori Pamfulia deshor Forga shohoro fosla. Ar Hannan urfe Markuse tarare toia Zeruzalemo firot gelagi.
ACT 13:14 Bade tara Forga taki aguaia Fisidia deshor Antiokia shohoro fosla ar Zummabare Ihudir mosido hamaia boila.
ACT 13:15 Musar shoriot ar nobi oḳlor kitab taki tilaot ḳora shesh oile, mozlisor neta oḳole tarare ḳoila, “O baisab oḳol, manshore nosiotor lagi kunta boyan ḳorar kial oile, ḳoroukka.”
ACT 13:16 Ou Pauluse ubaia atdi ishara ḳori koila, “O Boni Israil oḳol, ar Allare ḍoraora o-Ihudi oḳol afnara hunoukka.
ACT 13:17 Ou Israil zatir Allae amrar baf-dada oḳolre fosond ḳorsla, zebla tara Mishor desho musafirit asla, ou shomoy tarare mohan ḳorsila, ar tan moha kudrote tarare hikan taki bar ḳori anchila.
ACT 13:18 Onuman sallish boros dori tain morubumir maze huruttar ma-bafor laḳan tarar be-adobi sobor ḳorsla.
ACT 13:19 Bade tain Kenan deshor shatṭa zatire binash ḳoria, tan nizor bonda oḳolre hou deshaintor malikana dan ḳorla. Ou laḳan onuman sair-sho foinchash boros guzori gelo.
ACT 13:20 Heshe Shamuel nobir amol forzonto Allae ḳoyzon amir bezisla.
ACT 13:21 Oile manshe eḳzon bashsha sailo. Teu Allae sallish bosoror lagi Bin-Iamin bongshor Kishor fua Talutre bashsha banaila.
ACT 13:22 Bade Allae Talutre horaia Hozrot Daudre tarar bashsha banaila. Tain Daudor befare ḳoila, ‘Ami Iasor fua Daudre faisi, he amar monor moto manush. Amar hoḳol morzi amol ḳorbo.’
ACT 13:23 Allae tan oada mafik ou manshor oarish taki eḳzon toraneala, mani Hozrot Isare Boni Israil oḳlor gese azir ḳorsila;
ACT 13:24 Ou Isa aoar age hokkol Boni Israilor gese Hozrot Ehiae toblig korsila, ‘Guna taki dil firaia hari manshe toubar gusol ḳora dorḳar.’
ACT 13:25 Ar Ehiae tan toblig kamor aḳer ḳalo ḳoila, ‘Tumra kita mono ḳoro, ami ke? Ami to hi oada ḳora al-Mosi nae; tain amar bade toshrif anra. Tan faor zutar fita kular laḳ-o ami nae.’
ACT 13:26 “Te O baiain, Ibrahimor oarish oḳol, ar Allare ḍoraora o-Ihudi oḳol, amra hokkolor gese-u nazator i kalam nazil oise.
ACT 13:27 Zeruzalemor manshe ar tarar neta oḳole Isare na sinae, ar forteḳ Zummabare nobi oḳlor ze boyan tilaot oy eota na buzae, tara Isare dushi shaibosto ḳoria hou ḳota oḳol fura ḳorla.
ACT 13:28 Ar zane marar lak kunu dush na faile-o tara hakim Filator gese dabi zanaila, tanre zane marar lagi.
ACT 13:29 Tan bishoye Asmani Kitab oḳol-o zeta leḳa asil, ita hoḳolta fura oar bade tara tanre gaso loṭḳail halot taki, mani solib taki lamaia dafon ḳorlo.
ACT 13:30 Oile Allae tanre murda taki zinda ḳori tulla.
ACT 13:31 Ar Galil taki zera tan loge Zeruzalemo aisla, tarar gese tain bout din dori deḳa dila; era-u oḳon amrar gese tan befare shakki dira.
ACT 13:32 Ar amrar baf-dada oḳlor gese Allae zeta oada ḳorsila, amra afnaintor gese hou kush-ḳobri zanairam,
ACT 13:33 Allae Isare murda taki zinda ḳoria tarar oarish oḳol, mani amrar gese tan oada fura ḳorsoin, ar i befare Zobur kitabor dusra rukut oula leḳa ase: Tumi amar fut, aiz taki ami oilam tumar gaibi baf.
ACT 13:34 Allae zen tanre murda taki zinda ḳorsoin, ar tain zen kunudin-o koy oita nae, i befare Allae ḳoisoin: Ami Daudor gese ze pak oada oḳol ḳorsi, ita ami tumrare dan ḳormu.
ACT 13:35 Tain Zobur Shorifor aroḳ ayato ḳoisoin: Tumi nizor pak bondare koy oite ditae nae.
ACT 13:36 Daud to hi amolor manshor maze Allar kial-kushi fura ḳorar bade inteḳal ḳorla, ar tan moy-murobbi oḳlor gese tanre dafon ḳorar bade koy oigela,
ACT 13:37 oile Allae zenre murda taki zinda ḳorsoin, ein to koy oisoin na.
ACT 13:38 Erlagi amar bai oḳol, afnara-o zania raḳoukka, ou Isar mazdia-u guna taki mafi faoar ḳota afnaintor gese toblig kora or.
ACT 13:39 Afnara Musar shoriotor usillae gunar shaza taki rehai faisoin na, oile zekunu zone Isar ufre iman anle, tan usillae he gunar shaza taki rehai fae.
ACT 13:40 Erlagi afnara-o hushiar oukka, zate nobi oḳlor kitabo zeta boyan ḳora oise, ita zanu afnaintor ufre na goṭe:
ACT 13:41 Tumra zera Allare loia ṭaṭṭa ḳoro, tumra kial ḳoro, tumra somḳaia uṭo ar binash o; ḳaron tumrar amolo-u ami oula ek kam ḳormu, ze ḳamor ḳota ḳeu tumrar gese ḳoile-o, tumra kunumonte-u bishash ḳortae nae.”
ACT 13:42 Paulus ar Barnabas mosid taki zaoar bala manshe tarare minot ḳori koila, bador Zummabare-o tara i befare aro boyan ḳorar lagi.
ACT 13:43 Mosid taki manush oḳol bar oia zaoar bade, bout Ihudi ar Ihudi dormo manra forezgar oḳole Paulus ar Barnabasor ḳore ḳore gela. Era Paulus ar Barnabasor loge batchit ḳorla, tara erare utshaho dila, era Allar rohomotor ufre ḳaim roita ḳori.
ACT 13:44 Bador Zummabare ṭaunor manush dole dole Allar kalam hunar lagi aila.
ACT 13:45 Oile oto manshor biṛ dekia Ihudi oḳole ingshae bori gela, ar Pauluse zeta boyan ḳorla tara er ninda gaia tan birudita ḳorla.
ACT 13:46 Teu Paulus ar Barnabase shaosh ḳoria zuaf dila, “Allar kalam foyla afnaintor gese toblig kora dorḳar asil; oile afnara zebla ita ṭelia horai dira, ar aḳeri zindegi kamai kora dorḳar mono ḳorra na, te amra-o o-Ihudi oḳlor bae nozor firaillam.
ACT 13:47 Ḳaron Mabude amrare oula hukum ḳorsoin, Ami tumare o-Ihudi oḳlor gese nur hishabe bezisi, zate tumi duniar hesh shimana forzonto nazator usilla o.”
ACT 13:48 O-Ihudi oḳole ita hunia kushi oila ar malikor kalamor tarif ḳorla; ar zoto manshore Allae aḳeri zindegi hasilor lagi fosond ḳori raḳsila, tara iman anla.
ACT 13:49 Malikor kalam hi deshor hoḳol zagat fosi gelo.
ACT 13:50 Oile Ihudi oḳole tarar forezgar ḳandani beṭintore ar ṭaunor boṛo boṛo murobbi oḳolre uskaia dilo tara Paulus ar Barnabasor ufre zulum ḳoraia, tarar shimana taki kedaia bar ḳori dilo.
ACT 13:51 Teu Paulus ar Barnabase hi manshor birudde tarar faor duil zaṛia falaia Ikonia ṭauno gelagi.
ACT 13:52 Ar hinor ummot oḳol kushie ar Pak Ruhe furafur kamil oila.
ACT 14:1 Ikonia ṭauno aia-o ou laḳan Paulus ar Barnabas Ihudir mosido gia hamaila, hamaia tara omon laḳan toblig korla, ita hunia bout Ihudi ar o-Ihudi oḳole iman anla.
ACT 14:2 Oile zeta Ihudie iman anla na, tara o-Ihudi oḳolre uskai dia, mumin oḳlor bae bigṛaila.
ACT 14:3 Paulus ar Barnabas hi ṭauno bout din roila, tara shaosh ḳoria malikor befare toblig korla. Ar malike-o tan rohomotor kalamor fokke Paulus ar Barnabasor mazdi, bout muzeza ar keramoti oḳol zair ḳoraila.
ACT 14:4 Bade asta ṭaunor manush dui dol oigelo, eḳ dol Ihudi oḳlor fokke, aroḳ dol sahabi oḳlor fokke.
ACT 14:5 Oile Ihudi ar o-Ihudi kisu manshe tarar neta oḳlor loge milia, Barnabas ar Paulusre mair-doir ar fattor marar fondi korla.
ACT 14:6 Paulus ar Barnabase ita ṭer faia Luḳaenia deshor Lushra ar Dorbi shohoro, ar er ḳanda-ḳasat bagia roila;
ACT 14:7 tara hono Injilor kush-ḳobri toblig korla.
ACT 14:8 Lushra ṭauno eḳzon manush boat taḳto, tar faot kunu bol asil na, he maʼr feṭ taki-u lengṛa, kunudin-o aṭto farse na.
ACT 14:9 He Paulusor boyan hunat asil; Pauluse tar bae dian ḳori saila, ar bala oar lagi tar iman ase buzia,
ACT 14:10 tare zure ḍaḳdi koila, “Tumar faot bordi shida oia ubao!” Teu loge loge-u manushgu faldi uṭia aṭto laglo.
ACT 14:11 Paulusor i keramoti dekia manshe Luḳaenia bashae sillaia ḳoilo, “Devta oḳole manshor surot doria amrar gese lamia aisoin!”
ACT 14:12 Ar manshe Barnabasor nam dilo ‘Zius deb’ ar Paulus boṛo boyan ḳorra gotike, tan nam dilo ‘Harmis deb’.
ACT 14:13 Shohoror baira mul geiṭor ḳandat Zius devtar mondiror babon ṭakure bisal ar mala loia ailo, ḳaron hi ṭakure ar hokkol manshe Paulus ar Barnabasor niote foshu boli dito sailo.
ACT 14:14 Oile sahabi Barnabas ar Pauluse ita hunia beḳorar bonia zarzir finnor ḳafoṛ siṛia douṛia manshor gese gela, ar zure sillaia ḳoila,
ACT 14:15 “O sab oḳol, afnara ḳene ita ḳorra? Amra to ḳali afnaintor laḳan-u duki-shuki manush, amra afnaintor gese ou kush-ḳobri toblig korram, zate i oshar hoḳolta bad dia zinda Allar bae firoin, zein asman-zomin, doria ar ermaze zotota ase hokkolta foyda ḳorsoin.
ACT 14:16 Agor amolor hoḳol zatire tain zarzir ichchamoto fote solte disoin;
ACT 14:17 ta-o tain hamesha nizore zair ḳorsoin, tain asman taki meg dia, shomoy moto foshol dan ḳoria tan meherbani deḳaisoin, afnaintor feṭ bora ḳani ar dilor aram zugaisoin.”
ACT 14:18 I mat oḳol matar bade-o bout ḳoshṭo ḳoria erar foshu boli deoa bond ḳoraila.
ACT 14:19 Bade Antiokia ar Ikonia taki koyzon Ihudi aia, Paulusor birudde manshore uskaia dia tanre fattor marlo, ar tain morigesoin mone ḳoria, ṭaunor bare sesraia loia gelo.
ACT 14:20 Oile mumin oḳol tan sairobae eḳloge dola oar bade, tain uṭia ṭauno firia gela. Bador din tain Barnabasor loge oia Dorbi shohoro gelagi.
ACT 14:21 Dorbit gia harle hono kush-ḳobri toblig koria Paulus ar Barnabase bout manshore imandar banaila, bade tara Lushra, Ikonia ar Antiokiat firot gela;
ACT 14:22 hono gia tara mumin oḳlor imani bol baṛaia tarare imane mozbut roar lagi tagid dila, tara ḳoila, bout duk-toklifor fot faroia amra Allar bashshait hamani lagbo.
ACT 14:23 Tara zomatre salanir lagi forteḳ zomator murobbi-komiṭi banaila. Ar ze malikor ufre tara iman anchoin, en name ruza rakia dua ḳoria ou Isar ato erare shofia dila.
ACT 14:24 Bade Paulus ar Barnabase Fisidia deshor bitredi Pamfulia desho gela.
ACT 14:25 Tara Forga shohoro Allar kalam toblig koria Antulia zaz gaṭo gela;
ACT 14:26 Antulia taki zazo uṭia Antiokiat firot aila. Tara i soforo zeta ḳam oḳol injam ḳorsila, i kamor lagi tarare ou Antiokia taki-u Allar rohomotor hefazoto shofi deoa oisil.
ACT 14:27 Antiokiat fosia zomator hoḳolre ekḳano dola ḳorla, ar Allae tarar i ṭauno tarar loge roia zeta zeta ḳam oḳol ḳorsoin, ar tain kila o-Ihudi oḳlor maze iman anar duar kulia disoin, i hokkolta zanaila.
ACT 14:28 Heshe tara mumin oḳlor loge hikano bout din roila.
ACT 15:1 Ehudia taki koyzon manush Antiokiat aila ar imandar oḳolre ou talim hikanit lagla, “Musar shoriot mafik tumrar mosolmani korail na oile, kunumonte-u guna taki nazat faitae nae.”
ACT 15:2 Ita loia Hozrot Paulus ar Barnabasor loge ou manush oḳlor kub ḳota ḳaṭaḳaṭi oilo. Bade ṭik oilo, Paulus ar Barnabas Antiokiar ḳoyzon imandarre loge loia Zeruzalemo zaiba, gia tara sahabi ar zomator murobbi oḳlor loge i bishoye batchit ḳorba.
ACT 15:3 Antiokiar zomate tarar zaoar bondobost ḳori dila, Foinikia ar Shomoria elaḳar bitredi zaite zaite Paulus ar Barnabase manshore zanaila o-Ihudi oḳol kila Allar bae firer, ita hunia tara kub kushi oila.
ACT 15:4 Paulus ar Barnabas Zeruzalemo aia fosar bade zomator manshe, sahabi ar murobbi oḳole-o tarare mayar nozore kobul ḳorla. Ar tarar usillae Allae zeta ḳam ḳorsoin, ita hoḳlor gese zanaila.
ACT 15:5 Ou shomoy Forishi dolor ḳoyzon imandare ubaia ḳoila, “O-Ihudi oḳlor mosolmani korani zorur, ar tara zanu Hozrot Musar shoriot-o amol ḳore, erlagi tarare hukum deoa ouk.”
ACT 15:6 Teu i bishoyor foysala ḳorar lagi sahabi oḳol ar zomator murobbi oḳol eḳ zagat dola oila.
ACT 15:7 Bout batchitor bade Hozrot Fitore ubaia ḳoila, “Baiain oḳol, afnara to zanoin, bout din age afnaintor maz taki-u Allae amare fosond ḳori nisoin, zate o-Ihudi oḳole-o amar muk taki kush-ḳobri hunia iman anoin.
ACT 15:8 Allae to hoḳlor dilor ḳobor zanoin, te tain amrare zelaḳan Pak Ruhu dan ḳorsoin, o-Ihudi oḳolre-o oula Pak Ruhu dan ḳoria deḳaisoin, tara-o nazat hasil ḳorse.
ACT 15:9 Tain amrar ar tarar maze alada kunta raḳsoin na, ḳaron tara iman anchoin ḳori, tarar dil-o saf ḳorilisoin.
ACT 15:10 Te amrar baf-dada oḳole ba amra-o ze bar boitam farsi na, hi bar o-Ihudi ummot oḳlor ḳando tulia dia, ḳene afnara Alla Pakre forikka ḳorra?
ACT 15:11 Amra to mono ḳori, Hozrot Isar meherbanie amra zela guna taki mafi faisi, tara-o oula mafi faisoin.”
ACT 15:12 Teu hokkol nirai oigela; Paulus ar Barnabasor zoriae Allae o-Ihudir maze zeta muzeza ar keramoti kam oḳol ḳoraisoin, tarar muk taki ota hunla.
ACT 15:13 Tarar boyan shesh oar bade Iakube ḳoila, “Baisab oḳol, hunoukka,
ACT 15:14 Allae tan nizor bonda oar lagi o-Ihudi oḳol taki eḳdol manshore fosond ḳori nia deḳaisoin, o-Ihudi oḳlor bae-o tan kial ase, ar ou ḳota-u Saimon-Fitore oḳon boyan ḳorsoin.
ACT 15:15 I boyanor loge nobi oḳlor kalamor-o mil ase; zela leḳa ase,
ACT 15:16 Erbade ami aia Daudor foṛi zaoa gor hirbar tiar ḳormu, zeta binash oigese ita hirbar gatimu, hirbar noya ḳoria banaimu,
ACT 15:17 zate baki hoḳol manshe Mabudor tallash ḳoroin, ar zoto o-Ihudir nam amar bondar ḳatat leḳa ase, tara-o tallash ḳoroin. Mabude-u ou kalam ḳoira,
ACT 15:18 Ita bout din ag taki-u tan malum asil.”
ACT 15:19 Iakube aro ḳoila, “Te amar foysala oilo, o-Ihudi taki zera Allar foti or, tarare amra kunu duk ditam nae.
ACT 15:20 Tarar gese ḳali ou hukumḳan lekia zanai dei, tara zanu devtar namor hokkol ḳam taki, zinar ḳam taki, ar gola ṭifia mara zandaror gust ḳaoa ar lou ḳaoa taki duroi roin.
ACT 15:21 I hukum oḳol tarare zananikan bala, ḳaron Musae zeta talim disoin, ita bout zomana taki forteḳ ṭauno manshe toblig korra, ar tain zeta lekia toia gesoin, ita to forteḳ Zummabare mosidainto tilaot ḳora or.”
ACT 15:22 Teu sahabi oḳol, zomator murobbi oḳol, ar zomator hoḳol am manshe eḳmot oila, tarar nizor maz taki koyzonre fosond ḳoria Paulus ar Barnabasor loge Antiokiat faṭai diba. Ou tara Silas ar Ehuda urfe Barshabba namor ou dui murobbire fosond ḳorla.
ACT 15:23 Tarar ato ou siṭi lekia faṭaila: “Antiokia, Siria ar Kilikiar o-Ihudi mumin baiaintor gese, sahabi oḳole, zomator murobbi oḳole, ar mumin oḳole i salam zanairam.
ACT 15:24 Amra hunlam zen, amrar maz taki koyzon manush gia tarar zobandi afnarare ostir banaia fereshani korar; oile amra to tarare ila ḳamor kunu hukum disi na.
ACT 15:25 Erlagi amra hoḳole eḳmot oia ḳoyzonre fosond ḳoria, amrar mayar manush Barnabas ar Paulusor loge ḳori tarare afnaintor gese faṭailam,
ACT 15:26 Barnabas ar Paulus to amrar Hozrot Isa al-Mosir namor lagi morar zuka oigesla.
ACT 15:27 Amra Ehuda ar Silasre-o faṭailam, tara ita muke muke-o zanaiba.
ACT 15:28 Pak Ruhu ar amra milia oṭa-u bala mono ḳorlam zen, ou zoruri talim oḳol saṛa ar kunu bar afnaintor ufre na gosai.
ACT 15:29 Te afnara devtar namor mana kunu ḳani, lou, ar gola ṭifia mara zandaror gust ḳaiba na, ar zinar ḳam taki duroi roiba; ita taki hefazot roile afnaintor balai oibo. Iti, assalamu alaikum.”
ACT 15:30 Bade tara bidae loia Antiokiat aila, hino tara zomator manshore ekḳano dola ḳori siṭikan shomzai dila.
ACT 15:31 Manshe siṭikan foṛia i shantir nosiot hunia kushi oila.
ACT 15:32 Ehuda ar Silas, era duiozon nobi asla, era hinor mumin oḳolre bout laḳan oaz-nosiot ḳoria utshaho dila ar tarar imani bol mozbut ḳorla.
ACT 15:33 Hono bakka ḳoydin roar bade, zera tarare faṭaisla erar gese hirbar firot aita ḳori, Antiokiar mumin oḳolre salam zanaia bidae loila.
ACT 15:35 Oile Paulus ar Barnabas Antiokiat roigela, tara hino aro boutor loge malikor kalamor talim ar kush-ḳobri toblig korat roila.
ACT 15:36 Ḳoydin bade Pauluse Barnabasre ḳoila, “Amra zeta zagainto age malikor kalam toblig korslam, ao, hou zagainto hirbar gia deḳa ḳori. Dekia ai baiaintor hal-hokikot kita.”
ACT 15:37 Teu Barnabasor kial oilo, Hannan urfe Markusre loge loia zaita;
ACT 15:38 oile Pauluse enre loge neoa bala mono ḳorla na, ḳaron Markuse age Pamfuliat tarare falaia geslagi, tarar loge ḳam ḳora bad dilaisla.
ACT 15:39 Erlagi Paulus ar Barnabasor maze motor omil oigelo erdae tara zarzir fote alog oigela. Barnabase Markusre loia zazo ḳori Saipras difo gela;
ACT 15:40 ar Pauluse Silasre fosond ḳoria, Antiokiar mumin oḳlor zoriae Mabudor rohomotor ato shofa oia roana dila.
ACT 15:41 Tain Siria ar Kilikiar mazedi roana ḳoria fote fote zomat oḳolre aro mozbut ḳorla.
ACT 16:1 Hozrot Paulus foyla Dorbi ar bade Lushra ṭauno gia azila. Lushrat Timoti name eḳzon ummot asla, tan ma imandar, ma to Ihudi zator, oile baf Iunani zator.
ACT 16:2 Lushra ar Ikonia ṭaunor hoḳol imandare Timotir bout tarif ḳorta.
ACT 16:3 Pauluse Timotire loge nita ḳori kial ḳorla; tain Timotire mosolmani koraila, ḳaron hi zagaintor Ihudi oḳole zanta Timotir baf oila Iunani zator manush.
ACT 16:4 Zeruzalem zomator sahabi ar murobbi oḳole zeta hukum disla, tara ṭaune ṭaune sofor ḳori kori ita mumin oḳlor ato shomzaila ar manar tagid dila.
ACT 16:5 Oula zomator mumin oḳlor iman mozbut oilo, ar dine dine tarar foriman aro baṛilo.
ACT 16:6 Pak Ruhe Hozrot Paulus ar tan logor hoḳolre Asiya desho kalam toblig korte mana ḳorla, teu tara Forugia ar Galatia deshor bitredi faroia gela.
ACT 16:7 Gia Mushiar shimanat aia harle Bitunia desho zaita saila, oile Isar ruhe tarare hikano zaite dila na,
ACT 16:8 erdae tara Mushia desh falaia Toruas ṭauno gelagi.
ACT 16:9 Raitor bala Pauluse gaibi eḳ doroshon faila; tain deḳla, Makidonia deshor eḳ beṭae ubaia tanre minot ḳori koira, “Makidoniat faroia aia amrare shaijjo ḳoroukka.”
ACT 16:10 Tain i alamot deḳar bade-u amra Makidoniat zaoar lagi tiar oilam, amra buzlam, Makidoniar manshor gese kush-ḳobri toblig korar lagi Allae amrare faṭaira.
ACT 16:11 Ou amra Toruas saṛia zazo ḳori shuza Samtraki difo gelam, hin taki bador din Niafoli ṭauno gia azilam.
ACT 16:12 Niafoli taki amra Filifi ṭauno gelam. Iṭa oilo Makidoniar hoḳol taki boṛo ṭaun, ino Ruman razar manush boshot ḳorta. Amra ḳoydin ono roilam.
ACT 16:13 Eḳ Zummabare amra ṭaunor baira gangor faro gelam, mono ḳorlam, hikano Ihudi dormor dua ḳorar kunu zaga ase. Hino gia amra beṭintor eḳ dol dekia tarar loge mato boilam.
ACT 16:14 Ar erar maze Tuatira ṭaunor Ludia namor o-Ihudi Allaraia eḳ beṭi manush asla, ein baingoni rongor ḳandani kafoṛor ḳarbar ḳorta. Tain amrar boyan hunat asla, ar Mabude tan dilor duar kulia dilaila, zate tain Paulusor boyan dil dia hunoin.
ACT 16:15 Tain ar tan goror hoḳole toubar gusol ḳoria harle tain minot ḳori koila, “Afnara zudi amare malikor ufre imandar mono ḳoroin, te amar baṛikano aia roukka.” Ḳoia tain zure zatia amrare tan baṛit nilagi.
ACT 16:16 Eḳdin amra zebla hou dua ḳorar zagat zaoat aslam, ou shomoy zinnat shadoki eḳ bandi beṭi aḳta-u amrar samne ailo. Tai baiggo gonia tair girost oḳolre bout lab ḳoraito.
ACT 16:17 Tai amrar ḳore ḳore aia sillaia ḳoilo, “I manushguin uforalar shebok, era tumrare toranir fot deḳai dira.”
ACT 16:18 Tai bout din dori ita ḳorsil, eḳdin Pauluse biroḳto oia tair bae muk firaia hou zinre ḳoila, “Ami Isa al-Mosir name tumare i hukum diram, tumi i beṭir ges taki bar oia zaogi!” Ar loge loge-u hi zin bar oia gelogi.
ACT 16:19 Oile tair munib oḳole tarar lab fuṛaigelo dekia, Paulus ar Silasre doria ṭania shodoro loia gela.
ACT 16:20 Bade hakim oḳlor gese shomzai dia ḳoila, “I manush guinte amrar ṭauno aia betaya gonḍogul baṛai dise. Era to Ihudi ar amra oilam Ruman manush.
ACT 16:21 Era ou zator ḳayda-ḳanunor ḳota manshore hikaira, zeta ḳora amrar lagi be-aini.”
ACT 16:22 Ar hinor aro manush eḳloge dol bandia Paulus ar Silasor birudita ḳorlo, teu hakim oḳole erar ḳafoṛ-sufoṛ kulia singladi marar hukum dila.
ACT 16:23 Ar kub balaṭike singladi maria tarare zelo harai toia, zelor ofisarre hukum dila ḳoṛaḳoṛi fahara deoar lagi.
ACT 16:24 Zelor ofisare i hukum faia hari tarare zelor bitoror kuṭat harai toila, ar tarar faot ḍanḍa-beṛi lagaila.
ACT 16:25 Ada raitkur bala Paulus ar Silase Allar hamd-gozol gaite gaite dua ḳorat asla, zelor ḳoydi oḳole ḳan fatia tarar gozol hunla.
ACT 16:26 Ou shomoy aḳta-u boṛo eḳ boisal oilo, asta zelḳanar bit ḳafia uṭlo. Zelor hoḳol duar ar ḳoydi oḳlor shikol kuligelo.
ACT 16:27 Teu zelor ofisaror gum banglo ar zelor hoḳol duar kula dekia tan toluar bar ḳoria nize nize kun oizita saila, tain mono ḳorla, hoḳol ḳoydi bagia gesoingi.
ACT 16:28 Ou Pauluse dekia sillaia ḳoila, “Dom lo, dom lo, nizor ḳeti korio na, amra hoḳol-u ikano roisi.”
ACT 16:29 Teu ofisare eḳzonre batti anar hukum dia, tain douṛaia gia bitre hamaila, ar ḍoror suṭe ḳafi kafi Paulus ar Silasor faot foṛla;
ACT 16:30 bade Paulus ar Silasre bare ania zikaila, “Sab oḳol, ami kita ḳorle zane bastam farmu?”
ACT 16:31 Tara zuaf dila, “Hozrot Isar ufre iman anoukka, teu afne ar afnar baṛir hoḳol zane basba.”
ACT 16:32 Paulus ar Silase zelor ofisar ar tan baṛir hoḳolre malikor kalam hunaila.
ACT 16:33 Ar hou rait-u tain Paulus ar Silasre loia gia tarar shorilor ḳaṭa-sira doia dila, bade tain ar tan baṛir hoḳole loge loge toubar gusol ḳorla.
ACT 16:34 Ar tarare tan nizor goro nia ḳana ḳaite dila. Baṛir hoḳole mili Allar ufre iman ania bout kushi oila.
ACT 16:35 Bador din biane hakim oḳole fulish faṭaia zanaila, “I koydi oḳolre saṛi deo.”
ACT 16:36 Teu zelor ofisar sabe Paulusre zanaila, “Hakim oḳole hukum disoin afnarare saṛi dibar lagi, te afnara bar oia aukka ar sohi-salamote toshrif neukka.”
ACT 16:37 Pauluse tarare ḳoila, “Amra Ruman manush, amrar kunu bisar na ḳoria hoḳlor samne singladi marsoin ar zelo haraisoin. Oḳon hakim oḳole amrare lukaia saṛi dita saira? Ita oito nae, tara nize aia amrare bar ḳori neukka.”
ACT 16:38 Fulishe gia hakim oḳolre ou ḳota zanaila, hakim oḳole Paulus ar Silasre Ruman manush hunia ḍoraigela.
ACT 16:39 Tara Paulus ar Silasor gese aia maf saila, ar tarare bare nia ṭaun taki hori zaoar lagi minot ḳorla.
ACT 16:40 Teu tara zelḳana taki bar oia aia Bibi Ludiar baṛit hamaila. Hikano mumin oḳlor loge deḳa-shakkat ḳoria tarare utshaho dila, bade hon taki roana oila.
ACT 17:1 Hozrot Paulus ar Silas Amfipuli ar Apollunia ṭaunor mazedi gia Tisholonikit aila. Hino Ihudi oḳlor ekkan mosid asil;
ACT 17:2 Paulus tan niom moto-u hi mosido gela, ar laga laga tin Zummabare manshore Pak Kalam taki buzaila.
ACT 17:3 Tain buzaila ar forman-o deḳaila, toklif shoijjo ḳora ar murda taki zinda oia uṭa al-Mosir lagi zorur asil. Tain ḳoila, “Ou ze Isar ḳota ami afnarare buzairam, ein-u al-Mosi.”
ACT 17:4 Ita hunia erar maz taki koyzone iman ania Paulus ar Silasor loge shorik oila. Bout Allaraia Iunani beṭain ar ḳandani beṭin-o tarar loge shorik oila.
ACT 17:5 Oile Ihudi oḳole ingsha ḳoria bazari gunḍain ania dol banailo ar ṭaunor maze gulmal lagai dilo. Tara Zasunor baṛit hamla ḳoria Paulus ar Silasre tukaia manshor samne anto sailo.
ACT 17:6 Oile erare na faia tara Zasun ar aro ḳoyzon muminre ṭania sesraia ṭaunor shordar oḳlor gese loia gelo, ar sillai sillai koilo, “Ou beṭainte asta duniare lonḍo-bonḍo ḳoria oḳon ono-o aise.
ACT 17:7 Ar ou Zasune tar nizor baṛit erare memandari korse; era hoḳole amrar bashsha Ḳoisoror hukum na mania ḳoira, tain saṛa Isa name aroḳzon bashsha asoin.”
ACT 17:8 Ou laḳan mat matia tara shordar oḳolre ar am manshore-o uslaia dilo.
ACT 17:9 Shordar oḳole Zasun ar tan logor hokkolor zamanot loia zamine saṛi dila.
ACT 17:10 Rait oar bade mumin oḳole zoldi kori Paulus ar Silasre Biroyat faṭai dila. Hikano gia harle tara Ihudir mosido aila.
ACT 17:11 Tisholonikir Ihudi oḳol taki Biroya ṭaunor Ihudi oḳol bout kula-mela asla. Tara Allar kalam hunia kub gorzi oia kobul ḳorla, ar Pauluse zeta talim dira ita hasa ki na deḳar lagi tara forteḳ din Asmani Kitab kulia milaita.
ACT 17:12 Tarar maz taki bout Ihudie, ar Iunani taki-o bout ḳandani beṭain-beṭinte Isar ufre iman anla.
ACT 17:13 Oile Tisholonikir Ihudi oḳole zebla hunlo, Pauluse Biroyat aia-o toblig korra, ou tara-o Biroyat aia hinor manshore uslaia gulmal lagailo.
ACT 17:14 Ita hunia-u mumin oḳole Paulusre doriar faro faṭai dila, oile Silas ar Timoti Biroyat-u roila.
ACT 17:15 Paulusre loia zera roana oisil, tara tanre loia Atiniat gela. Gia harle Pauluse tarare ḳoila, Silas ar Timotire kub zoldi kori tan gese faṭanir lagi, ḳoia tarare bidae dilaila.
ACT 17:16 Atiniat aia Hozrot Pauluse zebla Silas ar Timotir lagi bar saira, ou shomoy tain deḳla hi ṭaunor maze murtie bora, dekia tan monor maze kub ḳoshṭo faila.
ACT 17:17 Ou tain Ihudi mosido gia Ihudi ar Allaraia Iunani oḳolre, ar fortidin bazaro gia-o zerar loge deḳa oito, tarar loge-o Hozrot Isar befare batchit ḳorta.
ACT 17:18 Teu Ifikuri ar Stuiki motobador ḳoyzon fonḍite tan loge torko lagaila, tara ḳoyzone ḳoila, “I bok-bok korrae kita hikaito sae?” Ar ḳeu ḳeu ḳoilo, “Mone ḳoy he kunu bideshi devtaintor ḳota zanaito sar.” Ḳaron Pauluse Hozrot Isa ar murda taki zinda oar kush-ḳobrir ḳota toblig korsila.
ACT 17:19 Bade tara Paulusre ania Areo-fagor mozliso nia azir ḳorla, ar tanre zikaila, “Ou zeta noya shikka afne ḳoira, ita kita amrare-o hunaiba ni?
ACT 17:20 Afne to kisu azgubi mat matira, te amra zantam sairam er asol maniḳan kita.”
ACT 17:21 Atinia ṭaunor manshe ar hino roura musafir oḳole-o ḳali noya noya befaror mat matia ba hunia tarar din ḳaṭaita.
ACT 17:22 Teu Hozrot Pauluse Areo-fagor mozlisor mazḳano ubaia ḳoila, “O Atiniar manush oḳol, ami deḳram, afnara hoḳol ḳamo-u kub devta bozoin.
ACT 17:23 Ami zebla faḳanit geslam, ou shomoy afnaintor pujar hoḳolta guria deḳlam, ami deḳlam eḳ fattoror maze leḳa ase, ‘Osina devtar name.’ Te hunoukka, afnara na-sinia zen puja ḳorra, ami tan ḳota-u afnaintor gese toblig korram.
ACT 17:24 Alla Pak, zein i dunia ar er mazor hoḳolta foyda ḳorsoin, tain behest ar duniar malik, tain to manshor banail kunu mondiro boshot ḳoroin na.
ACT 17:25 Tan kunu obab nai gotike manshor ges taki kunuta neoar-o goroz nai, tain-u to hokkol manshor zan, dom, ar hoḳolta dan ḳoroin.
ACT 17:26 Tain eḳzon manush taki hokkol zator manush foyda ḳorsoin, asta duniai zuṛi boshot ḳorar lagi. Tara kun amolo kunano boshot ḳorba iṭa-o tain foysala ḳori disoin.
ACT 17:27 Allae i kam ḳorsoin zate manshe tanre tallash ḳoroin, ar tukai tukai tan didar fain. Otoso tain amra ḳeuror ges taki duroi nae.
ACT 17:28 Afnaintor ḳoyzon ḳobie-o ḳoisoin, ‘Tan kudrote-u amrar zindegi, goti ar ṭai.’ Ar, ‘Amra-o tan oarish.’
ACT 17:29 “Ar amra zebla Allar oarish, te Allar surotre manshor kial-morzie banail shuna-rufa ba fattoror murti mono ḳora amrar lagi usit nae.
ACT 17:30 Agor zomanar manshe ita zanta na gotike Allae itare ḳosur mono ḳorsoin na, oile oḳon tain hoḳol zagar hokkol manshore mon bodlaia touba ḳorar lagi hukum dira.
ACT 17:31 Tain to oula eḳ dino ṭik korsoin, zedin tan fosondor hokkani manshor atane din-duniar hok bisar ḳoraiba. Iṭare ekin ḳorar lagi tain hou manshore murda taki zinda ḳoria er forman-o deḳaisoin.”
ACT 17:32 Murda oḳol hirbar zinda oia uṭba ikan hunia ḳeu ḳeu asha-ashi korlo, ar ḳeu ḳeu ḳoilo, “Afnar i befarḳan amra aroḳbar hunmu.”
ACT 17:33 Ou laḳan ḳori Pauluse hi mozlis taki uṭia gelagi.
ACT 17:34 Oile ḳeu ḳeu tan loge eḳmot oila ar iman-o anla. Erar maze Dionusio name Areo-fagor eḳzon membar, Damaris namor eḳzon beṭi manush ar aro ḳoyzone iman anla.
ACT 18:1 Bade Hozrot Paulus Atinia saṛia Korint ṭauno aila.
ACT 18:2 Hino aia harle Akil namor eḳzon Ihudir loge tan deḳa oilo. En baṛi Fonto desho, Ruman bashsha Keladuse Ihudi oḳolre Rum taki hori zaoar hukum disla gotike, Akile tan bou Fiskilare loge loia tuṛa ḳoydin age Itali taki Korintot aisla. Paulus tarar ḳandat gela.
ACT 18:3 Tain-o tarar laḳan tambu bananir ḳam ḳorta gotike tain tarar loge roia ou ḳamo lagla.
ACT 18:4 Forteḳ Zummabare Paulus Ihudi mosido gia Isar befare batchit ḳorta, tain Iunani ar Ihudi oḳolre iman anar lagi tagid dita.
ACT 18:5 Hozrot Silas ar Timoti Makidonia taki aia harle, Pauluse ḳali Allar kalamor toblig korta. Tain Ihudi oḳolre buzaita, Hozrot Isa-u oila al-Mosi mani Allar ḳas fosond ḳora zon.
ACT 18:6 Oile Ihudi oḳole zebla Paulusor birudita ar bodnam gaoat lagla, i shomoy tain nizor lebasor duil zaṛia falaia ḳoila, “Afnaintor lour dae afnaintor matat-u rouk. Ami amar dayitto taki kalas failam. Oḳon taki o-Ihudi oḳlor muka fot dorlam.”
ACT 18:7 Ḳoia hari hon taki Titio-Iustus namor eḳzon Allaraia manshor baṛit gela. En baṛi asil mosidor loge.
ACT 18:8 Mosidor mutolli Kirispo sab ar tan baṛir hoḳole malikor ufre iman anla. Ar Paulusor boyan hunia Korintio oḳlor maze boute iman ania toubar gusol ḳorla.
ACT 18:9 Raitor bala Mabude Paulusre doroshon dia ḳoila, “Ḍoraio na, toblig salaia zao, muk bond ḳorio na.
ACT 18:10 Ami tumar loge loge asi, ḳeu tumare hamla ḳoria tumar ḳeti korto nae. Ḳaron i ṭauno amar bout proza asoin.”
ACT 18:11 Ou Paulus deṛ boros dori hono roia manshore Allar kalam talim dila.
ACT 18:12 Bade Galion zebla Gris deshor hakim asla, ou shomoy Ihudi oḳol eḳloge milia Paulusre doria bisar ḳoranir lagi raz dorbaro nia ḳoila,
ACT 18:13 “Ou beṭae amrar shoriotor hukumor ulṭa talim dia ḳor, amra-o oula Allar ebadot ḳortam.”
ACT 18:14 Oile Pauluse zebla zobanbondi dita saila, ou shomoy Galione Ihudi oḳolre ḳoila, “O Ihudi oḳol, iṭa zudi kunu oinnae ba dushor ḳam oito te tumrar nalish ami hunlam one.
ACT 18:15 Oile iṭa zebla kunu ḳas buli ba nam ba tumrar shoriotor firka, te ita bishoy-ashoy tumra-u foysala ḳorilao, ita mator lagi ami bisar ḳortam sai na.”
ACT 18:16 Ḳoia hari tain adalot taki itare bar ḳori dilaila.
ACT 18:17 Teu manshe Ihudi mosidor ḳadim Susinre doria adalotor samne mair-doir ḳorla. Oile Galione imuka firia-u saila na.
ACT 18:18 Paulus aro bout din Korintot roar bade, mumin oḳlor ges taki bidae loia Siria desho zaita ḳori Kinkria namor zaz gaṭo aila, Akil ar Fiskila-o tan loge aila. Paulusor eḳ mannot asil ḳori ono aia tan matar sul ḳamaia zazo uṭla.
ACT 18:19 Bade Ifis ṭauno aia Pauluse hi duiozonre ono toia, tain mosido hamaia Ihudi oḳlor loge Hozrot Isar befare batchit ḳorla.
ACT 18:20 Ihudi oḳole tanre ḳoydin tarar gese roar lagi minot ḳorle-o, tain razi oila na.
ACT 18:21 Tain erar ges taki bidae loia ḳoila, “Inshalla, ami hirbar aimu.” Ḳoia tain Ifis taki zazo ḳori roana oigela.
ACT 18:22 Ar Ḳoisoriat aia harle zaz taki lamia Zeruzalemo gela, gia zomator manshor loge mulaḳat ḳoria hon taki Antiokiat aila.
ACT 18:23 Antiokiat ḳoydin ḳaṭanir bade hikan taki roana dia, Galatia ar Forugia deshor zagae zagae guria mumin oḳlor imani bol mozbut ḳorla.
ACT 18:24 Er maze Apollos namor eḳzon Ihudi Ifis ṭauno aila. Tan baṛi Alekzandria ṭauno, tain shundor ḳori oaz ḳoroin, ar Asmani Kitab-o kub bala buzoin.
ACT 18:25 Malikor torikar ilim-o tan asil, tain ruhe gorom oia Hozrot Isar befare sohi-shuddo oaz-nosiot ḳorta ar talim dita. Oile tain ḳali Hozrot Ehiar torikar toubar gusol saṛa ar kunu toubar gusolor ḳota zanta na.
ACT 18:26 Tain kub himmot ḳoria mosido gia oaz ḳorta. Fiskila ar Akile tan oaz hunia tanre tarar baṛit daot dila, ar Allar rasta aro bala ḳori buzaia dila.
ACT 18:27 Bade Apollos zebla Gris desho zaita saila, i shomoy imandar oḳole tanre utshaho dila, ar tanre kobul ḳorta ḳori ummot oḳlor gese siṭi-o dila. Teu tain gia Griso azir oila, ar Allar rohomote zera iman anchila tarar bout fayda oilo.
ACT 18:28 Ar Hozrot Isa-u zen al-Mosi, ou ḳota to tain Pak Kitab taki forman deḳaia, manshor samne himmot ḳori Ihudi oḳolre ekkere la-zuaf banaila.
ACT 19:1 Apollos zebla Korintot asla, ou shomoy Hozrot Paulus Asiya deshor mazedi Ifis ṭauno aila. Hikano ḳoyzon ummotor loge deḳa oae,
ACT 19:2 tain erare zikaila, “Afnara iman anar shomoy kita Pak Ruhu hasil ḳorsla ni?” Tara zuaf dila, “Pak Ruhu aroḳta kita, ita to amra hunchi-u na.”
ACT 19:3 Pauluse tarare ḳoila, “Te afnara kun torikae toubar gusol ḳorsla?” Tara ḳoila, “Ehia nobir torikae.”
ACT 19:4 Ou tain ḳoila, “Guna taki mon bodlaile ze gusol ḳorail oy, oṭa-u oilo Hozrot Ehiar torikar gusol, oile Ehiae to talim disla, tan bade zein toshrif anra, mani Hozrot Isar ufre-o iman ana lagbo.”
ACT 19:5 I nosiot hunar bade tara Hozrot Isar name toubar gusol ḳorla.
ACT 19:6 Bade Pauluse tarar ufre at raḳle tara Pak Ruhu faila, teu era nanan gaibi bashae matila ar firaki mat mata dorla.
ACT 19:7 Era hoḳole milia onuman barozon asla.
ACT 19:8 Bade tain Ihudir mosido gia eḳlagare tin mash himmot ḳoria toblig korla, Allar bashshair befare zukti-torko deḳaia tarare buzaila.
ACT 19:9 Erar maze ḳoyzonor dil na-humar oae tara iman anla na, tara hoḳlor gese Isar torikar gibot gaita. Teu Pauluse erar ges taki horia ummot oḳolre algaia tan loge raḳla, ar forteḳ din Turanno namor eḳ ustador ṭongit gia tarare talim dila.
ACT 19:10 Oula dui bosor guzorar bade Asiya deshor Ihudi ar Iunani, hokkolor ḳano-u Mabudor kalam fosi gelo.
ACT 19:11 Allae Hozrot Paulusor atane asanok keramoti kam zair ḳoraila.
ACT 19:12 Heshe oula-o oilo zen, tan gotror ḳafoṛ ba gamsaḳan-o kunu bemari manshor ḳasat nile-u bemar bala oizito, ar zin-bute-o bemari saṛia bagita.
ACT 19:13 Ermaze ḳoyzon guria faḳaia ḳaora Ihudi tabzati mullae-o Hozrot Isar nam loia zin-but saṛaito sailo, tara oula ḳoito, “Pauluse zen name toblig koroin, hou Isar duai dia, ami tumrare bar oia zaoar hukum diram.”
ACT 19:14 Erar maze Skiba namor eḳzon Ihudi fordan imamor shat fuae-o oula ḳorto.
ACT 19:15 Teu eḳdin bute tarare zuaf dilo, “Ami Isare-o sini, Paulusre-o sini, oile tumra ḳe?”
ACT 19:16 Ḳoia-u ze beṭare bute dorsil hi beṭae tarar ufre fal dia foṛia mair-doir ḳoria tara shato zonre arailo. Maire tarar shoril siṛia-biṛia zoḳom oigelo, tara lemṭa oia i baṛi taki bagila.
ACT 19:17 I kobor zebla Ifisor Ihudi ar Iunani oḳole zanla, te tara hokkole ḍoraigela, ar sairobae Hozrot Isar namor mohima zair oilo.
ACT 19:18 Zera Hozrot Isar ufre iman anchil, era boute aia hari kula-mela ḳori tarar bad ḳamor ḳota shikar ar zair ḳorla.
ACT 19:19 Ar zera zadu-ṭunar ḳam ḳorto, tarar maze-o boute tarar zadu-ṭunar boiain ania dola ḳori hoḳlor samne zalailila. I boiaintor dam hishab ḳoria deḳa gelo foinchash azar rufar dinar.
ACT 19:20 Ou laḳan ḳori malikor kalam bout baṛilo ar manshor maze kub ḳam ḳorlo.
ACT 19:21 Ita goṭar bade Pauluse mone mone niot ḳorla, tain Makidonia ar Gris oia Zeruzalemo zaitagi, tain ḳoila, “Zeruzalem zaoar bade ami Rum ṭauno-o zaoa zorur.”
ACT 19:22 Bade tain Timoti ar Irastas namor tan duio ḳadimre Makidoniat faṭaia, nize aro ḳoydin Asiya desho roila.
ACT 19:23 Ou shomoy Isar torikar bishoy loia bout gonḍogul laglo.
ACT 19:24 Ḳaron Dimitri name eḳzon baniae Artemis debir mondiror nomunae rufadi huru huru mondir banaito, aro bout baniae-o ou ḳam ḳoria bout lab ḳorto.
ACT 19:25 He ou bania oḳolre ar tarar logi oḳolre-o ekḳano dola ḳoria ḳoilo, “Bai oḳol, tumra to zanrae, i karbar taki amra bala lab fairam.
ACT 19:26 Oile tumra deḳrae ar hunrae-o, Paulus namor ou beṭae ḳali amrar Ifiso-u nae, ḳoite gele asta Asiya zuṛi bout manshore ḳoise ar ekin ḳoraise, ator banail deb-debi oḳol bule kunu devta-u nae.
ACT 19:27 Erlagi oḳon ḍor ḳorer, ḳali amrar ḳarbaror-u bodnam oibo ila nae, oile mohadebi Artemisor mondir-o beḳama oizibo, ar Asiya deshor hokkol manshe ar hara duniaiye milia zen puja ḳore, tain-o nizor ijjot araiba.”
ACT 19:28 Ita hunia tara gusae aguin oia zure zure sillaia ḳoila, “Ifisiar Artemis debi, zindabad!”
ACT 19:29 Loge loge asta ṭauno gonḍogul lagigelo; manshe Makidoniar Gous ar Aristakus namor Paulusor logor duizonre doria, eḳloge fal bandia douṛaia sṭeḍiamo loia gela.
ACT 19:30 Hozrot Paulus ou biṛor samne zaita saila, oile mumin oḳole tanre aṭḳailla.
ACT 19:31 Asiya deshor shorḳari ofisaror maze ḳoyzon asla Paulusor dust, era ḳobriadi tanre zanaila, tain hi biṛor samne gia nizor mosibot ḍakia anta na.
ACT 19:32 Biṛor maze manshe kub silla-silli ar geinjam lagaila. Beshir bag manshe zanta-u na ino kita oise, tara eḳzone eḳlaḳan, aroḳzone aroḳ laḳan matila.
ACT 19:33 Teu ḳoyzon Ihudie Sikondor namor eḳzonre samne ṭelia dilo bashon dibar lagi. Tain atdi ishara dila, zate manush nirai oia tan boktita hunoin.
ACT 19:34 Oile manshe zebla buzla, ein-o Ihudi, teu tara aro zure zure onuman dui gonṭa dori sillaia ḳoila, “Ifisiar Artemis debi, zindabad!”
ACT 19:35 Heshe ṭaunor searmane manshore nirai koraia ḳoila, “O Ifisia oḳol, ḳoukka sain, kun manushgue na zane zen, i Ifis ṭaun oilo mohan Artemis debir mondir ar asman taki tan zeta murti lamat foṛse er roikka ḳoroneala?
ACT 19:36 Ar i hasa ḳota ḳeu zebla ḳonḍaito farto nae, te bebutar laḳan kunu ḳam na ḳoria tumra nirai o.
ACT 19:37 Ou manshe to amrar mondiro suri-o ḳorse na, amrar debir kunu bodnam-o ḳorer na, ta-o tumra erare doria ancho.
ACT 19:38 Te huno, Dimitri ar tar logor bania oḳlor zudi kunu nalish taḳe, te adalot to kula ase, hakim oḳol-o asoin, tara hono gia zarzir mamla-mokoddoma ḳorouk.
ACT 19:39 Oile tumrar ar kunu dabi-daoa taḳle ita niom mafik mozliso boia miṭ-maṭ ḳora oibo.
ACT 19:40 Ashole aizkur i geinjam laganir lagi amrar ufre-u dush foṛto fare, i gonḍogul laganir kunu ḳaron deḳaitam fartam nae.”
ACT 19:41 Oḳan ḳoia tain mozlis bangi dila.
ACT 20:1 Geinjam shesh oar bade Hozrot Pauluse mumin oḳolre ḳobordi anaila, tara aia harle tain tarare utshaho dia, sohi-salamote bidae loia Makidoniat zaita ḳori roana oila.
ACT 20:2 Makidoniar mazedi zaite zaite mumin oḳolre bout utshaho dia, Gris desho aia azila.
ACT 20:3 Ono aia tin mash roar bade zebla zazo ḳori Siria desho zaita saila, ou shomoy Ihudi oḳole tan bifokke ku-motlob ḳorer hunia, tain Makidoniar mazedi zaita ḳori niot ḳorla.
ACT 20:4 Ar Biroya ṭaunor Furosor fua Sufatos, Tisholonikir Aristakus ar Sikundos, Dorbi shohoror Gous, Timoti, ar Asiya deshor Tukik ar Tofim, era hokkol Paulusor loge gela.
ACT 20:5 Era age oia Toruas ṭauno gia amrar lagi bar saoat asla.
ACT 20:6 Bade Ḳamir Saṛa Ruṭir Id shesh oigele amra zazo ḳori Filifi taki roana dia, fas din bade Toruas aia tarar loge millam, ono shatdin roilam.
ACT 20:7 Haftar foyla din Isar mezbani kaoar lagi amra ekḳano dola oile, Paulus bador din zaitagi kori maz rait forzonto mumin oḳlor gese oaz ḳorla.
ACT 20:8 Amra ufror talar ze goro boislam hikano bout batti asil.
ACT 20:9 Ar Utuḳ namor eḳ zuan fua kiṛkir ufre boat asil, Pauluse bout shomoy dori oaz ḳorae he huni huni gumai gesil, aḳta-u he tin tala taki lamat foṛigelo. Teu manshe tare mora halote tulla.
ACT 20:10 Paulus lamat lamia fuar ufre ḳait oia ainja ḳori doria ḳoila, “Tumra uloistol ḳorio na, tar bitre to zan ase.”
ACT 20:11 Bade tain hirbar ufror talat gia mezbani kaila, ḳaia harle fozor forzonto batchit ḳoria bidae loila.
ACT 20:12 Er maze ou fuare manshe zita halote baṛit nia zar for nai kushi oila.
ACT 20:13 Amra age gia zazo ḳori Asus gaṭor bae roana oilam, mono ḳorlam Paulusre hon taki tulmu. Ḳaron tain kial ḳorsla aṭia hikano gia uṭta.
ACT 20:14 Asus aia tain amrar loge milar bade, amra tanre zazo tulia Mitulinit ailam.
ACT 20:15 Bador din amra zaz kulia hikan taki roana oia Kius difor ḳandat ailam; er bador din amra Samus difo roilam, tar bador din gia amra Milita gaṭo biṛilam.
ACT 20:16 Asiya desho Pauluse deri korar kial na oae tain mone mone ṭik korsla, Ifiso na hamaia er galabae zaibagi, tain zoldi kori Zeruzalemo gia hari Fonchaisha Id hono adae ḳorta saila.
ACT 20:17 Milita taki Pauluse ḳobria faṭaia Ifisor zomator murobbi oḳolre anaila.
ACT 20:18 Tara aia fosar bade Pauluse ḳoila, “Afnara to zanoin, Asiya desho aia harle ami foyla din taki-u kila afnaintor loge shomoy ḳaṭaisi.
ACT 20:19 Ihudi oḳlor bout zator ku-foramish taki, tarar fatail fondir maze-o ami furafur norom dile, souḳor fani falaia Mabudor gulami korsi.
ACT 20:20 Afnarar fayda oibo ila kunu talim-u na lukaia furafur zanaisi, kula-mela mozliso ar goro goro gia talim dite-o na ḳorsi na.
ACT 20:21 Ihudi ar Iunanir gese toblig koria buzaisi, tarar gunar mon bodlaia Allar foti oita, ar amrar malik Hozrot Isar ufre iman anta.
ACT 20:22 Ar oḳon Pak Ruhur hukumbondi oia ami Zeruzalemo zairam, hikano amar kun dosha oibo, zani na.
ACT 20:23 Ḳali ou ḳoborḳan zani, Pak Ruhe hokkol ṭauno amare ou ḳota zanaira, toklif ar zel ḳaṭa amar lagi bar sar.
ACT 20:24 Oile-o amar nizor zanor forua ḳori na, amar zanre oto mulloban mono ḳori na. Ami irada ḳora fotor hesh ṭikana forzonto douṛaitam sairam. Allar rohomotor kush-ḳobrir toblig ar kezmotor ou ze bar Hozrot Isar ges taki faisi, er injam ditam sairam.
ACT 20:25 Oḳon ami eoḳan-o zani, afnara zerar maze ami Allar bashshair ḳota toblig korram, ou afnaintor loge-o ar kunudin deḳa oito nae.
ACT 20:26 Erlagi ami aiz afnaintor gese ou zobanbondi diram, hokkolor lour dae taki ami kalas.
ACT 20:27 Ami Alla Pakor hoḳol laḳan morzir ḳota afnaintor gese boyan ḳorte ḳoredi gesi na.
ACT 20:28 Afnara zarzir befare hushiar oukka. Pak Ruhe afnarare zerar saloḳdar banaisoin, tarar befare hushiar oukka. Allae tan nizor zonredi zerare ḳorid ḳorsoin, hi zomatre furafur deḳa-huna ḳoroukka, zela raḳale tar meṛar falor deḳa-huna ḳore, imam oia afnara-o oula ḳoroukka.
ACT 20:29 Ami zani, ami zaoar bade tumrar maze fagola bagor surotor manush aia hamaiba, tara nirdoy oia falor bout ḳeti korba.
ACT 20:30 Ar afnaintor nizor maz taki-o ḳeu ḳeu mumin oḳolre tar ḳore neoar lagi, hasa talimre misa ḳoia noya talim bar ḳorbo.
ACT 20:31 Erlagi afnara hozag roukka, ar mono raḳba, ami tin boros doria rait-din souḳor fani falaia afnarare hushiar ḳorte dom loisi na.
ACT 20:32 Oḳon Alla ar tan rohomotor kalamor zimmae ami afnarare shofilam. Allar i kalame afnarare goṛia tulbo ar tan pak bonda oḳlor lagi oada ḳora behesti monjilo fosai dibo.
ACT 20:33 Ami to ḳeuror shuna-rufa ba ḳafoṛ-sufoṛor bae lalos ḳorsi na.
ACT 20:34 Afnara nize-u to zanoin, amar ar amar logi oḳlor obab miṭanir lagi ami duio ate ḳam ḳorsi.
ACT 20:35 Ami hoḳol laḳan ḳamor maze nomuna deḳaisi, ou laḳan ḳam ḳoria durbol oḳolre shaijjo ḳora zorur. Hozrot Isar talimre mono raḳo, tain nize bataisoin, neoar saite deoa doinno.”
ACT 20:36 Oḳan ḳoia harle, Pauluse aṭu gaṛia hoḳlor loge dua ḳorla.
ACT 20:37 Bade zomator hoḳole milia kub ḳandon ḳandila, ar Paulusre ainja ḳori doria hunga dila.
ACT 20:38 Ḳas ḳori Paulusor ou ḳotar lagi beshi kandila, tain ḳoisla, tan muk tara ar deḳta nae. Bade tara tan loge oia gia zazo tulia dila.
ACT 21:1 Ifisor zomator murobbi oḳlor ges taki bidae loia, zaz kulia hari amra shuza fote Kus namor difo ailam, bador din amra Rudos difo ailam, hon taki Fatara namor ṭauno gelam.
ACT 21:2 Hono gia harle Foinikiat zaora ekkan zaz failam, amra hou zaze roana dilam.
ACT 21:3 Ar zebla Saipras dif deḳlam, ou shomoy difor ḍain galabae gia amra Siria deshor Shur ṭauno aia lamlam. Hikano zazor mal-samana lamai dilo.
ACT 21:4 Honor mumin oḳolre tukaia hari amra shat din tarar gese roilam; tara Pak Ruhur marfote Paulusre minot ḳorla, tain zanu Zeruzalemo na zain.
ACT 21:5 Ino ḳoydin ḳaṭanir bade amra hirbar roana oilam, teu tara hokkole bou-baichcha loia ṭaunor bare aia amrare aguai dila. Bade doriar faro amra aṭu gaṛia dua ḳorlam.
ACT 21:6 Dua bade zarzir fote bidae loia amra zazo uṭlam, ar tara nizor baṛit gelagi.
ACT 21:7 Shur taki roana oia amra zazor sofor shesh ḳoria Tolimayit azilam, honor mumin oḳolre bala-bura zikanir bade amra tarar loge eḳdin roilam.
ACT 21:8 Bador din amra bidae loia Ḳoisoriat ailam, ar toblig kamor buzurg Filifor baṛit gelam. Ein to Zeruzalemor hou shat ḳadimdaror eḳzon.
ACT 21:9 Tan sairzon abiati fuṛin asla, era nobir laḳan ohi koita.
ACT 21:10 Bakka ḳoydin hono roar bade Agabus namor eḳzon nobie Ehudia taki toshrif anla.
ACT 21:11 Tain aia hari Paulusor ḳomror taga kulilila, ar iṭadi nizor at-fao bandia ḳoila, “Pak Ruhe oula ḳoira, Zeruzalemor Ihudi oḳole ou ḳomror taga-alare oula banba, ar o-Ihudi oḳlor ato shofia diba.”
ACT 21:12 Ita hunia hinor manshe ar amra-o Paulusre bout minot ḳorlam, tain zanu Zeruzalemo zaoa bad dilain.
ACT 21:13 Pauluse ḳoila, “Tumra ita kita lagailae? Ḳandia amar mon bangi dirae ḳene? Hozrot Isar lagi ami Zeruzalemo ḳali bondi oa-u nae, morte-o tiar asi.”
ACT 21:14 Tanre ḳota hunaitam na faria amra nirai oigelam, ar ḳoilam, “Mabudor morzi kaim ouk.”
ACT 21:15 Bade amra mal-samana gaiṭ bandia Zeruzalemo roana dilam.
ACT 21:16 Ḳoisoria ṭaunor ḳoyzon mumin-o amrar loge aila, ar Saipras difor Menason namor eḳzon furana imandaror baṛit amrare loia gela. En baṛit-u amra roar ḳota asil.
ACT 21:17 Zeruzalemo aoar bade mumin oḳole kushi oia amrare kobul ḳorla.
ACT 21:18 Bador din Pauluse amrare loia Hozrot Isar bai Iakubor loge mulaḳat ḳorla. Hikano zomator murobbi oḳol-o aila.
ACT 21:19 Pauluse erare bala-bura zikaia harle, tan tobligor mazdi Allae kilan o-Ihudi oḳlor maze dini kam hasil ḳorsoin, ita hoḳolta eḳ ek kori tarar gese boyan ḳorla.
ACT 21:20 Ita hunia murobbi oḳole Allar tarif ḳorla ar tanre ḳoila, “Bai, tumi to deḳrae, azar azar Ihudie Hozrot Isar ufre iman anchoin, ar tara hoḳole-u Hozrot Musar shoriotre amol ḳorar kial ase.
ACT 21:21 Oile tara ou ḳobor-o faisoin, o-Ihudi oḳlor loge zeta Ihudi oḳol taḳoin, tarare tumi talim diso Musar shoriot bad dilaita ḳori, tara zanu huruttaintor mosolmani korani bad dilain ar Ihudi oḳlor reoaz-o na manoin.
ACT 21:22 Te kita ḳora zae? Tara to nisoy hunba tumi aiso.
ACT 21:23 Oḳon amra tumare zela ḳoi, tumi oula ḳorilao. Amrar maze sairzon beṭain asoin, tara ekkan mannot ḳorsoin;
ACT 21:24 tumi tarare loge loia zao, tarar loge gia tumi ar tarar fak-saf oar ḳoros ar matar sul ḳamanir foysha-o dilao. Teu hoḳole zanba, tumar name tara zeta ḳobor faisoin, ita kunta-u nae, ashole tumi nize-o Musar shoriot ar reoaz manrae.
ACT 21:25 Oile zeta o-Ihudi oḳole iman anchoin, tarare amrar ou foysala lekia zanai disi, devtar name niot ḳora ḳani kaita na, lou ḳaita na ar gola ṭifia mara kunu zandaror gust ḳaita na, kunu zator zinar ḳamo zaita na.”
ACT 21:26 Teu Pauluse hou manush oḳolre loge loia gia, tarar loge nizore-o fak-saf ḳorla. Bador din Baytul-Mukaddoso hamaila, ar tarar fak-saf oar lagi foshu kurbani kundin deoa oibo, eo tarik zanai dila.
ACT 21:27 Fak-saf oar niomor hi shat din shesh na oite-u, Asiya deshor ḳoyzon Ihudie Paulusre Baytul-Mukaddoso dekia, manshore uskai dia tane dorla.
ACT 21:28 Tara sillaia ḳoila, “O Boni Israil oḳol, aguao! Asta duniar manshor gese zegue amrar zatir, amrar shoriotor ar Baytul-Mukaddosor bifokke talim dia gure, ogu hou beṭa! He Iunani oḳolre ono haraia i pak zagaḳanre-o nafak banaise.”
ACT 21:29 Er age to Ifisor Tofimre Paulusor loge ṭauno sokkoro dekia tara mone mone shondoy ḳorsoin, Pauluse tanre Baytul-Mukaddoso-o haraisoin.
ACT 21:30 Teu asta ṭaunor manush gorom oigela, ar eḳloge douṛia aia Paulusre doria Baytul-Mukaddos taki ṭania bare anla, ar loge loge-u er duar oḳol bond ḳorilla.
ACT 21:31 Tara Paulusre marilita saila, oile ou shomoy Ruman sifai oḳlor fordanor gese ḳobor gelo, asta Zeruzalemor maze uloistol lagigese.
ACT 21:32 Loge loge-u tain subedar oḳol ar sifai dol loia douṛia tarar gese aila. Manshe sifai ar sifair fordanre dekia Paulusre mair-doir ḳora bond ḳorla.
ACT 21:33 Teu hi ofisare aia Paulusre aṭok koria duigesa shikoldi bandar hukum dila, bade zikaila, “I manushgu ḳe, he kita dush ḳorse?”
ACT 21:34 Gonḍogulor maze sillaia ḳeu eḳlaḳan, ḳeu ḳeu aroḳ laḳan ḳoilo. Oile tain balamonte kunta shomzita na faria Paulusre nia kenṭonmenṭo haraia toar hukum dila.
ACT 21:35 Paulus siṛir muko zaite-u manshor at taki basanir lagi, sifai oḳole tanre usa ḳoria boia nilagi.
ACT 21:36 Manshe ḳore oia misil dita lagla, “Ogure marilao!”
ACT 21:37 Sifai oḳole tanre kenṭonmenṭo harai dita saira, ou shomoy tain fordan ofisarre Iunani bashae soal ḳorla, “Ami afnar gese kunta mattam farmu ni?” Ofisare ḳoila, “Tumi kita Iunani basha zano ni?
ACT 21:38 Te tumi kita hou Mishori beṭa ni, zegue ḳoydin age laṛai koria, sair azar shontrashire loge loia morubumit gesil?”
ACT 21:39 Pauluse zuaf dila, “Sab, ami eḳzon Ihudi, Kilikiar Tarsho shohoror manush, ami zeta mone ḳoy ita ṭaunor manush nae. Ami afnare minot ḳorram, doya ḳori manshor gese amare matar shuzugkan deukka.”
ACT 21:40 Tain shuzug deoar bade Pauluse siṛir ufre ubaia, manshore nirai oar lagi atdi ishara dila, tara nirai oia harle tain Ibrani bashae ḳoat lagla.
ACT 22:1 Pauluse ḳoila, “O baba oḳol, bai oḳol, ami oḳon amar nizor zobanbondi diram, afnara hunoukka.”
ACT 22:2 Tain Ibrani bashae matra dekia manush ekkere nirai oigela. Ou tain ḳoila,
ACT 22:3 “Ami eḳzon Ihudi. Kilikiar Tarsho shohoro amar zonom oise; oile ou Zeruzalem ṭauno aia ami manush oisi, allama Gomolielor faor ḳandat boia ami amrar moy-murobbi oḳlor shoriot ar ḳayda-ḳanunor shullo-ana talim faisi. Ar aiz afnara zela allaoalagiri deḳaira, ami nize-o age oula allaoala aslam.
ACT 22:4 Ami Isar foti oḳolre zan-foran shofia zulum ar zane martam, beṭain-beṭinre bandia nia zel ḳanat haraitam.
ACT 22:5 Ita to fordan imam sab ar deshor fotua komiṭir hokkol moy-murobbi oḳole-o bala ḳori zanoin. Ami tarar ges taki siṭi loia, Damesk shohoror amrar baiainre dibar lagi roana oislam. Hono zera Isar torikat aisla, tarare bondi koria Zeruzalemo ania shaza deoar lagi hono zaoat aslam.
ACT 22:6 Zaite zaite Dameskor ḳandat gia harle beil duifor oigelo, aḳta-u amar sairo galabae asmani for somḳaia uṭlo.
ACT 22:7 Ami maṭit foṛigelam ar hunlam, amare ḳeu ḍakia ḳoira, ‘Shoul, Shoul, tumi amare ḳene toklif dirae?’
ACT 22:8 Ami zikailam, ‘Huzur, afne ḳe?’ Tain ḳoila, ‘Ami Nasarotor Isa, zenre tumi toklif dirae.’
ACT 22:9 Zera amar loge asil tara hoḳole-u i for oise ḳori deḳla, oile zein amar loge batchit ḳorsila, tan buli tara hunla na.
ACT 22:10 Bade ami koilam, ‘Malik, te ami kita ḳortam?’ Tain ḳoila, ‘Uṭo, Damesko roana deo, tumar zeta zeta ḳorar goroz ase, ita tumare hono zanail oibo.’
ACT 22:11 Ar hi somḳanie amar souk anda oigesil gotike, amar logi oḳole amar ato doria Dameskor bae loia roana dila.
ACT 22:12 “Hono Ononio namor eḳzon manush asla, tain Hozrot Musar shoriot mafik kub forezgar manush. Hikanor hoḳol Ihudir gese tain kub ijjoti zon.
ACT 22:13 Tain aia amar ḳasat ubaia ḳoila, ‘Bai Shoul, tumar deḳar takkot firot auk.’ Ar loge loge-u ami tanre deḳlam.
ACT 22:14 Ou tain ḳoila, ‘Amrar baf-dada oḳlor Allae tumare fosond ḳorsoin, tumi zanu tan morzi zantae faro, ar hou masum bonda Hozrot Isare-o deḳtae faro, ar tan zobanor buli-o huntae faro.
ACT 22:15 Tumi tan shakki oibae, zeta zeta deḳso ar huncho ita hokkolta tamam duniare zanaibae.
ACT 22:16 Oḳon ar deri korrae ḳene? Uṭo, tane ḍaḳo, ar toubar gusol ḳoria tumar hoḳol guna doia falao.’
ACT 22:17 “Bade ami Zeruzalemo firot aia harle eḳdin Baytul-Mukaddosor bitre dua ḳorat aslam, ou shomoy unganir haloto aḳta-u tan doroshon failam.
ACT 22:18 Ami deḳlam, tain amare ḳoira, ‘Zoldi kori uṭo, oḳon-u Zeruzalem saṛia baro, ḳaron amar befare tumar mukor kunu shakki inor manshe hunto nae.’
ACT 22:19 Ami koilam, ‘Malik, i hoḳol manshe-u to zanoin, zera tumar ufre iman anta, erare zelo harani ar mair-doir ḳorar lagi, ami hokkol mosidainto zaitam;
ACT 22:20 tumar shakki Stifanre zebla mara oisil, hi shomoy ami nize hikano ubaia shae deoat aslam, ar zera tanre marsil, ami tarar ḳafoṛ-sufoṛ fara dislam.’
ACT 22:21 Teu Malike amare ḳoila, ‘Tumi roana deo, ami duroir bin zati oḳlor gese tumare bezimu.’ ”
ACT 22:22 Manshe oto shomoy dori Paulusor boyan hunat asla, bade o-Ihudir nam hunia-u tara sillaia ḳoila, “Ogure dunia taki horai deo, igu basia roar zuka nae!”
ACT 22:23 Manshe zebla sillani dorla ar ḳafoṛ-sufoṛ falaia, asmano duil uṛanit lagla,
ACT 22:24 ou shomoy fordan ofisare Paulusre kenṭonmenṭo loia zaoar hukum dila, ar ḳoila, “Ere sabuk maria zera ḳoro, ḳene manshe tar birudde ila silla-silli korer.”
ACT 22:25 Paulusre zebla sabuk marar lagi bandila, i shomoy sho-sifair eḳ subedar hikano ubat asla, teu Pauluse tanre ḳoila, “Oḳono zare dushi shaibosto ḳora oise na, ila eḳzon Ruman manshore sabuk mara afnaintor lagi ṭik or ni?”
ACT 22:26 Ikan hunia hi subedare fordan ofisarre gia ḳoila, “Sar, afne ita kita ḳorat lagsoin? I beṭa to Ruman manush.”
ACT 22:27 Teu tain Paulusor daro gia zikaila, “Ḳo sain, tumi Ruman ni?” Pauluse ḳoila, “Ji oy.”
ACT 22:28 Ofisare ḳoila, “Ami bout ṭeḳa-foysha ḳoros ḳoria Ruman siṭizen oar shuzug loisi.” Pauluse ḳoila, “Ami zonom shutre-u Ruman.”
ACT 22:29 Ikan hunia-u ze sifaie tanre zera ḳorat zaoat asla, loge loge-u tara hon tone horia gelagi. Ar tain Ruman manush oile-o tanre bandisla ḳori fordan ofisare-o ḍoraigela.
ACT 22:30 Oile bador din hirbar Paulusre zikaita saila, kitar lagi Ihudi oḳole tanre dush dira, teu fordan ofisare Paulusor band kuli dila, boṛo imam oḳol ar fotua komiṭir hoḳolre ekḳano dola oar hukum dila. Bade Paulusre lamaia tarar samne azir ḳorla.
ACT 23:1 Pauluse fotua komiṭir manshor bae dian dori saia ḳoila, “O baisab oḳol, ami to oḳon forzonto amar bibeḳ forishkar rakia, Allar bonda hishabe dayitto adae ḳorram.”
ACT 23:2 Ikan hunia fordan imam Ononioe, Paulusor galat zera ubat asil, tarare ḳoila, “Ogur muko soṛ maro.”
ACT 23:3 Teu Pauluse tanre ḳoila, “O bonḍo, Allae tumare-o soṛ marba. Tumi shoriotor aine amar bisar ḳorat boia, shoriotor borkelaf ḳoria amare soṛ marar hukum dirae?”
ACT 23:4 Zera Paulusor ḳandat ubaisil, tara tanre ḳoilo, “Tumi Allar goror fordan imam sabre beijjot ḳorrae ni?”
ACT 23:5 Pauluse ḳoila, “Bai oḳol, ami to zani na ein fordan imam ḳori. Arnae ila ḳoilam na one, Allar kalamo to leḳa ase, ‘Tumar nizor zatir murobbire kunu gali dio na.’ ”
ACT 23:6 Pauluse zebla buzla hi mozlisor kisu manush Siddekia mozobor ar kisu oila Forishi mozobor, ou tain mozlisor maze zure zure ḳoila, “O bai oḳol, ami eḳzon Forishi ar Forishir aolad. Murda oḳol hirbar zinda oia uṭba, ou mator lagi oḳon amar bisar ḳora or.”
ACT 23:7 Tain ikan ḳoar loge loge-u Forishi ar Siddekia oḳlor maze ḳaijja lagigelo, mozlisor maze dui dol oigela.
ACT 23:8 Ḳaron Siddekia oḳlor ekin oilo, murda oḳol ar zinda oita nae, firista ba ruhu ita kunuta nai. Oile Forishi oḳole ekin ḳoroin ita hoḳolta-u asoin.
ACT 23:9 I gonḍogul bout boṛo oigelo, teu Forishi dolor ḳoyzon moulanae ubaia torka-torki kori koila, “Amra to i manshor kunu dush deḳram na. Kunu ruhu ba firistae to tar loge ila batchit ḳorta faroin.”
ACT 23:10 Ou laḳan ḳori betaya gonḍogul laglo, erdae fordan ofisare ḍoraigela, manshe Paulusre ṭukra ṭukra ḳori siṛilaiba, ou tain sifai oḳolre hukum dila, tara lamia gia Paulusre manshor ges taki horaia nia kenṭonmenṭo haraila.
ACT 23:11 Bade raitor bala Malik Isae Paulusor gese ubaia ḳoila, “Himmot ḳoro, amar name Zeruzalemo zela shakki diso, Rum ṭauno-o oula shakki dite oibo.”
ACT 23:12 Bador din fozoror oḳto Ihudi oḳole eḳ dagabazi korla, tara ḳosom ḳaia ḳoila, Paulusre marar ag forzonto tara dana-fani kunta muko dita nae.
ACT 23:13 Sallish zonor-o beshi manush ekḳano oia i dagabazir ḳosom ḳaila.
ACT 23:14 Tara boṛo imam ar murobbi oḳlor gese gia ḳoila, “Amra ḳoṛaḳoṛi kosom ḳaisi, Paulusre na mara forzonto dana-fani kunta muko ditam nae.
ACT 23:15 Oḳon afnara ar fotua komiṭir hoḳole fordan ofisaror gese ou abdar ḳoroukka zen, afnara aro balaṭike i bisaror todonto ḳorta saira, ou usillae he afnaintor gese aoar age-u, fotor maze amra tare marilimu.”
ACT 23:16 Oile Paulusor bagnae tarar i dagabazir ḳobor hunia, kenṭonmenṭo gia Paulusre ita zanaila.
ACT 23:17 Teu Pauluse sho-sifair eḳzon subedarre anaia ḳoila, “Ou fuagure fordan ofisar sabor gese loia zaukka, he tanre kita ḳoito aise.”
ACT 23:18 Ou hi subedare tare loia fordan ofisaror gese gia ḳoila, “Bondi Pauluse amare anaia ḳoila, ou fuagure afnar gese loia aitam, he afnar gese kita ḳoito sar.”
ACT 23:19 Fordan ofisare tar ato doria ek galabae loia gia ḳoila, “Tumi amare kita ḳoitae sairae?”
ACT 23:20 He ḳoilo, “Ihudi oḳole niot ḳorsoin, tara afnar gese ou abdar ḳorba, Paulusor bisar aro balaṭike todonto ḳorar lagi afne zanu samnor ḳail tanre deshor fotua komiṭir samne azir ḳorain.
ACT 23:21 Afne tarar ḳotae razi oin na zanu, era sallish zonor-o beshi manshe lukaia Paulusor lagi bar saira, tara ḳosom ḳaise, tanre na mara forzonto dana-fani kunta muko dito nae. Tara oḳon tiar oia foto boise, ḳali afnar razi oar bar saira.”
ACT 23:22 Fordan ofisare tare ou hukum dia bidae dila, “Tumi amar gese i kobor ḳoiso ḳori keurore hunaio na.”
ACT 23:23 Bade tain sho-sifair duizon subedarre anaia ḳoila, “Dui-sho zon sifai, shottoir zon guṛa-ala sifai, ar dui-sho zon sulfi-ala sifai aiz rait noyṭat Ḳoisoriat zaoar lagi tiar ḳoro.
ACT 23:24 Ar Paulusor lagi-o guṛar bondobost ḳoro, tare zanu nirafode deshor fordan hakim Filiksor gese fosail oy.”
ACT 23:25 Ḳoia, tain ou siṭi leḳla,
ACT 23:26 “Manonio fordan hakim sab, ami Keladus Lusias, afnare salam zanairam.
ACT 23:27 Ihudi oḳole ou manushgure doria zane marilita saisla, ami hunlam he eḳzon Ruman manush, hunia amar sifai oḳol loia gia tare basailam.
ACT 23:28 Bade ami huntam sailam manshe tar kita dush faisoin, erdae tare nia tarar mozliso azir ḳorlam.
ACT 23:29 Teu ami buzlam, tarar shoriotor kunu fotuar lagi er ufre dush dira, oile zelo harani ba zane marar zuka kunu nalish faisi na.
ACT 23:30 Ar ami hunlam, tar birudde dagabazi kora or, teu zoldi kori tare afnar gese faṭai dilam. Tar birudde zera nalish dise, tarare-o ḳoisi, tarar kunu nalish taḳle afnar gese gia hunaita.”
ACT 23:31 Sifai oḳole fordan ofisaror hukum mafik Paulusre loia raitor bala Antifatri ṭauno gela.
ACT 23:32 Bador din guṛa-ala sifai oḳlor loge Paulusre bidae dia baki sifai oḳol kenṭonmenṭo guria aila.
ACT 23:33 Guṛa-ala sifai oḳole siṭi ar Paulusre loia Ḳoisoriat fosia harle deshor fordan hakimor ato shomzai dila.
ACT 23:34 Tain i siṭi foṛia Paulusre zikaila, “Tumi kun deshor manush?” Paulus Kilikiar manush ikan hunia tain ḳoila,
ACT 23:35 “Tumare zera dusher tara ikano aia harle, ami tumar zobanbondi hunmu.” Bade tain hukum dila, Paulusre nia Raza Herudor baṛir zelo haranir lagi.
ACT 24:1 Fas din bade fordan imam Ononioe ḳoyzon Ihudi murobbi ar Tortullo namor eḳzon ukilre loia Ḳoisoriat gela, gia fordan hakimor adaloto Hozrot Paulusor birudde nalish dakil ḳorla.
ACT 24:2 Paulusre ania adaloto azir ḳora oilo. Bade ukil Tortulloe ou nalish gaila, “Manonio hakim sab, afnar shashono roia amra bout din taki boṛo shantie asi. Afne afnar aḳol-hekmot dia i zatir bout balai korra.
ACT 24:3 Erlagi amra hamesha hoḳol zagat afnar gunogan gai.
ACT 24:4 Amra afnar mulloban shomoy nosṭo ḳortam sairam na, meherbani koria hunle, amrar nalishḳan dui-sair ḳotae ḳoilimu.
ACT 24:5 Sab, amra deḳsi, ou manushgu boṛo eḳ afod oia azise. He Nasara namor eḳ bidormi dolor ustad. Hamesha ḳali hangama lagae, duniar hoḳol Ihudir maze doladoli lagani-u tar ḳam.
ACT 24:6 He amrar Baytul-Mukaddosre-o nafak banaito saisil, erdae amra tare aṭok korsi.
ACT 24:8 Ar ou zeta nalish dilam, afne nize tare zera ḳorle-u ita hoḳolta bar oizibo.”
ACT 24:9 Ukilor loge oia Ihudi oḳole-o ita hokkolta hasa ḳoia shae dila.
ACT 24:10 Teu fordan hakim sabe Paulusre ishara dila, Pauluse ḳoila, “Sab, afne bout boros dori i Ihudi zatir bisar ḳoria aira, iṭa hunia ami kub kushi oia amar zobanbondi diram.
ACT 24:11 Afne tallash ḳorle-u zaniliba, oḳono baro din oise na, ami ebadot ḳorar lagi Zeruzalemo geslam.
ACT 24:12 Ou zera amar befare nalish dira, tara ḳeu amare Baytul-Mukaddoso kunu manshor loge hangama ḳorat deḳsoin na. Ṭaunor kunuḳano ba kunu mosido-o manshore uskaia deoat amare faisoin na.
ACT 24:13 Oḳon tara amar zeta dush deḳaira, itar kunu forman-o tara dita farta nae.
ACT 24:14 Oile ami afnar gese shikar ḳorram, era zeḳṭare bidormi dol ḳoira, hou Isa al-Mosir torikae ami amar moy-murobbi oḳlor Allar ebadot ḳori. Tourat Kitabor batail hoḳol hukum-ahkam ar tamam nobi oḳlor kitabre ami ekin ḳori.
ACT 24:15 Ar era zelan ekin ḳoroin, ami-o oula Allar ufre ekin ḳori, forezgar ba gunagar hoḳolre-u morar bade hirbar zinda ḳora oibo.
ACT 24:16 Erdae ami Allar gese ar manshor gese-o hamesha amar bibeḳ forishkar raḳtam sai.
ACT 24:17 Bout boros bade ami Zeruzalemo geslam, kurbani ditam ar amar nizor zatir gorib oḳolre dan-ḳoyrat bilaitam ḳori.
ACT 24:18 Te ami fak-saf oia zebla Baytul-Mukaddoso hamailam, ou shomoy tara amare deḳsoin. Amar gese kunu biṛ-o oise na, ba kunu gonḍogul-o oise na.
ACT 24:19 Ḳali Asiya deshor ḳoyzon Ihudi hono asla. Amar ufre kunu nalish taḳle hou Ihudi oḳole afnar gese aia nalish dita asil.
ACT 24:20 Arnae ono zera aisoin era-u ḳoukka, ami zebla fotua komiṭir samne ubaislam, ou shomoy tara amar kita dush faisla?
ACT 24:21 Kunta-u na, ḳali ekkan mat ami zure zure matislam zen, murda oḳol hirbar zinda oia uṭar musla loia aiz afnaintor samne amar bisar ḳora or.”
ACT 24:22 Hakim Filikse Hozrot Isar torikar befare kub bala ḳori zanta, erdae tain bisar bond ḳoria ḳoila, “Sifair fordan ofisar Lusias aia harle ami tumrar bisaror foysala ḳormu.”
ACT 24:23 Tain sho-sifair subedarre hukum dila, “Paulusre aṭoḳ raḳo, oile tare mayar nozore rakio, tar ḳesh-kuṭume tar kezmot ḳorat aile bada dio na.”
ACT 24:24 Ḳoydin bade Filikse tan Ihudi bou Drusillare loge loia aia Paulusre ḳobordi anaila, ar Paulusor muk taki Isa al-Mosir ufre iman anar boyani hunla.
ACT 24:25 Pauluse zebla hok fote sola, nizore domaia raḳa, ar Hashoror bisaror ḳota boyan ḳorla, Filikse ita hunia ḍoraigela. Ḍoraia ḳoila, “Tumi oḳon zaogi, shomoy shuzug oile ami tumare ḳobordi anaimu.”
ACT 24:26 Tan mone mone asil, Pauluse tanre kisu gush diba, erlagi tain bare bare Paulusre anaia gof ḳorta.
ACT 24:27 Dui boros faronir bade Forkio Fistos aia Filiksor godit boila. Filikse Ihudi oḳolre kushi korta ḳori Paulusre zelo toia gelagi.
ACT 25:1 I desho aoar tin din bade Fistos Ḳoisoria taki Zeruzalemo gela.
ACT 25:2 Ou shomoy boṛo imam ar Ihudi neta oḳole tan gese aia Paulusor befare nalish dila. Tara Fistosor gese kub minot-ḳajji kori koila,
ACT 25:3 tain zanu meherbani kori Paulusre Zeruzalemo anain. Tarar motlob asil, Paulusre anar shomoy fotor maze lukaia roia marilita.
ACT 25:4 Hakim Fistose tarare ḳoila, “Paulusre to Ḳoisoriat aṭoḳ raḳa oise, ar ami-o kub tagda ḳori hikano zairam.
ACT 25:5 Te tumrar maz taki buzdar ḳoyzon amar loge aio, he kunu dush ḳorle er nalish dibae.”
ACT 25:6 Fistos tarar loge aṭ-dosh din roia harle Ḳoisoriat gelagi. Gia bador din tain adaloto boia, Paulusre tan samne azir ḳorar hukum dila.
ACT 25:7 Zeta Ihudi oḳol Zeruzalem taki aisla, Paulus hino azir oar bade tara tanre sairobae beria ubaia kub dusha-dushi korla, oile itar kunu forman dita farla na.
ACT 25:8 Ou Pauluse nizor zobanbondi dila, “Ami to Ihudi oḳlor shoriot, Baytul-Mukaddos, ba Ruman bashsha Ḳoisoror birudde kunu dush ḳorsi na.”
ACT 25:9 Oile Fistose Ihudi oḳolre kushi korar kial oae tain Paulusre zikaila, “Ou mamlar bisar ami Zeruzalemo ḳortam sairam, tumi hikano zaite razi aso ni?”
ACT 25:10 Pauluse zuaf dila, “Ami to Ruman adalotor samne azir oisi, ar ou adaloto-u amar bisar oaḳan zorur. Afne nize-o bala ḳori zanoin, ami Ihudi oḳlor loge kunu oinnae ḳorsi na.
ACT 25:11 Ta-o amar kunu ḳosur oile, moutor shaza faoar zuka kunu dush faile, ami morte razi asi. Oile era amar birudde zeta dush dira, ita zudi hasa na oy, te amare tarar ato saṛi deoar eḳtiar ḳeuror nai. Erdae ami bashsha Ḳoisoror gese afil ḳorram.”
ACT 25:12 Ikan hunia Fistose tan uzir-naziror loge foramish ḳori koila, “Tumi zebla bashshar gese afil ḳorlae, te bashshar gese-u zaibae.”
ACT 25:13 Ḳoydin bade Ihudi oḳlor raza Agrippo ar tan boin rani Bornikie, noya hakim Fistosre salam zananir lagi Ḳoisoriat aila.
ACT 25:14 Tara ikano ḳoydin roiba gotike, Fistose Paulusor mamlar ḳota razare zanaila. Tain ḳoila, “Filikse eḳzon manshore zelo toia gesoin.
ACT 25:15 Ami zebla Zeruzalemo geslam, ou shomoy honor boṛo imam ar Ihudi murobbi oḳole ou beṭar birudde nalish dia tar shaza saisoin.
ACT 25:16 Ami tarare ḳoislam, zar birudde nalish deoa oy, ar zera i nalish dein, hi badi-bibadir mukamuki zobanbondi ar zera na oile, ashamire kunu shaza deoar eḳtiar Ruman aino nai.
ACT 25:17 Teu tara hoḳol ono aia harle, ami bador din-u adaloto boia hou ashamire samne anar hukum dilam.
ACT 25:18 Zera tar birudde nalish disla tarar zobanbondi hunlam, oile ami zela onuman ḳorslam, ila kunu nalish tara disoin na.
ACT 25:19 Ḳali tarar nizor dormor ḳota, ar Isa namor kunu eḳzon mora manshor ḳota, Pauluse enre zinda ḳoia dabi korer, ota loia tara adaloto nalish dise.
ACT 25:20 Ar ita kila tallash ḳortam, ikan malum na oae ami tare zikailam, he Zeruzalemo gia i mamlar foysala ḳorte razi ase ni.
ACT 25:21 He razi na oia, afil ḳoria bashshar rayor lagi bar saoae, ami tare bashsha Ḳoisoror gese faṭanir ag forzonto aṭoḳ raḳar hukum disi.”
ACT 25:22 Ou raza Agrippe Fistosre ḳoila, “Ami nize tar zobanbondi huntam sai.” Fistose zuaf dila, “Te ḳail hunbane.”
ACT 25:23 Bador din raza Agrippo ar rani Borniki bout dumdam ḳori aila, tain sifair fordan ofisar oḳol, ṭaunor goinno-mainno manshore loia adaloto hamaila. Fistose hukum dia Paulusre-o ono anaila.
ACT 25:24 Bade Fistose ḳoila, “Mohan raza Agrippo, ar adaloto azir goinno-mainno sab oḳol, afnara hoḳole ou besaṛare deḳra. Hoḳol Ihudie milia Zeruzalem ar Ḳoisoriat amar gese tar bisar saia misil dia ḳoisoin, tare ḳotom ḳoro.
ACT 25:25 Oile ami deḳlam, moutor shaza deoar zuka kunu dush tar nai. Ta-o he nize bashshar gese afil ḳorae, ami tare tan gese faṭanir kial ḳorsi.
ACT 25:26 Oile mohan bashshar gese leḳtam, ila kunu dush fairam na gotike, ami shroddeo raza Agrippo ar afnara hoḳlor samne tare azir ḳorsi. Afnara zera ḳorle leḳar zuka kunta faimu ḳori mono ḳorram.
ACT 25:27 Ḳaron ami mono ḳori, kunu bondire salan deoar bala tar dush oḳol zananikan zorur.”
ACT 26:1 Ikan hunia raza Agrippe Paulusre ḳoila, “Tumar zobanbondi koar lagi onumoti dilam.” Teu Pauluse at zuṛ ḳoria nizor zobanbondi koila,
ACT 26:2 “Manonio raza namdar, Ihudi oḳole amar birudde zeta nalish disoin, ita befare aiz afnar gese amar zobanbondi hunanir shuzug faia, ami nizore baiggoman mono ḳorram.
ACT 26:3 Ḳas ḳori, Ihudi oḳlor hoḳol laḳan sal-cholon ar tarar fitna oḳol afnar zana ase. Erdae aroz ḳorram, meherbani kori afne amar matḳanain hunba.
ACT 26:4 “Huruman tone-u nizor elaḳat amar sal-cholon kila asil, bade Zeruzalemo aia kilaḳan solchi, ita to tamam Ihudi oḳole zanoin.
ACT 26:5 Tara to bout din dori amare sinoin gotike, tara kial ḳorle i shakki dita farba, amrar dormor maze Forishi namor ze moulobadi dol ase, ami ou Forishi torikae zindegi kaṭaitam.
ACT 26:6 Allae amrar moy-murobbi oḳlor gese zeta oada ḳorsila, hou oadae ami borosha ḳori, erlagi aiz amar bisar or.
ACT 26:7 Amrar baro ḳandanor manshe rait-din dile-zane ebadoti koria, hou oadar fol deḳar ashat asoin. Raza namdar, hou ashar lagi-u Ihudi oḳole amare dushira.
ACT 26:8 Allae murdare zinda ḳoria tuloin, ikan ḳene afnara bishash ḳorta faroin na?
ACT 26:9 “Ami to mono ḳortam, Nasarotor Isa namor birudde, hoḳol nomunar ḳam ḳora amar lagi forz.
ACT 26:10 Ar Zeruzalemo ami ola ḳorsi-o. Boṛo imam oḳlor onumoti loia Isar ummot oḳolre ami zelo haraitam. Tarare zane marar ḳalo ami tarar birudde buṭ ditam.
ACT 26:11 Ami hoḳol mosidainto gia bare bare tarare shaza ditam. Isar torika taki tarare firaia, Isar name lannot dita ḳori tarar ufre zur-zulum ḳortam. Erar ufre amar oto gusa asil zen, erare zulum ḳorar lagi ami bara deshor ṭauno-o zaitam.
ACT 26:12 “Oula eḳbar boṛo imam oḳlor ges taki kemota ar hukumzari loia ami Damesko zaoat aslam.
ACT 26:13 Ar raza namdar, ou shomoy beil duifor oigese. Aḳta-u deḳlam, amar ar amar logor hoḳlor sairobae shuruz taki aro beshi forala eḳ rushni, asman tone zoli uṭlo.
ACT 26:14 Ou amra hoḳol maṭit foṛi gelam ar ami hunlam, Ibrani bashae ḳeu amare ḳoira, Shoul, Shoul, tumi kene amar ufre zulum ḳorrae? Suḳa faizono lat maria nizor ḳeti korrae na ni?
ACT 26:15 Teu ami zikailam, munib, afne ḳe? Munibe zuaf dila, ami Isa, zenre tumi zulum ḳorrae.
ACT 26:16 Oḳon uṭo, faot bordi ubao. Tumi oḳon zeta deḳso ar zeta tumare deḳaimu, ita hoḳoltar shakki ar kezmotgar bananir kiale, ami nize tumare deḳa dilam.
ACT 26:17 Ami tumare o-Ihudi oḳlor gese faṭaiar, tarar ar tumar nizor zatir at taki ami tumare basaimu.
ACT 26:18 Tumi tarar souk kulia dibae, tara zanu andair taki nuror bae, Shoytanor doḳol taki Allar bae firia ain, amar ufre iman ania gunar mafi faia, forezgar bonda oḳlor maze tara-o dakil oin.
ACT 26:19 “Manonio raza namdar, behesti i doroshonre ami falaitam farlam na.
ACT 26:20 Erdae foyla Dameskor manshor gese, bade Zeruzalemo, Ehudia zilar hoḳol zagat ar o-Ihudi oḳlor gese-o toblig korlam. Tarare ḳoilam, touba ḳoria Allar bae firo, ar ou laḳan amol ḳoro, zeta dekia forman mile tumra hasaror touba ḳorso.
ACT 26:21 Ou ḳarone Ihudi oḳole Baytul-Mukaddoso doria amare marilita saisoin.
ACT 26:22 Oile Allar shaijjoe ami oḳon forzonto ṭikia asi, ar huru-boṛo hoḳlor samne ubaia shakki-o diram. Hozrot Musae ar tamam nobi oḳole zeta goṭibo ḳori bataia gesoin, itar bara ami kunta-u ḳoiram na.
ACT 26:23 Era ḳoisoin, al-Mosie toklif shoijjo ḳorba, tain-u foyla murda taki zinda oia uṭia hari tan nizor zati, ar o-Ihudi oḳlor gese-o nuror torikar ḳota toblig korba.”
ACT 26:24 Pauluse zebla ou laḳan zobanbondi dira, aḳta-u Fistose tanre zure damki mari koila, “Paulus, tumi to fagol oigeso. Tumi bout leḳa-foṛa ḳorso, ou leḳa-foṛae tumare fagol banailise.”
ACT 26:25 Pauluse zuaf dila, “Ji na, hakim sab, ami fagol nae. Ami to hok ar zuktir mat matram.
ACT 26:26 Raza namdare to ita hokkolta-u zanoin, ar ami himmot ḳoria tan samne kula-mela matiram. Ami furafur zani, ita hokkolta-u raza namdaror malum ase, ita to kunu andarir maze lukaia goṭse na.
ACT 26:27 “Te manonio raza namdar, afne kita nobi oḳolre ekin ḳoroin ni? Ami to zani, afne-o ḳoroin.”
ACT 26:28 Ou Agrippe ḳoila, “Tumi kita oto zoldi amare-o al-Mosir torikat nitaegi sairae ni?”
ACT 26:29 Pauluse ḳoila, “Ami Allar gese ou dua ḳorram, zoldi ouk ba derie ouk, ḳali afne nae, zoto manshe amar aizkur i zobanbondi hunra, era hokkol-u amar laḳan bonizaukka. Ḳali ou shikol bad dia.”
ACT 26:30 Teu raza, deshor fordan hakim, rani Borniki ar tarar loge adalotor hoḳol manush ubai gela.
ACT 26:31 Bade tara baronir fote eḳe-oinne ḳoila, “I besaṛae to moutor shaza ba zel ḳaṭar zuka kunta-u ḳorse na.”
ACT 26:32 Raza Agrippe Fistosre ḳoila, “He zudi bashshar gese afil na ḳorto, te tare oḳon ḳalas deoa gelo one.”
ACT 27:1 Hakimor foysala mafik zazo ḳoria amrare Itali desho faṭanir shomoy aile, Paulus ar aro ḳoyzon ḳoydire Zulio namor eḳzon sho-sifair subedaror ato shomzai dila. Zulio asla bashsha Ḳoisoror afon sifai dolor eḳzon subedar.
ACT 27:2 Bade amra Adramuttio gaṭor oula eḳ zazo oia roana dilam, zeḳan Asiya deshor bout zaz gaṭo zaoar lagi zuit ḳora oise. Ar Makidonia deshor Tisholoniki ṭaunor Aristakus amrar loge asla.
ACT 27:3 Bador din amrar zaz gia Sidono biṛlo. Subedar Zulioe Paulusor loge kub bala bebohar ḳorla. Tain tan dust oḳlor gese gia, nizor zoruri goroz kulanir izazot dila.
ACT 27:4 Bade hi zaga taki hirbar zaz saṛlo, ar amrar ulṭamuka batash deoae, amra Saipras difor zebae batash asil na hobaedi gelam.
ACT 27:5 Gia Kilikia ar Pamfuliar samnor shagor faroia Lukia deshor Mura ṭauno aia azilam.
ACT 27:6 Subedare hikano Itali desho zaora, Alekzandriar ekkan zaz faia, hou zazo ḳori amrare loia roana dila.
ACT 27:7 Amrar zazḳan kub aste aste solia bout din bade ḳoshṭo ḳori Klid ṭaunor ḳandat aia azilo, oile batashor lagi amra ar shohoze aguaitam farlam na. Teu amra ḳom batashedi Salmunar ḳandabae gia Kriti difor aoṛedi zaoat laglam.
ACT 27:8 Ar doriar faror ḳandabae ḳoshṭo ḳoria zaite zaite, ‘Shundor Longorḳana’ namor eḳ huru zaz gaṭo ailam, er ḳandat asil Lasea ṭaun.
ACT 27:9 Ou laḳan bout din guzori gelo, ruzar idor din shesh oia tuṛa tuṛa shit aise. I shomoy zaze sofor ḳora kub bifod. Teu Pauluse zazor manshore foramish dila.
ACT 27:10 Tain ḳoila, “Sab oḳol, ami deḳram, i soforo amrar bout mosibot ar ḳeti oibo. Ita ḳali zaz ba mal-samanar nae, amrar zanor-o ḳeti oibo.”
ACT 27:11 Oile subedare Paulusor ḳota na mania, zazor malik ar kefṭinor ḳota hunla.
ACT 27:12 Ar i longorḳanat shitor dino roite shubida oito nae gotike, beshir bag manshe hin taki zaoar lagi foramish dila. Tara saila kunumonte Finiks gaṭo fosia shitor din ḳaṭaita. I gaṭ asil Kriti difo, er uttor-fochchim ar dokkin-fochchim dik kula asil.
ACT 27:13 Bade zebla aste aste douknor batash salu oilo, ou tara mono ḳorla, tara zela asha ḳorsla ola-u oise. Erdae tara zazor longor kulia Kriti difor galabae roana dilo.
ACT 27:14 Oile tuṛa bade-u hi faro taki ian-kuni namor kub bezuita eḳ tufan ailo.
ACT 27:15 Amrar zaz tufanor maze foṛlo, tufanor ṭela mukabila ḳortam na faria, zazre batashor tale tale baṭiol dilam.
ACT 27:16 Bade Kouda namor eḳ huru difor aoṛedi gia, zazor logor barki naoḳanre amra bout ḳoshṭo ḳori banga taki basailam.
ACT 27:17 Manshe naore ṭania nia zazor ufre tulla, ar zazor toḳtainre doṛi dia doṛo ḳori bandila, zate tufane na bange. Bade Surti namor shagoror soro zaz lagizibar ḍore, fal lamaia zazre emne batash baṭiole saṛi dilam.
ACT 27:18 Tufane zazre omon laḳan goṛagoṛi shuru ḳorlo, erdae tara bador din zazor mal-samana fanit falai dila.
ACT 27:19 Tin dinor din tara nizor ate zazor shaz-shoronjam-o fanit falai dila.
ACT 27:20 Bout din taki san-shuruz kun zinish ita na deḳae, ar tufanor zur kub beshi oae, amra zane basar asha saṛi dilam.
ACT 27:21 Zazor manush bout din dori ufash roae Pauluse ubaia tarare ḳoila, “O baisab oḳol, amar ḳota hunia Kriti dif taki zazḳanre na saṛle, i mosibot ar ḳeti taki afnara basla one.
ACT 27:22 Oile oḳon ami afnarare ou foramish diram, afnara monor maze bol raḳoukka, amra ḳeu zane mortam nae, ḳali zazḳan binash oizibo.
ACT 27:23 Ami ze Allar ebadot-bondegi kori, hou Allar eḳ firistae goto rait amar ḳandat ubaia ḳoisoin,
ACT 27:24 Paulus, ḍoraio na, bashsha Ḳoisoror samne tumar ubani lagbo. Ar i zazo ḳori zera tumar loge oia zaira, Allae tumar ḳatire meherbani koria era hokkolor zan basaisoin.
ACT 27:25 Te sab oḳol, afnara monor maze bol raḳoukka. Ami ekin ḳori, Allae amare zela ḳoisoin, ola-u oibo.
ACT 27:26 Oile amra kunu difor ufre gia foṛmu.”
ACT 27:27 Ou laḳan ḳori amra Adria shagoror ufredi zaoat roilam, bade tufanor souddo dinor din ada raitkur bala naia oḳole andaz ḳorla, tara faror ḳandat aisoin.
ACT 27:28 Tara fani mafia deḳla ḳali ashi at goin ase, tuṛa bade hirbar mafia deḳla, shaiṭ at ase.
ACT 27:29 Erdae soror fattoror maze gia zaz dakka lagar ḍore, tara zazor ḳoredi sairgesa longor falaia, shuruzor for deḳar lagi dua ḳorat boila.
ACT 27:30 Naia oḳole zaz taki bagia zaoar motlob ḳori, samnor goloir tuṛa age longor falanir ḳota ḳoia, zazor barki naore doriat lamaila.
ACT 27:31 Teu Pauluse subedarre ar sifai oḳolre ḳoila, “Naia oḳol zaz taki bagi gele afnara hoḳol mara zaiba.”
ACT 27:32 Ikan hunia sifai oḳole naor doṛi kaṭi dila, teu nao fanit bashia gelogi.
ACT 27:33 Fotabala Pauluse hoḳolre minot ḳorla kunta ḳaoar lagi, tain ḳoila, “Aiz souddo din dori kita oibo na oibo ou sintae afnara kunta ḳaisoin na.
ACT 27:34 Ami afnarare minot ḳorram, kunta ḳaukka. Zan basaite oile to afnara ḳaite oibo. Deḳbane, afnaintor matar eḳsa sulor-o ḳeti oito nae.”
ACT 27:35 Ikan ḳoia hari Pauluse tara hoḳlor samne ruṭi ania Allar shukria zanaia, ruṭi siṛia ḳaoat lagla.
ACT 27:36 Teu hoḳole monor maze bol faia ḳani kaila.
ACT 27:37 I zazor maze amra hoḳole milia dui-sho siottoir zon aslam.
ACT 27:38 Hoḳole feṭ boria ḳaoar bade zazor bar ḳomanir lagi hokkol gom doriat falai dila.
ACT 27:39 Bian oia harle tara sinla na, i zaga ashole kun zaga. Oile oula eḳ baḳ deḳa gelo, i baḳor sor balue bora. Dekia tara foramish ḳorla, farle zazre nia hou soro tulilita.
ACT 27:40 Teu tara longorain ḳaṭia doriat falai dila, ar ḳanḍarir boiṭar doṛin-o ḳaṭi dila. Bade batash baṭiole samnor fal ṭangaia hou balur soror muka gelam.
ACT 27:41 Oile zaz tole lukail kuntat aṭki gelo. Ar samon gala aṭki zaoae, ḳoror goloit ḍeur baṛi lagia banga dorlo.
ACT 27:42 Teu sifai oḳole foramish ḳorla bondi oḳolre marilita, arnae ḳeu ḳeu hatraia bagizito fare.
ACT 27:43 Oile sho-sifair subedare Paulusre basanir kiale sifai oḳlor i foramish manla na. Tain hukum dila, zera hatar zane, tara age zaz taki falaia foṛia huknat uṭouk.
ACT 27:44 Ar hatar na zanra oḳole zazor toḳta ba aro kuntat doria huknat farouk. Ou laḳan hoḳole huknat uṭia zan basaila.
ACT 28:1 Amra hefazote faro uṭia harle zanlam, i difor nam oilo Malṭa.
ACT 28:2 Hinor manshe amrar loge kub bala-manshi korla, meg ar shit asil ḳori tara aguin zalaia amrare ḍakia nia ḳatir-zoton ḳorla.
ACT 28:3 Ermaze Pauluse eḳ aṭa hukna laḳṛi tukaia dola ḳori ania agunir maze deoar bade, agunir teze ek kalnag bar oia hari Paulusor ato ḳamoṛ mari dorlo.
ACT 28:4 Ḳalnage Paulusor ato ḳamoṛdi loṭki roise dekia, hinor manshe mata-mati lagaila, “I manushgu nisoy kunu kuni, doriar at taki he basigele-o niae-devtae tare baste dila na.”
ACT 28:5 Oile Pauluse at zaṛa dia ḳalnagre aguino falai dila, ar tan kunu ḳeti oilo na.
ACT 28:6 Manshe mone mone bar saoat asil, Paulusor gotor fulizibo, ba tain aḳta-u maṭit foṛia moriziba. Bout shomoy bar saia harle tan kunu bifod oise na dekia, tarar mot bodlaia ḳoila, “Ein to kunu devta.”
ACT 28:7 I zagar ḳandat hou difor Fublio namor ek kandani manshor zomidari asil. Tain amrare tan baṛit daot dila ar tindin dori amrare kub ḳatir-zoton ḳorla.
ACT 28:8 Ou shomoy Fublior baf taf ar ḳamṛi bemare bisnat falail asla. Pauluse bitre hamaia tan ḳandat boia dua ḳorla, tan gotro atai dia bemar shifa ḳorla.
ACT 28:9 Ita dekia hari hi difor zoto bemari asla, tara-o aia bala oila.
ACT 28:10 Tara amrare bout laḳan ijjot ḳorla, bidae bala zaz saṛar age amrar dorḳari hoḳol siz zugaia zazo ania boria dila.
ACT 28:11 Tin mash bade amra Alekzandriar eḳ zazo ḳori roana dilam. I zazḳan ou difo roia shitor din ḳaṭaisil, er samnor goloi kudia Zuṛ devtar murti lagail asil.
ACT 28:12 Bade amra Surakusho aia tin din roilam.
ACT 28:13 Hikan taki roana dia guri guri Italir Riziot ailam. Bador din douknor batash saṛlo, teu dusra din amra Futioli zaz gaṭo ailam.
ACT 28:14 Hino ḳoyzon muminor loge mulaḳat oilo, tara minot-ḳajji korae tarar loge eḳ hafta roilam. Ota ḳori kori amra Rum ṭauno aia azilam.
ACT 28:15 Rumor mumin oḳole amra aoar ḳobor hunsla, tara amrar loge mulaḳat ḳorta ḳori kunu kunu zone Appior bazar, ḳeu ḳeu Tin-Shoraiḳanar gau forzonto aguai aila. Erare dekia Pauluse Allar shukria adae ḳorla, ar dilor maze bout bol faila.
ACT 28:16 Amra Rumo aoar bade Pauluse tan nizor fosond mafik roibar onumoti faila. Ḳali eḳzon sifaie tane fara dito.
ACT 28:17 Tindin bade Pauluse Ihudi oḳlor boṛo boṛo murobbire dola ḳoria ekḳano ḳoraila. Tara dola oia harle tain ḳoila, “O baisab oḳol, zudio ami nizor zator ba moy-murobbir batail niom-ḳanunor ulṭa kunta-u ḳorsi na, ta-o Zeruzalem taki amare aṭok koria, Ruman oḳlor ato shomzail oise.
ACT 28:18 Ruman oḳole amare zera ḳoria moutor shaza deoar zuka kunu dush na faoae, amare ḳalas dilaita saisla.
ACT 28:19 Oile Ihudi oḳole bada deoae nirufae oia ami bashshar gese afil ḳorsi. Ta-o ami amar nizor zator ufre kunu laḳan dush ditam saisi na.
ACT 28:20 Te sab oḳol, tamam Boni Israilor dilor maze ze asha ase, hou ashar lagi-u amare i shikol findail oise, erlagi-u ami afnaintor loge mulaḳat ar batchit ḳortam sairam.”
ACT 28:21 Tara ḳoila, “Amra to afnar befare Ehudia taki kunu siṭi faisi na. Ar zeta Ihudi baiain hon taki aisoin, tara-o afnar name kunu nalish disoin na, ba bura kunta ḳoisoin-o na.
ACT 28:22 Oile amra afnar muk taki motamot huntam sairam. Ḳaron amra zani, hoḳol zagar manshe-u i torikar bifokke matoin.”
ACT 28:23 Paulusor loge hirbar mulaḳat ḳorar lagi eḳ tarik ṭik korla. Hou din tarar loge aro bout manush Paulusor goro aila. Pauluse fozor taki hainja forzonto haradin Allar bashshair ḳota tarar gese bangia boyan ḳorla. Hozrot Musar Tourat Kitab ar nobi oḳlor kitabor ayat deḳaia, Isar befare tarar dilo ekin zonmaita saila.
ACT 28:24 Tan boyan hunia kunu kunu zone iman anla, ar kunu kunu zone ita ekin ḳorla na.
ACT 28:25 Boyan hunar bade tarar maze motor omil oigelo, tara hikan taki bidae oita saila. Zaoar age Pauluse tarare ḳali ou nosiotḳan ḳorla, “Pak Ruhe Hozrot Ishaya nobir zoriae afnaintor baf-dada oḳolre ou ḳotaḳan ṭik-u ḳoisla,
ACT 28:26 Ou manush oḳlor ḳasat gia ḳo, tumra ḳane hunle-o kunta buztae nae, souke deḳle-o kunta sintae nae.
ACT 28:27 Ḳaron ita manshor dil oshaṛ oigese, tarar ḳano tala lagigese, tara zarzir souk muzi boiroise. Zate souke na deḳe, ḳane na hune, dil dia na buze, kizanu tara touba ḳoria, amar bae firizain, ar ami tarar shifa ḳorilai.
ACT 28:28 Erlagi afnara-o zania raḳoukka, oḳon taki Allai nazator kush-ḳobri o-Ihudi oḳlor gese zanail oibo, tara ita kush oia hunba.”
ACT 28:30 Hozrot Paulus fura dui boros dori tan nizor baṛa ḳora bashat roila. Ar zoto manush tan gese aita tarare kobul ḳoria,
ACT 28:31 furafur himmot ḳori Allar bashshair ḳota toblig korta. Ar Malik Isa al-Mosir befare bina badae kula-mela talim dita.
ROM 1:1 Ami Paulus to Hozrot Isa al-Mosir gulam. Ruman bashshair razdani Rum ṭaunor mumin oḳlor gese ou sohifaḳan leḳram. Alla Pake amare fosond ḳoria anchoin al-Mosir sahabi oar lagi ar tan batail kush-ḳobri toblig korar lagi.
ROM 1:2 Allae tan nobi oḳlor mazdi Pak Kitabor maze ou kush-ḳobrir ḳota age-u oada ḳorsoin.
ROM 1:3 Ou kush-ḳobri oilo tan ḳas mayar zon Isa al-Mosir befare. Tain-u amrar malik. Roḳto-mangshor silsilae tain oila Hozrot Daud nobir aolad, ar Allai Pak Ruhur kudrotie murda taki zinda oia Ibnulla hishabe zair oisoin.
ROM 1:5 Tan nam uzila ḳorar lagi, tan mazdi-u amra Allar niamot ar sahabi fod faisi, zate hoḳol zatir manshe iman ania Allar baiddo oia sole.
ROM 1:6 Ou manshor maze tumra-o aso. Allae to tumrare daot ḳoria anchoin, Isa al-Mosir afon zon oar lagi.
ROM 1:7 Te ou Rum ṭauno Allar zoto mayar bonda oḳol asoin, Allae tan pak bonda oar lagi zerare daot ḳoria anchoin, tumra hoḳlor gese ami ou siṭikan leḳram. Amrar gaibi baf Alla Pak ar Hozrot Isa al-Mosie tumrare rohomot ar shanti dan ḳoroukka.
ROM 1:8 Ami foyla-u ḳoiram, tumrar mozbut imanor ḳota asta duniair maze roṭigese ḳori, ami Isa al-Mosir name amar Allar shukria adae ḳorram.
ROM 1:9 Allar ḳas mayar zon Ibnullar befare kush-ḳobri toblig koria, ami dile-zane Allar ebadot ḳorram. Eḳ Alla-u shakki asoin, ami forteḳ bar munazator shomoy tumrar ḳota iad ḳori.
ROM 1:10 Ami hamesha ou ḳota magiram, otodin bade oile-o Allar morzie zekunu monte ami zanu tumrar gese aitam fari.
ROM 1:11 Ami tumrar loge deḳa ḳortam sairam, zate ruhani kunu niamot dia tumrare boloban ḳortam fari.
ROM 1:12 Mani, amar iman dekia tumra hoḳole ar tumrar iman dekia ami nize-o utshaho fai.
ROM 1:13 O baiain huno, ami bout bar tumrar gese aitam saisi, oile bar bar bada aise. Nanan zagat gia bin zatir gese toblig koria zela fol faisi, tumrar gese-o ola fol deḳar ashae aitam sairam.
ROM 1:14 Bodro Iunani zati ba obodro borbor zati, shikkito ba oshikkito, hoḳlor lagi-u to amar eḳ homan dae-bar ase.
ROM 1:15 Erlagi tumra zera Rum ṭauno boshot ḳorrae, ami amar shaiddo mafik tumrar gese-o kush-ḳobri toblig korar lagi kiali.
ROM 1:16 Ḳaron Hozrot Isa al-Mosir befare kush-ḳobri toblig korte ami kunu shorom mono ḳori na, ou kush-ḳobri hunia zera iman ane, tarar zan basanir lagi iṭa oilo Allai bol. Foyla Boni Israilor lagi zera eḳ Alla manoin, bade be-din bin zati oḳlor lagi.
ROM 1:17 Ou kush-ḳobrir maze-u to batail oise, Allae kila manshore be-ḳosur ḳalas hishabe kobul ḳoroin. Ḳali imanor mazdi-u manshore aual taki aḳer forzonto be-ḳosur ḳalas ḳoia goinno ḳora oy. Zela kitabo leḳa ase, “Imanor bole-u be-ḳosur ḳalas oa zonor zan basibo.”
ROM 1:18 Manshe nizor naformani dia Allai hokre lukaia raḳe. Tarar naformani ar Allar bae ḍor-ḳof na taḳae asman taki tarar ufre gozob nazil oy.
ROM 1:19 Allar befare zotoḳan buzar takkot ase ita manshor gese forishkar, Allae nize-u to ita zair ḳorsoin.
ROM 1:20 Tan zeta gunagun manshor a-deḳa, mani tan siroḳalin ḳemota ar Allai shobab, ita dunia foyda oar ag taki-u forishkar fuṭia uṭse. Tan foyda ḳora zinish deḳle-u manshe ita buzto fare. Erlagi-u tanre sini na ḳoia kunu manshe bana deḳanir ufae nai.
ROM 1:21 Allar befare otota zanar bade-o manshe tanre Alla babia tan ebadot-bondegi ar shukur-guzari na ḳorae, tarar bisar-bibeḳ oshar oigese ar be-aḳol mon andair oigese.
ROM 1:22 Zudio tara nizore aḳoldar mono ḳoroin, ashole tara be-aḳol.
ROM 1:23 Tara siroḳalin zinda Allar ebadot bad dia ostayi manush, foshu-faki, ar buke solra zandaror murti banaia otar puja ḳorse, Allar faona gourob-mohima otare dise.
ROM 1:24 Erlagi Alla Pake-o tarar dilor bod ḳaish mafik, tarare noforoti kamor ato saṛi disoin, otar dae tara eḳe-oinnor loge bodmaishi-beijjoti korer.
ROM 1:25 Tara Allar hokre bad dia misare fosond ḳorse. Foyda ḳorra Allare bad dia, tan foyda ḳora zinishor puja ḳorse. Oile zuge zuge siroḳal hoḳol tarif eḳmatro foyda ḳorra Allar-u. Amin.
ROM 1:26 Manshe olaḳan noforoti kam ḳorer dekia, Allae-o tarare ou bod ḳaishor ato shofi disoin. Otar beṭinte-o zamair loge mila-misha bad dia oinno beṭintor loge ḳobisi kam ḳorse.
ROM 1:27 Oula beṭainte-o beṭintor loge mila-misha bad dia oinno beṭar loge mila-mishar lagi fagol oigese, beṭainte beṭaintor loge ḳobisi kam ḳorse. Erlagi tara forteḳor zindegit zarzir bod ḳamor shaza faira.
ROM 1:28 Manshe tar dil taki Alla Pakre maner na dekia, Allae-o tarare ola bod ḳaishor ḳobisi dilor ato saṛi disoin, erlagi tara ota ḳorat roy.
ROM 1:29 Tara hoḳol nomunar naformani, bod ḳam, lub-lalos, ingsha-ninda, kun-ḳarafi, maramari, sol-soturi ar ḳana-ḳani korar lagi ustad.
ROM 1:30 Tara manshor gibot gae, ar Allare ginnae. Tara bod-mizazi, ohonkari, boṛai-beṭagiri ar noya noya naformanir dandae taḳe. Tara ma-bafor-o obaiddo.
ROM 1:31 Neki-bodi buzar aḳol nai, oada ḳelafḳari, fashan, itar dilo kunu doya-maya nai.
ROM 1:32 Tara to Allar i bisaror ḳota bala ḳori-u zane, zera ilaḳan ḳam ḳore, tarar shaza oibo mout. Ikan zania-o, tara ḳali nize ita ḳore na, baki zera ila ḳam ḳore, tarar fokke-o shae dey.
ROM 2:1 Erlagi-u ḳoiram, O manush zati, tumi to oinno zonre dushi shaibosto ḳorrae, ita bisar tumi hiklae kila? Tumar zuaf dibar kunu fot ase ni? Ḳaron tumi nize ze oforad ḳorrae, ou eḳoi oforade tumi aroḳzonre dushi koirae. Te i dush tumar ufre-o foṛer na ni?
ROM 2:2 Amra to zani, zera ilaḳan oforad ḳore, Allae hok insaf mafik tarar faona shaza diba.
ROM 2:3 O manush zati, ze ḳam tumi nize-o ḳoro, ou eḳoi kamor lagi tumi aroḳzonre dushi shaibosto ḳoro, te ḳemne buzlae, tumi Allar shaza taki rehai failibae?
ROM 2:4 Tumi to Alla Pakor oshesh meherbani, tan doirjo-shokti ar soborgarire elami korrae. Tan meherbanie tumare ḳali touba ḳorar fote ṭania ney, ikan fauriliso ni?
ROM 2:5 Oile tumar fashan dil ar touba na ḳorar monobabor lagi, tumar ufre Allar gozob dola ḳori toirae, Allae zedin gozob zair ḳorba, hok bisar ḳorba, hou dinor lagi shaza dola ḳorrae.
ROM 2:6 Tain forteḳ manshore zarzir ḳamor fol diba.
ROM 2:7 Zera doijjo doria nek kamor mazdi Allai tarif, ijjot, ar koyhin zindegi tallash ḳore, Allae tarare-u aḳeri zindegi dan ḳorba.
ROM 2:8 Oile zera nizor ḳaishor boshe sole, Allai hokor birudde roy, naformanir fokke taḳe, tarar ufre Allai duḳ-mosibot, gozob ar lannot aibo.
ROM 2:9 Forteḳ naformanor ufre ita aibo, foyla Boni Israilor ufre, bade bin zatir ufre.
ROM 2:10 Oile zera nek kam ḳore, tara forteḳe tarif, ijjot ar shanti faibo. Foyla Boni Israile, bade bin zatie faiba.
ROM 2:11 Allar dorbaro to fokkofatir kunu ḳarbar nai, hoḳol-u homan.
ROM 2:12 Shoriotor baire roia zeta manshe guna ḳorse, tara binash-o oiba shoriot saṛa, ar shoriotor bitre roia zera guna ḳore, ou shoriot mafik-u tarar bisar oibo.
ROM 2:13 Zeta manshe shoriotor boyan ḳali hune, Allar nozoro to tara be-ḳosur nae, oile zera shoriot amol ḳore, tara-u ḳali be-ḳosur ḳalas ḳoia goinno oiba.
ROM 2:14 Bin zati oḳole Allai kunu shoriot na faile-o, tara zebla emne-u shoriot mafik soloin, ou shomoy tarar bibeḳ-u shoriot bonizae.
ROM 2:15 Ete deḳa zae, shoriot mafik zeta ḳora zorur, ita tarar dilor bibeḳor maze leḳa ase. Tarar bibeḳe tarar ḳamor shakki dey, kunu kunu shomoy tarar bibeḳe tarare dushi shaibosto ḳore, ar kunu kunu shomoy tarar fokke-o shae dey.
ROM 2:16 Te Allae zedin Isa al-Mosir mazdi hoḳol manshor lukail amolor bisar ḳorba, hou din-u ita zair oibo. Ar ami oḳon ze kush-ḳobri toblig koriar, ou mafik-u bisar oibo.
ROM 2:17 Tumi zebla nizor forisoy dirae Boni Israil ḳoia, tumi Hozrot Musar shoriotor ufre borosha ḳorrae ar Allar mayar bonda ḳoia boṛai deḳairae.
ROM 2:18 Te Allae tumar ges taki kita asha ḳoroin, tumi kita ḳortae, ikan to tumi zano-u, shoriot taki tumi itar talim faiso.
ROM 2:19 Tumi mone mone ḳoirae, ami to andare fot deḳaiar, andarit zeta asoin, itar gese ami nuror rushni.
ROM 2:20 Be-aḳolre hedayot ḳoriar, huruttainre talim diar. Tumi buzrae, shoriotor bitre hok ar aḳol-buddi ase.
ROM 2:21 Ita kub bala ḳota, oile tumi zebla oinno manshore hikairae, te nize-o ita hiko na ḳene? Tumi manshore ḳoirae, suri korio na, oile tumi nize-u suri korrae na ni?
ROM 2:22 Manshore ḳoirae, zina ḳorio na, oile tumi nize kunu zina ḳorrae na ni? Tumi to deb-debir murtire ginnairae, hirbar nize-u murtir mondirre luṭ-toraz ḳorrae na ni?
ROM 2:23 Ze shoriot loia tumi boṛai korrae, i shoriotor ulṭa solia tumi nize-u Allare oshomman ḳorrae na ni?
ROM 2:24 Allar kalamo ase, “Tumrar sal-cholon dekia bin zati oḳole Allar namre beijjot ḳorer.”
ROM 2:25 Huno, tumi zudi shoriot mania solo, te mosolmani kam ḳoranir dam ase, ar shoriot mafik na solle, mosolmani kam ḳoraile-o zeta, na ḳoraile-o ota. Allar nozoro tumi mosolmani na ḳorail be-dinor laḳan.
ROM 2:26 Oḳon mosolmani na ḳoraia-o zudi keu shoriot mania sole, te Allae tare mosolmani korail ḳoia shomzita nae ni?
ROM 2:27 Ar mosolmani na ḳorail manshe zebla shoriot mania sole, te likito shoriot faia ar mosolmani koraia-o zudi tumi er ulṭa solo, taile hou mosolmani na ḳorail beṭae tumare dushito nae ni?
ROM 2:28 Bishoyṭa buzrae ni? Ḳali name Boni Israil oile-u ḳeu asol Boni Israil nae. Shorilor ongo ḳaṭia mosolmani koraile-o to, asol mosolmani oy na.
ROM 2:29 Oile mon taki zera Boni Israil, tara-u asol Boni Israil. Ita kunu likito ain-ḳanunor befar nae, dilor bitoror ruhani befar. Dilor mosolmani-u oilo asol mosolmani. Zogotor manshe erar tarif na ḳorle-o, Allae tarif ḳoroin.
ROM 3:1 Te ilaḳan befar oile, Boni Israil oae baṛti kunu lab ase ni? Mosolmani kam ḳoranit kunu fayda ase ni?
ROM 3:2 Nichchoy ase. Bout nomunar fayda ase. Foyla fayda: Alla Pake tan hokkol kalam nazil ḳorsoin Boni Israilor gese.
ROM 3:3 Oboshsho tarar kunu kunu zone beimani korse, ete kita oise? Tara beimani korle-o Alla Pake kunu tarar laḳan beimani korba ni?
ROM 3:4 Nauzubilla! Hoḳol manshe misa matle-o Alla to hamesha hok taḳoin. Fobitro Zobur Shorifo ase: Erbade-o forman milbo tumar zoban shoṭik, tumar fokke ray zaibo.
ROM 3:5 Duniabi manshe ḳoito fare, amrar na-hok kame zebla aro forishkar buza zae Alla Pak koto hok, te amrar na-hoke tan gourob oar bade-o tain amrare shaza dile ita tan oinnae? Nauzubilla.
ROM 3:6 Allae zudi hok insaf na ḳoroin, te tain kila asta zogotor bisar ḳorba?
ROM 3:7 Tara ḳoin, “Amar misa mator mazdi-u buza zae, Alla Pak hok-insafḳari. Ar amar misa mate zebla Allar gourob-tarif oy, te tain amare gunagar shaibosto ḳoroin ḳene?”
ROM 3:8 Ikan kub shundor zukti. Erlagi amra ḳoitam ni, “Ao, amra naformani korat roi, zate ou naformanir mazdi bala fol mile?” Kunu kunu manshe amrar bodnam gaia ḳoin, amra-o bule ola talim dei. Itae tarar faona shaza faiba.
ROM 3:9 Oḳon amra kita ḳoitam? Boni Israil hishabe amrar halot kita bin zati taki bala ni? Nichchoy na. Age-u amra ḳoisi, Boni Israil ar bin zati hoḳol-u gunar gulam.
ROM 3:10 Allar kalamo ase, Be-ḳosur bolte ḳeu nai, eḳzon-o nai;
ROM 3:11 aḳoldar eḳzon-o nai, ḳeu Allar tallash ḳore na.
ROM 3:12 Hoḳol manush be-foti oigese, hoḳol eḳloge naforman oigese, nek kam ḳore ila ḳeu nai, eḳzon-o nai.
ROM 3:13 Tarar muk to fosa lashor kula ḳoyboror laḳan, tarar zibe sol-soturi mate, ar ṭuṭor tole ase, hafor bish.
ROM 3:14 Tarar golar maze boddua ar titta mat-ḳotae bora,
ROM 3:15 kun-ḳarafir lagi tarar fao aguail,
ROM 3:16 tarar foto ḳali binash ar ahazari.
ROM 3:17 Shantir fot tara sine na,
ROM 3:18 tarar dil taki Allar ḍor-ḳof horigese.
ROM 3:19 Amra zani, Hozrot Musar shoriot tarar lagi-u, zerar gese ou shoriot deoa oise. Zate ḳali bin zati nae, shoriot faora Boni Israil-o, mani asta zogotor ḳeu kunta matibar shuzug nai, shob-u Allar bisaror daṛo foṛe.
ROM 3:20 Ḳaron shoriot amol ḳorle-u, Allae manshore be-ḳosur ḳalas ḳoia goinno ḳoriliba, ila kunta nae. Oile shoriotor mazdi-u manush gunar befare hushiar oy.
ROM 3:21 Oḳon to Alla Pake fot batai disoin, shoriot saṛa-o tain kila manshore be-ḳosur ḳalas hishabe goinno ḳoroin. Age tain Tourat Shorif ar nobi oḳlor kitabo ou befare ishara disoin.
ROM 3:22 Ou fot oilo, Hozrot Isa al-Mosir ufre zera iman ane, ou imanor mazdi-u Allae tarare be-ḳosur ḳoia goinno ḳoroin. I befare Boni Israil ouk ba bin zati ouk hoḳol-u eḳ homan.
ROM 3:23 Ḳaron, hoḳole-u guna ḳorse, Allar shan-tozollit hamanir shamorto ḳeuror nai.
ROM 3:24 Oile Isa al-Mosie manshore gunar at taki basanir bebosta ḳorsoin, tain Allar rohomotor dan hishabe manshore be-ḳosur ḳoia goinno ḳorar fot ḳorsoin.
ROM 3:25 Zera tan ufre iman ane, al-Mosie tarar lagi nizor loure koforar kurbani dia Alla Pakre kushi korsoin. Ou nomunae Allae deḳaisoin, zudio tan nizor soborgarir lagi manshor furana gunar shaza dite deri korra, tebou tain hok-insafḳari.
ROM 3:26 Ar oḳon tain ita deḳaisoin, zate forman oy, tain nize hok-insafḳari ar zera al-Mosir ufre iman anoin, tarare be-ḳosur ḳalas ḳoia goinno ḳoroin.
ROM 3:27 Erbade-o manshe boṛai deḳanir kunta ase ni? Na, kunta-u nai. Ḳene nai? Manshe shoriot mane ḳori tar boṛai korar kunta nai ni? Na, asol ḳota oilo, imanor maze boṛai korar zaga nai.
ROM 3:28 Amra zani, Allae manshore tar imanor lagi-u be-ḳosur ḳalas ḳoia goinno ḳoroin, shoriot manar lagi nae.
ROM 3:29 Te Alla ḳali Boni Israilor ni, bin zatir lagi-o nae ni? Nichchoy, tain bin zatir-o Alla.
ROM 3:30 Ḳaron Alla to eḳzon-u. Tain Boni Israilre zela imanor mazdi be-ḳosur ḳoia goinno ḳoroin, ola bin zati oḳolre-o ḳorba.
ROM 3:31 Oḳon ḳo sain, imanor lagi amra shoriot batil ḳorram ni? Na, muṭe-u na! Borong amra shoriotre mozbut ḳoriar.
ROM 4:1 Te amrar ḳandanor mul baf Hozrot Ibrahimor zindegir befare kita ḳoitam? Tain kita faila?
ROM 4:2 Shoriot manar lagi-u zudi tanre be-ḳosur ḳoia gona oy, te tain nizor boṛai deḳaita faroin, oile Allar dorbaro to nae.
ROM 4:3 Ḳaron Allar kalamo ase, “Ibrahime Allar ufre iman anae, Allae tanre be-ḳosur ḳalas ḳoia goinno ḳorla.”
ROM 4:4 Ḳamlae ḳam ḳoria ze beton fae, ikṭa kunu dan nae, ikṭa tar faona mozuri.
ROM 4:5 Oile kunu manshe zudi nizor amolor ufre borosha na ḳoria, ḳali tan ufre iman ane, zein gunagarre be-ḳosur ḳoia goinno ḳoroin, te tar imanor lagi he ḳalas fae.
ROM 4:6 Ar niz amol saṛa Alla Pake zare be-ḳosur ḳoia goinno ḳorsoin, Hozrot Daude-o tare nek-kofali koisoin. Fobitro Zobur Shorifo tain ḳoira,
ROM 4:7 Nek-kofali tara-u, zerar naformanire maf ḳora oise, Mabud Moulae zerar gunare ar hishabo dorta nae.
ROM 4:8 Nek-kofali hou zon, zar gunare Allae tar amol-nama taki kaṭi disoin.
ROM 4:9 Te nek-kofali kali tarare-u ḳoa oise ni, zerar mosolmani kam ḳorail oise? Mosolmani na ḳorail manshore-o ḳoa oise na ni? Oy, tarare-o nek-kofali koa oise. Ḳaron Allar kalamo faisi, Hozrot Ibrahimor imanor lagi-u, Allae tanre be-ḳosur ḳalas ḳoia goinno ḳorla.
ROM 4:10 Kun shomoy ḳorla? Mosolmani koranir age, na bade? Nichchoy, mosolmani koranir age-u oisla.
ROM 4:11 Mosolmani kam ḳoranir age-u Allae tanre imanor lagi be-ḳosur ḳoia goinno ḳorsla, ar mosolmani kam ḳorani asil er forman ba nishana. E taki buza zae, mosolmani na dile-o, ḳali imanor lagi zerare be-ḳosur ḳalas ḳoia dora oy, tarar mul baf oila Hozrot Ibrahim.
ROM 4:12 Mosolmani koranir age Hozrot Ibrahimor iman zelaḳan asil, mosolmani koraia zoto manshe ou imane sole, tarar-o mul baf oila ou Ibrahim.
ROM 4:13 Alla Pake oada ḳorsla, Hozrot Ibrahim ar tan ḳandanre i duniar doḳoldari diba. Shoriot manar lagi i oada ḳora oise na, borong Ibrahimor imanor lagi-u tanre be-ḳosur ḳalas ḳoia goinno ḳoria ou oada ḳorsla.
ROM 4:14 Shoriot mania ḳeu zudi doḳoldari failae, te to iman beḳama bonizae ar Allar oadar-o kunu dam roy na.
ROM 4:15 Shoriote to Allar gozob lamae. Asol ḳota oilo, zeḳano shoriot nai, ino shoriot bongor ḳota-o nai.
ROM 4:16 Erlagi i oada ḳali manshor imanor mazdi fura ḳora oy, zate iṭa Allar rohomotor dan hishabe roy. Te Ibrahimor ḳandanor gese ze oada ḳora oise, ikan nichchoy fura ḳora oibo. Ḳali shoriot manra oḳlor lagi-u furon ḳora oito nae, zera Ibrahimor imanor loge shorik, tarar lagi-o i oada fura ḳora oy.
ROM 4:17 Allar kalamo zela leḳa ase, “Ami tumare bout zatir mul baf banailam.” Ou hishabe Allar nozoro Ibrahim oila amra hoḳlor mul baf. Zein morare zindegi dein ar zeta oar nae, ota oaita faroin, hou Allar ufre tain iman ansla.
ROM 4:18 Ou Ibrahime zebla aolad faoar kunu asha ḳorar ḳota nae, hou shomoy-o tain Allar ufre borosha ḳoria imane mozbut roisoin. Allae tanre ḳoisla, “Tumar ḳandanre ami asmanor terar laḳan behishab ḳormu.” Ar ou ḳotar ufre tain iman anla.
ROM 4:19 Eḳ-sho bosor boyoshor Ibrahime zudio buzchila, hurutta zonom deoar ḳemota ar tan nai, tan bibi Sayrar-o hurutta oar boyosh shesh oigese, tebou tan iman mozbut asil.
ROM 4:20 Allar oadar befare tan mono kunu shondoy aise na, borong tain imane aro mozbut oia Allar tarif ḳorla.
ROM 4:21 Ibrahime furafur ekin ḳorla, Allae ze oada ḳorsoin, ita fura ḳorar ḳemota-o tan ase.
ROM 4:22 Ou ḳarone-u tan imanor lagi tanre be-ḳosur ḳoia goinno ḳora oisil.
ROM 4:23 “Be-ḳosur ḳoia goinno ḳora oisil,” ikan ḳali Ibrahimor lagi leḳa oise na,
ROM 4:24 amrar lagi-o leḳa oise. Imanor lagi-u Allae amrare be-ḳosur ḳoia goinno ḳorba, ḳaron ze Allae amrar Malik Isare murda taki zinda ḳorsla, amra tan ufre-u iman anchi.
ROM 4:25 Amrar gunar kofora hishabe ou Isare moutor ato tuli deoa oisil, ar amrare be-ḳosur ḳalas ḳoia goinno ḳorar lagi tanre murda taki zinda ḳora oisil.
ROM 5:1 Imanor mazdi amrare be-ḳosur ḳalas ḳoia goinno ḳora oise, gotike Malik Isa al-Mosir usillae Alla Pak ar amrar maze shu-shomporko boail oise.
ROM 5:2 Ou ze rohomotor tole amra asi, al-Mosie amrare i zagat ania fosaisoin. Erlagi Allar mohima faoar ashae amrar mon oḳon nichchit kushie bori gese.
ROM 5:3 Ḳali ikan nae, amra duk-koshṭor maze-o kushi-bashi korram. Ḳaron duk-koshṭoe sobor ane,
ROM 5:4 sobre meoa fole, ou meoae asha-borosha ane,
ROM 5:5 ar ou asha-borosha beḳama zae na. Ḳaron Allae amrare ze Pak Ruhu disoin, i Pak Ruhe amrar dilor maze Allai mohobbot zonmae.
ROM 5:6 Amra to ḳomzur-lasar aslam, shoṭik shomoye amrar laḳan gunagarre basanir lagi, al-Mosie nizor zan kurbani dila.
ROM 5:7 Kunu forezgar manshor lagi shadaronoto ḳeu zan dilaito sae na, ta-o kub bala zonor lagi aḳta ḳeu dile-o dilaito fare.
ROM 5:8 Oile amra gunagar halote-u al-Mosie amrar lagi nizor zan kurbani disoin. Oḳan taki forman mile, Allae amrare ḳoto maya ḳoroin.
ROM 5:9 Ar al-Mosir kurbanir usillae zebla be-ḳosur ḳalas ḳoia goinno oisi, te oḳon al-Mosir mazdi amra Allar shaza taki-o rehai faimu, iṭa to shullo-ana nichchit.
ROM 5:10 Amra age Allar dushmon aslam, hou shomoy tan ḳas mayar zon Ibnullar moutor usillae, tan loge amrar milon oise. Te to al-Mosir zinda oia uṭar mazdi oḳon aro beshi nichchit, amra nazat faimu.
ROM 5:11 Ḳali ikan nae, zar usillae ou milon oise, amrar malik ou Isa al-Mosir mazdi oḳon Allar name kushi-bashi-o ḳorram.
ROM 5:12 Eḳzon manshor mazdi duniait guna aia hamaisil, ar ou gunar mazdi mout-o aisil. Bade hoḳol manshe-u guna ḳorse, erlagi hoḳlor lagi-u mout aia azise.
ROM 5:13 Hozrot Musar shoriot nazilor age-o duniait guna asil. Oile shoriot asil na gotike gunare hishabo dora oito na.
ROM 5:14 Ta-o Baba Adom taki Musa nobir amol forzonto zera Adomor laḳan shorashori Allar hukumre bangise na, tarar ufre-o moute beṭagiri korse. Te kunu kunu ḳarone Baba Adomor loge, bade toshrif ana ou al-Mosir-o mil asil.
ROM 5:15 Oile Baba Adomor naformani ar Allar rohomotor danor maze bout tofat ase. Hou eḳzonor naformanir dae boutor lagi mout ailo ar aroḳzon, mani Isa al-Mosir meherbanir mazdi ze rohomoti dan ailo, Allar i rohomot aro bout beshi baṛi gelo.
ROM 5:16 Ar eḳzon manshor gunae zela fol deḳa gelo, Allar rohomotor dan to ilaḳan nae. Ḳali eḳzon manshor gunar lagi bout manshore dushi shaibosto ḳora oise. Oile bout beshi forimane guna ḳorar bade-o Allar ou rohomote bout zonre be-ḳosur ḳalas ḳoia goinno ḳora oise.
ROM 5:17 Eḳzon manshor gunar lagi zebla moute amrar ufre beṭagiri korse, te dusra aroḳzon, mani Isa al-Mosir mazdi amra zera Allar rohomote be-ḳosur ḳalas hishabe goinno oisi, amra-o ola ḳoto beshi nichchit oia Allai zindegi faia hoḳoltar ufre razotto ḳormu.
ROM 5:18 Asol ḳota oilo, eḳzon manshor gunar lagi zela hoḳol manshore dushi shaibosto ḳora oise, oula eḳṭa nek kamor mazdi hoḳol manshore be-ḳosur ḳalas ḳoia goinno oar shuzug deoa oise. Ou shuzugor fol oilo aḳeri zindegi.
ROM 5:19 Zemon doro, eḳzon manshor obaiddotar lagi bout manush gunagar oisoin. Oula eḳzon manshor baiddotar lagi bout manshore be-ḳosur ḳalas ḳoia goinno ḳora oise.
ROM 5:20 Ermaze shoriotor hukum-ahkam-o nazil oigelo, zate i naformanir hishabor foriman aro baṛi zae. Oile naformani zeno baṛilo, ino Allar rohomot aro bout baṛigelo.
ROM 5:21 I rohomot baṛilo, zate moutor mazdi age gunae zela beṭagiri korsil, oḳon be-ḳosur ḳalas oar mazdi Allar rohomote oula razotto ḳore. Ar otar fol hishabe amrar Malik Isa al-Mosir usillae aḳeri zindegi fai.
ROM 6:1 Te oḳon amra ola ḳoitam ni, amrar ufre zate Allar rohomot aro baṛe, erlagi amra aro guna ḳorat roi?
ROM 6:2 Nauzubilla, muṭe-u na! Gunar babote amra to morigesi, te i murda halote oḳon ar ḳemne gunar ḳamo roitam?
ROM 6:3 Aichcha, amra zoto zone al-Mosir name toubar gusol ḳorsi, amra to tan moutor loge-o shorik oisi.
ROM 6:4 Ou gusolor ḳalo amrare to al-Mosir loge ḳoybor deoa oise. Ar gaibi baf Allae tan moha kudrote al-Mosire zela ḳoybor taki zinda ḳori tulchoin, ṭik oula amra-o zanu noya zindegie din ḳaṭai.
ROM 6:5 Ar amra zebla al-Mosir mouto shorik oisi, te tain zela murda taki zinda oia uṭsoin, ola amra-o tan zinda oar loge shorik roimu.
ROM 6:6 Amra ikan zani, amrar shorilor bod ḳaishre beḳama ḳorar niote amrar furan ‘ami’re al-Mosir loge solibor ufre maria falail oise, zate amra ar gunar gulam na roi.
ROM 6:7 Ḳaron zar mout oizae, he to gunar ḳobza taki kalas failise.
ROM 6:8 Te al-Mosir loge zebla amrar moron oise, oḳon amrar iman oilo, tan loge zindegi-o faimu.
ROM 6:9 Amra zani, al-Mosi murda taki zinda oia uṭisoin ḳori tan ar mout oito nae. Moutor kunu ḳemota tan ufre nai.
ROM 6:10 Ashole tan ze mout oise, ita to gunar ḳemota binash ḳorar lagi kali eḳbar-u oise. Ar oḳon tan ze zindegi ase, iṭa to Allar mohimar lagi zinda asoin.
ROM 6:11 Ṭik oula, tumra-o mono ḳorio, gunar ḳemotar befare tumrar moron oigese, oḳon ḳali Isa al-Mosir name Allar mohimar lagi zinda aso.
ROM 6:12 Erlagi moutor zuka tumrar i shorilor ufre gunare kunu laḳan beṭagiri korte dio na, shorilre bod ḳaishor ato shofi dio na.
ROM 6:13 Shorilor kunu ongore bod ḳamor atiar banaio na. Borong nizore murda taki zinda oa zon mono ḳoria furafuri Allar ato shofi deo, shorilor hoḳol ongore nek kamor atiar hishabe Allar name bilai deo.
ROM 6:14 Tumra to gunar gulam nae, shoriotor aotae-o nae, ḳali Allar rohomotor tole aso.
ROM 6:15 Te oḳon kita ḳortam? Shoriotor aota taki saṛa faia, Allar rohomotor aotae asi kori, amra ḳali guna ḳortam ni? Nauzubilla, muṭe-u na!
ROM 6:16 Tumra buzo na ni, tumra zebla nizore ḳeuror ato shofi dia tar hukum mafik solo, te emne-u to tar gulam bonizao. Olaḳan tumra hoyto gunar gulam bonia morbae, arnae Allar gulam bonia nek kam ḳorbae.
ROM 6:17 Alla Pakor shukur, age zudio tumra gunar gulam aslae, ta-o Isayi torikar talim faia hari, dile-zane itar ashik oiso.
ROM 6:18 Gunar gulami taki saṛa faia, nek kamor gulam oiso.
ROM 6:19 Baiainre, tumrar aḳolor ḳomzuri dekia ami tumrar loge manush bulie matiram, age zela tumrar shorilor ongore nafaki ar bod ḳaishor gulam banaislae, oḳono ṭik oula, fak-fobitro zindegi kaṭanir lagi, zarzir ongore nek kamor gulamit shofi deo.
ROM 6:20 Tumra zebla gunar gulam aslae, i shomoy to nek kamor day-dayitto taki azad aslae.
ROM 6:21 Agor bod ḳam-ḳazor ḳota mono oile oḳon tumrar shorom lage, te ḳo sain, ita ḳame tumrar kita lab oito? Itar hesh fol to moron.
ROM 6:22 Oile oḳon tumra gunar gulami taki azad oia, Allar fotor gulam bonia fak-fobitro zindegi kaṭairae, er hesh fol to aḳeri zindegi.
ROM 6:23 Ashole gunar mozuri oilo mout, oile Allar rohomotor dan oilogi amrar Malik Isa al-Mosir usillae aḳeri zindegi.
ROM 7:1 Te O bai oḳol, Hozrot Musar shoriotor bishoy to tumrar zana-u ase. Ta-o tumra buzo na ni, shoriotor dabi-daoa manshor ufre boail taḳe, ḳali zinda taḳa forzonto.
ROM 7:2 Zela, zamai zotodin zita ase, otodin tar bou tar aotae banda roy, ar zamair moutor bade tar bou i bandon taki kalas fae.
ROM 7:3 Ar zamai zita taḳte bou zudi dusra beṭar gese hanga boy, taire to zinakur hishabe gona oy. Oile zamair moutor bade tai zamair bandon taki ain mafik kalas fae, erbade tai oinno zonor gese bia boile zinakur nae.
ROM 7:4 Baiainre, ṭik ou laḳan-u, al-Mosir shorilor moutor mazdi shoriotor bandon taki tumrar mout oigese ḳori, oḳon tumra oinno zonor bandono zaitae faro, ar ou oinno zon oila, murda taki zinda oa hou Isa al-Mosi, zate amrar zindegit Allar name nek fotor fol dore.
ROM 7:5 Age zebla amra shorilor morzie soltam, ou shomoy shoriote amrar mazor gunar bod ḳaishre kusaia hozag korto, ou ḳarone amrar shorilor ongo oḳole moutor foti gunar fol dorto.
ROM 7:6 Te age amra ze shoriotor bandono aslam, ita taki amrar mout oigese, oḳon amra i shoriotor bandon taki kalas faisi. Erlagi amra ar hi likito shoriotor gulam nae, ḳali Allai Pak Ruhe noya zindegir gulami kori.
ROM 7:7 Oḳon amra ola ḳoitam fari ni, shoriote-u guna ḳorae? Nauzubilla, muṭe-u na! Asol ḳota oilo, shoriot na taḳle to ami buztam farlam na one, guna ki zinish. Shoriote zudi na ḳoito, lub-lalos ḳorio na, te lalos ḳorle kita oy, ita amra buzlam na one.
ROM 7:8 Ar ou hukumor shuzug buzia amar bitre guna hamaia, hoḳol nomunar lub-lalos zonom dise. Shoriot na taḳle to guna-o morar laḳan sufsaf roy.
ROM 7:9 Amar zindegit shoriotre balamonte sinar age ami to zita aslam, oile ou hukum zanar loge loge-u guna hozag oilo, ar amar mout oilo.
ROM 7:10 Buzrae ni, ze shoriote ami zindegi faoar ḳota, hou shoriote amar lagi moron loia ailo.
ROM 7:11 Shoriotor ou hukumor shuzug faia gunae amare ṭogilo, ou hukumor bole-u gunae amar zan ḳaṛia nilo.
ROM 7:12 Oile ikan to hasa, Musa nobir deoa shoriot fobitro, er hukum-ahkam-o fobitro, ita shoṭik ar bala zinish.
ROM 7:13 Te ou bala zinishe-u kita amar moron anlo ni? Nauzubilla, muṭe-u nae! Borong gunae-u ita ḳorse, he bala zinish dia amare maria hari forman deḳailo, guna to guna. Ar ou hukum-ahkame-u buza zae, guna oilo mosto boṛo zogoinno.
ROM 7:14 Amra to zani, shoriot oilogi ruhani zogotor, oile ami oilam roḳto-mangshor zogotor, ami shorilor morzir bandono taḳae gunar gulam oisi.
ROM 7:15 Ami nize-u to buzi na, ami kita ḳam ḳori. Ashole ami zeta ḳortam sai, ita na ḳoria, zetare ginnai ota-u ḳori.
ROM 7:16 Ar zeta ḳortam sai na, ola gunar ḳam zebla ḳori, te ami emne-u shikar ḳoriar, shoriot ashole-o bala zinish.
ROM 7:17 Ita taki buza zae, ami nize ila ḳoriar na, oile amar maze ze gunae boshot ḳore, he-u amare dia ita ḳorae.
ROM 7:18 Ar ami to buziar, amar lour maze, mani shorilor ḳaishor maze bala kunu zinish-u nai. Ami nek kam ḳorar kial taḳle-o, amar shamortoe kulae na.
ROM 7:19 Ḳaron ami zeta nek kam ḳortam sai, ita ḳortam fari na, oile ze bod ḳam ḳortam sai na, ota-u ḳori.
ROM 7:20 Te zeta ḳortam sai na, ota-u zebla ḳori, er mani oilo ita ami kori na, borong ze gunae amar maze boshot ḳore, he-u ita ḳorae.
ROM 7:21 Oḳon amar nizor bitre-u dekiar, eḳṭa bod rifue ḳam ḳorer, ami nek kam ḳorat lagle, bod ḳam emne-u aia azi zae.
ROM 7:22 Ashole amar dilor ḳaislot mafik ami Allai hukum-ahkame kushi oi.
ROM 7:23 Oile amar shorilor ongor maze dusra arok kaislote ḳam ḳorer, amar dile nek kamre fosond ḳorle-o, ou bod ḳaislote amar dilor loge zuddo ḳoria, amare tar gulamit bandia raḳe.
ROM 7:24 Amar boṛo bod nosib! Amar shorilor ou bod ḳaislot, zegie amare moutor fote ṭane, tar at taki ke amare basaibo?
ROM 7:25 Allar shukur, amrar Malik Isa al-Mosie tar at taki amare basaisoin! Oḳon nichchit buza zae, dilor dik taki ami Allai shoriotor gulami kori, oile shorilor morzir dik taki ami gunar ḳaislotor gulami kori.
ROM 8:1 Te ou talim taki amra buzi, Isa al-Mosir zera afon zon boni gesoin, oḳon tarare ar dushi shaibosto ḳora oito nae.
ROM 8:2 Guna ar moutor at taki amare ḳalas ḳora oise, zindegi deora ruhe Isa al-Mosir usillae ḳalas ḳorsoin.
ROM 8:3 Roḳto-mangshor shorilor bod ḳaishor lagi shoriote amrare basaito farse na, ar shoriote zeta ḳorto farse na, Allae to nize-u ita ḳorsoin. Tain tan nizor ḳas mayar zon Ibnullare amrar laḳan gunagar manshor surote faṭaila, gunar ḳemotare binash ḳorar lagi. Ar ou mayar zonor zan kurbanir mazdi gunar bisar ḳoria tar ḳemotare batil ḳori dila.
ROM 8:4 Tain amrar fokko loia ita ḳorla, amra zera roḳto-mangshor shorilor ḳaishe na solia ruhur boshe soli, ou amrar lagi shoriotor dabi-daoa adae ḳorla.
ROM 8:5 Shorilor bod ḳaishor aotae zeta manush soloin, tarar mon-o bod ḳaishor bae kiali taḳe, ar zera Pak Ruhur aotae, tarar mon to Pak Ruhur kushi mafik solte kiali roy.
ROM 8:6 Shorilor bod ḳaish ze ḳamor kiali, itar fol oilo moron, oile Pak Ruhur kiale solar fol oilo zindegi ar shanti.
ROM 8:7 Ze zonor mon shorilor bod ḳaishor bae kiali, i mon to Allar dushmon, he Allai shoriot mante razi nae, manto fare-o na.
ROM 8:8 Erlagi-u zeta manush shorilor bod ḳaishor aotae soloin, tara Allare kushi korta faroin na.
ROM 8:9 Oile tumrar dilo zebla Allar ruhu boshot ḳoroin, te tumra to shorilor bod ḳaishor aotae nae, borong Pak Ruhur aotae. Asol ḳota oilo, al-Mosir ruhu zar maze nai, he al-Mosir nae.
ROM 8:10 Ar hasau zudi al-Mosi tumrar maze taḳoin, te gunar fol hishabe tumrar shoril morar foti oile-o, Pak Ruhur fol hishabe tumra to zinda. Allae to tumrare be-ḳosur ḳalas ḳoia goinno ḳorsoin.
ROM 8:11 Ar hou Isare zein murda taki zinda ḳorsoin, ou Allar ruhu zebla tumrar dilo boshot ḳoroin, te tan ou ruhur bole moutor aotae taḳa tumrar shorilre-o zindegi dan ḳorba.
ROM 8:12 Erlagi O bai oḳol, shorilor bod ḳaishor gese amra ar ṭeḳat nae, ou bod ḳaishor odine solar-o zorur nae.
ROM 8:13 Oḳon shorilor bod ḳaishor aotae solle to tumra siroḳalor lagi morbae, oile Pak Ruhur bole shorilor hoḳol naformanire binash ḳorille siroḳal zinda roibae.
ROM 8:14 Ḳaron Allar ruhur bole zera sole, tara-u Allar aolad.
ROM 8:15 Tumra to gulamir ruhu faiso na, te ar ḍoraitae ḳene? Tumra ḳali hou Allar ruhu faiso, zein tumrare aolad oar eḳtiar disoin. Erlagi-u Alla Pakre amra ruhani abba, fobitro baba ḳoia ḍaki.
ROM 8:16 Amrar dilor mazor Allai Pak Ruhe-o ola shakki dia ḳoira, amra Allar aolad.
ROM 8:17 Amra zebla aolad, te amra mouroshi baṭ faimu. Al-Mosie Allar ges taki mouroshi baṭ faiba, ar tan loge amra-o faimu. Ḳali amra tan loge duk-koshṭo shoijjo ḳorle, tan loge gourob-mohimar-o bag faimu.
ROM 8:18 Baiainre, amra bade ze mohima faimu, itar tulonae oḳonkur i duk-koshṭo kunta-u nae, ita to ami zani.
ROM 8:19 Hou shomoy aile deḳa zaibo ḳe ḳe tan asol aolad, erare deḳar lagi-u Allar foyda ḳora hoḳoltae zane-forane bar saira.
ROM 8:20 Ḳaron tan foyda ḳora hoḳolta-u oḳon oshar oigese. Ita kunu nize nize oshar oigese ni? Na, borong Allae-u tarare hou fote saṛi disoin. Oile erloge tain ou asha-o disoin,
ROM 8:21 eḳdin ita hoḳolta binashor at taki kalas oia, Allar aolad oḳlor shadinota ar gourobor bagi oito farbo.
ROM 8:22 Oḳon forzonto dekiar, hurutta foydar ḳalo maʼe zela buk faṭaia sillain, tan foyda ḳora hoḳoltae-u ola ahazari kori sillaira.
ROM 8:23 Ḳali ikan nae, amra-o hou ze mohima bade faimu, er foyla kishti hishabe Allai Pak Ruhre oḳon faisi, faia baki kishtir lagi amra-o ola sillaiar. Ar hou kishti faoar dinor lagi bar saiar, ze din amrare Allar aolad hishabe zair ḳora oibo, mani ze din amrar shorilre binashor at taki kalas ḳora oibo.
ROM 8:24 Amra ḳalas oar ou asha faisi, iman anar ḳalo. Te zeta zinish manshe dekilae, ita deḳar lagi he ar asha ḳore na, zeta deḳa oigese, itare deḳar asha ar ḳene ḳorto?
ROM 8:25 Oile na deḳa zinishre deḳar lagi amra doijjo doria bar sai.
ROM 8:26 Ita saṛa amrar ḳomzurir shomoy to Pak Ruhe amrare shaijjo ḳoroin. Dua ḳorar ḳalo amra kita saitam, ita to amra zani na. Oile mukdi zeta ḳoar shaiddo nai, dilor ḳandonor loge Pak Ruhe nize-u amrar fokko oia, itar lagi minoti koroin.
ROM 8:27 Ḳaron zein manshor dilor tallash ḳoroin, tain to Pak Ruhur ḳota-o buzoin. Pak Ruhe Allar morzi mafik tan pak bonda oḳlor lagi minoti koroin.
ROM 8:28 Amra zani, Allare zera mohobbot ḳoroin, mani Allae tan nizor morzi mafik zerare daot disoin, tarar balair lagi hoḳoltae eḳloge ḳam ḳorer.
ROM 8:29 Allae zerare ag taki-u tan nizor lagi fosond ḳori raḳsila, tarare tan ḳas mayar zon Isar laḳan oar lagi-u fosond ḳorsila, zate ou Isa Ibnulla-u, era hoḳlor boṛo bai oin.
ROM 8:30 Tain age zerare fosond ḳorsila, tarare-u daot dila. Ar zerare daot dila, tarare be-ḳosur ḳalas ḳoia goinno ḳorla, ar zerare be-ḳosur goinno ḳorla, tarare tan nizor gourob-mohima-o dan ḳorla.
ROM 8:31 Oḳon ita befare amra kita ḳoitam? Shoyong Alla Pak zebla amrar fokke, te amrar bifokke ḳegu lagto?
ROM 8:32 Amra hoḳolre basanir lagi, Allae zebla tan ḳas mayar zon Ibnullare bilai dite-o naraz oila na, tanre moutor ato shofi dila, te ou mayar zonor loge hoḳolta-u amrare dan ḳorta nae ni?
ROM 8:33 Ar Allae tan nizor lagi zerare fosond ḳorsoin, erar birudde nalish dibar shaiddo ḳar? Allae nize-u tarare be-ḳosur ḳalas ḳoia goinno ḳorsoin.
ROM 8:34 Te tarare ḳegue dushito? Zerar lagi hou Isa al-Mosir mout oise, moutor bade zinda ḳorio tula oise, tain oḳon Alla Pakor ḍain galar toḳto boia, amrar lagi minot-ḳajji korat asoin.
ROM 8:35 Erlagi ila kunu zinish ase ni, zetae amrare al-Mosir mohobbot taki alog korto? Zulum-nirjaton, zala-zontrona, monor ḳoshṭo, ḳaoa-findar obab, bifod-afod ba dushmonor toluar?
ROM 8:36 Fobitro Zobur Shorifo ase, Tumar namor lagi amrare hor-hamesha kun ḳora or. Manshor sokut amra oilam bolir faṭa.
ROM 8:37 Na, ila kunta-u nai. Ḳaron ze Isae amrare oto mohobbot ḳorsoin, tan bole amra ita hoḳoltat-u furafur joyi oiar.
ROM 8:38 Te ami ikan balamonte-u zani, zindegi ba mout, firista ba Iblisor kunu sela, oḳon ba bobishotor kunutae-u, kunu laḳan shoktie-u,
ROM 8:39 asmanor ba fatalor ba foyda oa kunu zinishe-u amrare Allar mohobbot taki alog korto farto nae. Tan ou mohobbot to amrar Malik Isa al-Mosir usillae faisi.
ROM 9:1 Ami al-Mosire shakki rakia, ekkere hasa ḳota ḳoiram, amar bibeḳe-o Pak Ruhur loge oia ou shakki der.
ROM 9:2 Boni Israilor lagi amar boṛo afsus ar shimahin ḳoshṭo lager.
ROM 9:3 Haere hae, ami lannotir ḳataro gia al-Mosir ges taki horail oia-o zudi, amar zatir baiain Boni Israilre basaitam fartam.
ROM 9:4 Allae to Boni Israilre tan nizor aolador eḳtiar disoin, tan shan-tozolli deḳaisoin, tan loge milonor usilla oḳol ḳaim ḳorsoin, shoriot nazil ḳorsoin, tan ebadot-bondegir shuzug kori disoin ar bout laḳan oada-o ḳorsoin.
ROM 9:5 Hozrot Ibrahim, Isʼhak ar Iakub nobi asla Boni Israilor mul murobbi. Bade Isa al-Mosi-o to roḳto-mangshor bae taki erar ḳandano-u zonom loisoin, ein hoḳoltar uforala, zuge zuge siroḳal tan tarif ouk. Amin.
ROM 9:6 Huno, Allar oada oḳol oḳon zen beḳama oigese, ila kunta nae. Ḳaron Boni Israilor maze zonom oilo ḳori-u, era hoḳol to asol Boni Israil nae.
ROM 9:7 Hozrot Ibrahimor ḳandan ḳori-u tara zen tan asol aolad, ila kunta nae. Borong kitabo leḳa ase, “Tumar fua Isʼhakor ḳandanre-u tumar ḳandan ḳoia gona oibo.”
ROM 9:8 Mani Israil zatir maze zonom oise gotike-u mono ḳorio na, tumra Allar aolad bonigeso. Ḳali Allar oada mafik zera aolad bonche, tarare-u Ibrahimor ḳandan hishabe goinno ḳora oibo.
ROM 9:9 Buzrae ni, Allae to Hozrot Ibrahimor gese ou oada ḳorsla, “Samnor bosor ou sando ami firia aimu, ou shomoy tumar bibi Sayrar kulo eḳ fua taḳbo.”
ROM 9:10 Ar ou fua oila, amrar furbofurush Hozrot Isʼhak. Ḳali ikan nae, ou Isʼhakor bibi Rebekar feṭor zuṛor fuain eḳoi bafor aolad oile-o,
ROM 9:11 era maʼr feṭo taḳa halote zebla bala-bura kichchu ḳorsoin na, hou shomoy Allae Rebekare ḳoisla, “Tumar boṛo fua to huru fuar gulam oibo.” On taki buza zae, Allae tan munsha fura ḳorar kiale manshore fosond ḳoroin, ḳeuror amolor bae na saia, tan nizor fosond mafik basia nein.
ROM 9:13 Erlagi-u Pak Kitabo leḳa ase, “Ami to Iakubre mohobbot ḳorsi, oile tar bai Ishʼre horaia raḳsi.”
ROM 9:14 Te oḳon amra ḳoitam ni, Allae-o obisar ḳoroin? Nauzubilla, muṭe-u na!
ROM 9:15 Allae Hozrot Musare ḳoisla, “Ami zare kushi doya ḳormu, ar zare kushi rohom ḳormu.”
ROM 9:16 On taki buza zae, rohomot to ḳeuror sesṭae ba ichchae mile na, ḳali Allar meherbani taki-u mile.
ROM 9:17 Asmani Kitabor ayato ase, Allae Feraunre ḳoisla, “Ami tumare bashsha banaisi, zate tumar mazdi hoḳole amar lila-ḳela dekia, hara duniait amar nam zair oy.”
ROM 9:18 Te deḳa zae, Allae tan nizor kushi mafik ḳeurore doya ḳoroin, ar ḳeuror dilre fashan banain.
ROM 9:19 Oḳon tumra amare zikaitae faro, “Allar morzir baira zebla ḳeu kunta ḳorto fare na, te Allae ḳene manshor dush-tiruti gonoin?”
ROM 9:20 I soalor shuza zuaf oilo, Allar ufre matar tumi ke? Ḳeu zudi kunu zinish banae, te tar banail zinishe zikaito farbo ni, amare ḳene ila banailae?
ROM 9:21 Eḳ maṭi taki kumare nanan zator zinish banaito fare na ni? Itar kunuṭa ijjoti kamo ar kunuṭa shadaron ḳamo lage.
ROM 9:22 Ṭik olaḳan, Allae tan lannot ar kudroti kemota deḳaita saisla, ar zerar ufre i lannot ḍalita saisla, erar faona asil ḳali binashi gozob, ta-o tain bout boṛo sobor ḳoria tarar ita shoijjo ḳorla.
ROM 9:23 Tain ita shoijjo ḳorla, ḳaron aroḳbar nizor kudroti shan-tozollir ḳota zanaita saila. Ar zerare doya ḳorsoin, erare tain age taki-u zuit ḳoria raḳsila, tan shan-tozolli deḳanir kiale.
ROM 9:24 Ashole amra-u oilam hou doyar zon. Amrare tain ḳali Boni Israilor maz taki-u daot dia anchoin na, oinno zatir maz taki-o to anchoin.
ROM 9:25 Hozrot Husia nobir sohifat Allae ḳoisoin, Zeta manush amar proza nae, tarare-o amar nizor proza banaimu. Ar zera amar mayar manush asil na, tarare-o mayar manush ḳoia ḍaḳmu.
ROM 9:26 Ze zomino ḳoa oisil, tumra amar proza nae, hou zomino-u tarare zinda Allar aolad ḳoa oibo.
ROM 9:27 Oile Boni Israilor befare Hozrot Ishaya nobie ḳoisla, Gonar bala zudio tara doriar soror balur laḳan behishab, tebou tarar mazor kub huru eḳ ongshoe ḳalas faiba.
ROM 9:28 Mabud Moulae zogotor faona ze shaza zuit ḳorsoin, ou shullo-ana shaza kub zoldi-u diba.
ROM 9:29 Hozrot Ishaya nobie aro bataisoin, “Alla Rabbul Alamine zudi amrar lagi kisu manshore zinda na raḳta, te amrar dosha to lannoti Sadum ar Amura ṭaunor laḳan oilo one.”
ROM 9:30 Te amra ou ḳota-u ḳoimu, bin zati oḳole zudio Allar forezgar bonda oar sesṭa ḳorse na, tebou iman anar mazdi tara Allar dorbaro forezgar bonigese.
ROM 9:31 Ar Boni Israile ḳali shoriot mania forezgar bonto saisil, oile shoriot manto farse na.
ROM 9:32 Aichcha, tara ḳene farse na? Tara imanor ufre borosha na ḳoria, ḳali kam-ḳazor amolor ufre borosha ḳorse, erlagi farse na. Manshe ze fattoro usṭa ḳain, tara-o ou fattoro usṭa ḳaisoin.
ROM 9:33 I befare Asmani Kitabo leḳa ase, Huno, ami Zeruzalemo ola eḳ fattor boaisi, ze fattoro manshe usṭa ḳaia foṛbo. Oile ze zone tan ufre iman anbo, he kunumonte-u shorminda oito nae.
ROM 10:1 Te O bai oḳol, Boni Israilor lagi amar dilor ou foriad ase, ami Allar dorbaro dua ḳoriar, tara zanu nazat fain.
ROM 10:2 Tarar befare ami oḳan-u ḳoiram, tarar monor maze Allar eshki ase, oile tara zane na, Allar dorbaro ḳemne forezgar bona zae.
ROM 10:3 Allar dorbaro be-ḳosur ḳalas oar fot na zanae, tara i fotre manche-o na, tara ḳali shoriot amol ḳoria forezgar bonto sae.
ROM 10:4 Ou shoriotor hoḳol dabi-daoa al-Mosie to adae ḳorilsoin, erlagi tan ufre zera iman ane, Allar dorbaro tarare be-ḳosur ḳalas ḳoia goinno ḳora oy.
ROM 10:5 Shoriot amol ḳoria Allar dorbaro forezgar oar befare, Hozrot Musae Tourat Kitabo leḳsoin, “Zera shoriot manto sae, tara furafur manle basibo.”
ROM 10:6 Ar imanor bole manush kila Allar dorbaro forezgar bone i befare Allar kalamo leḳa ase, “Mone mone ḳoio na, ḳe gia asmano uṭito?” Er mani oilo, hono uṭia al-Mosire lamaia anto.
ROM 10:7 Ba ikan-o ḳoio na, “Ḳe gia fatalo lamto?” Er mani oilo, hono lamia al-Mosire ḳoybor taki tulia anto.
ROM 10:8 Na ila kunta nae, ḳaron leḳa ase, “Ashole Allar kalam to tumar kub daro ase, ita tumar muko ar tumar dilo ase.” Ar amra zeta toblig korram, ita-u to hou kalam.
ROM 10:9 Oḳon tumi zudi muke shikar ḳoro Hozrot Isa-u malik, ar dile ekin ḳoro, Allae tanre murda taki zinda ḳorsoin, te tumi aḳer faibae.
ROM 10:10 Ḳaron dile iman anle Allae manshore be-ḳosur ḳalas ḳoia goinno ḳoroin, ar muke shikar ḳorle Allae nazat dan ḳoroin.
ROM 10:11 Allar kalame batae, “Ze zone tan ufre iman anbo, he kunumonte-u shorminda oito nae.”
ROM 10:12 Boni Israil ouk ba bin zati ouk, erar maze kunu tofat nai, ḳaron hoḳlor malik to eḳzon. Ze manshe Allar nam loy, Allae tare bout meherbani koroin.
ROM 10:13 Allar kalame to ḳoy, “Zekunu manshe Mabudor name ḍakile, he nazat hasil ḳorbo.”
ROM 10:14 Oile zan ufre tara iman-u anche na, tanre kila ḍakibo? Ar zan befare tara hunche-u na, tan ufre iman anbo kila? Toblig korra na taḳle, tara hunbo kila?
ROM 10:15 Ar tobligo ḳeu na faṭaile, tara kila tobligo zaibo? Zela Allar kalamo batail oise, “Doinno tarar fao ḳanain, zera aṭi aṭi kush-ḳobri toblig koroin.”
ROM 10:16 Oile hoḳol manshe to i kush-ḳobrire ḳano ṭai dey na. Hozrot Ishaya nobie ḳoisoin, “O Mabud, amrar toblig hunia ḳe iman anche?”
ROM 10:17 Te deḳa zar, Allar kalam hunle iman ae, ou kalam oilo, al-Mosir befare toblig.
ROM 10:18 Oile ami koiram, Boni Israil oḳole i kalam hunche na ni? Nichchoy hunche. Pak Kalame ḳoy, Tarar aoaz to hara duniait sitri gese, sitri gese tarar mat-ḳota, duniar eḳ mata taki aroḳ mata forzonto.
ROM 10:19 Ami hirbar ḳoiram, Boni Israile hou kalam buzchoin na ni? Nichchoy buzchoin, Allae to Hozrot Musa nobir mazdi tarare ḳoisoin, Zeṭa zati nai ila zati dia ingsha ḳoraimu, ammok zati dia tarar gusa tulaimu.
ROM 10:20 Bade Ishaya nobie kub shaosh ḳoria i ayato ḳoisoin, Amare zera tallash ḳorse na, tara-u amare faise. Amar gese zera kunta saise na, tarare ami didar disi.
ROM 10:21 Oile Boni Israilor befare tain ḳoira, Ami at baṛaia ḍakiram, hara din dori duio ate ḍakiram, naforman ar fashan eḳ zatire ḍakiram.
ROM 11:1 Erlagi ami oḳon zikairam, Allae kunu tan afon bonda Boni Israilor log saṛi disoin ni? Nichchoy na! Ḳaron ami nize-o to eḳzon Boni Israil ar Hozrot Ibrahimor bongshodor, Bin-Iamin ḳandanor manush.
ROM 11:2 Allae foyla taki tan ze prozare fosond ḳoria alog korsila, tain to erar log saṛsoin na. Hozrot Ilias nobir befare Allar kalamo kita ase, ita tumra zano na ni? Tain to Boni Israilor birudde Allar dorbaro ou nalish disla,
ROM 11:3 “O Mabud, itae tumar nobi oḳolre zane marilise, tumar kurbani kanain-o bangilise. Ḳali ami-u basia roisi, oḳon tara amar zanḳan-o nitagi saira.”
ROM 11:4 Teu Allae tanre kita zuaf disla mono ase ni? Tain ḳoisla, “O Ilias, ami to shat azar manshore amar nizor lagi alog koria raḳsi, era to i Baal devtare fornam ḳorse na.”
ROM 11:5 Ṭik olaḳan, Allae rohom ḳoria Boni Israilor eḳṭa ongshore oḳono alog kori raḳsoin.
ROM 11:6 Ar Allae zebla rohom ḳoria erare alog korsoin, te iṭa kunu nek amolor fol nae. Amolor fol oile to ar rohomot ḳoa oilo na one.
ROM 11:7 Te buza zae, Boni Israile shoriot amol ḳoria zeta faita saisla, ita tara faisoin na. Ḳali Allar fosond ḳora zone faisoin. Oile baki hoḳlor dil fashan bonigese.
ROM 11:8 Zela Allar kalame ḳoise, Allae tarar dilre beushi gumo falaisoin, tarar souk taḳte-o deḳe na, ḳan taḳle-o hune na. Aiz forzonto ou haloto ase.
ROM 11:9 Ola Hozrot Daud nobie-o ḳoira, Tarar dumdam ḳori kaoa-daoa-u shikaror zal ar fand bonizauk. Ita tarar bifodor ḳaron ouk, bod ḳamor shaza bonizauk.
ROM 11:10 Tarar souk anda oizauk zate na deḳe, tumi tarar ḳomorre hamesha guza ḳori rakio.
ROM 11:11 Te Boni Israil siroḳalor lagi ou bifodor fando roibo ni? Nichchoy na. Borong tarar naformanie bin zati oḳlor lagi nazator duar kuligelo. Allae saila, ita dekia tarar dilo zanu zala foyda oy, ḳaron bin zatie nazat failira.
ROM 11:12 Oḳan taki buza zae, tarar naformanir lagi zogotor manshor bout fayda oise, ar tarar ḳetie zebla bin zatir lab oilo, te tara zebla Allar nazator daot kobul ḳorba, ou shomoy bin zati oḳole aro ḳoto beshi rohom faiba.
ROM 11:13 O bin zati oḳol, ami tumrare ḳoiram, huno, tumrar gese-u amare sahabi hishabe faṭail oise ḳori, ami amar ḳamre kub dam diram.
ROM 11:14 Ḳaron, ou ḳam deḳaia amar nizor zati Boni Israilor dilo kunu zala foyda ḳortam fari, ar ou zalae tarar mazor kisu manshor zan basaitam fari.
ROM 11:15 Tara duroi hori zaoae zebla zogotor manshor loge Allar milon oilo, te tarare zebla hirbar ṭai diba hou shomoy kun halot oibo? Ita mora manush zita oar laḳan nae ni?
ROM 11:16 Doro, Allar name bilanir ruṭir mul ḳai zudi fobitro oy, te to banail ruṭi-o fobitro. Gasor mul zoṛ fobitro oile, er ḍal-fala-o nichchoy fobitro. Ṭik ola, Boni Israilor mul baf Hozrot Ibrahim zebla fobitro, te Boni Israil-o fobitro.
ROM 11:17 Ar mone ḳoro, gasor kisu ḍal-fala ḳaṭa oilo, bade ou ḳaṭa zagat tumar laḳan zongli zoytun gasor kisu ḍal ḳolom dia zuṛa deoa oilo, te tumi nichchoy mul gas taki-u rosh fairae.
ROM 11:18 Oḳon tumi-o nizore hou ḳaṭia falail ḍal taki boṛo mono ḳorio na, iad rakio, tumi mul gasre ṭikai raḳso na, borong mul gase-u tumare ṭikaia raḳse.
ROM 11:19 Tumi ikan ḳoitae faro, “Amare zuṛa dibar lagi-u to agor ḍal-falain ḳaṭa oisil.”
ROM 11:20 Ikan ṭik ase, oile iman na anar ḳarone-u to tarare ḳaṭia falail oise, ar iman anae tumare hono lagail oise. Te tumi-o beṭagiri na deḳaia Allare ḍorao.
ROM 11:21 Mono rakio, Allae zebla mul ḍal-falare-u rehai disoin na, te tumi kolomor ḍalre kunu rehai diba ni?
ROM 11:22 Erlagi-u sinta ḳoria deḳo, Alla Pak koto doyal ar ḳoto fashan. Zera be-fote faṭi gesoin tarar lagi tain fashan, ar tumar bae tain doyalu, zudi tumi tan doyar maze ro, na roile tumare-o ola ḳaṭia falai diba.
ROM 11:23 Ar hou Boni Israile-o zudi hirbar iman anoin, te tarare-o tain mul gasor loge zuṛa diba, Allae to ila zuṛa dita faroin.
ROM 11:24 Ashole to tumi aslae zongli zoytun gasor ḍal, tumare zebla hon taki kaṭia ania malikana baganor zoytun gasor loge asanoḳ halote zuṛa lagail oise. Te sinta ḳoro, zera ou gasor asol ḍal, tarare mul gasor loge lagani koto shuza.
ROM 11:25 O bai oḳol, tumra zate nize nize aḳoldar na bono, erlagi eḳṭa batuni befar ami tumrare hikai dei. Huno, bin zati oḳlor nazat faoar shongḳa fura na oa forzonto bout Boni Israilor dil fashan halote roibo.
ROM 11:26 Heshe ola-u hoḳol Boni Israile nazat hasil ḳorba, zela Asmani Kitabo ase, Toranealae toshrif anba Zeruzalemor Sion faṛ taki, tain Iakub nobir ḳandan taki naformani kedai diba.
ROM 11:27 Ami ola-u tarar gunare horailimu iṭa to amar deoa oada.
ROM 11:28 Huno, tumrar balair lagi kush-ḳobrir befare tara to oḳon Allar dushmon, oile Allai fosondor befare baf-dadar silsilae tara oila Allar mohobbotor manush.
ROM 11:29 Ḳaron Allae tan rohomotor dan-dokkina ar tan daotor ḳota kunumonte-u mot bodlain na.
ROM 11:30 Zela tumra-o eḳ shomoy naforman aslae, oile oḳon Boni Israile naformani korae tumra tan meherbani faiso,
ROM 11:31 ṭik ou laḳan, tumra meherbani faoae tara oḳon naformani korer, zate tara-o ola meherbani fain.
ROM 11:32 Ar Allar munsha oilo, tain zate hoḳlor bae meherbani deḳaita faroin, otar lagi hoḳolre-u naformanir maze bondi korsoin.
ROM 11:33 Buzrae ni, Allar banḍar ḳoto boṛo! Tan aḳol-hekmot ḳoto goin! Tan bibeḳ-bisar buzar oshaiddo, tan ḳam-ḳaz oḳol tallash ḳori buza zae na.
ROM 11:34 Zela kitabo ase, Ḳaron Mabudor mon sinar shaiddo ḳar ase? Tanre foramish dibar lak ḳe ase?
ROM 11:35 Ḳe age Allare kunta dilaito farse, ze ḳarone tain tar gese denadar asoin?
ROM 11:36 Ashole hoḳolta-u to tan ges taki, tan mazdi-u ae, tan nizor lagi foyda ḳorsoin. Zuge zuge siroḳal tan tarif ouk. Amin.
ROM 12:1 Erlagi O bai oḳol, Allae tumrare ola meherbani korae, ami tumrare ḳas minoti koriar, tumra zarzir shorilre Allar ato shofi deo, ila zinda fobitro kurbani Allar dorbaro kobul oy, oḳṭa-u oibo tumrar sohi-shuddo ebadot.
ROM 12:2 Ar ou ḳaraf zomanar talo foṛio na, borong nizor dilor bab bodlaia noya manush o. Teu tumra Allar morzi buzbae. Tan morzi to bala ar furafur nikut, ola ḳorle tain kushi oin.
ROM 12:3 Talim dibar lagi Allae amare ze ḳas niamot disoin, ou niamotor bole ami tumra forteḳ zonre ḳoiram, nizore zotoḳan boṛo mono ḳora usit, er saite beshi mono ḳorio na. Allae zare zotoḳan imani bol disoin, he zanu nizore er taki beshi kunta mono na ḳore.
ROM 12:4 Kial rakio, amra hoḳlor shorilo bout ongo ase, hoḳol ongoe to eḳlaḳan ḳam ḳore na.
ROM 12:5 Ṭik ou laḳan, mumin hishabe amra bout zon oile-o, al-Mosir loge shorik oia ḳali eḳ shoril oisi. Eḳoi shorilor ongo gotike amrar eḳe-oinne mil ase.
ROM 12:6 Allar rohomote amra nanan zone nanan laḳan niamot faisi, ou niamot zudi gaibi ohi zananir befare oy, te amrar iman mafik oli-auliar laḳan ohi koite taki.
ROM 12:7 Ḳeu zudi kezmot ḳorar niamot fae, te kezmot ḳorouk. Ar talim dibar niamot ze faise, he talim deuk.
ROM 12:8 Utshaho dibar niamot ze faise, he manshore utshaho deuk. Dan ḳorar niamot ze faise, he ḳalis niote dan ḳorouk. Murobbiana ḳorar niamot ze faise, he dile-zane hoḳolta salauk. Manshore shaijjo ḳorar niamot ze faise, he kushi mone shaijjo ḳorouk.
ROM 12:9 Maya-mohobbotor maze kunu ḳad mishaio na. Ḳarafire ginnao, balair ashik o.
ROM 12:10 Eḳe-oinnore afon bair laḳan dile-zane maya ḳoro, niz taki oinnore beshi dam deo.
ROM 12:11 Kezmot ḳamo durbol oio na, ruhre gorom raḳo, malikor gulami korat ro.
ROM 12:12 Samnor furuskaror ashae hamesha kushi-bashi koro, duḳ-mosiboto sobor ḳoro, hor-hamesha munazat ḳorat ro.
ROM 12:13 Allar pak bonda oḳlor obabo shaijjo ḳoro. Memandari korte kiali o.
ROM 12:14 Tumrar ufre zera zulum ḳore, tarar lagi nek dua ḳorio, boddua dio na.
ROM 12:15 Zera kushi-bashi korer, tarar loge kushi koro, zera ḳander tarar loge oia ḳando.
ROM 12:16 Tumra eḳe-oinne bai bai oia ro. Boṛoluki bab na deḳaia, shadaron manshor loge mili-mishi solo. Nizor fonḍiti deḳaio na.
ROM 12:17 Ḳarafir bodla hishabe ḳeuror ḳarafi korio na, hoḳol manshe zetare bala mono ḳoroin, tumra sinta-babna ḳoria ota-u ḳoro.
ROM 12:18 Tumrar torof taki zotoḳan shombob hoḳol manshor loge shantie boshot ḳoro.
ROM 12:19 O mayar bai oḳol, tumra ḳeuror bodla loio na, ita Allar ato saṛi deo, bodla deoa tan ḳam. Allar kalamo ase, “Naformanir shaza dibar eḳtiar ḳali amar-u ase, zar zela faona ami tare ola bodla dimu, ikan ami Mabude ḳoiram.”
ROM 12:20 Borong kitabe ḳoy, “Tumar dushmonor feṭo buk lagle, tare ḳani deo. Fiase dorle tare fani deo. Ola ḳorle to tumi tar matar ufre zalail angrar ṭukri toilae.”
ROM 12:21 Ḳarafir gese kunumonte-u ario na, borong balare dia ḳarafire arao.
ROM 13:1 Forteḳ manshe deshor razare mania solouk, ḳaron Allar morzi saṛa ḳeu razotto fae na, raza oḳolre to Allae-u godit boain.
ROM 13:2 Erlagi ze manshe deshor razar dushmoni kore, he ashole Allai hukumor dushmoni kore. Ila ḳam zetae ḳoroin, tara to nizor ufre gozob ḍakia anoin.
ROM 13:3 Ar bala ḳam ḳorra zone to razare ḍoranir kunta nai, oile ku-ḳam ḳorra zonor lagi koṭin bifod. Te tumra kita nirboye roitae sao ni? Taile bala fote aṭo, teu razae tumrar tarif ḳorba.
ROM 13:4 Razae to tumrar balair lagi-u Allar ḳadim hishabe ḳam ḳoroin. Oile tumra zera ku-ḳam ḳoro, tumrar lagi bifod ase. Tain ḳamoḳa ḳeurore maroin na, oile ku-ḳam ḳorrare Allar ḳadim hishabe ṭik-u shaza dein.
ROM 13:5 Te ḳali shazar ḍore nae, borong zarzir bibeḳor bisare-o razar hukum mana zorur.
ROM 13:6 Otar lagi-u to tumra ḳazna deo, ḳaron ḳazna tulia ḳoros ḳorar mazdi tara Allar kezmot ḳorra.
ROM 13:7 Oḳon zar zela faona, tare ola deo. Zenre ḳazna dibar ḳota, enre ḳazna deo; zenre mashul dibar ḳota, enre mashul deo; zenre ijjot ḳorar ḳota, ene ijjot ḳoro; zenre tazim ḳorar ḳota, ene tazim ḳoro.
ROM 13:8 Ḳali mayar rin saṛa dusra kunu befare ḳeuror gese rini oio na. Zano ni, ze manshe oinno zonre maya ḳore, he to shoriotor hukum-ahkam shullo-ana adae ḳorse.
ROM 13:9 Zela shoriotor hukum ase, “Zina ḳorio na, kun ḳorio na, suri korio na, lub-lalos ḳorio na,” ba i laḳan aro zoto hukum ase, i hoḳol hukumre ekḳano ḳori koa oise, “Tumar ari-forire nizor laḳan maya ḳoro.”
ROM 13:10 Ar maya taḳle ḳeu ari-forir ḳeti korto fare na, erlagi maya ḳorle furafur shoriot-u mana oizae.
ROM 13:11 Te bai oḳol, oḳonkur zomanar halot to tumra zano-u, erlagi buzi-huni solo. Tumra gum taki hozag oar shomoy oigese, ḳaron amra ze shomoy iman anchilam, hou halot taki-o amrar nazat oḳon aro daro aichche.
ROM 13:12 Rait fuaia hari bian oizar; oḳon zoldi ao, amra andarir bod ḳam saṛia nuror lebas lagai, Allai atiar findilai.
ROM 13:13 Hoi-hulla ḳori mod ḳaia ṭal oa, zina-bodmaishi ba mongoṛa sola, ingsha ar ḳaijja-fosad bad dia, ao, amra dinor fore solra manshor laḳan soli.
ROM 13:14 Finnor lebasor laḳan tumra Malik Isa al-Mosire furafur findilao. Shorilor bod ḳaish miṭanir sinta ekkere bad deo.
ROM 14:1 Tumrar mazor ze bai imane ḳomzur, tare-o afon hishabe shomzo, tar fosond-ofosond loia torka-torki korio na.
ROM 14:2 Buzrae ni, eḳzone mono ḳore, he hoḳol zator ḳani kaito farbo, oile ḳomzur imandar zone ḳali niramish ḳae.
ROM 14:3 Te mas-mangsho ḳaora zone ou niramish ḳaora zonre zanu na siṛae. Ar niramish ḳaorae-o zanu mas-mangsho ḳaorare na dushe, ḳaron Allae to duiozonre-u nizor ḳoia kobul ḳorsoin.
ROM 14:4 Ar tumare ḳegie ḳemota dilo, aroḳ beṭar gulamor bisar ḳortae? He ṭik fote ase, na bul fote ase ikan to tar munibe buzba. Ashole to he ṭik fote-u roibo, malike-u tare ṭik fote raḳta farba.
ROM 14:5 Kunu kunu manshe mono ḳoroin, shadaron din taki kunu ḳas dinor fozilot beshi. Ar ḳeu ḳeu hoḳol dinre-u eḳlaḳan mono ḳore. Te i befare ḳe kita ḳorto na ḳorto, ita zanu tar dil taki furafur shae dey.
ROM 14:6 Ze manshe kunu ḳas dinre mane, he to Malik Isare kushi korar niote-u ita mane. Ze zone hoḳol zator ḳani kae, he-o to malikre kushi korar niote-u ḳae, he Allar shukria adae ḳoria ḳae, ar ze zone hoḳolta ḳae na, he-o malikre kushi korar niote ḳae na, he-o Allar shukria adae ḳore.
ROM 14:7 Amrar mazor kunu bonda-u nizor lagi nize zinda roy na, ar nizor lagi more-o na.
ROM 14:8 Ḳaron amra zebla zinda roi, ḳali malikor lagi-u zinda roi, ar zebla moron oy, ḳali malikor lagi-u moron oy. Te amra zinda roile-o zeta, morle-o ota, amra to Malik Isar-u.
ROM 14:9 Malik al-Mosi-o to mara gesla ar hirbar zinda oia uṭsoin, zate tain zinda ar murda duio dolor-u malik bonoin.
ROM 14:10 Te tumi kene tumar bair kut tukairae? Tare ḳene siṛairae? Allar bisaror samne to amra hoḳol-u ubaimu.
ROM 14:11 Zela Allar kalamo ase, Mabude ḳoira, amar namor ḳosom ḳaia ḳoiar, hoḳole-u amar samne aia soizda ḳorbo, forteḳ muke-u shikar ḳorbo, ami-u Alla.
ROM 14:12 Ono deḳa zae, Allar dorbaro amra forteḳe-u zarzir ḳamor hishab dite oibo.
ROM 14:13 Te ao, oḳon taki amra eḳe-oinnor kut dora bond ḳori, ar niot ḳori, ila kunu ḳam ḳortam nae, ze ḳame aroḳ bair imanor ḳeti oibo, ba tare gunar fote nibo.
ROM 14:14 Malik Isar ummot oae ami balamonte-u zani ar buzi, emne to kunu zinish-u nazaiz nae, oile ḳeu zudi itare nazaiz mono ḳore, te tar lagi-u ita nazaiz.
ROM 14:15 Zudi tumar kunu ḳanir lagi aroḳ baie mono duk fae, te to tumi tare mohobbot ḳorrae na. Ze baire basanir lagi al-Mosie mout kobul ḳorla, kunu ḳanir lagi i bair shorbonash ḳorio na.
ROM 14:16 Tumi zetare fosond ḳoro, itar lagi dusra zone zanu tumare na nindae.
ROM 14:17 Allar bashshai to ḳali kana-finar lagi nae, borong Allai Pak Ruhe deoa forezgari, shanti ar kushi-bashir befar.
ROM 14:18 Ou nomunae zera al-Mosir kezmot ḳore, erar ufre Alla kushi taḳoin, ar manshe-o bala fain.
ROM 14:19 Erlagi ao, amra ola ḳam ḳori, ze ḳame shanti kaim oy, ze ḳame eḳe-oinnore goṛia tultam fari.
ROM 14:20 Ar kunu laḳan ḳanir lagi Allar ḳamre binash na ḳori, ḳanir zuka hoḳolta-u to halal. Oile tumi kunu eḳ bishesh ḳani kaoae zudi dusra manshor imano ḳoshṭo lage, te ita ḳaoa tumar lagi zaiz nae.
ROM 14:21 Bishesh kunu gust ba shorab ḳaoa, ze ḳame tumar baie mono duk fae, imane bada fae, ila kunu ḳam ḳora tumar lagi ṭik nae.
ROM 14:22 Tumar dilor ekinre, ḳali tumi ar tumar Allar maze raḳo. Nek-kofali to hou zon, ze zone bala mono ḳoria kunu ḳam ḳoria harle, tar mono kutkuti ae na.
ROM 14:23 Oile mono kutkuti loia zudi he kunta ḳae, te to he dushi. Ḳaron he zeta ḳaise, ita tar bibeḳor ofosond, ar bibeḳor ulṭa ḳam-u oilo guna.
ROM 15:1 Erlagi amra zerar iman mozbut ase, amra ḳali nizor kushir bae na saia, amrar ḳomzur motoshokki mona imandar baiainre-o zanu shoijjo ḳori.
ROM 15:2 Ota baiaintore goṛia tular niote, forteḳe-u tarar balair lagi tarar monor fosondre zanu kush raki.
ROM 15:3 Al-Mosie-o to tan nizore kushi korsoin na, borong Fobitro Zobur Shorifo ase, “O Mabud, tumare zera beijjot ḳorse, tarar ou hoḳol beijjoti amar ufre-u aise.”
ROM 15:4 Te agor Asmani Kitabo zotota leḳa oise, ita to amrare-u talim dibar lagi leḳa oise, zate ota dekia amrar sobor ar shantona ae, ar asha-borosha fai.
ROM 15:5 Oḳon sobor ar shantona deora Allae Isa al-Mosir fote solar lagi, tumra hoḳlor mon ek koroukka.
ROM 15:6 Teu tumra eḳ mone ar eḳ muke, amrar Malik Isa al-Mosir gaibi baf Allar tarif ḳortae farbae.
ROM 15:7 Erlagi-u O bai oḳol, al-Mosie zela tumrare afon ḳorsila, tumra-o ola eḳe-oinnore afon ḳorilao, zate Allar gourob oy.
ROM 15:8 Mono rakio, Allae Boni Israilor mul murobbi oḳlor loge zoto oada ḳorsla, otar hokikoti forman ḳorar lagi al-Mosi aia Boni Israilor kezmotgar oila.
ROM 15:9 Ar bin zatir gese-o aila, zate era-o Allar rohomot dekia tan tarif ḳore. I befare Zobur Shorifo age-u ḳoa oise, Erlagi-u ami bin zati oḳlor maze tumar tarif ḳormu tarar maze tumar gunogan gaimu.
ROM 15:10 Ar Tourat Shorifo ḳoa oise, O duniar hoḳol zatir manush, Allar afon proza Boni Israilor loge milia, tumra-o tan tarif ḳoro.
ROM 15:11 Hirbar Zobur Shorifo ḳoa oise, Hoḳol zatie Allar tarif ḳoro, desh ar gusṭie tan nam zofo.
ROM 15:12 Ar Hozrot Ishaya nobie leḳsoin, Zein Bashsha Daud bin Iasor ḳandanor mul kuṭi, hoḳol zatir ufre bashshai korar lagi ein aiba, tan ufre-u taḳbo hoḳol manshor asha-borosha.
ROM 15:13 Te dilor maze asha deora Allae imanor bole, tumrare hoḳol laḳan kushi-bashi ar shantir maze habuḍubu ḳaoaukka. Teu Allai Pak Ruhur kudrotie tumrar asha-borosha baia foṛbo.
ROM 15:14 O bai oḳol, tumrar befare ami furafur buzram, tumrar dilḳan nek niote bora ar sohi-shuddo imani aḳol ase, zate eḳe-oinnore foramish ditae faro.
ROM 15:15 Ta-o ḳoyeḳṭa befare ami tumrare mono ḳorai diram, Allae amare ou niamot disoin ḳori, ami shaosh ḳori tumrar gese lekiar,
ROM 15:16 Isa al-Mosir ḳadim hishabe Allae amare tumrar laḳan bin zati oḳlor gese faṭaisoin. Erlagi-u tan deoa kush-ḳobri tobligor mazdi ami imamotir ḳam ḳoriar, zate ou bin zati oḳol Allar Pak Ruhe fobitro oia tan dorbaro kobul oar zuka kurbani oin.
ROM 15:17 Alla Pakor lagi ami ze kezmot ḳoriar, ou ḳamor ḳarone Isa al-Mosir mazdi amar boṛai deḳanir eḳtiar ase.
ROM 15:18 Al-Mosie amar mazdi ze ḳam hasil ḳorra, er baire kunta matibar shaosh amar nai. Tain amar mukor ḳota, amar ḳam-ḳaz,
ROM 15:19 keramoti-muzeza ar Allai Pak Ruhur kudroti bole bin zati oḳolredi Allar gulami koraisoin. Erlagi-u ami al-Mosir kush-ḳobrire Zeruzalem taki Ilurika forzonto hoḳol zagar maze furafur toblig korsi.
ROM 15:20 Te ze zagat kunudin al-Mosir kush-ḳobri toblig kora oise na, hou zagat toblig kora-u amar zindegir mul ḳam mono ḳori. Ami sai na aroḳzonor gaṛa kuṭir ufre bor ḳoria gor banaitam.
ROM 15:21 Zela Allar kalamo ase, Tan ḳota zerar gese zanail oise na oḳon tara ita deḳba, tan befare age zera hunchoin na tara oḳon buzba.
ROM 15:22 Te ou ḳarone ami bout bar tumrar gese zaoar fote bada faisi.
ROM 15:23 Oinno zagat amar ḳam shesh na oae zaoa bond oigese, oile oḳon to ita zagat amar toblig kam shesh, kunu zaga-u bad roise na. Ashole bout bosor dori-u amar kial asil tumrar gese zaitam,
ROM 15:24 erlagi oḳon Spen desho zaoar ḳalo ami tumrar gese zaitam sairam. Ami asha ḳorram, hono zaoar shomoy tumrar loge deḳa oibo, ar kushi-bashi koria ḳoyḳan din tumrar loge ḳaṭaimu. Bade Speno zaoar lagi tumra-u amar bebosta ḳoria dibae.
ROM 15:25 Oile oḳon ami Allar pak bonda oḳlor maze rilif baṭibar lagi Zeruzalem ṭauno zairam.
ROM 15:26 Hino obab-onoṭonor maze Allar ze bonda oḳol asoin, tarar gese baṭia dibar lagi Makidonia ar Gris deshor zomat oḳole kisu shaijjo tulchoin.
ROM 15:27 Tara kub kushi oia ita tulchoin. Zano ni, i zomator bai-boin oḳol Zeruzalem ṭaunor Allar pak bonda oḳlor gese rini asoin. Ḳaron Allai batuni niamotor baṭ zebla Boni Israilor mazdi bin zatie faisoin, te bin zatir lagi-o zorur oilo, Boni Israilre duniabi befare shae-shaijjo ḳora.
ROM 15:28 Amar ou rilif baṭat gia hari ami zebla nichchit oimu, ita furafur tarar ato fosi gese, ou shomoy ami tumrar gese aia Spen desho zaimu.
ROM 15:29 Ami buziar, ami zebla tumrar gese aimu, ou shomoy al-Mosir shullo-ana rohom-niamot loia aimu.
ROM 15:30 O bai oḳol, Allar Pak Ruhur mohobbote ar amrar Malik Isa al-Mosir name ami tumrare ḳas minoti koriar, amar loge oia tumra-o amar lagi Allar dorbaro dua-munazator jihad salao.
ROM 15:31 Dua ḳorio, Ehudia zilat Isayi torikar birudi manshor at taki ami zanu rehai fai, ar amar ana i rilif ḳanain zanu Zeruzalem ṭauno Allar pak bonda oḳole shomzoin.
ROM 15:32 Teu ami kushi mone tumrar gese zaitam farmu, tumrar loge aram-ayesh ḳormu, inshalla.
ROM 15:33 Shanti deora Alla Pak tumrar loge loge roukka. Amin.
ROM 16:1 Te oḳon amrar boin Foibi Bibire faṭairam, tain oila Kinkria ṭaunor Isayi zomator ḳadim, tan befare ḳoiar,
ROM 16:2 Allar bonda oḳolre zela afon ḳora zorur, Malik Isar name enre-o ola afon mono ḳorio. Tain to amare ar aro bout manshore shaijjo ḳorsoin, erlagi zekunu befare shaijjo saile, tumra tanre shaijjo ḳorio.
ROM 16:3 Amar loge oia al-Mosir lagi zera ḳam ḳorsoin, ou Fiskila ar Akilre amar salam zanaio.
ROM 16:4 Amar zan basanir lagi, tara nizore moutor ato shofi disla. Ḳali ami nae, bin zatir mazor hoḳol zomat-u tarar gese rini.
ROM 16:5 Oḳon tarar baṛir zomato aia zera shorik oin, era hoḳolre-u amar salam zanaio. Turoshkor Asiya elaḳat hoḳol foyla zein al-Mosire kobul ḳorsla, hou Afinitus baire salam zanaio, ein amar mayar manush.
ROM 16:6 Ar hou Moriom Bibire-o salam zanaio, zein tumrar lagi bout menot ḳorsoin.
ROM 16:7 Amar nizor zatir manush Andronikus ar Juniare-o salam zanaio, era to amar loge oia zel ḳaṭisoin. Al-Mosir sahabi oḳlor gese era kub ijjoti zon, era amar age iman anchoin.
ROM 16:8 Amar mayar mumin bai Amfilusre salam zanaio.
ROM 16:9 Amrar logor tobligkari Urban baire, ar amar mayar dust Stakisre-o salam ḳoio.
ROM 16:10 Al-Mosir forikkat fash ḳora sifai Afilis baire-o salam dio. Bai Aristabulor baṛir hokkolre salam zanaio.
ROM 16:11 Amar zatir bai Herudunre salam dio. Morhum Nakisusor baṛir zera Malik Isar ummot oisoin, tarare-o salam zanaio.
ROM 16:12 Turfana ar Turfasa Bibire-o salam dio. Ou beṭinte Malik Isar lagi boṛo menot ḳorra. Mayar boin Farsiare-o salam ḳoio, Malikor lagi tain-o bout menot ḳorsoin.
ROM 16:13 Malik Isar fosondor manush Rouf baire salam dio, tan ammare-o salam ḳoio, i beṭi to amar-o ma.
ROM 16:14 Singkirat, Filigun, Harmis, Fatrub, Hermas ar tarar loge zoto imandar bonda asoin, era hoḳolre salam zanaio.
ROM 16:15 Bai Filagi, Julia Bibi, Nirias ar tan boinre, ar Olimpasre salam ḳoio, Allar zoto bonda tarar loge asoin era hoḳolre salam dio.
ROM 16:16 Huno, tumra eḳe-oinne fobitro golagoli korio. Al-Mosir hoḳol zomator bai-boninte tumrare salam zanaira.
ROM 16:17 O bai oḳol, tumrare minot ḳori koiram, age zeta talim faiso, ou talimor ulṭa talim dia zeguinte doladoli ar bada-bignor zonom dein, otar bae nozor rakio, tumra itar ges taki horia roio.
ROM 16:18 Ḳaron itae amrar malik al-Mosir gulami na ḳoria, tarar feṭor gulami kore. Miṭa miṭa mat matia ar tel malish ḳoria shorol-shuza manshore be-foti banae.
ROM 16:19 Ar tumra zen Allar hukum mafik solrae, ita to hoḳole-u zane, i kobor hunia ami-o kub kushi oisi. Te ami sairam, tumra nek fote kamil o, bod fot taki basia ro.
ROM 16:20 Shanti deora Allae Iblis-Shoytanre kub zoldi kori tumrar faor tole falai fishaiba. Amrar Malik Isa al-Mosir rohom-niamot tumrar ufre zari rouk.
ROM 16:21 Amar loge kush-ḳobri toblig koroin ze Timoti bai, ein tumrare salam zanaira. Amar zati bai Lukias, Zasun ar Sufatose-o tumrare salam ḳoira.
ROM 16:22 Hozrot Paulusor buli hunia ami Tortius mohorire leḳram, Malik Isar name ami-o tumrare salam zanairam.
ROM 16:23 Ami Paulus ar zomator hoḳolre zein memandari koroin, hou Gous baie tumrare salam zanaira. Ou ṭaunor shorḳari keshiar Irastas baie ar mumin bai Kuatuse tumrare salam zanaira.
ROM 16:25 Alhamdulilla, ami Pauluse Isa al-Mosir befare ze kush-ḳobri toblig kori, Alla Pakor ḳemota ase ou kush-ḳobrir usillae tumrare imane tir raḳa. Mono rakio, bout zomana dori Allae tan i batuni munshar ḳota lukai raḳsila,
ROM 16:26 oile oḳon ita duniar hoḳol zatir gese zair or. Siroḳalin zinda Allar hukume, agor zomanar nobi oḳole zeta lekia raḳsila, ota zair or, zate tara al-Mosir ufre iman ania Alla Pakor baiddo oin. Erlagi ou kush-ḳobri oḳon toblig kora or.
ROM 16:27 Tain-u eḳmatro Alla, tain-u aḳoldar, zuge zuge siroḳal Isa al-Mosir mazdi tan tarif ouk. Amin.
1CO 1:1 Ami Paulus, Alla Pakor morzie Allai daot faia Hozrot Isa al-Mosir eḳzon sahabi oisi. Ami ar amar mumin bai Susine,
1CO 1:2 Korint ṭaunor Allar zomator manshor gese, mani tumrar gese leḳram. Hozrot Isa al-Mosir torika kobul ḳorae Allae tumrare fak-fobitro ḳorsoin ar tan afon bonda oibar lagi daot disoin. Tumrar gese ar oinnainno zagar zoto manshe amrar Hozrot Isa al-Mosire malik koia manoin, tara hoḳlor gese amra ou siṭikan leḳram. Tain tarar-o malik, amrar-o malik.
1CO 1:3 Amrar gaibi baf Alla Pake ar Hozrot Isa al-Mosie tumrare rohomot ar shanti dan ḳoroukka.
1CO 1:4 Ami hamesha tumrar lagi amar Allar dorbaro shukria adae ḳori, ḳaron Isa al-Mosir torika kobul ḳorae tumra Allar rohomotor tole aiso.
1CO 1:5 Ou rohomot oilo, Hozrot Isa al-Mosir loge shorik oia tumra hoḳol nomunae mat-ḳota mata ar aḳol-ilime doni oiso.
1CO 1:6 Oḳon deḳa zar, al-Mosir befare amra zeta talim dislam, ita tumrar dilo gatia raḳso.
1CO 1:7 Ar Hozrot Isa al-Mosie dusrabar toshrif anar lagi tumra bar sairae, ermaze Allar deoa batuni kemotar zekunu niamot faite tumrar obab or na.
1CO 1:8 Ami zani, amrar Hozrot Isa al-Mosie tumrare aḳer forzonto imane mozbut raḳba, zate tain aibar ag forzonto tumra furafur nikut roibae.
1CO 1:9 Alla Pak to hok ar ḳaṭi, tain zela ḳoin ola oy. Tain tumrare daot disoin, tumra zanu tan ḳas mayar zon Isa Ibnullar loge ḳatir-shomporko raḳo, ein-u al-Mosi, amrar malik.
1CO 1:10 Te bai oḳol, Hozrot Isa al-Mosir oia ami tumrare zuṛ ate minot ḳoriar, tumra hoḳol eḳ o. Tumrar maze kunu doladoli na rouk, eḳ mon ar eḳ mot o.
1CO 1:11 Huno, Kulua Bibir baṛir manshor ges taki zanlam, tumrar maze ḳaijja-fosad soler.
1CO 1:12 Ami hunlam, tumrar maze ḳeu ḳoy, “Ami Paulusor dolor,” ḳeu ḳoy, “Ami Apollosor dolor,” ḳeu ḳoy, “Ami Fitoror dolor,” ar ḳeu ḳoy, “Ami al-Mosir dolor.”
1CO 1:13 Te ḳo sain, al-Mosire kita baṭa-baṭi kora oigese ni? Ami Paulusre tumrar lagi solibo loṭḳaia mara oise ni? Tumra kita amar name toubar gusol ḳorso ni?
1CO 1:14 Ami Allar dorbaro shukria zanai, ḳali Kirispo ar Gous saṛa, dusra kunu manshore ami toubar gusol ḳoraisi na.
1CO 1:15 Zate ḳeu ḳoito na fare, tumra amar name toubar gusol ḳorso.
1CO 1:16 Astifan bair foribaror manshore-o ami toubar gusol ḳoraisi, esaṛa ar kunu manshore gusol ḳoraisi koria amar mono or na.
1CO 1:17 Al-Mosie to amare toubar gusol ḳoranir lagi faṭaisoin na, ḳali kush-ḳobri tobligor lagi-u faṭaisoin. Ar ou kush-ḳobri-o kunu aḳoldari fonḍiti bab-bongie toblig korat faṭaisoin na, zate solibor ufre al-Mosir kurbani oa beḳama na bone.
1CO 1:18 Zara gozobi fotedi douṛar, al-Mosir solibor ufror kurbani tarar gese to ḳali be-aḳoli mono oy, oile amra zara nazator fote douṛairam, amrar gese ita oilo Allai bol.
1CO 1:19 Asmani Kitabo leḳa ase, “Ami aḳoldar oḳlor aḳolre beḳama ḳormu, ar buddiman oḳlor buddire bifol ḳormu.”
1CO 1:20 Te ou aḳoldar oḳol kuai? Alim oḳol-u ba kuai? Ar ou zomanat torko ḳorar ḳemota zar ase, he oḳon kuai? Duniabi aḳol to ḳali be-aḳoli, ita Allae-u deḳaira.
1CO 1:21 Allae tan nizor aḳol dia foysala ḳorsoin, zate duniae zanu tar aḳol dia tanre sinto na fare. Erlagi be-aḳolir ou kush-ḳobri tobligor mazdi Allae mumin oḳlor zan basaita saila.
1CO 1:22 Ihudi oḳole ḳali keramoti kam deḳta sain, Iunani oḳole aḳolor tallash ḳoroin,
1CO 1:23 oile amra toblig kori solibor ufre kurbani oa al-Mosir ḳota. Ita oilo Boni Israilor gese eḳṭa be-dini kam ar bin zati oḳole mono ḳoroin be-aḳoli kam.
1CO 1:24 Oile Boni Israil oukka ba Iunani oukka, Allar daoti bonda oḳlor gese ou al-Mosi-u oila Allai aḳol ar Allai bol.
1CO 1:25 Allai be-aḳoli manshor aḳol taki bout boṛo aḳoldar, ar Allai komzuri manshor shokti taki bout shobol.
1CO 1:26 Bai oḳol, sinta ḳori deḳo, tumrare zebla daot deoa oisil, hi shomoy tumra kilaḳan aslae. Tumrar mazor bout zon-u manshor sokut aḳoldar, ḳemotaban ba nami-dami bongshor aslae na.
1CO 1:27 Oile duniae zetare be-aḳoli koia mono ḳore Allae otare-u fosond ḳorsoin, zate duniar aḳoldar oḳole shorom fain. Ar duniae zetare ḳomzur mono ḳore, Allae otare fosond ḳorsoin, zate duniar boloban hoḳolta shorminda oin.
1CO 1:28 Duniar manshe zetare kub tuchcho mono ḳore, duniar bukut zetar kunu dam nai, Allae otare-u fosond ḳorsoin, zate duniar sokut zeta nami-dami, ita be-dami oizae.
1CO 1:29 Tain itare fosond ḳorsoin, zate duniar kunu manshe tan samne boṛai deḳanir shuzug na fain.
1CO 1:30 Ar tumra zera Isa al-Mosir afon zon boncho, ita to Alla taki-u oise. Al-Mosi-u oila amrar gese Allar deoa aḳol, fak-forezgari, fobitrota ar azadir kuṭi.
1CO 1:31 Erlagi Asmani Kitabo leḳa ase, “Ze manshe boṛai kore, he Mabudre loia-u boṛai korouk.”
1CO 2:1 Bai oḳol, Allar deoa kush-ḳobri tumrar gese toblig korat gia ami to shundor shundor bashae matisi na, ba boṛo kunu alim-ulamar laḳan boyan ḳorsi na.
1CO 2:2 Ami mone mone ṭik korslam, tumrar loge taḳar ḳalo ami kali ou Isa al-Mosir bishoye matimu, ze Isare solibor ufre loṭḳaia mara oise, ita saṛa ar kunta mattam nae.
1CO 2:3 Ami zebla tumrar loge roitam, ou shomoy nizore ḳomzur mono ḳortam ar ḍoraia ḳafitam.
1CO 2:4 Amar toblig ar amar boyanor maze manshor mon joy ḳorar moto kunu aḳol-hekmot ar zukti asil na, ḳali Allai Pak Ruhu ar kudroti bol deḳa gesil.
1CO 2:5 Ami sailam, tumrar iman manshor aḳol-ilimor ufre borosha na ḳoria, ḳali Allai bolor ufre borosha ḳore.
1CO 2:6 Ta-o zera imane kamil, tarar gese amra aḳolor mat mati. Oile ou aḳol to i zogotor nae ba zogotor neta oḳlor laḳan-o nae, tara to borbad oar foti.
1CO 2:7 Ashole amra ḳali Allai aḳol-hekmotor batuni gufon befare mati. Ou batuni befar to dunia foyda ḳorar age-u Allae tan nizor morzie ṭik koria raḳsoin, zate amra tan gourobor bagi oi.
1CO 2:8 Oile ou zogotor neta oḳole ita buzra na. Ita buzle tara, hou gourobor don amrar Malik Isare solibor ufre loṭḳaia marlo na one.
1CO 2:9 Oile amra zani, Allar kalame ḳoy, Zara Allare mohobbot ḳoroin, tarar lagi tain zeta raḳsoin, ita ḳeu souke deḳse na, ḳane-o hunche na, dilor maze kunudin sinta-o ḳorse na.
1CO 2:10 Ita oḳon tan Pak Ruhur mazdi amrar gese zair ḳorsoin. Pak Ruhur ozana kunta-u nai, tain Allar hoḳol batuni befar-o zanoin.
1CO 2:11 Manshor maze ola ḳeu ase ni, zera eḳzone aroḳzonor monor ḳobor zanoin? Ḳali nizor ruhe-u tar monor ḳobor zane. Ṭik ou laḳan, Allar Pak Ruhu saṛa dusra ḳeu tan gaibi befar zane na.
1CO 2:12 Ar amra to duniabi ruhu faisi na, borong Allar torof taki tan ruhu faisi, erlagi tan deoa niamot oḳol amra sini.
1CO 2:13 Ar ou niamotor befare-u amra ḳoi, ita ḳoar shomoy amra manshor aḳol bebohar ḳori na, ḳali Pak Ruhur mazdi talim faia ḳoi. Ruhani hokikotre zair ḳorar lagi, amra ruhani mat mati.
1CO 2:14 Ze manush ruhani monobabor nae, Allai Pak Ruhur mazdi zeta mile he itare kobul ḳore na, ḳaron tar gese ita beḳama. Ita befar he buze-o na, ḳaron ita ruhani zogotor befar, ḳali ruhdi zasai kora zae.
1CO 2:15 Ze zonor maze Pak Ruhu ase, he hokkolta zasai koria deḳe, tare ḳeu zasai korto fare na.
1CO 2:16 Zela Allar kalamo ase, Mabudor mon ḳegie buzto farse, tanre foramish dibar shaiddo ḳar? Oile al-Mosir mon amrar dilo taḳae, amra ita buzram.
1CO 3:1 Bai oḳol, ruhanik zonor loge zelaḳan mata usit, ami tumrar loge ila mattam farsi na. Borong duniabi manshor loge zela mata usit, tumrar loge ola-u matisi. Tumra to Isayi torikat ekkere huruttaintor laḳan, erlagi-u oula matilam.
1CO 3:2 Foyla ami tumrare shokto ḳani na dia ḳali dud ḳabaislam, hi shomoy shokto ḳani kaoar zuka aslae na, ar otodin bade-o tumra i befare hurutta roiso.
1CO 3:3 Ḳaron tumra oḳono duniabi roḳto-mangshe solrae. Tumrar maze oḳono ingsha, ḳaijja-fosad lagail-u ase. Te tumra roḳto-mangshor boshe roiso na ni?
1CO 3:4 Tumrar maze ḳeu zebla ḳoy, he Paulusor dolor, ḳeu ḳoy Apollosor dolor, te tumra duniabi manshor laḳan nae ni?
1CO 3:5 Apollos ḳe? Ar Paulus-u ba ḳe? Amra to shamainno kezmotḳari, amrar mazdi tumra imanor fote aiso. Allae-u amrare zarzir i dayitto disoin.
1CO 3:6 Ami bis lagaisi, Apollose fani disoin, ar Allae itare boṛo ḳorsoin.
1CO 3:7 Erlagi zein bis lagain ar zein fani dein, era ashole kunta-u nae, oile zein itare boṛo ḳori tuloin, tain-u hokkolta.
1CO 3:8 Bis lagaora ar fani deorar eḳoi uddesho. Era forteḳe zarzir menot mafik kamor fol faiba.
1CO 3:9 Oile amra duio zone-u Allar ḳam ḳoriar. Tumra Allar-u ḳet, tan banail bilḍing.
1CO 3:10 Allar ges taki ze ḳas rohomot ami faisi, ou rohomotor bole-u ami aḳoldar raz mestorir laḳan ian kuṭi gaṛsi. Ar ou kuṭir ufre oinno zone bilḍing banaira. Oile ḳe kila banaira, i befare tara hushiar ouk.
1CO 3:11 Ze ian kuṭi age-u gaṛa oigese, Malik Isa al-Mosi-u oila hou kuṭi, ikṭa bad dia ar kunu noya kuṭi keu gaṛto farto nae.
1CO 3:12 Oḳon i kuṭir ufre shuna, rufa, dami fattor, laḳṛi ar son dia ḳeu zudi gor banae,
1CO 3:13 te ḳe kila banaisoin, ita bala ḳori deḳa zaibo. Ruz Hashoror din ita zair oibo, hou din ogni-forikkar mazdi ita kula-mela oibo.
1CO 3:14 Zein zeta banaisoin, ita zudi ṭikia roy, te ein furuskar faiba.
1CO 3:15 Oile ita zoli gele furuskar taki bad foṛbo, ta-o tar nizor zan basibo. Tare deḳle buza zaibo, he aguinor mazdi faṛi dia aise.
1CO 3:16 Tumra zano na ni, tumra oilae Allar Kaba gor, tumrar maze tan Pak Ruhu boshot ḳoroin?
1CO 3:17 Ḳeu zudi Allar Kaba gor binash ḳore, te Allae-o tare binash ḳorba. Ḳaron tan taḳar gor oilo fobitro, ar tumra-u oilae hou gor.
1CO 3:18 Tumra ḳeu nizore faki dio na. Tumrar mazor ḳeu zudi duniar aḳol-ilime nizore aḳoldar mono ḳore, te he be-aḳol bonouk zate asol aḳoldar oito fare.
1CO 3:19 Ḳaron i zogotor aḳol-buddi, Allar nozoro ḳali be-aḳoli. Asmani Kitabo ase, “Allae aḳoldar oḳolre tarar salakit doroin.”
1CO 3:20 Aroḳ ayato ase, “Aḳoldar oḳlor hoḳol sinta-u beḳama, ita to Mabude zanoin.”
1CO 3:21 Erlagi amar ḳota oilo, hokkolta-u to tumrar, te tumra kunu manshore loia boṛai korio na.
1CO 3:22 Paulus, Apollos, Fitor, i dunia, zindegi, mout, bortoman, bobishot, hokkolta-u tumrar.
1CO 3:23 Tumra oilae al-Mosir, ar al-Mosi oila Allar.
1CO 4:1 Amrare dekia manshe buzouk, amra al-Mosir ḳadim, Allai batuni banḍaror ḳazanchi.
1CO 4:2 Ar zerar ufre banḍaror ḳazanchir bar deoa oy, tara to forman deḳani lagbo, tara hok-halal.
1CO 4:3 Te ami hok-halal ki na i bisar tumra ḳoro ba adalote-u ḳorouk, ete amar kunta zae ae na. Ami to amar nizor bisar-u ḳori na.
1CO 4:4 Amar mon shada oile-o forman ḳora zar na ami nirdush. Te Malik Isae-u amar bisar ḳorba.
1CO 4:5 Erlagi shoṭik shomoyor ag forzonto, mani Malik Isa hirbar na aoa forzonto tumra kunu bisar ḳorio na. Andairo zeta lukail ase, tain aia itare foro anba ar manshor dilor gufon niot oḳol zair ḳorba. Hou shomoy Allar ges taki hoḳole zarzir faona tarif faiba.
1CO 4:6 Bai oḳol, tumrar balair lagi ami amar nizor ar Apollosor udahoron dia tumrare ḳoilam, zate tumra amrar ges taki ou talim neo, Asmani Kitabo zeta leḳa ase, itar bare zaoa ṭik nae. Te tumra eḳzonre toia areḳzonre loia boṛai korio na.
1CO 4:7 Ḳeu zanu mono na ḳore tumi alada kunta bonigeso. Tumar nizor emon kun don ase, zeta tumi Allar ges taki lilla faiso na? Ar ita zudi lilla faia taḳo, te lilla faiso na ḳoia beṭagiri korrae ḳene?
1CO 4:8 Tumrare dekia to mono or, tumra age-u hokkolta faia doni oigeso, amrare bad dia-u tumra bashsha bonigeso! Tumra hasaror bashsha oile bala-u oito, amra-o tumrar loge bashsha oitam fartam.
1CO 4:9 Zuddo-bondi oḳolre marilibar niote, zuddor bijoe misilor ḳoror ḳataro zarare raḳa oy, amar mono oy Allae amrar laḳan sahabi oḳolre-o ola hoḳlor ḳore raḳsoin. Amra asta zogotor gese, hoḳol manshor gese, ar firista oḳlor gese-o tamshar nayok bonigesi.
1CO 4:10 Amra to al-Mosir lagi be-aḳol oisi, ar tumra bule al-Mosir name aḳoldar bonigeso. Amra ḳomzur, tumra boloban, tumra bule ijjoti bonigeso, amrar to kunu ijjot nai.
1CO 4:11 Amra oḳono feṭor buke, fanir fiase, ḳafoṛ-sufoṛor obabe ḳoshṭo ḳoriar, baṛi-gor nai kori boitolor laḳan roiar ar mair-doir ḳaiar.
1CO 4:12 Hamesha nizor ate menot ḳori kaiar. Manshor gail-mondo hunia-o, tarar balai saiar, zulum-nirjaton, humki-damkire sobor ḳoriar.
1CO 4:13 Bodnam-gibot shoijjo ḳori kori, norom shure tarare buzaiar. Oḳon forzonto amra asta zogotor ḳasrar laḳan, hoḳoltar gese-u zoinjal bonigesi.
1CO 4:14 Huno, tumrare shorom deoar niote ita leḳram na, ḳali amar mayar aolad hishabe hushiar ḳorar lagi leḳram.
1CO 4:15 Mono rakio, al-Mosir befare talim deoar lagi tumrar azar azar ustad taḳta faroin, oile tumrar baf to otozon nae. Kush-ḳobri tobligor mazdi Isayi zindegit eḳmatro ami-u oilam tumrar baf.
1CO 4:16 Oḳon ami tumrare minot ḳoria ḳoiar, ami zela soli, tumra-o ola solo.
1CO 4:17 Ou niote ami Timotire tumrar gese faṭailam, malikor name ein to amar mayar hok-halal fut. Malik Isa al-Mosire ami kila mania soliar, ar hoḳol zagar hoḳol zomato kila talim diar, ita tain mono ḳorai diba.
1CO 4:18 Tumrar mazor ḳeu ḳeu mono ḳorer, ami ar tumrar gese aitam nae, erlagi tara boṛai-beṭagiri deḳaira.
1CO 4:19 Inshalla ami kub zoldi-u aimu. Zetae boṛai-beṭagiri deḳaira, tarar mat hunat nae, ḳali tarar mul ḳemota deḳat aimu.
1CO 4:20 Allar bashshai to mat-ḳotar befar nae, ita oilo kudroti kemotar befar.
1CO 4:21 Tumrar ichcha kita? Ami tumrar gese kita loia aitam? Singla loia ni, na maya-momota ar norom mizaz?
1CO 5:1 Ami hunram, tumrar maze zelaḳan zogoinno zinar ḳam soler, ila ḳam bidormi oḳole-o ḳore na. Tumrar mazor eḳzone nizor haton maʼre-o bour laḳan raḳse.
1CO 5:2 Erbade-o tumra boṛai koro kila? Itar lagi tumra fana manga zorur nae ni? Ar zegie ita ḳorse, tare zomat taki bar ḳori deoa usit na ni?
1CO 5:3 Ami sho-shorile tumrar maze na taḳle-o ruhe to tumrar loge asi, erlagi zegie ita ḳorse, samne taḳa bisarir laḳan ami-o age-u tar bisar ḳoria raḳsi.
1CO 5:4 Amar bisar oilo, tumra Malik Isar name eḳ zagat dola o, ou shomoy ami-o ruhe tumrar loge roimu ar Malik Isar bol-shokti-o amrar loge taḳbo.
1CO 5:5 Ar ou naformanor shorilre binash ḳorar lagi Shoytanor ato dilaite oibo, zate Malik Isa aibar ḳalo tar ruhe nazat fae.
1CO 5:6 Baiainre, boṛai kora tumrar lagi ṭik nae. Zano na ni, moydar ḳair boṛo gamlare-o tuṛa ḳamire fulailae?
1CO 5:7 Te tumrar dil taki-o hou furan ḳamiror bab falai deo, zate ḳamir saṛa moydar ḳai bono, ar ashole-u to tumra ḳamir saṛa zon. Azadi Idor kurbanir meṛa-baichchar laḳan amrar lagi al-Mosire-o kurbani deoa oise. Zano to, hou ido hoḳol laḳan ḳamir raḳa haram.
1CO 5:8 Erlagi ao, amra-o hou furan ḳamir, mani ingsha ar ḳarafire bad dilai, er bodla ḳamir saṛa ruṭi, mani hok ar shada dile id adae ḳori.
1CO 5:9 Ami age tumrare leḳslam, tumra naforman ḳobis oḳlor loge shong dorio na.
1CO 5:10 Ami koiram na, i zogotor ḳobis manush, lubi, doḳolbaz ar deb-debir puja ḳorrar shongo ekkere saṛi ditae. Ila oile to tumra zogotor bare aro kunuḳano zaitegi oibo.
1CO 5:11 Oile ami kali oḳan ḳoitam sairam, ḳeu zudi nizore mumin ḳoia dabi kore, ar he zinakur, lubi, deb-debir pujari, gibot gaora, modkur, ba sur-ḍaḳait oy, te tar shong dorio na, tar loge ḳana-fina-o ḳaio na.
1CO 5:12 Huno, amar ola ṭeḳa foṛse ni, Isar torikar bairor manshor bisar ḳortam? Itar bisar Allae-u ḳorba. Oile torikar bitoror manshor bisar ḳora tumrar ḳam na ni? Tourat Kitabo ase, “Hou naformanre tumrar shomaz taki bar ḳori deo.”
1CO 6:1 Tumra ḳeuror zudi kunu imandar bair bifokke nalish taḳe, te Allar pak bonda oḳlor gese na gia, he kun shaoshe baira manshor gese bisar sae?
1CO 6:2 Tumra zano na ni, ou pak bonda oḳole-u asta zogotor bisar ḳorba? Ar asta zogotor bisar ḳorte farle ou mamuli befaror foysala ḳortae faro na ni?
1CO 6:3 Tumra zano na ni, amra firista oḳlor-o bisar ḳormu? Te duniar befar to kunta-u nae!
1CO 6:4 Tumrar zebla ou laḳan bisar-asaror zorur oy, ou shomoy zomator baira manshore ḳene bisaror salish banao?
1CO 6:5 Ami to tumrare shorom deoar lagi-u leḳram, tumrar maze ila aḳoldar salish eḳzon-o nai ni, zein tumrar nizor mazor gonḍogul miṭ-maṭ ḳorta faroin?
1CO 6:6 Ami deḳram, bisaror mozliso boia-o tumra baie baie ḳaijja ḳorrae. Ta-o abar o-imandaror samne!
1CO 6:7 Ashole tumra baie baie ou zela bisar salish salairae, itae to tumrar nizor-u ḳeti or. Tumra ita shoijjo ḳoro na ḳene ba nize nize ṭoga ḳao na ḳene?
1CO 6:8 Borong tumra nize-u to oinnae ḳorrae, manshore ṭogirae, ar ita nizor bair loge-u ḳorrae!
1CO 6:9 Ashole tumra zano na ni, Allar bashshait naforman ḳobis oḳlor kunu ṭai nai. Te tumrar bul sinta dur ouk, zeta manshor shobab ḳaraf, zetae zina ḳoroin, murtipuja ḳoroin, gaṭua nasain, shomḳami,
1CO 6:10 suri, lub-lalchi, modkur, gibot gaora ar doḳolbaz, ita manshe to Allar bashshait ṭai faita nae.
1CO 6:11 Tumrar mazor kunu kunu zon-o age ola aslae, oile Malik Isa al-Mosir usillae ar amrar Allar ruhe tumrare doia saf ḳorse, tumrare fobitro ḳora oise ar be-ḳosur ḳalas ḳoia goinno ḳora oise.
1CO 6:12 Kunu kunu manshe ḳoin, “Amar lagi kunta-u haram nae, hokkolta-u zaiz.” Oile hokkolta zen manshor lagi ufoḳari, ila sinta ṭik nae. Amar lagi hokkolta zaiz oile-o, ami kuntar gulam oitam nae.
1CO 6:13 Ḳeu ḳeu ḳoin, “Feṭor lagi kani ar ḳanir lagi feṭ deoa oise.” Kub shundor ḳota, oile Allae to i duiota-u binash ḳoriliba. Mono rakio, shoril to zina ḳorar lagi nae borong Malik Isar lagi-u, ar Malik Isa shorilor lagi.
1CO 6:14 Allae tan kudroti bole Malik Isare murda taki zinda ḳorsoin, ar ou bole amrare-o zinda ḳorba.
1CO 6:15 Tumra zano na ni, tumrar shoril oilo al-Mosir shorilor ongo? Te al-Mosir shorilre ami bodmaish beṭir shorilor loge milaitam ni? Nauzubilla, kunumonte-u na!
1CO 6:16 Tumra buzo na ni, ze beṭae bodmaish beṭir loge mila-misha ḳore, tar shoril to ou beṭir loge ekḳano milizae. Zela Fobitro Tourat Shorifo leḳa ase, “Tara duiozon eḳ shoril oiba.”
1CO 6:17 Oile ze zon Malik Isar loge milizae, he tan loge ruhe-o eḳ oizae.
1CO 6:18 Baiainre, tumra hoḳol zator zina taki zan basao. Manshe bad-baki zoto guna ḳore, ita shorilor bare ḳore, oile zegie zina ḳore, he tar nizor shorilor birudde guna ḳore.
1CO 6:19 Tumra buzo na ni, tumrar shoril oilo Allai Pak Ruhur Kaba gor, ou ruhre tumra Allar ges taki faiso, ein tumrar dilo boshot ḳoroin. Tumar shoril to tumar nizor shompod nae.
1CO 6:20 Bout dam dia tumare ḳorid ḳora oise. Erlagi tumar shorilre Allar gourobor ḳamo lagao.
1CO 7:1 Baiainre, tumra zeta fotua zanar lagi amar gese leḳso, oḳon ou befare ḳoiram. Tumrar ḳota ṭik ase, manshor lagi bala ḳam oilo bia-shadi na ḳora.
1CO 7:2 Oile shomazor halot dekia ami koiram, zina taki basibar lagi forteḳ beṭaintor bou taḳle bala, ar forteḳ beṭintor-o zamai taḳle bala.
1CO 7:3 Hoḳol zamaie tar bour faona hok adae ḳorouk, ar boue-o ola zamair faona adae ḳorouk.
1CO 7:4 Bour shoril to tair nizor nae, tair zamair. Olaḳan zamair shoril-o tar nizor nae, tar bour.
1CO 7:5 Zamai-boue eḳe-oinnore nirash ḳorio na, ḳali kas kunu dua-munazator lagi duiozone foramish ḳoria kisu shomoy alada roitae faro. Bade hirbar milizio, zate shorilor ḳaishor lagi Shoytane tumrare gunar fote ṭanar shuzug na fae.
1CO 7:6 Te i befare ami tumrare kunu hukum diram na, ḳali izazot diram.
1CO 7:7 Ta-o amar monor asha oilo, hoḳol manush amar laḳan abiati rouk! Oile Allar ges taki to eḳo manshe eḳo nomunar rohom-niamot faisoin.
1CO 7:8 Te ṛaṛi beṭintore ar bou mora beṭaintore ami foramish diram, tara zudi amar laḳan roita faroin, te bala.
1CO 7:9 Oile nizore shamlaite na farle tara bia-shadi korouk. Karon shorilor ḳaishe zolia-fuṛia mora taki bia-shadi kora-u bala.
1CO 7:10 Ar zamai-boure ami ou hukum diram, boue zanu tair zamai saṛia na zae. I hukum ḳali ami diram na, shoyong malike-u dira.
1CO 7:11 Ar zudi tai horia zaegi, te dusra bia na bouk, borong zamair gese firia auk. Ola kunu zamaie-o tar boure talaḳ na deuk.
1CO 7:12 Oḳon zeta ḳoiram, ita to shorashori malikor hukum nae, tan fokke ami koiram, kunu mumin bair bou zudi Isayi torikar na oin ar tain zamair loge shongshar ḳorta sain, te zamaie tanre talaḳ na deuk.
1CO 7:13 Ou laḳan kunu beṭi manshor zamai-o zudi Isayi torikar na oin, ar zamai tan loge roita sain, te boue i zamaire talaḳ na deuk.
1CO 7:14 Ḳaron ou bour usillae Allae tair zamaire fak-fobitro ḳorsoin ar ou zamair usillae tar boure-o fak-fobitro ḳorsoin. Ila na oile tumrar huruttain to nafak oilo one. Ashole to Allae oḳon tarare-o fak-fobitro mono ḳoroin.
1CO 7:15 Oile Isayi torikar baira hou bou ba zamai zudi emne-u alog oizita sain, te oita farba. Ila halote hou mumin bai ba boin biar kunu bandonor maze taḳoin na. Buzrae ni, amra shantie roar lagi Allae-u amrare daot disoin.
1CO 7:16 O bou oḳol, tumi kila buzlae, tumar zamair zan tumi basaitae fartae nae? O zamai oḳol, tumi-u ba kila buzlae, tumar bour zan tumi basaitae fartae nae?
1CO 7:17 Zai ouk, Malik Isae zare zela raḳsoin, Allae zare zela daot disoin, he ola solouk. Hoḳol Isayi zomatre ami ou eḳoi hukum diar.
1CO 7:18 Zela, mosolmani kam ḳorail kunu manshe Isayi torika kobul ḳorle he tar ou mosolmanire oshikar na ḳorouk, ar mosolmani na ḳorail kunu manshe Isayi torika kobul ḳorle, he mosolmani na ḳorouk.
1CO 7:19 Mosolmani kam ḳorani ba na ḳorani iṭa kunu boṛo befar nae, Allar hukum-ahkam mana-u oilo asol ḳota.
1CO 7:20 Allae zare ze halote daot disoin, he ou halote-u taḳouk.
1CO 7:21 Isayi torikat aibar ḳalo tumi gulam aslae ni? Te itar lagi bezar oio na, ar shadin oite farle shadin o.
1CO 7:22 Gulami kora halote Malik Isae zare daot ḳori anchoin, he to tan dorbaro shadin oigese. Ar shadin halot taki zare daot ḳori anchoin, he to al-Mosir gulam bonigese.
1CO 7:23 Baiainre, tumrare bout damdi korid ḳora oise, erlagi manshor gulam bonio na.
1CO 7:24 Allae zare ze halote daot disoin, Allar dorbaro he ola-u rouk.
1CO 7:25 Oḳon ami abiati fuṛintor muslar befare ḳoiram. I befare malikor ges taki ami shorashori kunu hukum faisi na, oile Allar rohomote hok-halal roia ami amar motamot zanairam.
1CO 7:26 Ou aḳeri zomanat zela mosibot aia azise, amar mone or tumra zein zela aso, ola-u ro.
1CO 7:27 Tumar zudi bou taḳe, te taire talaḳ dio na, ar bou na taḳle bia-shadi korat-o lagio na.
1CO 7:28 Oile bia ḳorle kunu guna oito nae, ar kunu abiati fuṛi bia boile tair-o guna oito nae. Ḳali zogoto tarar ḳoshṭo baṛibo, ou ḳoshṭo taki ami tumrare basaitam sairam.
1CO 7:29 Bai oḳol, ami koitam sairam, Malik Isae kub zoldi toshrif anra, beshi deri nae. Erlagi oḳon taki oula mono ḳorio, zerar bou-baichcha ase, mono ḳorio bou-baichcha nai.
1CO 7:30 Zera duḳ-mosiboto asoin, tara mone ḳoroukka kunu duḳ-mosibot nai, zera kushi-bashi korra, tara mone ḳoroukka kunu kushi-bashi nai, ar zara ḳorid-biki korer, tara-o mone ḳoroukka, ita malor ufre tarar kunu dabi-daoa nai.
1CO 7:31 Zera zogot-shongshar loia besto, tarar bab zanu furafur shongshari na oy, ḳaron bobor bazar to shango oizar.
1CO 7:32 Ami sairam, tumrare hoḳol nomunar sinta-babna taki horai raḳtam. Ḳaron abiati beṭainte sinta ḳoroin malikor befare, kila Malik Moulare kushi raḳa zae.
1CO 7:33 Oile biati manshe sinta ḳoroin shongsharor befare, kila goror bou-baichchare kushi raḳa zae,
1CO 7:34 erlagi tarar mon du-ṭanat foṛizae. Oula abiati beṭi ar fuṛinte sinta ḳoroin malikor befare, kila Malik Moulare kushi raḳa zae, zate tarar shoril ar mon fak-fobitro taḳe. Oile biati beṭinte sinta ḳoroin shongsharor befare, kila zamaire kushi raḳa zae.
1CO 7:35 Buzrae ni, ou talim oḳol to tumrar balair lagi koiram. Ami tumrar golat kunu fash lagaitam sairam na, ḳali koitam sairam, tumra nek fote solo ar dile-zane Malik Moular ashik o.
1CO 7:36 Kunu manshe zudi mono ḳore, he tar abiati fuṛir day-dayitto adae ḳorer na, fuṛir biar boyosh far oizar ḳori, he fuṛire bia deoa zorur mono ḳore, te tar kushi mafik fuṛire bia deuk. Ete kunu guna oito nae.
1CO 7:37 Oile ze manshor mon tir ase, zar mono kunu oshanti nai, he tar nizor monre shamlaia ḳam ḳore, i manshe zudi mone ḳore tar fuṛir bia-shadi zorur nae, te he ṭik kam-u ḳorer.
1CO 7:38 Oḳon buza zar, ze zone tar fuṛire bia-shadi dey, he nek kam ḳore ar ze zone tar fuṛire abiati halote raḳe, he aro beshi nek kam ḳore.
1CO 7:39 Zamai zotodin zinda taḳoin, otodin bou zamair bandono taḳoin. Oile zamai mara gele boue ḳalas fain, ar nizor fosond mafik Isayi torikar zekunu zonor gese bia boita faroin.
1CO 7:40 Ta-o ami mono ḳori, tain ṛaṛi halote roile-u aro bala. Ami buzram, ami ou hokkolta Allai ruhur bole ḳoiram.
1CO 8:1 Huno, oḳon ami devtar name bilai deoa foshador muslar ḳota ḳoiram. Amra to zani, amra hoḳlor-u aḳol-buddi ase. Oile aḳole boṛai baṛe, ar mohobbote manush goṛe.
1CO 8:2 Ḳeu zudi nizore shian mono ḳore, te zotoḳan shian oa zorur, otoḳan to oise na.
1CO 8:3 Oile ze zone Allare mohobbot ḳore, Alla Pake to tare sinoin.
1CO 8:4 Te devtar name bilai deoa foshador befare ḳoiram, amra zani, devta bolte i zogoto kunta-u nai, eḳ Alla saṛa dusra kunta-u nai.
1CO 8:5 Asmano ba zomino zekunu zagat, deb-debi name zudi kunta takia taḳe, te bout devta ar bout munib asoin.
1CO 8:6 Oile amrar zana mote ḳali eḳ Alla asoin, tain-u amrar gaibi baf. Tan ate hokkolta foyda oise, tan lagi-u amra basia asi. Ṭik oula amrar malik-o ḳali eḳzon, tan nam Isa al-Mosi. Tan usillae hokkolta foyda oise, amra ḳali tan lagi-u ṭikia asi.
1CO 8:7 Ita buzar aḳol to hoḳol manshor nai. Kunu kunu zone age devtare bozona ḳorto, erlagi tara oḳon devtar name bilai deoa foshad ḳaile, tarar bibeḳor ḳomzurie tare ḳolonki banae.
1CO 8:8 Ashole kunu nomunar ḳanir bole-u amra Allar dorbaro kobul oi na. Ḳani na ḳaile-o amrar imanor ḳeti oy na, ar ḳaile-o kunu lab oy na.
1CO 8:9 Oile hushiar roio, tumrar ou shadinota kunumonte-u zanu ḳomzur imandaror lagi gunar ḳaron na oy.
1CO 8:10 Tumar to aḳol-bibeḳ ase, oile zar bibek komzur, he zudi tumare devtar mondiro boia foshad ḳaoat deḳe, te he-o ou foshad ḳaito nae ni?
1CO 8:11 Ar ou ḳomzur baire basanir lagi-u to al-Mosie zan kurbani disla, oḳon tumar ou aḳole tar imanor shorbonash or.
1CO 8:12 Olaḳan tumra zebla tumrar mumin baiaintor loge gunar ḳam ḳoro, tarar ḳomzur bibeḳre duk deo, ou shomoy tumra al-Mosir birudde-u guna ḳoro.
1CO 8:13 Erlagi ami koiram, ḳana-finar ḳarone zudi amar bair imanor ḳeti oy, te tare guna taki basanir lagi ami gust ḳaoao ekkere bad dilaimu.
1CO 9:1 Baiainre, ami kita shadin nae ni? Ami kunu sahabi nae ni? Ami kunu amrar Malik Isare deḳsi na ni? Malikor lagi ami ze toblig kam ḳorsi, itar fol tumra nae ni?
1CO 9:2 Oinno ḳeu amare sahabi koia na manle-o tumra to manbae, amar sahabi kamor sil-sappoṛ tumra-u, ḳaron amar mazdi tumra tan ummot oiso.
1CO 9:3 Te amar sahabi fod loia zera shondoy ḳoroin, tara amar ou zuaf hunoukka.
1CO 9:4 Ami ar sahabi Barnabase kita ḳana-finar beton faibar odikar nai ni?
1CO 9:5 Mumin kunu boinre shadi korar odikar amrar nai ni? Oinno sahabi oḳole, Malik Isar baiainte ar sahabi Fitore zela zarzir bibire loia soforo zain, amra-o ola fari na ni?
1CO 9:6 Ḳali ami ar Barnabase-u nizor ate ḳamai koria ḳaitam ni?
1CO 9:7 Nizor gaṭṭir ṭeḳa bangia ḳeu sifair saḳri kore ni? Ze giroste folor bagan ḳore, he itar fol ḳae na ni? Ze raḳale foshufal raḳe, he itar dud ḳae na ni?
1CO 9:8 Ami to ḳali manush aḳole matiar na, Musa nobir shoriote-o ola ḳoise.
1CO 9:9 Shorioto ase, “Dan maṛa deoar shomoy gorur muko hufi lagaio na.” Te Allae ḳali gorur ḳota-u sinta ḳoroin ni?
1CO 9:10 Tain ashole amrar ḳota-u ḳoisoin, ikan hasa nae ni? Nichchoy, ita amrar lagi-u leḳa oisil, ḳaron zein ḳet ḳoroin ar zein dan maṛa dein, fosholor baṭ faoar ashae-u tarar ita ḳora usit.
1CO 9:11 Te amra zela tumrar maze ruhanik bisi ruisi, oula zudi tumrar ges taki duniabi kani-fani zugai, te beshi kunta niram ni?
1CO 9:12 Ar ou befare zudi tumrar ufre oinno manshor dabi kaṭe, te amra aro beshi dabi kaṭaitam fari na ni? Oile amra ila dabi na ḳaṭaia shoijjo ḳoriar, zate al-Mosir befare kush-ḳobri toblig kamo amra ḳeuror fotor ḳaṭa na oi.
1CO 9:13 Tumra zano na ni, fobitro Baytul-Mukaddoso zera ḳam ḳoroin, tara oḳan taki-u ḳana-fina fain, ar kurbani kanat zera ḳam ḳoroin, tara ou kurbanir mal taki baṭ fain.
1CO 9:14 Ṭik olaḳan Malik Isar hukum ase, zara kush-ḳobri toblig koroin, tara zanu ou ḳamor usillae ḳaoa-finda fain.
1CO 9:15 Oile ami to er kunta-u nisi na. Ar oḳon tumrare-o ita lekiar na, amar lagi otar bebosta ḳortae ḳori. Oḳon amar ou boṛaire zudi keu beḳama banailae, te amar mori zaoa-u bala.
1CO 9:16 Ami ze kush-ḳobri toblig koriar, ete amar boṛai deḳanir kunta nae, ita amar lagi forz. Toblig na ḳorle amar ufre lannot foṛouk!
1CO 9:17 Oile ami zudi kushi mone toblig kori, te to amar furuskar ase, ar zudi nizor kushie na-o ḳori, te malikor deoa zimmadar hishabe to ḳoriar.
1CO 9:18 Oḳon amar i kamor furuskar kita? I furuskar oilo, kush-ḳobri toblig koria hari faona beton nei na, bina foyshae toblig kora-u amar beton.
1CO 9:19 Ami zudio kunu beṭar gulam nae, tebou bout manshor zan basanir lagi nizore hoḳlor gulam banaia raḳsi.
1CO 9:20 Ihudi oḳlor mon joy ḳorar lagi Ihudi shomazo ami Ihudir laḳan oisi. Ami to Musa nobir shoriotor odine nae, oile zara tan shoriot mane, tarare joy ḳorar lagi ami tarar laḳan oisi.
1CO 9:21 Ar zara shoriotor baira, tarare joy ḳorar lagi ami shoriotor baira manshor laḳan oisi. Ashole ami Allar deoa shoriotor bare nae, al-Mosir shoriotor odine asi.
1CO 9:22 Zera ḳomzur, tarar gese ami komzuror laḳan oisi, tarare-o joy ḳorar lagi. Befar oilo, zekunu monte kisu manshor zan basanir lagi ami hoḳol shomazor mon zugai soliar.
1CO 9:23 Ḳali kush-ḳobrir lagi-u ami ita ḳoriar, zate er rohomotor bagi oi.
1CO 9:24 Tumra zano na ni, douṛor ḳelat uṭia hoḳole-u douṛae, oile furuskar ḳali eḳzone-u fae. Oḳon tumra-o oula douṛao zate furuskar fao.
1CO 9:25 Douṛor ḳelat douṛaia hari manshe ola eḳ mala fae, ze mala bade nosṭo oizae, ar ou mala faoar lagi era bout ḳoṭin niom-ḳanun-o mane. Oile amra to asol okkoy mala faoar lagi ita ḳorram.
1CO 9:26 Erlagi uddesho saṛa ami douṛairam na. Zeta beṭainte batashor loge kilakili koroin, ami to itar laḳan nae.
1CO 9:27 Borong ami nizor shorilre ḳoshṭo dia gulamor laḳan raḳsi, zate oinnor gese kush-ḳobri toblig koria hari, furuskar taki nize bad na foṛi.
1CO 10:1 Bai oḳol, ami sairam, morubumir maze amrar moy-murobbi oḳlor goṭona tumrar mono rouk. Era hoḳol to gaibi megor kuṭir tole roita, hoḳole faoe aṭia Nil doria faroia gesla.
1CO 10:2 Hoḳole-u hou megor kuṭi ar Nil doriar maze Hozrot Musar torikae pak gusol ḳorsla.
1CO 10:3 Tara Allar deoa eḳoi laḳan gaibi kani kaisoin,
1CO 10:4 eḳoi laḳan gaibi fani-o ḳaisoin, hoḳole ola ek kudroti fattor taki fani kaita, ze fattor tarar loge loge roito, ou fattor-u oila al-Mosi.
1CO 10:5 Ta-o era beshir bag manshor ufre Alla Pak kushi asla na. Erlagi-u tarar lash morubumir maze foṛi roilo.
1CO 10:6 Ita goṭona oilo amrar talimor lagi eḳ itihash, zate ota dekia amra hushiar oi ar tarar laḳan ku-fotor ashik na oi.
1CO 10:7 Tarar maze ḳeu ḳeu zela murtipuja ḳorsil, tumra ila ḳorio na. Tourat Shorifo ase, “Hoḳol manush ḳanit boila, bade tara ḳaoa-daoa ḳoria hari, hoi-hulla ḳori nas-gan, furti-amud ḳorat lagla.”
1CO 10:8 Aroḳbar tarar mazor bout zone zina ḳorae, eḳoi dine teish azar manush mara gesla. Te amra zanu olaḳan zina taki basia roi.
1CO 10:9 Tarar mazor boute Malik Moulare forikka ḳorat lagia hafor ḳamoṛ ḳaia morsoin. Amra zanu tanre ila forikka na ḳori.
1CO 10:10 Tarar mazor boute na-kush oia boḳa-zoḳa ḳorae, Allar gozobor firistae tarare binash ḳorsoin. Erlagi tumra ila ḳorio na.
1CO 10:11 Tarar ufre ita goṭisil nishana hishabe, zate ota dekia amra hushiar oi. Amra zera ou aḳeri zomanar manush, ou leḳa foṛia amra zanu shabdane roi.
1CO 10:12 Erlagi kunu manshe zudi mono ḳore, he mozbut ase, te he hushiar rouk zate tar iman na ale.
1CO 10:13 Manshor zindegit zelaḳan forikka ae, otar baira noya kunu forikka to tumrar ufre or na. Alla Pak to hok-halal, tain tumrare shoijjor otirikto kunu forikkat falaita nae, borong forikka taki basibar fot-o batai diba, zate tumra ita shoijjo ḳortae faro.
1CO 10:14 O mayar dust oḳol, erlagi ami tumrare ḳoiram, deb-debir puja taki zan basao.
1CO 10:15 Tumrare aḳoldar zania-u ami koiram, ami zeta ḳoiram tumra ita zasai-basai koria deḳo.
1CO 10:16 Al-Mosir mezbanir shomoy, shukria adae ḳoria fiala taki amra ze shorbot ḳai, itar mazdi amra al-Mosir lour loge shorik oi na ni? Ar ze ruṭi siṛia ḳai, i kanir mazdi tan shorilor loge shorik oi na ni?
1CO 10:17 Amra hoḳole zebla eḳ ruṭi baṭia ḳai, te buza zae, amra bout zon oile-o amra ḳali eḳ shoril.
1CO 10:18 Huno, Boni Israilor halot sinta ḳoro, tarar zeta manshe kurbanir gust ḳain, tara hou kurbani kanar hoḳol ḳamo-o shorik oizain na ni?
1CO 10:19 Ar ami kunu ḳoiram ni, devtar namor foshadre hishabo dora zae, ba ou devtare hishabo dora zae?
1CO 10:20 Na, muṭe-u na. Ta-o bidormi oḳole zoto nomunar boli dein, ita deo-danob, but-ferotor name-u dein, Allar name nae. Te ami sai na, ou but-ferotor loge tumrar kunu ḳatir-dusti rouk.
1CO 10:21 Huno, Malik Isar mezbani ar but-ferotor mezbani, i duio ḳamo shorik oa tumrar lagi ṭik nae. Malikor fiala ar butor fiala, duiota taki eḳloge ḳaoa ṭik nae.
1CO 10:22 Te amra kita ḳoriar, amra Malik Isar dilo aguin lagaitam ni? Tan loge laṛai koria zittam farmu ni?
1CO 10:23 Mono or ni, ami to age ḳoisi, kunu kunu zone ḳoin, “Amar lagi kunta-u haram nae, hokkolta-u zaiz.” Oile hokkolta zen manshor lagi ufoḳari, ila sinta to ṭik nae. Zudio era ḳoin, hokkolta-u halal, oile hoḳoltae to manshor iman baṛae na.
1CO 10:24 Te kunu zone-u nizor sharto loia fagol oio na, borong oinnor balai korar sesṭa ḳoro.
1CO 10:25 Bazar-aṭo zekunu gust biki oile ita ḳaio, nizor bibeḳre shanti raḳar lagi kunu shondoy ḳorio na.
1CO 10:26 Fobitro Zobur Shorife to ḳoy, “I zogot ar zogotor hokkolta-u Mabudor.”
1CO 10:27 Erlagi amrar torikar bairor kunu manshe zudi tumrare daot dein, ar tumra zaitae sao, te bibeḳre ṭanḍa raḳar lagi kunu shondoy na ḳoria zeta samne dein ota-u ḳaio.
1CO 10:28 Oile ḳeu zudi tumrare zanai dey, i kani kunu devtar namor foshad, te ze zone ikan ḳoise, tar balair lagi ar bibeḳor aramor lagi ita ḳaio na.
1CO 10:29 Ami to tumrar bibeḳor ḳota ḳoiram na, hou dusra manshor bibeḳor ḳota ḳoiram. Ḳaron oinno manshor bibeḳ-bisare, amar ichcha-onichchar shadinotat ḳene nak golaito?
1CO 10:30 Ami zudi Allar shukria adae ḳoria ḳana-fina ḳai, te ze ḳanir lagi shukria adae ḳorlam, ou ḳanir lagi ar bodnam oito ḳene?
1CO 10:31 Erlagi tumra ḳana-fina ḳoro ba zeta-u ḳoro na ḳene, hoḳolta-u Allar gourobor niote ḳorio.
1CO 10:32 Boni Israil ba bin zati, ba Allar zomator kunu manshor fotor ḳaṭa bonio na.
1CO 10:33 Ami zela hoḳol nomunar manshore hoḳol befare kush raḳar sesṭa ḳori, tumra-o oula ḳorio. Ami to nizor shartor sinta ḳori na, shob manshor balair sesṭa ḳori, zate tara nazat hasil ḳoroin.
1CO 11:1 Te ami zela al-Mosir laḳan soliar, tumra-o oula amar laḳan solo.
1CO 11:2 O bai oḳol, tumra amar deoa talim mono rakia solrae, ar hoḳol befare-u amare iad raḳrae, erlagi ami tumrar tarif ḳoriar.
1CO 11:3 Te ami sairam, tumra oḳan buzo, al-Mosi-u oila hoḳol beṭaintor mata, beṭain oila beṭintor mata, ar Alla Pak oila al-Mosir mata.
1CO 11:4 Ebadot-bondegir shomoy ze beṭae mata guria dua-munazat ḳore, ba firaki mate, he to tar matare oshomman ḳore.
1CO 11:5 Olaḳan ze beṭie mata na guria dua-munazat ḳore, ba firaki mate, ou beṭie-o tair matar oshomman ḳore, tai mata ḳamail beṭintor laḳan bonizae.
1CO 11:6 Kunu beṭie zudi mata na gure, te tair sul ḳamailauk. Oile beṭintor sul ḳamani shoromor bishoy mono oile, tair mata guria raḳouk.
1CO 11:7 Ebadot-bondegir shomoy mata guria raḳa beṭaintor lagi ṭik nae, Allae to beṭaintore tan nizor surote foyda ḳorsoin ar beṭaintor mazdi-u Allar mohima zair oy, oile beṭintor mazdi beṭaintor mohima zair oy.
1CO 11:8 Foyla beṭa manush Baba Adom to beṭi taki foyda oisoin na, oile foyla beṭi manush Mai Haoa nichchoy beṭa taki-u foyda oisoin.
1CO 11:9 Ar beṭintor lagi beṭain foyda oisoin na, borong beṭaintor lagi-u beṭin foyda oisoin.
1CO 11:10 Ou talim mafik firista oḳlor ḳota kial rakia, tabedari manar nishana hishabe hoḳol beṭinte mata guria raḳa zorur.
1CO 11:11 Ta-o Malik Isar torikar beṭi manshe goror beṭar ufre borosha ḳoroin, ar beṭae-o ola beṭir ufre borosha ḳoroin.
1CO 11:12 Ḳaron, foyla beṭa Adom taki zudio foyla beṭi Mai Haoa foyda, ta-o beṭin taki-u hirbar beṭaintor zonom oy. Ashole hokkolta-u to Allar foyda.
1CO 11:13 Tumra nize-u bisar ḳori deḳo, matat ḳafoṛ na dia kunu beṭie dua-munazat ḳora ṭik ni?
1CO 11:14 Ar shomazor hal-sal taki-u to buza zae, beṭaintor matat lamba sul raḳa shoromor befar,
1CO 11:15 oile beṭinte lamba sul raḳle tarar shunam baṛe na ni? Nizore guria raḳar lagi-u to tara i lamba sul faisoin.
1CO 11:16 Te ita loia ḳeu torko-bitorko ḳorle, amar forishkar zuaf oilo, ita saṛa dusra kunu niom amrar maze nai ar Allar zomator maze-o nai.
1CO 11:17 Oḳon ami ze befare foramish ditam sairam, i befare to tumra muṭe-u tarif faoar zuka nae. Tumra zomato zela shorik o, itae tumrar kunu fayda oy na, borong keti oy.
1CO 11:18 Ami huniar, tumra zebla zomato shorik o, ou shomoy tumrar maze doladoli taḳe, ar ita kisu ami bishash-o ḳori.
1CO 11:19 Ashole to tumrar maze motor omil taḳbo-u, zate tumrar mazor ḳaṭi nikut manshor forisoy mile.
1CO 11:20 Huno, tumra zebla ekḳano milia ebadot-bondegi koro, ou shomoy to al-Mosir mezbanir niote ḳani bilani oy na.
1CO 11:21 Ḳaron tumra eḳzone aroḳzonor bae kial na ḳoria-u ḳani kailao. Tumrar eḳzonor feṭo buk taḳe, ar aroḳzon ḳaia ṭal oizae.
1CO 11:22 Ḳana-fina ḳaibar lagi tumrar kunu gor-baṛi nai ni? Tumra ichcha ḳoria Allar zomatre elami korrae ni? Ar zerar ḳanir kunta nai, tarare shorom dirae ni? Oḳon ami ar kita ḳoitam? Tumrar tarif ḳortam ni? Nauzubilla!
1CO 11:23 Ashole ami Malik Isar ges taki ze talim faisi, ou talim-u ami tumrare disi. Malik Isare ze rait dushmonor ato dorai deoa oisil, hou rait tain ḳanir ruṭi ato loila,
1CO 11:24 ar Allar shukria adae ḳorla, bade ou ruṭi ṭukraia ḳoila, “Ita to amar shoril, ou shoril tumrar lagi bilai deoa or, te amare mono raḳar lagi oula ḳorio.”
1CO 11:25 Ola ḳaoar bade tain shorbotor fiala loia ḳoila, “Amar lour zoriae Allar loge milonor ze noya usilla ḳaim oibo, ou fiala oilo er nishana. Tumra ou fiala taki kaoar shomoy amare iad ḳorar lagi hamesha ola ḳorio.”
1CO 11:26 Te tumra zotobar ou ruṭi kaibae ar ou fialar shorbot ḳaibae, Malik Isa hirbar na aoa forzonto otobar-u tan moutor ḳota elan ḳorrae.
1CO 11:27 Erlagi kam-ḳeali koria ḳeu zudi i ruṭi kae ar fialar shorbot ḳae, te he Malik Isar shoril ar lour birudde guna ḳoria dushi bonizae.
1CO 11:28 Ou ruṭi kaibar age ar fialar shorbot ḳaibar age, manshe nizore zasai kori deḳouk.
1CO 11:29 Ḳaron ita ḳaoar shomoy he zudi Malik Isar shorilor befare na buze, te ita ḳaia he nizor ufre gozob ḍakia ane.
1CO 11:30 Otar lagi-u tumrar mazor bout manush ḳomzur ar bemari asoin, emonki keu ḳeu morsoin.
1CO 11:31 Amra nizor bisar nize ḳorille, malikor ator bisar taki rehai faimu.
1CO 11:32 Oile malike zebla amrar bisar ḳoroin, ou shomoy tain amrare shashon ḳoroin, zate duniar hoḳlor loge aḳerator din amrare dushi shaibosto ḳora na oy.
1CO 11:33 Erlagi O bai oḳol, tumra zebla mezbani kaoar lagi ekḳano dola o, ou shomoy eḳe-oinnor bae kial ḳorio.
1CO 11:34 Eḳzonor zudi feṭo buk lagizae, te he baṛi taki kaia auk, zate tumra ekḳano oae kunu shaza na fao. Te ami zebla tumrar gese aimu, ou shomoy bad-baki befare nosiot ḳormu.
1CO 12:1 O bai oḳol, ami sairam Allai Pak Ruhur dan-niamotor befare tumrar kunta-u ozana na rouk.
1CO 12:2 Tumrar zana ase, age zebla tumra Allar ebadot ḳortae na, hou shomoy tumrare olaḳan deb-debir bae ṭania neoa oito, zetae kunta matito fare na.
1CO 12:3 Oile ami tumrare zanairam, Allar ruhur bole matile kunu manshe ikan ḳoy na, “Isar ufre lannot foṛouk.” Ar Allai Pak Ruhur bol saṛa ḳeu ḳoito-o fare na, “Hozrot Isa-u malik.”
1CO 12:4 Ou eḳoi Pak Ruhur nanan nomunar dan-niamot ase.
1CO 12:5 Amra nanan niome eḳoi malikor kezmot ḳori.
1CO 12:6 Amra forteḳ zonre nanan nomunar ḳam-ḳaz deoa oise, oile Alla Pak to eḳzon-u, tain nanan ufaye amrar maze ḳam ḳoroin.
1CO 12:7 Hoḳlor faydar lagi ou Pak Ruhu eḳo zonor maze eḳo nomunae zair oin.
1CO 12:8 Ou Pak Ruhur bole kunu kunu zonre gian-buddir mat mata, ar ḳeurore aḳoldari mat matar niamot deoa oy.
1CO 12:9 Eḳzone ou ruhur bole gaibi borosha fain, ar ou ruhur bole dusra zone bemarire bala ḳorar ḳemota fain,
1CO 12:10 ḳeu ḳeu keramoti kam ḳorar ḳemota, ḳeu ḳeu firaki matar ḳemota, ḳeu ḳeu bad-bala ruhu oḳol ar zin-butre sinar ḳemota, ḳeu ḳeu nanan nomunar gaibi bashae matar ḳemota ar ḳeu ḳeu itar mani buzaia dibar ḳemota fain.
1CO 12:11 Ita hoḳol ḳam to ou eḳoi Pak Ruhe ḳoroin. Ou dan-niamot oḳol tan nizor kushi mafik forteḳ muminre baṭia dein.
1CO 12:12 O baiain oḳol, eḳ shorilor zela bout ongo taḳe, ola bout ongo milia eḳ shoril oy, al-Mosi-o to ṭik olaḳan.
1CO 12:13 Amra Boni Israil oi ba bin zati oi, azad ba gulam oi, ou eḳoi Pak Ruhe hoḳlor torikabondi oise eḳ shoril oar lagi. Hoḳole-u to ou eḳoi Pak Ruhu faisi.
1CO 12:14 Kunu manshor shorilre ḳali eḳ ongo dia banail oise na, borong bout ongo zuṛa deoa oise.
1CO 12:15 Oḳon faoe zudi koy, “Amar nam to at nae, te ami shorilor ongo-o nae,” erlagi fao zen shorilor ongo nae, ikan to ṭik nae.
1CO 12:16 Oula ḳane zudi koy, “Amar nam to souk nae, te ami shorilor ongo-o nae,” erlagi kan zen shorilor ongo nae, ikan to ṭik nae.
1CO 12:17 Manshor asta shoril-u zudi souk oizito, te hunbar ḳemota ḳoi failo one? Ar zudi shara shoril-u ḳan oizito, te geran hungibar ḳemota ḳoi roilo one?
1CO 12:18 Te Allae tan nizor kial-kushi mafik shorilor nanan ongore eḳ ek kori hazaisoin.
1CO 12:19 Hoḳol ongo zudi eḳlaḳan oizito, taile shorilor kun halot oilo one?
1CO 12:20 Shorilo bout ongo ase, ta-o shoril to eḳṭa-u.
1CO 12:21 Souke atre ḳoito fare na, “Tumare amar dorḳar nai,” ar matae duio faore ḳoito fare na, “Tumrare amar dorḳar nai.”
1CO 12:22 Ashole shorilor ze ongore ḳomzur mono oy, oguin-u beshi dorḳari.
1CO 12:23 Shorilor ze shoromor ongore amra huru-muru mono ḳori, iṭare amra beshi dam dei, mani ze ongore bare deḳani zae na, itare amra ijjot ḳoria guria raki.
1CO 12:24 Oile ze ongore bare deḳani zae, itare guria raḳar dorḳar oy na. Ashole Allae ou huru-muru ar ḳomzur ongore beshi ijjot dia, hoḳol ongore zuṛa lagaia eḳ shoril banaisoin,
1CO 12:25 zate shoril bagabagi na oy, borong eḳ ongoe aroḳ ongore nizor laḳan mono ḳore.
1CO 12:26 Shorilor eḳ ongor zudi koshṭo oy, te shara shorile ḳoshṭo fae, ar eḳ onge ijjot faile, asta shorile kushi-bashi kore.
1CO 12:27 Te tumra-u oilae al-Mosir shoril, tumra eḳo zon ou shorilor eḳo ongo.
1CO 12:28 Zano ni, Allae to zomator bitre foyla sahabi, bade firaki mat matra, bade ustad oḳol boail ḳorsoin. Erbade boail ḳorsoin zera keramoti kam ḳorra, bemar bala ḳorra, shaijjo-shohayota ḳorra, Isayi zomatre salaora ar nanan gaibi bashae matra zon.
1CO 12:29 Te era hoḳole-u kunu sahabi fod faisoin ni? Hoḳole-u firaki matoin ni? Hoḳol-u ustad ni? Ar hoḳole kunu keramoti kam ḳorar ḳemota faisoin ni?
1CO 12:30 Hoḳole kunu bemar shifa ḳorta faroin ni? Hoḳole-u gaibi bashae matoin ni? Hoḳole-u itar mani buzaia dita faroin ni? Nichchoy na.
1CO 12:31 Ta-o ami koiram, tumra hoḳol taki dami niamot oḳol faoar lagi ashik o. Ar kial ḳoro, oḳon ami tumrare aro bala ekkan fot deḳairam.
1CO 13:1 Ami zudi zogotor manush ba asmani firistar gaibi bashae mati, ar amar bitre kunu mohobbot na taḳe, te to ami zure zure bazail fitolor gonṭi ba jonjon ḳora ḳortalor laḳan oigesi.
1CO 13:2 Amar zudi firaki matibar ḳemota taḳe, hoḳol batuni befar buzi, hoḳol nomunar aḳol-buddie kamil oi, ar amar imani boldi usa faṛore-o eḳ zaga taki aroḳ zagat horailitam fari, oile amar dilo kunu mohobbot na taḳe, te Allar nozoro ami kunta-u nae.
1CO 13:3 Amar hoḳol don-samana zudi gorib-dukire bilai dei, emonki amar shorilre-o zudi zalanir lagi dan ḳorilai, ar amar bitre zudi mohobbot na taḳe, te kunu fayda nai.
1CO 13:4 Mohobbot hoḳol shomoy sobor ḳore, doya-maya ḳore, ingsha ḳore na, boṛai kore na, ohonkar ḳore na,
1CO 13:5 bad bebohar ḳore na, nizor shartor sesṭa ḳore na, rag-gusa ḳore na, ḳeu kunu ḳeti korle mono raḳe na,
1CO 13:6 naformanit kushi oy na, borong hokikotie kushi kore.
1CO 13:7 Mohobbote hokkolta shoijjo ḳore, hoḳolta bishash ḳore, hoḳol befare monor maze asha zugae ar hoḳol befare sobor ḳoria doijjo dore.
1CO 13:8 Huno, hoḳol firaki mat eḳdin fuṛaizibo, nanan basha-o shesh oizibo ar aḳoldaror aḳol-o fuṛaizibo, oile mohobbot kunu shomoy fuṛae na.
1CO 13:9 Te oḳon amra to kunuta-u shullo-ana zani na, firaki mat-o shullo-ana ḳoitam fari na.
1CO 13:10 Oile amra zani, shullo-ana oar shomoy zebla aibo, ou shomoy banga-sura hoḳolta fuṛaizibo.
1CO 13:11 Ami zebla huru aslam, ou shomoy huruttar laḳan matitam, huruttar laḳan sinta-babna ḳortam, ar huruttar laḳan bisar-bibechona ḳortam. Oile oḳon to boṛo oigesi, erlagi huruttar laḳan asar-bebohar bad dilaisi.
1CO 13:12 Oḳon to amra zafsa aynar maze hoḳolta forishkar deḳram na, bade hou shullo-ana oar shomoy aile amra hoḳolta samna-samni deḳmu. Oḳon ami hokkolta furafur zani na, hou shomoy aile ami hoḳolta furafur zanmu, Allae amare zela furafur sinoin, ola ami-o hoḳolta zanmu.
1CO 13:13 Buzrae ni, iman, asha, ar mohobbot, ou tino don hor-hamesha roibo, itar maze mohobbot-u hoḳol taki boṛo.
1CO 14:1 Erlagi O bai oḳol, tumra-o mohobbotor lagi ashik o, Pak Ruhur deoa dan-niamotor lagi kiali o, ḳas ḳori firaki matibar ḳemota faite kiali o.
1CO 14:2 Ḳaron ze manshe gaibi kunu bashae mate, he ita manshor loge mater na, Allar loge-u mater. Tar mator basha kunu manshe buze na, he ḳali Pak Ruhur bole batuni buli koy.
1CO 14:3 Oile zein firaki matoin, ein manshor gese-u matoin, en mate manshor zindegire goṛia tule, manshor dilo asha ar shantona zugae.
1CO 14:4 Te ze zone gaibi bashae mate, he ḳali nizore goṛia tule, oile zein firaki matoin, ein to Allar zomatre goṛia tuloin.
1CO 14:5 Erlagi ami sairam, tumra hoḳole-u gaibi bashae mato, oile aro beshi sairam, tumra hoḳole firaki mat mato. Mono rakio, kunu manshe zudi gaibi bashae mate, ar mator bade zomator manshore goṛia tular lagi dusra ḳeu itar mani buzaia na dey, te hou zein firaki matoin ein-u boṛo.
1CO 14:6 Baiainre, ami zudi tumrar gese aia ḳali gaibi kunu bashae mati, oile er mazdi Allar batuni munshar ḳota, aḳol-hekmotor ḳota, firaki kunu mat ba kitabi nosiot na zanai, te amaredi tumrar kunu fayda oibo ni?
1CO 14:7 Mone ḳoro, bashi, sharinda, ar zeta baiddo-bazonar bitre kunu zan nai, ita zudi ganor shoṭik shur-tal na mania baze, te ou baznat kita bazer, manshe ita ḳemne buzbo?
1CO 14:8 Zuddot zaoar lagi fouzi shingae zudi forishkar aoaz na dey, te kunu sifai reḍi oibo ni?
1CO 14:9 Olaḳan tumi zebla ozana bashae mato, te tumi kita ḳoirae, tara ḳemne buzbo? Tumar i mat ḳali batashor loge matrae ni?
1CO 14:10 I duniat nanan zator buli ase, ita kunuṭa-u mani saṛa nae.
1CO 14:11 Ar ami zudi ou buli na buzi, te ze zone matira, tan gese to ami bideshi manshor laḳan, ar tain-o amar gese bideshi.
1CO 14:12 Ikan to tumrar belae-o ṭik. Tumra zebla Pak Ruhur deoa dan-niamotor lagi kiali oirae, te ze niamot dia zomatre goṛia tula zae, ou niamot faoar lagi-u beshi sesṭa ḳorio.
1CO 14:13 Erlagi ze manshe gaibi bashae mate, he Allar gese mangouk, zate itar mani buzaia dito fare.
1CO 14:14 Ami zudi gaibi bashae dua ḳori, te ashole amar ruhe dua ḳorer, amar nizor mone kunta ḳorer na.
1CO 14:15 Oḳon ami kita ḳortam? Ami ruhu dia dua ḳortam, ar buddi dia-o ḳortam. Ami ruhu dia git-gozol gaimu, buddi dia-o git-gozol gaimu.
1CO 14:16 Ar tumi zudi kali ruhu dia shukria adae ḳoro, te mozlisor manshe kila Amin ḳoito? Tara to buzer-u na tumi kita ḳoirae, tara to osina zonor laḳan roila.
1CO 14:17 Tumi hoyto ṭik babe-u shukria adae ḳorrae, oile ou manshore to goṛia tula or na.
1CO 14:18 Ami Alla Pakor shukria adae ḳori, ḳaron ami gaibi bashae tumrar saite bout beshi mati.
1CO 14:19 Ta-o zomator mahfilor maze gaibi bashae azar azar ḳotar bodla, manshor talimor lagi ami aḳol ḳaṭaia ḳali fasḳan ḳota ḳoimu.
1CO 14:20 Baiainre, tumrar aḳol-buddi huruttar laḳan na oia boyosko manshor laḳan ouk. Oile ingsha-nindar befare tumrar mon masum baichchar laḳan ouk.
1CO 14:21 Asmani Kitabo ase, Osina bashae matra manushdi, bideshi manshor mukdi, ami ou zatir loge matimu. Ta-o amar mat tara hunto nae, ikan ami Mabude ḳoiram.
1CO 14:22 Te buza zae, gaibi bashae mata imandar oḳlor lagi kunu nishana nae, borong o-imandar oḳlor lagi ita eḳṭa nishana. Ar firaki mat mata o-imandaror lagi kunu nishana nae, oile imandaror lagi to ita eḳṭa nishana.
1CO 14:23 Zomator hoḳol manush eḳ zagat milar bade, hoḳole zudi eḳloge gaibi bashae mate, ar ou shomoy zomator bairor ba o-imandar kunu manush ino ae, te tara tumrare fagol ḳoiba na ni?
1CO 14:24 Ar hoḳole zudi firaki matoin, omon shomoy kunu o-imandar aia ino hamae, te ou hoḳlor mator mazdi he nizor gunar halot buzilibo, ou mat hunae tar nizor bisar nize ḳorbo.
1CO 14:25 Tar monor lukail bishoy kula-mela oibo, teu he soizdat foṛia Allar gourob-tarif ḳoria ḳoibo, “Afnarar maze nichchoy Alla Pak azir asoin.”
1CO 14:26 Baiainre, kita oito? Tumra zebla eḳ zagat zomato dola o, ou shomoy ḳeu git-gozol gain, ḳeu nosiot ḳoroin, ḳeu batuni befare ḳoin, ḳeu gaibi bashae matoin, ar ḳeu itar mani buzaia dein. Te zein zeta-u ḳoroin na ḳene, ita zanu zomatre goṛia tular niote oy.
1CO 14:27 Ḳeu zudi gaibi bashae kunta mate, te eḳozon ḳori dui-tinzone matouk ar eḳzone itar mani buzaia deuk.
1CO 14:28 Mani buzai dibar ḳeu na taḳle, tara zomato sufsaf taḳouk, ḳali nize nize Allar loge matouk.
1CO 14:29 Ar firaki matra oḳole ola dui-tinzone matouk ar baki hoḳole zasai-basai korouk.
1CO 14:30 Oile zomato zera boat asoin, tara ḳeuror gese zudi kunu ohi ba batuni kobor nazil oy, te zein boyan ḳorra, tain nirai oizaukka.
1CO 14:31 Olaḳan tumra hoḳole-u eḳ ek kori firaki matio, zate hunra oḳole talim ar utshaho fae.
1CO 14:32 Firaki matrar ruhu to tarar nizor boshe taḳe,
1CO 14:33 Alla Pake nichchoy gulmal fosond ḳoroin na, borong shanti fosond ḳoroin.
1CO 14:34 Allar pak bonda oḳlor hoḳol zomator niom-ḳanun oilo, zomator maze beṭi manush nirai roa usit, gof-shof ḳora tarar lagi ṭik nae. Shoriotor niom mafik tara odinota manouk.
1CO 14:35 Tara kunu talim zanar kiali oile baṛit gia nizor zamair ges taki zanouk. Ḳaron zomator maze beṭinte gof-shof ḳora shorom.
1CO 14:36 Aichcha ḳo sain, Allar kalam kunu tumrar ges taki bar oise ni? Ḳali tumrar gese-u aise ni?
1CO 14:37 Mono rakio, kunu manshe zudi nizore pir-dorbesh ba batuni kemota-ala mono ḳore, te he ikan buzilauk, ami tumrar gese zeta leḳlam, ita hokkolta-u Malik Isar hukum.
1CO 14:38 Ar ḳeu ita na manle, tare-o mainno ḳora oito nae.
1CO 14:39 Erlagi O bai oḳol, tumra firaki mat matibar lagi kiali o, ar gaibi bashae matite-o bada dio na.
1CO 14:40 Ta-o zomator hoḳol ḳam-u furafur adob-ḳayda ar niom-ḳanun mania ḳora zorur.
1CO 15:1 O mumin bai oḳol, ami age ze kush-ḳobri toblig korsilam, hou ḳota oḳon iad ḳorai diram. Tumra to ita kobul ḳorslae ar imane ṭikia-o roiso.
1CO 15:2 Ami ze kalam toblig korsi, ita zudi tumra mozbut ḳori doria raḳo, te ou kush-ḳobrir mazdi nazat fairae, ar na faile tumrar iman ana-u beḳama.
1CO 15:3 Ashole ami nize ze talim faisi, ou talimre kub zoruri mono ḳoria tumrare-o zanaisi. Allar kalam mafik amrar gunar mafir lagi al-Mosie nizor zan kurbani disoin.
1CO 15:4 Tanre dafon ḳora oisil, ar Allar kalam mafik moutor tin dinor din tain murda taki zinda oisoin.
1CO 15:5 Zinda oar bade tain foyla sahabi Fitorre, bade tan hou barozon sahabire deḳa disoin.
1CO 15:6 Erbade tain eḳloge fas-shor-o beshi mumin baire deḳa disoin. Erar maze ḳeu ḳeu mara gele-o, oḳono beshir bag zinda asoin.
1CO 15:7 Erbade tan bai Iakubre, bade hoḳol sahabire deḳa disoin.
1CO 15:8 Ar ami to hoḳlor heshor juli-jaṛa fut, ou amare-o tain deḳa disoin.
1CO 15:9 Sahabi oḳlor maze ami-u hoḳol taki nogoinno, ami to sahabi koia forisoy dibar laḳ nae, age ami Allar zomator ufre zulum ḳortam.
1CO 15:10 Oile oḳon ami zela oisi, ita Allar rohomote-u oisi. Amar ufre tan i rohomot beḳama gese na, ami oinno sahabi oḳol taki beshi menot ḳorsi. I menot to ami nize nize ḳortam farsi na, borong Allar rohomote-u ita ḳoraise.
1CO 15:11 Erlagi ami ba oinno kunu sahabie zein-u toblig kori na ḳene, amra ou eḳoi befare-u toblig koriar, ita hunia tumra-o iman ancho.
1CO 15:12 Te al-Mosire murda taki zinda ḳora oise ḳoia zebla toblig kora oy, taile tumrar mazor ḳeu ḳeu ḳemne ḳoy, manush morigele ar zinda oita nae?
1CO 15:13 Moron bade zinda oia uṭte na farle to, al-Mosi-o zinda oisoin na.
1CO 15:14 Ar al-Mosi zinda oia na uṭle to amrar toblig-o beḳama ar tumrar iman anao beḳama.
1CO 15:15 Emonki oḳan-o buza zar zen, Allar befare amra zeta toblig koriar ita misa, ḳaron amrar toblig oilo, Allae al-Mosire murda taki zinda ḳorsoin. Oile murda oḳolre zudi zinda ḳora na oy, te to tain al-Mosire-o zinda ḳorsoin na.
1CO 15:16 Ar murda oḳol zudi zinda oia na uṭoin, te to al-Mosi-o zinda oia uṭsoin na.
1CO 15:17 Al-Mosire zudi zinda ḳora na oia-u taḳe, te to tumrar iman beḳama, ar tumra oḳono gunar maze habuḍubu ḳairae.
1CO 15:18 Taile al-Mosir torikar zerar mout oigese, tara-o to binash oigesoin.
1CO 15:19 Al-Mosir ufre amrar ze asha, i asha zudi kali ou duniabi zindegir lagi oy, te to hoḳol taki amrar-u beshi bod nosib.
1CO 15:20 Oile asol ḳota oilo, al-Mosire to hasau murda taki zinda ḳora oise. Tain-u foyla foshol, murda taki zoto zonre zinda ḳora oibo, erar maze tanre-u foyla zinda ḳora oise.
1CO 15:21 Buzrae ni, eḳzon manshor mazdi zela mout aise, ola zinda oia uṭa-o eḳzon manshor mazdi aise.
1CO 15:22 Baba Adomor aolad hishabe hoḳol manshor zela moron oy, al-Mosir ummot hishabe oula hoḳolre zinda ḳora oibo.
1CO 15:23 Oile ermaze ḳota ase, Allae tan morzi mafik dafe dafe hoḳolta ḳoraiba. Ḳeto taki foyla tula fosholor laḳan foyla dafo al-Mosire zinda ḳora oise, bade tain dusrabar toshrif anar ḳalo tan ummot oḳolre-o zinda ḳora oibo.
1CO 15:24 Erbade kiamotor ḳalo al-Mosie duniabi hoḳol shashon, odikar ar ḳemotare binash ḳoria gaibi baf Allar ato bashshai shomzaiba.
1CO 15:25 Ḳaron, Allae zoto shomoy forzonto al-Mosir hoḳol dushmonre tan faor tolat na falain, oto shomoy forzonto tain bashshai korte oibo.
1CO 15:26 Ar shesh dushmon moutre-o tain binash ḳorba.
1CO 15:27 Fobitro Zobur Shorifo ase, “Tain hokkoltare-u al-Mosir faor tolat raḳsoin.” Te buza zae, hokkoltare al-Mosir odine raḳar mani oilo, Allae tan nizore bad rakia oinno hoḳoltare-u al-Mosir tole raḳsoin.
1CO 15:28 Ar hokkolta tan odine aia harle, hokkoltare loia ou ḳas mayar zon Ibnulla-o Alla Pakor odin oiba. Zate zein hoḳolta tan odine raḳsila, hou Alla Pak-u hokkoltar uforala oin.
1CO 15:29 Aichcha doro, murda oḳlor lagi zera toubar gusol ḳorer, murda oḳolre zudi kunudin-u zinda ḳora na oy, te erar fayda kita?
1CO 15:30 Ar amra sahabi oḳol-o ḳene gonṭae gonṭae bifodor mukamuki oiar?
1CO 15:31 Oy, bai oḳol, ami to forteḳ din-u moutor mukamuki oiar! Amrar Malik Isa al-Mosir name tumrare loia ze boṛai deḳai, ou boṛair lagi-u ami tumrare ita zanairam.
1CO 15:32 Ifis ṭauno zongli zanuar falor loge ami ze laṛai korsi, ita zudi kali duniabi niote ḳoria taki, te amar kunu lab oise ni? Murda oḳolre zudi zinda ḳora na oy, te ao, ola ḳoi, “Ao, ḳao-dao furti koro, ḳail to nichchit moron oibo.”
1CO 15:33 Baiainre, tumra bul ḳorio na, ola eḳ silleḳ ase, “Ku-shongie bala manshore-o naṭailae.”
1CO 15:34 Erlagi tumra bod nisha taki hozag o, ar guna ḳorio na. Tumrar mazor ḳeu ḳeu to shoyong Allare-u sine na, ita boṛo shoromor befar.
1CO 15:35 Kunu kunu manshe zikaito fare, “Murda oḳol ḳemne zinda oiba? Tarar shorilor goṭon kilaḳan oibo?”
1CO 15:36 Haere be-aḳol! Tumar nizor ḳetor maze ze bisi bain ḳoro, i bisi na morle to sera uṭe na.
1CO 15:37 Ar tumar bain ḳora bisi taki ze sera baroy, tumi to i sera bain ḳoro na, tumi kali bisi bain ḳoro dan ba oinno kunu fosholor, ogu moria-u sera baroy.
1CO 15:38 Bade Allae tan morzi mafik itar surot-aḳar goṭon ḳoroin. Tain forteḳ bisre-u tar zat mafik serar surot-aḳar dein.
1CO 15:39 Buzo na ni, hoḳol zandaror gust to eḳ shoman nae. Manshor gust eḳlaḳan, foshur eḳlaḳan, fakir eḳlaḳan ar masor aroḳ laḳan.
1CO 15:40 Oula asmano-o bout nomunar shoril ase, duniat-o bout shoril ase, ta-o behesti shorilor tez eḳlaḳan, ar duniabi shorilor tez aroḳ laḳan.
1CO 15:41 Shuruzor tez eḳlaḳan, sandor tez aroḳ laḳan ar terar tez dusra laḳan. Emonki eḳ tera taki aroḳ terar tez-o alada.
1CO 15:42 Moron bade zinda oia uṭa-o ou laḳan. Lash maṭi dia harle fosizae, oile ou lashre zebla zinda ḳora oibo, iṭa ar fosto nae.
1CO 15:43 Oshommani halote maṭi deoa oy, shommani halote tula oibo. Maṭi deoa oy durbol halote, ar tula oibo boloban halote.
1CO 15:44 Maṭi deoa oy roḳto-mangshor shoril, oile tula oibo ruhanik shoril. Roḳto-mangshor shoril zebla ase, te to ruhanik shoril-o ase.
1CO 15:45 Zela Baba Adomor befare Fobitro Tourat Shorifo ase, “Ou foyla Adom zinda zandar oila.” Te shesh Adom, zein al-Mosi, tain kita oila? Tain to oila zindegi deora ruhu.
1CO 15:46 Oile ruhanik ze shoril, ikan to foyla oy na, foyla oy roḳto-mangshor shoril, bade oy ruhanik shoril.
1CO 15:47 Zela foyla Adom maṭi taki aila, bade dusra Adom, al-Mosi aila behest taki.
1CO 15:48 Zogotor manush oila ou maṭir banail manshor laḳan, ar behesti manush oila hou behesti zon al-Mosir laḳan.
1CO 15:49 Te Baba Adomor laḳan amra zela maṭir ḳayar surot faisi, ṭik oula hou behesti zonor laḳan behesti surot-o faimu.
1CO 15:50 Baiainre ami tumrare ḳoiram, roḳto-mangshor kunu shoril Allar bashshair odikar fae na. Zetar binash ase, ita kunumonte-u sirostayi bone na.
1CO 15:51 Te ami tumrare eḳṭa batuni kota zanairam, zano ni, amra hoḳlor to mout oito nae, oile hoḳlor-u surot bodlizibo.
1CO 15:52 Kiamotor ḳalo eḳ muhurtor maze, sokur foloḳe, shingat fu deoar loge loge-u amra bodlizimu. Ou shinga bazia harle, hoḳol murda ola surote zinda oiba, zeta kunudin binash oito nae, ar amra-o hou surote bodlizimu.
1CO 15:53 Erlagi ze shoril binash oizae, itae ola surot faite oibo, zeta kunudin fosito nae, ar zeta morizibo, itae ola surot faite oibo, zeta kunudin morto nae.
1CO 15:54 Ar ze shoril fosizae, i shorile zebla sirostayi surot faibo, ze shorilor mout oy, itae zebla siroḳalin zindegi faibo, hou shomoy Allar kalamor ou leḳa folibo, Moutor binash oia joy aise.
1CO 15:55 O mout, tor joy kuai? Moutre, tor bish-dat kuai?
1CO 15:56 Moutor bish-dat oilo guna, ar gunare ḳemota zugae Musa nobir shoriot.
1CO 15:57 Oile Alla Pakor shukria adae ḳori, amrar Malik Isa al-Mosir usillae tain amrare joy dan ḳoroin.
1CO 15:58 Te, O amar mayar baiain, tumra imane mozbut o, zate kuntae tumrare alaito na fare. Malikor kezmotor lagi nizore hor-hamesha furafur bilai deo, tumra to zano, tan lagi menot ḳorle i menot kunumonte-u beḳama zae na.
1CO 16:1 O bai oḳol, Allar pak bonda oḳolre shaijjor lagi sanda tular befare ami oḳon ḳoiram. Galatia deshor Isayi zomat oḳolre ami zela hukum disi, tumra-o oula ḳoro.
1CO 16:2 Tumra forteḳ zone zarzir tofik onuzayi haftar foyla din kisu ṭeḳa-foysha dola ḳoro, zate ami zebla aimu, ou shomoy kunu sanda tula na lage.
1CO 16:3 Ami aia harle tumrar dola ḳora ou dan-ḳoyrat Zeruzalemo loia zaoar lagi, tumra zerare fosond ḳorbae, ami siṭi dia tarare faṭaimu.
1CO 16:4 Ar tumra zudi mono ḳoro ami-o zaoa zorur, te tara amar loge oia zaiba.
1CO 16:5 Amar kial oilo Makidonia oia aitam, erlagi ami Makidonia deshor bitredi tumrar gese aimu.
1CO 16:6 Aia hoyto tuṛa ḳoydin tumrar gese roimu ba asta shitkal tumrar gese-u ḳaṭaimu, zate ami zeno-u zai na ḳene tumra-u amare ou soforor lagi hoḳolta zuit-zait ḳoria dibae.
1CO 16:7 Fotor kuṭmor laḳan ami kali fotedi zaoar ḳalo tumrar loge deḳa ḳortam sai na, ami sairam, Allar morzi oile bakka ḳoydin tumrar loge taḳmu.
1CO 16:8 Oile Fonchaisha Id forzonto ami ou Ifis ṭauno-u roimu,
1CO 16:9 ḳaron amar samne oula boṛo eḳṭa shuzug ase, i shuzuge boṛo bala fol mile. Ta-o bout manshe itar birudita ḳorra.
1CO 16:10 Kial rakio, Timoti bai tumrar ono aile tain zanu shantie-nirboye roita faroin. Zano to, ami zela malikor kezmot ḳoriar, tain-o ṭik oula ḳorra.
1CO 16:11 Erlagi keu zanu tanre elami na ḳore. Bade tain zela amar gese aita faroin, oula shanti moto tanre aguaia dio. Ami to tan lagi bar saiar, asha ḳori baiaintor loge tain-o aiba.
1CO 16:12 Ar Apollos bair befare ḳoiram, tanre bout minot ḳorslam, baiaintor loge oia oḳon tumrar gese zaita, ta-o kunumonte-u razi oila na. Te shomoy-shuzug oile bade zaibane.
1CO 16:13 Baiainre, tumra hoḳol hushiar o, imane mozbut o, shaoshi bab deḳao ar boloban o.
1CO 16:14 Tumra zotota-u ḳoro, mohobbotor shohit ḳorio.
1CO 16:15 Ar tumrar to zana ase, asta Gris deshor maze Astifan bair foribar-u oila foyla imandar. Allar pak bonda oḳlor kezmotor lagi tara nizore shofi disoin.
1CO 16:16 Erlagi minot ḳoriar, ilaḳan manshore tumra ijjotor shohit bozio, aro zoto zone ola kezmot ḳoroin, Allar name menot ḳoroin, tarare-o ola bozio.
1CO 16:17 Ou Astifan bai, Fatunat bai ar Akik bai aisoin dekia ami kub kushi oisi, era aoae tumrar obab furon oise.
1CO 16:18 Era amar ar tumrar dilo aram disoin. Tumra ou laḳan manshore ḳas ijjot ḳorio.
1CO 16:19 Turoshkor Asiya deshor zomator manshe tumrare salam zanaira. Akil ar Fiskila, ar tarar goror zomator manshe malikor mohobbotor shohit tumrare salam zanaira.
1CO 16:20 Hoḳol mumin baiainte tumrare salam zanaira. Tumra eḳe-oinne fobitro golagoli korio.
1CO 16:21 Ami Pauluse nizor ate ou salamor ḳota leḳlam.
1CO 16:22 Malik Isare zudi keu mohobbot na ḳore, te tar ufre lannot foṛouk. Marana ta! Mani, O amrar malik, toshrif anoukka!
1CO 16:23 Malik Isar rohomot tumrar ufre zari rouk.
1CO 16:24 Tumra hoḳlor lagi amar Isayi mohobbot roilo. Amin.
2CO 1:1 Ami Paulus, Alla Pakor morzi mafik Hozrot Isa al-Mosir eḳzon sahabi. Korint ṭaunor Isayi zomat ar asta Gris deshor maze Allar zoto pak bonda oḳol boshot ḳoroin, erar gese ami ar amrar mumin bai Timotie ou sohifaḳan leḳram.
2CO 1:2 Amrar gaibi baf Alla Pake ar Malik Isa al-Mosie afnara hoḳlor ufre rohomot ar shanti nazil ḳoroukka.
2CO 1:3 Amrar Malik Isa al-Mosir gaibi baf Alla Pakor tarif ouk. Tain-u rohmanur rohim Alla, hokkolor dilor buz deora Alla.
2CO 1:4 Hoḳol zat duḳ-mosibotor shomoy tain amrare buz dein, zate tan ges taki buz faia, oinnor duḳ-mosibotor shomoy amra-o tarare buz ditam fari.
2CO 1:5 Al-Mosir laḳan amra zela bout duḳ-mosibot shoijjo ḳoriar, oula tan usillae bout buz-shanti-o faiar.
2CO 1:6 Amra ze duḳ-mosibot shoijjo ḳori, ita to tumrar monor shantona ar nazator lagi-u ḳori. Tumrare buz deoar niote-u Allae amrare buz dein. Tumra zebla amrar laḳan duḳ-mosiboto foṛbae, ou shomoy amrar deoa buz mafik tumrar ḳoshṭore shoijjo ḳorte shaijjo ḳorbo.
2CO 1:7 Tumrar ufre amrar mozbut ekin ase, tumra zela amrar duḳ-mosiboto shorik aso, oula Allar deoa buz-shantonar maze-o shorik aso.
2CO 1:8 Turoshkor Asiya desho amra ze mosiboto foṛslam, ota tumrare zanaitam sai. Hino taḳte amrar ufre ze azab aisil, ou azab ola marattoḳ asil, erlagi amra zanor maya saṛi dislam.
2CO 1:9 Mono ḳorslam, amra nichchit mara zaimu. Te amrar i halot oisil, zate amra nizor ufre borosha na ḳoria, ze Allae murdare zinda ḳori tuloin, ou Allar ufre borosha ḳori.
2CO 1:10 Eḳ bezuita moutor at taki tain amrare basaisoin, ar oḳono basaira. Amra tan ufre borosha ḳortam fari, tain hamesha-u amrare olaḳan basaiba.
2CO 1:11 Tumra-o dua-munazat ḳoria amrare shaijjo ḳorrae, erlagi bout zonor duar ḳatire amra ze rohom faisi, otar fol dekia boute Allar shukria adae ḳorba.
2CO 1:12 Amra zeta loia gourob ḳoriar, amrar bibeḳe-o ola ḳoy, Allar deoa fobitro ar shorol mon loia hoḳol manshor maze zindegi kaṭaisi, ḳas ḳori tumrar maze-u ḳaṭaisi. I zindegi amra duniabi aḳol-hekmote nae, ḳali Allar rohomotor bole ḳaṭaisi.
2CO 1:13 Amra to tumrar gese lukai-safai kunuta lekiar na, tumra ze leḳa foṛrae ar buzrae, ḳali ou befare-u lekiar. Ar asha ḳoriar, tumra hamesha-u ola buzat roibae.
2CO 1:14 Ashole amrar befare tumra tuṛa kisu zania-u, amrare loia zela boṛai korrae, Malik Isae toshrif anar shomoy tumrare loia amra-o ola boṛai kormu.
2CO 1:15 Ar ou ḳotar ufre borosha ḳoria ami kub kiali oislam, ami aoa-zaoar foto duiobar tumrar gese zaimu, gele tumra duiobar-u rohom-niamot faibae.
2CO 1:16 Ami mono ḳorslam, Makidoniat zaoar fote tumrar loge deḳa ḳormu ar hon taki hirbar tumrar gese aimu, zate Ehudia zilat zaoar ḳalo tumra amare aguaia deo.
2CO 1:17 Oile ami na aoae tumra mono ḳorrae ni, ami ita ḍong korslam? Zogotor manshe zela eḳbar ḳoy “Oy, oy” aroḳbar ḳoy “Na, na”, ami-o ola ni?
2CO 1:18 Alla Pak to hok ar ḳaṭi, ikan zela hasa, oula eoḳan-o hasa, tumrar gese amrar zoban eḳbar “Oy” ar aroḳbar “Na” oy na.
2CO 1:19 Ami, Silas, ar bai Timotie tumrar gese zar ḳota toblig korsi, hou Isa al-Mosi-u oila Allar ḳas mayar zon Ibnulla, tain eḳbar “Oy” ar eḳbar “Na” nae, tain to hoḳol shomoy-u “Oy.”
2CO 1:20 Alla Pakor hoḳol oada-u to al-Mosir mazdi fura oy. Erlagi munazator shomoy Allar gourobor lagi al-Mosir namor usillae amra “Amin” mani “Oy” ḳoi.
2CO 1:21 Ar al-Mosir lagi amrare ar tumrare zein mozbut ḳori ṭikai raḳsoin, tan nam Alla. Tain-u amrare ḳelafoti disoin.
2CO 1:22 Tan nizor don hishabe amrare sil-sappoṛ maria raḳsoin, ar tain zeta amrare dibar oada ḳorsoin, itar foyla kishti hishabe amrar dilor maze Allai Pak Ruhu dan ḳorsoin.
2CO 1:23 Ami Allare shakki rakia amar zindegir ḳosom ḳaia ḳoiram, tumrar bae doya-maya taḳae tumrare basanir kiale ami Korint ṭauno zaoa bond raḳsi.
2CO 1:24 Amra nizore tumrar imanor malik mono ḳorram na, borong tumrare kushi-bashie raḳar lagi tumrar loge roia ḳam ḳorram. Ḳaron tumra imane mozbut aso.
2CO 2:1 Erlagi mone mone ṭik korlam, tumrar mono duk deoar lagi ami ar tumrar gese zaitam nae.
2CO 2:2 Ḳaron ami tumrare duk dile amare kushi korbo ḳe? Ar ami zarare duk dimu, ou tumra saṛa amare kushi korar ar to ḳeu nai.
2CO 2:3 Amar ila leḳar ḳaron oilo, ami zebla zaimu, ou shomoy zera amare kushi korar ḳota, tarar ges taki zanu kunu duk na fai. Tumrar ufre amar i bishash ase, ami zetat kushi oimu, tumra-o itat kushi oibae.
2CO 2:4 Amar mono boṛo duk loia, sokur fani falaia age tumrar gese leḳslam. Ashole ami tumrare duk deoar lagi leḳsi na, borong tumrar lagi amar ze ḳoto mohobbot, oḳan zananir lagi-u leḳsi.
2CO 2:5 Amare zudi keu duk dia taḳe, te he ḳali amare nae, tuṛa oile-o tumra hoḳolre-u duk dise.
2CO 2:6 Tumra beshir bag zone milia tare ze shaza diso, ota-u tar lagi zotesṭo.
2CO 2:7 Oḳon tumra tare maf ḳori dilao, tare buz deo, zate beshi duke he ḳator na oy.
2CO 2:8 Erlagi kas ḳori tumrare ḳoiram, tumra zen tare maya ḳoro, ita forman ḳori deḳao.
2CO 2:9 Ami forikka ḳori deḳtam saislam, tumra hoḳol befare baiddo aso ki na, erlagi-u ami tumrar gese leḳsi.
2CO 2:10 Tumra zudi kunu befare ḳeurore maf ḳori dilao, te ami-o tare maf ḳori dei. Ar hasau zudi ami kunta maf ḳoria taki, te al-Mosir samne tumrar lagi-u ḳoriar,
2CO 2:11 zate Shoytane amrare duka dito na fare. Tar ku-motlobor ḳota to amrar ozana nae.
2CO 2:12 Ami Toruas ṭauno al-Mosir befare kush-ḳobri toblig korat gia deḳlam, hono ḳam ḳorar lagi malike amare eḳṭa shuzug kori disoin.
2CO 2:13 Oile amar imandar bai Titasre hono na faoae amar mono kub oshanti asil. Erlagi Toruas ṭaunor manshor ges taki bidae loia Makidoniat gelamgi.
2CO 2:14 Oile amra Allar shukria zanai, tain amrare hamesha al-Mosir bijoyor moha furtir misilor loge salaira. Al-Mosire sina to ek geranor laḳan. Allae tan joy-jatrae ou geran amrar mazdi hoḳol zagat sitrai dein.
2CO 2:15 Zera nazat hasil ḳorra ar zera binash oira, ou duio dolor lagi amra oilam al-Mosir ek geran, ou geranre al-Mosie Allar dorbaro kurbanir laḳan shofia dira.
2CO 2:16 Zera binash oizar, tarar gese amrar geran oilo morar gondo, zar fol oilo nichchit moron. Ar zera nazat hasil ḳorra, tarar gese amra oilam zindegir geran, er fol oilo aḳerator zindegi. I oto boṛo nek kam ḳorar lak kun zon?
2CO 2:17 Nizor labor lagi zela bout zone Allar kalam loia bebsha ḳore, amra to itar laḳan nae. Amra borong Allar faṭail zon hishabe shorol mone al-Mosir name Allare azir-nazir rakia toblig koriar.
2CO 3:1 Tumra kita mono ḳoro, amra ita ḳoia hirbar amrar nizor shunam gaoat lagsi ni? Kunu kunu manshor zela oinnor ges taki sonod neoa lage, amra-o olaḳan tumrar gese ba tumra taki sonod faoa lagbo ni? Na, muṭe-u na.
2CO 3:2 Tumrar nam to amrar dilor maze leḳa ase, tumra-u oilae amrar sonod. Ar ou sonodor ḳota to hoḳole-u zane ar hoḳole-u foṛe.
2CO 3:3 Ikan to forishkar buza zae, al-Mosir leḳa sonod oilae tumra-u, tumra-u amrar menotor fol. I sonod to kunu ḳali-kolom dia leḳa oise na, ḳali Allar Pak Ruhu dia leḳa oise. Ikan to Tur faṛo faoa shoriotor laḳan kunu fattoror ufre leḳa nae, borong manshor dilor maze-u leḳa oise.
2CO 3:4 Ou befare al-Mosir usillae Allar dorbaro amrar furafur nichchoyota ase,
2CO 3:5 ta-o amra ze nizor gune hoḳolta ḳoriltam farmu, ila kunu ḳota nae. I kezmoti gun to ḳali Allar ges taki-u fai.
2CO 3:6 Allar loge milonor noya usillar ḳota zananir lagi, tain-u amrare i kezmoti gun dan ḳorsoin. I usilla to okkore okkore shoriot manar befar nae, borong Pak Ruhur forisalonae dilor iman-akidar befar. Ḳaron okkore mout, ar ruhe zindegi.
2CO 3:7 Fattoror ufre leḳa shorioti ze kezmote moron ae, ou shoriot nazilor shomoy to Allar mohima zair oisil. Ou shomoy Hozrot Musar sehara-o Allar mohimae nurani oigesil. Tan mukor nurani surot zudio aste aste ḳomi zaoa dorsil, tebou Boni Israil oḳole tan sehara bae saoar takkot oise na.
2CO 3:8 Ou shoriotor kezmoti fol zudi oto mohima-ala oy, te Pak Ruhur kezmoti fol ḳoto beshi mohima-ala!
2CO 3:9 Ou ze okkori shoriote manshore dushi shaibosto ḳore, tar kezmoti kam zudi oto mohima-ala oy, te ze kezmote be-ḳosur ḳalas ḳoia goinno ḳore, i kezmot to aro ḳoto beshi mohima-ala!
2CO 3:10 Buzrae ni, age zeta mohima-ala asil, oḳon itar kunu mohima nai koile-u sole, tar tulonae oḳonkur noya kezmotor mohima bout beshi.
2CO 3:11 Ze nuranir tez ḳoma dorsil, ita zebla oto mohima-ala, te zeta siroḳal roibo, ita to aro ḳoto beshi mohima-ala!
2CO 3:12 Amrar mono olaḳan asha ase gotike-u amra kula-kuli mati.
2CO 3:13 Amra to Hozrot Musar laḳan nae, tain forda dia tan muk guria toisla, zate tan mukor ḳomi zaoa nurani surot Boni Israile na deḳoin.
2CO 3:14 Oile tarar dil fashan oigesil. Ar oḳono Tourat Shorifo leḳa, Allar loge milonor hou furana usillar ḳota tilaot ḳorle, tarar dilor maze forda taḳe. Ḳali Isa al-Mosir ufre iman anle ou forda hori zae.
2CO 3:15 Ar oḳon forzonto Hozrot Musar Tourat Shorif tilaot ḳorar shomoy Boni Israil oḳlor dil forda dia gura taḳe.
2CO 3:16 Tarar maze ḳeu zebla malikor ufre iman ane, ou shomoy hou forda hori zae.
2CO 3:17 Ou malik oila Pak Ruhu, ar malikor ruhu zeno ase, ono-u shadinota ase.
2CO 3:18 Aynar samne zela forda saṛa muk shorashori deḳa zae, oula amra hoḳol-u al-Mosir nurani mohima deki deki aro beshi mohima-ala bonia tan laḳan mohima-ala oiram. Amrar Malik Isa, mani Pak Ruhur kudroti bole-u ila or.
2CO 4:1 Ou ḳarone, Allae meherbani koria ou noya kezmoti kamor dayitto amrar ato disoin ḳori, amra nirash oi na.
2CO 4:2 Toblik kamo manshe lukaia zeta behayami koroin, ita amra muṭe-u ḳori na. Amra kunu ḳamo sol-soturi kori na, Allar kalamo bezal mishai na. Borong hok kotare kula-mela ḳoia hoḳol manshor gese ar Allar dorbaro amrare zoiggo hishabe forman ḳori.
2CO 4:3 Amrar kush-ḳobri zudi lukail taḳe, te lannoti fote zera zaira, tarar gese-u lukail taḳe.
2CO 4:4 Ou zogotor devta Iblise o-imandar oḳlor dilre anda banailise, zate tara kush-ḳobrir nur na deḳe. Ou kush-ḳobrir mazdi al-Mosir gourob zair oise, ar ou al-Mosi-u oila Allar obikol surot.
2CO 4:5 Amra to nizor befare toblig korram na, ḳali Isa al-Mosire toblig korram, tain-u malik, tan lagi-u amra tumrar gulam bonchi.
2CO 4:6 Amra ita toblig korram, ḳaron ze Allae ḳoisoin, “Andair taki for ouk,” hou Alla Pake tan nur amrar dilo zalaisoin, zate al-Mosir seharar maze Allar nuror mohima zair oy.
2CO 4:7 Allai ou nuror don to maṭir bashono raḳa oise, ou bashon oilam amra-u. Maṭir bashono raḳa oise, zate manshe buzto fare ou kudroti mohashokti amrar nizor ges taki aise na, borong Allar ges taki-u aise.
2CO 4:8 Hoḳolbae taki amrar ufre bout laḳan saf aile-o, amra surmar oisi na. Amra bedisha lagle-o furafur nirash oisi na.
2CO 4:9 Amrar ufre zulum ḳora oile-o Allae to amrar log saṛsoin na. Maṭit falaia asaṛle-o amra binash oisi na.
2CO 4:10 Hamesha Malik Isar moutor duk-koshṭor nishana amrar shorilo loia guriar, zate amrar shorilor maze tan zindegi-o deḳa zae.
2CO 4:11 Ar amra zoto shomoy basia asi, Malik Isar lagi amrare to hor-hamesha-u moutor ato tuli deoa or, zate ou moutor odin shorilo tan zindegi zair oy.
2CO 4:12 Ou nomunae amrar maze ḳam ḳorer moute, ar tumrar maze ḳam ḳorer zindegie.
2CO 4:13 Fobitro Zobur Shorifo ase, “Ami iman anchi gotike-u ḳoilam.” Ou eḳoi imanor bagi oia amra-o ola ḳoi.
2CO 4:14 Ḳaron amra zani, ze Allae Malik Isare zinda ḳorsla, hou Allae tan loge amrare-o zinda ḳorba, ar amrar loge ḳori tumrare-o tan samne azir ḳorba.
2CO 4:15 Ita hoḳolta tumrar balair lagi-u oise, zate manshor ufre Allar ze rohomot nazil oise, hou rohomotor ḳatire boute aro beshi kori Allar shukria adae ḳore ar Allar gourob oy.
2CO 4:16 Erlagi amra nirash oi na. Zudio amrar roḳto-mangshor shoril koy oizar, tebou amrar ruhu din din taza oia uṭer.
2CO 4:17 Oḳon amra ze ḳoydinor lagi shamainno ḳoshṭo ḳoriar, i koshṭor bodla amra siroḳalor lagi ofuronto shan-mohima lab ḳormu.
2CO 4:18 Soukdi zeta deḳa zae, amra to itar bae sairam na, borong zeta deḳa zae na, otar bae sairam. Souke zeta deḳa zae, ita to tuṛa ḳoydinor, oile zeta deḳa zae na, ita siroḳalor.
2CO 5:1 Amra zani, amra i duniabi ze ḍera-goro boshot ḳori, mani ze ḳomzur shoril loia asi, ikan zudi binash-o oizae, tebou Allar deoa ekkan gor amrar ase. I gor kunu manshor ator banail nae, ikan to hamesha behesto ase.
2CO 5:2 Ou ḍera-goro boshot ḳora halote amra lamba ḳori dom falaiar ar dile-zane asha ḳoriar, zate behesti hou noya goror maze amrare gura oy.
2CO 5:3 Ta-o ḳota oilo, ou ḍera-gor bangar bade amrare zanu lemṭa deḳa na zae.
2CO 5:4 Ou ḍera-goro roia bar-buza boite boite amra ahazari koriar. Erbade-o amra roḳto-mangshor i ḍera-gor saṛtam sai na, ta-o bala goror lagi bar sairam, zate oḳonkur ou moutor odin ḍera-gor falaia, siroḳal zinda taḳar zuka gor fai.
2CO 5:5 Otar lagi-u Allae amrare zuit ḳorsoin ar itar baenama hishabe amrare Pak Ruhu dan ḳorsoin.
2CO 5:6 Erdae amrar shaoshor kunu ḳomti nai. Amra to buzilisi, zotodin ou roḳto-mangshor shoril loia boshot ḳormu, otodin amra malikor ges taki horail roimu.
2CO 5:7 Amra to sokur deḳa kuntar boroshae soli na, ḳali imanor bole-u soli.
2CO 5:8 Ashole amrar bitor bora shaosh ase, ar amra roḳto-mangshor shorilo roa taki malikor loge boshot ḳoraḳan-u bala mono ḳori.
2CO 5:9 Erlagi amra shorilor maze taki ba na taki, amrar niot oilo malikre kushi kora.
2CO 5:10 Ḳaron al-Mosir adaloto amra hoḳole-u ubani lagbo, zate duniabi ou shorile amra zoto nomunar bad-bala ḳam ḳorsi, ou ḳamor bodla fai.
2CO 5:11 Amra to Alla Pakre ḍoraia soli, erlagi manshore buzanir sesṭa ḳorram. Amrar befar to Allar dorbaro forishkar, asha ḳori tumrar gese-o ola forishkar asi.
2CO 5:12 Ikan ḳoia amra hirbar nizor tarif gairam na, borong amrare loia tumrar boṛair ḳaron zanairam. Te zeta manshe bitor na dekia, ḳali manshor bar gala loia boṛai kore, tumra tarare eḳṭa zuaf ditae faro.
2CO 5:13 Amra zudi fagol oi, te Allar fagol oisi, ar zudi mata bala taḳe, te tumrar lagi-u bala ase.
2CO 5:14 Al-Mosir mohobbote amrare fush manaia salae. Amra nichchit buzchi, hoḳlor torof taki eḳzonor mout oisil, erlagi hoḳlor-u mout oise.
2CO 5:15 Tain hoḳlor lagi mara gesla, zate zera zinda asoin, tara zanu ar nizor lagi na basoin. Borong tarar lagi zein mara gesla ar hirbar zinda oisla, tan lagi-u tara basoin.
2CO 5:16 Erlagi oḳon taki amra ar manshor bairor surot dekia bisar ḳori na. Amra to age al-Mosire olaḳan mono ḳorslam, oile oḳon ar ila ḳori na.
2CO 5:17 Ḳeu zudi al-Mosir torika kobul ḳore, te he noya foyda oilo. Tar furan hoḳolta fusia hari ekkere noya bonigelo.
2CO 5:18 Ita to Alla taki-u oy. Tain al-Mosir usillae tan loge amrar milon goṭaisoin, ar amrare ou kezmotor dayitto disoin, bad-baki hoḳol manshore tan loge milai ditam.
2CO 5:19 Er mani oilo, Allae manshor gunar bae na saia, al-Mosir usillae tan loge manshor milon goṭaisoin. Ar ou milonor kush-ḳobri tobligor dayitto amrare disoin.
2CO 5:20 Erlagi-u amra al-Mosir naib hishabe tan fokke matiram. Ashole Allae-u amrar mazdi manshore minoti korra. Ar al-Mosir fokke amra-o minot ḳorram, tumra Allar loge milito o.
2CO 5:21 Hozrot Isa al-Mosie to kunu guna-naformani korsoin na. Oile amra hoḳlor gunar shaza Allae tan ḳando tuli dila, zate tan ufre iman anar mazdi Allai fobitrotae amra forezgar hishabe kobul oi.
2CO 6:1 Allar ḳadim hishabe amra ou minot ḳoriar, tumra zebla Allar rohomot faiso, te ikṭare bifol oite dio na.
2CO 6:2 Pak Kalamo Allae bataisoin, Ami shoṭik shomoye tumar arzi hunchi, nazat faoar din tumare shaijjo ḳorsi. Huno, oḳon-u shoṭik shomoy, oḳon-u nazat faoar din.
2CO 6:3 Al-Mosir name amra ze toblig kori, ou tobligor bodnam na oar lagi amra ila kunu ḳam ḳori na, ze ḳame manshor mono bada ae.
2CO 6:4 Borong hoḳol befare amra forman deḳairam, amra Allar kezmotḳari. Bout duk-koshṭo, zulum-mosibot, ar bifod-afod shoijjo ḳoria itar forman diram.
2CO 6:5 Amrare bout bar mair-doir ḳora oise, bout bar zelo harani oise, bout danga-hangama amrar ufredi gese, bout menot ḳorsi, na gumaia rait ḳaṭaisi ar ufash-ḳafash roisi.
2CO 6:6 Ita saṛa amrar fak-forezgar zindegi, aḳol-buddi, soborgari, doya-maya, dilor Pak Ruhu, ḳaṭi mohobbot,
2CO 6:7 hok kota ḳoa ar Allar kudroti bol, duio ate forezgarir atiar bebohar ḳoriar.
2CO 6:8 Manshe amrare dam deuk ba na deuk, amrar shunam gauk ba bodnam gauk, itae amrar zae ae na. Manshe ḳoira, amra bule ṭog, ashole to amra hok fote soli.
2CO 6:9 Manshe ḳoin, amrare sinoin na, tebou hoḳole amrare sine. Amra morar laḳ oigele-o basia asi. Amrare mair-doir ḳora or, oile zane mara or na.
2CO 6:10 Bout dukor maze-o amra hamesha kushi-bashi asi. Amra nize gorib oia-o boutre doni banaisi. Amrar to kunta-u nai, tebou hokkoltar malik. Ou laḳan amra forman ḳorsi, amra Allar kezmotḳari.
2CO 6:11 O Korint zomator mumin bai oḳol, tumrar gese to kula-mela-u matisi, tumrar lagi amrar mon uzaṛ ḳori disi.
2CO 6:12 Amrar dil tumrar lagi kulia raḳsi, oile tumrar dil amrar lagi bond ḳori toiso.
2CO 6:13 Te amar aolad hishabe tumrare ḳoiram, amra zela tumrar lagi dil kulia raḳsi, tumra-o ola amrar lagi tumrar dilḳan kulia deo.
2CO 6:14 Tumra bidormi manshor loge ḳeshi-kuṭumita ḳorio na. Forezgaror loge naformanor mil kuai? Allar nuror loge andarir kunu ḳatir ase ni?
2CO 6:15 Iblisor loge al-Mosir kunu ḳatir ase ni? Muminor loge bidormi shorik oibo kila?
2CO 6:16 Zano to, Pak Kalamo Allae ḳoira, Ami tarar bitre boshot ḳormu, tarar loge-u sola-fira ḳormu. Ami oimu tarar Alla, tara oiba amar proza. Te amra-u oilam zinda Allar boshot ḳana. Allar Kaba goror bitre murtir kunu zaga ase ni?
2CO 6:17 Pak Kalamo aro bataisoin, Erlagi tumra bidormir ges taki horo, tarar ges taki alog ro, nafak kunu zinish soio na, teu ami tumrare kobul ḳormu.
2CO 6:18 Ami oimu tumrar gaibi baf, tumra oibae amar aolad, ikan ami Alla Rabbul Alamine ḳoiram.
2CO 7:1 O mayar bai oḳol, ou oada oḳol to amrar lagi-u ḳora oise, te ao amra shorilor ar dilor nafaki dur ḳoria nizore fak-saf ḳori, ar Allar ḍor-ḳofe furafur fak-fobitro zindegir fote soli.
2CO 7:2 Bai oḳol, amra to kunu manshor loge oinnae ḳorsi na, ḳeuror ḳeti-o ḳorsi na ar ḳeurore ṭogaisi-o na. Erlagi amrare tumrar dilor maze ṭai deo.
2CO 7:3 Tumrare dushibar lagi ikan ḳoiram na. Ami age-u ḳoisi, tumra to amrar zanor zan ḳoiljar ṭukra, amra morle-o eḳloge mormu, basle-o eḳloge basmu.
2CO 7:4 Tumrar ufre ami kub borosha ḳori, tumrare loia boṛai kori. Erlagi oto duḳ-mosibotor maze roia-o amar zano shanti asil, amar mon kushi-bashie bora.
2CO 7:5 Huno, ou Makidoniat aia-o amrar shorilo kunu shuk faisi na, hoḳolbae taki-u amra ḳoshṭo faisi, baire asil gonḍogul ar zanor bitre asil ḍor-ḳof.
2CO 7:6 Oile Alla Pak, zein duki zonre buz dein, tain amrare buz dibar lagi Titas baire ono anaila.
2CO 7:7 Ḳali ikan nae, Titas baie tumrar ges taki ze buz faisla, ou buze tain amrare-o buz dila. Tain tumrar monor eshki, tumrar ḳanda-ḳaṭir ḳota zanaila, amar befare tumra bule kub agrohi. Ou hoḳolta hunia ami kub kushi oisi.
2CO 7:8 Baiainre, amar agor siṭir maze zudio tumrare duk dislam, tebou amar mono kunu ḳoshṭo nai. Ami zebla buzlam, ou siṭie tumrar monor maze tuṛa ḳoydin duk dise, ou shomoy ami-o kisu duk faislam,
2CO 7:9 oile oḳon ami kushi. Tumrare duk deoae kushi oisi na, borong duk faia tumra touba ḳorso dekia kushi oisi. Ou duk faislae tumra Allar morzie, zate amrar dara tumrar kunu ḳeti na oy.
2CO 7:10 Allar deoa monor ḳoshṭoe manshe touba ḳoroin, ar zan basain. Te ou ḳoshṭoe to duk nai. Oile duniabi monor ḳoshṭoe manshor moron ane.
2CO 7:11 Tumra buzrae ni, Allar deoa monor ḳoshṭoe tumrar ḳoto balai korse, tumrare naformani taki basaise, gunar bae tumrar ginna zonmaise, mone mone ḳoto ḍor ḍoraiso, Allar bae ḳoto aguaiso, naformani kamor bisar ḳorso. Ou befare tumra hoḳol monte-u forman diso, tumra nikut.
2CO 7:12 Ami zudio ou siṭi leḳsilam, oile ze manshe oinnae ḳorse ba zar ufre oinnae ḳora oise tar lagi nae, borong Allar dorbaro zate tumrar ou halotḳan zair oy zen, tumra hasau amrare mohobbot ḳoro, otar lagi-u leḳsi.
2CO 7:13 Erlagi amra buz-o faisi. Ou buz faia ar bai Titasor kushi dekia amra aro beshi kushi oisi, ḳaron tumra hoḳlor ges taki tain kub aram faisoin.
2CO 7:14 Ashole ami tumrare loia tan gese boṛai korslam, ete kunu shorminda-o oisi na. Tumrar gese amrar batail hoḳol ḳota zela hasa asil, oula tumrare loia amrar boṛai koraḳan-o tan gese hasa forman oise.
2CO 7:15 Tumra hoḳole zela tan nosiot mancho, monor ḍor-ḳofe ḳafi kafi tanre kobul ḳorso, oḳan mono oae tumrar bae tan maya kub beshi baṛise.
2CO 7:16 Ar ami-o kub kushi, tumrar ufre ami oḳon furafur borosha ḳortam fari.
2CO 8:1 Bai oḳol, ami tumrare zanairam Makidonia deshor zomat oḳole Allar ges taki koto niamot faisoin.
2CO 8:2 Zudio bout duḳ-mosibot dia tarare forikka ḳora oisil, tara kub gorib halote asla, tebou tarar monor maze bout furti asil, tara kula ate Allar name dan-ḳoyrat ḳorsoin.
2CO 8:3 Ami tarar fokke ḳoiram, tara kushi oia nizor tofik mafik, emonki tofik taki aro beshi-o dan ḳorsoin.
2CO 8:4 Ar kub kiali oia amrare minot ḳorsila, zate Allar ze bonda oḳol obabor maze asoin, erare obab taki basanir lagi tara shorik oita faroin.
2CO 8:5 Amra zotoḳan asha ḳorslam, tara er saite-o beshi dan ḳorsoin. Ḳali ikan nae, tara foyla nizore Malik Isar ato shofisoin, bade Allar morzie amrar gese-o shofa oisoin.
2CO 8:6 Ita dekia amra Titas baire kub minot ḳorslam, dan-ḳoyrat ḳorar ze ḳam tain tumrar maze salu ḳorsoin, ita zanu shesh-o ḳoroin.
2CO 8:7 Tumra zela hoḳol befare-u aguail aso, tumrar shobol iman, ḳota-barta, aḳol-hekmot, monor eshki, ar amrar bae zela kub maya-mohobbot ase, ṭik ou laḳan dan-ḳoyrat ḳorar nek amol-o zanu tumrar maze baia foṛe.
2CO 8:8 Ita lekia ami tumrare kunu hukum diram na, ḳali forikka ḳori deḳram, erlagi oinno mumin oḳlor nek kamor eshkir ḳota zanairam. Deki, tumrar mohobbot ḳotoḳan nikut.
2CO 8:9 Amrar Malik Isa al-Mosir rohom-niamotor ḳota to tumra zano-u, tain to Allai done doni asla, oile tumrar lagi gorib bonla, zate tain gorib bonar ḳarone tumra doni oitae faro.
2CO 8:10 Te ami tumrare foramish diram, ita manle tumrar balai oibo, tumra kub kushi oia goto bosor dan-ḳoyrat tulat lagsilae,
2CO 8:11 oḳon ou ḳam shesh ḳoro. Monor ze eshki loia tumra i kam shuru ḳorsilae, oula eshkie zarzir tofik mafik dan-ḳoyrat dia ita shesh ḳoro.
2CO 8:12 Dan-ḳoyrat dibar niot ḳorle, Allae to niot mafik kobul ḳoroin, te tofik taḳle deo, na taḳle nai.
2CO 8:13 Baiainre, ami sairam na, oinno manshe aram ḳorouk ar tumra ḳoshṭo ḳoro, borong tumra hoḳlor halot eḳlaḳan ouk, oḳan-u asha ḳorram.
2CO 8:14 Tumrar zeta don-doulot oḳon baṛti ase, otae tarar obab miṭauk, ar tarar zebla beshi oibo, ou shomoy tara-o tumrar obab miṭaiba. Olaḳan hoḳlor halot eḳoi laḳan ouk.
2CO 8:15 Zela Tourat Shorifo ase, “Zein beshi tukaisla tan-o beshi oise na, ar zein tuṛa tukaisla tan-o ḳom oise na.”
2CO 8:16 Huno, ami Allar shukria adae ḳori, amar monor maze tumrar bae zela kial ase, Allae ou eḳoi laḳan kial dan ḳorsoin bai Titasor maze-o.
2CO 8:17 Tain amrar onurud mania tumrar gese zaira, ar asol ḳota oilo tain nize-u kushi oia zaira.
2CO 8:18 Tan loge ḳori amra hou baire-o faṭaiar, kush-ḳobri tobligor lagi hoḳol zomate-u i bair tarif ḳoroin.
2CO 8:19 Zomator manshe ḳali tan tarif ḳorse na, amrar loge oia dan-ḳoyrat loia zaibar lagi tara-u tanre fosond ḳorse. Te Malik Isar gourobor lagi, ar oinno mumin oḳolre shaijjo ḳorar lagi, amra ou dan-ḳoyrat nibar bebosta ḳorsi.
2CO 8:20 Amra kub hushiar oia soliar, zate boṛo aḳaror ou rilif bilanir bade ḳeu amrar bodnam ḳorar shuzug na fae.
2CO 8:21 Mono rakio, amra ḳali Malik Isar gese nae, manshor samne-o hok-halali roar sesṭa ḳoriar.
2CO 8:22 Ar erar loge ḳori amra aroḳ baire faṭairam, enre amra bout bar bout laḳan forikka ḳoria deḳsi, tan kub eshki ase. Oḳon deḳram, tain tumrare kub bishash ḳoroin, erlagi tumrar bae tan eshki aro baṛise.
2CO 8:23 Oḳon Titas bair befare ami koiram, ein to amar loge roin, ar tumrar lagi kam ḳoroin. Bad-baki hoḳol baiaintor befare ḳoiram, hoḳol zomator manshe fosond ḳoria tarare faṭaira, tarar mazdi al-Mosir gourob oy.
2CO 8:24 Erlagi koiram, tumrar bitoror mohobbot, ar tumrare loia amra ze boṛai-beṭagiri deḳai, itar forman deḳaio. Teu hoḳol zomator manshe buzba, tumra ḳe.
2CO 9:1 Baiainre, Allar pak bonda oḳolre shaijjor lagi dan-ḳoyrat tular ze ḳam soler, ita befare to tumrare kunta leḳar zorur nae.
2CO 9:2 Ou befare tumrar monor kial to amar zana ase. Makidoniar manshor gese ami tumrar shunam gaia ḳoiram, Gris deshor manush mani tumra, goto bosor taki-u dan-ḳoyrat loia zuit aso. Tumrar i eshki dekia, Makidoniar bout manush hozag oisoin.
2CO 9:3 Erlagi ami ou baiainre faṭairam, zate tumrare loia amra ze boṛai deḳai, tara gia nizor souke ita dekia forman fain. Te ami zela boṛai korsi tumra-o olaḳan zuit roio.
2CO 9:4 Arnae amar loge oia Makidoniar kunu baiain gia zudi deḳoin tumra zuit nae, te tumrar ufre oto boṛo borosha ḳorae, amra shorom faimu ar tumra-o shorminda oibae.
2CO 9:5 Erlagi ou mumin oḳolre onurud ḳorlam, tara zanu amar age tumrar gese zain. Rilif ḳamor lagi dan-ḳoyrat dibar ze oada ḳorsilae, tara gia oguin zuit ḳorat shaijjo ḳorba. Te tumrar ges taki zur-zobordosti koria kunta adae ḳora oito nae, ḳali monor kushie deoa dan-ḳoyrat neoa oibo.
2CO 9:6 Kial rakio, ze giroste tuṛa ḳori zala bain dey, he tuṛa foshol daibo, ar ze giroste besh ḳori zala bain dey, he besh ḳori foshol daibo.
2CO 9:7 Te tumra-o ola forteḳe zarzir niot mafik dan-ḳoyrat deo. Monor maze ḳoshṭo loia ba deoa lagbo ḳori dio na. Ḳaron dilor kushie dan ḳorle, Allae maya ḳoroin.
2CO 9:8 Allae tumrare hoḳol laḳan rohom-borkot dita faroin. I ḳemota tan ase, zate tumrar dorḳari hoḳolta hamesha tumrar gese taḳe, ar nek kamor lagi kula ate ita bilaitae faro.
2CO 9:9 Zela Fobitro Zobur Shorifo ase, He to kula ate bilai dise, gorib oḳolre dan ḳorse, tar forezgari siroḳal stayi.
2CO 9:10 Mono rakio, girostor lagi zein bis zugaia dein, ar ḳaibar lagi zein dana-fani zugaia dein, tain tumrare-o bis zugai diba, itat borkot diba, tumrar nek kamor foshol bout baṛai diba.
2CO 9:11 Ou laḳan tumra hoḳolmonte doni oibae, ar kula ate dan-ḳoyrat bilaibae, teu amrar mazdi Allar shukur-guzar adae oibo.
2CO 9:12 Ou rilif ḳame ḳali Allar bonda oḳlor obabo shaijjo oito nae, borong bout zonor torof taki Allar shukur-guzar-o baia foṛer.
2CO 9:13 Tumra al-Mosir kush-ḳobrir ufozukto ou kezmot ḳorso dekia, tara Allar shukur-guzar adae ḳorba. Tumra duio ate dan-ḳoyrat bilanie, Makidoniar manshe ar baki hoḳole-u Allar gourob ḳorba.
2CO 9:14 Tumra dan-ḳoyrat deoae Allar ges taki ou ze asanoḳ niamot faiso, ota dekia tara tumrar lagi dile-zane dua ḳorba.
2CO 9:15 Allar ze danor ḳota mukdi koia fuṛanir shaiddo nai, hou danor lagi tan tarif ouk.
2CO 10:1 O mumin baiain, al-Mosir norom ar doyalu babor ḳota iad ḳoria, ami Pauluse tumrare minot ḳoriar, manshe ḳoin, ami zebla tumrar loge roi, ou shomoy ami bule ḍorai ḍorai taki, ar horia gia harle shaoshi oizai.
2CO 10:2 Te zera mono ḳore, amra duniabi manshor laḳan zindegi kaṭaiar, tarar loge zotoḳan shaosh deḳani dorḳar, ami sairam, ami aoar bade zanu otoḳan shaosh deḳani na lage.
2CO 10:3 Amra zudio roḳto-mangshor manush, oile amra ze laṛai korram, ita to kunu roḳto-mangshor laṛai nae.
2CO 10:4 Duniabi sifaie zeta ostro-shostro dia laṛai koroin, amra to ita dia laṛai kori na, Allai bole amrar ostro-shostroe faṛor ufror bankar-o bangilto fare.
2CO 10:5 Amrar ostrodi manshor banoaṭ zukti binash ḳori, ar Allare sinar fote zoto laḳan bada-bignoe dilre aṭḳaia raḳe, itare-o binash ḳori. Manshor monor hoḳol ku-sintare ḳedaia hari al-Mosir tole ani.
2CO 10:6 Te tumra zebla shullo-ana baiddo oia tan tole aibae, hou shomoy zeta obaiddo roiba, itare shaza dibar lagi amra zuit oimu.
2CO 10:7 Tumra to ḳali amrar bairor surot deḳso. Kunu manshe zudi nizore al-Mosir ummot mono ḳore, te tar sinta ḳora zorur, he zan ummot, amra-o to tan ummot.
2CO 10:8 Ashole Malik Isae amrare ze odikar disoin, i befare ami kisu boṛai deḳaile-o to shorminda oitam nae. Ḳaron i odikaror uddesho oilo, tumrare goṛia tula, kunu ḳeti kora nae.
2CO 10:9 Amar i leḳa foṛia mono ḳorio na, ami siṭi dia tumrare ḍor deḳairam.
2CO 10:10 Kunu kunu manshe matoin, “Tan leḳa siṭinte dilo ḍekka mare, ita shoktishali siṭi, oile tain ḳandat aile deḳa zae, tain ḳomzur ar oaz-nosiot-o muṭe-u gorom nae.”
2CO 10:11 Ota manshore zananir lagi koiram, amra duroi taki siṭir mazdi zeta leḳram, samne aile ṭik ola-u ḳormu.
2CO 10:12 Tumrar mazor kunu kunu zone tar nizor tarif gae. Tarar loge to amrar tulona sole na, ba tarar dolor shodoishsho oite-o shaosh ḳori na. Tara to nize nize zeta bala mono ḳoroin, otar loge-u tarar tulona ḳoroin, otadi-u bisar ḳoroin, buzrae ni, ita ḳoto boṛo ammok!
2CO 10:13 Huno, amrar zotoḳan boṛai kora usit, er beshi kortam nae, borong Allae amrar ḳamor ze shimana ṭik kori disoin, amra er bitre roia-u boṛai kormu, i shimanar bitre tumra-o aso.
2CO 10:14 Erlagi amra zebla tumrar gese geslam, ou shomoy shimar bara to gesi na. Tumrar gese to hoḳol foyla amra-u al-Mosir kush-ḳobri toblig korat geslam.
2CO 10:15 Esaṛa foror ḳam loia amra gourob ḳoriar na, ita ḳorle shimar bara oilo one. Amra asha ḳoriar, tumrar imani bol baṛar loge loge tumrar maze aro bout ḳam ḳortam farmu.
2CO 10:16 Hou shomoy tumrar ges taki aro duror deshainto gia kush-ḳobri toblig kortam farmu. Teu kunu manshe ḳoito farto nae, foror ḳam loia amra boṛai koriar.
2CO 10:17 Oile Allar kalamo ase, “Ze manshe boṛai kore, he Malik Moulare loia boṛai korouk.”
2CO 10:18 Ḳaron nizor shunam nize gaile-u forman oy na he bala manush, borong Malik Moulae zar shunam gain, he-u bala hishabe forman oy.
2CO 11:1 O mumin bai oḳol, ami sairam, amar tuṛa be-aḳoli tumra shoijjo ḳoro, ar hasau tumra amare shoijjo ḳorrae-o.
2CO 11:2 Allai eshkir zalae amar dilo tumrar lagi eḳ zala foyda oise. Te ami eḳzon noshar loge tumrar biar mat-ḳota ṭik kori raḳsi, en nam al-Mosi. Ami sairam, shoti koina hishabe tumrare tan ato shomzai ditam.
2CO 11:3 Oile ami ḍoraiar, hou hafe zela ku-buddi dia Bibi Haoare be-fote nisilgi, olaḳan tumrare-o al-Mosir ges taki horailito fare, he tumrar dilor ḳaṭi bab ar monor nishana alailibo.
2CO 11:4 Ḳaron amra ze Isar befare toblig korsi, oinno zone zebla tanre saṛa dusra kunu Isar ḳota toblig kore, tumra ita manrae. Ar tumra ze Pak Ruhu faiso, ou Pak Ruhu saṛa dusra kunu ruhu faile, ba ze kush-ḳobri tumra manrae, i kush-ḳobri saṛa dusra kunu kush-ḳobri hunle, kub kushi oia-u manilirae.
2CO 11:5 Oile ami mono ḳori na, hou nam-ḍaki sahabi dol taki ami kunumonte-u huru.
2CO 11:6 Ami zudio kub miṭa miṭa shure oaz ḳortam fari na, tebou amar to aḳol-buddir ḳomti nae, ita to ami hoḳol nomunae hoḳol halote tumrare deḳaisi.
2CO 11:7 Tumrar unnoti deḳanir lagi ami bina betone Allar deoa kush-ḳobri toblig koria nizore nisa ḳorsi, ita kunu faf ḳorsi ni?
2CO 11:8 Tumrar kezmotor lagi ami oinno zomat oḳlor ges taki shaijjo anchi, ḳoite gele tarare luṭia anchi.
2CO 11:9 Tumrar gese roar ḳalo ami zebla obabo foṛlam, hou shomoy-o ami keuror buza oisi na. Ḳaron Makidonia taki zeta baiain aisla, tara amare shaijjo ḳorsoin. Te kunu halote-u ami tumrar buza oisi na, oitam-o nae.
2CO 11:10 Al-Mosir ze hokikoti amar bitre ase ou hokor bole-u ami koiram, asta Gris deshor kunu zagat-u amar i beṭagiri keu bond ḳorto farto nae.
2CO 11:11 Ami ila matar ḳaron kita? Ami tumrare maya ḳori na ni? Eḳ Allae-u zanoin, ami tumrare ḳoto maya ḳori.
2CO 11:12 Nizor boṛai-beṭagiri deḳaia zeguin amrar homani oita sain, itae zanu i shuzug na fain, otar lagi ami zeḳan ḳorat asi, ikan ḳorat roimu-u.
2CO 11:13 Ashole to ita oila bonḍo sahabi ar ṭog kamlain. Tara nizore al-Mosir sahabi deḳaito ḳori nizor surot bodlilae.
2CO 11:14 Ete taijjub oar kunta nae, Iblise-o to nizore nuror firista deḳanir lagi tar surot bodlae.
2CO 11:15 Erlagi zeguinte Iblisor kezmot ḳoroin, tara-o zudi nizor surot bodlaia deḳain tara nek kam ḳorra, te taijjub oar kita ase? Tarar ḳamor fol tara aḳerato faibo.
2CO 11:16 Ami aroḳbar ḳoiram, amare zanu ḳeu fagol mono na ḳore. Ar zudi ila mono ḳorilao, te amare eḳ fagol hishabe-u shomzilao, zate ami-o tuṛa boṛai korar shuzug fai.
2CO 11:17 Ami oḳon zeta ḳoiram, ita Malik Isar hukume ḳoiram na, ḳali nizor boṛai deḳanit gia faglami korram.
2CO 11:18 Bout zone zebla duniabi bishoy loia boṛai deḳaira, te ami kene deḳaitam na?
2CO 11:19 Tumra to beshi aḳoldar, erlagi be-aḳol oḳolre kush dile shoijjo ḳoro.
2CO 11:20 Ḳali ikan nae, ḳeu zudi tumrare nizor gulam banaia raḳe, tumrare tar shikar banailae, fando falae, tumrar ufre ustadi kore ba tumrar galo soṛ mare, ta-o to tumra kushi oia shoijjo ḳorrae.
2CO 11:21 Oile ami kub shorminda oia shikar ḳoriar, ita befare tumrar gese amra boṛo ḳomzur aslam, ila netagiri kortam farsi na. Oinno manshe zeta loia boṛai korar shaosh fae, amar-o shaosh ase ita befare boṛai deḳanir, ami kali faglor laḳan ita matiram.
2CO 11:22 Zetae boṛai-beṭagiri deḳain, tara kita Ibrani zatir ni? Ami-o to tarar laḳan. Tara Boni Israil zatir ni? Ami-o ola. Tara Hozrot Ibrahimor aolad ni? Ami-o to.
2CO 11:23 Tara al-Mosir kezmotḳari ni? Ami aro boṛo kezmotḳari. Mono rakio, ami faglor laḳan matiram. Ami al-Mosir kezmoto lagia tara taki bout beshi menot ḳorsi. Bout bar zel ḳaṭsi, bout bar mair-doir ḳaisi, ar bout bar moutor mukabila oisi.
2CO 11:24 Ihudi oḳole amare fasbar durra marsoin, forteḳ bar unusallishṭa ḳori durra ḳaisi.
2CO 11:25 Tinbar amare singladi mara oise. Eḳbar amare fattor mara oise. Tinbar amar zaz ḍubi gesil, ar eḳ din eḳ rait doriar fanit bashail aslam.
2CO 11:26 Ami bout desh sofor ḳorsi. Ban-fanir ato, sur-ḍaḳaitor ato, nizor zatir ato ar bin zatir ato ami mosiboto foṛsi. Esaṛa ṭauno, morubumit, doriat, ar bonḍo mumin oḳlor ato-o ami mosiboto foṛsi.
2CO 11:27 Ou duḳ-mosibotor maze-o zane-forane menot ḳorsi, bout rait uzagori korsi, ḳani-fanir lagi koshṭo faisi, bout ufash-ḳafash roisi, shit ar ḳafoṛ-sufoṛor obabe-o ḳoshṭo faisi.
2CO 11:28 Ita saṛa-o al-Mosir zomat oḳlor lagi ami forteḳ din sinta ḳori.
2CO 11:29 Ḳeu ḳomzur oile ami nize-o tar ḳomzurir bagi oi na ni? Kunu ku-shongir talo foṛia ḳeu gunar fote gelegi, ami oshanti kori na ni?
2CO 11:30 Ami zudi boṛai deḳaitam sai, te ou ḳomzuri loia-u boṛai kormu.
2CO 11:31 Amrar Alla Pak ar Malik Isa al-Mosir gaibi baf, zein hamesha gourob faoar laḳ, tain nize-u zanoin, ami kunta-u misa matram na.
2CO 11:32 Dameskor bashsha Aritar hakim sabe amare dorar lagi Damesk ṭauno fara deoar hukum disla.
2CO 11:33 Oile ṭaunor baunḍorir oalor maze ze kiṛki asil, mumin baiainte eḳ ṭukrit ḳori ou kiṛki baedi amare maṭit lamai disla, ou nomunae ami tan at taki bagisi.
2CO 12:1 Te amar aro kisu boṛai kora dorḳar, i boṛaie kunu fayda nai, oile Malik Isae ze doroshon deḳaisoin ar zeta zanaisoin, ita oḳon ḳoiram.
2CO 12:2 Hozrot Isar eḳzon ḳadimre ami sini, oḳon taki souddo bosor age meraz shorifor lagi tanre behesto tulia neoa oisil. Tain zannatul-ferdouso gela, i shomoy tain sho-shorile gesoin ki na zani na, ḳali Allae-u zanoin.
2CO 12:3 Te enre ami sini, oile tane sho-shorile neoa oise ki na ami zani na, ḳali Alla Pake zanoin.
2CO 12:4 Meraz Shorifo nia harle tan loge bout batchit ḳora oise, ita batchit manshore hunani ṭik nae.
2CO 12:5 Oula manshore loia ami boṛai kormu. Amar nizore loia kunu boṛai nae, ḳali amar ḳomzurir lagi boṛai kormu.
2CO 12:6 Ou boṛai deḳaite saile-o, ami kunu be-aḳoli kortam nae, ḳali hasa mat matimu. Ta-o ami boṛai deḳani bad dilailam, kizanu amar ḳam-ḳaz dekia ba amar mukor zobanbondi hunia, manshe oḳon amare zotoḳan mono ḳoroin, er saite beshi mono ḳorilain.
2CO 12:7 Allae amare oto batuni befar zananie amar dilo zanu ohonkar na ae, ou niote tain amar shorilo eḳṭa rifu dila, amare ḳoshṭo dibar lagi, ou rifu oilo Iblisor sela.
2CO 12:8 Malik Isar dorbaro ami tinbar aroz ḳorslam, ou rifugu amar ges taki horaia nitagi.
2CO 12:9 Oile tain zuaf dila, “Amar rohomot-u tumar boutta, amar bol-shokti mile ḳali komzur halote.” Erlagi amar ḳomzurir befare ami kushi mone-u boṛai kormu, zate al-Mosir ou bol-shokti amar maze boshot ḳore.
2CO 12:10 Te al-Mosir namor lagi nanan laḳan ḳomzuri, beijjoti, obab-onoṭon, zulum-mosibot, ar befanat foṛle-o ami kushi oi. Ḳaron ḳomzur halote-u ami boloban oi.
2CO 12:11 Ami fagol oisi ṭik-u, oile tumra-u amare fagol oite baiddo ḳorso. Tumrar usit asil amar tarif ḳora. Ami zudio kub shadaron manush, tebou tumrar hou nam-ḍaki sahabi dol taki kunumonte-u huru nae.
2CO 12:12 Ami nizore eḳzon hok sahabi hishabe forman ḳorsi, bout shoijjo ḳoria tumrar maze nanan nomunar keramoti kam, kudroti nishana ar muzeza deḳaisi.
2CO 12:13 Aichcha ḳo sain, oinno zomat oḳol taki tumra kunumonte huru ni? Oy, ḳali eḳṭa befare huru aso, ita oilo, ami tumrar gese buza oisi na. I bulor lagi amare mafi deo.
2CO 12:14 Huno, ami tumrar gese zaoar lagi ou tin nombor bar zuit oilam, te ami kunu buza oitam nae, tumrar gese kunu don-samana sairam na, ḳali tumrare sairam. Ma-bafor lagi don-samana zomani to aolador forz nae, borong ma-bafor usit oilo aolador lagi don zomani.
2CO 12:15 Te ami kub kushi oia-u tumrar lagi amar hoḳolta ḳoros ḳormu, amar nizore-o bilai dimu. Ami zebla tumrare besh ḳori maya-mohobbot ḳoriar, te tumra ḳene amare ḳom maya ḳorrae?
2CO 12:16 Zai ouk, ami tumrar ufre buza oisi na, arnae ḳeu ḳoilito fare, ami salaki koria tumrare duka disi.
2CO 12:17 Ar tumrar gese ami zerare faṭaislam, eraredi tumrare ṭogaisi ni?
2CO 12:18 Titas baire ami minot ḳorlam tumrar gese zaoar lagi, tan loge hou baire-o faṭailam. Te ou Titase tumrare ṭogisoin ni? Ami ar Titas, amra duiozone to eḳoi ruhe ar eḳoi niote ḳam ḳori.
2CO 12:19 Aichcha, tumra mono ḳorrae ni, ou siṭi lekia amra nizor dush ḳaṭairam? Na, ikan ṭik nae, O dust oḳol, amra al-Mosir ḳadim hishabe Alla Pakre azir-nazir rakia leḳram, tumrare goṛia tular niote-u ita ḳoiram.
2CO 12:20 Ashole amar kub ḍor ḳorer, ami zebla tumrar gese aimu, aia hari tumrare zela deḳtam sairam, tumra zudi ilaḳan zuit na o, ar tumra-o amar ze ruf deḳtae sao na, ami zudi hou ruf deḳani lage. Ba aia deki tumrar maze ḳaijja-fosad, ingsha-ninda, rag-gusa, doladoli, foror bodnam gaoa, gibot gaoa, boṛai-beṭagiri ar gulmal ase.
2CO 12:21 Amar bitre ḍor ḳorer, ami aroḳbar zebla tumrar gese aimu, ou shomoy amar Allae ni tumrar samne amare shorminda banailain, zeta manshe guna ḳorsoin, zetae nafaki kam, zina, ar bodmaishi koria touba ḳorse na, otare dekia ni ami monor maze ḳoshṭo fai.
2CO 13:1 Baiainre, ami ou tin nombor bar tumrar gese airam. Zano to, Allar kalamo ase, “Dui ba tin zon manshe eḳoi laḳan shakki dile ou befar hasa forman oy.”
2CO 13:2 Te ami zebla dusrabar tumrar gese geslam, hou soforor age zera guna-ḳosuri korsil, ami tarare ar bad-baki hoḳolre hushiar ḳori dislam. Ar oḳon ami nize azir na oile-o tarare ola hushiar ḳori diram, ami aroḳbar aile tara ḳeu rehai faita nae.
2CO 13:3 Tumra bule forman sairae, amar muk dia al-Mosie matira ni. Ashole al-Mosi to tumrar befare kunumonte-u ḳomzur nae, tan nizor bol-shokti tumrar maze azir ase.
2CO 13:4 Zudio tanre ḳomzur halote solibor ufre loṭḳaia zane mara oisil, ta-o Allar kudroti bole tain oḳon zinda asoin. Ar amra-o ola tan laḳan ḳomzur asi, oile tan loge zinda roae Allai kudroti bole tumrar gese aia mukabila oimu.
2CO 13:5 Tumra nizore zasai kori deḳo, al-Mosir ufre hasaror iman ase ni? Tumra buzo na ni, Isa al-Mosi tumrar dilo asoin. Kial rakio, zasai korat gia zanu tumrar maze bezal na mile.
2CO 13:6 Ar ami asha ḳori tumra buzbae, amra to ḳaṭi hishabe forman oigesi.
2CO 13:7 Amra Allar dorbaro munazat ḳorram, tumra hoḳol laḳan bod ḳam taki basia ro. Amra nizor forezgarir forman deḳanir lagi ikan ḳoiram na. Ar manshe amrare forezgar mono na ḳorle-o, tumra hamesha nek kam ḳorat ro.
2CO 13:8 Amrar ḳemota oilo hokor fokke, na-hokor fokke amrar kunu bol nai.
2CO 13:9 Te amra zebla ḳomzur ar tumra boloban, ita deḳle amra kushi. Amra dua ḳoriar, tumra touba ḳoria hari furafur ḳaṭi o.
2CO 13:10 Erlagi ami tumrar ges taki duroi roia ita leḳram, zate tumrar samne aia harle Malik Isar deoa ḳemota ḳaṭaia ḳoṭu bebohar ḳora na lage. Malike amare i kemota disoin tumrare goṛia tular lagi, ḳeti korar lagi nae.
2CO 13:11 O bai oḳol, hesh-mesh ḳoiram, tumra kushi-bashi koro, nizore kamil banao, eḳe-oinnore nosiot ḳoro, eḳoi monobabe ro, shantie boshot ḳoro. Teu shantir ar mohobbotor Alla-o tumrar loge loge roiba.
2CO 13:12 Tumra eḳe-oinne fobitro golagoli korio.
2CO 13:13 Allar hoḳol pak bondae tumrare salam zanaira.
2CO 13:14 Malik Isa al-Mosir rohomot, Alla Pakor mohobbot, ar Pak Ruhur ḳatir-zoton tumra hoḳlor dilo rouk. Amin.
GAL 1:1 Ami Paulus, Isa al-Mosir eḳzon sahabi. Ami kunu manshor hukum-foramishe ba kunu manshor usillae sahabi oisi na. Ḳali Isa al-Mosi ar amrar gaibi baf Alla, zein al-Mosire murda taki zinda ḳori tulchoin, erar ges taki-u ḳelafoti faisi.
GAL 1:2 Ami ar amar logor hoḳol mumin baiainte milia, Galatia deshor Isayi zomat oḳlor gese ou sohifaḳan leḳram.
GAL 1:3 Amrar gaibi baf Alla Pake ar Isa al-Mosie tumrare rohomot ar shanti dan ḳoroukka.
GAL 1:4 Amrar gaibi baf Alla Pakor munshae, hou Isae amrar gunar mafir lagi nizor fobitro zan kurbani disoin, zate ou ḳaraf zomanar at taki amrare basaita faroin.
GAL 1:5 Alla Pakor tarif hor-hamesha zari rouk. Amin.
GAL 1:6 Ami boṛo taijjub oigesi, al-Mosir rohome zein ḍakia ania tumrare nizor bonda banaisoin, tane saṛia tumra kila oto zoldi aroḳ nomunar kush-ḳobrir bae firigelae.
GAL 1:7 Ashole to iṭa kunu kush-ḳobri-u nae. Oile ḳoyzon manush ase, zetae tumrar iman loia ḳeiṛ ḳelaira, tara al-Mosir kush-ḳobrire ulṭa-falṭa ḳorilta saira.
GAL 1:8 Huno, amra ze kush-ḳobri tumrar gese toblig korsi, ou kush-ḳobri saṛa dusra kunu kush-ḳobri zudi tumrar gese toblig kora oy, ita zudi amra nize-u ḳori, ba asmani kunu firistae aia ḳoroin, te ogur ufre lannot foṛouk.
GAL 1:9 Ami age zemne ḳoisi, oḳon hirbar oula ḳoiram, agor ze kush-ḳobri tumra mancho, ita saṛa dusra kunu kush-ḳobri keu tumrar gese toblig korle, ogur ufre lannot foṛouk.
GAL 1:10 Ita ḳoria ami kar ges taki tarif faitam saiar, kunu manshor ges taki na Allar ges taki? Ami kunu manshore kush ḳorar sesṭa ḳoriar ni? Ami zudi oḳono manshore kush ḳorar sesṭa ḳortam, te ami al-Mosir ḳadim oilam na one.
GAL 1:11 O baisab oḳol, afnara zania raḳoukka, ami ze kush-ḳobri toblig korsi, ita to kunu manshor banail motobad nae.
GAL 1:12 Ami ita kunu manshor ges taki faisi na, ḳeu amare ita hikaise-o na. Ḳali Isa al-Mosie nize amar gese ita zair ḳorsoin.
GAL 1:13 Ami age zebla Ihudi dormo mantam, hou shomoy amar sal-cholon kila asil ita to tumra huncho. Ami Allar zomat oḳolre ḳoto beshi zulum ḳortam, ar itare binash ḳorar sesṭat aslam, eota tumra zano.
GAL 1:14 Amar baf-dadar ges taki faoa shora-rosumot manat-o ami kub kiali aslam. Erdae amar boyoshi Ihudi oḳlor maze Alla-billa ḳorat ami bout aguail aslam.
GAL 1:15 Oile Allae to amar maʼr feṭo taḳte-u amare fosond ḳorsoin, tain-u nizor rohomote amare daot disoin. Tan munsha asil,
GAL 1:16 ami tan ḳas mayar zonor didar faia, oinnainno zatir gese kush-ḳobri toblig kori. Te ou didar faia-o ami kunu Adom zator loge foramish ḳorsi na.
GAL 1:17 Ar amar agor kunu sahabir loge mulaḳat ḳorar lagi ami Zeruzalem ṭaun ḳano-o gesi na. Borong ami Arob desho geslamgi, gia guri-firi hirbar Damesk ṭauno aisi.
GAL 1:18 Er tin boros bade sahabi Fitoror loge mulaḳat ḳorar niote Zeruzalem geslam, gia tan ono fonro din aslam.
GAL 1:19 Ou shomoy Hozrot Isar bai sahabi Iakub saṛa, dusra kunu sahabir loge amar deḳa oise na.
GAL 1:20 Eḳ Alla shakki asoin, ami ou zeta leḳlam, er eḳṭa horof-o misa nae. Mono raḳba, ou kush-ḳobri to kunu manshor ges taki faisi na, ḳali Isa al-Mosie nize amar gese zair ḳorsoin.
GAL 1:21 Bade ami Siria ar Kilikia deshor bout zagat geslam.
GAL 1:22 Ou shomoy Ehudia zilar Isayi zomat oḳole-o amare sinta na.
GAL 1:23 Tara ḳali ou ḳobor hunchila, “Age ze beṭae amrar ufre zulum ḳorto, ar Isar namre dunia taki tuṛilito saisil, oḳon hou beṭae al-Mosir imanor kush-ḳobri toblig korer.”
GAL 1:24 Ami iman ania bodli zaoae, tara Allar shukur-tarif ḳorta.
GAL 2:1 Souddo boros bade Barnabasor loge oia ami hirbar Zeruzalem gelam, ou shomoy Titasre-o loge nilam.
GAL 2:2 Allai hukume ami hono gelam. Gia honor baiainre ḳoilam, oinnainno zatir gese ami kun kush-ḳobri toblig kori. Oile zomator murobbi oḳolre ita niralae ḳoilam, amar sinta asil, amar oto douṛor ḳam zate beḳama na zae.
GAL 2:3 Amar logor bai Titas o-Ihudi oile-o, tan mosolmani kam ḳoranir lagi era kunu saf dise na.
GAL 2:4 Ashole imandar dolor bitre ḳoyzon munafik hamanie ola oilo. Isa al-Mosir ummot bonae amra ze shadinota faisi, otar kut dorar lagi-u era hamaisil, zate amrare Musar shoriotor gulamit raḳto fare.
GAL 2:5 Oile amra eḳ foloḳor lagi-o tarar gulami manlam na, zate kush-ḳobrir hokikoti tumrar gese ḳaim roy.
GAL 2:6 Ar zomator nam-ḍaki zon oḳlor loge ami matilam, era zein-u oin na ḳene, itae amar kunta-u zae ae na, Allae to muk saia mosolmani koroin na. Era to amare noya kunta disoin na,
GAL 2:7 borong tara buzilila, Ihudi shomazor gese kush-ḳobri tobligo Fitorre zela dayitto deoa oisil, ou laḳan oinnainno zatir gese tobligor dayitto amare deoa oise.
GAL 2:8 Tara oḳan deḳla, Ihudi oḳlor gese sahabi kamo Fitorre zein salaisoin, hou Allae-u oinnainno zatir maze sahabi kamo amare salaisoin.
GAL 2:9 Oḳan dekia zomator goinno-mainno murobbi, mani Iakub, Fitor ar Hannane buzilila, Allar torof tone ami kas rohomot faisi. Teu tara-o amrar loge eḳmot asoin oḳan deḳaita ḳori, amar ar Barnabasor loge tarar at milaila. Ar ou mate razi oila, amra toblig kormu oinnainno zatir gese, oile tara toblig korba Ihudi shomazor gese.
GAL 2:10 Tara ḳali ekkan abdar ḳorla, amra zanu zomator gorib oḳlor bae kial raki. Ashole amar-o ola ḳorar kub ichcha asil.
GAL 2:11 Bade Fitor Antiokia ṭauno aila. Ermaze tain eḳ boṛo oinnae ḳorae ami tan mukor samne-u afotti zanailam.
GAL 2:12 Ou shomoy Ihudi taki mumin oa eḳdol manshe fotua dita, oinnainno zati taki zera Isar ummot oy, tarar mosolmani kam ḳorani zorur. Ou fotua dolor kisu manush sahabi Iakubor ges taki aibar age Fitore oinno zatir loge mila-misha ḳori kana-dana ḳaita. Iṭa to kub bala. Oile era aoae erar ḍore tain ou bala ḳam bond ḳorilla. Oḳṭa-u boṛo oinnae.
GAL 2:13 Antiokiar aro bout Ihudi mumine-o Fitoror loge ou bonḍamit shamil oila. Hesh-mesh Barnabas-o tarar loge bul fote fao dilaila.
GAL 2:14 Oile ami zebla deḳlam, kush-ḳobrir hokikotor loge tarar ḳam-ḳaz miler na, ou hoḳlor samne Fitorre ḳoilam, “Afne Ihudi oia-o zudi Ihudi niom bad dia oinno zatir laḳan soloin, te oinno zatire ḳene oḳon Ihudi niom manar tagid dira?
GAL 2:15 Afne-ami duiozon-u to Ihudi, naforman o-Ihudi kulo zonmisi na.
GAL 2:16 Erbade-o to amra zani, Musar shoriot amol ḳorle-o Allae manshore dindar ḳoia kobul ḳoroin na, ḳali Isa al-Mosir ufre iman anle-u dindar ḳoia kobul ḳoroin. Erdae-u amra tan ufre iman anchi, zate shoriotor amole nae, oile al-Mosir ufre iman anae amrare dindar ḳoia kobul ḳoroin. Ḳaron shoriot amol ḳorle-o kunu manshore dindar ḳoia gona oito nae.”
GAL 2:17 Oile oḳon amra al-Mosir torikae dindar bontam sairam ḳori, Ihudi shorar niom-ḳanun bad dilaisi. Ete zudi kunu kunu zone amrare naforman ḳoin, te kita buza zae, al-Mosie kunu gunar kezmot ḳoroin ni? Nauzubilla, nisoy na.
GAL 2:18 Ami nize zeta bad dilaisi, ota zudi hirbar ḳori, te to nize-u nizore dushi forman ḳoriar.
GAL 2:19 Shoriotor niome shoriotor ato-u amar mout oigese, zate Allar tarifor lagi ami zinda roi.
GAL 2:20 Te dorilao, amare al-Mosir loge gaso loṭḳaia zane mara oise. Ami ar zinda nae, amar ḳayar maze al-Mosi-u zinda asoin. Ou ḳayae oḳon ze zindegi kaṭairam, iṭa Allar ḳas mayar zonor ufre imanor bole ḳaṭairam. Tain amare mohobbot ḳoria, amare toranir lagi nizor zan kurbani disoin.
GAL 2:21 Alla Pakor i rohomot ami bifol oite ditam nae. Shoriot amol ḳoria zudi manush dindar bonizito, te al-Mosi kamoḳa kurbani oila ni?
GAL 3:1 O be-aḳol Galati oḳol, tumrare ḳegie zadu ḳorse? Tumrar gese to kula-mela ar saf-sofa toblig kora oise, Isa al-Mosire gaso loṭḳaia zane mara oisil.
GAL 3:2 Te oḳon ami kali ou ḳotaḳan zantam sairam, tumra ze Pak Ruhu faiso, iṭa kita Musar shoriot amol ḳoria faiso ni? Na kush-ḳobri hunia iman anae faiso?
GAL 3:3 Tumra kunu ola be-aḳol ni? Pak Ruhur bole noya zindegi shuru ḳoria, oḳon nizor bole kamiab oitae sairae?
GAL 3:4 Te ḳamoḳa oto duk-koshṭo ḳorlae ni? Ami asha ḳori tumrar i koshṭo muṭe-u behuda gese na.
GAL 3:5 Aichcha, Allae to tumrare Pak Ruhu dan ḳorsoin, ar tumrar maze bout keramoti kam-o ḳorsoin. Te ḳo sain, tan shoriot manae tain ita ḳorla ni? Na kush-ḳobri hunia tumra iman anae ita ḳorsoin?
GAL 3:6 Ibrahim nobir befarḳan deḳo, Allar kalamo ase, “Ibrahime Allar oadae iman anae, Allae tanre dindar ḳoia kobul ḳorla.”
GAL 3:7 Erdae tumra-o shomzilao, zera iman ane, tara-u Ibrahimor asol aolad.
GAL 3:8 Asmani Kitabo age-u batail oise, Allar ufre iman anle-u to tain oinnainno zatire dindar ḳoia kobul ḳoroin. Ibrahimor gese ou ayator kush-ḳobri age-u zanail oisil, “Tumar usillae duniar tamam zatie borkot faiba.”
GAL 3:9 Te buza zae, Allar oadae iman anae Ibrahime zela borkot faisoin, tan bade zera iman anba tara-o ola borkot faiba.
GAL 3:10 Asmani Kitabe ḳoy, “Ze manshe shoriotor kitabo leḳa tamam hukum-ahkam amol na ḳore, he lannoti.” On taki buza zae, zera shoriot manar ufre borosha ḳore, tara hoḳlor ufre-u i lannot ase.
GAL 3:11 Allar kalame batae, “Dindar ḳoia zare kobul ḳora oy, he tar imanor zoriae zindegi faibo.” Erdae buza zae, shoriotor hukum-ahkam manle-o Allae ḳeurore dindar ḳoia kobul ḳoroin na.
GAL 3:12 Oile shoriote ḳoy, “Shoriotor hukum-ahkam mafik ze manush sole, he shoriotor mazdi-u zindegi kaṭaibo.” Te to buza zae, shoriote imanor ufre borosha ḳore na.
GAL 3:13 Shoriotor borkelaf ḳorae amrar ufre ze lannot asil, ou lannot al-Mosie tan nizor ḳando nia amrare azad ḳorsoin. Allar kalamo to ase, “Gaso loṭḳaia zare zane mara oy, he lannoti.”
GAL 3:14 Allae Ibrahim nobire ze borkot dan ḳorsoin, Isa al-Mosir zoriae ou borkot zate oinno zati oḳole-o fain, ar amra-o zate imanor mazdi oada ḳora hou Pak Ruhu fai, otar dae-u al-Mosie i lannot nizor ḳando nisoin.
GAL 3:15 O bai oḳol, ami duniabi kotadi buzai diram. Dui fokko manshor maze zebla kunu chukti faḳa-fukto oizae, ou chukti eḳ fokkoe ar batil ḳorto fare na, ba ermaze noya kunta lagaito-o fare na.
GAL 3:16 Te Ibrahim nobi ar tan aolador loge Allae ze oada ḳorsla, Allar kalamo to ḳoa oise na, “aolad oḳlor loge” mani bout aolador loge. Borong koa oise ḳali “tumar aolador loge” mani eḳ aolador loge, ar ou aolad-u oila al-Mosi.
GAL 3:17 Ami koitam sairam, Allae Ibrahimor amolo oadar mazdi ze niom boail ḳorsla, er sair-sho tish boros bade shoriot deoa oisil. Ou shoriot aoae agor hou oadar niom to batil ḳorto fare na. Te to tan oada zari roilo.
GAL 3:18 Ar Allar borkot faoa zudi shoriot amolor ufre nirbor ḳorto, te oadar ufre nirbor roilo na one. Oile Allae oadar mazdi-u Ibrahimre borkot dan ḳorsla.
GAL 3:19 Te ḳoiba, shoriot ḳene deoa oisil? Manshe gunar ḳam na saṛae, Allar torof taki oadar loge shoriot-o shamil ḳorsla. Ar Ibrahimor ze aolador befare Allae oada ḳorsla, ou zone toshrif na ana forzonto i shoriot boail asil. Allar firistar zoriae Musa nobir gese i shoriot nazil oisil. Ou Musa-u asla Alla ar manshor maze shafayatḳari, mani mazor manush.
GAL 3:20 Oile ḳali eḳfokko taḳle to mazor manshor zorur asil na; ar Alla to eḳzon-u. Tain Ibrahimor loge oadar ḳalo kunu mazor zon lagse na.
GAL 3:21 Te shoriot kunu Allar oada oḳlor ulṭa ni? Nichoy na. Allae zudi ou laḳan shoriot dan ḳorta, zetae aḳeri zindegi mile, te shoriot mania-u manush Allar dorbaro kobul oigelone.
GAL 3:22 Oile Asmani Kitabe batae, tamam manush-u gunar ḳobzae bondi, tara zanu Isa al-Mosir ufre iman ania, imanor zoriae oada ḳora hou borkot fain.
GAL 3:23 Iman aoar age shoriote amrare fara disil. Iman zair na oa forzonto ou shoriote-u amrare bandia raḳsil.
GAL 3:24 Erdae buza zae, al-Mosir gese fosanir age ou shoriote-u otodin amrare salaise, zate imanor zoriae amrare dindar ḳoia kobul ḳora oy.
GAL 3:25 Oile oḳon iman ḳaim oae, amra ar saloḳdar shoriotor tolua nae.
GAL 3:26 Isa al-Mosir ufre iman anae tumra hokkol oḳon Allar aolad bonigeso.
GAL 3:27 Tumra zara al-Mosir torika kobul ḳorso, tumra to finnor noya ḳafoṛor laḳan al-Mosir bitre hamaigeso.
GAL 3:28 Ihudi ar o-Ihudi, gulam ar azad, beṭin ar beṭaintor maze oḳon kunu tofat nai. Isa al-Mosir loge mishi zaoae tumra hoḳol-u to eḳ oigeso.
GAL 3:29 Tumra zebla al-Mosir zon oigeso, te to Ibrahimor aolad-o oiso, ar Allae Ibrahimre zeta diba ḳori oada ḳorsla, tumra-o otar bagi bonigeso.
GAL 4:1 Ashole ami buzaitam sairam, bafor hoḳol don-samanat aolador eḳtiar taḳle-o, he zotodin nabalik roy otodin aolad ar gulamor maze kunu tofat mile na.
GAL 4:2 Tar bafe ze shomoyor ḳota osiot ḳori zain, otodin he tar murobbi ba zimmadaror aotae roite oy.
GAL 4:3 Ou laḳan amra-o zebla nabalik aslam, hou shomoy duniar nanan sal-cholonor gulam aslam.
GAL 4:4 Oile shomoy fura oia harle, Allae tan ḳas mayar zonre bezila. Tain eḳzon nek aorotor feṭo zonom loia, shoriotor hukum-ahkam mafik zindegi kaṭaila.
GAL 4:5 Zate shoriotor aotae taḳa manshore azad ḳorta faroin, ar amrare-o Allar aolad bonar eḳtiar dein.
GAL 4:6 Erdae tumra Allar aolad bonizaoae tumrar dilo boshot ḳorar lagi, Allae tan ḳas mayar zonor ruhre bezisoin. Tumrar dilor ou ruhe to Alla Pakre abba ḳoia ḍaḳoin.
GAL 4:7 Gotike-u tumra gulam roiso na, aolad bonigeso; ar aoladre Allae zeta deoar oada ḳorsila, oḳon tumra eotar malikana-o faiso.
GAL 4:8 Age tumra zebla Alla Pakre sintae na, hou shomoy tumra zetar gulami kortae, iguin to ashole kunu devta-u nae.
GAL 4:9 Oile oḳon to Allare sincho; ashole Allae-u tan nizor forisoy disoin. Te tumra kila hirbar duniabi hou ḳomzur ar batil sal-cholonor bae firizirae? Aroḳbar otar gulam bontae sairae ni?
GAL 4:10 Tumra hirbar omuk ar tomuk din, mash, ritu ar bosorre manrae.
GAL 4:11 Erdae amar ḍor ḳorer, tumrar tole amar oto menot ni maṭi oizae.
GAL 4:12 O bai oḳol, ami tumrare minot ḳoriar, ami zela tumrar laḳan oigesi, tumra-o ola amar laḳan o. Tumra to otodin amar kunu ḳeti korso na.
GAL 4:13 Tumrar zana ase, amar shorilo bemar oae, ami tumrar gese foyla bar kush-ḳobri tobligor shuzug faislam.
GAL 4:14 Amar bemaror dae tumrar ḳoshṭo oile-o, tumra to gin ba ela ḳoria amare falaiso na. Borong Allar kunu firista ba Isa al-Mosire zelaḳan kobul ḳortae, ou laḳan amare-o kobul ḳorso.
GAL 4:15 Oile oḳon tumrar dilor hi eshki gelo kuai? Ami to tumrar befare oḳan-u ḳoitam fari, hou shomoy farle tumra nizor ḳoilja kulia amare dilailae one.
GAL 4:16 Te tumrar gese hok kota matae, ami oḳon dushmon oigelam ni?
GAL 4:17 Huno, ou zeguinte tumrar kuz-ḳobor loira, oguin to bod niote aira. Tara sain, tumrare amar bae tone firaia, tarar ashik banaita.
GAL 4:18 Bala niote ola ḳorle fayda oilo one. Oile ami zebla tumrar samne ai, ḳali ou shomoy nae, nek niote hor-hamesha kuz-ḳobor loa bala.
GAL 4:19 O amar fiara aolad oḳol, tumra zotodin al-Mosir laḳan na boncho, otodin ami hirbar tumrar lagi hurutta foydar bishor laḳan soṭfoṭ ḳorram.
GAL 4:20 Amar mone sar, ou foygam leḳa bad dia oḳon-u ami nize tumrar gese aia, ṭanḍa matae batchit ḳortam. Te tumrare loia kita ḳortam kunta buzram na.
GAL 4:21 Tumra zera Musar shoriotor gulami kortae sao, tumra ḳo sain, shoriote zeta ḳoy ita tumrar ḳano hamae na ni?
GAL 4:22 Allar kalame batae, Ibrahim nobir dui fua asla, foyla fua bandi beṭi Hazerar torofa ar dusra fua asol shadin Bibi Sayrar torofa.
GAL 4:23 Bandi beṭir torofa fuar zonom oisil duniar niome, oile asol shadin bibir fuar zonom oisil Alla Pakor oadae kudroti bole.
GAL 4:24 I mator mani oilo, ou dui beṭi oila duiṭa niom. Eḳ niom Tur faṛ tone aise, iṭae tar kezmot ḳorra manshore gulamir fote ṭane; ein oila bandi Hazera.
GAL 4:25 Ou Hazera mani Arob deshor Tur faṛ. Ar Hazera oila ou zogotor Zeruzalem ṭaunor eḳ nomuna, Zeruzalem ṭaune to tar fua-fuṛinre loia bandi bonche.
GAL 4:26 Oile asmani ze Zeruzalem, ein to shadin; ein-u amrar ma.
GAL 4:27 Asmani Kitabe ḳoy, “O niaoladi beṭi, zar kunu hurutta oise na, tumi kushir gozol gao. Hurutta foydar bishe zare dorse na, tumi gola faṭaia zure zure gozol gao. Zamair goror bour saite-o, zar ḳeu nai tair bout beshi aolad oiba.”
GAL 4:28 Bai oḳol, erdae-u tumrar zonom oise Allar oadar Isʼhakor laḳan.
GAL 4:29 Oile hou shomoy duniar niome zar zonom oisil, he zulum ḳorto ou zonre, zein zonom loisoin Allar Pak Ruhur bole; ar oḳono oula zulum or.
GAL 4:30 Erdae deḳo, Allar kalame ḳoy, “Bandire ar tair fuare baṛi tone ḳedai deo; bandir torofa fuae kunumonte-u asol bibir fuar loge, don-samanar baṭ faito nae.”
GAL 4:31 Te O bai oḳol, ou ayate buza zae, amra bandir aolad nae, amra to asol shadin bibir goror aolad.
GAL 5:1 O mumin oḳol, al-Mosie amrare shadin ḳorsoin, shadin halote roar lagi. Erdae tumrar shadinotare doria raḳo, gulamir lagam ar findio na.
GAL 5:2 Huno, ami Pauluse tumrare ḳoiram, tumra zudi oḳono mosolmani kam ḳorao, te al-Mosir kunu dam-u to tumrar gese nai.
GAL 5:3 Ami hoḳlor gese hirbar oḳan ḳoiram, ze zonre mosolmani korail oy, tar ufre forz oizae shoriotor tamam hukum-ahkam mana.
GAL 5:4 Tumra zara shoriot amol ḳoria dindar bontae sairae, tumra to al-Mosir ges tone alog oigeso, Allar rohomot tone horigeso.
GAL 5:5 Oile amrare dindar ḳoia kobul ḳora oibo, imane ou nichoyota faia Pak Ruhur bole amra bar sairam.
GAL 5:6 Isa al-Mosir ummot bonia harle mosolmani kam ḳoraile-o zeta, na ḳoraile-o ota. Borong mohobbotor mazdi ze iman zair oy, ou iman-u oilo asol.
GAL 5:7 Tumra to bala fote solat aslae; te ou hok fote solte tumrare ḳegie bada dilo?
GAL 5:8 Huno, tumra oḳon ze motobad manrae, ze Allae tumrare fosond ḳori anchoin, i motobad to tan batail fot nae.
GAL 5:9 Zano ni, eḳ fuṭa senae eḳ balti dudre borbad ḳorilae.
GAL 5:10 Te tumrar befare ami malikor dorbaro ou borosha ḳori, tumra dusra kunu motobado zaitae nae. Oile zegie tumrare satar, he ze-u oy na ḳene, tar faona shaza he faibo.
GAL 5:11 O bai oḳol, ami zudi oḳono oḳan ḳoi, manshe mosolmani kam ḳorani zorur, te amar ufre ḳene oḳono zulum or? Te duk-koshṭor solibor ufre al-Mosir moutor ḳota hunle zetae muk lukain, tarar muk lukani to bond oigelo one.
GAL 5:12 Erdae ami sairam, tumrar dilo zetae gonḍogul lagaisoin, oguinte tarar asta nofs ḳaṭia falai deuk.
GAL 5:13 O bai oḳol, Allae tumrare fosond ḳoria anchoin azad oar lagi. Oile azad bonia tumrar dilor gunar ḳaish furanit lagio na, borong dilor mohobbote eḳe-oinnor kezmot ḳoro.
GAL 5:14 Ḳaron asta shoriotre-u ekḳano ḳoria ḳoa oise, “Tumar ari-forire nizor laḳan maya ḳorio.”
GAL 5:15 Oile tumra zudi eḳe-oinne ḳaijja-fosad ar resha-reshi koro, te hushiar oizao! Ita ḳorle to tumra eḳe-oinnore binash ḳorilibae.
GAL 5:16 Huno, ami tumrare ḳoiram, Pak Ruhur bole zindegi kaṭao, teu dilor ou ḳaish miṭanir kial oito nae.
GAL 5:17 Ou ḳaishe zeta ḳoy, ita to Pak Ruhur bifokke, ar Pak Ruhe zeta ḳoin ita bod ḳaishor bifokke. Bod ḳaish ar Pak Ruhu era eḳe-oinnor birudi, erdae nek kamor niot ḳoria-o tumra ita fura ḳoro na.
GAL 5:18 Ar tumra zudi Pak Ruhur bole zindegi kaṭao, te tumra shoriotor gulam nae.
GAL 5:19 Dilor bod ḳaishor ḳam-ḳaz to kula-mela-u sina zae, ita oilogi zina, nafaki, bodmaishi,
GAL 5:20 devta puja, zadu-ṭuna, dushmoni, ḳaijja-fosad, lub-lalos, gusa, niz-motlobi, omil, doladoli,
GAL 5:21 ingsha, matlami, hoi-hulla ḳori bojjati kora, ar ou nomunar aro bout ḳam. Te ami age zela hushiar ḳorslam, oḳon hirbar oula ḳoiram, dilor ou bod ḳaishor gulami zera ḳore, Allar bashshait tarar kunu ṭai nai.
GAL 5:22 Oile Pak Ruhe sola zindegir fol oilo mohobbot, kushi-bashi, shanti, sobor ḳora, doyalu bab, bala-manshi kora, hok-halali roa,
GAL 5:23 norom oa ar nizore shamlaia raḳa. Ou nek kamor birudi kunuzat ain nai.
GAL 5:24 Ar Isa al-Mosir afon ummote to, zarzir rifure, dilor hoḳol bod ḳaish shudda Isa al-Mosir solibo ḳoybor dilaise.
GAL 5:25 Oḳon amra zudi ekin ḳori Pak Ruhur zoriae noya zindegi faisi, te ao, amra Pak Ruhur zimmae zindegi kaṭai.
GAL 5:26 Amra behuda boṛai-beṭagiri bad dei, eḳe-oinnore satani ar ingsha-ingshi ekkere saṛi dei.
GAL 6:1 O bai oḳol, zomator ḳeu zudi aḳta kunu gunar fando foṛizae, te tumra zera Pak Ruhe zindegi kaṭairae, tumra tare tulia anio. Ar kub norom dile i kam ḳorio, nizor befare-o hushiar roio, zate nize-o fando na foṛo.
GAL 6:2 Tumra eḳe-oinnor bar bo, teu al-Mosir niom furafur mana oibo.
GAL 6:3 Kunta na bonia-o ze manshe nizor boṛai-bahaduri deḳae, he to nize-u nizore ṭogae.
GAL 6:4 Te forteḳ manshe zarzir amol-ḳaislot forikka ḳorouk. Teu oinnor loge nizor tulona na ḳoria, tar nizor ḳamor lagi boṛai korto farbo.
GAL 6:5 Forteḳ zone-u nizor gaiṭ nize bo.
GAL 6:6 Huno, ze zonre Allar kalam hikail oy, he tar ustador balair lagi kezmot ḳorouk.
GAL 6:7 Bai oḳol, tumra be-foti bonio na, Allar loge to ṭaṭṭa-moshkora sole na. Zein zela ḳet ḳorbae, ein ola foshol faibae.
GAL 6:8 Dilor ou bod ḳaishre kush ḳorar lagi ket ḳorle, i ket taki gozob milbo. Oile Pak Ruhre kush raḳar lagi ket ḳorle, i Pak Ruhu taki aḳeri zindegi milbo.
GAL 6:9 Nek kam ḳorat lagia amra zanu nirash na oi. Hamesha lagia roile ṭik shomoye er foshol faimu.
GAL 6:10 Shuzug faile-u amra zanu hoḳol manshor, ḳas ḳori Allar foribaror manshor asan ḳori.
GAL 6:11 Deḳrae ni, ḳoto muṭa muṭa horofe ami nizor ate tumrar gese leḳsi!
GAL 6:12 Zeguinte tarar nizor bala-manshi zair ḳorto sae, otae tumrare mosolmani kam ḳoranir lagi tagid der. Al-Mosir solibor lagi zate tarar ufre kunu zulum na oy, zulum taki basar lagi tara ita ḳorer.
GAL 6:13 Huno, mosolmani kam zetae ḳoraisoin, otae-o to shoriotor borkelaf ḳoroin. Oile erbade-o tara tumrare mosolmani koraito sae, zate tara boṛai koria ḳoito fare tumra-o tarar dolo aso.
GAL 6:14 Oile ami koiram, ḳali Isa al-Mosir solib saṛa dusra kunu befare-u ami boṛai kori na. Ou solibor mazdi-u i dunia amar gese morigese, ar ami-o duniar sokut morigesi.
GAL 6:15 Erdae mosolmani kam ḳoraile-o zeta, na ḳoraile-o ota. Al-Mosir zoriae hirbar noya foyda oa-u oilo asol befar.
GAL 6:16 Ar ou imane zera zindegi kaṭae, mani kaṭi Allar bondare, tain rohom ar shanti dan ḳoroukka.
GAL 6:17 Hesh-mesh ḳoiram, Hozrot Isar lagi mair ḳaia ḳoto nomunar zoḳom amar nizor shorilo loia sokkor diar. Te amare ḳeu duk dio na.
GAL 6:18 Bai oḳol, amrar munib Isa al-Mosir rohomot tumrar dilo ḳaim rouk. Amin.
EPH 1:1 Ami Paulus, Alla Pakor morzi mafik Hozrot Isa al-Mosir eḳzon sahabi. Ifis ṭaunor maze al-Mosir torikar pak bonda ar mumin oḳlor gese ami Pauluse ou sohifaḳan leḳram.
EPH 1:2 Amrar gaibi baf Alla Pake ar Hozrot Isa al-Mosie afnara hoḳlor ufre rohomot ar shanti nazil ḳoroukka.
EPH 1:3 Alla Pakor tarif ouk, tain-u Isa al-Mosir Alla ar tan gaibi baf, ar ou Hozrot Isa-u amrar malik. Alla Pake to al-Mosir usillae asmanor forteḳ nomunar ruhani rohomot amrare dan ḳorsoin.
EPH 1:4 Alla Pakor dorbaro amra zate fak-fobitro ar nikut oitam fari, ou kiale tain i dunia foydar age-u, nizor maya-mohobbote al-Mosir usillae amrare fosond ḳorsoin.
EPH 1:5 Allae tan nizor morzi ar nizor kushie age-u ṭik koria raḳsoin, zate Isa al-Mosir usillae amrare tan afon aolad hishabe kobul ḳorba.
EPH 1:6 Allae ita ḳorsoin, zate tan ḳas mayar zon Isar usillae amrare zoto forimane rohomot ar mohima dan ḳorsoin, otae tan tarif oy.
EPH 1:7 Al-Mosir fobitro kurbanir usillae tan lour bodla amra gunar shaza taki kalas faisi, amra ou mafi faisi, ita to Alla Pakor ḳas rohomot.
EPH 1:8 Ou rohomot to Allae tan ḳas aḳol-hekmote amrar ufre ḍalia disoin.
EPH 1:9 Tain age taki zelaḳan kial ḳorsla, al-Mosir mazdi zeta ḳorar niot ḳorsila, ou kial-kushir hokkol batuni befar tain amrare zanaisoin.
EPH 1:10 Tain to age-u oḳan ṭik koria raḳsila, zate shomoy fura oia harle, tan afon morzi mafik asman-zominor hokkoltare ekḳano ḳoria, al-Mosir aotae anba.
EPH 1:11 Allae tan nizor aḳol-insaf dia nizor morzi mafik hoḳol ḳam ḳoroin. Tan munsha mafik tain age-u zeta ṭik koria raḳsila, hou munsha mafik tain amrare-o fosond ḳorsoin al-Mosir usillae tan ḳas bonda oar lagi.
EPH 1:12 Erlagi amra zera ag taki-u al-Mosir ufre borosha ḳortam, ou amrar mazdi-u zate Allar gourob-mohimar tarif oy, ou kiale-u tain amrare fosond ḳorsoin.
EPH 1:13 Ar afnara-o Allar hok kalam, mani nazator kush-ḳobri faia al-Mosir ufre iman anchoin. Al-Mosir ummot oae Alla Pake tan oada ḳora Pak Ruhu dia afnaintore sil-sappoṛ marsoin.
EPH 1:14 Te zeta manshore Alla Pake tan nizor shompod ḳoia ḍakisoin, erare tain eḳṭa odikar dibar oada ḳorsoin. Erlagi zotodin forzonto era furafur ḳalas na oisoin, otodin forzonto ou odikaror foyla kishti hishabe erare Pak Ruhu dan ḳorsoin. Ar ou hokkoltar mazdi Allar gourob-mohimar tarif oibo.
EPH 1:15 Te Hozrot Isar ufre afnara iman anchoin ar Allar hoḳol bondare-u afnara maya-mohobbot ḳorra, ou ḳobor ami zebla hunlam,
EPH 1:16 hunar bad taki-u, ami afnarar lagi Allar dorbaro shukria adae ḳora kunu shomoy-o bond ḳorsi na. Ami zebla munazat ḳori, i shomoy afnaintor ḳota fauri na.
EPH 1:17 Ami Allar dorbaro aroz ḳori, amrar Malik Isa al-Mosir Allae, zalal ar shan-ala gaibi bafe afnaintore ruhani aḳol ar buzar ḳemota deukka. Teu afnara aro balamonte tanre sinba.
EPH 1:18 Ami aro munazat ḳoriar, afnarar dilor souk kuli zauk, teu Allai daot faia afnarar dilor maze ze eshki foyda oise ota aro balamonte buzba. Erloge eoḳan-o buzta farba, Allar dorbaro tan pak bonda oḳol ḳoto boṛo shompotti.
EPH 1:19 Ar amra zera tan ufre iman anchi, amrar dilor maze ḳoto boṛo shoktie ḳam ḳorer. I shokti oilo, tan kudrotor mohashokti.
EPH 1:20 Ou shoktir bole-u tain al-Mosire mora taki zinda ḳorsoin, ar behestor arshe-azimo tan ḍainor toḳto nia boaisoin.
EPH 1:21 Asmanor hokkol nomunar ḳemota, shashon, shokti, ar bahaduri zarar ato ase, era hoḳolre-u tain al-Mosir tole raḳsoin. Ar zare ze name-u ḍaḳa oy na ḳene, ita i zogotor ouk ba aḳeri zogotor ouk, hokkol namor ufre Isa al-Mosir nam.
EPH 1:22 Allae hokkoltare-u al-Mosir aotae raḳsoin. Manshor mata zela tar shorilor bashsha, al-Mosire ola zomator mata, mani bashsha hishabe boail ḳorsoin.
EPH 1:23 Ar i zomat oilogi al-Mosir shoril. Zein asman-zominor hokkoltare shullo-ana furafur ḳorsoin, ou al-Mosie zomatre furafur ḳoroin.
EPH 2:1 Tumra to guna ar naformanir maze mora aslae.
EPH 2:2 Zogotor babor maze foṛia tumra-o eḳ shomoy hou naformani ar gunar fote sola-fira ḳortae. Ze bod ruhu asmanor hoḳol taki shoktiala raza, hou bod ruhe naforman oḳlor bitre ḳam ḳore, ar tumra-o hou bod ruhur murid aslae.
EPH 2:3 Amra hoḳole-u eḳ shomoy gunar shobabor gulam bonia, ota naforman manshor laḳan zindegi kaṭaitam. Ou bod shobab taki ze bod ḳaish amrar dilo aito, amra ola ḳam ḳortam. Ar ou ḳam-ḳazor lagi hota manshor laḳan amra-o Allar gozobor laḳ aslam.
EPH 2:4 Oile Alla Pak to rohomotor banḍar; tain amrare kub beshi maya-mohobbot ḳoroin.
EPH 2:5 Erlagi-u naformani koria amra zebla mora zindegir maze habuḍubu ḳaislam, hou shomoy al-Mosir loge tain amrare zinda ḳorla. Allar rohomote tumra rehai faiso.
EPH 2:6 Amra al-Mosir loge asi, erlagi Allae amrare al-Mosir loge zinda ḳoria, tan loge ḳori behestor bitre boaisoin.
EPH 2:7 Tain ita ḳorsoin, zate tan moha-mulloban rohomot oḳol zuge zuge siroḳal deḳaita faroin. Al-Mosir usillae tain amrare ze doya ḳorsoin, ou doyar mazdi tan i rohomotor ḳota zair oise.
EPH 2:8 Allar rohomote iman anae tumra nazat faiso. Ita tumrar nizor kunu amolor fol nae, ḳali Allar deoa dan.
EPH 2:9 Ita to kunu nek kamor bodla nae, zate ḳeu kunu laḳan boṛai korto na fare.
EPH 2:10 Amra to Alla Pakor ator foyda. Tain al-Mosir ummot hishabe amrare hirbar noya ḳori foyda ḳorsoin, zate amra nek kam ḳori. Ou nek kam tain age taki-u ṭik koria raḳsila zate amra ola zindegi kaṭai.
EPH 2:11 Zonmogoto babe tumra oilae bidormi zatir manush. Manshor at dia zarare shorilo mosolmani korail oise, era ḳoira, tumra bule mosolmani koraiso na.
EPH 2:12 Te mono rakio, age to tumra al-Mosir ges taki horail aslae; tumra aslae Allar fosond ḳora Boni Israilor bairor manush. Allae Boni Israilor loge milonor zoto laḳan usillar oada ḳorsoin, itar loge tumrar to kunu shomporko asil na. Tumrar kunu asha-o asil na; tumra aslae i duniat Alla saṛa zati.
EPH 2:13 Ek kotae, tumra Alla taki duroi aslae. Oile oḳon Isa al-Mosir ummot oae, tan kurbanir lour usillae tumrare Allar daro ana oise.
EPH 2:14 Tain-u amrar shanti. Israil zati ar bin zati, hokkolre tain ek korsoin. I duio zatir maze dushmonir ze oal asil, i oalre tain bangia surmar ḳorsoin.
EPH 2:15 Ar solibor ufre nizor ḳayare kurbani dia, tain Musa nobir shoriotor hoḳol hukum-ahkam ar ain-ḳanunor ḳemotare batil ḳorsoin. Tan ila ḳorar ḳaron oilo, tain saila, ou duiota dia tan nizor noya eḳ zati foyda ḳorta, zate ou zatir mazdi i duio dolor maze shanti oy.
EPH 2:16 Ar tain saila, solibor ufre tan nizor zan kurbanir usillae, ou duio dolre tain ekḳano ḳoria Allar loge milon goṭaita. Erlagi ou duio dolor maze dushmonir ze bab asil, i dushmonire tain ekkebare miṭai disoin.
EPH 2:17 Tumra eḳ shomoy Alla taki duroi aslae, ar Boni Israil oḳol ḳasat asla, oḳon tain aia ou duio dolor gese-u shantir kush-ḳobri toblig korsoin.
EPH 2:18 Erfole tan usillae amra duio dol Pak Ruhur mazdi, amrar behesti baf Alla Pakor dorbaro azir oitam fari.
EPH 2:19 Erlagi-u tumra oḳon bairor manush nae, bin zati-o nae. Borong Allar ḳas bonda oḳlor loge tumra-o Allar bashshai ar tan foribaror shodoishsho bonigeso.
EPH 2:20 Sahabi ar nobi oḳol oila tan goror kuṭi, ar Hozrot Isa al-Mosi oila mul ian kuṭi. Ou kuṭir ufre-u tumrare goṛa oise.
EPH 2:21 Al-Mosir loge zuṛa lagae, asta goror hoḳol ongsho eḳloge milia ekkan fobitro gor tiar oise.
EPH 2:22 Tumra-o aia tan loge zuṛa lagso, mani tan ummot oiso, erlagi tumrare-o eḳloge goṛia tula or, zate Pak Ruhur mazdi i goror maze Allar boshot ḳana oy.
EPH 3:1 Ou ḳarone ami Pauluse Allar dorbaro dua ḳoriar. Ar tumra zara bin zati, tumrare Isa al-Mosir torikar daot deoar lagi-u ami oḳon zelo bondi oisi.
EPH 3:2 Tumra nisoy huncho, Allae amare ou ḳas dayitto disoin, tan rohomotre ami tumrar ato fosai ditam.
EPH 3:3 Allae tan nizor batuni munsha ohir mazdi amare zanaisoin, ar ou befarḳan ami tumrar gese shongkefe leḳlam.
EPH 3:4 Ikan foṛle tumra buzbae, al-Mosir befare ou batuni bishoy buzar ḳemota amar ase.
EPH 3:5 I batuni befarḳan sahabi ar nobi oḳlor gese zela Pak Ruhur mazdi oḳon zair or, agor zomanar kunu manshor gese-u ila zair oise na.
EPH 3:6 Ar i batuni befar oilo, Injilor kush-ḳobrir mazdi bin zati oḳol-o Isa al-Mosir loge eḳ oia, Boni Israilor loge Allai odikaro shorik oy, hoḳol eḳ shorilor ongsho oy, eḳoi oadar duar bagi oy.
EPH 3:7 Allae tan moha kudrotor bole amare rohomot dan ḳorsoin, ar zela rohomot faisi, ola kush-ḳobri tobligor dayitto adae ḳorram.
EPH 3:8 Allar hokkol bondar maze ama taki huru ar ḳeu nai, ta-o al-Mosir ze donor ḳota shullo-ana buza zae na, ou mulloban donor kush-ḳobri bin zatir gese tobligor dayitto amar ufre disoin, iṭa-u Allar rohomot.
EPH 3:9 Ar tan batuni munsha kila ḳamo lagail zae, ikan zair ḳorar bar-o tain amar ufre disoin. Zein asman-zomin hokkolta foyda ḳorsoin, hou Allae otodin doria ita batuni raḳsila.
EPH 3:10 Tain ita batuni raḳar ḳaron oilo, asmanor hoḳol raza ar ḳemota-ala hoḳlor gese, Allar nanan nomunar aḳol-hekmot al-Mosir zomator mazdi oḳon kula-mela oy.
EPH 3:11 Tan nizor siroḳalor munsha mafik ita oise, ar ou munsha-morzi amrar Malik Isa al-Mosir mazdi fura ḳorsoin.
EPH 3:12 Tan loge shorik oia imanor bole, bukut shaosh rakia Allar samne amra azir oar eḳtiar faisi.
EPH 3:13 Erlagi ami tumrare minot ḳoriar, ami duḳ-mosibot shoijjo ḳoriar dekia tumra nirash oio na. Ita to tumrar lagi-u shoijjo ḳoriar, erlagi gourob ḳoro.
EPH 3:14 Te asman-zominor hoḳol zandarre zein foyda ḳorsoin, ami aṭu gaṛia hou batuni bafor samne munazato boisi.
EPH 3:16 Ami dua ḳori, Allae zanu tan oshesh kudrotor bole tumrare omon bol-shokti dein, zate Pak Ruhur mazdi tumrar dil mozbut oy,
EPH 3:17 ar imanor usillae al-Mosie tumrar dil furafur doḳol ḳoroin. Ami dua ḳori, tumra zanu Isa al-Mosir mohobbotor maze furafur ḍub dia tir ro.
EPH 3:18 Teu hoḳol pak bonda oḳlor loge tumra-o buzbae, al-Mosir mohobbotor kunu kul-kinar nai, kunu shesh shima nai.
EPH 3:19 Ou ze mohobbot furafur buzar oshaiddo, ami dua ḳoriar, i mohobbotre zanu tumra sino, sinia hari tumra-o Allai hoḳol nomunar gunagun hasil ḳoria furafur kamil o.
EPH 3:20 Ashole Allar ze kudroti bole amrar dilor maze ḳam ḳore, hou bolor usillae amrar sinta-babna ba saoa-faoa taki aro bout beshi kam tain ḳorta faroin.
EPH 3:21 Hozrot Isa al-Mosir mazdia ar zomator mazdia-o zug zug dori hor-hamesha Alla Pakor tarif ouk. Amin.
EPH 4:1 Amar malik al-Mosir lagi ami zelo bondi asi. Ou bondi halote ami tumrare minot ḳoriar, ze ḳamor lagi Allae tumrare daot disoin, tumra er ufozukto oia solo.
EPH 4:2 Tumrar asar-bebohar zanu furafur miṭa ar norom oy. Forteḳe sobor ḳoro ar dilo mohobbot rakia eḳe-oinnore shoijjo ḳoro.
EPH 4:3 Al-Mosir ze shantie amrare ekḳano zuṛa lagaise, hou shantir bole Pak Ruhur deoa eḳota rokkar lagi dile-zane sesṭa ḳoro.
EPH 4:4 Allae tumrare tan fote daot disoin ḳoria tumrar maze ḳali ekkan asha ase, ḳali eḳ shoril ar eḳzon Pak Ruhu asoin.
EPH 4:5 Ek iman, eḳ torikabondi ar eḳzon malik asoin.
EPH 4:6 Hoḳlor Alla ḳali eḳzon, mani behesti baf eḳzon-u asoin. Tain-u hoḳlor ufre, hoḳlor maze, hoḳlor dilo asoin.
EPH 4:7 Oile al-Mosie zela ṭik koria raḳsoin, hou mafik amra forteḳe ḳas rohomot faisi.
EPH 4:8 Erlagi Zobur Shorifo leḳa ase, Tain gia zebla behesto uṭila, ou shomoy bondi oḳolre bandia ṭania nila, ar tan manshore bout dan dila.
EPH 4:9 Te behesto gia uṭila, i ayat taki buza zae na ni, age tain duniar tole lamsila.
EPH 4:10 Ar zein lamsila, tain hoḳolta furon ḳorar lagi, asman taki aro ufre gia uṭisoin.
EPH 4:11 Tain manshore ou dan disoin, ḳoyzonre sahabi, ḳoyzonre nobi, ḳoyzonre kush-ḳobrir toblig, ḳoyzonre zomator imam ar ustad hishabe boail ḳorsoin.
EPH 4:12 Tain ila ḳorar ḳaron oilo, Allar pak bonda oḳole zanu tan ebadot-bondegi korar lagi zuit oy, ar ou nomunae al-Mosir shoril, zomat hishabe goṛia uṭe.
EPH 4:13 Tan kial oilo, amra hoḳole zanu Allar ḳas mayar zon, Ibnullar ufre iman ania, tanre bala ḳori sinia ekḳano oi. Ar al-Mosi zela hoḳol laḳan gune furafur bora, amra-o ola hoḳol gune furafur oia kamil oi.
EPH 4:14 Teu amra ar huruttar laḳan roitam nae. Manshe shoytani aḳol ḳaṭaia be-fote nibar lagi manshore ze bul talim dey, ou bul talime zanu amrare fanir aula-zaula ḍeur laḳan du-dila na banae.
EPH 4:15 Borong amrar dilor mohobbote hok mat matimu, hoḳol nomunae boṛo oia al-Mosir laḳan oimu. Tain-u to asta shorilor mata.
EPH 4:16 Asta shoril omola banail oise, zate shorilor hoḳol ongo zarzir zagat roia mul ḳayar loge zuṛa lagail roy. Forteḳ ongo zebla ṭik-ṭak kam ḳore, ou shomoy asta shoril-u matar bole baṛia uṭe, ar mohobbotor mazdi nizore goṛia tule.
EPH 4:17 Erlagi ami amar malikor name tumrare hushiar ḳori diar, bin dormor manshe zela baze sinta ḳoria zindegi kaṭain, tumra ar ila zindegi kaṭaio na.
EPH 4:18 Tarar dil to andairor maze foṛi roise. Itar dil gumra, erlagi-u tara Allar befare kunta sine na, kunta sinto sae-o na, erlagi Allar deoa zindegi taki tara bout duroi.
EPH 4:19 Tarar bibeḳ oshaṛ oigese, otar dae hor-hamesha nafaki kamor danda ḳore, tara nizor zindegire lagam saṛa bod ḳaishor ato saṛi dise.
EPH 4:20 Oile tumra to al-Mosir befare ilaḳan talim faiso na.
EPH 4:21 Tumra nichchoy tan befare huncho, hunia tan loge shorik oia, tan maze ze hok ase, ou hokor talim faiso.
EPH 4:22 Tan talim oilo, finnor furan ḳafoṛ manshe zebla ekkere falai dey, ou laḳan tumrar bitoror furan ‘ami’re ekkebare falai deo, ḳaron ou ‘ami’r bod ḳaishe manshor zindegire borbad ḳorilae.
EPH 4:23 Er bodla Alla Pakre shuzug deo, tain tumrar dilre noya halote goṛia tuloukka,
EPH 4:24 tan deoa noya ‘ami’re noya ḳafoṛor laḳan findo. Ou noya ‘ami’re asol hok-forezgari ar fak-fobitro ḳoria Allar surote goṛa oise.
EPH 4:25 Erlagi tumra misa mata bad deo, eḳe-oinne hasa mato, ḳaron amra hoḳol-u eḳe-oinne mishia asi.
EPH 4:26 Rag-gusa ḳorle-o i ragor lagi guna ḳorio na, shuruz ḍubar age-u gusar ḳota faurilao,
EPH 4:27 Iblis-Shoytanre kunu shuzug dio na.
EPH 4:28 Sure tar suri kora bad deuk, nizor ate halal fote menot ḳoria ḳana ḳauk, zate tar ḳaoa-findar bade-o gorib-dukire dibar lagi kisu zoma roy.
EPH 4:29 Tumrar mukdi zanu bad ḳota na baroy, borong aroḳzonor ufoḳari talimor lagi bala mat matio, zate ita hunia hunra zonor balai oy.
EPH 4:30 Tumra Allar Pak Ruhre duk dio na, aḳeri nazator ag forzonto ou ruhu dia-u Allae tumrare sil-sappoṛ maria toisoin.
EPH 4:31 Hoḳol nomunar birokti bab, mizaz deḳani, rag-gusa, sillaia ḳaijja ḳora, gala-gali, ar hoḳol nomunar ingsha-ninda tumrar ges taki horailao.
EPH 4:32 Borong tumra eḳe-oinne doya ḳoro, oinnor duke duki o, al-Mosir mazdi Allae zela tumrare maf ḳorsoin, tumra-o ola eḳe-oinnore maf ḳoro.
EPH 5:1 Tumra to Allar mayar aolad, te fut zela bafor laḳan oy, tumra-o ola o.
EPH 5:2 Al-Mosie zela amrare mohobbot ḳorsoin, tumra-o ola maya-mohobbotor fote solo. Tain amrare basaita ḳori nizor zanre kushboydar kurbani hishabe Allar name bilai disoin.
EPH 5:3 Kunu nomunar zina, nafaki ar lub-lalosor ḳota tumrar maze zanu na huna zae, ḳaron ita ḳam Allar pak bondar lagi ṭik nae.
EPH 5:4 Ar behaya-beijjotir zekunu mat-ḳota, asar-bebohar ba ḳobisi ṭaṭṭa-moshkora zanu tumrar maze na oy, itae tumrare manae na. Itar bodla Allar shukur-guzar ḳoro.
EPH 5:5 Tumra to zano-u, zinakur, nafak ar lalosi manshe, Alla Pak ar al-Mosir bashshair maze kunu zaga faito nae. Itae to eḳlaḳan murtipuja ḳorra.
EPH 5:6 Hushiar roio, misa mat matia ḳeu zanu tumrare be-fote na ney, Allar naforman bonia zera ita bod ḳam ḳore, tarar ufre Allar gozob lame.
EPH 5:7 Tumra ilaḳan manshor loge mishio na,
EPH 5:8 ḳaron tumra age andarir maze taḳle-o oḳon to al-Mosir ummot bonia nuror foto aiso. Erlagi Allar nure kamil zone zela zindegi kaṭani usit, tumra oula solo.
EPH 5:9 Ar nure solar fol oilo, forezgari, shotota, hoḳol nomunar nek kam.
EPH 5:10 Erlagi ze ḳame malik kushi oin, tumra zasai koria ou ḳam ḳoro.
EPH 5:11 Andair zogotor befayda ḳamor loge kunu nomunar shomporko rakio na, borong tumra otar dush deḳai deo.
EPH 5:12 Manshe lukaia zeta ḳam ḳoroin, ita befare kunta mata-o shorom.
EPH 5:13 Nuror mazdi dush deḳaia dilaile ita zaira oizae,
EPH 5:14 ḳaron ou nure-u hoḳolta zair ḳore. Erlagi silleḳ ase, O gumor manush, hozag o, mora taki zita o, teu al-Mosir nure, nurani koriba tumare.
EPH 5:15 Tumra sinta-babna ḳori deḳo, tumrar sal-cholon kilaḳan. Be-aḳolor laḳan na solia, aḳoldaror laḳan solo.
EPH 5:16 Nek kam ḳorar ze shuzug tumrar ato ase, ita shullo-ana ḳamo lagao, zano to oḳonkur zomana ḳaraf.
EPH 5:17 Erlagi-u ḳoiram, tumra be-aḳol bonio na, borong malikor morzire buzo.
EPH 5:18 Modor nishae ṭal oio na, itae zindegi nosṭo ḳorilae. Borong furafur Pak Ruhur boshe ro,
EPH 5:19 tumra hamd, ḳaoali ar Fobitro Zobur Shorifor gozol gaia eḳe-oinne batchit ḳoro; tumrar dilor bitre malikor name gozol gao.
EPH 5:20 Hamesha hoḳol befare amrar Malik Isa al-Mosir name behesti baf Allar shukria adae ḳoro.
EPH 5:21 Al-Mosir ijjot ar ḍore tumra eḳe-oinnore dil taki mainno ḳoro.
EPH 5:22 Tumra zera bou oiso, tumra zela Malik Isare mainno ḳoro, ou laḳan zarzir zamaire mainno ḳoro.
EPH 5:23 Ḳaron al-Mosi zela zomator, mani tan shorilor mata, zamai-o ola bour mata. Ashole al-Mosi-u ou asta shorilor toraneala.
EPH 5:24 Ar zomat zela al-Mosir zimmae ase, oula bou oḳol-o hoḳol befare zamair zimmae roa usit.
EPH 5:25 Tumra zera zamai oiso, huno, al-Mosie zela zomatre mohobbot ḳorsoin, ṭik olaḳan tumra-o zarzir boure mohobbot ḳorio. Tain to zomator lagi tan nizor zan kurbani disoin.
EPH 5:26 Tan kial oilo, tain zomatre fobitro ḳorar lagi, tan kalamor mazdi manshore torikar gusol ḳoraia,
EPH 5:27 nuror mohimae nizor samne azir ḳora. Ou shomoy zomator maze kunu ḳolonkor dag, kut ba ila kunta-u roito nae, ita fak-fobitro ar nikut oibo.
EPH 5:28 Erlagi zamaie tar nizor shorilre zela maya ḳore, ṭik tar boure-o oula maya ḳora forz. Nizor boure maya ḳorar mani oilo, nizor shorilre maya ḳora.
EPH 5:29 Ḳeu to kunu shomoy tar nizor shorilre ginnae na, hoḳole-u zarzir shorilor boron-fushon ḳore. Ekkere ou laḳan, al-Mosie-o tan zomator boron-fushon zugain.
EPH 5:30 Ḳaron amra tan shorilor ongo.
EPH 5:31 Allar kalamo leḳa ase, “Erlagi-u beṭainte ma-bafre saṛia bour loge taḳba, tara duiozon eḳ shoril oiba.”
EPH 5:32 Ikan oilo bout boṛo batuni befar, ashole ami to al-Mosi ar tan zomator befare ḳoiram.
EPH 5:33 Zai ouk, tumra hoḳole-u zarzir boure nizor laḳan maya ḳorio, ar bou oḳole-o zarzir zamaire ijjot ḳora zorur.
EPH 6:1 O aolad oḳol, malikor morzi mafik tumrar ma-bafor ḳotamoto solio, ar ola solaṭa-u to usit.
EPH 6:2 Allar kalamor foyla hukum, ze hukumor loge furuskaror oada ase, iṭa oilo, “Tumar ma-bafre ijjot ḳorio.
EPH 6:3 Teu tumar balai oibo, ar i duniat tumar hayati baṛibo.”
EPH 6:4 Te tumra zera huruttar baf oiso, tumra-o nizor aoladre sataio na, borong malikor talim ar shrinkolar mazdi tarare manush banao.
EPH 6:5 Tumra zera gulam, tumra al-Mosir zela baiddo, oula ḍor ar tazime dile-zane tumrar zogotor munib oḳlor baiddo roio.
EPH 6:6 Ḳali manshore kushi korar niote munibor samne baiddo roio na, borong al-Mosir gulam hishabe dile-zane Allar morzi mafik solrae ḳoria tumrar munibor baiddo roio.
EPH 6:7 Tumra ikan mono ḳorio na ze, tumra manshor kezmot ḳorrae, borong asmani malikor kezmot ḳorrae mono ḳoria, zogotor munibor kezmoto kiali o.
EPH 6:8 Mono rakio, malikor ges taki forteḳ manshe zarzir nek kamor furuskar faibo, he gulam ouk ba azad ouk.
EPH 6:9 Tumra zera munib, tumra-o tumrar gulam oḳlor loge oula bala bebohar ḳoro. Tarare ḍor deḳani bad deo, ḳaron tumra to zano, tara ba tumra hoḳlor-u malik eḳzon, tain behesto asoin; tan nozoro hoḳol-u shoman.
EPH 6:10 Hesh-mesh ḳoiram, tumra asmani malikor loge milia roia tan kudroti bole bolala o.
EPH 6:11 Zuddor lagi Allar deoa hoḳol nomunar atiar lagao, teu Iblisor hoḳol sol-soturir birudde mozbut oia ubaitae farbae.
EPH 6:12 Amrar ou zuddo to kunu manshor loge nae, ita oilo andair zogotor hoḳol raza ar tar ḳemota-ala oḳlor birudde, andair zogotor shoktiala bod ruhu oḳlor birudde, ar asmanor Iblis-Shoytan dolor birudde.
EPH 6:13 Te ou zuddor lagi tumra Allar deoa hoḳol nomunar atiar findilao, zate Iblise zebla hamla ḳorbo ou shomoy mozbut oia ubaitae faro, ar hesh-mesh tir roitae faro.
EPH 6:14 Erlagi Allai hokikotir belṭ ḳomro bando, ar buk basanir lagi forezgarir amol dia buk guria raḳo,
EPH 6:15 sifai oḳlor laḳan duio fao-o zuta lagao, zate shantir kush-ḳobri tobligor lagi zuit taḳtae faro.
EPH 6:16 Ar sifai oḳole nizore basanir lagi ze ḍala bebohar ḳore, oula hoḳol shomoy tumra imanor ḍala ato lo, ou ḍala dia Iblisor hoḳol zalail tir nibaitae farbae.
EPH 6:17 Matare basanir lagi Allar deoa nazat sifair kefor laḳan findilao. Ar Pak Ruhur toluar mani, Allar kalamre mozbut ḳori doro.
EPH 6:18 Pak Ruhur bole dile-zane hor-hamesha munazat ḳoro. Erlagi hozag roia hoḳol pak bonda oḳlor lagi shob shomoy munazat ḳorat roio.
EPH 6:19 Amar lagi-o dua ḳorio, ami kota matar bala zanu Allae amar mukor buli zugai dein, zate toblig korar shomoy ami shaosh ḳaṭaia kush-ḳobrir asol batuni bed manshore buzaitam fari.
EPH 6:20 Ou kush-ḳobri tobligor lagi luar cheindi banda halote-o ami al-Mosir naib hishabe ḳam ḳorram. Te zelor maze roia zelaḳan shaosh ḳaṭaia toblig kora zorur, dua ḳorio, ami zate ola ḳortam fari.
EPH 6:21 Amar hal-hokikot kilaḳan ar amar din-kal kila zar, ita amar mayar dust Tukik bair ges taki hunbae. Ein amrar malikor hok-halal kezmotḳari.
EPH 6:22 Ami tanre tumrar gese faṭailam, tumra tan muk taki amrar ḳobora-ḳobor hunbae, tain gia tumrare utshaho diba.
EPH 6:23 Amrar gaibi baf Alla Pake ar Hozrot Isa al-Mosie, mumin bai oḳolre shanti ar imani maya-mohobbote raḳoukka.
EPH 6:24 Amrar Hozrot Isa al-Mosir lagi zarar dilo ḳaṭi mohobbot ase, era hoḳlor ufre Allar rohomot nazil ouk. Amin.
PHI 1:1 Ami Paulus ar Timoti oilam Hozrot Isa al-Mosir gulam. Ou Filifi ṭauno boshot ḳorra, ze pak bonda oḳole Hozrot Isa al-Mosir ufre iman anchoin erare, erar ustad oḳolre ar ḳadimdar oḳlor gese leḳram.
PHI 1:2 Amrar gaibi baf Alla Pak ar Hozrot Isa al-Mosir rohomot ar shanti tumrar ufre nazil ouk.
PHI 1:3 Tumrar ḳota zotobar-u amar iad oy, otobar-u ami amar Allar shukria adae ḳori.
PHI 1:4 Ami zebla tumrar lagi dua ḳori, amar mono kub kushi loia dua ḳori.
PHI 1:5 Hozrot Isa al-Mosir toblig kamor lagi to tumra foyla taki oḳon forzonto amare shaijjo ḳorrae.
PHI 1:6 Ami ekin ḳori, ze Allae tumrar dilor maze ou nek kam shuru ḳorsoin, al-Mosie dusrabar toshrif ana forzonto, ou Allae i kam fura ḳorba.
PHI 1:7 Tumra to amar mayar manush, erlagi tumrar befare amar monor bab ola oa usit. Ami zelo bondi halote ba kush-ḳobrir hok kota zeno-u toblig kori na ḳene, tumra-o amar logor rohomotor bagi.
PHI 1:8 Eḳ Allae zanoin, al-Mosir mohobbote ami tumrar lagi koto ashik.
PHI 1:9 Ami dua ḳori, tumrar mohobbot zanu kamil bibeḳ ar aḳole din din baṛe.
PHI 1:10 Zate tumra aḳol ḳaṭaia bala bala befar oḳol sinbae, ar al-Mosie dusrabar toshrif anar ag forzonto,
PHI 1:11 tan bole tumra nek kam-ḳaz ḳoria ḳaṭi fote nikut oia roibae. Teu Alla Pakor gourob ar tarif zair oibo.
PHI 1:12 O amar bai oḳol, ami sairam tumra-o zano, amar ufre zeta zeta goṭise, itar lagi ashole kush-ḳobri tobligor ḳam aro baṛigese.
PHI 1:13 Erlagi onor razbaṛir sifai oḳole ar bad-baki manshe-o zanilisoin, ami to ḳali al-Mosir lagi-u zel ḳaṭiar.
PHI 1:14 Ar ami zelo hamanie amrar bout baiainte malikor ufre aro besh ḳori borosha ḳora hiksoin, tara ḍor-boy fauria Allar kalam tobligor lagi aro shaoshi oisoin.
PHI 1:15 Erar maze ḳeu ḳeu ingsha ar doladolir niote al-Mosir toblig korer, oile ḳeu ḳeu bala niote ḳorer.
PHI 1:16 Erar dilor mohobbote-u al-Mosir toblig korer. Tara zanoin, kush-ḳobrir fokke matar lagi-u amare aṭok kora oise.
PHI 1:17 Oile zera nizor fayda ḳamanir lagi al-Mosir toblig kore, era to bala niote ḳam ḳore na. Tara sae, ami zelo bondi roi ar amar ḳoshṭo baṛouk.
PHI 1:18 Oile itae kita ae zae? Asol ḳota oilo, zemne-u oy na ḳene, al-Mosir nam to toblig or. Ita dukabazir niote ouk ba sohi niote-u ouk. Ar ota dekia-u ami kushi. Amar i kushi kunudin fuṛaito nae.
PHI 1:19 Ami to zani, amar ufre zeta goṭise, itar hesh fol oilo, ami nistar faimu. Tumrar dua ar Isa al-Mosir ruhur bole ita oibo.
PHI 1:20 Amar kub mozbut ekin ase, ami kunumonte-u shorom faitam nae. Ami furafur shaosh ḳoria age zela al-Mosir gourob zair ḳorsi, ami mori ba basi oḳono ola zair oibo.
PHI 1:21 Ḳaron amar lagi zindegi oila al-Mosi ar moron oilo lab.
PHI 1:22 Oile ami zudi basia roi, te amar zindegit kub bala ḳam ḳorar shuzug oibo. Erlagi ami buzram na, ami kun fot loitam.
PHI 1:23 Duio fote-u amare ṭaner. Amar ichcha oilo, ami moria hari al-Mosir loge roitam, oḳan-u amar lagi bala.
PHI 1:24 Oile tumrar lagi amar basia roaḳan aro zoruri.
PHI 1:25 Ar ou monobole ami bala ḳori zani, ami basmu ar tumrar loge roimu, zate tumrar iman aro mozbut oia tumrar kushi baṛe.
PHI 1:26 Ami tumrar maze hirbar aia harle, amare loia tumra Isa al-Mosir name kub kushi korbae.
PHI 1:27 Asol befar oilo, tumra zarzir zindegire ou nomunae ḳaṭao, ze zindegi al-Mosir kush-ḳobrir laḳ. Teu ami nize aia deki ba duroi taki huni, ami buzmu, tumra dile-zane milia mozbut aso. Ar kush-ḳobrir mazdi ze iman foyda oy, ou imanor lagi hoḳole milia eḳ dile menot ḳorrae.
PHI 1:28 Zetae tumrar birudita ḳoroin, kunu befare-u tumra itare ḍoraio na. Teu forman oizibo, tara binashor fote zairagi ar tumra rehai fairae. I rehai kali Allar ges taki-u mile.
PHI 1:29 Al-Mosir ufre iman ancho iṭa zela rohomot, tan lagi zulum-mosibot shoijjo ḳorar shuzug faiso iṭa-o tumrar lagi rohomot.
PHI 1:30 Tumra age amare zela ḳoshṭo ḳorat deḳso ar oḳono zeta ḳoshṭor ḳota hunrae, tumra-o to ou laḳan ḳoshṭor maze foṛigeso.
PHI 2:1 Al-Mosir ufre iman anle zebla borosha mile, tan mohobbote zebla shanti mile, tumrar loge zebla Pak Ruhur bala shomporko ase, ar tumrar dilo zebla maya-momota ase,
PHI 2:2 te tumra amar bitoror kushikan furailao. Tumra hoḳol eḳ mone solo, dile-zane eḳ o, ar eḳe-oinnore mohobbot ḳoro.
PHI 2:3 Nizor labor asha ba beṭagiri deḳanir lagi kunta ḳorio na, borong noto oia nizor saite oinnore beshi dam deo.
PHI 2:4 Ḳali nizor shartor sinta ḳorio na, foror ḳota-o sinta ḳorio.
PHI 2:5 Hozrot Isa al-Mosir mon zelaḳan asil, tumrar mon-o olaḳan banailao.
PHI 2:6 Tain ashole Allai surote roile-o, Allai shinghashon doria raḳar lagi lalosi asla na.
PHI 2:7 Borong gulam bonia manush hishabe zonom loia nizore huru banaila.
PHI 2:8 Tain manush surote roia mout forzonto, duk-koshṭor solibor ufror mout forzonto baiddo roia nizore noto ḳorla.
PHI 2:9 Erlagi-u Allae tanre arshe-azimo uṭaila ar ola ijjoti eḳ nam dila, ze nam hoḳol taki shera.
PHI 2:10 Zate ou namor gune asman-zomin ar fatalor tamam zandar Isar samne noto oin,
PHI 2:11 ar gaibi baf Alla Pakor gourobor lagi shikar ḳoroin, Isa al-Mosi-u malik.
PHI 2:12 O amar mayar bai oḳol, tumra to hamesha-u amar hukum mania airae. Te ami samne taḳle zela mano, oḳon amar aforḳe-o ola tumrar dilor ḍor-ḳofe nek amol ḳoro. Ou amolor mazdi deḳao, tumra guna taki nazat failiso.
PHI 2:13 Buzrae ni, Allae tumrar dilor maze ola eḳ bab dan ḳorsoin, ita amol ḳorle tain kushi oin, ou amol ḳorar niot ar takkot-o tain tumrare disoin.
PHI 2:14 Tumra kunuzat torka-torki ba ḳaijja-fosad na ḳoria hoḳol ḳam ḳoro.
PHI 2:15 Zate shullo-ana forezgar ar nikut bono, ar i zomanar ḳobis naforman shomazor maze-o tumra Allar aolad hishabe ro. Ota manshor samne Allar Pak Kalam toblig koria, ou duniat-u tumra asmanor san-shuruzor laḳan soḳsoḳa bonizao. Teu al-Mosi zebla dusrabar toshrif anba, hou din ami buk fulaia ḳoitam farmu, amar ou menot ar aṭni-ḳaṭni beḳama gese na.
PHI 2:17 Huno, ze imanor kurbanir mazdi tumra Allar ebadot ḳorrae, er ufre zudi amar nizor loure kurbani hishabe ḍali deoa oy, ta-o ami kush asi, tumrare loia kushi korram.
PHI 2:18 Ṭik tumra-o ola kushi o, amar loge kushi koro.
PHI 2:19 Ami asha ḳori, Hozrot Isar morzi oile ami Timotire kub zoldi kori tumrar gese faṭaimu, teu tumrar halot zania ami shanti oimu.
PHI 2:20 Timotir laḳan ila ar ḳeu amar gese nai, zein tumrar lagi sinta ḳoroin.
PHI 2:21 Baki hoḳole-u Isa al-Mosir befare sinta na ḳoria, tara zarzir dandae asoin.
PHI 2:22 Oile Timotir befar to tumra zano, fute zela nizor bafor loge ḳam ḳore, tain-o ola al-Mosir kush-ḳobri tobligor lagi amar loge menot ḳorsoin.
PHI 2:23 Erlagi-u ami asha ḳoriar, amar dosha kita oibo, oḳan zanar bade-u ami tanre faṭaitam.
PHI 2:24 Oile ami malikor ufre borosha ḳori koiar, ami nize-o kub zoldi kori aitam farmu.
PHI 2:25 Ar ami mono ḳoriar, Usaidre tumrar gese faṭanikan kub zorur. Amar kezmot ḳorar lagi tumra tanre amar gese faṭaislae. Amra eḳloge toblig kori, Isa al-Mosir lagi jihad ḳori. Ein amar imandar bai.
PHI 2:26 Tain-o tumrar loge deḳa ḳorta saira, tumra tan bemaror ḳobor hunae, tain fereshanit foṛigesoin, erlagi ami tanre faṭaiar.
PHI 2:27 Ashole tain kub bemar asla, bemare tan na-basar halot oigesil. Oile Allae tanre rohom ḳorsoin. Ḳali tanre nae, tain basi zaoae Allae amare-o bout boṛo rohom ḳorsoin, zate ami ek koshṭor ufre ar kunu ḳoshṭo na fai.
PHI 2:28 Erlagi ami kub kiali oia tanre faṭaiar, zate tanre faia tumra-o kushi o, ar amar monor sinta-o hori zae.
PHI 2:29 Te Allar bonda hishabe furafur kushi oia tanre kobul ḳorio, ar erar laḳan manshore ijjot ḳorio.
PHI 2:30 Al-Mosir toblig korat gia tain morar foti oigesla. Amar samne na taḳae tumra ze ḳam ḳortae farso na, ou ḳamor lagi tain nizor zan dite-o razi asla.
PHI 3:1 O amar bai oḳol, hesh-mesh ḳoiram, malikor name kushi koro. Eḳ befar loia bare bare leḳte amar kunu ḳoshṭo or na, tumrare basanir lagi-u ami ita ḳorram.
PHI 3:2 Huno, hou kukror fal taki, mani naforman dolor dadir musla taki hushiar roio. Itae to tarar shorilor ḳaṭa-sirar ufre-u borosha ḳore.
PHI 3:3 Ashole amra-u oilam ḳaṭi mosolmani korail manush, amra to Isa al-Mosir name gourob ḳori, Allar ruhur bole tan ebadot ḳori, shorili kunu ebadotor ufre borosha ḳori na.
PHI 3:4 Ashole ḳeu zudi mono ḳore, nizor shorili ebadotor ufre borosha ḳorar zukti ase, te he buzilauk, tar saite amar aro beshi zukti ase. Ami-o itar ufre borosha ḳortam farlam one.
PHI 3:5 Zonmor aṭ dinor din-u amar mosolmani kam ḳorail oisil. Ami eḳzon ḳaṭi Ibrani, amar zonom oise to Boni Israilor Bin-Iamin gusṭit. Hozrot Musa nobir shoriotor befare ami to Forishi zomator.
PHI 3:6 Shoriot manar befare kunu manshe amar kut bar ḳorto farse na. Dormor befare ami kub ḳoṛa, al-Mosir zomator ufre-o ami zulum ḳortam.
PHI 3:7 Oile ou amol ḳorae amar zoto fayda oisil, oḳon al-Mosir lagi ami itare ḳeti mono ḳori.
PHI 3:8 Ashole ami zar lagi i keti shikar ḳoriar, ein-u amar Malik Isa al-Mosi. Tanre zanar maze-u hoḳol taki boṛo fayda, tan tulonae bad-baki hokkoltare-u ami keti mono ḳori. Ami zate al-Mosire fai, ar amare zate al-Mosir loge ekḳano milail deḳa zae, ou niote-u ami ita hokkoltare moylar laḳan horaia falaisi.
PHI 3:9 Te shoriot manae ami ze forezgar bonigesi, ikan nae, al-Mosir ufre iman anae-u Allae amare forezgar hishabe kobul ḳorsoin. I forezgari kali Alla taki-u mile, iṭa to imanor ufre nirbor ḳore. Al-Mosir loge milar bade-u amar ou halot oise.
PHI 3:10 Te ami al-Mosire sintam sai, ze kudroti bole tanre mora taki zinda ḳora oisil, ou bolre-o sintam sai. Ami tan duḳ-mosibotor bagi oitam sai, tain zela nizor zan kurbani disla, ami-o ou mouto shorik oitam sai.
PHI 3:11 Ar zekunu laḳan moron taki zinda oat-o shorik roi.
PHI 3:12 Te ami zeta faitam sairam, ita ze oḳon-u failisi, ba furafur kamiab oigesi ila kunta nae. Hozrot Isa al-Mosie ze niote amare bondi korsoin, ou niot fura ḳorar lagi-u ami douṛairam.
PHI 3:13 Bai oḳol, ami mono ḳorram na, ami itar lagal failisi. Oile ḳoror hoḳolta falaia ami dile-zane samnedi douṛaiar.
PHI 3:14 Douṛai douṛai sesṭa ḳoriar, Isa al-Mosir zoriae Alla Pakor ze behesti daot ase, furuskar hishabe ou daoto hamaitam fari.
PHI 3:15 Erlagi koiram, amra zara Hozrot Isar fote bout aguai gesi, amrar niot-o olaḳan oa zorur. Ar tumrar zudi oinno kunu niot taḳe, te Allae-u fot batai dibane.
PHI 3:16 Zai ouk, amra zotoḳan aguaisi, ou laḳan zindegi-o ḳaṭani usit.
PHI 3:17 Bai oḳol, tumra kilan zindegi kaṭaitae, ita to ami hikaisi. Tumra amar laḳan solo, ar ou laḳan zara sole, tarare dekia hiko.
PHI 3:18 Ami to bout bar tumrare ḳoisi, ar sokur fani falaia oḳono ḳoiram, ila-o bout zon ase, zera al-Mosir duk-koshṭor solibor dushmonor laḳan soler.
PHI 3:19 Tarar ḳofalo ase binash. Tarar feṭ-u tarar Alla. Naformani kam loia tara boṛai kore, ḳali duniar dandae fagol.
PHI 3:20 Oile amrar asol baṛi to behesto. Amrar toraora malik, Hozrot Isa al-Mosie hon taki toshrif anba. Amra tan lagi dile-zane bar sairam.
PHI 3:21 Tain aia amrar ou ḳomzur ḳaya bodlaia, tan ḳayar laḳan ḳemota-ala nuror ḳaya diba. Ze kudroti bole tain hokkolta ḳorta faroin, hou bole-u tain ita ḳorba.
PHI 4:1 O amar mayar bai oḳol, ami tumrare deḳtam sai. Tumra-u amar kushi, amar joyor mala. Amrar malikor loge tumra mozbut oia lagia ro.
PHI 4:2 O amar boin Salima ar Saida, ami minot ḳori koiram, eḳ malikor kezmoto lagail aso ḳori, tumra mili-mishi eḳ mone solo.
PHI 4:3 O amar logor asol shongi, ami tumare-o minot ḳorram, tumi ou beṭintore shaijjo ḳorio. Al-Mosir kush-ḳobri toblig kamo era amar loge bout ḳoshṭo ḳorsoin. Kiliman ar oinnainno baiaintor loge-o ḳoshṭo ḳorsoin. Tarar nam to Allar zindegi katat leḳa ase.
PHI 4:4 Malik Isar name tumra hamesha kushi-bashi koro. Ami hirbar ḳoiram, kushi-bashi koro.
PHI 4:5 Tumrar norom bebohar zanu hoḳol manshor sokut foṛe. Zano to, amrar malik kub zoldi-u aira.
PHI 4:6 Kunu befare-u tumra fereshan oio na, borong munazat ḳoro. Tumrar zotota saibar ase, Allar shukria adae ḳoria tan gese sao.
PHI 4:7 Teu Allar deoa ze shantir ḳota manshe sinta-o ḳorto fare na, Isa al-Mosir mazdi ou shanti aia tumrar dil ar monre roikka ḳorbo.
PHI 4:8 O bai oḳol, ami hesh-mesh ḳoiram, zeta hasa, zeta ufozukto, hok, ḳaṭi, shundor, ar ijjot faoar zuka, mani zeta bala ar zetae tarif oy, ou laḳan befare tumra kiali o.
PHI 4:9 Tumra amar ges taki ze talim faiso, zeta huncho, zeta deḳso, ar zeta kobul ḳorso ota oḳon amol ḳoro. Teu shanti deora Alla-o tumrar loge loge roiba.
PHI 4:10 Malike amar kushi aro baṛai dila, bout din bade tumra amare mono ḳorrae. Amar lagi to hamesha-u tumra sinta ḳorso, oile ita deḳanir shuzug faiso na.
PHI 4:11 Kunu obabo foṛia ami ikan ḳoiram na, zekunu halote-u shontusto roaḳan ami zani.
PHI 4:12 Obabi ba nobabi halote, ufashi feṭe ba bora feṭe, doni ba goribir maze kila shontusto roa zae, ita talim ami faisi.
PHI 4:13 Ashole zein amare bol-shokti zugaia dein, tan bole-u ami hokkolta ḳortam fari.
PHI 4:14 Ta-o tumra amar ḳoshṭor loge shorik oia, kub bala ḳam ḳorso.
PHI 4:15 O Filifi zomator mumin oḳol, tumra to zano, tumra foyla kush-ḳobri faoar bade ami zebla Makidonia desh taki geslamgi, ou shomoy tumra saṛa ar kunu zomate-u amar loge kunuzat len-den ḳorse na.
PHI 4:16 Ami zebla Tisholoniki ṭauno aslam, ou shomoy amar obabor ḳalo tumra ḳoybar shaijjo faṭaiso.
PHI 4:17 Ami tumrar ges taki kunu dan-dokkina sairam na, oile tumrar lagi ola eḳ fol asha ḳorram, zeta tumrar amol-namat zoma roibo.
PHI 4:18 Amar hoḳol faona-u ami failisi. Ashole amar zotoḳan zorur, er saite-o beshi ase. Usaid bair at taki tumrar ufohar faia oḳon amar bout oise. Ou ufohar to Allai kushboy-ala, Allar dorbaro kobul oar zuka kurbani. Alla Pak itae kushi oin.
PHI 4:19 Amar Allae tan nizor gourobor don hishabe, Hozrot Isa al-Mosir usillae tumrar hoḳol obab dur ḳorba.
PHI 4:20 Zuge zuge hor-hamesha amrar gaibi baf Alla Pakor tarif zari rouk. Amin.
PHI 4:21 Hozrot Isa al-Mosir torikar Allar hoḳol bondare amar salam dio. Amar logor hoḳol baiainte tumrare salam zanaira.
PHI 4:22 Allar zoto pak bonda i zagat asoin, ḳas ḳori bashsha Ḳoisoror baṛir mumin oḳole salam zanaira.
PHI 4:23 Hozrot Isa al-Mosir rohomot tumrar dilo taḳouk. Amin.
COL 1:1 Ami Paulus, Alla Pakor morzie Hozrot Isa al-Mosir eḳzon sahabi. Kolosi ṭaunor maze al-Mosir torikar pak bonda ar mumin oḳlor gese ami ar bai Timotie ou sohifaḳan leḳram. Amrar gaibi baf Alla Pake tumrar ufre rohomot ar shanti nazil ḳoroukka.
COL 1:3 Hozrot Isa al-Mosir ufre tumrar iman ar Allar pak bonda oḳolre maya ḳorar ḳota amra hunchi. Erlagi zebla-u tumrar lagi dua ḳori, ou shomoy amrar Malik Isa al-Mosir gaibi baf Alla Pakor shukria adae ḳori.
COL 1:5 Tumra age ze kush-ḳobri mani Allar hok kalam faiso, ou kalam hunia-u tumrar mono eḳ asha zonmise. Ou asha taki-u tumrar iman ar maya foyda oise. Ar tumra asha ḳorrae ze saman faitae, ita to behesto raḳa ase.
COL 1:6 I kush-ḳobri duniar hoḳolbae sitria bala folala oia din din baṛer. Ze din tone tumra ou kush-ḳobri ar Allar rohomotor befare furafur huncho, ou din tone-u itae tumrar bitre-o furafur ḳam ḳorer.
COL 1:7 Ou kush-ḳobrir ḳota tumra amar logor mayar bai Abu-Farasor gese huncho. Tain tumrar torof taki al-Mosir eḳzon hok kezmotḳari.
COL 1:8 Pak Ruhur bole tumrar dilor maze ze maya foyda oise, ou befare Abu-Farase amrare zanaisoin.
COL 1:9 Erlagi tumrar befare hunar bad taki-u amra hamesha tumrar lagi dua ḳori. Ruhani ilim ar buddi dia tumra zanu Allar munsha furafur buztae faro.
COL 1:10 Amra Allar dorbaro ou dua-u ḳorram, tumra zate hoḳol befare al-Mosir morzi zugaia solo ar tan ufozukto ummotor laḳan zindegi kaṭao. Hok kam ḳori kori foloban o, ar Alla Pakre aro bala ḳori sino.
COL 1:11 Allae tan moha kudroti bole hoḳol nomunar bol dia tumrare boloban ḳoroukka. Bala-mosiboto foṛle-o kushi-bashi roia sobor ḳorar tofik deukka.
COL 1:12 Ar hoḳol shomoy behesti baf Alla Pakor shukria zanao. Allar pak bonda oḳole nuror bashshait ze odikar faiba, itar bagi oar lagi to tain-u tumrare ufozukto banaisoin.
COL 1:13 Tain-u amrare andairor bashshai taki uddar ḳoria, tan ḳas mayar zonor bashshait anchoin.
COL 1:14 Ou mayar zonor ufre iman anae amra rehai faisi, mani guna taki mafi faisi.
COL 1:15 Ou mayar zon-u oila, batuni Allar zairi surot; hokkolta foyda ḳorar age tain asla, ar foyda oa hokkoltar maze tain-u fordan.
COL 1:16 Asman-zominor maze deḳa ar a-deḳa zotota ase, ita bashshai ouk ba bahaduri, shashon kiba ḳemota ouk, hokkolta-u tan ator foyda. Ita to ḳali tan lagi-u foyda ḳora oise.
COL 1:17 Hokkoltar foyla tain asla ar tan mazdia-u hoḳolta ṭikia ase.
COL 1:18 Tain-u tan shorilor mata, mani zomator mata. Tain-u hokkoltar foyla, ar tain-u foyla murda taki zinda oisoin, zate hoḳol befare tain-u fordan oita faroin.
COL 1:19 Allae saila, tan Allai gunor hokkolta zanu al-Mosir maze taḳe.
COL 1:20 Ar duniat ba behesto zeno-u oy na ḳene, ou al-Mosir mazdia zanu hokkoltar loge tan milon oy. Tain saila, solibor ufre al-Mosir kurbanir lour bodla shanti kaimor mazdi ou milon ouk.
COL 1:21 Tumra to eḳ shomoy Allar ges taki duroi aslae, ar tan befare tumrar dilo dushmoni bab asil. Ita tumrar bod ḳamor mazdi zair oise.
COL 1:22 Oile al-Mosir zan kurbanir mazdi Allae tumrare-o tan loge milon goṭaisoin, zate tumrare fak-fobitro, nikut ar ni-oforadi halote tan samne azir ḳorta faroin.
COL 1:23 Te al-Mosir befare kush-ḳobri taki ze nichchit asha tumra faiso, ḳali ou ashar ufre imane tir roio, in taki loṛio na. Tumra to zano, i kush-ḳobri hara duniat toblig kora oise, ami Paulus-o ou kush-ḳobri tobligor ḳadim oisi.
COL 1:24 Tumrar lagi ami duḳ-mosibot shoijjo ḳorae kub anondo fairam. Zano to, al-Mosir shoril mani zomator lagi tan ze duḳ-mosibot oḳono baki ase, ita oḳon amar shoril dia fura ḳoriar.
COL 1:25 Alla Pake tan fobitro kalam tumrar gese furafur toblig korar bar amare disoin, gotike-u ami zomator eḳzon kezmotḳari oisi.
COL 1:26 Allar kalamor ze batuni befar agor zomanar manshor gese zug zug dori lukail asil, ita oḳon tan pak bonda oḳlor gese zair ḳora oise.
COL 1:27 Allae saisoin, bin zati oḳlor gese-o tan batuni munshar gourob ze kita, ita zenu tan hoḳol bonda oḳole zanta faroin. Ashole al-Mosi tumrar dilo asoin, gotike tumra gourob faoar asha faiso.
COL 1:28 Ar ou al-Mosir befare amra toblig koriar, Allar deoa aḳol-hekmot dia manshore hushiar ḳoriar ar talim diar zate al-Mosir torikat furafur kamil halote tarare Allar dorbaro azir ḳortam fari.
COL 1:29 Ou niote Allar ze kudroti bol amar maze ḳam ḳorer, ou kudroti bole-u ami dile-zane menot ḳoriar.
COL 2:1 Ami tumrare zanaitam sairam, ami to tumrar lagi, Laodikea ṭaunor zomator lagi, ar zera amare deḳse na tarar lagi-o ḳoto menot ḳorram.
COL 2:2 Ami sairam, tarar dilo borosha faia mohobbote eḳ ouk. Ar furafur aḳole aḳoldar bonia nichchit ouk. Teu Allar lukail batuni bed buzbo, mani al-Mosire tara sinbo.
COL 2:3 Al-Mosir maze-u hoḳol aḳol-hekmot lukail ase.
COL 2:4 Ami ita ḳoilam, zate ḳeu banoaṭ mat-ḳota matia tumrare be-fote nito na fare.
COL 2:5 Ami sho-shorile tumrar maze na taḳle-o ruhur bole ṭik-u tumrar maze azir asi. Tumrar bala sal-cholon ar al-Mosir ufre mozbut iman dekia amar kub bala lager.
COL 2:6 Isa al-Mosire tumra malik hishabe zela kobul ḳorso, ou laḳan tan loge roia zindegi-o ḳaṭao.
COL 2:7 Al-Mosir maze shullo-ana ḍub dia tumrar zindegire goṛia tulo. Tumra talim faia ze iman ancho, ou imane mozbut ro ar hamesha Alla Pakor shukria adae ḳoro.
COL 2:8 Tumra hushiar roio, ḳeu zanu tumrare manshor banail mongoṛa talimdi bandia be-fote ṭania nito na fare. Al-Mosir loge i talimor kunu mil nai, ita to manshor mongoṛa rosumot ar duniabi nanan asar-beboharor ufre borosha ḳore.
COL 2:9 Allar hokkol laḳan gunagun al-Mosir ḳayar bitre ase.
COL 2:10 Erlagi al-Mosir loge shorik oia tumra-o hoḳol gune kamil oiso, tan ashon to hoḳol nomunar shashonḳari ar ḳemota-ala hokkoltar ufre.
COL 2:11 Al-Mosir ufre iman anae to tumrare mosolmani kam ḳorail oise. Ou mosolmani kunu manshor ate ḳorail oise na, al-Mosie nize-u ita ḳorsoin, mani dilor maze ze bod ḳaish asil, ou bod ḳaishre dil taki kaṭia falaisoin.
COL 2:12 Toubar gusolor mazdi al-Mosir loge tumrare-o maṭi deoa oisil, ar zein al-Mosire murda taki zinda ḳorsoin, hou Allar kudroti bole imanor mazdi tumrare-o al-Mosir loge zinda ḳora oise.
COL 2:13 Tumrar guna ar dilor bod ḳaish na horanie murda aslae, oile Allae tumrare al-Mosir loge zinda ḳorsoin. Tain amrar hoḳol gunar mafi disoin.
COL 2:14 Ar amrar bod amol-namar ze dolil asil, ou dolilre hoḳol zator dabi-daoa shudda fusia falaisoin. Laḳṛidi banail ze solibo Isare zane mara oise, ou solibo i dolilre fereg maria batil ḳorsoin.
COL 2:15 Al-Mosie bod shashonḳari ar ḳemota-ala hokkolor ḳemotare binash ḳorsoin. Solibo tan nizor zan kurbanir mazdi tarar ufre joyi oisoin ar hoḳlor samne tarar muk nisa ḳorsoin.
COL 2:16 Erlagi-u shinni-shoḳat, puja-foshad omaboishsha-funnima, id ba Zummabaror niom-ḳanun loia tumrare dushi korar eḳtiar ḳeuror nai.
COL 2:17 Ita to asil, bobishote zeta aibo otar eḳṭa nomuna matro, oile asolta to al-Mosir maze-u ase.
COL 2:18 Zera nizor shorilre ḳoshṭo deoa ar firista oḳlor ebadot ḳorare zoruri mono ḳore, era zanu tumrare furuskaror fot taki horaito na fare. Ou nomunar manshe zeta deḳse ḳoia ḳamoḳa boṛai-beṭagiri kore, ar ota loia boṛo boṛo gof mare, ashole erar ontor to ḳali duniabi sintae bora.
COL 2:19 Tara to matare, mani Isa al-Mosire mozbut ḳori doria raḳe na, ou matar ḳemotae asta shorilor aḍḍi-mangsho bol-shokti faia ekḳano roy, ar Allai bole baṛe.
COL 2:20 Al-Mosir loge mara gia tumra zebla duniabi hoḳol sal-cholon taki horia aiso, te hirbar ḳene duniabi manshor laḳan duniabi niom-nitir gulam oirae?
COL 2:21 Huno, ze zinish bebohar ḳorte ḳorte borbad oizae, ou zinishor befare ola niom ase, ita dorio na, soio na, ḳaio na. Ita to ḳali manshor mongoṛa hukum ar talim.
COL 2:23 Ḳemne ebadot ḳora, nizore nisa ḳora, ḳemne nizor shorilre ḳoshṭo deoa, ou niom-nitie ota hikae. I niom-niti deḳle mono oy, ita kub aḳolor ḳam, oile dilor bod ḳaishre domon ḳorar lagi itar kunu dam-u nai.
COL 3:1 Huno, tumra to al-Mosir loge mora taki zinda oiso, ar al-Mosi to behesto Allar ḍainor toḳto boat asoin, erlagi tumra-o oula behesti befar loia ashik o.
COL 3:2 Duniabi befare ashik na bonia, behesti befare ashik o.
COL 3:3 Tumra to mara geso, tumrar zindegi al-Mosir loge Allar dorbaro lukail ase.
COL 3:4 Zein tumrar zindegi, hou al-Mosi zebla hoḳlor samne zair oiba, ou shomoy tumra-o tan mohimar bagi oia tan loge zair oibae.
COL 3:5 Erlagi gunar zeta rifu oḳol tumrar zindegit ase, itare eḳdom binash ḳorilao. Ita oilo hokkol nomunar zina, nafaki, bod ḳaish, ku-sinta, ar lub-lalos, i lub-lalos oilo eḳlaḳan murtipuja.
COL 3:6 Zara Allar naformani kore, otar ḳarone-u tarar ufre Allar gozob lamia ae.
COL 3:7 Tumra-o age ou laḳan naformanir maze zindegi kaṭaitae.
COL 3:8 Oile oḳon rag-gusa, bitori dushmoni, ingsha-ninda, gala-gali ar ḳobisi mat-ḳota tumrar ges taki horailao.
COL 3:9 Eḳe-oinne misa matio na, ḳaron tumrar zindegir furan ‘ami’re tar hoḳol amol shudda furan ḳafoṛor laḳan falai diso,
COL 3:10 ar Allar deoa noya ‘ami’re noya ḳafoṛor laḳan findiso. Ou noya ‘ami’ aro noya oia tar foyda ḳorra malikor laḳan boner, zate ou foyda ḳorrare tumra furafur sino.
COL 3:11 Ou halote Ihudi kiba bin zati, mosolmani kam ḳorail ba na ḳorail, oshikkito borbor, nisa zati, gulam ba azad manshor maze kunu tofat nai. Ita hoḳoltar maze al-Mosi-u fordan, hoḳlor maze-u tain asoin.
COL 3:12 Te Allae zarare fosond ḳoria tan nizor lagi alog korsoin, tan hou mayar bonda hishabe tumrar dilor maya-momota, doya, norom bebohar, norom shobab ar sobor dia nizore hazao.
COL 3:13 Eḳe-oinnore shoijjo ḳoro, ḳeuror birudde tumrar kunu nalish taḳle tare maf ḳori deo. Malike zela tumrare maf ḳorsoin, tumra-o oula eḳe-oinne maf ḳora zorur.
COL 3:14 Ar ita hokkoltar loge maya-mohobbotdi nizore hazao. Mohobbote to hoḳolre furafur eḳloge bandia raḳe.
COL 3:15 Al-Mosie ze shanti dan ḳoroin, ou shanti tumrar dilo roia tumrare salauk. Eḳ shoril oia shantir maze roitae ḳori-u to tumrare daot deoa oise. Tumra shukur-guzar ḳorat ro.
COL 3:16 Al-Mosir kalamre tumrar dilor maze furafur boshot ḳorte deo. Allar deoa aḳol ḳaṭaia eḳe-oinnore talim ar foramish deo. Allar shukria adae ḳorar mazdi tan name hamd, ḳaoali ar Zobur Shorifor gozol gao.
COL 3:17 Tumra mukdi zeta mato ar shoril dia zotota ḳoro, ita Hozrot Isar name ḳoro, tan usilla loia gaibi baf Alla Pakor shukria zanao.
COL 3:18 Tumra zera bou oiso, tumra forteḳe zarzir zamair hukum mania solo, malikor bonda hishabe to ola sola zorur.
COL 3:19 Tumra zera zamai oiso, tumra-o zarzir boure mohobbot ḳorio, bour loge ḳoṭu bebohar ḳorio na.
COL 3:20 Tumra zera fua-fuṛi, tumra hoḳol befare ma-bafor baiddo roio, ila solle malik kushi oin.
COL 3:21 Ar tumra zera baf oiso, tumra nizor fua-fuṛintor monre titta ḳorio na, zate tarar mon na bange.
COL 3:22 Tumra zera gulam, tumra hoḳol befare tumrar zogotor munib oḳlor baiddo roio. Tara samne roia zebla tumrar ḳam-ḳaz deḳoin, ḳali ou shomoy tarare kushi raḳar sesṭa na ḳoria, borong malikor ḍor-ḳof bitre rakia ḳaṭi dile tarar baiddo roio.
COL 3:23 Tumra zeta-u ḳoro na ḳene, ita manshor lagi nae, borong malikre kushi korar niote dile-zane ḳorio.
COL 3:24 Mono rakio, malike tan bonda oḳlor lagi zeta raḳsoin, ita to furuskar hishabe tan ges taki-u tumra faibae. Tumra to ḳali Hozrot Isa al-Mosir kezmot ḳorrae.
COL 3:25 Ar ze zone naformani kore, he to tar ḳamor fol faibo. Mono rakio, malike ḳeuror muk saia bisar ḳoroin na.
COL 4:1 Tumra zera munib, tumrar gulam oḳlor loge niae ar hok insaf ḳorio. Mono rakio, behestor maze tumrar-o eḳzon munib asoin.
COL 4:2 Tumra mon dia shukria adae ḳoria dua ḳorat roio.
COL 4:3 Amrar lagi-o dua ḳorio, zate Allae amrare al-Mosir befare batuni hok kalam toblig korar tofik dein. Ou batuni hok kalamor lagi-u to amare bondi kora oise.
COL 4:4 Dua ḳorio, manshore zela forishkar ḳori buzani zorur, ami zanu ṭik oula buzaitam fari.
COL 4:5 Al-Mosir torikar bairor manshor loge aḳol ḳaṭaia solio, ar toblig korar hokkol shuzug kamo lagaio.
COL 4:6 Tumrar mukor zoban hamesha miṭa ar roshail ouk, zate ḳare kila zuaf ditae, ita tumra buzo.
COL 4:7 Amrar mayar bai, bishashi kadim ar malikor kezmoto amrar logor tobligkari Tukik baie, amar bistarito ḳobora-ḳobor tumrare zanaiba.
COL 4:8 Tan marfote amrar hal-hokikot zanbae, tain tumrare shaosh diba. Erlagi ami tanre tumrar gese faṭailam.
COL 4:9 Tukikor loge amrar mayar imandar bai Onisimre-o faṭailam. Ein to tumrar-u eḳzon. Tara inor hoḳol ḳobor-antor tumrare zanaiba.
COL 4:10 Amar logor bondi bai Aristakus ar Barnabasor kuṭum Markuse-o tumrare salam disoin. Ou Markusor befare tumra to ag taki-u ḳobor faiso, tain zudi tumrar gese zain, te kushi mone tanre kobul ḳorio.
COL 4:11 Ar Isa urfe Iustuse-o tumrare salam disoin. Allar bashshair lagi Ihudi oḳlor maze ḳali ou tin zone-u amar loge ḳam ḳoroin, tara amare bout shaosh disoin.
COL 4:12 Abu-Farase-o tumrare salam disoin, tain to tumrar afon manush ar Isa al-Mosir gulam. Ein hamesha tumrar lagi dile-zane munazat ḳorra, tumra zate kamil o, ar Allar morzi-munsha buzia mozbut oia ubao.
COL 4:13 Tan befare ami ou shakki ditam fari, tumrar lagi ar Laodikea, Hiorapoli ṭaunor manshor lagi-o Abu-Farase kub menot ḳoroin.
COL 4:14 Amrar mayar ḳobiraz Luk ar bai Dimase-o tumrare salam disoin.
COL 4:15 Laodikear imandar bai oḳolre, ar Nimufa ar tan baṛir zomator hoḳlor gese-o salam zanaio.
COL 4:16 Tumra ou siṭikan foṛia harle Laodikear zomator manshore foṛar lagi dio ar Laodikea zomatre dusra ze siṭi deoa oise, ou siṭi-o tumra foṛio.
COL 4:17 Arkipasre oḳan ḳoio, “Malikor kezmoto tumare ze ḳam deoa oise, ou ḳam shesh ḳorar niote mon dia ḳam ḳoro.”
COL 4:18 Ami Pauluse nizor ate ou salamor ḳota leḳlam. Mono rakio, ami zelo bondi asi. Allae tumra hoḳlor ufre rohomot nazil ḳoroukka. Amin.
1TH 1:1 Ami Paulus, bai Silas ar Timotie Tisholoniki ṭaunor zomator gese leḳram. Tumra amrar gaibi baf Alla Pak ar Hozrot Isa al-Mosir afon zon oiso. Tumrar ufre rohomot ar shanti nazil ouk.
1TH 1:2 Amra dua ḳorar bala hamesha tumrar zomator hoḳlor nam mono ḳoria Allar shukria adae ḳori.
1TH 1:3 Imanor lagi tumra ze ḳam ḳorrae, mohobbotor lagi tumra ze menot ḳorrae ar Hozrot Isa al-Mosir ufre asha-borosha ḳoria tumra ze sobor ḳorrae, ita amrar gaibi baf Allar dorbaro dua ḳorar shomoy hamesha mono ḳori.
1TH 1:4 O bai oḳol, Allar mayar bonda oḳol, amra zani, Allae-u tumrare fosond ḳorsoin.
1TH 1:5 Amrar kush-ḳobrir toblig kam to tumrar gese ḳali mukor ḳota-u roise na, borong Allai bol, Pak Ruhu, ar nichchit boroshar ufre salu oise. Tumrar balair lagi amra zebla tumrar loge roitam, ou shomoy kilan solchi, ita to tumra zano-u.
1TH 1:6 Tumra bout zulum-mosibotor maze-o Pak Ruhur deoa kushie amrar toblig kobul ḳoria, amrar ar malikor fote solrae.
1TH 1:7 Oula solia tumra Makidonia ar Gris deshor mumin oḳlor gese eḳ nishana oigeso.
1TH 1:8 Malikor kalam tumrar mazdi kali Makidonia ar Gris desho-u sitrise na, borong Allar ufre tumrar imanor ḳota hoḳol zagat-u sitrigese. I befare amra kunta matar zorur nae.
1TH 1:9 Hoḳol manshe-u to amrare ḳoira, tumra ḳoto ador ḳoria amrare kobul ḳorsilae, tara eoḳan ḳoira, tumra kila deb-debintor puja bad dia Allar foti oia, zinda hok Allar ebadot ḳorat aiso.
1TH 1:10 Ar murda oḳlor maz taki zenre zinda ḳori tula oise, hou Isa duniat aoar bar saitae faro. Tain oila Allar ḳas mayar zon Ibnulla, behest taki lamia aira, Allar ze gozob aia lamer, i gozob taki ou Isae amrare basaiba.
1TH 2:1 Bai oḳol, tumra to nize-u zano, tumrar gese amrar zaoaḳan beḳama gese na.
1TH 2:2 Tumra eoḳan-o zano, er age amra Filifi ṭauno zulum-mosiboto foṛslam ar beijjot oislam. Bade tumrar ono-o bout bada-nished ḳaṭaia amra Allai shaoshe shaoshi oia dile-zane tan kush-ḳobri kula-mela toblig korsilam.
1TH 2:3 Amrar daot to kunu bul talim taki nae, kunu bod niote-o nae ba kunu ṭogaṭogir niote-o nae.
1TH 2:4 Ḳali Allae amrare zoiggo mono ḳoria zela kush-ḳobri tobligor dayitto disoin, amra ola-u toblig korram. Kunu manshore kush ḳorar niote amra ita ḳoiram na, ḳali zein amrar dilre zasai koria deḳoin, hou Allare kush ḳorar lagi-u toblig korram.
1TH 2:5 Tumra to zano, amra kunu shomoy-u ḳeuror gese tel-malish ḳoria ḳota matsi na, ar kunu lub-laloso foṛia dandabazir ḳam-o ḳorsi na, eḳ Alla-u itar shakki.
1TH 2:6 Kunu manshor ges taki ijjot faite asha ḳorsi na, tumrar ges taki-o na, ba baira manshor ges taki-o na.
1TH 2:7 Amra ichcha ḳorle to al-Mosir sahabi hishabe tumrar ufre dabi kaṭaitam farlam one. Oile er bodla, maʼe zela nizor huruttainre zoy-zoton ḳoroin, tumrar loge taḳar shomoy amra-o ola norom bebohar ḳorsi.
1TH 2:8 Tumrar lagi kub beshi maya-mohobbot oae, ḳali Allai kush-ḳobri toblig nae, amrar nizor zan dite-o razi aslam. Zano to, tumra oilae amrar kub mayar manush.
1TH 2:9 Baiainre, ashole to amrar menot ar aṭni-ḳaṭnir ḳota, nichchoy tumrar mono ase. Allai kush-ḳobri tobligor faḳe faḳe amra dine-raite ruzi-ruzgar ḳorsi, zate amrar ḳorsa-fati tumra ḳeuror lagi buza na oy.
1TH 2:10 Ar tumra zera iman ancho, tumrar loge to amrar asar-bebohar asil fobitro, hok ar nikut. Tumra-u itar shakki, ar Alla Pak-o shakki asoin.
1TH 2:11 Tumra to zano, bafe zela nizor forteḳ aoladre utshaho, shantona ar mozbut foramish dein, amra-o tumra hoḳolre oula foramish ditam,
1TH 2:12 zate Allar bonda hishabe tumra ufozukto oia solo. Allae tumrare daot dira, tan nizor bashshai ar gourobor bagi oar lagi.
1TH 2:13 Mono rakio, amra hamesha Allar shukria adae ḳorram, ḳaron amrar ges taki Allar kalam hunia tumra zebla iman anchilae, hou shomoy kunu manshor mukor ḳota nae, borong Allar kalam hishabe-u tumra ita kobul ḳorsilae, ar hasau ita Allar kalam. Tumra zera iman ancho, hou kalame-u tumrar dilo ḳam ḳorer.
1TH 2:14 Bai oḳol, Hozrot Isar torikae solra Allar zoto zomat oḳol Ehudia zilat ase, tumrar hal-hokikot to tarar laḳan-u. Ḳaron tara zela nizor Ihudi zatir ato duḳ-mosibot faisoin, tumra-o oula nizor zatir manshor ges taki duḳ-mosibot faiso.
1TH 2:15 Mono rakio, Ihudi oḳole Hozrot Isa ar nobi oḳolre zane marsil, tara amrar ufre-o zulum ḳorse. Te Alla Pak tarar ufre kushi nae, hoḳol manshor loge-o tarar dushmoni bab ase.
1TH 2:16 Tara amrare nished dira, zate bin-dormi manshor gese amra Allai nazator kush-ḳobri toblig na ḳori. Ou laḳan tara zarzir gunar buza boṛo ḳorra. Erlagi tarar ufre Allar ḳaṛa gozob lamche.
1TH 2:17 O bai oḳol, monor dik taki na oile-o, shorilor dik taki to amra tuṛa dinor lagi, tumrar ges taki horail asi. Erlagi amrar kub kial ase, zate tumrar mukkan hirbar deḳtam fari.
1TH 2:18 Amra hoḳol-u, ḳas ḳori ami Pauluse bar bar sesṭa ḳorsi tumrar gese aitam. Oile Shoytane amrare aṭḳailise.
1TH 2:19 Hasau amrar Malik Isae zebla toshrif anba, ou shomoy tan samne amrar asha, anondo ar gourobor joyor mala hishabe kita faimu? Ita to tumra-u nae ni?
1TH 2:20 Ashole tumra-u amrar gourob, tumra-u amrar anondo.
1TH 3:1 Bade amra zebla ar shoijjo ḳortam farlam na, ou shomoy amra niot ḳorlam, amra eḳla-u Atinia ṭauno roia,
1TH 3:2 amrar bai Timotire faṭaimu, zate tain gia tumrar iman mozbut ḳoroin ar monor shaosh zugain. Tain to al-Mosir kush-ḳobrir toblig kamo Allar ḳadim, amrar logor bai, tanre faṭailam,
1TH 3:3 zate ou duḳ-mosibotor maze-o tumra ḳeu ḳoredi na zao. Tumrar zana ase, duḳ-mosibot amrar ufre ṭik-u aibo, ar ita shoijjo ḳora lagbo.
1TH 3:4 Ami age zebla tumrar loge aslam, hou shomoy tumrare ḳoisi, duḳ-mosibot amrar ufre aibo-u, ar ṭik-u olaḳan aise.
1TH 3:5 Te ami zebla ar shoijjo ḳortam farlam na, ou shomoy tumrar imanor halot deḳar lagi Timoti baire faṭailam. Amar mono ḍor asil, kizanu Shoytane tumrare lalos deḳaise ar amrar hoḳol menot beḳama gesegi.
1TH 3:6 Oile Timoti bai tumrar ges taki firia aia amrare zanaisoin, tumrar iman ar maya-mohobbotor halot bout bala. Tain ḳoisoin, tumra hamesha maya-mohobbote amrare mono ḳoro, ar amra zela tumrare deḳtam sairam, tumra-o oula amrare deḳar asha ḳorrae.
1TH 3:7 O bai oḳol, erlagi-u tumrar imanor mozbutir ḳota hunia, amrar oto duḳ-mosibotor maze-o dilo shanti faisi.
1TH 3:8 Tumra malikor ufre imane mozbut roile-u, amrar zindegikan doinno.
1TH 3:9 Tumrare loia Allar dorbaro amra ze kushi-bashi koriar, itar lagi amra kila Allar shukria zanaitam, zanram na.
1TH 3:10 Amra mon dia dine-raite hamesha dua ḳorram, zate tumrar mukkan hirbar deḳar shuzug fai, ar tumrar imanor bad-baki hoḳolta fura ḳortam fari.
1TH 3:11 Te gaibi baf Allae ar Hozrot Isa al-Mosie zanu, tumrar gese zaoar lagi amrare shuzug dein.
1TH 3:12 Amra zela tumrar bae maya-mohobbotor maze ḍubi gesi, ṭik oula Malik Isae tumrare-o eḳe-oinne, ar hoḳlor bae maya-mohobbote habuḍubu ḳaoaukka.
1TH 3:13 Ou laḳan tain tumrar dil furafur mozbut ḳoroukka, zate amrar Hozrot Isae zebla tan nizor pak bonda oḳol loia toshrif anba, ou shomoy amrar gaibi baf Allar nozoro tumra fobitro ar nikut ro.
1TH 4:1 O baiain huno, Allare kushi korar lagi kemne zindegi kaṭani lage, i talim to tumra amrar ges taki age-u faiso ar tumra ola solrae-o. Erbade-o Hozrot Isar oia tumrare minot ḳoriar ar hushiar ḳoriar, tumra zela solrae, oula aro besh ḳori solo.
1TH 4:2 Hozrot Isar deoa eḳtiare amra zeta hukum disi, ita to tumrar zana ase.
1TH 4:3 Ashole Allae saira, tumra zanu fak-fobitro o, mani hoḳol nomunar zina taki horia ro.
1TH 4:4 Ar zeta manshe Allare sinoin na, hou bin-dormir laḳan shorilor ḳaishor boshe na solia, tumra forteḳ zone zarzir shorilre fak-fobitro rakia man-shommane zina taki hushiar ro.
1TH 4:6 I befare ḳeu zanu nizor bair loge gaddari na ḳore. Mono rakio, amra age-u tumrare ḳoisi ar hushiar-o ḳorsi, ita naformani korle Malik Isae shaza diba.
1TH 4:7 Allae kunu amrare daot disoin ni naformanir fote solar lagi? Tain to amrare fak-fobitro oia solar lagi koisoin.
1TH 4:8 Erlagi zegie i talim mane na, he ḳali duniar manshore mane na ikan nae, he ashole hou Allare-u maner na, zein tumrare Pak Ruhu dan ḳorsoin.
1TH 4:9 Te baie baie kila maya-mohobbot taḳa zorur, i befare tumrare kunta leḳar goroz nai, ḳaron Allae tumrare hikaisoin, eḳe-oinne maya-mohobbot ḳortae.
1TH 4:10 Ar hasau tumra asta Makidonia deshor bai-boinre oula maya ḳorrae. Oile amrar ḳas onurud oilo, tumrar i mohobbot zanu dine dine aro baṛe.
1TH 4:11 Huno, amra age zela ḳoisi, ou ḳota mafik shantie zindegi kaṭao, foror ḳamo naḳ na golaia nize ḳam ḳoria ḳao.
1TH 4:12 Teu baira manshor sokut tumrar sal-cholon bodro oibo, ar oinno zonor ruzir ufre tumrar borosha ḳora lagto nae.
1TH 4:13 O bai oḳol, huno, murda oḳlor kun halot oibo, amra sairam ita tumra zano, zate moron bade kita oibo ikan na zanae zera nirash oizae, tumrar mon zanu ilaḳan na oy.
1TH 4:14 Huno, amra zebla ekin ḳori, Hozrot Isar mout oisil oile tain zinda oia uṭsoin, te eoḳan-o ekin ḳori, Hozrot Isae dusrabar toshrif anle Isar ufre iman ania zerar mout oise, Allae tarare-o Isar loge milon ḳoria tan loge niba.
1TH 4:15 Erlagi malikor kalam mafik tumrare ḳoiram, amra zera zinda asi ar malike toshrif anar ag forzonto zinda roimu, amra kunumonte-u hi murda oḳlor age zaitam fartam nae.
1TH 4:16 Ḳaron Allai shingar aoazor loge loge, fordan firistar ḍaḳor loge, Malik Isae zure haukdi hukum diba, tain nize-u behest taki lamia aiba. Ar al-Mosir ummot bonia zerar mout oigese, tara-u foyla zinda oia uṭba.
1TH 4:17 Erbade amra zera duniat zinda taḳmu, amrar malikor loge mulaḳat ḳorar lagi amrare-o megor kuṭit ḳori asmano tulia neoa oibo. Olaḳan amra siroḳal malikor loge roimu.
1TH 4:18 Erlagi tumra ota zanaia eḳzone aroḳzonre utshaho deo.
1TH 5:1 Baiainre, kun zomanat kun shomoy kita goṭibo, ita tumrar gese leḳar zorur nai.
1TH 5:2 Tumra nize-u to bala ḳori zano, raitkur bala zela aḳta-u sur ae, Malik Isa aibar dino ṭik ola-u aibo.
1TH 5:3 I zogotor manshe zebla ḳoiba, “Hoḳolta shanti oigese, kunu ḍor-boy nai,” ou shomoy, beṭintor hurutta oar bedona zela aḳta-u dore, oula ota manshor shorbonash aḳta-u oibo. Tara kunumonte-u rehai faito nae.
1TH 5:4 Bai oḳol, tumra kunu andarir maze boshot ḳorrae ni zen, hou din aḳta-u suror laḳan tumrar ufre aito?
1TH 5:5 Tumra hoḳol-u to Allar nuror ar dinor foror manush. Amra to andarir ba raitor balar manush nae.
1TH 5:6 Erlagi ao, oinno manshor laḳan amra na gumaia borong hozag roi ar nizore shamlaia raki.
1TH 5:7 Zano to, zera gumae, tara raitor balae-u gumae ar zera modkur, rait oile tara mod ḳaia ṭal oy.
1TH 5:8 Oile amra to dinor foror manush, erlagi nizore shamlaia raki. Amrar buk basanir lagi iman ar mohobbot dia buk guri, ar matare basanir lagi Allai nazator ashare sifair kefor laḳan matat lagai.
1TH 5:9 Mono rakio, Allae amrare shaza dibar lagi ḍakia anchoin na, borong amrar Malik Isa al-Mosir usillae nazat faoar lagi-u ḍakisoin.
1TH 5:10 Ar al-Mosir mout oise to amrar lagi-u, zate amra basi ba mori, tan loge-u hamesha zinda roi.
1TH 5:11 Erlagi-u tumra oḳon zela ḳorrae, hamesha ola eḳe-oinnore shaosh deo ar goṛia tulo.
1TH 5:12 Te baiain, amra minot ḳoria ḳoiar, tumrar lagi zera aṭni-ḳaṭni kaṭoin, malikor oia tumrare salain ar nosiot ḳoroin, tumra erare ijjot ḳorio.
1TH 5:13 Tara zela kezmot ḳorra, otar bae saia dilor mohobbote tarare ḳas ijjot dio. Ar tumra eḳe-oinne mili-mishi roio.
1TH 5:14 O bai oḳol, tumrare ou nosiotḳan ḳoriar, zeta manush kuṛia, tumra itare hushiar ḳori deo, ḍoraluk zonre shaosh deo, ḳomzur oḳolre shaijjo ḳoro, ar doijjo doria hokkolre shoijjo ḳoro.
1TH 5:15 Kial rakio, oinnayor bodla ḳeu zanu oinnae na ḳore. Tumra hamesha eḳe-oinnor, ar hoḳlor-u balai korar sesṭa ḳorio.
1TH 5:16 Hoḳol shomoy kushi-bashi korat roio,
1TH 5:17 hamesha dua-munazat ḳorio
1TH 5:18 Ar hoḳol haloto Allar shukria adae ḳorio. Ḳaron Alla Pakor kial oilo, Hozrot Isa al-Mosir loge imane tumra olaḳan solo.
1TH 5:19 Pak Ruhre dilor bitor taki nibaio na.
1TH 5:20 Ar zera Allar oli hishabe batuni koin, tarar ḳotare elami korio na,
1TH 5:21 borong hoḳolta zasai kori dekia, balaḳan bitre haraio.
1TH 5:22 Ar hoḳol nomunar naformani taki horia roio.
1TH 5:23 Shanti deora Allae nize tumrare furafur fak-fobitro ḳoroukka, amrar Malik Isa al-Mosie toshrif anar ḳalo tumrar asta shoril, ruhu ar dilre furafur nikut raḳoukka.
1TH 5:24 Ar tain nichchit ola-u ḳorba. Zano to, zein tumrare daot ḳori anchoin, tan ufre furafur borosha ḳora zae.
1TH 5:25 O baiain, amrar lagi dua ḳorio.
1TH 5:26 Tumra eḳe-oinne fobitro golagoli korio.
1TH 5:27 Amrar malikor name ami tumrare ou hukum diar, ou siṭikan foṛia zanu hoḳol baiaintore hunail oy.
1TH 5:28 Amrar Malik Isa al-Mosir rohomot tumrar loge rouk. Amin.
2TH 1:1 Amrar gaibi baf Alla Pak ar Hozrot Isa al-Mosir loge shorik, Tisholoniki ṭaunor zomator gese ami Paulus, bai Silas ar Timotie ou sohifaḳan leḳram.
2TH 1:2 Gaibi baf Allae ar Hozrot Isa al-Mosie tumrare rohomot ar shanti dan ḳoroukka.
2TH 1:3 Bai oḳol, amra hamesha tumrar lagi Allar shukria adae ḳora zorur. Tumrar imani bol bout baṛer ar eḳe-oinne maya-mohobbot-o baia foṛer, erlagi amra shukria adae ḳora dorḳar.
2TH 1:4 Amra to Allar zomat oḳlor samne tumrare loia boṛai koriar, ḳaron oto zulum-mosibot ar duk-koshṭo faia-o tumra sobor ḳorso ar imane ṭikia roiso.
2TH 1:5 Tumrare zate Allar bashshair zoiggo ḳoia gona oy, otar lagi-u tumra oto duḳ-mosibot shoijjo ḳorrae, ita oilo Allar hok-insafor forman,
2TH 1:6 tan hok-insaf oilo, zetae tumrare ḳoshṭo dein, tain itare ḳoshṭo diba.
2TH 1:7 Ar tumra zera oḳon ḳoshṭo fairae, Allae amrar loge tumrare-o i koshṭo taki rehai diba. Hozrot Isae zebla tan shoktishali firista oḳol loia, zalail agunir kunḍolit oia behest taki lamia aiba, ou shomoy oula oibo. Zeta manshe Allare sine na ar Hozrot Isar kush-ḳobrir ḳota mane na, Allae itare tarar faona shaza diba.
2TH 1:9 Malik Isae zebla toshrif anba, ou shomoy tarare omon shaza deoa oibo, zate tara tan didaror ar moha kudrotir bare foṛia hor-hamesha lannoti shaza faibo.
2TH 1:10 Hou din tan nizor pak bonda oḳol, zera tan ufre iman anche tarar mazdi, tan gourob-mohima zair oibo. Erar maze tumra-o aso, ḳaron amrar toblig hunia tumra iman ancho.
2TH 1:11 Erlagi amra hamesha tumrar lagi dua ḳori, amrar Allae zanu tumrare tan daotor zuka mono ḳoroin, tan ḳemotar bole tumrar hoḳol nek kamor asha furon ḳoroin, ar iman ania hari tumra zeta ḳam ḳorrae, i kam-o zanu tain fura ḳoroin.
2TH 1:12 Teu amrar Alla ar Hozrot Isa al-Mosir rohomotor lagi, tumrar mazdi amrar Malik Isar gourob zair oibo, ar tan mazdi tumra-o gourobor bagi oibae.
2TH 2:1 O bai oḳol huno, amrar Malik Isa al-Mosi to hirbar aiba, aia amra hoḳolre ekḳano dola ḳoria tan gese niba. Te ou befare tumrare minot ḳori koiram,
2TH 2:2 ḳeu zudi aia ḳoy Malik Isar din aia harse, he kunu gaibi doroshon deḳse, ba ohi nazil oise, ba amrar leḳa siṭi mono ḳoria-o tumra ḍoraia ostir oio na.
2TH 2:3 Ḳeu zanu kunumonte-u tumrare ṭogia iman luṭito na fare. Ḳaron hou din aoar age beshir bag manush Alla Pakor birudde zaibo, tara Allar ges taki duroi horizibo, ar duzoki zon, hou naforman Kane-Dorjal bar oibo.
2TH 2:4 Baroia “Allar name” zotota ase, ita hokkoltar bifokke ar ebadoti korar zuka hokkoltar bifokke gia, he nizore boṛo mono ḳorbo. He ola-o ḳorbo, Allar ebadot ḳanat boia nizore Alla ḳoia dabi korbo.
2TH 2:5 Te ami zebla tumrar gese roitam, hou shomoy ami i befare mattam, ita tumrar mono or na ni?
2TH 2:6 Hou naforman zate shomoy fura oar age bar oito na fare, erlagi kitae tare aṭḳaia raḳse, ikan to tumra zano-u.
2TH 2:7 Tumra eoḳan-o zano, hou naformanor lukail ḳam-ḳaz oḳono soler. Oile zein tare aṭḳaia raḳra, tain horia zaoar ag forzonto tare aṭḳanit roiba.
2TH 2:8 Tain hori gele hou naforman Kane-Dorjal bar oibo. Hozrot Isae mukdi fu dia tare binash ḳorba, ar tan kudroti mohimae azir oia tar bol-shoktire ḳotom ḳorba.
2TH 2:9 Hi Kane-Dorjal zebla aibo, tar loge roibo shoytani kemota. Ou shoytani kemotae he hoḳol misa keramoti ar muzeza ḳam deḳaibo.
2TH 2:10 Tar hoḳol nomunar beimani kaṭaia beiman manshore ṭogibo. Ita manush binash oiziba, ḳaron zan basanir lagi tara Allai hokre fosond ḳorse na, ar ḳobul-o ḳorse na.
2TH 2:11 Erlagi Allae tarare shoktishali ek ku-dandat falaiba, zate tara misa befarre ekin ḳore.
2TH 2:12 Ete Allai hokor ufre iman na ania zetae naformanire fosond ḳorsoin, tarare kiamotor din dushi shaibosto ḳora oibo.
2TH 2:13 O bai oḳol, O Malik Isar mayar zon oḳol, tumrar lagi amra hamesha Allar dorbaro shukria adae ḳora dorḳar, Allae to tumrare foyla taki-u basia alog korsoin nazat faoar lagi. Pak Ruhu dia tumrare fobitro ḳorar mazdi, ar Allai kush-ḳobrir hokor ufre iman ania tumra nazat faiso.
2TH 2:14 Amra ze kush-ḳobri toblig korsi, er usillae nazat faoar lagi Allae tumrare fosond ḳorsoin, zate tumra amrar Malik Isa al-Mosir mohimat shorik o.
2TH 2:15 Te O bai oḳol, tumra imane tir ro ar muke muke ba siṭir marfote amra ze talim disi, ita balamonte mono rakio.
2TH 2:16 Amrar gaibi baf Alla Pake ar shoyong Isa al-Mosie tumrar dilo nek utshaho dan ḳoroukka, hoḳol nomunar nek kam ar mat-ḳotar maze tir raḳoukka. Tain-u amrare mohobbot ḳorsoin, tain rohom ḳoria siroḳalin utshaho ar kushi-bashir asha dan ḳorsoin.
2TH 3:1 O bai oḳol, hesh-mesh ḳoiram, amrar lagi dua ḳorio, Hozrot Isar kush-ḳobri tumrar maze zela zoldi zoldi sitrisil, oula zanu din din sitrat roy ar gourob faoat roy.
2TH 3:2 Ar ou duaḳan-o ḳorio, amra zanu bibeḳ saṛa naforman oḳlor at taki rehai fai. Shob manush to ar imandar nae.
2TH 3:3 Oile Malik Isa to hok ar ḳaṭi, tain-u tumrare imane tir raḳba ar Shoytanor at taki hamesha hefazot ḳorba.
2TH 3:4 Malikor ufre iman ancho ḳori tumrar ufre amrar i ekin ase, amra zela hukum disi, tumra ṭik ou laḳan ḳam ḳorrae ar ḳorat roibae-o.
2TH 3:5 Malik Isae zanu tumrar dilre Allar mohobbotor fote ar al-Mosir soboror fote salu raḳoin.
2TH 3:6 Bai oḳol, amrar Hozrot Isa al-Mosir name ou hukum diram, tumrar zomator kunu imandar baie zudi kuṛiami kore ar amra zeta talim disi, ita na mane, te tar loge sola-fira bad dilao.
2TH 3:7 Huno, amrar laḳan ḳemne soltae, ita to tumra zano-u. Amra zebla tumrar loge roitam, ou shomoy to kunuzat kuṛiami korsi na,
2TH 3:8 magna kunu ḳani kaisi na. Amra dine-raite menot ḳoria ruzi-ruzgar ḳorsi, zate tumra ḳeuror buza na oi.
2TH 3:9 Oile amra zen tumrar ges taki shaijjo nibar odikar nai, ila to nae, ta-o amra ola ḳoria deḳaisi, zate tumra-o amrar laḳan solo.
2TH 3:10 Tumrar gese taḳar ḳalo talim dislam, kunu zone zudi kam ḳorto na sae, te he ḳani-o bad dilauk.
2TH 3:11 Amra oḳono hunram, tumrar maze ḳeu ḳeu kuṛiami korer ar kunuzat ḳam-ḳaz ḳorer na, borong hamesha foror kichcha gaia din ḳaṭae.
2TH 3:12 Te amrar Malik Isa al-Mosir oia ita manshore nosiot ar hukum diar, tara zanu shanti oia ruzi-ruzgar ḳoria ḳae, ar nizor ḳani nize zugae.
2TH 3:13 Baiainre, nek kamo heran oio na.
2TH 3:14 Ou siṭir bashae leḳa amrar foramish zudi keu na mane, te tare sinia raḳo, tar loge sola-fira bad dilao, teu he shorminda oibo.
2TH 3:15 Oile kial rakio, tare dushmon mono ḳorio na, borong bai hishabe hushiar ḳoro.
2TH 3:16 Shanti deora malike tumrare hamesha hoḳol nomunar shanti dan ḳoroukka. Malik Isa tumra hoḳlor loge loge roukka.
2TH 3:17 Huno, i salamor ḳota ami Pauluse nizor ate leḳsi. Oḳṭa-u amar forteḳ siṭir alamot, ami ou nomunae siṭi leki.
2TH 3:18 Tumra hoḳlor ufre amrar Malik Isa al-Mosir rohomot zari rouk. Amin.
1TI 1:1 Ami Paulus to amrar toraneala Alla Pak ar amrar asha-borosha Hozrot Isa al-Mosir hukume tan sahabi oisi.
1TI 1:2 Mumin hishabe amar ḳas aolad, Timotir gese leḳram. Gaibi baf Alla Pake ar amrar Malik Isa al-Mosie tumare rohomot, meherbani ar shanti dan ḳoroukka.
1TI 1:3 O Timoti, ami Makidonia desho zaoar bala tumare ḳoislam, oḳon hirbar minoti kori koiram, huno, tumi Ifis ṭauno-u ro, roia onor ola kisu mullaintore hukum deo, tara zanu manshore ar bul talim na dey.
1TI 1:4 Tarare ḳoio, tara zate banoaṭ kichcha ar lamba lamba ḳandanor lisṭor bae kiali na oin. Itae to nanan nomunar doladolir zonom dey, Allar ḳamor kunu fayda oy na, Allai fayda mile ḳali imanor mazdi.
1TI 1:5 Borong shoṭik talimor fol oilo, maya-mohobbot, ita to ḳaṭi dil, forishkar bibeḳ ar hasaror iman taki foyda oy.
1TI 1:6 Oile kisu manshe ita bad dia banoaṭ mat-ḳotar bae mon dilaise.
1TI 1:7 Tara zudio nize-u nizor mator mani buze na, ar ze befar loia boṛo golae mater, i befare-o balamonte zane na, tebou tara Musa nobir batail shoriotor ustad oito sae.
1TI 1:8 Amra zani, shoriot bala zinish, ḳeu zudi ṭik moto ita ḳamo lagae.
1TI 1:9 Amra to zani, i shoriot kunu forezgar manshor lagi deoa oise na. Ikan deoa oise, zetae Allar ain manoin na, Allare ḍorain na, naformani koroin, gunagar, kuni, nafak ar be-din, ma-bafor kuni,
1TI 1:10 zinakur, shomoḳami, bandi-gulamor ḳarbari, misa matra, misa shakki deora, ek kotae gunogane doni Alla Pakor mohan kush-ḳobrir talimor birudi zeta manush, otar lagi-u i shoriot deoa oise. Ar ou mohan kush-ḳobri tobligor bar tain amare dan ḳorsoin.
1TI 1:12 Hozrot Isa al-Mosi, zein amrar malik, tain amare bol zugaisoin, amare hok-halal mono ḳoria tan ḳamo boail ḳorsoin, erlagi ami tan dorbaro shukria zanairam.
1TI 1:13 Zudio ami age al-Mosir bodnam gaitam, tan manshor ufre zulum ḳortam, bod-mizaz deḳaitam. Ta-o tain amare rohomot dan ḳorsoin, ḳaron hou shomoy ami iman anchilam na.
1TI 1:14 Amrar munibe amare ḳoto boṛo meherbani korsoin, Isa al-Mosir torika kobul ḳorle ze iman ar mohobbot foyda oy, ita to amare furafur dan ḳorsoin.
1TI 1:15 Ashole i kota to hok-kaṭi ar shullo-ana manar laḳ, gunagar oḳlor zan basanir lagi-u Isa al-Mosie i duniat toshrif anchila. Ou gunagaror maze ami-u fordan.
1TI 1:16 Otar lagi-u Allae amare doya ḳorsoin, zate amar moto fordan gunagaror mazdi Isa al-Mosie tan shima saṛa soborgari deḳaita faroin, ar tan ufre iman anae zera aḳeri zindegi faiba, tara zanu amare dekia Allai fot buzoin.
1TI 1:17 Zein siroḳalin bashsha, zein niraḳar, eḳmatro Alla, zan kunu koy nai, tan ijjot ar gourob hor-hamesha zari rouk. Amin.
1TI 1:18 O mayar fut Timoti, tumar befare age zeta batuni mat mata oisil, ou mafik ami tumare minot ḳori koiram, tumi ita mono rakia al-Mosir lagi dile-zane laṛai korat ro.
1TI 1:19 Erloge nizor iman ar forishkar bibeḳre basaio. Kunu kunu manshe bibeḳor buli na mania, nizor imanre nosṭo ḳorilise.
1TI 1:20 I dolo asoin, Huminas ar Sikondor. Erlagi ami itare Iblisor ato shofi disi, zate tara buzta faroin, kufuri mat mata ṭik nae.
1TI 2:1 Ami foyla-u zanairam, forteḳ manshor lagi tumra Allar dorbaro kakuti-minoti, dua-munazat, foriad zanao ar shukria adae ḳoro.
1TI 2:2 Olaḳan raza-bashsha oḳol ar usa fodor hoḳol ofisaror lagi munazat ḳora zorur, zate amra Allar ḍor-ḳof mono rakia, hok-halal fote roia, nirafode shantie zindegi kaṭaitam fari.
1TI 2:3 Ita to amrar toraneala Allar nozoro nek kam, itae tain kushi oin.
1TI 2:4 Alla Pakor kial oilo, zate hoḳol manshe nazat fain, ar al-Mosir torikar hokkolta shullo-ana buzoin.
1TI 2:5 I hokikoti oilo, Alla ḳali eḳzon, Alla ar manshor maze shafayatḳari mazor manush-o ḳali eḳzon-u asoin, en nam Isa al-Mosi, ein-o manush.
1TI 2:6 Duniar hoḳol manshor zanor bodla hishabe, tain nizor zan kurbani disoin. Ou befare to Allar ṭik kora shomoye shakki deoa oise.
1TI 2:7 Ar ou shakki dibar lagi Allae amare toblig kamo, sahabi fodo boail ḳorsoin, tain amare dayitto disoin, bin zatir gese iman ar Allai hokor ustad hishabe. Ami ita hok mat matiar, misa kunta nae.
1TI 2:8 Ami sairam, hoḳol zagar beṭainte ḳalis niote duio at tulia munazat ḳorouk. Tarar monor maze kunuzat rag-gusa ba ḳaijja-fosador bab na rouk.
1TI 2:9 Ami eoḳan-o sairam, beṭinte tarar haya-shorom rakia shomazor ufozukto beshe bodro ḳafoṛ-sufoṛ findouk. Tara zanu nanan nomunae sulor beni bolia, shuna-rufa ar moni-muktar goyna lagaia ar dami dami kafoṛ findia nizore na hazain.
1TI 2:10 Borong Allar forezgar bandie zela nek kamor maze zindegi kaṭani usit, tara-o ola oin.
1TI 2:11 Ḳortar furafur baiddo roia, ar nirai-zirai roia ilim ḳamai koroukka.
1TI 2:12 Ustadi kora ar beṭaintor ufre musoddori korar odikar ami kunu beṭire dei na. Tara nirai-zirai roa zorur.
1TI 2:13 Zano to, hoḳol foyla Adomre ar bade Bibi Haoare foyda ḳora oisil.
1TI 2:14 Adom to Iblis-Shoytanor dukat foṛsoin na, oile Haoa Iblisor dukat foṛia Allar hukumor borkelaf ḳorsoin.
1TI 2:15 Oḳon zudi beṭinte tarar haya-shorom rakia iman, mohobbot ar fak-fobitro oia soloin, te hurutta zonom deoar mazdi tara rehai faiba.
1TI 3:1 Huno, asol hok kota oilo, ḳeu zudi zomator saloḳdar oita sain, te tain to nek kam ḳorar kiali oisoin.
1TI 3:2 Zomator saloḳdar manshor sokut nikut oite oibo. Tan ḳali eḳ bou oibo. Tain nizore shamlaia raḳba, tan bala aḳol-buddi roibo, shobab oibo bodro, ar memandari korte bala faiba. Manshore talim deoar ḳemota taḳte oibo.
1TI 3:3 Tain zanu modkur ar bod-mizazi na oin, borong tan shobab oibo norom, tain zanu mair-danga ḳorra ba ṭeḳa-foyshar lalosi na oin.
1TI 3:4 Tain zanu shoṭik babe tan nizor foribaror hokkolta salain, tan huruttain oiba baiddo ar adob-ḳayda manra.
1TI 3:5 Ze manshe tar nizor gor shamlaito fare na, he Allar zomatre kila deḳa-huna ḳorbo?
1TI 3:6 Kunu noya imandar bai zomator saloḳdar oa ṭik nae, ila oile tain hoyto boṛai-beṭagirie bahaduri korba, ar Iblisor lagi ṭik kora shazar bagi oiba.
1TI 3:7 Zomator bairor manshor gese tan shunam taḳa dorḳar, zate aḳta kunu bodnamor bagi na oin ar Iblisor fando na foṛoin.
1TI 3:8 Oula zomator ḳadim oḳol-o ijjoti ar ek kotar manush oa zoruri. Era zate modkur ar haram lub-lalchi na oin.
1TI 3:9 Tara zanu hok bibeḳe Isayi imanor batuni befarre mozbut ḳori dilo raḳoin.
1TI 3:10 Erlagi foyla tarare zasai kori deḳa zorur, zasait zudi tara nikut oin, te zomator ḳadim oita farba.
1TI 3:11 Ṭik olaḳan beṭi manush-o zanu ijjoti oin. Era manshor bodnam na gain, nizore shamlaia raḳoin, ar hoḳol befare bishashi oin.
1TI 3:12 Ḳadim sab ḳali eḳ bou-ala manush oiba. Tain zanu balamonte tan bou fua-fuṛin ar shongsharor deḳa-huna ḳoroin.
1TI 3:13 Ze ḳadime balamonte kezmot ḳoroin, ein shunam fain, ar Hozrot Isa al-Mosir ufre iman taḳae tan dil shaoshe bora roy.
1TI 3:14 O Timoti, ami asha ḳorram kub zoldi-u tumar gese aitam. Oḳan mono ḳoria tumare ita leḳram.
1TI 3:15 Zudi kunu ḳarone amar aite deri oizae, te i leḳa foṛle tumi buzbae, Allar foribaror manshor sal-cholon kila oito. I foribar to zinda Allar zomat, Allai hokikotor bit ar ian kuṭi.
1TI 3:16 Isayi imanor marifoti koto mohan, ita to oshikar ḳora zae na. Ou marifoti oula zair oilo, Tain manush surote zair oila, Pak Ruhe forman oila be-ḳosur, firista oḳole tan doroshon faila. Tan befare hokkol zatir gese toblig kora oilo, asta duniar manshe tan ufre iman anla, gourob-mohimae tanre ufre tuli neoa oilo.
1TI 4:1 O Timoti, Allai Pak Ruhe forishkar ḳori koira, aḳeri zomanat kisu manush Isayi iman taki horizibo, tara na-hok ruhu ar zin-butor talimor ashik oibo.
1TI 4:2 Zeta beiman oḳlor bibeḳ-buddi oshaṛ oigese, otar bonḍamir dae ola oibo.
1TI 4:3 Itae manshore ḳoṛaḳoṛi hukum dein bia-shadi na ḳorar lagi, ar kunu kunu ḳani kaite-o nished ḳoroin. Oile Allae to i kani foyda-u ḳorsoin, zera iman anche, zera Allar hokre zanilise, tara zate Allar shukria adae ḳoria ita ḳain.
1TI 4:4 Allar foyda ḳora hoḳol zinish-u bala. Haram mono ḳoria kunuta bad deoa ṭik nae, borong Allar shukria adae ḳoria ḳaoa zae.
1TI 4:5 Ḳaron Allar kalam ar i munazator mazdi ita fak-fobitro oizae.
1TI 4:6 O Timoti, tumi zudi ou talim oḳol mumin baiainre buzaia deo, te Isayi imanor ze hok ar nirbul talim mania solrae, i befare tumi faḳa-fukto oia al-Mosir eḳzon ufozukto ḳadim oibae.
1TI 4:7 Tumi aze-baze kichcha-ḳahini taki horia roio, ita to dadi-nanir ḳoa banail kichchar laḳan. Erlagi ita bad dia dilor imani beyam ḳorat ro.
1TI 4:8 Shorilor beyam ḳorle kisu fayda oy, oile dilor imani beyame hokkol bae taki fayda oy. Ermaze to ḳali i dunia nae, aḳerator asha-o ase.
1TI 4:9 Ita to furafur hok ar ḳaṭi, shullo-ana kobul ḳorar laḳ.
1TI 4:10 Erlagi-u amra zane-forane imanor menot ḳoriar ar kiali oia ḳam ḳoriar. Ḳaron amra to zinda Allar ufre borosha ḳori. Tain-u hoḳol manshor toraneala, ḳas ḳori zera tan ufre iman ane.
1TI 4:11 Te tumi-o ou befare hukum ar talim deo.
1TI 4:12 Tumi zuan beṭa mono ḳoria ḳeu zanu tumare ela na ḳore, erlagi mat-ḳotae, sal-cholone, mohobbote, imane ar fak-fobitrotae tumi mumin oḳlor gese eḳṭa nishana bonizao.
1TI 4:13 Ar ami aibar ag forzonto tumi mumin oḳolre Pak Kalam tilaot ḳora, shu-foramish deoa, ar talim deoat lagail roio.
1TI 4:14 Mono rakio, zomator murobbi oḳole tumar ufre at rakia, nobir laḳan gaibi buli matia tumare ḳelafoti disoin, te tumi i niamotre elami korio na.
1TI 4:15 Ita befare kiali o, nizore otar maze furafur ḍubaia raḳo, teu hoḳlor sokut foṛbo tumi agedi aguairae.
1TI 4:16 Tumar nizor befare ar tumar talimor befare hushiar roio. Teu tumi nizore basaibae, ar zera tumar boyan hunbo, tarare-o basaitae farbae.
1TI 5:1 O Timoti, huno, kunu murobbi manshor dush deḳanit gia ḳoṛa bashae matio na. Tarar loge nizor bafor laḳan bebohar ḳorio. Ar zuan oḳolre nizor bai mono ḳoria hedayot ḳorio.
1TI 5:2 Murobbi beṭinre nizor ma ar fuṛintore boin mono ḳoria, monor bab fak-fobitro rakia tarare hedayot ḳorio.
1TI 5:3 Zeta ṛaṛi beṭintor ḳeu nai, tarare kub zoton ḳori deḳa-huna ḳorio.
1TI 5:4 Oile kunu ṛaṛi beṭintor zudi fua-fuṛin ba nati-natni taḳoin, te Allar ḍore era-u zanu foyla zarzir foribaror deḳa-huna ḳore. Ou nomunae tarar moy-murobbir maya-momotar rin shud ḳorta farba, ar ita ḳame to Alla kushi oin.
1TI 5:5 Ze ṛaṛi beṭintor ḳeu nai, tara ḳali Allar ufre borosha rakia, dine-raite tan dorbaro munazat ar ḳanda-ḳaṭi korat roin.
1TI 5:6 Oile zeta ṛaṛi beṭinte zemne mone sae emne soloin, ita to zinda halote-u mora.
1TI 5:7 Ou befare hukum deo, zate ḳeu tarare dushi koar shuzug na fae.
1TI 5:8 Ze zone afon zonre, ḳas ḳori nizor foribaror manshor deḳa-huna ḳore na, he ashole Isayi imanre-u oshikar ḳorlo. Igu to bidormi taki-o bad.
1TI 5:9 Erlagi ṛaṛi beṭintor namor lisṭ ḳorar bala age deḳte oibo, i beṭir boyosh shaiṭ bosor oise ni, ar zamair bae tain furafur hok-halali asla ni.
1TI 5:10 Esaṛa nek kamor lagi tan shunam taḳte oibo, ou nek kam oilo, fua-fuṛin manush banani, memandari kora, Allar bonda oḳlor fao doani, duk-mosiboti manshore shaijjo ḳora, ar hoḳol nomunar nek kamo shorik oa.
1TI 5:11 Kunu zuan ṛaṛi beṭir nam i lisṭo tulio na. Ḳaron tarar zoubonor lagi shorilor gorome zebla utal-fatal ḳoroin, ou shomoy al-Mosir bae tarar ḍor-boy ḳomi zae, teu tara hirbar bia boita sain.
1TI 5:12 Erlagi tara Allar logor agor oada bongo ḳoroin, nizor ufre gozob ḍakia anoin.
1TI 5:13 Ar tara baṛie baṛie aḍḍa maria kuṛia bonizain. Ḳali kuṛia nae, zeta mat-ḳota tarar lagi zaiz nae, ota baze mat-ḳota-o matoin ar foror gibot gaoat roin.
1TI 5:14 Erlagi ami ou nosiot ḳoriar, zuan ṛaṛi beṭinte bia-shadi kora-u bala, tara huruttar ma ouk, nizor shongsharor deḳa-huna ḳorouk, ar dushmonre kunu laḳan bodnam gaoar shuzug na deuk.
1TI 5:15 Ḳoyzon ṛaṛi beṭin er maze-u to be-foti bonia Shoytanor fote sola-fira ḳorra.
1TI 5:16 Kunu Isayi imandar beṭi manshor goro zudi ṛaṛi beṭin taḳoin, te ou beṭie zanu erar deḳa-huna ḳoroin. Erare deḳa-hunar bar zomator ufre na deoa bala. Teu zeta ṛaṛi beṭin eḳdom lasar, zomate tarar deḳa-huna ḳorte shubida oibo.
1TI 5:17 Zomator ze fordan murobbi oḳole zomatre balamonte salain, ḳas ḳori zera Allar kalam toblig ar talim deoar lagi menot ḳoroin, tara ḍabul ijjot faoa zorur.
1TI 5:18 Allar kalamo to ase, “Dan maṛa deoar shomoy gorur muko hufi lagaio na.” Aroḳ ayato ase, “Ḳamlae tar beton faoar zoiggo.”
1TI 5:19 Mono rakio, dui ba tin zon shakkir ḳota saṛa, zomator murobbir birudde kunu nalish shomzio na.
1TI 5:20 Oile ze murobbi oḳole guna ḳorat-u taḳoin, zomator manshor gese tarar dush zair ḳorio, zate oinno hoḳole ḍorain.
1TI 5:21 Huno, Alla Pak, Malik Isa al-Mosi, ar Allar mayar firista oḳolre shakki rakia tumare ou hukum diram, tumi nirofokko roia ita ḳam ḳorio, ḳeurore for ba afon mono ḳorio na.
1TI 5:22 Soṭ ḳori keurore ḳelafoti dia, kunu fodo boail ḳorio na. Oinno manshe zebla gunar ḳam ḳore, tumi tarar loge shorik oio na, nizore nikut rakio.
1TI 5:23 Ar ḳoydin bade bade-u tumar bemar oy, erlagi tumi kali fani kaio na, tuṛa tuṛa anguror shorbot-o ḳaio, teu ozom oibo.
1TI 5:24 Kial rakio, kunu kunu manshor guna ola forishkar deḳa zae, erlagi tar bisar age-u oizae. Ar kunu kunu manshor guna bade dora foṛe.
1TI 5:25 Olaḳan nek kam forishkar deḳa zae, ar kunu nek kam forishkar deḳa na gele-o, ita lukail roy na.
1TI 6:1 Huno, ze gulam-bandie munibor gulami koroin, tara hoḳole-u zarzir munibre ijjoti zon mono ḳorouk, zate ḳeu Allar namre ba amrar talimre ḳaraf ḳoar shuzug na fae.
1TI 6:2 Ze zone Isayi imandar kunu munibor gulami koroin, ein zanu imandar bai hishabe tan munibre elami na ḳoroin borong aro bala ḳori tan kezmot ḳoroin. Ḳaron gulamor kezmote ze munibe ufoḳar faira, tain to mayar imandar bai. Te ota befare tumi talim ar hukum deo.
1TI 6:3 Ḳeu zudi ita bad dia dusra kunu talim dey, ar amrar Malik Isa al-Mosir ḳaṭi talim ar Allar ḍor-ḳofor talimre na mane,
1TI 6:4 he to misa ohonkari, he kunta-u buze na, motobed ḳora, behuda uftami kora tar eḳṭa bemar. Otar ḳarone ingsha-ninda, ḳaijja-fosad, ku-shondoy foyda oy.
1TI 6:5 Ar oshaṛ bibeḳ-ala manshor maze hamesha gulmal lagail-u taḳe. Ita manshor maze Allai hok nai. Tara Isayi imanre duniabi labor ufae mono ḳore.
1TI 6:6 Ashole monor tusṭie Isayi iman mafik zindegi kaṭaile kub beshi lab oy.
1TI 6:7 Amra duniat aibar ḳalo to kunta-u loge loia aisi na, ar zaoar ḳalo-o kunta nitam fartam nae.
1TI 6:8 Erlagi kali kani-ḳafoṛ faile-u amra kushi roimu.
1TI 6:9 Oile duniat zera doni oito sae, tara nanan nomunar forikkat ar fando foṛe, tarar mono kub bod ḳaish foyda oy, zetae tarar zindegire shorbonashor gato falae.
1TI 6:10 Ḳaron hoḳol nomunar bod ḳamor zonom oilo ṭeḳa-foyshar maya. Kunu kunu zon ṭeḳa-foyshar lalose Isayi iman taki horia gia, nizor ufre boṛo duḳ-mosibot ḍakia anche.
1TI 6:11 Oile tumi to Allar bonda, tumi ita bod ḳam taki horia ro. Tumi fak-forezgar zindegi, Allar ḍor-ḳof, iman, mohobbot, sobor, ar norom shobabor bae kiali o.
1TI 6:12 Imani laṛai korat ro. Aḳerator ze zindegir lagi Alla Pake tumare daot disoin, hou zindegire tumi mozbut ḳori doro. Tumi to imani shakki dislae bout manshor samne.
1TI 6:13 Oḳon Alla Pakor name, zein hokkoltar zan dein, ar zein hakim Fontio Filator samne nizor befare hok shakki disla, hou Isa al-Mosir name-o tumare ou minoti korram,
1TI 6:14 amrar Malik Isa al-Mosi zair oar ag forzonto tumi furafur nikut ar bodnam saṛa roia hukum adae ḳoro.
1TI 6:15 Ar gunogane doni hou Alla, zein eḳmatro shomraṭ, bashsha oḳlor bashsha ar malik oḳlor malik, tain-u tan ufozukto shomoye al-Mosire zair ḳorba.
1TI 6:16 Ḳali Alla Pakre-u moute ḳobza ḳorto fare na. Tain ola eḳ nuror foro boshot ḳoroin, hino kunu adom zat zaito fare na. Kunu Adome kunudin tanre deḳse-o na, deḳar takkot-o nai. Ijjot ar ḳemota siroḳal ḳali tan-u. Amin.
1TI 6:17 Huno, ou duniar doni oḳolre hukum deo, tara zanu boṛai na ḳoroin, ar duniabi ostayi donor ufre borosha na ḳoria, Allar ufre borosha ḳoroin. Amrar balair lagi tain-u hoḳolta kula ate dan ḳoroin.
1TI 6:18 Ar tarare ḳo, tara zanu oinnor balai kore, nek kam ḳorat roy, mon kulia dan-ḳoyrat ḳore, ar tarar don-doulotor baṭ oinno manshore dey.
1TI 6:19 Teu tara nizor lagi emon don zoma ḳorbo, zeta bobishote tarar lagi ekkan mozbut bitor laḳan oibo. Ete hasaror zindegire tara shokto ḳori doria raḳto farbo.
1TI 6:20 O Timoti, tumar zimmae ze shompod deoa oise, i shompod tumi balamonte hefazot ḳoro. Aze-baze aḳolor beḳama biddar bulir du-nosla talim taki horia ro.
1TI 6:21 Kunu kunu zon ota beḳama aḳol deḳanit gia, asol iman taki be-fote gesegi. Alla Pake tumrare rohomot dan ḳoroukka. Amin.
2TI 1:1 Ami Paulus to Alla Pakor morzie Hozrot Isa al-Mosir sahabi. Al-Mosir usillae Allar oada ḳora aḳeri zindegir ḳota tobligor lagi sahabi fod faisi.
2TI 1:2 Ami amar mayar aolad Timotir gese leḳram. Gaibi baf Allae ar amrar Malik Isa al-Mosie tumare rohomot, meherbani ar shanti dan ḳoroukka.
2TI 1:3 O Timoti, huno, amar moy-murobbie zela eḳ Allar ebadot ḳorta, ami-o oula forishkar bibeḳe Allar ebadot ḳori. Ami dua ḳorar bala dine-raite hamesha tumar lagi Allar shukria adae ḳori.
2TI 1:4 Tumar hou ḳandonor ḳota mono ḳoria tumare deḳar lagi mone kub ṭaner, tumare deḳle amar bitor kushie borizibo.
2TI 1:5 Amar mono ase, tumar dilḳan hok imane bora, tumar nani Lois ar tumar amma Unikir bitre-o ola hok iman asil. Ami nichchit zani, tumar bitre-o ola iman ase.
2TI 1:6 Erlagi oḳon tumare mono ḳorai diram, ami tumar shorilo at rakia ḳelafoti deoae, Allae tumare ze ḳas niamot dan ḳorsoin, i aguin zalaia tulo.
2TI 1:7 Allae to amrare bitu-ḍoralukor monobab disoin na. Borong bol-shokti, maya-mohobbot ar nizore shamlanir ḳemota dan ḳorsoin.
2TI 1:8 Erlagi amrar Malik Isar befare shakki dite shormaio na, ar tan namor lagi ami zen zelo bondi asi, amare loia-o shormaio na. Borong Allar deoa bole kush-ḳobri tobligor ḳamo amar loge roia duk-koshṭo shoijjo ḳoro.
2TI 1:9 Allae amrar zan basaisoin, ar fak-fobitro oia zindegi kaṭanir lagi daot disoin. Ita to amrar kunu nek kamor gune nae, borong tan morzi ar rohomotor gune-u ḳorsoin. Amrare i rohomot dan ḳorsoin to, dunia foyda ḳorar age Hozrot Isa al-Mosir usillae.
2TI 1:10 Ar Allae oḳon ou rohomot zair ḳorsoin, amrar toraneala Isa al-Mosie duniat toshrif anar mazdi. Al-Mosie to moutor ḳemotare surmar ḳorsoin, tan kush-ḳobrir mazdi siroḳalin nurani zindegir fot kula-mela ḳorsoin.
2TI 1:11 Ou kush-ḳobri tobligor lagi-u to amare tobligkari, sahabi ar ustad hishabe boail ḳora oise.
2TI 1:12 Erlagi-u ami ola duk-koshṭo faiar, ta-o ami shorminda nae. Ḳaron ami zani, ami kar ufre borosha ḳorsi. Amar furafur ekin ase, ami tan dorbaro zeta zoma ḳorsi, itare hefazote raḳar ḳemota tan ase, al-Mosie dusrabar toshrif anar din forzonto ita roibo.
2TI 1:13 Te tumi amar muk taki zoto talim huncho, ou hok talimre zanor ḳoboz mono ḳoria, al-Mosir ufror iman ar mohobbote doria raḳo.
2TI 1:14 Allae ze samana hefazote raḳar lagi tumar zimmae disoin, amrar dilor mazor Allai Pak Ruhur bole tumi itar hefazot ḳoro.
2TI 1:15 Tumi to zano, Turoshkor Asiya elaḳar hoḳol manush amar ges taki algi gesoin, Fugilas ar Hamaginas-o tarar loge gesoingi.
2TI 1:16 Bai Anisor foribaror ufre Malik Isae rohom-borkot deukka. Ein bout bar amar zano aram disoin, ami zelo hamaile-o tain kunu shorom mono ḳorsoin na.
2TI 1:17 Tain ou Rum ṭauno aia bout tallash ḳori amare bar ḳorsoin.
2TI 1:18 Ami Ifis ṭauno taḳte tain kila amar kezmot ḳorsla, ita to tumi balamonte-u zano. Malik Isae ola ḳoroukka, zate tan toshrif anar din ein meherbani fain.
2TI 2:1 O amar aolad Timoti, Isa al-Mosir usillae faoa rohomote tumi boloban o.
2TI 2:2 Ar bout shakkir samne amar mukor zeta talim huncho, ou talimre olaḳan hok-halal manshor ato deo, zera oinno manshore-o talim deoar ufozukto.
2TI 2:3 Tumi Isa al-Mosir ḳaṭi sifai oia duk-koshṭot shorik o.
2TI 2:4 Kamanḍarre kushi raḳar lagi zuddor ḳalo kunu sifai shongsharor maya-zalo hamae na.
2TI 2:5 Ou laḳan ḳelat lagia ḳeu zudi niom moto na ḳelae, te joyor mala he fae na.
2TI 2:6 Ar ze giroste menot ḳore, fosholor foyla baṭ to he-u fae, iṭa-u niom.
2TI 2:7 Te ami zeta buzaitam sairam, ita sinta ḳori deḳo, Malik Isae tumare ita hoḳolta buzar aḳol diba.
2TI 2:8 Isa al-Mosir befare tumi oḳan mono rakio, tanre murda taki zinda ḳora oisil, tain oila Bashsha Daud nobir bongshodor, amar ḳoa kush-ḳobrir maze-o ikan ase.
2TI 2:9 Ar ou kush-ḳobri toblig korae-u ami duk-koshṭo faiar. Dagi ashamir laḳan amare bondi raḳa oise, oile Allar kalam to bondi oise na.
2TI 2:10 Allae zerare fosond ḳoria alog korsoin, tarar lagi ami hokkolta shoijjo ḳoriar, zate al-Mosir usillae tara nazat fain, loge siroḳalin gourob-mohima-o fain.
2TI 2:11 Ou ḳota to ekin ḳorar zoiggo, Al-Mosir loge zebla amrar moron oise, te amra zinda-o oimu tan loge.
2TI 2:12 Amra sobor ḳoria shoijjo ḳorle, tan loge bashshai kormu. Ar tanre oshikar ḳorle to, tain-o amrare oshikar ḳorba.
2TI 2:13 Amra beiman oigele-o, tain hamesha hok-halali roin. Tain kunumonte-u nizore oshikar ḳorta faroin na.
2TI 2:14 O Timoti, tumi mumin oḳolre amar ou talimḳan mono ḳorai deo. Allar samne tarare hushiar ḳoro, zate aze-baze mat loia torka-torki na ḳoroin, ita mator to kunu dam nai, ita zera hune, tarar shorbonash oy.
2TI 2:15 Tumi Allar kushi mafik nizore forezgar halote tan samne azir ḳoro, ou laḳan ḳamla bono, ze ḳamlae Allar dorbaro shorom faoar kunu ḳaron nai. Ze ḳamlae shoṭik babe hok kalam talim dein, ou laḳan o.
2TI 2:16 Allar birudi aze-baze mat taki duroi ro. Ila mate Allar bae manshor ḍor-ḳof ḳoma dorbo.
2TI 2:17 Ila aze-baze talim to fosa-gar laḳan sairobae sitre. I dolo ase, Huminas ar Filitas.
2TI 2:18 Iguin to Allai hok taki ku-fote gesoingi. Itae ḳoin, mumin oḳol bule murda taki zinda oia harsoin. Ola aze-baze matia tara kunu kunu zonor iman nosṭo ḳorilise.
2TI 2:19 Tebou Allar banail mozbut bit uba roise, er ufre sil-sappoṛor laḳan ou ḳota leḳa ase, “Malike zanoin, ḳe ḳe tan,” ar “Ze zone al-Mosire malik koia shikar ḳore, he hoḳol zator guna taki horail rouk.”
2TI 2:20 O Timoti, zomidar baṛit to ḳali shuna-rufar zinish taḳe na, laḳṛir zinish ar maṭir tal-bashon-o taḳe. Ermaze kunuṭa shommani kamo ar kunuṭa nisa ḳamo bebohar oy.
2TI 2:21 Te zeta manush ou nisa ḳamor ashbabor laḳan, itar ges taki horia aia ḳeu zudi nizore fak-saf ḳorilae, te he shommani zinish bonizae. Tare fobitro hishabe alada ḳori raḳa oibo. He tar malikor ḳamo lagbo ar hoḳol nomunar nek kamor lagi zuit oibo.
2TI 2:22 Timoti hushiar o, zoubonor bod ḳaish taki tumar zan basao, ar zera ḳas dile malikor nam loy, tarar loge shorik oia forezgari, iman, mohobbot ar shantir lagi kiali o.
2TI 2:23 Aze-baze be-aḳoli torka-torkit shamil oio na, tumar zana ase, itae ḳali kaijja-fosad baṛae.
2TI 2:24 Malik Isar gulame ḳaijja-fosad ḳora ṭik nae, ein borong hoḳlor bae doyal oite oibo, ein manshore talim deoar ḳemota ar sobor-shokti taḳte oibo.
2TI 2:25 Tain nizor birudi manshore-o norom mone buz diba. Ou ashae talim diba, hoytoba Allae tarare touba ḳorar shuzug diba, zate tara Allai hokre balamonte sinoin.
2TI 2:26 Teu tara seton faia Iblisor fando taki zan basaiba, ou Iblise tar gulam bananir lagi erare dorsil.
2TI 3:1 O Timoti, ou hushiari kanain mono rakio, aḳeri zomanat kub mosibotor din aibo.
2TI 3:2 Manush shartofor oizibo, ṭeḳa-foyshar lalosi, boṛai-beṭagiri deḳani, manshore elami kora, durnam gaoa, ma-bafor obaiddo, nimoḳ-harami korbo ar Allar naformani korbo.
2TI 3:3 Maya-momota ḳomizibo, ḳaijja-fosad ḳorle afush ḳorto nae. Foror bodnam gaibo, nizore shamlaito farto nae, manush omanush oizibo ar hoḳol nomunar nek kamor dushmoni korbo.
2TI 3:4 Manshe beimani, fuṭani ar beforua bab deḳaibo, Allar ashik na oia duniabi aram-ayeshor ashik oibo.
2TI 3:5 Bairor bab-surote buza zaibo kub allaoala pak-musolli, oile muloto lebasdari bonḍo. Te tumi itar ges taki horia roio.
2TI 3:6 Otar mazor ḳeu ḳeu duka dia manshor goro hamaia ḳom imani beṭintore ku-fote ṭane. Ita beṭintor mogoz oilo gunar banḍar. Tara nanan nomunar furti-amudor boshe sole.
2TI 3:7 Tara hamesha Allai fotor talim hune, oile kunudin-o Allai hokikot tarar bitre hamae na.
2TI 3:8 Mishoror Feraunor zadugir-gunin Zanni ar Zamborie zela Musa nobir birudita ḳorsila, ṭik ou laḳan oguinte-o Allai hokor birudita ḳore. Itar bibeḳ fosi gese, tarar bitre imanor balai nai.
2TI 3:9 Oile tara ar aguaito farto nae, hou zadugir Zanni ar Zamborir be-aḳoli zela hoḳlor gese dora foṛsil, itar be-aḳoli-o ola dora foṛbo.
2TI 3:10 O Timoti, tumi amar talim, amar sal-cholon, amar uddesho, iman, soborgari, mohobbot, ar amar doijjor ḳota furafur kial ḳorso.
2TI 3:11 Antiokia, Ikonia ar Lushra ṭauno ami koto zulum-mosibot shoijjo ḳorsi, ita to tumi zano. Oile malike amare rokka ḳorsoin.
2TI 3:12 Ashole Allar ḍor-ḳof bitre rakia, Isayi imandar bonia zera zindegi kaṭaito sae, tara to zulum-mosiboto foṛbo-u.
2TI 3:13 Oile bonḍo ar ḳobis oḳol din din aro ḳaraf oibo. Tara nize-o be-fote solbo, ar aroḳzonre-o be-foti banaibo.
2TI 3:14 Te tumi zeta talim faiso, faia dile-zane ekin ḳorso, er ufre tir taḳo, ḳaron tumi nize zano, i talim ḳar ges taki faiso.
2TI 3:15 Tumi to huruman tone-u Allar kalamor talim faiso, ar ou kalame-u tumare Isa al-Mosir ufre iman anar usillae, nazat hasilor fot batai dibo.
2TI 3:16 Huno, Allar kalamor forteḳṭa horof Allar ges taki-u aise. Ita to talim, hushiari, hedayot, ar hok zindegi goṛibar kuraḳ,
2TI 3:17 zate Allar bonda oḳol ufozukto bonia hoḳol nek kamor lagi zuit oin.
2TI 4:1 Ami Alla Pakre shakki rakia, ar zein tamam zinda-murdar bisar ḳorba, hou Isa al-Mosire shakki rakia, duniat tan dusrabaror toshrif ana ar tan bashshair duai dia tumare ou ḳoṛa hukum diar.
2TI 4:2 Tumi Allar kalam toblig koro, shomoy-oshomoy kunta nai, hamesha toblig koro, kub beshi doijjo doria talim deo ar manshor oforad deḳai deo, tarare hushiar ḳoro ar buzao.
2TI 4:3 Agedi ola shomoy aibo, zebla hasa talim manshor shoijjo oito nae, borong nizor monor ḳaish furaita ḳori tara olaḳan ustad dorba, zetae tarar mon zugaia mongoṛa talim diba.
2TI 4:4 Tara hok talim taki muk firaia, mongoṛa kichcha-ḳahinir ḳore douṛaiba.
2TI 4:5 Oile tumi hoḳol befare nizore shamlaia raḳo, duk-koshṭo shoijjo ḳoro, al-Mosir befare kush-ḳobri toblig korat ro, Allar deoa dayitto adae ḳoro.
2TI 4:6 Amar moutor din aia azigese, amar nizor loure kurbani hishabe ḍali deoa or.
2TI 4:7 Ami to al-Mosir lagi zane-forane laṛai korsi, amare batai deoa fotor hesh mata forzonto douṛaisi, amar iman ṭikaia raḳsi.
2TI 4:8 Te amar forezgarir furuskar to zoma ase, hou hok-insafḳari malike Ruz Hashoror din amare joyor mala furuskar diba. Ita ḳali amare nae, zoto manush ashik oia tan lagi bar saira, tara hoḳolre-u diba.
2TI 4:9 O Timoti, tumi sesṭa salaia zoto zoldi faro amar gese ao.
2TI 4:10 Ḳaron Kirisken bai Galatia desho, Titas bai Dalmatia desho gesoin. Ar Dimas bai duniabi mayar dandat foṛia, amare saṛia Tisholoniki ṭauno gesoingi.
2TI 4:11 Ḳali Luk bai amar gese asoin. Erlagi Markus baire loia tumi zoldi ao, amar ḳam-ḳazo tain bout shaijjo ḳoroin.
2TI 4:12 Tukik baire ami Ifiso faṭaisi.
2TI 4:13 Ami aibar shomoy Toruas ṭaunor Karfus bair gese, amar ekkan saddor toia aisi, tumi aibar fote oḳanta anio, ar amar kitab ḳanain, ḳas ḳori samṛar ufre leḳa kitab ḳanain-o anio.
2TI 4:14 Huno, tama-fitolor ḳam ḳore ze Sikondor, ogie amar bout ḳeti korse, oile Malik Isae tare ufozukto bodla diba.
2TI 4:15 Te tar befare tumi hushiar roio, he ḳomor bandia amrar toblig kamor birudita ḳorsil.
2TI 4:16 Zano ni, amare foyla bar zebla adaloto neoa oilo, ou shomoy ḳeu amare shaijjo ḳorse na, hoḳole-u amare saṛia bagise. Ta-o Allae zanu tarar i bishoyḳan hishabo na doroin.
2TI 4:17 Ḳali Malik Isa amar fokke ubaila, tain amare bol zugaila. Erlagi ami bin zatir samne shullo-ana kush-ḳobri toblig korar shuzug faisi, tara hoḳole ita hunche. Ou bisaro tarar shinghor mukor kuraḳ oa taki Allae amare basaisoin.
2TI 4:18 Ou Malik Isae hoḳol nomunar bod ḳam taki-o amare hefazote raḳba ar sohi-salamote behesti bashshait far ḳorba. Zuge zuge siroḳal tan tarif ouk. Amin.
2TI 4:19 Amrar mumin bai Akilre, tan bibi Fiskila ar Anis bair foribarre amar salam zanaio.
2TI 4:20 Irastas bai Korint ṭauno roisoin, ar Tofimre bemar halote ami Milita bondoro toia aisi.
2TI 4:21 Te tumi kub sesṭa salao, shitor age aibar lagi. Bai Abul, Bodis, Olinis, boin Kuludia shoho aro hoḳol bai-boine tumare salam disoin.
2TI 4:22 Malik Isa tumar loge loge roukka. Allar rohomot tumrar loge taḳouk. Amin.
TIT 1:1 Ami Paulus to Alla Pakor gulam ar Hozrot Isa al-Mosir eḳzon sahabi. Amar dayitto oilo, Allar fosond ḳora bonda oḳolre imanor fote ana, ar Allare mania solar maze ze hokikot ase, ou hokikotre sinai deoa.
TIT 1:2 Ami al-Mosir kezmot ḳoriar, aḳeri zindegi faoar ashae. Ze Allae kunu misa matoin na, hou Allae i zindegi deoar oada ḳorsoin, dunia foyda oar age-u.
TIT 1:3 Tain tan kalam shoṭik shomoye zair ḳorsoin, ar amrar toraneala Allar hukum mafik ita toblig korar bar amar ato deoa oise.
TIT 1:4 Amar hou ḳas aolad Titasor gese leḳram, amra duiozon-u eḳoi imane al-Mosir ummot oisi. Amrar gaibi baf Allae ar toraneala Isa al-Mosie rohomot ar shanti dan ḳoroukka.
TIT 1:5 Titas huno, ami tumare ou Kriti difo toia aisi, zate zeta ḳam oḳono baki roise, tumi ota furafur adae ḳoro. Ar ami zela hukum dislam, ṭik oula tumi forteḳ ṭaunor zomator murobbi oḳolre ḳamo boail ḳoro.
TIT 1:6 Mono rakio, ze murobbi oḳol bodnam saṛa nikut, zerar ḳali eḳzon bou asoin, zerar fua-fuṛin Isayi imandar, zera beforua babe zindegi kaṭae na, borong ma-bafor baiddo ase, ou murobbire tumi boail ḳoro.
TIT 1:7 Allai kamor zimmadari faoae zekunu saloḳdar zanu bodnam saṛa nikut oin. Tain zanu shoirasar, bodragi, nishakur, maramari korra ba haram ruzi-ruzgaror lalosi na oin.
TIT 1:8 Er bodla tain zanu memandari korra, nek babor ashik, hok-halali, ar Allar baiddo zon oin. Tan bala bisar-buddi taḳe, ar nizore furafur shamlaia raḳta faroin.
TIT 1:9 Alla Pakor ze hok kalam talim faisoin, tain itare mozbut ḳori doria raḳoin, ar ṭik ou laḳan ḳaṭi talim toblig korta faroin. Erloge zera tan bifokke ase, tarar bul-beaḳoli-o dorai dein.
TIT 1:10 Ḳaron bout beshamal manush asoin, zetae ḳeurore manoin na, beḳama mat matoin, sol-soturi koroin. Zetae mosolmani kam ḳoranir lagi zura-zuri koroin, ami kas ḳori otar ḳota-u ḳoiram.
TIT 1:11 Itar muk bond ḳora zorur. Itae ku-fote ṭeḳa ḳamanir ashae ola talim dein, ze talim deoa tarar lagi ṭik nae. I talim dia kunu kunu foribarre bigṛailira.
TIT 1:12 Erlagi tarar nizor deshor eḳzon fonḍite ḳoisoin, “Kriti difor manshe hamesha misa matoin, iguin to zongli zanuaror laḳan, kuṛia ar feṭua.”
TIT 1:13 Ita to eḳdom hasa, erlagi tumi kub gorom oia tarar aib deḳaia deo, zate tarar Isayi iman shullo-ana nikut oy.
TIT 1:14 Ihudi oḳlor banail kichcha-ḳahini, ar zeta manush Allai hokikot taki be-fote gesegi, tara zanu itar hukum-ufodesh ḳano na loin.
TIT 1:15 Zerar dil fak-fobitro, tarar gese hoḳolta-u fobitro. Oile zerar dil nafakie bora, ar zeta beiman, itar gese kunta-u fobitro nae. Itar mon ar bibeḳ hoḳolta-u borbad.
TIT 1:16 Tara mukdi dabi koroin Allare manoin, oile tarar ḳamor mazdi tanre oshikar ḳoroin. Iguin to noforoti ar obaiddo. Itare kunu bala ḳamo lagail zae na.
TIT 2:1 Titas huno, tumi manshore olaḳan talim deo, zate tumar mator maze nikut hok talim taḳe.
TIT 2:2 Zomator murobbi beṭainre ḳo, tara zanu hamesha nizore shamlaia raḳoin, ijjoti bonoin, bala bisar-bibek kaṭain. Tarar zanu ḳaṭi iman, maya-mohobbot ar sobor taḳe.
TIT 2:3 Olaḳan murobbi beṭintore-o ḳo, tara zanu forezgarir adob-ḳayda mania soloin ar nekir bab hikain. Oinnor bodnam gaoa, ba nishakur bona tarar lagi ṭik nae.
TIT 2:4 Teu tara zuan fuṛintore hikaita farba, zate tarar zamai ar fua-fuṛinre mohobbot ḳoroin,
TIT 2:5 nizore shamlaia raḳoin, shoti roin, bala shongshari oin, doyalu oin, ar zamair baiddo taḳoin. Teu Allar kalamor bodnam ḳorar shuzug keu faito nae.
TIT 2:6 Olaḳan zuan fuaintore-o ufodesh deo, zate tara nizore shamlaia raḳoin.
TIT 2:7 Tumi tarar gese hoḳol nomunar nek kamor nishana o. Hok niote ar day-dayitto loia talim deo.
TIT 2:8 Ḳeu zanu tumar zobanor kunu dush na fae. Tumar oula sal-cholon dekia dushmon oḳol shorminda oiba ar amrar bodnam ḳorar kunu kut faita nae.
TIT 2:9 Tumi saḳor oḳolre ḳo, tara zanu hokkol befare munibor baiddo roin, munibor mon zugaia soloin, tarar mukor ufre be-adobi mat na matoin.
TIT 2:10 Munibor mal-samana suri na ḳoroin, borong nizor hok-halalir forman deḳaia hari, amrar toraneala Allar befare ze talim ase, ou talimre hokkol nomunae shundor ḳori hazain.
TIT 2:11 Zano to, Allar ze rohomotor usillae hoḳlor nazat mile, ita oḳon duniat zair oigese.
TIT 2:12 Ou rohomote-u amrare talim dira, zate amra be-dini kam-ḳaz taki ar duniar hoḳol bod ḳaish taki duroi roia, i zogoto nizore shamlaia raki, ar nek fote roia forezgar zindegi kaṭai.
TIT 2:13 Erloge amrar dilor forom asha furonor lagi bar sai, Allatala ar toraneala Isa al-Mosir shan-mohima zair oar kushi-bashi furonor lagi bar sai.
TIT 2:14 Isa al-Mosie to amrare basanir lagi tan nizor zan kurbani dilaisoin, zate hoḳol guna taki amrare ḳalas ḳori anta faroin, ar ou laḳan eḳdol manshore fak-fobitro ḳoroin, zera ḳali tan nizor oiba, zera nek kamor ashik oiba.
TIT 2:15 Tumi furafur bol ḳaṭaia ota befare talim deo, manshore nosiot ḳoro ar tarar dush-ḳosuri deḳaia deo. Tumare hey ḳorar shuzug keurore dio na.
TIT 3:1 Allar bonda oḳolre mono ḳorai deo, tara zanu deshor raza ar shorḳari niomor odine roin, tara obaiddo na oin, manshor hoḳol nomunar ufoḳar ḳorar lagi zuit taḳoin.
TIT 3:2 Tara zanu ḳeuror bodnam na gain, ḳaijja-fosad na ḳoroin, borong shanto-shisṭo roia hoḳlor loge norom bebohar ḳoroin.
TIT 3:3 Amra-o age be-aḳol ar naforman aslam, be-fote soltam, duniabi aram-ayesh ar nanan nomunar bod ḳaishor gulam aslam. Oinno manshore ingsha ḳortam, tarar ḳeti korar dandae din ḳaṭaitam. Ar nize ginnar zoiggo oile-o eḳe-oinnore ginnaitam.
TIT 3:4 Oile amrar toraneala Allar rohomot ar mohobbot zebla zair oilo,
TIT 3:5 ou shomoy tain amrare rehai dila. Amrar nizor kunu nek kamor lagi rehai disoin na, ḳali tan doya-mayae disoin. Pak Ruhe noya zonom dia, noya babe foyda ḳoria amrar dilre forishkar ḳorsoin. Ar olaḳan-u tain amrare rehai disoin.
TIT 3:6 Amrar toraneala Isa al-Mosir mazdi tain kula ate amrar maze ou Pak Ruhu ḍalia disoin.
TIT 3:7 Zate aḳeri zindegir asha-borosha faia, Allai hokkoltar odikari oi. Allar rohomote amrare be-ḳosur ḳalas hishabe kobul ḳorae-u to amra ita faisi.
TIT 3:8 Ikan to furafur hasa. Ami saiar, tumi ou befare furafur zur deo, zate Allar ufre zera iman anche, tara nek kam ḳorar kiali oy. Ila nek kam ḳora to hoḳlor lagi bala ar ufoḳari.
TIT 3:9 Ta-o beokufor laḳan torka-torki, zat-bongsho loia mata, ḳaijja-fosad, ar shoriot loia ḳota ḳaṭa-ḳaṭi korio na. Itae to kunu fayda oy na, ita ekkere beḳama.
TIT 3:10 Ze manshe doladoli lagae, tare foyla eḳbar, bade dusrabaro hushiar ḳorio, itae zudi he na bodle, te tar loge sola-fira ekkere bad dilaio.
TIT 3:11 Tumi to zano-u, ita manshor dilor sinta kub ḳaraf, he gunagar. He emne-u nizor naformanir forman dey.
TIT 3:12 Titas huno, ami Artimas ba Tukik baire tumar gese faṭaimu, era ḳeu gele tumi kas ḳori sesṭa ḳorio Nikafoli ṭauno aia amar loge deḳa ḳorar lagi. Ami niot ḳorsi, shitor ḳoymash ou Nikafolit roimu.
TIT 3:13 Ukil Zoin sab ar Apollos bair soforor lagi zotoḳan faro shaijjo ḳorio, zate tarar kunu obab na oy.
TIT 3:14 Amrar manshore to hikani zorur, shomazor balair lagi kila nizore ḳaṭail zae. Teu tara manshor zoruri obab miṭaito farbo, ola tarar nizor zindegi-o folala oibo.
TIT 3:15 Amar logor hoḳole tumare salam zanaira. Al-Mosir ufre iman anae zera amrare maya ḳoroin, tarare amar salam dio. Allar rohomot tumra hoḳlor ufre ḳaim rouk. Amin.
PHM 1:1 Ami Paulus, Isa al-Mosir lagi bondi asi. Ami ar amrar bai Timotie, amrar logor toblig korra mayar dust Filimonor gese leḳram.
PHM 1:2 Boin Afia, amrar loge imanor zudda Arkipas ar tumar baṛir zomator hoḳolre salam zanairam.
PHM 1:3 Amrar gaibi baf Alla Pake ar Hozrot Isa al-Mosie tumrar ufre rohomot ar shanti nazil ḳoroukka.
PHM 1:4 Ami hamesha munazator shomoy tumar ḳota iad ḳoria Allar shukria adae ḳori.
PHM 1:5 Ḳaron Hozrot Isa al-Mosir ufre tumar iman ar pak bonda oḳlor bae tumar mohobbotor ḳota ami hunchi.
PHM 1:6 Ami dua ḳori, mumin oḳlor loge tumar ḳatir-shomporko aro baṛouk. Tumi to zano, al-Mosir ḳatire Allae amrare ḳoto bala bala niamot bilai disoin.
PHM 1:7 Bai, tumar mohobbot dekia ami kub kushi oisi ar utshaho faisi, tumi to Allar pak bonda oḳlor dilo aram diso.
PHM 1:8 Tumar i bab dekia ami tumare ekkan ḳota ḳoitam sairam. Ami to al-Mosir name tumare hukum ditam farlam one, tumar ḳam fura ḳorar lagi.
PHM 1:9 Oile mohobbotor ḳatire hukum na dia tumare minot ḳoriar. Ami Paulus ou murobbi boyosho al-Mosir lagi bondi halote tumar gese i minoti korram.
PHM 1:10 Amar aolad Onisimor lagi arzi zanairam, ami zelo bondi taḳa halote he iman ania amar aolad bonigese.
PHM 1:11 Eḳ shomoy tumar gese he beḳama asil, oile oḳon amar ar tumar gese he bout ḳamaora bonigese.
PHM 1:12 Zai ouk, amar zanor taki beshi mayar ou manshore ami tumar gese firot faṭairam.
PHM 1:13 Ami tare amar gese raḳtam saislam, zate kush-ḳobrir dae bondi halote tumar oia he amar kezmot ḳorto fare.
PHM 1:14 Oile tumar izazot saṛa ami kunta ḳorlam na, zate zur ḳoria tumar bala ḳam adae ḳora na lage. Ami sairam, tumi niz taki-u ou ḳam ḳoro.
PHM 1:15 Tumi zate siroḳalor lagi tare firia fao, oito fare ou ḳarone-u he tumar ges taki tuṛa dinor lagi horia asil.
PHM 1:16 Oile tumi oḳon tare ar gulam hishabe faitae nae borong gulam taki boṛo, mani mayar bai hishabe faibae. Ḳas ḳori he amar kub mayar manush, oḳon tumar gese-o he aro mayar, ḳali roḳto-mangshe nae, imandar bai hishabe mayar.
PHM 1:17 Erdae tumi zudi amare eḳoi imanor bagi zano, te amare zela kobul ḳorar ḳota, tare-o ola kobul ḳorio.
PHM 1:18 He zudi tumar kunu ḳeti koria taḳe ar tar gese tumar kunu faona taḳe, te mono ḳorio, i faona tumi amar gese fao.
PHM 1:19 Ami Pauluse nizor ate lekia zanairam, tumar faona ami dilaimu. Ashole ami koitam sairam na ze, tumar nizor zanor lagi-u tumi amar gese rini aso.
PHM 1:20 Bai Filimon, Allar oaste ekkan ḳam ḳoro, eḳzon imandar bai hishabe amar zano aram deo.
PHM 1:21 Tumi amar ḳota raḳbae zania-u, tumar gese ou siṭikan leḳlam. Ami mono ḳori, ami zeta ḳorar lagi koiram, er taki beshi tumi korbae.
PHM 1:22 Huno, aro ekkan ḳota ḳoiram, tumi amar lagi memanor kuṭa ṭik koria rakio. Ḳaron ami asha ḳorram, tumrar duar usillae amare tumrar gese firot deoa oibo.
PHM 1:23 Abu-Farase tumare salam disoin, tain Isa al-Mosir lagi amar loge oia bondi asoin.
PHM 1:24 Ar amar logor tobligkari Markus, Aristakus, Dimas ar Luke-o tumare salam zanaira.
PHM 1:25 Amrar Hozrot Isa al-Mosir rohomot tumrar dilo ḳaim rouk. Amin.
HEB 1:1 Alla Pake agor zomanat nanan nomunae nobi oḳlor mazdia amrar moy-murobbi oḳlor gese ṭukra ṭukra ḳori ohi bezisoin,
HEB 1:2 oile oḳon aḳeri zomanat aia tain ohire manush surote shorashori bezisoin. Ou manush oila Allar ḳas mayar futor laḳan, en nam-u Kolimatulla, mani Allar ohi. Ou mayar fut Kolimatullar ato-u tain hokkoltar malikana dilaisoin, en usillae asman-zomin ar hokkolta foyda oise.
HEB 1:3 Ein-u oila Allar shan-tozollir nur, tan mazdia-u Alla Pake nizore zair ḳorsoin. Ou mayar fut Kolimatullar hukumor bole, tamam zogotor hokkolta sole. Tain duniar manshor gunare doia saf ḳoria, arshe-azimo Allar ḍainor toḳto toshrif raḳsoin.
HEB 1:4 Ita dekia amra buzi, Allae tanre firista oḳol taki aro beshi mortuba-ala nam disoin, ar zela nam oula ijjot-o dan ḳorsoin.
HEB 1:5 Allae kunudin kunu firistare ila ḳota ḳoisoin na, Tumi to amar fut, aiz-u ami tumar bafor laḳan oilam. Ba, Ami-u tar bafor laḳan oimu ar he oibo amar fut.
HEB 1:6 Tain zebla tan ḳas fordan futre duniat bezila, ou shomoy firista oḳolre hukum dila, O firista oḳol, tumra enre soizda ḳoro.
HEB 1:7 Allae firista oḳlor befare ḳoira, Firista oḳolre tain haoar nomunae foyda ḳorsoin, nizor ḳadim oḳolre agunir fulkir laḳan banaisoin.
HEB 1:8 Oile ou futor befare tain ḳoira, Ia Elahi, tumar toḳt hor-hamesha boail roibo, tumar insaf-u oilo hok insaf,
HEB 1:9 tumi naformanire ginnao ar dindarire bala fao, erlagi Allae-o, tumar Allae tumare ḳelafoti disoin, tumare ijjoti godi dan ḳorsoin, tumar bai-birador taki-o tumare bout beshi kushi disoin.
HEB 1:10 Allae aro ḳoira, O malik, tumi-u foyla duniar ian kuṭi gaṛiso, asman oḳol-o tumar ate foyda ḳorse.
HEB 1:11 Ita hokkolta binash oizibo, oile tumi to hamesha boail roibae. Ita ḳafoṛor laḳan furan oizibo,
HEB 1:12 tumi itare saddoror laḳan bainj ḳoria toibae, findibar ḳafoṛor laḳan ita hokkolta bodlaibae. Oile tumi zela aso, oula-u roibae, tumar hayati kunudin-u fuṛaito nae.
HEB 1:13 Ar Allae kunudin kunu firistare ila ḳota ḳoisoin na, Tumar dushmon oḳolre zotodin tumar faor tolat na falai, otodin tumi amar nizor toḳtor ḍain galat bo.
HEB 1:14 Firista oḳol to ḳali kezmot ḳorra ruhu nae ni? Zera nazat hasil ḳorba, tarar ufoḳar ḳorar lagi-u erare beza oise.
HEB 2:1 Te ou futor befare amra zotota hunchi, ita kub kial ḳoria shomza dorḳar, arnae aste aste i talim taki be-fote zaitamgi fari.
HEB 2:2 Firistar marfote batail kalam zebla ḳaim roise, ar zera i kalamor ulṭa solchil, era-o tarar faona shaza faise,
HEB 2:3 taile Allae tan ḳas meherbanie amrar lagi oḳon ze nazator fot tiar ḳorsoin, i fotor ulṭa solle amra kunu basmu ni? Ou nazator ḳota to hokkol foyla Malik Isae nize-u ḳoisoin, ar zera ita hunchil tara-o furafur saf ḳoria amrare ḳoisoin, ita ekkebare hasa.
HEB 2:4 Erar loge Allae nize-o nanan kisimor kudroti alamot, keramotir bol-takkotdi ou nazator fokke shakki disoin. Ar nizor morzie Pak Ruhur deoa nanan niamot bilai dia-o shakki disoin.
HEB 2:5 Te amra ze batuni bashshair ḳota ḳoiar, i bashshai to Allae kunu firistar zimmae raḳsoin na.
HEB 2:6 Borong Allar kalamor maze eḳzone bataisoin, Manush aroḳta kita zen tumi tarare iad ḳoro? Manshor aolad-u ba kita zen tarare deḳa-huna ḳoro?
HEB 2:7 Tumi to manshore firista taki kali tuṛa lamat lamaiso, gourob ar ijjotor mala to manshore-u dan ḳorso.
HEB 2:8 Tumar foyda hokkoltar ufre erare ijjot diso, hokkolta-u erar faor tolat, erar aotae raḳso. Te Allae hokkoltare erar aotae anae, erar ḳemotar bare ar kunta-u roise na. Oile oḳono to hokkoltare amrar nizor aotae deḳram na.
HEB 2:9 Ḳali hou Isare deḳram, tanre firista oḳol taki tuṛa lamat lamail oisil, zate Allar rohomote duniar tamam manshor zan basanir lagi, tan nizor zan bilai dein. Hasau tain kub ḳoshṭo faia nizor zan bilai dia mara gesoin, erlagi-u deḳram, Allae tanre ou ijjot ar gourobor mala findaisoin.
HEB 2:10 Ashole hokkolta-u to Allar lagi, tain-u hokkolta foyda ḳorsoin, ar tan kial oilo tan bout aolad-o tan shan-mohimar bagi oin. Erlagi-u tarar nazator ḳanḍari ou Isare duk-koshṭo dia kamil banaisoin, zate en log doria era tan gese ain.
HEB 2:11 Te ze Isae manshore fak-saf ḳoroin ar zera fak-saf bonoin, era hokkol-u to eḳ Allar foribaror. Otar dae Isae erare bai koia ḍaḳte kunu shorom fain na.
HEB 2:12 Tain ḳoisoin, Ami amar baiaintor gese tumar nam toblig kormu, shomazor maze tumar tarif-gozol gaimu.
HEB 2:13 Tain hirbar ḳoisoin, Ami Allar ufre borosha ḳormu. Ar aroḳbar ḳoisoin, Deḳoukka, ami-o asi ar hou aolad oḳol-o ono asoin, zerare Allae amar ato shofia disoin.
HEB 2:14 Aichcha, te i aolad oḳol to roḳto-mangshor manush, gotike Isa nize-o oula roḳto-mangshor ḳayae zonom loila. Ḳali ou ḳayar moutor usillae, moutor ḳemotar malik hou Iblisre gayel ḳorta faroin,
HEB 2:15 ar moronor ḍore zera hara zindegi moutor gulamor laḳan ḳaṭaira, tarare-o azad ḳorta faroin.
HEB 2:16 Tain to firista oḳolre shaijjo ḳoroin na, ḳali Ibrahimor aolad oḳolre-u shaijjo ḳorra.
HEB 2:17 I hokkolta furafur adae ḳorar lagi Isar-o zorur asil, tain nize-o ou baiaintor loge hoḳol befare homani oa. Homani oia Allar dorbaro nirbor ḳorar zuka, dil-dorodi fordan imam oita faroin. Imam bonia manshor gunar koforar lagi nizor zan kurbani dein.
HEB 2:18 Tain nize forikkat foṛia duk-koshṭo shoijjo ḳorsoin, erlagi-u zera forikkat foṛoin tarare-o tain shaijjo ḳorta faroin.
HEB 3:1 Erlagi O amar fak-forezgar bai oḳol, tumra zera behesti daoto shorik oiso, tumra forteḳe-u Isar bae souk raḳo. Alla Pake tan i kas kolifare bezisoin, tain-u to hou fordan imam, ikan amra manchi.
HEB 3:2 Hozrot Musa zela Allar gor-shongsharo nirbor ḳorar zuka asla, ou laḳan Isare-o zein bezisoin, ou Allar dorbaro tain asla nirbor ḳorar zuka.
HEB 3:3 Te gor banaora malike zela gor taki-o beshi ijjot fain, ou laḳan Allar gor-shongsharo Hozrot Isae-o Musa nobi taki beshi ijjot hasil ḳorsoin.
HEB 3:4 Hokkol gorain-u to kunu na kunu manshe banaisoin, oile zein hokkolta banaisoin tain-u Alla.
HEB 3:5 Ashole samnor zomanar lagi zeta batail oibo, ota befar zananir lagi, Musa asla Allar gor-shongsharor ḳam-ḳazo nirbor ḳorar zuka ḳamlar laḳan.
HEB 3:6 Oile al-Mosi to Allar gor-shongsharor zimmadar hishabe nirbor ḳorar zuka futor laḳan asla. Oḳon amra-o zudi zarzir dilor asha ar himmot rakia mout forzonto ḳaim roi, te deḳa zaibo zen, amra-o Allar gor-shongsharor bagi oisi.
HEB 3:7 Erlagi-u Allar Pak Ruhe bataisoin, Aiz zudi tumra tan aoaz huno,
HEB 3:8 te tumrar moy-murobbir laḳan, tumrar nizor dilre fashan banaio na. Allae ḳoira, tara zela morubumir maze, amar birudde gia amare forikka ḳorsla, tumra ila ḳorio na.
HEB 3:9 Tumrar baf-dadainte sallish bosor dori amar kudroti kam deḳar bade-o, hono amare forikka ḳorsoin.
HEB 3:10 Erlagi ami tarar ufre kub bezar oia ḳoilam, erar dil to hamesha be-fote sokkor der, tara to amar fot sinlo na.
HEB 3:11 Teu ami gusa ḳoria ḳosom ḳaia ḳoislam, amar deoa hou aramor zagat, era hamaito farto nae.
HEB 3:12 Baiain oḳol, hushiar o! Tumrar dilor maze zanu naformani ar beimani na hamae, ita hamai gele zinda Allar ges taki nizore duroi horailae.
HEB 3:13 Itar bodla zotodinre aiz ḳoia ḍaḳa oy, otodin tumra eḳe-oinnore shaosh deo, zate ḳeu gunar fando foṛia nizor dilre fashan na banae.
HEB 3:14 Ḳaron amra zudi foylakur laḳan hesh forzonto imane mozbut roia soli, te buza zaibo amra al-Mosir loge shorik oisi.
HEB 3:15 Tuṛa age batail oise, Aiz zudi tumra tan aoaz huno, te tumrar moy-murobbir laḳan, tumrar nizor dilre fashan banaio na.
HEB 3:16 Aichcha ḳo sain, Allar nizor zobanor buli hunar bade-o ḳegie tan birudita ḳorsil? Era-u nae ni, zerare Musa nobie Mishor taki bar ḳori anchila?
HEB 3:17 Ḳo sain, Allae sallish bosor dori kar ufre bezar asla? Erar ufre-u nae ni, zera guna ḳorsla ar morubumir maze lash oia foṛsla?
HEB 3:18 Allae ḳar ufre bezar oia ḳosom ḳaia ḳoisla, ‘Amar deoa hou aramor zagat era hamaito farto nae’? Ou erar ufre-u nae ni, zera tan zobanor buli hunia-o naformani korsil?
HEB 3:19 Ota taki-u to amra buzram, iman na anae tara Allar deoa hou aramor zagat hamaito farse na.
HEB 4:1 Allar deoa aramor zagat hamanir oada oḳono amrar lagi salu ase. Erlagi ao, amra aro hushiar oia soli, naile deḳa zaibo heshe tumra ḳeu aramor zaga taki bad foṛigeso.
HEB 4:2 Amrar gese zela kush-ḳobri toblig kora oise, Boni Israilor gese-o oula toblig kora oisil, i kush-ḳobri hunia tarar kunu fayda oise na, ḳaron tara ita hunle-o iman anche na.
HEB 4:3 Oile amra to iman anchi ar Allar oada ḳora hou aramor zagat hamaitam fariar. Ou aramor befare Allae ḳoisoin, Teu ami gusa ḳoria ḳosom ḳaia ḳoislam, amar deoa hou aramor zagat, era hamaito farto nae. Zudio dunia foyda ḳorar bad taki-u, Allar i aram tiar ḳora oise, ta-o tain ola ḳoisoin.
HEB 4:4 Ou aramor befare aroḳ ayato leḳa ase, “Allae i hoḳol ḳam shesh ḳoria shat nombor din aram ḳorla, tain idin ar kunta foyda ḳorla na.”
HEB 4:5 Oile tain-u hirbar ḳoisoin, Amar deoa hou aramor zagat, era hamaito farto nae.
HEB 4:6 Erlagi ou ḳota-u foysala oilo zen, kisu manush Allar hi aramor maze hamaita farba, oile foyla zerar gese kush-ḳobri toblig kora oisil, tarar naformanir ḳarone-u tara Allar hi aramor maze hamaito farse na.
HEB 4:7 Allae bout din age ita Boni Israilor gese bataisla, bade tan aramor maze hamanir lagi hirbar noya din ṭik koria ou dinor nam dila, aiz. Hirbar bout din bade tain Daud nobir gese ḳoisoin, zela ufre leḳa ase, Aiz zudi tumra tan aoaz huno, te tumrar nizor dilre fashan banaio na.
HEB 4:8 Oḳan ḳoar mani oilo, Hozrot Musar moutor bade Iusa nobie zudi tarare hi aramo harailita farta, te Allae bade aroḳ dinor ḳota ḳoila na one.
HEB 4:9 Te buza zae, aramo hamanir fot Allar bonda oḳlor lagi oḳono kula ase.
HEB 4:10 Mul ḳota oilo, Allae zela tan hokkol ḳam shesh ḳoria bade aram ḳorsla, ou laḳan kunu bonda-o tan aramor maze hamaia harle, he-o tar ḳam taki aram fae.
HEB 4:11 Te ao, amra-o hi aramor maze hamanir lagi kas dile aguai, zate hou naforman Boni Israilor laḳan Allar hukumor birudde gia, i aram taki bad na foṛi.
HEB 4:12 Allar kalam to zinda ar bolala ḳamla, duio gala darail toluaror saite-o beshi darala. I kalame fuṛ ḳoria manshor bitre hamaia dil-ruh, aḍḍi-gustre algae, ar dilor bitoror niot-sinta hokkoltare forikka ḳoria deḳe.
HEB 4:13 Allar foyda ḳora kunu moḳluḳat-u tan gese lukail nae. Tan souḳor samne hokkolta-u kula-mela zair ase, tan gese-u amrar hishab dite oibo.
HEB 4:14 Amra to ola eḳ fordan imam faisi, zein tamam asman far oia hari Allar arsho toshrif nisoin, tain-u Allar ḳas mayar zon, Isa Ibnulla. Te aukka, amra tan kolimare mozbut ḳori mani.
HEB 4:15 Ḳaron amrar fordan imam i laḳan nae zen, amrar kunu ḳomzurir duke tain duki oita nae, tain-o amrar laḳan hokkol zator gunar forikkat foṛsoin, oile kunuzat guna ḳorsoin na.
HEB 4:16 Erlagi aukka, amra himmot ḳoria Allar rohomotor toḳtor kinaro zai, zate meherbani hasil ḳortam fari, ar zelaḳan rohomotor goroz ase, ou laḳan rohomot-o fai.
HEB 5:1 Manshor fokke roia Allar ebadotir lagi manshor maz tone-u forteḳ fordan imamre fosond ḳori neoa oy. Tan ḳam oilo manshor guna mafir lagi foshu kurbani deoa ar hoḳol zator lilla-sodga boḳshia deoa.
HEB 5:2 Zera na buzia guna ḳore ar be-foti oy erar loge tain norom bebohar ḳorta faroin, ḳaron tan maze-o ḳomzuri ase.
HEB 5:3 Tain zela oinno manshor gunar lagia kurbani dein, oula tan nizor ḳomzuri ar gunar lagi-o kurbani kora forz.
HEB 5:4 Fordan imam oar ijjot ḳeu nize nize ḳamaito fare na, ḳali Allae zenre fosond ḳoroin tain-u i ijjot hasil ḳoroin, zela Allae Harun nobire i ijjot disla.
HEB 5:5 Isae-o oula fordan imam oar lagi nize nizore boṛo banaila na, borong Allae-u tanre ou gourob dan ḳorsoin, Allae bataisoin, Tumi to amar fut, aiz-u ami tumar bafor laḳan oilam.
HEB 5:6 Tain oula aroḳ ayato ḳoisoin, Bashsha Malki-Siddikor silsilae tumi-u hor-hameshakur imam.
HEB 5:7 Allae to Isare moutor at taki basaita farla one, Isa duniat taḳar shomoy tan gese ahazari kori kandia dua-minoti kori bik magisoin, tan maze Allar ḍor-ḳof ar baiddota taḳae itar zuaf-o faisoin.
HEB 5:8 Tain fut oile-o ḳoshṭo shoijjo ḳoria, Allar baiddo oia roa hikisoin,
HEB 5:9 ar ou laḳan roia tain zebla furafur kamil bonigela, Allae tanre Malki-Siddikor nomunae fordan imamor ḳetab dila, ou nomunae tan baiddo ummot oḳlor lagi Allai nazator fot kulia disoin.
HEB 5:11 Malki-Siddikor befare amrar aro bout boyan ase, oile tumrar ḳano tala lagai diso ḳori tumrare ita buzani kub ḳoshṭo.
HEB 5:12 Otodinor maze tumra-o ustad oizitae asil, oile oḳono deḳa zar tumrare Allar kalamor foyla soboḳ hikani lagbo. Tumrare oḳono huruttar laḳan dud ḳaoani lager, shokto ḳana hozom ḳortae farrae na.
HEB 5:13 Ar zera dud ḳae tara to geda hurutta, shoriotor hukum-ahkamor befare tara kunta-u buze na.
HEB 5:14 Shokto ḳana tarar lagi-u zerar boyosh oise, tara bala-burar tofat buzia aḳol ḳaṭaia sole.
HEB 6:1 Isar befare amra foyla zeta talim faisi, aukka itare faroia amra aro agedi aguaia kamil oi. Hou foylakur talim hirbar hikar ar goroz nai, zemon naformani kam taki dilre bodlani, Allar ufre iman ana,
HEB 6:2 nanan nomunar gusol, dua nibar shomoy atai deoa, moutor bade zinda oia uṭa, ar aḳerator bisar.
HEB 6:3 Inshalla, amra ola-u ḳormu.
HEB 6:4 Oile zera eḳbar Allar fot dekilaise, behesti danor moza faise, Pak Ruhe shorik oise,
HEB 6:5 Allar rohomotor kalamor moza buzche, ar samnor zomanar nanan kudroti kam deḳse,
HEB 6:6 deḳar bade-o kafiri kam ḳorse, erar dilre ar bodlail zaito nae, ḳaron tara nize Allar ḳas mayar zon Ibnullare hirbar duk-koshṭor solibo zane marer, ar hoḳlor samne kula-mela tan gibot gar.
HEB 6:7 Ze maṭie bare bare megor fani ozom ḳoria girost oḳolre hag-torḳari zugaia dey, i maṭit Allar rohomot nazil oy.
HEB 6:8 Oile ze maṭit ḳali bon-zongol ar ḳaṭa-gosa fole, ita beḳama maṭi, i maṭit lannot foṛe. Manshe itare aguindi zalain.
HEB 6:9 O mayar dust oḳol, zudio amra ilaḳan ḳoiram, oile ashole amra ḳas dile mono ḳori, tumrar halot e taki bout bala ase, ar tumrar zindegit nazator fol-o deḳa zar.
HEB 6:10 Alla to hok-insafḳari, tumra tan lagi ze mohobbot deḳairae, tan lagi zeta ḳam-ḳaz ḳorrae, tan pak bonda oḳlor kezmot ḳoria airae, ita to tain faurita nae.
HEB 6:11 Amrar kub ichcha oilo, tumra forteḳ zone-u hesh forzonto eḳoi laḳan ḳam ḳorat aguai aibae, zate tumrar asha fura oy.
HEB 6:12 Ou laḳan ḳamo aguaite tumrar alshi na ae; borong imane ar sobre zera Allar oada ḳora borkot hasil ḳorsoin, tumra-o tarar laḳan oizao.
HEB 6:13 Hozrot Ibrahimor loge Allae zebla oada ḳorsla, i shomoy dusra kuntar name tain ḳosom ḳaisoin na, ḳaron tan taki boṛo dusra kunta-u nai, erlagi tain nizor name ḳosom ḳoria ḳoisla,
HEB 6:14 Ami nisoy tumare borkot nazil ḳormu, tumar aolad bout forimane baṛai dimu.
HEB 6:15 Ibrahime oula bout lamba shomoy sobor ḳoria Allar oadar fol faila.
HEB 6:16 Manshe zebla kunu ḳosom ḳae, he tar saite dami keuror name ḳosom ḳae, teu buza zae tar ḳosom hasa, ar ou ḳosmor lagi hoḳolta miṭ-maṭ oizae.
HEB 6:17 Oula Allae-o zerar loge oada ḳorsoin, tan oadar nichchoyotar lagia tain-o ḳosom ḳaisoin, zate tan oada rod-bodol oar shondoy na taḳe.
HEB 6:18 Ar Allae kunu misa mata to bout duror ḳota. Te tain zebla oadar loge ḳosom-o ḳorsoin, oḳon amra aro ḳoto beshi borosha raḳtam fari. Erlagi ao, amra zera tan dorbaro gia asroy faisi, faia ze asha foyda ase, amrar samnor hou ashare mozbut ḳori doria roi.
HEB 6:19 Ou asha amrar zanor longoror laḳan, ḳaim ar mozbut. Iṭae Allar behesti ebadot ḳanar forda faroia Herem Shorifor bitre amrare nia fosae.
HEB 6:20 Ar amrar fokko oia Isa gia amrar age hi zagat fosi gesoin. Tain to Malki-Siddikor silsilar reoaz mafik hor-hameshakur lagi fordan imam oisoin, te ou befare oḳon ḳoiram.
HEB 7:1 I Malki-Siddik oila Allatalar imam, Shalemor bashsha. Ibrahime bashsha oḳolre zuddot araia hari firia aoar bala ou Malki-Siddikor loge tan mulaḳat oile, Malki-Siddike Ibrahimre dua ḳorsla.
HEB 7:2 Ibrahime tan hokkoltar dosh baṭor eḳ baṭ enre dilaila. Malki-Siddik namor mani oilo, forezgaror bashsha. Tain Shalem ṭaunor-o bashsha, mani shantir bashsha.
HEB 7:3 Malki-Siddikor ma nai, baf-o nai, tan kunu ḳandan-nama-o nai, tan hayatir shuru ba shesh nai. Te buza zae, tain Allar ḳas mayar futor laḳan, hor-hameshakur imam.
HEB 7:4 Te sinta ḳori deḳoukka, ein ḳoto mohan, zenre amrar ḳandanor mul baba Ibrahime-o tan gonimotor malor dosh baṭor eḳ baṭ dan ḳori disoin.
HEB 7:5 Ar Lebi gusṭir maze zera imamoti kam ḳoroin, tara shoriotor hukum mafik tarar baiain, mani Boni Israilor ges taki dosh baṭor eḳ baṭ adae ḳorar eḳtiar faisoin. Ou Boni Israil-o to Ibrahimor ḳandanor maze zonmisoin.
HEB 7:6 Oile hou ze Malki-Siddik Ibrahimor ḳandanor na oile-o, Ibrahimor ges taki dosh baṭor eḳ baṭ nisla, ar Ibrahimre dua-o disla, zen loge Allae nize oada ḳorsoin.
HEB 7:7 Huru oḳole boṛo oḳlor ges taki dua faia taḳoin, ermaze to shondoy nai.
HEB 7:8 Eḳbaedi ze imamor mout oy, ou Lebi gusṭir imam oḳole dosh baṭor eḳ baṭ adae ḳoroin, ar aroḳbae Malki-Siddik, kitabe ḳoy tain hor-hamesha zinda asoin, tain-o dosh baṭor eḳ baṭ adae ḳorsoin.
HEB 7:9 Hirbar ikan-o ḳoa zae, Lebi gusṭir ze imame dosh baṭor eḳ baṭ adae ḳorsoin, tain-o Ibrahimor mazdi Malki-Siddikre dosh baṭor eḳ baṭ disoin,
HEB 7:10 ḳaron Malki-Siddike zebla Ibrahimor loge mulaḳat ḳorla, Lebi to ou shomoy Ibrahimor naṛor bitre asla.
HEB 7:11 Lebi gusṭir imam sab oḳlor ḳam-ḳazor ufre nirbor ḳoria Allae Boni Israilre shoriot disla, i imamor mazdi zudi kamil oa zaito, te Lebi gusṭir foyla imam Harunor bodla Malki-Siddikor nomunar aroḳ imam aoar kunu goroz asil ni?
HEB 7:12 Imamor silsila bodlail oile to shoriotre-o bodlani lage.
HEB 7:13 I hoḳol boyan zan niote ḳorram, ein to Lebi gusṭir nae, arok gusṭir, hi gusṭir ḳeu kurbani kanar ḳadim asla na.
HEB 7:14 Amrar munib to Ehuda gusṭir maze foyda oisoin, i gusṭir ḳeu imam oiba ḳoria Musae kunta ḳoisoin na.
HEB 7:15 Malki-Siddikor nomunae zebla aroḳzon imame toshrif anoin, i shomoy to amrar boyan aro saf oigese.
HEB 7:16 Isa to roḳto-mangshor kunu niome imam oisoin na, ḳali tan hor-hameshakur kudroti zindegir bole-u oisoin.
HEB 7:17 Tan befare Pak Kalame ḳoy, Malki-Siddikor silsilae, tumi-u hor-hameshakur imam.
HEB 7:18 Te deḳoukka, eḳbae agor imamotir hukum-ahkam oḳol ḳomzur ar beḳama oizaoae itare horai deoa oise,
HEB 7:19 Musar shoriote to kuntare-u kamil banaito farse na. Ar aroḳbae oula eḳ mohan noya oada zari kora oise, i oadar zoriae amra Allar aro ḳasat aitam farmu.
HEB 7:20 Ar agor imam oḳlor befare to kunu ḳosom ḳora oise na, oile Isar imamotir befare Allae ḳosom ḳorsoin.
HEB 7:21 Tain ḳosom ḳoria enre boail ḳorsoin, ar ḳoisoin, Mabude ḳosom ḳaia ḳoira, tumi-u hor-hameshakur imam, tumar befare tan munsha bodlaita nae.
HEB 7:22 Te amra buzram zen, Isa Allar loge manshor milonor aro mohan eḳ usillar zamindar oisoin.
HEB 7:23 Ar Lebir gusṭi taki bout manshe imamoti korsoin, mout oizae ḳori era kunu zon-u hamesha imamoti korta farsoin na.
HEB 7:24 Oile Isa to hor-hamesha zinda asoin, erlagi tan imamoti kunudin-o fuṛaito nae.
HEB 7:25 Erlagi-u zera tan usilla loia Allar ḳasat ae, Allae tarare furafur nazat dan ḳoroin, ḳaron tarar fokke sufarish ḳorar lagi tain hamesha zinda asoin.
HEB 7:26 Ashole amrar lagi oula eḳzon fordan imamor zorur-o asil, zein fak-forezgar, be-guna, gunagar oḳol tone alog, ar Allae zenre asman oḳlor ufre tulchoin.
HEB 7:27 Baki hokkol fordan imame foyla tan nizor lagi, bade tan ḳoumor gunar lagi forteḳ din kurbani adae ḳora lagto. Oile ou imamor lagi itar zorur asil na, ḳaron tain tan nizore kurbani dia eḳoi bare i kam adae ḳorilisoin.
HEB 7:28 Shoriote zoto fordan imam oḳolre boail ḳorse era hoḳol-u ḳomzur, oile shoriotor bade Allar ḳosom mafik zenre boail ḳora oise, ein-u ḳas mayar fut, hor-hameshakur imamotir lagi enre kamil banail oise.
HEB 8:1 Amrar boyanor mul befar oilo, amrar oula eḳzon fordan imam asoin, zein behesto arshe-azimo Allar ḍainor toḳto toshrif raḳsoin.
HEB 8:2 Tain hou asol pak zaga, mani behesti ebadot ḳanat ebadoti korra, i ebadot ḳana to kunu manshor ator banail nae, ḳali Mabude nize banaisoin.
HEB 8:3 Foshu kurbani ar lilla-sodga adae ḳora oilo forteḳ fordan imamor dayitto, erlagi ou fordan imamor gese-o kurbanir zinish taḳte oibo.
HEB 8:4 Tain zudi oḳon duniat taḳta te imamoti korta farla na one, ḳaron shoriotor hukum mafik kurbani dibar imam to asoin-u.
HEB 8:5 Hi imam oḳlor ḳam oilo behesti kamor nomuna ba saya, zela Musae hi ebadot ḳana bananir shomoy Allae Musare hushiar ḳori koila, “Dekio, ou faṛor ufre tumare zela noksha deḳailam, ekkere ou laḳan ḳori hoḳolta banaio.”
HEB 8:6 Oile oḳon amra deḳram, Isae imamotir ze dayitto faisoin, iṭa hi imam oḳol taki bout bala, zela Allar loge manshor milonor aro bala eḳ usillar lagi tain zimmadar oisoin. I usilla agor usilla taki bout bala; i usilla to bout bala bala oadar ufre ḳaim oise.
HEB 8:7 Allar loge amrar milonor foyla usilla zudi nikut oito, te dusra usilla ḳaimor kunu zorur asil na.
HEB 8:8 Oile Allae tarar dush deḳaisoin, zela Asmani Kitabe ḳoy, Mabude ḳoira, Huno, ola eḳ oḳt aibo, zebla ami Boni Israil ar Ehuda gusṭir lagi, amar loge milonor eḳ noya usilla ḳaim ḳormu.
HEB 8:9 Ou noya usilla agor hi usillar laḳan nae, Mishor desh taki tarar moy-murobbi oḳolre, azad ḳori anar bala ze usilla ḳorslam. Ḳaron tara amar usillar ufre ṭik roise na, erlagi ami-o tarar log saṛi disi, ikan Mabude ḳoiram.
HEB 8:10 Oile ami Mabude eoḳan-o ḳoiram, i zomanar bade ami Boni Israilor loge, amar noya ou usilla ḳaim ḳormu, amar shoriot tarar dilor maze dimu, tarar ontoror maze ami lekia dimu, ami tarar Alla oimu, tara oiba amar proza.
HEB 8:11 Tara hoḳole-u tarar ari-forire, zarzir bai-biradorre ila talim deoa lagto nae bule, tumra Allare sino. Tara huru-boṛo hokkole emne-u to amare sinba,
HEB 8:12 ḳaron ami tarar hokkol naformani maf ḳormu, tarar gunare ar kunudin-u mono raḳtam nae.
HEB 8:13 Te buza zae, ‘noya usilla’ ḳota ḳoia tain foyla usillare furan banaisoin, ar zeta osol-furan oizae, ita to zoldi kori araizae.
HEB 9:1 Allar loge manshor milonor foyla usillar maze, Allar ebadotir lagi nanan nomunar niom-ḳanun asil, ar duniat ebadot ḳorar lagi ekkan ebadot ḳanar ḳota-o leḳa asil.
HEB 9:2 Hou niom mafik ekkan ebadot-tambu banail oisil, hi ebadot-tambur foyla kuṭat asil serag dani, fobitro ruṭi ar ita raḳar ṭebul. I foyla kuṭar nam asil Pak Zaga.
HEB 9:3 Dusra fordar bitre arok kuṭa asil, hi dusra kuṭar nam asil Ḳas Pak Zaga ba Herem Shorif.
HEB 9:4 I kuṭar maze asil, shunadi banail agor-kushboy zalani ṭebul, shunadi lefa shahadot shonduk, shondukor bitre asil shunar boyamo bora kudroti kani manna, imam Harunor laṭi, ou laṭit kudroti ful fuṭisil. Aro asil Allar loge milonor usilla leḳa hou duio shahadot fattor.
HEB 9:5 Hi shondukor ufre asil Allar zalali shunar dui Karubi, otar ḍaḳnaguin hou shondukor ḍaknir ufre milia deoa asil, ar ono-u gunar kofora adae ḳora oito. Ita hokkoltar kuṭinaṭi boyan ḳora oḳon zorur nae.
HEB 9:6 I hokkolta zuit ḳorar bade imam oḳole imamoti kamor lagi hamesha foyla kuṭar bitre hamaita.
HEB 9:7 Oile dusra kuṭat, mani Herem Shorifo ḳali fordan imam sabe bosoro eḳbar-u hamaita farta, tain-o kurbanir lou bina hino hamaita farta na. Tan nizor guna ar tan ḳoumor na-zana hoḳol gunar mafir lagi, kurbanir lou loia hono hamaita.
HEB 9:8 Te Pak Ruhe deḳaia dira, i duniar foyla ebadot ḳana zotodin ḳaim ase, otodin hi Herem Shorifo hamanir fot kula oito nae.
HEB 9:9 Hi ebadot ḳana oilo i zomanar lagi eḳ nishana, i nishanae amrare batai dey, ou laḳan kurbani ar lilla-sodgae ebadotḳarir bibeḳor kutkuti bab dur ḳorto fare na.
HEB 9:10 Ita to ḳali kaoa-daoa, ozu-gusolor befar, hokkolta-u ḳali zaira shoriot, dilor kunta nae. I shoriot ḳaim asil, aro bala kunu usilla aibar ag forzonto.
HEB 9:11 Oile oḳon zoto bala bala befar aise, al-Mosi to ou noya torikar fordan imam oisoin. Tain aro ijjoti aro beshi kamil ebadot ḳana oia aisoin. I ebadot ḳana kunu manshor ator banail nae, ikan i duniar duniabi kunta nae.
HEB 9:12 Kunu goru ba sagolor lou ato loia tain hino hamaisoin na. Ḳali tan nizor zan kurbanir lou dia eḳbar-u hi Herem Shorifḳano hamaisoin, hamaia amrare hor-hameshakur lagi kalas ḳorsoin.
HEB 9:13 Age zera nafak bonizito, tarar lagi goru ba sagolor lou ar ḍeki-gorur zalail sali siṭaia fak-saf ḳora oito, oile itae to erar shorilor bairgala ḳali fak-saf oito.
HEB 9:14 Te zein hor-hameshakur zinda ruhur mazdia, be-guna kurbani oia tan nizor zanre Allar name shofia dilaisoin, hi al-Mosir loue amrar dilre nafaki kam-ḳaz taki aro ḳoto beshi forimane fak-saf ḳorbo, zate amra zinda Allar ebadot-bondegi kortam fari.
HEB 9:15 Ar foyla usilla salu taḳte manshe zeta guna ḳorsla, ou gunar at taki kalas ḳorar niote, kofora hishabe al-Mosir mout oise. Allae zerare daotdi ania siroḳalin mouroshi shompod dibar oada ḳorsoin, al-Mosi to erar lagi-u noya usillar zimmadar oisoin. Ou mouroshi shompod oḳon manshe faibar shuzug oise,
HEB 9:16 ḳaron duniabi niome mouroshi shompodor kunu osiot-nama ḳamo lagaite oile, foyla ou osiot ḳorrar mout oise ḳori forman dorḳar oy.
HEB 9:17 Manshor moutor bade tar osiot-nama ḳamo lage, osiot ḳorra zinda taḳte ita kunu ḳamo lage na.
HEB 9:18 Ṭik ou laḳan-u, Allar loge milonor foyla usilla-o, moutor lou saṛa ḳamo lagail oise na.
HEB 9:19 Hozrot Musae shoriotor tamam hukum-ahkam Boni Israilre zananir bade, tain bisal ar sagolor lour loge fani mishaila, bade lal rong kora meṛar ruma ar esub gasor ḍeṭadi Allai shoriot kitabor ufre, ar hokkol manshor gotro siṭaia dila.
HEB 9:20 Musae ḳoila, “I lou oilo Allai milonor hou usillar lou, ze usilla mafik solar lagi Allae tumrare hukum disoin.”
HEB 9:21 Ou nomunae tain ebadot ḳana ar ebadoti kamor hokkol mal-samanar ufre-o lou siṭaia dila.
HEB 9:22 Asol ḳota oilo, Musar shoriot mafik beshir bag zinish-u lou dia fak-saf oite oy, kurbanir lou saṛa kunumonte-u gunar mafi faoa zae na.
HEB 9:23 Zeta zinish oḳol ḳali behesti zinishor nishana, otare kurbanir foshur loudi fak-saf ḳora zorur asil, oile zeta zinish asol behesti, itare fak-saf ḳorar lagi to aro mohan kurbanir zorur.
HEB 9:24 Ar al-Mosi to hou nishanar zinishor laḳan, manshor ator banail kunu Herem Shorifo hamaisoin na, tain ḳali asol behesto hamaisoin, zate amrar nazator lagi Allar samne oḳon azir oita faroin.
HEB 9:25 Hoḳol fordan imame kurbanir foshur lou loia zela forteḳ bosor Herem Shorifo hamani lage, al-Mosi to i laḳan bare bare kurbani oar lagi behesto toshrif nisoin na.
HEB 9:26 I laḳan oile to dunia foyda taki oḳon forzonto tain bare bare ḳoshṭo faia kurbani oite oilo one. Oile tain to aḳeri zomanat aia ḳali eḳbar-u zair oisoin, zate nizore kurbani dia tamam gunar kofora oin.
HEB 9:27 Allae to ṭik koria dilaisoin, hokkol manshor ḳali eḳbar moron oibo, ar moron bade bisar.
HEB 9:28 Ṭik ou laḳan, bout manshor gunar buza boibar lagi al-Mosire-o ḳali eḳbar-u kurbani deoa oise. Tain dusrabar toshrif anba, oile gunar kofora bonar lagi aita nae. Ḳali zera ashik oia tan lagi bar sar, tarare furafur nazat ḳorar lagi dusrabar aiba.
HEB 10:1 Shoriot oilogi kali eḳ nishana, itae bobishotor niamotor ḳota batai dey, iṭa to asol kunu befar nae. Erlagi-u zera Allar ebadot ḳorar kiali oy, shoriotor niome tara bosor bosor eḳoi laḳan kurbani dia to kunumonte-u kamil oito fare na.
HEB 10:2 Shoriote zudi tarare furafur kamil banailito, te to foshu kurbani deoa eḳbare-u bond oigelo one. Ebadot ḳorra oḳol zudi eḳbare-u fak-saf bonizito, te era nizore ar gunagar mono ḳorlo na one.
HEB 10:3 Oile ou foshu kurbanie tarare forteḳ bosor iad ḳoraia dey zen, tara ashole gunagar.
HEB 10:4 Muloto, sagol ba bisalor loue manshor gunare kunu laḳan-u saf ḳorto fare na.
HEB 10:5 Erlagi-u al-Mosie duniat toshrif anar ḳalo Allar dorbaro ḳoisoin, Foshu kurbani ba dan-sodga to ashole tumi sao na, oile amare ekkan ḳaya diso bilai dibar lagi.
HEB 10:6 Zalail kurbani ba gunar koforar kurbanie tumi to kushi oiso na.
HEB 10:7 Teu ami koilam, O Alla, deḳoukka, ami to ono aisi; tumar Kalam Shorifo zela ase, amar zonom oibo ou zogoto, tumar munshare ḳaim ḳorar lagi, ar hasau ami aisi.
HEB 10:8 Ufror ayat oḳlor maze al-Mosie foyla ḳoira, “Foshu kurbani ba dan-sodga to ashole tumi sao na, zalail kurbani ba gunar koforar kurbanie tumi to kushi oiso na.” Shoriotor hukum mafik ou kurbani oḳol adae ḳora oile-o, al-Mosie ola ḳoila.
HEB 10:9 Bador ayato tain hirbar ḳoila, “Deḳoukka, ami to ono aisi, tumar munshare ḳaim ḳorar lagi.” Te buza zae, dusra usillare ḳaim ḳorar niote, tain foyla usillare batil ḳorilila.
HEB 10:10 Erlagi Alla Pakor hou munsha mafik Isa al-Mosir ḳayare ḳali eḳbar-u kurbani deoa oisil, ou kurbanir bole Allar dorbaro amrare fak-saf ḳora oise.
HEB 10:11 Forteḳ imam sabe fortidin azir oia Allar ebadoti koroin ar bare bare kurbani adae ḳoroin, ta-o ou laḳan kurbanie kunudin-u gunare doia saf ḳorto fare na.
HEB 10:12 Oile al-Mosie to siroḳalor gunar mafir lagi kali eḳbar-u kurbani oia, arshe-azimo Allar ḍainor toḳto toshrif raḳsoin.
HEB 10:13 Ar hou shomoy taki tain bar saira, zotodin forzonto dushmon oḳolre tan faor tolat falaia surmar ḳora na oy, otodin bar saiba.
HEB 10:14 Ḳaron tan ou eḳbaror kurbanir usillae zerare fak-saf ḳora oise, erare siroḳalor lagi-u tain furafur kamil ḳorsoin.
HEB 10:15 Ou befare Allar Pak Ruhe-o amrar gese shakki dira, tain foyla ḳoisoin,
HEB 10:16 Ami Mabude ḳoiram, i zomanar bade ami Boni Israilor loge, amar noya ou usilla ḳaim ḳormu, amar shoriot tarar dilor maze dimu, tarar ontoror maze ami lekia dimu.
HEB 10:17 Bade hirbar ḳoira, Ami tarar naformani ar gunare ar kunudin-u mono raḳtam nae.
HEB 10:18 Te buzrae ni, Allae zebla guna ar naformanire mafi dilain, erbade to gunar lagi kunuzat kurbanir-u zorur nai.
HEB 10:19 Erlagi-u O bai oḳol, Hozrot Isa al-Mosir lour zoriae, amra behestor Herem Shorifo-u hamanir shaosh faisi.
HEB 10:20 Al-Mosie amrar lagi noya ar zinda eḳ torika kulchoin, tan shoril kurbanir usillae amra zanu ou Herem Shorifor duaror forda faroia, Allar samne azir oitam fari.
HEB 10:21 Te amrar eḳzon fordan imam-o asoin, Allar foribaror tamam manshor zimma to tan ato deoa oise.
HEB 10:22 Erlagi ao, imanor mazdi amra furafur nichchit bonia ḳaṭi dile Allar dorbaro azir oi; ḳaron dushi bibeḳor at taki amrar dilre al-Mosir loue fak-saf banaise, ar forishkar fani dia amrare naoail oise.
HEB 10:23 Mumin hishabe amrar dilo ze borosha ase ḳoia shikar ḳori, ao, ou boroshae furafur mozbut roia tan torikae soli, ḳaron zein oada ḳorsoin ein to shullo-ana hok-halali.
HEB 10:24 Amra eḳe-oinnor lagi kial ḳori, mohobbot ar nek kam ḳorar lagi eḳe-oinnore shaosh-foramish dei.
HEB 10:25 Kunu kunu zonor shobab oilo, tara zomato aia shorik oy na, oile amra zanu ou laḳan na oi. Al-Mosie dusrabar toshrif anar oḳt zoto gonaia aior, amra oto beshi kori eḳe-oinnore shaosh-foramish deoat roi.
HEB 10:26 Alla Pakor hok torika zanar bade-o zudi amra zania-hunia guna ḳorat roi, te i gunar koforar lagi kunuzator kurbani nai.
HEB 10:27 Ase ḳali Hashoror moydano ḳoṭin bisaror lagi ḍorai ḍorai bar saoa, ar Allar dushmon oḳolre zalaia sali korar gozobor ḍor.
HEB 10:28 Kunu zone Musar shoriotor hukum-ahkamor borkelaf ḳorle, ere kunu maya-momota na ḳoria dui ba tinzonor shakki loia zane marilite oy.
HEB 10:29 Te sinta ḳori deḳoukka, ze zone Allar ḳas mayar zon Ibnullare gin ḳore, he aro ḳoto boṛo azabor bagi oise! Ze lour usillae he fak-saf oise, Allai hou usillar loure he elami korse, ar ze Pak Ruhe rohomot boḳshia dein, hou ruhre-o beijjot ḳorse.
HEB 10:30 Ashole amra to tanre sini-u, zein formaisoin, Naformanir shaza deoa amar-u ḳam, amol mafik bodla dimu tamam insan. Aroḳ ayato tain ḳoisoin, Mabude tan bonda oḳlor bisar ḳorba.
HEB 10:31 Buzrae ni, zinda Allar samne azira deoa ḳoto boṛo mosibotor befar!
HEB 10:32 Tumra hou dinor ḳota iad ḳoro, zebla Isar torikar nuror fot faia hari, bout nomunar zulum-mosibotor maze-o mozbut roislae.
HEB 10:33 Kunu kunu shomoy shomazor samne beijjoti, zulum-ṭiṭḳari, ṭaṭṭa-moshkora hunia-o tumra nize ḳoshṭo shoijjo ḳorslae. Ar kunu kunu shomoy oinnor ufre ou laḳan ḳoshṭo aise hunia, tarar loge tumra-o dukito oislae.
HEB 10:34 Tumrar mazor zera zel ḳaṭisla, tarar duke tumra-o duki oislae. Tumrar don-samana luṭ-faṭ ḳora oile-o kushi aslae, ashole buztae farslae, tumrar lagi aro bout bala bala samana zoma ase, ze samana siroḳal roibo.
HEB 10:35 Te oḳon tumrar hi monobol kuaio na, ermaze to bout dami furuskar ase.
HEB 10:36 Tumra mozbut roa dorḳar, zate Allae ze furuskar diba ḳori oada ḳorsoin, tan morzi mafik solia tumra-o hou furuskar fao.
HEB 10:37 Allae to ḳoisoin, Ar tuṛa ḳoyḳan din baki ase, zein toshrif anar ḳota, tain toshrif aniliba, beshi deri korta nae.
HEB 10:38 Amar dindar bondae imanor bole-u aḳer faibo, oile ḳeu ḳoredi fisli gele tar ufre ami kushi roitam nae.
HEB 10:39 Oile amra to ḳoredi fislia binash oar manush nae. Zera iman ania nazat hasil ḳore, amra oilam hou dolor manush.
HEB 11:1 Iman kita? Amra zeta faimu ḳori asha ḳorsi, ita oḳon na faile-o bade faimu-u faimu, ou ekinor nam-u iman. Ou imanor bole-u amra nichchit oia buzi, oḳon zeta amrar souke deḳram na, ita ashole-o ase.
HEB 11:2 Ou imanor bole-u amrar moy-murobbi oḳole Allar ges taki tarif ḳamaisoin.
HEB 11:3 Imane-u amra buzram zen, Allae tan kalamor bole-u asman-zominor hokkolta foyda ḳorsoin, ita amrar sokur deḳa kunu siz taki emne foyda oise na.
HEB 11:4 Imanor bole Habile Allar name Kabilor saite bala kurbani adae ḳorla. Erlagi Allae Habilor befare bataila, ein eḳzon kamil manush. Te bout zomana age Habilor mout oile-o, imanor befare tain oḳono amrar loge matira.
HEB 11:5 Imanor bolor lagi-u Idris nobir mout oilo na, Allae tanre zinda halote behesto tulia nilagi, duniat tanre tukaia millo na. Idrisre behesto tulia neoar age Allae zanaisla, Idris amar kushi mafik solchoin.
HEB 11:6 Oile iman saṛa to ḳeu Allare kushi korto fare na. Zekunu manush Allar daro zaite saile, he ekin ḳora lagbo zen, Alla asoin, ar zera tan tallash ḳore, tain erare furuskar dein.
HEB 11:7 Imanor bole Nuh nobir zomanat zeta goṭona deḳa gesil na, Allar hushiari faia tain ota ekin ḳorla, ekin ḳoria nizor foribarre basanir lagi ekkan zaz banaila. Tan ou imani kamor mazdi zogotor naformanir forman deḳaila, ar Allar dorbaro forezgar hishabe goinno oigela, ḳali imanor bole-u ila oa zae.
HEB 11:8 Imanor bole Ibrahim nobie Allar hukum faia-u nizor biṭa-maṭi saṛia roana dila. Allae tanre ze desh dita ḳori oada ḳorsoin, hi deshḳan kun zagat, ikan na zania-o tain roana oigela.
HEB 11:9 Imanor bole tain Allar oada ḳora hou Kenan deshor bitre-o musafiror laḳan din ḳaṭaila. Tan loge aro zera hi oadar bagi asla, hou Isʼhak ar Iakubor laḳan tain-o tambue tambue roia zindegi kaṭaila.
HEB 11:10 Ashole ze ṭaun hor-hamesha ḳaim roibo, hou behesti ṭaunor lagi tain bar saoat asla, i ṭaunor noksha-nomuna shoho hokkol ḳarigori shoyong Allar ḳam.
HEB 11:11 Imanor bole Ibrahimor niaoladi Bibi Sayrae aolad zonom deoar ḳemota faila, tarar hurutta foydar boyosh faroigele-o Ibrahime ekin ḳorsla, zein i oada ḳorsoin, ein to hok, ein nizor oada furaiba-u furaiba.
HEB 11:12 Erlagi boyoshor bare morar foti ou eḳ Ibrahim taki oto manush zonom loila, zera asmanor tera ar doriar soror balur laḳan, gonia fuṛail zae na.
HEB 11:13 Mozbut imane zindegi kaṭaia era hoḳlor mout oise, era ḳeu hi oadar fol bug korta farsoin na, ḳali duroi taki ita dekia hari kushi oisoin. I duniat tara musafirit aisoin, ikan tarar nizor boshot ḳana nae, ita to tara manchoin.
HEB 11:14 Ar zera ikan manchoin, tara hoḳole-u shundor ḳori buzaisoin zen, tara nizor afon deshor tallash ḳorra.
HEB 11:15 Ze zomin taki tara bar oia aisla, hi zominor ḳota kial ḳorle to tara hirbar hono hamanir shuzug faila one.
HEB 11:16 Oile tara to aro bala eḳ desh, mani behestor tallash ḳorsla. Erlagi-u Alla Pake nizore tarar Alla ḳoia forisoy dite kunu shorom fain na, tain-u tarar lagia aramor eḳ ṭaun tiar ḳorsoin.
HEB 11:17 Ibrahim nobi forikkat foṛia hari imanor bole-u tan fua Isʼhakre kurbani disla. Ze Ibrahimor loge Allae nize oada ḳorsoin, hou zone tan ḳas mayar futre kurbani dilaita saisoin.
HEB 11:18 Ze futor befare Allae bataisla, “Tumar fua Isʼhakor ḳandanre-u tumar ḳandan ḳoia gona oibo.”
HEB 11:19 Ibrahimor dilor ou ekine tain kurbani dite razi oisla zen, Allae to murdare-o zinda ḳorta faroin. Ar hasau moutor tol taki Isʼhakre firot faila.
HEB 11:20 Imanor bole Isʼhake tan fuain Iakub ar Ishʼor bobishot zindegir lagi dua disla.
HEB 11:21 Imanor bole Iakube moutor oḳto Iusufor duio fuare dua dila, tain nizor laṭir ufre bordi Allar ebadoti korla.
HEB 11:22 Imanor bole Iusufe moutor oḳto ḳoisla, tan nizor zati Boni Israil Mishor desh taki bar oia zaiba, tara zaoar ḳalo tan aḍḍi-guḍḍire boia neoar hukum dila.
HEB 11:23 Imanor bole-u Musar ma-bafe Musar zonmor bade tin mash forzonto lukaia toila, tara deḳsla, fuagu kub shundor, bashshar hukume-o tara ḍoraila na.
HEB 11:24 Imanor bole-u Musae, tan buzdar oar bade Feraunor fuṛir goror nati koia forisoy dite razi oila na.
HEB 11:25 Tain gunar maze roia tuṛa ḳoydin shuk kamanir saite, Allar bonda oḳlor loge milia zulum-mosibotor maze roa-u fosond ḳorla.
HEB 11:26 Tain Mishoror hokkol zak-zomoḳor saite, al-Mosir name durnam hasilre-u beshi mulloban mono ḳorla, ḳaron tan nozor asil behesti furuskaror bae.
HEB 11:27 Imanor bole tain Mishor taki baroi gela, bashshar gusare-o ḍoraila na. Niraḳar Allare dekilaisoin, oula mono ḳoria-u tain sobor ḳori roila.
HEB 11:28 Imanor bole-u tain Azadi Id ar lou siṭaia deoar niom manla, zate Azrail firistae Boni Israilor foyla fuaintore na soin.
HEB 11:29 Imanor bole-u manshe Nil doriar mazedi hukna maṭir fotor laḳan aṭia gela, oile Mishori oḳole ila zaoat lagia buṛia morla.
HEB 11:30 Imanor bole-u Boni Israile Ziriho ṭaunor baunḍorir oal shatdin sokkor deoar bade emne-u foṛigelo.
HEB 11:31 Imanor bole-u ou ṭaunor Rahba namor bodmaish beṭie Boni Israilor guia oḳolre memandari korae, hinor naforman oḳlor loge i beṭi binash oila na.
HEB 11:32 Ar ḳoto zonor boyan ḳoitam? Zidaun, Barak, Shimshun, Ifta, Daud, Shamuel ar nobi oḳlor imani bolor boyan ḳorat lagle shomoye kulaito nae.
HEB 11:33 Imanor bole era bout desh doḳol ḳorsoin, hok-insaf ḳaim ḳorsoin, Allai oadar fayda hasil ḳorsoin, shinghor muk bond ḳorsoin,
HEB 11:34 agunir kunḍolir tez ḳomailisoin, toluaror samon taki rehai faisoin, ḳomzur taki-o bol hasil ḳorsoin, jihador maze bol-ḳemota deḳaisoin, bin-deshi oḳlor fouzre ḳedaia disoin.
HEB 11:35 Beṭinte tara zarzir murda oḳolre hirbar zinda halote faila. Aro boute zanor maya saṛia zulum-nirjaton shoijjo ḳoria morla, zate kiamotor bade behesti shuk fain.
HEB 11:36 Boute ṭaṭṭa-moshkora ar mair-doir shoijjo ḳorsoin, boute ḍanḍa-beṛi shoho zel ḳaṭisoin.
HEB 11:37 Manshe tarare fattordi iṭaisoin, ḳoratdi siria dui ṭukra ḳorsoin, toluardi zane marsoin. Tara zulum-mosibot, zala-zontrona faisoin, obabor ṭelae foshur samṛa findia shorom lukaisoin.
HEB 11:38 I dunia tarar zuka asil na, tara faṛ-zongol, morubumi, ar gat-gaṛar maze roia duniar zindegi kaṭaisoin.
HEB 11:39 Imanor bolor lagi era hokkole tarif ḳamaisoin, ta-o Allar oadar fol i duniat faisoin na.
HEB 11:40 Ḳaron Allae amrar lagi hou zomana taki aro bala furuskar toisoin, zate amrare bad dia tara kamil na bonoin.
HEB 12:1 Te amra deḳram, imani tezor bout shakki amrar sairobae ase. Erlagi ao, amra-o hoḳol zay-zamela horai, ze gunae amrare fesaia raḳe, otare horaia falai, ar douṛaora dolor loge oia doijjo dori hesh forzonto douṛai.
HEB 12:2 Aukka, amrar nozor raki Malik Isar bae, aual taki aḳer forzonto tain oila amrar imanor mul kuṭi. Tan lagi ze kushi raḳa oise, ou kushir baedi saia, duk-koshṭor solibor ufror moutre-o kobul ḳorla, i beijjotire kunu dam dila na. Ar oḳon arshe-azimo Allar ḍainor toḳto tain toshrif raḳsoin.
HEB 12:3 Te zein gunagar manshor oto boṛo dushmonire shoijjo ḳorla, tan befare sinta ḳoro, zate tumrar dilo kunu ḳomzuri ba nirasha na ae.
HEB 12:4 Gunar loge laṛait lagia to lou baronir dosha tumrar oḳono oise na.
HEB 12:5 Tumrar gaibi baf Allae, tan aolad hishabe tumrare ze nosiot ḳorsoin, tumra to ita fauriliso ni? Kitabo ase, O amar fut, Mabudor shashonre elami korio na, tain kunu damki dile, bezar oio na.
HEB 12:6 Ḳaron Mabude zerare mohobbot ḳoroin, tarare-u shashon ḳoroin, zerare tain aolad hishabe kobul ḳorilain, era forteḳ zonre shaza dein.
HEB 12:7 Shashon mono ḳoria tumra ḳoshṭo shikar ḳoro. Bafe-fute zelaḳan shomporko, Allae-o tumrar loge oula shomporko raḳsoin. Ila kunu fut ase ni, zare tar bafe shashon ḳoroin na?
HEB 12:8 Hokkol futre-u shashon ḳora oy. Tumrare zudi shashon ḳora na oy, te to tumra funga, asol fut nae.
HEB 12:9 Zano to, amrar duniabi baf oḳole amrare shashon ḳoroin, ar amra tarare ijjot ḳori. Te zein amrar asmani baf, tan gese gordona nuaia sola amrar lagi zorur nae ni, zate amra zindegi fai?
HEB 12:10 Amrar duniabi baf oḳole zela bala mono ḳorta, ola amrare shashon ḳorta, ar ita to tuṛa ḳoydinor lagi, oile Allae to amrare shashon ḳorra zate amra-o tan fak-fobitrota hasil ḳori.
HEB 12:11 Kunu shashonre-u kushir befar mono ḳora oy na, dukor befar-u mono oy, oile zera shashon mania sole, tara bade dindarir shantiala zindegi fae.
HEB 12:12 Erlagi tumrar ḳomzur atre mozbut ḳoro, durbol aṭure shobol ḳoro.
HEB 12:13 Tumra shida fote aṭo, zate lengṛa fao ar na ḳosḳe, borong bala oizae.
HEB 12:14 Hoḳol manshor loge shantie boshot ḳora ar pak-pakiza oia solar lagi kiali o, ila na solle ḳeu malikor doroshon faitae nae.
HEB 12:15 Hushiar roio, zate ḳeu Allar rohomot taki bad na foṛo. Kial rakio, tumrar mazor ḳeu zanu bishakto titta gasor zoṛor laḳan bar oia na satae, ar bout manshore nafak na banae.
HEB 12:16 Hozrot Iakubor bai Ishʼor laḳan kunu be-foti naforman foyda na oy. Ishe to ḳali eḳ oḳtor ḳanir lagi, tar nizor mouroshi malikana besilaise.
HEB 12:17 Tumrar to zana-u ase, zudio bade he sokur fani falaia ḳandi kandi dua mangisil, oile touba ḳorar shuzug ar he faise na.
HEB 12:18 Tumra nichchoy ila kunu faṛor ḳandat aiso na, ze faṛo atdi soa zae. Hou Tur faṛor zalail aguin, goin andair, hil-tufan,
HEB 12:19 shingar aoaz, ba zure zure mat-ḳotar kunu aoazor gese-o aiso na. Zure zure mator ou aoaz zera hunchil, tara minot ḳori koisil, zate tarar loge ar batchit ḳora na oy.
HEB 12:20 Tara Allar ou hukum shoito farsil na, Allae ḳoisla, “Zudi kunu foshue-o i faṛo soy, te tare-o fattor maria marilite oibo.”
HEB 12:21 Ou shomoy zera Mabudor didar deḳsil, tara oto ḍor ḍoraisil zen, shoyong Musa nobie ḳoila, “Ḍoror suṭe ami kafiram.”
HEB 12:22 Oile tumra to fobitro Sion faṛ ar zinda Allar ṭaunor ḳasat aiso, azar azar firistae zeḳano kushi-bashir mahfil ḳorra, hono aiso. I ṭaun oilogi, behesti Zeruzalem.
HEB 12:23 Behesti katat zerar nam leḳa oigese, boṛo fuar laḳan zerare ijjot deoa oise, erar banail zomator daro aiso. Zein tamam manshor bisar ḳoroin, hou Allar ḳasat aiso. Ze forezgar oḳol furafur kamil oigesoin, erar ruhur mozliso aiso.
HEB 12:24 Ze Isa Allar loge milonor noya usillar zimmadar, hou Isar gese aiso. Habilor lou taki aro mortuba-ala ze lou, tumra siṭail hou lour ḳasat aiso.
HEB 12:25 Musa nobie Allai hushiarir ḳota duniar manshore zananir bade zera tan hushiarire elami korsil, era zebla rehai faisoin na, te zein behesto takia amrare hushiar ḳorra, tan hushiarire elami korle to ekkebare nichchit-u amra kunu rehai faitam nae. Erlagi kial rakio, zein hou batchit ḳorsoin, tan hukumre elami korio na.
HEB 12:26 Hi amolo Alla Pakor mukor aoaze hara duniare ḳafaisil, oile oḳon tain ou oada ḳorsoin, “Ami dusrabar ḳali i duniare nae, asmanre-o ḳafaimu.”
HEB 12:27 Te “dusrabar” ou shobdo taki buza zae zen, zeta zinish oḳol laṛa-saṛa ḳorail zae, mani zeta foyda ḳora oise, itare bad deoa oizibo, ar zetare laṛa-saṛa ḳora zae na, ota ḳaim roy.
HEB 12:28 Buzra ni, ze bashshaire laṛa-saṛa ḳora zae na, amra to hou bashshai fairam, erlagi aukka, amra Allar dorbaro shukria zanai. Alla Pak ze nomunae kushi oin, ou nomunae amra tan ebadot ḳortam farmu, tanre ḍoraia, tazim ḳoria ebadot ḳormu.
HEB 12:29 Ḳaron amrar Alla to binash ḳorra agunir laḳan.
HEB 13:1 Tumra eḳe-oinnore afon bair laḳan hamesha maya ḳorio.
HEB 13:2 Memandari kora faurio na. Zano ni, kunu kunu zone na sinia Allar firistar-o memandari korsoin.
HEB 13:3 Zel ḳanat zeta manush bondi asoin, nizore-o ola bondi mono ḳoria tarare shaijjo ḳorio, ar zerar ufre zulum-mosibot ḳora or, nize ou mosiboto foṛso mono ḳoria, tarare kial ḳorio.
HEB 13:4 Hoḳole-u bia-shadire ijjot ḳorio. Zamai-bour shomporkore fak-fobitro rakio. Mono rakio, Allae ku-nozori, zinakur ar luchcha oḳlor bisar ḳorba.
HEB 13:5 Duniabi don-samanar lalos taki horia roio. Tumrar zeta ase, ota loia-u kushi roio. Allae bataisoin, Ami kunumonte-u tumare saṛtam nae, kunu halote-u tumare falaitam nae.
HEB 13:6 Erlagi-u amra himmot ḳoria ḳoitam fariar, Mabud amar shohae asoin, ami ḍoraitam nae. Manshe amar kita ḳorto?
HEB 13:7 Huno, ze buzurg oḳole tumrare Allar kalam talim disoin, tarar ḳota iad ḳorio. Tarar zindegir halotor ḳota balamonte sinta ḳoria, tumra-o tarar laḳan imane mozbut o.
HEB 13:8 Isa al-Mosi gotoḳail zela asla, aiz-o ola asoin, ar hor-hamesha-u ola roiba.
HEB 13:9 Nanan nomunar noya noya talime zanu tumrare be-fote na ney, ḳana-finar kuṭinaṭi bishoy na tukaia, borong Allar rohomotor ufre ḳaim ro. Ila kuṭinaṭi niomor ufre zera borosha ḳorto, itae to tarar kunu lab oise na.
HEB 13:10 Amrar to ekkan kurbani kana ase, ikanor kunta ḳaibar eḳtiar Musa nobir ebadot-tambur imam oḳlor nai.
HEB 13:11 Gunar mafir lagi zobo ḳora foshur lou loia, Boni Israilor fordan imam oḳol ebadot ḳanar Herem Shorifo hamain, oile ou foshur aḍḍi-mangsho hoḳolta Boni Israilor kempor bare nia zalail oy.
HEB 13:12 Ou laḳan Hozrot Isa-o Zeruzalem ṭaunor bare gia zulum-ḳoshṭo shoijjo ḳoria mout kobul ḳorla, zate tan nizor lour usillae manshore guna taki fak-saf ḳorta faroin.
HEB 13:13 Oḳon aukka, amra-o tan bodnamre nizor ḳando loia kempor bare tan ḳandat zaigi.
HEB 13:14 Ḳaron i duniat amrar lagi stayi kunu ṭaun nai, amra ḳali hou ṭaunor tallash ḳorram, ze ṭaunor didar bade faimu.
HEB 13:15 Te oḳon amra al-Mosir zoriae hamesha Allar dorbaro zikir-azkar kurbani kori, mani duio ṭuṭe tan namor gunogan gai.
HEB 13:16 Nek kam ḳora ar obabi manshore dan-ḳoyrat bilani faurio na, ḳaron ou laḳan kurbanie Alla Pak kushi oin.
HEB 13:17 Tumrar murobbi oḳlor hukum mania tarar gese mata nuaia roio, Allar dorbaro hishab deoa lagbo ḳori tara hamesha tumrar zanor faradar oia ḳam ḳorra. Oḳon tara zate kushi mone ita ḳoroin, erlagi tumra baiddo roio. Tara zudi mono duk faia tumrar lagi kam ḳoroin, te tumrar balai oito nae.
HEB 13:18 Amrar lagi dua ḳorio. Amra to zani, amrar bibeḳ saf-sofa ase, hokkol befare hok fote soltam sai.
HEB 13:19 Ami kas ḳori tumrar gese ou dua sairam, zate zoldi kori ami hirbar tumrar loge mulaḳat ḳortam fari.
HEB 13:20 Allar loge amrar milon, hor-hameshakur usilla, furafur ḳaim ḳorar lagia, amrar malik Hozrot Isa, nizor lou bilai dia, meṛa falor mohan raḳal bonisoin. Hozrot Isar moutor bade, shanti deura Alla Pake, murda taki tanre zinda ḳorisoin.
HEB 13:21 Hoḳol nek kamor tofik deukka, tan morzi zugaia solar, ar tain zeta fosond ḳoroin, dilo otar eshki deukka, Isa al-Mosir zoriae, en mohima hor-hamesha rouk, Amin.
HEB 13:22 Bai oḳol, tumrar gese minot ḳorram, tumra biroḳto na oia i nosiot huno, ami kub shoṭḳaṭe leḳlam.
HEB 13:23 Huno, amrar bai Timotie ḳalas faisoin, tain zudi shomoy moto amar ono ain, te ami tumrar gese aoar shomoy tane loge loia aimu.
HEB 13:24 Tumra nizor murobbi oḳolre, ar pak bonda oḳolre amar salam zanaio. Itali deshor manshe tumrare salam zanaira.
HEB 13:25 Tumra hoḳlor ufre Allar rohomot ḳaim rouk. Amin.
JAM 1:1 Ami Iakub, Alla ar Hozrot Isa al-Mosir gulam, duniar nanan desho sitrail Boni Israilor baro gusṭir manshore salam zanairam.
JAM 1:2 O amar bai oḳol, tumra zebla nanan zator forikkar maze foṛo, i shomoy ita kub kushir befar mono ḳorio.
JAM 1:3 Zano to, imanor forikkae tumrare tir taḳar ḳemota baṛai dey.
JAM 1:4 Ar i tir taḳar ḳemotare ḳamo lagao, zate tumra kamil ar ḳaṭi oia tumrar kunu ḳomti na roy.
JAM 1:5 Tumrar maze ḳeuror zudi aḳolor ḳomti taḳe, te he zanu Allar gese sae, teu faibo. Tain kunu bezari bab na ania hokkolre-u behishab dan ḳoroin, ḳali ate firain na.
JAM 1:6 Oile he mono kunu shondoy na rakia ekin ḳoria saite oibo. Ze shondoy ḳore he to doriar ḍeur laḳan, tare aula-zaula batashe uṛaia loia zae.
JAM 1:7 Ilaḳan manshe zanu Mabudor ges tone kunta faoar asha na ḳore,
JAM 1:8 he to du-dila manush, tar hoḳol ḳamo-u oshanti.
JAM 1:9 Ze imandar bai gorib, tare boṛo banaisoin ḳoria he nizore mubarok mono ḳorouk.
JAM 1:10 Ar ze doni, tare huru banaisoin ḳoria he-o nizore mubarok mono ḳorouk, ḳaron he gash fulor laḳan zoria foṛizibo.
JAM 1:11 Shuruz zebla uṭe, i shomoy tar teze gash hukai zae, ful zoria foṛizae, ar tar shundor nosṭo oizae. Doni manush-o olaḳan tar bestotar maze zoria foṛizibo.
JAM 1:12 Mubarok hou zon, ze zon forikkar shomoy mozbut roy. Forikkat kamiab oile joyor mala hishabe he aḳer faibo. Ou mala tan ashik oḳolre diba ḳori shoyong Alla Pake oada ḳorsoin.
JAM 1:13 Kunu manshe gunar bae eshki oia zanu na ḳoy, Allae amare gunar fote ṭanira. Kunu naformanir fote-u Allare ṭana zae na, tain-o ḳeurore i fote nein na.
JAM 1:14 Oile manshor nizor dile-u ṭania nia tare fando falae.
JAM 1:15 Bade dilor bod niot fura oile gunar bis feṭo loy, ar guna boṛo oia moutor zonom dey.
JAM 1:16 O amar mayar bai oḳol, tumra ou laḳan bul ḳorio na.
JAM 1:17 Hokkol bala ar nikut dan to behest tone lamia ae, zein asmani nur oḳol foyda ḳorsoin, hou Allar ges tone ae. Ou nur oḳol sebar laḳan ḍulaḍuli korle-o, tain ila ḳoroin na.
JAM 1:18 Tain nizor kushie amrare hok kalam dia tan bonda banaisoin, amra zanu ashraful moḳlukat, shrisṭir shera manush oi.
JAM 1:19 O amar mayar bai oḳol, mono rakio, tumra age huno bade mato, zoldi gusa ḳorio na.
JAM 1:20 Manshe gusa ḳorle Allar dorbaro kunu bala ḳam ḳorto fare na.
JAM 1:21 Gotike tumra hoḳol zator haram ar naformani kam bad dilao. Tumrar dilor maze ze kalam rua oise, norom dile ou kalam kobul ḳoro. Tumrare toranir ḳemota i kalamor ase.
JAM 1:22 Allar kalam ḳali hunle-u oito nae, olaḳan amol-o ḳoro. Kalam hunia zudi amol na ḳoro, te tumra nizore ṭogirae.
JAM 1:23 Ḳeu zudi i kalam hunia amol na ḳore, te he ou manshor laḳan, ze aynat nizor sera dekia zaegi,
JAM 1:24 bade horia gia faurilae tar sera kilaḳan.
JAM 1:25 Oile ze ḳaṭi ain manshore azad ḳore, ar ou ainor bae nozor rakia zera hamesha ziail roy, ita hunia hari faure na, amol ḳore, tara hoḳol ḳamo mubarok oibo.
JAM 1:26 Ze manshe nizore forezgar mono ḳore, oile nizor zifrare shamlae na, he to tar nizore ṭoge, tar hokkol ebadoti-u misa.
JAM 1:27 Etim oḳolre ar ṛaṛi beṭintore bifodor shomoy shae-shaijjo ḳora, erloge duniar hoḳol naformani taki nizore fak-saf raḳa-u oilo, Allar nozoro ḳaṭi ar sohi ebadoti.
JAM 2:1 O amar bai oḳol, tumra zebla amrar kudroti malik Hozrot Isa al-Mosir ufre iman ancho, te hoḳolre eḳ nozore dekio.
JAM 2:2 Doro, eḳzon manush tumrar mozlis ḳanat shundor ḳafoṛ-sufoṛ findia ato shunar angṭi lagaia ailo, ar moyla ḳafoṛ findia eḳzon gorib manush-o ailo.
JAM 2:3 Tumra zudi shundor ḳafoṛ-ala manshor mukedi saia ḳo, “Afne ou bala zagaḳano boukka,” ar gorib beṭare ḳo, “Oba, tui hono uba, arnae amar faor ḳandat bo,”
JAM 2:4 te tumra nizor maze har-for ḳorrae na ni, ar shoytani niote bisar ḳorrae na ni?
JAM 2:5 O amar mayar bai oḳol, huno. I duniar gorib manshore Allae fosond ḳorsoin na ni imane doni bananir lagi? Allar ashik manshore Allae ze bashshai deoar oada ḳorsla, i bashshair malik oar lagi tain gorib oḳolre fosond ḳorsoin na ni?
JAM 2:6 Oile tumra to i gorib oḳolre elami korso. Doni oḳole kita tumrare zulum ḳore na ni? Tara-u to tumrare ṭania-sesṛaia bisaro loia zae.
JAM 2:7 Ze mohan namor ḳatire tumrare ḍaḳa oy, tara kita i namre loia kufuri korer na ni?
JAM 2:8 Pak Kitabo leḳa ase, “Tumar ari-forire nizor laḳan maya ḳorio,” tumra zudi hasau Allar bashshair ou hukum amol ḳoro, te to bala-u ḳorrae.
JAM 2:9 Oile tumra zudi hoḳolre eḳ nozore na deḳo, te to guna ḳorrae, ar shoriotor borkelaf ḳoria dushi oirae.
JAM 2:10 Ḳeu zudi shoriotor hokkol hukum amol ḳoria-o ḳali eḳ hukum bange, te dora oibo he asta shoriot-u omainno ḳorse.
JAM 2:11 Ḳaron zein ḳoisoin, “Zina ḳorio na,” tain-u hirbar ḳoisoin, “Kun ḳorio na.” Te tumi zudi zina na ḳoria kun ḳoro, tebou to shoriotor borkelaf ḳorso.
JAM 2:12 Ze aine manshore azad ḳore, ou ain dia-u tumrar bisar oibo. Gotike buzi-huni mat mato ar ḳam ḳoro.
JAM 2:13 Mono rakio, ze manshe doya ḳorse na, bisaror shomoy tare-o doya ḳora oito nae. Hashoror moydano doyagir oḳole-u doya faibo.
JAM 2:14 O amar bai oḳol, ḳeu zudi koy amar iman ase, oile amol na ḳore, te fayda kita oibo? I imane tare basaito farbo ni?
JAM 2:15 Mono ḳoro, tumrar kunu bai ba boinor goro ḳani nai, findar ḳafoṛ-o nai.
JAM 2:16 I halote zudi tare ḳo, “Tumar balai ouk, ḳaia-findia shuke ro,” oile tar nidan horanir lagi kunu ufae na ḳoro, te tar kunu fayda oilo ni?
JAM 2:17 Olaḳan ze imanor loge amol nai, i iman to murda.
JAM 2:18 Mono ḳoro ḳeu ḳoilo, “Tumar iman ase ar amar amol ase.” Ṭik ase, tumar amol saṛa iman amare deḳao, ar ami tumare amar amolor maz dia iman deḳaimu.
JAM 2:19 Tumi ekin ḳorso Alla eḳ, kub bala ḳota. Bute-o to ola ekin ḳore, ar Allar ḍore ḳafe.
JAM 2:20 O be-aḳol, tumare ami kila buzaitam, amol saṛa iman to kunu ḳamor nae?
JAM 2:21 Amrar baf Ibrahime zebla tan fua Isʼhakre kurbani deoar lagi kurbanir zagat nisla, i shomoy kita tan i kamor lagi tanre forezgar hishabe kobul ḳora oise na ni?
JAM 2:22 Tumi to deḳso, tan iman ar amol eḳloge ḳam ḳorsil, ar amolor lagi-u iman kamiab oilo.
JAM 2:23 Olaḳan Pak Kitabor ayat fura oilo, “Ibrahime Allar oadae iman anae, Allae tanre dindar ḳoia kobul ḳorla.” Tan ufadi dila Allar dust.
JAM 2:24 Tumra to deḳlae, amolor lagi manshore forezgar hishabe kobul ḳora oy, ḳali imanor lagi nae.
JAM 2:25 Ou laḳan hou silan beṭi Rahbare-o tair amolor lagi forezgar hishabe kobul ḳora oisil na ni? Tai to hou duio guiare lukaia rakia, dusra fotedi sohi-salamote bar ḳori disil.
JAM 2:26 Ou halote amra buztam fari, ruhu saṛa ḳaya murda, amol saṛa iman-o murda.
JAM 3:1 O amar bai oḳol, tumra hoḳol ustad oio na. Tumra to zano, amra ustad gotike amrar bisar aro ḳoṭin oibo.
JAM 3:2 Amra hoḳol-u nanan nomunae be-foti oi. Ḳeu zudi zoban dia kunu guna na ḳore, te he kamil manush, tar asta shoril-u shamlaito farbo.
JAM 3:3 Guṛare shamlanir lagi muko lagam lagaia amra zebae ichcha obae nitam fari.
JAM 3:4 Ar ḳaṛalie-o huru ek kaṛal doria boṛo boṛo zazre tufani batash ṭelia, zebae kushi obae nito fare.
JAM 3:5 Oula zifra kub huru oile-o bout boṛo boṛo mat mate. Ar shamainno aguine kila boṛo zongol zalaito fare!
JAM 3:6 Zifra-o ola eḳ aguin. Amrar shorilor maze zifra eḳṭa ḳarafir banḍar, Zahannamor aguine zifrare zalae ar zifrae asta shorilre zalaia ḳolonki banaia, amrar zindegit aguin dorae.
JAM 3:7 Manshe zudio hokkol zator foshu-faki, haf-bichchu ar doriar boṛo boṛo masre shamlaise ar oḳono shamlae,
JAM 3:8 oile-o huru-muru zifrare ḳeu shamlaito fare na. Ikan kub sonchol ar ḳaraf, bezuita bishe bora.
JAM 3:9 Eḳ zifra dia-u amrar gaibi baf Allar tarif ḳori, hirbar ou zifra dia-u Allar surote foyda ḳora manshore boddua dei.
JAM 3:10 Eḳ muk taki-u tarif ar boddua bar oia ae. Bai oḳol, ita to ṭik nae.
JAM 3:11 Zornar muk taki eḳloge miṭa ar titta fani bar oia ae ni?
JAM 3:12 Bai oḳol, am gaso kita jam dore ni? Ar angur gaso am dore ni? Oula titta fanir maze miṭa fani mile na.
JAM 3:13 Tumrar maze aḳol-hekmot ala ḳeu ase ni? Taḳle he bala amol-ḳaislote norom oia ota deḳauk.
JAM 3:14 Oile tumrar dil zudi ingshae titta oia shartoe bora taḳe, te tumra boṛai koria hasare misa banaio na.
JAM 3:15 Ilaḳan hekmot behest tone ae na, ita dunia, ḳaraf nofs, ar Iblis taki-u ae.
JAM 3:16 Ḳaron ze zagat ingsha ar shartofori taḳe, i zagat fitna-fosad ar hoḳol zator naformani taḳe.
JAM 3:17 Oile behest taki ze hekmot ae, ikṭa oilo ḳaṭi. Ikṭa shantie bora, soborala ar norom mizazi, doya ar hok kame bora, tar maze kunu har-for ba bonḍami nai.
JAM 3:18 Zara shomazo shantir bis siṭae, tarar fol oilo forezgar zindegi.
JAM 4:1 Tumrar maze kuai tone mair-dorbar ar ḳaijja foyda oy? Tumrar shukor ḳaishe shorilor ze rifue laṛai kore, ogu taki-u ae.
JAM 4:2 Zeta tumrar nae, ota tumra mone mone sao, erlagi tumra kun ḳoro. Ar lalos ḳoro oile fao na, erdae tumra mair-dorbar ar ḳaijja ḳoro. Tumra to sao na, erdae fao na.
JAM 4:3 Ar saile-o fao na, ḳaron tumra to bod niote sao, zela tumrar monor ḳaish fura oy.
JAM 4:4 O beiman oḳol, tumra kita zano na ni, duniar loge dustir mani Allar loge dushmoni? Ze duniar mayae buṛi zae, he Allar dushmon oizae.
JAM 4:5 “Amrar bitre ze ruhu deoa oise, ikṭae amrare ingshar bae ṭane.” Pak Kitabor ou talim kunu emne batail oise ni?
JAM 4:6 Oile ita taki amrar ufre Allar rohomot aro beshi. Erlagi kitabor maze leḳa ase, “Boṛai korrar ufre Allae at tuloin, oile norom manshore rohom ḳoroin.”
JAM 4:7 Gotike tumra Allar zimmae roia Shoytanor mukabila ḳoro, teu he tumrar ges tone bagibo.
JAM 4:8 Allar bae sao, teu tain-o tumrar bae saiba. O gunagar oḳol, tumra nizore fak-saf ḳoro, O du-dila manush, tumrar dil ḳaṭi koro.
JAM 4:9 Duke ḳator oia ahazari koro, ashir bodla ḳando, kushir bodla mattom ḳoro.
JAM 4:10 Mabudor dorbaro noto o, teu tain tumrare usa ḳorba.
JAM 4:11 O bai oḳol, tumra eḳzone aroḳzonor gibot gaio na. Ḳeu zudi bair bodnam gae ba tar bisar ḳore, er mani he shoriotor bodnam ḳorlo ar shoriotor bisar ḳorlo. Tumi zudi shoriotor bisar ḳoro, te to shoriot manrae na, ulṭa tar bisar ḳorat ḳaṛa oiso.
JAM 4:12 Shoriot ar bisaror ḳemota ḳali eḳzonor ato-u ase. Tain-u basain, tain-u maroin. Te ari-forir bisar ḳorra tumi aroḳzon ḳe?
JAM 4:13 Huno, tumra zara ḳo, aiz ba ḳail amra omuk ṭauno zaimugi, gia hono eḳ boros roia ḳay-ḳarbar ḳoria lab ḳormu.
JAM 4:14 Oile ḳailkur ḳobor to tumra zano na. Tumrar zindegi-u ba kita? Tumrar zindegi to ḳosu fatar fani, tuṛa shomoy taḳe, bade foṛizae.
JAM 4:15 Erdae ila na ḳoia ola ḳo, “Inshalla, amra hayati faimu, ar ota-hota ḳormu.”
JAM 4:16 Oile tumra to boṛai koria fuṭani deḳairae. Ilaḳan fuṭani bala nae.
JAM 4:17 Ḳeu zudi zania-o bala ḳam na ḳore, te he gunar bagi oibo.
JAM 5:1 O doni oḳol, huno, tumrar ufre ze mosibot ar, itar lagi tumra ḳando ar ahazari koro.
JAM 5:2 Tumrar don-shompod binash oigese, tumrar ḳafoṛ-sufoṛ undure ḳaṭilise.
JAM 5:3 Tumrar shuna-rufat zongare dorilise, i zongare tumrar bifokke shakki dibo, ar agunir laḳan tumrar gust ḳaibo. Ita to kiamotor lagi tumra dola ḳori toiso.
JAM 5:4 Huno, tumrar dan daora ḳamlar ze beton aṭḳaiso, ou betone oḳon sillaia ahazari korer. I kamlaintor ahazari Alla Rabbul Alaminor ḳano gia azise.
JAM 5:5 Duniar bukut bilashita ar rong-tamshar maze tumra din ḳaṭaiso, duzoḳor kuraḳ bonar lagi nizore kub fulfula banaiso.
JAM 5:6 Tumra ni-oforadire dushi shaibosto ḳoria kun ḳorso, oile era kunu protibad ḳorse na.
JAM 5:7 Gotike O amar mayar bai oḳol, amrar malike toshrif anar ag forzonto tumra ḳoshṭo ḳoria tuṛa sobor ḳoro. Tumra to deḳso, giroste bala foshol faoar lagi megor ashae kila sobor ḳori boi roy.
JAM 5:8 Tumra-o ola sobor ḳoro, ostir oio na, ḳaron malike kub zoldi-u toshrif anra.
JAM 5:9 O bai oḳol, tumra zate Allar nozoro dushi na bono, erlagi tumra ḳali eḳzone aroḳzonor kut tukanit roio na. Huno, bisar ḳorar lagi to Alla Pak amrar samne aia ubai roisoin.
JAM 5:10 O mayar bai oḳol, ze nobi-rosul oḳole Mabudor name toblig korsla, tarar ḳoshṭo ar soboror ḳota sinta ḳori deḳo.
JAM 5:11 Tara to ḳoshṭo faia-o tir roisoin, erlagi amra tarar gunogan gai. Tumra to Aiyub nobir soboror ḳota bala ḳori zano, ar eoḳan zano, Allae bade tanre kila rohom ḳorsla. Alla to doya-mayar shagor.
JAM 5:12 O amar bai oḳol, amar asol ḳota oilo, tumra kunuzat ḳosom ḳorio na. Asmanor name-o na, zominor name-o na, ola kunu name-u ḳosom ḳorio na. Er bodla tumrar oy ḳan oy, ar na ḳan na ouk, zate tumra bisaror daṛo na foṛo.
JAM 5:13 Tumrar maze ḳeu mosiboto taḳle he dua ḳorouk. Ḳeu shuke taḳle hamd-ḳaoali gauk.
JAM 5:14 Ḳeuror bemar oile he zomator murobbi oḳolre daot deuk, tara aia Allar nam loia tar matat tel dia dua ḳoroukka.
JAM 5:15 Teu imanor sate dua ḳorar ḳatire Allae i bemarire shifa ḳorba. He zudi guna-o ḳoria taḳe, te tar guna maf ḳora oibo.
JAM 5:16 Erlagi tumra eḳzone aroḳzonor gese zarzir guna shikar ḳoro, ar eḳe-oinnor lagi dua ḳoro, zate bala oitae faro. Forezgar oḳlor munazat asanoḳ bolala.
JAM 5:17 Ilias nobi amrar laḳan-u roḳtoe-mangshoe manush asla. Tain dile-zane dua ḳorla meg na oar lagi, hasau shaṛe tin boros kunu meg oilo na.
JAM 5:18 Bade tain megor lagi dua ḳorla, teu meg oilo, ar zomino foshol folilo.
JAM 5:19 O amar bai oḳol, tumrar maze ḳeu zudi be-foti oizae, ar ḳeu tare firaia ane,
JAM 5:20 te zanio, ze manshe kunu gunagarre be-fot tone firaia ane, he ou gunagaror zan basae ar tar guna beshi oile-o mafi fae.
1PE 1:1 Allar fosond ḳora zoto bonda oḳol Fonto, Galatia, Kappadokia, Asiya ar Bitunia desho sitria bin-deshi hishabe boshot ḳorra, tarar gese ami al-Mosir sahabi Fitore ou sohifaḳan leḳram.
1PE 1:2 Gaibi baf Allae tan munshae tumrare fosond ḳorsoin ar Pak Ruhe fobitro ḳorsoin. Er uddesho oilo, tumra zate Isa al-Mosir baiddo o ar tan lou siṭaia tumrare fak-saf ḳora oy. Allae tumrare besh ḳori rohomot ar shanti dan ḳoroukka.
1PE 1:3 Hou Alla Pakor tarif ouk, zein amrar Malik Isa al-Mosir Mabud ar gaibi baf. Tain Isa al-Mosire mora taki zinda ḳoria, tan moha doyae amrare noya zonom dan ḳorsoin, ete amra eḳ zinda asha faisi.
1PE 1:4 Mani amra ola eḳ donor asha faisi, ze don kunudin nosṭo oito nae, hara zibon noya taḳbo, ermaze ḳaraf kunta taḳto nae. Nazator i don tumrar lagi behesto raḳa oise.
1PE 1:5 Tumra furafur nazat na faoa forzonto, Allai shoktie imanor mazdi tumrare hefazote raḳa oise. Ou nazat ṭik kora oise, aḳerator shomoy zair oar lagi.
1PE 1:6 Zudio ḳoy dinor lagi nanan zat forikkar mazdi tumra oḳon duk-koshṭo ḳorrae, ta-o ou nazator ashae to tumrar mon kushie bora.
1PE 1:7 Ou forikka oḳol soler, tumra zen imane ḳaṭi oḳan forman ḳorar lagi. Ar Isa al-Mosir zair oar shomoy, tumra zanu tarif, gourob ar shomman fao. Ze shuna koy oizae, ou shunare-o agunit fuṛia zasai kora oy. Ar tumrar imanor dam to ou shunar saite-o bout beshi, erlagi ou forikka soler.
1PE 1:8 Zudio al-Mosire tumra deḳso na, tebou tumra tanre mohobbot ḳorrae. Ar oḳono tanre souke na deḳle-o, kushi oia tanre ekin ḳorrae, i kushi to bashae ḳoa zae na, ita ḳali behesti kushi.
1PE 1:9 Ḳaron tumrar imanor aḳeri fol fairae, ikṭa oilo tumrar zanor furafur nazat.
1PE 1:10 Ze dua tumrar faoar ḳota, i befare bout age nobi oḳole bataisoin. Tara ou nazator befar zanar lagi bout kuz-ḳobor ḳorsoin.
1PE 1:11 Tarar dilo al-Mosir ruhe age-u shakki dia ḳoisoin, tanre ḳoshṭo ḳorte oibo ar bade tain mohima faiba. Nobi oḳole zanta saisla, al-Mosir ou ruhe kun shomoykur ar kun halotor ḳota tarare zanaira.
1PE 1:12 Oile Allae tarare deḳaia disoin, tara zeta bataira ita dia tarar nizor kezmot na ḳoria, tumrar kezmot ḳorra. Asman taki faṭail Pak Ruhu dia, zera tumrar gese al-Mosir befare kush-ḳobri toblig korsoin, tara tumrare nobi oḳlor ḳota-u zanaisoin. Firista oḳole-o ita befar zanar lagi kiali.
1PE 1:13 Erlagi tumrar monre hozag koro ar nizore shamlaia raḳo. Al-Mosi zair oar bade ze rohomot tumra faibae, ou rohomoti nazat faoar lagi furafur asha loia tumra bar sao.
1PE 1:14 Tumrar agor obuz halotor ḳaraf ḳam-ḳaz mafik zindegi kaṭaio na, borong Allar hukum manra aolad hishabe din ḳaṭao.
1PE 1:15 Zein tumrare daot disoin, tain zela fobitro, tumra-o oula hoḳol sola-firat fobitro o.
1PE 1:16 Pak Kitabo Allae ḳoisoin, “Ami fobitro, erlagi tumra-o fobitro o.”
1PE 1:17 Allae forteḳ manshor amol-nama dekia bisar ḳoroin, ḳeur mukor bae saia bisar ḳoroin na. Erlagi tanre zudi tumra gaibi baf ḍaḳo, te zotodin tumra ou duniat musafir halote taḳbae, otodin tumra tanre ḍoraia zindegi kaṭao.
1PE 1:18 Tumra zano, tumrar baf-dada taki faoa beḳama sal-cholonor fot taki, koy oar zuka shuna-rufar laḳan kunuta dia tumrare azad ḳora oise na.
1PE 1:19 Borong tumrare azad ḳora oise, al-Mosir moha dami lou dia, nikut-niskolonko meṛa-baichchar lou dia.
1PE 1:20 Dunia foyda oar age-u Allae tanre ṭik kori raḳsoin, oile ou hesh-mesh shomoy tain tumrar lagi-u zair oisoin.
1PE 1:21 Allae enre mora taki zinda ḳori tulia mohima dan ḳorsoin ar tan mazdi tumra Allar ufre iman ancho. Erlagi-u tumrar iman ar asha Allar ufre-u ase.
1PE 1:22 Oḳon hok-halali mania, tumrar dilre fak-saf ḳorso ar imandar bai oḳol zebla tumrar gese mayar manush oisoin, te ami koiram, tumra eḳe-oinnore dile-zane maya ḳoro.
1PE 1:23 Ze bis nosṭo oizae, tumrar zonom to ila bisor nae. Borong zeta nosṭo oy na, ota taki-u tumrar noya zonom oise. Ou bis oilo Allar siroḳalin zinda kalam.
1PE 1:24 Allar kalamo leḳa ase, Hoḳol manush-u gashor laḳan, gash fulor laḳan tara shundor; gash hukai zae, ful-o zori zae,
1PE 1:25 ḳali Allar kalam roy siroḳal. Ar ou kalam-u oilo kush-ḳobri, zeta tumrar gese toblig kora oise.
1PE 2:1 Erlagi oinno manshor ḳeti korar hoḳol zat ku-motlob, sol-soturi, bonḍami, ingsha, ar hoḳol zat nindar mat-ḳota tumrar dil taki horai deo.
1PE 2:2 Geda huruttaintor dudor fiasor laḳan tumra ḳaṭi ruhani dudor kiali o, ar ou dud ḳaia ḳaia zanu tumra boṛo oia nazat fao.
1PE 2:3 Malik Isar meherbanir moza to tumra faiso-u.
1PE 2:4 Te tumra tan gese ao. Tain-u oila agor nobi oḳlor ḳoa hou “zinda fattor”, ze fattorre manshe dam dise na, oile Allar gese ikṭa moha dami ar fosondor fattor.
1PE 2:5 Ar tumra tan torika kobul ḳorae, tumrare-o zinda fattoror laḳan Alla Pak roibar fobitro Kaba gor banani or. Erlagi Allai imam sab hishabe tumrare alada ḳori raḳa oise, zate tumra oula ruhani kurbani deo, zeta Isa al-Mosir ḳatire Allae kobul ḳoroin.
1PE 2:6 Allar kalamo ase: Huno, ami eḳṭa moha dami fattor fosond ḳorsi; ikṭare Zeruzalemo ian kuṭi hishabe gaṛisi. Ze zone tan ufre iman ane, he kunumonte-u shorminda oito nae.
1PE 2:7 Ar tumra iman anae, tumrar gese hou fattor moha dami oigese. Oile zera iman anche na, tarar belae kitabor ou ḳota-u ḳaṭe: Raz mestoir oḳole ze fattorre beḳama ḳoia falai disil, oḳṭa dia-u goror ian kuṭi oilo.
1PE 2:8 Ar, Ikṭa oula fattor, ze fattoro manshe usṭa ḳaibo, tarar asaṛ ḳaia foṛar ḳaron oibo. Manshe Allar kalam mane na, gotike-u usṭa ḳae. Ita to tarar ḳofali dosha.
1PE 2:9 Oile tumra to ila nae, tumra oilae Allar fosond ḳora ḳandan, bashshai imamor dol, fobitro zati, tan afon proza. Tain tumrare andair taki nizor nuror foro daot ḳori anchoin, tan gunogan ḳorar lagi.
1PE 2:10 Age to tumra Allar proza aslae na, oile oḳon oiso. Age tan maya-mohobbot-o faiso na, oḳon faiso.
1PE 2:11 Bai oḳol, i duniat tumra musafir hishabe ami tumrare minot ḳori koiram, tumra shorilor bod ḳaish taki basia ro, itae to tumrar ruhur bifokke zuddo ḳore.
1PE 2:12 Zera Allare sine na, tarar maze tumra hok fote solo. Teu tara tumrare dushi koia ninda ḳorle-o, tumrar hoḳol bala ḳam dekia kiamotor din Allar gourob ḳorbo.
1PE 2:13 Tumra Malik Isar ḳatire manshor banail shashon-bebosta manio. Deshor razare manio, ein to deshor fordan.
1PE 2:14 Tan montri ar hakimre manio, oforadir shaza ar bala zonre furuskar dibar lagi tain erare raḳsoin.
1PE 2:15 Allar munsha oilo, tumra bala ḳam ḳoria buṛboḳ manshor beḳama mat-ḳota bond ḳoro.
1PE 2:16 Tumra nichchoy shadin, ta-o naformanire guria raḳar lagi i shadinota bebohar ḳorio na. Borong nizore Allar gulam mono ḳoro.
1PE 2:17 Hoḳol manshore ijjot ḳoro, tumrar imandar bai oḳolre mohobbot ḳoro, Allare ḍorao ar deshor razare ijjot deo.
1PE 2:18 Ar baṛir gulam oḳolre ḳoiram, tumra munibre ijjot deo ar tarar ḳotat ro. Ze munib bala ar doyalu, ḳali zen tarar ḳotat taḳtae, ila kunta nae. Oile zera ḳoṭu bebohar ḳore, tarar ḳotat-o ro.
1PE 2:19 Ola ḳeu zudi kamoḳa duk-koshṭo fae ar Allare mono rakia ita shoijjo ḳorilae, te furuskar faibo.
1PE 2:20 Oboshsho oforador lagi mair ḳaia tumra zudi shoijjo ḳoro, te tarif ḳorar kunta ase ni? Oile bala ḳamor lagi tumra zudi koshṭo faia-o shoijjo ḳorilao, te ita Allar dorbaro tarifor laḳ,
1PE 2:21 Allae tumrare otar lagi-u daot disoin. Al-Mosie-o ḳoshṭo shoijjo ḳoria nomuna deḳaisoin, te tumra-o tan faor tale tale solo.
1PE 2:22 Tain kunu guna ḳorsoin na, tan muko asil na kunu sol-soturi.
1PE 2:23 Manshe tanre gali dile-o, tain firia gali disoin na. Ḳoshṭor shomoy er bodla loiba ḳoia ḍor-boy-o deḳaisoin na, borong zein hok bisar ḳoroin tan ato nizore shofi disoin.
1PE 2:24 Tain nizor shoril dia amrar gunar buza boisoin gasor ṭukrar solibo, zate gunar babote amra moria hari, fak-forezgarie zinda roi. Tan shorilor ḳaṭa-sirae tumrar shifa oise.
1PE 2:25 Age to tumra be-fote zaoa meṛar laḳan aslae, oile ze raḳale tumrar dilor deḳa-huna ḳoroin, oḳon tan gese-u firia aiso.
1PE 3:1 Olaḳan, zamair goror hoḳol bouaintore ḳoiram, tumra zarzir zamair ḳotae solo. Zudio kunu kunu zamaie Allar kalamre dam dey na, ta-o tumrar sal-cholone zanu tarare al-Mosir bae ṭania ane. Teu i befare tumrar ekkan ḳota-o mata lagto nae.
1PE 3:2 Tumrar fobitro zindegir halot dekia, ar Allar ḍor-ḳofe sola dekia tara nize-u aibo.
1PE 3:3 Nanan nomunae hazi-faṛi sulor kufa bandia, shuna-rufar goyna lagaia, ar dami dami kafoṛ findia nizore hazanit roio na.
1PE 3:4 Borong ze shundor kunudin nosṭo oito nae, hou nomunae sola-fira ar shantir ḳaislot dia nizor dilre hazao. Allar nozoro ota-u to moha dami.
1PE 3:5 Ṭik olaḳan agor zomanar allaoala beṭinte, Allar ufre borosha ḳoria zamair baiddo roia nizore hazaita.
1PE 3:6 Hozrot Ibrahimor bibi Sayra-o tan zamair baiddo asla ar tanre munib ḳoia ḍakita. Tumra-o manshore na ḍoraia zudi nek kam ḳoro, te oḳṭa-u forman oibo, tumra Bibi Sayrar zoiggo aolad.
1PE 3:7 Ar zamai oḳolre-o ḳoiram, tumra bibeḳ-buddi kaṭaia bour loge solo. Tara-o to tumrar logor ḳomzur manush ar Allar rohomotor dan hishabe tara-o tumrar loge zindegi faibo. Erlagi tarare ijjot deo, zate Allar dorbaro tumrar munazat beḳama na zae.
1PE 3:8 Heshe hoḳolre ḳoiram, tumra hoḳol eḳ-dila o, eḳe-oinnor duke duki o, baiaintore maya ḳoro, doyalu ar norom dilor manush o.
1PE 3:9 Oinnayor bodla oinnae ḳorio na, ḳeu gali dile firia gali dio na. Borong tarar lagi dua saio, ola solar lagi-u Allae tumrare daot disoin, ila ḳorle tumra rohomot faibae.
1PE 3:10 Zela Zobur Shorifo ase, Ze zone shuki zindegi kaṭaito sae ar shudin deḳar asha ḳore, he bad ḳota taki tar zifrare, sol-soturi taki ṭuṭre shamlauk.
1PE 3:11 Bad ḳam taki firia bala ḳam ḳorouk, shantir ashik oia er ḳore ḳore rouk.
1PE 3:12 Forezgaror ufre to Mabudor nozor, tarar dua hunar lagi tan ḳan ḳaṛa, oile bad ḳam ḳorrar ufre, Malik Moular bod nozor.
1PE 3:13 Tumra zudi bala bala ḳamor ashik o, te ḳe tumrar ḳeti korbo?
1PE 3:14 Forezgarir fote solar lagi zudio tumrar ḳoshṭo oy, ta-o tumra mubarok. Ar tumrare zetae ḍor deḳain itare ḍoraio na, ostir oio na,
1PE 3:15 borong al-Mosire nizor dilo malik hishabe kobul ḳoro. Tumrar asha-borosha zudi keu zanto sae, te tar zuaf dibar lagi hamesha zuit roio.
1PE 3:16 Oile i zuaf norom shure dio. Tumrar dil saf rakio, Isayi ummot hishabe zera tumrar bala sal-cholonor ninda ḳore, tara zanu shorminda oy.
1PE 3:17 Bod ḳam ḳoria ḳoshṭo faoa taki to, Allar morzi oile nek kam ḳoria ḳoshṭo faoa bout bala.
1PE 3:18 Mono rakio, amrar gunar mafir lagi al-Mosie-o eḳbar ḳoshṭo ḳorsoin, naformanre basanir lagi hou forezgar zone zan disoin, amrare Allar dorbaro fosanir lagi. Shorile tanre mara oisil, oile ruhe zinda ḳora oise.
1PE 3:19 Ar ruhe tain bondi ruhu oḳlor gese gia toblig korsoin.
1PE 3:20 Ou ruhu oḳol to Nuh nobir zomanar obaiddo manshor ruhu. Tan zaz bananir shomoy, Allar lamba soborgarir ḳalo era obaiddo roisoin, ou zazo uṭia ḳali aṭzon manshe gozobi fani taki zan basaisil.
1PE 3:21 I fani oilo al-Mosir name torikabondir eḳṭa nishana, zetae oḳon tumrar zan base. Torikabondie tumrar shorilor moyla saf oy na, ḳali Allar dorbaro saf dilor shae dey. Hozrot Isa al-Mosi mora taki zinda oia uṭae tumrar zan base,
1PE 3:22 tain behesto gesoin ar Alla Pakor ḍain galar toḳto boat asoin. Asmanor firista oḳol, ḳemotar malik oḳol ar raza oḳol tan odine asoin.
1PE 4:1 Al-Mosie nizor shorilo ḳoshṭo shoijjo ḳorsoin ḳori, tumrar dilor babre-o olaḳan ḳoro. Shorilo zar ḳoshṭo oise, he to gunar zalo bondi roise na.
1PE 4:2 Erlagi he zotodin duniat ase, otodin bod ḳaishe na solia ḳali Allai munshae zindegi kaṭae.
1PE 4:3 Allare zera sine na, tarar laḳan tumra-o age zina-bodmaishi, mouz-furti, matlami, hoi-hulla ar zogoinno murtipuja ḳoria din ḳaṭaitae.
1PE 4:4 Oile oḳon tumra tarar loge oia olaḳan beshamal naformani korrae na dekia, tara taijjub bonia tumrar ninda gaira.
1PE 4:5 Ta-o zein zinda ar murda oḳlor bisaror lagi zuit asoin, tara tan gese-u hishab-nikash dite oibo.
1PE 4:6 Erlagi-u murda oḳlor gese-o kush-ḳobri toblig kora oisil, zate manush hishabe tarar shorili bisar oile-o, ruhani zogoto tara Allar laḳan zinda roin.
1PE 4:7 Oḳon to hokkoltar hesh shomoy aichche. Erlagi tumrar monre ṭik koro, nizore shamlaia raḳo, zate munazato kamiab o.
1PE 4:8 Asol ḳota oilo, tumra eḳe-oinnore dil taki mohobbot ḳoro, ḳaron maya-mohobbote bout guna guria raḳe.
1PE 4:9 Kunuzat bitishona na deḳaia, tumra eḳe-oinnor memandari koro.
1PE 4:10 Allar ges taki zein zelaḳan niamot faiso, ou donor ḳaṭi kazanchi hishabe itare eḳe-oinnor kezmoto lagao.
1PE 4:11 Ḳeu zudi toblig koroin, te ou laḳan ḳoroukka zate buza zae, ita Allai buli. Ar zein kezmot ḳoroin, ein Allar deoa bol-shoktie kezmot ḳoroukka, zate hokkoltat-u al-Mosir usillae Allar tarif oy. Tarif ar kudroti kemota hor-hamesha tan-u. Amin.
1PE 4:12 Bai oḳol, tumra oḳon zibon-moron forikkat foṛia taijjub oio na, mono ḳorio na ita asanok kunta goṭer.
1PE 4:13 Borong tumra al-Mosir ḳoshṭor bagi oirae ḳori kushi koro, zate tan mohima zair oar shomoy-o tumra amud-furtie kushi-bashi kortae faro.
1PE 4:14 Al-Mosir namor lagi tumra zudi beijjot o, te tumra nek-kofali. Ḳaron Allar mohima-ala Pak Ruhu tumrar ufre ase.
1PE 4:15 Tumrar mazor ḳeu zanu suri, kun ba kunuzat oforadi hishabe, emonki foror ḳame nak golaia ḳoshṭo na ḳorouk.
1PE 4:16 Oile ḳeu zudi Isayi imandar hishabe duk-koshṭo ḳore, te he shorminda na ouk, borong Isayi forisoyor lagi Allar tarif ḳorouk.
1PE 4:17 Bisaror shomoy aichche, ar Allar fosond ḳora bonda oḳolredi-u bisar shuru oibo. Ita zudi amrar maz taki-u shuru oy, te zera Allar kush-ḳobri manche na, tarar dosha kilan oibo?
1PE 4:18 Allar kalamo ase, Allaraia manshor zanor sodma oile, gunagar ar be-dine muk lukaibo kuai?
1PE 4:19 Oile Allar morzie zera duk-koshṭo ḳorer, tara nek kam ḳori kori nizor zanre hou hok-halal foyda ḳorrar ato shofi deuk.
1PE 5:1 Oḳon zomator murobbi oḳolre ḳoiram, ami-o to eḳzon murobbi, ami nizor souke al-Mosir duk-koshṭo deḳsi, ar tan ze mohima zair oibo, ou mohimat-o shorik oimu. Ami minot ḳori koiram,
1PE 5:2 Allai ze meṛar fal tumrar aotae asoin, erar raḳali koro. Tarar imamoti koro, ḳora lagbo ḳori na ḳoria ba duniabi labor ashae na ḳoria, kush dile ḳoro. Allae to ola imamoti-u asha ḳoroin.
1PE 5:3 Tumrar aotae zera ase, erar ufre musoddori korio na, borong falor raḳali koria tarar gese nomuna bono.
1PE 5:4 Teu hou fordan raḳal Isae zebla duniat hirbar toshrif anba, ou shomoy tumra furuskar hishabe ola eḳ joyor mala faibae zeta kunudin binash oito nae.
1PE 5:5 Ou laḳan zuan oḳole-o tumrar murobbire mania solo. Gulamir beshe hoḳole-u eḳe-oinnor kezmot ḳoro, zela Allar kalamo ase, Allae ohonkarir birudde taḳoin, norom dilor manshore rohom ḳoroin.
1PE 5:6 Erlagi Allar ḳemotar samne tumra noto o, teu shomoy moto Allae tumrare usa ḳorba.
1PE 5:7 Allae to tumrare loia-u sinta ḳoroin, erlagi hoḳol sinta-babnar bar tan ufre dilao.
1PE 5:8 Tumra nizore shamlaia raḳo ar hushiar o. Ḳaron tumrar dushmon Iblise gorzon ḳorra bagor laḳan, tumrare ḳailito ḳori kaf doria gurer.
1PE 5:9 Erlagi imane mozbut roia tar mukabila ḳoro. Tumra to zano, duniar hoḳol zagat tumrar imandar baiainte eḳoi laḳan duk-koshṭo ḳorer.
1PE 5:10 Rohmanur rohim Alla Pake tumrare daot disoin al-Mosir loge oia tan sirostayi mohimar bagi oar lagi. Tuṛa ḳoydin duk-koshṭo ḳoria harle, tain nize-u tumrare ṭik-ṭak korba ar tir raḳba, tumrare boloban ḳoria mozbut kuṭir ufre ḳaṛa ḳoraiba.
1PE 5:11 Tan raz-ḳemota hor-hamesha zari rouk. Amin.
1PE 5:12 Ou siṭikan ami Silas mohrir sabredi kub ḳom ḳotae tumrar gese leḳaisi, ami tanre hok-halal bai mono ḳori. Ami sairam Allar ḳas rohomotor ou shakki hunia tumrar shaosh baṛouk, ar tumra ono tir oia ro.
1PE 5:13 Allae tumrar loge zerare fosond ḳorsoin, hou Babil ṭaunor mumin oḳole tumrare salam zanaira, ar amar dormor fua Markuse-o tumrare salam zanaira.
1PE 5:14 Tumra eḳe-oinne mohobbote golagoli korio. Tumra zera al-Mosir afon zon oiso, tumrar ufre shanti nazil ouk. Amin.
2PE 1:1 Ami Saimon-Fitor, Hozrot Isa al-Mosir eḳzon gulam ar sahabi. Tumra zera amrar laḳan, amrar Alla ar toraneala Isa al-Mosir fak-forezgarie eḳoi laḳan moha dami iman hasil ḳorso, ami tumrar gese leḳram.
2PE 1:2 Alla Pak ar amrar malik Hozrot Isare furafur sinar mazdi, tumrar ufre besh ḳori rohomot ar shanti nazil ouk.
2PE 1:3 Zein tan nizor mohima ar gune amrare daot disoin, tanre furafur sinar mazdi tan kudrote amra ola niamot faisi, zate amra forezgar bonia zindegi kaṭai.
2PE 1:4 Tan mohima ar gune amrar loge moha dami ar bout boṛo boṛo oada ḳorsoin, zate tumra duniabi hoḳol bod ḳaish taki basia Allai gunor bagi o.
2PE 1:5 Erdae tumra kub kiali oia, imanor loge nek kaislot, nek kaislotor loge al-Mosire sinar aḳol,
2PE 1:6 i aḳolor loge nizore shamlani, shamlanir loge doijjo ar doijjor loge forezgari,
2PE 1:7 forezgarir loge eḳe-oinne maya, ar eḳe-oinne mayar loge Allai mohobbote baṛo.
2PE 1:8 Tumrar maze zudi ita gunagun taḳe, ar ita boria foṛat roy, te amrar Malik Isa al-Mosire furafur sinaḳan tumrar beḳama-behuda zaito nae.
2PE 1:9 Oile ze zonor maze ita gunagun nai, he to anda, he kunta-u buze na. Ḳaron agor ze guna taki tare fak-saf ḳora oise, ikan he faurilise.
2PE 1:10 Erlagi bai oḳol huno, Allae zen hasau tumrare daot disoin ar fosond ḳorsoin, ita nichchit ḳorar lagi aro beshi kiali o. Ila ḳorle tumra kunu shomoy usṭa ḳaitae nae.
2PE 1:11 Ar amrar malik toraneala Isa al-Mosir hameshakur bashshait tumrare ador ḳori harail oibo.
2PE 1:12 Erlagi, ami hamesha tumrare ota befare mono ḳorai diram, zudio ita tumrar zana ase ar tumrar gese ze hokikot aise, itat tiro aso.
2PE 1:13 Ashole ami mono ḳorram, ami zotodin tambur laḳan ou shorile basia roimu, otodin tumrare ota mono ḳorai dia hozag raḳa usit.
2PE 1:14 Ḳaron ami to ar beshi din ou shorile roitam nae, amrar Malik Isa al-Mosie ikan amare forishkar zanai disoin.
2PE 1:15 Te amar moutor bade-o hamesha zate ota mono raḳtae faro, ami ou menot-o ḳormu.
2PE 1:16 Amrar Malik Isa al-Mosir kudroti shokti ar tan hirbar toshrif anar ḳota zananit gia, amra kunu banail kichcha ḳoisi na. Amra to nizor souke tan mohima deḳsi.
2PE 1:17 Asman taki zalal ar shanor ze aoaz ailo, “Ein-u amar ḳas mayar zon Ibnulla, en ufre ami kub kushi,” ou aoazor mazdi al-Mosie tan gaibi baf Allar ges taki ijjot ar gourob faisoin.
2PE 1:18 Amra zebla tan loge hou fobitro faṛo aslam, ou shomoy nizor ḳane behestor ou gaibi aoaz hunchi.
2PE 1:19 Ar amrar lagi aro boṛo forman oilo, Pak Kitabo nobi oḳole zotota batai gesoin. Andarir maze tumrar souk zelaḳan rushnir bae taḳe, ṭik olaḳan zoto shomoy bian oise na ar tumrar dilo fozoror shuk-tera uṭse na, oto shomoy tumra nobi oḳlor ḳotae kiali o, teu tumrar bala oibo.
2PE 1:20 Ar ḳas ḳori mono rakio, kitabor mazor kunu ḳota nobi oḳlor mongoṛa nae.
2PE 1:21 Ḳaron nobi oḳole tarar ichchamoto kunu ḳota ḳoisoin na, ḳali Pak Ruhur bole Allar deoa buli bataisoin.
2PE 2:1 Mono rakio, Boni Israilor maze zela bonḍo nobi oḳol asla, tumrar maze-o oula bonḍo ustad oḳol taḳba. Tara lukai lukai omon bul talim dibo, ze talime manshore binash ḳore ar ze malike tarare azad ḳorar lagi korid ḳorsoin, ou malikre forzonto tara oshikar ḳorbo. Olaḳan kub zoldi tara nizor ufre binash ḍakia anbo.
2PE 2:2 Tarar deḳa-deki bout manush ḳobisi fote zaibo, tarar lagi-u Isayi hok torikar bodnam oibo.
2PE 2:3 Lub-lalos ḳoria sol-soturir mat matia, nizor labor ashae tara tumrare ḳamo lagaibo. Tarar faona shaza to bout din taki bar sar, tarar binash-o beshi deri nae.
2PE 2:4 Emonki agor firista oḳole zebla guna ḳorsla, ou shomoy Allae tarare rehai disoin na, borong duzoḳor andairor gato falaia tarar bisar ḳorar lagi raḳsoin.
2PE 2:5 Ar tain hou agor duniare-o rehai disoin na, borong ou be-din oḳolre boinnar fanidi marsoin. Oile Nuh nobi ar oinno shatzonre tain basaisoin. Ḳaron Nuh nobie forezgarir ḳota toblig korta.
2PE 2:6 Ar Allae Sadum ar Amura ṭaunre aguin dia zalaia sali koria, onor manshore shaza disla. Ou nomunae tain deḳaisla, be-din oḳlor dosha kilaḳan oy.
2PE 2:7 Ta-o Lut nobire tain basaisoin. Ein to forezgar manush asla, hinor naforman oḳlor beshamal bab dekia tain kub ḳoshṭo faita.
2PE 2:8 Din din tarar aḳam-kuḳam ar ḳota-barta hunta. Shoriotor bifokke tarar naformani dekia, ou forezgar zonor mono kub duk lagto.
2PE 2:9 Ota taki deḳa zar, Allae to forezgar manshore forikkar maz taki-o basaita faroin. Oile zera be-dini kam ḳore, ḳas ḳori zera ḳobisi kore, kunu shashon mane na, tarare shaza deoaṭa kiamot forzonto raḳta-o faroin. I bonḍo ustad oḳol kub bod-shaoshi. Tara nizor ichchamoto sole ar batuni shordar oḳlor bodnam gaite ḍorae na.
2PE 2:11 Firista oḳol shokti ar ḳemotae era taki bout boṛo oile-o, ou batuni shordaror bifokke Mabudor dorbaro bodnam gaia kunu nalish dein na.
2PE 2:12 Be-aḳol zongli zanuar oḳole na buzia zela nizor kushie sole ar dora ḳaia more, ou bonḍo ustad oḳol-o otar laḳan. Tara zeta buze na, otar-o bodnam gae. Erlagi ou zongli zanuaror laḳan tarar binash ase,
2PE 2:13 ḳarafir bodla babot tarar lagi-o ḳarafi ase. Dinor belae-o mouz-furti koria mod ḳaite tarar bala lage. Tara to tumrar ḳanir talor tu ar gu. Tara zebla tumrar loge boia mezbani kae, ou shomoy tara bonḍami korte kub aram fae.
2PE 2:14 Tarar souk zinae bora, gunar ḳam kunu shomoy bond ḳore na. Ostir manshore be-fote ṭania ney. Tarar mon lub-lalosor ustad. Iguin to lannoti!
2PE 2:15 Tara Balam bin Bauror laḳan sohi fot saṛia be-fote gesegi. Ou bonḍo pir Balam to haram ḳamai-ruzgaror fagol asil,
2PE 2:16 oile ola bod ḳamor lagi he buba gadar domok kaise. Ou gadae manush bulie matia tar faglamit bada dise.
2PE 2:17 Ita manush to fanir hukna kuar laḳan ar batashor kuṛullar laḳan. Tarar lagi goin andair zoma raḳa ase.
2PE 2:18 Tara boṛo boṛo beḳama mat mate. Ar zera tuṛa age ku-fot saṛia zan basanir lagi bagisoin, ota manshore shorilor ḳaishe solia bodmaishi korar indon dey.
2PE 2:19 Hou bonḍo ustad oḳole ḳosom ḳaia ḳoy manshore azad ḳorto, oile tara nize-u noforoti kamor gulam. Zano to, ḳeu zudi kuntar gese arizae, te he itar gulam.
2PE 2:20 Te amrar malik ar toraneala Isa al-Mosire sinia hari zogotor ḳarafi taki horia aia-o, ḳeu zudi hirbar gia ou ḳarafir zalo aṭḳae, te tarar foyla dosha taki hesh dosha aro mondo.
2PE 2:21 Forezgarir fot sinar bade-o tarar gese shomzail ou fobitro hukumor ulṭa gese, er taki aro bala asil i fot na sina.
2PE 2:22 Tarar befare ou silleḳ-u shoṭik, “Kukre nizor bomi firia ḳae,” ar “Shuorre naoaile-o feḳo foṛia goṛiae.”
2PE 3:1 Mayar bai oḳol, ikan oilo tumrar gese leḳa amar dui nombor siṭi, i duio siṭit-u ami tumrare kial ḳorai diram ar tumrar dilre hozag korram.
2PE 3:2 Ami sairam, fobitro nobi oḳole age zotota bataisoin, ar amrar toraneala malike tumrar gesor sahabi oḳlor mazdi ze hukum disoin, ota mono raḳo.
2PE 3:3 Kub kial ḳori buzio, aḳeri zomanat rong-tamsha ḳorra oḳole rong-tamsha loia aziba, tara zarzir ḳaishe solba.
2PE 3:4 Tara ḳoiba, “Kita ba, hein aibar lagi ze oada asil, itar kita oilo? Duniar shuru taki zelaḳan solchil, amrar baf-dadar moronor bad taki oḳono to olaḳan-u soler.”
2PE 3:5 Ashole itae to ichcha ḳori-u faurilae, bout din age Allar kalamor bole asman foyda oise ar fanire horai dia zomin bar ḳora oisil, fanire zominor sairo galabae dola ḳora oisil.
2PE 3:6 Bade hou fanie boinna oia hi zomanar duniare binash ḳorsil.
2PE 3:7 Ar hou kalamor bole, oḳonkur asman-zominre aguindi zalaibar lagi raḳa or. Aḳeri bisar din forzonto itare ola rokka ḳora or, hou din be-din oḳlor shorbonash oibo.
2PE 3:8 Ta-o bai oḳol, tumra ikan faurio na, malikor gese eḳ din eḳ azar bosoror homan ar eḳ azar bosor eḳ dinor homan.
2PE 3:9 Kunu kunu manshe mono ḳoroin, malike tan oada furon ḳorte deri korra, ikan ṭik nae. Ashole tain tumrar bae sobor ḳoria roisoin, tain saira na ḳeu binash ouk, borong hoḳolre touba ḳorar shuzug dira.
2PE 3:10 Oile Malik Isa aibar din to suror laḳan aḳta-u aibo. Hou din asmane hu hu aoaz ḳoria binash oibo ar foyda ḳora hoḳolta aguine golia milai zibo. Dunia ar ermaze zotota ḳora oise, hokkolta zair oibo.
2PE 3:11 Olaḳan hokkolta binash oibo zania, tumra kilaḳan roa zorur? Tumra fak-fobitro roia forezgar zindegi kaṭaia,
2PE 3:12 Allar ṭik kora dinor lagi ashik oia bar sao. Hou din to asman zoli zoli binash oibo ar foyda ḳora hoḳolta aguine golizibo.
2PE 3:13 Oile amra Alla Pakor oada ḳora noya asman, noya zominor bar sairam, zeḳano ḳali forezgarir ṭikana.
2PE 3:14 Erlagi bai oḳol, tumra zebla ou dinor lagi bar saoat aso, te kub kial ḳoro, ou din tain zanu tumrare nikut-niskolonko halote shantir maze deḳoin.
2PE 3:15 Ar amrar malikor lamba soborgarire manshor zan basanir shuzug mono ḳorio. Ou eḳoi kota Allar deoa aḳole amrar mayar bai Pauluse-o tumrar gese leḳsoin.
2PE 3:16 Tan hokkol siṭit-u ou befare leḳoin. Er maze kisu befar ase zeta buza ḳoṭin, ḳali be-aḳol ar bedisha zone oinnainno kitabor laḳan itar manio bodlaia, nizor shorbonash ḍakia ane.
2PE 3:17 Bai oḳol, ou ḳota oḳol tumra age-u zancho, erlagi hushiar o zate ou naforman manshor bule tumrare bul fote na ney, ar imani bit taki na horae.
2PE 3:18 Tumra amrar malik ar toraneala Isa al-Mosir rohomote ar tanre sinar takkote baṛia uṭo. Oḳon ar hor-hamesha tan mohima zari rouk. Amin.
1JO 1:1 Hoḳol foyla taki-u zein asla, zanre nizor souke deḳsi, zan mukor aoaz amra hunchi, kub kial ḳori azmaia saisi ar nizor ate dora-soa ḳorsi, hou zindegi kalamor boyani leḳram.
1JO 1:2 Ou zindegi to i duniat zair oisla, amrar nizor souke i zindegire deḳsi, dekia hari tan befare shakki diram. Behesti baf Alla Pakor gese zein asla ar amrar maze zair oisla, aḳeri ou zindeganir ḳota-u tumrare zanairam.
1JO 1:3 Ou ze zonre amra deḳsi, zan mukor buli hunchi, tan befare-u tumrare ḳoiram. Zate ota hunar bade amrar loge tumrar-o ḳatir-dusti oy. Amrar ou ḳatir oilogi, gaibi baf Alla Pak ar tan ḳas mayar zon Ibnulla Isa al-Mosir loge.
1JO 1:4 Te amra ita leḳram, zate amra ar tumrar kushi-bashi fura oy.
1JO 1:5 Amra al-Mosir muk taki ita hunia hari, oḳon tumrare-o zanairam, Alla Pak to nur. Tan maze andarir kunu siṭa-fuṭa-o nai.
1JO 1:6 Ar amra andarir maze solia zudi koi, Alla Pak ar amrar maze ḳatir-dusti ase, te to amra misa matram, shoṭik kam ḳorram na.
1JO 1:7 Oile Alla Pak zela nuror maze boshot ḳoroin, oula amra-o zudi nuror fore soli, te amra eḳe-oinne ḳatir-dusti ase, ar tan ḳas mayar zon Isa Ibnullar fobitro loue amrar tamam guna-ḳosuri fak-saf ḳore.
1JO 1:8 Oḳon amra zudi koi, amra muṭe-u gunagar nae, te amra nize nizore ṭogiar, ete forman oy amrar maze Allai hokikoti nai.
1JO 1:9 Amra zudi zarzir gunar shikarukti dilai, te tan afon hok-halali ar fak-forezgarir gune, loge loge gunar mafi dilain, tamam naformani taki amrare fak-saf ḳorilain.
1JO 1:10 Oḳon amra zudi koi, amra kunu guna ḳorsi na, te amra tanre-u misa matra banailam, ete forman mile, amrar dilor maze tan kalam nai.
1JO 2:1 O amar sabal oḳol, ami tumrar gese ita leḳram, zate tumra gunar ḳam taki basia ro. Erbade-o ḳeu zudi kunu guna ḳorilae, te behesti babar dorbaro amrar eḳzon fak-forezgar shafayatḳari asoin, tan nam Isa al-Mosi.
1JO 2:2 Zano ni tain kita ḳorsoin? Amrar gunar kofora hishabe tan nizor zan kurbani disoin. Ḳali amrar nae, borong duniar hoḳol manshor gunar koforar lagi disoin.
1JO 2:3 Oḳon amra tanre sini ni? Nichchoy sini, amra tan hoḳol hukum-ahkam manle buza zaibo, amra tanre sini.
1JO 2:4 Ar ze manshe ḳoy tanre sine, sinia-o tan hukum-ahkam mane na, he misa mate, tar dilo hokikoti nai.
1JO 2:5 Oile ze zone tan kalam mafik sole, tar dilor maze nichchoy Allai mohobbot shullo-ana folise. Te amra tan maze boshot ḳori ni? Oy, ou monte buza zae amra tan maze boshot ḳori:
1JO 2:6 ar tan maze boshot ḳori koile, amrar lagi zorur oilo, tain zela solchoin, amra-o ola sola.
1JO 2:7 O shuna oḳol, ami to tumrar gese noya kunu hukumor ḳota leḳram na, borong ola eḳ hukumor ḳota leḳram, zeṭa foyla taki-u asil. Tumra age taki ze kalam huncho, oṭa-u oilo hou furana hukum.
1JO 2:8 Iṭare furana ḳoile-o ashole iṭa noya. Ou hukumor hokikotie Isa al-Mosi solta, ar tumrar zindegit-o ita ase. Deḳrae ni, andair ḳaṭi zar, asol nur oḳon zair or.
1JO 2:9 Kunu manshe zebla ḳoy, he Allai nuror foro ase, otoso tar baire ginnae, he ashole andarit roise.
1JO 2:10 Ar ze manshe tar baire maya-mohobbot ḳore, he nuror foro boshot ḳore, erlagi he asaṛ ḳaoar ḍor nai.
1JO 2:11 Oile zegie tar baire ginnae, he to andarit foṛi roise, andarir maze sola-fira ḳore. Ashole andaire tare anda banailise, erlagi he zane-u na, he kun fotedi zar.
1JO 2:12 O sabal oḳol, ami tumrar gese leḳram, zano ni, al-Mosir namor ḳatire, tumrar tamam guna-ḳosuri maf ḳora oigese.
1JO 2:13 O baf oḳol, ami afnaintor gese-o leḳram, foyla taki-u zein asoin, afnara to tanre sinoin. O zuan oḳol, ami tumrare leḳram, Iblisor logor moha-laṛait to, tumitain ziti geso.
1JO 2:14 O hurutta oḳol, ami tumrare leḳlam, tumra to behesti bafre siniliso. O baf oḳol, ami afnaintore leḳlam, afnara to tanre sinilisoin, zein hokkoltar foyla taki-u asoin. O nouzuan oḳol, ami tumrare leḳlam, tumra-u boloban, Allar kalam tumrar dilo gata, Iblisor logor moha-laṛait tumra zitso.
1JO 2:15 Oḳon kial ḳori huno, tumra i dunia ar zogot-shongsharor kunutar mayat foṛio na. Ze manush duniar mayat foṛizae, he to nizor behesti bafre mohobbot ḳore na.
1JO 2:16 Zano to, duniat zeta mile, ita oilo, roḳto-mangshor ḳaish, souḳor lub-lalos ar shongsharor bahaduri, ita kunuṭa-u behesti bafor ges taki ae na, ḳali dunia taki ae.
1JO 2:17 Te duniabi zogot-shongsharor hokkol bahadurir din fuṛai zar, oile ze bondae Allar morzi zugai sole, he to siroḳal ṭikia roibo.
1JO 2:18 Baba oḳolre, kiamot daro aichche. Te tumra nichchoy huncho, Kane-Dorjal aoar shomoy oigese. Ar asol ḳota oilo, ermaze bout dorjal aia harsoin. Ota dekia amra buziar, hasau kiamot daro aichche.
1JO 2:19 Ou dorjal oḳol to amrar maz taki-u bar oisoin. Ta-o era ashole amrar torikat asil na, amrar torikar oile to amrar loge roilo one. Tara bar oia gesegi kori-u buza zae, tara ḳeu amrar nae.
1JO 2:20 Oile tumra to hou fobitro zonor ges taki kelafoti faiso ar hoḳole-u hok aḳol faiso.
1JO 2:21 Tumra hokikoti sino na mono ḳoria ami tumrar gese leḳram ni? Na, ila kunta nae. Ashole tumra hokikoti sino, ar hok taki kunumonte-u na-hok baroy na, erlagi-u tumrare leḳlam.
1JO 2:22 Hozrot Isa-u Allar oada ḳora al-Mosi, ikan zegie shikar ḳore na, he to nichchit misa matra. Gaibi baf ar tan ḳas mayar zon Ibnullare zegie oshikar ḳore, he-u oilo dorjal.
1JO 2:23 Ou mayar zonre zegie oshikar ḳore, behesti bafor loge tar kunu ḳatir-shomporko nai, ar ze manshe mayar zonre shikar ḳore, tar loge to behesti bafor-o ḳatir-shomporko ase.
1JO 2:24 Te foyla taki tumra zeta hunia airae, ita zanu tumrar dilo gata roy. Ita dilo roile, behesti baf ar tan ḳas mayar zonor loge tumra-o gata roibae.
1JO 2:25 Ar iṭa-u oilo hou aḳeri zindegi, ze zindegi al-Mosie amrare dibar oada ḳorsoin.
1JO 2:26 Huno, tumrare zeguinte be-foti banaito sae, otar forisoy zananir lagi ami ita leḳlam.
1JO 2:27 Ashole al-Mosi taki tumra ze ḳelafoti faiso, ou ḳelafoti to tumrar dilo boshot ḳore. Erlagi dusra ḳeuror ges taki talim nibar kunu zorur nae, ou ḳelafotir ruhe tumrare dorḳari hoḳolta hikaiba. Tain to hok, tan maze na-hok kunta nai. Oḳon al-Mosir maze boshot ḳorar lagi tain zela talim disoin, tumra ṭik oula ro.
1JO 2:28 O sabal oḳol, amar foramish oilo, tan maze boshot ḳorat ro, teu tain zebla hirbar zaira oiba, ou shomoy amra shaosh faimu, tan samne aite shorom ḳorto nae.
1JO 2:29 Ar tumra zebla ekin ḳoro tain shullo-ana fak-forezgar, te eoḳan-o ekin ḳorio, ze bonda nek kamor ashik, tar zonom to shoyong Allar nur taki.
1JO 3:1 Huno, behesti bafe amrare ḳoto beshi maya ḳoroin! Tain amrare tan aolad ḳoia ḍaḳoin, ar ashole-o amra tan aolad. Ta-o i zogote amrare sine na, ḳaron zogote ou gaibi bafre-o sine na.
1JO 3:2 O shuna oḳol, oḳon to amra Allar aolad bonchi, erbade kita bonmu, ikan oḳono zani na. Ḳali zani, al-Mosi zebla dusrabar zair oiba, hou shomoy amra-o tan laḳan oimu. Amra to tanre tan asol surote deḳar shuzug faimu.
1JO 3:3 Ar zoto manshe al-Mosir ufre ila asha ḳore, tara nizore al-Mosir laḳan ḳaṭi bananit roy.
1JO 3:4 Ze manshe guna ḳore, he Allar hukum-ahkam bange, Allar hukum banga-u to guna.
1JO 3:5 Tumrar zana ase, al-Mosi oila be-guna masum, tain gunare ḳedanir lagi duniat zair oila.
1JO 3:6 Erlagi zera tan maze boshot ḳore, tara gunar fote sole na. Gunar gato zeguin foṛi roin, iguinte tanre deḳse-o na, sinche-o na.
1JO 3:7 O sabal oḳol, tumrare zanu ḳeu be-fote nito na fare. Al-Mosi to fak-forezgar, ar nek kamor ashik oḳol-o tan laḳan forezgar oy.
1JO 3:8 Oile gunar fotor ashik zera, tara Shoytanor murid, Iblis-Shoytane to foyla taki-u guna ḳorer. Tar ḳamre binash ḳorar niote, oḳon Allar ḳas mayar zon Ibnulla i duniat zair oila.
1JO 3:9 Te ze bondar zonom oise Allar nur taki, tar bitre Allar nuror bis boshot ḳore, erlagi he gunar gato foṛi roy na. Allai nur taki zonom oise ḳori, he gunar ḳamo foṛi roito fare na.
1JO 3:10 Ar zarzir amol deḳle-u buza zae, ḳe Allar aolad, ḳe Shoytanor fut: zeta manush nek fote sole na, tar mumin baire mohobbot ḳore na, he to Allar manush nae.
1JO 3:11 Tumra mulo taki-u ikan hunia airae, amrar lagi forz oilo, eḳe-oinnore mohobbot ḳora.
1JO 3:12 Te amra zanu Baba Adomor fut Kabilor laḳan na oi. He asil Iblisor murid, ingsha ḳoria tar afon baire kun ḳorsil. Zano ni kene kun ḳorsil? He hamesha naformani kam ḳorto, oile tar baie nek kam ḳorto.
1JO 3:13 O bai oḳol, duniar manshe zudi tumrare ginnae, te taijjub oio na.
1JO 3:14 Amra to amrar mumin baire mohobbot ḳori, erlagi buzram, amra moron taki basia zindegit aisi. Zera mohobbot ḳore na, tara to moronor gato foṛi roise.
1JO 3:15 Nizor baire zegie ginnae, he to kuni. Ar tumrar zana ase, kunu kunir dilo aḳeri zindegi boshot ḳore na.
1JO 3:16 Al-Mosie amrar lagi tan nizor zan bilai disla, oḳan taki-u amra buzchi, mohobbot ḳare ḳoy. Oḳon amrar bair lagi-o amrar zan bilai deoa zorur.
1JO 3:17 Shongsharo ḳaia-findia basar bebosta zar ase, he tar bair obab dekia-o zudi souk muzia boiroe, te tar bitre kila Allai mohobbot boshot ḳore?
1JO 3:18 Baba oḳolre, amra ḳali mukor maya na deḳaia, ḳamor mazdi zanu asol mohobbot deḳai.
1JO 3:19 Teu amra buzmu, amra hokor loge asi. Ar hok Allar samne amrar dilor tosolli aibo.
1JO 3:20 Ḳaron amrar dile-u zudi amrare dushi koia ray dey, te Alla Pak to i dil taki bout mohan, hokkolta-u zanoin.
1JO 3:21 Erlagi koiram, O shuna oḳol, amrar afon dile zudi amrare dushi shaibosto na ḳore, te shaosh ḳoria Allar dorbaro azira ditam farmu.
1JO 3:22 Ar tan gese amra zeta mangimu, ita tain diba. Ḳaron amra tan hukum-ahkam mania soli, ar ze ḳam ḳorle tain kushi oin, ḳali ou ḳam ḳori.
1JO 3:23 Tan hukum oilo, amra zanu tan ḳas mayar zon Ibnulla Isa al-Mosir ufre iman ani, ar eḳe-oinnore mohobbot ḳori. Ou hukum-u tain amrare disoin.
1JO 3:24 Ar ze bondae tan hukum mania sole, he tan maze-u boshot ḳore, ola tain-o tar maze boshot ḳoroin. Oḳon tain amrare ze Pak Ruhu dan ḳorsoin, ou ruhur mazdi amra buziar, tain amrar dilo boshot ḳoroin.
1JO 4:1 O shuna oḳol, duniat bout bonḍo nobi bar oisoin. Erlagi keu zudi aia ḳoy, ami ruhur bole matiram, te tumra zoldi bishash ḳorio na, borong zasai koria deḳo, i ruhu Allar ges taki aise ki na.
1JO 4:2 Allai ruhre sinar niom oilo, ze ruhe shikar ḳore manush surote Isa al-Mosie duniat toshrif anchoin, ou ruhu Allar ges taki aise.
1JO 4:3 Oile ze ruhe ou Isare shikar ḳore na, i ruhu Allar ges taki aise na. Ita oilo Kane-Dorjalor ruhu, ou dorjalor ruhu aibar ḳota tumra age huncho, ar oḳono he ou zogoto ase.
1JO 4:4 Oile O sabal oḳol, tumra to Allar manush, hou bonḍo oḳlor ufre tumra zitiso. Tumrar dilo ze ruhu asoin, ein to i zogotor ruhu taki bout mohan.
1JO 4:5 Ashole ou bonḍo oḳol to ou zogotor, erlagi tara ḳali zogotor buli bule, ar zogote-o tarar buli mane.
1JO 4:6 Ar amra oilam Allar manush. Allare zera sine, tara amrar buli mane. Oile zera Allar nae, tara amrar ḳota hune na. Ou nomunae amra dukabaz ruhu ar Allai hok ruhre sini.
1JO 4:7 O shuna oḳol, Allar deoa dan oilo mohobbot, erlagi amra zanu eḳe-oinne mohobbot ḳori. Ze bondar dilo mohobbot ase, tar zonom oise Allar nur taki, he Alla Pakre sine.
1JO 4:8 Ar zegur bitre mohobbot nai, he to Alla Pakre sine na, ḳaron Alla nize-u to mohobbot.
1JO 4:9 Alla Pakor mohobbot amrar maze ou nomunae zair oise, tain tan ḳas mayar zon Ibnullare ou duniat bezisoin, zate en usillae amra aḳeri zindegi hasil ḳortam fari.
1JO 4:10 Ar amra zen Alla Pakre mohobbot ḳorslam ila kunta nae, borong tain nize-u amrare mohobbot ḳoria, amrar gunar kofora oibar lagi, tan ḳas mayar zon Ibnullare zogoto faṭai dila, oḳṭare-u ḳoy mohobbot.
1JO 4:11 O shuna oḳol, Alla Pake zebla amrare ola mohobbot ḳorla, te amrar lagi-o zorur oilo eḳe-oinnore mohobbot ḳora.
1JO 4:12 Allare to ḳeu kunudin deḳse na. Oḳon amra zudi eḳe-oinnore mohobbot ḳori, te buza zaibo, tain amrar dilo boshot ḳoroin, tan mohobbote amrar dilo furafur fol dorse.
1JO 4:13 Amrare tan ruhu mubarok dan ḳorsoin, erlagi buzram, amra tan maze boshot ḳori, ar tain-o amrar maze boshot ḳoroin.
1JO 4:14 Amra nize deḳsi, dekia hari ou shakki diram, zogotor toraneala ḳanḍari hishabe, gaibi bafe tan ḳas mayar zon Ibnullare bezisoin.
1JO 4:15 Erlagi ze zone shikar ḳore, Hozrot Isa-u oila Allar ḳas mayar zon Ibnulla, tar dilo shoyong Alla Pak boshot ḳoroin, ar he-o Allar maze boshot ḳore.
1JO 4:16 Amrar loge Allar ze mohobbot ase, ikan amra zani, zania ekin-o ḳori. Ashole Alla nize-u mohobbot. Mohobbotor maze ze bonda boshot ḳore, he Allar maze-u boshot ḳore, ar Alla Pak-o tar maze boshot ḳoroin.
1JO 4:17 Ou nomunae mohobbot amrar dilor maze furafur folala oy. Teu kiamotor din amra shaoshi boni, ḳaron ou zogoto amra tan ronge rongi gesi.
1JO 4:18 Mohobbotor maze kunu ḍor-boy nai, shullo-ana mohobbote borong ḍor-boyre ḳedai dey. Ḍor-boyor maze to shaza faoar bab-shab ase, erlagi ḍor-boy zar bitre, he mohobbotor shullo-ana fol dorse na.
1JO 4:19 Te amra Alla Pakre mohobbot ḳori, ḳaron tain amrare foyla mohobbot ḳorsoin.
1JO 4:20 Ar ze manshe ḳoy, he Alla Pakre mohobbot ḳore, ḳoia tar mumin baire ginnae, he to misa matra. Ḳaron nizor souke deḳa baire zegie mohobbot ḳore na, a-deḳa Allare kila mohobbot ḳorbo?
1JO 4:21 Amra to tan ges taki ou hukum faisi, ze bondae Alla Pakre mohobbot ḳore, he zanu tar baire-o mohobbot ḳore.
1JO 5:1 Hozrot Isa-u oila Allar oada ḳora hou al-Mosi, ikan zera ekin ḳore, tarar zonom oise Allar nur taki. Zano ni, ze manshe kunu ma-bafre mohobbot ḳore, he erar aoladre-o mohobbot ḳorbo.
1JO 5:2 Te Alla Pakor aoladre mohobbotor befar kila buzaitam? Alla Pakre mohobbot ḳoria tan hukum-ahkam mania solle-u buza zae, amra hasau tan aoladre mohobbot ḳori.
1JO 5:3 Allar hukum-ahkam mania sola-u oilo Allare mohobbot ḳora. Ar tan hukum-ahkam mana to kub ḳoṭin kunu ḳam nae.
1JO 5:4 Ḳaron Allar nuror aolad oḳol i zogotor ufre joyi oin, ar zogotor laṛait ze zinishor bole joyi oisi, ikṭa oilo amrar iman.
1JO 5:5 Hozrot Isa-u oila Allar ḳas mayar zon Ibnulla, ikan zera ekin ḳore, i zogotor laṛait tara-u ḳali joyi oy.
1JO 5:6 Isa al-Mosi oila hou zon, zein fani ar lour bole duniat aisoin. Tain ḳali fanir zoriae nae, borong hou pak gusolor fani ar solibo zan kurbanir lour bole aisoin. Ita befare Allai Pak Ruhe shakki dira, ar ou ruhu to hok.
1JO 5:7 Ashole tino shakkie shakki dira:
1JO 5:8 ruhu, fani ar lou, ou tin shakkir shakki eḳ shoman.
1JO 5:9 Manshor mukor shakki zebla amra mani, te Allar deoa shakki to aro mozbut, tan ḳas mayar zon Ibnullar befare tain ola shakki disoin.
1JO 5:10 Ar ou mayar zonor ufre zera iman ane, tarar dile-o oula shakki dey. Oḳon Allai shakkire zera manche na, tara to shoyong Allare-u misa matra banailise, ḳaron Allae nize tan mayar zonor befare ze shakki disoin, tara ita manche na.
1JO 5:11 Tan shakki oilo, tain nize amrare aḳerator zindegi dan ḳorsoin, ou zindegi tan ḳas mayar zonor gese ase.
1JO 5:12 Ze manshe ou mayar zonre faise, he zindegi-o faise. Ar Allar hou mayar zonre zera faise na, tara i zindegi-o faise na.
1JO 5:13 Baiainre, tumra zera Isa Ibnullar ufre iman ancho, tumrare zananir lagi ami ita leḳlam, tumra aḳerator zindegi failiso.
1JO 5:14 Oḳon amra tan dorbaro ou shaosh faisi, tan morzi mafik amra kunta magile, ita tain hunba.
1JO 5:15 Amra zebla zani, amra zeta magi ita tain hunoin, te eoḳan-o zani, tan dorbaro amra zeta magisi, ita nichchit failisi.
1JO 5:16 Ḳeu zudi kunu mumin baire ola ek guna ḳorat deḳe, ze guna moutor foti nae, te he aroz ḳorle Allae hou baire hefazot ḳorba. Ami ino ou laḳan gunar ḳota ḳoiram, zerar guna moutor foti nae. Oile mono rakio, moutor foti guna-o ase, ila gunar befare aroz ḳorar lagi ami koiram na.
1JO 5:17 Ashole hoḳol zator naformani-u guna, oile hoḳol guna to moutor foti nae.
1JO 5:18 Amra zani, Allar nur taki ze bonda oḳlor zonom oise, era gunar ḳamo bondi roy na. Borong Allar nure zonom loa hou ḳas mayar zone tarar zanor hefazot ḳoroin, Iblise tarare ḳobza ḳorto fare na.
1JO 5:19 Ar amra to zani, ḳali amra-u oilam Allar manush, bad-baki asta zogot-u Iblisor faor tole.
1JO 5:20 Amra eoḳan-o zani, Allar ḳas mayar zon aia hari amrare ou aḳol disoin, zate hok Allare amra sini. Te hok Allar loge amrar milon oise, mani tan ḳas mayar zon Isa al-Mosir loge amrar milon oise. Tain-u to hok Alla, tain-u aḳeri zindegi.
1JO 5:21 O sabal oḳol, hoḳol nomunar murtipuja taki basia ro. Amin.
2JO 1:1 Ami hou murobbie ita leḳram, Allar fosondor hou Begom Sayebani ar tan aolad oḳlor gese. Allai hokor ḳatire ami zarare mohobbot ḳori, ḳali ami nae, aro zoto manshe Allai hok zanchoin tara hoḳole zare mohobbot ḳoroin, ou tumrar gese leḳram.
2JO 1:2 Ou hok to oḳon amrar bitre boshot ḳore ar hor-hamesha amrar loge roibo.
2JO 1:3 Hok ar mohobbotor ḳatire, gaibi baf Alla Pak ar ou bafor ḳas mayar zon Ibnulla, ein-u Isa al-Mosi, erar torof taki rohomot, meherbani ar shanti amrar loge roibo.
2JO 1:4 Gaibi bafe zela hukum disoin, hou hukum mafik afnar ḳoyzon fua-fuṛin Allai hokor fote soler dekia ami kub kushi oisi.
2JO 1:5 O mayar Sayebani, afnar gese amar eḳṭa onurud ase, amra zanu forteḳe eḳe-oinnore mohobbot ḳori. Ar ou ze onurud ami koriar, iṭa to noya kunu hukum nae, borong mulo taki-u amra ou hukum faislam.
2JO 1:6 Allar hukum mafik sola-u oilo mohobbot. Tumra foyla taki ze hukumor ḳota hunia airae, olaḳan mohobbotor fote solo.
2JO 1:7 Duniat oḳon bout laḳan dukabaz bar oisoin. Zetae ḳoin, manush surote Hozrot Isa al-Mosi duniat aisoin na, ila mat zera mate era oilo hou dukabaz ar Kane-Dorjal.
2JO 1:8 Te tumra hushiar roio, zate tumrar menotor fol na araia shullo-ana furuskar ḳamaitae faro.
2JO 1:9 Zeta manshe al-Mosir deoa talimor shima faroi zain, tan talimor bitre roin na, tarar dilor bitre Alla nai. Oile ze manush tan talimor ufre tir roy, tar dilor maze gaibi baf ar tan ḳas mayar zon Ibnulla, i duiozon-u asoin.
2JO 1:10 Kunu ustad tumrar gese aile he zudi ou laḳan talim na dey, te tare salam ḳorio na, ar tumrar baṛit asroy-o dio na.
2JO 1:11 Tare zegie salam ḳorbo, he to ogur bod ḳamor bagi oibo.
2JO 1:12 Tumrar gese to amar aro bout ḳota leḳar asil, oile ḳagoz-ḳolome hoḳolta leḳtam sairam na. Borong amar kial oilo, ami nize aia tumrar loge boia samna-samni gof ḳormu, teu hoḳlor bitoror kushi miṭbo.
2JO 1:13 Afnar ze boinre Allae fosond ḳorsoin, tan aolad oḳole afnare salam zanaira. Amin.
3JO 1:1 Allai hokor ḳatire ami zare mohobbot ḳori, amar mayar dust Gousor gese, ami hou murobbie ita leḳram.
3JO 1:2 O mayar dust, ami dua ḳoriar tumar hokkolta zanu shoṭik babe sole, aro saiar tumar dil zela bala tumar shoril-gotor-o zanu ola bala taḳe.
3JO 1:3 Tumar oḳan taki koyzon mumin bai aia ḳoila, Allai hokor befare tumi bule mozbut aso, ikan hunia ami kub kushi oisi.
3JO 1:4 Amar aolad oḳol Allai hokor fote solra hunia kushi lager, ikan taki boṛo ar kunu kushir ḳobor oy ni?
3JO 1:5 O mayar dust, tumar osina hou musafir baiainre zela kezmot ḳorso, ita to ḳaṭi muminor ḳam.
3JO 1:6 Tumar maya-mohobbotor ḳota tara zomator huru-boṛo hoḳlor samne ḳoise. Oḳon Allar kushi mafik tarare sohi-salamote faṭanir bebosta ḳori deo, te aro bala oibo.
3JO 1:7 Tara ḳali al-Mosir tobligo bar oisoin, torikar baira manshor ges taki kunu shaijjo loisoin na.
3JO 1:8 Erlagi ou laḳan manshore shaijjo ḳora zorur, zate hok kamo amra-o shorik taki.
3JO 1:9 Ami age zomator gese ekkan siṭi leḳslam, oile ḳobis Ditrife zomator netagiri korto sae, erlagi he amrar ḳota hune na.
3JO 1:10 Oḳon he zeta ḳorer, ami aia hari ita hoḳolre zanaimu. He amrare ingsha ḳoria bout misa bodnam roṭaise. Ḳali ikan nae, mumin kunu baire he maner na, ar oinno zera manto sae, tarare-o bada der, emonki zomat taki bar ḳori der.
3JO 1:11 O mayar dust, tumi bod ḳamor ḳoredi na douṛaia borong nek kam ḳoro. Ze manshe nek kam ḳore he oilo Allar bonda, ar zegie bod ḳam ḳore, he to Allar doroshon faise na.
3JO 1:12 Zano ni, hoḳole-u Dimitri bair shunam gaira, emonki shoyong Allar hoke-o en tarif ḳorra. Amra-o en tarif ḳorram, ar tumi to zano amrar mukor ḳota hasa.
3JO 1:13 Baire, tumar gese leḳar boutta asil, oile ḳolome-ḳalie hoḳolta leḳram na.
3JO 1:14 Asha ase, kub zoldi tumar loge deḳa-shakkat oibo, ou shomoy mukamuki hoḳolta gof ḳormu.
3JO 1:15 Tumar dust oḳole-o tumare salam zanaisoin. Amrar hoḳol bondu-bandobre salam zanaio. Assalamu alaikum.
JUD 1:1 Ami Ehuda to sahabi Iakubor bai ar Hozrot Isa al-Mosir gulam. Amrar gaibi baf Alla Pake zerare mohobbot ḳoroin, zera Allai daot faisoin, ar Isa al-Mosie zerar hefazot ḳoroin, ou sohifaḳan ami erar gese leḳram.
JUD 1:2 Tumrar ufre besh ḳori meherbani, shanti ar mohobbot zari rouk.
JUD 1:3 O mayar dust oḳol, amra hoḳole mili ze nazator bagi oisi, ou nazator befare ami kub kiali oia tumrar gese leḳtam saisi. Ermaze buzlam, aro dorḳar ase imanor lagi laṛair befare lekia tumrare utshaho deoa. Allae tan pak bonda oḳolre siroḳalor lagi ze imani don disoin, ou Isayi imanor fokke dile-zane laṛai kora to zorur.
JUD 1:4 Itar zorur oise, ḳaron zeta manshe be-dini kamor shaza faibar ḳota ag taki-u leḳa asil, tole tole ota manush aia tumrar dolo hamai gese. Amrar Allar rohomotre tarar bod ḳaish miṭanir atiar banaise, ar amrar eḳmatro Malik Isa al-Mosir ulṭa sole.
JUD 1:5 Te ou befar to tumra kub bala ḳori-u zano, ta-o ami kali oḳan mono ḳorai diram, Mishor desh taki Boni Israilre azad ḳoria anar bade, tarar mazor zetae iman anchil na, malike tarare binash ḳorsla.
JUD 1:6 Ar zeta firista oḳole nizor day-dayitto adae na ḳoria, nizor ashon taki hori gesla, Allae tarare siroḳal dori shikoldi bandia goin andair goro raḳsoin Hashoror dinor lagi.
JUD 1:7 Ou laḳan Hozrot Lut nobir zomanar Sadum, Amura ar ḳanda-ḳasar hoḳol ṭaunor manshe otar laḳan zina ḳorsil, ḳali zina nae, tara kub ḳobisi zina ḳorae siroḳal dori duzoḳo zolbo, ita oilo eḳṭa nishana.
JUD 1:8 Erbade-o ou bonḍo ustad oḳol, zetae baze kuab deki deki talim dein, tara ḳobisi kam ḳoroin, kunuzat shashon manoin na, ar batuni shordar oḳlor bodnam gain.
JUD 1:9 Emonki asmanor shordar firista Mikaile zebla Hozrot Musar lash loia Iblisor loge torka-torki korsla, ou shomoy tain Iblis-Shoytanor bodnam gaia dushi shaibosto ḳorar shaosh ḳorla na, borong koila, “Malike zanu tumare bond ḳoroin.”
JUD 1:10 Oile ou bonḍo ustad oḳole zeta buze na otar bodnam gae, ar zongli zanuaror laḳan nizor aḳole nizor shorbonash goṭae.
JUD 1:11 Ita to lannoti! Iguin Baba Adomor lannoti fut Kabilor laḳan bonchoin. Duniabi labor ashae tara hou bonḍo nobi Balamor ḳaishor ato nizore shofi dise. Ar Musa nobir bae bigṛi zaora hou neta Kurahor laḳan tarar binash ase.
JUD 1:12 Te ou lannoti ota aia zebla be-shoromor laḳan tumrar mezbani kae, ou shomoy ita oizain tumrar ḳanir talor moyla. Tara ḳali nizor shartor danda ḳore. Tara oila asmano uṛra huda megor kuṭi, ba bagano duibar mora-hukna fol gas, zegie fol na dorae, zoṛe-foṛe huria tulia falail oise.
JUD 1:13 Ar tara oila tufanor ḳalor doriar ḍeur laḳan, doriar ḍeue zela fenare bashaia tule, tarar bod ḳamor shorom-o ola bashia uṭe. Tara oila sairobae sokkor deora terar laḳan, itar hesh dosha oilo hor-hameshakur lagi zoma raḳa goin andair.
JUD 1:14 Baba Adomor ḳandanor shat nombor zon Hozrot Idrise-o ota manshor befare ḳoia gesoin, “Huno, manshor bisar ḳorar lagi, Malik Moulae tan azar azar fobitro firista loia aira.
JUD 1:15 Zetae be-dini kam ḳorsoin ar tan birudde lannoti mat matisoin, oḳon ou be-din gunagar oḳlor faona hishabe tain itare furafur dushi shaibosto ḳorat aira.”
JUD 1:16 Itae to hamesha-u na-sobri koroin, nizor ḳofalre dushoin ar tarar bod ḳaishor boshe soloin. Tarar hoḳol mato nizor boṛai-beṭagiri deḳain, sharto hasilor lagi manshor bozona ḳoroin.
JUD 1:17 Oile O mayar dust oḳol, ami tumrare ḳoiram, amrar Malik Isa al-Mosir sahabi oḳole age zeta bataisoin, ita mono rakio.
JUD 1:18 Era tumrare ou hushiari dita na ni, “Aḳeri zomanat forezgarre ṭaṭṭa-moshkora ḳorra eḳzat manush aiba, aia tarar be-dini bod ḳaish mafik solba.”
JUD 1:19 Duniabi babor ita manshe ḳali doladoli lagain, tarar bitre Allai Pak Ruhu nai.
JUD 1:20 Ta-o mayar baiain, tumrar ou nikut fak-fobitro imanor ufre bor ḳoria nizore goṛia tulat ro, ar Pak Ruhe kamil oia munazat ḳorat ro.
JUD 1:21 Allar mohobbotor maze nizore bandia raḳo, ar aḳeri zindegi faibar ashae amrar Malik Isa al-Mosir meherbanir lagi bar sao.
JUD 1:22 Tumrar maze zerar imane loṛa-soṛa ḳore, tarare doya ḳoro.
JUD 1:23 Aguin taki tulia ania manshor zan basao. Ar gunar bod ḳaishor zalae zetar zindegi borbad oigese, itar finnor nafak kafoṛ ḳanre-o ginna ḳoro, ar nizore hefazote rakia tarare doya ḳoro.
JUD 1:24 Ar ze Allae tumrare usṭa ḳaoa taki basain, zein nikut halote tumrare kushi-bashie tan shan-tozollir samne azir ḳorta faroin,
JUD 1:25 hou eḳmatro Alla zein amrar zan basain, tan zalal-shan, mohima, kudroti bol-shokti, ar raz-ḳemota amrar Malik Isa al-Mosir usillae zair ouk, hokkol zugor ag taki oḳon forzonto ar zuge zuge hor-hamesha-u ola ouk. Amin.
REV 1:1 Ou kitabo zotota leḳa oise, ita Alla Pake Isa al-Mosire zanaisoin, ar al-Mosie ita zair ḳorsoin. Tuṛa dinor bitre zeta zeta befar nichchit goṭibo, ita zate tan gulam oḳole zanoin. Al-Mosie tan firista faṭaia nizor gulam sahabi Hannanre ita hoḳolta zanaila.
REV 1:2 Sahabi Hannane Allar kalam ar Isa al-Mosir shakkir befare zoto doroshon deḳla, ou doroshonor befare-u tain zobanbondi dila.
REV 1:3 Ar hou zon-u nek-kofali, zein i kalamor agam ḳobor oḳol tilaot ḳoroin, ar tara-o nek-kofali, zera i kalam hunoin, hunia hari amol ḳoroin; ḳaron shomoy to daro aichche.
REV 1:4 Te ami Hannane Ruman bashshair Asiya deshor shato zomator gese ou zobanbondi leḳram. Zein asla, zein asoin ar zein hamesha roiba hou Alla Pak, ar tan toḳtor samne ze shat nomunar ruhu taḳoin, era ar zein hok-halal shakki hou Isa al-Mosie tumrare rohomot ar shanti dan ḳoroukka. Tain to murda oḳlor maz taki foyla zinda oia uṭisoin, tain-u duniar raza oḳlor bashsha. Tain amrare mohobbot ḳoroin, erlagi nizor zan kurbani dia, amrare gunar shaza taki basaisoin.
REV 1:6 Tain amrare loia eḳ bashshai tiar ḳoria, tan gaibi baf Allar ebadotir lagi imam banaisoin. Tan mohima ar kudroti bol hor-hamesha boail rouk. Amin.
REV 1:7 Huno, tain megor saḳat oia toshrif anra, forteḳe tanre soukdi deḳbo, zara laḳṛidi banail solibo gatia tanre zane marilisil tara-o deḳbo, ar tan lagi duniar hoḳol zatie zure zure ḳandiba. Oula-u ouk, Amin.
REV 1:8 Alla Mabude bataira, “Ami-u Alif ar Ya, zein asoin, zein asla ar zein hamesha roiba. Ami-u shorbo-shoktiman.”
REV 1:9 Ami to tumrar bai Hannan, Hozrot Isar ummot oae ami-o tumrar laḳan eḳoi koshṭo, eḳoi bashshai ar eḳoi soboror bagi oisi. Allar kalam toblig korae ar Isar fokke zobanbondi deoae amare Patmus namor difo nia bonobash deoa oisil.
REV 1:10 Ermaze Hozrot Isar fobitro din, eḳ Robibare ami Allai Pak Ruhur maze furafur ḍubi gelam, omon shomoy amar ḳoredi shingar aoazor laḳan eḳ aoaz hunlam.
REV 1:11 Hunlam, kunu eḳzone amare ḳoira, “Huno, tumi oḳon zeta deḳrae, ita ek kitabo leḳo, lekia Ifis, Izmir, Forgam, Tuatira, Sardi, Filadilfia ar Laodikea ṭaunor shato zomator gese faṭao.”
REV 1:12 Amar loge zein matira, tanre deḳar kiale ami koredi gurlam, guria deki, shunar shatṭa serag dani.
REV 1:13 Ou serag danir mazḳano bin-Adomor laḳan eḳzonre deḳlam. Tan finno fao forzonto lamba fainjabi, ar bukur ufre shunali eḳ foṭṭi.
REV 1:14 Tan matar sul dudor laḳan dola soḳsoḳa. Tan souk agunir lukkar laḳan.
REV 1:15 Fao oilogi, aguindi zalaia manjia forishkar ḳora soḳsoḳa fitolor laḳan, ar tan golar aoaz oilo, zure zure ḳol-kolaia zaoa fanir futor laḳan.
REV 1:16 Tan mukor surot asil fura zolmol ḳorra shuruzor laḳan. Tan muk taki darail ekkan toluar bar oilo, i toluaror duio galabae dar asil, ar tan ḍain ato asil asmanor shatṭa tera.
REV 1:17 Tane dekia ami morar laḳan tan faor ḳandat foṛi roilam. Teu tan nizor ḍainor at amar ufre toia ḳoila, “Ḍoraio na. Ami-u aual ar ami-u aḳer,
REV 1:18 ami-u Haiul-Kaiyum, zein nize nize hor-hamesha asi. Amar mout oisil, oile oḳon ami zug zug dori siroḳal zinda asi. Mout ar ḳoyboror sabi amar ato ase.
REV 1:19 Erlagi-u tumi oḳon zeta deḳrae, er age zeta goṭise ar bade zeta goṭibo, ita hokkolta tumi lekia to.
REV 1:20 Tumi shunar ze shatṭa serag dani deḳso ar amar ḍain ato shatṭa tera deḳso, itar mani oilo, shato tera oilo shat zomator shatzon firista, shatṭa serag dani oilo hou shato zomat.”
REV 2:1 Ifis ṭaunor zomator firistar gese leḳo: Zein nizor ḍain ato asmanor shatṭa tera doria, shunar shatṭa serag danir mazḳano sola-fira ḳoroin, tain ou ḳota ḳoira,
REV 2:2 Ami to tumrar ḳam-ḳaz, tumrar menot ar tumrar soboror ḳota-o zani. Ami zani, tumra kunuzat bod manshore shoijjo ḳortae faro na, ar sahabi na oia-o zeguinte nizore sahabi koia forisoy dein, tarare forikka ḳoria deḳso, ar forman-o faiso tara zen beimani mater.
REV 2:3 Tumrar bout sobor ase, tumra amar lagi bout ḳoshṭo ḳorrae, kunumonte heran oiso na.
REV 2:4 Oile tumrar birudde to amar nalish ase, tumra foyla amare zela mohobbot ḳortae, oḳon ita bad dilaiso.
REV 2:5 Tuṛa sinta ḳori deḳo, tumra ḳoto usa taki koto lamat lami geso. I halot taki dil bodlaia, age zeta ḳortae oḳon hirbar ola ḳoro. Ar zudi dil na firao, te ami tumrar gese aia tumrar serag danikan zaga taki horailimu.
REV 2:6 Tumrar to eḳṭa gun ase, Nikulayti oḳole zeta ḳam ḳoroin tumra itare ginna ḳoro, ar ami-o itare gin ḳori.
REV 2:7 Zar ḳan ase he hunouk, Pak Ruhe zomat oḳolre kita bataira. Ze zon joyi oibo tare ami Alla Pakor Zannatul-Ferdousor zindegi-gasor fol ḳaite dimu.
REV 2:8 Izmir ṭaunor zomator firistar gese ou ḳota leḳo: Zein aual ar aḳer, zein mara gesla, bade zinda oisoin, tain oḳan ḳoira,
REV 2:9 Ami to tumrar obab-onoṭon ar ḳoshṭor ḳota zani, oile erbade-o tumra doni. Zeta manshe ḳaṭi Ihudi name nizor forisoy dey, otoso Ihudir amol nai, borong Iblisor dolor manush, itae tumrar birudde kita matira ami to zani.
REV 2:10 Tumra ze mosibotor maze foṛbae, i mosibotre eḳdom ḍoraio na. Zano ni, Iblise forikka ḳorar niote tumrar mazor ḳoyzonre zelo dibo, hono tumra dosh din ḳoshṭo faibae. Huno, imanor fote tumra moron forzonto hok-halal roio, teu joyor mala hishabe ami tumrare aḳeror zindegi dimu.
REV 2:11 Zar ḳan ase he hunouk, Pak Ruhe zomat oḳolre kita bataira. Ze zon joyi oibo, dusrabaror moute, mani duzoḳe tar ḳeti korar kunu shaiddo nai.
REV 2:12 Forgam ṭaunor zomator firistar gese ou ḳota leḳo: Dar-ala ze toluaror duio galabae dar ase, ou toluaror malike oḳan ḳoira,
REV 2:13 Tumra kun zagat boshot ḳorrae ita to ami zani, ikano Iblisor shinghashon ase. Oile amar befare tumra hok-halal aso, amar ufror imanre oshikar ḳorso na. Amar toblig korra hou hok-halal zon Antipasre zebla shohid ḳora oisil, Iblisor aḳrar maze, tumrar ṭauno tare kun ḳora oisil, hou shomoy-o tumrar imanre oshikar ḳorso na.
REV 2:14 Ta-o tumrar birudde amar kisu mat ase. Tumrar ono ola kisu manush asoin, zetae Musa nobir amolor bonḍo nobi Balamor talime soloin. Ou Balame bashsha Balakre hikaisil, zate he devtar murtir samnor foshad ḳaoaia ar zina ḳoraia, Boni Israilre gunar fote ney.
REV 2:15 Ita saṛa-o Nikulayti oḳlor talime zeta soloin, ota ḳoygu-o tumrar ono asoin.
REV 2:16 Erlagi i halot taki tumra dil bodlao, ar na bodlile ami kub zoldi tumrar daro aimu, aia amar mukor toluardi tarar loge jihad ḳormu.
REV 2:17 Zar ḳan ase he hunouk, Pak Ruhe zomat oḳolre kita bataira. Ze zon joyi oibo, ami tare lukail behesti manna taki tuṛa manna ar eḳṭa dola fattor dimu. Ou fattoror ufre omon eḳ nam leḳa taḳbo, i nam ḳeu sine na; ze zone ou fattor faibo, ḳali he-u i nam sinbo.
REV 2:18 Tuatira ṭaunor zomator firistar gese ou ḳota leḳo: Allar ḳas mayar zon Ibnulla, tan souk oilo agunir lukkar laḳan, fao duioḳan manjia forishkar ḳora soḳsoḳa fitolor laḳan, tain oḳan ḳoira,
REV 2:19 Ami to tumrar ḳam-ḳaz, tumrar maya-mohobbot, iman, kezmot ar tumrar soboror ḳota zani. Ar eoḳan-o zani, tumra age zeta ḳam ḳorso, oḳon er taki aro beshi kam ḳorrae.
REV 2:20 Oile tumra to Izabel namor ou beṭire asroy dirae, erlagi tumrar birudde amar ekkan ḳota ase, tai nizore nobi koia forisoy dey. Amar bonda oḳolre tai zina ḳora ar devtar samnor foshad ḳaoa hikaia be-fote nergi.
REV 2:21 Ou zina taki touba ḳorar lagi ami taire shomoy dislam, oile tai touba ḳorte razi nae.
REV 2:22 Huno, erlagi ami taire eḳ bisnat falaia toimu, tair loge zetae zina ḳoroin, itae zudi touba na ḳoroin, te tarare-o boṛo mosiboto falaimu.
REV 2:23 Tair fua-fuṛinre-o ami marilimu. Teu hoḳol zomate zaniliba, ami to manshor dilor ar monor ḳobor raki. Ami amol-nama dekia tumra forteḳ zonor fol dimu.
REV 2:24 Tuatira zomator baki mumin oḳolre ḳoiram, tumra zera ou beṭir ḳotae solo na, manshe zetare Iblisor goin talim ḳoin, tumra zera hou fot sino na, ami tumrare dusra kunu bar ditam nae.
REV 2:25 Ḳali tumrar zeta ase, ami na aoa forzonto oḳnainre tumra mozbut ḳori doria roio.
REV 2:26 Amar gaibi bafe zela hokkol zatir ufre amare ḳemota disoin, zera joyi oibo, tarare-o ami ou ḳemota dimu. Ami ze ḳame kushi oi ou ḳam zera aḳer forzonto ḳorbo, tara i kemota faiba.
REV 2:27 Tara luar laṭi dia itare shashon ḳorba, ar maṭir fatilor laḳan itare surmar ḳorba.
REV 2:28 Zera joyi oibo, ami tare fozoror shuk-tera-o dimu.
REV 2:29 Zar ḳan ase he hunouk, Pak Ruhe zomat oḳolre kita bataira.
REV 3:1 Sardi ṭaunor zomator firistar gese leḳo: Allar shat nomunar ruhu ar shatṭa tera zein doria raḳsoin, tain oḳan ḳoira, Tumrar ḳam-ḳaz to ami zani. Tumra zinda aso ḳoria tumrar bout shunam ase, oile ashole to tumra murda.
REV 3:2 Tumra hozag oia uṭo, ar bad-baki zotota morar foti oigese, itare bol zugao. Huno, amar Allar samne tumrar ekkan ḳam-o ami shoṭik deḳsi na.
REV 3:3 Erlagi tumra zeta faiso ar zeta huncho, ota iad raḳo ar amol ḳoro. Tumrar oḳonkur halot taki dil bodlao. Tumra zudi hozag na o, te ami suror laḳan lukaia aimu, kun bala tumrar gese aimu, tumra ṭer-u faitae nae.
REV 3:4 Te ou Sardi zomato tumrar ola ḳoyzon manush asoin zerar lebaso kunu kut nai, mani tarar sal-cholon ḳarafir bae gese na. Tara forezgar bonda, erlagi tara forishkar dola lebas findia amar loge sola-fira ḳorba.
REV 3:5 Ze zon joyi oibo, he ola dola lebas finbo. Aḳerator zindegi kata taki tar nam ami kunudin-o fustam nae. Borong amar gaibi baf ar tan firista oḳlor samne ami tare amar ḳoia shikar ḳormu.
REV 3:6 Zar ḳan ase he hunouk, Pak Ruhe zomat oḳolre kita bataira.
REV 3:7 Filadilfia ṭaunor zomator firistar gese leḳo: Zein hok ar fak-fobitro, zen ato Bashsha Daud nobir sabi ase, zein kulle ar ḳeu bond ḳorto fare na, ar bond ḳorle ḳeu kulto fare na, tain oḳan ḳoira,
REV 3:8 Ami to tumrar ḳam-ḳaz zani. Huno, ami tumrar samne ekkan duar kula raḳlam, ikan bond ḳorar ḳemota ḳeuror nai. Ami to zani, tumra kub ḳomzur, erbade-o tumra amar hukum amol ḳorso ar amare oshikar ḳorso na.
REV 3:9 Zera Ihudi koia nizor forisoy dey otoso asol Ihudi nae, Iblis-Shoytanor dolor hou beiman oḳolre ami tumrar gese anaimu, tumrar fao-o dorai kodombusi koraimu, ar tarare zanai dimu ami tumrare mohobbot ḳori.
REV 3:10 Tumrare sobor ḳorar lagi ami ze hukum dislam ita tumra mancho; erlagi i duniar ufre mosibotor ze shomoy aia azer, hou shomoy taki ami tumrare hefazot ḳormu. Duniar manshore forikka ḳorar lagi ou mosibotor shomoy aibo.
REV 3:11 Huno, ami kub zoldi airam. Tumrar zeta ase otare mozbut ḳori doria raḳo, zate tumrar joyor mala ḳeu ḳaṛia nito na fare.
REV 3:12 Ze zon joyi oibo, tare ami amar Allar goror eḳṭa kuṭi banaimu, he ar kunudin bar oia zaito nae. Ami tar ufre amar Allar nam ar Allar ṭaunor nam-o leḳmu. Hou ṭaun oilogi noya Zeruzalem. Behestor maz taki, amar Allar daro taki hou ṭaun lamia aibo. Ar ze zon joyi oibo, tar ufre ami amar noya namḳan-o leḳmu.
REV 3:13 Zar ḳan ase he hunouk, Pak Ruhe zomat oḳolre kita bataira.
REV 3:14 Laodikea ṭaunor zomator firistar gese leḳo: Zen nam Amin, zein hok-halal shakki, zein Allar foyda ḳora hokkoltar mul kuṭi, tain oḳan ḳoira,
REV 3:15 Tumrar ḳam-ḳazor ḳota to ami zani. Tumra oilae na ṭanḍa, na gorom. Tumra hoy ṭanḍa na oy gorom oile bala oilo one.
REV 3:16 Oile tumra to umli gorom, na ṭanḍa, na gorom, erlagi ami amar mukor sefor laḳan tu ḳori tumrare falai dimu.
REV 3:17 Tumra to ḳoirae, tumra bout doni, tumra boṛoluk oigeso, erlagi tumrar kuntar obab nai. Ita kub bala ḳota, oile ashole to tumra buzrae na, tumra kub duki, ḳangal, gorib, anda ar lemṭa aso.
REV 3:18 Erlagi ami tumrare ou ufodesh diram, aguindi zalail ḳaṭi shuna tumra amar ges taki loia neo, zate tumra hasaror doni oitae faro. Amar ges taki dola lebas loia nia findo, teu tumrare ar lemṭa deḳa zaito nae. Amar ges taki sokut laganir surma loia neo, teu tumra hasaror souke deḳbae.
REV 3:19 Huno, ami zerare maya ḳori, tarar dush-tiruti deḳai dei ar shashon-o ḳori. Erlagi tumra umli gorom taki fura gorom oia touba ḳoro.
REV 3:20 Zano ni, ami duaror gese ubaia duaro ṭukairam. Amar golar aoaz hunia zudi keu tar duar kulia dey, te ami tar bitre hamaimu, tar loge ḳana-dana ḳaimu ar he-o amar loge ḳana-dana ḳaibo.
REV 3:21 Ami zela joyi oia amar gaibi bafor loge tan fobitro arshor kursit boisi, ṭik ou laḳan ze zon joyi oibo, tare-o ami amar loge amar kursit boar odikar dimu.
REV 3:22 Zar ḳan ase he hunouk, Pak Ruhe zomat oḳolre kita bataira.
REV 4:1 Erbade ami doroshon deḳlam, behestor ekkan duar kula ase. Ar ami tan golar aoaz hunlam, shingar aoazor laḳan zein age matisla, tain amare ḍaḳ dila, ḳoila, “Tumi ono uṭia ao. Ami oḳon tumare deḳaimu, erbade kita kita nichchit goṭibo.”
REV 4:2 Ḍaḳ hunar loge loge-u ami Pak Ruhe kamil oilam, ar deḳlam, behestor maze ekkan toḳt ase, ou toḳtor ufre eḳzon boat asoin.
REV 4:3 En surot oilo, dami hira ar lal monir laḳan. I toḳtor sairo galabae asil rongdenu, ita deḳte ekkere ḳosua fanna monir laḳan.
REV 4:4 Ou toḳtor sairo ḳandabae aro sobbishḳan toḳt asil, hou toḳto boat asla sobbishzon murobbi neta. Erar lebas asil dola soḳsoḳa ar matat asil shunar taz.
REV 4:5 Mazḳanor toḳt taki megor zilkani, guṛ-guṛi ḍaḳ ar bezuita ṭaṭari shobdo baronit asil. Er samne shatṭa mushal zalail asil, i mushal oilo Allar shat nomunar ruhu.
REV 4:6 Toḳtor samne foṭikor golashor laḳan forishkar ḳasor eḳ doria asil. Ar ou mazor toḳtor sairo galat sairzon zandar asil, erar samne-fise duiobae souk oḳole bora.
REV 4:7 Foyla zandarṭa deḳte shinghor laḳan, dusraṭa bisalor laḳan, tin nomborṭa manshor laḳan ar sair nomborṭa uṛal deora silor laḳan.
REV 4:8 Ou sairo zandaror forteḳor soyṭa ḳori ḍaḳna asil, ar bare-bitore sairobae souk asil. Tara din-rait hamesha ou zikir ḳorra, “Kuddusun, kuddusun, kuddusun, Rabbu Ilahul Kadir, kana wa-hua kainus saiyatin. Fobitro, fobitro, fobitro Alla Mabud Shorbo-shoktiman, zein asla, zein asoin, ar zein hamesha roiba.”
REV 4:9 Zein siroḳalin zinda, zein toḳto boat asoin, ou zandar oḳole zebla-u tan tarif, shomman ar shukria zanain,
REV 4:10 ou shomoy zein toḳto boat asoin, zein siroḳalin zinda, en samne hou sobbishzon murobbi neta noto oia soizda ḳoroin. I neta oḳole zarzir matar taz shinghashonor samne kulia toia ḳoin,
REV 4:11 “O amrar Mabud Alla, tumi to ijjot, tarif ar kudroti kemotar zoiggo. Tumi-u to hoḳolta foyda ḳorso, tumar morzie hoḳolta foyda oise ar ṭikia ase.”
REV 5:1 Ou toḳtor maze zein boat asla, tan ḍainor ato ami ekkan kitab deḳlam. Kitabor bare-bitore kunta leḳa ase, ikan shatṭa sil dia sil-sappoṛ mara.
REV 5:2 Bade ami deḳlam, kub shoktiala eḳzon firistae zure zure ḳoira, “Ila zoiggo ḳeu asoin ni, zein ou sil-sappoṛ bangia kitabḳan kulta farba?”
REV 5:3 Oile asman-zomin ba fatalor maze ila ḳeu millo na, zein ikan kula ba er bitor deḳar zoiggo.
REV 5:4 Teu ami Hannanor kub ḳandon ailo, ḳaron i kitabḳan kular ba er bitor deḳar zoiggo eḳzon-o faoa gelo na.
REV 5:5 Bade hou murobbi neta oḳlor mazor eḳzone amare ḳoila, “Oba, ḳandio na. Huno, zein Ehuda ḳandanor shingho, Daud nobir bongshodor, tain zitisoin. Tain ou shato sil-sappoṛ bangia kitabḳan kulta farba.”
REV 5:6 Ami aro deḳlam, murobbi neta oḳlor, sairo zandaror, ar ou toḳtor mazḳano eḳ meṛa-baichcha ubai roise. Deḳte mono oilo, i baichchare zobo ḳora oise. I meṛa-baichchar shatṭa hing ar shatṭa souk. Allar ze shat nomunar ruhre duniar maze faṭail oy, ou shato souk oilo hou shato ruhu.
REV 5:7 Bade ou meṛa-baichcha aia, toḳto zein boat asla, en ḍain at taki ou kitabḳan nila.
REV 5:8 Kitab neoar bade hou sairo zandare ar sobbishzon murobbi netae ou meṛa-baichchare soizda ḳorla. Era forteḳor ato egu ḳori sharinda, ar agor-kushboye bora egu shunar baṭi asil. I agor-kushboy oilo Allar pak bonda oḳlor dua-munazat.
REV 5:9 Ar tara noya ou gozol gaila, “Ḳali tumi-u shoṭik zon ou kitabḳan nibar, nia er sil-sappoṛ kulbar. Tumare to zane mara oisil. Tumi tumar lou dia hokkol ḳandan taki, Allar lagi manush ḳorid ḳorso. Hokkol zator bulie matra manush, hoḳol desh ar zati taki-o ḳalas ḳorso.
REV 5:10 Erare loia tumi eḳ bashshai kaim ḳorso, amrar Allar ebadotir lagi imam banaiso, era-u asta zogoto bashshai korba.”
REV 5:11 Bade ami sailam, ar hou toḳt, sairo zandar ar murobbi neta oḳlor sairobae bout firista oḳlor aoaz hunlam. Ino hazare hazar, kuṭi kuṭi firista asla.
REV 5:12 Era zure zure ou gozol ḳoila, “Ze meṛa-baichchare zobo ḳora oisil, ein-u ḳemota, don-doulot, aḳol, bol-shokti, ijjot, gourob ar tarif faoar zoiggo.”
REV 5:13 Erbade ami hunlam, asmano, zomino, fatalo ar doriar maze zoto zandar ase, ba itar bitre aro zotota ase, era hokkole oḳan ḳoira, “Toḳtor maze zein boat asoin, tain ar ou meṛa-baichchar, tarif, ijjot, gourob ar ḳemota hor-hamesha zari rouk.”
REV 5:14 Teu hou sairo zandare ḳoila, “Amin.” Ar hou murobbi neta oḳol noto oia soizda ḳorla.
REV 6:1 Bade ami deḳlam, hou meṛa-baichchae zebla shato sil-sappoṛor maz taki foyla sil bangira, ou shomoy hou sairo zandaror mazor eḳzone ṭaṭa foṛar aoazor laḳan zure ḳoila, “Ao.”
REV 6:2 Teu ami saia deḳlam, dola eḳṭa guṛa, er ufre zein soar oisoin tan ato tir-donuk ase. Tan matat taz lagail oilo, tain joy ḳorar lagi joy ḳori kori roana oila.
REV 6:3 Ar tain zebla dusra sil bangila, ou shomoy ami dusra zandaror aoaz hunlam, ein ḳoila, “Ao.”
REV 6:4 Teu lal churuk aroḳṭa guṛa bar oilo, ar er ufre zein soar oisoin, enre ou ḳemota deoa oilo, zate tain dunia taki hoḳol shanti kaṛia neingi, manshe eḳe-oinnore kun ḳoroin, enre boṛo ekkan toluar-o deoa oilo.
REV 6:5 Bade meṛa-baichchae zebla tin nombor sil bangila, ou shomoy ami tin nombor zandaror aoaz hunlam, tain ḳoila, “Ao.” Teu ami deḳlam, eḳṭa ḳala guṛa. Er ufre zein soar oisoin, tan ato ekkan falla ase.
REV 6:6 Ar ami hunlam, hou sairzon zandaror mazḳan taki keu zanu ḳoira, “Eḳ dinare ḳali eḳ sher gom ba eḳ dinare tin sher barli mile. Oile tumi zoytun ar angur gasor ḳeti korio na.”
REV 6:7 Ou meṛa-baichchae zebla sair nombor sil bangila, ou shomoy ami hunlam, sair nombor zandare ḳoila, “Ao.”
REV 6:8 Teu ami saia deḳlam, sali rongor ek guṛa, ou guṛar zein soar, en nam oilo mout ar tan ḳore ḳore ḳoybore aṭer. Erare duniar sair baṭor mazor eḳ baṭor ufre ḳemota deoa oilo, zate tara toluar dia, nidan dia, gozobi mout ar zongli zanuar dia manshor zan nein.
REV 6:9 Bade tain zebla fas nombor sil bangila, ou shomoy ami deḳlam, kurbani kanar tole ou laḳan manshor ruhu oḳol ase, zerare Allar kalamor lagi ar Hozrot Isar fokke zobanbondi deoar lagi zane mara oise.
REV 6:10 Era zure zure ḳoila, “O fak-fobitro hokkani Moula, amrare kun ḳorar bisar ḳorte ar bodla loite, tumi duniar manshore ar ḳotodin shomoy ditae?”
REV 6:11 Teu era hoḳolre dola lebas dan ḳora oilo, ar ḳoa oilo, tarar logor kezmotgar ar tarar zoto baiainre tarar nomunae shohid ḳora oibo, erar shongḳa fura na oa forzonto, aro kisu din bar saite oibo.
REV 6:12 Bade ami deḳlam, meṛa-baichchae soy nombor sil bangila, ou shomoy kub boṛo boisal oilo. Shuruzor rong oigelo ḳala siai ar bora sandor rong oilo lour laḳan lal.
REV 6:13 Tufan aile zela ḍumur gas taki kasa fol-o tufane falai dey, ṭik oula asmanor tera oḳol kulia zominor ufre foṛigelo.
REV 6:14 Asta asman dola oia ḳagozor fuṭla laḳan bonia gaib oigelo. Faṛ-forbot ar dif oḳol-o zarzir zaga taki horigelo.
REV 6:15 Ar duniar hoḳol raza-bashshain, namḳora zon, sifair fordan, zomidar, foyluan, gulam ba azad forteḳ zon-u faṛor gate gate, fattoror aoṛe lukailo.
REV 6:16 Tara ou faṛ ar fattor oḳolre ḳoilo, “Amrar ufre aia foṛo, zein toḳto boat asoin tan souḳor samon taki ar meṛa-baichchar gozob taki amrare lukao.
REV 6:17 Tarar gozobi hou kiamotor din to aichche, oḳon ar ṭikia taḳar shaiddo ḳar ase?”
REV 7:1 Erbade ami deḳlam, duniar sair kunat sairzon firista ubai roisoin. Tara duniat, doriat ar hoḳol gas-falat batash hamanir duar bond ḳorar lagi ubaisoin.
REV 7:2 Bade ami deḳlam, fube taki aroḳzon firista uṭia aira, zinda Allar sil-sappoṛ tan gese ase. Tain aia ze sairzon firistare dunia ar doriar ḳeti korar lagi kemota deoa oisil, hou sairo firistare zure zure ḍakia ḳoila,
REV 7:3 “Amra zotoboil amrar Allar gulam oḳlor ḳofalo sil na marsi, otoboil tumra duniar, doriar ba gas-falar ḳeti korio na.”
REV 7:4 Bade ami hou sil-sappoṛ mara manshor foriman hunlam. Boni Israilor hoḳol ḳandan taki eḳ laḳ sousallish azar zonre sil mara oise.
REV 7:5 Ehuda ḳandanor baro azar zon sil mara; Ruben ḳandan taki baro azar; Sadu ḳandan taki baro azar;
REV 7:6 Ashir ḳandan taki baro azar; Noftali kandan taki baro azar; Manosha ḳandan taki baro azar;
REV 7:7 Shimion ḳandan taki baro azar; Lebi kandan taki baro azar; Isaḳor ḳandan taki baro azar;
REV 7:8 Sobulon ḳandan taki baro azar; Iusuf ḳandan taki baro azar; Bin-Iamin ḳandan taki baro azar zon sil mara.
REV 7:9 Bade ami deḳlam, forteḳ desh, hoḳol ḳandan, hoḳol zati ar hoḳol zator bulie matra bout manush dola oisoin, erare gonia fuṛanir shaiddo ḳeuror nai. Era dola lebas findia ḳezur fata ato loia, hou toḳt ar meṛa-baichchar samne ubai roisoin.
REV 7:10 Tara zure zure ḳoira, “Amrar Alla zein toḳto boat asoin, ar meṛa-baichchar ato-u, gunar mafi ar nazat ase.”
REV 7:11 Erbade tamam firista oḳol, hou toḳtor, hou murobbi neta oḳlor ar sairo zandaror sairo ḳandabae ubaila. Tara toḳtor samne soizdat foṛia ḳoila,
REV 7:12 “Amin. Tarif, gourob, aḳol ar shukria, ijjot, ḳemota ar bol-shokti, zuge zuge amrar Allar-u ouk. Amin.”
REV 7:13 Bade murobbi neta oḳlor mazor eḳzone amare ḳoila, “Buzrae ni, dola lebas finda ou manush oḳol ḳe, era kuai taki aisoin?”
REV 7:14 Ami tanre ḳoilam, “O malik, ita to afne-u zanoin.” Teu tain ḳoila, “Era oila hou zon oḳol, zera hou moha mosibotor maz taki aise. Tarar lebasre meṛa-baichchar loudi doia dola banaise.
REV 7:15 Erlagi era Allar toḳtor samne ase; tara din-rait behesti ebadot ḳanar maze ebadot-bondegi korra. Ar toḳto zein boat asoin, tain nize erar ufre tambu ṭanai diba.
REV 7:16 Erar ar kunudin buk lagto nae, fanir fiase dorto nae; shuruzor tez erar gotro lagto nae, kunu gorom-o lagto nae.
REV 7:17 Toḳtor mazor meṛa-baichchae-u erar raḳali korba. Tain erare abe-hayator zindegi-fanir zornar gese loia zaiba, ar Allae erar souḳor fani fusia diba.”
REV 8:1 Bade ou meṛa-baichchae zebla shat nombor sil-sappoṛ bangila, ou shomoy onuman ada gonṭa shomoy behesto kunu aoaz huna gelo na.
REV 8:2 Ar ze shatzon firista Allar samne ubat taḳoin, ami erare deḳlam, erar ato shatṭa shinga deoa oilo.
REV 8:3 Erbade aroḳzon firista aia kurbani kanar samne ubaila. Tan ato shunar agor-kushboy dani. Toḳtor samnor agor zalanir shunar ṭebulor ufre zalanir lagi bout agor-kushboy tanre deoa oilo, Allar tamam pak bonda oḳlor dua-munazator loge mishanir lagi ita deoa oilo.
REV 8:4 Erlagi hou firistar ator agor-kushboyor dumar loge, pak bonda oḳlor dua-munazat-o Allar samne uṭlo.
REV 8:5 Bade ou firistae kurbani kana taki aguin nia agor danit borla, boria ita duniat falaila. Teu ṭaṭari aoaz, megor ḍaḳ, zilkani, ar boisal oilo.
REV 8:6 Ar hou ze shatzon firistar ato shatṭa shinga asil, era ou shinga bazanir lagi zuit oila.
REV 8:7 Foyla firistae shinga bazanir loge loge lou maḳail hil ar aguin zomino falail oilo. Teu zominor tin baṭor eḳ baṭ, gas-gasalir tin baṭor eḳ baṭ, ar hoḳol gash-fata zoli gelo.
REV 8:8 Erbade dusra firistae tan shinga fukila. Ou shomoy zalail faṛor laḳan muṭa eḳ siz doriat falail oilo. Itae doriar tin baṭor eḳ baṭ fani lou oigelo.
REV 8:9 Doriar tin baṭor eḳ baṭ zandar morigelo, tin baṭor eḳ baṭ zaz binash oigelo.
REV 8:10 Bade tin nombor firistae tan shinga fukila. Teu asmanor soḳsoḳa biraṭ eḳ tera boṛo mushalor laḳan zoli zoli tole foṛlo, iṭa aia hoḳol gang, ḳal-bilor tin baṭor eḳ baṭor ufre foṛlo.
REV 8:11 Ou terar nam asil Nagdana. Iṭa foṛia tin baṭor eḳ baṭ fani titta-zohor oigelo, i fanir lagi bout zon morla.
REV 8:12 Ar sair nombor firistae zebla shinga fukila, ou shomoy sand, shuruz ar tera, ita hokkoltar tin baṭor eḳ ongsho zoḳom oigelo, teu hoḳoltar tin baṭor eḳ baṭ andair oigelo, erlagi dinor tin baṭor eḳ baṭo ar raitor tin baṭor eḳ baṭo kunuzat rushni roilo na.
REV 8:13 Bade ami sailam, saia deki, eḳṭa sil faki bout usat asmanor mazedi uṛer, ar he zure zure mater, “Baki ze tinzon firistae shinga fukiba, tarar shinga fukile duniar bashinda oḳlor ufre gozob, gozob, gozob lambo.”
REV 9:1 Bade fas nombor firistae shinga fukila, teu ami deḳlam, asmanor eḳṭa tera behest taki duniat foṛlo. Ou terare habia duzoḳor sabi deoa oilo.
REV 9:2 Teu he habia duzoḳor duar kullo, bout boṛo ḍomḳa taki zela duma baroy, i duzoḳ taki ola duma bar oilo. Ou duzoki dumae asman ar shuruz andair oigelo.
REV 9:3 Hou duma taki bout fongofal bar oia duniat aila. Itare duniar ḳakṛa-bisar laḳan ḳemota deoa oilo.
REV 9:4 Tarare hukum deoa oilo, tara zanu duniar kunu gash-fata, gas-fala ba hag-torḳarir ḳeti na ḳore. Ḳali zeta manshor ḳofalo Allar sil-sappoṛ mara nai, otar ḳeti koroin.
REV 9:5 Ita manshore zane marar kunu ḳemota tarare deoa oilo na, oile fas mash forzonto zala-zontrona dibar ḳemota deoa oilo. Ḳakṛa-bisae kunu manshore ḳamoṛ dile zela bish-bedona oy, ou fongofale ḳamṛaile-o ola oibo.
REV 9:6 Hou shomoy manshe mout mangiba, ta-o mout oito nae. Tara morta saiba oile moron tarar ges taki bagibo.
REV 9:7 I fongofal oḳol deḳte zuddor lagi zuit ḳora guṛar laḳan. Tarar matat shunar tazor laḳan siz asil, ar mukor goṭon oilo manshor laḳan.
REV 9:8 Tarar sul oilo beṭintor sulor laḳan ar dat oilo shinghor dator laḳan.
REV 9:9 Tarar bukur maze asil luar fator laḳan ḳoshḳosha sal. Zuddor guṛar gaṛi ṭania guṛar fal eḳloge gele zela aoaz oy, tarar ḍaḳnar aoaz-o asil ou laḳan.
REV 9:10 Tarar leinj ar leinjor mukor bish-dat asil ḳakṛa-bisar laḳan. Fas mash dori manshore ḳoshṭo dibar ḳemota i leinjo ase.
REV 9:11 Habia duzoḳor firista asla ou fongofalor raza. Ibrani bashae i firistar nam oilo Abaddon, ar Iunani ba Grik bashae er nam oilo Apollion, mani gozobi firista.
REV 9:12 Foyla gozob horlo, oile huno, aro duiṭa gozob aia azer.
REV 9:13 Bade soy nombor firistae tan shinga fukila. Teu Allar samnor agor zalanir shunar ṭebulor sairṭa hingor ges taki ami eḳzonre oḳan ḳoite hunlam,
REV 9:14 ein hou shinga-ala soy nombor firistare ḳoila, “Moha gang Furator maze ze sairzon firista aṭoḳ asoin, tarare kulia deo.”
REV 9:15 Erlagi hou sairo firistare saṛi deoa oilo. Duniar tin baṭor eḳ baṭ manshore marar lagi ou firista oḳolre shoṭik shomoy, shoṭik din, mash ar bosoror lagi zuit ḳori raḳa oisil.
REV 9:16 Bade ami hunlam, guṛat soṛia zaoa ou sifair foriman asil bish kuṭi.
REV 9:17 Ou doroshono ami zoto guṛain ar guṛ-soar oḳol deḳlam, i soarre deḳte ola laglo, erar bukur ufror fouzi lebas agunir laḳan lal, aḳashor laḳan lil ar gondoḳor laḳan oldia. Guṛaintor ḳolla asil shinghor ḳollar laḳan, itar muko taki aguin, duma ar gondoḳ bar or.
REV 9:18 Erar mukor ou aguin, duma ar gondoḳor gozobdi tin baṭor eḳ baṭ manush mara oilo.
REV 9:19 I guṛaintor leinj ar mukor maze-u asil tarar bol, i leinj asil du-muki hafor laḳan. Ou leinjdi tara manshor ḳeti kore.
REV 9:20 Oile ou gozobor bade-o zeta manush zita roila, tara nizor ator banail murtipuja taki touba ḳorlo na. Tara nanan nomunar butor puja, ar zetae deḳoin na, hunoin na ba aṭa-sola ḳorta faroin na ota murtir puja ḳorat roila. Shuna, rufa, fitol, fattor ar laḳṛidi banail murtipujat roila.
REV 9:21 Erloge kun-ḳarafi, zadu-ṭuna, zina ar suri taki-o touba ḳorlo na.
REV 10:1 Bade ami deḳlam, behest taki kub shoktiala aroḳzon firista lamia aira. Megor saḳa asil tan lebas, tan muk shuruzor laḳan soḳsoḳa, tan fao asil agunir kuṭir laḳan. Tan matar ufre asil rongdenu.
REV 10:2 Tan ato huru-muru ekkan kitab kula asil. Tan ḍainor fao doriat ar bauor fao zominor ufre toia,
REV 10:3 shinghor laḳan kub zure gorzia uṭila. Ou gorzonor loge loge-u ṭaṭa foṛar moto shatṭa aoaz oilo.
REV 10:4 Ou shato aoaz hunia ami leḳat laglam; ermaze behest taki ou shobdo ailo, “Huno, ou shato ṭaṭari aoaze zeta ḳoisoin, ita batuni raḳo, lekio na.”
REV 10:5 Bade hou firista, zenre ami doria ar zominor ufre ubat deḳslam, tain behestor bae nizor ḍain at tulla.
REV 10:6 Tulia zein hor-hamesha siroḳal zinda asoin, zein asman, zomin, doria ar itar mazor hokkolta foyda ḳorsoin, tan name ḳosom ḳaia ḳoila, “Ar to deri oito nae.
REV 10:7 Oile shat nombor firistae shinga fukibar din Allar batuni lila-ḳela fura oibo. Allae tan nizor gulam, nobi oḳlor gese zela bataisla, oula-u folibo.”
REV 10:8 Behest taki age ze shobdo hunchilam, ein hirbar amare ḳoila, “Huno, doria ar zominor ufre ze firista ubat asoin, tan gese zao, gia tan at taki kula kitabḳan neo.”
REV 10:9 Teu ami en gese gia ḳoilam, ou huru-muru kitabḳan amar ato deoar lagi. Tain ḳoila, “Aichcha neogi, nia ḳailao. Ikane tumar feṭre titta ḳorilibo, oile tumar muko mou laḳan miṭa lagbo.”
REV 10:10 Ou ami hi firistar ator huru-muru kitabḳan nia ḳaililam. Ḳaite shomoy hasau amar muko mou laḳan miṭa laglo, ar gilia harle asta feṭ titta oigelo.
REV 10:11 Bade amare ḳoa oilo, “Tumi bout desh, bout zati, nanan bulie matra manush, ar bashshar befare hirbar ohi zanaite oibo.”
REV 11:1 Bade mafibar lagi laṭir laḳan eḳṭa nol amar ato deoa oilo, ar eḳzone ḳoila, “Huno, fobitro Baytul-Mukaddos Kaba Shorif ar kurbani kanare mafo. Mafia hono zera ebadot ḳore tarar foriman gono.
REV 11:2 Oile ou Kaba goror uṭanre mafio na, ikan bad deo, ikan to bidormi oḳolre deoa oise. Tara beyallish mash dori i fobitro zagaḳanre faodi koslaibo.
REV 11:3 Ar ami amar duizon shakkire ola ḳemota dimu, i kemota faia era ḳator oia solar soṭ findia, eḳ azar dui-sho shaiṭ din nobir laḳan ohi bataiba.”
REV 11:4 Era oila hou zoytun gas zuṛa, ar hou serag dani zuṛa, tara to din-duniar malikor samne ubat asoin.
REV 11:5 Ḳeu tarar ḳeti korte saile, tarar muk taki aguin bar oia hi dushmon oḳolre zalailibo. Zekunu zone tarar ḳeti korat lagle ou doshae mout oibo.
REV 11:6 Era zotodin nobi halote ohi bataiba, otodin zate kunu meg na oy erlagi asmanor duar bond ḳori dibar ḳemota tarar ase. Fanire lou banani, ar zotobar kushi otobar zekunu gozob ḍalia zogotor ḳeti korar ḳemota-o tarar ase.
REV 11:7 Tarar zobanbondi deoa shesh oigele habia duzoḳ taki hou zanuar uṭia aia tarar loge laṛai koria, tarare araia kun ḳorbo.
REV 11:8 Ar tarar lash hou mohan ṭaunor rastar maze foṛi roibo, ze ṭauno tarar malikre solibor ufre loṭḳaia kun ḳora oisil. I ṭaunor nam ṭik Sadum ba Mishor na oile-o eḳoi laḳan-u ḳaraf.
REV 11:9 Hou shomoy hoḳol desh, ḳandan, hoḳol zator bulie matra manshe ar hoḳol zatir manshe shaṛe tin din dori ou lashguin deḳba. Ar era mara gesoin ḳori zogotor duniabi manshe kushie furti-amud ḳorba, eḳe-oinnore ufohar diba. Ar i lash dafon ḳorar parmishon dita nae, ḳaron ou duio nobir lagi duniadari manshor ḳoshṭo oisil.
REV 11:11 Bade hou shaṛe tin din faroia harle Allar deoa zan erar bitre hamailo, teu era fao-o bordi ubaila. Ar zoto zone erare deḳla, hoḳole-u ḍoraia ḳafila.
REV 11:12 Bade era hunla, behest taki ḍakia zure zure ḳoa or, “Tumra ono uṭia aio.” Teu era nizor dushmonor samne eḳ megor saḳat oia behesto gelagi.
REV 11:13 Ou shomoy kub boṛo boisal oilo, ar hi ṭaunor dosh baṭor eḳ baṭ bangi gelo. Boisale shat azar manush morla. Ita dekia bad-baki hoḳole ḍoraia behestor Allar tarif ḳorat lagla.
REV 11:14 Ou nomunae dusra gozob faroilo, oile huno, tin nombor gozob kub zoldi aia azibo.
REV 11:15 Bade shat nombor firistae tan shinga fukila. Teu behestor maze zure zure elan ḳora oilo, “Oḳon to duniar bashshai amrar Mabud ar tan Mosir hukum-o aise. Tain zug zug dori siroḳal bashshai korba.”
REV 11:16 Bade hou sobbishzon murobbi neta, zera Allar samne zarzir toḳto boat asla, era Allare soizda ḳoria ḳoila,
REV 11:17 “O Shorbo-shoktiman Mabud Alla, tumi age-o aslae ar oḳono aso. Amra tumar shukur-guzar ḳorram, tumi to tumar moha ḳemota ato loia oḳon bashshai korrae.
REV 11:18 Hokkol zatie gusa ḳoria sillaise, te oḳon tumar gozob ḍalibar shomoy oigese. Murda oḳlor bisaror shomoy aise, ar tumar afon gulam nobi oḳlor, tumar pak bonda oḳlor, huru-boṛo zotozone tumare ḍorain, tarare furuskar dibar shomoy aise. Ar zera duniar ḳeti korse, tarare binash ḳorar shomoy-o aise.”
REV 11:19 Bade Allar behestor ebadot ḳanar duar kula oilo, ar er bitre Allai shahadot shonduk deḳa gelo. Ou shomoy megor zilkani, guṛ-guṛi ḍaḳ, ṭaṭa foṛa, boisal ar kub beshi hil-meg oilo.
REV 12:1 Bade asmanor maze ek kudroti karbar deḳa gelo, eḳzon beṭi manush asoin, tan finno asil shuruz ar faor tole sand, en matat ase baroṭa tera dia gata eḳṭa taz.
REV 12:2 Beṭir goro hurutta oita, erlagi hurutta oar bedonae beṭie ḳali sillaira.
REV 12:3 Erbade asmano arok karbar deḳa gelo, agunir laḳan lal eḳ biraṭ danob. Tar shatṭa mata ar doshṭa hing, shato matat shatṭa taz lagail.
REV 12:4 Tar leinjuṛdi baṛiaia asmanor tin baṭor eḳ baṭ terare duniat falai dilo. Ar ze beṭir goro hurutta oita, ou danob aia beṭir samne ou nomunae ubat asil zen, beṭir goro hurutta oite-u he ḳailito.
REV 12:5 Beṭir goro eḳ fua foyda oilo, ou fuae hokkol zatire luar laṭi dia shashon ḳorba. Ou huruttare Alla ar tan toḳtor gese su mari tulia neoa oilo.
REV 12:6 Ar ou beṭi manush morubumir bae bagia gelagi. Allae hi morubumir maze beṭir lagi ekkan zaga zuit ḳorsila, ein hono eḳ azar dui-sho shaiṭ din lalon-falon faiba.
REV 12:7 Bade behesto zuddo lagigelo. Firista Mikail ar tan odinor firista oḳole hou danobor loge laṛai korla, ar hou danobe-o tar sela-samsare loia erar loge laṛai korlo.
REV 12:8 Laṛait hi danob arigelo, ar tarare behest taki bar ḳori deoa oilo.
REV 12:9 Hou danobre ar tar sela-samsa oḳolre duniat falai deoa oilo. Ou danob oilo hou furana haf, zegur nam Iblis-Shoytan, he duniar hoḳol manshore be-foti banae.
REV 12:10 Bade ami hunlam, behest taki eḳzone zure zure ḳoira, “Oḳon to amrar Allar nazat, tan bol-shokti, tan bashshai ar tan Mosir ḳemota azir oigese. Ḳaron zegie amrar baiaintore dushi banaito, tare to behest taki falai deoa oise. He din-rait hamesha amrar Allar gese tarar name nalish dito.
REV 12:11 Meṛa-baichchar lou ar zarzir tobligi zobanbondir bole tara Iblisre araisoin. Tara nizor ḳayare beshi maya na ḳoria, zan dite-o zuit asla.
REV 12:12 “Erlagi-u O behest, tumi kushi koro. Tumra zera behest bashi, tumra-o furti koro. Oile afsus dunia ar doriar lagi, Iblis to tarar gese lamigese. He gusae fush-fash ḳorer, he to zane-u, tar shomoy ar beshi nai.”
REV 12:13 Hou danobe zebla deḳlo tare duniat falai deoa oise, dekia hou ze beṭir goro fua foyda oisil, he ou beṭir ḳore laglo.
REV 12:14 Erlagi ou beṭire kub boṛo eḳ sil fakir dukan ḍaḳna deoa oilo, beṭie ou ḍaḳnadi uṛal dia morubumit nizor zagat zaita farba. Hono hou danob-hafor souḳor aoṛe shaṛe tin bosor tanre lalon-falon ḳora oibo.
REV 12:15 Teu hi hafe tar muk taki fani bar ḳoria ek gang banaililo, gangor fute beṭire bashai nitogi kori.
REV 12:16 Oile duniae beṭire shaijjo ḳorlo, i hafe ze fani bar ḳorlo, duniar maṭie a ḳoria i fanire ḳaililo.
REV 12:17 Erlagi i danob-hafe beṭir bae aro beshi gusa ḳorlo, he beṭir oinno aolad oḳolre, mani zera Allar hukume sole ar Hozrot Isar fokke zobanbondi dey, tarar loge zuddo ḳorat gelo.
REV 12:18 Gia he doriar soror balur ufre ubai roilo.
REV 13:1 Bade ami deḳlam, doria taki eḳ zanuar uṭer, tar doshgu hing, shatgu ḳolla, forteḳ hingor matat eḳṭa ḳori taz, ar fortek kollar ufre nanan kufuri nam leḳa.
REV 13:2 I zanuargu deḳte sitabagor laḳan, tar fao oilo ballukor faor laḳan, ar muk oilo shinghor mukor laḳan. Hou danobe tar shokti, tar godi ar moha ḳemota ou zanuarre dilailo.
REV 13:3 I zanuaror eḳṭa ḳollar maze omon eḳ zoḳom asil, ou zoḳome he morar laḳ oigesil, oile zoḳomṭa bala oigelo. Ita dekia duniar hoḳol manush taijjub bonia tar ḳore ḳore gelo.
REV 13:4 Ar hou danobe tare i kemota disil ḳori manshe hou danobre soizda ḳorlo, erloge ou zanuarre-o soizda ḳorlo. Tara ḳoilo, “I zanuaror laḳan ar ḳe ase? Tar loge laṛai korar ḳemota ḳar ase?”
REV 13:5 I zanuarre kufuri buli ar beṭagiri mator muk deoa oilo. Beyallish mash dori tar ḳam salanir ḳemota failo.
REV 13:6 Erlagi he Allar birudde kufuri mat matilo, he Allar nam, tan boshot ḳana ar behest bashi oḳlor bodnam ḳorat roilo.
REV 13:7 Tare ḳemota deoa oilo, he Allar pak bonda oḳlor birudde zuddo ḳoria zitito farbo. Ar fortek kandan, forteḳ desh, forteḳ zati, forteḳ nomunar bulie matra manshor ufre-o tare ḳemota deoa oilo.
REV 13:8 Ita dekia duniabi hoḳol manshe tare soizda ḳorbo. Zogot foyda ḳorar age ze meṛa-baichchare zobo ḳorar ḳota shaibosto ḳora oise, hou meṛa-baichchar zindegi katat zerar nam nai, era forteḳe tare soizda ḳorbo.
REV 13:9 Zar ḳan ase, he hunouk:
REV 13:10 Ze zon bondi oar ḳota, he to bondi oibo-u. Toluaror tole zar kun oar ḳota, he ola kun oibo. Erlagi pak bonda oḳole mozbut iman ar sobor ḳora zorur.
REV 13:11 Bade ami deḳlam, zomin taki aroḳṭa zanuar bar oia ailo. Meṛar hingor laḳan tar dui hing ase, oile he matito hou danobor laḳan.
REV 13:12 Ou meṛar hing-ala zanuare hou foyla zanuaror hoḳol ḳemota bebohar ḳorto. Duniar hoḳol manshore he zur ḳoria hou zoḳom bala oa foyla zanuarre soizda ḳoraito.
REV 13:13 He hoḳlor samne boṛo boṛo keramoti kam ḳorto, emonki asman taki zomino aguin lamaia deḳaito.
REV 13:14 Hou foyla zanuaror lagi zoto laḳan keramoti deḳanir ḳemota tare deoa oisil, ota deḳaia he manshore be-foti banailo. Foyla ze zanuar toluaror sed ḳaia-o basi gesil, tar eḳṭa murti bananir lagi dusra zanuare manshore foramish dilo.
REV 13:15 Ar murtir bitre zan haranir ḳemota tare deoa oilo, zate i murtie matito fare, ar zera i murtire soizda ḳorto nae, tarare zane marar ḳemota-o tare deoa oilo.
REV 13:16 He huru-boṛo, doni-gorib, munib ba gulam hoḳolre baiddo ḳorlo, zarzir ḍain ato ba ḳofalor ufre eḳṭa sil marar lagi.
REV 13:17 Erlagi ou sil saṛa ḳeu kunu siz ḳorid-bikir ufae roilo na. I sil asil hou zanuaror nam ba namor marka nombor.
REV 13:18 Ita hoḳolta buzte bout aḳolor dorḳar. Zar aḳol ase he ou zanuaror namor horofor nombor gonouk, ita to kunu manshor namor nombor. Er foriman oilo, 666; soy-sho soyshoṭṭi.
REV 14:1 Bade ami saia deki, hou meṛa-baichcha Zeruzalemor fobitro Sion faṛor ufre ubai roisoin. Tan loge asoin eḳ laḳ sousallish azar manush. Tarar ḳofalor ufre ou meṛa-baichcha ar tan gaibi bafor nam leḳa ase.
REV 14:2 Erbade ami behest taki zure zure ḳol-kolaia zaoa fanir futor aoaz ar zure ṭaṭa foṛar shobdor laḳan eḳ aoaz hunlam. Amar mono oilo, kunu sharinda bazaora dole sharinda bazaira.
REV 14:3 Era hou toḳt, hou sairo zandar ar hou murobbi neta oḳlor samne eḳ noya gozol gaira. Kunu manshe i gozol hikto farlo na, ḳali dunia taki kalas ḳori neoa ou eḳ laḳ sousallish azar zon saṛa.
REV 14:4 Era to hou manush, zera kunu beṭintor loge zina ḳoria nizor ḳayare nafak banaise na. Ou meṛa-baichcha ze zagat zain, tara-o en ḳore ḳore roin. Alla ar meṛa-baichchar name ḳetor foyla foshol hishabe erare zogotor manshor ges taki kalas ḳora oisil.
REV 14:5 Era kunudin-o misa mat matisoin na, era shullo-ana nikut.
REV 14:6 Bade ami aroḳzon firista deḳlam, ein asmanor mazedi uṛira. Duniat boshot ḳorra forteḳ desh, fortek kandan, forteḳ bashae matra ar forteḳ zatir manshor lagi siroḳalin kushir ḳobor tan gese ase.
REV 14:7 Tain zure zure elan ḳorla, “Alla Pakre ḍorao, tan ijjot-tarif ḳoro, tan bisaror shomoy aichche. Zein asman-zomin, doria ar ḳal-bil, gang oḳol foyda ḳorsoin, tan ebadot ḳoro.”
REV 14:8 Bade tan ḳore ḳore dusra firista aia ḳoila, “Binash oigelo, binash oigelo, hou namḳora Babil ṭaun binash oigelo. Ze ṭaune tair zinar ḳamor ḳoṛa nisha-fani hoḳol zatire ḳaoaise, tai binash oigelo.”
REV 14:9 Bade tin nombor firista erar ḳore ḳore aia zur golae ḳoila, “Kunu manshe zudi ou zanuar ar ogur murtir puja ḳore, ogur sil tar ato ba ḳofalo lagae,
REV 14:10 te he-o Allai gozobi nisha-fani kaite oibo. Ou nishar loge kunuzat fani na mishaia Allai gozobi baṭit bora oise. Fobitro firista oḳol ar Allai meṛa-baichchar samne, aguin ar gondoḳ dia i manshore shaza deoa oibo.
REV 14:11 Ze agunit itare zalail oibo, i agunir duma kunudin bond oito nae. Ze manshe ou zanuar ar tar murtir puja ḳorbo, ogur namor hou sil lagaibo, he din-rait kunu shomoy-u azab taki rehai faito nae.”
REV 14:12 Erlagi zera Allar hukum mane ar Hozrot Isar torikar imane mozbut roy, Allar ou pak bonda oḳole i halotor maze sobor taḳa zorur.
REV 14:13 Bade ami hunlam, behest taki eḳzone ḳoira, “Ou ayat leḳo, oḳon taki malikor torikat roia zoto zonor zan zaibo, era-u nek-kofali.” Pak Ruhe ou shakki dira, “Nichchoy era-u nek-kofali. Tarar ḳam-ḳaz taki tara rehai faiba, ḳaron tarar ḳamor fol tarar loge loge roibo.”
REV 14:14 Bade ami saia deḳlam, dola eḳ megor saḳa, ou saḳar ufre bin-Adomor laḳan ḳeu eḳzon boat asoin. Tan matat shunar taz ar ato asil darail ḳasi.
REV 14:15 Bade aroḳzon firista behesti ebadot ḳana taki bar oia aila, ar zein megor ufre boat asla tanre zure sillaia ḳoila, “Duniar foshol ḳaṭibar shomoy oise, foshol furafur faki gese, afnar ḳasi lagaukka ar foshol ḳaṭoukka.”
REV 14:16 Teu ou megor saḳar ufre zein boat asla, ein duniat tan ḳasi lagaila ar duniar foshol ḳaṭa oilo.
REV 14:17 Bade behestor ebadot ḳana taki aroḳzon firista bar oia aila, tan gese-o ekkan darail ḳasi asil.
REV 14:18 Erbade kurbani kanar ges taki eḳzon firista bar oia aila, tan ḳemota asil agunir ufre. Aia tain zure zure hou ḳasi-ala firistare ḍakia ḳoila, “Tumar darail ḳasikan lagao ar duniar angur gas taki anguror soṛin ḳaṭia dola ḳoro, ita to faki gese.”
REV 14:19 Teu hou firistae duniat tan ḳasi lagaila ar duniar angur gasor hoḳol angur dola ḳoria, angur maṛar gato falaila. Ou gat oilo Allar gozobor moha gat.
REV 14:20 Ṭaunor bare angur maṛar gato i angur maṛia harle, ita taki lou bar oilo, i lour boinnae guṛaintor lagam forzonto aia soilo. Loue eḳ azar soy-sho stadia (onuman dui-sho mail) zaga ḍubi gelo.
REV 15:1 Bade ami behestor maze aroḳṭa lila-ḳela deḳlam, iṭa boṛo mohan taijjubi. Ami deḳlam, shatzon firista asoin, erar ato aḳeri shatṭa gozob. Itare aḳeri gozob ḳoar ḳaron oilo, oguin dia Alla Pakor gusar shesh foysala oibo.
REV 15:2 Bade ami deḳlam, aguin-ala ek kasor doria, ar zoto manshe hou zanuar, tar murti ba tar namor nomboror ufre zitsoin, tarare-o deḳlam. Deḳlam, tara Allar deoa sharinda ato loia ḳasor doriar faro ubai roisoin.
REV 15:3 Tara Allar bonda Musa nobir ar hou meṛa-baichchar ou ḳaoali gaira, “O Shorbo-shoktiman Mabud Alla, tumar lila-ḳela ḳoto mohan ar asanoḳ! O tamam zatir bashsha, ḳoto hok ar shoṭik tumar fot!
REV 15:4 O Mabud, tumare ḍoraito nae kun zone? Kun zone tumar namor tarif ḳorto nae? Ḳali tumi-u to fak-fobitro, tamam zati-u aibo tumar dorbaro, hokkole-u tumar ebadot ḳorbo, tumar hok bisar to zair oigese.”
REV 15:5 Erbade ami deḳlam, behestor hou shahadot tambur bitoror fobitro Kaba gorḳan kula oilo.
REV 15:6 Ou shomoy hou shatzon firistae shatṭa gozob loia Kaba gor taki bar oia aila. Tarar finnor lebas asil soḳsoḳa forishkar ar bukut asil shunali foṭṭi.
REV 15:7 Hou sairzon zandaror eḳzone ou shato firistare shatṭa shunar baṭi dila. I shato baṭi bora asil ḳali Alla Pakor gusa, zein zuge zuge hor-hamesha zinda asoin.
REV 15:8 Allar kudroti mohima taki ze duma baronit asil, ou dumae asta gor borigelo. Ar ou shatzon firistar shatṭa gozob na furani forzonto ḳeu gia Kaba goro hamaito farlo na.
REV 16:1 Bade ami hunlam, hou Kaba gor taki eḳzone ou shato firistare zure zure ḍakia ḳoira, “Tumra zao, gia Allar gozobe bora ou shato baṭi duniar ufre ufoit ḳori ḍali deo.”
REV 16:2 Teu foyla firistae gia tan baṭi duniar ufre ufoit ḳorla. Erlagi zarar gotro hou zanuaror sil asil, zera tar murtir puja ḳorto, ita hokkolṭir gotro eḳ zator kub bad bish fuṛa deḳa dilo.
REV 16:3 Dusra firistae tan baṭi doriar ufre ufoit ḳorla. Teu doriar hoḳol fani mora manshor lour laḳan oigelo, doriar hoḳol zandar morigelo.
REV 16:4 Ar tin nombor firistae tan baṭi gang ar hoḳol ḳal-bilor ufre ufoit ḳorla. Erlagi ita oigelo lour gang ar ḳal-bil.
REV 16:5 Ar ami hunlam, fanir ufre ze firistar ḳemota asil, ein ḳoira, “O fak-fobitro Alla, tumi age-o aslae, oḳono aso. Tumi hok-insafḳari, tumi-u to i gozobi shaza dirae.
REV 16:6 Iguinte pak bonda oḳlor lou zoraise, nobi oḳlor-o lou zoraise. Erdae-u tumi itare ou lou ḳabairae, ita-u tarar shoṭik faona shaza.”
REV 16:7 Ami hunlam, kurbani kanae shae dila, “O Shorbo-shoktiman Mabud Alla, tumar hoḳol bisar-u hok ar shoṭik.”
REV 16:8 Sair nombor firistae tan baṭi shuruzor ufre ufoit ḳorla. Teu shuruzre ḳemota deoa oilo, manshore agunit zalaia kulosh tular lagi.
REV 16:9 Ou shomoy kub gorome manshor shoril zoligelo, ar ou gozob oḳlor ufre zan ḳemota ase, hou Allar birudde tara kufuri mat matilo. Ototar bade-o tara touba ḳorlo na, ba Allar tarif-o ḳorlo na.
REV 16:10 Bade fas nombor firistae hou zanuaror godir ufre tan baṭi ufoit ḳorla. Teu i zanuaror bashshai andair oigelo. Manshe zala-zontronae zarzir zibo ḳamṛailo.
REV 16:11 Ou zala-zontrona ar shorilor bish fuṛar ḳarone tara behesti Allar birudde kufuri mato roilo, otar bade-o tarar bod ḳamor lagi touba ḳorlo na.
REV 16:12 Ar soy nombor firistae hou moha gang Furator ufre tan gozobi baṭi ufoit ḳorla. Teu gangor fani hukaia fubor deshor raza oḳlor zaibar fot oilo.
REV 16:13 Ou shomoy ami deḳlam, bengor laḳan tinṭa but. I tinoṭa hou danob, hou zanuar ar hou bonḍo nobir muk taki bar oia aise.
REV 16:14 Ou but oḳole keramoti kam deḳanit asil. Tara hara zogotor raza oḳolre ekḳano dola ḳorlo, Shorbo-shoktiman Allar hou mohan dino zuddo ḳorar lagi.
REV 16:15 Mono rakio, Hozrot Isae ḳoira, “Huno, ami to suror laḳan niralae aimu. Te doinno hou zon, ze zon hozag roibo ar nizor lebas findia roibo, zate he lemṭa oia gura na lage, ar manshe tar shorom na deḳe.”
REV 16:16 Ibrani bashae ze zagar nam Ar-Mazaddun, but oḳole hou razaintore ania ono dola ḳorla.
REV 16:17 Bade shat nombor firistae tan baṭi batashor ufre ufoit ḳorla. Ou shomoy behesti ebadot ḳanar toḳt taki zure zure ou aoaz oilo, “Oḳon oise.”
REV 16:18 Teu megor zilkani, guṛ-guṛi ḍaḳ ar ṭaṭa foṛto laglo, erloge ola bezuita boisal oilo, ila boisal duniat manush foyda taki oḳon forzonto kunudin oise na.
REV 16:19 Hou mohan ṭaun tin ṭukra oigelo, duniar nanan zatir ṭaun oḳol surmar oigelo. Ar Alla Pakor mono oilo, hou namḳora Babil ṭaunor ḳota, tain tan nizor gozobi nisha-fanir fiala boria ou Babilre ḳabaila.
REV 16:20 Ou shomoy tamam dif oḳol bagia gelogi, faṛ oḳolre ar deḳa gelo na.
REV 16:21 Asman taki boṛo boṛo fattoror laḳan hil oḳol manshor ufre foṛat roilo. Ita eḳo fattoror uzon oilo, onuman eḳ mon. Ou hilor gozobor lagi manshe Allar birudde kufuri mat matilo, ita asil kub marattok gozob.
REV 17:1 Ze shatzon firistar ato shatṭa baṭi asil, erar mazor eḳzone aia amare ḳoila, “Ao, aia deḳo, bout fanir ufre ze moha bodmaishni boise, tair kita shaza oibo.
REV 17:2 Zogotor raza oḳole tair loge zina ḳorsla, honor manshe tair zinar nisha-fani kaia ṭal oisla.”
REV 17:3 Bade hou firistae ruhani halote amare morubumit nila. Hono ami deḳlam, lal rongor eḳ zanuaror ufre eḳ beṭi boiroise. Ou zanuaror gotro bout kufuri nam leḳa ase. Ogur shatgu ḳolla ar doshgu hing deḳlam.
REV 17:4 Ou beṭie lal ar baingoni rongor kub dami kafoṛ findise, tai shuna ar dami dami moni-muktar goynadi hazise. Tair ato zinar moyla ar nanan nomunar noforoti zinishe bora shunar eḳ fiala.
REV 17:5 Tair ḳofalo ola eḳ nam leḳa asil, i leḳar ek gufon mani asil. I nam oilo, “Namḳora Babil ṭaun, bodmaish beṭin ar zogotor hoḳol noforoti zinishor ma.”
REV 17:6 Ami deḳlam, ou beṭie Allar pak bonda oḳlor lou ar zera Hozrot Isar ḳota toblig kore, erar lou ḳaia ṭal oigese. Taire dekia ami asanoḳ taijjub oilam.
REV 17:7 Teu hou firistae amare ḳoila, “Tumi taijjub oigelae ḳene? Ou beṭir befare, ar ze zanuare taire boia ner, zegur shatgu ḳolla ar doshgu hing, itar gufon bed ami tumare zanaiar.
REV 17:8 Tumi ze zanuar deḳsilae, igu age asil, oḳon nai, bade he habia duzoḳ taki uṭia aia siroḳalor lagi shaza faibo. Hou zera ou zogotor manush, zetar nam duniar foyla taki-u Allar zindegi katat leḳa nai, tara ou zanuarre dekia taijjub oiziba, ḳaron igu age asil, oḳon nai, otoso hirbar deḳa dibo.
REV 17:9 “Huno, oḳon zeta batail oibo, ita buzar lagi aḳolor dorḳar. Ou shato ḳolla oilogi, shatṭa faṛ, ze faṛor ufre ou beṭi boise. Ou shato ḳollare shatzon raza-o buza zaibo.
REV 17:10 Erar mazor fas raza age-u shesh oigese. Eḳzon oḳon ase ar eḳzon oḳono aise na. Ou raza aia harle tuṛa ḳoydin roite-u oibo.
REV 17:11 Hou ze zanuar age asil oḳon nai, he shatzonor mazor eḳzon oile-o, he ashole aṭ nombor raza. Bade he hor-hamesha siroḳal shaza faibo.
REV 17:12 “Ar tumi ze doshgu hing deḳso, ita oilogi doshzon raza. Tara oḳono razotto ḳora shuru ḳorse na, oile hou zanuaror loge raza bonia tara kub ḳom shomoy razotto ḳorar ḳemota faibo.
REV 17:13 I raza oḳlor mon oibo eḳoi laḳan, tara hoḳole tarar ḳemota ar eḳtiar hou zanuarre dilaibo.
REV 17:14 Tara meṛa-baichchar loge zuddo ḳorbo, ar meṛa-baichchae tarare araiba. Ḳaron tain oila malik oḳlor malik, bashsha oḳlor bashsha. Ar tan loge zera roiba tarare daot deoa oise, ar basia algail oise, tara hok-halali.”
REV 17:15 Bade ou firistae amare ḳoila, “Tumi ze fani deḳso, ze fanir ufre ou moha bodmaishni boise, ita oilogi bout desh, bout manush, bout zati ar bout zator bulie matra manush.
REV 17:16 Ar ze doshgu hing deḳso, itae ar ou zanuare i bodmaishnire bade ginnaiba, tara taire fotor hokir banaia lemṭa ḳorba, ar tair gust ḳaiba, heshe taire agunit falai zalaiba.
REV 17:17 Er ḳaron oilo, Allae tarar dilor maze ola eḳ niot disoin, zate tan morzi furafur fole. Erlagi tara eḳmot oia hou zanuarre hokkol ḳemota dilaiba, zate Allar kalam furafur folibar ag forzonto he razotto ḳore.
REV 17:18 Tumi ze beṭire deḳso, igu oilogi hou namḳora ṭaun, i ṭaune zogotor hoḳol razaintor ufre razotto ḳorer.”
REV 18:1 Itar bade ami aroḳzon firistare deḳlam, tain behest taki lamia aira. Tan bout boṛo ḳemota ase, tan mohimar bole asta duniae zolmol ḳorlo.
REV 18:2 Tain zure zure ḳoila, “Binash oigese, binash oigese, hou namḳora Babil ṭaun. Ikan oḳon butor aḳra oise, hokkol nomunar but-ferotor aḳra, nafak ar zogoinno fakintor boshot ḳana oise.
REV 18:3 Ḳaron ikane tair zinar ḳamor bezuita nisha-fani duniar hoḳol zatire ḳabaise. Zogotor raza oḳole tair loge zina ḳorse, zogotor befari shodagor oḳole oḳanor tale tale lagam saṛa nishae doni bonche.”
REV 18:4 Bade ami hunlam, behest taki aroḳzone ḳoira, “O amar bonda oḳol, tumra Babil ṭaun taki bar oia ao, zate tumra tair gunar bagi na o. Ar tair ufre zeta gozob nazil oibo, ita gozobe tumrare na fae.
REV 18:5 Tair guna gia to asmano lagigese, tair naformanir bae Allae kial ḳorsoin.
REV 18:6 Oinno zonor loge tai zela ḳorse, tumra-o tair loge ola ḳoro, tair ḳamor furafur faona taire deo. Ze fialar maze tai oinnor lagi naformani gulaito, ou fialat tair furafur shaza, shullo-ana shaza gulia taire ḳabao.
REV 18:7 Tai nizore loia zotoḳan boṛai korse, zoto beshi bilashitar maze zindegi kaṭaise, ṭik otoḳan zontrona ar duk taire deo. Tai to mone mone ḳoy, ‘Ami kunu ṛaṛi beṭi ni? Ami to ranir ashono boisi, ami kunumonte-u duḳ-mosiboto foṛtam nae.’
REV 18:8 Erlagi tair ufre eḳdine-u hoḳol gozob foṛbo. I gozob oilo mout, bilaf-ahazari ar nidan. Taire aguindi zalail oibo, ḳaron zein tair bisar ḳorba, i Alla Mabud kub boloban.”
REV 18:9 Zogotor zoto raza oḳole ogur loge zina ḳorse, tair loge hoi-hulla ḳori bilashi din ḳaṭaise, taire zalanir bala tair duma dekia otae ḳandiba, tair lagi ahazari korba.
REV 18:10 Tair zontrona dekia tara ḍoraia duroi ubaia ḳoiba, “Haere Babil, haere hae! Oto namḳora ṭaun, oto ḳemota-ala ṭaun! Ola zoldi tumar ufre gozob ailo ni?”
REV 18:11 Zogotor befari shodagor oḳole-o tair lagi kandiba ar ahazari korba, ḳaron tarar mal-samana oḳon kunu manshe loito nae.
REV 18:12 Tarar ita mal-samana oilo, shuna, rufa, dami dami moni-mukta, dami dami kafoṛ, baingoni rongor bashshai kafoṛ, reshmi ar lal ḳafoṛ, nanan nomunar kushboy-ala laḳṛi, attir datdi banail nanan siz, dami laḳṛidi banail siz, fitol, lua ar marbel fattordi banail nanan samana,
REV 18:13 ḍailchini, elais, agor-kushboy, mura-ator, loban-agor, anguror rosh, zoytunor tel, moyda-gom, goru-meṛa, guṛa ar guṛar gaṛi, erloge ḳorida gulam-bandi oḳol.
REV 18:14 Hou shodagor oḳole ḳoiba, “O Babil, tumi ze aram-ayesh faitae saislae, ita to tumar ges taki horigese. Tumar hoḳol don-samana, zak-zomoḳ binash oigese. Ita to ar kunudin-u firot faoa zaito nae.”
REV 18:15 Zeta shodagor oḳole ota malor bebsha ḳoria doni oisla, tair zontrona dekia hou befari oḳole ḍoraia duroi ubai roiba. Tara ḳandi kandi mattom ḳoria ḳoiba,
REV 18:16 “Ish, haere hae, dami dami moslin ḳafoṛ, baingoni ar lal rongor bashshai kafoṛ finda Babil ṭaun, shuna ar dami dami moni-mukta dia hazail-faṛail oto namḳora ṭaun!
REV 18:17 Oto zoldi tumar oto don-samanar banḍar binash oigelo ni?” Shodagori zazor sharong ar kaftan oḳole, naia oḳole, zaz ar falor naia ḳarbari oḳole duroi ubaia ita deḳba.
REV 18:18 Taire zalanir shomoy tair duma dekia tara sillaia ḳoiba, “I ṭaunor laḳan namḳora, zogotor ar kunu ṭaun asil ni?”
REV 18:19 Tara nizor matat duil maḳaia silla-silli korba ar ḳandi kandi mattom ḳoria ḳoiba, “Haere hae, hou namḳora Babil ṭaun, haere hae! Doriar maze zerar zaz solasol ḳore, tara to zazor ḳamai dia boṛoluk oisla, oḳon deḳrae ni, oto zoldi kila hoḳolta binash oigelo!”
REV 18:20 Ou shomoy hou firistae ḳoila, “O behest, tumi furti koro, ou ṭaunre binash ḳorae kushi koro. O Allar pak bonda oḳol, nobi-rosul oḳol ar sahabi oḳol, furti koro. Ogie tumrar birudde zotota ḳorsil, oḳon Allae tair bisar ḳorsoin.”
REV 18:21 Bade kub shoktiala eḳ firistae biraṭ eḳ fattor ania doriat falaia ḳoila, “Huno, ou namḳora Babil ṭaunre-o ola ḍekka mari falai deoa oibo, taire ar kunudin faoa zaito nae.
REV 18:22 Zera sharinda bazae, gan gae ar bashi ba shinga bazae, tarar aoaz ar kunudin tumar maze huna zaito nae. Ar kunudin-u tumar maze kunuzator mestori milto nae. Kunu moshla fishar faṭar aoaz kunudin huna zaito nae.
REV 18:23 Tumar maze kunudin kunu battir for zolto nae. Daman-koinar golar aoaz ar kunudin tumar maze huna zaito nae. Ḳaron asta zogotor maze tumar shodagor oḳol namḳora asil, zogotor hoḳol zati tumar sol-soturir zadue fagol oizito.
REV 18:24 Ar nobi-rosul oḳolre, Allar pak bonda oḳolre, ar zoto manshore i zogoto kun ḳora oise, tarar lou to tumar ou Babil ṭauno milche.”
REV 19:1 Erbade ami behestor maze bout manshor biṛor aoaz hunlam. Tara ḳoira, “Alhamdulilla! Mohima ar ḳemota, aḳerator nazat, hokkolta-u amrar Allar.
REV 19:2 Tan bisar to hok ar shoṭik. Ze ṭaune nizor zinar ḳam dia asta duniare nafak banaisil, hou moha-bodmaishnire Allae shaza disoin. Tan mayar gulam oḳlor lour bodla, tain ogur ges taki loisoin.”
REV 19:3 Era hirbar ḳoila, “Alhamdulilla! Ogur maz taki hor-hamesha duma bar oibo.”
REV 19:4 Alla Pak zein toḳto boat asoin, hou sobbishzon murobbi netae ar hou sairo zandare tanre soizda ḳoria ḳoila, “Amin! Alhamdulilla.”
REV 19:5 Ou shomoy behesti toḳto taki eḳzone ḳoila, “O Allar mayar gulam oḳol, tumra zera Allare ḍorao, tumra huru-boṛo hokkole amrar Allar tarif ḳoro.”
REV 19:6 Bade ami bout manshor biṛor aoaz ba zure zure ḳol-kolaia fani foṛar aoaz ba zure ṭaṭa foṛar aoazor laḳan ou ḳota ḳanain hunlam, “Alhamdulilla! Amrar Shorbo-shoktiman Mabud Allae bashshai kora shuru ḳorsoin.
REV 19:7 Ao, amra monor kushie furti kori, ar tan tarif ḳori, ḳaron meṛa-baichchae shadi korar shomoy oigese, tan ḳoina zuit oia hazigesoin.
REV 19:8 Tanre soḳsoḳa forishkar dami kafoṛ findail oise.” I kafoṛ oilo Allar pak bonda oḳlor forezgari sal-cholon.
REV 19:9 Bade hou firistae amare ḳoila, “Tumi oḳan leḳo, meṛa-baichchar shadir mozliso zerare daot deoa oise, tara mubarok.” Tain eoḳan ḳoila, “Ita oilo Allar kalam, ita ḳaṭi hasa.”
REV 19:10 Teu ami ou firistare soizda ḳorar niote tan fao-o foṛlam, oile tain amare ḳoila, “Hae, hae! Ita kita ḳorrae, ami-o to tumar laḳan gulam, ar tumar ze mumin bai oḳole Hozrot Isar fokke zobanbondi deoat roy, ami tarar laḳan-o gulam. Te ḳali Allare soizda ḳoro. Ou Isar zobanbondi-u oilo, nobi-rosul oḳlor zobanbondir mul kuṭi.”
REV 19:11 Bade ami deḳlam, behestor duar kula, ar hono dola eḳṭa guṛa ase. Hou guṛar ufre zein toshrif raḳsoin, tan nam oilo, hok ar hok-halali. Tain fak-forezgarie bisar-insaf ar zuddo ḳoroin.
REV 19:12 Tan souk oilo zalail soḳsoḳa agunir laḳan, tan matat bout taz ase. Tan shorilo omon eḳ nam leḳa, ze namor mani tain saṛa dusra ḳeu zane na.
REV 19:13 Tan finno ase lour maze ḍubail lebas, ar tan nam oilo, “Kalimatulla, Allar kalam.”
REV 19:14 Ar behestor sifai oḳole dami saf-sutra dola lebas findia, dola guṛar ufre soar oia tan ḳore ḳore zaira.
REV 19:15 Tain zate zogotor hoḳol zatire shaza dita faroin, otar lagi tan muk taki ekkan darail toluar bar oia ailo. Tain luar laṭi dia tamam zatire shashon ḳorba, ar angur maṛar gato manshe zela faodi angur maṛoin, Shorbo-shoktiman Allar lannoti gozobdi tain ola maṛiba.
REV 19:16 Tan urator maze ar tan lebaso ou nam leḳa ase, “Bashsha oḳlor bashsha, malik oḳlor malik.”
REV 19:17 Bade ami deḳlam, shuruzor maze eḳzon firista ubai roisoin. Asmanor maze zeta fakinte uṛira, tain era hoḳolre zure zure ḍakia ḳoila, “Ao, Allar dorbaro moha-daot ḳaoar lagi ekḳano dola o,
REV 19:18 zate tumra aia gust ḳaitae faro, bashsha, fordan sifai, foyluan oḳol, guṛain ar guṛaintor soar oḳol, azad ar gulam, huru-boṛo hoḳol manshor gust ḳao.”
REV 19:19 Erbade ami deḳlam, ou guṛat zein soar oisoin, en loge ar en sifai dolor loge zuddo ḳorar lagi hou zanuar, asta duniar raza oḳol, tarar shoinno-sifai dol loia ekḳano dola oila.
REV 19:20 Teu hou zanuarre doria aṭok kora oilo, ar ze bonḍo nobie tar fokko loia asanok kam deḳaito, tare-o dora oilo. Zeta manshe hou zanuaror sil lagaise, tar murtir puja ḳorse, ou bonḍo nobie tar asanok kam deḳaia ota manshore be-foti banaise. I duioṭare zinda halote, zalail gondoḳor agunir maze falani oilo.
REV 19:21 Hou dola guṛar ufre zein boat asla, tan muk taki ze darail toluar bar oia aisil, oḳandi tarar logor shango-pango oḳolre kun ḳora oilo. Erlagi hoḳol fakinte feṭ boria otar gust ḳaila.
REV 20:1 Erbade ami deḳlam, behest taki eḳzon firista lamia aira. Tan ato asil habia duzoḳor sabi, ar kub boṛo eḳsa longor.
REV 20:2 Tain hou danobre dorla, igu oilo hou furana haf, er nam oilo Iblis ba Shoytan. Tare doria eḳ azar bosoror lagi bandila,
REV 20:3 bandia habia duzoḳo falaila. Bade ou duzoḳor duaro tala lagaia er ufre sil-sappoṛ marla, zate he ou eḳ azar borosor maze bar oia, duniar kunu zatire be-foti banaito na fare. Heshe tare tuṛa ḳoydinor lagi saṛa oibo.
REV 20:4 Bade ami deḳlam, bout toḳt ase. Zera ou toḳtor ufre boisoin, erare bisar ḳorar ḳemota deoa oise. Allar kalam ar Hozrot Isar befare zobanbondi deoae zerare gordan mara oisil, erar ruhu oḳolre-o ami deḳlam. Era hou zanuarre ba tar murtire puja ḳorse na, ar ato ba ḳofalor ufre tar sil-o lagaise na. Era zinda oia uṭla, uṭia eḳ azar bosor dori al-Mosir loge bashshai korla.
REV 20:5 Iṭa oilo foyla bar murda taki zinda oia uṭa, ar ou zera zinda oila tara-u doinno ar fobitro. Foyla bar zera zinda oia uṭla, erar ufre to moutor dusrabar kunu bol ḳaṭani solto nae. Tara oiba Alla Pak ar al-Mosir imam. Tara hou eḳ azar bosor dori al-Mosir loge bashshai korba. Oile ou azar bosor fuṛanir ag forzonto bad-baki kunu murda zinda oila na.
REV 20:7 Ou eḳ azar bosor gia harle Shoytanre tar zel ḳana taki kalas deoa oibo.
REV 20:8 Teu he gia asta zogotor hoḳol zatire, mani Iazuz-Mazuzre be-foti banaibo, ar zuddo ḳorar lagi tarare ekḳano dola ḳorbo. Tar manush oiba, doriar soror balur laḳan, ita gonia furani zaito nae.
REV 20:9 Ou shomoy ami deḳlam, tara asta dunia taki baroi gia Allar pak bonda oḳlor roar zaga, Allar mayar ṭaunre gia berililo. Oile asman taki Allai aguin lamia itare zalaililo.
REV 20:10 Ar ze Iblise erare be-foti banaisil, tare doria zalail gondoḳor agunir gato falail oilo. Hou zanuar ar bonḍo nobire age-u ou gato falail oisil. Hono tara siroḳal roiba, ar dine-raite zala-zontronar azab faiba.
REV 20:11 Bade ami deḳlam, boṛo ekkan dola toḳt, ou toḳto eḳzon boat asoin. Tan samna taki asman ar dunia bagigelo, kunuḳano erar zaga roilo na.
REV 20:12 Erbade deḳlam, huru-boṛo tamam murda oḳol ou toḳtor samne ubai roisoin. Bade ḳoyḳan ḳata kula oilo, erbade aro ekkan ḳata kula oilo, ikanor nam zindegi kata. Ou ḳata oḳlor maze hou murda oḳlor zeta amol-nama leḳa oisil, hou amol mafik tarar aḳeri bisar ḳora oilo.
REV 20:13 Doriar maze zoto murda oḳol asla, doriae erar lash bar ḳori dilo. Ar mout ar ḳoyboror maze zeta murdain asla, mout ar ḳoybore tarare bar ḳori dilo. Forteḳ zonre tar nizor amol-nama mafik bisar ḳora oilo.
REV 20:14 Heshe mout ar ḳoyborre-o agunir gato falail oilo. Ou agunir gato foṛa-u oilo dusrabar mout mani, aḳeri mout.
REV 20:15 Zerar nam hou zindegi katat millo na, tarare-u agunir gato falail oilo.
REV 21:1 Bade ami ekkan noya asman ar noya zomin deḳlam. Foyla asman ar foyla zomin milai gese, kunu doria-o ar roilo na.
REV 21:2 Ami deḳlam, hou fobitro ṭaun, mani noya Zeruzalem. Ikan behestor maz taki ar Allar dorbaro taki lamia ar. Kunu biar ḳoinare zela damandor lagi hazail oy, ou ṭaunre-o ola shundor ḳori hazail oisil.
REV 21:3 Bade ami hunlam, hou behestor toḳto taki eḳzone zure zure ḳoira, “Oḳon manshor maze roar lagi Alla Pakor zaga oise. Tain manshor loge boshot ḳorba, ar tara oiba tan bonda. Tain shoyong tarar loge roiba, tarar Alla oiba.
REV 21:4 Tain erar sokur fani fusia diba. Ar kunu moron oito nae, duk, ḳandon, ḳoshṭo ar roito nae, agor ita hoḳolta-u shesh oigese.”
REV 21:5 Toḳto zein boat asla tain ḳoila, “Huno, ami hokkoltare noya ḳori foyda ḳoriar.” Bade tain hirbar ḳoila, “Amar ou ḳotaḳan leḳo, ḳaron ita ekin ḳorar laḳ hasa.”
REV 21:6 Tain amare eoḳan ḳoila, “Shesh oigese. Ami-u Alif ar Ya, aual ar aḳer. Huno, zar fanir fiase dorse, tare ami abe-hayator zindegi-fanir zorna taki bina foyshae fani dimu.
REV 21:7 Ze zon joyi oibo, he ita hoḳoltar odikar faibo. Ami oimu tar Alla, ar he oibo amar fut.
REV 21:8 Oile ḳa-purush, beiman, haramkur, kuni, zinakur, zadugir, murtipuja ḳorra, ar hoḳol nomunar misa matra oḳol zalail aguin ar gondoḳor gato roiba. Er nam-u oilo dusrabaror mout.”
REV 21:9 Hou ze shatzon firistar ato aḳeri shato gozob bora shatṭa baṭi asil, erar mazor eḳzone amar ḳandat aia ḳoila, “Ao, ami tumare ḳoina-beṭi deḳaimu, mani meṛa-baichchar boure deḳaimu.”
REV 21:10 Bade hou firistae ruhani halote amare boṛo eḳ usa faṛor ufre loia gela. Nia Allar mohimae soḳsoḳa ze fobitro Zeruzalem ṭaun, behestor maz taki ar Allar dorbaro taki lamia aoat asil, ou firistae amare ota deḳaila.
REV 21:11 I ṭaunor rong kub dami moni-muktar laḳan soḳsoḳa, foṭikor golashor nomunae dami hirar laḳan.
REV 21:12 Hou ṭauno boṛo ekkan usa oal asil, ou oalo baroḳan geiṭ asil, baro geiṭo barozon firista asla. Ou geiṭor ufre Boni Israilor baro ḳandanor nam leḳa.
REV 21:13 I geiṭor tinḳan fubedi, tinḳan utoredi, tinḳan douknedi ar tinḳan foismedi asil.
REV 21:14 I ṭaunor oalor baroṭa filar asil, itar ufre meṛa-baichchar barozon sahabir baroḳan nam leḳa.
REV 21:15 Amar loge zein batchit ḳorat asla tan ato shunar eḳṭa nol asil, zate tain ou ṭaun, ṭaunor geiṭ ar oal mafita faroin.
REV 21:16 I ṭaun asil sair kuni gul, lambae ar faṛe shoman. Bade tain ou noldi ṭaunḳan mafile, ikan lamba, faṛ ar usae oilo baro azar stadia (onuman deṛ azar mail).
REV 21:17 Bade tain oal mafila, i oal asil eḳ-sho sousallish at usa. Manshor ator mafor laḳan i firistae-o mafila.
REV 21:18 I oalḳan hiradi banail, ar i ṭaun asil foṭikor golashor laḳan ḳaṭi shunadi banail.
REV 21:19 Ṭaunor oalor filar oḳlor maze dami dami moni-mukta lagail asil. Foyla filar hirar, dusraṭa akik monir, tin nomborṭa tama moni, sair nomborṭa fanna moni,
REV 21:20 fas nomborṭa shuruz moni, soy nomborṭa iakut moni, shat nomborṭa lil moni, aṭ nomborṭa boidurjo moni, noy nomborṭa fit moni, dosh nomborṭa ufol moni, egaro nomborṭa firuz moni, ar baro nomborṭa foddorag moni.
REV 21:21 Baroḳan geiṭ baroṭa muktadi banail. Fortek geiṭ asil eḳoṭa dami muktar. Ṭaunor rasta asil foṭikor golashor laḳan ḳaṭi shunadi banail.
REV 21:22 I ṭauno ami kunu ebadot ḳana deḳlam na, Shorbo-shoktiman Alla Mabud ar meṛa-baichcha-u asla inor ebadot ḳana.
REV 21:23 I ṭaunre for ḳorar lagi kunu san-shuruzor zorur nai. Allar nuror mohimae for dey, ar meṛa-baichcha-u oila inor batti.
REV 21:24 Hoḳol zatir manush ou nuror fore sola-fira ḳorba, duniar bashsha oḳole tarar zak-zomoḳ loia ou ṭauno aiba.
REV 21:25 Dinor bala kunu shomoy-u i ṭaunor geiṭ bond oito nae, ar hino kunu rait oito nae.
REV 21:26 Tamam zatir ijjot ar gourob ono ana oibo.
REV 21:27 Nafak kunu siz, haramkur ba misa matra kunu manush, kunudin-o ino hamaito farto nae. Ḳali meṛa-baichchar zindegi kaṭar maze zerar nam leḳa ase, tara-u hamaiba.
REV 22:1 Erbade hou firistae amare abe-hayat, mani zindegi-fanir gang deḳaila. Ikṭa deḳte soḳsoḳa ḳasor laḳan. Iṭa Alla Pak ar hou meṛa-baichchar toḳtor daro taki bar oia,
REV 22:2 ṭaunor boṛo gollir mazḳanedi zaoat asil. Ar ou gangor duio faro zindegi-gas asil. Ou gasainto baro zator fol dore. Forteḳ mashe mashe fol dore, ou gasor fatae hoḳol zatir manshor bemar shifa oy.
REV 22:3 Kunuzat lannot ar roito nae. Alla Pak ar meṛa-baichchar toḳt ou ṭauno roibo, ar tan gulam oḳole tan ebadot ḳorba.
REV 22:4 Tara tan fobitro muk deḳba, tarar ḳofalo tan nam leḳa taḳbo.
REV 22:5 Ar kunu rait oito nae, tarar lagi lemor ba shuruzor foror zorur oito nae, ḳaron Alla Mabudor nur-u oibo tarar for. Tara hor-hamesha siroḳal dori bashshai korba.
REV 22:6 Bade hou firistae amare ḳoila, “Ita hoḳolta ekin ḳorar laḳ hasa. Alla Mabud, zein age tan nobi oḳlor mazdi batchit ḳorsoin, tain nizor firistare disoin, zate tuṛa ḳoydinor maze zeta goṭibo, ou firistae ita tan gulam oḳolre deḳain.”
REV 22:7 Hozrot Isae ḳoira, “Huno, ami kub zoldi-u airam. Ze zone ou kitabor hoḳol ayator agam ḳobor amol ḳore, he-u nek-kofali.”
REV 22:8 Te Isa al-Mosir sahabi ami Hannane ita deḳsi ar hunchi. Hoḳolta huna ar deḳar bade, ze firistae amare ita deḳaisoin, ami tanre soizda ḳorar niote tan fao-o foṛlam.
REV 22:9 Oile tain amare ḳoila, “Na, na! Tumi amare nae, ḳali Alla Pakre soizda ḳoro. Ami to ḳali tumar laḳan gulam, tumar baiain mani nobi oḳlor laḳan ar i kitabor hoḳol ayat zera mane, tarar laḳan-u gulam.”
REV 22:10 Erbade tain amare ḳoila, “Ou kitabor kunu agam ḳobor tumi lukaia rakio na, ḳaron shomoy gonaia aichche.
REV 22:11 Zegie naformani korer, he ola ḳorat rouk. Zegu ḳobis, igu tar ḳobisit rouk. Ar forezgar zone forezgari korat rouk, fak-fobitro zon fak-fobitro rouk.”
REV 22:12 Hozrot Isae ḳoira, “Huno, ami kub zoldi airam, ar forteḳ manshor amol-namar furuskar amar ato ase.
REV 22:13 Ami-u Alif ar Ya, aual ar aḳer, shuru ar shesh.
REV 22:14 “Tara-u nek-kofali, zera nizor ḳafoṛ-sufoṛ doia forishkar ḳore, zate zindegi-gasor fol ḳaoar odikar fae, ar geiṭedi gia fobitro ṭauno hamae.
REV 22:15 Kukror laḳan zogoinno manush, zadugir, zinakur, kuni, murtipuja ḳorra, ar zetae misa mat fosond ḳore, misar maze sole, ita hokkolṭi bare foṛi roise.
REV 22:16 “Te ami Isae amar firistare faṭaisi, zate ein zomat oḳlor lagi tumrar gese ota hoḳol befare zobanbondi dein. Ami to Bashsha Daudor ḳandan ar mul zoṛ, fozoror soḳsoḳa shuk-tera.”
REV 22:17 Pak Ruhe ar ḳoinae ḳoira, “Ao.” Ar ze zone ou ḳota huner, he-o ḳouk, “Ao.” Fanir fiase zare dorse, he auk. Ze zone fani kaito sae, he bina foyshae zindegi-fani kauk.
REV 22:18 Ze zone ou kitabor hoḳol agam ḳobor hune, tar gese ami ou zobanbondi diar, ḳeu zudi ou ayat oḳlor loge dusra kunta baṛae, te Allae-o ou kitabo leḳa hoḳol nomunar gozob tar zindegit baṛaiba.
REV 22:19 Ar ou kitabor ayat oḳol taki keu zudi kunta bad dey, te Allae-o i kitabo leḳa zindegi-gas ar fobitro ṭaunor odikar, tar zindegi taki bad diba.
REV 22:20 Ou befar oḳol loia zein zobanbondi dira, tain ḳoira, “Hasau, ami kub zoldi airam.” Amin. Hozrot Isa, afne toshrif anoukka.
REV 22:21 Allar tamam pak bonda oḳlor ufre, Hozrot Isar rohomot zari rouk. Amin. Ḳotom
